Isa akong kalderong puno ng laman Walang takip, bukas sa kahit kaninuman Handang ihain luto kong malinamnam Sabik na sabik malamanan kanilang tiyan
Sa aking pagkasabik sinimulan ang paghahanda
Lahat ng rekado’y sinigurong mailista Walang maiiwan walang hindi maililista ‘pagkat nais gawing espesyal pagkaing ihahanda
Nang ito’y inihain ang lahat ay nagsimulang kumain
Ngunit hindi lahat ninamnam nakalatag na pagkain Ang iba’y sinubo atdalidaling nilunok Hindi man lang nilasahan sunod sunod lang ang pagsubo
Ako na naghanda, nalungkot at natulala
Tinanong ang sarili may mali ba sa aking handa? Bakit kay bilis lunukin ang matagal inihanda? Hindi man lang ninamnam hindi man lang nakitang natuwa
Nagsimulang mawalan ng gana ang magiting na kusinera
Lahat ng kanyang niluto’y nawalan lahat ng lasa Lahat ay nagulat nagtaka at nabigla Anong nangyari at ang linamnam ay Nawala?
Isang tinig ang hindi mapigilang magsabi
Isinawalat ang lahat ng nasa puso at nasa isip Ipinahayag ang sakit ibinigkas ng mga labi Sa kung bakit Nawala pagkaing lageng laman ng isip Winikang sa linamnam ng kanyang inihahain Dulot ay sigla kalakasan at nagtutulak na abutin Pinapangarap ng isipan at nakakapaglayag kahit saan Natututong mangarap at abutin ang kalangitan
Sa tinuran ng batang lumapit sa akin
Mata’y nag-ulap at ginising ang maalab na damdamin Na lutuin ang masarap at masustansyang pagkain Ihain sa lahat kahit sa ayaw itong kainin
May ngiti sa labing nagsimulang maghanda ng rekado
Sinisigurong may pagmamahal sa bawat kong paghalo Aasaming magustuhan at masarapan ang lahat ng kakain At magtutulak sa kanyang kainin, namnamin at nguyain mga aral na inihain.