THU TATUAM September 15, 2013 Weekly Siyin News

Permit Nei Ngawlte Permit Pia Tuh Malaysia kumhpi in, thiamna anei Kawl ngammi permit nei ngawlte permit piak sawm ci'n Sep 11, 2013 the star news sung kisua hi. Malaysia Home Minister Datuk Seri Dr Ahmad Zahid Hamidi le Kawlngam Labour, Employment and Social Security panh Minister U Aye Myint te Sep 10 in kimu uh hi. Kawlngam mi hina lai sia Kawl Malaysia Kawl embassy in piak tuh hi. Home ministerpa in UNHCR card toai te le / toai ngawlte zongh kidop kul hi, Naseam tuh mi akisap tatak na munh zongh om in, Asean ngam tatek ci' thukhualna tawh Immigration te in, vaihawm pui kik tuh hi. Kawlngam mi 257,000 sung panh 113,000 in permit toai bek hi. Ngamdang mi permit nei ngawl naseamte sung panh Kawlngam sia athumna hi . "Allah" Vai Thiang Ngawl Lai Pathian ci kammal sia Malay kam in "Allah" ci ahikom, Malay minam tapidaw te in, amate kam in "Allah" ci kammal zangh nuam uh hi. Mulsim biakna bia Malayte in khaam ahikom, Putra thukhen zumh pi September 10, 2013 zingsang in, alang le lang Bus 4 dim kuan khawm ua, Thukhen zumhpi ah kisi hi. Athu man thei ngawllai in, October tha ciang laiten kik tuh hi. Tulaitak sia Sabah le Sarawak ah Tapidawte in "Allah" ci kammal sia zangh thei hi. Ngambeal Mithak Laakna Vai September 9 pa kipanh Cameron Hightland (Malaysia) ah kipia hi in, Amin om napi angaa ngawl pawlkhat sia:1. Nupa leilot, apa,anu,asuapui kitenni khawng he ngawl 2. Minlist sung aminpiak amh 3. A phone nambat azak phit sia zongh kidongh in amh. Sep 14 ni amundang pan adel tam lei ahikom mi 300 bangh cia sak kik in, Sep 15 ni zongh cancel hi. Sep 17 ni St. Thomas Jln Gambut 25000 Kuantan kipia kik tuh hi. Tua zawk ciang Jehor Berhu , Saremban le Kuala Lumpur hi tuh hi. Muanmawk bangh hi leh, ACR sia November tha bo kuan ahi katawm?

w w w .t h u t a t u a m. n e t
Australia Lampuithak Tony Abbott Tutuung Australia ngam 28th vei lampui kitealna sia September 7, 2013 in vawt aa, Liberal Party lampui Tony Abbott in ngaa hi. Party 50 panh mi 1,188 in, munh 529 atuh kidem uh hi. A pianna sia London (UK) hi in, November 4, 1957 in piang aa kumh 55 cing hi. Apa sia Deck Abbott hi in, Ha syavuan hi in, Kumh thum aphak 1960 ciang a innkuan in Australia ah peam uh hi. Sydney University panh BA (economics & law) taw man zawk Queen's College, Oxford ah Politics and Philosophy a Master of Arts (MA) sin hi. Tuazawk Australia cia kik in, St Patrick's Seminary sang kaa zawk RC thiampi suak ngei hi. Tanu 3 nei azi sia New Zealand te hi in, amin Margaret Aitken ci hi. USA Tuiphum GS Pa Khamtung Pai Tuh American Baptist Churches, General Secretary Rev.Dr. Roy Medley sia Rev.Dr.Judson Kawl ngam hong paizawk kum (200) cin 5-8 December 2013 hun sung Yangon ah hong pai kawm in khamtung ah hong paisawm hi. 9 December 2013 Yangon-to-Kalay 10 December 2013 Kalay -to- Falam 11 December 2013 Falam -to- Hakha 12 December 2013 Hakha -to- Thantlang,Hakha 13 December 2013 Hakha -to-Khuasak-to-Kalay Kawlngam Sung Pokna Le Biakna Poai Kawlngam sung munh tatuam ah, Pokna le Biakpiakna Poaipi 2013 sung anuai abangh AG pawlpite vaihawm thiamna taw kinei tuh hi. In Yangon ~ November 7-9, Myoma ground In Mandalay ~ November 11~12 In Mitkyina ~ November 14~15

