Türkmenistanyň ýokary häkimiýeti we dolandyryş edaralary
Türkmenistanda döwlet häkimiýeti ony kanun çykaryjy häkimiýete, ýerine
ýetiriji häkimiýete we kazyýet häkimiýetine bölmek ýörelgesi boýunça amala aşyrylýar. Türkmenistanyň iň ýokary wezipeli adamy Prezident bolup, ol döwletiň baştutanydyr. Türkmenistanyň Prezidenti ýerine ýetiriji häkimiýete hem baştutanlyk edýär. Türkmenistanyň çägindäki ýer, ýerasty baýlyklar, howa giňişligi, suw hem beýleki tebigy resurslar we deňiz ykdysady zonasy halkyň milli baýlygy we eýeçiligi bolup, Türkmenistanyň garaşsyzlygynyň maddy esasy bolup hyzmat edýärler.Garaşsyz döwlet, ýagny Dünýä bileleşiginiň deň hukukly agzasy hökmünde Türkmenistan öz daşary syýasatyny özbaşdak düzýär we durmuşa geçirýär, Birleşen Milletler Guramasyna we beýleki halkara guramalaryna gös- göni girýär, diplomatik, konsullyk, söwda we beýleki gatnaşyklary amala aşyrýar, olar bilen alyşýar, halkara şertnamalaryny baglaşýar.Türkmenistanyň öz döwlet nyşanlary: baýdagy, tugrasy, senasy bar.Häzirki wagtda Türkmenistan döwletimiz, sözüň doly manysynda, Özygtyýarly hemde Garaşsyz döwletdir. Özygtyýarlylyk içeri we daşary meseleleriň özbaşdak çözülmegidir. Biziň hemmämiz bulary gündelik durmuşymyzda görýäris. Häkimiýet we hökümet eda- ralarynyň maslahatlarynda döwlete, halkymyza dahylly meseleleriň dürli görnüşlerine garalýar. Olaryň ählisinde halkymyzyň bähbitlerinden ugur alynýar. Şonuň üçin hem häzirki wagtda döwlet Baştutanymyz döwletliligi berkarar etmek, jemgyýetde syýasy durnuklylygy berkitmek, kanunlara sarpa goýmak, ynsanperwerlik we adalatlylyk ýörelgelerini durmuşa ornaşdyrmak ýaly döwlet ähmiýetli meseleleri esasy wezipe edip goýdy. Garaşsyz, Bitarap Türkmenistan döwletimiziň hukuk binýady hasda berkeýär. Ýurdumyzyň Esasy Kanuny kazyýet häkimiýetiniň garaşsyzlygyny üpjün etdi, hukuk tertibini pugtalandyrmakda onuň ornuny kesgitledi. Esasy Kanunymyzyň VI bölümi „Kazyýet häkimiýeti“ diýlip atlandyrylýar. Indi biziň döwletimizde milli kazyýet gurluşyny mundan beýläk-de ösdürmegiň ileri tutulýan esasy ugurlary kesgitlenildi. 2009-njy ýylyň 15-nji awgustynda „Kazyýet hakynda“ Türkmenistanyň kanuny kabul edildi. Türkmenistanyň Konstitusiýasyna laýyklykda Türkmenistanda adyl kazyýetlik diňe kazyýet tarapyndan amala aşyrylýar. Türkmenistanda kazyýet adyl kazyýetligi amala aşyrmaga çalşyp, döwletimizde bellenilen konstitusion gurluşy, raýatlaryň hukuklaryny we azatlyklaryny, dolandyryş edaralarynyň, kärhanalaryň, edaralaryň we guramalaryň kanuny bähbitlerini hem-de hukuklaryny goraýar. Kazyýetiň alyp barýan bütin işi kanunçylygy we hukuk tertibini üpjün etmäge, hukuk tertibiniň bozulmagyna ýol açan sebäpleri we şertleri ýok etmäge gönükdirilendir. „Kazyýet hakynda“ Türkmenistanyň Kanunynyň 14-nji maddasyna laýyklykda Türkmenistanda Türkmenistanyň Ýokary