KAURAN NA (Neng: Sonjai Salenga)

J une 27, 2014 at 10:14pm

Ngening dinatang na bulan ning kauran,
Danum qng kailugan bayu mu naman.
Dati dabiral makalto ing bantilan,
Ngeni karagulan makalbug ne pin man.
Ing tiup ning abagat ketang dayat malat,
Subung ing danum palbug na ngan ing palat.
Dimla ning ambun managkat yang manunyat,
Kapeng busuk-busuk yamu ing katapat.
Ing patak ning uran keng yeru babarug,
Anti mong lango bubuyung qng balugbug.
Qng lakas ning uran salu ku karug-karug,
E mipatudtud pota bigla nang lumbug.
Y Tatang oyan nang dumulung qng ilug,
Ban silon biakusan patinga ikusug.
Biya, tilapia, bulig a kisug-kisug,
Manyaman lang ngan ilutung pakalugkug
Paksing licauc, single nasing mapali,
Bulanglang bangus ne man ing katuki.
Miryenda mu lupak at bagkat kamuti.
Abe ko neng kauran taba kang pilmi.
Dapot neng kauran pamamipi masakit,
Uling aring aldo e me pilming akit.
Ing malan maglias-liasan ya mansa dikit,
Ala nang remedyu matsura neng akakit.
Manyaman mandilu magbabad keng uran,
Dapot, bagnang katawan pilming mituran.
Lagnat, sipun, kuku ing kecang saluran,
Unya bale namut pamilya ing tanuran.
.
Nung ing uran anti yang kapagsubukan,
At ing aldo sumlag ne man kabukasan.
Nanu pa ta ing uran atinkayapan,
Dapot panagkat namu ing kaingatan.