ZORAM NGAIH HLA

- Rosangliana

1. Zanin chu ka lunglen min hnêm turin,

Ram chhung leh pawn telephone bute ka han thlir a;
US unaute ka ngai, Zampui tlangdung, aw, Manipur,
Rangoon pawh za li kan chuang e.

Aw, Zoram min nghilh bik suh ang che,

Dâwn changin Zoram kan ngai vawng vawng,
Hmangaih biahthu inhlân bang lo’ng aw.

2. Zanin Shillong tlang chhawrthlapui êng hnuaiah,

Pianna Zoram hmangaih berte lênna Kolasib ngaih a zual;
Lenrual lungduh zawngte kan ram ngeiah hlimin an lêng,
Lên ve hun aw, ka nghakhlel.

Mi ramah zawng lunglen a na e,

Lâm ang lo lêt ka nuam e;
A rei tawh lo’ng e,
Min lo nghak la, in\hen tawh lo’ng aw.

3. Zanin chu ka lunglen min hnem turin,

Rual hlui zawngte autograph address ka thlir a;
Hmana rual hlui fam tate ka ngai,
Hranghlui zai mi fam tate ka dâwn changin,
Luaithlipui ka nûl leh \hin.

KAN DAM CHHAN

 - Lalduhzuala

1. Eng dâwn ang maw hmanah Khuanu hian,

Hringnun hi a duan lai khan;
Hraileng awmhlei dung a thul em ni,
Hringnun hi a lo duan le?

Aw, enga’n nge maw Khuanu hian,

Hringnun hi a lo duan le?
Thâm ral leh mai tur hian em ni le?
Duh vang rêngin kan piang si lo.

2. Mim ang piangin sial ang kan seilian,

Hâi ang tara fam ralin;
Aw, dam chhan hi nei tak ang i maw,
He khawvel sual khur puiah?

3. Khawi lamah \uan rel tak ang i maw,

Hringnun hi a ral hunin;
An sawi Pialral hi awm tak ang maw,
‘Tah chuan engtin zel ni maw?

RAWL LAI KA DI
 - T. Lalnunzama (Zama)
1. Khawia’n \uan maw tiin, zirpui lenrual hluite,
Zah pawh dâwn zo lovin, zâwtin ka zawng che a;
Saw raltiang vangkhuaah, \uanin a lêng an ti,
Ka hmangaih en chim loh, ka tan vul che maw?

Tawn leh ka nuam ngei e aw, râwl lai ka di tê kha,

A châm reng thinlaiah, thiamna rûn khat bel a,
Dâr ang kan lên lai nite, auh kir leh theih ni si lo,
Hlim têa kan lên lai hun, a va’n rei lo tak em.

2. Chhem dam thlifim, dam te’n nem te’n va lêng zel la,
Ka di thlan dar tui luang, nem te’n va chhem dam la;
Hliaptu van râng chhûm aw, muang te’n zîng châm rih la,
Turni sen sa hnuaia \uan rel ka di hliahin.

3. Aw \hian koh thiam huiva, thlawkin va lêng ta la,

Ka di rûn sang belin, ti hian min va hlan la;
‘Nang ngai suihlung lêngin, chhîn zai a rêl thei lo,
Hrâm thiam, rimawi tin paw’n an hnêm zo lo,’ tiin.

PHENGPHE KHUA TLAI ZO TA

- Vanhnuna Hringngen
1. Enga’n nge hmanah aw, kan intawn loh,
Khua a tlai ta, a tlai zo ta si a.
Lairila’n zawng ka hmangaih em che,
A rem si lo rûn hmuna lên;
Tlei dang \âng belh hma khanin e,
Enga’n nge kan intawn loh?

Phengphe khua a tlai zo ta,

Thinlai nâ a dam thei lo;
Phengphe khua a tlai zo ta,
Thinlai nâ a dam thei lo.

2. Chhimhlei tual nuam lam chu pan ta la,

Par tin mawi te’n an vul siau ve;
Par mawi tinten an lo hmuak ang che,
I thinlai nâ thâwi dam ve nan,
Duhaisam Khuanu sam suih,
Lung chim te’n i tawng ngei ang.

Phengphe khua a tlai zo ta,

Thinlai nâ a dam thei lo,
Phengphe khua a tlai zo ta,
Thinlai nâ a dam thei lo.

Phengphe khua i tlai zo ta,

Thinlai nâ a dam thei lo,
Phengphe khua i tlai zo ta,
Ka thinlai nâ a dam thei lo.

INTAWNG LEH NGEI ANG AW

- CFL Hmingthanga

1. Kan vangkhawpui bêla chhingkhual i rawn chan lai khan e,

 Kâr pawh awm hman lovin ka lo hmangaih reng che a maw;
Mahse \uan \ul vang hian min liamsan leh ta si,
Kan intawng leh ang tih tal min tiam rawh.

Tuar i har dawn ngei ka di, i sakhmel mawi ka thlirin,

Hmangaihna chhingmit ngeia min thlir vang hian;
Ka tiam na’ng che, rinawmin lo awm reng la,
Duh luat vangin lâm ang ka lo lêt leh ngei ang.

Ka tuar nêm thei dawn lo, sam ang kan in\hen chuan,
Sakhmel mawi leh ka di lal-nun-nêm-tê;
Kumpui sûl vei hma hian intawng leh ngei ang aw,
Thlafam chan hma loh chuan ka \ângah bei hle hle.

