BAHAN SERMON MINGGU KANTATE, 7 MEI 2023

1 KRONIKA 16 : 23 - 28
“ MARENDE MA HAMU DI JAHOWA ALE SANDOK TANO ON”
______________________________________________________________________________

I. Patujolo
Huria na hinaholongan ni Tuhanta Jesus Kristus! Dirajumi angka pande bisuk ni Padan na Robi,
ia buku 1 Kronika on digurithon horong ni malim (sumber Priest) jala dung mulak bangso i sian
habuangan Babel (538 sM). Secara khusus di bindu 16 on, ditaringoti do Hasasahat ni Poti parpadanan
ni Jahowa (Tabut Perjanjian Allah) tu Jerusalem (ay.1–6) dohot pujipujian ni si David tu Debata
Jahowa (ay.7–22). Ia turpukta on, i ma bagian sian pujipujian ni si David marhite si Asaf dohot
hahaanggina i (ay.5) na mamuji jala pasangaphon Jahowa ala pambanenanNa, marhite ende,
mardongan parhinaloan dohot hasapi. On ma sada pujipujian na mansai ringkot di angka ‘acara
nasional’ di Israel hatiha i. Dijou do bangso i laho marningot jala mananda pambahenan ni Debata asa
dipuji jala dibaritahon nasida habalgaon ni Debata tu saluhut portibi on.

II. Hatorangan ni Turpuk

a. Ay. 23-25 “Endehon, baritahon jala pajojor ma hamuliaon ni Goar ni Debata
Diarahon do sude bangso Israel asa mamuji pasangap Debata ala hatimbulonNa. Tangkas didok
disi: Endehon (bernyanyilah), baritahon (kabarkanlah) dohot pajojor (ceritakanlah). Dipangke 3 kata
kerja Imperatif (perintah), na marlapatan: sude bangso i ‘ingkon’ mamujimuji Debata, ala tama situtu
pujion Debata. Ala na songkal do Debata mangatasi sude angka debata dohot huaso ni portibi on. Patar
do saluhut pambahenan di Debata di pardalanan sejarah ni bangso i, na paluahon jala marmudumudu
nasida. I do umbahen didok, ingkon dipajojor nasida angka habalgaon dohot hamuliaon ni Debata tu
sandok halak parbegu (bangsa-bangsa). Ai ndang adong na boi tartimbang manang angka debata bangso
na asing pe, molo dipatudos dohot Debata ni Israel.
Holan angka na tangkas mananda dohot manghilalahon sude pambahenan ni Debata, i do na ro
mamuji jala pasangap Debata. Molo so ditanda jolma i do Debata, nda tung ro nasida mamuji jala
marsomba tu Ibana. Molo so diingot jolma i angka denggan basa ni Debata, nda tung ro nasida marsaor
dohot Debata. Alani, ringkot asa sude bangsoNa i dohot hita angka na porsea i, mananda sude
pambahenan ni Debata di ngolu on. Asa tapuji, taendehon, tabaritahon jala tapajojor hamuliaon ni goar
ni Debata. I do umbahen na diendehon si Musa rap dohot halak Israel: “Ise ma songon Ho, ale Jahowa
di tongatonga ni angka debata? Ise ma songon Ho marmulia di bagasan habadiaon, na songkal
marpujipujian, na mambahen halongangan? (2 Musa 15 : 11). Marhite sian i dihatindanghon do paboa
Debata Sitompa langit dohot tano, na marhuaso jala manggomgomi saluhutna. Asa holan Debata
Jahowa sisombaon dohot sioloan di bagasan ngolu ni angka na porsea.

b. Ay. 26-28 “Debata na tongam, marmulia jala marhuaso sian saluhut debata
sileban”
Dihatindanghon raja David do paboa na tongam, marmulia jala marhuaso do Debata
martimbanghon sude debata. Ai tangkas do ajiajian do debata sileban sian bangso parbegu, na so
marhuaso ala tinompa ni tangan ni jolma do i. Alai, ianggo Debata gok halongangan do
pambahenanNa. Ibana na paluahon bangso Israel sian parhatobanan Misir, na mangaramoti jala
marmudumudu bangsoNa i marhite gogo dohot huasoNa. Alani, ingkon di bagasan haporseaon do
bangso i nang hita angka na porsea, laho mangolophonsa jala tau pujipujian holan di Debata Jahowa.
Tung na balga do tutu Debata, na tongam jala marmulia Ibana, na tuk patupa saluhutna hombar tu lomo
 ni rohaNa. Ai disoarahon do asa sude angka marga ni angka bangso di tano on mamuji Debata. Didok
di ay. 28: Hamu ale angka marga ni angka bangso, sai lehon hamu ma tu Jahowa, lehon hamu ma tutu
tu Jahowa hamuliaon dohot hagogoon, na marlapatan: holan Debata Jahowa na tama manjalo
hamuliaon dohot hasangapon i ala ni hagogoonNa i (pat. 1 Kron 29:12).

III. Sipahusorhusoron
Mansai umbuk do turpuk on patolhasonta tu Minggu Kantate, na marlapatan “Mangendehon ende
na imbaru di Debata” (Psalmen 98 :1). Songon topik Minggu: “Marende ma hamu di Jahowa, ale sandok
tano on”, na mangarahon hita asa mangendehon hamuliaon ni goar ni Debata. Ndada holan taendehon
goar ni Debata, alai ingkon do tabaritahon jala tapajojor sude pambahenan ni Debata di bagasan ngolunta.
Tarlumobi, nunga dilehon Debata AnakNa, Tuhan Jesus Kristus na mate jala hehe humonghop hita jolma
pardosa, asa parjambar hita di harajaonNa i. Holan ala asi ni roha ni Debata sambing do i, jala tajalo di
bagasan haporseaon tu Kristus i. Na gabe sungkun-sungkun, boasa ndang sude dope halak Kristen na
ungkap rohana laho mamuji dohot mangendehon hamuliaon ni goar ni Debata di bagasan parsaoran i?
Alus na jempek tusi; ala ndang dihilala jala ndang ditanda nasida dope habalgaon pambahenan ni Debata
di ngolunasida. Alani, tung mansai ringkot do tatanda sude pambahenan ni Debata dohot denggan basaNa
di ngolu on, asa taboto mandok mauliate tu Debata jala ro hita mamujimuji jala pasangap goarNa marhite
ende, soara dohot ulaonta siganup ari. Ringkot taendehon ma ende na imbaru tu Debata, marhite na
mangulahon hata ni Debata dohot na hombar tu lomo ni rohaNa di bagasan ulaonta na marragam i,
tarlumobi pambahenanta na tau pasangaphon goarNa. Ndada holan soaranta na mamuji goarNa na badia
i, alai ingkon ganup hita mamaritahon haluaon na pinatupa ni Debata di bagasan Kristus, Sipalua i.
Antong, tapuji jala tapasangap ma Debata saleleng hita mangolu di hasiangan on, jala ngolunta tabahen
gabe ende na imbaru di goarNa, songon angka anak ni Debata di bagasan haporseaon tu Kristus i. AMEN!

