So Kathilagadi ko Kaphakatalingoma o Ramadhan
So pd na pagapin pn sa kwarto a
Inisorat I Abu Shaykhani
Miyapanothol a so manga Salaf a siran so mga Sahabah
-radiyallahu ánhum- go so mga Tabi'un go Tabi'ut Tabi'in -
rahimahumullah- na pkhababaya siran go mawatan pn so
kakhawma o Ramadhan, ka nm olan pn a kathi nyan, na diran
dn dipririparadowan. Na tonay gda iyo ron igira saolan bo a
lamba on?
Adn a pakawma a bisitangka. Na plilimpiyo ka sa walay
go phaninindaang ka sa ipagana kiran. Na opama ko gyoto a
bisitang ka na sii rkano pagiga na phiya-piyaan ka so pagigaan
iyaan go panabnaran iyo a di madistrobo. Aya pakiosar iyo ron
na so pinakamapiya ko tangob iyo, olona go pkakamotanan so
kwarto. Giyanan i waraan tano a pkidmatan tano phiyapiya so
bisita tano. Alhamdulillah.
Na opama ko so pakawma a bisita na lawan roo? Ka
maawid sa madakl a pammgayan. Lawan pn ko mapipikir ka a
mangapipiya. Kathagompiya go kathatakna o mokarna a
masisinganin o omani isa. Go pkiangkat so mangararata go
manga tiyoba. Na knaba bo pn salongan a katharg iyan rkano
ka saolan. Ba di aya patot na mas pthilagadan oto? Aya
pakaaantapan tano ron saya na so Ramadhan, a pinopino o
Allah a madakl a limo, barakah go manga balas.
Na opama ko adn a kawma a exam ka sa eskwelaan. Na
didn dowa-dowa a panabnar ka taman sa pthoday ka asar bo
a makaapas ka sabap ko kasasaboting kawn a ayang ka
kakhakawita ko kathagompiya. So siran pman oto a da a
ongaya iyan, na di iran oto thagoon sa ginawa iran. Na ay gda
iyo opama ko knaba matag exam sa eskwelaan ka board exam
dn? Knaba bo saolan ka aya dn kalilid na nm olan a iplkat kawn
1
ko manga kitab ka.
matatarambisawn go dinggasto sa mala asar bo a makaapas.
Salakaw roo pn so pipira ragon a kiyaklas iyan.
Na ay gda ka opama ko so exam a pakawma rka na ron
katndo o pakaapas ka sii sa Dunya go sa Alongan a Mawri? Ba
di gyaya i da lawan iyan a priparadowan tano? Giyaya i piyor a
tpng o kaoyag-oyag.
Sabap roo manga pagari akn ko agama Islam, na
priparadowan tano giya kakhawma o Ramadhan. Na aya pd ko
manga okit iyan na kaaloy tano saya. Batiyaan tano phiyapiya
go ipanampay tano sa pd. Balasang kano ron o Allah.
Paganay ron na so kathawbat sii ko Allah. Sothiin tano
so manga poso tano ko langowan a pphakatangison lagid o
kasiig, kathakabor, kada a sowat, rarangit go manga lagid iyan.
Aya pakalimpiyo ron na so kathawbat ko Allah go kapamangni
Ron sa rila. Giyaya i isa ko pinakamapiya a okit ko kakawita
tano ko kapiya o Ramadhan.
Ikadowa na so kapagiistadi tano phaparoman ko manga
bandingan o kaphowasa go Ramadhan. Giyaya i isa ko manga
dadabiyatan o manga olama tano igira pephakarani so
Ramadhan. Knaba bo para ko manga ginawa iran ka para ko
manga taw a pphangingisa. Ka kalalayaman dn anan. Go
kalalayaman dn pn so kapkaadn o manga multaqa go manga
kalilimod a pphagosaynon so manga kokoman ko
kapamowasa.
Aya ikatlo na so kabayadi ko otang ka ko Ramadhan. So
adn a manga otang iyan a powasa na bayadi nyan dn ko da pn
kapakasold o Ramadhan.
