HI PAIS NGA PILYO

ni Jonathan Tapacion Raagas

Seminarista hi Ako,
Adlaw gab-i’n pag-inampo.
Bis’ kapoy naniniguro,
Bis’ piraw nag-eestudyo,
Pagsunod la han Ginoo.

Kundi naabot usahay

Ha dalan han kamaupay,
Nasimang, bis’ naglilikay,
Hingpit an pagpinasaway,
An pagka-padlas, tiupay.

In’ mga seminarista

Magpapadi na gad unta,
Kundi kon mayda daraga,
Sus! An buot nawawara,
Kalayo nagmumulay pa!

Kay inin hira kon danay

Kon bumaribad mahinay.
An pagbasol madali-ay,
Dayon la nga napahuway
Sanglit pirde han panulay.

Seminarista hi ako,
Maupay gud an panuyo,
Pero ig-ampo man niyo,
Nga hinaut magin husto
Nga padi ni JESUCRISTO!