ACARA IBADAH & BAHAN SERMON RESORT

HKBP RESORT IMMANUEL – DUMAI

Jumat, 06 Oktober 2023, Pkl. 10.30 WIB
01) Marende BE. No. 728 : 1, 5 “Husuru ho”
 Husuru ho lao sumeahon diri; radot ma ho di panjouonmi. Nang dileai jala diarsahi,
Husuru ho gabe naposongki. (Au sinuruni Ama i, manuru ho).
 Husuru ho gabe sijala jolma, palua angka na tarihot i. Arahon ma asa tu hangoluan,
Husuru ho ihuthon dalanKi. (Au sinuruni Ama i, manuru ho).
02) Renungan Harian : Lukas 10 : 3 (sian Almanak HKBP)
03) Marende BE. No. 517 : 1 – “Di dia angka jolma” (P. Pelean)
 Didia angka jolma, dijouhon Tuhan i. Na olo suruonku, torop na mago i?
Torop do ina Batak nang na marbaju i, nang ama, dolidoli, na mansai dao pe.
 Tardidi do nasida, ringgas marminggu be. Marrupa hadaulaton nasida sasude. Alai tung
dao rohana, ndang sae dosana i. Tuhanna ndang digolom nang panghophopNa i.
 Dison do au, o Tuhan, sai suru dohot au. Manjou angka jolma na tongtong mandaodao.
Hulehon ma gogongku nang tingkingki di Ho. Paima mulak dongan ndang olo au be so.
04) Tangiang Panutup: Ale Amanami… du.
MINGGU XVIII DUNG TRINITATIS, Tg, 08 Okt’ 2023, Ev. Jesaya 5 : 1 - 7
Topik: “DIHALOMOHON JAHOWA DO UHUM DOHOT HATIGORAN”
I. Patujolo
Turpuk Jesaya bindu 5 on, ima perumpamaan: Sada ende taringot tu Israel do 'porlak
anggur’ ni Debata Jahowa. Di Padan Naimbaru hea do didok Jesus: “Ahu do hau porlak
anggur na tutu, Damang do tukang porlak i” (Joh. 15:1, 5). Naeng idaonta disi paboa ringkot
do laho mangantusi perumpamaan asa mura diboto angka na porsea i. Dijou Debata
panurirang Jesaya manurirangi di taon 740 SM, tongon di hamamate ni raja Juda margoar
Uzia (6:1). Jala boi dohonan sahombar ma tu panurirangon ni si Amos dohot Hosea, atik pe
na dua panurirang on mamungka di taon 701 SM (Am. 1:1; Hos. 1:1). Ia Panurirang Jesaya
tarbarita do hapanurirangonna, ima sahalak panurirang na barani situtu manghatahon hata
sihatahononna. Ndada mabiar ibana mangadopi manang ise termasuk angka raja, ndada
marnida bohi, mandok hata na tullom nang pe dihasogohon halak ibana, ndada mangalului
hasangapon ibana, ala dietong sian Debata do hapanurirangonna i.
II. Hatorangan
Ay. 1-2, Jamita on dipasahat panurirang Jesaya marrumanghon ende, laho
manggombarhon holong ni roha ni Debata di bangso Israel. Digoari do nasida “hasianhu”
(“kekasihku”), na dipatudos tu porlak anggur di punsu ni sada dolok na napu (“bukit yang
subur”). Tung dihaholongi tukang porlak i do, pola sampe loja mangurus manang
patureturehon, marhite: na mamangkuri tano i asa gabur jala napu; dungi dijomputi angka
batu sian porlak i jala di tanom ma lopok na denggan (‘bibit pilihan/ unggulan’), dipauli
sada tungkup (“menara”) laho manjaga, dungi di hali sada pangilangan na manggiling
(memeras) parbue ni hau anggur i, asa haruar asa parbue ni hau anggur na tabo (“ na
tonggi=buah anggur yang baik”). Hape, tarhirim nampuna porlak i, ai adong ma na so
marparbue jala molo pe tung adong parbuena, digiliing ma (diperas) buahna i, hape di dai
ma, ndang na tonggi dai na, alai dai na asom do diparbuehon.
hlm. - 1 - file: “BANSER” di bulan Okt’ 2023 HKBP Resort Immanuel - Dumai
 Ay. 3-4, ndang pintor muruk nampuna porlak i ala anggur na asom i, alai disungkun
jolo pangisi ni Jerusalem dohot Juda, asa halak i manguhum porlak angggurna i nian, jala
disungkun dope aha sipatupaon tu porlak anggur i, asa anggur na tonggi diparbuehon
porlak i. Alai ndang adong alusna manang reaksi ni na sinungkunna i (sip sude! tanpa
respon).
