Sirhsan cabu. PIPU AAN MAWI, Pu Duh Cung Nung.

2004

TONGTHIMNAK LE A SIMFIANGNAK
A,a 1. A nu neh lo Hlei Tawl vuak -Mai tawh mi neh lo ruangih midang hnenih thinheng 2. A fim uihli tilper -Mi ruahban lo tiang ruat thei 3. A con cong loi' lal len -Mah hmuah ziang si hnai lo ih lal awter 4. A ttong sairuh deng kiak -Mah hmuah ziang si hnai lo ih tong hmual nei zet ih ttong thiam 5. A lut lam vaipuan in tuam -Mah pantu thaten rak dawmkai uh 6. A suak lam fungfek in thawi -Mah tlansantu cu duh in ham hlah uh 7. A tirhsian Sahluk vek -Mai co ding um lo tiang ih mi va zem thluh 8. A hmui in zoh hlah a aan in ngai -A hmuihmel zoh lo'in mizia le thinlung felfai a nei maw ti zoh uh 9. A ei pei ah Thantiam ral -Thil ziang khal a hlawhtlin zawngih cemral thluh sal 10. A luk lu lo a beh nam -Lu ngah si lo ih cawhkuan lak 11. A ti liakin -A khuapa relin a za ten a ciaplap in 12. A taw zarh a lu thiang -Mai duh lo mi hmuah a zarh tiih mai duhnak ah hmuah a thiang ti leh sal www.chinworld.info
Page 1

Sirhsan cabu. PIPU AAN MAWI, Pu Duh Cung Nung. 2004 13. A nang kaa lal e -Ziang tuan hman thahnem lo tongka lawng tha 14. A linglet ih alti thlawr bel -A ling a letih thil um, eg. a co lotu ding ih co riangri. 15. Ai kaw taw pit bang -Beisei ding zianghman um lo khopih beidong 16. Arte ti tla bang -Taksa pumpuluk ih cin thluh 17. Arpi zingtum sum kungah -Hlapi thleng zo dingih ruat naite ih um lai 18. Ar in cu hnga peng e a tiih amah le amah a khuhaw -Thil ruat famkim lo ih hlawk tum cun mai siatnak a thleng 19. Ar cang a mei sau khaw ek phiatthu men -A hleihlang ih thil ti cu sun lak men 20. Ar hla fingkhat sak -Mai sal bang sal leuhleuh 21. Arcang tlau le pacang tlau -Vaktawi hla tuk ruak hlawm lo 22. Ar cawngthai bang in -Thil um lo hawl hrat 23. Ar bangih ka cawngthai in -Ka ttuan le ka hawl cop hratin ka nei 24. Arpi lungsia Sava lungtluang -Pakhat ninghan nak cu pakhat lungawinak sawn 25. Arte hnap cuk bang -Zamfung hnuamhno 26. Arpi fa hum bang -Tongpa run ih mi va run www.chinworld.info
Page 2

Sirhsan cabu. PIPU AAN MAWI, Pu Duh Cung Nung. 2004 27. Ar khal nau zawngah an cukaw -Siatnak thlen zik ruangih mai unau khal rem lo 28. Arte hman puhmawh um lo in thi hlah -Siatnak a thlen cun puh mawh ding kan hawl B,b 1.Bar cing lo ei cing lo - Mai ei in nak cing nawn lo, dunglam thu thei nawn lo 2. Bahnah ih ti bung bang -Zianghman tang nawn lo 3. Bawm khal mawh hlah han khal mawh hlah - An mawh veve 4. Bahnah ih van ruah don - Beisei ding um lo cingin beisei thotho 5. Biakbairok khua tlai zo - A liamzo hnu ih thil ti a sawt lo 6. Bualkhaw tlawn le far lak cem -Ttum khat thilti ih a dang ngah belh 8. Bui taw tawh bang -Thil hua tuk let vutvo 9. Bual ni ih nupihawl le fur laiih lo ram hawl - Misia le mi tha theih a har, ram tha le ram sia theih a har 10. Butlak so tan cuh - Mah sun duh loih ttan khawh

www.chinworld.info

Page 3

Sirhsan cabu. PIPU AAN MAWI, Pu Duh Cung Nung. 2004 C,c 1. Cangai hman a khurah a lal - Mai innsungah zo kan ttih lo 2. Cahmangkhawh le Kel sa ei -Zumhnak in hnatuan theh lohli 3. Cangai khawm tia - Inn le thlam a fate bik tthimnak 4. Cangba ih cikhling ben bang - Thil kopaw thiamthei lo 5. Cawpa hur lai ton - Mi duh lai tak ton ngah 6. Cepa thangih ka awh laileng -Thu ka ti zo hnuhnu 7. Cirh ih partiam phun bang - Mi hrangah that hnemnak nei ringring 8. Cikhling le khuaiseng - Zamfung tuk 9. Coh barawh tuar -Ti ngaihnak thei loih tuar cuahco 10. Cong Lul tan kum - Reipi thil relnak 11.Cong Lul a um lo sungah a zang an fir -Um lai hmuah ih ti ngam lo um lo sungih ngam zet

