BAHAN SERMON RESORT IMMANUEL HUTAGURGUR

JAMITA TU MINGU ROGATE 14 MEI 2023

PILIPPI 4:1-7

MARTANGIANG MARDONGAN MAULIATE

Patujolo

Surat Pilippi ima surat na sinurathon Apostel Paulus, na tinongos ni si Paulus dohot si Timoteus
mandapothon huria di Pilippi. Di tongos Apostel Paulus ma i sian Roma, ditingki di hurungan dope ibana.
Dung dipiliit Debata si Paulus gabe parbarita na uli tung marragam do angka parungkilan na niadopanna.
Godang angka parsorion na ro ibana, isarana pola sampe tarhurung ibana, dilele, dohot angka na asing ditaon
ibana holan laho patulushon ulaon marbarita na uli. Nang pe dipenjara ibana alai anggo barita nauli ni Jesus i
ndang na terpenjara (mansohot) alai ingkon rarat do. Huria Pilippi i ma sada huria na tung dihaholongi
Apostel Paulus ala burju do huria Pilippi mangalehon dirina tu harajaon ni Debata, songoni nang mamelehon
na adong di ibana laho tu panghobasion ni si Paulus (2 Korint 8:1-5). Alani ido disosoi Apostel Paulus huria
Pilippi i laho pasadahon haporseaon nasida di bagasan Jesus Kristus. Ala sai adong do sian nasida ndang
saurdot manang ndang saroha sapingkiran di pangulaonnasida, ima Sintikhe dohot si Euodia. Gabe ndang
saurdot be angka panghobasi di huria i ala jumpang parsalisian. Asa turpukon ma mangapoi nasida asa
tontong marsihohot dibagasan Tuhani.

Hatorangan ni Turpuk

1. Soso marsihohot di bagasan Tuhan i (ayat 1-3).

Tung holong do roha ni Apostel Paulus tu huria na adong di Pilippi. Diondihon apostel i do huria Pilippi di
tangiangna. Na marpardomuan tu holong ni roha na pinasahat ni Apostel di ayat 1 i, i ma: donganku, na
hinaholongan, na hinasiholan, halasan ni rohangku, tumpalhu, angka haholongan . Songoni ma balga roha ni
Apostel tu huria na niantoanna marhite suratna on jala mangelek do rohana asa olo toguon tu na denggan,
ima asa “marsihohot hamu di bagasan Tuhan i”, marhaporseaon dohot marpangulaon di tonga ni huria i. Ima
elekelek ni Apostel Paulus asa marsada ni roha nasida, ai tung mansai ringkot do marsada angka na porseai
songon siihuthon Kristus. Alani ido ingkon do marsiurupan na porsea i laho padimundimun dohot patureture
hasadaon angka siihuthon Jesus i. Tarbotik tu Apostel Paulus ima na so sada roha ni si Euodia dohot Sintike
tubu parsalisian. Ndang saurdot mangula ulaon ni Tuhan i, alani ima naeng nian nasida “saroha jala
sapingkiran” (2:2). Dipangidohon si Paulus nasida asa marsada, unang gabe sibonsiri i/perpecahan/hasesega
di tonga ni huria i. Alani i do mansai gomos dielek Apostel Paulus asa marsada roha nasida di bagasan
Tuhan i. Jala boi denggan huria i mardalan di bagasan haporseaon maradophon Jesus Kristus di tonga ni
panosak angka parpoda haliluon. Ai molo soadong be parsalisian/parbadaan di tongatonga ni huria i boi do
huria i marlas ni roha di bagasan Tuhan i. Di ondolhon Apostel i do mandok tu nasida asa marlas ni roha di
tonga ni situasi na songon dia pei na boi mangela haporseaon ni nasida maradophon Kristus i. Hinorhon ni na
masa i ma umbahen na diapoi Apostel Paulus nasida asa mardosniroha di bagasan Tuhan i. Jala
dipangapoionna i, dielek apostel i do si Sinsigus, sahalak na bontor (teman yang setia) rap dohot si Klemens
dongan ni apostel i, songon i nang angka dongan saulaon ni apostel i na deba nari asa mangurupi nasida
nadua. Disosoi apostel i do angka donganna asa mangurupi si Euodia dohot si Sintike. Tontu parsuruon ni
apostel i di na dipangido ibana asa diurupi nasida, asa mardame do nasida nadua, asa unang marsalisi, asa
unang tu bagasna parsalisian ni nasida nadua. Anggiat boi rap sauduran muse ruas ni huria i, lumobi ma di
nasida nadua. I ma na gabe sintuhu ni hataridaan ni na marsada ni roha di bagasan Tuhan i. Ai tung arga
situtu do hasadaan ni roha di bagasan huria i. Memang tung na maol do patupahon hasadaon ni roha di
angka parpunguan, songon i do sasintongna nang di bagasan huria. Na mambahen i asa maol ala tutu ndang
sarupa sude parrohaon ni jolma i; asing halak, asing muse do nang roha nang parangena. Ala ni angka roha
nang pingkiran na marasing i do na olo mambahen tubu angka parsilisian, lumobi ma di tonga ni huria i.
Alani ni dang boi mangasahon gogo/pikkiran alai tongtong mangasahon Tuhani. Ai molo Debata do na
manosoi, tontu didongani Tondi na sian Debata i do hita mangula na denggan.