Pdt. David Silaban

SERMON DISTRIK XXVI LABUHAN BATU

JAMITA PESTA PARNINGOTAN ARI HANANAEK NI TUHAN JESUS; 18 MEI 2023
JOHANNES 6 : 60 - 63

MANGHAPORSEAI JESUS NA MANAEK TU SURGO

(MENGIMANI YESUS YANG NAIK KE SORGA)

I. Patujolo
Bangko ni jolma na “hisap/mongkus/rakus” ima manjonohi manang memuja-muji angka na
“memberi keuntungan” tu dirina. Alai molo ndang be dihilala ibana “memberi keuntungan” be di
ibana na dijonohi manang na di puja puji na i ndang sungkan jolma na sisongoni maninggalhon
na dijonohi manang na dipuja puji na i. Alani taida ma di turpuk on, ditingki di Kapernaum Jesus
torop do jolma na ro tu Jesus alai ndang ala na porsea nasida umbahen na ro nasida mandapothon
Jesus alai ala adong na naeng sibuaton nasida sian Jesus ima asa dilehon muse nasida mangan
songon na dipatupa Jesus uju ditamue Jesus mangan lima ribu halak di Tao Galilea, Tiberias. I do
umbahen didok Jesus tu nasida “tutu situtu do na hudok on tu hamu: Dilului hamu pe Ahu, ndada
ala naung dapot rohamuna tanda i, tung ala ni na bosur i do hamu na mangan roti i” (ay. 26). Jala
ditingki didok Jesus tu nasida “Ahu do roti hangoluan i na tuat sian banua ginjang” (ay. 32, 35,
51) ndang tarjalo pingkiran nasida pandohan ni Jesus i gabe marmungutmungut ma nasida tu
Jesus. Laos didok nasida ma “nda Ibana do Jesus, anak ni Josep i; nda tatanda amaNa dohot
inaNa? Beha ma dohononNa antong: Na tuat sian banua ginjang do Ahu?” (ay. 42). Ala secara
harafiah nasida mangatusi hata ni Jesus i jala ndang dapot nasida songon na pinangido roha nasida
naeng patupaon Jesus tu nasida ima asa dilehon muse nasida mangan songon na dipatupa Jesus
di Tiberias i laos laho do nasida maninggalhon Jesus huhut marmungutmungut.

II. Hatorangan ni turpuk

Hata sisean (bahasa Yunani: mathetes artinya murid) di turpuk on menghunjuk tu angka torop
jolma na ro sian Galilea ima na ditamue Jesus mangan 5000 halak. Na ro nasida mandapothon
Jesus muse tu Kapernaum na marsangkap nasida muse asa patupaon Jesus muse tu nasida songon
naung dibahen Jesus tu nasida ima na dilehon nasida mangan. Hata sisean Jesus na sampuludua i
(bahasa Yunani: Ἀπόστολος artinya Murid atau rasul) di turpuk on menghunjuk tu sisean Jesus
na sampuludua i .
Umbege pandohan ni Jesus tu angka jolma na torop i (mathetes), ima “Ahu do roti hangoluan
na tuat sian banua ginjang. Manang ise na manganhon roti on, i do mangolu mangolu
salelenglelengna. Ia roti silehononHi bahen hangoluan ni portibion, I ma dagingKu” didok
siseanNa i (mathetes) do “Hata na kasar do i; ise pabegebege i?” (ay.60). Ala secara harafiah do
siseanNa i (mathetes) mangalapati pandohan ni Jesus. I do umbahen na marmungutmungut
siseanNa i. Hape pandohan ni Jesus ima “Ahu do roti hangoluan na tuat sian banua ginjang” naeng
paingothon nasida do asa dilului nasida hangoluan na salelengleleng na ndada ngolu
parsatongkinan na dilului nasida ima hagiot ni portibion.
Laos di uduti Jesus muse mandok tu nasida, boha muse ma tarjalo roha nasida ima
dihatutubuNa-haheheonNa- hananaekNa. Ala ndang sadia dope na pinatupa ni Jesus, i ma
mangalehon mangan 5000 halak marhite 5 roti dohot 2 dengke. Dia ayat 63 i di pangingot Jesus
muse nasida ima “Tondi i do na pangoluhon; ndang marguna anggo daging i. Angka hata naung
Huhatahon tu hamu, Tondi do i dohot hangoluan”. Dipasingot Debata nasida asa porsea di Ibana
ima hangoluan i. jala asa unang tu roha daging i roha nasida ima hagiot ni portibion ala ndang
marguna i. Alai ndang porsea nasida jala ndang tarjalo roha nasida (mathetes) na nidok ni Jesus
ido umbahen di dok Jesus di ayat 66 i “Lan ma angka siseanNa i manundalhon Ibana olat ni i;
ndang be di dongani nasida Ibana”. Loas ditangkasi Jesus ma tu siseanNa na sampuludua i
(Ἀπόστολος) “nda tung dohot hamu naeng laho?” Ala dohot do nasida manangihon pangajarion
ni Jesus i. Laos dialusi si Petrus ma “Tung tu ise ma hami laho, ale Tuhan? Di Ho do hata
Hangoluan si salelenglelengna. Jala nunga huhaporseai jala hutanda hami : Ho do na badia ni
Debata.”

III. Aplikasi
• Hita angka porsea jala siihuthon Kristus, aha do na mambahen hita mangihuthon Jesus
Kristus?
a. Alani siubeonta do?
b. Alani mangomo tu diri sandiri do, songon sisean ni Jesus ima si Judas Iskariot?
c. Manang alani na haporseaonta do?

Molo ala ni ringkot di pardagingon do mangihuthon Jesus ndang boi hot i manang mura ma
munggil haporseaoanna. Alai molo ala ni haporseaonta do mangihuthon Jesus i, aha pe na masa,
une nang pe na so une, las ni roha manang arsak ni roha pe ndang mura munggil manang mura
maninggalhon Tuhan i.

• Angka na masa di ngoluta las ni roha manang arsak ni roha pe i, tahaporseai ma i mambahen
asa lam togu haporseaonta tu Debata.
• Di Ibadah parningotan ari hananaek ni Tuhan Jesus diajak do hita asa porsea di hatutubu ni
Tuhan Jesus, hamamateNa, HaheheonNa dohot na manaek Ibana tu ingananNa hian atik pe
so hita na gabe saksi mata secara langsung di na masa i, alai porsea ma hita di Hata ni Tuhan
i ai i do hangoluan di hita. Amen

Pdt.Irnawaty Sinaga,S.Th
HKBP Simpang Ajamu Resort Pantai Timur
 SERMON DI DISTRIK XXVI LABUHAN BATU DI HKBP RESSORT PANAI HILIR
“MARTANGIANG MARDONGAN MAULIATE”
(“BERDOA DAN MENGUCAP SYUKUR)
(Filipi 4: 1-7)
(BAHAN KHOTBAH MINGGU ROGATE, TANGGAL 14 MEI 2023)

I. PATUJOLO
Ia panurat ni surat Filipi, i ma apostel Paulus, na tinongos ni si Paulus dohot si Timoteus
mandapothon huria Filipi. Tung pe di bagasan hurungan ibana, tong do ditongos apostel Paulus
do huria Filipi i. Parngoluon ni partondion ni halak Filipi uju i marangkup do tu angka pangajarion
ni portibi on. Nang pe songon i, burju do huria Filipi mangalehon dirina tu Harajaon ni Debata.
Alai adong do tong jut roha ni apostel Paulus alana adong do sahorong sian ibana na mangalo
poda na. Pola do di dok si Paulus pandohan na koras tu nasida (Fil. 3: 2). Na asing muse, sai adong
do nang siang angka parompuan na mangula disi, alai ndang saurdot manang ndang saroha
sapingkiriann di pangulaonnasida, i ma Sintikhe dohot Euodia. Hombar tu pangalaho na hurang
renta, na hurang saurdot angka parhobas di huria i ma na tinaronganta di bagasan turpuk jamita
on.

