DECIEMBRE 24, 2022

BIHILYA HAN PAGKATAWO HAN GINOO

Celebrant: Maupay nga gab-i, mga kabugtuan ko kan Kristo. Yana nga gab-i an Misa
Bihilya han Pagkatawo han Ginoo.

Aton iginhahalad hini nga santos nga yukaristiya, kaupod han mga masunod nga
mga intensiyon: (mass intentions).

Yana, mga kabugtuan, aton ginsasaurog an MISA BIHILYA HAN PAGKATAWO

HAN GINOO; an aton PRINCIPAL SPONSORS amo an hira: (pangaranan) an aton
FAMILY SPONSORS amo an masunod: (pangaranan) ngan an aton OFFERERS amo an
masunod: (pangaranan)

An aton santos nga yukaristiya yana pangunguluhan han aton talahuron nga
OBISPO-EMERITU, HIS EXCELLENCY, MOST REVEREND FILOMENO G.
BACTOL, D.D., BISHOP-EMERITUS OF NAVAL kaupod an aton Kura Paroco,
Reberendo Padre Edwin G. Pontejos. Alayon pagtukdaw ug puno hin kalipay pag-urusa
kita pagkanta han pasiuna nga imno.

MGA RITO HAN PAGTIKANG

Celebrant: Ha ngaran han Amay ug han Anak ug han Espiritu Santo.

People: Amen.

Celebrant: An kalinaw maada ha iyo.

People: Ngan maada man ha imo.

RITO HA PAGBASUL

Celebrant: Samtang nag-aandam kita hin pagsaurog han misteryo han gugma ni Kristo,
igtug-an ta an aton mga sala ngan pangaro kita sa Dyos hin pasaylo ngan hin kabakod ha
kasingkasing.

People: NAGTUTUG-AN AKO HA MAKAGARAHUM NGA DYOS UG HA IYO,

AKON KABUGTOAN, KAY NAKASALA AKO HA HUNAHUNA, PULONG, BUHAT
UG PAGPASIBAYA: and striking their breast, they say: TUNGOD HAN AKON SALA,
HAN AKON SALA, HAN AKON DAKO NGA SALA. SANGLIT, NANGANGAMAYA
AKO KAN SANTA MARIA BIRHEN, HAN MGA ANGHEL UG MGA SANTOS, UG
HA IYO, AKON KABUGTOAN, NGA IG-AMPO AKO NIYO HA ATON GINOO NGA
DYOS.

Celebrant: Kalooyan unta kita han makagarahum nga Dyos, pasayloon an aton mga sala
ngan dad’on kita ngadto han kinabuhi nga dayon.

People: Amen.

KYRIE

GLORIA

PAG-AMPO HA PAGTIKANG

Celebrant: Mag-ampo kita:

O Dyos, ginlilipay nimo kami dida han ikinatuig nga paghulat han amon
katalwasan; ipakita nga kami nga nakarawat han imo bugtong nga Anak, an Manunubos,
hin waray kabaraka, matakos pagkilala ha iya, an tiarabut nga Maghurukom.
Pinaagi han amon Ginoo Jesucristo nga imo Anak, nga upod ha imo ug han Espiritu
Santo, buhi ug naghahadi, Dyos ha dayon nga mga katuigan.

People: Amen.

Commentator: Alayon paglingkod ngan pamati han mga pulong han Dyos.

LITURHIYA HAN PULONG

PAGBASA I

Pagbasa tikang han Basahan ni Isaias nga Manaragna.