2. Marlas ni roha di bagasan Tuhan i (ayat 4-5).

Taringot hata marlas ni roha tontu sahali i do na tapangidohon di bagasan parngoluanta siganup ari apalagi
molo dapotta aha naung tahirim di bagasan rohanta. Molo nunga ro las ni roha ala naung dapot aha naung
tahirim, tontu gabe mago do arsak na adong di bagasan rohanta i. Suang songon i do na pinasahat Apostel
Paulus di bagasan ayat on tarlumobi di ayat 4 on. Di dok Paulus do tu angka halak na adong di Filipi naung
gabe mangihuthon Kristus tarlumobi tu angka dongan sapanghobasionna asa marlas ni roha di bagasan
Tuhan i. Tung togu do dipasahat apostel i do pandohanna i, pola sampe didok: "Huulahi ma mandok: Marlas
ni roha ma hamu." I do tutu, marlas ni roha do jambar ni halak na porsea. Marlas ni roha na nidokna dison,
ndada na mandok na so adong parsorion molo porsea tu Kristus, alai na mandok: atik pe masa parsorion i,
urupanNa do hita, laos marhite pangurupionNa do mambahen las rohanta jala las ni roha i tontu di bagasan
Tuhan i do. Sude do halak mangharingkothon asa marlas ni roha, alai aha do na gabe hataridaanna? Ragam
pamingkirionta molo taringot tu na marlas ni roha. Alai marhite turpuk on ingkon marlas ni roha do hita di
bagasan Tuhan i, ndada sian na marhite na adong di pingkiranta. Molo tolap do hita manghangoluhon asa
marlas ni roha di bagasan Tuhan i laos marhite i do boi hita pabotohon habasaron na sian Tuhan i. Jala di
bagasan las ni roha i do dalanta laho pabotohon na donok do Tuhan i. Ra aha na adong di portibi on tontu boi
do mangalehon las ni roha, alai las ni roha na di dok ni apostel Paulus di bagasan ayat on i ma marlas ni roha
di bagasan Tuhan i. Boasa marlas ni roha di bagasan Tuhan i? Alana Tuhan i do mual ni pasupasu tu angka
na manghaporsea i Ibana alani do haroroan ni las ni roha na tongtong holan sian Tuhan i do. Ndang holan las
ni roha na di dok apostel Paulus di bagasan turpuk on alai dohot asa dipabotohon habasaron tu saluhut halak.
Pandohan Habasaron i ma burju, tobok ni roha, rade tumangihon hataNa. Ala ni i, molo tahangoluhon do na
marlas ni roha hita di bagasan Tuhan i, hombar tu turpuk ni Jamita on, ingkon saurdot do i dohot parsuruon,
" Unang ma holan na so alai borhat mangula angka na denggan.

3. Unang holsohon hamu agia aha, pasahat ma tu Debata marhite tangiang (ayat 6-7).

Tutu, sai olo do ro holso (kekhawatiran) di ngolu ni jolma, jala hinaholso i dihabiari jolma do. Nda tung
adong jolma na lomo rohana sai holsoan. Disosoi Apostel Paulus do asa nasa holso i dipasahat ma tu Debata
marhite tangiang dohot elekelek mardongan mauliate. Boi do tarimangi jala tahangoluhon, molo ro holso i,
manigor martangiang ma hita, mangelek tu Tuhan i, asa boi hilalaonta dame di panghilalaanta jala
lumumbang nang pangikiranta. Molo songon i do panghilalaanta uju martangiang hita, disi ma masa na
nidok ni Apostel Paulus di turpuk on, i ma: "Ramotan ni Debata do ateate dohot pingkiranta di bagasan
Kritus Jesus i." Dame ni Debata ima sonang ni roha nampuna ni Debata. Ala holan di Ibana do adong
hasonangan na polin manang na tutu, ido umbahen didok “sumurung” (lebih tinggi) sian saluhut roha. Jala
holan sian Ibana do boi ro i ndang sian jolma. Marhitehon i lam tu pos na ma rohanta, sai lehonon ni Debata
do dalan di angka na taholsohon. Ala ni i unang ma olo hita dirajai angka holso.

Panimpuli

1. Molo masa parsalisian dang jumpang lasniroha. Alani ringkot marsadaniroha mangeahi ngolu na
dumenggan na hinalomohon ni Tuhani. Unang marpangunsadean tu diri sandiri alai marsihohot tu Tuhani
ma. Molo masa angka paralisian di nahumaliang hita ulaonta ima pauliulihon/patureturehon asa tontong
mardame. ai denggan jala uli angka namangolu dibagasan sada niroha, boi tabandngkon tu Buku Endenta
nomor 122.

2. Molo tung pe angka aha na masa di bagasan parngoluonta, asa tongtong ma hita marlas ni roha di

bagasan Tuhan i, songon apostel Paulus di bagasan turpuk. Tung pe di

bagasan hurungan ibana tong do dipakke ibana partikkian do manonahon angka na

denggan tu angka donganna, suang songoni pe hita asa tongtong hita pasahathon angka na denggan tu

angka donganta tung aha pe na masa di bagasan parngoluonta on. Jala Molo tung pe ro angka holso

manang haporsuhon di bagasan parngoluonta on, unang ma tapangasahon dirinta alai tapangasahon ma

Debata marhite pasahathon sude angka holso dohot haporsuhonta tu Tuhan i marhite tangiang dohot
elekelek.Di bagasan Tuhan i ma talului jala tahangoluhon las ni rohanta. Tahangoluhon ma hasisingkop ni
las ni rohanta di bagasan Tuhan i, i ma: marhite holongNa dibagasan Jesus Kristus.

3. Goar ni Minggunta i ma, Minggu Rogate, lapatanna martangiang. Dijou do hita asa gabe sipartangiang.
Boasa? Alana martangiang i do hosa ni haporseaonta, ido umbahen didok Marthin Luther doa sebagai nafas
kehidupan orang percaya. Ala ni i tapasahat ma angka na taholsohon tu Ibana marhite tangiang, ai guru di
Ibana do luhutna. Jala unang langgushon tangiang.