II. HATORANGAN NI TURPUK

a. Ayat 1-3: “Sososo asa marsihohot (berdiri teguh) di bagasan Tuhan”. Di bagasan ayat on
adong dua hal na naeng di pasahat. Naparjolo, di bagasan ayat on dipatuduhon apostel
Paulus do holong dohot hasiholan ni rohana tu angka halak Filipi tarlumobi tu dongan
sapanghobasionna na rap mandongani ibana laho mambaritahon barita na uli. Napaduahon,
apostel Paulus ndang holan mandorong manang mangalehon semangat tu angka dongan
sapanghobasion na alai disoso ibana do angka halak Filipi tarlumobi tu angka dongan
sapanghobasionna asa marsihohot di bagasan Tuhan. Tung pe di bagasan penjara apostel
Paulus (Filipi 1: 12-26), ndang holan sososo asa marsihohot di bagasan Tuhan i, alai dohot di
diapoi ibana tarlumobi tu Euodia dohot Sintikhe asa marsada roha nasida di bagasan Tuhan
i. Suang songoni ma pangidoan elekele ni apostel Paulus tu sahalak dongan sapanghobasion
na i ma Sunsugos asa olo ibana laho mangurupi Euodia dohot Sintikhe di na mambaritahon
manang manghobasi di tonga ni angka halak Filipi. Lapatanna tung pe di bagasan hurungan
apostel Paulus ndang na gabe mangambati ibana laho pasahathon/mambahen surat
manonahon angka na denggan tarlumobi pasahathon las ni roha na tu angka dongan
panghobasionna. Alani do di bagasan ayat on patuduhon bahwa na mangido do apostel
Paulus tu angka dongan na asa tongtong marsihohot di bagasan Tuhan jala marsada ni roha
di na laho mambaritahon barita nauli tarlumobi tu halak Filipi.

b. Ayat 4-5: “Marlas ni roha jala mangulahon na denggan”. Taringot hata marlas ni roha tontu
sahali i do na tapangidohon di bagasan parngoluanta siganup ari apalagi molo dapotta aha
 naung tahirim di bagasan rohanta. Molo nunga ro las ni roha ala naung dapot aha naung
tahirim, tontu gabe mago do arsa na adong di bagasan rohanta i. Suang songon i do na
pinasahat Apostel Paulus di bagasan ayat on tarlumobi di ayat 4 on. Di dok Paulus do tu angka
halak na adong di Filipi naung gabe mangihuthon Kristus tarlumobi tu angka dongan
sapanghobasionna (ayat 2-3) asa marlas ni roha di bagasan Tuhan i. Ra aha na adong di
portibi on tontu boi do mangalehon las ni roha, alai las ni roha na di dok ni apostel Paulus di
bagasan ayat on i ma marlas ni roha di bagasan Tuhan i. Boasa marlas ni roha di bagasan
Tuhan i? Alana Tuhan i do sumber pasupasu tu angka na manghaporsea i Ibana alani do
haroroan ni las ni roha na tongtong holan sian Tuhan i do. Ndang holan las ni roha na di dok
apostel Paulus di bagasan turpuk on alai dohot asa dipabotohon habasaron tu saluhut halak.
Molo tabereng di bahasa Indonesia turpuk on di dok do “Hendaklah kebaikan hatimu
diketahui semua orang. Tuhan sudah dekat!”, ra olo do hita bingung mamereng turpuk on
alana ingkon patuduhon habasaron (kebaikan hati) tu saluhut halak. Hape molo tapatudos
tu hata ni Jesus di Mateus 6: 3 di dok “Asa jumpa dilehon ho asiasi, unang pola diboto
tanganmu sihambirang na nilehon ni tanganmu siamun”. Lapatanna di angka haburjuonta
i unang pola di boto halak hape di bagasan turpuk Filipi 4 tarlumobi di ayat 5 on di dok asa
pabotohon habasaron tu saluhut halak. Sasintong na ndang i na nimaksud ni turpuk on. Aha
do na naeng paboahon di bagasan ayat 5 on? Pandohan Habasaron i ma burju tobok ni roha,
rade manangihon pandohan manang alus ni dongan, rade roha ndang mambaloshon na
maralo tu roha. Arti angka ulaon na burju manang na denggan do na ingkon tapatuduhon tu
angka halak jala i do na ni maksud ni apostel Paulus.
c. Ayat 6-7: “Pabotohon tu Debata marhite tangiang”. Di bagasan parngoluonta on tontu sai
olo do hita holsoan. Olo ma ra holsoan ala so adong hepeng, ndang dapot hasil ni panen,
hurang puas taringot arga ni sawit dna. Ala holso ni roha i olo do mambahen hita gabe
mandao sian Debata. Alai berbeda do songon apostel Paulus. Sebagai pengikut Kristus yang
sejati dalam memberitakan Injil, ternyata adong do halak na so lomo roha mamereng Paulus
sehingga ingkon dipenjarahon di ibana (Filipi 1: 12-26). Tung pe di penjara ibana, ndang na
gabe mambahen holsoan alai gabe lam marlas ni roha do jala dipatuduhon ibana do marhite
di bagasan turpuk on, tung pe di penjara tong do ibana mambaritahon dohot mangalehon
poda tu angka dongan sapanghobasion na dohot tu angka halak Filipi naung gabe siihuthon
Kristus. Boasa tong do marlas ni roha Apostel Paulus tung pe di bagasan penjara ibana? Alana
porsea do ibana pasti dilehon Debata do hagogoon tu ibana jala tongtong do martangiang
ibana tu Debata taringot sude angka holso na. Ra boi do dokhon on bahwa molo
mangondolhon gogonna sandiri pasti ndang boi bertahan apostel Paulus laho mambaritahon
barita nauli, alani do dipasahat ibana do sude angka holso na adong di bagasan parngoluona
tu Debata marhite tangiang dohot elekelek dohot mauliate. I do muse na dipaboa ibana tu
angka donganna dohot tu angka halak Filipi. Lapatanna unang ma mangondolhon gogo dohot
dirina sandiri di bagasan parngoluona alana jolma na terbatas do hita alani molo adong angka
holso di bagasan parngoluon nasida/hita ingkon tapasahat do tu Debata marhite tangiang
dohot elekelek dohot mauliate. Boasa marhite tangiang, elekelek dohot mauliate? Alana
tangiang i do dalanta asa boi berkomunikasi tu Debata jala molo martangiang do hita
tarlumobi laho pasahathon angka holsota asa tongtong di bagasan elekelek (permohonan)
jala molo naung aha tadapot huhut na tapasahat tu Debata ingkon taingot do mandok
mauliate tu Tuhan i ala tongtong do diramoti Ibana hita. Suang songon i na di dok di bagasan
 ayat i ma “Dame ni Debata na sumurung sian saluhut roha, i ma mangaramoti ateate dohot
pingkiran…”. Lapatanna holan di bagasan Debata do adong hasonangan ni roha na polin
manang na tutu. I do umbahan na “sumurung” (lebih tinggi/melampaui) sian saluhut na roha
jala holan sian Debata do boi ro hasonangan i. Sonang roha nang pe godang angka na maol
di na humalian ibana molo dame ni Debata i mangaramoti angka ateate. Pandohan angka
ateate di bagasan ayat on, ndang na martudutudu tu materi fisikal alai tu roha do sangkap
na. Suang songon i ma nang pingkiran asa tongtong ma dame ni Debata na mangaramoti.
Lapatan na naeng dipasahat di bagasan ayat on i ma dame ni Debata do na boi manjagahon
roha dohot pingkiranta be.
III. Sipahusorhusoron
1. Molo tung pe angka aha na masa di bagasan parngoluonta, asa tongtong ma hita marlas ni
roha di bagasan Tuhan i, songon apostel Paulus di bagasan turpuk on tarlumobi di Filipi 4: 1-
7, tung pe di bagasan hurungan ibana tong do dipasangahon ibana do laho mambahen surat
manonahon angka na denggan tu angka donganna, suang songoni pe hita asa tongtong hita
pasahathon angka na denggan tu angka donganta tung aha pe na masa di bagasan
parngoluonta on.
2. Molo tung pe ro angka holso manang haporsuhon di bagasan parngoluonta on, unang ma
taondolhon dirinta alai taondolhon ma Debata marhite pasahathon sude angka holso dohot
haporsuhonta tu Tuhan i marhite tangiang jala martangiang pe hita tu Tuhan asa tongtong di
bagasan elekelek.
3. Di mingguta on, di dok do minggu Rogate: “Martangiang ma hamu”. Di jou minggu on do hita
asa martangiang. Boasa? Alana martangiang i do hosa ni haporseaonta jala i do na mambahen
mangholu hita alana i do tong hosa ni partondionta. Alani unang gabe sepele hita jala unang
gabe formalitas hita laho martangiang tu Debata. Amen.