Ay. 5-6, ala so adong alus i, gabe dialus sandiri nampuna anggur i ma didok ibana: (1)
Umpatonku ma handang ni porlak i, asa suda digagati pinahan anggurna i. (2) Lohaonku
manang luntahonku ma parikna, asa diluntakluntak angka pinahan liar. (3) Bahenonku
porlak i gabe halongonan, asa unang dirantingi jala asa tubu suga dohot sihupi. (4)
Dokhononku ma tu angka ombun, asa unang mangalehon udan be tu porlak i, asa mahiang
porlak i.
Ay. 7, sada ende ni parporlak i, ima: “Alai porlak anggur ni Jahowa Zebaot, i ma
pinompar ni Israel dohot angka baoa sian Juda, suansuanan hasudungan”. Didok : (1) Sai
dipaimaima Jahowa uhum hasintongan, hape pangarupaon (kelaliman) na ro; (2)
Dipaimaima Ibana hatigoran (kebenaran), hape anggukangguk do na dipatubegehon.

III. Sipahusorhusoron
1) Topik Minggu: “DIHALOMOHON JAHOWA DO UHUM DOHOT HATIGORAN” (Tuhan
Menghendaki Keadilan Dan Kebenaran). Sai dipaima jala dihirim Debata do sian hita
parbue na tonggi, paima so di paro IBANA “uhum” tu hita. Siahusorhusoronta ima, paboa
hita do “Israel na imbaru i”, angka na porsea di Debata. Hita do nuaeng porlak anggur ni
Debata i. Tarpaima dope Debata di ruas ni huria i asa: mananda Debata dohot di
huasoNa. Nunga jongjong HKBP marumur 162 taon mamungka: 07 Okt’ 1861 - 07 Okt’
2023, ima na binoan ni angka missionaris Jerman, gabe diajari halak Batak, dipatureture
laho mananda holong ni Debata. Sungkunsungkun ma on jala evaluasi di hita, boha
nunga songon dia parbuenta di adopan ni Debata. Sotung gabe songon pandohan na
mandok: maksud hati memeluk gunung apa daya tangan tak sampai, maksud hati
buahnya manis, ternyata buahnya asam. Oh…, kota Dumai-ku, apakah hasil buahmu?
Oh…, Gereja HKBP Resort Immanuel-Dumai-ku, ke manakah buahmu? Dipauliuli Debata
do hita asa marhasongan, dilehon Debata do pasupasuNa di ngolunta marhite “gabe na
ni ula jala sinur na pinahan”, hape aha ma na laho balos ni i mulak tu Debata? (Begitu
banyak cara dan proses yang dibuat Tuhan untuk kita dalam merenungkan, mentaati
dan melakukan firmanNya, tetapi apa hendak di kata, buah yang asam yang didapat) .
Naeng ma angka dongan tapadenggan parangenta be dohot pangalahonta be
maradophon Debata, asa unang hona uhum hita, taingot ma na nidok ni si Paulus:
“Tanggali hamu ma jolma na buruk i…, tasolukhon jolma na imbaru” (bnd. Ep. 4 : 22).
2) Marparbuehon parbue na denggan. Molo tarenunghon perdalanan ni ngolunta satongkin
sian tingki na metmet, na dipatureture natorasta hita, ditogutogu jala dipasingkolahon
sian SD, SMP, SMA dohot Perguruan Tinggi, diparbisuhi Debata do hita asa sahat
dibagasan hadengganon. Dianjuanju Debata do hita di pangalahonta nang pe jotjot
mangalaosi angka patikNa hita, dipasupasu Debata do parsaripeonta asa sopar jala
marpinompari (bnd. 1 Musa 1 : 28), hape olo jotjot hita ndang perduli disi, gabe tarhirim
Debata. Songon sahalak natoras na pabalgabalgahon ianakhonna, diajari sian na menek,
hlm. - 2 - file: “BANSER” di bulan Okt’ 2023 HKBP Resort Immanuel - Dumai
 alai dung balga/ magodang gabe dialo natorasna, tarhirim manang kecewa ma natorasna
i di pangalaho ni ianakhonna i. Jumpang ma songon pandohan ni halak Batak mandok:
“Hurimpu parhunihan hape pargadongan, hurimpu parsaulian hape hamagoan” .
