PAIDÁISH 1

1Ḳhudá ne ibtidá meṉ zamín o ásmán ko paidá kiyá. 2Aur zamín wírán aur sunsán
thí; aur gahráo ke úpar andherá thá: aur Ḳhudá kí rúh pání kí sath par jumbish kartí
thí. 3Aur Ḳhudá ne kahá, ki Raushní ho já: aur raushní ho gayí. 4Aur Ḳhudá ne dekhá
ki raushní achchhí hai; aur Ḳhudá ne raushní ko táríkí se judá kiyá. 5Aur Ḳhudá ne
raushní ko to Din kahá, aur táríkí ko Rát. Aur shám húí aur subh húí. So pahlá din
húá.
6Aur Ḳhudá ne kahá, ki Pániyoṉ ke darmiyán fazá ho, táki pání pání se judá ho
jáe. 7Pas Ḳhudá ne fazá ko banáyá, aur fazá ke níche ke pání ko fazá ke úpar ke pání
se judá kiyá: aur aisá hí húá. 8Aur Ḳhudá ne fazá ko Ásmán kahá. Aur shám húí aur
subh húí. So dúsrá din húá.
9Aur Ḳhudá ne kahá, ki Ásmán ke níche ká pání ek jagah jama‘ ho, ki ḳhushkí
nazar áe: aur aisá hí húá. 10Aur Ḳhudá ne ḳhushkí ko Zamín kahá; aur jo pání jama‘
ho gayá thá us ko Samundar. Aur Ḳhudá ne dekhá ki achchhá hai. 11Aur Ḳhudá ne
kahá, ki Zamín ghás, aur bíjdár búṭiyoṉ ko, aur phaldár daraḳhtoṉ ko, jo apní apní jins
ke muwáfiq phaleṉ, aur jo zamín par apne áp hí meṉ bíj rakkheṉ, ugáe: aur aisá hí
húá. 12Tab zamín ne ghás, aur búṭiyoṉ ko, jo apní apní jins ke muwáfiq bíj rakkheṉ,
aur phaldár daraḳhtoṉ ko, jin ke bíj un kí jins ke muwáfiq un meṉ haiṉ, ugáyá: aur
Ḳhudá ne dekhá ki achchhá hai. 13Aur shám húí aur subh húí. So tísrá din húá.
14Aur Ḳhudá ne kahá, ki Falak par naiyir hoṉ, ki din ko rát se alag kareṉ; aur wuh
nishánoṉ, aur zamánoṉ, aur dinoṉ, aur barasoṉ kí imtiyáz ke liye hoṉ; 15aur wuh falak
par anwár ke liye hoṉ, ki zamín par raushní ḍáleṉ: aur aisá hí húá. 16So Ḳhudá ne do
baṛe naiyir banáe; ek naiyir i akbar, ki din par hukm kare, aur ek naiyir i asg̣ar, ki rát
par hukm kare: aur us ne sitároṉ ko bhí banáyá. 17Aur Ḳhudá ne un ko falak par
rakkhá ki zamín par raushní ḍáleṉ, 18aur din par aur rát par hukm kareṉ, aur ujále ko
andhere se judá kareṉ: aur Ḳhudá ne dekhá ki achchhá hai. 19Aur shám húí aur subh
húí. So chauthá din húá.
20Aur Ḳhudá ne kahá, ki Pání jándároṉ ko kasrat se paidá kare, aur parande zamín
ke úpar fazá meṉ uṛeṉ. 21Aur Ḳhudá ne baṛe baṛe daryáí jánwaroṉ ko, aur har qism ke
jándár ko, jo pání se bakasrat paidá húe the, un kí jins ke muwáfiq, aur har qism ke
parandoṉ ko, un kí jins ke muwáfiq, paidá kiyá: aur Ḳhudá ne dekhá ki achchhá
hai. 22Aur Ḳhudá ne un ko yih kahkar barakat dí, ki Phalo, aur baṛho, aur in
samundaroṉ ke pání ko bhar do, aur parande zamín par bahut baṛh jáeṉ. 23Aur shám
húí aur subh húí. So páṉchwáṉ din húá.
24Aur Ḳhudá ne kahá, ki Zamín jándároṉ ko, un kí jins ke muwáfiq, chaupáye, aur
reṉgnewále jándár, aur janglí jánwar, un kí jins ke muwáfiq, paidá kare: aur aisá hí
húá. 25Aur Ḳhudá ne janglí jánwaroṉ aur chaupáyoṉ ko un kí jins ke muwáfiq, aur
zamín ke reṉgnewále jándároṉ ko, un kí jins ke muwáfiq banáyá: aur Ḳhudá ne dekhá
ki achchhá hai. 26Phir Ḳhudá ne kahá, ki Ham insán ko apní súrat par apní shabíh kí
mánind banáeṉ; aur wuh samundar kí machhliyoṉ, aur ásmán ke parandoṉ, aur
chaupáyoṉ, aur tamám zamín, aur sab jándároṉ par jo zamín par reṉgte haiṉ, iḳhtiyár
rakkheṉ. 27Aur Ḳhudá ne insán ko apní súrat par paidá kiyá, Ḳhudá ki súrat par us ko
paidá kiyá; nar o nárí un ko paidá kiyá. 28Aur Ḳhudá ne un ko barakat dí, aur kahá, ki
Phalo, aur baṛho, aur zamín ko ma‘múr o mahkúm karo: aur samundar kí machhliyoṉ,
aur hawá ke parandoṉ, aur kull jánwaroṉ par jo zamín par chalte haiṉ, iḳhtiyár
rakkho. 29Aur Ḳhudá ne kahá, ki Dekho, maiṉ tamám rú e zamín kí kull bíjdár sabzí
aur har daraḳht, jis meṉ us ká bíjdár phal ho, tum ko detá húṉ; yih tumháre kháne ko
hoṉ: 30aur zamín ke kull jánwaroṉ ke liye, aur hawá ke kull parandoṉ ke liye, aur un
sab ke liye, jo zamín par reṉgnewále haiṉ, jin meṉ zindagí ká dam hai, kull harí
búṭiyáṉ kháne ko detá húṉ. Aur aisá hí húá. 31Aur Ḳhudá ne sab par, jo us ne banáyá
thá, nazar kí, aur dekhá, ki bahut achchhá hai. Aur shám húí aur subh húí. So chhaṭá
din húá.
