Maranao Bible

MAKSOD
MAKSOD 1
So Totolan ko Kiyaadena ko Doniya
Sii sa pagampaganay na inaden o Tohan so langit ago so doniya.

2 So doniya na da a mambobontal iyan ago da a madadalem on. Lomalangkap so
maliboteng ko liyawaw o kalodan; samaoto na so Roh o Tohan na dii mamagenebeneb ko
liyawaw o ig.
3 Pitero o Tohan a “Maaden so maliwanag,” na miyaaden den so maliwanag.
4 Miyailay o Tohan a mapiya so maliwanag na taros a piyakasibaya iyan so maliwanag
ago so maliboteng.
5 Bitowan iyan so maliwanag sa ‘kadaondaw,’ na so maliboteng na bitowan iyan sa
‘kagagawii.’ Giyoto a miyagagawii ago miyapita a so paganay a gawii.
6 Pitero o Tohan a “Maaden so kawang a mipagelet ko manga ig ago mapakasesenggaya

iyan so manga ig.”
7 Na pimbaalan o Tohan so kawang a miyapakasenggaya iyan so ig sa kababaan o
kawang ago so ig sii sa kaporoan iyan; na miyanggolaola oto.
8 Na bitowan iyan so kawang sa ‘langit.’ Giyoto a miyagagawii ago miyapita a so
ikadowa gawii.
9 Pitero o Tohan a “Matimo sa satiman a darpa so manga ig ko atag o langit kaan

makagemaw so mamara a lopa,” na sakamaoto a miyanggolaola den.
10 Bitowan iyan so mamara a lopa sa ‘kalopaan’ na so miyatimo a manga ig na bitowan
iyan sa ‘ragat.’ Na miyailay o Tohan a mapiya.
11 Mandiyadi na pitero o Tohan a “Kapamangetoan so kalopaan sa manga paotanotan ago

so langon a pitibarangan a pamomolan a pepemagod ago pepemangonga.” Na sakamaoto
a miyanggolaola den
12 Ka miyakaaden so kalopaan sa paotanotan ago so langon a pitibarangan a pamomolan.
Na miyailay o Tohan a mapiya.
13 Giyoto a miyagagawii ago miyapita a so ikatelo gawii.
14 Pitero o Tohan a “Maaden so manga solo sii ko langit a mapakasenggaya iran so

kadaondaw ago so kagagawii. Mabaloy siran a manga nanao a kitendo ko manga mosim
ago so manga gawii ago so manga ragon,
15 Na mamanindaw siran ko langit a pemakaliwanag ko doniya.” Na sakamaoto a
miyanggolaola den,
16 Ka pimbaalan o Tohan so dowa timan a mangaala a solo a so alongan a makapepaar
ko kadaondaw ago so olan a makapepaar ko kagagawii. Inembaalan iyan mambo so
manga bitoon.
17 Tiyago iyan so manga solo ko langit kaan iran mapakaliwanag so doniya
18 Ago kandatoan iran so kadaondaw ago so kagagawii, ago mapakasibaya iran pen so
maliwanag ago so maliboteng. Na miyailay o Tohan a mapiya.
19 Giyoto a miyagagawii ago miyapita a so ikapat gawii.
20 Pitero o Tohan a “Mangapepeno so manga ig sa mbarambarang den a manga

panenedaan, na makapelayolayog mambo so manga papanok ko kawang.”
21 Na inaden o Tohan so mangaala a seda ko ragat, so langon a pitibarangan a manga
baraniyawa sii ko ig, ago so oman i pisosonan a papanok. Na miyailay o Tohan a mapiya.
22 Riyakmatan iyan siran langon a tig iyan a “Mbabad ago ndakedakel so manga
panenedaan kaan mamangipeno ko ragat, na ndakedakel mambo so manga papanok sii ko
doniya.”
23 Giyoto a miyagagawii ago miyapita a so ikalima gawii.
24 Pitero o Tohan a “Makaaden so lopa sa langon a pitibarangan a manga meranaranap,

maana a so manga pangangayamen, manga paoledoled ago manga binatang.” Na
sakamaoto a miyanggolaola den,
25 Ka inembaalan o Tohan so langon angkai a pitibarangan a meranaranap. Na miyailay
niyan a mapiya.
26 Oriyan iyan na pitero o Tohan a “Mbaal tano sa manosiya a misayan ko ginawa tano
ago mipelagid tano. Na kandatoan iran so manga seda ko ragat, so manga papanok ko
kawang, ago so langon o manga pangangayamen, manga iila a binatang ago manga
paoledoled.”
27 Kagiya ka maoto na inaden o Tohan so manosiya a inisayan iyan siran ko ginawa

niyan.
Minisayan siran ko ginawa o Tohan ko kiyaadena niyan kiran.
Inaden iyan siran a mama ago babay.
28 Na riyakmatan iyan siran, na pitero iyan kiran a “Mbabawata kano ago ndakedakel
kaan iyo mapeno ago kambayabayai so doniya. Ndatoi niyo so manga seda ko ragat, so
manga papanok ko kawang, ago so langon a meranaranap ko kalopaan.”
29 Na pitero iyan pen a “Inibegay aken rekano so langon a pitibarangan a pereperan ago
manga onga a kayo a pangenengken iyo.
30 Ogaid na so langon a binatang, manga papanok ago manga paoledoled, maana a so
oman i baraniyawa na aya pangenengken iran na so manga paotanotan ago so dii
meraraon a pamomolan.” Na miyanggolaola oto.
31 Inilay o Tohan so langon taman a inembaalan iyan na sayana a mapiya. Giyoto a

miyagagawii ago miyapita a so ikanem gawii.
MAKSOD 2
Miyapasad den so kiyaadena ko langit ago so doniya a rakes o langon a madadalem on.
2 Kagiya maoma so ikapito gawii na miyapasad den o Tohan so galebek a pinggolaola
niyan; na domike sekaniyan sii ko ikapito gawii ko langon a galebek iyan.
3 Piyakambarakat iyan so ikapito gawii ago inisenggay niyan a soti, ka domike sekaniyan
on sabap sa miyapasad iyan den so langon a galebek iyan a kapangaden.
4 Giyanan i totolan ko kiyaadena ko langit ago so doniya.
Si Adam ago si Sittihawa
Isako pagembaalan o Allah so doniya ago so langit

5 Na den a ba pamomolan sii sa doniya aya pen o ba paotanotan a ba romiti ko lopa ka
kagiya da pen pakiorani o Allah, ago da den a manosiya a ba on makapembasok;
6 Ogaid na aden a manga ig a pepekapoon ko didalem a lopa a pepekabasa ko langon o
liyawaw o kalopaan.
7 Samaoto na kominowa so Allah sa bayanek sii ko lopa na linimbag iyan a mama.

Inisengaw niyan on sa ngirong so napas a pepangoyag, na miyabaloy so mama a
baraniyawa.
8 Miyamola so Allah sa sapadan sii sa Iden sa tampar sa sebangan na roo niyan tiyago so
mama a linimbag iyan.
9 Piyamakato on o Allah so oman i pisosonan o kayo a mapiya i paras ago mapiya a ken
so onga niyan. Sii ko look o sapadan na ron matatago so kayo a pembegay sa
kapeketokawi ko mapiya ago so marata.
10 Aden a lawasaig a petoga sii sa Iden a pepekabasa ko sapadan. Sii ko onaan o sapadan
na miyambaabaad on so lawsaig sa pat.
11 Aya ngaran o paganay a lawasaig na Pison a pegondas ko melilibeta ko kalopaan a
Habila a aden a bolawan on.
12(Lombos so bolawan a matatago sangkoto a darpa, ago aden mambo a manga ambar
ago manga montiya roo.)
13 Aya ngaran o ikadowa a lawasaig na Giyon. Pegondas ai ko melilibeta ko kalopaan a
Kos.
14 Aya ngaran o ikatelo a lawasaig na giya Tigris a pegondas sa sebangan a Asiriya. Na
aya ikapat a lawasaig na giya Yopratis.
15 Kinowa o Allah so mama na tiyago iyan ko sapadan a Iden a kibir ago pekaipaten on.
16 Na bigan iyan so mama sa sogoan a tig iyan a “Makapembayabaya ka koman ko onga
o apiya antonaa kayo a matatago ko sapadan
17 Liyo ron so onga o kayo a pembegay sa kaketokawi ko mapiya ago so marata. Di ka
den ken ko onga angkoto a kayo, ka o makakan ka on na mataan a petay ka sangkoto a
gawii,”
18 Na pitero o Allah a ”Kena a ba mapiya i ba mabobotong so mama. Ipagembaal aken

sekaniyan sa domadait on a salinggogopa.”
19 Sa da pen ai kanggolaola na miyalimbag o Allah poon ko bote so langon a manga

binatang ago manga papanok. Na piyangowit iyan siran ko mama ka pagilain iyan o
antonaa i ipemeto niyan kiran, na apiya antonaa i inibeto o mama ko oman i bibiyag a
kaaden na giyoto den i ngaran iyan.
20 Kagiya ka maoto na piyamametowan o mama sa ngaran so langon o manga
pangangayamen, manga papanok ago manga binatang.
Ogaid na da pen a ba salinggogopa a domadait ki Adam.

21 Kagiya ka maoto na piyakipangenepan o Allah so mama sa torog. Sii ko katotoroga
on na kinowa niyan so satiman ko gosok o mama ago piyakandemet iyan bo so sapo a
kinowaan iyan ko gosok.
22 Na biyaloy o Allah a babay so gosok a miyakowa niyan ko kilid o mama; na inowit
iyan so babay ko mama.
23 Na pitero o mama a
"Na, katii den i datar aken, a tolan a poon ko tolan aken

ago sapo a poon ko sapo aken.
Mbetowan sekaniyan sa ‘babay,’
sabap sa miyakowa poon ko mama.”
24 Giyanan I kesabapan sa kangganati o mama ko ama iyan ago so ina iyan ka petepi
siran ago so karoma niyan, na pembaloy siran a isaisa.
25 Si Adam ago so karoma niyan na palaya siran matatalandiyang, na kena a ba siran

pekeya.
MAKSOD 3
So Da Kaparatiyaya o Manosiya
So nipay na aya mala i akal a di so apiya antonaa a binatang a inaden o Allah. Na iniise o
nipay ko babay a “Ba matamataan a pitero rekano o Tohan a ‘Di kano den ken ko onga o
apiya antonaa a kayo sii ko sapadan’?”
2 Na tig o babay ko nipay a “Pekakan kami ko onga o manga kayo sii ko sapadan
3 Liyo ron so onga o kayo a matatago ko look o sapadan. Ka pitero o Tohan a ‘Di kano
ken ko onga angkoto a kayo ago di niyo pen ai sekoa, ka o nggolaolaa niyo na petay
kano.' "
4 “Matamataan a kena a ba niyo petain!” a tig o nipay ko babay.

5 “Ka aya sabap a kiyateroa on o Tohan na katawan iyan a sii ko gawii a kapakakan iyo
ron na kebekar so manga mata niyo na kebaloy kano a lagid o Tohan, ka ketokawan iyo
so mbidaan o mapiya ago so marata.”
6 Na kagiya mailay o babay a so onga angkoto a kayo na mapiya a ken, ago mapiya i
paras a kapekeilaya niyan on, ago ikesigi ini a ikebaloy niyan a maongangen na
kominowa sekaniyan on na kiyan iyan. Na bigan iyan on pen so karoma niyan a
mipageepeda iyan na komiyan on mambo.
7 Sarta den a miyanga bebekar so manga mata iran na kiyatokawan iran a
matatalandiyang siran. Kagiya ka maoto na piyakandaidair iran mamanai so manga raon
a higos na inisapeng iran ko lawas iran.
8 Si ko kaperimon iyan na miyaneg o mama ago so karoma niyan so dalepek o Allah a

pelalakaw sii ko sapadan. Na mitepok siran sii ko manga kayo ko sapadan ka piyagna
iran rekaniyan a ginawa iran.
9 Ogaid na tiyalowan o Allah so mama a tig iyan a “Anda ka sesaya?”
10 Inisembag o mama a “Miyaneg aken seka sii ko sapadan, na miyalek ako ago mitepok
ako ka matatalandiyang ako.”
11 “Antawaa i mitero reka on sa matatalandiyang ka?’ a iniise on o Allah. “Ba ka

miyakakan ko onga o kayo a inisapar aken reka a di ka on ken?”
12 Tig o mama a “So babay a inibegay ngka raken a ped aken, na sekaniyan i migay raken
on ko onga o kayo, na kiyan aken.”
13 Na pitero o Allah ko babay a “Antonaa bes angkai a pinggolaola ngka?”

Tig o babay a “So nipay na piyagakalan ako niyan, na giyoto i kiyapakakan aken on.”
So Kiyapangokom o Allah
14 Mandiyadi na pitero o Allah ko nipay a
“Sabap sa pinggolaola ngka oto na

kemorkaan ka a di so langon a pangangayamen ago so langon a maila a binatang!
Kidola ngka so tiyan ka,
na kekan ka so bayanek
taman ko kaooyagoyag ka.
15 Pakaperidoain ko seka ago so babay,
ago so mambo so mbawataan ka
ago so mbawataan iyan.
Sesaan iyan so olo ngka
na tokaan ka so palo niyan.”
16 Na pitero iyan mambo ko babay a
“Tanto aken a pekaregenen so kaoogat ka,

na mbaliliten ka sa masakit ko kapembawata a ka.
Apiya oto na kebabayaan ka pen so karoma ngka,
na pendatoan ka niyan den.”
17 Na aya pitero iyan ki Adam na “Sabap sa piyakineg ka so karoma ngka ko kiyakana
ngka ko onga o kayo a inisapar aken reka a ‘Di ka on ken,' na
“Kesintaan so lopa sabap reka;

na aya bo a kakeragona ngka on ko ken ka
na makapenggolalan ko maregen a galebek taman ko kaooyagoyag ka.
18 Pemangeto on so mangararata a otan ago manga soroken,
na pekakan ka sa baden dii mamangeto a manga pamomolan.
19 Aya bo a kapekakan ka sa pereperan
na sabap ko kapengangatingi reka nggalebek
taman den ko kapakakasoy ngka ko bote,
ka giyanan i poonan ka;
pimbaalan ka poon ko bayanek,
na pembaloy ka bo a bayanek.”
20 Aya inibeto o Adam ko karoma niyan na Sittihawa ka kagiya sekaniyan i pembaloy a

ina o langon o manosiya.
21 Na inimbaal o Allah sa manga nditaren a kobal a ayam so Adam ago so karoma niyan,
na pinditaran iyan siran.
Piyakaawa si Adam ago si Sittihawa ko Sapadan
22 Oriyan na pitero o Allah a “Imanto na miyabaloy so mama a lagid tano ko kiyatokawi

niyan ko mbidaan o mapiya ago so marata. Na di on mapeparo o ba sekaniyan makakowa
ko onga o kayo a pembegay sa kaoyagoyag ago makakan sekaniyan on taros a
makapeginetaw sa taman sa pakataman.”
23 Kagiya ka maoto na piyakaawa sekaniyan o Allah ko Sapadan a Iden ka
pakapenggalebeken iyan ko lopa a ron miyakowa.
24 Kagiya mabogaw niyan roo so mama na tiyagoan iyan so sebangan a Sapadan a Iden
sa manga malaikat ago pekedeg a pedang a dii nggigilinggiling ko mbalabala a petemeng
ko lalan a ipesong ko kayo a pembegay sa kaoyagoyag.
MAKSOD 4
Si Kain ago si Abil
Rimbang i Adam so karoma niyan a Sittihawa, na miyaogat sekaniyan na inimbawata

iyan si Kain. Na pitero i Sittihawa a “Nggolalan ko tabang o Allah na miyakaaden ako sa
wata a mama.”
2 Oriyan iyan na mimbawata sekaniyan sa salakaw a wata a mama a si Abil.
Si Abil na mimbaloy a pananagikor sa bilibili, na si Kain na taribasok.

3 Miyakaisa a gawii na somiyapaat si Kain ko Allah ko miyaragon iyan.
4 Si peman si Abil na siyombali iyan so paganay a nati o isa ko bilibili niyan na so den so
aden a kalemboan on i inisapaat iyan ko Allah. Miyasoat so Allah ki Abil
ago so inisapaat iyan,
5 Ogaid na da niyan tarimaa si Kain ago so inisapaat iyan. Kagiya ka maoto na
miyakarimeng so paras i Kain ka tanto a kiyararangitan.
6 Mandiyadi na pitero o Allah ki Kain a “Ino ka pekerarangiti? Ino pekarimeng so paras

ka?
7 O patot so di ngka dii nggolaolaan na ba ka di ketarima? Ogaid na o di patot so di ngka
dii nggolaolaan na magaayan so dosa sii ko pintoan ka, ka masisinganin iyan a kandatoan
ka niyan, ogaid na disomala a mipaar ka nan.”
8 Mandiyadi na pitero i Kain ko pagari niyan a Abil a “Somong ta ko dii mbabasokan.”

Na sii ko kandodoo iran na piyamabaan i Kain so pagari niyan na biyono iyan.
9 Na iniise o Allah ki Kain a “Anda so pagari ngka a si Abil?”

“Di ko katawan,” a inisembag iyan. “Ba saken i pepegipat ko pagari aken?”
10 Tig o Allah a “Antonaa bes i pinggolaola ngka.” So rogo o pagari ngka na penggoraok
raken a pepekapoon ko lopa.
11 Kasintaan ka imanto, na di ka den makapenggalebek ko lopa a mingganga ko
kiyatarimaa niyan ko rogo o pagari ngka ko kiyabonoa ngka on.
12 O temepeng ka mbasok na da den a ba reka ipegeper o lopa. Pembaloy ka a da a
kebalingan iyan a dii melaolaog ko doniya.”
13 Pitero i Kain ko Allah a “So indaneg raken na mala a di so kekena ko!

14 Pembogaon ako ngka imanto ko lopa, na kebelag ako ko kamamasaan ka. Pembaloy
ako a da a kebalingan aken a dii melaolaog ko doniya, na apiya antawaa i pekatoon raken
na mbonoon ako niyan.”
15 Ogaid na pitero on o Allah a “Kena, ka o aden a makabono reka, Kain, na makapito ka

misaop.” Na giyoto a tiyagoan o Allah si Kain sa tiyap kaan di kebono o apiya antawaa i
pekatoon on.
16 Na miyawa den si Kain ko kamamasaan o Allah na miyaling ko inged a Nod sa
sebangan a Iden.
So Kiyababadan ki Kain
17 Romimbang si Kain ko karoma niyan na miyaogat, na inimbawata iyan si Inok. Sa

masa oto na pembangon si Kain sa bandar a inged a inisangay niyan ko wata iyan a mama
a si Inok.
18 Mimbawata si Inok sa wata a mama a si Irad; si Irad na aya ama I Mehodsail; si
Mehodsail na aya ama i Metosail, na si Metosail na aya ama i Lamek.
19 Miyangaroma si Lamek sa dowa kataw a babay a aya manga ngaran iran na si Adah
ago si Silah.
20 Inimbawata i Adah si Yabal; apoapoan sekaniyan o manga taw a kibabaling ko manga
barombarong ago pepemangoyag sa pangangayamen.
21 Aya ngaran o pagari niyan na si Yobal a apoapoan mambo o langon a
paboboniboniyan sa kotiyapi ago insi.
22 Si mambo si Silah na mimbawata sa mama a si Tobal-Kain a mimbaloy a panenesel sa
langon a pitibarangan a kasangkapan a galang ago potaw. So babay i Tobal-Kain na si
Naamah.
23 Pitero i Lamek ko manga karoma niyan a
“Hey Adah ago Silah, pamakinega ko niyo;

sekano a manga karoma i Lamek, na pakinega niyo so manga katero aken.
Miyakabono ako sa mangoda a mama sabap sa bintol ako niyan
ago kiyapalian ako niyan.
24 O makapito misaop si Kain,
na makapito polo ago pito misaop si Lamek.”
Si Sito ago si Inos
25 Romimbang peroman si Adam ko karoma niyan, na mimbawata sa wata a mama na

bitowan iyan sa Sito a tig iyan a “Bigan ako o Tohan sa salakaw a wata a mama a
minisambi ki Abil a miyabono i Kain.”
26 Si mambo si Sito na aden a wata iyan a mama, na iningaranan iyan sa Inos.
Sangkoto a manga gawii na mipoon mananalo so manga taw ko Ingaran o Allah.
MAKSOD 5
Ipoon ki Adam taman ki Nok
Giyai i salsila ko kiyababadan ki Adam:
Isako maaden o Tohan so manosiya na pimbaalan iyan siran a mipelagid o Tohan.

2 Inaden iyan siran a mama ago babay, na sii ko kiyaadena niyan kiran na riyakmatan iyan
siran ago bitowan iyan sa ‘Manosiya.’
3 Kagiya makapagidad si Adam sa magatos ago telo polo ragon na mimbawata sekaniyan
sa mama a lagid iyan, na bitowan iyan sa Sito.
4 Oriyan o kinimbawataan ki Sito na miyakapaginetaw pen si Adam sa miyakawalo gatos
ragon, na mimbabawata pen sa ped a manga wata a mama ago babay.
5 Miniraot so idad i Adam sa siyaw gatos ago telo polo ragon, na miyatay sekaniyan.
6 Kagiya makapagidad si Sito sa magatos ago lima ragon na mimbawata sa mama a si

Inos.
7 Oriyan iyan na miyakapaginetaw pen si Sito sa miyakawalo gatos ago pito ragon, na
mimbabawata pen sa ped a manga wata a mama ago manga babay.
8 Miniraot so idad i Sito sa siyaw gatos ago sapolo ago dowa ragon, na miyatay
sekaniyan.
9 Kagiya makapagidad si Inos sa siyaw polo ragon na mimbawata sa mama a si Kinan.

10 Oriyan iyan na miyakapaginetaw pen si Inos sa miyakawalo gatos ago sapolo ago lima
ragon, na mimbabawata pen sa ped a manga wata a mama ago manga babay.
11 Miniraot so idad i Inos sa siyaw gatos ago lima ragon, na miyatay sekaniyan.
12 Kagiya makapagidad si Kinan sa pito polo ragon na mimbawata sa mama a si

Mahalalil.
13 Oriyan iyan na miyakapaginetaw pen si Kinan sa miyakawalo gatos ago pat polo
14 Miniraot so idad i Kinan sa siyaw gatos ago sapolo ragon, na miyatay sekaniyan .
15 Kagiya makapagidad si Mahalalil sa nem polo ago lima ragon na mimbawata sa mama
a si Yared.
16 Oriyan iyan na miyakapaginetaw pen si Mahalalil sa miyakawalo gatos ago telo polo
17 Miniraot so idad I Mahalalil sa walo gatos ago siyaw polo ago lima ragon, na miyatay
sekaniyan.
18 Kagiya makapagidad si Yared sa magatos ago nem polo ago dowa ragon na
mimbawata sa mama a si Inok.
19 Oriyan iyan na miyakapaginetaw pen si Yared sa miyakawalo gatos ragon, na
20 Miniraot so idad i Yared sa siyaw gatos ago nem polo ago dowa ragon, na miyatay
sekaniyan.
21 Kagiya makapagidad si Inok sa nem polo ago lima ragon na mimbawata sa mama a si
Mitosilah.
22 Oriyan iyan na ipageepeda i Inok so Tohan sa miyakatelo gatos ragon, na
mimbabawata pen si Inok sa ped a manga wata a mama ago manga babay.
23 Miniraot so idad iyan sa telo gatos ago nem polo ago lima ragon.
24 Mipageepeda i Inok so Tohan, na baden miyada ka kinowa o Tohan.
25 Kagiya makapagidad si Mitosilah sa magatos ago walo polo ago pito ragon na
mimbawata sa mama a si Lamek.
26 Oriyan iyan na miyakapaginetaw pen si Mitosilah sa miyakapito gatos ago walo polo
ago dowa ragon, na mimbabawata pen sa ped a manga wata a mama ago manga babay.
27 Miniraot so idad i Mitosilah sa siyaw gatos ago nem polo ago siyaw ragon, na miyatay
sekaniyan.
28 Kagiya makapagidad si Lamek sa magatos ago walo polo ago dowa ragon na
mimbawata sa wata a mama.
29 Iningaranan iyan sa Nok a tig iyan a “Giyangkai a wata na mapekapiya niyan so manga
ginawa tano ko di tano dii kanggolaolaa ko langon a maregen a galebek tano a minisabap
ko kinisintaan o Allah ko lopa.”
30 Oriyan o kinimbawataan ki Nok na miyakapaginetaw pen si Lamek sa miyakalima
gatos ago siyaw polo ago lima ragon, na mimbabawata pen sa ped a manga wata a mama
ago manga babay.
31 Miniraot so idad i Lamek sa pito gatos ago pito polo ago pito ragon, na miyatay
sekaniyan.
32 Kagiya makapagidad si Nok sa lima gatos ragon, na mimbabawata sekaniyan sa telo

kataw a wata a mama a si Sim, si Ham ago si Yapet.
MAKSOD 6
So Kadostaan o Manosiya
Isako poon den ndakel so manga taw ko doniya ago di siran dii mbabawata sa manga
babay,
2 Na aden a manga mbawataan o Tohan a miyailay iran a manga tataid so manga babay a
mbawataan o manosiya na piyamangaroma iran so kiyababayaan iran on.
3 Sangkoto a masa na pitero o Allah a “Kena a ba taman sa pakataman a kakakaden o
niyawa ko ko lawas o manga taw, ka matag siran manosiya. Aya bo a taman a
kapepeginetaw iran na magatos ago dowa polo ragon.”
4 Sangkoto a manga gawii na aden a mangaala a taw sii sa doniya a kiyababadan siran ko
manga mbawataan o Tohan ago so manga babay a mbawataan o manosiya. Siran i
mangaala i kabatowa ago kababantogan a manga mama ko miyangaoona a gawii.
5 Miyailay o Allah a mala i kadostaan so manga taw sa doniya, ka so dii mapamikir o

oman i isa kiran na lalayon marata.
6 Na misendit sekaniyan ko kiyambaali niyan ko manosiya sii sa doniya na miyarata a
ginawa niyan.
7 Kagiya ka maoto na pitero o Allah a “Peyopasen aken ko doniya so manosiya a
miyaaden aken, na kena bo a ba so manga taw ka so pen so manga ayam, manga
paoledoled ago so manga papanok, ka miyakasendit ako ko kiyaadena ko kiran.”
8 Ogaid na inikalimo o Allah si Nok.
Nabi Nok
9 Giyai I totolan ki Nok. Maontol a mama si Nok na sekaniyan bo I taw a da a ba on

kidaway sii ko masa niyan, na ipageepeda iyan pen so Tohan.
10 Aden a telo kataw a manga wata i Nok a manga mama a si Sim, si Ham ago si Yapet.
11 Mikerata so doniya ko kapekeilaya on o Tohan ago mapepeno a kapanganiyaya.

12 Miyailay o Tohan a mala a kiyakerata o doniya ka miyamakarata i olaola so langon a
taw ron.
13 Na pitero o Tohan ki Nok a “Miyapamikir aken a pageposen aken so langon o
manosiya ka lomiyangkap ko doniya so kapepenganiyaya iran; na mataan den a
mbinasaan ko siran ago so doniya.
14 Kagiya ka maoto na mbaalen ka a ginawa ngka sa mala a kapal a kayo a kalipapa.
Perowarowangi ngka ago lapisi ngka sa lita so soled iyan ago so liyo niyan.
15 Giyai i kapembaali ngka on: aya kalendo iyan na magatos ago lima polo ka mitros, aya
kabelang iyan na dowa polo ago lima ka mitros ago aya kaporo iyan na sapolo ago lima
ka mitros.
16 Atepi ngka so kapal a aya pangeleban iyan na tenga sa mitros a poon ko bibir iyan
taman ko atep. Mbaali ngka sa pintoan so kilid o kapal, na pakatelowa ngka ka andana.
17 Pekitalingomaan aken sa mala a bagiyaw so doniya a ikebinasa o langon a baraniyawa
a inaden ko atag o langit. Pematay so langon taman sii sa doniya.
18 Ogaid na magembaal ako sa kapasadan mipantag reka; soled kano ko kapal, seka ago
so karoma ngka taman ko manga wata a ka a mama ago so manga karoma iran.
19 Pamakasoleda ngka pen ko kapal so nggagisa ka tiwalaya ko oman i pisosonan o
manga meranaranap kaan iyo mapangoyag a rakes o manga ginawa niyo.
20 Song reka so nggagaisa ka tiwalaya ko oman i pisosonan o papanok, oman i pisosonan
o binatang ago oman i pisosonan o paoledoled a pemakipangoyag reka.
21 Rorani ngka so kapal ko langon a pitibarangan a pangenengken a kekan iyo na
taliyonga ngka on ka aya niyo kaoyagan ago so manga ayam.”
22 Na so den so langon taman a inisogo o Tohan ki Nok i pinggolaola niyan.
MAKSOD 7
So Mala a Bagiyaw
Na pitero o Allah ki Nok a “Soled ka den ko kapal, seka ago so langon o pamiliya ngka
ka seka bo i miyailay aken a maontol sangkai a masa.
2 Pakaonota ngka so pito ka tiwalaya ko oman i halal a ayam, ago isa ka tiwalaya ko
oman i karam a ayam,
3 Ago pito mambo ka tiwalaya ko oman i pisosonan o papanok kaan siran langon
mapangoyag ago mababad peroman ko dalem o doniya.
4 Ka makapito pen gawii na pekioranan aken den so doniya ko soled o pat polo
kadaondaw ago kagagawii, ka peyopasen aken ko liyawaw o lopa so oman i baraniyawa a
kiyambaalan aken.”
5 Na ininggolalan i Nok so langon a inisogo on o Allah.
6 Nem gatos ragon a idad i Nok isako makatalingoma so mala a bagiyaw ko doniya.
7 Si Nok ago so karoma niyan a rakes o manga wata iyan.ago so manga karoma iran na
somiyoled siran ko kapal kaan on mamakalindong sabap ko bagiyaw.
8 So titiwalaya ko halal ago karam a manga binatang, so manga papanok ago so langon a
paoledoled ko lopa
9 A manga mama ago manga babay na somiyoled siran ko kapal a ped i Nok a aya den
inisogo o Tohan ki Nok.
10 Kagiya maipos so pito gawii na miyakatalingoma den ko doniya so mala a bagiyaw.
11 Sii ko kiyanem gatos ragon a idad I Nok ko ikasapolo ago pito gawii ko ikadowa a
olanolan na sii den sangkoto a gawii na mimbebeto so langon a manga bowalan ko
didalem a lopa, na piyangalelekaan pen so manga gimowa o ig roo sa langit.
12 Na pendeseng so oran sii ko doniya ko soled o miyakapat polo kadaondaw ago
kagagawii.
13 Sii sangkoto a gawii na miyakasoled den si Nok ago so karoma niyan ko kapal a rakes
o manga wata iyan a si Sim, Ham ago si Yapet ago so telo kataw a manga karoma iran.
14 Sakamaoto mambo na so oman i pisosonan o binatang, pangangayamen ago
paoledoled, ago so langon a pitibarangan a manga papanok
15 A so titiwalaya ko oman i baraniyawa na somiyoled siran ko kapal a ped i Nok
16 Ka giyoto den i inisogo o Tohan ki Nok. Na likeban o Allah so kapal kagiya
mamakasoled siran on den.
17 Miyakapat polo gawii a dii kambagiyawi ko doniya, na sii ko kapepegorog o ig na

iniletaw niyan so kapal ko kaporoan o lopa.
18 Tanto a mala a kiyaorog ago kiyalangkap o ig sii ko doniya, na pekeanodanod mambo
so kapal ko liyawaw o ig.
19 Na pegiseg pen a kapepekadalem o ig taman sa miyanga sasangkap so langon a manga
poporo a palaw ko pirowarowangan o doniya.
20 Na pepekadalem den so ig taman sa manga pat repa a kiyasangkapa ko manga palaw.
21 Miyamatay so langon a bibiyag a inaden sii sa doniya; so manga papanok, manga
pangangayamen, manga binatang, manga paoledoled ago so langon a manosiya.
22 Miyamatay so langon o manga baraniyawa ko kalopaan.
23 Giyanan i kiyapayopasa o Tohan ko langon taman a bibiyag a matatago ko lopa; so
manga manosiya, manga binatang, manga paoledoled ago so manga papanok na palaya
miyapapas ko doniya. Aya bo a miyalamba na si Nok ago so siran oto a miyaped iyan ko
kapal.
24 Na da den tirak so ig ko doniya ko soled o miyakamagatos ago lima polo gawii.
MAKSOD 8
So Kiyaipos o Bagiyaw
Ogaid na tatagoon o Tohan sa ginawa niyan si Nok ago so langon a manga binatang ago
pangangayamen a miyaped iyan ko kapal. Na piyakasamber iyan so ndo ko doniya na
mipoon den tomirak so ig.
2 Miyanga oolen so manga bowalan ko didalem a lopa, na gominek mambo moran ka
piyangalelekeban so manga gimowa o ig roo sa langit.
3 Petirak so ig sa maito-maito, na so kiyapopos o magatos ago lima polo gawii na minirat
den so ig.
4 Sii ko ikasapolo ago pito gawii ko ikapito olan na tomiked so kapal ko isa a palaw sii sa
kapalawan sa Ararat.
5 Petirak pen so ig taman ko ikasapolo olan, na sii ko paganay a gawii ko ikasapolo olan
na miyamakagemaw so poro o manga palaw.
6 Kagiya makapat polo gawii na likaan i Nok so dirowasa a inembaalan iyan ko kapal
7 Na miyoka sekaniyan sa kakowak. Na da ini makakasoy ka baden milayolayog ko
mbalabala taman ko kiyati o langon a ig ko lopa.
8 Mandiyadi na miyoka si Nok sa marapatik kaan iyan katokawi o tominirak den so ig.
9 Ogaid na da den a ba ketoon o marapatik a ketanaan iyan ka lomalangkap pen so ig ko
langon o kalopaan, na mimbalingan ki Nok sii ko kapal. Na kiyawa i Nok na inisoled
iyan.
10 Nomiyayaw sekaniyan sa miyakapito gawii na piyakalayog iyan peroman so marapatik
a poon ko kapal.
11 Kagiya makakasoy ron ko kaperimon iyan na aden a matotoka iyan a mailaw a raon a
kayo a olibi, na kiyatokawan i Nok a tominirak den so ig ko doniya.
12 Na nomiyayaw peroman sa miyakapito gawii na piyakalayog iyan bo so marapatik,
ogaid na da rekaniyan den kasoy.
13 Sii ko kiyanem gatos ago saragon a idad i Nok sii ko paganay a gawii ko paganay a
olanolan na miyati so ig ko doniya. Kinowa i Nok so midadapeng ko kapal na miyailay
niyan a pekemara so lopa.
14 Na sii ko ikadowa polo ago pito gawii ko ikadowa olanolan na miyamara den piyapiya
so kalopaan.
15 Mandiyadi na pitero o Tohan ki Nok a
16 “Peliliyo kano ko kapal, seka ago so karoma ngka taman ko manga wata a ka ago so
manga karoma iran.
17 Pamakaonota ngka pen lomiyo so langon a meranaranap a ped ka a so manga papanok,
so manga ayam ago so langon a paoledoled kaan siran mamakambabawata ago manga
bababad ago manga bebembar ko doniya.”
18 Kagiya ka maoto na lominiyo den si Nok a rakes o karoma niyan ago so manga wata
iyan ago so manga karoma iran.
19 So langon a manga ayam, manga paoledoled ago manga papanok a so oman i
pekeoyagoyag sii ko kalopaan na mililiyo ko kapal a mitondotondog so oman i pisosonan
iran.
Mikorban si Nok
20 Mandiyadi na mimbaal si Nok sa aparan ko Allah, na kominowa sekaniyan sa satiman

ko oman i pisosonan o halal a ayam ago halal a papanok na piyangorban iyan ai ko Allah
a petotongen.
21 Miyabaw o Allah so mamot na inikasoat iyan, na pitero iyan ko ginawa niyan a “Di
aken den ipesinta so lopa sabap ko manosiya apiya pen marata so masisinganin o poso
iran ipoon ko kawawatai kiran; ago di aken den mbinasaan so langon a manga baraniyawa
a datar o miyanggolaola ko den.
22 “Taman ko kaaaden pen o doniya

na so kapeseod ago so dii kaperagon,
so matenggaw ago so mayaw,
so pangolaon ago so pangoran,
so kadaondaw ago so kagagawii
na di den tereg.”
MAKSOD 9
So Kapasadan o Allah Mipantag ki Nok
Riyakmatan o Tohan si Nok ago so manga wata iyan a mama ka pitero iyan kiran a
“Mbabawata ago ndakedakel kano kaan mamangipeno ko doniya so kebabadan rekano.
2 So langon a manga binatang sa kalopaan, manga papanok sa kawang, manga paoledoled
ko lopa ago manga seda sa ragat na pengaalek rekano ago pemalagoy; mapapalad siran
den rekano ko kipepaaren iyo kiran.
3 Imanto na kekan iyo siran langon ka ipembegay aken siran rekano a pangenengken iyo a
lagid o kinibegan aken on rekano ko leletean.
4 “Ogaid na di kano den ken sa sapo a aden pen a rogo on, ka so rogo na aya niyan
kaoyagoyag.
5 Disomala a misaop so kapamonoa ko taw. Seopan aken so oman i binatang a
makabono sa manosiya, ago so pen mambo so oman i taw a makabono sa isen iyan a
manosiya.
6 “Apiya antawaa i pekabono sa manosiya,

na kebono mambo o manosiya;
ka sii ko kiyambaali o Tohan ko manosiya
na inisayan iyan sa ginawa niyan.
7 Sekano peman na mbabawata ago ndakedakel kano kaan mabembar ko doniya so

kebabadan rekano.”
8 Na pitero pen o Tohan ki Nok ago so manga wata iyan a

9 “Pagembaalan ko imanto so kapasadan aken mipantag rekano ago so manga moriyataw
niyo
10 Ago so langon a manga baraniyawa a miyaped iyo; so manga papanok, manga
pangangayamen ago manga binatang a so langon a merananap a miyaped iyo a mililiyo ko
kapal.
11 Na giyai i kapasadan aken; itopa ko rekano a di den kapeperomanan o ba mapolang a
bagiyaw so langon a oyagoyag a inaden, ago di den maaden peroman so bagiyaw a
ikebinasa o doniya.”
12 Tig pen o Tohan a “Giyai i nanao sangkai a da a ikepos iyan a kapasadan a

pagembaalan aken mipantag rekano ago so langon a baraniyawa:
13 Tegoon aken so boloto aken sii ko manga gabon, na kebaloy ai a nanao ko kapasadan
aken mipantag ko doniya.
14 Igira a pegowitan aken sa manga gabon so doniya ago pepekagemaw so boloto sii ko
manga gabon
15 Na peketademan aken so initopa ko rekano ago so langon a pisosonan a baraniyawa a
di den kapeperomanan o ba mabaloy so ig a bagiyaw a ikebinasa o langon a oyagoyag a
inaden.
16 Igira a pepekagemaw so boloto sii ko manga gabon na pekeilay aken ago peketademan
aken so da a ikepos iyan a kapasadan o Tohan mipantag ko langon a baraniyawa ko
doniya.”
17 Pitero o Tohan ki Nok a “Giyanan den i nanao ko kapasadan a inembaalan aken

mipantag ko langon a oyagoyag a inaden ko doniya.”
So Manga Wata i Nok a manga Mama
18 So manga wata i Nok a manga mama a mililiyo ko kapal na si Sim, si Ham ago si
Yapet. (Si Ham na aya ama i Kanaan.)
19 Giyangkai a telo kataw a manga wata i Nok na aya manga apoapoan o langon a taw sa
doniya.
20 Sa masa oto na mipoon den mamomolaan si Nok, na miyamamola sa manga obas.

21 Kagiya makainom sekaniyan ko arak a ig a obas na miyabereg, na miniga ko
barombarong iyan a matatalandiyang.
22 Si Ham a aya ama i Kanaan na miyailay niyan so ama iyan a matatalandiyang na taros
a piyanotol iyan ko dowa kataw a pagari niyan sa liyo.
23 Ogaid na kominowa si Sim ago si Yapet sa kimon na inisablay iran ko dowa a waga
iran, na miyangendod siran ko ama iran na inisapeng iran on so kimon ko katatalandiyang
iyan. Na sabap sa makatatalikod siran on na da iran den mailay so katatalandiyang o ama
iran.
24 Kagiya makanaw si Nok ko kabebereg iyan ago kiyatokawan iyan o antonaa i inikidia
on o ari a wata iyan
25 Na pitero iyan a
“Pesintaan si Kanaan!
Pembaloy sekaniyan a lebi a mababa a oripen
o manga pagari niyan.”
26 Pitero iyan pen a
“So podi na rek o Allah a Tohan i Sim!

Mabaloy si Kanaan a oripen i Sim.
27 Pakalaan o Tohan so pangingedan i Yapet;
makakaden si Yapet ko manga barombarong i Sim,
na mabaloy si Kanaan a oripen iyan.”
28 Kagiya maipos so bagiyaw na miyakapaginetaw pen si Nok sa miyakatelo gatos ago
lima polo ragon.
29 Miniraot so idad iyan sa siyaw gatos ago lima polo ragon, na miyatay sekaniyan.
MAKSOD 10
So manga Mbawataan o manga Wata i Nok
Giyai i salsila o manga moriyataw o manga wata i Nok a manga mama a si Sim, si Ham
ago si Yapet. Mimbabawata siran mambo sa manga mama ko kiyaipos o bagiyaw.
So manga Mbawataan i Yapet
2 So manga wata i Yapet a manga mama na

Si Gomer, Magog, Maday, Yaban, Tobal, Misik ago si Tiras.
3 So manga wata i Gomer a manga mama na
si Askenas, Ripat ago si Togarma.
4 So manga wata i Yaban a manga mama na
si Ilisah, Tarsis, Kitim ago si Rodanim.
5(So manga moriyataw iran na miyangabebembar ko kilid a manga ragat.)
Giyanan den so manga mbawataan i Yapet a so kiyababadan kiran na kibabaling ko
mbarambarang den a manga inged iran ago manga nasiyon a so oman i isa ka bangsa na
aden a rek iyan a basa.
So manga Mbawataan i Ham
6 So manga wata i Ham a manga mama na

si Kos, Misir, Pot ago si Kanaan.
7 So manga wata i Kos a manga mama na
si Sibas, Habilah, Sabtah, Raamah ago si Sabtikas,
So manga wata i Raamah a manga mama na
Si Sibas ago si Didan.
8 Si Kos na aya ama i Nimrod a mimbaloy a mala i gees ko doniya.

9 Mapasang sekaniyan i kapanganop ko kapekeilaya on o Allah. Giyanan i dii kateroa o
manga taw sa “Datar o Nimrod a mapasang i kapanganop ko kapekeilaya on o Allah!”
10 Aya maaped ko paganay a ndatoan iyan na giya manga siti a Babilon, Irik, Akad ago
Kalni a so kalangolangan ai na sii sa inged a Babiloniya.
11 Poon sangkoto a inged na somiyong sekaniyan sa Asiriya a ron iyan piyamangon so
manga siti a Niniba, Rihobot Ir, Kalah
12 Ago giya Risin a sii matatago ko pageletan a Niniba ago so kababantogan a siti a
Kalah.
13 Si Misir na aya apoapoan o manga taw sa Lod, Anam, Lihab, Napto,

14 Patros, Kaslo (a miyakapoon on so manga Pilistiyo) ago Kapetor.
15 Si Kanaan na aya ama i Sidon a paganay a wata iyan, ago apoapoan sekaniyan mambo
o manga Hitiyo,
16 Manga Hibosiyo, manga Amoriyo, manga Girgasiyo,
17 Manga Hibiyo, manga Arkiyo, manga Siniyo,
18 Manga Arbadiyo, manga Simariyo ago manga Hamatiyo. Miyamangiparak angkoto a
manga bangsa a kiyababadan ki Kanaan,
19 Na aya kaolad o pangiingedan iran na poon sa Sidon taman sa Gerar a marani sa Gasa
sii sa tampar sa pagabagatan, na taman peman sa Sodom, Gomorah, Admah ago giya
Siboim a marani sa Lasa sii sa tampar sa sebangan.
20 Giyanan den so manga mbawataan i Ham a so kiyababadan kiran na kibabaling ko

mbarambarang den a manga inged ago nasiyon iran a so oman i isa ka bangsa na aden a
rek iyan a basa.
So manga Mbawataan i Sim
21 Si Sim a kaka a pagari i Yapet na mimbabawata mambo sa manga mama. Si Sim na

aya apoapoan o langon o manga taw sa Ibir.
22 So manga wata i Sim a manga mama na
si Ilam, Asor, Arpaksad, Lod ago si Aram.
23 So manga wata i Aram a manga mama na
si Os, Hol, Gitir ago si Misik,
24 Si Arapaksad na aya ama i Silah, na si Silah na ama i Ibir.
25 Mimbawata si Ibir sa dowa kataw a mama.
So isa kiran na iningaranan sa Pilig, ka sii ko masa niyan na miyabaad so manga taw sa
doniya. Aya ngaran o pagari niyan na si Yoktan.
26 Si Yoktan na aya ama i Almodad, Silip, Hasarmabet, Hirah,
27 Hadoram, Osal, Diklah,
28 Obal, Abimail, Sibas,
29 Opir, Habilah ago si Yobab. Langon siran manga wata i Yoktan a manga mama.
30 Aya kaolad o pagiingedan iran na poon sa Misa taman sa Sipar ko kapalawan a darpa
sii sa tampar sa sebangan.
31 Giyanan den so manga mbawataan i Sim a so kiyababadan kiran na kibabaling ko

mbarambarang den a manga inged ago nasiyon iran a so oman i bangsa kiran na aden a
rek iyan a basa.
32 Langon angkoto a manga taw na manga mbawataan o manga wata a mama i Nok a
manga mama. So oman i salsila iran na mipepasod ko manga bangsa a kiyababadan
kiran. Miyakapoon kiran so langon a manga nasiyon a miyabembar ko doniya ko
kiyaipos o bagiyaw.
MAKSOD 11
So Maporo a Lantawa
Sa pagampaganay na so langon a taw sa doniya na sasatiman i basa ago ndatadatar so di
iran dii katero.
2 Sii ko kapepegiseg iran sa tampar sa sebangan na miyakaoma siran sa kapantaran a lopa
sii sa Babiloniya na miyaginged siran roo.
3 Mimbibitiyarai siran a tig o isa ko ped iyan a “Mamagogopa tano ka mamanowang tano
sa manga bata a pekategasen tano ko apoy.” Kagiya ka maoto na miyosar siran sa manga
bata ko di iran dii kambalay, ago lapot a miyakandekedeketa on.
4 Mandiyadi na pitero iran a “Imanto na bangonan tano a ginawa tano sa bandar a inged a
aden a lantawa on a pekarampay so poro iyan ko langit, ka pakibantog tano so ngaran
tano kaan tano di kiparak ko pirowarowangan o doniya.
5 Ogaid na miyanog so Allah ka pagilain iyan so bandar a inged ago so lantawa a

pembangonen o manga manosiya.
6 Na pitero o Allah a “Maiisaisa angkanan a manga taw ago sasatiman pen i basa. Na o
giyanan i kiyapoonan iran nggolaola na imanto na da a ba iran di mapenggolaola ko apiya
antonaa a mapemikir iran.
7 Na, manog tano roo ka goketen tano so basa iran kaan siran di makapesisinabota.”
8 Sii sangkai a okit na iniparak siran o Allah ko dalem o doniya, na ginekan iran mangon
so bandar a inged.
9 Giyanan i sabap a kiyabetowi ron sa “Babil,” ka roo giyoket o Allah so basa o langon a
manosiya, ago poon roo na iniparak iyan siran ko pirowarowangan o doniya.
Ipoon ki Sim taman ki Abram
10 Giyai i salsila o kiyababadan ki Sim:
Kagiya makadowa ragon a kiyaipos o bagiyaw na miyakapagidad si Sim sa magatos

ragon, na mimbawata sekaniyan sa mama a si Arpaksad.
11 Oriyan iyan na miyakapaginetaw pen si Sim sa miyakalima gatos ragon, na
12 Kagiya makapagidad si Arpaksad sa telo polo ago lima ragon na mimbawata sa mama
a si Silah.
13 Oriyan iyan na miyakapaginetaw pen si Arpaksad sa miyakapat gatos ago telo ragon,
na mimbabawata pen sa ped a manga wata a mama ago manga babay.
14 Kagiya makapagidad si Silah sa telo polo ragon na mimbawata sa mama a si Ibir.

15 Oriyan iyan na miyakapaginetaw pen si Silah sa miyakapat gatos ago telo ragon, na
mimbabawata pen sa ped a manga mama ago manga babay.
16 Kagiya makapagidad si Ibir sa telo polo ago pat ragon na mimbawata sa mama a si
Pilig.
17 Oriyan iyan na miyakapaginetaw pen si Ibir sa miyakapat gatos ago telo polo ragon, na
18 Kagiya makapagidad si Pilig sa telo polo ragon na mimbawata sa mama a si Riyo.

19 Oriyan iyan na miyakapaginetaw pen si Pilig sa miyakadowa gatos ago siyaw ragon,
na mimbabawata pen sa ped a manga wata a mama ago manga babay.
20 Kagiya makapagidad si Riyo sa telo polo ago dowa ragon na mimbawata sa mama a si
Sirog.
21 Oriyan iyan na miyakapaginetaw pen si Riyo sa miyakadowa gatos ago pito ragon, na
mimbabawaa pen sa ped a manga mama ago babay.
22 Kagiya makapagidad si Sirog sa telo polo ragon na mimbawata sa mama a si Nahor.

23 Oriyan iyan na miyakapaginetaw pen si Sirog sa miyakadowa gatos ragon, na
24 Kagiya makapagidad si Nahor sa dowa polo ago siyaw ragon na mimbawata sa mama
a si Tirah.
25 Oriyan iyan na miyakapaginetaw pen si Nahor sa miyakamagatos ago sapolo ago
siyaw ragon, na mimbabawata pen sa ped a manga wata a mama ago manga babay.
26 Kagiya makapagidad si Tirah sa pito polo ragon na mimbabawata sa manga mama a si

Abram, si Nahor ago si Haran.
27 Giyai so totolan ki Tirah: Si Tirah na aya ama i Abram, Nahor ago si Haran. Si Haran
na mimbawata sa mama a si Lot.
28 Isako oyagoyag pen si Tirah a ama i Haran na miyatay si Haran ko siti a Or sa
Babiloniya a ron inimbawata.
29 Miyangaroma si Abram ago si Nahor. Aya ngaran o karoma i Abram na si Saray, ago
so karoma i Nahor na si Milka a wata i Haran a aya mambo ama i Iskah.
30 Si Saray na da a wata iyan ka di pembawata.
31 Piyamakaonot i Tirah so wata iyan a si Abram, so apo iyan a si Lot a aya wata i Haran
ago so miyakamong on a babay a si Saray a karoma i Abram na palaya siran gomiyanat sa
siti a Or sa Babiloniya ka song sa inged a Kanaan. Ogaid na kagiya makaoma siran sa siti
a Haran na komiyaden siran roo.
32 Kagiya makapagidad si Tirah sa dowa gatos ago lima ragon na miyatay sekaniyan roo
sa Haran.
MAKSOD 12
Siyogo o Allah si Abram
Sa masa na pitero o Allah ki Abram a “Awai ngka so inged ka, so manga tonganay ngka
ago so walay o ama a ka na song ka ko inged a pekiilay aken reka.
2 “Mbaloin ko so manga mbawataan ka a mala a nasiyon,
ago perakmatan aken seka pen.
Mbaloin ko so ngaran ka a kababantogan,
ago perarakmat ka mambo ko manga ped.
3 Perakmatan aken so siran oto a perakmat reka,
ago ipesinta aken so apiya antawaa i pesinta reka;
na kerakmatan so langon a taw ko doniya a makapenggolalan reka.”
4 Sa masa oto na pito polo ago lima ragon a idad i Abram; na gomiyanat sekaniyan sa
Haran ka giyoto i pitero on o Allah, na miyonot on mambo si Lot.
5 Piyakaonot i Abram so karoma niyan a si Saray ago so pakiwataan iyan a si Lot na
initelon iyan pen so langon a tamok ago manga talasogoay a miyakowa iran sa Haran, na
miyantap siran sa inged a Kanaan.
Kagiya makaoma siran roo

6 Na tomiyaros lomalakaw si Abram sii sangkoto a inged taman den ko katatagoan ko
mala a kayo sa Morah sii sa Sikim. Sa masa oto na mababaling pen so manga Ikanaanen
sangkoto a inged
7 Ogaid na mipeyag so Allah ki Abram na pitero iyan on a “Imbegay aken angkai a inged
ko manga mbawataan ka.” Na mimbaal roo si Abram sa aparan ko Allah a miyakapeyag
on.
8 Oriyan iyan na miyawa sekaniyan roo ka miyantap ko manga bobongan sa sebangan a

Bitil, na mikampo ko masesebangan a Bitil ago masesedepan a Ay. Mimbaal roo pen sa
aparan na tiyalowan iyan on so Ingaran o Allah.
9 Oriyan oto na tomiyaros lomalakaw si Abram a pegantap sa pagabagatan a Kanaan.
Si Abram sii sa Misir
10 Sangkoto a masa na peteonen so inged a Kanaan, na sabap ko karegen o taon na

tomiyaros lomalakaw si Abram sa pagabagatan taman sa Misir ka mbeling roo sa di bo
matey.
11 Kagiya makarani sa Misir na pitero iyan ko karoma niyan a Saray a “Katawan aken a
mataid ka a babay.
12 Na amay ka mailay ka o manga Imisiren na mapemikir iran a seka i karoma ko, na
mbonoon ako iran ago pakapegoyagen ka iran.
13 Kapedipedi ka bo na teroa ngka a babay aken seka. Sabap roo na di ako petay, ka ba
ako baden kapepiyapiyai sabap reka.”
14 Na giyoto den i miyanggolaola, ka sii ko kiyapakaoma i Abram sa Misir na miyailay o

manga Imisiren a tanto a mataid a babay si Saray.
15 Miyailay sekaniyan mambo o ped ko manga sanasanaan o solotan sa Misir na piyodi
iran on so kataid iyan. Kagiya ka maoto na miyawit si Saray ko torogan o solotan.
16 Pipiyapiyaan iyan si Abram sabap ki Saray na bigan iyan sa manga bilibili, manga
sapi, manga kimar, manga onta ago manga oripen a manga mama ago manga babay.
17 Ogaid na tiniyoba o Allah sa mala a paniyakit so solotan ago so langon a taw ko

torogan iyan sabap ko kiyakowaa niyan ki Saray a karoma i Abram.
18 Kagiya ka maoto na piyakisogoan o solotan si Abram na pitero iyan on a “Antonaa bes
angkai a pinggolaola ngka raken? Ino ngka raken da teroa a karoma ngka sekaniyan?
19 Ino ngka peteroa a babay ngka sekaniyan a aya ko ron kiyakowaa a mapengaroma ko?
Na, katii so karoma ngka. Kowaa ngka den ago awa kano den!”
20 Na somiyogo so solotan ko manga pagtaw niyan, na piyakaliyo iran si Abram ko inged
a rakes o karoma niyan ago so langon taman a rek iyan.
MAKSOD 13
Miyakambelag si Abram ago si Lot
Kagiya makaawa sa Misir na lomiyalakaw si Abram sa tampar sa pagotaraan a pegantap

sekaniyan ko pagabagatan a Kanaan a ped iyan si karoma niyan ago so langon taman
iyan; na miyonot on mambo si Lot.
2 Tanto a kawasa si Abram ka madakel a pangangayamen iyan a rakes o madakel a pirak
ago bolawan.
3 Na giyanatan iyan a pagabagatan a Kanaan na minisegiseg pen lomalakaw a pegantap sa

Bitil. Miyakaoma sekaniyan ko darpa a pageletan a Bitil ago giya Ay a ron gowani
miyakakampo
4 A ron iyan mambo pimbaalan so paganay a aparan. Na roo tiyalowan i Abram so
Ingaran o Allah.
5 Si Lot a moonot ki Abram na aden mambo a manga bilibili niyan, manga kambing ago
manga sapi a rakes o pamiliya niyan ago manga talasogoay.
6 Kagiya ka maoto na sii ko katitimo iran langon na di petoon so lopa a kapenateban o
manga ayam iran ka tanto den a miyakadakel, na di siran keoyag ko satiman a darpa.
7 Na miyakapepawala so manga pananagikor i Abram ago so manga pananagikor i Lot.
(Sa masa oto na so manga Ikanaanen ago so manga Pirisiyo na kibabaling mambo
sangkoto a inged.)
8 Mandiyadi na pitero i Abram ki Lot a “Kapedipedi ka bo na o ba ta makapewala aya

pen o ba so manga pananagikor aken ago so rek ka, ka tonganaya ta.
9 Makapemili ka ko apiya antonaa mapiya i kebayaan ka ko langon angkai a kalopaan.
Aya mapiya na mbelag ta. O magantap ka sa diwang na sii ako sa kawanan, na o
magantap ka sa kawanan na sii ako sa diwang.”
10 Na milangkalangkaw si Lot na miyailay niyan a so langon a kapantaran sa Yordan na

pemangembowatan a ig so mbalabala on ka datar o Sapadan o Allah ago datar pen o
inged a Misir sii sa tampar sa Sowar. (Sangkai a masa na da pen binasaa o Allah so siti a
Sodom ago giya Gomorah.)
11 Kagiya ka maoto na miyatomo i Lot so langon a kapantaran a Yordan na miniseg
sekaniyan den sa tampar sa sebangan. Giyanan i okit a kiyapakambelag angkoto a dowa
kataw.
12 Mitelimbagak si Abram sa inged a Kanaan, na miyaginged si Lot sii ko manga siti ko
kapantaran ka biyangon iyan so kampo niyan a marani sa Sodom.
13 Na so manga mama sa Sodom na palaya den manga rarata, ago mala a di iran dii
kapakandosa ko Allah.
14 Na pitero o Allah ki Abram kagiya mabelag on den si Lot a “Pelangkalangkaw ka sii

ko darpa a katitindegan ka ago ilaya ngka a pagotaraan ago so pagabagatan, ago giya pen
a sebangan ago so sedepan.
15 Ka so langon a kalopaan a keilay ngka na imbegay aken reka ago so manga moriyataw
ngka sa katangana niyo ron sa taman sa pakataman.
16 Pakapendakelen ko so kebabadan reka a datar o bayanek ko lopa taman sa opama ka
aden a makabilang ko bayanek ko lopa na giyanan bo i kakebilanga ko kebabadan reka!
17 Ika roo den na lalakawi ngka so kaolad angkanan a lopa, ka imbegay aken reka.”
18 Mandiyadi na initepas i Abram so kampo niyan ka roo miyaling ko marani ko

mangaala a kayo sa Mamri sii sa Hibron. Na roo sekaniyan peman mimbaal sa aparan ko
Allah.
MAKSOD 14
Piyanabangan i Abram si Lot
Sangkoto a masa na aden a pat kataw a manga dato; si Amrapil a dato sa Babiloniya, si
Ariyok a dato sa Ilasar, si Kidorlaomer a dato sa Ilam ago si Tidal a dato sa Gowim
2 A miyakitidawa siran ko salakaw pen a lima kataw a manga dato a si Biras a dato sa
Sodom, si Birsiyas a dato sa Gomorah, si Sinab a dato sa Admah, si Simiber a dato sa
Sibowim ago so dato sa Bila (giyanan so inged a Sowar).
3 Miyaisaisa angkai a lima kataw a manga dato na piyakatimo iran so manga sondaro iran
sii ko balintad sa Sidim (giyanan so Maatay a Ragat).
4 Sii ko soled o miyakasapolo ago dowa ragon na mipapaar siran i Kidorlaomer, ogaid na
sii ko ikasapolo ago telo ragon na siyopak iran sekaniyan.
5 Sii ko ikasapolo ago pat ragon na si Kidorlaomer ago so miyamakapagabanga on a

manga dato a rakes o manga sondaro iran na pinggogobat iran ago piyamanaban iran so
manga Ripayo sii sa Astirot Karnaim, so manga Sosiya sii sa Ham, so manga Imiyo sii sa
kapantaran sa Kiriyataim
6 Ago so manga Horiyo sii ko kapalawan sa Idomiya, na piyanaloba iran siran taman sa
Ilparan a marani ko disirto.
7 Oriyan iyan na pipetoan iran a Inmispat (giyanan den na Kadis) ago miyamangipaar iran
so dalem a inged o manga Amalik ago so pen so manga Amoriyo a kibabaling sa Hasason
Tamar.
8 So peman so manga dato sa Sodom, Gomorah, Admah, Sibowim ago Bila (so inged a
Sowar) na tiyanor iran so manga sondaro iran sii ko balintad sa Sidim na miyakitidawa
siran
9 Ki Kidorlaomer a dato sa Ilam, si Tidal a dato sa Gowim, si Amrapil a dato sa
Babiloniya ago si Ariyok a dato sa Ilasar; lima kataw a manga dato a miyakitidawa ko pat
kataw a manga dato.
10 So balintad sa Sidim na mapepeno a manga galebo a lapoten, na kagiya palagoyan o
manga dato sa Sodom ago Gomorah so manga ridoay iran na miyanga oolog siran baden
ko manga galebo, ogaid na so telo kataw a ped a manga dato na miyamagapas ko manga
palaw.
11 Pitetaban o pat kataw a manga dato so langon a manga tamok sa Sodom ago Gomorah
a rakes o langon a kaoyagan iran, na miyawa siran roo den.
12 Biniyag iran pen si Lot a pakiwataan i Abram ago so langon a rek iyan ka kagiya
mababaling sa Sodom.
13 So sakataw a miyakapalagoy na somiyong ki Abram a Hibriyo na piyanotol iyan on so

miyanggolaola. Sa masa oto na mababaling si Abram ko marani ko mangaala a kayo a
rek i Mamri a so Amoriyo a aya pagari i Iskol ago si Anir. Palaya siran manga abanga i
Abram.
14 Kagiya maneg i Abram a miyabiyag so tonganay niyan na linimod iyan so telo gatos
ago sapolo ago walo a miyasinanad a manga mama a inimbabawata ko kampo niyan na
siyaloba iran so pat kataw a dato taman den sa siti a Dan.
15 Pimbaabaad iyan so manga pagtaw niyan, na giyobat iran so manga dato sii ko
kagagawii. Tiyaban iran siran ago piyanaloba iran taman den sa Hobah sii sa pagotaraan
a Damaskos.
16 Miyakowa peroman i Abram so langon a tamok, na inibaling iyan pen si Lot a
pakiwataan iyan a rakes o manga rek iyan, ago so pen so manga babay ago so manga ped
a taw a miyanga bibiyag.
Riyakmatan i Milkisidik si Abram
17 Kagiya makakasoy si Abram ko oriyan o kiyatabana niyan ki Kidorlaomer ago so

manga dato a abanga iyan na inalaw sekaniyan o dato sa Sodom sii ko balintad sa Sabih a
bebetowan mambo sa Balintad o manga Dato.
18 Na si Milkisidik a dato sa Salim ago imam o Lebi a Maporo a Tohan na miyawid roo
sa paan ago arak ki Abram,
19 Na riyakmatan iyan sekaniyan a tig iyan a
“Rarakmatan si Abram o Tohan a Lebi a Maporo

a Miyaden ko langit ago so doniya!
20 So podi na rek o Tohan a Lebi a Maporo
a aya reka miyalad ko manga ridoay ngka!”
Na inibegay ron i Abram so ikasapolo bagi ko langon taman a miyataban iyan.

21 Na pitero o dato sa Sodom ki Abram a “Began ka raken so manga taw na rek ka den so
manga tamok.”
22 Ogaid na pitero on i Abram a “Minisepa aken den ko Allah a Lebi a Maporo a Tohan a
Miyaden ko langit ago so doniya
23 A di aken den kowaan so apiya antonaa a rek ka a apiya so sapotol a tanor o di na ba
so iket a tinilas, ka o ba ngka matero i ‘Saken i miyaloy ki Abram a tatamoken.’
24 Da den a kowaan ko a rowar ko miyakan o manga pagtaw aken ago so bagian o manga
abanga aken a miyonot raken a si Anir, Iskol ago si Mamri. Pakikowaan ka kiran so
bagian iran.”
MAKSOD 15
So Kapasadan o Tohan mipantag ki Abram
Kagiya maipos oto na miyakiilay so Allah ki Abram ago miyakimbitiyarai ron a tig iyan a
“Di ka pekelek, Abram,

Saken i kelong ka,
na mbegan ko seka sa mala a balas.”
2 Pitero i Abram a “Ya Allah a Kadnan ko, antonaa i kipantag o imbegay ngka raken
kagiya da a wata aken na aya bo a makapekewali ko tamok aken na si Iliyasar a taw sa
Damaskos?
3 Kagiya da ako ngka den begi sa wata na so isa ko talasogoay aken na aya makapekewali
ko tamok aken.”
4 Na giyoto a pitero on a Allah a “Giyangkanan a mama na kena a ba so makapekewali ko

tamok ka, ka so rek ka a wata a mama a pekapoon ko lawas ka na aya on makapekewali.”
5 Na inowit sekaniyan o Allah sa liyo na pitero iyan on a “Ilaya ngka a langit ago bilanga
ngka so manga bitoon o kegaga ngka milang.” Na tig iyan pen a “Giyanan den i kadakel
o kebabadan reka.”
6 Na miyaratiyaya si Abram ko Allah na inibilang o Allah so paratiyaya niyan a aya niyan

kaontol.
7 Pitero iyan on pen a “Saken so Allah a aya reka miyakaawa sa Or roo sa Babiloniya
kaan aken reka mibegay angkai a inged sa katangana ngka on.”
8 Ogaid na pitero i Abram a “Ya Allah a Kadnan ko, andamanaya i kaketokawi aken ko
kaketangana ko ron?”
9 Tig o Allah a “Witi ako ngka sa isa a sapi, isa a babay a kambing ago isa a mama a
bilibili a nggagatelo ragon a idad iyan, na rakesi ngka sa isa a marapatik ago isa a
pagapak.”
10 Na inowit on langon ai i Abram, na piyamotol iyan siran na go inipametad iyan so
manga sapo sa dowa koyog, ka piyakapepantaga iyan so oman i sepotola on; ogaid na da
niyan pangopaka so manga papanok.
11 Piyanayab o manga banog so sapo ogaid na biyogaw siran i Abram.
12 Kagiya pesedep den so alongan na piyangenepan a torog si Abram na miyaoma

sekaniyan a piyakalekelek a tanto a maliboteng.
13 Na pitero on o Tohan a “Pekitokawan ko reka a matamataan a makapeginetaw so
manga moriyataw ngka a manga mananangga sii ko inged a kena a ba iran rek. Roo siran
mapengongoripen ago pemakaregenan ko soled o makapat gatos ragon.
14 Ogaid na siksaan aken so nasiyon a makapengongoripen kiran, na maipos oto na
pekaliyo siran on a makapetelon sa mala a kakawasaan.
15 Seka peman na kitapi ka ko manga apo o ka a lomilintad ka. Kilebeng ka amay ka
teman den piyapiya so omor ka.
16 Na di sii pen makapembalingan so manga moriyataw ngka taman ko ikapat kaapid
iran, ka so kadostaan o manga Amoriyo na da pen matarotop ko kindanegen ko ron
kiran.”
17 Kagiya somedep so alongan ago lomiyangkap den so maliboteng na minitekaw a

kiyapakagemaw o pegebel a koden ago pekedeg a barabad, na miyokit siran ko pageletan
o dowa koyog a manga sapo.
18 Giyoto den i kiyambaali o Allah sa kapasadan mipantag ki Abram a tig iyan a
“Imbegay aken ko manga mbawataan ka angkai a lopa a poon ko lawasaig sa Misir taman
den ko mala a lawasaig a giya Yopratis
19 A maaped on so pagiingedan o manga Kiniyo, manga Kinisiyo, manga Kadmoniyo,
manga Hitiyo, manga Pirisiyo, manga Ripayo, manga Amoriyo, manga Kanaaniyo, manga
Girgasiyo ago manga Hibosiyo.”
MAKSOD 16
Si Hagar ago si Ismail
So karoma i Abram a si Saray na da den makambawata sa wata ki Abram. Ogaid na aden

a talasogoay niyan a babay a Imisiren a aya ngaran iyan na si Hagar,
2 Na pitero i Saray ki Abram a “Da peroa o Allah a kapakambawata aken. Na pengnin ko
reka a rembanga ngka so talasogoay aken a babay. Baanda ron penggolalan so kakebegi
raken sa wata.”
Na miniyog si Abram ko pitero i Saray.
3 Kagiya ka maoto na inibegay i Saray si Hagar a Imisiren a talasogoay niyan ki Abram a
pembaloy a karoma niyan. (Miyanggolaola ini kagiya makasapolo den ragon a
kababaling i Abram sa Kanaan.)
4 Na rimbang i Abram si Hagar na miyaogat.
Kagiya katokawan i Hagar a maogat sekaniyan na inepoonan iyan mamagitowito so bai

niyan.
5 Na pitero i Saray ki Abram a “Madaneg ka sabap sangkai a kaperasaya raken. Piyalad
aken reka so talasogoay aken a kerembang ka, ogaid na ipoon ko kiyatokawi niyan sa
maogat sekaniyan na ba ko niyan den pepemagitowitoa. Makokom ta o Alah o antawaa
rekta i maontol, seka o di na saken!”
6 Ogaid na pitero i Abram a “Ilaya ngka man, ka kambabayabayaan ka so talasogoay

ngka! Nggolaolaa ngka on so apiya antonaa i ikesoat ka.” Na ipoon roo na
pepakaregenan i Saray si Hagar a aya niyan minipalagoy ki Saray.
7 Ogaid na so malaikat o Allah na miyaoma niyan si Hagar ko marani ko bowalan sii ko

disirto. Giyoto den so bowalan ko kilid o lalan a ipesong sa Sor.
8 Na pitero iyan a “Hey Hagar a talasogoay i Saray, anda ka poon ago anda ka song?”
“Pepelagoyan aken so bai aken a Saray,” a inisembag iyan.
9 Na pitero on o malaikat o Allah a “Kasoy ka ko bai ngka ago pakimbayabaya ka on.”

10 Tig iyan pen a “Pakapendakelen ko so manga mbawataan ka taman sa di siran
kebilang.”
11 Na pitero pen o malaikat o Allah a
“Maogat ka imanto na pembawata ka sa mama.

Aya ngka on imbeto na Ismail,
ka tiyago o Allah sa ginawa niyan so kapekerasay ngka.
12 Pembaloy sekaniyan a datar o maila a kimar;
sorangen iyan so oman i isa a taw
na sorangen sekaniyan mambo o langon a taw,
na mbeling sekaniyan a misisibay
ko langon o manga tonganay niyan.”
13 Na bitowan i Hagar so Allah a miyakimbitiyarai ron sa Ingaran a “Seka so Tohan a

pepekailay,” ka pitero i Hagar a “Miyailay aken den sii bes so Tohan a pepekailay raken!”
14 Giyanan i sabap a bitowan angkoto a paridi sa ‘Paridi o Oyagoyag a Pepekailay raken;’
na sii den matatago ko pageletan o Kadis ago Birid.
15 Na mimbawata si Hagar sa wata a mama ki Abram na iningaranan i Abram sa Ismail.

16 Miyakawalo polo ago nem ragon a idad i Abram ko kinimbawataan i Hagar ki Ismail.
MAKSOD 17
So Kapasadan mipantag ko Katori
Kagiya makasiyaw polo ago siyaw ragon a idad i Abram na mipeyag on so Allah a tig
iyan a “Saken so Tohan a Lebi a Mabager. Pangongonotani ako ngka ago di ka
pekidaway.
2 Itoman aken so kapasadan aken mipantag reka, ka tanto aken seka a pakapembabaden.”
3 Somiyodiyod si Abram, na pitero on o Tohan a
4 “So saken on na giyai so kapasadan aken mipantag reka: pembaloy ka a apoapoan o
madakel a nasiyon.
5 Di ka den kebetowan sa Abram, ka aya ngaran ka na Ibrahim sabap sa minitoro aken
seka a kebaloy a apoapoan o madakel a nasiyon.
6 Tanto aken a pakapendakelen so manga mbawataan ka, na mbaloin ko siran a manga
nasiyon; na aden mambo a manga dato a pekapoon reka.
7 Itoman aken angkai a initopa ko sii reka ago sii ko manga moriyataw ngka taman den
ko kapemagapidapidi kiran, ka da a ikepos iyan ai a kapasadan sa saken i Tohan ka ago
Tohan mambo o manga moriyataw ngka.
8 So dalem a inged a Kanaan a matag ka on mananangga imanto na imbegay aken reka
ago so manga moriyataw ngka sa katangana iran on sa taman sa pakataman; na saken so
Tohan iran.”
9 Na pitero pen o Tohan ki Ibrahim a “So seka on na disomala a mipenggolalan ka

mambo so kapasadan aken, seka ago so manga moriyataw ngka taman den ko
kapemagapidapidi kiran.
10 Na giyai i kapasadan aken mipantag rekano ago so manga moriyataw ngka a
mipenggolalan iyo: oman i isa
a mama sii rekano na matori.
11 Giyangkanan a kapanoria rekano na aya tanda o kapasadan aken mipantag rekano.
12 Taman den ko kapemagapidapidi rekano na matori so oman i mama sii rekano amay
ka makawalo gawii a idad iyan a ped on pen so siran oto a kena a ba niyo mbawataan ka
inimbawata baden ko kampo niyo o di na miyapamasa niyo ko di niyo royod a taw.
13 Apiya anda ko talasogoay a inimbawata ko walay niyo o di na miyapamasa o pirak iyo
na disomala a matori. Giyangkai a kapasadan aken a mitatanda ko manga lawas iyo na da
a ikepos iyan a kapasadan.
14 Apiya antawaa a mama i da matori na kebelag ko isa ka maginged a Israil, ka
miyasogok iyan so kapasadan aken.”
15 Na pitero pen o Tohan ki Ibrahim a “So sii ron peman si Saray a karoma ngka na di
ngka den pembetowi sa Saray, ka Sarah den i ngaran iyan.
16 Perakmatan aken sekaniyan ago matamataan a mbegan aken seka sa wata a mama a
nggolalan rekaniyan. Perakmatan aken si Sarah na pembaloy mambo a ina o manga
nasiyon. Na aden a manga dato o manga bangsa a pekapoon sekaniyan.”
17 Na somiyodiyod si Ibrahim, ogaid na mikela sekaniyan a pitero iyan sa ginawa niyan a

“Makapembawata bes so mama a miyakamagatos ragon a idad iyan? Keogat si Sarah a
miyakasiyaw polo ragon a idad iyan?”
18 Na pitero i Ibrahim ko Tohan a “Mataan a kabaya aken a si Ismail i makapeginetaw a
rarakmatan ka!”
19 Tig o Tohan a “Oway, ogaid na pembawata reka so karoma ngka a si Sarah sa wata a
mama na aya ngka on imbeto na Iskak. Ipetoman aken rekaniyan ago so manga
moriyataw niyan so kapasadan aken sa taman sa pakataman, ka da a ikepos iyan ai a
kapasadan.
20 So sii ron mambo si Ismail na miyaneg aken so piyangni ngka mipantag on, ka
perakmatan ko ago mbegan ko sa madakel a wata ago tanto aken sekaniyan a
pakapembabaden. Pembaloy sekaniyan a ama o sapolo ago dowa kataw a olowan, na
mbaloin ko so kebabadan on a mala a nasiyon.
21 Ogaid na aya tomanan ko ko kapasadan aken na so wata a ka a si Iskak a ipembawata i
Sarah sangkai a masa ko pekatalondog a ragon.”
22 Na kagiya makapasad makimbitiyarai so Tohan ki Ibrahim na miyawa rekaniyan.
23 Sii den sangkoto a gawii na ininggolalan i Ibrahim so miyatero on o Tohan ka

piyamanori iyan si Ismail a wata iyan ago so langon a ped a manga mama ko kampo niyan
a rakes o manga talasogoay a inimbabawata ko kampo niyan o di na miyapamasa niyan.
24 Siyaw polo ago siyaw ragon a idad i Ibrahim ko kiyatoria on,
25 Na so wata iyan a Ismail na sapolo ago telo ragon a idad iyan.
26 Si Ibrahim ago si Ismail na palaya siran miyanga totori sangkoto a gawii
27 A rakes o langon a talasogoay a inimbabawata ko kampo i Ibrahim o di na
miyapamasa ko di niyan royod a taw.
MAKSOD 18
So Telo kataw a Bisita
Mipeyag so Allah ki Ibrahim ko marani ko mangaala a kayo sii sa Mamri. Somasandang

si Ibrahim ko gimowa o barombarong iyan ko keoto a alongan
2 Na biyangon iyan a olo niyan na miyailay niyan so telo kataw a mama a tomitindeg ko
malo on mawatan. Kagiya mailay niyan siran na pinggagaanan iyan malaw.
Somiyodiyod si Ibrahim
3 Na pitero iyan a “Hey Kadnan ko, o kelimoon ako ngka na di ako ngka pelepasa a
oripen ka.
4 Sirong kano sangkai a kayo ka pakiwitan ko sekano sa ig a kionab iyo ko manga ai
niyo.
5 Na komowa ko sa makan iyo kaan makapiya a ginawa niyo na go kano bo taros, ka sii
kano den miyakaaot ko oripen iyo.”
Tig iran a “Oway, nggolaolaa ngka den so pitero o ka.”
6 Na minggagaan somoled si Ibrahim ko barombarong na pitero iyan ki Sarah a

“Nggagaan ka; kowa ka sa telo ka asad ko mainek a arina na pelililowa ngka na go ngka
mbaali a paan.”
7 Miyalalagoy si Ibrahim ko kodal na miyamamili on sa mapiya ago kaolit a nati a sapi,

na inibegay niyan ko talasogoay niyan a aya on minggagaan tiyagar.
8 Miyawid si Ibrahim sa mimbatik ago da mbatik a gatas ago so miyatiyagar a sapo o sapi
na inipagana niyan kiran. Sii ko kapeken iran na tomitindeg sekaniyan sii ko obay iran ko
atag a kayo.
9 Na iniise iran on a “Anda si Sarah a karoma ngka?”
“Ndodoo ko barombarong,” a tig iyan.
10 Na pitero o isa kiran a “Matamataan a kesoy ako reka sa datar ai a masa ko talondog a
ragon na pembawata si Sarah a karoma ngka sa wata a mama.”
Na pepamakinegen siran i Sarah ko ginowa o barombarong a katatalikodan o mama.
11 Miyalokes si Ibrahim ago si Sarah ka minitolod den so idad iran, na tiyapekan si
Sarah.
12 Na inikela i Sarah sii sa ginawa niyan a tig iyan a “Imanto a miyaronot ako den ago
miyalokes so karoma ko, na ba ako pen kegedii sa kabebaya?”
13 Na pitero o Allah ki Ibrahim a “Ino pekela si Sarah a pitero iyan a ‘Ba mataan a
pembawata ako a miyalokes ako den?’
14 Ba aden a di kegaga o Allah? Kesoy ako reka sii ko matetendo a masa ko talondog a
ragon na pembawata si Sarah sa mama.”
15 Na kagiya miyalek si Sarah na mipelaw a tig iyan a “Da ako kela.”

Ogaid na pitero iyan a “Kena, ka mikela ka.”
Inipamangni i Ibrahim a Siti a Sodom
16 Gomiyanat so manga mama na somiyong siran ko darpa a ron iran ketolongi a siti a
Sodom, na inidolog siran i Ibrahim.
17 Na pitero o Allah ko ginawa niyan a “Ba aken pegmaa ki Ibrahim so magaan aken
penggolaolaan?
18 Mataan a pembaloy so kebabadan on a kababantogan ago mala i gees a nasiyon, na
kerakmatan so langon a nasiyon ko doniya a makapenggolalan rekaniyan.
19 Ka miyapili aken sekaniyan a mapamando iyan so manga wata iyan ago so kebabadan
kiran sa kapengongonotani ran ko Allah ago so kanggolaolaa iran ko ontol ago so matito
kaan aken mitoman ki Ibrahim so initopa ko ron.”
20 Kagiya ka maoto na pitero o Allah ki Ibrahim a “Tanto a matanog a kapekenega ko ko

kapepekarata o manga taw sa Sodom ago giya Gomorah, ago sayana a mapened a di iran
dii kapakandosa.
21 Penogan aken siran imanto kaan aken mapariksa o ba iran miyanggolaola langon so
marata a miyaneg aken; na o di benar, na ketokawan aken.”
22 Mandiyadi na miyawa roo so dowa kataw ko manga mama na miyantap siran sa

Sodom, ogaid na makatitindeg roo den si Ibrahim ko hadapan o Allah.
23 Miyobay rekaniyan si Ibrahim a tig iyan a “Ba mataan a iperakes ka so manga oontol
ko kapolanga ngka ko manga rarata?
24 Opama ka aden a lima polo kataw a maontol ko siti na ba ngka mbinasaa so dalem a
inged? Ba ngka di pelepasa sabap ko lima polo a manga oontol a kebabaling on?
25 Mawatan sa ginawa ngka o ba ngka perakesen so manga oontol ko kambonoa ngka ko
manga rarata a pakapendataren ka so ikidia ngka ko maontol ago so marata. Mostakil o
ba ngka nan nggolaolaa! Ba di ontol so penggolaolaan o pengokom ko dalem a doniya?”
26 Inisembag o Allah a “O makatoon ako sa lima polo kataw a maontol sii sa Sodom na
pelepasen aken so dalem a siti sabap kiran.”
27 Mitero peroman si Ibrahim a tig iyan a “Pepekaraw ako reka pen makimbitiyarai,
Kadnan, apiya pen matag ako baden bayanek ago ombi.
28 Opama ka aden bo a pat polo ago lima kataw a maontol, ka kena a ba lima polo, na ba
ngka mbinasaa so dalem a siti sabap sa kiyakorangan sa lima kataw?”
Tig iyan a “O katoonan aken sa pat polo ago lima kataw a maontol na di aken
mbinasaan so siti.”
29 Na miyakimbitiyarai ron peroman si Ibrahim a tig iyan a “Opama ka aya bo a matoon

roo na pat polo kataw a maontol?”
Tig iyan a “O aden a pat polo kataw a maontol na di aken anan mbinasaan.”
30 Na pitero i Ibrahim a “Kapedipedi ka bo na o ba ka kararangiti, Kadnan, ka pakateroa

ko ngka bo. Opama ka aya bo a matoon roo na telo polo kataw a maontol?”
Na tig iyan a “Di aken anan penggolaolaan o makatoon ako roo sa telo polo."
31 Pitero i Ibrahim a “Pepekaraw ako reka pen makimbitiyarai, Kadnan, ogaid na opama
ka aya bo a matoon roo na dowa polo kataw a maontol?”
Tig iyan a “O makatoon ako sa dowa polo kataw na di aken mbinasaan.”
32 Na pitero i Ibrahim a “Kapedipedi ka bo na o ba ka kararangiti Kadnan, ka pakateroa

ko ngka sa makaisa pen. Opama ka aya bo a matoon roo na sasapolo a manga oontol?”
Tig iyan a “O aden a sapolo kataw na di aken mbinasaan.”
33 Kagiya makapasad makimbitiyarai so Allah ki Ibrahim na miyawa roo, na miyaling

mambo si Ibrahim.
MAKSOD 19
So Kadostaan a Sodom
Perimon kagiya makaoma so dowa kataw a malaikat sa Sodom. Sa masa oto na moontod
si Lot sii ko ipesoled ko siti, na kagiya mailay niyan siran na tominindeg na inalaw niyan
siran. Somiyodiyod sekaniyan
2 A tig iyan a “Manga Kadnan ko, kapedipedi kano bo na bolos kano ko walay o oripen
iyo. Makapengonab kano roo ko manga ai niyo ago makatorog kano roo pen, na
pekataros kano ko songowan iyo amay ka kepita.”
“Di,” a pitero iran, “ka sii kami keden sa plasa imanto a kagagawii.”
3 Ogaid na kagiya tanto niyan siran a tigel na miyonot siran on ko walay niyan.
Pitiyagaran iyan siran sa makan iran ago mimbaal sekaniyan sa paan a da a tapay ron, na
komiyan siran on.
4 Sa da iran pen kapakatorog na so langon a manga mama ko dalem a siti a Sodom a
ndatar so mangoda ago so lokes na linikopan iran so walay.
5 Liyalis iran si Lot a tig iran a “Anda so manga mama a miyakaoma reka imanto a
kegagawii? Liyon ka siran rekami kaan ami mipemotaliya.”
6 Liniyowan siran i Lot na initalanged iyan on so pintoan ko talikodan iyan.

7 Pitero iyan a “Pengangampedian ako rekano, manga gari; di niyo penggolaolaa angkai a
marata!
8 Ilaya niyo man ka aden a dowa kataw a wata aken a babay a da den marembang a
mama. Kapedipedi kano bo ka aya ko rekano den pakaliyon, na mapenggolaola niyo
kiran den so kabaya iyo. Ogaid na di niyo penggolaolai sa apiya antonaa angkai a manga
mama, ka miyolos siran ko walay aken na disomala a kelinding aken siran.”
9 Ogaid na tig iran a “Di kami ngka pegalangi!” Tig iran pen a “Miyakaoma sii si aki ini
a matag mananangga, ogaid na imanto na baden pesayan sa pangongokom! Awa ka san,
ka seka baden i pakataamen ami sa masakit!” Na ipeseromag iran si Lot ka pendasegen
iran so pintoan sa kanggebaa iran on.
10 Ogaid na so dowa kataw a mama sii ko soled o walay na kiyawa iran si Lot na giyamit
iran sa soled na initalanged iran on so pintoan.
11 Na siniksa iran a kabobota so manga mama ko liyo o walay a ndatar so mangoda ago
so lokes a diyokawan siran mangapap ko pintoan.
Miyawa si Lot sa Sodom
12 Pitero o dowa kataw a mama ki Lot a “Ba aden pen a ped ka sii sangkai a siti a manga
wata a ka a mama o di na babay o di na miyamakamong reka a manga mama o di na ped
pen a manga tonganay ngka? Liyon ka siran
13 Ka mbinasaan ami den angkai a inged. Sabap sa tanto den a matanog a kapekenega o
Allah ko kapepekarata o manga taw sii na siyogo kami niyan sa kambinasa mi ron.”
14 Mandiyadi na siyongowan i Lot so pekamong on a manga mama a matataalik ko

manga wata iyan a babay na pitero iyan a “Nggagaan kano lomiyo sangkai a siti ka
mbinasaan den o Allah!” Ogaid na aya kagegedaa iran on na ba sekaniyan baden dii
sendag.
15 Kagiya sobo na tigel o manga malaikat si Lot a tig iran a “Nggagaan ka! Pakaonota
ngka so karoma ngka ago so dowa kataw a manga wata a ka a sisii na liyo kano so siti
kaan kano di pematay ko kasiksaa on.”
16 Na dii sesendosendod si Lot, ogaid na kagiya inikapedi o Allah na piyangapetan o

manga mama so lima niyan ago so lima o karoma niyan ago so dowa kataw a wata iyan a
manga babay na piyangowit iran siran ko liyo o siti.
17 So den so kiniliyon iran kiran na pitero o isa on a “Palagowi niyo a ginawa niyo! Di
kano ndingil ko talikodan iyo ago di kano tereg ko apiya anda ko kapantaran! Palagoy
kano roo ko manga palaw kaan kano di pematay!”
18 Ogaid na pitero on i Lot a “Di, Kadnan ko, kapedipedi ka bo!

19 Inikapedi ako ngka den a oripen ka ago tanto ako ngka a inikalimo ko kiyasabeta ngka
ko niyawa ko. Ogaid na di ako makapegapas ko manga palaw ka baanda ko peraota
angkai a morala na petay ako.
20 Ilaya ngka man ka kaoto so maito a inged a marani a kepalagoyan aken. Kapedipedi
ka bo na ron ako ngka on pakapagapasa, ka tanto a maito – ba di benar? Na aya
kakesabet o niyawa ko!”
21 “Miniyog ako,” a pitero iyan. “Amponen aken pen angkanan a piyangni ngka: di aken
mbinasaan so maito a inged a pitero o ka.
22 Ogaid na pagapas ka roo nggagaan ka da den a ba ko mapenggolaola taman ko
kapakaoma ngka on.” (Giyanan i sabap a bitowan angkoto a maito a inged sa Sowar.)
Miyabinasa a Sodom ago Giya Gomorah
23 Somibang den so alongan ko kiyapakaoma i Lot sa Sowar.

24 Sangkoto den a oras na piyakioranan o Allah sa pekedeg a sandawa a Sodom ago giya
Gomorah a sii makapopoon ko Allah sa langit.
25 Piyaminasa niyan angkoto a manga siti ago so langon o kapantaran taman ko langon a
kibabaling sangkoto a manga inged ago so pepamangeto ko lopa.
26 Ogaid na so karoma i Lot na dominingil ko talikodan iyan ka pimbantayan iyan ai, na
miyabaloy sekaniyan a mapopolaos a timos.
27 Teked a kapipita ko miyakatalondog a gawii na mimbowat si Ibrahim na komiyasoy ko

darpa a miyaadap iyan on so Allah.
28 Tiyolongan iyan a Sodom ago giya Gomorah ago so langon o kapantaran na miyailay
niyan so peselepot a bel a pepekapoon ko lopa a datar o kapetegebel o mala a rapog.
29 Ogaid na sii ko kiyabinasaa o Tohan ko manga siti ko kapantaran na tatagoon iyan sa
ginawa si Ibrahim, ka piyakapalagoy niyan si Lot ko mala a kasiksaan a minibinasa ko
manga siti a ron sekaniyan babaling.
Si Lot ago so manga Wata iyan a Babay
30 Kagiya pekelek si Lot o ba kakaden sa Sowar na miyawa siran roo ago so dowa kataw
a wata iyan a babay na tomiyakedeg siran ko kapalawan, na roo siran komiyaden ko
liyang.
31 Miyakaisa a gawii na pitero o kaka a wata iyan ko ari niyan a “Pekelokes den so ama
ta ago da a ba mama sangkai a darpa a makapengaroma rekta kaan ta makambabawata.
32 Aya mapiya na pakainomen ta sa pakabereg so ama ta na romembang ta on kaan ta
mababad a sii makapenggolalan ki ama.”
33 Na piyakainom iran sa pakabereg so ama iran sangkoto a kagagawii. Somiyoled on so

kaka a wata iyan na romimbang on, na di katawan i Lot i kiyarembanga on o di na so
kiyambowat o wata iyan.
34 Sii ko miyakatalondog a gawii na pitero o kaka ko ari niyan a “Kagai ko gagawii na

miyakarembang ako ki ama. Na pakainomen ta sekaniyan peroman sa pakabereg imanto
a gagawii. Na soledi ngka ago rembang ka on kaan ta mababad so mbawataan tano a ron
makapenggolalan.”
35 Kagiya ka maoto na piyakainom iran peman sa pakabereg so ama iran sangkoto a

kagagawii. Somiyoled on so ari a wata iyan ago romimbang on, na da peman a imeleng i
Lot ko kiyarembanga on o di na so kiyambowat o wata iyan.
36 Sangkai a okit na so dowa kataw a wata i Lot a manga babay na palaya siran miyanga
oogat o ama iran.
37 So kaka a wata iyan na mimbawata sa mama na iningaranan iyan sa Mowab.
Sekaniyan i apoapoan o manga Mowabiyo a kapapantagan den imanto.
38 Na mimbawata mambo so ari niyan sa mama na bitowan iyan sa Bin Ami. Sekaniyan
i apoapoan o manga Amoniyo a kapapantagan den imanto.
MAKSOD 20
Si Ibrahim ago si Abimilik
Miyawa si Ibrahim sa Mamri na miniseg sa tampar sa pagabagatan a inged a Kanaan, na

sii sekaniyan miyaling ko pageletan a Kadis ago giya Sor. Oriyan iyan na sii ko
kakakaden iyan pasin sa Gerar
2 Na dii teroon i Ibrahim a si Sarah a karoma niyan na aya niyan babay. Sabap roo na si
Abimilik a dato sa Gerar na piyakirapit iyan si Sarah ka kinowa niyan.
3 Ogaid na kagiya magagawii na mipeyag so Tohan ki Abimilik a miyakanggolalan ko
taginepen na pitero iyan on a “Petay ka, ka so babay a kinowa ngka na aden a karoma
niyan.”
4 Ogaid na da den makebot i Abimilik si Sarah, na pitero iyan a “Hey Kadnan, ba kami
ngka mbinasaa ago so manga pagtaw aken apiya o da a sala aken?
5 Ba raken da matero i Ibrahim a ‘Babay aken sekaniyan?’ Na pitero mambo i Sarah a
‘Laki aken sekaniyan?’ Maliwanag so poso aken ko kiyanggolaolaa ko sii na da ako
makasela.”
6 Na pitero on o Tohan a nggolalan ko taginepen a “Oway, katawan aken a

miyanggolaola ngka nan a maliwanag so poso o ka. Kagiya ka maoto na piyakalidas aken
seka ko kapakapendosa ngka raken ko da ko reka on kapakisekoon.
7 Na kasowin ka imanto so karoma angkoto a mama ka nabi sekaniyan; na
ipengangarapan ka niyan sa di ngka kapatay. Ogaid na o di ngka kasowin na ketangked
ka a petay ka a rakes o langon o pagtaw ngka.”
8 Teked a kapipita ko miyakatalondog a gawii na piyakilimod i Abimilik so langon a

sanasanaan iyan, na kagiya mapanotol iyan kiran langon angkai a miyanggolaola na tanto
siran a miyanga aalek.
9 Oriyan iyan na piyakisogoan iyan si Ibrahim na pitero iyan on a “Antonaa angkai a
pinggolaola ngka rekami? Antonaa i minisala aken reka sa kiyawiti ngka raken ago so
ndatoan aken sangkai a mala a kasalaan? Kena a ba patot angkai a inikidia ngka raken.
10 Ino ngka ini penggolaolaa?”
11 Tig i Ibrahim a “Miyapikir aken a matamataan a da den a taw sii sangkai a inged a
maalek ko Tohan, na mbonoon ako iran kaan iran makowa so karoma ko.
12 Liyo ron pen na benar a babay aken sekaniyan, ka wata sekaniyan o ama aken ogaid na
kena a ba wata o ina aken, na miyapangaroma ko baden.
13 Na kagiya pakiawaan raken o Tohan so walay o ama aken na pitero aken ki Sarah a
‘Apiya anda ta pesong na giyai i kikelimoon ka raken: teroa ngka a laki ako ngka.’ "
14 Kagiya makapasad tero si Ibrahim na miyakipangowa si Abimilik sa manga bilibili,

manga sapi ago manga talasogoay a mama ago babay na inipamegay niyan siran ki
Ibrahim, na inikasoy niyan on pen si Sarah a karoma niyan.
15 Na pitero i Abimilik a “Pakipemilian ko reka so dalem a inged aken. Pekabaling ka ko
apiya anda ka on kebaya maling.”
16 Pitero iyan mambo ki Sarah a “Mbegan aken so laki ngka sa sanggibo a pelata a pirak.
Giyai i inipanginsalaan aken reka ko kamamasai ron o langon a ped ka, na ketokawan o
langon a taw a miyakabenar ka.”
17 Mandiyadi na miyangangarapan si Ibrahim ko Tohan; na piyamakapiya o Tohan si

Abimilik ago so karoma niyan taman ko manga sandil iyan kaan siran makambabawata
peroman,
18 Ka da peroa o Allah a kakeogat o oman i babay ko torogan i Abimilik sabap ki Sarah a
karoma i Ibrahim.
MAKSOD 21
So Kinimbawataan ki Iskak
Riyakmatan o Allah si Sarah a aya kinitoman o initopa niyan on.

2 Miyaogat si Sarah na mimbawata sa wata a mama ki Ibrahim sii ko kiyalokes iyan. So
kinimbawataan iyan on na sii den ko matetendo a masa a miyatero o Tohan ki Ibrahim.
3 Bitowan i Ibrahim sa Iskak so wata iyan a inimbawata rekaniyan i Sarah.
4 Na kagiya makawalo gawii a idad i Iskak na tiyori i Ibrahim ka giyoto i inisogo on o
Tohan.
5 Miyakamagatos ragon a idad i Ibrahim isako imbawata si Iskak.
6 Pitero i Sarah a “Piyakakela ako o Tohan, na so oman i isa a pekaneg makapantag sii na
makapekela mambo a datar aken.”
7 Tig iyan pen a “Antawaa i makapetero gowani ki Ibrahim a makapekeritan si Sarah sa
wata! Apiya oto na mimbawata ako rekaniyan sa wata a mama ko kiyalokes iyan.”
Piyakaawa si Hagar ago si Ismail
8 Miyakala si Iskak, na sii ko gawii a kiyapakageneka on somoso na mikendori sa mala si

Ibrahim.
9 Ogaid na miyailay i Sarah a dii mamagongatongat so wata a mama a inimbawata i
Hagar a Imisiren ki Ibrahim.
10 Na pitero i Sarah ki Ibrahim a “Bogawa ngka angkanan a talasogoay a babay ago so
wata iyan! So wata angkanan a talasogoay na di den kesaadan ko mapekewali o wata
aken a Iskak.”
11 Giyangkai a masosowa na tanto a inikerata a ginawa i Ibrahim sabap ko wata iyan a

Ismail.
12 Ogaid na pitero o Tohan ki Ibrahim a “Di ngka pakapekerataa ginawa ngka sabap ko
wata ago so talasogoay ngka a babay. Pakinega ngka so apiya antonaa i peteroon reka i
Sarah, ka so kebabadan ki Iskak i kibilang a manga mbawataan ka.
13 So peman so wata o talasogoay a babay na mbalowin ko mambo so kebabadan on a
nasiyon, ka wata a ka sekaniyan mambo.”
14 Teked a kapipita ko miyakatalondog a gawii na kominowa si Ibrahim sa manga

pangenengken ago kobal a mapepeno a ig na inibegay niyan ki Hagar ka piyakibawa
niyan on; na piyakalalakaw niyan siran ago so wata. Gomiyanat siran den na
miyagenebeneb siran ko disirto sa Birsiba.
15 Kagiya malengan den so ig ko kobal na piyakaiga i Hagar so wata ko atag o maito a

kayo.
16 Inawat iyan sekaniyan sa kawatan a peraoten a pana na miyontod, ka pitero iyan sa
ginawa niyan a “Di aken keraw milay so kapetay o wata.” Na sii ko kaoontod iyan roo na
mipoon den gomoraok sa matanog.
17 Miyaneg o Tohan so wata a penggoraok, na so malaikat o Tohan a sisii sa kasorgaan

na tiyalowan iyan si Hagar a tig iyan a “Antonaa i ikararata a ginawa ngka Hagar? Di ka
pekelek, ka miyaneg o Tohan so kapenggoraok o wata a makaiiga roo.
18 Song ka rekaniyan, na bangona ngka ago pakapiyaa ngka a ginawa niyan, ka mbalowin
ko so kebabadan on a mala a nasiyon,”
19 Na piyakailay o Tohan so mata i Hagar na miyakailay sa paridi. Somiyong sekaniyan

on na pino iyan a ig so kobal, na piyakainom iyan on so wata.
20 Sii ko kapepekala o wata na lalayon on so Tohan. Sii sekaniyan pepaginetaw ko

disirto na mimbaloy a pamamana.
21 Sii ko kababaling iyan ko Disirto sa Paran na piyakapangaroma sekaniyan o ina iyan sa
Imisiren a babay.
So Kapasadan i Ibrahim ago si Abimilik

22 Sangkoto a masa na si Abimilik ago si Pikol a komandir o manga sondaro niyan na
inimbitiyarai ran si Ibrahim a tig iran a “Lalayon reka so Tohan ko langon a di ngka dii
nggolaolaan.
23 Kagiya ka maoto na sepaan ka raken imanto sii ko Ingaran o Tohan a di kami ngka den
ndoratan sa pasad ago so manga wata aken taman ko manga moriyataw aken. Kagiya
inikalimo aken seka den na topaan ka raken a ikelimo ako ngka mambo ago so pen so
inged a ron ka mababaling a mananangga.”
24 Na pitero i Ibrahim a “Ipesepa aken anan.”
25 Ogaid na pipenonan i Ibrahim si Abimilik makapantag ko paridi a inagaw o manga

talasogoay i Abimilik.
26 Na pitero i Abimilik a “Di aken katawan o antawaa i minggolaola san. Da ngka raken
anan matero na imanto bo i kiyanega ko ron.”
27 Mandiyadi na kominowa si Ibrahim sa manga bilibili ago manga sapi na inibegay

niyan ki Abimilik; na mipesadonawai siran a dowa kataw.
28 Oriyan iyan an kominowa si Ibrahim sa pito timan a nati a babay a bilibili ko talon
iyan na inisibay niyan siran.
29 Na iniise i Abimilik ki Ibrahim a "Antonaa i maana angkanan a pito timan a bilibili a
inisibay ngka?”
30 Na tig iyan a “Tarimaa ngka raken angkai a pito timan a bilibili a aya inipemataan sa
saken i komiyalot sangkai a paridi.”
31 Kagiya ka maoto na bitowan angkoto a darpa sa Birsiba sabap sa miyakasepai roo

angkoto a dowa kataw a mama.
32 Kagiya makapesadanowai siran roo sa Birsiba na komiyasoy si Abimilik ago si Pikol a

komandir o manga sondaro niyan ko inged o manga Pilistiyo.
33 Na miyamola si Ibrahim sa kayo a tamarisk roo sa Birsiba na tiyalowan iyan roo
mambo so Ingaran o Allah a so da a kaposan iyan a Tohan.
34 Na miyatey a gawii a kakakaden i Ibrahim ko inged o manga Pilistiyo.
MAKSOD 22
Tipengan si Ibrahim
Da a matey a kiyaipos oto na tipengan o Tohan si Ibrahim. Pitero iyan on a “Ibrahim!”

