An mga ginhahangyo ni Minerva

Sa bungto san San Carlos,mayaun sayo nga babayi nga an ngaran Minerva kinse anyos na an
kanya edad,sayo la siya nga anak san mag asawa nga Amanda ngan Julio,an kanra pamilya an
ikaduha nga mayaman sa kanra bungto.Mabinuligon ngan mga buotan sira Amanda ngan Julio
dikan dire maghambog bisan hataas an katayuan san kanra kinabuhi.Kudi si Minerva mayaun
batasan nga dire maupay sayo na an pagkalangtanon,madali mauyam ngan daramu la an gin
hahangyo nga mga butang nga dire pa man angay sa kanya.Para sa kanya mabara an ngatan nga
butang nga mayaun sira ngan wara pulos sa kanya,para sa kanya kulang pa an mga butang nga
karuyag niya,pareho san kanya mga gamit bisan gidaramu-e na ngan dire na an iba napupulsan
kulang pa para sa kanya,karuyag pa niya magkayaun pa.San kanya kaadlawon nalangot siya san
kanya mga nakarawat nga mga regalo kay dire niya mga karuyag an mga ginhatag sa
kanya.Sanglit sa sobra nga langot gin hangyo niya nga makahanap ug makakita siya diwata nga
magtutuman san kanya ngatanan nga mga karuyag.

Sayo ka adlaw sa sobra kadesperada nagpakadto siya sa kagurangan san Balasin nga gin bantog
san mga tawo kanra nga sa Balasin mayaun nakita nga diwata an mga nagsikadto nga parag
panguha sungo ngan prutas ngan an iba nakaistorya pa an diwata kay buotan ngan mabinuligon
sa mga tawo nga parag kadto,kudi dire tinutuod san iba iton nga iristorya sa kanra bungto.
Sanglit si Minerva nagsari pagpakadto sa Balasin,gin sinusog niya an dalan ngan gin
pantigamnan an kanya gin agian para sa kanya pagbalik dire siya ig burog.Sa kanya pagnilakaw
tinanglay siya sanglit pinahuway muna siya sa ilarom san puno,samtang napahuway sige man
an kanya pangita sa kagurangan para makita an diwata.Naglabay an pira kaoras wara siya nakita
nga diwata,kaya umuli nala siya.Kinabuwasan binalik siya utro para makita an diwata pero wara
nalat niya kakita an diwata sanglit nasundan pa sin pira kaadlaw nga pagbinalik-balik sa
kagurangan san Balasin para mahanap an diwata,san wara la gihapon niya kakita an diwata
napag isip-isip niya bangin buwa la an iristorya ngan himu-himu la.Ngay-an gin kikinitaan la siya
san diwata tikang san una nga pagpakadto niya sa kagurangan hasta san pagbinalik-balik
niya.Kaya siton nga adlaw san tigikan na si Minerva nagpakita an buotan nga diwata,gin
pangutan-an si Minerva san diwata kon nanu an kanya tuyo, san gin sugad ni Minerva an kanya
karuyag sugaron,tinangdo an diwata kan Minerva ngan gin sugaran nga tutumanon niya an kan
Minerva gin hahangyo nga butang kudi sayo la kabeses.

Nalipay si Minerva pero naisip niya nga daramu an kanya mga gin hahangyo ngan para kanya
ngatanan iton importanti,ngan dire pwedi nga mapili la siya sayo sa kanya mga karuyag.Sanglit
kanya utro gin kaistorya an diwata.An diwata kay ungod nga buotan gin tangduan niya si
Minerva ngan gin sugad nga tutumanon niya an mga gin hahangyo ni Minerva tagsayo kada-
adlaw,Siton manta nga adlaw gin basbasan siya san diwata para matuman an mga gin hahangyo
nga mga butang o kon nanu pa man.Sobra nga gilipayi si Minerva Kay matutuman na gihapon
an kanya mga hinahangyo ngatanan.Nagpasalamat si Minerva sa buotan nga diwata ngan
nanalagan na siya tipauli.

