Chashm e Raushan Pakistan, Dil kee Dharhkan Pakistan
Sehraa Sehraa iskee Dhoom, Gulshan Gulshan Pakistan Apni Hastee ka Haasil, Apnaa Maamin Pakistan Lay kay rahen gay Pakistan, bat kay rahay ga Hindustan Manzil ko sar karna hay, Mushkil say kia darna hay Aazaadi kay Sholay ko, Dil mein Raushan karna hay Pakistan ki Ulfat mein, Apna Jeena Marnaa hay Lay kay rahen gay Pakistan, but kay rahay ga Hindustan Kis nay Shab-khoon maara hay, Shairoon ko Lalkaara hay Bacha Bacha Momin ka, Shola hay Angaara hay Qaum ki Khaatir mar Jaaen, bas yeh Qaumi naara hay Lay kay rahen gay Pakistan, but kay rahay ga Hindustan Hind kay Saaray Soobon mein, Islaami Lashkar hay Tayyaar Kasrat hay Dushman ki Fauj, Wahdat hay apni Talwaar Naam Khudaa ka laitay hain, Ho Jaae ga Bairhaa Paar Lay kay rahen gay Pakistan, but kay rahay ga Hindustan ***
PAKISTAN DAY SPEECH
Izzat Maab Safeer e Pakistan, aur Mohtaram Hazreen e Mehfil, Us roz jab subah ki kiran phooti, to Manto Park Lahore, jisay ab ham, Iqbal Park kay naam say jaantay hain, mein ta had-e-nigah, log he log thay. Halchal thee, Josh tha, Jazba thaa, Lahu mein walwalay ki hiddat thee, aur Aankho mein, umeed ki raushni. Iraaday kay bulandi thee, aur Himmat ki puchtagi logon kay us, thaathein maartay samundar mein, Us roz, koi Punjabi thaa, na Pathaan, Balochi na Sindhi, Bihaari na Bangaali. Wo sab aik thay, aik Allah kay maan nay waalay. Sab ki Aik umang, aur aik hi manzil. Aik hi junnon aur aik hi khaab wo sab, husool-e-manzil kay ehsaas, ki maala mein piroy hua thaay. Unkay dilon ki dharhkanein, ham-aahang thein, aur zubano par aik hi naara Lay kay rahen gay Pakistan, but kay rahay ga Hindustan Khawaateen o Hazraat, Wo yaum-e-saeed thaa, Tayees March Unees sau Chaalees. Wo tareekh saaz din, jab huquuq kay husool ki, taweel jid-o-jehed mein, Congress ki, mustaqil hat-dharmi, ka nishaana ban-nay walay, Chhay karorh musalmanon nay, waashigaaf alfaaz mein, mutahidda Hindustan mein apnay liyay, jughraphiaai taur par mulhiqa, muslim-
riyaston say kamtar, kisi dastoori hal ko, naaqaabil-e-amal qar day diya. Us Roz, Qarar Daad-e-Pakistan kay zareey, Islaamian-e-Hind nay, apnay liyay, jid-o-jehed-e Aazaadi ka intikhaab kar kay, apni tawanaaeeon, aur tehreek ki waazeh simt, muta-yyan kar li aur. Is qaum ki qiadat, us Rahnuma kay haath mein thi, jis ki azmat aur usool pasandi kay, ghair bhi motarif hain. aur jiskay, kirdar-oshakhsiat par, Hakeem ul Ummat, Shaair e Mashriq, Allama Muhammad Iqbal, ka yeh shair saadiq aata hay Nigah buland, sukhan dilnawaz, jaan pursoz Yehi hay rakht-e-safar meer-e-kaarwaan kay liyay Aur phir, chashm-e-falak nay, Quaid-e-Azam, Muhammad Ali Jinnah, ki walwala angaiz qiadat mein, saat saal kay qaleel arsay mein, alaihda watan kay khaab ko, tabeer mein dhaltay daikhaa. Mohtaram Haazreen, Husool-e-Aazaadi kay baad, Mamlikat-e-Khudadaad, Pakistan, nay zindagi kay tamaam showboon mein, bay inteha taraqqi ki hay. Taaham, ham nay abhi bahot aagay barhna hay: Chalay chalo, keh wo manzil, abhi, nahi aaee Hamein nahi bhoolna chaaheeyay, keh Iss Pak watan ki bunyadon mein, Shaheedon kay lahu hay. ungint qurbanion ki daastanein hain.
Mazloomon ki aahein hain. Buzurgon ki duaen hain. rah mein kat
marnay waalon ki hasratein hain. Kia apnay zaati, aur grohi mafaadaat kay liyay, ham apnay aslaaf ki roohon say, dhoka kar saktay hain? HARGIZ NAHIN! Haazreen e Mehfil, Aaj Pakistan aik jauhari taaqat hay. Aaein mil kar apnay ittihad-oyakjehti, jazba-o-amal, aur quwwat-e-eeman-o-ikhlaas say issay naaqabil-e-taskeer banaa dein. Pakistan Paida baad!