2.

SINIF ETE-4 AHMED PAŞA GAZELLERİ

1
1- Harîm-i Ka’be-i kûyuñ yeter penâh bana
Harâm ola dahi bir gayrı secde-gâh bana

2- Benim fürûğ-ı kamerden ferâğatım var kim

Çerâğ-ı mihr-i ruhundur delîl-i râh bana

3- Diyâr-ı yârı koyup seyr-i sebze-zâr etsem

Çemende dil uzatır her biten giyâh bana

4- Kamuya bencileyinsin dirig kamulara

Yeg ise âlemin ayruklarıyla âh bana

5- Boyu hevâsı ile bu hevesde hâk oldum

Ki sala sâyesin ol serv gâh gâh bana

6- Ne suçu var deyu râm etme öldür Ahmed’i gel

Ki senden ayrı dirilmek yeter günâh bana

7- Ne özr eder isem artuk gelir günâhımdan

Meger inâyet-i Şâh ola özr-hâh bana

2
1- Yâ kaşını peyveste kemân eyledin ey dost
Cevr okuna cânumı nişân eyledin ey dost

2- Şol dem ki revân eyledin ol serv-i revânı

Çeşmimden iki çeşme revân eyledin ey dost

3- Arz eyleyeli hüsn-i dilârânı cihâna

Âlem yüzünü bâg-ı cinân eyledin ey dost

4- Hoş bûy ile doldurdu sabâ dehri meger kim

Anber saçını müşg-feşân eyledin ey dost

5- Teng olsa lebin yâdına tañ mı dil-i Ahmed

Çün gonca gibi bağrını kan eyledin ey dost

3
1- Etmesin hurşîd-i rahşân rûy-ı cânân ile bahs
Bendeye lâyık degüldür k’ede sultân ile bahs

2- Bir denizdir hüsnü yârın katresidür âfitâb

Katrenin ne kadri vardır k’ede ‘ummân ile bahs

3- Kangı gül-ruhdur yüzünle da’vî-i hüsn eyleyen

Nice kevkebdir eden hurşîd-i tâbân ile bahs

1
 4- Sihr ta’lim eylemekde gamze-i câdû-yı dost
Çâh-ı Bâbilde eder Hârût-ı fettân ile bahs

5- Şol Skender isteyip bulmadığı Âb-ı Hayât

Hasiyette edemez bu lâ’l-i handân ile bahs

6- Tîr-i gamzeñle yatar meydân-ı aşkında zebûn

Şol dil-âverler k’eder tig-i Nerîmân ile bahs

7- Tıfl-ı dil çün mekteb-i aşkında almıştır sebak

Eylesin hikmet makâlâtında Lokmân ile bahs

8- Kimse Ahmed gibi nakş etmez kitâbın hüsnünün

Ne kadar nakkâş olursa edemez Mânîyle bahs

9- Şâh ayagı tozuna hem-ser dirilmiş lâ’l-i yâr

Gûyiyâ İsâdır etmiş Âb-ı Hayvân ile bahs

4
1- Ehl-i diller sohbet-i cânânda cânın yaktılar
Şem’ için pervâneler iki cihânın yaktılar

2- Sabr yagmacısı sâkîler elinden dâd kim

Âteş-i bâdeyle aklın hânumânın yaktılar

3- Husrevâ şîrîn lebinden işidenler kıssamı

Âh edip Leylî vü Mecnûn dâsitânın yaktılar

4- Şem’-i meclis germ olup öykündügüyçün yüzüne

Astılar bâzârda sonra zebânın yaktılar

5- Müdde’i bizden nice nâm ü nişândır sordugun

Kim hevâya uyanın evvel nişânın yaktılar

6- Öykünen ruhsârına nesrin idi bühtân edip

Lâle miskinin tutup nâ-hak cenânın yaktılar

7- Dâmen-i dehri mu’attâr kılmaga enfâs-ı ‘ûd

Ahmed’in micmer gibi küynüklü cânın yaktılar

5
1- Söze gelse lâ’l-i dür bârın dil ü cân oynatır
Salınıcak kâmetin serv-i hırâmân oynatır

2- Bûstân-ı bâg-ı cennettir ruhun ki erdikce bâd

Hûşe-i sünbül diyü zülf-i perişân oynatır

3- Pâyına saçmak için ey mâh sarrâf-ı feIek

Gâh elinde dürr ü geh lâ’l-i Bedahşân oynatır

2
4- Sâkiyâ peymâne sun kim şevkıne Şeh bezminin
Zöhre her gün çeng ile hurşîd-i tâbân oynatır