"Katii ako bo,” a tig i Ibrahim.
2 Pitero o Tohan a “Pakaonota ngka so wata a ka a mama, a so botong a wata a ka a si

Iskak a pekebabayaan ka, na song ka ko inged a Moriyah. Na sapaaten ka sekaniyan roo a
totongen a ipesoasoat raken sii ko isa ko manga palaw a itoro aken reka.”
3 Teked a kapipita ko miyakatalondog a gawii na miyamotol si Ibrahim sa ipagitagon ko
totongen a isepaat iyan, na siniyaan iyan so kimar iyan. Piyakaonot iyan so dowa kataw
ko talasogoay niyan ago si Iskak a wata iyan na miyantap siran den ko darpa a pitero on o
Tohan.
4 Sii ko ikatelo gawii na miyangilailay si Ibrahim na miyalangkaw niyan so darpa a malo
on pen mawatan.
5 Mandiyadi na pitero iyan ko manga talasogoay niyan a “Telimbagak kano sii ago so
kimar, ka sekami ago so wata aken na teros roo ka simba kami, na kesoy kami rekano
bo.”
6 Piyakiposai i Ibrahim ki Iskak so ipagitagon ko totongen a isepaat, na sekaniyan i

miyawid ko manga waga ago so gonong. Sii ko kapelalakaw iran a dowa kataw
7 Na pitero i Iskak ki Ibrahim a "Ama ko!”
“Ino ka, wata ko?” a tig i Ibrahim.
“Kaaawidan ta so manga waga ago so itagon,” a tig i Iskak, “ogaid na anda sesaya so
nati a bilibili a aya totongen a isepaat?”
8 Somimbag si Ibrahim a “So den so Tohan i mbegay sa nati a bilibili a totongen a

isepaat, wata ko.” Na domiyayon siran den lomalakaw.
9 Kagiya makaoma siran ko darpa a miyatero rekaniyan o Tohan na mimbaal roo si

Ibrahim sa aparan na tiyanor iyan on so manga itagon. Piyatong iyan so wata iyan a Iskak
na piyakaiga iyan ko aparan sii ko liyawaw o manga itagon.
10 Oriyan iyan na binindas i Ibrahim so gonong ka sombaliin iyan den so wata iyan.
11 Ogaid na so malaikat o Allah a sisii sa kasorgaan na tiyalowan iyan a tig iyan a
"Ibrahim, Ibrahim!”
“Katii ako bo,” a inisembag iyan.
12 “Di ngka mbetaden a lima ngka ko wata,” a tig iyan. “Di ngka penggolaolai sa apiya
antonaa, ka imanto na katawan aken a maaleken ka ko Tohan sabap sa da ngka raken
panganogoni so wata a ka a mama, a so botong a wata a ka.”
13 Na miyangilailay si Ibrahim na miyakailay roo sa mama a bilibili a misasadang so

panga niyan ko paket. Somiyong on sekaniyan na kinowa niyan so bilibili, na inisapaat
iyan a aya niyan tiyotong a inisoasoat a inisambi iyan ko wata iyan.
14 Bitowan i Ibrahim angkoto a darpa sa “Petiyagar so Allah.” Na apiya taman imanto na
aya dii matero na “Sii ko palaw o Allah na ketiyagar.”
15 Oriyan na tomiyalo peroman ki Ibrahim so malaikat a sisii sa kasorgaan

16 A tig iyan a “Pesepaan ko a ginawa ko, a pitero o Allah, sa sabap sa pinggolaola ngka
nan a so da ngka raken kapanganogoni ko wata a ka, a so botong a wata a ka,
17 Na matamataan a tanto aken seka a perakmatan ago tanto aken a pakapendakelen so
kebabadan reka a datar o manga bitoon sa langit ago datar sa kadakel o peted sa kilid a
ragat. Na penga tatangan o kebabadan reka so manga siti o manga ridoay iran.
18 Na nggolalan ko mbawataan ka na kerakmatan so langon a nasiyon sa doniya sabap sa
piyakineg ka so pitero aken reka.”
19 Na komiyasoy si Ibrahim ko manga talasogoay niyan na palaya siran somiyong sa

Birsiba, na komiyaden roo si Ibrahim sa Birsiba.
So manga Wata i Nahor a manga Mama
20 Da oto matey na miyatero ki Ibrahim a mimbabawata mambo si Milka sa manga wata

ko pagari i Ibrahim a si Nahor:
21 Si Ods aya kaka, si Bos a pagari niyan, si Kimowil (a aya ama i Aram),
22 Si Kisid, si Hadso, si Pildas, si Hidlap ago si Bitowil.
23 Na si Bitowil i ama i Ribikah. Giyangkanan a walo kataw a manga wata a mama na
inimbabawata i Milka ago si Nahor a pagari i Ibrahim.
24 So sandil i Nahor a aya ngaran iyan na si Riyomah na mimbabawata on mambo sa
manga wata a mama a si Tibah, si Gaham, si Tahas ago si Maakah.
MAKSOD 23
So Kiyapatay i Sarah
Miyakapaginetaw si Sarah sa miyakamagatos ago dowa polo ago pito ragon,

2 Na miyatay sekaniyan sii sa Kiriyat Arab (giyanan den na Hibron) sii sa inged a
Kanaan. Na inimboko i Ibrahim si Sarah na pesegad sekaniyan on.
3 Na giyanatan i Ibrahim so lalantangan ko karoma niyan na somiyong ko manga

mbawataan i Hit ka makipembitiyarai kiran. Pitero iyan a
4 “Kena a ba ako sii taw ka matag ako rekano baden mananangga. Na pesai ako niyo ko
lopa iyo a kelebengan aken ko karoma ko.”
5 Pitero on o manga Hitiyo a

6 “Pamakinega kami ngka, kadnan ami. Mala ka rekami i gees a dato. Lebengan ka den
so karoma ngka ko lebi a mapiya ko manga pekoboran ami. Da a ba rekami sengka sa
kibegan iyan reka ko rek iyan a pekoboran kaan ka on milebeng so karoma ngka.” 7
Mandiyadi na tominindeg si Ibrahim ago somiyodiyod ko manga Hitiyo a magiinged roo,
8 Na pitero iyan kiran a “O miyog kano a pakilebeng iyo raken sii so karoma ko na
kapedipedi kano bo na akoli niyo raken si Ipron a wata i Sohar
9 Sa pesaan iyan raken so liyang sa Makpila a matatangan iyan a sii matatago ko
temanaan o lopa iyan. Pangniya niyo ron a pesaan iyan raken sa kadiyangkaan so arga
iyan ko kamamasai niyo ron ka aya ko pelebengan.”
10 Kapapantagan oto a kaoontod roo i Ipron a ped iyan so manga Hitiyo a miyalimod ko
ipesoled ko siti niyan. Na simbag iyan si Ibrahim a pekeneg o manga Hitiyo a tig iyan a
11 “Di, kadnan ko. Pamakinega ko ngka; imbegay aken reka angkoto a lopa a rakes o
liyang a matatago on. Imbegay aken reka ko kamamasai ron o manga taw aken.
Lebengen ka on den so karoma ngka”
12 Na miperoman somodod si Ibrahim ko manga magiinged roo

13 Na pitero iyan ki Ipron ko kapekenega iran on a “Kapedipedi ka bo na pakinega ko
ngka; imbayad aken ko lopa so arga iyan. Tarimaa ngka raken ini kaan aken on milebeng
so karoma ko.”
14 Na tig i Ipron a
15 “Pamakinega ko ngka, kadnan ko; aya arga o lopa na lima ka kilo a pirak, ogaid na
antonaa i gona anan ko di ta dii kangginawai? Lebengen ka on den so karoma ngka.”
16 Miyayon si Ibrahim ko pitero i Ipron na tinimbang iyan rekaniyan so kadakel o pirak a

miyatero iyan a miyaneg mambo o manga Hitiyo; giyanan na lima ka kilo a pirak a
piyakaokit ko timbangan a pegosaren o manga padagang.
17 Kagiya ka maoto na so lopa i Ipron sii sa Makpila a marani sa Mamri a ndatar so lopa
ago so liyang a matatago on a rakes o langon a manga kayo sii ko soled o manga
temanaan o lopa
18 Na miyatangan i Ibrahim sii ko kamamasai ron o langon a Hitiyo a miyalimod ko
ipesoled ko siti.
19 Oriyan oto na inilebeng den i Ibrahim so karoma niyan a Sarah sii ko liyang a
matatago ko kalopaan sa Makpila a marani sa Mamri (giyanan den na Hibron) sii sa inged
a Kanaan.
20 Sii sangkai a okit na so kalopaan ago so liyang on na minisorat o manga Hitiyo a
miyatangan den i Ibrahim a aya niyan pelebengan.
MAKSOD 24
Si Iskak ago si Ribikah
Tanto a miyalokes si Ibrahim ago minitolod den a idad iyan, na pirarakmatan sekaniyan
den o Allah ko langon taman a pinggolaola niyan.
2 Na pitero i Ibrahim ko olowan o manga talasogoay niyan sii ko kampo niyan a aya
komikibir ko langon a rek iyan a “Lilipen ka a lima ngka ko didalem o bobon aken
3 Ka pakapesepaan ko seka sii ko Ingaran o Allah a Tohan o kasorgaan ago so doniya sa
di ngka den ikowa so wata aken a mama sa karoma sii ko manga Ikanaanen a sii ako kiran
makakakaden imanto.
4 Ka song ka baden ko inged aken ago sii ko manga tonganay aken na ron ka kiran
kowaan sa mapangaroma o wata aken a Iskak.”
5 Ogaid na iniise o talasogoay a “Antonaa i sowaan aken o di raken materang monot so

babay ko kakesoy aken sangkai a inged? Ba ko pagowita so wata a ka ko inged a poonan
ka?”
6 “Pananaggilai ngka o ba ngka mawit so wata aken roo!” a tig i Ibrahim.

7 “So Allah a Tohan o kasorgaan a miyakaawa raken ko walay o ama aken ago so inged a
pimbawataan raken ago miyakimbitiyarai raken pen sa inisepa iyan raken a imbegay
niyan angkai a inged ko manga moriyataw aken na sogoon iyan so malaikat iyan a
mangongonaan reka kaan ka mikowa so wata aken sa mapengaroma niyan a roo
pekapoon.
8 Opama ka di reka materang monot so babay ko kakesoy ngka sii na kepokas ka sangkai
a sapa. Ogaid na di ngka den pagowita so wata aken roo.”
9 Mandiyadi na inililip o talasogoay a lima niyan ko didalem a bobon o kadnan iyan a
Ibrahim na inisepa iyan on a penggolaolaan iyan so inisogo on i Ibrahim.
10 Oriyan iyan na kominowa so talasogoay sa sapolo ko manga onta o kadnan iyan na

lomiyalakaw den a maawid sa mbarambarang den a manga pipiya a pamemegayan a
piyakiawidan on o kadnan iyan. Na somiyong den ko siti a babalingan i Nahor sii sa
pagotaraan a Misopotamiya.
11 Kagiya makaoma roo na piyakaleko niyan so manga onta ko marani ko bowalan a
matatago ko liyo a siti. Perimon den oto ka oras a kapemanageb o manga babay.
12 Na miyangangarapan sekaniyan a tig iyan a “Ya Allah a Tohan o Kadnan aken a

Ibrahim, tarotopa ngka so keangin aken imanto ago kalimoon ka so kadnan aken a
Ibrahim.
13 Sii ako den makatitindeg sangkai a obay o bowalan, na pemakaoma den so manga raga
a kibabaling ko siti ka pemanageb.
14 Na peteroon ko ko isa kiran a ‘Kapedipedi ka bo na babaan ka so omoy ngka kaan ako
ron makainom.’ Na o teroa niyan raken a ‘Inom ka on den ka ipanageb aken pen so
manga onta ngka,’ na pengnin ko a sekaniyan den i miyaaraw ngka a mapangaroma o
oripen ka a si Iskak. O giyanan i manggolaola na ketokawan aken a inikalimo o ka so
kadnan aken.”
15 Sa da niyan pen kapakapasad mangangarapan na miyakaoma si Ribikah a poposain

iyan so omoy niyan. Wata sekaniyan i Bitowil a wata a mama i Milka a aya karoma i
Nahor a pagari i Ibrahim.
16 Tanto den a mataid so babay ago raga pen ka da den makeroma. Tomiyondagay
sekaniyan ko bowalan na inisageb iyan on so omoy niyan na taros a tomiyakedeg.
17 Na minggagaan so talasogoay sa kabalaka niyan on, na tig iyan a ‘Kapedipedi ka bo na

pakainoma ko ngka ko ig sii ko omoy ngka.”
18 “Inom ka on den, kadnan ko,” a tig o babay, na sarta a inibaba iyan so omoy ko waga
niyan na piyakainom iyan on sekaniyan.
19 Kagiya mapakainom iyan den na pitero o babay a “Ipanageb aken mambo so manga
onta ngka taman sa di siran makapasad mamanginom.”
20 Na magaan so magaan na inodod iyan langon so ig ko omoy niyan ko
pepemanginoman o manga ayam na mipeto sekaniyan nggagaan ko bowalan. Na
inipanageb iyan langon so manga onta niyan.
21 Da den a taroon o mama ko di niyan dii kasimaa ko raga ka pegilain iyan o ba
piyakabolos o Allah sa mapiya so kiyalalakaw niyan ago so di.
22 Kagiya makapasad mamanginom so manga onta na kominowa so mama sa kaningkir a

bolawan a aya kapened iyan na manga lima ka gramo, ago dowa timan a rinti a bolawan a
manga magatos ka gramo a kapened iyan.
23 Na iniise rekaniyan o mama a “Antawaa i kiwata reka? Kapedipedi ka bo na teroa
ngka raken o ba aden a keigaan ami ko walay o ama a ka imanto a gagawii?”
24 “Wata ako i Bitowil a so wata a mama i Milka ago si Nahor,“ a tig iyan.
25 “Na madakel a ragami ago kekan o manga onta sa walay ami, ago aden pen a keigaan
iyo roo.”
26 So kiyanega on o mama na somiyodiyod ago sominimba ko Allah

27 A tig iyan a “So podi na rek o Allah a Tohan o kadnan aken a Ibrahim ka da niyan
barobaa so kasasarigan a limo iyan ko kadnan aken. Matamataan a pinggonanao ako o
Allah ko kiyalalakaw aken sa kiyatoona ko ko walay o manga tonganay o kadnan aken.”
28 Na minggagaan maling so raga na piyanotolan iyan si ina iyan ago so manga ped iyan
sa walay makapantag ko miyanggolaola.
29 Si Ribikah na aden a laki niyan a aya ngaran iyan na si Laban, na minggagaan somong
si Laban ko mama sii ko bowalan.
30 Ka so den so kiyailaya niyan ko kaningkir ago so peririntiin o babay niyan ago
miyaneg iyan pen si Ribikah a piyanotol iyan so pitero on o mama na giyoto a
siyongowan iyan so mama. Miyaoma niyan a tomitindeg ko obay o manga onta a marani
ko bowalan
31 Na pitero iyan on a “Taros ka a rarakmatan o Allah! Ino ka sii baden titindeg?
Miyatiyagar aken den so walay ago so kedarpaan o manga onta ngka.”
32 Mandiyadi na tomiyaros sekaniyan ko walay. Na piyangowaan i Laban sa roran so

manga onta na bigan iyan siran sa ragami ago kekan iran. Inowitan iyan pen so mama
ago so manga ped iyan sa ig a mipamangonab iran sa ai.
33 Ogaid na kagiya kapangenatan so mama sa pangenengken na pitero iyan a “Di ako den
ken taman sa di aken mapayag so peteroon ko.”
“Teroa ngka rekami,” a tig i Laban.
34 Na tig iyan a “Talasogoay ako i Ibrahim.

35 Tanto a mala a kiyarakmati o Allah ko kadnan aken na mikewasa sekaniyan.
Piyamegan iyan sa manga bilibili, manga sapi, pirak ago bolawan, manga talasogoay a
mama ago babay, ago manga onta ago manga kimar.
36 Si Sarah a karoma niyan na mimbawata sa mama ko kadnan aken sii ko kiyalokes
iyan, na inibegay ron o kadnan aken so langon taman iyan.
37 Na piyakasepa ako o kadnan aken sa kipenggolalanen aken ko inisogo iyan a tig iyan a
‘Di ngka den ikowa so wata aken sa karoma sii ko Ikanaanen a manga babay sangkai a
inged a ron ako mababaling.
38 Ka song ka baden ko manga mbawataan o ama aken a manga tonganay aken na ron ka
sekaniyan kowaan sa mapangaroma niyan.’
39 “Na iniise aken ko kadnan aken a ‘Antonaa i sowaan aken o di raken monot so babay
ko kapembalingan aken?’
40 “Inisembag iyan raken a ‘So Allah a lalayon aken pepangongonotanan na pekaonoten

iyan reka so malaikat iyan, na pekabolosen iyan sa mapiya so kapelalakaw ngka kaan ka
mikowa so wata aken sa mapangaroma niyan sii ko manga tonganay aken a so mbawataan
o ama aken.
41 Aya bo a kakepokas ka ko inisepa a ka raken na amay ka makasong ka ko manga
tonganay aken na sengkaan iran a kapakaonota ngka ko babay, na giyoto den i kakepokas
ka ko sapa.’
42 “Na sii sangkai a kiyapakaoma ko imanto a gawii ko bowalan na inipangangarapan

aken a ‘Ya Allah a Tohan o kadnan aken a Ibrahim, kapedipedi ka bo na pakabolosa ngka
sa mapiya so kapelalakaw aken.
43 Sii ako den makatitindeg sangkai a obay o bowalan. Amay ka makaoma so isa a raga
a segeb na peteroon ko ron a ‘Kapedipedi ka bo na pakainoma ko ngka ko ig sii ko omoy
ngka.’
44 Na o teroa niyan raken a ‘Inom ka on den ka ipanageb aken pen so manga onta ngka,‘
na pengnin ko a sekaniyan den so babay a miyaaraw o Allah a mapangaroma o wata o
kadnan aken.’
45 “Sa da aken pen kapakapasad mangangarapan a sii bo ko poso aken, na miyakaoma si

Ribikah a poposain iyan so omoy niyan. Tomiyondagay sekaniyan ko bowalan na
somiyageb, na pitero aken on a ‘Kapedipedi ka bo na pakainoma ko ngka.”
46 “Na sarta a inibaba iyan so omoy ko waga niyan na pitero iyan a ‘Inom ka den ka
ipanageb aken pen so manga onta ngka.’ Na mininom ako ron, na piyakainom iyan pen so
manga onta ko.
47 “Oriyan iyan na iniise aken on a ‘Antawaa i kiwata reka?’ Na tig iyan a ‘Wata ako i
Bitowil a wata a mama i Nahor ago si Milka.’ So kiyanega ko sii na tiyago aken so
kaningkir ko ngirong iyan ago inisolot aken so manga rinti ko lima niyan,
48 Na somiyodiyod ako ago sominimba ko Allah. Piyodi aken so Allah a Tohan o
Kadnan aken a Ibrahim, ka pinggonanao ako niyan ko kiyalalakaw aken sa kakowaa ko
ko apo a babay o pagari o kadnan aken kaan aya mapangaroma o wata iyan a mama.
49 Na imanto o kalimoon iyo so kadnan aken ago mataan den a kipenggolalanen iyo ron
ko kabaya iyan na teroa niyo raken; na o kena, na teroa niyo kaan aken mapamikir o
antonaa i penggolaolaan ko.”
50 Na somimbag si Laban ago si Bitowil a tig iran a “Giyai na poon ko Allah; kagiya ka
maoto na da a ba ami reka mapetero.
51 Katii si Ribikah; pakaonota ngka den ko kambaling ka. Pakipangaromaan ka den ko
wata o kadnan ka a aya kaketoman o miyatero o Allah.”
52 So den so kiyanega o talasogoay i Ibrahim ko pitero iran na somiyodiyod sekaniyan ko

Allah.
53 Oriyan iyan na inipeliliyo niyan so dii pagarta a pirak ago bolawan ago manga nditaren
na inibegay niyan ki Ribikah. Piyamegan iyan mambo sa mala i arga a manga
pamemegayan so laki niyan ago so ina iyan.
54 Oriyan iyan na komiyan sekaniyan ago minimom a rakes o manga mama a ped iyan,
na roo siran den miyakatorog ko kagagawii.
Kagiya makambowat siran ko kiyapita iyan na pitero iyan a “Pakabalinga ko niyo ko
kadnan aken.”
55 Ogaid na pitero o laki i Ribikah ago si ina iyan a “Pakakadena ngka rekami pasin so
raga sa mamakasapolo gawii; oriyan iyan na pekaganat kano den.”
56 Na pitero kiran o mama a “Di ako niyo pesendoda. Tiyarotopan o Allah so kaangin
aken ko kiyalalakaw aken; na pakabalinga ko niyo imanto ko kadnan aken.”
57 Tig iran a ‘Talowan ami pasin si Ribikah ka pagisean ami o antonaa i kabaya iyan.”
58 Na tiyalowan iran ago inisean iran a “Ba ka pagonot sangkai a mama?”
“Magonot ako,” a tig iyan.
59 Kagiya ka maoto na piyakalalakaw iran si Ribikah ago so pepagipat on a babay ka

piyakaonot iran ko talasogoay i Ibrahim ago so ped iyan a manga mama.
60 Na inipangangarapan iran si Ribikah a tig iran a
“Mababad ka, babay ami, sa pipira nggibo.

Manga tatangan o kebabadan reka
so manga siti o manga ridoay iran!”
61 Miyakapaninimo den si Ribikah ago so manga raga niyan, na mikokoda siran ko

manga onta ka magonot siran den ko talasogoay i Ibrahim. Na palaya siran den
gomilyanat.
62 Si peman si Iskak na miyakakasoy den a poon ko Bir Lahay Roy ka sii sekaniyan
mababaling sa pagabagatan a Kanaan.
63 Miyakaisa a perimon na lominiyo sekaniyan ko pangomaan ka pemimikiran. So
kiyapangilailay niyan na miyalangkaw niyan so manga onta a pepekarani.
64 Lomiyangkaw mambo si Ribikah na miyailay niyan si Iskak. Tomipad sekaniyan ko
onta niyan
65 Na inisean iyan so talasogaoy a “Antawaa angkoto a mama ko pangomaan a
pepekaoma a pagalaon tano niyan?”
“Sekaniyan so kadnan aken,” a tig o talasogoay. Na kinowa i Ribikah so salimoot iyan
na inisapeng iyan ko paras iyan.
66 Kagiya makatoona siran na piyanotol o talasogoay ki Iskak so langon a miyanggolaola
niyan.
67 Oriyan iyan na inisoled i Iskak si Ribikah ko barombarong a babalingan gowani i
Sarah a ina iyan, na piyangaroma niyan si Ribikah. Pekebabayaan iyan si Ribikah na
miyakapiya a ginawa i Iskak oriyan o kiyapatay o ina iyan.
MAKSOD 25
So ped a manga Mbawataan o Ibrahim
Miyangaroma si Ibrahim sa salakaw a babay a aya ngaran iyan na si Kitorah.

2 Inimbabawata iyan rekaniyan si Simran, Yoksan, Midan, Midiyan, Isbak ago si
Siyowah.
3 Si Yoksan na aya ama i Sibas ago si Didan. Na so manga mbawataan i Didan na so
manga Asoriyo, manga Litosiyo ago so manga Liyomiyo.
4 Aya manga wata a mama i Midiyan na si Ipah, Ipir, Hanok, Abidas ago si Ildaah.
Langon ai na mbawataan i Kitorah.
5 Inibegak i Ibrahim ki Iskak so langon taman iyan,

6 Ogaid na sii ko da niyan pen kapatay na piyamegan i Ibrahim sa manga pamemegayan
so manga wata iyan a mama ko sandil iyan ago inawat iyan siran ko wata iyan a Iskak sii
ko inged sa tampar sa sebangan.
So Kiyapatay i Ibrahim ago so Kinilebengen on
7 Miniraot so idad i Ibrahim sa magatos ago pito polo ago lima ragon.
8 Na miyatay sekaniyan a minitolod piyapiya so idad iyan ago miyasoat ko
kiyapakapaginetaw niyan, na minitapi sekaniyan ko manga apo iyan.
9 Inilebeng o manga wata iyan a si Iskak ago si Ismail ko liyang sa Makpila a marani sa
Mamri sii ko lopa i Ipron a wata i Sowar a Hitiyo.
10 Giyanan so lopa a miyapamasa i Ibrahim ko manga Hitiyo. Roo minilebeng si Ibrahim
a minirembang ko karoma niyan a Sarah.
11 Oriyan o kiyapatay i Ibrahim na riyakmatan o Tohan so wata iyan a Iskak a sii
mababaling ko marani ko paridi a Bir Lahay Roy.
So manga Moriyataw i Ismail
12 Giyai i totolan ko wata o Ibrahim a si Ismail a inimbawata o talasogoay i Sarah a si

Hagar a Imisiren.
13 Giyai so manga wata a mama i Ismail a inisorat so manga ngaran iran ipoon sa kaka
taman sa ari: si Nibayot a paganay a inimbawata, si Kidar, Adbil, Mibsam,
14 Mismas, Domah, Masas,
15 Hadad, Timas, Hitor, Napis ago si Kidimah.
16 Giyanan so manga wata a mama i Ismail. Manga apoapoan siran o sapolo ago dowa
ka mbatabataa a so manga ngaran iran na aya inipameto ko tetanggisa a inged ago kampo
iran.
17 Miniraot so idad i Ismail sa magatos ago telo polo ago pito ragon; na miyatay
sekaniyan ago minitapi ko manga apo iyan.
18 Na aya kaolad o pagiingedan o manga mbawataan iyan na poon sa Habila taman sa Sor
sa sebangan a Misir igira a pepekaantap ka sa Asiriya. Miyaginged siran a maaawat ko
ped a mbawataan o Ibrahim.
Si Yakob ago si Isaw
19 Giyai i totolan ko wata o Ibrahim a si Iskak:
Si Ibrahim na aya ama i Iskak,

20 Na miyakapat polo ragon a idad i Iskak ko kiyapangaromaa niyan ki Ribikah a wata i
Bitowil a taw sa Aram sii sa Misopotamiya ago babay i Laban.
21 Inipangangarapan i Iskak ko Allah si karoma niyan sabap sa di pembawata. Na

inampon o Allah so piyangni niyan na miyaogat si Ribikah.
22 Miyadowa so wata sii ko tiyan iyan na di siran dii melobed. Pitero iyan a “Ino raken ai
mapenggolaola?” Na miyangadap sekaniyan ko Allah ka pagisean iyan.
23 Pitero on o Allah a
“Dowa ka nasiyon a matatago san ko roranan ka sa wata,

na pembawata ka sa dowa ka bangsa a makapembelag.
So isa a bangsa na pembaloy a mabegar a di so isa on,
na so kaka na mapenonogo o ari.”
24 Kagiya den a maoma so gawii a kapembawata iyan na mimbawata sekaniyan sa

miyadowa a wata a manga mama.
25 Aya paganay a miyakaliyo na mariga, na so langon o kobal iyan na datar o bombolen a
nditaren; na bitowan iran sekaniyan sa Isaw.
26 Oriyan iyan na lominiyo so pagari niyan a kakapetan iyan so palo i Isaw. Kagiya ka
maoto na iningaranan sekaniyan sa Yakob. Miyakanem polo ragon a idad i Iskak ko
kinimbawataan kiran i Ribikah.
Pipesa i Isaw so Kawadib iyan ko Kakakakai ron
27 Miyamakala so manga wata a mama, na mimbaloy si Isaw a mapasang i kapanganop a

mababaya magenebeneb sa liyo, ogaid na maimen a mama si Yakob a lalayon gomegenek
ko marani ko barombarong.
28 Si Iskak a mababaya koman sa sapo a maila a ayam na pekebabayaan iyan si Isaw; na
si peman si Ribikah na pakatatayaan iyan si Yakop.
29 Miyakaisa a gawii a petinda si Yakob sa sawaw a kodalis na miyakaoma si Isaw a sii

miyakapoon ko di niyan dii pagenebeneban, na tanto den a pekeor.
30 Na pitero i Isaw ki Yakob a “Nggagaan ka, begi ako ngka sangkanan a mariga a
sawaw ka tanto ako den a pekeor!” (Giyanan i sabap a kiyabetowi rekaniyan sa ‘Idom’ a
aya maana niyan na mariga.)
31 Na pitero i Yakob a “Pesaa ngka raken daan so kawadib ka ko kakakakai reka.”
32 Tig i Isaw a “Oway, ka petay ako den a ongos! Antonaa i kipantag raken angkanan a
kawadib?”
33 Ogaid na tig i Yakob a “Sepa ka pasin.” Na misepa si Isaw na giyoto i kiyapesaa

niyan ki Yakob ko kawadib iyan ko kakakakai ron.
34 Oriyan iyan na bigan i Yakob si Isaw ko paan ago sawaw a kodalis; na komiyan
sekaniyan ago mininom on na taros a gomiyanat ago miyawa roo. Na da on den
panganogoni i Isaw so kawadib iyan ko kakakakai ron.
MAKSOD 26
Si Iskak ago si Abimilik
Sii sa masa ini na tiyaon peman so dalem a inged a datar o kiyataona on isako masa o
Ibrahim. Na somiyong si Iskak ki Abimilik a dato o manga Pilistiyo sii sa Gerar,
2 Ka miyakapeyag den so Allah ki Iskak ago miyatero iyan on a “Di ka song sa Misir;
baling ka ko inged a peteroon ko reka.
3 Kaden ka sangkai a inged ka kelalayon ako reka ago perakmatan ko seka, na imbegay
aken reka ago so manga mbawataan ka so langon angkai a manga inged. Itoman aken so
initopa ko ko ama a ka a si Ibrahim
4 Ka pakapendakelen ko so kebabadan reka a datar o manga bitoon sa langit, ago
imbegay aken kiran langon angkai manga inged. Na kerakmatan so langon a nasiyon ko
doniya a nggolalan ko mbawataan ka
5 Sabap sa piyangongonotanan ako o Ibrahim ago tiyoman iyan langon so manga sogoan,
manga kitab ago manga kokoman aken.”
6 Kagiya ka maoto na komiyaden si Iskak sa Gerar.
7 Kagiya isean den o manga mama sangkoto a inged makapantag ki karoma niyan na
pitero iyan a “Babay aken sekaniyan,” ka pekelek sekaniyan o ba niyan teroa a “Karoma
ko sekaniyan.” Aya mapipikir iyan na “Baanda ko mbonoa o manga mama sangkai a
inged kaan iran makowa si Ribikah sabap ko kataid iyan.”
8 Kagiya den a matey a kakakaden roo i Iskak na miyakaisa a gawii na tomiyolong si

Abimilik a dato o manga Pilistiyo ko dirowasa iyan na miyailay niyan si Iskak a di niyan
dii teyaan si Ribikah a karoma niyan.
9 Na piyakisogoan i Abimilik si Iskak na pitero iyan on a “Matamataan a karoma ngka
sekaniyan! Ngkaino ngka peteroa a babay ngka sekaniyan?”
Inisembag i iskak a “Ka aya katao ko ron na ba ako baden mabono o teroa ko a karoma
ko sekaniyan.”
10 Tig i Abimilik a “Antonaa bes angkai a pinggolaola ngka rekami? Masiken a aden a
isa ko manga mama i romimbang ko karoma ngka na kiyatagoan kami ngka sa
kadostaan.”
11 Na liyalangan i Abimilik so langon o manga pagtaw niyan a tig iyan a “Apiya antawaa
i makarimpas sangkai a mama o di na so karoma niyan na mbonoon sekaniyan den.”
12 Sa masa oto na mimbasok si Iskak sangkoto a inged, na sii bo sangkoto a ragon na aya
miyaragon iyan na magatos takep ko inisaod iyan sabap ko kararakmati ron o Allah.
13 Mimbaloy sekaniyan a tatamoken, na pekeomanan so tamok iyan taman sa tanto
sekaniyan a mikewasa.
14 Madakel a talon iyan a bilibili ago sapi ago manga talasogoay niyan a aya on inisiig o
manga Pilistiyo.
15 Kagiya ka maoto na so langon a paridi a piyamangalot o manga talasogoay o ama iyan
a Ibrahim isako masa niyan pen na piyanambonan o manga Pilistiyo ka piyameno iran a
bote.
16 Na pietro i Abimilik ki Iskak a “Awa ka rekami, ka mimbaloy ka a tanto a mala i gees

a di sekami.”
17 Kagiya ka maoto na miyawa roo si Iskak na mikampo sii ko Balintad sa Gerar, na

malo miyatey a kakakaden iyan roo.
18 Piyangalot iyan peroman so manga paridi a miyapangalot isako masa o ama iyan a
Ibrahim ago piyanambonan mambo o manga Pilistiyo oriyan o kiyapatay o Ibrahim. Na
piyametowan iyan ai sa manga ngaran a datar o inipameto ron o ama iyan.
19 So manga talasogoay i Iskak na komiyalot sa isa pen a paridi sii ko balintad na

miyakatoon siran on sa mapiya a ig.
20 Ogaid na so manga pananagikor sa pangangayamen sii sa Gerar na miyakipewala siran
ko manga pananagikor i Iskak a tig iran a “Rek ami angkanan a ig!” Kagiya ka maoto na
bitowan i Iskak angkoto a paridi sa ‘Kapewala’ ka miyakimbono siran rekaniyan.
21 Na komiyalot so manga talasogoay i Iskak sa salakaw a paridi na kiyapepawalaan iran
peman. Kagiya ka maoto na bitowan iyan ai sa ‘Rido’.
22 Na miniseg si Iskak na komiyalot peroman sa paridi, na da iran kapepawalai. Bitowan
iyan ai sa ‘Kaolad’ a tig iyan a “Imanto den na bigan tano o Allah sa maolad a kekadenan
tano, na magosor bo so kapakambebetad tano sangkai a inged.”
23 Miyawa roo si Iskak na somiyong sa Birsiba.

24 Sangkoto a kagagawii na mipeyag rekaniyan so Allah a tig iyan a
“Saken so Tohan o ama a ka a Ibrahim.

Di ka pekelek ka lalayon ako reka.
Perakmatan aken seka ago pakapendakelen ko so kebabadan reka
sabap ko initopa ko ko oripen aken a Ibrahim.”
25 Na mimbaal roo si Iskak sa aparan na tiyalowan iyan so Ingaran o Allah. Mikampo

sekaniyan roo, na komiyalot roo pen sa paridi so manga talasogoay niyan.
So Kapasadan i Iskak ago si Abimilik
26 Na somiyong rekaniyan si Abimilik a poon sa Gerar a ped iyan si Ahodsat a so

mosawira iyan ago si Pikol a komandir o manga sondaro niyan.
27 Pitero kiran i Iskak a “Ino kano raken song a saken so ipekegowad iyo ago piyakaawa
iyo pen?”
28 Tig iran a “Miyailay ami den a lalayon reka so Allah; na aya pipikiren ami na patot a
pepasadanowai tano. Kabaya ami a ipesepa ka rekami
29 A di kami ngka pemarataan, ka da ami seka karimpasi; lalayon ami seka baden
pipiyapiyaan na piyakaawa ami seka sa da a rayorayo a ginawa ngka. Na rarakmatan ka o
Allah imanto.”
30 Na pikendorian siran i Iskak na mikekan siran ago miyamanginom.

31 Teked a kapipita ko miyakatalondog a gawii na mipepasadanowai siran sarta a
misesapai. Mandiyadi na piyakaganat siran o Iskak na inaawaan iran sekaniyan a
mapipiya a ginawa iran.
32 Sangkoto a gawii na miyakaoma so manga talasogoay i Iskak na pitero iran on so

makapantag ko miyakalot iran a paridi. Tig iran a “Miyakatoon kami sa ig!”
33 Kagiya ka maoto na bitowan iyan angkai a paridi sa ‘Siba’ (aya maana niyan na
‘Sapa’), na taman imanto na aya ngaran angkoto a siti na Birsiba.
34 Si peman si Isaw na kagiya makapagidad sa pat polo ragon na piyangaroma niyan si

Yodita a wata i Biri a Hitiyo ago si pen si Basemat a wata i Ilon a Hitiyo.
35 Na inikerata siran baden a ginawa i Iskak ago si Ribikah.
MAKSOD 27
Riyakmatan i Iskak si Yakob
Kagiya den a malokes si Iskak a di den pekanono na tiyalowan iyan so kaka a wata iyan a
si Isaw a tig iyan a “Hey, wata ko!”
Somimbag si Isaw a “Katii ako bo.”
2 Tig i Iskak a “Miyalokes ako den imanto na di nda ketey a kapetay aken.
3 Na kowaa ngka so pana a ka na song ka ko kalasan na go ako ngka on panganopen sa
maila a ayam.
4 Tiyagaren ako ngka on ko mapiya i taam a pangenengken a pekebabayaan ko na go
ngka raken wita. Na amay ka makan aken den na perakmatan aken seka sa di aken pen
kapetay.”
5 Na so dii kimbitiyarain i Iskak ki Isaw na pepemakinegen i Ribikah. Na so den so

kiyasong i Isaw sa kalasan ka penganop sa ayam a imbaling iyan
6 Na pitero i Ribikah ko wata iyan a Yakob a “Miyaontaling aken so pitero o ama a ka ko
pagari ngka a Isaw a tig iyan a
7’Witi ako ngka sa maila a ayam ago tiyagaren ako ngka on ko mapiya i taam a
pangenengken; na amay ka makan aken den na perakmatan aken seka ko kapengadap
aken ko Allah sa di aken pen kapetay.’
8 Na pakinega ko ngka piyapiya, wata ko, ago nggolaolaa ngka so peteroon ko reka.
9 Song ka ko manga pangangayamen na pamilii ngka sa dowa timan a kaolit a kangodaan
a kambing na go ngka raken wita kaan aken mitinda a mapiya i taam a pangenengken a
pekebabayaan o ama a ka.
10 Mapasad oto na kewit ka rekaniyan kaan iyan makan ago perakmatan ka niyan sa di
niyan pen kapetay.”
11 Na pitero i Yakob ki ina iyan a “Oway, ogaid na bombolen a mama si Isaw na saken
na matilak ako i kobal.
12 Baanda ko pagapera i ama na ketokawan iyan a peselibaan aken sekaniyan. Amay ka
magiyoto na di ako kerakmatan ka ba aken baden pakipesintai a ginawa ko.”
13 Tig i ina iyan a “Sii raken mitana so kisinta reka, wata ko; nggolaolaa ngka baden so
pitero aken. Ika roo den na kowaa ngka raken so manga kambing.”
14 Mandiyadi na somiyong sekaniyan roo na kinowa niyan so manga kambing taros a

inowit iyan ko ina iyan. Initinda o ina iyan a mapiya i taam a pangenengken a
pekebabayaan i ama iyan.
15 Oriyan iyan na kinowa i Ribikah so lebi a mapiya a manga nditaren i Isaw a tatagoon
iyan sa walay na piyakinditar iyan ki Yakob.
16 Kinowa niyan mambo so kobal o manga kambing na inisapeng iyan ko manga lima i
Yakob ago sa tengo iyan.
17 Na piyalad iyan ki Yakob so mapiya i taam a pangenengken ago so inembaalan iyan a
paan.
18 Somiyong sekaniyan den ko ama iyan na pitero iyan on a “Hey ama ko.”
“Ino ka, wata ko,” a tig iyan. “Antawaa ka?”
19 Tig i Yakob a “Saken si Isaw a kaka a wata a ka. Ininggolalan aken den so pitero o ka
raken. Kapedipedi ka bo na mbowat ka na go ka kan ko sapo o ayam a miyaanop aken
kaan ako ngka karakmati.”
20 Inisean i Iskak so wata iyan a “Ino magaan a kiyapakatoon ka on, wata ko?”
“Tiyabangan ako o Allah a Tohan ka," a inisembag iyan.
21 Na pitero i Iskak ki Yakob a “Obay ka sii, ka pagaperen ko seka, wata ko, kaan aken
katokawi o ba seka si Isaw ago so di.”
22 Miyobay si Yakob ki Iskak na inaper o ama iyan a tig iyan a “So lagam ka na lagid o
lagam i Yakob, ogaid na so manga lima ngka na lagid o manga lima i Isaw.”
23 Na da niyan makilala si Yakob ka bombolen so manga lima niyan a lagid o lima o
pagari niyan a Isaw. Kagiya ka maoto na perakmatan iyan sekaniyan,
24 Ogaid na iniise iyan on daan a “Benar a seka so wata aken a Isaw?"
“Saken,” a tig iyan.
25 Tig i Iskak a “Witi ako ngka ko sapo o ayam a miyaanop ka, wata ko, ka koman ako
ron a daan na go aken seka bo rakmati.”
Na inowit on i Yakob na komiyan on so ama iyan, ago inowitan iyan pen sa arak na
minimom on.
26 Oriyan iyan na pitero on i Iskak a “Obay ka sii, wata ko, na go ako ngka areki.”
27 Na miyobay sekaniyan on na inarekan iyan. Kagiya mabaw i Iskak so baw o bangkala

iyan na riyakmatan iyan sekaniyan a tig iyan a
“So ikasosoat a baw o wata aken na datar o baw o kalopaan a rarakmatan o Allah.
28 Kabegan ka o Tohan sa namog a pepekapoon sa langit
ago mabaloy niyan so lopa a ka a oodaren,
ago kabegan ka niyan pen sa madakel a pereperan ago bago a arak.
29 Makipenonogo reka so manga bangsa.
ago makasodiyod reka so manga nasiyon.
Ndatoi ngka so manga tonganay ngka;
na makasodiyod reka so manga mbawataan o ina a ka.
Kapesintaan so siran oto a pesinta reka,
ago karakmatan so siran oto a perakmat reka.”
Piyangni i Isaw so Karakmati ron i Iskak
30 Miyapasad i Iskak romakmat si Yakob, na so den so kiyaipos i Yakob ko hadapan o

ama iyan na miyakaoma so pagari niyan a Isaw a miyakapoon ko pepanganopan iyan.
31 Mitiyagar sekaniyan mambo sa mapiya i taam a pangenengken na inowit iyan ai ko
ama iyan. Pitero iyan ki ama iyan a “Hey ama ko, mbowat ka na kan ka ko sapo o ayam a
miyaanop aken kaan ako ngka karamati.”
32 “Antawaa ka?” a iniise on i Iskak.

“Saken so kaka a wata a ka a si Isaw,” tig iyan.
33 So kiyanega on i Iskak na tanto a piyananabad a tig iyan a “Antawaa bes angkoto a

miyakaanop sa ayam ago inowit iyan raken? Aya ko ron den kiyapasada koman kagiya
makaoma ka. Riyakmatan aken sekaniyan, na matamataan a sekaniyan den i
kerakmatan!”
34 Kagiya maneg ai i Isaw na miyakagoraok sa tanto a matanog ka sayana a miyarata a

ginawa niyan a tig iyan ko ama iyan a “Saken mambo, ama ko, rakmati ako ngka
mambo!”
35 Ogaid na pitero iyan a “Somiyong sii so pagari ngka na siyaliba ako niyan.
Miyatarima iyan den so iperakmat aken reka.”
36 Tig i Isaw a “Patot den a ngaran iyan na si Yakob! Ka miyakadowa ako niyan den
kaalampasi; kinowa niyan so kawadib aken ko kakakakai raken, ago imanto peman na
kinowa niyan so iperakmat raken!” Na tig iyan pen a “Ba da a miyalamba a ka a kirakmat
ka raken?”
37 Inisembag on i Iskak a “Biyaloy aken sekaniyan a dato o ka, na so langon a tonganay

niyan na inibegay aken on a manga talasogoay niyan. Inioyag aken rekaniyan den so
pereperan ago bago a arak. Kagiya ka maoto, wata ko, na da den a ba ko reka
mapenggolaola!”
38 Miyangangampedian pen si Isaw ki ama iyan a tig iyan a “Ba sasatiman bo a

iperakmat ka, ama? Hey ama ko, rakmati ako ngka mambo!” Na mipoon den gomoraok
si Isaw sa matanog.
39 Mandiyadi na pitero on i Iskak a
“So kebalingan ka na maawat ko oodaren a lopa

ago mawatan ko namog a pepekapoon sa langit.
40 Aya mipegoyag ka na so pedang ka,
na mapenonogo ka o pagari ngka.
Ogaid na amay ka somorang ka
na kepokas ka ko lig ka so kokoong iyan.”
Miyakapalagoy si Yakob
41 Ipoon roo den na ipekegowad i Isaw si Yakob sabap ko kiyarakmati ron o ama iyan.
Na pitero iyan sa ginawa niyan a “Magaan den so kapetay i ama; na sii ko kapendiyagai
ron na mbonoon aken si Yakob.”
42 Kagiya matero ki Ribikah so mapipikir i Isaw na piyakisongowan iyan si Yakob na

pitero iyan on a “Aya mibobolong o pagari ngka a Isaw ko rata a ginawa niyan na giya
kapipikira niyan sa kabonoa niyan reka.
43 Kagiya ka maoto, wata ko, na nggolaolaa ngka so peteroon ko. Pagapas ka nggagaan
ko laki aken a si Laban roo sa Haran.
44 Tareg ka on sa mamakapira gawii taman ko kapekalenggaw o rarangit o pagari ngka,
45 Na amay ka mada den so rarangit iyan reka ago kalipatan iyan so pinggolaola ngka on,
na pakisogoan aken seka roo sa kapakabalinga ko reka sii. Di aken kabaya o ba
makaperengan kano raken mada a dowa kataw a wata aken!”
46 Na taros a somiyong si Ribikah ki Iskak na pitero iyan on a “Kiyasemowan ako ko

Hitiyo a manga babay a miyapangaroma i Isaw! O pangaromaa i Yakob so isa ko datar
iran a manga Hitiyo sangkai a inged na da a bali raken o kapepaginetaw aken pen.”
MAKSOD 28
Mandiyadi na piyakisogoan i Iskak si Yakob na siyalam iyan ago tiyapaosan iyan a tig
iyan a “Di ka den pengaroma sa Ikanaanen a babay.
2 Song ka baden somambot sa Misopotamiya sii ko walay o ama o ina a ka a si Bitowil,
na pangaromaa ngka roo so isa ko wata i Laban a laki o ina a ka.
3 Karakmatan ka o Tohan a Lebi a Mabager, ago mababad ka niyan na go mapakandakel
ka niyan taman sa mabaloy so mbawataan ka a madakel a nasiyon.
4 Karakmatan ka niyan ago so kebabadan reka a datar o kiyarakmati niyan ko Ibrahim
kaan ka matangan angkai a inged a matag ka on baden mananangga imanto; a so inged a
inibegay o Tohan ko Ibrahim.”
5 Na piyakaganat den i Iskak si Yakob ko kasong iyan sa Misopotamiya sii ki Laban a
wata i Bitowil a taw sa Aram ago laki mambo i Ribikah a ina i Yakob ago si Isaw.
6 Kiyatokawan i Isaw a riyakmatan i Iskak si Yakob ago piyakasong iyan den sa

Misopotamiya ka roo niyan pakapangaromaa. Kiyatokawan iyan pen a kagiya
karakmatan sekaniyan i Iskak na tiyapaosan iyan sa “Di ka den pengaroma sa Ikanaanen a
babay.”
7 Miyailay i Isaw a piyaratiyaya i Yakob so ama iyan ago so ina iyan ka somiyong
sekaniyan den sa Misopotamiya.
8 Mandiyadi na kiyasabotan i Isaw a kena a ba itetembo o ama iyan so manga babay a
Ikanaanen.
9 Kagiya ka maoto na somiyong sekaniyan ki Ismail a wata i Ibrahim na piyangaroma
niyan si Mahalat a wata i Ismail ago babay i Nibayot ka inioman iyan ko manga karoma
niyan.
So Taginepen i Yakob sa Bitil
10 Na gomiyanat si Yakob sa Birsiba a miyantap sa Haran.

11 Kagiya somedep den so alongan na miyakaoma sekaniyan ko isa a darpa na domike
roo ko kagagawii. Kominowa sa ator na inolonan iyan na taros a miyakatorog.
12 Mitetaginep sekaniyan na miyakailay sa towak a pakatitindegen ko doniya a miraraot
so poro iyan sa kasorgaan, na so manga malaikat o Tohan na manog manik siran on.
13 Sangkoto a poro iyan na tomitindeg on so Allah na pitero iyan a “Saken so Allah a
Tohan o apo o ka a si Ibrahim ago so Tohan i Iskak. Imbegay aken reka ago so
kebabadan reka so lopa a kaiigaan ka.
14 Pekadakedakel so manga mbawataan ka a datar o bayanek sa doniya, na pemangiparak
siran ko sedepan taman sa sebangan, ago ipoon sa pagotaraan na taman den sa
pagabagatan. Na kerakmatan so langon a bangsa sa doniya a nggolalan reka ago so
manga mbawataan ka.
15 Lalayon ako reka na apiya anda ka song na pegipaten ko seka, na pekakasowin ko seka
pen sangkai a inged. Di aken seka mbelagen taman sa di aken mitoman so minitopa ko
reka.”
16 Miyakanaw si Yakob na pitero iyan a “Matamataan a sisii bes so Allah sangkai a darpa
na di aken katawan!”
17 Na miyalek sekaniyan a tig iyan a “Tanto a piyakalekelek angkai a darpa! Giyai den i
walay o Tohan; giyai den so gimowa o kasorgaan!”
18 Teked a kapipita na mimbowat si Yakob na kinowa niyan so ator a kiyaolonan iyan na

go piyakatindeg iyan sa tanda a tademan, na inododan iyan pen sa lana a olibi.
19 Bitowan iyan angkoto a darpa sa Bitil apiya pen aya ipembeto ron gowani sangkoto a
siti na Lods.
20 Oriyan iyan na misepa si Yakob ko Allah a tig iyan a “O malalayon ka raken ago
pegipaten ako ngka sangkai a kapelalakaw aken, ago mbegan ako ngka pen sa
pangenengken ago nditaren,
21 Na o makakasoy ako ko walay o ama aken a da a rayorayo a ginawa ko na mataan den
a kebaloy ka a Tohan aken.
22 Giyangkai a ator a piyakatindeg aken sii a tanda a tademan na pembaloy a darpa a
pesimbaan reka, na so langon a imbegay ngka raken na isenggay aken sa rek ka so
ikasapolo on bagi,”
MAKSOD 29
Miyakaoma si Yakob ko Walay i Laban
Tomiyaros den lomalakaw si Yakob na miyakaoma sekaniyan ko inged o manga taw sa

sebangan.
2 Miyailay niyan roo a paridi sii ko pananateba ago telo lompok a bilibili a kikaleleko a
marani ko paridi. Giyanan i kapepenageban sa ig ko kapepekainoma ko manga talon,
ogaid na aden a mala a ator a idadapeng ko ngari o paridi.
3 Oman roo matimo langon so manga talon na peliliden o manga pananagikor sa bilibili
so ator na go iran bo mapekainom so manga bilibili, na ipekesoy iran bo so ator ko ngari
o paridi.
4 Na inisean i Yakob so manga pananagikor a “Hey manga pagariya, anda kano

miyakapoon?”
“Poon kami sa Haran,” a tig iran.
5 Tig iyan kiran a “Katawan iyo si Laban a so apo i Nahor?”

“Oway, katawan ami,” a inisembag iran.
6 “Mapipiya a ginawa niyan?” a tig i Yakob.

“Oway,” a tig iran, “na kaoto so wata iyan a babay a si Rakila a pekaoma den a ped
iyan so manga bilibili o ama iyan.”
7 Na pitero i Yakob a “Maporo pen a alongan; kena a ba giya den i oras ko kapetimoa ko
manga talon. Ino niyo pemakainoma so manga bilibili na go niyo siran kasowin ko
pepenateban iran?”
8 “Di ami anan mapenggolaola," a tig iran “taman sa di matimo langon so manga talon
ago malilid ami mambo so ator a matatago ko ngari o paridi, na go ami bo
mapemakainom so manga bilibili.”
9 Sii ko di niyan kiran pen dii kimbitiyarain na miyakaoma si Rakila a pepekaonoten iyan
so manga bilibili o ama iyan ka sekaniyan i pananagikor on.
10 Kagiya mailay i Yakob si Rakila a wata i Laban a so laki o ina iyan ago so pen so
manga bilibili i Laban na miyobay sekaniyan ko paridi na linilid iyan so ator na go
piyamakainom iyan so manga bilibili o bapa iyan.
11 Oriyan iyan na inarekan iyan si Rakila, na miyakasegad sekaniyan sa kiyababaya iyan.
12 Pitero iyan ki Rakila a tonganay sekaniyan o ama iyan ka wata sekaniyan i Ribikah.
Na sarta a minggagaan somong si Rakila ko ama iyan na piyanotol iyan on ai.
13 So den so kiyanega i Laban ko totol makapantag ki Yakob a wata o babay niyan na

minggagaan sekaniyan on somong. Giyakes iyan ago inarekan iyan na taros a inowit iyan
sa walay. Kagiya mapanotol rekaniyan i Yakob so langon angkai a miyanggolaola
14 Na pitero on i Laban a “Matamataan a isa bo so rogo ta.”
Piyangaroma i Yakob si Liyah ago si Rakila
Kagiya makasaolan a kiyapakakaden i Yakob ki Laban

15 Na pitero on i Laban a “Kena a ba patot o ba ka raken dii nggalebek sa da a bayad iyan
a sii bo sabap ko katotonganayi aken reka. Teroa ngka raken o antonaa i pekisokay ngka
raken.”
16 Sa masa oto na dowa kataw a wata a babay i Laban. Aya ngaran o kaka on na si Liyah
ago aya ngaran o ari ron na si Rakila.
17 Si Liyah na maronok i mata ogaid na si Rakila na mapiya i arog a lawas ago mataid.
18 Pekebabayaan i Yakob si Rakila na pitero iyan a “Penggalebekan ko seka sa pito ragon
asar a pakipangaromaan ka raken so ari a wata a ka a si Rakila.”
19 Tig i Laban a “Tomo a sii aken reka pakipangaroma a di so ped a mama. Sii ka raken
den kaden.”
20 Mandiyadi na minggalebek si Yakob ko miyakapito ragon kaan iyan mapangaroma si
Rakila, na lagid o ba da bo makapira gawii rekaniyan sabap ko kapekebabayai niyan ki
Rakila.
21 Kagiya maipos oto na pitero i Yakob ki Laban a “Miyapopos den so pito ragon a pasad
ta! Pakipangaromaan ka raken den so wata a ka.”
22 Na mikendori si Laban na piyamakisogoan iyan so langon a taw sangkoto a darpa.
23 Ogaid na kagiya magagawii den na aya kinowa i Laban a inowit iyan ki Yakob na si
Liyah, kena a ba si Rakila, na rimbang i Yakob si Liyah. (24 Inibegay i Laban so
talasogoay niyan a babay a si Silpah ko wata iyan a Liyah a mabaloy a talasogoay niyan.)
25 So kiyapita iyan na miyailay i Yakob a sekaniyan bes si Liyah! Na somiyong si Yakob
ki Laban na pitero iyan on a “Antonaa bes angkai a inikidia ngka raken? Ba kena a ba si
Rakila i ininggalebek aken reka? Ino ako ngka kapegakali?”
26 Tig i Laban a “Kena a ba ami adat a ba maona pakipengaromaan so ari a di so kaka.

27 Nayawa ngka baden so kakepasad o isa ka padian a dii kakendori ko kiyakewing.
Mapopos oto na pakipangaroma ko reka pen so ari a wata aken a aya ngka on kibayad na
pito ragon pen a ipenggalebek ka raken.”
28 Miniyog si Yakob, na kagiya mapopos so pito gawii a kiyakendorii ki Liyah na

piyakipangaroma on i Laban si Rakila.
29 Inibegay i Laban so talasogoay niyan a babay a si Bilhah ko wata iyan a Rakila a
mabaloy a talasogoay niyan.
30 Na rimbang mambo i Yakob si Rakila, na mala a kapekebabayai niyan ki Rakila a di si
Liyah. Na pito ragon pen a ininggalebek iyan ki Laban.
So manga Wata i Yakob
31 Kagiya mailay o Allah a pekebabayaan i Yakob si Rakila a di si Liyah na biyaloy

niyan si Liyah a makapembawata, ogaid na balek si Rakila.
32 Na miyaogat si Liyah na mimbawata sa mama. Bitowan iyan sa Robin ka tig iyan a
“Miyailay den o Allah so dii kakerata a ginawa ko. Matamataan a kebabayaan ako
imanto o karoma ko.”
33 Miyaogat sekaniyan peroman na mimbawata sa mama. Na pitero iyan a “Kagiya

miyaneg o Allah a kena a ba ko pekebabayai o karoma ko na inibegay niyan raken mambo
angkai a wata.” Kagiya ka maoto na bitowan iyan sa Simiyon.
34 Na miyaogat sekaniyan peman na mimbawata sa mama, na pitero iyan a “Imanto na

makapetordowa kami piyapiya ago so karoma ko ka kagiya mimbabawata ako ron sa telo
kataw a wata a mama.” Kagiya ka maoto na bitowan iyan so wata sa Libi.
35 Na miyaogat sekaniyan peroman na mimbawata sa mama. Na pitero iyan a “Imanto

den na podin aken so Allah.” Kagiya ka maoto na bitowan iyan so wata sa Yodah. Na
gominek sekaniyan mbawata.
MAKSOD 30
Kagiya den a mailay i Rakila a da sekaniyan den mbawata ki Yakob na inidengki niyan ai
ko pagari niyan. Na pitero iyan ki Yakob a “Begi ako ngka sa manga wata, ka o di, na
petay ako!”
2 Tanto a kiyararangitan i Yakob si Rakila na pitero iyan on a “Ba saken so Tohan a da
niyan peroa a kapakambawata a ka?”
3 Tig i Rakila a “Katii si Bilhah a talasogoay aken. Rembanga ngka kaan sekaniyan
makambawata sa kibilang a wata aken kaan aken mabangon so pamiliya ko a nggolalan
rekaniyan.”
4 Na inibegay niyan ki Yakob si Bilhah a mabaloy a karoma niyan. Rimbang sekaniyan i

Yakob
5 Na miyaogat si Bilhah na go mimbawata ki Yakob sa wata a mama.
6 Na pitero i Rakila a “Piyakakebenar ako o Tohan. Inampon iyan so pangni aken ka
bigan ako niyan sa wata a mama.” Sabap sii na bitowan iyan sa Dan.
7 Miyaogat peroman si Bilhah na mimbawata ki Yakob sa ikadowa a wata a mama.

8 Na pitero i Rakila a “Tanto ako a miyakipagagawa ko pagari aken na miyakataban ako.”
Na bitowan iyan so wata sa Naptali.
9 Kagiya mageda i Liyah a gominek sekaniyan mbawata na kinowa niyan so talasogoay

niyan a si Silpah na inibegay niyan ki Yakob a mabaloy mambo a karoma niyan.
10 Na mimbawata si Silpah ki Yakob sa wata a mama.
11 Pitero i Liyah a “Sayana ako a mala i okor!” Na bitowan iyan so wata sa Gad.
12 Na mimbawata peroman si Silpah ki Yakob sa ikadowa a wata a mama

13 Samaoto na pitero i Liyah a “Tanto ako a miyababaya! Imanto na mbetowan ako den
o manga babay sa pekebabaya.” Kagiya ka maoto na iningaranan iyan so wata sa Yasir.
14 Miyakaisa a gawii sii ko dii kaperaragon sa trigo na somiyong si Robin ko pangomaan

na miyakatoon sekaniyan roo sa mangengeto a manderik, na inibaling iyan ki ina iyan a
Liyah. Na pitero i Rakila ki Liyah a “Kapedipedi ka bo na begi ako ngka ko manga
manderik a miyatoon o wata a ka.”
15 Ogaid na pitero i Liyah a “Ba ka pen da temani ko kiyakowaa ngka raken ko karoma
ko? Ba ngka pen kowaa so manga manderik o wata aken?”
Tig i Rakila a “O begi ako ngka ko manderik o wata a ka na pakarembangen aken reka
si Yakob imanto a gagawii.”
16 Na kagiya merimon a makaoma si Yakob a poon ko di niyan dii mbasokan na inalaw

sekaniyan i Liyah. “Rembang ka raken imanto a gagawii,” a tig iyan, “ka kiyaapinan
aken seka a manga manderik a miyatoon o wata aken.” Na romimbang sekaniyan on
sangkoto a kagagawii.
17 Inampon o Tohan so pangni i Liyah na miyaogat sekaniyan, na mimbawata ki Yakob

sa ikalima a wata a mama.
18 Na pitero i Liyah a “Biyalasan ako o Tohan sabap ko kinibegan aken ko talasogoay
aken a babay a mapengaroma o karoma ko.” Na bitowan iyan so wata sa Isakar.
19 Miyaogat peroman si Liyah na mimbawata ki Yakob sa ikanem a wata a mama.

20 Na tig i Liyah a “Bigan ako o Tohan sa mapiya a pamemegayan. Imanto na ketatap
raken so karoma ko sabap sa mimbawata ako ron sa nem kataw a wata a mama.” Na
bitowan iyan so wata sa Sibolon.
21 Oriyan iyan na mimbawata sekaniyan sa wata a babay na bitowan iyan sa Dinah.
22 Sa masa oto na tiyago o Tohan sa ginawa si Rakila; inampon iyan so pangni niyan ka
biyaloy niyan a makapembawata.
23 Miyaogat sekaniyan na mimbawata sa mama na pitero iyan a “Piyokas raken o Tohan
so kiyapakakeya aken.”
24 Bitowan iyan so wata sa Yosop ago tig iyan a “Pengnin ko a began ako o Allah sa isa
pen a wata a mama.”
Miyakadakel so manga Pangangayamen i Yakob
25 Oriyan o kinimbawataan i Rakila ki Yosop na pitero i Yakob ki Laban a “Pakaawaa ko

ngka sii kaan ako makakasoy ko poonan aken a inged.
26 Pakaonota ngka raken so manga karoma ko ago so manga wata aken a mininggalebek
aken reka na go ako ngka den pakalalakawa. Katawan ka den i kapiya a
kiypakanggalebek aken reka.”
27 Ogaid na pitero on i Laban a “O kelimoon ako ngka na di ka pagawa; kiyatokawan

aken ko di aken dii kaperimar a riyakmatan ako o Allah ka sabap reka.
28 Teroa ngka o antonaa i kisokay aken reka ka imbayad aken.”
29 Tig i Yakob a “Katawan ka den i kiyapakanggalebek aken reka ago so kapepekapiya o

manga pangangayamen ka sii ko kapepanagikora ko ron.
30 So maito a rek ka ko da ko pen kapakaoma na tanto a miyakadakel, na apiya anda ako
matatago na rarakmatan ka o Allah sabap raken. Ogaid na anda bes mambo i
kapenggalebeki ko ko rek aken a pamiliya?”
31 “Antonaa i kibegay aken reka? “ a iniise i Laban.

“Di ako ngka mbegi sa bapiya antonaa,” a tig i Yakob. “Ogaid na o penggolaolaa ngka
angkai a isa a pengnin ko reka na itaros aken so kapetegikora ko ago kapegoyaga ko
manga talon ka.
32 Imanto a gawii na pakilalakawi ngka raken so langon o pangangayamen ka, ka
ipanibay aken kiran so oman i isa a palang o di na bortikan a bilibili, oman i nati a bilibili
a maitem, ago oman i kambing a palang o di na bortikan; na giyanan den i sokay aken.
33 Na apiya anda i kapesosiya ngka ko inisokay ngka raken ko pemakatalingoma a gawii
na malebod a kakeilaya ngka o benar a maontol ako. Ka oman i matatangan aken a
kambing a kena a ba palang o di na bortikan, ago oman i bilibili a kena a ba maitem na
ketangked ka a miyapanekew.”
34 “Miyayon ako," a tig i Laban. “So den so pitero o ka i inggolalan ta.”

35 Ogaid na sangkoto bo a gawii na piyangowa i Laban so manga mandangan a manga
totorisan o di na palang ago so langon a babay a kambing a manga palang o di na bortikan
maana a so oman i isa a aden a mapoti on, ago so pen so oman i maitem a bilibili na
piyakitagikor iyan siran ko manga wata iyan a mama.
36 Na taros a bilag iran si Yakob sa telo gawii a ipelalakaw ron. Na ipeteros den i Yakob
so kapetegikora niyan ko miyalamba ko manga talon i Laban.
37 Mandiyadi na miyamotol si Yakob sa manga iilaw a sapak a kayo a poplar, almondo

ago plano na piyanorisan iyan ai sa mapoti ko kiyapangopisi niyan on.
38 Na inipaneked iyan angkai a manga sapak ko danga o pepemanginoman o manga talon
sabap sa di siran dii mbobowada igira a pepekaoma siran roo a pemanginom.
39 Na so kiyapamowadan a manga kambing ko danga o manga sapak na mimbabawata sa
manga nati a totorisan, palang ago bortikan.
40 Bebelagen i Yakob so mangoda a manga bilibili ko talon, ogaid na piyamakasangor
iyan so lamba ko talon ko manga totorisan ago manga iitem a pangangayamen ko talon i
Laban.
41 Igira a dii mamowad so kaolit a manga pangangayamen na ipepaneked i Yakob so

manga sapak sii ko pepemanginoman iran kaan iran pekeilay ko di iran dii kapamowad.
42 Ogaid na di niyan tegoon so manga sapak ko danga o manga lolobay a
pangangayamen. Sii sangaki a okit na pekebaloy so manga lolobay a pangangayamen a
rek i Laban, na so manga kaolit na rek i Yakob.
43 Sabap roo na tanto a mikewasa si Yakob na miyakakowa sa madakel a manga talon,
manga talasogoay a babay ago mama, manga onta ago manga kimar.
MAKSOD 31
Piyalagoyan i Yakob si Laban
Miyaneg i Yakob a dii teroon o manga wata i Laban a manga mama a “Miyaagaw den
langon i Yakob so rek o ama tano. Miyakowa niyan langon angkai a kakawasaan a poon
ko rek o ama tano.”
2 Na miyainengka mambo i Yakob a miyaalin so di ron dii kingginawain i Laban ka kena
a ba datar gowani.
3 Samaoto na pitero o Allah ki Yakob a “Kasoy ka ko inged o manga apoapoan ka ago sii
ko manga tonganay ngka, na kelalayon ako reka.”
4 Kagiya ka maoto na piyakisogoan i Yakob si Rakila ago si Liyah a somong siran on ko

pepenateban o manga talon iyan.
5 Na pitero iyan kiran a “Miyainengka aken a miyaaalin den so di raken dii kingginawain
i ama iyo ka kena a ba datar gowani. Ogaid na miyalalayon raken so Tohan o ama aken.
6 Katawan iyo a miyakanggalebek ako ki ama iyo sa taman sa kegaga ko. Apiya pen oto
na piyanalimbotan ako niyan, ka miyakasapolo iyan mabaroba so sokay aken. Ogaid na
da peroa o Tohan o ba ako niyan kapemaratai.
8 O pitero iyan a ‘So manga ayam a palang na aya ngka sokay,’ na pembabawata so
langon o manga talon sa manga palang a nati. Na o pitero iyan a ‘So manga ayam a
totorisan na aya ngka sokay,’ na pembabawata siran sa manga torisan a nati.
9 Kagiya ka maoto na kinowaan o Tohan sa manga pangangayamen si ama iyo na
inibegay niyan raken.
10 “Isako masa a dii kapamowad o manga pangangayamen na miyakatetaginep ako, na

miyailay aken a aya dii mamamowad ko manga talon na so manga mandangan a totorisan,
manga palang ago manga bortikan.
11 Sii sangkoto a taginepen aken na pitero raken o Malaikat o Tohan a ‘Yakob,’ na tig
aken a ‘Katii ako bo.’
12 Pitero iyan a ‘Ilaya ngka, ka aya bo a dii mamamowad na so bo so manga mandangan
a totorisan, manga palang ago manga bortikan. Di aken anan dii pakinggolaola, ka
miyailay aken so langon a ipekidia reka i Laban.
13 Saken so Tohan a miyakapeyag reka sii sa Bitil a ron ka inododan sa lana a olibi so
ator a piyakatindeg ka a tanda a tademan, ago misepa ka raken pen. Na paninimo ka den
imanto na go ka sii den awa sangkai a inged na kasoy ka ko inged a pimbawataan reka.' "
14 Somimbag si Rakila ago si Liyah ki Yakob a tig iran a "Da den a ba ami pen
mapembagian o di na mapekewali ko tamok o ama ami!
15 Ba kami niyan baden ipegiring sa salakaw a taw. Kena bo a ba giya kiyapesaa niyan
rekami, ka miyalengan iyan pen so minibetang rekami.
16 So langon a kakawasaan a kinowa o Tohan ki ama na patot a rek ami ago so manga
wata ami. Kagiya ka maoto na nggolaolaa ngka so apiya antonaa i miyatero reka o
Tohan."
17 Mandiyadi na miyaninimo si Yakob na go piyamakakoda iyan so manga wata iyan ago

so manga karoma niyan ko manga onta.
18 Initelon iyan so langon a pangangayamen iyan ago langon a miyapantiyari niyan sii sa
Misopotamiya ka kesoy sekaniyan den ko ama iyan a Iskak sa inged a Kanaan.
19 Sa da iran pen kapakaganat na miyakasong den si Laban ko talon iyan a manga bilibili
ka pengopawan iyan. Sii ko kandodoo niyan na piyanekew i Rakila so manga barahala o
ama iyan a matatago sa walay.
20 Liyo ron pen na inakal i Yakob si Laban ka piyagma iyan on so kapagawa iyan.
21 Kinowa niyan baden so langon taman iyan na miyalagoy sekaniyan nggagaan.
Rominipag sekaniyan ko lawasaig a Yopratis na miyantap ko kapalawan sa inged a
Giliyad.
Siyaloba i Laban si Yakob
22 Kagiya makatelo gawii na miyatero ki Laban a miyalagoy si Yakob.

23 Na sarta a piyakaonot i Laban so manga pagtaw niyan na siyaloba iyan si Yakob ko
miyakapito gawii; na sii niyan den riyaot ko kapalawan sa Giliyad.
24 Sangkoto a kagagawii na miyakaoma so Tohan ki Laban a nggolalan ko taginepen na
pitero iyan on a "Pananggilai ngka o ba aden a matero o ka ki Yakob a marata o di na
mapiya."
25 Si Yakob na kekampo sii ko kapalawan sa Giliyad kagiya raoten sekaniyan i Laban, na

mikampo roo mambo si Laban ago so manga pagtaw niyan.
26 Na pitero i Laban ki Yakob a "Antonaa bes angkai a inikidia ngka raken? Piyagakalan
ako ngka na pitonda a ka so manga wata aken a babay a datar o ba ngka miyabiyag ko
kiyatidawa!
27 Ino ako ngka pegakali ko kiyapalagoy ngka a di aken katawan? Ino ngka raken da
teroa a magawa ka kaan aken sekano mapakaganat a sasartaan a kapipiya a ginawa ago
kapagidaida a pegayonan o manga garingking ago manga kotiyapi?
28 Apiya so kapengareki aken ko manga apo aken ago so manga wata aken a babay ko
kangganat iran na da ngka raken peroa. Miyalalong ka!
29 Aden a kapaar aken sa kapakasakiti aken reka, ogaid na kagiya ko gagawii na
miyakimbitiyarai raken so Tohan o ama a ka a tig iyan a 'Pananggilai ngka o ba aden a
matero o ka ki Yakob a marata o di na mapiya.'
30 Katawan aken a aya kiyapakaawa a ka na sabap sa pekedali ka komasoy ko walay o
ama a ka; ogaid na ino ngka penekewa so manga barahala ko?"
31 Simbag i Yakob si Laban a tig iyan a "Miyalek ako o ba ngka raken tegela komowa so
manga wata a ka.
32 Na apiya antawaa i katoonan ka ko manga barahala ngka na kebono. Sii ko
kamamasaan o manga pagtaw ta na nggilobaa ngka o ba aden a rek ka a matatago ko
manga ipamemetad aken; o aden na kowaa ngka." Sa masa oto na di katawan i Yakob a
miyapanekew bes i Rakila so manga barahala o ama iyan.
33 Kagiya ka maoto na piyanoledan i Laban so barombarong i Yakob, so barombarong i

Liyah ago so barombarong o dowa kataw a talasogoay a babay, ogaid na da niyan matoon
so manga barahala niyan. Oriyan iyan na siyoledan iyan so barombarong i Rakila.
34 Samaoto na miyakowa den i Rakila so manga barahala na miyapanago iyan nggagaan
ko kabila ko siya o onta, na moontod sekaniyan on. Na piyanisik i Laban so langon
taman ko soled o barombarong ogaid na da niyan siran on matoon.
35 Na pitero i Rakila ko ama iyan a "O ba ka kararangiti, kadnan ko, ko di aken

kapekatindeg ko hadapan ka, ka sisii raken so basa." Na apiya piyanabenaran i Laban
mbanog so manga barahala na da niyan den matoon.
36 Mandiyadi na kiyararangitan si Yakob na piyasong iyan si Laban. "Antonaa i sala

aken?" a iniise iyan ki Laban. "Antonaa i miyandosa ko a inisaloba a ka raken?
37 Imanto a miyapanisik ka den so langon a ipamemetad aken na antonaa i miyatoon ka
on a rek ka a miyakowa ko walay ngka? Sii ngka betaden ko hadapan o manga pagtaw
ngka ago so manga pagtaw aken, ka siran i pakakokomen ta on o antawaa i makabebenar
rekta a dowa.
38 “Miyakadowa polo ragon a kiyapakakaden aken reka. So manga bilibili ago kambing
ka a manga babay na da den manggolaola o ba da mbabawata aya pen o ba aden a
miniseda aken ko manga mama a bilibili ko talon ka.
39 Igira a aden a miyapatay a maila a binatang ko pangangayamen ka na da ko reka den
wita ka saken i pesembi on. Piyamakibayadan ka raken pen so apiya antonaa i piyanekew
ron ko kagagawii o di na kadaondaw.
40 Igira a kadaondaw na kepatay ako a mayaw, ago tenggaw igira a kagagawii, na
maregen pen a kapetoroga raken.
41 Giyanan den i maoolaola ko ko soled o miyakadowa polo ragon a kakakaden aken
reka. Miyakasapolo ago pat ragon a ininggalebek aken reka sa kiyapangaromaa ko ko
dowa kataw a wata a ka, na miyakanem ragon pen a kiyapantiyariya ko ko manga
pangangayamen; na miyakasapolo ka pen mabaroba so sokay aken.
42 O da ako katabangi o Tohan o ama aken a so Tohan o Ibrahim ago so ipekelek o Iskak
na miyapakaawa ko ngka den sa da den a ba ko mipetelon. Ogaid na miyailay o Tohan so
kiyarasay ago so kiyanggalebek aken. Sabap roo na siyaparan ka niyan kagiya ko
gagawii."
So Kapasadan i Yakob ago si Laban
43 Simbag i Laban si Yakob a tig iyan a "Giyangkai a manga babay na manga wata aken,
so manga wata iran na manga apo aken, ago giyangkai a manga talon na manga talon
aken. Langon a pekeilay ngka na rek aken. Ogaid na da den a ba ko mapenggolaola
imanto mipantag sangkai a manga wata aken o di na so manga wata iran.
44 Kagiya ka maoto na pesadanowai ta, ago mbaal ta pen sa tademan ta on."
45 Mandiyadi na kominowa si Yakob sa ator na piyakatindeg iyan a tanda a tademan.

46 Na pitero iyan ko manga pagtaw niyan a "Panimo kano sa manga ator." Na
miyamangowa siran sa manga ator na initabotod iran. Kagiya mapasad oto na roo siran
mikekan ko obay o tabotod.
47 Bitowan i Laban angkai a tabotod sa 'Higar Sahadota,' ago bitowan mambo i Yakob sa
'Galid.'
48 Tig i Laban a "Giyangkai a tabotod na miyabaloy a tademan ta imanto a gawii."

Giyanan i sabap a kiyabetowi ron sa 'Galid.'
49 Bitowan mambo sa 'Mispa' ka pitero pen i Laban a "Kabantayan ta o Allah sii ko
kapakapembelag ta.
50 O perasaya ngka so manga wata aken a babay o di na o pangaroma ka sa ped a manga
babay a liyo ko manga wata aken na apiya pen da a ba rekta makamamasa na tatanodi
ngka a so Tohan i makababantay rekta a dowa kataw."
51 Pitero pen i Laban ki Yakob a "Kataya so minitabotod a manga ator, ago kataya pen so
ator a tanda a tademan a piyakatindeg aken ko pageletan ta.
52 Giyangkai a tabotod ago so ator na palaya tanda a tademan sa di aken den lepasen
angkai a tabotod sa ba ko seka pemaratai, ago di ngka den mambo lepasen angkai a
tabotod ago ator sa ba ako ngka pemaratai.
53 So Tohan o Ibrahim ago so Tohan o Nahor na aya rekta makakokom."
Mandiyadi na sii ko Ingaran o Tohan a aya ipekelek o ama iyan a Iskak na inisepa i
Yakob a tomanen iyan angkai a pasad.
54 Na mikorban si Yakob sii sangkoto a palaw na biyoyo iyan so manga pagtaw niyan ko
kiyakandori iyan. Kagiya makapasad siran koman na roo siran den miyamakatorog ko
palaw sangkoto a kagagawii.
55 Teked a kapipita ko miyakatalondog a gawii na piyangarekan i Laban so manga apo

iyan ago so manga wata iyan a babay taros a inipangangarapan iyan siran. Oriyan iyan na
gomiyanat sekaniyan ka kesoy den ko inged iyan.
MAKSOD 32
Mitiyagar si Yakob ko Kipetoonaan iyan ki Isaw
Sii ko kapeteros i Yakob lomalakaw na biyalak sekaniyan o manga malaikat o Tohan.

2 Kagiya mailay siran i Yakob na pitero iyan a "Giyai na kampo o Tohan!" Na bitowan
iyan angkoto a darpa sa 'Mahanaim.'
3 Na somiyogo si Yakob sa manga mama ka pekaonaan iyan siran ko pagari niyan a Isaw
sii sa kalopaan a Sair a giyanan na inged a Idomiya.
4 Siyogo iyan siran a tig iyan a "Giyai i peteroon iyo ko kadnan aken a Isaw: 'So oripen ka
a si Yakob na tig iyan a "Miyakakaden ako ki Laban, na inisendod aken a kambeling aken
taman den imanto.
5 Aden a manga sapi aken, manga kimar, manga bilibili, manga kambing, ago manga
talasogoay aken a manga mama ago manga babay. Inipakawit aken reka, kadnan ko,
angkai a katero, ka o ba ako ngka kalimoon." ' "
6 Kagiya makakasoy ki Yakob so manga siyogo na pitero iran a "Miyakasong kami den
ko pagari ngka a Isaw, na pesong sekaniyan sii imanto ka pagalaon ka niyan a moonot on
so pat gatos a manga pagtaw niyan."
7 So kiyanega sii i Yakob na tanto sekaniyan a miyalek ago masososa a pamikiran iyan.
Biyagi iyan so manga taw a moonot on sa dowa lompok, ago so pen so manga bilibili,
manga kambing, manga sapi ago manga onta niyan.
8 Aya paninti a akal iyan na "O maoma a gobat i Isaw so salompok on na makapalagoy so
salompok a kelamba."
9 Na taros a miyangangarapan si Yakob a tig iyan a "Ya Allah a Tohan o apo aken a
Ibrahim ago Tohan o ama aken a Iskak, na pitero o ka raken a 'Kasoy ka ko inged ka ago
so manga tonganay ngka ka pepiyapiyaan ko seka.'
10 Kena a ba ako makapapatot sangkai a langon a kipekelimoon ka raken a oripen ka ago
so kapetomani ngka raken sa pasad. Isako romipag ako ko lawasaig a Yordan na aya bo a
awid aken na so teken aken. Ogaid na imanto na miyadowa lompok ako.
11 Pengnin ko a sabeten ako ngka ko pagari aken a Isaw, ka pekelek ako o ba aya
mitalingoma niyan raken sii na gobaten kami niyan ago so manga babay ago manga wata.
12 Ogaid na miyatero o ka a 'Matamataan a pepiyapiyaan ko seka ago pakapendakelen ko
so manga mbawataan ka sa datar o peted sa kilid a ragat a di den kebilang.' "
13 Na tomiyareg si Yakob sangkoto a darpa ko kagagawii oto.
Kagiya mapita na piyagaraw niyan ko manga pangangayamen iyan so imbegay niyan a
pamemegayan ko pagari niyan a Isaw
14 A so dowa gatos a kambing a manga babay ago dowa polo a mandangan, dowa gatos a
bilibili a manga babay ago dowa polo a bilibili a manga mama,
15 Telo polo a onta a manga babay a rakes o manga nati iran, pat polo a sapi a manga
babay ago sapolo a sapi a manga mama, ago dowa polo a kimar a manga babay ago
sapolo a kimar a manga mama.
16 Oman i isa a salompok ko pangangayamen na piyakikibir iyan ko sakataw ko
talasogoay niyan. Na pitero iyan ko manga talasogoay a "Ona kano raken na go niyo
pamakapagawataa so oman i piselompokan a manga pangangayamen."
17 Ininsaratan iyan so maoona a talasogoay a tig iyan a "Amay ka alaon ka o pagari aken
a Isaw na go ka niyan isei sa 'Antawaa i dato o ka? Anda ka song? Anta i
kipangangayamen sangkai a ipendendendeg ka?'
18 Na aya isembag ka on na 'Rek ai i Yakob a oripen ka. Piyakiwit iyan ai a
pamemegayan ko kadnan iyan a Isaw, na matotondog kami niyan.' "
19 Na ininsaratan iyan mambo so ikadowa a talasogoay ago so ikatelo ago so langon a

ped iran a pendendeg ko manga talon a tig iyan a "Datar anan mambo a peteroon iyo ki
Isaw amay ka mabalak iyo.
20 Na o ba niyo kalipati a kateroa niyo ron sa 'Si Yakob a oripen ka na matotondog kami
niyan.' " Ka pitero i Yakob sa ginawa niyan a "Ipengangapin aken rekaniyan angkai a
manga pamemegayan a pekaonaan ko. Oriyan iyan na amay ka makapagilaya kami na
baanda ko niyan tarimaa."
21 Na piyakaona i Yakob so manga pamemegayan, ogaid na mitelimbagak sekaniyan ko
kampo ka roo pekatorog ko kagagawii.
Miyakipelobed si Yakob ko Tohan
22 Ogaid na sangkoto den a kagagawii na mimbowat si Yakob na piyamakaonot iyan so

dowa kataw a karoma niyan, so dowa kataw a talasogoay niyan a manga babay ago so
sapolo ago isa a wata iyan a manga mama ka meripag siran ko lawasaig a Yabok.
23 Kagiya mapakaripag iyan siran on na piyamakaripag iyan mambo so langon a rek iyan,
24 Ogaid na mitelimbagak roo si Yakob a da den a ba niyan ped.
Samaoto na aden a mama a miyakipelobed rekaniyan taman ko sobo.
25 Kagiya mailay o mama a di niyan kepeges si Yakob na siyampak iyan so witan i
Yakob na miyalepo ini ko di niyan on dii kipelobeden.
26 Na pitero o mama a "Bokai ako ngka, ka kepita den."
Ogaid na tig i Yakob a "Di aken seka mbokaan taman sa di ako ngka karakmatan."
27 “Anta i ngaran ka?" a iniise o mama.

"Yakob," a tig iyan.
28 Na tig o mama a "Kena den a ba aya ngaran ka imanto na Yakob ka Israil sabap sa
miyanagontaman ka ko Tohan ago so manosiya na miyakadaag ka."
29 Pitero i Yakob a "Kapedipedi ka bo na teroa ngka raken i ngaran ka."

Ogaid na tig iyan a "Ino ngka raken pegiseen so ngaran aken?" Na riyakmatan iyan si
Yakob roo.
30 Na pitero i Yakob a "Miyailay aken so Tohan sa miyakapagadapa kami; apiya pen oto
na piyakapagoyag ako pen." Kagiya ka maoto na bitowan iyan angkoto a darpa sa
'Piniyal.'
31 Pesebang so alongan ko kiyaganat i Yakob sa Piniyal, na malelepo sekaniyan sa witan.

32 Kagiya ka maoto na apiya taman imanto na so manga mbawataan o Israil na di siran
ken ko sapo ko witan ka kagiya giyanan i sapo i Yakob a miyasampak.
MAKSOD 33
Minitoona i Yakob si Isaw
Lomiyangkaw si Yakob na miyailay niyan si Isaw a pepekaantap kiran a oonotan o pat

gatos a pagtaw niyan. Kagiya ka maoto na piyakasenggaya iyan so manga wata iyan ki
Liyah, Rakila ago sii ko dowa kataw a talasogoay a manga babay.
2 Piyakaona niyan so manga talasogoay a rakes o manga wata iran. Piyakatalondog iyan
kiran si Liyah ago so manga wata iyan; na piyakaori niyan si Rakila ago si Yosop.
3 Na maoona kiran si Yakob a miyakapito sekaniyan makasodiyod ko kapepekarani niyan
ko pagari niyan.
4 Ogaid na piyalalagoy i Isaw si Yakob na giyakes iyan ago inarekan iyan, na misegada
siran.
5 Miyangilailay si Isaw na miyailay niyan so manga babay ago so manga wata. "Antawaa
angkai a manga ped ka?" a iniise iyan on.
Tig i Yakob a "Siran i manga wata a inilimo raken o Tohan."
6 Mandiyadi na miyobay so manga talasogoay ago so manga wata iran, na somiyodiyod

siran.
7 Tomiyalondog mobay si Liyah ago so manga wata iyan, na miyamanodiyod. Na aya
miyaori mobay na si Yosop ago si Rakila, na somiyodiyod siran mambo.
8 Iniise i Isaw a "Antonaa i maana angkoto a piselompokan a manga pangangayamen a

miyabalak aken?"
"Pamemegayan oto reka kaan ako ngka kalimoon, kadnan ko," a tig iyan.
9 Ogaid na tig i Isaw a "Mitataralo so rek aken, pagari ko. Tagoa ngka baden a rek ka."
10 “Di," a tig i Yakob. "O kelimoon ako ngka na tarimaa ngka raken angkai a
pamemegayan; ka datar o miyailay aken so paras o Tohan ko kiyailaya ko ko paras ka
imanto den a miyapiya a ginawa ngka raken.
11 Kapedipedi ka bo na tarimaa ngka so pamemegayan a miyawit reka, ka inikalimo ako
o Tohan ago inibegay niyan raken so langon a kapenggonaan aken." Na kagiya tigel i
Yakob si Isaw na tiyarima iyan oto.
12 Oriyan iyan na pitero i Isaw a "Itano, ka idolog aken sekano."
13 Ogaid na pitero on i Yakob a "Katawan ka, kadnan ko, a da a bager o manga wata, ago
di aken mipendarainon a kapegipata ko ko manga bilibili, kambing ago sapi a pesosowan
pen. O ndendegen siran nggagaan ko salongan na pematay so langon a manga
pangangayamen.
14 Kapedipedi ka bo, kadnan ko, na ona ka raken a oripen ka. Malombat a katondoga ko
reka, ka saden sa kagaan o manga pangangayamen a maoonaan aken ago so pen so manga
wata na aya ko reka mambo kapepekaoma sa Idomiya."
15 Na tig i Isaw a "So bo so ped ko manga pagtaw aken i pakibegaken ka raken sii
rekano."
"Naino," a tig i Yakob, "ka asar a ipekelimo ako ngka."
16 Mandiyadi na mipeto si Isaw sangkoto a gawii ka kesoy sa Idomiya.

17 Ogaid na somiyong si Yakob sa Sokot a ron miyangembaal sa kebalingan iyan ago
manga rayar a kesirongan o manga pangangayamen iyan. Giyanan i sabap a bitowan sa
'Sokot' angkoto a darpa.
18 Kagiya makakasoy den si Yakob sa inged a Kanaan a poon sa Misopotamiya na

miyakaoma sekaniyan sa da a rayorayo a ginawa niyan sa siti a Sikim na mikampo
sekaniyan ko marani ko siti.
19 Na so lopa a piyakatindegan iyan ko barombarong iyan na piyamasa niyan a magatos a
pelata sii ko manga wata i Hamor a manga mama a aya ama i Sikim.
20 Roo sekaniyan mimbaal sa aparan a bitowan iyan sa 'Il,' a so Tohan o Israil.
MAKSOD 34
Si Dinah ago so manga Taw sa Sikim
Si Dinah a so wata a babay i Yakob ago si Liyah na mindadalakaw ka mbantayan iyan so

Ikanaanen a manga babay.
2 Kagiya mailay sekaniyan i Sikim a wata i Hamor a Hibiyo, a aya dato sangkoto a darpa,
na kinowa niyan ago liyobed iyan.
3 Ogaid na tanto a miyabarayat si Sikim ki Dinah, na kiyababayaan iyan na go
piyangangapinan iyan.
4 Na pitero i Sikim ko ama iyan a Hamor a "Kowaa ngka raken angkai a raga a
mapangaroma ko."
5 Kiyatokawan i Yakob a kiyabatalan i Sikim so wata iyan a Dinah, ogaid na
kapapantagan oto a ndodoo so manga wata iyan a mama ko manga talon iyan sii ko
pepenateban. Kagiya ka maoto na da den a ba pinggolaola i Yakob taman ko
kiyapakaoma iran.
6 Somiyong si Hamor a ama i Sikim ki Yakob ka makipembitiyarai ron.

7 Samaoto na miyakaoma on mambo so manga wata i Yakob a poon siran ko
pepenateban, ka so den so kiyanega iran ko miyanggolaola na miyaling siran. Miyarata a
ginawa iran ago tanto siran a kiyararangitan sabap sa miyapakaito i Sikim so manga
mbawataan o Israil ko kiyarembanga niyan ko wata i Yakob, a so di wadib a
penggolaolaan.
8 Ogaid na pitero kiran i Hamor a "Miyapamola den so wata a ka a babay sa poso o wata
aken a Sikim. Kapedipedi kano bo na pakipangaromaan iyo rekaniyan.
9 Pakimbabalaiya kano rekami. Began iyo rekami so manga raga rekano, na kowaa niyo
mambo so manga raga rekami.
10 Makapeginged kano rekami ka peladen ami rekano so inged ami; makabaling kano sii
na makapendagang ago makapenamok."
11 Na pitero mambo i Sikim ko ama i Dinah ago so manga laki niyan a "Kalimoon kami
niyo ka imbegay aken rekano so apiya antonaa i peteroon iyo.
12 Pakalaa niyo den so pengnin iyo a imbetang aken ago isonggod, ka mbayadan aken so
apiya antonaa i peteroon iyo asar a pakipangaromaan iyo raken so raga."
13 Na miyamagakal so manga wata i Yakob ko kiyasembaga iran ki Sikim ago so ama

iyan a Hamor sabap ko kiyabatali i Sikim ko babay iran a si Dinah.
14 Aya inisembag iran kiran na "Di ami anan mapenggolaola: di ami mapakipengaroma
so babay ami ko mama a da matori, ka ipekaito ami anan.
15 Aya bo a kapagayoni ami reka na o kasayani kami niyo a manga totori mambo so
langon a manga mama rekano.
16 Oriyan oto na imbegay ami rekano so manga raga rekami na kekowa mi mambo so
manga raga rekano. Peginged kami rekano ago kebaloy tano a isa a bangsa.
17 Ogaid na o di kano pagayon o ba kano manga totori na kowaan ami so babay ami ka
magawa kami sii."
18 Giyangkai a antangan iran na inikasoat i Hamor ago so wata iyan a Sikim.

19 Na da den sendoden angkai a mangoda a mama so kapenggolaolaa niyan sii sabap ko
kapekebabayai niyan ko wata i Yakob a babay. Giya mama ini i lebi a pagaadatan ko
pamiliya o ama iyan.
20 Mandiyadi na somiyong si Hamor ago si Sikim ko dii timotimoan ko gimowa o siti ran
ka ipembitiyarai ran so ped iran a magiinged roo.
21 Pitero iran a "Makipengginawai rektano angkai a manga taw. Pakabalingen ago
pakandagangan tano siran sii ko inged tano, ka maolad a kekadenan iran on.
Mapengaroma tano so manga raga iran, na mapengaroma iran mambo so manga raga
tano.
22 Ogaid na aya bo a kapagayon angkai a manga taw sa kambaling iran rektano a
maisaisa tano ago siran na o manga totori so langon a manga mama rektano a datar iran.
23 Ba kena a kebaloy a rektano so langon a pangangayamen iran a rakes o manga tamok
iran? Kagiya ka maoto na mayon tano kiran, na mbaling siran rektano."
24 Na so langon a magiinged ko siti na piyamakineg iran si Hamor ago si Sikim a wata

iyan; na miyakitori so oman i mama kiran.
25 Kagiya makatelo gawii a kikasasakitan siran pen na so dowa kataw ko wata i Yakob a
si Simiyon ago si Libi, a so manga laki i Dinah, na kinowa iran so manga pedang iran na
somiyoled siran ko siti a kena a ba mangangandam so manga taw ron. Piyamono iran so
langon a manga mama on,
26 Na biyono iran pen si Hamor ago so wata iyan a Sikim. Kinowa iran si Dinah poon ko
walay i Sikim na inawaan iran so siti.
27 Oriyan iyan na miyakaoma so ped a manga wata i Yakob ko manga miyatay, na
pitebanan iran so siti sabap ko kiyabatali ron ko babay iran.
28 Piyangowa iran so manga bilibili, kambing, sapi ago manga kimar iran a rakes o
langon a ped a ipamemetad sii ko siti ago sii ko manga pangomaan.
29 Pitebanan iran so langon a kakawasaan iran ago piyamiyag iran so langon a manga
babay ago manga wata, na piyangowa iran pen so langon taman a matatago ko manga
walay.
30 Mandiyadi na pitero i Yakob ki Simiyon ago si Libi a "Pisemok ako niyo ka biyaloy
ako niyo a mado ko manga Kanaaniyo ago Pirisiyo a kibabaling sangkai a inged. Kena a
ba madakel a manga pagtaw aken, na o pakatepia iran so bager iran na go ako iran gobata
na kebinasa ako taman ko langon o pamiliya ko."
31 Ogaid na aya inisembag iran on na "Ba wadib so kinisayanen iyan ko babay ami sa
sondal?"
MAKSOD 35
Komiyasoy si Yakob sa Bitil
Sa masa oto na pitero o Tohan ki Yakob a "Song ka sa Bitil na ron ka kaden; mbaal ka on
sa aparan ko Tohan a miyakapeyag reka isako pepelagoyan ka so pagari ngka a Isaw."
2 Kagiya ka maoto na pitero i Yakob ko pamiliya niyan ago so langon a pepemangonot on

a "Pelelebaden iyo so manga barahala o kena a ba tano royod a taw a tatagoon iyo. Sotia
niyo a manga ginawa niyo ago sambi kano sa nditaren.
3 Na itano, ka somong tano sa Bitil. Pembaal ako roo sa aparan ko Tohan a aya raken
tomiyabang ko masa a kareregeni raken ago miyalalayon raken pen ko apiya anda ako
miyakasong."
4 Mandiyadi na inipamegay iran ki Yakob so langon a manga barahala o kena a ba iran
royod a kaaawidan iran ago so pen so manga aritis iran. Na inipelelebeng i Yakob ko
atag o kayo a ok a marani sa Sikim.
5 Na kagiya gomanat si Yakob ago so manga wata iyan na kiyatagoan sa tanto a mala a
kalek so manga taw ko manga siti a melilibeta kiran, na da a ba kiran on miyakaraw
somaloba.
6 Na miyakaoma si Yakob ago so langon a taw a ped iyan sii sa Los (giyanan so Bitil) sa
inged a Kanaan.
7 Mimbaal sekaniyan roo sa aparan. Bitowan iyan ai sa 'Il Bitil' sabap sa roo piyayag o
Tohan a ginawa niyan ki Yakob isako pepelagoyan iyan so pagari niyan.
8 Sa masa oto na miyatay si Diborah a so miyalokes a babay a pepegipat gowani ki

Ribikah, na sii inilebeng ko atag o kayo a ok sa pagabagatan a Bitil. Kagiya ka maoto na
bitowan oto sa 'Ok a Kasegad.'
9 Na miyakapeyag peroman so Tohan ki Yakob ko kiyapakapoon iyan sa Misopotamiya,

na riyakmatan iyan sekaniyan.
10 Pitero on o Tohan a "Aya ngaran ka na Yakob, ogaid na di ka den mbetowan sa
Yakob ka aya kebaloy a ngaran ka na 'Israil.' Kagiya ka maoto na iningaranan sekaniyan
o Tohan sa Israil.
11 Pitero on pen o Tohan a
"Saken so Tohan a Lebi a Mabager.

Kebabad ka ago pendakel;
Madakel a nasiyon a sii reka pekapoon,
ago aden pen a manga dato a mipembawata o kebabadan reka.
12 So inged a inibegay aken ko Ibrahim ago so Iskak
na imbegay aken reka,
na imbegay aken ai mambo ko manga mbawataan ka a pekatalondog reka."
13 Na giyoto a inawaan o Tohan si Yakob.

14 Na piyakatindegan i Yakob sa ator a tanda a tademan angkoto a darpa a ron sekaniyan
inimbitiyarai o Tohan. Inododan iyan sa arak ago lana a olibi a inisoasoat ko Tohan.
15 Na aya inibeto i Yakob sangkai a darpa na Bitil.
So Kiyapatay i Rakila ago si Iskak
16 Oriyan iyan na inawaan i Yakob ago so pamiliya niyan a Bitil. Na sii ko malo iran den
kiyapakarani sa Iprat na biyalilit si Rakila, na tanto a kiyaregenan.
17 Sii ko lebi a maregen a kapembalilita on na pitero on o panday a "Di ka pekelek,
Rakila, ka mimbawata ka sa isa pen a wata a mama."
18 Ogaid na petay si Rakila, na sii ko kaketonggos den o napas na bitowan iyan so wata
iyan sa Binoni. Ogaid na aya inibeto ron o ama iyan na Baniyamin.
19 Miyatay si Rakila na sii inilebeng ko obay o lalan a ipesong sa Iprat (giyanan den na
Bitlihim).
20 Bitadan i Yakob sa ator so kobor iyan a aya niyan tanda a tademan. Giyangkoto a ator
na pekitendo ko kobor i Rakila taman den imanto.
21 Tomiyaros lomalakaw si Israil na piyakatindeg iyan so barombarong iyan sii sa onaan

o Migdol Idir.
22 Sii ko kapakababaling pen i Israil sangkoto a inged na romimbang si Robin ki Bilhah a
sandil o ama iyan, na kiyatokawan ai i Israil.
Aden a sapolo ago dowa kataw a manga wata i Yakob a manga mama:
23 So manga wata i Liyah na si Robin a so kaka a wata i Yakob, ago siki Simiyon, Libi,
Yodah, Isakar ago si Sibolon.
24 So manga wata i Rakila na si Yosop ago si Baniyamin.
25 So manga wata i Bilhah a talasogoay i Rakila na si Dan ago si Naptali.
26 So manga wata i Silpah a talasogoay i Liyah na si Gad ago si Asir.
Giyanan i manga wata i Yakob a manga mama a inimbabawata rekaniyan sii sa
Misopotamiya.
27 Na miyakaoma si Yakob ko ama iyan a si Iskak sii sa Mamri a marani sa Kiriyat Arba
(giyanan den na Hibron) a ron miyakabaling so Ibrahim ago so Iskak.
28 Miniraot so idad i Iskak sa magatos ago walo polo ragon,
29 Na miyatay sekaniyan ago minitapi ko manga apoapoan iyan a minitolod den a idad
iyan ago miyasoat sekaniyan ko kiyalokes iyan. Na inilebeng o manga wata iyan a si Isaw
ago si Yakob.
MAKSOD 36
So Kiyababadan ki Isaw
Giyai i totolan ki Isaw a bebetowan mambo sa Idom.

2 Miyangaroma si Isaw ko manga babay a Ikanaanen, a si Adah a wata i Ilon a Hitiyo, ago
si Oholibamah a wata i Anah ago apo o Sibiyon a Hibiyo,
3 Ago si Basimat a wata i Ismail ago babay i Nibayot.
4 Inimbawata i Adah ki Isaw si Ilipas; si Basimat na inimbawata iyan si Rowil,

5 Na si Oholibamah na inimbabawata iyan si Hiyos, si Halam ago si Korah. Giyanan i
manga wata i Isaw a manga mama a inimbabawata rekaniyan sii sa inged a Kanaan.
6 Sa masa oto na piyamakaonot i Isaw so manga karoma niyan, so manga wata iyan, so
langon a manga pagtaw niyan ago manga pangangayamen iyan, na initelon iyan pen so
langon a miyapantiyari niyan sa Kanaan ka tomipas sekaniyan ko salakaw a inged a
maaawat ko pagari niyan a Yakob.
7 Aya sabap iyan na so lopa a kakadenan iran ago si Yakob na di pekaampel a ipekeoyag
o madakel a pangangayamen iran, na di kepakay o ba siran den matitimo.
8 Kagiya ka maoto na miyaling si Isaw sii sa kapalawan sa inged a Idomiya.
9 Giyai so manga mbawataan i Isaw a so apopoan o manga Idomiyan ko kapalawan sa
Sair.
10-13 Giyai i manga ngaran o manga wata i Isaw a manga mama:
So Karoma niyan a Adah na inimbawata iyan si Ilipas.

So manga wata Ilipas a manga mama na siki Timan, Omar, Sipo, Gatam ago si Kinas.
Aden mambo a sandil i Ilipas, a si Timna, na inimbawata iyan rekaniyan si Amalik.
Manga apo siran i Adah a karoma i Isaw.
So karoma i Isaw a si Basimat na inimbawata iyan si Rowil.

So manga wata i Rowil a manga mama na si Nahat, Sirah, Siyamah ago si Midsah.
Manga apo siran i Basimat a karoma i Isaw.
14 So manga wata a mama a inimbawata ki Isaw i Oholibamah a wata i Anah ago apo i
Sibiyon na siki Hiyos, Halam ago si Korah.
15 Giyai i manga ngaran o manga mbatabataa a kiyababadan ki Isaw:
Si Ilipas a kaka a wata i Isaw na aya apoapoan angkai a manga mbatabataa sii sa inged a
Idomiya:
Timan, Omar, Sipo, Kinas,
16 Korah, Gatam ago Amalik. Siran i kiyababadan ki
Adah.
17 Si Rowil a wata i Isaw na aya apoapoan angkai a manga mbatabataa sii sa Idomiya:
Nahat, Sirah, Siyamah ago Midsah. Siran i kiyababadan ko karoma i Isaw a si Basimat.
18 Giyai so manga mbatabataa a kiyababadan ko karoma i Isaw a si Oholibamah a wata i
Anah:
Hiyos, Halam ago Korah.
19 Giyanan den i manga ngaran o manga mbatabataa a kiyababadan ki Isaw a bebetowan

mambo sa Idom.
So manga Mbawataan i Sair
20 Giyai so manga wata a manga mama i Sair a Horiyo. Siran i tenger a manga taw sa
inged a Idomiya:
siki Lotan, Siyobal, Sibiyon, Anah,
21 Disiyon, Idsir ago si Disiyan. Giyangkanan a manga wata i Sair sii sa Idomiya na aya
manga apoapoan o manga mbatabataa a manga Horiyo.
22 So manga wata i Lotan a manga mama na:
si Hori ago si Homam. So babay i Lotan na si Timna.
23 So manga wata i Siyobal a manga mama na:
siki Alban, Manahat, Ibal, Sipo ago si Onam.
24 So manga wata i Sibiyon a manga mama na:
si Ayas ago si Anah. Giyanan so Anah a miyakatoon sa mayaw a bowalan sii ko
kapepenagikora niyan ko manga kimar o ama iyan a si Sibiyon sii sa mitataog a kaden.
25 So manga wata i Anah na:
si Disiyon a wata iyan a mama, ago si Oholibamah a wata iyan a babay.
26 So manga wata i Disiyon a manga mama na:
siki Himdan, Isban, Iteran ago si Kiran.
27 So manga wata i Idsir a manga mama na:
siki Bilhan, Saaban ago si Akan.
28 So manga wata i Disiyan a manga mama na:
si Os ago si Aran.
29 Giyai so manga apoapoan o manga mbatabataa a manga Horiyo sii sa inged a Idomiya:
siki Lotan, Siyobal, Sibiyon, Anah,
30 Disiyon, Idsir ago si Disiyan.
So manga Dato sa Idomiya
31 Giyai so manga dato a miyamakandato sa Idomiya isako da pen a miyakandato ko

manga Israil:
32 Si Bilas a wata i Biyor na miyakandato sa Idomiya, na aya ngaran o siti niyan na
Dinhabah.
33 Kagiya matay si Bilas na aya miyakasambi on a dato na si Hobab a wata i Sirah a poon
sa Bosrah.
34 Kagiya matay si Hobab na aya miyakasambi on peman na si Hosiyam a poon ko inged
o manga taw sa Timan.
35 Kagiya matay si Hosiyam na aya miyakasambi on mambo a mindato na si Hadad a
wata i Bidad a aya miyakataban ki Midiyan sii sa inged a Mowab. Aya ngaran o siti
niyan na Abit.
36 Kagiya matay si Hadad na kiyasambian sekaniyan i Samlah a poon sa Masrikah.
37 Kagiya matay si Samlah na aya miyakasambi on a dato na si Siyaol a poon sa Rihobot
ko obay o lawasaig a Yopratis.
38 Kagiya matay si Siyaol na aya miyakasambi on peman a dato na si Baal Hanan a wata i
Akbor.
39 Kagiya matay si Baal Hanan a wata i Akbor na aya somiyambi on a dato na si Hadad.
Aya ngaran o siti niyan na Paw, ago aya ngaran o karoma niyan na si
Mihitabil a wata i Matrid ago apo i Misahab.
40 Giyai i manga mbatabataa a kiyababadan ki Isaw a so manga ngaran iran na aya

inipamameto ko manga darpa a kibabalingan iran: Timnas, Albah, Hitit,
41 Oholibamah, Ilah, Pinon,
42 Kinas, Timan, Mibsar,
43 Magdiyal ago Iram. Giyanan den i manga ngaran o manga mbatabataa a kiyababadan
ki Idom (sekaniyan si Isaw a apoapoan o manga Idomiyan) a kibabaling ko manga darpa
iran sii ko inged a matatangan iran.
MAKSOD 37
So manga Taginepen i Yosop
Si peman si Yakob na mababaling sekaniyan sii sa Kanaan a aya inged a kiyabalingan o

ama iyan.
2 Giyai i totolan ki Yakob ago so pamiliya niyan:
Si Yosop na mimamangoda den a mama ka miyakasapolo ago pito ragon a idad iyan.
Petegikoren iyan so manga pangangayamen a ped iyan na so manga pagari niyan a manga
wata i Bilhah ago si Silpah a manga karoma o ama iyan. Na aden a minipenon i Yosop a
marata ko ama iyan makapantag ko manga pagari niyan.
3 Si Israil na tanto niyan a pekebabayaan si Yosop a di so apiya antawaa ko ped a manga

wata iyan sabap sa inimbawata sekaniyan ko kiyalokes iyan; na inimbaal iyan sa mapiya i
paras a pitibarangan i warna a kimon.
4 Kagiya mailay o manga pagari niyan a pekebabayaan o ama iran si Yosop a di so apiya
antawaa kiran na inikagowad iran si Yosop na kena pen o ba marinaw a di iran on dii
kimbitiyarain.
5 Miyakaisa a gawii na miteginep si Yosop, na kagiya panotolen iyan ai ko manga pagari

niyan na baden minisayo a kipekegowaden iran on.
6 Pitero iyan kiran a "Pamakinega niyo angkai a pitetaginep aken:
7 Pembekes tano sa pinggagarab a ilaw sii ko dii mbabasokan. Minitekaw baden a
mimbangon ago tominindeg so miyabekes aken, na linibet ai o manga bekes iyo na
miyamanodiyod siran on."
8 Pitero on o manga pagari niyan a "Kesolotan ka bes ago kapendatoan kami ngka?" Na
kiyalonsanan baden a kipekegowaden iran on sabap ko taginepen iyan ago so pitero iyan
kiran.
9 Oriyan iyan na miteginep peman si Yosop na piyanotol iyan ai peman ko manga pagari
niyan. "Pamakinega niyo," a tig iyan. "Aden peman a taginepen aken, na pitetaginep
aken a so alongan, so olan ago so sapolo ago isa a manga
bitoon na palaya raken pepemanodiyod."
10 Piyanotol iyan mambo ko ama iyan, na pimbongetan sekaniyan o ama iyan a tig iyan a
"Antonaa angkanan a miyatetaginep ka? Makapengadap reka bes si ina a ka ago saken
taman ko manga pagari ngka ago pemanodiyod reka pen?"
11 Na palaya on den rominiit so manga pagari niyan, ogaid na baden tatanodi o ama iyan
angkoto a taginepen.
Pipesa si Yosop o manga Pagari niyan
12 Lomiyalakaw so manga pagari i Yosop ka pakapenateben iran so manga

pangangayamen o ama iran ko marani sa Sikim.
13 Miyakaisa a gawii na pitero i Israil ki Yosop a "Katawan ka den a dii pakapanateben o
manga kaka ngka so manga talon sii sa Sikim. Na, paninimo ka, ka sogoon ko seka
kiran."
"Oway," a tig iyan.
14 Na pitero on o ama iyan a "Song ka roo na go ngka ilaya o mapiya so kapakambebetad

o manga pagari ngka ago so manga pangangayamen, na go ka baling kaan ka raken
matero." Na piyakaganat o ama iyan si Yosop sii sa Balintad a Hibron.
Kagiya makaoma si Yosop sa Sikim na
15 Pepegenebeneb sekaniyan sii ko pepenateban na miyailay o isa a mama. Na inisean o
mama a "Antonaa i di ngka dii nggilobaan?"
16 Tig iyan a "Di aken dii nggilobaan so manga pagari aken. Ba ngka raken di mapetero
o anda iran dii pakapanateba so manga pangangayamen iran?"
17 “Miyakaawa siran sii den," a inisembag on o mama. "Miyaneg aken kiran a tig iran a
'Somong tano sa Dotan.' "
Mandiyadi na siyono i Yosop so manga pagari niyan na miyaoma niyan siran sii sa
Dotan.
18 Ogaid na mawatan sekaniyan pen na miyalangkaw iran den. Na sa da niyan kiran pen
kapakaoma na miyapamikir iran a kambonoa iran on.
19 “Pekaoma sii bes angkoto a mapasang i katetaginep!" a tig man ai o oman i isa ko ped
iyan.
20 “Na, ba tano baden bonoa, na ologen tano so lawas iyan sii ko isa sangkai a manga
paridi; ka aya teroon tano na kiyan sekaniyan o maila a binatang. Oriyan oto na mailay
tano o antonaa i keondasan o manga taginepen iyan!"
21 Miyaneg ai i Robin na pisebenaran iyan a kapakalidasa niyan ki Yosop ko kambonoa

iran on. "Di tano bonoon," a tig iyan.
22 Di niyo pekatogaa so rogo iyan. Ologa niyo sekaniyan baden sangkai a paridi sii
sangkai a mitataog a kaden, ogaid na di niyo pekasakiti." Pitero oto i Robin kaan iyan
mapakalidas si Yosop ko penggolaolaan iran on ago mibaling iyan ko ama iyan.
23 Kagiya makaoma si Yosop ko manga pagari niyan na likas iran on so pitibarangan i

warna a kimon iyan a masosolot iyan
24 Na taros a giyander iran na inolog iran ko paridi a kaatiyan.
25 Na kagiya kioontod siran a di siran dii kekan na miyalangkaw iran so sesagorompong

a manga padagang a manga mbawataan o Ismail a makapopoon sa Giliyad a pepekaantap
siran sa Misir. So manga onta iran na kikarororanan sa manga palapa, ikekamotan ago
doka a pegowiten iran sa Misir.
26 Na pitero i Yodah ko manga pagari niyan a "Antonaa i kelaba tano o bonoa tano so ari
tano ago pagmaan tano so kiyapatay niyan?
27 Tomo a ba tano sekaniyan baden pesaa sangkoto a manga Ismail. Di tano pakasakitan
ka mataan a pagari tano sekaniyan ago isaisa a rogo tano." Na miyayon on so manga
pagari niyan.
28 Mandiyadi na kagiya somagad kiran so manga padagang a taw sa Midiyan na inigakap

o magariyari si Yosop ko paridi na pipesa iran sa dowa polo a pelata a pirak ko manga
Ismail; na inowit iran sekaniyan sa Misir.
29 Kagiya komasoy si Robin ko paridi ago miyailay niyan a da roo den si Yosop na kinisi
iyan so nditaren iyan ka tanto a mikerata a ginawa niyan.
30 Tomiyapi sekaniyan peman ko manga pagari niyan na tig iyan a "Da roo so wata!
Antonaa i sowaan ko?"
31 Mandiyadi na kinowa iran so kimon i Yosop na taros a siyombali siran sa kambing.

