METROPOLITAN CATHEDRAL OF SAN FERNANDO

Archdiocese of San Fernando

Pampanga, Philippines

NOVENA KANG SAN FERNANDO

Patulunan ning Arkidiosesis

1
NOVENA KANG SAN FERNANDO

Sidia neng

Bro. Genesis Samuel G. Paras

Ministry on Liturgy Coordinator

para king

Metropolitan Cathedral of San Fernando

City of San Fernando, Pampanga

Rev. Fr. Manuel D. Santa Maria

Rector

07 May 2021

Excerpts from Novena cang San Fernando © Msgr. Eugenio G. Reyes, JCD
Ding Imno at Dalit © Reb. Pd. J. Gatus; S.Amamangpang; N.Nucup; C. Cadiang

NOVENA KANG SAN FERNANDO

2
RITUNG PAMAGMULA
Talakad la ding sabla. Mikanta ya ing metung a Dalit kang San Fernando.

Pari: King lagyu ning Ibpa, ampon ning Anak, ampon ning Banal a
Espiritu.
Sabla: Amen.

Mapse yang mapilan a amanung pamuklat ing Pari. Kaibat nang minapseng amanu
ning Pari, mika-penandit a katahimikan kaibat siklaud la ding sabla para king pamanisi
at pamanyawad pakalulu king Dios.

Pari: O Guinu kung JesuCristo, mikatawan tau king pamangabus

kaku, mapakumbaba kung makasiklaud king arapan Mu,
manyawad king maragul mung kasaupan king pamanisi ku
karing kakung kasalanan. Kikilalanan ku’t tatanggapan ing
kanakung dewakan. Matibe kung magtantung salesen ku la
king metung a dalise at matapat a pamangumpisal at kaibat
kulang akumpisal, paramdam mu kening pusu ku ing maragul
at alang anggang sama king king kasalanan. Tatantu kung
matibe king lub ku king e na ku mikasalang pasibayu Keka;
metung a dalise at tapat a pamagtantung sumuyu Keka kaba
ning panaun a makatagan pa king bie ku. Pagkapilitan ku
ngan daptan iti, Dios ko, ban paligayan da Ka at layun
papanatilian ing sarili ku king arapan Mu, mangga man
kapilan. Amen.

Idalit ya ing Guinu Pakalulu o Dalit Pamanisi.

PAMUKLAT A PANALANGIN ALDO-ALDO

Kaibat ning dalit, tuki ya ing Pamuklat a Panalangin.

Sabla: O metung at mayupayang Dios, lubus kang maligaya at e

mangailangan nanu man king lelangan mu. Lelangan mu kami
pauli ning lugud mu. Dininan mu kaming isip at pusung dapat
kilala at malsinta keka a makapagpabanal karing kaladwa mi.

Sidia mu kekami ing kanwanan banua. Guinu, nu anti ing

katuliran kung purian da ka, suyuan at palsintan lakwas king
sablang nanu.

Yayabe ku ing kakung pamalsinta king pamalsinta da keka ding

anghel ban makasuyu kung tapat keka kaba ning bie ku.
Pagdamutan mu sanang tanggapan, ing kanakung kapurian,
3
 pamiparangal at pamipasalamat keka at ipagkalub mu sa ing
kanakung kayadwanan nung wari iti lalung makaligaya keka at
makakayap kening kaladua ku, king kekeng balen, king kekeng
bansa at king mabilug a Santa Iglesia. At ban lakwas mung
tingiran ing kakung kayadwanan, pamamilatan ku king
maligayang San Fernando, dangalan ning kekang Santa Iglesia at
metatag nang talapamingua ning kekang Kamalan.

O Dios, iti ya ing pagamu-amu ku keka at magnasa ku at

manalig, ing kamtan ku ing kanakung kayadwanan kaniting
novena.
Amen.

EBANGHELYO AT PANALANGIN PARA KING BALANG ALDO

Manatiling makatalakad para king pamipasyag king Ebanghelyo para king kayaldwan. Ing
Pari basan ne ing Ebanghelyo.

Ding Panalangin aldo-aldo:

Mumunang Aldo- 9 Kapat a Aldo- 11 Kapitung Aldo- 13
Kaduang Aldo- 9 Kalimang Aldo- 11 Kawalung Aldo- 14
Katlung Aldo- 110 Kanam a Aldo- 12 Kasiyam a Aldo- 14

PANALANGIN NING NOVENA

Kaibat ning Panalangin para king balang aldo, siklaud la ding sabla.