 PAIDÁISH 2
1So ásmán aur zamín aur un ke kull lashkar ká banáná ḳhatm húá. 2Aur Ḳhudá ne
apne kám ko, jise wuh kartá thá sátweṉ din ḳhatm kiyá, aur apne sáre kám se jise wuh
kar rahá thá sátweṉ din fárig̣ húá. 3Aur Ḳhudá ne sátweṉ din ko barakat dí, aur use
muqaddas ṭhahráyá; kyúṉki us meṉ Ḳhudá sárí káinát se jise us ne paidá kiyá aur
banáyá fárig̣ húá.
4Yih hai ásmán aur zamín kí paidáish, jab wuh ḳhalq húe, jis
din ḲHUDÁWAND Ḳhudá ne zamín aur ásmán ko banáyá. 5Aur zamín par ab tak khet
ká koí paudá na thá, aur na maidán kí koí sabzí ab tak ugí thí,
kyúṉki ḲHUDÁWAND Ḳhudá ne zamín par pání nahíṉ barsáyá thá, aur na zamín jotne
ko koí insán thá, 6balki zamín se kuhar uṭhtí thí, aur tamám rú e zamín ko seráb kartí
thí. 7Aur ḲHUDÁWAND Ḳhudá ne zamín kí miṭṭí se insán ko banáyá, aur us ke nathnoṉ
meṉ zindagí ká dam phúṉká; to insán jítí ján húá. 8Aur ḲHUDÁWAND Ḳhudá ne
mashriq kí taraf ‘Adan meṉ ek bág̣ lagáyá; aur insán ko, jise us ne banáyá thá, waháṉ
rakkhá. 9Aur ḲHUDÁWAND Ḳhudá ne har daraḳht ko, jo dekhne meṉ ḳhushnumá, aur
kháne ke liye achchhá thá zamín se ugáyá, aur bág̣ ke bích meṉ hayát ká daraḳht, aur
nek o bad kí pahchán ká daraḳht bhí lagáyá. 10Aur ‘Adan se ek daryá bág̣ ke seráb
karne ko niklá; aur waháṉ se chár nadiyoṉ meṉ taqsím húá. 11Pahlí ká nám Faisún
hai, jo Hawílah kí sárí zamín ko jaháṉ soná hotá hai, ghere húe hai. 12Aur us zamín ká
soná chokhá hai; aur waháṉ motí aur sang i sulaimání bhí haiṉ. 13Aur dúsrí nadí ká
nám Jaihún hai, jo Kúsh kí sárí zamín ko ghere húe hai. 14Aur tísrí nadí ká nám Dijlah
hai, jo Asúr ke mashriq ko játí. Aur chauthí nadí ká nám Furát
hai. 15Aur ḲHUDÁWAND Ḳhudá ne Ádam ko lekar bág̣ i ‘Adan meṉ rakkhá, ki us kí
bág̣bání aur nigahbání kare. 16Aur ḲHUDÁWAND Ḳhudá ne Ádam ko hukm diyá aur
kahá, ki Tú bág̣ ke har daraḳht ká phal be rok ṭok khá saktá hai: 17lekin nek o bad kí
pahchán ke daraḳht ká kabhí na kháná: kyúṉki jis roz tú ne us meṉ se kháyá, tú mará.
 18Aur ḲHUDÁWAND Ḳhudá ne kahá, ki Ádam ká akelá rahná achchhá nahíṉ; maiṉ
us ke liye ek madadgár us kí mánind banáúṉgá. 19Aur ḲHUDÁWAND Ḳhudá ne kull
dashtí jánwar aur hawá ke kull parande miṭṭí se banáe aur un ko Ádam ke pás láyá ki
dekhe, ki wuh un ke kyá nám rakhtá hai; aur Ádam ne jis jánwar ko kahá, wuhí us ká
nám ṭhahrá. 20Aur Ádam ne kull chaupáyoṉ, aur hawá ke parandoṉ, aur kull dashtí
jánwaron ke nám rakkhe; par Ádam ke liye koí madadgár us kí mánind na
milá. 21Aur ḲHUDÁWAND Ḳhudá ne Ádam par gahrí nínd bhejí, aur wuh so gayá: aur
us ne us kí pasliyoṉ meṉ se ek ko nikál liyá, aur us kí jagah gosht bhar
diyá; 22aur ḲHUDÁWAND Ḳhudá us paslí se, jo us ne Ádam men se nikálí thí, ek ‘aurat
banákar use Ádam ke pás láyá. 23Aur Ádam ne kahá, ki Yih to ab merí haḍḍiyoṉ meṉ
se haḍḍí, aur mere gosht meṉ se gosht hai: is liye wuh Nárí kahláegí, kyúṉki wuh Nar
se nikálí gayí. 24Is wáste mard apne máṉ báp ko chhoṛegá, aur apní bíwí se milá
rahegá: aur wuh ek tan hoṉge. 25Aur Ádam aur us kí bíwí, donoṉ nange the, aur
sharmáte na the.