kazyýeti, Türkmenistanyň Arbitraž kazyýeti, welaýat kazyýetleri we welaýat hukukly şäher kazyýetleri, şeýle hem etrap kazyýetleri we etrap hukukly şäher kazyýetleri hereket edýärler. Kazylar garaşsyzdyrlar, olar diňe kanuna tabyndyrlar we özleriniň içki ynam-ygtykadyna gollanýarlar. Kazylaryň işine hiç kimiň gatyşmagyna ýol berilmeýär, oňa gatyşylanlygy üçin kanun esa- synda jogapkärçilik çekdirilýär. Türkmenistanda kazylaryň hemmesi Türkmenistanyň Prezidenti tarapyndan bäş ýyl möhlete bellenilýär. Kazyýet işini ýöretmek döwlet dilinde alnyp barylýar. Eger-de gatnaşýan taraplaryň biri türkmen dilini bilmeýän bolsa, olar terjimeçi bilen üpjün edilýär. Ähli kazyýetlerde işler açyk seredilýär. Işiň ýapyk mejlisde seredilmegine diňe kanunda göz öňüne tutulan halatlarynda ýol berilýär. Taraplar Türkmenistanyň ähli kazyýetleriniň çykaran hökümleri, çözgütleri we beýleki kararlary barada şikaýat edip bilýärler. Kazyýet häkimiýetiniň ähli işi demokratik, hukuk, dünýewi we Bitarap döwleti her taraplaýyn berkitmäge, adalatlylygy ornaşdyrmaga, raýatary kanunlary anyk we gyşarnyksyz ýerine ýetirmek ruhunda terbiýelemäge, raýatlaryň abraýyna we mertebesine, hukuklaryna hormat goýmaga gönükdirilendir. Türkmenistanyň kazyýet hakyndaky kanunçylygy Türkmenistanyň Konstitusiýasyndan, şu Kanundan we Türkmenistanda kazyýet önümçiliginiň we kazylaryň hukuk ýagdaýynyň meselelerini düzgünleşdirýän beýleki kanunlardan ybaratdyr. Türkmenistanda Türkmenistanyň Ýokary kazyýeti, Türkmenistanyň Arbitraž kazyýeti, welaýat kazyýetleri we welaýat hukukly şäher kazyýetleri, şeýle hem etrap kazyýetleri we etrap hukukly şäher kazyýetleri hereket edýärler. Türkmenistanda kanunlaryň ýerine ýetirilişine gözegçilik edýän ýörite prokuratura edarasy hereket edýär. Bu barada Türkmenistanyň Konstitusiýasynyň VII bölüminde aýdylyp geçilýär. Prokuratura özüniň işini Esasy Kanunyň we 2009-njy ýylyň 15-nji awgustynda kabul edilen „Türkmenistanyň Prokuraturasy hakyndaky“ Kanunyň esasynda alyp barýar (Bu kanun 2010-njy ýylyň 1-nji ýanwaryndan güýje girdi). Kanunlaryň ýerine ýetirilişine gözegçilik etmegiň mak- sady kanunyň hemme zatdan ýokary tutulmagyny üpjün etmekden we kanunçylygy pugtalandyrmakdan ybaratdyr. Türkmenistanyň Konstitusiýasyna laýyklykda Türkmenistanyň çäginde kanunlaryň, Prezidentiň, Ministrler Kabinetiniň namalarynyň döwlet dolandyryş hem--de gözegçilik, harby dolandyryş, ýerine ýetiriji ýerli we ýerli öz--özüňi dolandyryş edaralary tarapyndan, eýeçiligiň ähli görnüşlerine degişli kärhanalar, edaralar, guramalar, birleşikler tarapyndan, telekeçilik işi bilen meşgullanýan adamlar, jemgyýetçilik birleşikleri, wezipeli adamlar hem-de raýatlar tarapyndan takyk we birmeňzeş berjaý edilişine gözegçilik etmek işi Türkmenistanyň Baş prokurorynyň we oňa tabyn prokurorlaryň üstüne ýüklenilýär.