Сидни Шелдон

Их гэрийн эзэгтэй
www.kiebooks.com
 Эхлэл

Кэйт

1982 он

Бүжгийн асар том танхим Кэйтийн төрсөн өдрийн баярыг тохиолдуулан ирсэн хий сүгээр
дүүрэн байлаа. Тэр хий сүгүүд яс махан бие цогцостой зочдын дундуур сүлжилдэн байхыг
Кэйт Блэкуэлл ажиглан, улиран өнгөрсөн өөр цаг үеээс ирсэн сүг сүнснүүд огт ажиг сэжиг
аваагүй байгааь оройн гоёлын палааж, смокингтой хатагтай, эрчүүл лүгээ бүжиглэхийг харж
байв. Мэн муж улсын Дарк-Харбор дахь “Хушийн гүвээ” өргөөнд хийж буй найранд зуугаад
зочид хүрэлцэн иржээ. “Сүг сүнсийг эс тоолбол тэр шүү дээ” гэж Кэйт дотроо бодон
инээмсэглэв.

Кэйт бие гоолиг, нуруу намхан. Ихэмсэг намба төрхтэй болхоор өндөр юм шиг харагдана.
Сэргэлэн бор нүдтэй, дуулгаваргүй маягийн эрүүтэй, эрс огцом тэг бүхий нүүр царай нь нэг
үзсэн хүний ой ухаанд даруй харагдаж үлдэнэ. Энэ бүхэн түүнд шотланд, голланд өвөг
дээдсээс нь уламжлан иржээ. Урьдын цагт мөрөн дээгүүр нь намиран унждаг асан буржгар
хүрэн үс нь одоо нэгэнт бууралтсан байна. Зааны ясан өнгөтэй хилэн палаажны тодруулан
сүүдэртүүлэх арьс нь аливаа настай хүнийхтэй адил тунгалаг юм шиг харагдана.

-Би 90 настай гэхэд насаа мэдрэхгүй юм. Энэ олон он жил хаашаа нисэн оддог байна вэ?
Хэмээн Кэйт нэг бодоод бүжиглэж буй сүг сүнснүүдийг харж,

- Эд нар л мэднэ дээ. Тэгэхэд эд нар амьд байсан. Эд нар чинь улиран одсон он жилийн нэг
хэсэг, миний амьдралын нэг хэсэг... гэж бодлоо. Тэгээд баярын царайгаар мишээн буй негр эр
Бандаг харав. Хажууд нь Кэйтийн хайрт Дэвид зогсож байна. Өндөр гоолиг, залуу сайхнаараа
Кэйт Дэвидийг чухам ийм байх үед нь дурлаж билээ. Дэвид нааш харан инээмсэглэхэд:

-Удахгүй уулзана аа, хонгор минь удахгүй гэж бодоод жич хүүгээ үзүүлэх юмсан гэж хүсэв.
Кэйт танхимыг тойруулж хараад хөвгүүнийг олж харлаа. Хөвгүүн найрал хөгжмийн дэргэд

зогсоод хөгжмчдийн тоглохыг чагнаж байлаа. Тэрээр үсээ толийтол самнаж, хар тансар
хилэн пиджак, дөрвөлжин хээтэй өмд өмссөн 8 настай гайхмаар хөөрхөн хүү ажээ. Роберт
хүү гантигаар өнгөлсөн задгай зуухны дээр хөрөг нь өлгөөстэй байгаа хуланц эцэг Жеми
Макгрегортой усны хоёр дусал шиг адилхан. Роберт хүүг өөр дээрээ харц тусаж буйг
мэдэрсэн мэт эргэж харахад, Кэйт хуруугаа гозгонуулан дуудав. Зуу шахам жилийн өмнө
тэнгисийн элсэн хаялганаас Кэйтийн эцгийнх нь олсон хорин кратын очир эрдэнэ болор
дэнгийн гэрэлд гялалзав. Бүжиглэж байгаа хосуудын хоорондуур Роберт хөвгүүний сүлжин
ойртож ирэхийг Кэйт ажиглаж байлаа.

“Би улирч өнгөрсөн үеийн хүн. Энэ хүү бол ирээдүйн хүн. Миний жич хүү хэзээ нэгэн цагт
“Крюгер-Брент” ыг толгойлно доо “ гэж Кэйт бодов. Хөвгүүнийг дэргэдээ ирэхэд Кэйт хажуу
тийшээ болж, зай тавьж өгөв.

-Эмээ таны төрсөн өдрийн баяр танд сайхан байна уу?

-Сайхан байна. Баярлалаа, хүү минь

-Найрал хөгжим гоц сайхан юм. Удирдаач нь ёстой сонгодог зэргийнх.

Кэйт эхлээд ойлгосонгүй. Тэгснээ царай нь туяарч,

-Энэ чинь шилдэг сайн гэсэн үг юмуу даа гэсэнд Роберт хүү инээд алдаж,

-Яг тийм. Таныг 90 настай гэхэд үнэмшмээргүй байна гэхэд Кэйт бас инээд алдаж,

- Үнэнээ хэлэхэд би өөрийгөө эмгэн болсон гэж бодохгүй байна шүү гэжээ.

Хөвгүүн эмээгийнхээ гарыг барьж, хэдийгээр 82 насны зөрөөтэй ч гэсэн хоёул хэн хэндээ
ойр дотныг мэдрэн дуугуй сууцгааж байлаа. Кэйт эргэж, зээ охиноо харав. Кэйтийн зээ охин,
нөхөртэйгөө энэ бүжиглэж байгаа улсын дотор ямар ч яриагүй хамгийн сайхан хос нь байлаа.
Робертын ээж нь хөвгүүн, эмээ хоёрынхоо хамт сууж байгааг хараад “Эмээ гайхалтай хүн юм.
Өтлөхийг мартсан юм болов уу гэмээр. Хичнээн их юм үзэж өнгөрүүлснийг нь хэн ч
таамаглахгүй” гэж бодов. Хөгжим зогсож, удирдаач нь:

- Эрхэмсэг ноёдоо хатагтай нараа, энэ завшаанд залуу ноён Робертыг та бүхэнд танилцуулья
гэв. Роберт хүү элэнц эмээгийнхээ гарыг атгаад төгөлдөр хуурын дэргэд очлоо. Хөгжмийн
дэргэд суугаад царай нь төлөв төвшин болж, хуруу нь хөгжмийн даруулга дээгүүр гүйв.
Хөвгүүн Скрябины зохиолыг тоглосон нь тэнгисийн толь мэт мандал дээр сарны туяа тусах
лугаа адил байлаа. Эх нь хүүгийнхээ хөгжимдөхийг сонсоод: “ Үнэхээр сод авьяастай юм.
Өсөж том болохоороо алдартай хөгжимчин болно доо. Хүү нь эхийн гараас нэгэнт гарч, энэ
дэлхийн хүн зонд хамаарах болно... ” гэж бодов. Робертыг тоглож дуусахад алга нижэгнэх нь
сонсогдлоо.

Найр өндөрлөх ойртжээ. Асар том цэцэрлэгт ширээ засаж, өнгө өнгийн дэнлүү, тууз, хийн
бөмбөлгөөр чимэглэсэн байв. Хөгжимчид тавцан дээр тоглож, ширээний хоорондуур үг
дуугуй зөөгч нар сүлжин зочдын таваг, хундагыг байнга сэлбэнэ. АНУ ын ерөнхийлөгчөөс
ирсэн цахилгааныг уншин сонсгов. Дээд шүүхийн дарга хундага өргөлөө. Мужийн амбан
захирагч магтаалын үг хэлэв.

- ... Манай орны гайхамшигт эмэгтэйчүүдийн нэг. Өглөг буяны олон зуун байгууллагад өдий
төдий их хөрөнгө мөнгө хандивласан нь үлгэр домог мэт болжээ. “Блэкуэлл сан” дэлхийн
тавцанд улс орны хүн ардын эрүүл мэнд, хөгжил цэцэглэлтийн төлөө ихийг хийсэн билээ.
Эрхэм Уинстон Черчиллийн хэлсэн үгийг өөрчлөсхийгээд хэлбэл “ өчнөөн олон хүнд ийм их
ач тус болсон хүн өөр байхгүй”. Би Кэйт Блэкуэллтэй танилцсан аз завшаандаа баярлалаа.”

“ Үхсэн хойноо... Хэн ч намайг мэдэхгүй. Энэ хүн ямар нэгэн хутагт ахайн тухай ярьж байгаа
юм шиг санагдана. Жинхэнэ Кэйт Блэкуэллийн үнэнийг мэдвэл энэ хүмүүс юу гэх бол?
Ойдоо хүрээгүй байхдаа хулгайлуулж байсан, өөрөө ч хулгайч хүний хүүхэд шүү дээ, би чинь.
Хэрэв өөрийн биед үлдсэн сорвийг үзүүлбэл энэ хүмүүс юу бодох бол?” гэж Кэйт бодов.
Кэйт толгойгоо эргүүлж урьд нэгэн цагт өөрийг нь алах гэж оролдсон хүнийг харав. Түүнийг
нүд гүйлгэн хараад сүүдэрт зогсож буй, нүүрээ гивлүүрээр халхалсан эмэгтэй рүү харцаа
шилжүүлэв. Алсад аянга нижигнэх чимээ сонсогдлоо. Мужийн амбан захирагч хэлэх үгээ
дуусгаад Кэйтийг цугласан олонд танилцуулахад Кэйт бослоо. Кэйт ярьж эхлэхэд дуу нь
хүчтэй болоод жигд байлаа.

-Би та нарын хэнээс ч илүү насыг наслалаа. Одоогийн залуучуудын хэлдгээр Яамай байгаа
даа. Гэвч би өдий насыг насалсандаа баярлаж байна. Эс тийм бол өнөөдөр дотнын сайн
нөхөд та нарынхаа дунд ингээд байж байхгүйсэн. Та нарын дотор миний төрсөн өдрийн
баярт оролцох гэж алс холын орноос ирсэн хүн олон бийг мэднэ. Тэд нар аян замдаа ядарсан
байх. Хүн болгоныг надтай адил эрчим чадалтай гэж бодох аргагүй гэхэд нь инээлдэх, алга
таших сонсогдов. Кэйт үргэлжлүүлэн:

-Энэ мартагдашгүй оройг надтай хамт өнгөрүүлсэнд таньд та бүхэнд баярлалаа. Алжаасан
зочид өөрсдөдөө зориулан гаргасан өрөө байранд орж амархад болно. Бусад зочдод зориулж
их танхимд бүжиг болно... гэтэл дахиад л аянга нижигнэж сонсдоход:

-Та бүхэн аадар бороонд шалба цохиулья гэхгүй бол дотогшоо орцгооно уу гэжээ.

Одоо оройн зоог нэгэнт дуусч, бүжиг тараад зочид өөр өөрсдийн тасалгаанд орцгоожээ. Кэйт
сүг сүнснүүдийн дунд ганцаар үлдэв. Номын сангийн тасалгаанд улиран өнгөрсөн он
жилүүдийг дурсан сууж байтал гэнэт сэтгэл нь үймрээд ирлээ.

“ Одоо намайг Кэйт гэж дуудах хүн байхгүй болжээ. Бүгд халин одсон” гэж гуниглан бодов.
Кэйтийн хорвоо давчуухан болсон шиг “Урьдын дурьтгалын навч харанхуйд эмгэнэлтэйеэ
сүрчигнэнэ” гэж Лонгфелла хэлсэн билүү дээ. Кэйт өөрөө асар удахгүй харанхуй халин одно.
Гэхдээ одоо биш “ Би амьдралынхаа хамгийн гол зорилтыг биелүүлэх хэрэгтэй байна. Тэсэж
байгаараа, Дэвид ээ. Би удахгүй чам дээрээ очно” хэмээн Кэйтийг бодож суутал,

-Эмээ... гэж дуудахад нь нүдээ нээв.

Халуун бүлийнхэн нь бүгдээрээ орж ирсэн байв. Кэйт тэднийгээ ээлжлэн харахдаа нэг ч
жижиг сажиг зүйлийг орхигдуулсангүй. “Миний халуун бүл. Миний мөнхийн амьдрал.
Алуурчин, тэнэгүүд, сэтгэл мэдрэлийн өвчтөн. Блэкуэллийнхний араг яс. Хүсэл найдлага,
өвчин зовлонгийн он жилүүд... Эцсийн үр дүн нь юу байна вэ?”

Зээ охин нь ойртож ирээд,

-Эмээ таны бие зүгээр үү? гэв

-Зүгээр. Би жаахан ядарчээ, хүүхдүүд минь, Явж унтья гээд босож, шат руу явлаа.

Яг энэхэн мөчид аянгын дуу чих дөжрөм пижигнэж, аадар бороо асгалаа. Ширүүн борооны
ус цонхыг пулемётын ээлж аятай пижигнүүлнэ. Кэйтийн гэрийнхэн бүгдээрээ шатны дээд
гишгүүр дээр зогсож буй ихэмсэг бардам намбатай жавхлан төгс эмгэнийг нүд ширтэн
харцгааж байв. Цахилгаан гялбалзаж, аянга нижигнэв. Кэйт Блэкуэлл тэднийг хараад өвөг
дээдсийнхээ аялгатай үгээр,
-Өмнөд Африкт бид ийм аянга цахилгаантай аадар бороог “тандерсторм” гэдэгсэн гэв.

Эрт, эдүгээ хоёр дахин хутгалдаж, Кэйт гудмаар ойр дотно сүнс сүгүүдээ дагалдуулан
унтлагынхаа өрөө рүү явлаа.
 Тэргүүн дэвтэр

ЖЕМИ МАКГРЕГОР
1-р бүлэг

-Ай тэнгэр, энэ чинь ёстой нэг тандерсторм байна даа гэж Жеми Макгрегор өгүүлэв.
Хэдийгээр өөрийн нь уугуул нутаг, Шотландын умард хэсэг аянга цахилгаантай аадар бороо
элбэгээрээ алдар цуутай боловч Жеми эдүгээ хүртэл ийм аймшигтай ширүүн бороо үзээгүй
байжээ. Асар их элсэн үүлс тэнгэрийг халхлан гэгээн өдөр байтлаа харанхуй шөнө шиг болов.
Тоостой тэнгэрийг африкчууд “вийрлиг” гэж нэрлэдэг цахилгааны гялбаа байн байн
гэрэлтүүлж, залгаагаар “тандерслаг” гэж аянга нүргэлэн нижигнэнэ. Дараа нь газар тэнгэр
хоёр нийлэх шиг болж, борооны урсгал майхан, урцыг дүүргэж Клипдрифттийн нарийхан
гудамжнуудыг бохир муухай гол горхи болгон хувиргав.

Нойтон шавраар барьсан байшин доошоо сууж эхлэхэд Жеми хажуу тийш үсрэн зайлав.

”Ер нь Клипдрифтт хотоос юм үлдэхгүй болов уу” гэж бодлоо. Клипдрифттийг ерөөсөө хот
гэхэд хэцүү. Энэ бол Вааль мөрний эрэгт байдаг майхан, урц, мухлаг тэрэгнээс үүссэн
тосгон аж. Тэнд алмас эрдэнэ олборлох ганц л зорилгоор өмнөд африкт ирсэн ширүүн
харцтай зэрлэг догшин байрын хүмүүс оршин сууна. Тийм хоосон мөрөөдөгчдийн нэг нь
Жеми Макгрегор байлаа. Тэрээр өтгөн үстэй, цайвар бор нүдтэй, нас 18 хүрч яваа нүдэнд
дулаахан хөвгүүн байв. Тэр бол залуу насны гэнэн хонгор сэтгэлтэй нь илт мэдэгдэх агаад
царайд нь хүний сэтгэлийг татаж чадах цайлган инээмсэглэл тодроно. Сэтгэл оюун нь өөдрөг
үзэл бодлоор бялхсан энэ залуу аливаа асуудлыг амархан шийдэж чадна.

Жеми Макгрегор Шотландаас Лондонь Эдинбургь Кейптаун хүрч тэндээс энэ Клипдрифттэд
иртлээ эцгийн гал голомтоос энэ хүртэл 8000 шахам миль алс замыг туулжээ. Жеми хүү
эцгийн өв хөрөнгөөс өөрт оногдох хэсгийг ах нартаа өгөхөд хүрсэн боловч үүнд огт харамсаж
хар буусангүй. Эцсийн бүлэгт 10 хувь илүү олно гэж мэдэж байлаа. Тэгээд амар амгалан
амьдралыг ардаа орхиж, алс холын энэ цөл нутагт баяжих гэсэн ганц хүсэл зорилгод
хөтлөгдөн ирсэн байна. Жеми ажлын хүндээс айдаггүй. Гэтэл нэг жижигхэн аж ахуйн
чулуурхаг газрыг ухах нь даанч үр ашиггүй байлаа. Жеми хүү ах, эгч, эцэг эхтэйгээ хамт
өглөөнөөс орой болтол зүтгэж ажилладаг боловч гэр орон нь хэзээ ч элбэг дэлбэг амьдралтай
байсангүй. Нэгэн удаа тэрээр Эдинбургийн яармаг дээр очиж үзээд мөнгөөр хичнээн олон
сайхан юм худалдан авч болдгийг мэджээ. Мөнгө хэмээгч эрүүл хүнийг аз жаргалтай болгож,
өвчтэй хүний зовлонг нимгэлдэг байна. Жемигийн олон сайн нөхөд, айл хөршийнхөн нь
үгээгүй ядуу амьдран үхэж үрэгдэж байлаа.

Өмнөд Африкаас хамгийн том алмас эрдэнэ олдсон тухай мэдээг сонсоод ямар их хөөрөн
баярлаж байснаа Жеми санав. Дэлхийн хамгийн том алмас эрдэнэ тэнд сул хэвтэж байсан
гэнэ. Азтай аавын хүүг тэнд тоолж баршгүй их эрдэнэсийн сан хүлээж байдаг гэнэ.

Жеми хүү бодож төлөвлөснөө бямба гаригийн оройн хоолон дээр гэрийнхэндээ хэлжээ.
Харанхуй гал тогооны өрөөнд нэг муу ширээний ард сууцгааж байсан гэрийнхэн нь
Жемигийн ичиж зовнисон юм шиг мөртлөө омог бардам яриаг гайхан сонсжээ.

-Би өмнөд африкт очиж, алмас эрдэнэ эрэх санаатай. Ирэх долоо хоногт тийшээ явна гэхэд
таван хос нүд түүнийг энэ чинь солиорчих нь энэ үү гэсэн янзтай харж байв. Эцэг нь

-Чи алмас эрхээр явлаа гэнээ? Хүү минь чи солиорчээ. Энэ бүх яриа чинь чамайг үнэн
шударга ажил хөдөлмөрөөс холдуулах гэсэн ад албины түлхээс шүү гэхэд Иан ах нь,

-Чи хаанаас зардлын мөнгө олсон юм бэ? Яагаад бидэнд хэлэхгүй юм...

-Хэрэв надад мөнгө байсан бол юу гэж алмас эрж явах билээ... Тэнд мөнгөтэй хүн байхгүй.
Би бусадтай л адил байх болно.Би хүнээс дутахгүй ухаантай, хүнээс дутахгүй хүч
тэнхээтэй...Алзахгүй гэж Жеми хариулахад Мэри эгч нь,

-Энни Корд гомдоно доо. Энни чамайг, хэзээ нэг үг хэлэх бол гэж хүлээж байгаа шүү гэжээ.
Жеми энэ эгчдээ хайртай. Эгч нь 24 гэхэд 40 авгай шиг харагдана. Мэри энэ насандаа гоё
хөөрхөн юм эдэлж үзээгүй. “Би үүнийг өөрчилнө, Мэри гоё хөөрхөн эдлэлтэй болно” гэж
Жеми өөртөө амлав. Эх нь ширээн дээрхи хоолны шавхруутай аяга тавгийг хурааж,
угаалтуурын төмөр саванд хийлээ. Тэр шөнө эх нь Жеми дээр ирж, орон дээр нь сандайлан эх
хүний ёсоор мөрөөр нь тэвэрч, хүүдээ урам зориг хайрлан,

-Миний хүү юу гэж зорьсон бэ, түүгээрээ л бол. Тэнд алмас эрдэнэ байдаг юм уу, үгүй юм уу,
бүү мэд. Байдаг юм бол миний хүү түүнийг олох л болно гээд нөгөө гартаа барьж байсан
хуучин муу түрийвч өгч,

-Үүн дотор хэдэн фунт байгаа. Цаадуулдаа битгий хэлээрэй. Эзэн тэнгэр чамайг минь ивээн
тэтгэх болтугай гэжээ. Жемиийг Эдинбург орхоор гэрээсээ гарахад түрийвчинд нь 50 фунт
байлаа.

Өмнөд Африк орох зам шаналгаатай хэцүү байлаа. Жеми бүтэн жил шахам явж байж тэнд
хүрчээ. Эдинбург очоод тэндхийн нэгэн шөнийн гуанзанд хоол зөөгчөөр орж, түрийвчиндээ
дахин 50 фунт нэмж хийсэн байна. Дараа нь Лондонд очив. Түм түжигнэж, бум бужигнасан
тэр их хотын хөл үймээн, цагт дөрвөн миль хурдтай давхих оминбус хэмээх олон морь
хөллөсөн том мухлаг тэрэгний түжигнэх чимээг гайхаж байлаа. Далбагар том малгай, торон
сүлжмэл банзал, гоё ганган туфлитэй хөөрхөн хүүхнүүд суулгасан сүйх тэрэг өөдөө сөөргөө
хөлхөлдөнө. Берлингтоны цуваа дэлгүүрийн тэнд эмэгтэйчүүдийн сүйх тэрэгнээс буухыг
Жеми бахдан харна. Тэнд алт мөнгө, сав суулга, хувцас хунар, үнэт үслэг эд, ваар шаазан,
эмийн санд учир битүүлэг шилэн сав, гуурс тэргүүтэн эд барааны элбэг дэлбэгийг хэлж
баршгүй.

Жеми Фицрой гудамжны 32 –р байшинд суух байр олжээ. Байрны хөлсөнд 7 хоногт 10
шиллинг төлөх боловч үүнээс хямд сууц олдсонгүй. Боомтод очиж өмнөд африк орох хөлөг
онгоц эрэн өдрийг өнгөрүүлэн орой нь Лондон хотын үзэсгэлэн сайхныг үзэж нүд
хужирлана.Нэгэн оройн “Ковент Гардены” ойролцох зоогийн танхимаас Уэльсийн хунтайж
нэгэн үзэсгэлэн гоо хатагтай лугаа сугадалцан гарч ирхийг харлаа. Хатагтай нь үзэсгэлэнт
цэцгээр чимэглэсэн асар том малгай өмссөн байхыг Жщми хараад “Энэ малгай Мэри эгчид
яасан сайхан зохих бол гэж боджээ. Жеми 1851 онд “Их үзэсгэлэнд” зориулан барьсан Болор
ордонд орж концерт үзэв. Бас Англид анх удаа цахилгаан гэрэл тавьсан Лондоны хөгжимт
театрт “Друри-Лейн”, дуурийн театрт “Савойя” –д орж үзжээ. Хотын зарим гудамжийг
цахилгаан гэрлээр гэрэлтүүлэх болсон байна. Бас телефон гэдэг гайхамшигт шинэ машинаар
хотын нөгөө хэсэгт байгаа хүнтэй ярьж болдог гэж Жеми сонсжээ. Тэгээд хойч ирээдүйд
хүрээд ирсэн юм шиг санагдаж байлаа.

Хэдийгээр ийм олон шинэ зүйл гарч, амьдрал оргилон бужигнаж байсан боловч Англи орон
тэр өвөл эдийн засгийн хүнд хямралыг туулж байв. Гудамжинд ажилгүй, өлсгөлөн хүн
дүүрэн, зодоон цохион гарах, жагсаал цуглаан болох нь олон.

“Эндээс явах хэрэгтэй байна. Үгээгүй гуйлгачин байдлаас зугтья” гэж Жеми бодлоо. Тэгээд
маргааш нь өмнөд африкийн Кейптаун орох “Волмер Касл” хөлөг онгоцны хоол зөөгчөөр
бүртгүүлжээ. Хөлөг онгоц зам зуур Мадера, Гэгээн Еленагийн арал дээр нүүрснийхээ
нөөцийг сэлбэхээр зогсож, тэнгисийн аялал 3 долоо хоног үргэлжлэв. Өвлийн улиралд
тэнгисийн аялал

амаргүй сорилт байдаг аж. Жеми аяны эхний өдрөөс эхлэн зовлон үзсэн боловч барагдашгүй
их эрдэнэсийн сандаа өдөр ирэх тутам ойртож яваа болохоор ер зориг шантарсангүй. Хөлөг
онгоц эквадор хэмээх улаан замыг өнгөрснөөс хойш уур амьсгал өөр болж, өвөл байснаа ид
шидийн гайхамшигаар зун болж, африкийн эрэгт ойртож очих үеээс шөнө бөгчим халуун,
чийгтэй байх болжээ.

“Волмер Касл” Кейптаун үүрээр ирээд Роббен-Айланд дээрх уяман өвчтөний сууринг эх
газраас тусгаарласан нарийнхан сувгаар болгоомжтой явсаар Тэйбл буланд хүрч зангуу
хаяжээ. Жеми хөлгийн тавцан дээр гарч, мандах нартай золгов. Өглөөний манан замхран
хотын дээрээс өнгийсөн Тэйбл уулын дүр тодорхыг бахдан харлаа.

Ингээд зорьсон газраа ирэх нь тэр...

Хөлөг онгоцыг буудал дээр ирж зогсмогц Жемийн урьд өмнө огт үзээгүй жигтэй хачин
хүмүүс хөлгийн тавцан дээр бөөн бөөнөөрөө гарч ирлээ. Тэдний дотор янз бүрийн зочид
буудалд очиж буухыг уриалан дууддаг хар, шар, улаан арьстан байв. Тавцан дээгүүр жаал
хөвгүүд сонин хэвлэл, чихэр жимс худалдан гүйлдэнэ. Сүйх тэрэгний хөтөч нар зорчих
хүмүүсийг дуудан чанга чангаар хашгиралдана. Гудамжны худалдаачид тэргэнцрээ түрэн
бараа тавараа магтан гуугачина. Энд тэндгүй том том хар ялаа нисэлдэнэ. Усан цэрэг, ачаа
зөөгчид олны дотуур түлхэлдэж, зорчигч нар ачаа тээшээ алдах вий хэмээн нүд алдалгүй
ширтэнэ. Энэ бол ёстой нэг эх захгүй бөөн үймээн бужигнаан байлаа. Хүмүүс хоорондоо
Жемийн урьд огт сонсоогүй ярилцаж, мань хүн нэг ч үг ойлгохгүй байлаа. Кейптаун Жемийн
урьд өмнө үзсэн хотуудтай адилгүй ажээ.

Хоорондоо адил байшин нэг ч байхгүй. Тоосго чулуугаар барьсан гурван давхар асар том
агуулахын хажууд цайрдсан нимгэн төмрөөр хийсэн жижиг цайны газар, дараа нь толь
үзмэрийн цонхтой алт мөнгөн гоёл чимэглэлийн дэлгүүр, түүний хажууд ногооны мухлаг
тамхины зүйл худалддаг хуучин муу пин байна. Гудамжаар дүүрэн эрэгтэй, эмэгтэйчүүд,
хүүхэд багачуудыг Жеми гайхан ажиглав. Дөрвөлжин хээтэй шотланд өмд өмсөж, дээрээс нь
хоёр гар, толгойгоо гаргах нүхтэй шуудай угласан кафр хүн явж байгаа харагдалаа. Түүний
өмнө шовгор сийрсэн малгайн нь доороос нямбай сүлжсэн шодон гэзэг нь цухуйсан цэнхэр
дээлтэй хоёр хужаа хөтлөлцөн явж байв. Тэнд бас үс нь нар салхинд гандсан улаан царайтай
чийрэг африкчууд олон харагдав. Тэд нар төмс, эрдэнэ шиш ногоо ачсан тэрэгтэй явж байлаа.
Эрчүүд нь хүрэн өнгийн тансар хилэн өмд, пиджак өмсөж, толгой дээрээ өргөн хүрээтэй
зөөлөн эсгий малгай тавьж, амандаа урт шавар гаанс зуужээ. Хойноос нь хар палааж, өргөн
хүрээтэй бүрх малгай, нүүрээ гивлүүрээр халхалсан эхнэрүүд нь явах ажээ. Толгой дээрээ
том том боодолтой юм тавьсан негр угаалгачин хүүхнүүд, улаан мундир, дуулга, малгайтай
цэргүүд... ер үзээд баймаар сонин жүжиг мэт.

Жеми хамгийн түрүүн хөлөг онгоц дээр нэгэн усан цэргийн өгсөн хаягийн дагуу хямд сууц
эрхээр явлаа. Эзэгтэй нь лут том биетэй, дунд хэр насны бэлбэсэн авгай байв. Тэр авгай
Жемийг хөлөөс нь толгой хүртэл хааад инээмсэглэн,

-Zoek yulle gond? гэхэд нь Жемийн царай улайж

-Уучлаарай... ойлгохгүй байна гэв.

-Англи хүн үү? Алт эрж ирсэн үү? Эсвэл алмас эрдэнэ үү?

-Тийм, алмас эрж ирсэн.

-Чамд энэ байр таарна. Энд чам шиг залуу хүнд хэрэгтэй юм бүхэн бий гэж авгай хэлээд
Жемийг дотогш дагуулан оров. “Өөрийгөө надад хэрэгтэй юмны тоонд оруулаагүй байх
болтугай” гэж Жеми бодлоо.

-Намайг миссис Вентер гэдэг. Сайн нөхөд маань бол зүгээр Ди-ди гэж дууддаг юм гээд авгай
алтан шүдээ яралзуулан инээмсэглэж:

-Бид сайн нөхөд болно гэж найдаж байна. Надаас юу дуртайгаа гуйж болно гэхэд нь,

-Та их эелдэг хүн найртай хүн байна. Хотын зураг хаанаас олох вэ, хэлж өгнө үү гэлээ. Жеми
зураг бариад хотыг судалж эхлэв. Нэг талд нь тариан талбай, усан үзмийн цэцэрлэгийн дагуу
9 миль сунайсан Рондербош, Клермон, Винберг дүүрэг байрлажээ. Нөгөө талд тэнгис
орчмын

Си Пойнт, Грин Пойнт дүүрэг байлаа. Жеми Странд-стрит, Бри-сритийн дагуух баячуудын
орон сууцны хорооллоор явж, хавтгай дээвэртэй нүүрэн талыг цэвэрхэн будсан хоёр давхар
том байшингуудыг бахдан харав. Тийнхүү хотоор тэнэж тэнэж, яагаад ч юм бэ, өөрт нь
өсөрхөн барьж идэх гэж байх шиг санагдсанд ялаанаас зугтан гэртээ харив. Том хар ялаа
түүнийг бөөн бөөнөөрөө дайрч байлаа. Жеми зочид буудалдаа ирээд өрөөнд нь ч дүүрэн
байгааг мэдэв. Бүх хана, ширээ, орыг ялаа шавсан байжээ. Тэгээд эзэгтэй дээр орж,

-Миссис Вентер ээ, миний өрөөнд байгаа ялааг яаж зайлуулах вэ? Энэ ялаа... гэсэнд авгай тас
тас инээж, мөрөн дээр нь пад пад алгадаад,

-Чи дасна. Хараад байгаарай гэжээ.

Кейптаунд ариун цэврийн байдал даанч муу, энэ талаар ер бодож боловсруулсан зүйл
байхгүй. Нар жаргахтай зэрэг хотын дээгүүр муухай үнэр танартай уур бүрхэнэ. Энэ нь хүн
тэсэхийн аргагүй. Гэвч Жеми үүнийг тэсэх ёстой гэж мэдэж байлаа. Энэ хотоос явахын тулд
түүнд мөнгө хэрэгтэй байв. “Чи мөнгөгүй бол алмасын уурхайд очоод тэсэхгүй шүү” гэж
өөрөө өөртөө дахин давтан хэлдэг байлаа. Тэнд очихоор амьсгалах тоолондоо мөнгө төлөх
хэрэгтэй болно гэдгийг түүнд хэн нэг нь сануулсан байжээ.

Жеми маргааш нь ажил олов. Нэг пүүсийн бараа таваарыг тэргээр зөөх болсон байна. 2
хоногийн дараа нэг зоогийн танхимд оройн хоолноос хойш сав суулга угаах ажил хийх болов.
Ширээн дээр үлдсэн хоолны үлдэгдлийг зочид буудалдаа авчирч хооллодог байлаа. Эндхийн
хоол нь нэг л хачин амттай. Жеми ээжийнхээ хийж өгдөг тахианы махтай шөл, шинэхэн
халуун талх, овьёосны гурилан бинг санах болов. Гэсэн ч чухам хэрэгтэй багаж хэрэгсэл
худалдан авах мөнгө хураах гэж тохь тух алдах, дасаагүй хоол идэхийг үг дуугүй тэсвэрлэж
байв. Замаа нэгэнт сонгож авсан болхоор эцэж туйлдтлаа ажил хийх, өмхий агаараар
амьсгалах, хар ялаа шөнө унтуулахгүй шавахын аль нь ч түүнийг зогсоож чадахгүй. Харин
Жеми муухай их ганцаардаж байлаа. Энд таних мэдэх хүн нэг ч байхгүй тул сайн нөхөд, гэр
орноо санан уйтгарлана. Жеми уг нь ганцаар байх дуртай. Гэвч энд ганцаардахын зовлон
эдэлж байв. Тэгсээр удтал хүсэн хүлээсэн өдөр нь болж, түрийвчиндээ хоёр зуун фунттэй
болж, замд ороход бэлэн боллоо. Маргаашнаас алмас эрдэнийн талбай руу явна.

Клипдрифтт дахь алмасны уурхай руу очдог суудлын мухлаг тэрэгний тасалбарыг “Инланд
Транспорт компани гэсэн хаягтай жижиг модон байшинд худалддаг ажээ. Жемийг өглөөний 7
цагт тэнд очиход өдий төдий хүн шавааралдаад кассанд нь дөхөж очихын ч аргагүй байв.
Азаа үзэх гэсэн олон зуун хүн мухлагт суух эрхийн төлөө үзэлцэж байлаа. Орос, Америк,
Австрали, Герман Англиас ирцгээсэн тэр олон хүн тасалбар худалдагч нарыг тал талаас нь
шаван сул суудал олж өгөөч гэж гуйж царайчлан өөр өөрийн хэлээр хашгиралдана. Нэгэн
загзгар ирланд хүн үлны дотроос тохойгоороо ёворч түлхэн гарч ирэхийг Жеми хараад,

- Уучлаарай, энд юу болж байна вэ? Гэсэнд

- Гойд юмгүй. Хөөтэй муу мухлаг тэрэгний тасалбарыг бүтэн сар хагасаар урьдчиллан
худалдаж дууссан гэнэ гэж дургуйцэн бөвтнөөд Жемийн цөхрөнгөө барсан царайг харж,

- Энэ ч бас хамгийн аймшигтай нь биш ээ хөө. Энэ муусайн турсаганууд 1 суудалд 500 фунт
нэхэж байна гэлээ.

Бүр хүн үнэмшмээргүй юм.

- Алмасны уурхайд хүрэх өөр ямар нэгэн арга байх ёстой доо.

- Нэг бол явган явах, эсвэл “голланд шуудангаар” явах, ийм л хоёр арга бий.

- “Голланд шуудан” гэдэг нь юу юм бэ?

- Үхэр тэрэг. Цагт 2 милийн хурдтай явдаг. Чамайг тэр газарт хүрэх гэсээр байтал хамаг
алмасыг түүж аваад дуусна.

Жеми хамаг алмасыг түүж аваад дуустал Кейптаунд саатахыг хүссэнгүй. Өглөөжин өөр ямар
нэг тээвэр олох гэж хөөцөлдлөө. Тэгээд үдийн хэрд түүнд нэг аз таарчээ. Жеми “шуудан”
гэсэн хаягтай адууны жүчээний дэргэдүүр явж байгаад дотогшоо шагайсанд ясан хэлхээ
болсон нэг хүн том том шуудайтай шуудангийн ачаа тэрэг дээр ачиж байхыг харав. Жеми
гэнэт сэтгэл шулуудан

- Уучлаарай. Та Клипдрифтэд шуудан хүргэдэг үү? гэж асуулаа.

- Ай даа. Одоо ачиж байгаа минь энэ гэхэд нь Жемийн сэтгэлд өчүүхэн горьдлого төрж,

- Хүн суулгах уу? Гэсэнд тэр хүн Жемийг анхааралтай ажин шинжээд,

- Заримдаа авч явдаг. Чи хэдэн настай вэ? Гэлээ.

Хачин асуулт байна.

- 18 тай. Юу гэж?

- Бид нас 31 ээс хэтрээгүй залуу хүн авч явдаг. Чиний бие эрүүл чийрэг үү?

Бүр хачин асуулт байна.

- Эрүүл чийрэг ээ, эрхэм ээ гэсэнд туранхай эр нуруугаа цэхэлж,

- Чи таарна. Би нэг цагийн дараа хөдөлнө. Чамаас 20 фунт авна даа гэхэд нь Жеми ийм аз
таарсныг итгэж ядан,

- Яасан сайн юм бэ, Би яваад чемоданаа аваад ирье... гэсэнд

- Чемодон хэрэггүй. Нэг цамц, шүдний сойз аваад явбал болно гэжээ.

Жеми шуудангийн тэргийг анхааралтай харвал тэр жижигхэн тэрэг дээр зузаан банз эв
хавгүй хадаж эвлүүлэн хайрцаг хийж, дотор нь шуудантай уут хийжээ. Хайрцаг дээр
дэлбэгчтэй нуруу гаараа нийлүүлээд нэг хүн сууж багтах зай байлаа. Аян зам тун хүнд байх
төлөвтэй.

-Яриа таарлаа. Би явж цамц, шүдний сойз аваад ирье гэж Жеми хэлэв.

Жеми эргэж ирэхэд дэлбэгч морио тэргэнд хөллөж хажууд нь хоёр өндөр залуу зогсож
байгаагийн нэг нь хар арьстан, нөгөө нь цайвар шар үстэй швед хүн аж. Тэр 2 залуу
дэлбэгчид мөнгө өгч байгаа харагддаа.

- Байзаарай. Та намайг авч явна гэсэн шүү дээ гэж Жеми өгүүлэхэд

- Та гурав гурвуулаа явна. Гараад сууцгаа гэж дэлбэгч хэллээ.

- Гурвуулуу юу?
- Гурвуулаа.

Энэ жижигхэн тэрэг дээр бүгдээрээ яаж багтахыг Жеми огт мэдэхгүй байсан боловч ямарч
гэсэн өөрөө заавал явна гэдгийг л мэдэж байлаа. Тэгээд хамт явах хүмүүстэй өөрийгөө
танилцуулж,

- Жеми Макгрегор гэсэнд

- Намайг Уоллок гэдэг гэж хар арьстан өгүүлэв.

- Намаг Петтерсон гэдэг гэж швед залуу хариулав.

- Бидний толгойд ийм бодол орсон нь сайн болжээ. Өөр хүн мэдээгүй нь бидний аз гэж
Жеми хэлэхэд,

- Энэ шуудангийн тэргийг бүгдээрээ мэднэ, Макгрегор. Харин энэ тэргээр явах зоригтой
аавын хүү цөөхөн байдаг юм гэж Петтерсон хариулав. Энэ ямар учиртай үг болохыг Жеми
асууж завдаагүй байхад,

- Хөдөлцгөөе хэмээн дэлбэгч хашгирав.

Гурван эр, Жеми дунд нь сууж, суудлаасаа зууран, дэлбэгчийн суудлын модон түшлэгийг
сайн налцгаав. Өчүүхэн ч хөдлөх зай үлдсэнгүй. “ Энэ тийм аймшигтай юм биш” хэмээн
Жеми өөрийн сэтгэлийг засав.

- Тэсээрэй гэж дэлбэгч хашгираад шуудангийн тэрэг Кейптауны гудамжаар Клипдрифтийн

алмасны уурхайг зорин давхив.

Үхэр хөллөсөн мухлаг тэргээр явахад арай тохьтой. Кейптаунаас алмасын уурхай руу
зорчигчдын сууж явдаг мухлаг нь уужуухан том, биржент дээвэр нь төөнөм халуунаас
хамгаална. Хэсэг явж байгаад зогсоход зорчигчид амарч, биеийн чилээг гаргах боломжтой.
Аялал 10 хохнг үргэлжилнэ.

Шуудангийн тэрэг бол хааяа нэг морь, дэлбэгчээ солиод зогсолтгүй явна. Хээр талын гүн
ховхилтой замаар морьд цогиулна. Тэрэг нь нумгүй болхоор донслох бүрд бие доргино. Жеми
шүд зуун: Би орой болтол тэсэх хэрэгтэй. Орой ууж идэж, унтаж амраад өглөө болоход хүч
тэнхээ сэргэнэ гэж бодож явав. Гэтэл шөнө морио солих гэж 10 минут зогсоод цааш
давхижээ.

- Бид хэдийд зогсож өл залгах юм бэ? гэж Жеми асуухад

- Ердөө зогсохгүй. Бид яарах ёстой. Бид шуудан хүргэж яваа улс шүү, эрхэм ээ гэж шинэ

Дэлбэгч дургүйцэн бөвтнөжээ. Тэд сарны гэрэлд гийсэн тоосон онхол донхол замаар
шөнөжин давхилаа. Замын бартаа бүр дээр тэрэг донслоход Жемигийн хамаг бие шархиран
өвдөх болов. Үхтлээ ядарсан боловч унтаж чадахгүй байлаа. Жаахан зүүрмэглэж байтал тэрэг
донслон сэрээнэ. Ядахдаа суниах зай байхгүй учир хамаг бие нь хөшин чилжээ. Гэдэс нь
өлсөж, үргэлж явсаар байгаад дотор нь муухай болж байлаа. Дараагийн удаа чухам хэдийд
хоолтой золгохыг мэдэхгүй байлаа. Клипдрифт хүртэлх 600 миль зай бий. Жеми Макгрегор
амьд мэнд тэсэж хүрэх эсэхээ мэдэхгүй болжээ. Ер нь тэнд хүрэх хүсэл байгаа эсэхээ ч
мэдэхгүй байв. Дахиад нэг өдөр, нэг шөнө өнгөрч, өвчин нь улам нэтрэн амь давчдах болов.
Жемигийн хамт яваа хүмүүс ч түүнээс дээрдэх юм байсангүй. Ядахдаа гомдол тавьж үглэх
тэнхээ тасарсан байлаа. Зорчигч нар эрүүл чийрэг, залуу хүмүүс байх хэрэгтэй гэж
дэлбэгчийн шаардсаны учрыг Жеми одоо л ойлгов.

Аянчид үүрээр байгаль онгон зэрлэг хэвээрээ байгаа Грейт Карруд хүрлээ. Хайр найргүй
төөнөх нарны дор хязгаархярхаггүй уужим тал нүдний өмнө цэлийж, тоос шороо, яршигтай
ялаа батгана аянчдын эцсийн тамирыг барна. Заримдаа униар зэрэглээн дундаас замаар явган
буюу морь унаатай сажилж яваа хэсэг бүлэг хүмүүс харагдана. Ганц бие морьтой хүнээс
гадна тус бүр хорь шахам шар хөллөсөн мухлаг тэрэгний цуваа үзэгдэнэ. Хөтөч нар нь урт
нарийхан шилбүүрээр тас няс шавхуурдан “Хөөг, хөөг” хашгиралдана. Том том мухлаг
тэргээр олон мянган фунт хүнсний зүйл, бараа таваар алт, алмасны эрэлчдэд зориулсан
багаж хэрэгсэл, майхан шуухан, зуух, гурил, нүүрс, керосин, дэн тэргүүтэн зөөж яваа ажээ.
Бас кофе, тутрага, чихэр, дарс, гутал, амттан, хөнжил тэргүүтэн бий. Энэмухлаг тэрэгнүүд
бол Клидрифтийг ертөнцийн бусад хэсэгтэй холбодог шижим юмсанж.

Аянчид Шар мөрнийг гатлах үеээс элчилгүй хээр талын уйдаж үхэм нэг хэвийн байдал дуусч,
ногоон бут сөөг үзэгдэх болов. Эндхийн газар улаавтар өнгөтэй агаад өвс нь ногоо нь аясын
зөөлөн салхинд найган намирна. Зарим газар навчны оронд өргөстэй одой модод үзэгдэнэ.

“Тэснэ шүү, Би тэснэ” гэж Жеми хайнгадхан бодов. Тэгээд бага багаар горьдлого төрж
эхлэхийг мэдэрлээ. 4 өдөр, 4 шөнө аян замын аймшигт алжаалыг туулсны эцэст тэртээ хол
Клипдрифт бараа торолзон үзэгдлээ.

Өөрийг нь чухам ямар хувь тавилан тосон хүлээж байгааг залуу Жеми Макгрегор мэдсэнгүй.
Аян замд ядарснаас улайсан нүдний нь өмнө гайхмаар хачин дүр зураг үзэгдлээ. Клипдрифт
гэдэг нь Вааль голыг хөвөөлсөн гол гудамжны дагуу босгосон, тавьсан өдий төдий майхан
тэрэгний орон байв. Балиар муухай замаар нүцгэн бие дээрээ хурц өнгийн пиджак өмссөн
африкууд, алт алмасны бавгар сахалтай эрэлчид, мах, талхны худалдаачин, багш, хулгайч
байрын хүмүүс хөлхөлнө. Клипдрифтийн төвд дэлгүүр, гуанз, билльярдын өрөө,
өмгөөлөгчийн контор болдог модон байшин, алмас худалдан авдаг мухлаг эгнэсэн байна.
Гудамжны буланд “Эзэн вангийн гулдан” нэртэй, холцорч ховхорсон хана нь нэг ч цонхгүй
зочид буудал байх агаад өрөө тасалгаа нь цонхгүй ажээ. Жеми тэрэгнээс буумагц хөл нь биеэ
даахаа больж, хөсөр унан тэрийж хэвтлээ. Тийнхүү босох тэнхэлтэй болтол тэр чигтээ
хэвтэв. Толгой нь заадсаараа ангалзан өвдөнө. Жеми гудамж, явган замаар дүүрэн шуугин
бужигналдах олны дундуур зочид буудал руу салгалан очив. Түүнд ханыг нь хар ялаа битүү
шавсан бөгчим халуун өрөө таарчээ. Тэнд эрхбиш нэг ор байлаа. Жеми орон дээр бүхлээрээ
унаж, агшин зуур унтаад өгчээ.

Залуу эр 18 цаг сэрэхгүй унтаад өгчээ.

Жемийг сэрэхэд хамаг бие нь янгинан өвдөх боловч цээжний нь дотор баясгалангийн дуу
эгшиглэж, “ Би хүрээд ирлээ. Хэрэг бүтлээ” хэмээн бодов.
Өлсөж үхэх гэж байгаагаа мэдээд хоол эрхээр гарлаа. Зочид буудалд нь хоол өгдөггүй, эсрэг
талд нь жижиг гуанз байдаг аж. Жеми тэр пиг дүүрэн хүнтэй гуанзанд орж, шорлож шарсан
хонины мах, харахад цурхай болов уу гэж таамагламаар шарсан загас цуврага мах захиалж,
даруулах амттан зуушинд жимсэн чөмөгтэй боов захиалав.

Жеми юм идээгүй удсанаас гэдэс нь өвдөж байлаа. Үлдсэн хоолоо байзназ байгаад идхээр
хойш тавьж, эргэн тойрноо харав. Ширээнүүдийн ард эрэлчид суугаад хэн бүхний сэтгэлд
ойр сэдэв болсон алмасны тухай хөөрөн шуугилдаж байв.

- Хоуптауны ойролцоо жаахан алмас үлдсэн. Гол нь орд нь Нью Рашид бий...

- Йобургийг бодвол Кимберлид хавьгүй их бий...

- Түрүү долоо хоногт Дутоиспаниас юу олдсоныг дуулсан уу? Тэнд дааж авчирахын талгүй их
алмас байна гэж дуулдсан...

- Кристианд шинэ орд олсон гэнэ. Би маргааш тийшээ явна.

Ингээд олны яриа үнэн байжээ. Энд газар сайгүй алмас эрдэнэ байдаг юм байна. Жемийн
сэтгэл хөөрөн догдлон аяга кофег арай гэж гүйцээн уув. Хоолны үнийг төлөх болоход 2 фунт
10 шиллинг гэснийг сонсоод гайхаж хоцорлоо. Ганц амиар энэ шүү. Хөл үймээн ихтэй
гудамжинд гарч ирээд: “Мөнгөө хямгадах хэрэгтэй юм байна” гэж бодлоо. Ард нь нэг хүн:

- Баяжих гэж хүсэн мөрөөдсөөр үү, Макгрегор? гэхэд нь эргэж харвал энд хамт ирсэн
Петтерсон байлаа.

- Тэгэлгүй яах вэ,.

- Тэгвэл алмастай газар очицгооё. Вааль голын цаад талд гэж Петтерсон хэлээд гараар заав.

Тэр 2 замаар орон алхаллаа. Клипдрифт эргэн тойрон уулсаар хүрээлэгдсэн нам газар
оршино. Өвс ногоо үл үзэгдэнэ. Агаарт улаан тоос босоод амьсгалахад маш хэцүү. Вааль гол
эндээс ¼ милийн зайтай урсах бөгөөд ойртон очиход аятайхан сэрүү татаад ирэв. Голын хоёр
талаар олон зуун эрэлчид байрлаж, зарим нь газар ухаж, нөгөө зарим нь чулуу элгэгдэж,
гуравдахь хэсэг нь бүдүүн хийцтэй ширээн дээр чулууг ялгаж байлаа. Тоног төхөөрөмж нь
шороо угаах машинаас эхлээд модон хайрцаг, төмөр хүрз хүртэлх янз бүрийн зүйл байх ажээ.
Эрэгтэйчүүд нь сахал үсээ хусаагүй, арьс нь наранд түлэгдэн барзайсан байх агаад захгүй
судалтай тэрмэн цамц, тансар хилэн өмд, резинэн гутал, өргөн хүрээтэй эсгий малгай
өмсцгөөжээ. Бүгдээрээ алмас юм уу мөнгө хийх ууттай өргөн ширэн бүс бүсэлсэн байлаа.

Жеми, Петтерсон хоёр голын хөвөөгөөр явж байгаад нэгэн залуу хөвгүүн, өвгөн хоёр хайрга
чулуунд хүрэхийн тулд лут том үхэр чулуу байрнаас нь хөдөлгөх гэж ноцолдож байгааг үзэв.
Тэдний цамц нь хөлс нэвтэрчээ. Хажууд нь өөр хоёр хүн жижиг тэргэнцэрт хайрга ачиж байв.
Нэгэн эрэлчин хайрцаг сав ганхуулж, нөгөө нь лагийг арилгах гэж хувингаар ус цутгаж байв.
Дараа нь том чулууг өөрснөө хийсэн ширээн дээр ялгаж, нарийн нягт үзэж гарлаа.
- Ийм амархан байдаг байна шүү гэж Жемийн жуумалзхад,

- Амархан юм шиг санагддаг нь худлаа. Би энд ирээд удаж байгаа улс амьтантай ярьж үзлээ.
Бидий ийшээ дэмий ирсэн шиг санагдаж байна гэв.

- Чи юу хэлэх гээд байна вэ?

- Энд баяжих хүсэлтэй хэдэн хүн газар ухаж байдаг гэж бодно вэ? Хорин мянга, чөтгөр алгад.
Бүгдэд хүрэх алмас энд байхгүй. Хүрдэг юм аа ч гэсэн зүтгээд зүтгээд нэмэр байгаа юм уу
даа гэж эргэлзэх боллоо. Өвөл нь халуунд халж, зун нь хүйтэнд хөрж, тондерстормд шалба
цохиулна. Тоос шороо, ялаа батгана, өмхий самхай... Бие угаачих, аятай тохитой унтчих газар
байхгүй, балиар муухай нь дэндүү. Долоо хоног бүр Вааль голд хүн үхдэг гэнэ. Зарим нь
санамсаргүй. Ихэнхийн хувьд энэ бол эндээс явах цорийн ганц зам гэнэ. Энэ хүмүүс боож
үхэхгүй яаж тэсдэг юм бэ, бүү мэд гэхэд нь Жеми бохир муухай цамцтай залуу эрийг хараад,

- Би мэднэ. Эд нар одоо ингээд аз таарна гэж горьдож байгаа гэв.

Хот руу буцаж явах замдаа Петтерсоны хэлсэн үнэн юм байна гэдгийг Жеми арга буюу
зөвшөөрөх хэрэгтэй болов. Жорлонгийн оронд жорлон болдог өргөн шуудууны хажуугаар
газар сайгүй хонь, ямаа, үхрийн яс цайран харагдана. Өмхий самхай нь тэсэхийн аргагүй.
Петтерсон түүнийг ажиглаж байснаа,

- Чи одоо яах гэж байна вэ? Гэсэнд

- Эрэлчийн багаж хэрэгсэл худалдаж авна гэсэнд,

Хотын төвд зэв идсэн хаяг дээр “Саломон ван дер Мерве, Бараа таваар” гэсэн нэгэн дэлгүүр
бий. Жемитэй нас ойролцоо өндөр негр залуу дэлгүүрийн хаалганы өмнө тэрэгнээс ачаа
буулгаж байв. Өргөн ханагар цээжтэй, булчин шөрмөс нь зангирсан тэр негр залуугийн
сайхныг Жеми гайхав. Тэр бол хар нүдтэй, бүргэд хамартай эрэмгий байрын эрүүтэй залуу
байлаа. Харваас эр чадал, нэр сүрдээ итгэсэн байдал мэдэгдэнэ. Негр залууг буутай том
хайрцаг үрэн эргэхдээ байцааны навч дээр халтирхад нь Жеми өөрийн эрхгүй түшихээр гар
сунгасан боловч негр залуу түүнийг хүн гэж тоож анзаарсангүй. Цааш эргэн дэлгүүр рүү
орлоо. Хажуугаар явж байсан луустай африк эр жигшин зэвүүцсэн байдалтай газар нулимаад,

- Энэ Банда баролонг овог аймгийн хүн. Мистер Ван Дер Мервегийн гарын дор зарагддаг
юм. Энэ банту овгийнхон ертөнцийг эзэгнэсэн юм шиг боддог байхаа. Мистер Ван Дер
Мерве энэ их зантай харыг яах гэж дэргэдээ авч байдаг юм бэ, бүү мэд гэжээ.

Дэлгүүр дотор гэрэл муутай, сэрүүхэн. Халж цооносон шуугиант гудамжнаас энд орж ирэхэд
таатай байлаа. Энд бас ер бишийн үнэртэй юм. Эндхийн ямх бүрд бараа таваар дүүрэн
чихээстэй байх шиг Жемид санагдав. Тэгээд дэлгүүр дотуур өөрийн ухаангүй болсон мэт явж
байлаа. Энд хөдөө аж ахуйн бордоо, пиво, сүү, тостой хайрцаг, цемент, тэсэрдэг шижим,
тэсрэх бодис, дарь, хогшил тавилга, ваар шаазан, дэнлүү, оо, саван, архи дарс, бичийн
хэрэгсэл, тамхи тэргүүтэн байв. Арван хэдэн тавиурын дээрээс доор хүртэл тэрмэн цамц,
хөнжил, шаахай,суран бүс дүүрэн өржээ. “Энэ бүхний эзэн нь их баян хүн байж таарна” гэж
Жеми бодов. Ард нь эмэгтэй хүний зөөлөн дуугаар

- Танд юугаар тус болох вэ? Гэх сонсогдлоо.

Жеми эргэж хараад нэгэн бүсгүйтэй нүүр нүүрээрээ тулгарав. Харахад нас 15 орчим болов уу
гэмээр. Нүүрний хэлбэр нь өвөрмөц сонин, дурлалын ил захидал дээр байгаа зүрх шиг.
Буржгар хар үстэй, шантгар хамартай, хурц ногоон нүдтэй ажээ. Жеми охины биеийн нь
хэлбэр галбирийг сайн хараад нас 16 хүрч байгаа болов уу гэж бодлоо.

- Би эрэлчин. Зарим нэг багаж хэрэгсэл худалдаж авмаар байна гэж Жеми охинд хэллээ.

- Танд юу хэрэгтэй вэ? Гэхэд нь Жеми яагаад ч юм бэ энэ бүсгүй нүдэнд аятайхан харагдхыг
хичээж,

- За даа ... ердийн юм гэсэнд бүсгүй нүдээ зальтайхан онийлгон инээмсэглээд

- Ердийн юм гэдэг чинь юу гэсэн үг вэ, эрхэм ээ? Гэхэд нь Жеми түгдэрч,

- За... Хүрз хэрэгтэй.

- Ердөө энэ үү?

Бүсгүй өөрийг нь даапаалж байгааг Жеми мэдээд цагаан сэтгэлээр талбиун инээмсэглэв.

- Үнэнээ хэлэхэд би шинэ хүн болхоор надад юу хэрэгтэйг мэдэхгүй байна гэсэнд бүсгүй
хариу инээмсэглэв.

- Энэ ч таны юу эрхээс болно доо, мистер?

- Намайг Жеми Макгрегор гэдэг.

- Би Маргерет Ван Дер Мерве байна хэмээн бүсгүй хэлээд дэлгүүрийн цаад тал руу сэтгэл
түгшсэн янзтай харав.

- Мисс Ван Дер Мерве тантай танилцсандаа баярлаж байна.

- Та хэзээ ирээв?

- Аа-хн. Өчигдөр ирсэн. Шуудангийн тэргээр.

- Тийм хэцүү аян замд дайгдаж яваа хүмүүс үхдэгийг танд хэлээгүй юм уу? Гээд бүсгүйн
нүдэнд хилэнгийн оч гялсхийв. Жеми инээмсэглэн,

- Тэдэнд гомдох юм алга. Харж байгаа биз дээ, би эрүүл энх байж байна гэсэнд

- Та “мой клиппе” эрэх гэж байгаа юм уу?

- “Мой клиппе гэж юу юм бэ?

- Алмас эрдэнийг голландаар ингэж хэлдэг юм. Гялалздаг чулуу гэж.

- Та голланд хүн үү?

- Манай гэрийнхэн Голландынх.

- Би Шотландаас ирсэн.

- Мэдэгдэж байна гээд бүсгүй дэлгүүрийн цаад тал руу дахин сэтгэл түгшсэн янзтай харснаа,

- Энд алмас бий, Мистер Макгрегор. Харин байгаа газрыг нь мэдэх хэрэгтэй. Олон эрэлчин
энд хий дэмий үйлээ үзэж тамаа цайж байдаг. Ганц нэгхэн хүн орд газар олж, бусад нь шавар
шавхай ухаж байдаг. Хэрэв та баяжья гэвэл өөрийн орд газрыг олох ёстой.

- Яаж олох гэж?

- Манай эцэг танд туслаж чадахсан. Бүгдийг мэддэг. Цагийн дараа завтай болно.

- Би эргээд ирнэ. Мисс Ван Дер Мерве танд баярлалаа.

Жемигийн сэтгэл хөөрөн баясаж, зовлон зүдгүүрээ мартаад нар гийсэн гудамжинд гарав.
Саломон Ван Дер Мерве алмас эрэх газрыг зааж өгвөл Жеми алмас олохдоо л олно. Тэгээд
удахгүй баяжхыг зөгнөсөн залуу хүний баясгалант инээдээр тас тас инээв.

Жеми гол гудамжаар дархны газар, бильярдын танхимын дэргэдүүр өнгөрсөн нэг муу
байшингийн дэргэд очив.Хаягийг нь уншвал:

Миллерийн халуун, хүйтэн ус

Өдөр бүр 6.00-20.00 ажиллана. Хувцас тайлах газар нь тохилог гэжээ.

“Би сүүлчийн удаа биеэ хэдийд угаалаа. Хөлөг онгоц дээр хувин усаар биеэ булхсан. Хэдийд
билээ дээ, байз...” гэж Жеми бодоод өөрөөс нь муухай үнэр ханхалж байгааг сэтгэлдээ
төсөөлөв.

Өөрийн шотланд гэрийн гал тогоонд өдөр бүр биеэ угаадаг байснаа санав. Халуун усны
газрын үүдийг онгойлгон дотогш орлоо. Дотроо хоёр хаалга байгаагийн нэг нь
эрэгтэйчүүдийнх нөгөө нь эмэгтэйчүүдийнх ажээ. Жеми эрэгтэйчүүдийн тасагт ороод
хижээл насны үйлчлэгчид хандан

- Усанд ороход ямар үнэтэй бэ? Гэсэнд

- Хүйтэн усанд бол 10 шиллинг, халуунд бол 15 шиллинг гэжээ.

Жеми бодол болов. Уг нь халуун усанд орвол сайхан сан. Даанч мөнгөө хамаагүй үрж
болохгүй. Багаж хэрэгсэл авахад мөнгө хэрэгтэй.
- Хүйтэн усанд орьё гэж хэлсэнд үйлчлэгч хүн түүнд хуучин муу алчуур өгөөд,

- Ийшээ орогтун, ай хөө гэлээ.

Жеми нэг өмгөр өрөөнд орвол гол дунд нь том цайран онгоц, хананд нь хадсан дэгээнээс өөр
юм байсангүй. Үйлчлэгч нь хар хүн онгоцыг модон торхноос ус авч дүүргээд,

- Бэлэн боллоо, мистер ээ. Хувцсаа тэр дэгээнээс өлгөж болно гэжээ.

Үйлчлэгчийн гарахыг хүлээж байгаад Жеми хувцсаа тайчин хир буртаг шивсэн биеэ нэг харж,
онгоцонд өрөөсөн хөлөө дүрж үзвэл үйлчлэгчийн хэлснээр ус нь хүйтэн байлаа. Жеми шүд
зуун онгоцонд орж, хөлөөс толгой хүртэл сайтар савандаж биеэ угаав. Онгоцноос гарахад ус
нь хар болсон байв. Үйлчлэгчийн өгсөн уранхай алчуураар биеэ арчаад хувцсаа өмсөв. Хир
даг болсон өмд, цамцаа өмсмөөргүй санагдана. “Дотуур хувцас авах хэрэгтэй юм” гэж бодоод
хичнээн бага мөнгө үлдсэнийг саналаа. Тэгтэл бас гэдэс нь өлсөж байдаг.

Жеми халуун усны газраас гараад хөл ихтэй гудамжаар “ Тэнүүлчин” нэртэй гуанзанд орлоо.
Ороод хоол, пиво захиалсанд улаан лоольны хачиртай хонины хавирга, төмсөн шанцай,
давсалсан өргөст хэмхтэй зайдас авчирч өглөө. Хоол идэж байх зуур зэргэлдээх ширээний
яриа чагнавал,

- Колсбэргийн тэндээс 21 кратын алмас олдсон гэнэ. Тийм алмас тэнд зөндөө байдаг гэнэ...

- Херборид шинэ ордолсон гэнэ. Би тийшээ явах санаатай...

- Ээ тэнэг. Шар мөрөнд л хамгийн том алмас бий...

Баарны лангууны тэнд тансар хилэн өмд, тэрмэн цамцтай, бавгар сахалтай нэгэн эр том
хундагатай пиво барин зогсоод баарны хүнд хандан,

- Би Хеброн орно. Багаж хэрэгсэл, хоол хүнс хэрэгтэй байна гэж итгэмжтэн хэлж байгаа
сонсогдов.

Баарны хүн, хугарч нахийсан хамартай, гөлөлзсөн нүдтэй бүдүүн халзан эр тас тас хөхөрч,

- Хэнд ч тийм юм хэрэгтэй. Чи намайг яагаад энэ баарт байж байна гэж бодоо вэ? Хүрэлцэх
хэмжээний мөнгө олмогцоо Шар мөрөн лүү явна. Чамд гэж хэлэхэд Саломон ВанДер Мерве
дээр оч. Дэлгүүрийн эзэн, энэ хотын тэн хагаст эзэн сууж буй хүн шүү гэж тэр хэлээд баарны
лангууг муухай алчуураар арчив.

- Тэр чинь надад ямар хэрэгтэй юм бэ?

- Хэрэв чи түүнд тоогдвол чамд туслана гэсэнд бүдүүн халзан эр өөдөөс нь гайхан ширтэж,

- Тийм үү? Нээрээ туслаж чадах юм уу?

- Хэдэн залууд тусласныг би мэдэх юм. Чи биеийн хүчээ үнэлж, тэр чамд хөлс мөнгө өгнө.
Ашгаа тэхий дундуур нь хуваана.

Жеми шамдан бодож эхлэв. Урьд бол үлдсэн 120 фунтээрээ багаж хэрэгсэл, хүнсний зүйл авч
хүрнэ гэж бодож байжээ. Гэтэл Клипдрифтэд юмны үнэ тэнгэрт хадсан байлаа. Ван Дер
Мервегийн дэлгүүрт 100 фунтийн жинтэй нэг шуудай австрали гурил 5 фунтын үнэтэй
байдгийг Жеми харсан юм. Фунт саахар 1 шиллинг, лонх пиво 5 шиллинг, 1 фунт жигнэмэг 3
шиллинг, 12 өндөг 7 шиллингийн үнэтэй. Юмны үнэ ийм байхад мөнгө дорхноо урсаад
дуусна. “ Тэнгэр минь, Энд гурван орой хоол идэх мөнгөөр манай гэрийнхэн бүтэн жил амь
зууж хүрэхсэн” гэж Жеми бодлоо. Харин Ван Дер Мерве ч юм уу, ямар нэгэн чадал чинээтэй
хүн туслах юм бол...

Жеми хоолныхоо мөнгийг бушуухан төлөөд дэлгүүрт очихоор яарлаа.

Саломон Ван Дер Мерве лангууны ард модон хайрцагнаас буу гарган зогсож байв. Тэр бол
шөвгөн нүүртэй, нүүрээ тойрсон өтгөн хууз сахалтай жижигхэн хүн байлаа. Үс нь сүрлийн
өнгөтэй, нүд нь онигор хар, хамар нь монцгор, уруул нь жимгэр. “ Охин нь эхтэйгээ адил юм
байлгүй дээ” гэж Жеми бодлоо.

- Уучлаарай, эрхэм ээ? Гэсэнд Ван Дер Мерве толгойгоо өргөн

- За? Гэлээ.

- Та мистер Ван Дер Мерве юу? Намайг Жеми Макгрегор гэдэг. Шотландаас алмас эрхээр
ирсэн юм.

- Тэгээд юу гэж?

- Таныг заримдаа эрэлчдийг санхүүжүүлдэг гэж дууллаа.

- Чөтгөр алгад гэж, Хэн тийм цуурхал гаргадаг байна вэ? Ганц нэг эрэлчинд туслахтай зэрэг
намайг өгөөмөр баян өвлийн өвгөн гэж боддог байна шүү гэж Ван Дер Мерве дургүйцэн
бөвтнөв.

- Надад 120 фунт бий. Энд энэ мөнгө маань хүрэлцэхгүй юм байна. Хэрэв аргагүйд тулбал би
ганц хүрз бариад алмас эрхээр явна. Гэхдээ луус, багаж хэрэгсэлтэй явбал миний алмас олох
боломж ихсэнэ гэж бодож байна хэмээн Жемийг шамдан өгүүлэхэд Ван Дер Мерве онигор
хар нүдээрээ Жемийг анхааралтай ширтэн харж,

- Ээ тэнгэр минь, Алмас олно гэж чи яаж мэдсэн юм бэ?

- Би дэлхийн хагасыг тойрч байж наашаа ирсэн. Баяжихаас нааш буцах бодолгүй байна. Энд
алмас байдаг л юм бол би олно. Хэрэв та надад тусалбал бид хоёр хоёулаа баяжина.

Ван Дер Мерве хамар доороо хүнгэнээд буруу харж, модон хайрцагнаас буу гаргах ажлаа
үргэлжлүүлэв. Жеми юу хэлэхээ мэдэхгүй хайвганан зогсож байлаа. Жемийн тийнхүү
гайхшран зогсож байтал Ван Дер Мерве гэнэт,
- Наашаа Голланд шуудангаар ирсэн үү?

- Үгүй. Шуудангийн тэргээр.

Өвгөн Жемийг дахин хөлөөс толгой хүртэл шинжин хараад эцэст нь,

- За яах вэ, ярилцья гэжээ.

Ийнхүү тэр оройдоо дэлгүүрийн цаад захад, Ван Дер Мервегийн суух байр болгож
төхөөрөмжилсөн хэсэгт уулзаж ярилцав. Тэр бол нэгэн зэрэг гал тогоо, хоолны өрөө,
унтлагын өрөө болж өгдөг хоорондуураа хамар хаалттай хоёр ор тавьсан өмгөр өрөө байлаа.
Ханын доод хэсгийг шавар чулуугаар, дээд хэсгийг хүнсний зүйл зөөж авчирдаг сарампай
хайрцгаар хийжээ. Хананд гаргасан дөрвөлжин нүх нь цонхыг орлодог байлаа. Бороотой үед
тэр нүхийг банзаар хадна. Хоёр хайрцаг дээр тавьсан урт зузаан банз ширээ болж. Бөөрөөр
нь тавьсан том хайрцаг эргэнэгийн үүрэг гүйцэтгэдэг аж. Ван Дер Мерве бол мөнгөндөө тун
ч гар татуу хүн юм байна гэдгийг Жеми ойлгов. Ван Дер Мервегийн охин үг дуугүй хоол хийх
зуур үе үе эцгийнхээ зүг харж байсан боловч Жемийн өөдөөс нэг ч удаа харсангүй. “Энэ
бүсгүй яагаад эцгээсээ ингэж их айдаг юм бол?” гэжЖеми бодов. Ширээний ард сууцгаасан
хойно Ван Дер Мерве,

- За залбирцгаая. Эзэн Тэнгэр таны өгөөмөр хишгийг хүртэж байдагтаа баярлалаа. Бидний
нүгэл хилэнцийг өршөөн хэлтрүүлж, шунал тачаалаас сэргийлэн хамгаалж байдагт тань
гялайлаа. Урт нас, удаан жаргал хайрладаг тань баярлалаа. Тэнгэрт тэрсэлсэн буруу номтныг
залхаан цээрлүүлдэгт тань баярлалаа. Аамэн гээд амьсгаа авалгүй, охиндоо хандан,

- Хоолоо өгөөрэй гэжээ.

Хоол нь жаахан гахайн шарсан мах, гурван ширхэг төмс, нэг жижиг шар манжин байв.
Жемид хамгийн бага хувь нь ноогдлоо. Эрчүүд хоол идэх зуураа ярилцаж, Маргерет ганц ч үг
дуугарсангүй. Хоол идэж дуусаад,

- Маш сайхан хоол байна, охин минь гэж Ван Дер Мерве бахархан өгүүлээд Жеми тийш
эргэж,

- За ажил явдлаа ярьцгаая гэлээ.

- За тэгье, эрхэм ээ

Ван Дер Мерве тавиур дээрээс урт шавар гаанс авч жижиг савнаас тамхи нэрээд, утаан
хөшигний цаанаас Жемийг анхааралтай ажиглан,

- Клипдрифтийн эрэлчид бүгдээрээ тэнэг. Эрэлчид олон, алмас бага бий. Бүтэн жил махаа
идээд ганц атга schlenterrs –ээс өөр юм олохгүй байж болно гэхэд нь

- Миний мэдэхгүй үг шиг байна, эрхэм ээ гэв.

- Тэнгүүдийн очир эрдэнэ. Хямдхан чулуу. Ойлгож байна уу.

- За… Ойлголоо, эрхэм ээ. Алмас хаанаас эрхийг мэдэх хүн бий юү?

- Грикүүд мэднэ… гэхэд нь Жеми өөдөөс нь гайхширсанд,

- Умард нутагт суудаг африк овог аймгийнхан. Тэд нар том том алмас олдог. Заримдаа надад
авчирч өгч бараа таваар арилжиж авдаг… гээд голланд өвгөн хуйвалдаан хийж байгаа мэт
дуугаа намсган,

- Хаанаас олохыг би мэднэ гэлээ.

- Мистер Ван Дер Мерве та өөрөө тийшээ очихгүй яасан юм бэ? гэсэнд өвгөн санаа алдаад

- Дэлгүүрээ орхих арга алга даа. Хамаг юмыг минь хулгай авчихна. Надад тийшээ яваад
алмас авчирч өгөх найдвартай хүн хэрэгтэй байна. Тийм итгэлтэй хүн олдвол би хэрэгтэй
бүх багаж хэрэгслийг өгч, алмас хаанаас эрхийг хэлж өгнө гээд тамхиа нэг сайн соров.

Жемийн зүрх булгилан хөл дээрээ босон харайж,

- Мистер Ван Дер Мерве, Таны эрж байгаа хүн би мөн. Та надад итгээрэй. Би өдөр шөнөгүй
ажиллана. Би танд тоолж барахгүй олон алмас авчирч өгнө гэж хэлэхдээ сэтгэл нь

догдолсноос хоолой нь чичирч байлаа. Ван Дер Мерве Жемийг нэг хэсэг ажин шинжснээ,

- За гэж ганц үг дуугарав.

Маргааш өглөө нь Жеми гэрээнд гарын үсэг зурав. Гэрээг нь африк хэлээр бичсэн байлаа.
Ван Дер Мервегийн хэлсэн нь,

- Одоо чамд учрыг хэлье. Энд чи бид хоёрыг бүтэн тэгш эрхтэй хамжаа түнш нар гэж бичсэн
байгаа. Би хөрөнгө оруулж, чи биеийн хүчээ үнэлнэ. Бүх ашгийг тэгшхэн хувааж авна гэв.

Жеми Ван Дер Мервегийн барьж буй гэрээг хараад өдий төдий гадаад үгний дотроос 2 фунт
гэсэн мөнгөний нэрнээс өөр юм ойлгосонгүй. Тэр үгсийг хуруугаараа заан,

- Энэ ямар учиртай юм бэ гэсэнд,

- Энэ бол чамд чиний олсон алмасын тэн хагасын дээр би чамд долоо хоногт 2 фунт нэмж
төлнө гэсэн үг. Тэнд алмас бий гэдгийг би мэднэ. Гэхдээ чи олж чадахгүй байж болох юм.
Тэгвэл чи ажлынхаа хөлсөнд эрхбиш хэдэн мөнгө авах болно гэв.

Энэ хүний хичнээн шударгыг Жеми гайхан,

- Эрхэм танд их баярлалаа гэсэнд

- За одоо чиний авч явах багаж хэрэгслийг бэлдэцгээе хэмээн Ван Дер Мерве хэлжээ.

Тэр хоёр Жемийн авч явах багаж хэрэгслийг хоёр цаг шилж сонгов. Жижиг майхан, унтлагын
уут, тогоо шанага, 2 шигшүүр, угаах хайрцаг, царил, 2 хүрз, 3 хувин, дотуур хувцас, оймс. Энд
бас сүх, дэнлүү, керосин, шүдэнз, саван байлаа. Хүнсний зүйл нь лаазалсан мах, хуурай үр
жимс, кофе, давс гэх мэт байлаа. Эцэст нь бүх юм бэлэн болов. Негр зарц Банда энэ бүх юмаа
шуудайлахад нь Жемид туслалаа. Банда Жемийн өөдөөс нэг ч удаа эгцэлж харсангүй, нэг ч
дуугарсангүй. “Англи хэл мэддэггүй байх л даа” гэж Жеми бодлоо. Маргерет дэлгүүртээ
худалдан авагчдад үйлчлээд завгүй байлаа. Жемийн энд байгааг мэдсэн ч гэсэн мэдээгүй дүр
байх шиг. Ван Дер Мерве хүрч ирээд,

- Чиний луус хаалганы тэнд байгаа. Юмаа ачихад чинь Банда чамд туслана гэхэд нь

- Мистер Ван Дер Мерве танд их баярлалаа гэж Жеми халуун сэтгэлээр талархав. Ван Дер
Мерве баахан тоо бичсэн цаас харж:

- Чамаас 120 фунт авна гэхэд нь Жеми ойлгож ядан өөдөөс нь бүлтийн ширтэн

- Юу гэнэ? Та өөрөө хэлэхдээ... гэсэнд Ван Дер Мервегийн хилэн бадарч царай нь минчийн
улайж,

- Чи намайг энэ бүх юмны дээрээс луусаа зүгээр өгч бас чамайг хамжаа түншээ болгоод дээр
нь бас долоо хоног бүр 2 фунт нэмж өгөх юм гэж бодов уу? Хэрэв чи намайг завших санаатай
байгаа бол хүнээ олсонгүй... гээд луусны нуруунд ачсан шуудайг буулгахаар завдахад нь Жеми
сандарч,

- Байз, байз. Би сайн ойлгоогүй бололтой. Зүгээр, зүгээр. Надад мөнгө бий гээд түрийвчээ
гарган хадгалж үлдсэн бүх мөнгөө лангуун дээр гаргаж тавьсанд Ван Дер Мерве хэсэг
эргэлзэж байснаа,

- За яах вэ. Чамайг сайн ойлгоогүй юм байж гэж бодьё. Энэ хотоор дүүрэн муусайн
луйварчид байдаг юм. Би хамжаа түншээ сонгохдоо болгоомжлох хэрэгтэй гэхэд нь Жеми
зөвшөөрч,

- Тийм л дээ, эрхэм ээ, нээрээ тийм гэжээ.

Сэтгэл нь хий хөөрөөд нэг юм дутуу ойлгосон бололтой. “Энэ хүн надад дахин нэг боломж
олгосон нь овоо” гэж Жеми бодлоо. Ван Дер Мерве халаасаа уудлан үнгэгдсэн цаасан дээр
гараар зурсан газрын зураг шуу юм гарган

- Энд байгаа. Магердамаас хойшоо Ваал голын хойт хөвөөнд гэхэд нь Жеми зургийг харж,
зүрх нь булиглан

- Хэдэн мил хол вэ гэсэнд

- Энд газрыг хол ойрыг хоногоор хэмждэг юм. Луусаар явахад 4-5 хоноод хүрнэ. Буцах замдаа
алмас ачиж ирэх тул илүү их хугацаа орно доо гэхэд нь Жеми инээд алдан,

- Тэгнэ гэжээ.
Жеми гудамжинд гарахдаа энгийн нэг жуулчин биш баяжих замаар явж байгаа эрэлчин
болсон байлаа. Дэлгүүрийн үүдэнд уяатай луусанд Банда ууттай юмсыг ачин дуусаж байв.

- Баярлалаа гэж түүнийг инээмсэглэн хэлэхэд Банда өөдөөс нь нэг эгцлэн хараад үг дүүгүй
яваад өгчээ. Жеми луусыг жолооноос нь барьж аваад

- Аян замдаа орцгооё, түншээ. Хөдлөх цаг боллоо гэж хэлээд умар зүгийг барин хөдлөлөө.

Шөнө нь Жеми голын дэргэд зогсож, луусны ачааг буулган усалж, өвс өгөв. Жеми өөрөө
лаазалсан мах, хатаасан гүйлс идэж, кофегоор даруулав. Шөнө янз бүрийн чимээ авиагаар
дүүрэн байлаа. Ус уухаар явж байгаа зэрлэг ан араатан архиран хүрхрэн, улин хуцах
сонсогдоно. Залуу эр энэ дэлхий дээрх хамгийн аймшигт араатны дунд урьд үзээгүй бүдүүлэг
улс оронд ямарч хамгаалалтгүй ганцаараа байлаа. Тэгээд өчүүхэн чимээ гарах бүрд давхийн
цочиж, харанхуйгаас одоо юу юугүй ямар нэгэн араатан үсэрч ирээд хурц соёогоо биед нь
шигтгэх болов уу гэж хүлээж байв. Бодол сэтгэл нь алслан оджээ. Тэгээд төрсөн гал
голомтынхоо амгалан тайван амьдрал, тохилог ор дэвсгэрээ дурсан санав. Жеми дав дувхийн
унтаж, догшин арслан заан зүүдэлж бас бавгар сахалтай эрчүүл асар том алмас эрдэнийг нь
булаах гэж байна хэмээн зүүдэлж хонов. Жеми үүрээр сэрэхэд нь луус нь үхчихсэн байв.
2-р бүлэг

Жеми нүдэндээ итгэсэнгүй, луусыг нь ямар нэг араатан ноцсон юм болов уу гэж бодоод
шархтсан газрыг эрсэн боловч юу ч байсангүй. Хөөрхий адгуус нойрондоо үхсэн байлаа. “
Мистер Ван Дер Мерве луусаа надаар төлүүлэх байх даа. За яах вэ, алмас аваад очихоор юм
бүхэн аяндаа болно” гэж Жеми бодлоо. Эргэж буцах зам байсангүй. Магердам тийш явган
явах болжээ. Агаарт шуугих чимээ гарахад нь толгойгоо өргөн харвал асар том хар дэлт
бүргэдүүд эргэлдэж байлаа. Жеми давхийн цочив. Зайлшгүй чухал хэрэгтэй юмсаа үүргэвчин
шалуухан хийж аваад цааш хөдлөв. 5 минутын дараа эргэж харахад нөгөө том хар махчин
шувууд үхсэн луусны сэгийг шавсан байлаа. Ганц урт чихнээс өөр юм харагдсангүй. Жеми
алхаагаа хурдасгав.

12 сар буюу африкийн зун байсан болхоор улаан наранд улайстал цооносон хээр талаар явна
гэдэг ёстой тамын зовлон ажээ. Жеми эхлээд золбоотой цовоо алхаж явснаа минут нь цаг
болж, цаг нь өдөр хоног болоход алхаа нь удаашрав. Сэтгэлийн хөөрөл дарагдаж, оронд нь
гуниг гутрал эзэллээ. Хаашаа ч харсан, эргэн тойрон элчилгүй ээрэм тал цэлийнэ. Энэ
чулуурхаг саарал цөлийг нар хайргүй төөнөнө. Жеми нэг булгийн дэргэд хоноглохоор болж,
шөнийн ан араатны яс үс хавталзмаар муухай архиран улилдах чимээн дунд унтлаа. Ан
араатны тийм чимээнээс нэгэнт айхаа больж харин ч ан араатны чимээ энэ тамын оронд ч
амьдрал байдгийг нотлох тул орь ганцаар биш шиг санагдана. Жеми нэг удаа нэгэн бүл
арслан харав. Эм арслан нь бага зэрэг зээр зуугаад эрийнхээ дэргэд очиж байхыг холоос
харлаа. Эм арслан ангийн олзоо эрийнхээ хөлд хаяад идэхэд нь саад болохгүй хажуу тийшээ
зайлав. Тэвчээр муутай басар гөрөөс рүү гүйн очиж зуугаад автал хүчирхэг эр арслан ганц
алгадаад хажуу тийш нь зайлуулав. Басар тэр дороо үхэж орхилоо. Эр арслан яаралгүй зоог
барьж эхлэв. Түүнийг цадсаны дараа энэ нэгэн өрх бүлийн бусад нь гөрөөс рүү ойртов.

Жеми аян замаа үргэлжлүүллээ. Хагас сар шахам явж байж Карруд хүрлээ. Энэ завсар
цөхрөнгөө барж байсан нь нэг биш Хүрэх газраа хүрч чадна гэж бат итгэхээ больсон байлаа.
“Би мөн усан тэнэг амьтан юм аа. Клипдрифтэд эргэж очоод Ван Дер Мервегээс өөр луус
гуйх хэрэгтэй байсан юм. Ван Дер Мерве бидний гэрээг цуцалсан бол яанаа? Үгүй дээ, би
ззөв ажил хийсэн юм байна” гэж дотроо бодлоо.

Жеми элчилгүй цөлийн дундуур урагш явсаар байлаа. Нэгэн удаа тэнгэрийн хаяаны тэндээс
4 хүн ирж явааг хараад “Би солиорч байна. Энэ лав зэрэглээ байх” гэж бодлоо. Гэвч
хүмүүсийн улам ойртоход Жемийн зүрх булиглаж, “Хүн байна. Хүн байна шүү” гэж бодлоо.
Хэлээ мартчихсан байх вий гэж айх шиг боллоо. Дуугарч хоолойгоо сорьж үзэхэд аль хэдийн
үхсэн хүний шиг санагдав. 4 эр ойртож ирлээ. Эцэж туйлдаад Клипдрифт рүү буцаж яваа
эрэлчид байжээ.

- Сайн байцгаана уу? Гэж мэндэлсэнд тэд толгой дохиод нэг нь

- Ийшээ юу ч байхгүй. Бид үзлээ. Цагаа дэмий үрэхийн нэмэр. Буцсан нь дээр гээд тэд
яваад өгөв.

Жемийн толгойд ямар ч бодол орохгүй хоосон болжээ. Өмнө нь хязгаар хярхаггүй их цөл
цэлийн байна. Халуун нар, хар ялаанаас нуугдчихаж болмоор газар нэг ч байхгүй. Хааяа нэг
өргөст бут тааралдах боловч зааны хөлд дэвсүүлэн газарт наалдсан байна. Хурц наранд
Жемийн нүд бараг сохорчээ. Арьс нь түлэгдэн цэврүү үсэрч, чих нь хий шуугин байлаа.
Амьсгаа авах тоолонд уушиг нь дэлбэрэх мэт санагдаж байлаа. Явах ч гэж урагшаа хий
гөлийн хөлөө арайхийн чирж байв. Ингээд өдөр цааш ганц ч алхаж чадахаа байгаад хөсөр
унажээ. Нүдээ анихад өөрөө асар том хайлуур сав дотор байж байна. Нар гэдэг нь туяагаараа
түүнийг түлж байгаа аварга том очир эрдэнэ юм байна гээж зүүдлэв. Тэгээд шөнө нь
бэмбэгнэтэл чичрэн сэрэв. Биеэ албадан байж жаахан борц идэж, бүлээн уснаас хэд
балгалаа. “Үүр цайхаас өмнө, халуу шатахаас өмнө хөдлөх хэрэгтэй” гэж бодоод босох гэтэл
босож чадсангүй, тэнхээ нь барагджээ. Хаашаа ч явахгүй, энд энэ чигтээ хэвтээд байвал
юутай сайхан билээ. “Дахиад жаахан унтья “ гэж бодлоо. Гэтэл хажуунаас нь нэг хүн “Чи нэг
унтвал дахиж сэрэхгүй шүү” гэж сануулах шиг боллоо. Том том дэлт бүргэд санаанд нь орж:
“Үгүй, би та нар миний ясыг үзэхгүй” гэж бодлоо. Тэгээд арайхийн хөл дээрээ босов.
Үүргэвч нь даагдахын аргагүй хүнд болжээ. Жеми үүргэвчээ чирэн урагшаа салгаллаа. Хэдэн
удаа ойчиж, хэдэн удаа боссоныг бүү мэд. Нэгэн удаа толгойгоо өргөн тэнгэр өөд өлийж,

- Би Жеми Макгрегор байна. Би энэ бүхнийг тэснэ. Би амьд үлдэнэ. Эзэн тэнгэр та сонсож
байна уу? Би тэснэ... гэж хэллээ.

Толгой дотор нь 2 хүн ярилцаад байх шиг.

- Чи эрдэнэ эрж яваа юу? Солиотой амьтан байна даа, чи. Тэр бүх яриа чинь чамайг шударга
хөдөлмөрөөс холдуулах гэсэн ад албины хорлонт мэх”

- Чи мөнгө хаанаас олсноо бидэнд хэлэхгүй яасан юм бэ? Энэ чинь дэлхийн нөгөө хязгаар
шүү. Чамд мөнгө байхгүй...

- Мистер Ван Дер Мерве, Би таны эрж буй хүн мөн. Надад итгээрэй, эрхэм ээ. Би өдөр
шөнөгүй ажиллана. Би танд тоолж баршгүй их алмас авчирч өгнө.

Гэвч аян зам бүр эхэнд нь, зам нь дууслаа.

“Чамд 2 зам бий. Нэг бол урагшаа яв, эсвэл эндээ үлдээд үхэх цагаа хүлээ... үхэх цагаа хүлээ.

Энэ үгс толгойд нь тасралтгүй цуурайтан байлаа. “ Дахиад нэг алх. За дахиад бас нэг
алхаарай, Жеми. Дахиад нэг...

2 хоногийн дараа Жеми Магердам тосгонд хүрлээ.

Хамаг бие нь цэврүү үсрэн идээлжээ. Зовхи нь бүлцийж хавдаад нүд нь бараг нээгдэхээ
больсон байв. Жеми гудамжны гол дунд өөрийн мэдэлгүй унав. Эрэлчид түүнийг өрөвдөн
нуруунаас нь үүргэвчийг авч, зовлонг нь нимгэлэх гэхэд нь Жеми тэднийг түлхэн

- Үгүй, миний алмасанд та нар бүү хүр. Миний алмасанд бүү хүр хэмээн дэмийрч байлаа.

3 хоногийн дараа нүцгэн ханатай жижигхэн өрөөнд ухаан оров. Хамаг бие нь боолттой
байлаа. Нүдээ нээгээд юуны өмнө орны хажууд дунд хэрийн насны тарган авгай сууж байхыг
харав.

- Би хаана ?... гээд цааш нь нэг ч үг дуугарч чадсангүй. Хоолойноос нь дуу гарахын оронд хий
хоржигнож байв.

- Чимээгүй бай, дүү минь. Чиний бие муу байна. Гэж тэр хүүхэн хэлээд боолттой толгойг нь
зөөлхөн өргөж, хөнгөн цагаан аягаар юм уулгав. Жеми ор тохойлдон ялимгүй өндийж

- Би хаа...? гэснээ шүлсээ нэг залгиж, дахин

- Би хаана байна вэ? Гэлээ.

- Чи Магердамд байна. Намайг Элис Жордан гэдэг. Чи манай зочид буудалд байна. Бүгд сайн
сайхан болно. Зүгээр сайн амраад бие чинь сайжирна. Хэвт гэлээ.

Хэдэн хүн үүргэвчийг нь авах гэж байсныг Жеми санаад хэрдхийн цочин

- Миний юм хум... хаана байна вэ? Хэмээн дахин өндийх гэж оролдсонд Элис хүүхэн зөөлөн
дуугаар аргадан зогсоож

- Бүх юм чинь энд байж байгаа дүү минь. Санаа бүү зов гээд буланд хэвтэж буй үүргэвчийг
заав.

“Би хүрээд ирлээ. Миний хэрэг бүтэж байна. Одоо юм бүхэн сайхан болно”

Элис Жордан ганц Жемийн амийг аварсан юм биш ажээ. Магердамын ард иргэдийн тэн
хагас нь энэ авгайн ач тусыг санаж явдаг байна. Энэ тосгонд алмас эрдэнэ олж баяжихаас
өөр юм боддоггүй эрэлчид дүүрэн бий. Элис Жордан авгай тэднийг анхааран халамжилж,
хооллож, сэтгэлийг засан урамшуулна. Элис өөрөө англи хүн бөгөөд эр нөхөр нь Леед хийж
байсан ажлаа орхиж, алмас эрхээр явахад нөхөртэйгээ хамт Өмнөд Африкт ирсэн байжээ.
Нөхөр нь ирснийхээ дараа 3 хоноод халуун хумхиагаар өвчлөн үхжээ. Элис эндээ үлдхээр
шийдсэн байна. Ерөөс үр хүүхэдгүй түүнд эрэлчин залуус үр хүүхэд мэт байх болов.Элис
авгай Жемийг 4 хоног асран өргөж, 5 дах хоног дээр Жемийн бие эдгэв.

- Миссис Жордан танд хязгааргүй их баярлалаа. Одоохондоо таны ачыг хариулж чадахгүй нь.
Гэсэн ч би хэзээ нэгэн цагт танд алмас эрдэнэ өгнө. Жеми Макгрегор би эр хүний үгээ өгч
байна.

Элис авгай энэ нүдэнд дулаахан залуугийн амнаас ийм үг дуулаад инээмсэглэв. Жеми их
турж, туулж өнгөрүүлсэн бэрх зовлонгийн айдас нүдэнд нь хурж үлдсэн ч гэлээ, зориг
шийдэмгийг нь гайхмаар байлаа.

“Энэ залуу бусадтай адилгүй юм” гэж миссис Жордан боджээ. Жеми угааж цэвэрлэсэн
хувцсаа өмсөөд хотыг үзэхээр гарав. Энэ бол Клипдрифтийн багасгасан хуулбар байлаа.
Мөнөөхөн майхан, мухлаг тэрэг, балиар муухай гудамж, ядуу тарчигхан газрууд, олон
эрэлчин. Гуанзны дэргэдүүр явж байхдаа олон хүн шуугилдахыг сонсоод очиж үзэхээр
шийдэв. Хэдэн хүн улаан цамцтай ирланд эрийг тойрон шавжээ.

- Энд юу болж байна вэ? Жеми асуув.

- Энэ хүн олзоо мялайж байна.

- Юу хийж байгаа юм бэ?

- Энэ өнөөдөр алмас олсон. Тэгээд өнөөдөр энэ гуанзанд уусан бүх вискийн үнийг төлөх
ёстой юм.

Жеми эрэлчдийн ширээний дэргэд очиж, нэр усаа хэлж өөрийгөө танилцуулсанд

- Макгрегор, чи хаанахынх вэ? Гэв.

- Шотландынх

- Танай тэр Шотланд нутгийнхан чамд юу гэж ярьсныг яаж мэдэх вэ. Ямар ч гэсэн эндээс
алмас олдог нь гонжийн жоо гэж нэгэн баргар царайт эрэлчин өгүүлэв.

Гонг-Конг, Форлон, Хоуп, Делпорт, Пуэман Копи, Сикспенни Гаш... гэх мэтийн хүрээ
буудлын нэр сонсдож байлаа.

Эрэлчид бүгдээрээ олон хоног сараар асар том үхэр чулуу хөдөлгөх, чулуурхаг газар ухах,
чулуу шигших мэтээр алмас эрж үйл тамаа цайж байгааг ярьж байв. Өдөр бүр хэдэн чулуу
олдог байна. Тэр нь баяжихад хүрэхгүй ч гэсэн горьдлогыг нь тасалдаггүй ажээ. Энэ хотод
өөдрөг санаа, гутруу санаа холилдон оршдог ажгуу. Өөдрөг сэтгэлтэн ирж байхад гутруу
сэтгэлтэн нь буцаж бахй жишээтэй. Жеми өөрөө хэний талд байгаагаа сайн мэдэж байв.
Жеми уусан архиндаа согтон ганхалзан байгаа улаан цамцтай ирланд хүний дэргэд очиж, Ван
Дер Мервегийн өгсөн зургийг үзүүлсэнд цаадах нь нэг хяламхийн хараад Жеми руу буцаан
шидэж,

- Шал балай юм. Тэндхийн газрыг ямх зай үлдээлгүй ухаж үзсэн. Чиний оронд би байсан бол
Бед Хоуп орж азаа үзэх юм байна гэв.

Жеми энэ үгийг итгэсэнгүй. Жеми гагцхүү Ван Дер Мервегийн зургийг шүтэж энд ирсэн.
Энэ бол түүнийг зам заагч юм. Энэ л Жемийг хөлгүй баян болгоно. Түүний тал талаас

- Колсберг яв, хүү минь. Тэндээс л одоо алмас олдож байгаа.

- Гилфилизис Конт руу яв.

- Би бол Мунтлайт Рашид оролдоод үзсэн нь дээр гэж бодож байна гэхчилэн зөвлөгөө өгөв.

Тэр орой хоол идэж байх үед Элис Жордан авгай

- Жеми, хаашаа явсан ч онцын ялгаа байхгүй. Очих газраа өөрөө шилж сонгоод тэнгэрт
залбиран ухаад бай. Бүгд л тэгдэг юм гэжээ.

Жеми шөнөжин элдвийг бодож зовж хоноод Ван Дер Мервегийн өгсөн зургийг мартхаар
шийдэж, олон хүний санаа зөвлөгөөг эс хайхран Молдер голын дагуу дорно зүг явахаар
шийдэв. Жеми миссис Жордантай салах ёс хийгээд аян замдаа орлоо.

3 өдөр, 3 шөнө явсны эцэст тохиромжтой газар олж, тэнд майхнаа босгов. Голын хоёр талаар
том том үхэр чулуу лүгхийх агаад Жеми бүдүүн модоор хөшүүрэг хийн том чулууг хөдөлгөн
доорхи хайрга чулуунд хүрэхийг хичээнэ.

Үүрийн гэгээнээс үдшийн бүрэнхий хүртэл газар ухаж, алмас байгаагийн шинж бүхий шар
шавар юм уу, тийм чулуулаг олохыг оролдож байлаа. Бүтэн долоо хоног болоход ядахдаа
жижиг чулуу ч олдсонгүй. Тэгэхээр нь дахиад аян замд орлоо. Нэгэн удаа алсад нарны туяанд
хурц тод гэрэлтэн буй мөнгөн байшин шиг юм харагдахад “ Миний нүд сохорч байгаа юм
болов уу” гэж Жеми бодов. Ойртож очиход бүх байшинг нь мөнгөөр барьсан юм шиг тосгон
байв. Гудамжаар нь уранхай ноорхой хувцастай индианууд явж байв. Жеми эргэн гайхан харж
явлаа. Мөнгөн байшин шиг харагдсан юм нь лаазалсан махны лаазаар зүйж хийсэн муусайн
оромж байжээ. Цаашаа замаа үргэлжлүүлэн нэг цаг яваад эргэж харахад тэр тосгон гялалзан
туяаран байв. Энэ нэгэн үзэгдэл Жемийн ой ухаанд мартагдашгүй хадагдан үлджээ.

Одоо Жеми умар зүгийг барин нэгэн голын хөвөөлөн явж, зам зуур алмас байж болмоор газар
ухаж үзэж байв. Гар нь царил даахаа болиход нойтон хайрга чулууг элгэгдэж эхэлнэ. Шөнө
болхоор үхсэн юм шиг унтдаг байлаа.

Хоёрдах долоо хоногийн сүүлчээр голыг өгсөн Паардепан хүрээний зүг явж байлаа. Голын
тохойд хоноглохоор буугаад түүдэг гал дээр мах шарж, цай чанаж аваад идэж уух зуур,
хязгааргүй тэнгэрт гялбалзах оддыг ширтэн байв. “Би энд юу хийж яваа хүн бэ? Тэнэг өвчтэй
юм шиг ээрэм цөлд ирж, чулуу онгилж, шавар ухаж явна. Гэртээ сууж байсан минь дээр
байж. Бямба гариг хүртэл нэг ч алмас олохгүй бол буцах мөрөө хайя” хэмээн Жеми бодлоо.

- Миний үгийг дуулж байна уу? Чөтгөр алгад чамайг...

“Ай тэнгэр минь, Би галзуурч байна” гэж бодлоо. Жеми хий гиюүрэн хурууныхаа салаагаар
элс урсгаж суугаад гэнэт нэг том чулуу дайралдхад нь хальт хараад хажуу тийш нь шидэж
орхив. Сүүлийн хэдэн долоо хоногт түүний гарт ийм чулуу хэдэн мянгаараа дайралддаг
байсан. Ийм чулууг Ван Дер Мерве юу гэж хэлж байлаа? Schlenters гэсэн. Гэтэл саяны
чулууны нэг юм нь Жемийн анхаарлыг татаад байлаа.Босож очоод авч үзвэл бусад чулуунаас
хамаагүй том болж ирээд этгээд сонин хэлбэртэй ажээ. Жеми тэр чулууг өмдөндөө арчаад
анхааралтай үзвэл алмас мөн шиг байлаа. Хэмжээгээр тахианы өндөгний хэрийн том ажээ. “
Ай тэнгэр минь, Энэ чинь алмас эрдэнэ мөн бол?” гэж дотроо бодоод гэнэт амьсгал нь
давхцав. Гар дэнлүү шүүрч аваад газраар тэмтэрч эхлэлээ. 15 минутын дараа дахиад 4 чулуу
оллоо. Хэмжээгээр түрүүчийнхээс жижиг ч гэсэн залуу эрийн цээж баяр баясгалангаар
бялхалаа. Үүрээр сэрээд солиотой юм шиг малтаж үзэв. Үд болтол дахиад 6 алмас оллоо.
Бүтэн долоо хоног газар малтаж, олсон алмасаа нууцгай газар хадгалж байлаа. Өдөр бүр
шинэ, шинэ алмас олж, эрдэнэ баялаг нь хэрхэн аривжиж байгааг хараад аз хийморьтойдоо
баярлаж барахгүй байв. Энэ эрдэнэсийн зөвхөн тэн хагас нь Жемигийн өөрийнх нь. Гэхдээ
энэ ч гэсэн ухаанд багтамгүй баян болоход бүрэн хангалттай билээ. Жеми долоо хоногийн
эцэст уул газрыг зураг дээр тэмдэглэн авч, царил хүрээ тэг зураад үнэлж баршгүй их
эрдэнэсээ үүргэвчийн ёроолд хийж, Магердамыг зорилоо.

...Жижиг конторын дээрх хаяг гуншинг уншвал,

“Алмас худалдан авна” гэжээ.

Бөгчим жижиг өрөөнд ороод Жеми гэнэт балмагдан сандрав. Эрэлчдийн алмас эрдэнэ гэж
авчирсан чулуу нь жинхэнэ хэрэг дээрээ хэнд ч хэрэггүй чулуу байсан тийм намтар
бишгүйдээ сонссон билээ. “ Минийх бас тийм чулуу байвал яана? Хэрэв...” гэж бодоод
бэмбэгнэв. Контортоо ширээний ард сууж байсан үнэлэгчийг

- Танд юугаар туслах вэ? Гэж асуухад нь Жеми нэгэнтээ санаа алдан

- Ийм юм аа, эрхэм ээ. Та энэ чулууг үзээд өгөхгүй юү? Гэв.

Жеми үүргэвчнээсээ чулуу гарган ширээн дээр тавихад үнэлэгч анхааралтай харж байснаа
ширээн дээр байгаа 28 алмасыг нүд бүлтийлгэн ширтэж,

- Хаанаас? Та үүнийг хаанаас олоо вэ? Гэхэд нь

- Хэрэв та үүнийг жинхэнэ алмас эрдэнэ мөн гэж нотолбол дараа нь хэлье гэсэнд үнэлэгч

хамгийн том алмасыг авч галт шилээр үзэж байснаа

- Ай тэнгэр, Энэ насандаа ийм том алмас үзээгүй юм байна гэж уулга алдах нь тэр.

Жемийн амьсгаа давхцан, хөөрөн бяарласандаа дороо цовхчин бүжиглэхэд бэлэн байлаа.

- Та энэ алмасуудыг хаанаас олоо вэ? Хэмээн үнэлэгч гуйж царайчилсан байдалтай асуув.

- 15 минутын дараа гуанзанд очоорой. Тэгээд танд бүгдийг ярьж өгье гэж Жеми

инээмсэглэн хариуллаа. Жеми алмасаа цуглуулан авч халаасандаа хийгээд гадагш гарч эндээс
хоёр байшингийн цаана байдаг бүртгэх контор руу очлоо. Тэнд очоод,

- Би энэ хэсэг газрыг Саломон Ван Дер Мерве, Жеми Макгрегорын нэр дээр бүртгүүлж шав
тавихыг хүснэ гэлээ.

Жеми энэ хаалгаар үгээгүй ядуу хүн орж ирсэн бол одоо олон саяар тоологдох хөрөнгө
бэлтэй баян хүн болоод гарч ирэв. Жемийг гуанзанд очиход эрдэнэс үнэлэгч тэнд байж
байлаа. Жемигийн олз омгийг бүгдэд ярьсан бололтой. Учир нь түүнийг ормогц гуанзанд чив
чимээгүй болж, хүн бүхний царайд адилхан нэгийг асуусан байдал илэрлээ. Жеми лангууны
дэргэд очоод баарын хүнд хандан

- Би олзоо мялаая... гээд цугласан олонд хандан,

- Паардспан гэв.

Элис Жордан авгай гал тогооныхоо өрөөнд цай ууж сууснаа Жемийг орж очиход баярын
царайгаар инээмсэглэн угтаж,

- Жеми, Энх мэнд эргэж ирсэн чин юутай сайн юм бэ гэж дуу алдаад урагдаж ноорсон хувцас
хунар, улаан толбо болсон нүүрийг ажин харж,

- Ажил чинь бүтсэнгүй юү? Бүү гутар. Надтай хамт сууж цай уу, дүү минь. Тэгээд дотор чинь
онгойно гэжээ. Жеми нэг ч үг хэлэлгүй халаасандаа гараа хийж, нэг том алмас гаргаж ирээд
миссис Жорданы алган дээр тавьж

- Би хэлсэн үгэндээ эзэн болж, үүнийг танд барья гэсэнд авгай тэр чулууг харж, харж нүдэнд
нь нулимс мэлтэгнэн

- Үгүй дээ, Жеми минь. Үүгээр би яах билээ. Чи ойлгохгүй байна уу, дүү минь? Энэ чинь
хүний занг эвддэг юм... хэмээн аяархан хэлжээ.

Жеми зохих ёсоор Клипдрифтэд эргэж ирлээ. Нэг жижиг алмасаа морь тэргээр арилжиж,
хамжаа түншийгээ гомдоохгүй, юм сануулахгүй гэж бүх зардлыг нарийн нягт тооцоолсон аж.
Клипдрифт орох зам саадгүй, тааламжтай сайхан байв. Клипдрифтээс гарсан цагаас хойш
ямаршуухан аймшигт зовлон үзэж өнгөрүүлснээ санаад “Ядуу, баяны ялгаа нь үүнд байдаг
юм байна. Ядуу хүн явган явж байхад баян хүн сүйх тэргээр морилж байдаг гэж боджээ.
Жеми морио аяархан ташуурдаж хязгаар хярхаггүй ээрэм талаар давхилаа.
3-р бүлэг

Клипдрифт огт өөрчлөгдөөгүй байхад Жеми тэс өөр ондоо хүн болсон байв. Түүнийг хотын
гудамжаар өнгөрөн Ван Дер Мервегийн дэлгүүрийн дэргэд очиж зогсоход хүмүүс хойноос нь
харцгааж байлаа. Үнэтэй сайн морь, тэрэг тэдний анхаарлыг татсан хэрэг бус залуу эрийн
баяр баясгалант царайг хараад гайхцгаажээ. Хотынхон урьд нь баяжсан эрэлчдийг харж
байсан болохоор энэ нэг үзэгдэл тэдний сэтгэлд найдлага төрүүлэв. Жемийг тэрэгнээс үсрэн
буухад мөнөөх хар арьстан зарц залуу үүдэнд зогсож байлаа. Жеми түүний өөдөөс
инээмсэглээд,

- Сайн уу? Би эргээд ирлээ гэлээ.

Банда морийг үг дуугүй уяад дэлгүүрт ороход Жеми хойноос нь даган оров. Саломон Ван Дер
Мерве худалдан авагчдад үйлчилж байснаа толгойгоо өргөн инээмсэглэхэд нь энэ жижигхэн
голланд эр ямар нэг аргаар юм бүхнийг хэдийн олж мэдсэн юм байна гэж Жеми ойлголоо.
Алмасны шинэ орд нээж олсон тухай мэдээ бүтэн тив дээгүүр хэрхэн гэрлийн хурдтай
тарсны учрыг хэн ч тайлбарлаж үл чадна. Ван Дер Мерве худалдан авагчдад үйлчилж дуусаад
дэлгүүрийн цаад руу толгой дохиж,

- Орогтун, мистер Макгрегор гэхэд нь Жеми дагаж орлоо. Ван Дер Мервегийн охин зуухны
дэргэд хоол хийнэ.

- Сайн байна уу, Маргерет гэж Жеми мэндлэхэд бүсгүйн царай улсхийж буруу харав.

- Чамайг их сонин сайхан мэдээтэй гэж дуулсан хэмээн Ван Дер Мерве мэлийтэл инээгээд
ширээний ард сууж, урдаа байсан тавгийг түлхэн зайлуулж зай гаргав.

- Нээрээ тийм шүү, эрхэм ээ гэж Жеми нүүр бардам хэлээд том савхин уут гаргаж, дотор нь
байсан алмасыг гал тогооны ширээн дээр асгахад, Ван Дер Мерве илбэдүүлсэн мэт нэг хэсэг
нүд бүлтийн харж байснаа дараа нь нэг нэгээр нь үзснээ хамгийн томыг үзэж, дараа нь
бүгдийг нийлүүлэн хилэн уутанд хийж, төмөр авдарт далд хийгээд цоожлов. Дахин ярьж
эхлэхдээ дуу нь үнэхээр бахдан баярласан өнгөтэй байлаа.

- Чи маш сайн ажиллажээ. Макгрегор. Маш сайн байна.

- Баярлалаа, эрхэм ээ. Энэ бол зөвхөн эхлэл. Тэнд дахиад олон зуун алмас бий. Энэ бүхэн
ямар үнэтэйг сэтгэлдээ төсөөлөхөд ч бэрх.

- Тэр хэсэг газартаа бүх дүрэм журам ёсоор шав тавьсан уу?

- Тэгсэн, эрхэм ээ. Хоёр хүний нэр дээр гэж Жеми хэлээд бүртгүүлсэн тухай баримт бичгийг
халааснаасаа гаргаж ирэв. Ван Дер Мерве бичиг баримтыг анхааралтай үзээд өөрийн
халаасанд хийж

- Чамайг шагнавал зохино. Энд хүлээж бай гээд дэлгүүр рүү орсон үүд рүү явахдаа
- Надтай хамт яв, Маргерет гэжээ.

Охин эцгийнхээ хойноос дуулгавартай дагав. “Энэ бүсгүй аймхай муур шиг юм” гэж Жеми
бодлоо. Хэдэн минутын дараа Ван Дер Мерве ганцаараа эргэж ирээд,

- За энэ гэж хэлээд түрийвч гарган 50 фунт нарийн тоолж өгөв. Жеми өөдөөс нь гайхан харж,

- Энэ чин юу юм бэ? Гэсэнд

- Чиний ажлын хөлс, хүү минь гэжээ.

- Ойлгохгүй байна.

- Чи 24 долоо хоног ажилласан байна. Долоо хоногт 2 фунт бодож 48 болж байна. 2 фунт би
чамд шагнал болгож байгаа юм... гэхэд нь Жеми тас тас инээж

- Алмасны тэн хагас нь минийх юм чинь би 2 фунтийн шагналаар яах билээ дээ гэв.

- Алмасны тэн хагас ий?

- Тийм ээ, эрхэм ээ. Миний хувь. Бид хамжаа түнш нар шүү дээ гэсэнд Ван Дер Мерве өөдөөс
нь нүдээ их болгон ширтэж,

- Түнш ий? Хэн чамд тэгж хэлсэн юм бэ? Гэхэд нь Жеми Ван Дер Мервегийн өөдөөс учрыг
ойлгож ядан харж,

- Хэн надад хэлсэн юм бэ гэнээ? Гэрээнд тэгж бичсэн байгаа гэв.

- Чи гэрээг уншсан юм уу?

- Уншаагүй, эрхэм ээ. Африкаанс хэлээр бичсэн байгаа. Та өөрөө бид түнш гэж хэлсэн шүү
дээ гэсэнд өвгөн толгой сэгсэрч

- Чи буруу ойлгожээ, Макгрегор. Надад түнш хэрэггүй. Би чамаар ажлаа хийлгэх гэж хөлсөлж
авсан. Би чамд багаж хэрэгслэл өгч, алмас эрүүлэхээр явуулсан гэхэд нь Жемийн цээж
давчдан хилэн бадарч байгааг мэдэрч,

- Та надад юу ч зүгээр өгөөгүй. Би багаж хэрэгслийн үнэд 120 фунт төлсөн гэсэнд өвгөн
далаа хавчаад,

- Дэмий маргаж үнэт цагаа үрж байх хүсэл алга. За ингэе. Би чамд дахиад 50 фунт өгөөд
хоёул өгөө аваагүй зүйл дуусгая. Энэ бол миний зүгээс өгөөмөр сайхан сэтгэл гэж бодож
байна гэхэд нь Жеми тэсгэлгүй хилэгнэн

- Бидний өгөө аваа дуусаагүй. Бүх алмасын тэн хагас нь минийх. Би түүнийгээ авна. Би
алмастай хэсгийг хоёр биеийнхээ нэр дээр бүртгүүлсэн шүү дээ гэсэнд Ван Дер Мерве
жуумалзан
- Тэгвэл чи намайг мэхлэсэн хүн юм байна. Үүний улмаас чамайг баривчилж болно шүү. Энэ
мөнгийг аваад эндээс тонил гээд Жемигийн гарт мөнгө атгуулав.

- Таныг шүүхэд өгнө дөө

- Чамд өмгөөлөгч хөлслөх мөнгө бий юм уу, түүнээс гадна эндхийн бүх өмгөөлөгч нар миний
төлөө ажилладаг юм.

“Энэ ер юу болж байна вэ? Хар дарсан зүүд шиг” гэж Жеми бодов. Эзгүй элсэн цөлийг олон
сар өдөр үйл тамаа цайж байж туулсан. Үүрийн гэгээнээс үдшийн бүрий хүртэл шургаж
унатлаа ажилласан, энэ бүхнээ нэхэн саналаа. Тийнхүү амиа алдахаас наахнуур зүдэрч зүтгэж
байж олсон, зүй ёсоор өөрийнх нь хөрөнгийг одоо энэ хүн булааж авах гэж байна. Жеми
голланд эрийн нүдийг эгцлэн харж

- Би үүнийг зүгээр өнгөрөөхгүй. Би Клипдрифтээс явахгүй. Таныг намайг яаж муухай

залилсныг эндхийн хүн бүхэнд ярина. Би танаас өөрт ноогдох алмасыг авна гэсэнд Ван Дер
Мерве харцыг нь даахгүй нүд дальдран өөр зүг харж,

- Эмчид үзүүлбэл дээр биз дээ, хүү минь. Наранд их шарагдаад тархи толгой чинь гэмтсэн
бололтой гэж бөвтнөхөд Жеми ухасхийн босож өвгөнийг заамдаж аваад

- Чамд харамсах цаг ирнэ гээд өвгөнийг тавьж мөнгийг нь ширээн дээр шидэж орхиод
дэлгүүрээс гүйн гарав.

Жемийг “Тэнүүлчин” гуанзанд эргэж очиход тэнд бараг хүн үлдсэнгүй. Эрэлчдийн олонх нь
хэдийн Паардспаны зүг явсан байжээ. Хилэн, цөхрөл хоёр Жемийн цээжийг урж байлаа.
“Хүн үнэмшмээргүй юм. Тун саяхан Крез шиг баян байснаа одоо дахиад л адгийн муу
гуйлгачин болчихлоо. Муу хулгайч Ван Дер Мервег цээрлүүлнэ. Харин яаж?” гэж Жеми
бодов. Ван Дер Мервегийн хэлдэг үнэн. Жемид өмгөөлөгч хөлслөн авах мөнгө байхгүй. Энэ
газар Жемид таних хүн байхгүй. Ван Дер Мерве бол бүхэнд хүндтэй голланд хүн. Жемид
байгаа ганц зэвсэг гэвэл үнэн үг. Өөрийгөө Ван Дер Мервегийн хэрхэн мэхлэснийг Өмнөд
Африктийн бүх хүн ардад ярина. Баарын хүн мэндлэн угтаж,

- Тавтай морилно уу, Мистер Макгрегор. Бүх зардлыг манайх даана. Юу авах вэ?

- Виски.

Смитийн хийж өгсөн 2 хувь вискийг Жеми нэгмөсөн хөнтрөв. Архи ууж сураагүй болхоор
галт шингэн хоолойг нь зурлаа.

- Дахиад виски.

- Одоохон. Виски хэнийг ч унагаж чадна гэж би хэлдэг юм даа.

Хоёрдахь хувь виски арай амархан оров. Баарны хүн нэгэн эрэлчинд хандан Ван Дер
Мервегээа тусламж гуй хэмээн хэлж байсныг Жеми санаад,
- Ван Дер Мерве өвгөнийг луйварчин гэж та мэдэх үү? Миний алмасыг мэхлээд авчихсан
гэсэнд

- Яасан аймаар юм бэ. Хүн үнэмшмээргүй юм байна гэж Смит өрөвдсөн байдалтай өгүүлэв.

- Түүнийг зүгээр өнгөрөөхгүй. Алмасны тэн хагас минийх. Ван Лер Мерве муу хулгай.
Үүнийг би хүн бүхэнд ярина гэж Жеми хэлэхдээ хэл нь ороолдон байв.

- Мэдээтэй л байгаарай. Ван Дер Мерве энэ хотод их эрх мэдэлтэй хүн шүү. Чи түүнтэй
нэгийгээ үзье гэж байгаа бол чамд тусламж хэрэгтэй. Ингэхэд миний мэдэх нэгэн хүн бий.
Бас л Ван Дер Мервег үзэн яддаг юм гэж Смит яриад ийш тийшээ хараад дуугаа намсган

- Гудамжны үзүүрт нэг муу пин бий. Би бүгдийг ярьж тохирьё. Өнөө орой тэнд 10 цагт
очоорой гэхэд нь

- Баярлалаа. Таны ачийг мартахгүй гэж Жеми хариулав.

- Орой 10 –т , хуучин муу пинд

Пин гэдэг нь биржгэр төмрөөр яаруу хийсэн нэг муу байшин шуу юм байв. Тэр пин хотын
захын гудамжны үзүүрт байлаа. Жеми оройн 10 цагт тэнд очив. Харанхуй болжээ. Пингийн
хажууд хүн харагдахгүй болхоор нь дотогшоо орлоо.

-Хүн байна уу?

Хариу байдаггүй. Жеми урагшаа яаралгүй алхлав. Харанхуйд адууны дүрс бүдэгхэн харагдаж,
ард нь чимээ сонсдоход Жеми эргэж харах гэтэл толгой дээрээс нь чанга цохиход хөсөр унав.
Нэг их тэнхээтэй хүн түүнийг толгой түрүүгүй балбаж эхлэлээ. Зодож занчих нь хэзээ ч
дуусахгүй янзтай. Өвдөхийг тэсэх тэнхээ тасарч байтал ухаан алдав...

Дээрээс нь хувингаар ус асгалаа. Нүдээ нээхэд Ван Дер Мервегийн негр зарц Банда харагдах
шиг болов. Түүнийг дахин балбаж эхлэлээ. Хавирга нь нужигнахыг Жеми мэдрэв. Хөл рүү нь
нэг хүнд юмаар яс нь шажигнахыг сонслоо. Дахиад л ухаан алдлаа.

Хамаг бие нь халуу оргиж байлаа. Хэн нэгэн хүн нүүр амыг нь төмрийн зүлгүүрээр маажиж
байх шиг санагдан гараа өргөн саатуулах гэтэл гар нь даагдсангүй. Нүдээ нээх гэтэл зовхи нь
бүлцийж хавдаад юу ч харагдсангүй. Хамаг биеийн эд эс бүхэн тэсэхүйеэ бэрх өвдөхийг
мэдрэн хаана байгаагаа санах гэж оролдож үзэв. Жаахан хөдлөх гэтэл нүүрийг нь төмөр
зүлгүүрээр дахин маажих шиг боллоо. Гарын дор эргэн тойрон элс байгаа нь мэдэгдэв.
Шархалсан нүүрээрээ элсэн дээр хэвтэж байжээ. Ёолон гиншиж өвдөг дээрээ өндийхийг
оролдож, нүдээ нээх гэтэл хий бүрэлзэхээс өөр юм харагдсангүй. Жеми эзгүй хээр цөлд
чармай нүцгэн хэвтэж байлаа. Өглөө болж, шарх сорви болсон биеийг нар хайр гамгүй
төөнөв. Тэд Жемийг энд үхэг гээд орхисон байж. Саломон Ван Дер Мерве, баарны эзэн Смит
2-н хийсэн ажил. Жеми голланд өвгөнийг занаж зүхсэн. Хариуд нь ингэж тамлан зовоохоор
шийджээ.
“Гайгүй ээ, сайхан мэдээрэй. Чи үүнийхээ горийг амсна. Би чамаас заавал өшөөгөө авна. Тэр
хоёр хоёулаа үүнийхээ төлөөсийг үзнэ” гэж Жеми бодов. Хэдийгээр хавирга нь хугарч,
амьсгал авахад хэцүү байсан боловч үзэн ядах сэтгэл нь хүч өгнө...

Хугарсан хавирга уушгийг цоо хатгахаас болгоомжлох хэрэгтэй юм. Жеми босох гэж
оролдоод тэр дороо ойчлоо. Баруун хөл нь бас хугарчээ. Ингээд хаашаа ч явж чадахгүй
болжээ.

Мөлхөж л чадна...

Жеми хаана байгаагаа мэдэхгүй байв. Тэд нар түүнийг гол замаас хол, цөөвөр чоно, дэлт
бүргэдээс өөр хэн ч олохын аргагүй тийм газар хаясан бололтой. Цөл бол асар том
оршуулгын газар юм. Жеми өөрөө сэг иддэг амьтадын цав цагаан болтол мөлжсөн хүний
ястай дайралдаж байсан нь нэг биш. Түүнийг ийнхүү бодож завдаагүй байтал дээгүүр нь
дэлт бүргэдийн далавч сүрчигнэх, сийгүүлэн дуугарах чимээ сонсдов. Тэрээр махчин
амьтадын барааг харж чадаагүй ч үнэрийг мэдээд айдас төрөв.

Жеми урагш мөлхлөө.

Өвдөхийн зовлонг эдлэх нь тэр ээ...

Өчүүхэн төдий хөдлөх бүрд тэсэхүеэ бэрх шаналан зовно. Нэг талаараа мөлхөхөд хугарсан
хөл нь янгинана. Нөгөө талаараа мөлхөх гэхэд хугарсан хавирга нь хоорондоо хавиралдана.
Хөдлөхгүй хэвтээд байх нь тамын зовлонг, хөдлөхөөр амь тавих шахна. Гэсэн ч Жеми
мөлхөсөөр байлаа.

Дээгүүр нь шувууны далавч сэрчигнэх чимээ сонсоод дэлт бүргэдүүд үхэхийг нь тэвчээртэй
хүлээж байгааг мэдлээ. Ухаан нь балартан орон гаран болжээ. Абердины сэрүүн сүмд ах
нарынхаа хооронд гоёлын хувцастай сууж байх юм. Мэри эгч нь Зини Кордтой хамт зуны
сайхан палааж өмссөн байна. Энни Корд өөдөөс нь хараад инээмсэглэхэд Жем босож дэргэд
нь очих гэтэл хоёр ах нь бөөр лүү нь өшиглөөд байх юм. Хамаг бие нь тэсхийн аргагүй
шархиран өвдөж, Жеми дахиад л эзгүй цөлд хэвтэж байх юм. Чармай нүцгэн, хугархай
хөлтэй.

Дэлт бүргэдүүд тэсэж ядсан байдалтай чанга чанга дуугарч байлаа.

Тэр махчин шувуудын хаана байгааг харах санаатай нүдээ өчүүхэн төдий ч атугай нээхийг
оролдов. Мэнэрсэн зовхинд нь ямар нэгэн юмсын дүрс үзэгдэх шиг болж, тэр цөөвөр чоно,
нохой болж хувирав.

Салхины дээд талаас өмхий халуун үнэртэж байлаа. Зогсохтой нь зэрэг махчин амьтад
дайран орж ирнэ гэж мэдэж байсан учир эцсийн хүчээ шавхан мөлхсөөр байлаа. Өвдөхийн
дээр наран хайр найргүй шарж, хамаг бие нь халуу оргино... Ван Дер Мервегээс өшөө авахаас
нааш бууж өгч болохгүй. Жеми орон цагийн баримжаа алджээ. Нэг миль мөлхсөн болов уу
гэж өөрөө бодож байлаа. Үнэн хэрэг дээрээ хэдхэн ярд газар тойрон мөлхсөн байлаа.
Эргэн тойрон юу ч харагдсангүй. Ганцхан Ван Дер Мерве дээр л хамаг анхаарлаа
төвлөрүүлнэ.

Ухаан нь балартаж эхэлснээ тэсэхүеэ бэрх өвдөхөд дороо сэхэв. Хэн нэг хүн хөлийг нь огтолж
байх шиг...

Жеми хаана байгаа, өөрт нь ямар явдал тохиолдсоныг тэр даруй санасангүй. Асар их хүчлэн
байж нүдээ нээлээ. Лут том дэлт бүргэд хөлийг нь тоншин зулгааж байлаа. Жеми тэр махчин
шувууны хар нүд, муухай өд сөдийг харлаа. Дэлт бүргэд дээр нь ирж суухад өмхий муухай
үнэр нь мэдэгдэж байв. Хашгирах гэтэл дуу гарсангүй. Урагшаа нэг таталдан огзгосхийж
хөлөөс нь цус гоожиж байсныг мэдэрлээ. Махчин шувууд дээгүүр нь эргэлдэн юу юугүй
дайрахад бэлэн байгааг олж харав. Хэрэв одоо ингээд ухаан алдах юм бол дахиад хэзээ ч
сэхэхгүй гэдгийг мэдэж байлаа. Жемийг зогсохтой зэрэг дэлт бүргэдүүд дайрна. Хажууд нь
шувууны далавч сэр сэр хийх сонсогдсон боловч хөөх тэнхэлгүй болжээ. Хамаг тэнхээ нь
нэгэнт барагджээ. Тэгээд нүүрээрээ халуун элс рүү шургалаа.

Том том махчин шувууд олз руугаа ухасхийлдэв.

4-р бүлэг

Бямба гариг бол Кейптаунд зах гардаг өдөр. Гудамжаар нь худалдагч, худалдан авагч нар
дүүрэн. Африкчууд, францууд, дүрэмт хувцастай цэргүүд, хуниас банзал, торон сүлжмэл
цамц өмссөн англи хатагтай нар тус хотын Бреамеонстейн, Парк Таун, Бургерсдрон талбайд
байдаг зах зээлээр бужигналдана. Энд хогшил тавилга, тэрэг, адуу мал, жимс ногоо, хувцас
хунар, тоглоом, янз бүрийн орчуулгатай ном зэрэг зүсэн зүйлийн барааг худалдана. Кейптаун
бямба гаригт есөн хэлийн хүн амьтан бужигнасан яармаг болж хувирдаг байлаа.

Банда цагаан арьстаны өөдөөс эгцэлж харахгүйг хичээн зах дээгүүр яаралгүй сажилж явлаа.
Цагаан арьстаны өөдөөс эгцэлж харах аюултай. Хар, улаан, өнгөт арьстан гудамжаар пиг
дүүрэн байх боловч засгийн эрх цөөнх цагаан арьстаны гарт байдаг. Банда тэднийг үзэн ядна.
Энэ бол Бандагийн өөрийнх нь газар нутаг, цагаан арьстанууд бол энд outlanlanders. Өмнөд
Африкт басуто, зулус, бечаун, матабеле гэх мэт олон овог аймаг бий. Эд нар бүгдээрээ банту
ястанд багтана. Банту гэдэг үг “абанту” буюу ард түмэн гэсэн үгнээс гарчээ. Бандагийн
өөрийнх нь баролон овог аймаг бол шилмэл дээд хэсэг нь. Урьд Өмнөд Африкт харт арьстны
хүчирхэг гүрэн оршиж байсан гэж эмээгийнхээ ярьж өгсөнийг Банда дурсан санав. Өмнөд
африк бол тэдний хаант улс, тэдний газар нутаг. Гэтэл одоо цагаан арьстанууд хамаг газрыг
бага багаар эзлэн авч, хар арьстаныг эрх чөлөөгүй боол болгосон. Хар арьстан хүн одоо амьд
мэнд тэсэж үлдэхийн тулд номхон дуугавартай байх ёстой. Гэвч энэ бол гадна өнгөн дээрээ
юм. Жинхэнэ хэрэг дээрээ бол тэд эвлэршгүй тэмцэгчид хэвээрээ үлджээ.

Банда хэдэн настайгаа мэдэхгүй. Учир нь хар арьстанд төрсний гэрчилгээ өгдөггүй. Цаг
үеийн дайн тулалдаан, их хүмүүсийн мэндэлсэн, таалал төгссөн өдөр, сүүлт од, газар
хөдлөлт мэт болсон явдлаар хар арьстнууд насаа хэмжинэ.

Банда өөрийнгөө овог аймгийн тэргүүний хүү гэдгээ мэддэг. Өөрийн ард түмний төлөө
тэмцэх ёстой гэдгээ ухаардаг. Банда банту овог аймгийнхны урьдыг хүчийг сэргэх ёстой. Ийм
эрхэм үүрэгтэйгээ ухамсарлаад нуруугаа цэхлэн алхаагаа хурдасгалаа. Тэгж яваад өөрийг нь
нэг хүн харж байгааг мэдрэв.

Банда дан хар арьстан оршин суудаг хотын зүүн зах руу алгуурхан явлаа. Том том байшин,
үнэт барааны дэлгүүр цөөрсөөр сүүлдээ дан биржгэр төмрөөр барьсан муусайн пин, ядуу урц
овоохой дайралдах болов. Банда бохир муухай нарийн гудамжаар орж, араас нь дагаж яваа
хүн байхгүйг баттай мэдэх гэж эргэн харлаа. Нэгэн муу модон байшингий дэргэд хүрээд бас
дахин эргэж тойрноо сайн харсны дараа хаалгыг хоёр тогшоод дотогшоо орлоо. Өрөөний
буланд туранхай хар авгай хувцас оёод сууж байв. Банда тэр авгайд толгой дохиод хажуугийн
өрөө рүү орлоо.

Тэнд орон дээр хэвтэж байгаа хүнийг Банда харлаа.

6 сарын өмнө Жеми Макгрегор анх ухаан ороод танихгүй айлын орон дээр хэвтэж байгаагаа
мэджээ. Тэгээд болсон явдлыг нэхэн санав. Ээрэм цөлд хугархай хөлтэй хэвтэж байсан. Дэлт
бүргэдүүд...

Унтлагын өрөөнд Бандаг орж ирэхэд “энэ одоо намайг ална” гэж Жеми боджээ. Жеми амьд
байгааг Ван Дер Мервеямар нэгэн янзаар мэдээд бүрмөсөн цааш харуулахаар хар зарцаа
явуулсан шиг байна.

- Эзэн чинь өөрөө ирэхгүй яасан юм бэ? Хэмээн Жеми хоолойгоо хэржигнүүлэн өгүүлэхэд

- Надад эзэн байхгүй гэж Банда хэллээ.

- Вөн Дер Мерве яагаа вэ? Чамайг явуулсан юм биш үү?

- Үгүй. Миний энд байгааг тэр мэдвэл бид 2-г хоёуланг маань ална.

Нэг л хачин, утга учиргүй балай юм болж байна даа.

- Би хаана байна вэ? Би хаана байна хэлээд өгөөч?

- Кейптаунд

- Тийм байх ёсгүй. Би яаж нааш ирсэн юм бэ?

- Би чамайг нааш нь авчирсан.

Жеми Бандагийн нүдийг удтал ширтээд,

- Яах гэж?

- Чи надад хэрэгтэй. Өшөө авахад...

- Юун өшөө вэ? Гэсэнд Банда ойртож ирээд

- Бүх учир надад байгаа юм. Ван Дер Мерве охин дүүг минь хүчиндсэн. Дүү минь түүнд хүү
төрүүлж өгөөд үхсэн. Миний дүү 11 настай байсан гэхэд нь Жеми

- Тэнгэр минь гэж дуу алдав.

- Би дүүгээ үхсэн өдрөөс хойш надад туслах цагаан арьстан хүнийг эрж явна. Тийм хүнийг би
хуучин муу пинд, чамайг зодоход тусалж байхдаа олсон, Макгрегор оо. Чамайг цөлд аваачиж
хаяахад үхчихсэн байсан гэж би нөгөөдүүлд хэлсэн юм. Дараа нь би буцаж очоод чамайг
авсан. Ам мөлтөс амжиж очсон байна лээ.

Дэлт бүргэд хурц хошуугаа биед нь шигтгэж байсныг Жеми санаад хамаг бие нь дагжин
чичрэв.

- Дэлт бүргэд чам руу дайраад байсан. Би чамайг мухлаг тэргэнд ачиж, өөрийн хүмүүсийн
гэрт аваачиж нуусан билээ. Манайхны нэг домч чиний хавирга, хөлийг янзалсан юм.

- Тэгээд?

- Миний садан төрлийн хэдэн хүн тэргээр Кейптаун орно гэж байсан. Бид чамайг аваад
явсан. Чи бараг цаг үргэлж ухаангүй байсан. Чамайг дахиад сэрэхгүй болов уу гэж айж
байлаа.

Жеми өөрийг нь алах шахсан хүний нүдийг эгцлэн харав. Бодох юм ч их байлаа. Энэ хүнд
итгэхгүй байлаа. Тэгтэл амийг нь аварчээ. Банда Жемиг ашиглан Ван Дер Мервегээс өшөөгөө
авах гэж байгаа юм байна. “Энэ чинь надад бас хэрэгтэй юм” гэж Жеми бодов. Ван Дер
Мерве хүний үнэргүй зан гаргасны хариугаа авах даа л авна гэж Жеми энэ дэлхий дээр
юунаас ч илүү хүсч байлаа. Тэгээд Жеми

- За, сайн байна. Би Ван Дер Мервегээс хоёр биенийхээ төлөө өшөө авахдаа л авна гэлээ.

Энэ бүх үеийн турш Бандагийн царайд анх удаа инээмсэглэл илэрэв.

- Тэр үхэх үү? гэж Банда асуухад

- Үгүй. Амьд байж байг гэж Жеми хэллээ.

Тэр өдөр Жеми орноосоо анх удаа босов. Хөл нь биеэ арайхийн дааж, толгой нь эргэж
байлаа. Баруун хөл нь гүйцэд сайн эдгээгүй учир явахдаа жаахан доголж байв. Бандаг түших
гэтэл

- Тавь, би өөрөө чадна гэлээ.

Өрөөн дотуур Жемигийн болгоомжтой явж байгааг Банда ажиглан харлаа. “Би лав их муухай
харагдаж байгаа байх. Сахал үсээ хусаагүй хэд хоносон бол? Гэж Жеми бодоод

- Надад толь хэрэгтэй байна гэв.

Банда жижиг толь авчирч өгөхөд Жеми нүүрээ харвал өөдөөс нь огт үл таних хүн харж
байлаа. Үс нь цав цагаан болжээ. Битүү сахал нь балиар муухай, хамар хугарч, мурийсан
байв. Зүс царай нь 20 насаар хөгширчээ. Хацар нь хонхойж, үрчлээ суугаад дээд уруулын дор
нь улаан тогтжээ. Нүдний нь харц нь хамгийн их хувирчээ. Энэ бол зовлон их үзсэн хүний
нүд, үзэн ядахын гал гялалзсан нүд байлаа. Жеми толио алгуурхан буулгаад

- Би салхинд жаахан явья гэж Жемиг хэлэхэд Банда

- Уучлаарай, Макгрегор. Тэр болохгүй гэлээ.

- Яагаад?

- Энэ чин Кейптаун, хотын энэ хэсэгт цагаан арьстан орж ирдэггүй. Цагаан арьстаны
хороололд хар арьстан юм. Чиний энд байгааг манай айл хөршийнхөн мэдэхгүй. Бид чамайг
шөнө авчирсан.

- Тэгээд би эндээс яаж явах вэ?

- Чамайг өнөө шөнө эндээс аваад явна.

Бандагийн өөртөө хичнээн осолтой ажил хийж байгааг Жеми анх удаа л ойлгов. Тэгээд санаа
зовж

- Надад мөнгө хэрэгтэй. Ажил олж хийх хэрэгтэй гэсэнд

- Би тэнгисийн боомтод ажил хийдэг. Тэнд хүн хэзээд хэрэгтэй гээд халааснаасаа мөнгө
гаргаж

- Май, үүнийг ав гэхэд нь Жеми мөнгийг аваад,

- Би заавал буцааж төлнө гэсэнд

- Охин дүүгийн минь өшөөг авч өгвөл тэр чин өрөө төлж байгаа хэрэг гэж Банда хэллээ.

Шөнө дундын үед Банда Жемийг пингээс гаргав. Эргэн тойрон харвал байшингийн оронд
хуучин муусайн пин, саравч шавааралдсан тосгоны гол дунд зогсож байв. Сая бороо орж
шалбааг болсон гудамжнаас өмхий үнэр үнэртэнэ. Банда мэтийн ийм омог бардам хүмүүс
яаж ийм газар амьдран сууж чаддагыг Жеми ойлгосонгүй.

- Ингэхэд...

- Чимээгүй. Манай айл хөршийнхөн их сониуч улс шүү гэж Банда шивгэнээд Жемийг
тосгоноос авч гарлаа.

- Хотын төв тэнд бий. Хөлөг онгоцны засварын газрын тэнд уулзья.

Жеми Англиас анх ирсэн даруйдаа буусан мөнөөхөн зочид буудалдаа суух болов. Ширээний
ард миссис Вентер сууж байлаа.

- Надад өрөө хэрэгтэй байна гэж Жемийг хэлэхэд авгай алтан шүдээ яралзуулан инээж

- Болно, эрхэм ээ. Намайг миссис Вентер гэдэг гэхэд нь

- Мэднэ гэсэнд авгай сэтгэл зовсон янзтай

- Та миний нэрийг яаж мэддэг юм бэ? Танил нөхөд чинь хэлээ юу?

- Миссис Вентер, та намайг танихгүй байна уу, би ноднин жил танайд буусан шүү дээ

Авгай Жемийн үрчгэр нүүр, муруй хамар, цав цагаан сахал үсийг анхааралтай ажин ширтээд:

- Би хүний зүс царай их сайн нүдэлж тогтоодог юм. Чамайг бол урьд огт зүу үзээгүй юм
байна. Тэгэхдээ энэ бол бидний журмын сайн нөхөд болоход саад болохгүй. Тийм үү? Миний
сайн нөхөд намайг Ди ди гэж дууддаг. Сайн эр чиний нэр алдар хэн бэ?

- Ян Тревис гэж хэлэх өөрийн дууг Жеми сонсов.

Жеми маргааш өглөө нь хөлөг онгоцны засварын газар ажилд орхоор очлоо.

- Бидэнд чадал тэнхээ сайтай хүн хэрэгтэй. Энэ ажилд чи дэндүү хөгшдөнө гэж даамал
хэлэхэд нь

- Би дөнгөж19 тэй... гэж Жеми эхлэн дуугарснаа, толинд өөрийн дүрээ харснаа санан
түгдэрч,

- Би ажил хийж чадна гэв.

Жеми өдөрт 9 шиллингийн хөлстэй ачигчийн ажилд оров. Боомтод ирсэн хөлөг онгоцонд
ачаа ачих хэрэгтэй байв. Банда болон бусад хар арьстан ачигч нар өдөрт 6 шиллингийн хөлс
авдагийгхожим мэджээ. Анх боломж таармагц Жеми Бандаг хажуу тийш аваачин

- Бидэнд ярих юм байна гэсэнд

- Энд болохгүй, Макгрегор. Хуучин агуулахад орой очоорой. Би ажил дуусаад тэнд очно.

Жемийг хоосон агуулахад очиход Банда тэнд хүлээж байлаа.

- Саломон Ван Дер Мервегийн тухай ярьж өгөөч?

- Чи юу мэдэхийг хүсээ вэ?

- Бүгдийг гэсэнд Банда газар нулимаад

- Тэр голландаас ирсэн юм. Миний мэдхээр эхнэр нь маш царай муутай, баян хүүхэн байсан.
Эхнэр нь нэг өвчнөөр үхсэн. Ван Дер Мерве эхнэрийнхээ мөнгийг авч Клипдрифтэд очиж
дэлгүүр нээгээд эрэлчдийг мэхэлж баяжсан юм.

- Намайг мэхлэсэн шиг үү?

- Тэр чинь түүний олон аргын нэг нь юм. Азаар алмастай газар олсон эрэлчид тэр газар
дээрээ шав тавихын тулд мөнгө зээлэх гэж Ван Дер Мерве дээр очдог юм. Тэднийг нүд
ирмэхийн завдалгүй нөгөө алмастай газрыг Ван Дер Мерве худалдаад авчихсан байдаг.

- Түүнтэй тэмцэх гэж оролдсон хүн байхгүй юм уу?

- Тийм боломж бараг байдаггүй. Хотын түшмэл нь Ван Дер Мервегээс хахууль авдаг.
Алмастай хэсгийг бүтэн хагас сарын турш хэнч ашиглаагүй бол түүнийг хэн дуртай хүн
худалдан авч болно гэсэн хууль бий. Хотын түшмэл, Ван Дер Мервед хэрэгтэй мэдээ өгч, уг
хэсгийг Ван Пер Мерве худалдан авдаг. Түүнд бас өөр нэг арга бий. Газар бүр зааг хязгаартай,
буланд бүрд тэмдэг хадсан байх ёстой. Гадас унасан байвал тэр хэсэг газрыг хэн дуртай хүн
худалдан авч болно. Аль нэг хэсэг газар түүнд аятайхан санагдвал шөнө тийш нь хүн явуулж
өглөө болоход гадас нь хөсөр унасан байдаг юм.

- Ай тэнгэр...
- Ван Дер Мерве бас баарын эзэн Смит ярьж тохирсон байгаа. Смит гэнэн эрэлчдийг Ван
Дер Мерве рүү явуулж, мань хүн хамжаа түнш болох тухай гэрээ байгуулж, түүний олсон бүх
алмас Ван Дер Мервегийнх гэж заасан байдаг. Хэн нэг нь дургүйцэж эсэргүүцвэл Ван Дер
Мервегийн гарын доорхи хүмүүс түүнийг дор нь номхотгодог юм.

- Үүнийг би мэднэ. Өөр юу мэдэх вэ?

- Тэр их сүсэг бишрэлтэй. Нүгэл хилэнцтэний сүнсийг аврах гэж залбирч байдаг.

- Маргеретын тухай юу хэлмээр байна даа?

- Мисс Маргерет уу? Эцгээсээ ухаангүй айдаг. Охин нь эр хүний өөдөөс харж зүрхэлсэн
байвал өвгөн хоёуланг нь ална.

Жеми эргэж хаалга руу явахад тэндээс тэнгис харагдаж байлаа. Энэ бүхнийг сайтар
эргэцүүлэн бодох хэрэгтэй юм.

- Маргааш дахиад ярилцья

Цагаан, хар арьстны хоорондуур ёроолгүй ангал нүх байдгийг Жеми Кейптаунд анх ойлгожээ.
Хар арьстанд цагаан арьстны олгодгоос өөр эрх байхгүй. Хар арьстнууд өөрсдийн хороололд
оршин суудаг, хэрэв цагаан арьстаны ажлыг хийж өгдөг бол тэндээсээ гарч явах эрхтэй
байдаг.

- Та нар яаж ийм байдлыг тэвчдэг юм бэ? Хэмээн Жеми нэгэн удаа Бандагаас асуусанд

- Өлөн арслан хумсаа нуудаг юм. Хэзээ нэгэн цагт бид энэ бүхнийг өөрчилнө. Цагаан
арьстанд бидний чийрэг булчин хэрэгтэй. Гэхдээ бидэнд бас тархи бийг тэд мэднээ. Цагаан
арьстнууд биднийг хичнээн их хавчин харгислах тусам хэзээ нэгэн цагт өөрснөө ад үзэгдэж,
гутамшиг болох ээлж ирнэ гэж айж байдаг. Цагаан арьстнууд ингэж бодоод яс нь хавталзаж
байгаа. Бид “ исико” гийн ачаар тэсэж байдаг юмаа.

- Исико гэж хэн бэ? Гэсэнд Банда толгой сэгсэрч

- Хүн биш ээ. Үүнийг хариулахад хэцүү байна. Макгрегор. Исико гэдэг бол манай үндэс
язгуур. Энэ бол аугаа их үндэстний хүн гэдгээ ухаарах сэтгэл. Энэ бол их мөрөн Замбезид нэр
өгсөн их үндэстэн. Олон олон үеийн тэртээ миний өвөг дээдэс өөрийн хүмүүсийг өмнөө
туун Замбези мөрний усан ордог байжээ. Хамгийн сул дорой нь усны эргүүлэгт орж үхэх юм
уу, гүмбэрваа матрын аманд ордог байж. Амьд үлдсэн нь уснаас гарч ирдэг. Банту омгийн хэн
нэг үхэхэд түүний гэрийнхнийг ой модонд оч гэж исико шаарддаг. Бусад хүмүүс тэдний уй
гашууг хуваалцахын хэрэггүй гэснээс тэр. Исико бол боол мэт дуулгавартай байхыг жигшин
зэвүүцэхийн нэр юм. Чи хэзээ нэгэн цагт Жон Тенго Жабавугийн тухай сонссон уу? Гэж
Банда асуухдаа энэ нэрийг их л хүндэтгэлтэй өгүүлэв.

- Сонсоогүй.

- Сонсноо, Макгрегор. Заавал сонсоно гэж Банда өгүүлээд ярианыхаа сэдвийг өөрчлөв.
Жеми Бандаг улам их хүндлэх болов. Тэр хоёр бие биедээ итгэдэггүй байсан. Жеми өөрийг нь
алах шахсан хүнд итгэж сурах хэрэгтэй болжээ. Банда бол өөрийн эртний дайсан цагаан
арьстай хүнээс айхгүй байж дасах хэрэгтэй байлаа. Олонх хар арьстныг бодвол Банда эрдэм
боловсролтой.

- Чи хаана сургуульд сурч байсан бэ, гэж Жеми асуухад

- Би сургуульд явж байгаагүй. Багаасаа ажил хийж байсан. Манай эмээ л надад юм бүхнийг
зааж сургасан юм. Эмээ маань багш байлаа. Эмээ өөрөө уншиж бичиж сураад дараа нь надад
зааж өгсөн юм. Эмээ маань их ачтай хүн шүү гэжээ.

Тэр бямба гаригт ээлжийн ажил дууссаны дараа Их Намаква ленд дах Намиб цөлийн тухай
Жеми анх сонсчээ. Тэр хоёр хуучин муу агуулахад Бандагийн ээжийн хийсэн зээрний махан
хуурга идэж суулаа. Мах нь жаахан эвгүй үнэртэй ч таваг дороо хоосров. Жеми овоолгоостой
хуучин муусайн шуудайн дээр хэвтээд Бандагаас элдвийг асууж эхлэлээ.

- Чи Ван Дер Мерветэй хаана танилцсан бэ?

- Намиб цөлд алмас эрдэнэтэй газар ажил хийж байхдаа танилцсан. Ван Дер Мерве тэр
газрыг хоёр хамжаа түнштэйгээ хамт эзэмшдэг. Ван Дер Мерве тэр түншийн холбоог нэг ядуу
эрэлчнээс хулгайлаад өөрийн эзэмшил газрыг үзхээр ирсэн юм.

- Ван Дер Мерве тийм их баян юм бол дэлгүүрт ажиллахын хэрэг юу вэ?

- Дэлгүүр нь гэнэн эрэлчин барих занга байхгүй юү. Тийм аргаар эрэлчдийг мэхэлж аваачдаг.
Тэгээд улам улам баяжиж байдаг. Жеми өөрөө Ван Дер Мервегийн дэгээнд хичнээн амархан
орсноо санав. “Манай эцэг танд тусалж чадна” гэж Маргерет хэлж байсан нь нүдэнд үзэгдэж,
чихэнд сонсогдох шиг боллоо. Жеми түүнийг хүүхдээрээ амьтан гэж бодож байснаа хөхийг
нь хараад тийм биш гэж мэдэж билээ. Жеми гэнэт босон харайж, царайд нь баяр баясгалант
инээмсэглэл тодров.

- Чи Ван Дер Мервегийн ажил яаж хийх болсноо яриад аль

- Нэгэн удаа уурхайд охинтойгоо хамт очсон юм. Охин нь тэгэхэд 11-тэй байсан. Охин нь
уйдсан ч юм уу, яасан юм бэ бүү мэд усанд орж байгаад тэнгисийн татлагаар урсаж холдсон
юм. Би тэнгист харайн орж, охиныг аварч уснаас гаргасан юм. Би тэгэхэд их залуу байсан.
Ван Дер Мерве намайг алах гэсэн юм гэхэд нь Жеми өөдөөс нь гайхан харж

- Яагаад?

- Яагаад гэвэл би охины биед хүрсэн байхгүй юу. Би хар арьстан болоод ч тэр биш, эр хүн
болохоор тэр. Ямар нэг эр хүн охины биед хүрч болно гэж сэтгэлдээ ч төсөөлж чаддаггүй
байж. Эцэстээ тайвшираад охины амийг аварсныг нэг юм санасан байх. Тэгээд намайг
Клипдрифтэд аваачиж өөрийн зарц болгосон гээд Банда хэсэг дуугүй болсноо намуухан
дуугаар үргэлжлүүлэн,
- Хоёр сарын дараа охин дүү маань намайг эргэж ирлээ. Насаараа Маргереттай чацуу байсан
юм гэж ярьлаа.

Үүний хариуд Жеми хэлэх үгээ олсонгүй. Банда хэсэг дуугүй байсны эцэст дахин ярьж эхлэв.

- Би Намиб цөлд үлдсэн бол дээр байсан юм. Тэнд хийх ажил тийм ч хэцүү биш. Бид
тэнгисийн хөвөөгөөр мөлхөж, алмас түүж аваад төмөр лаазанд хийдэг байсан.

- Байзаарай. Тэнд алмас элсэн дээр ил хэвтэж байдаг гэж хэлэх гээд байна уу, чи?

- Ай даа, яг тийм. Макгрегор, чи одоо бодож байгаа юм аа, мартаж орхи. Тэнгисийн тэр
хөвөөнд хэн ч очиж чадахгүй. Тэнд тэнгисийн долгион 30 фут өндөр байдаг. Далайн талын
хөвөөг ерөөсөө харж хамгаалдаггүй. Тийшээ тэнгисээр очих гэж олон олон хүн оролдож
үзсэн. Бүгдээрээ живж үхэх юм уу, усан дорхи хад мөргөж амь үрэгдэж байсан юм.

- Тэгвэл тийшээ очих өөр арга байж таарна даа.

- Байхгүй. Нөгөө талд нь цөл бий.

- Тэр алмасын ордод орох үүд хаана байдаг юм бэ?

- Эргэн тойрон өргөст төмөр утас татсан байгаа. Орох газрын нь тэнд манааны цамхаг бий.
Дотоод дэвсгэр газрыг нь хүнийг тасар татан хаядаг улаан галзуу нохойтой манаач нар
хамгаалж байдаг. Тэднийхэнд бас мина гэдэг тэсэрдэг зэвсэг бий. Тэр мина гэдгийг газар
сайгүй булсан байгаа. Чамд минатай талбайн зураг байхгүй бол мина тэсрээд чамайг хэдэн
хэсэг тасчина.

- Эргийн урт нь хэдий хэр вэ?

- 35 миль урт.

“35 миль газар алмас эрдэнэ элсэн дээр хэвтэж байдаг газар байдаг юм байна. Ай тэнгэр
минь” гэж Жеми бодов. Банда бодлыг нь мэдсэн мэт үргэлжлүүлэн,

- Тэнд хүрэхийг хүсэн мөрөөдсөн эхний хүн чи биш ээ, мөн эцсийнх ч бас биш. Чулуу мөргөж
хэмх үсэрсэн хүмүүсийн үлдэгдэлийг цуглуулах ажил надад бишгүй олон тохиолдож байсан.
Би мина дээр иэсэрсэн хүнийг үзсэн. Тэдний ноход хүний хоолой багалзуурыг тас татаж
байхыг үзсэн. Үүнийг мартаж орхи, Макгрегор. Тийшээ орж чадахгүй орсон ч амьд гарч
чадахгүй.

Тэр шөнө Жеми унтаж чадсангүй. Элсэн дээр Ван Дер Мервегийн алмас эрдэнэ гялалзаж
байдаг 35 миль газрыг сэтгэлдээ төсөөлөв. Хүчит их давалгаан хурц ирмэгтэй чулууг, хүний
цусанд улангассан галзуу ноход, харуул манааныхан, мөн минийг бодов. Жеми аюулаас
айхгүй, үхэхээс айхгүй. Айх ганц юм нь гэвэл Ван Дер Мервегээс өшөөгөө авч чадахгүй үхэх.

Маргааш өглөө нь Жеми газрын зургийн дэлгүүрт очиж, “Их Намаквалэнд” –ын газрын зураг
худалдан авлаа. Тэр зурган дээр нөгөө тэнгисийн хөвөө газрыг тэмдэглэжээ. Тэр нь умард
этгээдэд Пудерицийн тэндээс өмнө этгээдэд Шар мөрний адаг хүртэл сунайсан газар байлаа.
Бүх нутгийг улаан шугамаар хүрээлэн “Хориотой газар” гэж тэмдэглэжээ.

Жеми уг зургийг нарийн нягт судлав. Өмнөд Африкийн тэндээс 3000 милийг туулсан их
долгион үхэл авчрах хадыг хүчтэй мөргөдөг байна. Тэндээс урагшаа 40 милийн зайд задгай
эрэг байв. “Бодвол тэр хөөрхийс эндээс хориотой бүсэд очих гэж завиар гардаг байсан байх”
Жеми бодлоо. Газрын зураг үзэж байхдаа тэр хэсгийг тэнгисийн талаас яагаад
хамгаалдаггүйг ойлгов. Хад чулуу ихтэй болохоор тэнд хүрч буух ямар ч бололцоогүй ажээ.

Алмастай бүсэд хуурай газраас нэвтрэх боломжийг Жеми онцлон анхаарав. Бүх газрыг өргөст
төмөр утсаар хүрээлэн хашсан, өвч зэвсэгтэй харуул манааныхан 24 цагаар эргэж тойрч
байдаг гэж Банда ярьсан. Хаалганы тэнд манааны цамхаг бий. Дотогшоо нэвтэрч чаддаг юм
аа гэхэд тэнд мина, ноход бий.

Маргааш нь Жеми Бандагаас асуулаа.

- Минатай талбайн зураг байдаг гэж чи хэлсэн үү?

- Намиб цөлд үү? Ажилчидыг дагуулж явдаг ахлагч нарт тийм зураг бий. Мина дээр
тэсрэхгүй гэж бүгд бие биеийнхээ мөр дээр гишгэж явдаг. Нэг удаа миний урд явж байсан
манай авга ах чулуунд бүдрээд мина дээр ойчсон. Ахаас маань юу ч үлдээгүйгэж ярихад нь
Жеми давхийн цочив.

- Дараа нь бас тэнгисийн манан гэж гэж нэг юм бий. Зөвхөн цөлд л тийм манан байдаг.
Далайн тэндээс хүрч ирээд уулсыг хүртэлх бүх газрыг бүрхэнэ. Хэрэв чамайг тэнгисийн
хөвөөнд гарсан үед тийм манан тааралдвал огт хөдлөх аргагүй болно. Минийн талбайн зураг
байсан ч ашиггүй. Яагаад гэвэл эргэн тойрон юу ч харагдахгүй. Бүгдээрээ дороо суугаад
манан арилахыг хүлээдэг юм.

- Манан хэр удаан үргэлжлдэг вэ?

- Заримдаа бол хэдэн цаг, заримдаа бол хэдэн хоногоор үргэлжлэх нь бий.

- Банда, тэр минатай талбайн зургыг чи үзсэн үү?

- Зургийг хөндлөнгийн хүний нүдэнд үзүүлэхгүй гэж маш нарийн нягт хамгаалж байдаг.
Тийшээ очих гэж санасны хэрэггүй гэдгийг чамд дахин хэлье, Макгрегор. Хэн ч чадах ажил
биш. Тэнд хөөрхийсийг дүүжилж алдаг дүүжлүүр мод бий. Энэ нь компанийн юмыг
хулгайлах гэж бүү оролд гэсэн сануулга болдог. Нээрээ энэ чинь бүтэшгүй хоосон санаа гэж
Банда хэлээд царайд нь сэтгэл түгшсэн байдал илрэв.

“Ван Дер Мервегийн алмасны уурхайд хүрч чаддаг юм ч гэсэн тэндээс гарах зам үгүй юм
байна. Бандагийн зөв юм. Үүнийг мартах хэрэгтэй”

Маргааш нь Жеми Бандагаас,

- Уурхайд алмасын хулгайг яаж таслан зогсоодог юм бэ?

- Бүх ажилчдыг нэгждэг. Чармай нүцгэлж байгаад бүх нүх сүвийг сайн үзнэ. Зарим хүн хөлөө
огтолж шархандаа алмас хийгээд авч гарах гэнэ. Зарим нь шүдэндээ нуух гэнэ. Энэ бүх арга
залийг харуулууд андахгүй мэднэ... гэж Банда яриад Жемигийн өөдөөс харж,

- Амьд мэнд явья гэж байгаа бол тэр алмасыг толгойноосоо аваад хаячих гэж нэмж хэллээ.