PAIDÁISH 3
1Aur sáṉp kull dashtí jánwaroṉ se, jin ko ḲHUDÁWAND Ḳhudá ne banáyá thá,
chálák thá. Aur us ne ‘aurat se kahá, Kyá wáqa‘í Ḳhudá ne kahá hai, ki Bág̣ ke kisí
daraḳht ká phal tum na kháná? 2‘Aurat ne sáṉp se kahá, ki Bág̣ ke daraḳhtoṉ ká phal
to ham kháte haiṉ: 3par jo daraḳht bág ke bích meṉ hai, us ke phal kí bábat Ḳhudá ne
kahá hai, ki Tum na to use kháná, aur na chhúná, warna mar jáoge. 4Tab sáṉp ne
‘aurat se kahá, ki Tum hargiz na maroge: 5balki Ḳhudá jántá hai, ki jis din tum use
kháoge, tumhárí áṉkheṉ khul jáeṉgí, aur tum Ḳhudá kí mánind nek o bad ke
jánnewále ban jáoge. 6‘Aurat ne jo dekhá, ki wuh daraḳht kháne ke liye achchhá, aur
áṉkhoṉ ko ḳhushnumá ma‘lúm hotá hai, aur ‘aql baḳhshne ke liye ḳhúb hai, to us ke
phal meṉ se liyá, aur kháyá; aur apne shauhar ko bhí diyá, aur us ne kháyá. 7Tab
donoṉ kí áṉkheṉ khul gayíṉ, aur un ko ma‘lúm húá ki wuh nange haiṉ; aur unhoṉ ne
anjír ke pattoṉ ko síkar apne liye lungiyáṉ banáíṉ. 8Aur unhoṉ
ne ḲHUDÁWAND Ḳhudá kí áwáz, jo ṭhanḍe waqt bág̣ meṉ phirtá thá, suní: aur Ádam
aur us kí bíwí ne áp ko ḲHUDÁWAND Ḳhudá ke huzúr se bág̣ ke daraḳhtoṉ meṉ
chhipáyá. 9Tab ḲHUDÁWAND Ḳhudá ne Ádam ko pukárá, aur us se kahá, ki Tú kaháṉ
hai? 10Us ne kahá, Maiṉ ne bág̣ meṉ terí áwáz suní, aur maiṉ ḍará, kyúṉki maiṉ nangá
thá; aur maiṉ ne apne áp ko chhipáyá. 11Us ne kahá, Tujhe kis ne batáyá ki tú nangá
hai? Kyá tú ne us daraḳht ká phal kháyá, jis kí bábat maiṉ ne tujh ko hukm diyá thá, ki
use na kháná? 12Ádam ne kahá, ki Jis ‘aurat ko tú ne mere sáth kiyá hai, us ne mujhe
us daraḳht ká phal diyá, aur maiṉ ne kháyá. 13Tab ḲHUDÁWAND Ḳhudá ne ‘aurat se
kahá, ki Tú ne yih kyá kiyá? ‘Aurat ne kahá, ki Sáṉp ne mujh ko bahkáyá, to maiṉ ne
kháyá. 14Aur ḲHUDÁWAND Ḳhudá ne sáṉp se kahá, Is liye ki tú ne yih kiyá, tú sab
chaupáyoṉ aur dashtí jánwaroṉ meṉ mal‘ún ṭhahrá; tú apne peṭ ke bal chalegá, aur
apní ‘umr bhar ḳhák cháṭegá: 15aur maiṉ tere aur ‘aurat ke darmiyán aur terí nasl aur
‘aurat kí nasl ke darmiyán ‘adáwat ḍálúṉgá; wuh tere sir ko kuchlegá, aur tú us kí eṛí
par káṭegá. 16Phir us ne ‘aurat se kahá, ki Maiṉ tere dard i haml ko bahut baṛháúṉgá;
tú dard ke sáth bachche janegí; aur terí rag̣bat apne shauhar kí taraf hogí, aur wuh tujh
par hukúmat karegá. 17Aur Ádam se us ne kahá, Chúṉki tú ne apní bíwí kí bát mání,
aur us daraḳht ká phal kháyá, jis kí bábat maiṉ ne tujhe hukm diyá thá, ki Use na
kháná: is liye zamín tere sabab se la‘natí húí; mashaqqat ke sáth tú apní ‘umr bhar us
kí paidáwár kháegá; 18aur wuh tere liye káṉṭe aur úṉṭkaṭáre ugáegí; aur tú khet kí
sabzí kháegá; 19tú apne muṉh ke pasíne kí roṭí kháegá, jab tak ki zamín meṉ tú phir
lauṭ na jáe; is liye ki tú us se nikálá gayá hai: kyúṉki tú ḳhák hai, aur ḳhák meṉ phir
lauṭ jáegá. 20Aur Ádam ne apní bíwí ká nám Hawwá rakkhá; is liye ki wuh sab zindoṉ
kí máṉ hai. 21Aur ḲHUDÁWAND Ḳhudá ne Ádam aur us kí bíwí ke wáste chamṛe ke
kurte banákar un ko pahináe.
22Aur ḲHUDÁWAND Ḳhudá ne kahá, Dekho, insán nek o bad kí pahchán meṉ ham
meṉ se ek kí mánind ho gayá: ab kahíṉ aisá na ho, ki wuh apná háth baṛháe, aur hayát
ke daraḳht se bhí kuchh lekar kháe, aur hamesha jítá rahe, 23is
liye ḲHUDÁWAND Ḳhudá ne us ko bág i ‘Adan se báhar kar diyá, táki wuh us zamín
kí, jis meṉ se wuh liyá gayá thá, khetí kare. 24Chunáṉchi us ne Ádam ko nikál diyá;
aur bág i ‘Adan ke mashriq kí taraf karúbíoṉ ko aur chaugird ghúmnewálí shu‘lazan
talwár ko rakkhá, ki wuh zindagí ke daraḳht kí ráh kí hifázat kareṉ.

