Denoi gomendatzen dizuet Joyceren Hildakoak ipuina eta harekin John
Hustonek egindako filma; biak ala biak zoragarriak. Biak ala biak hildakoak zein bizirik dauden argitzeko ederrak. Hildakoekin bizi gara; behin baino gehiagotan aitatu dut hemen. Antropologoek diote hildakoak izan daitezkeela izpiritu erlijiosoa eragin zutenak; hildakoen desagerpen bat-bateko eta erabatekotik eratorri zela beste bizitza batekiko irrika. Hortik hildakoei zor diegun errespetua zeina hildako bat kritikatzerakoan aurretik desenkusa moduan esaten baita. Rita Barneraren hilaren harira hura kritikatu eta baloratzerako orduan, hildakoekiko errespetua paratzen da aitzakiatzat. Hildakoei errespetua zor omen zaie eta ezin da halako andre hila, hila den aldetik gutxietsi. PPkoena psikoanalizatzekoa da: haiek Barberarekiko arbuioa gainontzekoen errua omen da, noiz eta partidua bera eta buruzagi batzuen ohorea eta ipurdia salbatzeko erabili baitzuten. Onartuko didazue Britainia Handiko demokraziaren kalitatea beste gauza batzuetan hemengo kaka zaharraren pareko da-- Espainiakorena baino zertxobait handixeagoa dela. Thatcherren heriotzaren harira esandakoak arakatzen aritu naiz. Eta orduan harrigarria beharbada kulturalki-- egin zitzaidanak ez nau harritu oraingoan: futbol partidu batean zera zioen pankarta: Bost axola zuri gu, bizirik zeundenean, bost axola guri zu, hil zarenean; edo Brixton Londreseko auzo pobrean Agur, puta zaharra! zioena edo hileta ospatzeko Trafalgar Squarren izan zen festa; edo Socialist Worker paskinean Poza!, Poza! zioen izenburua. Aurreko egunean Suso del Torok zioen Espainiako demokraziak bekatu originala duela oinarri-oinarrian, alegia, Frankoren Erregimenaren premu izatea. Premutza horrek Rita Barbera hilaren figura errespetatzeko aipatzen den gizalegea ere kolonizaturik dauka eskandalua bailitzateke Valentzian jendea kalera aterako balitz, Thatcherren heriotza pozez ospatzeko egin bezala. Errespeta ditzagun hildakoak, izan ditzagun manera onak. Ongi da. Baina berehala dator segida: Franco hildakoa errespetatu, errespetatzen eta errespetatuko den modura. Amen.