Naskah Teater Tradisi Japin Carita

IMBAH SATABUL, SATABUL PULANG

Karya MS. Wijaya

Dramatic Personal
Rusma
Anang Jagau
Udin Taguh
Yati
Yana
Janah
Utih
Orang I
Orang II
Orang III

CERITA KEHIDUPAN DI SEBUAH KAMPUNG. ADA BEBERAPA REMAJA, DI

ANTARANYA ADALAH RUSMA. RUSMA ANAK TERTUA DARI TIGA
BERSAUDARA MEMPUNYAI MASALAH YANG TIBA-TIBA MEMBUAT DIRINYA
JADI BAHAN PEMBICARAAN OLEH TEMAN-TEMANNYA.

1 Japin Carita IMBAH SATABUL, SATABUL PULANGKarya MS. Wijaya

 ADEGAN I

(Di Gardu, dua orang pemuda sedang mengobrol sambil bermain kartu domino.)
ANANG JAGAU : Din, nyawa mandangarlah habar?
UDIN TAGUH : Hah?
ANANG JAGAU : Nyawa mandangar habarlah, jar nda?
UDIN TAGUH : Undakah?
ANANG JAGAU : Hi’ih...
UDIN TAGUH : Napanya tadi?
ANANG JAGAU : Astaga, Din. Nyawa, nih, pabila jadi tutulian kaya ini?
UDIN TAGUH : Manyambati nda kah, Nang? Kalahikah kita?
ANANG JAGAU : Ujar nda, mandangar habarlah? Disahuti “huhh-hahhh” haja
matan tadi.
UDIN TAGUH : Waluh bajarang... Kada malihatkah nda lagi fokus,
nah?!Talinga nda lagi basumpal headset!
ANANG JAGAU : Warik, nih! Kanapa kada bapadah?
UDIN TAGUH : Mata nyawa picak, kada balilihat!
ANANG JAGAU : Kalahikah?
UDIN TAGUH : Nyawalah, jaka lain sapupu nda kam, sudah am nda picik!
Habar napa garang?
ANANG JAGAU : Jaka kawan haja kita, nih, nda ulah gangan waluh dah nyawa
tu!Pina musti lalu!Banyakkah untalan?
UDIN TAGUH : Warik, nih! Habar napa jar nda?
ANANG JAGAU : Itu, nah, subuh tadi urang batangkapan, jar!
UDIN TAGUH : Hah? Bujur-bujur, ja nda kada percaya mun ilmu dadangaran
haja.
ANANG JAGAU : Tapi pinanya ini bujuran pang, Din ai.
UDIN TAGUH : Jar siapa?
ANANG JAGAU : Ujar Mama-Abah nda!Nda kada sawat manakuni siapa nang
ditangkap, kawitan nda handak balakas tulak!
UDIN TAGUH : Bah, nyawa, nih,dingsanak ai.Hati-hati mambawa habar, kalo
pina kada bujur!

2 Japin Carita IMBAH SATABUL, SATABUL PULANGKarya MS. Wijaya

ANANG JAGAU : Kisah pintar mamadahi nda, Din ai!
UDIN TAGUH : Mun dasar bujur. Banyak urang bakalahi gara-gara fitnah!
ANANG JAGAU : Nda kada mamfitnah! Dasar timpakul, nih!
UDIN TAGUH : Kawalah mambuktiakan pandiran nyawa?
ANANG JAGAU : Kaina ai bila nda bulik batakun lawan kawitan nda.
UDIN TAGUH : Kada canggih lalu, nih!Talipun kawitan nyawa! Kada
bapulsakah? Bapadah banyak duit!Waluh jua, nih!
ANANG JAGAU : HP disita kawitan nda, sanak ai. Nyawa, nih, muntung kada
batakar!
UDIN TAGUH : Nyawa muntung kada bafitrah!
ANANG JAGAU : Waluh bajarang! Nda lapau muntung nyawa nih!
UDIN TAGUH : Nda tinjak muntung nyawa!
ANANG JAGAU : Waluh!Muha kaya cubik!
UDIN TAGUH : Kada sadar diri, muha nyawa kaya burit panci...!(Masuk
beberapa perempuan yang ingin ke rumah Janah.)
YANA : Nah... Anang Jagau, Udin Taguh! Saban hari abut!Kaya
kampung ni ampun buhan nyawa! Sakahandaknya!
YATI : Uyy... Sasadangnya!Banyaki balajar!Kita parak ujian!
ANANG JAGAU : Eh, babinian!
YATI : Napa lalakian!
ANANG JAGAU : Jangan umpat campur urusan lalakian!
YANA : Kada penting lalu umpat campur urusan buhan nyawa.
Malihat buhan nyawa badua nih asa sakit mataku!
UDIN TAGUH : Yana, jangan tapi manyambati, kalo pina karindangan!
YANA : Lamas... Kada rigi unda!
ANANG JAGAU : Muyak, nih!Bajauh, gin, sana! Babinian kaya nyawa nih
maulah sakit talinga!
YANA : Sakali lagi manyambati nda(Melepas sendal.) Nah, tarima
bigi mata baganal! Pabila garang buhan nyawa ni sadar?
Yati, lakasi kita bajauh!
YATI : Hi’ih... Tapi, hadang (Berbisik ke Yana.)

