Kurre...

kurre sumanga’na
Sampa' ia parayanna
langan Puang di Matua
Tedao puang totumampa rara'ta
Iamo Puang Matua Ambe', Puang Yesus Anak Muane, na Puang Penaa masallo'
Iamo puang titanan tallu,
puang samba' batu lalikan
Tu kipentionganni sukaran alukna,
Kipellalundunni bisara madatun-Na

Kurre sumanga’na inde allo masero pindan

Pole parayanna inde kulla’ mabase banaa
iamo allo natanda balo' kombonganna puang dinii umpabendan kapemalaran
Iamo kulla' natoding rongko' to sangpettayanan dini umpatunannang pangurrande-randean

Iamo ulang rara'na,

iamo bannang bulaanna
Anna ma'kabumbu' sidoloanmo
Anna ma'urang sumomba'mo
Temai to malute umpalolong minna' bisara mellao langi'
Temai to tang mabeko umpatientan boka' sangka' turun di batara
Temai to napilei langsa' puang matua
Tomangka natonno' bua matasak to tumampata
To sitaranak sura' madatu
To siingko' sangka' pengkalossoran
Majelis gereja pdt, pnt, dken

Maimokomi..e..to sangdunduan pindan!

Inde mokomi e...to sangpetayanan
anta tendeng puang Matua
ta pakala’bi’ tu sanganna madatunna
Maikomi tara’ban-ra’ban umpenanian Puang,
anta unnarrak umpudi buntu batu oto’na kasalamaranta.
Maikomi anta ma’kurre sumanga’ umpennoloi oloNa,
sia mela’tek umpakendekanni pa’pudian.

Anna sundun langan lolokna

Inde kurrean sumanga'
Anna upu' langan mendaunanna inde polean paraya
Ungkurre sumanga' mamaseNa Puang diona tallu lolona, untimang pole paraa kaboro'Na Totumampa
diona Lolo Tau, lolo Patuoan na Lolo tananan