Kinmita hin dako nga kapawa an mga tawo nga naglalakat ha kasisidman. Adton nag-
ukoy didto hin masirom nga tuna, yana sinmirang na ha ira in kapawa. Tinagan mo hira hin
dako nga kalipay, O Ginoo; ngan ginlipay mo hira. Narayhak hira tungod han imo ginbuhat,
sugad han pagrayhak hin mga tawo kon nag-aani hira, o kon nagbabahinbahin hira han ira
tinikas nga mga manggad. Kay ginbari mo an yugo nga nakapabug-at ha ira ngan an tungkod
nga naghampak han ira mga sugbong. Ginpirde mo an nasod nga nagtalumpigos ngan
nagpahimulos han imo mga tawo, sugad han pagdag-a mo han kasondalohan han Madian
hadton maiha na nga panahon. Pagsusunogon hin kalayo an mga butas han nasulong nga
kasondalohan ngan an ngatanan nga mga panapton nira nga humog hin dugo! Natawo ha aton in
bata! Iginhatag ha aton in anak nga lalake! Ngan magigin punoan hiya naton. Pagtatawgon hiya
nga “Urusahon nga Magsaragdon,” “Gamhanan nga Dyos,” “Amay nga Waray Kataposan,”
“Prinsipe han Kamurayaw.” Magpapadayon hin kamainuswagon an iya hadianon nga gahom;
dayuday magmamalinaw an iya ginhadian. Maghahadi hiya nga sumurunod ni Hadi David,
ngan ipapakita niya an iya gahom dida han pagkamatadong ug katadongan, tikang yana tubtob
han kataposan nga panahon. Pagbubuhaton gud ini ngatanan han Ginoo nga Labi
Kamakagarahum.

Reader: An Pulong han Ginoo.

People: Salamat sa Dyos.

SALMO RESPONSORIO

R: Yana nga adlaw natawo an aton manunubos, hi Kristo nga Ginoo.

Kanta ha Ginoo hin bag-o nga kanta! / Kanta ha Ginoo, an bug-os nga tuna! / Kanta ha Ginoo,
pagdayawa hiya!

R: Yana nga adlaw natawo an aton manunubos, hi Kristo nga Ginoo.

Kada adlaw sumat katalwasan niya. / Ha kanasoran iyo igpakilala / iya pagkaharangdon, iya
himaya, / ngan an mga gamhanan nga buhat niya / ha ngatanan nga katawhan han tuna.

R: Yana nga adlaw natawo an aton manunubos, hi Kristo nga Ginoo.

Pagkalipay kamo, tuna, kalangitan! / Uwang, dagat, ug binuhat ha imo man; / pagkalipay kamo
nga mga kaumhan, / ngan mga binuhat ha imo ngatanan. / Niyan magrarayhak tanan kakahoyan

R: Yana nga adlaw natawo an aton manunubos, hi Kristo nga Ginoo.

Pagrayhak ha Ginoo kay maabot hiya gud man, / katawhan ha tuna iya paghadian / han
pagkamatadong ngan kamatuoran.

PAGBASA II

Pagbasa tikang han Surat ni San Pablo ngadto han kan Tito.

Iginpahayag han Dyos an iya grasya para han katalwasan han ngatanan nga mga tawo.
Nagtututdo ha aton ito nga grasya, nga bayaan ta an diri dyosnon nga kinabuhi ngan an
kalibutanon nga mga kaipahon, ngan mag-ukoy kita dida hin pagpugong han kalugaringon, hin
matadong, ngan hin dyosnon nga kinabuhi dinhe hini nga kalibutan, samtang naghuhulat kita
han ginlalaoman ta nga baraan nga Adlaw, diin makikita an kaharangdon han aton gamhanan
nga Dyos ngan Magtaralwas, hi Jesucristo. Igintubyan niya an iya kalugaringon tungod ha aton,
hin pagtalwas ha aton tikang han ngatanan nga karat-an, ngan hin paghimo ha aton nga putli
nga mga tawo nga sakop gudla ni Cristo, ngan nagtitinguha pagbuhat hin maupay.
Reader: An Pulong han Ginoo.

People: Salamat sa Dyos.

Commentator/Reader: Alayon pagtukdaw pagtahod han Santos nga Ebanghelyo.

ALLELUIA

EBANGHELYO

Celebrant: An Ginoo maada ha iyo.

People: Ngan maada man ha imo.

Celebrant: Pagbasa tikang han santos nga ebanghelyo sumala kan San Lucas.

People: Paghimayaon ka, Ginoo.

