ZAM Hotline 016-293 9027 ZAM Office 03-2142 6659

Email: zomiassociationmls@gmail.com

Volume 7, Issue 41
Zomite ading theihhuai thu: Malaysia gam sunga om Zomi khempeuhin ih minam hihna ahi ZAM card anei nailo/ abawl nailoten zingciang thaiciang cilo-in, tu mah mahin Zomi Card bawl mengmeng ni. Hamphatna ding thu leh la khatpeuh aomciang beka ibawl pen ahun zekai thei-in, hamphatna sang, supna lianpi hizaw thei hi. Gal taai dinmuna, I om laitakin, galtaai hihna/ciaptehna card bang hong kipia ding hileh sanggam nang bang card tawia, na tawi card anungta lai mah hiam? cih hoih tak encian mengmeng in! Ahun nalap kei kha ding hi. Zaksakna: ZAM card ahinglai (valid) atawilo peuhmah vai khat peuhpeuhah kihuh zolo ding hi. Gentehna: Gal taai min sanna/ciaptehna, Kimat kihenna leh damloh vaite akipan kibuaipih zolo ding hi. Nang tektek in ZAM card hingsak kik dinga napai theih kei leh, na paisak na lawmte tungah na Min, na suannite leh card no. te hoih tak puasak hamtang in! Card hong piak ciang na min leh na suahni te na paikhiat ma-in, man/lo cih limtak entel masa in. Azen zenin, na Phone nambat na laih aleh amanlang thei penin Zumah zasak pah zaw in! Theih gige ding: UN zumah lai na-at/khiat ciang, Zolai/ Kawllai tawh na-at sangin, Mikanglai (English) tawh at pah lecin nakpi takin lem zaw den hi. ZSM Vai zaksakna: Zomite itna leh veina tak tawh ZSM laibu tawi-in mimal sazian hong kaihkhopsak Pawlpi Sia/ Upate leh Khua makai Palaite tungah lungdam mah mah hi. I thukhun om bangin, March kha beima-in, zum ah laibu nong apkim nading un, kong zasak uh hi. Tukha bei ciangin Genvai alut nuamte ZSM zumah lutta ding uh hi. Gamdanga om Zomite: Kawlgam pan tuipi gal gam khat peuhpeuh atung Zomite tampi takin Gamdang itun tak ciangin, anuamsa pahding, ahau pahding, mi aban pahding dan khatin ih ki ngaihsun kha thei ding hi. Tua bang hipeuh mahlo-in, haksatna, lungkhamna, cihmawh dongtuakna cihte akipan anam nam akituak toto dinga, kipai hi zaw gige hi. Tua bang mahin, ih nusiat innkuan pih ten sum leh paai zong ding bek mahmah in hong ngaihsun pah uha, kha khatin, teng 2, 3 bang khak zoden keileng na nasepna hoih kei; adangah laih in cih khawng tawh hong sawl zawbeh lai hi. Malaysia din mun tawh kizui-in, nasepna mun alaih laihte ahih leh mi citaklo, akicianlo khatin kiciamteh thei hi. Nasep ih laihna manin,inn lam khak ding cih thadah ei leh ei zattawm ding nangawn kinei ngeilo hi. Tua banah ih lutkikna munte-ah, maithak(mothak) kisuak den tawntunga, innteek tang cih om ngeilo hi. (unknown) Galtaai mi khempeuh thunget khopding Topan deih: Hong tung ding March 23, 2013 Saturday ni-in, ih ki pawlna Pawlpi leh veng kikhopna ciatpan Malaysia gam sunga om galtaai khempeuh suakta taka Ih om theihna dingin, Topa kiangah lungsim khempeuh sungkhia-in, thungetna neikhawm ciat ni. Topan hong gualzawhpih ding hi.

March 17, 2013

ZAM Healthcare Department meeting nuamtak kizo: ZAM Health Department leh Zomi sungah damlote Zato apaipih zel zel Pawlpi pan ahizong, Khua kipawlna pan ahizong kimuhkhopna ZAM zumah March 12, 2013 Tuesday nitak lam nai 3:00PM pan 6:00PM dong hun nuamtak kizang thei-in, apai khempeuhin Zomi sungah Damlote a natna nam tawh kizui-a, Zato ah bangci bangin kalsuan pihding, paipih dingte cih thu kikupkhopna limci tak kineia, ZAM zum panin mi 6 tang, Palai Kipumpiak (Volunteer) cih tawh ciaptehna kipia hi. Hih mi 6 te bek hilo, Zomi sungah akipumpiak Zomi tampitak kisam lai hihang cih hong pulak phapha ingh!