5- İşitirse ravzasmdan dura raks ura Kemâl

Ahmed’in şi’r-i tarab-nâkin ki Selmân oynatır

6
1- Gül yüzüñ yâdına çeşmüm güher-efşân yaraşır
Çü bahâr irse çemen bezmine bârân yaraşır

2- Yoluna dîde-i uşşâk güher-rîz oluban

Kapına çehre-i uşşâk zer-efşân yaraşır

3- Saldıgı turra-i dil-düzdi zenahdânına yâr

Bu ki tarrâr olanuñ menzili zindân yaraşır

4- Dil ki tutmaya gamın çengine def gibi yüzüñ

Ney gibi her dem işi nâle vü efgân yaraşır

5- Bülbül-i bâg-ı suhan Ahmed-i şîrîn-güftâr

Bezm-i Şeh gülşenine murg-ı hoş-elhân yaraşır

7
1- Halka-i zülfüñ ruhsârında ser-gerdân yatar
Yasdanup genc üstüne bin başlı bir su’bân yatar

2- Sünbül-i zülf-i arak-rîzinden ol gül yüzlünün

Gün yüzünde ebr-i müşgîn-i gül-âb-efşân yatar

3- Gör nice hindû-beçedir gün yüzinde benleri

Kim gül-i ter döşenip mehtâbda uryân yatar

4- Ârızı hattından ol servin su’al ettim dedi

Bûstan-ı Rûmda tûtî-i Hindûstân yatar

5- Ey püser ebkâr-ı efkâr ile Ahmed gönlünün

Her gece bir gûşesinde bin meh-i tâbân yatar

8
1- Ah kim ömrüm cihân mülkünde cânânsız geçer
Ben cihân mülkün n’iderüm çün ki cân ansuz geçer

2- Dil cemâlinsiz cüdâdır nev-bahâr-ı hüsnden

Bâg-ı cennet bülbülün gör kim gülistânsız geçer

3- Her gece eksik degil dilde belâ vü derd ü gam

Sanma kim bu hâne-i dervîş mihmânsız geçer

4- Mezheb-i aşkın habîbin kangı bî-din terk eder

Küfr-i zülfünden nigârın nice îmânsız geçer
3
 5- Dedim ey cân kirpigin dil deldi gamzeñ duymadı
Dedi kim bilmez misin sihr oku peykânsız geçer

6- Dôstum kalmayalı mihrin gibi sabrım benim

Cevr hadden geçti ammâ hasret oransız geçer

7- Ahmed-i dil-hasteden hüsnün zekâtın yıgma kim

Gam bucagında yatıp derdiñle dermânsız geçer

9
1- Çekmeyen hecr elemin vasl safâsın ne bilir
Düşmeyen derde gamın dâr-ı şifâsın ne bilir

2- Ancalar mihr gibi şevk bisâtında yeler

Pâk-bâz olmayıcak aşk safâsın ne bilir

3- Yüzün ayında temâşâ-yı cemâl eylemeyen

Pertev-i âyine-i nûr-ı Hudâsın ne bilir

4- Dil ü cân vasf edemez derd-i derûnun haberin

Cigeri dag olanın kimse belâsın ne bilir

5- Tâk-ı ebrûsuna peyveste sücûd eylemeyen

Ahmed ol gûşe-i mihrâb du’âsın ne bilir

10
1- Ey arûs-ı hüsnüne Hindû gözüm âyine-dâr
Vey cemâlin bagına dest-i sabâ anber-nisâr

2- Dil marîzin sor ki derdinden ruhunla zülfünün

Nârdan bister döşenmiş mârdan bâlini var

3- Sulha yer yoktur ölürsen dahi ey bed-hû rakîb

Üstühanın saf tutup ceng ediser satranc-vâr

4- Hat getirmişsin dedim güldü dedi kim hat degil

Arızım lutfundan olmuş saye-i zülf âşîkar

5- Bahtı yüzün Ahmed’in tâli’ kaçan agarda kim

Hâl tek ruhsârına zahm urdu dest-i rûzigâr

11
1- Ruhu naziklik ile harf gülistâna atar
Kâmeti ta’ne okun serv-i hırâmâna atar

