32nd Sunday in Ordinary Time
Gospel: Luke 20:27-38
INTRODUCTION
Ang aton mga balasahon karon nga Domingo nagatudlo sa
aton nahanungod sa Pagkabanhaw nga isa sang mga importante
nga pundasyon sang aton doktrina kag pagtuluohan. Sa Kredo
aton ginapahayag ini sa mga pulong nga: “Nagapaabot man ako
sa pagkabanhaw sang mga minatay kag sang pagkabuhi nga
wala sing katapusan.”
Sa Nahauna nga Balasahon ginapakita sa aton ang istorya
sang kaisog sang mga mag-utod kag sang ila iloy nga ginpadakop
bangud indi sila luyag maglapas sang kasugoan nga nagadumili sa
pagkaon sang baboy. Ini nga kusog nagahalin sa paglaum
sapagkabanhaw sang mga minatay.
Sa Ikaduha nga Balasahon, nagpangamuyo si San Pablo sa
Dios kag kay Ginoong Jesus sang grasya nga nagahatag sang walay
katapusan nga kalipay kag maayo nga paglaum para sa komunidad
sa Tesalonika. Ang Apostol nangayo man sang pag-ampo sang mga
tumuluo agud nga mapadayon nila ang buluhaton sa misyon sa
tunga sang kabudlayan nga ila gina-atubang.
Sa aton Ebanghelyo, ginpamangkot si Jesus sang iya opinyon
nahanungod sa problema sang mga Saduceo nahanungod sa
Pagkabanhaw. Kag ila ginsugid ang sitwasyon sang babaye nga
nangin asawa sang mag-utod nga mga lalake suno sa pagsulondan
sang kasugoan ni Moises. Para sa ila, daku nga kabuangan ang
pagkabanhaw bangud sino na lang abi ang matuod nga bana niya
kun tanan sila nagpangasawa sa iya?
Gani sa pagsabat sa ila pamangkot ang aton Ginoo nagtudlo
sang husto nga paghangop sang Pagkabanhaw. Nga sa ulihi ang
tanan mangin, “kasubong sang mga anghel kag indi na mapatay
kag bilang mga anak sang Dios pagabanhawon gikan sa
kamatayon.”
POINTS
1. ANG LIMITADO NGA PAGTULOK SA KABUHI
• Bangud ang mga Saduceo wala nagatuo sa Pagkabanhaw,
limitado ang ila paghangop sang realidad sang kabuhi. Amo ina
nga ini nga grupo mas kilala sa ila politikal nga impluwensya
kag indi kasubong sang mga Pariseo nga mga istrikto nga
nagapatuman sang kasugoan.
• Kag ano ang konsekwensya kun kasubong sini ang aton punto
de vista?
• Mga utod makita naton sa palibot ini:
✓ Mangin apektado ang aton pagtulok sa konsekwensya sang
aton ginahimo kun wala kita sing kahadlok sa paghukom
sang Dios sa ulihi.
✓ Basi man nga ang aton hatagan importansya amo ang
manggad sa sining kalibutan bangud wala naman sang
lauman pa sa pihak nga kinabuhi.
✓ Ukon ang pinakamalala amo nga wala sing pulos ang mga
ispiritwal nga buluhaton kasubong sang pangamuyo,
pagsimba, pagpamalandong, etc. bangud wala man sing
padya nga mabaton.
2. ANG PAGTUO SA PAGKABANHAW NI KRISTO
• Madamo sang mga relihiyon ang nagapati man nga indi lamang
sa sining kalibutan kita magakabuhi. Amo ina sa iban nga mga
kustombre, ginapabalunan ang mga minatay sang mga halad
nga malahalon kag dala na ang pangamuyo sa maayo nga
pagpanglakaton sa pihak nga kinabuhi.
• Apang ang aton bersyon sang Pagkabanhaw nasandig sa kay
Ginoong Jesukristo. Ang iya pagkabanhaw matapos ang pag-
antus kag kamatayon amo ang nagdaug sang aton pagkagapos
sa sala kag sa gahum sang kamatayon. Kag si San Pablo
nagsiling: “kon wala nabanhaw si Cristo, wala sing pulos ang
amon pagwali, kag wala man sing pulos ang inyo pagtuo.”
• Mga utod, ang pagkabanhaw para sa aton indi “automatic” nga
padulungan pagkatapos sang kamatayon kundi grasya nga
ginabugay para sa mga may hugot nga pagtuo kag ginkabig nga
takos nga magsulod sa ginharian. Sa Ebanghelyo ni San Juan
11:25-26 ginsiling sang Ginoo: “Ako ang nagabanhaw sang
mga patay, kag ako man ang nagahatag sang kabuhi. Ang
nagatuo sa akon, bisan mapatay pa siya, mabuhi siya liwat.
Ang bisan sin-o nga nagakabuhi kag nagatuo sa akon indi na
mapatay hasta san-o.”

REFLECTION QUESTIONS
1. Bilang Kristianos nga nagatuo sa pagkabanhaw, makita bala
sa aton pagpangabuhi ang pagtinguha nga mabaton ini sa
ulihi?
2. Ginapadalum naton bala ang aton kaangtanan sa Dios paagi
sa pagtuo, paghigugma, paglaum kag pag-alagad sa Iya?
3. Ano bala ang mga kalibutanon nga panimuot ang
nagapugong sa aton sa pagpanglakaton pakadto sa
pagkabanhaw kag kabuhi nga wala sing katapusan?
GRACE
• Si St. Therese of Lisieux nagsiling anay: “The world’s thy ship
and not thy home.” Buot silingon nga indi naton paglimitahan
ang aton punto de vista sa kalibutanon lamang nga paminsaron.
Indi ini ang matuod nga puloy-an sang mga anak sang Dios
kundi sa ginharian sang langit.
• Pangayuon naton ang grasya, nga samtang nagalaum kita sang
pagkabanhaw kag sang aton langitnon nga palanublion, diri pa
lang sa kalibutan, aton na nga igakabuhi ang panimuot kag
pamatasan sang mga anak sang Dios.