Жеми үнэхээр тэгэхийг оролдов. Гэтэл алмасын тухай бодол эргэн эргэн ирж, ирэх бүрдээ
улам бүр хорхойг нь хөдөлгөнө. Ван Дер Мервегийн алмас эрдэнэ элсэн дээр Жемийг очиж
авхыг хүлээж байдаг.

Тийшээ хэрхэн очиж болохыг Жеми нэгэн шөнө бодож олов.

Бандатай бушуухан уулзахсан гэж өглөө болохыг тэсэж ядан хүлээлээ. Уулзаад олон таван
үггүй шууд л,

- Алмастай эрэгт ямар завь хүрэх гэж оролддог байсныг яриач?

- Чухам юуг нь вэ?

- Ямар янз маягийн завь байсан юм бэ?

- Ямар л бол ямар завь. Далбаат онгоц, зүтгүүр, моторт завь, далбаат завь. 4 хүн сэлүүрт
завиар тийшээ хүрэх гэж оролдсон явдал бий. Намайг тэнд ажиллаж байх үед 10 удаа тийм
оролдлого гарсан. Бүх завь, онгоцнууд хад чулуу мөргөөд хэмх үсэрч, хүмүүс нь бүгд живж
үхсэн гэхэд нь Жеми гүнзгий санаа алдаад

- Тийшээ салаар хүрэх гэж оролдсон хүн бий юу?

Банда өөдөөс нь гайхан ширтэн

- Салаар уу? Хэмээн лавласанд Жеми сэтгэлийнхээ догдолсныг нууж чадсангүй.

- Тиймээ. Үүнийг бодоорой. Хөлөг онгоц, завийн ёроол нь эрэг орчмын ил, далд хад чулуу
мөргөж эвдэрдгээс тийшээ нэг ч хүн хүрч чадаагүй. Сал бол усны гадаргаар усны доорхи
чулууны дээгүүр хөвөөд эрэгт гарна. Бид мөн ийм замаар буцаад ирж болно.

Банда Жемийн өөдөөс харж, харж эцэст нь ярьж эхлэхдээ дуу нь огт өөр болсон байлаа.

- Энэ чинь бодож үзүүштэй санаа байна, Макгрегор.

Энэ нь анхандаа толгой эргэм хэцүү оньсогыг тайлах тоглоом шиг байлаа. Тэр хоёр
төлөвлөгөөгөө цааш ярилцах тусам хамаг сэтгэлийг нь эзэмдэж эхлэлээ. Анхандаа дэмий сул
яриа шиг байсан зүйл сүүлдээ үйл ажиллагаа төлөвлөгөөний дүр төрхтэй болж ирэв. Алмас
нь элсэн ил хэвтэж байдаг болхоор тэдэнд багаж хэрэгслэл хэрэггүй. Далбаатай сал хийгээд
хориотой бүсээс 40 миль зайтай газар тэнгист гарч, шөнийн харанхуйг ашиглан хэнд ч
үзэгдэхгүйгээр эрэгт хүрч болно. Тэнгисийн эргийн хамгаалалтгүй хэсэгт мина байхгүй,
нохойтой эргүүл манаа нь зөвхөн хуурай замын хилийг манаж байдаг. Жеми Банда хоёр
тэнгисийн эрэгт зовохгүй тайван хүрч, хичнээн л бол хичнээн алмас түүж аваад ирж болно.

- Бид Ван Дер Мервегийн алмасаар өвөр халаасаа дүүргэж аваад үүр цайхаас өмнө буцах
замдаа орно.

- Яаж тэгэх юм бэ?

- Тэр амархан. Сэлүүрээр сэлүүрдэж байгаад чулуун дээгүүр хөвөх өнгөрч, дараа нь
далбаагаа босгоод гэрийн зүг буцна.

Жеми туйлын бат үнэмшилтэй ярьж байсан болохоор нэн удалгүй Бандагийн бүх эргэлзээ
замхрав. Энэ төлөвлөгөөнөөс ямар нэгэн өө сэв олох гэж оролдож үзсэн боловч юм бүхэн
дээр Жеми бэлэн хариулж байв. Төлөвлөгөө нь бүтэж болох байлаа. Энэ бол энгийн хялбар
болж ирээд биелүүлэхэд мөнгө зардал их орохгүй сайхан төлөвлөгөө. Гагцхүү чин зориг,
тэвчээр хатуужил л хэрэгтэй.

- Бидэнд олсон алмасаа хийх том цүнх хэрэгтэй болно доо. Гэж Жеми хэлэхэд Банда
инээмсэглэж,

- Хоёрыг аваад явбал яасан юм бэ? Гэжээ.

Хоёул урам зориг дүүрэн инээлдэв.

Дараагийн долоо хоногт нь хоёул ажлаасаа чөлөө авч, хориотой бүсээс 40 миль зайтай газар
далайн хөвөөнд байдаг Порт-Ноллот гэдэг жижиг тосгон орхоор үхэр тэргээр гарав. Зорьсон
газраа хүрээд ачаа юмаа буулгаж, байдлыг ажиглавал ядуу буурай, жижигхэн тосгон байлаа.
Бүдүүлэг хийцтэй пин саравч, төмөр пүнз, хэдэн мухлаг, алслан одсон элсэн хаялганы зурвас.
Энд хад чулуу байхгүй болохоор тэнгисийн долгион эрэг өөд зөөлөн давалгаалан ирнэ.
Завиар хөвөхөд туйлын зохимжтой сайхан газар ажээ. Энд зочид буудал байсангүй. Нутгийн
нэгэн худалдаачин жижиг өрөөгөө Жемид хөлслүүлж, Банда хар арьстны суудаг хороололд
очиж суулаа.

- Бид нууцаар сал хийж болох газар олох хэрэгтэй байна. Хэн нэгэн нь биднийг эрх
баригчдад ховлон мэдүүлбэл тоогүй юм болно гэж Банда өгүүллээ.

Мөн тэр өдөртөө л хэрэглэхээ больсон хуучин муу агуулах оллоо.

- Энэ чинь боломжийн газар байна. Ажилдаа орох цаг боллоо гэж Жеми хэлэхэд

- Арай болоогүй. Жаахан хүлээе. Нэг лонх виски худалдаж ав хэмээн Банда хэлэв.

- Яах юм бэ?

- Яахыг үзэж мэдээрэй.

Маргааш өглөө нь Жеми дээр нутгийн цагдаа хүрч ирэв. Тэр бол хамар нь нарийхан ягаан
судсаар бүрхэгдсэн, харваас архинд дуртай нь андашгүй махлаг зузаан эр байлаа. Цагдаа орж
ирээд Жемитэй мэндлэж,

- Сайн байна уу? Манай тосгонд шинэ хүмүүс ирсэн гэж дуулаад танилцхаар ирлээ. Би цагдаа
Мэнди байна гэхэд нь

- Намайг Ян Трэвис гэдэг гэж Жеми өөрийгөө танилцуулав.

- Мистер Трэвис та энэд аялж яваа юу?

- Үгүй. Зарцтайгаа Кэйптаун орж явна.

- Аа... би тэнд очиж үзсэн. Муухай том хот билээ. Бас муухай их чимээ шуугиантай.

- Тийм шүү. Цагдаа та жаахан юм балгах уу?

- Би ажлын цагаар уудаггүй гэж цагдаа Мэнди шийдэж ядан хэсэг алгуурласнаа

- За ер нь ганц удаа ёс алдаж болох юм гэхэд нь үүнийг Банда яаж тааж мэдснийг Жеми
гайхан нэг лонх вискигээ гарган,

- Сайхан хэрэг ээ гээд аяганы дундуур хэртэй хийж цагдаад барив.

- Баярлалаа, эрхэм Трэвис. Та өөрөө яах вэ?

- Би ууж болохгүй. Хумхаатай. Тийм болхоор Кэйдтаун орж эмчлүүлхээр явж байна. Танай
тосгонд хэд хоног амрах гэж буусан юм. Ийм хол газар явах нь надад хэцүү байна гэсэнд
цагдаа Мэнди түүнийг ажиглан хараад,

- Харахад та эв эрүүл хүн байна.

- Миний өвчин хөдөлсөн үед та харсан ч болоосой.

Цагдаагийн аяга хурдан хоосров. Жеми дахин виски хийж өглөө.

- Баярлалаа гээд ганцхан хөнтрөн аягыг хоослон,

- За би явах боллоо. Та тэгээд зарцтайгаа хэд хонох юм уу? Гээд босов.

- Тийм миний биеийг жаахан засрахаар бид замдаа орно.

- За сайн. Баасан гаригт би ирж шалгана гэж цагдаа хэлээд гарлаа.

Жеми Банда 2 тэр шөнөдөө эзгүй агуулахад сал хийж эхлэлээ.

- Банда чи сал хийж үзсэн үү?

- Үнэнээ хэлэхэд огт хийж үзээгүй.

- Би ч бас. Энэ хэцүү болов уу? Гээд 2 эр бие биеэ харав.

Тэр хоёр зах дээрээс тус бүр 50 голланы багтаамжтай 4 хос модон торх хулгайлан агуулахдаа
зөөж авчирав. 4 торхийг хооронд нь холбож бэхлээд 4 талаас нь модон хайрцаг барьж хүлэв.
Дээд талд нь бас тийм хайрцаг хадав. Банда энэ нэгэн төхөөрөмжийг эргэлзсэн байдалтай
харж,

- Сал гэхэд нэг л биш шиг гэхэд нь

- Хүлээж бай. Бид хийж дуусаагүй байна шүү дээ гэж Жеми хариулав.

Тэдэнд банз байхгүй болохоор дээд талыг нь гарын дор дайралдсан модны мөчир, дал модны
навч мэтээр хучин, энэ бүхнээ олсон аргамжгаар сайтар даруулж боолоо. Ажил дууссаны
дараа Банда дахин хараад,

- Энэ ямарч гэсэн сал биш л байна даа гэлээ.

- Аян замдаа орохын цагт бүгд хэвийн байдалтай байх болно гэж Жеми батлан хэлэв.

Нарийхан модны голоор шураг хийж, хоёр хавтгай мөчрийг сэлүүр болгож ашиглахаар
бэлдлээ.

- Одоо бидэнд дарвуул хэрэгтэй. Даруйхан шиг. Өнөөдөр аян замдаа ормоор байна. Маргааш
Мэнди цагдаа хүрч ирнэ.

Банда дарвуул оллоо. Орой нь нэгэн том баглаа хөх бүс авчраад,

- Энэ болох уу гэлээ.

- Бололгүй яах вэ. Чи үүнийг хаанаас олоо вэ? Гэсэнд Банда жуумалзан

- Асуугааад юу хийх вэ? Бидэнд тэртэй тэргүй эвгүй юм их боллоо гэжээ.

Хоёул шураг модонд дөрвөлжин бэхэлж, ийнхүү юм бүхэн бэлэн боллоо.

- Шөнийн 2 цагт, энэ тосгоныхныг бүгдээрээ дуг нойрсондоо дугжирч байхад хөдөлье. Одоо
хоёул жаахан амрах хэрэгтэй гэж Жеми хэллээ.

Далайгаар хөвөхийн өмнө сэтгэл нь хөөрөн догдлоод тэр хоёр шөнө шөнө цурам хийж
чадсангүй. Шөнө 2 цагт хоёул хуучин муу агуулахын өмнө уулзлаа. Хоёул энэ аялалыг тэсэж
ядан хүлээхийн сацуу хоёул айж байлаа. Гуравдахь зам байхгүй.

- Цаг боллоо гэж Жеми хэлэв.

Хоёул тэнгисийн хөвөөнд зогсож байв. Эргэн тойрон нам гүм. Дээр нь хархөх тэнгэр
цэлийж, хавирган саран сулхан гэрэлтэнэ. “Яасан сайн юм бэ? Биднийг хэн нэгэн хүн олж
харах боломж багасна” хэмээн Жеми боджээ.
Тэдний өмнө харанхуй шөнөөр хэнд ч мэдэгдэлгүй далайд гарч, дараачийн шөнө алмаст эрэгт
хүрч, үүр цайхаас өмнө буцах замдаа орох хүнд хэцүү зорилт тулгарч байлаа.

- Бенгалын урсгал өнөө орой тийшээ биднийг алмаст хаялганд урсгаж аваачина. Нар
жаргаагүй байхад бид тэнд бууж болохгүй. Харанхуй болтол тэнгист хүлээх хэрэгтэй болно
гэжЖемийг хэлэхэд Банда толгой дохиж,

- Эрэг орчмын жижиг арлууд дээр нуугдаж болно.

- Юун арал вэ?

- Тэнд Меркури, Икабод, Цөцгийтэй боов... гэх мэт хэдэн арван эзгүй арлууд бий.

- Цөцгийтэй боов оо? Гэж Жеми гайхан лавлахад

- Тэнд Хайрсан махны арал бий гээч

Жеми үнгэгдсэн газрын зураг гарган үзэж эхлэлээ.

- Энд нэг ч арал алга байна.

- Энэ бол сангасан арлууд. Англичууд сангасыг бордоо болгож ашигладаг юм.

- Тэнд хүн бий юу?

- Үнэр танар нь хүн тэсэхийн аргагүй. Зарим газар сангасын зузаан нь 100 фут хүрнэ.
Засгийн газар сангас цуглуудахад хоригдлуудыг ашигладаг. Зарим үхэж, хүүр нь тэндээ
үлддэг.

- Тэнд чинь бид нуугдана гэж Жеми хэллээ.

Хоёр эр чимээ шуугиан гаргахгүйг хичээн агуулахын үүдийг онгойлгож салаа өргөх гээд
байрнаас нь хөдөлгөж дийлсэнгүй. Жеми Банда 2 хар хөлсөө гоожуулан зүтгэвч сал нь
ургасан хад шиг байлаа.

- Хүлээж бай гэж Банда хэлээд агуулахаас яаран гарч, хагасцагийн дараа том бөөрөнхий мод
чирч ирлээ.

- Ингэж нэг оролдоод үзье. Би салны захаас өргөж байя. Чи үүнийг доогуур нь шургуул.

Банда салны захнаас өргөхөд түүний хичнээн их тэнхээтэйг Жеми гайхав. Тэгээд салны
доогуур том бөөрөнхий модыг бушуухан шургууллаа.

Дараа нь хоёул хамжин салны нөгөө талаас өргөсөнд бөөрөнхий мод дээгүүр сал амархан
гулсав. Салны дороос бөөрөнхий мод гарч дахиад эхнээс нь давтан хийлээ. Энэ бол хамаг
тэнхээ барсан хүнд ажил болохоор салыг усны хөвөөнд аваачих үед хөлөрсөн нүүр нь
гялалзаж байлаа. Энэ бүх ажилд Жемийн бодож төлөвлөснөөс их цаг орж, үүр цайх ойртжээ.
Тэр хоёр даруйхан хөдлөх хэрэгтэй байв. Эс тэгвэл тосгоны хэн нэг нь тэднийг хараад эрх
баригчдад ховлон мэдүүлнэ. Жеми дарвуулыг хурдан дэлгэж, бүх бэхэлгээг шалгалаа. Нэг юм
мартсан шиг санагдаад сэтгэл нь амарч өгөхгүй байлаа. Юунд сэтгэл зовоод байгааг гэнэт
ойлгоод тас тас хөхрөв. Банда өөдөөс нь гайхан харж

- Юу нь инээдтэй байна?

- Урьд нь би бүтэн тонн багаж хэрэгсэл аваад алмас эрхээр явж байсан. Одоо бол ганц
луужин л байна. Энэ бүгд дэндүү амархан ажил шиг санагдаад гэхэд нь Банда

- Удахгүй чиний бодол өөр болох байх аа, Макгрегор гэж тэрээр аяархан өгүүлэв.

- Чи намайг зүгээр Жеми гэж дуудах цаг болсон баймаар юм гэсэнд Банда гайхан толгой
сэгсэрч

- Чи нээрээ алс холоос ирсэн хүн... гээд дун цагаан шүд яралзуулан инээмсэглэж

- За яах вэ, эцсийн бүлэгт нэг үхэхээс хоёр үхэх юм биш... гээд нэрийг нь амталж үзэж байх
шиг уруулаа өмөлзүүлэн дараа нь

- Жеми гэж аяархан дуугарав.

- Алмас олох аян замдаа орох боллоо

Хоёул салаа гүехэн усанд түлхэн оруулаад өөрснөө дээр нь харайн гарч сэлүүрдэж эхэллээ.

Салаа жолоодож сурахад нь хэдэн минут хэрэгтэй болов. Тэд нар асар том бөглөөн дээр хөвж
явах шиг санагдав. Юутай ч бол хөвж байлаа. Тэнгисийн урсгал завийг умард зүг урсгана.
Жеми дарвуулаа босгоод завиа задгай тэнгис тийш заллаа. Тосгоныхныг нойрноос сэрэхэд
тэдний сал аль хэдийн тэнгэрийн хаяаны цаагуур далд орсон байжээ.

- Хэрэг бүтэж байна гэж Жеми дуу алдан хашгирав. Банда толгой сэгсэрч

- Үгүй, одоохондоо бүтсэн юм алга. Энэ чинь дөнгөж эхлэл гэж хэлээд Бенгалын хүйтэн
урсгалд гараа дүрэв.

Тэд дарвуулаа дэлгэн умард зүгт хөвлөө. Александрын булан, Шар мөрний адгийн дээгүүр
явж өнгөрөхдөө нэгэн сүрлэг нил дэглийнээс өөр амьд амьтны бараа харсангүй. Сал дээр нь
лаазалсан мах, хүйтэн тутрага, үр жимс, хоёр дашмаг ус бий боловч сэтгэл нь хөөрөөд

Юм идэж чадахгүй байлаа. Жеми өмнөөс угтаж буй аюул ослыг бодохгүй гэж өөрийгөө
албаджээ. Банда ер тэгж чадахгүй байв. Банда тэнд очиж үзсэн болохоор Буу зэвсэг, зуудаг
ноходтой харуул манааныхан, минатай талбайг санаад одоо ийм адал балмад явдалд автсанаа
өөрөө гайхаж явлаа. Шотланд залууг хараад: “Энэ чинь надаас тэнэг эр юм. Би үхлээ гэхэд
муу охин дүүгийнхээ төлөө үхнэ. Энэ хүн юуны төлөө үхэх болж байна” гэж бодлоо. Үд
дундын хэрд 5-6 аварга загас үзэгдлээ. Тэр хэдэн аварга загас хурц сэлүүрээрээ ус зүсэн сал
руу ойртож ирэв.
- Харав уу? Хар сэлүүртэй юм байна. Энэ чинь хүн иддэг хадарган загас байна хэмээн Банда
өгүүлэв. Аварга загаснууд салыг тойрон эргэлдэж байгааг Жеми ажиглаад

- Одоо бид яадаг билээ? Гэсэнд Бандагийн зүрх хөөрөн шүлсээ нэг залгиад

- Үнэнээ хэлэхэд урьд өмнө би ийм юм үзээгүй шүү, Жеми гэжээ.

Нэгэн аварга загас нуруугаараа салыг шүргэхэд сал золтой л задарч унасангүй. Жеми сэлүүр
шүүрч аваад аварга загасыг чичсэнд загас сэлүүрийг нь тэр даруй тас хазав. Аварга загаснууд
одоо бүр ойртож ирээд яаралгүй тойрон эргэлдэж, аварга том биеэрээ салын захыг шүргэж
байлаа. Тийнхүү шүргэн түлхэх тоолонд сал аймшигтай далжийна. Сал хэдий хэдийгүй
задран унаж болох байлаа.

- Биднийг живүүлээгүй байгаа дээр нь эднээс салах хэрэгтэй байна.

- Чи яаж тэгэх юм бэ?

- Надад нэг үхрийн лааз мах аваад аль,

- Тоглож байна уу даа. Ганц лааз мах эдний аманд ч үгүй, хамарт ч үгүй. Чи биднийг л идэх
гэнэ.

Бас нэг түлхэхэд нь сал золтой л хөмөрсөнгүй.

- Лааз аваад аль, бушуул гэж Жеми хашгирлаа. Банда хурдан нэг үхрийн лааз мах Жемигийн
гарт атгуулав.

- Талыг нь онгойлго, бушуулаарай. Банда халааснаасаа хутга гарган лаазны тагийн хагасыг
онгойлгов. Жеми лаазыг авлаа. Лаазны арзайж барзайсан хурц ирмэгийг хуруугаараа тэмтэрч
үзээд,

- Сайн барьж байгаарай гэж Бандад сануулав.

- Жеми салны захад сөхрөн суугаад хүлээж эхэллээ. Бараг тэр даруй амаа ангайж, хурц шүд
нь ярзайн харагдсан аварга загас үзэгдэв. Жеми загасны нүдийг л харж байлаа. Лаазыг хар
чадлаараа атгаж байгаад иржийсэн хурц ирмэгтэй тагаар нь аварга загасны нүдийг цавчив.
Аварга загас шарвахад сал нь эгц босоод ирлээ. Орчин тойрны нь ус гэнэт улаанаар будагдав.
Бусад аварга загаснууд одоо салыг тоож анхаархаа болиод шархатсан нөхөр лүүгээ ухасхийв.
Аварга загаснууд түүн рүү тал талаас нь дайран тасар татхыг Жеми Банда хоёр харж байлаа.
Сал нь улам улам холдсоор нэн удалгүй аварганууд харагдхаа болилоо. Банда санаа алдан

- Би нэгэн цагт энэ тухай үр ач нартаа ярьж өгнө. Үнэмших болов уу, яах бол чи юу гэж бодож
байна? Гээд хоёул нүднээсээ нулимс гартал, элгээ хөштөл хөхрөлдлөө. Өдөр нэгэнт өнгөрч
байх үед Жеми цагаа хараад,

- Бид алмастай эрэгт шөнө дундыг үед буух ёстой. Нар 6.15-т мандана. Тэгэхлээр бидэнд
алмас түүх 4 цаг. Хүрэлцээтэй юу, Банда?
- Тэр эрэг дээрээс 4 цагийн дотор чиний цуглуулсан алмасыг 100 хүн насаараа идээд
барахгүй. Бид тэр цагийг хүртэл амьд мэнд байх болтугай гэж найдна...

Өдрийн үлдсэн хэсэгт умар зүг хөвсөөр л байв. Орой тийшээ өмнө нь жижиг арал үзэгдэв.
Хэмжээ нь эргэн тойрон 200 ярдаас хэтрэхгүй ажээ. Аралд ойртож очоод шүтвэрийн хурц
үнэрт нүднээс нь нулимс гоожиж эхлэлээ. Энд хүн суудаггүйн учрыг Жеми одоо ойлгов.
Өмхий самхай нь тэсэхийн аргагүй. Энэ нь харанхуй болтол нуугдах сайхан газар болж өгнө.
Жеми далбааг залж жолоодон сал нь удалгүй эрэгт тулж очлоо. Банда салаа бэхлэн
аргамжиж, хоёул хуурай газар дээр буув. Энэ жижиг арал дээр хар галуу, хотон шувуу, нил
дэглий гээд наад зах нь сая шувуу байх шиг санагдана. Ухаанд багтамгүй чимээ шуугианд чих
дөчирч, өмхий үнэр нь амьсгаа авахын аргагүй. Тэр хоёр хэд алхаад шагайгаа хүртэл сангаст
шигдлээ.

- Сал дээр буцаж очьё гэж Жемиг хоолойгоо хэржигнүүлэн хэлэхэд Банда түүнийг үг дуугүй
дагав.

Тэднийг тэнгисийн хөвөөнд очихоор эргэх үед нэгэн сүрэг хотон шувуу тэнгэрт хөөрч, сууж
байсан газар нь гурван хүний хүүр хэвтэж байгаа харагдав. Энэ гурван хүүр энд хэр удаан
хэвтснийг хэлэхэд хэцүү. Шивтэр ихийн улмаас цогцос нь хэвээрээ хадгалагдан үлдэж, үс нь
час улаан өнгөтэй болсон байлаа. Хэдэн хормын дараа Жеми Банда 2 сал дээрээ эргэн ирээд
задгай тэнгис гарлаа. Тэд далбаагаа буулгаад эргээс хол хөвж байлаа.

- Шөнө дунд болтол энд хүлээе. Дараа нь хөдөлцгөөе.

Хоёул өмнө нь юу хүлээжбайгааг дор дороо бодолхийлэн сууцгаав. Наран жаргаж, тэнгэрийг
ухаанд багтамгүй сонин өнгөөр буджээ. Тэгснээ гэнэт харанхуй болов.

Тэд 2 цаг хүлээгээд дараа нь далбаагаа босгов. Сал нь дорно зүг, үл үзэгдэхэрэг рүү хөвж
эхлэлээ. Үүлний цаанаас саран цухуйж хавь ойрыг цайвар гэрлээр гийгүүлэв. Сал хурд авч
эхлэв. Алсад эргийн дүрс бүдэг бадаг үзэгдэнэ. Салхи хүчтэй үлээж, дарвуул нь хүлхийн сал
эргийн зүг хурдаллаа. Тэд удалгүй газрын бараа харав. Өдий төдий асга хад. Ийм холоос
хүртэл асар том давалгаан хад мөргөн зад үсрэх нь харагдаж, сонсдож байлаа. Холоос
харахад ч гэсэн аймаар сүртэй. Ойртоод очиход ямар байхыг Жеми сэтгэлдээ төсөөлж ядав.

- Эрэг дээр нээрээ харуул хамгаалалт байхгүй юм биз? Гэж шивгэнэн асуусанд Банда хариу
дуугарсангүй, өмнөө байгаа хад чулууг заав.

Юу гэж хэлэх гэснийг Жеми ойлголоо. Энэ хад чулуу хүний бодож зохиосон ямарч урхи
занганаас илүү аюултай. Энэ бол тэнгисийн манаа бөгөөд хэзээ ч амардаггүй, хэзээ ч
унтдаггүй манаа. Тэгээд осолд орох хүн амьтныг үг дуугүй хүлээж байдаг.

“За гайгүй. Энэ удаа бид энэ лүглэгэр лүглэгэр харуул манааг мэхэлж чадна. Бид дээгүүр нь
хөвөөд гарна” гэж Жеми бодлоо. Тэд салаараа нилээд газрыг хөвж туулсан, энэ хэсгийг ч
хөвөөд л өнгөрнө. Эрэг бүр ойртож, лут их долгионы хяр дээр дүүлж байгаагаа мэдрэв. Банда
шураг модноос зуурч
- Бид хэт хурдан урагшилж байна гэлээ.

- Санаа бүү зов. Ойртож очоод далбаагаа буулгахад хурд саарна. Бид хад чулууны дээгүүр
амархан хөвөөд гарна гэж Жемиа хариулав.

Салхи ширүүсч байлаа. Жеми үлдсэн зайг багцаалж үзээд дарвуулаа буулгасан ч долгион
салыг нь эрэгт урсган аваачих вм байна гэж тооцоолов. Тэгээд дарвуулаа даруй буулгалаа.
Гэтэл хурд саарсангүй. Сал одоо долгионы эрхэнд бүрэн ороод нэгэнтээ долгионы хяр дээр
гарч, нэгэнтээ доош унаж байв. Банда Жеми 2 усанд унахгүйн тулд салнаас хоёр гараараа
зуурчлаа. Эрэгт буух хэцүү байх болно гэж Жеми мэдэж байсан боловч байгалийн догшин
салхитай тааралдах юм гэж санасангүй. Хад чулуу бүр ойрхон болсон байлаа. Их долгион
эрчээрээ хад мөргөн дээшээ усан оргилуур болон цацарч байгааг харагдана. Төлөвлөгөө
бүтэх эсэх нь салаа хадгалан хамгаалж чадах эсэхээс болно. Салгүй бол буцаж чадахгүй.
Салгүй бол өөрсдийгөө үхсэнд тооцож болно.

Байгалийн догшин хүчин тэднийг шулуухан хад чулуу руу авч явлаа. Салхины шуугиан чих
дөжрөм их. Асар том долгион гэнэт салыг нь шүүрэн авч очлоо.

- Сайн бариарай, Банда. Одоо эхэллээ гэж Жеми хашгирав.

Лут их долгион салыг нь шүдэнзний мод аятай урсган хад чулуун дээгүүр хөврүүлнэ. Жеми
Банда 2 салнаас байдаг чадлаараа зууран амь мэнд гарахын төлөө тэмцэв. Жеми доош харвал
мод чулууны шовх үзүүр хутганы ир шиг сэрийнэ. Дахиад л хэдэн хором өнгөрвөл тэр хоёр
эрэг дээр эсэн мэнд гарч, айх аюулгүй болно.

Яг энэ агшинд сал огцомхон татасхийн нэг торх нь хадны сэрвэнд тээглэв. Тээглэсэн торх тэр
даруй тэнгис рүү урсан одлоо. Сал далжийн хэдэн хормын дараа дахиад л нэг торх салж унав.

Дараа нь дахиад нэг...

Ширүүн салхи, хайр найргүй долгион, аюулт хад чулуу салыг тал тал тийш нь чулуудан тоглох
ажээ. Салны дэвсгэр хөл доогуур нь гулсаж байгааг Жеми мэдэн Банда

-Үсэр гэж хашгирав.

Өөрөө усанд умбан орсонд лут их долгион түүнийг шүүрэн авч, оньсон харвуул мэт эрэг рүү
хүчтэй шидэв. Жеми яаж ч чадсангүй. Уушиг нь хорсож, нүдний нь өмнө өнгө бүрийн гал
жирвэлзэхийг мэдэрлээ.

“Би живж байна” гэж бодтол энэхэн агшинд долгион түүнийг элсэн эрэг дээр хаях нь тэр.
Цээж хөл нь шалбаран хувцас нь юу ч үгүй урагджээ. Арайхийж өндийж суугаад Бандаг эрж
ийш тийшээ харав. Банда Жемигээс арваад ярдын зайд элсэн дээгүүр мөлхөж байлаа. Африк
эр тэнгисийн усаар бөөлжиж харагдав. Жеми босож, дэргэд нь салгалж очоод,

- Чи зүгээр үү? гэсэнд Банда толгой дохиод нэгэнтээ хий сорон амьсгаа авч, Жемийн өөдөөс
харж
- Би харж чаддаггүй гэв.

Жеми түүнийг түшин босгов. 2 эр хад чулууны зүг харвал салнаас нь юу ч харагдсангүй.
Галзуу догшин тэнгис муу салыг нь зомгол болтол хэмхчжээ.

Тэр хоёр алмасын уурхайд хүрч ирлээ. Гэвч даанч буцах замгүй болжээ.

Ард нь тэнгис далай догширон ганирч байв.

Өмнө нь тэнгисийн хөвөөнөөс алсын уулсыг хүртэл үргэлжилсэн туулж баршгүй их цөл
цэлийнэ.

Хоорондуур нь ангал, хавцал хэрчсэн уулсын шовх оройг сарны бүдэг цайвар гэрэл
гийгүүлнэ. Уулсын хормойд “Хек сенкессель” буюу Шулмасын тогоо хэмээх хөндийгөөр
ямагт хүчит салхи зугаална. Энэ бол ертөнцийг бүтээсэн цагаас хойш анх байсан хэвээрээ
байгаа онгон зэрлэг байгал. Энд хүн байдгийг мэдэж болох ганц тэмдэг гэвэл “Хориотой
бүс” гэж муруй хазгай бичсэн пайз байлаа. Тэдэнд далайгаар буцах зам хаалттай. Намиб
цөлийг туулах ганц зам үлджээ.

- Заяа тавиландаа даатгаад энэ цөлийг туулах болж дээ гэж Жемийн хэлэхэд Банда толгой
сэгсрээд

- Харуул манааныхан биднийг харахтайгаа зэрэг алж орхино. Эсвэл модноос дүүжилнэ. Бид
харуул манааныхан, галзуу нохдоос зугтаж зайлж чаддаг юмаа ч гэсэн минатай талбайгаар
гарч чадахгүй. Бид нэгэнт өнгөрсөн гэж бодож байна гэжээ.

Жеми Бандаг хараад харамсан гэмших сэтгэл төрөв. Жеми энэ африк эрийг ийм адал балмад
явдалд татан оруулсан. Тэглээ гэж энэ негр хархүү түүнийг нэг ч удаа зэмлээгүй. Одоо ч
гэсэн гарах арга замгүй болсныг мэдсээр байж. Банда Жемийг огтоос зэмлэн буруушаахгүй
байна.

Эргийг аймшигтай их нүжигнэн нүргэлэн мөргөж буй асар их долгионыг Жеми хараад
гагцхүү ид шидийн гайхамшигаар амь гарчээ гэж бодов. Шөнийн 2 цаг болжээ. Үүр цайтал,
энэ хоёрыг илрүүлэн мэдэх хүртэл 4 цаг үлджээ. Юутай ч бол одоохондоо амьд байж байна.

“Бууж өгдөг юм бол чөтгөр намайг алгадаасай билээ” гэж Жеми бодов.

- Ажилдаа орцгооё, Банда гэсэнд негр хархүү өөдөөс нь гайхан харж,

- Бас ямар ажил вэ?

- Бид энд алмас авах гэж ирсэн биз дээ, тийм үү. Тэгэхлээр алмас цуглуулцгаая.

Банда энэ солиотой нүдтэй хачин эрийг гайхан ширтэв. Нойтон буурал үс нь толгойдоо
наалдаад өмдний оронд салбайж навсайсан юм санжигнаж байлаа.

- Чи юу хэлнэ вэ?
- Биднийг харахтай зэрэг буудаж ална гэж чи хэлсэн. Тэгэхлээр баяжаад юм уу, ядуу хэвээрээ
алагдахын ялгаа нь юу вэ? Бид ид шидээр энд хүрч ирлээ. Бас ид шидийн хүчээр эндээс гарч
чадах нь юу магад. Хэрэв гарч чадах юм бол, чөтгөр алгад гар хоосон явмааргүй байна.

- Чи солиотой хүн юм гэж Банда аяархан хэлэв.

- Эс тийм бол чи бид 2 энд зогсож байхгүй сэн гэж Жемийг сануулахад Банда дал мөрөө
хавчаад

- Татгалзах юм алга. Биднийг илрүүлж олтол өөр хийх ажил ч алга.

Жеми урагдсан цамцаа тайлав. Банда бас түүнийг дуурайв.

- За тэгээд чиний яриад байдаг том том алмас эрдэнэ хаана байна вэ?

- Газар сайгүй бий. Харуул манааныхан галзуу ноход ч газар сайгүй.

- Одоохондоо бид тэр тухай санаа зовох юм алга. Харуулынхан хаялганын хавиар хэдийд
эргүүл хийж эхэлдэг вэ?

- Үүр цайхаар

Жеми жаахан бодолхийлээд,

- Тэдний очдоггүй, бидний нуугчихаж болмоор тийм хэсэг бий юу?

- Тэд нар нэг ч газар үлдээлгүй эргэдэг. Бидэнд нуугдах газар байхгүй гэхэд нь Жеми
Бандагийн дал мөрөн дээр падхийтэл алгадаад,

- За тэгвэл ажилдаа орцгооё гэжээ.

Банда элсэн дээгүүр мөлхөж, хуруугаараа элс тэмтэрч байгааг Жеми харав. Хоёр минут
болоогүй байтал өндийж Жемид гараа сарвайн

- Оллоо гэв.

Жеми бас мөлхөж элсийг хурууныхаа завсраар шүүж эхлэв. Түүний олсон эхний хоёр алмас
жижгэвтэр байв. Гуравдах нь дор хаяад 15 крат хүрхээр байв. Жеми дороо суугаад тэр чулууг
удаан харав. Бүхэл бүтэн өв хөрөнгийг ийм амархан олж болно гэж итгэмээргүй. Энэ бүхэн
Ван Дер Мерве түүний хамжаа түнш хоёрынх шүү дээ.

Жеми цаашаа мөлхөв.

Жеми Банда хоёр гурван цагийн дотор 2-40 кратын 40 гаруй алмас оллоо. Тэнгэр дорно
зүгээс гэгээрч эхлэв. Жеми чухам энэ үед эрлээ зогсоож сал дээрээ харайж гараад эрэг
хавийн хад чулуун дээгүүр хөвөн буцах замдаа орхоор төлөвлөж байсан билээ. Одоо тэр
тухай бодохын ч хэрэг алга.
- Удахгүй үүр цайна. Дахиад эрве гэж Жемийг хэлэхэд

- Олсноо ашиглаж чадахгүй шүү дээ, чи. Нэгийг нь ч. Эсвэл чи баян хүн болж үхэх дуртай
байна уу?

- Одоохондоо үхэх огт хүсэлгүй байна.

Хоёул эрлээ үргэлжлүүлэн ямар нэг санаа бодолгүйгээр алмас түүсээр байв. Ухаан нь
баларлаж солиороо юу гэлтэй. Нэн удалгүй тэдний уранхай цамц 60 орчим алмас орсон
байлаа.

- Бүгдийг нь би бариад явах уу? Банда асуухад

- Үгүй. Хоёулаа гэж Жеми хэлснээ Бандагийн юу хэлэх гэснийг гэнэт ойлгов. Алмас авч яваад
баригдсан хүнийг их удаан тамлан алдаг.

- Би аваад явья гэж Жеми хэлээд алмасыг боож бүсэндээ уяв. Тэнгэрийн хаяа цайвар бор
болов. Одоо удахгүй нар мандана.

“Одоо яах вэ, гэдэг асуулт байна. Энэ асуултанд юу гэж хариулах вэ” Хоёул эндээ үлдээд үхэж
болох эсвэл элсэн цөл рүү яваад үхсэн ч болно.

- Явцгаая

Жеми Банда хоёр цөлийн зүг алгуурхан явлаа.

5-р бүлэг

- Минатай талбай хаанаас эхлэдэг вэ?

- Эндээс зуугаад ярдын газраас эхлэнэ.

Алсад ноход хуцах чимээ сонсдов.

- Бид минад сэтгэл зовсны хэрэггүй биз дээ. Ноход наашаа ирж явна. Харуул манааныхан
эргүүлд гарчээ.

- Тэд хэдийд энд ирэх вэ?

- 15 минут орчимын дараа. 10 минутын дараа ч байж магад.

Бараг гэгээ оржээ. Урьд бүдэгхэн сүүдэр шиг харагдаж байсан юм одоо бага шиг элсэн
довцог алсын уулс болж хувирлаа. Нуугдах газар даанч алга даа.

- Нэг эргүүлд хэдэн хүн байдаг вэ?

- Арваад хүн.

- Ийм том хаялганыг самнахад 10 хүн хангалтгүй.

- Ганц хүн байсан ч хангалттай. Түүнээс гадна тэдэнд нохой, зэр зэвсэг бий. Харуул
манааныхан сохор, бид үл үзэгдэгч хүмүүс биш шүү дээ.

Олон нохойн дуу бүр ойрхон сонсдож байлаа.

- Уучлаарай, Банда. Би чамайг уруу татаж энэ хөөтэй юманд оруулах ёсгүй байсан юм гэж
Жемийг хэлэхэд

- Чи намайг уруу татсан юм байхгүй дээ гэв.

Бандагийн юу хэлэх гэснийг Жеми ойлгожээ... Тэдэнд хүний дуу сонсогдов. Жеми Банда хоёр
бага шиг элсэн довцогийн дэргэд очлоо.

- Элс ухаад нуугдвал яасан юм бэ?

- Тэгж үзсэн хүн цөөнгүй бий. Ноход дор нь олоод багалзуурыг нь тас хаздаг юм. Би зовохгүй
түргэн үхэхийг хүснэ. Тэд намайг олж хараг. Дараа нь намайг зугтаж гүйхээр тэд буудаж
эхлэнэ. Нохдод тасчуулах хүсэл алга гэхэд нь Жеми Бандагийн гараас шүүрч аваад,

- Бид үхэх үйлтэй байж болох юм. Гэхдээ би л үхлээ угтаж гүйхгүй, чөтгөр алгад. Намайг
алах гэж байгаа бол жаахан зүтгэг гэв.

Одоо тэр хоёрт хүний яриа тодхон сонсогдож байлаа.

“Шалавлаарай, залхуу новшнуудаа. Цувраад яв. Та нар ханатал унтацгаасан. Одоо ажилдаа
орцгоо” гэж нэг хүн хашгирч байв. Жеми өөрийн эрхгүй гэдэргээ хэд алхан эргэж тэнгис рүү
харлаа.

“Живж үхсэн бол дээр байж үү дээ” Шовх шовх үзүүртэй хад чулууг тэнгисийн долгион
мөргөн зад үсэрч байхыг харав. Гэнэт долгионы цаана, тэртээ хол нэг юм харагдлаа. Энэ юу
байж болхыг ойлгосонгүй.

- Банда, тэр хараач...

- Энэ чинь манан байна. Долоо хоног хёор гурван удаа ийм манан татдаг юм гэж Банда
хэллээ.

Тэр хоёрыг ярьж байх зуур манан ойртон ирж, асар том хөшиг шиг юм бүхнийг халхаллаа.
Хүний дуу ч ойртож, энүүхэн хажууд нь сонсогдоно.

- Энэ мананг чөтгөр алгадаасай. Дахиад л саатах нь байна. Манай эзэд л дургүйцэнэ дээ.

- Энэ чинь бидний найдлага гэж Жеми шивэгнэв.

- Юун найдлага вэ?

- Манан. Эднүүс баднийг харахгүй.

- Ашиг алга. Нэгэн цагт манан арилж, бид эндээ үлдэнэ. Харуул манааныхан минат
талбайгаар нэвтэрч чаддаггүй байхад бид бол бүр чадахгүй. Ийм манантай хэдхэн алхаад
дороо хэдэн хэсэг тасчуулна. Чи дахиад ид шидийн хүчинд найдаж байна.

- Тэгэлгүй яах вэ гэж Жеми хэлэв.

Тэнгэр харанхуйлж, манан тэнгисийг хэдийн халхлаад одоо эрэг өөд ахиж байлаа. Хар хэрэм
мэт манан аймаар харагдах боловч Жеми “ Энэ манан биднийг аварна” гэж баярлан бодлоо.

- Хөөе, та хоёр. Энд ямар үхсэнээ хийж яваа юм бэ? Гэх дуу гэнэт сонсогдлоо. Жеми Банда 2
эргэж харав.

Зуугаад футийн цаана, элсэн довцогийн орой дээр буу барьсан манааны хүн зогсож байлаа.
Жеми тэнгис рүү харав. Манан түргэн ойртож байлаа.

- Хөөе, та хоёр. Наашаа хүрээд ирцгээ гэж манааны хүн хашгираад буугаа тэдэн лүү
чиглүүлэв.

Жеми хоёр гараа өргөөд

- Би хөлөө хугалчихсан. Явж чадахгүй байна гэж хашгирсанд

- Тэгвэл дороо зогсож бай. Би өөрөө очно гэж манааны хүн хэлээд буугаа доош буулган тэр
хоёр луу ойртож ирлээ. Жеми эргэж харвал манан бүр дэргэд нь ирсэн байлаа.

- Гүйгээрэй гэж Жеми шивэгнээд тэнгис тийш эргэн гүйсэнд Банда хойноос нь гүйв.

- Зогс...

Буун дуу тасхийж, сум нь тэр хоёрын хажуугийн элсийг пурхийлгэв. Хоёул харанхуй манан
руу гүйсээр байлаа. Дахин буу дуугарч, дараа нь тэр хоёр манан дунд ууслаа. Хүйтэн манан
ясанд нь хүртэл жиндүүлэн хайрав. Эргэн тойронд хөвөнд ороогдсон юм шиг юу ч
харагдахгүй байлаа. Хойноос нь хөөж яваа хүмүүсийн дуу тал талаас нь сонсдоно.

- Крюгер ээ, Би Брент байна. Чи сонсож байна уу?

- Сонсож байна, Крюгер.

- Цагаан, хар хоёр хүн эрэг дээр гарч ирсэн байна. Бүгдээрээ нааш хүрээд ир. Тэр хоёрыг
шууд алаарай...

- Ойрхон байгаарай гэж Жеми шивэгнэхэд Банда гараас нь шүүрч аваад

- Одоо хаачих вэ?

- Эндээс явцгаая...

Жеми луужинг нүдэндээ ойртуулан харахад зүү нь үзэгдэх төдий байлаа. Дорно зүг хаана
байгааг арайхийн тодорхойлоод,

- Ийшээ гэв.

- Байзаарай. Бид нэвтэрч чадахгүй. Ноходтой харуул манааныхан тааралддаггүй юм аа гэхэд

мина дээр орчихно.

- Минатай талбай хүртэл дахиад зуун ярд зай бий гэж чи хэлсэн шүү дээ. Бид эргээс холдох
хэрэгтэй байна.

Тэр хоёр танихгүй мэдэхгүй газраар цөлийн зүг сохор таамгаар алгуурхан явлаа. Жеми
алхаагаа тоолж байв. Хоёул байн байн ойчиж, бие биеэ түшин босгоод цааш явж байлаа.
Хэдхэн фут яваад Жеми зогсож, луужингаар зүг чигээ шалгана. Зуугаад ярд яваад дороо
зогслоо.

- Энэ хавиас минатай талбай эхлэнэ. Миныг онцгой аргаар тавьсан юм биш биз? Биднийг
аврах ямар нэгэн юм байж болох биш үү?

- Залбирах л үлдэж дээ. Энэ минатай талбайгаар одоо болтол хэн ч нэвтэрч байгаагүй. Мина
газар сайгүй бий. 6 ямхын гүнд зоосон байгаа. Бидэнд манан замхрахыг хүлээж байгаад
харуул манааныханд бууж өгөх зам байна гэлээ.
Харанхуй манан дунд сонсдож буй хүмүүсийн дууг Жеми чагнав.

- Крюгер ээ, дуугараач...

- Би байна. Брент...

- Крюгер...

- Брент...

Зузаан хөвөн мэт манан дунд биегүй хоолой нэг нэгийгээ дуудаж байв. Жеми ухаандаа бүхий
л хувилбарыг тооцоолон шаргуу бодож байлаа. Эндээ үлдэх юм бол манан арилмагц тэр
хоёрыг даруй буудан ална. Минатай талбай руу явах юм бол мина тэсэрч хэдэн хэсэг тасчина.

- Чи тэр минаг үзсэн үү?

- Би өөрөө булж байсан.

- Яаж тэсэрдэг юм бэ?

- Хүний биеийн жин дээрээс нь дархаар. 80 фунтээс илүү жинтэй юм бүхэн тэсрэх оньсыг
ажиллуулана. Тийм болхоор нохой дээгүүр нь явахад тэсэрдэггүй юм.

Жеми гүнзгий санаа алдаад,

- Банда, Би эндээс гарах аргыг мэдэх юм шиг байна. Элсэн дээр биеийнхээ жинг жигд
хуваарилах хэрэгтэй

- Ай тэнгэр минь

- Чи юу бодож байна?

- Кейптаунаас явдаг би ямар тэнэг амьтан бэ? Гэж бодож байна.

- Чи надтай хамт мөлхөхийг зөвшөөрөх үү?

Жемид хажууд нь зогсож буй Бандагийн царай бараг харагдахгүй байлаа.

- Надад голж шилээд байх юм үгүй биз дээ, аан?

- Тэгвэл урагшаа

Жеми элсэн дээр болгоомжтой сунайн хэвтэв. Банда түүнийг хараад нэг санаа алдан бас
дагалаа. Хоёр эр элсэн дээгүүр минатай талбай тийш алгуурхан мөлхөв.

- Хөдлөхдөө гар хөлөөрөө газар битгий дараарай. Бүх биеээрээ хөдлөөрөй гэж Жеми хэлэв.

Банда хариу хэлсэнгүй. Амьд үлдэхсэн гэж хүсэхийн ихээр хүсч байлаа.
Эргэн тойрон юу ч харагдахгүй хав харанхуй. Тэр хоёр хэдийд ч манааны хүн, нохой юм уу,
минатай дайралдаж болох байв. Жеми энэ тухай бодохгүйг хичээнэ. Тэд туйлын удаан
урагшилж байлаа. Тэр хоёр цамцгүй учир элс биеийг нь урна. Амьд мэнд гарах найдлага
бараг байхгүйг Жеми ойлгож байв. Минатай талбайг амьд мөлхөн өнгөрч чадаад харуул
манааныхантай дайралддахгүй өнгөрдөг юмаа гэхэд өмнө нь өргөст төмөр утас, буутай
манаач нар хүлээж байгаа. Түүний дээр манан хэдийд арилах нь тодорхойгүй. Манан одоо
ингээд ч замхарч магад.

Тэр хоёр цагийн баримжаа бүрмөсөн алдаад урагшаа мөлхсөөр байв. Ямх нь фут, фут нь ярд,
ярд нь миль болж хувирна. Тэнгисийн эргийг орхисноос хойш хэдий хэр хугацаа өнгөрсний
бүү мэд. Хоёр эр толгойгоо газарт наах хэрэг болж, нүд, хамар, чихэнд элс орно. Амьсгаа
аваахад хэцүү байлаа.

Тэртээ хол: “Крюгер... Брент... Крюгер... Брент гэх дуу сулхан сонсогдоно.

Тэр хоёр хэдэн минут тутамд амрах, луужишгаар зүг чигээ шалгах гэж зогсож байлаа. Илүү
түргэн мөлхөх дур хүсэл хичнээн их байв. Энэ бол өвдөг тохойгоороо газар тулна гэсэн үг.
Тэгээд төмрийн хэлтэрхий гэдэс рүү нь шигдэн орохыг мэдрэх шиг болно. Тийм болохоор
яарахгүйг хичээж байлаа. Хүмүүсийн дуу сонсогдсоор байсан боловч манан дунд чухам аль
талаас сонсдож байгааг ялгах арга байсангүй.

“Элсэн цөл уужим билээ. Бид гараад явчихна гэж Жеми горьдон бодов.

Гэнэт манан дундаас нэгэн нохой гарч ирээд Жемийн дээрээс үсрэн буув...

Огт санаандгүй байж байтал ингэсэн учир Жеми балмагдан сандарч, соотон нохойн хурц шүд
гарт нь шигдэхийг мэдрэв.Алмас боосон цамцаар тавиад нохойн тас зуусан эрүүг тавиулах
гэж оролдож үзсэн боловч нэг гараар дийлэх арга байсангүй. Гар дээгүүр нь халуун цус урсаж
байгааг мэдрэв. Нохой махыг нь дуугүй зулгааж, шүдээ улам гүнзгий шигтгэнэ. Жемийн нүд
харанхуйлж байтал бөглүүхэн цохих чимээ сонсдож, бас дахин сонсдон нохойн эрүү суларлаа.
Банда алмасаар нохойн толгой руу балбаж байгааг Жеми цус гүйлгэнэсэн нүдээр бүдэгхэн
харав. Соотон нохой гомдолтой гийнээд хөдлөхгүй болов.

- Чи яаж байна? Гэж Бандагийн сэтгэл түгшин асуух сонсдов.

Жеми үг дуугарч чадсангүй. Өвчин нь намдахыг хүлээн хэвтэж байлаа. Банда өмднөөсөө
хэсэг даавуу урж аваад Жемийн гарыг боож, цусыг нь тогтоов.

- Цаашаа хөдлөх хэрэгтэй. Нэг нохой ирсэн юм, дахиад ирэх байх гэж Банда хэллээ.

Жеми толгой дохин тэсэхүйеэ бэрх өвдөхийг хатамжлан шүд зууж, урагшаа алгуурхан мөлхөв.

Цааш хэрхэн мөлхөж байгаагаа өөрөө мэдсэнгүй. Түүний хөдөлгөөнийг дотор ухамсар нь
зохицуулж байлаа.

“Гараа урагш сунган биеэ татаж авна... гараа урагш сунгаад биеэ татаж авна...
Амь тэмцсэн энэ нэгэн аялал хэзээ дуусахыг мэдэхгүй. Одоо Банда луужингаар зүг чигийг
шалгаж, Жемиг буруу тийш мөлхвөл засаж залруулж байлаа. Тэдний эргэн тойрон харуул
манаа, ноход мина. Гагцхүү өтгөн манантайн ачаар тэр хоёр одоо болтол амьд мэнд байж
байна. Амиа авч гарахыг хичээн мөлхөх боловч хүч тамир нь барагдаж байлаа. Тэгээд хоёул
унтаад өгчээ...

Жеми нүдээ нээгээд нэг юм урьдынхаас өөр болсныг ойлгов. Хамаг бие нь өвдөхийг мэдрэн
элсэн дээр нэг хэсэг хэвтээд эцэст нь хаана байгаагаа сая санав. Өөрөөс нь 6 футийн зайтай
унтаж буй Бандаг хараад сал нь хад мөргөж эвдэрснийг... тэнгисийн манан бүрхсэнийг санав.
Гэтэл нэг юм өөр болсон шиг. Чухам юу болсныг ойлгох гэж өндийн суув. Гэнэт учрыг
ойлголоо. Банда харагдаж байна. Учир нь үүнд байжээ. “ Манан замхарчээ”

Энүүхэн дэргэд нь хүмүүсийн дуу сонсдоход нь чих тавин чагнан, тэр зүг харвал Банда тэр
хоёр хориотой бүсээс гарах газрын дэргэд бараг тулж ирсэн байлаа.

Энд Бандагийн ярьсанчлан бхүх хэсгийг тойруулан өргөст төмөр утас татсан байх агаад
манааны цамхаг харагдана. Жараад хар арьстан ажилчид гарч явна. Нөгөө ээлжийнхэн сая
орж ирш байлаа. Жеми Бандагийн дэргэд мөлхөн очиж, татаж чангаасанд Банда сэрээд
өндийн сууж, хаалганы дэргэдэх манааны цамхагийг харав.

- Ээ чөтгөр алгад. Бид зорьсон газраа хүрэх дөхсөн юмсанж гэж Бандаг итгэж ядан өгүүлэхэд

- Бид зорьсон газраа ирсэн. Алмасаа аль гэхэд нь Банда боодолтой юмаа Жемид өгч

- Чи яах нь вэ?

- Намайг дагаад яв.

- Хаалганы дэргэдэх манаач нар буу зэвсэгтэй. Биднийг ажилчид биш гэж шууд танина гэж
Банда сануулав.

- Чухам тэгнэ гэж найдаж байна.

Хоёул ажилчид тийш очлоо. Явж байгаа нь ээлжийн ажилд ирж байгаа ажилчдад хандан,

- За та нар үйлээ үзэж, тамаа цайх болж дээ. Бид нар бол манантай үед сайхан унтаж авлаа
байна хэмээн хөгжилтэйхэн хашгиралдана.

- Азтай золигнууд юм. Та нар яаж манан дуудаж чадаа вэ?

- Эзэн тэнгэр гуйж залбирсныг маань болгоож соёрхсон юм.

Жеми Банда хоёрыг хаалганы тэнд очиход хоёр чийрэг манаач ээлжээ дуусгаад явах гэж
байгаа бүх ажилчдыг жижигхэн байранд оруулан нарийн нягт нэгжиж байлаа.

Бүгдээрэнг нь чармай нүцгэлээд нүх сүв бүрийг нь үзэж шалгана. Жеми боодолтой алмасаа
цээжиндээ нааж, бөөн ажилчдын дундуур чихэлдэн нэг манаачийн дэргэд очоод,
- Уучлаарай эрхэм ээ. Ажилд орох талаар хэнтэй ярих вэ? Гэж асуув.

Банда хажууд нь айсандаа бие нь хөшчихсөн зогсоно. Манаач эргэн Жемийг хараад,

- Та нар энд юугаа хийж яваа юм бэ, чөтгөр алгад гэж?

- Бид ажилд орох санаатай ирсэн юм. Энд манаачийн орон тоо бий гэж сонссон. Миний зарц
алмас эрэх ажилд орно. Миний бодоход...

Уранхай ноорхой хувцастай хоёр эрийг манааны хүн хөлөөс нь толгой хүртэл шинжин,

- Эндээс тонилцгоо гэхэд нь Жеми

- Бид явмааргүй байна. Бид ажилд орох гэсэн юм. Хүн хэлэхдээ...

- Энэ бол хориотой бүс. Та нар бичиг байхыг хараагүй юм уу? Тонилцгоо гэж манаач
зандраад өргөст төмөр утасны цаана байгаа үхэр тэргийг зааж

- Порт-Ноллод оч. Ажилд орох санаатай юм бол тэнд очоод компанийн захиргаанд хэл гэжээ.

Хашааны гаднах үхэр тэргэнд ээлжийнхээ ажлыг дуусгасан ажилчид сууцгаана.

- Ай баярлалаа. Эрхэм ээ гээд Жеми Бандад дохио өгч хоёул хашааны хаалгаар эрх чөлөөний
зүг алхлав. Манааы хүн хойноос нь хараад,

- Ээ хоёр мал гэжээ.

10 минутын дараа Жеми Банда хоёр Порт-Нолло орхоор явж байлаа. Тэр хоёр сая фунтийн
үнэтэй алмас эрдэнэ авч явжээ.
6-р бүлэг

Клипдрифтийн гол гудамжаар сайхан хос морь хөлөглөсөн сүйх тэрэг тоос манарган
давхина. Сүйх тэргийг тамирчин хүний бие цогцостой өндөр жавхаатай эр жолоодон явна.
Түүний үс, живэр сахал нь цав цагаан. Тэр захиалгаар хийлгэсэн ганган хйцтэй костюм,
торон сүлжмэл цамц өмсөж, очир эрдэнийн шигтгээтэйзүү хатгасан хар зангиа зүүжээ.

Толгойдоо бортгон малгай өмсөж, ядам хуруундаа том гэгчийн очир эрдэнэ бөгж зүүсэн
байна. Энэ хүн энд шинэ хүн шиг санагдах боловч тийм биш байлаа.

Жеми Макгрегорыг нэг жилийн өмнө эндээс явсан тэр цагаас хойш Клипдрифт их өөр
болжээ. Одоо 1884 он, Клипдрифт ганцхан жилийн өмнө дан майхан хүрээ байсан бол одоо
шинэхэн хот болж хувирчээ. Кейптаунаас Хоуптаун хүртэл төмөр зам тавьж, Клипдрифт рүү
салаа зам тавьсныг дагалдан олон шинэ цагаач нэмэн ирсэн байна. Хүн ам улам олширч,
хүмүүсийн төрх байдал өөр болжээ. Хотод эрэлчид олон хэвээр ч гэсэн ажил хэргийн хувцас
хунар сайтай хатагтай нар олон үзэгдэх болжээ. Клипдрифт нэгэнт олонд хүндтэй хотын дүр
төрхийг олжээ.

Жеми гурван шинэ бүжгийн танхим, арваад шинэ гуанзны дэргэдүүр явж өнгөрөв. Бас сайхан
барьсан сүм, үсчин, “Гранд” гэсэн хаягтай зочил буудлын байшингийн дэргэдүүр явж
өнгөрөв. Банкны дэргэд очоод тэрэгнээсээ сэвхийтэл үсрэн бууж, хар арьстан хөвгүүнд
жолоогоо бариулаад,

- Морьдыг минь услаарай гэв.

Банкны байшинд ороод эрхэлсэн түшмэлд нь хандан данс нээлгэх хүсэлтэй гэж чанга гэгч нь
хэлэв.

Жемийн санасанчлан энэ мэдээ маш түргэн тарж, Жемийг банкнаас гараад “Тэнүүлчин”
гуанзанд ороход тэнд байгаа хүмүүс бүгдээрээ нүд бүлтийн ширтлээ. Энэ гуанз огт
өөрчлөгдөөгүй юм шиг. Танхим нь пиг дүүрэн хүнтэй байлаа. Жеми сониуч улсын харц дор
баарын лангууны дэргэд очив. Смит хүндэтгэлтэйеэ мэхийн ёсолж,

- Эрхэм та юу хүсэх вэ? Гэж асуув. Баарны хүн Жемийг таньсангүй.

- Хамгийн сайн виски.

- За, эрхэм ээ. Та энэ хотод шинэ үү? гээд виски хундагалаж өгөв.

- Тийм.

- Үүгээр дайрч яваа юм уу?

- Үгүй. Энэ хотод хөрөнгө оруулах аятайхан боломж бий гэж сонссон юм гэсэнд баарны
хүний нүд нь гялалзаж,
- Энэ хот шиг сайхан газар олдохгүй. Зуун мянган... Их мөнгөтэй хүн энд их далайцтай
хөдөлж болно. Ингэхэд би танд тусалж чадах юм байна.

- Тийм үү? Яаж тэр вэ? Гэсэнд Смит тонгойн их чухал нууц юм аминчлан ярьж байгаа мэт
шивэгнэн

- Энэ хотыг гартаа атгаж байдаг хүнийг би мэднэ. Тэр бол хотын зөвлөлийн төлөөлөгч.
Иргэний хорооны тэргүүн. Эндхийн хамгийн том хүн. Нэрийг нь Саломон Ван Дер Мерве
гэдэг юм гэхэд Жеми хундагатайгаас нэг балгаад,

- Нэрийг нь огт сонсоогүй юм байна.

- Тэр бол гудамжинд байдаг дэлгүүрийн эзэн. Танд капиталаа ашиг хонжоотой зүйлд
оруулахад тэр хүн тусална. Та тэр хүнтэй уулзаж ярихад зүгээр гэхэд нь Жеми вискигээ бас
нэг балгаад

- Энд ирж уулзана биз гэсэнд баарны хүн алмас эрдэнийн бөгж, очир эрдэнэ шигтгээтэй зүүг
хараад

- Болно, эрхэм ээ. Таныг хэн гэж танилцуулах вэ?

- Ян Тревис гээрэй.

- За тэгье, мистер Тревис. Мистер Ван Дер Мерве тантай дуртайяа уулзана гэж бодож байна.
Та хүлээх зуур үүгээр зугаа болгоорой. Миний гуанзнаас хувь өгч байгаа юм гээд хундаганд
нь дахин виски хийж өгөв.

Жеми виски шимэн баарны лангууны дэргэд сууж байхдаа энд байгаа хүмүүс өөрийг нь
сонирхон харж байгааг мэдрэв. Клипдрифтээс баяжиж хөлжөөд явах хүн цөөнгүй байдаг
боловч ийм баян хүн урьд өмнө энд ирж байсангүй. Энэ бол шинэ сонин зүйл байлаа.

15 минутын дараа баарны эзэн Саломон Ван Дер Мервег дагуулан ирэв. Ван Дер Мерве үл
таних буурал хүний дэргэд очоод инээмсэглэн гар сунгаж

- Мистер Тревис, намайг Ван Дер Мерве гэдэг.

- Би Ян Тревис.

Ван Дер Мерве өвгөн төрх байдлыг ажаад таних болов уу гэж Жеми бодож байв. Голланд
өвгөн түүнийг таньсангүй.

“Ер нь энэ хүн намайг яаж таних билээ дээ” гэж Жеми бодов. 18 настай гэнэхэн хонгор
хөвгүүнээс юу ч үлдээгүй. Смит зочдоо булангийн ширээний тэнд хүндэтгэн дагуулж
аваачив. Сууцгаасан хойно Ван Дер Мерве эхлэн

- Миний ойлгосноор мистер Тревис та капиталаа найдвартай ажил хэрэгт оруулах гэж байгаа
юм байна.
- Магадгүй.

- Би танд бага сага тус болж чадах байх. Энэ зүйл дээр дотроо бодолтой, дороо суурьтай
байхгүй бол горьгүй. Энд элдвийн зальхай амьтад зөндөө бий гэхэд нь Жеми өвгөний өөдөөс
эгцлэн харж,

- Үүнд эргэлзэх юм алга гэв.

Үнэмшмээргүй жигтэй сонин байдал бий боллоо. Жемийг өөрийг нь мэхлэн хамаг хөрөнгийг
нь булааж аваад дараа нь алах гэж оролдсон хүнтэй эелдэг найртай ярьж сууна. Өшөөгөө авах
сэтгэл цээжинд нь оволзон түүнд хүч өгнө. Энэ өшөө хонзонг Ван Дер Мерве удахгүй
биеээрээ үзэж мэдэх болно.

- Хэрэв нууц биш бол мистер Тревис та хэдий хэмжээний капитал оруулах хүсэлтэй байна
даа?

- Эхлээд зуун мянга орчим фунт гэж Жеми хайхрамжгүй байдалтай хэлээд Ван Дер Мерве
уруулаа шилэмдэхийг хараад үргэлжлүүлэн

- Дараа нь хоёр юм уу гурван зуун мянгыг... гэв.

- Аа... Та энэ капиталаа тун аятайхан зүйлд оруулж болно. Тун аятайхан. Ухаалаг зөв санал
зөвлөгөөг дагавал тэр шүү гэж Ван Дер Мерве түргэн нэмж хэлээд

- Та ямар нэг тодорхой юм сонирхож байна уу?

- Эхлээд үзэж танилцмаар байна... гэсэнд Мерве зөвшөөрөн толгой дохиж,

- Ухаантай хүний үг байна. Та манайд очиж оройн зоог барихгүй юү? Тэгээд бүх асуудлыг
ярилцья. Миний охин хоол хийхдээ их сайн. Та зөвшөөрвөл надад их хүндтэй завшаан болно
гэхэд нь Жеми инээмсэглэн

- Надад их тааламжтай байна, Ван Дер Мерве гэж хариулаад

“Надад нээрээ хичнээн таатай байгааг чи огт төсөөлөхгүй” гэж дотроо бодов.

Хөдөлж эхлэх цаг боллоо.

...Намибын алмасны уурхайгаас Кейптаун хүрэх аян зам өлзийтэй сайхан өнгөрчээ. Жеми
Банда хоёр эхлээд жижигхэн тосгонд зогсож, тэндхийн эмч нь Жемийн гарын шархыг
эмчилж өгөв. Дараа нь замын тэргэнд дайгдан Кейптаун тийш гарчээ.

Аян зам удаан, хүнд байсан боловч тэр хоёр тэр зэргийн бэрхшээлийг тоож анхаарсангүй.
Кейптаун очоод Жеми “Ройал” нэртэй сүржин зочид буудалд буув. Тэнд эрхэмсэг дээд
Эдинбургийн ван эзэн өөрийн биеэр энд саатсан морилж байсан гэсэн бичигтэй самбар
хадсан байв. Жемийг “Ван эзний байранд” их л хүндэтгэлтэйгээр оруулжээ.
- Хотын хамгийн сайн үсчин, хамгийн сайн оёдолчин, гуталчныг над дээр ирүүлнэ үү хэмээн
Жеми буудлын захиралд хэлэв

- Бүгдийн ёсоор гүйцэтгэнэ гэж захирал амлалаа.

“Мөнгө хэмээгч гайхмаар их хүчтэй байх юм даа” гэж Жеми бодов.

“Ван эзний байрны” онгоц ёстой догь аж. Жеми халуун усанд хэвтэж байхдаа сүүлийн долоо
хоногийн хэрэг явдлыг нэхэн санав. Бие өвдөх нь аажмаар гайгүй болжээ. Банда тэр хоёрын
сал хийж байсан тэр үеэс хойш хэдхэн долоо хоног өнгөрсөн юм гэж үү? Тэр хоёрын
хориотой бүс рүү хөвсөн, аварга загастай тулалдаж байсан, ад зэтгэрийн хүчтэй долгион муу
салыг зомгол болтол зад цохисон тэр цагаас хойш хэдэн жил өнгөрсөн шиг санагдана.
Бандатай хоёул манан дунд минатай талбай дээгүүр мөлхөж байснаа, соотон нохой гэнэт
дайрсныг, Крюгер... Брент... Крюгер... Брент... гэсэн хэзээч мартахын аргагүй бөглүүхэн дуу
сонсдож байсныг Жеми нэхэн саналаа. Бат итгэлт сайн анд нөхөр Бандагийн тухай юу
юунаас илүү их бодлоо. Кейптаунд хүрч ирээд Жеми Бандаг өөртэй нь хамт үлдээч гэсэнд
Банда дун цагаан шүдээ яралзуулан инээмсэглэж,

- Чамтай хамт байхад амьдрал дэндүү уйтгартай юмаа, Жеми. Би үнэхээр цэнгэн жаргаж
болох тийм газар очно.

- Чи юу хийх санаатай байна?

- Хад чулууг яаж давах чиний овжин төлөвлөгөө биелэсний дараа би аж ахуй худалдан авч,
эхнэр авч олон хүүхэдтэй болбол сайхан сан гэж бодсон юм.

- За яах вэ. Үнэлэгч дээр очиж, алмаснаас чамд ногдох хувийг чинь өгье.

- Үгүй. Тэр надад хэрэггүй гэж Банда хэлэхэд Жеми хөмсөг зангидан гайхаж,

- Чи юу хэлнэ вэ? Алмасны тэн хагас чинийх. Чи олон саяын хөрөнгөтэй баян болсон.

- Үгүй дээ, Жеми. Миний арьсыг хар. Хэрэв би тийм баян болох юм бол ганц өдөр ч амьд
явахгүй.

- Алмасны хагасыг нуучих. Чи...

- Надад хэрэгтэй юм гэвэл нэгэнаж ахуй, хоёр шар худалдаж авах жаахан мөнгө л хэрэгтэй.
Тэгвэл би эхнэр олж чадна. Надад хоёр гурван жижиг алмас байхад л боллоо. Бусад нь
чинийх.

- Яаж тэгж болох вэ, Банда. Чи өөрийн хувийг надад өгнө гэдэг нь юу гэсэн үг вэ?

- Болноо, Жеми болно. Яагаад гэвэл чи Ван Дер Мервегээс өшөөг минь авч өгнө гэхэд нь
Жеми түүнийг удтал харсны эцэст

- Тэгнэ гэж чамд амлая.

- За тэгвэл баяртай, Андаа гээд хоёул гар барилцан тэврэлдхэд,

- Бид хоёр дараа эргэж уулзана. Дараа уулзахад бас нэг сонин сайхан юм бодож олоод
байгаарай гэж Банда хэлэв.

Ингээд Банда гурван жижиг алмас авч халаасандаа хийгээд явлаа. Жеми эцэг эхдээ хорин
мянган фунт явуулж, хамгийн үнэтэй сүйх тэрэг худалдан аваад Клипдрифт орхоор морджээ.

Ингээд өшөөгөө авах цаг боллоо.

Жеми Макгрегор тэр орой Ван Дер Мервегийн дэлгүүрт очиж явахдаа үзэн ядах сэтгэл
цээжинд нь багтаж ядан оволзоход дороо зогсож биеэ барих хэрэгтэй болов.

Ван Дер Мерве арын өрөөнөөс яаран гарч ирснээ хэн орж ирснийг хараад царайд нь сэтгэл
ханасан байдал илрэн малийтал инээж,

- Мистер Тревис, тавтай морилно уу гэж уулга алдан өгүүлэв.

- Баярлалаа. Эрхэм... ээ... уучлаарай, таны нэрийг мартжээ.

- Саломон Ван Дер Мерве. Уучлах явдал байхгүй. Голланд нэр тогтооход хэцүү л дээ. Хоол
бэлэн, Маргарет аа гэж дуудаад Жемиг дотоод өрөөнд дагуулан оров. Тэнд бүх юм хуучин
хэвээрээ байлаа. Маргарет зуухны дэргэд цаашаа харан хоол хийнэ.

- Маргарет, энэ чамд ярьж байсан, манай эрхэм зочин мистер Тревис гэхэд нь Маргарет эргэж
харж,

- Амрыг эрье гэв. Бүсгүй ч бас Жемиг таньсангүй.

- Тантай танилцсандаа баяртай байна гэж Жеми хэлээд толгой дохин ёслов. Хонх дуугарч,
дэлгүүрт хүн орж ирэхэд Ван Дер Мерве босож,

- Уучлаарай би одоохон ирнэ. Мистер Тревис та гэртээ байгаа юм шиг эрх тааваараа
байгаарай гээд яаран гарав.

Маргарет ширээн дээр уур савссан махан хуурга авчирч тавиад талх авчирхаар яаран эргэтэл
зуухны хажууд Жемийн зогсож байхыг харлаа. Жеми түүнийг үг дуугүй ажиглан ширтэж
байв. Өнгөрсөн нэг жилд Маргарет цоморлигоо дэлгэсэн цэцэг мэт боловсорч, жинхэнэ эм
хүний төрхийг олоод урьд байгаагүй тачаангуй шинж мэдэгдэх болжээ.

- Таныг хоол сайн хийдэг гэж аав чинь хэлсэн гэсэнд Маргарет улсхийж

- Тэр үнэн байгаасай гэж найдаж байна, эрхэм ээ.

- Би гэрийн хоол идэж үзээгүй уджээ. Тийм болхоор тэсэж ядан хүлээж байна гэж Жеми

Хэлээд тавиур дээрээтаваг авч, ширээн дээр Маргаретэд зориулан тавив. Маргарет их
гайхлаа. Эр хүн гал тогооны ажил дээр эм хүнд тусладаг гэж огт сонсоогүй ажээ. Тэгээд
Жемийн өөдөөс бишүүрхэн харав. Сайхан царайг нь энэ муруй хамар, сорви эвдсэн юм
байна. Сэргэлэн бор нүд нь ухаантайг нь илтгэнэ. Үсэн буурал болсон нь их юм үзэж
өнгөрүүлснийг гэрчлэх атал цаанаас нь залуу насны цог золбоо мэдэгдэнэ. Нуруу өндөр, бие
чилгэр... Маргарет түүнийг харцыг даалгүй буруу харав. Ван Дер Мерве сэтгэл хангалуун
гараа хавиран орж ирээд,

- Би дэлгүүрээ хаачихлаа. Одоо оройн зоог барьцгаая гээд Жемийг хүндтэй байранд суулгаж,

- Залбирцгаая гэв.

Бүгд нүдээ аницгаав. Эцгийнхээ залбирал уншиж байх зуур Маргарет үл таних эрийг харах
гэж нүдээ нээв. “ Бид бүгд таны өмнө нүгэл хилэнцтэй билээ. Эзэн тэнгэр минь. Бид бүгд
таны гэсгээн цээрлүүлэхийг хүлээнэ. Бидэнд энэ хорвоогийн зовлон зүдгүүрийг тэсэх хүч
хайрлаж. Таны таалаар Тэнгэрт халихын хамт хүч хөдөлмөрийнхөө үр шимийг хүртэх
боломж хайрлан соёрхоно уу. Буянтай хүмүүст тусалдагт тань баярлалаа. Эзэн тэнгэр минь,
Амен”

- Мистер Трэвис та манай нутагт анх удаа ирж байгаа юу?

- Тийм анх удаа гэж Жеми хариулав.

- Та гэр бүл хаана байгаа юм бэ?

- Одоохондоо миссис Тревис гэж байхгүй. Миний эхнэр болохыг зөвшөөрөх хүүхэн олдоогүй
л байна.

“Усан тэнэг хүүхэн л зөвшөөрөхгүй байхдаа” гэж Маргарет бодоод үл таних хүн бодлыг нь
таачих вий хэмээн айж нүдээ буулгав.

- Клифдрифтэд боломж их бий шүү, мистер Тревис. Тун их боломж бий.

- Би хотын байдлыг үзмээр байна гэж Жеми хэлээд Маргаретын өөдөөс харсанд бүсгүйн

Царай улсхийв.

- Хэрэв нууц биш бол мистер Тревис та яаж ийм их өв хөрөнгийн эзэн болсноо хэлэхгүй?

Эцгийгээ ийм эвгүй юм асуухад Маргаретын сэтгэл зовсон боловч үл таних эр огь тоосон
шинжгүй

- Би эцгээсээ өв залгамжилж авсан юм гэж тайван харицлав.

- Аа мөн... Та ажил хэрэг эрхлэн явуулах их туршлагатай хүн байгаа биз дээ.

- Үгүй л болов уу даа. Надад миний үйл ажилгагааг чиглүүлж өгөх хашир хүн хэрэгтэй байна
гэсэнд Мервегийн царай туяарч
- Мистер Тревис та бид хоёр урьдын сайн ерөөлөөр учирчээ. Надад танил тал их бий. Гоц
сайн улс. Хэдхэн сарын дараа та өөрийн капиталыг хувь нугалан арвижуулж чадна гэж би
батлан дааж чадах байна гээд тонгойж, Жемийн гарыг пад пад алгадан,

- Энэ нэгэн өдөр та бид хоёрын цээжинд хадагдаж үлдэнэ гэж совин татаад байна гэхэд нь
Жеми инээмсэглэв.

- Та Гранд-отельд буусан боллов уу даа.

- Тэр тийм.

- Ухаанд багтамгүй их үнэтэй шүү дээ. Уг нь тан шиг бэл бэнчинтэй хүнд... гээд бас л
малийтал инээмсэглэв.

- Энд үзэж харах юм мундахгүй бий гэж сонссон юм. Охиныг чинь маргааш надад хотын
байдлыг үзүүлнэ үү гэж гуйвал та татгалзахгүй биз?

Маргаретийн зүрх палхийв. Ван Дер Мерве хөмсөг зангидан

- Хэлж мэдэхгүй байна. Охин маань... гээд үгээ дутуу орхив.

Ван Дер Мерве охиноо нэг ч эр хүнтэй хоёуланг нь үлдээхгүй байх хатуу журам баримталдаг
аж. Гэвч мистер Тревисийн тухайд жич үзэж болох юм. Ийм их аз таарч байхад найрсаг
зочломтгой эзний дүр үзүүлэх хэрэгтэй гэж бодоод,

- За маргааш би охины оронд лангууны ард зогсоё. Маргарет чи зочинд хотын байдлыг
үзүүлэх үү гэсэнд

- Таны хэлснээр больёгэж Маргарет аяархан хариулав.

- Яриа таарлаа. Өглөөний 10 цагийн үед болох уу? Хэмээн жеми хэлэв.

Хээнцэр ганган зочныг явсны дараа Маргарет ширээн дээрээс аяга таваг хураахдаа зүүд
нойрон дундаа хөдөлж байгаа юм шиг байв. “Энэ хүн намайг лав усан тэнэг хүүхэн байна
гэж бодсон байхаа” тэгээд оройн байдыг эргэн санаж, хэлсэн үг бүхнээ санахыг хичээв.
Ердөө хэл нь татсан юм шиг, юу ч хэлээгүй өнгөрчээ. Яагаад ингэв?

Дэлгүүрт олон зуун эрчүүдэд үйлчилж байхдаа биеэ барихгүй тайван байж чаддаг бус уу?
Харин тэр эрчүүд өөрийг нь Ян Тревисийн харсан шиг харж байсангүй.

“Эр хүн болгоны дотор ад чөтгөрийн муу авьяас шүгэлсэн байдаг юм шүү.Маргарет аа.
Эрчүүл чамайгбузарлачих вий” гэж эцгийн нь хэлдэг үг чихэнд нь хангинах шиг болно. Үүнд
учир байгаа юм болов уу? Танихгүй эрийг өөр өөдөө харахад хамаг тэнхээ нь алдран бие
чичрэх шиг болсныг санав. Энэ эр охин биеийг нь эвдэх санаатай юм болов уу? Ингэж бодоод
амттайхан цэнгэлийг эдлэх шиг боллоо. Нэг тавгийг гуравдахь удаа угааж байгаагаа сая
мэдээд ширээний ард суув. Аяа, ээж минь амьд мэнд байсан болоосой.
Эх нь бол бүх учрыг ойлгохсон. Маргарет эцэгтээ хайртай боловч заримдаа боол шивэгчин нь
юм уу даа гэсэн бодол төрдөг.

“Энэ янзаар бол би хэзээ ч нөхөрт очиж чадахгүй. Эцгийн үхэхийг хүлээх хэрэгтэй болох нь”
гэж бодсоноо ийм самуун юм бодсондоо ичингүйрэв. Тэгээд өрөөнөөс гарч, дэлгүүрт ороход
эцэг нь лангууны ард ашиг орлогоо тоолоод зогсож байлаа.

- Би явж унтлаа, аав аа.

Ван Дер Мерве алтан хүрээтэй шилээ авч, нүдээ арчсаны дараа охиноо тэврэв. Маргарет
яасныг өөрөө ч мэдсэнгүй эцгийнхээ тэврээс ухасхийн мултрав.

Хөшиг татаж тусгаарласан, унтлагын өрөө болдог хэсэгтээ орж ирээд хананд өлгөөстэй
толины өмнө очиж нүүрээ харж эхлэлээ. Маргарет өөрийгөө өргөмжлөн бодож сэтгэлээ
хуурдаггүй. Тийм гоц хөөрхөн биш ч гэсэн нүдэнд дулаахан. Нүүрийн тэг зөв, нүдний харц
усгал зөөлөн, биеийн хэлбэр галбир сайхан. Маргарет толинд ойртож очив. Ян Тревис өөрийг
нь сонирхон харахдаа юу олж үзсэн юм бол? Бүсгүй хувцсаа тайлж эхлэв. Ян Тревисийг
хажуудаа зогсоод харцаараа төөнөж байгаагаар сэтгэлдээ төсөөлөв. Гараараа мээмээ
яаралгүй илэхэд хөхний товч хатуурах нь мэдэгдэв. Хуруу нь гэдсэн дээгүүр доош гулсан
гэнэт өөрийн гар түүний гар болж хувирлаа. Гар нь одоо хөлийн хоорондуур орж, хүүхэн биеэ
энхрийлэн улам улам түргэн илэхэд толгой нь эргээд ирлээ. Толгойд нь нүдний өмнүүр олон
зуун хурч од гялалзах шиг болж, Маргарет тэр эрийн нэрийг амандаа шивэгнэн орон дээрээ
ойчив.

Жеми бүсгүйтэй хамт өөрийн сүйх тэргээр явж байхдаа хотын байдал хичнээн их
өөрчлөгдсөнийг дахин гайхав. Урьд майхан байсан газар одоо нишингээр хучсан юм уу төмөр
дээвэртэй сайхан сайхан модон байшин ярайжээ. Гол гудамжаар явж байхдаа

- Клипдрифт хөгжиж цэцэглэж байгаа хот юм шиг байна гэж Жемийг хэлэхэд,

- Шинэ ирсэн хүнд сонин сайхан санагдах байх гэж Маргарет хариулаад “Өнөөдрийг хүртэл

би энэ хотыг үзэн яддаг байсан” гэж дотроо бодов.

Тэр хоёр хотоос гарч, одоо Вааль голын дагуу уурхай руу явж байлаа. Борооны улирлын дараа
энэ хэсэг сайхан цэцэрлэг болон хувирчээ. Урьд элсэн цөл байсан газар одоо даль модон
төгөл ногоорон байна. Хэсэг эрэлчдийн хажуугаар явж байхдаа

- Сүүлийн үед том олбор их байсан уу? Гэж асуусанд

- Тийм их биш. Хэн нэг нь алмастай хэсэг олохтой зэрэг наашаа олон зуун шинэ эрэлчид
ирдэг. Тэдний олонхи нь горьдлого тасраад ядуу зүдүү буцдаг гэж Маргарет ярьж байснаа

энэ хүнд аюулыг сэрэмжлэн сануулах хэрэгтэй гэж бодоод,

- Намайг ингэж ярьсан гэж манай эцэг мэдвэл лав дургүйцэнэ. Гэхдээ би түүнийг аймшигтай
ажил гэж боддог юм даа, мистер Тревис ээ гэсэнд Жеми зөвшөөрч,
- Зарим хүний хувьд тийм л дээ. Зөвхөн зарим хүнд гэв.

- Та энд нэг хэсэгтээ байхаар төлөвлөж байгаа юу?

- Тийм

Маргарет цээжний дотор дуу эгшиглэж байгааг мэдэрч,

- Сайхан хэрэг ээ... гэснээ,

- Аав дуртай байх болно гэж бушуухан нэмж хэлэв.

Тэр хоёр өглөөжин хотын ойр орчмоор явж, Жеми хааяа зогсон бууж, эрэлч нартай ярьжж
байв. Тэдний олонх нь Маргаретийг таньж, хүндэтгэн мэндэлж байлаа. Эцэг нь дэргэд
байхгүй болохоор бүсгүй ч биеэ барилгүй энгийн найрсаг харилцаж байв.

- Таныг бүгдээрээ таньдаг юм шиг байна гэж Жемийг хэлэхэд

- Манай эцэгтэй харилцдаг болоод тэр. Аав бүх эрэлчдийг хэрэгцээтэй багаж хэрэгслээр
хангадаг юм гэв.

Жеми дуугүй өнгөрлөө. Эргэн тойрны юм бүхэн анхааралыг нь татна. Төмөр зам эндхийн
байдлыг их өөрчилжээ. Газар дээрээс нь алмасын орд олсон аж ахуйн эзний нэрээ “Де Бирс”
гэж нэрлэсэн шинэ том нэгдэл өөрийн өрсөлдөгч хөрөнгөтөн Барин Барнатогийн бүх газрыг
худалдан авсан байна. Одоо “Де Бирс” энэ бүхнийг нэгдмэл нэг байгуулага болгох гэж
шамдан оролдож байлаа. Кимберлийн ойролцоо алт, мангани, цайр олджээ. Энэ бол зөвхөн
эхлэл гэж Жеми итгэж байв. Өмнөд Африк бол ашигт малтмалын үнэнхүү эрдэнэсийн сан
байлаа. Ирээдүйг харж чаддаг хүний өмнө энд цаглашгүй их бололцоо нээгдэж байна.

Тэднийг эргэж ирэхэд орой болж байлаа. Жеми сүйх тэргээ Ван Дер Мервегийн дэлгүүрийн
үүдэнд зогсоогоод,

- Хэрэв та эцэгтэйгээ хамт оройн зоог барихийг зөвшөөрнө үү? гэсэн урилгыг минь хүлээж
авбал би их нэр төртэй завшаан гэж үзэх байна гэсэнд Маргарет царай нь туяарч,

- Би ааваас гуйя. Зөвшөөрнө гэж найдаж байна. Хамт зугаалсанд баярлалаа, мистер Тревис

Гээд дэрвэн дэгдэн одлоо.

... Гурвуул “Гранд-отелийн” зоогын том танхимд сууцгааж байв. Хүн олон байлаа.

- Энэ улс ийм газар хооллож байдаг, яасан элбэг мөнгөтэй улс вэ гэж Ван Дер Мерве амандаа
бөвтнөж байв.

Жеми хоолны цэсийг үзвэл давтсан мах 1 стерлинг 4 шиллинг, ширхэг төмс 4 шиллинг,
алимтай бялуу 10 шиллингийн үнэтэй байлаа.
- Энэ чинь ёстой дээрэм байна. Энд хоёр удаа хоол идвэл модоо барих юм байна гэж Мерве
уулга алдав.

Яахаараа Ван Дер Мерве тийм амархан модоо барьсан гуйлгачин болдог байна вэ гэж Жеми
сонирхов. Үүнийг мэдмээр байлаа. Хоол захих үед Мерве хамгийн үнэтэй хоол захиж,
Маргарет ганц таваг шөл захив. Сэтгэл нь хөөрөөд хоол идэх дур хүсэл үгүй болсон байжээ.
Гараа хараад өчигдөр орой юу хийж байснаа санаж, гэмших сэтгэл төрлөө. Жеми түүнийг
дамшиглан,

- Хоолны чинь мөнгийг төлнө. Юу дуртайгаа захиал гэсэнд Маргаретын царай улсхийж,

- Баярлалаа... Би ... өлсөөгүй байна гэжээ.

Охиноо ичингүйрснийг Мерве ажиглаад Жеми тийш огцомхон эргэж,

- Миний охин ховорхон бүсгүй шүү, мистер Тревис ээ, ховорхон бүсгүй гэхэд нь Жеми толгой
дохиж

- Танй хэлснийг бүрэн зөвшөөрч байна, мистер Ван Дер Мерве гэжээ.

Үүнийг сонсоод Маргаретийг цээжинд баяр баясгалан бялхав. Сэтгэл нь хөөрөөд хоолоо ч
идэж чадсангүй. Энэ Ян Тревис өөрт нь хэрхэн нөлөөлж байгааг бүр гайхмаар. Маргарет
түүний хэлэх үг, хөдлөх байдал бүрээс нууц далд утга эрж байлаа. Өөдөөс нь харж
инээмсэглэхээр нь сэтгэлд нь таалагдаж байгаа юм байна гэж баярлана. Хөмсөг зангидахаар
нь намайг үзэн ядаж байна гэж гомдоно. Маргаретын сэрэл сэтгэгдэл халуун хэмжүүр
мөнгөн ус шиг нэг дээшилж, нэг доошилж байлаа.

- Та өнөөдөр сонин сайхан юм олж үзэв үү? гэж Мервегийн асуухад,

- Гойд юм үзсэнгүй гэж Жеми тоомжиргүйхэн хариулав. Мерве урагш тонгойж,

- Миний үгэнд итгээрэй. Энэ орон түргэн хурдацтай хөгжих болно. Ухаантай хүмүүс энд
капиталаа оруулах болно. Төмөр замын шинэ салаа манай хотыг хоёрдах Кейптаун болгож
хувирна гэхэд нь Жеми эргэлзэх байдал үзүүлж,

- Мэдэхгүй дээ. Борооны дараах мөөг шиг олон хот өсөж байна гэж сонссон. Сүүлдээ хий сүг
болж хувирах тийм хотод хөрөнгө оруулмааргүй байна гэсэнд

- Клипдрифт тийм болохгүй. Эндээс өдөр ирэх тутам шинэ шинэ алмас олдож байгаа. Бас
алт... гэж Ван Дер Мерве батлан өгүүлэв. Жеми дал мөрөө хавчаад,

- Ийм байдал хэдий хэр удаан үргэлжлэх вэ? Гэв

- Энэ асуултанд хэн ч нарийн тодорхой хариулж чадахгүй. Гэхдээ...

- Харав уу.
- Та битгий түргэн түүхий шийдээрэй. Таныг ийм сайхан болоцоог алдуузай гэж санаа зовж
байна гэхэд нь Жеми хэсэг бодолхийлээд,

- Би нээрээ яарсан байж болох юм. Маргарет та маргааш дахиад надтай хамт хотоор явах уу?
Гэв

Ван Дер Мерве татгалзах гэж ам ангайснаа “Тэр орж ирээд 100 000 стерлингийн данс
нээхдээ юм гэж бодсон шинжгүй байсан шүү, Саломон. Удахгүй дахиад нэмж хадгалуулах юм
гэнэ билээ” гэж банкны эзэн мистер Торенсоны хэлснийг санаад шунаг сэтгэл нь дийлж,

- Маргарет явна л даа гэжээ.

Маргааш өглөө нь Маргарет гоёлын хувцсаа өмсөөд Жемийг хүлээж байтал эцэг нь хүрч
ирээд түүнийг хармагцаа царай нь минчийн улайж,

- Улс амьтан чамайг замаа алдсан хүүхэн гэж бодог гээ юу? Чи эрчүүдийн нүдийг булаах гэж
ингэж хувцаслав уу? Чи ажлаа хийж байгаа хүн. Наад палаажаа тайлаад ажлын хувцас өмс
гэжээ.

- Ааваа

- Миний хэлснээр бол гэхэд нь бүсгүй арцаж маргасангүй.

- За тэгье, аав аа гэжээ.

20 минутын дараа Ван ДерМерве, Жеми, Маргарет хоёрыг суугаад явж буй сүйх тэрэгний
хойноос харж зогсохдоо толгойд нь би буруу юм хийж байна уу даа гэсэн бодол төржээ.
Жеми энэ удаа сүйх тэргээ өөр зүг тийш залав. Газар бүр барилгын ажил ид өрнөж байлаа.
“Бүхий байдлаас үзэхэд ашигт малтмал олборлох ажил цаашид үргэлжлэх төлөвтэй. Хэрэв
тийм бол алт, алмас гэснээс үл хөдлөх хөрөнгө дээр их мөнгө олж болно. Клипдрфитэд шинэ
шинэ банк, зочид буудал, дэлгүүр, эмсийн хүрээлэн хэрэгтэй болно” гэж Жеми бодов. Энэ
жагсаалт хязгааргүй. Бололцоо ч адил. Маргарет өөрийг нь хараад байгааг ажиглаж,

- Эвгүй байна уу? Гэж асуусанд

- Үгүй үгүй, зүгээр гэж бүсгүй яаран хариулаад буруу харав.

Жеми түүнийг шинжин хараад царай нь туяаран байгааг ажиглав. Бүсгүй дэргэдээ эр хүн ойр
байгааг мэдрэн сэргэжээ. Үүнийг нь Жеми анхааран ажиглав. Энэ бол эрээр дутаж байгаа эм
хүн байлаа.

Үд дундын үед Жеми гол замаас гарч, голын дэргэдэн ногоон зүлэг дээр аварга том басбаб
модны дор зогсов. Зочид буудлаас хээр идэж уух юм авч гарчээ. Маргарет бүтээлэг дэвсэж,
сагсан савнаас идэш, ууш гаргалаа. Энд хүйтэн мах, шарсан цурвага, шар тутрага, гахайн мах,
бэрсүүт жүрж, тоор, анхимал жигнэмэг зэрэг байлаа.

- Энэ чинь ёстой дайллага байна даа. Би ийм гавьяагүй болов уу даа гэж Маргарет өгүүлэхэд
- Та түүнээс хавьгүй их гавьяатай гэж Жеми батлан өгүүлэв.

Маргарет цааш харж, идэш уушны зүйлийг өрж тавив. Жеми бүсгүйн хоёр хацрыг алгаараа
барьж байгаад,

- Маргарет аа, наашаа хараач гэсэнд

- Үгүй. Байз л даа... Би ... гээд бүсгүйн хамаг бие чичирлээ.

- Намайг хараач дээ.

Бүсгүй толгойгоо алгуурхан өргөн Жемийн нүдийг эгцлэн харав. Жеми түүнийг бие рүүгээ
татан тэвэрч, тэр хоёрын уруул нийллээ. Жеми бүсгүйн бэлхүүсээр чанга тэврэв. Маргарет
гараас нь мултрах гэж тэмүүлэн толгой сэгсэрч,

- Ай Тэнгэр, Бид ийм юм хийж болохгүй шүү. Болохгүй. Бид тамд унана гэж үглэж байлаа.

- Үгүй. Диваажинд очно.

- Би айж байна.

- Айх юм байхгүй. Чи миний нүдийг харсан уу? Миний нүд чамайг нэвт харж байна. Миний
юу харж байгааг чи мэднэ биз дээ. Чи надтай үүл борооны хэрэг үүсгэхийг хүсэж байгаа. Би
ч бас хүсэж байна. Айх юм байхгүй. Чи миний хүүхэн байх учиртай. Маргарет аа, Ингэж
хэлээч... Би Яны хүүхэн байх учиртай гээч... Алив хэлээч дээ. Би Яны хүүхэн байх учиртай
гээ.

- Би... Яны... хүүхэн байх учиртай.

Тэр хоёрын уруул дахин нийлж, Жемигийн хуруу бүсгүйн палаажны дэгээг мулталж эхлэлээ.
Нэгэн минутын дараа бүсгүй чармай нүцгэн болж, Жеми түүнийг өвсөн дээр эвтэйхэн
хэвтүүлэв. Охин биеэ эвдүүлж хүүхэн болох сэтгэл догдлуулсан энэхэн мөчид Маргарет
амьдрал хэмээгч юу болохыг сая л ойлгож байгаагаа мэдэрлээ. Бүсгүй хэзээ ч ийм сэрэл
сэтгэлийг үзэж мэдэрч байсангүй. “Би энэ мөчийг насан үүрд дурсаж явна” гэж бүсгүй
бодлоо. Аварга баобаб модны сүүдэрт ногоон зүлгэн дэвсгэр дээр нүцгэн биеийг нь зөөлөн
салхи илбэн таална... Тэр хоёр дахиад үүл борооны хэрэг үүсгэж, энэ удаа түрүүчийнхээсээ
илүү амттай сайхан болов. “Энэ дэлхий дээр нэг ч эмэгтэй хүн миний энэ хүнийг хайрлаж
байгаа шиг хайрлаж байгаагүй билээ” гэж Маргарет бодов.

Жеми халуун тэвэрт хэвтэж байхдаа энэ чигтээ хэзээ ч дуусахгүй үргэлжлээсэй гэж хүсэв.
Залуу эрийн өөдөөс ширтэн,

- Чи юу бодоо вэ? Гэж шивэгнэн асуусанд Жеми инээмсэглээд,

- Би өлсөж үхэх гэж байна гэж бас шивэгнэн хариулав.

Маргарет тас тас хөхөрлөө. Хоёул модны сүүдэрт хооллож, дараа нь усанд орж, элсэн дээр
удаан хэвтлээ. Дараа нь Жеми Маргаретыг дахин тэврэн авахад нь “Энэ өдөр хэзээ ч битгий
дуусаасай” гэж бүсгүй боджээ.

... Тэр орой Жеми, Ван Дер Мерве хоёр дахиад “Тэнүүлчин” гуанзны булангийн жижиг
ширээний ард сууцгааж байв.

- Таны хэлдэг үнэн юм. Энд капитал оруулах боломж нээрээ их юм гэж Жемийн өгүүлэхэд
Мервегийн царай туяарч

- Мистер Тревис тан шиг ухаантай хүн үүнийг ажиглах ёстой гэж мэдэж байсан юм аа гэв.

- Та надад ямар тодорхой санал зөвлөгөө өгөх вэ? Гэсэнд Мерве ийш тийш сэрэмжлэн харж,
дуугаа намсган,

- Пинелийн ойролцоо алмасын шинэ орд олсныг дөнгөж өнөөдөр надад хэллээ. Тэнд сул
арван хэсэг бий. Бид хуваагаад авч болох юм. Би таван хэсэгт нь 50 000 оруулья. Үлдсэн таван
хэсэгт нь та 50 000 оруул. Алмасыг тэнд хүрзээр малтаад авсан ч болохоор их бий. Бид нүд
ирмэхийн зуур олон саяын бэл бэнчин болно. Энэ тухай та юу хэлмээр байна?

Ван Дер Мерве аль илүү ашигтай хэсгүүдийг өөрөө аваад бусдыг нь Жемид өгнө гэдгийг
Жеми маш сайн мэдэж байв. Түүний дээр Ван Дер Мерве уг ажилд сохор улаан мөнгө ч
оруулахгүй гэж мөрийцэхэд бэлэн байв.

- Хорхой хүрмээр сонсдож байна. Хэдэн эрэлчин хувьд орох юм бэ?

- Хоёрхон

- Тэгвэл ийм их мөнгөний хэрэг юу байгаа юм бэ? Гэж Жеми гэмгүй царайлан асуув. Мерве
урагш тонгойж,

- Ухаантай хүний асуудаг үг. Ийм учиртай. Тэр хэсэг ямар их үнэ цэнэтэйг бүгдээр мэдэх
боловч эрэлчдэд түүнийг ашиглаж боловсруулах мөнгө байхгүй. Тэгэхээр нь бид тэдэнд 100
000 стерлинг фунт өгч, олсон алмасын 20 хувийг өөрсөндөө үлдээхийг зөвшөөрнө гэв.

Ван Дер Мерве энэ 20 хувийг гэдгийг их овжин оруулж хэлсэн болохоор бараг ажиглагдахгүй
өнгөрөв. Энэ голланд өвгөн эрэлчдээс бүх алмас, бүх мөнгийг залилж авна, энэ бүх юм
түүний өвөр түрийд үлдэнэ гэж Жеми баттай мэдэж байлаа.

- Түргэн хөдлөх хэрэгтэй. Энэ тухай хүн мэдэж орхивол... гэж Ван Дер Мервегийн
сануулахад,

- Ийм боломжийг алдаж болохгүй гэж Жеми зөвшөөрөв. Ван Дер Мервегийн царай туяарч,

- Санаа бүү зовогтун. Одоо даруйхан гэрээ бэлтгэ гэж би хэлье гэжээ. “Африкаанс хэлээр
биз” гэж Жеми дотроо бодлоо.

- Одоо өөр бас сонин сайхан санал бий... гэж Мерве хэлэв.
Ван Дер Мерве шинэ түншдээ ая тал засах гэж аль байдгаараа хичээхийн учир Маргаретыг
дагуулан Клипдрифтийн ойр орчныг үзье гэж Жемийг гуйхад татгалзахгүй болжээ. Маргарет
өдөр ирэх тутам Жемид улам их дурлаж байлаа. Бүсгүй унтах, сэрэхдээ түүний нэрийг
амандаа үглэнэ. Урьд Маргаретын огт тоож мэдээгүй байсан тийм сэрэл сэтгэлийг Жеми
сэргээжээ.

Бүсгүй өөрийн бие цогцсын юунд хэрэгтэйг одоо л ойлгож эхэлж байх шиг, урьд ичгүүртэй
муухай юм гэж бодож байсан зүйлээ одоо Жемид бэлэглэн барьж болох юм шиг санагдана.
Дурлал бол бүсгүйн хувьд одоо л үзэж судлаж буй шинэ орон байлаа. Нууц далд хөндий тал,
сэтгэл далласан өндөр оргил, бал бурам гол горхи, өвс найгасан хээр...

Клипдрифтийн ойр орчинд тэр хоёрын амраглан цэнгэж болох зэлүүд газар олон бий.
Тийнхүү учрах бүрдээ Маргарет анхных шигээ сэтгэл хөөрөн догдолно.

Гагцхүү эцгийгээ бодоод сэтгэл амаргүй болно. Саломон Ван Дер Мерве бол голландын
шинэтгэлт шашны үнэн сүсэгтэн бөгөөд охиноо юу хийж байгааг мэдэх юм бол хэрхэвч
уучлахгүй гэдгийг Маргарет мэдэж байв. Хэрцгий догшин зан заншил ноёрхож, эрчүүд болох
болохгүй хаа газар дураа хангаж байдаг Клипдрифт шиг ийм хотод хүртэл бүсгүйг хэн ч
ойшоон уучлахгүй. “Энэ дэлхий дээр ёс журамтай сайн хүүхэн, банзал хүүхэн гэж ердөө хоёр
янзын хүүхэн бий. Ёс журумтай сайн хүүхэнд бол нүгэл хилэнц байж болохгүй” гэж бүсгүй
бодно. Гэвч түгшүүрт бодол бүсгүйг зовох тул эцсийн бүлэгт энэ тухай Жемитэй ярихаар
шийджээ. Хоёул Вааль голын хөвөөгөөр сүйх тэрэгтэй явж байхдаа Маргарет энэ тухай яриа
үүсгэж,

- Ян, чи мэднэ дээ би... гээд цааш нь юу хэлэхээ мэдэхгүй ээрэн түгдрэн

- Чи бид хоёр... гэснээ дүүрсэн хэрэг гэсэн янзтай

- Чи надтай суух уу? Гэхэд нь Жеми инээд алдаж,

- Тэгнэ Маргарет аа, сууна гэхэд бүсгүй түүнтэй хамт инээд алджээ. Энэ бол түүний
амьдралын хамгийн аз жаргалтай мөчүүдийн нэг байлаа.

Ням гаригийн өглөө Мерве Жемийг охинтойтойгоо гурвуул сүмд очьё гэж урьжээ. Сүм нь гот
маягаар барьсан сүртэй том байшин байлаа. Танхимийн нэг талд ном номлогчийн индэр,
нөгөө талд нь бадралт баг бишгүүр байна. Тэднийг ороход бүгдээрээ Мервег хүндэтгэн ёслов.

- Би энэ сүмийг барихад тусалсан юм. Би эндхийн ахлагч нь гэж Мерве бахархан өгүүлэв.

Ном номлогч Эзэн тэнгэрийн хэсээлт, галт тамын тухай ном тавьж, Мерве анхааралтай
чагнан толгой дохино. “Энэ хүн ням гаригт Эзэн тэнгэрт залбирч, бусад өдөр нь ад албинд
залбирдаг бололтой” гэж Жеми бодлоо.

Мерве Маргарет Жеми хоёрын дунд сууж байсан боловч бүсгүй янаг хүнийхээ ойр байгааг
мэдэрнэ. “Миний бодлыг ном номлогч тааварлан мэдэж чадахгүй нь яамай даа” гэж бүсгүй
бодоод зүрх нь хөөрөн инээмсэглэв.
Мөн тэр оройдоо Жемийг “Тэнүүлчин” гуанзанд ороход Смит баарны лангууны ард зогсож
байснаа Жемийг хараад царай нь гэрэлтэн инээд алдаж

- Оройн мэнд, мистер Тревис. Юу уух вэ? Урьдын адил уу? Гэхэд нь

- Үгүй. Чамтай ярих юм байна, Смит. Арын өрөөнд хэмээн Жеми хэлэв. Мөнгө үнэртэж
байгааг Смит мэдрээд,

- Болно л доо, эрхэм ээ гээд туслахад хандан,

- Баарт үйлчилж бай гэлээ.

“Тэнүүлчин” гуанзн ы арын өрөө нь өмгөр жижигхэн боловч энд хөндлөнгийн хүнгүй
ярилцаж болно. Өрөөний дунд дугуй ширээ, дөрвөн сандал байлаа. Смит ширээн дээр байгаа
дэн асаав.

- Суугтун гэж Жемийг хэлэхэд Смит дуулгавартай суугаад

- Танд юугаар тус болж чадах байна, эрхэм ээ?

- Би л чамд тус болж чадах байна, Смит ээ гэсэнд Смит малийтал инээж,

- Нээрээ юу эрхэм ээ?

- Нээрээ гээд Жеми халааснаасаа урт нарийн янжуур гарган асааж аваад,

- Би чиний амийг хэлтрүүлэхээр шийдлээ гэсэнд Смит гайхан нүдээ анивчиж,

- Ойлгохгүй байна, эрхэм ээ

- Би Тревис биш ээ, Жеми Макгрегор. Санаж байна уу? Жилийн өмнө чи намайг үхэл рүү,
муу пин рүү явуулсан. Мервегийн таалалд нийцүүлэх гэж... гэсэнд Смит аюул тулгарч байгааг
мэдээд хөмсөг зангидан

- Юун тухай ярьж байгааг мэдэхгүй л... гэхэд нь

- Балиар амаа хамхиад, намайг сонсож бай гэх Жемийн дуу ташуур тас хийхтэй адил сонсдов.

Смит мохсон ухаандаа нэг юм бодох санаатай ядаж байгааг Жеми ажиглав. Смит өмнөө сууж
буй энэ буурал эрийг нөгөө гэнэн хонгор залуу хүү мөн гэж итгэж ядан байлаа. Жем
үргэлжлүүлэн,

-Би амьд мэнд үлдэж, баян чинээлэг болсон. Чиний энэ муу гуанзыг чамтай хамт шатаах
хүмүүсийг хөлслөн авч чадахуйц баян, Смит чи ойлгов уу? Гэлээ.

Смит юу ч мэдэхгүй гэж хэлэх гэснээ Жемигийн нүдийг хараад

- Тийм ээ, эрхэм ээ гэж болгоомжтой дуугарав.

- Чи эрэлчдийг Мерве руу явуулж, цаадах чин тэднийг гар хоосон болтол нь тонодог. Үүний
төлөө тэр өвгөн чамд шан өгдөг. Сонирхолтой хамтын ажиллагаа. Чи тэгээд үүндээ хэдий
хэрийн юм авдаг вэ?

Смит дуугарсангүй. Хоёр их хүчтэний дунд ороод хэнийх нь тал барихаа мэдэхээ болчихлоо.

- Хэдийг авдаг вэ?

- Хоёр хувийг гэж Смит дуртай дургүй хариулав.

- Би чамд таван хувийг өгнө. Би тэднийг мөнгөм санхүүгээр дэмжинэ. Ялгаа нь гэвэл
эрэлчид надаас зохих хувиа шударга ёсоор авна. Чи ч бас. Мервег чамд хоёр хувийн шан өгдөг
гэж чи үнэхээр итгэдэг юм уу? Тэгвэл чи ёстой усан тэнэг хүн юм байна гэсэнд Смит толгой
дохиод,

- За тэгье, мистер Тре... мистер Макгрегор. Бүгдийг ойлголоо гэхэд нь Жеми босож

- Арай болоогүй гээд Смит рүү тонгойн,

- Чи Мерве дээр очиж, бидний юу ярьсан тухай түүнд ярих гэж байна. Ийм янзаар чи давхар
ашиг олох санаатай юу? Харин энд нэг жаахан садаа бий гээд дуугаа намсган шивэгнэж

- Хэрэв тэгэх юм бол чи өөрийгөө хүүр болсон гэж бодоорой гэжээ.

7-р бүлэг

Жемийг хувцсаа өмсөж байтал хаалгыг нь аяархан тогшив. Жаахан байж байгаад дахин
тогшиход нь Жеми очиж үүд тайлж өгвөл Маргарет зогсож байлаа.

- Орогтун, Мэгги. Нэг хэрэг гараа юу? Гэж Жеми асуув.

Маргарет урьд нь Жеми дээр зочид буудалд ер ирж байгаагүй аж. Бүсгүй орж ирээд Жемитэй
нүүр нүүрээ харж тулахаар хэл нь татчихсан юм шиг дуугүй байлаа. Энэ нэгэн мэдээг хэрхэн
дуулгахаа бодон бодон шөнө нойргүй хоносон. Дахин барааг нь харахаа больчих болов уу
гэхээс зүрх нь бэмбэгнэнэ. Тэгээд гүн амьсгаа авч Жемигийн нүдийг эгцлэн харж

- Ян, бид хүүхэдтэй болно гэлээ.

Жемийн царай ажиггүй тайван байхад нь Маргарет айлаа. Гэнэт Жемийн царайд үлэмж баяр
баясгалан илрэхэд нь Маргарет эргэлзээ тайлагдлаа. Жеми бүсгүйг тэвэрч,

- Энэ чинь маш сайн хэрэг байна. Мегги, Маш сайн. Чи эцэгтээ хэлсэн үү? гэсэнд
Маргаретийн нүдэнд сэтгэлийн түгшүүр илэрч,

- Өө үгүй. Аав... гээд викториан маягийн ногоон будан дээр лаг хийтэл сууж

- Чи манай эцгийн занг мэдэхгүй байна. Тэр... хэзээ ч ойлгохгүй... гэв. Жеми цамцаа
бушуухан өмсөөд,

- Явж аавд чин үүнийг хэлье

- Зүгээр өнгөрнө гэж чи итгэж байна уу?

- Би хэзээ хэзээнээс илүү итгэж байна.

Жеми Маргарет хоёрыг дэлгүүрт ороход Мерве борцолсон мах хэмжиж байв.

- Ян уу? Би одоохон суларна гээд худалдан авагчид түргэн үйлчилсний дараа Жемийн дэргэд
ирж

- За тэгээд энэ сайхан өдөр ажил хэрэг чин бүтэмжтэй байна уу? Гэж асуухад

- Үүнээс бүтэмжтэй байх гэж яах вэ. Танай Маргарет хүүхэдтэй болно гэж Жеми
баясгалантай өгүүлэв.

Өрөөнд нам гүм боллоо. Эцэст Мерве

- Ойлгохгүй байна гэж бөвтнөв.

- Ойлгож ядах ву байх вэ. Охин чин надаас хүүхэд олсон.

Мервегийн нүүр нь цусгүй цагаан болж, Маргарет тэр хоёрыг ээлжлэн харж байснаа,

- Энэ чин үнэн үү?

Голланд өвгөний тархи эргэжээ. Толгойд нь эсрэг тэсрэг бодол багтаж ядан тэмцэлдэв. Охин
нь онгон биеэ алдсан байдаг чин аймшигтай муухай хэрэг... Жирэмсэн болсон юм байна...
Энэ хотынхон бүгдээрээ өвгөн охин хоёрыг элэглэн инээлдэнэ. Гэвч Ян Тревис баян хүн. Энэ
хоёрыг бушуухан гэрлэчихвэл...

Мерве Жеми тийш эргэж,

- Та нар нэн даруй гэрлэх юм байгаа биз дээ гэхэд нь Жеми түүний өөдөөс гайхан харж,

- Гэрлэх ий? Та өөрийн нохой явган, гахай нүцгэн болтол тоносон гэнэн залуу хархүүтэй
охиноо гэрлүүлэхийг зөвшөөрөх юм уу?

Мервегийн толгой заадсаараа ангалзан байлаа.

- Ян, та юу ярина вэ? Би хэзээ ч... гэхэд нь Жеми үгийг нь тасалж, ширүүн дуугаар

- Миний нэр Ян биш. Би Жеми Макгрегор байна. Та намайг танийгүй юм уу? Гээд өвгөний
сандарч тэвдсэн царайг харж

- Таниагүй л дээ. Тэр залуу үхсэн. Та түүнийг алсан. Гэсэн ч би Саломон Ван Дер Мерве танд
хар муу санахгүй. Танд бэлэг барья. Охины чин хэвлийд миний үр байгаа гэв.

Жеми ингэж хэлчихээд даруй эргэн гарч одоход Ван Дер Мерве охинтойгоо хойноос нь хий
гөлрөөд хоцорлоо.

Маргарет үнэмшсэнгүй. Түүний амнаас яаж ийм үг гардаг байна вэ? Надад хайртай шүү дээ
энэ хүн...

Саломон Ван Дер Мерве багтаж ядан уурласандаа хамаг бие ньсалганан охин руугаа эргэж,

- Садар эм, зайл чи. Банзал гэж ориллоо.

Маргарет чухам юу болсоныг ойлгох сөгөөгүй, шаланд наалдаж ургасан юм шиг хөдлөхгүй
зогсож байв. Эцгийг нь нэг муухай юм хийсэн гэж Ян үүний төлөө Маргаретыг буруутгаж
байх шиг. Тэр муухай хэрэгт Маргаретийг бас хамаатай гэж Ян бодсон байж Жеми Макгрегор
гэж хэн юм бол? Хэн бэ?...

Ван Дер Мерве охиноо тас хийтэл алгадаад

- Эндээс тонил. Миний нүдэнд дахиад бүү үзэгд хэмээн зандарлаа.

Маргаретийн зүрх нь амаараа гарах шахан булгилж хөдлөх сэхээгүй зогсоно. Эцэг нь
солиорсон юм шиг байна. Бүсгүй даруй эргэн, дэлгүүрээс ухасхийн гарав.
Саломон Ван Дер Мерве цөхрөнгөө баран хойноос нь ширтэв. Бусдын охин ийм шившигтэй
муухай юм хийж, эцэг эхийнхээ нэрийг бузарлаж байхыг өвгөн олон үзсэн. Сүмд тийм охины
эцгийн шившигийг дуудаж, нэгдлээс хөөн зайлуулдаг. Энэ бол тэдний зүй ёсоор эдлэх
цээрлэл.

Мерве охиноо Тэнгэрийн цээрлэлээс айдаг, дуулгавартай болгож хүмүүжүүлсэн. Яагаад

төрсөн эцгийнхээ өөдөөс ингэж тэрслэв? Мерве эр хүний өвөрт хэвтэж байгаа охиныхоо
нүцгэн биеийг сэтгэлдээ төсөөлж, хэрхэн хөдөлж, хэрхэн ёолж байгааг ургуулан бодоод
тачаал нь сэргэн эрхтэн нь хатуурахыг мэдрэв.

Голланд өвгөн дэлгүүрийнхээ үүдэнд “хаасан” гэсэн пайз өлгөөд тэнхээ нь тасран орон дээр
ойчлоо. Охины нь явдлыг хотынхон мэдэхээр өвгөн элэг доог болно. Түүнийг өрөвдөх нэг нь
өрөвдөж, охины нь тэрслүү үйлдлийн төлөө зэмлэн буруушаана. Аль нь ч байсан энэ бол
тэсвэрлэшгүй зовлон. Энэ тухай нэг ч хүнд мэдэгдэхгүй байх тийм арга хийх хэрэгтэй.
Банзал охиноо эндээс хол аваад явья. Тэгээд өвдөг сөхрөн сууж, залбирч эхлэлээ.

“Ай эзэн Тэнгэр минь. Та дуулгавартай боол намайг яах гэж ингэж цээрлүүлэв дээ? Таны
өмнө би ямар нүгэл хилэнц үйлдсэн юм бэ? Энэ охин үхэг. Ай тэнгэр. Тэр хоёр хоёулаа үхэг”

...Жемийг “Тэнүүлчин” гуанзанд ороход тэнд олон хүн цугласан байлаа. Жеми баарны
лангууны дэргэд очоод тэнд буй хүмүүс тийш хандан,

- Анхааран сонсоно уу гэсэнд олны шуугилдах чимээ намдав.

- Та бүхнийг вискигээр дайлна.

- Юу болоо вэ? Шинэ орд олоо юу? Гэж Смит асуухад Жеми тас тас хөхөрч

- Тиймэрхүү юм болсон, найзаа. Ван Дер Мервегийн охин жирэмсэлсэн. Тэгээд Ван Дер
Мерве энэ баярт учралыг тохиолдуулан тэмдэглэх гэж байна.

- Ай Эзэн Тэнгэр гэж Смит амандаа шивэгнэхэд,

- Энд Эзэн тэнгэр хамаагүй. Үүнийг Жеми Макгрегор хийсэн гэжээ.

Нэг цагийн дараа Клипдрифт хотынхон энэ шинэ мэдээг сонссон байлаа. Ян Тревис гэдэг нь
жинхэнэ хэрэг дээрээ Жеми Макгрегор байсныг, Маргарет түүнээс хүүхэд олсныг мэдэцгээв.

Мервегийн охин хотынхныг мэхлэн төөрөлдүүлж байсан байна.

- Түүнийг тийм хүүхэн гэж огт бодмооргүй сэн, тийм ээ?

- Манай хотын хэдэн эр тэр худгаас морио усалж үзсэн бол?

- Аюулын бүсгүй шүү, би л лав буцахгүй юм байна.

- Яана гэж? Ам ангайвал зөвшөөрнө биз дээ.

Тэгээд эрчүүд тас тас хөхрөлдөнө.

Саломон Ван Дер Мерве орой дэлгүүрээс гарахдаа нөмрөн ирж буй аюул сүйрэлээс хэрхэн
зайлахыг хэдийнэ мэдэж байжээ. Маргаретийг нэн даруй, эхний мухлаг тэргээр Кейптаун руу
явуулна. Муу зулбсагатайгаа тэнд байж байг. Тэгээд Клипдрифтийнхэн өвгөний шившгийг
мэдэхгүй. Ингэж бодоод голланд өвгөний уруулд хөнгөн мишээл үзэгдэв.

- Оройн мэнд, мистер Мерве. Таныг хүүхдийн хувцас бэлтгэж байгаа гэж дууллаа.

- Сайн уу? Саломон. Удахгүй манай хотод шинэ хүн нэмнэ гэж дууллаа.

Мерве дэлгүүртээ эргэж ирээд үүдээ түгжив.

Жеми “Тэнүүлчин” гуанзанд шинэ мэдээг олны шүүн хэлэлцэхийг чагнан виски шимж
суулаа. Клипдрифтад урьд өмнө ийм шуугаинт юм болж байгаагүй болохоор хүмүүс нарийн
тодорхой

зүйл бүрийг амтархан ярилцаж бахаа хангаж байлаа.

“ Банда хажууд минь байсан бол юутай сайхан билээ?” гэж Жеми бодлоо.

Бандагийн дүү охиныг өшөө голланд эрээс авч, өөрийг нь тоносныг хариуг авч чадлаа. Гэвч
энэ бол зөвхөн эхлэл. Жеми цаашид үргэлжлүүлэн өшөөгөө авах болно. Маргаретийг өчүүхэн
ч өрөвдсөнгүй. Маргарет эхний өдөр Жемид юу гэж хэлсэн билээ?

“Манай эцэг танд тусалж чадахсан. Бүгдийг сайн мэддэг гэсэн”

Энэ хүүхэн бас Мервегийн яс махны тасархай. Жеми энэ хоёрыг хоёуланг нь устгана.

Жемигийн сууж буй ширээний дэргэд Смит хүрч ирээд,

- Мистер Макгрегор, тантай ганцхан хором ярьж болох уу?

- Юу вэ? Гэсэнд Смит хоолойгоо засан

- Пниелийн ойролцоо арван хэсэгт ажиллах хоёр эрэлчнийг би мэднэ. Тэнд алмас бий. Харин
тэр хоёр залууд тоног төхөөрөмж худалдан авах мөнгө байхгүй. Тэгээд түнш эрж байна. Энэ
танд сонин байж магадгүй гэж бодлоо.

Жеми баарны хүний өөдөөс шинжин хараад

- Тэр хоёр чинь Ван Дер Мервед чиний ярьсан хүмүүс үү?

Смит гайхан толгой дохин,

- Тийм ээ, эрхэм ээ. Гэхдээ би таны саналыг бодож үзээд тантай хамсвал дээр гэж шийдлээ
гэхэд нь Жеми урт нарийн янжуур гаргаж ирсэнд Смит яаран гал гаргаж өгөв.
- Ярь гэсэнд Смит ярьж эхлэлээ.

Клипдрифтэд бүр анхандаа янхны явдал тохиолдын шинжтэй байжээ. Янхан нь голдуу бохир
муухай эмсийн хүрээлэн, гудамжны мухарт эрчүүдэд үйлчилдэг негр хүүхнүүд байв. Анхны
цагаан арьстан янхан хүүхнүүд өдөр нь хоол зөөгчөөр ажилладаг байлаа. Эрэлчид шинэ шинэ
алмастай хэсэг олохын хэрээр Клипдрифт хот цэцэглэн хөгжиж, үүнийг дагалдан цагаан
арьст янхан хүүхэн улам олон болжээ.

Одоо Клипдрифтийн захад дэр модоор барьж, төмрөөр бүрсэн арав гаруй байшин бий болж,
тэнд янхнууд эрчүүдэд үйлчилж байлаа.Олноос онцгой ганц газар гэвэл Лун-стритийн
ойролцоо байдаг мадам Агнесийн эмсийн хүрээлэн байв. Тэр хоёр давхар аятайхан
байшингийн дэргэдүүр нутгийн хатагтай нар нүүр улайхгүй өнгөрч болно. Эрчүүд нь, бас
чадал боломжтой явуулын хүмүүс энэ хүрээлэнд ирж цэнгэх нь цөөнгүй. Эндхийн үнэ хөлс
их, бүсгүйчүүд нь үнэнч шударга “хөдөлмөрөөр” хоолоо олж иддэг, царайлаг хөөрхөн,
нүүрэмгий аманцар хүүхнүүд. Архи дарсны зүйлийг харьцангуй аятайхан хогшил тавилгатай
зочлох өрөөнд өгөх ба мадам Агнеса үйлчлэгч нарыг хэзээ ч яаруулахгүй, хэзээ ч хуурч
мэхлэхгүй байх гэсэн нэгэн дүрмийг хатуу баримталдаг. Мадам Агнеса өөрөө 35 настай,
улбар шар үстэй, аальтай ааштай бүдүүн авгай. Урьд Лондон хотын нэгэн эмсийн хүрээлэнд
ажиллаж байгаад дараа нь Өмнөд Африкт мөнгө амархан олж болно гэдгийг сонсож,
Клипдрифтэд ирсэн ажээ. Мадам Агнеса өөрөө эмсийн хүрээлэн нээж хүрэх жаахан мөнгө
хурааж байгаад ажил явдал нь бүр анхнаасаа урагштай бүтэж эхэлжээ.

Мадам Агнеса уг нь эрчүүдийн зан байдалыг сайн мэддэг гэж гайхуулах дуртай байлаа.
Харин Жеми Макгрегор бол авгайд оньсого мэт учир нь үл олдох хүн байлаа. Түүний
ёроолгүй гүн худаг мэт хүйтэн харцтай нүдийг авгай юу юунаас илүү бахархана. Жеми
Макгрегор өөрийн тухай, өнгөрсөн намтраа огт ярьдаггүйгээрээ бусад эрчүүдээс ялгаатай.
Жеми Макгрегор Мервегийн охиныг зориуд жирэмсэн болгоод дараа нь түүнтэй гэрлэхийг
татгалзсан тухай хов яриаг Мадам Агнеса хоёр цагийн өмнө сонсоод “Өөдгүй новш” гэж
бодсон байжээ. Гэхдээ тэр бол нүдэнд дулаахан новш гэдгийг арга буюу зөвшөөрөх хэрэгтэй
байв. Улаан хивс дэвссэн шатаар Жеми бууж ирэхийг авгай харав. Жеми авгайд тавтай
нойрсохыг эелдэгээр ерөөгөөд гарч одлоо. Жеми зочид буудалдаа эргэж ирэхэд Маргарет
өрөөнд нь хүлээж байв. Бүсгүй цонхоор ширтэн зогсож байснаа Жемийг орж ирэхэд эргэн
харж,

- Сайн уу?... Жеми гэж хоолой нь чичрэн өгүүлэв.

- Чи энд юу хийж яваа юм бэ?

- Чамтай ярих юм байна.

- Чи бидэнд ярих юм байхгүй.

- Чиний яагаад ийм хачин зан гаргаж байгаагийн учрыг мэдэхгүй юм. Чи манай эцгийг үзэн
яддаг юм байж, би ойлголоо. Манай эцэг чамайг яасан байлаа ч гэсэн би чамд огт гэм
хийгээгүй шүү дээ. Миний үгийг үнэмшээч гуйя чамайг. Надаас битгий жигшээч... Би чамд
үнэн хайртай гээд ойртож ирэхэд нь Жеми өөдөөс нь хүйтэн хөндий харж,
- Энэ чинь чиний бэрхшээл гэв.

- Намайг битгий ингэж муухай хараач дээ. Чи өөрөө бас надад хайртай шүү дээ.

Жеми үгийг анхаарч сонссонгүй. Паардспан тийш хэрхэн зовж хүрсэн, хэрхэн үхэх
шахсанаа... том том үхэр чулууг хөдөлгөх гэж хамаг тэнхээ тамираа барж байснаа... ид
шидийн гайхамшгаар алмас эрдэнэ олсноо сэтгэлдээ ургуулан санав.

Олсон баялагаа Мервед авчирч өгөхөд

- Чи миний хэлснийг ойлгосонгүй. Макгрегор оо. Надад түнш хэрэггүй. Би чамаар ажлаа
хийлгэх гэж хөлслөж авсан. Одоо эндээс тонил гэж хэлснийг санав.

Дараа харгис хэрцгийгээр зодож жанчсан... Дэлт бүргэдийн өмхий үнэр ханхлахыг дахин
мэдэрч, хурц хушуу нь биед нь шигдэхийг дахин мэдэрлээ. Мерве түүнийг алах гэсэн.

Тэртээ холоос Маргарет дуу сонсдох нь,

- Чи санаж байна уу? Би ... би чиний хүүхэн... Би чамд хайртай.

Жеми хөшсөн биеэ нэг шилгээгээд бүсгүйн өөдөөс харав.

Хайртай гэнэ. Энэ үг түүнд ямарч утгагүй болжээ. Мерве залуу эрийн үзэн ядахаас бусад
сэтгэлийг арчиж арилгажээ. Жеми гагцхүү үзэн ядах сэтгэлийн хүчинд амвдарч байна. Үзэн
ядах сэтгэл түүнд амьдралыг тэтгэх рашаан болно. Аварга загастай тулалдаж, хад чулууг
давж, минатай талбайгаар мөлхөж явахдаа чухамхүү үзэн ядах сэтгэл л түүнд тус болж,
түүнийг явч гарсан. Яруу найрагч нар хайр дурлалын тухай бичиж, хайр дурлалын тухай дуу
дуулж байг. Хайр дурлал гэж байдаг байж болох л юм. Гагцхүү бусдын тулд байдаг юм уу
гэхээс Жемийн хувьд тийм юм байхгүй.

- Чи Ван Дер Мервегийн охин шүү дээ. Чи түүний ач хүүхдийг тээж яваа. Одоо эндээс тонил
чи.

Маргаретад явах газар байсангүй. Эцэгтээ хайртай тэгээд уучлаасай гэж хүсэх боловч эцэг нь
хэзээ ч уучлахгүйг мэдэж байлаа. Эцэг нь охиныхоо амьдралыг тамын зовлон болгоно.
Ерөөсөө голж шилээд байх юм байсангүй. Ямар ч гэсэн нэг тийшээ явах л хэрэгтэй.

Маргарет зочид буудлаас гараад эцгийнхээ дэлгүүр рүү явж байхдаа хажуугаар өнгөрсөн
хүмүүсийн нүд өөр дээр нь тусаад байгааг мэдрэв.

Зарим эрчүүд учиртай инээмсэглэх боловч бүсгүй тэргүүнээ омог бардам өргөөд тоохгүй
өнгөрч байлаа. Дэлгүүрийн үүдэнд очоод дотогшоо орохын өмнө зүрхшээн эргэлзэн зогсов.
Тэгээд гүнзгий амьсгаа аван дотогш орлоо. Лангууны ард хүн байсангүй. Арын тасалгаанаас
эцэг нь гарч ирлээ.

- Аав аа...
- Чи юу? Гэх эцгийн дууны өнгөнд туйлаас жигшин зэвүүцсэн аяс сонсдоход Маргарем огло
үсрэн зайлав. Эцгийгээ ойртож ирэхэд Маргарет виски үнэртэж байхыг мэдэрлээ.

- Энэ хотоос зайл. Өнөөдөрийн дотор. Одоохон. Миний нүднээс далд ор. Дуулж байна уу?
Миний нүдэнд дахиад бүү үзэгд гэж өвгөн хашгичаад хэдэн дэвсгэрт гарган шалан дээр хаяж

- Үүнийг аваад тонил.

- Би таны ач хүүхдийг тээж яваа.

- Чи ад албины үрийг тээж яваа гээд нударга зангидан ойртож

- Хүмүүс чамайг харах бүрдээ миний шившигийг санах болно. Хэрэв чи яваад өгвөл хүмүүс
үүнийг мартаж орхино...

Маргарет эцгийгээ удтал ширтэж байснаа гэнэт эргэж сохор юм шиг үүд рүү явлаа.

- Наад мөнгөө аваач тэнэг гичий минь. Наад мөнгө ав гэж Мерве орилов.

Хотын захад хямдхан зочид буудал байдаг. Маргарет тийшээ очлоо. Толгойд нь түмэн бодол
эргэлдэнэ. Зочид буудалд очоод тэндхийн эзэгтэй миссис Оуэнсийг асуулаа. Миссис Оуэнс
бол тавиад настай, нүдэнд дулаахан бүдүүн авгай. Тэр авгай Клтпдрифтэд нөхөртэйгээ ирж,
нөхөр нь түүнийг хаясан байжээ. Өөр хүүхэн бол санаа сэтгэлээр унах байсан биз. Миссис
Оуэнс сэтгэл чанга авгай байлаа. Авгай энэ хотод зовлонд унасан хүн олныг үзсэн боловч энэ
17 настай бүсгүй шиг гуниг зовлонд ингэтлээ их автсан хүн нэгийг ч олж үзээгүй аж.

- Чи намайг эрж явна уу?

- Тийм. Танайхаас... Танай эндээс надад ажил олдох болов уу гэж бодсон юм.

- Ажил ий? Юун ажил вэ?

- Ямар ч ажил яах вэ. Би хоол хийж чадна. Буусан хүмүүст үйлчилж, ор дэрийг хурааж чадна.
Би ... би ... Надад ямарч хамаагүй ажил өгөөч гэж гуйх бүсгүйн дууны өнгөнд цөхрөнгөө
барсан аяс сонсогдлоо.

Хамаг бие нь чичрэн байгаа бүсгүйг хараад миссис Оуэнсийн элэг эмтэрч,

- Надад туслах хүн илүүдэхгүй гэж бодож байна. Чи хэдийд ажилдаа орж чадах вэ? Гэхэд
бүсгүйн дотор онгойн санаа алдан,

- Одоо ингээд гэв.

- Би чамд ердөө... гээд миссис Оуэнс хэсэг бодсноо анх санаснаасаа нэмэхээр шийдэж

- Сард 1 фунт, 2 шиллинг, 11 пенс л төлж чадна. Хоол байр үнэгүй гэхэд нь,
- Гялайлаа гэж Маргарет баярлан дуу алдав.

... Саломон Ван Дер Мерве одоо Клипдрифтийн гудамжаар үзэгдэх нь цөөн болжээ. Түүний
дэлгүүрийн үүдэнд “Хаалттай” гэсэн пайз өлгөөстэй байх нь улам олшров. Худалдан авагч
нар яваандаа бусад дэлгүүрээс хэрэгтэй юмаа худалдан авах болов.

Мерве ням гариг бүр сүмд очдог хэвээр. Тэрээр сүмд мөргөх гэж очдоггүй. Эзэн тэнгэрээс
өөрийн нуруун дээр хилсээр буулгасан энэ шившгийн ачааг авч өг хэмээн шаардхаар очдог
байлаа. Бусад сүсэгтэн нар Мервегийн баян тарган, эрх дархтайг мэдэх учир ямагт хүндэтгэн
мэндлэх боловч одоо бол араас нь нүд үзүүрлэн харах, хоорондоо шивэр авир хийхийг мэдрэх
болов. Түүнтэй нэг вандан дээр зэрэгцэн суудаг байсан айлынхан одоо холдон зайлж сууна.
Голланд өвгөнийг нүдэнд орсон хог мэт ад үзэцгээх болжээ. Нэгэн удаа сүмийн ширээт
ламын номлол түүний зоригийг бүрмөсөн унтраалаа. Ширээт лам номлолдоо Левитийн
шүлгээс уншсан нь:

“Энэ дэлхийг садар самуунаар дүүргэхгүйн тулд охиноо бузар булай, завхай зайдан явдлаас
сэрэмжлүүлэгтүн” гэжээ.

Тэр өдрөөс хойш Мерве сүмд очихоо больжээ.

Мервегийн ажил үйлс унан доройтох тусам Жемигийн ажил үйлс өөдлөн дэвжиж байлаа.
Өрөмдөх арга хэрэглэх болсноор алмас олборлох зардал багассан байхад эрэлч нар хэрэгтэй
тоног төхөөрөмжөө худалдан авах мөнгө байсангүй. Жеми Макгрегор санхүүгийн тусламж
үзүүлээд оронд нь олборлолтоос хувь авч байна гэсэн яриа ам дамжих болов. Жеми яваандаа
тэдгээр хэсгийг бүрмөсөн худалдан авсан байна. Жеми үл хөдлөх хөрөнгө, худалдаа, алт
олборлолтонд хөрөнгө оруулж байлаа. Ажил хэргийг чин шударгаар эрхлэн хөтлөдөг
болохоор нэр хүнд нь улам өсч, улам олон хүн түүн дээр ирж санал тавих болжээ.

Хотод байдаг хоёр банкны нэгийг дампуурдагийн даваан дээр очоод байхад Жеми худалдан
авсан байна. Гэхдээ наймаа хэлэлцээ хийх үед түүний нэр ил мэдэгдсэнгүй.

Жемигийн гар хүрсэн юм бүхэн орлого оруулж байв. Тэгээд урьд зүүд зөнд нь ч ороогүй
тийм их эд баялаг хөрөнгийн эзэн болжээ.

Гэвч энэ бүхэнд түүний сэтгэл нэг их хөөрсөнгүй.

Өөрийн амжилтыг Мервегийн сүйрэн ядуурч буй хэр хэмжээгээр үнэлнэ. Өшөөгөө авах ажил
дөнгөж эхэлж байлаа.

Жеми хааяа Клипдрифтийн гудамжинд Маргареттай дайралдах боловч түүнийг танихгүй мэт
өнгөрдөг байв. Энэ уулзалт болгон Маргаретад ямар янзаар нөлөөлдөгийг Жеми огт
төсөөлдөггүй байжээ. Жемийг харахдаа бүсгүйн зүрх шимшрэн өөрийн бие сэтгэлийг
эзэмдэхийн тулд дороо зогсох хэрэгтэй болно. Маргарет Жемид хайртай хэвээрээ. Сэтгэл
зүрх нь яагаад ч хувирч өгөхгүй байлаа. Жеми эцгээс нь өшөө авах гэж Маргаретийг
ашигласан боловч Жемигийн сэтгэлийг эргүүлэн татаж болно гэж итгэж байлаа. Маргарет
удахгүй хүүхэд төрүүлнэ. Тэр цагт Жеми өөрийн яс махны тасархайг үзээд Маргареттай
ханилан сууж, хүүхэддээ өөрийн овог нэрийг өгнө. Маргарет өөрөө Макгрегор овогтой
болно. Түүнд өөр хэрэгтэй юм байсангүй. Маргарет шөнө унтахаар хэвтэхдээ тэсгийж
томорсон гэдсээ барьж үзээд

“Бидний хүү” гэж шивэгнэдэг байв. Хүү буюу охин төрөхийг Маргарет өөрийн дураар болгож
чадна гэж бодох нь тэнэг хэрэг боловч өчүүхэн төдий боломжийг ч алдахгүйг хичээнэ. Эр
хүн бүр хүүтэй болохыг хүсэх нь лав.

Гэдэс томорч, бүсгүйн айх нь улам ихэслээ. Нэг хүнтэй яримаар санагдах боловч энэ хотын
нэгч эмэгтэй түүнийг тоож ярих нь үгүй. Нүгэл хилэнцтэнийг өршөөж болохгүй, цээрлүүлэх
хэрэгтэй гэж шашин сургадаг. Маргарет хар элэгтний дунд ганцаараа байлаа. Шөнө дэрэндээ
нүүрээ шургуулан өөрийгөө болон төрөөгүй үрээ өрөвдөн уйлна.

Жеми хотын төвд хоёр давхар өргөө худалдан аваад өсөж өргөжсөн компанийнхаа төв байр
болгон ашиглах болжээ. Ерөнхий нягтлан бодох Гарри Макмилан нь нэг удаа Жемид ярихдаа,

- Таны бүх компанийг нэгтгэн нэг том корпораци болгоё. Энэ корпорацид нэр өгөх хэрэгтэй
байна. Танд ямар нэгэн хүсэл санал байна уу? Гэхэд нь Жеми

- Бодьё гэжээ.

Тэгээд энэ тухай бодох болов. Намиб цөлийн алмастай эрэгт өтгөн манан дунд нэвт
сонсогдож байсан алсын цуурай толгойд нь хангинана. Тэгээд корпорацил ямар нэр өгөхөө
мэдэв. Ерөнхий нягтлан бодохоо дуудан,

- Бид шинэ компанид “Крюгер-Брент” гэж нэр өгье. Крюгер-Брент лимитед гэжээ.

Нэг удаа Жеми дээр банкны захирал Элвин Кори орж ирээд,

- Саломон Ван Дер Мервегийн зээлийн тухай яриа байна. Ажил явдал нь туйлын бүтэлгүй
байгаа. Урьд бол бид түүнд итгэж болох байлаа. Одоо бол байдал эрс өөр болсон, мистер
Макгрегор. Түүнд зээллэг өгөхийг татгалзаад бүх мөнгөө төл гэж шаардах нь зүйтэй байх
гэсэнд

- Үгүй гэжээ. Кори өөдөөс нь гайхан харж

- Өвгөн өнөө өглөө ирж мөнгө гуйсан гэхэд нь

- Түүнд мөнгө өг. Хүссэн бүхнийг өг гэсэнд банкний захирал босч

- За, мистер Макгрегор таны хэлснээр болтугай. Түүнд хэлье гэхэд нь

- Түүнд юу хэлээд хэрэггүй. Зүгээр л гуйсныг нь өг.

Маргарет өглөө бүр таван цагт босож, буудалд байгаа хүмүүсийг өглөөний хоолонд орж
ирэхэд анхилуун сайхан үнэртэй урт талх, агшаасан будаа, гахайн мах, өндөг, жигнэмэг, уур
савссан аягатай кофе өгдөг байв. Буудалд байгаа хүмүүсийн ихэнх нь хэсэг дээрээ очиж яваа
буюу тэндээс буцаж ирсэн эрэлчид байдаг. Тэд нар Клипдрифтэд алмасаа үнэлүүлэх, халуун
усанд орох, архи уух, хотын эмсийн хүрээлэнд очих гэж түр саатдаг бөгөөд үүнийгээ яг ийм
дэс дараагаар гүйцэтгэдэг байна. Тэд бол адал сонин явдал эрж явдаг эрдэм боловсролгүй
бүдүүлэг хүмүүс.

Клипдрифтэд ёс журамтай сайн бүсгүйчүүдэд халдаж болохгүй гэсэн бичигдээгүй хууль бий.
Эр хүн хүүхэн хэрэглэх болбол янхны газар очно. Харин Маргарет Ван Дер Мерве энэ хоёр
хэсгийн алинд ч үл хамаарна. Нөхөргүй ёс журамтай бүсгүйчүүд жирэмсэн болдоггүй.
Тэдний онолоор бол Маргарет нэгэн удаа нүгэл хийснээс хойш одоо хэнтэй ч хамаагүй өвөр
түрийдээ ороход бэлэн байх учиртай. Гагцхүү эвтэйхэн гуйх хэрэгтэй. Тэгээд эрчүүл гуйдаг
байжээ.

Зарим эрэлчид түс тас шууд гуйна, зарим нь ичингүйрэн аяархан гуйна. Маргарет энэ
гутамшигийг нэр төртэй тэсэж өнгөрүүлдэг байлаа. Гэтэл нэгэн удаа миссис Оуэнс унтахаар
хэвтэх гэж байтал Маргаретийн ор байдаг арын өрөөнөөс бүсгүйн хашгирах сонсджээ.
Эзэгтэй хаалганы дэргэд гүйн очиж, угз татан онгойлговол буудалд нь буусан согтуу эрэлчин
Маргаретийн шөнийн цамцыг урж хаяад орон дээр дарж байлаа. Миссис Оуэнс индүү шүүрч
аван тэр хүн рүү барс мэт ухасхийн дайран очиж балбаж эхлэв. Цаад эрэлчин нь авгайгаас
хоёр дахин том биетэй ч гэсэн авгай нүд дальдирсангүй. Уур хилэн нь бадран толгой
тархигүй балбасанд нөгөө согтуу эрэлчин удалгүй ухаан алдан шалан дээр уналаа.

Миссис Оуэнс түүнийг шатаар чирэн буулгаж, гадагш түлхэн хаялаа. Дараа нь Маргарет дээр
буцан ирж, согтуу эрэлчний хазаж цус гаргасан уруул амыг арчиж өгөхдөө гар нь чичрэн
байлаа.

- Мэгги чи зүгээр үү?

- Одоо зүгээр, миссис Оуэнс. Танд их баярлалаа.

Маргарет гэнэт асгаруулан уйлав. Хүмүүс түүнтэй тоож ярихаа больсон энэ хотод хүний
сайхан сэтгэлийн анхны илрэл энэ байлаа.

Маргаретын цүдгэр гэдсийг миссис Оуэнс хараад:

“ Хөөрхий амьтан. Жеми Макгрегор энэ хүүхэнтэй хэзээч суухгүй дээ” гэж бодлоо.

Амаржих цаг ойртжээ. Маргарет одоо амархан ядардаг болжээ. Тонгойход бүр ч хэцүү болов.
Гэдсэн дотор нь хүүхэд нь хөдлөхийг мэдрээд баярлана. Энэ дэлхий дээр хүүтэйгээ
хоёулхнаа байгаа юм шиг сэтгэн хүүтэйгээ хэдэн цагаар ярьж, түүнийг ирээдүйд хүлээж буй
гайхамшигтай сонин зүйлсийн тухай ярина.

***

Нэгэн орой, хоолны дараахан зочид буудалд хар арьстан хөвгүүн орж ирээд Маргаретэд
битүүмжилсэн дугтуй өгч,
- Би хариуг нь хүлээж байя гэжээ.

Маргарет захидалыг нэг уншиж үзээд дараа нь дахин яаралгүй уншиж үзэв.

- Тэгье. Намайг зөвшөөрч байна гэж хэл.

Дараагийн баасан гаригийн яг үд дунд Маргарет мадам Агнесийн эмсийн хүрээлэнгийн

үүдэнд зогсож байлаа. Үүдэнд нь “Хаалттай” гэсэн бичиг өлгөөстэй байв. Маргарет
гудамжаар яваа хүмүүсийн гайхан харахыг эс тоон хаалгыг аяархан тогшив.

“Би буруу ажил хийж байгаа юм биш биз?” гэж нэг бодлоо.

Ийшээ ирэхээр шийдэхэд тун амаргүй байсан. Тэсэхийн аргагүй ганцаардахын автахын
эрхээр л ингэж шийдсэн байжээ.

Захидалд өгүүлэх нь:

“ Эрхэм мисс Ван Дер Мерве

Уг ьн энэ зүйл надад хүртээмгүй боловч миний бие болон энд ажилладаг бүсгүйчүүд тантай
шударга бишээр, хатуу ширүүн харилцсан гэж үргэлж ярилцдаг юм. Үнэхээр мухай явдал. Бид
танд болон таны хүүхдэд туслахыг хүснэ. Хэрэв танд эвгүй биш бол ирэх баасан гаригт
манай энд ирж үдийн зоог барина уу?

Баасан гаригийн үд дунд ирвэл танд зохимжтой юу?

Хүндэтгэн ёслосон мадам Агнеса

Жич: Бид энд уулзахыг олонд мэдэхгүй”

Маргарет буцахаар завдан эргэтэл мадам Агнеса гарч ирээд Маргаретийн гараас барьж,

- Орогтун, хонгор минь. Гадаа халуун байна гэв.

Тэгээд ногоо хилэн викториан маягийн буйдан зөөлөн сандал, жижиг ширээнүүд тавьсан
танхимд дагуулан оров. Танхимыг ногоон тууз, зурагт хуудас, бас хаанаас олсныг мэдэхгүй
өнгө бүрийн хийн бөмбөлгөөр чимэглэсэн байв. Зурагт хуудас дээр тэгш биш үсгээр,

ТӨРСӨН ӨДРИЙН БАЯРЫН ХҮРГЭЕ

ХҮҮ ТӨРНӨ

ТАВТАЙ МОРИЛНО УУ хэмээн бичсэн байлаа.

Танхимд мадам Агнесын янз бүрийн насны, өөр өөр өнгийн арьстай 8 бүсгүй байх агаад
бүгдээр гоёлын хувцас өмссөн, нүүр амаа будаагүй байлаа.
“Эд нар энэ хотын олонхи хатагтай нараас илүү намбатай харагдаж байна шүү” гэж Маргарет
гайхан бодлоо.

Янхан хүүхнүүдийг харж байхдаа Маргарет өөрөө биеэ ямар янзтай авч байх, тэдэнтэй яаж
харилцах учраа олохгүй байлаа. Маргарет эцгийнхээ дэлгүүрт эд нарт үйлчилж байсан.

Бүсгүйчүүдийн ихэнх нь нас залуу, зүс царай хөөрхөн. Зарим нь илт будмал үстэй юм бас
биеийн хэлбэрийг гоолиг гэж болмооргүй. Харин тэд бүгдээрээ Маргаретийг өрөвдөн түүний
сэтгэлд нийцүүлэх гэж аль байдгаараа хичээцгээж байгаа нь сайхан байлаа.

Бүсгүйчүүд Маргаретыг тойрон сууцгааж, явган яриа дэлгэн хөгжилдөхдөө зарим зүйлийн
тухай дуугүй басан нь дээр гэдгийг бас мэдэж байлаа. Энэ хотынхон юу гэж ярилаа ч гэсэн
энэ бүсгүйчүүд Маргаретыг хүндтэй хүүхэн гэж үзэж, тэдний хооронд ялгаа бийг ойлгож
байлаа. Энэ бүсгүйчүүд Маргаретыг тоож ирсэнд баярлаад санаанд нь нийцүүлэхийг хичээж
байлаа.

- Бид чамд их сайхан хоол хийсэн. Чи ходоодоо сойж ирсэн биз дээ гээд мадам Агнеса хэлээд
хоолны танхимд дагуулан аваачив.

Тэнд баяр ёслолын байдлаар ширээ засаж, Маргаретын суудлын өмнө нэг лонх шампани дарс
тавьсан байлаа. Маргарет гудмаар явж байхдаа хоёрдугаар давхрын унтлагын өрөөнүүд рүү
хөтлөсөн шатыг харав. Жемийн энд ирдгийг мэдэх болохоор энэ бүсгүйчүүдийн хэнийг
шилээ бол гэж сонирхож байлаа. Лав бүгдтэй нь хоносон байх. Тэгээд бүсгүйчүүдийг дахин
харав. Өөрт нь байхгүй чухам юу энэ бүсгүйчүүдэд байдаг юм бол оо?

Энэ бол зүгээр нэг үдийн хоол биш, ёстой нэг найрын ширээ байлаа. Эхлээд шанцай,
анхилуун сайхан үнэртэй хүйтэн шөл, дараа нь шинэхэн мөрөг загас өглөө. Дараа нь ром
дарстай чанамал жимс, жигнэмэг, бяслаг, үр жимс, кофе барив. Маргарет биеэ барилгүй
дуртайяа ууж идэж байлаа. Маргаретийн ширээний эхэнд, баруун талд нь мадам Агнеса, зүүн
талд нь Мегги гэдэг 16 настай хөөрхөн бүсгүй сууж байлаа. Эхлээд яриа эвлэж өгөхгүй
байлаа. Бүсгүйчүүд хөгжилтэй, инээдэмтэй сонин намтар олныг мэдэх боловч Маргаретад
ярьж болмоор юм биш. Тийм болохоор цаг агаарын тухай, Клипдрифтийн хэрхэн өсөж
хөгжсөн тухай, Өмнөд Африкийн ирээдүйн тухай ярьцгааж байв. Мадам Агнесын
бүсгүйчүүд бүгдээрээ улс төрийн бодлого, эдийн засаг, алмасны учир байдлыг сайн мэддэг
ажээ. Яагаад вэ гэвэл тэд энэ бүхний тухай сайн мэдэх хүмүүсээс шууд мэдээлэл авдаг аж.
Мегги л нэг удаа,

- Жеми саяхан шинэ орд худалдаж авсан... гэж үг алдснаа, даруй амаа барьж хэсэгхэн дуугүй
байснаа,

- Миний нагац эгчтэй суусан Жеми ахыг хэлж байгаа юм шүү... гэж даруй нэмж хэллээ.

Маргаретын цээжинд гэнэт хардах сэтгэл оволзход өөрөө ч гайхлаа. Мадам Агнеса ярианы
сэдвийг даруй өөрчлөв. Хоол идэж дууссаны дараа мадам Агнеса босож,

- Надтай хамт яв, хонгор минь гэв.

Маргарет бүсгүйчүүдтэй хамт хойноос нь дагав. Маргаретын урьд ажиглаагүй танхимд орвол
тэнд зөндөө бэлэг бэлтгэсэн байжээ. Бүгдийг гоё боож савласан байлаа. Маргарет нүдэндээ
итгэсэнгүй.

- Би... юу хэлэхээ мэдэхгүй байна.

- Задлаад үз гэж мадам Агнеса хэллээ.

Бэлгийн дотор хүүхдийн өлгий, сүлжмэл шаахай, богино өмд, малгай, хатгамал урт цув байв.
Тэнд бас франц туфли, алтан амсартай мөнгөн аяга, цэвэр мөнгөн бариултай сойз, сам,
хүүхдийн цээживчний алтан зүү, торжигнуур, модон морь, тугалган цэрэг, өнгө өнгийн шоо
дөрвөлжин, загалмайлах баяр өмсгөх урт цамц тэргүүтэн байлаа. Зул сарын баяр болж байгаа
ч юм шиг. Маргарет ийм юм болно гэж огт сэтгэлдээ төсөөлсөнгүй. Гэнэт баярлах сэтгэл
цээж дүүрч, баярласандаа асгаруулан уйллаа. Мадам Агнеса мөрөөр нь тэврээд бусад
бүсгүйчүүдийг явцгаа гэж дохисонд тэд өрөөнөөс чимээгүй гарч явцгаалаа. Мадам Агнеса
Маргаретыг буйдан дээр суулгаж, уйлахыг зогстол тэврэн аргадав. Маргарет мэгшин уйлах
завсар,

- Уучлаарай. Би яаснаа өөрөө ч мэдэхгүй байна гэсэнд

- Зүгээр зүгээр хонгор минь. Энэ байшин их нулимс үзэж өнгөрүүлсэн. Амьдрал надад юу
сургасан гэж бодно? Эцсийн бүлэгт юм бүхэн сайхан болдог. Чиний хүүхэд, та хоёрын хувь
заяа ч сайхан болно гэхэд нь

- Баярлалаа гэж Маргарет шивэгнээд өдий төдий бэлгийн зүг толгой дохиж

- Би та нарын ачийг хариулж чадахгүй... гэсэнд мадам Агнеса гарыг нь атгаж,

- Хэрэггүй. Энэ бүхэн бидэнд хичнээн баясгалантай сайхан байсныг чи мэдэхгүй байна.
Бидэнд ийм боломж цөөхөн олддог. Манай энд бүсгүйчүүдийн хэн нэг нь жирэмсэлбэл
аймшигтай эмгэнэлт явдал байдаг юм шүү дээ. Тэнгэр өршөө намайг гэж дуу алдан нүдээ
анихад нь Маргарет инээмсэглэн,

- Танд үнэнээ хэлэхэд энэ бол миний амьдралын хамгийн баяр жаргалтай өдрийн нэг байлаа.

- Урилгыг маань хүлээн авсанд бид их урамтай байна. Чухам үнэнийг мэдье гэж байгаа бол
энэ хотын хүүхнүүд бүгдээрээ чиний чигчий хуруунд ч хүрэхгүй. Муусайн шуламнууд.
Чамтай тэгж харицдагийн төлөө тэр муусайн юмнуудыг багалзуурдаад авмаар байдаг. За
уучлаарай хонгор минь. Тэр Макгрегор өөрөө тэнэг эр юм даа гээд босож,

- Ээ, энэ эрчүүд үү? Бид энэ муусайнуудгүйгээр амьдарч болдогсон бол энэ хорвоо ямар
сайхан байх байсан бол доо. Үгүй ч байж болох юм даа, хэн мэдэх вэ? Гэлээ.

Маргарет биеэ нэгэнт эзэмдэн барьлаа. Буйдан дээрээс босож мадам Агнесын гараас бариад,

- Таны сайхан сэтгэлийг хэзээ ч мартахгүй. Энэ насандаа мартахгүй. Энэ тухай би нэгэн цагт
хүүдээ ярина гэсэнд мадам Агнеса хөмсөг зангидан
- Хүүдээ ярих хэрэг байгаа юм уу даа?

- Хэрэгтэй гэж бат итгэж байна хэмээн Маргарет инээмсэглэв.

Мадам Агнеса Маргаретыг үүд хүртэл үдэж өгөөд,

- Бэлгийг чинь зочид буудалд хүргэж өг гэж хэлье. Сайн сайхныг хүсье гэхэд нь

- Баярлалаа, их баярлалаа гээд Маргарет явлаа.

Мадам Агнеса гудамжаар эв хавгүй алхалж яваа Маргаретын хойноос харж хэсэг зогсоод
дараа нь дотогш орж,

- За боллоо, охид оо. Одоо ажилдаа орцгооё гэжээ.

Нэг цагийн дараа мадам Агнесын эмсийн хүрээлэн зочид хүлээн авахаар үүдээ нээжээ.
8-р бүлэг

Хавхныхаа амыг хамхих цаг боллоо. Жеми зургаан сарын турш Мерве түүний хамжаа түнш
нарын компанийн хувийг худалдан авч одоо байдлыг өөрийн хяналтанд оруулжээ. Жеми
Намиб цөл дэх алмасны эргийг эзэлж авах зорилго тавьсан байна. Жеми түүний төлөө хөлсөө
урсган, цусаа гоожуулсан бөгөөд халуун амиа алдах шахсан билээ. Бандатай хамт тэндээс
хулгайлж авсан алмасаа ашиглан одоо Мервег устгаж чадах хүчийг оллоо. Энэ зорилтыг
биелүүлэхэд одоо л бэлэн боллоо.

Мерве улам улам өр ширэнд баригджээ. Нууцаар Жемийн мэдэлд байдаг банкнаас өөр
Мервед мөнгө авах газар байсангүй. Жеми банкны захиралд:

“Мервед гуйсан бүхнийг өг” гэсэн тодорхой заалт өгсөн.

Голланд өвгөний дэлгүүр одоо үргэлж хаалттай байх бөгөөд өдөр нь мадам Агнесынд
хүрээлэнд очиж, олонхидоо тэндээ хонодог байв.

Нэгэн өглөө Маргарет миссис Оуэнсын захисан цуврага авахаар махны дэлгүүрт очиж яваад
эцгийгээ эмсийн хүрээлэнгээс гарч явахыг харжээ. Гудамжаар салгалж яваа тэр балиар
муухай өвгөнийг эцгээ гэж танихад хэцүү байлаа.

“ Энэ надаас л болсон хэрэг. Ай тэнгэр надаас болж байгаа юм” гэж бүсгүй бодлоо.