3 Japin Carita IMBAH SATABUL, SATABUL PULANGKarya MS. Wijaya

YANA : Nah, hi’ih!Kami sakalumpuk kalo lawan sapupu buhan
nyawa? Tolong ai padahiakan, datangi kami manggawi
tugas, gani’i kami!Jangan tahu jadi haja!Tamakan Pangalih
Kawan, ngarannya!
YATI : Inya tuh mantul bila kami mamadahi. Katuhukan manjinet
pang.
YANA : Hi’ih, lalu kada tahu diurang!
ANANG JAGAU : Haratnya muntung mamfitnah urang!
YANA : Mamfitnah napanya? Kami tahu, tapi kami masih malindungi
kawan, kalo pina inya mau ampih? Tahu am wahini, ampih
atau kada. Mun di sakulahan, koler kami baparak!
YATI : Inya tuh babinian kalakuan, maka ai...
UDIN TAGUH : Suahlah nyawa malihat inya manjinet?
YATI : Nyata ai suah!
YANA : Nang, nyawa nih kada tahu habarkah? Subuh tadi urang
batangkapan! Acil Basnah, acil nyawa, kawitan si Rusma,
ditangkap pulisi!
ANANG JAGAU : Hah... Bujur-bujur ja?! Nyawa jangan mamfitnah!
YANA : Kadada untungnya nda mamfitnah! Dijanguki kaluarga, tuh,
jangan kada tatahu muha! Kujuk-kujuk haja gawian!
YATI : Ingatakanlah, sambil dipadahiakan masalah tugas kalumpuk
tadi.
YANA : Kami sudah dihadangi di rumah Janah!Datangi Si
Rusmalah?!Padahi, kami mahadangi!
ANANG JAGAU : Hi’ih, ayuha!
UDIN TAGUH : Ey... Bila katahuan nda buhan nyawa bakaramput, awas ha!
YANA : Kadada untungnya bakaramput dingsanak ai!(Yana dan Yati
Pergi. Anang Jagau dan Udin Taguh masih di tempat.)
UDIN TAGUH : Nang, nyawa kanapa?
ANANG JAGAU : Nda asa kada percaya!
UDIN TAGUH : Nda gin asa kada percaya jua. Di sakulahan, buhannya badua
tu rancak bakaramput!
ANANG JAGAU : Tapi mun bujuran asa sakit hati banar nda. Kawitan nda kada
mamadahi jua!Nda nih model kada dianggap anak!
UDIN TAGUH : Sabar, Nang. Kamana kita nih?Disini hajakah?

4 Japin Carita IMBAH SATABUL, SATABUL PULANGKarya MS. Wijaya

ANANG JAGAU : Kita datangi ka rumah Rusma gin!Nda panasaran!
UDIN TAGUH : Ayuha.Lakasi, Nang! (Mereka Pergi.)

5 Japin Carita IMBAH SATABUL, SATABUL PULANGKarya MS. Wijaya

 ADEGAN II
(Di rumah Janah.)

