BAKU DAPA LAI

DALAM KABAKTIANG
MINGGU KALIMA
(Deng Etnik Malayu Ambon)
BACA JAMAAT
PUNG BARITA
DATANG PAR
TUHAN
Orgen/trompet kas babunyi
lagu DSL No. 3
(JAMAAT BADIRI)
 MANYANYI
No. 10 Bait 1 - 3
“Tuhan Yang Suci”
Tuhan yang suci, suci
lawang e
Tuhan yang kudus,
kudus lawang e
Katong bardosa sio
datang somba
deng puji puji Tuhan
pung sayang
Yang beta rindu, Tuhan
pung sayang
biar beta hidop seng
balisa e
 Kas’ilang susa tukar
deng sanang
la beta minta dangke lai
Tuhan
Biar bet’pung hidop
paleng bardosa
bet’datang saja par
Tuhan jua
Beta parcaya Tuhan
paleng bae
Tuhan yang biking
hidop jadi bae
 TUHAN ADA
DENG KATONG
 PANDITA:
Basudara jamaat samua! Kabaktiang yang
katong biking ni, akang jadi deng nama Allah
yang biking langit deng dunya, Yesus Kristus
yang su tabus katong pung dosa deng kasi
salamat katong, Tuhan pung Roh yang biking
katong pung hidop jadi baru deng yang
biking katong hidop tarus-tarus deng Allah
 JAMAAT:
HELO!

PANDITA:
Allah kasi dame par jamaat
salalu
 MANYANYI
“Tete Manis Pung Sayang
Basar”
Tetemanis pung sayang
yang basar salalu
tinggal deng ale lai
Amin
NAS ALKITAB JADI
DASAR PAR
KABAKTIANG
 PANDITA:
Paulus pung Surat Partama par Jamaat di Tesalonika
pasal dua, bait ka sapuludua; jadi katong pung Nas di
Kabaktiang ni, KATONG BUJU KAMONG BIAR
KAMONG PUNG HIDOP BIKING ALLAH
PUNG HATI SANANG. BARANG, ALLAH
YANG PANGGEL KAMONG PAR JADI ANTUA
PUNG ORANG-ORANG WAKTU ANTUA
PARENTA DUNYA INI DENG NANTI ORANG-
ORANG TARU HORMAT PAR KAMONG
MACANG DENG DONG TARU HORMAT PAR
ANTUA.
 MANYANYI
“Kalo Yesus Su Tolong”
Kalo Yesus su tolong
katong
apa yang katong mau
balas
Kalo Yesus su piara
Sio basudara e
Mari bilang dangke
Yesus e
 Su piara beta deng ale
katong mau puji somba
Yesus e seng barenti lai
(JAMAAT DUDU)
MANGAKU DOSA
 SATU ANA REMAJA:
SIO TUHAN… SIO ALLAH YANG KATONG
SOMBA E…
KATONG MANGAKU KALO DALANG
KATONG PUNG HIDOP SABANG HARI,
KATONG JAGA BIKING APA YANG BAPA
SENG MAU. KATONG PAKE KATONG
PUNG PIKIRANG PAR SUSUN SIASAT
TARBAI DENG RENCANA JAHAT,
BUKANG RENCANA YANG BAE.
 KATONG PAR SASAJA KAS KALUAR KATA
YANG BIKING LUKA SUDARA PUNG HATI,
BUKANG KAS KUAT DONG DENG KATA-
KATA YANG BAWA DAME MAR KATONG
BIKING DONG SAMA SENG PUNG ARTI
APAPA.
KATONG JAGA BIKING APAPA YANG KAS
CILAKA ORANG LAENG. KATONG BAKU
BAKALAE DENG BIRMAN CUMA PAR TIRIS
DENG KINTAL SAPOTONG.
 BAKU MALAWANG TAGAL BATUSU
MULU KIRI KANANG DENG BANYA
HAL YANG BIKING KATONG SENG
RASA DAME DALANG HIDOP.
