Kopisanangan doungkosuabon kumaa toinsanan mongingia om

tambalut. Baino popolombus oku do iso susuyan i kitulu do Piasau.

Yoku nopo nga sompuun piasau. Suminuni oku mantad lonot. Poinsuni
oku id disan do bawang. Noowit oku waig mantad kabun hilo id sarayo.
Tonsi ku nopo nga opoto do akanon. Waig do tua ku milo do
inumon. Tonsi nopo lonot ku nga milo wonsoyon do santan pomorolot do
taakanon. Suai ko ii, milo nogi wonsoyon do tumau pogonsok om tumau
tobuk.
Bungkal ku milo pananaman do okd om wonsoyon do
ponginmuhau. Tompurung ku nopo nga milo wonsoyon mogikaakawo
tinunturu di kohiok. Guas ku milo wonsoyon do sunsuyon. Tiwak ku nopo
nga milo do rapaon. Wotuon o roun ku wonsoyon do sinduung. Tinggur
ku wonsoyon do ponginmuhau. Gamut ku milo losuon om imumugon
montok pomolingos toruol nipon.
Ounsikou ginawo ku tu kaanu manahak kotundunan kumaa do
tulun.

Ponontudukan nopo di aanu mantad susuyan diti nga minog do gompion

tokou o puun piasau tu kaanu manahak ogumu kounalan.
Suai ko iri, minog do munsikou tokou tu kaanu iti manahak kotundunan
kumaa dati oinsanan. Kotoluadan.

Kopisanangan doungkosuabon kumaa toinsanan mongingia om

tambalut. Baino popolombus oku do iso susuyan i kitulu do i
Gorouk om i Gonsuri

Miambalut i Gorouk om i Gonsuri. Insan tadau, minongoi i Gonsuri

tombului di Gorouk. Sondot no o rasam do asapou. Intulungung no i
Gonsuri id susut roun di Gorouk. Pamain-main no i Gonsuri. Koguraai
om karatu no tusak di Gorouk. Otogod dii i Gorouk.
Alaid i Gonsuri do pointulungung tu au tumodu o rasam. Poboros
no i Gorouk, Pamanau no Onsuri, kirugi pakou nu. Nongoruhak no o
roun ku nosunsungan nu.
Atukoi! Orouk, poingkibit o kara om poinsuun o gobuk. Ia nga
kosulu. Aparad o roun nu. Akatol o tinan ku nokogihil, ka di Gonsuri.
Osoding ko no Onsuri. Pokinongoho no iti boros ku. Kada nodii
ongoi do hiti. Kadarapas ko nopo ralan nga apatai ko, ka di Gorouk.
Au oku no gumuli nga pokinongoho no iti borosku. Nung rumoloi ko do
poruhukan nga au tumunda o tua nu, ka di Gonsuri.
Nokuro tu ingkaa kou, gatango no o piombolutan, ka di Turipos i
poinsako id raan do tombung.
Otopot o boros nu, Uripos. Onsuri, kada kito pikaus, ka di
Gorouk kumaa di Gonsuri.

Ponontudukan nopo di aanu mantad susuyan diti nga minog do

gatangon tokou kopio o tambalut tokou. Kotoluadan.