Pdt. Sehat Pandapotan Sinaga, S. Th.

(HKBP Panai Jaya Ressort Pantai Timur)

Bahan Sermon HKBP Distrik XXVI Labuhan Batu

Minggu EXAUDI, 21 Mei 2023

Turpuk : 2 Samuel 22 : 1 – 7

Topik : Ditangihon Jahowa Do Soara Ni BangsoNa

I. Patujolo
 Di ari Kamis 18 Mei 2023 tapestahon do Parningotan Ari Hananaek ni Tuhan Jesus. Tuhan
Jesus naung mate jala hehe i, na pamalum na marsahit i, na pabangkit naung mate i, na patupa
godang halongangan i, na gok huaso i, nunga manaek tu banua ginjang. Dang di portibi on be
Ibana. Boha nama? Ise nama na tau panungkunan? Tu ise nama hita mangalualu? Luluan ma
pangondingan na asing? Tudia nama hita marhaporusan? Boha, dongananNa dope hita?
TangihononNa dope joujounta? Alusan ma angka sungkunsungkun on di panimpuli ni bahan
sermon on.

II. Hatorangan

Uju si David gabe raja di Israel mereka berada di puncak kejayaan. Monang nasida
maralohon torop bangso na asing. Ido asa sai managam bangso i diharoro ni Mesias sian pomparan
ni raja David. Jadi buku Samuel pabotohon tu hita hababangkit ni si David gabe raja
manggomgomi Israel. Jala turpuk on ima ende pujipujian ni si raja i ala haluaon sian musuna
sudena dohot sian tangan ni si Saul.

Dihasogohon si Saul do raja David, olat ni binegena i ende ni angka parompuan mamiltik
parhinaloan huhut mandok: “Marriburibu do naung tinaluhon ni si Saul, alai anggo si David
marloksaloksa do.” (1 Samuel 18:7). Jadi disangkapi si Saul mambunu si David, pola dipalelelele
ibana. Di tingki maporus si David sian si Saul, tolhas ma ibana tu si Akis. Taboto do dison pola
dipaasing ibana pangalahona jala lalaen ibana dipaula. Songoni na mangadopi hisaphisap ni
anakna si Absalom na naeng pamatehon ibana ala marsangkap si Absalom gabe raja di Israel. Jadi
ragam parungkilon manang parsirangguton ni raja David di pardalanan ni ngoluna alani angka
musuna. Ido umbahen didok ibana di ayat 5 dohot 6 turpuk on : Nunga pola dihaliangi angka
ombak ni hamatean ahu, angka sunge ni hajahaton manonggoti ahu. Nunga pola dihaliangi angka
rante ni banua toru ahu, dilingkupi angka jorgong ni hamatean i ahu.

Alai marhite na sai joujou ibana tu Jahowa tarbahen malua ibana sian angka musuna i. (ayat
4). Gabe dihatindangkon ibana : Jahowa do dolok batu dohot haporusan jala sipalua, Debata do
partanobatoan, lombulombu, parondingondingan dohot haporusan, jala sipartumpak (ayat 2-3).
Diendehon raja David do haluaon naung jinalona i songon parbue ni joujouna manang tangiangna
na manongtong tu Debata. Laos dipatuduhon raja David do pos ni rohana paboa na ditangihon
Jahowa do joujouna dohot anggukna i. Didok di ayat 7 turpuk on : “Jadi di na targogot ahu, hujou
do Jahowa, jala hupangiar anggukhu tu Debatangku, jadi ditangihon Ibana soarangki sian joroNa,
jala tolhas anggukhi tu pinggolNa.”

Taboto do naung mate Tuhan Jesus di hau pinarsilang bahen tobus ni dosanta, jala hehe do
Ibana muse manaluhon hamatean i. Jadi di bagasan Ibana jumpang hita hamonangan maralohon
dosa dohot hamatean, ai peheheonNa do nang hita muse di ari hasangaponNa i. Disi ma
pasahatonNa tumpal hangoluan tu angka na marsihohot manghaporseai Ibana dohot tu angka na
marsitutu mangihuthon Ibana. Alai di na mardalan hita tusi, saleleng di hasiangan on, didok di
turpuk Epistel i, 1 Petrus 5:6-10 didok : Torang ma rohamuna, dungo ma hamu; na maotaot do
alomuna, sibolis i, songon babiat na marauang mangalului sibondutonna (ayat 8). Jadi kita juga
punya musuh. Mangula do sibolis i manait hita manadingkon haporseaonta. Ndang tarbahen so
masa angka haporsuhon di na marungkil hita maniop gomos haporseaonta di Tuhan Jesus. Nunga
dipaingot hian i tu hita ima di ayat 9-10 turpuk Epistel i : “Gomos ma hamu mangalo ibana
marhitehite haporseaon; ingot hamu ma: Ndang tarbahen so songgop angka haporsuhon sisongon
i nang tu angka hahaanggimuna na di portibi on.” Antong dia ma siulahonon molo songgop angka
haporsuhon i? Torang do na niula ni raja David manghamonangkon paraloanna, ima joujou tu
Jahowa. Ai ninna do: “Sai hupajoujou do Jahowa na tama sipujion i, jadi malua ma ahu sian angka
musungku.”