Hadto nga panahon nagsugo hi Emperador Augusto nga magpalista para han sensos an
ngatanan nga mga sakop han Imperyo. Hi Cirenio amo an gobernador han Siria han paghimoa
hini nga syahan nga sensos. Sanglit kinmadto hin pagpalista an ngatanan, an kada usa ngadto
han iya kalugaringon nga bungto. Tikang ha bungto han Nazaret ha Galilea, kinmadto hi Jose
ha Judea, ngadto han bungto han Betlehem nga natawhan ni Hadi David, kay tulin man hiya ni
David. Kinmadto hiya hin pagpalista upod hi Maria nga sinayoran na ha iya, ngan hingarak-an
na. Samtang nakadto hira ha Betlehem, inmabot an panahon nga mag-aanak na hi Maria. Nag-
anak hiya han iya suhag nga lalake, ginputos niya hin mga lampin, ngan iginhulid ha pasungan,
kay waray na man lugar para ha ira didto han balay nga pahuwayan. May mga magmarangno
hin karnero didto hadto nga dapit nga nag-aagma ha bug-os nga gab-i didto han kaumhan hin
pagmangno han ira mga panon. Pinmakita ha ira in usa nga anghel han Ginoo, ngan nalamragan
hira han himaya han Ginoo, ngan nagkahadlok hira. Kundi nagsiring ha ira an anghel, “Ayaw
kamo kahadlok! Hahani ako ngan may-ada ako dara nga maupay nga sumat para ha iyo, nga
maghahatag hin dako nga kalipayan han ngatanan nga katawhan. Natawo yana nga adlaw didto
han bungto ni David an iyo Magtaralwas nga amo an Cristo nga Ginoo. Amo ini an tigaman
para ha iyo: hiaagian niyo in bata nga pinutos hin mga lampin ngan hinulid ha pasungan.” Ha
gilayon pinmakita upod han anghel in dako nga hugpo hin mga anghel ha langit, nga
nagkakanta hin mga pagdayaw ha Dyos: “Himaya sa Dyos ha kahitas-an, ngan kalinaw dinhe ha
tuna hadton mga tawo nga maupay an kaburot-on!”

Celebrant: An Ebanghelyo han Ginoo.

People: Pagdayawon ka, O Kristo.

HOMILIYA
Commentator: Alayon pagtukdaw.

PAGTUG-AN HAN PAGTOO/CREDO

NATOO AKO HAN DIOS, AMAY NGA MAKAGARAHUM, MAGBURUHAT

HAN LANGIT UG HAN TUNA, UG KAN JESUCRISTO, IYA BUGTONG NGA ANAK
UG ATON GINOO, NGA IGINPANAMKON HA GAHUM HAN ESPIRITU SANTO,
IGIN-ANAK NI VIRGEN MARIA, IGINSAKIT HA SUGO NI PONCIO PILATO,
IGINRAYSANG HA KROS, NAMATAY UG IGINLUBONG, LINUSAD NGADTO HA
KAHILADMAN. HA IKATOLO KAADLAW NABUHI LIWAT. SINAKA HA LANGIT,
NGAN NALINGKOD HA TUO HAN AMAY. MABALIK NGAHAW PAGHUKOM
HAN MGA BUHI UG HAN MGA PATAY. NATOO AKO HAN ESPIRITU SANTO,
HAN SANTA IGLESIA CATOLICA, HAN PAGKAANGBITAN HAN MGA SANTOS,
HAN PAGWARA HAN MGA SALA, HAN PAGKABUHI HAN MGA LAWAS UG HAN
KINABUHI NGA DAYON. AMEN.

PAG-AMPO HAN BUNGTO

Celebrant: Natutuman iton mga plano han Dyos tungod gihapon hiton iya kaburot-on.
Sanglit pangaro-a ta sa Diyos an mga upa nga mabulig ha aton nga magin
magmatinumanon nga mga sumuronod ni Cristo. Sarabat kita pagsiring:

DUNGGA KAMI, GINOO.

1. Tungod han Santo Papa ug kaobispohan, ngan hadton nagtubyan han ira kalugaringon ha
pag-ataman han bungto han Dyos: nga an ira kinabuhi magin hul-os nga tigaman han
paghigugma ug pagkaurusa han katilingban ha ubos han ira Cristohanon nga panimangno.
Mag-ampo kita ha Ginoo:

2. Tungod han aton nasud Pilipinhon, yana nga talagsaon nga tuig han aton kasaysayan: nga
palabihon an iya kauswagan ha kamurayaw ug katadungan dida han mga plano ug desisyonn
han mga nagmamangulo ha iya han kada tagsa nga molupyo. Mag-ampo kita ha Ginoo.

