Bahan Sermon Parhalado HKBP Ressort Medan Kota

20 September 2023

Ev. 1 Musa 8:15-22 Pilippi 1:21-30

Diasuang Jahowa Hinadenggan ni Ngolu ni Jolma

Patujolo

Dihatindanghon Apostel Paulus do paboa las situtu rohana mida huria Pilippi, i ma di nanidokna
di ayat 3 + 5: Mauliate ma hudok tu Debata ganup huingot hamu, ai huingot saormuna tu Barita
na Uli sian mulana sahat ro di nuaeng". Las roha ni Apostel i marningot huria Pilippi, marningot ruas
dohot pangula ni huria na radot jala saor, tongtong manghangoluhon hata ni Debata mulai sian dijalo
nasida Barita na Uli i manongtong nasida mangaradoti manghangoluhon, Barita na Uli. Tarida do i nang
sian panarihon ni huria i di Apostel Paulus, disuru nasida si Epaproditus manaruhon silehonlehon tu si
Paulus na tongon di hurungan di huta Rom hatiha i, jala gabe tardok dohot do si Epaproditus on
mangurus si Paulus, alai ala marsahit posa ma muse si Epaproditus on gabe diloas ma mulak tu hutana
mandapothon angka keluargana (Pilippi 2:29-30). Haroro ni si Epaproditus dohot silehonlehon na
binoanna patuduhon hataridaan ni haporseaon dohot kepedulian ni huria Pilipi di naposo ni Debata na
tongon mangadopi parungkilon siala Barita na Uli i. Suang Songon i do nang hataridaan ni haporseaon
ni huria Pilippi na manghangoluhon Barita na Uli. Ai marhite parsaoran ni Barita na Uli do hataridaan ni
haporseaon tu Debata. Di bagasan las ni roha apostel Paulus manongos suratna tu huria i, nang pe
sian sudut pardagingon nunga tung marungkil ibana mangadopi angka tantangan di na tongon di
hurungan ibana. Alai margogo do ibana mangadopi sude na masa i. Marhite surat on disosoi Apostel i do
asa tongtong nasida di bagasan hasadaon. Ai hasadaon di tongatonga ni parsaoran ni huria i do na gabe
hataridaan ni panggulmiton di ngolu parhuriaon nasida. Huhut disosoi do nasida asa tongtong
manghangoluhon Barita na Uli. Dihasiholi Apostel i asa tongtong nasida gabe tiruan tu na humaliang
nasida, tarlobi ma tu angka halak sipelebegu na so Kristen dope di hatiha i. Disosoi Apostel i do tong
nasida asa margogo mangadopi angka sitaonon siala na mangihuthon Tuhan i.

Hatorangan

Ay. 21-26: Hatimbulon ni Debata dihangoluan dohot di hamatean di bagasan Kristus.