Мерве өөрөө чухам юу болж байгааг төсөөлөх ч чадвар үгүй байлаа. Гагцхүү амьдрал нь
уруудаж доройтох болсныг өөрийн буруу биш гэж л мэднэ. Эзэн тэнгэр нэгэн цагт сүсэг
бишрэлийнх нь батыг шалгах гэж Евааг сонгож авсан шигээ энэ удаа түүнийг сонгож авсан
бололтой. Мерве эцсийн бүлэгт өөрийн үл үзэгдэгч бүх дайсныг дийлж чадна гэж итгэж
байв. Түүнд гагцхүү жаахан цаг хэрэгтэй. Цаг, мөнгө хоёр. Голланд өвгөн өөрийн дэлгүүр,
зургаан алмасны уурхайг, түншийн баталгаануудаа, тэр байтугай морин тэргээ морьтой нь
барьцаанд тавьжээ. Үлдсэн ганц юм нь гэвэл Намиб цөл дэх алмасан эрэг. Түүнийгээ ч
удалгүй зээллэг авахдаа барьцаална гэж Жеми мэдэж байлаа.

- Түүний өрийн бүх дансыг цуглуулаад бүх өрөө 24 цагийн дотор төл гэж шаард гэж Жеми
банкны захиралд тушаав.

- Тэр өвгөн ийм богино хугацаанд тийм их мөнгө олж чадахгүй л болов уу даа, мистер
Макгрегор. Тийм боломж огт байхгүй... гэж банкны эзэн учирлахад,

- 24 цагийн дотор гэж Жеми түс тас хариулав.

Маргааш нь яг 4 цагт Мервегийн дэлгүүрт банкны захиралын туслах, шүүхийн гүйцэтгэгчтэй

хамт оров. Шүүхийн гүйцэтгэгч түшмэл,

“Саломон Ван Дер Мервегийн бүх эд хөрөнгийн хураан ав” гэсэн бичиг үзүүлжээ. Ван Дер
Мервег гадагш гаргаж ирэхийг Жеми өөрийн ажлын тасалгааны цонхоор харав. Өвгөн явган
зам дээр гарч ирээд хурц наранд гялбан анивчиж, юу хийх, хаашаа явахаа мэдэхгүй зогсож
байлаа. Түүнд юу ч үлдсэнгүй. Жеми өшөөгөө авч дуусчээ.

“Би яагаад дийлж гарсандаа баярлахгүй байна вэ?” Жеми гайхан бодов. Цээж дотор нь юу ч
үгүй хоосон байлаа. Жемийн устган дарсан хүн өөрийг нь аль хэдийнэ устгасан байжээ. Орой
нь Жемийг мадам Агнесын хүрээлэнд очиход авгай,

- Шинэ сонин сонссон уу, Жеми? Саломон Ван Дер Мерве цохондоо сум зоосон гэнэ гэжээ.

Хотын захад байдаг, булшны хоорондуур салхи зугаалсан ёозгүй оршуулгын газар оршуулах
ёслол болов. Оршуулгын газрын ажилчдаас гадна хоёрхон хүн байсан нь Маргарет, Жеми
Макгрегор хоёр байлаа. Маргарет цүдгэр гэдсээ нуух гэж энгийн хар платье өмсчээ. Бие нь
эрүүл биш болов уу гэмээр царай нь зэвхий байлаа. Жеми үнэтэй ганган костюм өмссөн
байв. Царай нь юу ч тоож анхаарахгүй хөшсөн байдалтай. Тэр хоёр булшны хоёр талд зогсоод
нарсан банзаар хийсэн авсыг нүхэнд буулгахыг харж байв. Авсны таг дээрээс бөөн бөөн
шороо унахдаа “Банзал, банзал” хэмээн хэлж байх шиг Маргаретад санагдав.

Жемийн өөдөөс харсанд тэр хоёрын харц тулгарлаа. Жеми түүнийг хөндлөнгийн үл таних
хүн мэт хүйтэн хөндий харж байв. Тэгэхэд нь Маргарет түүнийг үзэн ядав.

“Чиний буруу бас оролцсон атал чи сэрэл сэлгэлгүй хүн чулуу шиг хүрлийгээд зогсож байна.
Чи бид хоёр энэ өвгөнийг алсан. Эзэн тэнгэрийн өмнө би чиний эхнэр. Чи бид хоёр энэ нүгэл
үйлийг хамтран хийсэн” Бүсгүй булш руу харвал авсны таг шороон дор далд орсон байв.

- Эх дэлхий шороо танд зөөлөн өлгий болог гэж Маргарет шивэгнээд нүдээ өргөхөд Жеми
яваад өгсөн байлаа.

Клипдрифтэд эмнэлэг болгож, ашигладаг хоёр муу модон байшин бий. Тэр хоёр байшин
туйлын бохир муухай арчаагүй учир олонхи өвчтөн эдгэхийн оронд үхдэг байна. Эмэгтэйчүүд
гэртээ амарждаг. Маргаретын хоног нь тулаад ирэх үед миссис Оуэнс негр хорооллын Ханна
гэдэг эх баригч хүүхэнтэй ярьж тохирчээ. Өглөөний гурван цагт дуншиж эхлэхэд нь:

- Тайван хэвтэж бай. Байгаль эх өөрөө санаа тавина хэмээн Ханна хэлэв.

Эхэлж өвдөхөд нь Маргаретын уруулд инээмсэглэл тодров. Хорвоод нэгэн хүү төрүүлж, нэр
өгнө. Жеми Макгрегор төрсөн үрээ өөрийн хүүхэд гэж зөвшөөрөх л болгоно. Хүү нь ямар ч
гэм буруугүй шүү дээ. Өвдөх нь хэдэн цаг үргэлжилж, буудалд буусан сониуч хүмүүс чухам
юу болж байгааг үзэх гэж өрөө рүү шагайхад Ханна авгай тэднийг хөөж,

- Энэ бол амин хувийн хэрэг. Энэ чамд, Эзэн Тэнгэрт, чамайг нүгэл хийлгэсэн буг чөтгөрт л
хамаатай гэж Маргаретад хэлэв.

- Надаас хүү төрөх үү? гэж Маргаретын ёолон асуухад Ханна духыг нь нойтон алчуураар
арчаад,

- Зулай нь цухуйхаар чамд хэлье. Одоо хүчил. Чангахан Бүр чанга...

Базлах нь улам олширч, Маргаретийн биеийг аймаар өвчин тасчих гэж байх шиг. “Ай тэнгэр
Нэг л биш дээ” гэж бүсгүй бодов.

- Хүчтэйхэн гэж Ханна тушааснаа дууны нь өнгөнд түгшүүрт аяс мэдэгдэж

- Хүйтэйгээ ороочолдчихсон байна. Би гаргаж авч чадахгүй нь ээ гэж дуу алдав.

Ханна дээрээс нь тонгойн биеийг нь базалж, үнгэж эхлэхийг Маргарет улаан манан дундаас
ахрав. Нүд нь харанхуйлан гэнэт өвдөхөө больж, хоосон нүх рүү нисэн одоход хонгилын цаад
захад хурц гэрэл асаж байлаа. Тэндээс нэг хүн даллаж байгаа нь Жеми ажээ.

“Би энд байна хайрт Мегги минь. Чи надад гайхамшигтай сайхан хүү төрүүлж өгнө” Жемийн
сэтгэл эргэжээ. Үзэн ядах сэтгэл нь нэг тийшээ алга болов. Маргарет түүнд цаш үргэлж
хайртай байснаа мэднэ. Тэгтэл хэн нэгэн

- Бараг гүйцлээ хэмээн хэлэх сонсдож тэсэхийн аргагүй өвдөхөд нь дуу алдан хашгирлаа.

- Гарч байна. Бүгд ёсоороо байна гэж Ханна хэллээ.

Нэгэн хормын дараа Маргарет хөлийн хооронд нэг юм хөдлөхийг мэдэрч, Ханнагийн баяр
баясгалант дууг сонслоо. Авгай хүүхдийн улаан нялзгай биеийг өргөн,

- Клипдрифтэд тавтай морилно уу. Чи сайхан хүүтэй боллоо, хонгор минь гэжээ.

Хүү төрснийг Жеми түргэн сонсоно гэж Маргарет мэдэж байв. Тэгээд өөрөө ирэх юм уу
гэртээ дуудаж аваачихыг хүлээж байлаа. Ийнхүү хэдэн хоног өнгөрсний дараа Маргарет
түүнд зурвас бичиж явуулахаар шийдэв. Зарлага хүү хагас цагийн дараа эргэж ирэв. Маргарет
хүлээсээр байгаад бүр тарчилж гүйцжээ.

- Чи мистер Макгрегортой уулзав уу?

- Уулзлаа, хатагтай...

- Миний зурвасыг өгөв үү?

- Өгсөн, хатагтай...

- Юу гэж байна вэ? Хэмээн шаардангуй асуусанд хөвгүүн дороо хавьчиж,

- Тэр ... тэр надад хүү байхгүй гэж хэлсэн, мисс Ван Дер Мерве...

Маргарет хүүтэйгээ хамт өрөөгөө дотроос нь түгжээд бүтэн хоног тэндээс гарсангүй. Өглөө
нь миссис Оуэнсийг үүд тогшиход Маргарет тайлж өгөв. Бүсгүй ер бишийн хачин тайван
байлаа.

- Бие чинь зүгээр үү, Мегги?

- Зүв зүгээр. Баярлалаа гээд Жеми хүүд шинэ хувцсыг нь өмсгөж,

- Би өнөөдөр хүүгээ тэргэнд тавиад салхинд гарья гэв.

Мадам Агнеса, түүний бүсгүйчүүдийн бэлэглэсэн хүүхдийн тэрэг ёстой нэг урлагийн бүтээл
байлаа. Тэргийг уд бургасны бүдүүн саваагаар хийж, хятад торгоор бүржээ. Дээр нь торон
сүлжмэл шүхэр бэхэлсэн байлаа.

Маргарет хүүхэдтэй тэргээ Луп стритийн нарийхан явган замаар түрж явлаа.Хажуугаар нь
өнгөрсөн зарим эрчүүд хүүхдийг нь харан инээмсэглэх боловч хотын авгай хүүхнүүд нүд
буруулах буюу замын нөгөө талд гарна. Маргарет үүнийг огт тоож анхаарсангүй. Нэг л хүн
эрж явсан байжээ. Хэрэв тэнгэр сайхан байвал хүүдээ гоё хувцас өмсгөөд тэргэнд тавин авч
гарна. Долоо хоног өнгөрөхөд Жемитэй дайралдаагүй бөгөөд түүний зугтаагаад байгааг
ойлголоо.

“За яах вэ, чи хүү дээрээ ирэхийг хүсэхгүй байгаа бол хүү чинь чам дээр очно” гэж хөмхий
зуун шийдлээ. Маргааш өглөө нь Маргарет мисс Оуэнст хандан

- Би долоо хоног гадагшаа яваад ирнэ, миссис Оуэнс ээ гэсэнд,

- Хүү чинь ийм олон хоног жуулчилж болохооргүй нялх байна, Мегги... гэхэд

- Хүү хотод үлдэнэ гэв.

- Энд орхино гэж байгаа юм уу гээд миссис Оуэнс хөмсөг зангидахад

- Үгүй, энд орхихгүй... гэжээ.

... Жеми Макгрегор Клипдрифтийн баруунтаа байдаг нэгэн гүвээн дээр өөртөө байшин
бариулжээ. Тэр бол хавтгай дээвэртэй нэг давхар байшин байв. Гол хэсэгтээ залгаатай хоёр
жигүүр бий. Эргэн тойрон ногоон зүлэг, цонхны өмнө сарнай цэцэгтэй цэцгийн мандал. Ар
талд нь морины жүчээ, зарц үйлчлэгчдийн байр бий. Гэр ахуйн бүх ажил хэргийг Англид 6
хүү нь үлдсэн Южения Тэлли гэдэг дунд хэрийн насны бэлэвсэн авгай эрхлэн хөтөлнө.
Өглөөний 10 цагт, Жемийн контортоо байгаа үеийг тааруулан Маргарет хүүгээ тэврээд тэр
байшин тийш очлоо. Миссис Тэлли үүд тайлж өгөөд Маргарет хүүхэд хоёрыг гайхан харав.
Миссис Тэлли энэ хотын бүх хүмүүсийн нэгэн адил эднийг хэн болохыг мэддэг байлаа.

- Уучлаарай, мистер Макгрегор гэртээ байхгүй гээд хаалгаа хаах гэтэл Маргарет түүнийг
зогсоож,

- Би мистер Макгрегортой уулзах гэсэн юм биш. Хүүг нь авчирлаа.

- Тоогүй дээ. Энэ тухай би огт мэдэхгүй. Та...

- Би долоо хоног гадагшаа явна. Эргэж ирээд хүүгээ авна. Нэрийг нь Жеми гэдэг юм гээд
хүүхдээ сарвайсанд миссис Тэллийн царайд айсан байдал илэрч,

- Та хүүхдээ энд орхиж болохгүй. Мистер Макгрегор... гэхэд нь Маргарет түүнд үг хэлэх
чөлөө өгсөнгүй,
- Таны дур мэдэх хэрэг. Та энэ хүүхдийг дотогш нь аваад орно уу, эсвэл энд үүдний дэргэд
шатан дээр орхичихож болно. Тэгвэл мистет Макгрегорын санаанд бас л таарахгүй болов уу
даа. Гээд олон таван үггүй ангайж хоцорсон Тэлли авгайн гарт хүүгээ бариулчихаад яваад
өглөө.

- Байзаарай, яаж ингэж болох вэ? Буцаад ирээч... гэсээр авгай хоцорлоо.

Маргарет ядах эргэж ч харсангүй. Миссис Тэлли хүүхэд тэврэн зогсож байхдаа

“Ай тэнгэр. Мистер Макгрегор яасан их уурлах болоо” гэж бодлоо.

...Түүний ингэж их уурлаж байхыг авгай урьд үзсэнгүй. Жеми:

- Та яасан тэнэг хүн бэ? Хамрын нь өмнө хаалгаа тас хаачих ёстой байсан юм гэж загнав.

- Надад сэхээ авах чөлөө өгөөгүй юм аа, мистер Макгрегор оо. Тэр хүүхэн...

- Энэ хүүхдийг би гэртээ байлгахгүй.

Жеми өрөөн дотуур тогтож ядан холхиж, хааяа хөөрхий авгайн өмнө ирж зогсоод хашгичин
загнана.

- Үүний чинь төлөө таныг халбал таарахсан...

- Долоо хоногийн дараа ирж хүүгээ авна гэсэн. Би ...

- Хэзээ ирж авах нь надад падгүй. Энэ хүүхдийг ерөөсөө эндээс зайлуул. Одоохон.

- Үүнийг би одоо яадаг билээ, мистер Макгрегор... хэмээн авгай аяархан асууллаа.

- Хотод аваачаад орхичих. Тэнд ийм хүүхэд асардаг газар байх ёстой.

- Чухам хаана вэ?

- Би яаж мэдэх юм, чөтгөр алгад

Миссис Тэлли тэвэрч буй өлгийтэй хүүхдийг харав. Хашгирах дуунаас хүүхэд цочин айж
уйллаа.

- Клипдрифтэд өнчин хүүхэд асрах газар байхгүй. Энэ хүүхдийг хэн асрах ёстой болж байна
вэ? Гэж авгай хэлээд хүүхдийг бүүвэйлж эхэлсэн боловч хүүхэд улам чанга уйллаа. Жеми
тэсч ядан үсээ үнгэж,

- Сайхан сэтгэлтэйгээрээ та л асрах болж дээ гэв.

- За тэгье, эрхэм ээ.

- Бас наадахыгаа битгий уйлуулаарай. Энэ хүүхдийг миний нүднээс далд байлга. Миний гэрт
хүүхэд байгаа гэж мэдэхийг хүсэхгүй байна. Эхийг нь ирэхэд түүнтэй уулзахыг хүсэхгүй,
мэдэв үү.

Хүүхэд одоо тэнхээ мэдэн чарлав.

- Мэдлээ, Мистер Макгрегор гээд миссис Тэлли өрөөнөөс яаран гарав.

Жеми тамхи татан бренди шимэн ганцаараа сууж байв.

“ Тэнэг хүүхэн. Намайг хүүхдээ хараад зүрх нь уярч, өөр дээр очоод,

- Би чамд хайртай бас хүүдээ хайртай. Чамтай сууя гээд гуйгаад очно гэж бодсон бололтой”

Жеми хүүг ядаж тоож харсангүй. Энэ бол дурлалаас төрсөн хүүхэд биш. Ядахдаа тачаангуй
хүслээс төрсөн хүүхэд биш. Энэ бол Жемийн үзэн ядах сэтгэлээс төрсөн хүүхэд. Маргаретын
жирэмсэн болсныг хэлэхэд Мервегийн царай ямар болсныг Жеми хэзээ ч мартахгүй. Энэ бол
эхлэл байсан. Түүний авсны таг дээр шороо унасан нь төгсгөл байсан. Одоо Бандаг олж
тангаргаа биелүүлснийг ярих хэрэгтэй.

Жемийн сэтгэл зэвэрчээ.

“ Надад их зорилго хэрэгтэй байна” гэж тэр боллоо.

Аль хэдийн хэмжээгүй их эд баялагын эзэн болсон байлаа. Алмас эрдэнэ олох санаатай олон
акр талбай худалдан авч, тэндээсээ шар цагаан алт, бусад ховор метал, эрдэс олжээ. Банк нь
Клипдрифтийн бүх л үл хөдлөх хөрөнгийн тэн хасагыг барьцаалан хадгалж байлаа. Түүний
эзэмшил газар нь Намибаас Кейптаун хүрнэ. Энэ нь сэтгэлд таатай боловч Жемид бага
байлаа. Жеми эцэг эхдээ захиа бичиж энд ирж суухыг урьсан боловч тэд нар нь Шотланд
нутгаа орхихыг хүссэнгүй. Ах нар нь эхнэр авч, эгч нь нөхөрт очжээ. Жеми эцэг эхдээ их
хэмжээний мөнгө явуулсан. Үүндээ баярлах боловч амьдрал даанч нэг хэвийн уйтгартай
санагдана. Хэдэн жилийн өмнө амьдрал нь өөдлөх, уруудахаас бүрдэж байлаа. Тэгэхэд хүн
гэдгээ мэдэрдэг байсан. Бандатай хамт хориотой бүс рүү чулуун дээгүүр хөвж явахдаа,
минатай талбай дээгүүр мөлхөж явахдаа амьд хүн гэдгээ мэдэрч байсансан. Одоо бол үхсэн
амьдын хооронд үлгэн салган тоос хөдөлгөн явах шиг санагдана. Тэгээд ганцаараа,
ганцаардсан гэдгээ хүлээн зөвшөөрөх хүсэлгүй байлаа.

... Жеми лонхтой бренди руу гар сарвайгаад хэдийн дуусаныг үзэв. Тэрээр одоо архи уух нь их
болжээ. Архины шил аваад архи дарс хадгалдаг зоорь руу явлаа. Лонх онгойлгож байтал нялх
хүүхэд аан уун гэх нь сонсогдов.

“Миссис Тэлли тэр хүүхдийг өөрийн өрөөндөө байлгаж байгаа юм байна”

Авгай уг нь Жемийн зааварыг тушаалыг нарийн чанд биелүүлдэг. Хүүхэд гэрт нь байсан энэ
хоёр өдөр Жеми түүний барааг харж, дууг нь сонсоогүй. Миссис Тэлли хүүхдэд хандан,

- Чи нээрээ их хөөрхөн хүү юм. Бүр сахиусан тэнгэр шиг л хөөрхөн амьтан юм. Тийм шүү, яг
тийм гэж аялгуулан өгүүлэх нь сонсдов. Хүүхэд
- Аан уун гэлээ.

Жеми онгорхой хаалганы дэргэд очиж, миссис Тэллийн унтлагын өрөө рүү шагайвал гэрийн
бойдаа авгай хаанаас ч юм бэ хүүхдийн өлгий олж ирээд хүүхдийг дотор нь тавьсан байв.
Миссис Тэллийг дээрээс нь тонгойход хүүхэд бяцхан гараараа авгайн хуруунаас бариад авав.

- Хүүе, Жеми чи яасан их тэнхээтэй юм бэ? Том болохоороо... гэж авгай хэлснээ үүдний тэнд
Жемийг өөрийг нь зогсож байгааг хараад үгээ таслан,

- Ноёнтон танд ямар нэгэн юм хэрэгтэй болов уу?

- Үгүй үгүй. Дуу чимээ надад саад болоод байна гээд Жеми өлгийн дэргэд очив.

Жеми анх удааа хүүгээ харж байгаа нь энэ билээ. Сансанаас сүрхий том хүү байлаа. Эцгийгээ
хараад инээж байх шиг.

- Ээ уучлаарай, ноёнтоон. Энэ их сайн хүү. Бас эрүүл чийрэг. Та хуруугаа бариулаад үзээч. Их
тэнхээтэй гэлээ.

Жеми ганц ч үг дуугаралгүй шууд эргэн өрөөнөөс гарлаа.

Янз бүрийн компанид Жемийн гарын дор тавиад хүн ажилладаг. Тэдний дотроос зарлагаас
эхлээд захиргааны дээгүүр тушаалын ажилтаныг хүртэл “Крюгер-Брент лимитэд”
корпорацийн нэр хэрхэн гарч ирснийг мэдэхгүй хүн нэгээхэн бээр үгүй. Тэд нар Жеми
Макгрегорын ажлыг хийж байгаадаа баярлан бахархдаг. Жеми өмнөд Африкт алмас эрхээр
ирсэн нэгэн арваны даргын хүү 16 настай Дэвид Блэкуэллийг саявтар ажилд авсан байжээ.
Блэкуэллийн мөнгө дуусахад Жеми түүнийг уурхайн даамлаар авч, түүний хүүг бас ажил
авчээ. Тэр бол хэлсэн болгоныг сайн хийдэг идэвхтэй хүү байсан учир байнгын ажил хийлгэх
болсон байна. Дэвид Блэкуэлл хүү ухаалаг, нүдэнд дулаахан, идэвх зүтгэл сайтай. Бас илүү
олон таван үггүйг нь Жеми мэдэх учир түүнд л нэгэн даалгавар өгөхөөр шийджээ.

- Дэвид ээ, чи миссис Оуэнсийн зочид буудалд очоод ир. Тэнд миссис Ван Дер Мерве гэж
хүүхэн бий.

Дэвид энэ нэрийг мэддэг байлаа ч гэсэн мэддэгээ харуулсангүй.

- Мэдлээ, эрхэм ээ.

- Чи зөвхөн тэр хүүхэнтэй л уулзаж яриарай. Хүүхдээ манай гэрийн бойдаад орхичихсон
байна. Өнөөдрийн дотор ирж хүүгээ ав гээ.

- Ойлголоо, эрхэм ээ.

Хагас цагийн дараа Дэвид эргэж ирэхэд Жеми үзэж байсан бичиг цаасаас нүдээ салган дээш
харав.

- Ноёнтон таны даалгаварыг биелүүлэж чадахгүй юм шиг байна гэхэд Жеми босож,
- Яагаад? Юу нь төвөгтэй байна?

- Миссис Мерве тэнд алга.

- Байгаа газраас нь олоод уулз

- Хоёр хоногийн өмнө Клипдрифтээс яваад өгсөн гэнэ. Миссис тав хоноод ирнэ гэж байна
зочид буудалын эзэгтэй хэлж байна. Таныг хүсвэл би асууж лавлахад болох юм.

- Хэрэггүй, Дэвид чи явж болно.

- За гээд залуу хөвгүүн өрөөнөөс гарч одов.

“Тэр хүүхнийг чөтгөр аваасай. За яах вэ, эргэж ирээд хүүхдээ авах л болно доо”

Тэр орой Жеми гэртээ хооллов. Хоолны дараа ажлынхаа өрөөнд бренди уугаад сууж байтал
миссис Тэлли аж ахуйн зарим нэг ажил явдал ярьж байснаа гэнэт чих тавин чагнаж,

- Уучлаарай, Бяцхан Жеми уйлж байх шиг байна... гээд ухасхийн босож, өрөөнөөс гүйн
гарчээ. Жеми барьж байсан хундагаа ширээн дээр чанга тавьж, архийг асгав.

“Хөөтэй хүүхэд. Энэ авгай бас түүнийг Жеми гэж нэрлэж зүрхэлдэг байна шүү. Тэр хүүхэд
Жемитэй адилгүй. Ерөөсөө хэнтэй ч адилгүй”

Миссис Тэлли 10 минутын дараа эргэж ирээд бренди асгарсан байхыг үзэж,

- Танд өөр хундага авчирах уу?

- Хэрэггүй. Хамгийн гол нь та хэний ажлыг хийж байгаагаа санаж байх хэрэгтэй. Нэг муу
зулбасгаас болж миний яриаг тасалдуулах ёсгүй. Миссис Тэлли үүнийг та ойлгож байна уу?
Жеми их хүйтэн хөндий өгүүлэв.

- Ойлголоо, ноёнтоон.

- Тэр хүүхдийг миний гэрээс хэдий чинээ хурдан зайлуулбал надад болон танд төдийчинээ
сайн. Та ойлгож байна уу? Гэхэд нь гэрийн бойдаа авгай уруулаа жимийж,

- Ойлголоо, эрхэм ээ. Өөр юм байна уу? Гэсэнд,

- Байхгүй гээд авгай хаалга руу эргэтэл,

- Миссис Тэлли... гэж дуудав.

- Юу гээ вэ, Мистер Макгрегор?

- Та хүүхдийг уйллаа гэсэн, бие нь зүгээр үү?

- Зүгээр ээ. Даавуу нь норчихсон байна. Би хуурайлсан гэхэд нь Жеми ярвайж,

- Гүйцээ. Явж болно гэжээ.

Зарц үйлчлэгч нар нь эзнийхээ тухай, хүүгийн нь тухай ярилцдагийг Жеми мэдвэл лав их
уурлах бизээ. Тэд бүгдээрээ эзэн эвгүй зан гаргаж байгааг зөвшөөрдөг боловч энэ сэдвээр үг
дуугарах л юм бол ажлаасаа даруй халагдана гэж мэдэж байлаа. Жеми Макгрегор бол хүний
санал зөвлөгөөг авдаг хүн биш.

Маргааш орой нь Жеми контортоо саатав. Төмөр замын шинэ салаанд хөрөнгө оруулах
хэлэлцээ хийсэн байжээ. Тэр бол Намиб цөл дэх түүний түүний уурхайгаар Де Аар хүрч,
Кимберли-Кейптаун шугамтай нийлсэн жижигхэн салаа юм. Ийнхүү алт, алмасыг тэнгисийн
боомтонд хүргэх тээврийн зардал ихээхэн хямдарна. Өмнөд Африкийн анхны төмөр замыг
1860 онд Дунбараас Пойнтын хооронд тавьсан байна. Тэр үеэс хойш Кейптаунаас
Веллингтон хүрсэн өөр бусад зам тавьжээ. Төмөр зам бол хүмүүс болон бараа таваарыг
Өмнөд Африкийн зүрхээр дамжуулдаг ганц төмөр судас болох ёстой учир Жеми энэ ажилд
оролцохыг хүсчээ. Энэ бол түүний төлөвлөөгөөг биелүүлэх ажлын зөвхөн эхлэл.

“ Дараа нь хөлөг онгоцны талаар ажиллах хэрэгтэй. Далайгаар тээх эрдэс бодисыг миний
өөрийн хөлөг онгоц тээх ёстой” гэж Жеми бодлоо. Гэртээ ирээд хувцасаа тайчин унтахаар
хэвтэв. Лондоны засал чимэглэлийн нэгэн зураачийн янзалсан түүний асар том унтлагын
өрөөнд Кейптаунд модоор сийлж хийлгэсэн өргөн ор бий. Буланд нь хуучин испани
шургуулга, хувцасны хоёр том шүүгээ, дотор нь тавиад костьюм өлгөөстэй, мөн төдий хэр хар
хос гутал тавиастай. Жеми хувцас хунар нэг их тоодоггүй боловч багаасаа уранхай ноорхой
хувцастай явсан болохоор ийм олон хувцастай байхыг чухал гэж үзнэ.

Зүүрмэглэж байтал хүүхэд уйлахад нь орон дээрээ өндийж суугаад чагнав. Хүүхэд
өлгийнөөсөө ойчсон юм биш байгаадаа. Миссис Тэлли их бөх унтдагыг Жеми мэднэ. Хүүхэд
энд байж байгаад түүнд ямар нэг юм болбол сүйд болох нь тэр. Тэгвэл бүх хариуцлага Жеми
дээр бууж ирнэ.

“ Энэ авгайг чөтгөр аваасай” гээд Жеми бослоо. Дээлээ эгэлдрэглэж, улавч углаад гудмаар
миссис Тэллийн унтлагын өрөө рүү очив.

Хаалганы дэргэд очиж зогсоод чагнавал чимээгүй байхаар нь үүдийг аяархан нээвэл миссис
Тэлли хөнжлөөр битүү хучаад хурхирч байв. Жеми өлгий рүү очив. Хүүхэд гэдрэг харан
хэвтээд сэрүүн байлаа. Жеми ойртож очоод хөвгүүнийг харлаа. Ай тэнгэр, адилхан гэж бүр
өвчсөн юм шиг. Уруул ам, эрүү нь яах аргагүй Жемийн өөрийнх нь мөн. Нүд нь цэнхэр юм.
Гэвч хүүхэд болгон цэнхэр нүдтэй төрдөг. Нүд нь удахгүй бор болно гэж Жеми итгэж байлаа.
Хөвгүүн бяцхан гараа сарвалзуулан аан уун гэж дуугаран өөдөөс нь инээв.

“Сайн хүү юм. Сэрээд уйлахгүй байна шүү” хэмээн бодоод хөвгүүнийг анхааралтай ажиглав.

“Энэ чин яах аргагүй Макгрегор мөн байна” хэмээн бодлоо...

Жеми өлгийн дээрээс итгэл муутайхан тонгойн хүүхэд рүү хуруугаа сунгасанд хүү бяцхан
гараараа шүүрэн зуурлаа. “Бух шиг тэнхээтэй юм” гэж бодож байтал хүүгийн царай чинэрэн,
дүлж эвгүй хурц үнэр үнэртэв.

- Миссис Тэлли

Авгай огцомхон өндийж нүдэнд нь сэтгэл түгшсэн байдал илэрч

- Юу вэ? Яасан юу болов? Гэж асууллаа.

- Энэ хүүхдийг хуурайлах хэрэгтэй байна. Эсвэл энэ гэрийн бүх ажлыг би өөрөө хийх үү?

Жеми ингэж хэлчихээд өрөөнөөс гарлаа.

- Дэвид ээ? Чи хүүхдийн талаар юу мэдэх вэ?

- Та ямар утгаар асууж байна гэж Дэвид лавлав.

- Ерөнхийд нь. Хүүхэд юугаар тоглох дуртай байдаг вэ гэх мэт...

- Жаахан хүүхэд торжигнуурт дуртай байдаг байх аа гэж америк хүү хэллээ.

- 10 -ыг аваад ир гэж Макгрегор тушаалаа.

- Мэдлээ, эрхэм ээ.

Илүү дутуу юм асуудаггүй нь Жемид таалагдав. Дэвид сайн хүү шүү, хол явах хүү дээ гэж
Жеми бодлоо. Жемийг орой нь жижигхэн боодолтой юм сугавчлан ирэхэд миссис Тэлли,

- Өчигдөр орой эвгүй юм болсныг уучилна уу, мистер Макгрегор. Хүүхдийг уйлахыг би
яагаад дуулаагүй юм бэ, бүү мэд. Таныг сэрээснийг бодоход их чанга уйлсан байх гэхэд нь
Жеми уужим сэтгэлээр уучлан өршөөж,

- Сүйдтэй юм биш дээ. Нэг хүн сонссон нь яамай гээд боодолтой юмаа сарвайн,

- Үүнийг цаад жаалдаа өг. Жаахан тоглог. Бүтэн өдөр өлгийдээ хэвтэж байх тийм ч таатай
биш байх.

- Би заримдаа өлгийнөөс нь авдаг юм

- Та тэгээд хааш нь авч очдог юм бэ?

- Цэцэрлэгт гэхэд нь Жем хөмсөг зангидаж,

- Өчигдөр харахад царай нь муу байх шиг санагдсан гэв.

- Царай нь муу байсан гэв үү?

- Тийм. Зэвхий цайсан юм шиг байсан. Эхийгээ ирж авахаас наана өвдөж гай болох вий дээ
- Үгүй, эрхэм ээ. Хүүгийн бие зүгээр

- Би дахиад нэг харж болох уу?

- Нааш нь аваад ирэх үү?

- Аваад ир, миссис Тэлли

- Одоохон мистер Макгрегор оо...

Хэдэн мөчийн дараа авгай бяцхан Жемиг тэврэн орж ирэв. Жаалхүү цэнхэр торжигнуур
барьжээ.

- Харав уу, царай нь зүв зүгээр

- За би андуурсан бололтой

Авгай жаалхүүг болгоомжтой сарвайв. Жеми хүүгээ анх удаа өөрийн гар дээр авлаа. Тэгтэл
огт санаандгүй сэрэл сэтгэгдэл түүнийг эзэмдэв. Насан турш чухам энэ л хоромыг хүлээж
байсан мэт санагдана. Энэ бо түүний хүү, Жеми Макгрегорыг яс махны тасархай мөн. Хэрэв
энэ бүх эд баялагийг өвлөн залгамжлах хүнгүй бол бүхэл бүтэн эзэнт улс байгуулж, алт
алмас, төмөр замын эзэн болсны хэрэг юу вэ?

“ Би яасан тэнэг амьтан байгаа вэ” гэж Жеми бодлоо. Урьд нь юунаас татгалзаж байна вэ
гэдэг бодол толгойд нь огт орсонгүй. Үзэн ядах сэтгэл харах мэлмийг нь халхалжээ. Одоо
сэтгэл нь тавирч, цээж нь саруулсаад ирэхийг мэдэрлээ.

- Жемийн өлгийг миний унтлагын өрөөнд аваад ирнэ үү, миссис Тэлли?

3 хоногийн дараа Маргаретыг Жемийн гэрийн үүд тогшин орж ирээд

- Хүүгээ авахаар ирлээ гэхэд нь миссис Тэлли

- Ойлгож байна. За тэгвэл хүүхдийг чинь чамд өгөхгүй гэлээ.

...Жеми нэг хэсэг Маргаретыг дуугүй харж байснаа,

- За яах вэ, би найр тавьж зөвшөөрье. Чи энд Жемитэй хамт хүүхдийн хүмүүжүүлэгчээр
үлдэж болно гээд бүсгүйн царайг харж,

- Чамд өөр юу хэрэгтэй вэ? Гэж асуусанд

- Хүүд минь нэр хэрэгтэй. Эцгийнх нь овог нэр хэрэгтэй гэж Маргарет хариулав.

- За тэгвэл би энэ хүүг үрчилж авья гэхэд нь Маргарет түүний өөдөөс жигшин зэвүүцсэн
байдалтай харж,
- Миний хүүг үрчилж авах гэж үү? Үгүй дээ. Хүүгээ чамд өгөхгүй. Агуу их Жеми Макгрегор
чамайг өрөвдөж байна. Чи эд мөнгөөр баян, эрх дарх ихтэй ч чамд өөр юу ч байхгүй. Чамайг
өрөвдөж байна... ингэж хүүхэн хэлээд эргэн хүүгээ аваад гарлаа. Маргарет маргааш нь
Америк явахаар бэлтгэж эхлэлээ.

- Ийм янзаар чи асуудлыг шийдэж чадахгүй гэж миссис Оуэнс маргахад

- Би асуудлыг шийдэх гэсэн юм биш. Хүүтэйгээ хамт шинэ амьдрал эхэлж болох газар очих
гэж байна гэв.

Жеми Макгрегорын доромжлолыг цаашид хүлцэхгүй байхаар шийджээ.

- Чи тэгээд хэзээ явах гэж байна?

- Аль болох хурдан явна. Мухлаг тэргээр Ворчестор орж, тэндээс галт тэргээр Кейптаун орно.
Би Нью Йоркт очно гэж бодох байна. Мөнгө мааньч үүнд хүрэх бий.

- Их хол шүү дээ Мегги минь

- Зүгээр, хол нь дээр. Америк орон шинэ бололцооны нутаг гэдэг. Энэ л бидэнд хэрэгтэй.

Жеми туйлын хүнд хэцүү үед сэтгэл тайван байж чаддаг гэж хэзээд бахардагсан. Одоо бол
хавьтсан хүнээ загнаж зандрах болжээ. Конторт нь түгшүүртэй байдал бий болжээ. Жемийн
сэтгэлийг баярлуулах юм юу ч үгүй болов. Биеэ барьж сэтгэлээ тогтоож чадахгүй байлаа. 3
шөнө нойргүй хонов.

“ Тэр хүүхнийг чөтгөр алгадаасай билээ. Намайг өөртэйгээ суулгах гэж зүтгэнэ гэдгийг
урьдаас тааж мэдэх ёстой байсан юм. Эцгийгээ дуурайсан муухай санаатай хүүхэн”

Жеми Маргареттай жаахан буруу ярьжээ. Түүний төлөө анхаарал санаа тавина гэж хэлээд
ямар анхаарал санаа тавихаа хэлээгүй. Тийм л дээ. Мөнгө, мөнгө өгье гэж хэлэх хэрэгтэй
байсан юм. 1000 стерлингийн фунт, 10000 фунт...

- Чамд нэгэн эгзэгтэй хэцүү даалгавар өгье гэж Дэвид Блэкуэллд хэлсэнд,

- За эрхэм ээ гэв.

- Чи мисс Ван Дер Мерветэй очиж уулзаад ир. Намайг 20000 фунт өгье гэж байна гээ. Юун
мөнгө болохыг өөрөө мэдэж байгаа гээд Жеми чек бичиж,

- Үүнийг түүнд өг гэв. Мөнгө хэмээгч хичнээн их хүчтэй байдгыг Жеми аль хэдийн ойлгосон
билээ.

- Мэдлээ эрхэм ээ.

Дэвид 15 минутын дараа эргэж ирээд дундуур нь урсан чекийг Жемид эргүүлэн өгөхөд Жеми
өөрийн нүүр улайж байгааг мэдрэв.
- Баярлалаа, Дэвид. Чи явж болно.

Ингэхлээр энэ хүүхэн бүр их мөнгө салгах санаатай байгаа юм байна. За яах вэ, мөнгө өгье...
Харин өөрийн биеэр...

Оройн нь Жеми миссис Оуэнсийн зочид буудалд очиж,

- Мисс Ван Дер Мерветэй уулзья гэхэд

- Тийм боломж байхгүй болов уу даа. Маргарет хүүтэйгээ Америк орохоор явсан гэж миссис
Оуэнс хэлэхэд Жеми мэлрэн гайхаж,

- Тийм байх ёсгүй. Хэдийд явсан бэ?

- Ворчестер руу мухлаг тэргээр явсан даа.

Ворчестерийн хүлээх танхимд зорчигчид пиг дүүрэн байлаа. Энд эхнэртэйгээ хамт яваа
худалдаачид, явуулын зууч нар, эргүүлчид, цэрэг, усан цэрэг, гээд чухам хэн эс байна вэ.
Маргарет хүүхдийг нь хүн түлхэж унагахгүй цонхны дэргэд суудалд олоод хүүгээ чанга
тэврэн сууж, орчин тойронд юу болж байгааг эс анхааран өмнөө хүлээж буй хувь заяаг бодно.
Амьдрал яавч тийм амар байхгүй бизээ. Хаана ч очсон эр нөхөргүй, хүүхэдтэй хүүхэн байх
болно. Үүнийг олон нийт буруушаадаг. Гэвч Маргарет бяцхан Жемийг хүнээс дутуугүй
амьдралтай болгох арга олж чадна гэж бат итгэж найдна. Тэгж байтал буудлын үйлчлэгч

“ Галт тэрэг хөдлөх гэж байна” хэмээн зарлах сонсогдов. Маргарет толгойгоо өргөхөд өмнө
нь Жеми зогсож байлаа.

- Юм хумаа ав. Чамайг хааш нь ч явуулахгүй гэж Жеми хэлэв.

“Энэ хүн одоо болтол намайг худалдан авч болно гэж бодож байгаа юм байна” гэж Маргарет
бодоод,

- Энэ удаад чи хэдийг амлах гэж байна вэ гэсэнд Жеми эхийнхээ өвөр дээр амгалан нойрсож
буй хүүгээ хараад,

- Чамайг миний эхнэр бол гэж хэлэх гэсэн юм гэлээ.

9-р бүлэг

Тэд 3 хоногийн дараа гэрлэв. Цорын ганц гэрч нь Дэвид байлаа. Гэрлэх ёслолын үед Жеми
Макгрегор эсрэг тэсрэг бодол сэтгэгдэлд автав. Бусдыг удирдан захирч, дураараа загнаж
сурсан хүн одоо хүний хүсэл зоригийг даах болж байна. Маргаретийг хяламхийн харвал бараг
гоо үзэсгэлэнтэй юм шиг харагдлаа. Хавьтахад ухаан жолоогүй их хүсэл тачаалтай байдгийг
санасан боловч энэ бол түүх дурьдатгал төдий юм. Зүрх нь догдолсон сэтгэлийн хөдлөл огт
байсангүй. Жеми Маргаретыг өшөөгөө авахад зэвсэг болгон ашигласан. Гэтэл энэ хүүхэн
түүнд өв залгамжлагч төрүүлж өгөв.

- Та хоёр эхнэр нөхөр боллоо. Хүүхнээ үнсэж болно гэж ламтан айлдав. Жеми тонгойж,
Маргаретын хацарт уруулаа аяархан хүргээд,

- Харьцгаая гэжээ. Гэрт нь хүү нь хүлээж байгаа.

Эргэж ирээд Жеми Маргаретыг баруун жигүүрийнхээ нэгэн өрөөнд дагуулан аваачиж,

- Энэ чиний өрөө гэжээ.

- Мэдлээ...

- Би гэр аж ахуйн ажил эрхлэх өөр хүн авна. Миссис Тэлли хүүхэд асрах болно. Чамд ямар
нэг юм хэрэгтэй болбол миссис Тэллид юм уу, Дэвидэд хэлээрэй.

Ийм үг сонсох нь Маргаретад эвгүй байлаа. Жеми өөрийг нь зарц шивэгчин мэт үзэж байв. За
энэ ч гол биш.

“Миний хүү эцгийн нэрээр нэрлүүлж яьах болно. Энэ л надад хангалттай”

Жеми оройн хоолонд ирсэнгүй. Маргарет хүлээж ядаад ганцаар хооллов. Тэр шөнө орондоо
сэрүүн хэвтээд өчүүхэн чимээ гарах бүрд чих тавин чагнаж байлаа. Өглөөний 4 цагт унтахдаа
хамгийн сүүлд “Жеми энэ удаа мадам Агнесын аль хүүхэнтэй нь хоносон бол” гэж боджээ.
Маргарет, Жеми хоёрын харилцаа хуримын өмнө ямар байсан билээ, яг тэр хэвээрээ үлдсэн
бол Маргаретад Клипдрифтийн иргэдийн хандах байдал эрс өөрчлөгдөв. Урьд нь бүгдээрээ
түүнийг ад шоо үзэх янзтай байсан бол одоо олонд хүндтэй хатагтай болон хувирав.

Клипдрифтийн олон хүн ямар нэг янзаар Жеми Макгрегорын “Крюгер-Брент лимитэд” –ийн
эрхшээлд байдаг. Тэгээд Маргарет нэгэнт Жеми Макгрегорт тоогдон түүний эхнэр болсноос
хойш би энэ хүүхнийг тоож хүндэтгэх нь дуун дээр хэрэг гэж үзэцгээнэ. Одоо Маргаретыг
бяцхан Жемиг аваад салхинд гарахад хүн бүхэн инээмсэглэн мэндлэх болов. Тал талаас
урилга ирнэ. Маргаретыг цайнд, дайллагад урьж, олон нийттйн байгууллагыг толгойлно уу
гэж хүснэ. Маргаретыг үсээ өөр маягаар засахтай зэрэг хотын олон арван хүүхэн түүнийг
дуурайна. Түүнийг шар палааж худалдан авахтай зэрэг шар өнгө олны дунд их хүндтэй болно.
Маргарет тэднийг урьд хялайн үзэхийг юманд тоодоггүй байсан шигээ одоо эелдэг найртай
харилцахыг нь бас юманд үл тооно.
Жеми гагцхүү хүүтэйгээ хамт байх гэж гэртээ ирдэг. Маргареттай эелдэг харилцах боловч
үргэлж хол хөндий. Маргарет өглөө бүр зарц үйлчлэгч нарын өмнө жаргалтай эхнэрийн дүр
үзүүлэх хэрэгтэй болно. Жемийг явахад Маргарет цөхрөнгөө барж, өрөөндөө ороод дотроос
нь түгжинэ. Маргарет өөрийгөө үзэн ядна. Омог бардам зан минь хаачив? Гэвч одоо болтол
Жемид хайртайгаа мэдэж байлаа.

“Би энэ хүнд үргэлж сэтгэлтэй хэвээрээ байх болно. Ай эзэн тэнгэр минь туслаач”

Жеми Кейптаунд 3 хоногийн хугацаагаар очив. Түүнийг “Ройал” зочид буудлаас гарч ирэхэд
үйлчлэгчийн дүрэмт хувцастай хар арьстан дэлбэгч,

- Сүйх тэрэг хэрэглэх үү, эрхэм ээ?

- Үгүй, би явган явна

- Банда бол таныг сүйх тэргээр зугаалах болов уу гэж байсан гэхэд Жеми зогсож, дэлбэгчийг
анхааралтай харж,

- Банда юу? Хэмээн лавлав.

- Тиймээ, мистер Макгрегор.

Жемийг сүйх тэргэнд орж суухад дэлбэгч ташуураа даллан сүйх тэрэг хөдлөв. Жеми эрэлхэг
зоригт, бат журамт сайн анд нөхөр Банда юугаан бодож явлаа. Жеми энэ 2 жилийн турш
Бандаг олох гэж их ядсан. Гэтэл одоо түүнтэй уулзахаар явж байна.

Дэлбэгчийн боомт тийш эргэхэд хаашаа явж байгааг Жеми даруй ойлгов. 15 минутын дараа
сүйх тэрэг Банда, Жеми хоёрын Намиб дахь алмаст эрэгт хүрэх төлөвлөгөө зохиож байсан
хуучин муу агуулахын дэргэд очиж зогсов.

“Бид тэгэхэд яасан гэнэхэн тэнэг байгаа вэ” гэж Жеми бодсоор сүйх тэрэгнээс бууж агуулах
тийш очлоо. Банда түүнийг хүлээж байв. Энэ завсар огт хувирсангүй, гагцхүү одоо костюм
өмсөж, зангиа зүүсэн байлаа. Эхлээд хоёул бие биеийн өөдөөс дуугүй инээмсэглэж, дараа нь
чанга тэврэлдэв.

- Чи их өнгөтэй харагдаж байна гэж Жеми инээмсэглэн өгүүлэхэд Банда толгой дохиж
инээмсэглэн

- Ажил явдал бүтэмжтэй байгаа. Би нэг аж ахуй худалдан авсан. Эхнэр 2 хүүтэй. Улаан
буудай тарьж, тэмээн хяруул өсгөдөг.

- Тэмээн хяруулаа?

- Тийм ээ. Тэмээн хяруулын өд сөдөөр их мөнгө олж болно.

- Ойлголоо. Танай гэрийнхэнтэй танилцмаар байна санж.

Жеми өөрөө Шотландад үлдсэн гэр орноо их санадаг. Эцгийн гал голомтыг орхин гарсан тэр
цагаас хойш 4 жил өнгөрчээ.

- Чамайг олж уулзах гэж их эрсэн.

- Би ажил ихтэй байлаа, Жеми. Чамд хэлж сэрэмж авахуулах гэж ирсэн юм. Чамд базаахгүй
юм болж магадгүй байна гэхэд нь Жеми Бандагийн өөдөөс анхааралтай ширтэн,

- Юун эвгүй явдал вэ?

- Намибын алмасын уурхайн Ханс Циммерман их муу хүн. Ажилчид түүнийг үзэн яддаг.
Ажилчид ажлаа орхин явах гэж байна. Хэрэв тэгвэл харуул манааныхан тэднийг зогсоох гэж
оролдоно. Ингээд бослого гарна гэхэд Жеми Бандагийн өөдөөс эгцлэн харав. Банда

- Нэгэн удаа чамд Жон Тенго Жабаву гэдэг хүний нэр дурсаж байсныг санаж байна уу?

- Санаж байна. Улс төрийн зүтгэлтэн юм билээ. Сонин хэвлэлээс уншсан. Түүний талынхан
олон байдаг юм байна билээ.

- Би тэдний нэг нь гэхэд Жеми толгой дохиод,

- Ойлгож байна. Арга хэмжээ авья

- Сайн байна, Жеми. Чи их нөлөөтэй хүн болжээ. Үүнд чинь баярлаж байна.

- Баярлалаа, Банда.

- Чи их сайхан хүүтэй юм гэхэд нь Жеми гайхсанаа нууж чадсангүй.

- Яаж мэдээ вэ?

- Би сайн нөхрөө харж явдаг юм. За би хүн хартай уулзах ёстой. Намибын асуудалыг
зохицуулна гэж цааш нь хэлье гээд Банда бослоо.

- Тэгээрэй. Би үүнийг зохицуулна. Хоёул хэзээ дахин уулзах вэ? Гээд африк эрийг үүдний
тэнд үдэж аваачив. Банда инээмсэглэн

- Би ойрхон байж байна. Надаас салахад тийм ч амаргүй шүү гэв.

Ингээд Банда явлаа. Жеми Клипдрифтэд эргэж ирээд Дэвидийг дуудуулж

- Намибид ямар нэг эвгүй зүйл явдал бий юу?

- Үгүй, мистер Макгрегор гэж залуу эр хариулаад хэсэг эргэлзэж байснаа

- Хэрэг төвөг гарч магадгүй гэсэн яриа бий гэж нэмж хэлэв.

- Захиралыг Ханс Циммерман гэдэг. Ажилчидтай шударга бус харилцдаг эсэхийг мэд. Хэрэв
ажилчдыг хилслүүлдэг бол үүнийг өөрчлөх хэрэгтэй. Чи өөрийн биеэр энэ асуудлыг эрхлэн
зохицуул.

- Би маргааш өглөө Намиб руу явья.

Намиб алмасны уурхайд ирээд Дэвид харуул манааныхан болон ажилчидтай ярилцав. Олж
мэдсэн зүйл нь түүний уур хилэнг шатаажээ. Дэвид хэрэгтэй бүх зүйлээ мэдэж аваад Ханс
Циммерман дээр очив. Ханс бол 300 фунт жинтэй, 6 фут 6 ямх өндөр нуруутай ёстой аварга
эр байлаа. Түүний цус хурсан улаан нүдтэй, гахайн хоншоор нь үргэлж хөлөрч байдаг. Дэвид
урьд өмнө түүн шиг муухай хүнтэй уулзаж байсангүй. Циммерман бол уг нь “Крюгер-Брент
лимитед” корпорацийн хамгийн сайн захирлын нэг. Дэвидийг албан тасалгаанд ороход
Циммерман ширээний ард бичиг цаас үзэж сууж байснаа босож, Дэвидэд гар сарвайн,

- Мистер Блэкуэлл тантай уулзсандаа баярлаж байна. Та нааш ирэхийгээ урьдчилан мэдэгдэх
ёстой байсан юм гэв.

Өөрийг нь ирснийг Циммерман аль хэдийнэ мэдсэн гэж Дэвид итгэж байлаа.

- Виски уух уу?

- Баярлалаа. Хэрэггүй.

Циммерман зөөлөн сандлын түшлэг налан гэдийж, царайд нь инээмсэглэх байдал үзүүлэн

- Танд юугаар тусалж чадах вэ? Миний олдборлож байгаа алмасыг эзэн чамлаж байгаа юм
болов уу?

- Намибын уурхайн бүтээмж маш сайн байдгийг та бид хоёр хоёул мэднэ.

- Бусад уурхайтай жишихэд би африк хүн бүрээр хамгийн их ажил хийлгэдэг гэж захирал
сайрхав.

- Ажлын нөхцөлийн талаар бидэнд хэд хэдэн гомдол ирсэн гэсэнд Циммерманы царай
улсхийж,

- Бас юун гомдол вэ?

- Ажилчидтай ширүүн харилцдаг байна. Бас... гэсэнд Циммерман овор их биетэй хүн гэхэд
санаанд оромгүй огло үсрэн босож, хилэгнэсэндээ царай нь минчийн улайгаад,

- Эднүүс чинь хүн биш, хар арьстанууд. Та нарыг тэнд контортоо өмдөө цоортол сууж
байхад... гэхэд нь

- Байзаарай. Би... гэж Дэвидийг эхлэхэд үг хэлэх чөлөө өгсөнгүй.

- Үгүй, та өөрөө байзаарай. Би энэ хөөтэй алмасыг хэн хэнээс илүү олборлож өгдөг. Яаж
тэгдэг вэ гэвэл энэ муусайн турсагануудыг хэмх атгаж байдаг юм гэхэд нь,
- Бусад уурхайн ажилчдад бид сард 59 шиллинг өгдөг. Танайх дөнгөж 50 –ыг өгдөг юм байна
гэж Дэвид хэлэв.

- Та намайг ашиг их оруулж байна гэж гомдоллож байгаа юм уу? Хамгийн гол нь ашиг орлого
биз дээ?

- Мистер Макгрегор үүнийг зөвшөөрөхгүй. Ажилчдын цалинг нэмэгтүн.

- За тэгье. Эзний мөнгө юм чинь гэж Циммерман бөглүүхэн дуугарав.

- Энд ажилчдыг ташуурдаж шийтгэдэг гэж дуулсан гэсэнд Циммерман пар хийтэл инээд
алдаж,

- Өө тэр чинь нутгийн харуудад юу ч биш. Тэдний арьс нь зузаан болохоор ташуурдахад
өвдөхийг мэдэрдэггүй юм. Тэднийг зүгээр л айлгадаг юм.

- Мистер Циммерман та зарим ажилчдыг үхтэл айлгасан байна гэж Дэвид хэлээд захирлын
өөдөөс харахдаа: “Ёстой араатан юм. Бүр аюултай араатан” гэж бодох зуур,

- Дахиад нэг л гомдол ирвэл таныг халах болно. Ажилчидтай хүн ёсоор харицаж байгтун.
Залхаан цээрлүүлдгийг энэ мөчөөс эхлэн зогсоо. Би ажилчдын орон сууцыг үзсэн. Гахайн
хорооноос доор юм байна. Түүнийг янзлуул гэсэнд захирал биеэ барьж ядан өөдөөс нь
гөлийж байснаа,

- Өөр юм байна уу гэж дуугарав.

- Байна. Би 3 сарын дараа эргэж ирнэ. Ирээд миний үзсэн зүйл санаанд таарахгүй бол та өөр
компаниас ажил хайна биз. Сайн сайхныг хүсье гээд Дэвид гарч одлоо.

Ханс Циммерман уураа дарж ядан удаан зогсов. “Тэнэгүүд. Сүрхий өмгөөлөгчид гараад
иржээ” гэж бодлоо. Цмииерман бол нутгийн цагаан арьстан. Эцэг нь энд ирж суурьшжээ.
Газар нутаг бол цагаан арьстаных. Хар арьстнуудыг цагаан арьстанд зарагдаж бай гэж Эзэн
Тэнгэр зохиосон юм. Хэрэв эзэн тэнгэр хар арьстанд хүн ёсоор хандаж байгаасай гэсэн бол
хар арьстай болгож төрүүлэх үү дээ. Жеми Макгрегор үүнийг ойлгосонгүй. Нутгийн харуудыг
хамгаалж өмгөөлдөг тийм хүнээс юу горьдох вэ дээ. Ханс ямарч гэсэн жаахан болгоомжтой
байх хэрэгтэй юм байна гэж ойлгов. Гэсэнч Намибид хэн дарга вэ гэдгийг үзүүлээд өгнө өө.

“Крюгер-Брент лимитэд” улам өсөж өргөжиж, Жеми ийш тийшээ явах хэрэг олонтоо гардаг
байлаа. Жеми Канадад цаасны үйлдвэр, Австралид хөлөг онгоцны үйлдвэр худалдан авлаа.
Гэртээ байвал хамаг цагаа хүүтэйгээ хамт өнгөрүүлнэ. Хүү нь өдөр ирэх тусам эцэгтэйгээ
адилхан болж байлаа. Жеми хүүгээрээ бахархана. Гадагш явахдаа хүүгээ авч явахыг хүсэх
боловч Маргарет зөвшөөрдөггүй байлаа.

- Хүү бага балчир байна. Өсөж том болохоор нь хамт аваад явж байгаарай. Хүүтэйгээ хамт
баймаар байвал одоохондоо гэртээ байж бай.

Нэг мэдэхэд хүү нь ойдоо хүрч, дараа нь хоёр нас хүрсэн байв. Цаг хугацаа нисэх мэт хурдан
өнгөрөхийг Жем гайхаж байлаа. 1887 он дуусаж байна. Харин Маргаретийн хувьд энэ хоёр
жил бүтэн зуун шиг урт байлаа. Жеми долоо хоногт нэг удаа зочид урьж оройн зоог барина.
Тэгэхэд Маргарет эелдэг эзэгтэй болно. Бусад эрчүүд Маргаретын ухааныг үнэлж, түүнтэй
харилцах дуртай байдаг. Тэдний зарим нь Маргаретыг бүр дур булаам хүүхэн гэж үнэлдэгийг
мэднэ. Гэвч Жемийн эхнэр гээд халдаж чаддаггүй байлаа. Зочид тарсны дараа,

- Үдэшлэг ямар санагдав? Гэж Маргаретын асуухад Жеми

- Их сайхан боллоо. Тавтай нойрсоорой гэж Жеми хариулаад бяцхан унтлагын өрөөнд оров.

Хэдэн минутын дараа Жеми гэрээсээ гарч, гадаа хаалга дуугарах сонсогдлоо. Маргарет шөнө
бүр орондоо хэвтэж байхдаа өөрийн амьдралыг эргэцүүлэн боддог байлаа. Хотын
эмэгтэйчүүд өөрт нь хичнээн их атаархдагыг мэдэх бөгөөд үнэндээ бол атаархах юм огт үгүй
болохоор бүр их гомдолтой байдаг. Өөрт нь хөндлөнгийн хүнээс дор хүйтэн хөндий ханддаг
хүний эхнэр гэж тооцогдож явна. Жеми Маргаретыг ердөө хүн гэж тоохгүй. Жемийн
Шотландаас захиалан авдаг овьёосны шөлтэй тогоог толгойд нь углачихвал яах бол гэж
Маргарет хааяа боддог байв. Тэгээд царай нь ямар болохыг сэтгэлдээ төсөөлөн өөрийн
эрхгүй инээд алдлаа. Тэгснээ даруй цурхиран уйлж: “Би энэ хүнийг цаашид хайрлах хүсэл
алга. Тэсэхгүй нь ээ. Яавал солиорохоос өмнө үүнийг хайрлах дурлахаа болих вэ” гэж бодов.

1890 онд Клтпдрифт том хот болсон байлаа. Тал бүрээс эрэлчид ирж, тус хотод хуучин түүх
дахин давтагдсаар байлаа. Эрэлчид задгай, битүү морин тэргээр эсвэл явган ирнэ. Тэдэнд
уранхай хувцаснаас нь өөр юм юу ч байхгүй. Тэдэнд идэх хоол, багаж хэрэгслэл, орон сууц
хэрэгтэй. Энэ бүхнийг тэдэнд Жеми өгнө. Жеми олон арван алмасны, алтны уурхайн хамжаа
эзэн. Түүний алдар нэр өдөр хоног өнгөрөх тусам ихсэж байлаа. Нэгэн удаа Кимберли дахь
алмас олборлох ажлыг хяналтдаа авч байдаг “Де Брис” хэмээх томоохон нэгдлийн өмгөөлөгч
нь Жеми дээр ирлээ.

- Юугаар тус болж болох байна гэж Жемийг асуухад

- Мистер Макгрегор танд нэг санал тавих гэсэн юм. “Де Брис” танай компанийг худалдаж
авмаар байна. Үнийг нь хэлнэ үү гэжээ. Энэ бол Жемийн од гийсэн цаг байв. Тэгээд,

- Та нар өгөх үнээ хэлэлдээ гэж инээмсэглэн өгүүлэв.

Дэвид Блэкуэлл яваандаа Жемийн олдошгүй сайн туслагч болжээ. Жеми энэ америк залууг
өөртэйгээ адилтган үзэж байлаа. Дэвид ухаалаг, үнэнч шударга. Жеми түүнийг өөрийн
хувийн туслах болгож Дэвид 21 нас хүрэхэд ерөнхий захирал болгов. Дэвид бол Жемийг
өөрийн өргөж авсан эцэг мэт үзнэ. Дэвидийн төрсөн эцэг нь зүрхний шигдээсээр өвдөхөд
Жеми түүнд туслан эмнэлэгт хэвтүүлж, эмчилгээний үнэ хөлсийг төлсөн юм. Хэдэн сарын
дараа Дэвидийн эцэг өнгөрхөд Жеми оршуулгын зардлыг бас гаргажээ. Дэвид Крюгер-
Брентэд 5 жил ажиллахдаа Жемийг машид их хүндэтгэх болжээ. Жеми Маргарет хоёрын
харьцаа хүйтэн байдгийг Дэвид мэдэх бөгөөд үүнд их харамсана.

“ За энэ ч надад падгүй хэрэг” гэж Дэвид бодно. “Жемид бүх чадлаараа туслах нь миний
үүрэг гэж Дэвид дотроо шийджээ.
Жеми бүх чөлөөт цагаа хүүдээ зориулдаг хэвээрээ. Хүү нь 5 нас хүрэхэд Жеми түүнийг анх
удаа алмасны уурхай авч явахад бяцхан Жеми долоо хоногийн турш зөвхөн түүний тухай
ярьлаа. Тэр хоёр тал нутгаар хамт явж, хээр одтой тэнгэрийн дор майханд унтацгаав. Жеми
Шотландын тэнгэрт одод өөр өөрийн байранд байж байдгийг мэднэ. Гэтэл энэ өмнөд африкт
бол одны ордууд хоорондоо хутгалдсан байдаг ажээ. Нэгдүгээр сард толгой дээр гялалзах одод
тавдугаар сард огт өөр газар байдаг аж. Зургадугаар сард өмнөд африкт өвөл эхлэхэд
хилэнцийн орд орой дээр ирнэ. Хачин юм. Хэдий тийм боловч Жеми дулаахан газар дээр
хүүтэйгээ зэрэгцэн хэвтээд хязгааргүй хөх тэнгэрийг ширтэн байхдаа

“Бид хоёр хязгааргүй орчлонгийн хумхийн тоос шүү дээ” гэж бодохоор үгээр илэрхийлэх
аргагүй сэрэл сэтгэгдэл төрдөг байлаа. Тэр хоёр үүрээр сэрээд анд явж үдийн хоолонд
зориулан зээр агналаа. Бяцхан Жемид пони хэмээх давжаа морь бий. Түүнийгээ унаад хоёул
хээр талаар явж байхад морьтой хүн бүхлээрээ унаж болох, 6 фут гүнзгий шоргоолжны нүх
дайралдана. Хээр талд хүнийг хэзээд аюул отож байдаг. Нэгэн удаа Жеми хүүтэйгээ хамт
голын хөвөөгөөр явж байхдаа нүүж яваа асар их сүрэг гөрөөсний хөлд золтой л
дайруулсангүй. Тэнгэрийн хаяанд тоос манарахыг Жеми хараад аюул айсуйг мэдэрчээ.
Туулай, цөөвөр чоно хажуугаар нь гүйн өнгөрч, могой өвсөн дунд ам чулуун дор нуугдаж
байлаа. Жеми тэнгэрийн хаяаг дахин харахад их тоос тэдэн рүү ойртож байлаа.

- Эндээс түргэн явцгаая гэж хүүдээ хэлэв.

- Майхнаа яах вэ?

- Энд орхино.

Хоёул морьдаа давиран өндөр гүвээний орой өөд гарлаа. Туурай тачигнах чимээ сонсдож
дараа нь гөрөөсний сүрэг үзэгдлээ. Хагас саяаас доошгүй баймаар тэр их сүрэг 3 миль орчим
хэртэй сунайжээ. Гөрөөсний сүргийн замд дайралдсан мод, бут унаж үгүй болж туулай
цөөвөр чоно, могой мэт жижиг амьтад туурайд нь няц гишгүүлэнэ. Агаарт үүл мэт их тоос
босож газар доргин донсолж байлаа. Бүгд дууссан хойно энэ явдал 3 цаг хэртэй
үргэлжилснийг Жеми багцаалав. Жеми хүүг 6 нас хүрэхэд эцэг нь түүнд

- Дараа долоо хоногт чамайг Кейптаунд аваачиж, жинхэнэ том хот үзүүлнэ гэсэнд

- Ээж хамт явах уу? Ээж том хотод очих дуртай гэхэд нь Жеми хүүгийнхээ үсийг үнэрлээд

- Ээжид нь энд ажил их бий. Хоёр эр хүн яваад ирвэл зүгээр биз дээ, тийм үү? гэлээ.

Хөвгүүн хэдий жаахан ч гэсэн эцэг эх хоёрын хүйтэн харилцаанд мэдэрдэг авч энэ ямар
учиртайг ойлгодоггүй байжээ.

Тэр хоёр Жемийн хувийн галт тэргээр аялав. 1891 онд төмөр зам өмнөд африкт хүмүүсийн
зорчих гол хэрэгслэл болжээ. Учир нь галт тэргээр аялахад тохитой болоод хямд. Жемийн
өөртөө зориулан захиалсан хувийн вагон 71 фунт урт. Энд 4 өрөө, ажлын өрө болгон
ашигладаг танхим, хоолны өрөө, баар, гал тогооны өрөө бий.
- Бусад зорчигч нар хаана байгаа юм бэ? Гэж жаалхүүг асуухад Жеми инээд алдан

- Биднээс өөр зорчигчид байхгүй. Энэ бол чиний галт тэрэг шүү, хүү минь гэв.

Жаахан хүү замийн ихэнхийг цонхоор харж өнгөрүүлэв. Их тэгш тал тэнгэрийн хаяа хүртэл
үргэлжилнэ.

- Энэ газрыг Эзэн тэнгэр бүтээж, бидэнд зориулан шнэт эрдэнэсээр дүүргэсэн юм. Тэр
эрдэнэс бидний эрж олохыг хүлээж байдаг. Одоо олоод байгаа нь дөнгөж эхлэл гэж Жеми
хүүдээ тайлбарлав.

Кейптаунд хүрч ирээд Жеми хүү том том байшин, өдий төдий олон хүнийг үзэж гайхав. Эцэг
нь хүүгээ Макгрегорын компанийн “Шиппинг Лайн” зогсоол дээр аваачиж, боомтод байгаад
хэдэн арван галт онгоцыг үзүүлэв.

- Энэ хөлөг онгоцуудыг харж байна уу. Бүгдээрээ манайх гэлээ.

Клипдрифтэд эргэж ирэхдээ жаахан хүү бяцхан биедээ багтаж ядсан х сонинтой ээждээ
ирлээ.

- Хот тэр чигээрээ аавынх юм. Ээж танд сайхан санагдана даа. Дараа нь бидэнтэй хамт
яваарай гэж хэлэхэд Маргарет хүүгээ тэврэн авч биедээ наан

- Тэгнэ, миний хүү гэлээ.

Жеми гэртээ хонох нь цөөн хэвээрээ. Мадам Агнесынд очдогийг нь Маргарет мэднэ. Жеми
тэндхийн нэг хүүхэнтэй уулзаж учирч байх гэж байшин худалдаж авч өгснийг Маргарет
дуулжээ. Гэвч энэ нь үнэн худлыг Маргарет баттай сайн мэдээгүй ч, ямар ч гэсэн тэр хүүнийг
алахад бэлэн байлаа...

Маргарет солиорохгүйн тулд олон нийтийн ажил хийж эхэлжээ. Шинэ сүм барих хандив
цуглуулах, үгээгүй гуйлгачин байдалтай байгаа эрэлчдийн гэр бүлд туслах хороог байгуулж
удирдаж байлаа. Горьдлого тасарсан эрэлчдийг Кейптаунд үнэ төлбөргүй хүргэж байхад
зориулан нэг вагон гаргаж өгөхийг Жемигээс гуйлаа.

- Чи намайг мөнгөө салхинд хийсгэ гэж байгаа юм уу. Тэд нар энд ирж болсон юм чинь
эндээс сурсан дуугаа дуулаад ирсэн замаараа буцна биз хэмээн дургуйцэв.

- Тэд нар тийшээ явган явах аргагүй. Энд үлдвэл Клипдрифт л тэднийг хооллож ундлах
хэрэгтэй болно гэж Маргарет үг сөргөн хэллээ.

- За яах вэ. Нэг вагон өгье Жеми хэлжээ.

Маргарет өрөөнөөс гарч явахад хойноос нь харж байхдаа

“Энэ хүүхэн уул нь хэн нэгэн хүнд сайхан эхнэр байж болох сон” гэж өөрийн эрхгүй бахархах
сэтгэл төрөв.
Жемийн байшин авч өгсөн хүүхэн бол Мэгги байлаа. Тэр бол Маргаретыг мадам Агнесынд
хоол идэхэд хажууд нь сууж байсан царайлаг янхан хүүхэн. “Энэ хүүхэн манай эхнэртэй адил
Мэгги нэртэй байх нь ямар хачин тохиол вэ” гэж Жеми нэгэн удаа боджээ. Гэвч хоёр хүүхэн
хоорондоо огт адилгүй. Мэгги бол ихэмсэг маягийн царайтай, 22 –той сайхан биетэй хүүхэн.
Оронд ороод өлөгчин барс шиг авирлана. Бүсгүйг чөлөөлж авах гэж Жеми мадам Агнесад
ихээхэн мөнгө төлсөн бөгөөд одоо ч Мэггийн бүх зардалыг даадаг. Жеми Мэггийн байшинд
очихдоо хүнд мэдэгдэхгүйг хичээж дандаа шөнө очдог байв. Гэвч түүнийг орж, гарч явааг
хүмүүс мэр сэр хардаг бөгөөд гагцхүү бүгдээрээ амаа үдүүлсэн мэт дуугүй байцгаана. “Энэ
бол Жеми Макгрегорын хот юм чинь яаж ч байсан түүний дур шүү дээ” гэж бодоцгооно.

Тэр орой Жеми баяртай сайхан учран золгохыг сэтгэлдээ төсөөлөн Мэгги дээр очсонд цаадах
нь их ааш муутай байлаа. Мэгги өргөн орон дээр хэвтэж байв. Шөнийн нимгэн ягаан цамцны
нь цаанаас чийрэг том хөх тодхон харагдана.

- Би бүтэн өдөржингөө энэ байшинд байсаар бүр уйдаж гүйцлээ. Би ямар боол шивэгчин юм
уу? Мадам Агнесынд хөгжилтэй сайхан байсан. Чи ийш тийшээ явахдаа намайг аваад явж
болдоггүй юм уу? Гэж хүүхнийг дургүйцэн өгүүлэхэд,

- Чамд учрыг хэлсэн шүү дээ. Тэгж болохгүй байна... гэсэнд Мэгги орноосоо үсрэн босож,
өмнө нь ирж зогсоод нүдний нь харцанд өдөж сэрдсэн байдал илэрч,

- Чи хүүгээ авч явдаг биз дээ? Би хүүгээс чинь дор болж байна уу гэхэд нь

- Тийм гэж Жемийн аяархан хариулах дууны өнгөнд занаж сүрдүүлсэн өнгө мэдэгдэв. Тэгээд
эрэгнэгийн дэргэд очиж, өнөө оройн дөрөв дэх хундага вискигээ хийж авлаа. Уг нь ингэж
учиргүй их уудаггүй сэн.

- Чи намайг хүн гэж тоохгүй байна. Чамд зөвхөн миний бие л хэрэгтэй байж... гээд толгойгоо
гэдийн инээд алдан,

- Чи минь их ёс журамтай англи хүн юм аа гэв.

- Би англи биш, шотланд хүн.

- Тэнгэр минь, яагаад дандаа надаас үгийн өө эрж байдаг юм бэ? Миний хийсэн, хэлсэн
болгон чиний санаанд таарахгүй юм. Чи намайг хэн гэж бодоо вэ, аан? Гэхэд нь Жеми энэ
бүхнээс баахан залхаж

- Мадам Агнес дээр буцаж очиж болно. Би хэлээд өгөмз гээд малгайгаа шүүрч аван үүд рүү
явлаа.

- Чи надаас тийм амар салж чадахгүй, муу зулбасага минь гэхэд нь Жеми үүдний тэнд зогсож

- Би чамаас аль хэдийн салдагаа салсан гээд гарч одлоо.

Хөл нь гуйвж байгаагаа өөрөө гайхав. Толгойд нь эх захгүй элдвийн бодол хутгалдана. Дөрвөн
хундаганаас илүү уусан юм болов уу? Хэдэн хундага ууснаа санах гээд чадсангүй. Мэггийн
нүцгэн биеэ ил гарган өдөөж байсныг саналаа. Тэр хүүхэн Жемигээр тоглож хүсэл тачаалыг
нь сэргээж байгаад дараа нь хэрүүл өдсөн. Тэгээд Жеми бадарсан их хүсэл тачаалаа хангаж
чадалгүй гарсан.

Жеми гэртээ ирээд гудмаар өөрийн унтлагын өрөө рүү явж байснаа Маргаретын өрөөний
дэргэд саатан зогсов. Маргарет унтаагүй байгаа бололтой, хаалганы нь доогуур зурвас гэрэл
тусаж байлаа. Жеми гэнэт түүнийг шөнийн нимгэн цамцтай байгаагаар, эсвэл бүр нүцгэн
байгаагаар төсөөлөв. Шар мөрний хөвөөнд дор нь хэвтэж байхдаа бие нь халуу оргидог
байсныг санав. Тэгээд үүдийг онгойлгон ялимгүй гуйвж дайвсаар дотогш орлоо. Маргарет
керосин дэнгийн гэрэлд ном уншаад хэвтэж байснаа өөдөөс нь гайхан харж,

- Жеми... ямар нэг хэрэг явдал гараа юу? Гэхэд нь

- Би эхнэр дээрээ орж ирж болдоггүй юм уу гэхдээ хэл нь орооцолдож байв.

Маргарет биеэ барьсан шөнийн цамцтай байв. Жеми хөхийг нь хараад: “Тэнгэр минь, ямар
сайхан биетэй юм бэ” хэмээн бодох зуур хувцсаа тайчиж эхлэв.

Маргаретын нүд нь их болж, орноосоо босон харайгаад

- Чи яаж байна вэ?

Жеми үүд хаагаад эхнэрийнхээ дэргэд очив. Нэгэн хормын дараа гэхэд хажууд нь хэвтэж
байлаа.

- Чамтайгаа учрахыг хүснэ, Мэгги...

Архинд согтсон тархи нь мэнэрээд ямар Мэггитэй учрахыг хүсэж байгаагаа мэдсэнгүй.
Маргарет эхлээд эсэргүүцмээр болж байснаа одд эрхэнд нь бүрэн орж, биед нь наалдан

- Ай, хайрт Жеми минь. Би чамдаа хичнээн хайртай билээ хэмээн шивэгнэж байлаа.

Жеми болохоор, “ Би түрүүн үүнтэй ширүүлж муудалцдаг минь дэмий юм болжээ. Өглөө
босоод мадам Агнесынд битгий оч гэж хэлье” хэмээн бодож байлаа.

Маргаретыг сэрэхэд Жеми хажууд нь байсангүй. Гэвч биеийг нь мэдрэн, “Чамтай учрахыг
хүснэ, Мэгги” гэж хэлж байсыг санаад учиргүй их баярлав. Маргаретын зөв байж. Жеми өөрт
нь хайртай юм байна. Тэгэхлээр өдий олон жил гомдол, гутамшигийг тэсвэрлэн хүлээж
байсан нь талаар болсонгүй.

Өдрийн үлдсэн хэсгийг Маргарет зүүдэлж байгаа юм шиг өнгөрөөв. Усанд орж, толгойгоо
угаагаад Жемийн санаанд ямар хувцас илүү таарахыг тааж ядан хувцсаа арав дахин солилоо.
Жемийн дуртай хоолыг өөрийн гараар хийж тавих гэж тогооч хүүхнээ явуулав. Ширээн дээр
цэцэг тавьж гоёлоо.

... Гэтэл Жеми оройн хоолонд ирсэнгүй. Шөнө нь ч ирсэнгүй. Маргарет түүнийг шөнийн 3
хүртэл номын санд хүлээгээд дараа нь унтахаар авлаа.
Маргааш нь Жеми гэртээ ирээд Маргаретад эелдэгээр толгой дохин мэндэлж, хүүгийнхээ
өрөөнд орлоо. Маргарет хойноос нь гайхан харж хэсэг зогссоноо дараа нь эргэн өөрийгөө
толинд харав. Түүнийг хэзээ ч ийм гоо үзэсгэлэнтэй байгаагүй гэж толь хэлж өглөө.
Маргарет толийг анхааралтай хараад өөрийн нүдээ таньсангүй. Энэ бол ондоо хүний нүд
байлаа.
10-р бүлэг

Эмч Тигерийн царайд баярын инээмсэглэл туяарч,

- Миссис Макгрегор, танд дуулгах сайхан мэдээ байна. Та хүүхэдтэй болжээ гэжээ.

Маргарет гайхан сандарч, инээх үү уйлах уу яахыг мэдэхгүй байлаа. Сайхан мэдээ гэв үү. Аз
жаргалгүй гэр бүлд бас нэг хүүхэд нэмэгдэх үү? Маргарет цаашид элэг барихыг тэсэж
чадахгүй болжээ. Нэг арга олох хэрэгтэй. Үүнийг бодоод дотор нь муухай болж, духны нь
хүйтэн хөлс чийхрав.

- Өглөөгүүр бие чинь тавгүй болдог уу? Гэж эмч асуув.

- Тийм, жаахан тэгдэг... гэхэд нь эмч эм өгч,

- Үүнийг уучих. Тэгээд зүгээр болно. Таны бие эрүүл чийрэг, сэтгэл зовох юм байхгүй.
Гэртээ харьж, энэ сайхан мэдээг нөхөртөө дуулгагтун гэхэд нь

- За. Таны хэлснээр больё гэж Маргарет хариулжээ.

Тэр оройн хоолны ширээний ард суж байхдаа

- Өнөөдөр би эмчид очлоо. Намайг хүүхэд олсон байна гэсэн гэж Маргаретын хэлэхэд Жеми
нэг ч үг дуугаралгүй ширээн дээр амны алчуураа шидээд даруй босож өрөөнөөс гарав.
Энэхэн мөчид Маргарет түүнийг урьд хайрлаж байсан шигээ мөн тийм их хүчтэй үзэн ядаж
чадах байна гэдгээ ойлголоо.

Хүүхэд олсноос хойш Маргаретын бие тааруухан байх болж, ихэнх цагийг орондоо хэвтэж
өнгөрүүлэх болов. Бие нь сулдайж, амархан ядарна. Тийнхүү хэвтэж байхдаа Жемийг өмнө нь
ирж өвдөг сөгдөн унаад уучлал гуйна, тэгээд хоёул дахин амраглан цэнгэлдэх болно гэж
сэтгэлдээ ургуулан төсөөлдөг байв. Энэ бол бүтэшгүй хоосон хүсэл байлаа. Үнэн хэрэг
дээрээ байдал огт өөр байв. Яваад өгье гэхээр явах газар үгүй. Явах газар олдлоо ч гэсэн
Жеми хүүг нь хэзээ ч өгөхгүй.

Жеми хүү 7 нас хүрчээ. Тэр бол эрүүл чийрэг, ухаалаг, сэргэлэн золбоотой хүү байлаа. Жеми
хүү эхийнхээ зовлонг сэтгэлийн зөнгөөр мэдэрдэг юм уу, эхдээ их хайртай. Сургууль дээрээ
жижиг сажиг юм хийгээд ээждээ л авчирч бэлэглэдэг байв. Үүнд нь Маргарет их баярлан,
гуниг гутралаа бага ч гэсэн мартагнана.

- Аав яагаад гэртээ ирж хонодоггүй юм бэ гэж Жеми хүүг асуухад Маргарет голдуу

- Аав чинь их чухал ажилтай том хүн шүү дээ. Зав нь болдоггүй юм гэж хариулна.

“ Энэ хүүгийн эцэг бид хоёрын харилцаа бол миний зовлон. Хүүгийнх биш. Хүү минь
эцгийгээ үзэн яддаг болж болохгүй” гэж Маргарет бодно. Маргаретын жирэмсэн нь улам
мэдэгдэхүйц болж, гудамжаар явж байхад дайралдасан хүмүүс
- Дөхөж байгаа юм шив дээ, миссис Макгрегор. Ахтайгаа адил хөөрхөн хүү төрнө гэж итгэж
байна. Танай нөхөр азтай хүн юм гэлцэнэ.

Нүднээс нь далд бол тэд,

- Хөөрхий амьтан, их гунигтай байх юм. Нөхрийгөө нэг янхан хүүхэнтэй нөхцсөнийг лав
мэдсэн байх... гэлцэнэ.

Маргарет хүүдээ удахгүй жаахан дүүтэй болно гэж ойлгуулахыг хичээлээ.

- Удахгүй чи дүүтэй болно. Тэгээд тоглох хүнтэй, найзтай болно. Сайхан биз дээ, тийм үү?
гэхэд Жеми хүү ээжийгээ хүзүүдэн

- Ээж та ч гэсэн ийм уйтгартай байхаа болино гэжээ.

Маргарет нулимсаа арайхийн барилаа. Үүрээр 4 цагийн үед дуншиж эхлэв. Миссис Тэлли эх
баригч Ханна авгайд хүн явуулж, хүүхэд үд дундын үед төрлөө. Эхийнхээ уруул ам, эцгийнхээ
эрүүг өвлөж авсан хөөрхөн охин төржээ. Улаахан нүүрийг нь буржгар хар үс тойрон
хүрээлжээ. Маргарет охиноо Кэйт гэж нэр өгөв.

“Охинд маань хүч тэнхээ хэрэг болно. Би хүүхдүүдээ эндээс аваад явах ёстой. Харин яаж?”
гэж Маргарет болжээ.

Дэвид Блэкуэлл үүд тогшилгүй давхин орж ирэхэд нь Жеми гайхан толгой өргөж,

- Ямар элэнгээ хийж гэж... гэсэнд

- Намибид үймээн гарсан гэхэд нь Жеми босон харайж,

- Юу, Тэнд тэгээд юу болж байна?

- Нэг хар хүү алмас хулгайлах гэж байхад нь баривчилжээ. Тэр хүү суган дорхи арьсаа огтлон
алмас нуусан байсан гэнэ. Ханс Циммерман түүнийг бусдад сургамж болохуйцаар шийтгэх
гэсэн юм байх, ажилчдын өмнө ташуурджээ. Гэтэл хүү үхчихсэн байна. 12 настай хүү байсан
гэнэ.

Жемийн царай уурласандаа минчийн улайж,

- Чөтгөр алгад, Ажилчдыг ташуурдаж шийтгэхээ боль гэж тушаасан шүү дээ гэв.

- Би циммерманд хэлсэн

- Тэр муу турсгыг тэндээс зайлуул...

- Бид эрээд олдохгүй байна.

- Яагаад?
- Хар арьстануудын гарт байгаа гэнэ. Нөхцөл байдал бидний хяналтаас гарсан...

Жеми малгайгаа шүүрч аван

- Эндээ байж бай. Намайг иртэл ажил хэргийг удирдаж бай гэхэд Дэвид

- Тийшээ очсны хэрэггүй байх, мистер Макгрегор. Осолтой шүү дээ. Циммерманы алсан хүү
баролон овог аймгийнх юм байна. Тэднийхэн хэзээ ч уучилдаггүй, юу ч мартдаггүй улс. Би
бол...

Жеми хэдийн гараад явчихсан байжээ.

Алмасны уурхайгаас наана арваад милийн зайд очоод утаа гарч байхыг Жеми харав. Намибын
ажилчдын урц гэр шатаж байжээ.

- Ээ малууд, Өөрсдийнхөө гэрийг шатааж байна гэж Жеми бодлоо. Ойртож очиход буудалцах,
ёололдох чимээ сонсдов. Дүрэмт хувцастай цагдаа нар зугтан зайлахыг оролдож буй хар
арьстан ажилчдыг буудаж байлаа. Цагаан арьстан арав дахин цөөн боловч буу зэвсэгтэй
байлаа. Цагдаагийн дарга Бернард Соти, Жемийг хараад яаран ирж,

- Мистер Макгрегор та санаа бүү зов. Бид энэ муусайн зулбасагануудыг нэгийг ч үлдээлгүй
буудаж ална гэхэд нь

- Буудахаа боль гэж хүмүүстээ тушаа хэмээн Жеми хашгирав.

- Юу гэнээ, Хэрэв...

- Миний тушааснаар гүйцэтгэ хэмээн Жеми уурандаа аахилж уухилан хашгираад суманд
оногдсон нэгэн хар арьстан эмэгтэй унахыг хараад

- Галаа зогсоо гэж давтан өгүүлэв.

- Таны хэлснээр болтугай, эрхэм ээ хэмээн ахлах цагдаа хэлээд туслахдаа тушаал өгч, 3
мөчийн дараа буудах дуу зогсов. Газар сайгүй алагдсаг хүмүүс хэвтэнэ.

- Хэрэв миний зөвлөгөөг сонсоё гэвэл би... гэж Сотийн эхлэн хэлэхэд,

- Би таны зөвлөгөөгөөр юутахгүй. Тэдний толгойлогчдийг над дээр авчир гэлээ.

3 цагдаа Жеми дээр хар арьстан залууг авчирав.Гар нь хүлээстэй, нүүр нь цус болсон байх
боловч нүд нь айсан шинжгүй гялалзан цээжээ тэвхийлгээд хээв нэг омог бардам зогсоно.
Банту хэлээр омог бардам гэхийг “исико” гэж хэлдгийг Жеми санав.

- Би Жщми Макгрегор байна гэсэнд залуу негр газар нулимав.

- Энэ болсон явдал миний хийсэн хэрэг огт биш. Үүнийг танай хүмүүст мэдүүлэх хэрэгтэй
гэсэнд
- Үүнийгээ бэлэвсэн эхнэрүүдэд хэл гэв. Жеми Соти тийш эргэж

- Ханс Циммерман хаана байна вэ? Гэсэнд

- Манай хүмүүс түүнийг эрээд одоо болтол олохгүй байна гэв.

Хар залуугийн нүд хэрхэн гялалзахыг Жеми хараад Циммерман ерөөсөө олдохгүй болсон юм
байна гэж мэдлээ.

- Уурхайг 3 хоног хаана. Та өөрийн хүмүүстэй ярилцаж, юу хүсэж байгаагаа хэл. Би авч үзье.
Асуудалд туйлын шударга ёсоор хандана гэж амлая Жемийн хэлэхэд хар залуу өөдөөс нь
итгэж ядсан байдалтай харлаа.

- Энд шинэ захирал томилж, ажлын нөхцөлийг сайжруулна. Та нарыг 3 хоногийн дараа
ажилдаа эргэж ирээсэй хэмээн хүсэх байна гэсэнд ахлах цагдаа Жемийн өөдөөс гайхан харж

- Та үүнийг тавиад явуулах гэж байгаа юм уу? Наадах чинь манай хэд хэдэн хүнийг алсан...

- Мөрдөн байцаалт явуулах тухай зохих заавар өгнө. Тэгээд...

Морин туурай тачигнах сонсогдоход нь эргэж харвал тэдэн рүү давхин ирж яваа Дэвид
байлаа. Түүнийг гэнэт хүрч ирсэнд Жемийн сэтгэл түгшин, Дэвид мориноосоо үсрэн
буугаад,

- Мистер Макгрегор, хүү чинь алга болчихсон байна...

Жемид газар цөмрөх шиг санагдав.

Клипдрифтийн ард иргэдийн тэн хагас нь эрэлд оролцож, гуу жалга, тал хөндийгөөр нэгжсэн
боловч жаал хөвгүүн олдсонгүй...

Жеми өөрийн ухаантай, ухаангүйн хооронд болжээ.

“Зүгээр нэг тийшээ, явж байгаад төөрсөн байх. Удахгүй олдох биз”

Маргаретын унтлагын өрөөнд ороход охиноо хөхүүлээд байлаа.

- Юм дуулдана уу? Гэж Маргарет асуухад

- Одоохондоо алга. Би хүүгээ олно. Заавал олно гэж хэлээд охиноо нэг харснаа өөр юм
хэлэлгүй гарлаа. Удсангүй миссис Тэлли орж ирээд,

- Миссис Макгрегор, та санаа бүү зов. Жеми том хүү, алзахгүй...

Маргаретийн нүдийг нулимс бүрхээд юу ч харсангүй.

“Бяцхан Жемид хор хүргэх хүн байдаг юм уу? Хаанаас даа”

Миссис Тэлли тонгойн Кейтийг Маргаретын гараас аваад,

- Та унтахыг бод гээд охиныг хүүхдийн өрөөнд аваачиж, өлгийд нь тавиад,

- Чи бас унтаж байвал дээр, охин минь. Чамайг хэцүү амьдрал хүлээж байна гэж охинд
хэлээд өрөөнөөс гарч үүдийг хаажээ.

Шөнө дунд хүүхдийн өрөөний цонх нь онгойж, нэг хүн орж ирээд өлгийний дэргэд очиж,
хүүхдийг өлгийд нь ороон тэврэн явлаа.

Банда түргэн орж ирсэн шигээ түргэн яваад өгчээ.

Охины алга болсныг хамгийн түрүүн миссис Тэлли мэдэв. Анхандаа миссис Маргарет шөнө
ирж, Кейтийг өрөөндөө аваад явсан юм болов уу гэж бодов. Тэгээд Маргаретын унтлагын
өрөөнд ороод,

- Кейт хаана байна гэж асууснаа Маргаретын нүдийг хараад чухам юу болсныг даруй ойлгов.

Бяцхан Жеми хүүгийн алга болсноос хэдэн өдөр өнгөрсөн ч хүү олдсонгүй. Жеми цөхрөнгөө
бараад Дэвид Блэкуэллийн дэргэд очиж,

- Хүү яасан байж болох вэ, чи юу гэж бодож байна? хэмээн их л хичээж тайван дуугархыг
хичээв.

- Хүү чинь зүгээр байгаа гэж итгэж байна, мистер Макгрегор гэж Дэвид сэтгэлийг нь
тайвшруулахыг хичээв.

Үнэндээ бол Дэвид үүнд итгэхгүй байлаа. Банту нар хэзээ ч уучилдаггүй, юуг ч мартдаггүй
хүмүүс гэж Макгрегор өөрөө түүний сануулж байсан удаатай. Алагдсан хүү бол чухам банту
овгийн хүү байсан. Хэрэв банту нар бяцхан Жемийг хулгайлсан бол хөвгүүнийг өшөө авах
хууль ёсоор аймшигтай тамлан зовоож ална гэж Дэвид баттай мэдэж байлаа.

Жеми үүрээр үхтлээ ядарсан амьтан гэртээ ирэв. Шөнөжин эрэлчидтэй, цагдаатай,
Клипдрифтийн бусад иргэдтэйцуг хүүгээ эржээ. Жемийг өрөөндөө орхыг хүлээж байгаад
Дэвид,

- Мистер Макгрегор, таны охиныг бас хулгайлчихжээ гэж хэлэв.

Жеми зэвхий цайн өөдөөс нь үг дуугүй удаан ширтэж байснаа эргэж, унтлагын өрөөндөө
оров. Жеми сүүлийн хэд хоног цурамхийгээгүй болхоор дэрэн дээр толгой тавимагц унтаад
өглөө... Тэгээд аварга том баобаб модны сүүдэрт хэвтэж байх аж. Элчилгүй их талаар тэртээ
хол арслан явж байснаа ойртон ирж байх юм. Хүү нь түүнийг дугтчин:

- Сэрээрэй, аав аа. Арслан ирж явна гэж байх юм. Одоо араатан бүр ойртон иржээ. Хүү нь
түүний мөрнөөс чангаан дугтчисаар

- Сэрээч дээ Жеми нүдээ нээвэл Банда дээрээс нь тонгойн зогсож байлаа. Жемийг үгхэлэх
гэтэл Банда амыг нь гараараа таглаад,

- Чимээгүй гээд Жемид босох боломж олгов.

- Хүү минь хаана байна? гэж Жеми асуулаа.

- Хүү чин үхсэн.

Жемийн нүд харанхуйлаад явчихав.

- Уучлаарай Жеми, би тэднийг зогсоож амжсангүй. Чиний хүмүүс банту аймгийнхний цусыг
урсгасан. Манай хүмүүс өшөөгөө авах ёстой байлаа.

Жеми нүүрээ гараараа таглан,

- Ай тэнгэр, Тэд хүүг минь яасан бэ?

- Тэд хүүг чинь цөлд орхисон байна. Би... би цогцсыг нь олоод оршуулсан гэж Банда
өрөвдөнгүй өгүүлэв.

- Үгүй, тийм байх ёсгүй.

- Би хүүг чинь аврах гэж оролдсон шүү, Жеми гэхэд цөхрөнгөө барсан Жеми толгой дохиод

- Охин мин яасан бэ? Гэж бөглүү дуугарав.

- Тэд охиныг чинь хулгайлхаас өмнө би авсан. Одоо өрөөндөө унтаж байгаа. Хэрэв чи
амласнаа биелүүлбэл охинд чинь гай түй болохгүй.

Жеми нүдээ өргөв. Түүний царайд үзэн ядсан байдал тогтжээ.

- Би амласнаа биелүүлнэ. Харин надад хүүг минь алсан хүмүүсийг өг. Тэд үүнийхээ өр
төлөөсийг надад төлөг.

- Тэгвэл чи бүх овог аймгийг хүйс тэмтэрэх хэрэгтэй болно доо Жеми гэж Банда аяархан
өгүүлээд гарч одлоо.

...

Энэ ердөө хар дарсан зүүд биз гэж бодоод Маргарет нүдээ нээсэнгүй. Нүдээ нээвэл хар
дарсан зүүд үнэн болж, хүүхдүүд нь үхчихсэн байх болно гэж мэдэж байлаа. Тийм болохоор
өөрийгөө хуурч байгаа энэ. Тэгээд Жеми хүү ирж, бяцхан гараа биед нь хүргэн

- Ээж ээ, зүгээр. Бид энд байна. Бидэнд айх аюул алга байхгүй гэж хэлтэл нүдээ нээхгүй.

Маргарет 3 хоног орондоо хэвтжээ. Хүнтэй ярихыг татгалзаж байлаа. Эмч Тигерийг хэдэн
удаа ирэхэд нь тоосонгүй. Шөнө орондоо нүдээ аньж хэвтээд байгаад хүүгийн өрөөнөөс
чанга чанга чимээг сонслоо. Чих тавин чагнавал дахин нэг чимээ гарлаа.

- Жеми минь, хүү минь эргээд иржээ.

Маргарет орноосоо босон харайж, хүүгийнхээ өрөө рүү гүйж очлоо. Хаалганы цаанаас
араатан амьтан гасалж байгаа юм шиг хачин чимээ сонсдоход нь Маргаретын зшрх галзуу юм
шиг булгилан үүдийг хүчтэй түлхэн орлоо.

... Нөхрийнх нь нүүр ам хачин хачин муухай мурийгаад шалан дээр хэвтэж байлаа. Өрөөсөн
нүд нь аниастай, өрөөсөн нүд нь аймаар бүлтийгээд өөдөөс нь гөлийж байлаа. Жеми нэг юм
хэлэх гэж оролдсон боловч хоолой нь хэрчигнэн, цээжний гүнээс нэг хачин бөглүү дуу гарч
байлаа.

- Жеми... ээ, Жеми минь дээ... гэж Маргарет шивэгнэлээ.

Эмч Тигерийн хэлсэн нь,

- Таны сэтгэлийг тайвшруулах үг хэлж чадахгүй нь дээ, миссис Макгрегор. Танай нөхөр
сэтгэлийн их хүчтэй донсолгоонд орсон байна. Саад дайруулсан бололтой. Амьд үлдэх
найдлага 50 хувь, амьд үлдлээч гэсэн эдгэх магадлал тун бага. Бараг үгүй гэж хэлж болно доо.
Амьд үлдлээч гэсэн хүний сүг болно. Нөхрийг чинь зохих ёсоор сайн асарч сувилах хувийн
эмнэлэгт хэвтүүлэх талаар би ярилцая гэсэнд

- Үгүй гэв.

- Юу үгүй гэж? хэмээн эмчийг лавлахад Маргарет

- Эмнэлэгт хэвтүүлэхгүй. Би өөрөө асарна гэлээ.

- За яах вэ. Танд сахиул хэрэг болно. Би ярилцая гэсэнд

- Сахиул хэрэггүй. Би өөрөө Жемийг асарч сувилна гэхэд нь эмч толгой сэгсэрч

- Тэгж болохгүй миссис Макгрегор. Энэ ямар байхыг та төсөөлөхгүй байна. Танай нөхөр тань
хэвийн нэг хүн шиг байхаа больсон. Саад дайруулсан байна. Бүх бие нь эзэнгүй болсон гэж
үг, бүх насаараа ийм байх болно.

- Би өөрөө асарч сувилна гэж Маргарет дахин хэллээ.

Явж, явж Жеми одоо л нэг түүний хүн боллоо.

11-р бүлэг

Жеми Макгрегор саад дайруулсан тэр өдрөөс хойш яг нэг жил амьд байжээ.

Энэ бол Маргаретийн амьдралын хамгийн сайхан аз жаргалтай үе байлаа. Жеми бүр хүний
гарт ороод байсан юм. Хөдөлх нь бүү хэл, юм ярьж ч чадахгүй болжээ. Маргарет өдөр
шөнийн эргэлтэд нөхрийнхөө дэргэдээс холдсонгүй асран сувиллаа. Өдөр нь тэргэнцэр дээр
суулган дэргэдээ аваачин, өөрөө цамц оймс мэт нэхэх зуур Жемитэй энэ тэрийг ярьж, урьд нь
түүний огт сонслхыг хүсдэггүй байсан гэр орны ажил явдалын тухай, Кейт охины хэрхэн
өсөн торниж байгаа тухай ярина.

Шөнө нь Жемийн эзэнгүй болсон биеийг унтлагынхаа өрөөнд аваачин, орон дээрээ
өөрийнхөө дэргэд эвтэйхэн хэвтүүлнэ. Маргарет түүнийг хүүхэд мэт бүүвэйлэн байгаад
унтуулна.

Энэ хооронд Дэвид Блэкуэлл Крюгер-Брент лимитэдийг удирдаж байлаа. Тэр өөрөө компани
удирдахыг хүсээгүй ч нэг мэдэхэд компанийн хамаг ажлыг хийдэг болсон байв. Хааяа нэг
тэднийд ирж, Маргаретаар шаардагдах гарын үсэг зуруулна. Жемийн одоо ямаршуу байдалд
ороод байгааг хараад Дэвидийн зүрх шимширдэг байлаа.

“Би энэ хүний ачыг хариулах ёстой юм шүү” гэж Дэвид бодно.

Маргарет нөхөртөө хандан

- Чи зөв хүн олжээ. Дэвид тун сайн хүн гэж инээмсэглэн хэлээд нэхэж буй юмаа хажуу тийш
нь тавьж

- Чамтай адил шаргуу юм. Чи их журамтай, эелдэг зөөлөн мөртөө хүчин чадал төгс байсан
шүү дээ. Санаж байна уу? Чи хүсэн мөрөөдөхөөс хэзээ ч айдаггүй байсан. Одоо хүсэл
мөрөөдөл биелэлээ. Компани маань өдрөөс өдөрт цэцэглэн хөгжиж, өсөн өргөжиж байна
гээд нэхмэлийн зүү дахин барьж

- Кейт маань хэлд орж байгаа. Өнөө өглөө “Ээж ээ” гэж хэлсэн...

Жеми түрдэг тэргэнцэр дээр сууж, өрөөсөн нүдээрээ урагш хий гөлөрнө.

- Кейтийн нүд, уруул ам нь чинийхтэй адилхан. Их хөөрхөн охин болж...

Маргааш өглөө нь Маргарет сэрэхэд Жеми нас барчихсан байлаа. Маргарет түүнийг тэврэн
биедээ нааж

- Амгалан нойрсдоо хонгор минь. Би чамдаа үргэлж хайртай байх болно. Жеми минь. Хайр
минь дурлал минь баяртай гэлээ.

Маргарет одоо дахиад л ганцаараа боллоо. Эр нөхөр, хүү хоёр нь халин одож, газар ганц охин
нь л түүнд үлдэв. Маргарет хүүхдийн өрөөнд орж охиноо харлаа. Катерина буюу Кейт гэдэг
бол “ариун тунгалаг” гэсэн утгатай грек үг. Хутагтай, гэлэнмаа, хатан хаадад ийм нэр өгдөг.

- Кейт чи юу болох вэ гэж Маргарет охиноосоо асуулаа.

Энэ бол өмнөд Африкийг цагаан арьстанууд эзэмшиж байсан цаг үе. Нөгөөтэйгүүр өөр
хоорондоо эвдрэлцэн, тэмцэлдэж байсан цаг. Трансваалийн асуудал нутгийн цагаан арьстан
хийгээд англичуудын хоорондын харьцааг хурцатгажээ.

1899 оны 12 сарын 12 ны мягмар гариг буюу Кейтийг трөөд долоо хонож байхад Английн
вант улс африкийн цагаан арьстанд дайн зарлаж 3 долоо хоногийн дараа Шар бүгд
найрамдах улсад довтолсон байлаа. Дэвид Маргаретыг

- Өмнөд африкаас яв гэж ятгасанд Маргарет татгалзан

- Энд миний нөхөр бий гэжээ.

Яаж ч ятгаад Маргаретыг үгэндээ оруулж чадсангүй.

- Би энд суурьшсан голландуудтай нийлнэ. Та татгалзахгүй биз? хэмээн Дэвид асуухад

Маргарет

- Татгалзах юу байх вэ. Компанийн ажлыг би өөрөө эрхлэн удирдана гэж Маргарет хариулав.

Маргааш нь Дэвид яваад өглөө.

Англичууд дайнд ядах юмгүй амархан ялна гэж найдаж байв. Энэ бол тэдний хувьд нэг ёсны
залхаан цээрлүүлэх ажиллагаа байсан болохоор дайны ажиллагааг баяр ёслолын байдалтай
эхэлжээ. Лондонд болсон үдэлтийн дайллага дээр британийн цэргийн албан хаагч
голландуудын толгойг цар дээр тавьж барьсан зураг бүхий байжээ. Хоолонд

“Кейптаун сүмстэй трансвааль манжин”

“Претори маягаар шарсан гургууль” гэх мэт хоол байжээ.

Британчуудыг тэдний санаанд оромгүй явдал хүлээж байв. Голланчууд өөрсдийн газар нутаг
дээр эрэлхэг зоригтой, эрс шийдэмгий тулалдлаа. Анхны тулалдаан Мафекинш гэх жижиг
тосгоны дэргэд болж, англичууд өөдөөсөө ямар их хүч сөрөн тэмцэж байгааг анх удаагаа
ойлгожээ. Англиас нэмэлт хүч яаралтай явуулсан байна. Цэргүүд Кимберлийг бүслэн хааж,
Ледисмитийг эзлэв. Голландуудын их бууны калибр английнхаас том учир англичууд хөлөг
онгоц дээрээс их буу авч, Өмнөд африкийн гүн рүү зөөж аваачжээ.

Маргарет Клипдрифтэд тулалдаан бүрийн тухай мэдээг анхааралтай сонсож, хотын бусад
иргэдийг хамт байлдааны мэдээгээр амьдарч байлаа. Ирсэн мэдээний байдлаас шалтгаалан
тэдний сэтгэл санааны байдал баяр бахдалаас цөхрөнгөө барах нь бий. Нэгэн удаа
Маргаретын ажлын өрөөнд ажилчдын нэг нь гүйн орж ирж

- Клипдрифтэд англичууд ойртож ирж явна гэнэ. Тэд биднийг зүгээр л алж орхино гэхэд нь
Маргарет

- Шал дэмий үг. Тэд бидэнд гар хүрч зүрхлэхгүй гэжээ.

Таван цагийн дараа гэхэд Маргарет Кейт хоёр англичуудад олзлогджээ. Тэднийг Өмнөд
африкт бий болсон олон шоронгийн нэг, Пзардебергт рүү ачив. Олзлогдсон хүмүүсийг өргөст
төмөр утсаар хашсан, цэргийн харуул манаатай задгай талбай дээр хорьж байлаа. Амьдралын
нөхцөл туйлын хэцүү. Маргарет охиноо тэврэн

- Санаа бүү зов. Бид алзахгүй гэж хэлэхдээ өөрөө үүндээ итгэсэнгүй.

Өдөр ирэх тутам шинэ зовлон нэмэгдэнэ. Өлсгөлөн, халуун хумхианаас эхлээд хэдэн арав,
зуун сүүлдээ олон мянган хүний амь авч одлоо. Эм, эмч хоёр огт байсангүй. Хоол хүнс тачир,
хатуу хэцүүгээр дүүрэн энэ байдалд үргэлжилсээр л. Өөрсдийнхөө арга тасарсан байдлыг
хүлээн зөвшөөрөх хэцүү . Бүгд л хуяг харуулуудын бүрэн эрх мэдэлд. Хүүхдүүд үхэж байгааг
харсан Маргарет, Кейт даачийнх нь болов уу гэж их айна.

Бяцхан Кейт хэдий жаахан ч гэсэн үүнийг бас ойлгосон бөгөөд, өөрийгөө болон эхийгээ
өмгөөлөн хамгаалах хэрэгтэйг, ёстой ойлгожээ. Даанч тийм боломж түүнд байсангүй. Энэ
явдал Кейтэд насан туршын сургамж болсон бөгөөд голдоо ортол ойлгосон зүйл нь

“Эрх мэдэл. Хэрэв хүн эрх мэдэлтэй бол идэх хоолтой, эм тантай эрүүл байх, амьд үлдэх
боломжтой байх болно”

Эргэн тойрон хүмүүсийн үхэж байгааг жаал охин хараад “эрх мэдэл хэмээгч бол амьдрал”
гэсэн үгтэй утга адил юм байна гэж ойлгов.

“ Хэзээ нэгэн цагт би эрх мэдэлтэй болно. Тэр үед хэн надтай иймэрхүү янзаар харилцаж
чадахгүй” гэсэн гэнэхэн бодол Кейтийн санаанд орно.

Хатуу хэрцгий дайн үргэлжилсээр...

Белмонт, Граспан, Стромберг, Спиоенхон гээд тулалдаан дараа дараагаар залган голландууд
англичуудын өмнө тэсэх аргагүй болжээ. Бүрэлгэн сүйтгэсэн дайн 1902 он дуусан голландууд
бууж өглөө. Түрэмгийлэгчдийг гарт дөчөөд мянган энгийн иргэд, эмэгтэйчүүд хүүхдүүд
үрэгджээ. Дээр нь 28 мянган хүн дайны талбарт бус шорон, хорих лагерьт амь үрэгджээ.

Шоронгийн хаалга онгойход Маргарет Кейт хоёр Клипдрифтэд эргэж ирэв. Хэдэн долоо
хоногийн дараа Дэвид эргэж ирлээ. Дэвид дайнд хатуужин чийрэгжсэн байлаа. Тэр бол
Маргаретын итгэдэг Дэвид хэвээрээ байлаа. Дэвид дайны үеээр Маргарет Кейт хоёрт их
санаа зовжээ. Одоо тэдний энх тунх байгааг үзээд баярласныг өгүүлэх юун.

- Та нарыг яаж байгаа бол гэж их санаа зовж байлаа. Танд өмөг түшиг болохсон хэмээн их
хүснэ. Одоо бид ирээдүйгээ бодох хэрэгтэй гэжээ.

Маргарет үүнд их л баярлав. Мэдээж тэдний ирээдүй бол Крюгер-Брент байлаа.

Шинэ зуун, шинэ шинэ нээлт, бүтээлүүд авчирч үйлдвэржилт хүний амьдралыг өөрчлөв.
Уурын машины оронд дотоод шахалтын хөдөлгүүртэй автомашин бий болжээ. Дэлхий
дахины хүн ам 2 миллирд хүрэв. Энэ бол жинхэнэ өсөлт хөгжилтийн үе байлаа. Маргарет
Дэвид хоёр ч зүгээр байсангүй.

Ийнхүү Кейт охин харах хандах хүнгүй өсөв. Ганцаардлаа ажлаар сольсон Маргарет, ажилдаа
улайран нэг л мэдэхэд охиноо анхаарах завгүй болжээ. Кейт эрх дураараа, гөжүүн болж өсөв.

... Маргарет нэгэн удаа ажлаасаа ирээд 14 настай охин нь үеийн хоёр хөвгүүнтэй зодолдож
байхыг хараад дороо хөшиж орхив.

“Ээ, чөтгөр алгад. Ирээдүйд Крюгер-Брентийг жолоодох охин маань энэ үү. Эзэн тэнгэр
биднийг өршөөх болтугай” гэж дотроо бодлоо.
 Дэд бүлэг

Кейт, Дэвид хоёр

12 -р бүлэг

1914 оны зуны нэгэн халуун орой Кейт Макгрегорыг Йоганнесбург дэхь “Крюгер-Брентийн”
шинэ байранд ажлынхаа тасалгаанд сууж байхад гадаа машин ирэх чимээ сонсогдход нь үзэж
байсан цаасаа орхиод цонхны дэргэд очив. Цагдаагийн хоёр машин, нэг мухлагт машин
байшингийн гадаах хаалганы дэргэд ирж зогсоод 6 цагдаа машинаас үсрэн бууж, орох гарах
бүх хаалгыг хяналт хамгаалалтанд авахыг Кейт хараад хөмсөг зангидав.

Шөнө орой болж, гудамжинд хүн амьтны хөл тасарчээ. Кейт цонхны шилэнд туссан дүрсээ
харав. Кейт эцгийгээ дуурайсан цайвар бор нүдтэй, эхийгээ дууриасан чилгэр сайхан биетэй
үзэсгэлэнт гоо хүүхэн болжээ. Үүд тогшиход нь Кейт

- Ороорой гэлээ.

Үүд онгойж хоёр цагдаа орж ирсний нэг нь ахлах офицерийн тэмдэгтэй байлаа.

- Юу болж байгаа нь энэ вэ? гэж Кейт шаардангуй асуулаа.

- Ийм орой болсон хойно таны тавыг алдуулсныг минь уучилна уу, мисс Макгрегор. Би ахлах
байцаагч Коминский байна.

- Юу болоо вэ, ахлах байцаагч аа?

- Саявтар оргодол алуурчин этгээд энэ байшин руу орлоо гэж бид мэдээ авсан юм гэхэд нь
Кейтийн царай хувьсхийн

- Энэ байшинд уу? гэж лавлав.

- Тиймээ. Буу зэвсэгтэй, их аюултай этгээд

- Тэгвэл тэр этгээдийг даруй олж, эндээс аваад явбал ахлах байцаагч танд их баярлах байна
гэж Кейтийн зүрх нь хөөрөн өгүүлэв.

- Бид чухам тэгэх л гэж ирсэн юм, мисс Макгрегор. Та ямар нэгэн сэжигтэй чимээ сонсох юм
уу, сэжигтэй юм олж хараагүй биз?

- Үгүй. Би энд ганцаараа, энэ байшинд хүн нуугдаж болох газар зөндөө бий. Та нар бүгдийг
нь нягт нэгжиж үзнэ үү?

- Бид даруйхан ажилдаа орьё, мисс ээ.

Ахлах байцаагч гудам руу шагайн,

- Энэ байшинг зоориноос дээврийг хүртэл нэгжигтүн гэж өөрийн хүмүүс тушаал өгөөд Кейт
тийш эргэн
- Энд түгжээтэй өрөө тасалгаа бий юу? гэж асуухад нь,

- Байхгүй байх аа. Байвал би онгойлгоод өгнө хэмээн Кейт хариулав.

Кейтийн сэтгэл тавгүйрхэн тэвдэж байгааг ахлах байцаагч Коминский ажигласан боловч
тэглээ гэж зэмлэсэнгүй. Тэдний эрж байгаа хүн хичнээн аюултайг мэдсэн бол бүр их айж
сандрах байсан нь лав.

- Бид түүнийг олно гэж Кейтийн сэтгэлийг тайвшруулав.

Кейт ширээн дээрээс урьд үзэж байсан тайлан тооцоог авч үзсэн боловч анхаарлаа
төвлөрүүлж чадсангүй. Цагдаа нар бүх өрөө тасалгааг нэгжиж байгаа бололтой. “Тэр хүнийг
олсон болов уу?” Кейтийн бие эвгүйрхэн жихүүцэв.

Цагдаа нар гэмт этгээдийн нуугдаж болохуйц бүх газрыг нарийн нягт нэгжлээ. 45 минутын
дараа ахлах байцаагч Коминский Кейтийн өрөөнд эргэж ирэхэд өөдөөс нь эгцлэн харж,

- Нөгөө хүнээ олов уу?

- Арай олоогүй байна. Та санаа бүү зовогтун...

- Би яаж санаа зовохгүй байх билээ дээ, ахлах байцаагч аа. Энэ байшинд оргодол алуурчин
байгаа юм бол та нар түүнийг олоосой гэж хүсэх байна.

- Бид түүнийг олно, миссис Макгрегор. Бидэнд эргүүлийн ноход бий.

Гудамжинд нохой хуцах сонсдож, нэгэн эгшиний дараа хоёр том соотон нохой хөтөлсөн
цагдаа орж ирлээ.

- Бид бүх өрөөг тасалгааг нохойтой явж үзлээ. Ганц энэ тасалгаа үлдсэн гэхэд нь Коминский
Кейт тийш эргэж,

- Та сүүлийн хоёр цагт энэ тасалгаанаас гарсан уу? гэж асуулаа.

- Гарсан. Зарим нэг бичиг баримт авчрах хэрэгтэй болсон. Та түүнийг энд... гээд Кейт
давхийн цочиж

- Энэ тасалгааг бас нэгжиж үзнэ үү гэлээ.

Ахлах байцаагч сач орж ирсэн цагдаа руу толгой дохисонд цагдаа хоёр нохойгоо тавилаа.

- Мөр шинш гэж тушаалаа.

Ноход галзуурах шиг болж, хананд суулгасан ширээ рүү гүйлдэж очоод хуцаж эхлэлээ.

- Ай тэнгэр, Энд байгаа юм байна гэж Кейт дуу алдав.

Ахлах байцаагч буугаа гаргаж ирээд

- Онгойлго гэж тушаалаа.

Хоёр цагдаа мөн л гар буугаа гаргаж бэлэн бариад, шүүгээний хаалгыг онгойлгосонд хоосон
байлаа. Хоёр нохой нэг нь өөр хаалга руу гүйн очиж, үүдийг самардаж эхлэлээ.

- Энэ хаашаа ордог хаалга вэ? гэж ахлах байцаагч асуулаа.

- Халуун усны өрөөнд

Цагдаа нар хаалганы хоёр талд зогсож байгаад үүдийг угз татан онгойлгосонд дотор нь хүн
байсангүй.

- Энэ ноход урьд ер ингэдэггүй байсан юм гэж нэгэн цагдаа гайхан хэллээ.

Ноход үнэр авсан бололтой, өрөөн дотуур нааш цааш гүйлдэж байв. Тэр хүн хаана байдаг
байна вэ? Нохой Кейтийн бичгийн ширээний дэргэд гүйлдэн очиж, галзуурсан юм шиг
хуцалдлаа.

- Нөгөө хүн чинь ширээний шургуулганд байгаа юм байна гэж Кейт хэлээд инээхийг оролдов.
Ахлах байцаагч Коминский сандарсан байдалтай

- Таны тавыг алдуулсныг минь уучлаарай, миссис Макгрегор гээд цагдаа нар тийш хандан,

- Наад нохдоо зайлуул гэж зандарлаа.

- Та нар явахгүй биз дээ хэмээн Кейт зэмлэсэн байдалтай дуугарахад,

- Миссис Макгрегор танд айх юм байхгүй гэж батлан хэлье. Манай хүмүүс энэ байшинд алга
дарам газар үлдээлгүй нэгжсэн. Энд хүн байхгүй гэж би өөрөө батлан даая. Хуурамч түгшүүр
байсан бололтой. Хүлцэн хэлтрүүлнэ үү гэхэд нь Кейт шүлсээ залгиад,

- Та ганц бие эмэгтэйг шөнө орой аятайхан зугаацуулдаг юм байна... гэжээ.

Кейт цонхны дэргэд зогсон, байшингийн дэргэдээс цагдаагийн машинуудын явахыг харж
байв. Машинууд далд орсны дараа ширээний шургуулгыг онгойлгон дотроос нь цус болсон
тааран шаахай гаргаж ирлээ. Тэгээд гудамд гарч, үүдэн дээрээ “ЗӨВХӨН НЭВТРЭХ
БИЧИГТЭЙ ОРНО” гэсэн пайз бүхий хаалганы дэргэд очиж, үүдийг онгойлгон хананд
суулгасан лут том төмөр хаалганаас өөр юу ч үгүй өрөөнд оров. Энэ ган төмөр өрөөнд тус
компанийн гадаадад гарахад зориулсан алмасыг хадгалдаг байжээ. Кейт хэрэгтэй шифрийг
хурдан тохируулан хүнд хаалгыг онгойлгов. Нууц өрөөн дотор дүүрэн алмас хийсэн төмөр
хайрцагууд тавиур эгнэжээ. Өрөөний голд нь шалан дээр Банда хэвтэж байлаа. Банда бараг
ухаангүй байв. Кейт хажуунд өвдөг сөхрөн сууж,

- Тэд яваад өгсөн гэв.

Банда нүдээ алгуурхан нээж, инээмсэглэхийг оролдов.

- Би энэ өрөөнөөс гарч чадах байсан бол ямар баян болох байсан бол оо?

Кейт түүнийг түшин хөл дээр нь босгов.

Кейтийг гартаа хүрэхэд Банда эмзэглэн ярвайлаа. Боолт нь нэлдээ цус нэвчжээ.

- Та гутлаа өмсөж чадах уу?

... Цагдаа нарыг нохойтой ирнэ гэдгийг Кейт мэдээд түрүүнд Бандагийн гутлыг тайлан авч,
дараа нь тайлан ширээнийхээ шургуулганд нуусан байжээ. Одоо Бандад гутлыг нь өмсгөөд,

- Алийв, бид эндээс хурдхан зайлах хэрэгтэй байна гэсэнд Банда толгой сэгсэрч,

- Би ганцаараа явна. Хоёулаа явж байгаад баригдах юм бол чамд бөөн эвгүй юм болно гэв.

- Би яаж ийгээд аргална.

Банда ийш тийшээ харав.

- Ганц хоёр алмас авмаар байна уу? Хэдийг л бол хэдийг ав гэж Кейт хэлэхэд Банда өөдөөс нь
хараад үнэнээсээ хэлж байгаа ойлгов.

- Олон жилийн өмнө эцэг чинь бас иймэрхүү үг хэлж байсан сан гэхэд нь

- Мэднэ гэж Кейт хэлээд инээмсэглээд

- Надад мөнгө хэрэггүй. Нэг хэсэгтээ энэ хотоос явах хэрэгтэй байна.

- Та Йоханнесбургээс яаж гарах вэ?

- Нэги арга бодно.

- Байзаарай. Цагдаа нар бүх замыг хаасан. Хотоос гарах гарцууд дээр хянах эргүүлүүд бий
байх. Танд ямар ч бололцоо байхгүй.

- Чи тэртээ тэргүй надад их тус болсон. Одоо болсон гээд Банда зүтгэв.

Банда цус болсон уранхай цамцтай зогсож байлаа. Царайд нь үрчлээ сууж, үсэнд нь мөнгөн
сор хаялжээ. Кейт бүр жаахан хүүхэд байхдаа уулзаж байсан өндөр гоолиг эрийг сэтгэлдээ
тодхон саналаа.

- Банда Тэд нар таныг барьж аваад алчихна. Надтай явбал дээр гэж Кейт тайван хэлэв.

Зам үнэхээр хаалттайг Кейт мэдэж байв. Замын бүх бэлчир дээр эргүүлийнхэн зогсож байгаа.
Банда аюултай гэмт хэрэгтэн гэж тооцогдож байгаа. Дээрээс түүнийг амьд үхсэн алин
боловч олох тушаал өгсөн байх. Төмөр замын өртөөнүүдийг бас хянан шалгаж байлаа.
- Чиний төлөвлөгөө танай эцгийн төлөвлөгөөнөөс илүү сайн юм байгаа биз дээ гэж Банда
хэлэхдээ дуу нь сулхан байлаа. Түүнийг их цус алдсан болов уу гэж Кейт айж байлаа.

- Олон юм битгий ярьдаа. Хүчээ хайрла. Би бүгдийг өөрөө хийнэ хэмээн Кейт аль болохуйц
бат итгэлтэй ярихыг хичээв.

Бандагийн амь нас Кейтийн гарт байна. Энэ хүнийг амийг аврах ёстой. Дэвид яваагүй бол
юутай сайн билээ гэж Кейт зуунтаа бодов. Одоо яая гэх вэ, ганцаараа ажиллах хэрэгтэй
болжээ.

- Би машинаа хаалганы дэргэд авчирна. 10 минут орчим хүлээж байгаад гараад ирээрэй.
Машины хаалга онгорхой байх болно. Ороод шалан дээр хэвтээрэй. Тэнд хөнжил бий.
Түүгээр биеэ сайн хучаарай гэж Кейт хэллээ.

- Кейт, тэд хотоос гарч байгаа бүх машиныг шалгаж байгаа...

- Бид машинаар явахгүй. Өглөөний 8 цагт Кейптаун орох галт тэрэг хөдлөнө. Миний вагоныг
залгаарай гэж хэл өгчихсөн.

- Чи намайг хувийн вагоноор авч явах гэж байгаа юм уу?

- Ай даа гэсэнд Банда жуумалзан муухан инээмсэглээд,

- Макгрегорынхон та нар адал явдалд дуртай улс юм аа гэлээ.

30 аад минутын дараа Кейт өргөөнд ойртож очив. Машины нь шал дээр хөнжлөөр хучаастай
Банда хэвтэж байлаа. Кейт замын бүх харуул хамгаалалтыг төвөггүй өнгөрсөн боловч одоо
гэрлээр дохио өгч байгааг харав. Замыг цагдаа нар хаажээ. Танил царайтай хүн машины
дэргэд ирж,

- Ахлах байцаагч Коминский гэснээ дороо гайхан зогсож

- Мисс Макгрегор, энд юу хийж яваа юм бэ? гэхэд нь бүсгүй учрыг ойлгосон байдалтай
инээмсэглэж,

- Ахлах байцаагч, та намайг лав аймхай тэнэг хүүхэн гэж бодож байгаа байх. Үнэнээ хэлэхэд
өнөөдөр миний ажлын өрөөнд болсон явдлаас хойш айгаад болдоггүй. Тэгээд тэр алуурчныг
барьж автал хотоос явахаар шийдлээ. Та нар түүнийг барьсан уу?

- Арай үгүй. Бид түүнийг заавал барина. Галт тэргээр явахыг оролдох болов уу гэж бодоод
байна. Хаашаа юугаар явсан ч бид түүнийг бариад авна гэв.

- Тэгнэ гэж найдаж байна.

- Та хаа хүрэх нь вэ?

- Миний вагоныг галт тэргэнд залгасан. Кейптаун орно.

- Танд харуул хамгаалалт гаргаж өгөх үү?

- Өө хэрэггүй. Баярлалаа. Гэмт этгээдийг бүх замыг хааж халхалсныг мэдээд айхаа больлоо.

5 минутын дараа Кейт Банда хоёр Макгрегорынхны хувийн вагонд сууж байлаа. Купенд
харанхуй байлаа. Кейт Бандаг хэвтүүлээд,

- Гэрэл асаасны хэрэггүй биз. Өглөө болтол та энд айх аюулгүй. Галт тэрэг хөдлөхөөр халуун
усны өрөөнд ороод нуугдаж болно гэсэнд Банда толгой дохиод,

- Баярлалаа гэв. Кейт хөшиг татаад,

- Биднийг Кейптаунд очсоны дараа шархыг чинь үзэж өгөх танил эмч бий юу? гэсэнд Банда
өөдөөс нь гайхан харж,

- Бид гэв үү?

- Таныг ганцааранг чинь явуулчихаад сонин сайхан юмнаас хоцорно гэж бодов уу гэв.

Банда инээмсэглэн “Эцгийгээ дууриасан юм” гэж бодлоо.

Үүрээр Макгрегорынхны вагоныг бүрэлдхүүнд залгав. Өглөөний 8 –д галт тэрэг өртөөнөөс

хөдөллөө. Бандагийн шархнаас дахин цус гарч эхэлсэн учир Кейт боолтыг нь солив. Бандаг
өөрийн ажлын өрөөнд улаан голтой орж ирсэн цагаас хойш Кейт түүнтэй ярих бололцоо
гараагүй байжээ. Одоо тэгээд,

- Юу болсныг надад яриач? гэв.

Банда өөдөөс нь хараад “Юунаас эхлэх вэ” гэж бодлоо. Цагаан арьстанууд банту аймгийнхныг
тэдний өвөг дээдсийн нь нутагт уснаас хөөснийг хэрхэн тайлбарлах вэ... Хамаг хэрэг тэр
үеээс эхэлсэн байх уу? Эсвэл Трансваалийн ерөнхийлөгч Пол Крюгер парламентад хэлсэн
үгэндээ “Бид хар арьстны дээр байх ёстой. Тэгээд бидний зарц боол байхыг зөвшөөрч болох
юм... “ гэж хэлснээс хойш эхэлсэн байж болох юм. Үгүй, “Африк бол цагаан арьстных” гэсэн
уриа дэвшүүлсэн Сесиль Родсоос эхлэх үү? Өөрийн ард түмний түүхийг яаж ганц
өгүүлбэрээр илэрхийлэх вэ? Банда бодлогошров.

- Цагдаа нар хүүг минь алсан гэж Банда хэлэв.

Тэгээд ярьж эхлэлээ.

Бандагийн ууган хүү Нтомбентлийг улс төрийн цуглаанд оролцож байтал цагдаа нар
жагсагчдыг хөөн тарааж эхэлжээ.

Буу тачигнаж, эх захгүй үймээн эхлэжээ. Нтомбентлийг баривчлан авч маргааш өглөө нь
шоронгийн өрөөнд өөрийгөө дүүжилсэн байхыг олжээ.
- Тэд миний хүүг амиа хорлосон гэж хэлсэн. Би хүүгээ мэднэ. Минйи хүү хэзээч тэгэхгүй.
Тэд хүүг минь алсан гэж Банда хэлээд шүүрс алдав.

- Тэнгэр минь, их бага залуу байсан шүү дээ гэж Кейт хэлэв.

Кейт түүнтэй хамт тоглож наадан инээлдэж байснаа санав. Нтомбентль эвлэг сайн хүү
байсан.

- Уучлаарай, Банда. Би их харамсаж байна. Харин яагаад таныг мөрдөж хавчих болох оо?

- Хүүг минь алснаас хойш би хар арьстнуудын дунд цуглаан зохион байгуулж эхлэсэн юм. Би
өшөөгөө авах хэрэгтэй байлаа. Элгээ тэврээд сууж байлтай биш дээ. Цагдаа нар намайг
төрийн дайсан гэж зарласан. Намайг хулгай дээрэмд худал гүтгэн гүжирдээд 20 жилийн ял
заасан. Би гурван нөхөртэйгээ хамт оргосон. Биднийг оргож явах үед нэг хуяг алагдсан.
Цагдаа нар үүнийг мөн л миний хийсэн хэрэг гэж зарласан. Уг нь би энэ насандаа буу зэсвэг
барьж яваагүй билээ.

- За за. Юуны өмнө таныг айх аюулгүй тийм газар аваачих хэрэгтэй.

- Чамайг энэ хэрэгт татан оруулсныг минь уучлаарай.

- Та намайг хэрэг төвөгт татан оруулсан зүйл үгүй. Та миний дотны нөхөр гэхэд нь Банда
инээмсэглэж

- Намайг өөрийн дотны нөхөр гэж хэлсэн анхны цагаан арьстан аав чинь байсан даа. Ингэхэд
Кейптаунд очоод чи намайг галт тэрэгнээс яаж буулгах гэж байна даа?

- Бид Кейптаун орохгүй...

- Чи хэлэхдээ...

- Би чинь эмэгтэй хүн шүү. Нэг шийдснээ өөрчлөх эрхтэй шүү дээ.

Шөнө галт тэрэг Ворчестер өртөөн дээр зогсоход Кейт вагоноо салгаж, бэлтгэл зам дээр
тавиулахаар ярьж тохирсон байжээ. Өглөө сэрээл харвал Бандагийн ор хоосон байлаа. Банда
шөнө дөлөөр алга болоод өгчээ. Кейтийг цаашид осолтой юманд оруулахгүй гэсэндээ тэр
ингэсэн байжээ. Кейт гунигласан боловч Бандад гай түйтгэр болохгүй гэж итгэж байлаа.
Түүнд сайн найз нөхөд олон бий. “Дэвид сайшаах биз” гэж Кейт бодлоо.

Кейтийг Йоханнесбургт эргэж ирээд шинэ сониноо ярихад Дэвид,

- Чамайг ийм тэнэг юм хийнэ гэж санасангүй. Чи өөртөө аюул осолтой ажил хийгээд үл
барам, бүх компанид аюултай ажил хийсэн байна. Бандагийн энд нуугдаж байгааг цагдаа нар
мэдсэн бол яах байсныг чи ойлгож байна уу даа?

- Тэд түүнийг алж орхих байсан гэж Кейт үг сөрөхийг оролдсонд Дэвид цөхрөнгөө баран
духаа үрчийж
- Чи юу ч ойлгохгүй байгаа хүн үү?

- Ойлгож байна, чөтгөр алгад. Чамайг өрөвдөх сэтгэлгүй хүйтэн хоосон цэвдэг амьтан гэж
ойлгож байна гээд уурласандаа нүд нь учиргүй гялалзан байлаа.

- Кейт, чи хүүхдээрээ байна гэхэд нь Кейт түүнийг алгадах гэж гар далайхад нь Дэвид
түүнийг гарыг шүүрэн авч,

- Кейт ээ, чи сэтгэлийнхээ хөдөлгөөнийг тогтоож сурах хэрэгтэй гэжээ.

Энэ үг Кейтийн толгойд цуурай мэт хангинав.

- Кейт ээ, чи сэтгэлийнхээ хөдөлгөөнийг тогтоож сурах хэрэгтэй гэжээ...

Алт эртний явдал юм.

Кейт жаахан байхдаа өөрийг нь шоглосон жаал хөвгүүнтэй зодолдож байтал Дэвид хүрч
ирэхэд тэр хөвгүүн зугтжээ. Кейт түүний хойноос нь хөөтөл Дэвид өөрийг нь барьж аваад

- Байз Кейт, Чи сэтгэлийн хөдөлгөөнөө барьж сурах хэрэгтэй. Залуу авхай нар ингэж
зодолддоггүй юм гэхэд нь Кейт хэдэрлэн,

- Би залуу авхай биш. Намайг тавь гэжээ.

Ягаан палааж нь урагдсан, шавар шавхай болсон нүүр ам нь шалбарчээ.

- Ээж чинь мэдэхээс өмнө явж нүүр амаа угаа, хувцас хунараа янзал гэхэд нь Кейт зугтан одож
буй хөвгүүний хойноос харамссан байдалтай харж,

- Хэрэв чи л саад болоогүй бол би түүнийг сайн чадах байсан юм гэхэд охины улайсан
нүүрийг хараад Дэвид тас тас инээж,

- Эргэлзэхгүй байна гэжээ.

Кейт тайтгарч, Дэвидэд тэврүүлэн гэртээ орохыг зөвшөөрчээ.

Дэвидэд тэврүүлэх сайхан. Ер нь Дэвидийн юм бүхэн сайхан санагддаг. Дэвид насан

хүрэгсдийн дотроос Кейтийг ойлгодог цорын ганц хүн. Дэвид хотод ирэхээрээ заавал цаг
гарган Кейттэй тоглоно. Жеми хаана нэг зав чөлөө гарсан үед Бандатай хэрхэн хөглөж явснаа
залуу Дэвидэд ярьдаг байсан агаад одоо тэр намтрыг Дэвид Кейтэд ярьж өгнө. Кейт энэ яриаг
хэдэн цагаар сонсоход бэлэн байдаг ажээ.

- Тэд сал яаж хийснийг дахиад яриач гэхэд нь Дэюид ярина.

- Аварга загастай тулалдсныг яриач...

- Тэнгисийн манан буусныг яриач... яриач...

Кейт эхтэйгээ уулзалдах нь цөөн. Маргарет Крюгер-Брент компанийг удирдах гээд даанч зав
муутай. Үүнийг тэрээр Жемийн төлөө хийдаг байлаа. Маргарет Жемийг нас барахын өмнө
сүүлчийн нэг жил орой болгон түүнтэй ярдаг байсан шигээ одооч мөн ярина.

- Дэвид надад их тус болж байна. Хожим компанийг удирдхад Кейтэд тус болно. Чиний
сэтгэлийг зовоохгүй юм сан гэж бодох юм. Үнэндээ гэвэл би энэ охиныг яахаа мэдэхгүй
байна...

Кейт өөрийн дураар зүтгэдэг, гөжүүн хүүхэд байлаа. Эхийнхээ юм уу, миссис Тэллийн үгэнд
орно гэж байхгүй. Тэдний өгсөн палаажыг өмсөхгүй, заавал өөрийг өмсөнө гэж зүтгэнэ.
Хэзээ дуртай цагтаа юу дуртайгаа иднэ. Энэ муу занг нь болиулах гэж аргадаад ч нэмэргүй,
аашлаад ч нэмэргүй. Кейтийг хэн нэгний төрсөн өдрийн баярт авч очиход хэзээд тэр баярыг
гутаах нэг арга болсон байдаг ажээ. Үерхдэг охин найз байхгүй. Бүжгийн сургуульд явахыг
татгалзаад үүний оронд хөвгүүдтэй регби тоглоно. Кейт сургуульд ороод үг зөрөх талаар дээд
амжилтыг тогтоожээ. Ямар ч гэсэн Маргарет сард нэгэн удаа захирал авгайтай уулзаж,
Кейтийг сургуулиас хөөхгүй байх талаар гуйх хэрэг гардаг байжээ.

- Охиныг чинь ойлгохгүй юм аа, миссис Макгрегор. Ухаантай охин шиг мөртөө юм болгон
дээр зөрж хэдэрлэдэг. Бүр яахаа мэдэхгүй байна хэмээн захирал авгай үглэлээ.

Маргарет өөрөө ч яахыг мэдэхгүй байлаа. Кейтийг аргалж чаддаг ганц хүн нь Дэвид байлаа.

- Минйи ойлгосноор чамайг өнөөдөр төрсөн өдрийн баярт урьсан юм байна гэж Дэвид нэг
удаа хэлэхэд

- Би тэр төрсөн өдрийн баярыг чинь үзэн яддаг гэхэд нь Дэвид Кейт руу тонгойж

- Мэднээ. Гэхдээ Кейт, чамайг урьсан охины эцэг нь миний дотнын найз байгаа юм. Хэрэв чи
очихгүй юм уу, очоод бяцхан авхайн ёсоор биеэ аятайхан авч байхгүй бол надад эвгүй юм
болно гэхэд Кейт өөдөөс нь эгцлэн хараад

- Тэр чиний сайн найз уу?

- Тийм ээ.

- Би очно гэжээ.

Кейт төрсөн өдрийн баярт очоод өөлөх юмгүй, ёс журамтай байжээ.

- Чи яаж ингэж аргалж чаддаг юм бэ, бүү мэд. Энэ чинь ёстой ид шид байна гэж сүүлд нь
Маргаретын өгүүлэхэд Дэвид инээж

- Кейт их өвөрмөц зантай, биеэ даасан хүүхэд. Хамгийн гол нь түүний биеэ даасан занг
арилгахгүй байхыг хичээх хэрэгтэй гэсэнд,

- Чамд би нууцаа хэлье. Заримдаа би энэ охиныг багалзуурдаж алмаар санагддаг гэж
Маргарет баргар царайлан хэлжээ.
Кейт арваад настай байхдаа Бандатай танилцжээ.

- Би Бандатай танилцмаар байна гэхэд Дэвид өөдөөс нь гайхан харж,

- Тийм боломж байхгүй болов уу даа, Кейт. Бандагийн аж ахуйн эндээс их хол байдаг гэсэнд

- Чи намайг тийш нь авч очооч, Дэвид ээ. Эсвэл би ганцаараа явах уу?

Маргааш нь Дэвид Маргареттай яриад Кейтийг Бандагийн аж ахуй руу авч очив. Аж ахуй нь
хоёр га талбай эзэлдэг ажээ. Банда тэндээ хонь, тэмээн хяруул өсгөж, улаан буудай тариалдаг.
Бандагийн гэрийнхэн туургыг нь шавсан урцанд сууна. Шовгор дээврийг нь дал модны
навчаар бүржээ. Сүйх тэрэгнээс Кейт Дэвид хоёрыг бууж ирэхийг Банда харав. Дэвидийн
хажууд зогсож байгаа чөргөр охиныг хараад,

- Чамайг Жеми Макгрегорын охин гэж таниж байна гэсэнд

- Би таныг Банда гэж таниж байна. Эцгийн минь амийг аварсанд талархал гэж ирлээ гэхэд нь
Банда инээд алдан

- Орж манай гэрийнхэнтэй танилц гэжээ.

Бандагийн эхнэр нь бантуу овгийн сайхан хүүхэн байлаа. Банда хоёр хүүтэй ажээ. Том хүү
Нтомбенль нь Кейтээс 7 ах, бага хүү Маген ахаасаа нэг дүү. Нтомбенль эцгийгээ өвччихсөн
юм шиг адилхан төржээ. Түүний сайхан царайнд нэр төрөө бодох дотоод сэтгэлтийн их хүч
мэдэгдэнэ.

Кейт хоёр хөвгүүнтэй тоглон өдрийг барж, дараа нь гал тогооны тохилог бяцхан өрөөнд
хооллоцгоов. Дэвид хар арьстантай хамт сууж хоол идэж байгаадаа жаахан эвгүйрхэнэ. Дэвид
Бандаг хүндэтгэдэг боловч уламжлал ёсоор өөр өөр өнгийн арьстан хоорондоо нөхөрлөх
хориотой. Түүний дээр Бандагийн улс төрийн ажиллагаа Дэвидийн сэтгэлийг зовоодог ажээ.
Банда нийгмийг эрс шинэтгэл хийхийн төлөө тэмцдэг. Жон Тенго Жавабуг дагалдагчидын
нэг гэсэн яриа бий. Нутгийн ард иргэд уурхайд очиж ажиллах дургүй байдаг учир засгийн
газар уурхайд ажил хийдэггүй хар арьстныг 10 шиллингийн татвар авдаг. Өмнөд Африк даяар
үймээн самуун гарчээ. Нар жаргах шахаж байхад Дэвид Кейтэд

- Буцах замдаа орох боллоо. Газар хол шүү гэхэд

- Эрт байна гэж Кейт хэлээд Банда хандан

- Аварга загастай тулалдснаа ярьж өгөөч гэжээ.

Тэр үеэс хойш Дэвидийг хотод ирэхэд Кейт Бандагийнд хүргүүлдэг болжээ.

Кейт яваандаа томоожиж, тайман тогтуун болно гэж Дэвид итгэж байсан нь биелсэнгүй.
Харин ч өдөр ирэх тутам улам гөжүүн болж байлаа. Өөрийн насны охидын оролцдог
ажиллагаанд оролцохыг эрс татгалзана. Харин Дэвидийг уурхайд очихдоо дагуулж яв гэж
шаардаж, бас түүнтэй хамт анд, загасанд явна. Нэг удаа Вааль гол дээр хамт загас барьж
байгаад Кейтийг лут том тулбага загас гаргаж ирэхэд,

- Чи уг нь хөвгүүн болж төрөх ёстой байж гэж Дэвид хэлсэнд Кейт дургүйцэн муухай харж,

- Битгий тэнэг юм яриад бай Дэвид. Би хүү байсан бол чамтай яаж суух юм бэ гэхэд нь Дэвид
тас тас хөхрөв.

- Би чамтай сууна шүү дээ Дэвид гэхэд нь

- Үгүй болов уу, Кейт. Би чамаас хорь гаруй ах. Чи нэгэн цагт өөртөө таарсан залуу сайхан
хархүү олно.

- Надад залуу сайхан хархүү хэрэггүй. Надад чи л хэрэгтэй гэж Кейт уцаарлан өгүүлэв.

- Хэрэв чи үнэнээсээ хэлж байгаа бол чамд эр хүний сэтгэлийг яаж татах нууцыг хэлж өгье
гээд

- Ходоодоор нь дамжуулдаг юм. Наад тулбагаа цэвэрлээд сайхан хоол хийчих гэжээ. Кейт өөр
хүнтэй сууна гэж огт боддоггүй байлаа. Түүний хувьд энэ дэлхий дээрхи цорын ганц эр нь
Дэвид Блэкуэлл ажээ.

Маргарет долоо хоногт нэг удаа Дэвидийг оройн хоолонд урина. Кейт өөрийн зан авирыг
хянаж биеэ барих шаардлагагүйг бодоод дандаа гал тогооны өрөөнд зарц үйлчлэгч нартай
хамт хооллодог. Харин баасан гаригт Дэвидийг ирэхэд хоолны танхимд оройн хоол иддэг
байлаа. Дэвид бараг үргэлж ганцаараа ирнэ. Хааяа хүүхэн дагуулж ирэхэд хамт ирсэн
хүүхнийг нь Кейт даруй үзэн яддаг байлаа.

Түүнчлэн эвийг нь олж байгаад Дэвидтэй хоёулхнаа үлдсэн үед эелдэг энхрий дуугаар,

- Үсээ ийм өнгөөр будсан эмэгтэйг ер үзээгүй юм байна гэх юм уу

- Чиний дагуулж ирсэн энэ хүүхний палааж ямар хачин юм бэ. Энэ хүүхэн урьд мадам
Агнесынд ажиллаж байсан юм биш биз гэнэ...

Кейтийг 14 настай байхад сургуулийн захирал авгай Маргаретийг сургууль дээр дуудаж
уулзав.

- Манайх олонд нэр хүндтэй сайн сургууль, Миссис Макгрегор. Кейт бусад сурагчдад муу
нөлөө үзүүлээд байна гэхэд нь Маргарет санаа алдаад

- Кейт бас ямар хэрэг хийчихээ вээ гэсэнд захирал авгайн царай барайж

- Бусад хүүхдүүдэд муу үг зааж өгөөд байна. Зарим үг нь миний энэ насандаа дуулаагүй үгс
байдгыг нэмж хэлье. Хаанаас ийм үгс сураад байгааг бүү мэд гэлээ.

Маргарет үүнийг мэдэж байлаа. Кейт гадуур үерхдэг хөвгүүдээс ийм үгс сурч байгаа юм.
“За ер нь үүнийг эцэс болгох хэрэгтэй юм байна” гэж Маргарет шийдлээ.

- Та охинтойгоо яривал зүгээр. Бид түүнд дахиад нэг л боломж олгоё. Харин... гэж захирал
авгай өгүүлэхэд

- Үгүй, надад өөр санал байна. Охиныг гадаадад явуулж сургая гэжээ.

Маргарет өөрийн шийдвэрийг Дэвидэд ярьсанд цаадах нь жуумалзан инээмсэглэж

- Кейт дургүйцэнэ дээ гэв.

- Одоо яая гэх вэ. Кейтийг муухай хараал тавьдаг гэж захирал авгай гомдоллож байна.
Эрэлчидтэй байнга харилцаж, тэднээс муухай үгс сураад байна. Охин маань тэдэнтэй адил
ярьдаг. Үнэнээ хэлэхэд би түүнийг ойлгохгүй юм. Яахлаараа ийм хачин зан авир араншин
гаргадаг хүн бэ? Уг нь ухаантай хөөрхөн охин шүү дээ...

- Ухаан нь хэтрээд тэр биз дээ.

- Ухаантай ч бай, ухаангүй ч бай, гадаадад сургуульд явуулна.

Кейтийг тэр өдөр хичээлээсээ ирэхэд Маргарет өөрийн шийдвэрийг хэлэв. Кейт галзууртлаа
уурлан

- Та намайг холдуулах гэж байна гэж хашгирав.

- Хаанаас даа, охин минь. Чамд тэнд сайхан байх болно...

- Надад энд гэртээ сайхан байна. Энд миний найз нар бий. Та намайг тэднээс минь салгах
гэж байна.

- Тэр уранхай гуйлгачингуудыг хэлж байгаа бол...

- Уранхай гуйлгачид биш ээ. Хэнтэй ч адил хүмүүс тэд чинь.

- Маргалдах юмгүй, Кейт. Чи залуу авхайн нарын сургуульд сурах болно.

- Би амиа хорлоно гэж Кейт сүр бадруулан мэдэгдэв.

- Өөрөө мэд ээ, охин минь. Манайд тонгорог бий байх. Сайн эрвэл бас хор ч олдож магад.

Кейт цурхиран уйлж,

- Ээж ээ, намайг эндээс битгий явуулаач дээ гэж гуйхад Маргарет охиноо тэврээд,

- Чамд өөрт чинь тустай шүү, Кейт ээ. Удахгүй чи том болж хүнтэй сууна. Чам шиг
хувцасладаг, чам шиг элдэвээр аягладаг бүсгүйг хэн тоох юм бэ гэсэнд Кейт,

- Дэвид тооно гээд өөрөө пархийтэл инээд алдав.

- Дэвид үүнд ямар хамаатай юм бэ?

- Би түүнтэй сууна гэхэд нь Маргарет шүрс алдаад,

- Чиний юм хумыг бэлтгэ гэж би миссис Тэллид хэлье гэжээ.

Англид залуу бүсгүйчүүдийн дотуур байртай сургууль олон байдаг. Маргарет Глостершэрийн
“Челтенхем” гэдэг дотуур байртай сургуулийг Кейтэд илүү тохирно гэж үзжээ. Тэр бол чанга
бат сахилгатайгаараа алдаршсан сургууль юм. Дүрэмд нь тус сургуулийн сурвалжит
язгууртны охидыг сургахад зориулан байгуулсан гэж бичсэн байдаг.

Дэвид тэр сургуулийн захирал миссис Китонтой урьд нь ажилын шугамаар танилцсан
болохоор тэд Кейтийг онцын төвөггүй авлаа.

Харин Кейт ямар сургуульд очих гэж байгаагаа дуулаад бүр бухимдан уурлаж,

- Тэр сургуулийн талаар сонссон. Жигшмээр муухай юм билээ. Тэнд намайг гоё ганган нь
дэндсэн англи хүүхэлдэй болгоно. Та үнэхээр тэгээсэй гэж хүсэж байна уу гэж ээжээсээ
асуухад Маргарет

- Чамайг эелдэг ёс журам сураасай л гэж хүсэж байна хэмээн Маргарет хариулав.

- Надад элдэв ёс хэрэггүй. Мөрөн дээрх толгой минь байгаараа байна.

- Эрчүүд эмэгтэй хүний ганц ухааныг тоож анхаардаг юм биш шүү. ЧИ удахгүй залуу насанд
хүрнэ гэж Маргарет хүйтэн хөндий байдлаар өгүүлэхэд,

- Би хүүхэн болохыг хүсэхгүй. Намайг мөрөөр минь байлгаач. Ээ чөтгөр алгад гэж Кейт орь
дуу тавилаа.

- Бүсгүй хүүхэд хараал тавих муухай гэж Маргарет намуухан боловч хатуу чанга байдалтай
хэллээ.

Иймэрхүү яриа Кейтийн явах өдрийг хүртэл үргэлжлэв. Маргарет Дэвидийг ажлаар Лондон
орох ажлын далимд Кейтийг хүргэж өгөөч гэж гуйлаа.

- Кейтийг сургуульд нь аваад очооч. Ганцааранг нь явуулбал хаана очихыг бүү мэд. Тэнгэр
минь гэхэд Дэвид

- Дуртайяа тэгье гэж Дэвид хариулахыг Кейт сонсоод

- Аа тийм бий. Чи манай ээжээс дээргүй юм байна. ЧИ ч бас намайг холдуулах гэж тэсэн
ядаж байгаа юм байна гэхэд Дэвид

- Чи эндүүрч байна, Кейт. Би чамайг тэсэж чадна гэжээ.

Тэд Клипдрифтээс Кейптаунд хувийн вагоноор очиж, дараа нь хөлөг онгоцоор СаутГемптон
орлоо. Аялал 4 долоо хоног үргэлжилжээ. Дэвидтэй хамт байх сайхан ч Кейт омог бардам
болохоор үүнийгээ түүнд хэлсэнгүй.

“Бид хоёр гэрлээгүй ч гэсэн энэ аялал бидний бал сарын аялалтай адил байна” гэж Кейт
боджээ.

Тэнгисээр аялах үед Дэвид өрөөндөө бичиг цаас үзэж цагын ихэнхийг өнгөрүүлнэ. Кейт
буйдан дээр эвхэрч суугаад түүнийг ажиглаж байхдаа дэргэд нь байгаадаа баярлана.

- Чи өдөржин ингэж тоо баримт үзэж суухдаа уйддаггүй юм уу? гэхэд нь Дэвид үзгээ тавьж
өөдөөс хараад

- Энэ бол зүгээр нэг тоо баримт биш. Энэ бол түүх намтар.

- Юун түүх вэ?

- Хэрэв чи үүнийг уншаад ойлгож чаддаг бол бараа таваар худалдаж, худалдан авдаг
компаниудын тухай, бидний ажлыг хийдэг олон хүний түүхийг олж үзнэ. Танай эцгийн
үндэслэн байгуулсан энэ компанийн ачаар дэлхийн олон мянган хүн ажилтай, аяга
хоолтойгоо байдаг юм гэв.

- Би аавтай адил уу?

- Их адил. Адилхан зөрүүд, биеэ даасан байдалтай.

- Би зөрүүд юм уу?

- Чи эрх танхи охин. Чамтай суусан эр их зовно.

Кейт санаашран инээмсэглэв. “Хөөрхий муу Дэвид”

Аялалын сүүлчийн өдөр хоёул танхимд хооллож байхдаа Дэвид шууд л,

- Кейт чи яагаад ийм зөрүүд, гөжүүн байдаг юм бэ? гэж асуулаа.

- Би тийм зөрүүд гэж үү?

- Чи үүнийгээ өөрөө мэддэггүй юм уу. Чи муу эхийнхээ үйлийг үздэг гэхэд нь Кейт Дэвидийн
гар дээр гараа тавиад

- Чиний үйлийг үздэггүй юу? гэхэд Дэвидийн царай улсхийж

- Болиоч. Чамайг ойлгохгүй юм.

- Үгүй. Ганцхан чи л намайг ойлгодог шүү дээ.

- Чи яагаад өөрийн үе тэнгийн бусад охидтой адилгүй байдаг юм бэ?

- Тэдэнтэй адил бол би үхнэ.

- Ээ тэнгэр минь. Чи өөрийгөө сонсож байна уу?

- Чи намайг насанд хүртэл эхнэр авахгүй биз дээ, Дэвид? Би аль болохуйц хурдан том
болохыг хичээнэ. Өөр хүнтэй битгий суу за юу гэхэд нь охины чин үнэн сэтгэлийн үгэнд
Дэвид уярч охины толгойг илээд

- Би эхнэр аваад яг чам шиг охинтой болохыг хүснэ гэсэнд Кейт босон харайж бүх танхим
дүүрэн хашгирав.

- Дэвид Блэкуэлл, чи чөтгөр шулмынд очиж болно хэмээн хашгираад, танхимаас гүйг гарахад
олон хүн хойноос нь гайхан харцгаажээ.

Тэд Лондонд 3 хонов. Минут бүр Кейтэд сайхан байлаа. Машин тэрэг, торон сүлжмэл
палааж, үнэт эрдэнэс зүүсэн хатагтай нар, төв төлөв смокинг цасан цагаан цамцтай эрчүүд.
Кейт Дэвид хоёр “Рицад” үдийн хоол, “Савойяд” оройн хоол иднэ. Кейт Лондоноос явахдаа

“Энд заавал эргэж ирнэ. Дэвид бид хоёр эргэж ирнэ” гэж боджээ. Тэднийг Челтенхемд очиход
захирал авгайг тасалгаандаа хүлээн авлаа.

- Кейтийг сургуульдаа авсанд баярлалаа, хатагтай.

- Охиныг авснаар нөхрийнхөө найзыг баярлуулах гэсэн юм.

Тэгэхэд нь Кейт хууртснаа мэдэв. Энэ Дэвид л Кейтийг холдуулах гэсэндээ энэ дотуур
байртай сургуульд оруулжээ. Кейт үүнд ихэд гомдож уурлаад Дэвидтэй салах ёс хийсэнгүй.
13 -р бүлэг

Челтенхем сургууль тэсэхийн хэцүү ажээ.

Юм бүхнийг дүрэм заавар зохицуулна. Охид өвдөгнөөсөө урт палааж өмсөх ёстой. Хичээл 12
цаг үргэлжилнэ. Захирал авгай Китон бүр багш сурагчдыг атгах шиг болно. Сурагч охид
хожим сурвалжит баян хүний гэргий болох учир зан байдал, ёс зүй, эелдэг харилцааны дүрэм
журмыг багаасаа сурсан байх ёстой ажээ.

Кейт ээждээ захиа бичсэн нь

“Энэ бол сургууль биш шорон юм. Сурагч охид нь жигшмээр. Өөрсдийн хувцас хунар, тэнэг
найз хөвгүүдээс өөр юм ярихгүй. Багш нар ёстой араатнууд. Намайг энд барьж чадахгүй. Би
оргоно...”

Кейт гурван удаа сургуулиас оргож, гурван удаа шившигтэйгээр баригдан сургуульдаа буцаан
хүргэгджээ. Сургуулийн долоо хоног тутмын хурал дээр Кейтийн нэрийг байнга дурьдхад
бөгөөд багш нар нэг нь

- Энэ засрашгүй хүүхэд. Өмнөд Африк руу нь буцаах хэрэгтэй гэж бодож байна гэхэд нь
хатагтай Китон

- Хэцүү хүүхэд гэдгийг зөвшөөрч байна. Харин бид юу чаддагаа үзье. Хэрэв бид мисс
Макгрегорыг хүмүүжүүлж чадвал ерөөсөө хэнийг хүмүүжүүлж чадна гэв.

Ингээд Кейт сургуульдаа үлдэв.

... Сургуулийн дэргэдэх аж ахуйг Кейт гэнэтхэн сонирхох болсныг багш нар гайхах болов. Тэр
аж ахуйд ногоо тарьж, адуу үхэр гахай хонь өсгөдөг байжээ. Кейт бүх чөлөөт цагаа тэнд
өнгөрөөх болжээ. Үүнийг хатагтай Китон мэдээд анхандаа өгүүлшгүй их баярлаж байлаа.

- Харав уу, Тэвчээр хэрэгтэй байсан байна. Кейт явж явж өөрийн дур сонирхолтой зүйлийг
олжээ. Нэг сайхан өдөр газрын эзэнтэй суугаад эр нөхрийнхөө шадар туслагч болно гэж
захирал авгай багш нартаа хэлжээ.

Маргааш өглөө нь захирал авгай дээр аж ахуйн эрхлэгч Оскар Денкер ирж

- Танай сурагч Кейт Макгрегорын талаар ярихаар ирлээ. Тэр охиныг манай аж ахуй руу
явуулахгүй байхыг хүсье гэхэд нь хатагтай Кеитон гайхан

- Та юу ярина вэ? Миний мэдэхээр охин тэнд байх дуртай юм билээ гэлээ.

- Дуртай байлгүй яах вэ. Та түүний чухам юунд дуртайг нь мэдэх үү? Тэр мал адгуусны
эвцэлдэхийг харах дуртай. Эвгүй үг хэлснийг минь уучлаарай...

- Юу гэнээ?
- Үнэн нь энэ, хатагтай Китон. Тэнд тэр мал адгуус юу яаж байгааг харж өдөржин зогсдог.

- Ээ чөтгөр алгад... гэж хатагтай өөрийн эрхгүй хараал тавьжээ.

Дэвид өөрийг нь энэ сургуульд оруулсан гэж Кейт гомддог ч гэсэн түүнийг маш ихээр
санадаг байлаа.