Sabla: O Dios, a memili king maligayang Ari, y San Fernando III (Katlu),
antimong talapanualu ning kekang Banal a Iglesia keti king yatu,
pakiramdaman mu la sana ding kekami kayadwanan at layun gawan
meng talasaup mi king banua ining kekaming patulunan.

King mapilan a katahimikan, banggitan la ding sariling kayadwanan. Kaibat misundu

ya ing Panalangin.

San Fernando III, Ari ning Castilla ampon Leon, Conquistador ning
Andalucia, maslag nang uaga ning kasaleysayan; kayaliwa da ring
panaun mu karing kekami!

Keka, O taung banal ampon tapat, panigapu ming saupan mu kaming

maging kawangis mu, karing kekaming panaun: O tapat at tune
talatuki nang Jesus.

Saupan mu kami parating magobra para king kasuyuan ning

kapayapan at matampang pamiyabyayan; abayan mu kaming
makipagal para king katuliran at pamipante-pante, maglualu para
kareng maina nu la man karin.

4
 Pasiknangan mu kaming magobra para king metung a Banal a Iglesia
a Malaya king sablang upaya, at tanda ning lugud at pakalulu ning
Dios para karing sabla. Amen.

LITANIA NANG ARING SAN FERNANDO III

Manatili lang makasiklaud ding sabla. Ing Pari panimunan ne ing Litanya.
Nung e malyari ing Pari, panimunan ne ning metung a Cantor.

Guinu, malunus ka kekami.

Guinu, malunus ka kekami.
Cristo, malunus ka kekami.
Cristo, malunus ka kekami.
Cristo, pakiramdaman mu kami.
Cristo, pakiramdaman mu kami.

Dios Ibpa banua, miglalang king sablang mayap at banal.

Mag-ari ka busal mi.
Ding Anak, sala ding anggang banal.
Pamasalan mu kami.
Dios Espiritu Santo, kaligayan da ring anggang banal,
Manatili ka kekami.

Santa Maria, Reyna ning banua at yatu,

Ipanlangin mu kami.

San Fernando, mapanalangin at malugud king Dios,

Ipanlangin mu kami.
San Fernando, mapakumbabang pepasakup kang Cristo,
Ipanlangin mu kami.
San Fernando, masugid ding kausukan ning Espiritu Santo,
Ipanlangin mu kami.
San Fernando, patulunan ding pengaring lalaki,
Ipanlangin mu kami.
San Fernando, tapat kang asawa at padre de familia,
Ipanlangin mu kami.
San Fernando, mataluki king disiplina at pamanuru karing kekang anak,
Ipanlangin mu kami.

San Fernando, patulunan ding mangubyernu at king serbisyu publiku,

Antabayanan mu kami.
San Fernando, aring makatuliran, manungkulan alang pamangabiran,
Antabayanan mu kami.
San Fernando, masuyu at malingap karing kekang sasakupan,
5
 Antabayanan mu kami.
San Fernando, talapamayapa at malugud king malinis a pamanungkulan,
Antabayanan mu kami.
San Fernando, menuligsa at linaban king kapamiraitnan,
Antabayanan mu kami.
San Fernando, pepairal karing batas a mamingua karing kalulu at
mangailangan,
Antabayanan mu kami.

San Fernando, menalakad pagsantungan ding masakit at maki-kapansanan

Lingapan mu kami.
San Fernando, migmalasakit karing pisamban at lugal pipagaralan,
Lingapan mu kami.
San Fernando, migtanggul at linaban para king kasalpantayanan,
Lingapan mu kami.
San Fernando, sinuku me ing korona mung guintu king koronang suksuk
nang JesuCristo,
Lingapan mu kami.
San Fernando, Ari ka keti king yatu dapot ing Ari ning Banua ing tikian mu
king pamangobyernu (mu),
Lingapan mu kami.
San Fernando, menatili kang mapakumbaba at mamu-lub lipat ning kekang
kayupayan at kayatinan,
Lingapan mu kami.

San Fernando, laban king tuksu ning ketasan at pangasilo king upaya,
Ipamingua mu kami.
San Fernando, laban king kasiran a pasari ning kasakiman at kapamiasnan,
Ipamingua mu kami.
San Fernando, laban king tuksu ning pamanabusu busal ning kayatinan,
Ipamingua mu kami.
San Fernando, king pamanintun mi king daklat ning mayap a
pamag-parokya,
Ipamingua mu kami.
San Fernando, king pamanintun ming dalan ning mayap a pamanungkulan
king kekaming siyudad at lalawigan capampangan,
Ipanalangin mu kami.