2. Hmangaih dang nei reng chung chuan biahthu di min hlan lo la,
Ka thianghlimna par mawi thliaka min liamsan leh si chuan,
Riakmaw ianga vaiin dairial ka chang ngei ang,
Ka dâwn sei ngam lo aw ka chan tur hi.

Siktui luan kir hma loh chuan, rinawmin awm reng na’ng e,
Ka nunna chhâlin ka tiam nawn leh na’ng che,
Ka hmangaih che, duh lai di en chim loh,
Min hriatpui turin Khuanu ka thlang na’ng e.

3. Suihlung muang te’n hmangaihnain ka lo nghak reng ang che,

Kumtluang i thai ka chan thlengin ka hmangaih reng ang che;
Suihlung muang te’n zan mu lo chhing tawh la,
Kan tiam thu di zawng kha i vawng dun zel ang aw.

KHUANGCHAWI THLA

- C. Durthanga

1. Lêng zawngte hlimna ber, khuangchawi thla hi,

 Pi leh pu vanglai paw’n sawi nuam an ti;
Chung turni khua tlaiin thlang kâwla’n a liam,
Chhawrthlapui êng mawian khuang a rawn châwi e.

Chutin zaleng zawngte a êng mawi lawmin,

Mahni chhâi lai di rûn hlim te’n an kai a.
Chawrthla âr kâi par tlan, hlim te’n zai an vâwr,
Lengi hlim nui ri nen, lêng dang an ngai lo.

2. Thangvan sang lah mawi chuang, thlir ninawm lo,

Si-ar lêng rual zawng paw’n a sir an bêl a;
Vân râng chhûm lah sira’n an her liam zel a,
Thlir ninawm loh thangvan khua in mawi ngei e.

3. Mahse Khuanu lêng ruat dan rual si lo,

Thlang khuandimin kâwlrâwn an liam zo ta;
Ngaiin au mah ila, kîr zâi an rêl lo,
Thangvan mawina zawng pawh, puan ang chul zo ta.

VAU THLA
- Lalsangzuali Sailo

1. Ka hawi vel turnipui sen sa hnuaia’n,

|uang\uah leh vau par tin an vul chiai e;
Thlirin mual tin romei a kai chiai e,
En chim loh aw, Vau thla êng nuam.
 Aw, Siamtu kutchhuak rêng lo ni e,
An fak ning lo hram thiam aw mawi zawngten,
Thlir ve teh u, khua tin an mawi hluan e,
En chim loh aw, Vau thla êng nuam.

2. Sik ni pui tuar hnu thing lenbuang zawng pawh,

Chawr tin duah tin hnah nem chhuah hring nghial e;
Zai tin rem thiam lelthang, ngirtling chenin,
Vau thla ni êng an âwi bang lo.

3. Tlai nema’n hringfa zaleng naunâwnten,

Van dumpawl riai boruak thiang lêng kara’n;
Lêng tin kaina sumtuala’n nui hiau ve,
Thlang tlai liam tur kâwl êng hnuaiah.

4. Aw, par tin nungcha leh hringnun chen hian.

An ral leh \hin ni rei lêng thei lo hian;
Mahse Vau thla, hun mawi ber leh duhawm,
Châm reng mai la pialleiah hian.

RUNMAWI
- Valzotea

1. Zan khua a lo tlai hianin,

Kaina rûn sang kan mawi;
Suihlung rual zaa lengin,
Hlim zai kan vâwr \hin.
 Lêng zawngte hlimna ber rûn mawi,
Lanu chhuihthang val rual kan lâwina.

2. Tu dang lêng dang kan ngai lo,

Rimawi \ing\ang nen;
Khawi lam \uan zai rel lo hian,
Lunglen thu hril za e.

3. Eng dang dâwn lo rêng hian leh,

Chawltui ningzu rui a;
Han belh chang nite hianin,
Anka nem te’n min chhâwn.

4. Kan lâwina rûn hming \ha hluan,

Kan châwi na’ng che rûnmawi;
Chung Khuanu lêng hual zelin,
Kumtluang rûn mawi tling la.

PHENGPHE NUN NEM

- Zirsangzela Hnamte

1. Lêng dêr dêr thangvân zauvah,

Par tin zu lâwr phêngphe lêng;
Thlum tin chhim tlai ni lênin,
Zâl nan rûn a chham si lo.

Theih chang ve se lên thiama’n,

 |uang\uah par an vul laiin;
Chhûnrâwlah va ring ila,
Hringnun sual hnutiang chhawnin.

2. Chhun ni pui sen sa hnuaiah,

Thlir châng thinlai tihlimtu;
I sakruang ze tin \ial mawi,
Par zawng nen a mawi mang e.

3. Phêngphe nun nêm leh zaidam.

Vahkhuai, tho leh hmiripan;
Par zu dâwn za thlir changin,
Hringnun hi ka \ahpui \hin.

4. Phêngphe nun nêm lên thiami,

Lo lêng leh la kan rûnah;
Kei ariang leh par mawite,
I ngaiin ka kiu vawng vawng.

Pop Song chu ‘Popupar Song’ tih a ni a, a awlsam zawngin ‘Pop Song’ tiin sawi a ni.