PAIDÁISH 4
1Aur Ádam apní bíwí Hawwá ke pás gayá; aur wuh hámila húí, aur us ke Qáin
paidá húá. Tab us ne kahá, Mujhe ḲHUDÁWAND se ek mard milá. 2Phir Qáin ká bháí
Hábil paidá húá. Aur Hábil bheṛ bakriyoṉ ká charwáhá, aur Qáin kisán thá. 3Chand
roz ke ba‘d yúṉ húá, ki Qáin apne khet ke phal ká hadiya ḲHUDÁWAND ke wáste
láyá. 4Aur Hábil bhí apní bheṛ bakriyoṉ ke kuchh pahlauṭhe bachchoṉ ká aur kuchh in
kí charbí ká hadiya láyá. Aur ḲHUDÁWAND ne Hábil ko, aur us ke hadiya ko, manzúr
kiyá: 5par Qáin ko, aur us ke hadiya ko, manzúr na kiyá. Is liye Qáin niháyat
g̣azabnák húá aur us ká muṉh bigṛá. 6Aur ḲHUDÁWAND ne Qáin se kahá, Tú kyúṉ
g̣azabnák húá? aur terá muṉh kyúṉ bigṛá húá hai? 7Agar tú bhalá kare, to kyá tú
maqbúl na hogá? aur agar tú bhalá na kare, to gunáh darwáze par dabká baiṭhá hai, aur
terá mushtáq hai, par tú us par g̣álib á. 8Aur Qáin ne apne bháí Hábil ko kuchh kahá:
aur jab wuh donoṉ khet meṉ the, to yúṉ húá, ki Qáin ne apne bháí Hábil par hamla
kiyá, aur use qatl kar ḍálá. 9Tab ḲHUDÁWAND ne Qáin se kahá, ki Terá bháí Hábil
 kaháṉ hai? Us ne kahá, Mujhe ma‘lúm nahíṉ: kyá maiṉ apne bháí ká muháfiz
húṉ? 10Phir us ne kahá, ki Tú ne yih kyá kiyá? tere bháí ká ḳhún zamín se mujh ko
pukártá hai. 11Aur ab tú zamín kí taraf se la‘natí húá, jis ne apná muṉh pasárá, ki tere
háth se tere bháí ká ḳhún le; 12jab tú zamín ko jotegá, to wuh ab tujhe apní paidáwár
na degí; aur zamín par tú ḳhánaḳharáb aur áwára hogá. 13Tab Qáin
ne ḲHUDÁWAND se kahá, ki Merí sazá bardásht se báhar hai. 14Dekh, áj tú ne mujhe
rú e zamín se nikál diyá hai, aur maiṉ tere huzúr se rúposh ho jáúṉgá; aur zamín par
ḳhánaḳharáb aur áwára rahúṉgá; aur aisá hogá, ki jo koí mujhe páegá qatl kar
ḍálegá. 15Tab ḲHUDÁWAND ne us se kahá, Nahíṉ, balki jo Qáin ko qatl kare us se sát
guná badla liyá jáegá. Aur ḲHUDÁWAND ne Qáin ke liye ek nishán ṭhahráyá, ki koí
use pákar már na ḍále.
16So Qáin ḲHUDÁWAND ke huzúr se nikal gayá, aur ‘Adan ke mashriq kí taraf, Núd
ke ‘iláqe meṉ, já basá. 17Aur Qáin apní bíwí ke pás gayá, aur wuh hámila húí, aur us
ke Hanúk paidá húá; aur us ne ek shahr basáyá, aur us ká nám, apne beṭe ke nám par
Hanúk rakkhá. 18Aur Hanúk se ‘Írád paidá húá: aur ‘Írád se Mahúyáel paidá húá: aur
Mahúyáel se Matúsáel paidá húá: aur Matúsáel se Lamak paidá húá. 19Aur Lamak do
‘aurateṉ biyáh láyá: ek ká nám ‘Adah, aur dúsrí ká nám Zillah thá. 20Aur ‘Adah se
Yábal paidá húá: wuh un ká báp thá jo ḳhaimoṉ meṉ rahte aur jánwar pálte
haiṉ. 21Aur us ke bháí ká nám Yúbal thá: wuh bín aur báṉslí bajánewáloṉ ká báp
thá. 22Aur Zillah ke bhí Túbalqáin paidá húá, jo pítal aur lohe ke sab tez hathyároṉ ká
banánewálá thá: aur Na‘mah Túbalqáin kí bahin thí. 23Aur Lamak ne apní bíwiyoṉ se
kahá, ki
Ai ‘Adah aur Zillah, merí bát suno;
Ai Lamak kí bíwiyo, mere suḳhan par kán lagáo:
Maiṉ ne ek mard ko jis ne mujhe zaḳhmí kiyá már ḍálá
Aur ek jawán ko jis ne mere choṭ lagáí qatl kar ḍálá.
24Agar Qáin ká badla sát guná liyá jáegá,
To Lamak ká sattar aur sát guná.
25Aur Ádam phir apní bíwí ke pás gayá aur us ke ek âur beṭá húá aur us ká nám Set
rakkhá: aur kahne lagí, ki Ḳhudá ne Hábil ke ‘iwaz, jis ko Qáin ne qatl kiyá, mujhe
dúsrá farzand diyá. 26Aur Set ke háṉ bhí ek beṭá paidá húá, jis ká nám us ne Anús
rakkhá: us waqt se log YAHOWÁH ká nám lekar du‘á karne lage.

PAIDÁISH 5
1Yih Ádam ká nasabnáma hai. Jis din Ḳhudá ne Ádam ko paidá kiyá, to use apní
shabíh par banáyá; 2nar aur nárí un ko paidá kiyá; aur un ko barakat dí, aur jis roz
wuh ḳhalq húe un ká nám Ádam rakkhá. 3Aur Ádam ek sau tís baras ká thá, jab us kí
súrat o shabíh ká ek beṭá us ke háṉ paidá húá; aur us ne us ká nám Set rakkhá: 4aur
Set kí paidáish ke ba‘d Ádam áṭh sau baras jítá rahá: aur us se beṭe aur beṭiyáṉ paidá
húíṉ: 5aur Ádam kí kull ‘umr nau sau tís baras kí húí: tab wuh mará.
6Aur Set ek sau páṉch baras ká thá, jab us se Anús paidá húá. 7Aur Anús kí
paidáish ke ba‘d Set áṭh sau sát baras jítá rahá, aur us se beṭe aur beṭiyáṉ paidá
húíṉ: 8aur Set kí kull ‘umr nau sau bárah baras kí húí: tab wuh mará.
9Aur Anús nawwe baras ká thá, jab us se Qínán paidá húá: 10aur Qínán kí paidáish
ke ba‘d Anús áṭh sau pandrah baras jítá rahá, aur us se beṭe aur beṭiyáṉ paidá
húíṉ: 11aur Anús kí kull ‘umr nau sau páṉch baras kí húí: tab wuh mará.
12Aur Qínán sattar baras ká thá, jab us se Mahalalel paidá húá: 13aur Mahalalel kí
paidáish ke ba‘d Qínán áṭh sau chálís baras jítá rahá, aur us se beṭe aur beṭiyáṉ paidá
húíṉ: 14aur Qínán kí kull ‘umr nau sau das baras kí húí: tab wuh mará.
 15Aur Mahalalel paiṉsaṭh baras ká thá, jab us se Yárid paidá húá: 16aur Yárid kí
paidáish ke ba‘d Mahalalel áṭh sau tís baras jítá rahá, aur us se beṭe aur beṭiyáṉ paidá
húíṉ: 17aur Mahalalel ki kull ‘umr áṭh sau pachánawe baras kí húí: tab wuh mará.