“ Үзэн яддаг хүндээ дурлах нь миний хуьв ерөөл юм байхдаа” хэмээн гуниглан бодно.
Хоригдол хүн шиг суллагдах өдөр хоногоо тоолдог шиг, Кейт бас сургууль тарах өдөр хоногийг
тоолно. Дэвидийг нэг аймшигтай юм хийж орхих бий гэж айна. Кейтийг энэ хөөтэй
сургуульд сурч байх хооронд өөр хүүхэнтэй суучих вий гэж айна.

“ Хэрэв тэгэх юм бол хоёуланг нь ална... Үгүй биз. Зөвхөн эхнэрийг нь л ална. Тэгэхээр
намайг баривчлаад, санаатай зохион байгуулсан хүн амьны хэрэгт цаазаар авах ял заана.
Намайг цаазын тавцан дээр зогсож байхад Дэвид нада хайртайгаа ойлгоно. Гэтэл гэнэт
хожимдсон байна. Тэгээд надаас уучлал гуйна. Тийм ээ Дэвид чамайг би уучилья. Чи хайр
дурлалаа алдсан яасан тэнэг амьтан бэ? Одоо намайг дүүжилж ална. Үүрд баяртай Дэвид ээ
гэнэ. Эцсийн мөчид Кейтийн амийг өршөөнө. Дэвид түүнийг гар дээрээ өргөн өвөрмөц
сонин оронд аваачина. Тэр оронд энэ хөөтэй сургуулийн муухай хоолтой адилгүй сайхан хоол
иднэ”

Кейт Дэвидээс - Удахгүй Лондон орхоор завдан байна. Очоод чамтай уулзана гэсэн захидал
хүлээн авлаа. Тэгээд ухаан санаандаа элдвийг ургуулан бодож, захидалын мөр болгоны
дотроос далд утга эрж эхлэв.

“ Дэвид яах гэж Англил ирж байгаа юм бол? Мэдээжээр надтай уулзах гэж тэр байх. Яах гэж
над дээр ирэх гэв ээ? Яагаад гэвэл надаас хол байж чадахгүйгээ ойлгож. Ирээд намайг яваад
энэ муухай газраас авч явна. Кейт их баяртай байлаа. Өөрийн уран сэтгэмжээр зохион
бодсоноо үнэн гэж итгэн Дэвидийн ирэх өдөр ангийхантайгаа салах ёс хийж

- Миний янаг хүн намайг авахаар ирнэ гэж тэдэнд хэлжээ.

Цаад охид нь Кейтийн үгийг үнэмшиж ядан дуугүй ширтэн байв. Гэтэл Жоржина Кристин
гэдэг охин л

- Кейт Макгрегор чи дахиад л худал хэлж байна гэж дооглов.

- Өөрөө үзээрэй. Надад ухаангүй хайртай дурласан өндөр цэвэрхэн залуу бий...

Дэвид сургууль дээр ирээд бүх охидын нүд ширтэн байгааг гайхав. Охид хоорондоо
шивэгнэлдэн инээлдэж, Дэвидтэй харц тулгархаараа царай нь улайн нүд буруулцгааж байлаа.
Дэвид Кейтийг сэжигтэйгээр харж

- Эд нар урьд өмнө нь эр хүний бараа харж байгаагүй юм уу гэмээр санагдаж байна. Чи эд
нарт миний тухай вм яриагүй биз дээ гэсэнд Кейт

- Мэдээж үгүй. Чи ний тухай ярьж яах юм бэ? гэж Кейт омог бардам хариуллаа.
Хоёул сургуулийн гуанзанд хооллож байхдаа Дэвид гэр орны нь ажил явдал ямар байгааг
Кейтэд яриад,

- Ээж чинь чамд хайртай гэж хэлүүлсэн. Чамайг зун амралтаараа ирэх биз гэж байна лээ.

- Бие нь сайн уу?

- Сайн. Ажил ихтэй байгаа

- Компанийн ажил төрөл ямар байна даа?

Кейт гэнэт ингэж сонирхсонд Дэвид гайхав.

- Маш сайн. Чи юунд асууна вэ?

“Яагаад гэвэл компани хэзээ нэгэн цагт минийх болж, чи бид хоёр хамтран удирдах болно”
хэмээн охин дотроо бодлоо.

Дэвид тавгийг нь хараад,

- Чи юу ч идэхгүй байна гэлээ.

Үнэхээр Кэйт хоол идэх дургүй болсон байв. Дэвидийг “Хамт явцгаая, Кейт ээ. Чи нэгэнт
том хүүхэн болсон байна. Би чамтай учрахыг хүснэ. Хоёул ханилан сууя” гэж хэлэх ид
шидийн гайхамшигт мөчийг хүсэн хүлээж байлаа.

Амтат зууш, кофе авчирч өгсөн боловч ид шидийн гайхамшигт мөч ирсэнгүй. Гагцхүү дэвид
цагаа хараад,

- За миний явах цаг боллоо. Эс тэгвэл галт тэрэгнээс хожимдоно гэж хэлэхэд Кейт өөрийг нь
авч явахгүйг сая ойлгоод хэрдхийн цочив. Энэ өөдгүй новш Кейтийг энэ муухай сургуульд
илжирч байг гэж байгаа юм байна.

Кейттэй уулзсан нь Дэвидэд сайхан санагдав. Кейт ухаантай хөөрхөн хүүхэд. Элдэв ааш
араншин нь зүгээр болсон бололтой. Тэгээд Кейтийн мөрөн дээр гараа тавьж,

- Би явахынхаа өмнө чамд яаж тус болох вэ? гэсэнд Кейт өөдөөс нь эгцлэн харж,

- Чи эндээс эрлэгийн оронд бушуухан очиж тус болоорой гэж нялуун дуугаар хэлээд дээгүүр
харан цааш одоход Дэвид урвайгаад хоцров.

Маргарет Кейтийг санаж байгаагаа мэдэв. Охин нь хэдийгээ гөжүүн ч гэсэн Маргаретийн
хайртай ганц хүн билээ. “Охин минь чадалтай хүүхэн болно. Харин сурвалжит хатагтай
нартай адил биеэ авч явдаг болж сурах хэрэгтэй юм” гэж Маргарет бодлоо.

Кейт зуны амралтаараа гэртээ ирэв.

- Хичээл сургууль ямар байсан бэ? гэж Маргаретийг асуухад Кейт

- Тэр сургуулийг би үзэн ядна. Алхах гишгэх бүрд асран хүмүүжүүлэгч нар байдаг гэхэд нь
Маргарет охиноо шинжин хараад,

- Бусад охид бас тэгж бодох юм уу?

- Тэд нар юугаа мэддэг юм бэ. Та тэднийг харсаан ч болоосой. Ээжийнхээ хормой дор насыг
өнгөрөөсөн амьтад. Амьдралын тухай тэд юугаа мэдэх вэ дээ гэж Кейт эс тоомсорлон
өгүүлэв.

- Хөөрхий амьтан, чамд их хэцүү байсан байхаа хэмээн Маргаретыг хэлэхэд

- Намайг бүү дооглооч. Тэд ямар Өмнөд Африкт ирж үзсэн биш. Араатан амьтныг амьтны
хүрээлэнд л үзсэн байдаг. Тэдний дотор алтны, алмасны уурхай үзсэн хүн байхгүй.

- Тун их юм алдаж дээ, хөөрхийс

- За яах вэ. Та намайг тэдэнтэй адил болсон хойно харамсана бий вий.

- Чи тэдэнтэй адил болж чадна гэж бодож байна уу?

- Үгүй дээ. Та солиоров уу? гээд Кейт жуумалзав.

Кейт гэртээ ирээд хагас цагийн дараа гэхэд зарц үйлчлэгчдийн хөвгүүдтэй регби тоглож
байлаа. Түүнийг Маргарет цонхоор хараад “Би мөнгөө дэмий үрж байна даа. Энэ охин хэзээ
ч засрахгүй юм байна” гэж бодов.

Мөн тэр өдөр оройн хоол идэж байх үед,

- Дэвид энд байгаа юу хэмээн үгийн далимд асууж байгаа байдлаар асуув.

- Австралид яваа. Миний санаж байгаагаар маргаашнаас ирэх байх.

- Баасан гаригт манайд ирж хоол идэх үү? гэхэд нь Маргарет өөдөөс нь хараад

- Магадгүй. Чамд Дэвид таалагддаг юм аа даа, тийм үү? гэсэнд Кейт мөрөө хавчин

- Тийм шиг байна гэлээ.

- Ойлгомжтой гэж Маргарет хэлээд Кейт багадаа Дэвидтэй сууна гэж хэлж байсныг санаад
инээмсэглэв.

- Хүний хувьд надад зүгээр санагддаг. Эрийн хувьд бол би түүнийг үзэн яддаг гэж Кейт
ээждээ хэллээ.

Дэвидийг баасан гаригийг оройн хоолонд ирэхэд Кейт үүд рүү очиж, мэндлэнгүүтээ хүзүүнд
нь асан,

- Чамайг уучилья. Ээ би чамайг мөн их санасан шүү Дэвид ээ. Чи намайг санав уу? гэж
шивэгнэхэд Дэвид

- Санасан гэж Дэвид амыг нь дагуулан хэлснээ “Ай тэнгэр. Би энэ охиныг нээрээ санасан
байна шүү” гэж өөрөө гайхан боджээ.

Дэвид энэ жаал охиныг хэн хэнээс илүү сайн мэднэ. Энэ охин түүний нүдэн дээр өссөн.
Дэвид энэ охинтой уулзах бүрдээ урьд мэдээгүй байсан нэг шинэ юм олдог. Кейт 16
настайдаа бүсгүй хүний төлөв төрхийг бүрмөсөн олж гүйцжээ. Урт үс ньиөрөн дээгүүрээ
намиран унжина. Царай нь хүүхэмсэг маягтай болж, урьд нь ажиглаагүй байсан хүсэл
тачаалын шинж илэрчээ. Кейт ухаан хурц, сэтгэл чанга, үнэхээр хөөрхөн хүүхэн болсон байв.
“ Энэ хүүхэн олон эрийн сэтгэлийг булааж, зүрхийг дагуулна даа” гэж Дэвид бодов. Тэгээд
хоол идэж байх зуур,

- Хичээл сургууль ямар байна даа, Кейт гэж асуусанд

- Маш сайн. Би тэнд их юм сурлаа. Олон найз бүсгүйтэй. Багш нар маань их сайхан улсууд
гэж Кейт дуржигнуулахад Маргарет гайхан мэлрэв.

- Дэвид ээ, чи намайг уурхай авч явах уу?

- Чи амралтаа ийм янзаар өнгөрүүлэх санаатай байна уу?

- Тийм...

Уурхайд очих замд бүтэн өдөр орно. Энэ бол Кейт бүхэл бүтэн өдөр Дэвидтэй байна гэсэн
үг.

- Ээж чинь татгалзахгүй бол...

- Ээжээ та зөвшөөрөөч дээ...

- За. Тэг тэг охин минь. Чамайг Дэвидтэй хамт байхад миний сэтгэл амар байдаг.

Крюгер-Брент лимитедийн алмасны уурхайд хэдэн зуун хүн ажиллаж, ухах, угаах, ялгах ажил
хийнэ. Дэвид Кейт хоёр уурхайн захиралын өрөөнд уурхай үзүүлэхээр авч явахыг хүлээж суув.
Ханын дагуу олон янзын өнгө, хэмжээ бүхий алмасыг үзмэр болгон тавьжээ.

- Энэ бол тус компанийн хамгийн их ашиг орлоготой уурхайн нэг. Вааль голын хөвөөний
алмас хагшаас чулуулгаас олддог. Гадарга нь олон зууны турш элэгдсэн байдаг гэж Дэвид
тайлбарлав.

“Дэвид хэзээ хэзээнээс илүү сайхан харагдаж байна. Ямар сайхан хөмсөгтэй юм бэ” гэж Кейт
бодов.
- Энэ бүх чулууг янз бүрийн уурхайнаас олсон юм. Чулууны гадаад байдлаар гарлыг нь
тодорхойлоход амархан. Жишээ нь энэ байна. Шаравтар өнгөтэй, хэмжээ байдлаар нь
Паардспанаас олдсон юм байна гэж мэдэж болно. “Де Бирсийн” алмас тослог гадаргатай,
арван хоёр талт хэлбэртэй байдаг...

“Дэвид их ухаантай. Юм бүхнийг мэднэ”

- Энэ чулууны тухай бол Кимберлийнх гэж бат итгэлтэй хэлж болно. Учир нь найман талтай
байна. Тэндээс утаат алмасаас эхлээд тув тунгалаг алмас ч олддог. “Энэ захирал Дэвидийг
миний нууц амраг гэж бодож байгаа болов уу? Тийм болов уу гэж найдна”

- Алмасны өнгө нь үнийг нь тодорхойлоход тусалдаг. Өнгийг нь 1-10 хүртэл хуваариар юм уу

тунгалаг цэнхэрээс хүрэнийг хүртэл ялгадаг.

Дэвид аятайхан үнэртэй юм. Эр хүний... таатай үнэр. Би гарт нь хайртай... Энэ гараараа...”

- Кейт ээ...

- Өөв гэж Кейт гэмшсэн байдалтай дуугарав.

- Чи миний хэлснийг сонсож байна уу?

- Сонсолгүй яах вэ. Үг гээлгүй сонсож байна шүү гэж Кейт дургүйцэн өгүүлэв.

Дараачийн хоёр цагийг тэд газар доохи хонгилд өнгөрөөж, дараа нь хамт хооллов. Кейт
хэдийд ийм баяр жаргалтай байснаа санахгүй байлаа.

- Чи цагийг зугаатай өнгөрүүлэв үү хэмээн ээжийгээ асуухад нь Кейт

- Маш сайхан. Уурхай их сонин сайхан газар юм аа гэжээ.

Хагас цагийн дараа Кейт цэцэрлэгчийн хүүтэй барилдаж байхыг Маргарет цонхоор харжээ.

... Дараагийн жил Кейтийн бичдэг захианы өнгө аяс өөр болов. Кейт зүлэг дээрх хоккейн
багийн ахлагч болж, бүгдээс илүү сайн сурч, тэр ч байтугай хэдэн охинтой жинхэнээсээ
үерхэх болсон байна. Тэгээд амралтаараа хоёр найз охиноо дагуулан очихыг зөвшөөрнө үү
гэж эхээсээ гуйжээ. Маргарет үүнд их баярлаж байлаа. Охинтойгоо дахин уулзахыг тэсэж
ядан хүлээнэ. Маргаретийн хамаг хүсэл мөрөөдөл нь газар дээрхи ганц охин үр нь, Кейт нь
юм. “Жеми бид хоёр өнгөрсөн үеийнхэн. Кейт бол ирээдүй. Ирээдүй нь гялалзан байх ёстой”
гэж Маргарет бодно.

Кейтийг амралтаараа ирэхэд нь хэдэн арван залуус уулзах, үерхэхийг хүсэж урьсан боловч
Кейт тэднийг огт тоож анхаарсангүй. Америк явсан Дэвидийг буцаж ирэхийг тэсэж ядан
хүлээж байв. Дэвидийг оройн хоолонд зочилж ирэх үед Кейт түүнийг үүдэн дээрээ хүлээж
байв. Гоолиг сайхан биеийн нь хэлбэрийг тодруулсан хар хилэн бүстэй цагаан палааж өмссөн
байлаа. Уулзаад хичнээн халуун дотно тэврэхийг Дэвид гайхан аяархан түлхэж холдууллаа.
Бүсгүй өөдөөс нь эгцлэг харлаа. Бүсгүйн нүд ямар учиртайг нь мэдэхийн аргагүй нэг сонин
харцтай байхад нь Дэвид эвгүйрхэлээ. Кейтийн барааг харж болох ховорхон мөчид Кейт
дандаа л залуу эрчүүдийн дунд байдаг байлаа. “Энэ залуусын нэг нь хэзээ нэгэн цагт түүний
эр нөхөр болно доо” хэмээн Дэвид бодохдоо Кейтийг хардаж, харамлаж байгаагаа мэдэв.
Тэгж байтал Австрали орох ажил гарлаа. Дэвидийг эргэж ирэхэд Кейт Англи явчихсан
байлаа.

Кейтийг сургуулиа төгсөх жил нэгэн өдөр Дэвид гэнэт хүрч ирэв. Уг нь Дэвид урьдаар
утасдах юм уу, захиа бичиж хэзээ ирэхийгээ мэдэгддэг байсан юм. Энэ удаа Кейтэд
урьдчилан дуулгалгүй шууд хүрээд иржээ.

- Дэвид яасан сонин хүн бэ? гэж тэврэн мэндлээд

- Чи надад хэл өгөхгүй яагаа вэ. Тэгсэн бол би... гээд

- Чамайг аваачихаар ирлээ гэхэд нь Кейт тэвэрсэн гараа алгуурхан тавин холдож нэг мөч
хөдлөлгүй харж зогссоноо

- Юу болоо вэ гээд нуруугаа эгцэллээ.

- Ээжийн чинь бие муу байгаа гэхэд нь Кейт нэг хэсэг дуугүй байснаа

- Би явахад бэлэн гэв.

... Кейт эхийгээ үзээд гайхав. Хэдхэн сарын өмнө уулзхад цоо эрүүл байсан сан. Одоо бол
царай нь цонхийж турж эцээд нүдний гал нь бүдгэрсэн байлаа. Өмөн өвчин ээжийнх нь
биеийг төдийгүй сэтгэлийг нь эвдээ юу гэлтэй. Кейт эхийнхээ хажууд сууж гарыг нь бариад,

- Ээж ээ надад их харамсалтай байна. чөтгөр алгад гэсэнд Маргарет охиныхоо гарыг атган

- Би үхэхэд бэлэн байна, охин минь. Би эцгийн чинь нас барсан тэр өдрөөс хойш үхэхэд бэлэн
байсан. Одоо миний чамд хэлэх зүйл үг тэнэг үг шиг санагдах байх... гээд хэсэг эргэлзснээ

- Аавыг чинь тэнд муу асарч байгаа болов уу гэж сэлгэл зовоод байдаг байсан. Одоо би өөрөө
очиж асарна... гэжээ.

Маргаретийг гурав хоноод оршуулав. Эхийн нь нас барсан явдал Кейтэд хүнд цохилт болж,
сэтгэлд нь арилшгүй ул мөр үлдээжээ. Кейт эцэг ах хоёроосоо хагацсан. Гэвч тэднийг өөрөө
сайн санадаггүй. Эхийн үхэл бол бодит бөгөөд аймшигтай байлаа. Кейт дөнгөж 18 тай орь
ганцаар үлдсэндээ айх боллоо. Кейт эхийнхээ булшин дээр зогсоод нулимсаа барих гэж
байдаг чадлаараа хичээж байхыг Дэвид харав. Гэртээ ирээд Кейт асгаруулан уйлав.

- Ээж минь надад их хайртай байсан. Би даанч дуулгаваргүй муухай охин байсан шүү гэхэд нь
Дэвид аргадан тайтгаруулахыг хичээж,

- Чи их сайн охин байсан шүү гэлээ.

- Би муу эхийгээ үргэлж гомдоож байсан. Одоо ээжийгээ нэг баярлуулахын тулд юугаа ч
хайрлахгүй өгөх сөн. Эзэн тэнгэр минь, чи яах гэж ээжийг минь үхүүлэв дээ...

Кейт нулимсаа барагдтал уйлж, жаахан тайтгарахыг хүлээж байгаад Дэвид,

- Үнэмшихэд хэцүүг гэдгийг мэдэж байна. Гэхдээ гуниг харуусал яваандаа арилдаг. Чамд юу
үлдэх вэ гээч? Баяртай сайхан дурьдатгал үлдэнэ. Чи ээжтэйгээ харилцаж байсан дан сайн
сайхныг дурсах болно.

- Магадгүй. Одоо даанч харамсалтай байна шүү дээ гэлээ.

Маргааш өглөө нь тэр хоёр Кейтийн ирээдүйн тухай ярилцав.

- Чиний гал голомт Шотландад бий шүү гэж Дэвидийн сануулахад

- Үгүй. Тэнд миний гал голомт байхгүй. Төрөл садан л бий. Манай эцгийг наашаа ирэхэд тэд
дооглон инээлдэж байсан. Түүнд аль хэдийнэ нас барсан эхээс нь өөр хүн туслаагүй. Би
тэдэнтэй энээ тэрээ болохыг хүсэхгүй гэж Кейт эрс хэлжээ. Дэвид хэсэг дуугүй бодсноо

- Чи сургуулиа төгсөх бодолтой байна уу? хэмээн асуугаад Кейтийг хариулахаас нь өмнө

- Ээж чинь чамайг сургуулиа төгсөөсэй гэж хүсэх байсандаа гэлээ.

- Тэгвэл би сургуулиа төгсөнө гэж Кейт хариулаад хий гөлийн байснаа

- Чөтгөр алгад гэж нэмж хэлжээ.

- Ойлгож байна, ойлгож байна гэж Дэвид ялдамхан хэллээ.

Кейт сургуулиа онц төгсөж, төгсөхөд нь Дэвид очиж авлаа. Йоханнесбурггаас Клипдрифт рүү
хувийн вагоноор явж байхдаа Дэвид,

- Энэ бүхэн чинийх гэдгийг чи мэдэж байгаа. Энэ вагон, уурхайнууд, компани бүгд чинийх.
Чи их баян бүсгүй. Чи компанийг худалдаад олон саяын хөрөнгөтэй болж болно гэснээ
Кейтийн эгцлэн өөдөөс харж

- Эсвэл үүнийг өөртөө үлдээж болно. Чиний өөрийн шийдэх асуудал гэсэнд Кейт түүнийг
харж инээмсэглээд,

- Би шийддэгээ шийдсэн. Манай эцэг адал явдалд дуртай хүн байсан. Жирийн нэг адал
явдалтан. Би эцэгтэйгээ сайн танилцаж амжаагүй нь харамсалтай. Би энэ компанийг
худалдахгүй. Яагаад вэ гээч? Яагаад гэвэл миний адал явдалд дуртай эцэг өөрийн нь алах
гэсэн хоёр хүний нэрээр компаниан нэрлэсэн юм билээ. Энэ чинь гайхалтай сонин хэрэг. Би
заримдаа аавыгаа Бандатай цуг тэнгисийн хөвөөгөөр манан дунд явж байгааг сэтгэлдээ
ургуулан төсөөлж, харуул манааныхан “Крюгер... Брент...” гэж бие биеээ дуудаж байгааг нь
чихэндээ сонсох шиг болдог. Нойр хулжаад л явчихдаг. Үгүй дээ, би эцгийнхээ байгуулсан
компанийг хэзээч худалдахгүй. Чамайг энэ компанийг удирдаж байгаа цагт... гэхэд нь Дэвид
- Чамайг татгалзахгүй бол би энэ компанийг удирдсаар байх болно гэж аяархан өгүүлэв.

- Би бизнесийн сургуульд орхоор шийдсэн гэхэд нь Девид гайхан

- Бизнесийн сургууль аа? гэж лавласанд

- Энэ чинь 20 дугаар зуун Йоханнесбургт эмэгтэйчүүдийг авдаг бизнесийн сургууль бий

- Гэхдээ...

- Чи намайг мөнгөө яах санаатай байна гэж асуусан. Би мөнгөө аривжуулах санаатай байна
хэмээн Кейт хэлээд инээмсэглэв.
14 -р бүлэг

Бизнесийн сургууль Кейтэд сэтгэл догдлом адал явдал боллоо. “Челтенхем” сургууль
зайлшгүй дайрч гарах нүгэл шиг санагддаг байсан бол энд юм бүхэн ондоо. Хичээл бүр дээр
компанийг толгойлоход тус болох нэг ашигтай юм заавал ярина. Хичээлийн хуваарьт нягтлан
бодох, удирдлага, олон улсын худалдаа, захиргааны ажил орсон байв. Дэвид долоо хоногт нэг
удаа утасдаж хичээл болон сургууль ямар байгааг асууна.

- Маш сайн. Энд надад аймаар таатай байна гэж Кейт хариулана.

Кейт мөрөөдөх нь: “Хэзээ нэгэн цагт Дэвид бид хоёр хамт ажиллладаг болно. хэзээ нэгэн
цагт ажил хийсээр орой болтол саатна. Тэгээд Дэвид өөр рүү нь хараад

- Кейт хайрт минь, би одоо болтол нүдэн балай, тэнэг байжээ. Чи надтай суух уу гэнэ

Тэгээд нэгэн хормын дараа хоёул тэврэлдэнэ.”

Энэ бүхэн хожмын явдал. Одоо бол Кейт их юм сурах. Бизнесийн сургууль хоёр жилийн
хугацаатай. Кейт 20 нас хүрээд Клипдрифтэд эргэж ирэв. Дэвид түүнийг галт тэрэгний
буудал дээр тосож авлаа. Кейт хүзүүнд нь асаж

- Дэвид чамтай уулзсандаа баяртай байна гэсэнд Дэвид тэврээс нь мултарч

- Кейт чиний эргэж ирсэнд баяртай байна гэж сэтгэл зовсон байдалтай өгүүлэв.

- Болох бүтэхгүй юм гараа юу?

- Үгүй. Ердөө залуу авхай нар олны нүдний өмнө эрчүүдийн хүзүүнд асдаггүй юм.

- Ойлголоо. Үүнээс хойш чамайг тэврэхгүй гэлээ.

Харьж явахдаа Дэвид Кейтийг хулгай нүдээр сэм ажиглаж байлаа. Дур булаам, гэнэн хонгор,
гомдомтгой бүсгүй харагдав. Дэвид энэ бүсгүйн гэнэн хонгор сэтгэлийг хэзээч далимдуулан
ашиглахгүй гэж өөртөө ам өгөв.

Даваа гаригт Кейт Крюгер-Брент компанийн өөрийн ажиллах шинэ тасалгаандаа ирлээ.
Тэгээд өөрт нь огт үл ойлгогдох хэлээр ярьдаг ямар нэгэн этгээд хачин ертөнцөд хүрээд
ирсэн юм шиг санагдлаа. Энд өдий төдий хэлтэс, тасаг, дотоод гадаадын олон салбар байх
ажээ. Компанийн үйлдвэрлэн гаргадаг бүтээгдхүүн туйлын олон янз. Компанийн мэдэлд ган
хайлуулах үйлдвэр, мал аж ахуйн ферм, төмөр зам, галт онгоц бий. Гэр бүлийн гол баялаг нь
алмас, алт, цайр, мангани. Эдгээрийг өдөр шөнөгүй олборлож, компанийн төмөр авдрыг
мөнгөөр дүүргэнэ.

Энэ компанид бас эрх мэдэл бий. Асар их эрх мэдэл

Кейт Дэвидийн тасалгаанд сууж байхдаа дэлхий дахины мянга мянган хүний амьдрал хувь
заяанд нөлөөлөх шийдвэр гаргаж байхыг сонсов. Янз бүрийн хэлтэсийн удирдагч нар өөр
өөрийн санал зөвлөгөөг хэлэх боловч Дэвид үүнийг өөрчлөх нь олонтоо.

- Чи яах гэж тэгдэг юм бэ? Эд нар ажиллаж чаддаггүй юм уу? гэж асуухад нь Дэвид,

- Чадна л даа. Харин хэлтэсийн эрхлэгч бүр өөрийн хэлтсийг орчлон ертөнцийн төв гэж
боддог. Тийм ч байх ёстой юм. Өөр нэг хүн бүх юмны байдал төрхийг бүхлээр нь харж,
компанид аль нь илүү ашигтайг шийдэх ёстой. Явцгаая. Хоолны үед чамайг зарим нэгэн
хүнтэй танилцуулья гэж Дэвид хэллээ.

Тэгээд Кейтийг түүний тасалгааны хажууд байдаг хоолны танхимд дагуулан яваачив.
Ширээний ард нэвт шувт харсан сэргэлэн нүдтэй залуу хүн тэднийг хүлээж байлаа.

- Энэ Брэд Рожерс. Брэд ээ, шинэ эзэнтэйгээ танилц, Кейт Макгрегор гэж тэднийг
танилцуулав. Брэд Рожерс Кейтэд гар сунган,

- Миссис Макгрегор тантай танилцсандаа таатай байна гэв.

- Брэд бол манай нууц зэвсэг. Крюгер-Брентийн тухай миний мэдэхийг мэднэ. Хэрэв хэзээ
нэгэн цагт би эндээс явах хэрэг болбол чи сэтгэл зовсны хэрэггүй. Брэд чамд тусална гэж
Дэвид хэллээ.

“Хэрэв хэзээ нэгэн цагт би эндээс явах хэрэг болбол...” гэнээ гээд Кейт балмагдан сандрав.
“Дэвид энэ компанийг хэзээ ч орхихгүй л дээ. Харин яагаад...” Хоол идэж байх зуур Кейт өөр
юу ч бодох чадалгүй бодлогоширч, хоол идэж дууссаны дараа чухам ямар хоол идэснээ
санахгүй байлаа. Хоолны дараа Өмнөд Африкийн байдлыг хэлэлцэв.

- Бидэнд удахгүй бөөн төвөг чирэгдэл учирна. Засгийн газар хүн бүрээс татвар авах журам
тогтоосон гэж Дэвидийг хэлэхэд

- Энэ юу гэсэн үг вэ? гэж Кейт асуулаа.

- Энэ бол хар, шар, индиан өрхийн гишүүн бүр 2 фунтын татвар төлөх ёстой гэсэн шинэ
тогтоол. Энэ бол тэдний сард олдогоос ч илүү байгаа юм.

Кейт Бандаг бодоод аймшигтай юм болно гэдгийг сэтгэлийн зөнгөөр битүүхэн төсөөлөв.
Яриа дараагийн сэдэв рүү орлоо.

Кейт шинэ амьдралдаа бахдаж байлаа. Шийдвэр бүр саяаар тоологдоно. Их бизнесийн ажилд
эр зориг, авхаалж самбаа, хэдийд найр тавих, хэдийд шийдэмгий зүтгэхийг хэлж өгөх зөн
совин хэрэгтэй.

- Бизнес гэдэг чинь мөрийтэй тоглоом гэсэн үг. Бооцоо нь ухаанд багтамгүй их, өрсөлдөгч
нар маань туршлагатай мэргэжилтнүүд. Хоккей гэж байгаа бол чи уран чадамгай тоглох
хэрэгтэй гэж Дэвид хэлжээ.

Үүний тулд юу хэрэгтэйг Кейт мэднэ. Ухаан...

Кейт 21 нас хүрсэн тэр өдөр Крюгер-Брентийн бүх хөрөнгө түүний нэр дээр шилжиж ирэв.
Ийнхүү Кейт уг компанийн хууль ёсны эзэн боллоо.

- Энэ явдлыг тэмдэглэн баярын зоог барья хэмээн Дэвидэд хэлэхэд

- Уучлаарай, Кейт ээ. Би өнөө орой даанч их ажилтай гэжээ.

Кейт тэр орой Дэвидийн зан байдалыг эргэцүүлэн бодож үзлээ. Нүд сохор, чих дулий хүн л
Кейтийн Дэвидэд сэтгэлтэйг анхаарч ажиглахгүй байж болох юм. Кейт ямар нэгэн арга
бодож олох хэрэгтэй.

Кейт том байшинд ганцаараа суудаг. Дэвид тэр хоёр баасан гариг бүр хамт оройн зоог
барьдаг хэвээрээ. Бусад өдөр урьхад заавал нэг шалтгаан хэлээд татгалздаг. Ажлын үед
үргэлж хамт байх боловч Дэвид Кейтийг давшгүй хэрэм босгочихсон юм шиг байдаг.

Компани нь АНУ д галт онгоцны аялалын зам авах талаар хэлэлцээ хийж байлаа.

- Чи Брэдтэй хамт Нью Йорк орж, тэнд гэрээнд гарын үсэг зурахад яасан юм бэ? Чамд сонин
байх болно гэж Дэвид санал болгов.

Кейт өөрөө бол Дэвидтэй хамт явмаар санагдавч нэрэлхээд хэлж чадсангүй. Дэвидгүйгээр
болно. Ер нь Кейт Америк очиж үзээгүй байгаа...

Баримт бичигт гарын үсэг зурах ажил төвөггүй бүтэв.

Кейт Брэд хоёр Детройт, Чикаго, Питсбург, Нью Йорк дахь өөрийн компанийн салбаруудыг
үзэв. Америк орны цар хэмжээ, ард иргэдийн нь эрчим хүчийг Кейт гайхан биширчээ.
Аялалын оргил нь Мэн муж улсын Дарк-Харборт очиж, уран зураач Чарльз Дан Гибсонтой
уулзсан явдал байлаа. Зураачийн гэр Пенобскотын булан дахь Айлсборо хэмээх жижигхэн
арал дээр байдаг. Оройн зоог барихад 12 хүн байсан агаад Кейтээс бусад нь бүгдээрээ энэ
арал дээр байшинтай ажээ. Гибсон ярьсан нь

- Энэ арал их сонин түүхтэй. Олон жилийн өмнө энэ арлын оршин суугчид Бостоноос
жижигхэн хөлөг онгоцоор ирсэн байна. Одоо далайн хөвөөнд тэднийг гэр гэрт нь аваачих
хөнгөн морин тэрэг хүлээж байдаг. Гаталгаа буудлын тэнд гэрэлт цамхаг байхыг харж байна
уу?

- Харж байна.

- Түүнийг харгалзагч нохойтойгоо сахиж байдаг. Хажуугаар хөлөг онгоц өнгөрөхөд нохой нь
хонх цохидог юм гэхэд нь Кейт инээд алдаж,

- Та тоглож байна уу гэв.

- Үгүй, мисс. Хамгийн хачин нь тэр нохой дүлий. Доргиог мэдрэх гэж чихээ газар наадаг юм.

- Танай энэ нээрээ гайхамшигтай арал шиг байна гэж Кейт инээмсэглэв.
- Та маргааш өглөө энэ арлын байдлыг үзэж танилцвал яасан юм бэ?

- Нээрээ тэгвэл... гэж Кейт гэнэт сэтгэл хөөрөв.

Кейт арал дээр байдаг “Айлсборо Инн” хэмээх цорын ганц зочид буудалд шөнийг өнгөрүүлж,
өглөө нь сүйх тэрэг хөлсөлж аваад нэгэн дэлгүүр, төмөр эдлэлийн мухлаг, жижиг зоогийн
танхимаас бүрдсэн Дар-Харбордын төвөөс гарч хэдэн минутын дараа цэцэглэн буй моддын
дундуур мурилзсан замаар явж байлаа. Гудамж нь нэргүй, шуудангийн хайрцаг дээр нэр
бичээгүй байхыг ажиглаад дэлбэгчээс,

- Гудамж, хүний нэргүй ийм газар төөрмөөр юм байна эгсэнд,

- Үгүй шүү. Арлын иргэд бие биеэ сайн таньдаг юм гэхэд нь,

- Ойлголоо гэжээ.

Арлын хойд хэсэгт оршуулгын газар байлаа.

- Энд зогсоно уу гэж Кейт гуйгаад сшйх тэрэгнээс бууж, хуучин оршуулгын газар луу очиж,
булшнуудын хоорондуур явж үзэв.

Том Пендлетон

1794 – 1 - 25

Энэ чулуун дор би бурхны ариутгасан хэвтэрт үүрд нойрсож байна

Үүний хажууд түүний эхнэрийн булш байна.

Жейн Пендлетон

1802 - 2 - 25

Ахмад Уильям Хэтч

1866 – 10 – 30

Бүх далай тэнгисийг тойрч, амьдралын бүх шуургыг туулсан

гэх мэт олон янз бүрийн булшнууд байлаа.

Кейт оршуулгын газраар нам гүм, амгалан тайван байдлыг бахдан хэсэг тэнээд дараа нь сшйх
тэрэг дээр ирж, тэд цаашаа явлаа.

- Энд өвөл ямар байдаг вэ?

- Хүйтэн. Булангийн ус хөлдөж, мөсөөр хучигддаг. Эх газраас наашаа чаргаар ирж болно.
Зандаа бол бярваазаар...
Тэд эрэгт буцаж ирээд эргэн тойрон зэрлэг сарнай, намуун цэцэг ургасан цэцэрлэг бүхий
хоёр давхар сайхан байшин байхыг харав. Нүүрэн талын найман цонхны самбарыг ногооноор
будаж, хаалганы хажууд шимтэглэй цэцэгтэй ваар эгнүүлэн тавьжээ. Энэ байшин яг л
үлгэрээс гараад ирэв үү гэлтэй.

- Энэ хэний байшин бэ?

- Миссис Дребенийх. Хатагтай хэдэн сарын өмнө бурхан болсон.

- Одоо энд хэн суудаг юм бэ?

- Хүн суудаггүй.

- Энэ байшингхудалдах болов уу, та мэдэх үү? гэсэнд дэлбэгч Кейтийн өөдөөс хараад,

- Мэдэхгүй ээ. Худалддаг юм аа ч гэсэн энэ арал дээр суудаг айлуудын хэн нэгний хүү нь
худалдан авна. Энэ арлынхан бид энд гадны хүн суулгах дургүй.

Кейттэй ингэж ярих хэрэггүй байж. Цагийн дараа Кейт үл хөдлөх хөрөнгө худалдах
төлөөлөгчтэй ярилцаж байлаа.

- Дребений байшинг худалдах уу? гэсэнд өмгөөлөгч уруулаа жимийгээд

- Худалдах ч шиг, үгүй шиг гэв.

- Энэ юу гэсэн үг вэ?

- Худалдах нь худалдана. Гэхдээ асууж сурагласан хүн бий.

“Хуучин айлууд байж” гэж Кейт бодоод,

- Танд тодорхой санал тавьсан хүн байна уу?

- Байхгүй. Гэхдээ...

- Тэгвэл би худалдаж явмаар байна.

- Их үнэтэй байшин шүү дээ гэж өмгөөлөгч дурамжхан өгүүлэв.

- Үнийг нь хэлээч.

- 50 000 доллар.

- Би байшинг үзмээр байна.

Байшингийн дотоод байдлыг Кейт гайхлаа. Тэнгис тийш харсан уужуухан зочлох өрөө. Нэг
хана нь тэр аяараа шил. Зочлох өрөөний нэг талд том өрөө, нөгөө талд задгай зуухтай өрөө.
Өрөөний хана туургыг царсан хавтангаар бүржээ. Байшинд номын сан, төмөр зуухтай гал
тогооний өрөө, агуулах, угаалгын байр байна. Доод давхарт нь зарц үйлчлэгчид унтах 6 өрөө,
халуун усны өрөө, дээд давхарт нь арай жижиг 4 унтлагын. Кейтийн санаснаас хавьгүй илүү
том байшин байлаа.

“Дэвид бид хоёр үр хүүхдээ энд өсгөнө” гэж Кейт бодлоо. Цэцэрлэгийн явган зам хувийн
хөлөг онгоцны зогсоол тийш хөтөлжээ. Кейт өмгөөлөгч тийш эргэн,

- Энэ байшинг би авна гэжээ.

Байшиндаа “Хушийн өргөө” гэж нэр өгөхөөр шийдэв. Тэгээд Клипдрифтэд эргэн очиж,
байшин худалдаж авсанаа Дэвидэд ярихийг тэсэж ядан хүлээв.

Гэртээ харих зам зуур Кейтийн сэтгэл санаа учиргүй их догдлон байлаа. Дарк-Харбор дахь
байшин Дэвид Кейт хоёрын ханилан суухын билэг дэмбэрэл байв. Энэ байшин Дэвидийн
санаанд яг таарна гэдгийг тэр мэдэж байлаа.

Кейт Бред хоёр Клипдрифтэд орой эргэж ирээд ирсэн даруйдаа Кейт ажил дээрээ шууд очиж,
Дэвидийн ажлын өрөөнд яаран орлоо. Ширээний ард ажил хийгээд сууж байгаа Дэвидийг
хараад Кейтийн санаа сэтгэл булгилав. Дэвидийг хичнээ санаснаа одоо л ойлголоо. Дэвид
босоод,

- Орон гэртээ тавтай морилно уу, Кейт гээд бүсгүйг ам нээх завдалгүй

- Шинэ сониноо чамд хамгийн түрүүнд дуулгах гэсэн юм. Би эхнэр авах гэж байгаа гэлээ.
15-р бүлэг

Энэ явдал бүтэн хагас сарын өмнө огт санамсаргүй болсон аж.

Дэвидэд их хэцүү өдөр байлаа. Дээр нь бас алмас худалдан авдаг америк баяны дотнын найз
нөхөр Тим О Нил утасдаж, хамт оройн хоол идэхийг урьжээ. Дэвид жуулчидыг зугаацуулж
байх зав чөлөө байсангүй. Гэхдээ баян харилцагчийг гомдоож болохгүй байлаа. Кейтийг гуйя
гэхэд Брэд Рожерстой хамт Америкт яваа.

“Одоо яая гэх вэ” гэж Дэвид бодоод Тим О Нилд утасдаж, хамт оройн зоог барихыг урив.

- Би энд охинтойгоо ирсэн. Охиноо аваад очвол та татгалзахгүй биз дээ? гэж О Нил асуухад
Дэвид хэдийгээр оройг хүүхэдтэй хамт өнгөрүүлэх дургүй байсан ч гэсэн

- Юунд татгалзах вэ гэж эелдэг хариулжээ.

Тэд “Гранд” отелийн хоолны танхимд уулзав. Дэвидийг очиход тэд хэдийн ширээний ард
суусан байлаа. О Нил бол тавиад насны буурал үстэй, нүдэнд дулаахан эр байлаа. Охин
Жозефин нь дэвидийн урьд хожид үзээгүй туйлын хөөрхөн хүүхэн байлаа. Нас гуч орчим, бие
цогцос гоц сайхан, алтан шаргал үстэй цэнхэр нүдтэй...

- Хожимдсоныг минь уучилна уу. Хамгийн сүүлийн хоромд яаралтай ажил гараад...

Жозефин залуу эрд хүчтэй сэтгэгдэл төрүүдсэндээ баярлан бахдан,

- Тийм ажил голдуу сонирхолтой байдаг. Мистер Блэкуэлл таныг их том хүн гэж манай аав
хэлсэн шүү... гэлээ.

- Арай ч тийм биш ээ. Намайг зүгээр Дэвид гэж дуудана уу... гэсэнд бүсгүй толгой дохиж,

- Сайхан нэр байна. Хүч чадлын илэрхийлэл гэв.

Хоол дуусах яагаа ч үгүй байхад Жозефин бол хөөрхөнөөр үл барам, ярьж байгаа хүнийхээ
сэтгэлийг татах увидастай дур булаам бас ухаалаг хүүхэн юм гэж Дэвид мэдлээ. Дэвид өөрөө
бас хүүхэнд тоогдосноо ажиглажээ.

Жозефин түүний амьдрал байдлыг сонирхон урьд хэний асууж байгаагүй юмыг асууна. Зоог
барьж дуусах үед Дэвид Жозефинд бараг дурласнаа мэдэрлээ.

- Танайх хаана байдаг вэ? гэж О Нилээс асуув.

- Сан-Францискод.

- Та нар хэдийд буцах вэ хэмээн Дэвид аль болох хайхрамжгүйгээр асуув.

- Ирэх долоо хоногт

Жозефин бүсгүй Дэвидийн өөдөөс харан инээмсэглэж

- Клипдрифт хот миний төсөөлж байгаа шиг сонин сайхан санагдвал энл жаахан байя гэж
аавыг ятгаж болох юм гэхэд нь Дэвид,

- Энэ хот таны урмыг хугалахгүй байлгах талаар хичээе. Та алмасны уурхайд орж үзэх
сонирхолтой байна уу? гэсэнд хүүхэн инээмсэглэн,

- Байлгүй яах вэ. Баярлалаа гэлээ.

Урьд томоохон зочдод уурхай үзүүлэхэд Дэвид өөрөө дагалдан авдаг байснаа энэ үүргийг аль
хэдийнэ доод шатны хүмүүст шилжүүлсэн юм Одоо тэгээд,

- Та нар маргааш завтай юу? гэж асууж буй өөрийн дууг сонсоод өөрөө гайхах шиг болов.

Маргааш өглөө хэдэн хүнтэй уулзалттай байсан бөгөөд энэ бүгд онц чухал биш мэт
санагдлаа.

Дэвид О Нилтэй хамт уурхайн цооногоор 1200 футийн гүнд орлоо. Хонгил нүх нь өндрөөшөө
6 фут, уртаашаа 20 фут. Дотроо дөрвөр хэсэгтэй. Нэг нь мөргөцөг, хоёр нь алмастай хөрсийг
дээш гаргахад, нэг нь ажилчдыг зөөхөд зориулагдсан байна.

- Алмасыг яагаад кратаар хэмждэг юм бэ? Би гайхаад байдаг гэж Жозефин өгүүлэхэд,

- Уг нь эвэрлэг модны үрийг крат гэдэг л дээ. Жин нь тогтмол байдаг юм. Нэг крат нь 200
миллиграмм юм гэж Дэвид тайлбарлав.

- Гайхалтай юм гэж Жозефин хэллээ.

Зөвхөн алмасыг хэлсэн юм уу, битүү утга агуулсан юм уу Дэвид мэдсэнгүй. Жозефиныг
дэргэдээ байхаар залуу эрийн тархи мэнэрэн хөлчүүрхэнэ. Бүсгүйг харах бүрдээ амьсгаа нь
давхцана.

- Та нар хотын ойр орчныг үзвэл зүгээр. Та нарыг маргааш завтай бол би дуртайяа дагалдан
явах болно гэж Дэвидийн хэлэхэд Жозефин эцгийгээ юм хэлж амжихаас өмнө ам өрсөн
зөвшөөрөн,

- Тэгвэл маш сайхан байна гэлээ.

Дэвид өдөр бүр Жозефин болон түүний эцэг хоёртой уулзаж, өдөр ирэх тусам тэр хүүхэнд
хүчтэй дурлаж байлаа. Жозефин хүүхэн Дэвидийг илбэдчихэв үү гэмээр...

Үүнийг маргааш орой Дэвид О Нилийг охинтой нь оройн зоогт урихаар очиход О Нил,

- Өнөөдөр би жаахан ядраад байна, Дэвид. Намайг та хоёртой хамт явахгүй бол гомдохгүй
биз дээ? гэхэд нь Дэвид баярласнаа нууж ядан
- Юунд гомдох билээ дээ гэлээ.

Жозефин цаанаа их учиртай инээмсэглэн,

- Чамайг уйдуулахгүй байхыг хичээе гэв. Дэвид Жозефиныг саявтар нээгдсэн зоогийн
танхимд дагуулан очив. Танхим пиг дүүрэн хүниэй байсан боловч зохицуулагч нь Дэвидийг
таниад даруй ширээ олж тэднийг суулгав. Тайзан дээр гурвал хөгжимчин жааз ая тоглоно.

- Бүжиглэх үү? гэж Дэвидийг урихад

- Дуртайяа гэж бүсгүй хариулав.

Хэдэн хормын дараа хүүхний биеийн халуун илчийг мэдэрч,

- Жозефин, би чамд хайртай гэж чихэнд нь шивэгнэхэд хүүхэн уруул дээр нь гараа тавьж,

- Хэрэггүй, хэрэггүй Дэвид ээ. Гуйя... гэлээ.

- Яагаад?

- Яагаад вэ гэвэл би чамтай суухгүй.

- Чи надад хайртай юу гэж асуухад хүүхэн нүдээ жартайлган инээмсэглэж,

- Би чамд ухаангүй хайртай. Ил биш байна уу?

- Тэгээд яасан юм?

- Яагаад гэвэл би энд, энэ Клипдрифтэд амьдарч чадахгүй. Солиорно.

- Туршаад үзвэл яасан юм бэ?

- Тэгмээр байна санж. Гэсэн ч юу болж дуусахыг би мэдэж байна. Хэрэв би чамтай суугаад
энд үлдэх юм бол муухай ааштай яншаа эхнэр болж, чи бид хоёр удахгүй бие биенээ үзэн
ядна. Оройтоогүй дээр нь мөр мөрөө харсан нь дээр,

- Би чамаас салахыг хүсэхгүй гэсэнд хүүхэн Дэвидийн нүдийг эгцлэн харж, бүх биеэрээ
түүний биенд наалдан

- Чи Сан-Францискод очиж суувал яасан юм бэ, Дэвид гэлээ. Даанч Дэвидэд тийм боломж
байсангүй.

- Би тэнд очоод юу хийх вэ?

- Маргааш өглөө уулзья. Чи аавтай яриад үз...

Маргааш өглөө нь Дэвидийг очиход О Нил,

- Та хоёрын өчигдрийн ярианы тухай Жозефин надад ярьсан. Та хоёр бэрхшээл тохиолдсон
шиг байна. Надад нэг санал бий л дээ. Үүнийг чи сонирхвол асуудлыг шийдвэрлэж болно.

- Таны үгийг анхааралтай сонсоё, эрхэм ээ.

О Нил цүнхнээсээ ямар нэгэн зураг гаргаж ирээд,

- Хүнсний зүйл хөлдөөх талаар чи хэр мэдэх вэ?

- Огт мэдэхгүй.

- Хүнсний зүйлийг муудахаас сэргийлэн Америкт анх 1865 онд хөлдөөж эхлэсэн юм. Үүний
дараа тун удалгүй хүнсний зүйлийг тээвэрийн замд муутгахгүйгээр хол зайд тээвэрлэх талаар
асуудал тулгарсан. Тэгээд хөргүүртэй галт тэрэгний чингэлэг бий болсон л доо. Харин хэн ч
хөргүүртэй ачааны машин зохиож чадсангүй гээд О Нил цүнхээ пад пад алгадан,

- Одоо хүртэл тэр шүү дээ. Би саяхан энэ нээлтийн эрхийн бичгийг худалдаж аваад байна.
Энэ нээлт бол бүх хүнсний зүйлийн үйлдвэрлэл болон тээвэрлэлтэд эргэлт гаргана. Дэвид
ээ... гэхэд Дэвид зургийг үзэж,

- Үүнийг би огт ойлгохгүй юм шиг байна, мистер О Нил.

- Тэр хамаагүй ээ. Надад техникийн зөвлөх хэрэггүй. Энэ цаасан дээр бүр юм бий. Тэгээд ч
техникийн зөвлөхүүд надад олон бий. Энэ зүйлд мөнгө оруулж, уг ажлыг гартаа авах хүн л
хэрэгтэй байна. Энэ бол хоосон санаа огт биш. Би хоол хүнсний салбарын олон олон
мэргэжилтэнтэй ярилцсан. Амжилт нь бидний сананаас давна. Надад чам шиг бизнес мэддэг
хүн л хэрэгтэй байна.

- Компанийн захиргаа нь Сан-Францискод байх юм гэж Жозефин нэмж хэллээ. Дэвид

сонсоноо эргэцүүлэн ухаарахыг хичээв.

- Танд эрхийн бичиг бий гэв үү?

- Бий. Би үйлдвэрлэж эхлэхэд бэлэн болж байна.

- Энэ зургийг чинь аваад зарим нэгэн хүнд үзүүлэхийг татгалзахгүй биз?

- Юунд татгалзах билээ дээ.

Дэвид юуны өмнө О Нилийн тухай лавлан магадлав.

О Нил Сан-Францискод их нэр хүндтэй хүн ажээ. Тэрээр Берклигийн их сургуулийн нэгэн
тэнхимийг удирддаг, тэнд түүнийг маш ихээр үнэлдэг байна. Хүнсний зүйл хөлдөөх талаар
Дэвид огт юу ч мэдэхгүй ч үүнийг судалж үзэх бодолтой байлаа.

- Би тав хоноод ирнэ, хонгор минь. Чи эцэгтэйгээ намайг иртэл хүлээж чадах уу?
- Хэдий болтол ч хүлээхэд бэлэн байна. Би чамайг санана даа гэж Жозефин хэлэхэд

- Би ч бас гэж Дэвид хэлсэн нь аргагүй үнэн үг байлаа.

Дэвид тэндээс шууд галт тэргээр Йоханнесбург орж, тэнд Өмнөд Африкийн мах
боловсруулах томоохон үйлдвэрийн эзэн Эдвард Фредериктэй уулзахаар болзож тохирсон
байжээ. Дэвид түүнд зургийг өгч,

- Үүнийг үзээд бодлоо ний нуугүй хэлээч. Таны саналыг сонсмоор байна. Энэ ашигтай юм уу,
үгүй юу мэдэх хэрэгтэй байна гэсэнд

- Хүнсний зүйлийг хөлдөөх хөргүүртэй машин хэрэгтэй эсэх тухай би юу ч мэдэхгүй. Гэсэн ч
манайд энэ тухай мэддэг хүмүүс бий. Үдийн хоолны дараа ирээрэй. Таныг мэргэжлийн
хүмүүстэй танилцуулья гэжээ.

Дэвид өдрийн дөрвөн цагт үйлдвэр дээр эргэж очоод чухам ямар үг сонсох гэж байгаагаа
өөрөө мэдэхгүй ч догдлон сэтгэл нь тогтворгүй байлаа. Хагас сарын өмнө түүнийг “Крюгер-
Брент” ийг орхино гэж хэн нэгэн хүн хэлсэн бол хөх инээд нь хүрэх байсан биз ээ. Тэгээд
Дэвидийг Сан-Франциско дахь хүнсний бүтээгдхүүний үйлдвэрийн жижиг компани
толгойлохыг хүснэ гэж хэлбэл бүр их инээх байсан биз ээ. Жозефин О Нил гэдэг нэгэн хүн
байгаагүй сэн бол ерөөсөө ийм боломж байхгүй сэн.

Дэвидийг ороход өрөөнд Эдвардаас гадна хоёр хүн байлаа.

- Энэ доктор Кроуфорд, мистер Кауфман. Дэвид Блэкуэлл танилцагтун.

Тэд гар барилцав. Үүний дараа Дэвид тэвчээр алдан шууд эхлэлээ.

- Эрхмүүд миний авчирсан зургийг үзэв үү? гэж асуулаа.

- Тэгсэн, мистер Блэкуэлл. Бид зургийг анхааралтай үзэж судалсан гэж доктор Кроуфорд
хариулав. Дэвид гүнзгий амьсгаа аван санаа алдаад

- За тэгээд гэлээ

- Миний ойлгосноор энэ шинэ нээлтэд Амеркид эрхийн бичиг авсан юм шив дээ?

- Тэр тийм ээ...

- За тэр ч яах вэ. Энэ эрхийн бичиг авсан хүн учиргүй их баяжина даа гэхэд Дэвид толгой
дохилоо. Дэвидийн дотоод сэтгэл их догдлон зөрчилдөнө.

- Үүнийг аугаа нээлттэй адилтгаж болно. Үүнээс өмнө яагаад нэг ч хүн үүнийг бодож
олсонгүй вэ вэ гэж гайхмаар энгийн хялбар юм.

Дэвид учраа олохгүй болжээ. Сэтгэлийнхээ угт бол өөрөө шийдэх хэрэг гарахгүй болов уу
найдаж байсан сан. Хэрэв энэ санал ашиггүй зүйл байсан бол Дэвид Жозефинхийг Өмнөд
Африкт үлдээч гэж ятгаад үзэх бодолтой байсан сан. Гэтэл О Нилийн үг үнэн байжээ. Энэ
шинэ нээлт үнэхээр эргэлт гаргаж чадах байлаа. Одоо Дэвид шийдэх ёстой болов.

Буцах замын турш энэ бодол толгойноос гарсангүй. Дэвид хэрэв зөвшөөрөх юм бол Крюгер
Брентийг орхин, өөрийн мэдэхгүй шинэ бизнесийг Амеркид эхлэх ёстой. Дэвид өөрөө
Америк хүн боловч Амеркийг эх орноо гэж үздэггүй. Одоо дэлхийн нэгэн хүчирхэг компанид
дээгүүр албан тушаал хашиж байгаа. Тэрээр өөрийн ажилдаа дур сонирхолтой. Жеми
Макгрегор, Маргарет нар Дэвидэд их дотно сайн байсан сан. Кейт ч бас. Дэвид Кейтийн
төлөө хар бага наснаас анхаарал тавьж ирсэн. Макгрегорууд Дэвид гэр бүл байжээ. Дэвидийг
харсаар байтал Кейт халтар царайтай гөжүүн охин байснаа дур булаам сайхан хүүхэн болж
өссөн. Кейтийн бүх амьдрал түүний нүдний өмнө зургийг цомог шиг ил байсан. Хэдийд ямар
ааш гаргахыг мэдэхүйеэ бэрх, гомдомтгой охин нүдэнд нь үзэгдэнэ.

Галт тэрэг Клипдрифтэд ирэх үед Дэвид нэгэнт шийдсэн байлаа.

Дэвид Крюгер Брентийг орхино...

... Дэвид галт тэрэгний буудал дээрээс шууд Гранд отель очиж, О Нилийн сууж байсан давхар
луу гүйхээрээ гарлаа. Жозефин үүд тайлж өгөөд,

- Дэвид гэж уулга алдав.

Дэвид Жозефинийг чанга тэврэн үнсэхдээ хүүхнийг хөвчин биеэрээ өөрт нь наалдахыг
мэдрэв.

- Дэвид минь, би чамайг их санасан гээч... Одоо чамаас дахин салахгүй гэхэд нь

- Салахын хэрэг байхгүй. Би Сан-франциско орно гэж Дэвид яаралгүй хэллээ.

Америкаас Кейтийн буцаж ирхийг Дэвид тэсэж ядан хүлээж байв. Одоо нэгэнт
шийддэгийгээ шийдсэн хойно Жозефинтэй хурдаг гэрлэж, шина амьдралаа аль болохуйц
түргэн эхлэхийг яарч байлаа.

Одоо тэгээд Кейттэй уулзангуутаа,

- Би эхнэр авах гэж байгаа гэж яаран хэлсэн нь энэ ажээ.

Кейтийн чих дүнгэнээд Дэвидийн ярьж байгааг сонсохтой үгүйтэй боллоо. Гэнэт хамаг
биеийн тэнхээ алдарч ширээний захаас шүүрэн авлаа. “Үгүй ээ, энэ байж болшгүй хэрэг. Би
үхмээр байна. Ай эзэн тэнгэр минь надад үхэл хайрлаач” гэж бодов. Бие, сэтгэлийнхээ ахмаг
тэнхээ хүчийг шавхан нэг муу инээмсэглэх аядан,

- Тэр хүүхнийхээ талаар хэлээч, Дэвид. Тэр азтай хүүхэн хэн бэ гэж асуухдаа өөрийн дууг
хичнээн тайван байгааг гайхлаа.

- Нэрийг нь Жозефин О Нил гэдэг. Энд эцэгтэйгээ цуг ирсэн. Чамайг түүнтэй дотно
нөхөрлөнө гэж найдаж байна. Их сайн хүүхэн.
- Чиний дурласан хүүхэн тийм л байх ёстой доо, Дэвид.

Дэвид хэсэг түгдэрснээ,

- Бас нэг юм байна, Кейт ээ. Би компаниа орхих хэрэгтэй болж байна.

Кейтийн хөл доорхи газар цөмрөх шиг санагдлаа.

- Чи эхнэр авлаа гээд компаниа орхих албагүй шүү дээ гэхэд нь Дэвид

- Учир нь үүнд байгаа юм биш ээ. Жозефинийн эцэг Сан-Францискод шинэ бизнес эхлэх гэж
байгаа юм. Би түүнд хэрэгтэй.

- Тэгэхлээр ... тэгэхлээр чи Сан-францискод очиж суух юм уу?

- Тэгнэ. Эндхийн ажлыг Бред Рожерс зовлонгүй амжуулж чадна. Би түүнд компанийг
удирдахад туслах сайн мэргэжилтэн олж өгнө.

- Тэгнэ л дээ. Чи тэр хүүхэнд тун их дурласан бололтой. Би чиний сүйт бүсгүйтэй хэзээ
танилцах вэ гэхэд нь Дэвид инээмсэглэн

- Чамайг завтай бол өнөө оройн хоол цуг идье гэсэнд Кейт

- Би завтай гэлээ.

Кейт ганцаараа үлдсэн хойноо ёстой л нэг мэлмэрүүлэн уйллаа.

Тэд дөрвүүлээ Макгрегорынд гэрт оройн зоог барив. Кейт Жозефинийг үзээд гайхан мэлрэв.
“Ай тэнгэр. Дэвид энэ хүүхэнд дурлах нь үнэн юм” Жозефин үнэхээр дур булаам хөөрхөн
хүүхэн байлаа. Түүний дэргэд Кейт өөрөө царай муутай, эв хавгүй хүүхэн шиг санагдав.
Жозефин юм ярихад тааламжтай цэцэн цэлмэг, ухаалаг хүүхэн юм. Энэ хүүхэн Дэвидэд
дурласан нь мөн эргэлзээгүй. “ Ээ чөтгөр алгад”

Хоолны үеэр Тим О Нил өөрийн шинэ компанийн тухай Кейтэд ярив.

- Их найдлагатай юм байна гэж Кейт хэлэв.

- Крюгер Брентийн дэргэд юухан байхав дээ, мисс Макгрегор. Бид энэ ажлыг цоо шинээр
эхлэх гэж байна. Гэсэн ч бид Дэвидээр туслуулан хөл дээрээ хурдан зогсож чадна гэж найдаж
байна.

- Дэвидтэй хамт та нар амжилт олох нь дамжиггүй гэж Кейт нотлов.

Энэ үдэш Кейтэд ёстой нэг тамын зовлон байлаа. Кейт нэгэн зэрэг сэтгэлтэй хүнээ, Крюгер
Брентийн маш чухал мэргэжилтнээ алдав. Хоолны үед ярих хэлэх юмаа эрх бтш олж байсан
боловч дараа нь юу ярьсанаа санахгүй байлаа. Гагцхүү Дэвид Жозефин хоёрын өөд өөдөөсөө
харахад амиа хорломоор санагдаж байсныг л санаж байлаа. Зочид буудалд очих замдаа
Жозефин

- Энэ хүүхэн чамд дурласан юм байна, Дэвид ээ гэхэд нь Дэвид инээмсэглэн

- Кейт үү? Бид журмын сайхан анд нөхөд. Бүр бага балчир байхаас нь би мэдэх юм. чи түүнд
их таалагдсан гэжээ.

Жозефин инээмсэглэн “Энэ эрчүүд ийм гэнэхэн улс шүү” гэж бодож байлаа.

Тим О Нил Дэвид хоёр маргааш нь уулзав.

- Би эндэх ажил явдалаа янзалж дуусхад хоёр долоо хоног хэрэгтэй байна... Би бидний
хөрөнгө оруулалт санхүүжүүлэлтийн талаар бодож үзээд хэрэв бид ямар нэгэн том компанид
хандах юм бол тэр компани биднийг залгиж орхиод бидэнд өчүүхэн хувь өгнө гэсэн
дүгнэлтэд хүрлээ. Ийм болохоор бид манай үйл ажиллагааг өөрсдөө санхүүжүүлэх хэрэгтэй
болов уу даа. Эхний үед бидэнд барагцаагаар 80 мянга хэрэгтэй болно. Надад 40 мянга бий.
Тэгэхээр бидэнд дахиад 40 өөд мянга хэрэгтэй...

- Надад 10 аад мянга бий. Манай ах надад таван мянгыг бол зээлдүүлж чадах байх гэж О Нил
хариулав.

- Ингээд цаана нь 25 мянга үлдэж байна. Үүнийг банкнаас зээлэхийг хичээе гэсэнд,

- Бид одоохон Сан-Франциско орж ажилдаа орьё гэж О Нил хэллээ.

Ингээд хоёр хонгийн дараа Жозефин аавтайгаа цуг Америк руугаа буцлаа.

- Тэдний Кейптаун хүртэл миний галт тэргээр явж болно шүү гэж Кейт хэлэхэд

- Энэ чинь их эелдэг найртай санал байна гэж Дэвид хариулав.

Жозефин явснаас хойш Дэвид сэтгэлийн тав алдаж, Сан-Франциско явахын түс боллоо.
Дараагийн хэдэн хоног тэд Бред Рожерст туслах сайн мэргэжилтэн хайлаа. Дэлгэрэнгүй
жагсаалт хийж Кейт Дэвид Бред гурав хүн бүрийг хэдэн цагаар нарийвчлан хэлэлцэв.

- Тэйлор техникийн талаар сайн мэргэжилтэн. Харин удирдлагын талаар тааруухан...

- Симмонсын хувьд юу гэж бодож байна даа?

- Зүгээр хүн. Даанч ийм ажилд арай бэлэн биш. Дөрөв таван жил хүлээг гэж Бред хэлэв.

- Бэблок ямар вэ?

- Таарах хүн анхааралдаа авья.

- Харин Персон?
- Компанид эцсээ хүртэл үнэнч биш болов уу? Өөрийгөө их боддог хүн шиг санагддаг гэж
Дэвид хэлснээ Кейтийг гэнэт орхих болсондоо харамслаа.

Тэр гурав жагсаалтыг үргэлжлүүлэн хэлэлцлээ. Олон өдөр үргэлжилсэн энэ мэтийн ярианы
эцэст Бред Рожерстой хамт ажиллах дөрвөн хүнийг шилж авлаа. Энэ дөрөв дөрвүүлээ
гадаадад ажилладаг. Тэдэнд ярилцах урилга явууллаа. Эхний хоёр ярилцлага амжилттай
боллоо. Гурав дахь хүнтэй ярилцах байсан өглөө Дэвид зэвхий цагаан царайлан Кейтийн
өрөөнд орж ирээд

- Миний оронд хүн авсан уу? гэж асуухад нь Кейт сэтгэл түгшин өөдөөс нь хараад

- Ямар нэгэн юм болоо юу Дэвид гэсэнд

- Би... би... гээд зөөлөн сандал дээр лаг хийтэл сууж

- Нэг хэрэг явдал болоод байна гэв.

Кейт ширээний араас босож дэргэд нь ирээд,

- Юу болсныг ярил даа гэж намуухан дуугаар асуув.

- Тим О Нилээс захиа авлаа. Шинэ нээлтийн эрхийн бичгээ худалдчихсан байна...

- Чи юу хэлэх гээд байна аа?

- Хэлэх гэснээ хэлж байна. Эрхийн бичгээ худалдаад дээрээс нь 200 000 мянган доллараас
хувь авч байна уу гэсэн Чигагогийн мах боловсруулах “Три Стар” компанийн саналыг О Нил
хүлээн авсан байна. Тэр компани О Нилд ерөнхий захиралын суудал амласан байна. О Нил
ийм явдал болсонд харамсаж байна гээд ийм хорхой хүрэм сайхан саналыг татгалзаж
чадсангүй гэж бичсэн байна хэмээн Дэвид харамсан ярилаа.

Кейт үүнийг анхааралтай сонсоод,

- Жозефин яасан бэ, Юу гэж бичсэн байна? Лав эцэгтээ уурласан байх даа гэсэнд,

- Жозефинээс ч захиа ирсэн. Намайг Сан-Францискод очихтой зэрэг хурим хийнэ гэнэ.

- Чи хэзээ явах гэж байна? гэсэнд Дэвид дэлбэрч

- Үгүй, Би явахгүй. Урьд нь бол явах байлаа. Би аугаа их компани байгуулах байлаа. Тэгтэл
тэднүүс мөнгөнд шунажээ гэв.

- “Тэд” гэж чи хүн хилсдүүлж байгаа юм биш үү? Уг нь...

- О Нил охиныхоо зөвшөөрөлгүйгээр хэзээ ч ийм ажил хийхгүй байсан.

- Би юу хэлэх ээ мэдэхгүй байна Дэвид ээ...

- Энд яриад байх ч юм алга. Түүнээс гадна би энэ насандаа хамгийн том алдаа хийх шахжээ.

Кейт өөрийн ширээ рүү явж очин мэргэжилтэн нарын жагсаалтыг аваад яаралгүй урж хаялаа.

...Дэвид О Нилээс захиа авсанээс хойш 6 сар өнгөрөв. Энэ бүх үеийн турш Кейт Дэвид хоёр
хамт ажилласаар байлаа. Ажилдаа дарагдан оройд хоёулхнаа ажил дээрээ үлдэх нь олонтоо.
Кейт аливааг Дэвидийн санаанд тааруулахыг хичээн, чадах ядахаараа тал засахыг хичээнэ.
Гэтэл Дэвидийн хөшүүн сэтгэлийг хөдөлгөж чадахгүй байлаа. Эцэст нь бүр тэсгэл алдлаа.

Дэвид тэр хоёр эрдэс баялагийн нэг шинэ орд үзэхээр Риод онгоцоор очлоо. Одоо тэгээд
Кейтийн өрөөнд хоол идээд дараа нь данс тооцоо бодлоо. Кейт биед эвтэйхэн кимоно өмсөв.
Дэвид тооцоо хийж дуусан нэг сунайж

- За өнөөдөрийн хувьд ажил ингээд гүйцээ. Явж унтая

- Гашуудалаа тайлах болсон юм биш үү, Дэвид ээ? гэж Кейт тайван дуугаар шууд хэлэхэд
Дэвид өөдөөс нь гайхасхийн харж,

- Юун гашуудал вэ гэлээ

- Жозефин О Нилийн хойноос гашуудахаа...

- Би түүнийг өөрийг амьдралаас авч хаясан.

- Тийм юм бол одоо хэвийн ажиллаач дээ

- Чи намайг яа гээд байгаа юм бэ? хэмээн Дэвидийн дуу ширүүсэв.

Тэгэхэд нь Кейтийн уур гэнэт шатав.

Дэвидийн нүдэнд балай байдлыг бүр тэсэхээ больжээ. Хичнээн жил үүнийг хүлээж дэмий
өнгөрөөв дөө.

- Яахыг чинь би хэлээд өгье. Намайг үнс

- Юу

- Чөтгөр алгад Дэвид намайг үнс. Би чиний эзэн гээд дэргэд нь очин

- Намайг үнс гээд Дэвидийн хүзүүгээр нь тэврэн уруулд нь уруулаа хүргэв. Дэвид эхлээд
тэврээс нь мултрах гэж зүтгэн эсэргүүцэж байснаа удалгүй Кейтэд бууж өглөө. Дэвид
Кейтийг тэврэн биедээ шахан нааж

- Кейт гэж шивэгнэлээ.

- Намайг хэзээ ч гуйхгүй юм болов уу гэж бодож байлаа шүү хэмээн Кейт чихэнд нь бас
шивэгнэлээ.
... Тэр хоёр бүтэн хасаг сарын дараа гэрлэв. Клипдрифтэд урьд хожид хэзээ ч ийм нижгэр
хурим найр болж байсангүй. Эхлээд сүмд ураг холбох ёслол хийж, дараа нь хотын захиргаанд
хүлээн авалт хийлээ. Янз янзын хоол дараа дараагаараа ирж, виски, шампань дарсыг авдар
авдараар нь сөгнөж, найрал хөгжим эгшиглэн хурим найр өглөө болтол үргэлжиллээ. Үүр
цайх үеэр шинэ хос хоёр сэмхэн яваад өглөө.

- Би явж юмаа бэлтгэе. Нэг цагын дараа хойноос очоорой гэж Кейт хэлэв.

Үүр цайж гүйцээгүй байхад Кейт асар том байшингийнхаа унтлагын өрөөнд ороод хананд
өлгөөстэй зургийн дэргэд очиж, нууц товчийг дарахад зураг хажуу тийш гулсаж, араас нь
нууц төмөр шүүгээ гарч ирлээ. Нууц коодийг тааруулан нээхэд дотор нь Чигагогийн мах
боловсруулах “Три Стар” компанийг Кейт Макгрегорын нэр дээр худалдан авсан гэрээ,
хажууд нь О Нилээс мах хөлдөөх нээлтийн эрхийн бичгийг худалдан авсан гэрээ байлаа. Кейт
хэсэг бодолхийлснээ эдгээр бичг цаасыг эргүүлэн нууц шүүгээнд хийж түгжив.

Дэвид одоо Кейтийн хүн болсон. Ер нь Дэвид хэдийнээс Кейт хүн байсан. Хоёул энэ
компанийг дэлхий дээрхи хамгийн том хамгийн хүчирхэг компани болгоно.

Жеми Макгрегор Маргарет Макгрегорын хүсэн мөрөөдөж байсан шиг тийм л компани
болгоно.
 Гутгаар дэвтэр

Крюгер-Брент лимитед

1914-1945
16-р бүлэг

Урьд нэгэн цагт Жемийн нэгэн хундага бренди бариад сууж байдаг асан номын санд одоо
Кейт сууж байна. Бидэнд бал сараараа цэнгэн зугаалж байх зав чөлөө байхгүй хэмээн Дэвид
нотлон өгүүлэв.

- Компанийн төлөө нэг хүн анхаарал санаа тавих ёстой шүү дээ гэхэд нь

- Тийм ээ, мистер Блэкуэлл. Харин миний төлөө хэн анхаарал тавах юм бэ? гэж Кейт
тунирхан асуув.

Өвөр дээрээ эвтэйхэн суусан Кейтийн биеийн халуун илч нимгэн палаажийг нэвт төөнөхийг
Дэвид мэдрэн уншиж байсан бичиг цаас нь шалан дээр унав. Кейт босоод нэгэнтээ хөдлөх
төдийгөөр палаажаа тайлж хаялаа. Дэвид түүний гоо үзэсгэлэнг гайхан бахдав. Ийм гоо
үзэсгэлэнг харахгүй яасан удаан сохор байв аа?

Одоо Кейт өөрөө хувцасыг нь тайчиж эхлэхэд давагдашгүй их хүсэл тачаал сэргэхийг
мэдэрлээ. Хоёул нүцгэн биеэрээ чанга тэврэлдэн хэвтээд Дэвид хүүхнийг илэн таалав.
Эхлээд нүүр хүзүү, мээмийг нь илэн таалсаар Дэвидийн хуруу хэвлийн нь доорхи алтан шар
үсэнд хүрэх үед Кейт гиншигнэн ёолж,

- Намайг эдлээч, Дэюид хийгээч... гэж мансууралдаа шивэгнэв.

Дэвидийг дээрээсээ хэвтэхэд Кейт айзмыг даган хөдөллөө. Түүнийг асар их давалгаан улам
өндөр өргөх шиг санагдаж, амьсгаа давхцан нүдний нь өмнө энэ хорвоо тэсрэн өнгө
гэрлээрээ гялбуулан сохлох шиг болов. “Би төрөл арилжин тэнгэрийн оронд ирэх шиг байна”
гэж Кейт бодлоо.

Тэр хоёр дэлхийг тойрон аялж, Парис, Цюрих, Сидней, Нью Йорк очих далимдаа бас
компанийнхаа ажил явдлыг далимд нь аялуулж явлаа. Хаана очсон ч бие биесээ анхааран

халамжилж, загас усны цэнгэлийг эдлэхдээ нэг нэгийнхээ бие цогцос төдийгүй сэтгэл
оюуныг судлан таньж байлаа. Кейт Дэвидэд чухамхүү цэнгэлийн ширгэшгүй ундарга болж
байв. Өглөө сэрээд Дэвидийг сэрээн ороо нь орсон өлөгчин барс мэт амраглан цэнгэж, хэдэн
цагийн дараа хоёул хурал зөвлөлдөөнд зэрэгцэн сууж, хариуцлагатай чухал шийдвэр гаргана.

Их ашиг хонжооны ертөнцөд эмэгтэй хүний дээгүүр албан тушаал эзлэх нь ховорхон байдаг
болохоор эхлээд Кейтэд өршөөн хүлцэх байдалтай хандаж байснаа асар удалгүй түүнийг
гүнээ хүндэтгэн харилцах болжээ.

Мөнгөн санхүүгийн нарийн адармаатай ил далд ажлын гүн дунд орох нь Кейтэд бахтай
сайхан санагддаг байлаа. Хашир туршлагатай бизнесменүүд лүгээ үзэлцэн ихэнхдээ дийлж
гарахыг нь Дэвид бахдан ажиглаж байдаг байв. Кейт ерөөсөө ялан дийлэхийн оронд төрсөн
хүн юм. Кейт юу хүсэж байгаагаа сайн мэдэхийн зэрэгцээ үүндээ яаж хүрэхээ мөн л сайн
мэднэ. “Эрх мэдэл”
Тэд бал сарынхаа сүүлчийн долоо хоногийг Дарк-Харбор дахь “Хушийн төгөл” өргөөнд
өнгөрүүлэв.

Тэд 1914 оны 6 сарын 28 нд дайны тухай дам сураг сонсчээ. Кейт Дэвид хоёрыг Сассекийн
нэгэн эдлэнд урьсан байна. Тэр хөдөө нутагт зан үйл, ёс заншилыг их хүндэтгэдэг байлаа.
Эрэгтэйчүүд өглөөний цайнд бүрэн хувцастай орж, зугаалахаар явахдаа хувцсаа сольж,
үдийн хоолонд орохдоо бас л хувцсаа сольно. Цай уух, оройн зоог барихдаа мөн л хувцсаа
сольно. Тухайн байдалд тохирсон хувцас өмсөнө.

- Өдөрт хэдэн удаа хувцсаа солих юм бэ? Би чинь азарган тахиа шиг л санагдаж байна гэж
Дэвид дургүйцэн өгүүлэхэд

- Чи хамгийн дур булаам азарган тахиа шүү дээ, хонгор минь. Гэртээ очоод ямарч хувцасгүй
явж болно гэж Кейт тайтгаруулна. Дэвид түүнийг тэврээд,

- Гэртээ харих цагийг тэсэж ядан хүлээж байна гэжээ.

Оройн зоог дээр Австри-Унгарын хаан ширээ залгамжлагч хунтайж Фердинандыг хатан
Софитой нь хамт алсан тухай шинэ мэдээ сонсгов.

- Эмэгтэй хүнийг буудан ална гэдэг бузар булай хэрэг. Харин Балканы хойгийн нэг орны
улмаас хэн ч дайн дэгдээхгүй биз гэж гэрийн эзэн лорд Маней хэлжээ.

Яриа дараа нь спорт тоглоомын сэдэвт шилжив.

Кейт шөнө орондоо хэвтэж байхдаа,

- Дэвид ээ, дайн болох болов уу? Чи юу гэж бодож байна даа хэмээн асуусанд

- Нэг үл шалих герцогыг алсны улмаас уу? Дайн болохгүй гэж Дэвид хариулав.

Дэвид эндүүрчээ. Австри-Унгар улс Фердинандыг алах зорилго бүхий хуйвалдаанд хөрш
зэргэлдээх Сердийг оролцсон байж болзошгүй хэмээн сэжиглээд Балканы тэр оронд дайн
зарлажээ. Ингэж 6 сард эхлэсэн дайнд 10 сар гэхэд европийн ихэнх том гүрэнүүд татагдан
оролцсон байлаа. Энэ бол цоо шинэ маягийн дайн байв. Нисэх онгоц, шувбагч завь зэрэг
оньсон тээврийн хэрэгслийг байлдаанд анх удаа хэрэглэжээ.

Дайнд Герман орсон гэж сонссон тэр өдөр,

- Бидний өмнө гайхалтай сайхан бололцоо нээгдэж байна гэж Кейтийг хэлэхэд нь Дэвид
хөмсөг зангидан,

- Чи юу хэлж байна вэ? гэж лавласанд

- Байлдаж байгаа орнуудад зэр зэвсэг, байлдааны хэрэгслэл хэрэг болно... гэхэд нь

- Би дайтаж байгаа орнуудад юу ч өгөхгүй. Бидний ажил төрөл тэртэй тэргүй өөдрөг
урагштай байна. Бусдын зовлонгоор баяжих нь тусгүй гэж Дэвид бат хатуу хэлэв.

- Үүнийг сүйд болгох хэрэггүй. Хэн нэгэн нь зэр зэвсэг үйлдвэрлэх ёстой шүү дээ.

- Намайг энэ компанид ажиллаж байгаа цагт бид ийм ажил хийхгүй. Энэ асуудлыг дахин
сөхөх хэрэггүй хэмээн Дэвид дороо эргэн гарлаа.

“Ээ чөтгөр алгад, Дэвид яахаараа ийм хөнгөн хийвсэр сэтгэлтэй байна вэ?” гэж Кейт бодлоо.

“Энэ хүүхэн яахаараа ийм цэвдэг хүйтэн сэтгэлтэй байна вэ? Ашиг хонжооны ажил түүний
хүн чанарыг эвджээ” гэж Дэвид харамсан бодлоо.

Дараачийн хэд хоног хэн хэнд нь тэсвэрлэшгүй хэцүү байлаа. Дэвид ам мурийсандаа
харамсах боловч байдлыг яаж засаж залруулахаа мэдсэнгүй. Кейтийн омог бардам зан өөрөө
эхлэн эвлэрэх алхам хийхэд нь саад болж байлаа. Учир юунд вэ гэвэл Кейт өөрийн санааг зөв
гэж бат итгэлтэй байжээ...

АНУ дайнд оролцохгүй гэж ерөнхийлөгч Вудро Вильсон амласан боловч Германын шумбагч
онгоцууд зорчигч тээврийн хөлөг онгоцыг торпедоор харвах болж, Германуудын зэрлэг
балмадаар авирлаж буй тухай мэдээ сонин хэвлэлд гарах болсны дараа АНУ холбоотон
улсуудад туслах хэрэгтэй гэсэн уриа сонсдох болов.

“Дэлхий дахиныг ардчилалд чөлөөтэй болгоё” гэж нэгэн урианд өгүүлсэн байлаа.

Дэвид онгоц жолоодож чаддаг бөгөөд Францад Америк нисэгчдээс бүрдсэн Лафайэт нисэх
хүчин байгуулж эхлэхэд Кейтэд

- Би энэ эскадрильд бүртгүүлье гэсэнд

- Үгүй энэ дайн чамд ямарч хамаагүй гэж Кейт эсэргүүцэв.

- Энэ дайн надад хамаатай. АНУ хөндлөнгөөс хараад сууж байж болохгүй шүү дээ. Би
америкийн иргэн тэгээд өөрийн эх орондоо туслахыг хүсэж байна гэж Дэвид тайван өгүүлэв.

- Чи одоо дөч гарсан шүү дээ.

- Гэсэнч би онгоц жолоодож чадна. Тэдэнд ямарваа тусламж багадахгүй.

Кейт яаж ч ятгаад тус болсонгүй. Сүүлийн хэд хоног тэр хоёр хэрэлдснээ тас мартан үргэлж
л хамт байлаа. Хоёул бие биедээ ухаангүй хайртай болохоор яг одоо өөр юм сонирхохгүй.

Франц руу гарахын өмнө Дэвид

- Чи Бред Рожерстой хамт компаниа надаас доргүй удирдаж чадна гэхэд нь Кейт,

- Чамд гай түйтгэр болох вий. Тэгвэо би тэсэхгүй гэж Кейт уйлахад Дэвид түүнийг тэврэн
үнсээд
- Гай түйтгэр болохгүй дээ. Би энгэр дүүрэн одон медальтай эргэж ирнэ гэжээ.

Маргааш өглөө нь Дэвид яваад өгөв.

Дэвидийн эзгүйд Кейт маш ихээр ганцаардан энэлэн зовж байлаа. Дэвидийн сэтгэлийг
татхад хичнээн их хугацаа орсон билээ. Түүнийг дөнгөж өөрийн болгоод байтал энэ хөөтэй
дайн. Одоо тэгээд Дэвидийг бүрмөсөн алдах бий гэж айна. Хэн нэг хүний ярьж байгаа
байдал төрх, намуухан инээх чимээ хэн нэгний аялаж байгаа дуу энэ бүхэн Дэвидийг
санагдуулна. Дэвидээс захиа авангуут цоортол нь уншина. Дэвид юм бүхэн сайн сайхан
байгаа хэмээн бичдэг байлаа. Германууд агаарт хүч давамгайлж байгаа боловч удахгүй
байдал өөрчлөгдөнө. Америкийг удахгүй дайн зарлана гэсэн яриа бий Боломж гарахаар захиа
бичнэ гэх мэт захиа бичнэ.

Кейт хариуд нь урт урт захиа бичнэ. Өдөр болгон

" Чиний минь зам өлзийтэй байх болтугай. Хайрт минь биеэ бодоорой”

Кейт ажил хийж л ганцаардлаа мартдаг аргатай.

Дайны эхэн үед Франц, Герман хоёроос бусад оронл орчин үеийн хүчирхэг зэр зэвсэг
байсангүй. Гэвч холбоотнуудад амьд хүч, нөөц, байлдааны хэрэгслээр хавьгүй илүү байжээ.
Асар их армитай улсын зэвсэглэл нь хомс тачир байлаа.

- Энэ бүх улс оронд тусламж хэрэгтэй. Бүгдэд нь танк, их буу бас сум хэрэгтэй гэж Кейт
хэлхэд Бред нүд буруулан,

- Дэвидийн бодлоор... гэтэл Кейт Бредийн яриаг шууд таслан

- Одоо Дэвид энд алга. Бид өөрсдөө үүнийг шийдэх ёстой гэлээ.

Кейт нэгэнт шийдснийг Бред мэдэж байлаа.

Зэвсэг үйлдвэрлэх талаар Дэвидийн дургүйцсэний учрыг Кейт ерөөсөө ч ойлгоогүй байжээ.
Холбоотнуудад зэвсэг хэрэгтэй. Тэднийг хэрэгцээт зүйлээр ханган нь Кейт үүрэг мэт
санагдаж байлаа. Кейт шууд үйл ажиллагаандаа орж найрамдалт улсуудын зарим нэгэн
тэргүүнтэй уулзаж, Крюгер-Брент удалгүй танк, их буу, галт бөмбөг, цэргийн дүрэмт хувцас
үйлдвэрлэх болсон байна. Энэ л үйл ажиллагаа компанийг огцом өсгөн удалгүй олон улсын
хэмжээний корпораци болгожээ...

Кейт сүүлийн үеийн тайлан тооцооны мэдээг судалж үзээд,

- Бред чи энэ тоо баримтыг үзэв үү? Дэвид эндүүрснээ хүлээж хэрэгтэй болно доо гэж
Рожерст хэлжээ.

Тэр завсар Өмнөд африкт амар айван байсангүй. Олон нийтийн сэтгэл хөөрөн догдолж,
үймээн бужигнаад хаа сайгүй. Намын удирдагч нар холбоотнуудыг дэмжинэ гэдгээ мэдэгдэж,
Өмнөд Африкийг Германаас хамгаалах үүрэг авсан боловч нутгийн цагаан арьстанууд олонхи
нь Их Британд туслахыг татгалзан байжээ.

Тэд урьдын гомдолыг мартаагүй байжээ.

Европт байдалд ноцтой өөрчлөлт гарсангүй. Харин байдал холбоотнуудад ашиггүй тийшээ
хандаж байв. Баруун фронт дээр өөрчлөлт гарсангүй. Хоёр тал Франц Бельгийн нутагт суваг
малтан бүгэж байлаа. Цэргүүдийн амьдрал туйлын хүнд байлаа. Бороо асган нуувч сувгийг ус
шавраар дүүргэж, газар сайгүй харх хулгана гүйлдэн халдварт өвчин таарана. Дэвидийг
тэнгэрт байлдаж байгаа хэмээн Кейт баярлана.

Удалгүй Дэвидийн угтан хэлсэн үнэн болж, Америк дайнд оролцох болсноо зарлалаа.
Генерал Жон Д. Першингийн командласан амеркийн анхны явган цэрэг Францад буулаа.
Урьд нь хэн ч сонсоогүй Сент Михель, Шато-Терри, Мез-Аргон гэх мэтийн хотууд одоо
амьтан хүний амнаас салахаа байв. Холбоотнууд хүчирхэг нэмэгдэл хүчин авч удалгүй барагт
дайн дууслаа.

Ийнхүү дэлхий дахин ардчилалд чөлөөтэй боллоо.

Дэвидийг Нью Йоркт хөлөг онгоцноос буухад Кейт угтан авлаа. Тэр хоёр эргэн тойрон бөөн
бужигнаан шуугиан болж байгааг эс анзааран өөд өөдөөсөө харан удаан зогсов. Дараа нь
Дэвид Кейтийг чанга тэврэн авлаа.

Дэвид турж эцээд туйлдаж ядарсан байдалтай харагдана.

“Ай тэнгэр, би үүнийгээ хичнээн их үгүйлэн санаа вэ?” гэж Кейт бодоод мянган зүйлийн юм
асуумаар санагдавч тэр бүхнийг хойш тавихаар шийдлээ.

- Чамайг “Хушын төгөлд” аваачья. Тэнд олигтойхон амараарай гэж Кейт хэллээ.

Дэвидийн эргэж ирэхийг хүлээж байх зуур Кейт орон байшингаа их өөрчилсөн байлаа.
Уужимхан зочлох өрөөндөө шинэ хогшил тавилга тавьж, буйданг шинээр бүрүүлж, задгай
зуухны дэргэд тохилог зөөлөн сандлууд тавьжээ.

Задгай зуухны дээр уран хээтэй хивс өлгөж, хоёр талаар нь алтадмал тавиур байрлуулжээ.

Шилэн хаалганууд нь байшингийн гурван талаар тойрон сэрүүн тагт тийш гарсан байв.
Өрөөнүүд нь саруулхан, уужим агаад тэнгисийн булангийн үзэсгэлэнт байгаль тийш харжээ.

Кейт Дэвидэд засвар хийж өнгө зассан байшин үзүүлэх зуур хөгжилтэй шулганан байлаа.
Дэвид бодол болон дүнсийнэ. Байшинг үзэж дууссаны дараа,

- Чамд ямар санагдаж байна вэ, хонгор минь? хэмээн Кейтийн асуухад,

- Байшин маань гайхамшигтай сайхан байна. Одоо сууцгаая. Чамтай ярих юм байна гэж
Дэвид өгүүлэв. Кейтийн зүрх палхийж,

- Юу чамд таалагдахгүй байна?

- Бид дэлхийн тэн хагасыг зэр зэвсгээр хангаж байгааа юм байна...

- Чи нягтлан бодохын данс бүртгэлийг үзвэл зүгээр. Манай орлого... гээд Кейтийн эхлэхэд
Дэвид үгийг нь таслан

- Би огт өөр юм ярьж байна, Кейт. Миний санаж байгаагаар намайг явахаас өмнө компани
маань муугүй орлоготой байсан. Зэр зэвсэг үйлдвэрлэх талаар бид хэлэлцэж тохирсон шиг
санах юм.

Кейт уур хилэн нь бадарч цээжиндээ багтаж ядан байгаагаа мэдэрч,

- Чи хэлцэж тохирсон гэж бодсон байж. Би үгүй... Цаг өөр болж байна шүү дээ, Дэвид. Бид
бас хамт өөр болж байна гэж сэтгэлийнхээ хөдлөлийг барьж ядан хэлэв.

Дэвид өөдөөс нь хэсэг ширтээд,

- Чи бас өөр болсон уу? гэж аяархан асуулаа.

Кейт шөнө орондоо хэвтэж байхдаа “би юү? Дэвид үү? Бид хоёрын чухам хэн нь өөр болсон
юм бол” гэж өөрөөсөө асуув.

“Кейт өөрөө хүчтэй болоо юу эсвэл Дэвид хүч дорой болоо юу?”

Зэвсэг үйлдвэрлэлийг эсэргүүцэж Дэвидийн хэлсэн учир шалтгааныг санав. “Сулхан

шалтгаан” Хэн нэгэн нь холбоотнуудыг зэр зэвсгээр хангах ёстой байлаа шүү дээ.Түүнээс
гадна цэвэр ашиг нь ухаанд багтамгүй их. Дэвидийн ажил хэргийн барьц хаачив? Кейт
Дэвидийг хэзээнээс ухаантай, хашир, туршлагатай хүн гэж үзэж байсан. Одоо бол өөрөө
компанийг Дэвидээс дутуугүй бүр илүү сайн удирдаж чадахаа мэдэрч байлаа. Ийнхүү Кейт
энэ шөнө элдвийг бодон цурам хийсэнгүй.

Өглөөний хоолны дараа Дэвид, Кейт хоёр цэцэрлэгээр зугаалав.

- Энд ямар сайхан юм бэ. Амгалан тайван. Надад их аятайхан байна гэж Дэвидийг хэлэхэд,

- Өчигдрийн бидний ярианы тухайд гэвэл... хэмээн Кейт эхлэхэд, Дэвид таслан

- Тэр тухай тэгээд болно. Намайг байхгүйд чи өөрийн зөв зүйтэй гэж үзсэнээрээ ажилласан
гэжээ.

Энэ нь Кейтийг дахиад л бодолд оруулав.

“Дэвидийг энд байсан бол би яах байсан бол?” Кейт үүнийг дотроо бодон, юу ч хэлэлгүй
өнгөрөв.

“Үүнийг компанийхаа төлөө хийсэн. Би чинь энэ компанийг нөхрөөсөө илүү эрхэмлэн
үнэлдэг болж байна уу даа?” Кейт байшинлуугаа алхах зуураа өөрөөсөө асуугаад энэ
асуултанд хариулахаас хаширчээ.
17-р бүлэг

Дараачийн 5 жил аж үйлдвэр санаанд багтамгүй их өргөжин хөгжснөөрөө онцгой байлаа.

“Крюгер-Брент” гол үйл ажиллагаа уурхай, алмас олдворлолт байсан бол дайны үед зэвсэг
үйлдвэрлэлтээс олсон ашигт тулгуурлан бүрч илүү хөгжин цэцэглэжээ.

Үйл ажиллагаа нь Өмнөд Африкт төвлөрхөө больжээ. Дэлхийн олон улс оронд олон янзын
салбартай болжээ. Компани саявтар хэвлэн нийтлэх том нэгдэл, даатгалын компани, хагас
сая га талбай бүхий ой модтой газар худалдан авчээ.

Кейт нэгэн шөнө Дэвидийг дугтчин сэрээж,

- Бид төв байраа өөр газар шилжүүлэх хэрэгтэй байна, хайрт минь... гэхэд нь Дэвид юу ч
ойлгосонгүй орон дээрээ өндийж суугаад,

- Юу гэнээ? гэж лавлав.

- Одоо дэлхий дахины үйлдвэр худалдааны ажил төрлийн төв нь Нью Йорк болж байна.
Манай төв байр чухам тэнд л байх ёстой. Өмнөд Африк бол ашиг хонжоо наймааны ажилд
дэндүү буйд нутаг. Түүний дээр манайд утсан харилцаа, цахилгаан мэдээ бий болсон
болохоор бид бүх салбаруудыг хялбараар хянаж чадах бөгөөд аль дуртай цагтаа холбоо барьж
болно гэхэд

- Тун сайхан санаа байна. Үүнийг би яагаад бодож олсонгүй вэ. Харин өглөө болтол хүлээж
болох уу гэж Дэвид нойрмог бөвтнөөд дахин хэвтэж унтаад өгөв...

Нью Йорк бол сэтгэл догдлуулсан шинэ ертөнц байлаа. Кейт бүүр анх энд ирэхдээ л хотын
түргэн айзам хэмнэлийг мэдэрч байсан сан.

Энд амьдран сууна гэдэг амаргүй. Энд дэлхийн эргэлт бусал газраас илүү түргэн, юм бүхэн
толгой эргэмээр хурдан болдог юм уу гэсэн сэтгэгдэл төрнө.

Кейт Дэвид хоёул Уолл-стритэд төв байр байгуулах газар сонгон худалдан авч уран
барилгачид ажилдаа орлоо.

Кейт бас 5дугаар өргөн чөлөөнд сэргэн мандалтын үеийн франц маягийн өргөөний зураг
төсөл хийлгэхээр бас нэг уран барилгач хөлслөн авлаа.

- Энэ хот хэт их шуугиантай байна гэж Дэвид гомдол тавьдаг болжээ.

Энэ бол үнэн үг. Тэнгэр баганадсан өндөр өндөр байшин барьж, цахилгаан алхны чимээ
газар сайгүй сонсдоно. Нью Йорк хот дэлхий дахины худалдаа арилжааны шүтээн юм. Галт
онгоцны, даатгалын, худалдааны, банкны том том компани энд өөрийн төв байртай болсон
байна. Нью Йорк хот амьдралын эрч хүч төгөлдөр байх шиг санагдана. Кейт хотыг бахдан
шагших боловч Дэвидэд зохихгүй байгааг мэдэрч л байлаа.
- Дэвид хайрт минь, энэ чинь ирээдүй шүү дээ. Энэ хот өсөн өргөжиж бид бас хамт өсөж
байна.

- Тэнгэр минь, чамд өөр юу хэрэгтэй юм бэ, Кейт?

- Юм бүхэн хэрэгтэй гэж Кейт хариулахдаа огт түгдрэлгүй хэллээ.

Дэвидийн ямар учиртай ингэж асуусныг Кейт ойлгож ядна.

Энэ тоглоомд хожих хэрэгтэй. Тэгэхлээр бусдыг ялж дийлэх ёстой. Энэ амархан. Дэвид
яагаад үүнийг ойлгохгүй байна вэ?

Дэвид бол сайн бизнесмен. Гэвч тэргүүн баячуудын дунд тэргүүнд нь явах халуун эрмэлзэл,
хор, шар ч юм уу нэг юм дутаад байх шиг.

Жеми Макгрегор хор шартай хүн байсан. Тэр удам дамжин Кейтэд иржээ. Чухам хэдийд ийм
болсныг Кейт өөрөө мэдсэнгүй.Эсвэл дандаа ийм байсан уу?

Ямар ч гэсэн амьдралын нэгэн үед компанийн эзэн, компани хоёрын байр солигдон, компани
нь түүний эзэн, Кейт өөрөө боол нь болсон байна.

Тийм ээ, одоо Кейт компанийг захирч дийлэхээ больж, Компани түүнийг эрхэндээ оруулжээ.

Кейт үүнийг ойлгож ядан Дэвидэд учирлан тайлбарлаг гэсэнд цаадах нь инээд алдаж

- Чи дэндүү их ажиллаж байна хэмээн аман дээрээ хэлээд дотроо бол “ Эцэгтэйгээ ямар
адилхан юм бэ” гэж бодов. Яагаадыг бүү мэд, үүнд нь гэнэт Дэвидийн сэтгэл түгшлээ.

Харин Кейт “Дэндүү их ажиллаж байна” гэснийг гайхав.

Чухамхүү ажил нь түүний амьдралын баяр баясгалан билээ. Ажил нь түүнд эрч хүч чадлын
ундарга билээ. Өдөр бүр шинэ зорилт гарч ирэх бөгөөд шинэ зорилт бүр хүч сорих, толгой
эргэмээр шинэ тоглоом байдаг.

Энэ тоглоомд заавал хожих ёстой. Ямарч үнээр хамаагүй, ялах ёстой.

Энэ талаар түүнтэй эн зэрэгцэх хүн байхгүй. Мөнгө юм уу амжилтанд учир байгаа юм биш.
Эрх мэдэлд хамаг учир бий. Ялалтанд хамаг учир бий.

Дэлхийд нутаг хил хязгаар хамааралгүй мянга, мянган хүний амьдралыг хянан цагдаж байх
эрх мэдэл. Урьд нэгэн цагт Кейтийн амьдрал бусдын эрхшээлд байсаан. Эрх мэдэл өөр нь
байгаа цагт түүнд өөр юу ч хэрэггүй. Эрх мэдэл бол хосгүй зэвсэг.

Одоо Кейт хаад, тэргүүн баячууд тэр бүү хэл ерөнхийлөгчийн гэрт оройн хоолонд урихдан,
тэд бүгд л Кейтэд нэр нүүр олох гэж шадарлан ойртохыг эрэлхийлнэ.

Крюгер-Брент шинэ үйлдвэр байгуулах нь шинэ ажлын орон тоо нээдэг. Ажилчин болгон
харьяат улсдаа татвар төлдөг. Улс, улс төр энэ л татвараар амьдардаг...

Эрх мэдэл ээ гэж!

Тэднийг Нью Йоркт шилжиж ирснээс хойш нэг жилийн дараа, хаврын эхээр Кейтийн бие
чилээрхлээ. Дэвид түүнийг эмчид үзүүл гэж ятгаж,

- Нэрийг нь Жон Харви гэдэг юм. Залуухан ч гэсэн нэр хүнд сайтай, олонд хүндлэгдсэн эмч
гэв.

- Кейт тэр эмчид дуртай дургүй үзүүлэв. Жон Харви гэж төв төлөв царайтай туранхай эр
байлаа. Харахад 25-26 тай болов уу гэмээр.

- Надад өвдөх зав байхгүйг тэнд хэлээд хэлчихье хэмээн Кейт сануулахад эмч үл мэдэг
инээмсэглэн,

- Таны хэлснийг анхааралдаа авлаа, миссис Блэкуэлл. Үзлэгээ эхлэх үү гэлээ?

Эмч Кейтийг анхааралтай үзэж, хэд хэдэн шинжилгээ аваад,

- Танд ноцтой өвчин байхгүй гэж би итгэж байна. Шинжилгээний хариу 2-3 хоногийн дараа
гарна. Лхагва гаригт утасдаарай гэжээ.

Лхагва гаригийн өглөө Кейт утасдсанд

- Миссис Блэкуэлл танд дуулгах баяртай мэдээ байна. Та удахгүй бүл нэмнэ гэжээ.

Энэ бол Кейтийн амьдралд хамгийн их сэтгэл догдлуулсан мөчийн нэг байлаа. Тэгээд энэ
шинэ сониноо Дэвидэд бушуухан дуулгахсан гэж сэтгэл яарав.

Дэвидийн сэтгэл ингэж их хөөрсөн байхыг Кейт ер үзээгүй ажээ. Дэвид түүнийг хүчирхэг
гараараа дээш нь өргөн,

- Бид чамтай адилхан охинтой болно гэж хэлээд дотроо “Энэ л Кейтэд чухам хэрэгтэй байсан
юм. Кейт одоо гэртээ байдаг болно. Ёстой нэг эхнэр хүн шиг” хэмээн бодлоо.

Харин Кейт бол “Бид хүүтэй болно. Хөвгүүн маань нэгэн цагт Крюгер-Брентийг удирдах
болно. Крюгер-Брентийн ирээдүйн хаан айсуй. Хаан тавтай морилогтун” гэж бодлоо.

Төрөх цаг ойртох тусам Кейт ажил дээрээ байх нь багасчээ, гэсэнч тэрээр өдөр бүр компани
очно.

- Бизнесийг түр мартан аятайхан амар гэж Дэвид хэлэхдээ чухам бизнес л Кейтэд шилдэг
амралт болно гэдгийг ойлгосонгүй.

Хүүхэд 12 сард төрөх ёстой.

- Хүүхэд маань 25 нд төрөөсэй. Бидэнд зул сарын гайхамшигт бэлэг болог хэмээн Кейт
мөрөөднө. “Энэ жил тун гайхамшигт зул сарын баяр болно доо!”

Кейт одоо олон улсыг хамарсан концернийн тэргүүн, сэтгэлтэй хүнтэйгээ ханилсан, одоо үр
хүүхэдтэй болох гэж байна. Энэ инээдтэй хачин дэс дараалалыг Кейт өөрөө ч анзааран
ажигласангүй.

Кейтийн гэдэс томорч, албан тасалгаандаа арайхийн хүрдэг болсон Дэвид юм уу, Бред
Рожерсийг гэртээ бай гэж ятгахад нь

- Одоохондоо тархи маань ажиллаж байгаа гэж хэгжүүрхэнэ.

Хүүхэд төрөхөөс хоёр сарын өмнө Дэвид Өмнөд Африкт шалган байцаах ажлаар явжээ.
Дараачийн долоо хоногт Нью Йоркт буцаж ирэх ёстой байлаа.

Кейт ширээнийхээ ард суугаад ажиллаж байтал өрөөний нь үүд онгойж Брэд орж ирэв.
Түүний царай сэтгэл түгшсэн байдалтай бөгөөд үг хэлж чадахгүй түгдэрлээ. Кейт үүний
ажиглан,

- Шенноноос манайд захилга өгсөнгүй юү? гэж асуусанд Брэд,

- Үгүй. Би... Би сая нэг муу мэдээ авлаа... Санамсаргүй гай тохиолджээ. Кейт сэтгэлээ барь...
Уурхайд нурсан байна... гэхэд нь Кейтийн зүрх шимширч,

- Хаана тэр вэ? Хүний амь үрэгдээ юү? гэхэд нь Брэд гүнзгий санаа алдан,

- Зургаан хүн. Кейт... Тэдний нэг Дэвид... гэлээ.

Энэ үг хананаас хананд цуурайтан өрөөг дүүргэж улам улам чангаран Кейтийг дөжрүүлэв.
Энэ дууны авианы их хүрхгээ урсгал долгиондоо Кейтийг хаман авч, амьсгаа нь давхцаж
байгааг мэдрэв. Гэнэт бүх юм зогсох шиг болсноо удалгүй харанхуйд живлээ.

... Хүүхэд нь цагийн дараа, хугацаанаасаа хоёр сарын өмнө дутуу төрлөө. Кейт хүүдээ
Дэвидийн эцгийг хүндэтгэн Энтони Жеймс Блэкуэлл гэж нэр өгчээ.

Сарын дараа Тавдугаар өргөн чөлөөнд бариулсан шинэ байшин бэлэн болж, Кейт
хүүхэдтэйгээ хамт, асрагч, үйлчлэгч нараа аваад тэнд очиж суулаа. Хогшил тавилгыг хоёр
итали шилтгээнээс авчирсан нь харлуулсан царсаар хийсэн 16 зууны үеийн эд хогшил байв.
Шалыг ягаан гантигаар хийжээ. Ханыг нь царсан хавтангаар бүрсэн номын санд 18 дугаар
зууны үеийн маш сайхан задгай зуух, дээр нь Гольбейны жинхэнэ өөрийн нь хөрөг өлгөжээ.
Тэнд бас Дэвидийн бууны цуглуулгыг тавьсан ан агнуурын өрөө, Рембрант, Веласкес,
Беллини нарийн бүтээлээр чимсэн зургийн үзэсгэлэн, бүжгийн танхим зэрэг олон өрөө
тасалгаа танхим байлаа. Кейтийн унтлагын өрөөний хажууд хүүхдийн өрөө, зочдод зориулсан
өдий төдий унтлагийн өрөө байлаа. Цэцэрлэгт Роден, Огнюст Сен-Годен нарын баримал
тавьжээ. Энэ бол хаан хүнд таарах ордон ажээ.

“Хаан нь удахгүй өсч торнино” гэж Кейт баярлан бодож байлаа.

Тони хүү 4 нас хүрэхэд Кейт түүнийг бэлтгэл сургууль өглөө. Тони бол бор нүдтэй, зөрүүд
маягийн дөрвөлжин эрүүтэй, төлөв томоотой сайн хүү байлаа. Тонид хөгжмийн хичээл зааж,
таван настайдаа бүжгийн хичээлд явдаг болов. Кейт хүүтэйгээ хамт Дарк Харбор дахь
“Хушийн төгөл” өргөөндөө мартагдашгүй үеийг өнгөрүүлнэ. Кейт наян футийн яхта худалдан
авч “Корсар” нэр өгөөд хүүтэйгээ хамт Мэнийн хөвөө дагуу тэнгисийн долгион зүсэн
зугаалдаг байлаа. Тони хүү үүнийг ихэд бахдан баясна. Кейт бол өөрөө гагцхүү ажил хийхдээ
сэтгэлийн баяр бахыг эдэлнэ.

Кейтийн сэтгэлийг зовоодог ганц юм гэвэл эх нутаг Өмнөд Африкийн хувь заяа байлаа. Тэнд
арьсны өнгөөр ялгаварлан гадуурхах явдал түрэмгийгээр газар авч байна. Улс төрийн хүчин:
“Веркрамптес” хэмээх цгаан арьстны эрх ашгийн төлөөх бүлэг, “Верлигтес” хэмээх хар
арьстны эрх ашгийн төлөөх хоёр үзэлд арл түмэн хуваагджээ. Ерөнхий сайд Жеймс Херцог,
Ян Смит нар эвсэл байгуулж, парламентын анхны сонгууль яллаа. Тэд газрын шинэ хууль
баталж, хар арьстны газар өмчлөх эрх, сонгох эрхийг хасав. Олон сая хүн янз бүрийн том
жижиг бүлэгт хуваагджээ. Эрдэс баялаг, аж үйлдвэрийн төв, тэнгисийн боомтуудгүй өөрөөр
хэлбэл ашиггүй газар руу хар арьстнуудыг цөллөө.

Кейт Өмнөд Африкийн засгийн газрын удирдах албаны түшмэлтэй уулзаад,

- Энэ чинь яваандаа тэсрэх аюултай бөмбөг байна. Та нар 8 сая хар арьстныг боол байлгах
гэж хичээж байна гэсэнд

- Энэ чинь боолчлолтой огт адилгүй, миссис Блэкуэлл. Бид үүнийг тэдний өөрийн эрх
ашгийн тулд хийж байгаа юм.

- Тийм үү?

- Арьстан бүр өөр өөрийн өвөрмөц онцлогтой. Хэрэв хар арьстанууд цагаан арьстантай
хутгалдах юм бол тэр өвөрмөц онцлогоо алдана. Иймээс л бид тэднийг ингэж хамгаалж
байгаа юм. Үгүй ээ, хамгаалахыг хичээж байгааг тэд ойлгохгүй байна.

- Шал балай яриа байна. Өмнөл Африк арьстны үзэлт улс болон хувирч байна.

- Тийм биш ээ. Манай оронд хар арьстнууд дэлхийн бусад бүх орноос илүүгээр сайхан
амьдарч байгаа.Бусад орны хар арьстанууд манай оронд ирэх гэж олон мянган бээрийн зам
туулж байна. Хуурамч нэвтрэх бичгээр ч гэсэн манай оронд ирэх гэж оролддогыг бид бас та
мэднэ шүү дээ.

- Тэгвэл тэднийг өрөвдөж байна гэж Кейт зэвүүцэв.

- Яг үнэнийг хэлэхэд хар арьстанууд бол бүдүүлэг амьтад шүү миссис Блэкуэлл. Тэднийг
өмөөрөөд байх хэрэг нэг их байхгүй. Бидний хийж байгаа бүхэн тэдний сайн сайхны төлөө
юм.

Энэ уулзалтаас Кейтийн сэтгэл түгшин буцлаа. Өөрийн эх орны улс төрийн бодлогын чиг
шугамыг ойлгон, эх орныхоо ирээдүйн төлөө цээжинд нь айдас хурлаа.
Кейт Бандагийн хувь заяанд сэтгэл зовно. Түүний тухай Өмнөд Африкийн сонин хэвлэлд их
бичиж, түүнийг “Хондон улаан цэцэг” хэмээн нэрлэж байлаа. Харуул түүний эр зоригийг
гайхан бахдана. Банда ажилчин, жолооч, хашаа цэвэрлэгчийн дүрд хувилан цагдаа нар
баригдалгүй өдийг хүрчээ. Банда партизаны хөдөлгөөн зохион байгуулж, хамгийн аюултай
гэмт хэрэгтний жагсаалтад оржээ. Түүний Өмнөд Африк даяар эрэн сурвалжилж байлаа.
“Кейп Таймс” сонинд нийтлэгдсэн нэгэн өгүүлэлд эрсэргүүцэн жагсагчид түүнийг хар
арьстны хороололын гудамжаар гар дээрээ өргөн авч явсан тухай өгүүлсэн байв.

Банда тосгон тосгоноор хэрэн хэсэж, ард түмэнд үгээ хэлдэг ажээ. Цагдаа нарыг түүний
барьхаар очиход Банда учир битүүлэг байдлаар алга болоод өгсөн байдаг байлаа. Түүнд бие
хамгаалагч нар байдаг бөгөөд, шөнө болгон өөр газар хонодог гэсэн яриа байлаа.

Банда үхэхээс нааш зогсохгүйг Кейт мэднэ.

Кейт түүнтэй уулзахаар шийдэв. Тэгээд өөрийн итгэдэг нэг хуучин ажилчинг дуудуулж,

- Уили, чи Бандаг олж чадах уу?

- Банда өөрөө олдохыг хүсэл л тэр юм биз.

- Юу ч гэсэн оролдоод үзээч. Би уулзмаар байна.

- Хичээе...

Маргааш өглөө нь Уили,

- Хэрэв та өнөө орой завтай бол таныг авхаар машин ирнэ гэжээ.

Кейтийг Йоханнесбургээс хойд зүгт, 70 миль зайтай байдаг жижиг тосгонд авчирав. Жолооч
нь жижигхэн байшингийн дэргэд зогсоход Кейт машинаас буун дотогшоо орлоо. Банда тэнд
байлаа. Тэр энэ завсар огт өөрчлөгдсөнгүй хэвээрээ.

“Нас нь 60 хүрч байгаа шүү дээ” гэж Кейт саналаа. Хэдэн жилийн турш цагдаа нараас
нуугдаж байгаа хүн гэхэд үнэмшмээргүй тайван дөлгөөн намбатай байлаа. Банда Кейтийг
тэврэн мэндлээд,

- Чи улам бүр гоо үзэсгэлэнтэй болж байна гэхэд нь Кейт инээд алдан,

- Үгүй ээ. Би хөгширч байгаа. Удахгүй дөч хүрнэ.

- Тэгвэл улирах цаг чамайг одоохондоо тойрч байна...

Хоёул гал тогооны өрөөнд орж, Банда кофе чанаж байх зуур,

- Өмнөд Африкийн улс төрийн байдал миний санааг зовоож байна. Энэ бүхэн яаж дуусдаг
бол?
- Тийм ээ. Байдал улам дордож байна. Засгийн газар хэлэлцэхийг хүсэхгүй байна. Цагаан
арьстанууд харилцах гүүрийг эвдсэн. Тэр гүүр бидэнд биш тэдэнд дахиад хэрэг болно.
Цагаан арьстанууд бидний адгуус мал мэт дорд үзэж байна.

- Цагаан арьстан болгон тэгж боддоггүй та мэднэ. Танд нөхцөл байдлыг өөрчлөх хүсэлтэй
журмын сайн нөхөд бий биз. Хэзээ нэгэн цагт байдал өөр болно. Харин үүнд цаг хугацаа
хэрэгтэй.

- Цаг хугацаа гэдэг элсэн цаг мэт урсаад л байдаг...

- Ингэхэд Итаме, Магене хоёр яасан бэ?

- Эхнэр хүүхэд маань нуугдаж байгаа. Цагдаа нар намайг эрсээр байгаа шүү дээ гэж Банда
гунигтай хариулав.

- Би танд яаж туслах вэ? Би зүгээр суугаад байлтай биш. Энэ чинь бас миний эх орон шүү
дээ. Мөнгө хэрэгтэй юү?

- Мөнгө хэзээд тус болдог.

- За сайн. Өөр юу байна даа?

- Бид бүхний төлөө залбирч байгаарай...

Маргааш нь Кейт Нью Йорк руу буцлаа.

...Тонийг жаахан өсөж торнихоор Кейт сургуулийн амралтын үед ажлаар ийш тийш явахдаа
хамт авч явдаг болов.

Жаалхүү музейд ухаангүй дуртай, их зураач, уран барималчдын бүтээлүүдийн өмнө хэдэн
цагаар ч хамаагүй зогсдог байв. Тони гэртээ хананд өлгөөстэй байгаа зургийг хуулбарлан
зурах боловч өөртөө хатуу шаардлага тавьдаг болохоор зурснаа ээждээ үзүүлдэггүй байлаа.

Тони төлөв томоотой, бүрэг ичимхий байдлаараа хүмүүсийг бахдуулсан эелдэг зөөлөн
хөвгүүн болж, Кейт хүүгээрээ бахархана. Хүү ангидаа аль ч талаараа тэргүүн зэргийн сурагч.

- Чи тэднээс бүгдээс нь давна, тийм үү? гэж Кейт инээд алдан хүүгээ тэвэрнэ.

Бяцхан Тони хүү ээжийнхээ итгэлийг хөсөрдүүлэхгүйг аль байдагаараа хичээнэ. Тони 12
настай байхад Кейт Ойрхи Дорнодоор ажлаар яваад иржээ. Хүүгээ их санасан учир бушуухан
уулзах гэж сэтгэл яаран байлаа. Хүү нь гэртээ хүлээж байв. Кейт хүүгээ чанга тэврэн,

- Төрсөн өдрийн мэнд хүргэе. Баяр нь сайхан болсон уу?

- С-сайхан болсон, ээж ээ. И-их сайхан.

Кейт тэвэрсэн гараа задлаад хүүгээ харав. Тони урьд нь ер ээрч байгаагүй.
- Бие чинь зүгээр үү?

- Зүгээр ээ, ээ-ээж ээ.

- Битгий ээр. Удаан ярилдаа. Өөр сонин сайхан юу байна даа?

Долоо хоног өнгөрхөд Тони улам ээрэх боллоо.Кейт эмч Харвитай уулзахаар шийдлээ. Харви
хүүг үзээд,

- Энэ хүү бие махбодын хувь цоо эрүүл байна. Сэтгэхүйн ачаалал нь хэтэрч байгаа юм биш
биз?

- Миний хүүгийн үү? Үгүй. Та юунд ингэж асууж байна?

- Тони их уян сэтгэлтэй хүү. Ер нь ээрэх бол ихэнхдээ сэтгэцийн ачаалтай холбоотой байдаг.

- Та эндүүрч байна. Тони ангидаа тэргүүн сурагч, өнгөрсөн улиралд сайшаалалын үнэмлэх
авсан. Бүх талаар хөгжингүй. Сайн тамирчин, сайн сурагч. Бас урлагт муугүй. Үүнийг
сэтгэхүй чадвар дутуу гэхэд хэцүү байна гэж Кейт ярихад Харви өөдөөс нь анхааралтай
ажиглан,

- Ойлголоо. Түүнийг ээрэхэд та яадаг вэ?

- Мэдээж засаж хэлдэг.

- Битгий тэгж байгаарай гэж зөвлөх байна. Энэ нь хүүхдийн сэтгэлийн түгшүүрийг улам
ихэсгэдэг гэхэд Кейтийн уур хүрч,

- Хэрэв та Тонийг сэтгэхүйн сааталтай гэж байгаа үүнд миний буруу байхгүйг би батлан
хэлье. Би хүүдээ хайртай. Хүүгээ дэлхий дээрхи хамгийн авьяастай хүүхэд гэж үздэгийг
минь та өөрөө мэднэ.

Хамаг учир чухам үүнд байгаа юм байна. Үүнийг нэгч хүүхэд тэсэж даахгүй. Харви бичиг
тэмдэглэлээ үзэж,

- За үзье... Тони 12 той биз дээ?

- Тийм.

- Та хүүгээ өөрөөсөө хол суулгавал тус болох юм биш үү? Жишээ нь сайн сургалттай ямар
нэгэн хувийн сургуульд оруулж болно шүү дээ гэхэд нь Кейт учрыг олж ядан өөдөөс нь
бүлтийж харав.

- Тони нэг хэсэг бие дааж амьдраг, Швейцарид маш сайн хувийн сургуулиуд бий.

Швейцарь гэнэ. Тонийг өөрөөсөө тийм хол газар сууна гэж бодоход тэсэхүйе бэрх байлаа. Хүү
нь тийм хол газар ганцаараа сууж чадахгүй бага балчир байна. Гэтэл эмч өөдөөс нь ширтээд
байдаг.

- Таны хэлснийг бодьё гэж сүүлд нь Кейт хариулав.

Кейт тэр өдөр чухал зөвлөгөөнтэй байсныг хойшлуулж, гэртээ эрт эргэж ирлээ. Тони
өрөөндөө гэрийн даалгавар хийгээд сууж байлаа.

- Ө-өнөөдөр б-би онц-ц авсан, ээ-ээж ээ.

- Чамайг Швейцарид очиж сур гэвэл чи юу гэх вэ? гэсэнд хүүгийн царай туяарч,

- Болох юм уу? гэж асуултаар хариулав.

...Сар хагасын дараа Кейт Тонийг онгоцонд суулгаж өглөө. Хүүг Женев нуурын хөвөөнд
байдаг Ролл гэдэг бага шиг Ле Росийн сургуульд оруулжээ.

Кейт онгоцны буудал дээр зогсон онгоц хөөрхийг харж байлаа.

“Энэ чөтгөр алгад, би хүүгээ яасан их санах болоо” Кейт огцом эргэж түүний хүлээж буй
машиндаа суугаад албан байрлуугаа явлаа.

Бред Рожерстой хамт ажиллах нь Кейтэд аятайхан байдаг. Бред Кейтээс хоёр ах. Энэ хэдэн
жил тэр хоёр журмын сайхан анд нөхөд болжээ. Крюгер-Брент компанид Бредийн үнэнчийг
Кейт үнэлдэг байлаа. Бред эхнэргүй. Тэгээд хөөрхөн хүүхнүүдтэй уулзаж учирдаг ч гэсэн
өөрт нь битүүхэн дурласаныг Кейт хэдийн ажигласан юм. Бред олон удаа үг цухуйлган
байсан боловч Кейт түүнтэй дан ажил төрлийн харилцаатай байхыг хичээж байдаг. Кейт ганц
л удаа энэ дүрмээс хазайжээ.

Бред нэг хүүхэнтэй тогтмол уулзах болсон байна. Шөнө орой болсон хойно эргэж ирээд
өглөө нь зөвлөгөөн дээр нойр нь ханаагүй, ядарсан царайтай харагддаг болжээ. Үүгээр
зогсохгүй бодол санаа нь тэртээ хаа хол бэлчиж байх шиг харагдана. Энэ нь компанийн ажил
үйлс муугаар нөлөөлж болох байв. Байдал сар илүү үргэлжилсний дараа Кейт арга хэмжээ
авар цаг боллоо гэж шийдлээ. Дээр олон жилийн өмнө Дэвид нэг муу хүүхнээс болж
компанийг орхих шахсан. Одоо Бредийг мөн тиймэрхүү байдал оруулж болохгүй. Крюгер-
Брентийг хэн ч орхихгүй, орхиж чадах ч үгүй.

Кейт ганцаараа Парис орж, тэндхийн экспорт-импортын нэгэн компанийг авахаар төлөвлөж
байснаа сүүлчийн мөчид Бредийг хамт явья гэж гуйлаа.

Эхний өдөр хоёулаа ажил хэрэг хөөцөлдөн өнгөрөөж, орой нь “Гран Вефурт” хоол идэв.
Дараа нь Кейт Бредийг өрөөндөө урьж, шинэ компанийн төлөвлөгөөний тайлан тооцоог үзье
гэлээ. Бред орж ирэхэд Кейт Бредийг унтлагын нимгэн хувцастай угтлаа.

- Бичиг баримтаа аваад ирлээ. Одоо бид... гэж Бредийг эхлэхэд

- Бичиг баримт хүлээж байг, Бред. Би чамтай хоёулаа л байх гэсэн юм... гэж Кейт зөөлөн
дуугаар хэлэв. Түүний дууны өнгөнд өдөн, урин дуудах аялга сонсдоход Бред түүний нүдийг
эгцлэн ширтээд,

- Өө Кейт... гэж шивэгнэв.

Кейт түүний хүзүүгээр тэврэн хөвчин биеэрээ биед нь наалдлаа.

- Би энэ мөчийг хичнээн удаан хүлээсэн гээч... хэмээн Бред шивэгнэлээ.

- Би ч бас гэж Кейт хариулав.

Тэгээд хоёул унтлагын өрөөнд орлоо.

Кейт уг нь тачаангуйн хүсэл ихтэй хүүхэн байсан. Дэвидээс хойш хүсэл тачаалынхаа бүх эрч
хүчийг бусад зорилгод зориулан зарцуулдаг болсон байжээ. Олон жилийн өмнөөс зөвхөн
ажил нь түүний бүх л хүслийг бүрэн хангадаг болжээ. Одоо тэр эрээр дутсандаа биш
Бредтэй учрах гэсэн юм биш ээ...

Бредийг дээрээ гарахад Кейт түүний эрийн тэнхээ сайтайг мэдэрсэн ч дур хүсэл нь
сэргэсэнгүй.

- Кейт ээ, би чамд аль хэдийнээ дурласан...

Бред дээрээс нь бүх биеэрээ дараад аль эрт дээр үеийн айзмаар хөдөлж байв. “Эднийхэн
компанидаа муухай их үнэ нэхэж байна. Энэ компани надад хэрэгтэйг мэдээд үнэ өртгийг нь
татахгүй нь дээ” гэж Кейт бодож байлаа.

...Бред чихэнд нь янагийг үг шивэгнэнэ.

“Би хэлэлцээ хийхийг татгалзан эд нарын өөрсний гуйхыг хүлээж болох юм. Үгүй намайг
гуйхгүй бол яах вэ. Тэгвэл би алдана”

...Бредийн хөдөлгөөн хурдсахад Кейтийн бөгсөө хөдөлгөн хавсрав.

“Үгүй. Тэгж болохгүй. Эд нар өөр худалдан авагч амархан олно. Нэхсэн үнийг нь өгье. Дараа
нь өөрт хэрэгтэй салбарыг үлдээж бусдыг нь худалдья”

...Бредийн хүсэл бадран ёологноход Кейт бөгсөө улам сайн хөдөлгөн түүний цэнгэлийг дээд
цэгт нь хүргэлээ.

“Маргааш эдэнд зөвшөөрнө гэдгээ хэлье”

...Бред сунжруулан ёолж, хөлсөө арчин,

- Тэнгэр минь, Кейт ээ. Маш сайхан боллоо. Чамд таалагдав уу?

- Хорвоод хосгүй жаргалаа гэж Кейт инээмсэглэн хэллээ.

Кейт Бредийн тэвэрт хэвтэж байхдаа төлөвлөгөөгөө цааш нь бодсоор байлаа. Бредийг өглөө
сэрэхэд нь,

- Бред ээ, чиний уулздаг тэр хүүхэн... гэж эхлэсэнд Бред баясгалантайгаар инээд алдан яриаг
нь таслан,

- Ай тэнгэр, чи чинь хардаж байх шив дээ. Түүнийг мартаж орхи. Би түүнтэй дахиж
уулзахгүй гэж ам алдая гэжээ...

Кейт үүнээс хойш Бредтэй дахин хоносонгүй. Яагаад зөвшөөрөхгүй байна вэ гэж асуухад нь

- Чамтай дахин учрах сан гэж хичнээн их хүсэж байгааг минь чи мэдэхгүй. Гэсэн ч дахиж
давтаад байвал чи бид хоёр хэзээ ч хамт ажиллаж чадахгүй гэдгийг мэдэж байна. Тэгэхлээр
бид хоёр хоёул биеэ барих хэрэгтэй байна, Бред... гэжээ.

Бред үүнийг зөвшөөрхөөс өөр арга байсангүй.

Компани нь өсөж өргөжихийн хэрээр Кейт сүм хийд, сургуульд хандив өргөх өглөг буяны сан
байгуулжээ.

Энэ бүх ажлын дунд тэр өөрийгөө мартсангүй ээ. Кейт уран зураг цуглуулж эхэлжээ. Сэргэн
мандалтын үеийн Рафаэль, Тициан, Тинторетто зэрэг олон зураачдын бүтээлийг худалдан
авч цуглуулгаа өргөтгөжээ.

Блэкуэллийнхний цуглуулга дэлхий дээр хамгийн үнэтэй хувийн цуглуулгад тооцогдож байв.
Энэ зургийн үзэсгэлэн цөөн хэдэн зочдоос өөр үзсэн хүнгүй болохоороо тэгж таамагладаг
аж. Кейт цуглуулганыхаа зургийг гэрэл зураг татуулах буюу хэвлэлд шүүн хэлэлцэхийг
зөвшөөрдөггүй байлаа. Ер нь хэвлэл мэдээллийн тухайд Кейт хатуу журам баримтладаг.
Блукуэллийнхний хувийн амьдрал бол хориотой сэдэв байлаа. Гэрийн ганц үйлчлэгчээс
эхлэн, компанийн ажилтан нарын хэн нь ч Блэкуэллийн гэр бүлийн амьдралыг шүүн
хэлэлцэх ёсгүй эсвэл эрхгүй гэж хэлбэл дээр юм. Мэдээж элдвийн цуу үг, хов живийг аргалах
аргагүй. Учир нь Кейт Блэкуэлл бол оньсого таавар мэт учир нь үл ойлгогдох хүүхэн, харин
хүмүүсийн ойлгодог зүйл болох мөнгө хөрөнгө түүнд байлаа. Тэр бол энэ дэлхийн хамгийн
баян хамгийн хүчирхэг хүүхнүүдийн нэг мөнөөс мөн. Иймээс мянган түмэн асуулт гарч ирэх
боловч хариулт нь тун цөөн.

Кейт Ле Роси дахь сургуулийн захирал авгайд утасдаж,

- Манай Тонигийн хичээл сургууль ямар байгаа бол мэдмээр байна? гэв.

- Маш сайн, миссис Блэкуэлл. Танай хүү гоц сайн сурагч. Хүү чинь...

- Энэ ч яах вэ... гээд Блэкуэллийн гэр бүлийнхний талаар хэн нэгэн нь өө сэвтэйг хэлэх үү,
байх уу гэж Кейт хэсэг эргэлзснээ,

- Ээрдэг нь яаж байгаа бол? гэсэнд

- Хүү чинь огт ээрдэггүй шүү дээ, хатагтай. Их сайхан хэл яриатай.

Кейтийн дотор онгойж санаа алдав. Тонийн ээрдэг нь түр зуурын үзэгдэл гэдгийг мэдэж
байсан.

“Ай энэ эмч нар уу”

Нэг сарын дараа Тониг амралтаар гэртээ ирэхэд Кейт түүнийг нисэх онгоцны буудал дээр
тосож авлаа. Хүүгийн бие эрүүл, царай нь өнгөтэй байлаа. Кейтийн цээжинд баяр хурж,

- Сайн уу, хүү минь. Чи ямар байв даа?

- И-их сайн, ээ-ээж ээ. Таны б-бие сайн уу? гэжээ...

Тони өөрийг нь Швейцарид сурч байх хооронд эхийнхээ худалдаж авсан шинэ уран
зурагнуудыг тэр даруй сонирхон үзэж эхлэлээ. Тэр зурагнууд жаал хүүг илбэдэж орхилоо.
Ялангуяа Монет, Ренуар, Моризо зэрэг францын импрессионист буюу сэтгэл хөдлөлийг
илэрхийлэлээр зурдаг уран зураачдын бүтээлийг онцгой бахдав. Энэ зураачид Тонийн өмнө
ид шидийн ертөнцийг нээж өгчээ. Тони зургийн тавиур, будаг худалдаж аваад ажилдаа оров.
Гэвч өөрийн зурсныг муу болсон гэж үзэх тул хэнд ч үл үзүүлнэ. Ер нь аугаа их зураач нартай
яаж дүйцэх билээ дээ.

- Энэ зурагнууд бүгдээрээ нэгэн цагт чинийх болно гэж Кейт түүнд хэлжээ.

Энэ яриаг 13 настай хүүг балмагдуулав. Энэ зурагнууд хэзээ ч Тонигийн өмч байж болохгүйг
эх нь ойлгосонгүй. Юу вэ гэвэл Тони өөрийн мөнгөөр худалдан аваагүй билээ. Тони амь
тэжээх мөнгийг өөрөө олох ёстой гэж бат итгэдэг. Харин эхээсээ хол байх үед амгалан байдаг
бөгөөд эхийнхээ дэргэд элдэв зөрчилт бодолд автан цээж давчиддаг байлаа.

Эхийн нь эргэн тойрон болж байгаа зүйл туйлын сонирхолтой. Эх нь хэзээд үйл явдлын дунд
байж, тушаал заавар өгч, хүний ухаан санаанд багтамгүй гэрээ хэлэлцээр хийж, түүнтэй хамт
гайхалтай сонин улс орноор аялан жуулчилдаг. Тони эхээсээ айн сүрдэхийн зэрэгцээ
цаглашгүй их бахдан бахархана. Тони эхийгээ энэ дэлхий дээрхи хамгийн гайхамшигтай
эмэгтэй гэж үздэг байлаа. Тэгээд эхийнхээ дэргэд ээрдэгтээ ихэд гэмшин өөрийгөө зэмлэнэ.
Кейт өөрөө хүүгийнхээ цээжинд ямар их бишрэл бас айдас төрүүлдэгийг мэддэггүй байлаа.
Нэгэн удаа,

- Ээ- ээж ээ-ээ, т-та б-бүх е-ертөнц дахиныг у-удирддаг уу? гэж хүүг асуухад, Кейт инээд
алдан,

- Үгүй дээ, хаанаас. Юун ийм балай юм асууна вэ?

- М-манай с-сургууулийн хүүхдүү-д б-бүгдээрээ т-таны тухай ярьдаг. Та х-хүний

с-санаанд б-багтамгүй ии-их хүн юм-мм.

- Нээрээ би хүний санаанд багтамгүй хүн. Би чиний ээж шүү дээ гэв.
Тони ээжийгээ баярлуулахсан гэж юу юунаас илүү их хүснэ. Эх нь компаниа хичнээн их
эрхэмлэн үздэг. Тонийг хэзээ нэгэн цагт энэ компанийн эзэн болоосой гэж хүсдэгийг мэднэ.
Хөвгүүн үүнд харамсдаг байлаа. Тони өөрөө хэзээ ч компанийн эзэн болж чадахгүй гэж
бодож байлаа. Учир нь тэрээр амьдралаа огт өөр зүйлд зориулна хэмээн боддог байлаа.

Үүнийгээ эхдээ учирлан тайлбарлах гэхэд нь Кейт инээд алдаж,

- Юун балай юм бэ, Тони. Чи өөрийн ирээдүйг төлөвлөх болоогүй балчир байна гэжээ.

Тэгээд Тони рүү дахин ээрэх болсон байна...

Тони зураач болохыг хүсдэг, гоо сайхныг шүүрэн авч үеийн үед мөнхжүүлэхийг хүсэн
мөрөөддөг байлаа. Энэ бол түүнд нэр төрийн хэрэг юм. Тэрээр Парист очиж уран зураг
сурхыг мөрөөдөх боловч эхийгээ энэ ярианд аажмаар бэлтгэх хэрэгтэйг мэдэж байлаа.

Тэр хоёр зуны амралтыг гайхамшигтай сайхан өнгөрүүлэв. Кейтэд өргөн уудам эдлэн газар
бий. Кейт Плам-биич, Өмнөд Калифорнид байшин, Нью Портландад хөдөө аж ахуй худалдан
авсан агаад Тонигийн амралтын үеэр энэ бүх газар очиж үзжээ. Нью Портландад морин
уралдаан үзэж, Нью Йоркд очоод “Дельмонико” зоогийн газар үдийн хоол идэн, “Плаза” –д
үдэлж, ням гаригт “Лучод” оройн хоол иднэ. Кейт өөрөө морин уралдаан сонирхдог, морьд нь
дэлхийн шилдэгт ордог юм. Уралдаанд Кейтийн морь оролцох байвал хүүгээ дагуулан морин
тойруулганд очно. Тэнд очоод Кейтийн ложинд сууж байхдаа эх нт хоолойгоо сөөтөл
хашгиран уралдаж байгаа морийг хөхөөн дэмжиж байхыг гайхан ажиж байв. Эхийн нь
сэтгэлийг мөнгө баясган цэнгээж байгаа юм биш гэдгийг Тони сайн мэддэг болжээ.

- Ялан дийлэхэд л хамаг учир нь байгаа юм шүү дээ. Хамгийн гол нь ялан дийлэх гэдгийг
санаж яваарай гэж Кейт хэллээ.

Хоёул бас яхта онгоцоор зугаалж, заримдаа явган явж, бас зургийн үзэсгэлэн үзнэ. Оройн нь
гал түлсэн задгай зуухны дэргэд сууж байхдаа Кейт Тонид түүнийг өвөг буюу өөрийн эцэг
Жемийн тухай, бас Бандагын тухай ярьж, мөн эмэг ээжид нь мадам Агнеса түүний
бүсгүйчүүд ямар баяр зохиосныг ярьж өгнө.

- Хэзээ нэгэн цагт Крюгер Брент чинийх болно, Тони. Чи энэ компанийг толгойлно...

- Би-би к-компани толгойлохыг хүсэхгүй байна, ээ-ээж ээ. Б-би э-эрх мэ-эдэл, и-их м-
мөнгөний алийг нь ч с-сонирхохгүй.

- Ээ тэнэг, эрх мэдэл, их бизнесийн тухай чи юу мэдэх юм бэ? Чи намайг дэвэн дэлхийгээр
хэрэн хэсэж, нүгэлт муу юм хийж явдаг гэж боддог юм уу? Эсвэл чи Крюгер Брентийг замдаа
дайралдсан бүхнийг нухчин дардаг хайр найргүй машин гэж бодно уу? Чамд нэг юм хэлье.
Энэ дэлхий дээр Христийн дараа бид, хүмүүсийн төлөө юу юунаас илүү анхаарал тавьдаг.
Бид олон зуун мянган хүнд ажил өгч тэд амьдрал залгуулдаг. Бидний татвараар манай орны
хүмүүс сургууль, номын сан, сүм байгуулдаг, биднээс ажлынхаа хөлсөнд авсан цалингаар үр
хүүхдээ тэжээж хувцаслах боломж олж авдаг юм... гээд Кейт сэтгэлийнхээ хөдлөлд автан
амьсгаа нь дээр гарч,
- Бид хүмүүс ажилгүй, өлсөж байгаа тийм газар үйлдвэр байгуулж, үүний ачаар тэд нэр
төртэй амьдрах боломж олдог. Бид бол тэднийг авран тэтгэгчид. Тэгэхлээр чи дахиад эрх
мэдэл юм уу, их бизнесийн тухай дооглон ярихаа болиорой гэхэд нь хүү сандран,

- Ө-өршөөгөөрэй, ээ-ээж ээ гэж Тони хариулаад дотроо бол “Ямарч байсан би зураач болно”
гэж гөжүүдлэн боджээ.

Тонийг 15 хүрэхэд Кейт түүнийг зуны амралтаараа Өмнөд Африкт очиж амар гэж хэлэв.

- Би өөрөө хамт явж чадахгүй нь. Чамд тэнд сайхан байх болно. Би чамайг зохих ёсоор угтаж
ав гэж хэл өгнө.

- Б-би а-амралтаа Д-Дарк Харборт ө-өнгөрүүлмээр б-байна.

- Ирэх жил болоорой. Энэ зун Йоганессбурт оч гэж Кейт бат хатуу хэллээ.

Кейт Йоганессбург дахь өөрийн компанийн салбарын захиралд маш нарийн даалгавар өгч,
хоёул хамтран Тонигийн явах замналыг төлөвлөжээ. Тонид түүний ирээдүй Крюгер Бренттэй
салшгүй холбоотойг сайн ойлгуулахаар өдөр бүрийг төлөвлөсөн байна.

кейт Йоганессбургээс өдөр болгон мэдээ авч байлаа. Тонид алтны уурхай үзүүлж, хоёр дахь
өдрийг алмасны талбайд өнгөрүүлж гэх мэтээр Крюгер Брентийн Өмнөд Африкийн гол
үйлдвэрүүдээр аялуулсан байна. Амралт дуусахаас хэд хоногийн өмнө Кейт Йоганессбург
дахь салбарын захиралд утасдан,

- Тонигийнэ ажил явдал ямар байна даа? гэж лавлав.

- Хүү чинь цагийг маш сайхан өнгөрүүлж байна, миссис Блэкуэлл. Тэр ч байтугай энд дахин
жаахан байж болох уу гэж надаас асуусан гэхэд нь кейт баярлан,

- Сайн байна, тун сайн байна гэжээ.

Амралт дуусахад Тони эхлээд Саутгемитонд очиж, тэндээс Америк руу нисэх “Пан
Американ” компанийн нисэх онгоцонд суужээ. Кейт нисэхийн бусад компанийг тоодоггүй,
өөрөө дандаа “Пан Американ” нисэх онгоцоор нисдэг юмсанж. кейт чухал зөвлөгөөнөө
хойшлуулан хүүгээ угтахаар саявтар байгуулсан Нью Йоркийн Ла Гуардия нисэх онгоцны
буудалд очив.

- Сайн явж ирэв үү. Сайхан амарсан уу, миний хүү гэсэнд хүүгийн царай туяаран,

- Ө-өмнөд А-африк г-гайхамшигтай сайх-хан орон юм байна, ээ-ээж ээ. Т-та мэ-мэдэх биз
дээ... Н-намайг В-ван Д-дер Мервегээс ма-манай өвөөгийн алмас х-хулгайлсан Намиб ц-цөлд
аваачиж ү-үзүүлсэн шүү гэхэд нь,

- Хулгайлаагүй юм шүү, хүү минь. Зүй ёсны өөрийн юмыг буцааж авсан хэрэг хэмээн
Кейтийн залруулахад,
- Т-тэгэлгүй дээ... гэж Тони доогтойхон мушилзаад,

- Нэг үгээр хэлэхэд би тэнд очиж үзлээ. Тэнгисийн манан суухыг үзэж чадсангүй. Харин тэнд
буутай харуул манаач нар одоо хүртэл байдаг юм билээ. Ганц нэг биш тэд олуулаа байна
лээ.Намайг ганц хоёр чулуу дурсгал болгож авья гэхэд зөвшөөрөөгүй шүү гэхэд нь Кейт баясан
инээд алдан,

- Чи ганц хоёр чулуугаар яах нь вэ? Нэн удахгүй бүгдээрээ чинийх болно гэв.

- Би тэдэнд тэгж хэлсэн л дээ. Даанч миний үгийг тоож сонсоогүй гэхэд нь Кейт хүүгээ
тэврээд,

- Тэнд сайхан байгаа биз, тийм үү?

Хүү нь ямар өв хөрөнгө хүлээж байгааг ойлгосонд Кейтийн сэтгэл өег байлаа.

- Тэндхийн юу нь хамгийн гоё санагдасн гээч?

- Юу нь вэ? гэж Кейт инээмсэглэн асуув.

- Өнгө будаг нь. Би байгалийн байдлын олон зураг зурсан. Тэндээс явмааргүй байлаа. Би
тийшээ дахин очиж, хэдэн зураг зурмаар байна гэхэд нь Кейт царайндаа баярлан урамшсан
дүр үзүүлэхийг хичээн,

- Зураг ий? Тэр чинь сонирхож оролдоход их сайхан ажил уу?

- Зүгээр сонирхож оролдож байгаа юм биш ээ. Би зураач болохыг хүсдэг. Аль эртнээс бүр
жаахан байхын ингэж мөрөөддөг байсан. Би Парист очиж энэ чиглэлээр сурмаар байна.
Надад авьяас байх шиг санагддаг.

- Чи зураг зурахад бүх насаа зориулах гээгүй юм байгаа биз дээ?

- Бүх насаа зориулмаар байна. Миний сонирхдог ганц юм энэ.

Кейт ялагдснаа ойлголоо.

“Энэ хүү өөрийн санаснаар амьдрах эрхтэй юм даа. Харин би хүүгээ яаж ийм муухай алдаа
хийх боломж олгож болох билээ дээ” гэж Кейт бодлоо.

Есдүгээр сард асуудал аяндаа шийдэгдлээ. Европ дайнд татагдан орж, энэ дэлхийн олон сая
хүн амьтныг зовоосон дэлхийн хоёрдугаар дайн эхлэжээ.

- Чамайг Вартоны санхүү, худалдааны сургуульд оруулмаар байна. Европд одоо дайн болж
байна. Чи амгалан тайван газар жаахан суу. Хоёр жилийн дараа чамайг зураач болох санаагаа
орхихгүй бол чиний санаснаар больё гэж Кейт түүнд амлалаа.

Тэр болтол Тонийг энэ тэнэг санаагаа орхино гэж Кейт бат итгэж байлаа. Хүү нь дэлхийн
хамгийн том компаниудын нэгнийг толгойлох боломж байж байхад нэг муу зураг нялж пялж
суух юм гэдэг бодол Кейтийн толгойд багтахгүй байлаа. Тони ямар ч гэсэн өөрийнх нь хүү
шүү дээ.

Крюгер Брентийн хувьд гэвэл дэлхийн хоёрдугаар дайн, нэгдүгээр дайн шигээ шинэ
бололцоо боломжийг нээж өгөв. Байлдаж байгаа улс орнуудад зэр зэвсэг, галт хэрэгслэл
хүрэлцэхгүй байлаа. Крюгер Брент тэдэнд хэрэгтэй бүх зүйлийг өгч чадна. Өгөх ч болно.

Ингээд л компанийн үйлдвэрүүд өдөрт 24 цаг ажиллаж байгаа билээ.

АНУ хөндлөнгөөс хараад сууж чадахгүйг Кейт бат мэдэж байлаа. Ерөнхийлөгч Рузвельт улс
орноо ардчилалын цайз бологтун гэж уриалжээ. Тэгээд 1941 оны 3 сарын 11 нд АНУ ын
конгресс ленд-лизийн тухай хууль баталсан юм. Холбоотнуудын хөлөг онгоцыг германы
нисэх онгоц шумбадаг хөлгүүд дайран довтолж байлаа.

Герман улс өрөвдөхийг үл мэдэх давагдашгүй их хүчтэй болсон байлаа.

Гитлер Версалийн гэрээг зөрчин хүчирхэг цэргийн машинтай болжээ. Герман улс “цахилгаан
дайны” стратеги ашиглан Польш, Бельги, Нидерланд, Люксембург, Францыг ээлж дараалан
нуга даржээ.

Герман дахь Крюгер Брентийн үйлдвэрүүдийг улсынх болгож, тэнд ажиллаж байсан еврей
нарыг баривчлан хорих лагерьт хорьсон тухай мэдээ аваад Кейт энэ асуудал дээр ажиллаж
эхлэжээ. Кейт хэд хэдэн тийшээ утасдаж маргааш нь Швейцари орохоор мордов. Түүнийг
Цюрихт очиход тэндхийн хэлтэст хурандаа Бринкман уулзахыг хүсэж байна гэсэн зурвас
хүлээж байв.

Бринкман уг нь бол Берлин дахь Крюгер Брентийн салбарын захирал юм. Бүх үйлдвэрийг
улсынх болгосны дараа Бринкманд хурандаа цол олгоод хуучин ажилд нь хэвээр нь үлдээсэн
ажээ.

Хурандаа өөрөө зочид буудалд хүрч ирлээ. Тэр бол цайвар шар үсээ халзарч яваа гавал дээрээ
нямбайлан тавьсан төлөв төвшин байрын туранхай хүн юм.

- Фрау Блэкуэлл энд тантай уулзсандаа хязгааргүй их баяртай байна. Манайх дайнд ялсны
дараа таны бүх үйлдвэрийг буцааж өгнө гэдгийг засгийн газрын нэрийн өмнөөс танд
уламжилна уу гэж намайг явуулсан юм. Герман улс аж үйлдвэрийн аугаа их орон болно. Бид
тан шиг хүнтэй хамтран ажиилахыг хүснэ.

- Герман дайнд ялагдвал яах вэ? гэсэнд хурандаа ялимгүй жуумалзан инээмсэглээд,

- Тийм юм болохгүй гэдгийг та бид хоёр сайн мэдэж байгаа. АНУ Европын хэрэг явдалд
хөндлөнгөөс оролцохгүй байгаа нь зөв мэргэн бодлого, АНУ цаашид ч энэ бодлогоо хэвээр
баримтлах болов уу гэж найдаж байна гэхэд нь Кейт урагш тонгойн,

- Тэр эргэлзээгүй, хурандаа. Еврей нарыг хорих лагерьт устгаж байна гэж би сонслоо. Энэ
үнэн үү?

- Британы суртал нэвтрүүлэг юм. Еврей нарыг хөдөлмөрийн лагерьт явуулж байгаа нь үнэн
боловч тэдэнтэй зохих ёсоор харицдаг гэж би офицер хүний ёсоор баталья гэжээ.

Энэ үг ямар утга учиртайг Кейт мэдсэнгүй, тэгээд бүгдийг өөрөө магадлаж мэдэхээр
шийдлээ.

Кейт маргааш нь Германын томоохон худалдаачин Отто Герр Бюллертэй уулзхаар болзож
тохиров. Тэр бол цагаан цайлган царайтай, багагүй зовлон үзсэн нүдтэй 50 орчин насны эр
байлаа. Кейт түүнтэй бага шиг цайны газар уулзаж, Отто танхимын булан дахь жижиг ширээг
сонгож суулаа.

- Еврей нарыг төвийг сахисан орнуудад сэм явуулах нууц сүлжээ таны удирдлагад байдаг гэж
би найдвартай хүнээс сонссон юм...

- Тэр худлаа, хатагтай Блэкуэлл. Тийм ажиллагааг гуравдугаар райхын талаар урван тэрсэлсэн
хэрэг гэж үзэж болно.

- Таны ажилд бэлэн мөнгө их хэрэгтэй байдаг гэж би сонссон л доо.

Отто дал мөрөө хавчлаа.

- Нууц сүлжээ байхгүй юм чинь. түүнд мөнгө үрэхийн хэрэг юу вэ?

Отто нэмж хэлээд сэтгэл түгшсэн янзтай танхимыг тойруулан харлаа. Энэ хүн өдөр шөнийн
эргэлтэнд амиа дүйж явдаг.

- Би ямар нэг тусламж үзүүлмээр байна. Төвийг сахисан найрамдалт олон оронд Крюгер
Брентийн үйлдвэр бий шүү дээ. Дүрвэгсэдийг тийш нь явуулж чадах хүн байвал бид тэднийг
ажлаар хангаж чадна. Бидэнд хямд ажлын хүч их хэрэгтэй байна санж... Кейт үүнийг тун
болгоомжтой өгүүлхэд Отто гашуун хар кофе бага багаар балган хэсэг үг дуугүй сууж байснаа
эцэст нь,

- Энэ зүйлийн тухай надад мэдэх юм байхгүй. Улс төрийн хэрэгтэй хамаагүй оролдох
осолтой. Харин гай зовлонд унасан хүнд тусалья гэж байгаа бол Англид аймшигт өвчнөөр
зовж байгаа миний нэг авга ах бий. Эмчилгээний төлбөрт нэхэж байгаа их мөнгийг бид төлж
чадаагүй байгаа юм...

- Хэд хэрэгтэй вэ?

- Сард 5000 доллар. Мөнгийг Лондон дахь эмнэлэгийн дансанд юм уу, эсвэл Швейцарийн аль
нэг банкинд шилжүүлэхэд л болно.

- Үүнийг зохицуулж болох юм байна.

- Манай авга танд их баярлах болно доо.

Үүнээс хойш хоёр сарын дараа дүрвэгсэдийн багахан бүлгүүд найрамдалт орнуудад ирж,
Крюгер Брентийн үйлдвэрт ажилд орох болов.

Тони хоёр дахь жилийн сүүлчээр сургуулиа орхилоо. Энэ тухай ярилцахаар Кейт дээр ирлээ.

- Б-би хичээхээрээ х-хичээсэн ээ-ээж ээ. Н-нээрээ и-их хи-ичээсэн шүү. Г-гэсэн ч-ч б-би зу-
ураач болж, з-зураг з-зурж су-сурахаар ши-шийдлээ. Д-дайн д-дуусахаар б-би Парист о-очих
бодолтой байна.

Хүүгийн үг бүр Кейтийн зүрхийг зүүгээр шивэх мэт хатгаж байлаа.

Тони үргэлжлүүлэн,

- Э-энэ т-таны санаанд т-таарахгүй байгааг б-би мэдэж байна. Гэвч би өө-өөрийн

э-эрхээр ам-амьдрахыг хүснэ. Б-би с-сайн з-зураач болж чадна гэж и-итгэж б-байна. Т-та н-
надад тийм боломж олгооч дээ-ээ.

Кейт цөхрөнгөө барав. Тонигийн хийх гэж байгаа ажил бол цагийг дэмий үрсэн хэрэг. Яагаад
ийм ухаантай хүү үүнийг ойлгохгүй байна вэ?

- Чигагогийн урлагын институтэд тэнцсэн.

- Чи тийшээ хэзээ явах юм бэ?

- Хичээл нь 15 нд эхлэнэ...

- Өнөөдөр хэдэн билээ?

- 16...

12 сарын 7 ны ням гариг Японы хуандийн тэнгисийн цэргийн флот “Накияма” хэмээх
бөмбөгдөгч онгоц, “Зеро” хэмээх сөнөөгч онгоцууд Пойль Харборыг дайран довтолж АНУ
маргааш нь дайнд орлоо. Тони тэр өдөртөө Америкийн тэнгисийн явган цэрэгт бүртгүүлэв.
Түүнийг Виржиниа дахь Куантикод явуулж, Тони тэнд офицерийн түр сургууль төгсөөд
тэндээсээ Номхон далайн өмнөд хэсэгт томилогджээ.

Кейтэд ёроолгүй ангал нүхний амсар дээр зогсож байгаа юм шиг санагдах болов. Өглөөнөөс
эхлээд орой болтол компанийн хойшлуулшгүй ажлыг эрхлэн толгой нь өөр юм бодох завгүй
байх боловч ураг тархины гүнд нь нэг л айдас салахгүй оршино. Тонийг алагдсан гэдэг мэдээ
хэзээ ирэх бол гэж цаг үргэлж айн бачимдана.

АНУ их хохирол хүлээж байв. Японы нисэх онгоцнууд Гуам, Мид вэй, Уэйк дахь амеркийн
цэргийн баазуудыг зад бөмбөгджээ. Удалгүй Японууд эхлээд Сингапур, тун удалгүй ойр
орчимын арлуудыг нүд ирмэх зуур эзэллээ. Генерал Дуглас Макартур Филиппинээс цэргээ
татан зайлуулахад хүрчээ. Берлин, Ром хүчирхэг хүчин дэлхий дахиныг аажмаар эзэлж, хүрэн
толбо болтол нь зад цохижээ.
Тониг олзлогдон тамлуулах вий гэж Кейт айна. Ер нь Кейт одоо юм бүхнээс айж байлаа.

Кейт эрх мэдэлтэй гэвч одоо хэрхэхийг Эзэн тэнгэрт даатгахаас өөр зам байсангүй.

Харин Тонигийн захидал бүр найдлага төрүүлнэ. Ядаж хэдэн долоо хоногийн өмнө Тониг
амьд байсныг тэр үед мэдэж баярлана.

“Бидэнд шинэ мэдээ ирэхгүй. Оросууд тэсэж байгаа болов уу? Японы цэргүүд ёстой
араатнууд юм аа. Харин үхэхээс огт айдаггүй нь үнэлэх хэрэгтэй. Нэгдсэн улсад сонин сайхан
юу байна даа? Ажилчид цалингаа нэмэгдүүлэхийг шаардан ажил хаяж байгаа гэсэн, үнэн үү?
Таныг их санаж байна...” гэж Тони нэгэн захидалдаа бичжээ.

Холбоотны хүчин Номхон далайд өөрийн анхны давшилт байлдааны ажиллагаа явуулав. АНУ
Соломон арал дээрхи Куадалканалд тэнгисийн десантын явган цэрэг буулгаж, тэндээс АНУ-
ын цэрэг япончуудын эзэлсэн арлуудыг чөлөөлж эхлэлээ.

Европын холбоотнууд дараа дараагаар ялалт байгуулж, цаг аргагүй нааш эргэжээ.

6 сарын 6 нд америк, британийн цэргүүд Нормандын эрэгт бууж, жилийн дараа 5 сарын 8 нд
Герман улс үг дуугүй бууж өгөх гэрээнд гарын үсэг зурлаа.

Уг оны 8 сарын 6 нд АНУ эртний өшөөгөө авч Японы Хирошима хот дээр атомын бөмбөг
хаялаа. Гурван хоногийн дараа Нагасаки хотыг бас л атомын бөмбөгөөр бөмбөгдлөө. 8 сарын
14 нд Япон улс бууж өглөө.

Ингээд цус урсгаж, тамир барсан аймшигт дэлхийн хоёрдугаар дайн дууслаа.

Долоо хоногийн дараа Тони гэртээ ирлээ. Тони Кейт хоёр Дарк Харбор дахь байшингийнхаа
сэрүүн тагт дээр, тэнгисийн булангийн усан мандал дээгүүр цагаан дарвуулт яхта онгоц
сүлжилдэхийг харж суулаа.

“ Хүү маань дайнд яваад их өөр болжээ” гэж Кейт бодлоо. Тонийн бие чийрэгжиж буурь
суусан нь ил байлаа. Тони жижигхэн живэр сахал тавьж, нүүр нь нар салхинд борлон
цэвэрхэн сайхан болжээ. Нүдний нь харцанд урьд байгаагүй нэгэн шинэ байдал бий болсон
байв.

Дайны үед Тониг өөрийн ирээдүйнхээ тухай мөрөөдөлөө орхисон болов уу гэж Кейт найдаж
байв.