Inisomek iran so kimon ko rogo o kambing
32 Na inowit iran ko ama iran. Na pitero iran on a "Miyatoon ami ai. Ilaya ngka piyapiya
o ba giyai so kimon o wata a ka."
33 Miyakilala niyan na pitero iyan a "Giyai so kimon o wata aken. Miyapatay sekaniyan
a maila a binatang. Matamataan a miyasekisi si Yosop!"
34 Na kinisi i Yakob so nditaren iyan na minditar sa sako; na inimboko iyan so wata iyan
sa miyatey a alongan.
35 Miyamakaoma on so langon a manga wata iyan a mama ago babay ka teyoan iran
sekaniyan ogaid na da kiran pakitayo. Pitero iyan a "Ipemboko aken so wata aken taman
ko kitapi aken rekaniyan sii ko darpa o miyamatay." Na ipesegad iyan den si Yosop.
36 Si peman si Yosop na pipesa o manga taw sa Midiyan ki Potipar roo sa Misir a isa
sekaniyan ko sanasanaan o solotan sa Misir. Sekaniyan i kapitan o manga gordiya ko
torogan o solotan.
MAKSOD 38
Si Yodah ago si Tamar
Sangkoto a manga gawii na giyanatan i Yodah so manga pagari niyan na komiyaden ko

mama a aya ngaran iyan na si Hirah sii sa siti a Adolam.
2 Roo minitoona i Yodah so wata a babay o Ikanaanen a mama a aya ngaran iyan na
Sowas, na piyangaroma niyan angkoto a babay.
3 Miyaogat sekaniyan na mimbawata sa mama, na bitowan iyan sa Ir.
4 Miyaogat peman na mimbawata sa mama, na bitowan iyan sa Onan.
5 Mimbawata sekaniyan peroman sa isa pen a wata a mama na bitowan iyan sa Silah. So
kinimbawataan iyan on na sii siran kapapantagi sa Kidsib.
6 Piyakapangaroma i Yodah so kaka a wata iyan a si Ir, na aya ngaran o babay a

miyapangaroma niyan na si Tamar.
7 Ogaid na marata i olaola si Ir ago da on masoat so Allah. Sabap roo na biyono
sekaniyan o Allah.
8 Mandiyadi na pitero i Yodah ki Onan a "Pangaromaa ngka so bitowanen a karoma o

pagari ngka na nggolalanen ka on so ipapaliyogat reka ko kaiipagi ngka on a giya
kipembawataan iyo ko mibilang a manga wata o pagari ngka."
9 Ogaid na katawan i Onan a so manga wata a ipembawata iyan na kena a ba niyan rek.
Sabap roo na oman iyan rembangen so karoma o pagari niyan na pegododen iyan so biga
iyan ko lopa kaan di pembabawata sa kibilang a kiyababadan ko pagari niyan.
10 Na da kasoaten o Allah so pinggolaola niyan, na sabap sii na biyono iyan sekaniyan
mambo.
11 Oriyan iyan na pitero i Yodah ko miyakamong on a babay a si Tamar a "Roo ka kaden

a lagid o bitowanen ko walay o ama a ka taman sa di pen kapakala o wata aken a mama a
si Silah." Pitero iyan ai ka pekelek sekaniyan o ba pen matay si Silah a datar o manga
kaka niyan. Mandiyadi na somiyong si Tamar ko walay o ama iyan na ron miyaling.
12 Kagiya den a matey na miyatay so karoma i Yodah a so wata i Sowas. Kagiya

mapopos so kiyanggawiini ko karoma niyan na somiyong si Yodah sa Timnah a roo
pepangopawan so manga bilibili niyan, na miyonot on so ginawai niyan a si Hirah a taw
sa Adolam.
13 Na miyatero ki Tamar a "So panogangan ka na pesong sa Timnah ka pekipangopawan

iyan so manga bilibili niyan."
14 So den so kiyanega niyan sii na siyambian iyan so nditaren a balo a sosoloten iyan na
miselimomot sekaniyan kaan di kekilala, na miyontod ko ipesoled ko maito a inged a
Inaim sii ko lalan a ipesong sa Timnah. Ka katawan iyan a apiya pen miyakala den si
Silah na da sekaniyan on pakipangaromaan.
15 Kagiya mailay sekaniyan i Yodah na aya katao niyan on na ba sondal, ka sasapengan

iyan a paras iyan.
16 Da niyan makilala a sekaniyan so miyakamong on a babay; na sinilayan iyan ko kilid a
lalan na pitero iyan on a "Na, pakirembang ka raken."
"Antonaa i imbegay ngka raken sa kapekirembang aken reka?" a iniise iyan on.
17 “Pakiwitan ko seka sa nati a kambing poon ko talon aken," a tig iyan.

"Ba ako ngka kebegi sa sanda a tegoon aken taman ko kapekiwiten ka on?" a iniise
iyan on.
18 Tig iyan a "Antonaa i imbegay aken reka a sanda?"

"So tanda a ka a rakes o rantay niyan ago giyangkanan a teken ka," a inisembag iyan.
Na inipamegay niyan on ago romimbang sekaniyan on, na miyaogat iyan so babay.
19 Miyaling si Tamar na piyokas iyan so salimomot iyan na siyolot iyan peroman so
nditaren iyan a nditaren a balo.
20 Da oto matey na piyakiwit i Yodah ko ginawai niyan a si Hirah so nati a kambing kaan
iyan maaon ko babay so inisanda iyan on, ogaid na da sekaniyan matoon i Hirah.
21 Inisean iyan so manga mama roo sa Inaim a "Anda so sondal a sisii gowani ko kilid
angkai a lalan?" Tig iran a "Da den a ba sii miyakasong a sondal?"
22 Komiyasoy sekaniyan ki Yodah na pitero iyan on a "Da ko sekaniyan matoon, na

kabasa pen o manga mama sangkoto a inged na da den a ba roo miyakasong a sondal."
23 Tig i Yodah a "Na go den o matatago iyan angkoto a manga nganin, ka matag ta baden
mikela o manga taw roo. Asar a miyatoman aken so pasad ami, ka piyakiwit aken on
angkai a kambing ogaid na da ngka sekaniyan matoon."
24 Kagiya den a mamakatelo olan na miyatero ki Yodah a "Misondal so miyakamong

reka a babay; na minisabap sii a kiyaogat iyan imanto."
Tig i Yodah a "Liyon iyo sekaniyan na go niyo pakitotongen!"
25 Na sii ko kipeliyon iran on na piyakiwit iyan ko panogangan iyan so inisanda iyan on,
na piyakitero iyan on pen a "Miyaogat ako o mama a kirek sangkai a tanda ago so rantay
niyan, ago giyangkai a teken. Na, kilalaa ngka o antawaa i kirek on."
26 Miyakilala i Yodah a rek iyan oto na pitero iyan a "Maontol sekaniyan a di saken, ka
miyakasela ako ko da ko rekaniyan kapakipangaromaan ko wata aken a Silah." Na da on
den rembang peroman si Yodah.
27 Kagiya maoma den so kapembawata i Tamar na kiyatokawan a dowa so ipembawata

iyan.
28 Sii ko kapembalilita on na lominiyo so lima o isa on. Kiyapetan o panday na
tiyambedan iyan sa mariga a tanor, na pitero iyan a "Giyai i paganay a miyakaliyo."
29 Ogaid na giyamit baden o wata a lima niyan na so pagari niyan i miyaona a
inimbawata. Na pitero o panday a "Giyai bes i kiyapakategel ka lomiyo!" Giyanan i
sabap a kiyabetowi ron sa Piris.
30 Oriyan
iyan na inimbawata so pagari niyan a katatambedan sa mariga a tanor so lima niyan. Na
bitowan sekaniyan sa Sirah.
MAKSOD 39
Si Yosop ago so Karoma i Potipar
Si peman si Yosop na miyawit sa Misir. Si Potipar a Imisiren a isa ko sanasanaan o

solotan sa Misir ago kapitan o manga gordiya na piyamasa niyan si Yosop ko manga
Ismail a miyamakawit rekaniyan roo.
2 Lalayon so Allah ki Yosop na miyabaloy sekaniyan a mapiya i bobolos. Mababaling

sekaniyan ko walay o kadnan iyan a Imisiren.
3 Kagiya mailay o kadnan iyan a lalayon on so Allah ago pepakaondasen o Allah sa
mapiya so langon a di niyan dii nggolaolaan
4 Na miyasoat sekaniyan ki Yosop, na biyaloy niyan a aya on pepanalagad. Sekaniyan
pen i piyakakibir i Potipar ko walay niyan ago inisarig iyan on so langon taman a rek iyan.
5 Sabap ki Yosop na ipoon roo den na rarakmatan o Allah so pamiliya o Imisiren a rakes
o langon taman a rek iyan a matatago ko walay niyan ago sii pen ko di niyan dii
nggalebekan.
6 Na sii ko kisasarigen i Potipar ki Yosop ko langon a rek iyan na di niyan den iaawid a
akal so apiya antonaa liyo ron so peken iyan a pangenengken.
Mapiya i arog a lawas si Yosop ago mataid a mama.
7 Da matey na miyabarayat rekaniyan so karoma o kadnan iyan, na pitero iyan on a
"Rembang ka raken."
8 Ogaid na siyangka sekaniyan i Yosop a tig iyan on a "Ilaya ngka man, ka so kadnan
aken na di niyan den iaawid a akal so apiya antonaa sii ko walay niyan kagiya sisii ako.
Piyakakibir ako niyan ko langon taman iyan.
9 Tingki kami sa gees sangkai a walay. Da den a ba raken inisapar o kadnan aken a
makaliyoliyo reka sabap sa karoma ka niyan. Di kepakay o ba ko nggolaolaa angkai a
tanto a kamarataan a ikedosa ko ko Tohan."
10 Na apiya gawii gawii a kapendolona niyan ki Yosop na pesengka den si Yosop o ba on
rembang o di na apiya so kipagepedaan iyan on.
11 Miyakaisa a gawii na somiyoled si Yosop ko walay ka penggolaolaan iyan so galebek

iyan on, na da den a ba kiyatabowi a talasogoay ko soled o walay.
12 Na sinikem o babay so kimon i Yosop a tig iyan a "Rembang ka raken!" Ogaid na
inibegak iyan baden so kimon iyan ko lima o babay ko kiyapalalagoy niyan sa liyo.
13 Kagiya mailay niyan a inibegak i Yosop sa lima niyan so kimon iyan ago miyalalagoy
sa liyo
14 Na piyananalowan iyan so manga talasogoay na pitero iyan kiran a "Ilaya niyo, ka
miyawit sii angkai a Hibriyo kaan tano niyan mapakaito! Somiyoled sekaniyan ko
rowang aken ka perembangen ako niyan, ogaid na kominisek ako sa matanog.
15 Kagiya maneg iyan a kominisek ako na miyalalagoy sekaniyan sa liyo na minibegak
iyan raken angkai a kimon iyan."
16 Na tatagoon iyan den ko obay niyan so kimon i Yosop taman ko kiyapakaoma i

Potipar.
17 Kagiya makaoma na siyoson iyan on angkai a totol a tig iyan a "Giyangkoto a oripen a
Hibriyo a inowit ka sii na somiyoled ko rowang aken ka pekaitoon ako niyan.
18 Ogaid na so den so kiyakisek aken sa matanog na miyalalagoy sekaniyan sa liyo na
minibegak iyan angkai a kimon iyan ko obay aken."
19 Kagiya maneg o kadnan i Yosop so totol on o karoma niyan ko kiyateroa niyan on sa

"Giyai den i inikidia raken o oripen ka," na tanto sekaniyan a kiyararangitan.
20 Na piyakidakep iyan si Yosop na taros a kiyalaboso niyan sii ko pengalabosowan o
solotan.
Ogaid na sii sangkoto a kakakalaboso i Yosop
21 Na lalayon rekaniyan pen so Allah. Inogopan iyan si Yosop ka piyakikalimo iyan ko
sanasanaan ko kalaboso.
22 Piyakikibir o sanasanaan ki Yosop so langon a makakalaboso, na sekaniyan pen i
pepemaapaar ko langon a dii nggolaolaan roo.
23 Di den pesegipaan o sanasanaan so apiya antonaa a kikibiren i Yosop, ka lalayon on so
Allah ago pepakaondasen iyan sa mapiya so langon a di niyan dii nggolaolaan.
MAKSOD 40
So Pangengenat sa Arak ago so Pangengembaal sa Paan
Da peman matey na so pangengenat sa arak o solotan sa Misir ago so maporo o manga

pangengembaal iyan sa paan na miyakasela siran ko solotan.
2 Kiyararangitan o solotan angkai a dowa kataw a manga sanasanaan iyan,
3 Na giyoto a piyakikalaboso niyan siran ko walay o kapitan o manga gordiya a ron
mambo kakalabosowa si Yosop.
4 Na so kapitan na initoro iyan si Yosop a makapenalagad kiran; na malo miyatey a
kakakalaboso iran roo.
5 Miyakaisa a gawii na so pangengenat sa arak o solotan sa Misir ago so pangengembaal

sa paan a miyanga kakalaboso na palaya siran mitetaginep. Na oman i taginepen iran na
aden a maana niyan.
6 Kagiya mapita a miyakaoma kiran si Yosop na miyailay niyan a mararata a ginawa iran.
7 Mandiyadi na inisean iyan angkoto a manga sanasanaan o solotan a tig iyan a "Ino
makaririmeng a manga paras iyo imanto?"
8 “So oman i isa rekami na aden a taginepen iyan," a tig iran, "ogaid na da a ba on rekami
pekabaton sa maana."
Na pitero kiran i Yosop a "Ba kena a rek o Tohan so dii kapemaanai ko manga
taginepen? Panotola niyo raken so manga taginepen iyo."
9 Na so pangengenat sa arak na piyanotol iyan ki Yosop so taginepen iyan. "Sii ko

taginepen aken," a tig iyan, "na aden a miyailay aken ko mapapanempang aken a isa ka
waged a obas
10 A telo timan i sapak. Na so den so kiyapamagombos iyan na miyamagobarobar ago
miyamangonga, na taros a piyanga lolotoan den so manga obas.
11 Samaoto na katatayongan aken so tagayan o solotan; na romiyopo ako ko manga obas
na go piyanemek aken so ig iyan ko tagayan o solotan, na taros a inidawag aken on."
12 “Giyai i maana niyan," a tig i Yosop. "So telo a sapak na telo gawii.
13 Makatelo gawii imanto na pekaliyon ka o solotan ko kalaboso ka pekakasowin ka
niyan ko galebek ka. Na indawag ka ko solotan so tagayan iyan a datar o asal a
kapegenati ngka on sa arak.
14 Ogaid na amay ka mapiya a bobolos ka na tatademi ako ngka. Kapedipedi ka bo na
kalimoon ako ngka na aloya ako ngka ko solotan kaan ako mapakaliyo sangkai a
kalaboso.
15 Ka matag ako miyabiyag sii sa inged o manga Hibriyo, na apiya sii sa Misir na da den
a ba ko pinggolaola a patot a kikalaboso raken."
16 Kagiya maneg o maporo o pangengembaal sa paan a mapiya so inipemaana i Yosop

sangkoto a taginepen na pitero iyan ki Yosop a "Aden mambo a pitetaginep aken: Aden a
maooto aken a telo ka baskit a paan.
17 So maliliyawaw ron a baskit na mapepeno a pitibarangan a paan a pagenetan ko
solotan, ogaid na pepamanokaan ai o manga papanok."
18 “Giyai i maana niyan," a tig i Yosop.

"So telo timan a baskit na telo gawii.
19 Makatelo gawii imanto na pekaliyon ka o solotan ka pekipotolan ka niyan sa olo.
Pekibitin iyan so lawas ka ko kayo na pemanokaan o manga papanok so sapo o ka."
20 Sii ko ikatelo gawii na miyaoma mambo so gawii a kinimbawataan ko solotan, na

pikelilangan iyan so langon a sanasanaan iyan. Piyakaliyo niyan so pangengenat sa arak
ago so maporo o pangengembaal sa paan na piyakapangadap iyan siran ko manga
sanasanaan iyan.
21 Piyakakasoy niyan so pangengenat sa arak ko asal a galebek iyan a kapegenati niyan sa
arak ko solotan.
22 Ogaid na piyakibitin iyan so pangengembaal sa paan a giyoto den i kiyatoman o
inipemaana i Yosop ko manga taginepen iran.
23 Ogaid na so pangengenat sa arak na da niyan den katanodi si Yosop ka kiyalipatan

iyan baden.
MAKSOD 41
So manga Taginepen o Solotan sa Misir
Kagiya maipos so dowa ragon na mitetaginep so solotan: Tomitindeg sekaniyan ko obay

o lawasaig a Nail.
2 Minisarta a aden a penggakap ko lawasaig a pito timan a kaolit a manga sapi a manga
pipiya i kanggolawasan, na piyanateb iran so manga otan ko kilid o lawasaig.
3 Aden a miyakatalondog kiran a minggagakap ko ig a salakaw pen a pito timan a manga
sapi a perarakowagen ago manga rarata i paras, na miyamangobay siran ko ped a manga
sapi ko kilid o lawasaig.
4 Na so perarakowagen a manga sapi na piyangangan iran so pito timan a kaolit a manga
sapi. Samaoto na miyakanaw so solotan.
5 Miyakatorog sekaniyan bo na mitetaginep peroman. Aden a sapoon a kamais a

miyonga sa pito timan a poso a manga lilimegas ago manga pipiya a oniin.
6 Na aden peman a mireretok sangkoto a sapoon a kamais a salakaw pen a pito timan a
poso a manga roroni a miyanga lalanes o ndo a pepekapoon ko disirto.
7 Na so manga roroni a poso na pilalamed iran so pito timan a malimegas a poso a manga
pipiya a oniin. Oriyan iyan na miyakanaw so solotan na kiyatanodan iyan a matag baden
oto taginepen.
8 Kagiya mapita na miniawid oto a akal iyan. Kagiya ka maoto na piyakisogoan iyan so
langon a paririmar ago manga dadalem i istihad a taw sii sa Misir. Piyanotol kiran o
solotan so manga taginepen iyan, ogaid na da a ba kiran on pekabaton sa maana.
9 Oriyan iyan na pitero o pangengenat sa arak ko solotan a "Imanto a gawii na

kiyatademan aken so sala aken.
10 Isako kararangitan kami ngka, solotan, ago so maporo o pangengembaal sa paan na
piyakikalaboso kami ngka sii ko walay o kapitan o manga gordiya.
11 Miyakaisa a gawii na mitetaginep so oman i isa rekami, na oman i taginepen ami na
aden a maana niyan.
12 Samaoto na aden a ped ami roo a mangoda a Hibriyo a talasogoay o kapitan o gordiya.
Piyanotol ami ron so manga taginepen ami na go pimaanaan iyan rekami. Piyamatonan
iyan sa maana so oman i taginepen ami.
13 Na so inipemaana niyan on rekami na aya den miyanggolaola: piyakakasoy ako ngka
ko galebek aken ago piyakibitin ka so ped aken."
14 So den so kiyanega roo o solotan na piyakisogoan iyan si Yosop, na piyakaliyo iran

sekaniyan nggagaan ko kalaboso. Kagiya makapamarbas ago makasambi sa nditaren na
miyangadap sekaniyan ko solotan.
15 Pitero o solotan ki Yosop a "Aden a miyateginep aken na da a ba on makapemaana.

Ogaid na miyatero raken so makapantag reka a o panotoli ka kon sa taginepen na
kapemaanaan ka."
16 “Di aken anan kegaga," a tig i Yosop ko solotan, "ogaid na so Tohan i mbegay reka ko
kabaya a ka a kapemaanai ko taginepen ka."
17 Na pitero o solotan ki Yosop a "Pitetaginep aken a tomitindeg ako ko kilid o lawasaig

a Nail.
18 Minisarta a aden a penggakap ko lawasaig a pito timan a kaolit a manga sapi a manga
pipiya i kanggolawasan. Na piyanateb iran so manga otan ko kilid o lawasaig.
19 Na aden a miyakatalondog kiran a minggagakap a salakaw pen a pito timan a sapi a
pekeraraparapay, perarakowagen ago manga rarata i paras a di so apiya antonaa a manga
sapi a miyanga iilay aken sii sa dalem a Misir.
20 Na so perarakowagen ago manga rarata i paras a sapi na piyangangan iran so pito
timan a kaolit a manga sapi a miyaona gomakap.
21 Ogaid na sii ko oriyan o kiyapangangana iran on na di kiran kesarino o ba iran
miyapangangan, ka da den maalin so karata iran i paras. Sa masa oto na miyakanaw ako.
22 “Ogaid na mitetaginep ako peroman, na miyakailay ako sa sapoon a kamais a miyonga

sa pito timan a poso a manga lilimegas ago manga pipiya a oniin.
23 Na aden peman a mireretok sangkoto a sapoon a kamais a salakaw pen a pito timan a
poso a manga roroni ago miyamangipes a miyanga lalanes o ndo a pepekapoon ko disirto.
24 Na so manga roroni a poso na pilalamed iran so pito timan a malimegas a poso.
Piyanotol aken ai ko manga paririmar, ogaid na da a ba kiran raken on makapemaana."
25 Mandiyadi na pitero i Yosop ko solotan a "So dowa a taginepen ka na ndatar sa

maana. Piyayag reka o Tohan so magaan iyan den nggolaolaan.
26 So pito timan a manga pipiya a sapi na giyoto na pito ragon; ago so pito timan a
manga pipiya a poso a kamais na pito ragon mambo. So dowa a taginepen na isaisa bo sa
maana.
27 So pito timan peman a perakowagen a marata i paras a manga sapi a miyakatalondog
kiran gomakap ago so pen so pito timan a poso a kamais a manga roroni a miyanga
lalanes o ndo a pepekapoon ko disirto na giyoto na pito ragon a taon.
28 “Benar den so miyatero aken reka: piyayag reka o Tohan so magaan iyan den
nggolaolaan.
29 Aden a pekatalingoma a pito ragon a kapagodara ko dalem a Misir.
30 Ogaid na pekatalondog on so pito ragon a taon, na so langon a manga ragon a oodaren
na kelipatan, ka so dalem a inged na kelaslas a taon.
31 Di den ketademan so kiyaodara ko inged sabap ko taon a pekatalondog on ka tanto a
maregen.
32 Na aya sabap a kiyasoson o taginepen ka na kagiya miyatakdir den o Tohan angkai a
kesowasowa, na itelingoma niyan den sa magaan.
33 “Aya mapiya imanto, solotan, na pamamili ka sa somasabot ago mapiya i pamikiran a

mama a aya ngka mapakapetendingan ko inged a Misir.
34 Na toro ka mambo sa manga taw a pekakibir ko inged a pemanekat siran ko ikalimo
bagi ko keragon sii sa Misir ko soled o pito ragon a kapagodara on.
35 Sogoon ka kiran so kapanimoa iran ko langon a pereperan sangkai a pekatalingoma a
manga pipiya a ragon, na begi ngka siran sa kapaar sa kapanaliyonga iran on sii ko manga
siti ago so kapagipata iran on.
36 Giyangkoto a pangenengken na ipetelagad ko inged kaan di kekowa a ongos sii ko
soled o pito ragon a taon a pekatalingoma."
37 Na miyapikir o solotan ago so langon a sanasanaan iyan a mapiya angkai a antangan.

38 Mandiyadi na pitero kiran o solotan a "Makatoon tano mangaday sa apiya antawaa a
datar angkai a mama a sasartaan o Roh o Tohan?"
39 Giyoto a pitero o solotan ki Yosop a "Sabap sa piyakitokawan reka ini langon o Tohan
na da den a ba salakaw a datar ka a somasabot ago mapiya i pamikiran.
40 Seka i makapetendingan ko ndatoan aken, na makipembayabaya reka so langon o
manga pagtaw aken. Aya bo a kaoona ko reka sa kapaar sangkai a inged na so di ron dii
kandatoi."
Piyakitandingan ki Yosop so Inged a Misir

41 Pitero pen o solotan ki Yosop a "Pakipetendingan aken reka imanto a dalem a inged a
Misir."
42 Na giyoto a piyokas o solotan ko kemer iyan so sising iyan a ipesiliyo ko kadato na
piyakisising iyan ki Yosop, na go siyolotan iyan si Yosop sa sida a kimon ago piyakaselay
niyan pen sa salay a bolawan.
43 Piyakapagda iyan pen ko karo o mala i kadato a maoonaan iyan so manga mama a
ipelalalis iran a "Pakaokita niyo!" Giyanan den i kiyapakitendingana on o solotan ki
Yosop ko dalem a Misir.
44 Na pitero peman o solotan ki Yosop a "Saken so solotan, ogaid na sii sangkai a dalem
a Misir na da den a sakataw bo a ba niyan kibayaw a lima niyan o di na giya ai niyan
taman sa di ka niyan kaodasi."
45 Na bitowan o solotan si Yosop sa ngaran a Sapinat Paniyas; na piyakipangaroma niyan
on si Asinat a wata i Potipiras a aya imam sa siti a Hiliyopolis. Na lomiyangkap so
bantogan i Yosop ko inged a Misir.
46 Miyakatelo polo ragon a idad i Yosop ko kiyabaloy niyan a sanasanaan o solotan sa

Misir. Na giyanatan i Yosop so torogan o solotan na piyagenebeneb iyan a dalem a Misir.
47 Sii ko soled o pito ragon a kaoodara ko lopa na tanto a mala a miyaragon on.
48 Sii sangkoto a manga ragon na piyanimo i Yosop so langon a pereperan a miyanga
raragon on, na piyanaliyong iyan ai sii ko manga siti. Sii ko oman i siti na ron iyan
pepenaliyonga so pekeragon ko dii mbabasokan a melilibeta on.
49 Tanto a madakel a pereperan a miyataliyong i Yosop ka datar o peted sa ragat, na
ginekan iyan somorat so kadakel iyan ka di den kegaga magasad.
50 Sa da pen kapakaoma o manga ragon a taon na aden a dowa kataw a wata i Yosop a
manga mama a inimbawata i Asinat a wata i Potipiras a imam sa Hiliyopolis.
51 Bitowan i Yosop so kaka a wata iyan sa Manasih, ka tig iyan a "Piyakilipatan raken o
Tohan so langon a karomasayan aken ago so langon o pamiliya o ama aken."
52 So ikadowa a wata iyan na bitowan iyan sa Ipraim, ka tig iyan a "Bigan ako o Tohan sa
manga wata sii ko inged a kiyaregenan ako ron.
53 Miyapopos so pito ragon a kaoodara sa Misir

54 Na mipoon den so pito ragon a taon a aya den kinitoman o miyatero i Yosop. Tiyaon
den so langon a ped a inged, ogaid na so dalem a Misir na aden pen a pangenengken on.
55 Kagiya makagedam sa ongos so langon a taw sa Misir na gomiyoraok siran ko solotan
sa pangenengken. Na pitero o solotan ko langon a Imisiren a "Song kano ki Yosop na
nggolaolaa niyo so mapetero iyan rekano."
56 Kagiya tanto a makaregen so taon ago lomiyangkap pen ko dalem a Misir na

piyakipelelekaan i Yosop so manga taliyong na pipepasa niyan so pangenengken ko
manga Imisiren.
57 Na miyamakaoma sa Misir so manga taw a poon ko langon a ped a inged ka
pemamasa siran sa pereperan ki Yosop, ka tetanto so taon ko mbalabala sa doniya.
MAKSOD 42
Somiyong sa Misir so manga Pagari i Yosop
Mandiyadi na kagiya katokawan i Yakob a aden a pereperan sa Misir na pitero iyan ko

manga wata iyan a mama a "Ino kano baden dii tetentenga?
2 Miyaneg aken a aden kon a pereperan roo sa Misir. Na, song kano roo na go kano ron
pamasa sa makan tano kaan tano di pematay."
3 Kagiya ka maoto na gomiyanat so sapolo kataw a manga kaka i Yosop ka song sa Misir
ka pemasa siran on sa pereperan.
4 Ogaid na da kiran pakaonota i Yakob si Baniyamin ka ipekewan iyan o ba aden a
makakaid ko wata iyan.
5 Na maaped so manga wata i Israil ko ped a manga taw a pemanong mambo sa Misir a
pemamasa sa pereperan, ka tiyaon mambo a inged a Kanaan.
6 Samaoto na si Yosop na aya den gobirnador sii sa Misir, na sekaniyan i dii pesa sa
pereperan ko langon o manga taw ko inged. Na kagiya makaoma roo so manga pagari
niyan na miyamanodiyod siran ko hadapan iyan.
7 So den so kiyailaya i Yosop ko manga kaka niyan na miyakilala niyan siran, ogaid na
omamanti na di niyan siran katawan, ka piyamasong iyan siran baden. "Anda kano
poon?" a iniise iyan kiran.
"Miyakapoon kami sa inged a Kanaan," a tig iran, "ka pemasa kami sa pangenengken."
8 Apiya pen pekekilala i Yosop so manga kaka niyan na da iran sekaniyan makilala.
9 Na giyoto a kiyatademan iyan so miyanga tetaginep iyan makapantag kiran, na piterro
iyan kiran a "Manga manonoriman kano! Aya inisong iyo sii na pagilain iyo o anda i di
malilinding ko inged ami."
10 Pitero iran on a "Kena, kadnan ami. Ka aya inisong ami sii a manga oripen ka na
pemasa kami sa pangenengken.
11 Sekami langon na isaisa bo a ama ami. Kena a ba kami manga manonoriman, kadnan,
ka maontol kami a manga mama."
12 “Pamerak!" a tig iyan kiran. "Somiyong kano sii ka pagilain iyo o anda i di
malilinding ko inged ami."
13 Na pitero iran a "Sekami a manga oripen ka na manga wata kami o sakataw a mama a
mababaling sa Kanaan, na sapolo ago dowa kami a magariyari. So isa ko pagari ami na
miyada, na so ariyari na sisii ko ama ami imanto."
14 Pitero kiran i Yosop a "Benar den so pitero aken rekano a manga manonoriman kano!
15 Na giyai i katepengi rekano: Pesepa ako sii ko ingaran o solotan a di kano sii pekaawa
taman sa di sii makasong so ariyari rekano!
16 Sogoa niyo so isa rekano a marapit iyan so pagari niyo. So ped rekano na
pengalaboson kaan katepengi so di niyo dii teroon o ba benar ago so di. O di benar na
pemataan ako sii ko ingaran o solotan sa manga manonoriman kano!"
17 Na piyangalaboso niyan siran langon sa miyakatelo gawii.
18 Sii ko ikatelo gawii na pitero kiran i Yosop a "Kagiya maaleken ako ko Tohan na
makapegoyag kano o nggolaolaa niyo ai:
19 O mataan a manga oontol kano na begaken iyo so isa ko pagari niyo sii sa kalaboso, na
so ped rekano na balingen iyo den so pereperan sii ko tataonen a manga pamiliya niyo.
20 Ogaid na disomala a mawit iyo raken sii sa ariyari rekano kaan maamad o benar so di
niyo dii teroon ago di aken sekano mapakibono."
Na inayonan iran a penggolaolaan iran ai.
21 Na pitero iran ko oman i isa kiran a "Matamataan a ipendaneg rektano so pagari tano,
ka miyailay tano so kiyakerata a ginawa niyan isako pengangampedian rektano, ogaid na
da tano pakinega. Giyanan i kinitalingoma rektano angkai a maregen."
22 Na pitero kiran i Robin a "Ba ko rekano da matero a di niyo pemaratai sekaniyan?

Ogaid na da ako niyo pakinega! Na itena rektano den imanto so kiyapatay niyan."
23 Siyabot i Yosop so di iran dii teroon, ogaid na di iran ai katawan, ka aden a di kiran dii
makasinabota.
24 Na tiyalikodan siran i Yosop na taros a miyakasegad. Ogaid na somiyangor bo ago
miyakimbitiyarai kiran peman, na inisibay niyan kiran si Simiyon na piyatong iyan ko
hadapan iran.
Komiyasoy so manga Pagari i Yosop sa Kanaan
25 Mandiyadi na somiyogo si Yosop sa pamenoon a pereperan so manga sako iran ago

tegoon so pirak o oman i isa kiran ko sako iyan, ago mbegan siran pen sa mapeloto iran
ko kapelalakaw iran. Kagiya manggolaola kiran oto
26 Na pirororan iran so manga pereperan iran sii ko manga kimar iran na gomiyanat siran
den.
27 Sii ko darpa a dikean iran ko kagagawii na bikar o isa kiran so sako iyan ka kowa on
sa pekikan iyan ko kimar. Sarta a miyailay niyan so pirak iyan a matatago ko ngari o
sako,
28 Na pitero iyan ko manga pagari niyan a "Inikasoy raken so pirak aken! Katii, sii ko
sako aken!"
Na tanto a minikiyab so manga poso iran na miyamagisei siran a pepenanabaden a tig
iran a "Antonaa bes angkai a inikidia rektano o Tohan?"
29 Kagiya makaoma siran ki Yakob a ama iran sii sa Kanaan na piyanotol iran on so
langon a kiyasagadan iran. Pitero iran a
30 “So mama a aya tetandingan ko inged na pirangitan kami niyan, na sinditan kami
niyan pen sa pepanoriman kami kon ko inged.
31 Ogaid na aya pitero ami ron na 'Maontol kami a manga mama; kena a ba kami manga
manonoriman.
32 Sapolo kami ago dowa a magariyari a sasatiman i ama. So isa rekami na miyada, ago
so ariyari rekami na sisii imanto ko ama ami sa Kanaan.'
33 “Na giyoto a pitero rekami o mama a 'Giyai i kakeamada ko o benar a manga oontol
kano: Begaken iyo raken so isa a pagari niyo, na balingen iyo so pereperan ko tataonen a
manga pamiliya niyo.
34 Ogaid na wita niyo raken sii so ariyari rekano kaan aken matangked a kena a ba kano
manga manonoriman ka benar a manga oontol kano. Amay ka magiyanan na ikesoy aken
rekano so pagari niyo na makapengongoyagan kano sii sangkai a inged.' ”
35 Na sii ko kapengowai ran sa tago ko manga sako iran na miyatoon o oman i isa kiran
so oyot iyan a katatagoan sa pirak iyan! Kagiya mailay iran ago so ama iran so pirak na
palaya siran miyanga alek.
36 Na pitero kiran o ama iran a "Kinowaan ako niyo sa manga wata! Miyada den si
Yosop na miyada pen si Simiyon, na imanto na kebayaan iyo pen komowa si Baniyamin.
Saken i mararasay ko langon taman ai!"
37 Na pitero i Robin ko ama iyan a "O di aken reka mikasoy si Baniyamin na pekibono
aken reka so dowa kataw a wata aken a mama. Sarigen ka sekaniyan raken, ka ikesoy
aken reka."
38 Ogaid na tig i Yakob a "Di rekano roo pekaonot so wata aken, ka miyatay so pagari
niyan na sekaniyan bo i miyalamba. O aden a makakaid on ko kapelalakaw niyo roo na
tibaba a pekiwit ako niyo ko darpa o miyamatay a mararata a ginawa ko, ka miyalokes
ako den man."
MAKSOD 43
So Ikadowa a Kiyalalakaw sa Misir
Tetanto pen so taon sii sa Kanaan,

2 Na kagiya malengan iran koman so pereperan a miyawit iran a poon sa Misir na pitero
kiran o ama iran a "Kasoy kano na go kano bo pamasa sa maito a makan tano."
3 Ogaid na pitero on i Yodah a "Inipemataan rekami o mama a di kami rekaniyan den

makapengadap o di ami ped so ari ami.
4 O pakaonota ngka rekami so ari ami na song kami roo na go ipemasa mi seka sa
pangenengken.
5 Ogaid na o di ngka pekaonota na di kami roo den song, ka pitero o mama a di kami ron
den makapengadap o di ami ped so ari ami."
6 Na iniise i Israil a "Ino ako niyo pemaratai ko kiyateroa niyo ko mama sa aden pen a ari
rekano?"
7 Tig iran a "Piyangingisean kami piyapiya o mama makapantag sa ginawa mi ago so

pamiliya tano. 'Ba oyagoyag pen so ama iyo?' a iniise iyan rekami. 'Ba aden pen a ped a
pagari niyo?' Na simbag ami baden so manga pakaise iyan. Ba ami katawi o ba aya
peteroa niyan rekami na 'Wita niyo sii so pagari niyo'?"
8 Na pitero i Yodah ko ama iyan a Israil a "Pakaonota ngka raken so ari ami, ka somong
kami roo somambot kaan tano di pematay a ongos ago so manga wata ami.
9 Isenda aken rekaniyan a ginawa ko na sii ngka raken sekaniyan kiise. O di aken
sekaniyan sii mikasoy a mapakapangadap aken reka na kioba a ka raken ai sa taman sa
kapetay aken.
10 Opama ka da tano misendod so kasong ami roo na miyakadowa kami roo den ai
makasorombaling."
11 Na pitero kiran o ama iran a Israil a "O di anan mipesomala na nggolaolaa niyo ai:
Panagoi niyo so manga sako iyo ko lebi a manga pipiya a baden dii pamangeto ko lopa na
wita niyo a pamemegayan sangkoto a mama, a so maito a doka, maito a gola a batiyokan,
manga palapa, manga ikekamotan ago manga onga a kayo a pistasiyo ago almondo.
12 Takepa niyo so kadakel o pirak a pagawidan iyo kaan iyo mikasoy so pirak a
miyapanago ko ngari o manga sako iyo, ka baanda oto ribat.
13 Pakaonota niyo pen so ari niyo na kasoy kano somambot sangkoto a mama.
14 Pengnin ko a ikelimo kano o Tohan a Lebi a Mabager amay ka makapengadap kano ko
mama kaan iyan rekano mapakaonot so ped a pagari niyo ago si Baniyamin ko
kapembaling iyo. So saken on na o bagian aken a kakedai raken sa manga wata na
kedaan ako bo sa manga wata."
15 Mandiyadi na inawidan o magariyari so pamemegayan ago so dowa takep a pirak na

gomiyanat siran, na somiyong siran sa Misir a ped iran si Baniyamin. Kagiya
mamakaoma roo na miyangadap siran den ki Yosop.
16 Na kagiya mailay i Yosop si Baniyamin a ped iran na pitero iyan ko komikibir ko
walay niyan a "Wita ngka angkai a manga mama sa walay. Sombali ka sa pangangayamen
na tiyagara ngka, ka ipegatoang aken siran amay ka maoto a alongan."
17 Ininggolalan o mama so pitero on i Yosop ka inowit iyan so magariyari ko walay i

Yosop.
18 Sii ko kapegowita kiran ko walay niyan na miyanga aalek siran ka aya mapipikir iran
na "Aya kapagowita rektano roo na so pirak a inipangasoy rektano ko manga sako tano
isako miyaona. Ka senditan tano niyan ago ndakepen kaan tano niyan mapangongoripen
ago maagaw niyan pen so manga kimar tano."
19 Kagiya ka maoto na miyobay siran ko komikibir i Yosop na miyakimbitiyarai siran on

sii ko pintoan o walay.
20 “Hey kadnan," a tig iran, "Isako mona a mamasa kami sii sa perperan
21 Na kagiya makaoma kami ko pendekean ami ko kagagawii na piyamekar ami so
manga sako ami na giyoto a miyatoon on o oman i isa rekami so pirak iyan a da kakorangi
sii ko ngari o sako iyan. Kagiya ka maoto na inawidan ami reka sii peman
22 A rakes o inioman ami ron a pirak a ipemasa mi sa pangenengken. Di ami katawan o
antawaa i miyanago ko pirak ami sii ko manga sako."
23 Tig iyan a "Di niyo aawiden a akal; di kano pekelek. So Tohan iyo, a so Tohan o ama
iyo, na aya rekano migay sa pirak sii ko manga sako iyo. Miyatarima aken den so manga
pirak iyo." Na giyoto a iniliyo niyan kiran si Simiyon.
24 Na piyakabolos o komikibir so magariyari ko walay i Yosop na bigan iyan siran sa ig a

ipagonab ko manga ai ran, ago piyakakan iyan pen so manga kimar iran.
25 Pitiyagar iran so manga pamemegayan a imbegay iran ki Yosop ko kapekaoma niyan
ko kaoto a alongan, ka miyaneg iran a makipegatoang kiran.
26 Kagiya maling si Yosop na piyalad iran on so manga pamemegayan a inisoled iran ko

walay na taros a miyamanodiyod siran ko hadapan iyan.
27 Iniise iyan kiran o mapipiya a ginawa iran ago tig iyan pen a "Mapipiya a ginawa o
miyalokes den a ama iyo a miyatero iyo raken? Ba sekaniyan pen oyagoyag?"
28 Tig iran a "Oyagoyag pen so ama ami a oripen ka ago mapipiya a ginawa niyan." Na
miyamanodiyod siran a aya iran on inipagadat.
29 Inilay i Yosop so pagari niyan a Baniyamin a so wata o tito a ina iyan, na iniise iyan a
"Ba giyai so miyatero iyo a ariyari rekano?" Na go tig iyan on pen a "Ikalimo ka o Tohan,
wata ko!"
30 Giyoto a lominiyo nggagaan si Yosop ka tanto sekaniyan a kiyagagawan ko pagari
niyan ago kesegadan iyan; na somiyoled ko rowang iyan na ron somigad.
31 Kagiya makapanagop sekaniyan na lominiyo kiran a pegrenen iyan a ginawa niyan, na

pitero iyan ko manga talasogoay a "Nata niyo so manga pangenengken."
32 Na inenatan iran si Yosop a sekaniyan bo ko isa a lamisaan, na so peman so manga

pagari niyan na sii ko ped a lamisaan. So pen so manga Imisiren a pemangangan roo a
ped iyan na salakaw mambo a lamisaan a kiyanan iran sabap sa di siran makipegatoang
ko manga Hibriyo ka giyoto na pakasisingay ko manga Imisiren.
33 So manga pagari i Yosop na piyamakaontod ko kasasangoran iyan a
pakatetalondogaan siran ipoon ko kaka na taman ko ari. So kiyainengkaa iran sii na ba
siran den miyakatentenga ka tanto siran a miyamemesa.
34 Sii siran inenatan ko pangenengken a maanat ko lamisaan i Yosop, na so inenat ki
Baniyamin na miyakalima takep ko inenat ko apiya antawaa kiran. Na miyamangangan
ago miyamangondaya siran mamanginom a ped iyan.
MAKSOD 44
So Pirak a Tagayan ko Sako
Ininsaratan i Yosop so komikibir iyan a tig iyan a "Pamenoa ngka a pangenengken so

manga sako iran taman sa makena iran mawid, ago tagoa ngka so pirak o oman i isa a
mama ko ngari o sako iyan.
2 Na tagoa ngka pen so tagayan aken a pirak sii ko ngari o sako o ariyari kiran a rakes o
pirak a inibayad iyan ko perperan." Na ininggolalan iyan so pitero on i Yosop.
3 Kagiya pekaliwanag na miyapakalalakaw so manga mama a ped iran so manga kimar

iran.
4 Kagiya da siran pen tanto makawatan ko siti na pitero i Yosop ko komikibir iyan a
"Salobaa ngka nggagaan angkoto a manga mama, na amay ka raoten ka siran na teroa
ngka kiran a 'Ino niyo mbadali sa marata so mapiya?
5 Ba kena a giyai so tagayan a peginoman o kadnan aken ago di niyan dii perimar?
Marata angkai a pinggolaola niyo!'"
6 Na kagiya raoten siran o komikibir na giyoto den i pitero iyan kiran.

7 Ogaid na simbag iran a tig iran a "Ino pembasaa o kadnan ami angkanan a manga
katero? Mawatan sa ginawa mi a manga oripen ka o ba ami anan nggolaolaa!
8 Apiya so pirak a miyatoon ami ko ngari o manga sako ami na inowit ami sii peman a
poon sa Kanaan ka inikasoy ami reka. Ino ami kapemanekewi sa pirak o di na bolawan
so walay o kadnan ka?
9 Apiya antawaa i katoonan ka on na kebono; na mapengongoripen ka mambo so ped
rekami."
10 “Oway, miyayon ako ko pitero iyo," a tig iyan, "ogaid na so bo so katoonan on i

pembaloy a oripen aken, ka di aken selaan so ped rekano."
11 Mandiyadi na magaan so magaan a kinibabaan o oman i isa kiran ko sako iyan ko lopa
na bikar iyan.
12 Na taros a piyanisik o komikibir so manga sako a poon ko sako o kaka na taman ko
ari, na sii miyatoon so tagayan ko sako i Baniyamin.
13 So kiyagiyoto niyan na piyamangisi iran so manga nditaren iran sa kiyakerata a ginawa
iran. Na piroronan iran so manga kimar iran na komiyasoy siran ko siti.
14 Katatabowan pen si Yosop sa walay kagiya makaoma on si Yodah ago so manga

pagari niyan, na gomipe siran ko hadapan iyan.
15 Pitero kiran i Yosop a "Antonaa bes angkai a pinggolaolaa niyo? Ba niyo di katawi a
so datar aken a mama na peketokawan aken ko kaperimar so di niyo dii nggolaolaan?"
16 “Antonaa i mapetero ami reka, kadnan ko?" a tig i Yodah. "Antonaa i kisembag ami?
Andamanaya i kapakapemataan ami sa da a sala ami? Siyawaan o Tohan so kadostaan
ami na palaya kami ngka den manga oripen imanto, kadnan ko; giya den a ginawa mi ago
so kiyatoonan ko tagayan."
17 Ogaid na tig i Yosop a "Mawatan sa ginawa ko o ba ko anan nggolaolaa! Aya bo a

pembaloy a oripen aken na so bo so kiyatoonan ko tagayan. So ped rekano na baling
kano ko ama iyo sa da a rayorayo a ginawa niyan."
Inipangangampedian i Yodah si Baniyamin

18 Giyoto den a miyobay si Yodah ki Yosop na pitero iyan on a "Kapedipedi ka bo,
kadnan ko, na peroa ngka raken a kapakapangangampedian aken reka. Di ako ngka
kerarangiti a oripen ka, ka tingki kano ago so solotan.
19 Iniise ka rekami, kadnan ko, o ba aden a ama ami o di na isa pen a pagari ami.
20 Na inisembag ami reka a aden a miyalokes a ama ami ago aden pen a ari ami a
inimbawata o ama ami ko kiyalokes iyan. Miyatay den so pagari o ari ami na sekaniyan
bo i miyalamba ko manga wata o ina iyan; na pakatatayaan sekaniyan o ama iyan.
21 “Na pitero o ka rekami a 'Wita niyo raken sii kaan aken mailay.'
22 Pitero ami reka, kadnan ko, a 'Di keawaan o ari ami so ama iyan, ka o awai niyan na
petay so ama iyan.'
23 Ogaid na pitero o ka rekami a 'Taman sa di niyo sii mapakaonot so ari niyo na di kano
raken den makapengadap.'
24 Na kagiya komasoy kami ko ama ami na piyanotol ami ron so pitero o ka.
25 “Kagiya malo matey na pitero o ama ami a 'Kasoy kano na go kano bo pamasa sa
maito a makan tano.'
26 Ogaid na pitero ami ron a 'Di kami pekakasoy. Aya bo a kasong ami roo na o
mapakaonot ami so ari ami, ka di kami makapengadap sangkoto a mama o di ami ped so
ari ami.'
27 “Na so ama ami a oripen ka na pitero iyan rekami a 'Katawan iyo a dowa kataw a wata
a mama a inimbawata raken o karoma ko a si Rakila.
28 So isa on na inawaan ako niyan den, na taman roo na da ko sekaniyan den mailay.
Pitero aken sa ginawa ko a matamataan a miyasekisi sekaniyan o maila a binatang.
29 Na o kowaa niyo raken pen angkai a pagari niyan na go sekaniyan kakaidi na tibaba a
pekiwit ako niyo ko darpa o miyamatay a mararata a ginawa ko, ka miyalokes ako den
man.'
30-31 “Kagiya ka maoto," a tig pen i Yodah, "na amay ka komasoy ako ko ama aken ago
mailay niyan a di ami ped so ari ami na taros den a ipetay niyan ai, ka miiiket so niyawa
niyan ko niyawa angkoto a wata iyan. Na sekami a manga oripen ka na pembabaan ami a
pekiwit ami so miyalokes a ama ami ko darpa o miyamatay a mararata a ginawa niyan.
32 Inisanda aken a ginawa ko ko ari ami sii ko ama aken ko kiyateroa ko ron sa 'O di aken
reka mikasoy na kioba a ka raken ai sa taman sa kapetay aken.'
33 “Kagiya ka maoto, kadnan ko, na kapedipedi ka bo na saken i pakatelimbegaka ngka

sii a mabaloy a oripen ka a misambi ko ari ami, na pakakasoya ngka sekaniyan a ped o
manga pagari niyan.
34 Andamanaya i kapakabaling aken ko ama aken o di aken ped so ari ami? Di aken
keraw milay angkai a morala a pekatana ko ama aken!"
MAKSOD 45
Miyakitokaw si Yosop
Di den keren i Yosop a ginawa niyan sii ko kamamasaan o manga talasogoay niyan, na
inipananalo niyan a "Awai ako niyo langon! Kagiya maipos siran a da den a sakataw
kiran bo a ped i Yosop na miyakikilala sekaniyan ko manga pagari niyan.
2 Miyakagoraok sekaniyan sa matanog taman sa miyaneg o manga Imisiren, na
miyapanotol ai sii ko torogan o solotan.
3 Pitero i Yosop ko manga pagari niyan a "Saken si Yosop! Oyagoyag bes si ama?" So
kiyanega sii o manga pagari niyan na di iran kesembag sa tanto kiran a kiyaleki ko
kapakaaadap iran on.
4 Na pitero kiran i Yosop a "Obay kano raken." Kagiya makaobay siran on na tig iyan a
"Saken so pagari niyo a Yosop a pipesa niyo a mawit sa Misir.
5 Na, di niyo perataa o di na pengobai a ginawa niyo sabap ko kiyapesaa niyo raken a
mawit sii, ka piyakaona ako rekano sii o Tohan kaan mapakapagoyag so manga taw.
6 Miyakadowa ragon den a kiyataona ko doniya, na aden pen a lima ragon a da den a lopa
a ba mapendado o di na keragonan.
7 Piyakaona ako rekano sii o Tohan kaan aken sekano mapakapagoyag sangkai a
piyakamemesa a okit kaan mapakatangked a kakebabad iyo ko doniya.
8 “Kagiya ka maoto na kena a ba sekano i miyakiwit raken sii, ka so Tohan. Biyaloy ako
niyan a mosawira o solotan ago maporo ko langon a manga pagtaw niyan, na saken pen i
tetandingan ko dalem a inged a Misir.
9 Na, kasoy kano nggagaan ki ama na teroa niyo ron a giyai i pitero o wata iyan a si
Yosop: 'Miyabaloy ako o Tohan a maporo ko dalem a Misir. O ba ngka sendoden a
kasong ka raken sii.
10 Makapeginged ka ko kalopaan a Gosen kaan ka raken makarani; seka ago so manga
wata a ka, manga apo o ka, ago manga bilibili, kambing ago sapi i ka, ago so langon a rek
ka.
11 Pagperen ko sekano roo kaan kano di kemeremeri ago so pamiliya ngka ago an di
kekorangi so langon taman ka, ka makalima pen ragon so taon.' "
12 Tig pen i Yosop a "Imanto na giya den a manga ginawa niyo ago so pagari aken a
Baniyamin i pepekailay sa saken den a si Yosop i di rekano dii makimbitiyarai.
13 Panotola niyo ki ama so makapantag ko kala aken i gees sii sa Misir ago so langon a
miyailay niyo. Na o ba niyo raken sii di mawit nggagaan."
14 Mandiyadi na giyakes iyan so pagari niyan a Baniyamin na taros a miyakagoraok.

Miyakagoraok mambo si Baniyamin ko kanggagakesa iran.
15 Na pinggagakes iyan pen a penggoraok ago piyangarekan iyan so oman i pagari niyan.
Oriyan oto na miyakimbitiyarai siran on.
16 Kagiya misampay sa torogan o solotan so totol makapantag ko kiyapakaoma o manga

pagari i Yosop na inikasoat ai o solotan ago so manga sanasanaan iyan.
17 Na pitero o solotan ki Yosop a "Teroa ngka ini ko manga pagari ngka: Rorani niyo so
manga kimar iyo na kasoy kano sa inged a Kanaan,
18 Na pakaonota niyo so ama iyo ago so manga pamiliya niyo na go kano raken kasoy.
Imbegay aken rekano so lebi a mapiya ko lopa sii sa Misir, na kitaralo so pereperan a
ikeoyag iyo ron.
19 “Teroa ngka kiran pen a 'Kowa kano ko manga karo sa Misir a kapegdaan o manga
wata iyo ago so manga karoma niyo, na pakaonota niyo so ama iyo ago kasoy kano sii.
20 Di niyo aawiden a akal so manga tamok iyo a kibegak iyo, ka so lebi a mapiya ko
dalem a Misir na kebaloy a rek iyo.' "
21 Na ininggolalan den ai o manga wata i Israil. Bigan siran i Yosop sa manga karo a aya
den inisogo o solotan, na bigan iyan siran pen sa mapeloto iran ko kapelalakaw iran.
22 Bigan iyan so oman i isa kiran sa sokoba a nditaren, ogaid na si Baniyamin na bigan
iyan sa telo gatos a pelata a pirak ago lima ka sokoba a nditaren.
23 Na giyai i piyakiwit iyan ko ama iyan: sapolo a kimar a rororanan sa lebi a manga
pipiya a nganin sa Misir, ago sapolo a babay a kimar a rororanan sa pereperan ago manga
paan ago ped a pangenengken a mapeloto o ama iyan ko kasong iyan sa Misir.
24 Na giyoto a piyakalalakaw niyan den so manga pagari niyan, na sii ko kapengganat
iran na pitero iyan kiran a "O ba kano pepewala sa lalan!"
25 Miyawa siran sa Misir na go miyamakaoma ko ama iran a si Yakob sii sa inged a

Kanaan.
26 Pitero iran on a "Oyagoyag pen si Yosop! Sekaniyan i tetandingan ko dalem a inged a
Misir." Sarta den a kiyaletan a napas i Yakob ka di kiran makapengimbenar.
27 Ogaid na kagiya panotolen iran on so langon a pitero kiran i Yosop ago miyailay niyan
pen so manga karo a piyakiwit i Yosop a kapagdaan iyan sa Misir na miyakapiya a
kapengginawa niyan.
28 Na pitero iyan a "Miyapakaparatiyaya ako den! Oyagoyag pen si Yosop a wata aken!
Song ako ron den ka pagilain ko sekaniyan sa di aken pen kapetay."
MAKSOD 46
Somiyong si Yakob sa Misir
Gomiyanat si Israil a kaaawidan iyan so langon taman iyan, na kagiya makaoma

sekaniyan sa Birsiba na mikorban roo ko Tohan o ama iyan a Iskak.
2 Na miyakimbitiyarai so Tohan ki Israil ko kiyapeyag iyan on ko kagagawii a pitero iyan

a "Yakob! Yakob!"
"Katii ako bo," a tig iyan.
3 “Saken so Tohan a so Tohan o ama a ka," a tig iyan. "Di ka pekelek ko kasong ka sa
Misir, ka mbalowin ko a mala a nasiyon so kebabadan reka roo.
4 Magonot ako reka somong sa Misir, na matamataan a ikesoy aken so manga mbawataan
ka sangkai a inged. Na si den si Yosop i pideng sa mata ngka amay ka petay ka."
5 Na gomiyanat si Yakob sa Birsiba. So manga wata iyan a manga mama na piyamakada
iran si Yakob, so manga wata iran ago so manga karoma iran ko manga karo a
piyamakiwit kiran o solotan a kapagdaan iran.
6 Initelon iran so pangangayamen iran ago so miyapantiyari ran sii sa Kanaan na
somiyong siran den sa Misir. Piyamakaonot i Yakob so langon a mbawataan iyan
7 A so manga wata iyan a manga mama ago manga babay ago so manga apo iyan a manga
mama ago manga babay.
8 Giyai i manga ngaran o manga mbawataan o Israil (giyanan den si Yakob) a somiyong
sa Misir:
Si Robin a kaka a wata i Yakob.

9 So manga wata i Robin a manga mama na
siki Hanok, Palo, Hisron ago si Karmi.
10 So manga wata i Simiyon a manga mama na
siki Himowil, Hamin, Ohad, Hakin, Sohar ago si Siyaol a inimbawata o Ikanaanen a
babay.
11 So manga wata i Libi a manga mama na
siki Girson, Kohat ago si Mirari.
12 So manga wata i Yodah a manga mama na
siki Ir, Onan, Silah, Piris ago si Sirah (ogaid na miyatay den si Ir ago si Onan sii sa
Kanaan).
So manga wata a mama i Piris na
si Hisron ago si Hamol.
13 So manga wata i Isakar a manga mama na
siki Tolas, Powah, Hasiyob ago si Simron.
14 So manga wata i Sibilon a manga mama na
siki Sirid, Ilon ago si Halil.
15 Giyanan den i manga wata a mama a inimbawata i Liyah ki Yakob sii sa

Misopotamiya. Telo polo ago telo kataw langon so manga mbawataan i Yakob a
miyakapoon ki Liyah a liyo ron ki Dinah a wata iyan a babay.
16 So manga wata i Gad a manga mama na

siki Sipon, Hagi, Siyoni, Isbon, Iri, Arodi ago si Areli.
17 So manga wata i Asir a manga mama na
siki Imnah, Isbah, Isbi ago si Biriyas. So babay iran na si Sirah.
So manga wata a mama i Biriyas na
si Hibir ago si Malkiyal.
18 Giyanan den i sapolo ago nem kataw a mbawataan i Yakob a miyakapoon ki Silpah a
so talasogoay a babay a inibegay i Laban ko wata iyan a Liyah.
19 So manga wata a mama o karoma i Yakob a si Rakila na

si Yosop ago si Baniyamin.
20 Sii sa Misir na aden a dowa kataw a wata i Yosop a manga mama a si Manasih ago si
Ipraim a inimbawata rekaniyan i Asinat a wata i Potipiras a aya imam sa Hiliyopolis.
21 So manga wata a mama i Baniyamin na
siki Bilas, Bikir, Asbil, Giras, Naaman, Ihi, Ros, Mopim, Hopim ago si Ared.
22 Giyanan den i sapolo ago pat kataw a mbawataan i Yakob a miyakapoon ki Rakila.
23 So wata i Dan a mama na

si Hosim.
24 So manga wata i Naptali a manga mama na
siki Hadsil, Goni, Hisir ago si Silim.
25 Giyanan den i pito kataw a mbawataan i Yakob a miyakapoon ki Bilhah a so

talasogoay a babay a inibegay i Laban ko wata iyan a Rakila.
26 Aya kadakel o manga mbawataan i Yakob a miyonot on ko kiyasong iyan sa Misir a di

on ped so miyakamong on a manga babay na nempolo ago nem kataw langon.
27 Na ped on si Yosop ago so dowa kataw a inimbawata iyan sii sa Misir na aya kadakel
o pamiliya i Yakob a ndodoo sa Misir na pito polo kataw.
Si Yakob ago so Pamiliya niyan sii sa Misir
28 Piyakaona i Yakob si Yodah sii ki Yosop ka pekialaw rekaniyan sii ko masasakop a

Gosen. Na kagiya makaoma siran den sa Gosen
29 Na piyakitiyagar i Yosop so karo niyan na somiyong sekaniyan roo ka pagalaon iyan
so ama iyan a Israil. So den so kiyapakatoona iran na giyakes i Yosop so ama iyan na
miyatey a kiyapakasegad iyan.
30 Na pitero i Israil ki Yosop a "Apiya matay ako den imanto na asar a miyailay aken
seka ago katawan aken a oyagoyag ka pen!"
31 Oriyan iyan na pitero i Yosop ko manga pagari niyan ago so ped ko pamiliya o ama
iyan a "Pengadap ako ko solotan ka pekitokawan ko ron a miyakaoma raken so manga
pagari aken ago so pamiliya o ama aken a sii makapopoon sa inged a Kanaan.
32 Peteroon ko ron a manga pananagikor kano sa bilibili ago pepangayam sa
pangangayamen, na piyangowit iyo sii so manga bilibili, manga kambing ago manga sapi
iyo ago so langon taman a rek iyo.
33 Na amay ka pakisogoan kano o solotan ago ipagise iyan rekano o antonaa i galebek iyo
34 Na aya niyo ron sembagen na 'Sekami a manga oripen ka na pepangayam kami ipoon
ko kangodai rekami taman den imanto a datar o galebek o manga apo ami.' Sabap san na
pekabalingen kano niyan sii sa masasakop a Gosen." Aya sabap a kiyateroa sii i Yosop
na so oman i pananagikor sa bilibili na pakasisingay ko manga Imisiren.
MAKSOD 47
Na miyangadap si Yosop ko solotan na pitero iyan on a "Miyakaoma so ama aken ago so
manga pagari aken a makapopoon sa Kanaan a mitetalon iran so manga bilibili, manga
kambing ago manga sapi iran ago so langon taman a rek iran, na palaya siran ndodoo sa
Gosen imanto."
2 Samaoto na pakaoonoten i Yosop so lima kataw ko manga pagari niyan, na piyakikilala
niyan siran ko solotan.
3 Inisean o solotan so magariyari a "Antonaa i galebek iyo?"

"Sekami a manga oripen ka na manga pananagikor sa bilibili," a inisembag iran on, "a
datar o galebek o manga apo ami.
4 Somiyong kami sii ka tereg kami pasin sangkai a inged, ka da a ba kapenateban o
manga talon ami roo sa Kanaan sabap ko karegen o taon. Kagiya ka maoto na kapedipedi
ka bo na pakipagingedi ngka rekami a masasakop a Gosen."
5 Na pitero o solotan ki Yosop a "Imanto den a miyakaoma reka so ama a ka ago so

manga pagari ngka
6 Na papaladen reka man a kalopaan a Misir. Pakipagingedi ngka kiran so lebi a mapiya a
lopa ko inged a giya masasakop a Gosen. Na o katawi ngka i aden a kapasang iyan kiran
na aya ngka pakakibira ko manga pangangayamen aken."
7 Na giyoto a inisoled i Yosop so ama iyan na go iniadap iyan ko solotan, na siyalam i

Yakob so solotan.
8 Iniise o solotan ki Yakob a "Pira i idad ka?"
9 Tig i Yakob a "Miyakamagatos ago telo polo ragon a miyapero raken a

kiyapakapaginetaw aken ko doniya; na maito ago maregen angkoto a manga ragon ago da
pen makaraot ko miyapero a kiyapakapaginetaw o manga apo aken."
10 Na giyoto a riyakmatan i Yakob so solotan na go miyawa den ko hadapan iyan.
11 Mandiyadi na piyakapaginged i Yosop so ama iyan ago so manga pagari niyan sii sa
Misir. Bigan iyan siran sa lopa sii ko lebi a mapiya a darpa ko inged a marani ko siti a
Ramisis a aya den inisogo o solotan.
12 Na pepemegan pen i Yosop sa manga pangenengken so ama iyan ago so manga pagari
niyan taman ko langon o pamiliya o ama iyan ka di niyan siran dii tokiden a mipepasod
ko kadakel o manga wata iran.
Si Yosop ago so Taon
13 Kagiya tanto den a miyakaregen so taon na da den a ba lamba a pangenengken ko

dalem a inged; ndatar a Misir ago Kanaan a piraraot a ongos so manga taw ron sabap ko
taon.
14 Na sii ko kapepamasaa iran ko pereperan ki Yosop na inipamamayad iran on so langon
o pirak a ndodoo sa Misir ago sii sa Kanaan. Na piyangowit ai i Yosop ko torogan o
solotan.
15 Kagiya malengan so pirak sa Misir ago giya Kanaan na somiyong ki Yosop so langon
a Imisiren na pitero iran on a "Begi kami ngka sa pangenengken! Di kami ngka baden
peteodi ko kapematay ami. Da a miyalamba ko pirak ami."
16 “Kagiya miyalengan den so pirak iyo," a tig i Yosop, "na wita niyo raken so manga
pangangayamen iyo, ka sambian aken siran sa pangenengken."
17 Sabap roo na piyangowit iran on so manga pangangayamen iran na piyanambian iyan a
pangenengken so manga koda, manga bilibili, manga kambing, manga sapi ago manga
kimar iran. Tarotop a miyakasaragon a kapegoyaga niyan kiran a pangenengken a
ipepenambi iyan ko langon a pangangayamen iran.
18 Kagiya mapopos angkoto a ragon na somiyong siran peman ki Yosop na tig iran a "Di
ami reka mapegma, kadnan, a miyalengan den so pirak ami, ago miyakowa ngka pen so
manga pangangayamen ami. Da a ba rekami miyalamba a kibayad ami reka a rowar ko
manga lawas ami ago so manga lopa ami.
19 Di kami ngka baden peteodi ko kapematay ami a rakes o lopa ami! Pamasaa kami
ngka a pangenengken ago so lopa ami. Makioripen kami ko solotan, na mabaloy so lopa
ami a rek iyan. Begi kami ngka sa oniin a mapamola mi kaan kami di pematay ago di
pekarimeng so lopa ami."
20 Kagiya ka maoto na piyamasa i Yosop so langon a kalopaan sa Misir a mabaloy a rek

o solotan. Pipesa o oman i Imisiren so lopa iyan ka tanto siran a kiyaregenan sabap ko
taon. Sabap roo na miyabaloy so langon a kalopaan a rek o solotan
21 Na miyaoripen iyan pen so manga taw ko mbalabala sa inged a Misir.
22 Aya bo a da niyan mapamasa a lopa na so rek o manga imam. Kena a ba disomala a
kapesaa iran ko lopa iran, ka di siran dii ndiyakatan o solotan sa pangenengken a aya iran
ipekeoyag.
23 Na pitero i Yosop ko manga taw a "Ilaya niyo man, ka miyapamasa ko sekano den ago
so lopa iyo a rek o solotan. Katii so oniin a mapamola niyo ko lopa.
24 Ogaid na amay ka meragon kano na paliyogat a imbegay niyo so ikalimo on bagi ko
solotan, na so kelamba on a pat bagi na rek iyo a ipegoniin iyo ko lopa ago kekan iyo ago
so manga pamiliya niyo."
25 “Matamataan den a piyangoyag kami ngka!" a tig iran. "Inikalimo kami ngka, kadnan,
na makioripen kami mambo ko solotan."
26 Na mimbaal si Yosop sa taritib mipantag ko lopa sa Misir a da den maalin taman den
imanto. Aya tig iyan na so ikalima bagi ko pekeragon na rek o solotan. Aya bo a
makaliyoliyo ron a lopa a da mabaloy a rek o solotan na so lopa o manga imam.
So Kaposan a Piyangni i Yakob
27 Sa masa oto na mababaling so manga mbawataan o Israil sii ko masasakop a Gosen sa

inged a Misir. Miyakatamok siran roo ago miyanga bababad, na tanto siran a mindakel.
28 Miyakasapolo ago pito ragon a kiyapakapaginetaw i Yakob sa Misir. Miyakapagidad
sekaniyan sa magatos ago pat polo ago pito ragon.
29 Kagiya makarani den so kapetay niyan na piyakitawag iyan so wata iyan a Yosop na
pitero iyan on a "Lilipen ka a lima ngka ko didalem a bobon aken na go ngka topaan a
ikalimo ako ngka. Sepaan ka raken a di ako ngka ipelebeng sii sa Misir.
30 Kabaya aken a mirembang ako ko manga apo aken; liyon ako ngka sa Misir na sii ako
ngka lebengen ko libengan kiran."
"Ipenggolalan aken so pitero o ka," a tig i Yosop.
31 “Sepa ka raken," a tig i Yakob. Na misepa on si Yosop. Oriyan iyan na sominimba si

Israil sii ko kaolonan o igaan iyan.
MAKSOD 48
Si Manasih ago si Ipraim
Da matey na miyatero ki Yosop a "Pekesakit so ama a ka." Sabap san na piyakaonot iyan
so dowa kataw a wata iyan a manga mama a si Manasih ago si Ipraim na somiyong siran
ki Yakob.
2 Kagiya matero ki Yakob a miyakaoma on so wata iyan a Yosop na miyamagebager
sekaniyan na mimbowat sii ko igaan iyan.
3 Na pitero i Yakob ki Yosop a "So Tohan a Lebi a Mabager na mipeyag raken sii sa Los
sa inged a Kanaan ago riyakmatan ako niyan roo.
4 Pitero iyan raken a 'Mbabaden ko seka ago pakapendakelen ko so mbawataan ka taman
sa manga babaloy siran a madakel a bangsa. Na imbegay aken reka angkai a inged ko
manga moriyataw ngka a ketangan iran sa taman sa pakataman.'
5 “Imanto na so dowa a wata a ka a manga mama a inimbawata reka sii sa Misir sa da

aken pen kapakaoma reka sii na kibilang a manga wata aken. Si Ipraim ago si Manasih
na kibilang a rek aken a datar o tito aken a manga wata a si Robin ago si Simiyon.
6 Ogaid na o aden pen a ped a manga wata a ka na rek ka den oto. Kibilang siran baden a
ped ko dowa ka mbatabataa a Ipraim ago Manasih amay ka pekawali siran.
7 So saken on na isako kapelalakaw aken a sii ako makapopoon sa Misopotamiya na
miyatay so ina a ka a si Rakila ko obay aken sa inged a Kanaan isako malo kami marani
sa Iprat. Na sii aken inilebeng ko kilid a lalan a ipesong sa Iprat" (bebetowan ai imanto sa
Bitlihim).
8 Na kagiya mailay i Israil so manga wata i Yosop na tig iyan a "Antawaa siran?"
9 “Giyai so manga wata aken a mama a inibegay raken sii o Tohan," a tig i Yosop ko ama
iyan.
Tig i Israil a "Pakaobaya ngka siran raken kaan aken karakmati."
10 Miyakalobay den so manga mata i Israil sabap ko kiyalokes iyan den, na di tanto
pekanono. Mandiyadi na piyakaobay ron i Yosop so manga wata iyan na pinggagakes
ago piyangangarekan siran o ama iyan.
11 Pitero i Israil ki Yosop a "Aya katao ko ron na di aken seka den mailay, ogaid na apiya
so manga wata a ka na piyakiilay raken pen o Tohan!"
12 Mandiyadi na kinowa siran i Yosop ko bobon o ama iyan na somiyodiyod sekaniyan

ko ama iyan.
13 Na taros a piyakatindeg siran i Yosop ko obay o ama iyan; si Ipraim na sii matatampar
ko diwang a lima i Israil, na si peman si Manasih na sii matatampar ko kawanan a lima i
Israil, na piyakadaseg iyan siran on.
14 Ogaid na pitibaba i Israil a kiyapakambalawagaa niyan ko manga barokan iyan na
inidapenet iyan so kawanan a lima niyan ko olo i Ipraim apiya sekaniyan pen i ari, na giya
diwang a lima niyan na sii niyan inidapenet ko olo i Manasih apiya o sekaniyan i kaka.
15 Na taros a riyakmatan iyan si Yosop a tig iyan a
"So Tohan a piyangongonotanan o manga apo aken a Ibrahim ago Iskak;

a so Tohan a tomatagikor raken ko kapepaginetaw aken taman den imanto;
16 A so Malaikat a siyabet ako niyan ko langon a pekabinasa raken, na karakmatan iyan
angkai a manga wata!
Mabaloy siran a kibantog ko ngaran aken ago so ngaran o manga apo aken a Ibrahim ago
Iskak,
ago tanto a makandakedakel so kebabadan kiran sii ko doniya!"
17 Kagiya mailay i Yosop a idadapenet o ama iyan a kawanan a lima niyan ko olo i
Ipraim na da niyan kasoaten; na kiyapetan iyan a kawanan a lima o ama iyan ka kowaan
iyan ko olo i Ipraim na go sii niyan ipagogalin ko olo i Manasih.
18 Pitero iyan ko ama iyan a "Kena a ba giyanan, ama ko. Giyai i kaka; ron ka dapeneten
a kawanan a lima ngka ko olo niyan."
19 Ogaid na somiyangka so ama iyan a tig iyan a "Katawan aken, wata aken, katawan
aken. Pembaloy mambo si Manasih a mala a bangsa, ogaid na pembaloy so ari niyan a
mala a di sekaniyan, na pendakedakel a tanto so kebabadan on a lagid o manga nasiyon."
20 Na riyakmatan siran i Yakob sangkoto a gawii a tig iyan a "Imbeto o manga Israil so
manga ngaran iyo ko kaperarakmat iran sa datar ai: 'Mabaloy kano o Tohan a datar o
Ipraim ago so Manasih.' " Sii sangkai a okit na piyakaona niyan si Ipraim ki Manasih.
21 Oriyan iyan na pitero i Israil ki Yosop a "Magaan ako matay, ogaid na kelalayon reka
so Tohan ago ikesoy ka niyan pen ko inged o manga apoapoan ka.
22 Na pelawanen aken sa sabagi ko lopa on so imbegay aken reka a di so imbegay aken
ko manga pagari ngka, a giya Sikim a so sabagi ko inged a miyaagaw aken a pedang ago
pana ko manga Amoriyo."
MAKSOD 49
Pirarakmatan i Yakob so manga Wata iyan
Samaoto na piyakitawag i Yakob so manga wata iyan a mama na pitero iyan kiran a
"Lilibeta ko niyo ka peteroon ko rekano o antonaa i keolaola niyo ko pekatalingoma a
manga gawii.
2 “Timo kano na pamakineg kano a manga wata i Yakob;

pamakinega niyo so ama iyo a Israil.
3 “Robin, a kaka a wata aken;

seka i kakayaan aken ago aya paganay a inionga o bager aken;
lebi ka a ipoporo ago lebi a mala i gees.
4 Ogaid na sabap sa lagid ka o bagiyaw a di ka keren na di ka den keona,
ka somiyong ka ko igaan o ama a ka na piseboan ka oto;
rimbang ka so sandil aken!5
"Si Simiyon ago si Libi na aya magari;

pinggomaan iran so manga pedang iran ko kapanganiyaya.
6 Di ako den sembong ko di iran dii kapagopakat;
ago di ako den pengeped ko di iran dii katimo,
ka kagiya miyamono siran sa manga taw ko kiyararangiti kiran,
ago pilelepo iran so manga sapi sa kabaya iran a ginawa.
7 Kanarakaan so gani iran ka piyakalekelek,
ago so rarangit iran, ka da a kapedi iyan!
Iperak aken siran ko inged o manga Israil,
ka pakapemagawataan aken siran sii ko manga mbawataan o Yakob.
8 “Seka, Yodah, na podin ka o manga pagari ngka;

kakapetan ka sa lig so manga ridoay ngka;
na sodiyod reka so manga wata o ama a ka.
9 Mangoda ka a arimaw, hey Yodah;
inawaan ka so miyapatay ngka, na komiyasoy ka bo, wata aken, ko pelekowan ka.
Lagid o arimaw na miniga sekaniyan a gomegepe,
na da a ba on pekaraw romingasa.
10 So sangkad o kasosolotani na di den kowaan ki Yodah,
o di na so tongkas o kadadatoi sii ko pageletan o ai niyan
taman sa kapakaoma o kirek on;
na sekaniyan i pengongonotanan o manga taw.
11 Ipagiket iyan so kimar iyan ko waged a obas,
ago so nati o kimar iyan sii ko lebi a mapiya a waged.
Pipian iyan so nditaren iyan ko arak,
ago so manga kimon iyan sii ko rogo a obas.
12 Maitem so mata niyan a di so arak,
na mapoti so ngipen iyan a di so gatas.
13 “Pekabaling si Sibolon ko kilid a ragat,

na pembaloy a pendansalan o manga kapal;
pekaolad so kapegingedan iyan taman sa Sidon.
14 “Si Isakar na mabager a kimar

a pegiga ko pageletan o isisiya on a potal.
15 Amay ka mailay niyan so kapiya o dedekean iyan
ago so kadaya o lopa iyan na melengkong, ka isenggolay ron so awid,
ka kagiya tegelen nggalebek a datar o oripen.
16 “Pengokomen i Dan so ped iyan a manga taw

a isa siran ko mbatabataa o manga Israil.
17 Pembaloy si Dan a nipay ko kilid a lalan;
a so mala i bisa a nipay ko lalan,
ka petokaan iyan so palo o koda
na aya ikelayang o kokoda on.
18 “Ya Allah, penayaon ko so kapenabet ka.
19 “Si Gad na nggobaten o sagorompong a manga pangangayan,

ogaid na magato sekaniyan na selobaan iyan siran.
20 “So lopa i Asir na kepakayan,

na makapetiyagar sekaniyan sa pangenengken a mapapatot ko solotan.
21 “Si Naptali na babay a saladeng a bobotawanan,

a dii mbabawata sa manga pipiya i paras a nati.
22 “Si Yosop na maila a koda sii ko obay o bowalan;

aya den maila a koda sii ko silid a bobongan.
23 Masarangit a kiyaanopa on o manga pepemana;
piyana iran sekaniyan na riyasay iran.
24 Ogaid na mabetad so pana niyan
a makababager so manga barokan iyan
a nggolalan ko kabatowa o Mala i Gees a Tohan i Yakob,
a nggolalan ko Pananagikor sa Bilibili, a so Ator a pelinding ko Israil,
25 A nggolalan pen ko Tohan o ama a ka a pepanabang reka.
Sekaniyan so Lebi a Mabager a aya iperakmat iyan reka
na so manga rakmat a poon sa langit,
ago manga rakmat a poon sa didalem a lopa,
ago so iperarakmat a manga wata ago manga pangangayamen.
26 So iniperarakmat reka o ama a ka na mala
a di so kapiyaan o da a kaposan iyan a manga palaw,
ago kemboway a di so andang a manga bobongan.
Makatana ini langon ko olo i Yosop,
sii ko poro o olo niyan a sekaniyan i miyaaraw ko manga pagari niyan.
27 “Si Baniyamin na maila a aso a pepengekeb;
peken iyan sa kapipita so miyapatay niyan,
na sii ko kaperimon iyan na di niyan dii mbagibagiin so miyaagaw niyan."
28 Giyanan den so sapolo ago dowa ka mbatabataa o Israil, ago giyanan i pitero kiran o
ama iran isako perarakmatan iyan siran; na pipetot iyan ko oman i isa kiran so
iniperarakmat iyan on.
So Kiyapatay i Yakob
29 Oriyan iyan na ininsaratan iyan siran a tig iyan a "Magaan ako den mitapi ko manga
apo aken; sii ako niyo lebengen ko manga apo aken sii ko liyang a matatago ko lopa i
Ipron a Hitiyo.
30 Giyanan so liyang roo sa Makpila a marani sa Mamri sa inged a Kanaan. Miyapamasa
oto i Ibrahim a pelebengan a poon ki Ipron a rakes o lopa on.
31 Roo minilebeng si Ibrahim ago so karoma niyan a si Sarah; roo minilebeng si Iskak
ago so karoma niyan a si Ribikah, na roo aken pen inilebeng si Liyah.
32 So lopa ago so liyang a matatago on na sii miyapamasa ko manga Hitiyo."
33 Kagiya mapasad minsarat i Yakob so manga wata iyan na miniga peroman ko igaan na
giyoto a miyatay sekaniyan ago minitapi den ko manga apo iyan.
MAKSOD 50
Na giyakes i Yosop so ama iyan a penggoraok ago di niyan pen dii pangangarekan.
2 Oriyan iyan na piyandoan i Yosop so manga pamomolong a talasogoay niyan a
balsamaren iran so ama iyan. Na biyalsamar iran si Israil
3 A aya ininggalebek iran on na miyakapat polo gawii ka giyanan i kapembalsamara ko
miyatay. Na miyakapito polo gawii a kiyandiyagai ron o manga Imisiren.
4 Kagiya mapopos so kiyandiyagai ron na pitero i Yosop ko manga sanasanaan o solotan

a "O kelimoon ako niyo na teroa niyo ko solotan angkai a pakipetero aken rekano:
5'Kagiya magaan den matay so ama aken na piyakasepa ako niyan sa ipelebeng aken
sekaniyan ko kobor a miyatiyagar iyan den sa inged a Kanaan. Kagiya ka maoto na
kapedipedi ka bo na pakasonga ko ngka roo kaan aken on milebeng so ama aken.
Mapasad oto na kesoy ako bo.' "
6 Na pitero o solotan a "Ika roo den na go ngka lebengen so ama a ka, ka giyanan i
piyakisepa iyan reka."
7 Mandiyadi na gomiyanat si Yosop sa kipelebengen iyan ko ama iyan. Na

miyamangonot on so langon a sanasanaan o solotan ago so manga mosawira iyan ago so
langon a mangaala i bangensa sa inged a Misir
8 A rakes o pamiliya i Yosop, ago so manga pagari niyan ago so manga ped ko pamiliya o
ama iyan. Aya bo a inibegak iran sa Gosen na so bo so manga wata iran ago so manga
talon iran a manga bilibili, kambing ago sapi.
9 Aden pen a domiyaramba on a manga komokoda ago mageeda sa manga karo; tanto oto
a madakel a taw a miyamangonot on.
10 Kagiya makaoma siran ko darpa a pegegikan sa trigo sii sa Atad a marani sa lawasaig
a Yordan na sayana siran a miyamakamboko, na mindidiyagaw siran sa matanog. Na
miyakapito gawii a kiyapakindiyagai i Yosop ko ama iyan roo.
11 Kagiya mailay o manga Ikanaanen a magiinged roo so di iran dii kandiyaga sii ko
pegegikan sa Atad na pitero iyan a "Tanto a mala angkanan a dii kandiyaga o manga
Imisiren!" Giyanan i kiyabetowi sangkoto a darpa a marani sa Yordan sa 'Abil Misraim.'
12 Na ininggolalan o manga wata i Yakob so initenan iyan kiran,

13 Ka inowit iran sekaniyan sa inged a Kanaan na inilebeng iran ko liyang sii sa Makpila
a marani sa Mamri. Miyapamasa oto o Ibrahim a pelebengan a sii poon ki Ipron a Hitiyo
a rakes on pen so lopa on.
14 Kagiya mapasad iyan lomebeng so ama iyan na komiyasoy sa Misir si Yosop ago so
manga pagari niyan ago so pen so langon a domiyaramba on lomebeng ko ama iyan.
Piyakasarig i Yosop so manga Pagari niyan
15 Oriyan o kiyapatay o ama iran na pitero o manga pagari i Yosop a "O ino o aden pen a
ratem rektano i Yosop na go tano niyan saopi ko langon a marata a miyanggolaola tano
ron?"
16 Kagiya ka maoto na piyakitero iran ki Yosop a "Sa da pen kapatay o ama a ka na
ininsaratan kami niyan
17 Sa peteroon ami reka a 'Kapedipedi ka bo na rilaan ka ko manga pagari ngka so
miyasela iran ago miyandosa, ka marata a inikidia iran reka.' Na, kapedipedi ka bo na
rilai ngka imanto so sala ami a manga oripen o Tohan o ama a ka." Na kagiya
mitalingoma ki Yosop angkai a katero na miyakasegad sekaniyan.
18 Na somiyong on so manga pagari niyan na gomipe siran ko hadapan iyan a tig iran a
"Sisii kami a manga oripen ka!"
19 Ogaid na pitero kiran i Yosop a "Di kano pekelek. Ba saken so Tohan?

20 Miyapamikir iyo a kapemaratai niyo raken, ogaid na pikodarat o Tohan a mapiya so
keondasan iyan a aya kiyaoyaga ko madakel a taw a pepeginetaw imanto a gawii sabap ko
miyanggolaola.
21 Kagiya ka maoto na di kano pekelek. Pageperen ko sekano ago so manga wata iyo."
Na piyakasarig iyan siran ko di niyan kiran on dii kateroa ko inikapiya a ginawa iran.
So Kiyapatay i Yosop
22 Na mababaling den si Yosop sa Misir ago so langon o pamiliya o ama iyan.

Miyakapagidad sekaniyan sa magatos ago sapolo ragon
23 Taman ko kiyailaya niyan ko manga wata ago so manga apo i Ipraim. So pen so
manga wata i Makir a wata a mama i Manasih na miyanga aaben i Yosop ko
kinimbabawataan kiran.
24 Sa masa oto na pitero i Yosop ko manga Israil a "Magaan ako den matay, ogaid na
matamataan a tegikoren kano o Tohan, ka pekaliyon kano niyan sangkai a inged ago
pagowiten kano niyan ko inged a minisepa iyan a imbegay niyan ko Ibrahim, Iskak ago si
Yakob."
25 Na piyakasepa i Yosop so manga Israil a tig iyan a "Sepaan iyo raken a amay ka
pagowiten kano o Tohan sangkoto a inged na itelon iyo so bangkay aken."
26 Na miyatay si Yosop a miyakamagatos ago sapolo ragon a idad iyan. Biyalsamar iran
so bangkay niyan na tiyago iran ko kaban roo sa Misir.
IKSODOS
IKSODOS 1
Pirarasay so manga Mbawataan o Israil
Giyai i manga ngaran o manga wata i Yakob a manga mama a ped iyan a somiyong sa
Misir, na so oman i isa kiran na miyonot on so pamiliya niyan:
2 Siki Robin, Simiyon, Libi, Yodah,
3 Isakar, Sibolon, Baniyamin,
4 Dan, Naptali, Gad ago si Asir.
5 Pito polo langon angkoto a manga mbawataan i Yakob. Samaoto na ndodoo den si
Yosop sa Misir.
6 Kagiya den a matey na miyatay si Yosop ago so langon o manga pagari niyan taman ko
langon a rese iran;
7 Ogaid na miyanga bababad so manga Israil, na tanto siran a mindakel ago miyakabager
taman sa miyabembar siran ko dalem a inged.
8 Sangkoto a manga gawii na miyakandato so bago a solotan sa Misir a da a katawi niyan

ko makapantag ki Yosop.
9 Na pitero iyan ko manga pagtaw niyan a "Ilaya niyo ka miyabaloy angkai a manga Israil
a tanto a madakel ago mabager
sii rektano.
10 Disomala a mamikir tano sa okit a karena tano ko kapepekadakel iran, ka o aden a
makipetidawa rektano na baanda iran pagampili so manga ridaoy tano kaan tano iran
mitidawa ago makaawa siran sangkai a inged."
11 Kagiya ka maoto na piyakisangan siran o manga Imisiren ko manga pamemeges a

merasay kiran ko maregen a galebek; na piyakibangon iran ko manga Israil so manga siti
a Pitom ago giya Ramesis a aya peteliyongan sa kakawasaan o solotan.
12 Ogaid na saden sa kala a kaperasaya kiran o manga Imisiren na kala mambo a
kapepekadakel ago kapekebembar iran taman sa miyapangandam siran o manga Imisiren.
13 Kagiya ka maoto na piyangongoripen iran so manga Israil sa da a ba on kapedi.
14 Piyakapait iran so kapepaginetaw o manga Israil ko tanto a maregen a galebek a
kapamangembaal sa manga bata a ipembalay iran, ago so langon a pitibarangan a galebek
ko dii mbabasokan. Na sii ko langon a masopiit a piyakinggalebek kiran o manga
Imisiren na da iran siran den kapediin.
15 Na miyakimbitiyarai so solotan sa Misir ko dowa kataw a babay a manga panday o

manga Hibriyo a aya manga ngaran iran na si Siprah ago si Powah.
16 Tig iyan kiran a "Igira a petebangan iyo so manga Hibriyo a babay ko kapembawata
iran na o mailay niyo a mama a ipembawata iyan na bonoa niyo; na o babay na oyaga
niyo."
17 Ogaid na maaleken ko Tohan so manga panday na da iran nggolalanen so pitero kiran
o solotan sa Misir, ka piyakapaginetaw iran baden so manga wata a mama.
18 Mandiyadi na piyakisogoan o solotan so manga panday na iniise iyan kiran a tig iyan a
"Ino niyo ai penggolaolaa? Ino niyo da pamonoa so manga wata a mama?"
19 Somimbag siran a "So manga Hibriyo a babay na kena a ba datar o manga Imisiren a
babay, ka manga papasang siran i kambawata, ka da ami siran pen maoma na di siran den
dii makambawata."
20-21 Na sabap sa maaleken ko Tohan so manga panday na biyalasan iyan siran sa

mapiya, ka bigan iyan siran sa manga moriyataw. Na mindakel pen so manga Israil ago
tanto siran a miyakabager.
22 Kagiya ka maoto na bigan o solotan sa sogoan so langon o manga pagtaw niyan a tig
iyan kiran a "Kowaa niyo so oman i wata a mama a gopen inimbawata o manga Hibriyo
na pangitogen iyo ko lawasaig a Nail; ogaid na pakapaginetawa niyo baden so manga
babay ron."
IKSODOS 2
Kinimbawataan ki Mosa
Sangkoto a manga gawii na so sakataw a mama ko mbatabataa a Libi na miyangaroma sa

babay a ped pen mambo ko moriyataw i Libi;
2 Na miyaogat sekaniyan na mimbawata sa mama. Kagiya mailay niyan a mataid a wata
na initapok iyan ko miyakatelo olan. So
3 Ogaid na kagiya di niyan den mapegna na kominowa sekaniyan sa reban a balagen na
siyalapot iyan a lita kaan di peletosi a ig. Kagiya mapasad oto na piyakaiga iyan on so
maito a wata na tiyago iyan sii ko manga otan ko kilid o lawasaig.
4 So peman so babay angkai a wata na tomitindeg ko malo on maawat, ka pagilain iyan o
antonaa i keolaola niyan.
5 Samaoto na so wata a babay o solotan sa Misir na tomiyondagay ko lawasaig ka

pepaigo on, na so peman so manga raga niyan na dii ndadalakaw ko kilid o lawasaig.
Sarta a miyainengka iyan so reban sii ko manga otan na piyakikowa niyan ko talasogoay
niyan a babay.
6 Kagiya kalekaan iyan na miyailay niyan so maito a wata a sarta a gomiyoraok. Na
inikapedi iyan a tig iyan a "Isa ini ko manga wata a Hibriyo!"
7 Mandiyadi na miyakarani ron so babay o maito a wata na inisean iyan so wata o solotan
a tig iyan a "Ba ko seka kowaan sa Hibriyo a babay a maritan iyan reka so wata?"
8 “Oway, ika roo den," a inisembag o wata o solotan. Na lomiyalakaw so raga na

piyakaonot iyan so ina o maito a wata.
9 Pitero on o wata o solotan a "Kowaa ngka angkai a maito a wata na go ngka raken
ritana, ka tendanan ko seka." Mandiyadi na kinowa niyan so wata na pepekasoson iyan.
10 Kagiya den a makala so wata na inowit o ina iyan ko wata o solotan na miyabaloy a
wata iyan. Na bitowan iyan sa Mosa ka aya pitero iyan na "Kinowa ko sekaniyan ko ig."
Miyagapas si Mosa sa Midiyan
11 Miyakaisa a gawii kagiya kesad den a mangoda si Mosa na mindadalakaw sekaniyan

ka imbentel iyan so manga royod iyan a Hibriyo. Na pimbantayan iyan siran a dii
pakanggalebeken sa manga reregen a galebek. Miyailay niyan so sakataw a Imisiren a
peperanegen iyan so isa a Hibriyo a royod i Mosa.
12 Mandiyadi na miyaningidingil si Mosa, na kagiya mailay niyan a da a ba on pepekailay
na biyono iyan so Imisiren na initapok iyan so lawas iyan ko peted.
13 Sii ko miyakatalondog a gawii na mindadalakaw peman na miyailay niyan so dowa
kataw a Hibriyo a dii mbono. Inisean iyan so sakataw ron a miyamaba a tig iyan a "Ino
ngka dii peranega so royod ka a Hibriyo?"
14 Na tig o mama a "Antawaa i tomiyoro reka a olowan ami ago pepangokom rekami?
Ba ngka mapipikir a kambonoa ngka raken a lagid o kiyabonoa ngka ko Imisiren?" So
kiyanega sii i Mosa na miyalek, na minigedi sa pamikiran iyan a "Kiyatokawan bes so
pinggolaola ko!"
15 Kagiya maneg o solotan so makapantag sii na piyanamaran iyan a kapakibonoon iyan

ki Mosa. Ogaid na piyalagoyan i Mosa so solotan na miyagapas sa inged a Midiyan ka
mbeling roo pasin; na miyontod sekaniyan roo ko obay a paridi.
16 Samaoto na aden a imam sa Midiyan a pito kataw i wata a manga babay, na
miyakaoma siran ko paridi ka segeb siran on ago penoon iran a ig so pepemanginoman o
manga bilibili o ama iran.
17 Na miyakaoma mambo so ped a manga pananagikor sa bilibili na biyogaw iran so
manga raga, ogaid na tominikeras si Mosa na piyanabangan iyan siran, na piyamakainom
iyan pen so
manga bilibili iran.
18 Kagiya makabaling so manga raga ko ama iran a si Hitro na inisean iyan siran a tig
iyan a "Ino pekagaan a kiyapakabaling iyo imanto?"
19 Tig iran a "Aden a Imisiren a miyanindeg rekami ko kapemaratai rekami o ped a
manga pananagikor. Liyo ron pen na inipanageb kami niyan na go piyamakainom iyan so
pangangayamen ami."
20 “Anda sekaniyan?" a tig iyan ko manga wata iyan a babay. "Ino niyo mbegaken?
Songowi niyo na go niyo boyoa koman."
21 Na miyapamikir i Mosa a komaden ki Hitro, na piyakipangaroma niyan ki Mosa so

wata iyan a si Siporah.
22 Mimbawata si Siporah sa wata a mama na bitowan i Mosa sa Girsom, ka pitero iyan a
"Rait ako sangkai a inged."
23 Kagiya matey den na miyatay so solotan sa Misir, ogaid na so manga Israil na di iran
pen dii miperego so kapepengongoripena kiran. Miyakagoraok siran sa tabang na
minisampay ko Tohan so kiyapakagoraok iran.
24 Miyaneg o Tohan so di iran dii kaperego na kiyatanodan iyan so kapasadan iyan
mipantag ko Ibrahim, Iskak ago Yakob.
25 Miyailay o Tohan so manga Israil na tiyago iyan siran sa ginawa niyan.
IKSODOS 3
So Mosa ago so Pekedeg a Maito a Kayo
Miyakaisa a gawii a petegikoren i Mosa so manga pangangayamen i Hitro a panogangan

iyan a mama a imam sa Midiyan na inagak iyan so talon taman sa sabala o disirto.
Miyakaoma sekaniyan sa Sinay a so palaw o Tohan.
2 Na mipeyag rekaniyan roo so Malaikat o Allah sii ko pekedeg a apoy a madadalem ko
maito a kayo. Miyailay i Mosa a apiya pen pekedeg so kayo na kena a ba ini peketotong.
3 Na minigedi sa pamikiran iyan a "Mobay ako ron kaan aken mapagamasamas angkai a
sabelek a pangingilain o ino di ketotong so kayo."
4 Kagiya mailay o Allah a pepekarani ron si Mosa sa kapagilaya niyan on piyapiya na

tiyalowan o Tohan a poon ko look o kayo a tig iyan a "Mosa! Mosa!"
Tig i Mosa a "Katii ako bo."
5 “Di ka sii ndaseg," a tig o Tohan. "Pokasa ngka on so tinilas ka, ka so katitindegan ka
na soti a lopa."
6 Tig iyan pen a "Saken so Tohan o manga apo o ka, a so Tohan o Ibrahim, Iskak ago
Yakob." So kiyanega on i Mosa na inidalong iyan a paras iyan ka ipekelek iyan milay so
Tohan.
7 Na pitero on o Allah a "Miyailay aken den so kaperasaya ko manga taw aken roo sa
Misir. Miyaneg aken so kapenggoraok iran sabap ko kapepengongoripena kiran o
pepemeges kiran. Katawan aken so kararata a ginawa iran.
8 Kagiya ka maoto na miyanog ako ka sebeten ko siran ko lima o manga Imisiren;
pekaliyon ko siran sangkoto a inged, ka pagowiten ko ko mapiya ago maolad a lopa a
pekepakayan ago oodaren, a so pagiingedan o manga Kanaaniyo, manga Hitiyo, manga
Amoriyo, manga Pirisiyo, manga Hibiyo ago manga Hibosiyo.
9 Matamataan a minisampay raken so kapenggoraok o manga Israil, na miyailay aken pen
so kapesonsinga kiran o manga Imisiren.
10 Na, lalakaw ka imanto, ka sogoon ko seka ko Piraon kaan ka mapakaliyo sa Misir so
manga pagtaw aken a manga mbawataan o Israil."
11 Ogaid na pitero i Mosa ko Tohan a "Antawaa ko a patot a song ko Piraon ago pekaliyo
ko langon o manga Israil roo sa Misir?"
12 Tig o Tohan a "Keped ako reka, na aya kinanao reka a saken i somiyogo reka na amay
ka mapakaliyo ngka so manga taw roo sa Misir na simbaan ako niyo sii sangkai a palaw."
13 Na pitero i Mosa ko Tohan a "Amay ka somong ako ko manga Israil sa kapeteroa ko

kiran a 'So Tohan o manga apo iyo i somiyogo raken sii rekano,' na aya ipagise iran raken
na 'Antawaa i Ingaran iyan?' Na antonaa i isembag aken kiran?"
14 Pitero o Tohan ki Mosa a "Saken na Saken den. Na giyai i peteroon ka kiran:

'Sekaniyan a bebetowan sa "Saken den" na aya raken somiyogo sii rekano.' "
15 Tig pen o Tohan ki Mosa a "Teroa ngka ko manga Israil a 'So Allah a Tohan o manga
apo iyo, a so Tohan o Ibrahim, Iskak ago Yakob i somiyogo raken sii rekano.' Giyanan i
Ingaran aken sa taman sa pakataman a ipepenanadem raken taman ko
kapepemagapidapidi ko manga taw.
16 “Na, lalakaw ka den na go ngka limoda so manga pelokelokesen o manga Israil, na

teroa ngka kiran a so Allah a Tohan o manga apo iran, a Tohan o Ibrahim, Iskak ago
Yakob na mipeyag reka. Teroa niyo kiran a matamataan a miyatago aken siran sa ginawa
ago miyailay aken so ipekidia kiran sii sa Misir.
17 Na miyapamikir aken a pekaawaan ko siran ko kaperasaya kiran sii sa Misir, ka
pagowiten ko siran ko pekepakayan ago oodaren a lopa a pagiingedan o manga
Kanaaniyo, manga Hitiyo, manga Amoriyo, manga Pirisiyo, manga Hibiyo ago manga
Hibosiyo.
18 “Pekinegen o manga taw aken so peteroon ka kiran. Na song kano ago so manga
pelokelokesen o manga Israil ko solotan sa Misir na go niyo ron teroa a 'So Allah a Tohan
o manga Hibriyo na miyakindarpai rekami. Na pengnin ami reka a pakalalakaon kami
ngka sa makatelo gawii ko disirto kaan kami makakorban ko Allah a Tohan ami.'
19 Ogaid na katawan aken a di kano pekalalakaon o solotan taman sa di sekaniyan tanto a
mategel.
20 Kagiya ka maoto na ipenggolalan aken so kabarakat aken, ka siksaan ko so manga
Imisiren ko langon a piyakalekelek a itena aken kiran. Maipos oto na pekalalakaon kano
niyan den.
21 “Mbelowin ko so manga Imisiren a ipengalimo kano iran kaan amay ka mawa kano na
aden a mipetelon iyo.
22 So oman i babay rekano na pangniya niyan ko manga Imisiren a manga siringan iyan o
di na so babay a mababaling ko walay niyan a kapamegi ran rekano sa manga ipamemetad
a pirak ago bolawan, ago manga nditaren a pakipenditar iyo ko manga wata iyo a manga
mama ago babay. Sangkai a okit na kekowa niyo so manga tamok o manga Imisiren."
IKSODOS 4
So manga Poriba a Inibegay ki Mosa
Somimbag si Mosa a "Opama ka di ako iran paratiyayaa o di na pakinegen? Ka o ba iran

baden teroa a 'Da reka peyag so Allah!' "
2 Na pitero rekaniyan o Allah a "Antonaa angkanan a kakapetan ka?"

"Teken," a inisembag iyan.
3 Tig o Allah a "Itogen ka ko lopa."