Jadi tarbahen hita do monang maralohon sibolis pangago i molo joujou hita tu Jahowa. Ai
didok do: “tingganghon hamu ma nasa na hinolsohon ni rohamuna tu Ibana, ai disarihon do hamu.”
PaulionNa, pahotonNa jala patoguonNa do hita manghamonangkon na taparungkilhon i, ima
haporseaonta di Tuhan Jesus Siparmonang i.

III. Panimpuli

Pasahaton ma turpuk on di minggu Exaudi, astuanna: Sai tangihon ma soarangku ale

Jahowa. Jala topik ni minggu mansoarahon : Ditangihon Jahowa do soara ni bangsoNa. Hita do
bangso ni Jahowa, naung bongot tu harajaonNa marhite pandidion na badia, siihuthon Kristus
Jesus Tuhan i. Tapestahon do parningotan ari hananaek ni Tuhan Jesus, haporseaonta mandok
hundul do Ibana di siamun ni Debata Jahowa. Antong Ibana ma parhitean di hita sahat tu Debata
Ama. Ibana do na tau haporusanta, pangondinganta, partanobatoan jala sipalua hita. Molo pe
ingkon manaon haporsuhon hita satongkin di portibi on, joujou ma tu Jahowa hamu saluhut
bangsoNa, ai ditangihon do soaramu. Asa Debata pauliulihon, na pahothon jala patoguhon hita
manghaporseai Ibana di bagasan Tuhan Jesus Kristus i. Amen.

Pdt. Roni Nainggolan, Negeri Lama

SERMON HKBP DISTRIK XXVI LABUHAN BATU MINGGU PENTAKOSTA I

(PESTA PARJOLO PARNINGOTAN ARI HASASAOR NI TONDI PARBADIA)
MINGGU, 28 MEI 2023
TOPIK : “JANGKON MA TONDI PARBADIA”
(TERIMALAH ROH KUDUS)
EV. : JOHANNES 20: 19-23; EP. : 1 SAMUEL 10: 6-13
Marpesta do hita sadarion manghalashon dohot marningot Hasasaor ni Tondi Parbadia .
Somal do digoari Pesta Parningotan Hasasaor ni Tondi Parbadia manang pesta Pentakosta.
Pentakosta lapatanna ari palimapuluhon. Digoari Pentakosta ala di ari palimapuluhon dung hehe
Tuhan Jesus , Di na tongon marpungu halak Jahudi di Jerusalem marpesta gotilon, di si ma
songgop tondi parbadia tu angka sisean i . Pesta na balga do di ari Parningoton Hasasaor ni Tondi
Parbadia di halak kristen. i do alana dua ari di pestahon. Digoari pesta na balga ala di arion adong
tolu parningoton na tahalashon. Parjolo, di goari Pentakosta on , ari parningotan hatutubu ni
Huria . Tingki Hasasaor ni Tondi Parbadia i do parmulaan ni parsaoran , persekutuan ni na porsea
i, ima di rajumi parmulaan ni hasadaon ni na porsea i, na ginoran Huria. Paduahon, Digoari do ari
parningoton hasasaor ni tondi parbadia ari parningoton ni pesta gotilon ni halak jahudi. Pesta
gotilon marlapatan pasahatthon patumonaan na niula tu bagas Joro . Hasomalan ni halak Israel
do pasahathon patumonaan ni parbue ni naniula tu bagas joro. Patoluhon, digoari do Ari
hasasaor ni tondi parbadia ari parningotan di ulaon Zending . Ombas hasasaor ni tondi Parbadia
i do parmulaan ni ulaon Zending. Dung pe songgop Tondi Parbadia tu angka sisean i asa borhat
nasida mangulahon parenta ni Jesus , mambaritahon barita na uli i. Nian ndada holan di tingki
Pentakosta songgop tondi Parbadia tu portibion, sian na robi mangula do tondi Parbadia tu
naposo ni Debata. Jala sahat tu sadarion mangula do tondi parbadia , jala di si ma nalnal tarida
na mangula do Debata Papatarhon hasintonganNa dohot sangkapNa tu jolma pardosa. Di
pardalanan ni Huria na parjolo tangkas do di ida na porsea i panogunoguon ni Tondi Parbadia ,
na mangalehon habaranion di sisean i laho manghatindangkon Jesus di na laho pararathon barita
nauli .

Panurat ni bukku on ima si Johannes anak paduahon ni si Zebedeus (Mark. 1:19-20), Inana
margoar Salome, iboto ni si Jakobus, halak Galilea do nasida sian huta Betesda. Tujuan ni si
Johannes lao manurathon buku on ima, asa tangkas do pandandaion angka halak Yahudi dohot
non Yahudi jala angka jolma na berpikir Helenistik, anggiat porsea tu Jesus Kristus, Anak ni
Debata, naung mate humophop angka pardosa. Johannes 20:31 mandok: “Alai umbahen na
sinurat angka on, asa porsea hamu, Jesus do Kristus, Anak ni Debata, jala asa hamu angka na
porsea i dapotan hangoluan marhitehite goarNa”. Laos Jesus i do Hata ni Debata naung adong
sian mulanai, andorang so adong dope portibion.

Barita taringot tu haheheon ni Jesus sian na mate, tung so tarjalo roha dohot pingkiran ni
manisia. Dang tarbahen jolma i pajojorhon taringot tu haheheon, molo sian pingkiran ni jolma do
dipangasahon. Termasuk, sisean ni Jesus sandiri pe, dang tarrajumi nasida hamamate jala
haheheon ni Jesus dihau pinarsilang i. Hape nunga rap sapardalanan jala sapanganan nasida
raphon Tuhan i, jala nunga piga-piga hali dipatolhas jala dipatorang Jesus angka dia na ingkon
masa di anak ni jolma i. Ganggu do nasida taringot tu hahehehon i, jala pangkorhon ni ganggu ni
roha nasida gabe tubu ma biar ni roha dinasa siseani. Ganggu jala biar ni roha nasida i tampak do
di patorang di ayat 19 i, di naung sordak pintu ni bagas nasida i, jala ringkot ingotonta na sai
dipalelelele Jahudi do angka sisean ni Jesus.

Tarsonggot situtu do nasida uju jongjong Jesus ditongatonga nasida. Songgot ni roha
nasida i lam manambai biar dohot ganggu ni roha nasida. Ala sordak do pintu i, jala molo tung pe
adong sasahalak na naeng bongot tu bagas i, ingkon jomolo manuktuhi pintu do nian asa buha
on pintu di ibana. Hape Jesus, bongot do di tongatonga nasida so pamotoan nasida. Molo
tapamanat di Lukas 24:37-38, adong do anggapan nasida, bege ni Jesus do naro tu tongatonga
nasida. Pola dipasingot Jesus sisean i, binahen ni ganggu jala biar ni roha nasida i. Asa dipatudu
Jesus do tanganNa dohot andoraNa tu nasida asa marnida jala porsea nasida dihaheheonNa i.
Dung i, lam maroha nasida, ai Jesus do na niida nasida i, na bongot tu tongatonga nasida i, “na
mandok : Dame ma di hamu” (Ay. 19).