2- Kaşları yayı gibi gayrîyi kendiye çeker

Gamzesi oku gibi âşıkı yabana atar

3- Yine pervâne gönül şem-i ruhuñ şevkiyle

4
 Kendi cânın götürüp âteş-i sûzâna atar

4- Şol kadar tîr-i kazâ urdu felek cânıma kim

Şimdi bana ok atan tîr ile peykâna atar

5- Ahmed’i gülşen-i aşkında görüp dil uzatan

Eline taş aluban murg-ı hôş-elhâna atar

12
1- Bir sencileyin yâr-ı cefâ-kârı kimin var
Bî-rahm ü sitem-kâr ü dil-âzârı kimin var

2- Lâ’lin gibi bir hokka-i yâkût-ı güher-pûş

Agzın gibi bir dürc-i dürer-bârı kimin var

3- Şâdi-i visâlinde ne var yoksa nasîbüm

Şol gam ki firâkında benim var kimin var

4- Arz et güle gül yüzünü gülşende ki görsün

Bu vech ile bir ârız u ruhsârı kimin var

5- Ey dost nazar eyle ki uşşâk arasında

Ahmed gibi bir âşık-ı gam-hârı kimin var

13
1- Kıldım belâ-yı aşk ile mübtelâ sefer
Meşhûrdur ki âşıka yâ sabr u yâ sefer

2- Hayretteyim ki böyle havâ-dâr iken sana

Çün erdi kûyuna niçin eder sabâ sefer

3- Gitmez kapından ol ki göre zülf ü haddini

Akrebde olsa mâh degildir revâ sefer

4- Kâ’be kapın koyup çekeriz gam beriyyesin

Ömre komaz temettu’i ol bî-safâ sefer

5- Kat-’ı alayık eyleyip Ahmed gibi kılar

Sevdâ-yi zülf-i yâr ile müşg-i Hıtâ sefer

14
1- Her dem gözümden eşigine seyl-i hûn gider
Sabr u karâr dilden ü cândan sükûn gider

2- Hey hey ne sihr var senin âhû gözünde kim

Bin şîr gelse bir bakışından zebûn gider

3- Her zâhirî ne bile mahabbet tarîkini

Kim bâr-gâh-ı derdine sâhib-derûn gider

5
 4- Gül-gûn yaşım ki gül yüzün âyine-dârıdır
Aks-i ruhunla her tarafa lâle-gûn gider

5- Zülfün kemendi kanına susamış Ahmed’in

Çâhına düşüp ol zekânın ser-nigûn gider

15
1- Yine bî-çare gönül hasret ile yâra gider
Dil ü cân şevkını arz etmege dil-dâra gider

2- Dagılır lâle ruhun üstüne hâl-i siyehin

San ki hindû-beçe gül dermege gül-zâra gider

3- Sünbülünden sanemâ şemme-i bûy almak için

Misk sevdâya düşüp külbe-i attâra gider

4- Goncana gerçi gönül cem’ oluban derdi dili

Göreli sünbül-i gül-pûşunu sad-pâre gider

5- Şîveler satıp u cânı almaga kasd etti gözün

Görün ol mest -i harâbâtı ki bâzâra gider

6- Doldurur hokka-i lâ’line lebin gül-şekeri

Ya’ni’ dil-hastelerin derdine timâra gider

7- Tûti-i bâg-ı sühan Ahmed-i şîrîn-güftâr

Her nefes cân atıp ol la’i-i şeker-bârâ gider

16
1- Ol hilâl-ebrûnu gördükçe gözüm giryân olur
Âdet oldur kim görünse mâh-ı nev bârân olur

2- Gerçi dil-ber pend ider setr eyle râz-ı aşkı der

Âkıbet inen bilirim âleme destân olur

3- Beni öldürmek dilermiş lâ’lin için gözlerin

Ah kim yok yere bir gün ara yerde kan olur

4- Aglar iken âhımız eflâke erdi ra’d-veş

Ol sebebden gök dahi yaşlar döküp nâlân olur

5- Nâle kıldıgınca Ahmed goncasının güldügü

Bu ki bülbüller figân ettikçe gül handân olur

17
1- Sihr ile câzu gözün her dem ki âle başlar
Cân ü dil elden gidip ayaga düşer başlar

2- Şevkin oduna hevân ile yanıp hâk olalı

Âb-i hasrettir bu gözümden dökülen yaşlar
6
3- Kirpigüm haddin hayâlin şöyle rengîn yazdı kim
Kıl kalemle resm idemezler anı nakkâşlar

4- Safha-i hurşîde nakş olmuş sanasın mâh-ı nev

Ay yüzünün gurresinde iki hilâli kaşlar

5- Murg-ı hôş-elhân olup Ahmed yüzün gül-zârına

Bülbül-i gûyâ hezâran eyledi şâpâşlar

18
1 Hâl-i ebrûsını yârin kim gönül mesken tutar
Murgdur kim âşiyân-ı gûşe-i gülşen tutar