TOPA in, En un; ka nasempa a dau pai-in, amah alianin kikoihin kilaamto dinga, sang mahmah ding hi. Isaiah 52:13

UN zumah Innkuan Lutpihte ading: UN zumah Innkuan lutpih ding anei peuhmah in, tu kal khat sung amanlang thei penin ZAM zumah min hong pia un! 2013 kum ading in, Kha 3 ciang khat vei ta UN zumah min sa zian apding hita ahih manin, tu kha beima ki-ap nuam hi. ZAM iNfO! Mimang hong zonpih un: Phaileng khuami, Langh Khan Kam, (ZAM-10309)in, tuma nipi kal 2 lai-in, PJ SS4,Taman Bahagia LRT Station ah nasem dinga pai pen nasepna munlah tunglo, tuni dong innlam lah tungkik nawnlo ahih manin, athei/ amu kha I om leh hehpihna tawh hih anuai-a nambat ah hong zasak un: Nanga: 012-984 0937.

Pilvang!..Pilvang!...Pilvang.! UN card neilo peuhmah khua sungah kua mah vakse dah ni! March kha sung pen kiteel ding kha ahih manin, khua sung Lamka bom teng leh Kota raya mai-a, mihing lam kan na dinga kibawl leibul ah, nisim in Palik mawtaw pi khatta khawl dena, adim angah dong mi man ziahziah uhhi. Tuabek hilo, Maluri Meileng(LRT) buta nuai-ah nitak lam nai 4:00pm-7:00pm dong, mi mante form silhlo ahih manun, pilvang takin gamtat kalsuan siam ni. Zomi kuama peuh khua sungvak kidawm mahmah ding hihang. Ni khatin mi atawm pen mi (10) tabang mat thuak den uh hi.
Theihding: Galtaai mi khatin khua sung vakciang sum Zanga (RM-500) tungsiah kipua theilo ahih manin, tuazah sang atam zaw puakloh ding hipah hi. Tulaitak khua hun sia mahmaha, Migilo, Damiah leh Palikte akipan ih sum I paai, banah ih nuntakna nangawn abeihang, phamawh asalo ahih manun, pilvang mahmah ni! ZAM iNfO!

**ZAM Thupuak kal siala, kihawmkhia pen Leitung mun tuamtuam aom Zomi khempeuhin asim theih nadingin, Website: zomidaily.com & email: zomiassociationmls@gmail.com tepan kisim thei-in, aituam email tawh adeihte in zong kingen thei. hi.**

RST interview/ gamteelna phi zawh kum 1 cingta: bangmah zum pan thu hong zaksak naikei leh Kipawl na zum pan lai-at sak lecin hoih zaw ding hi. UN Card kimu, ZAM zumah hong la un! 1. Khin Maung Shwe, 354-12C01751, (09/05/2015) 2. Far Chin Tial, 354-11C04008, (18/05/2015) 3. Lalhmuliani, 791-09C17411, (11/03/2016) 4. Van Pen Uk, 791-10C00541, (10/02/2016)
Damlohna khat peuh tawh Zato napai ciang: Zomi sungah khat peuhin Damlohna hang tawh Zato/ NGOsikhan(Clinic) napai ciangin, Cidamna lam vai sai palai te kiangah thu leh la Siavuante kiangah gen dan ding limtak dong masa lecin hoih pen ding hi. UN ngahnai khatin bangcih gen leh hoihzaw cih akipan dotna omlo in, kigen masa theilo hi, cih phawk gige in! DHS(Lah Wah Kah) na phi khitteh: Zi/pasal na lut pih khakleh gam thumna pai ding hun hong zekai to pah ding hi. Tua ahih manin, ahih theih innkuan lutpih ding hun hinawnlo hi cih phawk den ni.