18Aur Yárid ek sau básaṭh baras ká tha, jab us se Hanúk paidá húá: 19aur Hanúk kí
paidáish ke ba‘d Yárid áṭh sau baras jítá rahá, aur us se beṭe aur beṭiyáṉ paidá
húíṉ: 20aur Yárid kí kull ‘umr nau sau básaṭh baras kí húí: tab wuh mará.
21Aur Hanúk paiṉsaṭh baras ká thá, jab us se Matúsilah paidá húá: 22aur Matúsilah
kí paidáish ke ba‘d Hanúk tín sau baras ták Ḳhudá ke sáth sáth chaltá rahá, aur us se
beṭe aur beṭiyáṉ paidá húíṉ: 23aur Hanúk kí kull ‘umr tín sau paiṉsaṭh baras kí
húí: 24aur Hanúk Ḳhudá ke sáth sáth chaltá rahá: aur wuh g̣áib ho gayá: kyúṉki Ḳhudá
ne use uṭhá liyá.
25Aur Matúsilah ek sau satásí baras ká thá, jab us se Lamak paidá húá: 26aur Lamak
kí paidáish ke ba‘d Matúsilah sát sau byásí baras jítá rahá, aur us se beṭe aur beṭiyáṉ
paidá húíṉ: 27aur Matúsilah kí kull ‘umr nau sau unhattar baras kí húí; tab wuh mará.
28Aur Lamak ek sau byásí baras ká thá, jab us se ek beṭá paidá húá: 29aur us ne us
ká nám Núh rakkhá, aur kahá, ki Yih hamáre háthoṉ kí mihnat aur mashaqqat se, jo
zamín ke sabab se hai, jis par Ḳhudá ne la‘nat kí hai, hameṉ árám degá. 30Aur Núh kí
paidáish ke ba‘d Lamak páṉch sau pachánawe baras jítá rahá, aur us se beṭe aur
beṭiyáṉ paidá húíṉ: 31aur Lamak kí kull ‘umr sát sau sathattar baras kí húí: tab wuh
mará.
32Aur Núh páṉch sau baras ká thá, jab us se Sim, Hám, aur Yáfat paidá húe.

PAIDÁISH 6
1Jab rú e zamín par ádmí bahut baṛhne lage, aur un ke beṭiyáṉ paidá húíṉ, 2to
Ḳhudá ke beṭoṉ ne ádmí kí beṭiyoṉ ko dekhá, ki wuh ḳhúbsúrat haiṉ; aur jin ko unhoṉ
ne chuná un se biyáh kar liyá. 3Tab ḲHUDÁWAND ne kahá, ki Merí rúh insán ke sáth
hamesha muzáhamat na kartí rahegí, kyúṉki wuh bhí to bashar hai; taubhí us kí ‘umr
ek sau bís baras kí hogí. 4Un dinoṉ meṉ zamín par jabbár the; aur ba‘d meṉ jab Ḳhudá
ke beṭe ádmí kí beṭiyoṉ ke pás gaye, to un ke liye un se aulád húí. Yihí qadím zamáne
ke súrmá haiṉ, jo baṛe námwar húe haiṉ. 5Aur ḲHUDÁWAND ne dekhá ki zamín par
insán kí badí bahut baṛh gayí, aur us ke dil ke tasawwur aur ḳhayál sadá bure hí hote
haiṉ. 6Tab ḲHUDÁWAND zamín par insán ke paidá karne se malúl húá aur dil meṉ
g̣am kiyá. 7Aur ḲHUDÁWAND ne kahá, ki Maiṉ insán ko, jise maiṉ ne paidá kiyá, rú e
zamín par se miṭá ḍálúṉgá; insán se lekar haiwán aur reṉgnewále jándár aur hawá ke
parandoṉ tak; kyúṉki maiṉ un ke banáne se malúl húṉ. 8Magar Núh ḲHUDÁWAND kí
nazar meṉ maqbúl húá.
9Núh ká nasabnáma yih hai: Núh mard i rástbáz aur apne zamáne ke logoṉ meṉ
be‘aib thá, aur Núh Ḳhudá ke sáth sáth chaltá rahá. 10Aur us se tín beṭe, Sim, Hám,
aur Yáfat paidá húe. 11Par zamín Ḳhudá ke áge nárást ho gayí thí, aur wuh zulm se
bharí thí. 12Aur Ḳhudá ne zamín par nazar kí, aur dekhá, ki wuh nárást ho gayí hai;
kyúṉki har bashar ne zamín par apná taríqa bigáṛ liyá thá.
13Aur Ḳhudá ne Núh se kahá, ki Tamám bashar ká ḳhátima mere sámne á pahuṉchá
hai; kyúṉki un ke sabab se zamín zulm se bhar gayí; so dekh, maiṉ zamín samet un ko
halák karúṉgá. 14Tú gophar kí lakṛí kí ek kishtí apne liye baná; us kishtí meṉ
koṭhriyáṉ taiyár karná, aur us ke andar aur báhar rál lagáná. 15Aur aisá karná ki kishtí
kí lambáí tín sau háth, us kí chauṛáí pachás háth, aur us kí úṉcháí tís háth ho. 16Aur us
kishtí meṉ ek raushandán banáná, aur úpar se háth bhar chhoṛkar use ḳhatm kar dená;
aur us kishtí ká darwáza us ke pahlú meṉ rakhná, aur us meṉ tín darje banáná, nichlá,
dúsrá, aur tísrá. 17Aur dekh, maiṉ ḳhud zamín par pání ká túfán lánewálá húṉ, táki har
bashar ko, jis meṉ zindagí ká dam hai, dunyá se halák kar ḍálúṉ: aur sab jo zamín par
haiṉ mar jáeṉge. 18Par tere sáth maiṉ apná ‘ahd qáim karúṉgá; aur tú kishtí meṉ jáná,
tú, aur tere sáth tere beṭe, aur terí bíwí, aur tere beṭoṉ kí bíwiyáṉ. 19Aur jánwaroṉ kí
har qism meṉ se do do apne sáth kishtí meṉ le lená, ki wuh tere sáth jíte bacheṉ; wuh
nar o máda hoṉ. 20Aur parandoṉ kí har qism meṉ se, aur charandoṉ kí har qism meṉ
se, aur zamín ke reṉgnewáloṉ kí har qism meṉ se do do tere pás áeṉ, táki wuh jíte
bacheṉ. 21Aur tú har tarah ke kháne kí chíz lekar apne pás jama‘ kar lená, kyúṉki yihí
tere aur un ke kháne ko hogá. 22Aur Núh ne yúṉ hí kiyá; jaisá Ḳhudá ne use hukm
diyá thá, waisá hí ‘amal kiyá.