Tahaporseai jala Tahaposi ma Tuhan i

Dimula na dang porsea angka sisean i na tutu hehe Jesus sian na mate. Ndang porsea nasida ala
mangihuthon pangantusion ni jolma , tubu mangolu dungi mate, ido proses ni ngolu ni jolma .
nang pe naung hea di bereng sisean i di pahehe Jesus na mate , ima si Lazarus boru ni si Zairus ,
doli doli ni huta Nain,. Sasintongna ingkon persea do nasia na tutu hehe Jesus sian hamatean ala
nunga di bereng nasida Jesus pahehehon angka na mate. Ndang porsea sisean i hehe Jesus sian
na mate ala mangihuthon pingkiranna , hamatean i do ujung ni ngolu ni jolma , Ala di bereng
sisean i mate Jesus , ndang masuk tu pingkiran nasida naung hehe Jesus sian na mate.
Mangihuthon sisean i nunga talu Jesus di bahen hamatean i. Mangihuthon sisean i monang Jahudi
ala boi nasida mamusa Jesus. Ala sai tu hamatean i roha ni sisean i gab mago ma panghirimon
nasida soluk mabiar jala mandele, ala naung mago sian roha nasida taringot haheheon ni Jesus.
Di tingki na mabiar i nasida , ro do Jesus jongjong di tonga tonga nasida huhut mandok “ Dame
ma dihamu” .Pandohan Dame ma di hamu na marlapatan mangambolongkon biar dohot
hagangguon sian roha ni sisean i. Saleleng mabiar dohot ganggu roha ni sisean i , maol do nasida
manghaporseai haheheon ni Jesus. Alani i parjolo biar i di ambolongkon sian roha ni sisean i .
Dung di dok Jesus songon i jala di patuduhon bogas ni labang i, las ma roh ni sisean i. las roha
nasida ala naung di pasisi Jesus biar dohot hagangguan i sian roha nasida . haheheon ni Jesus
pasisihon biar sian roha ni sisenNa. Haheheon ni Jesus patuduhon ndang adong na so boi
patunduhon ni Debata ., ndang adong na so boi ditaluhonon ni Debata, hamatean i pe tunduk do
tu ibaNa . Alai unang ta pangasahon pingkiranta mangantusi sangkap dohot dalan ni Debata.

Asa dame rohanta dohot ngolunta

Ndang di pasombu Tuhan Jesus sai mabiaar siseanNa jala martabuni. Ala ni ima di patuduhon
Jesus Ibana tu siseanNa jala di patuduhon tanda ni haheheanNa i. Ima bogas ni labang i. Ndang
di pasombu Jesus siseanNa i mabiar jala ganggu roha nasida laos disi ma di patuduhon Jesus
diriNa jala di dok “ Dame ma di hamu “ lapatan na “ Bolong ma biar sian rohamu. Jala di dok
muse “ Sonang ma rohamu” Lapatanna “ Las ma rohamu. Dipasahat Jesus dame di tingki olo hita
marsaor dohot donganta di bagasan hata ni Debata. Parjumpangan dohot Jesus marhite hataNa
, mangalehon sonang ni roha dohot dame huhut padaohon hagangguon, jala parjumpanganta
dohot hataNa mangalehon sonang ni roha.Dipatuduhon Jesus bogas ni labang i tu siseanNa asa
bolong sian roha nasida ganggu ni roha jala dame na pinasahat ni Jesus i gabe lam hot
Haporseonni Sisean i. Boi do masa tu hita songon na masa tu sisean i, gok biar hita nang pe tadok’
Si ihuthon Kristus do ahu” marragam pangalaho mambahen hita mabiar , Asa mago biar i sian
rohanta ta dapothon ma parsaoran ni angka na porsea i, Ai dibagasan hata ni Debata do Jumpang
Dame. Ndang di pasahat Jesus Dame i tu sisean i tingki punjung songon si Thomas, dung pe rap
marpungu sisean i asa di pasahat Dame i lapatanna ringkot do parsaoran dohot dongan, Alani i
molo marsak hita ro ma hita tu parsaoran ni Huria i.

Parsuruan ni Debata

Dipandohan napaduahalihon i, dung mago biar dohot ganggu ni roha i, dung marlas ni roha
nasida, dung dijalo nasida dame i, diuduti Jesus muse dohot hata : “Songon sinuru ni Ama i Ahu,
suruaonKu hamu”. Hahehehon ni Jesus mangonjar angka naporsea dimisi ni Debata laho
mamaritahon Hata ni Debata tu sandok tano on. Dung las roha ni angka sisean i ala naung mago
biar i, di si pe asa di suru Jesus nasida mamaritahon hamonanganNa i. Alani parjolo do biar i di
pasisi asa di ingot parsuruan na sahat tu nasida , di dok “ Songon sinuru ni Ama i Ahu, Suruonku
ma hamu” Disuru nasida manghatindangkon haheheon ni Jesus .

Na sinuru ni Ama do Ibana, gabe suruon ni Jesus ma angka sisean. Balga situtu do misi ni Jesus
na naeng sitorushonon ni angka sisean i di portibion, suangsongoni ditorushon tu huria-Na, asa
lam mangerbang harajaon ni Debata di sandok portibion. Tarjaou do hita naporsea nagabe
sipardohot diparsuruon i. Antong asa tarulahon hita tohonan/parsuruon i, unang tapangasahon
gogonta alai tajalo ma Tondi Parbadia i asa tarulahon hita sangkap dohot lomo ni roha ni Debata
dingolu parsatongkinan on. Parbue ni haporseaonta di Jesus tahatindangkon ma hamonanganNa
i, haheheon ni Tuhan Jesus manungguli hita mamuji dohot manghatindangkon huasoNa. Dung
Tartangkup Jesus , mabiar sisean i, alai dung di papatar Jesus diriNa naung hehe sian hamatean,
tarsunggul ma roha nasida manghatindangkon Jesus naung monang i. Panindangion nasongon i
do dipangido jamita on sian hita . Ta hatindangkon ma Jesus naung hehe, naung monangi, unang
ta tabunihon haporseaonta , alai tapapatar marhite panggulmiton ni ngolu. Mamarangehon lomo
ni roha ni Debata ai ido panindangion na mangolu. Na manghatindangkon Tuhan i do hita molo
taparangehon lomo ni roha Na marhite hasintongan di ulaon, marhite na gabe tiruan, jala gabe
dalan pasu pasu ma hita diparngoulan siganup ari. Amen.