UTIH : Yana, kayapa, nah.Lawas banar kita ni mahadangi!Si Rusma

kadada cungul jua!
YANA : Tadi sudah nda padahi Anang, pas tatamu.Nda pasani sakira
mamadahi Rusma!
UTIH : Muarnya nda ai!Dahulu inya kada kaya ini!
YANA : “Dahulu”, jar.Model lawas banar tu!Pas masih pacaran lawan
nyawakah, maksudnya?
UTIH : Cemburukah, eyy?
JANAH : Tapi bujur jar Utih, buhannya ai. Kami batiga rancak
bakawanan.Urangnya tu baikan banar! Kawitannya gin
baikan jua!
YATI : Tapi kanapa bisa kaya itu, yo?
YANA : Itu am... Acil kada tahu, Nak ai.
UTIH : Lamas... Kisah tuha, nih.
JANAH : Kaya ini haja, nah. Ditoleransi haja inya kada datang hari ini,
kalu inya lagi sedih?
YANA : Uma ai, heh!Di kelompok lain, sebelum di kelompok ini, dua
kali jua sudah inya ditoleransi kawanan. Iya kalo,Yati?
YATI : Hi’ih…!
YANA : Nyawa ai, Janah ai,nang maambil keputusan. Nyawa ketua
kalumpuk!
UTIH : Bujur!Nda setuju lawan Yana!
JANAH : Tapi nda, nih, kam, kasihan lawan inya!
UTIH : Bujur pulang jar nyawa Janah ai…
YANA : Dasar lakian kada beisi pendirian! Timpakul!
JANAH : Sudah, sudah, setop…! Isuk-isuk, amun inya kada datang
jua, kita ambil keputusan, masih dibuat dikalumpuk atau
kada?!
YANA : Kayapa buhannya?
YATI : Hi’ih haja nda nih…

6 Japin Carita IMBAH SATABUL, SATABUL PULANGKarya MS. Wijaya

UTIH : Hi’ih gin jua…
YANA : Nah, amun kaya itu, kami bulik ai. Lakasi,
buhannya!Yati,lakasi…!
YATI : Hi’ih, ayuha…!
SEMUA : Assalammualaikum…
JANAH : Waalaikum salam… Macam-macam haja, ih, kakawanan
ni!Umai, heh,parut lapar pang, nah.Bamasak ai dahulu…

7 Japin Carita IMBAH SATABUL, SATABUL PULANGKarya MS. Wijaya

 ADEGAN III
(Di Rumah Rusma. Si Rusma duduk. Melamun. Muram.Datang Anang Jagau dan Udin
Taguh.)

ANANG JAGAU : Assalammualaikum…! Rus…! Rusma!

UDIN TAGUH : Rus…!
RUSMA : Waalaikum salam...!Masuk ja! Duduk ja…!
ANANG JAGAU : Rus, nyawa sudah makanlah?
RUSMA : Kada usah balalakun, Nang ai!Mun handak mainjam duit,
kadada lagi! Kaluarga nda bangkrut dah!
ANANG JAGAU : Umalah, Rus!Jangan sangka buruk dulu!
RUSMA : Imbah pang, apa? Nyawa tu, nah, jua, Din ai!Unda kadada
lagi duit sagan nyawa pintai manukar ruku!
UDIN TAGUH : Nda pulang, yat,nang kana sambur…
ANANG JAGAU : Anu... Rus, mana paman?
RUSMA : Abah nda manjanguk Mama nda di penjara. Jangan kisah
takajut!Nyawa konyol lalu mun kada tahu!
ANANG & UDIN : Umailah…
UDIN TAGUH : Rus, kita batiga nih badingsanak.Basapupu sakali. Bakisah
pang nang sabujurnya!
RUSMA : Mulai pabila buhan nyawa tu maurusi hidup nda? Nda nih
lagi mauk!
ANANG JAGAU : Nang ngaran dangsanak ni, Rus ai, harus saling mambantui!
RUSMA : Unda nih banyak masalah, tapi kadada nang hakunnya
mandangari!
UDIN TAGUH : Ni kami hakun mandangari, nah. Lakasi bakisah, Rus…
Kanapa Acil sawat kaya itu?
RUSMA : Buhan nyawa tahu ai, kalo, mun kami ni sudah bangkrut?
Nah, urang nang katuju mainjam duit lawan Mama tu, bulan
tadi lari!
ANANG JAGAU : Siapa, Rus?
RUSMA : Paman sate nang rancak bajualan di muka masjid tu, nah!
Parak satangah milyar sidin mainjam duit!Mana bila
manukar hayam, rancak bahutang! Rahatan Mama
mandatangi ka rumahnya, sakalinya urangnya kadada lagi!