2 Kâmet-i Tûbâ mıdır yâ Rab hümâ seyr ettirir

Yâ nihâl-i serv-i ra’nadur gül ü sûsen tutar

3 Her taraftan gelmesin diye ana tîr-i nazar

Zülfü gün yüzünün üstünde zırıh cevşen tutar

4 Teng ü târ etti gözüm hecri velî şem’-i hayâl

Şükr kim bârî dil ü cân hücresin rûşen tutar

5 Ahmed uş bu cânını şükrâne yaz ol mâha kim

Cân ü dil kasdına şîr-âhû-yi şîr-efgen tutar

19
1 Agladıgımca ben ol şûh-ı sitemkâr güler
Bir olup düşman ile her nefes oynar güler

2 Subha dek her gece bülbül gibi feryâdumızı

Müşkil ol kim işidüp ol yüzü gülzâr güler

3 Dostlar böylem’olur dostlugun kâ’idesi

K’agladıgın göricek yârının ol yâr güler

4 Cân ferah oldugu dilden degil Allâh bilir

Düşmana karşı kılıp gayreti nâ-çâr güler

5 Ahmed ağladıgıyle âlemi gark eyledigi

Bu ki gördükce anun hâlini agyâr güler

20
1 Aşk vîran ettigin âkiller abâd istemez
Hûblar bî-dâdının dâdın bilen dâd istemez

2 Ölü dirgürmekde lâ’lin câna dermândır velî

Âşık öldürmekde gamzen tîg-i cellâd istemez

3 Ey Halîlim âteş-i sûzâna pertâb etseler

7
 Hazret-i Cibrilden aşk ehli feryâd istemez

4 Girye vü âh eyleme zülfünde ey cân oynayan

Kim kamu cân-bâz olan bârân ile bâd istemez

5 Ahmed edelden temâşâ hedd ü kaddin vasfını

Bâg u bôstân seyrin anmaz serv ü şimşâd istemez

21
1 Bir dil mi kalmışdur bu tîr-i gamzenden kan olmamış
Bir cân mı vardır ol kemân ebrûya kurbân olmamış

2 Şol ömr kim sensiz geçer ol ömr zâyi imiş

Bir cân k’anun cânanı yok ol cân dahi cân olmamış

3 Ne fitnedir yâ Rab bu kim bir dil-berin her gamzesi

Bir demde bin cân almasa derler bu fettân olmamış

4 Zülfün gidermiş ol sanem kâfirligin komaz henüz

Zünnârını kesmiş velî dahi müslümân olmamış

5 Şehrinde lâ’lin şevkine şol denli kan aglamaşım

Kim bir der ü dîvâr yok yâkût u mercân olmamış

6 Anıp çerag-ı hüsnünü pervâne gönlüm şem-vâr

Meclis mi var kim germ olup sûzân u giryân olmamış

7 Mecnûn-ı diller mecma’ı zülfündür anı çözse bâd

Cem’iyyet-i hâtır m’olur andan perîşân olmamış

8 Gülden kokun alıp seher âh etse Ahmed derd ile

Bülbül bulunmaz bâğda kim bağrı biryân olmamış

22
1 Hayâl-i yâr ile kıldım bu gece sohbet-i hâs
Semâ-î nâlem idüpdür gözüm yaşın rakkâs

2 Niçin düşer yüzü ‘ıydinde dil zenahdâna

Gerek ki ıydde zindândan olunaydı halâs

3 Lebin kanım içer anunla bir degilse dilin

Ko kanım ile soruşayın el-curuha kısas

4 Ne sengden yaratıptır Hudâ yüregini kim

Dürişirem ne tılısm ana kâr eder ne havâs

5 Sımağa şîşe-i nâmûsun Ahmed’in nice bir

Hemîşe reng-i melâmet ala avâm u havâs

23
8
1 Murg-ı câna tîr-i gamzeden per ü bâl eyledin
Halka-i zülfün hayâlin ana halhâl eyledin