Tarhirim, tarhirim, tarhirim sude (sangat “kecewa penonton”). Antong, tarenunghon ma
pandok ni BE. 784 : 1-2, didok: Aha do naung hubahen Tuhan? Dia ma bahenonku
Tuhan? Bagas ma i taalusi jala tapahusorhusor di rohanta be.
3) Hona uhum do angka na so marparbuehon parbe na denggan. Tarrimas do Debata molo
ndang adong hamubaon ni angka na hinasianNa i. UmpatonNa, lohaonNa jala
luntahanNa ma molo ndang marparbue jala molo parbue na asom do. On ma sada
gombaran na mardalan do uhuman ni Debata tu halak na so olo be ditogihon mulak tu
Debata, na gabe hamatean si salelenglelengna nama jambarna. Tarbukti do i, bangso
Israel gabe madabu do muse tu habuangan/ ditaban do muse nasida ala ni sude
parulaonna na jahat i. Antong, andorang so lalu “rimas ni Debata”, “umpatumpat ni
Debata”, dohot “lohaloha nang luntakluntak ni Debata”, taparbuehon ma perbue na
tonggi i, na tabo jala ramos marhite na olo hita mangulahon hataNa (bnd. Joh. 15:17).
Bukan sekedar kwantitas (jumlah jemaat atau jumlah PARHALADO) tetapi bagaimana
kwalitasnya atau mutunya, i do na rumingkot di Tuhan i. Sipata, godang do tantangan
siadopanta laho patupahon i, alai taingot ma: “pasti Tuhan akan memampukan kita”
(bnd. Plp. 4 : 13). AMEN. (Pdt. Riwansi E. Nainggolan).
Minggu XIX Dung Trinitatis, Tanggal 15 Okt’ 2023, Ev. Mat. 22 : 1 - 14
Topik: “LAN DO NA JINOU ALAI OTIK DO NA TARPILLIT”
I. Patujolo
Molo tapaihut-ihut surat Injil mateus on ndada sahali on be Jesus mambaen
parumpamaan taringot “harajaon ni Debata”. Angka Parumpamaan taringot Harajaan ni
Debata ima perumpaan songon sada namora(Mat. 20:1-16), songon dakdanak (Mat. 18:1-
5), songon panabur boni (Mat. 13), Anak boru na sampulu (Mat. 25) dohot na asing na i
dope. Jala dang na holan taringot “harajaon ni Debata ” Jesus mambaen parumpamaon
dohot angka pangajarion na asing pe jotjot do Jesus mamangke parumpamaan. Di turpuk on
didok parumpamaan Harajaon ni Debata tarpatudos tu sada Raja mamestahon ianakhonna.

II. Hatorangan ni Turpuk

Sasintongna ulaon na marpesta pasti doi ulaon lasniroha jala manggohi lasniroha
nasida pasti adong do na ni ontang na nasida. Dison didok sahalak Raja do nampunasa
ulaon manang “suhut bolon”. Tontu boi tardok Raja ima halak na sangap, jala na ni
hormatan ni saluhut. Na pasti bolon do ulaon i, jala angka na ni undang na pe pasti do torop,
ro di angka sisolhotna, nang angka rekan pejabat. Songon ido somalna molo marpesta
angka uluan na sangap. Jala Ise na so la sroha molo sahat undangan i, apalagi muse
nampunsa ulaon i ima sahalak raja na marhasangapon. Alai mansai ironis do namasa
diturpuk on, dung sahat gokhon i. Nunga rade be sude angka na hombar tu ulaon i rodi
angka sipanganon laho menyambut angka undangan ni pesta i. Disuru Raja i ma manjou
naposona, molo dihalak batak songon parhobas ima angka parboru. Raja i nagabe suhut
disuru ma angka boruna(parhobas) laho manjou angka ontangna asa ro. Mandok nunga
siap jala nunga rade be ulaon pesta las ni roha i. Alai dang adong na ro nanggo sada. Molo di
hlm. - 3 - file: “BANSER” di bulan Okt’ 2023 HKBP Resort Immanuel - Dumai
hata halak hita Batak didok “Gokhon do sipaimaon , jou jou do sialuson”. Nunga tingkos
nabinaen ni Raja i songon hasuhuton di Pesta i. di Gokhon jala adong do muse panjouon I,
dang adong olo ro. Dungi diulai Raja ido muse marsuru naposona, didok “paboa hamu ma
tu angka naginokhonnan muna, nunga rade sipanganon,….nunga rade saluhut…. Lapatanna
Raja I ima hasuhuton di Pesta nunga tangkas paboahon haradeonna, haradeon
namanjanghon, manamue, dohot naringkot disipanganon nasida pe. Alai marsidalian do
nasida dibaen “tois niroha nasida, nasada laho tu hauma, nasada laho tu partigaa tigaan”.
