Editor: H.

Malsawmtluanga
Ph: 9615425400 / 9436784572

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9436392830 Lalbiaktluanga : 9612322711 Ramngaizuala : 9862386148

Thingsulthliah Sub - Town Weekly Newspaper

VOL. VII
RIPANS BUATSAIH

No. 20 THINGSULTHLIAH

Ni 1 June 2013

(INRINNI)

FREE CLINIC-AH INENTIR AN TAM HLE Tunkar ni 29/5/2013(nilaini) khan RIPANS buatsaihin Thingsulthliah CHC-ah Free Clinic neih a ni a, hetah hian Thingsulthliah leh khaw thenawm atangin inentir an thahnem hle tih kan lo dawng. Tuna RIPANS-a B.Sc(N) IV Year training, Thingsulthliah-a awm mek ten Registration leh thil tul ang ang te an lo buaipui a ni. He Free Clinic-a damlo inentir zat leh Doctor lokalte chu a hnuaia mi ang hi a ni. 1. Medicine : Dr. Lalsanglura, Dr. Rosangi, Dr. F.Lalawmpuii, Dr. H.Lalrinmawia, Dr. Zothansangi, Dr. Vanlalruata te an ni a, Doctor pathumin damlo 250 an en. 2. Gynaecological(Hmeichhe lam natna) : Dr. Nivedita Sharma. Damlo 172 a en a, amah chauh anih avangin zan dar 9:00 thleng a en phah a, a fakawmin a tlawmngai hle a ni. Dr. Nivedita hi RIPANS Director Dr. Chawngthanliana thiannu a ni. 3. Eye(mit) : Dr. Lalrinzuali, Dr. R.Lalduhawmi. Damlo 220 an en a, kum upa zual tlem-a-zawng hnenah a thlawnin tarmit an pe bawk a ni. 4. Paediatric(Naupang lam) : Dr. C.F. Zodinpuii. Ani hian naupang damlo 143 lai a en hman a ni. 5. Dental(Ha lam) : Dr. Vansangzuali. Damlo 95 a en hman.
Heng bakah hian X-Ray mi 44, ECG(Lung lam enna) mi 23, Thisen leh zun test 232 tih hman a ni a, damdawi a thlawnin sem a ni bawk. An damdawi sem te hi strip,Syrup,Drop ang chi hi pakhat zela chhiarin a vaiin 1344 an sem a, Cheng Nuai khat chuang man a tling a ni. RIPANS Director Dr. Chawngthanliana hmalaknain Thingsulthliah hmunah Free Clinic buatsaih a ni hi a lawmawm tak zet a, Aizawl lam pan buai ngai lova mipui ten Doctor thiam tak tak te mahni khuaah ngei an entir thei hi mipuiin lawmawm an ti a, khawtlang hruaitu Village Council chuan lawmthu a sawi tak meuh meuh a ni. PU C.L.RUALA, M.P(LS)-IN NUAI 10 PE Inrinni kalta khan Pu C.L.Ruala, MP(Lok Sabha) chuan Thingsulthliah High School a rawn tlawh a, Thingsulthliah High School Golden Jubilee lawmna tur chungchang Organising Committee te nen thlirlawkna hun an hmang. High School Golden Jubilee atan hian a Fund atangin High School Field hung nan leh Pavilion sak nan Rs. Nuai 8 a pek tur thu a hma a a lo sawi tawh chu a hmunah a rawn enfiah a, a hautak dawna a hriat avangin Nuai 10 a pek tur thu he hunah hian a sawi. A chungah High School Golden Jubilee Organising Committee te an lawm hle a ni. SELING P/S- I & II AMALGAMATE Nimin zirtawpni khan Seling Primary School-I leh II chu hmun khatah an inchhungkhawm (amalgamate) tan ta a, Karleh thawhtan June ni 3, 2013 atangin hmun khatah class an kal tan ang. Nimin khan P/S-I atangin bungrua awm ang ang te P/S-II(Seling Field bul)-ah an thiar. Thu kan lo dawn danin Sikul pahnih-a zirtirtu pahnih ve ve awm chu he Seling Primary School-ah hian pali an awm dawn ta a ni.

LUNGNGAIH DAR RI Ni 27.5.2013 Dar 4:20 am khan Zonunpari(36) D/o Sangthangpuii, Tlangnuam Hmar Veng chu Thisen Cancer avangin Durtlang Damdawiin-ah a boral a, hemi ni hian Evan Sapthoma(Aizawl) Ephraim Kohhran chuan a vui. Ni 27.5.2013 Dar 6:20 am khan Pu V. Liandawla(61) H/o Pi Banglovi, Tlangnuam Hmar Veng chu T.B. natnain Durtlang Damdawiin-ah a boral a, hemi ni hian Rev. R. Lianzama, Mizoram UPC-in a vui. INNEI Ni 25.5.2013 khan Zoramthari D/o Lalbiaki, Seling Vengsang leh Lalhmangaihzuala, Lungmuat te Lungmuat Presbyterian Kohhran-ah an innei. Zoramthari hi ni 24.5.2013 khan thlahna neih a ni. Ni 25.5.2013 khan Lalhruaizeli D/o Lalchhandami, Seling Champhai Road leh Rinchhana S/o Disthanga, CTI te Salvation Army, CTI Corps-ah an innei. SANITATION MOTOR LEI TUM Tlangnuam Sanitation Committee chuan Bawlhhlawh paihna Motor TATA Ace an hman lai chu an hralh a, tunah hian motor thar lei tumin an buaipui mek. PAWISA KHELH & EIRUK DO NI Naktuk Pathianni hian India Eastern Territory chhunga Salvation Army te chuan Pawisa khelh leh Kut tling lova sum eiruk Dona Ni an hmang dawn a. Corps hrang hrangah hun hmangtu ten hetiang lam hawi hian thuchah an puang ang. TLANGNUAM HAUHUK Kar kalta inrinni khan Forest Wildlife Division te Tlangnuam-ah lokalin Hauhuk man an tum a. Flat-iron a siam Bawm chhungah Hauhuk hi a luh duh mai loh avangin a kah mutna-in an kap a. a damdawi hian a hneh loh avangin man theihin a awm lova. Wildlife Division hotute hian damdawi chak zawk an chah leh mek a, Chawlhkar thum chhunga lo thleng hman tura ngaih a ni. Chumi chhung chuan Hauhuk hi tuman lo ti na lo turin Tlangnuam V/C chuan mipuite an ngen.