Iniitog i Mosa ko lopa na miyabaloy oto a nipay, na piyalagoyan i Mosa.
4 Mandiyadi na pitero on o Allah a "Porota ngka na sii ngka kapeti sa ikog." Na piyorot
iyan, na sarta a miniasal sa teken sii sa lima niyan.
5 “Nggolaolaa ngka ini," a tig o Allah, "kaan maparatiyaya o manga Israil a miyakapeyag
reka den so Allah a Tohan o manga apo iran, a so Tohan o Ibrahim, Iskak ago Yakob."
6 Na pitero on pen o Allah a "Lilipen ka a lima ngka ko bangkala a ka." Mandiyadi na

inililip i Mosa a lima niyan ko bangkala iyan, na kagiya iliyo niyan na kiyakokosan a
bowa a mapoti a datar o giyaw.
7 “Na lilipen ka peroman ko bangkala a ka," a tig o Allah. Miyanggolaola ini i Mosa, na
so kiniliyon iyan on na miniasal bo, ka lagid o lawas iyan.
8 Tig o Allah a "O di ka iran paratiyayaa o di na di iran masagipa so paganay a

pakamemesa a poriba na baanda iran paratiyayaa so ikadowa.
9 Ogaid na o di iran paratiyayaa angkai a dowa a poriba o di na di iran pakinegen so
peteroon ka na kowa ka ko ig sa Lawasaig a Nail na ododa ngka ko mamara a lopa, na so
ig a kinowa ngka ko lawasaig na kebaloy a rogo sii ko lopa."
10 Ogaid na tig i Mosa ko Allah a "Hey Kadnan, kena a ba ako mapasang i katero apiya
gowani taman sangkai a kinimbitiyarain ka raken a oripen ka, ka malombat ako i katero
ago di tanto pekakorop."
11 Pitero on o Allah a "Antawaa i mimbaal sa ngari o manosiya? Antawaa i pekabaloy

ron a bengel o di na pengaw, ago pepekailay o di na bota? Ba di saken a so Allah?
12 Na, lalakaw ka den ka tebangan ko seka sa kapakatero o ka na ipaginsarat aken reka
pen o antonaa i mapetero o ka."
13 Ogaid na tig i Mosa a "Hey kadnan, kapedipedi ka bo na salakaw baden a sogoa ngka a
penggolaola sii."
14 Na tanto a kiyararangitan o Allah si Mosa, na tig iyan a "Antonaa bes so pagari ngka a
si Aron a so Libitiyo? Katawan aken a makapetero sekaniyan piyapiya. Liyo ron pen na
pepekaoma den sii imanto ka mbelaken ka
niyan, na amay ka mailay ka niyan na kebabaya sekaniyan.
15 Makipembitiyarai ka on ago mapetero o ka on o antonaa i peteroon iyan. Palaya aken
sekano den tebangan sa kapakatero iyo, na ipaginsarat aken rekano pen o antonaa i
mapenggolaola niyo.
16 Ipetero ka niyan ko manga taw ka kebaloy sekaniyan a aya ngka ngari, na kebaloy ka
sii rekaniyan a lagid o tohan ko di ngka on dii kapakateroa.
17 Na, awidi ngka angkanan a teken a mipenggolaola ngka ko pakamemesa a manga
nanao."
Komiyasoy si Mosa sa Misir
18 Mandiyadi na komiyasoy si Mosa ko panogangan iyan a Hitro na pitero iyan on a

"Kapedipedi ka bo na pakakasoya ko ngka ko manga tonganay aken a ndodoo sa Misir
kaan aken maamad o ba aden pen a oyagoyag kiran."
Tig i Hitro a "Lalakaw ka den sa da a rayorayo a ginawa."
19 Samaoto a kasisii pen i Mosa sa Midiyan na miyatero on o Allah a "Kasoy ka sa Misir

ka so langon a manga mama a kebaya reka mono na palaya den miyamatay."
20 Kagiya ka maoto na kinowa i Mosa so karoma niyan ago so manga wata iyan a manga
mama na piyamakakoda iyan siran sa kimar; na gomiyanat siran ka kesoy siran sa Misir.
Na aawidan pen i Mosa so teken a piyakambarakat o Tohan.
21 Na pitero o Allah ki Mosa a "Amay ka makaoma ka roo sa Misir na o ba ngka di

manggolaola ko hadapan o Piraon so langon a pakamemesa a inibegay aken reka a kapaar
sa kinggolalanen ka on. Ogaid na pakapetegasen ko so olo niyan, na di niyan
pekalalakaon so manga taw.
22 Amay ka magiyoto na teroa ngka ko Piraon a 'Giyai i pitero o Allah: So Israil na kaka
a wata aken a mama,
23 Na miyatero aken reka a pakalalakawa ngka so wata aken kaan ako niyan masimba.
Ogaid na minda ka o ba ngka pakalalakawa. Kagiya ka maoto na mbonoon ko so kaka a
wata a ka a mama.' " Ogaid na da ngka on peroa
24 Sii ko pendekean a darpa ko lalan a ipesong sa Misir na biyalak o Allah si Mosa ka ba

niyan den kowai sa niyawa.
25 Ogaid na kominowa si Siporah sa magarang a ator na inabis iyan so kobal ko poro o
sangoran o wata iyan na iniseko iyan oto ko ai i Mosa a tig iyan a "Matamataan a seka na
rogo a miyakapangaroma raken!"
26(So kiyateroa niyan sii na inipangilat iyan ai ko kiyatori.) Kagiya ka maoto na da
tarosen o Allah so kakowai niyan sa niyawa ki Mosa.
27 Si peman si Aron na miyatero on o Allah a "Lalakaw ka na balaka ngka si Mosa sii ko

disirto." Na lomiyalakaw sekaniyan na biyalak iyan si Mosa sii ko palaw o Tohan, na
inarekan iyan sekaniyan.
28 Giyoto a piyanotol i Mosa ki Aron so langon taman a iniinsarat on o Allah ko
kapekakasoya niyan on sa Misir ago so makapantag mambo ko langon a pakamemesa a
poriba a inisogo iyan on.
29 Na somiyong si Mosa ago si Aron sa Misir na linimod iran so langon o manga

pelokelokesen o manga Israil.
30 Piyanotol kiran i Aron so langon taman a iniinsarat o Allah ki Mosa. Mandiyadi na
pinggolaola den mambo i Mosa so pakamemesa a manga poriba sii ko kamamasaan o
manga taw
31 Na miyaratiyaya siran. Kagiya maneg iran a miyatago siran o Allah sa ginawa ago
miyailay niyan pen so kararasay iran na somiyodiyod siran ago miyamanimba.
IKSODOS 5
Kapangembaal sa manga Bata a da a ba Ipembegay a Ragami
Oriyan oto na somiyong si Mosa ago si Aron ko Piraon na pitero iran on a "Giyai i pitero
o Allah a Tohan o Israil: Pakalalakawa ngka so manga pagtaw aken kaan ako iran
maselasela sii ko disirto."
2 Ogaid na pitero o Piraon a "Antawaa so Allah a disomala a pakinegen ko so katero iyan

sa kapakalalakawa ko ko Israil? Di aken katawan i Allah ago di aken pen pekalalakaon
so Israil."
3 Tig i Mosa ago si Aron a "So Tohan o manga Hibriyo na miyakindarpai rekami. Na
pengnin ami reka a pakalalakaon kami ngka ko disirto sa makatelo gawii kaan kami
makakorban ko Allah a Tohan ami, ka o di ami ini nggolaolaa na siksaan kami niyan a
paniyakit o di na katidawa."
4 Ogaid na pitero kiran o solotan sa Misir a "Hey Mosa ago Aron, ino niyo pekipalagowi
ko manga taw so galebek iran? Kasoy kano ko manga galebek iyo!"
5 Tig iyan pen a "Ilaya niyo man, ka miyakadakedakel kano imanto sangkai a inged, na
pekageneken iyo siran bes nggagalebek!"
6 Na sii den sangkoto a gawii na inisogo o Piraon ko manga Imisiren a pepemeges ko

manga oripen ago so kikakapatas kiran a manga Israil a tig iyan a
7 “Di niyo den pemamegi so manga taw sa manga ragami a keosar iran ko di iran dii
kapangembaal sa manga bata. Siran den i makapemagenebeneb manimo sa ragami a
keosar iran.
8 Ogaid na papaliyogaten iyo kiran den so kadakel o manga bata a pekepasad iran
gowani; di niyo kiran pekikorangi. Manga tapolan siran na giyanan i kipenggoraoken iran
sa 'Pakalalakawa kami ngka kaan kami makakorban ko Tohan ami.'
9 Pakaregeni niyo baden so galebek angkoto a manga mama kaan siran di pekadeke
nggalebek ago di iran den mapesagipa so manga kabokegan."
10 Mandiyadi na so manga Imisiren a pamemeges ago so manga kapatas a manga Israil na

somiyong siran ko manga taw a manga Israil na pitero iran kiran a "Giyai i pitero o
Piraon: 'Di aken sekano den mbegan sa ragami.
11 Sekano den i makapemagenebeneb mangowa sa pekeosar iyo a ragami sa apiya anda
niyo ketoon, ogaid na di den kelebatan so kadakel o manga bata a ipapaliyogat rekano.' "
12 Kagiya ka maoto na miniparak so manga Israil ko dalem a inged a Misir sa kapenimo
iran sa manga paotanotan a kisambi iran ko ragami.
13 Na lolopiten siran o manga pepemeges kiran a tig iran a "Tarotopi niyo so manga
galebek a ipapaliyogat rekano oman gawii a datar isako aden pen a manga ragami niyo."
14 Liyo ron pen na so manga Imisiren a pamemeges na piyamadasan iran so manga Israil
a piyamakakekapatas iran ko galebek, na iniise iran kiran a "Ino niyo da katarotopi kagai
ago imanto so ipapaliyogat rekano a manga bata a datar gowani?"
15 Sabap roo na somiyong ko Piraon so manga kapatas a manga Israil na mipenon siran
on a tig iran a "Ino ngka rekami ini dii nggolaolaa?
16 Da den a ba rekami ipembegay a ragami, ogaid na di rekami pen dii teroon a 'Mbaal
kano sa manga bata!' Kiyapamadasan kami, ogaid na so manga pagtaw ngka i kisala sii."
17 “Manga tapolan kano," a tig o Piraon; "tanto kano a mangaala i bokel! Giyanan i di
niyo dii kateroa sa 'Pakalalakawa kami ngka kaan kami makakorban ko Allah.'
18 Imanto na tarosen iyo baden so galebek iyo! Da den a imbegay rekano a ragami; ogaid
na disomala a katarotop iyo so kadakel o manga bata a ipapanton rekano."
19 Na miyatangked sa ginawa angkoto a manga kapatas a manga Israel a miyakaregen so

masosowa iran kagiya matero kiran a "Di niyo den kekorangan so kadakel o manga bata a
di niyo dii mbaalan a ipapaliyogat rekano sa oman gawii."
20 Kagiya mawa siran ko Piraon na miyaoma iran si Mosa ago si Aron a nanayaon iran
siran,
21 Na pitero iran ki Mosa ago si Aron a "Pengnin ami a mailay o Allah so pinggolaola
niyo na madaneg kano niyan pen! Ka biyaloy kami niyo a mado ko Piraon ago sii ko
manga sanasanaan iyan, na datar bo o ba niyo siran bigan sa pedang a mipemono iran
rekami."
Initopa o Allah so Kapakaboka ko Kaooripeni
22 Giyoto a miyadap peroman si Mosa ko Allah na pitero iyan on a "Ya Allah, ino ngka
pakipemaratai angkai a manga taw? Ino ako ngka sii pen sogoa?
23 Ipoon den ko kiyapakapangadap aken ko Piraon sa kinimbitiyarain ko ron sabap reka
na ba niyan baden dii pemaratai angkai a manga taw, na da ngka siran bo kapanabangi."
IKSODOS 6
Mandiyadi na pitero o Allah ki Mosa a "Keilay ngka imanto o antonaa i ikidia ko ko
Piraon, ka sabap ko mabager a lima ko a ipetena aken on na pekalalakaon iyan so manga
pagtaw aken; sabap ko mabager a lima ko na mbogaon iyan siran pen ko inged iyan."
2 Pitero pen o Tohan ki Mosa a "Saken so Allah.
3 Lebi ako a Mabager a Tohan isako peyag ako ko Ibrahim, Iskak ago so Yakob, ogaid na
da aken kiran den pakitokawi a ginawa ko a nggolalan ko Ingaran aken a Allah.
4 Pimbaalan aken pen so kapasadan aken mipantag kiran sa kibegan aken kiran ko inged
a Kanaan a manga mananangga siran on gowani.
5 Liyo ron pen na miyaneg aken den so dii kapakaperego o manga Israil a
pepengongoripenen o manga Imisiren, na kiyatanodan aken so kapasadan aken.
6 “Kagiya ka maoto na teroa ngka ko manga Israil a 'Saken so Allah, na pokasan ko

sekano sa kokoong o manga Imisiren. Mbokaan ko sekano ko di iran rekano dii
kapangongoripena. Sebeten ko sekano a nggolalan ko kala aken i kabatowa ago so
mangaala a isiksa kiran.
7 Terimaan ko sekano a manga pagtaw aken na pembaloy ako mambo a Tohan iyo. Sa
masa oto na ketokawan iyo a saken so Allah a Tohan iyo a miyokas rekano ko kokoong o
manga Imisiren.
8 Na pagowiten ko sekano ko inged a inisepa aken a imbegay aken ko Ibrahim, Iskak ago
Yakob, ka pekitangan aken rekano. Saken so Allah.'"
9 Piyanotol ai i Mosa ko manga Israil, ogaid na da iran sekaniyan pamakinega ka

kiyadaan siran den sa inam sabap ko karegen o kapepengongoripena kiran.
10 Mandiyadi na pitero o Allah ki Mosa a

11 “Song ka ko Piraon a solotan sa Misir na go ngka on teroa a pakaliyowa niyan so
manga Israil ko inged iyan."
12 Ogaid na tig i Mosa ko Allah a "Apiya so manga Israil na da ako iran pamakinega.
Na andamanaya i kapekinega raken o Piraon a kena a ba ako mapiya i katero?"
13 Ogaid na pitero o Allah ki Mosa ago si Aron a "Teroa niyo ko manga Israil ago so
Piraon a inisogo aken rekano a kiliyon iyo ko manga Israil sa Misir."
So Salsila ki Mosa ago si Aron
14 Giyai so manga kiyapoonan o manga mbawataan o Israil:
So manga wata i Robin a manga mama a aya kaka a wata o Israil na siki Hanok, Palo,
Hisron ago si Karmi. Siran i pilokelokesan o mbatabataa a Robin.
15 So manga wata i Simiyon a manga mama na siki Himowil, Yamin, Ohad, Yakin,
Sohar ago si Siyaol a wata o Ikanaanen a babay. Siran i pilokelokesan o mbatabataa a
Simiyon.
16 Giyai so manga ngaran o manga wata i Libi a manga mama ago so manga moriyataw
iran. So manga wata iyan na siki Girson, Kohat ago si Merari. Miyakapaginetaw si Libi
sa magatos ago telo polo ago pito ragon.
17 So manga wata i Girson a manga mama na si Libni ago si Simay, na madakel a manga
mbawataan iran.
18 So manga wata i Kohat a manga mama na siki Amram, Iskar, Hibron ago si Odsiyal.
Miyakapaginetaw si Kohat sa magatos ago telo polo ago telo ragon.
19 So manga wata i Merari a manga mama na si Mali ago si Mosi.

Siran den i pilokelokesan o mbatabataa a Libi.
20 Si Amram na miyapangaroma niyan so babay o ama iyan a si Yokebid, na mimbawata

siran na si Aron ago si Mosa. Miyakapaginetaw si Amram sa magatos ago telo polo ago
pito ragon.
21 So manga wata i Iskar a manga mama na siki Korah, Nipig ago si Sikri.
22 So manga wata i Odsiyal a manga mama na siki Misiyail, Ilsapan ago si Sitri.
23 Si Aron na miyapangaroma niyan si Ilisiba a wata i Aminadab ago babay mambo i

Nason; na mimbabawata siran na siki Nadab, Abiho, Iliyasar ago si Itamar.
24 So manga wata i Korah a manga mama na siki Asir, Ilkanah ago si Abiyasap. Siran i
pilokelokesan o mbawataan i Korah.
25 Si Iliyasar a wata i Aron a mama na miyapangaroma niyan so isa ko wata i Potiyal, na

mimbawata siran na si Pinihas.
Giyoto den i kiyapoonan o mbatabataa a Libi a rakes o kiyababadan kiran.
26 Giyangkoto a Aron ago Mosa i minimbitiyarai o Allah a tig iyan a "Liyon iyo so
manga mbatabataa a Israil sa Misir."
27 Siran den so miyakimbitiyarai ko Piraon a solotan sa Misir makapantag ko kipeliyon
iran ko manga Israil sa Misir. Giyoto den si Mosa ago si Aron.
Ipetero i Aron si Mosa
28 Isako makimbitiyarai so Allah ki Mosa sii sa Misir

29 Na pitero iyan on a "Saken so Allah; teroa ngka ko Piraon so langon taman a peteroon
ko reka."
30 Ogaid na tig i Mosa ko Allah a "Katawan ka a kena a ba ako mapiya i katero.
Andamanaya i kapekinega raken o Piraon?
IKSODOS 7
Na pitero o Allah ki Mosa a "Ilaya ngka man, ka mbalowin ko seka a datar o Tohan ko
Piraon, na si Aron a pagari ngka na aya ngka pakapeteroon ko lalag ka.
2 Peteroon ka ki Aron so langon taman a isogo aken reka; na mapetero iyan pen ko Piraon
a pakaliyowa niyan so manga Israil ko inged iyan.
3 Ogaid na pakapetegasen ko so olo o Piraon, na apiya pen madakel a nanao ago
pakamemesa a penggolaolaan aken sa Misir
4 Na di kano niyan den pekinegen. Oriyan oto na tenaan ko sa lima a inged a Misir sa
mangaala a kasiksaan,lk ka giyoto den i kapekaliyowa ko ko manga taw aken a so manga
mbatabataa a Israil.
5 Na ketokawan o manga Imisiren a saken so Allah amay ka pakatanaan ko kiran a lima
ko sii sa Misir sa kapekaliyowa ko ko manga Israil ko inged iran."
So Teken i Mosa na Miyabaloy a Nipay
6 Na so den so inisogo o Allah ki Mosa ago si Aron i pinggolaola iran.

7 Isako makimbitiyarai siran ko Piraon na miyakawalo polo ragon a idad i Mosa, ago
miyakawalo polo ago telo ragon a idad i Aron.
8 Na pitero o Allah ki Mosa ago si Aron a

9 “Amay ka teroon rekano o Piraon a 'Pakailaya ko niyo sa pakamemesa a ketotoowan
ako ron,' na teroa ngka ki Aron a 'Kowaa ngka so teken ka na go ngka itogen ko hadapan
o Piraon,' ka kebaloy anan a nipay."
10 Mandiyadi na somiyong si Mosa ago si Aron ko Piraon na so den so inisogo kiran o

Allah i pinggolaola iran. Iniitog i Aron so teken iyan ko hadapan o Piraon ago so manga
sanasanaan iyan na miyabaloy ai a nipay.
11 So kiyailaya on o Piraon na piyakisogoan iyan so manga baraakal ago manga
pembabarakat, na giyangkoto a manga Imisiren a salamangkiro na siyowa iran oto
mambo ko okit a di iran dii kaselamangka.
12 Iniitog o oman i isa kiran so teken iyan na miyabaloy a nipay. Ogaid na so teken i
Aron na pilalamed iyan so manga teken iran.
13 Apiya oto na baden miyakategas so olo o Piraon na da niyan siran pakinega a giyoto
den i kiyatoman o miyatero o Allah.
So Kasiksaan a Rogo
14 Oriyan iyan na pitero o Allah ki Mosa a "Tanto a mategas i poso so Piraon ka

pesengkaan iyan a kapakaliyowa niyan ko manga taw.
15 Amay ka kapipita na lalakaw kano na go niyo balaka so Piraon ko kapesong iyan sa ig.
Aawidi ngka so teken a miyabaloy a nipay na nayawa ngka sekaniyan ko kilid a lawasaig
a Nail.
16 Na teroa ngka on a 'So Allah a Tohan o manga Hibriyo na siyogo ako niyan sa
kapeteroa ko reka on a pakalalakawa ngka so manga pagtaw niyan kaan iran sekaniyan
masimba sii ko disirto. Ogaid na taman imanto na da ngka den pakinega.'
17 Na teroa ngka pen ko Piraon a 'Aya tig o Allah na ketokawan ka a sekaniyan so Allah
sabap sangkai a mapenggolaola: ilaya niyo ka imbadas aken so kakapetan ko a teken sii
ko ig sa Nail na kebaloy a rogo.
18 Pematay so manga seda sii sa Nail ago pekado so lawasaig, na di den pekainom so
manga Imisiren ko ig on.' "
19 Na pitero pen o Allah ki Mosa a "Teroa ngka ki Aron a 'Kowaa ngka so teken ka na go
ngka antapen ko manga ig sii sa Misir, a so manga lawasaig, manga pakaig, manga
tangela ago so kitataliyongen a ig kaan ai manga babaloy a rogo. Na pekalangkap so rogo
sa dalem a inged a Misir apiya sii ko manga laya ago manga omoy.' "
20 Na so den so inisogo o Allah i pinggolaola i Mosa ago si Aron. Inibayaw i Aron so

teken iyan na inibadas iyan sa Nail sii ko kamamasai ron o Piraon ago so manga
sanasanaan iyan, na miyabaloy a rogo so langon a ig sa Nail.
21 Miyamatay so manga seda ko lawasaig na miyakado pen so ig on taman sa di on den
pekainom so manga Imisiren. Na lomiyangkap so rogo sii sa Misir.
22 Ogaid na siyowa ini mambo o manga Imisiren a salamangkiro ko okit a di iran dii
kaselamangka. Na baden miyakategas so olo o Piraon na da niyan pakinega si Mosa ago
si Aron a giyoto den so miyatero o Allah.
23 Ba sekaniyan den miyaling ko torogan iyan, na apiya angkai a miyanggolaola na da
niyan tagoa sa ginawa.
24 Na miyamangalot so langon a Imisiren ko manga kilid o lawasaig kaan siran
makakowa sa paginomen iran a ig, ka di siran den pekainom ko ig sa Nail.
So Kasiksaan a manga Babak
25 Miyakapito gawii ko kiyasiksaa o Allah ko lawasaig

1 Napitero iyan ki Mosa a
IKSODOS 8
"Song ka ko Piraon na go ngka on teroa a 'Giyai i pitero o Allah: Pakalalakawa ngka so
manga pagtaw aken kaan ako iran masimba.
2 O di ka iyog a pakalalakaon ka siran na pekisiksa aken sa manga babak so dalem a
inged ka. Giya Nail na kepeno a babak. Penggagakap siran ago pemanoled ko torogan ka
ago so rowang ka ago sii ko igaan ka, ago so pen so manga walay o manga sanasanaan ka
ago sii ko manga pagtaw ngka, ago taman ko manga tolang ago manga towanga iyo sa
pangenengken.
4 Pemanepak siran reka ago sii ko manga pagtaw ngka taman ko langon a sanasanaan
ka.'"
5 Oriyan oto na pitero o Allah ki Mosa a "Teroa ngka ki Aron a 'Antapen ka so teken ka
ko manga lawasaig, manga pakaig ago manga tangel na pakagakapa ngka so manga babak
sii ko kalopaan a Misir.' "
6 Mandiyadi na biter i Aron a lima niyan na piyakaantap iyan ko manga ig sa Misir. Sarta
a minggagakap on so manga babak na kiyasapengan iran so kalopaan.
7 Ogaid na so manga salamangkiro na siyowa iran oto mambo ko okit a di iran dii
kaselamangka, ka piyakagakap iran mambo so manga babak ko kalopaan a Misir.
8 Na piyakisogoan o Piraon si Mosa ago si Aron na pitero iyan kiran a "Pangniya niyo ko
Allah a kowaan iyan raken angkai a manga babak ago sii ko manga pagtaw aken ka
pakalalakaon ko mambo so manga pagtaw niyo kaan siran makakorban ko Allah."
9 Tig i Mosa ko Piraon a "Seka den i tendo ko oras a kipemangnin aken reka ago so
manga sanasanaan taman ko manga pagtaw ngka kaan kano kadai sa manga babak ago so
manga walay niyo sa da den a ba on kelamba a liyo ron sa Nail."
10 “Mapita," a tig o Piraon.

"So den so pitero o ka," a tig i Mosa, "kaan ka katokawi a da den a ba rimbang o Allah
a Tohan ami.
11 So manga babak na magawa siran reka ago sii ko manga walay niyo taman ko manga
sanasanaan ago manga pagtaw ngka, na aya bo a kelamba kiran na so bo so sisii sa Nail."
12 Kagiya maipos si Mosa ago si Aron ko Piraon na miyangangarapan si Mosa ko Allah

makapantag ko manga babak a inowit iyan ko Piraon.
13 Na inampon o Allah so pangni i Mosa. So manga babak sii ko manga walay ago so
manga lamalama ago so langon a kalopaan na palaya miyamatay.
14 Inipanambak siran o manga Imisiren na inipakado ini a dalem a inged.
15 Ogaid na kagiya mailay o Piraon a miyapinda so kareregeni kiran na ba niyan den
piyakategas so olo niyan na da niyan pakinega si Mosa ago si Aron a giyoto den so
miyatero o Allah.
So Kasiksaan a manga Rengit
16 Mandiyadi na pitero o Allah ki Mosa a "Teroa ngka ki Aron a bayaon iyan so teken
iyan na go niyan badasen ko lopa kaan so bayanek ko dalem a inged a Misir na kebaloy a
manga rengit."
17 Na pinggolaola iran den ai, ka inibayaw i Aron a lima niyan a kakapetan iyan so teken
iyan na go inibadas iyan ko lopa, na miyanga babaloy a manga rengit so langon o bayanek
sa dalem a Misir; na miyakatalingoma so manga rengit ko manga taw ago sii ko manga
pangangayamen.
18 Ogaid na kagiya tepengan maden o manga salamangkiro so manga rengit ko okit a di
iran dii kaselamangka na da iran ai masowa. Na sisii den so manga rengit ko manga taw
ago so manga pangangayamen.
19 Na pitero o manga salamangkiro ko Piraon a "Galebek ai o Tohan!" Ogaid na baden

miyakategas so olo o Piraon na da niyan den pakinega si Mosa ago si Aron a giyoto den
so miyatero o Allah.
So Kasiksaan a manga Tendek
20 Oriyan iyan na pitero o Allah ki Mosa a "Kabalaga ka mbowat na go ngka balaka so

Piraon ko kapesong iyan sa ig. Teroa ngka on a 'Giyai i pitero o Allah: Pakalalakawa
ngka so manga pagtaw aken kaan ako iran masimba.
21 Ka o di ngka siran pekalalakawa na pakipenggoronggorongan ko seka ko manga
tendek taman ko manga sanasanaan ago so manga pagtaw ngka ago sii pen ko manga
walay niyo. Pemangipeno so manga tendek ko manga walay o manga Imisiren ago apiya
so lopa a katatagoan kiran.
22 “ 'Ogaid na sii ko gawii a kapenggolaolaa on na pelepasen ko ron so kalopaan a Gosen

a ron kibabaling so manga pagtaw aken; da den a tendek a ba roo pekasong kaan ka
katokawi a saken, a so Allah, na dii nggalebek sangkoto a darpa.
23 Pakapembidaan ko so manga pagtaw aken ago so manga pagtaw ngka.
Mapenggolaola angkai a pakamemesa a nanao mapita.' "
24 Na ininggolalan den ai o Allah. Minibombor so tanto a makapal a tendek ko torogan o

Piraon ago sii ko manga walay o manga sanasanaan iyan. Na mikerata so dalem a inged a
Misir sabap ko manga tendek.
25 Piyakisogoan o Piraon si Mosa ago si Aron na pitero iyan kiran a "Ikano roo den na sii
kano den korban ko Tohan iyo sangkai a inged."
26 “Kena a ba anan patot," a tig i Mosa, "ka so manga pangangayamen a di ami dii
korbanen ko Allah na pakasisingay ko manga Imisiren a kapesombalia on. Na o mailay
iran angkai a pakasisingay kiran na ngkaino, ba kami ran di maperorobak a manga ator?
27 Disomala a telo gawii a ipelalakaw ami ko disirto sa kapekorban ami ko Allah a Tohan
ami ka aya niyan rekami inisogo."
28 Tig o Piraon a "Pakalalakaon ko sekano kaan kano makakorban ko Allah a Tohan iyo
sii ko disirto asar a di kano makawatan. Imanto den na pangangarapanen ako ngka.
29 Tig i Mosa a "So den so kapakaganat aken reka na pengangarapan ako ko Allah, na
mapita i kapagawai reka o manga tendek ago sii pen ko manga sanasanaan ago so manga
pagtaw ngka. Ogaid na tangkeda ngka a di ka peman mamagakal ko di ngka
kapekalalakawa ko manga taw sa kapekorban iran ko Allah."
30 Na gomiyanat si Mosa ko Piraon na taros a miyangangarapan ko Allah.

31 Inampon o Allah so pangni i Mosa ka piyakaawa iyan so manga tendek ko Piraon ago
sii pen ko manga sanasanaan ago so manga pagtaw niyan. Da den a satiman bo a tendek a
ba on miyalamba.
32 Ogaid na sii peman sangkai a masa na piyakategas o Piraon so olo niyan na da niyan
den pakalalakawa so manga taw.
IKSODOS 9
So Kiyasiksaa ko Pangangayamen
Oriyan iyan na pitero o Allah ki Mosa a "Song ka ko Piraon na go ngka on teroa a 'Giyai i
pitero o Allah a Tohan o manga Hibriyo: Pakalalakawa ngka so manga pagtaw aken kaan
ako iran masimba.
2 Ka o di reka maparo o ba ngka siran mapakalalakaw ka ba ngka baden peterosen so
kapegerena ngka kiran
3 Na tenaan aken sa pakalekelek a paniyakit so manga talon iyo a manga koda, manga
kimar, manga onta, manga sapi, manga bilibili ago so manga kambing iyo.
4 Ogaid na pakapembidaan aken so manga pangangayamen o manga Israil ago so rek o
manga Imisiren kaan da den a petay ko pangangayamen o manga Israil.' "
5 Na tindo o Allah so oras a tig iyan a "Mapita i kapenggolaolaa ko sii ko inged."

6 Na sii ko miyakatalondog a gawii na pinggolaola den o Allah. Miyamatay so langon a
pangangayamen o manga Imisiren, ogaid na da den a satiman bo a ba miyatay ko rek o
manga Israil.
7 Piyakipariksa ini o Piraon na kiyatokawan iyan a da a satiman bo a ba miyatay ko
manga pangangayamen o manga Israil. Apiya pen oto na miyakategas baden so olo niyan
na da niyan den pakalalakawa so manga taw.
So Kasiksaan a manga Lebag
8 Mandiyadi na pitero o Allah ki Mosa ago si Aron a "Gamak kano sa ombi sii ko
pirapogan na samboraken ai i Mosa sa poro ko kamamasaan o Piraon.
9 Kebaloy ai a bayanek a kibember ko dalem a inged a Misir, na kesabapan ai sa manga
lebag a pembabaloy a panido ko manga taw ago manga pangangayamen ko dalem o
inged."
10 Na gomiyamak siran sa ombi ko pirapogan na miyangadap siran ko Piraon.

Inisamborak i Mosa sa poro na kiyasabapan ai sa manga lebag o manga taw ago so manga
pangangayamen, na miyanga babaloy ai a manga panido iran.
11 So manga salamangkiro na di siran makapengadap ko Piraon sabap sa pilelebagan
siran mambo taman den ko langon a Imisiren.
12 Ogaid na minitoman so miyatero o Allah ki Mosa ka da den pakinega o Piraon si Mosa
ago si Aron, ka piyakategas baden o Allah so olo niyan.
So Kasiksaan a Giyaw
13 Oriyan iyan na pitero o Allah ki Mosa a "Kabalaga ka mbowat mapita na go ka

pangadap ko Piraon. Teroa ngka on a 'Giyai i pitero o Allah a Tohan o manga Hibriyo:
Pakalalakawa ngka so manga pagtaw aken kaan ako iran masimba.
14 Ka o di ngka ini sowaa sangkai a masa na itena aken reka so panimbel a kasiksaan ago
sii ko manga sanasanaan ka ago taman ko manga pagtaw ngka kaan ka katokawi a da den
a rimbang aken ko pirowarowangan o doniya.
15 O miyapakategorar aken reka den a lima ko ko kiyatanai ko reka a paniyakit ago sii ko
manga pagtaw ngka na miyaiped kano den langon ko doniya.
16 Ogaid na pakapepegoyagen ko seka pen kaan aken reka mapakiilay so gees aken ago
an mapakalangkap so Ingaran aken ko dalem a doniya.
17 Na kagiya ipepengimporoan ka pen a ginawa ngka ko manga pagtaw aken ko di ngka
kiran kapekalalakawa
18 Na mapita sa datar ai a oras na pekioranan aken a Misir sa manga ala a giyaw a da on
den ai kaokiti ipoon ko gawii a kiyapagingedi ron.
19 Kagiya ka maoto na pakipangowiten ka nggagaan so manga pangangayamen ka ko
kesirongan kiran a rakes o langon taman a rek ka sii ko kalopaan, ka penga oolog so
giyaw ko oman i taw ago pangangayamen a da makabaling ka ndodoo pen ko liyo o
walay, na taros a ipematay iran.' "
20 So ped ko manga sanasanaan o Piraon a inikalek iran so katero o Allah na

pinggagaanan iran a kapamakasirong o manga oripen ago manga pangangayamen iran.
21 Ogaid na siran oto a da iran tagoa sa ginawa so katero o Allah na inindarainon iran
baden ko pangomaan so da mamakalindong a manga oripen ago manga pangangayamen
iran.
22 Na pitero o Allah ki Mosa a "Antapen ka a lima ngka sa langit kaan makaoran so

giyaw ko dalem a Misir sii ko manga taw, so manga pangangayamen ago so langon taman
a dii mamangeto ko manga pangomaan on."
23 Na kagiya mibayaw i Mosa so teken iyan sa langit na piyakandadalendeg o Allah ago
piyakaoran iyan sa giyaw, na miyamangitras so kilakilat ko lopa. Piyakioranan o Allah so
inged a Misir
24 Sa manga ala a giyaw, na mikilakilat ko mabalabala on. Giyoto i lebi a piyakalekelek
a barat a miyanggolaola sa Misir ipoon ko kiyabaloy niyan a nasiyon.
25 Sii sa dalem a Misir na so langon taman on a da mamakasirong na miyanga sosogat a
giyaw a ndatar so manga taw ago manga pangangayamen. Miyanga ooteng iyan so
langon taman a dii mamangeto ko manga pangomaan ago miyanga sasapak iyan pen so
langon a manga kayo.
26 Aya bo a darpa a da kaorani sa giyaw na so bo so kalopaan a Gosen a katatagoan ko
manga Israil.
27 Na piyakisogoan o Piraon si Mosa ago si Aron na pitero iyan kiran a "Sangkai a masa
na miyadosa ko. So Allah i maontol, na saken ago so manga pagtaw aken i mariribat.
28 Pangangarapan ka ko Allah ka kiyatangkaan den angkai a kilakilat ago giyaw!
Pekalalakaon ko sekano; di kano sii den pekakaden."
29 Tig i Mosa a "Anda den i kapakaliyo aken ko siti na tepenay ako ko kapengangarapan
aken ko Allah; na nggenek so dalendeg ago so kapegoran iyan sa giyaw kaan ka katokawi
a so doniya na rek o Allah.
30 Ogaid na katawan aken a seka ago so manga sanasanaan ka na di kano pen maaleken
ko Allah a so Tohan.
31(Miyanga bibinasa so manga pamomolan a gapas ago bantad, ka sa masa oto na

miyamakatoa den so bantad ago pepamagobarobar den so manga gapas.
32 Ogaid na da mabinasa so trigo ka pekeori a kapekatoa niyan.)
33 Na inawaan i Mosa so Piraon na lominiyo ko siti. Tomiyapenay sekaniyan ko

kapepengangarapan iyan ko Allah, na sarta a gominek ndadalendeg ago so kapegoran iyan
sa giyaw ko inged.
34 Ogaid na kagiya mailay o Piraon a gominek so oran, so giyaw ago so dalendeg na
mindosa sekaniyan peroman ka piyakategas iyan ago so manga sanasanaan iyan so manga
olo iran.
35 Na giyoto den so miyatero o Allah a nggolalan ki Mosa, ka miyakategas so olo o
Piraon na da niyan den pakalalakawa so manga Israil.
IKSODOS 10
So Kasiksaan a manga Tarapan
Oriyan iyan na pitero o Allah ki Mosa a "Song ka ko Piraon ka piyakategas aken so olo
iran ago so manga sanasanaan iyan kaan aken minggolalan sii kiran angkai a manga
pakamemesa a nanao aken
2 Ago an ka mapanotol ko manga wata ago manga apo o ka o andamanaya i
kiyapakaregeni ko ko manga Imisiren ago so kininggolalanen ko kiran ko manga nanao
aken; na ketokawan iyo langon a saken so Allah."
3 Mandiyadi na somiyong si Mosa ago si Aron ko Piraon na pitero iran on a "Giyai i

pitero o Allah a Tohan o manga Hibriyo: Ay katey a kapesengkaa ngka ko
kipangalimbabaanen ka sa ginawa ngka ko hadapan aken? Pakalalakawa ngka so manga
pagtaw aken kaan ako iran masimba.
4 Ka o di ka iyog sa ba ngka siran mapakalalakaw na pagowitan aken sa manga tarapan so
inged ka mapita.
5 Kisapeng siran ko lopa taman sa di den mailay. Pelenganen iran mamangangan so
langon taman a da mabinasa o giyaw a rakes on pen so oman i kayo a pegto ko manga
pangomaan iyo.
6 Pemangipeno siran ko manga walay ngka taman ko langon a walay o manga sanasanaan
ka ago so langon a Imisiren; lebi ini a madakel a manga tarapan a di so miyailay o manga
lokes iyo aya pen o ba so manga apo iyo kembo siran den maaden sa doniya na taman den
imanto." Na tomiyalikod si Mosa na giyanatan iyan so Piraon.
7 Na so manga sanasanaan o Piraon na pitero iran on a "Ay katey a kalilitagi rektano

angkai a mama? Pakalalakawa ngka so manga taw kaan iran masimba so Allah a Tohan
iran. Ba ngka da mainengka a kiyabinasaan den a inged a Misir?"
8 Kagiya ka maoto na piyakakasoy si Mosa ago si Aron ko Piraon na pitero iyan kiran a
"Lalakaw kano; simbaa niyo den so Allah a Tohan iyo. Ogaid na antawaa bes i
melalakaw?"
9 Tig i Mosa a "Palaya kami melalakaw a rakes o manga kangodaan taman ko manga
lokes. Pemakaonoten ami so manga wata ami a mama ago babay ago so manga bilibili,
kambing ago sapi ami, ka peselaselaan ami so Allah."
10 Na tig o Piraon a "Ipesepa aken ko Allah a di aken den peparon a kapakaonot rekano o
manga babay ago manga wata! Marayag a marata kano i pamikiran.
11 Di anan kepakay! So bo so manga mama rekano i pekalalakaw; na simbaa niyo so
Allah ka giyanan i kabaya iyo." Na biyogaw si Mosa ago si Aron ko hadapan o Piraon.
12 Mandiyadi na pitero o Allah ki Mosa a "Antapen ka a lima ngka sa Misir kaan

mibombor so makapal a tarapan ko lopa a penganganen iran so langon taman a
pepemangeto on a so langon a da mabinasa o giyaw."
13 Na iniantap i Mosa so teken iyan sa Misir na piyakasamber o Allah so ndo a

pepekapoon sa sebangan, na somiyamber ko inged sangkoto a kadaondaw ago
miyababasa gawii. So den so kiyapita iyan na miyawit roo o ndo so manga tarapan.
14 Lomiyangkap siran ko dalem a Misir na miyamanana ko mbalabala ko inged a tanto
siran a makapal. Da den a ba ini datar sa kadakel a tarapan a ba kiyaokiti sii sa Misir aya
pen o ba kaperomani.
15 Kiyasapengan iran langon so lopa taman sa miyakaitem, na piyangangan iran so
langon a da mabinasa o giyaw a so langon taman a pepemangeto on a rakes o langon o
manga onga a kayo. Da den a ba miyalamba a raon o apiya antonaa kayo o di na
pamomolan sii ko dalem a inged a Misir.
16 Na piyakisogoan nggagaan o Piraon si Mosa ago si Aron na pitero iyan kiran a

"Miyadosa ko ko Allah a Tohan iyo ago sii rekano.
17 Kapedipedi kano bo na rilaan iyo raken angkai a dosa ko sa makaisa bo, na go niyo
pangangarapana ko Allah a Tohan iyo a kowaan iyan raken angkai a pemakapatay a
kasiksaan."
18 Na giyanatan i Mosa so Piraon na miyangangarapan ko Allah.

19 Na siyambian o Allah so ndo sa tanto a mabager a ndo a pepekapoon sa sedepan. Na
inigorong iyan so manga tarapan ago inibayog iyan ko Mariga a Ragat. Da den a ba
satiman bo a tarapan a ba minibegak ko apiya anda sa Misir.
20 Ogaid na piyakategas o Allah so olo o Piraon na da niyan den pakalalakawa so manga
Israil.
So Kasiksaan a Maliboteng
21 Oriyan iyan na pitero o Allah ki Mosa a "Antapen ka a lima ngka sa langit kaan
makalangkap so maliboteng sa inged a Misir, a so kaliboteng a datar o ba pekegedam."
22 Na iniantap i Mosa a lima niyan sa langit na liyangkapan a makapal a maliboteng so
dalem a Misir ko soled o miyakatelo gawii.
23 Da makapamagilaya so manga Imisiren, na da a ba isa kiran bo a ba pekaliyo ko walay
niyan ko miyakatelo gawii. Ogaid na so manga Israil na kaliliwanagan so langon a manga
babalingan iran.
24 Na giyoto a piyakisogoan o Piraon si Mosa na pitero iyan on a "Lalakaw kano ago

simbaa niyo so Allah; apiya so manga babay rekano ago manga wata iyo na pemakaonot
rekano pen. Ogaid na begaken iyo baden so manga bilibili, kambing ago sapi iyo."
25 Tig i Mosa a "Disomala a pakitelonen ka rekami so manga pangangayamen a

ipekorban ago totongen ami a isepaat ko Allah a Tohan ami.
26 Kagiya ka maoto na pekaonoten ami mambo so manga pangangayamen ami; da den a
ba isa kiran bo a ba on mbegaken. Disomala a pemilian ami siran sa pagosaren ami ko
kasimbaa ko Allah a Tohan ami, na taman sa di ami roo pen kapekaoma na di ami
katawan i kisapaat ami ron."
27 Ogaid na piyakategas o Allah so olo o Piraon na da sekaniyan iyog sa ba niyan siran

mapakalalakaw.
28 Na taros a pitero o Piraon ki Mosa a "Awai ako ngka! Pananggilai ngka o ba ta
makapagilaya peroman! Sii ko gawii a kailaya ngka ko paras aken na petay ka den!"
29 “Mataan den," a tig i Mosa. "Di ako reka den pengadap peroman."
IKSODOS 11
So Kasiksaa ko Kaka a Wata a Mama
Miyatero den gowani o Allah ki Mosa a "Satiman pen a kasiksaan a itena aken ko Piraon
ago giya Misir. Maipos oto na pekaawaan kano niyan on den. Na amay ka pekaawaan
kano niyan na matamataan den a tanto kano niyan a mbogaon.
2 Na, teroa ngka ko manga Israil a palaya siran pamangni sa manga ipamemetad a pirak
ago bolawan ko manga siringan iran."
3(Miyabaloy den o Allah so manga Imisiren a ipengalimo iran so manga Israil. Liyo ron
pen na so manga sanasanaan o Piraon ago so langon a taw sa Misir na kikilalaan iran a
mala i gees si Mosa.)
4 Na giyoto a pitero pen i Mosa ko Piraon a "Giyai i pitero o Allah: Sii ko kakelooki sa
gawii na pegenebeneben ko a Misir.
5 Na petay so oman i kaka a wata a mama sa Misir ipoon ko kaka a wata o Radiya Piraon
na taman den ko kaka a wata o oripen a babay a pabobowayo, ago so pen so oman i
paganay a inimbawata o pangangayamen.
6 Tanto a pekatanog so kagoraok na taman sa pemangigorong ko mbalabala ko inged a
Misir, na pikembokembo na da oto manggolaola aya pen o ba kaperomani.
7 Ogaid na sii ko manga Israil a ndatar so taw ago so pangangayamen na apiya so
kanggebo ron o aso na di. Giyanan i kaketokawi niyo sa dii pakambidaan o Allah a Misir
ago giya Israil.
8 Na so langon angkai a manga sanasanaan ka na pemanong raken ka sodiyodan ako iran
a tig iran a 'Awa kano den, seka ago so langon o manga pagtaw ngka!' Oriyan oto na
magawa ako den." Na giyoto a si Mosa a tanto a pekerarangitan na giyanatan iyan so
Piraon.
9 Miyatero den mambo o Allah ki Mosa a "Ipeteros o Piraon so di niyan reka kapekinega
kaan mapakadakel so manga pakamemesa a galebek aken sii sa Misir."
10 Na mininggolalan den langon i Mosa ago si Aron angkai a manga pakamemesa ko
hadapan o Piraon, ogaid na piyakategas baden o Allah so olo o Piraon, na da niyan den
pakaliyowa so manga Israil ko inged iyan.
IKSODOS 12
So Paska
Pitero o Allah ki Mosa ago si Aron sii sa Misir a

2 “Giyangkai a olanolan na bilangen iyo a aya niyo paganay a olanolan ko ragon.
3 Pakalangkapa niyo ko langon o isa ka maginged a Israil a sii ko ikasapolo gawii sangkai
a olanolan na ikowa o oman i mama sa kangodaan a bilibili so pamiliya niyan a nggagaisa
ko oman i isa ka mbangonan sa walay.
4 O di malengan koman o isa ka mbangonan sa walay so satiman a bilibili na saden sa
marani kiran a siringan na kebaadan iran on a aya kapembaabaada on na makaaayon ko
kadakel o taw ago so kekan o oman i isa kiran.
5 So piliin iyo a pangangayamen na mama a miyakasaragon a idad iyan a da den a daway
niyan; na aya kapemilian iyo na so manga bilibili o di na manga kambing.
6 Tagikora niyo oto taman ko ikasapolo ago pat gawii ko olanolan, na amay ka perimon
sangkoto a gawii na so langon o isa ka maginged a Israil na penombaliin iran angkoto a
manga pangangayamen.
7 Oriyan iyan na kowa siran ko rogo na panagoi ran on so mbala a kilid ago so poro o
pintoan o manga walay a kenan iran ko manga bilibili.
8 Sii den sangkoto a kagagawii na ken iran so sapo a iniyaw ko apoy a rakes o mapait a
manga lite ago paan a da a tapay ron.
9 Di niyo kena so sapo a ba da maloto o di na pisewawan, ka pagiyawa niyo ko apoy a
merakerakes on so olo, so manga ai ago so soled a tiyan iyan.
10 Di kano pelamba ko sapo taman ko kapipita. O aden a kesama on ko kepita na totonga
niyo ai.
11 Giyai i okit a kakena niyo ron: Nggagaani niyo koman a ndiditar kano sa ipelalakaw a
titinilas kano pen ago kakapetan iyo so manga teken iyo. Giyai na Paska a ipeselasela ko
Allah.
12 “Sii den sangkoto a kagagawii na pegenebeneben ko a Misir ka pemonoon aken so

oman i kaka a wata a mama a ndatar so manosiya ago so pangangayamen. Ndanegen ko
so langon a manga katohanan sa Misir; saken so Allah.
13 So rogo sii ko manga pintoan na aya tanda ko manga walay a katatagoan rekano; na
amay ka mailay aken so rogo na pelepasen ko sekano. Di kano den ketanaan a morala a
ikebinasa niyo amay ka siksaan ko so inged a Misir.
14 “Giyangkai a gawii na selaselaa niyo taman ko kapepemagapidapidi rekano a aya niyo
kapepistai ko Allah, ka giyanan i pekitadem iyo ko pinggolaola ko rekano na taman sa
pakataman ai a sogoan.
15 Sii ko soled o pito gawii na aya bo a kekan iyo ron a paan na so da a tapay ron. Sii ko
paganay a gawii na kowai niyo sa tapay so manga walay niyo, ka apiya antawaa rekano i
makakan sa aden a tapay ron ipoon ko paganay a gawii taman ko ikapito gawii na kebelag
ko isa ka maginged a Israil.
16 Sii ko paganay a gawii na talabok kano sa soti a kalilimod, na peromani niyo ai ko
ikapito gawii. Di kano penggolaola sa apiya antonaa galebek sangkoto a manga gawii
liyo ron so kapetiyagara niyo ko ken o oman i isa rekano.
17 “Selaseaa niyo angkai a Pista ko Kakan sa Paan a da a Tapay ron ka kagiya sii sangkai
a gawii na kalangolangon iyo a mbatabataa na piyamakaliyo aken sa Misir. Selaselaa
niyo angkai a gawii taman ko kapepemagapidapidi rekano, ka taman sa pakataman ai a
sogoan.
18 Sii ko paganay a olanolan na kan kano sa paan a da a tapay ron ipoon ko perimon ko
ikasapolo ago pat gawii taman ko kaperimon iyan ko ikadowa polo ago isa gawii.
19 Sii ko soled o pito gawii na da den a ketoon a tapay ko manga walay niyo, ka apiya
antawaa i koman sa aden a tapay ron na kebelag ko isa ka maginged a Israil apiya o rait
sekaniyan o di na tenger a taw a Israil.
20 Di kano ken sa apiya antonaa a aden a tapay ron. Sii ko langon o manga walay niyo na
aya bo a kekan iyo ron a paan na so da a tapay ron."
21 Mandiyadi na piyakilimod i Mosa so langon a pelokelokesen ko manga Israil na pitero

iyan kiran a "Ikano roo den na pamamili kano sa kangodaan a manga bilibili a mitiyagar
ko manga pamiliya niyo, na sombalia niyo ai a inggabi niyo ko Paska.
22 Na kowa so oman i isa rekano sa sapak a kayo a hisop na go niyan sombon ko rogo a
tatangelen ko ladiya, na sisingen iyan ai ko poro ago sii ko mbala a kilid o pintoan iyan.
Da den a isa rekano bo a ba meliyo ko walay niyan taman sa mapita.
23 Aya sabap iyan na pegenebeneb so Allah ko inged sa kapemonoa niyan ko manga
Imisiren, na amay ka mailay niyan so rogo sii ko poro ago so mbala a kilid o pintoan na
pelepasen iyan oto, ka di niyan on den pekasoleden so Malakalmaot ko manga walay niyo
sa ba kano niyan mabono.
24 “Ketoman iyo taman ko manga moriyataw niyo angkai a manga insarat rekano, ka
taman sa pakataman ai a sogoan.
25 Amay ka makasoled kano den ko inged a initopa o Allah a imbegay niyan rekano na
mipenggolalan iyo angkai a sowaan.
26 Na amay ka iise rekano o manga wata iyo a 'Antonaa i maana rekano angkai a
sowaan?'
27 Na peteroon iyo kiran a 'Giyai so kapekorban ami ko Paska a pantag bo ko Allah, ka
lipas iyan so manga walay o manga Israil sii sa Misir isako pamonoon iyan so manga
Imisiren, na inilidas iyan on so manga pamiliya mi.' "
So kiyanega sii o manga Israil na somiyodiyod siran ago miyamanimba.
28 Na gomiyanat siran den na so den so inisogo o Allah ki Mosa ago si Aron na aya iran
pinggolaola.
So Kiyapamonoa ko manga Kaka a Wata
29 Sii ko look a gawii na piyamono o Allah so langon a kaka a wata a mama sii sa Misir
ipoon ko kaka a wata o Radiya Piraon na taman ko kaka a wata o taw a totongkopen ko
kalaboso ago so pen so kaka a wata o langon a pangangayamen.
30 Na miyamakanaw so Piraon ago so langon a sanasanaan iyan taman ko langon a
manga Imisiren sangkoto a kagagawii; na tanto a matanog a kiyagoraok sii sa Misir ka da
den a isa bo ko manga walay iran a ba da a miyatay ron.
31 Sii den sangkoto a gagawii na piyakisogoan o Piraon si Mosa ago si Aron na pitero
iyan kiran a "Ganat kano den! Belaga niyo so manga pagtaw aken, sekano ago so manga
Israil! Lalakaw kano ago simbaa niyo so Allah ka aya niyo piyangni.
32 Telonen iyo so manga bilibili, kambing ago sapi iyo ka aya niyo miyatero, na ganat
kano den. Na pangangarapanen ako niyo mambo."
33 Na tigel o manga Imisiren so manga taw ka pakapenggagaanen iran siran mawa ko

inged a tig iran a "O di kano mawa na palaya kami pematay."
34 Kagiya ka maoto na piyanago o manga Israil so miyabonaw iran a arina a da den
kasaogi sa tapay sii ko manga towanga iran, na piyamotos iran ai ko manga nditaren iran
na go piyamosai ran.
35 Miyanggolaola o manga Israil so miyatero kiran den i Mosa ka miyamangni siran daan
ko manga Imisiren sa manga ipamemetad a pirak ago bolawan, ago manga nditaren.
36 Na kagiya biyaloy o Allah so manga Imisiren a ipengalimo iran so manga Israil na
inipamegay iran kiran so apiya antonaa a piyangni iran. Sangkai a okit na miyakowa iran
so manga tamok o manga Imisiren.
Gomiyanat so manga Israil sa Inged a Misir
37 Na gomiyanat so manga Israil sa Ramisis na miyakaoma siran sa Sokot. Manga nem

gatos nggibo siran a manga mama a pelalag a da on mibilang so manga babay ago manga
wata.
38 Madakel a miyamangonot kiran a di iran royod a manga taw ago so makapal a
pangangayamen a bilibili, kambing ago manga sapi.
39 Miyamangembaal siran sa da a tapay ron a paan ko miyabonaw a arina a kiyaawidan
iran ko kiyapakaawa iran sa Misir. Da ini kasaogi sa tapay ka kagiya baden minitekaw a
kiyabogawa kiran sa Misir na da siran lakay tiyagar sa mapeloto iran.
40 Aya kiyapakabaling o manga Israil sa Misir na miyakapat gatos ago telo polo ragon.
41 Sii den sangkoto a gawii a kiyapopos o pat gatos ago telo polo ragon na gomiyanat sa
Misir so langon a mbatabataa a manga pagtaw o Allah.
42 Na sabap sa totodayan siran o Allah sangkoto a kagagawii ko kiyapakaliyowa niyan
kiran sa Misir na petoday mambo so langon o manga Israil sangkai a kagagawii a
ipeselasela iran ko Allah taman ko kapepemagapidapidi kiran.
So manga Kokoman ko Paska
43 Pitero o Allah ki Mosa ago si Aron a "Giyai i manga kokoman mipantag ko Paska:
"Da a rait ko inged a ba pekakan ko inggabi ko Paska.
44 Apiya antawaa ko manga oripen i miyapamasa niyo na pekakan on asar a miyatori iyo
daan,
45 Ogaid na so mananangga o di na so pesokayan iyo a gomagalebek na di on pekakan.
46 “Disomala a ken ai langon sii ko walay a pitiyagaran on; da a ba niyo kiliyo ko sapo o
pangangayamen ko walay. Da den mambo a ba niyo potola ko tolan iyan.
47 So langon o isa ka maginged a Israil na mapeselasela iran so Paska,
48 Ogaid na so da matori a mama na di on den pekakan. O aden a rait ko inged a
mababaling rekano a kebaya selasela ko Paska o Allah na disomala a matori daan so
langon a manga mama ko pamiliya niyan. Oriyan oto na kepakay a mamangeped ko
kaselaselaa on a datar bo o ba timpo a mbawataan o Israil.
49 Isa bo a kitab a mipenggolalan ko timpo a mbawataan o Israil ago so rait ko inged a
mababaling rekano."
50 Na tiyoman o langon o manga Israil so inisogo o Allah ki Mosa ago si Aron.

51 Sii den sangkoto a gawii na piyakaliyo o Allah sa Misir so langon a mbinabataa a
manga Israil.
IKSODOS 13
So Kinisenggain ko manga Kaka a Wata
Pitero o Allah ki Mosa a

2 “Senggain iyo a rek aken so oman i kaka a wata a mama. So oman i paganay a
ipembawata sii ko manga Israil a ndatar so manosiya ago so pangangayamen na kibilang a
rek aken."
3 Na pitero i Mosa ko manga taw a "Pepenanademi niyo angkai a gawii a kiyapakaawa

iyo sa Misir a ron kano miyapangongoripen, ka piyakaliyo kano ron o Allah a nggolalan
ko kala iyan i kapaar. Di kano ron ken sa apiya antonaa a sasaogan sa tapay.
4 Imanto a gawii a olanolan a Abib na aya niyo kagaganat sa Misir.
5 Inisepa o Allah ko manga apo iyo a imbegay niyan rekano so pagiingedan o manga
Kanaaniyo, manga Hitiyo, manga Amoriyo, manga Hibiyo ago manga Hibosiyo. Na
amay ka pakasoleden kano o Allah sangkoto a pekepakayan ago oodaren a inged na
nggolalanen iyo angkai a kaselaselaa ko paganay a olanolan ko oman ragon:
6 Sii ko soled o pito gawii na kan kano sa paan a da a tapay ron, na go sii ko ikapito gawii
na selaselaa niyo ron so Allah.
7 Sii sangkoto a pito gawii na aya bo a kekan iyo a paan na so da a tapay ron; o ba kano
katooni sa apiya antonaa a aden a tapay ron aya pen o ba aden a matoon a tapay ko bapiya
anda ko pagiingedan iyo.
8 Sii ko paganay a gawii ko kaselasela na teroa niyo ko manga wata iyo a mama a "Di
aken ai dii nggolaolaan sabap ko pinggolaola raken o Allah ko kiyapakaawa aken sa
Misir.'
9 Giyangkai a kaselasela na ipenanadem iyo a datar o tanda a miiiket ko manga lima niyo
o di na mibababad ko beneng iyo; pekitadem iyo pen ai ko kapetontola niyo lalayon ko
Kitab o Allah; ka piyakaliyo kano o Allah sa Misir a nggolalan ko kala iyan i kabarakat.
10 Kagiya ka maoto na petomana niyo angkai a sogoan ko matetendo on a masa oman
ragon.
11 “Amay ka mawit kano o Allah ko inged o manga Ikanaanen ago mibegay niyan rekano
pen ai a aya kaketoman o inisepa iyan rekano ago so manga apo iyo
12 Na palada niyo ko Allah so oman i paganay a ipembawata roo a mama. Oman i
paganay a ipembawata a mama o pangangayamen na rek o Allah.
13 Ogaid na oman i paganay a ipembawata o kimar na sanggara niyo a nati a bilibili a aya
niyo pekorbanen. Ogaid na o di niyo oto senggara na lepoa niyo so lig iyan. Sanggara
niyo so oman i paganay a ipembawata iyo a mama.
14 “Sii ko pemakatalingoma a manga gawii amay ka iise reka o wata a ka a mama a tig
iyan a 'Antonaa i maana ini?' na teroa ngka on a 'Miyakanggolalan ko mala a kabarakat o
Allah na miyapakaliyo kami niyan sa Misir a ron kami miyapangongoripen.
15 Na isako pakategasen o Piraon a olo niyan ko di niyan rekami kapekalalakawa na
piyamono o Allah so oman i kaka a wata a mama sii sa Misir a ndatar so manosiya ago so
pangangayamen. Giyanan i sabap a di ami dii korbanen ko Allah so oman i paganay a dii
imbawata a mama o pangangayamen na go pesenggaren ami pen so oman i kaka a wata
ami a mama.
16 Na giyangkai a kaselasela na datar o ba tanda sii ko lima mi ago sii ko beneng ami a
ipenanadem ami ko kiyapakaliyowa rektano o Allah sa Misir a nggolalan ko mala a
kabarakat iyan.' "
So Mapopolaos a Gabon ago Apoy
17 Kagiya mapakaawa o Piraon so manga taw na da siran agaka o Tohan sii ko lalan a
ipegokit ko pagiingedan o manga Pilistiyo apiya pen giyoto i mapantek. Ka tig o Tohan a
"O mailay iran a aden a makipetidawa kiran na o ba iran baden alina a pamikiran iran na
ba siran baden komasoy sa Misir."
18 Sabap roo na piyakaalilit siran o Tohan, ka sii niyan siran piyakaokit ko lalan sii ko
disirto a ipegantap ko Mariga a Ragat.
Kagiya gomanat so manga Israil sa Misir na maaator siran piyapiya ko kapelalakaw
iran.
19 Na initelon i Mosa so bangkay o Yosop, ka miyapakasepa o Yosop so manga Israil
isako kateroa niyan on a "Sepaan iyo raken a amay ka pagowiten kano o Tohan sangkoto
a inged na itelon iyo so bangkay aken."
20 Na giyanatan o manga Israil a Sokot na mikampo siran sa Itam ko kilid o disirto.

21 Igira a kadaondaw na maoonaan iran so Allah a sisii ko mapopolaos a gabon a ipetoro
iyan kiran so lalan a pagokitan iran; na igira a gagawii na maoonaan iran sekaniyan sii ko
mapopolaos a apoy a tomatayaw kiran kaan siran pepekalalakaw sa apiya anda ko gagawii
daondaw.
22 Apiya anda ko mapopolaos a gabon igira a kadaondaw ago so mapopolaos a apoy igira
a gagawii na da den mada ko maoonaan o manga taw.
IKSODOS 14
So Kiyaripag ko Ragat
Na pitero o Allah ki Mosa a

2 “Teroa ngka ko manga Israil a peto siran na go siran kempo ko marani sa Pi Hahirot sii
ko pageletan a Migdol ago so ragat. Roo siran kempo ko marani ko ragat sii ko pantag a
Baal Sipon.
3 Na kigedi ko pamikiran o Piraon a 'Sii den peketaataap so manga Israil ko inged, ka
miaalang kiran on so disirto.'
4 Na pekategasen ko so olo o Piraon na selobaan kano niyan. Ogaid na kebantogan ako a
nggolalan ko penggolaolaan ko ko Piraon ago so langon o manga sondaro niyan; na
ketokawan o manga Imisiren a saken so Allah." Na pinggolaola den o manga Israil so
miyatero kiran.
5 Kagiya matero ko solotan sa Misir a miyakapalagoy so manga taw na miyaalin so

pamikiran o Piraon ago so manga sanasanaan iyan mipantag kiran, na pitero iran a
"Antonaa angkai a miyanggolaola tano? Ba tano baden kiyabokai so manga Israil ko
kapengongoripena tano kiran!"
6 Mandiyadi na piyakitiyagar o Piraon so karo niyan na piyakaonot iyan langon so
sondaro niyan.
7 Piyakaonot iyan pen so langon a manga karo sa Misir a maaped on so nem gatos a lebi a
manga pipiya on a so oman i isa on na pageedaan o maporo a sondaro.
8 Na kagiya piyakategas o Allah so olo o Piraon a solotan sa Misir na siyaloba iyan so
manga Israil a gomaganat siran a makasasarig.
9 So langon o Imisiren a manga sondaro o Piraon a rakes o langon a koda ago manga karo
niyan taman ko kipageeda on na siyaloba iran so manga Israil na riyaot iran siran sii ko
kapekempo iran ko kilid a ragat a marani sa Pi Hahirot a mipapantag sa Baal Sipon.
10 Sii ko kapepekarani kiran o Piraon na miyalangkaw o manga Israil so manga Imisiren

a pepekaantap kiran. Tanto siran a miyangaalek na gomiyoraok siran den ko Allah.
11 Pitero iran ki Mosa a "Ino kami ngka pen sii pagowita sangkai a disirto a ron kami
pematay? Ba da den a kelebengan roo sa Misir? Antonaa angkai a inikidia ngka rekami
sangkai a kiniliyon ka rekami sa Misir?
12 Ba ami reka da matero roo sa Misir a taregi kami ngka ago pakipangongoripenen kami
ngka den ko manga Imisiren? Tomo so kapengongoripena rekami o manga Imisiren a di
so kapematay ami sii sangkai a disirto!"
13 Simbag siran i Mosa a tig iyan a "Di kano pekelek! Mbayorantang kano baden ka
kemasaan iyo o antonaa i penggolaolaan o Allah sa kasebeta niyan rekano imanto. So
manga Imisiren a kamamasaan iyo imanto na di niyo den keilay peroman.
14 So den so Allah i pengato rekano; ba kano den rerenek."
15 Mandiyadi na pitero o Allah ki Mosa a "Ino ka raken penggoraok? Teroa ngka ko

manga Israil a taros siran den.
16 Na seka peman na bayaon ka so teken ka na go ngka antapen ko ragat. Kesisi so ig
kaan makaokit so manga Israil ko ragat ko mamara a lopa.
17 Na sabap sa pekategasen ko so poso o manga Imisiren na petelokonan iran roo so
manga Israil. Na kebantogan ako a nggolalan ko penggolaolaan ko ko Piraon ago so
langon o sondaro niyan taman den ko manga karo niyan ago so kipageeda on.
18 Na ketokawan o manga Imisiren a saken so Allah amay ka kabantogan ako a nggolalan
ko Piraon ago so manga karo niyan ago so kipageeda on."
19 Samaoto na so Malaikat o Tohan a sisii ko maoonaan o isa ka maginged a Israil na

tomipas ko oriyan iran. Na sakamaoto mambo a miyogalin so mapopolaos a gabon a
poon ko onaan iran ka sii tominindeg ko oriyan iran
20 Sii ko pageletan o manga Imisiren ago so manga Israil. Sii sangkoto a kagagawii na
maliboteng so gabon ko sabala na maliwanag ko sabala on. Kagiya ka maoto na da den
makandasega so manga Imisiren ago so manga Israil ko miyababasa gawii.
21 Na biter i Mosa a lima niyan sa tampar sa ragat na sii ko miyababasa gawii na

pepakapagendoden o Allah so ragat a nggolalan ko mabager a ndo a pepekapoon sa
sebangan, na biyaloy niyan a mamara a lopa. Miyasisi so ig
22 Na taros a rominipag so manga Israil ko ragat sii ko mamara a lopa a mikekeleb on so
ig ko kawanan diwang iran.
23 Pitelokonan siran o manga Imisiren ko ragat a so den so langon a manga koda o Piraon
taman den ko manga karo niyan ago so kipageeda on.
24 Kagiya sobo na so Allah a sii ko mapopolaos a apoy ago gabon na tiyolongan iyan
angkoto a madakel a sondaro a manga Imisiren na giyorigaw niyan siran.
25 Piyakagenek iyan tominger so manga tirikan o manga karo iran kaan maregen a
kapepekaiseg iran. Na pitero o manga Imisiren a "Palagoyan tano so manga Israil ka
ipepengato siran den o Allah sii rektano!"
26 Giyoto a pitero o Allah ki Mosa a "Bayaon ka a lima ngka sa tampar sa ragat kaan
makakasoy so ig sii ko manga Imisiren a rakes o manga karo iran ago so kipageeda on."
27 Na inibayaw i Mosa a lima niyan sa tampar sa ragat, na kagiya somebang so alongan
na miniasal so ragat. Piyanga dadasengan o ig so manga Imisiren ko kapepelagowi ran
on, na piyanalimpato siran o Allah sii ko ragat.
28 Miniasal so ig ago miyamangikolob ko manga karo ago so kipageeda on taman den ko
langon a manga sondaro a Imisiren a mitelokon ko manga Israil sii ko ragat; da den a ba
isa kiran bo a ba miyalamba.
29 Ogaid na so manga Israil na miyakaokit siran ko ragat a lomiyalakaw ko mamara a

lopa a mikekeleb so ig ko mbala a kilid iran.
30 Sangkoto a gawii na siyabet o Allah so manga Israil a poon ko lima o manga Imisiren;
na miyailay o manga Israil so manga bangkay o manga Imisiren a miyamangidese ko kilid
o ragat.
31 Na kagiya kabantayan o manga Israil so mala a kabarakat o Allah a minitaban iyan ko
manga Imisiren na inikalek iran so Allah na siyarigan iran sekaniyan pen taman ki Mosa a
oripen iyan.
IKSODOS 15
So Inidikir i Mosa
Oriyan iyan na inidikir i Mosa ago so manga Israil angkai a indikir ko Allah:
"Ndikiran aken so Allah,

ka sekaniyan i lebi a maporo.
So manga koda ago so kikokoda on
na inipangitog iyan ko ragat.
2 Ipegidaida aken so Allah a bager aken;
sekaniyan i miyakasabet raken.
Podin aken sekaniyan a Tohan ko,
a Tohan mambo o ama aken; na mbentogen aken sekaniyan.
3 So Allah na mapasang i kapakitidawa;
So Allah i ngaran iyan.
4 So manga karo o Piraon ago so manga sondaro niyan
na inipangitog iyan ko ragat.
So lebi a mapasang ko manga poporo a sondaro niyan
na miyangaaled ko Mariga a Ragat.
5 Piyanga tatambonan siran ko madalem a ig;
minitindep siran ko kadaleman on a datar o ator.
6 “Ya Allah, so kawanan a lima ngka

na piyakamemesa so bager iyan.
So kawanan a lima ngka, ya Allah,
na riyopet iyan so manga ridoay.
7 Sabap ko kala a ka i bantogan
na liyangkoloban ka so siran oto a somiyorang reka.
Piyakamborngat ka so pesokeyaw a rarangit ka
na tiyotong iyan siran a datar o gango a ragami.
8 Singawan ka so ragat na miyaporon so ig.
So mareges a ig na miyakatindeg a datar o keleb;
tomigas so madalem a ig ko look o ragat.
9 “Pitero o ridoay a
'Petelokonan ago peraoten ko siran .
Pembagibagiin ko so mapeteban aken.
Penggolaolaan aken kiran so langon o kabaya aken.
Mbindasen ko so pedang aken
na go mbinasaan aken siran.'
10 Ogaid na giya bo a kiyaiyop ka
na minikolob kiran so ragat.
Miyamangigaled siran a datar o timbega
sii ko piyakalekelek a ig.
11 “Ya Allah, antawaa ko manga katohanan i datar ka?

Antawaa i rimbang ka
a kapagaadatan ago masosoti,
a piyakamemesa i bantogan,
ago dii nggolaola sa manga kabarakat?
12 Biter ka a kawanan a lima ngka
na liyamed o lopa so manga ridoay ngka.
13 “Sabap ko limo o ka na pepegagaken ka so manga taw a miyapanabet ka.

Nggolalan ko bager ka na pagowiten ka siran ko soti a kaden ka.
14 Keneg ai o manga nasiyon na sarta den a penanabaden siran;
Tanto a pekarata a ginawa o manga taw sa Pilistiya.
15 Pengaalek so manga dato sa Idom;
tanto a penanabaden so manga olowan sa Mowab;
pengaadaan sa inam so langon a taw sa Kanaan
16 ka peraoten siran a kalek ago katalaw.
Ya Allah, sabap ko kala a ka i kabarakat
na merenek siran baden a datar o manga ator
taman sa kapakaokit o manga taw ngka,
taman den ko kapakasagad o manga taw a miyaaon ka.
17 Isoled ka siran ko inged ago pekakadenen ka pen
sii ko palaw a kawali ngka,
giyoto den so darpa, ya Allah, a inembaalan ka a kaden ka,
a so walay ngka a seka den i miyangon on.
18 Pendato so Allah sa taman sa pakataman."
So Inipagidaida i Mariyam
19 So manga Israil na miyokit siran ko ragat a lomiyalakaw ko mamara a lopa, ogaid na

isako mokit ko ragat so manga koda o Piraon ago so manga karo niyan a rakes o
kipageeda on na piyakaasal kiran o Allah so ig na miyamangikolob kiran ai.
20 Na giyoto a si Mariyam a babay i Aron na kominowa sa garingking na tiyondog
sekaniyan o langon o manga babay a kikakapet mambo sa garingking ago dii sesayaw.
21 Na miyamagidaida si Mariyam a tig iyan a:
"Pagidaidaan tano so Allah,

ka sekaniyan i lebi a maporo.
So manga koda ago so kikokoda on
na inipangitog iyan ko ragat."
So Ig sa Marah ago sa Ilim
22 Oriyan oto na pinakodaan i Mosa so manga Israil na gomiyanat siran ko Mariga a

Ragat na sii siran lomiyalag ko Disirto sa Sor. Miyakatelo gawii a inilalakaw iran ko
disirto na da den a ba iran miyaoma a ig.
23 Miyakatalingoma siran ko darpa a bebetowan sa Marah ogaid na di siran pekainom ko
ig on ka mapait. (Giyanan i sabap a kiyabetowi sangkoto a darpa sa Marah.)
24 Kagiya ka maoto na piyanarotaroan o manga taw si Mosa a tig iran a "Antonaa i
keinom tano?"
25 Mandiyadi na gomiyoraok si Mosa ko Allah, na piyakailay sekaniyan o Allah sa
piyonit. Iniitog iyan ai ko ig na miyabaloy so ig a mapiya i taam.
Roo siran bigan o Allah sa manga kokoman ago manga sogoan, na roo niyan siran pen
tipengan.
26 Tig iyan a "O pakinega niyo piyapiya so dii teroon o Allah a Tohan iyo ago
maginontolan kano ron, na o tagoa niyo pen sa ginawa so manga sogoan iyan ago
peratiyayaan iyo so langon a manga kokoman iyan na da den a ba ko rekano itena ko
manga paniyakit a initana aken ko manga Imisiren, ka saken so Allah a pepemolong
rekano."
27 Oriyan oto na miyakatalingoma siran sa Ilim a aden a sapolo ago dowa a bowalan on
ago pito polo waro a kayo a korma, na roo siran den mikempo ko marani ko ig.
IKSODOS 16
So Roti ago so manga Pogowa
Gomiyanat sa Ilim so langon o isa ka maginged a Israil. Na sii ko ikasapolo ago lima
gawii ko ikadowa olan a kiyapakaawa iran sa Misir na miyakaoma siran sa Disirto sa Sin
sii ko pageletan a Ilim ago Sinay.
2 Sii sangkoto a disirto na so langon o isa ka maginged na piyanarotaroan iran si Mosa
ago si Aron
3 A tig iran kiran a "Tomo a ba kami baden piyangowai o Allah sa niyawa roo sa Misir!
Pepemakaontod kami roo a pepemakakan sa sapo ago ped a pangenengken taman sa
manga oosog kami. Ogaid na ba kami niyo baden inowit sangkai a disirto ka pemonoon
kami niyo langon a ongos!"
4 Na pitero o Allah ki Mosa a "Pekioranan aken sekano sa roti a poon sa langit. Oman
gawii na pepemakaliyo so manga taw kaan iran peketimo so tetangkai baden kiran
sangkoto a gawii. Sii sangkai a okit na tepengan ko siran o ba iran paratiyayaa so manga
insarat aken.
5 Sii ko ikanem gawii na tiyagar siran manimo sa dowa takep ko asal a peketimo iran ko
oman gawii."
6 Mandiyadi na pitero i Mosa ago si Aron ko langon a manga Israil a "Amay ka perimon
na ketokawan iyo a so den so Allah i miyakaliyo rekano sa Misir;
7 Na amay ka mapita na keilay niyo so bantogan o Allah, ka miyaneg iyan so di niyo
rekaniyan dii kapanarotaroi. Antawaa kami bes a patot a di niyo dii panarotaroan?"
8 Tig pen i Mosa a "Ketokawan iyo a so Allah i miyakaliyo rekano amay ka mbegan kano
niyan sa sapo a makan iyo ko kaperimon iyan ago roti a ikeosog iyo sii ko kapipita, ka
miyaneg o Allah so di niyo ron dii kapanarotaroi. Antawaa kami bes? Kena a ba sekami
i di niyo dii panarotaroan ka so den so Allah."
9 Na pitero i Mosa ki Aron a "Teroa ngka ko langon o isa ka maginged a Israil a

pangadap siran ko Allah ka miyaneg iyan so di iran dii kapanarotaro."
10 Na sii ko dii kimbitiyarain i Aron ko langon o manga Israil na lomiyangkaw siran ko

disirto na sarta a mipeyag on so bantogan o Allah a ndodoo ko gabon.
11 Na pitero o Allah ki Mosa a

12 “Miyaneg aken so dii kapanarotaro o manga Israil. Teroa ngka kiran a amay ka
perimon na pekakan siran sa sapo, na sii ko kapita iyan na keosog siran sa roti. Amay ka
manggolaola nan na ketokawan iran a saken so Allah a Tohan iran."
13 Sangkoto a kaperimon iyan na makapal a manga pogowa a miyamakatalingoma ko

kampo na minisapeng siran on; na kagiya mapita na madakel a namog a lomiyangkap ko
kampo.
14 Kagiya mati so namog na aden a miyamangibagak a manga roroni ago manga ninipis a
nganin sii ko liyawaw o disirto a mipelagid o giyaw.
15 Kagiya mailay ai o manga Israil na inipamagisei ran a "Antona oto?" Ka di iran
katawan o antonaa oto.
Pitero kiran i Mosa a "Giyanan so roti a inibegay rekano o Allah a kekan iyo.
16 Na giyai i inisogo rekano o Allah: so oman i isa rekano na pangowa on sa tetangkai
rekaniyan. Kikowa niyo ron sa nggagaisa ka gantang so oman i isa a taw ko pamiliya
niyo."
17 Na pinggolaola o manga Israil so miyatero kiran; so ped kiran na miyangowa on sa

madakel, na so peman so ped na maito.
18 Na kagiya pangasaden iran ko gantang na so miyangowa on sa madakel na da on
kasobrai; na so miyangowa on sa maito na da on kakorangi. So oman i isa kiran na
miyakakowa on sa mitangkai rekaniyan.
19 Na pitero kiran i Mosa a "O ba den a pakapitai ron o apiya antawaa rekano."
20 Apiya pen oto na so ped kiran na da iran pakinega si Mosa ka milalamba siran on sa
piyakapitaan iran, ogaid na piyamangoled ago miyaosang den. Sabap sii na
kiyararangitan siran i Mosa.
21 Oman mapita na pepengowa so oman i isa sa tetangkai rekaniyan, na igira a peranti so
alongan na peketeno so pepemangibagak on ko disirto.
22 Sii ko ikanem gawii na miyamangowa siran on sa dowa takep a kadakel iyan maana a
dowa ka gantang ko oman i isa kiran, na so manga pelokelokesen o isa ka maginged na
pipenon iran ai ki Mosa.
23 Pitero iyan kiran a "Miyatero den o Allah a mapita na Gawii a Indeke, a so soti a gawii
a pantag bo ko Allah. Kagiya ka maoto na pangiloto kano ron imanto sa saden sa kabaya
iyo a pagilotoon iyo ron, na tinda kano sa saden sa kabaya iyo a itinda iyo ron. Na so
langon o kesama on na tagoa niyo taman mapita."
24 Na piyakapitaan iran ai a aya kiran den inisogo i Mosa, na da ini manga oosang aya
pen o ba piyamangoledi.
25 Na pitero kiran i Mosa a "Kana niyo anan imanto, ka imanto na Gawii a Idedeke a
pantag bo ko Allah. Ka da den a ba niyo ron ketoon ko lopa imanto.
26 Nem gawii a kapakapengowa niyo ron, ogaid na sii ko ikapito gawii, a so Gawii a
Idedeke, na da a ba on ketoon."
27 Apiya oto na aden pen a manga taw a lominiyo ko ikapito gawii ka pengowa on, ogaid
na da den a ba iran on miyatoon.
28 Mandiyadi na pitero o Allah ki Mosa a "Ay katey pen a kapesengkaa niyo ko
kaparatiyayaa niyo ko manga sogoan ago insarat aken rekano?
29 Tanodi niyo a saken a so Allah i migay rekano ko Gawii a Idedeke. Giyanan i sabap a
igira a ikanem gawii na pembegan aken sekano sa pangenengken a di rekano dii toon ko
dowa gawii. So oman i isa rekano na tareg ko kakadenan iyan ko ikapito gawii; da den a
ba rekano pekaliyo."
30 Mandiyadi na domike so manga taw ko ikapito gawii.
31 Bitowan o manga Israil angkai a roti sa 'manna'. Datar ai o maroni a liso a mapoti a
aya taam iyan na datar o biskowit a sasaogan sa gola teneb.
32 Na pitero i Mosa a "Giyai i inisogo o Allah: 'Tago kano sa isa ka gantang ko manna a
pantag bo ko manga moriyataw niyo kaan iran mailay so roti a inipamegay aken rekano a
makan iyo sii ko disirto isako pakaawaan aken sekano sa Misir.'"
33 Na tig i Mosa ki Aron a "Kowa ka sa omoy na go ngka tagoi sa isa ka gantang a

manna; na betaden ka ini ko hadapan o Allah kaan matago a pantag bo ko manga
moriyataw tano."
34 Tiyoman i Aron so inisogo o Allah ki Mosa ka inibetad iyan so manna ko danga o

Kaban sa Kapasadan kaan matago a paninggalan.
35 Na so den so manna i pekekan o manga Israil ko soled o miyakapat polo ragon taman
ko kiyapakaoma iran ko darpa a aden a taw ron; peken iran den so manna taman sa
minisampay siran ko temanaan o inged a Kanaan.
36(Aya kalilid a pegosaren a asad sa masa oto na bebetowan sa 'Ipah' a aya kala iyan na
sapolo ka gantang.)
IKSODOS 17
So Ig a Miyakapoon ko Lakongan
Gomiyanat so isa ka maginged a Israil sii ko Disirto sa Sin na igira a pesogoon siran o
Allah na poon ko isa a darpa na petepas siran ko ped a darpa. Mikampo siran sa Ripidim
ogaid na da a ig a ba roo keinom o manga taw.
2 Kagiya ka maoto na pimbongetan iran si Mosa a tig iran a "Begi kami ngka sa ig a
mainom ami!"
Tig i Mosa a "Ino ako niyo dii mbongeti? Ino niyo petepengi so Allah?"
3 Ogaid na tanto den a pekewaw so manga taw, na piyanarotaroan iran si Mosa a tig iran
a "Ino kami ngka kowaa sa Misir na inowit kami ngka sii a pemonoon kami ngka bo a
kawaw ago so manga wata ami taman ko manga pangangayamen?"
4 Na gomiyoraok si Mosa ko Allah a tig iyan a "Antonaa i mikidia ko sangkai a manga

taw? Magaan ako iran den ai robaken a ator."
5 Na aya inisembag o Allah ki Mosa na "Pakaonota ngka so ped ko manga pelokelokesen

ko manga Israil na ona kano ko manga taw. Aawidi ngka so teken a inibadas ka sa
lawasaig a Nail.
6 Pekatindeg ako ko kasasangoran iyo ko obay o lakongan roo sa Palaw a Sinay. Badasi
ngka so lakongan ka pekapoon on so ig a keinom o manga taw." Na pinggolaola den ai i
Mosa ko kamamasai ron o manga pelokelokesen o manga Israil.
7 Na bitowan iyan angkoto a darpa sa 'Masah' ago 'Miribah' ka kagiya miyamanarotaro
roo so manga Israil ago tipengan iran so Allah a tig iran a "Ba sisii rektano so Allah ago
so da?"
Tiyaban so manga Amalik
8 Miyakaoma so manga Amalik ka nggobaten iran so manga Israil roo sa Ripidim.

9 Na pitero i Mosa ki Yosowa a "Pagaraw ka ko manga mama rektano na liyo kano na go
kano pakitidawa ko manga Amalik. Mapita na tindeg ako ko poro o bobongan a
kakapetan ko so teken a piyakambarakat o Tohan."
10 Pinggolaola i Yosowa so miyatero on i Mosa ka lominiyo siran ago miyamakitidawa

ko manga Amalik; samaoto na tomiyakedeg si Mosa, si Aron ago si Hor ko poro o
bobongan.
11 Taman ko kibabayaon i Mosa ko manga lima niyan na pepekataban so manga Israil,
ogaid na igira a pekibaba iyan a lima niyan na aya pepekataban na so manga Amalik.
12 Kagiya dokawan den a manga barokan i Mosa na kominowa si Aron ago si Hor sa ator
na piyakiontodan iran ki Mosa. Na pimbalaan iran sekaniyan a ibabayaw iran so manga
lima i Mosa kaan di kibaba taman ko kasedep o alongan.
13 Sabap roo na miyataban i Yosowa a pedang so manga sondaro a Amalik.
14 Oriyan iyan na pitero o Allah ki Mosa a "Soraten ka ko ribro so totol makapantag sii
kaan peketademi na go ngka batiyaa ki Yosowa; ka kagiya ponasen ko ko liyawaw o
doniya so apiya antonaa a pekitadem ko manga Amalik."
15 Na mimbaal si Mosa sa aparan na bitowan iyan ai sa "So Allah i Pandi aken."

16 Na pitero iyan a "Ka so manga lima na sii minibayaw ko korsi o Allah! Na
makipetidawa so Allah ko manga Amalik taman ko kapepemagapidapidi kiran."
IKSODOS 18
Inibentel i Hitro si Mosa
So panogangan i Mosa a mama a si Hitro a imam sa Midiyan na miyaneg iyan so

makapantag ko langon taman a inikidia o Tohan ki Mosa ago so manga Israil ago so
kiyapakaliyowa kiran o Allah sa Misir.
2 Kagiya ka maoto na somiyong si Hitro ki Mosa a pakaoonoten iyan so karoma i Mosa a
si Siporah a piyakabaling iyan on gowani,
3 Ago so dowa kataw a wata iyan a mama a si Girsom ago si Iliyasar. Iningaranan i
Mosa so isa on sa Girsom ka kagiya miyatero iyan a "Rait ako ko inged."
4 Miyatero iyan pen a "So Tohan o ama aken na aya raken tomiyabang na siyabet ako
niyan ko kambonoa raken o solotan sa Misir." Kagiya ka maoto na bitowan iyan so isa on
sa Iliyasar.
5 Na si Hitro a ped iyan so manga wata ago so karoma i Mosa na miyakaoma siran ko
disirto a ron kakampo si Mosa ko marani ko palaw o Tohan.
6 Andang den a minisogo roo i Hitro ki Mosa a tig iyan a "Saken a si Hitro a panogangan
ka na pekatalingoma reka a ped aken so karoma ngka ago so dowa kataw a manga wata
iyan."
7 Kagiya ka maoto na lominiyo si Mosa ka pagalaon iyan so panogangan iyan; na

somiyodiyod sekaniyan on ago inarekan iyan. Kagiya makaselama siran na somiyoled
siran ko barombarong.
8 Piyanotol i Mosa ki Hitro so langon taman a pinggolaola o Allah ko Piraon ago so
manga Imisiren ko kiyapanabangi niyan ko manga Israil ago so langon a piyanga ookitan
iran a maregen ko kiyalalakaw iran ago so kiyasabeta kiran on o Allah.
9 Miyababaya si Hitro ko kiyanega niyan ko langon taman a manga pipiya a pinggolaola o

Allah ko manga Israil ko kiyapokasa niyan kiran ko kapaar o manga Imisiren.
10 Tig iyan a "So podi na rek o Allah a miyokas rekano ko lima o Piraon ago so manga
Imisiren ago miyoka ko manga taw ko kapepengongoripena kiran sa Misir!
11 Imanto na kiyatokawan aken a lebi a mala i gees so Allah a di so langon a katohanan,
ka pinggolaola niyan oto ko manga Imisiren isako pakadapanasen iran so manga Israil!"
12 Na giyoto a kominowa si Hitro sa pangangayamen a pekorbanen ago isepaat iyan a
totongen, ago ped pen a manga isepaat iyan ko Tohan; na miyangeped on si Aron ago so
langon a pelokelokesen o Israil sa kakena iran ko kandori ko kamamasaan o Tohan.
So Kiyatoro sa manga Pangongokom
13 Sii ko miyakatalondog a gawii na moontod si Mosa a pepengokomen iyan so manga

taw, na pepemanong siran on ipoon ko kapipita na taman den ko kiyaperimon iyan.
14 Kagiya mailay i Hitro so langon a dii nggolaolaan i Mosa mipantag ko manga taw na
inisean iyan a tig iyan a "Antonaa angkai a ikikidia ngka ko manga taw? Ino seka bo i
oontod a pepengokom sangkai langon a manga taw a lomilibet reka ipoon ko kapipita
taman ko kaperimon iyan?"
15 Somimbag si Mosa a tig iyan a "Pepemanong siran raken kaan iran katokawi o antonaa
i kabaya o Tohan.
16 Igira a aden a di pegayonan o dowa kataw na pesong siran raken na pekokomen aken
siran ago pepekitokawan aken kiran so manga sogoan ago manga kitab o Tohan."
17 Na pitero on i Hitro a "Giyangkai a di ngka dii nggolaolaan na kena a ba mapiya.

18 Ba ka den peroogi ago giyangkai a manga taw a pepemanong reka. Tanto reka a
maregen so galebek. Di ngka ini kegaga o ba seka bo.
19 Na, pamakinega ko ngka ka aden a ipemosawir aken reka; na pengnin ko a misarta
reka so Tohan. Patot a seka den i akila ko manga taw a dii penon ko Tohan ko manga
simoket iran.
20 Na patot pen a kipepengendaon ka kiran ko manga sogoan ago so manga kitab, ago so
kapepekitokawi ngka kiran ko okit a kapepeginetaw iran ago so paliyogat a
penggolaolaan iran.
21 Ogaid na aya mapiya na so langon angkai a manga taw na pagarawi ngka sa mapasang
a manga mama a maaleken ko Tohan ago pepenga sasarigan a ipekegowad iran so
kakowa sa tendan, na pakapagolowana ngka siran ko pisenggibowan, pimbagatosan,
pilimapolowan ago pisepolowan ko manga taw.
22 Na siran den i lalayon ka pepekakokoma ko manga taw. Kewit iran reka so oman i
maregen a rido, ogaid na so langon a makep on na siran den i pepekakokom on.
Pekaogop siran reka na pekalebod so galebek ka.
23 O nggolaolaa ngka ini sii ko kapesogoa reka o Tohan na kekena ngka so galebek, na
pemakabaling langon angkai a manga taw a kikasosoat."
24 Piyakineg i Mosa so panogangan iyan ka ininggolalan iyan so langon taman a

inimosawir iyan on.
25 Piyagarawan iyan sa mapasang a manga mama so kalangolangon o manga Israil na
piyakapagolowan iyan siran ko pisenggibowan, pimbagatosan, pilimapolowan ago
pisepolowan ko manga taw.
26 Miyabaloy siran a pemangokom lalayon ko manga taw. So maregen ko manga rido na
aya iran pegowiten ki Mosa, ogaid na so oman i makep on na siran den i pekokom on.
27 Oriyan iyan na piyakaganat den i Mosa so panogangan iyan na miyaling si Hitro ko
inged iyan.
IKSODOS 19
Sii sa Palaw a Sinay
1-2 Inawaan o manga Israil a Ripidim na miyakaoma siran ko Disirto sa Sinay sii den ko
gawii a kiyatarotop a telo olan ko kiyapakaawa iran sa Misir. Na roo siran mikampo ko
disirto ko danga o Palaw a Sinay.
3 Tomiyakedeg si Mosa ko palaw ka pengadap ko Tohan. Na tiyalowan sekaniyan o

Allah sii sangkoto a palaw a tig iyan a "Giyai i peteroon ka ko manga Israil a manga
mbawataan o Yakob:
4'Kiyamasaan iyo so inikidia ko ko manga Imisiren ago andamanaya pen i kiyaawidi aken
rekano sii raken a datar o kapegawidi o agila ko wata iyan sii ko manga papak iyan.
5 Na, o pangongonotani ako niyo sa ikelas ko ginawa niyo ago tomanen iyo so kapasadan
aken na kebaloy kano a manga pagtaw aken. Rek aken so dalem o doniya ogaid na
kearaw kano ko langon o manosiya
6 A kisenggay a rek aken a nasiyon a palaya manga imam a isa ka ndatoan.' Giyanan den
i peteroon ka ko manga Israil."
7 Na komiyasoy si Mosa na linimod iyan so manga pelokelokesen o manga taw na

piyayag iyan kiran so langon a inisogo on o Allah a peteroon iyan.
8 Na parengarengan a kiyasembag langon o manga taw a tig iran a "Kalangolangon o
pitero o Allah na penggolaolaan ami!" Na inisampay i Mosa ko Allah so inisembag iran
on.
9 Pitero o Allah ki Mosa a "Pekatalingoma ako reka a nggolalan ko makapal a gabon

kaan maneg o manga taw so di aken reka dii kimbitiyarain ago an ka iran kasarigi ipoon
imanto."
Na giyoto a pitero i Mosa ko Allah so miyatero o manga taw.
10 Na tig o Allah ki Mosa a "Song ka ko manga taw na go ngka kiran pakisotin a ginawa
iran imanto ago mapita. Kepamamipian iran so manga nditaren iran
11 Kaan siran makatiyagar ko ikatelo gawii, ka sii sangkoto a gawii na penog so Allah ko
Palaw a Sinay a pekeilay den o langon o manga taw.
12 Pametadi ngka sa temanaan so melilibeta ko palaw a da den a ba on pekalepas ko
manga taw, na teroa ngka kiran a 'Pananggilai niyo o ba kano makatakedeg ko palaw aya
pen o ba kano makadapo ko itado niyan; ka apiya antawaa i someko ko palaw na kebono.
13 Disomala a perobakan sekaniyan a ator o di na mbonoon a pana sa da den a ba
rekaniyan pekaseko. Ndatar so manosiya ago so pangangayamen a di den mapeparo o ba
sekaniyan pen oyaga. Ogaid na pekadaseg siran ko palaw amay ka moni sa malayat so
bogiyong."
14 Mandiyadi na tomiyondagay si Mosa ko palaw na piyamakisoti niyan ko manga taw a

ginawa iran, na piyamamipian iran so manga nditaren iran.
15 Pitero iyan kiran a "Titiyagara niyo a ginawa niyo ko ikatelo gawii; o ba niyo
rembanga so manga karoma niyo."
16 Sii ko kapipita ko ikatelo gawii na mindadalendeg ago mikilakilat a misasarta on so

kiyapakagemaw o makapal a gabon ko poro o palaw ago so kiyaoni pen o bogiyong sa
tanto a matanog; na piyananabad sa kalek so langon a taw ko kampo.
17 Piyangowit siran i Mosa ko liyo o kampo kaan iran maadap so Tohan, na
miyamanindeg siran ko kababaan o palaw.
18 Kiyakoloban sa bel so palaw ka kagiya miyanog on so Allah sii ko apoy. Peselpot on
so bel a datar o mala a rapog, na so den so palaw i lininog sa tanto a mabager,
19 Na pepekatanog a kapegoni o bogiyong. Na giyoto a mitero si Mosa, na simbag
sekaniyan o Tohan a nggolalan ko dalendeg.
20 Tomiyana so Allah ko poro o Palaw a Sinay, na tiyalowan iyan si Mosa ko poro o

palaw. Tomiyakedeg on si Mosa
21 Na pitero on o Allah a "Tondagay ka na go ngka pakaiktiyara so manga taw ka o ba
iran malepas so temanaan o katatagoan raken sa kapembantay iran; ka o nggolaolaa iran
oto na madakel a pematay kiran.
22 Apiya so manga imam a lalayon pepekarani ko Allah na kesoti ran pen a ginawa iran,
ka o di, na ndenegen ko siran."
23 Na pitero i Mosa ko Allah a "Di den mapekatakedeg so manga taw sangkai a Palaw a
Sinay ka seka den i miyakaiktiyar rekami ko kiyateroa ngka sa 'Pametadi ngka sa
temanaan so melilibeta ko palaw na go ngka senggain a soti.'"
24 Na tig o Allah a "Tondagay ka na go kano sii kasoy ago si Aron. Ogaid na so manga
imam ago so manga taw na o ba iran lepasa so temanaan sa katekedeg iran raken ka
ndenegen ko siran."
25 Mandiyadi na tomiyondagay si Mosa ko manga taw na pitero iyan kiran so pitero on o
Allah.
IKSODOS 20
So Sapolo a manga Sogoan
Na pitero o Tohan so langon angkai a manga katero:
2 “Saken so Allah a Tohan iyo a aya rekano miyakaliyo sa Misir a ron kano
miyapangongoripen.
3 “Da den a Tohan a ba ngka simbaa a rowar raken.
4 “Di ngka pagembaalen a ginawa ngka sa barahala a kisayan ko apiya antonaa a kaaden a
matatago ko langit sii sa poro, o di na sii ko doniya sii sa baba, o di na sii ko ig ko
didalem a lopa.
5 Di ngka sodiyodi so apiya antonaa a barahala aya pen o ba ngka simbaa; ka saken a so
Allah a Tohan ka na tanaod a Tohan a ipetena aken ko manga wata so dosa o manga ama
iran taman ko ikatelo ago ikapat ka apid o siran oto a pekegowad raken,
6 Ogaid na ipekelimo aken so pipira nggibo ko siran oto a pekebabaya raken ago petoman
ko manga sogoan aken.
7 “Di ngka pagosara so Ingaran o Allah a Tohan ka ko ribat a manga okit, ka selaan den o
Allah so apiya antawaa i pagosaren iyan so Ingaran iyan ko ribat.
8 Tatademi ngka so Gawii a Idedeke ko kisesenggain ka on a soti.

9 Nem bo gawii a mipenggolaola ngka ko langon a galebek ka,
10 Ogaid na so ikapito gawii na Gawii a Idedeke a pantag bo ko Allah a Tohan ka. Sii
sangkoto a gawii na da den a ba ngka penggolaolaa ko apiya antonaa galebek ka, apiya
seka o di na so wata a ka a mama o di na babay, so oripen ka a mama o di na babay, o di
na so manga pangangayamen ka, aya pen o ba so mananangga a mababaling ko inged ka.
11 Ka miyakanem gawii a kiyambaali o Allah ko langit, so doniya ago so ragat taman den
ko langon taman a madadalem on, ogaid na domike sekaniyan ko ikapito gawii. Kagiya
ka maoto na riyakmatan o Allah so Gawii a Idedeke na inisenggay niyan a soti.
12 “Pagadati ngka so ama a ka ago so ina a ka kaan ka mamboway ko inged a imbegay

reka o Allah a Tohan ka.
13 “Di ka pemono.
14 “Di ka pesebo.
15 “Di ka pemanekew.
16 “Di ngka peseksiin so di benar mipantag ko siringan ka.
17 Di ngka kesigin so walay o siringan ka; di ngka kesigin so karoma o siringan ka, o di
na so oripen iyan a mama o di na babay, o di na so sapi iyan, so kimar iyan o di na so
apiya antonaa a rek o siringan ka."
So Kalek o manga Taw
18 Kagiya maneg o manga taw so dalendeg ago so oni o bogiyong ago miyailay iran pen
so kilakilat ago so kapegbel o palaw na piyananabad siran sa kalek, na kipakatitindeg
siran baden a maawat on.
19 Na pitero iran ki Mosa a "Seka den i pakimbitiyarai rekami ka pakinegen ami seka,
ogaid na di ngka rekami pakapeteroa so Tohan ka ipematay ami baden."
20 Tig i Mosa a "Di kano pekelek; ka miyakatalingoma sii so Tohan sa katepengi niyan
rekano ago an malalayon so kipekeleken iyo ron kaan kano di makapendosa."
21 Na mitelimbagak so manga taw a maawat sii ko kapepekarani i Mosa ko domadetem a
gabon a ndodon so Tohan.
So manga Barahala ago so manga Aparan
22 Na giyoto a pitero o Allah ki Mosa a "Teroa ngka ini ko manga Israil: 'So den so
manga ginawa niyo i miyakaseksi ko kinimbitiyarain aken rekano a poon sa kasorgaan:
23 Di niyo pagembaalen a ginawa niyo sa manga barahala a pirak o di na bolawan a
mbalowin iyo a katohanan a ipagoman iyo raken.
24 “ 'Na mbaalen ako niyo sa aparan a lopa a ron iyo dii makorban so manga bilibili,
kambing ago sapi iyo a ipesepaat iyo raken a petotongen ago ipesepaat iyo pantag bo ko
kanggiginawai
. Na so oman i darpa a isenggay aken a ron ako niyo pesimbaa na pekatalingoma ako
rekano na perakmatan ko sekano.
25 O pagembaalen ako niyo sa aparan a manga ator na di niyo pagembaali a ba kisasapili
so manga ator, ka kedaan sa kasosoti o osari niyo sa kasangkapan.
26 Aya pen o ba niyo mbaali sa towak so aparan aken ka o ba kano madiyampa amay ka
manik kano ron.' "
IKSODOS 21
So manga Oripen a Hibriyo
"Giyai i manga kokoman a imbegay ngka kiran:
2 “O pamasa ka sa oripen a mama a Hibriyo na nem bo ragon a kapenalagadi niyan reka,

ka sii ko ikapito ragon na kebokaan sekaniyan a di mapekabayad.
3 O sasakataw sekaniyan a miyakowa ngka na sekaniyan bo i kebokaan, ogaid na o aden a
karoma niyan ko kiyakowaa ngka on na kebokaan sekaniyan mambo a ped o karoma
niyan.
4 O so kadnan iyan i miyakabegay ron sa karoma
na go siran mbabawata sa manga mama ago babay na so karoma niyan ago so manga wata
iyan na kibilang a rek o kadnan iyan, na so bo so mama i kebokaan.
5 “Ogaid na o teroa o oripen a 'Pekebabayaan ko so kadnan aken ago so karoma ko ago so

manga wata aken,' ago di niyan pen kabaya o ba kabokai
6 Na kewit sekaniyan o kadnan iyan ko walay a pesimbaan. Sii niyan mapekatindeg ko
obay o pinto o di na sii ko kilid o pintoan na ron iyan kepesowi so tangila niyan; na
kebaloy sekaniyan a oripen den sa taman sa kaooyagoyag iyan.
7 “O pesaa o mama so wata iyan a babay a mapengongoripen na kena a ba datar o oripen

a mama a pembokaan.
8 O mapesa so babay ko mama a mapengaroma niyan ogaid na da niyan temboon so
babay na mapekiaon iyan ko ama iyan. Di mapeparo ko kadnan iyan o ba niyan pesaa so
babay ko manga mananangga ka kagiya da niyan katomani sa pasad.
9 Na o pemasaa o mama so babay a imbegay niyan ko wata iyan a mama na kisayan iyan
sa datar o ba niyan wata a babay.
10 O pangaroma so mama sa ikadowa a babay na di niyan kelebatan so pangenengken
ago so nditaren a ipembegay niyan ko miyaona a babay a rakes on so kakakaromai niyan
on.
11 O di tomana o mama angkai a telo a atastanggongan iyan on na kebokaan so babay a di
den mapekabayad sa pirak."
Manga Kokoman ko Kabatali ko Ped
12 “Apiya antawaa i makasogat sa taw a inipatay niyan na disomala a mbonoon.

