Sa simula ay pagbati at masayang pagpupugay Ang handog ko sa naritong natitipong kababayan Dalangin ko'y lagi kayong patnubayan ng Maykapal At makamtan araw-araw ang payapang pamumuhay.
Kaya tayo naririto'y pagkat wala tayo roon At tayo ay wala roon dahil dito tayo ngayon Subalit ang isang sanhi kaya tayo natitipon Ay sapagkat meron tayong sasaguting isang tanong.
Ngunit bago magtanungan, pakilala muna tayo -- Ako po si PERT MAGTAPAT, laki't tubong Batangueno Sa Balagtasan pong ito'y Lakandiwa ang papel ko Mabait na Lakandiwa - ang matalo, pugot-ulo!
Maswerte raw tayong mga manggagawang nandayuhan Dahil dito'y masagana at ang sweldo pa ay dolyar Ngunit dito ay meron ding masaklap ang kapalaran Biktima ng pang-aapi sa trabahong napasukan.
Pag ganyang may manggagawang biktima ng pag-abuso Na ang lalong mas marami'y kapwa nating Pilipino Marapat lang na kumilos tayong mga naririto Upang mali'y matigil na at ang sala'y maiwasto.
Subalit kung ang kikilos ay ilan lang at di lahat Ay malabong kamtin iyang pagbabagong hinahangad Kaylangan ay magkaisa, magkabuklod, magkayakap At 'yan ngayon ang s'yang paksang sa inyo ay ilalahad.
Ang tanong ay "Kaya kaya, o di kaya makakaya Nating mga Pilipino na tutoong magkaisa? Sadya bagang lagi tayong walang paki, kanya-kanya? O mayroon pa ba tayong tinatanaw na pag-asa?
Bukas ngayon ang tanghalan sa nais na makihamok Tiyakin lang ng sasali na ang utak ay di bugok Balagtasan ay di biro, talino ang s'yang pampukpok Talino rin ang panangga, pansalag sa bawat suntok!
PANIG NG "KAYA" (Pagpapakilala)
Sa mabunying Lakandiwa't kababayang naririto EMMA MALACA is my name, bumabati po sa inyo Humihiling na sana po'y tanggapin sa entablado Sana rin po'y dumami pa ang dollar na maipon n'yo!
Hindi na 'ko liligoy pa: isang tanong, isang sagot Kaya baga nating mga Pilipinong magkabuklod? 'Yan ba'y dapat sagutin pa? Kitang-kitang very obvious... Oo, s'yempre, walang duda, definitely, oh yes, of course!
LAKANDIWA (Pagtanggap)
Ang makatang si Emma ay akin ngayong tinatanggap Halika at 'wag ka riyan sa ibaba magpasikat Pinasok mo'y Balagtasang tagisan ng mauutak Kung kokonti ang baon mo'y p'wede ka pang makaatras.
PANIG NG "KAYA"
Salamat po, Lakandiwa, hindi kayo mabibigo Sanay ako sa bigkasan, d'yudo, arnis, larong piko Balagtasang nilahuka'y hindi lamang tatatlumpu Tatlumpu kong nakalaban, ngayo'y nasa Mental pa po!
PANIG NG "HINDI KAYA" (Pagpapakilala)
Ang sabi n'ya, dumami raw ang dollar n'yong maiimpok Ang sa aking hiling naman kung sakaling itutulot, Madagdagan sana rito ang Pinay na mangingitlog Para naman automatic na mayroong U.S. Passport!
RAFAEL A. PULMANO po ang lingkod n'yong nagpupugay Ako man po'y humihiling na tanggapin sa tanghalan Sa tanong ng Lakandiwa, ang panig kong ilalaban: Pilipino'y hindi kayang magkaisa kaylan pa man!
LAKANDIWA (Pagtanggap)
Magtuloy ka kung tutoong sa bakbakan ay handa ka, Kundi naman, d'yan ka na lang, 'wag na dito magkalat pa Dito'y walang karapatan ang mapurol pagkat baka Tayo rito ay batuhin ng balanang nakanganga!
PANIG NG "HINDI KAYA"
Salamat po, di rin kayo magsisisi pagkat ako Ay batikan sa tulaan at hindi pa natatalo Kung nais pong patunayan ang galing ko, tanungin n'yo Ang lahat kong nakalaban - naro'n po sa sementeryo!
LAKANDIWA
Yamang kapwa narito na ang makatang maglalaban Simulan na agad natin itong ating Balagtasan Unang tindig ay si Emma, siya'y ating palakpakan, Pag pumalpak, saka natin paulanan ng masinggan!
KAYA (Unang Tindig)
Mahigit na pitong libo ang isla ng ating bansa Bawat bayan mong puntahan, iba-iba yaong wika Iba-iba ang ugali, kanya-kanyang paniwala Ngunit tayo'y isang lahi na nilikha ni Bathala.
Dahil isang lahi tayo'y nakaukit sa isipan At puso ng Pilipino ang diwa ng makabayan Kaya pag may inaapi, kung may dapat ipaglaban Handa tayong magkaisa, kapit-bisig, damay-damay!