www.chinworld.info

Page 4

Sirhsan cabu. PIPU AAN MAWI, Pu Duh Cung Nung. 2004 D,d 1. Dunglam cai bo lo - Thu rualaw thei lo, sihte sa zawn vek 2. Dunglam rawl san -A thupten ih thilti 3. Dunglam Zu bui mei can -Dunglam can tawi rel nak 4. Dunglam sabarh - Rin lo piih thil tha tong 5. Duhnak mit a caw - Mai duh ruangih an siatnak khal hmu nawn lo 6. Duhham tuk malte ngah - Hamtam tuk mi hnak ih ngah tam tum cu co lonak sawn 7. Duhfa hlephlep khawl khaw deng - Duhdawttuk ziangdang raut nawn lo cu tthenawk nak 8. Duhtu zahra, huatu zahra - Miza duh kim a um thei lo E,e 1. Fala zul hrat, sakhi zul hrat - Fala lenih thlun hrat ahcun neih nge nge 2. Fala le Uite a tham tu poh duh - Mi va zut met tu cun duh an hlawh cingcing 3. Fanu kir le loram kir - Fanu kir khal pai lennak, loram kir khal pathatnak 4. Farah khaw ong tong lo - Farah tuk cu vanthat ton a har

www.chinworld.info

Page 5

Sirhsan cabu. PIPU AAN MAWI, Pu Duh Cung Nung. 2004 5. Farah khurh awm tong lo - Farah cu zo hman bawmtu an nei lo 6. Fatir thih le tibur thei khat bung - Fatir thih khal na an ti tuk lo tibur bung khawl zang a ram tlak lo 7. Falai sia le lolai sia - Falai sia cu hman an tlak lo 8. Fangci cuh le Vok zangcuh - Thil a tikcu luan ter lo ding, Fangci khal toruah khelhih vorh a tul, Vokpi khal a hur lai ih hman a tul 9. Fanghma tthanih tthang - Mithmuh hmai theihih tthang thuntho 10. Fangvui fual le nupi tha - Fangvui fual khal a dang hnak in fang a tam terih lugnawi a ce hlei, Nupi tha khal in sungkhat an finkhawmih lung an awiter hleice 11. Fur ti hal le tar lam hur - Fur tihal cengmang tuar a theih lo, tar lam hur cengmang supawk a theih ve lo H,h 1. Hma lo tho in a fem lo - Thil fate tal a um cia lo ah thu puh a um lo 2. Hmar su hmet bang in - Nuamtei thil tham durhdo 3. Hmur cudup le kam khawng - Ei tlak lo ei 4. Hnari hnuaiah kaa kua - Na kaa kua khaw na tong men, na thu ngai tlak lo 5. Hngal in sa ei - Zo sawm lo khalin an in an ei vivo men 6. Hmel thleng theih lo, nuncanlawng thleng theih - Nuncan sia khal mi tha ah an cang leh thei www.chinworld.info
Page 6

Sirhsan cabu. PIPU AAN MAWI, Pu Duh Cung Nung. 2004 7. Hmunphei le ralrem - Hmunphei feh khal bang a um lo, Ralrem khal thin phannak a um nanw lo 8. Huat ka duhah fir ka puh - Huat ruangih thu phan tiang mi va puh 9. Hricu hmaitha zuan -Milian le mitha va tlawn hliaphliap 10. Hrikpi leh lang - Puantah mi pattuk rel nak 11. Hrisau tuk a ngerhaw kel -A hleifuanih thilti cu mah a run awk leh 12. Hrong mahhla lo Pak Cio pa - Hrong supawk thei lo ruangih mai tuar phah I,i 1. Inntu kawm le hnuaihangtuk -Inntu kawm khal hamtu an neih ruangah a har, hnuaihang tuk khal hling a neih ruangah a har 2. Inn hnen do hnakin khua sarih do -Ral cu ttihnung khal sehla hmuh a har, Innhnen cu zing le zan kan hmuaw ih tuar a har sawn K,k 1. Kaa bang ol - Duh mi hmuah ngah hluahhlo 2. Kaa kua ram buber - Awka that men san a tlai lo 3. Kaa le belte - Mai ei khop fangfang ngah 4. Ka ui hngak ah ka su thu hlur - Neih mi hmang siang lo ih ret siat lak men