Aha do huroa mambaen borat nasida ro tu Pesta? Alani toisna gabe marsidalian nasida.
Sasintongna parumpaan on laho mengencam halak Jahudi do hatihai. Songon halak Jahudi
naung saleleng on manghirim diharajaon ni Debata marhite hite mesias. Naeng didok Jesus:
nunga saut be Harajaon ni Debata I songon gokhon asa masuk tu harajaon ni Debata.
Gokhon I tu halak namanghirim saleleng on diharoroNa. Raja I nampuna Ulaon I ima Tuhan
Jesus, naro tu portibion laho “manjamu hita, narade manamue hita di perjamuan Pesta i.
Saonnari rodo GokhonNa jala Jou jouNa,alai dang adong naro, jala laos martois niroha
mambaen sidalianNa. Halak Jahudi naleleng on sai radot di Patik ni Tuhan I, alai laos do
adong do parulaonna, songon angka siboto surat naso porsea di harajaon ni binuan ni
Tuhan Jesus. Songon angka Namarsangap ni Israel naso olo manjanghon pangajarion ni
Tuhan I marhite angka panurirang songon sejarah dipadan narobi. Dirimpu rohani nasida
do Naposo nasinuru ni Raja I gabe alo nasida, gabe manggunturi nasida. dipusa nasida ma i.
Nangpe dang ro nanggo sada naung ginokhonna I, dang gabe mago buti Lasniroha ni
Raja i. pasti do adong kekecewaan molo adong sahalak namarulaon manggokhon alai dang
ro naginokhonnai. Alai didok Raja I “Nunga rade nian nahasea tu pesta I, alai dang tau
angka napinio”. Didok Jesus “dang tau”(tidak layak). Wajar do rajai mandok songon I, Ala
dang denggan respon ni angka na niundang I tu ibana. angka naso tarharaphon be, angka
pangalaho naso rade dijou, nagok sidalian I, dang tau I mandapot harajaon ni Debata I, dang
tau I manjalo inganan ni haluaon i. Nang soro angka naung ni gokhon nai, dang sumurut
lasnirohana nangpe adong kekecewaanna. Disuru do muse naposoNa tu angka dalan
balobung, asa diarahon angka saluhut najumpangna. Lapatanna manang ise naolo diarahon.
Nadidokna naung godang hape naung manghirim, tardok porsea naung gabe sasaran ni
haluaon I, dang gabe jaminan olo ro manopot Tuhan i.
Ido umbaen didok Raja i “manang ise jumpangmu”. Lapatanna rade do tangan ni
Jahowa manjou manang ise naolo ro tu Ibana. didok do “na jahat dohot nadenggan” ima
namanggohi Pesta i. dang sumurut Las ni roha ni nampunasa Ulaon i hape, ai torop do
manang ise naro tu Pesta i.
Halak naung jumpangan ni Jahowa, ima halak naung marlasniroha. Martua ma halak
najumpangan ni naposona, tarjou ibana, jala rade rohana jonok tu Debata. Pasti do gok
lasniroha ganup halak naung jumpangan I ro tu Pesta i. Alai adong sahalak tamue ni Raja
“naso marpahean pesta”. Tontu halak naro tu pesta nda ikhon denggan do paheanna
patuduhon haradeonna mangadopi pesta i. Merasa do ibana parsidohot marlasniroha
dipesta I, hape dirina pe dang diparrohahon. Marsipaula do ibana songon naung layak
manjalo lasniroha hape diboto Debata do rohana. nda haleaon do nabinaenna, manang
hailaon do nabinaenna disi molo so denggan paheanna. Ipe didok Jesus do “nabeha do
parmasuk mu tuson amang? Ai dang marpahean Pesta Ho? Nangpe sahalak Raja ibana,
hlm. - 4 - file: “BANSER” di bulan Okt’ 2023 HKBP Resort Immanuel - Dumai
nampuna ulaon I songon “hasuhuton” di Pesta I ditanda ibana do angka tamuena, jala
diparrohahon ibana do songon dia pangalahona, sikapna di Pesta i. ndang gabe sibuk ibana
sandiri ibana ala nampuna ulaon. Alai tangkas do Ibana mangulahon dohot mamareso
hinaringkot ni do ulaon i. Songon sahalak naso marpahean pesta I gabe ditali patna dohot
tanganna laos dibolonghon,masa ma angka anguk anguk…” Jesus do nampuna Harajaon I,
Di Ibana do hinsu ni Hangoluan i. Lapatanna molo ro hita tu Debata, ingkon ma dibagasan
hahormarton, dibagasan habadiaon.