Tung so hadodoan do tutu hatimbulon ni Tuhan i, ai boi marlas ni roha angka na porsea di bagasan
parungkilon. Songon napinataridahon ni Apostel Paulus di turpuk on. Di sada sisi nunga dipabulus ibana
rohana naeng borhat mandapothon Tuhan i, Alai marningot hinaringkot ni rohana ingkon pararathon
Barita na Uli, naeng nian lumeleng ibana mangolu asa haru sahat Barita na Uli tu sandok portibi on. Na
dua pangalaho i manosak di ngoluna. Tudos tu halak na tarsosak dibatu hopit (jurang berdinding batu), na
so boi ibana humusor tu siamun manang tu hambirang ia so holan mardalan tulus tu jolo. Songon i
panghilalaan ni Apostel Paulus manorushon ulaonna, ulaon pararat Barita na Uli nang pe sian sude sudut
ibana disosak. Tumagon ma ibana mate borhat mandapothon Jesus i, ai dumenggan doi molo di bagasan
haporscaon angka na porsca i. Alai manosak muse do di ngoluna unang jolo ibana mate ala naeng dope
pararathon Barita na Uli. Bagas do I diparungkilhon ibana di hurungan i, tingki paintehon uhuman na tu
ibana. Alai saluhutna dipasahat ibana do tu Tuhan Jesus asa Tuhan i na mangatur ngoluna. Ai dumenggan
do Tuhan i mangatur ngoluna sian ibana mangatur ngoluna. Habaranion di bagasan haporseaon do ibana
mandok di ayat 21, ai Kristus do hangoluan di ahu jala laba nang hamatean. Mansai bagas do lapatan
dohot na nidodo ni pandohan on, ndang songon murana mandok. Ingkon halak naung tangkas mambahen
Jesus na gabe ojahan ni ngoluna, halak naung manghilala holan dibagasan Jesus do ibana mangolu, ido
halak na barani mandok, laba nang hamatean. Mansai manorusi do tu panghilalaan pandohan on molo
adong mandok hata on di bagasan haporseaon, isarana si si Ahok (Gubernur DKI) rupani na barani
mandok ayat on boi do gabe patubuhon semangat dohot parsitutuon dihaporseaon ni halak na umbegesa,
jala patubuhon semangat dohot gogo di halak na manghatahon.
Sandok dingoluna Kristus do hangoluanna, na pangoluhon dohot na mambahen mangolu ibana asa gabe
marlapatan ngoluna. Dihangoluhon Apostel Paulus do paboa ngolu na marlapatan, I ma molo gabe
marguna ngoluna tu halak. Ai halak na mangolu di bagasan Kristus i, didok ma i "(Yun:EnKristo", di
bagasan Kristus). Holan di bagasan Kristus do jumpang hita hangoluan, ala Ibana Sipangolu dohot na
menjamin ngolu, jala ganup halak na di bagasan Kristus disi ma jumpangna ngolu na imbaru, na gabe
marpanghorhon ngoluna halak na humaliangna.
Jala: Laba hamatean: hamatean i songon na modom doi di si Paulus, ai paheheonna do saluhut angka na
Porsea di ari uhum sogot I (1Korint 15:51-52, 1 Tess 4:14), 4:14), jala dung jonok di ida ibana hamatean
i, ndang holan na modom be i dihaporseai ibana, alai sangkidop mata laho papindahon sian portibi on tu
hasonangan di lambung ni Kristus. Ai Kristus do na marhuaso di hangoluan dohot hamatcan, silehon
hangoluan dohot sitaluhon hamatean, asa hamatean pardagingon holan hitehite nama i manuju hangoluan.
Marlaba hamatean di angka halak na mate di bagasan Kristus, umbahen didok di Rom 14:8 " Ai ia
mangolu pe hita mangolu di Tuhan i do jala nłate pe hita nłate di Tuhan i, asa mangolu manang mate pe
hita tong do di Tuhan i hita”. Asa na rumingkot di ngolunta on i ma, di Tuhan di Tuhan I do hita manang
daong. Molo di Tuhan i do hita, tontu hilalaonta ma tabo ni hangoluan on, jala ndang habiaranta be
hamatean i.
Ay. 27-30: Hatimbulon ni Debata na tarida di ngolu ni na porsea
Tongon do luat Pilippi on na ginomgoman ni Rom, nang pe naung dao sian kota Rom alai hot do nasida
mangolu songon warga Negara Rom. Alani songon halak Kristen nasida na marsaor di ngolu siganup ari
songon sada warga Negara, naeng unang lupa na umarga i ma parsaoran di bagasan barita na uli. Na dao
umarga do parsaoran ni halak Kristen ala ni Barita na Uli sian parsaoran di haportibi on. Asa jongjong
nasida marsihohot mangadopi angka na manosak ngolu ni halak Kristen, angka na mambibiari nasida. Ai
molo hot halak Kristen mangolu di bagasan sada parsaoran na uli di Barita Nauli jala tarida di
panggulmiton ni ngoluna siganup ari, i ma gabe sada dalan pararathon Barita na Uli i. Ai gabe magigi ma
angka halak parbegu di pangalaho nasida, jala gabe rade maniru dohot mangihuthon parsaoran ni
ngolu ni halak Kristen. Ai tiruan diparsaoran i do na gabe dalan marbarita na uli tu angka na humaliang.
Naeng tarida do hatimbulon I, marhite parsaoran ni angka na porseai. Ndang mura i di nasida, ai di ida
nasida do si Paulus na dilombuti di tingki mamboan Barita na Uli tu hut Pilippi ( Ul.Ap.16:19). Alai na
boi do ulahonon nasida molo rap dohot Kristus. Nacng dipatorang si Paulus tu nasida na niadopan nasida
i ma partontangan mangalo musu na naeng mangambat barita na uli i.