2 Bahr-ı aşkında çekip almaga gönlüm zevrakın

Dest-i cevrünle ham-ı zülfünü çengâl eyledin

3 Yâ cemâlin cimidir zülfün k’anı zeyn etmege

İçine bir nokta koduñ adını hâl eyledin

4 Âh kim hâlin gibi bahtım siyeh-hâl etmege

Hâke saldın zülfünü ömrümü pâ-mâl eyledin

5 Nâzdan bir nâme yazdın kim anun her harfini

Âşık-ı bî-çârene menşûr-ı ikbâl eyledin

6 Parmagında hâme-i dür-bârını dören dedi

Bu ne tûtidir kim ana sîmden bâl eyledin

7 Sâkiyâ devr ehline sunup visalin câmını

Ahmed’e geldikçe sâgar n’için ihmâl eyledin

24
1 Cihân güzelleri çün bî-vefâ imiş bildik
Gönül vefâsıza vermek hatâ imiş bildik

2 Anı ki cân u cihândan azîz sanırdık

Dirîg ömr gibi bî-vefâ imiş bildik

3 Ne fâ’ide ki degil küncümüzde nûr-efşân

Tutam ki burc-i melâhatta ay imiş bildik

4 Dolaşdı zülfüne dil tıflı rişte sandı veli

Göreli pîç ü hamın ejderhâ imiş bildik

5 Visâli hânına ermek dilerdi evvel lik

Nasîbi Ahmed’in âhir du’â imiş bildik

25
1 Sanemâ sanma ki senden usanam gelmez isen
Şem’-veş bezm-i hayâlinde yanam gelmez isen

2 Bir iki gün bu gönül hastasın yanam gelmez isen

Künc-i hasrette gamın yâr edinem gelmez isen

3 Korkum oldur ki gamından yakamı çâk edeyin

Nâr-ı hasretle diyârını yakam gelmez isen

4 Bu gönül murguna uyup usadım gam kafesin

Uçam uş cennet-i kûyunda konam gelmez isen

9
5 Dil-i Ahmed gibi gam sengiyle mecrûh olayın
Yâd-ı lâ’linle kızıl kana yunam gelmez isen

26
1 Cânıma bâlâ-yı kaddinden belâ eksik degil
Başıma sevdâ-yi zülfünden hevâ eksik degil

2 Çeşm-i şûr-engîzi yârın gör ne hûnidir k’anun

Mest olup her gün elinde ok u ya eksik degil

3 Hâlime bir den nazar kıl arada kan olmasın

Kim gözümle gönlüm içre mâ-cerâ eksik degil

4 Türk-i çeşmin tîrkeşinden cânı kim kurtara kim

Ne kadar kim gözlerem tîr-i kazâ eksik degil

5 Geh hevâ-yı kadd olur gönlümde geh sevdâ-yı zülf

Âh k’ol miskîne dâ’im bir belâ eksik digil

6 Nâlesinden Ahmed’in ey yâr bîzâr olma kim

Kanma kim gül-zâr ola destân-serâ eksik degil

27
1 Sebzede sünbül mü var bu zülfe ser-gerdân degil
Bâgda reyhân mı var ol hatt için hayrân degil

2 Kara kaşın yayına kurbân olam k’atdıgı ok

Başlı bagrım zahmına merhem urur peykân degil

3 Nâme-i a’mâl-i mücrimden siyehdir haşrde

Şol muhabbet-nâme kim nâmın ana unvân degil

4 Kangı nâ-dân benzetir sen gül budagın serve kim

Serv bâlâ-yi belâ-engîz ile fettân degil

5 Taht-ı sultân-ı hayâlindir çü gönlü Ahmed’in

Devlet-i hüsnünde ey şeh n’için âbâdân degil

28
1 Ser-nâme-i mahabbeti cânâna yazmışam
Hasret risâlesin varak-ı câna yazmışam

2 Nâlişlerini derd ile bî-çâre bülbülün

Bâd-ı sabâ eliyle gülistâna yazmışam

3 Zülfün hikâyesini gönülde misâl edip

Gam kıssasını levh-i perîşâna yazmışam

4 Resm etmişem gözümde hayâlini gûyiyâ

10
 Nakş-ı nigârı sâğar-ı mercâna yazmışam

5 Tâb-ı ruhuñla sûzını yazarken Ahmed’in

Şevkinden odlara düşüben yana yazmışam

29
1 Yüzünü görmeyicek şöyle derd-nâk olurum
Ki gamdan ölmedigümi anıp helâk olurum