www.chinworld.info

Page 7

Sirhsan cabu. PIPU AAN MAWI, Pu Duh Cung Nung. 2004 5. Ka farah hnak a tlai nalam - Ka farah tuk ruangah mi in zangfah sawn 6. Ka senah muthla ka ttih, ka tumah ka pu ka ttih - Senlai ah tih um lo mutla ka tih ka tum in pui tongsia ka tih 7. Ka thlam kang khaw kang zo ta. Than zoh kang khaw ka diriam - Kan cem kan ralnak kalih in siat suahtu an ral ve cu kan diriam ve 8. Ka zum lo in zai zum rah hlah - Ka zum lo vek in ziang hman a cang ngah lo 9. Ka pa thi law kei lian lang, tapsak karlang sa zem lang - Pai ro co duh ruang ih pa thi lohli seh tiih saduhthat 10. Kam nal an dawk ter rero - Tong tam nana cu ei le in dingah duhsak an hlawh 11. Kam tam hmur le artaw - Cawlh ti nei lo in an phun zawk rero 12. Kam hmuh lo khuavang kan bia - Minung lemawk theih lo a um lo 13. Kawl ngian le Vai ngian - Biak hmuahih that zet a thupter siatnak tawlrel 14. Kawl lak -Mi va sawm ih thil va ti 15. Khual tam le ar tam - Rawlsia khal thaw zetin an ei thei 16. Khawte lo ar - Mi lakah an tlang nel lo, an ttih a hrut 17. Khunsir sirih sir - Zianghman santlai lo ih a lak ih retmen 18. Khawpi thu le hreicawng kau theih lo - Thil kau tuk relnak www.chinworld.info
Page 8

Sirhsan cabu. PIPU AAN MAWI, Pu Duh Cung Nung. 2004 19. Khual thuthang le ar hma cuk - A sinnak hnak ih thu rel uar deuh 20. Kheng sungsa hman bangrepih, ei rual a theih lo - Thil a rualrem ngai ngaiih zemawk a theih lo 21. Khuangli nau lai duh lo - Mi hnuai dor duh lo pawl 22. Khingkho lei dirin - Harsa zetih leiba cawk 23. Khuaivah fem le mi aa cai - Ninum tiangih mi thawi ringring 24. Kut za zawng za in - ol ce um lo ih ttuan tlang vialvo 25. Kei ih fapa neih le pulhpi tlun - Thil pakhat te neih canih siatnak tong 26. Kehtlak ui su beng -Thiam hmun hma nei lo. nautat nak tong 27. Kei i nu le dawngttengin - Tar tuk thi thei lo 28. Kaikawk a par tikah -Duh lo tuk thutiamnak 29. Ka nui' thu lung ningna savom sumdeng hmu hlah ing - Nu le pai' thu ngai lo cu siat tonnak 30. Kut dunglet nei - Pasal le sungte dang theih lo ih mai sung thil pe thup

www.chinworld.info

Page 9

Sirhsan cabu. PIPU AAN MAWI, Pu Duh Cung Nung. 2004 L, l 1. Lai king kuakbeng barh -Harsa tuar vangsanglam 2. Laiking ti tit bang - Veikhat thilti lawng men, a dung thlun nawn lo 3. laiking puanpi tah tum bang -Tumnak nei leng leng ih tuahsuak ngah mi nei lo 4. Lal dah lo lal a na - Thil ti dah lo cun cin tawk an thei lo 5. Leiba le saihlum nget kel hlah - Cemral lak a um em lo ding, sam leh ni a um leh ding 6. Lei ka zohah a pit, van ka zohah a sang - Mangbang vansang tawp khawk 7. Lente tuanvun bang - Mihngal ziangih mi siar lo 8. Lente ral nawt -Zamrang ciamco 9. Lian do tei unau dar tong bang - Siatnak hmang tiih thatnak tong 10. Lopi ne le khengpi ne - Ei khop a tang cingcing 11. Lo ram that le nupi tha -Mi dawt huahhlo, mi an cawm 12. Lungtat ih hnah a neih tikah -Cang thei dah lo ding mi tthimnak 13. Lungphur kheng tlang vel - A hla zawngih feh, cem lai thiam lo.

www.chinworld.info

Page 10

Sirhsan cabu. PIPU AAN MAWI, Pu Duh Cung Nung. 2004 M,m 1. Mai hrang cangai khorh -Mai hmakua lawng ruat, mi ruat cem dah lo 2. Mai thu duh le kaihra huah -Mai duh poh a har kan thei lo 3. Mai thu thaw, mawi voih thaw -Mai thu le mai ta vial tha ih ruat mi dang ziangih siar lo 4. Mai mi duh thawi kai hra lek - Mai duh mi thawn cu ziang khal harsa a um lo 5. Mai mihuat thawi khuangpi cawi - Mai mihuat thawn cun nomnak a um dah lo 6. Mai tilzang cum - Mai natnak ding tiang tuah pang 7. Mai far tthi farfo - Mai farnu lam tthit cu a zarh lo 8. Mai taw sip cop - A cang thei lo mi tiang pol le ruat ih ttih cop 9. Mai mineh cu duhduh ti - Zianghman thathnem si lo, lal hlerhhler 10. Mai miang lal ih lal - Zianghman thathnem si lo, lal hlerhhler 11. Mai kawng parih sa can - Mai parih thu thleng leh ding theithiam lo 12. Mai taw hlip - Mah le mah mualpho aw ter. 13. Makpa sia le lo bua -Ziang hma ih santlai lo, sorbok ding um lo