- Хүү минь, чи одоо яах бодолтой байна даа? гэж асуусанд Тони инээмсэглэн,

- Би танд бүр дайнаас өмнө хэлж байсан шүү дээ. Парист очих сурах бодолтой байгаагаа гэж.
Дөтгөөр дэвтэр

Тони

1946-1950
18-р бүлэг

Тони урьд нь Парист ирж байсан. Харин одоо нөхцөл байдал их өөр болжээ. Герман
эзлэлтийн дараа “Дэлхийн нийслэл” өнгө алдсан боловч нээлттэй хот гэж зарласны ачаар
эвдлэн сүйдэхээс аварагдсан байна. Ард түмэн энлэн зовж байлаа. Хэдийгээр нацистууд
Луврийн бүх баялагыг зөөж хоосолсон боловч Тонийг очиход Парис хот бас танагтай байлаа.
Тони энэ удаа жуулчлалаар ирээгүй, энд суурин сууж, хотын нэг хэсэг болохоор ирээд байгаа
билээ. Тони уг нь Маршал Рошийн өргөн чөлөөнд байдаг, эзлэлтийн үеийг тэсч гарсан
өргөөнд сууж болох байсан сан. Үүний оронд Монпарнасын ойролцоо, Сена мөрний зүүн
хөвөөнд байдаг хуучин муу байшинд хогшил тавилгагүй байр хөлслөн авчээ. Тэр байр нь
задгай зуухтай зочлох өрөө, нэг муу өмгөр унтлагын өрөө, хөргүүртэй гал тогооны өрөөнөөс
бүрдсэн байв. Унтлагын өрөө, гал тогооны өрөөний хооронд ширмэн онгоц, суудал нь
хагарсан хөтөвчтэй халуун усны өрөөтэй байлаа. Байрны эзэн авгай уучлал гуйж эхлэхэд Тони
түүнийг зогсоож,

- Зүгээр, зүгээр хатагтай. Бүгд сайхан байна. Би энэ байрыг хөлсөлж авна гэжээ.

Тони эхний бямба, ням гаригийг нохой бөөсний зах дээр өнгөрөөв. Даваа, мягмар гаригт
хуучин эд юм худалддаг дэлгүүрээр хэсэн буйдан ор элэгдсэн ширээ, хоёр зөөлөн сандал,
хуучин муу шүүгээ, гал тогооны ан цав гарсан ширээ, бас хоёр хоолны ширээний сандал зэрэг
хэрэгтэй бүх хогшил тавилгыг худалдаж авчээ.

“Ээж мэдвэл сүйд болно” гэж Тони бодлоо. Уг нь байрандаа хуучин цагийн сайхан эд хогшил
тавиж болох байсан. Харин тэгвэл Тони америк зураачийн дүрд жүжиглэх төдий юм болно
гэсэн үг. Гэтэл Тони үнэхээр зураач болохыг хүсэж байгаа билээ.

Одоо уран зургийн сайн студид очих л үлдлээ. Парис дахь урлагийн сургуулийг Франц даяар
хамгийн нэр хүндтэй студи гэж үздэг. Тэнд элсэгчдийг маш нарийн чанд шилж авдаг
болохоор элсэн орж чадсан америк хүн цөөн. Тони энд элсэн, суралцахыг хүсч өргөдөл
хүсэлтээ бичээд, “Тэднийх намайг хэзээ ч авахгүй байх даа. Гэнэт харин авчихвал яанаа” гэж
нэг бодов. Уралдаанд шалгалтанд өгөх зургаа 3 долоо хоног зурсан бөгөөд дараа нь 4 долоо
хоног хариу хүлээлээ. 4 дэх долоо хоногийн сүүлчээр шуудан зөөгч сургуулиас захидал авчирч
өглөө. Тониг дараа долоо хоногийн даваа гаригт өөрийн биеэр ирж ярилцана уу? гэсэн
байжээ.

Урлагийн сургууль арван хэдэн анги танхим бүхий том чулуун байшинд байдаг аж. Тони
сургуулийн захирал Мэтэр Гессан гэдэг баргар царайлсан өндөр хүний албан тасалгаанд
оров. Гессан бараг хүзүүгүй гэмээр агаад уруул нь ямарч өнгөгүй нарийнхан зурвас шиг
санагдана.

- Таны зураг сонирхогчдын хэмжээнээс хэтрээгүй байна. Гэхдээ нэг юм байх шиг санагдлаа л
даа. Манай хороо таныг авахаар шийдэхдээ таны зургыг болсон байна гэхээсээ илүү
болоогүйг байна гэдгийг илүү харсаныг эхлээд дурьдая. Ойлгож байна уу?
- Сайн ойлгохгүй байна багш аа

- Яваандаа ойлгоноо. Та Канталь багшийн ангид суралцах болно. Хэрэв та тэсэж тогтвол тэр
хүн танд таван жил багшлах болно.

“Би тэсэж тогтоно” гэж Тони өөрөө өөртөө амлав.

Канталь багш гэдэг нь халзан толгойгоо нил өнгийн дугуй малгайгаар гоёсон тагдгар эр
байлаа. Канталь багш хүрэн нүдтэй, монцгор хамартай, бамбагар зузаан уруултай нэгэн
байлаа. Тэр багш,

- Америкчууд бүгдээрээ юм мэддэггүй, зэрлэг бүдүүлэг хүмүүс. Чи яах гэж энэ сургууль
орсон юм бэ? гэсэн үгээр Тониг угтав.

- Зурж сурах гэж орсон юм гэсэнд Канталь багш хамар дороо хүнгэнээд өнгөрлөө.

Ангидаа 25 сурагчтай. тэднйи олонхи нь францууд. Суралцах танхимын өнцөг булан бүрд
зургийн тавиур байлаа. Тони цонхны дэргэдэх тавиурыг сонгож авлаа. Өрөөнд грек
барималаас хуулбарласан хүний биеийн янз бүрийн хэсгийн гөлтгөнө дүрснүүд байлаа. Тони
зургийн загвар болох хүнийг эрж ийш тийш харсан боловч, тийм хүн байсангүй.

- Эхлээрэй гэж Канталь багш сурагчиддаа тушаав.

- Уучлаарай. Би... би будаг авчираагүй гэж Тони хэлэхэд

- Чамд будаг огт хэрэггүй. Эхний жил та нар харандаагаар зурж сурна гэж Канталь багш
хэлээд танхимын буланд байгаа нэгэн бүлэг барималуудыг зааж,

- Та нар үүнийг зурна. Энэ та нарт амархан ажил шиг санагдаж магадгүй гээд багш
жуумалзан муушилаа, тэгээд үргэлжлүүлэн,

- Харин он дуусахаас наана та нарын тэн хагасыг хасна гэдгийг эртнээс сануулья. Эхний жил
та нар хүний биеийн бүтцийг судална. Хоёрдугаар дамжаанд үлдсэн нь амьд загвар харж
тосон будгаар зурна. Гуравдугаар дамжаанд та нараас цөөхөн хүн үлдэх нь лав. Тэгээд та нар
надтай хамт, миний арга маягаар, улам сайжруулан зурах болно. Дөрөв, тав дахь жилийг та
нар өөрийн гэсэн арга маягийг эрж олоход зориулана. За одоо ажилдаа орцгоо... гэлээ.

Сурагчид харандаагаа дуулгавартай барьж авцгаалаа.

Канталь багш ангийн дотуур явж, тавиур бүрийн дэргэд саатан санал ажиглалтаа хэлнэ.
Тонигийн тавиурын дэргэд ирээд,

- Биш. Энэ зохихгүй. Миний нүдэнд үзэгдэж байгаагаар бол гарын гадаад дүрс л байна. Би
бол дотор нь байгаа булчин шөрмөс, ясыг нь үзэхийг хүснэ. Үүнийг яаж хийхийг мэдэх үү?
гэв.

- Мэднэ, багш аа. Гарыг сэтгэлдээ төсөөлж мэдэрсний дараа зурах хэрэгтэй.
Сургууль дээрээ хичээлгүй бол Тони голдуу гэртээ ноорог судалбар зураад сууж байдаг.
Өглөөнөөс орой болтол тэр зураг зураад сууж чадна. Уран зураг түүнд урьд мэдэхгүй байсан
эрх чөлөөний сэрэл сэтгэгдэл төрүүлнэ. Тавиурын дэргэд гартаа бийр бариад сууж байхдаа
тэр өөрийгөө тэнгэрийн элч мэт стэгэж мэдэрнэ. Тэгээд нэг гараараа бүхэл бүтэн ертөнц
бүтээж чадна. Энэ бол ташууран хөлчүүрэм сэрэл сэтгэл байлаа. Тони уран зураач болох
заяатай төрсөн аж.

Тони зураг зураг зураагүй үедээ Парисын гудамжаар тэнэн, энэ ер бишийн гайхамшигт хотыг
судална. Энэ бол Тонийн өөрийн нь хот, урлаг нь төрсөн өлгий нь байлаа. Сена мөрөн Парис
хотыг хоёр хуваадаг. Баруун зүүн эрэг болгож хуваасан нь эсрэг тэсрэг хоёр ертөнц гэж хэлж
болох байлаа. Зүүн эрэг нь оюутан, зураач, үймэн бужигнагч залуучуудынх. Энэ бол
Монпариас, Расней цэцэрлэгт гудамж, Сен Жермен Де Пре, Флор цайны газар, Генри
Миллер, Эллиот Поль... Зүүн эрэг бол Тонигийн гэр орон юм. Тони Буль Бланш юм уу Ла
Купольд хэдэн цагаар сууж, сайн нөхөдтэйгөө өөрийн хачин жигтэй ертөнцийн байдлыг
шүүн хэлэлцэж чадна.

- Гугенхэймийн музейн захирал нь одоо Парист ирээд гарын дор дайралдсан бүхнийг
худалдан авч байна гэнэ.

- Намайг хүлээж л байг...

Тэд бүгдээрээ нэг л сэтгүүл гар дамжуулан үзнэ. Энэ нь үнэ ихтэй сэтгүүл аж. Тони Ле Росид
франц хэл сурсан болохоор бусад оюутантай амархан нөхөрлөжээ. Учир нь тэднийг нэгэн
халуун хүсэл нэгтгэдэг юм. Цаадуул нь Тонийн ямар айлын хүүхэд болохыг мэдэхгүй,
өөрсөнтэйгөө адил ядуу буурай хүн гэж бодно.

Ядуу зураач нар Сен Жермен цэцэрлэгт гудамжны “Флор”, “Ле До Маго” цайны газар
цугларч, Каннет гудамжин дахь Лу По де Этьен –д үдийн хоол иднэ. Тэдний дотор “Максим”
юм уу, “Лессер” мэтийн тансаг зоогийн танхимын босгыг алхаж үзсэн хүн үгүй.

Энэ үед Парист Парист аугаа их зураач нар бүтээлээ туурвиж байлаа. Тони хааяа Пабло
Пикассогийн барааг харна. Нэг удаа найзтайгаа зугаалж яваад Марк Шагальтай дайралдсан
билээ.Тэр бол өтгөн буурал үстэй, сонин хувцастай 50 орчим настай өндөр эр байв.

- Энэ хүнийг олж харсан нь бидний аз. Парист ирэх нь маш ховор цөөн байдаг гэж Тонигийн
найз түүнд шивэгнэжээ.

Тони Макс Эрнестийг гудамжинд цайны газар дарс шимэн суухад нь, мөн өөрийн нэгэн
барималын адил эв хавгүй биетэй аугаа их Альберто Жиакометтийг олж харав. Ийм
барималчийн майга хөлтэйг Тони гайхлаа. Тони залуу бүсгүйчүүдийг гар, хөлгүй хүүхэлдэй
мэт дүрсэлсэн садар самууны зураг зурж нэрд гарсан Ганс Белмертэй танилцжээ. Тониг
Брактай танилцуулсан нь хамгийн сэтгэл догдлом мөч байлаа. Тэр зураач Тонитой эелдэг
найрсагаар ярьж, Тони өөрөө нэг ч үг дуугарч чадсангүй.

Ирээдүйн сод билэгтэн ураг зургийн үзэсгэлэн үзэж, өрсөлдөгч нараа шинжинэ. “Драун
Давид” зургийн үзэсгэлэнд урьд нэгэн цагт урлагийн сургуульд сурч байсан, нэрд гараагүй
залуу зураач Бернар Буффе, Сутин, Утрилло, Дюфи нарын зургийн үзэсгэлэн гарчээ.
Оюутнууд “Салон Д Отом”, Сена гудамж дахь мадемуазель Руссийн зургийн үзэсгэлэнд
чихэлдэж, зав чөлөөтэй цагтаа азтай өрсөлдөгч нарынхаа тухай хов живийг ярина.

Тонигийн байрыг Кейт анх үзээд их гайхсан боловч санаагаа ил хэлсэнгүй нууж чадлаа.
Харин дотроо бол “Ээ чөтгөр алгад, Миний хүү яаж ийм оромжинд сууж болдог байна аа”
гэж бодоод, хүүдээ болохоор

- Овоо тохитой юм байна. Харин хөргүүр харагдахгүй байх юм. Чи хүнсний зүйлээ хаана
хадгалдаг юм бэ? гэж асуулаа.

- Цонхны гадаа гэхэд нь Кейт цонхны дэргэд очиж, онгойлгон нэг алим авч,

- Уран бүтээлийн нэг загварыг чинь би идэж орхих юм биш биз? гэсэнд Тони,

- Ү-үгүй, ээ-ээж ээ гэжээ. Кейт алимыг нэг хазаад,

- Одоо зургийнхаа тухай надад ярь гэж шаардлаа.

- Яриад байх гойдын юм байхгүй. Бид одоохондоо харандаагаар зурж байгаа гэж Тони үнэнээ
хэллээ.

- Тэр Канталь багш чинь сайн хүн үү?

- Хэлээд яах вэ. Хамгийн гол нь тэр намайг тоодог. Ирэх жил сурагчдын дөнгөж гуравны нэг
нь үргэлжлүүлэн суралцана.

Кейт энэ удаа Тониг компанитай амьдралаа холбох хэрэгтэй гэж нэг ч үг дурссангүй.

Канталь багш сурагчдаа магтах дургүй. Хааяа нэг

- Яах вэ, үүнээс дор юм ч байдаг гэх юм уу

- Арьсан дор юу байгаа нь бараг харагдаж байна гэж хамар дороо хүнгэнэнэ.

Жилийн дараа хоёрдугаар дамжаанд шилжсэн найман оюутны нэгэнд Тони оржээ. Азтай
оюутнууд энэ үйл явдлыг тэмдэглэхээр Монмартрын нэгэн шөнийн клубт очиж, мал болтлоо
архидаад английн жуулчин бүсгүйчүүлтэй шөнийг өнгөрөөжээ.

Дахиад хичээл эхлэхэд Тони тосон будагаар амьд загвар харж зурах болов. Хүний биеийн
бүтцийг бүтэн жил үзэж судалсны дараа Тони булчин шөрмөс, мэдрэлийн эс бүр хаана
байдгийг мэдэх болсон шиг санагдана. Урьд нь зөвхөн хуулж зурдаг байсан бол одоо бийр
бариад нүдний өмнөх загвар эмэгтэйг харж туурвин бүтээх болов. Канталь багш хүртэл
гайхах болжээ.

- Чамд хамгийн гол юмыг өлгөж авах авьяас байна. Одоо чи арга ажиллагаагаа сайжируулах
талаар олигтойхон хичээх хэрэгтэй гэж Канталь багш хүнгэнэжээ.
Студид арваад хүн ирж оюутнуудад биеэ зуруулдаг байлаа. Тэднийг Канталь багш сонгодог.
Багшийн олон сонгож авдаг загварын дотор ийм аргаар анагаах ухааны дээд сургуульд сурах
төлбөрийн мөнгөө олдог Карлос, умдаг дээрээ улбар шар үстэй, ар нуруу нь сэвхтэй Аннета
гэдэг махлаг намхан хүүхэн, Доминик Массо гэдэг нүүрний тэг үзэсгэлэн гоо, хар ногоон
нүдтэй дур булаам шар хүүхэн бий. Доминик бол бүхний хайртай бүсгүй. Өдөр бүр хичээл
дууссаны дараа залуучууд бүгдээрээ түүнийг тойрон шавж, болзоонд урина.

- Би ашигтай, аятай хоёрыг хослуулах дургүй. Түүний дээр энэ чинь шударга биш юм болно.
Та нар бүгдээрээ миний хамаг юмыг харсан. Гэтэл та нарын ямар маягийн бие цогцостойг
би хараагүй гэж бүсгүй хариулна.

Иймэрхүү янзаар битүү утгатай үг хаялцах боловч Доминик оюутнуудын хэнтэй ч болзоонд
явдаггүй байлаа.

...Нэгэн удаа бусад бүх сурагчид тарж явсны дараа Тони Доминикийн зургийг гүйцээн зурж
байтал гэнэт ард нь дуу гарч,

- Миний хамар дэндүү урт байна гэх сонсогдоход Тони эргэж харвал Доминик ард нь зогсож
байлаа.

- Ээ уучлаарай. Одоохон засаадхья...

- Хэрэггүй дээ. Зураг чинь их сайхан болсон байна. Үнэнийг хэлэхэд миний хамар угаасаа
жаахан урт л даа гээд Доминик дур булаам инээмсэглээд,

- Үүнд чинь би тус болж чадахгүй болов уу даа гээд Тони бас инээмсэглэлээ.

- Хн... Франц хүн бол: “Чи их хөөрхөн хамартай юм байна” хэмээн хэлэх байсандаа...

- Чиний хамар хөөрхөн харагдаж байна. Уг нь би франц хүн биш л дээ.

- Андашгүй мэдэгдэж байна. Чи надтай болзоо тавьж уулзья гэж нэг ч гуйгаагүй. Яагаад тэр
вэ? гэхэд Тони ичиж,

- Бүү мэд. Чамайг гуйсан хүн болгонд татгалздаг болохоор чинь тэр байх...

- Арай ч бүгдэд нь татгалздаггүй. Тавтай нойрсоорой гээд Доминик яваад өглөө.

Үүнээс хойш Тонийг студид саатах үед Доминик хувцсаа өмсчихөөд эргэн ирж, дэргэд нь
зогсон, харж байдгийг Тони ажиглажээ.

- Чиний зураг их сайхан болж байна. Чамайг сайн зураач болно гэдэгт итгэлтэй байна гэж
нэгэн удаа Тони өгүүлэхэд,

- Баярлалаа, Доминик. Чиний хэлснээр болох болтугай.

- Чи урлагийг их эрхэмлэдэг үү?

- Тийм ээ.

- Жинхэнэ зураач болох хүн намайг оройн хоолонд урихгүй юм уу? гээд Тониг гайхсаныг
ажиглан,

- Би бага иддэг. Биеийнхээ хэлбэрийг эвдэх дургүй гэхэд нь Тони инээд алдаж

- Бололгүй дээ. Дуртайяа урья гэжээ.

Хоёул бага шиг гуанзанд оройн хоол идэж байхдаа уран зураач нарын тухай, тэдний зургийн
тухай ярилаа. Алдар цуутай уран зураач нарт Доминик загвар болж зуруулдагыг Тони ам
ангайн сонсож байлаа. Сүүтэй кофе ууж дууссаны дараа Доминик,

- Чи тэднээс дутахгүй сайн зурдгийг хэлэх хэрэгтэй гэхэд нь Тони урамшин баярлаж,

- Би цаашид их оролдох хэрэгтэй гэж даруухан хариулав. Хоолны дараа Доминик,

- Чи надад байраа үзүүлэхгүй юм уу? гэв.

- Болох юм... Даанч үзмээр юм байхгүй л дээ.

Хоёул Тонигийнд очиж, ойрд цэвэрлээгүй орон байрыг нь Доминик тойруулан хараад толгой
сэгсэрч,

- Чиний хэлдэг үнэн байж. Энд үнэндээ үзэж харах юм алга. Байрыг чинь хэн цэвэрлэдэг юм
бэ?

- Долоо хоногт нэг удаа цэвэрлэгч авгай ирдэг...

- Түүнийгээ халсан нь дээр юм байна даа. Энд их балиар байна. Чи найз охинтой юу?

Тони энэ асуултанд ихэд ичэнгүйрэн,

- Байхгүй гэсэнд бүсгүй түүнийг шинжин харж,

- Ингэхэд чи цэнхэр юм биш биз?

- Үгүй.

- Ашгүй дээ. Би бүр айлаа шүү. Хувин алчуур олдох уу?

Доминик байрыг их өөриймсөгөөр цэвэрлэж эхлэв. Цэвэрлэж дуусаад,

- Одоо огт өөр боллоо. Би биеэ угаах хэрэгтэй байна гэлээ.

Халуун усны өрөөнд орж, онгоцонд ус хийж эхлэв.

- Чи ийм жижигхэн онгоцон дотор яаж багтдаг юм бэ?

- Хөлөө гадагш нь гаргачихдаг юм гэсэнд бүсгүй тас тас хөхрөн,

- Харах юм сан гэлээ.

15 минутын дараа бүсгүй угаалгын өрөөнөөс үс нь нойтон, бэлхүүсээрээ алчуур бүслээд гарч
ирэв. Доминик гоо сайхан биетэй, хөх нь чийрэг том, хөл нь урт шулуун, тэрээр үнэхээр гоо
сайхны бүрдэл ажээ. Тони урьд нь Доминикийг эмэгтэй хүн гэж анхаарч хардаггүй, зүгээр л
зурах ёстой нүцгэн загвар гэж үздэг байв. Одоо бол зүрх нь булгилан, амьсгаа нь дээшлээд
ирлээ. Доминик түүнийг ажиглан харж байснаа,

- Ор чинь хаана байна гээд алчуураа алгуурхан тайллаа.

Тони урьд өмнө Доминик шиг хүүхэнтэй уулзаж учирч байсангүй. Доминик түүнд оронд нь
юу ч хүсэж шаардахгүйгээр аль байдгаа өгч байлаа. Бүсгүй орой бүр шахам Тонигийнд ирж
хоол хийж өгнө. Хоёул нэг газар очиж хоол идэх болбол Доминик аятайхан хямдхан газар
олно.

- Чи мөнгөө хэмнэх хэрэгтэй, хонгор минь. Сайн зураачид ч гэсэн анхны капитал хэрэгтэй
байдаг юм гэнэ.

Тэр хоёр музей үзэн, тойрон аялагчид багатай газраар тэнэнэ. Жишээ нь Оскар Уайльд,
Дредерик Шопен, Оноре де Бальзак, Марсель Пруст нарын үүрд амгалан нойрсож буй Пер-
Лашез оршуулгын газар. Бас нэг агуйн үзэсгэлэнгээр явж, нэгэн удаа Доминикийн танилын
чиргүүл онгоцонд суун Сена мөрнөөр бүтэн долоо хоног хөвжээ.

Доминик бол ёстой ид шидийн гайхамшиг байлаа. Хошин шогийг мэдрэмж сайтай агаад
Тонийн сэтгэл гутарсан үед их тус болно. Парист Доминикийн танихгүй хүн үгүй шиг
санагдана. Үдэшлэгт очоод Тонийг францын алдар цуутантай танилцуулах нь олон. Доминик
Тонийг үргэлж урамшуулан,

- Чи эд нараас хавьгүй илүү алдартай болно, хонгор минь гэдэг байлаа.

Тонийг зураг зурмаар санагдах үед Доминик бүтэн өдөржин ажилтай ядарсан байсан ч
дуртайяа түүнд загвар болж өгнө.

“Ай тэнгэр, би яасан азтай хүн бэ” гэж Тони дотроо боддог байлаа.

Тэгээд өөрийг нь баян айлын хүүхэд гэсэндээ биш, зүгээр л байгаа тэр чигээр нь хайрлаж
байгаад нь баярлана. Тони асар их өв хөрөнгө залгамжлах ёстойгоо Доминикт хэлэхээс айна,
хэлбэл харилцаа нь өөр болох болов уу. Гэвч тэсэж чадсангүй. Доминикийн төрсөн өдрийн
баяраар тохиолдуулан шилүүсэн дээл бэлэглэжээ. Доминик гайхамшигт сайхан үслэг дээлээр
биеэ ороон өрөөн дотуур бүжиглэж,

- Энэ насандаа ийм сайхан юм үзсэнгүй. Энэ дээл надаас хөөрхөн юм хэмээн баярлан баясаж
байснаа гэнэт зогсож,

- Тони, чи үүнийг хаанаас авсан бэ? Ийм дээл их үнэтэй байх, чи үүнийг авах мөнгө хаанаас
олов? гэлээ.

Ингэж асууна гэж Тони мэдэж байсан бөгөөд,

- Хулгайн юм аа. Родены музейн дэргэд нэг хүнээс авсан юм. Тэр хүн энэ дээлнээс салахын
түүс болж, ерийн нэг пальтоноос хямдхан өгсөн юм.

Доминик нэг хэсэг өөдөөс нь дуугүй ширтэн байснаа дараа нь хоёул хөхрөлдөв. Доминик,

- Би энэ дээлийг өмсөнө. Хоёул шорон орох болсон ч яах вэ гэлээ.

Дараа нь иэр Тониг хүзүүдэн тэврэн асгаруулан уйлж

- Чи минь яасан ч тэнэг амьтан бэ. Миний хайртай тэнэгхэн гэжээ.

“ Үүний тулд худлаа хэлэхэд болох л юм” гэж Тони боджээ.

Үүнээс хойш тун удалгүй Доминик Тониг өөрийн байранд нүүн ирж суу гэж урив. Доминик
урлагийн сургуульд ажиллаж бас алдар цуутай зураач нарт загвар болж зуруулдаг болохоор
Пресен-Седрен гудамжинд гайгүй том байртай хөлсөлж суух чадалатй ажээ.

- Тони чи ийм газар суух ёсгүй. Надтай хамт суу. Чи түрээсний мөнгө төлөх хэрэггүй. Харин
хоол даана биз. Би хувцасыг чинь угааж, хоол хийнэ. Би...

- Үгүй баярлалаа.

- Яагаад үгүй гэж?

Бүсгүй юу гэж тайлбарлах вэ? Яаж энэ хүүхэнд баян хүн гэж үнэнээ хэлэх вэ? Энэ хүүхнээр
туслуулхааргүй баян хүн гэж үнэнээ хэлэхэд нэгэнт хожимджээ.

Одоо үнэнээ хэлбэл Доминик өөрийгөө мэхэлж байсан юм байна гэж бодох болно. Тийм
болохоор,

- Би чамаар тэжээлгэж байгаа юм шиг болж байна. Чи тэртээ тэргүй надад их тус болж
байна гэж хариулав.

- Тэгвэл би байраа орхин чам дээр ирж сууя. Би чамтай хамт байхыг хүсэж байна.

Ингээд удалгүй Доминик Тонигийнд байранд ирж суув.

Тэдний хамтын амьдрал гайхалтай сайхан байлаа. Тэр хоёр бие биедээ их итгэх болжээ.
Амралтын өдөр хоёул хотоос гадагш гарч, хөдөөгийн зочид буудалд буугаад Тони зургийн
тавиураа тавьж байгалийн зураг зурна. Юм идэх бол Доминик хоол хүнсний зүйлтэй сагсан
сав авчирч хоёул зүлгэнд дээр суун найрлана. Дараа нь амраглан цэнгэнэ. Тони энэ насандаа
ийм аз жаргалтай байсангүй.
Тони уран зурагт амжилт их олж байлаа. Канталь багш нэгэн удаа Тонигийн зургийг бусад
оюутнуудад үзүүлж,

- Энэ хүний биеийг харагтун. Хэрхэн амьсгалж байгаа нь харагдаж байна... гэжээ.

Тони үүнийг Доминикт хэлэх гэж орой болохыг тэсэж ядан хүлээв.

- Би амьсгалыг яаж дүрсэлж чадсан гээч? Би загварыг нь шөнө болгон өвөртөлдөг болохоор
үүнийг хийж чадлаа гэхэд нь Доминик хөгжилтэй инээд алдснаа дараа нь царайгаа төв
болгож,

- Миний бодлоор чи дахин гурван жил сургуулиа төгстөл суралцах хэрэг алга. Чи бие дааж
уран бүтээл туурвихад бэлэн болжээ. Үүнийг бүгдээр харж байна шүү дээ...

Тони өөрийгөө олон мянган зураачийн нэг, зураг бүтээл нь бусад олон зургийн далайн дунд
замхарна гэж ямагт айж, ийнхүү бодоод сэтгэл гутардаг байлаа.

“Ялж дийлэх нь хамгийн гол нь. Үүнийг санаж яваарай, Тони”

Тони заримдаа нэг зураг зурж дуусаад

“Би авьяастай юм. Үнэн авьяастай юм” гэж баярлах өдөр байдаг. Бас заримдаа өөрийн зурсан
зургийг хараад,

“Би ердийн нэгэн сонирхон оролдогч төдий юм” гэж гаслан гансрах өдөр ч бий.

Доминикийн дэмжин урамшуулахад сэтгэл сэргэн бага багаар хүч чадвартаа итгэдэг болжээ.
Тони хорь гаруй зураг зуржээ. Нэг зураг дээр модны сүүдэрт хэвтэж буй Доминикийг зурсан
байна. Навчис нэвт туссан нарны туяа бүсгүйн нүцгэн бие дээр гялалзан наадна. Наад талд нь
эр хүний дотуур цамц, хүрэм харагдана. Бүсгүй янаг нөхрөө хүлээж байгаа нь үзэгчдэд даруй
ил. Доминик энэ зургийг үзээд,

- Тони чи үзэсгэлэнгээ гаргах хэрэгтэй.

- Солиоров уу? Би үзэсгэлэн гаргах яагаа ч үгүй байна.

- Эндүүрч байна хонгор минь.

Маргааш нь Тонийг гэртээ ирэхэд Доминик ганцаараа биш, түүнтэй хамт Антон Георг гэдэг
цүдгэр гэдэстэй, бүлтгэр нүдтэй өндөр эр сууж байв. Тэр бол Дофин гудамжинд байдаг
зургийн үзэсгэлэнгийн эзэн.

- Юу болж байна даа? гэж Тониг асуухад

- Юу юу болж байна гэж. Таны зургуудыг их сайхан зургууд гэж би дүгнээд байна хэмээн
Георг дуу алдаад Тонийн мөрийг пад пад хийн алгадан,
- Таны зурагнуудыг үзэсгэлэндээ дэлгэж үзүүлбэл их нэр төрийн хэрэг гэж би үзнэ... Тони
царай нь туяаран буй Доминикийн өөдөөс харж,

- Би юу хэлэхээ мэдэхгүй байна.

- За гээ хэмээн Доминик хэллээ.

- Зураг чинь аяндаа хэлээд өгч байна гэж Георг хариулав.

- Би зургаа дэлгэж үзүүлэхэд бэлэн болоогүй байна. Шүүмжлэгч нар намайг арчаад хаяна
даа.

- Эндүүрч байна даа, хөө. Жижиг үзэсгэлэн гаргах нь чамд яг хэрэгтэй зүйл. Тэнд зөвхөн
танил талынхан очдог. Тэгэхлээр чамд хор болохгүй. Месье Георг өөрийн итгээгүй зураачид
ийм алтан боломж олгохгүйг бодооч. Тэр чамайг хамгийн алдартай зураач болно гэдэгт
надтай санал нэг байгаа гэж Доминик хэлэхэд,

- За яах вэ. Юмыг яаж урьдчилан мэдэх вэ дээ. Ганц хоёр зураг худалдаж чадах ч магадгүй юм
гэж Тони эцэст нь зөвшөөрлөө.

Маргааш нь Тони цахилгаан утас авлаа. Үүнд

“Бямбад Парист очно. Хамт хооллоё. Ээж чинь” гэжээ.

Кейтийг байрандаа орж ирэхэд Тонигийн толгойд юуны өмнө “ Миний ээж ямар сайхан
хүүхэн бэ” гэсэн бодол төржээ. Кейтийн нас нэгэнт тавь гарч, хар үсэнд нь энд тэнд цагаан
сор суусан ч гэсэн бие цогцсоос нь амьдралыг тэтгэх нэгэн гайхамшигт хүч цацран байх шиг
санагдана. Тонийг нэгэн удаа ээжээсээ,

- Ааваас хойш та дахиад хүнтэй суухгүй яасан юм бэ? гэж асуухад,

- Миний зүрх сэтгэлд ердөө хоёрхон эрийн зай бий. Нэг нь чиний эцэг, нөгөө нь чи гэж Кейт
тайван хариулж билээ.

Одоо Парис дахь байрны гол дунд зогсож буй эхийгээ хараад Тони,

- Ээ-ээж ээ т-тантай уулзсандаа б-баяртай б-байна гэсэнд Кейт инээд алдан,

- Чи их өнгөтэй харагдаж байна, Тони. Бас эрүү сахал чамд зохижээ. Линкольны залуу
үеийнхтэй адилхан болсоэ байна гээд ойртон ирж сахлыг нь барьж үзсэнээ өрөөг нь
тойруулан харж,

- Тэнгэрийн авралаар чи гайгүй сайн цэвэрлэгч олоо юу даа. Огт өөр болсон байна гэв.

Тэгээд Кейт зурж дуусаагүй зурагтай тавиурын дэргэд очиж удаан харлаа. Тони хажууд нь
зогсоод эхийнхээ юу хэлэхийг хүлээн зүрх нь хөөрч байлаа. Кейт ярьж эхлэхдээ дуу нь ер
бишийн зөөлөн өнгө аястай байлаа.
- Маш сайхан болжээ. Нээрээ сайхан байна гэх Кейтийн дууны өнгөнд хүүгээрээ бахархсан
байдал ил.

Кейт урлагийн нүдтэй, тиймээс ч хүү нь уран зурагт үнэнхүү авьяастайг нь олж хараад чин
сэтгэлээсээ баярлав. Тэгээд хүү рүүгээ эргэн,

- Өөр зураг үзье гэв.

Дараагийн хоёр цагт Тонийн зургийг үзэж өнгөрүүлэв. Кейт зураг бүрийг магтахдаа дууны
өнгөнд нь ая тал зассан байдал мэдэгдсэнгүй. Кейт хүүгийнхээ амьдралыг өөрийн хяналтанд
авч чадаагүй. Тэгээд эх нь ялагдснаа энгийн тайван хүлээж байгааг нь Тони гайхан бахадлаа.

- Би чиний зургийн үзэсгэлэн гаргуулья гэвэл юу гэмээр байна. Надад танил тал бий гэж
Кейт ярьж эхлэхэд Тони

- Баярлалаа, ээжээ. Хэрэггүй. Ирэх баасан гаригт миний зурагнуудыг нэгэн үзэсгэлэнд
үзүүлнэ гэхэхд нь Кейт хүүгээ тэвэрч,

- Яасан сайн юм бэ. Ямар үзэсгэлэнд вэ?

- Георгийн үзэсгэлэнд...

- Дуулаагүй үзэсгэлэн байх чинь...

- Жижигхэн галлерей байгаа юм. Би Хаммерын юм уу, Уайлпенштэйний үзэсгэлэнд зургаа

дэлгэх болтол өсөөгүй байна.

Кейт нүцгэн Доминикийг дүрсэлсэн дургийг зааж,

- Чи эндүүрч байна. Миний бодоход... гэтэл үүд нээгдэх сонсогдлоо...

- Чамтайгаа учрахыг хүснэ. Хувцсаа тайлаарай, хонгор минь... гэж Доминик хэлэн орж
ирснээ Кейтийг харж түгдрэн зогсож

- Ээ өршөөгөөрэй. Би... Би Тониг, чамайг зочинтой байгааг мэдсэнгүй

Гурвуул эвгүйрхэн хэсэг дуугүй болов.

- Доминик оо, энэ миний ээж. Ээж ээ, энэ Доминик Массо...

Хоёр эмэгтэй бие биеэ шинжин ажиглав.

- Миссис Блэкуэлл тантай танилцсандаа баяртай байна гэж Доминик хэллээ.

- Би миний хүүгийн зурсан таны зургуудыг үзэж байлаа... гээд Кейт дуугүй болж, бас нэг
хэсэг чимээгүй болцгоов.
- Тони зургаа үзэсгэлэнд дэлгэж үзүүлэх гэж байгаа. Танд хэлсэн биз дээ?

- Хэлсээн. Сайхан мэдээ байна.

- Ээж та очиж үзэх үү?

- Маш дуртайяа үзэхсэн. Даанч баасан гаригт Йоганнесбургт захиралуудын зөвлөгөөн хийлгэх
учиртай. Түүнийг хойшлуулж болохгүй. Эртний мэдсэн бол тэр зөвлөгөөнийг ганц нэг
өдрөөр хойшлуулж болох байсан л даа. Даанч би хожуу сонслоо. Тоогүй юм болж байна даа.

- Зүгээрдээ, зүгээр. Ойлгож байна гэж Тони хурдхан хэлэв.

Эх нь Доминикийн дэргэд компанийн тухай ярьж эхлэх юм болов уу гэж айтал Кейт зураг
үзэн завгүй байлаа.

- Чиний зургийн үзэсгэлэнг хэрэгтэй хүмүүст үзүүлэх нь чухал байна.

- Хэрэгтэй хүмүүс гэж хэн бэ, миссис Блэкуэлл? гэхэд нь Кейт Доминик тийш эргэн

- Санал бодлыг нь анхааран сонсдог хүмүүст үзүүлэх хэрэгтэй. Шүүмлэгч Андре Д Уазо
мэтийн хүнд үзүүлэх ёстой.

Андре Д Уазо гэдэг нь Францад хамгийн хүндтэй шүүмжлэгч байлаа. Тэр хүн урлагийн
ертөнцийн үүдийг арслан мэт хамгаална. Түүний нэг л өгүүллэг зураачийг мандуулах буюу
оргүй сүйд хийж чадна. Д Уазог үзэсгэлэн нээх бүрд урьдаг боловч тэрээр гагцхүү хамгийн
томыг нь очиж үздэг байлаа. Зургийн үзэсгэлэнгийн эзэд, зураач нар түүний юу хэлэхийг
хүлээн бэмбэгэнэн чичирдэг. Андре Д Уазо бол хурц үгийн уран чадвартан бөгөөд егөөтэй
хурц үг нь Парис хотоор түргэн зуур тархана. Парисын урлагийнхний хүрээнд Д Уазог
хүндэтгэхийн сацуу бас нэгэн зэрэг үзэн ядна. Түүний хурц ухаан, хайр найргүй
шүүмжлэлийг хүн бүхэн мэднэ.

- Д Уазо тийм жижиг үзэсгэлэн үздэггүй гэж Тони үг сөрөхөд

- Чиний үзэсгэлэнг үзэх ёстой. Шүүмжлэгч Д Уазо л чамайг шууд алдаршуулж чадна.

- Эсвэл сүйд хийнэ.

- Чи хүчиндээ итгэдэггүй юм уу? гэж Кейт хүүгийнхээ өөдөөс айсан мэт харав. Доминик
хажуунаас нь,

- Итгэдэг л дээ. Харин бид Тонигийн үзэсгэлэнг Д Уазо үзнэ гэж найдахгүй байна.

- Би түүнийг сайн таньдаг хүнийг мэднэ шүү гэхэд нь Доминикийн царай туяарч

- Тэгвэл маш сайн юм сан гээд Тони тийш эргэж,

- Энэ чамд ямар хэрэг болохыг чи мэдэж байна уу?

- Хэн ч тоохгүй болгож мартуулах уу?

- Өөртөө итгээрэй. Би түүнийг таашаалыг мэднэ. Чиний зургийг үзээд бахдан сайшаах болно.

- Хэрэв Тони чи өөрөө хүсвэл би түүнийг ятгаж үгэндээ оруулахыг хичээе гэж Кейтийг
хэлэхэд Доминик хажуунаас нь

- Тони хүсэх нь мэдээж, миссис Блэкуэлл ээ гэхэд нь Тони толгой дохин гүнзгий санаа алдаад,

- Би айж байна. Гэсэн ч яадаг юм бэ, чөтгөр алгад. Ирвэл ирэг л дээ.

- Би зохицуулахыг хичээе гэж Кейт хэлээд тавиур дээр байгаа зургийг удаан харж харж, дараа
нь Тони тийш эргэхдээ нүдэнд нь гуньсан байдал илэрч,

- Би маргааш явна. Өнөөдөр надтай хамт оройн хоол идэхгүй юү? гэхэд нь

- Тэгье, тэгье. Бид завтай гэж Тони хариулав. Кейт Доминик тийш эргэн,

- “Максим”-д очиж хооллох уу эсвэл өөр... гэвэл Тони үгийг нь таслан

- Манай энүүхэнд ойрхон аятайхан гуанз бий гэжээ.

Тэд Викторийн талбай дахь гуанзанд оройн хоол идэв. Хоол нь сайн, дарс нь бас сайн аж.
Хоёр эмэгтэй хөгжилтэй хөөрөлдөн байлаа. Тони тэр хоёрыг хараад,

“Энэ бол миний энэн яваа насны хамгийн сайхан оройн нэг. Миний ээж, миний хайрт бид
гурав хамт байж байна” бодлоо.

Маргааш нь Кейт нисэх буудлаас утасдан,

- Би хэрэгтэй хүмүүстэй ярьсан. Д Уазог очно гэж баттай хэлэх хүн алга. За ямар ч байсан
бид чадахаа хийсэн. Ирэх эсэх нь түүний асуудал. Би чамдаа хайртай, хүү минь. Чиний зураг
гайхалтай сайхан болсон байна лээ. Би чиний өмнөөс баяртай байна.

- Б- би бас т-танд хайртай ээ-ээж ээ гэжээ.

Тонийн зургийг дэлгэж тавьсан байрыг нилээд хүчлэн байж үзэсгэлэнгийн танхим гэж болох
ажээ. Тонийн хорь гаруй зургийг сүүлчийн мөчид ханаар тараан өлгөв. Гантиг ширээн дээр
нэгэн лонх шабле дарс бяслаг тавьсан байлаа. Үзэсгэлэнгийн танихмд Антон Георг, Тони,
Доминик, хананд зураг өлгөж буй залуугаас өөр хүн байсангүй. Антон Георг цаг хараад,

- Урилганд чиний үзэсгэлэнгийн нээлт 7 цагт гэж бичсэн болохоор, ингэсгээд одоо хүмүүс
цуглаж эхлэнэ гэв.

Тони ингэтлээ сэтгэл нь хөдөлж, зүрх нь хөөрнө чинээ санасангүй. “Миний зүрх хөөрөхөөр
барахгүй, бүр бажгадаж байна” гэж Тони бодоод,
- Хүн ирэхгүй бол яах вэ? Нэг ч хүн үзэхгүй бол яана? гэхэд нь Доминик инээж, хацрыг нь
зөөлөн алгадан,

- Тэгвэл энэ дарс, бяслан биднийх болж бид найр хийх болно гэжээ.

Анхны үзэгчид ирж эхлэлээ. Месье Георг тэднийг баярын царайгаар угтаж байлаа.

“Эд нар чинь зураг худалдан авах чадалтай улс биш байна” гэж Тони царайгаа барайлган
бодоод туршлагатай нүдээр үзэгчдийг 3 хэсэгт хуваав. Тэдний дотор өрсөлдөгчөө сайн
мэдэхийн тулд бүх үзэсгэлэнг хэсдэг уран зураачид бас оюутнууд, ямар зураачийн зургийг
анхаарах хэрэггүй вэ гэдгийг сайн мэдэж байхын тулд бас л үзэсгэлэн бүрийг хэсдэг
наймаачид, өөрсдийгөө урлагийн ертөнцөд хамааруулах дуртай эр эм жүжигчид байлаа.

“Ээ чөтгөр, би нэг ч зураг худалдаж чадахгүй юм байна” гэж Тони бодлоо. Танхимын цаад
захад зогсож байсан месье Георг Тонийг дуудан дохив.

- Би энэ хүмүүстэй уулзахыг хүсэхгүй байна. Эд нар намайг тасар татахад бэлэн байна гэж
Доминикт Тони шивэгнэсэнд,

- Дэмийр. Эд нар чамтай танилцах гэж ирсэн юм. Эелдэг найртай байгаарай, Тони гэв.

Тэгээд Тони аль байдаг чадлаараа хичээж, хүн бүхэнтэй танилцан магтаалын үг сонсоод
инээмсэглэх дүр үзүүлж байлаа. “Үүнийг магтаалын үг гэж үзэж болох юм болов уу?” хэмээн
өөрөөсөө асуув. Урлагийнхны дунд олон жилийн турш алдар нэртэй уран зураачдын ажлыг
үнэлдэг тодорхой үгсийн сан бий болжээ. Ямар ч утгагүй хоосон сүржин үгнүүд...

- Та үнэхээр санаагаа илэрхийлж чадсан байна...

- Ийм сайхан зураг урьд өмнө үзсэнгүй...

- Гайхамшигтай зураг байна...

- Энэ зураг надад нэгийг бодогдууллаа...

- Үүнээс илүү зурна гэж юу байх вэ...

Хүмүүс нэмж ирсээр. Энэ хүмүүс миний зургыг сонирхож ирэв үү, аль эсвэл үнэгүй дарс
бяслаг идэж уух гэж ирсэн юм уу, чухам юунд татагдаж ирсэн бол гэж Тони бодоод амжлаа.

Одоогоор нэг ч зураг худалдаж аваагүй байна. Дарс бяслаг бол гайхалтай хурдан дууслаа.

- Тэсээрэй. Эд нар бүгдээрээ нэг юм худалдаж авахыг хүсэх болно. Эхлээд зургийг шинжиж,
шинжилж үзэж ёстой. Дараа нь эргэж тойрч эхлэнэ. Дараа нь үнийг нь сонирхоно. Тэгээд
дэгээнд орно доо, вуала гэж миссис Георг Тонигийн чихэнд шивэгнэж байв.

- Ай тэнгэр. Би чинь загас барьж суугаа хүн шиг сэтгэгдэл төрөөд байна гэж Тони Доминикт
өгүүлэв.
Тэндээс месье Георг түргэн түргэн алхлан Тонигийн дэргэд хүрч ирээд,

- Худалдаа эхлэчихсэн шүү. Нэгийг худалдчихлаа. Нормандын байгалийн байдал. 500 франк
гэж баясан хэллээ.

Энэ мөчийг Тони насан турш мартахгүй санаж авлаа. Хэн нэгэн хүн өөрийнх нь зургийг
худалдан авчээ. Түүний зурсан зураг хэн нэгний сэтгэлд таалагдан, гэртээ юм уу, контортоо
өлгөөд өөрөө харан нүд баясаж, сайн нөхөддөө үзүүлж байх гэж мөнгө төлсөн байна. Энэ бол
үхэшгүй мөнхөрсөнтэй адил, нэг зэрэг хэд хэдэн газар зэрэг амьдарч байгаа мэт санагдлаа.
Сайн зураач нар дэлхий дахины олон зуун айл гэр, музей үзэсгэлэнд байж, заримдаа хэдэн
мянга, заримдаа хэдэн сая хүний нүдийг баясган цэнгэлийг эдлүүлдэг. Тони өөрөө Леонардо
Да Винчи, Микеланжело, Рембрант нарын сүм дуганд ороод очсон юм шиг, жирийн сонирхон
оролдогч байхаа болиод жинхэнэ мэргэжлийн зураач болсон юм шиг санагдана. Хэн нэгэн
хүн түүний зургийг худалдан авсан байна. Доминикийн нүүр нь туяаран гүйж ирээд,

- Чиний бас нэг зургийг хүн худалдаж авсан гэхэд нь Тони

- Ямар зураг?

- Баглаа цэцэг...

Үзэсгэлэнгийн танхимд хүмүүс шуугилдан шилэн хундага хангинаж байснаа гэнэт бүгд
чимээгүй болж, хүмүүс шивэгнэлдэн хаалга руу харцгаалаа.

Үзэсгэлэнгийн танхимд Андре Д Уазо орж ирлээ. Тэр бол нүүрний тэг том, өтгөн буурал
үсээ урт ургуулсан 50 орчим насны өндөр хүн байлаа. Юүдэнг нь арагш буулгасан хэлхгэр
цув, өндөр оройтой бүрх малгай өмсчээ. Хойноос нь бөөн бараа бологчид дагалдан явна.
Хүмүүс түүнд зам тавьж өгөв. Энд их шүүмжлэгчийг танихгүй хүн байсангүй. Доминик
Тонигийн гарыг чанга атган,

- Хүрээд ирлээ. Энд хүрээд ирлээ шүү гэж шивэгнэв.

Месье Георгт урьд өмнө ийм хүндэт завшаан тааралдаж байсангүй, тэгээд их шүүмжлэгчийн
улыг долоохоос наахнуур зогсоо зайгүй мэхэлзэн, нахилзан, бөхөлзөн тонголзон байлаа.

- Месье Д Уазо, би маш их баяртай байна. Надад их нэр төрийн хэрэг. Танд дарс барихыг
зөвшөөрнө үү... гээд месье Георг сайн дарс худалдаж аваагүй дээ өөрийгөө зүхлээ.

- Баярлалаа. Би энд нүд баясгах гэж ирсэнээс ходоод баясгах гэж ирээгүй. Зураач хаа байна?
гэж Д Уазо асуухад Тони байрнаасаа хөдлөх чадваргүй байлаа. Месье Георг Тониг заан,

- Энэ байна, Месье Андре Д Уазо. Энэ Энтони Блэкуэлл... гэхэд нь

- Эрхэм тантай танилцсандаа баяртай байна. Таны ирсэнд би их баярлалаа гэж Тони
арайхийн дуугарав.

Уазо тэргүүнээ үл мэдэг мэхийн ёслоод хананд өлгөсөн зураг тийш очиж, зургыг нэг бүрчлэн
анхааралтай үзсэний дараа дараагийн зурагт шилжинэ. Тони шүүмжлэгчийн нүдний харцыг
ажиглах гэж оролдсон боловч ямар нэг юм харцнаас нь олж мэдсэнгүй. Уазо хөмсөг зангидах
ч үгүй, инээмсэглэх ч үгүй байлаа. Нүцгэн Доминикийг дүрсэлсэн зургийн өмнө шүүмжлэгч
удаан зогсов. Ийнхүү тэрээр нэг ч зураг үлдээлгүй үзэсгэлэнгийн нэг захаас нөгөө захад
хүрлээ. Тонигийн нүүрнээс хөлс дусална. Уазо үзэж дуусаад Тонигийн дэргэд очиж,

- Би ирж үзсэндээ баярлаж байна гэв.

Алдарт шүүмжлэгчийг явсны дараа хэдхэн минутын дотор бүх зургийг худалж дуусав. Ингээд
шинэ зураач төрж, бүгдээрээ энэ үйл явдалд аль нэг талаар хамаатай байхыг хүсэв.

- Энэ насандаа ийм гайхалтай юм үзсэнгүй. Уазо миний үзэсгэлэнд ирдэг байна шүү. Миний
үзэсгэлэнд. Маргааш энэ тухай Парисийнхан бүгдээрээ уншина. “Би ирж үзсэндээ баяртай
байна” гэж тэр хэлсэн. Уазо амныхаа зоргоор дэмий үг хэлдэг хүн биш. Энэ явдлыг
тэмдэглэж шампани дарс задалья гэж месье Георг баясан өгүүлэв.

Шөнө нь Тони Доминик хоёр энэ үйл явдлыг хоёулхнаа тэмдэглэв. Доминик цээжинд нь
наалдан,

- Би урьд нь олон зураач нартай үерхэж байсан. Харин аугаа их зураач нар хэрхэн төрдөгийг
үзээгүй юм байна шүү. Өглөө чиний хэн болохыг Парисынхан бүгдээрээ мэддэг болно...
гэжээ.

Доминикийн хэлсэн үнэн байлаа.

Өглөөний таван цагт Тони Доминик хоёр түргэн хувцаслан өглөөний сонин худалдаж авахаар
гадагш гүйн гарцгаав. Тони сонин шүүрч аваад урлагийн тухай нүүрийг дэлгэж үзвэл түүний
үзэсгэлэнгийн тухай Андре Д Уазогийн бичсэн нийтлэл яг голд нь байлаа. Тони хурдан
уншиж эхлэв.

“Өчигдөр Георгийн зургийн үзэсгэлэнд амеркийн залуу зураач Энтони Блэкуэллийн зургийн
үзэсгэлэн гарлаа. Ийм үзэсгэлэн шүүмжлэгч нарт их хэрэгтэй байдаг юм. Би олон авьяаслаг
зураачдын үзэсгэлэн үзсээр байгаад муу зураг ямар байдгийг мартаж орхижээ. Өчигдөр
мартснаа санав...”

- Боль. Цааш нь унших хэрэггүй гэж Доминик гуйгаад сониныг нь булааж авахыг оролдоход,

- Тавь гэж Тони огцом өгүүлээд, цааш нь уншлаа.

“...Анхандаа би үүнийг тоглоом наадам юм уу даа гэж бодов. Сонирхон оролдогчдийн

хэмжээнээс хэтрээгүй юмнууд өлгөж орхиод үүнийгээ урлаг гэж нэрлэх бүдүүн зүрхтэй хүн
байдаг гэж үнэмшихэд бэрх. Би авьяас билигийн өчүүхэн ч атугай гялбаа олж үзэхийг
оролдсон. Ай хөөрхий, даанч тийм юмны үнэр ч байсангүй. Зураг өлгөхийн оронд зураачийг
өөрийг нь дүүжлэх ёстой байсан юм. Бүхий л байдлаас үзэхэд мистер Блэкуэлл урьд нь
будагчны ажил мэргэжилтэй байсан бололтой тул тэр ажилдаа эргэж орогтун гэж чин
сэтгэлээсээ зөвлөх байна” гэжээ.
- Үнэмшихгүй байна. Чиний авьяасыг ажиглаагүй гэж үнэмшихгүй байна. Өөдгүй новш гэж
Доминик шивэгнээд цөхрөнгөө барж цурхиран уйлав.

Тони зүрхийг нь төмөр бахиар хавчаад авах шиг болохыг мэдэрч, амьсгаа нь бөглөрөв.

- Тэр хүн бүгдийг харжээ. Уран зурагны талаар бүгдийг мэддэг хүн шүү дээ... Энэ л хамгийн
гомдолтой байна. Ай тэнгэр би яасан тэнэг амьтан бэ? гэж Тони харамсан өгүүлээд цааш
эргэв.

- Тони чи хаачих нь вэ?

- Бүү мэд...

Тони хацар дээгүүр нь нулимс урсахыг эс анхааран хүйтэн нойтон гудамжаар алхалж явлаа.
Хэдэн цагийн дараа Парисынхан бүгд энэ өгүүллийг уншина. Хамгийн гол нь өөрийн авьяас
билэг, хүч чадалдаа итгэсэн нь их гомдолтой байлаа. Зураач болж чадна гэж үнэн голоосоо
итгэж байсансан. Д Уазо ядаж энэ төөрөгдлөөс нь ангижруулж өгөв. Тони анх тайралдсан
баарт ороод ухаан алдатлаа уухаар шийдэв.

... Тони маргааш өглөө нь л гэртээ ирлээ. Доминик түүнийг хүлээсээр бүр шаналж гүйцжээ.

- Тони чи хаачаад ирэв? Ээж чинь утасдаад салдаггүй. Чиний төлөө сэтгэл зовоод огт
унтсангүй...

- Чи өгүүллийг уншиж өгөв үү?

- Хн... тэгсээн. Ээж чинь шаардаад... болоогүй...

Энэ мөчид утас дуугарч, Доминик Тонигийн өөдөөс нэг хараад харилцуур авлаа.

- Байна уу? Тийм ээ, миссис Блэкуэлл ээ. Тони дөнгөж сая орж ирлээ гээд харилцуурыг Тонид
өгөв.

- Б-байна уу? ээ-ээж ээ...

Кейтийн дуу гуниг гутрал дүүрэн байлаа.

- Тони, хүү минь... Би түүнийг няцаалт бич гэж шаардана. Би...

- Ээж минь, энэ чинь арилжаа наймааны хэрэг биш шүү дээ. Энэ бол шүүмжлэгчийн санал.
Тэр намайг дүүжилж алах хэрэгтэй гэж үзсэн байна... гэж Тони алжаангуй өгүүлэхэд,

- Хүү минь, ийм үг сонсоход надад хичнээн гашуун байна вэ. Би тэсэхгүй нь... гээд Кейт цааш
нь юм хэлж чадсангүй дуугүй болов.

- Зүгээр ээжээ. Би зураач болж чадна гэж дэмийрсэн юм байна. Тэр маань бүтсэнгүй. Зураач
болоход хамгийн хэрэгтэй юм нь надад байсангүй. Ингээд гүйцээ. Би Уазог үзэн ядна. Гэсэн
ч тэр бол золиг шиг сайн шүүмжлэгч байгаа юм. Үүнийг хэнтэй ч мэлзэх аргагүй. Тэр
намайг хамгийн том алдаанаас минь аварлаа.

- Тони хүү минь. Би чамд яаж туслах вэ?

- Уазо бүх зүйлд цэг тавьж өглөө. Би авьяасгүйгээ 10 жилийн дараа биш одоо мэдсэн минь
сайн болж. Би энэ хотоос явах хэрэгтэй байна.

- Намайг хүлээж бай, хүү минь. Би маргааш Йоханнессбургээс нисэж очьё. Тэгээд хоёулаа
харья...

- За тэгье гээд Тони харилцуур тавьж Доминик тийш эргэж,

- Уучлаарай Доминик оо. Чи чамд тохирох хүн биш юм... гэв.

Доминик дуугарсангүй, тэсвэрлэшгүй их гуниг гутрал дүүрэн нүдээр өөдөөс нь ширтлээ.

Маргааш нь Матиньон гудамжинд байрладаг Крюгер Брент компанийн захиралын өрөөнд

Кейт чек бичиж байлаа. Өмнө нь суугаа хүн гүнзгий санаа алдан,

- Тоогүй юм боллоо. Танай хүн үнэнхүү авьяас билэгтэй юм. Алдартай зураач болж чадах
байсан гэхэд нь Кейт тэр шүүмжлэгчийн өөдөөс хүйтэн хөндий хараад,

- Энэ дэлхий дээр түм буман зураач бий, месье Д Уазо. Миний хүү тэдний нэг болох ёсгүй
гээд чекээ түүнд сарвайн,

- Та амласнаа биелүүлсэн, би амласнаа биелүүллээ. Крвгер Брент компани Йоханнессбург,

Лондон, Нью Йорк дахь уран зургийн үзэсгэлэнгийн ивээн тэтгэгч боллоо. Зураг шилж
сонгох хариуцлагатай үүргийг танд тохоон хүлээлгэж байна. Мэдээжээр зохих шан хөлсийг
танд өгөх болно гэв.

Д Уазог явсны дараа Кейт гунигт бодолд дарагдан ширээний ард удаан суув. Кейт хүүдээ
хайртай. Хэрэв хүү нь хэзээ нэгэн цагт үүнийг мэдэх юм бол... Кейт ямар осолтой ажил
хийснээ мэдэж байлаа. Гэвч хүү нь өв хөрөнгөөсөө татгалзаж байгааг нь зүгээр хараад сууж
чадсангүй. Ямар үнээр ч болтугай, түүнийг хамгаалах ёстой, компаниа хамгаалах ёстой. Кейт
хамаг биеийн нь тэнхээ алдран ядарснаа мэдээд бослоо. Тонийг аваад гэртээ харих цаг
болов. Хүүдээ түүний энэ харамсал гунигийг туулан давж, хэн байх ёстой вэ, тэр ёсоороо
тийм хүн болоход нь туслана.

Тони бол компанийн ерөнхийлөгч байх ёстой, хан хүү юм.

19-р бүлэг

Дараачийн хоёр жилд Тони Блэкуэлл асар том тээрмийн хоёр чулууны хооронд байгаа мэт
байлаа. Тони Крюгер Брент хэмээх лут том эзэнт улсын өв залгамжлагч болов. Энэ компани
сүүлийн үед өргөжиж цаасны үйлдвэр, нисэх компани, банк, эмнэлэгийн сүлжээг шинээр
олж авчээ. Тони Блэкуэлл өөрийн нь нэрийг мэдмэгц ямарваа хаалга өмнө нь нээгддэгийг
олж мэдэв. Эд хөрөнгө, эрх мэдлийн аль нь ид шидийн гайхамшигт чадалтай ажээ. Тони
“Юнион”, “Брук”, Линск” мэтийн нэр хүндтэй клубийн гишүүн нь болжээ. Түүнийг газар
бүр хүндэтгэлтэй хүлээн авах боловч өөрөө ийм гавьяагүй гэж бодно. Тони ийм эрхэм нэр
хүндийг олохын тулд юу ч хийгээгүй. Тони цаг ямагт өөрийн ээжийн сүүдэрт оршиж,
түүнийг алдарт ээжтэй нь эсвэл зроигт өвөг эцэгтэй нь байнга зүйрлэж байгааг мэдэрч байв.
Энэ нь шударга биш юм. Учир нь Тони мина тавьсан тавьсан талбайгаар мөлхөөгүй, аварга
загастай тулалдаагүй, бас ээж шигээ агуу том компани байгуулаагүй билээ.

Өвөг эцгийнх нь айхыг үл мэдэх чин зоригийн тухай домог нь Тониг огт хамаагүй. Тэр бол
өнгөрсөн зуунд, өөр цаг үед, өөр газар нутагт үлдсэн домог. Тони түүнийг хэзээч хараагүй,
ийм хаа холын танихгүй хүнтэй өөрийг нь зүйрлэх нь яршигтай.

Тони Крюгер Брент –д идэвх зүтгэлтэй сайтай, чин сэтгэлээсээ ажиллаж байлаа. Зүрх
шимшрүүлсэн дурьдатгалыг ой ухаанаасаа авч хаяхыг хичээнэ. Доминикт хэдэн захидал
бичсэн боловч бүгдээрээ битүүмжлэгдсэн хэвээрээ буцаж иржээ. Тэгэхэд нь Канталь багшид
утасдсанд Доминикийг студид загвар болж зуруулахаа больсон. Нэг тийшээ ор сураггүй алга
болоод өгсөн гэж хариулжээ.

Тони хийх ажлаа хичээнгүй шаргуу хийж байлаа. Даанч ажил хийгээд баяр баясгалан, урам
зориг сэргэхийг мэдрэхгүй, цээжний нь дотор хөндий хоосон байх шиг санагдана. Үүнийг нь
Кейт ажиглаж мэдсэнгүй. Хүүгийнхээ тухай, хүүгийн ажлыг явцын тухай мэдээг өдөр тутам
аваад хүүгийнхээ өмнөөс баярлан байв.

- Тони ашиг хонжооны ажилд төрөлхийн авьяастай юм гэж Кейт нэгэн удаа Бредэд хэлжээ.

Тонигийн ажилдаа хичээнгүй зүтгэлтэй байдаг нь Кейтийн хувьд уг ажилдаа дур

сонирхолтой байгаагийн гол нотолгоо аж. Тони өөрийн гайхамшигт ирээдүйгээсээ татгалзах
шахсаныг Кейт санаад бие нь жихүүцэх мэт дал мөрөө хөдөлгөдөг байв. Тэгээд хүүгээ аварч
чадсандаа ихэд баярлана.

1948 онд Өмнөд Африкийн засгийн эрхийг Үндсэрхэг нам барьж, олон нийтийн бүх газар
“хар арьстных” “цагаан арьстных” гэж хуваагдах болсон ажээ. Ард иргэдийн шилжин
нүүхийг хориглож, төрийн ийм бодлогын улмаас олон айл өрхийн халуун бүлийнхэн салж
тасарсан байна. Хар арьстан бүр биедээ “пиу” авч явах ёстой, тэр нь нэвтрэх бичиг төдийгүй
төрсний гэрчилгээ, ажил хийх зөвшөөрөл, татвар төлсөн тасалбар байдаг байлаа. Энэ баримт
бичиг хар арьстаны амьдралыг бүрэн тодорхойлно. Өмнөд Африкт хэд хэдэн удаа бослого
гарсан боловч цагдаа нар харгис хэрцгийгээр нухчин дарлаа. Үймээн самуун эмх замбараагүй
явдал гарч байгаа тухай Кейт сониноос үе үе олж уншдаг байлаа. Тэр дундаа Бандагийн нэр
хэдэн удаа нүдэнд нь тусчээ. Бандагийн нас дээр гарсан ч гэсэн нууц байгууллагыг удирдсаар
байлаа. “Банда өөрийн ард түмний төлөө тулалдсаар байх болно доо. Бандагийн зан тийм
билээ” гэж Кейт бодоод санаа алдлаа.

Кейт 56 насны төрсөн өдрийнхөө баярыг Тонитой хоёул Тавдугаар өргөн чөлөөн дахь
байшиндаа тэмдэглэв. “Миний өмнө сууж байгаа энэ 24 тэй, нүдэнд дулаахан хархүүг миний
хүү гэхэд үнэмшмээргүй юм. Би ч залуугаараа байгаа биш билүү” гэж Кейт бодов. Тони
хундага өргөж,

- М-миний ер бишийн ээ-ээжийн төлөө. Төрсөн өдрийн халуун б-баярын мэнд хүргэе...

гэхэд нь,

- Миний ер бишийн хөгшин ээжийн төлөө гэх ёстой байсан юм гэж Кейт хэлээд “Би удахгүй
ажил явдлаас холдоно. Миний суудлыг миний хүү эзэлнэ. Миний хүү” гэж бодох зуур,

- Энэ байшин надад дэндүү томдоод байна. Баруун жигүүрийг чамд өгье. Чи энд ирж суу гэж
хэллээ.

Тонигийн хувьд дургүй байсан ч гэсэн маргалдснаас зөвшөөрөх нь илүү амар байв. Тони Кейт
хоёр өглөө болгон хамт цай ууж, дандаа л Крюгер Брентийн тухай ярилцана. Олон байшин
барилга, машин, нягтлан бодохын данс тооцоо гэх мэт амь сүнсгүй эдийн бөөгнөрөл болсон
компанийн төлөө ээж нь ийм их анхаарал тавин хайрлан санаа тавьдгийг Тони гайхдаг
байлаа.

Юу нь ээжийн сэтгэлийг ингэж их татдаг юм бол?

Энэ дэлхий дээр гайхалтай сонин сайхан юм өчнөөн төчнөөн байхад улам их эд баялагтай,
улам их эрх мэдэлтэй болохыг эрмэлзэн амьдарлаа ингэж дэмий үрж болдог юм болов уу?
Тони эхийгээ ойлгодоггүй боловч эхдээ хайртай тул хүсэл таалалд нь нийцүүлэхийг хичээдэг
байв.

Тони Ромоос Нью Йорк руу “Пан Американ” компанийн нисэх онгоцоор ирэв. Эднийх
зорчигчдыг хэрхэн үйлчилж байгаа нь түүнд их сайхан санагддаг. Агаарын том хөлөг газраас
тасрахад Тони хоол идэхээс татгалзаж, янз бүрийн ундаа, дэр хөнжил мэтийг өгөх гэсэн
үйлчлэгч бүсгүйчүүдийг эс анхааран компанийн хөрөнгө оруулалтын тайлан төлөвлөгөөг
үзэж эхлэв.

- Баярлалаа, мисс ээ. Зүгээр зүгээр

- Мистер Блэкуэлл танд ямар нэг юм хэрэгтэй болбол...

- Баярлалаа. Тэгнэ... Дараа больё...

Тонийн хажууд сууж буй эмэгтэй хувцасны шинэ загварын сэтгүүл үзэж байлаа. Тэр
сэтгүүлийнхээ хуудасыг эргүүлэхэд нь нэг гэрэл зураг дээр Тонийн нүд туслаа. Тэр зураг дээр
оройн гоёлын палаажтай бүсгүй байгаа Доминик мөн байлаа. Эргэлзэх зүйлгүй... Нүүрний
төрх байдал, хар ногоон нүд цайвар шар үс... Зүрх нь хүчтэй булиглахыг Тони мэдрэв. Тэгээд
хажуудах эмэгтэйдээ хандан,

- Уучлаарай. Наад гэрэл зургийг чинь үзэж болох уу?

Тони маргааш өглөө нь бэлэн хувцасны дэлгүүрт утасдаж тэдний зар сурталчилгааны
товчооны нэрийг мэдэж аваад тийшээ утасдлаа. Нарийн бичгийн дарга хүүхэнд

- Танай загвар өмсөгч нэг хүүхэнтэй уулзах гэсэн юм. Та надад тус болж түүний утасыг...
гэтэл хүүхэн

- Жаахан байзнаарай... гэв. Хэсэг хугацааны дараа,

- Танд юугаар тус болох вэ? гэх эрэгтэй хүний ширүүн дуу дуугарлаа.

- “Вог” сэтгүүлийн энэ сарны дугаарт гарсан танай нэгэн зар миний анхаарлыг татсан юм.
Бэтмэн дэлгүүрийн оройн гоёлын палааж сурталчилж байгаа загвар өмсөгч эмэгтэй. Энэ
сурталчилгааг та нийтлүүсэн үү?

- Тийм.

- Тэгвэл энэ загвар өмсөгч эмэгтэй аль агентлагийнх вэ? Та надад хэлж өгөөч?

- Карлтон Блессинг гэж тэрээр хариулаад Тонид утасны дугаарбг хэлж өгөв. Нэг минутын
дараа Тони Карлсон Блессинг товчооны хүүхэнтэй ярьж байлаа.

- Би танай нэг загвар өмсөгч хүүхнийг эрж байгаа юм. Нэр нь Доминиз Моссо гэдэг.

- Уучлаарай. Бид хувийн чанартай мэдээлэлийг өгдөггүй гэж хүүхэн хариулаад яах ийхийн
зуургүй утсаа таслачихав.

Тони утасны харилцуур барьж хэсэг дуугүй бодлогошрон суулаа. Доминикийг яаж ч байгаад ч
гэсэн хамаагүй олох ёстой. Ямар нэгэн арга байх л ёстой доо. Тэгээд босч Бред Рожерс дээр
оров.

- Сайн уу? Тони. Юу байна даа. Кофе уух уу гэсээр түүнийг угтлаа.

- Үгүй баярлалаа. Та Карлсон Блессинг гэдэг зар сурталчилгааны агентлагыг мэдэх үү?

- Мэдхээр барах уу даа. Тэр чинь манай харьяа компани.

- Юу гэнээ?

- Манай нэгэн салбарын дор ажилладаг агентлаг. Юу болоо вэ?

- Манайх түүнийг хэзээ худалдаж авсан юм бол?

- 2 жилийн өмнө бил үү дээ... Чамайг компанид ажиллаж эхлэх үед байхаа. Чи тэндний юуг
сонирхоо вэ?

- Загвар өмсөгч нэг эмэгтэйг олох гэсэн юм аа. Миний хуучин танил байгаа юм.

- Зовох юмгүй. Би утасдья.

- Хэрэггүй би өөрөө болоё.

Тонигийн сэтгэл сэргэн жигүүр ургасан юм шиг өрөөнөөс Бредийн гарлаа. Үдээс хойш тэр
Карлсон Блессинг агентлаг дээр очиж нэрээ хэлээд нэг минутын дараа тэдний захирал
мистер Тилтоны өрөөнд сууж байлаа.

- Бидэнд их хүндэтгэлтэй учрал байна, мистер Блэкуэлл. Ямар нэгэн асуудал гараагүй биз?
Манай орлого сүүлийн улиралд...

- Зүгээр, зүгээр. Би танай загвар өмсөгч Доминик Массог эрж явна гэсэнд Тилтоны царай
туяарч,

- Доминик манай гол загвар өмсөгч болсон. Танай ээж хурц нүдтэй хүн юм гэхэд нь Тони
буруу дуулав уу хэмээн бодож,

- Уучлаарай юу гэнээ? хэмээн лавлав.

- Мисс Массог ажилд ав гэж ээж чинь өөрөө тушаасан юм. Энэ бол манайх Крюгер Брентэд
шилжих үеийн хэлэлцээний нэг хэсэг байсан. Энэ бүгд архивт байгаа. Таныг хүсвэл...

- Хэрэггүй дээ. Та Доминикийн гэрийн хаягыг надад өгөөч?

Тони учрыг ойлгохгүй байлаа. Энэ зүйлд эх нь ямар хамаатай юм бэ?

- Болно, мистер Блэкуэлл. Доминик өнөөдөр зураг авхуулахаар өөр хот руу явсан гээд өмнөө
байсан хувиарыг үзэж

- Маргааш үдээс хойш Нью Йоркт ирнэ гэлээ.

Маргааш нь Тонийг олон айл суудаг угсармал байшингийн дэргэд хүлээж зогсож байтал
хажууд нь хар седан машин ирж, дотроос нь Доминик гарч ирлээ. Тамирчин байрын бие
бялдартай өндөр эр чемоданыг нь барьж явна. Тонийг хараад Доминик дороо зогтусаж,

- Тони, ай тэнгэр. Чи мөн үү... Чи энд юу хийж яваа юм бэ

- Чамтай ярих юм байна гэсэнд нөгөө эр хажуунаас нь,

- Дараа болоорой хөө, Бидэнд одоо зав алга гэхэд нь Тони түүнийг хүн гэж тоосонгүй.

- Энэ найзыгаа эндээс тонил гэж хэлээч,

- Хөөе чи яасан их үгтэй эд вэ?

Доминик хархүү тийш эргэж

- Яв Бен. Орой чамд утасдамз гэсэнд цаадах нь эргэлзэн дал мөрөө хавчаад,

- За яах вэ, тэгье гэлээ.

Тэр Тонигийн өөдөөс муу харж, машиндаа суулаа. Доминик Тониг хараад,

- Энд зогсоод яах вэ. Дотогшоо орцгооё.

Доминикийн байр дээр, доор хоёр давхар бөгөөд үнэтэй эд хогшил тавьжээ.

- Чиний ажил явдал овоо урагштай байгаа юм байна, тийм үү гэж Тонийг хэлэхэд Доминик
цамцаа имрэх зуур,

- Гайгүй шүү. Юм балгах уу?

- Үгүй баярлалаа. Би Парисаас явсныхаа дараа чамтай холбоо барих гэж оролдсон.

- Би өөрөө тийшээ явсан.

- Америк руу юу?

- Тийм

- Чи яаж яваад Карлстон Блессинг агентлагт ажилд орсон юм бэ?

- Зарлал үзээд утасдсан юм л даа хэмээн Доминк дурамжхан хариулав.

- Доминик оо, чи яаж манай ээжтэй анх хэдийд танилцсан юм бэ?

- Би юу? Парист чиний байранд... Санаж байна уу...Бид хамт оройн хоол...

Тонигийн цээжид уур хилэн багтаж ядан оволзож, үгийг нь таслан,

- Боллоо, Доминик. Тоглоомыг ингээд дуусгая. Би эмэгтэй хүнд хэзээ ч гар хүрч байгаагүй.
Харин чи надад дахин худал хэлэх юм бол чиний зураг сайхан гардагаа болино гэж сануулья.

Доминик нэг юм хэлэх гэснээ Тонийн царайны байдлыг хараад амаа хамхив.Тони түүнд

- Доминик оо би сүүлчийн удаа асууя. Чи манай ээжтэй хэдийд анх танилцсан бэ?

Доминик санаа алдаад хариулав.

- Чамайг урлагийн сургуульд орох үед. Ээж чинь намайг тэр сургуульд зургийн загвараар авах
тухай ярьж тохирсон юм.
Тони цохиулсан мэт дайвалзаж,

- Юу? Намайг чамтай танилцаг гэсэн юм уу, тэгээд чамайг миний амраг бол гэж хөлс мөнгө
өгөө юу?

- Тийм гэх үү дээ. Дайны дараа амьдрал аймаар хэцүү байсан. Надад мөнгө байгаагүй. Чи
үүнийг ойлгохгүй... Надад итгээрэй, Тони. Би чамд үнэхээр хайртай байсан. Нээрээ би чамд
сэтгэлтэй байсан.

- Чи миний асуусныг л хариул гэх Тонин дууны өнгөнд хорсол хилэн дүүрэн байлаа. Доминик
үүнийг сонсоод айлаа. Түүний өмнө яахаас ч үл буцах хүн зогсож байв.

- Энэ бүхэн ямар хэрэгтэй байсан юм бэ?

- Ээж чинь надаар чамайг харж хандуулж байх гэсэн юм.

Эхийн нь худалдаж авч өгсөн Доминик хичнээн эелдэг зөөлөн, энхрий янаг байсныг Тони
санаад ичихдээ амьсгаа нь бөглөрөх шахав. Энэ бүх хугацааны турш Тони эхийнхээ гарын
тоглоом болж байжээ. Хоромхон зуур ч хараа хяналтнаас нь гадна байсангүй. Эх нь Тонийг
ерөөсөө хүний чинээнд боддоггүй юм байж. Эх нь төрсөн ганц үр минь гэхээсээ өөрийн
эзэнт гүрний хаан ширээ залгамжлах хунтайж хэмээн үзэж байж. Эх нь Крюгер Брент
компаниас өөр юм сонирхдоггүй аж. Тони Доминикийг сүүлчийн удаа хяламхийн хараад
цааш эргэж, торж бүдчин тасалгаанаас гүйн гарлаа.

Доминик хойноос нь нулимс дүүрэн мэлтгэнэсэн нүдээр харж зогсохдоо, “Би чамд хайртай
гэж хэлэхдээ худал хэлээгүй юм шүү Тони, Худал хэлээгүй” гэж бодов.

Тонийг орж ирэхэд Кейт номын сангийн өрөөнд сууж байлаа. Тони шал согтуу байлаа.

- Би Доминикийг олсон. Түүнтэй ярилцсан... Би та хоёрын занганд орсон. Намайг аргагүй

байдалд оруулаад... Намайг занганд чинь ороход та их баярласан уу? гэхэд нь Кейтийн сэтгэл
сэрдхийж,

- Тони...

- Одоо цаашид миний амьдралд миний хувийн амьдралд оролцохыг хориглож байна. Дуулж
байна уу? Хориглож байна гээд гуйвж дайван өрөөнөөс гарч одов.

Кейтийн сэтгэл түгшин хойноос нь ширтэж байхдаа гай түй болох нь гэж муу совин татлаа.
20-р бүлэг

Тони маргааш нь Гринбич-Вилижид өөртөө байр хөлсөлж авлаа. Эхтэйгээ хамт хоол иддэг
уламжлал нь тасарч, эхийгээ зүгээр нэг ажил төрлийн холбоотой энгийн хүн мэт үзэж
харилцах болжээ. Кейт үе үе ойртон эвлэрэхийг оролдож үзэх боловч түүнийг нь Тони үл
тооно.

Кейтийн зүрх нь шимшрэх боловч Тонийн талаар зөв юм хийсэн гэж өөртөө итгэлтэй байлаа.
Дэвидтэй мөн иймэрхүү янзаар харилцсан нь зөв болж таарсан шүү дээ. Эд нарыг энэ
компанийг орхин одоход хүргэж болохгүй. Тони бол Кейтийн хайртай цорын ганц хүү. Хүү нь
одоо улам улам олноос оорцог, зожиг тасархай болж байгааг ажиглав. Тонид дотнын сайн анд
нөхөд байхгүй. Халуун дотно, энхрий ялдам зан нь хүйтэн хөндий, цэвдэг цэрвүү байдлаар
солигджээ. Тони өөрийн эргэн тойрон хэрэм босгож, түүнийг нь хэн ч давж чадахгүй байлаа.
“Энэ хүүд халамжит сайн эхнэр, асран хүмүүжүүлэх хүн хэрэгтэй юм байна. Би хүүдээ
туслах ёстой” гэж Кейт шийджээ.

Брэд Рожерс Кейтийн тасалгаанд орж ирээд,

- Муу мэдээ дуулгах болж байх шиг гэв.

- Юу болоо вэ? гэхэд нь Брэд ширээн дээр нь нэгэн цахилгаан утас тавиад,

- Өмнөд африкийн парламент хар арьстан ард иргэдийн төлөөлөх зөвлөлийг тарааж,
коммунист арга хэмжээ авсан байна гэв.

- Ай тэнгэр.

Тэр ажиллагаа нь чухамдаа бол коммунизмд хавьтах юм байсангүй. Уг хуульд төрийн

бодлогыг үл зөвшөөрөн түүнийг ямар нэг аргаар өөрчлөх гэж оролдсон этгээдийг буруутай
хэмээн үзэж шоронд хоривол зохино гэсэн байжээ.

- Тэд нар хар арьстан ард иргэдийн эсэргүүцлийг дарах санаатай юм байна. Хэрэв ... гэж
Кейтийг эхлэн ярьж байтал энэ үед гарын туслах бүсгүй орж ирээд,

- Танд гадаадаас утасдаж байна. Йоганнесбургийн мистер Пирс гэв.

Жонатан Пирс бол компанийн Өмнөд Африкийн хэлтсийн захирал. Кейт харилцуур аваад,

- Сайн уу, Жони. Танай тэндхийн ажил явдал ямар байна даа? гэв.

- Маш сайн, Кейт... Надад зарим нэг шинэ сонин мэдээ бий. Түүнийгээ чамд даруй дуулгах
гэсэн юм.

- Юу болоо вэ?

- Цагдаа нар Бандаг баривчилсан гэсэн мэдээ сая надад ирлээ.

... Кейт анхны нисэх онгоцоор Йоганнесбург рүү нисэв. Тэгээд өмгөөлөгч нартаа Бандад
туслах арга ол тушаажээ. Гэвч “Крюгер Брент” ийн аугаа хүч чадал нь Бандаг шоронгоос
гаргахад хүрэхгүй байж болох юм. Бандаг төрийн гэмт хэрэгтэн гэж үзэж байгаа тул ямар ял
шийтгэл ноогдох нь илт байлаа. Кейт түүнтэй уулзаж, тусалья гэдгээ хэлэх ёстой. Нисэх
онгоц буумагц Кейт контортоо очиж, тэндээс шоронгийн даргад утасдав.

- Банда ганцаар хорих өрөөнд байгаа, миссис Блэкуэлл. Хэнтэй ч уулзуулахыг хориглосон.
Таныг жич үзэж болох юм биз.

Кейт маргааш өглөө нь шоронд Бандатай уулзав. Гав дөнгөтэй Банда шилэн хашлаганы
цаанаас Кейтийг харж байлаа. Үс нь цал буурал болжээ. Бандаг цөхрөнгөө барж байгаа болов
уу гэж бодсон чинь харин өөдөөс нь жуумалзан байлаа.

- Чамайг ирнэ гэж мэдэж байсан. Чи аавыгаа дуурайсан хүн юм. Элдэв хэрэг төвөгт
хутгалдалгүй сууж болсонгүй юү? гэхэд нь

- Ээ чөтгрө алгад, Таныг эндээс яаж гаргах вэ?

- Авсанд хийж гаргаж болно. Надад шоронгоос гарах өөр зам байхгүй дээ.

- Надад овжин өмгөөлөгч нар бий.

- Тэр тухай мартаж орхи, Кейт. Эд нар намайг шударга ёсоор баривчилсан. Би шоронгоос мөн
шударга ёсоор гарах ёстой.

- Та юу хэлнэ вэ?

- Шоронд суух аятай биш байна. Яаж чиг аятай байх вэ дээ. Намайг барьж тогтоож чадах
тийм шорон одоохондоо байхгүй.

- Тэгж битгий яриарай, Банда. Эд нар таныг алж орхино шүү.

- Намайг хэн ч алж чадахгүй. Аварга загас, манааны ноход, минатай талбайг юманд бодоогүй
хүн шүү дээ, би чинь. Одоо бодоход тэр ер нь миний амьдралын хамгийн сайхан цаг байжээ...
гээд Бандагийн нүд гялалзав.

Кейтийг маргааш нь Бандатай уулзахаар ирэхэд нь шоронгийн дарга,

- Уучлаарай, миссис Блэкуэлл. Аюулгүй байдлын үүднээс бид түүнийг өөр шоронд
шилжүүлсэн гэв.

- Хаана вэ?

- Үүнийг танд хэлж болохгүй байна.

Маргааш өглөө нь өглөөний цай хоолтой цар дээр тавьсан сонины гарчгийг үзвэл,
БОСОГЧДЫН ТОЛГОЙЛОГЧ ШОРОНГООС ОРГОХ ГЭЖ ОРОЛДООД АЛАГДАВ гэсэн
байв. Кейт нэг цагийн дараа шоронгийн даргын албан тасалгаанд сууж байлаа.

- Түүнийг шоронгоос зугтах гэхээр нь буудан алсан, миссис Блэкуэлл. Ингээд гүйцээ.

“Эндүүрч байна. Ингээд гүйцэхгүй. Гүйцэх яагаа ч үгүй. Банда алагдсан ч ард түмэндээ эрх
чөлөө олж өгнө гэсэн мөрөөдөл нь үхээгүй” гэж Кейт бодлоо.

Оршуулгын дараа хоёр хоноод Кейт Нью Йорк орохоор нисэв. Онгоцны цонхоор өөрийн
хайртай газар нутгийг сүүлчийн удаа харлаа. Энэ бол хөрсөн дор нь барагдашгүй их баялаг
хадгалагдаж байдаг арвин баялаг үржил шимтэй газар. Эзэн тэнгэр энэ нутагт өгөөмөр их
хишиг хайрлажээ. Даанч хараал хүрч, муу юм ширлэжээ. “Би дахиад ийшээ ирэхгүй. Хэзээ ч
ирэхгүй” гэж Кейт уйтгарлан бодов.

...Крюгер Брентийн стратегийн төлөвлөгөөний хэлтсийн ажлыг хянаж байх нь Бред

Рожерсын гол үүрэг. Худалдан авбал зохих шинэ компанийг шилж сонгох талаар Бред Рожерс
хосгүй хүн. Бред 5 дугаар сарын эхээр нэгэн өдөр Кейт дээр орж ирээд ширээн дээр нь хоёр
хавтас тавьж,

- Би бага сага юм оллоо. Хоёр компани. Бид энэ хоёрын алиныг нь ч худалдан авсан асар их
амжилт олно.

- Баярлалаа, Бред ээ. Би үүнийг орой уншья.

Кейт орой нь ганцаараа хооллож байх зуураа “Уаст Ойл энд Тул”, “Интэрнэшнл Текноложи”
гэдэг хоёр компанийн тухай Бред Рожерсийн нууц илтгэлийг судалж үзэв. Хоёр илтгэл
хоёулаа их урт, дэлгэрэнгүй агаад хоёул “ХС” гэсэн товчлолоор дууссан нь худалдах
сонирхолгүй гэсэн үг байлаа. Энэ бол энэ хоёр компанийг худалдан авахын тулд ер бишийн
хүчин чармайлт гаргах хэрэгтэй гэсэн үг. Компани бүрийг хөрөнгө бэл сайтай, бие даасан
байдалтай эзэд толгойлдог болохоор зүгээр нэг “залгих” бололцоо байхгүй. Энэ бол хор
малтсан ажил. Кейт хэн нэг хүнтэй өрсөлдөж үзэлгүй уджээ. Үүнийг бодох тусам хорхой нь
хүрч, хор шар нь хөдөлнө. Хоёр илтгэлийг дахин үзэв. Уаст ойл компани Техас нутгийн
Чарли Уастынх бөгөөд нефтийн цооног, нефтийн тоног төхөөрөмж үйлдвэрлэх пүүсүүд бас
нефть олборлох хэтийн төлөв сайтай газар эзэмшдэг ажээ. Энэ компанийг худалдаж авбал
“Крюгер Брент” д үнэтэй сайхан бэлэг болох нь дамжиггүй.

Кейт 2 дахь илтгэлийг дахин авч уншлаа. Интэрнэшнл Текноложи нь германы гүн Фредерик
Хоффманынх юм байна. Хоффман гүн анхандаа Эссенд төмөрлөгийн жижигхэн үйлдвэрээс
өөр юмгүй байснаа тэр нь хэдхэн жилийн дотор хөлөг онгоцны үйлдвэр, химийн завод,
танкер хөлөг онгоцны үйлдвэр гэх мэт чухал хэдэн үйлдвэртэй болж өргөжиж чаджээ.
Крюгер Брент энэ хоёр компанийн аль нэгийг л авч дийлэнэ. Алийг нь авахаа Кейт нэгэнт
шийдлээ. Илтгэлийн төгсгөлд ХС гэсэн дээр Кейт харц хэсэг тогтоод,

“За яах вэ, үзэж больё доо. ХС мөн үү, биш үү” хэмээн бодлоо.

Маргааш нь өглөө нь Брэд Рожерсыг дуудуулж,

- Энэ мэдээлэлийг яаж олж авсныг чинь мэдмээр байна. Чарли Уаст болон Хоффманы тухай
надад яриач хэмээн инээмсэглэлээ.

Брэд урьдын адил “гэрийнхээ даалагварыг” сайн биелүүлжээ. Тэр шууд л эхлэлээ.

- Чарли Уаст Далласт төрсөн. Өвөрмөц этгээд ааштай, ичиж эрээлхэхийг мэдэхгүй,
компанийг өөрөө хариуцан удирддаг. Шулмас шиг зальтай хүн. Цулгуй хоосноос эхлэж хэдэн
цооног таамгаар өрөмдсөн нь аз таарсан юм санж. Компани нь өсөж өргөжин, одоо Техасын
тэн хагасыг эзэмшдэг гэхэд болно.

- Хэдэн настай билээ дээ?

- 47.

- Хүүхэдтэй юү?

- 25 тай ганц охинтой. Амьтны яриа үнэн бол хөөрхөн хүүхэн гэнэ.

- Нөхөртэй юм уу?

- Салсан гэнэ билээ.

- Өө. Хоффманы тухай юу гэмээр байна даа.

- Хоффман Чарлигаас хоёр дүү. Дундад зууны үеээс эх авсан нэр алдартай сурвалжит айлын
удам, гүн хэргэмтэй. Бэлэвсэн эр, Өвөг эцэг нь төмөрлөгийн үйлдвэрээс ажил төрлөө
эхлэсэн байна. Хоффман тэр үйлдвэрийг эцгээсээ өвлөж аваад одоогийн аварга том
корпораци гардан байгуулсан аж.

- Хүүхэдтэй юү?

- 23 тай охинтой.

- Хөөрхөн хүүхэн үү?

- Энэ тухайд сайн мэдэж чадаагүй гэж Брэд буруугаа хүлээх мэт өгүүлээд,

- Их зожиг айл юм. Зөвхөн өөрсний нь хүрээнийхний дунд эргэлддэг байна... Ер нь бид цаг
дэмий үрж байж мэдэх юм шүү. 2 компанийн ажилчидтай ярилцаж үзсэн. Хэн хэн нь
компаниа худалдах янзгүй байна. Бат тогтвортой санхүүтэй болохоор манай саналыг яасан ч
хүлээж авахгүй.

Кейтийн хор шар дахин хөдөллөө.

10 хоногийн дараа Кейт АНУ гын ерөнхийлөгчөөс Вашингтонд болох олон улсын аж
үйлдвэрийн том эздийн бага хуралд оролцоно уу гэсэн урилга хүлээн авлаа. Бага хурлаар
шинэ тутам хөгжиж байгаа улс орнуудад тусламж үзүүлэх асуудал хэлэлцэх аж. Кейт
хөөцөлдөж байгаад Чарли Уаст, Хоффман нарт бас урилга явуулсан байхаар зохицуулж
чадлаа. Кейт тэр хоёрын сэтгэлдээ ургуулан төсөөлсөн нь жижиг нарийн зүйл дээр ч
алдаагүй тохирсон байлаа. Техас нутгийн хүн бүрэг ичимхий байхыг нэг ч үзээгүй билээ.
Чарли ч мөн тийм эр байлаа. Тэр бол 6 фут, 4 ямх өндөр нуруутай, жаахан махлаж яваа, регби
тоглодог тамирчны бие цогцостой булиа эр байлаа. Байдал төрх хурц илэрсэн өргөн нүүртэй
тэртээ холоос дуулдах чанга дуутай хүн байв. Гаднаас нь ажиглахад ам задгай гэнэн цагаан
хүн шиг байвч Кейт энэ зэргийн юманд хууртахгүй. Кейт түүнтэй арваад минут яриад л энэ
хүнээр өөрийнх нь дургүй юмыг хийлгэх аргагүй юм байна гэж ойлгов. Өөрийн үзэл бодлыг
гайхмаар гүжирмэг шулуухан хамгаалах ажээ. Хэн ч бай, түүний компанийг мөнгөөр ч юм уу,
арга залиар салгаж чадахгүй. Гэвч Кейт түүний сул талыг таньж чадсан нь эхний удаад
хангалттай.

Харин Хоффман бол тэс ондоо хүн байлаа. Тэр бол ялимгүй бууралтаж яваа хар хүрэн үстэй,
ихэс язгууртны намба төрхтэй нүдэнд дулаахан эр байв. Зан байдал эелдэг найртай, гаднаас
нь харахад цагаан санаатай хүн шиг байх боловч ган болд мэт зоримог хатуу хүн юм байна
гэж Кейт шууд мэдэрлээ.

Вашингтоны бага хурал 3 хоног үргэлжлэв. Бага хурлыг дэд ерөнхийлөгч удирджээ. Кейт хүн
бүхэнд мартагдашгүй сэтгэл төрүүлж чадлаа. Асар том корпорацийн тэргүүн, хүний
сэтгэлийг татан дагуулах увидастай тэр хүүхнийг бүгдээр гайхан шагшина. Кейт зорилго яг
ийм байсан бөгөөд тэр санасандаа хүрчээ. Кейт аятай мөчийг анан хүлээж байгаад Чарлид
хандах,

- Мистер Уаст та энд гэр бүлтэйгээ ирсэн үү?

- Охиноо дагуулж ирсэн. Эндээс бага сага юм худалдан авах юм гэнэ билээ.

- Тийм үү, сайхан хэрэг ээ.

Кейт Чарлигийн охинтойгоо ирснийг мэдэхээр үл барам, охин нь “Графинкел” дэлгүүрээс

ямар ямар палааж худалдан авсныг, тэр бүү хэл охин нь маргааш юу хийхийг ч нэгд нэггүй
мэдэж байгаа гэж хэний санаанд орох билээ.

- Би баасан гаригт Дарк Харборт бяцхан хүлээн авалт хийнэ. Амралтын өдөр таныг
охинтойгоо хамт манайд өнжвөл маш их баярлах байна.

- Таны тухай би их сонссон. Таны урилгыг дуртайяа хүлээн авья гэж Техас эр хариулав.

Кейт инээмсэглэн

- Таныг авахаар нисдэг тэрэг ирүүл гэж манайхан хэлье...

10 минутын дараа Кейт Хоффмантай ярьж байлаа.

- Та Вашингтонд ганцаараа ирсэн үү, эсвэл гэргийтэйгээ хамт ирсэн үү?

- Эхнэр маань хэдэн жилийн өмнө өөд болсон. Би энд охинтойгоо ирсэн.
Кейт Чарлигийн тухай мэдсэн шиг Хоффман тухай бас мэдэж байлаа. Хоффман Хэй Адамс
зочид буудлын 418 дугаар өрөөнд буусныг ч эхлээд... бүгдийг л мэдэж байлаа.

- Баасан гаригт би Дарк Харборт бяцхан цайллага хийнэ. Таныг амралтын өдөр охинтойгоо
хамт тэнд өнжихийг зөвшөөрвөл би их баярлах байна гэсэнд Хоффман инээмсэглэн

- Ер нь бол би Германдаа буцах хэрэгтэй байна. Гэсэн ч нэг хоёр хоног саатахад гэм болохгүй
болов уу гэв.

- Сайн байна. Таныг тийш нь хүргэж өгөх унаа танд бэлдүүлье...

Кейт Дарк Харбор дах эдлэндээ хоёр сард нэг удаа хүмүүс уриж цайллага хийдэг
уламжлалтай. Зочдын дотор алдар нэр, сүр хүчин төгс хүмүүс байх бөгөөд ийм уулзалтын
ашиг тус нь их. Кейт энэ удаад ч гэсэн бүх зүйлийг хамгийн дээд хэмжээнд зохиосон байх
талаар хичээв. Тониг ятгаж цайллаганд оролцуулах нь хамгийн гол бөгөөд хэцүү зорилго
байлаа. Тониг энд хагас бүтэн сайнд өнжүүлэх хэрэгтэй.

Кейтийг энэ тухай яриа үүсгэхэд Тони шууд л,

- А-амжихгүй. Б-би даваа гаригт Монтреаль о-орно. Надаа ажил зөндөө гэж дургүйцэн
хариулав.

- Энэ маш чухал ажил. Чарли болон Хоффман нар ирэх болно. Тэд ... гэж Кейт ятгахад Тони
үгийг нь таслан,

- Тэдний х-хэн болохыг би мэднэ. Би Брэдтэй ярьсан. Манайх тэднйи алийг нь ч худалдан авч
чадахгүй

- Оролдоод үзье, Тони гэхэд Тони эхийнхээ өөдөөс хэсэг дуугүй хараад,

- Бид хоёуланг нь авч чадахгүй. Та алинд нь санаатай байгаа юм бэ?

- Уастын компанид... Түүнийг авч чадвал манай орлого 15 хувиар нэмэгдэнэ. Арабын орнууд
бидний багалзуурыг атгаж байгааг мэдээд артельд нэгдэж нефтийн үнэ тэнгэрт хадна. Нефть
ирээдүйд нэгэн өдөр шингэн алт болно шүү, Тони.

- Тэгвэл тэр интернэшнл текноложи энд юу хийж байгаа юм бэ?

Кейт дал мөрөө хавчин,

- Сайхан компани юм. Гэхдээ Уаст ойлтой яаж эн зэрэгцэх билээ дээ. Уаст ойл биднийх
болбол бидэнд их ашигтай. Чи заавал байна шүү, Тони. Канад очихыг хэд хоногоор
хойшлуулж болно шүү дээ.

Тони үдэшлэгийг үзэн яддаг. Сайрхуу эрчүүд, улирч баларсан хүүхнүүд цуглаж, дуусгаваргүй
яриа үргэлжилдэг. Гэвч бизнес бол бизнес.
- За яах вэ, би очьё.

Шатрын бүх бод хүүг хөлөг дээр өрж гүйцлээ.

Уастынхан “Сесна” онгоцоор боомт дээр ирээд, тэндээс гаталгаа онгоцоор арал дээр очиход,
тэднийг хушны төгөлд аваачих том машин хүлээж байлаа. Кейт тэднийг үүдэн дээрээ тосож
авлаа. Чарлигын охины тухай Брэд үнэн хэлжээ. Люси бол өндөр гоолиг нуруутай, хар үстэй,
хүрэн нүдтэй, нүүрний тэг зөв, хүн атаархам хөөрхөн хүүхэн ажээ. Галаносын палааж гол
шиг сайхан биеийн нь хэлбэрийг тодруулжээ. Брэд Рожерсын хэлснээр бол 2 жилийн өмнө
баян итали нөхрөөсөө салсан. Кейт Люсиг Тонитой танилцуулаад хүүгийнхээ байдлыг
битүүхэн ажиглаж байв. Тони Уастынхантай эелдэгээр мэндлэн ёслоод зочдод зориулан
баарны хүний холимог дарс найруулж буй эргэнэг тийш тэднийг дагуулж явлаа.

- Ямар сайхан байшин бэ? Чи энд цагийг их өнгөрүүлдэг биз дээ? гэж Люси техас нутгийн
аялга үл мэдэгдэх зөөлөн дуугаар Тонигоос асуув.

- Үгүй дээ гэж Тони хариулав.

Тониг дахин юм хэлэх болов уу гэж Люси хүлээсэн боловч цаадах нь нэмж юм дуугарсангүй.

- Чи энд өссөн үү? гэж Люси асуулаа.

- Тийм.

Тэдэн дээр Кейт хүрч ирлээ.

- Тонигийн хамгийн баясгалант сайхан дурьдатгал энэ байшинтай холбоотой. Даанч одоо энд
олон ирэх зав чөлөө муутай байдаг. Тийм ээ Тони? гэхэд нь Тони эхийнхээ өөдөөс хүйтэн
хөндий хараад,

- Арай ч тийм биш. Ер нь би Канадад орох гэж байсан юм... гэхэд нь,

- Явах гэж байснаа та нартай танилцах гээд больсон юм гэж Кейт өмнөөс нь хэлэв.

- Би их баяртай байна. Танай хүүгийн тухай их сонссон. Манайд ажилд орж, надад ажил
хийж өгөхийг зөвшөөрөх болов уу? гэж Чарли Уаст инээмсэглэн өгүүлэв.

- Ээ-ээжийн санаанд таарна гэж бодохгүй байна, мистер Уаст гэхэд нь Чарли дахин
жуумалзан,

- Мэднэ... гээд Кейт тийш эргэж

- Кейт Блэкуэлл ёстой их хатагтай. Цагаан ордонд болсон уулзалт дээр ямар их сэтгэгдэл
төрүүлснийг нүдээр үзсэн хүн л мэднэ. Танай ээж... гэснээ Фредерик Хоффман охинтойгоо
ирэхийг хараад дуугүй боллоо.

Марианна эцгийгээ өвчсөн юм шиг адилхан төржээ. Эцгийнхээ адил ихэс язгууртны намба
төрхтэй, урт цайвар шар үстэй. Марианна цагаан шифон палааж өмссөн байлаа. Люси
Уастын дэргэд тун даруухан харагдана.

- Миний охин Марианна. Танилцана уу. Хожимдож ирснийг минь уучилна уу. Манай нисэх
онгоц Ла Гуардын нисэх будалд саатаад... гэж Хоффман гүн өгүүлэхэд,

- Тоогүй дээ. Бид яг дуугараа барихаар завдаж байсан юм. Та юу уух вэ? гэж Кейт өгүүлэв.

Эх нь Уастынхныг түрүүнд, Хоффманныхныг дараа нь ирүүлэх гэж нисэх онгоцыг зориудаар

саатуулсныг Тони гадарлаж байлаа.

- Шотланд виски ууя гэж Хоффман гүн өгүүлэв.

- Харин та гэж Кейт Марианнаас асуув.

- Баярлалаа. Би уухгүй.

Хэдэн минутын дараа бусад зочид ирж, Тони эелдэг найртай гэрийн эзний үүргийг
хичээнгүйлэн биелүүлэв. Ийм цугларалтанд Тонигийн хичнээн их дургүйг Кейтээс өөр хүн
мэдэхгүй. Тони эргэн тойрондоо юу болж байгааг Кейтээс өөр хүн мэдэхгүй. Тони эргэн
тойрондоо юу болж байгааг огт сонирхохгүй уйдаж байдаг. Тони хүн амьтантай харилцахын
бахыг мэддэггүй хүн. Үүнд нь Кейтийн сэтгэл зовж байлаа.

Хоолны танхимд хоёр ширээ засчээ. Кейт Марианнаг дээд шүүхийн гишүүн, нэг сенатор
хоёрын дунд суулгаж, Люси Уастыг өөр ширээнд, хүүгийнхээ баруун талд суулгажээ.
Эхнэртэй эхнэргүй олон эрчүүд бүгдээрээ Люсид нүдээ өгчих шахна. Люсигийн Тонитой
яриа үүсгэх гэж оролдож байгааг Кейт ажиглав. Люсид Тони таалагдаж байгаа нь илт. Ингээд
эхлэлийг тавилаа хэмээн Кейт дотроо инээмсэглэж суулаа. Маргааш өглөө нь Чарли Уаст
Кейтээс,

- Миссис Блэкуэлл, та маш сайхан яхта онгоцтой юм. Хэдий хэрийн хэмжээтэй вэ?

- Мэдэхгүй юм байна гээд хүү рүүгээ эргэн

- Тони, Манай “Корсар” хэр урт вэ? гэж асууллаа.

Ээж нь яхта онгоцны хэмжээг сайн мэдэж байлаа. Гэвч Тони,

- 80 фут.

- Техас нутгийн бид яхта санахтай мантай. Бид их адгуу болохоор нисэх онгоц дээр гэж
боддог гээд Уаст тас тас хөхөрч,

- Яхта онгоцоор хөвж үзвэл яасан юм бэ? За би лав хөлөө норгох байх гэхэд нь Кейт
инээмсэглээд,

- Та нарт энэ арлыг үзүүлбэл болох уу? Арлыг яхта онгоцоор тойрч үзье гэхэд нь Чарли
Кейтийн өөдөөс ширтэн,

- Миссис Блэкуэлл, та их эелдэг хүн юм гэв.

Тони тэднийг үг дуугүй ажиглаж байлаа. Эх нь эхний нүүдлийг хийлээ. Үүнийг Чарли
ажиглаж мэдээ болов уу? Лав мэдэхгүй байгаа биз. Уаст ухаалаг бизнесмен боловч Кейт шиг
ийм нарийн сайн тоглоомчинтой дайралдаж байгаагүй билээ. Кейт Тони Люси хоёр тийш
эргэж,

- Өнөөдөр их сайхан өдөр байна. Та хоёр далбаат онгоцоор зугаалбал яасан юм бэ? гэхэд нь
Тони ам нээхээс өмнө Люси өрсөн,

- Маш дуртай байна гэхэд нь

- Уучлаарай. Надад гадаадаас хүн утасдах ёстой хэмээн Тони хариулаад эхийнхээ муухай
харахыг мэдрэв. Кейт Марианна тийш эргэн,

- Өнөө өглөө танай аав харагдсангүй гэв.

- Аав энэ арлыг үзэж яваа. Өглөө эрт босдог юм.

- Таны морь унах дуртайг мэднэ. Энд сайхан морьд бий шүү.

- Баярлалаа, миссис Блэкуэлл. Таныг дургүйцэхгүй бол би зүгээр л салхинд явья.

- Болно л доо гээд Кейт Тони тийш эргэж,

- Чи мисс Уасттай далбаат онгоцоор зугааож амжихгүй юм уу? гэж асуухдаа дуу өнгө нь
ширүүхэн байлаа.

- Амжихгүй

Энэ бол өчүүхэн ялалт боловч ямар ч гэсэн ялалт байлаа. Тулалдаан эхэлжээ, харин Тони
ялагдахгүй шүү гэж бодлоо. Энэ удаа эх нь яаж ч чадахгүй. Дахиад эхдээ хууртахгүй. Эх нь
нэг удаа Тонийг шатрын хүү болгон ашигласан, одоо дахиад тэгэх санаатай байна. Эхэд нь
Уаст ойл компани үнэхээр хэрэгтэй юм байж. Чарли Уаст компаниа худалдах янзгүй аж.
Гэсэн ч хүн бүхэн сул талтай байдаг хойно доо. Чарлигийн сул талыг Кейт мэдээд авчээ.Тэр
нь Люси. Хэрэв охин нь Блэкуэллийн ам бүлийн хүн болох юм бол Уаст ойл Крюгер
Брэнтийнх болох нь гарцаагүй юм. Тони эхийгээ тоомсоргүй харав. Кейт урхи зангыг их
овжин тавьжээ. Люси бол царайлаг хөөрхнөөр үл барам, хүний сэтгэлийг татан дагуулах
увидастай ухаалаг хүүхэн байв. Харин энэ тоглоомд Люси Тонийн нэг адил шатрын хүү
төдий. Тони юу боллоо ч гэсэн энэ бүсгүйд гар хүрэхгүй. Эхтэйгээ нэгийгээ үзэж дуусахаар
шийджээ. Өглөөний цайны дараа Кейт Тонид,

- Чи утас хүлээж байх зуураа мисс Уастэд манай цэцэрлэгийг үзүүлэхгүй юү?

гэхэд нь Тони бултаж зайлах арга олсонгүй.

- За тэгье гээд Люсигээс бушуухан салахын түүс болов. Кейт Чарли руу эргэж,

- Та ховор ном сонирхдог уу? Манай номын санд тийм номын цуглуулага бий гэсэнд,

- Таны надад үзүүлэх гэсэн юм бүхэн надад сонин сайхан байна гэж Техас нутгийн эр
хариулав.

Кейт мартснаа сая санасан мэт Марианна Хоффман руу эргэж,

- Та энд уйдах юм биш биз?

- Өө уйдахгүй, миссис Блэкуэлл. Надад санаа бүү зов.

- За тэгвэл санаа зовохоо больё.

Эх нь үнэхээр санаа зовохгүйг Тони мэдэж байлаа. Мисс Хоффман Кейтэд ямар нэг ашиг тус
болж чадахгүй. Тийм болохоор бүсгүйг ер тоож анхаарахгүй байлаа. Өнгөн дээрээ эелдэг
найртай инээмсэглэвч жинхэнэ хэрэг дээрээ хайр найргүй шулуухан хөдөлж байв.

- Тони чи бэлэн үү? гэж Люси асуухад Тони

- Бэлэн гэв. Ингээд тэр хоёр хаалга руу явлаа. Ард нь,

- Сайхан хос оо, тийм үү? гэж ээж нь хэлэхийг Тони сонслоо.

Люси Тони хоёр ер бишийн сайхан үнэр анхилуулсан зүйл зүйлийн цэцэг бүхий, хэдэн акр
талбайтай цэцэрлэг тйиш явлаа.

- Ямар сайхан цэцэрлэг вэ? гэж Люси шүүрс алдан өгүүлэв.

- Тийм шүү.

- Манай Техаст ийм цэцэг байхгүй.

- Байхгүй юү?

- Энд нам гүм, тайван сайхан юм.

- Тийм ээ

Люси огцом зогтусаж, Тонийн өөдөөс ширтэхдээ царай нь улсхийхийг Тони ажиглаад,

- Би буруу юм хэлчихэв үү дээ?

- Чи ерөөсөө юм хэлэхгүй юм. Чамайг тийм, үгүй гэхээс өөр үг хэлэхийг сонсохгүй болохоор
гомдож байна. Би л чиний хойноос гүйгээд байгаа юм шиг.

- Тийм биш юм уу гэсэнд Люси тас тас инээж

- Уухай. Би чамайг юм ярьж чаддаг болговол нэг юм гэж... гэхэд нь Тони жуумалзан,

- Чи юу гэж инээгээ вэ?

- Зүгээр.

Тони эхийгээ бодлоо. Эх нь дийлдэхийг хэрхэвч хүсэхгүй дээ.

Кейт Чарлид Уастад ханыг нь харлуулсан царсаар бүрсэн асар уудам номын сандаа дагуулж
ирэв. Тавиур дээр Оливер Голдсмит, Лоренс Стерн, Тобиас Смоллет, Жон Донн нарын номны
анхны хэвлэл, Бен Жонсоны анхны боть байлаа. Энд бас Самуэль, Батлэр, Беньян нарын
анхын ботиуд гээд л эрдэнэс мэт ховор нандин ном өрсөн тавиурыг Уаст нүдээрээ идэх мэт
ширтэн байснаа Жон Кристийн маш сайхан хавтастай “Эндэмион” ботийн дэргэд зогсож,

- Розенбергийн хэвлэл байна гэхэд нь Кейт өөдөөс нь гайхан харж,

- Тийм бий. Ийм ном хоёрхон байдаг гэнэ лээ гэсэнд, Уаст

- Нөгөө нь надад бий гэлээ. Кейт инээд алдаж,

- Таныг би арай хөнгөн үзсэн бололтой. Та өнгөн дээрээ техас нутгийн хээгүй эрийн дүр
үзүүлж намайг хуурчээ гэсэнд Уаст баясгалантай инээмсэглэн,

- Үнэмшмээргүй байна уу? Биеэ өнгөлөн далдлах аятайхан арга шүү.

- Та хаана сургууль төгссөн бэ?

- Колорадод геологийн дээд сургууль, дараа нь Оксфордод... гээд Кейтийн өөдөөс нь ажин
шинжих байдалтайг харж,

- Намайг Вашингтоны бага хуралд урих талаар таныг санаа тавьсан гэж би дуулсан юм. Энэ
үнэн үү? гэсэнд Кейт дал мөрөө хавчин

- Таны нэрийг л хэлсэн юм. Урихыг тэд өөрсдөө урьсан. Чарли Кейт өөд эгцлэн хараад,

- Надад их аятайхан юм болжээ. Одоо бид хоёр хоёулхнаа байхад та надад юу бодож сэдсэнээ
хэлбэл яасан юм бэ? гэлээ.

Тониг үүдний өрөөний ойролцоо байдаг өөрийн ажлын тасалгаанд сууж байтал, үүд онгойж
нэг хүн орж ирэх сонсогдлоо. Нүдээ өргөн харвал Марианна Хоффман байлаа. Тонийг ам
нээхийн завдалгүй бүсгүй бахархан дуу алдав. Хананд өлгөөстэй байгаа зурагнуудыг хараад
тийнхүү уулга алдсан байжээ. Тонигийн Парист байхдаа зурсан зурагнуудаас үлдсэн цөөн хэд
нь энэ бөгөөд тийм ч муу зурагнууд биш гэж Тони өөрөө мэднэ. Тонийг хөдлөхөд сандлын
савхан бүрээс шажигнан дуугарч, Марианна түү рүү эргэн хараад,

- Ээ уучлаарай, энд хүн байгааг би мэдсэнгүй гэхэд нь Тони босож өрөөндөө хөндлөнгийн
хүн зөвшөөрөлгүй орж ирсэнд дургүйцэн,
- Яах вэ, зүгээр. Та хэнийг эрж явна вэ? хэмээн ширүүхэн дуугарав.

- Би хүн эрээгүй. Би зүгээр... явж байсан юм. Таны зургийн цуглуулга музейд байвал таарах
юм байна.

- Тийм ээ, энэ хэдээс бусад нь... гэж Тони хариулахдаа нилээд хүйтэн хөндий дуугарснаа,
өөрөө ч гайхав.

Тонийн дууны өнгө зэвүүн аястай байгааг бүсгүй гайхан, зураг руу огцом эргэлээ. Тэр
зураачийн нэрийг зурагнаас ажиглаад,

- Та зурсан юм уу?

- Таны санаанд таарахгүй байгаа бол уучлаарай гэсэнд бүсгүй дэргэд нь очиж,

- Үгүй дээ, зүгээр л...Маш сайхан зурагнууд байна. Та ийм сайхан зурж чаддаг байж, зураг
зурахгүй өөр юмаар оролдож байхын хэрэг юу байна, ойлгохгүй байна. Гоц сайхан зурагнууд
байна шүү дээ.

Тони түүний юу хэлж байгааг анхааран сонсохгүй бушуухан яваад өгөөсэй хэмээн хүсэж
байлаа. Марианна үргэлжлүүлж,

- Би уг нь зураач болох гэсэн юм. Оскар Кокошкигоор бүтэн жил заалгаж, санасандаа хүрч
зурж чадахгүйг мэдээд орхисон л доо. Та бол... гээд зураг тийш бүр ойртлоо. Тэгснээ Тони
руу дахин эргэж

- Та Парист сурч байсан уу? гэхэд нь

- Тийм гэж Тони дуртай дургүй хариулаад энэ хүүхэн бушуухан далд ороосой гэж дахин хүсэв.

- Тэгээд та зураг оролдхоо бүр больсон юм уу?

- Тийм

- Тоогүй дээ, Та ...

- Аа та нар энд байсан юм уу?

Тони Марианна хоёрыг эргэж харахад үүдэнд Кейт зогсож байлаа. Кейт нэг хэсэг тэр хоёрыг
анхааралтай харж байснаа Марианны дэргэд ирж,

- Би Марианна таныг эрж явна. Таныг цахирмаа цэцэгт дуртай гэж аав чинь хэлсэн. Та манай
хүлэмжийг үз гэхэд нь,

- Баярлалаа. Би зүгээр... гэж Марианна амандаа бөвтнөв. Кейт Тони тийш эргэж,

- Чи бусад зочдын илүү анхаарах хэрэгтэй байна гэж хэлэхдээ Тонийг үл сайшаасан
байдалтай байлаа. Кейт Марианын гараас хөтлөн дагуулан гарав.

Эх нь бусад хүнийг ийнхүү өөрийн эрхэндээ оруулж чаддагийг бүр гайхмаар. Ер илүү дутуу
хөдлөхгүй, бүх хөдөлгөөнөө нарийн зохицуулсан байх юм. Эх нь Хоффманыхныг сүүлдэж
ирэхээр тааруулан зохиож, дараа нь Люсийг дандаа л Тонигийн дэргэд суулгаад байлаа.
Чарли Уасттай хоёулхнаа аминчлан ярих юм. Илт тоглож байх шиг. Харин эхийнхээ занг сайн
мэдэх болохоор л илт юм шиг санагдаж байгааг мэдэж байв. Эх нь сэмхэн явуулга хийж
чаддагийг Тони мэднэ. Люси Уаст сайхан хүүхэн юм. Хэн нэгэн хүнд сайхан эхнэр болно.
Тони биш. Тони эхийнхээ санаж сэдсэн бүхнийг сөрж эсэргүүцэнэ. Эх нь дандаа ашиг
завшаан эрсэн цэвдэг сэтгэлтэй хүн юм. Тони үүнийг нэгэнт мэдэж байгаа болохоор эхээсээ
айхгүй. Гагцхүү одоо дараа нь яах бол гэдгийг сонирхож байлаа. Удаан хүлээх хэрэг
гарсангүй. Тэд сэрүүн тагт дээр холимог дарс ууцгааж суулаа. Кейт хүүдээ хандан,

- Мистер Уаст ирэх бямба ням гаригт биднийг хөдөөх эдлэндээ очно уу гэж найрсагаар урьж
байна. Төсөөлж байна уу? Би Техас нутгийн хөдөөгийн эдлэн ерөөсөө үзээгүй хэмээн баярын
царайгаар өгүүлэв.

Уг нь Кейтэд Уастынхаас хоёр дахин том эдлэн бий.

- Тони чи очих уу?

- Очоорой гэж Люси гуйв.

Бүгд Тонигийн юу хэлэхийг хүлээнэ...

- Дуртайяа очьё

- Сайн байна гэж Люси баярлан өгүүлэв. Кейт бас баярлажээ.

Тони бодсон нь” Энэ Люси юу бэ? намайг урхиндаа оруулах гэвэл тэр бүтэхгүй” Эх нь
Доминикийг хөлслөн татаж өөрт нь үйлчлүүлсэнийг мэдсэнээс хойш Тони эмэгтэйчүүдэд
итгэхээ больжээ. Хүүхнүүдэд мөнгө л хэрэгтэй. Хуурч мэхлэх, уйлж унжих мэтийн элдэв
төвөг. Бүх төрлийн хүүхнүүд дотроос янхан хүүхнүүд л хамгийн шударга шулуун аж.

Люси Уастын урмыг хугалах болж дээ.

Тони өглөө эрт усан санд орж жаахан сэлэхээр шийдээд очтол тэнд Марианна байж байлаа.
Усны цагаан хувцас гол шиг сайхан биеийг нь жавхайтал барьжээ. Хүүхний хоёр гараа хурдан
бөгөөд жигд хөдөлгөн сэлж байхыг Тони ажиглав. Бүсгүй Тонийг хараад дэргэд нь сэлэн ирж,

- Өглөөний мэнд

- Өглөөний мэнд. Та их сайн сэлдэг юм байна гэсэнд Марианна инээмсэглэн,

- Биеийн тамирт дуртай. Аавыг дууриагаад тэр гэж хэлээд уснаас гарч ирэхэд нь Тони алчуур
авч өгөөд үсээ арчихыг нь харж байх зуур,
- Та өглөөний цайгаа уусан уу?

- Уугаагүй. Тогооч ийм эрт босохгүй байлгүй.

- Энд зочид буудалтай адил 24 цагийн үйлчилгээтэй байдаг гэсэнд бүсгүй инээмсэглэн,

- Сайхан юм байна

- Та хаана суудаг вэ?

- Голдуу Мюнхенд. Манайх хотын гаднах хуучин цагийн шилтгээнд суудаг.

- Та хаан сурч байсан бэ?

- Энэ их урт намтар. Дайны үед намайг Швейцарид сургуульд явуулсан. Дараа нь Оксфорд,
дараа нь Сорбонн, тэгээд Лондон, Парис хэд хэдэн жил сууж байсан шүү. Та өөрөө, гээд
нүдийг нь эгцлэн харав.

Хоёул тэнгисийн булангийн мяралзсан ус тийш харсан сэрүүн тагт дээр цай ууцгаав.
Марианнатай юм ярихад таатай ажээ. Бүсгүйн төлөв төвшин намба төрхийг Тони гайхлаа.
Марианна аальгүйтэж маяглахгүй, олон юм чалчаад байхгүй. Тонигийн амьдралыг үнэнээсээ
сонирхож байв. Энэ тогтуухан зантай тайван дөлгөөн бүсгүй өөрт нь үнэхээр таалагдаж
байгааг Тони гэнэт мэдрэв. “Ээжийн үгнээс зөрж, тэгэхээс тэгэх гэсэндээ ингэж санагдаагүй
биз гэж” тэрээр бодов.

- Та хэзээ буцах вэ?

- Ирэх долоо хоногт. Би удахгүй нөхөр гарах гэж байгаа юм л даа.

Тони гэнэт ийм үг дуулаад жаахан эвгүйрхэн,

- Аа... сайхан хэрэг ээ. Хэнтэй вэ?

- Нэгэн эмчтэй. Бид хоёр багын танил юм.

“Үүнийг яах гэж хэлэв. Энэ нь надад ямар хамаатай билээ дээ” гэж Тони бодсноо гэнэт
төрсөн сэтгэлдээ хөтлөгдөн,

- Та Нью Йоркт очоод надтай нэг удаа зоог барихгүй юү? гэсэнд бүсгүй юу гэж хариулахаа
олж ядан хэсэг түдэрснээ,

- За... дуртайяа зөвшөөрье гэхэд нь Тонийн санаа амран инээмсэглэж,

- Чамтай уулзах болзоо тавьж байна шүү...

Тэр хоёр Лос айландад байдаг, далайн хишгээр дагнан мэргэжсэн бага шиг ресторанд
хооллов. Тони Марианнатай эхийн нь тагнуул туршуул олж чадахааргүй газар уулзах гэсэн
байжээ. Хоёул цаана наана бодолгүй энгийн нэг уулзаж байгаа боловч хэрэв эх нь мэдвэл
үймүүлэх гэж хичээнэ гэдгийг ойлгож байлаа. Тони Марианнатай нэгэн оройг хамт
өнгөрүүлэхэд ийм жаргалтай сайхан байх юм гэж гот бодсонгүй. Марианна хошин шогийг
өлгөж авах гойд хурц мэдрэмжтэй юм. Тони Парисаас явсан цагаас хойш анх удаа нүүр
тэнийн инээж баясан байлаа. Тони уг нь сэргэлэн цовоо цагаан сэтгэлтэй хүн билээ.
Марианна түүнийг чухам тэр л зангаар нь байлгаж чадаж байлаа.

“Та Германдаа хэзээ буцах вэ?”

“Ирэх долоо хоногт. Би хүнтэй суух гэж байгаа”

Дараачийн тав хоногт Тониг Марианнатай өдөр бүр уулзаж байлаа. Яагаадыг өөрөө ч
мэдэлгүй Канад явахыгаа хойшлууллаа. Энэ бол эхийнхээ хүсэл зоригийг сөрж, тэгэхээс тэгэх
гэсэн хэрэг гэж бодож байв. Энэ үнэхээр тийм бол бүр анхандаа тийм байсан байж болох юм.
Одоо бол юм бүхэн өөр болжээ. Тонийн сэтгэл Марианнад улам их таалагдаж байлаа. Хэзээ
нэгэн цагт хайр дурлалын сэтгэл эргэж ирнэ гэж найдахаа болиод байтал Марианнад
үнэнээсээ дурлаж эхлэх нь тэр.

Марианна Нью Йоркт анх удаа ирсэн нь энэ нь ажээ. Тэгээд Тони түүнийг олон газраар
дагуулан явж, хоёул эрх чөлөөний хөшөө үзэж, гаталгаа онгоцоор Стэйнти айландад очиж,
эмпайр стэйт билдингийн хамгийн дээд давхарт гарч, чайна таунд хятад хоол идэв. Бас бүх л
музей, зургийн үзэсгэлэнг үзэж өдрийг өнгөрүүлэнэ. Хоёул бие биедээ өөрийн эрхгүй сэтгэл
татагдан байгааг мэдэрсэн ч гэсэн амин хувийн юм ярихаас хичээнгүйлэн зайлсхийж байлаа.
Таван хоног нисэх мэт хурдан өнгөрч Уаст хөдөөх эдлэндээ Кейт Тони хоёрын очих ёстой
баасан гариг болов.

- Чи Герман руу хэзээ явах вэ?

- Даваа гаргийн өглөө гэж Марианна аяархан хариулав.

Тони үдээс хойш Хьюстон орохоор нислээ. Уг нь эхтэйгээ хамт компанийн онгоцоор нисэж
болох байсан боловч эхтэйгээ хоёулхнаа байхаас тээршээсэн байжээ. Кейт бол Тонигийн
хувьд зүгээр л ажил төрлийн хамжаа, сүр хүчин төгс, заль мэх агуу, айж болгоомжилмоор
аюултай хүн байлаа.

Хьюстоны нисэх буудал дээр Тониг Уильямс П. Хобби гэдэг жолооч роллс ройс машинтай
хүлээж байлаа. Машины жолооны ард эрээн цамцтай жолооч суужээ.

- Олонхи зочид эдлэн дээр шууд нисэх онгоцоор очдог. Мистер Уаст тэндээ нисэх онгоц
хөөрөх буух талбай байгуулсан юм. Эндээс машинаар явахад хашааны хаалга хүртэл нэг цаг,
цаашаа гол байшин хүртэл хагас цаг явах хэрэгтэй болно гэж жолооч хэлэв.

Тони анхандаа жолоочийг арай даваадуулж байгаа биз гэж бодтол үнэн хэлсэн байжээ.
Уастын хөдөөх эдлэн нь чухамдаа эдлэн газар гэмээргүй, бага шиг хотхон гэмээр аж. Тэд
хашааны хаалгаар ороод хувийн зам руу эргэж, 30 минутын дараа эхний байшин барилга үнээ
малын хашаа байр үзэгдэж, дараа нь зочид зарц үйлчлэгчдийн байшин залгав. Гол байшин нь
гайхмаар том хэмжээтэй нэг давхар барилга байв. Тэр барилга Тонид үзэмжгүй муухай юм
шиг санагдав.

Кейт хэдийн ирсэн байв. Чарли тэр хоёр бага шиг нуурын дайтай усан сан тийш харсан
сэрүүн дэвсэг дээр сууж, ямар нэгэн юм хөгжүүн ярьж байснаа Чарли Уаст Тониг хармагц
үгээ дутуу орхиж дуугүй боллоо. Тони өөрийн нь тухай ярьж байсныг таамаглав.

- Аа манай жаал ирлээ, Сайн явж ирэв үү?

- Баярлалаа. Сайн явж ирлээ.

- Чамайг түрүүний ирэх болов уу гэж Люси харж байсан гэж Кейт өгүүлэв.

- Тийм үү?

Чарли Уаст Тонигийн мөрөн дээр пад пад алгадаж,

- Бид Кейт та хоёрыг хүндэтгэн том найр наадам хийх гэж байна гэхэд нь

- Т-та и-их найрсаг хүн байна гэж Тони хариулаад “ эд нар намайг хонь шиг номхон
дуулгавартай амьтан байлгана гэж бодож байгаа бол тэр бүтэхгүй” гэж дотроо бодов.

Цагаан цамц, хуучин жинс өмд өмссөн Люси хүрч ирэв. Түүний гоо үзэсгэлэнг хараад
Тонигийн амьсгаа давхцлаа. Люси ойртож ирээд Тонигийн гараас шүүрч,

- Тони, чамайг ирэхгүй нь гэж айлаа шүү гэхэд нь

- Уучлаарай. Жаахан ажил гараад... гэсэнд Люси өөдөөс нь ялдамхан инээмсэглэж,

- Тэр яах, ирсэн чинь болоо. Чи юу хйимээр байна даа?

- Чамд ямар санал байна вэ?

- Чамайг яая гэвэл чиний дураар болно гэж бүсгүй зөөлөн өгүүлээд нүд рүү нь эгцлэн харав.

Кейт Уаст хоёр нэг учир ургалаа гэсэн шиг бие биеэ таатай харав.

Техас нутгийн баримжаагаар бодсон ч хүлээн авалт, гайхамшигтай боллоо. Хоёр зуугаад
зочид өөрсдийн хувийн нисэх онгоц, мерседес, роллс ройс машинаараа ирцгээжээ. Найрал
хөгжим эгшиглэн, баарны зургаан хүн зочдод үйлчлэн шампани дарс, виски, сэрүүн ундаа,
шар айраг сөгнөж байлаа. Дөрвөн тогооч хайруулан дээр үхэр гахай, цуврага, нугасны мах
шарж байв. Далайн хавч, наймаалж, зургаан зүйлийн шанцай, утсан мах тэргүүтнийг ширээн
дээр багтаж ядтал өржээ. Тусгай ширээн дээр гэрийн бялуу, хотол бялуу, жүнз зүйл зүйлийн
зайрмаг зэрэг амтат идээ тавьсан байв.

Тони урьд өмнө ингэж ямар ч ашиггүйгээр баян тансагаа хий гайхуулж байхыг үзээгүй юм.
Шинэ хуучин баячуудын ялгаа энэ дээ.
Хуучны баячууд “ Мөнгө байвал түүнээ нуу” гэдэг байсан шинэ цагийн баячууд “Мөнгө
байвал түүнээ үр” гэдэг болсон байна.

Хүмүүс ингэж эд баялагаараа гайхуулдаг нь хачин. Эмэгтэйчүүд нь нүдээ бүлтэртэл гоёж

хээнцэрлэсэн эрдэнэсийн чимэг зүүлт нь зул сарын сүлд модны чимэглэл мэт гялалзана.
Тони олноос зайдуухан зогсоод зочдын чанга чанга ярилцан өдий төдий зуушийг амархан
далд оруулж байхыг гайхан харна. Тонид ямар нэг утгагүй дэмий ёслолд оролцож байх шиг
санагдав. Хаашаа ч харсан цар дээр хар түрс, шампани дарс тавьж, зочдыг дайлж байгаа зарц
үйлчлэгчид гүйлдэж байгаа харагдана. Энд үйлчлэгч нар нь зочдоос цөөнгүй байх шиг.
Хүмүүсийн харилцаж байгаа үгний хэсэг чих дэлсэж байлаа.

- Тэр чинь Нью Йоркоос ирээд надад нэг дэмий юм худалдах гэж оролдсон. Тэгэхэд нь би “Та
цагаа дэмий үрж байна, эрхэм ээ. Хьюстоноос зүүн тийшээ байгаа ямар ч юмыг би
сонирхохгүй” гэж хэлсэн.

- Чи энэ чалчаа нарыг хараач. Малгай дор байгаа толгойд нь юу ч үгүй хоосон.

Люси Тонигийн ханцуйд гар хүрч,

- Чи юм идэхгүй яагаа вэ? Нэг юм санаанд чинь таарахгүй байна уу? гэж асуугаад өөдөөс нь
ажиглан ширтэв.

- Үгүй, зүгээр. Найр их сайхан болж байна гэсэнд бүсгүй инээмсэглэн

- Чи хамгийн гол юмыг үзээгүй байна. Жаахан хүлээ. Удахгүй галын наадам болно гэв.

- Галын наадам аа?

- Тийм ээ. Уучлаарай, энд их чимээтэй шуугиантай байна. Ийм юм цөөхөн болдог. Манай аав
ээжийг чинь гайхуулах санаатай юм байх... Маргааш эд нар бүгдээрээ яваад өгнө гээд Люси
инээмсэглэв.

“Би ч бас явна” гэж Тони баргар царайлан бодов. Ерөөсөө энд ирдэг дэмий ажил болжээ. Эх
нь Уаст ойл энд Тул компанийг гартаа оруулж авах санаатай байгаа юм бол өөр арга олж
болохсон. Тони эхийгээ эрэнэ ийш тийш харвал бахдан баяссан эрчүүдийн дунд баруунтайхан
зогсож байлаа. Эх нь үнэхээр гайхамшигт эмэгтэй. Нас 60 хүрч байгаа гэхэд хамаагүй залуу
харагдана. Нүүрт нь үрчлээ багатай, өдөр тутам биеийн тамирын дасгал, иллэг хийдэгийн
ачаар бие хаа нь гоолиг хэвээр. Кейт өөрөө их сахилга журамтай, бусдыг ч тийм байхыг
шаарддаг. Тони өөрийн эрхгүй эхийгээ бахдан сайшааж буйгаа мэдрэв. Хөндлөнгөөс харахад
Кейт хүнтэй харилцахын цэнгэлийг эдлэн, цагийг зугаатай сайхан өнгөрүүлж байх шиг
санагдана. Кейт зочидтой энэ тэрийг ярилцан инээлдэж байлаа. “Ээж уг нь энэ бүхнийг үзэж
чаддаггүй хүн дээ. Гэвч амттай хоол олоод хүлхчихийн тулд яахаас ч буцахгүй ажээ” гэж
бодлоо.

Тони Марианныг дурсан санаад тэр бүсгүйд ч ийм хүмүүсийн дунд байх нь эвгүй санагдах
биз гэж бодов. Марианныг бодоод зүрх нь шимшрэн эмзэглэж байлаа.
“Би нэгэн доктортой суух гэж байгаа. Бид хоёр багын танил” гэсэн.

Хагас цагийн дараа Люси Тонийг гэнэт санах үед Тони хэдийнэ Нью Йорк орох замдаа явж
байжээ.

Тони нисэх буудлаас Марианнад утасдаж,

- Чамтай уулзмаар байна гэсэнд,

- За тэгье гэж бүсгүй олон таван үггүй зөвшөөрөв.

Марианна Хоффманы тухай бодол Тонигийн толгойноос гарахгүй байлаа. Тони удаан
хугацааны турш ганцаараа байхдаа ганцаардлын зовлонг мэдэрдэггүй байсансан. Одоо
ганцаардахын зовлон дахин түүнийг ээрэх болов. Марианнатай хамт байхдаа бол үнэнхүү
амьдралын баяр баясгаланг эдэлж, түүнийг хүрээлэн байсан хар сүүдэр замхран арилна.
Одоо хэрвээ Марианныг алдах юм бол амьд явах ямар ч утга учиргүй болно гэдгийг мэдэрч
байлаа.

Марианна ухасхийн залуу эрийг хүзүүдэн тэвэрч, хоёр залуугийн цээжинд амраглан
цэнгэхийн давагдашгүй хүсэл бадарч, тийнхүү цаг хугацааг мэдэрхээ нэгэнт больжээ. Дараа
нь хоёулаа тэврэлдэн хэвтэж, Марианны торгомсог үс Тонигийн хацрыг гижигдэн байв.

- Марианна Би чамтай суумаар байна гэсэнд бүсгүй хоёр хацрыг нь алгаараа барьж, нүд рүү
нь эгцлэн хараад,

- Лав уу, Тони? Үүнд жаахан саад бий гэж аяархан өгүүлэв.

- Чиний сүй юу?

- Үгүй. Үүүнийг аргалж болно. Би танай ээжээс зовоод байна...

- Ээж ямар ч хамаагүй ээ...

- Байз. Би үгээ дуусгая. Ээж чинь чамайг Люси Уасттай суулгах санаатай байгаа...

- Ээжийн юу санахыг алийг тэр гэх вэ. Би бол чамтай хамт байхыг хүснэ гэж Тони хэлээд
Марианнаг чанга тэврэв.

- Ээж чинь намайг үзэн ядах болно доо. Энэ чинь нэг их хүсмээр юм биш.

- Чи миний юу хүсэж байгааг мэдэх үү? гэж Тони шивэгнэв.

Тэр хоёр дахиад хүслийн галд шатан бие биеэ энхрийлэн таалж, цэнгэлийн манлайг
эдэллээ...

Кейт 48 цагийн дараа л чухам юу болсныг мэдэв. Тони ер хэл мэдээ өгөлгүй Уастын хөдөөх
эдлэнг орхиж, Нью Йорк ниссэн байлаа. Чарли Уаст гомдож, Люси бүр өөрийн ухаантай,
ухаангүйн хооронд болжээ. Кейт эвгүйрхэн уучлал гуйгаад тэр оройдоо Нью Йорк орохоор
нисэв. Гэртээ ирээд юу юуны түрүүнд Тонид утастсанд утсаа авахгүй байлаа. Маргааш нь бас
л Тони олдсонгүй.

Кейтийг тасалгаандаа ажил хийж суутал хувийн утас нь дуугарахад хэн утасдаж байгааг
харилцуур авахаас өмнө мэдэв.

- Тони бие чинь зүгээр үү?

- Зүгээр, ээжээ.

- Чи одоо хаана байна вэ?

- Би өчигдөр Марианна Хоффмантай гэрлэсэн. Одоо бал сараа тэмдэглэж байна... гэсэнд
Кейт дуугарсангүй.

- Та сонсож байна уу ээжээ?

- Сонсож байна.

- Ийм үед та эх хүний ёсоор баяр хүргэж аз жаргал ерөөж болохсон доо гэж хэлэх Тонигийн
дууны өнгөнд харамсан гомдсон аяс сонсдов.

- Чамдаа аз жаргал ерөөе хүү минь.

- Баярлалаа, ээж ээ гээд харилцуурт дүнгэнэх сонсдов.

Кейт харилцуурыг тавиад дотуур харилцааны хонх дараад,

- Брэд, ороод ирээч хөө гэлээ.

Брэдийг орж ирэхэд,

- Сая Тони утасдлаа гэсэнд Брэд царайг нь ажиглан,

- Тэнгэр минь. Чамд нэг юм болсон гэж битгий хэлж үзээрэй гэв. Кейт инээмсэглэн,

- Надад биш, Тонид нэг юм болсон. Хоффманы эзэнт улс аяндаа бидний гарт ороод ирлээ
гэсэнд Брэд Рожерс зөөлөн сандалд луг хийтэл сууж,

- Үнэмшихгүй байна. Тонийн хичнээн зөрүүд зантайг би мэднэ. Чи түүнийг яаж үгэндээ
оруулж Марианна Хоффмантай суухыг зөвшөөрүүлэв ээ?

- Тун амархан. Би нөгөө тал руу нь түлхсэн юм хэмээн Кейт санаа алдав.

Кейт зөв ажил хийснээ мэдэж байв. Марианна Тонид их сайн эхнэр болж амьдралын баяр
баясгаланг сэргээж өгнө.
Люси Уаст бүсгүй үргүй. Харин Марианна бол Тонид хүү төрүүлж өгнө.
21-р бүлэг

Тони Марианна хоёр хуримаа хийснээс хойш 6 сарын дараа Хоффманы компани Крюгер
Брентийн бүрэлдэхүүн хэсэг боллоо. Фредерик Хоффман тал засаж, албан ёсны гэрээнд
Мюнхен хотноо гарын үсэг зурж, Хоффман Герман дахь албан ёсны Крюгер Брентийн
салбарын үахирал боллоо. Тони Марианнатай гэрлэснийг ээж нь хичнээн хүлцэнгүй номхон
хүлээж авсныг гайхлаа. Эх нь ялагдаж дийлдэхдээ ч нэр төрөө аваад гарч чаддаг хүн юм.
Гэсэнч Тониг залуу эхнэртэйгээ Бахамын арлуудаар хуримын аялал хийгээд буцаж ирэхэд эх
нь Марианнатай хичнээн элгэмсэг дотно ярилцаж байгааг Тони гайхлаа. Кейт Тонигийн
Марианнатай суусныг сайшааж байна хэмээн хэлэхдээ үнэн сэтгэлээсээ хэлж байх шиг
санагдсан нь хамгийн гайхалтай. Кейтийн санаа сэтгэл ийм хурдан эргэж хувирсан нь
хачирхмаар. Тони уг нь эхийнхээ занг сайн мэддэг гэж бодож байсан нь тийм чбиш байж
хэмээн бодлоо. Гэрлэлт нь бүр анхнаасаа бүтэмжтэй сайхан болжээ.

Тони урьд ганцаардахын зовлонд энэлэн шаналж байсан бол Марианнатай сууснаас хойш
сэтгэлийн зовлон нь арилж, урьдынхаасаа өөр хүн болсоныг бүгдээр мэдэж, Кейт бүр сайн
мэдэж байлаа.

Тони ийш тийшээ ажлаар явахад Марианна ямагт дагалдан явна. Хоёул хамт тоглож, үргэлж
инээд наадам болж баясан цэнгэнэ. Кейт тэднийг хараад “Би зөв ажил хийжээ” гэж баярлан
боддог болов. Тони эхдээ өсөрхөн байдалтай ханддагийг чухамхүү Марианна болуилж чадна.
Марианна бал сарын аялалаас буцаж ирээд,

- Ээжийг чинь гэртээ урьж зоогт байна гэв.

- Үгүй дээ, Марианна. Чи манай ээжийн занг мэдэхгүй байна. Ээж...

- Харин тэгээд ээжтэй чинь сайн танилцья гэсэн юм. Тэгье л дээ, Тони...

Тони яаж зөрж зүтгээд дийлсэнгүй, эцэст нь эхнэртэй найр тавин бууж өглөө. Тэгээд нэгэн
оройг уйтгартай өнгөрүүлэх болж дээ гэж бодож байтал гайхалтай нь бхү юм санаснаас огт
өөр болжээ. Кейт хүүгийндээ ирээд үнэхээр магнай тэнийн баярласан байдалтай байв.
Дараагийн долоо хоногт Кейт өөрөө Тони Марианна хоёрыг гэртээ, оройн хоолонд урив.
Түүнээс хойш ийнхүү нэг нэгэндээ очиж хоол иддэг уламжлалтай болжээ.

Кейт Марианна хоёр их л ойртон дотносож, үргэлж утсаар ярьж, долоо хоногт наад зах нь нэг
удаа хамт хоол иддэг болжээ.

Нэгэн удаа тэр хоёр Лютес зоогийн танхимд уулзахаар болзож тохироод Марианнын орж
ирэхэд нэг юм болохоо байсныг Кейт хараад л мэдрэв.

- Хоёр хувь виски өгнө үү, мөстэй гэж Марианна хоол зөөгчид хэлэв.

Марианна уг нь дарс л уудаг сан.

- Юу болоо вэ, Марианна?

- Би Харви эмчид үзүүллээ гэхэд нь Кейтийн сэтгэл түгшин,

- Чи өвдөө юү?

- Үгүй зүгээр. Харин... гээд Марианна түгдэрснээ ярьж эхлэв.

Энэ явдал хэд хоногийн өмнөөс эхлэсэн аж. Маринны бие чилээрхээд байхлаар нь эмч Харви
үзүүлж зөвлөгөө авахаар ярьж тохиросн байна. Доктор Харви инээмсэглэн,

- Та өнгөтэй харагдаж байна, Марианна. Миссис Блэкуэлл та хэдэн настай вэ?

- 23 тай

- Танайханд удамшилын өвчин байсан уу?

- Үгүй ээ.

Эмч үүнийг тэмдэглэж аваад,

- Өмөнгөөр өвдсөн хүн хүн бий юү?

- Байхгүй.

- Эх эцэг тань энх тунх уу?

- Аав амьд. Ээж минь олон жилийн өмнө ослоор нас барсан.

- Гахайн хавдар хүрсэн үү?

- Үгүй.

- Улаан эсэргэнэ?

- 10 настай байхдаа...

- Мэс засал хийлгэж байсан уу?

- 9 настайдаа, тагнайн буйлс авхуулсан юм байна шүү.

- Тэгэхлээр энэ тохилдлоос өөр эмнэлэгт хэвтэж байгаагүй юм шив дээ?

- Тийм. Үгүй байз, нэг удаа цөөн хоног хэвтээд гарсан юм байна шүү.

- Яасан юм бэ?

- Зүлгэн дээрхи хоккей тоглож байтал гэнэт нүд харанхуйлаад явчихсан. Эмнэлэгт ухаан
орсон. Хоёр хоног хэвтээд гарсан. Гойдын өвчин байхгүй гэсэн.
- Тоглож байхдаа бэртсэн юм биш биз?

- Үгүй. Зүгээр л ухаан алдсан.

- Тэгэхэд та хэдэн настай байсан бэ?

- 16 настай. Үүнийг шилжилтийн настай холбоотой болов уу гэж эмч тэр үед хэлсэн.

Жон Харви хөмсөг зангидан,

- Ухаан орох үед тамир тэнхээ чинь суларсан юм мэдэгдсэн үү? гэхэд нь Марианна хэсэг
бодолхлээд,

- Тийм шиг санагдаж байна. Хэд хоногийн дараа зүв зүгээр болсон. Түүнээс хойш дахиад
тийм юм тохиолдож байгаагүй.

- Толгой чинь өвддөг үү? Нүд чинь эрээлжлэх удаа байдаг уу?

- Эмнэлэгээс гарахад тэгдэг байснаа сүүлдээ зүгээр болсон... Надад ноцтой өвчин байгаа юм
болов уу? гэж Марианна сэтгэл түгшин асуув.

- Хэлэхэд хэцүү байна. Зарим нэгэн шинжилгээ хийсний дараа баттай мэдэж болно.

- Юун шинжилгээ вэ?

- Тархины судасны зураг авах хэрэгтэй байна. Энэ амархан. Одоо ч хийчихсэн болно.

Гурван хоногийн дараа Марианнад эмнэлэгийн сувилагч утасдаж, доктор Харви дээр ирж
зөвлөгөө авна уу гэв.

Марианнаг ирэхэд Харви өрөөндөө хүлээж байлаа.

- Бид таны оньсогыг тайлсан шүү.

- Муу мэдээ дуулгах гэж байна уу?

- Арай үгүй. Миссис Блэкуэлл таны аневризм өвчин нэг удаа хурцдаад өнгөрсөн юм байна.
Энэ бол ялангуяа шилжилтийн насны эмэгтэйчүүдэд олонтоо тохиолддог үзэгдэл. Таны
тархинд нэг жижиг судас тасарч, жаахан цус гарсан байна. Үүнээс болоод таны толгой өвдөж,
нүд эрээлжилж байжээ. Золоор ийм өвчин аяндаа эдгэдэг юм.

Марианны сэтгэл түгшин сандарч,

- Энэ юу гэсэн үг вэ? Өвчин дахиж болох уу? гэсэнд доктор Харви инээмсэглэн,

- Гайгүй байх. Хэрвээ та дахиад хоккейн шигшээ багт оролцож тоглох гээгүй бол айх юмгүй.

- Тони бид хоёр морь унаж, теннис тоглодог. Энэ болох уу?
- Болно. Хэр хэмжээг нь тааруулах хэрэгтэй. Теннис тоглохын оронд секс хий. Ямар нэг
зөрчил байхгүй гэхэд нь Марианны дотор онгойж санаа алдаад,

- Ашгүй дээ. Тэнгэрийн аврал.

Марианна талархан явхаар завдан босоход, Харви

- Бас нэг юм байна, Миссис Блэкуэлл. Тони та хоёр хүүхэдтэй болохыг хүсвэл хүүхэд өргөж
авахыг зөвлөх байна гэхэд нь Марианны бие хөших шиг болж,

- Та өөрөө сая юм бүхэн болно гэж хэлсэн шүү дээ.

- Тэр тийм. Харамсалтай нь жирэмсэн үед цус дамжуулах системийн ачаалал их нэмэгддэг.
Амаржихаас 6-8 долоо хоногийн өмнө цуны даралт ихэсдэг. Танд аневризм тохиолдож
байсныг харгалзах юм бол осол тохиолдох магадлал тун их байна. Энэ осол хэрэв тохиолдвол
ослоор үл барам аминд хүрэх аюултай байж болно. Өнөө үед хүүхэд үрчилж авах тун
амархан. Танд зөвлөхөд...

Марианна эмчийн үгийг сонсохоо больжээ. Тонийн хэлж байсан: “Хурдхан хүүхэдтэй болох
юмсан. Анхны хүүхэд маань чамтай адил хөөрхөн охин хүүхэд байгаасай” гэсэн үг чихэнд нь
хангиналаа.

- Би эмчийн үгийг цааш нь сонсож чадаагүй. Өрөөнөөс гүйж гараад шууд наашаа ирлээ гэж
Марианна өгүүлэв.

Кейт асар их зориг тэвчээр, сэтгэлийн хүч гаргаж байж сэтгэлийнхээ хөдлөлийг дарж чадлаа.
Арга олох хэрэгтэй. Хэзээд нэг арга байдаг даа...

Тэгээд л албан хүчээр инээмсэглэх аядан,

- За яах вэ. Би үүнээс дор юм болоо юу гэж айлаа шүү...

- Тони бид хоёр хүүхэдтэй болохыг даанч их хүсдэг юм.

- Марианна, доктор Харви бачуухан дотортой хүн байгаа юм. Чи олон жилийн өмнө ганцхан
удаа ухаан алдсан юм байж. Доктор Харви үүнийг дэвэргээд сүйдтэй юм болгож байх шиг...
Чиний бие сайн байдаг биз дээ, тийм үү? гээд Марианны гараас барив.

- Уг нь их сайн юм сан. Сая...

- Тайвшир даа. Чамайг дандаа муурч унаад байдаг юм уу гэж бодмоор байна шүү.

- Үгүй хаанаас даа.

- Бие чинь зүгээр болоод тэр. Ийм юм аяндаа зүгээр болдог гэж Харви хэлсэн байна шүү дээ.
- Гэхдээ бас осолтой гэж хэлсэн...

Кейт нэгэнтээ гүнзгий санаа алдаад,

- Ээ Марианна, Жирэмсэлнэ гэдэг чинь ерөөсөө эмэгтэй хүн болгонд осолтой. Амьдрал
гэдэг аюул ослоор дүүрэн байдаг. Хамгийн гол нь хэдийд осолтой юм хийж болох, хэдийд
хийж болохгүйг л мэдэх хэрэгтэй. Тийм үү? гэхэд нь

- Тийм гэж Марианна зөвшөөрөөд хэсэг бодсоны дараа сэтгэл шулуудаж,

- Таны зөв. Тонид юу ч хэлэхээ больё. Сэтгэлийг нь зовоогоод яах вэ гэхэд нь

- Тийм ээ, бид хоёрын нууц болж үлдэг гэж Кейт хариулаад “ Бэрийг минь айлгасны төлөө
Харвиг өөрийн гараар багалзуурдаж алмаар байна” гэж боджээ.

Гурван сарын дараа Марианнаг жирэмслэхэд Тони ихэд баярлаж, Кейт хөөрөн бахдаж, харин
доктор Харви хэрдхийн цочжээ.

- Ирэх долоо хоногт үр хөндүүлэх талаар хүнтэй ярья хэмээн тэрээр Марианнад хэлсэнд,

- Хэрэггүй дээ, эмчээ. Миний бие сайн байгаа. Би хүүхэддээ гаргана гэлээ.

Марианна доктор Харвид үзүүлснээ Кейтэд ярьсанд Кейт даруй эмч дээр очиж,

- Миний бэрийг үр хөндүүл гэдэг чинь юу гэсэн үг вэ?

- Хүүхдээ авахуулахгүй бол тэр өөрөө үхэж болно гэдгийг түүнд учирлаж хэлсэн юм.

- Заавал үхнэ гэж хэн батлаж байгаа юм бэ? Бэрийн бие их сайн байгаа. Түүнийг ингэж
айлгах хэрэггүй.

...Марианна жирэмслээд 8 сар болжээ, төрөх ойртож байлаа. Нэгэн удаа өвлийн сүүл сарын
эхээр цагаас өмнө өвдөж эхлэжээ. Түүнийг ёолоход Тони сэрж, хувцасаа яаран өмсөөд,

- Санаа бүү зов, хонгор минь. Би чамайг одоохон эмнэлэгт аваад очьё гэлээ.

Тэсэхийн аргагүй их өвдөж байлаа.

- Түргэлээрэй.

Марианна эмчид үзүүлснээ Тонид ярих юм уу гэснээ болив. “Үгүй дээ, хадам ээжийн зөв.
Марианна өөрөө шийдэх ёстой. Амьд явна гэдэг сайхан юм аа. Тэгэхлээр Эзэн тэнгэр гай
түйтгэрийг зайлуулж намайг аврах биз”

Тониг эхнэрээ эмнэлэгт авч очиход тэнд юм бүхэн бэлэн болсон байлаа. Марианныг
үзлэгийн өрөөнд авч очиход Тони хүлээн авах өрөөнд үлдэв. Төрөлтийн эмч Мэттсон
Марианны даралтыг хэмжиж үзээд хөмсөг зангидан, дахин хэмжиж үзээд толгойгоо өргөн
сувилагчид хандан,

- Мэс заслын өрөөнд бушуухан аваач гэжээ...

Тони эмнэлэгийн хонгилд янжуур худалддаг автоматын дэргэд зогсож байтал ард талд нь нэг
хүн,

- Аа аугаа их зураач өөрийн биеээр зогсож байна гэх дуулдав.

Тони эргэж харвал, Доминикийн нэрийн гадаа хамт явж байхад нь дайралдсан эр байв. Нэр
нь хэн билээ байз. Аа тийм, Бэн гэсэн. Тэр хүн Тонигийн өөдөөс эелдэг найртай харав.
Доминик энэ хүнд Тонигийн тухай юу ярьсан байж болох вэ? Энэ үед Доминик өөрөө хүрч
ирээд Бэнд хандан,

- Мишелийг яаралтай мэс заслын өрөөнд оруулсан гэнээ. Сувилагч нь хэллээ. Хоёулаа дараа...
гэснээ Тониг хараад зогтусаж,

- Тони, чи энд юу хийж яваа юм бэ?

- Эхнэр маань амаржих гэж байгаа...

- Үүнийг бас ээж чинь зохион байгуулсан уу? хэмээн Бэн хажуунаас нь асуув.

- Та юу хэлэх гээд байна?

- Ээжийг чинь чиний өмнөөс юм бүхнийг хйиж өгдөг гэж Доминик ярьсан.

- Болиоч, Бэн.

- Яана гэж? Үнэн юм чинь. Чи өөрөө надад бүгдийг ярьсан шүү дээ гэхэд нь,

Тони Доминик тийш эргэж,

- Энэ хүн юу яриад байна вэ?

- Юу ч яриагүй... Бэн хоёулаа явья гэж Доминик яаруулав.

Бэнийг хорьж зогсооход хэцүү байжээ.

- Би танай ээж шиг ээжтэй болоосой. Чамайг загвар болдог хөөрхөн хүүхэнтэй нөгцөхийг
хүсэхэд ээж чинь дор нь худалдаж аваад өгдөг. Чамд Парист үзэсгэлэнгээ гаргах хэрэг болоход
мөн л ээж чинь бүгдийг зохион байгуулаад өгдөг. Чи...

- Чи солиотой хүн байна.

- Хэн бэ, би юу? гэж Бэн асууснаа Доминик тийш эргэж,

- Энэ мэдэхгүй юм уу? гэж асуув.

- Би юу мэдэхгүй юм бэ? гэж Тони шаардангуй асуулаа.

- Тони чи наадхынхаа үгийг бүү сонс.

- Манай ээжийг Парист миний зургийн үзэсгэлэнг гаргаж өгсөн гэж энэ хүн хэллээ. Энэ
худлаа биз дээ? хэмээн Тони асуугаад Доминикийн царайг харснаа,

- Үнэн юм уу? гэхэд нь,

- Чи юу хэлэх гээд байна?

- Миний зургийн үзэсгэлэн гаргуулах гэж манай ээж Георгт мөнгө төлөө юу?

- Үгүй. Чиний зураг үнэндээ түүний санаанд таарсан юм шүү дээ.

- Чи наадхидаа нөгөө шүүмжлэгчийн тухай хэлээч гэж Бэн хажуунаас нь оролцов.

- Болиоч дээ, Бэн гээд Доминик үүд рүү явахад нь Тони гараас нь шүүрч аваад,

- Байз, Шүүмжлэгчийн тухай юу хэлэв ээ? Манай ээж түүнийг миний үзэсгэлэнд очуулахаас
өөр юм яриа байсан юм уу?

- Тийм гэж Доминик сонсох төдий шивэгнэв.

- Тэгээд тэр нь юу вэ? Шүүмжлэгч миний зургийг элдэв муухайгаар шүүмжилсэн шүү дээ.

- Үгүй, Тони. Тийм биш. Андре д Уазо чамайг аугаа их уран зураач болж магадгүй гэж ээжид
чинь хэлсэн.

Тони буруу дуулах шиг санагдан,

- Намайг газар дор ортол муул гэж манай ээж д Уазод мөнгө төлөө юү?

- Чамайг газар дор ортол муулах гэж хүссэн хүн байхгүй. Ээж чинь чиний тусын тулд ийм
ажил хийж байна гэж итгэлтэй байсан.

Эхийн нь хийсэн энэ ажил ухаанд багтамгүй аймшигтай юм. Тонид эхийн нь хэлсэн бүхэн
худал байжээ. Эх нь Тонид өөрийн эрх дураар амьдрах бололцоо хэзээч олгоогүй юм байна.
Бас тэр Андре д Уазо, яаж тийм хүнийг хахуульдан татан болдог байна вэ? Кейт хүн бүхний
үнэ цэнг мэднэ л дээ. Уайльд “ Тэд нар юм бүхний үнэ цэнг мэддэг бөгөөд ер юуг ч тоож
үнэлдэггүй юм” гэж хэлэхдээ Кейт шиг хүмүүсийг хэлсэн байж таарна. Юм бүхнийг зөвхөн
компанийнхаа тусын тулд хийдэг байна.