2 Ben onu görmedigim gün firâka döyimeyip

Varıp yüzün görenin ayagına hâk olurum

3 Gönül marîzine şol denli hoşça geldi gamın

Ki gayrı nesne yedirmege vehm-nâk olurum

4 Dedim gözüme ne çok yundun aglayıp dedi kim

Hayâli mushafını okumaga pâk olurum

5 Bu gün ki hasta vü zârım esirge ben kulunu

Ki erte derd ü gamın hasretiyle hâk olurum

6 Cemî’ derde benim topragım kefâret ola

Ne dem ki lâ’l-i lebin hasretiyle hâk olurum

7 Açıp yakasını gösterse boynun Ahmed’e âh

Ben ana gül gibi reşk ile câme-çâk olurum

30
1 Hecrin ile çok zamândur kim dil-efgâr olmuşum
Mihnet ile âşinâ vü derd ile yâr olmuşum

2 Zülfünün bendinde gönlüm bulmadı bir dem güşâd

Bunca bin derd ü gama kandan giriftâr olmuşam

3 Aşk meydânı içinde oynayalı başımı

Derd-i serden kurtulup gâyet sebük-bâr olmuşum

4 Gerçi hecrin çengine düşelden işümdür figân

Ney gibi aşkında bir dem sanma bîzâr olmuşum

5 Pertev-i nûr-ı tecellîden ko yansın cân ü dil

Var Ahmed ben bu gün müştâk-ı dîdâr olmuşum

31
1 Cân neler çektigini cânân bilir mi bilmezem
Bendesinin hâlini sultân bilir mi bilmezem

2 Her gece sevdâ-yi zülfüyle perişân-hâl olup

Olduğum reyhânına hayrân bilir mi bilmezem

11
3 Ûd gibi inlesem feryâdım işitir veli
Ben ne için ettigim efgân bilir mi bilmezem

4 Hırmenini ömrümün ol yâr-ı gendüm-gûn aceb

Nice yakar âteş-i hicrân bilir mi bilmezem

5 Aşkımı terk eyledi Ahmed der imiş ol habîb

Câna müşkil geldigin buhrân bilir mi bilmezem

32
1 Göreliden beri ol gonca-dehânı severim
Saklayıp aşkını sînemde nihânî severim

2 Nice bir kaşı gibi sözümü kec kılam edâ

Dogru söz bu ki ben ol gonca-dehânı severim

3 Kaddine karşı gözüm nicesi yaş dökmeye kim

Demiş ol serv-i revân âb-ı revânı severim

4 Sînemi gamzesi tîrine nişân eyledigim

Bu ki cânım ile ol kaşı kemânı severim

5 Ahmed’im kim komazam aşkını ölünceye dek

Ne kadar pîr isem ol tâze cûvânı severim

33
1 Eyâ perî nicesin hoş musun safâca mısın
Gel e beri nicesin hoş musun safâca mısın

2 Şeker dudaklı kamer yüzlü serv boyluların

Semen-beri nicesin hoş musun safâca mısın

3 Bahâr-ı hüsn ü bihâda belâlı bülbülünün

Gül-i teri nicesin hoş musun safâca mısın

4 Bizimle bir nefes insânlık eyle soruşalım

Gel ey peri nicesin hoş musun safâca mısın

5 Sefer kılıp gelir Ahmed ki diye şehrimizin

Güzelleri nicesin hoş musun safâca mısın

34
1 Ey fitnesi çok kavli yalan yandım elinden
Bir nâz ile bin gönül alan yandım elinden

2 Sen şem gibi gayr ile meclisde gülersin

Ben akıtırım yaş ile kan yandım elinden

3 Ney gibi delindi cigerim aşkın elinden

Her dem ederim âh ü figân yandım elinden
12
4 Yandı dü cihân âteş-i âhımla ve lîkin
Ben senin eyâ şâh-ı cihân yandım elinden

5 Şol sundugun âteş midir ey sâki bana kim

Sen aldın ele câm hemân yandım elinden

6 Her hâr ile sen sohbet edersin dün ü gün ben

Derdin ederim münis-i cân yandım elinden

7 Ahmed çeke cevrini ve lûtfun göre agyâr

Ey şefkati az şâh-ı cihân yandım elinden

35
1 Gamzesi rahm ide dir budur sebeb feryâddan
Görüñüz dîvâneyi kim mey umar cellâddan

2 Döndü yaşım Kâ’be yolundan kapına Dicle-veş

Dôstum ma’zûr tut yanlış döner Bagdâddan

3 Bu ne ad yavuzlugudur terk-i cân etmez demiş

Er olana hod ölüm yigdir yaramaz addan

4 Serv-i kaddin hasretinden ölicek tâbûtumu

Eylerim şâhım vassıyet k’edeler şimşâddan

5 Çehremizde husrevâ lâ’lin hevâsı eglenir

Kıssa-i Şîrîn okunur safha-i Ferhâddan

6 Âh kıldıgımca örter âteşim ruhsârını

Şem’i Ahmed lâ-cerem pinhân ederler bâddan

7 Göre tercîh ede deyu şi’rimi sâhib-nazar

Nîk nazm edemezem şerm eyleyü üstâddan

36
1 Nâlemi zemzeme-i murg-ı seherden sorasın
Derd-mend oldugumu hasta cigerden sorasın