Pdt. Nasib Parulian Nainggolan

HKBP Negeri Lama Ressort Negeri Lama

Bahan Sermon Jamita Minggu Pentakosta II 29 MEI 2023

Turpuk: 4 Musa 11 : 24 – 30
Topik: Ndang Hasuhatan Huaso Ni Tondi Ni Debata
I. Patujolo Ni Turpuk
Laho pabagashon lapatan manang aha nanaeng dohonon ni turpuk 4 Musa 11 : 24 – 30-on,
ringkot do jahaonta sian ayat sada songon dalan laho manangkasi songon dia do situasi kondisi
namasa diturpuk-on. Turpuk 4 Musa Bindu 11-on ima sada peristiwa namasa ditingki pardalanan
ni Bangso Israel sian Dolok Sinai tu Kadesy na niuluhon ni si Musa (4 Musa 13 :26). Dipardalanan
ni Bangso Israel sian Sinai tu Kadesy, marmungutmungut do bangso i. Bonsir na mambahen nasida
marmungut-mungut ima ala holsoan nasida aha nama nanaeng sipanganon nasida (ayt 4 – 13).
Diungutunguthon nasida na so mangallang juhut nasida. Dibandinghon nasida ngolu nasida di
tingki di Misir na so pola martuhor, isarana: ansimun, jelok, ingkau rata, bawang na rara dohot
bawang hian. Diungutunguthon nasida do na holan Manna dipangan nasida. Songon ima situasi
namasa di bangso i uju niuluhon ni si Musa sian Sinai tu Kadesy. Molo taadophon turohanta, nunga
taboto ra songon dia manguluhon jolma namarungut-ungut, naholan na gaor, na so olo bersyukur,
sai manuntut hakna alai kewajibanna dang diulahon, jala nasai manuntun hombar tu lomo ni
rohana. Maol do diadopi si musa bangso i, alani manghatai ma si Musa dohot Jahowa didok ma:
Boasa tung songon i toruonMu naposoMon? Jala boasa tung so jumpangan asi ni roha ahu
diadopanMu, umbahen tung ampehononMu tu ahu siusungon ni sandok bangso on? Mangalualu
si Musa tu Jahowa. Dialualuhon si Musa do tu Jahowa na so mampu ibana manuhuk tanggung
jawab na balga i, molo holan sahalakna manuhuk. Didok si Musa: Ndang tarusung sasada ahu be
sandok bangso-on, madokdokhu do i di ahu. Ala ni holso ni si Musa i, ro ma alus ni Debata tu si
Musa i ma marsuru si Musa mamillit pitu pulu halak sian sintua ni halak Isarael, angka na tangkas
tinanda ni si Musa hian sian sintua ni bangso i, dohot panuturina. Di oloi si Musa do parsuruon i,
dipapungu ibana ma na pitu pulu sintua ni Israel. Laos ido unokni turpuk 4 musa 11 : 24 – 30-on,
ido umbahen didok judulna “ Na Pitu Pulu Sintua Ni Israel”. Asa lam tangkas taboto aha
sasintongna na ditaringoti di turpuk-on tapaihut-ihutma hatorangan na mangihut.
II. Hatorangan ni Turpuk
Ayt 24: Si Musa mangulahon parsuruon ni Jahowa ima mamillit 70 halak Sintua ni Israel.
Marhite ayat 24-on dipaboa do tu hita, molo borat sada ulaon disada punguan tarlumobi ma di
sada huria unang ma pintor mandele manang naeng paluahon ulaon manang tanggung jawab i.
Songon si Musa na mandele manguluhon Bangso Israel di turpuk on jala naeng paluahon ulaon
naung dipasahat Jahowa, pintor disuru Debata do mamillit 70 halak sian sintua. Di ayat 16
didok”Papungu ma tu Ahu pitu pulu halak sian sintua ni halak Israel, angka na tangkas tinandam
nasida hian sintua ni bangso dohot panuturina asa jongjong nasida disi rap dohot ho”. Parsuruon
ni Tuhan i, paboahon dang denggan sahalak pemimpin terlalu mamorsir pingkiran dohot
manuhuk sada ulaon naborat. Alai denggan ma mamillit manang manodo halak na asing laho
mangurupi ulaon i. Dos mai mandok ringkot ni manajemen pembagian tugas. Alai molo pe
ingkon patupahon manajemen pembagian tugas, di ayat 16 i disuru Jawoba si Musa mamillit
natangkas ditanda si Musa. Marlapatan mai molo naeng manodo sada jolma gabe patner kerja
isarana dihuria mansai ringkot panandion na tangkas tu nanaeng di todo i. Marlapatan mai
ingkon jumolo do dimata-mata i ise nanaeng sitodoon. Molo di huria, asa lam niang sada ulaon
jala denggan mardalan denggan do patupahon manajemen pembagian tugas alai dipamanat jala
jumolo ma dimata-matai ise nanaeng sitodoon i.
Ayt 25: Dipasonggop Debata tondi tu 70 halak sintua i manguluhon nasida laho manurirangi.
Ayat 25 on paboahon dang sae holan patupahon pamilliton tu orang-orang tertentu laho
pamurahon sada ulaon. Dung dipillit jala dipapungu si Musa na 70 halak sintua i, mangudut ma
muse Jahowa mambuat, mangampehon jala pasonggophon tondi tu nasida asa tondi i
manguluhon nasida manurirangi. Marlapatan mai ringkot ni sada ulaon memperlengkapi angka
calon nanaeng tinodo mangulahon sada ulaon. Songon Jawowa memperlengkapi 70 halak sintua
i marhite mangalehon tondi. Alani dang sae holan memperlengkapi marhite pasahathon angka
parbinotoan alai manangiangkon asa Tondi ni Debata manguluhon nasida laho marhobas. Laos
sadalan mai dohot topik ni Minggu sadarion na mandok “Ndang Hasuhatan Huaso Ni Tondi Ni
Debata”. Marlapatan mai ringkot ni peran manang pangurupion ni Tondi laho patupahon
pangkobasion lumobi laho manurirangi di tonga-tonga ni huria.
Ayat 26 – 30: si Eldad dohot si Medad na tong pasidohot mangulon huhut tondi i di atas nasida
gabe dohot nasida manurirangi di parsaoran i. Molo tapaihut ihut ayat 26-30, ro do alus ni si
Josua mandok si Eldad dohot si Medad :Ale tuanhu Musa, orai ma nasida. Alai didok si Musa
ma mandok si Josua: Tung tama ma ho mangiburu manadinghon ahu? Anggiat nian dipangido
rohangku sandok bangso ni Jahowa manurirangi, jala dibasabasahon Jahowa tondiNa songgop tu
atas nasida. Sian panghation i sahali nai, boi berengonta kepemimpinan ni si Musa na olo berbagi
kepemimpinan tu donganna. Jala olo do sai masa penolakan manang protes tu angka naung
tatodo laho gabe calon parhobas. Songon si Josua na protes tu si Musa asa di orai si Eldad dohot
si Medad. Alai didok si Musa dipangido rohangku sandok bangso ni Jahowa manurirangi, alai
songgop ma nian tondi Porbadia tu nasida. Marlapatan mai, boe do manang ise manurirangi alai
ingkon ma diperlengkapi, diajari jala dibohali dohot parbinotoan lumobi ma dibohali dohot
pangurupion ni Tondi Porbadia.
III. Sipahusorhusoron
Ringkot do pembagian tugas di sude ulaon, termasuk ma diulaon di tongatonga ni Huria i.
Asa unang holan sadasada halak na mamorsir pingkiranta, unang holan sahalak mangusung
tanggungjawab di tongatonga ni huria i. Molo rap mangula sude ndang adong ulaon na borat, ai
sude parsidohot laho mangula ulaon i. Marsiajar ma hita sian kepemimpinan ni si Musa. Sikap na
olo mambagi ulaonna. Alai molo pe naeng tasagi ulaon i, bisuk ma hita manodo ise do na une
mangulahon ulaon i. Ingkon adong panandaion dohot ulaon mamatamatahon na tangkas. Dungi
ingkon do diperlengkapi manang dibohali marhite parbinotoan na tangkas lumobi ma dibohali
dohot Tondi ni Debata. Sadarion ima Pesta Pentakosta na paduahon. Tapestahon di bagasan
tingkion haroro ni Tondi Parbadia. Molo tabereng sian turpuk on dung dilehon Debata tondiNa
tu pitu pulu halak sintua i gabe manurirangi ma nasida diparsaroan i. Peristiwa i patuduhon huaso
dohot peran ni Tondi ni Debata tu angka sisean mangulahon ulaon marbarita na uli. Di Apostel 1
: 8 didok :” Alai jaloonmuna do hagogoon ni Tondi Parbadia na songgop tu hamu, gabe
sitindangiKu ma hamu disandok tano on”. Alani tajangkon ma Tondi ni Debata manguluhon hita
di ulaon si ganup ari. Amen.