III. Sipahusorhusoron
Di na tadok hita halak naung porsea ingkon ma nian olo hita mangoloi jou jou ni Tuhan
i. Marragam situtu di panjouon ni Tuhan I asa mardalan hita dihasintonganna. Tung unang
be marsidalian hita, masiboan alasanna, masiboan sahitna, dang boi hita manjua asal olo
hita rot u Tuhan I mangoloi HataNa jala mardalan tu lomo nirohaNa. Na mangihut Jesus do
panamue na burju di ngolunta. Lapatan ungkap jala rade do roha manamue di hita manang
sadihari pe ro hita tu Ibana. Dang Hea adong Sordak ni pintuNa,nangpe di Ibana nampuna
hinsu Hangoluan i. Alani I binsan mangolu hita, ro ma hita, ai rade dibaen Tuhantai jala na
pinagido nirohanta di ibana do, ibana do hangoluan, Ibana do haroroan ni pasu pasu.
Tangkas diboto Tuhan ido manang ise naro tu Pesta i. Halak Natarjou ipe naso ro mangalusi
joujouNa I, dang tau i dohot di HarajaonNa. Jala halak na so denggan marpangalaho,
nparsidohot, dang dapot Haluaon i. Holan Tuhan Jesus do berhak mamillit ise do na bongot
tu HarajaonNai. Sian tonga tonga ni natarjou I pe, diboto Debata ise natau sipillitonna “lan
do na jinou alai otik do na tarpillit”. Amen. (Diak. Riswana br. Simatupang)
Minggu XX Dung Trinitatis, Tgl, 22 Okt’ 2023, Ev. Jes. 45 : 1 - 7
Topik: “JAHOWA DO MUAL NI HALUAON” (Tuhan Sumber Keselamatan)
I. Patujolo
Panurirang Jesaya ima anak ni si Amos na jinou ni Debata gabe panurirang laho
pasahathon hata ni Debata tu bangso israel dung marujung ngolu ni Raja Uzia na
manggomgomi bangso israel. Buku Jesaya on dibaga gabe tolu bagian parjolo Proto Jesaya
(bindu 1 – 39), paduahon Deutro Jesaya, ( bindu 40 - 55 ), patoluhon Trito Jesaya, (bindu
56 - 66). Jala turpuk jamitaon masuk ma tu Deutro Jesaya ima na mamaritahon habuangan
bangso Israel. Habuangan na manghorhon biar ni roha. Mabiar do bangso Israel di sitaonon
nasida ala ni habuangan i na manghorhon parungkilon di parngoluon nasida, ndada holan
ngolu ni sasahalak alai dohot ngolu ni parbangsoon nasida, ndang holan hamatean ni
sasahalak alani habuangan i na dihabiari nasida, alai dohot do, hamatean ni parbangsoon.
Mansai mabiar do bangso i di hatiahai ala dijajah, dibuang, diasingkan, bahkan diperbudak
do nasida), Ido umbahen na mansai mabiar situtu nasida. Alai nang ndang gabe dipasombu
Debata bangsoNa dihabuangan di patuduhon Debata do apulapul marhite pamillitionna di
raja Kores (raja Persia) lao patupahon haluaon di Bangso Israel. Lapatanna nang pe
dihabuangan nasida tongtong do dipatuduhon Debata holong ni rohaNa tu bangsoNa i.
