Editor: H.

Malsawmtluanga
Ph: 9615425400 / 9436784572

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9436392830 Lalbiaktluanga : 9612322711 Ramngaizuala : 9862386148

Thingsulthliah Sub - Town Weekly Newspaper

VOL. VI

No. 50 THINGSULTHLIAH

Ni 15 December 2012

(INRINNI)

KARLEH-AH TLANGNUAM CENTENARY LAWMNA Tlangnuam khua-in kum 100(Centenary) a tlin lawmna programme chu karleh hian neih a ni dawn ta a. Programme hi ni 3 chhung neih a ni dawn a, Programme tlangpui chu a hnuaia mi ang hi a ni. Ni 18/12/2012 Dar 1:00-ah VC House tualah Centenary hmang tura lo haw te hmuahna hun neih a ni ang. Ni 18/12/2012 Dar 6:30 pm ah Com. Hall-ah Centenary Meidet a ni ang a, Pu C.Lalsiama, VCP chu meidettu a ni ang. Dar 7:15 pm atangin Centenary Nite hman zui a ni ang a, Variety programme hmangin hun hlimawm tak hman tum a ni. Ni 19/12/2012 dar 10:00 am atangin Tlangnuam Field-ah Centenary hawnna leh Intihhlimna hun hman a ni ang a, Pu V.Lalremthanga, IAS chu khuallian niin Centenary hawnna a nei ang. Tlangnuam MUP ten Centenary Hlado an chham ang a, Centenary Choir an zai bawk ang. Tlangnuam YMA, MUP, MHIP leh Tlangnuam H/S ten Hnamlam chi hrang hrang an entir ang a, Infiamna hun hman a ni bawk ang. He hunah hian lawmman chi hrang hrang semna neih a ni bawk ang. Ni 20/12/2012 Dar 10:00 am ah VC House kawt-a Centenary Hriatrengna Lungphun (Monument) hawnna neih a ni ang a, Khuallian Pu R.Lalzirliana, Home Minister-in a hawng ang. Centenary Choir te zaiin chumi hnuah Com. Hall kawtah Centenary Dar vawi 100 vuak a ni ang. Dar 11:00 am atangin vantlang inkhawm neih zui a ni ang a, he hunah hian Souvenir leh Tlangnuam Documentary Film tlangzarh anih bakah Tlangnuam Hla kungpui pahnih Upa Zasiama leh Pu Sialkhawthanga chanchin ziahna bu(Pu RL Thanmawia ziak) tlangzarh a ni bawk ang. Hemi ni hian tanpui ngaite pual thilpek lakkhawm a ni ang. Tlaiah Centenary Ruai ropui tak theh a ni ang. (Simeikhu Editorial Board pawhin sawmna kan dawng a, kan lawm hle.) HOME MINISTER TOUR PROGRAMME Bialtu MLA, Home Minister ni bawk Pu R. Lalzirliana chuan Krismas lo thleng tur denchhenin a bial chhung a fang dawn a, khaw hrang hrangah kum 2012-a boral te Ralna hun a hmang nghal ang; a Tour Programme chu hetiang hi a ni ang. Ni 14.12.2012-ah Tuikhurhlu Ni 15.12.2012-ah Saitual leh Keifang Ni 18.12.2012 Zingchaw Tst BDO Quarters-ah a ei ang a, Dar 11:00 am ah Thingsulthliah-ah Meeting a neihpui ang a, hemi zawh hian Seling-ah Meeting a neihpui leh ang. Hetah hian Seling Branch YMA Library sak thar a hawng nghal ang. Meeting neihna tur hmun hi V.C. te lo ruahman tura tih a ni. Ni 20.12.2012-ah Tlangnuam-ah Centenary Lungphun a hawng ang. TST INTERNAL ROAD SIAM MEK Thingsulthliah Internal Road, D/A Paitehmuntlang chu tunkar atangin Boulder phah a ni a, karleh ah zawh hman beisei a ni. Radiant Hearts School C/A kawng leh H/A Venghnuai kawng chu Alkatra hmanga Black-top hna tan theih tura peih a ni tawh a. Tuna Navodaya kawng Black-top hna thawk mek, Road-Roller hman zawh huna hmang nghal turin hma lak mek a ni.

LUNGNGAIH DAR RI Ni 10.12.2012(thawhlehni) chhun Dar 12:00 khan Pu Thanzuala(74) F/o Zununmawii, Aichalkawn chu Sialmual rama a fehnaah Lungphuchawlin a boral a, a ruang hi lumenpui niin a tuk chawhma dar 11:00-ah Pastor R. Lallianparan a vui. INNEI Ni 11/12/2012 khan Benjamin Lalduhawma S/o C.Lalthankima (Kimtea) Tlangnuam Hmar Veng leh Ramsangliani C/o K.Liandawla, Tlangnuam Venglai te Presbyterian Kohhran Hall-ah an innei. Ni 13/12/2012 khan K.Lalramsiama S/o K.Neihthanga(L) Seling CP Road leh Ruthi Ramtharengmawii D/o Lalrammawia, Chhinga Veng Aizawl te Presbyterian Pastor Quarter, Tst-ah an innei. TANPUINA PE DAWN Thingsulthliah Presbyterian Kohhran Hmeichhia chuan naktuk Pathianni zingkar hian kohhran chhunga miharsa zual chhungkaw 6 hnenah tanpuina Rs. 500/- leh thingfak engemaw zat pek theuh an tum. LOM IN DAMLO KAN Tunkar chhung khan Khawngaihtu Pawl (League of Mercy), Thingsulthliah chuan Damlo pathum an kan a, tanpuina sum hetiang hian an hlan: Pi Thantluangi, D/A Rs. 1000/- Pi Huapzauvi, H/A Rs. 500/- Pi Laikungi, H/A Rs. 500/POOR FUND PE Kar kalta zirtawpni khan Don Bosco School, Seling Class-VI zirlai ten an thawhkhawm hmangin Tst CHC Poor Fund atan Rs. 1000/- an pe. Thingsulthliah Damdawi-Ina nausen piang hmasa ber, tuna Tlangnuam-a cheng mek Pu C.Hnundailova chuan tunkar ni 12/12/2012 khan a piancham denchhenin Poor Fund tan Rs. 500/- a pe bawk. THINGSULTHLIAH JAC DIN Ni 12.12.2012 zingkar khan Village Council chuan JAC din a rel a, JAC body hi siam fel khat a ni tawh. Tlawmngai tura member an ruatte hriattirna hi pek chhuah thuai tum a ni.