 Ikapat na kaplilimpiyo go kaphiyapiyai ko manga masjid.
Para mapiya a kaggdama tano ron go makaoyat sa manga taw.
Go miyakapiyapiya opama ko matanor dn so gawii o kisangan
ko katothon.
Ikalima na panabnaring ka so bakasyon ka ko oman
saragon ko galbkan ka na siing ka maosar sa Ramadhan. Sii ko
siran oto a mga empleyado odi na manga padagang. Na o di
iran khagaga na minominos na apiya sii ko moripori a sapolo
gawii ko Ramadhan na taralbi pn o makapag-i'tikafon.
So adn a manga restawran iyan, pkhananan, tinda a
manga pang-nngkn na aya patot na gagawii bo a kapllka iran
odi na igira marani dn so ilalapis.
Miyakapiyapiya pn opama ko maiyakapanimo ka sa
pnggastoon ka ko sold o sawlan go para ko pamilyang ka para
makatordo kano manambayang, mamatiya sa Quran go so
manga lagid iyan a manga simba.
Ikanm na pangniyang ka ko Allah a rawtn ka so
Ramadhan. Benar a da a miyaaloy a phoon sa Quran odi na
Hadith a mattndo a dua ogayd na apiya antona dua a mitotoro
iyan oto na palaya dn kapakay. Ya Allah sampayn kaming ka sa
giya khaoma a Ramadhan go so pamakatondogon. Ameen.
Ikapito. Langag nka so mga dua sa Ramadhan. Adn a
minisorat tano a matitimoon so manga dua ko igira miyailay
so hilal, iftar, igira adn a miyagana rka, sii ko Laylatul Qadr, sii
ko Eid go manga lagid iyan. Sa khabaya on komowa na ishai
nyan bo so misorat saya.
Ikawalo na pakapipiyaang ka a ginawang ka ko
kakhawma nyan. Lawan pn ko kapipiya ginawa a pkagdam ka
igira a miyatarima ka ko galbk a angin ka, odi na miyakaapas
ka sa exam. Lawan pn igira a miyailayng ka so taw a
pkhababayaan ka a miyathi a dangka maylay.
Kapakay pn a miyasima tano ko manga sarowang so
panagontaman iran go kapkasonor iran igira phakawma so
mala a gawii iran. Pipira olan pn na pkagdam dn ko mlilibta
iran, manga walay iran, taman sa pkailay sa mga TV go aya iran
bo tothol.
Na so Muslim na lawan roo pn a mapakiilay nyan ko
Kadnan iyan go isa oto ko toos o bagr o paratiyaya iyan.
ِّ ُ‫ ﴿ َو َمن يُّ َع ِّظ ْم َش َعائِّر هللا فَِّإ َّنَا ِّمن تَ ْق َوى الْ ُقل‬:‫ال هللا ﷻ‬
‫وب﴾ سورة‬ َ َ‫ق‬
َ
32 ‫احلج آية‬
“Na sadn sa slaan iyan so manga tanda o Allah, na
mataan a pd oto ko kapphangongonotan o manga poso."
[Suratul Hajj Ayah 32]
Ikasiyaw go aya moripoi. Pakigdam tano go ipanampay
tano sii ko manga pamilya tano go sii ko salakaw so
kaphakatalingoma o Ramadhan.
Pakiilay tano ko Allah so kapkhababayai tano Ron.
Pakiilay tano ko Allah so panagontaman tano. Adn tano
maparoli so gagaw go limo Iyan go angkat Niyan so misosogat
rkitano imanto a tpng.
-------
SO KHABAYA MOGOP ODI NA SADKA KO KIPPHANAMPAYN KO MANGA
NDAOWAN O ISLAM NA KONTAKA NYAN BO SI USTADH SA 0938-8349099 ODI
NA KO EMAIL IYAN: muhammadbani@gmail.com
FB: Muhammad Macaraya Bani
Jazakumullahu khayran.