Uhu : I Kilau om I Godu

Isai ilo sumandak?

Oomis tomod o tirak,
Manangon oku dokoyu,
Kinongoho iti tangonku.
Kopisanangan om tabi pibabasan kumaa toinsanan. Ngaranku nopo nga I Daniel Sheanly. Kiumul
oku do 8 toun. Tadau baino orohian oku popolombus iso tangon ki’uhu do I Kilau om I Godu.

Haro-haro no kaka di pogulu po o songinan godu om songinan kilau miambalut. Misampaping no

kaka tionon diolo. Insan tadau, angatai no kaka di Kilau i Godu do mongoi pokitaakanon.

“Odu, kano mongoi pogihum do taakanon. Monimung mantad kito taakanon. Orikot nopo moti
timpu madrasam nga au kito no kalabus mongoi pokitaakanon,” ka di Kilau.

“Siodop tomod oku, Ilau. Pogulu nopo. Modop oku po,” ka di Godu. Au i Godu nokoopud do mongoi
pokitaakanon.

Insaru kaka daa i Kilau mangangat di Godu monimung do taakanon nga au nopo i Godu mongoi
tanud.

“Mokitaakanon oku i’ yoho do oruhai-ruhai orikot timpu madrasam,” kaka simbar di Godu.

Insan totuong, rasam no kaka di asapou om aiso kinotingkadan gisom piipiro tadau.
Osimbayan tomod kaka i Kilau tu haro mantad no taakanon di notimung dau. I Godu nopo kaka dii
nga tumongob tomod tu noowian no do taakanon. Monosol tomod kaka isio tu au minonimung mantad
do taakanon. Kosorou no kaka daa dii i Godu mongoi pokianu di Kilau do taakanon.

“Ilau, haro po daa topod-topod do taakanon nu di? Louson tomod oku tu noowian oku no taakanon,”
kaka di Godu. Gagaran po kaka i Godu tu sogitan om louson.

“Ino no dia oi Odu. Au ko gia minokinongou nangatan ku monimung taakanon. Aiso no taakanon ku.
Uli nopo,” kaka di Kilau do otogod.

Osianan kaka daa i Kilau di Godu nga tigiran kasari i Kilau tu au i Godu tuminumboyo
pangangatan dau monimung do taakanon. “Kosianai no doho, Ilau. Monosol kopio oku tu au
minokinongou dia,” kaka di Godu mokiinsian.

Osianan kaka dii i Kilau di Godu om angatai no kaka disio i Godu minion id tionon dau. Minion kaka i
Godu id tionon di Kilau gisom do nopupusan o timpu madrasam. Osonong tu ogumu o notimung di
Kilau do taakanon om ii no o nakan diolo do daamot.

Mantad kinaantakan dii, au no dii gobulan i Godu. Mitanud-tanud nopo kaka dii yolo di Kilau do
mogihum om monimung do taakanon.
Iri-iri no tangonku. Pounsikou.
Kaamatan ramayon tokou,

Popogirot do pisompuruan,

Pibabasan om piombolutan,

Koruba kawagu do suai tadau.