Компани нь Кейт Блэкуэллийн амин сүнс байж... Тони эргэж гудмаар сохор юм шиг
дайвалзан алхаллаа.
...Мэс заслын өрөөнд Мэттсон Марианны амийг аврах гэж байдаг чадлаараа хичээж байв.
Даралт нь эрс буурч, зүрхний нь цохилт тасалдаж байлаа. Марианнад хүчинтөрөгч
амьсгаалуулж, цус юүлсэн боловч тус болсонгүй. Марианны тархинд цус харваж, ухаан алдав.
Яг энэ үед эхний хүүхэд төрж, удалгүй ихрийн хоёрдахь нь төрсний дараа гурав дөрвөн минут
болоод эх нь нас барлаа...

- Мистер Блэкуэлл хэмээн дуудахыг Тони сонсоод эргэж харвал доктор Мэттсон хажууд нь
зогсож байлаа.

- Та хөөрхөн ихэр охидтой боллоо. Ихэр юм... гэхэд нь Тони эмчийн нүдийг нь эгцлэн харж,

- Марианна... яаж байна? гэсэнд эмч уртаар санаа алдан,

- Би их харамсаж байна. Бид чадах бүхнээ хийсэн... Эхнэр тань... гэхэд нь Тонигийн дотор
харанхуйлан, эмчийг заамдаж аван сэгсчин,

- Юу гэнээ, чи худал хэлж байна... Марианна үхэх ёсгүй... хэмээн хашгирлаа.

- Мистер Блэкуэлл. Бид...

- Тэр хаана байна? Би өөрөө очиж үзнэ... Марианна хаана байна...

- Одоохондоо та тийшээ очиж болохгүй. Тэр их цус алдсан... Бэлтгэж байгаа...

- Өөдгүй амьтан чи эхнэрийг минь алчихлаа. Чи түүнийг минь алчихсан байна... гээд Тони
эмч рүү ухасхийв.

Дадлага хийж байгаа анагаахын хоёр оюутан Тонигийн гараас шүүрэн авч,

- Та тайвширагтун, эрхэм ээ... мистер Блэкуэлл гэхэд нь Тонийн ухаан солиорох шиг
санагдаж,

- Намайг миний эхнэр дээр оруулаач гэлээ.

Энэ чимээгээр гарч ирсэн эмч Харви нөгөө хоёрт хандан

- Наад хүнээ тавь. Бид хоёрыг хоёуланг маань үлдээгээч гэсэнд эмч Мэттсон, дадлагын хоёр
оюутан эмчтэй хамт яваад өглөө. Тони асгаруулан уйлж,

- Жон, тэд миний Марианнаг алчихлаа... Эд нар түүнийг минь алчихлаа...

- Эхнэр чинь... Үнэнийг хэлэхэд зүрх шимширч байна. Эхнэрийг чинь эд алаагүй. Би
Марианнаг хэрэв хүүхэд гаргах юм бол эмгэнэлтэй юм болж дуусах магадгүй шүү хэмээн аль
хэдийн сануулсан юм сан.

Тони нилээд удаж байж сая л энэ үгийн утгийг ухав.

- Юу гэнээ? Та юу ярьж байнаа?

- Марианна чамд юу ч хэлээгүй юм уу? Кейт бас хэлээгүй юу? гэхэд нь Тони учрыг нь ойлгож
ядан өөдөөс нь гөлийж,

- Марианна... ээж надад юу хэлэх ёстой байсан гэж?

- Ээж чинь намайг бачуухан дотортой амьтан гэж загнаад Марианнаг битгий үр хөндүүл гэж
зөвлөсөн юм. Би их харамсаж байна... Охидыг чинь үзлээ. Хөөрхөн амьтад байна. Чи очиж
үзэхгүй юм уу?...

Үүнийг сонсоогүй мэт Тони яваад өглөө...

Кейтийн гэрийн бойдаа түүнд хаалга тайлж өгөөд,

- Мистер Блэкуэлл, таны амрыг эрье.

- Өглөөний мэнд, Лестер гэсэнд бойдаа Тонигийн царайг хараад, сэтгэл түгшин

- Таны бие зүгээр үү, эрхэм ээ?

- Зүв зүгээр. Надад кофе авчирч өгөөч, Лестер?

- Бололгүй яах вэ, эрхэм ээ.

Бойдааг гал тогооны өрөө рүү явахад Тони хойноос нь хараад “За Тони, Зоригтойхон
хөдлөөрэй” гэж өөртөө тушаав.

Тони эргэн зэвсгийн цуглуулгын өрөө рүү явлаа. Гар бууны цуглуулга хадгалдаг тавиурын
дэргэд очиж, гялалзан буй үхлийн зэр зэвсэгийг харав. “Тони чи энэ тавиурыг онгойлго”

Тони тавиурыг онгойлгон дотроос нь гар буу авч хүрдийг нь шалгаж үзвэл бүх сум байрандаа
байв. “Эх чинь дээр байгаа, Тони” Тони шатаар дээшээ өгсөв. Эх нь ийм нүгэлтэй муухай юм
хийгээд байдаг нь түүний буруу биш, ердөө л түүнд муу юм шүглэжээ. Тэгээд эхийнхээ биед
шүлгэсэн ад зэтгэрийг үлдэн зайлуулахаар шийдэв. Энэ компани эхийн нь сүнс сүлдийг
хулгайлан аваад, Кейт юу хийж байгаагаа өөрөө мэдэхгүй болсон байна. Эх нь компанитай
нэгэн цогцос болон нийлж ургажээ. Тони эхийгээ алснаар энэ нүгэлт компанийг бас
сөнөөнө.

Тони Кейтийн өрөөний үүдэнд очиж зогсов. “Онгойлгоод ор, Тони”

Тони үүд онгойлгон орлоо. Кейт толины өмнө зогсож, байснаа үүд онгойх чимээгээр эргэн
харж,

- Тони юу болоо вэ?...

Тэрээр сайн шагайж байгаад бууныхаа гохыг дарж эхлэв...

22-р бүлэг

Ууган хүүгийн эрх, гал голомтоо сахиж өрхийн тэргүүлэгч болох буюу эд хөрөнгийг өвлөн
залгамжлах эрх аль эрт балрын цагаас эх үндэстэй билээ.Ван эзний гэр бүлд хүүхэд төрөх
үед хэрэв ихэр хүүхэд төрвөл хожим хойчийн өдөр маргаан зөрчил гарахаас сэрэмжлэхийн
тулд хоёр хүүхдийн аль нь түрүүлж төрснийг бүртгэн тодорхойлох гэж дээгүүр албан
тушаалын хүн заавал байлцдаг байв. Доктор Мэттсон ч хоёр охины аль нь түрүүлж төрснийг
нарийн нягт бүртгэж авсан байна.

Блэкуэллийн ихэр охид бол урьд өмнө төрж байгаагүй ер бишийн хөөрхөн охид гэдэг дээр
хэн бүхний санал нийлж байв. Хоёр охин эрүүл чийрэг, хөдөлгөөн ихтэй. Эмнэлгийн бүх
сувилагч нар элдэв шалтаг гарган хоёр ихэрийг очиж үздэг байлаа. Бас Блэкуэллийн гэр
бүлийнхнийг халхалсан нууц ийнхүү сонирхоход нь тус болсныг хэлэх хэрэгтэй. Эх нь
амаржих үедээ нас барж, эцэг нь үүний дараа алга болжээ. Ихэр хоёрын эцэг нь өөрийн
эхийг алсан гэдэг цуурхал байдаг боловч энэ тухай нарийн тодорхой мэдсэн хүн байхгүй.
Сонинд бас ямар нэг мэдээ гараагүй. Харин эхнэр нь нас барсны улмаас Тони Блэкуэллийн
сэтгэл хямарч, одоо эмчлүүлж байгаа гэсэн товчхон мэдээ гарсан. Сурвалжлагч нар эмч
Харвигаас учир байдлыг тодорхой мэдэх гэж асуухад: “Тайлбар өгөхгүй” гэж хариулдаг байв.

Сүүлийн хэд хоног доктор Жон Харви ёстой нэг хүнд сорилтын үе байлаа. Гэрийн бойдааг
ухаантай ухаангүйн хооронд хийрхэн утасдсаны дараа Кейтийн гэрт очоод өөрийн нүдээр
үзснээ хэзээ ч мартахгүй тогтоож авчээ. Кейт хүзүү, цээжиндээ сумны шархтай, шалан дээр
ухаангүй хэвтэнэ. Цагаан хивсэн дээр цус тогтон улаан болжээ. Тони шүүгээнээс эхийнхээ
хувцсыг гарган тасар тасар хайчилж байлаа. Эмч Харви ийм аймшигт дүр зургийг нэгэнтээ
тойруулан хараад даруй “түргэн тусламж” дуудав. Дараа нь Кейтийн дэргэд очиж сөхрөн
судсыг нь барьж үзвэл мэдэгдэхтэй үгүйтэй жигд биш цохилж байлаа. Царай нь цав цагаан
болжээ. Эмч Харви Кейтэд түргэн зуур адерналин хоёр нүүрс хүчлийн натри тарив.

- Энд яг юу болсон юм бэ? гэж Харвиг асуухад гэрийн бойдаагийн хөлс чим чим дусаж,

- Мэ...мэдэхгүй байна, эмч ээ. Мистер Блэкуэлл намайг кофе авчирч өгнө үү гэсэн. Намайг
гал тогооны өрөөнд байж байхад буун дуу сонсогдсон юм. Дээшээ гүйж очиход миссис
Блэкуэлл шаланд дээр хэвтэж байлаа. Мистер Блэкуэлл дэргэд нь зогсоод: “Энэ одоо ээж
таньд дахин хор болохгүй. Танд шүглэсэн муу юмыг би алчихсан” гэж үглэж байсан. Дараа нь
эхийнхээ хувцас хунарыг шүүгээнээс гарган хайчилж эхлэсэн гэв.

Эмч Харви Тони тийш эргэж,

- Тони чи чинь юу хийж байгаа нь энэ вэ? гэсэнд Тони хайчаа савчин,

- Ээждээ ач тус болж, компанийг сүйтгэж байна. Марианнаг ээж алчихсан шүү дээ, та мэднэ
гэж Кейтийн хувцасыг хайчилсаар байлаа.

Кейтийг “Крюгер Брентийн харьяа хувийн эмнэлэгийн яаралтай мэс заслын тасагт аваачлаа.
Сумнуудыг гаргаж авах мэс засал хийх үед гурван удаа цус юүлжээ.
Гурван лухгар эр хамжин байж, Тониг бүхээгт машинд суулгав. Гагцхүү эмч Харви тариа
хийсний дараа Тони жаахан тайвширлаа. Эмч нартай хамт цагдаагийнхан хүрч ирэв. Харви
цагдаа нарт хэл өгөх гэж Брэд Рожерсийг явууласан ажээ. Брэд ямар нэг аргаар энэ болсон
явдлын тухай мэдээлэлийг хэвлэл мэдээлэлд нэвтрүүлэхгүй байхаар тохиросн байлаа. Харви
эмнэлэгт очиход Кейт хамгийн түрүүнд,

- Хүү минь яасан бэ? гэж асуув.

- Хүүг чинь асарч сувилж байгаа, Кейт ээ. Бие нь зүгээр. Тониг Коннектикут дахь хувийн
сувиллын газар явуулсан.

- Жон оо, Тони намайг яагаад алах гэв. Яагаад? гэж асуух Кейтийн дууны өнгө тэсвэрлэшгүй
их гашуун гунигтай байлаа.

- Марианнаг үхсэнийг чиний буруугаас болсон гэж бодож байх шиг байна лээ.

- Яасан балай юм бэ?

Жон Харви дуугүй өнгөрөв. Харви өөрөө ч гэсэн Марианны үхсэнийг Кейтийн буруу гэж үзэж
байсан юм. Харвиг явсны дараа Кейт үүнийг үнэмшиж ядан хэвтэж байлаа. Марианна Тонийг
нь аз жаргалтай болгож өгсөн болохоор Кейт Марианнад хайртай байсан. “Би юу ч хийсэн
гэсэн, дандаа хүү чинийхээ төлөө, чинийхээ сайн сайхны төлөө л хийсэн юм шүү дээ. Миний
хамаг хүсэл мөрөөдөл чамтай л холбоотой байсан. Чи үүнийг даанч мэдсэнгүй гэж үү дээ”

Гэтэл хүү нь Кейтийг үзэн ядаж, одоо алах гэлээ. Үүнд л голгүй гомдон үхмээр санагдаж
байлаа. Гэсэн ч Кейт үхэж болохгүй. Хийсэн бүх юм нь зөв байсан. Буруу бол эдний л буруу.
Эд нар бүгдээрээ сэтгэл зориг султай улс. Эцэг маань дэндүү сул дорой хүн байсан болохоор
хүүгийнхээ үхлийг тэсэж гарч чадаагүй. Эх маань бүр ч дорой хүн байсан болохоор эр
нөхрөөсөө хойш ганцаар амьд явж тэсээгүй.

Кейт бол сул дорой хүн огт биш.

“Би дийлнэ. Надад бэрхийг давах бие, сэтгэлийн тэнхээ бий. Би амьд явна. Би тэсэж чадна.
Компани маань тэсэж тогтоно...”
Тавдугаар дэвтэр

Ева Александра хоёр

1950-1975
23-р бүлэг

Кейт Дарк Харборт сууж байлаа. Далайн хөвөө нутгийн ивгээлт наран, цэвэр цэнгэг агаа
түүний биеийн илааршихад тус болж байв.

Тониг ухаан солиотой хүмүүсийн хувийн эмнэлэгт хэвтүүлжээ. Тэнд өвчтөнийг хамгийн дээд
хэмжээнд маш сайн үйлчилнэ. Кейт хүүгээ Парис, Вена, Лондоны сэтгэл мэдрэлийн шилдэг
мэргэжилтэн нарыг урьж шинжлүүлсэн боловч тэд нар сорьж туршсаны дараа бүгд хүн алах
интэй сэтгэл мэдрэлийн гажиг гэсэн нэг л онош тавьж байв.

- Эм, сэтгэл мэдрэлийн эмчилгээ ямар ч үр дүн өгөхгүй. Их догшин өвчтөн. Зохих арга
хэмжээ авах хэрэгтэй.

- Ямар арга хэмжээ вэ? гэж Кейт лавлав.

- Танай хүүг эсгийгээр доторлосон тасагт байлгана. Ихэнх цагт номхотгох цамц өмсгөөтэй
байлгадаг.

- Зайлшгүй хэрэгтэй юм уу?

- Тэгэхгүй бол ойртсон хавьтсан хүнээ алчих гээд байдаг юм...

Кейт нүдээ анив. Энэ яриад байгаа хүн бол сайхан сэтгэлт, эелдэг зөөлөн Тони биш л дээ.
Энэ бол биед нь ад албин шүглэсэн тэс ондоо хүн байлаа. Кейт нүдээ нээгээд,

- Ямарч арга байхгүй юу?

- Ухамсарт нь хүрч чадахгүй л бол ямар ч арга байхгүй. Бид одоохондоо эмээр л аргацааж
байгаа. Эмний нөлөө арилахаар дахиад л догширдог.

Кейт хэсэг бодолхийлээд,

- Эмч ээ, танд ямар санал байна даа?

- Ийм үед тархины багахан хэсгийг зайлуулах нь гайхалтай үр дүн өгдөг.

- Мэс засал уу? гэж Кейт асуугаад шүлсээ залгив.

- Тийм. Амьдралын үйл ажиллагаанд нь ямар ч хор хөнөөл байхгүй. Сэтгэлийн хөдлөлийн
гажиг нь арилна.

Кейтийн хамаг бие хөшиж орхив. Меннинжер эмнэлэгийн залуу эмч Моорис эхлэн ам нээж,

- Энэ нь миссис Блэкуэлл танд хичнээн хүнд байгааг мэдэж байна. Хэрэв та... гэхэд нь,

- Хүүг тайвшируулах өөр арга байхгүй бол мэс засал хий дээ гэж Кейт өгүүлэв.
Фредерик Хоффман Германаас ирж, хоёр зээг европ руу авч явах гэлээ.

- Надтай хамт Германд байж байг.

Марианны нас барснаас хойш тэрээр хорин насаар хөгширсөн шиг Кейтэд санагдав. Кейт
түүнийг өрөвдөх боловч хүүхдүүдээ өгөхийг хүссэнгүй.

- Бяцхан охидод зөөлөн гартай, эмэгтэй хүний халамж хэрэгтэй шүү дээ, Фредерик.
Марианна өөрөө ч гэсэн хүүхдүүдээ энд өсгөж хүмүүжүүлэх бодолтой байсан. Чи үргэлж
нааш ирж, эдэнтэйгээ уулзаж байхад хаалга маань нээлттэй.

Эцэсийн бүлэгт Кейт Фредерикийг ятган үгэндээ оруулж дөнгөлөө. Кейтийн байшинд
хүүхдийн өрөө гаргаж, ихэр охид тэнд байх болов. Кейт олон хүмүүжүүлэгчтэй уулзаж
ярилцсаны дараа Соланж Дюна гэдэг залуу франц бүсгүйг охидын хүмүүжүүлэгчээр шилж
авав.

Кейт эхлэж төрсөн охинд Ева гэдэг нэр өгч, ихэр дүүд нь Александра гэдэг нэр өглөө. Хоёр
охин ялгаж танихын аргагүй ав адилхан төржээ. Өөрийн хүү Тони Марианна хоёрын
бүтээсэн энэ хос гайхамшигийг хараад Кейт баярлаж бардаггүй байлаа. Хоёр хүүхэд хоёул
хөдөлгөөн ихтэй, ухаалаг. Гэхдээ хэдхэн долоо хоногийн дараа Ева нь Александраас эгчмэд
мэт санагдах болов. Ева түрүүлж хэлд оров, бас хөлд оров. Александра хөгжлөөрөө түүнийг
түргэн гүйцсэн боловч Ева удирдагч гэдэг нь бүр анхнаасаа тодорхой байлаа. Александра
ихэр эгчдээ ухаангүй хайртай, юм бүхэн дээр түүнтэй адилхан байхыг хичээнэ. Кейт зав
чөлөөт цагаа охидтой хамт өнгөрүүлнэ. Хүүхдүүдийн дэргэд өөрөө ч нас залуужих мэт
санагддаг байлаа. Кейт дахиад л “Миний нас хөгширч, ажил төрлөөс холдохын цагт...” хэмээн
мөрөөдөж эхлэжээ.

Кейт хоёр ач охиныхоо нэг ойдоо хүрсний баярыг тэмдэглэв. Ихэр хоёрт баярын бялуу хийж,
компанийн ажилтан, зарц үйлчлэгч нар нь бэлэг барилаа. Дараахан нь залгаад охидын
хоёрдахь төрсөн өдөрийн баяр болов. Цаг хугацаа нисэх мэт өнгөрч, охид хурдан өсөн торниж
байлаа. Кейт одоо хоёр охиныг ялгааг сайн мэдэх болжээ. Ева хүчтэй бөгөөд зоримог,
Александра зөөлөн зантай, юм бүхэн дээр эгчийнхээ үгийг дагана. “Эцэг эхгүй хоёр хүүхэд,
бие биедээ ийм хайртай байдаг нь сайхан хэрэг” хэмээн Кейт бодно.

Охидын таван насны ойн өмнөх шөнө Ева Александраг алах гэж оролджээ...

Ахуйн сударт өгүүлэх нь:

“Чиний хэвлийд хоёр үр удам буй, тэгээд чиний хэвлийгээс хоёр өөр үндэстэн үүсэн төрж,
нэг нь нөгөөгөөсөө хүчтэй болмуй. Том нь багадаа хүчин зүтгэмүй” гэжээ.

Ева, Александра хоёрын тухайд гэвэл Ева дүү охиныхоо төлөө хүчин зүтгэх өчүүхэн ч хүсэл
байсангүй. Ева ухаан орсон цагаасаа хойш Александраг үзэн яддаг болжээ. Дүүг нь хэн нэгэн
тэврэх, эрхлүүлэх бэлэг өгөхөд Евагийн дотор арзганадаг байлаа. Евад энэ шударга биш зүйл
шиг санагдана. Ева тэр хоёрыг хүрээлж байгаа бүх хөөрхөн эд юмс, хайр халамж, энэ бүхэн
ганцхан өөрийнх нь байгаасай гэж хүснэ. Евад ядахдаа өөрийн төрсөн өдөр байхгүй.
Александраг өөртэй нь адилхан тэгээд адилхан хувцасладаг болохоор нь, эмээгийн хайр
халамжийн хагасыг булааж авдаг болохоор нь Ева түүнийг үзэн ядна. Александра бол
шунахай сэтгэлгүй учир өөрийн тоглоом, хүүхэлдэйг Евад өгөхөд хэзээд бэлэн байдаг. Ева
бол өөрийн юмыг огт хуваахгүй. Өөрт байгаа юмыг ганцхан өөрөө л хэрэглэнэ. Энэ нь бас
түүнд багаддаг байжээ. Ева Александрын бүхнийг ганцхан өөртөө авахыг хүснэ. Оройдоо
хоёр охин Соланж Дюнийн хараа хяналт дор хоёул тэнгэрт залбиран уншлага уншина. Ева
бол дотроо Тэнгэрээс Александраг үхүүлээд өгөөч гэж гуйн залбирдаг болжээ. Мөргөж
залбирсан нь биелэж өгөхгүй болохоор нь Александраг өөрөө замаасаа зайлуулах хэрэгтэй
юм байна гэж шийдлээ.

Хэд хоногийн дараа хоёр охины таван насны ойн баяр болно. Энэ ойн баярыг дахиад л
Александратай хуваах болно гэж бодохоос Ева тэсэж чадахаа больжээ. Александра найз нөхөд
бэлэг, бэлэг сэлтийг минь шударга бишээр хулгайлж байна гэж бодно. Түүнийг нэн даруй
эндээс зайлуулах хэрэгтэй байлаа.

Төрсөн өдрийн баярын өмнөх шөнө Ева унтаж чадахгүй, бодлогошрон хэвтэж байлаа.
Гэрийнхэн нь бүгдээрээ унтаад өгсөн гэж бодоод Александрын орны дэргэд очиж, дүүгээ
дуудан сэрээгээд,

- Алекс, гал тогоонд очиж, бидэнд өгөх баярын бялууг үзье гэж шивэгнэлээ.

- Бүгдээрээ унтацгааж байгаа шүү дээ гэж Александра нойрмог дуугаар хариулав.

- Бид хоёр хэнийг ч сэрээхгүй.

- Мисс Дюна дургуйцэнэ. Бялууг маргааш өглөө үзье.

- Би одоо л үзмээр байна. Чи хамт явах юм уу, үгүй юм уу?

Александра нүдээ нухлав. Тэрээр бялууг огт сонирхохгүй боловч эгчийгээ гомдоохыг
хүссэнгүй.

- Явья гэж Александра хэлээд орноосоо босож, гэрийн хувцас өмсөв. Ихэр охид шөнийн ягаан
нейлон цамцтай байлаа.

- Явцгааяа. Битгий чимээ гаргаарай гэж Ева хэлэв.

- Чимээ гаргахгүй гэж Александра хариуллаа.

Хоёул унтлагын өрөөнөөс гарч өлмийгөөрөө гэтэн урт гудмаар мисс Дюнын өрөөний
дэргэдүүр, гал тогоо руу очсон шат тийш явлаа. Гал тогоо нь хоёр лут том шатдаг зуух, зургаан
халуун хүхээ, гурван хөргүүр, том том хөлдөөгүүртэй том өрөө. Хөргүүр дотор тэдний тогооч
миссис Тэйлорын хийсэн хоёр бялуу байхыг Ева үзэв. Нэг дээр нь “Александрад төрсөн
өдрийн баяр хүргэе” нөгөө дээр нь “Евад төрсөн өдрийн баяр хүргэе” гэж бичсэн байжээ.
Үүнийг үзээд Ева “Ирэх жил ганц надад бялуу хийнэ” хэмээн баярлан бодлоо. Ева хөргүүр
дотроос Александрын бялууг гарган ширээн дээр тавьж, шургуулга онгойлгон өнгө өнгийн
лаа гаргаж ирлээ.

- Чи юу хийж байна? гэж Александра асуув.

- Бялуун дээр лаа асаах ямар байдгыг үзье.

- Хэрэггүй дээ. Энэ бялууг эвдчихнэ, тэгээд маргааш миссис Тэйлор уурлана шүү дээ, Ева.

- Уурлахгүй ээ гээд Ева өөр нэг шургуулга онгойлгон хоёр том хайрцагтай шүдэнз гаргаж
ирэв.

- Алийв, Алекс. Надад туслаач.

- Унтлагынхаа өрөөнд эргэж очьё, Ева.

Ева түүнийг муухай харж,

- За яах вэ, явж бай. Хулчгар амьтан. Би өөрөө хийнэ гэхэд нь Александра хэсэг эргэлзснээ,

- Би юу хийх бэ? хэмээн асуухад Ева түүнд хайрцагтай шүдэнз өгч,

- Энэ лаануудыг асаа гэв.

Александра галаас айдаг байв. Шүдэнзээр тоглох аюултай гэдгийг хоёр охинд хэлж сануулсан
байжээ. Томчуулын үгэнд ороогүй хүүхдэд ямар аймшигтай юм тохиолдож болдгийг хоёр
охин сайн мэддэг байлаа. Гэсэн ч Александра Евагийн үгнээс зөрөхийг хүссэнгүй, лаануудыг
дуулгавартай асааж эхлэв. Ева түүнийг ажиглаж байлаа.

- Энд бас байна, тэнэг минь.

Александра бялууны цаад захад байгаа лаанд хүрэх гэж цааш тонгойлоо. Ева хурдан зуур
шүдэнз зуран нөгөө гартаа барьж буй хайрцагтай шүдэнз рүү асаатай шүдэнзээ ойртуулав.
Шүдэнд дүрсхийн асахад Ева түүнийг Александрын хөлд хаяв. Шөнийн цамцны нь хормой
шатаг гэсэн байж. Александра чухам юу болсныг даруй ойлгосонгүй. Хөл нь гэнэт их
өвдөхийг мэдрээд доош харж, дуу алдан хашгирлаа.

- Авраарай, Туслаарай...

Ева шатаж буй шөнийн цамцыг харан зогсож байлаа. Александра айсандаа бие нь хөшиж
орхиод хөдлөлгүй зогсож байв.

- Битгий хөдөл. Би яваад хувингаар ус аваад ирье гэж Ева хашгираад агуулах руу гүйхдээ айж,
баярлах зэрэгцэн зүрх нь булгилж байгааг мэдэрлээ.

Аймшигийн кино гарч байсны ачаар Александрын амийг аварч чадлаа. Блэкуэллийнхний
тогооч миссис Тэйлор хааяа нэг өвөр хормойдоо ордог цагдаагийн түрүүч Ричард Догертийн
хамт кино үзэхээр явсан байжээ. Тэр орой дэлгэц дээр өдий төдий хүний хүүр, эрэмдэг
зэрэмдэг бие гарсан учир миссис Тэйлор сүүлдээ тэсэхээ больжээ. Кинонд гарч буй нэг
хүний хүзүүг тас огтолсны дараа авгай бүр цөхрөнгөө барж,

- Ричард чамд энэ дасаж дадсан юм байдаг биз. Миний хувьд бол ингээд боллоо гэжээ.

Түрүүч Ричард Догерти авгайн хойноос дуртай дургүй даган кино театраас гарлаа. Тэр хоёр
Блэкуэллийнхний гэрт бодож байснаас нэг цагийн түрүүнд ирлээ. Миссис Тэйлор арын
хаалга онгойлгомогц гал тогооны өрөөнөөс Александрын хашгирах дуу сонсдлоо. Миссис
Тэйлор түрүүч Догерти хоёр Александра руу ухасхийн очиж, шатаж байгаа шөнийн цамцыг
тайлж хаяв. Охины хөл түлэгдэн цэврүү үсэрсэн боловч, галын дөл нүүр үсэнд нь хараахан
хүрээгүй байлаа. Александра ухаан алдан унав. Миссис Тэйлор том саваар ус хутган авч,
шатаж буй гал дээр асгалаа.

- Түргэн тусламж дууд. Миссис Блэкуэлл гэртээ бий юу? гэж Догерти асуухад

- Бий, унтаж байгаа.

- Дуудаж сэрээ...

Миссис Тэйлор “түргэн тусламж” утасдаж харилцуурааа тавиад хүүхэд эхэр татан уйлахыг
сонслоо. Агуулахаас Ева нэг хувинтай ус барин гарч ирээд,

- Александра үхчихсэн үү? Яасан бэ? гэж орь дуу тавихад нь миссис Тэйлор Еваг тэврэн
тайвшруулахыг оролдон,

- Үхээгүй, охин минь. Александра зүгээр. Санаа бүү зов.

- Энэ миний буруу. Алекс баярын бялуун дээрээ лаа асаах гэсэн юм. Би хорьж зогсоох ёстой
байсан юм гэхэд нь Тэйлор Евагийн толгойг илж,

- Зүгээр, зүгээр. Одоо бүх юм хэвийн. Энэ чиний буруу огт биш гэлээ.

- Би шүдэнз алдаж унагаснаас Алекс шатсан. Аймаар юм боллоо.

Эмч Харви ирээд,

- Александрын хөл, нуруу түлэгджээ. Хоёрдугаар зэргийн түлэгдэл. Гэхдээ айх юм байхгүй.
Манайд түлэгдэлтийг анагаах орчин үеийн сайн эм бий. Үүнээс долоон дор юм болж болох
байж гэхэд нь Александрын түлэгдсэн биеийг үзэж сэрдхийн цочсон Кейт,

- Мэднэ... Би Евап илүү санаа зовж байна.

- Ева бас түлэгдээ юү?

- Үгүй. Гэхдээ хөөрхий охин энэ явдлыг өөрийн буруу гээд сэтгэл нь зовж, муухай хар дарж
зүүдлэх болжээ. Сүүлийн гурван шөнө би Еваг тэвэрч байж унтуулж байгаа. Сэтгэл мэдрэлд
нь сэв үлдүүзэй гэж айж байна. Ева их сэтгэл хөдлөмтгий хүүхэд.
- Хүүхэд тийм л байдаг, яваандаа зүгээр болно. Хэрэг гарвал надад хэлээрэй. Би Еваг
хүүхдийн сэтгэл мэдрэлийн сайн эмч олж өгье.

- Баярлалаа Харви гэж Кейт түүнд талархлаа.

Евагийн урам хугарч, сэтгэл нь гонсойв. Төрсөн өдрийн баярыг тэмдэглэсэнгүй. “Дахиад энэ
Александрагаас л боллоо” гэж Ева харамсан бодлоо. Александрын шарх сорви багатай сайхан
эдгэв. Евагийн гэмших сэтгэл хурдан зүгээр боллоо. Кейт түүнийг ятган,

- Хэнд ч санамсаргүй гай тохиолдож болно шүү дээ, охин минь. Чи өөрийгөө зэмлэж зүхэх
хэрэггүй гэж хэлдэг байлаа.

Ева өөрийгөө зэмлэж зүхээгүй. Миссис Тэйлорыг л зүхэж байлаа. Яах гэж ирээд хамаг
санасныг минь хөөдөж орхив. Бүгдийг нь их сайхан бодож төлөвлөсөн юм сан...

...Тонигийн байдаг сувиллын газар Коннектикут муж улсын ойн бүсэд бий. Кейт сард нэг удаа
хүүгээ эргэж очдог байв. Мэс засал амжилттай болжээ. Тони ширүүн догшин ааш зан
гаргахаа бүр мөсөн больжээ. Тони Кейтийг таньж, Ева Александра хоёрыг асуух боловч
тэдэнтэй уулзахыг ер хүсдэггүй байв. Ер нь Тонигийн сонирхох юм бага. Тони жаргалтай
байх шиг санагдана. “Үгүй дээ, юу нь жаргалтай байх вэ. Зүгээр л сэтгэл хангалуун байх шиг.
Харин юундаа сэтгэл хангалуун байдаг юм бол доо? гэж Кейт бодно. Кейт сувиллын газрын
захирал Бержерээс,

- Миний хүү ер нь юм хийдэг үү? гэж асуухад

- Хийдэг. Хийлгүй яах вэ. Тони өдөржин зураг зурдаг.

Уран зургаараа дэлхий дахиныг татан дагуулж чадах байсан хүү нь бүтэн өдөржин зураг
зурдаг гэнэ.

- Тэгээд юу зурдаг юм бэ дээ?

- Аа тэр бол хүн ойлгох аргагүй юм байдаг юм гэжээ.

24-р бүлэг

Кейт дараагийн хоёр жил Александрын төлөө санаа их зовох болов. Жаал охинд байсхийгээд
л гай түйтгэр тохиолдох гээд байх болжээ. Зуны амралтын үед Бахам дахь эдлэнд байх үед
Александра Еватай хамт усанд тоглож байгаад золтой л живсэнгүй. Гагцхүү цэцэрлэгч эрс
шийдэмгий хөдөлсний ачаар Александраг аварч чадлаа. Дараа нь охид ууланд зугаалж яваад
Александра хаднаас хальтран унаж, эгц огцом бэлд ургасан бутнаас зуурсны ачаар амьд мэнд
гарчээ.

- Дүүгээ сайн харж хандаж бай. Наадахи чинь аминдаа арчаа муутай юм гэж Кейт Евад
хэлэхэд,

- Мэднэ. Би харж хандаж байя, эмээ гэж Ева хариулав.

Кейт хоёр ач охиддоо хоёуланд нь хайртай. Харин өөр өөр янзаар хайрлана. Охид 7 нас
хүрчээ. Макгрегорынхныг дуурайсан цэвэрхэн царайтай, хөөрхөн нүдтэй, бур булаам жаахан
охид болжээ. Хоёул хоорондоо царай зүс, биеийн байдлаар ав адил боловч зан чанар нь их
ялгаатай. Александрын номхон дөлгөөн ааш зан нь Кейтэд Тониг санагдуулна. Ева бол өөртөө
нь адил бие даасан байдалтай, зөрүүд гөжүүн.

Охид сургуульдаа “роллс-ройс” оор хүргүүлнэ. Александра машинаар хичээлдээ очиж

байгааг ангийн хүүхдүүд харвал ичиж зовно. Ева бол үүнийгээ гайхуулж сайрхана. Кейт
охидод долоо хоног бүр жаахан мөнгө өгч, зардлаа нарийн тооцож, бичиж тэмдэглэж байхыг
шаардана. Евагийн мөнгө амархан дуусаад Александраас мөнгө зээлүүлээч гэж гуйдаг байв.
Ева тооцоогоо хуурамчаар үйлдэн эмээгээ амархан маллаж сурчээ. Кейт үүнийг нь мэдээд
инээдээ барьж яддаг байлаа.

Кейт анхандаа Тониг нэгэн цагт эдгэрээд эргээд ирнэ гэж горьддог байв. Гэвч цагийн уртад
Кейтийн мөрөөдөл замрхан ариллаа. Эмч нар Тонийг хааяа сувилагчтай хамт гадагш явахыг
зөвшөөрсөн боловч ямар нэгэн ажил үйл хийнэ гэж санасны гарз гэжээ.

1962 он дундаа орж байлаа. Крюгер Брэнт улам цэцэглэн мандаж, Кейтийн халааг хэн авах вэ
гэдэг асуудал гарч ирэв. Кейт хэдийн 70 насныхаа ойг тэмдэглээд өнгөрчээ. Үс нь бууралтсан
боловч, амьдралын эрч хүчээр орчин тойрныхоо хүмүүсийг гайхуулан байв. Кейт улиран
өнгөрөх цаг хугацааг тогтоож дийлэхгүй гэдгээ ойлгож байлаа. Эртнээс бэлдэх хэрэгтэй.
Компанийг халуун бүлийнхээ гарт үлдээх хэрэгтэй. Брэд хэдийвээр сайн захиарл боловч
Блэкуэлл биш. Кейт ихэр охидоо өсөж өндийтөл хүлээх хэрэгтэй. Сесил Родсын: “Хийсэн юм
бага, хийх юм их байна” гэсэн сүүлчийн үгийг Кейт санав.

Охид 12 хүрсэн. Асар удахгүй залуу авхай нар болно. Кейт хэзээнээс охидод цаг гарган хамт
хичээллэж, ажиллаж, байсан ч одоо бүрч их цаг гаргах болсон байна. Чухам шийдвэр гаргах
цаг туллаа.

Улаан өндөгний баярын амралтаар Кейт ач охидтойгоо хамт өөрийн нисэх онгоцоор Дарк
Харборт очив. Охид Өмнөд Африкийнхаас бусад гэр бүлийн бүх эдлэн газарт очиж үзсэн
боловч Дарк Харбор тэдэнд бусдаас илүү санагддаг. Энэ арал дээр хязгааргүй эрх дураараа
байх сайхан. Охид далбаат онгоцоор зугаалж, усанд шумбаж, усан цанаар гулгана. Ева үүний
урьд сургуулийнхаа үерхдэг охидоос урьдаг байсан шигээ урьж болох уу гэхэд нь Кейт анх
удаа татгалзлаа. Охидыг анхааран халамжилж, хааяахан нэг сануулга үг хэлдэг эмээ нь энэ
удаа тэдэнтэй ганцаараа хамт байхыг хүсчээ. Нэг юм болох гэж байна гэдгийг охид
сэтгэлийнхээ зөнгөөр мэдрэв. Кейт тэднээс хоромхон зуурч холдохгүй, яхта онгоцоор хамт
зугаалж, усанд хмат сэлж, тэр ч байтугай хэзээний моринд сайн хүний ёсоор мориор
тэдэнтэй хамт зугаалав.

Охид хоорондоо гайхмаар адилханыг Кейт дахин бахдлаа. Харин энэ удаа Кейт тэр хоёрын
тийм адилхан байдлыг онц сонирхсонгүй, зан байдлын ялгааг нь анхааран ажиглаж байжээ.
Кейт сэрүүн тагт дээр суугаад охидын теннис тоглохыг харж суулаа. Тэгээд охидыг жишин
үзлээ. Ева удирдагч, Александра бол гүйцэтгэгч. Ева зөрүүд, Александра чих зөөлөн. Ева
биеийн тамирт төрөлхийн авьяастай байхад Александрад байсхийгээд л гай түйтгэр
тохиолдоно. Хэд хоногийн өмнө охид далбаат завиар хөвж, Ева жолоодож явтал дарвуул нь
гэнэт салхинд хүлхийж, Александраг завинаас унагажээ. Александра золтой л үхсэнгүй.
Золоор ойролцоохон өөр нэг дарвуулт завь явж байх таарч, багийнхан Евад туслан дүүгийнх
нь амийг аварчээ. Кейт энэ бүхнийг Александра нь Евагаас гурван минут сүүлд төрснийх юм
болов уу гэж боддог байв. Энэ ч яахав чухал биш, Кейт нэгэнт сонголтоо хийсэн бөгөөд
бооцоо нь 10 гаруй тэрбум доллар байх болно. Кейт Евад тохирох сайн нөхөр олж өгөөд
өөрөө огцрохын цагт Ева Крюгер Брэнтийг толгойлох болно. Александрын тухайд гэвэл
элдэвт санаа зовох зүйлгүй эрх дураараа баян жаргалтай амьдрах нөхцөл бүрдүүлж өгнө.
Александра Кейтийн байгуулсан өглөг буяны сангийн ажлыг эрхлээд байж бүрэн чадна.
Александрын хувьд энэ их сайхан ажил байх болно. Александра ерөөсөө өр нимгэн, сайхан
сэтгэлтэй охин...

Кейт өөрийн төлөвлөгөөний дагуу Еваг тохирох сургуульд оруулахаар шийдэж, Өмнөд
Калифорнид байдаг Бриаркрестийн сайхан сургуулийг сонгож авлаа. Кейт тэр сургуулийн
захирал миссис Чандлерт хандан,

- Охид хоёулаа оюун ухаан, бие бялдарын талаар хөгжил сайтай. Ева илүү авьяастайг та үзэх
болно. Энэ гайхамшигтай охин, ирээдүйд тун хол явах бүх бололцоог бий гэж итгэж байна
гэсэнд,

- Манай бүх охид адил тэгш бололцоотой, миссис Блэкуэлл. Та Евагийн тухай ярилаа. Харин
Александра ямар вэ?

- Александра юу? Их сайн охин. Би хоёр охиныхоо амжилтыг ажиглаж байх болно гэж Кейт
өгүүлээд босов.

Кейтийн энэ үг Чандлерт сануулга мэт хатуу сонсогдлоо.

Шинэ сургууль хоёр охины санаанд таарав. Ялангуяа Ева их баяртай байлаа. Ева эмээдээ, мөн
Соланж Дюнд тайлагнаж байх хэрэггүй, эрх чөлөөтэй болсондоо баярласан байжээ.
Бриаркрестийн дүрэм журам хатуу боловч Ева үүнд сэтгэл зовсонгүй. Учир нь тэрээр дандаа
дүрэм журмыг тойрон гарсаар ирсэн. Санаанд нь таараагүй ганц юм нь гэвэл дахиад л нөгөө
гайтай Александра хажууд нь байгаа явдал. Ева тэднийг Бриаркрестэд явуулах гэж байгааг
анх сонсоод,

- Би тийшээ ганцаараа явж болох уу? Намайг ганцааранг минь явуулаад өгөөч дээ, эмээ? гэж
гуйсанд

- Үгүй дээ, Ева. Александра хажууд чинь байж байвал дээр гээд Кейт зөвшөөрөөгүй аж.

Ева урам хугарснаа дотроо нуугаад,

- Эмээ таны хэлснээр болтугай гэжээ.

Ева ер нь эмээгийнхээ өөдөөс үг сөрдөггүй. Эрх мэдэл хэний гарт байгааг тэр сайн мэддэг
байлаа. Евагийн эцэг нь сэтгэл мэдрэлийн өвчтэй, эмнэлэгт байдаг солиотой хүн бий. Эх нь
тэднийг төрөх үед нас барсан. Бүх мөнгө эмээгийнх нь мэдэлд байдаг. Эмээ нь бас асар их
баян хүн гэж Ева мэднэ. Эмээ нь чухам хэдий хэрийн хөрөнгөтэйг Ева мэдэхгүй ч ямарч
гэсэн Евагийн авахсан гэж хүсдэг бүх хөөрхөн эю юмыг худалдан авч чадахуйц их мөнгө лав
бийг мэднэ. Харин Ева тэр хөөрхөн эд юмст зүйлгүй их дуртай. Ганц Александра л саад
болоод байна...

Охид өглөөгүүр морь унаж зугаалах дуртай. Олонхи охид өөрийн морьтой байдаг. Кейт
охидод төрсөн өдрийн бэлэг болгож нэг нэг морь бэлэглэсэн байжээ. Сургагч Жером Дэвис
хоёр охины эхлээд нэг фут, дараа нь хоёр фут, эцэст нь дөрвөн футийн саад дээгүүр давж
байхыг ажиглан харж байлаа. Жером Дэвис бол морин сургуулийн шилдэг сайн сургагчийн
нэг юм. Түүний шавь нарын дотроос алтан медаль авч байсан хүн цөөнгүй. Жером моринд
төрөлхийн авьяастай хүнийг андахгүй таньдаг. Түүний шинэ шавь Ева Блэкуэлл бол тийм
охин байлаа. Евад эмээл дээр яаж суух, жолоо яаж барихыг заах хэрэг болсонгүй. Ева
морьтойгоо нийлж ургасан мэт саадын дээгүүр онц төвөггүй давж байв. Евагийн алтан шар
үс салхинд намиран үлгэрийн баатар бүсгүй шиг харагдана. “Ийм хүн юунд ч торохгүй” гэж
Жером боддог байлаа.

Залуу агтач Томми бол Александрад талтай хандана. Александрын морио унаж байхыг
мистер Дэвис харж байлаа. Александра Ева хоёрыг андуурч хутгахгүй тулд ханцуйн дээр нь
өөр өөр өнгийн тууз хадсан байжээ. Ева Александрт туслан, Томми өөр нэг сурагч охинд
туслаж байв. Яг тэр үед Дэвисийг гол байшинд утсан дээр дуудлаа. Хэдэн минутын дараа
аймшигтай юм болжээ.

Жером Дэвисийн хожим таамагласнаар Александра морио эмээллэж, талбай дээгүүр нэг
тойрч, эхний хамгийн намхан саад руу ойртон очсон байна. Морь нь гэнэт булгин тангарч,
Александраг чулуун хэрэм дээр хаяжээ. Александра дороо ухаан алдсан байна. Гагцхүү сохор
азаар морины хөлд гишгүүлсэнгүй амьд мэнд үлдэв. Томми Александраг эмнэлэгийн хэсэгт
аваачин сургуулийн эмч тархи нь жаахан хөдөлсөн байна гэсэн онош тавиад,

- Яс нь бүтэн байна, айх юмгүй. Маргааш гэхэд зүв зүгээр болж, морь унаж давхих болно
гэжээ.

- Дүү минь үхэж болох байсан шүү гэж Ева уулга алдав.
Тэгээд дүүгийнхээ дэргэдээс холдохгүй сахиж байлаа. Миссис Чандлер бие биедээ ийм
хайртай эгч дүү байхыг үзээгүй шиг санагдаж, сэтгэл нь уярчээ. Мистер Дэвис уг морийг
арайхийн барьж аваад эмээлийг нь авах үед тохом нь цус болсон байхыг ажиглав. Эмээлийг
нь бүр аваад үзэхэд морьны нуруунд консервийн лаазны хурц ирмэгтэй жижиг тасархай
шигдсэн байв. Дэвис энэ тухай миссис Чандлерт мэдэгдэж, захирал авгай нэн даруй мөрдөн
байцааж шалгах тушаал өглөө. Ойр хавьд байсан охид болон морин сургуулийн бүх ажилчдыг
байцаалаа.

- Энэ хэсэг төмрийг эмээл доогуур хийсэн хүн зүгээр тоглох гэсэн байх. Харин энэ нь гайтай
муухай юм болж дуусаагүй нь яамай даа. Хэн тэгснийг мэдэх хэрэгтэй гэж миссис Чандлер
хэлэв.

Нэг нь ч би тэгсэн гэж хэлэхгүй болохоор миссис Чандлер охидыг нэг нэгээр нь өрөөндөө
дуудаж байцаалаа. Охид бүгд л энэ тухай юу ч мэдээгүй гэж хариулав. Евагийн ээлж болоход
нэг л хачин зан байдалтай байлаа.

- Хэн тэгсэн байж болох вэ, чи мэдэх үү? хэмээн миссис Чандлер асуухад Ева нүдээ буулган,

- Энэ тухай ярихыг хүсэхгүй байна гэж бөвтнөв.

- Тэгвэл чи харсан юм уу?

- Үгүй л дээ, миссис Чандлер.

- Александра ноцтой бэртэж болох байсан шүү дээ. Цаашид ийм явдал дахин гаргуулахгүйн
тулд үүнийг хйисэн бүсгүйг цээрлүүлэн шийтгэх ёстой.

- Бүсгүй биш ээ...

- Тэгээд хэн юм бэ?

- Томми.

- Агтач уу?

- Тийм ээ, хатагтай би харсан. Би зүгээр л олмыг чангалж байгаа юм байх гэж бодсон. Томми
муу юм болно гэж бодоогүй байх. Александра түүнээс дандаа өө эрж байдаг юм. Тэгээд
түүнийг жаахан залхаах гэсэн байх. Ай миссис Чандлер, та яах гэж үүнийг надаар яриулав аа.
Надаас болж хэн нэгэн хүнд эвгүй юм болохыг хүсэхгүй байна гээд хөөрхий жаал охин
хийрхэн багтарч унахын даваан дээр очив.

Миссис Чандлер ширээнийхээ араас босож, Еваг тэврээд,

- Гэмгүй Ева, Бүгдийг надад ярьсан чинь зөв боллоо. Санаа бүү зов. Би өөрөө учрыг нь олно
гэлээ.

Маргааш өглөө нь охидыг адууны жүчээ рүү очиход тэнд шинэ агтач хүлээж байжээ.
... Хэдэн сарын дараа сургууль дээр бас нэг эвгүй юм болов. Хэдэн охид хар тамхи татаж
байгаад баригджээ. Тэдний нэг нь марихуаныг Евагаас худалдан авсан гэж хэлсэн байна. Ева
тас үгүйсгэлээ. Миссис Чандлер нэгжлэг хийж үзээд Александрын шургуулганаас марихуана
олсон байна. Ева дүүгээ тас өмөөрч,

- Би үүнийг хэзээ ч үнэмшихгүй. Хэн нэг нь Алексын шургуулганд хар тамхи хийсэн байх,
тэгж л таарлаа гэв.

Болсон явдлын тухай мэдээг Кейтэд явуулжээ. Ева дүүгээ өмөөрсөн нь Кейтэд аятайхан
санагдлаа. Судсаар нь Макгергорын цус урсаж байгаа юм байна.

Ач охидынхоо 15 насны ойгоор Кейт тэднийг Өмнөд Каролинад байдаг эдлэндээ аваачиж,
том үдэшлэг зохиов. Евад эр нөхөр болох хүн эрэх цаг нэгэнт болсон учир Кейт олон залуу
хүн урьсан байна.

Тэр хөвгүүд нь охидыг төдийлэн их сонирохдоггүй насан дээрээ байгаа хөвгүүд. Кейт
тэднийг хооронд нь танилцуулах талаар санаа тавьжээ. Тэр залуусын хэн нэг нь Евагийн
нөхөр болж, Крюгер Брэнтэд ажиллах болж юу магад.

Александра үдэшлэгт дургүй боловч эмээгийнхээ урмыг хугалахгүйн гэж сэтгэл их таатай
байгаа юм шиг дүр үзүүлэнэ. Ева бол үдэшлэгт ухаангүй дуртай. Үнэтэй сайхан хувцас хунар,
гоёл чимэглэл, талархан бишрэгчдийн харц түүнд сайхан санагддаг. Александра бол ном
уншиж, зураг зурах дуртай. Дарк Харбор дахь эцгийнхээ өрөөнд буй уран зурагнуудыг хэдэн
цагаар харж суухдаа эцгийгээ өвчлөхөөс нь өмнө танилцаж чадаагүйдээ харамсана. Баярын
үеэр эцэг нь сувилагч дагуулж ирдэг байлаа. Эцэг нь нүдэнд дулаахан, э?лдэг зантай хүн
харагдах боловч түүнтэй ярих юм олддоггүй. Өвөг эцэг Фредерик Хоффман нь Германд
суудаг агаад бие нь муу учир холын аян замд явж чадахгүй. Хоёр охин түүнтэй уулзах нь
ховор.

Сургуульд хоёр дахь жилдээ сурч байгаад Ева жирэмсэлжээ. Хэдэн долоо хоног хувхай цагаан
царайлж, нүдний зовхи нь хөхрөөд заримдаа өглөөний хичээл тасалдаг болов. Бөөлжих нь
олширсны дараа Еваг эмнэлэгт аваачиж үзүүллээ. Тэр даруй миссис Чандлерыг эмнэлэгийн
өрөөнд дуудан аваачиж,

- Еваг жирэмсэлсэн байна гэж эмч түүнд хэлэв.

- Тийм байх ёсгүй. Яагаад тийм болдог билээ? гэхэд нь

- Ердийн жамаар гэж эмч тайван хариулав.

- Энэ охин хүүхдээрээ байгаа шүү дээ.

- Эх болохоор завдан байгаа залуу бүсгүй,

Ева асуултанд хариулахыг татгалзан,

- Надаас болж хэн нэгэн хүн гай болохыг хүсэхгүй байна гэжээ.
Миссис Чандлер ч түүнээс өөр хариу сонсоно гэж найдаагүй ажээ.

- Ева хонгор минь, чухам юу болсныг яриач гэсэнд Ева эцсийн бүлэгт бууж өгөн,

- Намайг хүчиндсэн гээд асгаруулан уйллаа.

Миссис Чандлер балмагдан сандрав. Хамаг бие нь чичрэн байгаа Еваг тэврэн биедээ
наагаад,

- Хэн бэ? гэж шаардангуй асуулаа.

- Мистер Паркинсон.

Тэр бол англи хэлний багш байлаа. Хэрэв Ева Блэкуэллээс өөр хүн ийм үг хэлсэн бол миссис
Чандлер хэрхэвч үнэмшихгүйсэн. Жозеф Паркинсон бол эхнэр, гурван хүүхэдтэй, даруу төлөв
хүн сэн. Бриаркрестэд найман жил багшилсан энэ завсар миссис Чандлер түүнд хэзээ ч муу
санаж байгаагүй билээ. Захирал тэр багшийг өрөөндөө дуудаж ирүүлээд Евагийн үнэн
хэлснийг даруй ойлголоо. Паркинсон илт тэвдсэн байдалтай байв.

- Мистер Паркинсон, таныг юу гэж дуудсаныг та мэдэх үү?

- Гадарлаж байна.

- Ева Блэкуэллд хамаатай явдал.

- Би... тийм ч байх гэж бодсон юмаа.

- Ева өөрийг нь хүчиндсэнийг баталж байна.

Паркинсоны царайд гайхах байдал илэрч,

- Би түүнийг хүчиндсэн гэж үү? Ай тэнгэр, хэнийг хүчиндсэн бэ гэвэл намайг л хүчиндсэн
байх...

- Та юу ярина вэ. Тэр чинь хүүхэд шүү дээ гэж миссис Чандлер зэвүүцэн өгүүлэв.

- Тэр чинь хүүхэд биш. Тэр бол бяцхан шулмас гэж Паркинсон хорсон өгүүлээд, хөлөрсөн
духаа арчин,

- Улирлын турш эхний ширээнд банзалаа дээш нь шуугаад суудаг байсан. Хичээлийн дараа
миний дэргэд ирж, элдвийн дэмий юм асууж надад наалдаад байдаг байлаа. Би түүнийг тоон
анхаараагүй юм. Дараа нь сар хагасын өмнө манай эхнэр хүүхэд байхгүй хойгуур манайд
ирсэн. Ай тэнгэр Би яаж ч чадаагүй гэж хоолойгоо зангируулан хэлээд уйлж эхлэлээ.

Өрөөнд Еваг оруулж ирэв. Сэтгэл нь хэдийн тайвширчээ. Ева орж ирээд мистер Паркинсоны
өөдөөс эгцлэн харахад цаадах нь нүдээ буруулав. Өрөөнд миссис Чандлер, хотхоны
цагдаагийн дарга нар байлаа.
- Яагаад ийм явдал болсныг бидэнд ярина уу? гэж цагдаагийн дарга эелдэг асуув. Ева тайван
хариулж эхлэлээ.

- За тэгье, ноёнтон. Мистер Паркинсон миний англи хэлний шалгалтын ажлын тухай ярих
хэрэгтэй байна гэж хэлсэн. Тэгээд намайг ням гаригт үдээс хойш гэртээ очоорой гэсэн юм.
Очиход мистер Паркинсон ганцаараа байсан. Тэгээд унтлагын өрөөнд орж нэг юм үзүүлье
гэхлээр нь би дагаад дээшээ гарсан. Тэгтэл орон дээрээ дарж аваад...

- Худлаа, огт өөр юм болсон. Эн бүгд худал. гэж мистер Паркинсон хашгичлаа.

Энэ бүхний тухай Кейтэд мэдэгдэв. Энэ хэргийг олонд мэдэгдэлгүй дарж орхивол хэн хэндээ
дээр гэж тэд шийджээ. Мистер Паркинсонын ажлаас нь халж, муж улсаас 48 цагийн дотор
гарч явахыг тушаажээ. Ева хувийн эмнэлэгт үр хөндүүлэв.

Кейт нутгийн банкнаас сургуулийн хувьцааг худалдаж аваад уг сургуулийг хаалаа. Ева энэ
тухай мэдээд,

- Тоогүй дээ, эмээ. Тэр сургууль надад аятайхан санагддаг юм гэжээ.

Мэс заслаас хойш хэдэн долоо хоногийн дараа Евагийн бие сайжирч, Александра тэр хоёрыг
Лозаны ойролцоо байдаг Феривудын хүрээлэн дэх швейцар сургуульд оруулжээ.
25-р бүлэг

Евагийн цээжинд оволзох гал халуун хүсэл даанч их хүчтэй байсан болохоор бүсгүй өөрөө
өөрийгөө яаж ч чадахгүй байлаа. Зөвхөн секс буюу хормой хотны явдалд учир байгаа юм биш.
Энэ бол амьдрах хүсэл, юм бүхнийг хийх, газар бүхэнд очих эрмэлзлэл байлаа. Амьралаас
тэр аяараа Евагийн халуун янаг шиг санагдаж, амьдралаас авч болох юм бүхнийг авах гэж
эрмэлзэнэ. Ева хүн бүхний юм бүхэнд атаархана. Балетаар хичээллэж эхэлсний дараа бүх
бүжигчдийг үзэн ядах болов. Учир нь үзэгч олон зөвхөн Евад л алга ташин баяр хүргэх ёстой
юм. Ева эрдэмтэн, дуучин, мэс засалч, нисэгч, жүжигчин болохыг хүснэ. Мэргэжил бүхнийг
эзэмшиж, барьж авсан бүх юмаа бусдаас илүү сайхан хийхийг хүснэ. Юм бүхнийг хүсэх
бөгөөд хүлээж тэвчихгүй байлаа.

Феривудын хүрээлэнгийн өөдөөс харсан хөндийн цаад захад цэргийн сургууль байдаг байлаа.
Ева 17 хүрэх үедээ тэр сургуулийн бараг бүх сонсогч, багш, ажилчин нартай унтаж үзсэн
байлаа. Ева галзуу юм шиг сэртэндэж сээтэгнэн завхай зайдан зангаа нэг их нуудаггүй
боловч үүний түрүүчийнх шиг жирэмслэхгүйн тулд сэрэмжлэх арга хэмжээ авч байв. Евад
секс сайхан санагдана. Тэгэхдээ эр эмийн ажилд явдал нь бус, эрчүүдийг эрхэндээ оруулах нь
сайхан санагддаг байжээ.Өөрийг нь өвөртлөхийг хүссэн эрчүүдийн шуналтай харц аятайхан
санагдана. Ева эрчүүдийг өдөж, хүсэл тачаалыг нь бадруулах дуртай. Эрчүүд өөрийг нь эдлэх
гэж элдвийн худал хуурмаг уран гоёмсог үг урсгахыг сонсох дуртай. Эрчүүдийг эрхэндээ
оруулах нь Евад цэнгэлийн манлай болдог байлаа. Ева эр хүнийг нэг озоод л хүсэл
тачаалалыг нь бадруулж чадна, нэг хүйтэн үг хэлээд л хүслийг нь дарж чадна. Евад
эрчүүдийн хэрэг байхгүй, харин эрчүүдэд л Ева хэрэгтэй байдаг. Ева эрчүүдийг өөрийн
гарын дор байлган захирч чадна. Энэ бол гайхамшигтай сэрэл сэтгэгдэл юм.

Ева хэдхэн минутын дотор аливаа эр хүний сайн, саар тал бүхнийг мэдээд авч чадна. Ева
дотроо эрчүүдийг бүгдээрээ тэнэг байдаг юм байна гэж бодох болжээ. Ева хөөрхөн царайлаг
болж ирээд ухаалаг сэргэлэн бүсгүй. Түүний дээр асар их хөрөнгийн өв залгамжлагч. Арав
гаруй хүн ханилан сууя гэж буурьтай санал тавьжээ. Ева үүнийг сонирхсонгүй. Сэртэндэж,
сээтэгнэж эрийг эрхэндээ оруулахыг хичээнэ. Нэг удаа сургууль дээр бүжиг болоход
Александра нь Рене Малло гэдэг франц оюутантай танилцжээ. Тэр бол царайлаг биш ч гэсэн
ухаалаг сэргэлэн, эелдэг найртай залуу байлаа. Франц оюутан Александрад их таалагдаж, тэр
хоёр дараа долоо хоногт хотод уулзахаар тохирчээ.

- Оройн 7 -д гэж Ренегийн хэлэхэд,

- Би хүлээж байя гэж Александра хариулав.

Александра орой нь өөрийн шинэ танил оюутан залуугийн тухай Евад яриад,

- Бусадтай огт адилгүй. Их бүрэг ичимхий, энхрий зөөлөн зантай. Бид хоёр бямба гаригт
театрт очиж юм үзнэ гэв.

- Тэр оюутан чамд таалагдаж байна уу? гэж Евагийн асуухад Александрын царай улайж,

- Дөнгөж саяхан танилцсан. Ер нь чи өөрөө мэднэ дээ гэв.

Ева толгойгоо салаавчлан орон дээрээ хэвтэж байлаа.

- Би юу ч мэдэхгүй. Цаадхи чинь чамайг ор луу чирсэн үү?

- Ева, тэр залуу бусадтай огт адилгүй гэж би чамд хэлсэн шүү дээ. Тэр их бүрэг ичимхий.

- Аа мөн, тийм байж. Миний дүү дурлачихжээ.

- Үгүй л дээ. Чамд ярьдаг нь дэмий юм боллоо.

- Зөв болсон шүү гэж Ева үнэнээсээ хэллээ.

Дараагийн хагас сайны орой Александраг театрт ирэхэд Рене харагдсангүй. Александра
гудамжны буланд бүтэн цаг хүлээж зогсохдоо хажуугаар өнгөрсөн хүмүүсийн сониуч нүд өөр
дээр нь тусаж байгааг анхаарсангүй. Эцэст нь Рене ирэхгүйг ойлгон Александра өөрийгөө
мал шиг тэнэг амьтан юм уу гэж бодов. Нэгэн муу жижиг гуанзанд ганцаараа хоол идчихээд
сургууль руугаа буцлаа. Ева өрөөндөө байсангүй. Александра жаахан ном уншиж байгаад
гэрлээ унтраалаа. Шөнийн хоёр цаг болж байхад Ева цонхоор орж ирж байгаа сонсдов.

- Миний санаа зовж байлаа шүү гэж Александрын шивэгнэхэд

- Би хуучин танилтайгаа дайралдаад. Чи энэ үдшийг сайхан өнгөрүүлэв үү?

- Муухай юм боллоо. Тэр оюутан ирсэнгүй.

- Хөөрхий амьтан. Чи эрчүүдэд итгэж болохгүй гэдгийг мэдэж авахад зүгээр.

- Тэр залууд гай түй болсон юм биш байгаа даа?

- Үгүй биз дээ, Алекс аа. Чамаас илүү сэтгэлдээ таарсан нэг юм олсон байх.

“Тийм л болж таарлаа” гэж Александра бодлоо. Тэгээд үүнд нэг их гайхсан ч үгүй.
Александра өөрийгөө хөөрхөн, тэгээд эрчүүд бахархан хардгийг мэддэггүй байжээ.
Александрын насан турш Евагийн нөмөр нөөлөгийг бараадаж явдаг. Евад ухаангүй хайртай,
тэгээд ганц Ева л эрчүүдэд таалагдаж болох юм шиг санадаг байлаа. Александра өөрийгөө
хоёрдугаар зэргийн хүн гэж бодох агаад бүр хар багаас нь Ева л түүний толгойд ийм бодол
шингээж өгснийг өчүүхэн ч үл сэжиглэнэ.

Уулзахаар болзоод бүтээгүй нь ганц энэ биш. Александрагийн санаанд таарсан залуус
уулзахаар болзоо тавиад дараа нь хаашаа ч юм бэ алга болчихдог байв. Нэгэн удаа
Александра Лозанны гудамжинд явж байгаад Ренегийн барааг харав. Рене дэргэд нь гүйж
ирээд,

- Юу болоо вэ? Утасдана гэсэн чинь яасан бэ? гэжээ.

- Утасдах ий? Чи юу ярина вэ? гэсэнд Рене гэдэргээ нэг алхаж,

- Чи Ева мөн үү? гэв.

- Үгүй биш, Би Александра байна гэсэнд залуугийн царай улсхийн,

- Уучлаарай... Би ... биш ээ, жаахан яарч явна... гээд түргэн түргэн алхлан одоход Александра
гайхсандаа ангайгаад хоцорчээ.

Оройн нь болсон явдлыг Евад ярихад цаадхи нь дал мөрөө хавчин,

- Солиотой амьтан байж. Түүнийг мартаж орхи, Алекс гэжээ.

Ева эрчүүдийг сайн мэддэг гэж бодох боловч тэдэнд бас нэг сул тал байдгийг мартснаас болж
сүйдэх шахжээ. Эрчүүд хүүхэнтэй хоносноо гайхуулж ярих дуртай байдаг, цэргийн
сургуулийн сонсогч нар ч жичдээ хүмүүс биш. Тэд нар Ева Блэкуэллийн сайхныг бахдан
хөөрөлддөг байлаа.

- Үүлэн борооны явдал дууссаны дараа би хуруугаа хөдөлгөж чадахгүй байсан...

- Тийм хүүхэн байдаг гэж ёстой зүүдэнд ороогүй яявсан сан...

- Өвөртлөхөд ёстой нэг өлөгчин бар даа...

Ева цэргийн сургуулийнхнаас наад зах нь хорин сонсогч арав гаруй багш сургагчтай хоносон
болохоор нэн удалгүй Евагийн завхай зайдан байдал нууц биш болжээ. Цэргийн сургуулийн
нэг сургагч энэ тухай Феривудийн хүрээлэнгийн багш эмэгтэйд ярьж, тэр багш эмэгтэй цааш
нь өөрийн захирал авгайд миссис Коллинзд илтгэсэн байна. Захирал авгай энэ байдлыг
нууцаар мөрдөж, хов жив үндэстэй болохыг мэдээд Еваг өрөөндөө дуудаж,

- Хэрэв таныг эндээс нэн даруй явбал манай сургуулийн нэр хүндэд дээр гэж би бодож байна
гэхэд нь Ева миссис Коллинзын өөдөөс юу ч ойлгохгүй байгаа байдлаар харж,

- Та юу ярьж байна вэ?

- Цэргийн сургуулийн сонсогчын тэн хагаст таны үйлчилж амжсаныг хэлж байна. Үлдсэн
хагас нь ээлжээ тэсэн ядан хүлээж байгаа...

- Ямар муухай худал үг вэ... Би энэ тухай эмээдээ заавал хэлнэ. Эмээ дуулаад... гэж Ева
жигшин зэвүүцсэндээ хоолой нь зангиран өгүүлэв. Захирал авгай үгийг нь таслан,

- Танд тэгж төвөг удаад яах вэ гэж бодсон юм. Би уг нь шуугиан дэгдээмээргүй байна л даа.
Харин асуудал ийм тал руугаа эргэж байгаа бол танай эмээд таны нууц амрагуудын нэрсийн
жагсаалтыг явуулж болох юм гэв.

- Тэр жагсаалтыг чинь үзье.

Миссис Коллинз урт жагсаалтыг үг дуугүй өгөв. Ева үүнийг үзээд наад зах нь долоо найман
хүний нэр дутуу байгааг ажиглаж мэдээд дотор нь жаахан онгойж бий болсон байдлыг
эргэцүүлэн бодож эхлэлээ. Хэсэг бодсоны дараа нүдээ гялалзуулан,

- Энэ чинь манай гэр бүлийнхний эсрэг илт хуйвалдаан байна. Хэн нэгэн этгээд намайг
ашиглан манай гэр бүлийг доромжлон эмээгийн дургүйг хүргэх гэж байгаа бололтой. Иймд
хүргэхгүйн тулд би өөрөө эндээс явна гэсэнд,

- Тун зүйтэй шийдвэр байна. Маргааш өглөө таныг нисэх буудалд хүргэж өгнө. Би эмээд чинь
утас цохино. Та харих юм байгаа биз дээ. Одоо явж болно миссис Блэкуэлл гэж захирал авгай
тун ч хүйтэн хэллээ. Ева үүд рүү явж байснаа гэнэт зогсож,

- Манай дүү яах вэ? гэж асуув.

- Александра энд үлдэж болно.

Александраг хичээл тараад өрөөндөө ирэхэд Ева юм хумаа чемоданд хийж байлаа.

- Чи юу хийж байгаа чинь энэ вэ?

- Гэртээ харья.

- Харих ий? Улирлын дундуур уу? гэхэд нь Ева,

- Чи бид хоёр энэ сургуульд хайран цагаа дэмий үрж байгааг чи ойлгодоггүй юм уу? гэхэд нь
Александра мэл гайхан,

- Ингэж боддогийг чинь би огт мэдээгүй юм байна шүү гэсэнд,

- Би үүнийг өдөр болгон бодож байдаг. Ганц чамайг бодоод л энд байж байна. Чамд энд
аятайхан санагддаг бололтой юм гэв.

- Тийм. Гэхдээ...

- Уучлаарай Алекс аа. Би цаашид тэсэхээ байлаа. Нью Йоркт буцаж очно. Гэртээ харимаар
байна. Бидний байж байвал таарах газар тэр.

- Чи миссис Коллинзтэй ярив уу?

- Сая ярьсан.

- Ямар янзаар хүлээж авч байна?

- Чи яана гэж бодоо вэ? Хөөрхий зайлуул, үүнийг сургуулийн нэр хүндэд муугаар нөлөөлөх
бий гэж л айж байна. Тэгээд намайг үлдээч гэж гуйсан л даа.

Александра орны захад сандайлаад,

- Юу хэлэхээ ч мэдэхгүй байна.

- Ийм тийм юм хэлээд яах вэ. Энэ чамд хамаагүй.

- Хамаатай шүү. Хэрэв чи энд зовж байгаа бол.. гээд Александра хэсэг дуугүй байснаа

- Чиний зөв юм уу даа. Бид хайран цагаа дэмий үрж байна. Латин үйл үгийн цаглахуй хэнд
хэрэгтэй билээ?

- Зүйтэй. Ханнибалын тухай, ер нь тиймэрхүү хүмүүсийн тухай унших хэнд сонин байх юм
бэ?

Александра шүүгээний дэргэд очиж, дотроос нь чемоданаа гаргаж ирээд орон дээр тавив.
Ева инээмсэглэн,

- Би чамайг эндээс хамт явья гэж гуймааргүй байсан, Алекс аа. Одоо хамт Америкт очих гэж
байгаадаа их баяртай байна гэхэд нь Александра эгчийнхээ гарыг атгаад,

- Би ч бас гэжээ.

- Аа тийм. Намайг юм хумаа янзалж байх хооронд чи эмээд утасдаад маргааш бид гэртээ
очно гээд хэлчихгүй юү? Энд бүр уйдаж залхлаа гэж хэлээрэй. За юу? гэхэд нь Александра
хэсэг эргэлзэн байснаа,

- За яах вэ, тэгье. Эмээ дургүйцэх байх даа гэсэнд,

- Эмгэний төлөө санаа бүү зов оо. Би аргална гэж Ева хэллээ.

Үүнд Александра огтхон ч эргэлзсэнгүй. Ева эмээгээр юу л бол юу хийлгэж чаддаг. “Ер нь
Евагийн хэлснийг хэн татгалзах вэ дээ” гэж Александра бодлоо.

Тэгээд утас авч залгалаа.

Кейт Блэкуэллд дээгүүр албан тушаалтай дотны сайн найз нөхөд ч олон, өстөн дайсан ч олон
бий. Сүүлийн хэдэн сарын түүний чихэнд элдэв муу юм сонсдох болжээ. Кейт анхандаа
хорон санаатны хов жив гэж тоож анхаарахгүй байлаа. Гэтэл элдэв цуу үг намдахгүй байв.
Ева Швейцарь дахь цэргийн сургуулийн сонсогчидтой дэндүү олон уулздаг гэнэ. Ева үр
хөндүүлсэн гэнэ. Ева өнгөний өвчин тусаад эмчлүүлж байгаа гэнэ.

Тийм болохоор ач охидоо ирэх гэж байгааг дуулаад Кейтийн дотор онгойж санаа алджээ. Ийм
муухай хов жив хаанаас гарч байгааг мэдэх гэсэн аж.

Хоёр бүсгүйг онгоцоор ирэхэд Кейт гэртээ хүлээж байлаа. Евагийн гараас хөтлөн
унтлагынхаа өрөөнд дагуулан аваачаад,

- Сүүлийн үед элдэв муухай юм их дуулдах боллоо. Юунаас болоод та хоёрыг сургуулиас
хөөсөн юм бэ? гэж Кейт асуугаад Еваг муухай харав.

- Биднийг хөөгөөгүй. Алекс бид хоёр сургуулиас гарахаар өөрснөө шийдсэн юм.
- Хөвгүүдтэй нөхцсөнөөс болсон уу?

- Болиоч дээ, эмээ. Энэ тухай яриад яах юм бэ гэж Ева гуйв.

- Ярих л хэрэгтэй дээ. Чи тэнд юу хийж байсан бэ?

- Би яагаа ч үгүй. Энэ Алекс л... гээд Ева амаа жимийв.

- Алекс яасан юм бэ? гэж Кейт ширүүхэн асуулаа.

- Түүнийг бүү зэмлээрэй, эмээ. Алекс миний оронд би болж тоглох их дуртай. Хүүхдийн
тоглоом шиг л юм даа. Би юу ч мэдээгүй байж байтал, сургууль дээр миний араар хов жив
ярих болсон... гэж Ева ичингүйрэв.

- Алекс өөрийгөө чамайг гэж хүн хуурч байгаа юм уу? Чи тэр тоглоомыг нь зогсоохгүй яасан
юм бэ? гэж Кейт ихэд гайхан асуув.

- Би болиулах гэж оролдож үзсэн. Гэтэл амиа хорлоно гэж айлгасан. Ай эмээ, Энэ
Алексийн... сэтгэл мэдрэл нь тогтворгүй юм шиг байна. Хэрэв та энэ тухай яривал Алекс яах
ч юм билээ, бүү мэд... гээд Евагийн нүдэнд нулимс мэлтэлзээд ирлээ.

Хөөрхий Евагийн ингэж их энэлэн зовж байгааг хараад Кейтийн сэтгэл амаргүй болж,

- Битгий уйл даа, охин минь. Би Александрад юу ч хэлэхгүй. Энэ чи бид хоёрын нууц байх
болно гэхэд нь,

- Би танд үүнийг ярихгүй гэж бодсон юм. Эмээ таны сэтгэлийг зовооно гэж мэдэж байсан
гээд Ева эхэр татан уйлсаар байлаа.

Сүүлд цай ууцгааж суухдаа Кейт Александраг ажин шинжээд, “Гаднаа гялалзсан сайхан,
дотроо ялзарсан муухай амьтан юм даа” гэж бодов. Александра тийм шившигтэй муухай юм
хийсэн нь тоогүй хэрэг. Өөрийгөө Ева гэж залилсан нь бүр долоон дор жигшүүртэй юм. Кейт
үүнд бүр балмагдаж орхив.

Дараагийн хоёр жил Ева Александра хоёр мисс Портерын сургуульд сурч байлаа. Ева
эмээтэйгээ эв эвдэрхээс айн овоо даруу төлөв байлаа. Эмгэн нэг их удаан тэсэхгүй, одоо 79
хүрч байгаа шүү дээ. Тэгээд Ева өв залгамжлагч болох бат итгэлтэй байхыг хүссэн хэрэг.

Ихэр охидыг 21 нас хүрэхэд Кейт тэднийг Парист дагуулан аваачиж, “Коко Шанель” иас шинэ
гоёл худалдан авч өгөв. “Ле Пти Ведуин” зоогийн газар оройн зоог барих үед Ева Александра
хоёр гүн Альфред Морье, түүний хатан Вивьен нартай танилцлаа. Гүнтэн буурал үстэй,
тамирчны чийрэг сайхан биетэй 50 орчим насны эр байлаа. Хатан нь язгууртны хүлээн авалт
хийдгээрээ нэрд гарсан, нүдэнд дулаахан авгай байв. Ева гүн хатан хоёрыг нэг их тоож
анхаарахгүй байж байтал хэн нэгэн нь гүнгийн хатанд хандан,

- Би Альфред та хоёрт атаархах юм. Та хоёр энэ дэлхий дээр хамгийн аз жаргалтай хосуудын
нэг мөн. Ханилаад хэдэн жил болж байгаа билээ? 25 уу? гэхийг сонсов. Альфред гүн
эхнэрийнхээ өмнөөс,

- Ирэх сард 26 жил болно. Би түүхэнд эхнэртээ ханийн бат журмыг нэг ч удаа алдаж
байгаагүй цорын ганц франц эр байх гэж хариулав.

Бүгд инээлдэж, ганцхан Ева л инээсэнгүй. Тэгээд зоог барьж дуустал Морье гүн, түүний
хатныг ажиглан байлаа. Гүнтэнд энэ хөгширч яваа хүзүү нь үрчийсэн, шалхгар авгайн юу нь
сайхан санагдагийг Ева гайхав. Энэ гүн ерөөсөө эр эмийн явдлыг жинхэнэ ёсоор нь хийж нэг
ч үзээгүй байх. Сайрхдаг нь дэмий юм болжээ. Альфред Морье гүнтэн Евагийн хор шарыг
хөдөлгөсөн байна.

Ева маргааш нь Морье гүнгийн ажил руу утасдаж,

- Би Ева Блэкуэлл байна. Та намайг лав мартсан байх гэсэнд,

- Таныг яаж мартах билээ дээ, хонгор жаал бүсгүй минь. Та миний найз Кейтийн ихэр ач
охидын нэг байх аа?

- Гүн та намайг мартаагүйд урамтай байна. Танд төвөг удсаныг минь уучлаарай. Таныг дарс
сайн мэддэг гэж хүнээс дууллаа. Би эмээдээ зориулж зоог барих санаатай. Ямар хоол хийхийг
бол би мэдэж байна. Харин дарсны талаар юу ч мэддэггүй. Тэгээд таныг надад зөвлөгөө өгч
туслах болов уу гэж найдсан юм.

- Дуртайяа зөвшөөрье. Ямар хоол өгөх гэж байгаагаас бүх зүйл шалтгаална. Загасан хоолтой
бол хөнгөн шабле дарс яг таарна.

- Өө эрхэм ээ, би үүнийг мартаж орхих байх. Та надтай уулзаж зөвлөгөө өгөхгүй юу? Хэрэв
та надтай үдийн зоог барихгүй юү?

- Кейтэд хамаатай юм бол би цаг гаргана.

- Яасан сайн юм бэ...

Морье гүн энэ үдийн зоогийг насаараа мартахгүй санаж явах болно. Тэр хоёр “Лассер”
зоогийн танхимд уулзав. Дарсны тухай яриа удаан үргэлжилсэнгүй. Морьегийн уйтгартай
лекцийг хайхрамжгүй сонсож байснаа Ева гэнэт,

- Би танд хайртай, Альфред аа гэхэд нь гүнтэн үгээ гүйцээж чадалгүй түгдрэн зогсоод,

- Юу гэнээ? Уучлаарай... гэв.

- Би танд хайртай гэж байна... гэхэд нь гүнтэн хундагатайгаасаа жаахан балгаад,

- Сайн ургацын дарс байна... гээд Евагийн гарыг чад чад алгадан инээмсэглэж,

- Журмын сайн нөхөд бие биедээ хайртай байх ёстой л доо гэв.
- Би тийм хайрыг хэлээгүй байна, Альфред аа.

Альфред гүн Евагийн нүдийг хараад ямар хайрын тухай ярьж байгааг нь даруй ойлгож, сэтгэл
нь үймрэв. Энэ бүсгүй дөнгөж 21 тэй, гүн өөрөө 50 гарсан. Эхнэртэйгээ жаргалтай сайхан
байдаг. Одоогийн бүсгүйчүүд юу болж байгааг гүн ойлгохоо больжээ. Энэ бүсгүйн өөдөөс
харж, үгийг нь сонсож суухдаа дотор нь эвгүй оргиж, сэтгэлийн тав алдагдаж байна. Ева бол
гүнгийн урьд хожим уулзаж явсан эмэгтэйчүүдийн дотроос хамгийн үзэсгэлэн гоо, хамгийн
хүсүүштэй бүсгүй байсан болохоор сэтгэлийн тав бүр ч их алдагджээ. Ева хул шар өнгийн
хуниастай банзал, биеэ барьсан ногоон углаа цамц өмсчээ. Цамцны цаанаас хөхний товч
товойж байгаа харагдав. Гүнтэн бүсгүйн гэмгүй нүдийг хараад хэлэх гэж байсан үгээ мартаж
орхив.

- Та... та ядахдаа намайг танихгүй шүү дээ.

- Би бүр жаахан охин байхаасаа таныг хүсэн мөрөөдөж байсан. Хуяг дуулга нь гялалзсан
өндөр гоолиг нуруутай цэвэрхэн сайхан баатар эрийг сэтгэлдээ төсөөлөн боддог байлаа.

- Миний хуяг дуулга жаахан зэвэрсэн болов уу даа. Би...

- Намайг битгий элэглээч дээ. Би өчигдөр оройн зоог дээр таныг хараад нүд салгаж чадахгүй
байсан. Би өөр юу ч бодож чадахгүй байлаа. Би шөнөжин таныг бодоод нойргүй хоносон.

Энэ сүүлчийн үг нь бараг үнэн байжээ.

- Танд юу хэлэхээ мэдэхгүй байна, Ева. Би эхнэртэй хүн...

- Ай би таны эхнэрт яасан их атаархана вэ? Эхнэр чинь энэ дэлхийн хамгийн азтай хүүхэн
юмаа. Үүнийгээ өөрөө мэддэг болов уу?

- Мэднэ л дээ. Би үүнийг үргэлж сануулж байдаг гэж гүн хэлээд эвгүйрхэн инээмсэглэв.

- Эхнэр чинь таны сайн сайхныг мэддэг юм уу? Таны хичнээн халуун хүсэлтэйг ойлгодог уу?
Таныг жаргаах гэж санаа тавьдаг уу? Би бол...

Гүнгийн сэтгэл жаахан тавгүйрхэн,

- Та залуу сайхан хүүхэн, мисс Блэкуэлл. Хэзээ нэгэн цагт өөрийн хуяг дуулга нь гялалзсан
баатартайгаа уулзаж л таарна...

- Би түүнийгээ олсон. Түүнтэйгээ үүл борооны хэрэг үүсгэхийг хүснэ.

Гүн танхимд байгаа бусад хүн сонсуузай гэж эмээн эргэж харав.

- Ева, та болиоч дээ... гэхэд нь Ева урагшаа тонгойж,

- Миний гуйх ганц юм энэ. Энэ тухай дурьдатгалыг би насан туршдаа хадгалж санаж явах
болно...
- Тэр болохгүй. Та намайг эвгүй байдалд оруулж байна. Залуу бүсгүйчүүд танихгүй эрд
иймэрхүү юм хэлэх ёсгүй гэж гүн бат хатуу хариулав.

Евагийн нүдэнд нулимс мэлтэлзээд ирлээ.

- Та намайг хэн гэж бодоо вэ? Би хавьтсан хүнтэй ээ... Би нэг л эртэй учирсан. Бид сүй тавиад
ханилан суух гэж байсан юм... гээд бүсгүйн хацрыг даган нулимс урсч,

- Тэр их сайхан сэтгэлтэй, энхрий янаг хүн байсан. Тэгээд хэдэн уулчинтай хамт ууланд
авирч яваад амь үрэгдсэн. Миний харсаар байхад тийм юм болсон. Их аймшигтай...

Морье гүн бүсгүйн алган дээр гараа тавьж,

- Намайг уучлаарай, Ева гэв.

- Та түүнтэй минь төстэй юм. Би таныг хараад Билл минь юм шиг санагдсан... Хэрэв та
надад ганцхан цаг бэлэглэвэл танд дахин хэзээ ч төвөг удахгүй. Та дахиад миний барааг олж
харахгүй. Тэгье л дээ... Альфред аа...

Морье гүн Еваг удаан харсны эцэст сэтгэл шулуудлаа. Эцсийн бүлэгт тэр франц эр шүү дээ.

Тэр хоёр өдрийн үлдсэн хэсгийг Сен-Ани гудамжинд байдаг жижигхэн зочид буудалд
өнгөрүүлэв. Морье гүн эхнэр авахын өмнө хэдэн хүүхэнтэй учрахдаа ийм юм огт үзэж
байсангүй. Евагийн биед шулмас шүглэсэн юм уу гэмээр, догшин хар шуурга шиг байлаа.
Орой тийшээ Морье гүн цаашид тэнхээгүй болсноо мэдрэв.

Хоёул хувцаслаж байх үед Ева,

- Хоёул хэзээ уулзах вэ, хонгор минь? гэсэнд

- Би чамд утасдамз гэж Морье хариулав.

Гүн энэ хүүхэнтэй дахин уулзахыг хүссэнгүй. Энэ хүүхэнд ад албин шүгэлсэн юм уу гэмээр
цаанаа л нэг аймаар. Ийм хүүхнийг америкчууд “хэрүүлийн эзэд” гэдэг. Тэгээд гүнтэн Еватай
дахин уулзахыг өчүүхэн ч хүсэхгүй байлаа.

Хэрэв тэднийг зочид буудалаас гарч явахыг Алиса Вандерлейк хараагүйсэн бол ингээд бүх
юм дуусах байсан билээ. Алиса Вандерлейк өнгөрсөн жил Кейт Блэкуэллийн байгуулсан
өглөг буяны нэг хороонд ажиллаж байжээ. Миссис Вандерлейк нийгмийн дотор дээгүүр байр
суурьтай болохыг халуун сэтгэлээр хүсдэг учир энэ нэг явдал нь түүний өмнө сайхан
бололцоо нээж өгсөн байна. Миссис Вандерлейк сониноос Морье гүн, түүний хатан, Кейт
Блукуэллийн ихэр ач охины гэрэл зургийг үзсэн байжээ. Саяны хүүхэн ихэр охидын аль нь
болохыг мэдсэнгүй. Энэ ч чухал биш. Миссис Вандерлейк үүргээ биелүүлэх ёстой байлаа.
Тэмдэглэлийн дэвтэрээс Кейт Блэкуэллийн гэрийн утасны дугаарыг олов. Харилцуурыг
гэрийн бойдаа авлаа.

- Миссис Блэкуэллтэй яримаар байна.

- Таны алдарыг асууж болох уу?

- Алиса Вандерлейк байна. Хувийн асуудлаар ярина.

Нэг минутын дараа Кейт Блукуэлл утсан дээр ирэв.

- Хэн бэ?

- Би Алиса Вандерлейк байна, миссис Блэкуэлл ээ. Та намайг санаж байгаа байх. Ноднин
жил бид хоёр өглөг буяны хороонд хамт ажиллаж...

- Хандивын тухай яриж байгаа бол та манай...

- Үгүй, үгүй. Би танд хувийн асуудлаар утасдаж байна. Танай ач охины тухай ярих гэсэн юм...
гэж миссис Вандерлейк яаран өгүүлээд, Кейт Блэкуэлл одоо намайг цайнд ч юм уу урих байх,
тэгээд аятайхан ярилцана. Энэ бол дотно нөхөрлөлийн эхлэл болно гэж бодлоо.

- Чухам юу юм бэ? гэж Кейт Блэкуэлл асуув.

- Үүнийг танд хэлэхийг би өөрийн үүрэг гэж үзэж байна. Хэдэн минутын өмнө таны нэг ач
охин Альфред Морье гүнтэй хамт зочид буудалаас гарч явахыг харлаа. Их сонин тохиолдол.

- Юу? Миний хоёр ач охины аль нь вэ? гэж Кейт асуухад миссис Вандерлейк эвгүйрхэн инээд
алдаад,

- Хэлэхэд хэцүү байна. Тэр хоёр их адилхан гэхэд нь

- Мэдээлэл өгсөнд чинь баярлалаа гэж Кейт хэлээд харилцуураа тавив.

Кейт сая авсан мэдээгээ эргэцүүлэн бодож хэсэг зогсов. Тэд нар өчигдөрхөн хамт оройн зоог
барьсан. Кейт Морье гүнтэй танилцаад 15 жил болж байна. Сая сонссон зүйл бол түүний зан
байдалд огт нийцэхгүй юм байна. Гэвч эрчүүд гэдэг уян зөөлөн хүмүүс. Александра
Альфредыг уруу татаж өвөр хормойдоо оруулсан бол...

Кейт харилцуураа аваад утас залгагч бүсгүйд

- Намайг Швейцарьтай яриулж өгөн үү? Лозани дахь Феривудын хүрээлэн гэв.

Ева орой гэртээ ирэхдээ царай нь улаан ягаан туяа татан байв. Морье гүнтэй ханатал
амрагласандаа ч бус, түүнийг ялж дийлж давсандаа ийнхүү баярлажээ.

“Морье гүнг ийм амархан эрхэндээ оруулж болсон юм чинь өөр хэнийг ч дөнгөж болох юм
байна. Дэлхий дахиныг өөрийн өмнө өвдөг сөхрүүлнэ дээ” гэж бодов. Номын санд ороход
Кейт тэнд сууж байлаа.

- Сайн уу, эмээ? Өнөөдрийг ямар янзаар өнгөрүүлэв дээ? Сайхан байв уу?
Кейт гоо үзэсгэлэнт охиноо ажин ширтээд зогсож байлаа.

- Төдий л аятай өнгөрүүлсэнгүй. Чи өдрийг яаж өнгөрүүлэв дээ?

- Дэлгүүрээр жаахан явлаа. Санаанд таарах юм олдсонгүй. Ерөөсөө хэрэгтэй бүх юмыг
маань та аваад өгдөг болохоор...

- Хаалгаа хаачих, Ева.

Ева эмээгийнхээ дууг сонсоод баахан болгоомжлон зузаан царсан хаалгыг хаав.

- Юу болоо вэ, эмээ?

- Юу болсныг чи өөрөө ярь. Би эхлээд Альфред Морьег нааш нь урих юм уу гэснээ энэ бүгд
дэндүү гутамшигтай гэж бодлоо.

- Би... би таны юу хэлж байгааг ойлгохгүй байна.

- Тэгвэл би чамд шулуухан хэлье. Чи өнөөдөр Морье гүнтэй унтсан байна.

Евагийн нүднээс нулимс асгарлаа.

- Таны тэр найз намайг яасныг та хэзээ ч мэдэхгүй болов уу гэж найдсан юм... Аймаар юм
болсон. Надад утасдаад хамт үдийн хоол идье гэсэн. Намайг архиар шахаж согтоогоод... гэж
Ева жигд тайван ярихыг хичээв.

- Дуугүй бай хэмээн Кейтийн зандарсан нь алгадаад авснаас өөрцгүй байв. Кейт ач охиноо
жигшин харж,

- Ямар булай юм бэ гэв.

Кейтийн хувьд энэ бол түүний нэгэн насны хамгийн хүнд хэцүү цаг байлаа. Ач охиныхоо
тухай хамаг үнэнийг сая л ойлгож мэджээ. Сургуулийн захирал авгайн, “Залуу авхай нар залуу
эрчүүлтэй уулзах гэж хүслэгийг би ойлгож байна, миссис Блэкуэлл. Хэрэв ёс зүйн дотор
олонд мэдэгдэлгүй өнгөрч байгаа бол би үүнд нь хэзээ ч саад хйидэггүй. Харин Ева бол
дэндэнэ гэхэд даанч дэндээд...” гэж ярьсан үг чихэнд нь сонсогдсоор байх шиг санагдав.

Ева хамаг буруугаа Александра руу тохсон.

Кейт бүх зүйлийг бүр эхнээс нь саналаа. Александра түлэгдсэн. Александра хаднаас нисэж
үхэх шахсан. Еваг далбаат завь жолоодож явахад Александра завинаас унаад усанд бүтэж үхэх
шахсан. Англи хэлний багшийг хэрхэн хүчиндснийг Евагийн ярьсаныг Кейт саналаа. “Мистер
Паркинсон миний англи хэлний шалгалтын ажлын тухай ярих хэрэг байна гэж хэлсэн. Тэгээд
намайг ням гаригийн үдээс хойш гэртээ очоорой гэсэн юм. Очиход мистер Паркинсон
ганцаараа байсан. Тэгээд унтлагын өрөөнд орж нэг юм үзүүлье гэхээр нь дагаад дээшээ
гарсан. Тэгтэл намайг орон дээрэээ дарж аваад...”
Бриакрестэд байхад Ева хар тамхины наймаа хйиж байна гэсэн ял зэмд унаад эцэст нь
Александрын буруу болж дууссаныг Кейт санав. Ева Александрыг буруушааж зэмлээгүй,
харин өмөөрч байсан. Өөрийгөө шударга журамт баатар болгож үзүүлдэг нь Евагийн сурч
амташсан арга. Ямар муухай хар санаа вэ?

Одоо тэгээд Кейт өөрийн өмнө сууж буй дур булаам хөөрхөн шулмасыг ажиглан харж байв.
“Ирээдүй чиний гарт байсан. Чи хэзээ нэгэн цагт Крюгер Брентийн тэргүүн болох ёстой
байлаа. Би чамайг хайрлан хүмүүжүүлж байсан”

- Энэ гэрээс зайл. Би дахиад чиний барааг харах хүсэл алга гэж Кейт хэлэхэд Евагийн царай
хувхай даав.

- Чи муу завхай эм. Үүнийг чинь яах вэ, би хэлтрүүлж болох байсан. Энэ бүхний дээр чи
худал хэлэх интэй хүн байна. Үүнийг чинь би хүлцэхгүй.

Огт санаандгүй байж байтал гэнэт ийм юм болоо. Евө цөхрөнгөө барж,

- Эмээ Александра намайг гүтгэсэн байвал яах вэ? гэсэнд,

- Александра энэ тухай юу ч мэдэхгүй байгаа. Би дөнгөж сая миссис Коллинзтэй ярилаа гэхэд
нь Евагийн дотор онгойж санаа алдаад,

- Ердөө энэ үү? Миссис Коллинз намайг үзэн яддаг., тэгээд... гэсэнд,

- Боль доо. Одоо би чамд итгэхгүй. Бүгд өнгөрсөн. Би өмгөөлөгчид хүн явуулсан. Чамд өв
үлдэхгүй гэж Кейт алжаангуй дуугаар өгүүлэв.

Ингээд тэнгэр цоорч, газар цөмөрлөө.

- Та ингэх ёсгүй. Би... би яаж амьдрах юм бэ?

- Чамд багавтар тэжээлийн мөнгө өгнө. Өнөөдрөөс эхлээд чи биеэ дааж амьдрах болно. Юу
дуртайгаа хийж болно... гээд Кейтийн дуу ширүүсч,

- Харин ямар нэгэн хэрүүл шуугиантай намтар чихэнд дуулдах юм уу, сонинд гарсан байх юм
бол, хэрэв чи өөрийн зан байдлаар Блэкуэллийнхний нэрийг гутаах юм бол чамд тэжээлийн
мөнгө өгөхөө болино, ойлгов уу?

Ева Кейтийн нүдийг эгцлэн хараад маргаж мэтгээд нэмэргүй болсныг ойлгов. Биеэ өмөөрөх
хэдэн арван учирлал аман дээр нь гарч ирсэн боловч дуугүй өнгөрлөө. Кейт босоод хоолой нь
зангирч,

- Чи намайг ойлгох уу, үгүй юу бүү мэд. Би урьд өмнө хэзээ ч ийм хэцүү шийдвэр гаргаж
байгаагүй юм байна гэв.

Кейт ингэж хэлээд цааш эргэж, намба төгс сүр жавхантай алхлан өрөөнөөс гарч одов. Кейт
гэрэл муутай унтлагын өрөөндөө ороод ганцаараа үлдээд чухам яагаад бүгд ийм болсныг
эргэцүүлэн бодов.

“Хэрэв Дэвид минь үхээгүй. Тони эцэгтэйгээ хамт байсан бол...”

“Хэрэв Тони маань зураач болох гээгүй бол...”

“Хэрэв Марианна үхээгүй бол...”

“Хэрэв... энэ яасан ашиггүй дэмий үг вэ?”

Ирээдүй хэмээгч уян зөөлөн шавар. Энэ зөөлөн шавраар юу ч барималдаж болно. Харин
өнгөрсөн үе бол цахиур чулуу мэт хатуу. “Миний хайрлаж байсан хүмүүс бүгдээрээ урван
нүүр бурууллаа. Дэвид, Тони, Марианна, одоо Ева” Там хэмээгч бусад хүмүүсийг хэлнэ” гэж
Сартрын хэлсэн нь үнэн юм. Миний энэ сэтгэлийн шарх хэзээ нэгэн цагт аньж эдгэрэх болов
уу?” хэмээн Кейт бодов.

Кейт ийнхүү сэтгэлийнхээ зовлонд энэлэн шаналж байсан бол Ева хилэгнэсэндээ байж суух
газраа олохгүй байв. Яамай байгаа даа, нэг эртэй оронд орж хоёр цаг хэртэй наргиа биз.
Гэтэл энэ эмгэн Еваг урьд өмнө үзэгдээгүй гэмт хэрэг хийсэн юм шиг аяглаж байна.
Хоцрогдсон муу мам. Зөнөг толгой. Ева сайн өмгөөлөгч олж байгаад шинэ гэрээсийг
хүчингүй болгуулна. Энэ эмгэнийг эцэг, эх нь солиотой хүмүүс байсан. Евагийн өв
залгамжлах эрхийг хэн ч хасаж чадахгүй. Крюгер Брент Евагийнх. Энэ компани чинийх гэж
эмэээ хичнээн хэлсэн билээ. Энэ Алексаас л болсон хэрэг. Тэр яаж хутган үймүүлж,
эмээгийн чихэнд юу гэж шивэгнэсэн юм бол? Алекс өөрөө компанийг гартаа оруулж авах
гэсэн юм байна. Хамгийн аймшигтай нь Алекс удахгүй үнэхээр бүх юмны эзэн болно.
Өнөөдөр хэдийгээр аймшигтай юм болсон ч Крюгер Брент Александрынх, Александра
компанийг гартаа оруулаад авна гэсэн энэ бодол даанч тэсэхийн аргагүй байлаа. “Би яасан ч
ийм байдалд хүргүүлж болохгүй. Ямар ч хамаагүй аргаар үүнд саад хийх хэрэгтэй” гэж Ева
бодлоо.

Александра цэцэрлэгт ном уншаад сууж байснаа Евагийн хөлийн чимээг сонсоод толгойгоо
өргөв.

- Алекс аа, би Нью Йорк орохоор шийдлээ гэхэд нь Александра эгчийнхээ өөдөөс гайхан
харж,

- Одоо ингээд үү? Эмээ ирэх долоо хоногт Далмаци руу аялал хийхээр төлөвлөж байгаа. Чи...

- Тэр Далмаци чинь хэнд хэрэгтэй юм бэ? Сүүлийн үед би амьдралын тухай эргэцүүлэн
бодох боллоо. Би тусдаа гарах цаг болсон байна. Би ямар жаахан охин биш. Тийм болохоор би
өөрөө жижиг байр олж аваад чамайг томоотой байвал хааяа ашиглахыг зөвшөөрнө гэж Ева
ярихдаа “Үүнтэй ингэж л ярих хэрэгтэй юм. Илүү дутуу сэтгэлийн хөдөлгөөнгүй, зүгээр
нөхөр журмын байдлаар. Хамгийн гол нь үүнд огт ажиг сэжиг авахуулахгүй байх хэрэгтэй
юм” гэж дотроо бодлоо.

Александра эгчийгээ зэмлэнгүй харж,

- Эмээ мэдэх үү?

- Би үүнийг өнөөдөр эмээд хэлсэн. Эмээ дургүй байсан л даа гэсэн ч миний үгээр болсон. Би
өөрөө ажил хийж амиа тэжээе гэсэн чинь эмээ тэжээлийн мөнгө заавал өгнө гэж зүтгээд,

- Хоёул хамт явах уу? гэж Александра асуув.

“Хоёр нүүртэй муухай амьтан, эхлээд муу Еваг гэрээс нь хөөлгөж орхиод одоо болохоор хамт
явна гэнэ шүү. Зүгээр, Евагаас салахад тийм ч амаргүй. Би та нарт бүгдэд чинь үзүүлээд өгнө
өө”

Ева өөрийн байртай болоод засал чимэглэлийн алдартай мэргэжилтэн хөлслөн авч байраа
янзлуулна. Ева өөрийн дураар ажиллах бүрэн эрх чөлөөтэй байх болно. Гэртээ эрчүүд урина.
Энэ насандаа анх удаа эрх дураараа наргин жаргана.

- Алекс аа, чи их сайхан сэтгэлтэй юм аа. Уг нь би нэг хэсэг ганцаараа баймаар байна.

Александра гунигтай нүдээр эгчийгээ харав. Эдүгээ хүртэл ихэр хоёр нэг ч салж үзээгүй
билээ.

- Бид үргэлж уулзаж байна биз дээ, тийм ээ?

- Тэгэлгүй яахав вэ. Чиний санаж байгаагаас олон уулзаж байх болно...
26-р бүлэг

Ева Нью Йоркт ирээд Кейтийн буугаарай гэж тушаасан зочид буудалд буув. Цагийн дараа
Евад Брэд Рожерс утасдаж,

- Эмээ чинь Парисаас утасдсан. Та нарын хооронд нэг юм болсон шиг байна гэхэд нь Ева
инээд алдаж,

- Үгүй л дээ. Ялимгүй жаахан будлиан гарсан гээд нэг намтар зохиож ярих гэснээ энэ нь
хичнээн аюултай байж болохыг даруй ухаарав.

Ева одоо болгоомжтой байх хэрэгтэй. Урьд бол мөнгөөр дутна гэж айх юмгүй, хэзээ ч
мөнгөтэй байдаг байсан. Одоо бол мөнгөнд санаа зовох боллоо. Эмээ нь хэдий хэрийн мөнгө
өгч байхыг мэдэхгүй болохоор энэ насандаа анх удаа аймшигтай санагджээ.

- Эмээ чинь гэрээслэлээ шинэчилж бичсэнээ чамд хэлсэн үү?

- Тийм. Нэг юм хэлж байсан гэж Ева аль болох тайван дуугаар хариулав.

- Бид энэ асуудлыг ярьж тохирох хэрэгтэй байна. Даваа гаригт 3 цагт уулзвал яах вэ?

- тэгье л дээ, Брэд ээ.

- Миний өрөөнд. Болох уу?

- Би очно...

Даваа гаригт 3-т таван минут дутуу байхад Ева Крюгер Брент руу орлоо. Харуул
хамгаалалтын офицер түүнийг хүндэтгэн мэндэлж, цахилгаан цатны хүн хүртэл таньж
байлаа. “Бүгдээрээ намайг таньж байна. Би чинь Блукуэллийн халуун бүлийн хүн шүү дээ”
гэж Ева бодов. Тэгээд дээгүүр албан тушаалын түшмэдийн ажилладаг давхарт гарч, хэдэн
минутын дараа Брэдийн өрөөнд сууж байлаа.

Кейт энэ ач охиндоо ямар их найдлага тавьж байсныг Брэд мэдэх болохоор Кейтийг утасдаж,
Евад өв залгамжлуулхаа болих санаатай байна гэж хэлэхэд их гайхжээ. Тэнд чухам юу
болсныг Бред төсөөлөхгүй байлаа. За ер нь энэ түүнд хамаатай зүйл биш. Кейт түүнийг мэдэх
хэрэгтэй гэж үзвэл өөрөө өөрт нь хэлнэ биз. Тушаасныг биелүүлэх нь Брэдийн ажил. Тэгээд
өмнөө сууж байгаа хөөрхөн залуу бүсгүйг хэрхэн зуур өрөвдөв. Брэд Рожерсын Кейттэй анх
танилцах үед Кейт мөн л ийм залуу байсандаа. Брэд өөрөө ч залуу байж. Одоо гэвэл халуун
хайрын сэтгэлийг нь Кейт хэзээ нэгэн цагт ойлгох болов уу гэж горьдсоор байгаа үсэн буурал
тэнэг,

- Чи зарим нэгэн бичигт гарын үсэг зурах хэрэгтэй байна. Уншиж үзээд дараа нь... гэж
Брэдийг эхлэн өгүүлэхэд,

- Заавал гарын үсэг зурах албагүй гэсэнд,

- Энэ их чухал юм шүү, Ева. Эмээгийн чинь гэрээс ёсоор чи бол таван сая долларын
хэмжээний итгэмжилсэн хөрөнгөөс зохих хэмжээний орлого авч байх хүн. Гэрээс ёсоор чи
энэ мөнгийг 21 – 35 насны хооронд хэзээ ч авч болно... гээд Брэд хоолойгоо засаж,

- Эмээ чинь чамайг 35 нас хүрэхэд энэ мөнгийг өгөх нь зүйтэй гэж үзсэн байна гэв.

Энэ нь алгадаад авснаас өөрцгүй байлаа. Брэд үргэлжлүүлэн,

- Өнөөдрөөс эхлээд чи долоо хоногт 250 доллар авч байх болно гэв.

Энэ бол байж болшгүй хэрэг. Гайгүй нэг палааж үүнээс үнэтэй байдаг. Ева долоо хоногт 250
доллараар амьдарч яасан ч чадахгүй. Еваг доромжлох гэж зориуд ингэсэн байна. Бас энэ муу
өөдгүй амьтан эмээтэй санаа нэг байдаг байх. Тэгээд одоо дотроо баярлаж байгаа биз. Ева
ширээн дээр байгаа бэхийн хүрэл даруулгыг шүүрч аваад тархийг нь хага цохимоор байлаа.
Тэр ч байтугай гавлын нь яс тас няс хийн хагарахыг сэтгэлдээ төсөөлөн бодов.

Брэд үргэлжлүүлэн,

- Чи дэлгүүрээс юм худалдаж авахдаа чек бичих юм уу, Блэкуэлл нэрийг ашиглаж болохгүй.
Худалдаж авсан юмныхаа мөнгийг бэлнээр төлж байх ёстой гэв.

Байдал улам бүр дордсоор...

- Цааш нь сонин хэвлэлд чиний нэртэй холбогдсон ямар нэг хэрүүл шуугиан намтар
хэвлэгдэн гарах юм бол тэжээлийн мөнгө өгөхийг аяндаа зогсооно. Ойлгов уу?

- Ойлголоо Ева шивэгнэв.

- Александра та хоёрын нэр дээр тус бүр таван сая долларын даатгалын гэрээ байгуулсан
байсан. Чиний гэрээг өнөө өглөө хүчингүй болгосон. Жилийн эцэс болоход эмээ чинь чиний
зан байдалд сэтгэл хангалттай байвал тэжээлийн мөнгийг хоёр дахин нэмнэ... гээд Брэд
Рожерс өгүүлээд, хэсэг дуугүй байсны эцэст,

- Бас нэг юм байна, Ева гэв.

- Юу вэ? гэхэд нь Брэд Рожерс нүдээ буулгаж,

- Эмээ чинь чамтай дахиж уулзахыг хүсэхгүй байна гэв.

“Яах вэ дээ ер нь, мажийхаар нь ганц очиж үзнэ” гэж Ева бодлоо. Брэд энэ бодлыг нь
тасалдуулж,

- Хэрэг гарвал надад утасдаж байгаарай. Чамайг энэ байшинд юм уу, өөрийн аль нэг эдлэнд
битгий үзэгд гэж Кейт хэлсэн гэв. Брэд уг нь энэ асуудлаар Кейттэй маргаж үзжээ.

- Ай тэнгэр минь, Кейт ээ. Чиний төрсөн ач охин, чиний яс махны тасархай шүү дээ. Тэгэхэд
чи уяман өвчтэй хүнээс сэжиглэж байгаа юм шиг хандаж байна гэхэд нь,
- Тэр чинь уяман өвчтэй хүн мөн шүү гэж Кейт хэлсэн байжээ.

Ингээд яриа дууссан байна. Одооо тэгээд Брэд биеэ цагаатгах гэж дэмий нэг оролдож байлаа.

- Ингээд гүйцэх шив дээ. Чамд асуух юм байна уу, Ева?

- Байхгүй.

Ева балмагдан өөрийн ухаантай ухаангүй хооронд байв.

- Тэгвэл бичиг баримтад гарын үсэг зураад...

Арван минутын дараа Ева гадаа гудамжинд зогсож байв. Цүнхэнд нь 250 доллар байлаа.
Маргааш өглөө нь Ева үл хөдлөх хөрөнгө худалддаг төлөөлөгчид утасдаж, суух байр эрж
эхлэв. Ева хүсэл мөрөөдөлдөө Төв цэцэрлэг тийш харсан цонхтой, үнэт хогшил тавилгатай,
зочид хүлээн авч болох тавцантай тансаг сайхан байр сэтгэлдээ ургуулан бодож байжээ.
Бодит байдал огт өөр боллоо. Долоо хоногт 250 долларын орлоготой хүнд Төв цэцэрлэг тийш
харсан цонхтой тансаг өрөө гэдэг бол санашгүй санаа. Евагийн чадал хүрэх юм гэвэл Бага
Италид байдаг ганц өрөө байр байв. Тэнд нэг буйдан ортой, үл хөдлөх хөрөнгийн төлөөлөгч
“номын сан” гэж нэрлэсэн булантай, гал тогооны жижигхэн өрөө, вааран хавтан нь
халтартсан халуун усны өрөөтэй аж.

- Танайд байгаа байрны хамгийн сайн нь энэ үү? гэж Еваг асуухад,

- Үгүй, Надад хотоос Саттон Плейст хорин өрөөтэй байшин бий. Өртөг нь хагас сая доллар.
Дээр нь арчилгааны зардлыг нэмнэ гэжээ.

Өөдгүй новш гэж Ева бодов.

Еваг маргааш нь тэр байранд нүүж очсоноос хойш жинхэнэ зовлон эхлэв. Тэр бол ёстой
шорон байлаа. Урьд эмээгийндээ байхдаа зөвхөн хувцасны шүүгээ нь энэ муу өмгөр өрөөнөөс
том байсан. Александра нь тавдугаар өргөн чөлөөний лут том байшинд жаргалтай сууж
байгааг Ева атаархан бодлоо.

“Ай тэнгэр. Тэгэхэд Александра түлэгдэж үхэхгүй яав даа?” Хэрэв тэгсэн бол Александра
үхээд Ева цорын ганц өв залгамжлагч болж үлдсэн бол одоо байдал огт өөр байх байсансан.
Кейт Евагийн өв залгамжлах эрхийг хасаж зүрхлэхгүй байсансан.

Кейт Еваг өв залгамжлах эрхээсээ ингээд зүгээр нэг татгалзана гэж бодож байгаа бол их
эндүүрч байна. Ева долоо хоногт 250 доллараар амь зуухыг хүсэхгүй. Банкинд 5 сая доллар
Еваг хүлээж байгаа. Түүнийгээ тэндээс авна. “Тэр мөнгийг гартаа оруулж авах ямар нэгэн
арга байх ёстой доо. Тэр аргыг нь олох хэрэгтэй юм” гэж Ева бодов.

Маргааш нь шийдвэр оллоо.

- Мисс Блэкуэлл танд юугаар тусалж болох байна вэ? гэж Эрвин Сигрэм эелдэгээр асуув.
“Нэшнал юнион банкны” дэд ерөнхийлөгч тэр хүн үнэхээр юу хий гэснийг нь хийхэд бэлэн
байжээ. Хэрэв өөрийн банкинд Крюгер Брэнтийн данс нээлгэж чадах юм уу, хагасыг ч гэсэн
нээлгэвэл толгой эргэмээр өөдлөн мандах энүүхэнд,

- Миний нэр дээр мөнгө хадгалуулсан байгаа, 5 саяыг. Зарим нэгэн хязгаарлалтын улмаас уг
мөнгийг би 35 нас хүрсний дараа авч болох юм... гэж Ева тайлбарлаад дур булаам хөөрхөн
инээмсэглэж,

- Тэр болтол хүлээнэ гэхэд даанч удаан санагдаад байна гэсэнд банкны хүн бас инээмсэглээд,

- Таны оронд байсан бол мөн яг ингэж бодох юм байна. Та 19 тэй юу?

- Би 21 тэй.

- Мисс Блэкуэлл та их хөөрхөн бүсгүй юм гэхэд нь Ева түүнд бас нэг инээмсэглэл шагнаад,

- Баярлалаа, мистер Сигрэм гэв.

“Бүх юм санаснаас амархан бүтэх төлөвтэй. Энэ чинь усан тэнэг амьтан байна” гэж Ева
бодлоо.

Банкны хүн Евагийн өөрт нь талтай байгааг мэдрээд, “Би энэ хүүхэнд таалагдаж байх шиг”
гэж боджээ.

- Танд чухам яаж тус болох байна?

- За, би энэ мөнгөний зарим хэсгийг урьдчилан авч болох болов уу гэж бодсон юм. Нас
хөгширхөөс өмнө одоо зандан цагт надад мөнгө их хэрэгтэй байна. Сүйт хархүү маань
барилгын инженер, одоо Израильд ажиллаж байгаа юм. Гурван жилийн дараа эргэж ирэх юм
гэж Ева ярихад Эрвин Сигрэм учрыг ойлгосон байдалтай толгой дохилзон,

- Таныг сайн ойлгож байна гэв.

Сигрэмийн зүрх булгилаад иржээ. Энэ хүүхний хүсэлтийг ёсоор нь болгож өгнө. Банкнаас
барьцаат капиталаар мөнгө зээллүүлэх бол захаас аван замаар үргэлж байдаг. Энэ хүүхний
сэтгэл баясаад Блэкуэллийн гэр бүлийн бусад гишүүдийг нааш нь явуулна. Сигрэм өөрөө
тэдний төлөө эрвийх дэрвийхээрээ зүтгэнэ. Үүний дараа дорхноо өөдлөн мандаад ирнэ.
Тэгээд хэзээ нэгэн цагт “Нэшнал юнион банкыг” толгойлох юу магад. Одоо өөрийн өмнө
сууж буй энэ дур булаам хөөрхөн хүүхний ачаар тэгнэ шүү дээ.

- Зовох юм байхгүй. Энэ бол онцын төвөггүй ажиллагаа. Бид танд бүх 5 саяыг зээлдүүлж
чадахгүй л дээ. Гэхдээ ухаан нь нэг сая доллар нэн даруй олгож болох байна. Танд энэ
хангалттай юу? гэж тэрээр өгүүлэхэд,

- Хангалттай гэж Ева хариулаад багтаж ядан баярласнаа нуухыг хичээв.

- Маш сайн байна. Та мөнгө хадгалуулсан болзолоо надад яриад өгвөл... гээд үзэг авахад нь,
- Та Крюгер Брэнтийн Брэд Рожерстой холбоо барьж болно. Тэр хүн танд шаардагдах
мэдээллийг өгнө.

- Би түүнд одоохон утасдая, гэхэд нь Ева босож

- Үүнд хэдий хэр хугацаа орох вэ? гэж лавлав.

- Нэг хоёр өдөр хэрэгтэй. Бүх бичиг баримтыг бүрдүүлэх талаар би өөрөө биечлэн
хөөцөлдөнө гэхэд нь Ева цэвэрхэн сайхан гараа сунгаж,

- Та их эелдэг найртай хүн юм гэлээ.

Еваг өрөөнөөсөө гармагц Эрвин Сигрэм харилцуураа авч,

- Крюгер Брэнт Лимитэд, Брэд Рожерстой залгаад өгнө үү гээд хамаг бие нь таатайхан
болоод ирэв.

Хоёр хоногийн дараа Еваг банкинд эргэж ирэхэд түүнийг Эрвин Сигрэмийн өрөөндөө
аваачлаа. Сигрэм түүнийг дөнгөж ормогц,

- Би мисс Блэкуэлл танд тусалж чадахгүй нь шиг байна гэхэд нь Ева чихэндээ итгэж ядан,

- Ойлгохгүй байна. Та үүнийг хялбархан ажил гэсэн шүү дээ. Та хэлэхдээ...

- Уучлаарай. Тэгэхэд би хэрэгтэй мэдээлэл аваагүй байсан... гээд Эрвин Брэд Рожерстой
ярьсанаа эргэж саналаа.

“Үнэхээр Ева Блэкуэллийн нэр дээр 5 сая долларын данс нээсэн байгаа. Та энэ хадгаламжаар
баталгаа болгоод өөрийн дуртай хэмжээний мөнгө олгож болох юм. Харин үүнийг чинь Кейт
Блэкуэлл нөхөрсөг биш ажил гэж үзэх болно гэдгийг сануулая” гэж Рожерс хэлсэн байжээ.

Хэрэв мөнгө олговол үүнээс уламжлаад юу болж болохыг Брэд Рожерс тайлбарлах хэрэг
байсангүй. “Крюгер Брэнтэд” нэр нөлөө ихтэй дотно хүмүүс олон бий. Хэрэв тэд нар
Нэшнал Юнион банкинд хадгалуулсан мөнгөө татах юм бол Эрвин ажилгүй үлдэнэ.

- Уучлаарай. Танд юугаар ч тус болж чадахгүй нь ээ гэж Сигрэм давтан өгүүлэв.

Ева цөхрөнгөө баран өөдөөс нь харав. Энэ байдал өөрт нь хичнээн хүнд цохилт болсныг
харуулахгүйг хичээж,

- Хөөцөлдөж өгсөнд тань баярлалаа. Нью Йоркт өөр олон банк бий. Баяртай гэсэнд

- Мисс Блэкуэлл. Нью Йорк битгий хэл, дэлхийн нэг ч банк танд туслаж чадахгүй болов уу
даа...

... Александра юу бодохоо ч мэдэхээ болив. Урьд нь эмээ нь Еваг аль болохоор эрхлүүлэн ая
тал тавьдаг байсан. Одоо юм бүхэн эрс өөр болжээ. Кейт Ева хоёрын хооронд ямар нэгэн
аймшигтай юм болжээ гэдгийг тааварласан боловч чухам юу болсныг тааж ядна.

Александраг энэ тухай яриа үүсгэхтэй зэрэг Кейт “Үүнийг яриад яах вэ. Ева амьдралынхаа
замыг өөрөө сонгож авсан хүн” гэдэг байв.

Бас Евагийн хэл амыг татаад ч юм олж мэдсэнгүй.

Харин эмээ нь одоо түүнд их цаг гарган анхаарах болжээ. Александра Кейтийн дэргэд байх
болсноор үл барам үйл ажиллагаанд нь идэвхтэй оролцох болов. Александрад “эмээ маань
одоо л намайг анх харж байна уу даа” гэсэн сэтгэгдэл төрж, эмээ нь түүнийг анхааран ажин
цэгнээд байх шиг санагддаг болжээ.

Кейт үнэхээр ч ач охиноо анх харж байгаа нь энэ. Нэг удаа “шатаж” хашраад одоо
Александрын тухай болгоомжтой төлөвлөж байв. Кейт Александратай ихээхэн цагийн хамт
өнгөрөөж, олон юм асууж, хариултыг нь анхааран сонсдог байлаа. Эцсийн бүлэгт сэтгэл
хангалуун байлаа.

Александрын дотоод ертөнцийг ойлгоход хэцүү, их бүрэг хүн. Александра ухаантай, эелдэг
зантай, бас гоо үзэсгэлэнтэй тул бүхний хайрыг татаж чаджээ. Түүнийг театр, дайллага,
үдэшлэгт олон урих боловч алийг нь хүлээн авах алийг нь татгалзахыг Кейт өөрөө шийддэг
байв. Гэвч энэ нь огт хангалтгүй байлаа. Кейт одоо Блэкуэллийнхний эзэнт гүрнийг
удирдахад нь Александрад туслах эрийг эрж олоход хамаг хүчин чармайлтаа чиглүүлэв.

Мэдээж Александра энэ тухай мэдэх хэрэггүй.

Тохирох хүн олсны дараа ярих цаг аяндаа олдоно. Кейт заримдаа Еваг дурсан санаад нойр нь
хулжин зовдог байв.

Энэ завсар Евагийн сэтгэл сэргэлэн, сайхан байх болжээ.

Эмээтэйгээ муудалцсаны дараа нэг хэсэг барьц алдан хүчиндээ итгэхийг болиод өөрийн
нэгэн маш чухал чадварыг мартсан байв.

Энэ юу вэ гэвэл Ева эрчүүдийг эрхэндээ оруулах ид шидийн хүч. Ева уригдаж очсон анхныхаа
үдэшлэг дээр зургаан эрд утасныхаа дугаарыг өгсний дөрөв нь эхнэртэй хүмүүс байж.
Дараагийн өдрөөс эхлээд тэд Евад утасджээ. Тэгээд Ева цаашид мөнгөний төлөө санаа зовох
хэрэггүй гэдгийг ойлгов. Түүнд үнэт эрдэнэсийн зүйл, уран зураг мэтийн үнэтэй бэлэг
барьна. Мөн өөрөө тэднээс мөнгө салгах арга сурлаа.

- Би саяхан нэг эргэнэг захиалсан юм. Миний чек ирээгүй байна. Чи туслахгүй юү гэнэ.

Тэгээд хэн ч гуйсныг нь үл татгалзана.

Олны дунд үзэгдэхдээ гагцхүү эхнэргүй ганц бие эрчүүдийг дагуулж явна. Эхнэртэй
харчуултай бол өдрийн цагаар байрандаа уулзана. Ева их болгоомжтой байх болжээ. Хэрүүл
шуугиантай мэдээний буланд өөрийн нэрийг хэрхэвч оруулахгүй байх талаар онцгой анхаарч
байв. Энэ нь долоо хоног тутам авдаг тэжээлийн мөнгөө алдах вий гэж айсандаа бус, харин
Кейтийг хэзээ нэгэн цагт өөрийн өмнө сөхрүүлнэ гэсэн бат итгэл юм. Кейтэд Крюгер
Брэнтийг удирдаж чадах өв залгамжлагч хэрэгтэй. Александра бол эрийн ая дагаж, гэрийн
мухар сахисан амьтан болно уу гэхээс өөр юу чадахгүй.

Ева нэг удаа “Хотын амьдрал” сэтгүүлийн нэгэн шинэ дугаарыг үзэж байгаад нэг аятайхан
залуутай бүжиглэж байгаа Александрагын зураг байхыг харав. Ева ихэр дүүгээ харсангүй,
хамт бүжиглэж байгаа залууг нь анхааралтай ажиглав. Тэгээд хэрэв Александра хүнтэй сууж,
хүү төрүүлбэл өөрийнх нь төлөвлөгөө бүтэхгүй болохыг гэнэт ухаарав.

Ева зурагнаас нүд салгалгүй удаан харав.

Нэг үе Александра Евад байнга утасдаж, үдийн хоол юм уу, оройн хоол хамт идье гэж урьдаг
байсан. Ева элдэв шалтаг хэлээд урилгыг нь хүлээн авахаас татгалздаг байв. Харин одоо
дүүтэйгээ уулзахаар шийдэж, Александраг гэртээ ирнэ үү гэж урив.

Александра эгчийнхээ байранд ирж үзээгүй байжээ. Ирээд харамсаж өрөвдөж байгаагаа
хэлэх болов уу гэтэл Александра харин,

- Сайхан байр байна. Их тохитой юм гэжээ. Ева инээд алдан,

- Тийм ээ, надад таалагддаг юм. Би хэзээнээс ганцаараа аминчхан байдалтай байхыг хүсдэг
байсан...

Ева нилээд их үнэт эдлэл, эрдэнэсийн зүйлийг барьцааны газар хадгалуулсан болохоороо уг
нь илүү тансаг сайхан байранд шилжин сууж бололцоо бий. Гэвч Кейт үүнийг мэдээд ийм их
мөнгө хаанаас олсон бэ? хэмээн шалж шаардаж магадгүй гэж хаширласан нь энэ аж.
Болгоомжлоход ер илүүдэхгүй.

- Эмээгийн бие сайн уу?

- Сайн... гээд Александра хэсэг эргэлзснээ,

- Ева, эмээ та хоёрын хооронд юу болсныг би мэдэхгүй юм. Гэхдээ харин би тус болж чадах
юм байвал..э гэсэнд Ева санаа алдаад,

- Чамд юу ч хэлээгүй юм уу? гэж асуув.

- Юу хэлээгүй. Энэ тухай сонсохыг хүсдэггүй юм.

- Эмээг зэмлэх юм алга. Хөөрхий минь, буруугаа мэдэж байгаа байх. Ийм учиртай, би нэгэн
залуу эмчтэй танилцсан юм. Бид хоёр ханилан суух санаатай. Тэгээд үүл борооны явдал
хйидэг л байлаа. Үүнийг эмээ мэдчихээд намайг гэрээс хөөж, миний нүдэнд битгий үзэгд
гэж загнасан. Эмээ маань дэндүү хуучинсаг үзэлтэй юм даа. Алекс минь гэж Евагийн ярихад
Алексийн царайд аргаа барсан байдал мэдэгдэж,

- Аймаар юм, Хоёулаа эмээтэй уулзаж ярья гэсэнд Ева,

- Тэр маань нисэх онгоцны осолд ороод үхчихсэн...

- Тэнгэр минь. Ева чи энэ тухай надад түрүүний хэлэхгүй яасан юм бэ?

- Чамд ярихаас ичээд байлаа л даа... Одоо чи мэдэх боллоо гээд Ева дүүгийнхээ гарыг чанга
атгав.

- Би эмээтэй яриад үзье. Эмээд учрыг нь хэлье...

- Хэрэггүй. Надад бас нэр төрөө бодох сэтгэл байна. Эмээд энэ тухай хэзээ ч хэлэхгүй гэж
амла. Хэзээ ч болохгүй, Алекс аа.

- Би бол эмээд яриад...

- Ярихгүй гэж амла гэхэд Александра санаа алдаад,

- За яах, тэгье гэж дурамжхан хариулав.

- Би жаргалтай сайхан амьдарч байгаа, Алекс. үүнд санаа зовох хэрэггүй. Дуртай цагтаа
гарна, дуртай цагтаа ирнэ. Энэ их сайхан. Эрх чөлөө их сайхан.

Александра Еваг эгцлэн хараад түүнийг хичнээн их үгүйлэн санадагаа ойлгов. Ева
Александрагын мөрөөр тэвэрч,

- Миний тухай ингээд цэглэе. Чи өөрийнхөө амьдралын тухай яриач. Сэтгэлийн зүрхний
эзэн, мөрөөдлийн хунтайжтайгаа уулзсан уу? Тийм үү?

- Үгүй дээ, Ева.

Энэ удаа Ева дүүгээ анхааралтай ажиглав. Энэ бол өөрийн нь толинд харагдаж буй дүрс мөн
байлаа. Ева өөрийнхөө энэ дүрсийг устгана, заавал шүү...

- Зүгээр. Удахгүй олно, түүнийгээ.

- Надад яарах юм алга. Би ч гэсэн амиа тэжээх мөнгийг өөрөө олохоор шийдээд байгаа. Энэ
тухай эмээтэй ярьсан. Дараа долоо хоногт зарлал сурталчилгааны агентлагийн захиралтай
уулзаж, ажлын талаар ярина.

...Ихэр охид Евагийн байрны ойролцоох жижигхэн ресторанд хоол идэж, хоолны мөнгийг Ева
өөрөө төлөв. Ева дүү хүүхнээсээ юу ч авахгүй байхаар шийджээ. Хоёул салах үед Александра
нь,

- Ева чамд мөнгө хэрэгтэй бол... гэсэнд

- Битгий дэмий ярь. Надад өөрт минь хүрэлцээтэй мөнгө бий гэхэд нь Александра
санаснаараа зүтгэж,
- Ямар ч гэсэн чамд мөнгөний хэрэг гарвал би дуртайяа туслана гэжээ.

Ева Александрагын өөдөөс эгцлэн хараад түүнийг үнэнээсээ хэлж байгааг нь ойлгов. Тэгээд
инээмсэглэн,

- Хэлснийг чинь санаж байя, Алекс аа. Үнэндээ надад мөнгөний хэрэг байхгүй л дээ гэв.

Удахгүй бүх юмыг бууриар нь хаман авах гэж байгаа хүн атга чимх юмаар яах вэ дээ. Гагцхүү
үүнийг яаж хийхээ сайтар бодож төлөвлөх хэрэгтэй юм. Ямар ч алдаагүй цэвэрхэн хийнэ.

Еваг амралтын өдөр Нассау арал дээр хамт өнгөрүүлье гэж урьжээ.

- Чамайг байхгүй бол бидэнд уйтгартай байх болно, Ева. Энд чиний бүх найз нар цуглана.

Швейцарьт сургуульд хамт сурч байсан Нита Людвиг гэдэг бүсгүй утасдсан байж. Ева тэнд
очоод шинэ эрчүүлтэй танилцах болно. Одоо явдаг эрчүүдээс нэгэнт уйсчээ.

- Аятайхан санал байна. Би очно гэж Ева хариулав.

Өдөр нь долоо хоногийн өмнө халуун сэтгэлдээ шатсан дээгүүр албан тушаалтай, эхнэр, хоёр
охинтой нэгэн хар хүний бэлэглэсэн маргад эрдэнийн шигтгээтэй бугуйвч барьцаанд өгсөн
байна. Тэгээд “Лорд энд Тэйлор” дэлгүүрээс зуны шинэ гоёл, Нассау орох онгоцны тасалбар
худалдан авлаа. Маргааш өглөө нь нисэх онгоцонд суусан байв...

Людвигийнхний эдлэн газар яг далайн хөвөөнд байдаг. Гол байшин нь гуч гаруй өрөөтэй,
хамгийн жижиг өрөө нь л гэхэд Евагийн бүх өрөөг нийлүүлснээс том. Зарц бүсгүй Еваг
өрөөнд нь дагуулж очоод Еваг усанд орж байх хооронд ачааг нь задлав. Дараа нь Ева найз
нартайгаа мэндлэхээр доош буув.

Танхимд 16 хүн байлаа. Тэд нар бүгдээрээ баян тарган хүмүүс. Зөвхөн өөртэйгөө эн зэрэгцэх
баян тарган хүмүүстэй харилцаатай байна гэдэг бол Нита Людвигийн гүн ухаан ажээ. Энэ
хүмүүс Нитатай адилхан амьдарч, Нитатай адилхан юм боддог болохоороо бие биетэйгээ
харилцахад амархан, хэл амаа ололцох нь сайн байдаг. Эд нар бүгдээрээ хамгийн нэртэй сайн
сургууль төгссөн, бүгдээрээ баян тансаг амьдралтай. Эдлэн газартай, яхта онгоцтой, хувийн
нисэх онгоцтой, бас татварын талаар адилхан бэрхшээлтэй тулгардаг. Эд бол давуу эрх
ямбатай дээдсийн хүрээнийхэн юм...

Мөнгөөр юм бүхнийг худалдан авч болохгүй гэж бодох нэг нь бодож л байг. Харин эд нар бол
мөнгөөр гоо үзэсгэлэн, хайр дурлал, энэ хорвоогийн бяан тансаг амьдрал, тэр бүр хэл хойт
насны диваажингийн жаргалыг эд мөнгөөр худалдан авдаг. Ева л зөнөсөн эмгэнээс болж энэ
бүхнээсээ хагацсан. “Гайгүй дээ, нэг их удахгүй” хэмээн Ева бодож байлаа.

Ева танхимд ороход яриа намдав. Энд олон сайхан хүүхэн байх боловч Ева Блэкуэллтэй
зэрэгцэх хүүхэн байсангүй. Нита Евагийн гараас барьж, урьд танихгүй хүмүүстэй
танилцуулав. Ева дур булаам инээмсэглэн, эрчүүлийг анхааралтай ажиглан, чухам хэнийг нь
өөрийн урхиндаа оруулахаа бодож байлаа. Хижээл насны эрчүүдийн олонх нь эхнэртэй. Энэ
нь харин ч Евагийн зорилтыг хөнгөвчилж өгнө.

Сул тавьсан өмдтэй, биеийн тамирын хавай цамцтай халзан эр Евад ойртон ирж,

- Уулзсан хүн болгон чиний гоо үзэсгэлэнг гайхан бахадсаар байгаад чамайг залхаасан болов
уу даа гэж бодож байна, гэхэд нь Ева түүнд нүүр шагнан инээмсэглээд,

- Гэсэн ч би ер залхдаггүй юмаа, мистер...?

- Петерсон. Намайг зүгээр л Дэн гэж дуудаж байгаарай. Чи Холливудын од болбол таарах
бүсгүй юм.

- Надад тийм авьяас байхгүй болов уу даа,

- Чамд өөр бусад олон авьяас их бий гэж итгэж байна гэхэд нь Ева учиртайхан инээмсэглэв.

- Үүнийг хүн бүр өөрийн биеэр үзэж байж мэдэх хэрэг... гэсэнд халзан эр уруулаа долоон,

- Чи энд ганцаараа ирэв үү, Ева? гэж асуув.

- Тийм.

- Тэнгисийн буланд миний яхта онгоц зангуугаа хаяад зогсож байгаа. Маргааш надтай хамт
бяцхан аялал хийх үү?

- Дуртайяа зөвшөөрье гэж Ева хариулав.

Петерсон малийтал инээж,

- Чи бид хоёр урьд яагаад танилцсангүй вэ? Би танай эмээг аль хэдийнээс танина гэхэд нь
Ева арай хийж биеэ бариад, инээмсэглэх дүр эсгэн.

- Манай эмээ гайхалтай хүн шүү... За бусадтайгаа нийлэх үү? гэсэнд Петерсон нүд ирмээд,

- Тэгье л дээ, харин маргаашийг битгий мартаарай гэжээ.

Петерсон Еватай дахиад хоёулхнаа ярьж чадсангүй. Ева хоолны үед түүнээс зугтаад байснаа
дараа нь зочдод зориулсан машины нэгэнд сууж хот оров. “Блэкбэрд Тауэр” Ардастрын
цэцэрлэгийн дэргэдүүр өнгөрөхөд нил дэглий нааш цааш хөлхөж байгаа харагдав. Хөлөг
онгоцны зогсоолын дэргэд хэсэг зогсож, загасчдын завиас том том яст мэлхий, халуун орны
загас нялцгай биетэн буулгаж байгааг харлаа.

Тэнгисийн булангийн усны мандал очир эрдэнийн толь адил гялалзана. Булангийн цаад талд
“Парадис-Айланд”-н хаялгана харагдана. Онгоцны зогсоолоос моторт завь тасарч хурд
авахын үед гурвалжин далавчтай шүхэр хөөрөн гарч ирэв. Энэ бол сэтгэл зүрх догдлом
үзэгдэл байлаа. Ева үүнийг илбэдүүлсэн юм шиг л нүд цавчилгүй ширтэн харав. Моторт завь
огцомхон эргэж, гурвалжин далавчтай эр хажуугаар нь ойрхон нисэж өнгөрөхөд Ева түүний
цэвэрхэн бор царайг харж амжив. Дараа нь тэр хүн, далайн зүг нисэн одлоо.

Тэр хүн Нита Людвигийн зочлох танхимд таван цагийн дараа орж ирэв. Түүнийг энд ирнэ
гэж Ева зөн совингоороо яагаад ч юм мэдсэн байжээ. Ойроос харахад бүр ч цэвэрхэн сайхан
эр юм. Өндөр нуруутай, чилгэр сайхан биетэй, бор царайтай, хар нүдтэй тэр сайхан эр лавай
цагаан шүд гялалзуулан инээмсэглэв. Нита түүнийг Евагтай танилцуулж,

- Энэ бол Жорж Меллис. Танилц Ева Блэкуэлл гэв.

- Ай тэнгэр, чи чинь Луврийн хүн шиг байна гэж Жорж Меллисийн хэлэхэд хоолой нь сөөнгө
агаад ялимгүй гадаад аялгатай сонсогдов.

- Явья, өвгөөн. Чамайг бусад зочидтой танилцуулья гэж Нита хэлэхэд Жорж гар занган
сэгсэрч,

- Хэрэггүй. Би танилцах гэсэн хүнтэйгээ танилцсан гэхэд нь Нита өөдөөс нь гайхан хараад,

- За яах вэ, хэрэг гарвал дуудаарай гээд эргэж явлаа.

- Чи Нитайтай арай ширүүн харьцаж байгаа юм биш үү гэж Еваг асуухад Меллис мушийн
инээвхийлээд,

- Би энэ удаа хэлсэн үгэндээ хариуцлага хүлээхгүй. Би дурлачихлаа. Нита намайг өршөөнө
байх гэхэд нь Ева инээд алдан,

- Нээрээ тийм байх. Чиний цэвэрхэн сайханыг би гайхаж байна.

- Энэ үгийг чамд буцаагаад хэлж болох байна гэв.

Ева энэ залууг мөнгөтэй болов уу, үгүй болов уу гэж сонирхсонгүй. Зүгээр өөрийн эрхгүй
сэтгэл татагджээ. Евад урьд өмнө өөр нэг ч эр ийм сэтгэгдэл төрүүлж байгаагүй билээ.

- Чи хэн бэ? гэж Ева асуув.

- Нитай хэлсэн шүү дээ, Намайг Жорж Меллис гэдэг.

- Чи хэн бэ гэж Ева дахин асуулаа.

- Аа чи философи утгаар асууж байгаа юм уу? Тэгвэл би тийм сонин хүн биш. Би Грек хүн.
Манай гэрийхэн оливын мод ургуулдаг.

“Аан энэ чинь тэр Меллис байж. Меллис гэсэн худалдааны таних тэмдэгтэй лаазласан олив
болон, оливын тос бүтээгдхүүн хүнсний дэлгүүр болгонд байдаг”

- Эхнэртэй юу гэж Ева асуухад Жорж жуумалзан,

- Чи дандаа ингэж халз дайрдаг уу?

- Үгүй.

- Би эхнэргүй.

Энэ үгийг сонсоод Ева өгүүлшгүй их баярлав.

Ева энэ залууг эрхэндээ оруулахсан гэж халуунаар тачаалан хүсэж, намайг эдлээсэй гэж
бодоод бодлоо толгой нь эргэв.

- Чи яагаад оройн хоолон дээр байгаагүй вэ?

- Үнэнээ хэлэх үү?

- Тэг

- Амин хувийн шалтгаан байсан.

Ева дуугүй хүлээж байв.

- Би нэгэн залуу хүүнийг амиа битгий хорлооч гэж ятгах хэрэг гараад... гэж Меллис
хайхрамжгүй өгүүлэв.

- Үгэндээ оруулж дөнгөсөн биз дээ?

- Дөнгөсөн. Чи харин тийм хүүхэн биш биз дээ?

- Хамгийн гол нь чи өөрөө тийм хүн биш байх хэрэгтэй

Жорж тас тас хөхөрч,

- Би чамд хайртай. Би чамд нээрээ дурлачихлаа байна гээд Евагийн гараас барихад бүсгүй
тэсэлгүй их хүсэхдээ хамаг бие нь чичрэв.

Жорж Теллис оройжин Евагаас төө ч холдсонгүй. Евад шампань дарс дөхүүлэн, тамхийг нь
асаан, сайхан хуруугаа биед нь хүргэх гэх мэтээр байнга ая тал засаж байлаа. Залуу эрийн
дэргэдээ байхад Евагийн дотор халуу оргин шатаж, хоёулхнаа үлдэх цагийг тэсэж ядан
хүлээв. Шөнө дундаас хойш зочид тарж эхлэхэд Жорж Меллис Евагаас,

- Өрөө чинь хаана вэ? гэж асуув.

- Хойт жигүүрийн сүүлчийнх...

Жорж толгой дохиж, өтгөн сормуусны дороос Еваг анхааралтай ширтэв.

Ева хувцсаа тайчин, шүршүүрээр биеэ угааж, биеэ барьсан нимгэн хар хувцас өмслөө.
Шөнийн нэг цагт үүдийг нь аяархан тогшиход Ева даруй тайлж өглөө. Жорж орж ирээд
бүсгүйг хэсэг бахдан харж,
- Чиний дэргэд Венус дагина юу ч биш юм байна гэж уулга алдахад нь,

- Надад түүнээс их давуу тал бий. Би гартай шүү дээ гэж Ева шивэгнээд Жоржыг тэврэн авч,
биед нь наалдаад залуу эрийн үнсэхэд толгой нь эргэн,

- Ай тэнгэр хэмээн ёоглон гиншив.

Залуу сайхан эр пиджакаа тайлахад нь Ева туслав. Дараа нь өмд, богино өмдөө тайлаад
Евагийн өмнө булчин шөрмөсөө зангируулан зогсож байв. Евагийн хүсэл тачаал бадран тэсэж
ядан,

- Бушуухан, намайг бушуухан эдлээч гэж шивэгнэсэнд,

- Цаашаа хар. Надад бөгс чинь хэрэгтэй гэж сайхан хархүү тушаалаа.

Ева өөдөөс нь гайхан харж,

- Юу? Би ... би мэдэхгүй... ннн... ойлгохгүй байна гэсэнд Жорж нүүр рүү нь нударга зангидан
цохив. Ева айж балмагдан, өөдөөс нь айдас дүүрэн харцаар бүлтийн ширтэлээ.

- Цаашаа хар!

- Үгүй...

Хархүү Еваг дахин цохилоо. Евагийн нүл эрээлжлээд явчихав.

- Цаашаа хар!

- Болиоч дээ! Гуйя...

Жорж Меллис түүнийг дахин хар тэнхээгээрээ цохиж, хүчирхэг гараараа биеийг нь эргүүлэн
өвдөг сөхрүүлэхийг мэдрээд,

- Болиоч дээ! Болихгүй бол хашгирлаа шүү! гэв.

Хархүү дахин цохилоо, Ева ухаан алдаж байгаагаа мэдрэв. Хархүү хоёр өгзөгийг нь яран
юмаа оруулахыг нь ухаантай ухаангүйн хооронд мэдэрлээ. Бие нь тэсэхийн аргагүй их өвдөв.
Ева хашгирах гэж ам ангайснаа дахин цохиод авах болов уу гэж айгаад дуугарч чадсангүй.

- Болиоч дээ, гуйж байна шүү дээ...

Ева гараас нь мутрахыг оролдсон боловч хархүү тавихгүй бөх барьж байгаад улам лав
шургуулахад бие нь дундуураа тасрах шиг санагдав. Тэсвэрлэшгүй их өвдөхөд бүсгүй ухаан
алдав. Хамгийн сүүлд хархүүгийн урт сунжруулан гиншигнэхийг сонсоод нүд нь
харанхуйлан, бүрмөсөн ухаан алджээ.

Еваг ухаан ороход Жорж хувцсаа өмсчихсөн зөөлөн сандал дээр тамхи татан сууж байснаа
орны дэргэд ирж, үсийг нь илэв. Түүнийг гар хүрэхэд Ева биеэ хураалаа.

- Бие чинь ямар байна, хонгор минь?

Ева өндийж суух гэснээ хөндүүрлэн өвдөхөд нь үрчилзэн ёолов. Хамаг бие нь хөндүүр
болсон байна.

- Өөдгүй муу адгуус... хэмээн хоолойгоо хэржигнүүлэн өгүүлсэнд хархүү тас тас инээж,

- Би чамтай харин ч эелдэг байсан шүү гэв.

Ева өөдөөс нь итгэж ядан ширтлээ. Меллис инээмсэглэж, үсийг нь дахин илээд,

- Би үүнээс догшин ширүүн байж чадна, үнэндээ ширүүн байх дуртай. Чамд хайртай
болохоороо эелдэг зөөлөн байсан. Удахгүй чи дасна, хараад байгаарай гэжээ.

Евад буу байсан бол энэ хархүүг дор нь буудаад алчих байсан сан.

- Чи солиотой амьтан байна

Хархүүгийн нүд гялалзан нударга зангидахад Ева үхтлээ айв. Энэ үнэхээр солиотой амьтан
ажээ. Ева айхдаа,

- Би чамайг гомдоох гээгүй юм аа. Ердөө... л би урьд нь ийм юм үзээгүй. Намайг орхиод
яваач. Би унтая. Гуйя л даа гэв.

Жорж түүнийг удтал харсны дараа булчин нь суларч, толины дэргэд очоод суурь дээр нь
байсан Евагийн цагаан алтан бугуйвч, очир эрдэнийн сондорыг үзэж байснаа сондорыг авч
халаасандаа хийгээд,

- Би үүнийг дурсгал болгож авья гэв.

Ева эсэргүүцэж зүрхэлсэнгүй.

- Тавтай нойрсоорой хонгор минь гэж хархүү хэлээд орны дэргэд ирж, Евагийн уруулыг
шимэн озлоо.

Ева түүнийг гарахыг хүлээж байгаад орон дээрээс босохдоо тэсэхүйеэ бэрх өвдөхөд нь уйлах
шахлаа. Алхах гишгэх бүрд хөндүүрлэнэ. Үүдээ түгжиж аваад сая нэг айх аюулгүй болсныг
мэдэрч санаа амарлаа. Халуун усны өрөөнд хүрч чадах эсэхийг мэдэхгүй, хэсэг зуур орон
дээрээ түрүүлгээ харан хэвтэж, өвчин намдахыг хүлээв. Уур хилэн нь оволзон шатаж байлаа.
Энэ хархүү туйлын үзэшгүй муухай ёсон бусаар хүчиндэв. Амиа хорлох гэж оролдсон тэр
бүсгүйг чухам яасныг сэтгэлдээ төсөөлөхгүй байлаа.

Ева халуун усны өрөөнд арай чамай хүрээд толинд өөрийгөө харж хэрдхийн цочив.
Хархүүгийн цохисон газар нүүр нь хавдаж, зовхи нь хөхөрчээ. Онгоц дүүрэн халуун ус
хийгээд, арайхийн дотор нь орж, өвчин жаал намдтал удаан хэвтэв. Ус нь хөрөхөд онгоцноос
гарч, хэд болгоомжтой алхахад өвчин нь жаал гайгүй болсон ч гэсэн явахад туйлын хэцүү
байв. Ева өглөө болтол түүнийг эргээд ирэх вий хэмээн айсаар цурам хийлгүй хонолоо.

Үүрээр цурам хийсэн Ева өглөө орноосоо босоод цагаан даавуу цус болсон байхыг үзэв.
“Гайгүй ээ, чи үүнийхээ өр төлөөсийг үзэх болно” Ева арайхийн хөдөлж, халуун усны өрөөнд
ороод халуун усанд удаан хэвтэв. Нүүр нь улам их хавджээ. Хүйтэн усанд алчуур норгон
хавдаж бүлцийсэн нүүр, нүдэн дээр тавилаа. Онгоцонд хэвтэж байхдаа Жорж Меллисийг
бодлоо. “Тэр садист аж... Түүнийг зан байдалд хүнийг тарчилган зовоох гажиггаас гадна бас
нэг хачин юм байх даа. Хүзүүний сондорыг минь аваад явсан. Яах гэсэн юм бол?”

Хоёр цагийн дараа хэдийгээр юм идэх дургүй байсан ч өглөөний цайнд доошоо буулаа.
Нитатай даруй уулзаж ярих хэрэгтэй байв.

- Ай тэнгэр минь, чи чинь яачих нь энэ вэ? гэж Нита уулга алдан угтлаа. Ева гунигтай
инээмсэглээд,

- Шал балай юм болоод оо, Шөнө жорлон орох гэж яваад танай олон царсан хаалганы нэгийг
мөргөчихлөө.

- Эмч дуудах уу?

- Хэрэггүй дээ. Жаахан хөх няц болоол биз... гээд эргэн тойрон харж,

- Жорж Меллис хаа байна? гэв.

- Теннис тоглож байгаа. Их сайн тоглодог юм. Жорж чамтай үдийн хоолон дээр уулзана гэж
байна лээ. Чи түүнд таалагдсан бололтой, найз аа.

- Түүний тухай яриач, Нита. Хэн юун хүн бэ? хэмээн Ева хайхрамжгүй байдалтай асуув.

- Жорж их баян, грек айлын хүүхэд. Ууган хүү нь. Тоолж баршгүй их эд хөрөнгөтэй. Өөрөө
Нью Йоркт “Хэнсок энд Хексон” брокерийн конторт ажилладаг.

- Гэр бүлийнхээ бизнесийг эрхлэхгүй яасан юм бол?

- Оливын тос санаанд нь таардаггүй биз. Ер нь Меллис өв залгамжлагч болохоороо ажил

хийх албагүй л дээ. Цаг өнгөрөөх гэж л нэг юм хийж байдаг байх. Шөнөдөө бол ёстой завгүй
биз, хи хи хи

- Уухай?

- Ээ найз минь. Жорж Меллисийг хүсэн хүсдэг хүүхэн зөндөө. Түүнийг нүд ирмэхэд л ямарч
хүүхэн дотоожоо шувтална. Үнэнийг хэлэхэд би нөхөргүйсэн бол оролдоод үзэх байсан сан.
Сайхан эр шүү, тийм ээ?

- Тийм гэж Ева хариулжээ.

Ева сэрүүн тагт дээр ганцаараа сууж байгаад Жорж Меллис орж ирэхэд айсандаа давхийн
цочлоо. Хархүү дэргэд нь хүрч ирээд,

- Өглөөний мэнд, Ева. Бие чинь сайн уу? хэмээн үнэнээсээ өрөвдсөн байдалтай асуугаад,
хавдсан нүүрэнд нь хуруу хүрч,

- Хонгор минь, чи дур булаам хөөрхөн байна гээд сандал авч мордон суугаад гялалзан буй
тэнгисийн мандлыг зааж

- Чи хараач, Ямар үзэсгэлэнтэй сайхан байгаль вэ? гэв.

Жорж урьд шөнө юу ч болоогүй юм шиг ярьж байлаа. Ева түүний үгийг сонсож суухдаа
түүнд дахин сэтгэл татагдаж байгаагаа мэдрэв. Өчигдөр шөнө тийм муухай юм болсны дараа
шүү! Энэ музейд байдаг грек сахиусан тэнгэрийн барималтай адил залуу, үнэндээ сэтгэл
мэдрэлийн эмнэлэг байвал дээр юм.

- Би маргааш өглөө эрт Нью Йорк буцах ёстой. Чамд яаж утасдах вэ? гэж Жорж Меллис
асуув:

- Би саяхан нүүсэн. Манайд одоохондоо утас байхгүй. Би өөрөө чамд утасдамз гэж Еваг
хэлэхэд Меллис сайхнаар инээмсэглэн,

- За тэгээрэй, хонгор минь. Би хүлээж байна шүү. Өчигдөр чамд сайхан байсан биз дээ, тийм
үү?

Ева буруу дуулав уу гэж бодов. Жорж дөхөн ирж чихэнд нь

- Чамд би өөр олон юм зааж өгнө... шивэгнэв.

“Жорж Меллис би ч бас чамд бага сага юм зааж өгнө” Ева дотроо бодлоо.

Ева гэртээ ирээд, Доротид утасдлаа. Папараци буюу хэвлэл мэдээллийнхэн алдар цуутай
хүмүүсийг их анхаардаг. Тэдэн дундаас Нью Йоркын Дороти хамгийн бат найдвартай нь юм.
Дороти урьд нь баян хүний эхнэр байсан аж. Нөхөр нь Доротиг хаяад 20 настай гарын туслах
хүүхэнтэйгээ нийлснээс хойш Дороти ажил хийж амиа тэжээх болжээ. Нэн удалгүй авьяас
чадалдаа тохирсон ажил олж, сонины хов живийн булан эрхэлдэг болжээ. Нийгмийн дээд
хэсгийн хүмүүсийг сайн таньдаг, хүмүүс түүнд итгэдэг болохоор Доротид мэдэхгүй нууц гэж
бараг байхгүй. Хоорондоо өрсөлдөгч баячууд нэгийгээ хорлох гэж Дороти долоон
булчирхайгаа тоочин ярьдаг. Олон хов жив дундаас Дороти үнэнийг олж чаддаг нь гайхалтай.
Евад Жорж Меллисийн тухай ярьж өгөх хүн байдаг юмаа гэхэд тэр бол Дороти мөн. Ева
түүнийг “Ла Пирамидад” урьж үдшийн зоог барив. Дороти бол зууван нүүртэй, улбар шар
үстэй, махлаг тарган авгай. Хүнгэсэн дуугаар ярьж, чанга, чанга инээнэ. Зөндөө үнэт
эрдэнэсийн чэмэг зүүлт зүүнэ. Даанч бүгд хуурамч эд дээ.

Хоол захисаны дараа Ева,

- Би саявтар Бахамын арлуудаар ороод ирлээ. Цагийг зугаатай сайхан өнгөрүүлсэн гэж
хайхрамжгүй байдалтай өгүүлсэнд,

- Мэднэ. Надад Нита Людвигийн бүх зочдын нэрс бий. Хөгжилтэй байв уу? гэхэд нь Ева дал
мөрөө хавчаад,

- Хуучин найз нартайгаа уулзлаа. Нэг сонин хархүүтэй танилцсан гээд нэрийг нь санаж ядан
байгаа дүр үзүүлэн магнайгаа атируулж,

- Жорж Миллер гэдэг грек хүн гэсэнд Дороти тас тас хөхөрч,

- Жорж Меллис шүү, найз аа гэв.

- Нээрээ тийм, Меллис. Чи түүнийг таних уу?

- Барааг нь харсан. Золтой л хүн чулуу болчихоогүй. Ай тэнгэр ёстой цэвэрхэн төрсөн эр
байна билээ дээ.

- Чи түүний тухай юу мэдэх вэ?

Дороти хүн дуулчихвий гэж болгоомжилсон мэт ийш тийш харснаа, Ева руу бөхийж,

- Хэн ч мэдэхгүй нэг нууцыг чамд хэлье. Жорж Меллис бол гэрийнхэндээ нүдэнд орсон хог,
шүдэнд хавчуулагдсан мах шиг ад үзэгдсэн хүн байгаа юм.Меллисийнхэн өгүүлэшгүй баян
улс. Том хүү Жоржоор гэр бүлийнхээ бизнесийг эрхлүүлэх бодолтой байсан гэнэ лээ. Гэтэл
Жорж олон удаа эвгүй юм хийж, хөвгүүд охидын аль алинтай нь наргиад байхаар нь эцэг эх,
дүү нар нь тэсээгүй. Тэгээд нааш нь Америк руу хөөсөн бололтой юм билээ.

Ева үг бүрийг нь анхааралтай сонсож байлаа.

- Хөөрхийд сохор улаан мөнгө өгөөгүй болохоор өөрөө ажил хийж амиа тэжээх хэрэгтэй
болдог гэсэн.

“Аан тийм болоод миний сондорыг авсан байж”

- Түүнд онц санаа зовох юм байхгүй л дээ. Нэг баян хүүхэнтэй сууна... Тэгээд л болоо...
гэснээ Еваг ажиглан хараад,

- Чи түүнийг яагаад сонирхож байгаа юм бэ?

- Нэг их сонирхоогүй л дээ

Энэ бол худлаа байлаа. Жорж Меллис Евад өөрийн асуудлыг шийдвэрлэх түлхүүр болж болох
юм. Жорж Меллис Евагийн баялагын түлхүүр болно.

Ева шөнөжин энэ тэрийг эргэцүүлэн бодлоо. Маргааш өглөө нь Жоржийн ажилладаг
брокерийн конторт утасдсанд, Жорж дууг нь даруй таньж,
- Чиний утасдахыг хүлээсээр байгаад галзуурах шахаж байлаа. Хоёул оройн хоол хамт идээд
дараа нь ... гэтэл Ева

- Үгүй. Хоёул маргааш уулзаж үдийн хоол идье гэсэнд Жорж гайхаж,

- За тэгье л дээ. Уг нь би маргааш харилцагч нартайгаа уулзах ёстой юмсан. Хойшлуулахаас

даа гэхэд нь Ева

- Маргааш, манайд, 12 хагаст гээд гэрийнхээ хаягийг хэлж өгсөнд, Жорж,

- Очно гэж дуртай нь аргагүй хариулжээ.

Жорж болзооноосоо хагас цаг хожимджээ.

Энэ чинь ёс мэддэггүй хүн байна гэж Ева бодлоо. Жорж Меллис хэн ч байсан өөрийг нь
хүлээж байгаа хүмүүст тоомсоргүй ханддаг аж. Жорж хэзээ дуртай цагтаа цэнгэн жаргаж
чаддаг. Жорж Меллис шиг цэвэрхэн төрсөн, хүний сэтгэлийг татаж чаддаг хүн хэрэв хүсвэл
энэ дэлхийг эзэлсэн ч чадна. Түүнд ганц л дутагдал бий. Тэр ядуу, бүр улаан мөнгөгүй. Энэ
бол түүний эмзэг газар юм. Ялангуяа асар их баялаг дунд өссөн, тэр их баялагийг бариад
алдсан болохооор мөнгөндөө, хөрөнгөндөө харамсана.

Жорж Евагийн байрыг үнэлэн цэгнэх мэт орчин тойрноо ажин хараад,

- Аятайхан газар байна гээд хоёр гараа сунган Евад ойртож,

- Би чамайг үргэлж бодоод байлаа гэхэд нь Ева түүнд тэврүүлэхээс зайлж,

- Байз. Надад чамтай ярих юм байна, Жорж! гэсэнд хархүү гайхасхийн өөдөөс нь эгцлэн
хараад,

- Дараа яримз гэхэд нь

- Үгүй. Одоо ярина. Хэрэв чи түрүүчийнхийгээ дахин хийх бол би чамайг ална гэсэнд Жорж
өөдөөс нь хачин мушийн инээвхийлээд,

- Тоглож байна уу?