KATONG BIKING RUSAK TANA, AER
DENG UDARA DI KATONG PUNG
NEGRI LA TAR KALESANG PAR HIDOP
YANG BAE
 JAMAAT:
(manyanyi)

Bapa ampong beta jua

Kristus ampong beta jua
 PENATUA:
Sio Tuhan Allah e! Kasi ampong
katong pung sala deng dosa jua.
Roba katong pung roh deng hati jadi
baru la biar katong pung pikirang,
kata-kata deng samua yang katong
biking jadi labe bae lai
 JAMAAT:
Pimping katong supaya
katong seng kaliru deng turut
setang pung parenta par
biking dosa ulang-ulang
 PENATUA:
Katong cuma bicara kas tau Injil
par orang, maar katong seng
biking akang
 JAMAAT:
Barita Injil yang katong
dengar tu par sasaja katong
tar biking akang. Ampong
katong pung sala jua, Tuhan
ee!
 PENATUA:
Katong minta samua tu deng
nama Tuhan Yesus yang katong
somba

SAMUA:
AMIN!
 ALLAH KASI
AMPONG KATONG
PUNG DOSA
 PANDITA:
Par basudara samua yang batul-batul
mangaku dosa par Allah deng yang batul-
batul manyasal basudara dong pung dosa-
dosa, Allah su kasi ampong basudara dong.
Ini su tatulis dalang kitab Yesus pung
Utusang pung Carita pasal tigablas ayat
tigapulu dalapang deng tigapulu sambilang
yang bilang kata,
 “Basudara e! Kamong musti tau kalo
tagal Yesus mati di kayo salib, Tuhan
kasi ampong dosa-dosa. Ini ni pasang
yang katong ada bilang par kamong. Jadi
sapa sa yang parcaya Yesus, Tuhan kasi
ampong dia pung dosa samua la anggap
dia pung hidop batul...”
 MANYANYI KJ
No. 36 (Ambon/Fordata)
“Beta Dapa Ampong E”
 Beta dapa ampong e,
cuma tagal Tuhan Yesus
Beta dapa s’lamat e, cuma
tagal Tuhan Yesus
Tuhan pung sayang e su
kasi s’lamat beta hidop
jadi baru
cuma tagal Tuhan Yesus
(JAMAAT BADIRI)
HIDOP IKO TUHAN
PUNG MAU
 PANDITA:
Tagal itu basudara jamaat e, mari katong
baku sayang satu deng laeng. Barang,
Allah sandiri su sayang katong labe
kamuka deng su utus Antua pung Ana
par datang tabus katong pung dosa-dosa,
biar katong bisa baku bae deng Antua (1
Yohanis 4 : 10-11)
MANYANYI NJ GPM
No. 148
“Ale Jang Balaga”
Ale, jang balaga dalam
hidop ini
Ale, jang bagaya dalam
hidop ini
Dalam dunia ini jang
haga haga, kalo seng
tahang bisa bahaya
Nanti ale sangsara
iblis tawata tawa
Mari manyanyi puji
Tuhan
 Katong pung Tuhan
yang hidop Taruh
percaya dan iman serta
pengharapan
Nanti Tuhan Yesus kasi
hidop yang abadi
Yang kekal dalam
rumah Bapa
katong sanang
katong sanang
(JEMAAT DUDU)
BACA DENG DENGAR
ALLAH PUNG
AJARANG

Mazmur 97 : 1-12
 PENATUA:
TUHAN E, TARU ROH DI
KATONG PUNG HATI JUA
BIAR KATONG BISA BACA,
DENGAR LA BIKING IKO
TUHAN PUNG PARENTA PAR
HIDOP LABE BAE. ELO!