San Fernando, king pamanuntun mi king daklat ning mayap a

pamag-parokya,
Ipanalangin mu kami.
San Fernando, patulunan ning kekaming siyudad at ning Arkidiosesis ming
pakamalan,
Ipanalangin mu kami.

6
Kaibat ning Litania, ing Pari nganang manalangin:

Pari: Panalangin mu kami, O Maligayang San Fernando.

Sabla: Ba’ mi lang apagaintuliran nabangnan ding pangaku nang Cristong

Guinu mi.

Pari: Manalangin tamu.

O Dios, a memili kang Aring San Fernando antimong talapaglualu
ning kekang Santa Iglesia keti king yatu, pakiramdaman mu la sana
ding kapurian, kapasalamatan at kayaduana’ning kekang balayan, a
mamaus keka king kasaupan ding panalangin nang San Fernando a
gewa mung talasaup mi king banua. Iti yang aduan mi
capamilata’nang JesuCristong Guinu mi. Amen.

TAULING PANALANGIN NING ALDO-ALDO NOVENA

Manatili lang makasiklaud ding tau.

Sabla: O Dios a mayupayang tutu, pinili me ing maligaya at mapalad mung

alipan ing nuan a San Fernando iniang makilaban ya’t makipamuk
karing kasalang ning kasalpantayanan, at pigkaluban meng dakal
tagumpe kareti. Ipagamu-amu mi kapamilatan niting Banal at alang
alang king kekang kalam, akamtan mi sana ing tagumpe karing
kasalang ding kekeng kaladua, ban lalung milusuk karing pusu mi
ing kekang pakalulu.

Antimurin, pagamu-amu mi king saupan me ing kekang Santa Iglesia

king pamakilaban na karing kayang kasalang. Tairan me at ingatan
ing kekaming Santo Papa y (N.) ban keta e mabawas ing kayang
tetagan, layun yang managumpe king sablang kabalatungan at king e
ustung kasalpantayanan. Pasiknangan mu la, O Dios, ding kaladuang
magdusa king purgatory at pamatulan mu la kabang panenayan dang
miyagum keka king kayarian mu banua. Lunusan mong tairan king
kekang Santa Iglesia ding sablang bansang e kikilala king lagyu mu
ban ding sabla pakirasan dang kamtan ing ligaya banua bunga na
ning kekang kamatayan.

Papagbalikan mu la lub ding makasalanan a pepaimburis king

pamalsinta da keka pauli ning pamanusig da king marok nang
kayungyungan ning demonyu, ning yatu at ning laman. Papanatilian
mo ring banal king pamalsinta keka ban king saup ning mal mung
grasya, manatili lang tupad at mapamintu king kaburian mu.

7
 Iligtas mu kami, O Dios, king anggang panganib a magdala kekami
king kasalanan, at idayu mu kekami ing anggang marok a
makakawani kekami keka; idayu mu keka ing danup, mabayat a sakit,
salut, ayun, alti, albug, giyera o pamilaban-laban ding bansa at balen.
At kakataulian, idayu mu kekami ing dewakan ning demonyo ban
keta, ding sabla mie la antimong metung mung bansa o metung mung
balen Cristiano, layun mangaintulid lang mabilang karing kekang
pinili king banua. Amen.

Talakad la ding sabla at ikanta ya ing metung a dalit kang San Fernando.
Maganap ne kanita ing Misa para king aldo ning Novena.

Kaibat nang mebasa ning Ebanghelyo siklaud la ding tau para king aldo-aldo
Panalangin ning Novena.

MUMUNANG ALDO
(May 21)

Sabla: O Dios ko at Guinu ko, pigkalaman meng metung a kasalpantayanan

a e karaniuan ing alipan mu at kekaming Patulunan i San Fernando.
Pagkaluban mu kami naman sanang kasalpantayanan a anti kaniti
8
 pablasang kailangan mi ya iti ban munie bie king kaladua mi at ban
sumaup kekami king pamakilaban karing sablang kekaming kasalang.
Antimurin, iti dinan na kaming pamananggap king kekang aral
kalupa ning pamananggap ding anak king tuturu ning kekang Banal a
Iglesia at munie sama at suklam king baluktut at e matulid a aral ning
yatu, demonyo at laman. Aduan mi king kapamilata’ning kekang
grasya, ing alupig mi la ding anggang kasalang mu, kasalang ning
Banal a Iglesia at kasalang ding kaladua mi, antimo ing pamaglupig
na ning alipan mung I San Fernando.