www.chinworld.info

Page 11

Sirhsan cabu. PIPU AAN MAWI, Pu Duh Cung Nung. 2004 14. Malmak khaw ong tong lo - Ziangtik khalih vanthat nak tongdah lo 15. Mah khop se caih bo lo - Mai tuan tawkding a um ringring. 16. Mah porhawk le sakhi ngal -Mah porhawk khal mi'n ziangah an rel lo. Sakhi ngal khal ah ziang hman a bet tham lo 17. Mar fim le zawng fim - Mi hrokhrawl a thlem ih mi thlem pawl 18. Makpa le zo lo tan kel - Makpa khal kumkhua rinsan an tlak lo, zo lo khal kumkhua thlawh lan a tlak lo 19. Makpa tha le liang dam tha -Makpa tha in pu lei phur an sawng 20. Mang le melmang - Umzia an nei ngaingai lo a reh ol. 21. Mi thusim le ar hmacuk -Mi rel mi zaten zum tlak a si lo 22. Mi hur tuk luk duh lo, mi hrong tuk pek duh lo - Thil ti hlephlep pawl cu an duhnak vekih thlun kim a theih lo 23. Mi thu cawngih artaw tok - Thiam hmunhma nei lo mi thu zir cop 24. Mize le saze - Zianghman satlai lo, thil thahnem cuang lo 25. Mi aa ih mifimnun sim bang - Mifim khal in ziang kim a thei thluh ce lo 26. Mi aa sentlung khal khit - Mi aa tong cu a mai parah a thleng sal

www.chinworld.info

Page 12

Sirhsan cabu. PIPU AAN MAWI, Pu Duh Cung Nung. 2004 27. Mize parah natnak bok -Mize cun nat a puhaw ringring 28. Mi aa at man kuan cawk lo - Mi aa cu a tong tamih cawh kuan a tong theu 29. Mifim fim man ei cawk lo - Mi fim cu a tongkam menin ei ding a hmu 30. Mifim mit men in lang - Mi'n an theithiam ih an hmaisong mai. 31. Mi kut parih sasem hlaw - Mi ta cu tha cuang ih hmuh a si theu 32. Mi kutih rul kaih tum - Mah hmuahin ti duh zair lo, mi va ti ter 33. Mi aa tong in lang - Mi aa cun a mai duh zawng lawng a rel 34. Misefa le ngal lak fang - Meisefa khal an tha tluan suak thei lo. Ngal lak fang khal pathatnak a tlak lo 35. Mifim thu lai rel -Mifimcun mawi lo tha lo in thu an rel lo 36. Mi harah Dar al - Mi santlai lo khal in thathnem tikcu an nei 37. Minung nunnak bolo, zawngsen nunnak bolo -Minung rawl loin thih hluan a um lo, zawng khal rawl lo in an thi ve ce lo 38. Mi thu cawng ih cawngkor - Mi ti vek va zirzawng vivo 39. Mithi ti that man um lo - Mithi ti that cu a thu lak men lam khirh sal tu a um nawn cuang lo 40. Mithi bang le ba kawk bang - Vanduai tong zo ton leh phang thin nuam lo

www.chinworld.info

Page 13

Sirhsan cabu. PIPU AAN MAWI, Pu Duh Cung Nung. 2004 41. Mithi thlan phei kharin dai - Thil kan hmuh nawn lo mi cu kan hngilh leh 42. Mi niamin mi sang zuan kel - Tumtahnak sang neih vivo ding 43. Milian a duhin tong, van ruah a duh in sur - El theih le kham theih a si lo. Mi aan ngai lo ih mai duh mi tong hluahhlo 44. Mipa le nam per -Va thlem lonak a um lo, a hruah theih vivo 45. Mitha thlan le sehnar cum -Mitha taksa cu a hnu hmin a mawi ringring 46. Mise thlan le belte phul -Reipi awh lo ral leh mai 47. Mise hnon le puanse hnon - Lak thlak zianghman a um nawn lo 48. Mise puar le ar ih puar -Misia ei khop hmu khal an puarthau mai, ar rawl puar khal pek belh khale an tlan thotho 49. Mise hmai lang lo -Mi lakah thu tha va rel khalle miin an ngaihsak lo 50. Mise len le tite len -Misia lian hruak khal tuar an har, tite lian khal a kiangkap a hrut balih a kangsal lohli mai. 51. Min dam le hur dam -Khaw min khal a reh hnuah a min sal nawn lo, mi hurkhal neh hnu ah mi an cawm sawn 52. Mize le uizang - Hnatuan fialih ti vungvo rei tuan paih lo 53. Muthla hmel hmuh -Voikhat hmuh hruak hliah man lo www.chinworld.info
Page 14

