MI ROPUI NIH KHER A NGAI LO

-GOSPEL VANLALRINCHHANA, BD.1

“Lalpa i Pathian chu i thinlung zawng zawngin, i thlarau zawng zawngin, i rilru zawng
zawngin I hmangaih tur a ni” (Matthaia 22:37)

Pathian rawngbawl tur hian Lalpa hian khawvel thiamna degree sang neih kher hi min phut
lem lo a, ama tan kan theihna zawng zawng hi a duh ber zawk a ni. Tirhkoh Petera kha he
khawvel thiamna zawng chuan chhuan tur eng degree mah a nei lo. Pathian thurilhtu tha tak a
ni tho. Zirtirte zinga Isua hman ber leh hotu chan chang ber a ni tlat. A aia lehkhathiam zawk,
chhiahkhawntu Matthaia te pawh an awm. Isua tan a inpe ber a, a hmangaih ber vang zawk a
ni.

Mosia pawh Israel fate hruai chhuak tura Pathianin a koh lai khan “Mi tawng hmang thiam
ka ni ve ngai lo a ni; mi tawng ban leh mi tawng mawh ka ni si a” (Exodus 4:10) a ti a. Mahse,
Pathianin a ko tawh a, a awmpuia, hma a hruaisak tlat a ni. Ama theihna maiin a kal lo a, Lalpa
chakna nen a kal a ni. Zawlnei Jeremia pawh Lalpa’n a koh lai khan, Jeremia chuan “E, Lalpa
Pathian, ngai teh, thu ka sawi thiam lo, ka naupang si” tiin chhuanlam a siam a, Lalpa chuan, “
‘Ka naupang’ ti suh, ka tirhna che apiang hnenah i kal ang a, thu ka pek che apiang I sawi tur a
ni. Anmahni vangin hlau suh la, chhan chhuak tur chein i hnenah ka awm e” a ti a nih kha.
Gideona pawh Grape sawrna khura a biru lai a ko mai a ni. Lapa’n a tirh chhuah te hi a awmpui
zui zel thin. Lalpa'n a mi koh te hi mithiam, chak, ropui, huaisen leh fing, mi tling leh tlak an ni
kher lo, a koha te hi mi tling leh tlakah a lo chher zawk thin a ni.

Makedonia chanchinbua zawhna leh chhanna column changtu Dr.Lip hi Pathian thu a hriain
a thiam em em a, mahse Theology lamah degree hi eng mah a nei lem lo, Lalpa tan a inpe a,
Lalpa'n a hmang a, hriatna leh finna te a ti pung mai a ni. Chu chu Lal Solomona hian a lo hre
chiang hle a ni ang; "Lalpa tih hi finna bul a ni" (Thufing 1:7, 9:10, Sam 111:10) a lo ti thlawt a ni.

Sushant Rajput chuan, "Kei chu eng mah ka ni lo, zero pawh ka ni phak lo, Minus atanga bul tan
ka ni" a ti a. Mahse, a thawhrimna chuan dinhmun duhawm zawkah a hlang kai mai a ni. Bul kan
tan dan aiin a tawp ka khar dan hi a pawimawh zawk a, keini pawh, minus atangin bul kan tan
pawh a ni thei, mahse kan Talent te tipung theitu Lalpa a awm a, amahah kan innghah hi a
pawimawh a ni. "Bul tan turin ropui kher a ngai lo a, ropui tur erawh chuan bul tan a ngai thung
si a ni”.
 Israel Lal atana Samuela'n Davida a thla dawn lai khan, Jesaia fapa te zingah a upa lam leh
tisa lamah pawh chak zawk an han zawng hmasa a, mahse Lalpa mi tlan an awm tlat lo. Koh
zingah pawh tel ve lo, Football tawngkam takin, Subtitute-ah pawh awm pha ve lo, ram lama
Beram vengtu kum naupang te Davida a thlang daih a sin. A hun lai khan a tisa zawnga
ngaihtuah chuan a mak mai thei, kum lamah pawh naupang ber, chak lo ber tura ngaih kha
Lalpa'n a thlang tlat a sin. Amah lam a thlir lo, Pathiana a innghahna lam kha a hmuhsak zawk a
ni. Lalpa rinchhanin Ramsa lakah pawh a Beram te a chhan fo a, Lalpa rinchhanin milian leh
chak Goliatha pawh a hneh mai a ni. "A ni, thihna hlim kawr ruam zawh mah i la, thil tha lo reng
reng ka hlau lo ang. Nang ka hnehah i awm si a" (Sam 23:4) a ti tlat a lawm.

Ka sawi loh thih loh pakhat chu, BD zir tura dil tur hian tling lo leh fel lo hi ka inti em em
a, khawvel thiamna lamah ni se kei aia thiam an tam si, keima thiamna chuan ka inziak tling thei
kher lo mai thei; mahse Lalpa kohna ka hnar thei si lo, “Lalpa rinchhanin Abrahama ang khan ka
kal chhuak ve tawp ang e” tiin ka rilru ka siam a, Lalpa’n hna min thawhsak a ka lawm hle a ni.
Tin, Lalpa’n a thu zir tura min lak hnu pawh hian, ka hmuh belh leh chu, Lalpa hian khawvel
thiamna lamah chhuan tur nei lo lo ho hi min la a maw ni tih mai tur hian, keimah anga a bik
takin English lama harsatna nei kan awm nual a ni tih ka hmu leh a, Lalpa hian mi ropui leh tling
kher a thlang lo a ni tih hi ka va hmu chiang leh zual em. A pawimawh ber chu a kohna chhan hi
a ni.

Pathian rawngbawl tur hian tling leh tlak tawk loin kan inhria a ni mai thei. "Mifing leh
remhria ten an daih zo lo, kan kovah Lalpa'n a nghat ta" (KHB no.529) tiin hla siamtu chuan a lo
ti thlawt a sin. Pathian chuan mi ropui a zawng lo a, a ropuina hmu thiam tur mi a zawng zawk
ni. Khawvel thiamna kan neih lam a ngai pawimawh ber lo a, thinlung zawng zawnga atana i
inpekna kha a duh ber a ni. Kan nihna ang ang a theih tawka a rawngbawl turin min duh zawk a
lo ni. “Pathian tana mi ropui te hi mi derdep te te an ni a, an hnenah Pathian a awm tih leh
Pathianin a ti thei tih an rin avangin Pathian tan thil ropui tak an ti thin a ni.” (Hudson J. Tailor).