8 Japin Carita IMBAH SATABUL, SATABUL PULANGKarya MS. Wijaya

UDIN TAGUH : Nyawa tahulah kamana sidinlari?
RUSMA : Jika nda tahu, kada bakajadian kaya ini pang!
ANANG JAGAU : Dasar timpakul! Kanapa nyawa kada bakisah, Rus?
RUSMA : Kamana nda bakisah? Nyawa badua sibuk kujuk-kujuk!
Kawitan nyawa sibuk bajualan!Kadada nang bagaduh!Napa
kaluarga nda ampih bajualan, gin, kada ditatakuni!
UDIN TAGUH : Uma, Rus… Amun kami dikiyau, kami mau ai mandangari!
RUSMA : Cah… Pandir wara!
UDIN TAGUH : Ayuha.Sudah, Rus.
ANANG JAGAU : Anu, Rus… Kayapa sambungannya?
RUSMA : Buhan nyawa badiam hajalah. Unda bahari suah manjinet,
makanya kurus!Iimbah malihat nda bakurus, lalu ai Mama
nda kapingin jua!
ANANG & UDIN : Bujur-bujur ja!
RUSMA : Makanya jar nda, buhan nyawa tu kada tatahu muha lawan
kaluarga! Nda ni jarang kaluar rumah marga handak baampih
manjinet ni pang!Ngalih banar maampihinya! Gara-gara
tasalah kawan haja!
ANANG JAGAU : Kadanya kami kada tatahu pang…
RUSMA : Cah… Buhung! Gara-gara bangkrut bajualan hayam,Mama
nda ganti profesi, manggini’i urang bajualan sayur haja
lagi,sambil jadi bandar jinet!
UDIN TAGUH : Kanapa kada ditagur, Rus?
RUSMA : Kaya apa handak managur? Hujungannya ganal, kawa
mahidupi kami batiga badingsanak!
ANANG JAGAU : Nah, mana ading nyawa?
RUSMA : Umpat Abah nda!
UDIN TAGUH : Kanapa nyawa kada umpat?
RUSMA : Nda supan! Tahulah disupan? Nda handak ampih ja sakulah!
ANANG JAGAU : Jangan, Rus ai…! Kami ni, nah, biar dianggap urang macal,
biar balajar kulir, tapi kami kada hakun ampih sakulah!
RUSMA : Banyak pandir buhan nyawa nih! Nda koler tatamu urang
banyak! Buhan nyawa mun manambahi pikiran nda, baik
bulik ha!

9 Japin Carita IMBAH SATABUL, SATABUL PULANGKarya MS. Wijaya

ANANG JAGAU : Akayrum… Anu, Rus. Tadi buhan Yana mancari’i
nyawa.Manggawi tugas kalumpuk, jar!
RUSMA : Nda handak ampih sakulah, jar nda!
ANANG JAGAU : Jangan nang kaya…
RUSMA : Bulikan, jar nda!
UDIN TAGUH : Waduh, iyapang, disambur pulang... Ayuha, Rus ai. Basabar,
Rus, lah? Lakasi, Nang…. Kami bulikan.
Assalammualaikum…!
RUSMA : Waalaikum salam! Datang ka mari manambahi pikiran
haja!Baik bawa guring!

10 Japin Carita IMBAH SATABUL, SATABUL PULANGKarya MS. Wijaya

 ADEGAN IV

(Seminggu kemudian. Di rumah Janah.)

YANA : Uma ai,Pukul barapa nih, maka sudah panas
manggantang?Hati panas jua, nah! Si Rusma ni, heh, kada
datang pulang pinanya hari ini.Minggu tadi sudah kada
datang! Kita ni parak lagi ujian!Hari Selasa,try out, dah!Ini
tugas terakhir! Utih, nih, mana jua?!
YATI : Kaya apa, yu? Nda bingung, nah.
JANAH : Kaya apalah...Nda taumpat bingung, buhannya ai.
YANA : Jaka kaluarakan haja matan kalumpuk, samalam tu!Pakai
acara kasian pang. Kawan, jar, kasian.Kawan nangapa kaya
itu? Yati,sudah nyawa hubungilah, Rusmanya?
YATI : Hi’ih, sudah…
UTIH : Assalammualaikum…! Buhannya!
SEMUA : Waalaikum salam…!
JANAH : Kanapa nyawa, Tih? Kaya disasah hantu!
UTIH : Anu... Rusma kada datang pulang, kalo?
YATI : Hi’ih. Napa?
UTIH : Pinanya inya kada kawa datang!
SEMUA : Kanapa?
UTIH : Nda nih hanyar haja tahu habar, subuh tadi Abahnya Rusma
mati! sakit jantung, jar!
SEMUA : Inalillah wa’ina ilaihi ro’jiun...
UTIH : Kita kasanaankah? Pinanya mayatnya sudah
dimandiakan,baisukan tadi, ini hadap dikubur haja lagi.
YANA : Tapi tugas baluman tuntung, isuk dikumpul!
JANAH : Yana, kakawanan barataan, jangan mamikirkan diri
sorang!Kita janguki inya! Kasian, minggu tadiMamanya
ditangkap pulisi marga katahuan jadi bandar jinet, hari ini
abahnya pulang nang habis umur!
UTIH : Lakasi, kita kasanaan, yu? Bujur jar Janah!
SEMUA : Lakasi…!(Mereka pergi. Sementara Anang Jagau,
Udintaguh, Rusma di jalan menuju pemakaman.)