Panghonahonna tu Jamita.
Kristus do hangoluan jala laba nang hamatean
Jotjot do ayat on dipasahat halak di tingki mangapuli, alai ndang pola binoto sadia bagas do
panghangoluhon ni na mandok i di ayat on. Ai sude do jolma mabiar mate, umbahen sai marsantabi tu
angka jabu, marsantabi tu borngin dohot angka na asing. Marsiding situtu do hita tu hamatean, nang pe
ndang adong nanggo sahalak na boi malua so mamolus hamatean, ingkon sude tahe mamolus hamatean
pardagingon i. Alai na mambahen pos rohanta i ma di hata ni Yesus na di Johannes 11:25: Ahu do
haheheon dohot hangoluan, na mangolu do na porsea di Ahu atik pe mate ibana. Lapatanna, holan
Jesus do na boi menjamin dohot mangalehon hangoluan di jolma. Holan Jesus do na boi memastikan
hangoluan. Hea do adong sahalak parjamita manungkun ruas ni huria: "Boasa ndang mabiar jolma
modom?, sotung mate ibana tingki modom, jala laos so dungo be muse?” Dialusi ruas i do parjamita i di
bagasan haporseaon, didok ibana: umbahen ndang mabiar ahu modom amang, ai porsea do ahu
padungoon ni Debata do ahu marsogot, ninna. Laos songon i do angka na porsea umbahen ndang mabiar
mate, ai porsea do ibana padungoon manang sunggulan ni Debata do ibana sogot, ndang tahilalai sadia
leleng, songon na modom rupani sampe 6 jom, hape hira na satongkin do tahilala. Molo halak naung
mambahen Kristus gabe ngoluna, ndang mabiar be ibana mate. Alai angka halak na mangulahon
hajahaton tontu do ibana mabiar mate ala ni angka dosa na niulahonna. Hape nunga ro Kristus manaluhon
hamatean i, mangalehon jaminan di angka na porsea, paboa ndang hamatean ujung ni ngolu ni angka na
porsea, alai hangoluan salelenglelengna do.
Parsaoran ni ngolu ni na porsea
Songon warga Negara Indonesia hita tagohi do sude angka kewajibanta, i ma patandahon na warga
Negara na sah do hita. Alai aha do tapatuduhon paboa halak na porsea hita, jala na mian di bagasan
Ilarajaon ni Debata? Aha do tapatuduhon songon halak Kriston hita tu angka na humaliangta, suraon dope
tarida hasurunganta songon halak Kristen maradophon angka halak na so Kristen? Songon sahalak na
porsea hita, i ma molo mian hita di Barita na Uli. Ai halak na mian di Barita na Uli dipatuduhon i do di
panggulmiton ni ngoluna marparbuehon na denggan. Molo mangolu hita diparsaoran na denggan songon
na porsea. jala sude ngolunta gabe tiruan tu halak na humaliang. Molo taida nuaeng on, dia do imbar ni
halak Kristen sian na so Kristen? Suraon dope adong halobianta di haburjuon, di holong ni roha, di na
manghangoluhon Barita na Uli, sian na so Kristen? Bahkan adong dope halobian ni ngolu ni angka
pangula ni huria sian ruas ni huria? manang naung dos do, manang gabe sebalikna, ruas hira pangula ni
huria, jala pangula ni huria hira ruas. Tarida dope hatimbulon ni Debata di bagasan parsaoran ni halak
Kristen di tingki on? Hape molo tabereng sekilas, hira sarupa do parbadaon ni Kristen dohot na so
Kristen. Antong aha do na boi patuduhononta halobian ni halak Kristen na gabe tiruan tu na humaliang ,
asa gabe di hagigihon halak na asing pangalahona jala rade maniru pangalao ni halak Kristen. Amen