EISHOMO RYA KABIRI

Eishomo eriruga omu

kitabo ky’Okutandika.
Okutandika 22:1-18
Ruhanga akagyeza Aburahamu,
yaamweta ati: Aburahamu!
Yaamwetaba ati: Nyamuhanga!
Yaamugira ati: Twara omwana
waawe omwe nyamunegyere
Isaaka, ou okunda, oze omu
nsi ya Moriya, omutambire aha
kibungo kimwe omu bibungo
by’aho, eki ndaakugambire,
kuba ekitambo ekyokize. Atyo
Aburahamu yaimuka kare omu
kasheeshe, yaatandika
endogoya ye, yaatwara babiri
aha batsigazi be na Isaaka
omwana we; yaashatura enku
z’okwotsya ekitambo,
yaimuka,
 yaaza omu mwanya ogu
Ruhanga amugambiire. Aha
kiro kya kashatu Aburahamu
yaanaga amaisho, yaareba
omwanya gukiri hare.
Aburahamu yaagira abatsigazi
be ati: nyowe n’omwojo tuze
kuriya, turamye, haza
tugarukye, tubashangye aha.
Aburahamu yaakwata enku
z’okwotsya ekitambo,
yaazikorera Isaaka omwana
we; we yaatwara omuriro
n’omusyo gw’endiga;
baagyenda hamwe bombi.
Isaaka yaayeta Aburahamu
ishe ati: Taata! Aburahamu
yamwetaba ati:
n’enki, mwana wangye? Yaagira
ati: baitu shi, ka twine omuriro
n’enku; Omwana gw’entaama
ogw’okutamba gurahi?
Aburahamu yaagarukamu ati:
Mwana wangye, Ruhanga naija
kwebonera omwana
gw’entaama gw’ekitambo
ky’okwotsya.
 Batyo bagumizamu bombi. Ku
baahikire omu mwanya ogu
Ruhanga amugambiire,
Aburahamu yaayombekayo
eitambiro, yaariteekyeraho enku,
yaaboha Isaaka omwana we,
yaamugarika aha itambiro aha
nku. Aburahamu yaakununkirira
omusyo kurezya omutabani.
Maraika wa Nyakubaho yaayema
omu iguru, yaamweta ati:
Aburahamu! Aburahamu!
Yaamugira ati: Otakora ahari
ogwo mwana, nari kugira eki
waamwitsa; ahabw’okuba hati
naamanya ku orikutiina Ruhanga
ahabw’okutaanyima mwana
waawe omwe nyamunegyere.
Aburahamu yaimutsya amaisho,
yaamagamaga, yaareba
enyima ye empaya y’entaama
ekwatsirwe ebikamba omu
mahembe; Aburahamu
yageyenda, yaihayo egyo
mahembe; yaagitamba kuba
ekitambo ekyokize omu
mwanya gw’omwana we.
 Aburahamu yaayeta ogwo
mwanya Yehovayire, nk’oku
kirikugambwa na hati ngu, Aha
kibungo kya Nyakubaho
kiryaheebwa. Maraika wa
Nyakubaho yaagaruka
yaayema omu iguru, yaayeta
Aburahamu omurundi gwa
kabiri, yaamugira ati:
Naayerahira, nikwo Nyakubaho
arikugira, ahabw’okukora eki,
okutanyima mwana waawe
omwe nyamunegyere, nti:
Okukuha ndyakuha omugisha,
Kandi n’okukanyisa
ndyakanyisa oruzaaro rwawe,
rube nk’enyonyoozi z’omu
iguru.
 Kandi nk’omusheenyi gw’aha
rubaju rw’enyanja; n’oruzaaro
rwawe ruryakubuura amarembo
g’abazigu baarwo; kandi
omurirwo amahanga goona
ag’omu nsi nimwo gariheerwa
omugisha, ahabw’okuba
oyrobeire eiraka ryangye.
Ekyo nikyo Kigambo kya Mukama.
 TUSHABE:
Ai Ruhanga Ishe w’abaikiriza
boona okanyisa omu nsi yoona
abaana b’endagaano noobaha
omugisha gw’okuba abaana;
kandi omu ibanga rya Paska
noohikiiriza eki wabaire
araganiise Aburahamu
omugaragwa waawe,
noorahira ku ariba ishenkuru
w’abantu b’amahanga goona;
abantu abi orikweta boona,
obahe omugisha gw’okukurata
gye eki waabeeteire, babone
kutaaha omu ruganda rwawe.
Eki twakikushaba omuri Kristo
Mukama waitu. _AMIINA.