- Тоглоом биш ээ. Би чамд ажил төрлийн санал тавих гэсэн юм.

- Чи надад ажил төрлийн санал тавих гэж урисан хэрэг үү?

- Ай даа. Чи хөгшин авгай нарт хувьцаа, үнэт цаас худалдаа хэдийг олдогийг мэдэхгүй. Харин
энэ чамд хангалтгүй байдаг гэж баттай мэдэж байна... гэсэнд Жоржийн царай хилэгнэсэндээ
минчийн улайлаа. Евагийн цохилт байгаа оножээ, Дороти үнэн хэлжээ. Жорж,

- Чи солиотой хүн? Манайх баян... гэхэд нь Ева

- Тийм ээ, танайх баян. Гэсэн ч чи ядуу. Манайх бас баян, гэвч надад сохор улаан зоос ч
байхгүй. Чи бид хоёр цоорхой завинд сууж байгаа улс. Энэ муу цоорхой завийг яаж яаж том
яхта онгоц болгох аргыг би мэднэ гэсэнд Жоржийн царайд сонирхсон байдал илэрч,

- За чи юу болсон юм бэ, түүнийгээ яриад байгаарай гэлээ.

- Гойд юмгүй. Миний асар их өвийг гараас алдуулсан. Миний ихэр дүү Александрыг бол
үгүй.

- Энэ чинь надад ямар хамаатай юм бэ?

- Хэрэв чи Александратай суувал энэ бүх хөрөнгө чинийх болно.

- Уучлаарай хөө. Би эхнэр авна гэж бодохоор дотор муухай оргиж байна шүү.

- Эхнэр авсны чинь дараа бид энэ асуудлыг шийднэ. Миний дүүд элдэв гай тохиолдох гээд
байдаг юм л даа...
27-р бүлэг

“Бэркли энд Мэтьюз” зарлал чимэглэлийн агентлаг Мэдисон авенью дахь бусад агентлагаас
мэдэгдэхүйц ялгаатай. Энэ агентлагийн гол харилцагчид нь Крюгер Брэнт компани болон
түүний харьяа олон арван үйлдвэр байдгийн ачаар жилийн орлого нь бусад агентлагын
орлогыг нийлүүлснээс их байдаг. 75 гаруй хариуцлагатай ажилтан, кино зохиолч, гэрэл
зурагчин, олон нийтийн мэдээллийн хэрэгслийн мэргэжилтэн нар зөвхөн Крюгер Брэнтд
зарлал сурталчилгааны хэсэгт ажилладаг юм. Тийм учраас Кейт Арон Бэрклид утасдаж,
Александрад тохирох ажил олж өгнө үү? гэхэд тийм орон тоо даруй олдсон нь гайхаар зүйл
огт биш аж. Бэркли Кейтэд нүүр тал олохын тулд Александраш бүр ямар нэг захирал болгоход
бэлэн байжээ.

- Манай охин зарлал сурталчилгааны мэргэжилтэн болохыг хүсэж байгаа юм гэж Кейт түүнд
хэлжээ.

Арон Бэркли яг зарлал сурталчилгааны хэлтэст орон тоо сул бий гэж Кейтэд батлан
илэрхийлээд Александраг хэзээ дуртай цагтаа ажилдаа орж болно гэжээ.

Ингээд Александра даваа гаригаас уул ажилд оров.

Яг Мэдисон авеньюд тийм ч олон зарлал сурталчилгааны агентлаг байдаггүй. Бэркли энд
Мэтьюз бол жичдээ. Энэ агентлаг Мэдисон авенью, 57 дугаар гудамж хоёрын буланд буй лут
том байшинд байрладаг. Энд найман дугаар давхарыг эзлэх бөгөөд бусдыг нь түрээлэдэг аж.
Арон Бэркли түүний түнш Норман Мэтьюз нар арвилан хэмнэхийн тулд хагас жилийн өмнө
ажилд орсон залуу бүсгүйг ажлаас нь халж, оронд нь Александаг авахаар шийджээ. Энэ тухай
яриа бүх агенлтагаар ам дамжин тарав. Залуу бүсгүйг ажлаас нь халаад оронд нь агентлагын
хамгийн гол харилцагчийн зээ охиныг авсаныг ажилтан нар мэдээд жигшин зэвүүцсэн нь
туйлгүй. Тэд нар Александратай танилцаагүй байж, биднийг тагнан улыг маань шагайх ёстой
өөдгүй гичий бий байх гэцгээж байлаа.

Александраг анх ажилд ирэхэд тэр даруй Бэрклийн асар том ажлын өрөөнд дагуулан аваачив.
Тэнд Арон Бэркли, Норман Мэтьюз хоёр хоёулаа хүлээж байлаа. Тэр хоёр хоорондоо тэс
ондоо хүмүүс аж. Бэрли өтгөн буурал үстэй, өндөр туранхай хүн байхад Мэтьюз нь гялаан
халзан толгойтой тагдгар тарган эр байлаа. Харин энэ хоёрт адил юм бий тэр нь эд хоёул
зарлал сурталчилгааны гоц сайн мэргэжилтэн, ёстой нэг эзэрхэг харгис амьтад ажээ. Энэ
хоёр захиргаандаа байгаа хүмүүсээ боол мэт үзэж, харилцах бөгөөд ажилтан нар нь иймэрхүү
харилцааг тэсэж байдагын цорын ганц гол шалтгаан бол Бэркли энд Мэтьюз нарын ажлийг
хиййж чадсан хүн юуг ч хийж чадах бөгөөд, тэднийг өөр хаа ч гэсэн дуртай ажилд авдаг
байна. Энэ бол ёстой л зарлал сурталчилгааны ажлын шилдэг сургууль байлаа.

Александраг дагуулж аваачсан өрөөнд компанийн дэд захирал Лукас Пинкерсон бас байлаа.
Тэр бол нүдний харц хүйтэн, намба төрх язгууртны ихэмсэг байдалтай хүн юм. Пинкерсон
нөгөө хоёр түншээсээ нас залуу боловч ажлын туршлага дутмагийг ажилтан нартайгаа
ширүүн догшин харилцдагаар орлуулдаг байна.

Арон Бэркли Александраг тохилог зөөлөн сандалд суулгаад,

- Мисс Блэкуэлл танд юу авчирах вэ? Цай юу? кофе юу?

- Баярлалаа. Юу ч хэрэггүй.

- Та зарлал сурталчилгааны ажил сурах гэж байгаа гэж эмээ тань хэлсэн.

- Надад тийм бололцоо олгосонд их баярлаж байна, мистер Бэркли. Надад туршлага байхгүй
ч гэсэн би их хичээнэ.

- Хн, тэгэх алба байхгүй... гэж Мэтьюз дуугарснаа өөрийн үгийн даруй засаж,

- Ийм ажилд нэг их яарах хэрэггүй гэж байна л даа. Танд бүхнийг сурах цаг хангаллтай байх
болно гэхэд нь

- Манайд энд танд аятайхан байна гэж найдаж байна. Манайд хамгийн шилдэг сайн
мэргэжилтэн нар ажилладаг юм гэж Арон Бэркли нэмж хэлэв.

Цагийн дараа Александра эндхийн ажилчид зарлал сурталчилгааны хамгийн шилдэг

мэргэжилтэн нар юмаа гэхэд тийм ч эелдэг зантай хүмүүс биш юм байна гэдгийг мэдэв.
Лукас Пинкерсон түүнийг ажилтан нартай танилцуулахад цаадуул нь их хүйтэн хөндий
хүлээж авлаа. Тэд нар түргэн зуур толгой дохисон болоод ажилдаа эргэж орцгоов. Александра
тэдний ёозгүй байгааг мэдрээд яиар шалтгаантайг ойлгож ядав. Пинкерсон Александраг нэг
хананд нь “Клиогийн” шагнал бүхий тавиуртай багавтар хурлын танхимд дагуулан аваачив.
Тэнд тамхины утаа дүүрэн байлаа. Дугуй ширээний ард сууж буй хоёр эрэгтэй, нэг эмэгтэй
сэт сэвээгүй тамхи татах аж. Эмэгтэй нь улбар шар үстэй намхан тарган хүүхэн байлаа.
Эрэгтэйчүүд нь нас дөч шахаж яваа, элдэвт санаа зовсон байрын цайвартай ажээ.

- Энэ чиний хамт ажиллах манай уран бүтээлийн баг. Элис Коппель, Винс Бернст, Марти
Бергимер нар. Энэ мисс Блэкуэлл гэсэнд тэр гурав Александраг харав.

- За танилцагтун... гэж Пиркерсон хэлээд Винст хандан,

- Сүрчигийн сурталчилгааны бичгийг маргааш өглөө надад бэлэн болгож өгөөрэй. Бас мисс
Блэкуэллийг юугаар ч дутаахгүй байх талаар анхаарч байгаарай гээд гарч одов.

- Танд юу хэрэгтэй вэ? гэж Винст Бернстыг асуухад санаандгүй байсан Александра жаахан
тэвдэн,

- Би... би зарлал сурталчилгааны ажил сурмаар байна гэсэнд,

- Тэгвэл та яг зохисон газраа олж иржээ. Бид таны багш болохсон гэхээс байж ядаж байна гэж
Элис өгүүлэхэд нь Марти түүнийг үгийг тасалж,

- Одоо боллоо гэв.

Александра сандарч,
- Би та нарыг юугаар гомдоосон юм бол?

- Зүгээр ээ. Одоо манайхны сэтгэл амаргүй байгаа цаг. Бид шинэ сүрчигийн зарлал
сурталчилгаан дээр ажиллаж байна. Мистер Бэркли, Мэтьюз нар бидний ажлын үр дүнд
сэтгэл дундуурхан байх шиг гэв.

- Би та нарт саад болохгүйг хичээнэ гэж Александраг хэлэхэд нь,

- Тэгвэл тун сайн байна санж гэж Элис бөвтнөв.

Өдрийн үлдсэн хэсэг нь үүнээс дээрдсэнгүй. Александрын өөдөөс инээх бүү хэл инээмсэглэх
хүн ч алга. Энэ муу гичийгээс болж ажлаа алдах юм биш байгаа гэж бүгд л Александраг
жигшин холуур тойрно.

Ажлын эхний өдөр дуусч байх үед Бэркли Мэтьюз нар Александрад гаргаж өгсөн жижиг
өрөөнд ирж, байдлыг үзлээ. Тэр хоёрын тийнхүү Александрын байдлыг харахаар ирсэн нь
бусад ажилчдын анхаарлаас мултарсангүй.

... Агентлагийхан бүгдээрээ бие биеэ зүгээр нэг нэрээр нь дууддаг боловч Александраг
болохоор тэгэхгүй.

- Намайг зүгээр л Александра гэж дуудаж байгаач гэхэд нь

- За тэгье гэх боловч дараа нь дахиад л мисс Блэкуэлл гэж дуудацгаана.

Александра бушуухан сураад, нийтийн үйл хэрэгт хувь нэмрээ оруулахыг хүсэж байлаа. Шинэ
санаа хэлэлцдэг зөвөлгөөнд оролцоно. Уран сайхны эрхлэгч нар эх ноорог хэрхэн бэлтгэж
байгааг ажиглана. Лукас Пинкерсон өөрөөр нь батлуулахаар авч очсон сурталчилгааны
зургийн төслийг авах юмгүй болтол шүүмжилж байхыг сонсов. Түүнтэй ажиллаж байгаа
хүмүүсийг Александра өрөвддөг байв. Александра хэлтсийн дарга нарын зөвлөгөөнд суух,
харилцагч нартай уулзах, гэрэл зургийн сеанст оролцох гээд давхар давхраар гүйнэ.
Хүмүүсийн яриаг чагнан дуугүй суух нь олон. Эхний долоо хоног дуусахад бүтэн сар
өнгөрсөн мэт санагдаж байлаа. Александра туйлдаж ядраад харьдаг байлаа. Ажилдаа
түүртсэндээ тэр биш, хамт ажилладаг хүмүүсийн тэсэхийн аргагүй байдал бий болгосноос
тэр юм.

- Ажил явдал ямар байна даа гэж Кейтийн сонирхон асуухад,

- Их сайн. Тэндхийн юм бүхэн сонин сайхан байна гэв.

- Чиний ажил бүтэмжтэй болно гэж итгэж байна. Алекс аа. Ямар нэг асуудал гарвал мистер
Бэркли юмуу Мэтьюзд хэлж байгаарай.

Александра чухам ингэх л дургүй байлаа.

Александра маргааш нь ажилдаа очихдоо хүнийрхүү хүйтэн хөндий байдлын хэрмийг хэмх
цохих арга олохоор хатуу шийджээ. Өглөөгүүр, мөн үдийн завсарлагаар ажилтан нар кофе
ууж, хоорондоо элдвийг ярилцана.

- Нэшнл Медиагийн юу болсныг дуулсан уу? Нэг цэцэрхүү амьтан пүүсдээ олны анхаарал
татах гээд санхүүгийн тайланг нь Нью Йорк Таймст улаан өнгөөр нийтлүүлсэн гэнэ.

- Нөгөө нэг нисэхийн компанийн эрмэлзэх уриаг санаж байна уу? “Эхнэртэйгээ хоёул нэг
билетээр” гэсэн байдаг. Энэ уриа нь их амжилттай биелж байтал уг компаниас өөрийн
онгоцоор ниссэн зорчигчдын эхнэрүүдэд талархлын захидал явуулдаг болсноос хойш хэрэг
бишдэсэн гэнэ. Ийм захидал авсан эхнэрүүд галзууртлаа уурлаж, эр нөхрүүд нь хэнтэй хамт
ниссэнийг мэдэх гэж компанийг захидалаар булж байгаа гэнэ. Цаадуул нь...

Ингэж ярьцгааж байснаа Александраг орохтой зэрэг бүх яриа дороо зогсолоо.

- Танд кофе авчирах уу, мисс Блэкуэлл?

- Баярлалаа. Би өөрөө авчирна.

Александраг өөртөө кофе аягалаж байх зуур тэр байранд чимээгүй байлаа. Түүнийг гармагц
яриа дахин сэргэнэ.

- Цэвэр савангийн зарлал сурталчилгааны тухай дуулсан уу? Гэрэл зургийг нь шошго дээр
гаргасан тэнгэрийн дагина шиг хөөрхөн хүүхэн садар самуунын од байсан гэнэ.

Александра үдийн завсарлагаагаар Элист хандан,

- Хамт хоолонд явах уу? гэсэнд,

- Уучлаарай, би болзоотой гэв.

Александра Винсийн өөдөөс харсанд

- Би бас адил гэв.

Марти руу харахад,

- Хоол идэх завгүй, хоолойгоор татсан их ажилтай гэжээ.

Александрын урам хугараад хоол идэх дургүй болжээ. Эд нар Александраг шоовдор хүүхэд
мэт нүд үзүүрлэх боловч бүсгүй бууж өгсөнгүй. Тэгээд хэдийгээр нэр сүртэй баян айлын
хүүхэд боловч эд нартай л адилхан хүн гэдгээ үзүүлэх арга олохоор шийдэв. Мэтьюз, Бэркли,
Пинкерсон нар гар хумхилгүй зүтгэн ажилладаг ажилтан нараа загнан зандарч байхыг
бишгүй сонсчээ. Александра тэднийг өрөвдөх боловч тэд нар түүний өрөвдөх сэтгэлээр
дутаагүй. Александра өөрөө ч тэдэнд хэрэггүй хүн юм байна.

Гурван хоногийн дараа Александра бас дахин оролдож үзэв. Элист хандан,

- ... энүүхэн ойрхон жижигхэн итали гуанз байдаг гэж сонссон юм байна... гэсэнд Элис
- Би итали хоолонд дургүй гэжээ. Винст,

- Турах гээд цагаан хоол идэж байгаа гэв. Марти болохоороо,

- Хятад хоолонд илүү дуртай гэв.

Александрын царай улайв. Эд нар түүнтэй харилцахыг огт хүсэхгүй байгаа юм байна шүү
дээ. За яах вэ чөтгөр алгадаг, та нарыг бүгдийг чинь!

Одоо боллоо. Александра эд нартай ойртож нөхөрлөхийг аль чадлаараа оролдсон. Гэтэл эд
нар өөрийг нь зовоож байна. Энд ажилд ордог нь дэмий юм болжээ. Хэн болохыг нь нэг ч
хүн мэдэхгүй өөр газар ажилд орьё. Дараа долоо хоногт энэ ажилаас гарья гэж гуниглан
боджээ.

Мягмар гаригт үдээс хойш утас залгагч нараас бусад нь бүгдээрээ үдийн хоолонд явсан үед
Александра зориуд саатаж үлдэв. Дарга нарын тасалгаанд тэднийг янз бүрийн хэлтэстэй
холбосон дотоод утас байдаг. Дарга нар хэн нэгэн ажилтнаа дуудах гэвэл дор нь зохих хүний
нэрий бүхий товчийг дарах хэрэгтэй. Александра Арон Брэкли, Норман Мэтьюз, Лукас
Пинкерсон нарын хоосон тасалгаанд сэмхэн ороод нэрнүүдийн байрыг солин хутгаж
орхилоо. Лукас хоолны дараа эргэж ирээд ахлах редакторыг дуудах гэж нэг товч дарж,

- Одоохон над дээр ороод ир гэж архирлаа.

Хэсэг дуугүй байсны дараа,

- Юу гэнээ? хэмээн Мэтьюзийн чих дөжирөм чанга зандрах сонсдоход нь Пинкерсон утсаа
гайхан харж,

- Мистер Мэтьюз, та юу? гэв.

- Өөр хэн байх юм вэ, чөтгөр алгад. Тэгэхээр одоохонад дээр ороод ир!

Минутын дараа ерөнхий редактор харилцуурын товчыг дараад,

- Надаас нэг хувийг аваад доош нь аваачиж өг гэсэнд өөдөөс нь Арон Бэркли

- Юу гэж хашгирав.

Ухаанд багтамгүй хачин юм боллоо. Нэрсийг зохих журмаар буцааж байрлуулахын тулд 4 цаг
хэрэгтэй болов. Энэ бол агентлагын ажилтан нарын амьдралд хамгийн хөгжилтэй ажлын
өдөр байлаа. Буруу дуудах бүрд бүгд тас тас инээлдэж байв.

Дарга нарыг тамхи аваад ир, эвдэрсэн тосгуур засаад өгөөч, эсвэл захиа хүргээд өг гэх
мэтчилэн гуйж байв. Бэркли, Мэтьюз, Лукас нар буруутай этгээдийг олох гэж бүх юмыг
орвонгоор нь эргүүлсэн боловч тэдний чармайлт ямар үр дүнгүй хоцров.

Харин дарга нарын утас залгагч бүсгүй л дарга нарыг үдийн хоолонд явсан үед Александраг
тэдний орж байхыг харсан байжээ. Гэвч утас залгагч Фрэн бүсгүй дарга нараас илүү, дарга
нарын судасыг барьж байдаг Кейт Блэкуэллийн ач охиноос илүү айжээ. Тийм болохоороо
хэнийг хараагүй гэж хэлсэн юм. Харин тэр орой бүсгүй нууц амраг Винс Бернсдээ унтахын
өмнө юу харснаа хэлжээ. Чухам юу болсныг сонсоод Винст орон дээрээ өндийж суугаад,

- Юу? Ээ чөтгөр алгад. Блэкуэлл үүнийг хийсэн гэж үү? хэмээн дуу алджээ.

Маргааш өглөө нь Александрөг өрөөндөө ороход тэнд түүнийг Винст, Элис, Марти гурав
хүлээж байлаа. Тэднийг хэн нь эхлэхээ мэдэхгүй дуугүй байхаар нь Александра,

- Ямар нэгэн явдал болоо юу? гэж асуусанд, Винст

- Зүгээрээ, Алекс аа. Бидэнтэй хамт үдийн хоол идэхгүй юу л гэж... Бид энүүхэнд нэгэн
жижиг итали гуанз байдгийг мэднэ гээд инээмсэглэв.
28-р бүлэг

Ева хүмүүсийг захирах авьяас чадалтайгаа бүр багаасаа мэддэг байсан. Урьд бага байхад
тоглоомтой адил байсан бол одоо үхэх, сэхэхээ үзэх дээрээ тулаад байна. Евагийн өв хөрөнгө
залгамжлах эрхийг хасаж хилсдэж хэлмэгдүүлсэн. Энэ бол Александра болон сэжигч зөнөг
эмгэн хоёрын хийж байгаа ажил. Эд нараас хариугаа авна. Энэ бодол Евад туйлын
тааламжтай санагдаж, золтой л хий тавьсангүй. Одоо тэр хоёрын амь нас Евагийн гарт буй...

Ева төлөвлөгөөгөө нарийн нягт боловсруулж, бүх нүүдлийг урьдаас сайн бодов. Хамгийн
эхлээд Жорж Меллистэй жаахан зууралдах хэрэг гарсан.

- Ай тэнгэр минь. Энэ чинь их аюултай ажил байна. Больё чи минь! Надад мөнгө хэрэгтэй
болбол би ийм осолтой юм хийлгүйгээр олж дөнгөнө гэхэд нь Ева үл тоомсорлон,

- Ямар аргаар? Үсээ цэнхэрээр будсан хөгшин авгай нартай явалдаж уу? Чи иймэрхүү янзаар
насаа барах бодолтой байна уу? Чи таргалж, нүдний чинь эргэн тойрон үрчлээ суухаар яах
вэ? Үгүй дээ, Жорж. Би чамайг ухаантай залуу бодсон юм. Чамд дахиад ийм боломж хэзээ ч
олдохгүй. Хэрэв чи миний үгэнд орох юм бол чи бид хоёр энэ дэлхий дээрхи хамгийн том
компанийг гартаа оруулж авна. Миний үгийг дуулж байна уу, чи? Дэлхийн хамгийн том
компанийн эзэн!

- Төлөвлөгөө чинь биелэнэ гэж чи яаж мэдэж байгаа юм вэ?

- Яагаад гэвэл би эмээ, Алекс хоёрыг сайн мэднэ. Тэдний занг надаас илүү хэн ч мэдэхгүй.
Надад итгээрэй. Санасан хэрэг минь сэтгэлчлэн бүтнэ шүү.

Евагийн дуу бат итгэлтэй байсан боловч Жоржид талаар зарим нэг эргэлзээ байлаа. Ева бол
өөрийн үүргийг ямар ч өө сэвгүй биелүүлнэ. Харин Жорж яадаг бол? Энэ чинь яаж ч мэдэх
хүн. Нэг юман дээр алдаа гарвал бүх төлөвлөгөө нуран унана.

- За шийд. Зөвшөөрөх үү, үгүй юү? гэж Еваг шаардахад Жорж өөдөөс нь удааг ширтсний
эцэст,

- Зөвшөөрье гэж хариулаад Евагийн дэргэд очиж, мөрөөр нь тэврэн,

- Харин одоо чамтай учирмаар байна гэж хоолойгоо хэржигнүүлэн өгүүлэхэд нь,

- Болох юм. Харин хэвийн байдлаар шүү... гэж Ева хэлээд хүсэл тачаал нь бадрахыг мэдрэв...

Хоёул оронд орлоо. Жорж нүцгэн байхдаа сайхан адгуус лугаа адил ажээ. Бас их аюултай
адгуус. Энэ нь тачаалыг улам хөдөлгөнө. Ева одоо Жоржийг захирч чадах болжээ. Тэгээд
залуу эрийн сайхан биеийг үнсэн таалж,

- Намайг ав, Жорж гэж шивэгнэв.

- Цаашаа хар
- Үгүй минийхээр.

- Надад дэмий байдаг.

- Мэднэ. Чи намайг хөвгүүн гэж бодоогүй биз дээ. Үгүй дээ хонгор минь. Миний дээр гар,
ажилаа хий!

Жорж үгийг нь дуугүй дагав.

- Ийм маягаар миний хүсэл ханадаггүй юм... гэхэд нь Ева инээд алдан амьсгаадаж,

- Тэр надад ямар хамаатай юм бэ? Миний хүсэл ханавал болоо гэв.

Эрийн аргын эд лавхан орж ирэхийг Ева мэдрэн бөгсөө идэвхийлэн хөдөлгөж эхлэв. Тийнхүү
дараа дараагаар тавьж байхдаа залуу эрийн царайд дурамжхан байгааг ажиглав. Жорж энэ
хүүхнийг өвтгөж, хашгируулах хүсэл оргиловч зүрх нь хүрсэнгүй.

- Дахиад гэж Ева тушаахад залуу эр хөдөлгөөнийг нь даган хүүхнийг хүсэл ханаж, гиншин
ёолон үргэлжлүүлэв.

- ах-аах. Одоо боллоо..

Жорж бууж хажууд нь хэвтээд Евагын хөхийг базан,

- Одоо миний ээлж, би... гэсэнд

- Хувцсаа өмс! гэж Ева ширүүн тушаав.

Залуу эр уурласандаа хамаг бие нь чичрэн орноос босов. Ева түүнийг дооглох байдалтай
жуумалзан,

- Жорж, чи дуулгавартай сайн байлаа. Чамайг шагнах хэрэгтэй. Би чамд Александраг өгөх
санаатай байна гэв.

... Александрын амьдралын юм бүхэн нь өөр болжээ. Сүүлчийнх гэж бодож байсан өдөр нь
түүний хувьд ялгуулсан баярын өдөр болж дуусаж, айлын шоовдор хүүхэд мэт байснаа одоо
баатар болжээ. Түүний хийсэн хөгтэй хэргийн тухай мэдээ бүх Мэдисон авеньюгаар тарав.

- Чи ёстой домогт баатар боллоо гэж Винст өгүүлэв.

Александра ажилдаа их дуртай. Ялангуяа бүтээлч нөхцөл байдал сэтгэлийг нь татна.

Александра зарлал сурталчилгааны ажилд насаа зориулахгүй гэдгийг мэдэж байлаа. Цаашид
юу хийхийг өөр ч мэдэхгүй байгаа. Александраг эрчүүд эргүүлэн, суух санал тавьсан бөгөөд
хоёр ч удаа яг зөвшөөрдөгийн даваан дээр яагаад ч юм бэ бүү мэд нэг л түдгэлзээд байв.
Александра ухаангүй дурлаж болох эртэй уулзаагүй л байна.

Нэгэн баасан гаригийн өглөө Ева түүнд утасдаж, хоолонд урив.

- Энд нэг шинэ франц гуанз нээгдээд байна. Хоол нь их сайн гэнэ...

Александра урилгыг их баяртай хүлээж авлаа. Урьд нь Александра өөрөө Евад олон удаа
утасдсан боловч янз бүрийн шалтаг хэлээд уулзахаас зайлсхийдэг байв. Өнөөдөр Александра
өөрөө хүнтэй уулзах болзоотой боловч,

- Дуртайяа хамт хоол идье гэж хариулжээ.

Гуанз нь их үнэтэй тансаг газар байв. Баарны лангууны дэргэд суудал сулрахыг хүлээсэн олон
хүн байлаа. Ева энд орохын тулд алдарт эмээгийн нэрийг ашиглах хэрэг болжээ. “За гайгүй
ээ, Та нар намайг энэ муу гуанзандаа орооч гэж гуйх цаг ирнээ” гэж Ева хорсон бодов. Еваг
ширээний ард сууж байтал танхимын ахлагч нь өөрөө Александраг дагуулан танхимд орж
ирэв. Евад дахиад л өөрийгөө толинд харж байгаа вм шиг сэтгэгдэл төрлөө. Тэгээд ихэр
дүүгийнхээ хацар дээр үнсэж,

- Чи их өнгөтэй харагдаж байна шүү, Алекс аа. Ажил чинь чамд зохижээ гэлээ.

Хоол захиалсны дараа хоёул сонин сайхан ярилцлаа.

- Ажил ямар байна даа? гэж Ева асуув.

Александра өөрт тохиолдсон бүх явдлыг ярьж, Ева өөрийн амьдралын тухай сайтар бодож
зохиосон зүйлээ ярив. Ева яриан дундаа нүдээ өргөтөл Жорж Меллис харагдсан бөгөөд ихэр
хоёр охиныг гайхан харж зогсоно. “Ай тэнгэр, энэ тэнэг чинь бид хоёрыг ялгахгүй байна” гэж
Ева бодох зуур,

- Жорж, гэж дуудсанд Жоржийн дотор онгойж санаа алдан,

- Ева! гэж дуугарав.

- Ямар сонин хүн бэ? гэж Ева хэлээд ихэр дүүгийнхээ зүг толгой дохин,

- Чи манай дүүг танихгүй байх аа? Алекс аа, чамд Жорж Меллисийг танилцуулж болох уу?
Жорж, энэ миний ихэр Александра гэлээ.

Жорж гараас нь барьж,

- Би гайхан баярлаж байна гэжээ.

Ева түүнд өөрийгөө ихэр гэж хэлсэн боловч ийм адилхан гэж хэлээгүй ажээ. Александра
Жоржийг нүдээ их болгон харна.

- Бидэнтэй хамт суугаач, Жорж гэж Еваг хэлэхэд,

- Дуртайяа зөвшөөрөхсөн. Даанч би ажил хэргийн уулзалтаас хожимдох гээд байна. Дараа
боломж... гээдАлександраг эгцлэн харж
- Удахгүй уулзах болов уу гэж найдаж байна гээд охидыг орхин явлаа.

Жорж үүд рүү явахад ихэр охид хойноос нь харав.

- Ай тэнгэр, энэ хэн бэ? гэж Алекс асуухад,

- Өө, Нита Людвигийн танил юм. Тэдний үдэшлэг дээр үүнтэй танилсан юм гэв.

- Үгүй, мөн цэвэрхэн төржээ эсвэл надад тэгж санагдав уу? гэхэд нь Ева инээд алдаж,

- Энэ чинь надад таалагдах хүн биш. Хүүхнүүд бол нүдэнд дулаахан хархүү гэлцдэг юм.

- Тэгэлгүй яах вэ? Эхнэртэй юм уу?

- Байхгүй байх. Хүүхэн олдоогүй дээ тэр биш. Жорж их баян. Дутуу юм байхгүй гэж болно.
Цэвэрхэн төрсөн, мөнгөтэй, нийгмийн дунд байр сууриа олсон хүн... гээд Ева өөр юм ярьж
эхлэв.

Ева хоолны үнийн тасалбар аваад ирнэ үү гэхэд нь мистер Меллис төлчихсөн гэж хоол зөөгч
хэллээ. Алексын толгойноос Жорж Меллис гарахаа больжээ. Гэтэл даваа гаригт Ева утасдаж,

- Чи нэгэн хүнд их сэтгэгдэл төрүүлсэн бололтой байна, хонгор минь. Жорж Меллис
утасдаж, чиний утасны дугаар асууж байна. Түүнд өгч болох уу? гэв.

- Хэрэв өөрөө түүнтэй...?

- Надад таалагдах хүн огт биш гэдгийг би чамд хэлсэн шүү дээ.

- Хнн, за тэгвэл миний утасны дугаарыг өгч орхи,

Хоёул хоёр гурван минут энэ тэрийг яриад, Ева утсаа тавилаа. Тэгээд орон дээр хажууд нь
хэвтэж буй Жоржийг харж,

- Авхай зөвшөөрч байна.

- Хэдийд вэ?

- Намайг хэлсэн цагт!

Александра Жорж Меллисийн утасдах учиртайг санахгүй гэж хичээнэ. Тэгж их хичээх тусам
тэр залуу санаанд нь ороод болж өгдөггүй. Урьд цэвэрхэн сайхан эрчүүл түүнд ер
таалагддаггүй байлаа. Учир нь ийм эрчүүл бүгдээрээ их аминчхан сэтгэлтэй байдаг. Жорж
Меллис бол тэдэнтэй адилгүй. Түүний нэг л ер бишийн их хүчтэй нь мэдэгдэнэ. Гар нь
Александрын гарт хүрэх үед үүнийг мэдэрчээ. “Солиотой амьтан! Чи түүнийг хоёрхон
минутын төдий харсан шүү дээ” гэж тэрээр өөрийгөө зэмлэв.

Долоо хоног өнгөрөхөд Жорж утасдсангүй. Эхлээд хүсэн хүлээж байснаа урам нь хугарч,
сүүлдээ бүр уур нь хүрэв. “ Чөтгөр рүү тонилог, цаашаа! Бодвол өөр нэг юм олоо биз, болино
л биз” гэж Александра бодлоо. Дараачийн долоо хоногийн сүүлчээр утас дуугарахад
харилцуур аваад Жоржийн дууг сонсмогц уур нь түргэн хүрсэн шигээ дорхноо дарагдав.

- Би Жорж Меллис байна. Таныг эгчтэйгээ хамт байхад зоогийн танхимд бид танилцсан шүү
дээ. Та санаж байна уу? Намайг тань руу утасдаж болно гэж Ева хэлсэн...

- Тийм ээ, таныг утасдана гэж Ева хэлсэн л дээ. Хоолоор дайлсанд баярлалаа.

- Таны таалалд нийцүүлж чадвал сайхан сан гэхэд нь Александра инээд алдав.

- Та надтай хамт оройн зоог барихгүй юу? гэж Жорж асуухад,

- Болно л доо, дуртайяа зөвшөөрье.

- Яасан сайн юм бэ. Таныг татгалзсан бол би амиа хорлох байсан сан.

- Хүүе, битгий тэгээрэй. Би ганцаараа хоол идэх тун дургүй хэмээн Александра буцааж
Жоржийг дамшиглалаа.

- Би ч бас. Малберри стритэд байдаг нэг зоогийн танхимыг мэднэ. “Мэтун” гэдэг юм,
түүнийг мэдэх хүн цөөн. Хоол нь...

- Мэтун миний дуртай зоогийн газар байгаа юм гэж Александра дуу алдав.

- Та тэр зоогийн газрыг мэддэг юм уу? гэж Жорж гайхлаа.

- Тийм ээ

Жорж Евагийн өөдөөс харж жуумалзав. Евагийн арга ухаантайг бахадсан байжээ. Ева
дүүгийнхээ юу юунд дуртайг Жоржид нэгд нэгэнгүй ярьж өгсөн учир тэрээр Александрын
тухай бүгдийг мэдэх болжээ. Жорж харилцуураа тавихад “За ингээд шоу эхлэлээ” гэж Ева
бодов.

Энэ бол Александрын амьдралд хамгийн сайхан орой байв. Александра элдэв дэмий юм
бодож айж байснаа Меллисийг хармагц айдас эргэлзээ нь замхран ариллаа. Хоёул эхлээд
баарт жаахан юм балгасны дараа зоогийн танхимд оров.

- Хоолны цэс үзэх үү? Эсвэл би таны орноос захиалчих уу? гэж Жорж асуув.

Энд Александрын өөрийн дуртай хоол байдаг боловч Жоржид тал засахыг хүсэж,

- Та захиалал даа гэлээ.

Жорж Александрын дуртай хоолыг захиалахад “энэ хүн миний бодсоныг тааж мэдээд байна
уу” гэмээр сэтгэгдэл төрлөө. Тэдэнд нарийн итали гоймонгоор хачирлаж, тусгайлан
бэлтгэсэн тугалын мах, шанцай авчирч өгөхөд Жорж өөрөө найруулан хутгав.
- Та хоол хийж чаддаг юм уу? гэж Александрын асуухад,

- Миний дуртай ажил. Ээж маань зааж өгсөн юм. Энэ талаар манай ээжтэй эн зэрэгцэх хүн
байхгүй гэв.

- Та гэрийнхэнтэйгээ холбоо барьдаг уу? гэж асуув.

Хархүүгийн инээмсэглэхэд энэ залуу дэлхий дээр хамгийн цэвэрхэн эр байна гэж Александра
бодлоо.

- Би грек хүн. Надад 2 эрэгтэй, 2 эмэгтэй дүү бий. Бид бие биедээ их хайртай гээд нүдэнд нь
гуниг илэрч,

- Тэднээсээ салахад их хэцүү байсан. Аав дүү нар минь намайг үлдээч гэж их гуйсан л даа.
Надаар гэр бүлийн бизнес эрхлүүлэх бодолтой байсан юм.

- Та үлдэхгүй яасан юм бэ?

- Та намайг тэнэг хүн гэж бодох байх л даа. Би өөрийн хүчээр, өөрийн байр сууриа олохыг
хүссэн юм. Би хэзээнээс бэлэг авах дургүй. Тэр бол өвөө, аав хоёрын бэлэг байлаа. Үгүй дээ,
би эцгээсээ юу ч авахгүй. Миний хувийг дүү нар минь аваг.

Александра Жоржийг бахархан харав.

- Түүний дээр хэрэв би Грект үлдсэн бол тантай танилцахгүй байх байлаа шүү дээ гэж Жорж
нэмж хэлэхэд Александра баярласандаа нүүр нь улайж байгаагаа мэдрэв.

- Та эхнэртэй байсан уу?

- Үгүй. Нэг удаа сүй тавиад сүүлчийн мөчид... гэснээ тонгойж, итгэсэн хүний ёсоор дуугаа
намсган

- Хосгүй үзэсгэлэнт Александра Би танд хуучинсаг хүн шиг санагдаж магадгүй. Ямар ч гэсэн
би нэг гэрлэвэл тэгээд болно. Надад нэг л эмэгтэй байвал болоо. Харин эхнэр маань надад
хэрэгтэй чухам тэр хүүхэн мөн байх ёстой гэхэд нь,

- Сайхнаа гэж Александра шивэгнэв.

- Та өөрөө? Та дурлаж явсан уу? гэж Жорж Меллис асуув.

- Үгүй.

- Нэг хүний аз дутаж даа, харин миний аз...

Энэ үед хоол зөөгч амтат зууш авчирч өглөө. Жорж үгээ дуусгасангүй. Александра Жоржийг
үгээ дуусгана уу гэж гуйх гэснээ сэтгэл зовоод болив.
Александра урьд өмнө хэзээ ч ийм сул чөлөөтэй байсангүй. Жорж амьдрал байдлыг нь
сонирхон асуухад, асуусан бүгдийг дуртайяа хариулж байлаа. Жорж Меллис хүүхнүүдийг
сайн мэднэ гэж сайрхах дуртай. Хөөрхөн хүүхнүүд биедээ итгэл муутай байдгийг мэднэ.
Учир нь тэдний гоо үзэсгэлэнд илбэдүүлсэн эрчүүд тэднийг урлагийн бүтээл мэт үзэж
хандах бөлгөө. Жорж хөөрхөн хүүхэнтэй уулзаад гоо үзэсгэлэнг нь огт тоож анхаардаггүй.
Тэр хүүхний зөвхөн дотоод сэтгэл бодол санаа, сэрэл мэдрэлийг сонирхож байна хэмээн
итгүүлж, өөрийгөө сэтгэлийн үгээ нуухгүй ярьж болох ганц хүн хэмээн үнэмшүүлж чаддаг
байна. Александра урьд өмнө ийм эр хүнтэй уулзаж байсангүй. Тэгээд Жоржид эмээгийнхээ
тухай, Евагийн тухай ярив.

- Ихэр эгч чинь та нартай хамт суудаггүй юм уу?

- Үгүй. Өөрөө тусдаа суух дуртай байдаг.

Ева эгч нь Жоржийн сэтгэлд яагаад таалагдаагүйн учрыг Александра ойлгохгүй байв. Ямарч
гэсэн Александра үүнд баяртай байжээ. Хооллож байх үед бүх эмэгтэйчүүд Жоржийг
сонирхон харж байгааг ажиглав. Жорж өөрөө хүүхнүүдийг нэг ч харсангүй зөвхөн
Александраг ширтэн түүнд анхаарал тавина.

Кофе ууж байх үед Жорж,

- Таны джаз хөгжимд дуртай эсэхийг мэдэхгүй юм. Гэгээн хутагт Маркын талбайд “Файв
Спотс” гэж клуб байдаг... гэсэнд

- Сесил Тэйлор тоглодог уу? гэж Александра лавлав. Жорж өөдөөс нь гайхан ширтэж,

- Та тэнд очиж үзсэн юм уу? гэв. Александра инээд алдан,

- Хэд ч очиж үзэв дээ. Та бид хоёрын таашаал сонирхол нийлж байгааг үнэмшмээргүй юм
гэсэнд

- Энэ чинь ид шидийн гайхамшиг байна гэж Жорж аяархан дуугарав.

Тэр хоёр Сесил Тэйлорын сайхан тоглолтыг үзээд клубээс гарч Бликер стрит дэхь баарт орж,
жаахан юм балган хөгжим сонсож, дартс тоглов. Жорж тэнд үргэлж тоглож байдаг нэг
хүнтэй сум шидэн тоглохыг Александра ажиглав. Цаадахь нь туршлагатай тоглогч боловч
Жорж түүнд өчүүхэн ч найдлага үлдээсэнгүй. Жорж үхэх сэхэхээ үзэх болж байгаа юм шиг
хөмхийгөө зуун тоглож байлаа. “Энэ Жорж дандаа ялж дийлэхийг эрмэлздэг юм байна” гэж
Александра бодов.

Тэднийг баарнаас гарахад шөнийн 2 цаг болж байлаа. Александра энэ шөнийг дуусдаггүй
болоосой гэж гэнэт хүсэв.

Роллс ройсыг жолооч барьж, Жорж Александра хоёр арын суудал дээр сууцгаав. Жорж үг
дуугарсангүй, Александра хааяа нэг харж явлаа. “Еватай усны хоёр дусал шиг адилхан юм”
гэж бодоод Александратай оронд орж, бүсгүйг тэсэхүйе бэрх өвдсөндөө ёолон орилж байгааг
сэтгэлдээ төсөөлөв.

- Чи юу бодоо вэ? гэж Александрын асуухад хархүү өөрийн юу бодож байгааг бүсгүй
тааварлаж магадгүй гэсэн шиг өөр тийшээ харж,

- Чи лав намайг шоолж инээх байх гэв.

- Шоолохгүй, бүр амалья...

- Намайг улс амьтан танхай амьтан шиг боддог юм. Яхта онгоц, үдэшлэг энэ тэр гээд...

- Тэгээд, гэхэд нь Жорж бүсгүйг удааг ширтсэний эцэст,

- Чамайг миний занг бүрмөсөн өөрчилж чадах цорын ганц хүүхэн юм болов уу даа гэж бодож
байна гэхэд нь Александрын зүрх булгилан,

- Би юу хэлэхээ мэдэхгүй байна гэв.

- Юм хэлээд яах вэ гээд залуу эрийн уруул ойртож ирэхэд үнсэх нь үү гэж бодтол үнссэнгүй.

“Битгий их яараарай. Ялангуяа эхний орой. Хэрэв чи яарч дэмий юм болбол Алексын өв
хөрөнгө дээр сууж авахыг эрмэлзэж байгаа олон Ромеогийн урт жагсаалтан дээр нэрээ
нэмэхээс хэтрэхгүй шүү” гэж Ева сануулсан ажээ. Тийм болохоор Жорж тэдний сууж яваа урт
хар машин Блэкуэллийнхний байшингийн гадаа очиж зогстол Александрын гарыг барихаас
хэтэрсэнгүй. Жорж Александраг үүдэнд нь хүргэж өглөө. Александра өөдөөс нь эргэж,

- Би хэзээ ч ийм баяр жаргалтай байж үзээгүй юм байна гэв.

- Миний хувьд энэ бол ид шидийн шөнө байлаа гэж Жорж хариулав.

Александрын нүүрт баярын мишээл туяарч,

- Тавтай нойрсоорой, Жорж гэж хэлээд үүдээ онгойлгон орлоо.

15 минутын дараа Александрын утас дуугарав. Харилцуурт Жоржийн дуу сонсдож,

- Намайг яасан гээч? Би гэр рүүгээ утасдлаа. Тэгээд нэгэн гайхамшигт эмэгтэйтэй
мартагдашгүй үдшийг хамт өнгөрүүлснээ гэрийнхэндээ ярьсан. Сайхан зүүд зүүдлээрэй,
үзэсгэлэн гоо Александра минь гэв.

Жорж Меллис харилцуураа тавиад, “Энэ бүсгүйтэй гэрлэсний дараа би нээрээ гэр лүүгээ
утасдаж, та нарыг бүгдийг чөтгөр алгадаасай гэж хэлэх юм хуна” хэмээн боджээ.
29-р бүлэг

Жорж Меллис алга болчихжээ.

Маргааш нь утасдсангүй, ерөөсөө бүтэн долоо хоног таг чиг. Утас дуугарах бүрд
Александрын зүрх булиглан харилцуур авах боловч тэр болгонд урам хугарч байлаа. Чухам юу
болсныг тааж ядав. “Чамайг миний занг өөрчилж чадах цорын ганц хүүхэн юм уу даа гэж
бодож байна” хэмээн хэлснийг санав. Түүний утасдахгүй байгаагийн мянган шалтгааныг
Александра бодож үзэв.

“Би түүнийг гомдоосон байх”

“Би түүнд их таалагдсан байх. Тэгээд надад дурлачихаж магадгүй гэж айхдаа холхон байхаар
шийдсэн биз”

“Намайг өөртөө таарах хүүхэн биш гэж бодсон байх”

“Түүнд гэнэтийн гай зовлон тохиолдоод одоо эмнэлэгт үхлүүт хэвтэж байгаа байх”

Александра шаналж гүйцээд эгчдээ утасдахаар шийджээ. Эхлээд биеэ албадан элдэв дэмий
юм жаахан ярьсаны дараа,

- Ингэхэд нөгөө Жорж Меллисийн тухай юм дуулдана уу? гэж асуув.

- Дуулдаагүй. Чи юунд асууна вэ? Чамд утасдаж, оройн хоолонд урина гэж байсан шүү дээ...

- Намайг урьсан л даа. Түрүүчийн долоо хоногт,

- Дахиад чамд утасдаагүй юу?

- Үгүй утасдаагүй.

- Ажил ихтэй байгаа биз,

“Утасдах завгүй ажилтай хүн гэж хаа байх вэ” гэж Александра дотроо бодоод,

- Тийм л юм байх даа гэв.

- Жоржийг мартаж орхи, хонгор минь. Би энд нэгэн канад хархүүтэй танилцаад байна. Нисэх
компанийн эзэн гэнэ...

Ева утасаа тавихад царайд нь инээмсэглэл тодрон байлаа. Ямар нарийн юм бодож төлөвлөөд
байгааг нь эмээ нь мэдэх юм бол...

- Чи яагаад байнаа? гэж Элис Коппель Александрагаас асуув.

- Уучлаарай гэж Александра дуугарав.

Юу ч хийсэн урамгүй байх болжээ. Хоёр долоо хоног өнгөрч байхад Жорж утасдсангүй.
Александрын уур хүрнэ. Тэгэхдээ Жоржид уурлах нь бус, түүнийг толгойноосоо авч хаяж
чадахгүй байгаа өөртөө уурлана. Тэр хархүү утасдах албатай биш дээ. Тэр хоёр ганц удаа хамт
оройн хоол идсэнээс биш, өөр юмгүй. Тэгэхэд Александра түүнийг өөртэйгөө ханилан сууна
гэж амласан юм шиг аашилж байна. Ай тэнгэр, энэ Жорж Меллис ямар ч хүүхний толгойг
эргүүлж чадна шүү. Нэг муу Александраар яах билээ дээ.

Александрын уур уцаар ихтэй болсныг эмээ нь хүртэл ажиглажээ.

- Чи яах нь энэ вэ, охин минь? Ажил чинь хүнддэж байгаа юм биш биз?

- Үгүй, зүгээр эмээ. Сүүлийн үед нойр жаахан муухан гэлээ.

Үнэндээ бол Александра шөнө Жоржтой үүл борооны хэрэг үүсгэж байгаагаар зүүдлэх
болсон байжээ. Ээ чөтгөр алгад, Александра түүнтэй танилцсандаа баярлахыг болив.

Жорж маргааш нь Аллександрын ажлын газар руу утасдлаа.

- Алекс уу? Би Жорж Меллис байна... гэхэд нь Александра дууг нь мартсан юм шиг удаан
дуугүй байв.

- Алекс аа, сонсож байна уу?

- Сонсож байна.

Александрын цээжинд эсрэг тэсрэг сэтгэл төрж, уйлах уу, инээх үү, алийгаа ч мэдэхгүй
болжээ. Энэ хархүү биеэ тоосон аминчхан хүн юм. Одоо дахиад түүнтэй уулзахгүйгээ хэлье.

- Би аль түрүүний утасдах ёстой байсан юм. Би дөнгөж сая Афинаас ирээд байна. Нисэх
онгоц таван минутын өмнө буусан.

- Афинаасаа аа? гэж Александра гайхав.

- Тийм ээ. Тэр нэгэн орой бид хоёр хамт хоол идсэнийг санаж байна уу?

- Санахаар барах уу даа.

- Маргааш нь миний дүү Стив утасдаад... Манай аавын зүрхний өвчин хөдлөөд...

Александра элдэв дэмий юм бодож байсандаа ичих сэтгэл төрж,

- Ай Жорж, Одоо аавын чинь бие ямар байна вэ?

- Тэнгэрийн авралаар гайгүй өнгөрлөө. Надад их хэцүү байсан. Намайг Грект бүрмөсөн ирж,
компанийг толгойлооч гэж ээж гуйгаад...

- Чи зөвшөөрсөн үү?
- Үгүй.

Александрын дотор онгойж санаа алдан,

- Би энд байх ёстой гэдгээ мэдэж байна. Би өдөр болгон чамайг бодож байлаа. Хоёул хэдийд
уулзах вэ?

Александра “Одоохон” гэж хашгирмаар санагдавч биеэ барьж,

- Өнөө орой хамт хооллох уу? гэхэд нь Жорж Александрын дуртай бас нэгэн зоогийн
танхимын нэр хэлмээр санагдсан боловч биеэ барьж,

- Тэгье, хаана очмоор байна? гэв.

- Хаана ч яах вэ. Манай гэрт ирж оройн хоол идэх юм биш үү?

- Үгүй. Би найман цагт чамайг авья.

Жорж Кейттэй уулзхад хараахан бэлэн болоогүй байжээ. “Эмгэнээс холхон байгаарай. Тэр л
бидний гол саад шүү” гэж Ева сануулсан байжээ.

Александра харилцуураа тавьчихаад суудлаасаа үсрэн босож, Элисийг үнсэв. Винс, Марти
хоёрт гар даллан,

- Би үсчинд очлоо. Маргааш болтол баяртай гэчихээд өрөөнөөс гүйн гарч одов.

- Эр хүн ярьжээ гэж Элис нөгөө хоёртоо хандан өгүүлэв.

Тэр хоёр “Максвэл Пламд” хоол идлээ. Танхимын ахлагч нь тэднийг захиалсан ширээнд
дагуулан аваачлаа.

- Чи намайг ганц удаа ч болтугай санав уу? гэж Жоржийн асуухад ийм ил шулуун хүнтэй мөн
ил шулуун ярьж болно гэж Александра бодоод,

- Санасан. Чамайг утасдахгүй болохоор ямар нэгэн аймшигтай юм болсон юм болов уу гэж
бодож байлаа. Би... би айж байсан шүү гэв.

Ева бас нэгэн оноо авлаа. “Адгаад байхгүй хүлээж бай. Удахгүй цаг нь болохоор би чамд
хэлнэ” гэж Ева түүнд хэлсэн аж.

Төлөвлөгөө нь биелж байгааг Жорж анх удаа ойлголоо. Урьд бол хэзээ нэгэн цагт хэмжээгүй
их хөрөнгөнд жишээлбэл Блэкуэллийнхний эд хөрөнгө шиг ийм хэмжээгүй их хөрөнгөнд
эзэн сууна гэж найдахгүй, зүгээр л хоосон мөрөөдөж байжээ. Одоо бол Александраг янагийн
нүдээр ширтэж суухдаа тоглоом бүтэж байгааг ойлгов. Александра нэгэнт гарт нь оржээ.
Төлөвлөгөөний эхний шат амжилттай дууслаа. Цаашид азаа үзэх болж байна. Энэ осолтой ч
гэсэн Евагийн тусламжинд дулдуйдаж байлаа.
“Чи бид хоёр нэг тэргэнд хөллүүлсэн морьд. Юм бүхнийг хувааж хийх ёстой” гэж Ева хэлсэн
аж.

Харин одоо Жорж Меллис олзоо Еватай хуваах бодолгүй болжээ. Бүгдийг гартаа оруулж
авсаны эхлээд Евагийн тусламжаар Александраг янзална дараа Еваг өөрийг нь. Ингэж
бодохтой зэрэг дотор нь уужирч, сэтгэл нь баясаад ирлээ.

- Чи инээгээд байх шив гэж Александраг хэлэхэд Жорж алгаа гар дээр нь тавиад,

- Бид хоёр хамт байх ямар сайхан юм бэ гэж бодож сууна гээд халааснаасаа жижиг хайрцаг
гаргаж,

- Чамд Грекээс... авчирсан юм гэв.

- Ай Жорж,

- Онгойлгоод үз,

Дотор нь маш сайхан сондор байв.

- Ямар гоё юм бэ?

Энэ бол Евагаас булааж авсан очир эрдэнийн сондор байв. “Наадахыгаа Александрад өгч
болно. Александра үүнийг үзээгүй юм” гэж Ева хэлжээ.

- Энэ чинь их үнэтэй бэлэг байна...

- Чамд юугаа хайрлах билээ. Чиний санаанд таарсанд баярлаж байна.

- Би... гээд Александрын бие нь чичирч,

- Баярлалаа гэж хэлэхдээ толгой нь эргэж байлаа.

Жорж Александрын тавгийн хараад,

- Хоолоо идэхгүй яагаа вэ? гэхэд нь

- Би цатгалан байна гэж Алекс хариулав.

Жорж энэ үед Александрын нүдийг эгцлэн хараад яая л гэвэл өөрийн дур болсныг ойлголоо.
Жорж Меллис хөөрхөн, муухай, хөгшин, залуу олон хүүхний нүд ийм болж байхыг харсан
билээ.Тэгээд бүгдийг нь хэрэглэж байсан. Тэр хүүхнүүд ямар янзаар юу хүссэнийг нь өгдөг
байлаа. Харин энэ удаа, энэ хүүхэн зүйрлэшгүй их хөрөнгө өгнө дөө.

- Чи юу хүсэж байна? гэж залуу эрийн асуух дуунд уриалан дуудсан өнгө аяс сонсдов.

- Чамтай учрахыг хүсэж байна гэж Александра илэн далангүй үнэнээ хэлэв.
Жорж байраараа бахархдаг нь хэр юм. Энэ бүх үнэтэй ганган хээнцэр хогшил тавилгыг
Жоржид ая тал засаж нүүр олох гэсэн эр эм нуудгай нар бэлэг болгон түүнд барьсан юм.
Бэлгэнд дургүй хэн байх билээ дээ. Тиймээс Жорж бэлгийг жишимгүй хүлээж авдаг аж.

- Ямар сайхан байр вэ? гэж Александра уулга алдав.

Жорж дэргэд нь очиж тэврээд,

- Энэ бүхэн чинийх шүү, хонгор минь гэлээ.

Хархүү эхлээд энхрий зөөлөн үнсэн таалав. Үнсэж таалах нь улам халуун тачаангүй болсоор
Александрын нэг мэдэхэд хоёул унтлагын өрөөнд ороод ирсэн байлаа. Өрөөг цэнхэр эдээр
доторлож, гол нь хоёр хүний өргөн ор тавьжээ. Жорж Александраг тэврээд бүх бие нь чичирч
байгааг мэдрэв.

- Чи зүгээр үү?

- Би... миний зүрх хөөрөөд байна гэлээ.

Александра энэ залуу эрийн урмыг хугалах бий гэж айж байлаа. Өөдөөс нь ичингүйрэн
ширтэх зуур цамцныхаа товчыг чичрэн тайлж эхлэв.

- Би туслая гэж Жорж шивэгнээд Александрын хувцасыг тайлж байхдаа Евагийн

хэлснийг дахин саналаа. “Биеэ бариарай, тэнэг минь. Хэрэв чи түүнийг өвтгөөд өөдгүй новш
гэдгээ мэдүүлчих юм бол чи түүний барааг дахин олж харахгүй. Мэдэв үү. Нударгалдаг муу
зугаагаа янхан хүүхэн, залуу хөвгүүд дээр туршиж бай”

Жорж Александрын бие цогцосыг харвал Евагийнхтэй ав адилхан ажээ. Энэ булбарай цагаан
биеийг урж шалбалж, хар тэнхээгээрээ зодож жанчин, тэнэг хүүхэн айж өвдсөндөө орилж
чарлахыг нь сонсох дур хичнээн их хүрнэ вэ? Гэвч нэг гараараа нөгөө гараа барилаа.

Жорж хувцсаа тайчаад Александраг тэврэн хоёул бие биеийн нүдийг ширтэн хэсэг зуур
зогсов. Дараа бүсгүйг орон дээр зөөлхөн тавьж хамаг биеийг нь озон таалж эхлэсэнд
Александра цаашид бие сэтгэлээ барьж чадахаа болилоо.

- Намайг эдлээч... бушуухан, одоохон гэж яраглав.

Залуу эрийг дээрээ гарч ирэхэд бүсгүй юутай ч зүйрлэшгүй цэнгэлийн манлайг эдэллээ...

Хоёул ядарч сулдайгаад зэрэгцэн хэвтэж байхдаа Александра санаа алдаад,

- Ай хонгор минь, ямар сайхан юм бэ. Чамд бас сайхан байсан гэж найдаж байна гэхэд нь

- Тэгэлгүй яах вэ хэмээн Жорж худал хэлэв.

Бүсгүй залуу эрийн цээжинд нүүрээ наангаад яасныг өөрөө ч мэдэлгүй асгаруулан уйлж
гарлаа.

- За боль доо. Их сайхан байна шүү дээ гэж Жорж түүнийг аргадан тайтгаруулав.

Үнэхээр бүх юм сайхан байлаа. Ева Жоржоор бахархахад болно.

...Аливаа амраг хоёр бие биенээ хардах, бие биендээ гомдох явдал байдаг. Александра Жорж
хоёрын хооронд тийм юм огт байсангүй. Жорж Евагийн удирдлагын дор Александрын
сэтгэлээр уран чадамгай тоглож байв. Бүсгүйн айдас, уран сэтгэмж, тэр бүхнийг хархүү сайн
мэддэг болохоор юу хэрэгтэйг нь өгөхөд бэлэн байлаа. Бүсгүйг инээлгэе гэвэл инээлгэж,
уйлуулья гэвэл уйлуулж чадна. Александра үүл борооны ажилд учиргүй их дуртай байхад
Жоржид энэ бол ёстой нэг тамын зовлон байдаг байв. Александратай хамт хэвтэж, тачаангуй
хүслээ тэсэж ядан яраглахад нь түүнийг нэвширтэл жанчмаар, өршөөл гуйтал нь тарчилаан
зовоомоор дур хүрдэг байв. Тэгвэл сая нэг өөрөө дур хүсэл нь ханаж, тачаал нь тайлагдана.
Тэгээд ингэж чадахгүйдээ бухимдан Александраг улам улам үзэн ядаж, жигшин зэвүүцэх
болов.

Жоржийн очиж тачаалаа тайлж болох газар олон бий боловч болгоомжтой хөдлөх хэрэгтэй
гэдгийг өөрөө мэдэж байжээ. Жорж шөнө орой эхнэргүй ганц бие эрчүүдийн баараар явж,
хийх ажилгүй ганц бие бэлэвсэн хүүхэн юм уу, садарлахын донтой хөвгүүд, мөнгө олохын
шуналд автсан янхан хүүхэн олж Вест сайд, Бовери, Гринбич вилижийн бага шиг зочид
буудалд дагуулж аваачдаг байв. Нэг буудалд хоёр дахиж очдоггүй байлаа. Очсон ч түүнийг
оруулахгүйг тэр мэднэ. Учир нь түүний нөхцсөн цаад хүн нь зодуулж жанчуулсан, тамхины
галаар түлүүлсэн, ухаан алдсан байдаг.

Жорж мазохистуудаас зайлсхийдэг. Мазохистууд өвтгөхөд нь баясан цэнгэн, өөрийн нь бахыг

алдуулдаг аж. Үгүй дээ, нөхцөж буй нөгөө хүн үнэнээсээ ёолон жаахан хүүхэд эцгээсээ
өршөөл гуйх мэт өршөөлийг Жоржоос гуйх ёстой. Учир нь гэвэл эцэг нь Жоржийг өөрийг нь
жаахан байхад өчүүхэн төдий алдаж эндэх бүрд ухаан алдтал нь зодож жанчдаг байжээ.
Жоржийг 8 настай байхдаа хөрш айлын хөвгүүнтэй хоёул нүцгэн байж байхад нь тааралдаад
Жоржийн хамар чихнээс цус садартал зодож билээ. Хүүгээ үүнээс хойш ийм нүгэлтэй юм
хийхгүй баттай болгох гэж түүнийг эрхтэнийг толгойг тамхины галаар түлсэн юм. Биеийн
шарх аньж эдгэсэн боловч сэтгэлийн шарх аньсангүй.

Меллис өөрийн өвөг дээдэс эртний Илиадийнхнаас өвлөж авсан эзэрхэг дээрэнгүй, зэрлэг
догшин авиртай. Тэрээр бусдын тушааж заахыг хэзээ ч үл хүлцэнэ. Харин Ева Блэкуэлл өөрт
нь хэрэгтэй тул түүний дарлан доромжлохыг шүд зуун тэсдэг юм. Блэкуэллийнхний эд
баялгийг гартаа оруулж авсны дараа энэ муу хүүхнийг “намайг алаад өгөөч” гэж гуйтал нь
тарчилаан зовооно доо.

Еватай танилцсан нь яасан их аз вэ? Жоржийн аз болсон байхад Евагийн хохь болж дуусна.

Жоржийг яг өөрийнх нь санаанд таарсан цэцэг бэлэглэж, эсвэл мөн тийм янзаар хамгийн
дуртай ном гэх мэтийг авч өгөхөд Александра хүсэл сонирхлыг нь яаж ингэж тааварлан
мэдэж чаддагийг гайхдаг байв. Музейд хамт очоод чухам Александрын санаанд таарсан тийм
зургийг бахархан магтана. Александра Жоржоос жаахан ч гэсэн өө олох гээд чадсангүй. Энэ
бол өөгүй төгс хүн юм. Тэгээд Жоржийг эмээтэйгээ бушуухан танилцуулах сан гэж яарав.
Гэтэл Жорж дандаа нэг шалтаг олоод Кейт Блэукуэллтэй танилцахыг хойшлуулсаар...

- Яана гээ вэ, хонгор минь. Чи манай эмээтэй танилцаад бахархах болно. Түүнээс гадна би
суудаг гэр орноо чамд үзүүлмээр байна хэмээн Александра түүнийг шалахад,

- Эмээ чинь миний сэтгэлд таалагдана гэж итгэж байна. Харин би өөрөө түүний сэтгэлд
таалагдахгүй байгуузай гэж айж байна гэж Жорж хариулав. Түүний даруу зантайд бүсгүйн
сэтгэл уярч,

- Энэ чинь инээдтэй юм байна. Эмээ дороо чамд хайртай болно.

- За яах вэ. Би бүсээ чангалж байгаад нэг очьё л доо.

Жорж энэ асуудлыг Еватай шүүн хэлэлцэв.

- Одоо яая гэх вэ. Эрт орой нэгэн цагт чи эмгэнтэй танилцах л хэрэгтэй болно. Мэдээтэй
байгаарай, их зальтай, айхтар ухаантай шулмас шүү. Хэрэв ажиг сэжиг авбал зүрхийг чинь
суга татаж аваад нохойд хаяж өгнө гэж мэдээрэй гэж Ева хэлсэн байна.

Өглөөнөөс хойш Александрын сэтгэл тогтож өгдөггүй. Жорж, Кейт, Александра гурав анх
удаа хоол хамт идэх гэж байгаа юм. Бүгд сайн сайхан болоосой гэж Александра Эзэн тэнгэрт
залбирна. Кейт Жорж хоёрыг бие биеийнхээ санаанд таараасай, эмээ нь Жоржийн ямар сайн
залуу болохыг олж харж, Жорж эмээг нь зохих ёсоор хүндэтгээсэй хэмээн Александра юу
юунаас илүү хүсэж байв.

Кейт ач охиноо ийм баяр баясгалантай байхыг урьд өмнө үзээгүй аж. Александратай ханилан
суухыг хүссэн, хүн атаархмаар сайхан залуу эр олон байсан боловч тэдний нэгийг нь ч
Александра сонирхоогүй юм. Тэгээд ач охиныг нь ингэж илбэдсэн хархүүг Кейт анхааралтай
ажин шинжих бодолтой байлаа. Бусдын эд баялагт шунан нүдээ өгөх шахдаг хүнтэй Кейт нэг
биш удаа тааралдаж байсан болохоор Александраг тийм хүнтэй суулгах бодолгүй байлаа.
Тиймээс Кейт энэ мистэр Меллистэй танилцахыг хүсэж байлаа. Тэр хүн өөртэй нь уулзахаас
зайлсхийгээд байгаа юм уу гэсэн сэтгэгдэл төрсөн болохоор үүний шалтгааныг олж мэдэх
гэсэн аж.

Хаалганы хонх дуугарах сонсдож, нэгэн минутын дараа ач охин нь сонгодог сайхан бие
цогцос бүхий өндөр эртэй хамт орж ирэв.

- Эмээ, Танд Жорж Меллисийг таницуулахыг зөвшөөрнө үү?

- Ашгүй дээ, Мистер Меллис таныг надаас нуугдаад байна уу даа гэж бодох шахаад байлаа...

- Үгүй л дээ, миссис Блэкуэлл. Тантай уулзах гэж хичнээн хүсэж байсныг минь та
төсөөлөхгүй байна гэж Жорж өгүүлээд Кейтийн толиотой сайхныг магтаж үг хэлэх гэснээ
цаг тухайд биеэ барив.

“Болгоомжтой байгаарай, Жорж оо. Зусар зулгүй үг огт хэрэггүй. Тэгэх юм бол бухыг улаан
нөмрөгөөр өдөөж уурлуулсантай адил юм болно шүү” гэж Ева сануулсан.

Бойдаа дарс авчирч тавиад сэмхэн холдов.

- Мистер Меллис та суугтун.

- Баярлалаа.

Жорж буйдан дээр очиж суухад Александра хажууд нь зэрэгцэн суугаад эмээгийнхээ өөдөөс
харлаа.

- Миний ойлгосноор бол та миний ач охинтой нилээд олон уулздаг юм байна.

- Тийм ээ. Уулзахад таатай байдаг.

Кейт бор нүдээрээ түүнийг ажин шинжээд,

- Таныг брокерын пүүсэд ажилладаг гэж Александра надад хэлсэн.

- Тийм ээ.

- Үнэнийг хэлэхэд энэ надад хачин санагдаж байна. Та нилээд их ашиг хонжоотой нэг газар
удирдаж болох байтал багавтар цалинтай түшмэлийн ажил хийж байх хэрэг юу билээ?

- Эмээ би танд ярьсан шүү дээ хэмээн Александра ярианд оролцлоо.

- Би мистер Меллисээс өөрөөс нь хариу сонсмоор байна.

“Эелдэг найртай байгаарай. Гэхдээ ая тал зассаны хэрэггүй. Чиний сул талыг мэдчихвэл
тасар тасар татаад хаяна шүү”

- Би хувийнхаа амьдралыг хүнд ярих дургүй байдаг юм л даа, миссис Блэкуэлл гэснээ
шийдэж ядан байгаа мэт хэсэг дуугүй байснаа дараа Кейтийн өөдөөс эгцлэн ширтэж,

- Гэхдээ тухайн байдлыг бодоод... Би биеэ даасан хүн л дээ. Надад хүний юм хэрэггүй. Хэрэв
би өөрөө “Меллис энд компани” байгуулсан бол өнөөдөр ч гэсэн түүнийгээ удирдаж байх
сан. Энэ компанийг манай өвөг эцэг үндэслэн байгуулж, манай эцэг цэцэглэн мандаж байгаа
корпораци болгосон. Түүнийг манай дүү нар удирдаж чадна. Өөрийн хүчээр өөрөө ямар нэг
компани байгуултал таны хэлсэнчлэн бага шиг цалинтай түшмэл байсан нь надад дээр гэж
шийдсэн юм. Хэзээ нэгэн цагт өөрийн компани байгуулбал тэр л миний бах байх болно.

Кейт алгуурхан толгой дохив.

Энэ бол Кейтийн санаснаас огт өөр хүн байлаа. Бэлэн хоолон дээр буух гэж ач охиных нь
хойноос аль хэдийнээс хөөцөлдөж байгаа зальтай эр байх болов уу гэсэн бодсон чинь шал өөр
хүн шиг байлаа. Хэдийгээр Кейтэд нэг л сэжигтэй мэт санагдавч чухам юу болохыг нь өөрөө
мэдэхгүй байв. Энэ хүн хэтэрхий арван хуруу тэгш юм.
Харин арван хуруу тэгш хүн гэж байдаггүй Кейт сайн мэднэ. Энэ юу нуугаад байна вэ?

- Миний сонсоноор бол танайх нилээд чадалтай айл шиг...

“Ганц хэрэгтэй юм гэвэл чи өөрийгөө аймаар баян хүн. Алекст ухаангүй дурласан гэж л
эмгэнд итгүүлэх хэрэгтэй. Хүний сэтгэлийг татан дагуулах хамаг мэхээ хийгээрэй. Биеэ сайн
барь. Тэгвэл бүх юм бүтнэ”

- Мөнгө гэдэг зайлшгүй хэрэгтэй эд л дээ, миссис Блэкуэлл. Үүнээс гадна миний сонирхдог
олон юм бий.

Кейт “Меллис энд компанийн” хөрөнгө чинээний байдлыг хэдийн лавлаж мэдсэн аж. “Дан
энд Брэдститийн” тоо бүртгэлээр тэдний хөрөнгө 30 сая доллараас давсан.

- Мистер Меллис та гэрийнхэнтэйгээ эв найртай байдаг уу? гэсэн Жоржийн нүүр туяарч,

- Их эв найртай байдаг. Ер нь грекүүд их гэр бүлсэг л дээ. Манайд нэг зүйр үг байдаг юм.
Бидний нэг маань хуруугаа эсгэвэл бусдын хуруунаас цус гарна гэж. Бид ойр дотно
харилцаатай л даа.

Үнэндээ гэвэл Жорж Грекээс 3 жил хэл мэдээ аваагүй аж.

Кейт сайшаан толгой дохиод,

- Би гэр бүлийн эв найртай харилцааг сайшаадаг юм гэв.

Кейт ач охиноо түргэн харвал Александрын царайд хайр дурлал бичээстэй байлаа. Тэгээд
хормын төдий Дэвидийгээ санан, хоёул бие биедээ хичнээн хайртай байснаа дурсан санав.
Олон он жил улиран өнгөрсөн боловч тэр хайрын дурьдатгал бүүдгэрэн баларсангүй. Өрөөнд
Лестер орж ирээд,

- Зоог бэлэн, хатагтай хэмээн зарлав.

Хоолны үед энгийн ярилцахын далимд Кейт бас юм асууж байлаа. Жорж асуусан бүхнийг нь
хариулахад бэлэн байжээ.

- Мистер Меллис та хүүхдэд хайртай юу?

“Эмгэн жич хүүгээ үзэх гэж их хүсдэг. Хамгийн их хүсдэг юм нь энэ”

Жорж Кейтийн өөдөөс гайхан харж,

- Хүүхдэд хайртай юу гэж үү? Хүүхэдгүй эр ямар эр байх вэ дээ. Намайг эхнэр авахаар
хөөрхий эхнэр минь ажил ихтэй байна болно. Грект хүний ядуу баяныг хүүхдийнх нь тоогоор
хэмждэг юм л даа гээд инээмсэглэв.

“Энэ хүн үнэнээсээ ярьж байх шиг. Мистер Меллисийн хувийн мөнгөн санхүүг шалгаж үз
гэж Брэдэд хэлье” хэмээн Кейт бодлоо.

... Александра унтахын өмнө учиргүй догдлон хэн нэгэнтэй ярихаар шийдэн Ева руу утасдаж,
Жорж Меллисийн гэрт нь оройн зоог барьсаныг ярив.

- Би тэсэж ядаж байна. Бүгдийг тодорхой яриач хэмээн Ева хэллээ.

Александра ярьж эхлэв.

- Эмээгийн санаанд таарах шиг боллоо гэсэнд Ева инээд алдан,

- Эмээ юу гэж байна?

- Жоржоос амин хувийн чанартай зөндөө олон юм асуусан. Жорж сорилтыг нэр төртэй давж
гарлаа.

- Тодорхой байна. Тэгэхлээр хоёр шувуухай үүрээ засахаар шийдээ юу?

- Би... хн. Жорж сууя гэж гуйгаагүй байгаа. Гэхдээ гуйх болов уу гэж бодож байна хэмээн
Александра гэнэн цагаахнаар хариулахдаа хоолойн нь чичрэн байлаа.

- Эмээ зөвшөөрөх үү?

- Зөвшөөрөх байх. Жоржийн хувийн мөнгөн санхүүг шалгах гэж байгаа. Энэ талаар зовох юм
юу байгаа аж дээ...

Евагийн зүрх палхийв.

- Чи эс мэдэх биш дээ, эмээгийн хашир болгоомжтойг... хэмээн Александра үргэлжлүүлэн

хэлэхэд,

- Тийм ээ мэднэ гэж Ева алгуурхан хариулав.

Одоо даруйхан нэг арга бодохгүй бол хамаг төлөвлөгөө талаар өнгөрөх нь тэр...

- Надтай ярьж байгаарай гэж Ева хэлэхэд,

- Тэгэлгүй яах вэ, Ева. Тавтай нойрсоорой гээд Александра утасаа тавилаа.

Ева дүүтэйгээ ярьж дуусаад даруй Жорж руу залгасанд, цаадах нь гэртээ байсангүй. Ева
түүнийг утас автал 10 минут тутам залгаж байлаа. Жоржийг харилцуур авмагц дуугарахын
завдалгүй,

- Чи нэг хоёр сая доллар даруйхан олж чадах уу?

- Чи солиоров уу?

- Кейт чиний мөнгөн санхүүг шалгах гэж байна.

- Манай гэрийнхэн баяныг тэр мэднэ шүү дээ. Яагаад... гэтэл Ева яриаг нь таслан,

- Танай гэрийнхнийг хэлээгүй, чамайг хэлж байна. Эмгэнийг хашир гэж чамд хэлсэн биз дээ,
би гэхэд нь Жорж хэсэг дуугүй бодолхийлснээ,

- Би хаанаас сая доллар олох вэ гэж буцааж асуулаа.

- Нэг санал байна...

Маргааш өглөө нь Кейт туслахдаа,

- Хэнсон энд Хэнсон компани ажилладаг мистер Жорж Меллисийн хувийн санхүүг
шалгаадах гэж Брэдэд хэл гэсэнд,

- Мистер Рожерс маргааш ирнэ л дээ. Ажилаар өөр хотод яваа. Хүлээх үү эсвэл... гэхэд нь
Кейт,

- Үүнийг маргааш хийхэд болно гэв.

Хэнсон энд Хэнсон брокерийн пүүс доод Манхеттэнд Уолл стритийн буланд байдаг аж.
Сангийн бирж онгойгоод орчин тойронд тоймгүй үймээн. Пүүсийн төв байранд брокер,
шинжээч нягтлан бодох харилцагч нарын хувийн төлөөлөг гэх мэт 250 хүн ажиллах бөгөөд
бүгдээрээ хурдан шалмаг ажиллана. Харин Жорж Меллис айж балмагдан ширээнийхээ ард
сууж байлаа. Хэрэв түүний одоо хийхээр завдан буй зүйл тасалдах юм бол тэрээр шоронд
орох нь гарцаагүй юм. Бүгд санасан ёсоор бүтвэл Жорж энэ дэлхийн эзэн болно...

- Чи наад утсаа авахгүй юм уу?

Пүүсийн нэгэн ажилтныг дэргэд нь ирээд ингэж хэлэхэд Жорж сая нэг сэхээ оров. Ширээн
дээрх утас түрүүнээс хойш тэсэлгүй хангинаад байсныг сая л анзаарлаа. Биеэ хэвийн
байдлаар авч байх хэрэгтэй. Эс тэгвэл ажиг сэжиг авч магад. Жорж харилцуурыг шүүрэн
аваад,

- Жорж Меллис сонсож байна гээд хажуудаа зогсож буй ажилтан руу харж инээмсэглэв.

Жорж өглөөжин хувьцаа худалдан авах, худалдах тухай заавар тушаал өгч, авч байх зуур
Евагийн төлөвлөгөөг үргэлжлүүлэн бодсоор л байлаа. Сая доллар яаж хулгайлах вэ? Үгүй яаж
сая доллар зээлдэх вэ?

“Энэ их амархан шүү, Жорж. Чи банкны хувьцааг ганц шөнө зээлдэж хэрэглэх хэрэгтэй.
Өглөө нь буцаагаад байранд нь хийчихнэ. Хэн ч юу ч мэдэхгүй” гэж Ева хэлсэн юмсанж.

Брокерын пүүс бүрийн төмөр авдарт олон сая долларын бонд, үнэт цаас хадгалаастай байдаг.
Зарим томоохон хувьцаан дээр эзний нэр байх боловч ихэнх үнэт цаас чухам хэнийх болохыг
тодохойлж болох түлхүүр тоотой байдаг. Ийм хувьцааг худалдаж болохгүй. Ерөөсөө Жорж
хувьцааг мөнгө болгох гэж байгаа юм биш, огт өөр зорилгоор хэрэглэх, үгүй түр зээлдэх гэж
байгаа юм. Хэнсон энд хэнсоны үнэт цаасыг 7 давхрын тусгай байранд хадгалдаг. Тийшээ
гагцхүү нууц түлхүүр бүхий пайзтай бол орж болно. Хадгалах газрын үүдийг буутай цагдаа
манаж байдаг. Жоржид тийм пайз байхгүй. Гэвч хэнээс авч болохыг мэднэ.

Элен Тэчэр бол 40 өөд насны бэлэвсэн хүүхэн. Тэр бол аюулын царайлаг болж ирээд гол шиг
сайхан бие цогцостой. Элен бас сайхан хоол хийдэгээрээ алдаршжээ. Хүнтэй суугаад 20
гаруй жил болсон агаад эр нөхөр нь өнгөрснөөс хойш их ганцаардах болжээ. Түүнд анхаарал
халамждаа авж бүхнээ зориулах эр хэрэгтэй байв. Даанч пүүсэд ажилладаг эмэгтэйчүүдийн
олонхи нь нас залуу болохоор Элентэй уулзах болзоо тавих хүн олдохгүй.

Элен дээд давхарт нягтлан бодох хийдэг. Элен Жоржийг анх хараад өөрт нь чухам ийм л эр
хэрэгтэйг ойлгожээ. Тэгээд Жоржийг манайд очиж оройг хоол ид хэмээн урьж, сайхан
хоолоор дайлахын сацуу өөр зугаа цэнгэл ч олдоно гэх байрын үг цухуйлгасан боловч Жорж
дандаа нэг шалтаг хэлээд татгалздаг байв. Тэр өглөө Элений утас дуугарахад тэрээр
харилцуур аваад,

- Нягтлан бодох хэлтэс, Элен Тэчэр сонсож байна гэсэнд,

- Элен, Жорж байна гэж Меллисийн чихэнд аятайхан дуу сонсогдлоо.

- Юу гээ вэ, Жорж?

- Чамд хэлэх нэг сонин юм байна. Чи наашаа ороод ирэхгүй юу?

- Одоо юу?

- Тийм.

- Хэцүү л байна даа. Ажил гэж жигтэйхэн их.

- Өө, чи ажил ихтэй байгаа бол хэрэггүй. Дараа боломз...

- Үгүй, үгүй. Би одоо очлоо.

Жорж харилцуураа тавьтал утас нь дахин дуугарсан боловч тоож анхаарсангүй. Ширээн
дээрээс гарын дор аль дайралдсан бичиг цаасыг шүүрч аваад цахилгаан өргүүр рүү очлоо.
Ойр хавьд хүн байхгүйг мэдээд цахилгаан өргүүрийн дэргэдүүр өнгөрч, явган шатаар дээш
харайн хурдалав. Дээд давхарт хэд харайн хүрээд Элений өрөөг рүү шагайтал хоосон байлаа.
Эргэлзэх юмгүй шууд ороод хаалгийг сайн хаалаа. Баригдвал...

Жорж ийм юм бодохгүйг хичээлээ. Элен пайзаа хадгалдаг шургуулыг татвал пайз байж
байлаа. Жорж пайзыг авч халаасандаа хийгээд өрөөнөөс гарч, өөрийн давхарт гүйн буув.
Түүнийг өрөөндөө ирэхэд Элен түүнийг хүлээж байлаа.

- Уучлаарай. Намайг яаралтай дуудаад... гэж Жорж хэлэхэд,

- Зүгээр, зүгээр. Чи сонин юм хэлье гэв үү?

- Өнөөдөр чиний төрсөн өдөр гэж нэгэн бяцхан шувуухай миний чихэнд шивэгнэсэн юм.
Тэгээд чамайг үдийн хоолонд урих гэсэн юм гээд хүүхнийг ажиглан зогслоо.

Элен миний төрсөн өдөр биш гэж үнэнээ хэлэх юм уу гэснээ Жоржтой хамт хоол идэх
бололцоог алдмааргүй санагдан,

- Чи их эелдэг найртай хүн юм. Чамтай үдийн хоол идэхэд татгалзах юм алга гэлээ.

- Яриа таарлаа. Нэг цагт “Тонид” уулзья.

Жорж Эленийг хоолонд утсаар урьж болох байсныг Элен анзаарсангүй.

Эленийг гарсан даруйд Жорж хөдөлж эхлэлээ. Пайзыг байранд нь буцааж тавихын өмнө их
зүйлийг хийж амжих хэрэгтэй. Жорж 7 давхарт гарч, хадгалах газрын сараалжин төмөртэй
хаалганы дэргэд очиж, пайзыг шургуулсанд хаалга онгойв. Дотогшоо орох гэж байтал
харуулын хүн,

- Таныг урьд өмнө зүс үзээгүй юм байна гэхэд Жоржийн зүрх дэлссэн ч, бие барин
инээмсэглээд,

- Нээрээ тийм. Энэ миний харьяа газар биш. Манай харилцагч нарын нэг нь яаралтай
утасдаж, өөрийн үнэт цаасыг шалгаадах гэлээ л дээ. Арай бүтэн өдөр орохгүй байгаа гэж
найдна гэсэнд манааны хүн өрөвдсөн байдалтай инээмсэглэж,

- Амжилт хүсье гээд Жоржийн хойноос хараад үлдлээ.

Хадгалах байр нь уртаашаа 30, өргөөшөө 15 футийн бетонон өрөө байлаа. Жорж төмөр
шүүгээнүүдийн дэргэд очиж, шургуулгыг онгойлгож үзэв. Дотор нь америкийн сангийн
бирж, Нью Йоркийн янз бүрийн компанийн үнэт цаас хадгалаастай. Дэвсгэрт бүр дээр уг
дэвсгэрт агуулагдсан хувьцааны тоог заасан байна. Жорж бушуухан 100 мянгын үнэтэй арван
үнэт цаас аваад пиджакныхаа дотуур халаасанд хийж, шургуулгыг хаагаад байрнаас гарлаа.

- Хурдан амжуулаа шив дээ, хөө гэж харуулын хүнийг хэлэхэд Жорж толгой сэгсэрч,

- Компьютер надад буруу мэдээлэл өгчээ гэтэл,

- Хөөтэй компьютерууд. Биднийг удахгүй хөөднө дөө гэв.

Ажлынхаа байранд ирэх үед Жоржийн хөлс чим чим дусалж байлаа. Одоохондоо бүх юм
бүтэмжтэй байна.

Харилцуур авч, Александрын утасанд залгалаа.

- Хонгор минь, би өнөө орой танай эмээ та хоёртой уулзмаар байна гэсэнд,

- Чамайг өнөө орой ажил төрлийн уулзалттай гэж бодсон юм шүү

- Түүнийг хойшлуулсан. Чамтай ярих чухал зүйл байна...

Жорж өдрийн нэг цагт Элен Тэчэрийн өрөөнд орж, пайзыг байранд нь тавилаа. Энэ үед Элен
зоогийн танхимд түүнийг хүлээж байгаа. Уг пайзыг буцааж тавимааргүй байв. Дахиад хэрэг
болно шүү дээ. Гэвч орой нь буцааж өгөөгүй пайз маргааш өглөө нь аяндаа хүчингүй
болдгийг мэднэ. Арваад минутын дараа Жорж Элентэй хамт ширээнийн ард сууж байлаа.
Хүүхний гараас бариад,

- Хоёул олон уулзаж байвал сайн байна. Маргааш дахиад хамт үдийн хоол идэх үү? гээд
нүдийг нь эгцлэн харсанд хүүхний царай туяарч,

- Тэгье л дээ, Жорж гэжээ.

Жорж тэр өдөр ажлаасаа явахдаа өвөртөө, сая долларын үнэт цаастай байлаа. Жорж
Блэкуэллийнхний гэрт 7 цагт очиход түүнийг тэр даруй номын санд дагуулж аваачив. Тэнд
Александра, Кейт хоёр хүлээж байлаа.

- Оройн мэнд, урилгагүй хүрч ирснийг минь уучлаарай. Та хоёртой нэг юм яримаар байна.
Миссис Блэкуэлл та намайг дэндүү хуучинсаг хүн гэх болов уу даа. Би танаас ач охинтой
чинь ханилан суухыг зөвшөөрнө үү гэж гуйхаар ирлээ. Ирлээ ч гэж гуйж байна... Би
Александрад сэтгэлтэй. Александра ч надад сэтгэлтэй гэж бодож байна. Тэгээд таныг
зөвшөөрч, ерөөл сургаалаа хайрлах болов уу гэж бодож байна... хэмээн Жорж хэлээд
хүрэмнийхээ дотуур халааснаас биржийн дэвсгэртээ гаргаж, Кейтийн өмнө ширээн дээр
тавиад,

- Би Александрад үүнийг сүй тавьсаны бэлэг болгож байгаа юм. Танаас адис ерөөл хүсье гэв.

Кейт Жоржийн ширээн дээр хайхрамжгүй байдалтай тавьсан биржийн дэвсгэртийг харлаа.
Компаниудын нэрсийг Кейт сайн мэднэ. Александра Жоржийн дэргэд ойртон очиж,

- Ай хайрт минь хэмээн шивэгнээд эмээгийнхээ өөдөөс царайчилсан байдалтай хараад,

- Эмээ хэмээн дуугарав.

Кейт хоёр залууг хараад татгалзаж чадахгүйгээ мэдэж, нэгэн агшны төдий атаархах сэтгэл
төрөх шиг болжээ.

- Та хоёрт сайн сайхныг хүсэн ерөөе гэж удаан зөөж хэллээ. Жорж инээмсэглээд Кейтийн
дэргэд очиж,

- Болох уу? гээд хацар дээр нь үнслээ...

Жорж Александратай хоёулхнаа үлдээд,

- Сая долларын үнэт цаас гэртээ хадгалж байхын хэрэггүй юм уу даа. Би сейфэнд хийчихье
гэж хайхрамжгүй байдалтай өгүүлсэнд,
- Тэг тэг гэж Александра зөвшөөрөв.

Жорж дэвсгэртүүдийг цуглуулан авч халаасандаа лав хийлээ.

Тэр орой Кейт орон орохдоо “Жоржийн санхүүг шалгах хэрэггүй юм шив дээ” гэж бодлоо.

Маргааш нь үнэт цаасыг буцааж байранд нь тавих гэж дахиад л Эленийг залилах хэрэг
боллоо. Жорж “чамд өгөх бэлэг байна” хэмээн утасдаад, хүүхнийг доошоо бууж ирэх хооронд
өрөөнд нь орж, пайзыг авч амжлаа. Тэгээд Эленд “гуччи” пүүсийн чамгүй үнэтэй хүзүүний
ороолт бэлэглэж, өнөөдөр хамт хоол иднэ гэдгээ сануулав. Жорж онцын төвөггүйгээр үнэт
цаасыг буцааж тавиад нэн удалгүй Элентэй хамт хоол идэж байлаа. Үдийн хоол өндөрлөх үед
Элен Жоржийн гараас нь бариад,

- Жорж оо, чи манайд очиж оройн хоол идэхгүй юу? гэхэд нь,

- Горьгүй байх аа. Би эхнэр авах гэж байгаа гэжээ.

Дараачийн өдрүүдэд тэд хуримын төлөвлөгөөг хэлэлцлээ.

- Нэг их олон зочин уримааргүй байна, эмээ. Бидэнд нэг их сүртэй хурим хэрэггүй, тийм үү?
гэж Александраг өгүүлэхэд,

- Зөвшөөрч байна. Энэ бол хувийн хэрэг гэж Жорж түүнийг дэмжлээ.

Тэгээд Блэкуэллийнхний гэрт хуримын ёслол хийж, шүүгчээр гэрлэлтээ батлуулахаах

шийдлээ.

- Танайхантай танилцмаар байна. Бүгдээрээ ирнэ биз дээ?

- Мэдээжийн хэрэг, бүгд ирнэ.

- Манайхан таны сэтгэлд таарна гэж итгэж байна гээд Жорж Александрын өөдөөс харав.

Ач охиндоо Жоржийн хандаж харилцаж байгаа байдалд Кейтийн сэтгэл уярчээ. Ач охин нь
үнэн хайрын сэтгэлтэй хүнтэйгээ сууж байгаад нь баярлаж байлаа.

... Хуримын ёслолоос хоёр хоногийн өмнө Жорж Блэкуэллийнд урвагар царайтай хүрч ирээд,

- Би дөнгөж сая нэг аймшигтай мэдээ авлаа. Аавын зүрхний өвчин дахин хөдөлжээ гэсэнд,

- Яасан тоогүй юм бэ. Одоо бие нь яаж байна? хэмээн Кейт харамсан өгүүлэв.

- Аавыг сэхэх нь сэхэх байх гэж байна. Даанч миний хуриманд ирж манайхнаас хүн ирж
чадахгүй нь шиг байна.

- Грект очиж бал сараа тэнд өнгөрөхийн ялдамд танайхантай уулзах танилцаж болох шүү
дээ? хэмээн Александраг санал болгоход Жорж хацрыг нь илээд,
- Надад өөр төлөвлөгөө бий, хонгор минь. Төрөл садан хэрэггүй, чи бид хоёр хоёулхнаа... гэв.

Хуримын ёслол Блэкуэллийн гэрт болж, хорь гаруй зочид оролцов. Александра хуримдаа Еваг
урья гэж эмээгээсээ мөргөн гуйсан боловч Кейт хавьтуулсангүй.

- Эгчийг чинь хэзээ ч энэ гэрийн босго алхуулахгүй гэхэд нь Александрын нүдэнд нулимс
мэлтэгнэн,

- Эмээ та битгий ийм хатуу сэтгэл гаргаач дээ. Би та хоёртоо их хайртай. Та түүнийг уучилж
болохгүй юм уу?

Кейт хормын төдий Евагийн хийсэн уучилж болохгүй явдлыг ярих гэснээ биеэ барьж,

- Ева байхгүй бол бид бүгдэд илүү дээр гэв.

Хуриман дээр Жорж гэрэл зурагчидад,

- Аль болох олон зураг аваарай. Би гэрийнхэндээ Грек рүү явуулах юм гэж хэлж байхыг Кейт
сонсоод “Залуу хүн гэхэд их анхаарал халамжтай хүн юм” гэж боджээ.

Хуримын бялууг зүссэний дараа Жорж Александрын чихэнд,

- Хонгор минь, би ойрхон зуур гадагш гараад ирье гэв.

- Юу болоо вэ?

- Юу ч болоогүй, зүгээр. Намайг амралтнаас өмнө нэг чухал харилагчтай ажил явдлаа
дуусгаарай гэсэн юм л даа. Удаан саатахгүйг хичээнэ. Онгоц нисэхээс өмнө ирнэ гэхэд нь
Александра инээмсэглэж

- Бушуухан ирээрэй. Би явахгүй чамайг хүлээж байна шүү гэлээ.

...Жоржийг орж ирэхэд Ева унтлагын нимгэн хувцастай хүлээж байлаа.

- За хонгор минь, хурим чинь ямар болов? Сайхан байв уу?

- Сайхан байлаа. Ямар ч саадгүй...

- Яагаад тийм болсон гэж бодож байна даа. Яагаад гэвэл би бүгдийг нь төлөвлөсөн болохоор
тэр. Үүнийг битгий мартаарай... гэхэд нь Жорж Евагийн өөдөөс харж,

- Хэзээ ч мартахгүй,

- Чи бид хоёр үүрд хамжаа түнш хэвээрээ үлдэнэ.

- Тийм л дээ.

- За тийм байж. Чи ингээд гэрлэлээ гээд Ева инээмсэглэв.

Жорж цагаа харж,

- Тийм, Надад цаг бага байна, би бушуухан буцаж очих хэрэгтэй. Чи яах гэж утасдав?

- Арай болоогүй гэж Ева хэлэв.

- Яагаад?

- Эхлээд чи... хувцасаа тайл, дүүгийнхээ нөхөртэй энгэр зөрүүлж үзье ... гэв.
30-р бүлэг

Жорж Александра хоёрын бал сарыг Ева төлөвлөсөн аж. Баахан зардал гаргах хэрэгтэй
болжээ.

- Энэ удаа гар татаж болохгүй гэж Ева Жоржид хэлжээ.

Ингээд Ева нэгэн халуун сэтгэлтэй хар хүний өгсөн үнэт эдлэлийн гурван хослол зүүлтээ
худалдаад мөнгийг нь Жоржид өгчээ.

- Баярлалаа, Ева. Би...

- Сүүлд нь буцааж өгөөрэй.

Бал сар гайхалтай сайхан болов. Жорж Александра хоёр Ямайкийн умард хэсэгт Монтего
булан дахь “Раунд Хилл” зочид буудалд буужээ. Зочид буудлын захиргааны байшинг тойроод
хориод сайхан байшин бий. Меллисийнхний дэргэдээ тусгай усан сан бүхий “Ноэль Ковард”
ордонд буулаа. Үйлчлэгч эмэгтэй өглөөний цай хийж өгнө. Жорж жижгэвтэр яхта онгоц
хөлсөлж аваад хоёул тэнгисээр аялж, заримдаа загсанд явна. Хоёул усанд орж, ном уншиж,
эсвэл дэлгүүр хэснэ. Өдөр хэд хэдэн удаа үүл борооны ажил үүсгэнэ. Александра Жоржийн
өвөрт ороод хүссэн бүхнийг нь хангаж өгөхийг хичээнэ. Тэгээд түүний хүсэл ханан ёолоход
түүнд ийм цэнгэлийг эдлүүлж чадсандаа баярлана.

Нэг өдөр Жорж,

- Алекс аа, би Кингтон орох хэрэгтэй байна. Тэнд манай пүүсийн нэг салбар байдаг юм.
Дарга намайг зав гарвал байдлыг үзчихээд ирээрэй гэж захисан юм. Би тийшээ орчихоод
ирье. Сүүлд даргад хэлэх юмтай гэв.

- Тэг л дээ. Хамт явах уу? хэмээн Александраг санал болгоход, Жорж хөмсөг зангидан,

- Чамайг аваад явахад сайхан байх сан. Даанч ажлаас надад утасдаж сүүлчийн ажлын явцыг
мэдэгдэх ёстой юм. Чи эндээ үлдээд, утасдахаар нь юу хэлснийг бичиж авч надад туслахгүй
юу? гэв.

- Буудалын хүлээн авагчыг бичээд ав гэж болдоггүй юм уу?

- Болохгүй. Их чухал ажил байгаа юм. Аль дайралдсан хүнд итгэж болохгүй чухал ажил
байгаа юм.

- За тэгвэл би үлдье гээд Александра хоцров.

Жорж машин хөлсөлж аваад Кингстон орохоор хөдөллөө. Ямайкийн нийслэлд хүрэхэд цаг
нэг хагас болж байлаа. Хотын гудамж тойрон аялагчдаар дүүрэн. Кингстон бол худалдааны
хот мөний сацуу номын сан, музейгээр алдартай билээ.

Жорж алиныг нь ч сонирхсонгүй. Хэдэн долоо хоног тайлж чадаагүй тачаал биед нь хураад
тэсэхийн аргагүй болсон нь энэ. Анх дайралдсан баарт орж, баарны хүнээс байдлыг асуулаа.
Жорж таван минутын дараа тэндээс 15 настай хар арьстай янхан охин дагуулан гарч ирлээ.
Тэд хямдхан зочид буудалд орж, тэнд цаг болсны Жорж ганцаараа гарч, ирээд хөлсний
машинд суун Монтегод эргэж очиход Александра түүнд ажлаас нь утасдаагүй болохыг хэлэв.

Маргааш нь сонин дээр нэгэн тойрон аялагч янхан хүүхнийг зодож бэртээсэн нь одоо үхлүүт
эмнэлэгт байгааг мэдээлсэн байлаа.

“Хэнсон энд Хэнсон пүүсийн эзэд Жорж Меллисийн зан байдлыг шүүн хэлэлцэв. Нэр
нөлөөтэй олон харилцагчид Меллисийг өгсөн үүрэг даалгавар муу биелүүлж байна гэсэн
гомдол багагүй иржээ. Тэгээд Жоржийг ажлаас халахаар шийдээд байтал нөхцөл байдал өөр
болов.

- Жорж Меллис Кейт Блэкуэллийн хүргэн. Үүнийг харгалзах хэрэгтэй гэж түнш нарын нэг нь
хэлэхэд,

- Тэр тийм шүү. Хэрэв бид Блэкуэллийн мөнгөнөөс нааш нь татаж чадах юм бол гэж өөр нэг
түнш хэлэв.

Хоёр түншийн нүдэнд шуналын оч гялалзан, Жорж Меллист дутагдлаа засах боломж олгох нь
зүйтэй гэж шийджээ.

...Александра Жорж хоёрыг хуримын аялалаас буцаж ирэхэд,

- Та хоёр надтай хамт суувал дээр. Энэ байшин том, бид бие биедээ саад болохгүй. Та нар...
гэж Кейт ярьж эхлэв. Жорж үгийг нь эвтэйхэн таслан,

- Хамт сууя гэсэнд тань баярлаж байна. Александра бид хоёр өөрийн гэсэн тусгай орон
байшинтай байвал дээр гэж шийдсэн л дээ.

Жорж алхах гишгэх бүрийг ажин шинжиж байх эмгэнтэй нэг гэрт хамт суухыг хүссэнгүй.

- Ойлгож байна. Тэгвэл би та хоёрт байшин худалдаж авч өгье. Та хоёрын хуримын бэлэг
болог гэхэд нь Жорж Кейтийг тэврэн,

- Та их сайхан сэтгэлтэй хүн юм. Алекс бид хоёр таны бэлгийг талархан хүлээж авах болно
гэж үнэнээсээ өгүүлэв.

- Баярлалаа, эмээ. Бид хоёр энэ хавьд ойрхон байшин ольё гэж Александра хэлэхэд,

- Тийм л дээ. Бид танд ойрхон байхыг хүснэ. Та байна шүү, хүний сэтгэлийг татан дагуулж
чадах хүн юм гэж Жорж нэмж хэллээ.

Удалгүй Кейтийн байшингаас хэдэн хашааны цаана, цэцэрлэгийн дэргэд хар тоосгоор
барьсан хуучин цагийн маш сайхан байшин олжээ. Тэр бол асар том унтлагын өрөө, зочдод
зориулсан хоёр унтлагын өрөө, зарц үйлчлэгчдийн байр, гал тогооны уужуухан өрөө, хоолны
танхим, гоёмсог зочлох өрөө, номын сантай гурван давхар сайхан байшин байв.
- Хогшил тавилгыг чи өөрөө л янзлах болж дээ, хонгор минь. Би харилцагч нартай ажиллаад
зав муутай байна шүү гэж Жорж Александрад хэлэв.

Үнэн хэрэг дээрээ Жорж харилцагч нартай бараг уулздаггүй бөгөөд энэ удаа бүр шал ондоо
юм сонирхож байлаа.

Янхан хүүхнүүд, баарт очдог ганц бие эмэгтэйчүүдээс цагдаагийн газар гомдол мэдүүлэг
ирэх болжээ. Хохирогч эмэгтэйчүүд хүчиндэгч этгээдийг Өмнөд Америкийнх болов уу
гэмээр цэвэрхэн царайтай, боловсон маягтай гадаадын хүн гэж тодорхойлж байлаа.
Цагдаагийн картын санд түүний зураг байсангүй. Ямар ч атугай хохирогч эмэгтэйчүүд тэгж
баталж байв. Ева Жорж хоёр тэднийг хэн танихгүй жижиг гуанзанд хоол идэцгээж байв.

- Чи Алексыг аргалж байгаад гэрээслэл бичүүлэх хэрэгтэй. Энэ тухай Кейтэд мэдэгдэж
болохгүй шүү гэж Ева ширүүхэн хэлэв.

- Би яаж гэрээслэл бичүүлэх юм бэ, чөтгөр алгад?

- Яаж хийхийг би зааж өгнө, хонгор минь...

Маргааш нь Жорж Александратай хамт “Ле Плэзирт” оройн хоол идэхээр ярьж тохиров. Тэр
бол Нью Йоркт байдаг хамгийн шилдэг сайн франц зоогийн газар юм. Зоогийн газрын эзэн
Пьер хоцорч ирсэн Жоржийг, Александрын хүлээж буй ширээний дэргэд аваачлаа. Жорж
уучлалт хүсэн, хоцорсноо тайлбарлалаа.

- Намайг уучлаарай, хайрт минь. Би өмгөөлөгч нартай уулзаад... Тэдэнтэй үг хэлээ ололцох
хэцүүг чи эс мэдэх биш. Дандаа төвөг ургуулж байдаг...

- Ямар нэгэн юм болоо юу, Жорж оо?

- Үгүй л дээ. Би зүгээр л гэрээслэлээ өөрчлүүлсэн юм... гээд Александрын гараас барьж,

- Одоо хэрэв надад ямар нэгэн гай зовлон тохиолдох юм бол миний бүх эд хөрөнгө чамд
үлдэнэ гэв.

- Жорж оо, надад хэрэггүй шүү дээ...

- Тийм л дээ. Миний хөрөнгө Блэкуэллийнхний хөрөнгийн дэргэд юу ч биш л дээ. Гэхдээ
жаахан ч гэсэн минийх юм бас би түүнийг чамд л үлдээх гэсэн юм л даа...

- Чамд ямар нэгэн гай зовлон тохиолдохгүй.

- Тийм ээ, Алекс аа. Гэхдээ амьдралд юу эс байдаг билээ. Аливаа сайн мууд бэлэн байх нь ер
гэмгүй шүү дээ. Бүх зүйл сайн байвал сайн л биз, харин муугаар эргэхэд... Ингэвэл ирээдүй
найдвартай шүү дээ. Чи юу гэж бодож байна даа?

Александра хэсэг бодолхийлээд,

- Би бас гэрээслэлээ өөрчлөх хэрэгтэй юм байна тийм үү?

- Яах юм бэ гэж Жорж гайхав.

- Чи миний эр нөхөр. Надад байгаа юм бүхэн чинийх.

- Надад чиний мөнгө хэрэггүй, Алекс аа.

- Мэднэ. Гэхдээ чиний хэлдэг зөв. Юиыг яаж мэдэх вэ, эртнээс бэлэн байх хэрэгтэй... гээд
нүдэнд нь нулимс мэлтэлзэн

- Чи намайг тэнэг амьтан гэх байх. Би аз жаргалдаа ташуураад бидэнд ямар нэг гай зовлон
тохиолдоно гэж бодох ухаангүй байна гэсэнд,

- Тийм шүү гэж Жорж аман дотроо шивэгнэв.

- Би гэрээслэлээ өөрчлүүлэх талаар маргааш Брэдтэй ярья гэсэнд Жорж дал мөрөө хавчин,

- Өөрөө л мэд дээ, хонгор минь гэснээ толгойд нь өөр нэг бодол төрсөн байдал үзүүлж,

- Чиний гэрээслэлд миний өмгөөлөгч өөрчлөлт оруулбал зүгээр юм уу даа. Аль хэдийнээс
миний ажил хэргийг эрхлэн зохицуулж байгаа, найдвартай сайн хүн байгаа юм. Тэр бүх
зүйлийг хамгийн аятайхан зохицуулж чадна...

- Эмээ бол... гээд Александра ярих гэтэл Жорж түүнийг хацрыг илэг таалж,

- Эмээд бидний хувийн амьдрал, ажил явдал ямар хамаа байх вэ. Би эмээд чинь хайртай.
Гэхдээ бидний амин хувийн явдал амин хувийнх хэвээрээ байг, тийм үү Алекс аа?

- Чиний зөв. Би эмээд юу ч хэлэхгүй. Чи өмгөөлөгчтэйгээ ярьж тохироод, маргааш намайг

очьё гэж байна гээрэй.

- Надад сануулаадхаарай. Одоо миний гэдэс өлсөж байна. Далайн хавчнаа эхлэх үү?...

Жорж долоо хоногийн дараа Еватай уулзав.

- Алекс шинэ гэрээслэл бичив үү?

- Өнөө өглөө. Харин ирэх долоо хоногт түүнийг төрсөн өдрийн баяраар компанийн
хувьцаанаас өөрт ноогдох хувийг авна.

Дараачийн долоо хоногт Крюгер Брэнт компанийн хувьцааны 49 хувийг Александрын нэр
дээр шилжүүлжээ. Жорж энэ сонинг тэр даруй Евад дуулгасанд цаадахь нь,

- Маш сайн байна. Өнөө орой хүрээд ир. Энэ үйл явдлыг тэмдэглэх хэрэгтэй гэхэд нь,

- Амжихгүй. Кейт Алексын төрсөн өдрийн баярыг тохиолдуулан үдэшлэг хийх гэж байгаа
гэсэнд Ева нилээд удаан дуугүй байсны эцэст,

- Ямар хоол хийх вэ? гэсэн хачин асуув.

- Би яаж мэдэх вэ дээ

- Мэдээд ир гээд харилцуурт утас тасарсан дийд дийд гэх чимээ сонсогдлоо.

45 минутын дараа Жорж Евад дахин утасдаж,

- Хоолны нэрс чамд ямар хэрэгтэйг бүү мэд. Чамайг уриагүй шүү дээ. За яах вэ, хэлье
“Коктель Сан-жак”, “Шатобриан”, латук шанцай, кофе. Алексын дуртай зайрмагаар хийсэн
хотол бялуу, сэтгэл чинь ханав уу? гэж дуртай дургүй өгүүлэв.

- Мэдлээ, Жорж оо. Орой уулзая.

- Болохгүй, Ева. Би яаж эхнэрийнхээ төрсөн өдрийн баяраас зугтах вэ.

- Нэг арга ол...

Жорж харилцуурыг тавиад цагаа харж, “Талийгаасай, чи. Бүгдээрээ талийгаасай” гэж бодлоо.
Жоржийг гагцхүү Блэкуэллийн ам бүлд багтсан болохоор л пүүс нь ажлаас халахгүй шиг
байдгийг Жорж мэджээ. Нөгөө талаар өөдлөх баяжих замд аюултай юм хийхийг хүсэхгүй
байлаа. Жорж ажил явдал нь урагштай байгаа залуугийн зохиомол дүр бий болгосон. Кейт
Александра хоёрт үнэн байдлыг мэдүүлж болохгүй. Нэн удахгүй эдний эрхшээлээс гарна даа.

Жорж эцэгтээ хуримын урилга явуулсан боловч өвгөн ядаж хариу өгсөнгүй. “Би дахиад чиний
барааг харахыг хүсэхгүй. Миний хувьд чи үхсэн, ойлгов уу” Аав нь хэдэн жилийн өмнө энэ
хатуу үгийг Жоржид хэлжээ. Үхсэн хүү нь босоод ирэхээр эцэг нь гайхах болно.

Александрын төрсөн өдрийн баяр үнэхээр сайхан боллоо. Александра 23 хүрчээ. Хэдэн арван
зочид цугларсан ба Александра Жоржийг өөрийн найз нараа урь гэсэнд тэр татгалзаж,

- Энэ бол чиний баяр шүү дээ, Алекс аа. Зөвхөн чиний найз нар ирэг гэжээ.

Үнэндээ бол Жоржид найз нөхөд байхгүй. Тэрээр ганцаараа байдаг, үүгээрээ бахархдаг.
Бусдын эрхшээлд байдаг хүнийг сул дорой амьтан гэж үзнэ. Александра лаа үлээн унтрааж
байгааг харах зуур: “Чи өөртөө урт наслахыг ерөөх хэрэгтэй байсан юм даа” гэж бодлоо.
Өнөөдөр Александрын гоо үзэсгэлэн төгс байгааг аргагүй хүлээв. Шифоноор хийсэн урт
цагаан платье, ганган хийцтэй мөнгөн туфли, Кейтийн бэлэглэсэн очир эрдэнийн сондор.
Цагаан алтан хүрээтэй том том очир эрдэнэ од мэт гялалзана.

Кейт тэднийг харах зуур, “Бидний хуримын нэг жилийн ойгоор Дэвид сондорыг бэлэглээд
надад хайртай гэж хэлж байсан сан” хэмээн бодов.

Харин Жорж бол “Энэ сондор дор хаяхад хагас сая хүрнэ дээ” гэж бодож байлаа.
Александрын олон найз хүүхэн оройжин Жоржоос нүд салгалгүй ширтэцгээж, ярьж байхдаа
биед нь хүрэхийг хичээж байгааг Жорж өөрөө ажиглаад, “Ээ муусайн өлөгчинүүд” гэж
хараан байлаа. Өөр нөхцөл байдалд бол Жорж хорхойгоо дарж тэсэхгүй үзээд алдах байсан
биз. Гэвч Александрын найз хүүхнүүдтэй энээ тэрээ болохыг хүссэнгүй. Жоржийн ажил
явдал их бүтэмжтэй байгаа болохоор ослтой юм хийхийг нэг л хүсэхгүй байлаа.

Шөнийн нэг цагт хэдэн минут дутуу байхад Жорж утасны дэргэд очиж зогсов. Утас
дуугарахад харилцуурыг даруй авлаа.

- Сонсож байна.

- Мистер Меллис уу? Утасан холбооны газраас утасдаж байна. Та яг шөнийн нэг цагт
утасдаарай гэж захиалсан...

Александра Жоржийн хажууд зогсож байв. Жорж өөдөөс нь харангаа харилцуурт,

- Хэдэн цагт гэнээ?

- Мистер Меллис үү?

- Тийм.

- Та шөнийг нэг цагт утасдаарай гэж захиалга өгсөн байна.

- За мэдлээ. Намайг одоо гарлаа гэж хэл. “Пан Ам” ийн танхимд намайг хүлээж бай гээ гэж
Жорж хэлээд харилцуурыг шидэв.

- Юу болоо вэ гэж Александрын асуухад,

- Өнөөх мангуу Хэнсон Сингапур орохоор нисэх гэж байгаа юм. Ажлынхаа өрөөнд
гэрээнийхээ төслийг мартчихсан байна гэнэ. Намайг очоод нисэх буудал дээр аваад ир гэж
байна гэхэд нь Александрын царайд урам хугарсан байдал илэрч,

- Одоо юу? Үүнийг өөр хүнээр хийлгэж болдоггүй юм уу?

- Ганц итгэдэг хүн нь би. Олигтой гарын туслах олдоггүй юм болов уу гэж бодмоор... гээд
Александрыг тэвэрч,

- Уучлаарай хонгор минь. Би төрсөн өдрийн чинь баярыг гутаахгүй. Аль болохуйц түргэн
буцаад ирнэ гэхэд нь Александра муухан инээмсэглээд,

- Чамайгаа хүлээж байя, Жорж оо гээд хойноос нь харж хэсэг зогссоноо зочид дээр очхоор
эргэлээ.

“Ева төрсөн өдрийнхөө баярыг ямар янзаар тэмдэглэж байгаа бол?” гэж Александра гэнэт
бодов.
...Еваг үүд тайлж өгөхөд Жорж дотогш орлоо.

- Аргалаад ирлээ шүү дээ. Чи их ухаантай хүн юм гэж Еваг хэлэхэд,

- Би энд үлдэж болохгүй гэхэд нь Ева түүний гараас барьж,

- Ийшээ ор, хонгор минь. Чамд сонин юм бэлтгэсэн гээд зочлох өрөөндөө дагуулж оров.

Хоёр хүнд зориулан ширээ засаж, цасан цагаан бүлээлгээр бүтээж, олон лаа асаажээ.

- Энэ хэнд зориулсан юм бэ?

- Өнөөдөр миний төрсөн өдөр шүү дээ, Жорж оо.

- Өө тийм л дээ. Би чамд бэлэг авчраагүй юм байна гэхэд нь Ева хүзүүг нь илж,

- Сүүлд авчраарай. Одоо суу гэв.

- Баярлалаа. Би юм идэхгүй. Саяхан хоол идсэн гэж Жоржийг хэлэхэд,

- Суу гэж Ева давтан хэллээ.

Жорж Евагийн царайг нэг хараад, ширээ рүү суув. Оройн хоолонд “Коктель Сан-жак”,
“Шатобриан”, латук шанцай, неаполитан зайрмагтай хотол бялуу бэлтгэсэн байлаа. Ева
өөдөөс нь харж суугаад Жоржийг албан хүчээр хоол идэж байгааг ажиглах зуур,

- Алекс бид хоёр үргэлж юм бүхнээ хуваадаг байсан. Өнөөдөр ч бас би түүнтэй төрсөн
өдрийн баярын хоолоо хувааж байна. Харин ирэх жил бид хоёрын нэг нь л энэ өдөр төрсөн
өдрөө тэмдэглэнэ. Алексын санамсаргүй гайд оруулах ажлыг эхлэх цаг боллоо, Жорж.
Хөөрхий эмгэн уй гашууд автан үхнэ. Тэгээд бүх баялаг нь биднийх болно. Одоо харин
унтлагын өрөөнд орцгооё. Чи миний төрсөн өдрийн баяраар надад бэлэг барь гэлээ.

Жорж үүнийг сонсоод бие нь зарсхийлээ. Жорж бол тэнхээ сайтай, зоригтой эр хүн. Гэтэл
энэ Ева түүнийг атгандаа атган арчаагүй дорой амьтан болгодог. Ева шаардаж байгаад
Жоржоор хувцасаа тайлуулж, дараа нь өөрөө Жоржийн хувцасыг тайлан сурамгай таалж
байгаад тачаалыг нь сэргээлээ. Тэгээд дээр нь гарч мордоод бөгсөө яаралгүй яаралгүй
хөдөлгөн,

- За ингээд, хонгор минь... Яасан сайхан юм бэ?... Чи тавьж чадахгүй л байна уу? Яагаад вэ
мэдэх үү? Чи сэтгэл мэдрэлийн өвчтэй. Чи хүүхэнд дургүй биз дээ тийм үү? Чи эмэгтэй
хүнийг зовоох тарчилгах л дуртай. Чи намайг ч гэсэн өвтгөмөөр байгаа биз тийм үү? Тэгмээр
байна уу, хэлээч дээ? гэв.

- Чамайг алмаар байна гэхэд нь Ева амьсгаадан инээмсэглэж,

- Чи тэгж чадахгүй. Яагаад гэвэл чи бид хоёрын хэн хэн маань компанийг гартаа оруулж
авахыг хүсэж байгаа. Бас нэг зүйл чи намайг хэзээ ч тарчлаан зовоож чадахгүй. Яагаад гэвэл
хэрэв надад ямар нэгэн гай тохиолдох юм бол найз хүүхэн минь түүнд хадгалуулсан захиаг
цагдаагийнханд аваачиж өгнө гэхэд нь Жорж Евагийн өөдөөс итгэж ядан харж,

- Худлаа гэв.

Ева урт хумсаараа Жоржийн нүцгэн цээжийг маажиж,

- Үүнийг шалгах ганц л арга бий тийм үү? гэж доогтой асуув.

Евагийн үнэн хэлж байгааг Жорж гэнэт ойлгов. Жорж энэ хүүхний өсгий дороос хэзээ ч гарч
чадахгүй. Энэ хүүхэн Жоржтой өөрийн боол мэт харилцаж, цаг ямагт доромжилж байх
болно. Жоржийн дотор харанхуйлж, толгой дотор нь ямар нэгэн юм тэсрэх шиг боллоо.
Нүдийг нь улаан хөшиг халхлан биеэ эзэмдэж чадахгүй болж байгааагаа мэдрэв. Түүнийг
үйлдлийг хэн нэгэн өөр хүн удирдан чиглүүлж байх шиг. Юм бүхэн удааширлаа...

Сүүлд санаж байхад Жорж Еваг дээрээсээ авч хаяад түүний муухай орилохыг сонссон. Жорж
Евагийн зөөлөн биеийг хайр найргүй балбаж, энэ нь түүний бахыг ханган дахин дахин дур
тавьж байгаатай адил зүйрлэшгүй сайхан байлаа. “Ай тэнгэр, би үүнийг хичнээн удаан
хүлээв” гэж Жорж бодлоо. Тэртээ хол нэг хүн хашгираад байх шиг. Юу билээ, хэн бэ?....

Нүдийг нь бүрхсэн улаан хөшиг аажмаар арилж, Жорж эргэн тойрон харвал Ева цусандаа
хутгалдан орон дээрээ хэвтэж байлаа...

Евагийн хамар нь муруйж, хамаг бие нь урагдаж шалбаран, тамхины галд түлэгдэн нүд нь
бүлцийн хавдан, эрүү нь хугарчээ.

- Одоо болиоч... болиоч гэж хүүхэн арайхийн шивэгнэж байлаа.

Жорж хий үзэгдлийг арилгах гэж толгойгоо хэд дахин сэгсрэв. Гэтэл юу ч өөрчлөгдсөнгүй.
Энэ бүгд хий үзэгдэл бишийг ойлгоод балмагдан сандарлаа. “Би юу хийчих нь энэ вэ? Бүгд
өнгөрчээ...”

Жорж Ева руу тонгойн,

- Ева, Ева гэсэнд хүүхэн нүдээ нээх гэж оролдох зуур,

- Эмч... дууд гэж үг хэлэх бүрдээ ихэд шаналан зовж

- Харви... Жон Харви... ийг дууд... гээд ухаан алдав.

- Яаралтай ирнэ үү? Ева Блэкуэллд санамсаргүй гай тохиолдоод байна. Түргэлээрэй

гэж Жорж утасны харилцуураар Харвид хэллээ.

...Харви өрөөнд орж ирээд Еваг, цус болсон ор дэр, өрөөг хараад,

- Ай тэнгэр гэж уулга алдлаа.

Еав ухаан орлоо. Харви Евагийн судас сулхан цохилж байгааг үзээд Жоржид хандан,

- Цагдаа дууд. Бидэнд түргэн тусламжийн машин хэрэгтэй гэж хэл гэхэд нь Ева өвдөхийг
хатамжлан тэсэж,

- Цагдаад хэлэх хэрэггүй... гэхэд нь Жон Харви дээрээс нь тонгойн,

- Бүгд зүгээр болно. Би чамайг эмнэлэгт аваачина гэсэнд Ева гараас нь зууран,

- Цагдаа хэрэггүй... гэж дахин шивэгнэлээ.

- Би энэ тухай мэдэгдэх ёстой. Надад... гэсэнд Ева гарыг нь чанга атган,

- Үгүй... хэрэггүй... гэлээ.

Доктор Харви Евагийн бэртэж гэмтсэн нүүр ам, тамхины галд түлэгдсэн биеийг дахин нэг
хараад,

- Ева дуугүй бай, ярих хэрэггүй гэлээ.

Өвдөх нь тэсэхүйеэ бэрх байсан ч Ева амьдралынхаа төлөө тэмцэлдэн удаан дуугүй байсны
эцэст,

- Үгүй цагдаа, хэрэггүй. Хувийн эмнэлэгт... Кейт намайг уучлахгүй... Цагдаа хэрэггүй...
машинд дайруулсан гээрэй гэж үгээ зөөн хэллээ.

Маргалдаж байх цаг байсангүй. Харви утасны дэргэд харайн очиж, дугаар залгаад,

- Би Харви байна гээд Евагийн хаягийг хэлж,

- Түргэн тусламжийн машин даруйхан явуул. Эмч Кит Уэбстэрийг ол. Яаралтай дуудлага гэж
хэлээрэй. Маш яаралтай шүү. Мэс заслын өрөө бэлдээрэй... гээд хэсэг зуур чагнаснаа:

- Машины осолд орсон... гээд харилцуур шидэж орхив.

- Эмчээ танд их баярлалаа хэмээн Жоржийг бөвтнөхөд Харви түүнийг муухай харлаа.

Жорж хувцас хунараа янзалсан боловч түүний хурууны үеүүд шалбарч, хавджээ. Бас ханцуй нь
цус болсон байлаа.

- Үүнийг би чиний төлөө биш Блэкуэллийнхний төлөө хийж байгаа юм. Харин чамд нэг
болзол байна. Та сэтгэл мэдрэлийн эмчид үзүүлэх хэрэгтэй гэхэд нь,

- Надад хэрэггүй... гэсэнд

- Тэгвэл би цагдаад мэдэгдэнэ, муу нохойн зулбсага чамайг сул чөлөөтэй орхиж болохгүй гэж
Харви шийдэмгий хэлээд утас руу сарвайхад нь, Жорж
- Байзаарай гэснээ хэсэг бодолхийлээд ямарч горьдлогогүй болсон ч хувь ерөөлөөр бас нэг
боломж таарч байгааг ойлгон,

- За, би сэтгэл мэдрэлийн эмчид үзүүлье гэв.

Энэ зуур алсад түргэний машины дохио хангинах сонсогдлоо.

Еваг урт нүхэн хонгилоор авч явахад толгой дээгүүр нь өнгө бүрийн гэрэл асаж, унтарч байв.
Түүнийг бие жингүй болж, “Би хүсвэл нисэж чадах юм байна” гэж бодлоо. Гараа хөдөлгөх
гэтэл нэг юм саад болоод хөдөлгөж болохгүй байв. Ева нүдээ нээвэл ногоон халаадтай хоёр
эр түүнийг ханыг нь цагаанаар будсан хонгилоор түргэн тэргээр түрж явлаа. “Би жүжигт
тоглож байна. Харин дүрээ мартчихжээ. Би ямар дүрд, хэнд тоглож байгаа билээ дээ” гэж
Ева бодов. Нүдээ дахин нээхэд тэр мэс заслын ширээн дээр хэвтэж байлаа. Ногоон халаадтай,
маск зүүснээс нүүр нь харагдахгүй, намхан туранхай хүн дээрээс нь тонгойж,

- Намайг Кит Уэбстэр гэдэг. Би танд мэс засал хийнэ гэв.

- Би үзлийн муухай амьтан болохыг хүсэхгүй гэж Еваг шивэгнэхэд нь эмч,

- Хаанаас тийм болох вэ. Одоо таныг унтуулна. Биеэ сул тавь гэж Уэбстэр эмч хэлээд
унтуулах эмч рүү толгой дохилоо...

...Жорж гар нүүрийнхээ цусыг угааж, хувцсаа янзлаад цаг харвал 3 болж байлаа. Аман дотроо
хараал тавин гэр рүүгээ явлаа. Александраг унтсан байгаасай гэж горьдон хаалга онгойлготол
Александра зочлох өрөөний гадна хаалга руу харсан буйдан дээр түүнийг хүлээгээд сууж
байлаа.

- Ай хонгор минь, Би бүр зовж гүйцлээ. Чи зүгээр биз?

- Зүгээр ээ, Алекс аа. Чи унтахгүй яагаа вэ гэхэд нь Александра түүнийг тэвэрч,

- Би цагдаад утасдах юм уу гэж бодож суулаа. Чамд ямар нэг аймшигтай юм тохиолдсон юм
шиг санагдаад... гэхэд нь “Нээрээ тийм шүү, надад аймшигтай юм тохиолдсон” гэж Жорж
дотроо бодлоо.

- Нөгөө гэрээгээ аваачиж өгөв үү? гэж Александрын асуухад,

- Юун гэрээ? гэснээ гэнэт санаж,

- Аан тийм, аваачиж өгсөн гэж хариулахдаа аль дээр ийм худал үг хэлсэн шиг санагдав.

- Чи тэгээд юунд саатаа вэ? гэхэд нь Жорж бас л нэг арга дор нь олж,

- Хэнсоны нислэг хойшлоод, Хэнсон намайг хэсэг хамт байгаач гэж гуйгаад л. Бүр салж
өгдөггүй шүү. Дараа нь чамд утасдах гэтэл хэтэрхий орой болчихсон болохоор чамайг унтаж
байгаа байх гэж бодсон юм. Хонгор минь намайг уучил гэв.
- Чи минь хүрээд ирснээс хойш болоо...

Жорж орондоо орохдоо Еваг дамнуургаар авч гарсныг санав. Ева сүүлчийн хүчээ шавхан,

- Харь... бүгд... зүгээр гэж шивэгнэсэн юм.

Ева үхчихвэл яана? Тэгвэл Жоржийг Еваг алсан хэрэгт баривчилна. Ева амьд үлдвэл юм
бүхэн сайн сайхан, урьдын хэвэндээ орно. Ева Жоржийг уучилна, учир нь Евад Жорж
хэрэгтэй. Жоржийн нойр хулжиж Еваг хэрхэн тарчилгасан, түүний хэрхэн өршөөл гуйж
байсныг бодсоор, нойргүй хонолоо. Хүүхний яс шажигнаж, түлэгдсэн арьсны үнэр үнэртэх
санагдаж, энэ мөчид бүр муу Еваг хайрламаар санагдлаа...

Харви хичээж Уэбстэрээр Евад хагалгаа хийлгэх болсон нь Евагийн аз юм. Уэбстэр бол
сэлбэн сэргээх мэс заслын тал дээр дэлхийд нэтрэй мэргэжилтэн. Уэбстэр Парк-Авеньюд
хувиараа эмчилгээ хийдэг, бас доод Манхэттанд хувийн эмнэлэгтэй, тэндээ болохоор нярай
хүүхдийн согог засах талаар дагнадаг. Уэбстэр үйлчлүүлэгч нараасаа төлж чадахын хэрээр
тэнгээр нь хөлс авдаг. Уэбстэр санамсаргүй осол эндэлд орсон хүмүүстэй ажиллаж байсан
хэдийч Ева хараад хирдхийн цочижээ. Гоо үзэсгэлэнт Ева Блэкуэллийн зургийг хаа нэгтээ
сэтгүүлээс үзсэнээ санаад дотор нь эвгүй оргилоо. Өөр бас нэгэн зүйл гэвэл тэрээр шууд л
энэ хүүхний гэмтэл машины ослоос бишийг таамаглалаа. Тэр бүү хэл иймэрхүү гэмтэлийг
машинаас биш, өөр юунаас биш зөвхөн хүнээс гарахыг ойлголоо. Гэмт хэрэгтнийг нуун
хамсаатан болохыг хэн ч хүсэхгүй, ялангуяа хувиа хичээгч Уэбстэр бол бүр ч үгүй.
Хагалгаанд орохын өмнө тэрээ Харвигаас

- Хэн түүнийг ингээ вэ гэж тэрээр ширүүхэн асуулаа.

- Зам дээр, уулзвар дээр болсон бололтой...Кит ээ гэж Харви хөлс нь бурзайн хариулахад, Кит
инээвхийлээд,

- Дайрсан жолооч нь машинаасаа бууж ирээд өгзөгөн дээр нь тамхиа унтраасан юм биз дээ?
Яг үнэн хэрэг дээрээ юу болсон юм бэ гэхэд дуу нь ширүүслээ.

- Надад үнэнийг хэлэх эрх байхгүй болов уу даа, Кит. Харин чи түүнийг бүтэн болгож чадах
уу?

- Би тийм л ажил хийдэг шүү дээ, Жон...

Эмч Уэбстэр маргааш үд дунд хагалгаагаа дуусаад туслах нартаа,

- Гүйцлээ. Эрчимтэй эмчилгээний тасагт хэвтүүл. Өчүүхэн төдий асуудал гарч ирвэл надад
даруй мэдэгдээрэй гэж зарлигддлаа.

Мэс засал 9 цаг үргэлжилжээ.

2 өдрийн дараа Еваг эрчимт эмчилгээний тасгаас энгийн тасагт шилжүүлэв. Жорж тэссэнгүй
эмнэлэгт хүрч ирлээ. Еватай уулзаж ярилцан өс хонзон санаагүйг нь баттай мэдэх гэсэн аж.
Жорж Меллис жижүүрийн сувилагч хүүхэнд,
- Би мисс Блэкуэллийн өмгөөлөгч байна. Өөрөө намайг ирж уулзана уу гэсэн юм. Би удаан
саатахгүй гэж хэлэв.

Сувилагч сайхан залуу эрээр нүдээ хужирлан, таашаан хараад,

- Ер нь бол миссис Блэкуэлл дээр хүн оруулахыг хорьсон. Яах вэ, та орж болно биз. Харин
удаж болохгүй шүү гэжээ.

Ева ганцхан өөрт нь зориулан гаргасан тусгай өрөөнд нүүр ам нь цул цагаан боолттой,
гагцхүү нүд, ам нь ил байв.

- Сайн уу, Ева.

- Жорж... гэх дуу сонсдох төдий сул байлаа. Жорж түүнд дөхөн очиж дээрээс нь тонгойлоо.

- Чи... Алекст... хэлээгүй биз дээ?

Жорж санаа алдан, орны зах дээр сандайлаад

- Хаанаас хэлэх вэ... Чамтай ярих гэж ирлээ... гэхэд

- Чиний юу гэж ирснийг мэдэж байна... Цааш нь... үргэлжлүүлье. Төлөвлөсөн ёсоор нь...
гэхэд нь Жоржийн дотор жаахан онгойж,

- Намайг уучил, Ева. Би өөрөө мэдээгүй... гэв.

- Алекст хүнээр утасдуулан... намайг юманд явсан гээрэй... Мөд ирэхгүй гээ...

- За тэгье

Ева нүд рүү харж,

- Жорж оо, нэг тус болоо гэв.

- Юу гэж хэмээн Жорж асуутал

- Тарчилж үхээрэй чи гэв.

Ева унтаад өгчээ. Сэрэхэд нь хажууд нь эмч Уэбстэр байж байлаа.

- Таны бие яаж байна гэж чихэнд нь эвтэйхэн зөөлөн дуугаар асуув.

- Ядарч байна. Би яасан бэ?

Уэбстэр хариу хэлэхийг алгуурлав. Рентген зургийг үзэхэд шанааны болон эрүүний яс хугарч,
бас нүүрийн булчин гэмтсэн учир амаа нээх хаах бүрд өвдөж байгаа. Хамар нь бас хоёр
хувирга нь хугарчээ. Өгзөг болон хөлийн улыг тамхины галаар түлсэн нь удаж байж эдгэнэ
дээ.
- Яасан байна вэ? гэж Ева дахин асуув.

- Таны шанааны яс, хамар хугарч гэмтсэн. Бас нүүрний булчин гэмтсэн, тамхины галаар
түлсэн байна. Би бүгдийг аргалж янзалсан хэмээн Уэбстэр аль болохуйц зөөлөн өгүүлэв.

- Надад толь өгөөч? гэж Ева гуйлаа.

Энэ бол хэрхэвч болохгүй зүйл.

- Уучлаарай. Манайд толь байхгүй гэж эмч инээмсэглэв.

Ева дараагийн асуултыг асуухаас халшраад байлаа.

- Би боолтыг авсны дараа... ямар харагдах вэ?

- Сайхан харагдана. Гай тохиолдохоос өмнө ямар байсан яг тэр янзаараа...

- Үнэмшихгүй байна.

- Өөрөө үзээрэй. Одоо харин танд ямар явдал тохиолдсоныг яриач?

Ева хэсэг дуугүй байсны эцэст,

- Машинд дайруулсан юм гэв.

Ийм хөөрхөн хүүнийг яаж ингэж муухай болгож болдог байна аа гэж Уэбстэр гайхна. Уг нь
Уэбстэр хүний хэрцгий догшин авиртай нэг биш удаа дайралдаж байсан.

- Таныг ингэсэн хүний нэрийг хэлээч?

- Мак загварийн машин байсан...

Евагийн ийнхүү зөрж зүтгээд байгааг эмч анзааран, “эхлээд Харви худал хэлсэн, одоо энэ
мисс Блэкуэлл...”

- Хүнд халдсан тухайд би цагдаагийнханд мэдэгдэж байх үүрэгтэй гэхэд нь Ева гараас нь
барьж,

- Хэрэггүй дээ, таныг гуйя. Эмээ дүү хоёр минь мэдвэл гутарч сүйд болно... Бас дээр нь
сонин хэвлэл... та мэднэ дээ... намайг хэн болохыг. Хэрэггүй... гэв.

- Би таныг зам тээврийн осолд орсон гэж бичих арга алга. Та замаар нүцгэн шалдан гүйж
яваагүй биз дээ?

- Таныг гуйя

Уэбстэр Ева хараад зүрх нь шимширлээ.

- Таныг гэртээ шатан дээрээс унаад бэртсэн гэх үү дээ...

Ева гарыг нь чанга атган,

- Чухамдаа тэгсэн юм гэхэд нь Уэбстэр санаа алдан,

- Тийм ч байх гэж би бодсон юм гэжээ...

Уэбстэр Ева дээр өдөр болгон, заримдаа завтай үедээ хэд хэдэн удаа орж ирдэг байлаа.
Ирэхдээ эмнэлгийн дэлгүүрээс цэцэг, шоколад гэх мэт бэлэг авчирч өгнө.

- Би энд зүгээр л хэвтээд байх юм. Босож болохгүй юм уу гэж нэг удаа Еваг асуухад

- Миний нэг хамжаа тантай байнга ажиллаж байгаа гэв.

- Танц хамжаа гэв үү?

- Байгал эхийг хэлж байна. Энэ боолтын дор таны арьс мөч тутам эдгэрч байгаа...

Эмч Уэбстэр хэд хоногийн дараа боолтыг авч дахин шинэчлэв.

- Би толинд харья л даа гэж Еваг гуйхад,

- Яасан ч болохгүй гэж эмч хориглолоо.

Уэбстэрээс өөр хэн ч Еваг эргэж ирдэг хүн байхгүй. Тийм болохоор Ева түүний ирэхийг
тэсэж ядаж хүлээдэг болжээ. Энэ бол намхан нуруутай, шингэн үстэй, дандаа анивчиж
байдаг харалган нүдтэй хүн байлаа. Евагийн дэргэд байхдаа өөртөө итгэл алдсан байдалтай
гэрэвшээд байдаг. Энэ нь Евад зугаатай санагддаг байв.

- Та эхнэртэй юу?

- Байхгүй ээ, байгаа ч үгүй.

- Яагаад?

- Бүү мэд. Би ер нь хэзээ ч олигтой эр нөхөр болж чадахгүй. Би цаг үргэлж эмнэлэг дээр
байдаг л даа.

- Эр хүнд эмэгтэй хүн хэрэгтэй шүү дээ гэсэнд,

Эмчийн царай улайж,

- Та ойлгохгүй болов уу даа...

- Яг үнэнээр нь ярь л даа.

- Надад хэзээ ч тогтмол уулздаг хүүхэн байгаагүй.

- Эндхийн бүх сувилагч хүүхнүүд танд дурласан гэж мөрийцэхэд бэлэн байна.

- Харин би тийм оргилуун сэтгэлтэй хүн биш л дээ.

“Зөөлөн хэлбэл тийм юм даа” гэж Ева дотроо бодов. Тэгсэн ч гэсэн сувилагч хүүхнүүдтэй
ярьж байхад Уэбстэрийг шүтэн биширдэг нь мэдэгдэж байлаа.

- Ид шидтэй хүн шүү. Хүний нүүрийг ямар болгоё гэвэл болгож чадна хэмээн тэдний нэг нь
Евад хэлжээ.

Нярай хүүхэд, осолд орсон хүмүүстэй Уэбстэр хэрхэн ажилладагийг сувилагч бүсгүйчүүд
бахархан ярина. Ева энэ тухай өөрөөс нь асуухад шууд хариулахаас булзан,

- Харамсалтай нь одоо үед хүнийг гадаад байдлаар нь үнэлдэг юм. Би гажиг согогтой төрсөн
хүүхдийн нүүр, биеийг засаж туслахыг хичээдэг. Энэ нь тэдний хойчийн амьдралд их учир
холбогдолтой гэхээс өөр юм бараг хэлэхгүй.

Евагийн хувьд Уэбстэр бол оньсого шиг хүн байлаа. Энэ хүн мөнгө олохын төлөө юм уу,
алдар нэртэй болохын төлөө ажилладаггүй. Уэбстэр өчүүхэн ч ашиг завшаан бодохгүй. Ева
урьд өмнө ийм хүнтэй дайралдаж байгаагүй болохоор үүний цаад учрыг мэдэх гэж оролдоно.
Ева энэ эмчийг хүнийх нь хувьд биш өөрт нь юу хийж тус болох талаас нь л сонирхжээ...

Сарын дараа Еваг хувийн эмнэлэгт шилжүүлэв.

- Тэнд танд илүү эвтэйхэн байх болно гэж Уэбстэр батлан өгүүлжээ.

Хотоос ирэх гэж замд их цаг ордог боловч Уэбстэр өдөр болгон Ева дээр ирнэ.

- Танд өөр өвчтөн байдаггүй юм уу? гэж нэгэн удаа Еваг асуухад

- Тан шиг өвчтөн өөр байхгүй гэжээ.

... Еваг хувийн эмнэлэгт шилжүүлснээс хойш яг таван долоо хоногийн дараа Уэбстэр боолтыг
нь аваад толгойг нь хажуу тйиш нь эргүүлж,

- Өвдөж байна уу? гэж асуув.

- Үгүй.

- Ингэж эргүүлэхэд арьс нь татаж байна уу?

- Үгүй.

Уэбстэр хажууд байгаа сувилагчид хандан,

- Мисс Блэкуэллд толь авчирч өг гэв.

Хүсэн хүлээсэн энэ мөч ирэхэд Евагийн айдас хүрэв. Энэ завсар нүүрээ толинд харах юмсан
гэж үргэлж хүсдэг байлаа. Одоо цаг нь болоод ирэхэд аймшигтай санагджээ. Толинд огт
танихгүй өөр хүн харагдвал яана?

...Уэбстэрийг толь өгөхөд,

- Айгаад байна гэж Ева аяархан хэлэв.

- Өөрийгөө хар л даа хэмээн эмч зөөлөн хэллээ.

Ева алгуурхан толь авч нүүрэндээ ойртуулав. Ай ид шид гайхамшиг, огт хувирсангүй гээч...

Нүүр нь хэвээрээ байна. Сорви байна уу гэж сайн харлаа. Байхгүй...

- Баярлалаа... гэж Ева уйлах шахан өгүүлээд эмчийг тэврэн үнсэхэд уруул нь халуу оргиж
байхыг мэдрэв.

Уэбстэр ичингүйрэн зайлж,

- Би... Энэ танд таалагдсанд баяртай байна гэж бөвтнөв.

Уэбстэрийг ид шидтэй хүн гэж сувилагч нарын ярьдаг нь аргагүй үнэн юм байна...
31-р бүлэг

Ийм хэрэг явдал болсны улмаас Жорж Меллис бүр барьц алджээ. Хүсэн эрмэлзэж байсан
хамаг юмаа хөөдөхийг шахлаа. Урьд нь түүнд Крюгер Брэнт хичнээн их хэрэгтэйг
ухамсарлаагүй байжээ. Жорж ганц бие авгай нарын өгдөг бэлэгт сэтгэл хангалттай байдаг
байв. Одоо Александра Блэкуэллтэй ханилан суугаад эцгийн бий болгосноос хэмжээгээрээ
хэд дахин том компанийг өөрийн мэдэлд авч болох байлаа. Энэ нь тоглоом эсвэл зүгээр л
мөрөөдөл биш. Жорж Меллис өөрийн хүслийг биелүүлэхийн тулд хүн алахад ч бэлэн
байгаагаа гэнэт мэдрэв. Жорж үлгэр жишээ эр нөхрийн дүрд хичээнгүйлэн жүжиглэж
байлаа. Александратай хамт аль болохуйц их цаг өнгөрүүлнэ. Хоёул хамт өглөөний цай ууж,
өдөр зоогийн танхимд хооллож, орой нь гэртээ хоол иднэ. Амралтын өдрийг Лонг Айландын
Ист Хэмптонд байдаг Кейтийн зуны байшинд өнгөрүүлнэ. Заримдаа “Сессуне” дах Дарк
Харборт нисэх онгоцоор очно. Жорж тэр хуучин цагийн сайхан байшин, эртний баримал,
үнэлж баршгүй уран зурагнуудад дуртай. Тэгээд өрөө тасалгаануудаар хэдэн цагаар
сэлгүүцэн зугаална. “Энэ бүгд удахгүй минийх болно, зөвхөн минийх” гэж бодохоос толгой
нь эргэнэ.

Жорж бас үлгэр жишээ хүргэн байхыг хичээж, Кейтийг их анхааран тал засдаг байв. Кейт
хэдий нас 81 хүрсэн боловч Крюгер Брэнтийг толгойлсон хэвээрээ, эрч хүч төгс байлаа.
Жорж долоо хоногт нэг удаа энхэртэйгээ хамт Кейтийн гэрт очиж оройн зоог идэхийг ёс
болгож, долоо хоногт өөрөө хэд хэдэн удаа түүнд утасддаг байлаа.

Өнгөн дээрээ ийм хайртай байгаа юм шиг хүмүүсээ алахаар сэдэж төлөвлөж байгааг нь хэн ч
мэдсэнгүй.

Гэтэл нэгэн өдөр эмч Жон Харви утасдаж энэ цэлмэг сайхан амьдралыг нь гутаав.

- Би таныг сэтгэл мэдрэлийн эмч Питэр Темплтонд үзүүлэхээр ярилцаж бүртгүүлсэн... гэхэд
нь Жорж аль болохуйц эелдэг найртай ярихыг хичээж,

- Одоо тийм шаардлага байхгүй болов уу? Миний бодоход... гэсэнд

- Таны юу бодох нь надад хамаагүй. Хэрэв та сэтгэл мэдрэлийн эмчид үзүүлбэл би болсон
хэрэг явдлын тухай цагдаагийнханд мэдэгдэхгүй гэж бид хоёр тохирсон шүү дээ. Хэрэв та
ярьж тохирсноо биелүүлэхгүй гэж байгаа бол хэрэг хэзээч хуучирдаггүйг анхааруулья гэлээ.

- Эмч Темплтоны утасны дугаарыг бичээд авагтун, 555321... Темплтон таны утасдахыг
хүлээж байгаа. Өнөөдөр шүү гээд Харви харилцуураа тавив.

“Хөөтэй муу тэнэг” гэж Жорж уурсан бодлоо. “Сэтгэл мэдрэлийн эмчид үзүүлэх л дутаж
гэнэ. Гэвч осолтой юм хийж болохгүй. Харви Кейтийн хүргэн болохоор нь л түүнийг цагдаад
мэдэгдээгүй. Харви занаж сүрдүүлснээ гүйцэтгэж магад, эсвэл бүр долоо дор юм болж
Кейтэд хэлчихвэл баларлаа гэсэн үг. Тэгэхээр түүнийг хэлснээр нь л байя, одоохондоо. Тэр
новшийн Темплтонд утасдаж нэг хоёр үзүүлээд л зүйл дуусгая” гэж Жорж бодоод
инээмсэглэлээ.
Ева Жоржийн ажил руу утасдаж,

- Би гэртээ байна гэв.

- Чи яаж байна? Зовох юм байхгүй юү? Жорж хэлж цөхөн асуув.

- Ирээд үзээрэй. Өнөө орой.

- Хэлэхэд хэцүү байна. Алекс бид хоёр...

- Орой 8 цагт...

Жорж нүдэндээ итгэж ядав. Ева өмнө нь урьдын адил гоо үзэсгэлэн төгс хэвээр зогсож
байлаа. Зодож жанчсаны ул мөр байна уу? гэж сайн харсан боловч юм мэдэгдсэнгүй.

- Үнэмшмээргүй юм. Чи...урьдынхтайгаа адилхан л... Ева чи сайхан харагдаж байна...

- Тийм ээ. Би хөөрхөн хэвээрээ байгаа биз дээ, Жорж? гээд Жоржийг яах гэж байгаагаа

бодон дан уруулаараа инээвхийлэв.

Энэ Жорж Меллис бол араатан. Араатан араатандаа бүр алж устгавал зохих галзуу араатан.
Хийсэн хэргийнхээ өр төлөөсийг гүйцэд амсах болно доо. Гэхдээ одоо биш. Энэ араатан Евад
санаж сэдсэнээ гүйцэлдүүлэхэд нь хэрэгтэй.

Хоёул өөд өөдөөсөө хараад инээмсэглэн зогсож байлаа.

- Ева, надад хэлэх үг ч алга. Би... гэхэд нь хүүхэн үгийг нь таслан гараа зангаж,

- Нэгэнт болоод өнгөрсөн юмыг сөхөж яриад яах вэ. Харин бидний төлөвлөгөө хэвээрээ шүү
гэхэд нь Жорж мартсанаа сая санаж,

- Надад Харви утасдсан. Намайг нэг хөөтэй золигийн сэтгэл мэдрэлийн эмчид үзүүлэхээр
ярьж тохирсон байна лээ гэсэнд Ева толгой сэгсэрч,

- Болохгүй. Зав байхгүй гэж хэл

- Би уг нь тэгж хэлэх гэсэн юм. Даанч намайг тэр эмчид үзүүлэхгүй бол Харви тэр шөнө
болсон явдлыг цагдаагийнханд мэдэгдэнэ гээд байгаа юм.

- Ээ чөтгөр алгад гээд Ева эргэцүүлэн бодож эхлэв.

- Тэр сэтгэл мэдрэлийн эмчийг хэн гэдэг юм бэ?

- Питэр Темплтон

- Дуулсан юм байна. Их нэр хүндтэй эмч.

- Санаа бүү зов. Би түүнд юу ч хэлэхгүй. Хэрэв...

Ева үгийг нь сонссонгүй. Түүнийг толгойд нэг бодол төржээ. Тэгээд Жорж руу эргэж,

- Үүн шиг сайхан юм хэнч бодож олохгүй... гэв.

Питэр Темплтон бол өндөр нуруутай, өргөн ханхар цээжтэй, эрэмгий ширүүн царайтай, нэвт
шувт харсан цэнхэр нүдтэй, 30 орчим насны залуухан эр байлаа. Түүнийг гадаад байдлаар нь
эмч гэмээргүй харин америк хөл бөмбөг тоглодог тамирчин болов уу гэмээр. Питэр дэвтрээ
үзэв. Үзэж эмчлэх хүмүүсийн дотор Кейт Блэкуэллийн хүргэн болох Жорж Меллис гэж шинэ
нэр нэмэгджээ. Питэр баячуудын зовлон бэрхшээлийг тоож анхаардаггүй. Түүний мэргэжил
нэгт нөхдийн олонхи нь нийгмийн дээд хэсгийнхний дотроос өвчтөн олж эмчлэх болбол их
баяртай байдаг. Питэр сэтгэл мэдрэлийн эмчээр анх ажиллаж эхлэхдээ мөн тийм хүсэл
сонирхолтой байжээ. Гэтэл баячуудыг таних тусам тэдний жаргал зовлон өөрт нь огт
сонирхолгүй байгааг удалгүй ойлгожээ.

Дээгүүр албан тушаалын хүмүүс өөрснийгөө ямар нэг баярт урисангүй хэмээн бахардан
хийрхэнэ. Банкны эзэд бирж дээр мөнгө алдсны төлөө амиа хорлох гэнэ. Тарган авгай нар
жин нэмэгдлээ хэмээн тэсэж ядна. Баячуудын ертөнц энэ мэт инээд хүрмээр зовлон
бэрхшээлээр дүүрэн. Питэрт иймэрхүү балай юманд цагаа дэмий үрэхийг огтхон ч хүсэхгүй
байлаа. Питэр энэ Жорж Меллисийг хүлээн авч үзэхийг дуртай дургүй зөвшөөрсөн байжээ.

- Чи наад хүнээ өөр эмчид явуулах юм биш үү, Жон? Надад даанч зав алга гэж Харвид
хэлсэнд,

- Надад тус болж үзээч дээ, Питэр.

- Ямар бэрхшээл зовлонтой хүн бэ?

- Чи өөрөө үзээд шийд. Би ердөө л гэрийн эмч төдийхөн.

- За яах вэ. Надад утасд гэж хэлээрэй л дээ.

Ингээд Жорж Меллис одоо алдарт эмчийн хүлээлгийн өрөөнд суугаа нь энэ. Эмч Питэр
дотуур харилцааны утасны товч дарж,

- Мистер Меллис ороод ирнэ үү гэв.

Питэр саяхан нэгэн сэтгүүлд гарсан Жоржийн зургийг үзсэн боловч эр хүн ийм дур булаам
цэвэрхэн байж болох юм гэж сэтгэлдээ төсөөлөөгүй байжээ. Хоёул гар барин мэндлэлцээд,

- Мистер Меллис та суугтун гэхэд Жорж буйданг харж,

- Энд үү?

- Хаа дуртай газраа суугтун.

Жорж ширээний дэргэдэх зөөлөн сандалд сууж, Питэрийн өөдөөс харж инээмсэглэв. Жорж
урьд нь эмчтэй уулзах энэ мөчийг санахаас зүрх нь халширч байжээ. Ева ярилцсаны дараа
бүх юм өөр болжээ. Одоо ингээд эмч Питэр Темлтон Жоржийн хамсаатан бөгөөд гэрч
боллоо.

Питэр өөдөөсөө хараад сууж байгаа хүнийг ажиглан шинжив. Сэтгэл мэдрэлийн эмчид анх
үзүүлж байгаа өвчтөнүүд сэтгэл тавгүй байгаа нь мэдэгддэг. Зарим нь дуугүй суудаг. Зарим
нь олон юм ярьж, сэтгэл догдлолоо нуухыг хичээдэг. Харин энэ хүн бол шал өөр тайван байх
юм. Тэр ч байтугай сэтгэл мэдрэлийн эмчид үзүүлэхээр ирсэндээ баяртай байх шиг.

- Танд зарим нэгэн бэрхшээл бий гэж Харви хэлсэн л дээ гэхэд нь Жорж санаа алдаад,

- Нэг биш, хоёр бэрхшээл байна гэв.

- Ямар учиртайг яриач дээ, Жорж.

- Ичмээр, эвгүй юм л даа. Тэгээд танд үзүүлж зөвлөгөө авахаар шийдсэн юм... гээд урагшаа
тонгойж,

- Би энэ насандаа хийхгүй гэж бодож байсан юмаа хийж, эмэгтэй хүнийг зодсон гэж халуун
сэтгэлээр хэлсэнд Питэр дал мөрөө хавчив.

Жорж үргэлжлүүлэн,

- Бид хоёр муудалцсан юм. Тэгээд би яаснаа өөрөө ч мэдээгүй. Нэг ухаан ороход би түүнийг
цохиод авсан байсан гээд дуугаа намсган,

- Аймаар муухай юм гэв.

Питэр туршлагатай эмч болохоороо энэ Меллисийн бэрхшээлийг шууд ойлголоо. Үүнд
эмэгтэй хүнийг зодох бахтай сайхан байдаг юм байна.

- Та эхнэрээ зодсон юм уу?

- Үгүй. Ихэр эгчийг нь...

Питэр Блэкуэллийн алдар ихэр охидыг мэднэ. Тэдний тухай сониноос олонтоо уншжээ.
Түүний санаж байгаагаар ихэр хоёр усны дусал шиг адилхан, гоо үзэсгэлэн төгс. Ингэхэд энэ
эхнэрийнхээ ихэрийг зодсон гэв үү, сонин хэрэг ээ. Ялангуяа тэр хүүхнийг ганц хоёр
алгадаад авснаа ярьж байгаа нь их сонин. Хэрэв тийм байсан бол Харви энэ Меллисийг үзээд
аль гэж тэгж их шахаж шаардахгүй сэн.

- Та түүнийг цохиод авсан гэлээ. Чанга цохисон уу?

- Нилээд чанга. Би чухам яаснаа мэдэхгүй, үгүй санахгүй байна гэдгээ танд сая хэлсэн шүү
дээ. Ухаан ороод нэг мэдэхэд... би нүдэндээ итгэхгүй байсан...
“Ухаан ороод нэг мэдэхэд гэдэг бол биеэ өмөөрөх сонгодог хэлбэр. Би ийм хэрэг хийгээгүй
энэ бол миний дотоод ухамсрын хийсэн хэрэг”

- Та гэнэт өөрийн ухаангүй болтол хилэгнэсэн шалтгааныг хэлж чадах уу?

- Сүүлийн үед миний сэтгэл тавгүй байгаа л даа. Эцэг маань хүнд өвчтэй. Зүрхний
шигдээстэй юм л даа. Өвчин нь хэд дахин хөдөлсөн. Би их санаа зовж байна. Би эцэгтээ их
хайртай...

- Эцэг тань энд, Америкт амьдардаг уу?

- Үгүй, Грект.

“Аа мөн, Меллис гэдэг чинь энэ байж”

- Та хоёр бэрхшээл байна гэж хэлсэн.

- Тийм ээ. Манай эхнэр Александра... гээд Жорж дуугүй болов.

- Та эхнэртэйгээ харилцахад бэрхшээлтэй байгаа юм уу?

- Эмч таны бодож байгаа бэрхшээл биш ээ. Бид хоёр бие биедээ их хайр халамжтай. Харин...
гээд Жорж эргэлзэн хэсэг дуугүй болж,

- Сүүлийн үед эхнэр маань тийм ч сайн биш байгаа гэв.

- Бие нь үү?

- Үгүй. Сэтгэл санаа нь. Сүүлийн үед үргэлж гутруу, заримдаа амиа хорлоно гэх мэт балай
юм ярьдаг болсон.

- Эмч мэргэжилтэнд үзүүлж, зөвлөгөө авсан уу? гэхэд нь Жорж гунигтай инээмсэглэн,

- Эмчид үзүүлэхээс дургүйцээд байгаа юм аа гэв.

“Муу л байна даа. Парк авенюгийн аль ч эмч үүнийг ашиглан хөлжиж болохсон доо” гэж
Питэр бодоод,

- Та энэ тухай Харвид ярьсан уу?

- Яриагүй.

- Харви танай гэрийн эмч болохоор түүнтэй ярих нь зүйтэй. Тэгээд тэр хэрэгтэй гэж үзвэл
сэтгэл мэдрэлийн эмчид үзүүлэхийг зөвлөнө.

- Александрад иймэрхүү юм өөрөөсөө нууж байна гэж бодуулахгүй юмсан. Харви... гэж
Жоржийг зүрх хөөрөн өгүүлэхэд,
- Ойлголоо, мистер Меллис. Би өөрөө түүнд утасдья гэжээ.

- Ева, бидэнд бөөн төвөгтэй юм болоод байна гэж Жорж орж ирэнгүүт мэнд усгүй өгүүлэв.

- Юу болоо вэ?

- Би бүгдийг чиний хэлснээр хийж, Александрын биеийн байдалд санаа зовж байна, амиа
хорлоно гэж ярьдаг гэсэн.

- Тэгээд,

- Тэр муу нохойн хүү Харвид утасдаж түүнтэй ярина гэж байна.

- Ай тэнгэр, яриулж болохгүй.

Ева өрөөн дотор холхиж байснаа гэнэт зогсож,

- Санаа зоволтгүй. Би Харвийг аргална. Харин Темплтон чамайг юу гэж байна, дахиж ир
гэсэн үү?

- Тэгсэн.

- Чи заавал очоорой.

Ева маргааш өглөө нь Харви дээр очлоо. Харви Блэкуэллийнхэнд хайртай. Хүүхдүүд нь
түүний нүдэн дээр өсөж өндийсөн. Марианна болон Тонид эмгэнэлт явдал тохиолдож,
Кейтийн аминд халдсныг санаж байна. Тонийг сэтгэл мэдрэлийн эмнэлэгт хэвтүүлснийг
санаж байна. Кейт их зовсондоо хөөрхий. Одоо ингээд Кейт Ева хоёр муудалцаж, тангараг
тасарсан. Юунаас болж ийм байдалд хүрснийг Харви мэдэхгүй. Ер нь энэ бол түүнд падгүй
хэрэг. Харви зөвхөн энэ гэр бүлийнхний эрүүл мэндэд л санаа тавих үүрэгтэй.

Еваг тасалгаанд орж ирэхэд Жон Харви өөдөөс нь хараад,

- Кит маш сайн ажиллажээ гэв.

Духан дээрхи жижигхэн сорви л мэс засал хийснийг санагдуулна.

- Уэбстэр энэ сорвийг сарын дараа арилгана гэсэн.

