TUMKAU CAWI ZARHPINI

(Palm Sunday) # 14

 A thaizing ah cun Lanhtak Puai ca i a rami mi tampi nih khan Jesuh cu Jerusalem khua ah a ra lai ti kha an theih. Cucaah kuhchuk hnah kha an i put i amah don awkah khan an kal i;
Pathian cu thanghat ko u. Bawipa min in a rami cu Pathian nih thluahchuah pe ko seh. Pathian nih Israel siangpahrang cu thluahchuah pe ko seh, tiah an au.

 Jerusalem khua chungah an va luh tikah a khuapi in an i tuai i, Hi pa hi ahodah a si, tiah mi nih khan an rak hal hna.
Hi pa hi Galiliram Nazareth khuami profet Jesuh a si, tiah mi bupi nih khan an leh hna.

 Jesuh cu Biakinn ah khan a va lut i Biakinn chung i chaw a rak zuarmi le a rak cawmi kha a hawl dih hna i; Thangka thlengtu pawl cubuai le laileng zuartu pawl hutdan zong kha a leh dih hna. Annih cu,Cathiang chungah, Pathian nih ka inn cu thlacamnak inn a si lai a ti, tiah aa ial. Sihmanhsehlaw nannih nih cun mifir kua ah nan ser cang, tiah a ti hna.

 Puai caan lio i Pathian biak awkah Jerusalem i a hung kal mi hna lakah khan Grikmi tlawmpal an i tel ve. Galili peng Bethsaida khuami Filip sinah khan an ra i,Bawipa, Jesuh hmuh kan duh, an ti. Jesuh nih cun,Mi Fapa hi sunparnak nganpi pek ka si caan a phan cang. Biatak kan chim hna, facang ci pakhat cu vawlei ah tuh a si i a thih ta lo ahcun pakhat lawng a si peng ko. A thih ta lawngah facang mu tampi a chuahter khawh. Aho paoh, a nunnak a dawmi nih cun a nunnak cu a thlau lai; hi vawlei cung i a nunnak a huami nih zungzal nunnak ah cun aa chiah lai.