2 Gussamın kıssaların yazar iken âhımdan

Hâmeler yandıgını nâme-i terden sorasın

3 Şevkini ruhlarının şem-i kamerden bilüben

Zevkini leblerinin şehd ü şekerden sorasın

4 Kîse-i ömrü tehî ettigimi yolunda

Olıcak hâk beden kâse-i serden sorasın

5 Hak olduguma inanmaz isen bâd-ı sabâ

Ayagı tozuyla geldi seferden sorasın
13
6 Gözlerim yaşı gibi dil-bere ey peyk-i nesîm
Ne için saldı beni ayn-ı nazardan sorasın

7 Vâdî-i hecrde Ahmed kulun üftâde garib

Cevrler çekdigini devr-i kamerden sorasın

37
1 Berg-i benefşe sâye-bân olmuş kızıl güllerine
Gül-zâr-ı cennet bülbülü tahsîn eder dillerine

2 Nâz ile çekmiş fitneyi sürme deyü ellerine

Yakmış kanın âşıkların hınnâ deyü ellerine

3 Hüsnün gülü açıldı hep dermekden eksilmez aceb

Ne hâssasiyet komuş Çalab gör cennetin güllerine

4 Ol Yûsuf-ı gül-pîrehen toz etmemege dâmenin

Şişeyle gül suyun saçar yaşlı gözüm yollarına

5 Çok cevr edersin Ahmed’e k’ilden ile düşe gide

Yazık degil mi güc ede sultân olan kullarına

38
1 Kemend-i zülfüne yârın giriftâr olmasın kimse
Benim şûrîde bahtımdan siyeh-kâr olmasın kimse

2 Beni sögüt gibi başdan ayaga hançere sancar

Hey ol serv-i hevâ-bahşa hevâ-dar olmasın kimse

3 Senin bâzâr-ı aşkında eder dellâl-ı cân feryâd

Metâ-ı akl kâsiddir harîdâr olmasın kimse

4 Yüzün gül-zârı şevkından yine mest oldu bülbüller

Bahâr ü mevsim-i güldür ko hûş-yâr olmasın kimse

5 Görelden Ahmed’in halin dilegim Hakdan oldur kin

Diyâr-ı yârı terk etmekde nâ-çâr olmasın kimse

39
1 Nice bir nâz ögretirsin gamze-i gammâzına
Nâz ile yaktın bizi had yok mu âhır nâzına

2 Nâlesinde incinip dûr etme zülfünden dili

Cânlar avlarsın ceres takmaz mısın şeh-bâzına

3 Sana sinem sırrını fâş etti eşkim lâ-cerem

Hıl’at-i lâ’lin geyürdün her dem ol gammâzına

4 El-emânet açma dil-dârın leb-i râzın dile

14
 Âkıl iseñ eyleme mecnûn mahrem râzına

5 Sidre kaddinde uçarsın dilberin ey murg-ı dil

Müntehâ pervâz edersin âferin pervâzına

6 Depret ey sâki elin kim lâ’l yagsın bezmine

Tutma ey mutrib dilin kim sûz versin sâzına

7 Derd-i dil mey-hânesinde nakd-i cân olur telef

Hey demezsen Ahmed’â şol çeşm-i şâhid-bâzına

40
1 Ebr aglamazdı dîde-i hûn-bârım olmasa
Gülmezdi gül bahâr-ı ruh-ı yârım olmasa

2 Mâ’şûkun alnı tâkına irmezdi düzd-i dil

Ger nerdibân-ı kâkül-i dil-dârım olmasa

3 Almazdı adım agzına ol matla’ı cemâl

Mecmû’asında mahlâs-ı eş’ârım olmasa

4 Dedim ki gül çekip yakasın eylemezdi çâk

Bülbül dilinde nagme-i güftârım olmasa

5 Dedi ederdi Ahmed’i ef’i saçım helâk

Tiryâk-i hande-i leb-i dür-bârım olmasa

41
1 Zülfünde ruhları aceb anun ne mâh ki
Kim bir gecede bakana göründü mâh iki

2 Çeşmim kaşına secde kılar dil yanagına

Bir din içinde n’için ola kıble-gâh iki

3 Virâne kıldı gönlümü şevkin ile gamın

Olur harâb ol il kim ola pâdişâh iki

4 Yolunda cân verip seni sevdim demiş gönül

İki kez öldür anı ki etti günâh iki

5 Ahmed ne arz ede sana hâlin ki müdde’i

Yanında eksik olmadı geh bir ü gâh iki

42
1 Köyinür mihr ü mehin hırmeni söyletme beni
Tutuşur subh-gehin revzeni söyletme beni