Жон Харви Евагийн мөрөн дээр пад пад алгадаж,

- Энэ сорви чиний гоо үзэсгэлэнг улам тодруулж байна шүү, Ева! гээд зөөлөн сандал зааж,

- Чамд юугаар тусалж болох байна даа?

- Би өөрөө зүгээр ээ. Алексын тухай ярихаар ирлээ гэхэд нь Харви хөмсөг зангидан,

- Яасан бэ? Жоржтой холбоотой юу? гэж асуув.

- Өө үгүй. Жоржийг өөлөх юм байхгүй. Жорж л Александрад санаа зовоод байгаа. Сүүлийн
үед Алексын ааш хувирч, нэг хачин болоод байгаа. Гуньж гутарч амиа хорлоно гэж ярьдаг
болсон гэхэд нь Харви,

- Үнэмшмээргүй юм. Александра тэгмээргүйсэн гэлээ.

- Бүү мэд ээ. Би ч эхлээд гайхсан. Александратай яриад зан нь их хувирсаныг бүр гайхлаа. Тун
их уруу дорой байх болжээ. Миний санаа их зовж байна. Эмээтэй ярих аргагүй... Тийм
болоод тань дээр ирлээ. Нэг арга бодох хэрэгтэй байна... гээд Евагийн нүдэнд нулимс
мэлтэгнэж,

- Эмээ намайг тоохоо байсан. Одоо Александраг алдах юм бол би тэсэхгүй гэв.

- Хэдийнээс тийм болов?

- Мэдэхгүй. Би Александраг таньтай ярь гэсэн л дээ. Эхлээд дургүй байснаа би ятгаж байгаад
үгэндээ оруулсан. Та түүнд туслана биз дээ?

- Туслалгүй яах вэ? Маргааш өглөө ир гээ. Санаа зовох явдалгүй, Ева. Одоо ид шидийн
гайхамшигийг бүтээдэг шинэ эм гарсан. Шинжлэх ухаан хөгжиж байна шүү.

Харви Еваг үүд хүргэж өгөв. “ Энэ Ева ийм анхаарал халамжтай, сайн охин шүү. Кейт Еваг
уучилж чаддаггүй нь харамсалтай”

Ева гэртээ ирээд, духан дээрхи сорвио сайтар арчиж арилгав.

Маргааш өглөө нь Харвид гарын туслах бүсгүй нь,

- Тань дээр миссис Меллис ирээд байна гэв.

- Нааш нь оруул.

Александра тасалгаанд нь орж ирэв. Царай нь цонхийж, зовхи нь хөхөрчээ. Харви гараас нь
бариад,

- Александра чамтай уулзсандаа баяртай байна. Ажил явдал ямархуу байна даа?

- Миний бие зүгээрээ. Танд дэмий төвөг удаж байгаа байх. Энэ Ева л... танд үзүүл гэсэн юм.
Миний бие сайн.

- Сэтгэл санааны хувьд? гэхэд нь Александра хэсэг дуугүй байснаа,

- Сүүлийн үед нойр жаахан муутай гэв.

- Өөр зовиур байна уу?

- Та намайг янгууч амьтан гэх болов уу даа...

- Үгүй дээ яалаа гэж дээ... Александра гэсэнд хүүхэн зовхи буулгаж,

- Сэтгэл хий түгшээд, ядраад байх юм... Жорж намайг жаргалтай байлгах гэж хичээхээрээ
хичээж байгаа л даа. Надад болохоор... Заримдаа бүр нэг горьдлого тасарсан шиг санагдаад
л...

Харви Александраг анхааралтай сонсож байлаа.

- Өөр юм байна уу, Алекс?

- Би солиорч байгаа юм болов уу? гэж Александра сонсдох төдий өгүүлээд эмчийн өөдөөс
эгцлэн харахад Харви толгой сэгсэрч,

- Үгүй дээ, хаанаас. Анедонин гэж юу вэ мэдэх үү? гэхэд нь Александра толгой сэгсрэв.

- Энэ бол чиний ярьсан хам шинж үүсгэдэг биологийн хямрал юм. Нилээд их газар авсан
өвчин. Энэ өвчнийг амжилттай анагаах эм саяхан гарсан. Ноцтой юм байхгүй гэж итгэж
байна.

Харви Александраг үзсэний дараа,

- Би чамд велбуртин бичиж өгье. Их сайн эм. Чиний гутралыг арилгана гэв.

Хүүхэн эмчийн бичиж өгсөн жорыг хайхрамжгүй харж байлаа.

- Эмээ заавал уугаарай, Александра. Долоо хоногийн дараа ирж үзүүлээрэй. Асуудал гарвал
өдөр шөнө хэзээ ч хамаагүй утасдаарай гэсэнд,

- Баярлалаа, эмч ээ. Зүүд минь намайг дахин зовоохгүй болов уу гэж найдаж байна...

- Ямар зүүд вэ?

- Танд яриагүй бил үү? Би ойрдоо хар дарж зүүдлээд байгаа. Би салхитай үед яхта онгоцоор
учиргүй хурдан хөвж явах юм. Тэнгисийн эзэн намайг хаанаас ч юм дуудаад л. Би хашлагын
дэргэд очоод, өнгийн хараад өөрийгөө живж байгааг хардаг...

...Хүүхэн гадаа гарч ирээд байшингийн хана налан зогсов. “Болсон шүү. Би энэ муу хөгшин
Харвиг маллаж дөнгөлөө” гэж Ева баярлан бодоод жорыг урж хажууханд байгаа хогийн
саванд хаялаа.
32-р бүлэг

Зөвлөгөөн хэтэрхий удааширч, Кейт их ядарснаа мэдэв. Дугуй ширээний тойрон суугаа
компаний удирдлагын зөвлөлийн 5 эрэгтэй, 3 эмэгтэйг харлаа. Бүгдээрээ хүч чадал дүүрэн
залуу хүмүүс “Тэгэхлээр энэ хурал удааширсан биш, миний амьдрал сунжирсан болж байна
уу даа. Би ч хөгширч байна даа” гэж Кейт бодов. Ингэж бодоход гунигтай байлаа. Үхэхээс
айсандаа ч биш. Кейт үхэх болоогүй. Крюгер Брэнтийг Блэкуэллийн гэрийнхний хэн нэгэн
нь толгойлох болтол Кейт үхэхгүй. Еватай муудалцсанаас хойш ганц Александрад найдлага
тавих болжээ.

- Эмээ би таны төлөө чадах бүхнээ хийнэ гэдгийг та мэднэ. Харин энэ компанийг би
чадахгүй юм байна. Жорж бол... гэж Александра ярьж байсан.

- Кейт чи зөвшөөрөх үү? Юу гэж бодож байна даа? гэж Брэд Рожерс асуув.

Энэ асуулт Кейтийг бодит амьдралд эргүүлэн авчирлаа. Кейт Брэдийн өөдөөс гэмшсэн
байдалтай харж,

- Уучлаарай, чи юу гэв? хэмээн лавлав.

- Би Делеког нэгтгэх асуудлыг хэлэлцэж байна гээд Брэд тэвчээртэй тайлбарлаж эхлэв.

Брэд Кейтийн зан байдалд сэтгэл зовох болжээ. Сүүлийн хэдэн сар Кейт хурал зөвлөгөөн
дээр хөндлөнгийн юм бодож суух нь олонтоо болжээ. Тэгээд зөнөж байгаа юм болов уу гэж
бодож байтал Кейт яагаад миний санаанд ийм бодол төрсөнгүй вэ гэж Рожерсийг гайхмаар
тийм шийдвэр гаргадаг байв.

... Меллис Питэр Темплтон дээр хоёр дахь удаагаа ирэв.

- Мистэр Меллис та урьд олон удаа хүчирхийлж байсан уу? гэхэд нь Жорж толгойгоо сэгсэрч,

- Үгүй дээ. Би хүчирхийллийг үзэн яддаг гэж хариулаад “Чи муу нохойн хүү үүнийг наанаа
бичээд аваарай. Мөрдөн байцаагч энэ тухай чамаас лав асууна” гэж дотроо бодов.

- Аав ээж хоёр чинь таныг зодож шийтгэдэг байсан уу?

- Үгүй.

- Тэгвэл та дуулгавартай хүүхэд байсан юм шив дээ?

“Болгоомжтой байгаарай. Энэ хүн чамд урхи тавьж байна шүү”

- Ердийн нэг хүүхэд гэж үздэг байсан.

- Ердийн нэг хүүхдийг ч гэсэн хааяа нэг цээрлүүлэн шийтгэдэг дээ. Ердийн хүүхэд насанд
хүрэгчдийн ёс журмыг байсхийгээд л зөрчдөг.
- Би тэр ёс журмыг тэгвэл нэг их зөрчдөггүй байсан байх гээд Жорж инээмсэглэв.

“Энэ хүн худал хэлж байна. Яах гэж тэр вэ? Юу нуугаад байна вэ?” гэж Питэр Темплтон
бодоод Меллистэй анх уулзсныхаа дараа эмч Харвитай ярьснаа санав.

- Тэр Меллис чинь эхнэрийнхээ ихэрийг цохиод авсан гэж хэлж байна лээ. Тэгээд... гэхэд нь
Харви зэвүүцэж,

- Цохиод авсан гэнэ үү? Яргачин шиг авирласан байна лээ. Тэр хүүхний шанаа, хамар, хэдэн
хавиргыг хугалж, хоёр өгзөг хөлийг нь тамхины галаар түлсэн байсан гэхэд нь Питэр ярвайж,

- Надад тийм юм огт хэлээгүй.

- Мэдээж хэлэхгүй. Би түүнийг чамд үзүүлэхгүй бол бүгдийг нь цагдаад мэдэгдэнэ гэж
сануулсан юм.

- Меллис бас эхнэрийгээ гуньж гутраад байгаа гэсэн.

- Тэр бол үнэн. Эхнэр нь над дээр ирсэн. Би велбуртин бичиж өгсөн. Түүнд би санаа зовоод
байна... Харин Жорж Меллисийн тухай чи юу гэж бодож байна даа?

- Одоохондоо хэлэхэд хэцүү л байна. Ер нь бол аюултай хүн шиг санагдаж байна гэж Питэр
бодлогошрон алгуурхан хариулав.

...Ева Блэкуэлл эмч Кит Уэбстэрийн толгойноос гарахаа больжээ. Тэр хүүхэн хүрэхийн
аргагүй гоо үзэсгэлэнт дагина шиг санагдана. Сэргэлэн цовоо, хөдөлгөөн ихтэй, баяр
баясгалантай. Эмч өөрөө бол бүрэг ичимхий, эв дүйгүй, уйтгартай хүн. Уэбстэр эхнэр авч
байгаагүй. Өөртэй нь нэг ч хүүхэн таарахгүй гэж мэдэж байлаа. Китийн эзэрхэг дээрэнгүй эх
нь түүний онхиогүй эцгийг бүрэн захирдаг байсан. Уэбстэр бэлгийн хүсэл тачаал сул,
гагцхүү ажилдаа зүтгэснээр сэтгэлийн бахыг эдэлдэг. Гэтэл одоо Ева хүүхэн зүүдэнд нь
ороод амраахаа больжээ. Өглөө нь зүүдээ санаад сэтгэл эвгүй оргидог байв. Ева бүрмөсөн
эдгэрсэн болохоор Уэбстэрт түүнтэй уулзах ямар нэгэн шалтаг олдохоо больжээ. Хэдий тийм
боловч түүнтэй уулзах ёстой гэж мэдэж байлаа. Тэгээд гэр рүү нь утасдав.

- Ева юу? Би Кит Уэбстэр байна. Та намайг мартаагүй биз дээ? Би танд утасдаж, таны
биеийг асуух гэсэн юм.

- Баярлалаа, Кит ээ. Миний бие сайн. Та өөрөө сайн уу?

- Ээ-ээ, сайн сайн гэж Уэбстэр нэг юм дуугараад зүрхээ чангалж байгаад,

- Таныг хоолонд урьвал та завгүй байдаг болов уу даа?

Ева инээмсэглэв. Энэ эмч их бүрэг ичимхий сонин хүн шүү. Гэвч энэ нь Ева зугаатай
санагдаж,

- Дуртайяа зөвшөөрье, Кит гэв.

- Нээрээ юу? Хэзээ, хаана хэмээн гайхан сандаран түгдэрлээ.

- Маргааш болох уу?

- Тохирлоо гэж хүүхнийг үгээ буцах вий гэж айсан мэт хурдан өгүүлэв.

Ева Уэбстэртэй уулзсандаа сэтгэл хангалттай байв. Энэ эмч дурласан жаалхүү шиг байх юм.
Алчуураа унагаж, дарс асгаж, ваартай цэцэг түлхэж унагасан. Ева түүнийг хараад инээдээ
барьж ядан байлаа. “Хэн үүнийг гайхамшигтай засалч гэж бодох вэ дээ”

Хоол идэж дуусах үед Уэбстэр ичингүйрэн,

- Хоёул дахиад уулзаж, үгүй хамт хооллож болох уу, Ева? гэж асуусанд Ева царайгаа төв
болгон

- Хэрэггүй биз дээ, Кит ээ. Би чамд дурлачих вий гэж айгаад байна гэж хариулав.

Уэбстэр юу хариулахаа мэдэхгүй, царай нь улайв. Ева мөрөн дээр нь гараа тавьж,

- Кит, би чамайг хэзээ ч мартахгүй гэв.

Уэбстэр ваартай цэцэгийг дахин түлхэж унагалаа.

... Жон Харвийг эмнэлэгийн гуанзанд хоол идэж байтал Кит Уэбстэр ирж нийлэв.

- Жон, би нууцыг хадгалж чадна гэж амалья. Ева Блэкуэллд чухам ямар хэрэг явдал
тохиолдсоныг ярьж өгөөч... гэсэнд Харви хэсэг бодолхийлснээ дал мөрөө хавчин,

- За яах вэ. Нэгэнт өнгөрсөн явдал болохоор тэгье л дээ. Тэр бол түүний ихэр дүү охины
нөхөр Жорж Меллисийн хийсэн ажил гэв.

Одоо л Кит Уэбстэр Евагийн нууц дотоод ертөнцөд нэвтэрсэн мэт санагдлаа.

Жорж Меллис тэсэж чадахаа больжээ.

- Мөнгө байна. Александра аль хэдийн гэрээслэлээ өөрчилж бичсэн. Бид одоо юугаа
хүлээгээд байгаа юм бэ, чөтгөр алгад?

Ева буйдан дээр хөлөө ачиж суугаад, өрөөн дотуур нааш цааш хөлхөж байгаа Жоржийг харж
байв.

- Ева хөдлөх цаг боллоо!

“Үүний зүрх нь хөөрч, тэвчээр алдаж байна” гэж Ева бодов. Жорж Меллис цагиргалж хэвтээд
ухасхийн хатгахад бэлэн байгаа могойтой адил болжээ. Жорж цаг нь цохиж байгаа тэсрэх
бөмбөг шиг аюултай болсон байна. Ева нэг удаа алдаж эндсэнээс болоод амиа алдах шахсан.
Одоо дахин тийм алдаа хийхгүй.
- Чиний зөв юм. Хөдөлж эхлэх цаг боллоо гэж Ева алгуурхан өгүүлэв. Жорж тэр дороо
зогсоод,

- Хэзээ вэ? гэж асуухдаа нүд нь нэг л хачин...

- Ирэх долоо хоногт!

Жорж Меллисийн эмчилгээ бараг дуусч байхад энэ завсар эхнэрийнхээ тухай дахин нэг ч
дурсаагүй байснаа сая гэнэт мартснаа санасан мэт,

- Аа тийм. Би Александрын төлөө санаа зовсоор байна. Гуньж гутрах нь улам ихдээд байгаа.
Урьд шөнө өөрийгөө усанд шивж байхыг зүүдэлсэн гэсэн. Би яах учраа олохгүй байна... гэв.

- Би Харвитай ярьсан. Эм бичиж өгсөн байна лээ. Тэр их сайн эм байгаа юм, тус болох
ёстой...

- Тус болох болов уу гэж их найдаж байна. Эхнэрт маань ямар нэгэн юм тохиолдвол би
тэсэхгүй гэж Жорж үнэн голоосоо хэлж байгаа байдалтай хэлэв.

Яг энэ үед Питэр Темллтон өөрийн нүдний өмнө ямар нэгэн жүжиг тоглоод байгааг
сэтгэлийн зөнгөөр мэдэрлээ. “Энэ юу гэв ээ? Яагаад үүнийг надад одоо хэлж байна?”

- Мистер Меллис та урьд эмэгтэйчүүдтэй харилцаж байснаа юу гэж тодорхойлох вэ?

- Хэвийн байдалтай

- Та эмэгтэй хүн уурлаж, биеэ барьж чадахаа больж байсан удаа бий юу?

Эмч юу гэх гээд байгааг Жорж эрх биш ойлгожээ.

- Огт үгүй. Би хүчирхийллийг үзэн яддаг гэж танд хэлсэн шүү дээ.

“Яргачин шиг авирласан байна лээ. Шанаа, хамар, хэдэн хавиргыг нь хугалж, хоёр өгзөг,
хөлийг нь тамхины галаар түлсэн байсан” гэж Харвийн хэлснийг Питэр санаад,

- Зарим хүний хувьд хүчирхийлэл бол сэтгэлийн чилээг тайлах нэг арга байдаг л даа.

- Таны юу хэлж байгааг мэднэ. Миний нэг найз янхан хүүхнүүдийг зоддог юм...

“Миний нэг найз гэнэ ээ. Аюултай дохио гэж үүнийг хэлдэг юм”

- Тэр найз маань янхан хүүхнүүдийг үзэн яддаг. Цаад хүүхнүүд нь түүнээс аль болох их
мөнгө салгах гэж оролддог байна. Тийм болохоор найз маань тэдэнтэй жаахан ширүүн
дориун харилцдаг юм билээ. Сургамж болгох гэсэндээ тэр... гээд эмчийн өөдөөс харахад
царайд нь үл таашаах байдалтайг байгааг хараад сэтгэл нь тайвшран цааш үргэлжлүүлэн,

- Түүнтэй хамт Ямайк орсноо санаж байна. Нэг хар арьстан хүүхэн манай найзыг зочид
буудалдаа дагуулж аваачсан юм билээ. Тэгээд хувцсаа тайчсны дараа мөнгө нэмж өг гэж
шаардсан гэнэ лээ... Жорж инээмсэглэн,

- Манай найз тэр хүүхнийг насандаа мартахгүйгээр залхаасан юм байх гэж ярив.

“Энэ чинь солиотой хүн байна. Найз гэдэг нь худлаа л даа. Найз гэж зохиогоод өөрийнхөө

“баатарлаг гавьяаг” гайхуулж байгаа нь энэ. Энэ чинь биеэ өргөмжлөхийн донтой, аюултай
этгээд байна” гэж Питэр Темлтон бодоод Харвитай даруй уулзхаар шийдлээ.

Хоёр эмч “Харвардын клубт” уулзав. Питэр бэрхшээлтэй байдалд оржээ. Хууль ёсоор эмч хүн
өвчтөний хувийн нууцыг задлаж болохгүй. Тэгэхээр Меллисийн тухай мэдээллийг яаж олж
авах вэ.

- Жорж Меллисийн эхнэрийн тухай чи юу хэлмээр байна гэсэнд Харви,

- Александра юу? Их сайн хүүхэн. Ева тэр хоёрыг би төрсөн цагаас нь эхлээд мэднэ. Ав
адилхан ихэр хоёр байгаа юм. Хоёул зэрэгцээд зогсож байхыг нь хараад баймаар байдаг юм.

- Ав адилхан ихэр ээ хэмээн Питэр нэгийг бодолхийлэн лавлав.

- Тийм, ялгахын аргагүй. Бага байхдаа хоёул бие биеэ оролж дурсгүйтээд байсныг яана. Нэг
удаа Еваг өвдөхөд би түүнд тариа хийх гээд Александрад хийчихснээ санаж байна. Хачин юм
шүү. Цаг хугацаа хурдан өнгөрч байна даа. Үнэнийг хэлэхэд би одоо болтол тэр хоёрыг ялгаж
чаддаггүй юм хэмээн Харви толгой сэгсрэв.

Питэр бодолхийлээд,

- Чам дээр Александра очсон гэсэн байх аа?

- Тийм.

- Жон чи түүнийг тэгвэл Александра мөн гэж яаж таньсан юм бэ?

- Тэр амархан. Евад мэс засал хийлгэсний дараа духан дээр нь жижигхэн сорви үлдсэн юм
гэж Харви хариулав.

- Ойлголоо.

- Меллисийн байдал ямар байна даа?

Питэр өөрийн сэжигээ ярих уу, байх уу гэж эргэлзэв. Хормийн дараа,

- Одоохондоо би үнэнийг нь хэлүүлж чадаагүй байна. Үргэлж хэрэм хананы цаагуур нуугдаж
бултаад байгаа. Гэсэн би улайлгаж чадах байх.

- Болгоомжтой байгаарай, Питэр. Миний саналыг асуух юм бол гажигтай хүн шиг билээ гээд
Евагийн цусандаа хутгалдан орон дээрээ хэвтэж байсныг санав.

- Ихэр хоёр асар их өв хөрөнгөтэй бас мундаг том компаниа захирдаг юм биз дээ гэж өөртөө
чангаар хэлж орхив. Одоо Харвийн эргэлзэх ээлж болж, хэсэг дуугүй байснаа,

- Ер нь энэ бол тэдний гэр бүлийн нууц байгаа юм. Яах вэ, чамд хэлчихье. Кейт Евад улаан
мөнгө ч үлдээхгүй гэж шийдчихсэн. Бүх хөрөнгийг Александра өвлөх юм...

“Би Александрын төлөө сэтгэл зовсоор байна. Гуньж гутрах нь улам ихдээд. Өөрийгөө усанд
шивж байна гэж зүүдлэсэн. Би яах учраа олохгүй байна” гэж Жорж хэлсэн. Энэ чинь хүн алах
сонгодог төлөвлөгөө мөн шиг байх чинь! Гэтэл Меллис өөрөө тэртэй тэргүй асар их өв
хөрөнгө залгамжилах ёстой шүү дээ. Мөнгөтэй хүн мөнгөний төлөө хүн алахгүй, тэгэх хэрэг
байхгүй. Чи дэндүү сэжигч сэрдэмхий байна” гэж Питэр өөртөө хэлэв.

...Нэгэн хүүхэн хүйтэн тэнгист живж байна. Хархүү дэргэд нь сэлж очих гэтэл тэнгисийн
долгион түүнийг өөр зүгт түлхэнэ. Хүүхэн улам живж байна. “Тэсээрэй, би одоохон очлоо”
гэж хархүү хашгирав. Хурдан сэлэхийг хичээвч гар хөлд нь тугалга цутгачихсан юм шиг
даагдахгүй хүнд байлаа. Тэгж тэгж зорьсон газраа хүрч очтол хүүхэн алга болчихсон байна.
Хархүү эргэн тойрон харахад хүүхний бараа ч алга. Тэртээ дор лут том аварга загасны сүүдэр
харагдлаа... Питэр ингэж зүүдлээд сэрэв. Сэрээд гэрэл асааж, орон дээрээ өндийн сууж
саяныхаа хачин зүүдийг эргэцүүлэн бодлоо.

Питэр өглөө нь цагдаагийн дэслэгч Ник Паппасад утасдлаа. Ник Паппас бол 6 фут, 4 ямх
өндөр нуруутай, 300 гаруй фут жинтэй лужир том эр. Түүний тэр лухгар биед дуслын төдий ч
өөх байхгүй, дан булчин шандас гэдгийг түүний барьсан аль ч гэмт хэрэгтэн батлан хэлж
чадна. дэслэгч Паппаса Манхэттений “торгон оймсны” хороон дахь хүн амины хэргийн
хэлтсийг удирддаг. Питэр хэдэн жилийн өмнө нэгэн хүн амины хэрэгт эмнэлэгийн
мэргэжилтнээр оролцохдоо дэслэгчтэй танилцсан юм. Паппаса Питэр хоёр түүнээс хойш
үерхэж нөхөрлөх болсон аж. Тэр хоёр сард ганц хоёр уулзаж шатар тоглодог байлаа.

Ник харилцуур авч,

- Хүн амины хэлтэс, Паппас сонсож байна гэв.

- Би Питэр байна, Ник ээ

- Мэнд амар уу, хөгшөөн? Ухвар мөчт хүний дотоод ухамсрын нууцыг тайлж л байна уу?

- Шийдэх гэж оролдсоор л. Тина сайн уу?

- Сайн сайн. Чамд юугаар тус болж чадах байна Питэр?

- Надад зарим нэгэн мэдээлэл хэрэгтэй байна л даа. Чамд Грект танилууд бий байхаа?

- Чи надаас ийм юм асуудаг хүн үү? Грект миний зуугаад төрөл садан бий. Бүгдээрээ надаас
мөнгө гуйдаг. Хамгийн гайхалтай нь би тэдэнд гуйсан мөнгийг нь өгч явуулдаг өвчтэй хүн.
Чамаар нэг шинжлүүлнэ байгаа гэж Паппаса өгүүлэхэд,
- Хожимджээ хөө. Чиний наад өвчин засал авахгүй гэв.

- Тина бас тэгж хэлдэг юм. За тэгээд чамд ямар мэдээлэл хэрэгтэй юм бэ дээ?

- Чи Жорж Меллисийн тухай сонссон уу?

- Оливийн тосны Меллис уу?

- Тийм

- Би бизнес сонирхдоггүйг чи мэднэ. Гэсэн ч түүнийг дам мэднэ.

- Тэдний том хүү Жорж энд Америкт байдаг юм. Түүнийг мөнгөтэй үгүй мэдэх хэрэгтэй
байна?

- Чи тоглож байна уу? Чамд өрөө төлөхгүй байгаа юм уу? Түүний гэрийнхэн...

- Түүний хувийн мөнгийг хэлж байна аа.

- За за асуугаад л өгье. Чи цагаа дэмий үрж байгаа байх, Питэр ээ. Тэр Меллисийнхэн ёстой
жинхэнэ баячууд.

- Далимд хэлэхэд хэн нэгэн хүн синьор Меллистэй ярих болбол битгий их шахаж шавдуул
гээрэй. Өвгөн зүрхний шигдээстэй,тэр нь хэд хэд дахин хөдөлсөн гэнэ лээ.

- За тэгье. Өнөөдөр л холбоо барья.

Питэр зүүдээ санаж,

- Хариу авангуутаа утасдаарай, Ник

- Энэ юун тухай болохыг надад хэлэхгүй юм уу, Питэр? гэж асуух Паппасын дууны өнгө өөр
болоод ирэв.

- Одоохондоо юмгүй. Үүнийг миний сониуч зан гэж ойлгож болно. Утасаар ярьсны төлбөр
тооцоог надад явуулаарай.

- Эргэлзэх юмгүй, явуулна. Ингэхэд харин чи надад үдийн хоолны өртэй боллоо шүү.

- Яриа таарлаа гээд Питэр утасаа тавив. Үүний дараа Питэрийн сэтгэл нь овоо сэргэлээ.

... Кейт Блэкуэллийн бие муудав. Ширээний ард суугаад утсаар ярьж байтал гэнэт зүрх рүү нь
хатгаж, нүд нь эрээлжлээд ирэхэд ширээний ирмэгээс зуураад авлаа. Өвчин нь удалгүй бага
багаар намдалаа. Яг энэ үед тасалгаанд Брэд Рожерс орж ирээд Кейтийн царай зэвхий
даасныг шууд л ажиглан,

- Бие чинь зүгээр үү, Кейт ээ? гэж асуухад Кейт ширээнээс зуурсан гараа тавьж,
- Толгой эргээд. Аймаар юм биш гэв.

- Чи сүүлийн удаа хэдийд эмчид үзүүлсэн бэ?

- Надад тийм дэмий юмаар хөөцөлдөж байх зав алга, Брэд ээ.

- Зав гарга. Чамайг Жон Харви үзүүлэхээр цаг ав гэж Аннетад хэлье.

- Ээ чөтгөр алгад, Брэд. Үүнийг ярихаа больё!

- Эмчид үзүүлнэ гэж амла.

- Чиний үглэхээс салахын тулд үзүүлье л дээ.

...Маргааш өглөө нь Питэр Темплтоны гарын туслах бүсгүй,

- Мистер Паппаса танд утасдаж байна гэв. Питэр харилцуур яаран аваад,

- Сайн уу, Ник ээ?

- Чи бид хоёрт ярих юм байна, найз аа гэхэд нь Питэрийн сэтгэл түгшиж,

- Меллисийн тухай юм олж мэдэв үү?

- Би өөрөө эцэгтэй нь ярилаа. Юуны өмнө өвгөний зүрх хэзээ ч өвдөж байгаагүй гэнэ.
Хоёрдугаарт Жоржийг хүүгээ гэж үзэхгүй, үхсэнд тооцдог гэнэ. Жорж Меллисийг хэдэн
жилийн өмнө өвөртөө ганц улаан мөнгөгүй, гэрээсээ хөөж явуулсан гэнэ. Яагаад гэж асуухад
хариу хэлэлгүй харилцуураа тавьчихлаа. Тэгэхээр нь би Афины цагдаагийн газар байдаг нэгэн
найздаа утасдлаа л даа. Наад Жорж Меллис чинь их нэр алдартай шувуухай юм.
Цагдаагийнхан түүнийг сайн мэддэг гэнэ. Хөвгүүд охидын аль альтай нь зугаалдаг. Зугаалгын
дараа зодож занчаад хаячихдаг байж. Грекээс явахынхаа өмнө 15 тай бандич хүүг
эрэмдэглэсэн байна. Мань хөвгүүд шархаа даалгүй зочид буудалд үхчихсэн байсан нь
маргааш нь олдсон юм байх. Цагдаагийнхан тун удалгүй хэргийн эзэн, хэнгэрэгийн дохиур
бол Жорж Меллис гэж тогтоосон байна л даа. Эцэг Меллис учир мэдэх хэн нэгэн хүний гарт
юм атгуулаад уг хэргийг хав дарсан бололтой. Ингээд хүүгээ Америк руу хөөж явуулжээ. Энэ
чамд ямар сонсогдож байна даа?

Ийм үлгэр шиг эсвэл Холливудын кино шиг юм сонсоод Питэр балмагдлаа.

- Баярлалаа, Ник ээ? Би чамд өртэй боллоо.

- Үгүй, чи Жорж Меллисийн талаар юу мэдэхийгээ надад хэл. Наад хархүүгийн чинь өвчин
хууч сэдрээд хуучин замаараа орсон бол их муухай хэрэг.

- Ярьж болох юм бүхнийг чамд ярина. Тинад мэнд хүргээрэй гээд Питэр харилцуураа тавив.

Сая авсан мэдээлэлээ сайтар эргэцүүлэн бодох хэрэгтэй байлаа. Меллистэй өнөөдөр 12 цагт
үдийн хоолны дараа уулзахаар цаг товлосон.

... Жон Харвийг өвчтөн үзэж байтал гарын туслах нь утасдаж,

- Тань дээр миссис Меллис ирээд байна. Танд үзүүлэхээр бүртгүүлээгүй... гэхэд нь

- Миний тасалгаанд оруул. Тэнд хүлээж байг. Би нэг их удахгүй дуусна гэв.

Энэ удаа Александрын царай улам цонхийж, зовхи нь хөхөрч бүлцийжээ.

- Цаг авалгүй шууд ирснийг минь уучлаарай...

- Санаа зоволтгүй, Алекс. Яаж байна? Бие чинь ямар байна?

- Бие муу хэвээрээ, хэцүүхэн л байна.

- Бичиж өгсөн эм ууж байгаа юу?

- Ууж байгаа.

- Тэгээд байдал дээрдсэнгүй юу? гэсэнд хүүхэн гар хуруугаа нужигнуулж,

- Би бүр дордоод байна. Цөхрөнгөө барж байна шүү. Биеэ барьж чадахгүй боллоо. Ямар нэг
тэнэг юм хийчих вий гэж айгаад...

- Чиний бие сайн байгаа. Энэ бол зөвхөн сэтгэл санааны асуудал. Чамд номифенсин гэдэг
өөр эм бичиж өгье. Нөлөө хи сайтай бас чадалтай эм, хурдан үйлчилнэ. Хоёр хоногийн дараа
зүв зүгээр болчихно гэж Харви хэлээд, жор бичин Александрад өгөөд,

- Баасан гариг хүртэл зүгээр болохгүй бол надад утасдаарай. Сэтгэл мэдрэлийн эмчид
үзүүлэх хэрэгтэй болж магадгүй.

Хагас цагийн дараа Ева байрандаа хүрч ирээд нүүрээ угаан будгаа арилгав. Бүх юм ёсоороо
болж байна.

... Жорж Меллис Питэрийн өмнө биедээ итгэсэн бйадалтай инээмсэглэж суув.

- Таны бие ямар байна, мистер Меллис?

- Сайн байна, эмч ээ. Та надад их тус боллоо.

- Тийм үү? Чухам яаж тус болов?

- Миний үгийг анхаарч сонслоо. Энэ бол католик шашны нэг баримтлал байх аа, тийм үү?
Нүглээ наминчлах...

- Таны бие сайжирсанд баяртай байна. Эхнэр чинь яаж байна даа? гэсэнд Жорж хөмсөг
зангидан,
- Эхнэрийн бие муу байгаа. Улам муудаад байх шиг. Дахиад Харвид үзүүлсэн. Амиа хорлох
бий гэж айж байна. Эхнэрээ нэг тийш нь аваачдаг юм бил үү. Нутаг сэлгэж сэтгэлийг нь
сэргээе.

Чухам энэ үг Питэрт нэгийг ёрлосон аймшигтай үг шиг санагдаад, цочлоо. Эсвэл санаа
дагаад тэр үү?

- Та эхнэртэйгээ Грект очвол яасан юм бэ? Эхнэр чинь танайхантай танилцаж амжаагүй
байгаа гэсэн байх аа?

- Тийм танилцаагүй байгаа. Манай төрөл садныхан Александратай уулзах гэж тэсэж ядаж
байгаа. Даанч эцэг маань надтай уулзах болгондоо намайг компанийн захирал болооч гэж
шалаад амраадаггүй юм л даа...

Энэ үед Александра Меллист үхлийн аюул заналхийлж байгааг Питэр Темлдтон ойлголоо.

Жорж Меллис хэдийн явсан боловч Питэр тасалгаандаа бичиг тэмдэглэлээ үзэн суусаар.
Эцэст нь утасны харилцуур авч дугаар залгав.

- Жон, чамаас хүсэх юм байна. Александра, Жорж хоёр бал сараа хаана өнгөрүүлсөнийг
мэдэж өгөх арга байна уу?

- Одоо шууд хариулья. Ямайкад өнгөрүүлсэн.

“Миний нэг найз янхан хүүхнүүдийг үзэн яддаг. Цаад хүүхнүүд нь түүнээс аль болох их
мөнгө салгах гэж оролддог байна. Тийм болохоор найз маань тэдэнтэй жаахан ширүүн
дориун харилцдаг юм билээ. Сургамж болгох гэсэндээ тэр... Түүнтэй хамт Ямайк орсноо
санаж байна. Нэг хар арьстан хүүхэн манай найзыг зочид буудалдаа дагуулж аваачсан юм
билээ. Манай найз тэр хүүхнийг насандаа мартахгүйгээр залхаасан юм байх...” гэж
Меллисийн ярьсныг санав.

“Гэхдээ энэ бол Жорж Меллис эхнэрээ алах гэж байгаагийн нотолгоо хараахан биш. Тэр
хүүхэн миний өвчтөн биш, ер нь надад хамаагүй. Надад падгүй хэрэг” гэж Питэр бодлоо.

Гэвч өөрт нь падгүй зүйл биш гэдгийг тэрээр сайн мэдэж байжээ.

... Питэр Темплтон боловсрол олох гэж багагүй хөдөлмөрлөсөн хүн. Питэр өөрөө Шинэ
Английн анагаах ухааны дээгүүр нэр хүндтэй суралцах санаатай байсан ч гэсэн боломж
байсангүй. Эцэг нь Небраск дахь бага шиг хотын коллежийн ивээн тэтгэгч байжээ. Питэр
Небраскийн их сургуулийг онц сайн дүнтэй төгсөж, сэтгэл мэдрэлийн өвчнийг судалж
эхэлсэн байна. Ажил нь анхнаасаа л амжилттай байлаа. Питэр ажилын амжилтийн нууц юу
вэ гэвэл тэрээр хүмүүст хайртай, хүний бэрхшээл зовлонд сэтгэл зовдог байв. Александра
Меллис бол Питэрийн өвчтөн биш. Гэсэн ч түүнд туслах ёстой гэдгийг Питэр мэдэж байлаа.
Александра бол энэ толгой эргэм оньсгогыг тайлахад дутаад байгаа нэг гогцоо. Түүнтэй
биеээрээ уулзвал нууцыг халхалсан хөшигийг ярахад тус болж магад. Тэгээд түүний утасыг
эрж олоод түүнд залгалаа.

- Миссис Меллис, намайг Питэр Темплтон гэдэг. Би...

- Таныг мэднэ, эмчээ. Танц тухай Жорж надад ярьсан.

Питэр гайхав. Жоржийг сэтгэл мэдрэлийн эмчид үзүүлдэгээ нуудаг байх гэж бодсон байжээ.

- Тантай уулзаж яримаар байна, миссис Меллис. Хамт үдийн хоол идвэл ямар вэ?

- Жоржид хамаатай юм уу? Ямар нэгэн юм болоо юу?

- Үгүй юу ч болоогүй. Зүгээр тантай танилцаж ярилцах гэсэн юм.

- За тэгье л дээ, эмч ээ.

Тэр хоёр маргааш нь л уулзахаар болзлоо.

Тэр хоёр нэгэн зоогийн газрын булангийн ширээний ард сууцгааж байлаа. Александраг
танхимд орж ирсэн цагаас хойш Питэр түүнээс нүд салгаж чадсангүй ширтээд л байлаа.
Хүүхэн даруухан хувцаслажээ. Банзал, биеийнхээ хэлбэрийг тодруулсан цамц. Ганц гоёл нь
хэлхээ сувд. Питэр царайг нь ажиглан алжаа ядарсан, гуньж гутарсан шинж байгаа эсэхийг
харахад тийм юм огт мэдэгдсэнгүй. Александра Питерийн тийнхүү ажин шинжиж байгааг
мэдсэн ч мэдээгүй юм шиг байлаа.

- Манай нөхрийн бие зүгээр үү?

- Зүгээр.

Энэ бүхэн Питэрийн урьд санаж байснаас хавьгүй илүү нарийн ээдрээтэй ажээ. Тун эгзэгтэй
нөхцөл байдал бий болжээ. Питэр Темплтон өвчтөний нууцийг задлах эрхгүй. Нөгөө талаар
Александрад яаж ийж байгааг сэрэмж авхуулах хэрэгтэй.

Хоол захиалсны дараа,

- Нөхөр чинь яагаад надад үзүүлэх болсон учраа танд ярьсан уу?

- Ярьсан. Сүүлийн үед Жорж их бачимдуухан байгаа л даа. Түүнийг ажилладаг брокерийн
пүүсийн хамжаа нар нь бүх хариуцлагыг Жоржийн нуруун дээр тохсон байна. Жорж хүнд их
тусч зантай, үгүй гэж хэлж чаддаггүй хүн байгаа юм. Эмч та лав үүнийг мэдэх биз.

“Жорж Еваг яасныг энэ хүүхэн огт мэдээгүй юм байна”

- Жорж тантай уулзаж ярилцсанаас хойш санаа сэтгэл их сайхан болж байна гэж ярьсан.
Нөхөрт маань тус болж байгаад тань их баярлаж байна гэж Александра хэлээд Питэрийн
өөдөөс тал өгч инээмсэглэв.
Бүхий л байдлаас үзэхэд энэ хүүхэн эр нөхрөө хүндлэхийн дээдээр хүндэлдэг болотой.
Питэрийн хэлэхээр завдан буй зүйл хүүхний жаргалтай ертөнцийг нэг мөсөн нураагаад
хаяна. Эр нөхөр нь өсвөрийн хөвгүүнийг тарчлаан алсан, сэтгэл мэдрэлийн өвчтэй, орон
гэрээсээ хөөгдсөн амьтан, ихэр эгчий г зэрлэг балмадаар зодож жанчсаныг яаж хэлэх вэ? Бас
дуугүй байгаад байж болдоггүй.

- Хүнд тус болох нь танд бас их таатай байдаг болотой хэмээн Александраг өгүүлэхэд,

- Заримдаа тус болж чаддаг, заримдаа чаддаггүй гэж Питэр болгоомжтой хариулав.

Хоёул хоол идэж байх зуур энгийн ярилцаж, удалгүй эвсэг сайхан харилцаатай боллоо. Питэр
гэнэт Жоржид атаархаж байгаагаа мэдэрлээ. “Би ийм эхнэртэй болоосой”

Хоол дуусаж кофе авчирлаа.

- Тантай танилцсандаа баярлаж байна. Гэхдээ та намайг зүв зүгээр хоолонд уриагүй юм
байгаа биз дээ? гэж Александра гэнэт шууд тулган асуув.

- Нээрээ тийм. Ийм учиртай...

Питэр дуугүй болов. Түүний хэлэхээр завдаг буй зүйл энэ хүүхний амьдралыг орвонгоор нь
эргүүлнэ. Питэр Александраг өөрийн сэжиг таамгийг ярьж, нөхрөө эмнэлэгт хэвтүүлж
эмчлүүлэх хэрэгтэй гэж зөвлөх санаатай байлаа. Одоо Александратай танилцсаныхаа дараа
ингэхэд хэцүү байлаа. Жорж хэлэхдээ эхнэр нь гуньж гутраад хэцүү байгаа гэсэн. Гэтэл
Питэр ийм эрүүл чийрэг, ийм аз жаргалтай хүүхэнтэй урьд өмнө уулзаж байгаагүй юм шиг
санагдана. Эм уугаад бие нь засарсан юм болов уу? Үүнийг бол асууж болох юм байна шүү.

- Эмч Харви хэлэхдээ...

Тэгтэл Жоржийн дуу сонсогдож,

- Аа чи минь энд байсан юм уу? Гэр рүүгээ утасдсан чинь чамайг энд байгаа гэсэн юм л даа
гээд Питэр тийш эргэн,

- Эмч тантай уулзсандаа баяртай байна. Та хоёртой нийлж болох уу? гэв.

Одоо ингээд Александратай ярих боломжгүй боллоо.

- Тэр эмч Александратай уулзах ямар хэрэг байсан юм бэ? гэж Ева шаардангуй асуув.

- Бүү мэд. Тэнгэрийн авралаар хаашаа явахаа үйлчлэгч бүсгүйд хэлж... Би ч ганцхан хормын
дараа тэнд очсон л доо.

- Энэ чинь надад огт таалагдахгүй байна.

- Аймшигтай юм болоогүй дээ, тайвшир. Би Алексаас асуусан, энгийн юм ярилцсан байна

лээ.
- Төлөвлөгөөгөө хурдхан биелүүлэх хэрэгтэй байна.

Энэ үгийг сонсоод Меллисийн тачаал тайлагдсан адил бие сэтгэл нь сайхан боллоо. Энэ
мөчийг удаан хүсэн хүлээсэн юмсан.

- Хэзээ вэ?

- Одоо даруйхан.
33-р бүлэг

Кейтийн нүд эрээлжилж, юмны дүрс хэлбэр бүдэг харагдах нь олширчээ.

Кейт нэгэн шинэ пүүс худалдан авах сонин санаа бодож байснаа гэнэт тэр пүүсийг аль
хэдийн худалдан авснаа ухаарлаа. Үүнээс айгаад Брэдийн үгийг дагаж эмчид үзүүлэх
үзүүлэхээр шийджээ. Эмч Харви Кейтийг үзлэгт ор гэж ятгаж ядсан юм. Одоо ийм бололцоо
таарсныг сайн ашиглахаар шийдэв. Кейтийн биеийг сайтар шинжилж үзээд тасалгаандаа
хүлээж байхыг хүслээ. Эмчийн сэтгэл түгшив. Кейт Блэкуэлл өдий насыг насалсан хүн гэхэд
бие нь хөнгөн сайн байгаа боловч сэрэмж авмаар зарим нэгэн шинж тэмдэг мэдэгдлээ.
Жишээ нь тараагуур судасны хатуурсны улмаас толгой нь эргэх болж, үүнийг дагаад ой
санамж мууджээ. Кейт ажил төрлөөс холдох цаг аль хэдийн болсон атал удирдлагын жолоог
өөр хүнд бариулахыг татгалзсаар өдий хүрчээ.

Жон Харви шинжилгээний дүнг үзээд,

- Миний бие чинийх шиг эрүүл болоосой гэв.

- Ая тал засах яах вэ. Надад ямар бэрхшээл байна вэ?

- Үндсэндээ насных. Тараагуур судас уян хатан чанараа бага зэрэг алдсан байна...

- Атеросклероз уу? Анагаах ухаанд тийм нэр томьёо байдаг шиг санагдаж байх чинь. Хэр
зэрэг ноцтой юм бэ?

- Чиний насан дээр хэвийн үзэгдэл.

- Нүд эрээлжлэхийг гайгүй болгох эм бичиж өгөөч. Олон хүний өмнө муурч унавал муухай
юм болно. Миний нэр хүндэд муугаар нөлөөлөнө гэхэд нь Харви толгой дохиод,

- Үүнийг бид аргалж болно. Ингэхэд чи ер нь хэдийд ажил төрлөөс холдох санаатай байна
даа?

- Жич хүү минь компанийг толгойлох үед...

Харви Кейтийн өмнөөс хараад сууж байхдаа хэлсэн бүхнийг нь зөвшөөрөхөөс аргагүй
үнэхээр зориг хатуужилтай эмгэн юм шүү гэж бодов.

Кейт бодсоныг нь мэдсэн юм шиг,

- Миний насан дээр хамгийн харамсалтай юм юу гээч? Евагийн зан байдал. Би Евад их
хайртай байсан. Би түүнд бүхэл ертөнцийг тэр чигээр нь өгье гэж бодож байтал Ева ганц хар
амиа боддог байжээ.

- Кейт чи эндүүрч байна. Ева чамд хайртай.

- Үхсэн хойно...
- Чи мэдэхгүй байна. Ева саяхан... гээд Харви үгээ сайтар тунгаан бодож,

- Саяхан санамсаргүй гай зовлонд орж, үхэх шахсан гэсэнд Кейтийн дотор палхийж,

- Чи энэ тухай түрүүний хэлэхгүй яасан юм бэ?

- Ева зөвшөөрөөгүй юм. Чиний сэтгэлийг үймрэнэ гэж айгаад надаас дуугүй байх ам мөчиг
авсан юм.

- Ай тэнгэр, одоо бие нь ямар байгаа вэ?

- Одоо зүгээр...

Кейт хажуу тийш харж,

- Энэ тухай надад ярьсан чинь баярлалаа... гэв. Харви,

- Чамд эм бичиж өгье гээд жор бичээд толгойгоо өргөхөд Кейт Блэкуэлл хэдийн гараад
явчихсан байжээ.

... Ева үүд онгойлгоод нүдэндээ итгэж ядав. Үүдэнд эмээ нь зогсож байлаа. Бие нь цэх, намба
ихэмсэг, царай нь төлөв.

- Орж болох уу? гэж Кейт асуув.

Ева ганц ч үг дуугарах сэхээгүй, зүгээр л хажуу тийш болж, толгой дохилоо.

Кейт ороод байрыг тойруулан харсан боловч юм хэлсэнгүй.

- Сууж болох уу?

Энэ үед Ева сэхээ орж,

- Уучлаарай, бололгүй яах вэ. Юу авчирах вэ? Цай юу, кофе юу?

- Хэрэггүй баярлалаа. Чиний бие зүгээр үү, Ева?

- Зүгээр ээ. Баярлалаа.

- Би сая Харви дээр очоод ирлээ. Чамд санамсаргүй гай тохиолдсон гэж байна лээ.

Ева яахыг мэдэхгүй эмээгийнхээ өөдөөс анхааралтай ширтэв.

- Тийм...

- Чамайг... үхэх шахсан гэж тэр хэлсэн. Чи миний санааг зовоохгүй гээд надад энэ тухай
хэлэхийг зөвшөөрөөгүй байна.
“Ийм учиртай байж шүү” Ева одоо ямар янзаар харилцвал зохихыг мэдэх болов.

- Тийм ээ, эмээ.

- Тэгэхлээр чи надад хайртай юм байна гээд Кейтийн хоолой зангирлаа.

Евагийн дотор онгойж,

- Хайртай л даа. Би танд ямагт хайртай байсан.

Кейт ач охиноо тэвэрч биедээ наагаад,

- Би гэж нэг солиотой амьтан. Чи намайг хэзээ нэгэн цагт уучлах уу? Би чамд дэндүү ширүүн
хандсан байна... Чамайг сүйд болсон бол би тэсэхгүй байсан гэж Кейт хэлээд нусны алчуур
гаргаж нусаа нийв. Ева Кейтийн гарыг илж,

- Бүгд зүгээр, эмээ. Миний бие сайн байгаа гэлээ.

Кейт нулимсаа барьж ядан анивчиж, Евагийн өөдөөс эгцэлж хараад,

- Бүгдийг шинээр эхэлье. Чи эцгийгээ дуурайсан зөрүүд хүн юм. Чи буруу зас, би ч буруугаа
засья. Юуны өмнө би чамайг гэрээслэлдээ дахин оруулана.

“Би зүүдэлж байх шиг” гэж Еав бодоод,

- Би мөнгөнд санаа зовохгүй. Хамгийн гол нь та л сайн байж байвал болоо.

- Чи миний ач охин. Чи миний өв замгалжлагч. Александра та хоёр хоёулаа.

- Би юугаар ч дутаагүй. Яах вэ таныг баярлуулах гэж,

- Би их баярлалаа. Чи хэдийд над дээр очиж суух вэ?

- Би эндээ үлдвэл дээр байх гэж Ева хэлээд хэсэгхэн эргэлзсэний дараа,

- Би тан дээр үргэлж очиж байх болно, эмээ. Ай эмээ та миний яаж ганцаардаж байсныг
мэдэхгүй байна.

Кейт ач охиныхоо гараас барьж,

- Чи намайг уучлах уу? гэсэнд Евө өөдөөс нь эгцэлж хараад,

- Би таныг уучилна гэж баясгалантайгаар хэллээ.

Кейтийг гармагц Ева виски хийж аваад зөөлөн сандал дээр сууж, эргэцүүлэн бодож эхлэлээ.
Баярласандаа бархирмаар санагдаж байх чинь. Ева Александра хоёр өв залгамжилна. Харин
Александрагаас салахад амархан. Одоо Жорж Меллис л Евагийн санааг зовоож байв. Жорж
одоо Евагийн замд тээр болж байна.
- Төлөвлөгөө өөрчлөгдлөө. Кейт намайг гэрээслэлдээ дахин оруулсан гэж Ева Жоржид хэлэв.

Жоржийн тамхи асаахаар завдан хөдөлсөн гар нь дороо зогсож,

- Нээрээ юу? Баяр хүргэе.

- Одоо Александрад гай зовлон тохиолдвол Кейт сэжиг авна. Тийм болохоор бид түүнийг
дараа нь аргалья...

- Энэ чинь миний санаанд огт таарахгүй байна.

- Чи юу хэлэх гээд байна?

- Би тийм ч тэнэг хүн биш шүү, хонгор минь. Александрад гай дайрвал эд хөрөнгө нь надад
шилжиж ирнэ. Чи миний хувийг надад өгөлгүй, намайг замаасаа зайлуулах гэж байна. Тийм
үү?

Ева дал мөрөө хавчин,

- Чамайг илүүдэж байна гэж л хэлье. Үг хэлээ ололцож болох юм. Чи Александрагаас сал. Би
мөнгөтэй болмогцоо... гэсэнд Жорж инээд алдаад,

- Болино байгаа хүүхээ. Төлөвлөгөө өөрчлөгдөөгүй. Баасан гаригийн орой би Александратай

Дарк Харборт уулзана... Ойлгосон уу? гэв.

Эмээ нь Еватай эвлэрснийг сонсоод Александра хөл алдан баярлаж,

- Бид дахиад нэгэн халуун ам бүл боллоо гэжээ.

... Утас хангинаад салдаггүй.

- Сайн уу? Би Кит Уэбстэр байна. Чамд саад болоогүй биз?...

Уэбстэр долоо хоногт хоёр гурван удаа утасддаг байв. Түүний эв хавгүй оролдож, урдуур
хойгуур гүйх нь Евад анхандаа зугаатай байснаа сүүлдээ залхаж орхижээ.

- Одоо ярих зав алга. Би гадагшаа гарах гэж байна гэсэнд

- Яасан тоогүй юм бэ. Чамд саад хийхээ байя. Би адууны үзэсгэлэнгийн хоёр тасалбар авсан
юм л даа. Чамайг моринд дуртайг мэдэх болохоор...

- Уучлаарай. Би долоо хоног гадагшаа явна.

- Ойлгож байна. Долоо хоногийн дараа уулзах уу? Би жүжгийн тасалбар аваад байж байя.
Ямар жүжиг үзмээр байна вэ?

- Би бүгдийг нь үзчихсэн, Кит. Миний явах цаг боллоо гээд харилцуураа тавив.
Хувцаслах цаг болжээ. Ева Бродвейн залуу жүжигчин Рори Максентай уулзахаар болзоо
тавьсан байжээ. Хоёул хэрхэн үүл борооны ажил үүсгэдэгийг санаад бие нь аятайхан болохыг
мэдрэв.

Жорж харьж явах замдаа Александрад цэцэг худалдан авлаа. Дотор нь саруулхан сайхан
байлаа. Кейт эмгэн Еваг гэрээслэлдээ дахин оруулсан ч гэсэн үүнээс болж байдал
өөрчлөгдөхгүй. Александрад гай тохиолдсоны дараа Еваг янзална. Бүгд бэлэн болсон.
Александра баасан гаригт түүнийг Дарк Харборт хүлээж байх болно. “Хоёулхнаа үлдэнэ шүү.
Зарц үйлчлэгч нарыг гэрт нь явуулчихаарай” гэж Жорж хэлээд уруулыг нь озсон.

Питер Темплтон Александраг бодоод байх болжээ. “Эхнэрээ нэг тийш нь аваачдаг юм уу даа.
Нутаг сэлгэж, сэтгэлийг нь сэргээе” гэж Жорж Меллисийн хэлснийг санав. Александрад
аюуд учирч байна гэж совин татаад байх боловч Питерч яах я арга байсангүй. Хий хоосон
сэжигээ Ник Паппасад хэлээд ямарч нэмэр байхгүй.

Крюгер Брэнтийн удирдлагийн төв байран дахь албан тасалгаандаа Кейт Блэкуэлл өөрийн эд
баялагийн ихэр хоёр ач охиндоо адил тэнцүү өвлүүлэх гэрээслэл бичиж байлаа.

Нью Йоркийн нэгэн дүүрэгт Тони Блэкуэлл эмнэлгийн цэцэрлэгт зургийн тавиур өмнөө
тавиад зогсож байлаа. Зотон даавуун дээр хүүхэд сараачсан юм болов уу гэмээр хүн ойлгох
аргагүй дүрс зурсан харагдана. Тони гэдрэг нэг алхан өөрийн зурсан зургийг бахдан харж
байв.

Баасан гариг, цаг 10.57

Хөлсний машин Ла Гуардия нисэх онгоцны буудалын машины зогсоол дээр очиж, “Истерн
Эйрланс” гэсэн хаягтай хаалганы харалдаа очиж зогсов. Ева машинаас буугаад жолоочид
зуутын дэвсгэрт өгөв.

- Ээ, надад хариулт хүрэх мөнгө байхгүй, авхай. Арай бага шиг дэвсгэрт алга уу? гэж
жолоочийг хэлэхэд,

- Байхгүй.

- Яваад задлуулаад ирээч дээ. Надад зав алга. Би одоо Вашингтон руу шууд нисэх гэж байна...
гэж Ева хэлээд, алтан цагаа харснаа нэгийг шийдэв бололтой,

- Наад мөнгөө авч болно, хариулт хэрэггүй гэж гайхаж хоцорсон жолоочид хэлээд шууд эргэж
онгоцны буудал руу гүйн орлоо. Тэгээд тэрээр хашлага тйиш ухасхийж,

- Вашингтон руу ирэх очих нэг тасалба гэж амьсгаадан өгүүлсэнд тэндхийн ажилтан
ойролцоох өлгөөтэй байгаа цаг руу зааж,

- Онгоц 2 минутын өмнө нисчихсэн гэв.

- Би яаралтай нисэх хэрэгтэй байна. Би хүнтэй уулзах ёстой юм. Арга алга уу? гэж Ева
балмагдав.

- Тайвшир мисс. Дараагийн онгоц ердөө нэг цагийн дараа ниснэ.

- Дэндүү оройтоно. Ээ чөтгөр гэж гэснээ биеэ барьж,

- За яая гэх вэ, хүлээхээс. Энд цайны газар бий юу? гэв.

- Байхгүй, хатагтай. Харин гудмаар цаашаа явбал кофены автомат бий гэлээ.

Нисэх буудлын ажилтан Евагийн хойноос харж “Ямар хөөрхөн хүүхэн бэ. Энэ хүүхний уулзах
гэж яарч байгаа хархүү нь би байдаг ч болоосой” гэж боджээ.

Баасан гариг, цаг 14.00

“Бид хоёр дахиад нэг бал сарыг өнгөрүүлнэ” гэж Александра бодоод хөөрөн баясав.
“Хоёулхнаа үлдэнэ шүү. Зарц үйлчлэгч нарыг гэрт нь явуулчихаарай. Хагас бүтэн сайныг
хоёул гайхамшигтай сайхан өнгөрүүлье” гэж Жорж хэлсэн. Александра гэрээс гарах гэж яарч
байлаа. Ажил төрлийн чанартай үдийн зоог нь бодож төлөвлөснөөс илүү сунжиран удаж,
Александра болзсон цагаас хожимдох гээд байна. Үйлчлэгч бүсгүйд хандан,

- Би явлаа. Даваа гаригийн өглөө ирнэ.

Хаалганы дэргэд очтол, утас дуугарлаа. “Би хожимдох гээд байдаг... “ гэж Александра бодов.

Баасан гариг, цаг 19.00

Жорж Меллис Евагийн төлөвлөгөөг бас дахин бодож үзээд нэг ч өө олсонгүй. “Филбруков” -д
очиход чинь моторт завь хүлээж байх болно. Хүнд харагдалгүйгээр тэр завиар Дарк Харборт
очоорой. Завиа Корсарын хитэгээс уяарай. Александраг ирсэний дараа түүнийг сарны
гэгээнд яхта онгоцоор зугаалья гэж урь. Тэнгист очоод түүнийг яадаг сан өөрийн дураар бол
харин цус гаргаж болохгүй шүү. Хүүрийг нь хашлага давуулаад далайд хаяж орхи. Тэгээд
моторт завиараа Филбруковт очиж, тэндээсээ гаталгаа онгоцоор Дарк Харборт эргэж оч.
Байшин хүртэл хөлсний машин аваарай. Жолоочийг нь машинаас буулгаж, “Корсар” онгоц
зогсоолын тэнд үгүй байгааг та хоёр ажиглаж мэдсэн байхаар нэг арга олоорой. Александраг
гэртээ очоогүй байхыг мэдээд цагдаагийнханд утасд. Цогцосыг нь яасан ч олохгүй.
Тэнгисийн таталтаар хаа хамаагүй урсаад явчихна. Түүний амиа хорлох гэж байсныг алдар
нэртэй хоёр эмч батлах болно”

Моторт завийг Филбрук-Ковд уяж орхисон байв. Жорж гэрэл асаалгүй, сарны гэрэлд
тэнгисийн буланг гаталж өнгөрөөд хэнд ч мэдэгдэлгүйгээр Блэкуэллийнхний эдлэн газрын
усан онгоцны зогсоолд хүрэв. Завийн моторыг унтрааж, “Корсарт” уялаа.

Жоржийг зочлох өрөөнд ороход Александра буйдан дээр суугаад утсаар ярьж байснаа
харилцуурыг гараар таглаад,

- Ева ярьж байна... гээд хэсэг чагнасны дараа,

- Надад зав алга, Ева. Хайрт минь хүрээд ирлээ. Ирэх долоо хоногт хамт хоол идье гэчихээд
харилцуурыг тавьж, Жорж руу эргэж,

- Чи өнөөдөр эрт ирсэн байна. Яасан сайн юм бэ гэсэнд,

- Чамайгаа санаад хамаг ажилаа орхичихоод яаран ирлээ гэхэд эхнэр нь Жоржийг үнсэн
таалан,

- Чамдаа хайртай шүү гэв.

- Би ч бас чамд хайртай, хонгор минь. Зарц үйлчлэгч нарыг явуулчихсан уу? гэхэд Александра
инээмсэглэж,

- Чи бид хоёр хоёулхнаа. Намайг ямар хоол хийсэн гэж бодно. Чиний дуртай моссакийг...

Жорж эхнэрийнхээ хацрыг аяархан илж,

- Би хөөтэй золигийн ажил дээрээ өдөржин сууж байхдаа юу бодсон гээч? Тэнгисийн цэвэр
салхинд гарч... гэхэд нь,

- Чи тэгж хүсээд байгаа бол... Хоол хөрчихнө дөө... гэсэнд Жорж цээжин дээр нь гараа тавьж,

- Хоол хүлээж байг. Би хүлээж чадахгүй нь гэсэнд Александра инээд алдаж,

- За яах вэ. Би хувцасаа солиод ирье гэв.

- Би ч бас.

Жорж дээш гарч, өмд, углаа цамц, тэнгисийн шаахай өмслөө. Удтал хүсэн хүлээсэн цаг нь
болоход цэнгэлийн дээдийг эдлэхээ санан баясав.

- Би бэлэн, хонгор минь гэх эхнэрийнхээ дууг сонсоод Жорж эргэн харав.

Александра бараан өмд, углаа цамц, зотон даавуу туфли өмсөөд үүдэнд зогсож байв. Урт
цайвар шар үсээ цэнхэр туузаар боожээ. “Мөн ч хөөрхөн хүүхэн шүү” гэж Жорж бодоод,

- Би ч бэлэн гэж хариулав.

Яхта онгоцноос моторт завь аргамжсан байхыг Александра хараад,

- Үүгээр яах юм бэ, өвгөөн? гэв.

- Булангийн цаад захад нэг жижигхэн арал байдаг. Би түүнийг үзмээр байна. Тэр хавьд усан
дор чулуу ихтэй. Яхта онгоцны маань ёроолыг эвдэж магадгүй гэж Жорж хариулав.

Жорж яхта онгоцыг зогсоолоос тайлж, салхины дагуу чиглүүлсэнд “Корсар” тэнгисийн зүг
хөдөлж эхлэлээ. Зогсоолоос гарсаны дараа салхины хүч ширүүсч, яхта онгоц долгион дээгүүр
хурдлан хөвлөө.

- Ямар сайхан юм бэ. Би их баяртай байна, хонгор минь гэж Александрын дуу алдахад Жорж
инээмсэглэн,

- Би ч бас гэв.

Александрын баяр баясгалантай байгаа нь, баяр жаргалтай хэвээрээ үхэх гэж байгааг нь
яагаад ч юм бэ Жоржид таатай сайхан санагдлаа.

Эргэн тойрон харвал ойр хавьд нэг ч онгоц алга. Гагцхүү тэртээ хол тэнгисийн хөвөөний
гэрэл гялалзана.

ХӨДӨЛЖ ЭХЛЭХ ЦАГ БОЛЛОО.

Жорж онгоцны жолоог автомат залуур дээр тавиад эзгүй тэнгисийн мандлыг дахин нэг
тойруулан харж, татлага руу ойртож очив. Зүрх нь цээжиндээ багтаж ядан оволзож байлаа.

- Алекс аа, Чи үүнийг хараач гэж дуудав.

Эхнэр нь ойртон ирж, тэртээ дор бараатан байгаа хүйтэн тэнгисийг харав.

- Намайг тэврээч гэж Жорж хоолойгоо зангируулан хэллээ.

Александрыг биедээ наалдахад нь Жорж уруулыг нь шимэн озож, нуруугаар нь тэвэрч аваад
татлагаас дээш алгуурхан өргөж эхлэлээ.

Хүүхэн гэнэт гараас нь мултрахыг оролдон ноцолдож,

- Жорж хэмээн нэрийг нь тун ч тодхон хэллээ.

Жорж түүнийг алдалгүй чанга тэвэрсэн чигтээ улам улам дээш нь өргөн хашлага давуулан
хаяхаар завдан байтал гэнэт цээжээр нь хатгуулан өвдлөө. “Зүрх өвдөж байна уу даа” гэж
бодоод гүн амьсгаа авахаар амаа ангайтал амаар нь цус садрав. Жорж гараа тавьж, цээжээ
хараад нүдэндээ итгэсэнгүй. Түүний цээжинд дээрх шарх байх бөгөөд чухам тэр шархнаас л
цус олгойдож байлаа. Жоржийг нүдээ өргөхөд хүүхэн цус болсон хутга бариад инээмсэглэн
зогсож байв.

“Энэ чинь Александра биш, Ева байсан байна шүү...” гэж Жорж Меллис үхэхийн өмнө бодож
амжлаа.
34-р бүлэг

Александраг байшиндаа очих үед оройн 10 цаг болж байлаа. Жоржид хэдэн удаа утасдсан
боловч утсыг хүн авсангүй. Александраг хожимдож ирлээ хэмээн Жорж зэмлэхгүй болов уу
гэж тэрээр найдаж байлаа. Бүр шал балай юм болсон. Александра шатаар бууж явахдаа утас
дуугарахыг сонссон боловч их яарч явсан болохоороо тоож анхаараагүй юм. Гадаа бүр
машины дэргэд очоод байхад нь үйлчлэгч бүсгүй араас нь байшингаас гүйн гарч ирээд,

- Миссис Меллис, Эгч чинь утасдаж байна. Маш чухал хэрэгтэй гэнэ...

Александра гэртээ буцан орж, харилцуур авахад,

- Алекс минь, би Вашингтонд ирээд байж байна. Надтай аймаар муухай юм тохиолдлоо.
Чамтай уулзаж ярих яаралтай хэрэг байна гэж Ева шууд хэллээ.

- За тэгье. Би одоо Дарк Харбор орох гэж байна. Даваа гаригт эргэж ирээд... гэсэнд,

- Хойшлуулж болохгүй хэрэг. Намайг Ла Гуардия нисэх буудал дээр тосож уулзахгүй юү? Би 5
цагийн онгоцоор очно гэж Ева бүр цөхрөнгөө барсан байдалтай өгүүлэв.

- Тэгье л дээ. Би уг нь Жоржтой...

- Надад чамтай ярих чухал хэрэг гараад байна. Хэрэв чи завгүй юм бол...

- Байз л даа, Ева... Хннн.. За яах вэ, би нисэх буудал дээр чамайг хүлээж байя...

Евагийн тус болооч гэж гуйх нь цөөн байдаг болохоор Алекс татгалзаж чадсангүй. Дарк
Харборт сүүлчийн нисэх онгоцоор очно биз. Александра Жоржид хэл өгөх гэж ажил руу нь
утасдахад тэрээр яваад өгсөн байжээ. Цагийн дараа хөлсний машин аваад Вашингтоноос
ирэх 5 цагийн онгоцыг тосохоор очив. Зорчигчдын дотор Ева байсангүй. Александра түүнийг
хоёр цаг хүлээж ядаад сүүлд нь Дарк Харбор орохоор явлаа. “Хушийн төгөл” өргөө харанхуй
байхад нь гайхлаа. Жорж хэдийнэ ирээд байж байгаа биз. Александра өрөө тасалгаагаар явж,
гэрэл асаав.

- Жорж оо?

Нөхөр нь энд алга. Александра гэр рүүгээ утасдлаа.

- Мистер Меллис гэртээ байна уу?

- Байхгүй, миссис Меллис. Хагас, бүтэн сайнд тантай хамт гадагшаа явна гэж байсан.

- Баярлалаа, Мари. Жорж нэг газар саатсан юм байлгүй.

Ямар нэгэн учир шалтгаан байх ёстой доо. Бодвол сүүлчийн мөчид урьдынх шиг бас нэг
яаралтай ажил гарч, түүнийг Жоржид даалгасан байх. Одоо ингээд хүрээд ирэх биз.
Александра Ева руу утас залгав.
- Ева, чи юу болов оо? гэж Александра гайхан асуухад,

- Харин би чамаас л асуумаар байна. Би чамайг Кеннеди нисэх буудал дээр хүлээгээд л
байлаа. Чамайг ирэхгүй болохоор...

- Кеннеди гэв үү? Чи намайг Ла Гуардияд ир гэсэн шүү дээ.

- Битгий худал хэл. Би Кеннеди нисэх буудал гэсэн шүү дээ...

- Үгүй... гэснээ маргалдаад ашиг нь юу билээ гэж Александра бодоод,

- За тэгвэл би буруу дуулсан болотой. Чи зүгээр үү гэсэнд,

- Бүгд хэвийн байдалтай. Ийм сонин юм болсон. Би Вашингтоны нэг улс төрийн
зүтгэлтэнтэй танилцлаа л даа. Их хартай юм... гэж Ева инээд алдаад,

- Утсаар олон юм яриад яах вэ, Даваа гаригт хамт хоол идье тэгээд бүгдийг нь сайн ярья гэхэд
нь

- За тэгье гэж Александрын дотор онгойлоо.

- Сайхан амраарай, Чамаар сонин юу байна даа, Жорж сайн уу?

- Одоохондоо ирээгүй л байна. Дахиад л нэг ажил гарсан юм байлгүй. Ядахдаа утасдахгүй
юм хэмээн Александра тайван хариулахыг хичээв.

- Удахгүй ирэх биз дээ. Тайван нойрсоорой, Алекс аа

- Тавтай нойрсоорой, Ева хэмээн Александра хэлээд харилцуураа тавьлаа.

“Ева маань Жорж шиг сайн хүнтэй танилцвал юутай сайхан билээ” гэж Александра бодоод
цаг харвал 23 өнгөрч байлаа.

Жоржийн ажил руу утасдвал хэн ч хариулсангүй. Жоржийн очдог клуб руу утасдсанд тэнд
байсангүй.

Шөнө дундын үед Александрын сэтгэл түгшиж эхлэлээ. Цагийн дараа бүр айж сандарч эхлэв.
Чухам яах учраа олохгүй байлаа. Жорж нэг тийш яаралтай явсан юм болов уу, тэгээд утасдаж
амжаагүй юм болов уу? Нэг учир шалтгаан байх ёстой доо. Цагдаагийнханд утасдах уу? Гэтэл
Жорж хүрээд ирвэл балай юм болно.

Александра шөнийн 2 цагт цагдаа руу утасдлаа. Айлсборд өөрийн цагдаа байхгүй. Хамгийн
ойрын хэсэг нь Уалдо гүнлэгт байдаг.

- Уалдогийн цагдаагийн хэсгийн түрүүч Ламберг сонсож байна гэх нойрмог дуу сонсдов.

- “Хушийн төгөл” өргөөнөөс миссис Меллис ярьж байна гэж Александра хэллээ.
- Юугаар танд тус болох вэ, миссис Меллис?

- Би өөрөө ч мэдэхгүй байна. Нөхөр маань аль эрт ирэх ёстой байсан. Одоо болтол алга гэж
Александра итгэл муутайхан өгүүлэхэд,

- Мэдлээ гэв.

Аливаа эр хүнийг шөнийн хоёр цаг хүртэл саатуулж болох дор хаяад гурван шалтгаан байж
болдгийг түрүүч Ламберг мэднэ. Энэ нь хар, шар, хүрэн үстэй хүүхэн...

- Ажил гараад саатсан юм биш биз гэж цагдаа таамаглав.

- Уг нь... утасддаг юм...

- Юу эс байх вэ дээ, миссис Меллис. Утасдах аргагүй байх тохиолдол элбэг байдаг...

“Би яасан тэнэг хүн бэ” гэж Александра өөрийгөө зүхлээ. Үнэндээ цагдаагийнхан юу хийж
гялайлгах вэ дээ. Цагдаагийнхан хүн алга боллоо гэж мэдэгдсэнээс хойш 24 цагийн дараа л
сая эрэлд гардаг гэж Александра уншсан юм байна. Тэнгэрийн авралаар Жорж арай алга
болоогүй байна. Зүгээр нэг газаар саатаа биз.

- Таны зөв юм уу даа. Төвөг удсаныг минь уучлаарай хэмээн Александра хэлэв.

- Санаа зоволтгүй, миссис Меллис. Нөхөр чинь удахгүй ирнэ гэж итгэж байна.

Жорж тэр шөнө ирсэнгүй.

Найдан хүлээж байсан өглөөний 7 цагийн гаталгаа онгоцоор ч ирсэнгүй. Дараачийнхаар нь ч

ирсэнгүй. Александра цөхрөнгөө барж эхлэлээ. Манхеттан дах гэр рүүгээ залгахад Жорж
гэртээ очоогүй байлаа. Санамсаргүй гай тохиолдоод эмнэлэгт ухаангүй хэвтэж байгаа юм
болов уу? Амь насанд нь муу хүн халдчихав уу? Үгүй үгүй ийм муухай юм болох ёсгүй.

Жорж ийшээ ирж намайг байхгүйг мэдээд буцаад явчихсан байх. Хэрэв түүнийг
барьцаалчихсан бол яанаа...

Александра ул мөр эрж, байшин дотуур явж үзлээ. Юу ч алга. Хөлөг онгоцны зогсоол дээр
очлоо. “Корсар” онгоц долгион дээр дүлхийн, энх амгалан найгалзаж байна.

Александра Уалдогийн цагдаагийн хэсэгт дахин утасдлаа.

Өглөөнөөс тэнд цагдаагийн газар 20 жил ажилласан дэслэгч Филип Ингрэм гэдэг хүн
жижүүрлэж бйагаа аж. Жорж Меллис шөнө гэртээ хариагүй тухай дэслэгч мэдэж байжээ.
Цагдаагийн хэсгийнхэн бүгдээрээ энэ тухай хөөрөлдөн билэнч юм ярьцгаасан аж.

- Нөхөр тань танаас түрүүлж ирээд буцсан байж болох юм. Миссис Меллис. Бид одоохон очьё
гэж дэслэгч өгүүлэв.
Энэ бол дэмий цагийн гарз гэж дэслэгч Ингрэм мэдэж байлаа. Эр нөхөр нь нэг газар наргиж
байгаа биз. “Нэгэнт Блэкуэллийнхэн утасдаж байгаа болохоор бид хөл алдан гүйх ёстой шүү
дээ” гэж дэслэгч дургүйлхэн бодоод,

- Цагийн дараа ирнэ гэж жижүүрийн түрүүчид хэлээд гарлаа.

Дэслэгч Ингрэм Александрын яриаг сонсоод, байшинг тойрон үзэж, хөлөг онгоцны
зогсоолыг шалгаад хэрэг биш болжээ гэж дүгнэв.

Жорж Меллис эхнэртэйгээ Дарк Харборт оройн 10 цагт уулзах ёстой байсан атал энд ирсний
ямар ч ул мөр байсангүй. Ердийн нэг явдал. Гэвч дэслэгч Ингрэм алдар нэрт
Блэкуэллийнхэнд туслахад муу нь юу билээ дээ гэж бодлоо. Тэгээд ойр орчмийн нисэх
онгоцны буудалууд руу утасдлаа. Линкольнвилл дахь гаталгаа онгоцны буудал руу ч утасдлаа.
Эдгээр газруудын хаана ч сүүлийн 24 цагийн дотор Жорж Меллисийг харсан хүн, түүнд
үйлчилсэн хүн байсангүй.

- Нөхөр маань Дарк Харборт ирээгүй юм болов уу? гэж Александра дэслэгчид хэлжээ.

“Энэ чөтгөр алгадмар чинь хаачдаг байна вэ?” Эрүүл ухаантай эр хүн Александра шиг ийм
эхнэрээс сайн дураараа татгалзаж болох юм гэж дэслэгчийн ухаанд багтахгүй байлаа.

- Бид бүх газрыг шалгасан. Эмнэлэг, морг... гээд үгээ дутуу орхив.

Александра сэтгэлийнхээ догдлолыг барих гэж хичээвч их хэцүү байгаа нь мэдэгдэж байлаа.

- Баярлалаа дэслэгч ээ.

- Энэ миний үүрэгт ажил юм даа гэж Ингрэм хариулав.

Дэслэгч Ингрэм хэсэг дээрээ эргэж ирлээ. Жорж Меллис үнэхээр ч хаа ч байсангүй.
Санамсаргүй осол эндлийн бүртгэлд тийм нэр овогтой хүн алга. Дэслэгч сүүлд нь сэтгэл
шулуудаад “Мэн курьер” сонины танил сурвалжлагчдаа утасдаж энэ мэдээг мэдээлэв. Ингээд
илүү орлого олох болсондоо баярласан дэслэгч харилцуураа тавьсаны дараа Жорж
Меллисийг сураггүй алга болсон хүмүүсийн бүртгэлд оруулав.

Үд дунд болоход өдрийн бараг бүх л сонинд

БЛЭКУЭЛЛИЙН ӨВ ЗАЛГАМЖЛАГЧ ХҮҮХНИЙ НӨХӨР НЬ АЛГА БОЛЖЭЭ

гэсэн гарчигтай нийтлэл гарчээ.

- Питэр ээ, чи Жорж Меллисийг шалгаад өгөөч гэж гуйснаа санаж байна уу?

- Саналгүй яах вэ, юу гэж?

- Тэр чинь алга болчихжээ.

- Юу?

- Хайлсан, ууршсан юм шиг л алга болчихжээ... гээд Питэрийн сонссоноо ухаарахыг хэсэг
хүлээв.

- Биедээ юм явч явсан байна уу? Мөнгө? хувцас? паспорт?

- Үгүй. Мэн муж улсын цагдаагийн газрын мэдээгээр бол ердөө л хий агаарт уусчихсан
байна. Чи түүнийг эмчилж байсан хүн. Тэгэхээр мань хүн яагаад ийм үзүүлбэр тоглож
байгаагийн учрыг хэлж өгөх болов уу гэж бодоод утасдаж байна

- Огт мэдэхгүй юм.

- Толгойд чинь юм орвол хэлээрэй дээ. Халуухан юм болох шинжтэй шүү.

- За тэгнээ гэж Питэр амлав.

Хагас цагийн дараа эмч Александрад утасдлаа. Хүүхэн бахардаж унахын даваан дээр байгааг
эмч дууны өнгөнөөс нь мэдлээ.

- Би... Жорж маань алга болчихсон. Хаана байгааг нь мэдэх хүн алга. Танд юм хэлээгүй биз?
гээд Александра асгаруулан уйлав.

- Надад юу ч хэлээгүй, миссис Меллис. Яасныг нь огт мэдэхгүй байна.

- Ай тэнгэр...

Питэр хүүхний сэтгэлийг тайвшруулахыг хичээж,

- Санаанд юм орвол танд даруй утасдана. Та хаана байгаа вэ? гэсэнд,

- Би одоо Дарк Харборт байгаа. Орой Нью Йорк орно. Би эмээгийндээ байх болно.

Александар гэртээ байж чадахгүйгээ мэдэж байлаа.

- Охин минь, гай зовлон болоогүй гэж би итгэж байна. Бодвол нэг тийшээ яаралтай явахдаа
утасдахаа мартсан биз. Надад ч тийм явдал тохиолдож байсан гэж Кейт хэлсэн боловч энэ
хэлсэндээ өөрөө итгэхгүй байлаа.

Жоржийн алга болсон тухай эмчийн хэрхэн ярьж байгааг Ева зурагтаар харж суулаа. Дэлгэц
дээр хушийн төгөлийн өргөөний гэрэл зураг, дараа нь Жорж Александра хоёрын хуримын
ёслолын гэрэл зураг гарав. Жоржийг нүүрийг томоор үзүүллээ. Жорж үхэхийн өмнө өөдөөс
нь гайхсан бүлтийсэн нүдээр ширтэж байсныг тэр санав. Зурагтаар нэвтрүүлэгч
үргэлжлүүлэн,

- Хулгайлсан хэрэг биш шиг байна. Жорж Меллисийг санамсаргүй осол эндэлт өртсөн болов
уу гэж цагдаагийнхан үзэж байна хэмээн ярьлаа.
Ева сэтгэл ханамжтай инээвхийлэв. – Эд цагаа дэмий үрж байна. Эд нар хэзээч Жорж хэзээч
олохгүй. Тэнгисийн таталт одоо түүнийг бүр хаа хамаагүй хол урсган аваачсан. Хөөрхий
Жорж, дүрдээ сайн тоглосон. Их сайн тоглосон хөөрхий. Гагцхүү Ева зохиолын төгсгөлийг
жаахан өөрчилчихсөн юм. Ева Мэнд нисэн очиж, Филбрук-Ковоос “найздаа зориулан”
моторт завь хөлслөн авчээ. Зэргэлдээх онгоцны зогсоолоос өөр нэгэн завь аваад Дарк
Харборт очиж, Жоржийг хүлээжээ. Жорж огт ажиг сэжиг авсангүй, төлөвлөгөө ёсоор
ажиллаж байлаа. Ева яхта онгоцыг зогсоолын дэргэд орхихын өмнө тавцанг нь сайтар
угаасан. Үүний дараа Жоржийн завийг буцаан аваачиж, өөрийн завийг бас буцааж өгөөд,
Нью Йоркт буцаж очжээ. Тэгээд л Александрын утасдахыг хүлээсэн. Энэ хүн амины хэргийг
өөгүй сайхан зохион байгуулсан. Цагдаагийнхан бас нэгэн хүний учир битүүлэг алга болсон
баримттай эвлэрэхээс өөр аргагүй болно доо.

- Одоо цаг агаарын мэдээ нэвтрүүлэнэ... гэж нэвтрүүлэгч өгүүлэхэд Ева зурагтаа унтраалаа.

Ева бүсгүй Рорри Маккейнтай уулзах болзооноос хожимдохыг хүссэнгүй...

Маргааш өглөө нь 6 цагт загасчид Пенобскот булангийн долгион зүсүүрийн хажуунаас Жорж
Меллисийн цогцсыг олжээ. Өглөөний мэдээгээр Жоржийн үхлийг “санамсаргүй осол” гэж
мэдээлсэн бол шинэ мэдээлэл ирснийг дараа мэдээлийн өнгө аяс өөр болоод ирлээ.
Жоржийн цогцосны цээжинд дээр шарх нь үүний өмнө үзэж байсанчлан загасны шүднийх
биш, харин мэсний шарх бөгөөд хохирогчийг хутгалан хөнөөснийг шүүхийн магадлан
шинжиллэх эмч нар батлан тогтоосон аж.

Тэр өдрийн сонинуудад,

“УЧИР БИТҮҮЛЭГ ХҮН АМИНЫ ХЭРЭГ”, САЯТНЫГ ХУТГАЛЖ АЛСАН БАЙНА” гэх
мэтийн гарчиг эрээлжилж байв.

Дэслэгч Ингрэм тэнгисийн түлхэлтийн зургийг судалж байснаа сандлынхаа түшлэгийг налан
гэдийж бодлогошров. Хэрэв долгион зүсүүр байгаагүй бол ус Жорж Меллисийн хүүрийг
тэнгис рүү урсган аваачих байж. Тэнгисийн таталт цогцосыг Дарк Харборын тэндээс
авчирсан байсанд дэслэгч туйлын их гайхлаа. Учир нь Жорж Меллис тэнд очоогүй шүү дээ.

Мөрдөгч Ник Паппас дэслэгч Ингрэмтэй уулзахаар Менд нисэж ирлээ.

- Энэ хэргийг мөрдөн байцаахад манай хэлтэс танд тусалж чадах болов уу гэж найдна.
Манайд Жорж Меллисийн тухай зарим нэг мэдээлэл бий. Хууль ёсоор бол бид энэ хэрэгт
хажуунаас болохгүй л дээ. Харин хэрэв танайх хүсвэл бид дуртайяа туслах байна гэж Паппас
хэллээ.

Уалдогийн цагдаагийн газар алба хааж байгаа 20 жилийн дотор гарсан ганц ноцтой гэмт
хэрэг гэвэл согтуу тойрон аялагч нутгийн бэлэг дурсгалын дэлгүүрийн чимэг болж байсан
хандгайн толгойг буудаж унагасан хэрэг байжээ. Харин одоо энэ Меллисийн тухай сонин
болгон бичиж байгаа. Энэ хэргийн ашиглан өөрийн алдар нэрийг мандуулж болох юм байна
гэдгийг Ингрэм ойлгожээ. Тэгээд Паппасийн өөдөөс харж,
- Мэдэхгүй л байна шүү гэлээ.

Ник Паппас түүнийг бодлыг тааж мэдсэн юм шиг,

- Бид таны нэр алдарыг булааж авахгүй. Их дуулиантай хэрэг байна. Дээрээс биднийг шахаж
шавдуулах болно. Хэргийг хурдан илчлэх нь та бидний хэн хэнд ашигтай гэсэнд, дэслэгч
Ингрэм үүн дээр алдах онох юм алга гэж бодоод,

- Зөвшөөрч байна гэлээ.

Александрад тайвшруулах тариа хийж, оронд нь хэвтүүллээ. Жоржийг алагдсан гэж нэг л
итгэхгүй байлаа. Жорж шиг хүнийг алж болно гэж үү? Биед нь хутгалсан шарх илэрсэн гэж
цагдаагийнхан хэлсэн. Тэднүүс эндүүрсэн биз. Энэ лав санамсаргүй тохиолдсон гай байх.
“Түүнийг минь алсан байх ёсгүй. Түүнийг хүн алсан байх ёсгүй.” тэгсээр эм нөлөөлж
Александра унтлаа.

Жоржийн цогцсыг олсныг Ева мэдээд гайхан мэлрэв. “Олдсон нь дээр ч байж болох юм.
Александраг сэрдэж сэжиглэх болно. Тэр арал дээр очсон шүү дээ” гэж Ева бодлоо.

Кейт Еватай хамт сууж байлаа. Жоржийн алагдсан тухай мэдээ Кейтэд айхавтар нөлөөлжээ.

- Жоржийг алах нь хэнд ашигтай вэ, тэндээс алуучныг эрэх хэрэгтэй? гэж асуухад нь Ева
санаа алдаад,

- Бүү мэдээ, эмээ. Ухаанд багтахгүй юм. Хөөрхий Александра, миний гол харлаад байна. Хар
залуугаараа бэлэвсэн хоцорлоо... гэж Ева хариулав.

... Дэслэгч Ингрэм Линкольнвилл Айлсборгийн гаталгаа онгоцны ажилтныг байцааж байлаа.

- Мистэр, миссис Меллис хоёрын хэн нь ч баасан гаригт гаталгаа онгоц хэрэглээгүй нь лав
уу?

- Миний ээлжинд үгүй. Би нөгөө ээлжийн хүнээс бас асуусан. Тэднийг хараагүй байна лээ.
Тэд нисэх онгоцоор ирцгээсэн байх.

- Бас нэг юм байна. Баасан гаригт гаталгаа онгоц дээр чиний танихгүй хүн байсан уу?

- Жилийн энэ үед наашаа хүн ирдэггүй шүү дээ, чи өөрөө мэднэ. Зун бол тойрон аялагчид
дайралдаж болох. Намрын сүүл сард бол? Чи юу гэх нь энэ вэ?

Дэслэгч дараа нь Айлсборгийн нисэх буудлын эрхлэгчтэй уулзав.

- Үгүй, Фил ээ. Жорж Меллис тэр орой нисэх онгоцоор ирээгүй. Харин гаталгаа онгоцоор
ирсэн байх.

- Лью түүнтэй дайралдаагүй гэж байна лээ...

- Усаар сэлээд ирсэн байж таармааргүй еэ дээ?

- Миссис Мэллис яасан бол?

- Оройн 10 –т “Бичкрафтаар” нисэж ирсэн. Манай хүү Чарли түүнийг Хушний төгөлд хүргэж
өгсөн.

- Хүүхний санаа сэтгэл ямар байсан бол?

- Үүнийг асуудаг чинь гайхалтай байна. Сэтгэл нь их хөдөлсөн байсан. Манай хүү хүртэл
ажигласан байна лээ. Миссис Меллис уг нь их тайван, дөлгөөн зантай, түүнтэй ярихад таатай
байдаг. Тэр орой муухай их яараад байсан шүү,

- Бас нэг юм асууя. Тэр өдөр танихгүй зорчигчид үзэгдсэн үү? гэсэнд цаадах нь толгой
сэгсэрч,

- Үгүй, бүгд нутгийнхан гэв.

Дэслэгч цагийн дараа Ник рүү утасдаж,

- Бүгдээрээ туйлын ээдрээтэй байна. Баасан гаригийн орой миссис Меллис ийшээ хувийн
нисэх онгоцоор иржээ.Нөхөр нь хамт байгаагүй юм байна. Гаталгаа онгоцны зорчигчдын
дотор Жорж Меллис байсангүй. Ерөөсөө арал дээр түүнийг ирснийг нотлох баримт алга гэж
тэрээр мэдээлэв.

- Тэнгисийн таталтыг эс тоолбол тэр юм.

- Тийм л дээ.

- Түүнийг алсан хүн цогцсыг хашлага давуулж хаяад, тэнгисийн таталтаар хол урсаж одно гэж
бодсон бололтой. “Корсар” –г шалгасан уу?

- Би өөрөө үзсэн. Ноцолдон тэмцэлдсэний ул мөр ерөөсөө байхгүй. Цус бас байхгүй.

- Яхта онгоцыг магадлах мэргэжилтэн нараар үзүүлмээр байна. Татгалзахгүй биз дээ?

- Бидний болзож тохирсон маань хүчинтэй хэвээрээ байх юм бол татгалзахгүй.

- Санаж байна. Маргааш уулзья.

Маргааш нь Ник арал дээр хэсэг мэргэжилтэн нартай хамт ирэв. Дэслэгч тэднийг “Корсар”
зогсож буй Блэкуэлийнхний хувийн зогсоол дээр дагуулан аваачлаа. Цагийн дараа
мэргэжилтэн нарын нэг нь,

- Бидний аз таарах шиг байна, Ник. Татлагын дор цусан толбо байхыг оллоо гэв.

Мөн тэр оройдоо лабораториас хариу ирсэн нь уг цусан толбо Жорж Меллисийн цус болох
тогтоогджээ.

Манхэттнений “торгон оймс” хорооны цагдаагийн хэсгийн амьдрал хэвийн байдлаар

үргэлжилж байлаа. Урьдчилан хорих өрөөнүүдээр дүүрэн мансуурах донтон, янхан хүүхэн,
золбин тэнэмл хүмүүс, Питэр Темплтон нэгэн цагдааг дагалдан Ник Паппасийн тасалгаа руу
гудамжаар явж байхдаа чих дөжрөм шуугилдаж өмхий самхай ханхлахыг гайхав.

- Сайн уу, Питэр. Ирсэнд чинь баярлаж байна.

Үүний түрүүхэн Ник утасдаж, Питэрийг ирэхгүй бол хойноос нь буутай цагдаа явуулна гэж
сануулсан юмсанж. Дагаж ирсэн цагдаа холдов.

- Юу болоо вэ, Ник ээ? Энэ чинь ямар учиртай юм бэ?

- Одоохон чамд ярьж өгье. Нэг хүн өөрийгөө дэндүү ухаантай гэж бодож байгаа юм байна.
Үхсэн хүн өөрөө очоогүй арал дээрээс алга болжээ. Энэ чамд ямар санагдаж байна даа?

- Шал балай юм.

- Ай даа, яг тийм. Гаталгаа онгоцны хүн, нисэх буудлын эрхлэгч нар тэр өдөр Жорж
Меллисийн барааг хараагүй гэж нэг дуугаар батлан мэдүүлж байна. Ингээд моторт завь
үлдлээ. Бид завийн бүх буудлын эздээс асуулаа, байдаггүй шүү.

- Жорж Меллис тэр өдөр үнэндээ Дарк Харборт оччгүй байж болно шүү дээ.

- Шүүхийн мэргэжилтэн нар өөр бодолтой байгаа. Жорж тэр байшинд байсныг батлах
нотолгоо бий. Алга болохын өмнө өмсөж явсан хувцас нь тэндээс олдсон.

- Түүнийг байшинд алсан хэрэг үү?

- Блэкуэллийн яхта онгоц дээр. Хүүрийг хашлага давуулан хаяжээ. Үүнийг хийсэн хүн цогцос
нь хятад руу урсан очно гэж бодсон байна.

- Тэгээд яаж? гэхэд нь Ник үгийг нь таслан махлаг гараа өргөж,

- Одоо миний асуух ээлж. Меллис чиний өвчтөн байсан. Эхнэрийнхээ тухай чамд ярьсан
байж таарна.

- Энэ ямар хамаатай юм бэ?

- Шууд хамаатай. Эхнэр нь нэгдүгээр сэжигтэй этгээд.

- Чи солиорчээ.

- Өө, сэтгэл мэдрэлийн эмчийг ийм хэллэг хэрэглэдэггүй гэж бодсон юм сан.

- Ник, Чи яагаад Жоржийг Александра алсан гэж үзэж байгаа юм бэ?

- Тэр хүүхэн тэнд байсан. Нөхрийгөө алах шалтгаан байсан байж таараад байна. Арал дээр
шөнө орой очсон байна. Яагаад гэвэл нисэх буудалд эгчийгээ хүлээж саатсан гэнэ.

- Эгч нь юу гэж байна вэ?

- Чи юу гэж бодоо вэ? Тэр хоёр чинь ихэр шүү дээ. Тэр орой Жоржыг хушийн төгөл өргөөнд
очсон гэж бид итгэж байна. Эхнэр нь болохоор нөхөртэйгөө уулзаагүй гэж хэлдэг. Байшин нь
том ч гэсэн хоёр хүн бие биеэ олохгүй байхаар том арай биш. Дараа нь миссис Меллис зарц
үйлчлэгч нартаа хагас бүтэн сайны амралт өгч явуулсан байна. Яах гэж тэгсэн бэ гэж асуухад
Жорж өөрөө тэгж хүссэн гэнэ. Жорж нь бидэнд өчиг өгч чадахаа больсон шүү дээ.

Питэр бодол болон сууж байлаа.

- Түүнд нөхрийгөө алах шалтгаан байсан гэж чи хэллээ. Ямар шалтгаан юм бэ?

- Өө чи юмыг ийм амархан мартдаг хүн үү? Энэ тухай чи өөрөө надад ярьсан шүү дээ. Тэр
авхайг нударгалах гэж гар нь загатнадаг донтой хүнтэй суусан гэж. Бодвол эхнэрээ нилээд
зоддог байсан биз. Тэгээд эхнэр нь одоо боллоо, ханалаа, салцгаая гэсэн биз. Нөхөр нь
зөвшөөрсөнгүй. Яалаа гэж салах вэ дээ. Сонин хэвлэлийнхэн бөөн шуугиан дэгдээнэ гэж
айгаад эхнэр нь шүүхэд мэдүүлсэнгүй. Тэгээд нөхрийгөө алахаас өөр зам үлдсэнгүй гээд ник
зөөлөн сандлыг түшлэг налан гэдийв.

- Чи тэгээд надаар яах гэсэн юм бэ? гэж Питэр асуув.

- Мэдээлэл хэрэгтэй байна. Хэд хоногийн өмнө чи миссис Меллистэй хамт хооллосон юм
байна... гээд дуу хураагуурын товчийг дарж,

- Бүгдийг хальсанд буулгаж авна, Питэр ээ. Тэр уулзалтынхаа тухай яриач. Александра
Меллис ямархуу зан байдалтай байсан бэ? Хашгирч гуугачсан уу, ууртай байв уу? Ямар нэгэн
юм нуугаад байх шиг санагдсан уу?

- Би энэ насандаа тийм аз жаргалтай тайван дөлгөөн хүнийг үзээгүй юм байна... гэхэд нь Ник
түүний өөдөөс хэсэг хараад дуу хураагуураа тасалж,

- Би тоглохтой манатай байна хөө. Өглөө би эмч Харвитай ярьсан. Александрын амиа хорлох
гэж боддогийг болиулахын тулд эм бичиж өгсөн байна лээ. Ойлгов уу?

Жон Харви дэслэгчтэй яриад сэтгэл нь их догдлосон байжээ. Мөрдөгч түүнээс,

- Мистэр Меллис танаас мэргэжилийн тусламж авч байсан уу? гэж шууд асуухад

- Уучлаарай. Надад өөрийн өвчтөний тухай мэдээ өгөх эрх байхгүй. Танд тус болж чадахгүй
болов уу даа.

- За яах вэ, ойлгож байна гээд мөрдөгч босож,

- Хүн амины хэрэгт холбогдолтой зүйл. Нэг цагийн дараа би миссис Меллисийн өвчтөний
түүхийг хурааж авах шүүхийн бичиг авчирна. Би хэрэгтэй бүх зүйлээ олж аваад сониныхонд
өгнө гэхэд нь доктор Харви дүнсийгээд дуугарсангүй.

- За тэгээд та ярих уу, эсвэл би бичиг авчирах уу?

- Суугтун эрхэм ээ. Сүүлийн үедсАлександрад сэтгэл хөдлөлийн чанартай бэрхшээл байсан
гэж эмч Харви хэллээ.

- Чухам ямар?

- Санаа сэтгэлийн маш их гутруу байдалд орж, амиа хорлох тухай ярьдаг болсон байсан.

- Өөрийгөө хорлох бодолтой байсан юм уу? Эсвэл бусдыг уу?

- Үгүй. Усанд живж үхэж байгаагаар зүүдлэх боллоо хэмээж байсан. Би велбутрин бичиж
өгөөд тус болоогүй. Тэгэхэд нь номифенсон бичиж өгсөн. Тус болсон эсэхийг мэпэхгүй
байна.

Ник Паппас олж авсан мэдээллээ эргэцүүлэн ухаарахыг хичээв.

- Өөр юм байна уу? гэсэнд,

- Байхгүй эрхэм ээ гэж эмч хариуллаа.

Жон Харви худлаа хэлчихээд одоо гэмшин зовж байлаа. Ева Блэкуэллийг Жорж Меллисийн
хэрцгий балмадаар зодож занчсан тухай юу ч дурсаагүй. Энэ тухай цагдаагийнхан аль эртний
мэдүүлэх ёстой байсан болохоор сэтгэл нь давхар зовж байлаа. Уг нь эмч Харви
Блэкуэллийнхнийг хамгаалах гэсэн юм даг. Еваг зодож занчсан. Жорж Меллисийн алагдсаны
хооронд холбоо байгаа үгүйг эмч мэдэхгүй. Ямар ч гэсэн энэ тухай дуугүй байх хэрэгтэй юм
гэж совингоороо мэдэрч байлаа. Кейтийг өмгөөлж хамгаалахийн тулд эмч Харви чадах
бүхнээ хийнэ. Түүнийг ингэж шийдээд байтал төдөлгүй сувилагч хүүхэн,

- Танд эмч Уэбстэр утасдаж байна гэхэд нь Харви харилцуур авлаа.

- Жон оо, Чамтай уулзаж ярих юм байна. Чи үдээс хойш завтай юу? гэх Китийн дуу
сонсогдов.

- Зав гаргая. Хэдэн цагт вэ?

- Тавд болох уу?

- Болно Кит ээ.

5 цагт Кит Уэбстэр эмч Харвийн тасалгаанд ирээд сууж байлаа.

- Юм балгах уу, Кит?

- Үгүй, баярлалаа. Би уудаггүй. Төвөг удсаныг минь уучлаарай...

Кит уулзах бүрдээ уучлал гуйж байдаг шиг Жонд санагдлаа. Хүн бүхний таалалд нийцүүлэх
гэж байдаг ийм нэг хорхойд хоргүй амьтан. Илж эрхлүүлээсэй гэж хүсэж байгаа гөлөг шиг л...
Энэ унхиагүй гадаад байдлын цаана гайхамшигтай мэс засалч нуугдаж байгаа гэж ухаанд
багтмааргүй.

- Чамд юугаар тус болж чадах байна вэ, Кит? гэсэнд Кит ер гүнзгий шүүрс алдаад,

- Энэ... за Ева Блэкуэллийг Жорж Меллисийн зодсон тухай юм.

- Чухам юу вэ, Кит?

- Евагийн үхэх шахсаныг бид мэднэ шүү дээ.

- Тийм ээ, тэгээд?

- Энэ тухай цагдаагийнханд хэн ч мэдэгдээгүй. Одоо... Энэ хүн амины хэрэг энэ тэр гээд. Би
тэр тухай цагдаагийнханд хэлж таарах юм биш үү?

“Би үүнээс хаашаа ч зайлахгүй” гэж Харви дотроо бодоод,

- Үүнийг чи өөрөө л шийдэх ёстой доо, Кит.

- Мэдэж байна. Даанч мисс Ева Блэкуэллд эвгүй юм хийх хүсэл алга. Гайхалтай хүүхэн шүү
гэв.

Эмч Харви өөдөөс нь ажин ширтлээ. Кит Уэбстэр дахин нэг шүүрс алдаад,

- Тэр тийм шүү... Би нэг л юманд сэтгэл зовж байна. Энэ тухай цагдаагийнхан мэдэж орхивол
миний нэр хүндэд муугаар нөлөөлнө.

“Миний нэр хүндэд ч бас” гэж Харви бодоод,

- Цагдаагийнхан тэр тухай олж мэднэ гэх үнэмшил тун бага, Кит. Ева дуугүй байх болно, чи
ойлгож байгаа биз дээ. Тэгэхлээр хэн ч мэдэхгүй. Духан дээрхи жижигхэн сорви байхгүй бол
мэс засал хийлгэсэн гэж хэн ч мэдэхгүй гэсэнд Кит нүдээ анивчиж,

- Юун сорви бэ? гэв.

- Яагаав, духан дээр нь жижигхэн улаавтар сорви байсан. Чамайг нэг сарын дараа арилгаж
өгнө гэсэн гэж Ева тэр үед хэлж байсан.

Энэ удаа эмч Уэбстэр бүр их анивчиж эхлэлээ. Энэ нь мэдрэлийн татвалзаа шиг байлаа.

- Санахгүй юм... Чи сүүлчийн удаа Еватай яг хэдийд уулзсан бэ?

- Арваад хоногийн өмнө ирж, ихэр дүүгийнхээ тухай ярьсан юм. Үгийн далимд хэлэхэд тэр
сорви байгаагүй бол би Ева нь юм уу, Александра нь юм уу ялгаж танихгүй байсансан. Тэр
хоёр чинь ав адилхан ирэх хоёр шүү дээ, чи мэднэ гэсэнд Кит алгаархан толгой дохиод,

- Тийм ээ. Би сэтгүүлээс Евагийн ихэр дүүгийн зургийг үзсэн. Гайхмаар адилхан юм билээ.
Чи тэгээд миний мэс засал хийсний дараа үлдсэн сорвиор нь Еваг танисан гэв үү?

- Ай даа, чухам тийм.

Уэбстэр доод уруулаа химлэн нилээд удаан бодлогошрон суусны эцэст,

- Би цагдаагийнханд хэлэх хэрэггүй юм шиг байна. Бүгдийг сайн бодож цэгнэх хэрэгтэй
гэсэнд,

- Ингэж шийдсэнд чинь баяртай байна, Кит ээ. Ихэр хоёр их сайн эгч дүүс байгаа юм.
Түүнээс гадна энэ сонингууд бүгдээрээ Жоржийг Александра алсан гэх байрын юм бичээд
байгаа. Тийм байх ёсгүй. Би түүнийг бүүр жаахан охин байхаас нь мэдэх юм...

Даанч энэ үед эмч Уэбстэр түүний үгийг сонсохоо байжээ.

Уэбстэр эмч Харвигаас салаад гүн бодолд дарагдав.

Гоо үзэсгэлэнт Евагийн нүүрэн дээр өчүүхэнч сорви үлдээгээгүйгээ тэрээр баттай мэдэж
байлаа. Гэтэл сорви байхыг эмч Харви үзсэн гэж байна. Ева мэс засал хийлгэснээс хойш
духаа эсгэсэн байж болох юм. Гэтэл тэр худал хэлэхийн хэрэг юу вэ? Учир нь ойлгогдохгүй
байлаа. Уэбстэр үүнийг удаад эргэцүүлэн бодсоор нэгэн дүгнэлтэнд хүрээд давхийн цочив.
“Миний бодол зөв бол бүх амьдрал минь өөр болно”

Маргааш өглөө нь Кит Харвид утасдаж,

- Жон оо, дахин төвөг удаж байгааг минь уучлаарай. Ева Блэкуэлл чам дээр ихэр дүүгийнхээ
тухай ярих гэж очсон гэсэн гэлүү?

- Тийм.

- Дараа нь чам дээр Александра нь очсон уу?

- Тийм. Маргааш нь ирсэн. Чи үүнийг юунд асууж байна вэ?

- Зүгээр л сонирхсон юм. Евагийн юу хүссэнийг хэлэхгүй юү?

- Александра нь санаа сэтгэлээр унаад байсан юм. Ева дүүдээ туслах гэсэн юм билээ. Еваг
Александрын нөхөр алах шахсан. Одоо нөхөр нь үхчихсэн. Үүнийг Александраг хийсэн хэрэг
гэлцэж байгаа...

Уэбстэр өөрийгөө гойд ухаантай хүн биш гэж хэдийнээс мэддэг байжээ. Сургуульд байхдаа
чдаж дунд дүн авахын тулд хамаг хүчээ шавхах хэрэгтэй болдог байсан аж. Нөхөд нь түүнийг
элдвээр шоолон доромжилдог байлаа. Китийг анагаах ухааны коллежд элсэхэд эцэг эх нь
хүртэл гайхаж билээ. Түүнийг мэс засалч болно гэхэд олигтой эмч болно гэж хэнч
бодсонгүй. Тэгтэл Уэбстэр олныг гайхуулсан юм. Кит үнэхээрийн авьяас билэг төгөлдөр тэс
засалч болжээ. Түүнийг чулуу шаврын оронд хүний махан бодиор ид шидийг бүтээдэг суут их
барималчтай адилтгаж болох байлаа. Нэн удахгүй Кит Уэбстэр олны амнаас салахаа болив.
Хэдий тийм амжилт олсон боловч хүүхэд байх үеийнхээ онхиогүй зангаас салсангүй. Нөгөө л
хүн бүхэнд тээр болсон, охидын шоолон инээдэг жаал хөвгүүн хэвээрээ юм шиг санасаар...

Евагийн утасанд арай гэж нэг залгаад Уэбстэрийн сэтгэл догдлосондоо алга нь хөлрөв.
Харилцуурт,

- Рори юу гэх сонсдход,

- Биш ээ. Би Кит Уэбстэр байна гэв.

- Өө... сайн уу? гэх Евагийн дууны өнгө өөр болохыг сонсов.

- Ажил явдал ямар байна даа?

- Маш сайн гэх хүүхний дууны өнгө тэсэж ядсан байдал илт.

- Би чамтай уулзмаар байна...

- Би хүнтэй уулздаггүй. Сонин уншдаг бол миний дүү бүсгүйн нөхөр алагдсаныг мэдэх ёстой
доо. Би гашуудаж байгаа.

Кит хөлөрсөн гараа өмдөндөө арчаад,

- Чухам энэ тухай л чамтай ярих гсэн юм. Надад чиний эрхбиш сонирхох мэдээлэл бий.

- Юун мэдээлэл вэ?

- Энэ бол утсаар ярих асуудал биш гээд... Евагийн сандран бодлогошрон байгааг мэдрэв.

- За тэгвэл хэзээ уулзах юм бэ?

- Чамд боломж байвал одоо...

30 минутын дараа Кит Уэбстэр Евагийн гэрт очсон байлаа.

- Би их ажилтай байна. Чи надтай юу ярих гэсэн юм бэ? гэхэд нь,

- Энэ тухай гэж Кит буруугаа хүлээсэн байдалтай өгүүлээд дугтуйнаас гэрэл зураг гарган
Евад өгөв. Гэрэл зураг дээр Ева өөрөө байлаа.

- Юу юм бэ? гэж Ева гайхан асуув.

- Энэ бол чиний зураг.

- Харж байна. Тэгээд цааш нь гэж товчхон асуусанд,

- Энэ зургийг мэс засалын дараа, чиний боотлыг авсны дараа авсан юм.

- Тэгээд?

- Чиний духан дээр ямарч сорви алга байна.

Хүүхний царай хувьсхийхийг Уэбстэр ажиглаж амжлаа.

- Суугаач, Кит ээ.

Уэбстэр буйдангийн ирмэг дээр сандайлаад Евагаас нүд салгалгүй ширтэн байлаа. Кит энэ
насандаа олон хөөрхөн хүүхэнтэй дайралдаж байсан боловч Евагийн гоо үзэсгэлэн түүнийг
бүр илбэдэж орхижээ.

- Ямар учиртайг яриад аль.

Уэбстэр Харюитай хэрхэн уулзсанаа, учир битүүлэг сорвины тухай ярьж эхлэв. Евагийн
царай ажиггүй тайван байлаа. Китийг ярьж дуусахад,

- Чиний юу ярьж байгааг ойлгохгүй байна. Чи цагийг минь дэмий үрж байна. Сорвины
тухайд гэвэл гэм зэмгүй тоглоом байсан юм. Энэ тун амархан. За гүйцлээ. Би ажилтай байна
гэв.

Кит байрнаасаа ч хөдөлсөнгүй.

- Уучлаарай чамд төвөг удсаныг минь. Би цагдаагийнхан дээр очихын өмнө чамтай ярих нь
зүйтэй юм уу гэж бодсон хэрэг.

Евагийн бие хөшиж орхив.

- Чи цагдаа дээр очиж яах юм бэ?

- Чамайг Жорж Меллис зодсон гэдгийг тэдэнд ярих ёстой. Бас энэ сорвины талаар. Энэ чамд
ямар хэрэгтэй байсныг мэдэхгүй. Чи цагдаагийнханд хамаг учрыг хэлнэ биз.

Гэнэт Ева айж эхлэв. Энэ ангайсан тэнэг чухам юу болсныг мэдэхгүй. Гэсэнч цагдаагийнхан
үүнийг байцааж эхлэхэд хүрэлцэхүйц юм мэдэж байгаа юм байна.

Жорж Меллис Евагийнд олон ирдэг байсан. Цагдаа нар түүнийг энд харсан гэрч нарыг олно.
Жоржийг алсан тэр шөнө Ева Вашингтонд байсан гэж худал хэлсэн. Евад хэрэгт
холбогдолгүйн баталгаа байхгүй. Ерөөсөө ийм юм болно гэж бодсонгүй. Еваг Жорж алах
шахсаныг цагдаагийнхан мэдэх юм бол тэд Евад өшөөгөө авах шалтгаан байсныг ойлгох
болно. Тэгээд бүх юм илэрнэ. Энэ эмчийг цагдаагийнхантай яриулж болохгүй.
- Чамд юу хэрэгтэй вэ? Мөнгө үү?

- Үгүй гэж Кит зэвүүцэв.

- Тэгээд юу хэрэгтэй юм бэ?

Китийн нүүр нь халуу оргиж байгааг мэдрэн нүдээ буулгав.

- Чи надад их таалагддаг юм аа, Ева. Чамд элдэв эвгүй юм битгий тохиолдоосой гэж хүсэх
юм гэхэд нь Ева инээмсэглэх байдал үзүүлж,

- Надад ямар нэг эвгүй юм тохиолдохгүй, Кит ээ. Би ямарч муу юм хийгээгүй шүү дээ. Энэ
бүхэн Меллисийн алагдсан хэрэгт өчүүхэн ч холбогдолгүй гэж Ева хэлээд Китийн гараас
барьж,

- Хэрэв чи энэ бүхнийг мартаж орхивол чамд маш их баярлах байна. За юу? гэхэд нь Кит
гарыг нь алгаараа дараад,

- Би дуртайяа мартаж орхихсон. Даанч бямба гаригт намайг дуудаж байцаана. Бүгдийг ярих
нь миний журамт үүрэг гэсэнд хүүхний нүдэнд сэтгэлийн түгшүүр илэрч,

- Чи тэгэх ёсгүй гэв.

Кит Уэбстэр хүүхний гарыг илж,

- Харамсалтай нь ярих л ёстой. Үүнийг саатуулж болох ганц л арга бий гэж ичингүйрэн
өгүүлэв.

- Юу юм бэ?

- Эр нөхөр нь эхнэрийнхээ эсрэг өчиг мэдүүлэхийг хуулиар хориглодог юм шүү дээ.

35-р бүлэг

Кит Уэбстэрийг байцаах ёстой өдрөөс хоёр хоногийн өмнө тэр хоёр гэрлэв. Ямар нэгэн ёслол
хийсэнгүй. Зүгээр л шүүгчид бүртгүүлээд өнгөрчээ. Кит Уэбстэртэй ханилан сууна гэж
бодохоос Евагийн дотор муухай болж байлаа. Гэвч яг одоохондоо үүнээс өөр арга зам
байсангүй. “Энэ ангайсан тэнэг юм намайг насаараа өөртэй нь ханилна гэж бодож байгаа
байх. Үүнийг өчиг мэдүүлэг өгсний дараа гэрлэлтээ цуцлуулна” гэж Ева бодож байв.

Ник Паппас толгойгоо эргэтэл бодов. Жорж Меллисийг хэн алсныг лавтай мэдэж байх шиг
санагдах боловч ямар нэг нотолгоо байсангүй. Блэкуэллийнхний гэрийнхэнийг хүрээлсэн
дуугүй байхын хэрмийг нэвтэлж чадахгүй байлаа. Ник Паппас энэ асуудлыг өөрийн дарга,
хашир туршлагатай цагдаа, ахмад Гарольд Коэнтэй шүүн ярилцав.

Коэн дэслэгчийн яриаг тайван сонсоод,

- Чамд өчүүхэн ч нотолгоо алга. Шүүхийнхэн чамайг олны элэг доог болгоно гэхэд нь,

- Бүү мэд дээ. Ямар ч гэсэн миний зөв гэдгийг мэдэж байна... гээд хэсэг бодолхийлснээ

- Намайг Кэйт Блэкуэллтэй уулзаж ярья гэвэл та дургүйцэхгүй биз?

- Юу? Яах юм бэ?

- Нэг юм мэдээд авч чадах юу магад. Тэр бол өрхийн тэргүүн. Тэр эмгэнд өөрөө ч сайн
мэдээгүй мэдээлэл байж болох юм.

- Болгоомжтой байгаарай.

- Тэгнэ л дээ.

- Бас битгий их шавдуулаарай, Ник ээ. Тэр чинь нас сүүдэр дээр гарсан хүн шүү.

- Чухам үүнд л найдаж байна гэж Ник хэллээ.

Дэслэгч Ник Кэйттэй ажлын тасалгаанд нь уулзлаа. Кэйтийг харахад яасан ч 80 хүрсэн
гэмээргүй. Зүй нь сэтгэл их түгшсэн баймаар атал царай нь ажиггүй тайван байлаа.
Блэкуэллийнхний тухай сонинд бичихэд Кэйтийн дургүй байдгийг Паппас мэднэ.

- Дэслэгч таныг надтай маш чухал зүйл ярих гэж байна гэж миний гарын туслах хэлсэн.

- Тийм ээ, хатагтай. Маргааш шүүхийн тусгай байцаагч дээр Жорж Меллисийн амь алдсан
тухай зөвлөлгөөн болох юм. Энэ хүн амины хэрэгт танай ач охиныг холбогдсон гэж бодох
үндэслэл надад байна гэхэд нь Кэйт нуруугаа цэхлээд,

- Би үүнд итгэхгүй гэв.

- Миссис Блэкуэлл та, миний үгийг анхааралтай сонсоно уу. Цагдаагийн мөрдөн байцаалт
бүр гэмт хэргийн сэдлэг шалтгааныг эрэхээс эхлэдэг. Жорж Меллис бол хүнийг тарчлаан
зовоох донтой, тэгээд таны хөрөнгө зөөрийн хойноос хөөцөлдөж явсан хүн юм... Танай ач
охинтой гэрлээд их баян болсон. Танай ач охиныг үргэлж зодож жанчдаг байсан байж болох
юм. Тэгээд ач охин чинь түүнийг салья гэхлээр Жорж Меллис татгалздаг байж. Ач охин тань
түүнийг алахаас өөр замгүй болсон байна гэж дэслэгч яриад Кэйтийн царай хувхай цагаан
болохыг ажиглан, яриагаа үргэлжлүүлэн,

- Би өөрийн энэ онолын нотолгоог эрж эхлэлээ. Жорж Меллис үхэхийнхээ өмнө “Хушийн
төгөл” өргөөнд очсоныг бид мэднэ. Дарк Харборт эх газраас гаталгаа онгоцоор юм уу, эсвэл
нисэх онгоцоор очиж болно. Гэтэл тэр өдөр Жорж Меллис тээврийн энэ хоёр хэрэгслийн
алийг нь ч хэрэглээгүй гэж нутгийн цагдаагийн дарга нотолж байв. Би ид шидэнд итгэдэггүй.
Жорж Меллис усан дээгүүр явган явж чадах хүн биш. Далайн хөвөө орчмоос завь хөлсөлж
авсан байх нэг зам үлдлээ. Би завийн бүх буудлыг тойрч шалгаад Гилки Харборт аз таарав.
Жорж Меллисийн алагдсан тэр өдрийн 16 цагт нэгэн залуу хүүхэн моторт завь хөлсөлж аваад
найз хархүү нь сүүлд ирж авах юм гэж хэлсэн байна. Тэр эмэгтэй хөлсийг нь бэлэн мөнгөөр
төлөөд, тасалбар дээр нь нэрээ үлдээжээ. Тэрээр нэрээ Соланж Дюна гэсэн байна. Та энэ
нэрийг санаж байна уу?

- Санаж байна. Миний хоёр ач охиныг багад нь асарч байсан хүмүүжүүлэгч хүүхний нэр.
Хэдэн жилийн өмнө Францдаа буцаж очсон шиг санагдаж байна.

Паппас сэтгэл ханамжтай толгой дохиод,

- Зэргэлдээ завийн буудлаас мөн тэр хүүхэн өөр нэгэн завь хөлсөлж аваад 3 цагийн дараа
буцааж өгсөн байна. Тасалбар дээр нь мөн л Соланж Дюна гэж гарын үсэг зурсан байна. Би
завийн буудлын эздэд Александрын зургийг үзүүлэхэд, тэд завь хөлслөгч хүүхэн мөн байна
гэж түүнийг танисан. Харин хар үстэй байсан гэнэ.

- Тэгэхлээр...

- Хиймэл үс өмссөн байж.

- Александраг эр нөхрөө алсан гэж үнэмшихгүй хэмээн Кэйт хоолойгоо зангируулан өгүүлэв.

- Би ч үнэмшихгүй байна, миссис Блэкуэлл ээ. Энэ хүн амины хэргийг түүнийг ихэр эгч Ева
үйлджээ гэж дэслэгч хариулав.

Кэйтийн бие хөшиж орхив. Дэслэгч үргэлжлүүлэн,

- Александра хүн амины хэрэг хийх боломжгүй байсан. Хүн амины хэрэг гарсан өдөр түүний
юу юу хийж байсныг би нарийн нягт шалгалаа. Өдрийн ихэнх хэсгийг найз хүүхэнтэйгээ
Нью Йоркт өнгөрүүлээд дараа нь арал дээр нисэж очсон очсон байна. Александрад хоёр завь
хөлсөлж авах цаг байгаагүй... гээд хөмсөг зангидаж,

- Тэгэхлээр Соланж Дюна гэдэг нэр зээлдсэн Александрын ихрийн өрөөсөн үлдэж байна.
Энэ нь Ева л байж болох юм. Би хэргийн сэдлэг шалтгааныг эрлээ. Меллисийн зургыг
Евагийн суудаг байшингийн хүмүүст үзүүлэхэд хөршүүд нь Меллис Евагийнд олон очдог
байсныг тодорхой нотлов. Тэр бүү хэл Жорж Меллис нэгэн удаа Евагийнд очоод түүнийг
ухаан алдтал зодож занчсан гэж байшингийн даамал хэлсэн. Ева үхэх шахсан байна. Та энэ
тухай юу мэдэх вэ?

- Би юу ч мэдээгүй гэж Кэйт шивэгнэв.

- Меллисийн тэгдэг нь гэм биш зан байгаа юм. Ингэхлээр Евад сэдлэг шалтгаан байсан
байна. Өшөөгөө авах гэж... Ева түүнийг Дарк Харборт хууран аваачиж, тэнд түүнийг алсан
байна гээд Паппас кэйтийн өөдөөс харж гэмших сэтгэл төрөв. Тэгээд үргэлжлүүлэн,

- Ева тэр өдөр Вашингтонд байсан гэж мэдүүлж байгаа. Нисэх буудалд хүргэж өгсөн хөлсний
машины жолоочид өөрийгөө нүдэлж аваг гэж 100 доллар өгч, дараа нь онгоцноос хожимдлоо
гэж хашгичин сүйд болжээ. Гэвч түүнийг үнэхээр Вашингтон очсон гэдэг баталгаа алга. Ева
хиймэл үс углаад Мэнд хувийн нисэх онгоцоор очиж, тэндээс хоёр завь хөлсөлж авсан. Ева
Меллисийг алж, цогцсыг нь хашлага давуулан хаяад яхта онгоцыг зогсоолд нь аваачиж завийг
чирэн буудалд аваачихад буудал хэдийн хаагдсан байсан байна гэв.

Кэйт дэслэгчийн өөдөөс харж хэсэг суугаад эцэст нь,

- Миний ойлгож байгаагаар энэ бүгд шууд биш нотолгоо байна гэхэд дэслэгч шийдвэрлэх мөч
тулсаныг мэдэж,

- Тийм. Тусгай байцаагчийн хийж байгаа мөрдөн байцаалтанд биеийн тодорхой нотолгоо
хэрэгтэй байдаг. Миссис Блэкуэлл та ач охиноо бусдаас илүү сайн мэднэ. Таны ярих зүйл
маш их тус болж болох юм гэхэд нь Кэйт хэсэг бодолхийлснээ,

- Нөхцөл байдлаас шалтгаалал танд зарим нэгэн мэдээлэл өгч болох байна гэхэд нь Ник
Паппасийн зүрхний цохилт олшроод ирлээ. Хүчин чармайлт нь амжилт олох төлөвтэй.
Эмгэн одоо бүгдийг ярих биз. Дэслэгч урагшаа тонгойн,

- Юу вэ, миссис Блэкуэлл ээ гэсэнд,

- Жорж Меллисийн алагдсан тэр өдөр миний ач охин Ева бид хоёр Вашингтонд хамт байсан
юм шүү хэмээн Кэйт яаралгүй тов тодхон хэлэв.

Дэслэгчийн царай барсхийгээд явчихыг Кэйт ажиглав. “Тэнэг амьтан. Чи намайг чамд
Блэкуэллийнхний нэрийг гутаан доромжлох боломж олгоно гэж горьдов уу. Манай
гэрийнхнийг сонин хэвлэлийнхэн элдэв муухайгаар хэлэхийг зөвшөөрнө гэж бодоо юу. Үгүй
дээ. Еваг зөвхөн би өөрөө цээрлүүлэн шийтгэнэ” хэмээн Кэйт бодлоо.

... Хүн амины хэрэг мөрдөн байцаах тусгай төлөөлөгч “Жорж Меллис нэг буюу хэд хэдэн үл
мэдэгдэх этгээдийн гарт амь үрэгдсэн байна” гэсэн дүгнэлт хийжээ.

Шүүхээр хэргийг сонсон хэлэлцэхэд Питэр Темплтон очсоныг Александра хараад гайхан
таашаав.
- Таны санаа сэтгэлийн дэмжлэг болох гэсэн юм хэмээн Питэр түүнд хэлжээ.

Александра хэдийгээр биеэ сайн эзэмдэж байсан ч тун амаргүй байгаа нь ил. Завсарлагаагаар
Питэр түүнийг “Лобстэр Паундид” хоол идье гэж урив.

- Энэ бүх явдал дууссаны дараа та нэг тийшээ явбал зүгээр гэж Питэр хэлэхэд,

- Тийм ээ, Ева намайг хамт явья гэсэн гээд Александрын нүдэнд гуниг харамсал илэрч

- Жоржийг үхсэн гэж одоо болтол итгэхгүй юм. Үхсэн гэж мэдсэн мөртлөө нэг л үнэн
бодитой биш шиг санагдаад... гэхэд нь,

- Энэ бол таны ухамсарын биеэ хамгаалах хариу үйлдэл гэв.

- Даанч утгагүй хачин юм боллоо. Тэрээр гайхалтай сайн хүн байсан... гээд Питэрийн өөдөөс
харж,

- Та түүнтэй их ярьсан. Нээрээ гайхалтай хүн биз, тийм үү? гэхэд

- Тийм дээ, нээрээ гэж Питэр алгуурхан өгүүлэв.

...

- Гэрлэлтээ цуцлуулья, Кит ээ хэмээн Евагийн хэлэхэд Уэбстэр гайхан анивчиж,

- Яагаад тэр билээ гэж эхнэрээсээ асуув.

- Одоо боллоо, Кит. Чи намайг насаараа чиний хажууд байна гэж бодоо юу?

- Тэгэлгүй яах вэ. Чи миний эхнэр шүү дээ.

- Чамд юу хэрэгтэй вэ? Блэкуэллийнхний мөнгө үү?

- Надад мөнгөний хэрэг байхгүй, хонгор минь. Миний орлого их, чиний юу хүссэнийг би
аваад өгч чадна.

- Гэрлэлтээ цуцлууна гэж чамд хэлээд байна шүү гэхэд нь Кит харамсан толгой сэгсэрч,

- Би зөвшөөрөхгүй л гэх байна гэв.

- Тэгвэл би салах өргөдөлөө өгнө.

- Чиний зүгээс тун болгоомжгүй юм болно. Александрын нөхрийн амийг бүрэлгэсэн

этгээдийг цагдаагийнхан олж чадаагүй, хэрэг нээлттэй хэвээрээ байгаа. Хүн амины хэрэг
дээр хэрэг хуучирна гэж байдаггүй юм шүү дээ, хонгор минь. Хэрэв чамайг надаас салах юм
бол би арга буюу... гээд гайхаш тасарсан байдалтай гараа дэлгэв.

- Чиний ярьж байгаагаар бол би түүнийг алсан болж байна.

- Чи түүнийг алсан шүү дээ, Ева

- Чи яаж мэдсэн юм бэ? гэж Ева тоомсоргүй өгүүлэв.

- Энэ бол чиний надтай суусны цорын ганц шалтгаан гэсэнд Евагийн нүдэнд үзэн ядахын оч
гялалзаж,

- Муу зулбасга. Энэ чамд ямар хэрэгтэй юм вэ? гэхэд нь,

- Би чамд хайртай юм аа гэж Кит гунигтайхан инээмсэглэв.

Ева Александратай хамт явахыгаа хойшлуулахад хүрэв. Энэ бол китийн санаа байлаа.

- Барбадост очиж бал сараа тэнд өнгөрүүлье.

- Би хаашаа ч явахгүй гэж Ева эрс шийдэмгий хэллээ. Киттэй хамт нэг сар болно гэхэд
Евагийн дотор муухай болж байлаа.

- Хэрэв бид хуримын аялалаар явахгүй бол хачин юм болно шүү дээ. Хүмүүс илүү дутуу юм
асууж шалгаана. Бидэнд энэ ямар хэрэгтэй билээ дээ.

Александра долоо хоногт нэг удаа Питэр Темплтонтой уулзах болов. Анх Жоржийн тухай
ярих гэж уулздаг байснаа хэдэн сарын дараа зүгээр түүнтэй хамт цагийг өнгөрүүлэх нь
таатай сайхан байх болжээ. Питэрийг итгэж болох хүн байна хэмээн таньж, чухам ийм
хүнээр дутаж байснаа мэдрэв. Питэр бол эмэгтэй хүний санаа сэтгэлийг мэддэг ухаалаг,
эелдэг найртай хүн. Александра түүний ярьсан,

- Би дадлагын эмч байхдаа өвлийн шөнө анхны дуудлаганд явах боллоо. Миний өвчтөн
үргэлж ханиалгадаг өвгөн байлаа. Би цээжийг нь чагнах хэрэгтэй байлаа. Чагнуур цэв
хүйтэн. Чагнуураа халаагуур дээр тавьчихаад тэр хооронд хоолойг нь үзэв. Дараа нь
чагнуураа аваад өвгөний цээжин дээр тавьчихсан чинь булзлуулсан муур шиг ухасхийн
өндийлөө. Ханиалгах нь зүгээр болж, түлэгдсэнийг нь 2 долоо хоног эмчлэх хэрэг гарч билээ
гэхэд нь Александра тас тас хөхрөв. Олон сарын дараа хүүхний инээхийг Питэр анх сонсч
байгаа нь энэ байлаа.

- Дараа долоо хоногт уулзах уу? гэж Питэр асуухад

- Болно л доо, тэгье гэж Александра инээмсэглэлээ.

... Бал сар нь Евагийн санаж байсан шиг тийм ч муу болсонгүй. Китийн арьс нь эмзэг учир
наранд удаан байж чадахгүй. Ева бол хаялган дээр өдөр бүр очдог байлаа. Ганцаараа байх гэж
ер үгүй. Түүнийг адал явдалд дуртай хүмүүс бөөн бөөнөөрөө шавна. Ева өдөр бүр нэг шинэ
эр сонгож авдаг байлаа. Эр нөхөр нь өрөөндөө хүлээж байгаа гэж мэдэх болохоор эр эмийн
явдал нь давхар тааламжтай байх болжээ. Кит Уэбстэр эхнэрийнхээ хүссэн болгоныг нэн
даруй биелүүлдэг байлаа. Ева түүнийг дайран доромжилж, уурыг нь хүргэхийг оролдож
үзсэн боловч Китийн хайр дурлал хязгааргүй их байлаа. Түүнтэй хавьтана гэхээс Евагийн
хамаг бие агзас хийдэг боловч золоор Китийн эрийн тэнхээ даруухан, ойртох нь цөөн.

“Намайг аргагүй л нас дарж байна даа” гэж Кэйт бодов. Крюгер Брэнт компанид хатуу гар
хэрэгтэй байлаа. Компанийг судсаар нь Блэкуэллийн цус урсаж байгаа хүн толгойлох ёстой.
“Намайг явахаар юу болдог бол? Би энэ компанийн төлөө хамаг байдгаа зориулсан. Юуны
тулд вэ? Хар элэгийн хүмүүсийн гар оруулар гэж үү? Ээ чөтгөр алгад, яасан ч тиймд хүргэж
болохгүй”

Бал сарын дараа Кит эхнэртээ,

- Би удахгүй ажилдаа орох хэрэгтэй байна. Олон мэс засал төлөвлөсөн байгаа. Чи намайг
байхгүйд ганцаардах болов уу? гэсэнд Ева царайдаа төлөв төвшин байдал үзүүлэх гэж
хичээж,

- Ганцаардахгүйг хичээе гэжээ.

Кит өглөө эрт ажилдаа яваад өгнө. Еваг сэрэхэд гал тогооны өрөөнд өглөөний хоол бэлэн
байдаг байлаа. Кит Евагийн нэр дээр банкинд данс нээгээд байнга мөнгө нэмж оруулдаг
байв. Ева мөнгийн баруун солгойгүй үрэн таран хийнэ. Кит ийм янзаар Евагийн хүслийг
хангадагтаа баяртай байжээ. Ева өөрийн нууц амраг Рорид үнэт эрдэнэсийн зүйл авч
бэлэглэнэ. Үүнээс гадна тэр нь ажил хийдэггүй, Евагаар тэжээлгэдэг байлаа.

- Би аль дайралдсан рольдоо тоглож болохгүй. Миний нэр алдарт хортой гэж Рори Евад
хэлдэг байв.

- Би ойлгож байна, хонгор минь.

- Чи шоу бизнесийн тухай юу мэддэг юм бэ? Чи чинь алт атгаж төрсөн хүн.

Ева түүнд ая тал засах гэж үнэтэй бэлэг авч өгдөг байв. Ева байрны нь хөлсийг төлнө, хувцас
хунар авч өгнө, театр киноны нэрд гарсан найруулагч нартай уулзуулах үнэ ихтэй зоогийн
газар дагуулж очно. Ева Рорийн дэргэд 24 цаг хамт байхыг хүсэх боловч эр нөхөртэй
болохоороо оройд болгон аргагүй гэртээ ирдэг. Кит энэ үед гал тогооны өрөөнд Евагийн
дуртай хоолыг хийж байна. Еваг хаачаад ирэв гэж хэзээ ч асуухгүй.

Дараа жил нь Александра Питэр хоёр урьдынхаасаа олон уулзах болжээ. Ингэж уулзах нь хэн
хэнд нь хэрэгтэй. Питэр Александратай хамт эцгийн нь хэвтэж буй эмнэлэгт очиж, зовлонг
нь хуваалцана.

Питэр нэг удаа Александраг авах гэж очоод Кэйттэй танилцжээ.

- Та эмч юм уу? Би энэ насандаа арван хэдэн эмч оршуулаад өөрөө амьд мэнд байж байна. Та
анагаах ухааны талын бага сага ч болтугай юм мэдэх үү? гэхэд нь,

- Жаахан юм мэднэ, миссис Блэкуэлл ээ гэв.

- Та аль нэг корпорацид ажилладаг уу?

- Үгүй.

- Ээ чөигөр алгад. Та юу ч чаддаггүй хүн байна. Танд санхүүгийн асуудлаар сайн зөвлөх
хэрэгтэй. Би таныг өөрийн санхүүгийн мэргэжилтэнтэй уулзуулж өгье. Юуны өмнө тэр хүн...

- Баярлалаа, миссис Блэкуэлл. Миний ажил тэртэй тэргүй урагштай байгаа.

- Манай нөхөр бас зөрүүд хүн байсан юм... гээд Кэйт Александра руу эргэж,

- Тэгж байгаад энэ хүнийг оройн хоолонд уриарай. Би энэ хүнтэй яримаар байна гэжээ.

Хоёул гадагшаа гарсан хойно,

- Эмээ чинь намайг үзэн ядаж байх шиг гэж Питэрийн хэлэхэд Александра тас тас инээж,

- Чи эмээгийн санаанд яг таалагдлаа. Үзэн яддаг хүнтэйгээ ярьж байхыг нь чи сонссон

болоосой гэв.

- Намайг чамтай суух зөвшөөрөл гуйхад эмээ чинь юу гэх бол? гэсэнд Александрын царай
туяарч,

- Эмээ бид хоёр их баярлана, Питэр ээ гэжээ.

Александра Питэр хоёрын дотнын харилцааг Кэйт сонирхон ажиглаж байлаа. Залуу эмч
сэтгэлд нь таалагдаж, ач охинд нь сайн нөхөр болно гэж бодох болов. Гэхдээ сэтгэлийн угт
зарим нэг эргэлзээ төрдөг байлаа. Одоо задгай зуухны дэргэд сууж, хоёр залууг харж байгаад,

- Би Александрагаа Крюгер Брэнтийг удирдаж чадах хүнтэй суулгах гэж хүлээдгээ танд хэлэх
хэрэгтэй байна гэж худал хэлсэнд,

- Би ажил төрлийн санал тавих гэж ирээгүй шүү дээ, миссис Блэкуэлл. Александра бид хоёр
ханилан суух гэж байна... гэхэд нь Кэйт эмчийн энэ үгийг сонсоогүй юм шиг үргэлжлүүлэн,

- Нөгөө талаар та сэтгэхүйн шинжээч хүн юм байна. Та хүний ухаан санааг таньж чадна. Та
гарамгай бизнесмэн болж чадна. Таныг манай компанид ажиллуулмаар байна. Би... гэсэнд,

- Үгүй. Би бизнес сонирхдоггүй гэж Питэр бат хатуу өгүүлэв.

- Та бид хоёр гудамжны буланд байдаг мухлагийн тухай яриагүй байна. Та манай ам бүлийн
гишүүн болно. Надад энэ ажлыг удирдах хүн хэрэгтэй... гэж Кэйт ширүүхэн хэлэв.

- Уучлаарай. Би танай компанийг огт сонирхдоггүй. Та өөр хүн олох хэрэгтэй болж дээ...
гэхэд нь Кэйт Александра руу эргэж,

- Энэ тухай чи юу бодож байна вэ? гэв.

- Хамгийн гол нь Питэр надтай суугаад аз жаргалтай байвал болоо,

- Ачийг үл мэдэх амьтан. Та хоёр хоёулаа өр зузаан аминчхан улс байна гэж Кэйт санаа
алдаад,

- За яах вэ. Та нар хэзээ нэгэн цагт бодлоо өөрчлөх ч юу магад... Ингэхэд та хоёр хүүхэдтэй
болохыг хүсдэг үү? гэж гэмгүй царайлан асуусанд Питэр инээд алдаад,

- Энэ бол бидний хэрэг. Миний бодоход миссис Блэкуэлл та хүмүүсийг их чадамгай удирдан
чиглүүлж чаддаг юм байна. Александра бид хоёр бол өөрснөө бие дааж амьдрахыг хүснэ.
Хэрэв үр хүүхэдтэй болбол тэд нар маань биднийх байх болно гэхэд нь Кэйт аятайхан
инээглэж,

- Би бусдын амьдралд хажуунаас оролцохгүй байхыг амьдралын журам болгосон хүн шүү,
Питэр ээ гэжээ.

Александра Питэр хоёр хуримын аялалаар яваад ирснээс хойш хоёр сарын дараа Александра
жирэмсэлжээ. Кэйт энэ тухай сонсоод ихэд баярлан, “Маш сайн байна. Александрагаас хүү
төрнө” гэж бодов.

...Ева орондоо хэвтэж байхдаа халуун усны өрөөнөөс Рорийг чармай нүцгэн гарч ирэхийг
харав. Рори залуу сайхан бие цогцостой. Түүнтэй үүл борооны хэрэг үүсгэх бахтай сайхан
байдаг. Ева бас л сэтгэл дундуурхан байна. Рориг өөр хүүхэнтэй явдаг болов уу гэж сэжиглэх
боловч уурлуулах вий гээд асуухаас айна. Хархүү орон дээр сууж, Евагийн хацрыг хуруугаараа
илээд,

- Хүүхээ, чиний нүүрэнд үрчлээ сууж байна. Чамд их зохиж байна шүү гэв.

Энэ үг Еваг хутгалаад авснаас өөрцгүй санагдав. Тэр хоёр дахин үүл борооны явдал хийж
байхад, Евагийн бодол тэртээ хол байлаа. Ева тэндээс гарч гэртээ харихад 9 болж байлаа.
Кит гал тогооны өрөөнд хоол хийж байв. Кит эхнэрийнхээ хацар дээр үнсээд,

- Оройн мэнд, хонгор минь. Би чиний дуртай хоолыг хийсэн. Өнөөдөр... гэсэнд,

- Кит ээ, энэ үрчлээг арилгах хэрэгтэй байна гэхэд нь Кит нүдээ анивчиж,

- Юун үрчлээ вэ?

- Энэ гээд Ева нүднийхээ буланг заав.

- Энэ тун жаахан юм бас чамд их зохидог юм. Би их дуртай.

- Үгүй, би үзэн ядаж байна гэж Ева хашгирлаа.

- Надад итгээрэй, Ева.

- Тэнгэрийг бодож, энэ үрчлээг арилгаад өгөөч. Энэ чинь чиний ажил шүү дээ.

- За яах вэ... Чамайг баярлуулах гэж тэгдэг юм уу даа хэмээн Кит эвлэрэнгүй өгүүлэв.
- Хэзээ вэ?

- Сар хагасын дараа болох уу? Одоо надад өвчтөн олон байгаа.

- Чиний тэр өвчтөнүүд чинь яамай байна. Би чиний эхнэр. Маргааш энэ үрчлээг арилгаад
аль.

- Бямба гаригт эмнэлэг хаалттай байдаг.

- Онгойлгохгүй юу, чи.

“Яадаг мал вэ” гэж Ева бодлоо. Энэ хөөтэй үрчлээнээс даруй салах хэрэгтэй байхад чинь.

- Зэргэлдээ өрөөнд ор гэж Кит хэлээд Еваг ажлынхаа өрөөнд аваачив.

Зөөлөн сандалд суулгаад Евагийн нүүр дээр гэрэл тусган анхааралтай харж эхлэлээ. Өчүүхэн
буурай амьтан байснаа агшин зуур аугаа их мэс засалч болон хувирч, ийм эрс ялгаатай
болсныг Ева даруй мэдрэв. Эрэмдэг болсон нүүрийг нь хэрхэн ид шидээр зассаныг саналаа.
Энэ үрчлээ арилгах мэс засал Китэд утгагүй балай юм шиг санагдаж байгаа. тийм биш. Ева
Рорийг алдах бий гэж энэ дэлхий дээр хамгийн их айж байв.

Кит гэрэл унтраагаад,

- Зовлон байхгүй. Өглөө бүгдийг хийнэ гэж батлан хэлэв.

Маргааш өглөө нь хоёул эмнэлэгт хамт очлоо.

- Уг нь надад сувилагч тусалдаг юм. Энэ бол төвөггүй мэс засал. Би өөрөө хийчихнэ гэж Кит
Евад хэлэв.

- Далимд нь энэ арьсийг татчихаарай гэж Ева хүзүүгээ заав.

- Чи хүсээд байгаа бол яах вэ дээ, хонгор минь. Одоо би чамд тариа хийнэ. Чи унтаад
өвдөхийг огт мэдэхгүй.

Китийн тариа хийхдээ хичнээн сурамгайг Ева харав. Ева өвдөхөөс айсангүй. Үүнийг Рорийн
төлөө хийж байгаа юм. Түүний чийрэг сайхан бие хаа, тачаангуй хүслийн гал гялалзсан
нүдийг саналаа.

Ева унтаад өгөв. Сэрэхэд эмнэлгийн орон дээр хэвтэж байлаа. Хажууд нь Кит зогсож байв.

- Ямар болсон бэ гэж Еваг нойрмог дуугаар асуухад,

- Маш сайн болсон гэж Кит инээмсэглэв.

Ева толгой дохиод дахин унтлаа. Сэрэхэд Кит орны нь дэргэд суусаар байв.
- Боолтыг хэд хоног авч болохгүй. Эдгэтэл нь эмнэлэгч байж бай.

- За тэгье.

- Кит өдөр болгон ирж нүүрийг нь үзээд толгой дохин,

- Маш сайн байна гэнэ.

- Би хэдийд өөрийгөө толинд харж болох юм бэ?

- Баасан гаригт.

Ева тасагтаа утас тавь гэж тушаав. Юуны өмнө Рорид утасдлаа.

- Хүүе хүүхээ, чи хаашаа алга болчихов оо? Би чамайг хүсээд байна гэж Рориг өгүүлэхэд,

- Би ч адилхан чамайг санаж байна, хонгор минь. Би Флоридад эмнэлэгийн бага хуралд
саатах болж байна. Дараа долоо хоногт эргэж очно.

- Бушуухан ирээрэй.

- Чи намайг санаж байна уу?

- Ухаангүй.

Харилцуурт өөр хүний шивэгнэх дуу Евад сонсдов.

- Чамтай хэн байгаа юм бэ?

- За энд нэг жаахан наргиан болж байна. Би одоо явах боллоо гэж Рори даажигнах байдалтай
өгүүлээд харилцуурт утас тасарсан дохио сонсдов.

Ева хэсэг зуур бодлогошроод, дараа нь Александрад утасдаж, түүнийг жирэмсэлснээ бахдан
ярихыг уйтгарлан сонсож байгаад,

- Нагац эгч болох цагийг тэсэж ядан хүлээж байна гэв.

Ева эмээтэйгээ уулзах нь цөөн. Эмээ нь хүйтэн хөндий хандах болсны учрыг Ева ер
ойлгохгүй гайхаж байв. “Гайгүй ээ. Дараа дахиад миний өмнө мөлхөх болно” гэж Ева бодлоо.
Кэйт Китийн тухай ер асуудаггүй. Асуусангүй гэж Ева гомдоггүй. Ева Роритой ярьж байгаад
нөхрөөсөө салахад туслуулж болох магадгүй. Тэгвэл Рориг өөтэйгөө үүрд холбож авна. Ева
Китийг өдөр бүр араар нь тавьж байхад Кит юу ч мэддэггүй нь гайхалтай. Бас нэг жаахан
авьяастай нь яамай даа. Боолтыг нь баасан гаригт авна гэсэн, тэгэхээр шууд Рори дээр очно.

Баасан гаригт Ева өглөө эрт сэрээд Китийн ирэхийг тэсэж ядан хүлээв.

- Үд болох гэж байна. Чи хаашаа алаг болчихдог юм бэ? гэж Еваг гомдон өгүүлэхэд,
- Уучлаарай хонгор минь. Өнөөдөр хоёр мэс засал хийгээд...

- Чиний тэр мэс засал яамай байна. Бушуухан энэ боолт аваад аль. Би өөрийгөө хармаар
байна.

Боолтыг нь туйлын болгоомжтой авахад Ева номхон сууж байв. Кит гэдэргээ нэг алхаж,
царайг нь шинжин ажиглаад,

- Маш сайн байна гэв.

- Толь аваад ир.

Кит зэргэлдээ өрөөнд яаран орж, тэндээс жижиг толь авчирав. Тэгээд омог бардам
инээмсэглэж Евад өгөв. Ева толийг нүүрэндээ алгуурхан ойртуулснаа дуу алдан хашгирлаа...
36-р бүлэг

Кейтэд цагийн хүрд улам улам хурдан эргэлдээд байх шиг санагдах болжээ. Өвлийн дараа нь
хавар, хаврын дараа зун, зуны дараа намар залгаж, дараа нь бүгдээрээ нийлэн жилийн болно.
Кейтийн нас 80 хол гарчээ. Заримдаа өөрийн насыг мартаж орхино. Нүүр нь хөгширч
үрчийжээ. Кэйт гадаад төрх байдалдаа их анхаарал тавьж, нүүрнийхээ үрчлээг арилгахыг
хичээнэ. Өөрийгөө толинд харахад ихэмсэг намба төрхтэй, эрэмгий маягийн царайтай авгай
харагддаг байлаа.

Кэйт өдөр болгон ажилдаа очдог хэвээрээ. Энэ бол чухамдаа хохимой толгойтыг хуурах гэсэн
заль мэх төдий байв. Кэйт захиралуудын зөвлөлийн бүх хуралд суудаг боловч юун тухай ярьж
байгааг арай ядаг ойлгоно. Бүгдээрээ хэтэрхий түргэн яриад байх шиг санагдана. Их
мартамхай болсондоо хамгийн их санаа зовж байлаа. Түүний ертөнцийн хүрээ хязгаар
аажмаар явцууржээ.

Кэйт Крюгер Брэнтийг толгойлох, биеээр нь Блэкуэллийнхний цус гүйж байгаа хүн гарч
иртэл үхэж чадахгүй, амьдралаас зууралдсаар Жеми Макгрегор, Маргарет нарын зовж байж
Кэйт өөрөө Дэвидтэй хамт зовж зүдэрч байж хураасан хөрөнгө зөөрөө хар элэгийн хүний
гарт оруулахыг үл хүснэ. Кейтийн их найдлага тавьж байсан Ева өөрийг нь хоёр дахин
муухайгаар мэхэлж, эцсийн бүлэгт алуурчин болсон. Гэвч Кэйт түүнийг цээрлүүлэхгүй
байхаар шийджээ. Кэйт нэг удаа Еваг харсан. Түүнийг ямар болгосон нь бүрэн хангалттай
шийтгэл байв.

Ева өөрийгөө толинд харсан тэр өдөр амиа хорлохыг оролдов. Бүтэн шил дүүрэн нойрны эм
уусан боловч Кит ходоодыг нь цэвэрлээд гэртээ аваачиж, байнгын хараа хяналтанд байлгах
болжээ. Ажилдаа явахдаа Евагийн дэргэд сувилагч сахиулж үлдээдэг байв.

- Намайг үхүүлээд өгөөч, Кит ээ. Би ийм царайтай амьд явахыг хүсэхгүй гэж нөхрийгөө
гуйхад,

- Одоо чи минийх болсон. Би чамд эгнэгт хайртай байх болно гэж Кит хэлжээ.

Ева муухай царайг нь хүн харах бий гэхээс тэсэж яддаг байлаа. Сувилагч хүүхнээр сахиулахаа
болиоч гэж Китийг гуйна. Тэр хүүхэн царайг нь үргэлж хараад байхаар тун эвгүй санагддаг
байж.

Александра байсхийгээд утасдах боловч Ева түүнтэй уулзахыг татгалздаг байлаа. Ева
хөндлөнгийн хүн гэртээ оруулдаггүй. Түүний уулздаг ганц хүн гэвэл Кит Уэбстэр. Евад
ердөө ганц Кит л үлджээ. Еваг гадаад ертөнцтэй холбодог ганц хүн нь Кит болохоор одоо
намайг хаячихвий гэж айдаг болжээ. Ева үзлийн муухай царайтайгаа ганцаараа үлдэх бий
гэж айна.

Кит ажилдаа эрт явдаг учир гэж өглөөний тавд сэрнэ. Ева бас эрт босож, Китэд хоол унд
хийж өгнө. Орой ирэхэд нь хоол хийж тавина. Китийг саатвал айж сандарна. Өөр хүүхэнтэй
болсон байвал яана гэхээс зүрх нь зогсох шахна.
Үүдний цоож дотор түлхүүр эргэлдэхийг сонсмогц угтан очиж, нөхрөө чанга тэвэрнэ. Ева
нөхрийгөө хоёул үүл борооны ажил үүсгэе гэвэл татгалзах бий гэж айгаад хэзээ ч тэгж
гуйдаггүй. Харин Китийг санаачлан хавьтахад Ева үүнийг сайхан сэтгэлийн эрхэм дээд
илрэл гэж хүлээж авдаг байлаа. Нэг удаа Ева нөхрөөсөө,

- Хонгор минь, чи намайг ингэж цээрлүүлэхээ болих юм биш үү? Миний царайг хуучин хэвд
нь оруулаад өгөөч дээ гэж зүрхлэн гуйсанд Кит өөдөөс нь хэсэг хараад,

- Тийм боломж байхгүй гэж омог бардам хариулжээ.

Цаг улиран өнгөрөх тусам Кит улам хатуу шаардангуй болж, эцсийн бүлэгт Еваг өөрийн
өөрийн боол мэт болгож, юу хүссэн болгоно гүйцэтгүүлдэг байв. Евагийн муухай царай
түүнийг Китэд төмөр гинжнээс илүү бөх бат холбожээ.

Александра Питэр хоёр хүүтэй болж, Роберт гэж нэр өгчээ. Роберт бол ухаалаг хөөрхөн хүү
байлаа. Кэйт түүнийг хараад Тонийг дурсан санана. Роберт 8 нас хүрч, өсөлт хөгжлөөр
үеийнхнээсээ түрүүлж явлаа.

Блэкуэллийн гэр бүлийн гишүүд бүгдээрээ нэг өдөр урилга хүлээж авлаа.

Урилга дээр бичсэн нь,

“ МИССИС КЭЙТ БЛЭКУЭЛЛ

90 НАСНЫ ОЙН БАЯР ЁСЛОЛД

ТАНЫГ ХҮРЭЛЦЭН ИРЭХИЙГ УРЬЖ БАЙНА.

БАЯРЫН ЁСЛОЛ 9 САРЫН 24-ны ОРОЙН 8 ЦАГТ

МЭН МУЖ УЛСЫН ДАРК ХАРБОРТ ДАХЬ

“ХУШИЙН ТӨГӨЛ” ӨРГӨӨНД

гэжээ.

Китийн урилгыг уншаад Евагийн өөдөөс харж,

- Сайхан хэрэг байна, хоёул очьё гэв.

- Өө үгүй, би чадахгүй. Би...

- Бид очно гэж Кит тодхон хэллээ.

Тони Блэкуэллийг эмнэлэгийн цэцэрлэгт зураг зурж байхад захиа өгөв. Тони дугтуйг задалж
үзээд, царайд нь инээмсэглэл илэрч,

- Сайхан хэрэг ээ. Би төрсөн өдрийн баярт тун дуртай гэв.

Питэр Темплтон урилгыг анхааралтай уншиж үзээд,

- Кэйтийг 90 хүрч байгаа гэхэд үнэмшмээргүй байна. Гайхалтай хүн шүү гэсэнд,

- Робертод бүр өөрийн нэр дээр нь бичсэн урилга ирсэн шүү, чи мэдсэн үү гэжээ.
37-р бүлэг

Зочид тарцгааж, халуун бүлийнхэн бүгдээрээ “хушийн төгөл” өргөөний номын санд
цуглажээ. Кэйт гэр бүлээ тойруулан харав. Бүгдээрээ гайхалтай тод харагдаж байлаа. Тони
хүү нь инээмсэглэн байна. Тэр нэгэн удаа эхийгээ алах гэж оролдсон сон. Одоо хүн дүрстэй
нэг ийм амьтан болжээ. Кэйт энэ хүүдээ хичнээн их найдлага тавьж байсан билээ. Дараа бас
Евад. Гэтэл Ева алуурчин болсон. Хэрэв шуламын ааш араншингүйсэн бол Ева энэ дэлхийн
эзэн болох байсансан. Еватай суусан тэр онхиогүй Кит Уэбстэр гэгч Еваг тэгж цээрлүүлэн
шийтгэсэний учир нь юу юм бол? Бас сайхан сэтгэлт, энхрий ялдам Александра нь Кэйтийн
урман дээр ус асгалаа. Олж ханилсан эр нөхөр нь бас компанид ямар нэгэн хамаатай байхыг
татгалзсан. Тэрслүүд амьтад. Энэ крюгер Брэнтийн төлөө хөдөлмөрлөн зүтгэж энэлэн зовж
байсан минь талаар өнгөрөх гэж үү? “Үгүй дээ, тиймд хүргэж болохгүй. Маш их ажил хийж,
бүхэл бүтэн их гүрэн бий болгосон. Кейптаун дахь эмнэлэгийг миний нэрэмжит болгосон
гэсэн, би олон арван сургууль, номын сан байгуулж, Бандагийн овог аймгийнханд тусалсан”

Кэйтийн толгой өвдөж эхлэв. Өрөөнд аажмаар хий сүг сүнс дүүрлээ. Жеми болон Маргарет
Макгрегор хоёр ямар сайхан улс вэ... Тэр Банда наашаа хараад инээмсэглэж байна... Хонгор
хайртай Дэвид нь гараа тосон ирж явна.

Кэйт хий үзэгдлийг үлдэн зайлуулах гэж толгойгоо хэд сэжив. Эд нартай очиж уулзах арай
болоогүй. “Удахгүй очно, удахгүй...” гэж Кэйт бодлоо.

Энд номын санд Кэйтийн халуун бүлийн бас нэг чухал хүн байж байна. Кэйт харж ханашгүй
хөөрхөн жич хүүдээ ханда.,

- Хүрээд ир, хүү минь гэсэнд Роберт хүү дэргэд нь ирж, гараас нь бариад,

- Таны төрсөн өдрийн баяр маш сайхан болж байна, эмээ гэхэд нь,

- Баярлалаа, хүү минь. Чиний санаанд таарсан бол яамай. Хичээл сургууль чинь ямар байгаа
вэ? гэсэнд,

- Дандаа онц сайн дүн авдаг. Би ангидаа тэргүүн сурагч гэв.

Кэйт Питэрийг харж,

- Та нар Робертыг өсөж том болохоор нь Вартоны сургуульд өгөх хэрэгтэй. Тэр бол хамгийн
шилдэг... гэсэнд Питэр инээд алдаж,

- Ай тэнгэр. Ээж минь та энэ зангаа хэзээ ч тавихгүй хүн үү? Роберт хүү өөрийн дуртай
сургуульд сурах болно. Хөгжмийн авьяастай, хөгжимчин болох хүсэлтэй байдаг. Роберт
өөрийн эрх дураар амьдрах ёстой гэсэнд Кэйт нэгэнтээ санаа алдаад,

- Чиний зөв өө. Би хөгшрөөд та нарын амьдралд оролцох ямар ч эрхгүй болжээ. Хөгжимчин
болох дуртай бол өөрөө мэдэг гээд жаал хөвгүүн тийш эргэж нүдэнд нь хайрын сэтгэл туяарч,
- Роберт хүү минь сонсож бай. Эмээ чинь чамд юу ч амлахгүй. Гэхдээ туслахыг хичээе.
Дэлхийд алдартай нэг хөгжмийн зохиолчийн сайн найз хүнийг би таних юм... гэжээ.

ТӨГСӨВ