Khamul Sau Bel Numei Guinness Record Laibu sung ah akiciamte tuh numei khamul saubel khat sia USA, ngam mi Vivian Wheeler ci aa, Acheptee ni sia September 10,2013 hi. Akhamul sia letmat 10.04" sau ci hi.Akha-mul sia kumh 7 aphak lai om ngawl papui meet tan aa, 1993 zawk meet nawn ngawl in kison hi. Naungil Nei Kiheang Zatangkhaam Pua Numei khat in naungil vawttawm khat apumpi ah belh in asung ah zatui khaam pua ci hi. Canada ngammi Tabitha Leah Ritchie kici hi in, Columbia khupi Bogota El Dorado international airport panh Canada Toronto apai sawm hi in, Officer khat in, anau ngil adok leh, ama in tha 7 cing ci hi. Officer sia in, angil athap sak leh, lum ngawl in, nip ngawl in sah ahikom, asit leh aleilot kilangh aa, cocaine kg 2 mu uh hi. Yemen Ngam Atuh Lamdang Ngawl Nung nipi sung zongh kumh 8 numei khat sia, amopoai ni zaan in, apasal taw a omkhopna panh chisan tam luang lei in thilaw hi. Ahihang Yemen ngam ah kumh 15 nuaisia numeite sia zawkthawk thu taw pasal kinei sak tawntung in kison uh hi. Numei 4 sung panh 1 sia kumh 15 acin ma pasal nei ci hi. 9/11 Kumh 12 Cinh USA Ah Vai Tatuam 2001 September 11 lai USA ngam World trade center kisimthap thu khuangai pulaakna khat Washington ah nilaini zingsang panh Mawtaw cycle million nei ci uh hi. White House innpi ah sia Sep 11 zingsang in, khuangai thu pulaakna in, thim diidee in om uh hi. September 11,2001 kisimni in, athi avekpi mi 3,000 khawng in thilaw hi. Muslimte sia tuahun lai tualthatte cin kingaw aa, amate siatna vo kison ahikom, alungkim ngawl Muslimte in USA ngam ah DC ma ah, alungkim ngawl thu pulaakna nei hi. Tua muslimte mihonpi te nung pan Tapidaw mipu pawlkhat in ngupna thu son kawm taw zazan ci hi.

Bible Soceity In Laithiangthobu Hawm Bible Society of Myanmar pan GS. Rev. Khoi Lam Thang le Rev Dr Zaw Win lampuina taw Behte ( Kachin ) te IDP (Internally Displaced People) Camp leh KIO/A HQ Laiza khua ah Laithiangtho-bu 30000 (Tul sawmthum) pia hi. Laithiangtho bute sia (Portion) bu 30000 a kikhen hi a, MUSE pan LAIZA dong nikhat sung thaangip 20 taw, laibu 9 vei puak uh hi. August 29 ni 7:3010:00 PM sung KIA lampui nina General Gum Maw tawh tukhawm in, behkhat hihna kikum, a ngimnate uh hong kison ua, Sya Khoi in zongh Laithiangtho ma son aa, Gen Gum Maw in zongh tutuung kumhpi taw buaina sia "Divine timing hi" ci aa, tetti panh tuh hau peuma ci hi Kawlpi Ah Biakna Tatuamte Kikhopna Kawlpi khua hausa zumh ah, September 9,2013 in, Biakna tatuam lampuite in, kimu khopna nei in, kilem vadiam om khop thei natuh kikupna nei hi. Thadote Khuangaihni Vawt Thadote khuangai-ni 'Kuki Black Day' sia September 13, 2013. India Delhi Jantar Mantar ah nitak nai 5:00 in vawt uh hi. 1993 September 13 in, Naga hiam-toai NSCM-IM te in, Thadote mi Manipur ngam sung that lumh hi. 1993-1995 kilaklaw Nagate thalup huu in, Thadote 900 sia NSCM te ii thatlup huu in thi ci aa, hi September 13 sia amate khuangaini in ciamtee uh hi. Manipur sung Thado kampau 115,045 pha in, Naga ngam sung 50,000 le Khampat , Tamu, Khandi le Humalin ah 135,000 val bangh pha tuh in kimuang maw hi. Mawtaw Tawh Suakkhial Malaysia om suapui Pau Khan Khual (Voklaak) sia Sep 11 in Genting HL ah mawtaw suak khial in apeang ngu talh in POP taw kituam in, tulaitak a inn ah om hi.