3. Tungod han aton kabugtuan nga yana nag-aantos hin pagsari ug kakurian: nga mabag-o an
ira paglaum sa Dyos, mapabaskog pa an ira pagtoo han iya gahum ug kaupayan, ngan
mapadilaab an iya paghigugma sugad han iya karuyag. Mag-ampo kita ha Ginoo.

4. Tungod hadton nanhiuna na ha aton pagbaya hinin kalibutan: nga mahiaguman na nira an
katalwasan nga tumong han pagkatawo han Manunubos han kalibutan. Mag-ampo kita ha
Ginoo.

5. Tungod ha aton nga nagkakatitirok yana dinhi hini nga pagsaurog: nga ha butnga han aton
kalipay yana ngan ha luyo hiton mainampoon nga pagpamulat han aton Ginoo, rigonon kita
ha pagbinurubligay ug pag-inungay. Mag-ampo kita ha Ginoo.
Celebrant: Mahigugmaon nga Amay, dungga an amon kasingkasing nga pag-ampo ngan,
pinaagi han imo padayon nga pag-upod ha amon ha ikinaadlaw, ipatuman ha amon in’
huyayag ug mamurayaw nga kabubuwason. Pinaagi kan Jesucristo nga amon Ginoo.

People: Amen.

LITURHIYA HAN YUKARISTIYA

Commentator: Alayon paglingkod para hin paghalad. There are offertory envelopes
available. You may use them in sharing your gifts of love. May-ada kita mga sobre. Ini in’
pwede niyo gamiton paghalad. Damo nga Salamat.

PAGHALAD

Commentator: Alayon pagtukdaw.

Celebrant: Kabugtoan, pagampo kamo nga inin aton halad karawaton han Dyos, Amay
nga makagarahum.

People: Karaw'ton unta han Ginoo ini nga mga halad tikang ha imo mga kamot ha
pagdayaw ug paghimaya han iya ngaran, ha aton kapulsanan ug han kaupayan han bug-os nga
Singbahan.

PAG-AMPO HA PAGHALAD

Celebrant: Ginoo, igbuot gad nga dida han pagtuman namon han pagsaurog han bihilya
han pagkatawo makita man liwat namon nga ini an tinikangan han katalwasan namon.
Pinaagi kan Jesucristo nga amon Ginoo.

People: Amen.

PREPASYO

Celebrant: An Ginoo maada ha iyo.

People: Ngan maada man ha imo.

Celebrant: Bayawa an iyo mga kasingkasing.

People: Binabayaw na namon ngadto han Ginoo.

Celebrant: Pagpasalamat kita han Ginoo naton nga Dyos.

People: Angay ug sadang hiya pasalamatan.

Celebrant: Amay nga makagarahum, angay ug sadang nga magpasalamat kami ha imo
pinaagi kan Jesucristo nga amon Ginoo.

Tungod han katingalahan nga pagkahimo nga tawo han Dyos Anak, sumulhog dinhi
ha amon hunahuna in’ bag-o nga hayag han imo himaya; basi ha pagkilala namon ha iya
nga Dyos nga nakikita, maaghat kami hin paghigugma han mga butang nga diri kinikita.

Sanglit, upod han mga hugpo han kaanghelesan, pag-aawitan namon an imo himaya
hin waray hunong nga pagsiring:

SANCTUS

PAG-AMPO HAN YUKARISTIYA II

Santos ka nga gayud, Ginoo, burabod han ngatanan nga kahingpitan.

Sanglit nangangamuyo kami nga ipalusad mo an imo Espiritu basi iya santoson ini nga
mga halad, ngan tungod ha amon mahimo unta nga Lawas + ug Dugo ni Jesucristo nga
amon Ginoo.

