LITURGI KEBAKTIAN

MALAM PASSION III

HKI RESORT BENGKULU
Rabu, 8 April 2020 Pkl 19.00 - selesai

1. Votum
Kep. Keluarga: "Marhitehite Goar ni Debata Ama, dohot Goarni Anak Na Tuhan Jesus
Kristus, dohot Goar ni Tondi Parbadia, na manompa langit dohot tano
on, dipasaor ma dame-Na tu tondinta (tondimuna) be! Amen".
Rap mandok ma hita di tangiangta i:
K : Ale Jesus Tuhannami, bereng hami na dison. Pinarmahan Mi do hami, saluhutna
na dison. Sai asi rohaM di hami sai pangolu hami on! Amen.

2. Marende BE No. 622 Mansai Nalnal Di Angka Partingkian

1. Mansai nalnal di angka partingkian , Sinondang ni silangMu Tuhanki
Sian hatiuron na marsinondang, HolongNa na so halampoan i
Sudena bangso do marpanghirimon, Tu sondang ni asi ni roha i
Songon parluga na manghalungunhon, Parbinsar ni mataniari i

2. SilangMu Kristus tanda ni holongMu, Pahisar tondi na magopu i

Mangalononghon sasude dosangku, Mabaor tu laut asi ni rohaMi
Naung tubu hami gabe na imbaru, Na niurasan sian dosa i
Ala mudarMu na niusehonMu, Di Golgota di hamamateMi

3. Ayat dohot Tangiang

Rom 3:25-26 (TOBA) Ibana do dipadiri Debata bahen habangsa parasian marhite sian
haporseaon di mudarna i, asa dipapatar Debata disi hatigoranna, ala naung dibolus
matana angka dosa najolo marhite lambas ni rohana. Ai naeng papataron ni Debata
hatigoranna apala nuaeng, asa pintor Ibana jala dipintori na marhaporseaon di Jesus.

Martangiang ma hita
Ale Debatanami na di banua ginjang, Debata parholong dohot parasi ni roha. Mauliate
ma pasahathon nami tu adopanMu, ai nuga ditaluhon Ho ulahon ni si bolis marhite
AnakMu, Jesus Kristus, Tuhannami. Sai dongani jala ramoti ma hami saluhutna asa
margogo hami mangalo dosa dohot sibalis pangago. Marhite i asa dapotan ngolu na
dibagasan dame na sumurug sian Ho, sahat hami tu hangoluan na salelengnilelengna,
marhite Jesus Kristus Tuhannami. Amin.

1
4. Marende BE. No. 83 “Na Lao Do Birubiru i”
1. Na lao do Birubiru i, Mamorsan angka dosa
Ni nasa hajolmaon i, Di benget ni rohaNa
Diporsan do sahitta i, Dilehon do DiriNa i
Tu tangan ni pamunu, Ditaoni do na bernit i
Rodi na tos hosaNa i, Didok : Naeng porsanonHu
2. Ianggo Birubiru i, Ima alealengku
Na paluahon tondingki, Disuru Debatangku
Didok mandok AnakNa i, Sai topot ma pardosa i
Naung sun tinoruanHu, Balga tutu do rimasHi
Alai tarbaen do mombun i, Horhonon ni mudarMu

5. Manjaha Bibel 1:
Bapak: Dung i sahat ma Jesus rap dohot nasida tu porlak sada na margoar Getsemane.
Jadi didok ma tu angka sisean i: Hundul ma hamu jolo dison, saleleng disan
Ahu martangiang. Dung i ditogihon ma si Petrus dohot anak ni si Sebedeus na
dua i, dung i gabe marsak situtu ma Ibana jala bobonosan. Jala didok ma tu
nasida: Mansai marsak situtu do rohangku, hira na mate do. Dison ma hamu,
dungo rap dohot Ahu! Dung i laho ma Ibana saotik tujolo, dipatungkap ma
bohina tu tano martangiang, ninna ma: Ale Amang, namun na tarbahen,
salpuhon ma siinumon on sian Ahu! Alai tahe, unang marguru tu rohangku;
roham do! Dung i mulak ma Ibana tu angka siseanna, jala tarpodom do nasida
didapot, jadi didok ma tu si Petrus: Ndang margogo hamu hape dungo rap
dohot Ahu nanggo sangombas? Dungo ma hamu jala martangiang, asa unang
hamu bongot tu pangunjunan, ai na girgir do nian tondi i, alai gale do ia
daging!
Ibu : Dung i laho ma Ibana paduahalihon martangiang, ninna ma: Ale Amang, molo
so tarbahen salpu on, nda ingkon huinum, sai saut ma lomo ni Roham!
Anak : Dung i di na ro i Ibana, tarpodom muse ma nasida didapot, ai mansai dokdok
do salibonnasida. Jadi ditadingkon ma nasida, diulakkon ma laho martangiang
patoluhalihon, mandok hata ondeng. Dung i didapothon ma muse angka
siseanna jadi didok ma tu nasida: Datdatanmuna dope modom dohot
maradian? Nunga dapot tingkina nuaeng, sahat ma Anak ni jolma i tu tangan
ni pardosa. Hehe ma hamu, laho ma hita! Ndi, nunga, ro na pasahathon Ahu!

