Professional Documents
Culture Documents
Trinity awmzia/nih rinna hi tûn hma aṭangin a nih theih dan leh
theihloh dan ngaihtuahna rilru ah alo inbuan ve fo ṭhin a. Trinity rin dan a ni
emaw, Oneness rin dan a ni emaw, thenkhat anga thlahtu te atanga pawm
zawk anih vang ngawta, sahuai thingvawna pawm loh lam rindan hnawl sak
erawh ṭha ka ti hek lo.
Trinity chu enge ni? Tri leh unity belhbawm thumal a ni a, Pathian
pakhat GOD nihna sawina a ni. Tri = pathum (Pa, Fapa, Thlarau Thianghlim),
Unity = Pakhat (Patian). Isua chu Pathian a ni, Pa chu Pathian a ni, Thlarau
Thianghlim chu Pathian a ni. A Tri na chu Isua, Pa leh Thlarau Thianghlim a ni
a a Unity na chu Pathian a ni. Pathian pathum a awm tihna nilovin Pathian
sawina vek pathum a awm tihna a ni.
Pathian pakhat chauh a awm ti si chu chu engvanga sawi hran nge a
tul? Ele, heng pathum te hi Pathian hnathawh dan hrang theuh thil tih in
anglo vek a ni si a sawi hran loh chuan Pathian rorelna kan hmu in kawlkalh
dawn a ni. Anih leh heng pathum te hi a awm hrang reng em?
Awm hrang reng e, a awm hran avang hian Pathian rorelna chu kan hre
fiah zawk a ni. Engtin? Pa chuan Pathian rorel hna a khaikhawma, Fapa
chuan ngaihdamna(Chhandam tu), Thlarau Thianghlim chuan tanpuina leh
sual hriata thiamloh chantirna.
Pa leh Fapa leh Thlarau Thianghlim te hi pumkhat leh lak hran theih loh
duhdan thuhmun vek, hnathawh dan in anglo anni. Pa hi Pathian rorelna
kenkawhna a ni a, chu a rorelna hmanrua chu Thlarau Thianghlim a ni.
Thlarau Thianghlim chu a nunga, thlarau chunga thunei tu a ni, a thianghlima
bawlhlawh leh sual reng reng a ngaithei lo a ni.
Chu Thlarau Thianghlim chu sawi tawh angin Pathian mize ṭhatna tawp
entirna nung renga awm anih avangin bawlhlawh reng reng a ngaithei lova,
a sawi chhia leh a hnawl tu chu ngaihdam theih a ni lo, Pathian thatna tawp
duhlo anih tawh avangin kawng dang a awm tawh lo.
Chu Thlarau Thianghlim duhdan nung renga chu sawi chhiaa hnawlin
Lucifer a chuan amah leh Pathian thlarau siam hmun thum athena hmun 1
dawn lai chu thlemin a dodal pui ta a. An duhthlanna ngeiin chatuan atana
Pathian ngaihdam theih lohvin an in barhlut ta a ni, chu ngaihdam theihlohna
thu chu Pathianin Amah atanga Thlarau Thianghlim a tirhchhuah ruala Amah
veka roreltura ding Pa thu chhuak awm sa a ni.
An mit alo var a, Pathianin thlarau tisa neiin a siam ani tih an inhriat
meuh chuan Setana rilru ang a mit lo var in an mahni famkim lohna leh
saruak hria in an in zahpui ta a, Pathian ang an lo nihna chu chhia leh ṭha
hriatna ah chiah alo ni si. Pathianin “In ei ni la la in in thi ang” a tih chu
roreltu Pa rorelna ah chuan thi tlak mitthi an lo ni ta reng maia, Pa thinlung
ah chuan an thi ta der mai.
Mahse mihring hi chhan neia Pathianin a siam a ni kan tih tawh kha, a
hmangaihna tawp lan tir theihna mi nung, sual reng reng hre lo Hmangaihna
chiah pai, Fapa kal tlanga rorelna neih tur a ni bik tlat mai. Sual reng reng pu
ve lo, Pathian hmangaihna hlang, ngaihdamna ringawt ngaihtuahtu Fapa
Isua chuan a Hmangaihna in a tuar zawh leh zawhloh chu mihring innghahna
neih chhun a ni.
