Uccen d ubareɣ

Yiwen wass, yuḍen yizem aṭṭan d afessas : iwet-it ubeḥri. Yečča timlalin s
ticcert, ur yufi ara ɣur-sent. Armi ur d-yefki ara Rebbi tawwurt, yessegrew-d
akk lewḥuc, icawer-iten; yal yiwen, ad as-d-yemmel ddwa yessen.

Ssusmen akk axaṭer ttaggaden izem. Inṭeq ubareɣ, yenna-as:« Ɣef wakken
sliɣ, qqaren lhan yidammen n wuccen i waṭṭan i k-yuɣen. » Netta d wuccen, d
iεdawen, si zik. Uccen, tekcem-it tergagayt. Ixemmem, ixemmem, yerra-as:« D
sseḥ ay agellid n lewḥuc, d tidet, idammen-iw, lhan i ubeḥri maca ilaq ad
xelḍen d wallaɣ n ubareɣ! »

Iwet yizem abareɣ, yenɣa-t, yekkes-as-id allaɣ-is. Yezzi-d imir ɣer wuccen
yenna-as:
- A Mḥend uccen, tura d nnuba-k!
- Ay agellid n lewhuc, fiḥel ma tenɣiḍ-iyi, d nekk ara ak-d-ifken idammen-
iw, yerna s lferḥ d ameqqran!

Yebbi wuccen ameẓẓuɣ-is, ijreḥ-it-id, ismiqqi-d kra n tmiqwa n

yidammen, issexleḍ-itent d wallaɣ n ubareɣ, yefka-t i yizem ad t-yečč. Yenna-
as yizem:« Ziɣ ay Uccen, kečč, d ṭṭbib ameqqran! Tessneḍ ad tekkseḍ aṭṭan;
tessneḍ ad tekkseḍ aεdaw! »
Seg tgemmi-nneɣ.