Bakit tayong Pilipino taun-tao'y nagdiriwang Niyang ating tinatawag na Araw ng Kasarinlan? Ito kayang bansa natin ay malayang matuturan Kung noo'y di nagkaisa yaong ating kababayan?
Noong tayo'y magkaisang ang diktador mapatalsik Tayong mga Pilipino'y iginalang ng daigdig Ang Edsa ay siyang saksi na di tayo palulupig Kapag tayo'y nagkaisa ng damdamin, puso't isip!
Nagkaisa tayo noon, kaya bakit hindi ngayon? Kaya nating magkaisa sa'n man tayo naroroon! Kaya nating magkaisa sa mabuting nilalayon, Isang lahi, isang dugo, isang mithi, isang nasyon!
LAKANDIWA
Ang makatang nagpauna'y maliwanag na nagsaysay Anya'y kaya nating Pinoy magkaisa, magkatuwang Ang kaniyang katunggali'y atin namang pakikinggan Tingnan natin kung talagang ang tuktok nga ay may laman!
HINDI KAYA (Unang Tindig)
Kalaban ko'y para palang sugarol sa betubeto Nakatikim lang manalo, umasa nang walang talo Hindi komo't noong araw, nagbuklod ang Pilipino, Lagi na nga't kahit saa'y magkasangga na nga tayo.
'Wag na tayong lumayo pa: marami d'yan na pamilya Ama't ina, mga anak, may alitan tuwi-t'wina Kung pamilya na kayliit ay di na nga magkaisa, Gaano pa tayong mga Pilipinong sangkaterba?
Ang dakilang Panginoo'y labingdal'wa ang alagad Isipin mo, labingdal'wa - ang isa pa ay nag-Hudas! Kung sila nga na kokonti, magkaisa ay kayhirap, Di lalo na tayong mga Pilipinong sangkatutak!
Ang tunay na nangyayari,masakit man kung pakinggan, Lagi tayong kanya-kanya, parang hindi magkakulay, Problema ng kapwa tao'y wala tayong pakialam Kung meron mang pakialam ay para lang magsiraan!
Di nga p'wedeng magkaisa tayong mga Pilipino Karamihan kasi sa 'tin ay may utak-alimango Maayos ang pakisama pag maayos lang ang takbo Ngunit pag may problema na,kanya-kanya, labu-labo!
LAKANDIWA
Si Emma kung magsalita, akala mo ay lilindol Si Rafael naman, parang sasabog ang bulkang Mayon Ikalawang tindig ngayon ng dalawang nagsasabong Palakpakang matutunog, muli nating isalubong!
KAYA (Ikalawang Tindig)
Kalaban ko'y hindi naman reporter ng d'yaryong tabloid, Ang maganda'y di mapansin, nakikita lang ay bulok Mas maraming Pilipinong maka-Bayan, maka-Diyos, Ngunit ang 'yong pinupuna'y yung masamang kakarampot!
Sa pamilya ay oo nga't laging merong tupang itim At Hudas ay di mawala saan ka man makarating Ngunit ito'y natural lang at di dapat maging sagwil Sa sino mang naghahangad na ang tao'y pag-isahin.
Kaya tayo nagbubuklod, nagsisikap magkaisa Ay sapagkat nais nating lumakas ang ating p'wersa Ang hindi mo magagawa at hindi ko makakaya Kaya nating magampanansa lakas na pinagsama!
Sila, ikaw, saka ako, tayong lahat ay may lakas Na di kayang maitumba kahit merong maging ahas Marami sa Pilipino ay may dangal at may utak Tutulong sa kapwa Pinoy sa halip na magpahamak!
LAKANDIWA
Aawatin ko na sana si Emma nang sumandali Napansin kong si Rafael, kanina pa di makali Siya ngayo'y nagbabalik -mas mainit, mas matindi Para lalong mapasarap, palakpakan nating muli!
HINDI KAYA (Ikalawang Tindig)
Ngayon ko lang napagtantong kalaban ko ay balimbing 'Ginigiit na ang Pinoy ay kaya raw pag-isahin Pagkatapos, siya na rinitong ngayo'y umaamin Na hindi raw mawawala ang Hudas at tupang itim!
Paano mo masasabing tayo'y p'wedeng magkaisa Kung sa "tayong" sinabi mo'y merong ibang ipe-p'wera? Tanong dito'y kaya baga, o hindi ba makakaya, Nating mga Pilipinongmagkaisa? Ay hindi, ah!
Sa kumpanyang halos puro Pinoy na ang empleyado Siguradong merong sipsip, vacuum cleaner, sumbungero! Di baleng may matapakan para lamang umasenso Sapagkat ang kanyang motto: "Mabuhay ang sarili ko!"
Di ko naman sinasabing ahat tayo'y puro palpak Marami ring Pilipinong ibig tayong maiangat Ngunit ilan sila't ilan naman yaong naghahangad Na itaas ang sarili kahit kapwa'y maibagsak?