Sirhsan cabu. PIPU AAN MAWI, Pu Duh Cung Nung. 2004 54. Mi aa ttong ah khua to -Mi aa ttong in hmailam thu an phuang ngah cang a um theu N,n 1. Na at-awk le sentlung pawng va khik - Thil tha lo tuah tum 2. Nam lo ih milu tan - Mi siatnak pittawp tuahtu/reltu 3. Nam linglet hum bang -Mah le mah siatnak thurel pang 4. Nauhak tualleng in lang sete tualkual in lang - A thoknak in an sinak ding a lang cia 5. Nauhak hngal le zawng hngal - Hnawhtlan theih lo, mi hmaisongnak tla nei lo 6. Nete fungfek tuar - Tuah mi bangaw ih a tuar hleice um 7. Nimthlakau bangin -Mi zuanzang, zamtha 8. Ngalcar khawn le zunrim ngaih -A pem hmuh ding um lo ih na tuar har zet 9. Nui muangmuah le pai muang muah liam - Thil ti lohli lo sung ah can tha a liam 10. Nu su hmu ka bang - Ka ningzak ka lau dukdi 11. Nuhmei thu le sa zan tla - Thu tthin dualdo hmang 12. Nuhmei tthit le vabu luah -Neih hmuahin va khawm cih thluh

www.chinworld.info

Page 15

Sirhsan cabu. PIPU AAN MAWI, Pu Duh Cung Nung. 2004 13. Nunau sopsawlol le khentio sopsawlol - Nunau sual cu thu sim theih an si lo, an lung sungah an thun duh lo 14. Nunau le sentlung phat hmang - An ttong mi theih cingih pha tualto 15. Nu tlung ka bang - Ka thin a nuam hlunhlo 16. Nupizia biarkaih in lang -Pai thuamhnaw kenin nupi thathum a lang 17. Nun ah sing lawm, thih ah sung tlung -Na that lai ah rualpi tha na nei tam ding, siat na ton cun sungkhat lawngin an lo hlawm 18. Nunawn tthit le thal kai ziat - Nunawnin mi a duat thiam sawn 19. Nunau tha lo mak in vawng -Nupi tha lo cu dawi hlo an tul 20. Nunau favon thlafang pai - Nunau favon cu duat an ttul, thih sia ih thih a ol 21. Nunau thu le sepi ki - Hman ngaingai a tlak deuh lo 22. Nupi hrem lo, lo pawn hai lo -Nupi hrem lo mi an hmuh suam. Lo pawn hei lo khawl mi an nek vivo 23. Nunau thua ah le thlatteh thu ah - Nupi tha neih cu a manhla hleice. Thaltteh khal thing dang hnakin a tuah a tam 24. Nunau su huhin -Mi tirhfak, ziang khal dil theih lo, sihthi lo 25. Nunau bum nuam, vanim bum nuam -An duh zawng thlun hmaisa ahcun duhnak hmun pohah a hruai theih

www.chinworld.info

Page 16

Sirhsan cabu. PIPU AAN MAWI, Pu Duh Cung Nung. 2004 26. Nupi ttha le loram ttha - Mi an cawm thei, mi hmuahin an daw thluh 27. Nupi thleng kel, hruangsia thleng kel - Hruangsia na thleng lo le rannung an suak ding, nupi sia na thleng lo le insang a tla bal 28. Nupi cum kel dar khuang cumkel - Darkhuang khal a ttul canah cum kel. Nupi khal an mawh canah cum an tul 29. Nung cung lukhawng rel - Mi parih a hlawknak vial lak tum 30. Nupi mak le con khat tloh - Nupi mak cu veikhat sunnak thawn abang 31. Nun sung khawvang zoh - Thathnemnak nei nawn lo khal in nun kan duh 32. Ni Iang thing pawk - Mi dang ruahnak ttawm thei lo ih mai ruahdan le mai thu lawng pom feufeu P,p 1. Pacang fim le ngalhriang tleng khan - An thu ruahnak theih ban lo 2. Pacang a tongah thi, Pawpi a neh ah thi - Pacang cu a ttong vek in a tuar ngam, Pawpi khal a neh ruangah a thih phah 3. Pacang ttha nam in vawng, nunau ttha lo makin vawng - Pacang ttha cu ral ah nam in an thi, nunau tttha lo khal mak an ttul tengteng 4. Pacang zuri le zawng mang sia - Zianghman sullam an nei lo 5. Pam pheh ttha hlah, phar pheh ttha hlah -Ziang khal thuh ralawk ngaingai a theih lo 6. Panghel in tawpeng a nei - Pang hel pawl cun poi an tok www.chinworld.info
Page 17

Sirhsan cabu. PIPU AAN MAWI, Pu Duh Cung Nung. 2004 7. Pate thin le lungtat khai, papi thin le ba hlam sa - Thu ruat man lo ih ti vukvi. thin tawi. Papi thinheng khal rei a awh, ba suan hlam khal a daih a har 8. Pasal van in tla - Nuhmei mangbang ttong. Rin lo ih thil tha tong 9. Puan sung zang fil - A thupte ih thil ti mi thieh a har 10. Puat kiarkiar ih pet thuttho - Rawl ei theh ih tlan hlo men 11. Phiang voih tla purh, tto ruah tla purh - Ruah lawknak um lo in thil ti hruakkhri 12. Phiang zil thi bang - Mize ding zuarzi men 13. Pasal nawn le buh tthing hut - Sunlawinak le lungawi nak malte lawng a um R,r 1. Ral I hnu in Sel Kio tlo - Mi thu hnu ih duh tawk ttong leh ngam 2. Ral tthat lo ih sawn ton - Mai sinak lo vek in um 3. Ram rawl le ui su - Ram rawl khal a thaw ngaingai lo, Ui su khal milai hrangah zianghman a si lo 4. Rawl le ka lu sum - Rawl hawlah thih ka huam 5. Rin lo in sa kap - Zum lopi ih thil ttha tong 6. Rin lo ih zawlhlawm - Zum lo pi ih rawl coihtu neih