Iniang i Aring San Fernando, panlualu ne ing kayang kayarian, king

maragul a tepangan, e na pignasan ing dangalan ning kayang sarili,
nune ing dangalan ning Dios at ning kasalpantayanan; inia
pepanuana’na ning banua ing kayang pamakipaglaban.

Aku man, O Dios, makilaban ku pauli ning kekang dangalan, pauli

ning pamalsinta ku keka, ban kapilan man e mag-ari kening pusu ku
ing marok at likung hilig ning laman. Manalig ku keka, O Dios, king
saupan mu ku ban atagulaling keng bukud mung para keka ing
kanakung pusu at kaladua. Iti pin aduan ku kapamilata’na ning
bugtung mung Anak at kambe ning kekeng Patulunan I San Fernando
a kayabe mu na king kekang kayarian banua. Amen.

Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

KADUANG ALDO
(May 22)

Sabla: O Dios at Guinu, a dapat kung luguran mipnung katapatan,

ipagkalub mu kekami iting pamalsinta a binie mu king nuan a San
Fernando a kekaming Patulunan, a pauli nita, arapat na la detang
mauling bage king ikarangal at ikaligaya ning kekang lagyu.

Saupan mu kami, Guinu, ban ayampang mi ngan angga king

kamatayan, ing kekaming bie, antimo ing tuturu na ning Ebanghelyo.
Kanita iti yang maging uliran karing para ming tau at karing
kamaganak mi. Saupan mu kami naman ban makatupad kami karing
kekeng katungkulan king bie at layun sikapan pagdulapan ing
kekang dangalan, anti ning iti ya na pin man ing kekaming kayausan
at tula keti king yatu. Iti ya ing tanda ning pamagkamit mi king
ligayang alang kapupusan kagum mu king banua, a kekang sasadia at
pengaku karing tapat susuyu keka.

9
 Iti Guinu, ya ing aduan mi keka alang-alang king pamamilata’na ning
maligaya ming patulunan I San Fernando a bina mung peparangalan
at pigkalaman dakal a grasya king bie na keti yatu at pinuk kagum
mu king kekang kakatas-katasan a ligaya banua angga king alang
angga. Amen.
Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

KATLUNG ALDO
(May 23)

Sabla: O Dios a lubus king kayapan at tutung mapamakalulu, pagamu-amu

mi keka ing pagkaluban mu keng matibe kapanaligan king kekang
pangaku, at iti ya ing munie sipagan king pamanupad mi karing
kekang kautusan. Idayu mu la kekami ding panganib at makasalanan
nang amuyut ning yatu.
Pasiknangan mu sana ing kekeng kapanaligan tanggap kasaupan at
tetagan king pamakipaglaban mi karing kekeng kasalang: ing marok
nang pita ning laman, ing kayungyungan ding pusu mi karing bage
material, ing mapamirayang amuyut ning yatu at demonyo, a salang
king krus ning mal mung Anak.

Daptan mi ing anggang kagiuan mi ban layun atuparan ing aduan mu

kekami, at sumaup karing aliua kapamalita’ning mal a grasya mu ban
mangaintulid kaming mibilang karing kekang piniling miras king
ligaya mung alang kapupusan banua.

O Dios, iti yang pagnasan ming tanggapan kaniting novena king

kapamilata’ning maligaya ming patulunan i San Fernando, a telaga
mung sumaup king pamangailangan ning kekaming balen. Amen.

Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

KAPAT A ALDO
(May 24)

Sabla: O alang angga at mapamakalulung Dios, parati mong lunusan ding

sablang tatangis king karelang kasalanan. Pagkaluban mu keng
grasyang magtantunh sumisi king anggang arapat ming pamikasala
kaba ning bie mi, at mabiasa kami sanang sumaup king kailangan
ning kapara ming tau. Mabiasa kami naman sanang mamatawad king
arapat dang kasalanan kekami ding aliua. O Dios, patauaran mi la
ngan sana ding sablang mikasala kekami antimo nung makananu mu
keng petauaran karing kasalanan mi kalupa na ning aduan mu
10
 kekami potang pangadian mi ya ing “Ibpa Mi.” Makanian pin, O
Dios, samantalang manyauad kaming kapatauaran karing kekeng
kasalanan, ipaniauad mi la naman tauad detang anggang dinapat
kalapastanganan o minie nanumang paginakit o sukal lub kekami.
Patauaran mu kami, O Dios. Lunusan at pakalulwan mu ke ngan
sabla pati na ring kautus mi, kamaganak at sablang kasalang mi.
Pagnasan mi ngang kamtan iti, alang-alang king pamamilatan ning
kekeng maligayang pintakasing i San Fernando, a tutung mignasang
suyuan n aka king mitmung lugud at katapatan mangga man kapilan.
Amen.

Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

KALIMANG ALDO
(May 25)

Sabla: O Dios Ibpang malugud, luluguran mu kami migit pa king lugud

ding sablang pengari. Pagamu-amu mi keka ing pagkaluban mu keng
grasyang makatupad king mabayat ming katungkulan karing kekeng
anak, a pigkalub mu kekami, ban aturu mi la king banal a takut keka,
at ban deti asuyuan da ka king mipnung pamalsinta. Binang maragu;
at mabayat, O Guinu, ing katungkulan a binie mu kekami, dapot
pagnasan mi ing saupan mu kami king mal a grasya mu ban atuparan
mi iting kekeng katungkulan.

Layun mu no man sanang saupan ding kekeng anak at isadia mo ding

karelang pusu king pamanyuyu keka. E mu sana ipaintulut, O Guinu,
king mika-anak kaming pasukal lub keka king karelang pamikasala,
pablasang mayap pang makalibung ulit ing e no mibayit keti king
yatu nung uari’t mikasala la mu keka. Dalan mo king kayarian mu
banua samantalang e da pa binating ing grasyang tinggap da king
Biniag. At nung uari’t pakaban mu ing bie da, iyanad mo sana ban
maging tapat mong talasuyu kaba ning bie ra at maging maligaya la
ding karelang pengari at maging dangalan mu la keti king yatu.

Aduan mi iti, O Dios, alang-alang king pamangaintuliran ning kekeng

Patulunan i San Fernando, a ketang bie na meging mayap ya’t uliran a
pengari karing kayang anak, tapat a talasuyu mu at king uli niti
pigkaluban meng mibiebie kambe mu king ligayang alang
kapupusan. Amen.

Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

11
 KANAM A ALDO
(May 26)

Sabla: O Guinu, lelangan mu kaming kawangis mu. Mayapan mu sanang

mie kami agpang king paksa ning pamaglalang mu kekami. Tinatag
me ing Sakramento ning Matrimonio ban kapamilata’ na niti, dakal la
ding kekang talasuyu/ Ipaintulut mu sana, O Guinu, king akilala mi
ing degulan na niting Sakramento at atuparan mi ing mabayat nang
kayaduanan, antimo ing pamanupad na ning alipan mung I San
Fernando. Ituru mu kami nung makananu keng mibie-bie kaniting
Sakramento antimong mangayap a talasaua at e sana maging sangkan
iti ning pamikasala mi keka, nune maging dalan ya painturu king
kekang ligaya.

O Dios, pilan la karing talasaua ring mababaldug king impierno pauli

ning e ra pamanupad king banal a paksa ning matrimonio? Aslagan
mo ding kekeng kaisipan ban kapilan man e ke maliaring manabu
king impierno pauli ning e mi pamanupad king banal nang
kayaduanan at parasan niting sakramento. Pamasalan mu kami
kaisipan ban kanita kapilan man eke maliaring miyungyung king e
ustu at e malinis a lugud, at king kataksilan. Mabiasa kami sanang
tupad king banal dang katungkulan ding miasaua antimo ing
pisumpan da king kekang altar, at uli niti, maging uliran kami karing
aliua, agpang munaman king alimbauang pepakit na kekami ning
alipan mung I San Fernando.

Tingiran mu sana’t pakiramdaman ining kekeng kayaduanan. Bustan

mung dakal la king kekaming balen ding talasauang uliran king
kabanalan at kalinisan, at mapaui ing marinat at manauang a
pamibie-bie a pasari ning kasalanan.

Pagnasan ming tanggapan iti, O Dios, alang-alang king masikanan

nang pamamilatan ning maligaya ming patulunan I San Fernando,
para king lalung ikaligaya at ikakayap ding kaladua mi. Amen.

Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

KAPITUNG ALDO
(May 27)

Sabla: O Dios a Guinu mi, Ika ing linalang karing anghel, ban mingat karing
kaladua mi. Ala lang patugut susuyu at mamintu king banal mung
kaburian. Ipaintulut mu sana ing saupan da kami deting anghel king
mabayat ming katungkulan maningat king kalinisan da ring kekeng
12
 anak ban keta asaupan mi lang manatiling banal at dagul malinis
antimo ring kekang anghel.

Kanita, mangaintulid la king kekang arapan; maging maligaya la ding

karelang pengari at maging makauili la karing espiritung mimingat
karela. Kapnuan mu la ding pusu mi king banal a kapagnasan at
pamagkapilit mituru king kabanalan karing kekeng anak, a keka
naman binang liguran pablasang anino na la at larauan ning mismung
kabanalan at kalinisan ning kekang sariling kayanakan.

Ituru mu kekami, O Dios, ing paralan nung makananu ming ataman

ing kalinisan at kabanalan karing pusu dening kekeng kayanakan. E
mu sana ipaintulut king ding karelang mata mimulat la king marauak
a alimbaua at makadungis karing kaladua ra.

Pagnasan mi ngan kamtan iti, O Dios, kapamilata’ning maligaya

mung alipan i San Fernando, a tutung makapasubali king pamanuru
king kabanalan karing kayang meging labing-limang anak. Parati
sanang maging mumuna ming pigampa ing alarauan mi karela ing
tune nang ulaga ning kalinisan at kabanalan, kapamilata’ning
mismung pamibie-bie mi. Amen.

Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

KAUALUNG ALDO
(May 28)

Sabla: O Dios, iniang pepasublian meng mie ing dalagang anak nang Jairo at
ing baintaung anak nang bugtung ning metung a mebalu karin Naim,
bina mung pepakilala kekami ing maragul mung lugud karing
kayanakan, at layun kaburian mung mie la king banal a malinis a
pamanyuyu keka. Balu mu, Guinu ing dakal a panganib a sisira
karing kayanakan king panaun ngeni. Balu mu king kapagnasan ning
demonio ing mirayu la keka inasa’t ing marok a bisyu yang
pagkapilitan nang papag-arian king pusu da ring kayanakan a dapat
sumuyu at malsinta sana keka. E makalingad keka, O Dios, king
kamarinayan, ing kahinhinan, at ing kataimtiman ding dalaga
mabubulag at mababating karing pamilyang bininyagan. Aldo-aldo iti
madadakurak king libu-libung kasalaulan at miyayaliuang

13
 kanauangan. At mekad e mi man tatangisan pablasang e mi
apapansinan at atatastas ing dewakan a pasari na karing kaladua.

Lunusan mo ring kekeng kayanakan, o Guinu. Ingatan mo reting

maulagang bulaklak at e mu ipaintulut king malanat la at
mangasalanta, pablasang balu mung mausta king ding makasalanan
at marinat a kayanakan ilang makasira karing pamilia, karing balen at
king kekang Santa Iglesia. Iligtas mu la, O Dios, karing dakal a
panganib a makapadurut karela. Itugtug mu karing pusu rai ng
mayupaya mung grasya. Ipagkalub mu karela ing banal at malinis a
pamalsinta keka antimo ing pamalsinta da ring anghel banua. Maliari
la sanang mangaintulid king ligayang sasadia mu banua.

Pagnasan ming kamtan iti, O Dios, alang-alang king pamamilata’ning

kekeng Patulunan I San Fernando, a bina mung liguran king panaun
ning kayang kayanakan, at tutunh migkapilit sumuyu at malsinta
keka angga king kapupusan. Amen.
Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
Kaibat igale ya ing metung a kanta kang San Fernando o kapasalamatan king Guinu.

KASIYAM A ALDO
(May 29)

Sabla: O Dios, buri mu king ding kekang talasuyu mie lang tahimik at king
kapayapan. Pagamu-amu mi, ipagkalub mu sana iting kapayapan ban
makasundu la ring sablang balen at bansa at maging metung la uaring
pamilia king kekang pusu. Idayu mu kekami ing kagutgutan ,
pamipaginakit at pamisalangsangan. Ilako mu karing pusu mi ing
katakauan king pibandian, king kayupayan, at king dangalan, a
panibatan ning kasiran ding balen at ning dakal a pamikasala mi
keka.