2
6. Marende BE. 171:1-3 “Tandai ma Au“
1. Tandai ma au, sungkapi ma dohot rohangku
Uji ma au, pamanat huhut ma dalanku
Olo ditanda Ho au Debata
2. Asi ma rohaM, taringot tu pangalahongku
Olo tutu, jotjot do na lilu dalanku
Sesa dosangku sude Debata
3. Sai tatap ma au, tambai ma haporseaonku
Togu ma au tu Surgo papintor langkangku
Ala AnakMu ma i, Debata
7. Manjaha Bibel 2:
Anak : Alai diboto si Judas siparjehe i do inganan i, ai jotjot do marpungu tusi Jesus
dohot angka siseanna. Ia si Judas i, diarahon ma angka soldadu dohot angka
naposo ni sintua ni malim, didapothon ma tusi, mantat sulusulu, palito dohot
sinjata.
Bapak: Diboto Jesus do saluhut na naeng songgop tu Ibana, jadi ruar ma Ibana, didok
ma tu nasida: Ise do na jinalahanmuna i? Gabe ninna nasida ma mangalusi
Ibana: Jesus, halak Nasaret i do! Dung i ninna Jesus ma mandok nasida: Ahu
do i!
Anak : Alai dohot do si Judas siparjehe i jongjong di lambungnasida. Asa dung didok
tu nasida: Ahu do i, sumurut ma nasida, angka martinggangan ma tu tano.
Dung i diulahi ma manungkun nasida: Ise do na niluluanmuna? Jadi didok
nasida ma: Jesus, halak Nasaret i do.
Bapak: Dung i ninna Jesus ma mangalusi: Nunga hupaboa tu hamu: Ahu do i. Asa molo
Ahu dilului hamu, loas hamu ma laho angka on! Ai naeng do jumpang hata na
nidokna i: Ndang adong na mago hubahen agia sada sian angka na nilehonmi
tu Ahu.
Ibu : Alai nunga dipabotohon parjehe i hian partinandaan tu nasida, ai didok do: Ia i
na huumma, Ibana ma i; i ma tangkup hamu!
Anak : Asa pintor didapothon ma Jesus, didok ma: Tabi di Ho, Guru! Laos diumma.
Alai ninna Jesus ma mandok ibana: Marhua ho tuson, anggia? Dung i ro ma
nasida, dilaluhon ma tangannasida tu Jesus manangkup Ibana.
8. Marende BE. No. 180 “Ro tu Jesus Ho na loja“
1. Ro tu Jesus ho na loja Na maheu i
Lam lumbang do di lambungNa Rohami
2. Bereng di hau pinarsilang Daon ni sahitmi
Tuhanmi na hona uhum Singkatmi
3
9. Manjaha Bibel 3:
Anak : Dung i adong ma sada sian angka dongan ni Jesus mangalaluhon tanganna,
disintak ma podangna, ditampulhon ma tu naposo ni sintua ni malim sahalak,
dipisikkon ma pinggolna.
Bapak: Jadi didok Jesus ma tu ibana: Pasarung podangmi, ai na manintak podang,
mago ma bahenon ni podang! Ai na so tarbahen Ahu do di roham mangido
sian Damang, asa dipadiri di Ahu saonari lobi sian sampuludua loksa
surusuruan? Alai songon dia ma disi saut hata ni Surat i na mandok: Ingkon
masa do na songon i? Uju i ma didok Jesus tu angka natorop i: Hira na dompak
panamun do hamu hehe, marpodang jala marlombutlombut manangkup Ahu.
Ariari do Ahu nian hundul mangajari di bagas joro, so adong ditangkup hamu
Ahu. Alai na masa do sudena on, asa jumpang hata ni angka panurirang i.
Dung i ditadingkon saluhut sisean i ma Ibana laho maporus.

10. Marende BE. 541:1-3 “Na Mulak Jesus i” (pasahathon pelean)

1. Na mulak Jesus i di hasangapon i,
Mangalap na badia i tu hasonangan i
Hutundalhon ma na di pudingki
Jesus ma haposanki di haroroNa i
2. So tung na tading au di haroroNa i
So tung ditiop rohangkon na olo sega i
Hutundalhon ma na di pudingki
Jesus ma haposanki di haroroNa i

11. Tangiang Panutup

Kep. Keluarga : Rap ma hita mandok di tangiang hatopanta i:
Sude: Ale Amanami nadi banua ginjang, Sai pinarbadia ma goarMu, Sai ro ma
harajaonMu. Sai saut ma lomo ni rohaM, Di banua tonga on songon nadi banua
ginjang.
Lehon ma tu hami sadari on hangoluan siapari, Sesa ma dosanami, songon
panesanami di dosa ni dongan namardosa tu hami. Unang hami togihon tu
pangunjunan, Palua ma hami sian pangago.Ai Ho do nampuna harajaon dohot
hagogoon rodi hasangapon saleleng ni lelengna. Amen.
Kep. Keluarga :Singkop ma di hamu asi ni roha dohot dame, marhitehite
panandaonmuna di Debata dohot di Jesus, Tuhanta i!
Sude : Amen. (3x diendehon)