www.chinworld.info

Page 18

Sirhsan cabu. PIPU AAN MAWI, Pu Duh Cung Nung. 2004 7. Ring ruh tuar - Har cuahco ih tuar 8. Ritte hmur tuah in - A tha thei bikih tuah 9. Roling khaw tian thang -Mangbang vansan ruangih mi theih thluh 10. Rolung tlon - Mai thinhengter mi lemsal 11. Ruah lo ka ruatih phawkawn car -A si thei lo tiangih ruat 12. Rulih hnu le ralih hnu - Rulneh khal zawt a theih lo ttih a nung lanta, ral neh khal zawt a theih ngai ngai lo 13. Runral sakham var bang - Hnia le awk ih sa ei 14. Rul pal sual - Rul cu ummen khal sehla pal ngah ah cun mi a cuk. Mi um menmen khal tawhthai ahcun mah riangri ih tuarnak 15. Rulha ka ha herher - Mi ti na dingih bawh herher 16. Rung na ra na ka ti lo -Mi an um lo sungih relsia hratih an rel siatmi ih ton hruak 17. Rul thahhrulh bang i - Thi lohli thei lo tal zawk rero

www.chinworld.info

Page 19

Sirhsan cabu. PIPU AAN MAWI, Pu Duh Cung Nung. 2004 S,s 1. Sakhi thingpar kai ter - A si thei lo ding tiangih ngaihtuah ih thu pol 2. Sakhi ka ir it - Helhkam mi neih ruangih lung phang ringring 3. Sakhi zan khat thau -Vei khat thil hmuh duak, hmu nei tata lo 4. Sakhi a dang ah, con kiang a dang ah -Hmun dangdang ih tthenaw thluh 5. Sakhi suak khaw sim le rel I tamnak -Thil tuah tumih tuah ngah theilo, miih rel lak men 6. Sakhi tlang za kaan, saphai ka hmunah -Khui khal thleng aw la a hnenah na kir tho tho ding 7. Saphai mi ham bang -Khui khal tlan thiam lo ih bum thei 8. Sa sem khat ah hrantang -Hngak ttul lo mi hngak a ttha lo 9. Saphu lei phah -Ngah sal duh ih mi tlon 10. Sa kang pharin -Tongpa phar ih phar ciamco 11. Sava in ar e a ti -Mai thu duh mi lawng ruat/rel 12. Sahnuai mei tan bang -Thinheng tukih phar vutvo 13. Samhri lo le samhri lo -Duhtawkih hnukcai aw, thawi aw

www.chinworld.info

Page 20

Sirhsan cabu. PIPU AAN MAWI, Pu Duh Cung Nung. 2004 14. Sazaw taw semin -Ti ttento hratih hlawhtling 15. Savom rilte kah bang -Thinheng tuk a ling ih ling 16. Savom linglet thou -A tikcu lo ih thil tuah 17. Sorse hmun riat rawh -Duh ham ruangih thil ti zelzel 18. Se ruah tuarih tuar -Ti ngaihngak thei lo ih tuar cuahco 19. Se hloh hnu ih sekawt khar -Thil a tthahnem nawn lo hnu ih tuah 20. Sen cai hngilh um lo -Ziangtiklai khalah cing ringring 21. Se sun hlaih buh pher phah -Thil ti ngah hlanih ti zo vekin um 22. Su khal ui hlah, vainim pum khal ui hlah -A tikcu lai ah ziangkhal ui dig a si lo 23. Sunhlu ti thlum -Ttongkam thlumih thinpemnak um lo ih mi va hnem 24. Sunttam arpi a tiat le -Duh lo tuk thukamnak 25. Sunlawi duldo duh lo, Sawrse hnenih tlan -Mah le mah ti mual pho-aw 26. Suntam inn thar lawm -Veikhat lawng lung awi hlunghlo 27. Sihte puan tom sai hngak -Thil pakhat ruangih mi tampi puh vivo www.chinworld.info
Page 21

Sirhsan cabu. PIPU AAN MAWI, Pu Duh Cung Nung. 2004 28. Simlam um pang par -A tirih ziang hman paih lo a ne lamih phar ciamco 29. Suncaw heu le cang pal cim -Zianghman tthahnem lo ih a ei lawng tthahnem 30. Sihte sa zawn bang -Zate ih ttuan vualvo 31. Sete tual khual in lang, minung tualleng in lang -Sia khal tual a kualin siat le that a lang, mi nung khal tualeng in a lang 32. Sim pathat le papar luah -Rin lo ih thil ttha ton 33. Siangte khal lam seh la zoh man hlang -Ttuan ttul tuk khui vak man lo 34. Sumhmui mit tong -Siatnak va tong T,t 1. Taima ekther bo lo -Taima cun malte tal an nei cingcing, lole zapi lak ah mi taima an um cingcing 2. Tai tlung zangfil a ttul -Kan ti laklawh cu ti tlang vivo a ttul 3. Tefa ruat lo Khua Thang hawi -Mi hrang lawng ruat midang hrang ruat tel lo 4. Teng Lam ih cizawl thuh -Mai hmuh ding um lo ih thuh hlo ta 5. Teng Lam ih liang leh -Mai tawthohnak ih kirsal 6. Teng Lam sa zem -Mai co ding um lo mi va zem thluh