Mazmur 97 : 1-12
PANDITA RIWAYAT

Mazmur 97 : 1-12
 MANYANYI
No. 30 Bait 1 & 2
“Tuhan Pung Firman”
 Tuhan pung Firman
tarang di hati
kas’tunju jalang pigi ka
sorga
 Tuhan pung Firman
tarang par hidop
dekat deng Tuhan sio
beta rasa s’nang
 Tuhan pung Firman
seng ada sala
kasi samangat hati yang
susa
 Tuhan pung Firman
jalang par hidop
dekat deng Tuhan sio
beta rasa s’nang
JAMAAT PUNG
JAWABANG
(JAMAAT BADIRI)
MANGAKU
PERCAYA
 PANDITA:
Jamaat mari badiri la katong
mangaku katong pung
parcaya deng sama-sama
bilang…
 Beta parcaya par Allah
Bapa
yang pung kuasa par samua-
samua yang ada.
Antua yang biking langit
deng dunya ni.
 Beta parcaya par Yesus
Kristus,
Allah pung Ana satu areng-
areng,
yang jadi katong pung Raja.
 Antua ada dalang Maria
pung poro tagal Allah pung
Roh,
la lahir ka dunya biar kata
Maria ni masi parawang.
Antua dapa siksa waktu
Pontius Pilatus pegang
parenta.
Antua dapa salib, mati, la
dapa kubur.
Antua turung ka orang
mati pung dunya,
la hidop kombali pas
akang pung lusa.
 Antua nai ka sorga,
dudu di Allah pung sabala
kanang,
la pegang parenta sama-sama
deng Antua
yang pung kuasa par samua
yang ada.
 Antua nanti datang dari
sana
par jadi hakim par samua
orang
yang masi hidop deng
yang su mati.
Beta parcaya par Allah pung
Roh.
Beta parcaya kalo Allah su
pili katong
par jadi Yesus pung orang-
orang
 yang taika jadi satu di
antero dunya ni,
deng sama-sama tarima apa
yang bae dari Antua.
Beta parcaya kalo Antua
kasi ampong
katong pung dosa-dosa
deng nanti kasi hidop
katong pung badang
kombali,
la katong hidop tarus-
tarus deng Antua.
(JAMAAT DUDU)
MANYANYI PUJI
TUHAN
TANDA JAMAAT
MINTA DANGKE
 SYAMAS:
Basudara jamaat e! Tuhan su kasi
berkat banya dalang katong pung
hidop ni. Tagal itu, mari katong minta
dangke dari Antua deng cara kasi apa
yang katong su tarima dari Antua tu.
Tuhan kasi berkat par katong.
 MANYANYI
No. 35 Bait 1 dst
“Ayo, Bawa Ale Pung Natzar”
 Ayo, bawa ale pung
natzar par Tete Manis
bawa akang deng rasa
senang
 Bawa-bawa akang
dengang rasa sanang
Ayo jua, bawa jua
Tuhang ambe ale pung
natzar
 Ayo, bawa ale pung
korbang ka altar Tuhang
bawa ale pung korbang
ka altar Tuhang
 Bawa-bawa akang
dengang dendang sukur
bawa ale pung korbang ka
altar Tuhang
bawa akang, bawa akang
akang Tuhang t’rima ale
pung korbang
Ayo, angka ale pung
suara t’rima Tuhang
angka ale pung suara
t’rima Tuhang
Angka-angka akang
deng suara manis e
Ayo suda, angka suda
Tuhang dengar ale
basaro
Ayo, topu-topu tangang
puji Tete Manis
topu-topu tangang puji
Tete Manis
Kas’ba-kas’babunyi
barsuka rame-rame
Ayo babunyi gareng-
gareng
Tuhang dengar topu
tangang e
 Ayo, lenggang badang,
putar lengso e par
Tuhang
lenggang badang, putar
lengso e par Tuhang
 Goyang goyang badang
deng muka manis e
Ayo badang lombo-lombo
Tuhang t’rima ale pung
syukur
(JAMAAT BADIRI)
SOMBAYANG
SUKUR
PAMBARIANG
 SYAMAS:
Jamaat, mari katong
sombayang sama-sama minta
berkat dari Tuhan par katong
pung pambariang ni
 SAMUA:
SIO ALLAH BAPA E! SAMUA
YANG KATONG TARIMA NI,
AKANG ASAL DARI BAPA.