II. Hatorangan ni Turpuk
Ayat 1 Debata mamillit, mamiahi Raja Kores laho paluahon bangso Israel Raja Kores
ima sahalak raja non Juhudi na diurasi (diurapi) Jahowa. Debata mamiahi-melantik Kores
gabe sipalua tu halak Israel. Sada hasomalan do molo di Israel melantik sada raja ingkon
diulahon panurirangNa, taingot Raja Saul, Daud, Debata do na mengangkat Raja Kores laho
hlm. - 5 - file: “BANSER” di bulan Okt’ 2023 HKBP Resort Immanuel - Dumai
manggonopi bagabagaNa. Ditiop Debata do tanganna siamun papatuhon angka bangso
parbegu dijolona, Dilehon Debata do huasoNa mangalehon gogo dohot manungkoli si
Kores.Tarida ma panjouon ni Debata tu si Kores ndang mamereng bohi, latar belakang,
suku, bangso ni sasahalak laho patuduhon huasoNa. Misi ni Jahowa marhite na miniahanNa
si Kores ima laho paluahon bangso na pinillitNa i sian habuangan Babel. Raja Kores
marhuaso dung 40 taon ma lelengna bangso i di habuangan Babel. Huta Jerusalem nunga
hancur so adong be na tading na gabe boi inganan
Ayat 2-4, Debata rap mardalan dohot bangsoNa, Halak na pinillit ni Debata pasti
mampu mangulahon na nidokNa ala Debata do mandongani ibana huhut ndang mandao
sian ibana, songon si Kores na taida dison didongani Debata ibana mardalan dijolona.
Ganup ari do si Kores diramoti Jahowa manang aha pe na diulahonna sai mardongan huaso
ni Jahowa. Ndang alangalang Jahowa mandongani jala mamasumasu ganup pardalanan ni si
Kores pahornopon angka buntulbuntul, ropuhonNa angka pintu tombaga jala segaanNa
angka sordak bosi. Ndang adong nangga sada na boi mangalo ulaon ni Tuhan i. Digohi
Tuhan i do si Kores marhite hamoraon ima arta na dihaholomon dohot homitan angka na
tinabunihon angka raja-raja. Martamba ma arta si Kores sian hamonangan ni angka bangso-
bangso na ditaluhonona. Dipasupasu jala diramoti Tuhan do ibana marhite saluhut
pambahenan ni Debata. Denggan situtu do angka pasupasu na pinasahatNa tu hita angka
jolma on ima patauhon ai sian Ibana sambing do saluhutna i. Alai, na jumotjot taida di
partingkian on ai marhite hamoraon na jinalona i gabe lupa do jolma i ai Jahowa do na
manumpahi sasudena i.
Pandohan “Ala ni Jakob naposongKi dohot ala ni Israel na Hupillit i umbaen na Hujou
goarmu” asa ditanda si Kores do ia si Jakob ima sahalak naposoNa jala bangso Israel ima
bangso na pinillitNa. Ndang ditanda si Kores ia Debata na marsuru ibana ima Debata bangso
Israel. Ngolu ni si kores magodang di parugamaon na manomba ganaganaan, tung so
ditanda ibana do Debata na sasintongna. Tung pe songoni, ditanda Tuhan do ibana jala
dipangke do si Kores laho paluahon bangso Israel. Di jou jala dipillit do Kores paluahon
bangsoNa i. Asa panjouon tu ganup diri ni jolma adong do sialana, ala ni i ganup halak naeng
ma manungkun dirina be aha do tujuan ni panjouon na tu ibana sandiri asa sian ima taboto
jala taulahon ma hombar tu panjouon na tu ibana.
Ayat 5-7 Hasintongan na mandasor didok Ahu do Jahowa. Pandohan “Ahu do Jahowa,
lapatanna ndang adong be Debata dungkon ni Ahu”. Ndang adong debata di liat portibi on
na boi mambahen songon na binahen ni Debata Jahowa. Dipatandahon Ibana do diriNa asa
diboto halak Ibana i ma: jadi hatiuron dohot sitompa haholomon, sibahen hadameon dohot
sitompa hamagoan. Jotjot do Debata patudu hagogoonNa asa mananda halak di huasoNa
songon na masa tu si Firaun (bnd. 2 Musa 9: 14, 16, 8:6; 9: 26). Pandohan sitompa
hamagoan di ayat 7 ndang boi bahenon i sahira patokan na Debata do parohon hamagoan
alai patudu huaso i ni tanganNa nang pe so olo Ibana mambahen hamagoan tu jolma.
Debata sibahen hangoluan do alai gabe hamagoan do tu halak na so mangulahon lomo ni
rohaNa. Jolma i do mamboan ibana tu hamagoan ala so diihuthon lomo ni roha ni Debata.