www.chinworld.info

Page 22

Sirhsan cabu. PIPU AAN MAWI, Pu Duh Cung Nung. 2004 7. Thainu lunglen -Tthal tir rawng suahnak 8. Thoci bangin -Zu duh tuk, ziangtiklai khal ih mi hnaihnok ringring. Zu duh tuk relnak 9. Thothe bah in - Zianghman khawngaw man lo ih bah pang 10. Thing khawhawr zuam hlah - Thing kawhawr khal ceh a ol thluh lo 11. Thingse par lai nei - Masiate khalin tthat lai tikcu an nei 12. Thing kawi pom rem - Mi ngiaufio veve khal an rem aw thiam 13. Thing khal a par hmuah in rah hlah - Ziang khal mai duh vek ngah thluh a theih lo 14. Thihsin arbawm nawh - Thih hnu khalah mithi khua khalah rethei aw. Mi camnak 15. Thing phur khat le pasal pakhat - Hawl tak ah cun mai tong cu a hmuh theih 16. Thih ttihah limpi'n fei liak - Ttul tuk ruangih tuah duh lo mi tiang tuah 17. Thianhring ruak buah - Manhlap tuk fai man lo ih kholhawk 18. Thingthu cuhawk - Thil thupi um cuang lo ih tawhawk pang 19. Thlum al khen - Thil thlum tuk relnak. Zu thlum relnak. 20. Tlangak in a dum lo a rang hring hlah - Mai bawi kel hlon a theih lo; mah thawn mizia bang aw fa nei www.chinworld.info
Page 23

Sirhsan cabu. PIPU AAN MAWI, Pu Duh Cung Nung. 2004 21. Titavet ih kawl tlawng - A tir hmuah ih ziang thei lo. Theih hnu hmuah ih bangnak cang khal thiam nawn lo 22. Tidai bung hnu ruh theih lo - Ttong zo hnu bal sal/ phiat a theih lo 23. Tian Hrang thei veh - Ziangtiklai khalih pan ringring 24. Tua tir hngilh um hlah - Neih hmaisa bik hngilhti a um lo 25. Tuha le tlangrai - Thil a lingletaw thei sal 26. Tuha boh le hreiha boh - Tarlam ih upa ttianawk cu zo poh khal neih a tul, duh a hril thei lo 27. Tinsih le Ai hmal - Mai phurh le ttuan suah relnak T,t 1. Tapa le ttangtta - Ttangta kal hai a daih vekin ttapa khalin hai an daih 2. Tapa le dar tithawl - Ttapa le dar tithawl an sunglawi veve. Ttapa khal a thih phanah an dimdoihih dar tithawl khal a kuai phanah an dimdoih. 3. Tapa lo mithli tla - A ttah ngai hmuah ttap lo ih mithli tla 4. Tau-ar ka lu sum le sum - Thih ttih lo ih rawl hawl. Ttau-ar khal an ril a rawn ruangah thih an ttih lo vekin minung khal kan ril a rawn cun thih kan ttih lo 5. Thahnem ngai ih pam sin tong - Tthanem ngai tuk lam ih ngah mal riangri

www.chinworld.info

Page 24

Sirhsan cabu. PIPU AAN MAWI, Pu Duh Cung Nung. 2004 6. Thahnem ra hnemhno, hloh ra hlohhlo - Tthahnemnak cu nuam ten a thleng ih siatralnak cu a thleng tohto 7. Thim pang cang lo'n - Ttong ralsinnak 8.Toruah samei cawi -Ttoruah a sur: ruah can is lo a han hnu ih ram tawi 9.Tong thei sabawk khai - Ttong thei tuk; mi tlun ih um tum 10. Tuan demman le ei demman - Ttuan mal cun ei ding malte lawng an hmu 11. Tuan hruthro le ei hruthro - Taima ih ttuantu cun duhtawk ei ding an ei 12. Tong kam khat sepi man - Ttongkam thiam cun sepi kuan ding khal an luat 13. Toruah le vok zaang - A tik cu lai ih ti lohli. U,u 1. Uico nau duh - Thil duh rei lo 2. Uico ka ha herher - Ziangmi a tong ding tiih mi bawh ringring 3. Uico tawkua cum - A um lo cing um ter ttento 4.Uico saruh ham - Mi zawn ruah nei lo mai hrang lawng ruat 5. Uico in bo khaw ar in cuk - Pakhat in a hmuhsuam ruangih mi dang khal ih hmuhsuam vivo www.chinworld.info
Page 25