13 Inonta bo o da niyan ai tibabaa ka baden kahanda o Tohan a kiyanggolaola ini na
makapegapas sekaniyan ko darpa a isenggay aken rekano, na kelinding roo.
14 Ogaid na amay ka kararangitan o taw so ped iyan na go niyan tibabaa mono na kebono
sekaniyan den apiya pen miyakapagapas ko aparan aken.
15 “Disomala a mbonoon so apiya antawaa i meraneg sa ama iyan o di na so ina iyan.
16 “Disomala a mbonoon so apiya antawaa i manegel miyag sa ped a taw na go niyan ai

pesaa o di na matatangan iyan pen amay ka matoon.
17 “Disomala a mbonoon so apiya antawaa i pesinta sa ama iyan o di na so ina iyan.
18 “O aden a mbobono a manga mama na go sogata o isa on so ped iyan a ator o di na

sontok a kena a ba niyan petain ka ba sekaniyan den miyapanisekit sa igaan
19 Na di kedaneg so somiyogat on o makambowat ago makalalakaw a teteken so ped
iyan. Ogaid na kebayadan iyan baden so miyailang a oras o ped iyan ago mipenggolalan
iyan pen a kapemolongi ron piyapiya.
20 “O pamentola o taw so oripen iyan a mama o di na babay na go niyan ai patain na

kedaneg sekaniyan.
21 Ogaid na o makambowat so oripen iyan ko salongan o di na sii ko ikadowa gawii na di
sekaniyan kedaneg ka kagiya rek iyan angkoto a oripen.
22 “O aden a mbobono a manga mama na o makasogat siran sa maogat a babay na go

bagowasi a da tanto sekaniyan kasakiti na disomala a kesala so miyakasogat on sa apiya
antonaa i isela on o karoma o babay asar a peron o manga pepangokom.
23 Ogaid na o kasakiti so babay na aya kidaneg iyo ron na niyawa a pantag o niyawa,
24 Mata a pantag o mata, ngipen a pantag o ngipen, lima a pantag o lima, ai a pantag o ai,
25 Lowis a pantag o lowis, pali a pantag o pali ago baneg a pantag o baneg.
26 “O masogat o taw so sabala a mata o oripen iyan a mama o di na babay na go

mabinasa na kebokaan iyan angkoto a oripen ka aya niyan kibayad ko mata o oripen.
27 Na o masogat iyan so ngipen o oripen iyan na go kasepoi na sakamaoto mambo a
kebokaan iyan ka aya niyan kibayad ko ngipen o oripen.
So Atastanggongan o Kirek
28 “Amay ka aden a mama o di na babay a masidong o mama a sapi na go niyan patain na

disomala a kerobak a ator so sapi taman sa matay, na di ken so sapo iyan. Ogaid na di ini
kidaneg ko kirek ko sapi.
29 Inonta bo o aya den olaola gowani o sapi na so kapanidong sa taw ago miyapakaiktiyar
den so kirek on na go da niyan on ai kodalen na o aden a mama o di na babay a mapatay o
sapi na kerobak a ator so sapi na kebono mambo so kirek on.
30 Ogaid na o mapeparo a kesala baden na keaon iyan a niyawa niyan ko kambayadi
niyan ko minisala on.
31 O makasidong so sapi sa wata a mama o di na babay na mipenggolalan mambo angkai
a kokoman ko kirek ko sapi.
32 Na o makasidong so sapi sa oripen a mama o di na babay na pekabayad so kirek on sa
telo polo a pelata a pirak ko kadnan o oripen, na kerobak a ator so sapi.
33 “O kowai o taw sa dapeng so galebo o di na komiyalot sekaniyan sa galebo sa da niyan

bo dapengi na o aden a maolog on a sapi o di na kimar
34 Na kapembayadan o kirek ko galebo so pangangayamanen. Kibegay niyan so pirak ko
kirek ko ayam na kekowa niyan mambo so ayam a miyatay.
35 “O kapalii o sapi so sapi o isa a taw na go niyan patain na mapepesa iran so oyagoyag
on na mapembagi iran so arga iyan; na mapembagi iran pen so sapi a miyatay.
36 Ogaid na o katawi den a pepanidong angkoto a sapi na da on kodalen o kirek na
disomala a kapembayadan iyan so miyatay a sapi na go kekowa niyan mambo."
IKSODOS 22
Kalinding sa Tamok
"O pamanekew so taw sa sapi o di na bilibili na go niyan ai sombalia o di na pesaa na

kapembayadan iyan sa lima takep so sapi ago pat takep so bilibili.
2-4 Disomala a kapembayadan iyan so miyapanekew niyan. Ogaid na o da a kibayad
iyan on na mapepasa sekaniyan a kibayad ini ko miyapanekew niyan. O matoon sa
tangan iyan so pangangayamen a piyanekew niyan a oyagoyag pen a apiya anda ko sapi,
kimar o di na bilibili na kapembayadan iyan sa takep.
"O katokawi so tekew ko kapesoled iyan ko walay sii ko kagagawii na o masogat na go
niyan patain na so miyakapatay ron na di kesala sa bono. Ogaid na o manggolaola ini a
somibang den so alongan na kesala sekaniyan sa bono.
5 “O pakapanateba o taw so manga pangangayamen iyan sii ko pangomaan iyan o di na

pamomolaan iyan a manga obas na go siran madadag na go panateb siran ko pamomolan
o ped a taw na kapembayadan iyan so kebinasa a pamomolan a poon ko lebi a mapiya a
maperagon o di na kerebas ko rek iyan a lopa.
6 “O mamisol so taw na go dola so apoy ko manga paket taman sa miyakatotong ko
pereperan a da pen maragon o di na miyapaginemong na disomala a kapembayadan o
miyamisol so miyabinasa.
7 “O tomadin so taw sa pirak o di na tamok ko siringan iyan na go ini panekewa ko walay

o siringan iyan na o madakep so tekew na makapembayad sa takep.
8 Ogaid na o di sekaniyan ketoon na kewit so kirek ko walay ko hadapan o pepengokom
kaan mapariksa o ba niyan kinowa so rek o siringan iyan.
9 So langon a rido mipantag ko banta a apiya anda ko sapi, kimar, bilibili, nditaren o di na
ped a tamok a miyada na so dowa kataw a di ron dii magagaw na kewit siran ko
pepengokom, na apiya antawaa kiran i kebenaran o pepengokom na makapembayad sa
takep ko ped iyan.
10 “Amay ka aden a itadin o taw ko siringan iyan a kimar, sapi, bilibili o di na apiya
antonaa a pangangayamen na go ini matay, o di na kapalian, o di na aden a miyogaw ron
sa da den a ba on miyakaseksi
11 Na mipesepa o siringan o taw ko hadapan o Allah a da niyan kowaa so ayam iyan. Na
ketarima o kirek on so kinisepaan sii, na di kebayadan o siringan iyan.
12 Ogaid na o piyanekew so ayam ko siringan iyan na kapembayadan iyan ai ko kirek on.
13 O inikeyaga o maila a binatang so ayam na kewit iyan ko kirek on so miyalamba on a
aya on kikarina; ka di niyan kapembayadan so ayam a minikeyaga o maila a binatang.
14 “O somembay so taw sa pangangayamen ko siringan iyan na go kapalii o di na matay

sa da kamasai o kirek on na disomala a kapembayadan iyan on.
15 Ogaid na o ndodon so kirek on ko kiyanggolaola niyan na di ini kapembayadan o
miyanembay. Na o inapinan so ayam na so apin iyan na aya den minibadal ko miyailang.
Manga Kokoman ko Adat
16 O maagak o mama so raga a da a katataalikan on na go niyan rembanga na disomala a

kapembayadan iyan so kibetang on na taros a mapengaroma niyan.
17 Ogaid na o di ron den pakipengaromaan o ama o raga so wata iyan na
makapenginsalaan pen so mama ko kararagai ko babay a datar o kibetang on.
18 “Di niyo pakapegoyaga so babay a pangangatao.
19 “Apiya antawaa i keroma sa binatang na disomala a mbonoon.
20 “Saden sa taw a somapaat ko salakaw a tohan a makaliyoliyo raken a so Allah na

disomala a selaan sa kapatay.
21 “Di niyo pemaratai so rait ko inged ago di niyo pepakaregeni ka manga rait kano
mambo gowani sa inged a Misir.
22 “Di kano pengarasi sa balo o di na ilo.
23 Ka o pangarasii niyo na go sekaniyan raken goraok na mataan den a pagamponen ko
so kapenggoraok iyan.
24 Ka tanto ako a kerarangitan na pemonoon ko sekano ko katidawa, na kebalo so manga
karoma niyo ago keilo sa ama so manga wata iyo.
25 “O pagotangi niyo so apiya antawaa ko manga pagtaw aken a kikakokorangan na di

niyo sowaa so dii tobo; di niyo sekaniyan sekati sa iseg.
26 O tarimaa niyo a sanda so gerab o siringan iyo na kasowin iyo ron sa di pen kasedep o
alongan
27 Ka aya niyan bo ipesepeng ko lawas iyan. Antonaa pen i petenggoben iyan ko
kapekatorog iyan? Amay ka gomoraok sekaniyan raken na pagamponen aken, ka
makalimoon ako.
28 “Di niyo pesintaan so olowan iyo aya pen o ba niyo pagitowitoa so Tohan.
29 “Di niyo pesendoden so kipesepaaten iyo raken ko pereperan, arak ago lana a olibi
niyo.
"Senggain iyo a rek aken so paganay a ipembawata iyo a mama.
30 Sakamaoto mambo a ikidia niyo ko manga sapi ago manga bilibili niyo. Pito bo gawii
a kapekatareg o paganay a mama a nati ko ina iyan, ogaid na sii ko ikawalo gawii na
senggain iyo a rek aken.
31 “Kebaloy kano a manga soti a pagtaw aken. Kagiya ka maoto na di kano ken ko sapo
o pangangayamen a miyapatay o maila a binatang; itogen iyo baden ko manga aso."
IKSODOS 23
Manga Kokoman ko Kaontol ago Kalimo
"Di niyo pekalangkapa so di benar a totol. Di niyo pagogopi so marata a taw ko

kapeseksii niyo ko ribat.
2 “Di niyo pesiyonoti so madakel a taw ko di iran dii kanggolaola sa marata. Na amay ka
peseksi kano ko kakokom na di niyo mbibida so kokoman ko kapagampili niyo ko
kadakelan.
3 Di niyo peramigi so miskin a taw amay ka kokomen.
4 “O mabalak ka so pekedadadadag a sapi o di na kimar o ridoay ngka na wita ngka

rekaniyan.
5 O mailay ngka so kimar o taw a pekegowad reka a miyaoteng sabap ko roran iyan na di
ngka sekaniyan baden pagawai; ogopi ngka makatindeg ko kimar.
6 “O ba niyo di kaontoli sa kokoman so manga miskin amay ka kokomen so rido iran.

7 Pananggilai niyo so kapanendisendit sa di benar, na di niyo mbonoa so taw a maontol o
di na da a miyasogok iyan, ka di aken den pekabenaren so taw a miyakasela.
8 “Di kano terima sa tendan, ka so tendan na pepekabota ko taw a pepekailay ago

pepekabinasa pen ko kabenar o manga oontol.
9 “Di niyo pengarasii so rait ko inged; miyagedam iyo den so kararaiti sabap ko kiyarait
iyo gowani sa Misir.
Kokoman ko Ikapito Ragon ago so Ikapito Gawii
10 “Sii ko soled o nem ragon na makapepemamolaan kano ko lopa iyo ago

makapeperagon kano ron sa pereperan.
11 Ogaid na sii ko ikapito ragon na pakadekea niyo so lopa; di niyo pengowai sa
mangengeto kaan ai kapangowai sa makan o manga miskin rekano, na kekan mambo o
manga iila a binatang so kelamba iran on. Datar ai mambo a ikidia niyo ko
piyamamolaan iyo sa obas ago manga asinda niyo a olibi.
12 “Nem gawii a ipenggalebek iyo, ogaid na sii ko ikapito gawii na di kano penggalebek
kaan makadeke so sapi iyo ago kimar, na kerenggayan mambo so manga oripen iyo ago
manga rait a kigagalebek rekano.
13 “Iktiyari niyo o ba niyo di manggolaola so langon taman a miyatero aken rekano. Di

kano pepemangangay ko ped a manga katohanan; apiya so kapegaloya niyo ko manga
ngaran iran na di."
So Telo a Pista ko Saragon
14 “Makatelo ko saragon na kapepistaan ako niyo.
15 “Selaselaa niyo so Pista ko Kakan sa Paan a da a Tapay ron. Sii ko soled o pito gawii
na kan kano sa paan a da a tapay ron ka aya ko rekano inisogo. Nggolaolaa niyo ai sii ko
matetendo a manga gawii ko olanolan a Abib, ka giyoto so olanolan a kiyapakaliyo niyo
sa Misir.
"Da a ba rekano raken makapengadap a ba da a ipesoasoat iyan raken.
16 “Selaselaa niyo so Pista ko Kaperagon sii ko kipesepaaten iyo ko paganay a inionga o

pereperan a piyamola niyo ko lopa iyo.
"Na selaselaa niyo so Pista ko Kapanimo sii ko kakepopos o ragon amay ka mapanimo
iyo so manga pereperan ko lopa iyo.
17 “Oman saragon sangkai a telo a manga pista na so langon a manga mama rekano na
makapengadap ko Allah a Lebi a Mamaapaar.
18 “Di niyo sepaaten so rogo o pikorban iyo a pangangayamen a ba niyo ron perakesen so
paan a aden a tapay ron. Na di niyo pen pekapitai so sibo o pikorban iyo raken sangkai a
manga pista.
19 “Awidi niyo ko Walay o Allah a Tohan iyo so lebi a mapiya a pereperan ko paganay a
keragon iyo.
"Di niyo petindaan so nati a kambing o di na bilibili sii ko gatas o ina iyan.
So Malaikat o Tohan a Pengonaan ko manga Taw
20 “Ilaya niyo man ka pakapengonaanen ko rekano so isa a malaikat a magipat rekano ko

kapelalakaw niyo ago magowit rekano ko darpa a miyatiyagar aken den.
21 Pakinega niyo sekaniyan ago sowaa niyo so peteroon iyan rekano ka saken i somiyogo
on; di niyo sopaka ka di niyan iperila so kasopaka niyo ron.
22 O pakinega niyo piyapiya so di niyan dii teroon ago inggolalan iyo so langon a ipesogo
aken na peridoon ko so manga ridoay niyo ago sorangen aken so siran oto a pemanorang
rekano.
23 Pengonaan rekano so malaikat aken ka pagowiten kano niyan ko pagiingedan o manga
Amoriyo, Hitiyo, Pirisiyo, Kanaaniyo, Hibiyo ago manga Hibosiyo; na polangen ko siran.
24 Di niyo sodiyodi so manga katohanan iran aya pen o ba niyo simbaa; na di niyo pen
sowaa so manga olaola iran. Nggegebaa niyo so manga barahala iran ago peroropeta niyo
so babarakaten kon a manga ator iran.
25 Simbaa ko niyo a so Allah a Tohan iyo ka perakmatan aken so pangenengken ago so ig
iyo. Pengowaan aken sekano sa manga paniyakit
26 Na da a babay a ba mbagowasi aya pen o ba mabalek sii ko inged iyo; na pekalendoon
aken pen so omor iyo.
27 “Tegoan aken sa kalek ago nggorigaon aken so langon o manga taw a ketalingomaan
iyo. Pakapetelaon ko so langon a ridoay niyo na pelagoyan kano iran.
28 Pekaonaan aken rekano so manga taboowan ko pegantapan iyo ka mbogaon iran so
manga Hibiyo, manga Kanaaniyo ago manga Hitiyo.
29 Di aken siran mbogaon ko saragon kaan di kedai sa taw so kalopaan ago di rekano
tanto a pekadakel so manga iila a binatang.
30 Pesegintonen ko siran mogaw rekano taman sa makadakel kano ago matangan iyo so
inged.
31 “Tegoon aken so temanaan o kapegingedan iyo a poon ko Mariga a Ragat na taman ko

ragat o manga Pilistiyo, ago poon ko disirto na taman ko lawasaig a Yopratis. Peladen
ko rekano so manga taw a mababaling ko inged na mapemogaw niyo siran sii ko
kapegantap iyo kiran.
32 Di kano kiran pakipepesadanowa aya pen o ba sii ko manga katohanan iran.
33 Di niyo siran pekabalinga ko kapegingedan iyo ka o nggolaolaa niyo ai na
pakapendosaan kano iran raken; so kasimbaa niyo ko manga katohanan iran na
matamataan a kilitag rekano.
IKSODOS 24
Tiyangked so Kapasadan
Pitero o Allah ki Mosa a "Takedeg kano raken, seka ago si Aron, si Nadab, si Abiho ago
pito polo ko pelokelokesen o manga Israil. Simba kano amay ka mawatan kano raken
pen;
2 Seka bo i pekarani raken ka di kepakay o ba siran raken pekarani aya pen o ba reka
makaonot tomakedeg so ped a manga taw."
3 Mandiyadi na somiyong si Mosa ko manga taw na piyanotol iyan kiran so langon a

manga katero o Allah ago so manga sogoan iyan; na mirengarengan siran somembag a tig
iran a "Langon taman a miyatero o Allah na ipenggolalan ami!"
4 Na inisorat langon i Mosa so manga katero o Allah.
Sii ko teked a kapipita ko miyakatalondog a gawii na mimbaal sekaniyan sa aparan sii
ko itado o palaw, na roo niyan piyamakatindeg so sapolo ago dowa a manga ator a aya
tanda ko sapolo ago dowa ka mbatabataa a manga Israil.
5 Oriyan iyan na somiyogo sekaniyan sa manga ngongoda a manga Israil na somiyapaat
siran ko Allah sa manga korban a petotongen, na mikorban siran on pen sa manga sapi
pantag bo ko kanggiginawai.
.
6 Siyalod i Mosa so rogo na sii niyan tiyago so sabagi on ko manga ladiya, na so peman
so sabagi on na inipamirik iyan ko aparan.
7 Oriyan iyan na kinowa niyan so Ribro a Kapasadan a kasosoratan ko manga sogoan na
biyatiya iyan a pekeneg o manga taw. Na somimbag siran a tig iran a "Ipenggolalan ami
so langon taman a miyatero o Allah; na pemaratiyaya kami den!"
8 Na kinowa i Mosa so rogo sii ko manga ladiya na inipamiripirik iyan ko manga taw a
tig iyan a "Giyai so rogo a ron mipepasod so kapasadan a inembaalan o Allah mipantag
rekano ko kiyabegi niyan rekano sangkai a langon a sogoan."
9 Tomiyakedeg si Mosa, si Aron, si Nadab, si Abiho ago so pito polo a pelokelokesen o

manga Israil.
10 Na miyailay iran so Tohan o Israil a so dadapoan iyan na lagid o ba kalalapisi sa
montiya a sapiro a matimenag a datar o langit.
11 Apiya oto na da pakatanai sa lima o Tohan angkai a manga olowan o manga Israil;
miyailay iran so Tohan na mikekan siran ago miyamanginom.
Si Mosa sii ko Palaw a Sinay
12 Na pitero o Allah ki Mosa a "Takedeg ka raken ko palaw na go ka sii tareg, ka

imbegay aken reka so dowa timan a mapapapan a ator a kikasosoratan ko manga kitab
ago sogoan a inisorat aken on a ipemangendao ko manga pagtaw aken."
13 Mandiyadi na gomiyanat si Mosa a ped iyan si Yosowa a salinggogopa iyan, na

tomiyakedeg den si Mosa ko palaw o Tohan.
14 Miyatero iyan daan ko manga pelokelokesen a "Nayawa kami niyo sii taman ko
kapakakasoy ami rekano. Ped iyo si Aron ago si Hor, na apiya antawaa i aden a
pekikokom iyan na song kiran."
15 Kagiya tomakedeg si Mosa ko palaw na minikokos on so gabon,

16 Na so sigay o Allah na tomiyana ko Palaw a Sinay. Miyakanem gawii a kakokokosi o
gabon ko palaw, na sii ko ikapito gawii na so Allah a sii ko gabon na tiyalowan iyan si
Mosa.
17 Sii peman ko manga Israil na aya kapekeilaya iran ko sigay o Allah na lagid o pekarab
a apoy ko poro o palaw.
18 Somiyoled si Mosa ko gabon ko kapetekedeg iyan ko palaw, na tomiyareg sekaniyan
roo ko soled o pat polo ka kadadaondaw ago kagagawii.
IKSODOS 25
So manga Pamemegayan ko Barombarong

2 “Teroa ngka ko manga Israil a pangowiti ako iran sa manga pamemegayan. Tarimaa
ngka so pamemegayan o oman i mama a masisinganin o poso iyan a kimbegan iyan on
raken.
3 Na giyai i manga pamemegayan a terimaan ka kiran: bolawan, pirak ago tombaga;
4 Biro, kasomba ago mariga a tanor; landap a sotra; bombol a kambing;
5 Kobal a bilibili a iniloto sa mariga; kobal a mangaala a seda; kayo a akasiya;
6 Lana a olibi a petegoon ko solo; manga palapa a isembor ko lana diyabat ago sii ko
petotongen a doka;
7 Ago manga montiya a oniksa ago ped a manga montiya a indeket ko saliko o maporo a
imam ago sii ko raben a ipesepeng ko rareb iyan.
8 “Pakambaala ngka siran sa Barombarong a pesimbaan raken kaan ako kiran

makakaden.
9 So ladiyawan o Barombarong ago so langon a pagigimo ron a pekiilay aken reka na aya
ngka den sowaan ko kapagembaali ngka on."
So Kaban sa Kapasadan
10 “Makapembaal siran sa Kaban a kayo a akasiya a pat polo ago lima ka porgada a katas
iyan, dowa polo ago pito ka porgada a kaolad iyan ago dowa polo ago pito ka porgada a
kaporo iyan.
11 Lapisi ngka sa lombos a bolawan so soled iyan ago so liyo niyan, na bibiri ngka sa
bolawan so melilibeta on.
12 Mbaali ngka sa pat timan a rambit a towangen a bolawan na pamatria ngka sii ko
kababaan o pat a rogo o kaban, a ndodowa timan a rambit ko oman i kilid iyan.
13 Mbaal ka sa dowa timan a tibal a kayo a akasiya na pelalapisi ngka sa bolawan.
14 Sanggaren ka so manga tibal ko manga rambit sii ko mbala a kilid o kaban kaan on
pekitibal.
15 Kelalayon on den so manga tibal ko manga rambit o kaban na di ron den kowaan.
16 Na soleden ka ko kaban so dowa timan a mapapapan a ator a imbegay aken reka a
kikasosoratan ko manga sogoan.
17 “Mbaali ngka sa lekeb iyan a lombos a bolawan a ron pepepasa so dosa, a aya katas
iyan na pat polo ago lima ka porgada, ago dowa polo ago pito ka porgada a kaolad iyan.
18 Na mbaal ka on sa dowa timan a piyagetawtaw a lagid sa paras o manga malaikat a
seselen a bolawan
19 A mapagoonay ko lekeb a sesatiman a malaikat ko oman i poro iyan.
20 Mbaali ngka siran a sesangora a totolongan iran so lekeb ago mabebekar so manga
papak iran a makasasayap on.
21 Na soleden ka ko kaban so dowa timan a mapapapan a ator a imbegay aken reka na go
ngka on tagoa so lekeb.
22 Na sii ko liyawaw o lekeb na ron ako reka makipetelabok ko pageletan o dowa timan a
malaikat a matatago ko kaban, na makipembitiyarai ako reka on makapantag ko langon a
sogoan a imbegay aken reka mipantag ko manga Israil.
So Lamisaan ko Paan a Ipesepaat ko Allah
23 Mbaal ka sa lamisaan a kayo a akasiya a telo polo ago nem ka porgada a katas iyan,
sapolo ago walo ka porgada a kaolad iyan ago dowa polo ago pito ka porgada a kaporo
iyan.
24 Lapisi ngka sa lombos a bolawan na go ngka bibiri sa bolawan so melilibeta on.
25 Mbaali ngka sa pamalagen ko melilibeta on a telo ka porgada a kaolad iyan, na go
ngka pen bibiri sa bolawan so melilibeta ko pamalagen.
26 Mbaali ngka sa pat timan a rambit a bolawan na pamatria ngka ini ko oman i rogo
niyan a kikatatagoan ko ai niyan.
27 Obain ka so manga rambit ko pamalagen, ka ron ipesenggar so manga tibal igira a
pegawidan so lamisaan.
28 Mbaali ngka so manga tibal a kayo a akasiya na pelalapisi ngka sa bolawan.
29 Mbaali ngka pen sa manga lapad, manga tagayan, manga omoy ago manga ladiya a
pegosaren ko kipesepaaten ko arak. Langon den ai pagembaalan a lombos a bolawan.
30 Na lalayona ngka babatogen so paan a ipesepaat ko Allah sangkai a lamisaan sii ko
hadapan aken."
So Petegoan sa Solo
31 “Mbaal ka sa petegoan sa solo a lombos a bolawan a seselen so itado niyan ago so

lawas iyan; na ron mapagoonay so manga tagayan iyan a isasayan sa obarobar a rakes o
manga boko ago manga ombos iyan.
32 Ketagoan so lawas iyan sa nem timan a sapak a tetelo ko oman i sabala on.
33 Oman i isa ko nem timan a sapak na ketagoan sa tetelo a tagayan a isasayan sa
obarobar a almondo a rakes o boko ago so ombos iyan.
34 So mambo so lawas o petegoan sa solo na ketagoan sa pat a tagayan a isasayan sa
35 Ketago so isa a boko ko kababaan o oman i dowa timan a sapak a makambabala ko
lawas iyan.
36 So manga boko ago so manga sapak na maoonay ko lawas iyan ago so itado niyan; na
langon den ai pagembaalan a seselen a lombos a bolawan.
37 Mapasad oto na mbaali ngka so pito a solo iyan na go ngka on panagoa kaan iran
kalindawi so darpa a kasasangoran iyan.
38 Mbaali ngka so manga ipelipit ko sombowan iyan, ago so manga talam iyan a palaya
den lombos a bolawan.
39 Telo polo ago pat ka kilo a lombos a bolawan a pagosaren ko kapagembaali sangkai a
petegoan sa solo taman den ko langon a kasangkapan on.
40 Na iktiyari ngka o ba ngka ini di kambaali a datar o ladiyawan a piyakiilay aken reka
sii ko palaw.
IKSODOS 26
So Barombarong a Dii Telabokan ko Allah
Mbaali ngka so Barombarong a sapolo timan i manga oolad a dinis a pembaalan a biro,
kasomba ago mariga a tanor, ago landap a sotra a ipemorda on so lagid o paras o manga
malaikat a galebek o mapasang i kapamorda.
2 So manga maolad a dinis na palaya ndatadatar sa kapangaala a sesapolo ago pat ka
mitros a katas iyan ago ndodowa ka mitros a kaolad iyan.
3 Pakandaidaira ngka mamanai so oman i lima timan on.
4 Oman i sesabala a kilid o dowa a ndilima a dinis na panangilai ngka sa biro a tanor.
5 Ndilima polo a mipenangila ngka on ko oman i sabala a kilid a makapepantapantag on
den so manga tangila iran.
6 Oriyan iyan na mbaal ka sa lima polo a sambita a bolawan a mapakapendair iran so
dowa a ndilima a dinis kaan masasatiman.
7 Mapasad oto na mbaal ka sa sapolo ago isa a manga oolad a dinis a bombol a kambing a
aya kilapis ko Barombarong.
8 Giyangkai a sapolo ago isa a dinis na ndatadatar sa kapangaala a sesapolo ago lima ka
9 Pakandaidaira ngka mamanai so lima timan on, na pakandaidaira ngka mambo so nem
on timan. So ikanem timan ko nem a piyakandaidair na lepia ngka sii ko onaan o
Barombarong.
10 Ndilima polo a mipenangila ngka on ko oman i sesabala a kilid o piyakandaidair a
manga dinis.
11 Oriyan iyan na mbaal ka sa lima polo a sambita a tombaga na go ngka panagoa ko
manga tangila a mapakapendair iran angkai a dowa timan a piyakandaidair a manga dinis
a bombol a kambing kaan masasatiman angkai a lapis.
12 Na so saopak ko salad on a dinis a ikaolad iyan ko Barombarong na teyotonen sii sa
talikodan iyan.
13 Na so pen so tenga sa mitros a ikatas iyan ko Barombarong sii ko mbala a kilid iyan na
teyotonen a isepeng on.
14 Na mbaal ka peman sa dowa timan pen a ipelapis ko Barombarong a kisapeng on a so
isa on na kobal a bilibili a iniloto sa mariga, ago so ikadowa a peliyawaon on na manga
kobal a mangaala a seda.
15 “Mbaal ka sa manga oolad a papan a kayo a akasiya a pemakatindegen a seblayan ko

Barombarong.
16 Oman i isa on na lima ka mitros a kaporo iyan ago dowa polo ago pito ka porgada a
kabelang iyan
17 A aden a dowa timan a ai niyan a makapendorog. Ndatadatar den a kapagembaali ko
langon a manga papan o Barombarong.
18 “Mbaali ngka sa dowa polo timan a papan so kilid o Barombarong sa tampar sa

pagabagatan,
19 Na mbaali ngka ini sa pat polo timan a onayan a pirak, a ndodowa i onayan so oman i
papan, a sesatiman ko oman i ai o papan.
20 So peman so sabala a kilid o Barombarong sa tampar sa pagotaraan na mbaali ngka sa
dowa polo timan a papan
21 Ago pat polo timan a onayan iyan a pirak, a ndodowa i onayan so oman i isa on a
papan.
22 So peman so likod o Barombarong sa tampar sa sedepan na mbaali ngka sa nem timan
a papan
23 Ago dowa timan pen a papan a penagoon ko manga rogo niyan sii sa likod.
24 Sii sangkai a dowa a rogo o Barombarong na pakapelapisen so dowa timan on a papan
a poon sa baba na taman den sa poro a pakapetekesaan. Giyanan den i kapagembaali ko
manga papan a penagoon sangkai a dowa a rogo.
25 Sabap roo na kewalo timan langon a manga papan ago sapolo ago nem timan a onayan
iyan a nggagadowa timan ko oman i papan.
26 Oriyan iyan na mbaal ka sa manga kayo a akasiya a pemalawagen ko manga papan;

lima timan a kebalawag a makapekekampeta ko manga papan sii ko isa a kilid o
Barombarong,
27 Ago lima timan mambo a makapekekampeta ko manga papan ko sabala a kilid iyan,
ago lima pen timan a makapekekampeta ko manga papan sii sa tampar sa sedepan roo ko
likod iyan.
28 So pelooken a kebalawag ko oman i ndilima on na pakapenarosen a poon ko isa a rogo
o Barombarong na taman ko isa pen a rogo niyan sii ko look o manga papan.
29 Pelalapisi ngka sa bolawan so manga papan na tagoi ngka ini sa manga bolawan a
rambit a ron pemangisanggar so manga pamalawagen; na pelalapisi ngka mambo so
manga pamalawagen sa bolawan.
30 “Na pakatindega ngka so Barombarong a mipepasod ko ladiyawan a piyakiilay aken

reka sii ko palaw.
31 “Mbaal ka sa kortina a biro, kasomba ago mariga a tanor ago landap a sotra a
ipemorda on so lagid o paras o manga malaikat a galebek o mapasang i kapamorda.
32 Tayotona ngka ini ko pat timan a polaos a kayo a akasiya a pelalapisan sa bolawan a
aden a manga sadanga iyan a bolawan ago pemakatindegen ko pat timan a onayan a pirak.
33 Sadangen ka so kortina ko manga sadanga kaan matayoton. Na betaden ka so Kaban
sa Kapasadan a katatagoan ko dowa timan a mapapapan a ator sii ko likod o kortina.
Kilet so kortina ko Soti a Darpa ago so Lebi a Soti a Darpa.
34 Oriyan iyan na batogen ka ko Kaban sa Kapasadan so lekeb iyan a ron pepepasa so
dosa sii ko Lebi a Soti a Darpa.
35 Na sii ko liyo o kortina na betaden ka on so lamisaan sii sa tampar sa pagotaraan o
Barombarong, na betaden ka on mambo so petegoan sa solo sii sa tampar sa pagabagatan
ko sakeb o lamisaan.
36 So peman so gimowa o Barombarong na mbaali ngka sa rending a biro, kasomba ago

mariga a tanor ago landap a sotra a mbordaan.
37 Mbaali ngka angkai a rending sa manga bolawan a sadanga ago lima timan a polaos a
kayo a akasiya a pelalapisan sa bolawan. Na towang ka sa lima timan a tombaga a
onayan a pemakatindegan on."
IKSODOS 27
So Aparan a Petotongan sa Ipesepaat
"Mbaal ka sa aparan a kayo a akasiya. Patpasagi ini a dowa ago tenga ka mitros a katas
iyan ago kabelang iyan, na isa ago tenga ka mitros a kaporo iyan.
2 Mbaali ngka sa pangapanga so oman i isa ko rogo niyan a mapagoonay ko aparan na go
ngka ini langon lapisi sa tombaga.
3 Mbaali ngka mambo sa manga kararaw a petegoan sa ombi, manga sakerad, manga
ladiya, manga ipesedang sa sapo ago manga petegoan sa waga. Langon angkai a
kasangkapan na tombaga a pengembaalan.
4 Mbaali ngka mambo sa tapaan a tombaga, na patrii ngka sa rambit a tombaga so oman i
rogo niyan a kitibal on.
5 Tagoa ngka so tapaan ko kababaan o taar o aparan a aya kaporo iyan na petilookan so
kaporo o aparan.
6 Na mbaali ngka so aparan sa manga tibal a kayo a akasiya na go ngka pelalapisi sa
tombaga.
7 Isenggar ini ko manga rambit kaan dii kambalai so manga tibal ko aparan igira a
pegawidan.
8 Mbaali ngka a sesemba so aparan a manga papan a iseyan ko ladiyawan a piyakiilay
aken reka sii ko palaw."
So Lamalama o Barombarong
9 “Mbaali ngka sa lamalama so Barombarong. So kilid iyan sa tampar sa pagabagatan na

kealad a manga rending a landap a sotra a lima polo ka mitros a katas iyan
10 Ago dowa polo timan a polaos a pemakatindegen ko dowa polo timan a onayan iyan a
palaya tombaga, a so manga polaos na ketagoan sa manga sadana ago ipekempet on so
manga raros a palaya den pirak.
11 So pen so kilid iyan sa tampar sa pagotaraan na datar iyan mambo a kapagembaali ron.
12 “So kilid iyan sa tampar sa sedepan na kealad a manga rending a dowa polo ago lima
ka mitros a katas iyan ago sapolo timan a manga polaos a rakes o sapolo timan a onayan
iyan.
13 So mambo so kilid o lamalama sa tampar sa sebangan a ron tegoa so gimowa iyan na
dowa polo ago lima ka mitros a katas iyan.
14-15 So dowa timan a rending on a makambabala ko gimowa na pito ago tenga ka
mitros a katas o oman i isa on a aden a telo timan a polaos iyan ago telo a onayan iyan.
16 “So gimowa o lamalama na ketagoan sa rending a sapolo ka mitros a katas iyan a

pembaalan a biro, kasomba ago mariga a tanor ago landap a sotra a mbordaan a aden a pat
timan a polaos iyan a rakes o manga onayan iyan.
17 So langon o manga polaos ko melilibeta ko lamalama na pakapekekampetaan o manga
raros a aden a manga sadanga on na palaya den pirak, ago aden pen a manga onayan iyan
a tombaga.
18 So lamalama na lima polo ka mitros a katas iyan ago dowa polo ago lima ka mitros a
kaolad iyan a kealad o dowa ago tenga ka mitros a kaporo iyan a manga rending a
pagembaalan a landap a sotra, na so manga onayan iyan na palaya den tombaga.
19 So langon a ped a manga igagama a pagosaren ko kapesimba sii ko Barombarong a
rakes o manga lapek iyan ago so ipelapek ko lamalama na palaya den tombaga a
pengembaalan."
So Ipelana ko Solo
20 “Sogoa ngka so manga Israil sa kawiti ran reka sa lombos a lana a olibi a ipelana ko
solo kaan lalayon mapepekasindaw.
21 Ka so solo a ndodoo ko Barombarong sii ko liyo o kortina ko onaan o Kaban sa
Kapasadan na lalayon on pepakasindaon i Aron ago so manga wata iyan sii ko hadapan o
Allah ipoon ko kaperimon na taman ko kapita iyan. Giyai na da a ikepos iyan a sogoan
ko manga Israil taman ko kapepemagapidapidi kiran.
IKSODOS 28
So Penditaren o manga Imam
"Tawaga ngka si Aron a pagari ngka ago so manga wata iyan a manga mama a si Nadab,
Abiho, Iliyasar ago si Itamar. Senggain ka siran ko manga Israil a makapanalagad raken a
manga imam.
2 Mbaalen ka si Aron a pagari ngka sa soti a nditaren kaan sekaniyan kapagadati ago
mipangkat.
3 Teroa ngka ko langon a mapasang a mama a piyamegan aken sa moodiset a mbaal siran
sa manditar i Aron para ko kasotiya rekaniyan kaan ako niyan kapanalagadi sii ko
kaiimami ron.
4 Giyai i manga nditaren a pagembaalan iran: so raben a ipesepeng ko rareb, so saliko, so
kimon, so bangkala a bobordaan, so sorban ago so sambitan. Pagembaalan iran angkai a
soti a penditaren i Aron ago so manga wata iya kaan ako iran kapanalagadi sii ko
kaiimami kiran.
5 Aya pagosaren iran na bolawan, ago biro, kasomba ago mariga a tanor, ago landap a
sotra."
So Saliko
6 “Pagembaalan iran so saliko a biro, kasomba ago mariga a tanor, bolawan ago landap a
sotra a galebek o mapasang i kapangaol.
7 Tegoan iran ai sa dowa timan a rambit o waga a pemanain ko mbala a kilid iyan kaan ai
dii mapakakempet.
8 Na so pelangkitan a sambitan a pegonain ko saliko na ndatar mambo a kapembaali ron a
biro, kasomba ago mariga a tanor, bolawan ago landap a sotra.
9 “Oriyan iyan na kowa ka sa dowa timan a montiya a oniksa na go ngka on tanora

tomombok so manga ngaran o sapolo ago dowa kataw a manga wata o Israil a manga
mama
10 A ipepesod ko kiyapakatondotondog o kinimbawataan kiran, a ndenem a manga
ngaran ko oman i satiman a montiya.
11 So panday sa manga montiya na itombok iyan on so manga ngaran o manga wata o
Israil. Mapasad oto na sokodi ngka angkai a manga montiya ko manga pamalagen a
bolawan,
12 Na go ngka paneketen sii ko dowa a rambit o waga o saliko a aya den ipenanadem ko
sapolo ago dowa ka mbatabataa a Israil. Sabap roo na dii kapagawidawidan i Aron so
manga ngaran iran sii ko waga niyan kaan siran lalayon peketademi o Allah.
13 Mbaal ka mambo sa dowa timan a ndeketan a bolawan
14 Ago dowa timan a rantay a lombos a bolawan a tiyalitali, na paneketen ka ini sangkai a
manga ndeketan on a bolawan."
So Raben a Ipesepeng ko Rareb
15 “Mbaal ka sa raben a ipesepeng ko rareb o Maporo a Imam a manditar iyan ko

kapepengokom iyan. Mbaali ngka a biro, kasomba ago mariga a tanor, bolawan ago
landap a sotra a datar o saliko a kapembaali ron o mapasang i kapangaol.
16 Pekapatpasagiin ai ago pelepiin a siyaw ka porgada a katas iyan ago kaolad iyan.
17 Na deketi ngka sa pat koyog a manga montiya. So paganay a koyogan iyan na tegoan
sa montiya a robi, topas ago komarapar.
18 So ikadowa koyog na tegoan sa torkowis, paramata ago diyamanti;
19 So ikatelo koyog na hasinto, agata ago amatista,
20 Na so ikapat koyog na birilo, oniksa ago haspiro. Sokodi ngka angkai a manga
montiya ko manga pamalagen a bolawan.
21 Oman i isa sangkai a sapolo ago dowa timan a montiya na itombok on so ngaran o isa
ko manga wata o Israil a aya den tanda ko isa ko sapolo ago dowa ka mbatabataa.
22 “Mbaal ka mambo sa manga rantay a lombos a bolawan a tiyalitali a tegoon ko raben.
23 Mbaal ka sa dowa timan a kaningkir a bolawan na go ngka pangampeten ko dowa a
rogo o raben sii sa tampar sa poro.
24 Iketen ka so dowa timan a rantay a bolawan ko manga kaningkir sii ko manga rogo o
raben.
25 Na so sabala ko poro o manga rantay na paneketen ka ko dowa timan a ndeketan on a
bolawan, na go ngka ini panagoa ko manga rambit o waga o saliko sii ko panempang
iyan.
26 Mapasad oto na mbaal ka pen sa dowa timan a kaningkir a bolawan na go ngka
pangampeten ko dowa a rogo a kababaan o raben sii ko didalem iyan a matatampar ko
saliko.
27 Na mbaal ka peroman sa dowa timan a kaningkir a bolawan na pangampeten ka ko
kababaan o dowa timan a rambit o waga o saliko ko panempang iyan, a marani ko
tebiraan ago sii ko kaporoan o lalangkitan a sambitan o saliko.
28 Pakapegiketaan a biro a tali so manga kaningkir ko raben ago so manga kaningkir ko
saliko kaan mikampet so raben ko sambitan ago di kepokas ko saliko.
29 “Igira a pesoled si Aron ko Lebi a Soti a Darpa na pekeawidan iyan sii ko rareb iyan so
manga ngaran o manga mbatabataa a Israil a itotombok sangkai a raben kaan siran lalayon
peketademi o Allah.
30 Na tagoa ngka mambo sii ko raben so Orim ago so Tomim a maosar ko
kapepengokom kaan ai kaaawidi i Aron ko rareb iyan igira a pepangadap ko Allah. Na
oman on makapangadap si Aron na disomala a manditar iyan angkai a raben sii ko rareb
iyan kaan iyan mapengokom so manga Israil."
So Ped a Nditaren o manga Imam
31 “Mbaali ngka so kimon a ipelapis on so saliko a palaya biro a warna niyan.

32 Tegoan ai sa lig ko look iyan a mbibiran sa inaol a kowiliyo kaan di kekisi so sisid
iyan.
33-34 Sii ko melilibeta ko sagayadan o kimon na tayotoni ngka sa manga garigay a
iroropa sa onga a granada a pagembaalan a biro, kasomba ago mariga a tanor a
kitatayotonan pen sa manga tongkaling a bolawan so oman i pageletan iyan.
35 Pekesolot i Aron angkai a kimon igira a pegimam. Na igira a pesoled sekaniyan ko
Soti a Darpa a pepangadap ko Allah ago igira a peliyo na pekeneg so oni o manga
tongkaling kaan sekaniyan di petay.
36 Mbaal ka sa tanda a lombos a bolawan na go ngka on tomboken angkai a manga

katero a aya niyan den siliyo: ISESENGGAY KO ALLAH.
37 Iketen ka ini ko panempang o sorban a biro a tali a inggakot on.
38 Ketago ini ko beneng i Aron kaan iyan mapakada so ribat a mararambit ko dii
kisedkaan o manga Israil ko manga ipesenggay iran a rek o Allah a apiya antonaa i
ipesedka iran. Sii den ai lalayon petegoa ko beneng iyan kaan matarima o Allah angkai a
manga sadka.
39 “Aola ngka so bangkala i Aron a landap a sotra, na mbaal ka sa sorban a landap a sotra
ago so sambitan a pelangkitan.
40 Pangembaalen ka mambo so manga wata i Aron sa manga bangkala, sambitan ago
manga totob kaan siran kapagadati ago seselaan.
41 Pakinditaren ka ini ko pagari ngka a si Aron ago so manga wata iyan. Oriyan iyan na
salawati ngka siran sa lana ago pangidini ngka siran. Senggain ka siran a makapanalagad
raken a manga imam.
42 “Mbaalen ka siran sa manga sinempek a sotra a aya iran ipesepeng ko lawas iran poon
sa kasadan na taman sa bobon.
43 Pekesolot ai i Aron ago so manga wata iyan igira a pesoled siran ko Barombarong a dii
Telabokan o di na igira a pegobay siran ko aparan sa kapegimam iran sii ko Soti a Darpa
kaan siran di pekediyampa ago kebono.
"Giyai na taman sa pakataman a kokoman ki Aron ago so manga moriyataw niyan."
IKSODOS 29
So Kapengidini ko manga Imam
"Giyai i ikidia ngka ki Aron ago so manga wata iyan a manga mama amay ka sotin ka
siran kaan ako iran kapanalagadi sii ko kaiimami kiran. Kowa ka sa kangodaan a mama a
sapi ago dowa timan a mama a bilibili a da a daway niyan.
2 Na mbaal ka sa manga paan, manga apang a sasaogan sa lana ago manga biskowit a
iibongen a lana, na langon den ai pagembaalan a arina a da a tapay ron.
3 Tagoa ngka ini ko reban na aya ngka den ai sapaaten raken a kirakes ko sapi ago so
dowa timan a bilibili.
4 “Oriyan iyan na wita ngka si Aron ago so manga wata iyan ko gimowa o Barombarong
a dii Telabokan na go ngka siran pakapeigoa.
5 Kowaa ngka so manga nditaren na pakisoloten ka ki Aron so bangkala, so kimon a
ipelapis on so saliko ago so raben, na pakisembitanen ka on so lalangkitan a sambitan o
saliko.
6 Na tagoa ngka so sorban ko olo niyan na iketen ka on so tanda a totombokan sa
ISESENGGAY KO ALLAH.
7 Kowaa ngka so lana na ododi ngka on a olo niyan a aya ngka on den kaselawati.
8 Pakaonota ngka pen so manga wata iyan na go ngka kiran pakinditaren so manga
bangkala,
9 Na pamakasembitana ngka ago pamakatotoba ngka pen siran. So kaiimami na kedalem
kiran ago so manga moriyataw iran sabap ko da a ikepos iyan a kokoman. Giyanan den i
okit a kapagidini ngka ki Aron ago so manga wata iyan.
10 “Wita ngka so mama a sapi ko gimowa o Barombarong na kedapenetan i Aron ago so

manga wata iyan so olo niyan.
11 Na sombalia ngka so sapi ko hadapan o Allah sii ko gimowa o Barombarong.
12 Kowa ka ko rogo iyan na sombon ka on a tindoro o ka na go ngka on sisingi so manga
pangapanga o aparan. So kelamba on na ododa ngka ko itado o aparan.
13 Kowaa ngka so manga sibo a mikokokos ko soled a tiyan, so lebi a mapiya ko atay, so
dowa timan a pato a rakes o manga sibo iyan na go ngka ini langon totonga ko aparan a
aya raken isepaat.
14 Ogaid na so sapo o sapi, so kobal iyan ago so matatago ko tinai niyan na totonga ngka
sii ko liyo o kampo. Giyanan den i kaperilai ko dosa o manga imam.
15 “Oriyan iyan na kowaa ngka so isa ko mama a bilibili, na kedapenetan i Aron ago so
manga wata iyan so olo niyan.
16 Sombalia ngka ini na go ngka kowaa so rogo iyan na pamiriken ka ko manga kilid o
aparan.
17 Pamekanga ngka so lawas o bilibili na onabi ngka so soled a tiyan ago so manga ai
niyan, na rakesen ka on so olo niyan ago so manga anggaota o lawas iyan.
18 Na totonga ngka langon so bilibili sii ko aparan. Giyanan den i petotongen a ipesepaat
a mamot ko Allah.
19 “Oriyan iyan na kowaa ngka so lamba a bilibili, na kedapenetan i Aron ago so manga
wata iyan so olo niyan.
20 Sombalia ngka ini na kowa ka ko rogo iyan na sisingi ngka on so kababaan o kawanan
a tangila i Aron ago so pen so kawanan a tangila o manga wata iyan, ago sii ko kawanan a
ama a lima iran ago so kawanan a ama a ai ran. Oriyan iyan na pamiriken ka so kelamba
a rogo ko manga kilid o aparan.
21 Na kowa ka pen ko rogo a sisii ko aparan ago so ped ko lana diyabat na go ngka
pamiriken ki Aron ago sii ko manga nditaren iyan, ago sii pen ko manga wata iyan ago so
manga nditaren iran. Amay ka magiyoto na miyasoti sekaniyan ago so manga wata iyan a
rakes o manga nditaren iran.
22 “Pangabisa ngka ko bilibili so manga sibo iyan, na kowaa ngka so kasiboan a ikog
iyan, so manga sibo a mikokokos ko soled a tiyan, so lebi a mapiya ko atay, so dowa
timan a pato a rakes o manga sibo iyan ago so kawanan a bobon iyan. (Giyai so bilibili a
pagosaren ko kipagidinen ko kaiimami).
23 Na so peman so reban a katatagoan ko manga paan a da a tapay ron a inisapaat raken
na kowa ka on sa satiman a paan, satiman a apang a sesemboran sa lana, ago satiman a
biskowit.
24 Pametaden ka langon angkai a pangenengken ko manga lima i Aron ago so manga
wata iyan kaan iran mapalad ko Allah ko kibayaon iran on ko hadapan iyan.
25 Oriyan iyan na kowaa ngka ini ko lima iran na totonga ngka sii ko aparan a aya den
ipesepaat ko Allah a ikasosoat iyan so mamot iyan.
26 Mapasad oto na kowaa ngka so kagepe angkai a bilibili na palada ngka ko Allah ko
kibayaon ka on ko hadapan iyan; na giyai den i bagian ka ko lawas iyan.
27 “Igira a aden a imam a pagidinan ko kaiimami na so kagepe ago so bobon o bilibili a

pagosaren ko kapagidini ron na kisenggay a rek aken, ka mapembagian ai o manga imam.
28 Giyai na lalayon bagian o manga imam igira a dii korban so manga taw sa Israil pantag
bo ko kanggiginawai, ka aya iran den pamemegayan ko Allah.
29 “Amay ka matay si Aron na ipetenan so soti a manga nditaren iyan ko manga wata
iyan ka aya iran mapenditar ko kaselawati ago kapagidini kiran ko kaiimami.
30 So wata i Aron a pekasambi on ko kaiimami na di niyan ai dii nditaren ko soled o pito
gawii igira a pesoled sekaniyan ko Barombarong a dii Telabokan sa kapegimam iyan sii
ko Soti a Darpa.
31 “Kowaa ngka so bilibili a pagosaren ko kipagidinen ko kaiimami na tindaan ka so

sapo iyan ko soti a darpa.
32 Sii ko gimowa o Barombarong a dii Telabokan na ron kekan i Aron ago so manga
wata iyan so bilibili ago so paan a matatago ko reban.
33 Siran i pekakan sangkai a manga nganin a inosar ko kiyapapasa ko dosa ko kiyaidini
kiran ko kaiimami ago so kiyasotiya kiran; ogaid na da den a salakaw a ba on pekakan, ka
kagiya giyanan na soti.
34 O aden a kepitaan ko sapo o bilibili o di na paan, na totonga ngka. Di den ai kekan, ka
soti.
35 “Nggolalanen ka so langon taman a inisogo aken reka mipantag ki Aron ago so manga
wata iyan. Pito gawii a kapengidini ngka kiran ko kaiimami.
36 Oman gawii na korban ka sa mama a sapi sabap ko dosa kaan mapapas. Giyanan i
kakesotiya ko aparan. Oriyan iyan na salawati ngka sa lana so aparan kaan misenggay a
rek aken.
37 Sowaa ngka ini sa oman gawii ko soled o pito gawii. Mapasad oto na kesoti piyapiya
so aparan, na apiya antonaa i makaseko on na kesoti."
So Kakorban Oman Gawii
38 Giyai i lalayon a pekisapaat ka ko aparan oman gawii: dowa timan a kangodaan a

bilibili a miyakasesaragon a idad iyan.
39 So satiman on na mapekorban ka ko kapipita, na so isa on na sii ko kaperimon iyan.
40 Aya iperakes ka a isepaat ko keona a bilibili na isa ka kilo a arina a bobonaon a isa ka
litro a lombos a lana a olibi ago isa ka litro a arak a pagododen a aya den sapaat a
panginginomen.
41 Korbana ngka so ikadowa a bilibili sii ko kaperimon iyan na perakesan ka sa datar sa
kala o pangenengken ago panginginomen a ipesepaat igira a kapipita. Giyanan na
petotongen a ipesepaat a mamot ko Allah.
42 Taman ko kapepemagapidapidi rekano na giyangkai a petotongen a ipesepaat na

lalayon ipenggolalan ko hadapan o Allah sii ko gimowa o Barombarong a dii Telabokan.
Ron aken seka ipetelabok ago ipembitiyarai.
43 Roo aken pen mambo ipetelabok so manga Israil, na kesoti angkoto a darpa a
nggolalan ko bantogan aken.
44 “Sotin aken so Barombarong a dii Telobokan ago so aparan; na isenggay aken si Aron
ago so manga wata iyan a makapanalagad raken a manga imam.
45 Keden ako ko manga Israil na kebaloy ako pen a Tohan iran.
46 Ketokawan iran a saken so Allah a Tohan iran a aya kiran miyakaliyo ko inged a Misir
kaan ako kiran makakaden. Saken so Allah a Tohan iran."
IKSODOS 30
So Aparan a Petotongan sa Doka
Mbaal ka sa aparan a kayo a akasiya a petotongan sa doka.

2 Pakapatpasagia ngka ini a tenga sa mitros a katas iyan ago kabelang iyan, ago isa ka
mitros a kaporo iyan a pagonain on so manga pangapanga niyan sii ko manga rogo niyan.
3 Lapisi ngka sa lombos a bolawan so poro iyan, so manga kilid iyan ago so manga
pangapanga niyan, na bibiri ngka pen sa bolawan so melilibeta on.
4 Mbaali ngka sa dowa timan a rambit a bolawan a pematriin ko kababaan o bibir iyan a
nggagaisa ko oman i sabala on a ron ipesenggar so manga tibal igira a pegawidan.
5 Na mbaali ngka so manga tibal a kayo a akasiya na go ngka pelalapisi sa bolawan.
6 Betaden ka angkai a aparan sii ko onaan o kortina a idadalong ko Kaban sa Kapasadan
ago so lekeb iyan a ron pepepasa so dosa ago ron ako reka pen dii makitelabok.
7 “Oman mapita na pepekatotong si Aron sa doka sangkai a aparan igira a pekibiren iyan
so manga solo.
8 Na igira a perimon a petenteman iyan so manga solo na peketotongan iyan peroman sa
doka. Giyangkai a kapetotong sa doka ko hadapan o Allah na lalayon a di ron dii
kinggolalanen taman ko kapepemagapidapdi rekano.
9 Di ngka sepaati angkai a aparan sa di sak a doka o di na apiya antonaa a petotongen a
ipesepaat, o di na so ipesepaat a pangenengken aya pen o ba ngka ododi sa sapaat a
panginginomen.
10 Makaisa ko saragon na kesoti i Aron so aparan ko kapetegoi niyan sa rogo ko manga
pangapanga niyan a sii kowaa ko rogo o ayam a inikorban sabap ko dosa kaan mapapas.
Mipenggolalan ai oman saragon taman ko kapepemagapidapidi rekano. Giyangkai a
aparan na lebi a soti a isesenggay a rek o Allah."
Kasedka sa Pirak ko Barombarong
11 Na pitero pen o Allah ki Mosa a

12 “Amay ka isorat ka so manga Israil ka mbilangen ka siran na pekabegay so oman i isa
kiran ko Allah sa sadka a iperending iyan sa niyawa niyan. Aya sabap iyan na an siran di
peketanai a paniyakit sii ko kapembilanga ngka kiran.
13 Oman i isa a keped ko minibilang a manga taw na pekabegay sa nem ka gramo a pirak
a timbangen ko timbangan a pegosaren ko Barombarong. Giyai na ipesedka iran ko
Allah.
14 So langon o kibilang maana a so oman i isa a miyakadowa polo ragon a idad iyan o di
na kalalawanan pen na kibegay niyan angkai a sadka ko Allah.
15 So kawasa na di pekabegain sa ba kelawani so nem ka gramo a pirak, na so mambo so
miskin na di pekabegain sa ba ini kakorangi amay ka ipesedka iran ai ko Allah a
kirending ko manga niyawa iran.
16 Tarimaa ngka angkai a pirak ko manga Israil na osara ngka ko kapekibira ko
Barombarong a dii Telabokan. Giyangkai a sadka na ipetedem o Allah ko manga Israil
kaan mirending ko manga niyawa niyo."
So Palanggana a dii Pangonaban

18 “Mbaal ka sa mala a palanggana a tombaga a pepengonaban a rakes o tombaga a
pembatogan on. Betaden ka ini ko pageletan o Barombarong ago so aparan, na go ngka
tagoi sa ig.
19 Si Aron ago so manga wata iyan na kapengonaban iran on a lima iran ago so manga ai
ran.
20 Igira a pesoled siran ko Barombarong na makapengonab siran daan ko ig kaan siran di
pematay. Na igira a pegobay siran ko aparan ka pesepaat siran on sa petotongen a soasoat
ko Allah
21 Na disomala a kapengonaban iran a lima iran ago so manga ai ran kaan siran di
pematay. Giyai na taman sa pakataman a sogoan a mipenggolalan i Aron ago so manga
moriyataw niyan taman ko kapepemagapidapidi kiran."
So Lana Diyabat
22 Pitero pen o Allah ki Mosa a

23 “Pangowa ka sa lebi a manga pipiya a palapa; nem ka kilo a ig o timek a mira, telo ka
kilo a mamot a kemi, telo ka kilo a mamot a tebo,
24 Nem ka kilo a kasiya, a langon ai timbangen ko timbangan a pegosaren ko
Barombarong, ago pat ka litro a lana a olibi.
25 Mbaali ngka ini a soti a lana diyabat a pakapesembosemboren a datar o dii kambaali
ko ikekamotan. Kebaloy ai a soti a lana diyabat.
26 Na osara ngka ini sa kapenalawati ngka ko Barombarong a dii Telabokan, so Kaban sa
Kapasadan,
27 So lamisaan a rakes o langon a ipamemetad on, so petegoan sa solo ago so manga
igagama iyan, so aparan a petotongan sa doka,
28 So aparan a petotongan sa ipesepaat a rakes o langon a kasangkapan on, ago so pen so
palanggana a dii pangonaban a rakes o pembatogan on.
29 Langon ka ini senggain a rek o Allah kaan ai mabaloy a lebi a soti; na apiya antonaa i
pekaseko on na kesoti.
30 “Panalawati ngka sa lana si Aron ago so manga wata iyan na senggain ka siran a
makapanalagad raken a manga imam.
31 Teroa ngka ko manga Israil a 'Giyai i lana diyabat a ipapantag raken taman ko
kapepemagapidapidi rekano.
32 Di niyo ron pagododi so di on kapapatotan a manga taw aya pen o ba kano mbaal sa
lana a datar ai sa kapakapesembosembora on. Giyai na soti, na disomala a ibilang iyo
mambo a soti.
33 Apiya antawaa rekano i magembaal sa datar iyan o di na apiya antawaa i pelana on ko
kena a ba imam na kebelag ko isa ka maginged a Israil.' "
So Doka
34 Oriyan iyan na pitero o Allah ki Mosa a "Kowa ka sa manga mamot a manga palapa a
so istakti, onika, galbanom ago lombos a doka, na langon den ai pakapendatadataren sa
kadakel.
35 Mbaali ngka ini a mamot a doka a pakapesembosemboren a datar o dii kambaali ko
ikekamotan. Ketimosan ai kaan di kebinasa ago an masoti.
36 Teponga ngka so ped on na awidi ngka ko Barombarong na go ngka betaden ko danga
o Kaban sa Kapasadan a ron ako reka dii makitelabok. Tarimaa niyo ai a lebi a soti.
37 Di niyo pagembaalen a ginawa niyo sa apiya antonaa a doka a datar ai sa
kapakapesembosembora on. Bilangen iyo a soti a isesengay ko Allah.
38 Apiya antawaa rekano i magembaal sa datar iyan ka ba niyan den pagosara a
ikekamotan na kebelag ko isa ka maginged a Israil."
IKSODOS 31
Si Bisalil ago si Oholiyab
Na pitero pen o Allah ki Mosa a

2 “Ilaya ngka, ka pinili aken si Bisalil a wata i Ori a wata peman i Hor a ped ko
mbatabataa a Yodah,
3 Na sinep aken sekaniyan ko Roh o Tohan a rakes o moodiset, kapasang ago katao ko
langon a pitibarangan a papandayan,
4 Maana a so kapeteonga ago so kapegartai ko bolawan, pirak ago tombaga,
5 So kapenapili ago kasokodi ko manga montiya, so kapangokiri ko kayo ago so
kanggalebeka ko langon a pitibarangan a pepedayan.
6 Liyo ron pen na initoro aken a ogopa iyan si Oholiyab a wata i Ahisamak a ped ko
mbatabataa a Dan. Piyamegan aken mambo sa moodiset so langon a manga panday kaan
iran kambaali so langon taman a iniinsarat aken rekano a pagembaalan
7 A maana so Barombarong a dii Telabokan, so Kaban sa Kapasadan a rakes o lekeb iyan,
ago so langon a pagigimo o Barombarong,
8 So lamisaan a rakes o manga ipamemetad on, so lombos a bolawan a petegoan sa solo
ago so manga igagama iyan, so aparan a petotongan sa doka,
9 So aparan a petotongan sa ipesepaat a rakes o langon a kasangkapan iyan, so
palanggana a dii pangonaban ago so pembatogan on,
10 So pagaolen a manga nditaren, a so soti a nditaren i Aron a so imam ago so manga
nditaren o manga wata iyan a pekesolot iran igira a pepegimam siran,
11 So lana diyabat ago so pen so doka a petotongen ko Soti a Darpa. Pagembaalan iran ai
langon a aya kaketoman o inisogo aken reka."
So Gawii a Idedeke
12 Oriyan iyan na pitero o Allah ki Mosa a

13 “Teroa ngka ko manga Israil a: Selaselaa niyo so manga Gawii aken a Idedeke.
Giyanan na nanao raken ago sii rekano taman ko kapepemagapidapidi rekano kaan iyo
katokawi a saken so Allah a sominggay rekano a rek aken.
14 “Selaselaa niyo so Gawii a Idedeke ka soti anan rekano. Apiya antawaa i somogok ko
kokoman iyan na kebono; apiya antawaa i nggalebek sangkoto a gawii na kebelag ko isa
ka maginged a Israil.
15 Nem gawii a mipenggalebek iyo, ogaid na so ikapito gawii na Gawii a Idedeke a
pantag bo ko Allah. Apiya antawaa i nggalebek sangkoto a gawii na kebono.
16 Mapeselasela o manga Israil so Gawii a Idedeke ko kapetomana iran ko kokoman iyan
taman ko kapepemagapidapidi kiran, ka da a kaposan iyan ai a kapasadan.
17 Giyanan na taman sa pakataman a nanao raken ago sii ko manga Israil, ka miyakanem
gawii a kiyaadena o Allah ko langit ago so doniya na sii ko ikapito gawii na gominek
nggalebek ka domike."
18 Kagiya mapasad mimbitiyarai o Allah si Mosa sii ko Palaw a Sinay na inibegay niyan
on so dowa timan a mapapapan a ator a kikasosoratan ko manga sogoan a inisorat on o
tindoro o Tohan.
IKSODOS 32
So Bolawan a Nati a Sapi
Kagiya mailay o manga taw a miyatey den a da kapakatondagay i Mosa ko palaw na

mitimotimo siran ki Aron na pitero iran on a "Di tano katawan o antonaa i miyasowasowa
angkoto a mama a si Mosa a miwit rektano sii poon sa Misir. Kagiya ka maoto na
mbaalen kami ngka sa tohan a makapengonaan rektano."
2 Na pitero kiran i Aron a "Pokasa niyo so manga aritis a bolawan a kisosoloten o manga
karoma niyo ago so manga wata iyo a manga mama ago babay na pangowita niyo raken."
3 Mandiyadi na piyamokas o langon o manga taw so manga aritis iran na piyangowit iran
ki Aron.
4 Kinowa niyan angkai a inipamegay iran on na tiyowang iyan na go pipandayan iyan a
panasang sa kiyambaali niyan on a barahala a inisayan sa nati a sapi. Na pitero o manga
taw a "Hey manga Israil, giyai i tohan tano a miwit rektano sii poon sa Misir!"
5 So kiyanega sii i Aron na mimbaal sekaniyan sa aparan ko hadapan o bolawan a sapi na

go inipananalo niyan a tig iyan a "Mapita na kendorian tano so Allah."
6 Na teked a kapipita ko talondog a gawii na miyangowit siran roo sa manga
pangangayamen a pikorban iran ago inisapaat iran a petotongen, ago aden pen a ped a
inisapaat iran pantag bo ko kanggiginawai.
. Oriyan iyan na miyamangontod so manga taw na mikekan siran ago miyamanginom na
taros a miyamanindeg ago mikeriyala sebenar.
7 Mandiyadi na pitero o Allah ki Mosa a "Tondagay ka nggagaan, ka so manga pagtaw

ngka a inowit ka sii poon sa Misir na piseboan iran a ginawa iran.
8 Da bo matey na tomiyalikod siran ko lalan a inisogo aken kiran ka inimbaal iran a
ginawa iran sa barahala a tiyowang a bolawan a inisayan sa nati a sapi. Na siyododan ago
pikorbanan iran a tig iran a 'Hey manga Israil! Giyai i tohan tano a aya rektano sii miwit
poon sa Misir'
9 “Pekeilay aken angkanan a manga taw," a tig o Allah ki Mosa, "na mataan a tanto siran
a mategas i olo.
10 Na, pakambayaa ko ngka, ka pakapemborngaten ko kiran so rarangit aken na go
mbinasaan ko siran. Na mbelowin ko seka ago so kebabadan reka a mala a nasiyon."
11 Ogaid na miyangangampedian si Mosa ko Allah a Tohan iyan a tig iyan a "Ya Allah,
ino ngka pakapemborngata so rarangit ka ko manga taw ngka a miyapakaliyo ngka sa
inged a Misir a nggolalan ko kala ka i gees ago so kabarakat ka?
12 O ba baden matero o manga Imisiren a 'Marata bes a antap o Allah ko kiyapakaliyowa
niyan ko manga taw niyan, ka sii niyan siran pemonoa ko manga kapalawan na peyopasen
iyan siran pen ko doniya'. Kapedipedi ka bo na pakalenggawa ngka so tanto reka a
kapekerarangiti; salina ngka so mapipikir ka a kasiksaa ngka ko manga taw ngka.
13 Tademi ngka so manga oripen ka a so Ibrahim, Iskak ago Israil ago so inisepa a ka
kiran sii ko Ingaran ka a tig ka a 'Pakapendakelen ko so kebabadan rekano a datar sa
kadakel o manga bitoon sa langit, na imbegay aken ko manga moriyataw ngka so dalem
angkai a inged a initopa ko a mapekewali ran sa taman sa pakataman.'"
14 Na giyoto a misendit so Allah na da niyan pakatanaa ko manga taw niyan so kasiksaan
a miyatero iyan a itelingoma niyan kiran.
15 Na gomiyanat si Mosa na tomiyondagay ko palaw a kaaawidan iyan so dowa timan a

mapapapan a ator a kikasosoratan sa manga sogoan so oman i seklida on.
16 So den so Tohan i mimbaal sangkoto a dowa timan a mapapapan a ator, na sekaniyan
den i tomiyombok on ko manga sogoan.
17 Na kagiya maneg i Yosowa so manga taw a dii mamangogiyab, na pitero iyan a "Aden
a pekeneg aken a oni a katidawa roo ko kampo."
18 Tig i Mosa a "Kena oto a ba kapameseg o miyamakataban aya pen o ba kagoraok o

piyamanaban, ka oni o dii mamagidaida a pekeneg aken."
19 Kagiya makarani si Mosa ko kampo na miyailay niyan so sapi a bolawan ago so

manga taw a dii seseyaw, na tanto sekaniyan a kiyararangitan. Inipapes iyan so dowa
timan a mapapapan a ator a kaaawidan iyan na piroropet iyan ai sii ko itado o palaw.
20 Na kinowa niyan so sapi a inembaalan iran na tiyonaw niyan ko apoy. Tiyapotapong
iyan ago inibombor iyan ko ig na piyamakiinom iyan ko manga Israil.
21 Na pitero i Mosa ki Aron a "Antonaa i inikidia reka angkai a manga taw sa

kiyapakandosaa ngka kiran sa mala?"
22 “Di ka kerarangiti, kadnan ko," a tig i Aron. "Katawan ka den angkai a manga taw a
mamot kiran so kanggolaola sa marata.
23 Ka pitero iran raken a 'Di tano katawan o antonaa i miyasowasowa angkoto a mama a
si Mosa a miwit rektano sii poon sa Misir. Kagiya ka maoto na mbaalen kami ngka sa
tohan a makapengonaan rektano.'
24 Mandiyadi na pitero aken kiran a 'Apiya antawaa rekano i aden a imbolawanan iyan na
pokasa niyan on.' Na inipamegay iran raken so manga bolawan iran, na iniitog aken ko
apoy na baden ini miyabaloy angkai a nati a sapi!"
25 Na miyailay i Mosa a da mipaar i Aron so mitataralo a dii kakeriyala o manga taw na

go kekowa siran a pagereg ko manga ridoay iran.
26 Kagiya ka maoto na tominindeg si Mosa ko gimowa o kampo na inipananalo niyan a
"Apiya antawaa rekano i tempil ko Allah na song raken!" Na mitimotimo on so langon o
mbatabataa a Libi.
27 Na pitero iyan kiran a "Giyai i pitero o Allah a Tohan o manga Israil: Oman i isa
rekano na takipen iyan so pedang iyan, na pagenebeneba niyo so mbalabala ko kampo na
pamonoa niyo so manga pagari niyo, manga layok iyo ago manga siringan iyo."
28 Na ininggolalan o mbatabataa a Libi so iniinsarat kiran i Mosa, na sii den sangkoto a
gawii na manga telo nggibo a manga mama a miyamatay.
29 Oriyan iyan na pitero kiran i Mosa a "Imanto a gawii na inisenggay niyo a ginawa niyo
ko Allah sabap sa da niyo panganogoni so manga wata iyo a manga mama ago so manga
pagari niyo; sabap sii na riyakmatan kano o Allah."
30 Sii ko miyakatalondog a gawii na pitero i Mosa ko manga taw a "Mala a miyandosa

niyo. Ogaid na tekedeg ako imanto ko Allah sii ko palaw; ka baanda ko ron kapakirilai
so dosa niyo."
31 Na komiyasoy si Mosa ko Allah na tig iyan a "Ya Allah, mataan a tanto a mala a
miyandosa angkai a manga taw! Inimbaal iran a ginawa iran sa katohanan a bolawan.
32 Kapedipedi ka bo na rilai ngka so dosa iran, ka o di, na ponasa ngka baden so ngaran
aken ko ribro a minisorat ka."
33 Tig o Allah ki Mosa a "Sekaniyan oto a miyakandosa raken i ponasen ko ko ribro

aken.
34 Na lalakaw ka den imanto na agaka ngka so manga taw ko darpa a miyatero aken reka,
na pengonaan rekano so malaikat aken. Ogaid na pekatalingoma so gawii a itena aken
sangkai a manga taw so dosa iran."
35 Mandiyadi na tiyanaan o Allah sa paniyakit so manga taw sabap ko inikidia iran ko

sapi a bolawan a inembaalan i Aron.
IKSODOS 33
Siyogo o Allah so manga Israil sa Kaganat iran sa Sinay
Oriyan iyan na pitero o Allah ki Mosa a "Ganati ngka angkai a darpa, seka ago so manga
taw a inowit ka sii poon sa Misir, na song kano ko inged a inisepa aken ko Ibrahim, Iskak
ago Yakob a tig aken a 'Imbegay aken ai ko manga kebabadan rekano.'
2 Sogo ako sa malaikat a pengonaan rekano, na mbogaon ko roo so manga Kanaaniyo,
Amoriyo, Hitiyo, Pirisiyo, Hibiyo ago manga Hibosiyo.
3 Song kano sangkoto a inged a pekepakayan ago oodaren a lopa on; ogaid na di ako
rekano magonot, ka mategas kano i olo a manga taw na o ba ko sekano mabinasa sii ko
kapelalakaw niyo."
4 Kagiya maneg o manga taw angkai a inikerata a ginawa iran a katero na mimboboko
siran, na da den a ba kiran somiyolot sa imbolawanan.
5 Ka miyatero o Allah ki Mosa a "Teroa ngka ko manga Israil a 'Mategas kano i olo a
manga taw. O monot ako rekano apiya sakotika bo na o ba ko sekano mabinasa. Imanto
na pokasa niyo so manga imbolawanan iyo ka pemikiren aken o antonaa i ikidia ko
rekano.' "
6 Kagiya ka maoto na sii ko oriyan o kiyaawa o manga Israil ko Palaw a Sinay na kena a
ba siran somosolot sa imbolawanan.
So Barombarong a dii Telabokan
7 Aya adat i Mosa na pembangon sa Barombarong ko liyo o kampo a malo on mawatan,

na bitowan iyan ai sa 'Barombarong a dii telabokan.' Apiya antawaa i kebaya
makimosawir ko Allah na pekasong sekaniyan sangkoto a Barombarong ko liyo o kampo.
8 Igira a pegantap si Mosa ko Barombarong na dii meliliyo so langon o manga taw ka
pemanindeg siran ko gimowa o manga Barombarong iran, na di iran dii simaan si Mosa
taman ko kapakasoled iyan ko Barombarong.
9 Oman on somoled si Mosa na manog so mapopolaos a gabon ka petereg ko gimowa o
Barombarong sii ko dii kimbitiyarain o Allah ki Mosa.
10 Na anda den i kakeilaya o manga taw ko mapopolaos a gabon a sii matatago ko
gimowa o Barombarong na palaya siran pemanodiyod a so oman i isa kiran na sii ko
gimowa o Barombarong iyan.
11 Na dii mbitiyarai o Allah si Mosa a magaadapa siran a datar o dii kimbitiyarain o
mama ko layok iyan. Igira a pekesoy si Mosa ko kampo na so mangoda a salinggogopa
iyan a si Yosowa a wata i Non na di magawa ko Barombarong.
Si Mosa ago so Bantogan o Allah
12 Pitero i Mosa ko Allah a "Mataan a miyatero o ka raken a 'Agaka ngka angkai a manga
taw sangkoto a darpa,' ogaid na da ngka raken pakitokawi o antawaa i pekaonoten ka
raken. Miyatero o ka raken a 'Katawan aken seka piyapiya ago miyasoat ako reka.'
13 Na o mataan a miyasoat ka raken na pangendaon ka raken so manga okit ka kaan aken
seka katokawi ago an aken seka pen kapanonoatani. Na tatademi ngka a giyangkai a
nasiyon na manga pagtaw ngka."
14 Tig o Allah a "Saken den i magonot rekano, na pekadekeen ko sekano."

15 Na tig on i Mosa a "O di kami ngka pagonoti na di kami ngka pekaganata sangkai a
darpa.
16 Ka andamanaya i kaketokawi ron o ped a taw sa miyasoat ka raken ago so manga
pagtaw ngka o di kami ngka onoti? Antonaa pen i kakibida ami ago so manga pagtaw
ngka ko langon o ped a taw sa doniya?"
17 Na tig o Allah ki Mosa a "Pagamponen ko so pangni ngka sabap sa katawan aken seka
piyapiya ago miyasoat ako reka."
18 Tig i Mosa a "Kapedipedi ka bo na pakiilain ka raken so bantogan ka."
19 Na pitero o Allah a "Pakasagaden ko so langon a tihaya aken sii ko kamamasaan ka, na

mbeton aken so Ingaran aken a Allah sii ko hadapan ka. Ikepedi aken so kebayaan aken
komapedi, na ipengalinggagaw aken so kebayaan aken mangalinggagaw.
20 Ogaid," a tig iyan, "na di ngka keilay so paras aken ka da den a ba raken pekailay a ba
pen maoyag."
21 Na pitero pen o Allah a "Ilaya ngka, ka aden a darpa a marani raken a sii ka pekatindeg
ko lakongan.
22 Na amay ka somagad so bantogan aken na tegoon aken seka ko kaoopakan ko
lakongan, na isepeng aken reka a lima ko taman sa kapakasagad aken.
23 Maipos oto na pokasen ko reka so lima ko na keilay ngka a likod aken; ogaid na di den
keilay a paras aken."
IKSODOS 34
So Bago a Mapapapan a manga Ator
Pitero o Allah ki Mosa a "Panapil ka sa dowa timan a mapapapan a ator a datar o

miyaona, ka isorat aken on so manga katero a minisorat ko miyaona a manga ator a
piroropet ka.
2 Tiyagar ka ko kapipita na takedeg ka ko Palaw a Sinay, na pangadap ka raken roo ko
poro iyan.
3 Da den a ba reka pekaonot; da den a taw a ba keilay ko apiya anda sii ko palaw aya pen
o ba aden a manga bilibili o di na manga sapi a ba makapenateb ko itado o palaw."
4 Mandiyadi na miyamanapil si Mosa sa dowa timan a ator a datar o miyaona. Sii ko

teked a kapipita na tomiyakedeg sekaniyan ko Palaw a Sinay a aya den inisogo o Allah,
na inawidan iyan roo so dowa timan a ator.
5 Na giyoto a miyanog so Allah sii ko gabon na tominindeg roo a ped iyan, na bito niyan
on so Ingaran iyan a Allah.
6 Somiyagad so Allah ko hadapan i Mosa a ipepenanalo niyan on a "Saken so Allah, so
Allah a so Tohan a masalinggagaw ago makapediin, kena a ba malebod kararangiti ago
tanto a mala i limo ago kasasarigan.
7 Lalayon aken ipekelimo so pisenggibowan a manga taw, ago perilaan aken so
kamarataan, so kapakasogok ago so kapakandosa. Ogaid na di aken den pelepasen
domaneg so miyamakandosa, ka ipetena aken so dosa o manga ama ko manga wata ago
manga apo iran taman ko ikatelo ago ikapat ka apid iran."
8 Somiyodiyod somambot si Mosa ka sominimba

9 A tig iyan a "Ya Allah, o miyasoat ka raken na pengnin ko a monot ka rekami. Apiya
pen o mategas i olo angkai a manga taw na rilai ngka so kamarataan ago kadostaan ami,
na tarimaa kami ngka a kawali ngka."
So Kiyambagowi ko Kapasadan
10 Na pitero o Allah a "Magembaal ako imanto sa kapasadan mipantag ko manga Israil.

Sii ko kamamasaan iran na penggolaola ako sa manga pakamemesa a da den manggolaola
ko apiya anda a nasiyon ko dalem o doniya. Na so langon a taw a kibabalingan iyo na
keilay iran so mapenggalebek o Allah, ka piyakalekelek so penggolaolaan aken sabap
rekano.
11 Tomana niyo so ipesogo aken rekano imanto. Mbogaon ko so manga Amoriyo,
Kanaaniyo, Hitiyo, Pirisiyo, Hibiyo ago manga Hibosiyo sii ko kapegantap iyo kiran.
12 Pananggilai niyo o ba kano pakipesadanowa ko manga taw a kibabaling ko inged a
songowan iyo, ka o ba ini rekano militag.
13 Ka nggegebaa niyo baden so manga aparan iran, paminasaa niyo so babarakaten kon a
manga ator iran na pamataa niyo pen so manga polaos a toos ko katohanan iran a Asirah.
14 Da den a salakaw a tohan a ba niyo simbaa, ka so Allah na aya Ingaran iyan na Tanaod
na tanaod sekaniyan a Tohan.
15 Iketiyari niyo o ba kano pakipesadanowa ko manga taw a kibabaling sangkoto a inged,

ka igira a pesimba siran ko manga katohanan iran ago di siran on dii korban na mboyoon
kano iran na pekakan kano ko di iran on dii korbanen.
16 Na o pakipangaroma niyo ko manga wata iyo a manga mama so manga babay kiran na
igira a pesimba angkoto a manga babay ko manga katohanan iran na pagagaken iran so
manga wata iyo a manga mama sa katalikodi ran raken ka simba siran mambo sangkoto a
manga katohanan.
17 “Di niyo pagembaalen a ginawa niyo sa tiyowang a manga barahala.
18 Selaselaa niyo so Pista ko Kakan sa Paan a da a Tapay ron. Sii ko soled o pito gawii
na kan kano sa paan a da a tapay ron ka aya ko rekano inisogo. Nggolalanen iyo ai ko
miyatendo aken a manga gawii sii ko olanolan a Abib, ka aya niyo kiyapakaawa sa Misir.
19 Oman i paganay a ipembawata iyo a mama ago oman i paganay a ipembawata o

manga pangangayamen iyo a ndatar so sapi, bilibili o di na kambing na kibilang a rek
aken.
20 Sanggara niyo a nati a bilibili so paganay a inimbawata o kimar, ogaid na o di niyo
senggara na lepoa niyo a lig iyan. Sanggara niyo so langon o paganay a inimbawata iyo a
mama.
"Da den a ba raken makapengadap a ba da a ipeselasela iyan.
21 “Nem gawii a mipenggalebek iyo, ogaid na sii ko ikapito gawii na deke kano; apiya
pen sii ko mosim a idadado ago iraragon na pekadeke kano ron den.
22 “Selaselaa niyo so Pista ko Kaperagon oman iyo pagepoonan meragon so paganay a

inionga o trigo niyo, ago so pen so Pista ko Kapanimo sii ko kakepopos o ragon.
23 Makatelo ko saragon na so langon a manga mama rekano na makapengadap ko Allah a
Lebi a Mamaapaar, a so Tohan o Israil.
24 Na amay ka miyabogaw aken den so manga nasiyon ko inged a songowan iyo ago
miyapakaolad aken so kapegingedan iyo na da den a ba keterangan magaw ko lopa iyo
igira a pepamanong kano mangadap ko Allah a Tohan iyo sa makatelo ko saragon.
25 “Di niyo sepaaten so rogo o pikorban iyo a pangangayamen a ba niyo ron perakesen so
paan a aden a tapay ron, na da den a ba niyo pekapitai ko pikorban iyo ko kiyaselaselaa
niyo ko Paska.
26 “Oman saragon na awidi niyo ko Walay o Allah a Tohan iyo so lebi a mapiya a
pereperan ko paganay a keragon iyo.
"Di niyo tindaan so nati a kambing o di na bilibili ko gatas o ina iyan."
27 Na pitero pen o Allah ki Mosa a "Soraten ka angkai a manga katero, ka mipepasod

sangkai a manga katero so kapasadan a inembaalan aken mipantag reka ago so manga
Israil."
28 Na ndodoo den si Mosa a ped o Allah ko soled o pat polo ka kadadaondaw ago
kagagawii a da den makakan o di na makainom. Na inisorat iyan ko manga mapapapan a
ator so manga katero o kapasadan a so Sapolo a Sogoan.
So Pesigay a Paras i Mosa
29 Sii ko kapetondagay i Mosa ko Palaw a Sinay a aawidan iyan so dowa timan a

mapapapan a ator a kasosoratan ko kapasadan na pesigay so paras iyan sabap ko
kinimbitiyarain iyan ko Allah, ogaid na di niyan ai katawan.
30 Kagiya mailay i Aron ago so langon a manga Israil si Mosa a pesigay so paras iyan na
miyangaalek siran o ba siran on obay.
31 Ogaid na tiyalowan siran i Mosa, na giyoto a pipetoan sekaniyan i Aron ago so langon
a manga olowan ko isa ka maginged, na miyakimbitiyarai kiran si Mosa.
32 Oriyan oto na miyamangobay ron so langon o manga Israil, na inisampay niyan kiran
so langon a sogoan a inibegay ron o Allah sii sa Palaw a Sinay.
33 Kagiya makapasad si Mosa makimbitiyarai kiran na siyapengan iyan a paras iyan.

34 Ogaid na igira a pesoled si Mosa ko Barombarong ko hadapan o Allah ka
makipembitiyarai ron na pesewaan iyan a paras iyan taman sa kapakaliyo niyan. Na igira
a pepekaliyo sekaniyan na di niyan dii teroon ko manga Israil o antonaa i inisogo on a
peteroon iyan kiran,
35 Na pekeilay iran a pesigay so paras iyan; na giyoto a pesepengan iyan peman a paras
iyan taman ko pekatalondog a kasoled iyan roo a makipembitiyarai ko Allah.
IKSODOS 35
Manga Kokoman ko Gawii a Idedeke
Linimod i Mosa so langon o isa ka maginged a Israil na pitero iyan kiran a "Giyai i manga
inisogo o Allah a ipenggolalan iyo:
2 Nem gawii a mipenggalebek iyo, ogaid na so ikapito gawii na soti rekano a gawii, ka
Gawii a Idedeke a pantag bo ko Allah. Apiya antawaa i nggalebek on na kebono.
3 Apiya so kabiyag sa apoy sii ko manga walay niyo ko Gawii a Idedeke na di niyo ai
penggalebeka.
Manga Pamemegayan ko Kapagembaali ko Barombarong
4 Pitero i Mosa ko langon a manga Israil a "Giyai i inisogo o Allah:

5 Kowa kano ko manga tamok iyo sa pamemegayan ko Allah. Oman i isa a keterang so
poso iyan na pekaawid sekaniyan ko Allah sa pamemegayan a bolawan, pirak, o di na
tombaga;
6 Biro, kasomba ago mariga a tanor ago landap a sotra; bombol a kambing;
7 Kobal a bilibili a iniloto sa mariga ago kobal o mangaala a seda; kayo a akasiya;
8 Lana a tegoon ko solo; manga palapa a isembor ko lana diyabat ago sii ko petotongen a
doka;
9 Ago manga montiya a oniksa ago ped a manga montiya a ipeneket ko saliko o maporo a
imam ago sii ko raben iyan.
Manga Pagigimo ko Barombarong
10 “Langon kano a mapasang i kanggalebek na song kano raken na go niyo pangembaali

so langon taman a inisogo o Allah
11 Maana a so Barombarong a rakes o ipelapis ago so ipesepeng on; so manga sadanga,
manga papan, manga pamalawagen, manga polaos ago so manga onayan iyan;
12 So Kaban sa Kapasadan a rakes o manga tibal iyan, so lekeb iyan ago so kortina a
indalong on;
13 So lamisaan a rakes o manga tibal iyan ago so langon a ipamemetad on ago so paan on
a ipesepaat ko Allah;
14 So petegoan sa solo a rakes o manga igagama iyan, so manga solo ago so ipelana on;
15 So aparan a petotongan sa doka a rakes o manga tibal iyan, so lana diyabat ago so doka
a petotongen; so iperending ko gimowa o Barombarong;
16 So aparan a petotongan sa ipesepaat a rakes o tombaga a tapaan a tegoon on, so manga
tibal iyan ago so langon a kasangkapan on; so palanggana a pepangonaban a rakes o
pembatogan on;
17 So manga rending ko lamalama a rakes o manga polaos ago manga onayan iyan ago so
iperending ko gimowa o lamalama;
18 So manga lapek ago manga tali a pagosaren ko Barombarong ago sii ko lamalama;
19 Ago so pen so pagaolen a manga nditaren a pesoloten i Aron a imam ago so manga
wata iyan a manga mama igira a pegimam siran ko Soti a Darpa."
Piyangawidan o manga Taw so manga Pamemegayan iran
20 Mandiyadi na so langon o isa ka maginged a Israil na giyanatan iran si Mosa,

21 Na so oman i isa kiran a miyaterang so poso iyan ago masisinganin iyan na komiyasoy
a aawidan iyan so pamemegayan iyan ko Allah a keosar ko kapagembaali ko
Barombarong a dii Telabokan ago so langon a pagigimo ron a ipesimba, ago so pen so
soti a manga nditaren.
22 So langon a miyanga teterang a ndatar so manga mama ago manga babay na
miyamakaoma siran a kiaawid ko langon a pitibarangan a imbolawananan maana a so
manga batawi, manga aritis, manga sising ago manga rinti, na inisesadka iran ko Allah
angkai a manga bolawan.
23 So oman i aden a biro, kasomba o di na mariga a tanor iyan o di na landap a sotra,
bombol a kambing, kobal a bilibili a iniloto sa mariga o di na kobal o mangaala a seda na
inowit iyan roo.
24 Siran oto a pemakabegay sa pirak o di na tombaga na piyangawidan iran ai na inisedka
iran ko Allah, na oman i aden a kayo niyan a akasiya a keosar ko apiya anda ko galebek
na inowit iyan roo mambo.
25 So langon a manga babay a mapasang i kambaal sa tanor a biro, kasomba ago mariga,
o di na landap a sotra na inembaalan iran ai na piyangowit iran roo.
26 So pen so manga babay a kikateterangan ago mapasang i kapanali na piyanali ran so
bombol a kambing.
27 So manga olowan na miyamangawid siran sa manga montiya a oniksa ago ped a
manga montiya a ipeneket ko saliko ago so raben.
28 Miyamangawid siran pen sa manga palapa, ago lana a tegoon ko solo ago isembor ko
lana diyabat ago sii ko doka a petotongen.
29 So langon a manga mama ago manga babay a Israil a miyanga teterang na
miyamangawid siran sa ipemegay iran ko Allah a ikelas ko poso iran a pagosaren ko
kapenggolaolaa ko langon a galebek a inisogo o Allah ki Mosa.
Si Bisalil ago si Oholiyab
30 Oriyan iyan na pitero i Mosa ko manga Israil a "Ilaya niyo ka pinili o Allah si Bisalil a
wata i Ori a wata peman i Hor a ped ko mbatabataa a Yodah,
31 Na sinep iyan sekaniyan ko Roh o Tohan a rakes o kapasang, moodiset ago katao ko
langon a pitibarangan a papandayan
32 Maana a so kapeteonga ago kapegartai ko bolawan, pirak ago tombaga;
33 So kapenapili ago kasokodi ko manga montiya; so kapangokiri ko kayo ago so
kanggalebeka ko langon a pitibarangan a pemagartaan a papandayan.
34 Na inibegay rekaniyan pen o Allah ago sii ki Oholiyab a wata i Ahisamak a ped ko
mbatabataa a Dan so moodiset sa kapamangendaowa iran ko manga ped.
35 Sinep iyan siran a kapasang sa kanggolaolaa ko langon a pitibarangan a galebek a
kapangokir, kateong, kapamorda sa biro, kasomba ago mariga a tanor ago landap a sotra,
ago kapangaol. Mapenggalebek iran so oman i pisosonan o galebek na mapasang siran
pen i kapagantangan.
IKSODOS 36
1 “Kagiya ka maoto na si Bisalil, si Oholiyab ago so oman i mapasang a mama a bigan o
Allah sa moodiset ago katao sa kasowaa ko langon a galebek ko Barombarong na
kapengembaalan iran so langon taman a aya kaketoman o inisogo o Allah."
Madakel a Pamemegayan a Inisedka o manga Taw
2 Piyakisogoan i Mosa si Bisalil ago si Oholiyab ago so langon a ped a mapasang a mama
a piyamegan o Allah sa moodiset ago so miyanga teterang nggalebek ka pakipepoonan
iyan kiran den so galebek.
3 Na kinowa iran mambo ki Mosa so langon a pamemegayan a piyangawidan o manga
Israil a pagosaren ko kapagembaali ko sot a Barombarong. Ogaid na oman mapita na
pepengawidan roo pen o manga taw so manga pamemegayan iran.
4 Sabap roo na so langon a manga panday a dii nggagalebek ko Barombarong na initareg
iran pasin so galebek iran
5 Na pitero iran ki Mosa a "Minitaralo so pepengowiten o manga taw a ipenggalebek ko
inisogo o Allah."
6 Mandiyadi na piyakalangkap i Mosa ko dalem o kampo angkai a pandoan a tig iyan a

"Da den a mama o di na babay a ba pagawid sa apiya antonaa pen a ipesedka niyan a
pagosaren ko Barombarong." Sabap roo na gominek roo mangowit so manga taw sa
manga pamemegayan
7 Ka so miyapangowit iran roo den na kiyalawanan pen so keosar ko langon a galebek.
So Kiyapangembaali ko Barombarong
8 So lebi a mapasang a manga mama ko dii nggagalebek na inembaalan iran so

Barombarong a sapolo timan i mangaoolad a dinis a pimbaalan a biro, kasomba ago
mariga a tanor ago landap a sotra a inipamorda on so lagid o paras o manga malaikat a
galebek o mapasang i kapamorda.
9 So maolad a manga dinis na palaya ndatadatar sa kapangaala a sesapolo ago pat ka
10 Piyakandaidair iran mamanai so oman i lima timan on.
11 Oriyan iyan na piyanangilaan iran sa biro a tanor so oman i sesabala a kilid o dowa a
ndilima a dinis.
12 Ndilima polo a minipanangila iran on ko oman i sabala a kilid a miyakapentapantag on
so manga tangila iran.
13 Na mimbaal siran sa lima polo a sambita a bolawan na inosar iran ai ko
kiyapakandaira ko dowa a ndilima a dinis a aya on den kiyasatimana.
14 Kagiya mapasad oto na mimbaal siran sa sapolo ago isa a manga oolad a dinis a
bombol a kambing a aya kilapis ko Barombarong.
15 Giyangkai a sapolo ago isa timan a dinis na ndatadatar sa kapangaala a sesapolo ago
lima ka mitros a katas iyan ago ndodowa ka mitros a kaolad iyan.
16 Piyakandaidair iran mamanai so lima timan on, na piyakandaidair iran mambo so nem
on timan.
17 Ndilima polo a minipanangila iran on ko oman i sesabala a kilid o piyakandaidair a
manga dinis
18 Na mimbaal siran sa lima polo a sambita a tombaga a minindair o dowa a
piyakandaidair a dinis kaan masasatiman.
19 Mimbaal siran sa dowa timan pen a ipelapis ko Barombarong a kisapeng on a so isa on
na kobal a bilibili a iniloto sa mariga, ago so ikadowa a peliyawaon on na manga kobal o
mangaala a seda.
20 Oriyan iyan na mimbaal siran sa manga oolad a papan a kayo a akasiya a

pemakatindegen a seblayan ko Barombarong.
21 Oman i isa on na lima ka mitros a kaporo iyan ago dowa polo ago pito ka porgada a
kabelang iyan
22 Na aden a dowa timan a ai niyan a makandodorog. Ndatadatar a kiyambaali ran ko
langon a manga papan o Barombarong.
23 Inembaalan iran sa dowa polo timan a papan so kilid o Barombarong a matatampar sa
pagabagatan,
24 Na mimbaal siran sa pat polo timan a onayan a pirak a ndodowa i onayan so oman i
papan ka sesatiman a onayan ko oman i ai o papan.
25 So peman so sabala o Barombarong a matatampar sa pagotaraan na inembaalan iran sa
dowa polo timan a papan
6 Ago pat polo timan a onayan a pirak a ndodowa i onayan so oman i isa on a papan.
27 So peman so likod o Barombarong a matatampar sa sedepan na inembaalan iran sa
nem timan a papan
28 Ago dowa timan pen a papan a penagoon ko manga rogo niyan sii sa likod.
29 Sii sangkai a dowa a rogo o Barombarong na piyakapelapis so dowa timan on a papan
a poon sa baba na taman den sa poro a piyakatekesa. Melagid a kiyambaali ko manga
papan a piyanago sangkai a dowa a rogo.
30 Kagiya ka maoto na miyawalo timan langon a manga papan a rakes o sapolo ago nem
timan a onayan iyan a pirak a nggagadowa timan ko oman i papan.
31 Mimbaal siran pen sa kayo a akasiya a pemalawagen a lima timan a kebalawag a

makapekekampeta ko manga papan sii ko isa a kilid o Barombarong,
32 Ago lima timan mambo a makapekekampeta ko manga papan sii ko sabala a kilid
iyan, ago lima pen timan a makapekekampeta ko manga papan a matatampar sa sedepan
roo ko likod iyan.
33 So pelooken a kebalawag ko oman i ndilima on na inembaalan iran a pakapenarosen a
poon ko isa a rogo o Barombarong taman ko isa pen a rogo niyan sii ko look o manga
papan.
34 Pilalapisan iran sa bolawan so manga papan na tiyagoan iran sa manga rambit a
bolawan a ron pemangisanggar so manga pamalawagen. Na pilalapisan iran mambo sa
bolawan so manga pamalawagen.
35 Inembaalan iran so kortina a biro, kasomba ago mariga a tanor ago landap a sotra a
inipamorda on so lagid o paras o manga malaikat a galebek o mapasang i kapamorda.
36 Mimbaal siran sa pat timan a polaos a kayo a akasiya a teyotonan ko rending na
pilalapisan iran ai sa bolawan na tiyagoan iran mambo sa manga sadanga a bolawan. Na
tiyowang iran so pat timan a onayan iyan a pirak.
37 So peman so gimowa o Barmbarong na inembaalan iran sa rending a biro, kasomba
ago mariga a tanor ago landap a sotra a kiyabordaan.
38 Na inembaalan iran ai sa lima timan a polaos a rakes o manga sadanga iyan.
Pilalapisan iran sa bolawan so manga poro iyan ago so manga raros a makapekekampeta
on; ogaid na so lima timan a manga onayan iyan na inembaalan a tombaga.
IKSODOS 37
So Kiyambaali ko Kaban sa Kapasadan
Pimbaalan i Bisalil so Kaban sa Kapasadan a kayo a akasiya a pat polo ago lima ka
porgada a katas iyan ago dowa polo ago pito ka porgada a kaolad iyan ago dowa polo ago
pito ka porgada a kaporo iyan.
2 Na liyapisan iyan sii sa liyo ago sa soled sa lombos a bolawan, na binibiran iyan sa
bolawan so melilibeta on.
3 Mimbaal sekaniyan sa pat timan a rambit a tiyowang a bolawan na piyamateri iyan sii
ko kababaan o pat a rogo o kaban, a ndodowa timan a rambit ko oman i sabala on.
4 Mimbaal sekaniyan pen sa manga tibal a kayo a akasiya na pilalapisan iyan sa bolawan,
5 Na inisanggar iyan so manga tibal ko manga rambit sii ko mbala a kilid o kaban kaan on
pekitibal.
6 So lekeb o Kaban a ron pepepasa so dosa na pimbaalan iyan a lombos a bolawan a pat
polo ago lima ka porgada a katas iyan ago dowa polo ago pito ka porgada a kaolad iyan.
7 Na mimbaal sekaniyan sa dowa timan a piyagtawtaw a lagid sa paras o manga malaikat
a sisel a bolawan
8 A oonain ko lekeb a sesatiman a malaikat ko oman i poro iyan.
9 Sesangora so manga malaikat a totolongan iran so lekeb, ago mabebekar so manga
papak iran a makasasayap on.
So Kiyambaali ko Lamisaan
10 Pimbaalan iyan so lamisaan a kayo a akasiya a telo polo ago nem ka porgada a katas
iyan, sapolo ago walo ka porgada a kaolad iyan ago dowa polo ago pito ka porgada a
kaporo iyan.
11 Liyapisan iyan ai sa lombos a bolawan na go binibiran iyan sa bolawan so melilibeta
on.
12 Na mimbaal sekaniyan on sa pamalagen ko melilibeta on a telo ka porgada a kaolad
iyan, na binibiran iyan pen sa bolawan so melilibeta ko pamalagen.
13 Tomiyowang sekaniyan sa pat timan a rambit a bolawan na piyamateri iyan ko oman i
rogo o lamisaan sii ko kikatatagoan ko ai niyan.
14 Iniobay niyan so manga rambit ko pamalagen ka ron ipesenggar so manga tibal igira a
pegawidan.
15 So manga tibal iyan na inembaalan a kayo a akasiya a liyapisan sa bolawan.
16 Na inembaalan iyan so manga igagama o lamisaan a palaya den lombos a bolawan; so
manga lapad, manga tagayan ago so manga omoy niyan taman ko manga ladiya a
pegosaren ko kipesepaaten ko arak.
So Kiyambaali ko Petegoan sa Solo
17 Pimbaalan iyan so petegoan sa solo a lombos a bolawan a sisel so itado niyan ago so
lawas iyan. Oonain on so manga tagayan iyan a isasayan sa manga obarobar a rakes o
manga boko ago so manga ombos iyan.
18 Nem timan a sapak o lawas iyan a tetelo ko oman i sabala on.
19 Oman i isa ko nem timan a sapak na tiyagoan sa tetelo a tagayan a isasayan sa
20 Sii mambo ko lawas o petegoan sa solo na aden a pat timan a tagayan iyan a isasayan
sa obarobar a almondo a rakes o boko ago so ombos iyan.
21 Aden a satiman a boko ko kababaan o oman i dowa timan a sapak a makambabala ko
lawas o petegoan sa solo.
22 So manga boko ago so manga sapak na oonain ko lawas iyan ago sii ko itado niyan, na
langon den ai inembaalan a sisel a lombos a bolawan.
23 Inembaalan iyan so pito a solo iyan ago so manga ipelipit ko sombowan iyan ago so
pen so manga talam iyan a palaya den lombos a bolawan.
24 Telo polo ago pat ka kilo a bolawan a miyaosar iyan ko kiyambaali niyan ko petegoan
sa solo taman den ko langon a kasangkapan on.
So Kiyambaali ko Aparan a Petotongan sa Doka
25 Pimbaalan iyan so aparan a kayo a akasiya a petotongan sa doka. Piyakapatpasagi iyan

a tenga sa mitros a katas iyan ago so kabelang iyan ago isa ka mitros a kaporo iyan a
kikaoonain on so manga pangapanga niyan ko manga rogo niyan.
26 Liyapisan iyan sa lombos a bolawan so poro iyan, so manga kilid iyan ago so manga
pangapanga niyan, na binibiran iyan sa bolawan so melilibeta on.
27 Mimbaal sekaniyan sa dowa timan a rambit a bolawan na piyamateri iyan ko kababaan
o bibir a nggagaisa ko oman i sabala on a ron pekisanggar so manga tibal igira a
pegawidan.
28 Inembaalan iyan so manga tibal a kayo a akasiya na pilalapisan iyan sa bolawan.
So Kiyambaali ko Lana Diyabat ago so Doka
29 Inembaalan iyan mambo so soti a lana diyabat ago so lombos a doka a

piyakasembosembor a manga mamot a palapa a datar o dii kambaali ko ikekamotan.
IKSODOS 38
So Kiyambaali ko Aparan a Petotongan sa Ipesepaat
Pimbaalan iyan a kayo a akasiya so aparan a petotongan sa ipesepaat. Patpasagi ini a

dowa ago tenga ka mitros a katas iyan ago kabelang iyan, ago isa ago tenga ka mitros a
kaporo iyan.
2 Pimbaalan iyan sa pangapanga so oman i isa ko pat a rogo niyan a oonain ko aparan na
go liyapisan iyan pen ai langon sa tombaga.
3 Pimbaalan iyan a tombaga so langon a kasangkapan ko aparan; so manga kararaw,
manga sakerad, manga ladiya, manga ipesedang sa sapo ago so manga petegoan sa waga.
4 Inembaalan iyan pen sa tapaan a tombaga so aparan na tiyago iyan ai ko kababaan o taar
o aparan a aya kaporo iyan na kiyapatilookan so kaporo o aparan.
5 Tomiyowang sekaniyan sa pat timan a rambit a tombaga na piyamateri iyan ko oman i
rogo o tapaan a ron pekisanggar so manga tibal.
6 Inembaalan iyan so manga tibal a kayo a akasiya na pilalapisan iyan sa tombaga
7 Na inisanggar iyan ai ko manga rambit sii ko mbala a kilid o aparan. Inembaalan a
sesemba so aparan a manga papan.
So Kiyambaali ko Palanggana a Pepangonaban
8 Pimbaalan iyan so palanggana a pepangonaban a rakes o pembatogan on a palaya den

tombaga. Aya inosar iyan ko kiyambaali ron na so tombaga a manga pagalongan o
manga babay a pepanalagad sii ko gimowa o Barombarong a dii Telabokan.
So Lamalama o Barombarong
9 Oriyan iyan na pimbaalan iyan so lamalama o Barombarong. So kilid iyan a

matatampar sa pagabagatan na aaladen a manga rending a landap a sotra a lima polo ka
mitros a katas iyan
10 A rakes o dowa polo timan a polaos a pakatitindegen ko dowa polo timan mambo a
onayan iyan a palaya den tombaga; na so manga polaos na aden a manga sadanga iyan
ago ikakampet on a manga raros a palaya den pirak.
11 So pen so kilid o lamalama sa pagotaraan na datar iyan mambo a kiyambaali ron.
12 So kilid iyan a matatampar sa sedepan na aaladen a manga rending a dowa polo ago
lima ka mitros a katas iyan a rakes o sapolo timan a polaos ago sapolo timan a onayan
iyan a so manga polaos na aden a manga sadanga on ago manga raros a palaya den pirak.
13 So kilid iyan a matatampar sa sebangan a ron matatago so gimowa iyan na dowa polo
mambo ago lima ka mitros a katas iyan.
14-15 So dowa timan a rending on a makambabala ko gimowa na pito ago tenga ka
mitros a katas o oman i isa on a aden a telo timan a polaos iyan a rakes o telo timan
mambo a onayan iyan.
16 So langon a manga rending a iaalad ko lamalama na palaya den landap a sotra.
17 So manga onayan a pakatitindegan ko manga polaos na palaya den tombaga, na so
manga sadanga ago so manga raros o manga polaos na palaya den pirak, na so pen so
ilalapis ko poro o manga polaos na pirak. So langon a polaos ko lamalama na
piyakakekampeta o manga raros a pirak.
18 So rending ko gimowa o lamalama na biro, kasomba ago mariga a tanor ago landap a
sotra a piyamordaan. Sapolo ka mitros a katas iyan ago dowa ago tenga ka mitros a
kaporo iyan a datar bo o kaporo o manga rending a iaalad ko lamalama.
19 Aden a pat timan a polaos iyan a rakes mambo o pat timan a onayan iyan a palaya den
tombaga. So manga sadanga o manga polaos, so ilalapis ko manga poro iyan taman ko
manga raros iyan na palaya den pirak.
20 So langon a manga lapek o Barombarong ago so alad o lamalama na palaya den
tombaga.
So Langon Taman a Inosar ko Kiyambaali ko Barombarong
21 Giyai i listaan ko langon taman a miyaosar ko kiyambaali ko Barombarong a ron

matatago ko Kaban sa Kapasadan. Inisorat ai o manga Libitiyo ko kinisogoon kiran on i
Mosa a pikepatasan siran mambo i Itamar a wata i Aron a imam.
22(Si Bisalil a wata i Ori a wata peman i Hor a ped ko mbatabataa a Yodah na
inembaalan iyan so langon taman a inisogo o Allah ki Mosa.
23 Aya salinggogopa iyan on na si Oholiyab a wata i Ahisamak a ped ko mbatabataa a
Dan. Mapasang sekaniyan i kapenday, kapanaong ago kapamorda sa biro, kasomba ago
mariga a tanor ago landap a sotra.)
24 So bolawan a inisedka ko Allah a miyaosar ko kiyambaali ko Barombarong na tarotop
a sanggibo ka kilo a piyakaokit ko timbangan sii ko Barombarong.
25 So pirak a miyakowa ko isa ka maginged isako isorat so kadakel iran na telo nggibo
ago pat gatos ago dowa polo ka kilo a piyakaokit ko timbangan ko Barombarong.
26 Giyanan den so ndenem ka gramo a poon ko oman i isa a mama a minibilang a dowa
polo ragon a idad iyan ago kalalawanan pen. Aya kadakel o manga mama na nem gatos
ago telo nggibo ago lima gatos ago lima polo kataw.
27 So telo ron nggibo ago pat gatos ka kilo a pirak na inosar ko kiyambaali ko magatos
timan a tiyowang a manga onayan o manga polaos o Barombarong taman ko manga
onayan o kortina, a so oman i onayan na tetelo polo ago pat ka kilo.
28 So miyalamba on a dowa polo ka kilo na piyangembaalan on i Bisalil so inipelalapis
ko manga poro o manga polaos ago so manga sadanga iyan taman ko manga raros iyan.
29 So pen so tombaga a inisedka o manga taw ko Allah na dowa nggibo ago pat gatos ka
kilo.
30 Inosar iyan ai ko kiyambaali ko manga onayan ko gimowa o Barombarong, so
tombaga a aparan a rakes o tombaga a tapaan on taman ko langon a kasangkapan on,
31 So manga onayan o manga polaos ko lamalama a melilibeta ko Barombarong a rakes
on so onayan o gimowa iyan, ago so pen so manga lapek o Barombarong ago sii ko
melilibeta on.
IKSODOS 39
So Kiyambaali ko manga Nditaren o manga Imam
Piyangaol iran a biro, kasomba ago mariga a tanor so manga nditaren a pesoloten o
manga imam igira a pegimam siran ko Soti a Darpa. Inembaalan iran mambo so soti a
nditaren i Aron a aya den inisogo o Allah ki Mosa.
So Saliko
2 Pimbaalan iran so saliko a biro, kasomba ago mariga a tanor, bolawan ago landap a
sotra.
3 Siyasa iran so bolawan taman sa miyakanipis na go piyanabas iran ai a maroni a kawat a
ipengaol ko biro, kasomba ago mariga a tanor ago so landap a sotra a so galebek o
mapasang i kapangaol.
4 Inembaalan iran so saliko a dowa timan i rambit ko waga niyan sii ko mbala a kilid iyan
kaan ai dii mapakakempet.
5 So liyangkitan a sambitan a oonain on na datar iyan mambo a kiyambaali ron a biro,
kasomba ago mariga a tanor ago landap a sotra a giyoto den i inisogo o Allah ki Mosa.
6 Piyanapilan iran so manga montiya a oniksa na go pisokodan iran ko manga pamalagen

a bolawan. Inipanombok iran on so manga ngaran o manga wata o Israil a manga mama,
7 Na inipaneket iran ko dowa a rambit o waga o saliko ka aya ipenanadem ko sapolo ago
dowa ka mbatabataa a Israil. So den so inisogo o Allah ki Mosa i pinggolaola iran.
So Raben a Ipesepeng ko Rareb
8 Pimbaalan iran so raben a galebek o mapasang i kapangaol. Datar o saliko a kiyambaali

ron a biro, kasomba ago mariga a tanor, bolawan ago landap a sotra.
9 Piyakapatpasagi iran ai a lipi a siyaw ka porgada a katas iyan ago kabelang iyan.
10 Diketan iran ai sa pat koyog a manga montiya. So paganay a koyogan iyan na montiya
a robi, topas ago komarapar.
11 So ikadowa koyog na torkowis, paramata ago diyamanti;
12 So ikatelo koyog na hasinto, agata ago amatista,
13 Na so ikapat koyog na birilo, oniksa ago haspiro. Pisokodan ai langon ko manga
pamalagen a bolawan.
14 Oman i isa sangkai a sapolo ago dowa timan a montiya na initombok on so ngaran o
isa ko manga wata o Israil a aya den tanda ko isa ko sapolo ago dowa ka mbatabataa.
15 Mimbaal siran sa manga rantay a lombos a bolawan a tiyalitali a tegoon ko raben.