11 Japin Carita IMBAH SATABUL, SATABUL PULANGKarya MS. Wijaya

ANANG JAGAU : Sabar, Rus. Rejeki lawan umur sudah ada nang maatur.
UDIN TAGUH : Contohnya kaya kami badua ni, nah.Imbah bulik matan
rumah nyawa minggu tadi, kami mau baubah.
RUSMA : Kaya apa handak sabar? Mama nda masuk penjara gara-gara
nda, Abah nda habis umur gara-gara talalu mamikirakan
kaluarga.Imbah Satabul, Satabul Pulang!Macam-macam
musibah kaluarga nda!
ANANG JAGAU : Kita ambil hikmahnya haja, Rus ai. Sasadangnya sudah kita
baramian. Mungkin ini taguran Tuhan.Lakasi kita ka
kuburan!Ading nyawa sudah badahulu lawan Mama nda,
tadi!
RUSMA : Nda marasa kadada artinya lagi hidup di dunia ni...(Masuk
Orang I, Orang II, Orang III yang juga ingin pergi ke
pemakaman.)
ORANG I : Itu si Rusma, yat!
ORANG II : Purun haja masih inya batampai muha, lah?
ORANG III : Hi’ih...!
ANANG JAGAU : Eyy... Baapik bapandir! Buhan nyawa nih kawan sakalas si
Rusma, kalo? Kaya lain kawan, ha!
UDIN TAGUH : Kanapa muntung pina pirut? Bajauh matan sini mun cagar
manyambati haja!
ORANG I : Kisah nyawa, nih! Angin-anginan haja, baik kaina tabulik
pulang ai.Dasar kaluarga kada beres!
UDIN TAGUH : Ey.. Babinian, muntung kada suah bafitrah! Bajauh pada sini,
jar nda!
ORANG-ORANG : (Mulut komat-kamit. Pergi.)
RUSMA :Mandangar saurang, kalo? Kadada lagi nang bagaduh lawan
nda!
ANANG JAGAU : Jangan kaitu! Kita dingsanak!Kaluarga! Iya kalo, Din?
UDIN TAGUH : Hi’ih, Nang ai! Kita ni matan lagi halus samuak saliur!Biar
mbah ganal sawat kada tapi bahiranan, tapi wahini kami
sadar, kaluarga panting banar!(Masuk Janah dkk.)
JANAH : Assalammualaikum...!
RUSMA, ANANG, UDIN : Waalaikum salam...!
JANAH :Rusma, kami turut berduka citalah.Mudahan almarhum Abah
nyawa tenang disisi-Nya.

12 Japin Carita IMBAH SATABUL, SATABUL PULANGKarya MS. Wijaya

RUSMA : Amin, tarima kasihlah...
YANA : Rus, nda minta maaflah... Nda rancak sarik, manyambati
nyawa di balakang.Nda sadar, manyambati urang di
balakang tu kada baik.Ujung-ujungnya bisa jadi fitnah!
RUSMA : Ayuha, kada papa. Salawas ini nda sadar, rancak banar
mangalihi urang. Yana, kakawanan sabarataan, nda minta
maaflah sudah mangalihi sabarataan.
KAWAN-KAWAN : Hi’ih, kadapapa...
JANAH : Alhamdulillah... Nah, jangan basangkalan lagilah,
kakawanan.
UTIH : Hi’ih... Nang, Din, Unda shimuang banar buhan nyawa
badua tabulik kaya bahari lagi. Ingat, kada, pas lagi halus,
kita rami bamainan?
ANANG & UDIN : Ingat banar, coy ai...!
JANAH : Rusma, Anang, Udin, buhan nyawa handak kakubur, kalo,
nih?
UDIN TAGUH : Hi’ih...
JANAH : Kami handak baimbai, kawalah?
RUSMA : Kawa banar!
ANANG JAGAU : Lakasi, kita tulakan!
SEMUA : Ayuuu...

Selesai
***

Banjarmasin, 02 Februari 2017

13 Japin Carita IMBAH SATABUL, SATABUL PULANGKarya MS. Wijaya