Abril 1, 2022 - Biyernes

Lenten Weekday (4). Violet.

ORDO
HOURS Pss IV, Seasonal Wkdy
MASS Prop, Pf of Lent I-IV
RDGS Wis 2: 1. 12-22 / Ps 34: 17-18. 19-20. 21. 23 / Jn 7: 1-2. 10. 25-30

ANTIPONA SA PAGSUGOD
O Dios, luwasa ako diha sa imong ngalan, ug sa imong gahom palingkawasa ako. O Dios,
patalinghugi ang akong pag-ampo, dungga ang mga pulong sa akong baba.

PAG-AMPO SA KATILINGBAN
MAG-AMPO KITA:
Nag-andam ikaw, O Dios, ug mga panabang nga sibo sa among kaalaot. Itugot
nga madawat unta namo uban sa kalipay ang imong panabang ug makita kini
sa among santos nga kinabuhi.
Kini among gipangayo pinaagi sa among Ginoong JesuCristo imong Anak, nga buhi ug hari
uban kanimo ug sa Espiritu Santo, Dios hangtod sa kahangturan. Amen.

KINUTLO GIKAN SA BASAHON SA KAALAM NI SOLOMON (Wis. 2: 1. 12-22)

Sayop ang dautang mga tawo sa ilang pag-ingon sa ilang kaugalingon, “Ang atong
kinabuhi hamubo ra ug puno sa kasakit, ug kon moabot na ang katapusan niini, wala
kitay kalingkawasan. Walay nahibaloan nga mibalik gikan sa kalibutan sa mga patay.
Ang matarong nga mga tawo walay kapuslanan, kondili mga samokan lamang, busa
mangita kitag higayon sa paglaglag kanila. Supak sila sa atong gibuhat; nagpasangil sila
kanato nga kita nagsupak sa Balaod ni Moises ug naglapas sa mga pagtulon-an sa atong
mga katigulangan. Nangangkon sila nga nakaila kuno sila sa Dios, ug nagtawag sila sa
ilang kaugalingon nga mga anak sa Ginoo. Dili kita makaagwanta sa pagtan-aw sa mga
tawo nga sama kanila; ang ilang kinabuhi sukwahi sa tibuok natong panghunahuna.
Lahi sila sa ubang mga tawo; lain ang ilang mga paagi. Naghunahuna sila nga ang atong
sukdanan sa pamatasan hilabihan kadautan nga kinahanglan likayan ang tanan nga
atong gibuhat. Nagpagarbo sila nga ang Dios mao ang ilang Amahan, ug nagtuo sila
nga human masulti ug mabuhat ang tanan, ang mga matarong lamang maoy malipay.
Apan tan-awon ta kon tinuod ba kana! Tan-awon ta unsay mahitabo kon mamatay na
sila! Kon ang mga matarong tinuod gayod nga mga anak sa Dios, ang Dios magluwas
kanila sa ilang mga kaaway. Busa sulayon ta sila. Ato silang daugdaogon ug sakiton;
unya sutaon ta unsa kamalinawon ug kamakatarunganon sila! Sutaon ta asa kutob ang
ilang pag-agwanta! Silotan ta sila sa usa ka makauulaw nga kamatayon, sanglit nag-
ingon man sila nga ang Dios mao ray manalipod kanila.”
Ingon niini ang hunahuna sa dautang mga tawo, apan sayop sila. Nabutaan sila sa
ilang kaugalingong kadautan. Wala gayod sila mahibalo sa mga tinagoan sa Dios, wala
gayod sila maglaum sa mga ganti sa usa ka kinabuhi nga balaan ug walay buling.
PULONG SA GINOO.

SALMO RESPONSORYO (Ps. 34: 17-18. 19-20. 21. 23)

R. Ang Ginoo haduol sa mahinulsulon og kasingkasing.
Ang Ginoo nakigharong sa mga nagbuhat og dautan, aron mapapas ang ilang
handumanan dinhi sa yuta. Sa pagtuwaw sa matarong, nagpatalinghug kanila ang
Ginoo ug sa tanan nilang mga kalisdanan giluwas niya sila.

R. Ang Ginoo haduol…

Ang Ginoo haduol sa mahinulsulon og kasingkasing; ug luwason niya ang mga naguol.
Daghan ang mga kagul-anan sa matarong apan luwason sila niining tanan sa Ginoo.

R. Ang Ginoo haduol…

Bantayan niya ang tanan niyang mga bukog walay usa kanila nga mabali. Luwason sa
Ginoo ang kinabuhi sa iyang mga sulugoon; walay makasala kanila nga modangop
kaniya.

R. Ang Ginoo haduol sa mahinulsulon og kasingkasing.

BERSO SA DILI PA ANG EBANGHELYO

Kon karong adlawa makadungog kamo sa iyang tingog, ayaw patig-aha ang inyong mga
kasingkasing.

KINUTLO GIKAN SA EBANGHELYO SUMALA NI SAN JUAN (Jn. 7: 1-2. 10. 25-30)
Human niini misuroy si Jesus sa Galilea. Dili siya buot mosuroy sa Judea,
kay ang kadagkoan sa mga Judio didto nagtinguha man pagpatay kaniya.
Niadtong higayona hapit na ang Pangilin sa mga Payag.
Sa nanglakaw na ang iyang mga igsuon ngadto sa pangilin, si Jesus miadto
usab; apan wala siya magpasayasaya.
Pipila sa mga tawo sa Jerusalem miingon, “Dili ba mao kini siya ang ilang
buot patyon? Tan-awa, nagsulti siya atubangan sa kadaghanan, apan walay
nagsultig bisang unsa batok kaniya! Tungod ba kaha kay nasayod ang mga
pangulo nga siya ang Mesiyas? Apan inig-abot sa Mesiyas, walay masayod
kon taga diin siya. Apan kitang tanan nasayod taga diin kining tawhana.”
Samtang nagtudlo si Jesus sulod sa templo, miingon siya sa kusog nga
tingog, “Nakaila ba gayod kamo kanako ug nasayod ba kamo kon taga diin
ako? Apan wala ako moanhi sa akong kaugalingong pagbuot. Ang nagpadala
kanako matuod. Wala kamo makaila kaniya, apan ako nakaila kay gikan man
ako kaniya ug siya man ang nagpadala kanako.”
Unya misulay sila sa pagdakop kaniya, apan walay nakahimo niini kay
wala pa man moabot ang iyang panahon.
ANG EBANGHELYO SA GINOO.

PAG-AMPO SA MGA GASA

O Dios nga makagagahum sa tanan, ang makaalim nga gahum niining
sakripisyo magpalingkawas unta kanamo sa sala ug magtabang kanamo sa
pagduol kanimo uban sa putli nga kasingkasing.
Kini among gipangayo pinaagi ni Cristo among Ginoo. Amen.

Preface of Lent I-IV

ANTIPONA SA PANGALAWAT
Tungod sa kamatayon ni Cristo naluwas kita ug napasaylo ang atong mga sala. Pagkadako sa
grasya sa Dios, nga sa walay sukod gihatag niya kanato!

PAG-AMPO HUMAN SA PANGALAWAT

MAG-AMPO KITA:
Sama nga nausab kami gikan sa karaang kinabuhi ngadto sa bag-o, itugot,
Ginoo, nga kami nga mibiya na sa daan nga kadautan, mabag-o usab sa
kasantos sa kasingkasing.
Kini among gipangayo pinaagi ni Cristo among Ginoo. Amen.