PAIDÁISH 7
1Aur ḲHUDÁWAND ne Núh se kahá, ki Tú apne púre ḳhándán ke sáth kishtí meṉ á;
kyúṉki maiṉ ne tujhí ko apne sámne is zamáne meṉ rástbáz dekhá hai. 2Kull pák
jánwaroṉ meṉ se sát sát, nar aur un kí máda: aur un meṉ se jo pák nahíṉ haiṉ, do do,
nar aur un kí máda, apne sáth le lená. 3Aur hawá ke parandoṉ meṉ se bhí, sát sát, nar
o máda, lená; táki tamám zamín par un kí nasl báqí rahe. 4Kyúṉki sát din ke ba‘d
maiṉ zamín par chálís din aur chálís rát pání barsáúṉgá, aur har jándár shai ko, jise
maiṉ ne banáyá, zamín par se miṭá ḍálúṉgá. 5Aur Núh ne wuh sab,
jaisá ḲHUDÁWAND ne use hukm diyá thá, kiyá.
6Aur Núh chha sau baras ká thá, jab pání ká túfán zamín par áyá. 7Tab Núh aur us
ke beṭe, aur us kí bíwí, aur us ke beṭoṉ kí bíwiyáṉ, us ke sáth, túfán ke pání se bachne
ke liye kishtí meṉ gaye. 8Aur pák jánwaroṉ meṉ se, aur un jánwaroṉ meṉ se jo pák
nahíṉ, aur parandoṉ meṉ se, aur zamín par ke har reṉgnewále jándár meṉ se, 9do do,
nar aur máda, kishtí meṉ Núh ke pás gaye, jaisá Ḳhudá ne Núh ko hukm diyá
thá. 10Aur sát din ke ba‘d aisá húá ki túfán ká pání zamín par á gayá. 11Núh kí ‘umr
ká chha sauwáṉ sál thá, ki us ke dúsre mahíne kí ṭhík sattrahwíṉ táríḳh ko, baṛe
samundar ke sab sote phúṭ nikle, aur ásmán kí khiṛkiyáṉ khul gayíṉ. 12Aur chálís din
aur chálís rát zamín par bárish hotí rahí. 13Usí roz Núh aur Núh ke beṭe Sim, aur Hám,
aur Yáfat, aur Núh kí bíwí, aur us ke beṭoṉ kí tínoṉ bíwiyáṉ; 14aur har qism ká jánwar
aur har qism ká chaupáya aur har qism ká zamín par reṉgnewálá jándár aur har qism
ká paranda aur har qism kí chiṛiyá, yih sab kishtí meṉ dáḳhil húe. 15Aur jo zindagí ká
dam rakhte haiṉ, un meṉ se do do kishtí meṉ Núh ke pás áe. 16Aur jo andar áe, wuh
jaisá Ḳhudá ne use hukm diyá thá, sab jánwaroṉ ke nar o máda the.
Tab ḲHUDÁWAND ne us ko báhar se band kar diyá. 17Aur chálís din tak zamín par
túfán rahá; aur pání baṛhá, aur us ne kishtí ko úpar uṭhá diyá: so kishtí zamín par se
uṭh gayí. 18Aur pání zamín par chaṛhtá hí gayá, aur bahut baṛhá; aur kishtí pání ke
úpar tairtí rahí. 19Aur pání zamín par bahut hí ziyáda chaṛhá; aur sab úṉche paháṛ, jo
dunyá meṉ haiṉ, chhip gaye. 20Pání un se pandrah háth âur úpar chaṛhá; aur paháṛ ḍúb
gaye. 21Aur sab jánwar, jo zamín par chalte the, parande, aur chaupáye, aur janglí
jánwar, aur zamín par ke sab reṉgnewále jándár, aur sab ádmí, mar gaye: 22aur
ḳhushkí ke sab jándár, jin ke nathnoṉ meṉ zindagí ká dam thá, mar gaye. 23Balki har
jándár shai jo rú e zamín par thí mar miṭí, kyá insán, kyá haiwán, kyá reṉgnewálá
jándár, kyá hawá ká paranda, yih sab ke sab zamín par se mar miṭe. Faqat ek Núh báqí
bachá, yá wuh jo us ke sáth kishtí meṉ the. 24Aur pání zamín par ek sau pachás din
tak chaṛhtá rahá.

PAIDÁISH 8
1Phir Ḳhudá ne Núh ko, aur kull jándároṉ aur kull chaupáyoṉ ko, jo us ke sáth
kishtí meṉ the, yád kiyá: aur Ḳhudá ne zamín par ek hawá chaláí, aur pání ruk
gayá. 2Aur samundar ke sote, aur ásmán ke daríche, band kiye gaye, aur ásmán se jo
bárish ho rahí thí tham gayí; 3aur pání zamín par se ghaṭte ghaṭte ek sau pachás din ke
ba‘d kam húá. 4Aur sátweṉ mahíne kí sattrahwín táríḳh ko kishtí Arárát ke paháṛoṉ
par ṭik gayí. 5Aur pání dasweṉ mahíne tak barábar ghaṭtá rahá: aur dasweṉ mahíne kí
pahlí táríḳh ko paháṛoṉ kí choṭiyáṉ nazar áíṉ. 6Aur chálís din ke ba‘d yúṉ húá, ki Núh
ne kishtí kí khiṛkí, jo us ne banáí thí, kholí. 7Aur us ne ek kawwe ko uṛá diyá; so wuh
niklá, aur jab tak ki zamín par se pání súkh na gayá, idhar udhar phirtá rahá. 8Phir us
ne ek kabútarí apne pás se uṛá dí, táki dekhe, ki zamín par pání ghaṭá yá nahíṉ; 9par
kabútarí ne panja ṭekne kí jagah na páí, aur us ke pás kishtí ko lauṭ áí; kyúṉki tamám
rú e zamín par pání thá: tab us ne háth baṛhákar use le liyá, aur apne pás kishtí meṉ
rakkhá. 10Aur sát din ṭhahrkar us ne us kabútarí ko phir kishtí se uṛá diyá; 11aur wuh
kabútarí shám ke waqt us ke pás lauṭ áí; aur dekhá to zaitún kí ek táza pattí us kí
choṉch meṉ thí. Tab Núh ne ma‘lúm kiyá, ki pání zamín par se kam ho gayá. 12Tab
wuh sát din âur ṭhahrá; is ke ba‘d phir us kabútarí ko uṛáyá, par wuh us ke pás phir
kabhí na lauṭí. 13Aur chha sau pahle baras ke pahle mahíne kí pahlí táríḳh ko yúṉ húá,
ki zamín par se pání súkh gayá: aur Núh ne kishtí kí chhat kholí, aur dekhá, ki zamín
kí sath súkh gayí hai. 14Aur dúsre mahíne kí sattáíswíṉ táríḳh ko zamín bi’lkull súkh
gayí.
