Onartzen dut ez naizela gaztetan bezain lehorra, errazago samurtzen
naizela..., nola esango dut, kontu humanoekin, nahiz eta Gabonetan nire gaztaroko lehorkeriara itzuli sentimentalkeriari dagokionez. Nik ere, zuek ez eze, jaso ditut watsappez asmo onak eta maitasun adierazpenak erakusten dituzten mezu, bideo eta argazkiak, batzuk- batzuk eguzki-loreen forman. Argazki horiekin ere jaso dut berri hau (itzulpena nirea da): Barkos Gabonetan ere sektarismoak jota: jai hauek zoriontzeko euskal nazionalismoari dagokion lore bat erabili du. Izenburua Navarra.com atariko El Espaol egunkari digitalean irakurri dut. Berriaren garapenak dio, hitzez hitz, Barkosek erabili duen lore lehor eta itxura txarrekoa aurkitzen da bakarrik Piriniotan, Pais Vasco-n eta Kantabrian. Erreparatu geografiaren erabilera zitalari, zeina artikulugilearen kontra itzultzen baita, izan ere, horren arabera Pirinioak ez dira Nafarroa. Ez eta Urbasa-Andia, nire etxe ingurua, nondik ekartzen baitziren eguzki- loreak Arbizuko atari buruetan paratzeko. Askorentzat, jarraitzen du berriak, eguzki-lorea baskoak babesten dituen lorea da; horixe aukeratu du Barkosek nafarrei zorionak emateko. Nafarroan gertatzen ari den prozesuaren gauzarik interesgarrienetakoa zera da: agerian uzten duela urteetan gertarazi den berrezarpen ideologikoa zeina frankismoaren pean hasi baitzen. Ideologia da besteen bartzak bai baina norberaren zorriak ez ikustea ahalbidetzen duen errealitatearen zati ezkutu hori. Artikuluaren egileak bere zorriak ez ikusteaz gain, besteren bartzak hiltzeko edozer erabiltzeko dago prest, baita bazokak ere. Eta bazokek beren lana egiten dute, egunero erabiltzen badituzu batez ere. Nafarroa erregimen bat izan da, beste toki asko bezala, partidu bera urteetan eta urteetan agintean egoteak erregimenak osatzeko joera baitu; eta erregimenaren sostengatzaileek edozer egiteko prest daude boterea berreskuratzeko. Eta niri osti txarrak barrunbeak kiskaltzen dizkit. Gauden bake eta maitasun sasoi honetarako batere ona ez dena.