16 Na mimbaal siran mambo sa dowa timan a bolawan a ndeketan ago dowa timan a
bolawan a kaningkir, na inikampet iran so manga kaningkir ko dowa a rogo o raben sii sa
tampar sa poro.
17 Oriyan iyan na iniiket iran so dowa timan a rantay a bolawan ko manga kaningkir sii
ko manga rogo o raben,
18 Na so sabala ko poro o manga rantay na inipanaket iran ko dowa timan a ndeketan on
a bolawan na go piyanago iran ai ko manga rambit o waga o saliko sii ko panempang
iyan.
19 Mimbaal siran peman sa dowa timan a kaningkir a bolawan na inikampet iran ko dowa
a rogo a kababaan o raben sii ko didalem iyan a matatampar ko saliko.
20 Oriyan iyan na mimbaal siran peman sa dowa pen timan a kaningkir a bolawan na
inikampet iran ai ko kababaan o dowa timan a rambit o waga o saliko ko panempang iyan
a marani ko tebiraan ago sii ko kaporoan o lalangkitan a sambitan o saliko.
21 Na piyakapagiketa iran a biro a tali so manga kaningkir ko raben ago so manga
kaningkir ko saliko na giyoto a minikampet so raben ko sambitan kaan di kepokas ko
saliko a aya iran den pinggolaola so inisogo o Allah ki Mosa.
So Ped a Nditaren o manga Imam
22 Inaol iran so kimon a ipepegimam a ipelapis on so saliko a palaya biro a warna niyan.
23 Aden a lig o kimon ko look iyan a bibibiran sa inaol a kowiliyo kaan di kekisi so sisid
iyan.
24-26 So melilibeta ko sagayadan o kimon na tiyayotonan iran sa manga garigay a iroropa
sa onga a granada a pimbaalan a biro, kasomba ago mariga a tanor ago landap a sotra; na
kitatayotonan pen sa manga tongkaling a lombos a bolawan so oman i pageletan o manga
garigay a aya den inisogo o Allah ki Mosa.
27 Piyangaol iran a landap a sotra so manga bangkala i Aron ago so manga wata iyan
28 A rakes o sorban ago so piyagartaan a manga totob, ago so manga sinempek a sotra,
29 Ago so pen so lalangkitan a sambitan a pimbaalan a landap a sotra ago biro, kasomba
ago mariga a tanor a aya den inisogo o Allah ki Mosa.
30 Pimbaalan iran a lombos a bolawan so soti a tanda a tegoon ko sorban, na initombok

iran on angkai a manga katero a aya niyan den siliyo: ISESENGGAY KO ALLAH.
31 Iniiket iran ai ko panempang o sorban a biro a tali a inigakot on a aya den inisogo o
Allah ki Mosa.
Miyapasad so Galebek
32 Sa masa oto na so langon a galebek ko Barombarong a dii Telabokan na palaya den

miyapasad. Ininggolalan o manga Israil so langon taman a inisogo o Allah ki Mosa.
33 Na piyangowit iran ki Mosa so Barombarong ago so ipelapis on taman ko langon a
pagigimo ron maana a so manga sadanga iyan, manga papan, manga pamalawagen,
manga polaos ago so manga onayan iyan;
34 So ipesepeng on a kobal a bilibili a iniloto sa mariga ago so ipesepeng on pen a manga
kobal o mangaala a seda; so kortina a indalong ko Kaban,
35 So Kaban sa Kapasadan a rakes o lekeb iyan ago so manga tibal iyan;
36 So lamisaan a rakes o langon a ipamemetad on, ago so paan on a ipesepaat ko Allah;
37 So lombos a bolawan a petegoan sa solo, so aatoren a manga solo on a rakes o ipelana
on ago so langon a manga igagama iyan;
38 So aparan a bolawan, so lana diyabat, so petotongen a doka, ago so iperending ko
gimowa o Barombarong;
39 So tombaga a aparan a rakes o tombaga a tapaan on, so manga tibal iyan ago so langon
a kasangkapan on; so palanggana a pepangonaban ago so pembatogan on;
40 So manga rending ko lamalama a rakes o manga polaos ago manga onayan iyan ago so
iperending ko gimowa iyan; so manga tali ago so manga lapek ko lamalama; so langon a
pagigimo a pagosaren ko Barombarong a dii Telabokan
41 Ago so pen so piyangaol a manga nditaren a pesoloten o manga imam igira a pegimam
siran ko Soti a Darpa maana a so soti a nditaren i Aron a imam ago so manga wata iyan a
manga mama.
42 So den so langon a manga galebek a inisogo o Allah ki Mosa i mininggolalan o manga

Israil.
43 Na piyariksa i Mosa so langon taman a piyangembaalan iran na miyailay niyan a so
den so inisogo o Allah. Kagiya ka maoto na riyakmatan siran i Mosa.
IKSODOS 40
Piyakatindeg so Barombarong
Oriyan iyan na pitero o Allah ki Mosa a

2 “Sii ko paganay a gawii ko paganay a olanolan na pakatindega ngka so Barombarong a
dii Telabokan.
3 Tagoa ngka on so Kaban sa Kapasadan na go ngka on dalongen so kortina niyan.
4 Soleden ka ko Barombarong so lamisaan na go ngka on tanora so manga ipamemetad
on. Soleden ka on pen so petegoan sa solo na go ngka on tagoa so manga solo iyan.
5 Betaden ka so bolawan a aparan a petotongan sa doka sii ko onaan o Kaban sa
Kapasadan, na tayotona ngka ko gimowa o Barombarong so rending iyan.
6 “Betaden ka so aparan a petotongan sa ipesepaat sii ko onaan o gimowa o Barombarong

7 Na betaden ka pen so palanggana a pepangonaban sii ko pageletan o Barombarong ago
so aparan na go ngka tagoi sa ig.
8 Pakatindega ngka so ipagalad a manga rending ko lamalama o Barombarong na go ngka
tayotona ko gimowa o lamalama so rending iyan.
9 “Mapasad oto na kowaa ngka so lana diyabat na go ngka on panalawati so

Barombarong ago so langon taman a tiyago on; senggain ka ini a rek o Allah ago so
langon a pagigimo ron, na pembaloy ai a soti.
10 Oriyan iyan na panalawati ngka so aparan a petotongan sa ipesepaat ago so langon a
kasangkapan on; senggain ka ini a rek o Allah ka pembaloy a lebi a soti.
11 Salawati ngka pen so palanggana ago so pembatogan on na go ngka senggain a rek o
Allah.
12 “Wita ngka si Aron ago so manga wata iyan ko gimowa o Barombarong a dii
Telabokan na pakapeigoa ngka siran sa ig.
13 Oriyan iyan na soloten ka ki Aron so soti a nditaren na salawati ngka sekaniyan sa lana
diyabat a aya ngka on kasotiya kaan ako niyan kapanalagadi sii ko kaiimami ron.
14 Wita ngka roo mambo so manga wata iyan na soloten ka kiran so manga bangkala
iran.
15 Na panalawati ngka siran mambo a datar o kiyasalawati ngka ko ama iran kaan ako
iran kapanalagadi sii ko kaiimami kiran. Giyangkai a kiyasalawati kiran na aya kiran den
kiniidinen ko kaiimami taman ko kapepemagapidapidi kiran."
16 Na so den so langon taman a inisogo o Allah ki Mosa na aya niyan ininggolalan.
17 Kagiya ka maoto na piyakatindeg so Barombarong ko paganay a gawii ko paganay a

olanolan sii ko ikadowa ragon a kiyapakaawa iran sa Misir.
18 Kagiya mapakatindeg i Mosa so Barombarong na inibetad iyan so manga onayan iyan,
piyakatindorog iyan on so manga papan, piyakakekampeta iyan on so manga
pamalawagen ago piyamakatindeg iyan pen so manga polaos.
19 Oriyan iyan na kiyayat iyan ko Barombarong so lapis iyan, na inilapis iyan on so
sapeng iyan a aya den kiyatoman o inisogo on o Allah.
20 Kinowa niyan so dowa timan a mapapapan a ator na tiyago iyan ko soled o Kaban sa
Kapasadan, na inisanggar iyan so manga tibal ko manga rambit iyan na tiyago iyan on so
lekeb iyan a ron pepepasa so dosa.
21 Oriyan iyan na inisoled iyan so Kaban sa Kapasadan ko Barombarong na tiyayoton
iyan on so kortina a indalong on ka aya on den inisogo o Allah.
22 Tiyago i Mosa so lamisaan sii sa liyo o kortina sii sa tampar sa pagotaraan o
Barombarong,
23 Na inibetad iyan on so paan a ipesepaat ko Allah a aya on den inisogo o Allah.
24 Tiyago iyan so petegoan sa solo sii ko Barombarong a pantag o lamisaan sii sa tampar
sa pagabagatan,
25 Na tinteman iyan so manga solo on ko hadapan o Allah a aya on den inisogo o Allah.
26 Oriyan iyan na tiyago iyan so bolawan a aparan sii ko Barombarong ko onaan o

kortina,
27 Na tomiyotong sekaniyan on sa doka a aya on den inisogo o Allah.
28 Kagiya mapasad oto na tiyayoton iyan den so rending ko gimowa o Barombarong.
29 Tiyago iyan so aparan a petotongan sa ipesepaat sii ko liyo o gimowa o Barombarong

na inisapaat iyan on so petotongen a ipesepaat ago so ipesepaat a pangenengken a aya on
den inisogo o Allah.
30 Inibetad iyan so palanggana a pepangonaban ko pageletan o Barombarong ago so

aparan, na tiyagoan iyan ai sa ig a ipemangonab.
31 Si Mosa ago si Aron ago so manga wata iyan na pepamangonaban iran on so manga
lima ago manga ai ran
32 Igira a pesoled siran ko Barombarong o di na pegobay siran ko aparan ka aya den
inisogo o Allah ki Mosa.
33 Oriyan iyan na piyakatindeg i Mosa so ipagalad ko lamalama o Barombarong ago so

aparan na go tiyayoton iyan pen so rending ko gimowa o lamalama. Giyoto den i
kiyapasada i Mosa ko langon o galebek on.
So Bantogan o Allah
34 Oriyan iyan na minikolob so gabon ko Barombarong a dii Telabokan, na minipeno on

so bantogan o Allah.
35 Na di pekasoled si Mosa ko Barombarong sabap sa tomatana on so gabon ago
mipepeno on so bantogan o Allah.
36 Sii ko langon a kapelalakaw o manga Israil na igira a pekiporo so gabon ko

Barombarong na pengganat siran,
37 Ogaid na taman sa di ron miporo so gabon na di siran mambo melalakaw taman ko
gawii a kiporo iyan.
38 Ka sii ko langon o masa a kapelalakaw iran na so langon o isa ka maginged a Israil na
pekeilay iran so gabon o Allah ko liyawaw o Barombarong igira a daondaw, ago apoy ko
liyawaw niyan igira a gagawii.
LIBITIKOS
LIBITIKOS 1
So manga Korban a Ipesepaat a Petotongen
Tiyalowan o Allah si Mosa sii ko Barombarong a dii Telabokan na miyakimbitiyarai ron

a tig iyan a
2 “Teroa ngka ko manga Israil a: Igira aden a isa rekano a pekorban ko Allah na aya kewit
iyan on a pekorbanen na isa ko manga pangangayamen iyan a sapi, bilibili o di na
kambing.
"3 O aya ipekorban iyan a isepaat a totongen na isa ko manga sapi iyan na aya kewit iyan
na so mama on a da a daway niyan. Kewit iyan ai ko gimowa o Barombarong a dii
Telabokan kaan matarima o Allah.
4 Kidapenet iyan a lima niyan ko olo o sapi a pekorbanen a isepaat a totongen na ketarima
ini a aya on kisambi kaan mapapas so dosa niyan.
5 Kesombali iyan so sapi sii ko hadapan o Allah, na so manga imam a manga wata i Aron
na kekowa iran so rogo iyan na mipemiripirik iran ko langon o manga kilid o aparan a
ndodoo ko danga o Barombarong.
6 Oriyan iyan na kelodasan iyan sa kobal so sapi na pemekangen iyan pen.
7 Ketagoan o manga imam sa apoy so aparan ago pagitagonan iran
8 Na taros a ipemetad iran sii ko pekedeg a itagon so miyapamekang a lawas o sapi a
rakes o olo ago so manga sibo iyan.
9 Na keonaban iyan so soled a tiyan o ayam ago so manga bobon iyan, na iperakes ai o
imam tomotong sii ko aparan. Giyai i dii kakorban sa ipesepaat a petotongen a mamot ko
Allah.
10 “O aya ipekorban iyan a isepaat a totongen na isa ko manga bilibili niyan o di na
kambing na aya kewit iyan na so mama on a da a daway niyan.
11 Kesombali iyan so ayam ko tampar sa pagotaraan o aparan sii ko hadapan o Allah, na
mipemiripirik o manga imam so rogo iyan sii ko langon o manga kilid o aparan.
12 Mapemekang iyan so ayam na taros a ipemetad ai o imam sii ko pekedeg a itagon ko
aparan a rakes o olo ago so sibo iyan.
13 Na keonaban iyan so soled a tiyan o ayam ago so manga bobon iyan, na iperakes ai o
imam tomotong sii ko aparan. Giyai i dii kakorban sa ipesepaat a petotongen a mamot ko
Allah.
14 “O aya ipekorban iyan a isepaat a totongen sii ko Allah na papanok na aya kewit iyan
na marapatik o di na pagapak.
15 Kewit ai o imam ko aparan na mbibiden iyan so lig o papanok sa kambadota niyan ko
olo niyan na totongen iyan ai ko aparan, na mapekatoga iyan so rogo iyan ko kilid o
aparan.
16 Kekowa niyan so tinokaan o papanok ago so matatago on na kilebad iyan sii ko
masesedepan o aparan a ndodon so ombi.
17 Na kekapetan iyan so manga papak o papanok na pagopaken iyan so lawas iyan a kena
a ba niyan pakapembelaga, na taros a totongen iyan ko pekedeg a itagon ko aparan. Giyai
i dii kakorban sa ipesepaat a petotongen a mamot ko Allah.
LIBITIKOS 2
So Kapesapaat sa Pangenengken
"Igira a aden a pesepaat sa pangenengken ko Allah na aya kewit iyan na mapiya a arina.
Keododan iyan ai sa lana a olibi ago perakesan iyan sa doka
2 Na kewit iyan ko manga imam a manga wata i Aron. Kowa so imam sa sagamak ko
arina ago so lana a rakes o langon o doka on na totongen iyan ai sii ko aparan a aya den
toos a so kalangolangon iyan na inisapaat ko Allah. Giyai na ipesepaat a pepakaokiten sa
apoy a mamot ko Allah.
3 So kelamba ko pangenengken a inisapaat na rek i Aron ago so manga wata iyan; lebi ini
a soti ko manga ipesepaat ko Allah a pepakaokiten sa apoy.
4 “O aya isepaat ka na paan a initinda ko pogon na aya kewit ka na so da a tapay ron a

manga apang a inembaalan a mapiya a arina a sesemboran sa lana a olibi, o di na manga
biskowit a da a tapay ron a iibongen a lana.
5 O aya isepaat ka na paan a initinda ko aloba na aya kewit ka na so inembaalan a mapiya
a arina a sesemboran sa lana ago da a tapay ron.
6 Pangopaka ngka ini na go ngka ododi sa lana a olibi sa kisepaaten ka on.
7 O itinda sa kara so isepaat ka na mbaali ngka pen a mapiya a arina a sesemboran sa lana
a olibi.
8 Na so pangenengken a isepaat ka ko Allah a inembaalan sangkai a manga palapa na
kepalad ka ko imam na pagowiten iyan sii ko aparan.
9 Na kekowa on o imam so sabagi ko pangenengken a aya den toos a so kalangolangon
iyan na inibegay ko Allah, na totongen iyan ai ko aparan a aya isepaat a pekaokiten sa
apoy a mamot ko Allah.
10 So kelamba ko inisapaat na rek i Aron ago so manga wata iyan. Lebi ini a soti ko
manga ipesepaat ko Allah a pepakaokiten sa apoy.
11 “Da a ba pangenengken a isepaat iyo ko Allah a ba ketagoi sa tapay, ka inisapar so

kapetotonga ko tapay o di na gola teneb a inisaog ko ipesepaat ko Allah a pepakaokiten sa
apoy.
12 Kepakay a mawit iyo ini ko Allah a isepaat iyo ron a iperakes ko paganay a inionga o
pereperan ka, ogaid na di den ai ketotong sii ko aparan a aya mamot ko Allah.
13 Timosi ngka so oman i isepaat ka a pangenengken. Di ngka den pendarainonen so
katagoi ngka on sa timos a aya den toos ko kapasadan o Tohan ka. Tagoi ngka sa timos
so langon o manga ipesepaat ka.
14 “Amay ka sepaat ka ko Allah ko paganay a inionga o pereperan ka na aya kewit ka na

miyabowayo a onga a miyasendag ko apoy.
15 Sembori ngka sa lana a olibi na go ngka tagoi sa doka, ka isepaat ai a pangenengken.
16 Na totongen o imam so sabagi ko onga ago lana a rakes o langon o doka on a aya den
toos a so kalangolangon iyan na inibegay ko Allah. Giyanan na isepaat ko Allah a
pekaokiten sa apoy.
LIBITIKOS 3
So dii Kakorban pantag bo ko kanggiginawai
"O aden a sepaat ko Allah sa isa ko manga ayam iyan a pekorbanen pantag bo ko
kanggiginawai na aya kewit iyan on na mama a sapi o di na babay a da a daway niyan.
2 Kidapenet iyan a lima niyan ko olo o ayam na kesombali iyan sii ko gimowa o
Barombarong a dii Telabokan. Na so rogo iyan na mipemiripirik o manga imam a wata i
Aron sii ko langon o manga kilid o aparan.
3 So ped sangkai a ayam na kisapaat ko Allah a pekaokiten sa apoy maana a so langon o
sibo a mikokokos ko soled a tiyan,
4 So dowa timan a pato a peketangelan sa titi a rakes o mikokokos on a sibo ago so lebi a
mapiya ko atay a mapengabis on a rakes o manga pato.
5 Na palaya ini totongen o manga imam sii ko aparan a iperakes ko ayam a ipesepaat a
petotongen sii ko liyawaw o pekedeg a itagon. Giyai i isepaat a pangenengken a totongen
a mamot ko Allah.
6 “O aya isepaat iyan ko Allah na isa ko manga bilibili niyan o di na kambing a

pekorbanen pantag bo ko kanggiginawai na aya kewit iyan on na so mama o di na babay a
da a daway niyan.
7 O aya ipekorban iyan na bilibili na kewit iyan ko hadapan o Allah,
8 Na kidapenet iyan a lima niyan ko olo o ayam na taros a kesombali iyan sii ko danga o
Barombarong a dii Telabokan. Na mipemiripirik o manga imam so rogo o ayam sii ko
langon o manga kilid o aparan.
9 So ped sangkai a ayam na kisapaat ko Allah a pekaokiten sa apoy maana a so langon a
kasiboan a ikog a sii pagabisa ko marani ko bekokong, so langon o sibo ko soled a tiyan,
10 So dowa timan a pato a rakes o mikokokos on a sibo, ago so lebi a mapiya ko a
mapengabis on a rakes o manga pato.
11 Na palaya ini totongen o imam sii ko aparan a aya den isepaat a pangenengken sii ko
Allah.
12 “O aya ipekorban iyan na kambing na kewit iyan ko hadapan o Allah,

13 Na kidapenet iyan a lima niyan ko olo o ayam na taros a kesombali iyan sii ko danga o
Barombarong. Na mipemiripirik o manga imam so rogo iyan sii ko langon o manga kilid
o aparan.
14 So ped sangkai a ayam na kisapaat ko Allah a pekaokiten sa apoy maana a so langon o
sibo sii ko soled a tiyan,
15 So dowa timan a pato a rakes o mikokokos on a sibo, ago so lebi a mapiya ko atay a
mapengabis on a rakes o manga pato.
16 Na totongen ai langon o imam sii ko aparan a aya den kapekorban sa isepaat a
totongen a mamot ko Allah. So langon o sibo na rek o Allah.
17 “Inisapar rekano so kakan sa sibo ago rogo. Giyai na da a ikepos iyan a sogoan ko
langon o kebabadan rekano apiya anda kano pekabaling.
LIBITIKOS 4
So dii Kakorban sabap ko Dosa

2 “Teroa ngka ko manga Israil a: Amay ka aden a miyakandosa sa da niyan tibabaa ko
kiyasogoka niyan ko apiya antonaa a sogoan o Allah na mipenggolalan iyan so
pemakatalondog a manga insarat:
3 “O aya miyakandosa na so kiyaidinan a imam na miyawitowit iyan so manga taw ko

kasalaan, na pekawit sekaniyan ko Allah sa mangoda a mama a sapi a da a daway niyan
na mapekorban iyan sabap ko dosa niyan.
4 Kepalad iyan so sapi ko Allah sii ko gimowa o Barombarong a dii Telabokan. Na
kidapenet iyan a lima niyan ko olo o sapi na taros a kesombali iyan roo ko hadapan o
Allah.
5 Oriyan iyan na kekowa o kiyaidinan a imam so ped ko rogo o sapi na kisoled iyan ko
Barombarong.
6 Kisombo niyan a kemer iyan ko rogo na mipemesipesik iyan sa makapito ko hadapan o
Allah sii ko onaan o kortina a irerending ko Lebi a Soti a Darpa.
7 Oriyan iyan na kisalapot iyan so rogo sii ko manga pangapanga o aparan a petotongan
sa doka a ndodoo ko hadapan o Allah sii ko Barombarong. So kelamba ko rogo o sapi na
keodod iyan ko itado o aparan a petotongan sa manga korban a sisii ko danga o gimowa o
Barombarong.
8 Na mapengabis iyan so langon o sibo sii ko soled a tiyan o sapi a pekorbanen sabap ko
dosa
9 A rakes o dowa timan a pato ago so mikokokos on a sibo taman ko lebi a mapiya ko
atay.
10 Na ketotong ai o imam ko aparan a petotongan ko manga ipesepaat a datar o ipekidia
ko manga sibo o sapi a dii korbanen pantag bo ko kanggiginawai.
11 Ogaid na so kobal o sapi ago so langon o sapo iyan a rakes on so olo ago so manga
bobon, ago so pen so soled a tiyan ago so tinai niyan
12 Maana a so langon o miyalamba ko sapi na kewit iyan ko liyo o kampo sii ko lompiyo
a darpa a pelebedan sa ombi, na roo niyan ai ketotong ko itagon sii ko mitatabotod a
ombi.
13 “O so langon o isa ka maginged a manga Israil na aya miyakandosa sa da iran tibabaa

ko kiyasogoka niyan ko apiya antonaa a sogoan o Allah na apiya pen di iran ai katawan na
miyataksil siran den.
14 Na anda den i katokawi ran ko dosa a miyasogok iran na pekawit siran ko hadapan o
Barombarong sa mangoda a mama a sapi a aya iran mapekorban sabap ko dosa iran.
15 So manga pelokelokesen ko isa ka maginged na kidapenet iran a manga lima iran ko
olo o sapi sii ko hadapan o Allah na taros a sombaliin iran roo.
16 Oriyan iyan na kewit o Maporo a Imam so ped ko rogo o sapi ko soled o Barombarong
17 Na kisombo niyan a kemer iyan ko rogo na mipemesipesik iyan sa makapito ko
hadapan o Allah sii ko onaan o kortina.
18 Na taros a selapotan iyan sa rogo so manga pangapanga o aparan a petotongan sa doka
a matatago ko hadapan o Allah sii ko Barombarong. So kelamba ko rogo na keodod iyan
ko itado o aparan a petotongan sa manga korban a sisii ko danga o gimowa o
Barombarong.
19 Na mapengabis o imam ko sapi so langon o sibo na go totongen iyan sii ko aparan,
20 Na aya ikidia niyan sangkai a sapi na datar o inikidia niyan ko sapi a pikorban sabap
ko dosa o imam. Sii sangkai a okit na ipenggolalan o imam so kakepapasa ko dosa o
manga taw na kerilaan siran.
21 Na kewit o imam ko liyo o kampo so miyalamba ko sapi na totongen iyan roo a datar o
kapetotonga niyan ko sapi a dii korbanen sabap ko rek iyan a dosa. Giyai den i dii
kakorban igira a pekedosa so isa ka maginged.
22 “O so isa ko manga olowan na aya miyakandosa sa da niyan tibabaa ko kiyasogoka

niyan ko apiya antonaa a sogoan o Allah a Tohan iyan na miyataksil sekaniyan den.
23 Na anda den i katokawi niyan ko dosa a miyasogok iyan na makapekorban sekaniyan
sa mandangan a da a daway niyan.
24 Kidapenet iyan a lima niyan ko olo o mandangan na kesombali iyan ko hadapan o
Allah sii ko penombalian ko manga ayam a dii korbanen a ipesepaat a petotongen. Giyai
na dii kakorban sabap ko dosa.
25 Na kisombo o imam so kemer iyan ko rogo o ayam na kisalapot iyan sii ko manga
pangapanga o aparan a petotongan sa manga korban na keodod iyan so kelamba ko rogo
sii ko itado o aparan.
26 Na ketotong iyan so langon o sibo o ayam sii ko aparan a datar o ipekidia niyan ko
sibo o dii korbanen pantag bo ko kanggiginawai. Sii sangkai a okit na ipenggolalan o
imam so kakepapasa ko dosa o olowan na perilaan sekaniyan.
27 “O so ped ko isa ka maginged na aya miyakandosa sa da niyan tibabaa ko kiyasogoka
niyan ko apiya antonaa a sogoan o Allah na miyataksil sekaniyan den.
28 Na anda den i katokawi niyan ko dosa a miyasogok iyan na makapekorban sekaniyan
sa babay a kambing a da a daway niyan sabap ko dosa niyan.
29 Kidapenet iyan a lima niyan ko olo o kambing a pekorbanen sabap ko dosa na go
kesombali iyan sii ko penombalian ko manga ayam a dii korbanen a ipesepaat a
petotongen.
31 Oriyan iyan na mapengabis iyan on so langon o sibo o kambing a datar o
kapepengabisi sa sibo ko dii korbanen pantag bo ko kanggiginawai, na ketotong ai o
imam ko aparan a mamot ko Allah. Sii sangkai a okit na ipenggolalan o imam so
kakepapasa ko dosa angkoto a taw na perilaan sekaniyan.
32 “Ogaid na o bilibili a mapekorban iyan sabap ko dosa na aya kewit iyan na babay a
bilibili a da a daway niyan.
33 Kidapenet iyan a lima niyan ko olo o bilibili a pekorbanen sabap ko dosa na kesombali
iyan sii ko penombalian ko manga ayam a dii korbanen a ipesepaat a petotongen.
35 Oriyan iyan na mapengabis iyan on so langon o sibo o ayam a datar o kapepengabisi sa
sibo ko manga bilibili a dii korbanen pantag bo ko kanggiginawai, na ketotong ai o imam
ko aparan a rakes o manga ped a ipesepaat a petotongen sii ko Allah. Sii sangkai a okit
na ipenggolalan o imam so kakepapasa ko dosa angkoto a taw na perilaan sekaniyan.
LIBITIKOS 5
So dii Nggolaolaan a Paliyogat on so dii Kakorban sabap ko Dosa
"O aden a taw a makandosa sabap ko di niyan kapeyaga ko miyailay niyan o di na

kiyatokawan iyan amay ka pakapeseksiin ko dii kokoman na kesala sekaniyan.
2 “O di na o aden a miyakaseko sa apiya antonaa a maresik apiya anda ko lawas o

miyatay a binatang, pangangayamen o di na paoledoled na apiya pen o di niyan ai
katawan na miyadalem sekaniyan a hadas ago miyataksil.
3 “O di na o makaseko sekaniyan sa maresik a miyakapoon ko manosiya, a so apiya

antonaa a ikebaloy niyan a kena a ba soti, apiya pen o di niyan ai katawan, na amay ka
katokawan iyan na ketaksil sekaniyan den.
4 “O di na o aden a taw a baden penggagaan sepa sa da niyan pamikira mipantag ko apiya

antonaa a penggolaolaan iyan a mapiya o di na marata, na apiya pen o da niyan ai
mainengka, na ketaksil sekaniyan den amay ka katokawan iyan.
5 “Amay ka aden a taw a miyataksil sabap ko apiya anda sangkai a dii manggolaola na
ketaobat iyan so miyandosa niyan.
6 Na pekawit sekaniyan ko Allah sa satiman a babay a bilibili o di na kambing a aya
niyan den mipenginsalaan ko dosa niyan, na taros a mapekorban ai o imam a aya
kakepapas o dosa niyan.
7 “O di niyan kegaga a kapakakorban iyan sa bilibili o di na kambing na aya kewit iyan

ko Allah na dowa timan a marapatik o di na dowa timan a kangodaan a pagapak a aya
niyan den mipenginsalaan ko dosa niyan. So isa on na mapekorban sabap ko dosa, na so
isa on na mapekorban a isepaat a totongen.
8 Kewit iyan ai ko imam na pekorbanen iyan paganay so isa on sabap ko dosa. Kebibid
iyan so lig o papanok a kena a ba niyan mbadota so olo niyan
9 Na taros a mipemirik iyan so ped ko rogo iyan ko kilid o aparan, na so lamba on na
mapekatoga ko itado o aparan. Giyai na kakorban sabap ko dosa.
10 Na so ikadowa a papanok na pekorbanen o imam a isepaat a totongen a aya kaketoman
o taritib. Giyanan i kipenggolalanen o imam ko kakepapasa ko dosa angkoto a taw na
kerilaan sekaniyan.
11 “Ogaid na o di niyan kegaga a kapakakorban iyan sa dowa a marapatik o di na pagapak

na aya kewit iyan sabap ko dosa niyan na isa ka kilo a lebi a mapiya a arina. Di niyan ai
ketagoan sa lana a olibi o di na doka ka kagiya giyai na isepaat sabap ko dosa.
12 Kewit iyan ai ko imam a aya on nggamak sa toos a so kalangolangon iyan na inibegay
ko Allah, na taros a totongen iyan ai sii ko aparan a iperakes ko ped a ipesepaat a
petotongen ko Allah. Giyai na kasapaat sabap ko dosa.
13 Sii sangkai a okit na ipenggolalan o imam so kakepapasa ko apiya anda sangkai a
manga dosa a miyasogok o taw na kerilaan sekaniyan. So lamba ko arina na rek den o
imam a datar o pangenengken a ipesepaat."
So dii Kakorban sabap ko Kiyataksil
14 Pitero o Allah ki Mosa a

15 “Amay ka aden a taw a miyakandosa sa da niyan tibabaa ko kiyasogoka niyan ko
taritib mipantag ko manga nganin a isesengay a soti ko Allah na kewit iyan ko Allah so
mama a bilibili a aya niyan den ipenginsalaan, a disomala a da a daway niyan ago
kiyaostowan sa arga sii ko pirak a piyakaokit ko timbangan sii ko Barombarong. Giyai na
kakorban sabap ko kiyataksil.
16 Na disomala a kapetepalan o taw so da niyan minggolalan mipantag ko soti a manga
nganin ago kioman iyan on pen so ikalima bagi ko arga iyan, na kibegay niyan ai langon
ko imam. Na pekorbanen o imam so bilibili a aya niyan kipenggolalanen ko kakepapasa
ko sala o taw, na kerilaan sekaniyan.
17 O madosa so taw ko kiyasogoka niyan ko apiya antonaa a sogoan o Allah apiya pen o
di niyan ai katawan na miyataksil sekaniyan den na go kesala.
18 Pekawit sekaniyan ko imam sa kiyadiyangkaan sa arga a mama a bilibili a da a daway
niyan a pekorbanen sabap ko kiyataksil iyan. Sii sangkai a okit na ipenggolalan o imam
so kakepapasa ko ribat a miyanggolaola o taw sa da niyan tibabaa, na kerilaan sekaniyan.
19 Giyai na dii kakorban sabap ko kiyataksil; miyataksil sekaniyan sabap ko
kiyanggolaola niyan sa ribat ko Allah."
LIBITIKOS 6
So Ped a Manga Dosa a Paliyogat on a dii Kakorban sabap ko Kiyataksil

2 “O aden a miyakandosa ago miyakasela ko Allah a nggolalan ko kiyaakala niyan ko
siringan iyan mipantag ko bapiya antonaa a inisana on, o di na initadin on o di na
miyapanekew ron, o di na o miyanalimbot sekaniyan sa ped a taw,
3 O di na o miyakatoon sekaniyan sa tamok a miyada ago inipelaw niyan ai, o di na o
minisepa iyan so di benar, o di na o miyakasogok sekaniyan sa apiya anda ko lagid ai a
manga dosa a dii manggolaola o manga taw
4 Na amay ka miyakandosa so taw sa datar ai ago miyataksil na disomala a kikasoy niyan
so miyapanekew o di na miyagasab iyan, o di na so minisarig on, o di na so miyatoon iyan
a miyada,
5 O di na apiya antonaa a pisepaan iyan sa di benar. Kapetepalan iyan ai langon ago
kioman iyan on pen so ikalima bagi ko arga iyan na kibegay niyan ko kirek on sii ko
gawii a kapekorban iyan sabap ko kiyataksil iyan.
6 Na pekawit sekaniyan ko imam sa kiyadiyangkaan sa arga a mama a bilibili a da a
daway niyan a aya niyan ipenginsalaan a pekorbanen ko hadapan o Allah sabap ko
kiyataksil iyan.
7 Sii sangkai a okit na ipenggolalan o imam so kakepapasa ko dosa o taw ko hadapan o
Allah. Na kerilaan sekaniyan ko bapiya anda sangkai a manga miyanggolaola niyan a
minitaksil on."
So dii Kakorban sa Ipesepaat a Petotongen

9 “Began ka angkai a sogoan ki Aron ago sii ko manga wata iyan: Giyai i manga taritib
mipantag ko manga ayam a dii korbanen a ipesepaat a petotongen: So dii korbanen a
ipesepaat a petotongen na sii den ko aparan ko mababasa gawii taman ko kapita iyan, na
di den perengen so apoy ko aparan.
10 Sii ko kapipita na kesolot o imam so manga nditaren iyan a sotra a rakes o karsinsiliyo
niyan a sotra sa didalem, na kekowa niyan so ombi o pikorban a miyatotong ko apoy sii
ko aparan na kibetad iyan ai ko obay o aparan.
11 Oriyan iyan na kendaan iyan angkai a manga nditaren na kesolot iyan so ped na taros a
keawidan iyan so ombi ko lompiyo a darpa roo ko liyo o kampo.
12 Lalayon den bibiyagan sa apoy so aparan; di den ai perengen. Oman kapita na
pekeomanan o imam sa itagon ago peketanor iyan on so dii korbanen a ipesepaat a
petotongen, na peketotong iyan on pen so sibo o dii korbanen pantag bo ko
kanggiginawai.
13 Tatap den a kabibiyaga ko apoy sii ko aparan; di den ai perengen.
So Kapesapaat sa Pangenengken
14 “Giyai i manga taritib mipantag ko ipesepaat a pangenengken: Kepalad ai o manga

imam a manga wata i Aron sii ko Allah ko hadapan o aparan.
15 Kowa on so imam sa sagamak ko mapiya a arina a sesemboran sa lana a olibi a rakes o
langon o doka a matatago sangkai a pangenengken a isepaat na ketotong iyan ai sii ko
aparan a aya den toos a so kalangolangon iyan na inibegay ko Allah, na mamot ai
rekaniyan.
16 So kelamba on na ken o manga imam, ogaid na kekan ai a da a tapay ron ko lompiyo a
darpa sii ko lamalama o Barombarong.
17 Di ini kitinda a ba sasaogi sa tapay. Inibegay aken ai ko manga imam a aya iran den
bagian ko ipesepaat raken a pepakaokiten sa apoy. Lebi ini a soti a datar o dii korbanen
sabap ko dosa ago sabap ko kiyataksil.
18 Apiya antawaa a mama ko mbawataan i Aron na pekakan on. Lalayon ai misesenggay
a bagian iran ko manga ipesepaat ko Allah a pepakaokiten sa apoy taman ko
kapemagapidapidi kiran. Apiya antawaa i pekaseko on na pembaloy a soti."
So Kapesapaat ko Kipegidinen ko Kaiimami

20 “Giyai i manga sapaat a pekewit o oman i mbawataan i Aron sii ko Allah ko gawii a
kapegidini ron sa kaiimami: isa ka kilo a mapiya a arina (a datar sa kala o matetendo a
ipesepaat a pangenengken) a so sabagi on na sii ko kapipita, na so lamba on na sii peman
ko kaperimon iyan.
21 Kesaogan ai sa lana ago kitinda ko kara, na kisapaat angkai a pangenengken a
miyapangopak sii ko Allah a mamot rekaniyan.
22 So oman i mbawataan i Aron a keidinan sa kaiimami na mipenggolalan iyan angkai a
kapesepaat. Giyai na tatap a bagian o Allah na disomala a totongen ai piyapiya.
23 So oman i isepaat o imam a pangenengken na ketotong sa tarotop; di den ai kekan."
So dii Kakorban sabap ko Dosa

25 “Teroa ngka ki Aron ago so manga wata iyan a: Giyai i manga taritib mipantag ko dii
kakorban sabap ko dosa. So ayam a pekorbanen sabap ko dosa na kesombali ko hadapan
o Allah sii ko darpa a penombalian ko manga ayam a dii korbanen a ipesepaat a
petotongen; lebi ini a soti.
26 So imam a mikorban on na aya on pekakan, na sii ini kekan ko lompiyo a darpa sii ko
lamalama o Barombarong.
27 Apiya antonaa i kiseko ko sapo o ayam na pembaloy a soti, na apiya antonaa a nditaren
i katarsikan ko rogo iyan na kepipian ko lompiyo a darpa.
28 So kiyatindaan ko sapo a koden a bote na disomala a peropeten, ogaid na o sii
minitinda ko koden a tombaga na kekikisan ai ago keonaban sa ig.
29 Apiya antawaa a mama a ped ko mbawataan o imam na pekakan sangkai a pikorban;
lebi ini a soti.
30 Ogaid na di den ken so sapo o apiya antonaa a pikorban sabap ko dosa opama ka so
rogo iyan na minisoled ko Barombarong ko kininggolalanen ko kiyapapasa ko dosa;
disomala a totongen ai sa tarotop."
LIBITIKOS 7
So dii Kakorban sabap ko Kiyataksil
"Giyai i manga taritib mipantag ko dii kakorban sabap ko kiyataksil; lebi ini a soti.
2 So ayam a pekorbanen sabap ko kiyataksil na kesombali ko darpa a penombalian ko
manga dii korbanen a ipesepaat a petotongen, na mipemiripirik so rogo iyan sii ko langon
o manga kilid o aparan.
3 So langon o sibo iyan na palaya den kisapaat maana a so kasiboan a ikog iyan, so sibo
ko soled a tiyan,
4 A rakes o dowa timan a pato niyan ago so mikokokos on a sibo, ago so lebi a mapiya ko
atay a mapengabis on a rakes o manga pato.
5 Ketotong ai o imam sii ko aparan a aya isepaat ko Allah a pekaokiten sa apoy. Giyai i
dii kakorban sabap ko kiyataksil.
6 Apiya antawaa a mama a ped ko mbawataan o imam na pekakan ko sapo iyan, ogaid na
sii ini kekan ko soti a darpa; lebi ini a soti.
7 “Ndatar sa taritib a kipenggolalanen ko kakorban sabap ko dosa ago so kakorban sabap

ko kiyataksil; so sapo o ayam na rek o imam a ininggolalan iyan so kiyapapas o dosa.
8 So imam a sepaat sa korban a totongen para ko apiya antawaa a taw na aya pekakowa
ko kobal o ayam.
9 Oman i inisapaat a pangenengken a initinda ko pogon o di na pitiyagar sii ko kara o di
na aloba na rek den o imam a somiyapaat on.
10 Ogaid na so langon o ped a manga inisapaat a pangenengken a da mailoto apiya anda
ko sesemboran sa lana o di na mamara na mapembagibagi o langon o manga imam a
mbawataan i Aron.
So dii Kakorban pantag bo ko kanggiginawai
11 “Giyai i manga taritib mipantag ko ipesepaat ko Allah a dii korbanen pantag bo ko

kanggiginawai:
12 O aya kapekorban o taw na para ko panalamat na aya kirakes iyan ko ayam a
pekorbanen iyan na manga paan a inembaalan a da a tapay ron apiya anda ko manga
apang a sesemboran sa lana a olibi, o di na manga biskowit a iibongen a lana, o di na
manga mamon a inembaalan a mapiya a arina a bobonaon a lana.
13 Na aya pen a kirakes iyan ko pekorbanen iyan pantag bo ko kanggiginawai para ko
panalamat na so manga mamon a aden a tapay ron.
14 Pekasapaat sekaniyan sa satiman ko oman i pisosonan o paan a aya niyan
pamemegayan ko Allah, na rek ai o imam a miyamiripirik ko rogo o ayam sii ko manga
kilid o aparan.
15 So sapo o ayam a pikorban pantag bo ko kanggiginawai para ko panalamat na kekan
sii ko gawii a kiyakorbana on, na da den a ba on pekapitai.
16 “Ogaid na o aya kapekorban iyan na sabap ko samaya, o di na iklas anan a pekorbanen

na kekan so sapo sii ko gawii a kiyakorbana on, na sii pen ko talondog a gawii na kekan
so kelamba on.
17 Ogaid na apiya antonaa a sapo i kelamba ko ikatelo gawii na disomala a totongen.
18 O aden pen a sapo iyan a makan ko ikatelo gawii na di terimaan o Allah angkai a
pikorban pantag bo ko kanggiginawai, na di on kebalian so somiyapaat on ka karam ai, na
so taw a koman on na kesala.
19 “So sapo a miseko ko apiya antonaa a kena a ba soti na di den kekan; disomala a
totongen. So peman so sapo a kepakay a makan na apiya antawaa i soti na pekakan on.
20 Ogaid na so taw a kena a ba soti na o koman ko sapo a pikorban pantag bo ko
kanggiginawai a minisenggay a rek o Allah na kebelag sekaniyan ko isa ka maginged a
Israil.
21 Na o aden a makaseko ko apiya antonaa a maresik apiya anda ko miyakapoon ko
manosiya, o di na karam a binatang, o di na apiya antonaa a piyakasisingay a maresik na o
kan sekaniyan ko sapo o pikorban pantag bo ko kanggiginawai a minisenggay ko Allah na
kebelag angkoto a taw ko isa ka maginged a Israil."
Inisapar so Kakan sa Sibo ago Rogo

23 “Teroa ngka ko manga Israil a: Di kano den ken ko apiya antonaa a sibo o sapi, bilibili
o di na kambing.
24 So sibo o ayam a miyatoon a maatay den o di na so miyapatay o maila a binatang na
kepakay a osaren ko ped a kapenggonaan on, ogaid na o ba niyo kana.
25 Apiya antawaa i koman ko sibo o ayam a kisapaat ko Allah a pekaokiten sa apoy na
kebelag ko isa ka maginged a Israil.
26 Liyo ron pen na apiya anda kano pekabaling na di kano den ken sa rogo o apiya
antonaa a papanok o di na ayam.
27 O aden a koman sa rogo na kebelag angkoto a taw ko isa ka maginged a Israil."
So Bagian o manga Imam

29 “Teroa ngka ko manga Israil a: Apiya antawaa i sepaat ko Allah sa pekorbanen pantag
bo ko kanggiginawai na keawidan iyan so sabagi on a aya pamemegayan iyan ko Allah
30 A giya den a lima niyan i pekaawid on kaan misapaat a totongen sii ko Allah.
Keawidan iyan so sibo o ayam a rakes o kagepe niyan na peladen iyan ai ko Allah ko
kibayaon iyan on ko hadapan iyan.
31 Totongen o imam so sibo sii ko aparan, ogaid na so kagepe iyan na rek i Aron ago so
manga wata iyan.
32 So kawanan a bobon o ayam na kibegay ko imam a aya niyo sadka.
33 So imam a somiyapaat sa rogo ago so sibo o pikorban pantag bo ko kanggiginawai na
aya pekakowa ko kawanan a bobon a aya niyan bagian.
34 Ka inisenggay aken a rek i Aron a imam ago so manga wata iyan so kagepe a
pekibayaw raken ago so bobon a pepeladen raken a sadka a tatap den a bagian iran ko dii
korbanen o manga Israil pantag bo ko kanggiginawai."
35 Giyanan so sabagi ko ipesepaat ko Allah a petotongen a inisenggay a rek i Aron ago so
manga wata iyan sii ko gawii a kiyaidini kiran a makapagimam siran ko Allah.
36 Sii sangkoto a gawii na inisogo o Allah a ipembegay ini kiran o manga Israil a aya den
tatap a bagian iran taman ko kapemagapidapidi kiran.
37 Giyanan den i manga taritib mipantag ko dii kakorban sa ipesepaat petotongen, so

kapesepaat sa pangenengken, so dii kakorban sabap ko dosa, so dii kakorban sabap ko
kiyataksil, so kapesepaat ko kipegidinen ko kaiimami, ago so dii kakorban pantag bo ko
kanggiginawai.
38 Inibegay ai o Allah ki Mosa sii ko Palaw a Sinay ko mitataog a kaden sii ko gawii a
kiyasogoa niyan ko manga Israil sa kapagowita iran ko manga sapaat iran ko Allah.
LIBITIKOS 8
So Kiyapangidini ko manga Imam

2 “Pakaonota ngka si Aron ago so manga wata iyan ko gimowa o Barombarong a dii
Telabokan na awidi ngka roo pen so manga nditaren ko kaiimami, so lana diyabat, so
mama a sapi a pekorbanen sabap ko dosa, so dowa a mama a bilibili, ago so reban a
tatagoan sa paan a da a tapay ron,
3 Na limoda ngka roo so langon o isa ka maginged a Israil."
4 Pinggolaola i Mosa so inisogo on o Allah, na kagiya matimo so langon o manga taw ko

gimowa o Barombarong
5 Na pitero iyan kiran a "Inisogo o Allah angkai a taritib a ipenggolalan aken imanto."
6 Na piyakaadap i Mosa si Aron ago so manga wata iyan ko manga taw na
piyakapamangonab iyan siran sa ig.
7 Oriyan iyan na piyakinditar i Mosa ki Aron so bangkala ago so kimon na inibabed iyan
on so salambat. Piyakisolot iyan on so saliko ago piyakisembitan iyan on so lalangkitan a
sambitan kaan mitekes rekaniyan piyapiya so saliko.
8 Na piyakisolot iyan on pen so raben na piyanago iyan ko raben so Orim ago so Tomim.
9 Tiyago iyan so totob ko olo i Aron, na sii ko panempang o totob na iniiket iyan on so
tanda a bolawan a aya toos ko kisesenggain ki Aron a soti a so den so inisogo o Allah ki
Mosa.
10 Oriyan iyan na kinowa i Mosa so lana diyabat na inisalawat iyan ko Barombarong ago
so langon a kikatatago on. Sii sangkai a okit na inisengay niyan ai langon a soti ko Allah.
11 Miyakapito niyan kapamesipesiki sa lana so aparan a rakes o langon a kasangkapan on
ago so palanggana a dii pangonaban taman ko pembatogan on kaan iyan ai masoti.
12 Na inododan iyan ko lana diyabat so olo i Aron a aya niyan on kinisenggain a soti ko
Allah.
13 Oriyan iyan na piyamakaadap i Mosa so manga wata i Aron sii ko manga taw na
pinditaran iyan siran sa manga kimon, na piyamakisembitan iyan kiran so manga
salambat ago piyanagoan iyan sa totob so manga olo iran a so den so inisogo on o Allah.
14 Oriyan iyan na kinowa i Mosa so mama a sapi a pekorbanen sabap ko dosa, na si Aron
ago so manga wata iyan na inipanapenet iran a lima iran ko olo o sapi.
15 Na pikorban i Mosa so sapi na inisombo niyan a kemer iyan ko rogo na inisalapot iyan
ko pat a manga pangapanga o aparan kaan masoti. Inodod iyan so lamba ko rogo sii ko
itado o aparan, na nggolalan sii na inisenggay niyan ai a soti ko Allah.
16 Na kinowa i Mosa so langon o sibo sii ko soled a tiyan o sapi, ago so lebi a mapiya ko
atay, ago so mbala a pato a rakes o mikokokos on a sibo na tiyotong iyan ai ko aparan.
17 Ogaid na so lamba ko sapi a rakes o kobal iyan, so sapo iyan ago so manga tinai niyan
na tiyotong iyan roo ko liyo o kampo a so den so inisogo on o Allah.
18 Oriyan iyan na kinowa i Mosa so mama a bilibili a isepaat a totongen, na inidapenet on

i Aron ago so manga wata iyan a manga lima iran ko olo o bilibili,
19 Na pikorban ini i Mosa. Na taros a inipamiripirik iyan so rogo ko langon o manga
kilid o aparan.
20-21 Oriyan iyan na piyamekang iyan so bilibili ago inonaban iyan sa ig so soled a tiyan
ago so manga bobon iyan, na tiyotong iyan so olo niyan, so manga sibo iyan ago so
langon o manga anggaota o lawas iyan sii ko aparan a aya den ipesepaat a petotongen a
mamot ko Allah a so den so inisogo iyan ki Mosa.
22 Oriyan iyan na kinowa i Mosa so ikadowa a mama a bilibili a pegosaren ko

kipagidinen ko kaiimami, na inidapenet i Aron ago so manga wata iyan a manga lima iran
ko olo o bilibili,
23 Na pikorban ai i Mosa. Na kominowa sekaniyan ko rogo o bilibili na inipanising iyan
so rogo ko kababaan o kawanan a tangila i Aron, ago sii ko kawanan a ama a lima niyan
ago sii ko kawanan a ama a ai niyan.
24 Mapasad oto na piyamakaobay niyan so manga wata i Aron na piyanisingan iyan sa
rogo so kababaan o kawanan o manga tangila iran, ago so manga kawanan a ama a lima
iran ago so kawanan a manga ama ai ran. Oriyan iyan na inipamiripirik iyan so lamba ko
rogo ko langon o manga kilid o aparan.
25 Kinowa niyan so manga sibo o bilibili, a so kasiboan a ikog, so langon o sibo ko soled
a tiyan, so lebi a mapiya ko atay, so mbala a pato a rakes o mikokokos on a sibo ago so
kawanan a bobon,
26 Na poon ko reban a tatagoan sa paan a da a tapay ron a isesenggay ko Allah na
kominowa sekaniyan sa satiman a apang, ago so isa on a bobonaon a lana, ago satiman a
biskowit na tiyago iyan ai ko liyawaw o sibo ago so kawanan a bobon o bilibili.
27 Inipametad iyan ai langon sii ko manga lima i Aron ago so manga wata iyan na piyalad
iran ai ko Allah ko kinibayaon iran on ko hadapan iyan.
28 Oriyan iyan na kinowa ini peroman i Mosa ko manga lima iran na tiyotong iyan ai ko
aparan sii ko liyawaw o ipesepaat a petotongen. Giyai na ipesepaat ko Allah para ko
kapagidini ko kaiimami a pepakaokiten sa apoy a mamot ko Allah.
29 Kinowa pen i Mosa so kagepe, a aya niyan den bagian ko bilibili a pegosaren ko
kapegidin, na piyalad iyan ko Allah ko kinibayaon iyan on ko hadapan iyan. Langon den
ai pinggolaola i Mosa a so den so inisogo on Allah.
30 Mandiyadi na kominowa si Mosa ko lana diyabat ago so rogo a matatago ko aparan na

inipamesipesik iyan ki Aron ago sii ko manga nditaren iyan, ago sii ko manga wata iyan
ago so manga nditaren iran. Sii sangkai a okit na miyasoti niyan si Aron ago so manga
wata iyan taman ko manga nditaren iran.
31 Na pitero i Mosa ki Aron ago so manga wata iyan a "Tindaan iyo so sapo sii ko
gimowa o Barombarong a dii Telabokan na ron iyo ai kana a rakes o paan a tatagoon ko
reban a inisapaat ko kiyaidin a so den so inisogo aken rekano a tig aken a 'Si Aron ago so
manga wata iyan i pekakan on,'
32 Ogaid na o aden a kelamba ko sapi ago so paan na ketotong iyo ai.
32 Di kano pagawa ko gimowa o Barombarong ko soled o pito gawii taman sa di
mapopos so manga gawii a kapepegidini rekano, ka pito gawii a kapepegidini rekano.
34 So miyanggolaola imanto a gawii na so den so inisogo o Allah a mipenggolalan kaan
mapapas so manga dosa niyo.
35 Pekakaden kano ko gimowa o Barombarong ko gagawii daondaw ko soled o pito
gawii a di niyo dii inggolalan so ipapaliyogat o Allah kaan kano di pematay, ka giyai i
inisogo raken o Allah."
36 Na tiyoman i Aron ago so manga wata iyan so langon a inisogo o Allah a
miyakanggolalan ki Mosa.
LIBITIKOS 9
Mipoon Magimam si Aron ago so manga Wata iyan
Sii ko ikawalo gawii na tinimo i Mosa si Aron ago so manga wata iyan ago so manga
pelokelokesen sa Israil
2 Na pitero iyan ki Aron a "Kowa ka sa nati a mama a sapi a pekorbanen sabap ko dosa,
ago satiman a mama a bilibili a isepaat a totongen a palaya den da a daway niyan, na
palada ngka ini ko hadapan o Allah.
3 Na teroa ngka ko manga Israil a komowa siran sa mandangan a pekorbanen sabap ko
dosa, ago satiman a sapi ago satiman a bilibili a sesaragon a idad iyan a palaya den da a
daway niyan a isepaat a penotongen.
4 Pakakowaa ngka siran pen sa mama a sapi ago mama a bilibili a mapekorban pantag bo
ko kanggiginawai sii ko hadapan iyan a rakes o pangenengken a isepaat a sasaogan sa
lana a olibi, ka imanto a gawii na pepayag rekano so Allah."
5 Mandiyadi na piyangowit o manga taw so langon taman a inisogo i Mosa sii ko danga o
Barombarong a dii Telabokan, na miyalimod roo so langon o isa ka maginged na
tominindeg siran ko hadapan o Allah.
6 Na pitero kiran i Mosa a "Giyai i inisogo o Allah a penggolaolaan iyo kaan mapayag
rekano so bantogan o Allah."
7 Pitero pen i Mosa ki Aron a "Obay ka ko aparan na panapaaten ka on so pekorbanen
sabap ko dosa ago so totongen a isepaat a aya kakepapasa ko dosa ngka ago so dosa o
manga taw; na panapaaten ka on pen so manga isepaat a ikepapas o manga dosa o manga
taw a so den so inisogo o Allah."
8 Mandiyadi na miyobay si Aron ko aparan na siyombali iyan so sapi a pekorbanen sabap

ko dosa niyan.
9 So manga wata iyan na inowit iran rekaniyan so rogo na inisombo niyan a kemer iyan
ko rogo na inipanalapot iyan ko manga pangapanga o aparan. Na so lamba ko rogo na
inodod iyan ko itado o aparan.
10 So manga sibo o ayam, so mbala a pato niyan ago so lebi a mapiya ko atay niyan na
tiyotong iyan sii ko aparan a so den so inisogo o Allah ki Mosa.
11 Ogaid na so sapo ago so kobal na roo niyan tiyotong ko liyo o kampo.
12 Oriyan iyan na siyombali i Aron so ayam a isepaat a totongen. So rogo na inowit

rekaniyan o manga wata iyan, na inipamiripirik iyan ai ko langon o manga kilid o aparan.
13 Pinggagaisa iran on domawag so manga anggaoto o lawas o ayam a rakes o olo niyan,
na tiyotong iyan ai langon ko aparan.
14 Inonaban iyan so soled a tiyan ago so manga bobon na tiyotong iyan ko liyawaw o
ipesepaat a petotongen ko aparan.
15 Oriyan iyan na inowit i Aron so manga isepaat para ko manga taw. Kinowa niyan so
mandangan a pekorbanen sabap ko manga dosa iran na siyombali iyan ago inisapaat iyan
a datar o inikidia niyan ko paganay a inisapaat iyan para ko ginawa niyan.
16 Kinowa niyan pen so ayam a pekorbanen a isepaat a totongen na inisapaat iyan ai a
nggolalan ko matetendo on a okitokit iyan.
17 Na inisapaat iyan pen so isepaat a pangenengken. Kominowa sekaniyan on sa
sagamak na tiyotong iyan ko aparan a inioman ko petotongen a ipesepaat ko kapipita.
18 Oriyan iyan na siyombali iyan so mama a sapi ago so mama a bilibili a pekorbanen
pantag bo ko kanggiginawai para ko manga taw. So rogo na inowit rekaniyan o manga
wata iyan na inipamiripirik iyan ko langon o manga kilid o aparan.
19 So manga sibo o sapi ago so bilibili, a so kasiboan a ikog ago so mikokokos ko soled a
tiyan a rakes o mbala a pato ago so lebi a mapiya ko atay
20 Na inibatog iran ai ko manga kagepe angkai a manga ayam. Inawidan ai i Aron ko
aparan na tiyotong iyan on so manga sibo
21 Na piyalad iyan ko Allah so manga kagepe ago so kawanan a bobon ko kinibayaon
iyan on ko hadapan iyan a so den so inisogo i Mosa.
22 Oriyan iyan na inibayaw i Aron a manga lima niyan sii ko manga taw na riyakmatan
iyan siran. Na sabap sa miyapasad iyan den somapaat so korban sabap ko dosa, so korban
a inisapaat a petotongen ago so manga korban pantag bo ko kanggiginawai na tomipad
sekaniyan ko aparan
23 Na somiyoled si Mosa ago si Aron ko Barombarong. Kagiya lomiyo siran na
riyakmatan iran so manga taw, na mipeyag so bantogan o Allah ko langon o manga taw.
24 Minitekaw den a aden a apoy a somiyokeyaw a poon ko Allah na lingan iyan tomotong
so petotongen a manga sapaat ago so manga sibo sii ko aparan. Kagiya mailay ini o
manga taw na palaya siran den miyakabeseg sa kababaya, na minggegepe siran ko lopa.
LIBITIKOS 10
So Dosa i Nadab ago si Abiho
So manga wata i Aron a si Nadab ago si Abiho na tiyagoan iran sa waga so manga
petotongan iran sa doka na bitadan iran ai sa doka; nggolalan sii na inisapaat iran ko
Allah so di sak a apoy a minisogok ko sogoan iyan.
2 Sarta den na aden a apoy a somiyokeyaw a poon ko Allah na tiyotong iyan siran, na
miyamatay siran ko hadapan o Allah.
3 Na pitero i Mosa ki Aron a "Giyai i miyatero den o Allah: 'Pekiilay aken so kasosoti
aken sii ko siran oto pegobay raken, na kebantogan ako sii ko kamamasaan o langon o
manga taw.' " Na da den makatero si Aron.
4 Piyakisongowan i Mosa si Misiyail ago si Ilsapan a manga wata i Osiyal a bapa i Aron a
tig iyan kiran a "Song kano sii; awidi niyo angkai a manga tonganay niyo ko liyo o kampo
a mawatan ko hadapan o soti a Barombarong."
5 Na miyakaoma siran na kiyapetan iran so manga nditaren o manga bangkay na inawidan
iran ko liyo o kampo a so den so inisogo i Mosa.
6 Pitero i Mosa ki Aron ago sii ko manga wata iyan a si Iliyasar ago si Itimar a "O ba niyo
ndarainonen so manga bok iyo aya pen o ba niyo kisia so manga nditaren iyo sii ko
kapemboko iyo. O nggolaolaa niyo ai na pematay kano, na kerarangitan o Allah so
langon o maginged. Inonta bo na so langon a ped a manga Israil, a manga tonganay niyo,
na kepakay a ndiyagaan iran so siran oto a biyono o Allah a apoy.
7 Ogaid na di kano peliyo ko Barombarong kaan kano di pematay. ka kagiya kiyaidinan
kano a nggolalan ko lana diyabat o Allah." Na tiyoman iran so inisogo kiran i Mosa.
So manga Sogoan para ko manga Imam
8 Mandiyadi na pitero o Allah ki Aron a

9 “Seka ago so manga wata a ka na di pekainom sa arak o di na ped a panginginomen a
pakabereg igira a pesoled kano ko Barombarong a dii Telabokan. O nggolaolaa niyo ai na
pematay kano. Sogoan ai a da a ikeda iyan a disomala a peketoman o langon a kebabadan
rekano.
10 Disomala a kekilala niyo so mbidaan o misesenggay ago so komakalilid, ago so
mbidaan o kena a ba soti ago so soti.
11 Na mipengendao niyo ko manga Israil so langon o manga kokoman a inibegay kiran o
Allah a nggolalan ki Mosa."
12 Pitero i Mosa ki Aron ago sii ko miyalamba a manga wata iyan a si Iliyasar ago si
Itamar a "Kowaa niyo so sapaat a pangenengken a miyalamba ko inisapaat a petotongen
ko Allah na tiyagara niyo ai a da a tapay ron na kana niyo sii ko kilid o aparan, ka lebi ini
a soti.
13 Disomala a kekan iyo ai sii ko darpa a soti, ka bagian iyo ago so manga wata a ka ko
manga ipesepaat a petotongen ko Allah. Giyai i inisogo raken o Allah.
14 Ogaid na so kagepe a inibayaw ago so bobon a pamemegayan na kepakay a ken iyo
ago so langon a ped ko manga pamiliya niyo sii ko apiya antonaa a darpa a lompiyo. Ka
inibegay ai rekano a bagian iyo ko manga dii korbanen pantag bo ko kanggiginawai a
ipesepaat o manga taw sa Israil.
15 Pekeawidan iran angkai a bobon ago kagepe igira a ipesepaat iran a petotongen so
manga sibo kaan ai langon mapalad ko Allah ko kibayaon on ko hadapan iyan. Giyai i
bagian iyo ago so manga kebabadan rekano sa dayon sa dayon a so den so inisogo o
Allah."
16 Kagiya ipangingise i Mosa so mipantag ko mandangan a pikorban sabap ko dosa na

kiyatokawan iyan a miyatotong bes. Sabap san na kiyararangitan iyan si Iliyasar ago si
Itamar a manga wata i Aron, na iniise iyan kiran a
17 “Ino niyo da kana so pikorban sabap ko dosa sii ko darpa a maaped ko soti a
Barombarong? Lebi ini a soti a ipesepaat, na inibegay ini rekano o Allah sabap ko
kapepakadaa niyo ko kiyataksil o isa ka maginged sii ko di niyo dii kinggolalanen ko
kakepapasa ko manga dosa iran.
18 Sabap sa da mawit so rogo o ayam ko soled o Soti a Darpa na disomala a kekan iyo so
sapo o ayam ko darpa a maaped ko soti a Barombarong a aya ko rekano den inisogo."
19 Somimbag si Aron a tig iyan ki Mosa a "Ilaya ngka man, ka imanto a gawii na
inisapaat iran so pikorban iran sabap ko dosa ago so pikorban a inisapaat a petotongen sii
ko Allah, ogaid na minitomparak raken angkai a morala! O miyakakan ako imanto ko
pikorban sabap ko dosa na ba ini mapiya sii ko kapegilaya on o Allah?"
20 Na kagiya maneg ai i Mosa na miyasoat sekaniyan.
LIBITIKOS 11
So Halal ago so Karam a Pangenengken
Na pitero o Allah ki Mosa ago si Aron a

2 “Teroa niyo ko manga Israil: So langon o manga ayam a kikakaden ko kalopaan na
giyai i kekan iyo ron:
3 Apiya antonaa a ayam a maoopak so kanoko niyan ago pepenepasepa igira a pekan.
4-6 Ogaid na di kano pekakan ko manga ayam a pepenepasepa ogaid na kena a ba
maoopak so kanoko niyan a ibarat o onta, so taksing ago so arnab. Giyai na karam
rekano.
7 Na di kano pekakan ko baboy, ka apiya pen maoopak a manga kanoko niyan na di
pepenepasepa; karam ai rekano.
8 Di kano pekakan ko sapo angkai a manga ayam aya pen o ba niyo sekoa so miyatay a
lawas iran, ka karam ai rekano.
9 “So langon o baraniyawa a matatago ko manga ragat ago sii ko manga lawasaig na
kekan iyo so apiya antonaa a aden a manga payang iyan ago manga nap.
10 Ogaid na so langon o baraniyawa ko manga ragat ago so manga lawasaig a da a
payang iyan ago manga nap apiya anda ko pepelalangoy ago so ped a manga baraniyawa
on na patot a ibilang iyo a piyakasisingay.
11 Sabap san na di kano pekakan ko sapo iran aya pen o ba kano seko ko miyatay a lawas
iran.
12 Apiya antonaa a baraniyawa sii ko manga ig a da a manga payang iyan ago manga nap
na piyakasisingay rekano.
13-19 Giyai i manga papanok a di niyo kekan ka piyakasisingay rekano: so agila, so

garoda, so banog, so darayo, so sikep, so manaol, so bayata, so romaragit, so kakowak, so
bengit, so kang, so laasan, so tabonan, so pilikano, so barawa, so talik, so talaong, so
kabeg ago so paniki.
20 Piyakasisingay rekano so langon o pepapak a manga oled a pelalakakaw ko lopa

21 Liyo ron so makasosompat i manga ai a dii tepak ko lopa. Kepakay a ken iyo ai
22 A so langon a barang o manga tarapan, manga sengog, manga tipa ago manga sisip.
23 Ogaid na so langon o ped a manga paoledoled a pepapak a pelalakaw o di na pendola
na piyakasisingay rekano.
24-28 Apiya antawaa i makaseko sa miyatay a lawas o isa sangkai a pemakatalondog a

manga ayam na kedalem a hadas taman sa perimon: so ayam a aden a manga kanoko
niyan a kena a ba tarotop a kaoopak iyan, ago so di pepenepasepa sii ko kapekan iyan ago
so ayam a ipelalakaw niyan so pat a palad a ai niyan a madakel i kanoko. Apiya antawaa
i makaawid sa isa a miyatay a lawas iran na kepipian iyan so manga nditaren iyan na
kedalem a hadas taman ko perimon.
29-30 Sii ko manga baraniyawa a pepamanola ko lopa na karam rekano so riya, so silep,
so palaas, so teki, so tagetek, so tabalik, so parangan ago so tabegang.
31 So langon angkai a pemanola ko lopa na karam rekano. Apiya antawaa i makaseko on
o di na so miyatay a lawas ai na kedalem a hadas taman ko perimon.
32 Apiya antonaa a kasangkapan a keologan ko miyatay a lawas ai na keresikan ai apiya
anda ko pimbaalan a kayo, o di na dinis, o di na kobal, o di na kakayon. Ketago ini ko ig
na maresik ai taman ko perimon. Oriyan iyan na kelompiyo bo.
33 O maolog so isa kiran sii ko koden a bote na keresikan so langon a matatago on, na
keropet iyo so koden.
34 Apiya antonaa a pangenengken a kekan a ketekan sa ig a poon sangkoto a koden na
keresikan, na apiya antonaa a panginginomen a ndodon na keresikan.
35 Apiya antonaa i keologan ko bangkay o isa sangkai a manga pemanola na keresikan;
so datola o di na pogon na disomala a nggebaan. Kiyaresikan ai na bilangen iyo a kena a
ba soti,
36 Ogaid na so bowalan o di na paridi a pekowaan sa ig na malolompiyo den, ogaid na
apiya antawaa i makaseko ko miyatay a lawas angkai a manga ayam na kedalem a hadas.
37 Masosoti den mambo so apiya antonaa a manga oniin a pemolaan a keologan sangkai
a bangkay.
38 Ogaid na o raramesen a ig so oniin ago kaologan ai sa bangkay na maresik rekano.
39 “O matay so ayam a kepakay a makan iyo na apiya antawaa i makaseko ko bangkay

niyan na kedalem a hadas taman ko perimon.
40 So ken ko sapo iyan o di na so makaawid ko bangkay niyan na kepipian iyan so manga
nditaren iyan na kedalem a hadas taman ko perimon.
41 “Oman i paoledoled a pemanola ko lopa na piyakasisingay; di ini kekan.

42 Mirarakes sii so apiya antonaa a ipendola niyan a tiyan iyan, o di na ipelalakaw niyan
so pat a ai niyan o di na madakel a manga ai; piyakasisingay ini langon.
43 Di niyo peresiki a ginawa niyo a nggolalan sangkai a manga kaaden ka ikebaloy niyo a
kena a ba soti,
44 Ka saken so Allah a Tohan iyo; senggain iyo a ginawa niyo a rek o Allah na sosoti
kano ka kagiya saken na soti. Di niyo peresiki a ginawa niyo a nggolalan ko apiya
antonaa a kaaden a pemanola ko lopa
45 Ka saken so Allah a miyakaliyo rekano sa inged a Misir kaan ako mabaloy a Tohan
iyo. Kagiya ka maoto na disomala a sosoti kano, ka saken na soti.
46 “Giyai i manga kokoman mipantag ko manga ayam, so manga papanok ago so langon
a baraniyawa a dii keokaog ko manga ig ago so langon a kaaden a pemanola ko lopa
47 Kaan iyo makilala so mbidaan o karam ago so halal sii ko manga baraniyawa a kekan
ago so di kekan."
LIBITIKOS 12
So Kasotiya ko gopen Mimbawata

2 “Teroa ngka ko manga Israil a: So babay a miyaogat ago mimbawata sa mama na
madadalem a hadas ko soled o pito gawii ndatar bo o kadadalem iyan a hadas sii ko masa
a kapekekail iyan oman olan.
3 Sii ko ikawalo gawii na ketori so bago a mama.
4 Oriyan iyan na pekanayaw pen so babay sa telo polo ago telo gawii na go bo masoti ko
keperogoi ron. Di sekanian pekaseko sa apiya antonaa a nganin a soti aya pen o ba
makasoled ko soti a darpa taman sa di mapopos so manga gawii a di niyan dii kasoti.
5 “Ogaid na o mbawata sekaniyan sa babay na madadalem a hadas ko soled o sapolo ago

pat gawii a datar o katatago on o basa. Na pekanayaw sekaniyan pen sa nem polo ago
nem gawii taman ko kakesoti niyan ko keperogoi ron.
6 “Amay ka mapopos so manga gawii a di niyan dii kasoti pantag ko bago a mama o di na
bago a raga na pekawit sekaniyan sa nati a bilibili a saragon a idad iyan sii ko imam ko
gimowa o Barombarong a dii Telabokan a pekorbanen a isepaat a totongen, ago satiman a
pagapak o di na marapatik a pekorbanen sabap ko dosa.
7 So imam i pekasapaat on ko Allah a ipenggolalan iyan so kakepapasa ko dosa o babay,
na kesoti sekaniyan den ko kiyakaili ron. Giyai i manga taritib mipantag ko babay a dii
mbawata sa bago a mama o di na bago a raga.
8 O di niyan kegaga so bilibili na pekaawid sekaniyan sa dowa a marapatik o di na dowa

a pagapak. So isa on na pekorbanen a isepaat a totongen, na so isa on na pekorbanen
sabap ko dosa. Sii sangkai a okit na ipenggolalan o imam so kakepapasa ko dosa o
babay, na kesoti sekaniyan."
LIBITIKOS 13
Manga Taritib mipantag ko manga Sakit ko Kobal
Pitero o Allah ki Mosa ago si Aron a

2 “Amay ka so taw na aden a ibol iyan o di na pese o di na panaw a kepakay a kabisaan
na kewit sekaniyan ki Aron a imam o di na isa ko manga wata iyan a manga imam.
3 Keiksamin o imam so ibol ko kobal iyan, na o miyakapoti so baraibon on ago datar o ba
madalem a di so kobal ko melilibeta on na bisa ini a paniyakit ko kobal, na mapetero o
imam a maresik angkoto a taw.
4 “Ogaid na o so ibol na mapoti ogaid na kena a ba madalem a di so kobal ago so

baraibon on na kena a ba miyakapoti na tegoon o imam angkoto a taw sii ko misisibay a
darpa ko makapito gawii.
5 Sii ko ikapito gawii na keilay ini peroman o imam, na o gedageda iyan on na da maalin
so ibol ago da mipalat ko kobal iyan na isibay peroman o imam sa makapito gawii.
6 Sii ko ikapito gawii na pagiksaminen ai peroman o imam, na o komilas so ibol ago da
mipalat ko kobal iyan na mapetero o imam a lompiyo sekaniyan. Matag baden ai ibol.
Na kepipian o taw so nditaren iyan na kelompiyo sekaniyan.
7 Ogaid na o minipalat so ibol ko kobal iyan oriyan o kiyapakiilain iyan on ko imam ago
so kiyateroa on o imam a miyalompiyo sekaniyan den na disomala a mapekiilay niyan
peroman ko imam.
8 Keilay peroman o imam na o minipalat so ibol na mapetero o imam a maresik angkoto a
taw, ka kagiya bisa ini a paniyakit ko kobal.
9 “Apiya antawaa i aden a bisa niyan a paniyakit ko kobal na kewit ko imam.

10 Keiksamin sekaniyan o imam, na o aden a lebag iyan a mapoti sii ko kobal iyan a aden
a romiriga on a sapo, ago o miyakapoti so baraibon on
11 Na miyatey den a paniyakit ko kobal, na mapetero o imam a maresik sekaniyan. Di
den kailangan a katagoa on ko misisibay a darpa kaan maiksamin peroman ka kagiya
marayag den so karesik iyan.
12 O minipalat so paniyakit ago lomiyangkap ko kobal iyan ipoon sa olo na taman sa ai
niyan sii ko kapekeilaya on o imam
13 Na keiksamin sekaniyan o imam. Na o mailay niyan a lomiyangkap so paniyakit ko
langon o lawas iyan na mapetero o imam a lompiyo angkoto a taw ka kagiya langon
miyakapoti so lawas iyan.
14 Ogaid na amay ka aden a romiriga a sapo a keilay ko lawas iyan na kena a ba lompiyo
sekaniyan.
15 So den so kailaya o imam ko romiriga a sapo na mapetero iyan a kena a ba lompiyo
angkoto a taw, ka so romiriga a sapo na maresik; so paniyakit iyan na kabibisaan.
16 Inonta bo na o makapoti so romiriga a sapo na pekasong sekaniyan ko imam.
17 Keiksamin sekaniyan peroman o imam na o miyakapoti den na mapetero o imam a
miyalompiyo sekaniyan den.
18 “Amay ka so taw na aden a pese ko kobal iyan ago miyapiya,

19 Ago so kabebetadan ko pese na pimbowatan a lebag a mapoti o di na malo marigariga
na mapekiilay niyan ko imam.
20 Keiksamin ai o imam na o mailay niyan a madalem a di so kobal ago miyakapoti so
baraibon on na mapetero o imam a maresik angkoto a taw. Bisa ini a paniyakit ko kobal a
lomitaw ko kaatoan o pese.
21 Ogaid na o mailay o imam a da makapoti so baraibon on ago da tantel ko sapo ago
komilas ai na ketago sekaniyan o imam ko misisibay a darpa ko makapito gawii.
22 Na o mipalat ai ko kobal sii sangkoto a manga gawii na mapetero o imam a maresik
angkoto a taw, ka kabibisaan sekaniyan.
23 Ogaid na o da ini maalin ago da mipalat na matag ai poneng o pese, na mapetero o
imam a lompiyo angkoto a taw.
24 “O aden a taw a miyalowis sa lawas ago mariga mapoti o di na mapoti so miyaredak a

kobal on
25 Na keiksamin ai o imam. O miyakapoti so baraibon on ago kena a ba sii bo ko kobal
ka taman ko sapo sii ko kapekeilaya on na bisa ini a paniyakit a gomimaw ko lowis, na
mapetero o imam a maresik angkoto a taw.
26 Ogaid na o mailay o imam a da makapoti so baraibon on ago da tantel so lowis ko
sapo ago komilas den ai na kisibay sekaniyan o imam ko makapito gawii.
27 Sii ko ikapito gawii na keiksamin sekaniyan peroman o imam, na o mailay niyan a
minipalat ko ped a kobal iyan na mapetero o imam a maresik angkoto a taw ka bisa ini a
paniyakit ko kobal.
28 Ogaid na o da ini maalin ago da mipalat ko ped a kobal ka baden komilas na matag ai
poneng o lowis, na mapetero o imam a lompiyo angkoto a taw.
29 “O so mama o di na babay na aden a ibol iyan sa olo o di na sa baka

30 Na keiksamin ai o imam na o mailay niyan a madalem a di so kobal ago so manga bok
iyan ko ibol na miyakabinaning ago miyakanipis na mapetero o imam a maresik angkoto
a taw, na bodok ai a bisa a paniyakit sa olo o di na baka.
31 Ogaid na o mailay o imam a so bodok na sii bo ko kobal, ogaid na da pen makapiya so
langon o manga bok on na ketago sekaniyan o imam ko misisibay a darpa ko makapito
gawii.
32 Sii ko ikapito gawii na keiksamin peroman o imam so bodok, na o da mipalat ago da
makabinaning so bok on ago kena a ba madalem a di so kobal
33 Na kekikisan o taw so olo niyan a liyo ron so manga bok ko bodok na tetapen
sekaniyan o imam ko misisibay a darpa sa makapito pen gawii.
34 Sii ko ikapito gawii na keiksamin peroman o imam so bodok na o da mipalat ko kobal
ago kena a ba madalem a di so kobal na mapetero o imam a lompiyo angkoto a taw.
Kepipian iyan so manga nditaren iyan, na kelompiyo sekaniyan.
35 Ogaid na o minipalat so bodok ko kobal oriyan o kiyateroa on o imam a lompiyo
sekaniyan
36 Na keiksamin sekaniyan peroman o imam, na o mailay niyan a minipalat so bodok ko
kobal na di den kailangan a nggiloba sekaniyan sa binaning a bok, ka marayag den so
karesik iyan.
37 Ogaid na o mailay o imam a da mipalat so bodok ago miyamangeto on den so maitem
a bok na miyapiya den ai na miyalompiyo den angkoto a taw, na mapetero o imam a
lompiyo sekaniyan.
38 “Amay ka so mama o di na so babay na panaon so kobal iyan

39 Na keiksamin sekaniyan o imam. Na o mailay niyan a so panaw ron na malo mapoti
na matag ai pamoti a mito ko kobal, na lompiyo angkoto a taw.
40 “O aden a mama a kiyaropawan na lompiyo sekaniyan.

41 O maopaw sa beneng na lompiyo sekaniyan.
42 Ogaid na o aden a malo romiriga a ibol ko olo niyan a kiyaropawan o di na sii ko
beneng iyan na bisa ini a paniyakit.
43 Keiksamin sekaniyan o imam na o libagan so ibol a malo romiriga a datar sa paras o
bisa a paniyakit ko kobal
44 Na kabibisaan so mama ago maresik sekaniyan. Na mapetero o imam a kena a ba
lompiyo angkoto a taw sabap ko ibol ko olo niyan.
45 “So taw a sesakit na disomala a makapenditar sa miyanareditan ago di niyan ketanor

so bok iyan, ago kesepengan iyan so kababaan o paras iyan ago mipelalis iyan sa matanog
a 'Maresik!' Maresik!'
46 Tatap den a karesik iyan sii ko langon o masa a kasesakit iyan. Pekakaden sekaniyan a
matatawantawan sii ko liyo o kampo.
Manga Taritib mipantag ko Olabong
47 “Amay ka so nditaren na aden a olabong on apiya anda ko nditaren a dilana o di na

sotra,
48 O di na sii ko apiya antonaa a pimbaalan a dilana, o di na sotra, o di na panit
49 Na o so olabong ko dinis o di na panit na miyakagadong o di na rominiga na pekipalat
ai a olabong na disomala a mapekiilay ko imam.
50 Keiksamin ai o imam na kisibay niyan sa darpa so inolabong a nganin ko makapito
gawii.
51 Sii ko ikapito gawii na keiksamin ai peroman o imam, na o minipalat so olabong ko
nditaren, o di na dinis, o di na sii ko panit na pekabinasa ini a olabong; maresik angkoto a
nganin.
52 Na ketotong o imam so nditaren a dilana, o di na sotra, o di na apiya antonaa a dinis, o
di na panit a inolabong sa datar ai, ka pekabinasa ini, na disomala a totongen sa tarotop.
53 “Ogaid na o mailay o imam a da mipalat so olabong ko nditaren o di na sii ko panit

54 Na pekipipian iyan angkoto a nganin san na pekisibay niyan ko makapito pen gawii.
55 Oriyan o kiyapipii ron na keilay peroman o imam, na o da maalin so paras o olabong
apiya pen da ini mipalat na maresik pen ai. Ketotong ai sa tarotop apiya aya bo inolabong
na so sabala on o di na saklid.
56 Ogaid na o mailay o imam a komilas so olabong oriyan o kiyapipii ron na keabat iyan
on so inolabong ko nditaren, o di na dinis, o di na panit.
57 Ogaid na o lometaw peroman so olabong na pepalat pen ai na disomala a totongen
angkoto a nganin.
58 Ogaid apiya pen o miyada on so olabong oriyan o kiyapipii ron na kepipian ai
peroman, na kelompiyo den.
59 “Giyai i taritib mipantag ko inolabong a dilana o di na sotra a nditaren, o di na so apiya

antonaa a pimbaalan a dilana, o di na sotra, o di na panit kaan matero o imam a lompiyo o
di na maresik."
LIBITIKOS 14
So Kasotiya ko Taw a Miyapiya ko Bisa a Paniyakit

2 “Giyai i manga taritib ko taw a miyapiya ko bisa a paniyakit sii ko gawii a kakesoti
niyan. Kewit sekaniyan ko imam
3 Na mapekaonot sekaniyan o imam ko liyo o kampo na ron iyan keiksamin. O miyapiya
den ko bisa a paniyakit iyan
4 Na pekikowa o imam so dowa a oyagoyag a papanok a halal, ago satebi a kayo a sidro,
mariga a tanor ago sapak a hisop.
5 Na pekisombali o imam so isa ko papanok ko liyawaw o koden a bote a aden a ig on a
poon ko bowalan.
6 Oriyan iyan na kekowa niyan so oyagoyag a papanok, ago so satebi a kayo a sidro, so
mariga a tanor ago so sapak a hisop na kisombo niyan ai langon ko rogo o papanok a
siyombali sii ko liyawaw o ig.
7 Na mipamesipesik iyan so rogo sa makapito ko taw a pelompiyon na giyoto a mapetero
o imam a miyalompiyo sekaniyan den. Mandiyadi na kebokaan iyan ko pangomaan so
oyagoyag a papanok.
8 “So taw a pelompiyon na kepipian iyan so nditaren iyan, ago makapegopaw, ago
makapepeigo sa ig kaan masoti. Oriyan iyan na pekasoled sekaniyan ko kampo ogaid na
pekakaden pasin sa makapito gawii ko liyo o barombarong iyan.
9 Sii ko ikapito gawii na kekikis iyan on peroman so langon o bok ko olo niyan taman ko
sompa iyan, so manga kiray niyan ago so ped a manga baraibon iyan. Kepipian iyan so
nditaren iyan ago makapepeigo, na kesoti sekaniyan.
10 “Sii ko ikawalo gawii na pekaawid sekaniyan sa dowa a mama a nati a bilibili ago isa
a babay a bilibili a saragon a idad iyan a langon ai da a daway niyan a rakes o isepaat a
pangenengken a telo ka kilo a lebi a mapiya a arina a sasaogan sa lana ago isa ka katiya a
lana a olibi.
11 Giyai langon a rakes o taw a pelompiyon na mapekapangadap o imam ko Allah sii ko
gimowa o Barombarong a dii Telabokan
12 Na kekowa o imam so isa ko mama a bilibili na kisapaat iyan ai a pekorbanen sabap
ko kiyataksil a kirakes on so isa ka katiya a lana, na kepalad iyan ai ko Allah ko kibayaon
iyan on ko hadapan iyan.
13 Kesombali o imam so bilibili ko soti a darpa a ron pesombalia so dii korbanen sabap
ko dosa ago so dii korbanen a ipesepaat a petotongen. Mapenggolaola niyan ai ka kagiya
so dii korbanen sabap ko kiyataksil, a datar o dii korbanen sabap ko dosa, na rek o imam,
na lebi ini a soti.
14 Na pekakowa so imam ko rogo o pikorban sabap ko kiiyataksil na kisalapot iyan ko
kababaan o kawanan a tangila o taw a pelompiyon, ago so kawanan a ama a lima niyan,
ago sii ko kawanan a ama a ai niyan.
15 Pekakowa pen so imam sa lana ko katiya na keodod iyan ko palad a diwang a lima
niyan
16 Na kisombo niyan so kawanan a tindoro iyan sii ko lana ko palad iyan na
mipemesipesik iyan ai sa makapito ko hadapan o Allah.
17 Oriyan iyan na kisalapot iyan so ped ko lamba a lana ko palad iyan sii ko kababaan o
kawanan a tangila o taw a pelompiyon, ago sii ko kawanan a ama a lima niyan, ago sii ko
kawanan a ama a ai niyan sii ko liyawaw o rogo o pikorban sabap ko kiyataksil.
18 So miyalamba a lana sa lima o imam na ketago iyan ko olo o pelompiyon a taw. Giyai
i kipenggolalanen iyan ko kakepapasa ko dosa o taw sii ko hadapan o Allah.
19 Oriyan iyan na mapekorban o imam so isepaat sabap ko dosa na ipenggolalan iyan pen
so kakepapasa ko dosa o taw a pelompiyon ko karesik iyan. Mapasad oto na kesombali
iyan so isepaat a totongen
20 Na kisapaat iyan sii ko aparan a rakes o isepaat a pangenengken. Sii sangkai a okit na
ipenggolalan o imam so kakepapasa ko dosa para ko taw na kesoti sekaniyan den.
21 “Ogaid na o miskin so taw a pelompiyon a di niyan ai kegaga na pekakowa sekaniyan

sa satiman bo a mama a bilibili a pekorbanen sabap ko kiyataksil a peladen ko Allah ko
kibayaon on sii rekaniyan kaan mapapas so dosa o taw, a rakes o isa ka kilo a lebi a
mapiya a arina a sasaogan sa lana a olibi a isepaat a pangenengken, ago isa ka katiya a
lana a olibi,
22 Ago dowa a marapatik o di na dowa a pagapak a saden sa kegaga niyan. So isa on na
pekorbanen sabap ko dosa ago so isa on na pekorbanen a isepaat a totongen.
23 Sii ko ikawalo gawii na kewit iyan ai langon ko imam para ko kapelompiyowa
rekaniyan sii ko gimowa o Barombarong a dii Telabokan roo ko hadapan o Allah.
24-25 Kesombali o imam so bilibili a pekorbanen sabap ko kiyataksil na peladen iyan ai
ko Allah, a rakes o isa ka katiya a lana, ko kibayaon iyan on ko hadapan iyan. Na
pekakowa sekaniyan ko rogo o bilibili na kisalapot iyan ko kababaan o kawanan a tangila
o taw a pelompiyon, ago so kawanan a ama a lima niyan, ago sii ko kawanan a ama a ai
niyan.
26 Na keodod o imam so ped ko lana sii sa diwang a palad iyan
27 Na kisombo niyan on a kawanan a tindoro iyan ago mipemesipesik iyan sa makapito
sii ko hadapan o Allah.
28 Kisalapot iyan so ped ko lana sa lima niyan sii ko kababaan o kawanan a tangila o taw,
ago sii ko kawanan a ama a lima niyan, ago sii ko kawanan a ama a ai niyan sii ko manga
piyanalapotan iyan ko rogo o pikorban sabap ko kiyataksil.
29 Na so miyalamba ko lana sa palad iyan na ketago iyan ko olo o taw a pelompiyon.
Giyai i kipenggolalanen iyan ko kakepapasa ko dosa o taw sii ko hadapan o Allah.
30 “Oriyan iyan na mapekorban o imam so dowa a marapatik o di na so dowa a pagapak a

saden sa kegaga o taw.
31 So isa on na pekorbanen sabap ko dosa, na so isa on na pekorbanen a isepaat a
totongen a rakes o isepaat a pangenengken. Sii sangkai a okit na ipenggolalan o imam so
kakepapasa ko dosa o taw a pelompiyon sii ko hadapan o Allah.
32 Giyai i manga taritib mipantag ko apiya antawaa a aden a bisa niyan a paniyakit ko
kobal a di pekagaga ko ipapaliyogat a isepaat para ko kakesoti niyan."
Olabong sii ko manga Walay

34 “Amay ka makaoma kano sa inged a Kanaan a imbegay aken rekano a matangan iyo
na o tagoi aken sa pekipalat a olabong so isa a walay sangkoto a inged
35 Na so kirek ko walay na pekasong ko imam na mapetero iyan on a 'Miyakainengka ako
sa datar o ba olabong sii ko walay aken.'
36 Kisogo o imam a kowaan sa tago so walay sa di niyan on pen kapekasoled a pagilain
iyan so olabong, ka o di ini mapenggolaola na so langon a matatago ko walay na
mapetero a maresik. Mapasad oto na pekasoled so imam ko walay
37 Na keiksamin iyan so olabong ko manga keleb. O aden a manga daket on a
magadogadong o di na marigariga a aya kapegilaya on na madalem a di so liyawaw o
keleb
38 Na pekaliyo so imam sangkoto a walay na pelekeban iyan ko makapito gawii.
39 Sii ko ikapito gawii na pekakasoy ron so imam ka pagilain iyan peroman. O minipalat
so olabong ko manga keleb o walay
40 Na kisogo iyan a kowaan on so manga ator a kiyaogalinan sa olabong ago ipelebad ko
kena a ba soti a darpa ko liyo o siti.
41 Na pakipangikisan iyan so intiro a soled o walay ago pekitabotod iyan so miyakikis on
ko kena a ba soti a darpa ko liyo o siti.
42 Oriyan iyan na pekakowa siran sa ped a manga ator a misambi ko manga ator a
miyakowa on, na pekakowa siran pen sa bago a sominto a misalapot ko manga keleb.
43 O gemaw peroman so olabong sii ko walay oriyan o kiyapangowaa on ko manga ator

ago so kiyapangikisi ko manga keleb ago so kiyapanalapoti ron pen sa sominto
44 Na kesongowan ago keiksamin peroman o imam. O mailay niyan a minipalat so
olabong na pekabinasa ini a olabong, na maresik so walay.
45 Disomala a nggebaan -- a so manga ator on, so manga tarakayo, ago so langon a
sominto on na kewit ai ko liyo o siti sii ko kena a ba soti a darpa.
46 Apiya antawaa i makasoled ko walay ko kalelekebi ron na kedalem a hadas taman ko
perimon.
47 Apiya antawaa i makatorog o di na koman sii ko walay na kepipian iyan so manga
nditaren iyan.
48 “Ogaid na o somoled on so imam ago mailay niyan a da makagemaw peroman so

olabong oriyan o kiyapanalapoti ron sa sominto na mapetero iyan a miyalompiyo angkoto
a walay, ka miyada den so olabong.
49 An masoti so walay na pekakowa so imam sa dowa a papanok, satebi a kayo a sidro,
mariga a tanor ago sapak a hisop.
50 Kesombali iyan so isa ko papanok ko liyawaw o koden a bote a aden a ig on a poon ko
bowalan.
51 Oriyan iyan na kekowa niyan so kayo a sidro, so sapak a hisop, so mariga a tanor, ago
so oyagoyag a papanok na kisombo niyan ko rogo o siyombali a papanok ago so ig, na
mipemesipesik iyan ko walay sa makapito.
52 Sii sangkai a okit na kesoti niyan so walay a nggolalan ko rogo o papanok, so ig, so
oyagoyag a papanok, so kayo a sidro, so hisop ago so mariga a tanor.
53 Oriyan iyan na kebokaan iyan so oyagoyag a papanok ko liyo o siti roo ko pangomaan.
Giyanan i kipenggolalanen iyan ko kasotiya ko walay, na kesoti den ai.
54-57 “Giyai i manga taritib mipantag ko langon a kabibisaan a paniyakit ko kobal, a so

ibol, so lebag, so pese, ago so panaw, ago mipantag ko olabong sii ko nditaren o di na sii
ko walay, kaan mapariksa o ba maresik o di na malolompiyo angkai a manga nganin."
LIBITIKOS 15
Manga Taritib mipantag ko Maresik a Petoga a poon ko Lawas
Pitero o Allah ki Mosa ago si Aron a

2 “Teroa ngka ko manga Israil a: Apiya antawaa i mama a aden a petoga a poon ko
sangoran iyan na madadalem a hadas,
3 Apiya mitataros a kapegondas iyan ko lawas iyan o di na miyaparin, na maresik angkoto
a mama.
4 “Apiya antonaa i keigaan o di na keontodan iyan na keresikan mambo,

5-7 Na apiya antawaa i makaseko ko inigaan o mama a pegondas on so maresik, o di na
makaontod ko kiyaontodan iyan, o di na makaseko sangkoto a mama na kepipian iyan so
nditaren iyan ago makapepeigo, ogaid na madadalem den a hadas taman ko perimon.
8 “Amay ka so taw a lompiyo na kadodaan o aden a pegondas on na kepipian iyan so

nditaren iyan ago makapepeigo, ogaid na madadalem den a hadas taman ko perimon.
9 “Apiya antonaa a siya, o di na ampido, o di na ontoda ko karo a kiyaontodan o mama a

aden a pegondas on a maresik na keresikan,
10 Na apiya antawaa i makaseko ko apiya antonaa a kiyaontodan angkoto a mama na
madadalem a hadas taman ko periman, na apiya antawaa i makaawid on na kepipian iyan
so nditaren iyan ago makapepeigo, ogaid na madadalem den a hadas taman ko perimon.
11 “Amay ka aden a taw a maseko o mama a aden a pegondas on a da niyan pen kaonabi
a manga lima niyan sa ig na kepipian o taw so nditaren iyan ago makapepeigo, na
madadalem sekaniyan a hadas taman ko perimon.
12 “Apiya antonaa a koden a bote a maseko o aden a pegondas on na keropet, na so

kasangkapan a kayo na keonaban sa ig.
13 “Amay ka mada ko mama so pegondas on na pekanayaw sekaniyan sa pito gawii, na

kepipian iyan so nditaren iyan ago makapepeigo ko ig a poon ko bowalan, na kelompiyo
sekaniyan.
14 Sii ko ikawalo gawii na pekakowa sekaniyan sa dowa a marapatik o di na dowa a
pagapak na pekasong ko hadapan o Allah ko gimowa o Barombarong a dii Telabokan, na
kibegay niyan ai ko imam.
15 Pekorbanen o imam so isa on a isepaat sabap ko dosa, na so isa on na pekorbanen iyan
a isepaat a totongen. Sii sangkai a okit na ipenggolalan o imam so kakepapasa ko dosa o
mama ko hadapan o Allah pantag ko sakit iyan a petoga.
16 “Amay ka so mama na liniyowan a biga na makapepeigo sekaniyan, ogaid na

madadalem den a hadas taman ko perimon.
17 Apiya antonaa a pimbaalan a dinis o di na panit a ketekan ko biga na keonaban, na
maresik den ai taman ko perimon.
18 Igira a romimbang so mama sa babay ago liniyowan a biga na palaya siran
makapepeigo sa ig, ogaid na madadalem siran den a hadas taman ko perimon.
19 “Igira a miyakaoma ko babay so kail na madadalem sekaniyan a hadas ko soled o pito

gawii. Apiya antawaa i makaseko rekaniyan na madadalem den a hadas taman ko
perimon.
20 Apiya antonaa i keigaan iyan o di na keontodan iyan ko kakakail iyan na maresik.
21-23 Na o aden a makaseko ko kiyaigaan iyan o di na kiyaontodan iyan na kepipian iyan
so nditaren iyan ago makapepeigo, ogaid na madadalem sekaniyan den a hadas taman ko
perimon.
24 O romimbang so mama sa babay ko kapekekail iyan na keresikan sekaniyan o karesik
o babay, na madadalem sekaniyan a hadas ko makapito gawii, na apiya antonaa i keigaan
iyan na maresik mambo.
25 “O aden a babay a perogoan ko mamakapira gawii sii ko masa a liyo ron ko

kapepekaoma on o kail, o di na o mitataros den so kaperogoi ron oriyan o kiyapakaoma
on o kail na madadalem sekaniyan a hadas taman sa aden a pegondas on a rogo, a datar o
manga gawii a kiyapakaoma on o kail.
26 Apiya antonaa a keigaan o di na keontodan iyan sangkai a manga gawii na maresik, a
datar o masa a kapekekail iyan.
27 Apiya antawaa i makaseko sangkai a manga nganin na kepipian iyan so nditaren iyan
ago makapepeigo, ogaid na madadalem den a hadas taman ko perimon.
28 “Amay ka mada rekaniyan so rogo na pekanayaw sekaniyan sa pito gawii na go bo
kelompiyo.
29 Sii ko ikawalo gawii na pekakowa sekaniyan sa dowa a marapatik o di na dowa a
pagapak na kewit iyan ai ko imam roo ko gimowa o Barombarong a dii Telabokan.
30 Pekorbanen o imam so isa on a isepaat sabap ko dosa, na so isa on na pekorbanen iyan
a isepaat a totongen. Sii sangkai a okit na ipenggolalan iyan so kakepapasa ko dosa o
babay ko hadapan o Allah pantag ko kiyarogoi ron.
31 “Sii sangkai a okit na pekisibay niyo so manga Israil ko manga nganin a ikedalem iran
a hadas an siran di pematay ko karesik iran sii ko kaperesiki ran ko soti a kakadenan ko a
sisii kiran."
32 Giyai i manga taritib mipantag ko mama a aden a maresik a petoga ko sangoran iyan, o
di na so mama a madadalem a hadas sabap sa liniyowan a biga,
33 Ago pantag ko babay ko kadadalem iyan a kail, ago so mama o di na babay a aden a
pegondas on, ago mipantag ko mama a romimbang ko babay a madadalem a hadas.
LIBITIKOS 16
So Gawii a Kapepasa ko Dosa
Oriyan o kiyapatay o dowa kataw a manga wata i Aron a miyamatay isako somapaat siran
ko Allah sa di sak a apoy
2 Na pitero o Allah ki Mosa a "Teroa ngka ko pagari ngka a si Aron a sii bo ko matetendo
a manga gawii i kapekasoled iyan ko Lebi a Soti a Darpa sii ko likod o kortina a
irerending ko lekeb o Kaban sa Kapasadan a ron pekepapas so manga dosa an sekaniyan
di petay, ka pepayag ako ko liyawaw o lekeb o Kaban a nggolalan ko gabon.
3 “Giyai i ipapaliyogat ki Aron ko kapekasoled iyan ko Lebi a Soti a Darpa: Pekaawid

sekaniyan sa kangodaan a mama a sapi a pekorbanen sabap ko dosa, ago satiman a mama
a bilibili a pekorbanen a isepaat a totongen.
4 Kesolot iyan so manga nditaren o kaiimami -- so sotra a kimon a rakes o karsinsiliyo a
matatampar ko lawas iyan, so sambitan ko kasadan iyan, ago so totob. Makapepeigo
sekaniyan daan na go niyan bo masolot.
5 Na pekakowa sekaniyan sii ko manga Israil sa dowa timan a mandangan a pekorbanen
sabap ko dosa ago satiman a mama a bilibili a pekorbanen a isepaat a totongen.
6 “Paganay na mapekorban i Aron so mama a sapi a isepaat sabap ko dosa kaan mapapas
so manga dosa niyan ago so manga dosa o pamiliya niyan.
7 Oriyan iyan na kewit iyan so dowa timan a mandangan sii ko gimowa o Barombarong
ka ipagadap iyan roo ko Allah.
8 Na keripa i Aron o anda ko dowa a mandangan i isepaat ko Allah ago so mbogaon on
ko disirto sii ko saitan a si Asasil.
9 Kekowa i Aron so mandangan a miyaripa a isepaat ko Allah na pekorbanen iyan sabap
ko dosa.
10 Ogaid na so mandangan a miyaripa a mbogaon na ipagadap a oyagoyag sii ko Allah
kaan maosar ko kapepasa ko dosa o manga taw a nggolalan ko kapembogawa on ko
disirto sii ki Asasil.
11 “Amay ka masombali i Aron so mama a sapi a pekorbanen sabap ko dosa kaan

mapapas so dosa niyan ago so dosa o pamiliya niyan
12 Na pekakowa sekaniyan sa petotongan sa doka a mapepeno a waga a poon ko aparan a
matatago ko hadapan o Allah a rakes o dowa gamak a pitepong a mamot a doka na
keawidan iyan ai sii ko Lebi a Soti a Darpa.
13 Roo ko hadapan o Allah na ketago iyan on so doka sii ko manga waga kaan so bel iyan
na mikolob ko lekeb o Kaban sa Kapasadan kaan sekaniyan di petay.
14 Na pekakowa sekaniyan ko rogo o sapi na mipemesipesik iyan a kemer ko panempang
o lekeb, na so ped on peman na mipemesipesik iyan sa makapito sii ko hadapan o Kaban
sa Kapasadan.
15 “Oriyan iyan na mapekorban iyan so mandangan a isepaat sabap ko dosa para ko

manga taw na keawidan iyan so rogo o mandangan sii ko Lebi a Soti a Darpa, na
mipemesipesik iyan sii ko lekeb o Kaban sa Kapasadan ago sii ko hadapan iyan a datar o
inikidia niyan ko rogo o sapi.
16 Sii sangkai a okit na ipenggolalan iyan so kapelompiyowa ko Lebi a Soti a Darpa
sabap ko karesik o manga Israil ago so kapegongkir iran sii ko di iran dii kandosa.
Mapenggolaola niyan ai mambo ko Barombarong a dii Telabokan a matatago ko lembak
o kena a ba masosoti a kampo iran.
17 Da den a ped a taw a ba pekasoled ko Barombarong ipoon ko kasoled on i Aron sa
kipenggolalanen iyan ko kapelompiyowi ko Lebi a Soti a Darpa taman ko kapekaliyo
niyan oriyan o kininggolalanen iyan ko kakepapas o dosa para ko ginawa niyan ago so
pamiliya niyan, ago para ko langon o manga Israil.
18 “Mapasad oto na pekasong sekaniyan ko aparan a petotongan sa ipesepaat a matatago

ko hadapan o Allah ka pelompiyon iyan ai. Pekakowa sekaniyan ko rogo o sapi ago so
rogo o mandangan na kisalapot iyan ko manga pangapanga o aparan.
19 Na kisombo niyan a kemer iyan ko rogo na mipemesipesik iyan ko aparan sa
makapito. Nggolalan sii na kelompiyo niyan so aparan ko manga dosa o manga Israil ago
kisenggay niyan a soti.
So Kambing a Kebogaw
20 Amay ka mapasad i Aron so di niyan dii kinggolalanen ko kapelompiyowi ko Lebi a