Bustan mu sa king maging metung kami pilubluban king kapagnasan

mi king kayapan, alang-alang king kekang Santa Iglesia. Aduan mi
king kapamalita’ning Aring San Fernando king maging tune mu keng
balayan a mapamintu keka. Ipanlualu mu king marok at king
kasalanan, at layun saupan mu kaming manatiling metung a balayan
Cristiano; balayan a uliran ding sabla, mapamintu karing kekaming
pastul a kayalili mu keti sulip, antimo ing balen a pamuntukan nang
San Fernando. Kanita, mangaintulid kaming mipalad miagum keka
karin banua at midalit alang tuknang king kekang ligaya. Pablasang
ika ing Dios a linalang at mengabus kekami, minie king grasyang
makapagbanal karing kaladua mi. Amen.

Kaibat ning Panalangin aldo-aldo pangadian ya ing IBPA MI, BAPU MARIA, LIGAYA,.
14
Kaibat igale ya ing metung a kanta kang San Fernando o kapasalamatan king Guinu.

15
 DING IMNO AT DALIT
1. Gozo kang San Fernando
Refrain:
Ika pin ing lalapitan king sabla
ming kailangan!
O Fernandong lusuk malam,
Nais mu ke ngan saupan ®
Keting mapalad ming labuad
A tutu mung peka-lingap
Pigmasakit at iningat
King e kalarung pigagap
Ari ka pin sakdal nuan,
Pusu mu mipnu king kalam ®
Makasalanan kung bina,
Isip mi bulag at lisia,
Pauli ning degulan na
Kasalanan mi ngan sabla.
O aring sari king tapang
King sala ligtas mu ke ngan ®
Keka saup mu e ke dapat,
Keka lumapit at tanggap,
Dapot ing Dios birian na
Kekami mamilatan ka.
Kasngauan keke ngan kimtan
Yubu mu kabud tengalan ®
Manibat king kekang trono
Mag-ari ka at magmando,
Lalapit kami keka,
O pakalulu mu ibie mu.
Aklis mi kekang tingiran
Balen mi kekang lunusan ®
King tuksu keka ke lalapit,
Pamikasala pipilit,
Nio keka mamaklis
Saup mu e mu pagkait.
16
Pusu ku e paimburisan
Mabaldug king kasalanan ®
Salang mi tutu lang dakal
Demonio mabagsik caual,
Mata mu ilingun marapal.
Kalam mu agad idampal.
Kapayapan e mi kamtan
Saup mu uari’t e datang.
King Dios karin ke lalaban
Utus na e mi pamintuan,
Daptan mu pu sa’ kekeng
sisian
Maragul ming kasalanan.
Grasya ning Dios lusuk malam
Keke sanang pakamalan ®
Santong tutung masikanan,
Arap ning Dios mamilatan,
Banal a utus ning Guinu
Mabiasa ke sang mamintu.
Keti sang keke balayan
Maguagi ing kabanalan ®
Karing miasaua uliran
Pengari anti mu naman,
Ding Ari dapat tularan
Ding Cristiano diua ne man
Ding herejeng mapaglaban
Dapat de pin pitakutan ®
Ding anak, matua angga na
Saupan mo sang parapara,
King panganib idayu la
Ban king sala milisia la.
Idayu mu king balayan
Sabla sablang kasalanan. ®
Babai king kekeng balen,
King kilus maging mahinhin,
King aldo bukas ila ring
Maging indung uliran pin.
Karing anak da pakamal
At miturung kabanalan. ®

Santong kekeng Patulunan,

Lunusan mo sa’t balikdan
Ding dalaga ning balayan
Ingatan sang kalinisan.
Sabla sabla sang manauang
Lisian sana’t pitakutan. ®

Ding Anak ming maisak mu

Pamisip da pa tutubu,
Kauatan mo king buri ra
Ban e mabaldung king sala.
King karelang paintungulan
Saupan mo sana’t tairan. ®

O Santong lauit kamalan

O Santong lauit kamalan,
Malugud ming patulunan,
King pusu mi’t pilubluban
Itapuk ing kabanalan.
Keti sang kekeng balayan
Luguran ka’t parangalan. ®

2. Dalit kang San Fernando

Refrain:

17
 Mipuri ka San Fernandong
Kekang lagyu mipabanalan
Luid ka Patron ming
kaluguran
Ipanalangin me ing kekang
balayan (2x)

Ari kang sinuyu anting alipan

Balen ning Guinu kekang
Siyuan ®

Katuliran ing kekang pekilaban.

Katutuan ing kekang kapagnasan. ®

Kekang talent ampon pibandian

Taung maluka dekayanan ®

Coda:
San Fernando! San Fernando! San Fernanong Mal!