Ala ni taihuthon ma Debata asa unang adong di rohanta Debata do na mambahen hamagoan
tu hita. Songon na dipanghilahon ni bangso i Marhuaso do Debata mambahen bangso na
gale i gabe asa margogo lao manaon haporsuhon na dipanghilalaho nasida dihabuangan i,
hlm. - 6 - file: “BANSER” di bulan Okt’ 2023 HKBP Resort Immanuel - Dumai
siala dipahot Debata do roha nasida, ai Debata sandiri do na paluahon. Paluahonna ma
bangsoi sian habuangan i. jala bahenonMa padan na Imbaru. Israel na mabiar hian gabe
sihabiaran. Jaminan do i dilehon tu nasida songon na didok di 2 Musa 14:14 “Jahowa do
Marporang humophop hamu asal hohom hamu.
III. Sipahusorhusoron
Ganup jolma boi do dipakke Debata lao pararathon Barita na uli Songon raja Kores na
dipillit Debata lao paluahon BangsoNa sian habuangan Babel. Nang pe sasintongna hurang
do panandaion ni raja i tu Debata. Alai Dipangke Debata do halak na so mananda Ibana gabe
ulaulaNa, ima na patuduhon otoritas penuh ni Debata tu angka na tinompaNa. Tarlumobi
ma hita naung tarjou gabe siihuthon Kristus disuru do hita mamaritahon Barita na Uli
marhite angka silehonlehon ni Debata tu hita tu angka jolma na dihumaliangta so pola
mamereng latar belakang nang kedudukanna. Songoni ma nang hita saluhutna naung
dipillit Debata lao pararathon barita na uli i, ingkon marsitutu ma nian hita lao mangulahon
ulaonta i di ngolun on. Nang pe godang angka hamaolon na ta adopi alai ingkon porsea do
hita na di patau jala di pargogi Debata do hita asa malua sian angka hamaolon i. songon
topik ni minggunta didok Jahowa do mual ni Haluaon (Tuhan sumber Keselamatan). Antong
ingkon porsea do hita na di palua Debata do sian angka hogogoton, haporsuhon di ngolunta
on. Songon bangso Israel naung dipalua Debata sian habungan i. Songoni do nang hita
saluhutna nungga be tajalo haluaon marhitehite Tuhan Jesus Kristus naung manobus
dosanta saluhutna. Amen. (CBiv. Friska Deprita br. Sianturi)
Minggu XXI Dung Trinitatis, Tgl, 29 Okt’ 2023, Ev. 1 Tes. 2 : 1 - 8
Topik: “MARHIRAS NI ROHA MANGHATAHON BARITA NA ULI MANGASAHON DEBATA”
Patujolo
Las do roha jala bangga molo lam torop angka ruas ni huria na olo mamelehon dirina
marhobas di Tuhan i. ambil bagian dalam pelayanan untuk melayani Tuhan. Alai dohot
tujuan manang motivasi na sintong, na denggan ma asa tongtong jumpang hiras ni roha
dohot semangat pelayanan laho manghatahon barita nauli molo pe tung jumpang ragam
angka hamaolon alai mangasahon Debata sai na tulus do saluhutna. Ima na taida dibagasan
turpuk on.
Adong 4 hal naeng putihanta sian 1 Tessalonik 2 : 1-8 na gabe barita las ni roha di hita
jala parsiajaran na arga di hita asa tongtong marhiras ni roha manghatahon barita nauli
mangasahon Tuhan i. Dia ma i?
1. Tujuan dohot motivasi mamaritahon barita nauli.
Diondolhon Apostel Paulus di turpuk on, tujuan dohot motivasina laho mamaritahon
barita nauli ndang laho mangalului sangap ni jolma jala ndang alani gogona, alai holan
pasangaphon Debata do. Ala Debata do na palumehon dohot margogoihon ibana
marhite na mangalehon hiras ni roha dohot habaranion manghatahon barita nauli
nang pe godang paraloan manang hamaolon alai tongtong satia jala unduk Rohana.
Naeng marsiajar hita sian Ap. Paulus, manulingkit rohanta, aha do tujuan dohot
motivasinta mamaritahon Hata ni Debata. Ndang laho mangalului hasangapon tu
dirinta alai laho pasangaphon Debata do (ayat 6). Molo salah tujuanta dohot
motivasinta mamaritahon barita nauli tontu salah do nang sude panghobasionta di
huria i. Motivasi dohot tujuan mamaritahon barita nauli pe ndang asa mambahen las
hlm. - 7 - file: “BANSER” di bulan Okt’ 2023 HKBP Resort Immanuel - Dumai
 roha ni torop jolma alai asa las roha ni Debata. Alani di sude panghobasionta dohot
ulaonta di Huria i tau halomoan ni roha ni Debata jala Debata ma na marsangap ndada
dirinta.