Fapa chuan Pa leh Thlarau Thianghlim duhdan a dodal ngai reng reng
lova, Pathian nihna neisa, Thlarau Thianghlim leh Pa nihna tawmpuia lungawi
sa a awm vek anni zawk a. An duhdan taka kan tana Pa leh Thlarau
Thianghlim ti lungawi leh tura ama tana hremna Dan siam nilo, a
hmangaihte tana Pa leh Thlarau Thianghlim hmanga hremna Dan awm sa
zawng zawng te chu zawh famkima Pathian(Pa, Fapa, TT) lungawina thlen
famkim leh a tum anih chu (a tan nilo i tan leh ka tan), “Mi tirtu duhzawng tih
hi ka chaw tui ber a ni”a ti.
Pa hneh tawh lova paih thlak leh Thlarau Thianghlimin chatuan atana
thiamloh a chantir tawh hnu a ni tih in hre mahse Lucifer-a chuan Pa nilo,
Thlarau Thianghlim nilo Fapa (Isua) tal chu hneh theih ala inringa vawi tam
tak a thlem a ni. Mihring tana rorel tur Pathian(Isua) chuan Pathian nihna a
ṭawmpui thin Pa leh Thlarau Thianghlim thiltih theihna chuan an kalsan a ṭul
chang a awm thin a.
Setana hi kan tan min tlan nan a hneh a ngaih vang leh kan tan
thiamloh chantir chu alo kal chhan a nih si avang in hnehtu nisa Pa ropuina
chuan a kalsan ṭhin a, Setana bawl at tuarna chu a kut ah a nghat a ni. “Ka
pa, ka pa engatinge min kalsan” tiin a rum a ni. A lungngaih vawrtawp lai
pawhin Pa chuan a pui thei lova, a ti harh turin Fapa(Pathian) aia hnuai fê a
siama awm Vantirhkoh erawh alo ding ve hram a ni.
“Fapa meuh pawh ni mah sela, a thil tuarahte chuan thu awih a zîr ta a
ni; tichuan, tihṭhat famkima lo awmin, a thu awih zawng zawngte tân
chatuana chhandamna bulpui a lo ni ta.” Pathian (Pa, Fapa, TT) nena kan
inremna chu Amahah chuan nghaha lo awmin a rinchhan apiang te chu Pa
leh Thlarau Thianghlim pawhin thiamloh a chantir thei ta lo.
Isua chuan kan tan tuarin, kan sualna zawng zawng phurin min
ngaidam tawha. Keini en lova Isua en tu Pa Pathian chu Isua tuarnaah
lungawi tawh mahse Pa rorelna chuan mihring te hi engtiklaimahin
thianghlim leh fel a ti ngai dawn lova, kan felna lai ber pawh pawnchhe
hnangkhâi leh pan bawmkhak lûk in ni e ti tu hian ro ala rel leh dawn a.
Isua chu he khawvel ah lokal leh in a beram te chu a rawn hruai anga,
Pa hnenah mihring bawlhlawh te chu Amah an ṭana a thihna leh thawhlehna
an ṭawmpui ve avangin an ai Pa hmaah a din sak anga, pawnchhe hnangkhai
leh panchhe bawmkhah lûk ang mihring te ṭan nan chuan a kut, a ke leh nâk
a ser chu a hmuh tir ang. “Tupawh mi hmaa mi ṭan apiang chu ka Pa van a
mi hmaah ka ṭan ve ang” a tih kha.
Chu Isua lo kal lehna tur chu Amah (Fapa) hnenah pawh hriattir in a
awm lova roreltu Pa chauh lo chuan a hre lo a ni. Fapa chuan a zawmpui Pa
leh Thlarau Thianghlim duhdan a hriat chian angin alo kal leh dawna thil
thleng tur chu a sawi lawk thei a, a hun leh ni erawh Pa thu thu a ni a ti.
Aigupta saltang chhuak tawh(Isua tlan tawh) Israel fa te ni mah ila kan
kawngka bianga Beramno thisen kan tah loh chuan, mi tha tumah an awm
hrelo tu Pathian (Pa) chuan tlan tawh/saltang chhuak kan nih leh nih loh lam
a en ve dawn lova, en tlak kan awmloh avangin Beramno thisen kai chu a
kalhlen tawp anga, a kailo erawh chu a suat hmiah hmiah mai dawn a ni.
Rorelna chu Pa leh Fapa leh Thlarau Thianglim duhdan a rel a ni dawn a ni.
Fapa ṭan apiang te chu Thlarau Thianglim awmpui anni anga, chu chu Pa in
thiam a chantir ang.