Pangarade sermon: Cal Guru Binsar Situmorang

BAHAN SERMON DISTRIK HKBP DISTRIK XXVI LABUHAN BATU.

JAMITA TU MINGGU TANGGAL 4 JUNI 2023
1MUSA 1:1-2,26-28
Senin, tanggal 1 April 2023.

DEBATA SITOLU SADA PANOMPA SALUHUT NASA NA ADONG

I.PATUJOLO
Manaringoti taringot tu panompaon, ingkon tangkas do di hita, ise do panompa i . Ia panompa i , ima
Debata. Nang pe godang pandapot/pandangan taringot tu hatotompa ni saluhut alai haporseaonta mandok,
Debata do panompa, ndang adong na asing. Proses panompaon ni Debata mulai sian 1 Musa 1 jala sekaligus
tarida disi pangondohonon paboa Debata do panompa ni nasa na adong. I Musa 1, ima alus lao manulak
pandapot taringot tu hajajadi ni saluhutna ala ni angka “kejadian alam”.
Nuaeng, tapaihutihut ma panompaon ni Debata di langit dohot tano dohot panompaon ni Debata di jolma
manisia.

II.HATORANGAN
A.Panompaon na pinatupa ni Debata di langit dohot tano.
Panompaon ni Debata di langit dohot tano, ido bagian parjolo na ditaringoti di turpuk jamita on. Manghatai
taringot tu panompaon ni Debata di langit dohot tano gabe sada diskusi na so marhaujungan do i, godang
pandangan pandangan na berbedabeda taringot tu hajajadi ni langit dohot tano on. Ingkon sian haporseaon
do hita manjalo paboa langit dohot tano ndada na adong boti i, alai adong na manompa, ima Debata.
Tangkas do dihatahon 1 Musa 1:1; “Dimula ni mulana ditompa Debata ma…”
Alani i Debata do haroroan ni parmulaan i, unang madabu hita tu pangantusion na marnida langit dohot
tano on alani “ kejadian alam”. Jala unang madabu hita tu pangantusion na marnida hajajadi ni langit dohot
tano berdasarkan tiori tiori ni angka na malo.
Hata ni Debata taringot tu panompaon ni langit dohot tano nunga singkop di paandar di 1 Musa 1;1-2.

B.Panompaon ni Debata di jolma

Ndang boi ganggu rohanta, ingkon porsea do hita paboa Debata do na manompa jolma, tangkas do i tarida
di turpuk on, I Musa 1:26:
“Dungi manghuling muse ma Debata:Tole ma Tatompa jolma, tumiru rupanTa, tudos tu
pangalahonTa…..”. Pandohan, ditompa Debata do jolma i tumiru rupa dohot pangalaho ni Debata sada
pangantusion na mansai ringkot do i, asa marhite i malo jolma i mameakon diri secara benar songon na
tinompa ni Debata. Asa tung tangkas diboto jolma i hasurunganna sian angka na tinompa na asing. Angka
jadijadian na asing ditompa Debata marhite hataNa alai jolma ditompa Debata marhite tanganNa. Ima
hataridaanna paboa jolma do tumimbo sian jadijadian na asing(Mahkota ciptaan Allah).
Aha do lapatanna ditompa Debata jolma tumiru rupa ni Debata jala tudos tu pangalaho ni Debata?
Ndang secara fisik na nidokna hasarupaan ni jolma tu Debata, alai dibagasan kwalitas ni ngolu i do, ingkon
boi mencirikan kwalitas ni Debata. Alai kenyataan na dipatuduhon jolma i di ngoluna siganup ari suhar do
sian i. Nunga disegai dosa i be hasarupaan ni jolma dohot Debata. Na badia do Debata alai sai mangolu
dibagasan dosa do ianggo jolma i.
Dosa menyebabkan gambar Allah dalam diri manusia tidak berfunsi dengan benar. Manusia hidup bukan
untuk kemuliaan Allah melainkan untuk kepentingan diri sendiri yang merusak dan menghancurkan. Hanya
satu jalan untuk memperbaiki gambarNya di dalam diri kita oleh karya penyelamatan Yesus.
Molo didok tudos tu rupa dohot tumiru tu pangalaho ni Debata ndang na gabe marlapatan jolma i gabe
Debata. Samalo jala sasangap ni jolma, ndang hea gabe Debata Ibana hot do ibana tudos dohot tumiru
Debata ditompa Debata.
Molo didok ditompa Debata jolma i tumiru rupa ni Debata jala tudos tu pangalaho ni Debata tujuanna asa
mangarajai nasa na tinompa na asing lapatanna dipasahat do tanggung jawab tu jolma i lao mangarajai
dalam arti positif asa mangolu saluhutna dibagasan hadengganon. Asa jolma i mitra ni Debata do laho
mangulahon, mangatur angka na tinompa na asing asa uli saluhutna asa patar huaso ni Debata di saluhut na
tinompaNa.

III.PANUTUP
1. Debata do panompa i, unang tarela hita tu angka pandapot na asing na maralo tu hata ni Debata.
Turpuk jamita on tangkas manulak hatotompa ni nasa na adong ala “kejadian alam” dohot ala
tioritiori na asing.

2. Ditompa Debata do jolma tudos tu pangalaho, tumiru rupa ni Debata asa marhasurungan jolma i di
kwalitas ni ngoluna sian angka jadijadian na asing asa marsangap goar ni Debata marhite
hajongjongan ni jolma i, paholang diri sian parange na ramun ala na badia do Debata, badia ma
nang ngolu ni jolma na tinompa i.

3. Ditompa Debata jolma tudos tu pangalaho,tumiru rupa ni Debata tujuanna,ima asa gabe ulaula ni
Debata na bertanggungjab mangarajai, mangatur sude angka na tinompa na asing.
4. Nunga disegai dosa i hasarupaon dohot hadosan ni rupa dohot pangalaho ni Debata,alai dilehon
Debata do anakNa Tuhan Jesus Kristus laho paulak hasarupaon dohot hadosan ni rupa dohot
pangalaho ni jolma i dohot Debata.

5. Mari kita menjaga diri kita masing masing baik adanya supaya kesegambaran kita dengan Tuhan
tidak ternodai.

Pdt. Bernike Pardosi,

HKBP Resort Batu Mamak Torgamba
.