Tikang siton nga adlaw nga nagkaistorya sira san diwata.Taga aga naghuhulat siya nga
malipayon ngan matibaksi kay pirme natutuman an kanya mga karuyag.Nilabay an mga adlaw
ngatanan nga kanya mga gin hangyo natuman sayo-sayo nga naghatag kanya sin kalipayan nga
kanya gin huna-huna nga mag-iiha.Kudi naisip ni Minerva an mga natuman nga kanya mga
karuyag dire ta man naghahatag sin maiha nga kalipayan,an kaurugan pa san kanya mga gin
hangyo naghatag kanya kabiduan,sugad san gin hangyo niya nga sira an maging
pinakamayaman sa kanra bungto an nahitabo gin pangawatan sira ngan an kanya kag-anak
hibusan pa magkamatay kay gin huldap,nabuno san huldaper an kanya tatay,maupay la kay
nadara dayon sa hospital samtang an iba nasul-an la siya.Haros ngatanan nga kanya gin hangyo
kahuna niya nga makakaupay kanya,kudi wara ta man nahibulig ngan wara ta man siya
katumani san kanya ruyag,kaya sugad niya sa kanya kalugaringon nga dire sugad siton an kanya
karuyag.

Sanglit si Minerva nawaraan na gana ngan dire na nalilipay sa taga paglabay san adlaw,ngan
wara na siya labot san mga gin hahangyo niya san una,kabaligtaran na an kanya gin-inisip
nadire na siya nga matuman an kanya mga karuyag kay nahahadok na siya san mga kalalabasan
kon idaritso pa niya nga matuman an kanya mga gin hahangyo.Kaya siton nga adlaw gin kadto
Niya sa Balasin an buotan nga diwata para makaistorya utro,san nakaatubang na niya an diwata
kanya gin sugad nga nadire na siya nga matuman pa an kanya mga karuyag,kay makaharadok
na nga inabot na siya sa punto nga pagmamata niya kada adlaw dire siya mapakali kay may
posibilidad nga maghatag nalat kabiduan an kanya mga gin hangyo nga butang, nagtinangis si
Minerva samtang gin susugad iton sa diwata. Ngan nakimaluoy siya sa diwata nga kunta
matuman an kanya pinakaurihi nga gin hahangyo an mahibalik an dati nga mga butang,ngan
matuman na an tinuod nga kalipayan nga kanya pinaka-hinahangyo sa ngatanan nga kon nanu
pa man.Gin kaluoyan siya san diwata,gin kumpas san diwata an kanya madjik wand ngan
nawara tigda.

Nag-apura pag-uli si Minerva sa kanra balay,magaan na an kanya huna-huna ngan kasing-kasing

kay batid siya nga mahibabalik na sa dati an kanya kinabuhi.Pag-abot sa kanra balay kinukulba
siya kay bangin wara na katuman an kanya urihi nga gin hangyo,kudi natapod siya nga dire siya
papabay-an san buotan nga diwata nga bisan sala niya an nahitabo gin tagan pa siya gihapon
tyansa nga maitadong an kanya mga sala,ngan wara dapat siya paghangyo sin nanu pa man Kay
kon tutuoson,maupay an kanya kinabuhi dire siya nagkukuri pareho san mga kablas,ngan
napagisip-isip niya nga an kanya la kalugaringon an kanya gin dinumdom wara niya kaisip an
mga kalalabasan,nagbasul man siya urihi na.
Tungod siton nga panhitabo daramo an kan Minerva nahibaruan sugad San kon nanu man an
gin hahangyo nato saat kinabuhi dapat may kaupayan nga naihahatag ngan dapat kita mismo
an magtalinguha nga matuman iton dire na umasa sa mga madjik. Ngan labaw san ngatanan an
makontento ngan malipay sa mga digtoy nga butang o kon nanu an mayaun saat kinabuhi,ngan
dire sayangon an oras sa mga butang nga dire man importanti ngan sa mga kapritso.