SAMUA YANG KATONG
HARAP TU, AKANG BISA JADI
TAGAL KRISTUS PUNG
SAYANG.
 SAMUA:
SAMUA YANG KATONG DAPA
SABANG HARI TU, TAGAL ROH
PIMPING KATONG.
TAGAL ITU, KAS KUAT KATONG
PAR SAYANG SAMUA ORANG
DENG TOLONG KATONG SUPAYA
KALESANG SAMUA YANG BAPA
BIKING. ELO!
(JAMAAT DUDU)
MANYANYI PUJI
TUHAN
SOMBAYANG
PAR GAREJA
DENG DUNYA
 ANA SKOLA MINGGU/JUJARO/MUNGARE:
TUHAN… KATONG HATI BARSUKA TAGAL
BISA BAKUDAPA DI KABAKTIANG ORAS
INI. KATONG MINTA TUHAN SAYANG
KATONG SAMUA. JAGA KATONG PUNG
HARI-HARI HIDOP. KATONG NI TUHAN
PUNG ANANA, TAGAL ITU SAYANG KATONG
DARI YANG MASI DALANG MAMA PUNG
PORO SAMPE KATONG YANG SU SKOLA
TINGGI.
 KASI KATONG PANDE DENG HOKMAT PAR
BALAJAR BAE-BAE BIAR BISA JADI ORANG
LA ANGKA MAMA DENG PAPA PUNG MUKA.
PELE KATONG DAR SAGALA KAJAHATANG
DUNYA DENG AKANG PUNG TAHELA YANG
BISA BIKING KATONG BINASA DENG HARI
ESO JADI GALAP GULITA. DENGAR DENG
MANYAU KATONG PUNG SUARA NI JUA
TUHAN. DENG TUHAN YESUS PUNG NAMA SA,
KATONG SOMBAYANG PAR BAPA DI SORGA
 MAMA/PARAMPUANG YANG SU
BARUMATANGGA:
KATONG MO BILANG PAR TUHAN, TOLONG
KATONG PUNG SUSA JUA. JAGA KATONG
PUNG LAKI KA KATONG PUNG BINI KA
ANANA YANG PI KARJA. DARI KALUAR
SAMPE BALE MASO RUMA, TUHAN
PIMPING JUA. SAMUA YANG DONG BIKING
DI KANTOR DENG TAMPA-TAMPA KARJA
YANG LAENG BIAR ITU JADI BERKAT
BASAR PAR RUMATANGGA.
KAS CUKUP KATONG PUNG HIDOP
JUA TUHAN SUPAYA KATONG SENG
BAMINTA KA SENG BAJALANG
BAUTANG DIMANA-MANA. SAMUA
KEPENG YANG KATONG DAPA DARI
KARINGAT SANDIRI, BIAR ITU JADI
BERKAT PAR ANANA PUNG SKOLA,
 KATONG PUNG MAKANG DENG PAKE
MAAR LABE DAR ITU, KAS INGA KATONG
SUPAYA SENG LUPA ANGKA ULU HASIL LA
BARBAGE DENG ORANG YANG KURANG.
KATONG YANG TINGGAL TAPISA TAGAL
HIDOP PUNG TUNTUTANG, TUHAN
SAYANG KATONG JUA, SUPAYA KATONG
SENG SALA JALANG LA MANYANGKAL
RUMA TANGGA.
ANANA YANG ADA SKOLA DI ORANG
PUNG GUNUNG TANA, TUHAN JAGA
DONG LAI, SUPAYA DONG SENG
BIKING SUSA DIRI DENG BIKING
KATONG LALA HATI. DENGAR DENG
MANYAU KATONG PUNG SUARA NI
JUA TUHAN. DENG TUHAN YESUS
PUNG NAMA SA, KATONG
SOMBAYANG PAR BAPA DI SORGA
 Bapa’/Laki-laki yang su barumatangga:
TUHAN E! MARI JAGA KATONG DI BANGSA NI
JUA. LABE HARI LABE TUA BUKANG LABE BAI,
MAAR LABE TALAMBURANG DIMANA-MANA.
