PAAMBIT MAHITUNGOD SA BOKASYON SA MGA LAYKO

Usa ka mahigugmaong pagtimbaya kaninyong tanan!

Ikalipay nako ang pagpaambit kaninyo karon mahitungod sa bokasyon sa mga layko.
Motutok ako sa akong kaugalingong kasinatian sa pagka-layko nga misyonarya. Ako, si
Milagrosa Villas, 64 anyos,taga-Calamba, Misamis Occ., usa ka magtutudlo, ug usa ka
sakop sa pundok sa mga laykong misyonarya nga gitawag og Filipino Lay
Redemptorists (kun FLARE). Sukad sa tuig 1980, sa pangedaron nga 25 anyos,
mikuyog ako sa Redemptorist Mission Team sa Iligan aron sa pagpadayon sa misyon ni
Kristo sa kalibotan.

Unsa man kining FLARE? Kinsa man kami? Unsa ang among tumong ug kinabuhi sa
pundok?

Kami ang pundok sa mga layko, nga nagtinguha sa pagmugna og usa ka estilo sa
kinabuhi nga nagtahan sa kaugalingon diha sa Misyon ni Kristo, subay sa karisma ni
San Alfonso de Liguori, ang magtutukod sa Kongregasyon sa mga Redentorista.

Niadtong Nobyembre 1984, kaming upat nga nagpasiugda sa maong pundok naghimo
og resolusyon, nga mao ang mosunod:

1.) Kami, nga usa ka pundok sa mga layko nga lumilihok uban sa mga
Redentorista sa Probinsiya sa Cebu, nagkasinabot nga tukoron ang
Redemptorist Lay Community aron sa paghatag kanamo og diwa sa pagka-
katilingban, pagka-managsoon, ug pagka-kauban.
2.) Nagkasinabot kami, nga pinaagi niining maong pundok, among makab-ot ang
subsob nga pag-inambitay sa managsama nga panglantaw ug pagtahan nga
apostolikanhon.
3.) Pinaagi niining maong katilingban, mapalawoman namo ang pag-ambit sa
karisma ug espiritu sa mga Redentorista.
4.) Pinaagi niining maong katilingban, mahatagan sa dakong pagtagad ang
bokasyon sa mga layko ug ang ilang pagsaksi sa mga bili sa Ebanghelyo diha
sa kalibutan karon.

Ang among kinatibuk-ang katuyoan mao: Ang pagpadayon sa Misyon ni Kristo – sa

pagka-maampoon, pagka-maalagaron, ug pagka-propeta sa panahon karon – isip usa
ka katilingban sa mga layko. Buot namong ipadayag ang pagsaksi sa mga bili sa
Ebanghelyo, isip usa ka katilingban sa mga layko, diha sa kalibutan karon. Partikular
nilang katuyoan mao ang pagpuyo sa kinabuhi sa pag-ampo, sa apostolado, ug
katilingbanong kinabuhi.

Among gihatagan og lawom nga kahulogan ang among pagka-LAYKO - Tungod kay
buot kami nga magpuyo sa tinuoray nga kahulogan sa pagka-magtutuo ug pagka-
sumusunod ni Kristo nga naambitan diha sa among Bunyag. Saksihan namo ang mga
bili sa Ebanghelyo diha sa atong kalibutan karon.
Busa, maka-pangutana kita: Mahimo diay sa usa ka layko sa pagpadayon sa Misyon ni
Kristo? Kinsa diay ang mga layko diha sa atong Simbahan?

Ang termino nga “layko”, sumala sa Lumen Gentium, Dogmatic Constitution on the
Church – nagpasabot “ang Katawhan sa Dios nga miambit sa pagka-pari, propeta, ug
pagka-hari ni Kristo sa ilang kaugalingong paagi ug abilidad.

Ang mga layko “nangita sa Gingharian sa Dios pinaagi sa pakiglambigit sa kalibutanong

kalihukan ug sa paghan-ay niini subay sa plano sa Dios.”
 Ang kalibutan mao ang lugar ug agianan sa mga layko diha sa pagtuman sa ilang
Kristohanong bokasyon.
 Diha sa kalibutan motubo ang mga layko sa pagka-balaan – diha sa pamilya,
trabaho, ug lulinghayaw – sa natad sa ekonomiya, politika, ug kultura – dinhi sila
magsangyaw sa Maayong Balita sa Gingharian sa Dios.

Karong panahona, diin ang kalibotan gihulga ug gisakit sa pandemiya sa COVID19, ug

ang grabe nga epekto niini sa ekonomiya, politika, kultura, ug relihiyon, labaw nga
gikinahanglan ang atong mahigugmaong pagsangyaw sa Paghari sa Dios. Kitang mga
layko ang labing daghan, ug anaa sa tanang suok sa kalibotan, busa labaw nga aduna
kitay katungdanan sa pagsaksi sa mga bili sa gugma, kaangayan, kalinaw, ug
panaghiusa. Makighiusa kita sa mga obispo, kaparian, kamadrehan,ug mga
relihiyoso/sa niining maong misyon!

Busa, duyog kaninyo ug sa mga kadagkoan sa atong Simbahan, kaming mga layko nga
sakop sa FLARE Community, tinukmod sa among pagtoo, miangkon kami sa katungod
ug katungdanan sa pagpadayon sa Misyon ni Kristo – sa pag-alagad, pagsaksi,
pagsangyaw, ug paghalad sa kaugalingon alang sa Gingharian sa Dios – diin anaay
Kaangayan, Kamatuoran, Kalinaw, ug Gugma.

Sama sa unang mga Apostoles, ug sa atong Mahal nga Birhen Maria nga atong Inahan
sa Kanunay’ng Panabang, maningkamot kami nga mahimong buhing sakramento sa
pagpuyo sa usa ka Kristohanong katilingban – nga maampoon, ma-alagaron, ug
masaksihon.

Nagatoo kami nga diha sa pagtuman sa Misyon ni Kristo, maka-ambit kami sa Iyang
Pasyon, ug sa paglaum sa Pagkabanhaw ngadto sa kinabuhing walay katapusan.
Hinaut pa unta.