3. Marcha nang San Fernando

San Fernando kekaming patulunan.

18
Panalangin me, ing kekang balayan.
King kapagalan, pasiknangan,
Kaba ning bie mi, antabayanan,
King kasakitan, lingapan,
King sablang marok, ipamingua,
Aring banal, makiramdam ka sa,
King panalangin mi.

San Fernando kekaming patulunan.

Panalangin me, ing kekang balayan.
King kabiayan mi, pasiknangan,
Ding pamilia mi, antabayanan,
Ding masakit, lingapan,
King sablang tuksu, ipamingua,
Aring banal, makiramdam ka sa,
King panalangin mi.

San Fernando kekaming patulunan.

Panalangin me, ing kekang balayan.
Lalauigan mi, pasiknangan,
Kekaming siyudad, antabayanan,
Ing Arkidiosesis, lingapan,
Ing parokya mi, ipamingua
Aring banal, makiramdam ka sa,
King panalangin mi.

Ending:
Aring banal, makiramdam ka sa,
King panalangin mi

19
4. Dalit kang San Fernando III, Ari
Refrain:
San Fernando, alipan nang Cristo
Nuan ka O maligaya ming santo
Tairan mu ke king banuang tagimpan
King kayarian ning Dios a karinan.

Pisyag king dapat lugud king Guinu

bie mu sese ning keyang amanu
laus lub kang keya pepasakup
usuk na king pusu mu sininup
O San Fernando, ipanalangin mu kami. ®

Ari kang tutung makatuliran

malugud at tapat menungkulan
lebanan mu ing kapamiraitnan
memuntukan kang e mangabiran
O San Fernando, antabayanan mu kami. ®

Busal na ning kekang kayatinan

pepakit mu ing tune kababan
peglualu mu la ding sablang mayna
santungan da ka ding alang-ala
O San Fernando, pakalingapan mu kami. ®

Atad mu ke ngan king ustung dalan

nung nu alang tuksu ning ketasan
lawan me ing kekaming balayan
ing Arkidiocesis mung ingatan
O San Fernando, pasiknangan mu kami. ®

Pamupus:
O San Fernando, O San Fernando.

20
5. Dalit kang San Fernando -2*
(C. Cadiang)

Metung kanga ring mignasang pailalam ing kayarian mu

King tune Kayarian ning bie, Kayarian na ning Dios a Mal
Ligaya mu ing tagumpe ning Iglesia a keka mal
Kapakanan ding sakup mu, yang pigagap mu pekamal.

E mo buring mibayatnan ding sakup mu king mal a buis

Pigaganakan bulsa na pakakalulung memalen,
Ari ka man pigagap mu kalat kasalpantayanan
Mitalaga kang pisamban at obispong mangasiua.

Makayanib king ordin nang San Franciscong tatangalan

At king kekang kamatayan, abitung mal sinulud mu
Dakal milagrong meganap keta mismung kutkutan mu
Dakal mekinabang keka kabanalan pepauaga.

San Fernandong patulunan, malikid ka king balayan

Ding mamimunu tairan king daklat na ning katapatan.
Balen kekaming kebaitan, ipamingua king deuakan
King Dios a kekang palsintan, ipanalangin mu kami.

21
BENDISYUN KING LARU NANG SAN FERNANDO

Kayari ning Panalangin kaibat ning Pamakinabang, ing Pari munta ya king
lugar a nung nukarin la makapuwestu ding laru. Kaibat nganang
manalangin:

Pari: Ing kasaupan tamu atiu king lagyu ning Guinu.

Sabla: A linalang king banua ampon yatu.

Kaibat nganang misundu:

Pari: Manalangin tamu.

O Guinu, karing bage a lelangan mu at apapalto ning
tau kabilang ya ing laru.
Ibat pa ketang minuna
ginamit da ne ding tau iti
ban pasigla karing katawan dang palungkutan
ning sakit.
Bendisyunan ✠ mu sana at pabanalan iting laru
ban ding anak mung gumamit kaniti
kambe ning matibe kapaniwalan keka,
kamtan da ing kapaldanan ning karelang katawan.
Ulinita lalu ra kang purian at parangalan.
Iti yang aduan mi
kapamilatan nang Cristong Guinu mi.

Sabla: Amen.

Kayari nang menalangin ning Pari, insensuwan ne at pisikanan neng agua

bendita ing laru.
Kaibat magbalik ne king keyang lugar at ibie na ne ing tauling bendisyun.

22
23
24