15Tab Ḳhudá ne Núh se kahá, ki 16Kishtí se báhar nikal á; tú, aur tere sáth terí bíwí,
aur tere beṭe, aur tere beṭoṉ kí bíwiyáṉ. 17Aur un jándároṉ ko bhí báhar nikál lá jo tere
sáth haiṉ, kyá parande, kyá chaupáye, kyá zamín ke reṉgnewále jándár, táki wuh
zamín par kasrat se bachche deṉ aur bárwar hoṉ aur zamín par baṛh jáeṉ. 18Tab Núh
apní bíwí aur apne beṭoṉ aur apne beṭoṉ kí bíwiyoṉ ke sáth báhar niklá. 19Aur sab
jánwar, sab reṉgnewále jándár, sab parande, aur sab jo zamín par chalte haiṉ, apní
apní jins ke sáth, kishtí se nikal gaye. 20Tab Núh ne ḲHUDÁWAND ke liye ek mazbah
banáyá; aur sab pák chaupáyoṉ aur pák parandoṉ meṉ se thoṛe se lekar us mazbah par
soḳhtaní qurbáníáṉ chaṛháíṉ. 21Aur ḲHUDÁWAND ne un kí ráhatangez ḳhushbú lí;
aur ḲHUDÁWAND ne apne dil meṉ kahá, ki Insán ke sabab se maiṉ phir kabhí zamín
ko la‘nat nahíṉ bhejúṉgá; kyúṉki insán ke dil ká ḳhayál laṛakpan se burá hai; aur na
phir sab jándároṉ ko jaisá ab kiyá hai, márúṉgá. 22Balki jab tak zamín qáim hai, bíj
boná aur fasl káṭná, sardí aur tapish, garmí aur jáṛá, din aur rát mauqúf na hoṉge.
 PAIDÁISH 9
1Aur Ḳhudá ne Núh aur us ke beṭoṉ ko barakat dí, aur un ko kahá, ki Bárwar ho,
aur baṛho, aur zamín ko ma‘múr karo. 2Aur zamín ke kull jándároṉ aur hawá ke kull
parandoṉ par tumhárí dahshat aur tumhárá ru‘b hogá; yih aur tamám kíṛe jin se zamín
bharí paṛí hai aur samundar kí kull machhliyáṉ tumháre háth meṉ kí gayíṉ. 3Har
chaltá phirtá jándár tumháre kháne ko hogá, harí sabzí kí tarah maiṉ ne sab ká sab tum
ko de diyá. 4Magar tum gosht ke sáth ḳhún ko, jo us kí ján hai, na kháná. 5Maiṉ
tumháre ḳhún ká badla zarúr lúṉgá; har jánwar se, us ká badla lúṉgá; ádmí kí ján ká
badla ádmí se aur us ke bháí band se lúṉgá. 6Jo ádmí ká ḳhún kare, us ká ḳhún ádmí
se hogá, kyúṉki Ḳhudá ne insán ko apní súrat par banáyá hai. 7Aur tum bárwar ho, aur
baṛho, aur zamín par ḳhúb apní nasl baṛháo, aur bahut ziyáda ho jáo.
8Aur Ḳhudá ne Núh aur us ke beṭoṉ se kahá, 9Dekho, maiṉ ḳhud tum se aur
tumháre ba‘d tumhárí nasl se, 10aur sab jándároṉ se, jo tumháre sáth haiṉ, kyá parande
kyá chaupáye aur zamín ke jánwar, ya‘ní zamín ke un sab jánwaroṉ ke báre meṉ, jo
kishtí se utre ‘ahd kartá húṉ. 11Maiṉ is ‘ahd ko tumháre sáth qáim rakkhúṉgá; ki sab
jándár túfán ke pání se phir halák na hoṉge, aur na kabhí zamín ko tabáh karne ke liye
phir túfán áegá. 12Aur Ḳhudá ne kahá, ki Jo ‘ahd maiṉ apne aur tumháre darmiyán,
aur sab jándároṉ ke darmiyán, jo tumháre sáth haiṉ, pusht dar pusht hamesha ke liye
kartá húṉ, us ká nishán yih hai, ki 13maiṉ apní kamán ko bádal meṉ rakhtá húṉ; wuh
mere aur zamín ke darmiyán ‘ahd ká nishán hogí. 14Aur aisá hogá, ki jab maiṉ zamín
par bádal láúṉgá, to merí kamán bádal meṉ dikháí degí: 15aur maiṉ apne ‘ahd ko, jo
mere aur tumháre aur har tarah ke jándár ke darmiyán hai, yád karúṉgá; aur tamám
jándároṉ kí halákat ke liye pání ká túfán phir na hogá. 16Aur kamán bádal meṉ hogí;
 aur maiṉ us par nigáh karúṉgá, táki us abadí ‘ahd ko yád karúṉ jo Ḳhudá ke aur zamín
ke sab tarah ke jándár ke darmiyán hai. 17Pas, Ḳhudá ne Núh se kahá, ki Yih us ‘ahd
ká nishán hai, jo maiṉ apne aur zamín ke kull jándároṉ ke darmiyán, qáim kartá húṉ.
18Núh ke beṭe, jo kishtí se nikle, Sim, Hám, aur Yáfat the: aur Hám Kan‘án ká báp
thá. 19Yihí tínoṉ Núh ke beṭe the: aur in hí kí nasl sárí zamín par phailí.