Soti a Darpa, so Barombarong a dii Telabokan, ago so aparan na kekowa niyan so
oyagoyag a mandangan.
21 Na kidapenet iyan so dowa a lima niyan ko olo o mandangan ago penaroon iyan on so
langon a kamarataan ago kapegongkir o manga Israil sii ko langon o di iran dii kandosa.
Sii sangkai a okit na kibetad iyan ai langon sii ko olo o mandangan, na kebogaw niyan so
mandangan ko disirto a pekikibir ko mama a minitoro a penggolaola sii.
22 So den so mandangan i pekaawid ko langon o kadostaan o manga taw ka pagowiten
iyan ko matatawantawan a darpa, na kebogaw o mama so mandangan roo ko disirto.
23 “Mapasad oto na pekasoled si Aron ko Barombarong ka pagendaan iyan so manga

nditaren iyan a sotra a siyolot iyan sa di niyan pen kasoled ko Lebi a Soti a Darpa, na
kibegak iyan ai roo.
24 Makapepeigo sekaniyan roo ko soti a darpa na go niyan bo masolot so kalilid a
nditaren iyan. Na pekaliyo sekaniyan ago pekorbanen iyan so isepaat a totongen para sa
ginawa niyan, ago so isepaat a totongen para ko manga taw a aya niyan kipenggolalanen
ko kakepapasa ko dosa niyan ago so dosa o manga taw.
25 Ketotong iyan pen ko aparan so langon o sibo o ayam a pikorban sabap ko dosa.
26 “So peman so mama a miyogaw ko mandangan a piyakaawa na kepipian iyan so

nditaren iyan ago makapepeigo na go bo pekasoled ko kampo.
27 So mama a sapi ago so mandangan a piyangorban sabap ko dosa a inisoled so rogo
iran ko Lebi a Soti a Darpa a inilompiyo ron na kewit ko liyo o kampo na roo ketotong so
kobal iran, so sapo ago so tinai iran.
28 So mama a tomiyotong on na kepipian iyan so nditaren iyan ago makapepeigo na go
bo pekasoled ko kampo.
So Kaselaselaa ko Gawii a Kapepasa ko manga Dosa
29 “Giyai na da a kaposan iyan a taritib a ketoman iyo: Sii ko ikasapolo gawii ko ikapito
olan na makapepowasa kano ago di kano den penggalebek a melagid so tenger a taw ago
so rait a mababaling rekano.
30 Sii sangkai a gawii na ipenggolalan so kakepapasa ko langon o manga dosa niyo, na
kelompiyo kano den ko hadapan o Allah.
31 Gawii ai a idedeke para rekano, na makapepowasa kano. Da a ikepos ai a taritib.
32 So maporo a imam a kiyasalawatan ago kiyaidinan ko kaiimami a isembi ko ama iyan
na aya penggolaola ko kakepapas o dosa. Kesolot iyan so soti a manga nditaren a sotra
33 Na ipenggolalan iyan so kapelompiyowa ko Lebi a Soti a Darpa, so Barombarong a dii
telabokan, ago so aparan, na ipenggolalan iyan pen so kakepapasa ko dosa para ko manga
imam ago so langon o manga taw ko isa ka maginged.
34 Giyangkai a dii kinggolalanen ko kakepapas o manga dosa para ko langon o manga
Israil na da a kaposan iyan a taritib a peketoman iyo sa makaisa ko saragon.
Na miyanggolaola ini a so den so inisogo o Allah ki Mosa.
LIBITIKOS 17
Inisapar so Kakan sa Rogo

2 “Teroa ngka ki Aron ago sii ko manga wata iyan, ago so langon o manga Israil a "Giyai
i inisogo o Allah:
3 Apiya antawaa ko manga Israil a korban sa sapi, o di na bilibili, o di na kambing sii ko
soled o di na liyo o kampo
4 Ka da niyan wita ko gimowa o Barombarong a dii Telabokan sa kapekorbana niyan on a
isepaat ko Allah ko hadapan o kakadenan o Allah na giyangkoto a mama na miyasogok
iyan so kokoman mipantag ko kapakatogaa ko rogo, na kebelag sekaniyan ko isa ka
maginged a Israil.
5 Aya antap angkai a sogoan na an pekewit o manga Israil ko Allah so manga ayam a di
iran dii korbanen sii ko manga pangomaan. Disomala a kewit iran ai ko imam sii ko
gimowa o Barombarong kaan makorban a isepaat ko Allah pantag bo ko kanggiginawai.
6 Amay ka magiyanan na mipemesipesik o imam so rogo ko aparan o Allah sii ko
gimowa o Barombarong na go ketotong iyan on so manga sibo iyan a mamot ko Allah.
7 Disomala a genekan iran den so di iran dii kakorbani ko manga kambing a saitan roo ko
pangomaan. Giyai na da a ikepos iyan a sogoan kiran a peketoman o langon a kebabadan
kiran.
8 “Teroa ngka kiran a apiya antawaa ko manga Israil o di na sii ko manga rait a
kibabaling kiran i somapaat sa totongen o di na pekorban
9 A di niyan pagowiten ko gimowa o Barombarong sa kisepaaten iyan on ko Allah na
kebelag sekaniyan ko isa ka maginged a Israil.
10 “Apiya antawaa ko manga Israil o di na sii ko manga rait a kibabaling kiran i koman sa
apiya antonaa a rogo na makiperidoay ako rekaniyan, na mbelagen ko sekaniyan ko isa ka
maginged a Israil,
11 Ka so kaoyagoyag o oman i baraniyawa na sisii ko rogo, na inisenggay aken ai rekano
a keodod iyo ko aparan a aya ipepas ko manga dosa niyo, ka so rogo a ron matatago so
kaoyagoyag na aya pekapapas ko dosa.
12 Giyanan i sabap a kiyateroa ko ron ko manga Israil a apiya antawaa kiran o di sii ko
manga rait a mababaling kiran na di den pekakan sa rogo."
13 “Apiya antawaa ko manga Israil o di na sii ko manga rait a kibabaling kiran a

manganop ago makakowa sa apiya antonaa a halal a binatang o di na papanok na
disomala a mapekatoga iyan a daan so rogo iyan na ketambonan iyan sa lopa.
14 So kaoyagoyag o oman i baraniyawa na sisii ko rogo iyan, na giyanan i sabap a
kiyateroa ko ron ko manga Israil a di siran pekakan sa rogo o apiya antonaa a baraniyawa
ka kagiya so kaoyagoyag o oman i baraniyawa na matatago ko rogo iyan; apiya antawaa i
koman on na kebelag den.
15 “Apiya antawaa tenger a taw o di na rait i koman sa sapo a ayam a baden miyatay o di
na miyapatay o maila a binatang na kepipian iyan so manga nditaren iyan ago
makapepeigo, ogaid na madadalem sekaniyan den a hadas taman ko perimon, na
kelompiyo bo.
16 Ogaid na o di niyan pipii so nditaren iyan ago di pepeigo na indaneg on so kadostaan
iyan."
LIBITIKOS 18
So Inisapar a Kapekeromai
2 “Teroa ngka ko manga Israil a: Saken so Allah a Tohan iyo.
3 Di niyo sowaa so paparangayan o manga taw sa Misir a ron kano miyakabaling, aya pen
o ba niyo sowaa so olaola iran sii ko inged a Kanaan a ron aken sekano pagowita. Di
niyo peginetaon so manga okitokit iran.
4 Tomana niyo so manga kokoman aken ago nggolalanen iyo piyapiya so manga sogoan
aken. Saken so Allah a Tohan iyo.
5 Tomana niyo so manga sogoan ago so manga kokoman aken, ka so taw a petoman on
na sii dii makanggolalan a kapepegongowi niyan ko kaoyagoyag iyan. Saken so Allah.
6 “Da den a sakataw bo a ba niyan mapekeroma so apiya antawaa ko madaseg a manga

tonganay niyan. Saken so Allah.
7 Di ngka pekayai so ama a ka ko kapekeromaa ngka ko ina a ka. Sekaniyan i ina a ka; o
ba ngka keromaa.
8 Di ngka pekeromaa so karoma o ama a ka, ka keyaan on so ama a ka.
9 Di ngka pekeromaa so babay ngka apiya anda ko wata o ama a ka o di na ina a ka apiya
anda sekaniyan inimbawata ko walay ngka o di na sii ko salakaw a darpa.
10 Di ngka pekeromaa so apo iyo a babay, ka keyaan ka on.
11 Di ngka pekeromaa so wata a babay o karoma o ama a ka a inimbawata o ama a ka, ka
babay ngka sekaniyan.
12 Di ngka pekeromaa so babay o ama a ka, ka madaseg sekaniyan i ama a ka.
13 Di ngka pekeromaa so babay o ina a ka, ka madaseg sekaniyan i ina a ka.
14 Di ngka pekayai so pagari i ama a ka ko kapekeromaa ngka ko karoma niyan. Babo o
ka sekaniyan.
15 Di ngka pekeromaa so miyakamong reka a babay, ka karoma sekaniyan o wata a ka a
mama.
16 Di ngka pekeromaa so karoma o pagari ngka, ka keyaan on so pagari ngka.
17 Di ngka pakaperakesa keroma so babay ago so wata iyan a babay, ago di ngka
pekeromaa so apiya anda ko wata a babay o wata iyan a mama, o di na so wata a babay o
wata iyan a babay. Madaseg iyan siran, na kamarataan ai.
18 Di ngka ndowain so pagari a babay o karoma ngka sa ba ngka pekeromaa sii ko
kaooyagoyag pen o karoma ngka.
19 Di ngka pekeromaa so babay sii ko masa a kandodon o basa, ka madadalem sekaniyan

a hadas.
20 Di ngka pekeromaa so karoma o siringan ka, ka kapeseboan ka on a ginawa ngka.
21 Di ngka pelada so apiya anda ko manga wata a ka sa ba pekorbana ko katohanan a si
Molik, ka kebatalan ka so Ingaran o Tohan ka. Saken so Allah.
22 Di ngka pekeromaa so datar ka a mama a ba datar o ipekidia ngka ko babay;
piyakasisingay ini.
23 Di ka pakipemotaliya ko binatang ka ikebaloy ngka ini a maresik. Na da a babay a ba
niyan kepalad a ginawa niyan ko binatang a ba on makikeroma, ka piyakalekelek ai a
bibid.
24 “Di niyo peseboi a ginawa niyo ko apiya anda sangkai a manga okit, ka giyanan i
manga olaola a miyakaresik ko manga nasiyon a mbogaon ko sii ko kapegantap iyo ron.
25 Apiya so lopa na kiyaresikan. Giyanan i sabap a ndenegen ko so manga kibabaling on
sabap ko kamarataan iran, na pagotaan siran o lopa
26 Ogaid na sekano a manga tenger a taw o di na so manga rait a kibabaling rekano na
tomana niyo so manga sogoan ago so manga kokoman aken. Di niyo sowaa so apiya
antonaa sangkai a piyakasisingay a olaola.
27 Ka langon ai dii nggolaolaan o manga kibabaling ko inged a ron aken sekano
pagowita, na kiyaresikan so lopa.
28 Na o peresiki niyo so lopa na pagotaan kano niyan a datar o kapagotaa niyan ko manga
nasiyon a kibabaling roo imanto.
29 Apiya antawaa i nggolaola sa apiya anda sangkai a manga piyakasisingay na kebelag
ko isa ka maginged a Israil.
30 Kagiya ka maoto na tomana niyo piyapiya so manga sogoan aken na di niyo sowaa so
apiya anda sangkai a piyakasisingay a olaola a dii nggolaolaan o manga taw a kibabaling
roo imanto ko inged. Di niyo peseboi a ginawa niyo sangkai a manga nganin. Saken so
Allah a Tohan iyo."
LIBITIKOS 19
Manga Kokoman mipantag ko Kasosoti ago Kaontol

2 “Teroa ngka ko langon o isa ka maginged a Israil a: Sosoti kano, ka saken, a so Allah a
Tohan iyo, na soti.
3 So oman i isa rekano na pagadati niyan so ama iyan ago so ina iyan, na tomana niyo so
manga kokoman ko manga Gawii aken a Idedeke. Saken so Allah a Tohan iyo.
4 Di kano penanangoran ko manga barahala aya pen o ba niyo mbaalen a ginawa niyo sa
tiyowang a manga katohanan. Saken so Allah a Tohan iyo.
5 “Igira a pekorban kano sa ayam pantag bo ko kanggiginawai na tomana niyo so manga

taritib on kaan aken matarima para rekano.
6 Kekan iyo ai sii ko gawii a kiyakorbana niyo ron o di na sii ko talondog a gawii, ogaid
na apiya antonaa a kelamba on ko ikatelo gawii na disomala a totongen.
7 O aden a miyalamba ko pikorban sii ko ikatelo gawii na maresik den ai na di aken
terimaan.
8 Apiya antawaa i koman on na kesala ka kagiya da niyan pagadati so inisenggay a soti ko
Allah, na kebelag sekaniyan ko isa ka maginged a Israil.
9 “Igira a peperagonan ka so lopa a ka na di ngka nggaraba so pereperan ko manga kilid

iyan aya pen o ba ngka osipa so miyalamba on.
10 Di ngka pelengana romopo so asinda ngka a obas aya pen o ba ngka pamorota so
miyanga oolog a obas. Begaken ka on ai para ko manga miskin ago so manga
mananangga. Saken so Allah a Tohan iyo.
11 “Di kano pemanekew, di niyo selibaa so ped aya pen o ba kano pamokeg.
12 Di niyo pesepaan so di benar sii ko Ingaran aken ka kebatalan iyo so Ingaran o Tohan
iyo. Saken so Allah.
13 “Di ngka selimboti so ped ka aya pen o ba ngka aniyayaa. Di ngka sendoden sa ba
ngka pakapitai so kasokayi ngka ko piyakanggalebek ka.
14 Di ngka pesodia so bengel aya pen o ba ngka alangi so lalan o bota, ka kaleken ka
baden so Tohan ka. Saken so Allah.
15 “Di niyo mbibida so kokoman; di ngka peramigi so manga miskin aya pen o ba ngka
ampili so manga kawasa, ka pangokomen ka baden so ontol sii ko ped ka a magiinged.
16 “Di ka pemanipanik ko manga siringan ka sa kapemagantaa ngka ko ped a taw. Di ka

penggolaola sa apiya antonaa a masiken a ron kabinasai so kaooyagoyag o siringan ka.
17 “Di ngka pemolaa ko poso o ka so kagowad ko pagari ngka. Mbongeten ka ko ped ka

so dosa niyan kaan ka di kerambit ko kiyataksil iyan.
18 Di ngka seopi o di na pemolai sa ratem so apiya antawaa ko manga ped ka, ka
kababayai ngka baden so siringan ka a datar o ginawa ngka. Saken so Allah.
19 “Tomana niyo so manga sogoan aken. Di ngka pakipemowadi so manga ayam ka ko

salakaw ron a ayam. Di ngka mambo seodi so lopa a ka sa dowa barang a oniin. Di ka
solot sa nditaren a pimbaalan a dowa barang a dinis.
20 “O rembanga o mama so oripen a babay a matataalik a mapengaroma o ped a mama

ogaid na da pen maaon o di na kabokai so babay ko kaooripeni ron na kedaneg siran,
ogaid na di siran kebono ka kagiya da pen kabokai so babay.
21 Ogaid na pekawit so mama sa mama a bilibili sii ko gimowa o Barombarong a dii
Telabokan a pekorbanen ko Allah sabap ko kiyataksil.
22 Na pekorbanen ai o imam a aya niyan kipenggolalanen ko kakepapasa ko dosa o
mama, na kerilaan sekaniyan o Allah.
23 “Amay ka somoled kano sa inged a Kanaan ago mamola kano ron sa manga onga
sapad a kekan iyo na bilangen iyo so manga onga niyan a kena a ba soti sii ko soled a telo
ragon. Sii sangkoto a masa na inisapar so kakena niyo ron.
24 Sii ko ikapat ragon na kisenggay so langon a onga niyan a rek o Allah a aya rekaniyan
den ipenalamat.
25 Ogaid na sii ko ikalima ragon na kekan iyo den so onga niyan. Sii sangkai a okit na
pekadakel so manga onga a pekeragon iyo ron. Saken so Allah a Tohan iyo.
26 “Di kano ken sa sapo a di pen dii pirogo. Di kano perimar aya pen o ba kano
pangatao.
27 Di niyo potoli so manga bok iyo sa pipikan ago di niyo tempadi so manga sompa iyo
28 Aya pen o ba niyo palii o di na patiki a lawas iyo ko di niyo dii kimbokoon ko
miyatay. Saken so Allah.
29 “Di ngka pekayai so wata a ka a babay ko kapakapesondala ngka on. O nggolaolaa
niyo ai na pelangkap ko inged so kasondal ago kepeno a kamarataan.
30 Tomana niyo so manga kokoman o Gawii aken a Idedeke, na selaa niyo so soti a darpa
aken. Saken so Allah.
31 “Di kano pekimosawir ko manga pamamaloy ago pepamangangay, ka kebatalan kano

kiran. Saken so Allah a Tohan iyo.
32 “Petindeg kano igira a pekadarpa so manga lokes ago pepagadati niyo siran, na
kaleken iyo so Tohan iyo. Saken so Allah.
33 “Di niyo pemaratai so manga rait a mababaling ko inged iyo.

34 Disomala a miiring iyo siran ko tenger a taw; kababayai niyo siran a datar o ginawa
niyo, ka tatademi niyo a manga mananangga kano mambo gowani roo sa inged a Misir.
Saken so Allah a Tohan iyo.
35 “Di kano penalimbot ko kapegosara niyo ko kena a ba ontol a takes, timbangan o di na

libras.
36 Osar kano sa ontol a timbangan, ontol a gantangan ago ontol a asada. Saken so Allah
a miyakaliyo rekano sa Misir.
37 Piyapiyai niyo tomoman so langon o manga sogoan ago so manga kokoman aken, ka
saken so Allah."
LIBITIKOS 20
So manga Daneg ko Mbarambarang a Dosa

2 “Teroa ngka ko manga Israil a: Apiya antawaa ko manga Israil o di na so manga rait a
mababaling sa Israil i mikorban sa wata iyan sii ki Molik na kebono. Paliyogat a
perobakan sekaniyan a ator o manga taw ko inged.
3 Makiperidoay ako sangkoto a mama ago mbelagen ko sekaniyan ko isa ka maginged a
Israil, ka sii ko kiyakorbana niyan ko wata iyan sii ki Molik na piresikan iyan so soti a
kaden aken ago biyatalan iyan so soti a Ingaran aken.
4 Na o pepegilaya baden o manga taw ko inged so kiyakorbana angkai a mama ko wata
iyan sii ko Molik ka da iran sekaniyan bonoa
5 Na saken i makiperidoay ron ago so pamiliya niyan, na mbelagen ko siran ko isa ka
maginged a Israil a rakes o langon a miyamangonot rekaniyan ko kiyasondal iyan ko
kiyasimbaa niyan ki Molik.
6 “O aden a taw a tomiyalikod raken ko kapegisei niyan ago kaparatiyayaa niyan ko

manga pemangangay ago manga pemangintonong na makiperidoay ako rekaniyan ago
mbelagen ko sekaniyan ko isa ka maginged a Israil.
7 Senggain iyo a ginawa niyo a soti ago sosoti kano, ka saken so Allah a Tohan iyo.
8 Paratiyayaa niyo ago tomana niyo so manga sogoan aken ka saken so Allah a pepekasoti
rekano.
9 “Apiya antawaa i isinta iyan so ama iyan o di na ina iyan na kebono; kisendit rekaniyan
so kiyapatay niyan.
10 “O makasina so mama ko karoma o ped a mama na palaya mbonoon so misina a

mama ago so babay.
11 O keromaa o mama so karoma o ama iyan na piyakayaan iyan so ama iyan. Na palaya
mbonoon so mama ago so babay, na sii kiran kisendit so kiyapamatay iran.
12 O keromaa o mama so miyakamong on a babay na mbonoon siran a dowa. So
pinggolaola iran na bibid, na sii kiran kisendit so kiyapamatay iran.
13 O keromaa o mama so ped iyan a mama a datar o ipekidia niyan ko babay na
piyakasisingay so pinggolaola iran. Kebono siran a dowa na sii kiran kisendit so
kiyapamatay iran.
14 O pangaromaa o mama so babay ago so ina o babay na marata ini. Palaya siran a telo
na disomala a totongen ko apoy kaan mapapas rekano so datar anan a kamarataan.
15 O makipemotaliya so mama sa binatang na paliyogat a mbonoon so mama ago so
binatang.
16 O magobay so babay sa binatang ka makipekeroma on na palaya kebono so babay ago
so binatang; sii kiran kisendit so kiyapamatay iran.
17 “O pangaromaa o mama so babay niyan, a babay niyan sii ki ama iyan o di na sii ki ina
iyan na kamarataan ai na kebelag siran a dowa ko manga tonganay iran. Piyakayaan o
mama so babay niyan na kesala sekaniyan.
18 O rembanga o mama so babay sii ko kandodon o basa na kebelag siran a dowa ko
manga tonganay iran ka kagiya siyawaan iran so pekepoonan o rogo iyan.
19 O keromaa o mama so babay i ama iyan o di na so pagari a babay i ina iyan na

piyakayaan iyan so madaseg a tonganay niyan, na palaya siran kesala.
20 O keromaa o mama so karoma o bapa iyan na piyakayaan iyan so bapa iyan. Kesala
siran a dowa, na pematay siran a da a manga wata iran.
21 O keromaa o mama so karoma o pagari niyan na pematay siran a da a manga wata
iran. Kasebo ini a pinggolaola niyan na piyakayaan iyan so pagari niyan.
22 “Tomana niyo piyapiya so langon o manga sogoan ago so manga kokoman aken kaan
di kano maota o inged a ron aken sekano pagowita.
23 Di niyo peginetaon so paparangayan o manga taw a kibabaling roo a mbogaon ko sii
ko kapegantap iyo kiran. Ipekegowad aken siran sabap ko kiyanggolaolaa iran sangkai
langon a kamarataan.
24 Ogaid na initopa ko rekano a ketangan iyo so lopa iran a imbegay aken rekano a
kawali niyo, a pekepakayan ago oodaren a lopa. Saken so Allah a Tohan iyo a sominggay
rekano a mabaloy a rek aken ko ped a manga nasiyon.
25 Kagiya ka maoto na disomala a pakasenggayaa niyo so halal ago so karam a manga
ayam ago manga papanok. Di niyo peresiki a ginawa niyo ko kaken iyo sa apiya antonaa
a ayam, o di na papanok o di na pemanola ko lopa a tindo aken a karam rekano.
26 Sosoti kano sii raken, ka saken, a so Allah, na soti. Inisenggay aken sekano ko ped a
manga nasiyon a aya ko rek.
27 “So mama o di na babay a pemangangay o di na pangangatao na disomala a mbonoon.

Kerobak iyo a ator, na sii kiran kisendit so kiyapamatay iran."
LIBITIKOS 21
So Kasosoti o manga Imam
Na pitero o Allah ki Mosa a "Teroa ngka ko manga imam a so manga wata i Aron a: Di
kebatalan o imam a ginawa niyan ko kasekoa niyan ko apiya antawaa ko manga tonganay
niyan a miyatay
2 Liyo ron so tanto niyan a madaseg a tonganay, a so ina o di na ama iyan, so wata iyan a
mama o di na babay, so pagari niyan a mama,
3 O di na so da mapangaroma a babay niyan a tatagikoren iyan.
4 Na di niyan kebatalan a ginawa niyan a nggolalan ko kasekoa niyan ko bangkay o taw a
minitonganaya iyan ko kiyapakakemonga.
5 “Di keopawan o manga imam a manga olo iran aya pen o ba iran tampadi so manga
sompa iran, ago di iran kapemalian a manga lawas iran ko di iran dii kamboko.
6 Paliyogat a isesenggay siran a soti ko Tohan iran ago di iran kabatalan so Ingaran o
Tohan ka kagiya siran i pepalad ko pangenengken o Tohan iran a ipesepaat a petotongen
ko apoy sii ko Allah. Kagiya ka maoto na paliyogat a masosoti siran.
7 Di siran makapengaroma sa babay a miyakasondal aya pen o ba bitowanen, ka kagiya
isesenggay so imam a soti ko Tohan iyan.
8 Kibilang o manga taw so manga imam a soti ka kagiya siran i pesepaat ko
pangenengken o Tohan iyo. Bilangen iyo siran a soti, ka saken, a so Allah a pesoti
rekano, na soti.
9 O miyakasebo so wata a babay o imam na piyakayaan iyan so ama iyan, na ketotong
sekaniyan ko apoy.
10 “So maporo a imam, a so isa ko magariyari a kiyasalawatan sa lana diyabat ago

kiyaidinan a makasolot ko nditaren a kaiimami, na di niyan mipendarainon so bok iyan
aya pen o ba niyan kisia so nditaren iyan ko kipembokoon iyan ko miyatay.
11-12 Insenggay sekaniyan a soti ko kiyasalawati ron sa lana diyabat o Tohan iyan, na di
niyan kebatalan a ginawa niyan aya pen o ba niyan kaperesiki so soti a darpa o Tohan
iyan a nggolalan ko kaawai niyan on sa kasoled iyan ko darpa a aden a bangkay ron, apiya
pen o ama o di na ina iyan ai. Saken so Allah.
13 “Raga a mapengaroma o maporo a imam,

14 A kena a ba balo, o di na bitowanen a babay aya pen o ba babay a miyakasondal. Aya
bo a mapengaroma niyan na raga a taw sa Israil
15 Kaan masoti so manga kebabadan rekaniyan sii ko manga taw a bangsa niyan. Saken
so Allah a miyaloy rekaniyan a soti."
16 Na pitero peman o Allah ki Mosa a
17 “Teroa ngka ki Aron a: Da den a taw ko kebabadan reka a aden a daway o lawas iyan a
ba pekasapaat ko pangenengken o Tohan iyan.
18 Da a taw a aden a daway niyan a ba raken pekadaseg, a datar o bota o di na lepo, so
mabibinasa a paras o di na lawas iyan,
19 So sadir i lima o di na ai niyan,
20 So bekog i likod o di na karengki, so mabibinasa a mata niyan o di na pegibolen aya
pen o ba kiyapon.
21 Saden sa mbawataan i Aron a imam a aden a daway o lawas iyan na di kepakay a ba
raken pekadaseg sa kisepaaten iyan ko petotongen a ipesepaat ko Allah. Aden a daway
niyan na di sekaniyan pekasapaat ko pangenengken o Tohan iyan.
22 Kepakay a ken sekaniyan ko soti a pangenengken a inisapaat ko Tohan taman den ko
lebi a soti a pangenengken,
23 Ogaid na sabap ko daway niyan na di sekaniyan pekaobay ko kortina aya pen o ba
makadaseg ko aparan kaan di kebatali so soti a manga darpa aken. Ka saken so Allah a
aya kiran pepekasoti."
24 Mandiyadi na inisampay i Mosa angkai a manga katero ki Aron ago so manga wata i
Aron ago sii ko langon a manga Israil.
LIBITIKOS 22
So Kasosoti o manga Sapaat

2 “Teroa ngka ki Aron ago so manga wata iyan a pagadati ran so soti a manga sapaat o
manga Israil a ipesenggay iran raken kaan iran di kebatali so soti a Ingaran aken. Saken
so Allah.
3 Teroa ngka kiran a o aden a isa ko manga kebabadan kiran a kababatalan sii ko
kiyaobay niyan ko manga sapaat o manga Israil a ipesenggay iran a soti ko Allah na
kebelag angkoto a taw ko kamamasaan aken. Saken so Allah.
4 “Apiya antawaa ko kiyababadan ki Aron a aden a sakit iyan sa kobal o di na aden a

petoga ko lawas iyan na di sekaniyan pekakan ko manga soti a ipesepaat taman sa di
malompiyo. Na kebatalan sekaniyan o makaseko sa bangkay, o di na taw a madadalem a
hadas ko kiyaliyo ron o biga,
5 O di na o makaseko sekaniyan pen sa apiya antonaa a maresik a pendola ko lopa, o di
na taw a kiyaresikan ko apiya antonaa i inikaresik iyan.
6 So imam a makaseko sa apiya anda roo na kababatalan den taman ko perimon, na di
sekaniyan pekakan ko apiya antonaa a soti a ipesepaat taman sa di sekaniyan makapeigo
sa ig.
7 Amay ka somedep den so alongan na kelompiyo sekaniyan na maipos oto na pekakan
sekaniyan den ko manga soti a sapaat, ka giyai i pangenengken iyan.
8 Di pekakan so imam sa apiya antonaa a baden miyatay o di na pisekisi o maila a
binatang, ka kebatalan sekaniyan on. Saken so Allah.
9 “Disomala a tomanen o manga imam so manga kokoman aken kaan siran di ketaksil
ago pematay sabap ko kaongkira iran on. Saken so Allah a aya kiran pepekasoti.
10 “Da den a sakataw bo a di maaped ko pamiliya o imam a ba pekakan ko soti a

inisapaat aya pen o ba matag banto o imam o di na so sosokayan i ba on makakan.
11 Ogaid na so manga oripen o imam a miyapamasa niyan a pirak o di na sii inimbawata
ko walay o imam na pekakan ko pangenengken iyan.
12 O so wata a babay o imam na mapangaroma o mama a kena a ba imam na di den
pekakan ko soti a inisapaat.
13 Ogaid na o miyabalo sekaniyan o di na miyabitowanen ago da a wata iyan ago
miyaling peroman ko walay i ama iyan a datar o kararagai ron na pekakan sekaniyan ko
pangenengken i ama iyan, ogaid na di sii pekakan so di maaped ko pamiliya o imam.
14 “Apiya antawaa i miyakakan ko soti a inisapaat a di niyan katawan a soti ini na

kebayadan iyan ko imam so miyakan iyan ago kioman iyan on so ikalima bagi a arga iyan.
15 So manga imam na di iran kiiring so soti a manga ipesepaat o manga Israil ko Allah a
datar o kalilid a pangenengken
16 A nggolalan ko kapekikanen iran on ko taw a di on kepakayan, ka kitaksil ini ago
kidaneg sangkoto a taw. Saken so Allah a pesoti sangkai a manga sapaat."
So Ketarima ago so di Ketarima a manga Sapaat

18 “Teroa ngka ki Aron ago so manga wata iyan ago sii ko langon o manga Israil a: Apiya
antawaa ko manga Israil o di na sii ko manga rait a mababaling sa Israil i malad sa
pamemegayan a isepaat a totongen ko Allah apiya anda ko kitomanen ko samaya o di na
iklas a sapaat
19 Na aya kewit iyo na satiman a mama a sapi, bilibili, o di na kambing a da a daway
niyan kaan ai matarima rekano.
20 Di niyo pagowita so apiya antonaa a aden a daway niyan, ka di ini terimaan rekano.
21 Amay ka aden rekano a magawid sa sapi o di na bilibili a pekorbanen pantag bo ko
kanggiginawai a itoman ko samaya o di na iklas a sapaat na paliyogat a da a daway niyan
o di na paawing kaan ai matarima.
22 Di kano sepaat ko Allah sa ayam a bota, o di na lepo, o di na aden a pali iyan o di na
lebag o di na ibol iyan, aya pen o ba dii ndana. O ba niyo ai panaapaten ko Allah sii ko
aparan a pekaokiten ko apoy.
23 So sapi o di na bilibili a miyakimay o di na miyarotig na kepakay a misepaat iyo a
iklas a pamemegayan, ogaid na di ini ketarima o sapaaten a itoman ko samaya.
24 Sii ko inged iyo na di kano den pekasapaat ko Allah sa ayam a miyagaras so orak iyan,
o di na miyapesa, o di na kiyapalian, aya pen o ba miyakapon.
25 Na di niyo sepaaten a pangenengken o Tohan iyo so apiya antonaa a ayam a miyakowa
niyo a poon ko rait. Di ini ketarima rekano ka ibibiling ai a kiyabatalan ago kiyatagoan sa
daway."
27 “Igira aden a sapi a inimbawata, o di na bililibi, o di na kambing na sii den pasin ko
ina iyan ko soled a pito gawii, ogaid na ipoon ko ikawalo gawii na kepakay a isepaat a
petotongen ko Allah.
28 Di niyo penombalia ko soled o salongan so ina a sapi, bilibili o di na kambing ago so
wata iyan.
29 Igira a pekorban kano sa isepaat ko Allah para ko panalamat na nggolaolaa niyo ai sii
ko okit a katerimaa niyan on rekano.
30 Disomala a kekan bo ini sii den sangkoto a gawii; da den a pekapitaan iyo ron. Saken
so Allah.
31 “Piyapiyai niyo tomoman so manga sogoan aken. Saken so Allah.

32 Di niyo mbatali so soti a Ingaran aken. Disomala a kilalaan o manga Israil a soti ako.
Saken so Allah a aya rekano pepekasoti
33 Ago miyakaliyo rekano sa inged a Misir kaan ako mabaloy a Tohan iyo. Saken so
Allah."
LIBITIKOS 23
So Matetendo a manga Pista

2 “Began ka ko manga Israil angkai a manga insarat mipantag ko miyanga tetendo a pista
o Allah, a so manga ala a gawii a di niyo katelabok sa soti a kalilimod.
So Gawii a Idedeke
3 “Aden a nem gawii a mipenggalebek iyo, ogaid na so ikapito gawii na Gawii a Idedeke,
a so gawii a katelabok iyo sa soti a kalilimod. Da den a ba niyo sii mapenggalebek apiya
anda kano mababaling, ka rek o Allah so Gawii a Idedeke.
So Pista a Paska ago so Kakan sa da a Tapay ron a Paan
4 “Na giyai i manga pista o Allah, a so di niyo dii katelabok sa soti a kalilimod a
mapeselasela iyo sii ko miyanga tetendo on a gawii.
5 “So Pista a Paska o Allah na magpoon ko perimon sii ko ikasapolo ago pat gawii ko
paganay a olanolan.
6 Na so ikasapolo ago lima gawii sangkoto bo a olanolan na aya poonan o Pista ko Kakan
sa Paan a da a Tapay ron. Sii ko soled o pito gawii na disomala a kekan iyo so paan a da
a tapay ron.
7 Sii ko paganay a gawii na talabok kano sa soti a kalilimod na di niyo penggolaolaa so
apiya antonaa a galebek iyo.
8 Oman gawii ko soled o pito gawii na pekasapaat kano ko Allah sa sapaat a petotongen.
Na sii ko ikapito gawii na talabok kano sa soti a kalilimod na di kano penggalebek sa
apiya antonaa."
So Kapelada ko Paganay a Miyaragon

10 “Teroa ngka ko manga Israil a: Amay ka somoled kano ko inged a imbegay aken
rekano ago peragonen iyo ron so pereperan iyo na kewit iyo ko imam so sabekes ko
paganay a miyaragon iyo.
11 Sii ko gawii ko oriyan o Gawii a Idedeke na peladen iyan ai ko Allah ko kibayaon iyan
on ko hadapan iyan kaan ai matarima rekano.
12 Sangkoto den a gawii na makapekorban kano ko Allah sa isepaat on a totongen a
satiman a nati a bilibili a saragon a idad iyan a da a daway niyan
13 A kirakes on so ipapaliyogat on a isepaat a pangenengken a dowa ka kilo a lebi a
mapiya a arina a sasaogan sa lana a olibi a peladen ko Allah a pekaokiten ko apoy, ago so
sapaat a panginginomen a isa ka litro a arak.
14 Di kano den pekakan sa bapiya antonaa sangkai a bago a pereperan apiya anda ko
mailaw, sindag aya pen o ba pimbaalan a paan taman sa di niyo mawit angkai a isepaat ko
Tohan iyo. Giyai na da a ikepos iyan a taritib para rekano taman ko langon a kebabadan
rekano apiya anda kano mababaling.
So Pista ko Kaperagon
15 “Sii ko gawii a kiyawita niyo ko sabekes a pereperan a inibayaw ko Allah, a giyoto so

gawii a tomiyalondog ko Gawii a Idedeke, na poon kano ron milang sa pito ka padian.
16 Sii ko ikalima polo gawii, a so gawii a kaipos o ikapito a Gawii a Idedeke, na
pekapalad kano ron sa bago a isepaat a pangenengken ko Allah.
17 Apiya anda kano mababaling na awid kano sa dowa timan a paan a pimbaalan a dowa
ka kilo a lebi a mapiya a arina a initinda a aden a tapay ron. Giyai na kepalad ko Allah ko
kibayaon on ko hadapan iyan a aya niyo ron ipesepaat ko paganay a miyaragon iyo.
18 Aya kirakes iyo ko paan na pito timan a nati a bilibili a sesaragon a idad iyan, ago
satiman a mama a sapi, ago dowa timan a mama a bilibili a langon da a daway niyan.
Giyangkai a manga ayam na pekorbanen a isepaat a totongen ko Allah a rakes o
ipapaliyogat on a manga sapaat a pangenengken ago panginginomen, na mamot ai a
isepaat ko Allah.
19 Makapekorban kano pen sa satiman a mandangan a isepaat sabap ko dosa, ago dowa
timan a nati a bilibili a sesaragon a idad iyan a isepaat pantag bo ko kanggiginawai.
20 Kekowa o imam angkai a manga nati a bilibili a rakes o paan na peladen iyan ai ko
Allah ko kibayaon iyan on ko hadapan iyan. Kisenggay ini a soti ko Allah, na bagian ai o
manga imam.
21 Sii den sangkoto a gawii na di kano penggalebek ka talabok kano sa soti a kalilimod.
Taritib ai a da ikepos iyan para rekano taman ko langon a kebabadan rekano apiya anda
kano mababaling.
22 “Igira a peperagonan ka so lopa a ka na di ngka nggeraba so pereperan sii ko manga

kilid iyan, aya pen o ba ngka osipa so miyalamba on. Samai ngka on so manga miskin
ago so manga mananangga. Saken so Allah a Tohan iyo.
So Pista ko Kapekaoniya ko manga Bogiyong

24 “Teroa ngka ko manga Israil a: So paganay a gawii ko ikapito a olanolan na gawii a
kandeke iyo. Mapeselasela ini ko kapemakaoniya ko manga bogiyong, na talabok kano
sa soti a kalilimod.
25 Da den a ba niyo ron mapenggalebek, ogaid na makapekorban kano ko Allah sa manga
isepaat a petotongen."
So Gawii a Kapepasa ko manga Dosa

27 “So ikasapolo gawii sangkai a ikapito a olanolan na Gawii a Kapepasa ko manga dosa.
Talabok kano sa soti a kalilimod, na powasa kano ron ago korban kano ko Allah sa
manga ipesepaat a petotongen.
28 Di kano penggalebek sangkai a gawii, ka giyai i gawii a kipenggolalanen ko
kakepapasa ko manga dosa niyo ko hadapan o Allah a Tohan iyo.
29 Apiya antawaa rekano i di pepowasa sangkoto a gawii na kebelag ko isa ka maginged
a Israil.
30 Saden sa nggalebek sa apiya antonaa sangkai a gawii na mbonoon ko.
31 Di kano ron makapenggalebek! Giyai na da a ikepos iyan a taritib para rekano taman
ko langon a kebabadan rekano apiya anda kano mababaling.
32 Gawii ai a tarotop a kandeke iyo, na makapepowasa kano ron ago pekadeke ipoon ko
perimon ko ikasiyaw gawii ko olanolan taman ko kaperimon iyan ko talondog a gawii."
So Pista ko manga Lawig

34 “Teroa ngka ko manga Israil a: Sii ko ikasapolo ago lima gawii sangkai a ikapito a
olanolan na ron ipagpoon so Pista ko manga Lawig a ipeselasela ko Allah ko soled o pito
gawii.
35 Sii ko paganay a gawii na talabok kano sa soti a kalilimod, na di kano penggalebek sa
apiya antonaa.
36 Oman gawii ko soled o pito gawii na korban kano sa isepaat a totongen sii ko Allah.
Sii ko ikawalo gawii na talabok kano sa soti a kalilimod na korban kano pen sa isepaat a
totongen sii ko Allah. Soti ai a kalilimod na di kano penggalebek sa apiya antonaa.
(37 “Giyai i manga pista a tindo o Allah a aya kapeselaselaa niyo ron na so di niyo dii
katelabok sa soti a kalilimod ago so kapesepaat iyo ko Allah sa manga sapaat a
pepakaokiten ko apoy, a so manga korban, manga pangenengken ago manga
panginginomen a paliyogat rekano ko oman gawii.
38 Mapeselasela angkai a manga pista a liyo ko manga Gawii o Allah a Idedeke, na
giyangkai a manga sapaat na liyo ko ipesepaat iyo a manga pamemegayan, ago so manga
pekorbanen a ipesepaat iyo sabap ko samaya, ago so iklas a manga ipesepaat iyo ko
Allah.)
39 “Na, tademi niyo a aya pegang angkai a Pista ko manga Lawig na so ikasapolo ago
lima gawii ko ikapito a olanolan oriyan o kiyaperagona niyo ko langon a pereperan ko
lopa iyo. Selaselaa niyo angkai a pista sii ko Allah ko soled o pito gawii. So paganay a
gawii ago so pen so ikawalo gawii na tarotop a kandeke iyo.
40 Sii ko paganay a gawii na pangowa kano sa lebi a mapiya a onga o manga kayo, ago
manga pakong o palmira, ago manga marimpoong a sapak o manga lolombay a kayo a
pepamangeto ko obay o lawasaig, na keriyala kano ko hadapan o Allah a Tohan iyo ko
soled o pito gawii.
41 Oman ragon sii ko ikapito a olanolan na selaselaa niyo angkai a pista ko Allah ko
soled o pito gawii. Taritib ai a da a ikepos iyan para rekano taman ko langon a kebabadan
rekano.
42 Sii ko soled o pito gawii na so langon o tenger a taw a manga Israil na sii pekabaling
ko manga lawig
43 Kaan katokawi o manga kebabadan rekano a piyamakakaden aken so manga Israil sii
ko manga lawig isako pakaliyon ko siran sa inged a Misir. Saken so Allah a Tohan iyo."
44 Giyanan i kiyapakitokawi i Mosa ko manga Israil ko mipantag ko miyanga tetendo a

pista a ipeselasela iran ko Allah.
LIBITIKOS 24
So Kapekibira ko manga Solo ko Petegoan sa Solo

2 “Sogoon ka ko manga Israil a witan ka iran sa lombos a lana a olibi a ipelana ko manga
solo a ndodoo ko Barombarong kaan lalayon mapepakasindaw.
3 Kibetad i Aron ko petegoan sa solo sii ko onaan o kortina a irerending ko Kaban sa
Kapasadan a matatago ko Lebi a Soti a Darpa ko Barombarong a dii Telabokan, na
lalayon iyan pepakasindaon so manga solo sii ko hadapan o Allah ipoon ko perimon na
taman ko kapita iyan. Giyai na da a ikepos iyan a taritib para rekano taman ko langon a
kebabadan rekano.
4 So manga solo ko lombos a bolawan a petegoan sa solo na disomala a itataros den a
kapekibira on kaan ai mapepakasindaw lalayon sii ko hadapan o Allah.
So Paan a Ibebetad ko Hadapan o Allah
5 “Kowa ka sa lebi a mapiya a arina na pangembaali ngka a sapolo ago dowa a manga
paan a nggagaisa ka kilo a arina a pagosaren ko oman i isa on.
6 Tagoa ngka ini sii ko hadapan o Allah sii ko lamisaan a lalapisan sa lombos a bolawan.
Rantara ngka sa dowa koyog a ndenem oman i sakoyog.
7 Pametadi ngka sa lombos a doka so obay o oman i sakoyog a paan. Pekisapaat ka
angkai a doka a petotongen ko Allah a iseliyo ko paan ago aya den toos a so
kalangolangon iyan na isesenggay ko Allah.
8 Giyangkai a paan na disomala a lalayon ipembetad ko hadapan o Allah ko oman Gawii
a Idedeke a aya den kapetomana o manga Israil ko da a kaposan iyan a kapasadan.
9 Rek den ai i Aron ago so manga wata iyan na sii ran kekan ko darpa a soti, ka kagiya
lebi ini a soti sii ko lalayon iran dii mambagian ko manga pamemegayan a ipesenggay ko
Allah."
Ladiyawan ko Ontol a Daneg
10 Samaoto na aden a mama a aya ina iyan na babay a taw sa Israil ago aya ama iyan na
Imisiren. Na roo ko kampo o manga Israil na minimbono iyan so ped a mama a taw sa
Israil.
11 Sii ko di iran dii kambono na so mama a wata o babay sa Israil na piyagitowito ago
inisinta iyan so Ingaran o Allah. Sabap roo na inowit iran ki Mosa. (Aya ngaran o ina
iyan na si Silomit a wata i Dibri a ped ko mbatabataa a Dan.)
12 Na tiyangan iran sekaniyan taman sa mapayag kiran so kabaya o Allah a ikokom
rekaniyan.
14 “Wita ngka ko liyo o kampo so misinta na pakidapeneti ngka a olo niyan ko langon a
taw a miyamakaneg rekaniyan, na so langon o isa ka maginged na pekarobak on a ator.
15 Na teroa ngka ko manga Israil a 'Apiya antawaa i sinta ko Tohan iyan na kesala,
16 Na apiya antawaa i magitowito ko Ingaran o Allah na disomala a mbonoon. So langon
o isa ka maginged a Israil na pekarobak on a ator. Apiya anda ko rait o di na tenger a taw
a magitowito ko Ingaran o Allah na kebono.'
17 “Apiya antawaa i mono sa taw na mbonoon mambo,

18 Na apiya antawaa i mono sa ayam o ped a taw na kesambian iyan so miyapatay niyan -
- aya imbayad ko kaoyagoyag na kaoyagoyag.
19 “Apiya antawaa i binasaan iyan so ped a taw na saden sa kiyabinasai niyan ko ped na
mapenggolaola rekaniyan mambo.
20 So lepo na mbayadan a lepo, so mata na mbayadan a mata, na so ngipen na mbayadan
a ngipen. So den so kiyabinasai niyan ko ped na aya on mambo ikidia.
21 Apiya antawaa i mono sa ayam na makapendiyat sa ayam, ogaid na apiya antawaa i
mono sa manosiya na paliyogat a mbonoon mambo.
22 Ndatar sa taritib so rait ago so tenger a taw. Saken so Allah a Tohan iyo."
23 Kagiya mapasad ai tero i Mosa ko manga Israil na inowit iran ko liyo o kampo so taw
a misinta na riyobakan iran sekaniyan a ator a so den so inisogo o Allah ki Mosa.
LIBITIKOS 25
So Ragon a Idedeke
Roo ko Palaw a Sinay na pitero o Allah ki Mosa a

2 “Teroa ngka ko manga Israil a: Amay ka makasoled kano ko inged a imbegay aken
rekano na apiya so lopa na mapekadeke iyo ko saragon ko oman ikapito ragon a
ipepagadat iyo ko Allah.
3 Sii ko soled o nem ragon na kapepamamolaan iyo so manga lopa iyo ago ketayongan
iyo so manga asinda niyo a obas ago makaperoropo kano ko manga onga niyan.
4 Ogaid na sii ko ikapito ragon na mapekadeke sa tarotop so lopa, a giyai na ragon a
isesenggay ko Allah. Di niyo pemolai so manga lopa iyo aya pen o ba niyo tayongi so
manga asinda niyo a obas.
5 Di niyo peragona so ba on den miyamangeto a pereperan aya pen o ba niyo ropoa so
manga obas ko da niyo katayongi a manga waged a obas. Ragon ai a tarotop a kandeke o
lopa.
6 Na sii sangkai a ragon a kadedeke o lopa na so miyaori a miyaragon iyo ron na pekaper
rekano -- seka ago so oripen ka a mama ago babay, ago so sosokayan ka a gomagalebek,
ago so mananangga a tomatapi rekano,
7 Taman den ko manga pangangayamen ka, ago so manga iila a binatang a matatago ko
lopa a ka. Apiya antonaa i kionga o lopa na kekan.
So Ragon a Kapakaasal
8 “Bilang kano sa makapito ragon a idedeke maana a makapito matakep so pito ragon;
giyanan na pat polo ago siyaw ragon langon.
9 Na sii ko ikasapolo gawii ko ikapito olan, a so Gawii a Kapepasa ko Dosa, na
pakaoniya niyo sa matanog so manga bogiyong sii sa dalem a inged.
10 Senggain iyo a soti angkai a ikalima polo ragon na go niyo panawatewagen so
kapemaradikaa ko langon a kibabaling ko dalem a inged. Giyai na Ragon a Kapakaasal
para rekano; so langon a lopa a miyapesa na kikasoy ko asal a kikawali ron, na apiya
antawaa i miyapesa a oripen na pekakasoy ko manga tonganay niyan.
11 Giyangkai a ikalima polo ragon na Ragon a Kapakaasal para rekano; di niyo pemolai
so lopa iyo aya pen o ba niyo peragona so ba on den miyamangeto, na di niyo peropoa so
manga obas ko da niyo katayongi a asinda.
12 Soti rekano angkai a Ragon a Kapakaasal; na aya bo a kekan iyo na so miyaori a
miyaragon ko lopa.
13 “Sii sangkai a Ragon a Kapakaasal na so langon a lopa a miyapesa na kikasoy ko asal

a kikawali ron.
14 O makapesa ka sa lopa ko ped ka a Israil, o di na makapamasa ka on na di pelabiti o
oman i isa so ped iyan.
15 Paliyogat a aya ipegarga ko lopa na mipepasod ko miyalamba a manga ragon a
kepakay a kapeperagonan ai sa pereperan ko di pen kakeoma o Ragon a Kapakaasal, a so
ikalima polo ragon.
16 Amay ka madakel pen a lamba on a manga ragon a da on kaomai na mala mambo so
arga iyan ogaid na amay ka maito bo na maito mambo a kibayad on, ka kagiya aya bo a
mapepesa na so kadakel o maperagon on.
17 Di kano pelalabita, ka kaleken iyo baden so Tohan iyo. Saken so Allah a Tohan iyo.
18 “Piyapiyai niyo tomoman so manga taritib ago so manga kokoman aken na

makapeginetaw kano a malilinding sii ko inged.
19 Samaoto na ipagonga o lopa so madakel a pereperan, na pekakan kano ago penga
oosog sa da a ba rekano pekabinasa ko kapepeginetaw niyo ron.
20 Na opama ka ipagise iyo a 'Antonaa i ken tano sii ko ikapito ragon o di tano pamola,
aya pen o ba tano maperagon so manga pereperan tano?'
21 Sii ko ikanem ragon na perakmatan ko sekano sa mala, na keragonan so lopa sa
pereperan a pekaper rekano ko soled o telo ragon.
22 Sii ko kapemola niyo ko ikawalo ragon na pekakan kano pen ko andang a miyaragon
iyo ko ikanem ragon, na kitaros iyo so kapekena niyo ron taman pen ko ikasiyaw ragon a
iperagon iyo.
So Kikasowin ko manga Tamok
23 “So lopa na di mapepasa a ba rek den o makapamasa on sa dayon sa dayon ka kagiya

saken i kirek ko lopa, na sekano na matag on manga mananangga ago manga ogopa aken.
24 “Sii ko dalem a inged a matatangan iyo na igira a miyapesa so lopa na disomala a

peroa niyo a kakeaona on o asal a kirek on.
25 O aden a taw sa Israil a miyamiskin ago miyapepasa niyan so lopa iyan na so madaseg
a tonganay niyan na keaon iyan so miyapesa o pagari niyan.
26 Na o da den a ba niyan tonganay a pekaaon on ogaid na miyakapiya sekaniyan i
bobolos ago aden a kiyatangkaan a pirak iyan a kiaon iyan ko lopa
27 Na keitong iyan so bali o kapegosara on ipoon ko ragon a kiyapesaa niyan on. Na
kelebat iyan ai ko minibayad rekaniyan o miyakapamasa on na kikasoy niyan on so lamba
on. Oriyan iyan na pekakasoy ko asal a kirek on so lopa iyan.
28 Ogaid na o di niyan kebaog a kapagaona niyan on na matatangan den o miyakapamasa
on taman ko Ragon a Kapakaasal, na sii sangkoto a ragon na kikasoy so lopa ko asal a
kirek on.
29 “O aden a pepasa sa walay a matatago ko siti a malilibet a pangeleban na aden a

kabenar iyan sa kapagaona niyan on ko soled o saragon oriyan o kiyapesaa niyan on. Sii
sangkoto a masa na keaon iyan.
30 Ogaid na o di maaon ko soled o saragon na so walay a matatago ko siti a malilibet a
pangeleban na ketatap a rek den o miyakapamasa on ago so manga moriyataw niyan. Di
ini kikasoy ko Ragon a Kapakaasal.
31 Ogaid na so manga walay a matatago ko pagingedingedan a kena a ba malilibet a
pangeleban na kibilang ai a datar o pangomaan. Keaon ai na paliyogat a kikasoy ko asal a
kirek on ko Ragon a Kapakaasal.
32 Ogaid na so manga Libitiyo na lalayon iran kabenar so kakeaona iran ko manga walay
a matatago ko manga siti a isesenggay kiran.
33 O mipesa so Libitiyo sa walay a matatago ko siti niyan ago da niyan ai aona na kikasoy
ini rekaniyan sii ko Ragon a Kapakaasal ka kagiya so manga walay sii ko manga siti o
manga Libitiyo na aya iran kawali sii ko manga Israil.
34 Ogaid na so manga lopa a pananateba sii ko dair o manga siti ran na di den mapepesa.
Rek iran ai sa dayon sa dayon.
So Kaogopi ko manga Miskin
35 “O aden a tonganay ngka a miyamiskin ago di niyan keper a ginawa niyan na ogopi
ngka sekaniyan na pakatapia ngka a datar o mananangga.
36 Di ngka pentoni sa tobo, ka kaleken ka baden so Allah na pakakadena ngka sekaniyan
sii reka.
37 Di niyo pegotangi sa ba pepakaisega aya pen o ba ngka pesai sa pangenengken a
pelabaan ka.
38 Saken so Allah a Tohan iyo a aya rekano miyakaliyo sa Misir kaan aken rekano
mibegay so inged a Kanaan ago an ako mabaloy a Tohan iyo.
So Kamaradikaa ko manga Oripen
39 O aden a isen ka a Israil a miyamiskin ago miyapesa niyan reka a ginawa niyan na di
ngka pakapenggalebeka a datar o oripen,
40 Ka sayanen ka baden sa sosokayan a gomagalebek o di na matag tomatareg reka.
Makapenggalebek sekaniyan reka taman ko Ragon a Kapakaasal,
41 Na sa masa oto na kemaradika sekaniyan a rakes o manga wata iyan na pekakasoy
siran ko manga tonganay iran ago sii ko kawali o manga apo iran.
42 So manga Israil na manga oripen aken a piyamakaliyo aken sa inged a Misir; sabap san
na di siran den mapepasa a oripen.
43 Di ngka siran pendatoi sa kapangarasi, ka kaleken ka baden so Tohan ka.
44 “So manga oripen iyo na disomala a sii pekapoon ko manga nasiyon ko melilibeta
rekano; sii kano kiran makapemasa sa manga oripen.
45 Makapemasa kano pen sa manga oripen poon ko manga mananangga a kibabaling
rekano o di na poon ko manga pamiliya iran a inimbabawata sii ko inged iyo, na kebaloy
siran a rek iyo.
46 Na kepakay a itenan iyo siran ko manga wata iyo a makewali ran; na
mapengongoripen iyo siran sa taman sa kapatay iran. Ogaid na di niyo pagiringen a datar
ai so isen iyo a manga Israil aya pen o ba niyo pangarasii.
47 “O kewasa so isa a mananangga a mababaling rekano ago mamiskin so ped ka a Israil

ago pesaan iyan a ginawa niyan sangkoto a mananangga o di na sii ko isa a tonganay
niyan
48 Na kepakay a maaon sekaniyan oriyan o kiyapesaa on. Isa ko manga tonganay niyan i
pekaaon on;
49 So bapa iyan o di na tenged iyan o di na apiya antawaa ko madaseg a manga tonganay
niyan i pekaaon on, o di na o kegaga niyan na keaon iyan a ginawa niyan.
50 Sekaniyan ago so miyakapamasa on na kebilang iran so manga ragon ipoon ko
kiyapesaa niyan sa ginawa niyan taman ko Ragon a Kapakaasal, na aya kiaon rekaniyan
na mipepasod ko ipesokay ko sosokayan a gomagalebek sii ko kadakel angkai a manga
ragon.
51-52 O madakel pen a manga ragon a da pen kaomai ko Ragon a Kapakaasal na mala
mambo a bagi ko arga a minipamasa rekaniyan a kibayad iyan a kiaon ko ginawa niyan.
Ogaid na o maito bo a lamba a manga ragon na maito mambo a pirak a kiaon iyan ko
ginawa niyan a makaaayon ko kadakel angkai a manga ragon
53 A datar o ba gomagalebek sekaniyan a dii pakanggalebeken a kaseragona a kapasadan.
Na disomala a inengkaan iyo a so mananangga a aya kirek on na di niyan sekaniyan
kapengarasiyan.
54 O di sekaniyan maaon ko da pen kaomai ko Ragon a Kapakaasal na kemaradika
sekaniyan ago so manga wata iyan sangkoto den a ragon.
55 Ka kagiya so manga Israil na rek aken a manga oripen; manga oripen aken siran a
piyakaliyo aken sa inged a Misir. Saken so Allah a Tohan iyo.
LIBITIKOS 26
So manga Rakmat ko Kapeparatiyaya
"Di kano pengembaal sa manga katohanan o di na manga barahala ago di niyo

pemakatindega so manga polaos o di na piyamangokiran a manga ator a ba niyo pesimbaa
sii ko inged iyo. Saken so Allah a Tohan iyo.
2 Selaselaa niyo so manga Gawii aken a Idedeke ago pagadati niyo so darpa a pesimbaan
raken.
3 “O nggolalanen iyo so manga taritib aken ago piyapiyaan iyo tomoman so manga
sogoan aken
4 Na mbegan ko sekano sa oran ko oman i mosim iyan, na keragonan so lopa sa
pereperan ago pemangonga so manga kayo.
5 So kapeperagon iyo sa pereperan na iperaot ko kaperoropo iyo sa manga obas, na so
kaperoropo iyo sa obas na iperaot ko kaseod iyo sa oniin. Pekakan kano sa taman den sa
kabaya iyo na penga oosog kano ago makapeginetaw kano sa da a ba rekano pekabinasa.
6 “Mbegan ko sekano sa kalilintad sii ko inged iyo kaan kano pepekatorog a da a ba niyo
ikelek. Mbogaon ko so piyakalekelek a manga binatang ko manga lopa iyo, na di den
sagaden a katidawa so inged iyo.
7 Penalobaan iyo so manga ridoay niyo na pemonoon iyo siran a manga pedang.
8 So lima rekano na makapenaloba sa magatos kiran, na so magatos rekano na
makapenaloba sa sapolo nggibo kiran.
9 Ikelimo aken sekano ago pagodaren aken, ago pakapendakelen ko sekano, na itoman
aken so kapasadan aken sii rekano.
10 Di niyo kelengan koman so andang a miyaragon iyo ko miyaipos a ragon, ka kailangan
a kilebeden iyo ko lamba on kaan mamin so bago a pereperan ko tataliyongan iyo ron.
11 Sii aken rekano tegoa so kedenan ko na di aken sekano den telikodan.
12 Mipageepeda aken sekano; kebaloy ako a Tohan iyo, na kebaloy kano a manga pagtaw
aken.
13 Saken so Allah a Tohan iyo a miyakaliyo rekano sa Misir kaan kano mapokas ko
kaooripeni rekano o manga Imisiren. Piyotol aken so potaw a inikokoong rekano kaan
kano pepekalalakaw a makapepangandag.
So Indaneg ko di Kaparatiyaya
14 “Ogaid na o di ako niyo pakinega ago di niyo tomanen so langon angkai a sogoan
15 Ago isili niyo so manga taritib aken ago ongkiren iyo so manga kokoman aken ago
sogoken iyo so kapasadan aken
16 Na giyai i ikidia ko rekano: pagowitan ko sekano sa piyakalekelek a kabinasaan, ago
rayor a paniyakit, ago manga mayaw a ikebinasa o manga mata niyo ago ikeilang o
niyawa niyo. Da a lalaw a kaseodi niyo ko lopa iyo ka so manga ridoay niyo i pekakan ko
maperagon on.
17 Makiperidoay ako rekano na tebanen kano o manga ridoay niyo. So pepanga gogowad
rekano na aya rekano makapendato, na pemalagoy kano apiya pen o da a ba rekano dii
seloba.
18 “Apiya pen mitana aken rekano ini langon na o di ako niyo pen pamakinega na
makapito matakep a karegen o ipendaneg aken rekano sabap ko manga dosa niyo.
19 Mbinasaan ko so mategas a katatakabor iyo ka di aken pekioranan so inged iyo, na
pemakategas so lopa iyo a lagid o tombaga.
20 Da a lalaw a kapepanamar iyo nggalebek, ka di keragonan so lopa iyo sa pereperan aya
pen o ba mamangonga so manga kayo niyo.
21 “O ipeteros iyo baden so kapegongkira niyo raken ago di ako niyo den pemakinegen
na pelonsanan aken sekano domaneg sa makapito matakep a badal o manga dosa niyo.
22 Pekigobat aken sekano ko manga wawaraw a binatang na pemonoon iran so manga
wata iyo ago polangen iran so manga pangangayamen iyo, na pepekaito kano taman sa
keawaan sa taw so manga lalan iyo.
23 “O di rekano pen milalang angkai a manga daneg ka itataros iyo baden so kaperidoa
niyo raken
24 Na itataros aken mambo a kariridoa ko rekano na makapito pen matakep a karegen o
ipendaneg aken rekano sabap ko manga dosa niyo.
25 Pekiwitan ko sekano sa katidawa ka iseop aken so kiyabarobaa niyo ko kapasadan
aken sii rekano. Na o mamalagoy kano ko manga siti niyo na pagowitan ko sekano ron sa
manga paniyakit, na kepalad kano ko kapaar o manga ridoay niyo.
26 Potolen ko so kapepekakowa niyo sa pangenengken; sabap sii na kepakay a so sapolo
a manga babay na kitinda iran so maito a manga paan iran sii ko sasatiman bo a pogon,
Tekesen iran so paan a ipembegay iran rekano, na apiya makakan kano sii langon na di
kano ron keosog.
27 “Amay ka maipos ai langon na o di ako niyo pen pakinega ago peperidoon ako niyo
pen
28 Na pakapemborngaten ko rekano so somosokeyaw a rarangit aken ko kaperidoa ko
rekano na makapito matakep a kapelonsani ko rekano domaneg sabap ko manga dosa
niyo.
29 Kekan iyo so sapo o manga wata iyo a manga mama ago manga babay.
30 Mbinasaan ko so manga darpa iyo a pesimbaan ko manga barahala, ago nggebaan ko
so manga aparan iyo a petotongan sa doka, na ipemaraser aken so manga bangkay niyo ko
liyawaw o miyanga tetempag a manga barahala niyo, na ikengingiri aken sekano.
31 Pelaslasen ko so manga siti niyo ago mbinasaan ko so manga darpa iyo a
pemanimbaan, na di aken den terimaan so mamot a ipesepaat iyo.
32 Sabap ko tarotop a kapelaslasa ko ko inged iyo na apiya so manga ridoay niyo a keden
roo na pememesa ko kakeilaya iran on.
33 Iperak aken sekano ko manga nasiyon na ipenaloba aken rekano so pedang aken.
Keawaan so inged iyo ago penga gegeba so manga siti niyo.
34-35 Na sii ko masa a kaaawai niyo ron sii ko kitataogen rekano ko inged o manga
ridoay niyo na pekadeke so lopa iyo ago ipekapiya niyan so tarotop a kandeke iyan a da
niyo ron mibegay ko oman makapito ragon sii ko kababaling iyo ron pen.
36 So makapantag ko miyamakapagoyag rekano sii ko manga inged o manga ridoay niyo

na tanto aken a sewanen so manga poso iran kaan apiya so pogipit o manga raon a
pesemberen o ndo na ipekelek iran, na pemalagoy siran a datar o ba pepamalagoy ko
katidawa, na penga ooteng siran apiya pen da a ba kiran peseloba.
37 Pemangirepang so oman i isa ko ped iyan sii ko kapemalagoy iran a datar o ba
peselobaan siran a pedang, na di kano den pekaato ko manga ridoay niyo.
38 Pematay kano sii ko ped a manga nasiyon, na penga lalamed kano o lopa o manga
ridoay niyo.
39 Na so kelamba rekano na penga dadadas sii ko inged o manga ridoay niyo sabap ko
manga dosa niyo ago so manga dosa o manga apo iyo.
40 “Ogaid na sii sa moripori na terimaan o manga pagtaw aken so kadostaan iran ago so
kadostaan o manga apo iran sii ko kiyaongkira ago kiyaridoa iran raken
41 A aya kiyasabapan ko kiyaridoa ko kiran ago so kinitaogen ko kiran ko inged o manga
ridoay iran. Sa masa oto na amay ka minidaneg kiran den so manga dosa iran na
ipengalimbabaan iran so di peratiyaya a manga poso iran.
42 Na tedeman ko so kapasadan aken ki Yakob ago si Iskak ago si Ibrahim na ipemataan
aken so initopa ko kiran mipantag ko lopa.
43 Ogaid na disomala a pekaawaan siran pasin ko lopa kaan ai mapakapiya ko
kapakadedeke iyan sii ko kaaawai ran on, na itena kiran so manga dosa iran ko kinisilin
iran ko manga kokoman aken ago so kiyasodiya iran ko manga taritib aken.
44 Apiya pen oto na sii ko kasisii ran pen ko inged o manga ridoay iran na di aken siran
ipendarainon aya pen o ba aken siran talikodi sa kapolanga ko kiran, ka ikepos ai o
kapasadan aken kiran, na saken so Allah a Tohan iran.
45 Ogaid na sabap kiran na tedeman ko so kapasadan aken ago so manga apo iran a
miyapamakaliyo aken sa Misir sii ko kamamasai ron o manga nasiyon kaan saken, a so
Allah, na mabaloy a Tohan iran."
46 Langon ai na manga taritib, manga kokoman ago manga sogoan a inibegay o Allah ko
manga Israil a miyakanggolalan ki Mosa sii ko Palaw a Sinay.
LIBITIKOS 27
Manga Taritib mipantag ko Samaya a Tindos a Pamemegayan ko Allah
2 “Teroa ngka ko manga Israil a: O aden a semaya sa tindos sa kisenggain iyan ko isa a
taw sii ko Allah a nggolalan ko kapalada niyan ko datar iyan sa bali
3-7 Na giyai i pirak a imbadal ko taw a pekaokiten ko timbangan sii ko Barombarong:
so mama a miyakapagidad sa dowa polo ragon taman ko nem polo ragon na lima polo a
pelata a pirak; so babay na telo polo a pelata a pirak;
so mama ipoon ko lima ragon a idad iyan taman sa dowa polo ragon na dowa polo a
pelata a pirak; so babay na sapolo a pelata a pirak;
so mama ipoon ko saolan a idad iyan taman sa lima ragon na lima timan a pelata a
pirak; so babay na telo timan a pelata a pirak;
so mama a miyakapagidad sa nem polo ragon ago lawan pen na sapolo ago lima a
pelata a pirak; so babay na sapolo a pelata a pirak.
8 O aden a misemaya sa taw a di niyan kebaog so miyatendo on a arga na kewit iyan ko

imam so taw a inisemaya iyan na so imam i pekabetad on sa bali niyan a makaaayon ko
kakebaoga on o mama a misemaya.
9 “O aya minisemaya iyan na ayam a kepakay a isapaat ko Allah na kebaloy ai a

isesenggay ko Allah.
10 Di niyan kesambian angkai a ayam apiya anda ko lebi pen a mapiya so isembi iyan on
o di na marata. Ogaid na o sambii niyan ai sa salakaw a ayam na palaya den ai kisenggay
ko Allah.
11 O so ayam a inisemaya iyan na karam a di sak a isepaat ko Allah na kewit iyan ai ko
imam
12 Na pagargaan iyan ai a mipepasod ko kapiya o di na karata o ayam, na saden sa
ipagarga on o imam na giyanan den i arga iyan.
13 Na o kabaya o misemaya ko ayam a imbegay niyan baden so imbadal on a pirak na
kioman iyan on so ikalima bagi ko arga iyan.
14 “O aden a taw a isenggay niyan so walay niyan a rek o Allah na so imam i pekakokom
on o mapiya o di na kena a ba mapiya, na saden sa ipagarga iyan on na giyoto den i arga
iyan.
15 Na o kabaya o taw a imbegay niyan baden so imbadal on a pirak na kioman iyan on so
ikalima bagi ko arga iyan.
16 “O aden a taw a isenggay niyan ko Allah so ped ko lopa a miyakewali niyan na so bali
niyan na kipasod ko kala o kisaod on a oniin na aya arga o dowa gatos ka gantang a
bantad na sapolo a pelata a pirak.
17 O mitabo ko Ragon a Kapakaasal so kisenggain iyan ko Allah sangkoto a lopa na di
den kealin so tarotop a bali niyan.
18 O aya kisenggain iyan on na maipos so Ragon a Kapakaasal na kearga ini o imam a
mipepasod ko kadakel o ragon a miyalamba taman ko talondog a Ragon a Kapakaasal, na
kelebatan so tarotop a arga iyan.
19 Amay ka so taw a sominggay ko lopa na kebayaan iyan maon na kioman iyan on so
ikalima bagi ko arga iyan na ketangan iyan den peroman.
20 Ogaid na o di niyan aona so lopa ago ba niyan den pesaa ko ped a taw na di den ai
keaon.
21 Na amay ka makaoma so talondog a Ragon a Kapakaasal na pembaloy so lopa a soti a
isesenggay ko Allah, na kerek ai o manga imam.
22 “O aden a taw a senggay ko Allah sa lopa a miyapamasa niyan a kena a ba ped ko

miyakewali niyan
23 Na kearga ini o imam a ipepasod ko manga ragon taman ko Ragon a Kapakaasal, na
disomala a kebayadan o mama so arga iyan sii den sangkoto a gawii ka isenggay ini a rek
o Allah. Ogaid na sii ko Ragon a Kapakaasal na ikesoy angkoto a lopa ko asal a kirek on
a ron iyan miyapamasa.
25 “So kapegargaa o imam ko langon ai na mipepasod ko pirak a pepekaokiten ko

timbangan ko Barombarong.
26 “Di kepakay o ba senggain ko Allah so popaw sa lawas o manga ayam ka kagiya so

popaw sa lawas iran na andang den a rek iyan apiya anda ko sapi, bilibili o di na kambing.
27 Ogaid na so popaw sa lawas o karam a ayam na keaon ko matetendo a arga iyan a
kioman on pen so ikalima on bagi. O di ini pagaona na mapepasa o imam ko ipagarga on.
28 “Ogaid na apiya antonaa a rek o taw a taman sa pakataman a kinisenggain iyan on ko

Allah, apiya anda ko taw, ayam, o di na lopa a miyakewali niyan na di ini mapepasa aya
pen o ba maaon; so langon taman a inisenggay ko Allah sa datar ai na rek iyan sa taman
sa pakataman.
29 Saden sa taw a minisenggay ko kambinasaa on na di den keaon; paliyogat a mbonoon
sekaniyan.
30 “Rek o Allah so ikasapolo bagi ko langon taman a pekeragon iyo apiya anda ko
pereperan a poon ko lopa iyo o di na manga onga a poon ko kayo; isesenggay ini ko
Allah.
31 O kebayai maon o mama so ped ko ikasapolo bagi iyan na kioman iyan on so ikalima
bagi ko arga iyan..
32 So isa ko oman i sapolo a ayam a sapi, bilibili o di na kambing na rek o Allah. Igira a
pembilangen so manga ayam na so oman i ikasapolo on na kisenggay ko Allah.
33 So kirek ko manga ayam na di on mapeparo o ba niyan pen pariksaa o mapiya o di na
marata angkai a ayam, aya pen o ba niyan kasambii. O sambii niyan na so siyambian iyan
ago so inisambi iyan on na palaya den ai pembaloy a soti a isesenggay ko Allah ago di
den keaon.
34 Giyai i manga sogoan a inibegay o Allah ki Mosa roo ko Palaw a Sinay para ko manga
Israil.
MANGA BILANGAN
MANGA BILANGAN 1
So Paganay a Kiyabilanga ko manga Israil
Sii ko paganay a gawii ko ikadowa olan ko ikadowa ragon oriyan o kiyapakaawa o manga
Israil sa Misir na sisii so manga Israil ko Disirto sa Sinay. Na miyakimbitiyarai so Allah
ki Mosa sii ko Barombarong a dii Telabokan a tig iyan a
2-3 “Bilanga niyo ago si Aron so langon a taw ko isa ka maginged a Israil a nggolalan ko
oman i mbatabataa ago oman i pamiliya. Pelilistaan iyo so manga ngaran o langon a
mama a miyakapagidad sa dowa polo ragon ago lawan pen a kepakay a makasondaro ko
katidawa.
4 Oman i isa ka mbatabataa na pekapoon on so sesakataw a mama a olowan ko pamilya a
pekaogop rekano.
5-15 Giyai i manga ngaran o manga mama a miyapili sangkai a galebek:
Si Ilisor a wata i Sidiyor a poon ko mbatabataa a Robin,

si Silomiyal a wata i Sorisiyaday a poon ko mbatabataa a Simiyon,
si Nasiyon a wata i Aminadab a poon ko mbatabataa a Yodah,
si Nitanil a wata i Sowar a poon ko mbatabataa a Isakar,
si Iliyab a wata i Hilon a poon ko mbatabataa a Sibolon,
si Ilisiyama a wata i Amihod a poon ko mbatabataa a Ipraim a wata i Yosop,
si Gamaliyal a wata i Pidasor a poon ko mbatabataa a Manasih a wata i Yosop,
si Abidan a wata i Gidiyoni a poon ko mbatabataa a Baniyamin,
si Ahiyasir a wata i Amisiyaday a poon ko mbatabataa a Dan,
si Pagiyal a wata i Okran a poon ko mbatabataa a Asir,
si Iliyasap a wata i Diyowil a poon ko mbatabataa a Gad,
ago si Ahira a wata i Inan a poon ko mbatabataa a Naptali.
16-17 Piyakaonot i Mosa ago si Aron angkai a sapolo ago dowa a manga olowan
18 Na tinimo iran so langon o isa ka maginged sii ko paganay a gawii ko ikadowa olan na
binilang iran so manga taw ko oman i mbawataan ago pamiliya sii ko oman i mbatabataa.
Miyamangilista so manga ngaran o langon a mama a miyadowa polo ragon a idad iyan
ago lawan pen.
19 Binilang siran i Mosa roo ko Disirto sa Sinay a so den so inisogo on o Allah.
20-46 Giyai i kadakel o kepakay a makasondaro a manga mama a miyadowa polo ragon a
idad iyan ago lawan pen a miyamakapoon ko oman i mbawataan ago pamiliya iran:
Pat polo ago nem nggibo ago lima gatos a poon ko mbatabataa a Robin a kaka a wata i
Yakob,
Lima polo ago siyaw nggibo ago telo gatos a poon ko Simiyon,
Pat polo ago lima nggibo ago nem gatos ago lima polo a poon ko Gad,
Pito polo ago pat nggibo ago nem gatos a poon ko Yodah,
Lima polo ago pat nggibo ago pat gatos a poon ko Isakar,
Lima polo ago pito nggibo ago pat gatos a poon ko Sibolon,
Pat polo nggibo ago lima gatos a poon ko Ipraim a wata i Yosop,
Telo polo ago dowa nggibo ago dowa gatos a poon ko Manasih a wata i Yosop,
Telo polo ago lima nggibo ago pat gatos a poon ko Baniyamin,
Nem polo ago dowa nggibo ago pito gatos a poon ko Dan,
Pat polo ago isa nggibo ago lima gatos a poon ko Asir,
Lima polo ago telo nggibo ago pat gatos a poon ko Naptali
Aya kadakel iran langon na nem gatos ago telo nggibo ago lima gatos ago lima polo.
47 Ogaid na so manga taw ko mbatabataa a Libi na da mirakes ko kiyabilanga kiran

48 Ka miyatero den o Allah ki Mosa a
49 “Amay ka mabilang ka so manga taw sa Israil na di ngka on perakesen milang so
mbatabataa a Libi.
50 Ka pakikibiren ka kiran baden so Barombarong a pembetadan ko Kaban sa Kapasadan
ago so langon o manga pagigimo ron ago manga kasangkapan. Siran i pepekaawid ko
Barombarong ago so manga pagigimo ron sii ko kapelalakaw niyo, na siran i pepekaipat
on ago dii makakempo ko melilibeta on.
51 Igira a ipepegogalin so Barombarong na so manga taw ko mbatabataa a Libi i
pepekatimo on, na igira a pembangonen na siran i pepekatindeg on. Apiya antawaa a
salakaw a taw i mobay ron na disomala a mbonoon.
52 So ped ko manga Israil na dii makakempo a dii melompolompok a so oman i
mbatabataa na sii ko rek iran a darpa ko atag o pandi iran.
53 Ogaid na so manga taw ko mbatabataa a Libi na dii kempo ko melilibeta ko
Barombarong a pembetadan ko Kaban sa Kapasadan sa kapepagipata iran on kaan da a
makadaseg on a salakaw a kesabapan ko kitanaan o Allah ko rarangit iyan ko isa ka
maginged a Israil.
54 Na so den so langon a inisogo o Allah ki Mosa i pinggolaola o manga Israil.
MANGA BILANGAN 2
So Kapakambebetad o manga Mbatabataa sii ko Kampo

2 “So manga Israil na makapekempo sii ko melilibeta ko Barombarong a dii Telabokan a
malo siran on makawawatan, so oman i isa kiran na sii ko atag o toos o lompok iyan ago
so pandi o pamiliya niyan.
3-4 Sii sa tampar sa sebangan o Barombarong na ron dii makakempo so lompok o Yodah
a aya matatago on na so manga mbatabataa a Yodah, Isakar ago Sibolon. Aya olowan o
mbatabataa a Yodah na si Nason a wata i Aminadab, na aya kadakel o manga sondaro
niyan na pito polo ago pat nggibo ago nem gatos.
5 So mbatabataa a Isakar na makapekempo a telondog kiran. Aya olowan iran na si

Nitanil a wata i Sowar,
6 Na aya kadakel o manga sondaro niyan na lima polo ago pat nggibo ago pat gatos.
7 So mbatabataa a Sibolon na aya kiran talondog. Aya olowan iran na si Iliyab a wata i
Hilon,
8 Na aya kadakel o manga sondaro niyan na lima polo ago pito nggibo ago pat gatos.
9 So langon o manga sondaro sii ko lompok o Yodah na magatos ago walo polo ago nem
nggibo ago pat gatos. Siran i pekaona gomanat ko kapelalakaw.
10-11 Sii sa pagabagatan na ron dii makakempo so lompok o Robin a aya matatago on na
so manga mbatabataa a Robin, Simiyon ago Gad. Aya olowan o mbatabataa a Robin na
si Ilisor a wata i Sidiyor, na aya kadakel o manga sondaro niyan na pat polo ago nem
nggibo ago lima gatos.
12 So mbatabataa a Simiyon na makapekempo a telondog kiran. Aya olowan iran na si

Silomil a wata i Sorisaday,
13 Na aya kadakel o manga sondaro niyan na lima polo ago siyaw nggibo ago telo gatos.
14 So mbatabataa a Gad na aya kiran talondog. Aya olowan iran na si Iliyasap a wata i
Diyowil,
15 Na aya kadakel o manga sondaro niyan na pat polo ago lima nggibo ago nem gatos ago
lima polo.
16 So langon o manga sondaro sii ko lompok o Robin na magatos ago lima polo ago isa
nggibo ago pat gatos ago lima polo. Siran i ikadowa a pengganat ko kapelalakaw.
17 Aya tomalondog kiran a pengganat na so manga taw ko mbatabataa a Libi a

pepekaawid ko Barombarong a dii Telabokan. Pekalalakaw siran sii ko pageletan o dowa
lompok a maoona kiran ago so dowa on lompok a sii sa oriyan. So langon o manga
mbatabataa na aya kapakatotondotondog iran lomalakaw na ipepasod ko kapakambebetad
iran ko manga lompok iran a so oman i isa a lompok na sii ko atag o pandi iyan.
18-19 Sii sa sedepan na ron dii makakempo so lompok o Ipraim a aya matatago on na so
manga mbatabataa a Ipraim, Manasih ago Baniyamin. Aya olowan o mbatabataa a Ipraim
na si Ilisiyama a wata i Amihod, na aya kadakel o manga sondaro niyan na pat polo
nggibo ago lima gatos.
20 So mbatabataa a Manasih na makapekempo a telondog kiran. Aya olowan iran na si

Gamaliyal a wata i Pidasor,
21 Na aya kadakel o manga sondaro niyan na telo polo ago dowa nggibo ago dowa gatos.
22 So mbatabataa a Baniyamin na aya kiran talondog. Aya olowan iran na si Abidan a

wata i Gidiyoni,
23 Na aya kadakel o manga sondaro niyan na telo polo ago lima nggibo ago pat gatos.
24 So langon o manga sondaro sii ko lompok o Ipraim na magatos ago walo nggibo ago
magatos. Siran i ikatelo a pengganat ko kapelalakaw.
25 Sii sa pagotaraan na ron dii makakekempo so lompok o Dan a aya matatago on na so

manga mbatabataa a Dan, Asir ago Naptali. Aya olowan o mbatabataa a Dan na si
Ahiyasir a wata i Amisiyaday, na aya kadakel o manga sondaro niyan na nem polo ago
dowa nggibo ago pito gatos.
27 So mbatabataa a Asir na makapekempo a telondog kiran. Aya olowan iran na si

Pagiyal a wata i Okran,
28 Na aya kadakel o manga sondaro niyan na pat polo ago isa nggibo ago lima gatos.
29 So mbatabataa a Naptali na aya kiran talondog. Aya olowan iran na si Ahira a wata i
Inan,
30 Na aya kadakel o manga sondaro niyan na lima polo ago telo nggibo ago pat gatos.
31 So langon o manga sondaro sii ko lompok o Dan na magatos ago lima polo ago pito
nggibo ago nem gatos. Siran i pekeori gomanat ko kapelalakaw.
32 Giyanan so manga taw sa Israil a minibilang a mipepasod ko manga pamiliya iran.

Aya kadakel o miyamangilista langon a matatago ko manga lompok iran na nem gatos
ago telo nggibo ago lima gatos ago lima polo.
33 Ogaid na so manga taw ko mbatabataa a Libi na da mirakes ko kiyabilanga ko ped a
manga Israil a so den so inisogo o Allah ki Mosa.
34 Ininggolalan o manga Israil so langon taman a inisogo o Allah ki Mosa. Oman i isa ka
mbatabataa ago pamiliya na dii kempo ago pepelalakaw sii ko atag o oman i pandi iran.
MANGA BILANGAN 3
So manga Wata i Aron
Giyai i totolan ko pamiliya i Aron ago si Mosa sii ko masa a kinimbitiyarain o Allah ki
Mosa sii ko Palaw a Sinay.
2 Aya manga wata i Aron na siki Nadab a so kaka, Abiho, Iliyasar ago si Itamar.
3 Siran i kiyaidinan ago minisenggay a makapegimam.
4 Ogaid na si Nadab ago si Abiho na miyamatay ko hadapan o Allah sii ko Disirto sa
Sinay isako somapaat siran on sa apoy a da maparoli o Allah. Na sabap sa da a ba iran
manga wata na si bo si Iliyasar ago si Itamar i miyakapagimam a ped o ama iran a si
Aron.
So Kinitoroon ko Mbatabataa a Libi a Makapanalagad ki Aron

6 “Pakitawagen ka so mbatabataa a Libi na pakadarpaa ngka siran ko hadapan i Aron a
imam kaan siran mabaloy a manga salinggogopa iyan.
7 Mipenggolalan iran so manga sangan iran para ki Aron ago sii ko langon o isa ka
maginged a Israil ko di iran dii kanggolaolaa ko galebek iran ko Barombarong a dii
Telabokan.
8 Siran pen i pekakibir ko langon a kasangkapan ko Barombarong sii ko di iran on dii
kanggalebek para ko manga Israil.
9 Senggain ka so mbatabataa a Libi a aya makapenalagad ki Aron ago so manga wata
iyan.
10 Toroon ka si Aron ago so manga wata iyan a aya manga imam; na o aden a ped a
tepeng magimam na disomala a mbonoon."

12-13 “Pinili aken so mbatabataa a Libi a poon ko manga Israil a mabaloy a rek aken, ka
kagiya isako pamonoon ko so oman i wata a mama a popaw sa lawas ko manga Imisiren
na inisenggay aken a rek aken so langon o manga mama a popaw sa lawas ko manga
Israil a melagid so taw ago so ayam. Ogaid na imanto na miyakowa ko so mbatabataa a
Libi a inisambi ko manga popaw sa lawas ko manga Israil. Rek aken siran; saken so
Allah."
Binilang so Mbatabataa a Libi
14 Pitero o Allah ki Mosa roo ko Disirto sa Sinay a

15 “Bilanga ngka so manga taw ko oman i pamiliya ko oman i totonganaya sii ko
mbatabataa a Libi. Bilanga ngka so oman i mama a miyakapagidad sa saolan ago lawan
on pen."
16 Giyoto a binilang siran i Mosa a so den so inisogo on o Allah.
17-20 So manga ngaran o manga wata i Libi na si Girson, si Kohat ago si Mirari, a so
oman i isa kiran na aya apoapoan o mbawataan a ibebeto ron so ngaran iyan.
So manga wata i Girson na si Libni ago si Simay.
So manga wata ki Kohat na siki Amram, Isar, Hibron ago si Osiyal.
So manga wata i Mirari na si Mali ago si Mosi.
So oman i isa kiran na aya apoapoan o mbawataan a ibebeto ron so ngaran iyan.
Giyai so manga mbawataan a kiyababadan ko Libi.
21 So kiyababadan ki Girson na so manga mbawataan i Libni ago si Simay.

22 So kadakel o langon a manga mama a miyakasaolan a idad iyan ago lawan pen a
miyabilang na pito nggibo ago lima gatos.
23 Giyangkai a manga mbawataan i Girson na sii makapekempo ko sedepan o
Barombarong
24 A aya olowan iran na si Iliyasap a wata i Lail.
25 Aya sangan iran na so kapekibira ko Barombarong a dii Telabokan a rakes o manga
sapeng iyan, so kortina ko gimowa o Barombarong,
26 So manga rending ko lamalama a ililibet ko Barombarong ago so aparan, so kortina ko
gimowa o lamalama, ago so manga tali a pegosaren sangkai langon a manga nganin.
27 So kiyababadan ki Kohat na so manga mbawataan i Amran, Ishar, Hibron ago si

Osiyal. Aya kadakel o manga mama a miyakasaolan a idad iyan ago lawan pen na walo
nggibo ago nem gatos. Aya sangan iran na so kapekibira ko Soti a Darpa.
29 Giyangkai a manga mbawataan i Kohat na sii makapekempo ko pagabagatan o
Barombarong,
30 Na aya olowan iran na si Ilisapan a wata i Osiyal.
31 Piyakisangan kiran so kapekibira ko Kaban sa Kapasadan, so lamisaan, so petegoan ko
manga solo, so manga aparan, so manga kasangkapan a pegosaren o imam ko Soti a
Darpa, so kortina a iperending ko gimowa o Lebi a Soti a Darpa ago so langon taman a
pegosaren sangkai a manga nganin.
32 Si Iliyasar a imam, a so wata i Aron, na aya pangolo o manga olowan ko mbatabataa a

Libi. Sekaniyan i initoro a maporo ko siran oto a pepekakibir ko Soti a Darpa.
33 So kiyababadan ki Mirari na so manga mbawataan i Mali ago si Mosi.

34 Aya kadakel o manga mama a miyakasaolan a idad iyan ago lawan pen a miyabilang
na nem nggibo ago dowa gatos.
35 Aya olowan o manga mbawataan i Mirari na si Soril a wata i Abihail. Sii siran
makapekempo ko pagotaraan o Barombarong.
36 Aya piyakisangan kiran a galebek na so kapekibira ko manga papan o Barombarong,
so manga pamalawagen, so manga polaos a rakes o manga onayan iran, so manga
pembetadan on, ago so langon a kasangkapan a mararambit ko kapegosara sangkai a
manga nganin
37 Taman den ko manga tokod o mililibet on a lamalama a rakes o manga onayan iran, so
manga pasek ago so manga tali.
38 Si Mosa ago si Aron ago so manga wata iyan na sii makapekempo ko danga o
Barombarong sa tampar sa sebangan. Siran i pekibir ko Soti a Darpa para ko manga
Israil. Apiya antawaa a ped a taw i tomepeng mobay ko Soti a Darpa na disomala a
mbonoon.
39 Aya kadakel langon o manga mama ko mbatabataa a Libi a miyabilang ko kinisogoon

on o Allah a miyamakapagidad sa saolan ago lawan pen na dowa polo ago dowa nggibo.
So Mbatabataa a Libi a Minisaliyo ko manga Mama a Popaw sa Lawas
40 Na pitero o Allah ki Mosa a "Bilanga ngka so langon o manga mama a popaw sa lawas
ko manga Israil a miyakasaolan a idad iyan ago lawan pen na pelilistaan ka so manga
ngaran iran.
41 Rek aken siran, ogaid na senggain ka so manga taw ko mbatabataa a Libi a misaliyo
kiran, ago senggain ka so manga pangangayamen o mbatabataa a Libi a misaliyo ko
langon a popaw sa lawas ko manga pangangayamen o manga Israil. Saken so Allah."
42 Na binilang i Mosa so langon a popaw sa lawas ko manga Israil a so den so inisogo on

o Allah.
43 Aya kadakel iran a manga mama a miyakasaolan a idad iyan ago lawan pen na dowa
polo ago dowa nggibo ago dowa gatos ago pito polo ago telo.

45 “Senggain ka a rek aken so manga taw ko mbatabataa a Libi a misaliyo ko langon a
mama a popaw sa lawas ko manga Israil, ago senggain ka so manga pangangayamen o
mbatabataaa a Libi a misaliyo ko popaw sa lawas ko manga pangangayamen o manga
Israil. Saken so Allah.
46 Ogaid na disomala a keaon ka so dowa gatos ago pito polo ago telo a manga popaw sa
lawas ko manga Israil a milalawan ko kadakel o manga taw ko mbatabataa a Libi.
47 Panekati ngka sa ndilima lad a pirak so oman i isa kiran a piyakaokit ai ko timbangan
a pegosaren ko Barombarong.
48 Na began ka so pirak ki Aron ago sii ko manga wata iyan a aya miniaon ko minilawan
kiran."
49 Mandiyadi na piyanekat i Mosa so pirak
50 A poon sangkai a manga popaw sa lawas ko manga Israil na aya kala iyan na sanggibo
ago telo gatos ago nem polo ago lima lad a pirak a piyakaokit ko timbangan ko
Barombarong
51 Na inibegay niyan ki Aron ago sii ko manga wata iyan a so den so inisogo on o Allah.
MANGA BILANGAN 4
So manga Sangan o Mbawataan i Kohat

2 “Bilanga niyo so sabaad ko mbatabataa a Libi a maaped ko mbawataan i Kohat.
3 Bilanga niyo so langon o manga mama ipoon ko telo polo ragon a idad iyan taman sa
limapolo a kepakay a makanggalebek ko Barombarong a dii Telabokan.
4 “Aya galebek o manga mbawataan i Kohat sii ko Barombarong na so kapekibira ko lebi

a soti a manga betad.
5 Igira a ipagogalin so kampo na pekasoled si Aron ago so manga wata iyan ko
Barombarong na kekowa iran on so kortina ko danga o Kaban sa Kapasadan ago kisapeng
iran ko Kaban.
6 Kelapisan iran ai sa kobal a kambing ago kebongkosan iran pen sa dinis a lombos a
biro. Moripori na ketago iran on so manga tibal iyan.
7 “Oriyan iyan na kekayatan iran sa biro a dinis so lamisaan a pesepaatan sa paan ko

Allah, na penagoon iran on so manga lapad, so manga pinggan, so manga ladiya ago so
manga omoy a petegoan sa arak a ipesepaat, na ndodon den so paan a lalayon on ibebetad.
8 Kesapengan iran ai sa mariga a dinis ago kelapisan iran pen sa kobal a kambing; na
ketago iran on so manga tibal iyan.
9 “Pekakowa siran sa biro a dinis na kisapeng iran ko petegoan sa solo a rakes o manga
solo on, so manga ipelipit ko sombowan iyan, so manga talam, ago so manga omoy a
petegoan sa lana.
10 Na palaya ini a mirarakes ko manga kasangkapan on na kepotos iran sa kobal a
kambing ago kibetad iran ko ipetibal on.
11 “So aparan a bolawan na kebongkosan iran sa biro a dinis ago kelapisan iran sa kobal
a kambing na ketago iran on so manga tibal iyan.
12 Oriyan iyan na kekowa iran so langon a kasangkapan a pegosaren ko kapepanalagad
sii ko Soti a Darpa na kepotos iran ai sa biro a dinis a lalapisan sa bombol a kambing, na
kibetad iran ai ko ipetibal on.
13 “Kekowa iran so ombi ko aparan a tombaga na kesapengan iran sa mariga a dinis.

14 Oriyan iyan na kibetad iran ko liyawaw niyan so langon a kasangkapan a pegosaren ko
kapesepaat ko aparan, so manga petengelan sa waga, so manga tinidor para ko sapo, so
manga sakerad ago so manga ladiya. Kesapengan iran ai langon sa kobal a kambing, na
ketago iran on so manga tibal iyan.
15 “Amay ka mapasad somapeng i Aron ago so manga wata iyan so soti a manga igagama
ago so langon a soti a kasangkapan na amay ka matiyagar den so kampo sa kipagogalinen
on na magobay ron so manga mbawataan i Kohat a aya magawid sangkoto a manga
nganin, ogaid na di iran den keseko so soti a manga nganin ka pematay siran."
"Giyai so manga sangan o manga mbawataan i Kohat mipantag ko Barombarong a dii
Telabokan.
16 “Si Iliyasar a wata i Aron a imam na aya komikibir ko langon o Barombarong ago so
langon taman a ipamemetad on a mirarakes on so soti a manga pagigimo ago manga
kasangkapan on. Kekibir iyan so lana a ipesolo, so mamot a doka, so ipesepaat lalayon a
pereperan and so lana diyabat."

18 “Di niyo pekipolangen so manga mbawataan i Kohat sii ko mbatabataa a Libi.
19 Ka giyai i nggolaolaa niyo kiran kaan siran di pematay igira a pepekaobay siran ko lebi
a soti a manga nganin: pekaonot kiran si Aron ago so manga wata iyan ko kasoledi iran
ko Barombarong, na pekisangan iran ko oman i isa a mama so galebek iyan ago so
pagawidan iyan.
20 Ka o makasoled on so manga mbawataan i Kohat ago mailay iran so soti a manga
nganin sii ko kapesepengi ron i Aron ago so manga wata iyan na pematay siran.
So manga Sangan o Mbawataan i Girson

22 “Bilanga ngka so manga taw ko oman i pamiliya ko oman i totonganaya ko
mbawataan i Girson.
23 Bilanga ngka so langon o manga mama ipoon ko telo polo ragon a idad iyan taman sa
limapolo a kepakay a makanggalebek ko Barombarong a dii Telabokan.
24 Aya sangan iran a manga galebek na so kapegawidi iran sangkai a manga betad:
25 So Barombarong a mirarakes on so manga kortina on, so ipesepeng on, so kobal a
kambing a ipelapis ko sapeng, so kortina o gimowa iyan
26 Ago so pen so manga rending o lamalama a mililibet ko Barombarong ago so aparan,
so rending o gimowa o lamalama, ago so manga tali ago so langon o kasangkapan a
mararambit ko kapegosara sangkai a manga nganin. Giyai i galebek iran.
27 Si Aron ago so manga wata iyan i makapemando ko manga mbawataan i Girson
mipantag ko manga atastanggongan iran apiya anda ko kapegawid ago so ped a galebek.
Disomala a pepakisangan iyo kiran so langon a keawidan iran.
28 Giyai i manga sangan o manga mbawataan i Girson sii ko Barombarong a dii
Telabokan, na si Itamar a wata i Aron na aya tomatanding ko galebek iran."
So manga Sangan o Mbawataan i Mirari
29 Pitero pen o Allah a "Bilanga ngka so manga taw ko oman i pamiliya ko oman i
totonganaya ko mbawataan i Mirari.
30 Bilanga ngka so langon a manga mama ipoon ko telo polo ragon a idad iyan taman sa
limapolo a kepakay a makanggalebek sii ko Barombarong a dii Telabokan.
31 Aya sangan iran a galebek na so kaawidi ko manga papan, so manga pamalawagen, so
manga polaos a rakes o manga onayan iran
32 Taman den ko manga tokod o mililibet on a lamalama a rakes o manga onayan iran, so
manga pasek, so manga tali, ago so langon a kasangkapan a mararambit ko kapegosara
sangkai a manga nganin. Na pakisangen ka ko oman i mama so matetendo a manga
nganin a pagawidan iyan.
33 Giyai i galebek o manga mbawataan i Mirari sii ko kapenggalebek iran ko
Barombarong, na aya tomatanding on na si Itamar a wata i Aron a imam."
So Kiyabilanga ko Mbatabataa a Libi
34-48 Na tiyoman i Mosa ago si Aron ago so ped a manga olowan o manga Israil so
inisogo o Allah. Binilang iran so manga taw ko oman i pamiliiya ko oman i totonganaya
ko oman i mbawataan sii ko mbatabataa a Libi kaan iran mapariksa so kadakel o manga
mama ipoon ko telo polo ragon a idad iyan taman ko lima polo a kepakay a
makanggalebek ko Barombarong a dii Telabokan. Aya kadakel o manga mbawataan i
Kohat na
dowa nggibo ago pito gatos ago lima polo,

dowa nggibo ago nem gatos ago telo polo ko mbawataan i Girson, na
telo nggibo ago dowa gatos ko mbawataan i Mirari.
Aya kadakel iran langon na walo nggibo ago lima gatos ago walo polo.
49 Minilista so oman i isa kiran a so den so inisogo o Allah ki Mosa, na bigan so oman i
isa kiran sa galebek. a ipepasod ko sogoan o Allah a miyakanggolalan ki Mosa.
MANGA BILANGAN 5
So Kiyasotiya ko Kampo

2 Sogoon ka ko manga Israil a "Pakaliyowa niyo ko kampo so oman i pekebowa o di na
aden a petoga a poon ko lawas iyan o di na miyadalem a hadas ka miyakaseko sa miyatay.
3 Pakaliyowa niyo siran on a ndatar so manga mama ago manga babay kaan iran di
kaseboi so manga kampo iran a ron ako komakaden."
4 Na tiyoman ai o manga Israil na piyakaliyo iran siran ko kampo.
So Bayad o Kasalaan

6 “Teroa ngka ko manga Israil a: Igira a miyakandosa so mama o di na babay sii ko Allah
ko kiyanggolaola niyan sa ribat ko ped a taw na miyataksil angkoto a mama o di na
babay.
7 Na ketaobat iyan so miyandosa niyan na kebayadan iyan sa tarotop so inisala on ago
kioman iyan on so ikalima bagi on na sii niyan ai kibegay ko kiyaselaan iyan.
8 Ogaid na o miyatay den angkoto a taw a da a madaseg iyan a tonganay a kebegan ko
imbayad ko kasalaan na rek ai o Allah na sii kibegay ko imam a rakes o mama a bilibili a
pekorbanen kaan mapapas so dosa niyan.
9 So langon a sidka a pagowiten o manga Israil ko imam na rek iyan ai.
10 So ipembegay ko oman i isa a imam na rek iyan den."
So Ipetepeng ko di Toman sa Pasad a Karoma a Babay

12 “Teroa ngka ko manga Israil a: Opama ka aden a mama a da katomani sa pasad o
karoma niyan ka mindosa so babay
13 Ko kiyarembang iyan ko ped a mama. Na opama ka di ini ketokawan o karoma niyan
ka pageemaan rekaniyan ago da matibowa sa kiyanggolaolaa sii o babay.
14 O pepanaod so mama ago miyapangandam iyan a miyakasebo so karoma niyan, o di
na opama ka da makasebo so babay,
15 Na kewit sekaniyan o mama sii ko imam. Pekaawid sekaniyan pen sa isepaat iyan a
isa ka kilo a arina a bantad para ko karoma niyan. Di niyan ai keododan sa lana a olibi
aya pen o ba niyan tagoi sa doka ka kagiya isepaat ai sabap ko kapanaod a aya pekitendo
ko tito a benar mipantag ko dosa.
16 “So imam na pekaonoten iyan so babay na mapekatindeg iyan sii ko hadapan o Allah.
17 Magodod so imam sa soti a ig ko omoy a bote ago tegoan iyan ai sa bayanek a poon ko
salasa o Barombarong.
18 Oriyan o kiyapakatindega niyan ko babay ko hadapan o Allah na pekirobay niyan on
so bok iyan na pekikapetan iyan ko babay so isepaat sabap ko kapanaod a aya pekitendo
ko tito a benar mipantag ko dosa, na so imam na aya komakapet ko mapait a ig a aden a
sinta on.
19 Na pakapesepaan o imam so babay a tig iyan a 'O da a ped a mama a miyakarembang
reka ago da ka makasilay ago da makasebo sii ko kapakatetapi iyo ago so karoma ngka na
pengnin ko a di ka kabinasaan angkai a ig a aden a sinta on.
20 Ogaid na o miyakasilay ka sii ko kapakatetapi iyo ago so karoma ngka ago piseboan ka
a ginawa ngka ko kiyarembang ka ko ped a mama a kena a ba ngka karoma
21 Na pengnin ko ko Allah a pakisintaan ka niyan ko manga tonganay ngka ago itewap ka
iran amay ka mabaloy ka niyan a balek ago miberot a tiyan ka.
22 Na, makasoled angkai a ig ko tiyan ka a ipemberot iyan ago ikebaloy ngka a balek.'
"Na isembag o babay a 'Amin, mapenggolaola ini.'
23 “Kisorat o imam angkai a manga sinta sii ko pesoratan na ponasen iyan ko mapait a ig
so inisorat iyan.
24 Sii ko di niyan pen kapekainoma ko babay ko ig a aden a sinta on a kesabapan ko
mapait a karomasayan o miyakasela sekaniyan
25 Na kekowa o imam so isepaat para ko kapanaod sa lima o babay na kibayaw niyan ai
ko hadapan o Allah na pagowiten iyan ko aparan.
26 Pekakowa sekaniyan sa sagamak ko arina a aya den toos na totongen iyan ko aparan.
Oriyan iyan na pekiinom iyan ko babay so ig.
27 Na o piseboan o babay a ginawa niyan ago da niyan katomani sa pasad so karoma
niyan na soled rekaniyan so ig a aden a sinta on na tanto niyan a ikerasay. Kiberot so
tiyan iyan na kebaloy sekaniyan a balek a kasisintaan o manga tonganay niyan.
28 Ogaid na o da niyan kaseboi a ginawa niyan ago masosoti sekaniyan na da a kesowa
iyan ago makapembabawata pen.
29 Giyai den i kokoman ko kapanaod mipantag ko babay a miyakasilay ago piseboan iyan
a ginawa niyan sii ko kapakatetapi iran ago so karoma niyan
30 O di na igira a miyatago ko mama so kapanaod sabap sa pangangandamen iyan so
karoma niyan. Mapekatindeg o imam so babay ko hadapan o Allah na keokas iyan ko
babay so langon angkai a kokoman.
31 So karoma niyan a mama na kena a ba imbilang a miyakasela, ogaid na o miyakasela
so babay na itena on so indaneg ko dosa niyan.
MANGA BILANGAN 6
Manga Taritib ko manga Nasariyo

2 “Teroa ngka ko manga Israil a: O aden a mama o di na babay a tindos a ipesemaya iyan
a isenggay niyan a ginawa niyan ko Allah sa kakebaloy niyan a Nasariyo
3 Na di sekaniyan pekainom sa arak o di na apiya antonaa a pakabereg a panginginomen
apiya so soka o di na ig a obas, aya pen o ba kan sa obas apiya anda ko gopen riyopo o di
na inagag.
4 Sii ko masa a kananasariyo niyan na di sekaniyan den pekakan sa apiya antonaa a poon
ko obas taman ko liso o di na opis iyan.
5 “Taman sa di mapopos so masa a kasesemaya iyan sa kisesenggay niyan na di den

kepotolan so bok iyan. Mapekatas iyan so bok sa olo niyan ka masosoti sekaniyan,
6 Na di den pekaobay ko miyatay ko masa a kisesenggain iyan sa ginawa niyan ko Allah
7 Apiya pen o aya miyatay na so ama iyan o di na ina iyan o di na pagari niyan o di na
babay niyan. Di niyan kekaraman a ginawa niyan para kiran ka kagiya so bok sa olo
niyan na aya toos ko kisesenggay niyan ko Tohan iyan,
8 Na sii ko langon angkai a masa na masosoti sekaniyan ko Allah.
9 “O aden a mitekaw a matay ko obay niyan a inikakaram oto o bok iyan a misesenggay
na makapegopaw sekaniyan sii ko kapopos o pito gawii kaan sekaniyan malompiyo.
10 Na sii ko ikawalo gawii na pekawit sekaniyan sa dowa a marapatik o di na dowa a
pagapak ko imam sii ko gimowa o Barombarong a dii Telabokan.
11 Pekorbanen o imam so isa on sabap ko dosa, na so isa on na pekorbanen iyan a isepaat
a totongen. Sangkai a okit na kepapas so kiyataksil iyan a minisabap ko kiyapakaobay
niyan ko miyatay. Na sii sangkoto a gawii na kesoti niyan peroman so olo niyan.
12 Kaperomanan iyan so kisenggain iyan sa ginawa niyan ko Allah ko tarotop a masa
niyan ka kagiya di kibilang so manga gawii ko miyaona a kinisenggain iyan on sabap ko
kiyakarami rekaniyan. Na pekawit sekaniyan sa mama a bilibili a saragon a idad iyan a
aya pekorbanen sabap ko kiyataksil.
13 “Giyai so kokoman ko Nasariyo amay ka mapopos so masa a kisesenggain rekaniyan.