Sirhsan cabu. PIPU AAN MAWI, Pu Duh Cung Nung. 2004 6. Uico neh lam ttang - Ttanhmun nei cuang lo ih a neh tu hnenih ttang 7. Uico mai sung thei - Uico hman in mah rawl petu an thei 8. Uico vak khaw saruh tong - Vah tam hrat ah cun thil ttha a tong theih 9. Uico sahang mak - Duh-na ringringih duh lo bangih um 10. Uico vanlam san - Ttankhawhnak a tawp ruangih mai ngam lo mi tiang rak tuahmawh 11. Uico mai luak ei -Mai duh lo bang duh sal 12. Uico sa hlo ter bangin -Hlohter mi hawl vutvo 13. Ui zaang bangin -Hnatuan pekih paih vutvo, a rei hnu ih paih nawn lo 14. Ui haang sa tuk a khu lo -Thinheng tuk ttong thei nawn lo me remrem 15. Uite hai her ka bang -Duhtuk ruangih mi veh vutvo 16. Ui taw kaang bang -Helhkam neih ruang ih um menmen thei lo kaam deldel 17. Ui le me bang in - Ziangtik khal ih remaw lo 18. Ui lupu le sal lupu - Naa luar tuk lo naa zet vek ih ttap le ai ih zual ko

www.chinworld.info

Page 26

Sirhsan cabu. PIPU AAN MAWI, Pu Duh Cung Nung. 2004 V,v 1. Vanva zuang sam - Ram kau tuk relnak 2. Va buluah in - A zate ih lak thluh 3. Vanim ttahnak - Ramcar le ngallak tuk relnak 4. Vanim bum nuam - Mi thurel mi pohpoh lung hluahhlo 5. Vanim sapih taw thu - Hlawhcawn belh ih mi bang lo 6. Vaithang hloh I hlo - Zingzoi ding um lo khop ih hloral 7. Vansang tiril tok -Mangbang tawpkhawk 8. Voih lo puh hman a na - Thuphan puh cu thin a na 9. Vok mei taal bangin - Sullam nei lo ih vak rero 10. Vok veikhat suak, lungtum tong -Thilti sunih vansiat tong 11. Vokpi hman in kuang a awm - Vokpi rawl khop kuang kiangih a it theu bangin mi inn ih rawl khop vete ih tlan a mawi lo 12. Vok at ih aa -Zianghman thei thiam lo ih aa 13. Vunnel parih ti bung bang - Cemral lohli www.chinworld.info
Page 27

Sirhsan cabu. PIPU AAN MAWI, Pu Duh Cung Nung. 2004 Z,z 1. Zanlam ttan thum suak, zianglam ttul ziar - Zanlam hmuah ih turpakak rero si zinglam ih ttul sal 2. Zaizum khal ka zum lo in a rah lo - Zum lo vek ih ziang khal ngah lo 3. Zathal cilphui mai par tla - Ttong sia hman cu mai parah a tla sal 4. Zai duh mak in - Duhthusam kim ding ih nuamnai tei ruah 5. Zam Dal bang in - Mize a um cia hman ei paih lo 6. Zawhte hmaiphiah - Tiluklak ih thilti 7. Zawhte ek phum -Puante ih thil phum men 8. Zawhte meisa cawng - Lenvahnak khalih tapta vivo men 9. Zawhte upat I upa -Ttahnemnak nei cuang lo kum lawng upa 10. Zawng ih hmai hman ka zah - Mi an um lai ah cun relsiat a har, an hmaisong um 11. Zawngih hma nei bang - Hnagakhlap tukih tuah leuhleuh 12.Zawng sih hmu bang - Khui dang vak thiam lo ih pan vutvo 13. Zawngte saduhthat - A cang thei lo ding tiangih ruat

www.chinworld.info

Page 28

Sirhsan cabu. PIPU AAN MAWI, Pu Duh Cung Nung. 2004 14. Zawng lakih ngau kaang - Mi thuhla ih va hrolhaw hrat ih mai parih thupoi thleng 15. Zawngin a mai tawcak a hmu lo ih mi tawcak a hnihsan - Mai tthat lonak hmuah hmu lo ih mi tthat lo nak va rel 16. Zawng banhal uam bang - Tu le tu zoh leuhleuh 17. Zing ruahsur le mak thuan thih - Zing ruahsur khal a han lohli, mak thuan khal an zuun in rei a daih lo 18. Zinghnam zawhte kuang orh tum - Mai tuahngam lo ding mi thutha thei 19. Zinghnam mei zuh - Zianghnam tang nawn lo 20. Zin kiang tloh le bawi biak - Thil harsa rem tthat awk a tul 21. Zo lung tluang - Tha ngaingai lo ih thil ti duak 22. Zolo thlawh le papar luah -Zum lo pi ih hlawhtling 23. Zubui hman in a mah kua a sial - Ma hmakua ruat thei lo mi hlotlau 24. Zubui lung tong ka bang -Ti ngaihnak thei lo zawm tla 25. Zuibui mei can - A tawibik tthimnak 26. Zumaw lo ih ti lung kaat - Ringaw ngamlo ih thil ti cu tluk bahnak 27. Zuhrei ek seng - Ttul nawn lo tiang thil ret khawm www.chinworld.info
Page 29