2 Ben kül oldum sözüm od oldu yakar irdügini

Kerem et sana gerekse seni söyletme beni

15
3 Severem didigüm içün eridim şem’ gibi
Dilim odlara yakıpdur beni söyletme beni

4 Sakın ey dost sakın dûd-ı dilimden kararır

Hüsnünün hil’atinin dâmeni söyletme beni

5 N’ola âhen-dil isen Ahmed’in âhından usan

K’eridir sırça gibi âheni söyletme beni

43
1 Bu gün bir serv-kad gördüm urunmuş bir külâh egri
Eliyle oynayıp zülfün eder geh dogru gâh egri

2 Nigâr egri bakan gözden cemâlin gizler ey zâhid

Sen ol didârı görmezsin çün edersin nigâh egri

3 Rakîbi hasbeten lillâh edinme hüsnüne mahrem

Ma’âzallâh ki yaraşmaz nedîm-i pâdişâh egri

4 Dedim kaddin dil ü dini müselmânlar gibi dogru

Hat-ı tersâ gibi n’içindir ol zülf-i dü-tâh egri

5 Dedi kadd-i bülendimde anunçün egridir zülfüm

Ki meyl ettikçe bâlâya olur dûd-ı siyâh egri

6 Beli bâr-ı mezâlimden bükülmüş anun içindir

Şehâ divân-ı hüsnünde kaşın bî-iştibâh egri

7 Kadeh tut lâle vâr Ahmed ki bu dem yâd-ı bezminle

Düzer nâzik kabâsın gül giyer gonca külâh egri

44
I
1 Gül yüzünde göreli zülf-i senem-sây gönül
Kuru sevdâda yeler bî-ser ü pây gönül
2 Demedim mi sana dilaşma ana hay gönül
Vay gönül vay bu gönül vay gönül ey vay gönül

II
1 Çîn-i zülfünden umar nâfe-i hoş-bûy murâd
Bu hevâ yoluna yıllarla yeler niteki bâd
2 Ol dahi sencileyin etmedi ben hastayı yâd
Vay gönül vay bu gönül vay gönül ey vay gönül

III
1 Bizi hâk etti hevâ yoluna sevdâ nidelim
Pây-mâl eyledi bu zülf-i semen-sâ nidelim
2 Kul edinmezdi güzeller bizi illâ nidelim
Vay gönül vay bu gönül vay gönül ey vay gönül

16
 VI
1 Felegin nûş ederim nîşini sâgarlar ile
Dogradı hâr-ı cefâ bagrımı hançerler ile
2 Baş koşam demez idim ben dahi dil-berler
Vay gönül vay bu gönül vay gönül ey vay gönül

V
1 Yarım itten çok uyar ardına agyar dirig
Bize yâr olmadı ol şûh-ı sitem-kâr dirig
2 Kıldı bir dil-ber-i her-câyiyi dil-dâr dirig
Vay gönül vay bu gönül vay gönül ey vay gönül

VI
1 Ben demezdim ki hevâ yoluna ser-bâz gelem
Ney-i aşkınla gamın çengine dem-sâz gelem
2 Derdim aşk kopuzun uşadam vâz gelem
Vay gönül vay bu gönül vay gönül ey vay gönül

VII
1 Dil dilerken yüzünün vaslını cândan dahi yig
Bir demin görür iken iki cihândan dahi yig
2 Aktı bir serve dahi âb-ı revândan dahi yig
Vay gönül vay bu gönül vay gönül ey vay gönül

VIII
1 Dest-i kûtâhıma baş egmedin ey serv-i dırâz
K’ola şekker lebine tûti-i dil mahrem-i râz
2 Vâz geldim ben eger gelse bu gönül dahi vâz
Vay gönül vay bu gönül vay gönül ey vay gönül

IX
1 Ahmed’im kim okunur namım ile nâme-i aşk
Germdir sözlerimin sûziyle hengâme-i aşk
2 Dil elinden biçiliptir boyuma câme-i aşk
Vay gönül vay bu gönül vay gönül ey vay gönül

17