KA THAI TLUANGTE

Dawn thiam a har ngei, Ṭahzai ka rel leh ṭhin

Dam tea len kan rel chauh va;
Ka ring phal lo aw, ka ngaithiam thei mawlh lo,
Fam rihsang min liam san hi.
Ka duhlai hi Lalpa min chelh sak rawh ti a,
Thlaphang au khan chhangtu a nei si lo;
Van a duai chuang em mai nau ang nuarin,
Ka ṭap ka ṭap mai dawn e.

Damna dawi kha i tan fam chan na tur maw,

Thinlai min run a na ngei e;
Vangkhua a ngui lenrual hril pawh a hai ngei,
Van duai kan ṭap run khawharah.
Theih chang se aw rauthla leng zui ka nuam ngei e,
Sakruang i kiangah ngei zal ve i la;
A na em e ka tuar thiam lo a ni,
Lalpa min hnem ang che.

Lam ang let zai reng i rel tawh si lo,

Lung ka phang ngei i tel lo chuan;
Fam zun ngai zawng hringnun rel thiam a har ngei,
Min thlir ve maw rauthla lengin.
Thangvan ah khian famvang khawpui a awm an ti,
Tah chuan a leng a maw ka thai duh lai;
Kei pawh chu hmun ka len ve theih nan chuan,
Lalpa min pui ang che.

Thangvan ah khian famvang khawpui a awm an ti,

Tah chuan a leng a maw ka thai duh lai;
Kei pawh chu hmun ka len ve theih nan chuan,
Lalpa min pui ang che.

Fam zun ngai zawng hringnun rel thiam a har ngei,

Ka ngai em che ka thai Tluangte.