2. Di bagasan hatuluson dohot holong ni roha mamaritahon barita nauli.
Di ayat 5 tangkas didok:”Ndang dung hami marhata lemeslemes (bermulut manis),
ndang dung hami marbisukbisuk mambuat arta, Debata di sitindangi di si”. Angka na
marhata lemeslemes i ma na mambahen holan asa las roha ni jolma na umbegesa
sambing alai ndang las roha ni Debata. Molo marbarita nauli hita tangkas didok ndang
marhata lemeslemes, ndang marbisukbisuk mambuat arta ala diida Debata do roha
parbagasanta. Ingkon jujur, tulus rohanta manghatahon hata ni Debata, i ma laho
patolhashon hasintongan ni hataNa dohot asi ni roha nang holong ni rohaNa tu sude
jolma. Molo dijou Debata hita marhobas di huriaNa, ingkon tangkas tarsurat di bagasan
rohanta ndang laho mangalului arta manang pangomoan tujuanta so holan mamelehon
ngolunta gabe ulaula na metmet gabe hapataran ni asi ni roha dohot holongNa asa lam
marmulia Debata marhite ulaon dohot panghobasionta. Alani manat ma hita angka na
tarjou manghobasi huria ni Debata, naeng di bagasan hatuluson ni roha, kejujuran jala
hasatiaon tu Debata hita manghobasi huriaNa. Jala gabe haposan hita di angka ulaon na
pinasahat ni Debata tu hita be marhite huriaNa.
3. Mangasahon holong ni Kristus manghobasi huriaNa.
Songon holong ni ina tu ianakhonna songon i ma holong ni Ap. Paulus tu ganup huria
na hinobasanna. Naeng ma tahaholongi huria ni Debata di bagasan holong ni Kristus.
Molo tahaholongi huria ni Debata tontu tulus do rohanta manghobasi huria i, ndang
marungutungut alai di bagasan las ni roha dohot panghirimon na mangolu (ayat 7-8).
Tontu sai adong do tantangan nang hamaolon na taadopi na marhuria on. Baik sian
bagasan nang sian duru pe. Alai molo tahaholongi do huria na tahobasi i tontu
dipargogoi Debata do hita mangadopi angka na masa i di bagasan habasaron dohot
hiras ni roha. Dipaimbaru semangat nang gogonta laho manghobasi huriaNa ai Ibana
do nampuna huria i jala Ibana do Raja ni huria i. Songon apostel Paulus na pauliuliohn
huria na hinobasanna sian nasa gogo, pingkiran dohot holong ni rohana naeng songon i
hita pauliulihon huria ni Tuhanta asa lam ture, lam pita, lam denggan, lam maju jala
las roha ni Debata .
4. Ndang magopo ulaon manghatahon barita nauli di bagasan hiras ni roha.
Ndang marisuang ulaon manghatahon barita nauli na niulahon ni apostel Paulus di
huria na hinobasanna (ayat 1). Naeng tangkas tapeop i di bagasan rohanta ndang
magopo manang marisuang ulaon manghatahahon barita nauli manang didia pe hita
manghobasi huria ni Tuhan i. Nang pe marporsuk jala godang angka na hansit dohot na
bernit diae apostel Paulus di huria na hinobasanna, pola marsipal jala mangae do ibana
sian angka na mamusui ibana alai tung margogo do ibana jala ndang moru hiras ni
rohana dohot semangatna mamaritahon barita nauli i. Naeng marsiajar hita sian
apostel Paulus on, na tongtong marhiras ni roha (berani) manghatahon hasintongan
nang godang ancaman dohot penganiayaan na ro tu ibana ala pos do rohana di
pandonganion dohot pangaramotion ni Tuhan i di ngoluna. Ingkon pos rohanta, ndang
di pasombu Debata hita di na marbarita nauli. Di dongani do hita marhite Tondi
hlm. - 8 - file: “BANSER” di bulan Okt’ 2023 HKBP Resort Immanuel - Dumai
Parbadia, jala di lehon do tu hita tondi hagogoon, tondi pangarajaion diri ndada tondi
hatahuton. Alani sahat ma ula TOHONANMI. Amen. (Biv. Juliana br. Silaen).

hlm. - 9 - file: “BANSER” di bulan Okt’ 2023 HKBP Resort Immanuel - Dumai