INSTITUTION NARRATIVE

Sano niya itubyan ha kamatayon an iya kalugaringon, kinuha hiya hin tinapay ngan
nagpasalamat ha imo. Iya ginpinitpinit, ihinatag han iya mga tinun-an ngan nagsiring:

KARAW'TA NIYO NGAN KAON KAMO NGATANAN HINI: KAY AMO INI AN
AKON LAWAS NGA IGTUTUBYAN TUNGOD HA IYO.

Sugad man, kahuman han panihapon, iya kinuha an kalis ngan nagpasalamat liwat ha
imo. Ihinatag niya han iya mga tinunan ngan nagsiring:

KARAW'TA NIYO NGAN INOM KAMO NGATANAN HINI: KAY AMO INI AN
IRIMNAN HAN AKON DUGO, AN DUGO HAN BAG-O UG WARAY PAGKAPAPAS
NGA GINSAARAN NGA IG-UULA TUNGOD HA IYO UG HAN NGATANAN NGA
MGA TAWO BASI MAPASAYLO AN MGA SALA. BUHATA INI NIYO NGA
HINUMDUMAN HA AKON.

MYSTERIUM FIDEI

Celebrant: Igtug-an ta an misteryo han pagtoo.

People: Ginoo, pinaagi han imo pagkamatay ha kros ug pagkabanhaw, gintalwas mo kami.
Ikaw an Manunubos han kalibutan.

Concelebrant: Ha pagdumdum han iya kamatayon ug pagkabanhaw, amon

ginhahalad ha imo, Ginoo, ini nga tinapay han kinabuhi ug irimnan han katalwasan ha
pagpasalamat ha imo kay ginpakatakus mo kami hin pag-atubang ug pag-ataman ha imo.
Nangangamaya kami ha imo nga kami ngatanan nga nagsasaro han Lawas ug Dugo ni
Cristo, magkaurosa pinaagi han gahum han Espiritu Santo.

Concelebrant: Ginoo, hinumdumi an imo Singbahan ha bug-os nga kalibutan ngan

hingpita hiya dida ha pagsihigugmaay, upod kan Francisco amon Papa ug kan John amon
Obispo ug han ngatanan nga kinarawat han sakramento han orden.

Concelebrant: Hinumdumi liwat an amon kabugtoan nga pinahuway na puno hin

paglaum nga hira mababanhaw. Pasudla hira ug an ngatanan nga mga minatay ngada
han kapawa han imo himaya. Kalooye kami ngatanan, basi matakus kami makaangbit
han kinabuhi nga dayon, upod han Baraan nga Birhen Maria, Iroy sa Dyos, ha Baraan
nga Jose iya esposo, han baraan nga mga Apostol, ug han ngatanan nga mga Santos nga
nakalipay ha imo ha ngatanan nga katuigan. Itugot nga magdayeg ug maghimaya kami ha
imo pinaagi kan Jesucristo nga imo Anak.

Celebrant: Pinaagi ha iya, dida ha iya, upod ha iya, dida ha pagkausa han Espiritu Santo,
ha imo an ngatanan nga himaya ug pagdayeg, makagarahum nga Amay, ha dayon nga
mga katuigan.

People: Amen.

Celebrant: Kay gin-agda man kita han Manunubos, pag-urosa kita pagampo han
pangadion nga iya gintutdo ha aton.

AMAY NAMON

Celebrant: Bawia kami, Ginoo, ha ngatanan nga karat’an; tagi kami hin kalinaw hini nga
mga adlaw basi pinaagi han panabang han imo kamaloloy-on, dayuday mahigawas kami
han sala ngan matalwas kami ha ngatanan nga kasamukan, samtang malipayon kami nga
nagpapamulat han pag-abot ni Jesucristo nga amon manunubos.

People: Kay imo an ginhadian, an gahum ug an himaya yana ug ha kadayunan.

AN TIGAMAN HAN KAMURAYAW

Celebrant: Ginoo, Jesucristo, kay nagsiring ka man han imo mga apostol: "An
kamurayaw ibibilin ko ha iyo, an akon kamurayaw ihahatag ko ha iyo;" ayaw asay
pagkulawe an amon mga sala, kundi an pagtoo han imo Singbahan; ngan sumala han imo
kaburut-on ihatag ha amon an kamurayaw ug pagkaurosa. Ikaw nga buhi ug naghahadi
ha dayon nga katuigan.