20Aur Núh káshtkárí karne lagá; aur us ne ek angúr ká bág̣ lagáyá. 21Aur us ne us kí
mai pí aur use nasha áyá, aur wuh apne ḍere meṉ barahna ho gayá. 22Aur Kan‘án ke
báp Hám ne apne báp ko barahna dekhá, aur apne donoṉ bháiyoṉ ko báhar ákar
ḳhabar dí. 23Tab Sim aur Yáfat ne ek kapṛá liyá aur use apne kandhoṉ par dhará, aur
píchhe ko ulṭe chalkar gaye, aur apne báp kí barahnagí ḍháṉkí. So un ke muṉh ulṭí
taraf the, aur unhoṉ ne apne báp kí barahnagí na dekhí. 24Jab Núh apní mai ke nashe
se hosh meṉ áyá, to jo us ke chhoṭe beṭe ne us ke sáth kiyá thá use ma‘lúm húá: 25aur
us ne kahá, ki
Kan‘án mal‘ún ho;
Wuh apne bháiyoṉ ke g̣ulámoṉ ká g̣ulám hogá.
26Phir kahá,
ḲHUDÁWAND, Sim ká Ḳhudá, mubárak ho;
Aur Kan‘án Sim ká g̣ulám ho.
27Ḳhudá Yáfat ko phailáe,
Ki wuh Sim ke ḍeroṉ meṉ base;
Aur Kan‘án us ká g̣ulám ho.
28Aur túfán ke ba‘d Núh sáṛhe tín sau baras âur jítá rahá. 29Aur Núh kí kull ‘umr
sáṛhe nau sau baras kí húí. Tab us ne wafát páí.
 PAIDÁISH 10
1Núh ke beṭoṉ, Sim, Hám, aur Yáfat kí aulád yih haiṉ. Túfán ke ba‘d un ke háṉ beṭe
paidá húe.
2Baní Yáfat yih haiṉ; Jumar, aur Májúj, aur Mádí, aur Yáwán, aur Túbal, aur
Masak, aur Tírás. 3Aur Jumar ke beṭe; Ashkanáz, aur Rífat, aur Tujarmah. 4Aur
Yáwán ke beṭe; Ilísah, aur Tarsís, Kittí, aur Dodání. 5Qaumoṉ ke jazíre in hí kí nasl
meṉ baṭkar, har ek kí zabán aur qabíle ke mutábiq muḳhtalif mulk aur guroh ho gaye.
6Aur baní Hám yih haiṉ: Kúsh, aur Misr, aur Fút, aur Kan‘án. 7Aur baní Kúsh yih
haiṉ: Sabá, aur Hawílah, aur Sabtah, aur Ra‘máh, aur Sabtíka: aur baní Ra‘máh yih
haiṉ; Sabá, aur Dadán. 8Aur Kúsh se Namrúd paidá húá; wuh rú e zamín par ek súrmá
húá hai. 9ḲHUDÁWAND ke sámne wuh ek shikárí súrmá húá hai, is liye yih masal
chalí, ki ḲHUDÁWAND ke sámne Namrúd sá shikárí súrmá. 10Aur us kí bádsháhí kí
ibtidá mulk i Sin‘ár meṉ Bábul, aur Arak, aur Akkád, aur Kalnah se húí. 11Usí mulk
se nikalkar wuh Asúr meṉ áyá aur Nínawah, aur Rahobot ‘Er, aur Kalah ko, 12aur
Nínawah aur Kalah ke darmiyán Rasan ko, jo baṛá shahr hai, banáyá. 13Aur Misr se
Lúdí, aur ‘Anámí, aur Lihábí, aur Naftúhí, 14aur Fatrúsi, aur Kaslúhí, (jin se Filistí
nikle,) aur Kaftúrí, paidá húe.
15Aur Kan‘án se Saidá, jo us ká pahlauṭhá thá, aur Hitt, 16aur Yabúsí, aur Amorí,
aur Jirjáshí, 17aur Hawwí, aur ‘Arqí, aur Síní, 18aur Arwádí, aur Samárí, aur Hamátí
paidá húe: aur ba‘d meṉ Kan‘ání qabíle phail gaye. 19Aur Kan‘áníoṉ kí hadd yih hai:
Saidá se G̣azzah tak jo Jirár ke ráste par hai, phir waháṉ se Lasa‘ tak, jo Sadúm aur
‘Amúrah aur Adamah aur Zibíán kí ráh par hai. 20So baní Hám yih haiṉ, jo apne apne
mulkoṉ aur gurohoṉ meṉ apne apne qabíloṉ aur zabánoṉ ke mutábiq, ábád haiṉ.
21Aur Sim ke háṉ bhí, jo tamám baní ‘Ibr ká báp aur Yáfat ká baṛá bháí thá, aulád
húí. 22Baní Sim yih haiṉ: ‘Ailám, aur Asúr, aur Arfaksad, aur Lúd, aur Arám. 23Aur
baní Arám yih haiṉ: ‘Úz, aur Húl, aur Jatar, aur Mas. 24Aur Arfaksad se Silah paidá
húá; aur Silah se ‘Ibr. 25Aur ‘Ibr ke háṉ do beṭe paidá húe; ek ká nám Falaj thá;
kyúṉki zamín us ke aiyám meṉ baṭí; aur us ke bháí ká nám Yuqtán thá. 26Aur Yuqtán
se Almúdád, aur Salaf, aur Hasármáwat, aur Iráḳh, 27aur Hadúrám, aur Úzál, aur
Diqlah, 28aur ‘Ubal, aur Abímáel, aur Sibá, 29aur Ofír, aur Hawílah, aur Yúbáb, paidá
húe: yih sab baní Yuqtán the. 30Aur in kí ábádí Mesá se mashriq ke ek paháṛ Safár kí
taraf thí. 31So baní Sim yih haiṉ, jo apne apne mulkoṉ aur gurohoṉ meṉ apne apne
qabíloṉ aur zabánoṉ ke mutábiq, ábád haiṉ.
32Núh ke beṭoṉ ke ḳhándán un ke gurohoṉ aur nasloṉ ke i‘tibár se yihí haiṉ; aur
túfán ke ba‘d jo qaumeṉ zamín par já ba já munqasam húíṉ, wuh in hí meṉ se thíṉ.