Namdang zi/pasal I neih khak zenzen leh UNHCR vaiah thu haksa mahmah pi khat ong suak ding ahih man in mikim in I ngaihsut kul mahmah ding hi. Malaysia ah namdang zi/pasalcih thadah I inn kuan pih na ngawn I lutpihding pen akum in kivei ahih mah bang in, UNHCR I lutcil in Zi leh Pasal neinailo ten zi/pasal ong neih teh kilutpih ding vaipen kumkhat ong ngaksak uh hi. Nasep na pan ahi zong inn sap napan ahi zong ki thuah munna hang in a ki accident thei ahih sam hang nang leh kei I vaipen accident uhhi cih tawh UNHCR in thu ong khenlo ding uh ahih man in, I maban ding ngaihsut huai mahmah ding hi. Kei Malaysia ah bang hangin ong tung kahiam? Bang ngimna nei ka hiam? Ka ngimna/tupna hong khaktan thei ding thute tawh koidan in kipelh theiding kahiam cih lung ngai kawm in, Malaysia I tun khitteh namdang zi leh pasal neihlo ding mi kimin hanciam ding hihang. Ganhing nangawn in atanote nusialo: Leitung nuntakna nei khempeuh apiangsak I biak Pasian in mihing abawlin, ama lim leh mel sunbek hilo-in ahu ongmopte I hih mah bangin, nuntakna anei singkung lopa ganhingte sang azah tampitak in asangzaw dinga ongbawl ahihi. Atunga thulu mahbangin ganhing nangawn in atate nusialo cihbek hilo-in sihpih ngam lai uhhi. Mihingte Ganhing sangin abangkim asangzaw tham hi, gentehna in, Khuamuhna, Ngaihsutna, Pilna, Siamna leh Theih theihnate ahihi. Leitung khuahun hang maw? Ih nuntakzia aginatlo hangmaw? ahih keileh ganhingte sangin I nuntakna I niamsek hangmaw? tuhun teh Nu leh Pa pawlkhatten asung pana piang atate sihpih ngam/ nuntakpih ngam cih thadah taisan in anusia kitam mahmah tahi. Ei Malaysia pen minam dangte zahzong aphazolo a ci tawm mahmah I hih kawmkalin, mi simmawh ding leh mi neumuh dingin I om khak lohding thupi mahmah ding hi. Malaysia-ah Zomi tulsawm val I om hangin, midang tawh tehna kitawm mahmah lai hinapin nu leh pa ten I tate nusia in ataisan ki tam mahmah bilbel hi. Hih tawh kisai-in nu leh pa khempeuh in I lungngaih hun ong tung tahi, eipen ganhingte sang nuntak khuasakzia theihna, ciimna, pilna nei I hihhang Ganhingte sang I nuntak/ I gamtatzia atualniam kitam mahmah hi. Zi leh Tate nusia/Pasal leh Tate nusia in taisan cih thu limlim pen mihing vai hetlo-in Ganhingte itna neihzah zong anei zolo mihingte ki hita zen hi. Nute aw, Pate aw bangin, ei/nang hibangin tate nusia ding/ataisan dingin, bangin ongtawsawn ahiam? Na zi aginatloh hangmaw? Na Pasal aginatloh hangmaw? ahih keileh midangte na zi na pasal sang asiamzawk hangmaw? Natheihloh kalin na tate tagah nahi gige ahih lam phawkin. Nu leh Pa damlai napin tate tagah suak khin hi. Thu khupna: Ganhingte etteh kik ni, mailamah I minam sungah adiak diakin Malaysia-ah tate nusia Nu le Pa atawm theih nadingin I minam bupin I hanciam kulding hi. Nupa ten nasepna-ah semkhawm hamtang ni, I zi/ I pasal tawh muntuam tuakah kikhen in nasem keini. Zeetna tam mahmah ahih manin kidawm ding hihang. Nu leh Pa te aw, I zi I pasalte tung longal kuamah iplah sekei ni! Midangte I zi/ I pasalte sang siamzaw mah unteh, zong nopci zawthei mah unteh ahizong lunghian sawm het keini. Kei ka lunghiang mawk leh ka tate tagah suakmawk loding ahiam? cih phawk gige ni!

Help College sangkah nuamte: Zomi Galtai naupangte ading sangsap man piakkullo (Free) sang kikah thei hi. Akah nuamte in, hih anuai-a teng neih ding kisam hi: ZAM zumah Form kingah thei hi. 1. UN Card/ Laidal nei hi ding 2. Kum 15-24 kilkal hi ding 3. Application Form, anunung pen (Deadline) March 29, 2013 ni apkik ding hi. 4. Mail(Laito),Email leh Fax te tawh anuai-a, munah ki khak thei hi. UNHCR Youth Coordinator P.O. Box: 10185, 50706 Kuala Lumpur, E-mail: mlsluyth@unhcr.org Fax: 03) 2141-1780 Kimat/kihenna I tuah khakleh: Theihhuai pawlkhat, Na sanggam/na tanau khat peuh deihloh penin mat leh hen atuah leh ZAM Palaite nako pahun. Akisam dingte: 1) a ki matna mun, 2) aman Palikte, 3) a ki mat hun, ani, 4) ZAM card nambat cihte theileng ih kanna lem theipan hi. ZAM Card nambat ih theih kei leh ki kan pak thei nawnlo-in, tawlkhat sung athu zak ding hungaih phot kul hi. Palaite contact nading: Palai Tuangpu: 016-254 4093, Palai Thaa Mung: 016-646 5375.
Upkhak hetloh ding: Mun khat peuhpeuh pan motor hoih nono tawh nasep ding ompak in nikhat sung bek hi nitha 100 ongpia ning ci a ong zol a om leh up khak hetlo ding a hihi. Gam mi pawlkhat ten sum zonna in ong nei in, khua nawl ah ka inn puahpak ding om ci in, nitha tampipi tawh mi zol thei uh hi. Up kha in izuih khak leh khuanawl ah ong paipih ding uh a, inn lui khat ah hih inn hi puahding ong cidingin, I puanteng ong suahsak ding uha, tua khitteh I puan teng tawh ong taisan ding uh hi. Tua dan in khem atuak ei Zomi honkhat zong omkhin a hih manin, hidan thu khawng tawh ong kizol khak himhim a leh upkhak hetlo ding thupi hi. Malaysia I om sung: Malaysia I om sung in ahih theihnak leh Nungak Tangval ten namdang zi/pasal neih lohding hanciam ding hihang(adiakdiak in kawl zi/pasal). Malaysia ciang bek tawh lungkima gam thumna lunggulh keng aci I om leh bel thukhat hi bilbel dinga, kei ka tupna leh ka sawmna Malaysia ciangbek hikei aci peuhmah in neihloh ding thupi mahmah hi.