People: Amen.

Celebrant: An kamurayaw han Ginoo dayuday maada ha iyo.

People: Ngan maada man ha imo.

Celebrant: Ipakita ta yana nga an kamurayaw naghahadi dinhi ha aton.

PAGPINITPINIT HAN TINAPAY

KORDERO HAN DYOS

PANGOMUNYON

Celebrant: Iini an Cordero han Dyos, nga nagkukuha han mga sala han kalibutan.
Baraan adton gintatawag ngada han panihapon han Cordero.

People: Ginoo, diri ako takos hin pagkarawat ha imo, kundi pagluwas la hin pulong, ngan
mag-uupay ako.

Celebrant: An Lawas ug Dugo ni Cristo magdara unta ha akon ngadto han kinabuhi nga
dayon.

People: Amen.

AWIT HAN PANGOMUNYON

Commentator: Alayon pagtukdaw.

PAG-AMPO HUMAN PANGARAWAT

Celebrant: Mag-ampo kita:

Ihatag ha amon Ginoo, nga kami nga nagtubo tungod han pagkatawo han imo
bugtong nga Anak magmakusog dida han pagkaon ug irimnon nga langitnon. Pinaagi kan
Jesucristo nga amon Ginoo.

People: Amen.

PAGPASALAMAT/PASABOT/ANNOUNCEMENTS

Commentator: Alayon paglingkod para han mga pasalamat.

Commentator: Maupay nga gab-i ha iyo ngatanan ngan Advance Merry Christmas!
Ha ngaran han aton Kura Paroco, Rev. Fr. Edwin Pontejos, kinasing-kasing nga
ginpapasalamatan ko inin masunod nga bumulig para han kalampusan han aton MISA
BIHILYA HAN PAGKATAWO HAN GINOO.

Siyahan, ngadto han aton main celebrant yana, HIS EXCELLENCY THE MOST
REV. FILOMENO G. BACTOL, BISHOP-EMERITUS OF NAVAL.

Ikaduha, ngadto han aton… PRINCIPAL SPONSORS hira (panngaranan), an aton

FAMILY SPONSORS (pangaranan), ha ngatanan nga naghalad.

An mga magka-durudilain nga mga lay liturgical ministers, EXTRAORDINARY

MINISTERS OF HOLY COMMUNION, kaupod an Parish Staff and Personnel dinhi ha
singbahan, Damo nga Salamat!

Ngan ha iyo ngatanan nga aanhi yana nga nagtambong hini nga santos nga
yukaristiya. Damo, Damo nga Salamat!

RITO HAN PAGTAPOS

PAG-ABIABI

Celebrant: An Ginoo maada ha iyo.

People: Ngan maada man ha imo.

PAGBENDISYON

Celebrant: Iyukbo an iyo mga ulo para han bendisyon han Dyos.

Pinaagi han kahimo nga tawo han iya anak ginbungkag han Dyos an gahum han
kasisidman han kalibutan. Ngan dida han mahimayaon nga paghimugso ni Cristo
nga ginpasabot han anghel ngadto han mga magmarangno han karnero iya
ginpalamrag hini nga labi kabaraan nga gab-i. -Amen.

Bungkagon unta han Diyos nga labi kamaupay an kasisidman han sala dida han iyo
kinabuhi ngan palamragon unta niya an iyo mga kasingkasing han kahayag han
pagkamaupay. -Amen.

Pun-on unta kamo han Diyos han kalipay han mga magmarangno han karnero
ngan maghimo ha iyo han magsaramwak han maupay nga sumat. -Amen.
 An Diyos nga nagsumpay han langit ug han tuna maghura ha iyo hin kalinaw ug
kalipay ngan magtimpo ha iyo ngada han pagkaurosa han singbahan ha langit. -
Amen

Ngan bendisyonan unta kamo han makagarahum nga Diyos, Amay + Anak ug han
Espiritu Santo kumunsad ngada ha iyo ngan pumabilin ha kadayunan.

People: Amen.

PAGPALAKAT

Celebrant: Human na an Misa. Balona niyo an kamurayaw ug paghigugma ni Kristo.

People: Salamat sa Dyos.