SETANG PUNG PARENTA BIKING KATONG DI
AKANG NEGRI NI HIDOP SENG DAME. KATONG
LABE TARKIRA HURU HARA YANG JAU
DARIPADA MANGENTE SUDARA DI DALAM
KAMPONG PUNG HIDOP YANG SANGSARA,
LAPAR, DAPA GEPE DENG SENG BEBEAS
BIKING APAPA.
 TUHAN PUNG ROH TU KATONG MINTA PAR
PELE BALA SAKITANG DENG COBAANG YANG
BARAT DI KATONG PUNG BANGSA, NEGRI
DENG BENDAR NI. KASI HOKMAT DENG HATI,
PIKIRANG YANG BAE PAR SAMUA ORANG
YANG PEGANG PARENTA DI BANGSA, DI
MALUKU DENG BENDAR AMBON NI, SUPAYA
JANG CUMA ANGKA JANJI DENG BILANG
SUMPA MAAR KARJA TAR PAKE HATI PAR LIA
KATONG ORANG KACIL DI TANA AIR
INDONESIA NI.
KATONG SOMBAYANG PAR GAREJA, BIAR SAMUA
GAREJA MANYATU HATI PAR JADI TUHAN PUNG
UTUSANG DI DUNYA YANG TABAOS KABAR BAE
LA TURUNG TANGANG PAR HIDOP LAENG
SAYANG LAENG. BUKANG CUMA DENGAR
AJARANG, BUKANG CUMA TAU RIWAYAT, MAR
LABE DARI ITU KATONG BISA BIKING NYATA-
NYATA APA YANG TUHAN AJAR. DENGAR DENG
MANYAU KATONG PUNG SUARA NI JUA TUHAN.
DENG TUHAN YESUS PUNG NAMA SA, KATONG
SOMBAYANG PAR BAPA DI SORGA
SOMBAYANG
PAR GAREJA
DENG DUNYA
(JAMAAT BADIRI)
 ALLAH UTUS
JAMAAT DENG
KASI JANJI PAR
SAMA-SAMA DENG
KATONG
 PANDITA:
Basudara jamaat e! Mari pulang deng
hati yang sanang la biking basudara
dong pung karja bae-bae. Allah pung
Roh kas kuat katong par tau mana yang
batul deng mana yang sala la barani par
unju kabenaran di muka banya orang
 MANYANYI
No. 34
“Sio Tuhan, Kasi Kuat Jamaat”
Sio Tuhan, kasi kuat
jamat par iko Tuhan
pung p’renta
La bisa roba hidop par
jadi bae
sio Tuhan yang
katorang puji
 PANDITA:
TUHAN YESUS KRISTUS KASI UNJU ANTUA
PUNG HATI BAE DENG KASI DAME PAR
BASUDARA JAMAAT SAMUA. ANTUA JAGA
DENG PIARA JAMAAT PUNG HIDOP LA PELE
SAGALA BALA SANGSARA SUPAYA JAMAAT
SENG CILAKA. ANTUA TARU BERKAT
MALIONG-MALIONG DI JAMAAT PUNG
RUMATANGGA, PIRING NATSAR, LESA
DENG TAMPAYANG AER MINONG. TUHAN
ADA DENG KATONG SAMPE SALAMANYA
 JEMAAT:
(menyanyi) NJ GPM No. 342
“HELO, HELO, HELO
KOKUANYA!”
 JAMAAT DUDU &
KABAKTIANG SU KLAAR,
JAMAAT SOMBAYANG DI
TAMPA DUDU.
 Slamat Hari
Minggu basudara
samua