LAKANDIWA
Kung baga sa niluluto, kumukulo na nang husto Ang bungguan ng dalawang kapwa ayaw magpatalo Komo ito'y huling tindig, tatahimik muna ako Hahayaan ko na silang magkabaklian ng buto!
KAYA (Ikatlong Tindig)
Pilipino ay maraming magagandang katangian Na ang iba ay mana pa sa kulturang nakagisnan Isa rito yaong ating kung tawagi'y Bayanihan Na kung saan bawat isa'y bukas-palad sa pagdamay.
Ang ugaling ito'y bukal at likas sa ating dugo Handa tayong makiisa saan man tayo magtungo Mababa ang ating loob, malambot ang ating puso Lalo't kapwa natin Pinoy ang lumapit, nagsumamo.
Dahil dito'y buo pa rin yaring aking paniwala Kaya nating magkaisa sa halip na magkasira Kaya nating magkabuklod sa dakilang ninanasa Lalo na kung dangal nitong ating lahi'y nakataya!
HINDI KAYA (Ikatlong Tindig)
Palibhasa'y luma ka na, paniwala mo'y luma rin Bayanihang sinabi mo'y malaon nang napalibing Isipin mo na lang yaong mga Pinoy na recruiter Sa kapuwa Pilipino'y sila pa ang nangbi-victim!
May nagsabing ang tao raw'y tatlong uri, tatlong klase: Yaong una'y gumagawa nang sa gayon may mangyari, Ikalawa'y nanonood na lamang sa nangyayari Ang ikatlo'y natutulog, walang alam sa nangyari.
Marami sa Pilipino'y tagamasid, tagapuna Hindi na nga gumagawa, mahilig pang mang-intriga Meron namang sigurista,may sakit sa "Teka muna," At meron ding mukhang pera, sasama lang kung kikita!
KAYA
Kalaban ko'y pogi sana, kaya lamang, may diprens'ya Marahil sa konsumisyon pinaglihi ng nanay n'ya Sa halip na kabutihan ng Pinoy ang iparanya Sa pagpintas ng kapuwa ay s'ya pa ang nangunguna.
Isa ka ring Pilipino kaya bawat kasiraan Na ipukol sa kalahi'y ikaw rin ang tatamaan Pero kahit na ilan pa ang tulad mong mapang-asar, Mas marami pa rin kaming sa Bayan ay nagmamahal!
HINDI KAYA
Oo, ako'y Pilipino - walang labis, walang kulang Kapintasan ng bayan ko'y dala ko ring kahihiyan Katulad mo ay hangad kong magkaisa tayong tunay Ngunit, "kaya ba o hindi?"-Yan ang paksa ng usapan!
Sa tingin mo, bakit tayong Pilipino'y kinakaya? Inaapi, minemenos, minamaliit ng iba? E, kasi nga, hindi tayo kailan man magkaisa Pansariling kapakanan ang palaging inuuna!
KAYA
Gayon pala, alam mo nang dapat tayong magkaisa Para itong pang-aapi sa Pinoy ay matigil na, Bakit hindi ka pa ngayon makisali, makisama? Mas marami, mas matatag, mas matibay, mas may p'wersa!
HINDI KAYA
Ang salitang "magkaisa" ay maganda ngang pakinggan Subalit sa nariritong trabaho ang pinuntahan Iyan ba ay makakain ng sikmurang kumakalam? Yan ba'y p'wedeng mai-remit sa pamilyang naghihintay?
KAYA
Kapag tayo'y nagkaisa ay wala nang magugutom Kakulangan noong wala ay pupunan ng mayroon!
HINDI KAYA
Sa panahon ng sagana, masasabi mo ang ganyan, Sa gipit mo masusubok ang tibay ng 'sang samahan!
KAYA Nagkaisa tayo noon, kaya pa rin natin ngayon! HINDI KAYA Kung kaya ay bakit tayo sa hirap di makabangon? KAYA Aasenso tayo kapag nagkaisa tayong lahat! HINDI KAYA Init lang yan, maligo ka't mawawala ang 'yong lagnat! KAYA Ikaw itong amoy unggoy...! HINDI KAYA Hindi naman mukhang s'yokoy...! LAKANDIWA Tigil kayo't malayo na ang narating ng usapan Magpalamig muna kayo't ako naman ang pagbigyan Ang usapin, lumalabo, hindi ito lumilinaw Kapag init niyang ulo'y binayaang mapairal.
Nais ko lang liwanagin kung ano ang ating paksa Hindi natin inaalamkung magbuklod ay okey nga Palagay ko lahat tayo, mapabata at matanda, Kumbinsidong dapat lamang magkaisa tayong sadya.
Ang tanong ay kaya nga ba nating mga mamamayang Magkaisa, magkabuklod, magkayakap, magkadamay? Kayong mga nanonood nitong abang Balagtasan Ang s'yang aking tatanungin: Ano'ng sagot ninyo...Bayan?