Imong gipadala ang Imong Anak sa kalibutan Aron pagsangyaw sa Maayong Balita sa kaluwasan sa tanan: Ngadto sa mga makasasala, kabus, gilupigan, masakiton, Ngadto sa mga gitalikdan ug gipasagdaan. Iyang gihalad ang Iyang kinabuhi didto sa Krus alang kanato Ug nabanhaw siya pag-usab ngadto sa bag-ong kinabuhi Aron pagtubos kanato ug mahiuli kami Kanimo. Imong gipadala ang Imong Balaang Espiritu ngadto sa mga Apostoles Aron pagpadayon sa tahas sa Imong Anak Ug paggiya sa tanan ngadto sa kaluwasan.
Kami nagpasalamat Kanimo, Amahan
Sa pagdala kanamo gikan sa kangitngit ngadto sa kahayag. Pinaagi sa Imong mahigugmaong plano, 500 ka mga katuigan kaniadto Mga misyonero miabot sa among kayutaan aron pagsangyaw Sa Ebanghelyo ni Jesus Imong Anak ngadto sa among mga katigulangan. Kadto naghimo kanamong Imong katawhan ug ang Simbahan. Ang gasa sa pagtoo naguban kanamo lagpas sa kangitngit ug kahayag, Mga kapildihan og kadaugan sa among kasaysayan isip Imong katawhan. Ang among pagtoo maoy among tinuod nga iwag Nga nagbalwag sa kangitngit.
Bag-uha dinhi kanamo ang grasya sa Imong Espiritu
Nga nagdasig kanamo nga mosaksi ni Jesus Imong Anak, Ngadtos kalibutan nga gigun-ob sa kahakog, kapintas, inhustisya, sakit ug pag-antos. Hinaut nga ang among pagtoo maghatud kanato sa kahiusa isip Imong mga Anak Nga muatiman ug mopangga sa usag-usa. Hinaut nga ang Balaang Espiritu mugahom kanato nga mahimong magsasangyaw sa maayung Balita Ngadtos among mga kaigsuonan sa Asya ug sa tanang kanasuran. Gasahi kami og tiunayng tinguha sa pagtabang sa uban Nga mohangop sa pagtoo diha sa Ginoong Jesus Nga makaambit sa Imong kamaya ug kinabuhi.
Hinaut nga ang Balaang Inahan, ang Bitoon sa Ebanghelisasyon,
Mag-uban kanamo ug mag-ampo alang kanamo Samtang kami magpakabuhi ug magpaambit sa among pagtoo ngadtos uban. Hinaut nga ang among dili maparog nga gugma ug debosyon kaniya Isip among Pinanggang Inahan Maghimo kanamong tinuod nga mga tinun-an Ug mga saksi ni Jesus ngadto sa tanan, Kanunayng andam nga ipadala, Ug masinugtanon sa bisan unsay isugo kanamo ni Jesus.
Kini among gipangayo pinaagi ni JesuKristo, Imong Anak
Kinsa nagpuyo ug naghari uban Kanimo diha sa kahiusa sa Espiritu Santo, Dios hangtod sa kahangturan. Amen.