Kewit sekaniyan ko gimowa o Barombarong
14 Na kepalad iyan roo so manga sapaat iyan ko Allah: satiman a mama a bilibili a
saragon a idad iyan a da a daway niyan a pekorbanen a isepaat a totongen, satiman a
babay a bilibili a saragon a idad iyan a da a daway niyan a pekorbanen sabap ko dosa, ago
satiman a mama a bilibili a da a daway niyan a pekorbanen pantag bo ko kanggiginawai,
15 Ago so pen so manga isepaat a pangenengken ago panginginomen a paliyogat a
kirakes on. Kepalad iyan pen so isa ka reban a paan a da a tapay ron, manga apang a
inembaalan a mapiya a arina a sesamboran sa lana a olibi ago manga biskowit a iibongen
a lana.
16 “Pagowiten ai langon o imam ko hadapan o Allah, na ipenggolalan iyan so kakorban

sabap ko dosa, ago so kakorban sa isepaat a totongen.
17 Oriyan iyan na isepaat iyan so isa ka reban a paan a da a tapay ron ago so pen so mama
a bilibili a mapekorban pantag bo ko kanggiginawai a rakes on so sapaat a pangenengken
ago panginginomen.
18 “Mapasad oto na sii ko gimowa o Barombarong na makapegopaw so Nasariyo na

kekowa niyan so bok iyan a toos ko kisesenggay niyan na ketago iyan ko apoy sii ko
didalem o pikorban pantag bo ko kanggiginawai.
19 Oriyan o kiyaopawa niyan ko bok iyan na kowaan o imam so waga o bilibili amay ka
maloto, a rakes o isa a apang ago isa a biskowit a da a tapay ron a poon ko reban na
pekikapetan iyan ai ko Nasariyo.
20 Na peladen ai o imam ko Allah ko kibayaon iyan on ko hadapan iyan. Manga soti ai a
rek o imam a rakes o kagepe o bilibili ago so bobon iyan. Maipos oto na kepakay den a
makainom sa arak so Nasariyo.
21 “Giyai i kokoman ko Nasariyo a inisemaya iyan so isepaat iyan ko Allah a

ipapaliyogat ko kipesenggain iyan sa ginawa niyan, a kioman on so apiya antonaa i ped a
kegaga niyan. Disomala a kitoman iyan so inisemaya iyan a ipapaliyogat ko kokoman ko
Nasariyo.
So Rakmat a Ipengangarapan o manga Imam

23 “Teroa ngka ki Aron ago so manga wata iyan a giyai i ipengangarapan iyo ko
kaperakamati niyo ko manga taw sa Israil:
24 “Pengnin ko a rarakmatan kano o Allah

ago iipaten kano niyan.
25 Pengnin ko a kababayaan kano o Allah
ago ikalimo kano niyan.
26 Pengnin ko a masoat rekano so Allah
ago began kano niyan sa kalilintad.
27 “Giyai den i okit a kimbetaden i Aron ago so manga wata iyan ko Ingaran aken sii ko
manga Israil, na perakmatan ko siran.
MANGA BILANGAN 7
So manga Pamemegayan o manga Olowan sii ko Kisenggain a Soti ko Barombarong
Sii ko gawii a miyapakatindeg i Mosa so Barombarong na piyanalawatan iyan ai ago

piyanoti niyan a rakes o langon a igagama on, ago so pen so aparan a rakes o langon a
kasangkapan on.
2 Oriyan iyan na somiyong roo so manga pelokelokesen sa Israil a manga olowan siran ko
oman i mbatabataa a miyakasangan ko kiyambilanga ko manga taw.
3 Miyamangowit siran roo sa manga pamemegayan a piyalad iran ko Allah sii ko danga o
Barombarong: nem timan a karo a aden a atep iyan ago sapolo ago dowa a manga mama a
sapi, a sesatiman a karo a poon ko oman i dowa a olowan ago nggagaisa a sapi a poon ko
oman i isa kiran.

5 “Tarimaa ngka ngkai a manga pamemegayan kaan maosar ko manga galebek ko
Barombarong a dii Telabokan. Mbagibagia ngka ini ko manga Libitiyo a mipepasod ko
galebek a piyakisangan ko oman i isa kiran."
6 Na tiyarima i Mosa so manga karo ago so manga sapi na pimbagibagi iyan ai ko manga
Libitiyo.
7 Dowa a karo ago pat a sapi a inibegay niyan ko mbawataan i Girson para ko galebek
iran,
8 Na pat a karo ago walo a sapi a inibegay niyan ko mbawataan i Mirari para ko galebek
iran. Na si Itamar a wata i Aron na aya tomatanding ko langon a galebek iran.
9 Ogaid na so mbawataan i Kohat na da niyan begi sa karo o di na sapi ka kagiya so soti a
manga nganin i masasangan iran, na paliyogat a posain iran ai.
10 Kagiya kasalawatan so aparan na piyangowit on o manga olowan so manga

pamemegayan iran para ko kisenggain on a soti na piyalad iran ai sii ko hadapan o aparan.
11 Ka miyatero o Allah ki Mosa a "Oman salongan na sakataw a olowan a pekawit sa
pamemegayan iyan para ko kisenggain a soti ko aparan."
12-83 So oman i olowan na ndatadatar so manga pamemegayan a piyangawidan iran na

giyai:
=satiman a mala a pelato a linang a aya timbang iyan na isa ka kilo ago tenga, ago
satiman a ladiya a linang a aya timbang iyan na walo gatos ka gramo a piyakaokit ko
timbangan ko Barombarong a palaya ini kikapepeno a mapiya a arina a sesemboran sa
lana a olibi a aya den isepaat a pangenengken,
=satiman a lapad a bolawan a aya timbang iyan na magatos ago sapolo ka gramo a
mapepeno a doka,
=satiman a mangoda a toro a sapi, satiman a mama a bilibili, ago satiman a nati a mama a
bilibili a saragon a idad iyan a mapekorban a isepaat a totongen,
=satiman a mandangan a mapekorban sabap ko dosa,
=dowa timan a mama a sapi, lima timan a mama a bilibili, lima timan a mandangan, ago
lima timan a nati a mama a bilibili a saragon a idad iran a mapekorban a ipesoasoat ko
Allah.
Miyakatondotondog mangowit so manga olowan sa manga pamemegayan iran sii

sangkai a katatanor iyan:
Sii ko paganay a gawii na so olowan o mbatabataa a Yodah a si Nasiyon a wata i

Aminadab,
sii ko ikadowa gawii na so olowan o mbatabataa a Isakar a si Nitanil a wata i Sowar,
sii ko ikatelo gawii na so olowan o mbatabataa a Sibolon a si Iliyab a wata i Hilon,
sii ko ikapat gawii na so olowan o mbatabataa a Robin a si Ilisor a wata i Sidiyor,
sii ko ikalima gawii na so olowan o mbatabataa a Simiyon a si Silomiyal a wata i
Sorisiyaday,
sii ko ikanem gawii na so olowan o mbatabataa a Gad a si Iliyasap a wata i Diyowil,
sii ko ikapito gawii na so olowan o mbatabataa a Ipraim a si Ilisiyama a wata i Amihod,
sii ko ikawalo gawii na so olowan o mbatabataa a Manasih a si Gamaliyal a wata i
Pidasor,
sii ko ikasiyaw gawii na so olowan o mbatabataa a Baniyamin a si Abidan a wata i
Gidiyoni,
sii ko ikasapolo gawii na so olowan o mbatabataa a Dan a si Ahiyasir a wata i
Amisiyaday,
sii ko ikasapolo ago isa gawii na so olowan o mbatabataa a Asir a si Pagiyal a wata i
Okran,
sii ko ikasapolo ago dowa gawii na so olowan o mbatabataa a Naptali a si Ahira a wata i
Inan,
84-88 Giyai so manga pamemegayan a inowit o manga olowan sa Israil para ko

kinisenggain a soti ko aparan ko kiyasalawati ron:
=sapolo ago dowa a mala a manga pelato a linang, ago sapolo ago dowa a manga ladiya a
linang a aya timbang iran langon na dowa polo ago pito ka kilo ago tenga a piyakaokit ko
timbangan ko Barombarong,
=sapolo ago dowa a lapad a bolawan a aya timbang iran na manga isa ka kilo ago tenga a
palaya ini kikapepeno a doka,
=sapolo ago dowa a mangoda a toro a sapi, sapolo ago dowa a mama a bilibili, ago sapolo
ago dowa a nati a mama a bilibili a sesaragon a idad iyan a mapekorban a isepaat a
totongen a rakes o inipaliyogat a isepaat a manga pangenengken,
=sapolo ago dowa a mandangan a mapekorban sabap ko dosa,
=dowa polo ago pat a mama a sapi, nem polo a mama a bilibili, nem polo a mandangan,
ago nem polo a nati a mama a bilibili a sesaragon a idad iyan a mapekorban pantag bo ko
kanggiginawai.
89 Igira a pesoled si Mosa ko Barombarong ka ron dii makimbitiyarai ko Allah na

pekeneg iyan so sowara o Allah a pepekapoon ko pageletan o dowa a piyagtaotaw a
malaikat a matatago ko liyawaw o Kaban sa Kapasadan. Giyanan i okit a di rekaniyan dii
kapakimbitiyarai o Allah.
MANGA BILANGAN 8
So Kiyatentemi ko manga Solo

2 “Teroa ngka ki Aron a amay ka pekatindegen iyan so pito timan a manga solo na sii
niyan pekalindawa ko danga o petegoan sa solo."
3 Pinggolaola ini i Aron, ka piyakatindeg iyan so manga solo kaan kalindawi so hadapan
o petogoan sa solo a so den so inisogo o Allah ki Mosa.
4 So langon o petegoan sa solo na inembaalan a sisel a bolawan ipoon ko itado niyan
taman ko manga obarobar iyan. Aya kiyambaali ron na datar o ladiyawan a piyakiilay o
Allah ki Mosa.
So Kiyasotiya ago so Kinisenggain ko Mbatabataa a Libi

6 “Sibain ka so manga Libitiyo a poon ko ped a manga Israil na pakasotiya ngka siran
7 Sii sangkai a okit: pamesipesiken ka kiran so ig a ipepas ko manga dosa na
pamakiopawi ngka kiran so langon o lawas iran na pamakipipii ngka kiran pen so manga
nditaren iran. Mapasad oto na miyasoti siran.
8 Na pakakowaa ngka siran sa mangoda a mama a sapi ago so paliyogat a iperakes on a
isepaat a pangenengken a mapiya a arina a sesemboran sa lana a olibi, na pekakowa ka sa
ped a mangoda a mama a sapi a pekorbanen sabap ko dosa.
9 Limoda ngka so langon o isa ka maginged a Israil na pamakatindega ngka so manga
Libitiyo ko danga o Barombarong a dii Telabokan.
10 Amay ka pagowiten ka siran den ko hadapan o Allah na kedapenetan siran o manga
Israil.
11 Na kepalad i Aron ko Allah so manga Libitiyo a aya den tindos a pamemegayan on o
manga Israil kaan siran misenggay sa kinggolalanen iran ko galebek iran ko Allah.
12 “Oriyan iyan na kidapenet o manga Libitiyo a manga lima iran ko olo o dowa a sapi,
na mapekorban ka so isa on sabap ko dosa, ago so ped iyan na mapekorban a isepaat a
totongen a aya ngka kipenggolalanen ko kakepapasa ko manga dosa o manga Libitiyo.
13 Pamakatindega ngka so manga Libitiyo ko hadapan i Aron ago so manga wata iyan na
palada ngka siran ko Allah a aya on den tindos a pamemegayan.
14 Sii sangkai a okit na kisenggay ngka so manga Libitiyo a rek aken a poon ko ped a
manga Israil.
15 Amay ka mapasad ka masoti ago misenggay ngka so manga Libitiyo na kepakay a
makanggalebek siran ko manga sangan iran sii ko Barombarong a dii Telabokan.
16 Minisenggay siran raken a poon ko ped a manga Israil, na miyatarima aken siran a rek
aken a inisambi ko langon o manga mama a popaw sa lawas ko manga israil.
17 Isako pamonoon aken so langon a mama a popaw sa lawas ko manga Imisiren na
inisenggay aken a rek aken so langon a mama a popaw sa lawas ko manga Israil a
melagid so manga taw ago so manga ayam.
18 Ogaid na imanto na miyatarima aken so manga Libitiyo a inisambi ko langon a manga
mama a popaw sa lawas ko manga Israil,
19 Na inibegay aken so manga Libitiyo ki Aron ago so manga wata iyan a aya
pamemegayan a poon ko langon o manga Israil kaan siran makapanalagad sii ko
Barombarong para ko manga Israil ago an iran mapakalidas so manga Israil ko morala a
kitana kiran o makaobay siran ko Soti a Darpa."
20 Na ininggolalan i Mosa ago si Aron ago so langon o isa ka maginged a Israil so langon
a inisogo o Allah ki Mosa mipantag ko manga Libitiyo.
21 Piyamanoti o manga Libitiyo so manga ginawa iran ago piyamamipian iran so manga
nditaren iran. Na piyalad siran i Aron ko Allah a aya den tindos a pamemegayan
rekaniyan, na ininggolalan iyan so okitokit a kakepapas o manga dosa iran kaan siran
masoti.
22 Tiyoman o manga taw so langon a inisogo o Allah mipantag ko manga Libitiyo.
Oriyan iyan na miyakapanalagad so manga Libitiyo sii ko Barombarong a dii Telabokan a
penanakodaan siran i Aron ago so manga wata iyan.

24 “Giyai i taritib ko manga Libitiyo: So manga mama a miyakapagidad sa dowa polo
ago lima ragon ago lawan pen na makapenalagad ko Barombarong,
25 Ogaid na amay ka makapagidad siran sa lima polo na pekagenek siran ko galebek iran
ago di siran on den pakapenggalebeken.
26 Keogopan iran baden so manga pagari ran ko di iran dii kinggolalanen ko manga
sangan iran, ogaid na di siran pekasangan ko apiya antonaa a galebek on. Giyai den i okit
a kisanganen iyo ko manga Libitiyo ko manga galebek iran."
MANGA BILANGAN 9
Manga Kokoman ko Paska
Miyakimbitiyarai so Allah ki Mosa sii ko Disirto sa Sinay sii ko paganay a olanolan ko

ikadowa ragon oriyan o kiyapakaawa o manga Israil sa inged a Misir. Pitero iyan a
"Pakiselaselaan ka ko manga Israil so Paska sii ko matetendo a gawii
3 Sii ko perimon ko ikasapolo ago pat gawii sangkai a olanolan. Selaselaa niyo ai ko
kapetomana niyo ko langon o manga kokoman ago manga taritib iyan."
4 Sabap roo na iniinsarat i Mosa ko manga Israil so kaselaselaa iran ko Paska
5 Na ininggolalan iran ai roo ko Disirto sa Sinay ko kiyaperimon iyan ko ikasapolo ago
pat gawii ko paganay a olanolan. So den so langon a inisogo o Allah ki Mosa i
ininggolalan o manga Israil.
6 Ogaid na aden a manga taw a di siran makapeselasela ko Paska sangkoto a gawii ka

kena a ba siran masosoti sabap ko kiyapakaseko iran sa bangkay. Sabap san na
somiyong siran ki Mosa ago si Aron sangkoto a gawii
7 A tig iran a "Miyadalem kami a hadas ka miyakaseko kami sa miyatay; ogaid na ino
rekami di peperoa a kapakasapaat ami ko Allah ko miyatendo a gawii a datar o ped a
manga Israil?"
8 Na pitero kiran i Mosa a "Nayaw kano, ka iise aken ko Allah o antonaa i isogo iyan
mipantag rekano."

10 “Teroa ngka ko manga Israil a 'Igira aden a isa rekano o di na isa ko kebabadan rekano
a madadalem a hadas sabap sa miyakaseko sa miyatay, o di na o kawawatanan sekaniyan
ko kiyalalakaw niyan na makapeselasela sekaniyan pen ko Paska ko Allah.
11 Mapeselasela iran ai ko talondog a olanolan, sii ko perimon ko ikasapolo ago pat gawii
ko ikadowa a olanolan. Kekan iran so bilibili a rakes o paan a da a tapay ron ago so
mapait a lite.
12 Da den a ba iran on pekapitai aya pen o ba aden a potolen iran ko tolan o ayam.
Mipenggolalan iran so langon o manga kokoman mipantag ko Paska.
13 Ogaid na apiya antawaa i masosoti ago kena a ba kawawatani ko kapelalakaw niyan a
ipendarainon iyan so kapeselaselaa niyan ko Paska na kebelag sekaniyan ko isa ka
maginged a Israil ka kagiya da niyan sapaaten so ipesepaat ko Allah sii ko matetendo a
gawii. Na kidaneg sangkoto a taw so sala iyan.
14 “ 'O aden a rait a mababaling rekano a kebaya selasela ko Paska na mipenggolalan iyan
mambo so manga kokoman on ago so manga taritib iyan. Ndatar sa kokoman so rait ago
so tenger a taw.' "
So Gabon ko Liyawaw o Barombarong
15 Sii ko gawii a kiyapakatindega ko Barombarong a pembetadan ko Kaban sa

Kapasadan na minikolob on so gabon. Na ipoon ko kagagawii taman ko kiyapita iyan na
so gabon ko liyawaw o Barombarong na datar o apoy a kapekeilaya on.
16 Giyanan den i maoolaola niyan; mikokolob on so gabon igira a daondaw, ago apoy a
kapekeilaya on igira a gagawii.
17 Igira a pekibayaw so gabon a poon ko liyawaw o Barombarong na pengganat so manga
Israil, na o anda petereg so gabon na ron siran mambo dii kempo.
18 Sabap ko sogoan o Allah na pelalakaw so manga Israil, na sii peman ko sogoan iyan
na di siran dii kempo. Taman ko katatareg o gabon ko liyawaw o Barombarong na sii
siran den ko kekampowan iran.
19 Igira a dii magtey so gabon ko liyawaw o Barombarong na petomanen o manga Israil
so sogoan o Allah ka di siran den mambo pegalin sa kampo.
20 Igira kowan na di pekapira gawii a katatareg o gabon ko liyawaw o Barombarong, na
giyoto mambo i katey o katatareg iran roo. Na sabap peman ko sogoan o Allah na
pengganat siran.
21 Igira kowan na aya bo a katatareg o gabon na ipoon ko perimon na taman sa kepita, na
igira a pekibayaw ko kapipita na pengganat siran. Apiya anda ko daondaw o di na
gagawii a kapekibayaw o gabon na pengganat siran den.
22 Apiya i katey a katatareg o gabon ko liyawaw o Barombarong maana a dowa gawii o
di na saolan o di na saragon na tomatareg den mambo so manga Israil ko kampo na go di
siran den melalakaw; ogaid na saden sa kapekibayaw niyan na aya iran den ipengganat.
23 Sabap ko sogoan o Allah na di siran dii kempo, na sabap ko sogoan iyan na pelalakaw
siran. Petomanen iran so langon ta
man a ipesogo kiran o Allah a nggolalan ki Mosa.
MANGA BILANGAN 10
So manga Bogiyong a Pirak
Na pitero Allah ki Mosa a

2 “Mbaal ka sa dowa timan a bogiyong a sisel a pirak na osara ngka ini a ipetewag ko
manga taw sii ko kapetimoa kiran ago ipenanao sa kapengganat iran ko kampo.
3 Igira a pepakaonin so dowa a bogiyong na so langon o isa ka maginged na kelimod
siran ko hadapan ka sii ko gimowa o Barombarong a dii Telabokan.
4 Ogaid na o satiman bo i pekaonin on na so bo so manga olowan o manga mbatabataa sa
Israil i kelimod sii reka.
5 Igira a minitekaw a matanog a kiyaoni o bogiyong na so manga mbatabataa a kekampo
sa sedepan na pekaganat lomalakaw.
6 Na sii ko ikadowa a kapekaoniya on na aya pekaganat na so manga mbatabataa a
kekampo sa pagabagatan. Ka so kitekaw a kapepakaoniya on sa matanog na aya nanao ko
kapengganat.
7 Ogaid na so kapelimoda ko isa ka maginged na mapekaoni so manga bogiyong ogaid na
kena a ba ndatar sa nanao.
8 Aya bo a pepakaoni ko manga bogiyong na so manga imam a manga kebabadan ki
Aron. Giyai na da a ikepos iyan a sogoan sii rekano ago so langon a kebabadan rekano.
9 “Igira a di kano dii makitidawa ko manga ridoay niyo a penggobat ko inged iyo na
pakaoniya niyo sa matanog so manga bogiyong a aya den tagotao ko kapagiktiyar. Na
saken, a so Allah a Tohan iyo, na keneg aken ai na penabangan ko sekano ko manga
ridoay niyo.
10 Sii mambo ko masa a kapekebabaya iyo ko kapeselaselaa niyo ko kapeseribolan ago so
ped a miyanga tetendo a kapepista niyo na mapekaoni niyo so manga bogiyong sii ko
kapesepaat iyo sa manga dii korbanen a ipesepaat a petotongen ago so dii korbanen
pantag bo ko kanggiginawai. Giyai na pekitadem iyo ko hadapan o Tohan iyo. Saken so
Allah a Tohan iyo."
Giyanatan o manga Israil so Disirto sa Sinay
11 Sii ko ikadowa polo gawii ko ikadowa a olanolan ko ikadowa ragon oriyan o

kiyapakaawa o manga Israil sa Misir na minibayaw so gabon ko liyawaw o Barombarong
a pembetadan ko Kaban sa Kapasadan.
12 Na giyanatan o manga Israil so Disirto sa Sinay na piyanagadan iran so manga darpa
taman sa tomiyareg so gabon ko mitataog a kaden sa Paran.
13 Giyai i paganay a kiyaganat iran sii ko sogoan o Allah a nggolalan ki Mosa.

14 Aya miyaona gomanat na so manga mbatabataa a dii kempo ko lompok o Yodah sii ko
atag o pandi iran. Aya magoolowan ko mbatabataa a Yodah na si Nason a wata i
Aminadab,
15 Si Nitanil a wata i Sowar na aya magoolowan ko mbatabataa a Isakar,
16 Na si Iliyab a wata i Hilon na aya magoolowan ko mbatabataa a Sibolon.
17 Oriyan iyan na tinimo so Barombarong na gomiyanat so manga mbawataan i Girson

ago so manga mbawataan i Mirari a aya on pepegawid.
18 Aya tomiyalondog kiran lomalakaw na so manga mbatabataa a dii kempo ko lompok o

Robin sii ko atag o pandi iran. Si Ilisor a wata i Sidiyor na aya magoolowan ko
mbatabataa a Robin,
19 Si Silomiyal a wata i Sorisiyaday na aya magoolowan ko mbatabataa a Simiyon,
20 Na si Iliyasap a wata i Diyowil na aya magoolowan ko mbatabataa a Gad.
21 Aya tomiyalondog kiran lomalakaw na so manga mbawataan o Kohat a aawidan iran

so soti a manga nganin. Na mapekatindeg so Barombarong sa di iran pen kapekaoma ko
bago a pekempowan iran.
22 Aya tomiyalondog kiran lomalakaw na so manga mbatabataa a dii kempo ko lompok o

Ipraim sii ko atag o pandi iran. Si Ilisiyama a wata i Amihod na aya magoolowan ko
mbatabataa a Ipraim,
23 Si Gamaliyal a wata i Pidasor na aya magoolowan ko mbatabataa a Manasih,
24 Na si Abidan a wata i Gidiyoni na aya magoolowan ko mbatabataa a Baniyamin.
25 Aya miyaori lomalakaw na so manga mbatabataa a dii kempo ko lompok o Dan sii ko
atag o pandi iran. Siran i dii nggordiya sii sa likod ko langon o manga lompok. Si
Ahiyasir a wata i Amisiyaday na aya magoolowan ko mbatabataa a Dan,
26 Si Pagiyal a wata i Okran na aya magoolowan ko mbatabataa a Asir,
27 Na si Ahira a wata i Inan na aya magoolowan ko mbatabataa a Naptali.
28 Giyai i kaaator o kapelalakaw o manga Israil a melolompolompok siran igira a
pengganat siran.
29 Samaoto na pitero i Mosa ki Hobab a wata i Riyowil a taw sa Midiyan, a panogangan i

Mosa a "Ngganat kami imanto ka song kami ko darpa a miyatero rekami o Allah a
'Imbegay aken rekano.' Na, onot ka rekami ka piyapiyaan ami seka, ka minitopa o Allah
so kapetegompiya o Israil!"
30 Ogaid na pitero on i Hobab a "Di, di ako magonot. Kesoy ako ko inged aken ago so
manga tonganay aken."
31 “Kapedipedi ka bo na di kami ngka ngganati," a tig i Mosa. "Katawan ka o anda kami

makapekempo sii ko mitataog a kaden, na seka i makapenggonanao rekami.
32 O onot ka rekami na pakapembagianen ami seka ko apiya antonaa i imbegay rekami o
Allah a manga kamapiyaan."
Gomiyanat so manga Taw
33 Kagiya gomanat so manga taw ko Palaw o Allah roo sa Sinay na lomiyalakaw siran ko
miyakatelo gawii, na pepangonaan kiran so Kaban sa Kapasadan o Allah a di kiran dii
nggonanao ko darpa a kapekempowan iran.
34 Sii ko kapelalakaw iran oman gawii na lomiliyawaw kiran so gabon o Allah.
35 Na igira a ipengganat so Kaban na ipepelalis i Mosa a
"Mbowat ka, ya Allah!

Mapakambelabelag so manga ridoay ngka!
Kapalagoyan ka iran."
36 Na igira a ipembetad ai na di niyan dii teroon a
"Kasoy ka, ya Allah,

sii ko nggibonggibo a manga mbawataan o Israil!"
MANGA BILANGAN 11
So Apoy a Miyakapoon ko Allah
Samaoto na miyanarotaro so manga taw ko Allah mipantag ko kareregeni kiran. Kagiya

maneg iyan ai na somiyokeyaw so rarangit iyan, na so apoy a poon ko Allah na komiyarab
sii kiran na riyobrob iyan so ped ko manga darpa ko melilibeta ko kampo.
2 Na gomiyoraok so manga taw ki Mosa sa tabang na miyangangarapan sekaniyan ko
Allah, na miyapareng so apoy.
3 Sabap roo na bitowan angkoto a darpa sa Tabirah, maana a 'so darpa a petotongan,' ka
ron komiyarab so apoy o Allah sii kiran.
Miyamili si Mosa sa Pito polo a manga Olowan
4 Samaoto na aden a da a oked iyan a manga salakaw a taw a moonot ko manga Israil a
tanto siran a miyanga dadali sa ped a pangenengken, na so mambo so manga Israil na
mipoon den peman gomoraok a tig iran a "O ba bo aden a karni a makan tano!
5 Peketademan tano so langon a seda a peken tano roo sa Misir a da a bayad iyan, ago so
pen so manga pipino, manga milon, manga bombay, manga tiboyas ago manga tekapen.
6 Ogaid na imanto na miyasemo tano den ka da den a ped a pekekan tano a rowar sangkai
a roti!"
(7 So roti na datar sa paras o manga roroni a liso a mapotipoti i warna.
8-9 Igira a pepanga oolog so namog sii ko kampo ko kagagawii na pegonot on so roti. Na
oman mapita na dii magenebeneb so manga taw sa kapepemorota iran on ko lopa, na
penggalingen iran ai o di na pembowayon iran. Na ipetinda iran ai a pepagapangen iran
ko kara. Aya taam iyan na datar o biskowit a sasaogan sa lana a olibi.)
10 Miyaneg i Mosa a penggoraok so langon o manga pamiliya sii ko oman i gimowa o

manga barombarong iran. Tanto a kiyararangitan so Allah, na inikasosa ini i Mosa.
11 Na iniise iyan ko Allah "Ino ako ngka tanto a pepakaregeni a oripen ka? Antonaa i da
ngka raken kasoaten? Ino ngka raken pakipembalogon angkai langon a manga taw?
12 Ba aken inikaogat ago inimbabawata angkai a manga taw? Ino ngka raken peteroa a
sekopon ko siran a datar o maritan a maawid sa ikaririga taman den ko lopa a initopa
ngka a imbegay ngka ko manga apo iran?
13 Anda ko pekakowa sa karni a mapakikan aken sangkai a manga taw? Lalayon iran
raken ipenggoraok a 'Begi kami ngka sa karni a makan ami!'
14 Di aken kegaga mawid langon angkai a manga taw a saken bo! Tanto aken ai a
mindadamar!
15 O giyai i ipekidia ngka raken na bonoa ko ngka baden imanto. O kelimoon ako ngka
na pakilidasi ngka raken so kakebinasa ko!"
16 Na pitero o Allah ki Mosa a "Witi ngka raken sa pito polo kataw a manga
pelokelokesen sa Israil a katawan ka a manga olowan ago manga sanasanaan ko manga
taw. Pakaonota ngka siran ko Barombarong a dii Telabokan na pakatindega ngka siran
roo a ped ka.
17 Penog ako ago makipembitiyarai ako reka roo, na kowa ako ko Roh a madadalem reka
na ndalemen ko ini kiran mambo. Na keped ka siran a makapembalogo sangkai a manga
taw kaan ka di kambibisai angkai a atastanggongan.
18 “Na teroa ngka ko manga taw a 'Sotiya niyo a ginawa niyo ko kapetiyagar iyo mapita,
ka ken kano sa sapo. Miyaneg kano o Allah ko kiyagoraok iyo sa "O ba bo aden a karni a
makan tano! Adiadi pen so masosowa tano roo sa Misir!" Kagiya ka maoto na mbegan
kano o Allah sa karni, na kekan iyo.
19 Kena bo a ba salongan a kapekakan iyo ron, o di na dowa gawii, o di na lima gawii, o
di na sapolo gawii, o di na dowa polo gawii,
20 Ka sii ko tarotop a saolan taman sa mamangigowa iyo ago masemo kano ron ka kagiya
tiyalikodan iyo so Allah a sisii rekano, ago gomiyoraok kano ko hadapan iyan a tig iyo a
"Ino tano pen pekaawa sa Misir?" ' "
21 Na pitero i Mosa a "Aya kadakel o manga taw a sisii raken na nem gatos nggibo, ogaid
na tig ka a 'Mbegan ko siran sa karni a pekekan iran ko soled o saolan!'
22 Apiya pen o masombali so langon o manga talon a bilibili ago kambing ago manga
sapi na ba siran on keosog? O makowa langon so manga seda ko ragat na ba kiran ai
pagetoon?"
23 Na simbag o Allah si Mosa a "Ba aden a di aken kegaga? Keilay ngka imanto o
kitoman so pitero aken reka, o di na di."
24 Mandiyadi na lominiyo si Mosa na inisampay niyan ko manga taw so miyatero

rekaniyan o Allah. Oriyan iyan na tinimo iyan so pito polo kataw a manga pelokelokesen
iran na piyakatindeg iyan siran ko melilibeta ko Barombarong.
25 Na miyanog so Allah sii ko gabon na miyakimbitiyarai ki Mosa. Kominowa
sekaniyan ko Roh a madadalem ki Mosa na inipamegay niyan ko pito polo kataw a
pelokelokesen. Na kagiya mitemo kiran so Roh na miyangalamat siran, ogaid na da iran
ai kaperomani.
26 Ogaid na aden a dowa ko pito polo a manga pelokelokesen, a si Ildad ago si Midad, a
mitelimbagak ko kampo a da siran song ko Barombarong. Na minitemo kiran mambo so
Roh na miyangalamat siran sii ko kampo.
27 Aden a mangoda a mama a miyalalagoy ki Mosa na pitero iyan on a "Si Ildad ago si
Midad na pepangalamat roo ko kampo."
28 Na si Yosowa a wata i Non a salinggogopa i Mosa ipoon den ko kangodai ron na
pitero iyan ki Mosa a "Kadnan ko, pakatarega ngka siran!"
29 Ogaid na somimbag si Mosa a "Ba ini miniawid a akal ka sabap raken? O ba bo

mbegan o Allah so Roh iyan ko langon o manga pagtaw niyan ago mbalowin iyan siran
langon a manga pepekaalamat!'
30 Na komiyasoy si Mosa ko kampo a ped iyan so manga pelokelokesen sa Israil.
Inowitan o Allah so Kampo sa manga Pogowa
31 Samaoto na piyakasamber o Allah so ndo a aya miyakabayog ko manga pogowa a

poon sa ragat. Na piyamakatana iyan siran ko mbalabala ko kampo a manga salongan a
ipelalakaw ron a kaolad iyan a poon ko oman i kilid iyan ago isa ka mitros a kakapal iran
ko liyawaw o lopa.
32 Na mililiyo so manga taw a miyamanimo sa manga pogowa sii ko miyababasa alongan
sangkoto a gawii ago miyababasa gawii taman ko miyababasa alongon ko tomiyalondog a
gawii. Da a isa kiran bo a ba tominimo sa kiyakorangan so dowa nggibo ka gantang a
manga pogowa. Na piyangayar iran ai ko mbalabala ko soled o kampo sa kiyambolada
iran on.
33 Ogaid na sii pen ko kateteteba iran ko karni ka da iran pen malamed na mimborngat
kiran den so gani o Allah na siniksa iyan siran sa maregen a paniyakit.
34 Sabap roo na bitowan iran angkoto a darpa sa Kibrot Hatabah ka kagiya inilebeng iran
roo so manga taw a miyadali koman sa ped a pangenengken.
35 Ipoon sa Kibrot Hatabah na somiyong so manga taw sa Hasirot na tomiyareg siran roo.
MANGA BILANGAN 12
Dingki i Mariyam ago si Aron si Mosa
Si Mariyam ago si Aron na inipamanemotemod iran si Mosa sabap ko karoma niyan a

taw sa Kos (ka miyangaroma sekaniyan sa iKosen a babay.)
2 Pitero iran a "Ba si bo si Mosa i pepakaokitan o Allah ko katero iyan? Ba ta niyan
mambo di pekaokiti ko katero iyan?" Na miyaneg ai o Allah.
3(Si Mosa na tanto a pepangalimbabaan a mama a di so apiya antawaa a taw ko dalem a
doniya.)
4 Na sarta den a pitero o Allah ki Mosa ago si Aron ago si Mariyam a "Song kano a telo
kataw roo ko Barombarong a dii Telabokan!" Somiyong siran roo,
5 Na miyanog so Allah sii ko mapopolaos a gabon na tominindeg ko gimowa o
Barombarong, na tiyalowan iyan si Aron ago si Mariyam na miyobay siran on.
6 Na pitero kiran o Allah a "Pamakineg kano piyapiya! Igira aden a matatago rekano a
nabi na pepayagen aken on a ginawa ko a nggolalan ko manga pangingilain, na di ako ron
dii makimbitiyarai a nggolalan ko manga taginepen.
7 Ogaid na kena a ba ini datar a ipekidia ko ki Mosa a oripen aken; inisana aken
rekaniyan so langon o manga pagtaw aken.
8 Di aken sekaniyan dii imbitiyarai a magaadapa kami a dii makanggolalan ko marayag a
katero a kena a ba maregen saboten; na pekeilay niyan so bontal o Allah. Sabap sii na
ino niyo di keleken a kapemagantaa niyo ki Mosa?"
9 Mimborngat kiran so rarangit o Allah na inawaan iyan siran.

10 Kagiya mibayaw so gabon a poon ko Barombarong na sarta den a miyabowa si
Mariyam, na miyakapoti sekaniyan a datar o giyaw. Kagiya somangor rekaniyan si Aron
na miyailay niyan a aden a bowa niyan,
11 Na inigoraok iyan ki Mosa a "Aidaw, Kadnan ko! Kapedipedi ka bo na di kami ngka
ndanega sabap sangkai a dosa a kalalalongan a kiyasogoka mi ron!
12 Di ngka sekaniyan ngganati a datar o miyatay a da mabes ko kinilotaden on o ina iyan
a miyaredak den so sabagi ko kobal iyan!"
13 Na gomiyoraok si Mosa ko Allah a "Hey Tohan ko, kapedipedi ka bo na bolongi ngka

sekaniyan; pengangampedian ako reka!"
14 Na inisembag o Allah ki Mosa a "O kiyadodai sekaniyan o ama iyan sa paras na ba

sekaniyan di keyai ko soled o pito gawii? Pakaliyowa ngka sekaniyan ko kampo ko soled
o pito gawii na mapopos oto na mapekasoled sekaniyan den ko kampo."
15 Kagiya ka maoto na miyapakatareg si Mariyam ko liyo o kampo ko soled o pito gawii,

na da den pagalin sa kampo so manga taw taman sa da on makasoled peroman si
Mariyam.
16 Oriyan iyan na gomiyanat siran sa Hasirot na sii siran mikempo ko mitataog a kaden
sa Paran.
MANGA BILANGAN 13
So Sapolo ago Dowa a manga Manoriman

2 “Sogo ka sa manga mama a makapanoriman ko inged a Kanaan, a so lopa a imbegay
aken ko manga Israil. Pamilii ngka sa sakataw a olowan so oman i isa ko sapolo ago
dowa ka mbatabataa."
3 Na iniggolalan i Mosa so inisogo on o Allah. Miyamili sekaniyan sa sapolo ago dowa a

manga olowan o manga Israil na piyakalalakaw niyan siran a poon ko kampo iran ko
mitataog a kaden sa Paran.
4 Giyai i manga ngaran iran:
Si Siyamowa a wata i Sakor a poon ko mbatabataa a Robin,

5 Si Siyapat a wata i Hori a poon ko mbatabataa a Simiyon,
6 Si Kaleb a wata i Yaponih a poon ko mbatabataa a Yodah,
7 Si Igal a wata i Yosop a poon ko mbatabataa a Isakar,
8 Si Hosiya a wata i Non a poon ko mbatabataa a Ipraim,
9 Si Palti a wata i Rapo a poon ko mbatabataa a Baniyamin,
10 Si Gadiyal a wata i Sodi a poon ko mbatabataa a Sibolon,
11 Si Gadi a wata i Sosi a poon ko mbatabataa a Manasih (a wata i Yosop),
12 Si Amiyal a wata i Gimali a poon ko mbatabataa a Dan,
13 Si Sitor a wata i Mikail a poon ko mbatabataa a Asir,
14 Si Nakbi a wata i Bopsi a poon ko mbatabataa a Naptali,
15 Ago si Giyowil a wata i Maki a poon ko mbatabataa a Gad.
16 Giyanan so manga ngaran o manga mama a siyogo i Mosa a makapariksa ko inged.
(Bitowan i Mosa si Hosiya a wata i Non sa Yosowa.)
17 Isako sogoon siran i Mosa sa kapanorimani ran ko inged a Kanaan na pitero iyan kiran
a "Lalakaw kano sa tampar sa pagotaraan a sii kano pagokit ko disirto sa pagabagatan a
Kanaan na takedeg kano ko kapalawan.
18 Ilaya niyo o antonaa i mapeparas o lopa, na pariksaa niyo o ba manga babager so
kibabaling on o di na manga lolobay, ago o ba siran madakel o di na maito,
19 Ago antonaa i kapakambebetad o manga inged a babalingan iran o ba mapiya o di na
marata, ago o ba da a kota iyan o di na kikakokotaan,
20 Ago antonaa so lopa on, ba masibokar o di na di, na ba aden a manga kalasan on o di
na da. Na panamari niyo a kapakaawid iyo ko ped ko onga sapad a pepamangeto
sangkoto a lopa." (Samaoto na mosim a kaperebasa ko paganay a ipagonga o manga
obas.)
21 Mandiyadi na lomiyalakaw so manga mama sa tampar sa pagotaraan na

piyanorimanan iran so lopa ipoon ko mitataog a kaden sa Sin na taman den sa Rihob a
marani sa Libo Hamat.
22 Sii ko kapegokit iran sa Nigib na miyakaoma siran sa Hibron a ron kibabaling so
manga mbawataan i Ahiman, Siyasay ago si Talmay a manga kiyababadan ko Anak.
(Miyabangon a Hibron sa pito pen ragon a da kabangon a Sowan roo sa Misir.)
23 Kagiya makaoma siran ko Balintad a Iskol na roo siran somiyapak ko obas sa aden a
sapingi on a tanto a mapened a kailangan a matibal o dowa ka taw, na miyawid siran pen
sa manga granada ago manga higos.
24 Bitowan angkoto a darpa sa balintad a Iskol sabap ko sapingi a manga obas a siyapak
roo o manga Israil.
So Totol o manga Manoriman
25 Oriyan o pat polo gawii a kiyapanoriman iran na mimbabaling so manga mama

26 Sa Kadis ko mitataog a kaden sa Paran na piyanotol iran ki Mosa ago si Aron ago so
langon o isa ka maginged a Israil so miyasima iran, na piyakiilay iran kiran so manga
onga sapad a miyakowa iran ko lopa.
27 Pitero iran ki Mosa a "Somiyong kami ko lopa a piyakisongowan ka rekami, na
mataan den a pekepakayan ai ago oodaren, na katii so manga onga sapad on.
28 Ogaid na manga babager so manga taw a kibabaling on, na manga ala ago kikokotaan
so manga siti iran. Liyo ron pen na miyailay ami roo so manga kiyababadan ki Anak a
manga iganti!
29 So manga Amalikiyo na kibabaling ko pagabagatan ko inged, so manga Hitiyo, manga
Hibosiyo ago so manga Amoriyo na aya kibabaling ko manga kapalawan, na so manga
Kanaaniyo na sii mababaling ko kilid a ragat ago sii ko kilid a Lawasaig a Yordan."
30 Ogaid na piyakarenek i Kaleb so manga taw a dii penon ki Mosa a tig iyan a "Somong
tano roo den imanto na tanganen tano so lopa, ka mataan a ketaban tano!"
31 Ogaid na so ped a manga mama a miyonot ki Kaleb na pitero iran a "Di tano kegobat
angkoto a manga taw! Manga babager siran a di sektano!"
32 Na piyakalangkap iran ko manga Israil so marata a totol makapantag ko inged a tig
iran a "So lopa a piyanorimanan ami na pelameden iyan so manga taw a kibabaling on.
So langon a taw a miyailay ami roo na tanto a manga ala.
33 Miyailay ami roo so manga Nipilim a manga kiyababadan ki Anak a miyakapoon ko
manga iganti. Datar kami o matag baden manga tarapan o pagabain ami kiran a ginawa
mi, na datar anan mambo a kapekeilaya iran rekami."
MANGA BILANGAN 14
Miyongkir so manga Taw
Mandiyadi na gomiyoraok sa matanog so langon o manga taw, na somigad siran sebenar

ko miyababasa gawii.
2 Piyanarotaroan iran si Mosa ago si Aron na pitero kiran o langon o isa ka maginged a
Israil a "O ba bo kami miyamatay roo sa Misir, o di na sii sangkai a mitataog a kaden!
3 Ino kami pen pagowita o Allah sangkoto a inged? Pematay kami baden ko katidawa, na
penga bibiyag so manga karoma ago manga wata ami! Ba di tomo a komasoy tano sa
Misir?"
4 Na pitero o oman i isa ko ped iyan a "Tomoro tano sa nakoda na komasoy tano sa
Misir!"
5 Mandiyadi na gomipe si Mosa ago si Aron ko lopa sii ko danga o isa ka maginged a
Israil a malilimod roo.
6 Na si Yosowa a wata i Non ago si Kaleb a wata i Yaponih a ped siran ko
miyakapanoriman ko lopa na kinisi iran so manga nditaren iran ko kiyarata a ginawa iran,
7 Na pitero iran ko langon o manga Israil a malilimod roo a "So lopa a siyongowan ami
ago piyanorimanan ami na tanto a mapiya a lopa!
8 O masoat rektano so Allah na pagowiten tano niyan sangkoto a lopa a pekepakayan ago
oodaren na imbegay niyan rektano.
9 Di niyo sopaka so Allah, na di niyo keleken so manga taw ko inged ka malebod a
katebana tano kiran. Da den a pekalinding kiran, ogaid na sisii rektano so Allah! Di niyo
siran keleken!"
10 Na inipagita o langon o isa ka maginged a kaperobaka iran a ator ki Yosowa ago si
Kaleb, ogaid na sarta den a mipeyag so bantogan o Allah ko liyawaw o Barombarong a
dii Telabokan sii ko langon o manga Israil.
11 Na pitero o Allah ki Mosa a "Ay katey pen a kipekegowaden raken angkai a manga
taw? Ay katey pen a di iran raken kaperatiyayaa apiya pen kiyanggolaolaan ko siran sa
madakel a piyakamemesa a manga nanao?
12 Na, siksaan ko siran a paniyakit ago itolak pen na mbelowin ko seka a nasiyon a lebi a
mala ago mabager a di siran!"
Inipangangarapan i Mosa so manga Taw

Na pitero i Mosa ko Allah a "Piyakaliyo ngka angkai a manga taw a poon sa Misir a
nggolalan ko kala a ka i gaos. Na amay ka maneg o manga Imisiren o antonaa i inikidia
ngka ko manga pagtaw ngka
14 Na penotolen iran ai ko manga kibabaling sangkai a inged. Na miyaneg o manga taw
sangkai a inged a seka, ya Allah, na mipageepeda o manga pagtaw ngka ago
miyakipagilaya ka kiran, ya Allah, ago isasayap kiran so gabon ka. Katawan iran a
pepangonaan ka kiran ko mapopolaos a gabon igira a daondaw ago mapopolaos a apoy
igira a gagawii.
15 Na o pamonoa ngka langon angkai a manga taw na so manga nasiyon a miyamakaneg
makapantag ko bantogan ka na mapetero iran a
16'Sabap sa di kegaga o Allah a kapekasoleda niyan ko manga pagtaw niyan ko inged a
inisepa iyan a imbegay niyan kiran na piyolang iyan siran ko mitataog a kaden.'
17 “Kapedipedi ka bo, Kadnan ko, na pakiilain ka imanto so kala a ka i kapaar na

tomanen ka so initopa ngka ko kiyateroa ngka sa
18'Saken, a so Allah, na kena a ba malebod kararangiti a tanto ako a masalinggagaw a
peperila sa kadostaan ago kapakasopak, ogaid na di aken pelepasen domaneg so
miyamakasela, ka ipetena aken so dosa o manga ama ko manga wata iran ago manga apo
taman ko ikatelo ago ikapat ka apid iran.'
19 Na pepangangampedian ako reka, ya Allah, na rilai ngka so dosa angkai a manga taw
sabap ko kala a ka i gagaw a datar o kiyarilai ngka kiran ipoon ko kiyaganat iran sa Misir
taman imanto!"
20 Na somimbag so Allah a "Rinilaan ko siran a so den so piyangni ngka.

21 Ogaid na mataan den ko kaooyagoyag aken ago so kipepeno o bantogan aken ko
dalem a doniya
22 Ka da den a isa bo sangkai a manga taw a ba pekasoled sangkoto a inged. Miyailay
iran so bantogan aken ago so piyakamemesa a manga nanao a pinggolaola ko sa Misir ago
sii ko mitataog a kaden ogaid na madakel den a kiyatepengi ran raken ko da iran raken
kaparatiyayaa.
23 Di iran den keilay so lopa a inisepa aken a imbegay aken ko manga apo iran. Da den a
isa kiran bo a miyagowad raken a ba on pekasoled.
24 Ogaid na masasalebo so pamikiran o oripen aken a si Kaleb, na tarotop a
kapepangongonotani niyan raken. Sabap roo na pagowiten ko sekaniyan ko lopa a
siyongowan iyan na mapekewali o manga kebabadan on so inged
25 A so manga balintad on i babalingan imanto o manga Amalakiyo ago manga
Kanaaniyo. Mapita na pepato kano ago ganat kano komasoy ko mitataog a kaden sa
tampar ko Mariga a Ragat."
Diyaneg o Allah so manga Israil ko Kiyapanarotaro iran

27 “Ay katey pen a kasesebari aken sangkai a manga rarata a taw a pepanarotaroan ako
iran? Miyaneg aken so inipanemotemod angkai a manga Israil.
28 Na teroa niyo kiran a 'Mataan den ko kaooyagoyag aken, ka so den so miyaneg aken a
miyatero iyo i ikidia ko rekano.
29 Pematay kano na pemangibegak so manga bangkay niyo sii sangkai a mitataog a
kaden. Sabap sa piyanarotaroan ako niyo na da den a sakataw rekano bo a miyakapagidad
sa dowa polo ragon ago lawan pen
30 A ba pekasoled ko inged a inisepa aken a pekibalingan aken rekano a liyo ron si Kaleb
a wata i Yaponih ago si Yosowa a wata i Non.
31 Na so manga wata iyo a miyatero iyo a penga bibiyag na aya ko ron pekasoleden a
ikepiya a ginawa iran so inged a inikagowad iyo.
32 Ogaid na sekano na pemangibegak so manga bangkay niyo sangkai a mitataog a
kaden.
33 So manga wata iyo na pegandawandaw siran sangkai a mitataog a kaden ko soled o pat
polo ragon a pepanga rarasay sabap ko di niyo kaperatiyaya taman sa mibegak so
moripori ko manga bangkay niyo ko mitataog a kaden.
34 Datar o kiyatey o kiyapanoriman iyo ko inged a pat polo gawii na pat polo ragon
mambo a kakerasay niyo sabap ko manga dosa niyo, a saragon a imbadal ko oman i
salongan on. Na ketintiman niyo so kariridoa ko rekano!'
35 Saken, a so Allah, i mitero sii! Mataan a penggolaolaan ko ini sangkai langon a
manga rarata a taw a miyataayon sa kiyasopaka iran raken. Kelengan siran matay sii
sangkai a mitataog a kaden!"
36-37 Na so manga mama a miyasogo i Mosa a miyanoriman ko inged a mimbalingan

ago piyakapanarotaro iran so manga taw ko Allah a nggolalan ko kiyapakalangkapa iran
ko marata a totol makapantag ko inged na siniksa siran o Allah a paniyakit, na miyamatay
siran.
38 Sii ko manga mama a miyanoriman ko inged na si bo si Yosowa a wata i Non ago si
Kaleb a wata i Yaponih i da on matay.
Tipengan o manga Israil a Kasoledi iran ko Inged
39 Kagiya panotolen i Mosa ko langon o manga Israil so pitero o Allah na tanto siran a
miyakamboko.
40 Na teked a kapipita ko talondog a gawii na mimbowat siran komabalaga na
tomiyakedeg siran ko poro o palaw a tig iran a "Katii kami a makatitiyagar somong ko
darpa a initopa rektano o Allah, ka kagiya miyakandosa kami."
Ogaid na pitero kiran i Mosa a "Ino niyo imanto sogoka so inisogo o Allah? Di niyo
kibolos so pamikiran iyo!
42 Di kano roo song. Kena a ba niyo mipageepeda so Allah na tebanen kano o manga
ridoay niyo.
43 Makipetidawa rekano so manga Amalikiyo ago so manga Kanaaniyo na pematay kano
a pedang. Di rekano magonot so Tohan ka kagiya tiyalikodan iyo sekaniyan."
44 Ogaid na sabap ko kategas iran i olo na tomiyaros siran lomalakaw a pegantap siran ko
kapalawan apiya pen da den awa si Mosa o di na so Kaban sa Kapasadan o Allah ko
kampo.
45 Na tiyondagayan siran o manga Amalikiyo ago so manga Kanaaniyo a kibabaling
sangkoto a kapalawan na miyakitidawa ko manga Israil na tiyaban iran ago inipananapek
iran siran taman den sa Hormah.
MANGA BILANGAN 15
Manga Kokoman mipantag ko dii Kakorban

2 “Teroa ngka ko manga Israil a 'Oriyan o kapakasoled iyo ko inged a imbegay aken
rekano a mbalingan iyo
3 Na amay ka sepaat kano ko Allah sa korban a pekaokiten sa apoy apiya anda ko
petotongen a ipesepaat, o di na dii korbanen pantag bo ko samaya, o di na iklas a sapaat, o
di na ipesepaat sii ko kapepista niyo a mamot rekaniyan na aya mipekorban iyo na mama
a sapi, bilibili o di na kambing a poon ko manga talon iyo.
4-5 Saden sa pekorban sa nati a bilibili o di na kambing a isepaat a totongen ko Allah na
kerakesan iyan sa isepaat a pangenengken a isa ka kilo a mapiya a arina a sasaogan sa isa
ka litro a lana a olibi ago so isepaat a panginginomen a isa ka litro a arak.
6 O aya isepaat na mama a bilibili na kerakesan ai sa dowa ka kilo a mapiya a arina a
sasaogan sa isa ago tenga ka litro a lana a olibi,
7 Ago isa ago tenga ka litro a arak a isepaat a panginginomen. Giyai na mamot ko Allah.
8 “ 'Opama ka mama a sapi na aya niyo pekorbanen a isepaat a totongen, o di na

pekorbanen pantag bo ko samaya, o di na pekorbanen pantag bo ko kanggiginawai
9 Na aya kirakes on na telo ka kilo a mapiya a arina a sasaogan sa dowa ka litro a lana a
olibi
10 Ago dowa ka litro a arak a isepaat a panginginomen. Giyai na isepaat a totongen a
mamot ko Allah.
11 “ 'Giyanan i kirakes iyo ko oman i pekorbanen iyo a mama a sapi, o di na mama a

bilibili, o di na nati a bilibili ago nati a kambing.
12 O kalalawani so satiman a pekorbanen iyo na nggolaolaa niyo ai ko oman i isa on.
13 “ 'Oman i tenger a taw na ketoman iyan angkai a manga insarat igira a pepalad
sekaniyan sa isepaat iyan a totongen a mamot ko Allah.
14 Taman ko kapepamagapidapidi rekano na igira aden a rait o di na apiya antawaa ped a
mababaling rekano a pepalad sa sapaat a petotongen a mamot ko Allah na disomala a
sowaan iyan so di niyo dii nggolaolaan.
15 Ndatar so taritib a mipenggolalan iyo ago so rait a mababaling rekano. Giyai i da a
ikepos iyan a kokoman sii ko langon o kebabadan rekano. Sekano ago so manga rait na
ndatar sii ko hadapan o Allah
16 Na ndatar so manga sogoan ago manga kokoman a pekitoman rekano.' "
Pitero pen o Allah ki Mosa a
18 “Teroa ngka ko manga Israil a 'Oriyan o kapakasoled iyo ko inged a pagowitan ko
rekano
19 Na amay ka ken kano ko pereperan sangkoto a lopa na sapaaten iyo so sabagi on a
pamemegayan ko Allah.
20 Igira a pepangembaal kano sa paan na sibain iyo so paganay a paan a kiyambaalan ko
paganay a sabagi ko miyagaling a pereperan iyo na sapaaten iyo a pamemegayan ko Allah
a poon ko pegegikan.
21 Taman ko kapepamagapidapidi rekano na kibegay niyo angkai a pamemegayan ko
Allah a poon ko paganay a miyagaling a pereperan iyo.' "
Dii Kakorban sabap ko da Tibabaa a manga Dosa
22 “ 'Opama ka da niyo tibabaa a da niyo katomana ko apiya antonaa sogoan a inibegay o

Allah ki Mosa,
23 Na opama ka sii ko pemakatalingoma a manga gawii na di ketoman o isa ka maginged
so langon taman a inisogo rekano o Allah a miyakanggolalan ki Mosa,
24 Na o di petibabaa so kapenggolaolaa sii ka di katawan o isa ka maginged na
makapekorban so langon o isa ka maginged sa mangoda a mama a sapi a isepaat a
totongen a mamot ko Allah na kirakes on so paliyogat a isepaat a pangenengken ago
isepaat a panginginomen, ago satiman a mandangan a mapekorban sabap ko dosa.
25 Na ipenggolalan o imam so manga okitokit a kakepapasa ko dosa o langon o isa ka
maginged a Israil na kerilaan siran ka kagiya da iran tibabaa so kiyapakandosa iran ago
sabap sa inibegay iran so isepaat iran ko Allah a pekaokiten ko apoy ago so pekorbanen
sabap ko dosa.
26 Na kerilaan so langon o isa ka maginged a Israil taman ko manga rait a kibabaling
kiran, ka miyarambit siran langon ko da matibaba a kiyaribat.
27 “ 'Ogaid na o sakataw bo i miyakandosa sa da niyan tibabaa na pekawit sekaniyan sa

babay a kambing a saragon a idad iyan a pekorbanen sabap ko dosa.
28 Na sii ko hadapan o Allah na ipenggolalan o imam so manga okitokit a kakepapasa ko
dosa o taw a miyaribat ko kiyapakandosa niyan a da niyan tibabaa, na perilaan angkoto a
taw.
29 Satiman bo a kokoman a ipenggolalan ko miyakandosa sa da niyan tibabaa apiya anda
ko tenger a taw sa Israil o di na rait a mababaling rekano.
30 “ 'Ogaid na apiya antawaa i pitibaba iyan a kiyadosa niyan, a ndatar so tenger a taw
ago so rait, na miyapagitowito iyan so Allah, na kebelag sekaniyan ko isa ka maginged a
Israil.
31 Sabap sa pisodi iyan so katero o Allah ago siyogok iyan so sogoan iyan na mataan den
a kebelag sekaniyan kiran, na itena on so kadostaan iyan.' "
So Mama a Somiyogok ko Kokoman ko Gawii a Idedeke
32 Miyakaisa a gawii a kasisii o manga Israil ko mitataog a kaden na miyakailay siran sa

mama a pepangintagon ko Gawii a Idedeke.
33 Inowit iran sekaniyan ki Mosa ago si Aron ago sii ko langon o manga Israil
34 Ogaid na tiyangan iran sekaniyan baden ka da iran katokawi piyapiya o antonaa i
ikidia iran on.
35 Na giyoto a pitero o Allah ki Mosa a "Disomala a mbonoon angkoto a taw.
Kerobakan sekaniyan a ator o langon o manga taw roo ko liyo o kampo."
36 Na inowit sekaniyan o langon o isa ka maginged roo ko liyo o kampo na riyobakan
iran sekaniyan a ator taman sa miyatay a so den so inisogo o Allah ki Mosa.
So Taritib mipantag ko manga Garigay

38 “Teroa ngka ko manga Israil a 'Taman ko kapepamagapidapidi rekano na panagoi niyo
sa manga garigay so manga sisid o manga nditaren iyo, na aya ipengiket iyo ron na biro a
tanor sii ko oman i rogo niyan.
39 Aya gona angkai a manga garigay na an iyo pekeilay ago an iyo peketademi so langon
a sogoan o Allah kaan iyo ai peketoman ago di kano raken pekatalikod ko kapengonoti
niyo ko manga baya a ginawa niyo ago manga mata.
40 Giyangkai a manga garigay na pekitadem iyo ko kapetomana niyo ko langon o manga
sogoan aken kaan kano mabaloy a masosoti ko Tohan iyo.
41 Saken so Allah a Tohan iyo a miyakaliyo rekano sa inged a Misir kaan ako mabaloy a
Tohan iyo. Saken so Allah.' "
MANGA BILANGAN 16
Somiyopak si Korah, si Datan ago si Abiram
Si Korah a wata i Isar a moriyataw i Kohat a wata i Libi na mikediyat siran ago so telo
kataw a mama a poon ko mbatabataa a Robin, a si Datan ago si Abiram a manga wata i
Iliyab, ago si On a wata i Pilit.
2 Na inondoy iran so dowa gatos ago lima polo kataw a ped a manga Israil sa kasopaka
iran ki Mosa. Giyangkai a manga mama na makikilala a manga olowan a kipagaadatan o
isa ka maginged a Israil.
3 Mitimo siran na somiyong siran ki Mosa ago si Aron na pitero iran kiran a "Tanto kano
a minitaralo! So oman i isa rekami ko isa ka maginged na soti, na mipageepeda ami so
Allah. Ino niyo poporoon a ginawa niyo sangkai a manga pagtaw o Allah?"
4 Kagiya maneg ai i Mosa na gomipe sekaniyan ko lopa.

5 Na pitero iyan ki Korah ago so langon o manga ped iyan a "Amay ka mapita na pekiilay
o Allah o antawaa i rek iyan ago antawaa i soti, ka pekadarpaan iyan ko hadapan iyan
angkoto a taw a miyapili iyan.
6 Hey Korah, ago so langon a ped ka na giyai i nggolaolaa niyo: Kowa kano sa manga
petotongan sa doka
7 Na mapita na panotong kano ron sa doka ko hadapan o Allah, na so mama a kepili o
Allah na aya den soti. Sekano man a manga Libitiyo i tanto a mitataralo!"
8 Pitero pen i Mosa ki Korah a "Na pamakineg kano, hey manga Libitiyo!
9 Ba kano da kaonseri ko kinisibain rekano o Tohan o Israil ko langon o ped a manga taw
sa Israil ago piyakarani kano niyan sa ginawa niyan kaan kano makanggalebek ko
Barombarong o Allah ago makatindeg kano ko hadapan o isa ka maginged a penalagad
kiran?
10 Inibegay niyan rekano angkai a tindos a galebek ago so langon o ped ka a manga
Libitiyo, na imanto na pananamaran iyo pen a makamal iyo mambo so kaiimami!
11 Sii ko kapepanarotaroi niyo ki Aron na so den so Allah i pesopaken iyo ago so langon
o manga ped ka."
12 Na piyakisongowan i Mosa si Datan ago si Abiram a manga wata i Iliyab, ogaid na tig
iran a "Di kami ron song!
13 Ba ka da kaonseri ko kiyapakaliyowa ngka rekami ko pekepakayan ago oodaren a lopa
sa Misir kaan kami ngka mapamono sangkai a mitataog a kaden? Na imanto na kabaya a
ka pen a kapendatoi ngka rekami!
14 Liyo ron pen na da kami ngka wita ko pekepakayan ago oodaren a lopa aya pen o ba
kami ngka begi sa manga pangomaan ago asinda a obas a mapekewali ami, na imanto na
petepengan kami ngka somaliba. Di kami ron song!"
15 Na tanto a kiyararangitan si Mosa na pitero iyan ko Allah a "Di ngka terimaa so apiya
antonaa a pamemegayan a isepaat iran reka! Da den a ba ko kiran miyaaniyaya apiya
satiman bo a kimar aya pen o ba aden a isa kiran bo a kiyanggolaolaan ko sa ribat."
16 Na pitero i Mosa ki Korah a "Mapita na seka ago so langon a pepangonot reka na song
kano sii ko hadapan o Allah na song on mambo si Aron.
17 Kewit o oman i isa rekano sii ko hadapan o Allah so petotongan iyan sa doka a aden a
doka on, dowa gatos ai ago lima polo langon a petotongan sa doka, na kewit on mambo i
Aron so petotongan iyan sa doka."
18 Sabap san na kinowa o oman i isa kiran so petotongan iyan sa doka na tiyagoan iran sa
manga waga ago doka na tominindeg siran ko gimowa o Barombarong a dii Telabokan a
ped iran si Mosa ago si Aron.
19 Na kagiya matimo i Korah so langon o manga ped iyan na siyakeb iran si Mosa ago si
Aron sii ko gimowa o Barombarong na mipeyag so bantogan o Allah ko langon o isa ka
maginged,
21 “Awata niyo angkai a malilimod ka polangen ko siran sa sagogona!"
22 Ogaid na gomipe si Mosa ago si Aron ko lopa na inigoraok iran a "Ya Allah a Tohan o
langon o manga niyawa o manosiya, na ba ngka kerarangiti so langon o isa ka maginged
sabap ko kiyadosa o sasakataw bo a mama?"

24 “Teroa ngka ko manga taw a awata iran so manga barombarong i siki Korah, Datan
ago si Abiram."
25 Na minggagaan somong si Mosa ki Datan ago si Abiram a oonotan sekaniyan o manga

pelokelokesen sa Israil.
26 Pitero iyan ko manga taw a "Awata niyo so manga barombarong angkai a manga rarata
a taw! Di niyo sekoa so apiya antonaa a rek iran ka o ba kano baden mirakes ko
kapolanga kiran sabap ko manga dosa iran."
27 Sabap roo na inawat o manga taw so manga barombarong i siki Korah, Datan ago si
Abiram.
Samaoto na lomiliyo si Datan ago si Abiram a kititindeg ko manga gimowa o manga
barombarong iran a ped iran so manga karoma iran ago manga wata.
28 Na pitero i Mosa ko manga taw a "Giyai i kaketokawi niyo a siyogo ako o Allah sa
kanggolaolaa ko sangkai langon a pinggolaola ko ago kena a ba aken akal galebek.
29 O aya ipematay angkai a manga taw na kalilid a kapatay ka aya keokitan iran na so bo
so kalalayaman a pekeolaola o manosiya na da ako sogoa o Allah.
30 Ogaid na o sabelek a penggolaolaan o Allah ka so lopa na ngganga ago lameden iyan
siran a rakes o langon taman a rek iran na o manga oolog siran ko kobor iran a kikaooyag
na ketokawan iyo a giyangkai a manga mama na inikagowad iran so Allah."
31 Sii den ko kiyaposa niyan sii tero na miyaopak so lopa a katitindegan iran
32 Ka mingganga ini ago liyamed iyan siran taman ko manga pamiliya iran ago so langon
o manga pagtaw i Korah a rakes o langon taman iran.
33 Miyanga oolog siran ko kobor iran a kikaooyag pen a rakes o langon a rek iran. Na
mindemet so lopa na minitambon kiran, na miyapapas siran den ko isa ka maginged.
34 Na so langon o ped a manga Israil a ndodoo na miyamalagoy ko kiyanega iran ko
kapekisek iran a ipepelalalis o manga taw a "Mamalagoy tano! O ba tano baden mambo
malamed o lopa!"
35 Na sarta den a somiyokeyaw so apoy a poon ko Allah na riyapog iyan so dowa gatos
ago lima polo kataw a manga mama a miyamanapaat sa doka.
So manga Petotongan sa Doka

37 “Teroa ngka ki Iliyasar a wata i Aron a 'Pangowaa ngka so manga petotongan sa doka
a poon ko miyalamba o apoy na go ngka kayara so manga waga on sii ko malo on
maawat, ka so manga petotongan sa doka na palaya miyasoti
38 Sabap ko kiyapangowita on ko hadapan o Allah. Kagiya ka maoto na kowaa ngka
ngkai a manga piyanotongan sa doka o manga mama a miyapamono sabap ko
kiyapakandosa iran, na sesela ngka ini a ipelapis ko aparan, kaan ai mabaloy a nanao a
ipelalang ko manga Israil.' "
39 Kagiya ka maoto si Iliyasar a so imam na piyanimo iyan so manga galang a petotongan
sa doka a inawidan angkoto a manga mama a miyanga tototong na piyakisesel iyan ai a
ipelapis ko aparan
40 A so den so inisogo rekaniyan o Allah a nggolalan ki Mosa. Giyai i ipelalang ko
manga Israil sa da den a ped a taw a pekatotong sa doka ko hadapan o Allah a
makaliyoliyo ko moriyataw i Aron, ka o aden a somogok on na kebinasa sekaniyan a
datar i Korah ago so manga pagtaw niyan.
41 Ogaid na sii ko talondog a gawii na so langon o isa ka maginged a Israil na

piyanarotaroan iran si Mosa ago si Aron a tig iran a "Piyamono iyo so manga pagtaw o
Allah!"
42 Ogaid na kagiya nggoronggorongan o manga taw si Mosa ago si Aron na siyangoran
iran so Barombarong a dii Telabokan na miyailay iran a minisapeng on so gabon ago
mipeyag on so bantogan o Allah.
43 Na somiyong si Mosa ago si Aron ko danga o Barombarong
45 “Awata niyo angkai a malilimod ka polangen ko siran sa sagogona!" Ogaid na gomipe
si Mosa ago si Aron ko lopa,
46 Na pitero i Mosa ki Aron a "Kowaa ngka so petotongan ka sa doka na betadi ngka sa
waga a poon ko aparan na tagoi ngka ini sa doka, na nggagaani ngka mowit ko malilimod
a manga taw na ron ka on sapaaten ko Allah kaan siran karilai, ka mimborngat den so
gani o Allah na kiyapoonan den so morala."
47 Na ininggolalan i Aron so pitero on i Mosa, na miyalalagoy ko look o malilimod a

manga taw. Samaoto na so paniyakit na kiyapoonan iyan den mamono so manga taw
ogaid na minisapaat nggagaan i Aron so doka kaan mapapas so dosa iran.
48 Tominindeg sekaniyan ko pageletan o miyamatay ago so kikaooyag na tomiyareg so
kasiksaan.
49 Ogaid na sapolo ago pat nggibo ago pito gatos a manga Israil a miyamatay sabap ko
morala a da on maped milang so miyamatay sabap ko kiyapakasopak i Korah.
50 Oriyan iyan na kagiya tomareg den so morala na komiyasoy si Aron ki Mosa sii ko
gimowa o Barombarong.
MANGA BILANGAN 17
So Teken i Aron

2 “Pakimbitiyarai ka ko manga Israil na kowa ka kiran sa sapolo ago dowa a manga teken
a nggagaisa ko oman i olowan o oman i isa ka mbatabataa a manga Israil, na soraten ka so
ngaran o oman i olowan sii ko teken iyan.
3 Sii ko teken o mbatabataa a Libi na soraten ka on so ngaran i Aron, ka sesatiman a
teken para ko oman i mbatabataa.
4 Wita ngka ini langon ko Barombarong na betaden ka sii ko onaan o Kaban sa
Kapasadan a ron aken seka petelaboka.
5 Na so teken o mama a kepili aken na pelonawan a ombos. Sii sangkai a okit na
pekageneken ko angkai a lalayon rekano dii kapanarotaroi o manga Israil."
6 Inisampay i Mosa ko manga Israil angkai a manga insarat, na so oman i olowan iran na
migay rekaniyan sa teken, a sesatiman ko oman i isa ka mbatabataa, na sapolo ago dowa a
teken langon, ago maaped on so teken i Aron.
7 Na inibetad i Mosa so manga teken sii ko onaan o Kaban sa Kapasadan sii ko
Barombarong.
8 Sii ko talondog a gawii na somiyoled si Mosa ko Barombarong na miyailay niyan a so

teken i Aron a poon ko mbatabataa a Libi na liyonawan ago miyagombos, na
miyagobarobar taros a miyonga sa manga almondo!
9 Mandiyadi na kinowa i Mosa so langon o manga teken a matatago ko hadapan o Allah
na iniliyo niyan ai ago piyakiilay niyan ko langon o manga Israil, na kinowa o oman i
olowan so teken iyan.
10 Na pitero o Allah ki Mosa a "Kasowin ka metad ko onaan o Kaban sa Kapasadan so
teken i Aron kaan roo den matatago a mabaloy a lalangan ko manga taongkir, ka pematay
siran o di iran geneki so di iran raken dii kapanarotaroi."
11 Na ininggolalan i Mosa so inisogo on o Allah.
12 Na inigoraok o manga Israil ki Mosa a "O giyanan na pematay kami den! Palaya kami
kebinasa!
13 Apiya so kapekaobay o apiya antawaa ko Barombarong o Allah na ipetay niyan! Ba
kami langon pematay?"
MANGA BILANGAN 18
So manga Galebek o manga Imam
Pitero o Allah ki Aron a "Seka ago so manga wata a ka ago so manga Libitiyo na aya
makapembalogo ko manga kasalaan a kesogok sii ko Soti a Darpa, ogaid na sekano ago
so manga wata a ka i aya bo makapembalogo ko kasalaan a kesogok mipantag ko
kaiimami.
2 “Pakaonota ngka so manga tonganay ngka ko mbatabataa a Libi sii ko Barombarong a

pembetadan ko Kaban sa Kapasadan an siran i pepekaogop rekano ago so manga wata a
ka sii ko kapepanalagad iyo ron.
3 Ogaid na igira a di siran dii nggalebek ko Barombarong sii ko kapepamandoi niyo kiran
na di siran den pekaobay ko manga kasangkapan ko Soti a Darpa aya pen o ba sii ko
aparan, ka o ba baden mamatay kano langon.
4 Keogopan ka iran a aya kesangan iran na so kapegipata ko Barombarong a dii
Telabokan ago so langon a manga galebek on, ogaid na da a pekaogop rekano a salakaw a
taw a liyo ko mbawataan o Libi.
5 Seka bo ago so manga wata a ka i pekasangan ko kapekibira ko Soti a Darpa ago so
aparan kaan di pemborngat peman so rarangit aken ko manga Israil.
6 Saken den i minili ko manga tonganay ngka a manga Libitiyo a poon ko manga Israil a
aya reka den pamemegayan a isesenggay ko Allah kaan siran makanggalebek sii ko
Barombarong a dii Telabokan.
7 Ogaid na seka bo ago so manga wata a ka i makapenggolalan ko kaiimami sii ko langon
a galebek a mipantag ko aparan ago sii ko soled o Lebi a Soti a Darpa. Pamemegayan
aken rekano so kaiimami, na apiya antawaa a ped a taw i mobay ko soti a manga nganin
na mbonoon."
So Bagian o manga Imam ko manga Sapaat
8 Na pitero o Allah ki Aron a "Piyakikibir aken reka so manga soasoat a ipesepaat raken o
manga Israil; langon angkai a manga soti a pamemegayan raken o manga Israil na
inisenggay aken a bagian iyo ago so manga wata a ka ago sii pen ko manga kebabadan
reka sa taman sa pakataman.
9 Rek ka so ped ko manga soti a ipesepaat a di totongen ko apoy. Giyangkai a sabaad ko
langon a soti a ipesepaat iran raken apiya anda ko ipesepaat a pangenengken, o di na dii
korbanen sabap ko dosa, o di na dii korbanen sabap ko kiyataksil na bagian ka ini ago so
manga wata a ka.
10 Kana niyo ai ko soti a darpa; so bo so manga mama i pekakan on; soti ai para rekano.
11 “Rek ka pen so langon a pamemegayan a pepeladen raken o manga Israil ko

kapekibayaon on ko hadapan aken. Inibegay aken ai rekano ago so manga wata a ka a
manga mama ago manga babay a aya niyo lalayon bagian. Pekakan sii so apiya antawaa i
masosoti sii ko pamiliya ngka.
12 “Inibegay aken reka pen so lebi a mapiya ko paganay a inionga a maperagon a

ipesepaat raken o manga Israil, a so lana a olibi, arak ago so manga pereperan.
13 So langon o paganay a pekeragon ko lopa a pegowiten iran ko Allah na rek ka. Na
pekakan on so oman i isa a masosoti ko pamiliya ngka.
14 “So langon taman sii sa Israil a isesenggay ko Allah na rek ka pen.
15 “Oman i mama a popaw sa lawas ko manga Israil ago so oman i paganay a inimbawata
a mama o manga ayam a isepaat iran ko Allah na rek ka. Ogaid na keaon ka so oman i
popaw sa lawas a taw ago so oman i paganay a inimbawata a mama o karam a ayam.
16 Keaon ka siran amay ka makasaolan a idad iran a aya ipegaon on na lima timan a
pelata a pirak a piyakaokit ko timbangan ko Barombarong.
17 Ogaid na di ngka keaon so paganay a inimbawata o manga sapi, manga bilibili, o di na
manga kambing. Palaya ini soti a isesenggay a rek o Allah. Penombaliin ai na
pamesipesiken ka so rogo iran ko aparan na panotonga ngka so manga sibo iran a
ipesoasoat a mamot ko Allah.
18 Na rek ka so sapo angkai a manga ayam a datar o kagepe ago so kawanan a bobon o
manga ayam a inibayaw raken.
19 “Langon angkai a soti a pamemegayan a ipesepaat o manga Israil ko Allah na

inisenggay aken a rek ka ago so manga wata a ka a manga mama ago manga babay a aya
niyo den lalayon bagian. Giyai na di den kebaroba ago da a ikepos iyan a kapasadan o
Allah mipantag reka ago so manga kebabadan reka."
20 Na pitero pen o Allah ki Aron a "Da a ba ngka mapekawali ko lopa o manga Israil aya
pen o ba aden a bagian ka kiran. Saken i bagian ka ago kawali ngka sii kiran.
So Bagian o manga Libitiyo
21 “Makapantag ko mbatabataa a Libi a manga tonganay ngka na inisenggay aken a rek

iran so langon a manga diyakat o manga Israil maana a so ikasapolo bagi ko langon a rek
iran a aya iran den kawali a imbadal ko galebek iran a so kapekibira ko Barombarong a
dii Telabokan.
22 Ipoon imanto na di den pekaobay so ped a manga Israil ko Barombarong, ka o mobay
siran on na kedosa siran ago pematay.
23 So bo so manga Libitiyo na aya makapenggalebek ko Barombarong, na mipembalogo
iran so apiya antonaa a kasalaan a kesogok on. Giyai na da a kaposan iyan a taritib taman
ko kapamagapidapidi rekano. Da a mapekewali o manga Libitiyo sii ko manga Israil
24 Ka kagiya inibegay aken kiran a kawali iran so ikasapolo bagi ko rek o manga Israil a
ipesepaat iran a pamemegayan ko Allah. Giyanan i kiyateroa ko ron sa da a ba iran
mapekewali ko manga Israil."
So Diyakat a Kibegay o manga Libitiyo

26 “Teroa ngka ko manga Libitiyo a 'Amay ka matarima iyo ko manga Israil so ikasapolo
bagi a diyakat a inibegay aken rekano a kawali niyo na kepalad iyo raken so ikasapolo
bagi sangkoto a diyakat a aya niyo raken pamemegayan.
27 Giyangkai a pamemegayan iyo na imbilang a datar o pereperan a poon ko pegegikan o
di na ig a obas a poon ko petemekan on.
28 Sangkai a okit na pekapalad kano pen ko Allah sa pamemegayan a poon ko langon a
ikasapolo bagi a diyakat o manga Israil a peketarima iyo. Giyangkai a pamemegayan iyo
ko Allah na kibegay niyo ki Aron a so imam.
29 Kepalad iyo ko Allah a bagian iyan so lebi a mapiya ago lebi a soti ko langon taman a
minindiyakat rekano.
30 Na igira a pepeladen iyo ko Allah so lebi a mapiya on na imbilang ai rekano a sii den
pepekapoon ko pegegikan o di na so petemekan sa arak.
31 Na sekano ago so manga pamiliya niyo na kekan iyo so kelamba on ko apiya anda, ka
sokay niyo ai ko di niyo dii kanggalebek ko Barombarong a dii Telabokan.
32 Kena a ba kano kesala ko kakena niyo sii asar a miyapalad iyo ko Allah so lebi a
mapiya on. Ogaid na iktiyari niyo o ba niyo kidian ko soti a manga pamemegayan o
manga Israil a datar o ipekidia niyo ko kalilid a manga nganin kaan kano di pematay.
MANGA BILANGAN 19
So Ig a Ipelompiyo

2 “Began iyo ko manga Israil angkai a taritib a ipapaliyogat kiran o Allah: Teroa niyo
kiran a wit siran rekano sa mariga a babay a sapi a kangodaan pen a da a daway niyan ago
da den kasangani sa kokoong.
3 Began niyo ki Iliyasar a imam na kewit iyan ai ko liyo o kampo a ron kesombali sii ko
hadapan iyan.
4 Oriyan iyan na kisombo i Iliyasar so tindoro iyan ko rogo na mipemesipesik iyan ai sa
makapito a ipagantap iyan ko hadapan o Barombarong a dii Telabokan.
5 Na kapembantayan iyan a katotonga ko intiro o sapi a rakes o kobal iyan, sapo, rogo
ago manga tinai niyan.
6 Na pekakowa so imam sa satebi a kayo a sidro, sapak a hisop ago mariga a tiniker na
ipagitog iyan ai sii ko apoy a petotongan ko sapi.
7 Maipos oto na kepipian iyan so manga nditaren iyan ago makapepaigo sa ig. Oriyan
iyan na pekasoled sekaniyan ko kampo, ogaid na madadalem sekaniyan den a hadas
taman ko perimon.
8 So mama a tomiyotong ko sapi na kepipian iyan mambo so nditaren iyan ago
makapepaigo na madadalem sekaniyan den a hadas taman sa perimon.
9 “Saden sa masosoti a mama na ketimo iyan so manga ombi o sapi na kibetad iyan sii ko
soti a darpa ko liyo o kampo. Ketago ini roo a keosar o isa ka maginged a Israil, ka iseog
iran ai ko ig a pegosaren ko okitokit a ipelompiyo ko sala.
10 So mama a miyanimo ko ombi o sapi na kepipian iyan mambo so nditaren iyan na
madadalem sekaniyan den a hadas taman sa perimon. Giyai na da a ikepos iyan a sogoan
para ko manga Israil ago so manga salakaw a taw a mababaling kiran.
So Kapakaseko sa Miyatay
11 “Apiya antawaa i makaseko sa bangkay o taw na madadalem den a hadas ko soled o

pito gawii.
12 Disomala a kelompiyo niyan a ginawa niyan a nggolalan sangkai a ig a ipelompiyo sii
ko ikatelo ago ikapito gawii. Ogaid na o di niyan pelompiyowa a ginawa niyan sii ko
ikatelo ago ikapito gawii na di sekaniyan kesoti.
13 Saden sa makaseko sa bangkay o taw a di niyan pelompiyon a ginawa niyan na
kiyaresikan iyan so soti a darpa o Allah, na kebelag sekaniyan ko isa ka maginged a Israil.
Sabap sa da rekaniyan mipamesipesik so ig a ipelompiyo na ketatap rekaniyan so
kadadalem iyan a hadas.
14 “Giyai i kokoman a tomanen amay ka aden a taw a matay ko walay: Apiya antawaa i
sisii ko walay kagiya matay so taw ago apiya antawaa i somoled on na madadalem den a
hadas ko soled o pito gawii,
15 Na oman i di kalelekeban a pananagoay ko walay na keresikan.
16 Apiya antawaa i sisii ko pangomaan a makaseko sa taw a miyapatay a pedang o di na
baden miyatay, o di na makaseko sa tolan o taw, o di na kobor na madadalem sekaniyan
den a hadas ko soled o pito gawii.
17 “Aya ikidia ko taw a madadalem a hadas na ikowa ko ombi o mariga a sapi a tiyotong
a ipelompiyo ko sala na ketago ini ko omoy ago keododan sa mapiya a ig.
18 Oriyan iyan na so taw a masosoti na pekakowa sa sapak a hisop na isombo niyan ko ig
na mipemesipesik iyan ko walay ago so langon o manga kasangkapan on ago sii ko apiya
antawaa i miyakasoled on. Na mipemesipesik iyan pen ko miyakaseko ko tolan o
manosiya o di na kobor, o di na sii ko miyakaseko ko taw a miyabono o di na baden
miyatay.
19 Kapemesipesikan on o masosoti a taw so madadalem a hadas sii ko ikatelo ago ikapito
gawii. Na sii ko ikapito gawii na kepipian iyan so manga nditaren iyan ago makapepaigo
sa ig, na sii ko kaperimon iyan miyasoti sekaniyan den.
20 “Ogaid na so taw a madadalem a hadas a di niyan pelompiyon a ginawa niyan na

kebelag ko isa ka maginged a Israil ka kagiya kiyaresikan iyan so soti a darpa o Allah. Da
rekaniyan mipamesipesik so ig a ipelompiyo na kena a ba sekaniyan den masosoti.
21 Giyai na di den kebaroba a sogoan kiran.
"So mama a miyamesipesik ko ig a ipelompiyo na kepipian iyan mambo so nditaren
iyan. Apiya antawaa i makaseko sangkai a ig a ipelompiyo na madadalem den a hadas
taman ko perimon.
22 Apiya antonaa i maseko o taw a madadalem a hadas na kebaloy mambo a kena a ba
soti, na apiya antawaa pen i makaseko sii na madadalem den a hadas taman ko kaperimon
iyan.
MANGA BILANGAN 20
So Ig a poon ko Lakongan
Sii ko paganay a olanolan na miyakaoma so langon o isa ka maginged a Israil ko mitataog

a kaden sa Sin na mikempo siran sa Kadis. Miyatay roo si Mariyam na go minilebeng.
2 Da a ba ig a keinom o manga Israil sangkoto a darpa na pinggoronggorongan iran si

Mosa ago si Aron.
3 Na pimbongetan iran si Mosa a tig iran a "Tomo pen a minirakes kami mamatay ko
manga pagari ami sii ko danga o Barombarong o Allah!
4 Ino kami ngka pagowita sangkai a mitataog a kaden a ron kami mamatay a rakes o
manga pangangayamen ami?
5 Ino kami ngka pen pekaliyowa sa Misir ago sii kami ngka inowit sangkai a
piyakalekelek a darpa? Da a ba sii pereperan, o di na higos, ago da pen asinda on a obas
o di na granada. Apiya so ig a keinom ami na da den!"
6 Na giyanatan i Mosa ago si Aron so malilimod a manga taw na somiyong siran ko

gimowa o Barombarong a dii Telabokan na ron siran gomipe ko lopa, na mipeyag kiran
so bantogan o Allah.
8 “Kowaa ngka so teken ka, na seka ago si Aron na timoa niyo so langon o isa ka
maginged. Na pakimbitiyarai ka sangkoto a lakongan sii ko kamamasai ron o manga taw,
ka pakapembowalanen iyan so ig on. Sii sangkai a okit na kebegan ka sa ig so langon o
manga taw a poon ko lakongan kaan siran on mamakainom ago so manga
pangangayamen iran."
9 Na tiyoman i Mosa so inisogo on o Allah. Kinowa niyan so teken a poon ko hadapan o

Allah,
10 Na tinimo iran ago si Aron so manga taw sii ko danga o lakongan, na inilalis iyan
kiran a "Pamakineg kano a manga taongkir! Ba disomala pen a kapagowiti ami rekano sa
ig a pekapoon sangkai a lakongan?"
11 Giyoto a inibayaw i Mosa so teken iyan na inibentol iyan ko lakongan sa miyakadowa,
na tomiyoga on so mala a ig, na miyamanginom on so manga taw ago so pangangayamen
iran.
12 Ogaid na pitero o Allah ki Mosa ago si Aron a "Da ako niyo paratiyayaa piyapiya ka
da niyo pakikilalaan ko manga Israil so kabarakat aken. Kagiya ka maoto na kena a ba
sekano i pekawit sangkai a manga taw roo ko inged a imbegay aken kiran.
13 Miyanggolaola ini sii ko manga ig sa Miribah a ron piyanarotaroi o manga Israil so

Allah ago roo niyan kiran piyakiilay so kasosoti niyan.
Da Pakaokita a Idomiya so manga Israil
14 Sii ko katatago i Mosa sa Kadis na somiyogo sekaniyan sa manga taw ko dato sa

Idomiya a tig iran on a:
"Giyai i kabasa o manga tonganay ngka a manga Israil: Katawan ka den so langon a
kamaregenan a kiyaokitan ami,
15 A so kiyapakasong o manga apoapoan ami roo sa Misir ago so kiyapakabaling iran roo
sa miyatey den a manga ragon. So manga Imisiren na piyanatro kami ran so manga apo
ami
16 Ogaid na kagiya gomoraok kami ko Allah sa tabang na inampon iyan so pangni ami na
somiyogo sekaniyan sa malaikat na piyakaliyo kami niyan sa Misir.
"Imanto na sisii kami sa Kadis a so maito a inged ko temanaan o masasakop ka.
17 Kapedipedi ka bo na pakaokita kami ngka ko inged ka. Di ami terapasen so manga
pangomaan iyo o di na so manga asinda a obas iyo aya pen o ba kami inom sa ig ko
manga paridi iyo. Sii kami melalakaw ko mala a lalan na di kami silay sa kawanan o di
na sa diwang taman sa makaliyo kami ko masasakop ka."
18 Ogaid na somimbag so dato sa Idomiya a "Di kano pekaokit ko inged ami! O tepengi
niyo na sondolan ami sekano ago makipetidawa kami rekano.
19 Na pitero on o manga Israil a "Kedegen ami so mala a lalan, na o makainom kami o di

na so manga ayam ami ko ig ka na mbayadan ami. Da den a ped a sowaan ami a rowar ko
kapagokit ami roo a melalag."
20 Ogaid na pitero o dato sa Idomiya a "Di kano sii den pekaokit!" Na giyoto a tinimo
iyan so madakel ago manga babager a sondaro niyan na lominiyo siran sa kanggobata iran
ko manga Israil.
21 Na kagiya da iyog a Idomiya a ba on makaokit so manga Israil ko inged iran na
sominilay siran ko ped a pagokitan.
So Kiyapatay i Aron
22 Poon sa Kadis na lomiyalakaw so langon o isa ka maginged a Israil na miyaoma iran

so Palaw a Hor
23 A marani ko temanaan a Idomiya. Roo na pitero o Allah ki Mosa ago si Aron a
24 “Kitapi sii si Aron ko manga apo iyan. Di sekaniyan pekasoled ko inged a inibegay
aken ko manga Israil ka kagiya siyogok iyo so iniinsarat aken rekano roo ko ig sa
Miribah.
25 Pakaonota ngka tomakedeg si Aron ago si Iliyasar a wata iyan ko Palaw a Hor.
26 Pakindai ngka ki Aron roo so nditaren iyan ko kaiimami na go ngka pakisoloten ki
Iliyasar, ka petay roo si Aron a kitapi ko manga apo iyan."
27 Na pinggolaola i Mosa so inisogo on o Allah. Tomiyakedeg siran ko Palaw a Hor sii

ko kapegilaya on o langon o isa ka maginged.
28 Piyakindaan i Mosa ki Aron so nditaren iyan ko kaiimami ron na piyakisolot iyan ki
Iliyasar a wata iyan. Na miyatay si Aron roo ko poro o palaw, na oriyan oto na
tomiyondagay si Mosa ago si Iliyasar ko palaw.
29 Kagiya katokawan o manga taw a miyatay den si Aron na so langon o isa ka maginged
a Israil na pindiyagaan iran sekaniyan ko soled o telo polo gawii.
MANGA BILANGAN 21
Tiyaban so manga Ikanaanen
So dato sa Arad a Ikanaanen a mababaling sa pagabagatan a Kanaan na kagiya maneg

iyan a pepekaoma so manga Israil sii ko lalan a ipesong sa Atarim na giyobat iyan siran
na biniyag iyan so ped kiran.
2 Na misepa so manga Israil ko Allah a "O pakitabanen ka rekami angkai a manga taw na
na mbinasaan ami sa tarotop so manga siti iran."
3 Inampon o Allah so pangni o manga Israil na piyakitaban iyan kiran so manga
Ikanaanen, na piyaminasa iran sa tarotop so manga Ikanaanen a rakes o manga inged iran.
Sabap san na bitowan angkoto a darpa a Hormah.
So Tombaga a Nipay
4 Oriyan iyan na gomiyanat so manga Israil a poon sa Palaw a Hor na kideg iran so lalan
a ipesong ko Mariga a Ragat kaan iran maalibet so masasakop a Idomiya. Ogaid na tanto
a inoleg so manga taw sii ko kapelalakaw iran
5 Na piyanarotaroan iran so Tohan ago si Mosa a tig iran a "Ino kami ngka pekaliyowa sa
Misir kaan kami mamatay sangkai a disirto? Da a ba on paan! Da a ba on ig! Na
miyasemo kami den sangkai a da a oked iyan a pangenengken!"
6 Sabap roo na inowitan siran o Allah sa manga bibisa a nipay, na piyanoka iran so
manga taw, na madakel a manga Israil a miyamatay.
7 Na miyamanong so manga taw ki Mosa a tig iran a "Miyamakandosa kami ko
kiyapanarotaroi ami ko Allah ago seka. Pangniya ngka ko Allah a kowaan iyan rekami
angkai a manga nipay." Mandiyadi na inipangangarapan i Mosa so manga taw
8 Na pitero rekaniyan o Allah a "Mbaal ka sa nipay na tagoa ngka ko poro o polaos. Na
apiya antawaa i miyatoka a nipay na o mailay niyan ai na keoyag."
9 Na mimbaal si Mosa sa nipay a tombaga na tiyago iyan ko poro o polaos. Na apiya
antawaa i miyatoka a nipay a minilay ron na da matay.
So Kiyalalakaw o manga Israil sa Mowab

10 Tomiyaros den lomalakaw so manga Israil na mikempo siran sa Obot.
11 Gomiyanat siran sa Obot na mikempo siran sa Iya Abarim sii ko mitataog a kaden sa
tampar sa sebangan a Mowab.
12 Poon roo na lomiyalakaw siran na mikempo ko Balintad a Sirid.
13 Gomiyanat siran roo na tomiyaros ko sabala a Lawasaig a Arnon na mikempo siran sii
ko mitataog a kaden a midadair ko masasakop o manga Amoriyo. Giya Arnon na aya
temanaan a Mowab sii ko pageletan o manga Mowabiyo ago so manga Amoriyo.
14 Giyanan i sabap a aya miyatero sii ko 'Ribro a Totolan ko manga Kiyapakitidawa o
Allah' na
"..so inged a Wahib ago so manga baogan on sii sa Sopah,

so manga balintad o Lawasaig a Arnon,
15 Ago so manga silid o manga baogan
a ipetondagay taman ko inged a Ar
a matatago ko temanaan a Mowab."
16 Poon roo na tomiyaros den lomalakaw so manga Israil roo sa Bir a ndodon so paridi a
ron miyatero o Allah ki Mosa a "Timoa ngka so manga taw ka mbegan ko siran sa ig."
17 Samaoto na inipagidaida o manga Israil angkai a idaida:
"Mbowalan ka den, hey paridi!

Magidaida tano sa makapantag on,
18 Makapantag ko paridi a kiyalot o manga pendatoon,
ago so manga olowan o manga taw,
a inikalot iran on so manga tongkas iran ago manga teken."
Na poon ko mitataog a kaden na tomiyaros so manga Israil sa Matanah,

19 Na poon sa Matanah na taman sa Nahaliyal, na poon sa Nahaliyal na taman sa Bamot,
20 Na poon sa Bamot na somiyong siran ko balintad sii sa Mowab a marani ko poro o
Palaw a Pisgah a katotolongan iyan so disirto.
So Kiyatabana ki Sihon ago si Og
21 Samaoto na piyakasong o manga Israil so manga siyogo ki Sihon a dato o manga

Amoriyo a tig iran a
22 “Pakaokita kami ngka ko inged ka. Kedegen ami so mala a lalan taman sa makaliyo
kami ko masasakop ka. Di kami den tipas ko manga pangomaan iyo ago so manga asinda
niyo a obas aya pen o ba kami inom ko manga paridi iyo."
22 Ogaid na somiyangka si Sihon o ba makaokit so manga Israil ko masasakop iyan. Na

tinimo iyan baden so langon a sondaro niyan na lominiyo siran ka nggobaten iran so
manga Israil roo ko mitataog a kaden, na minitidawa iran so manga Israil roo sa Yahas.
24 Ogaid na piyamono siran o manga Israil ko katidawa na inagaw iran so inged iran
ipoon sa lawasaig a Arnon na sii bo taman sa Yabok a aya den temanaan o manga
Amoniyo, ka aaladen sa mabager so temanaan iran.
25 Inagaw o manga Israil so langon o manga siti o manga Amoriyo a rakes a Hisbon ago
so langon o melilibeta on a pagingedingedan na biyalingan iran pen.
26 Giya Hisbon na aya siti i Sihon a dato o manga Amoriyo. Gowani na miyakitidawa
sekaniyan den ko andang a dato sa Mowab na miyaagaw niyan on so intiro a lopa iyan
taman den sa Arnon.
27 Giyanan i sabap a aya dii ipagaidaida o manga dii mbabayok na:
"Song kano sii sa Hisbon a siti i Sihon!

Mabangon ai peroman ago kambagowan!
28 Miyakapoon so apoy sa Hisbon
a somiyokeyaw a poon ko siti a Sihon.
Riyapog iyan a Ar sii sa Mowab
ago liyamed iyan so manga poporo a darpa sa Arnon.
29 Dowandowaan kano, hey manga Mowabiyo!
Miyabinasa kano den a pepamanimba ko katohanan a Kimos!
So miyakapalagoy a manga wata iyan a manga mama ago manga babay
na piyakibiyag iyan ki Sihon a dato o manga Amoriyo.
30 Bininasa mi siran den sa tarotop
ipoon sa Hisbon na taman den sa Dibon.
Liyaslas ami siran den taman sa Nopah
ago roo sa Midiba."
31 Komiyaden so manga Israil ko inged o manga Amoriyo.

32 Na oriyan o kiyasogo i Mosa sa manga manoriman sa kapariksaa iran sa siti a Hasir na
miyaagaw ai o manga Israil a rakes o melilibeta on a manga inged na piyamogaw iran on
so manga Amoriyo a kibabaling roo.
33 Oriyan iyan na komiyori siran na miyantap siran sa Basan, ogaid na lominiyo ron si Og
a dato sa Basan ago so langon o manga sondaro niyan na miyakitidawa siran ko manga
Israil roo sa Idri.
34 Na pitero o Allah ki Mosa a "Di ngka sekaniyan keleken, ka piyalad aken reka den si
Og a rakes o langon o manga pagtaw niyan ago so inged iyan. Na nggolaolaa ngka
rekaniyan so inikidia ngka ki Sihon a dato o manga Amoriyo a mindato roo sa Hisbon."
35 Kagiya ka maoto na piyolang siran o manga Israil taman ko manga wata iyan a manga
mama ago so langon o pagtaw niyan, na da den a ba kiran miyakapagoyag. Na giyoto a
tiyangan iran so lopa iyan.
MANGA BILANGAN 22
Piyakisogoan o dato sa Mowab si Balaam
Na tomiyaros lomalakaw peman so manga Israil taman ko kapantaran sa Mowab na sii
siran mikempo sa sebangan a Lawasaig a Yordan a mipapantag a Yariko.
2 So dato sa Mowab, a si Balak a wata i Sipor, na katawan iyan so langon o inikidia o
manga Israil ko manga Amoriyo,
3 Na miyanga sososa siran ago so langon o manga Mowabiyo na tanto iran a inikalek so
kadakel o manga Israil.
4 Na pitero o manga Mowabiyo ko manga olowan sa Midiyan a "Giyangkai a bariboribo a
manga taw na pelameden iran so langon o melilibeta rektano a datar o sapi a pepanateb
ko manga otan sii ko pangomaan!" Sabap san na si Balak a dato sa Mowab
5 Na somiyogo sekaniyan sa manga mama ki Balaam a wata i Biyor a roo mababaling sa
Pitor a so pimbawataan on a inged a marani ko Lawasaig a Yopratis. Na inisampay iran
ki Balaam angkai a katero i Balak: "Aden a miyakaoma sii a tanto a madakel a taw a
miyamakaliyo sa Misir; misasapeng siran ko liyawaw o kalopaan na komiyaden siran ko
dair aken.
6 Kapedipedi ka bo na song ka sii imanto na sintaan ka siran raken, ka tanto siran a
mabager a di saken, ka o ba ko siran mataban ago midendeg aken siran sangkai a inged.
Ka katawan aken a so apiya antawaa i ipengangarapan ka na kerakmatan, na so ipesinta a
ka na kesintaan."
7 Na gomiyanat so manga sanasanaan sa Mowab ago sa Midiyan a kiaawidan iran so

itendan iran ko kapesinta. Kagiya makaoma siran ki Balaam na piyanotol iran on so
miyatero i Balak. "Sii kano den pakatorog ko kagagawii," a tig i Balaam, "ka teroon ko
rekano bo so isembag raken o Allah." Na domike roo so manga sanasanaan sa Mowab.
9 Na miyakatalingoma so Tohan ki Balaam na iniise iyan on a "Antawaa ngkai a manga

mama a sisii reka?"
10 Tig i Balaam ko Tohan a "Manga siyogo siran i Balak a dato sa Mowab, ka piyakitero
iyan raken a
11'Aden a miyakaoma sii a tanto a madakel a taw a miyamakaliyo sa Misir na misasapeng
siran ko liyawaw o kalopaan. Kapedipedi ka bo na song ka sii imanto na sintaan ka siran
raken ka o ba ko siran mataban ago midendeg aken siran sangkai a inged.' "
12 “Na pitero o Tohan ki Balaam a "Di ngka siran pengonoti. Di ngka pesintaan angkoto
a manga taw a miyakapoon sa Misir ka rarakmatan ko siran."
13 Kagiya mapita na mimbowat si Balaam na pitero iyan ko manga siyogo i Balak a

"Baling kano ko inged iyo ka minda so Allah o ba ko sekano pangonoti."
14 Kagiya ka maoto na so manga sanasanaan sa Mowab na komiyasoy ki Balak na pitero
iran on a "Somiyangka si Balaam o ba rekami onot."
15 Mandiyadi na somiyogo peman si Balak sa ped a manga sanasanaan a madakel pen

ago lebi pen a seselaan a di so miyaona.
16 Somiyong siran ki Balaam na pitero iran on a "Giyai i kabasa i Balak a wata i Sipor:
Kapedipedi ka bo na di ngka pekibangenen a kapakasong ka raken.
17 Tendanan ko seka sa tanto a mapiya ago ipenggolalan aken so apiya antonaa i peteroon
ka raken. Song ka sii baden na sintaan ka raken angkai a manga taw!"
18 Ogaid na inisembag kiran i Balaam a "Apiya pen o began raken i Balak so torogan
iyan a mapepeno a pirak ago bolawan na da den a ba ko mapenggolaola a mala o di na
maito a misogok ko inisogo raken o Allah a Tohan ko.
19 Ogaid na tareg kano sii ko kagagawii a datar o siyowa o manga ped iyo kaan aken
katokawi o ba aden pen a peteroon raken o Allah."
20 Sangkoto a kagagawii na miyakatalingoma so Tohan ki Balaam na pitero iyan on a

"Sabap sa siyogo reka angkai a manga mama sa kapekaonota iran reka, na onot ka kiran
den, ogaid na so bo so peteroon ko reka i nggolaolaa ngka."
So Kimar i Balaam
21 Kagiya mapita na mimbowat komabalaga si Balaam na siniyaan iyan so kimar iyan na

miyonot ko manga sanasanaan sa Mowab.
22 Ogaid na tanto a kiyararangitan o Tohan ko kiyaonot iyan kiran, na so malaikat o
Allah na tominindeg ko lalan sa kasoranga niyan on. Na sii ko kakokoda i Balaam ko
kimar iyan a oonotan o dowa kataw a talasogoay niyan
23 Na miyailay o kimar so malaikat o Allah a tomitindeg ko lalan a kakapetan iyan so
mabibindas a pedang. Na sominilay so kimar sii ko pangomaan ogaid na liyambitan i
Balaam ka pekakasowin iyan ko lalan.
24 Mandiyadi na tominindeg so malaikat ko darpa a masimpit on so lalan a kapageeletan
o dowa a asinda a obas a mbabala ko lalan so pangeleban a ator.
25 Kagiya mailay o kimar so malaikat na riyompir iyan so pangeleban na miyalopit so ai
i Balaam, na liyambitan iyan peroman so kimar.
26 Mandiyadi na miniseg peroman so malaikat sa onaan na tominindeg ko tanto a
masimpit ko lalan a di on den pekasilay sa kawanan o di na sa diwang.
27 Na kagiya mailay o kimar so malaikat na lomiko, na masesakad sekaniyan baden i
Balaam. Na mimborngat so gani i Balaam na inipamentol iyan on so teken iyan.
28 Na giyoto a piyakatero o Allah so kimar na iniise iyan ki Balaam a "Antonaa i
miyasela aken reka a liyambitan ako ngka sa miyakatelo?"
29 “Pilalongan ako ngka!" a inipesong i Balaam. "O aden a pedang aken na mbonoon ko
seka den imanto!"
30 Na tig o kimar ki Balaam a "Ba di saken so kimar ka a lalayon ka dii kodaan taman
imanto? Ba ko reka ini minikidia gowani?"
"Kena," a inisembag iyan.
31 Na bikar o Allah so mata i Balaam na miyailay niyan so malaikat o Allah a tomitindeg

ko lalan a kakapetan iyan so mabibindas a pedang. Na somiyodiyod on si Balaam na
gomipe ko lopa.
32 “Ino ngka pelambiti so kimar ka sa miyakatelo den ai?" a iniise on o malaikat.
"Miyakaoma ako sii ka pesorangen aken seka ka kagiya bibid raken so di ngka dii
nggolaolaan.
33 Pekeilay ako o kimar na sinilayan ako niyan sa miyakatelo. O da ako niyan silayi na
mataan a miyapatay aken seka den imanto ago miyapakapagoyag aken den so kimar."
34 Na pitero i Balaam ko malaikat o Allah a "Miyakandosa ako. Da aken katokawi a

tomitindeg ka bes ko lalan a pegerenen ako ngka. Na o di ngka ikesoat so kasong aken
roo na mbaling ako baden sa walay."
35 Ogaid na pitero o malaikat ki Balaam a "Onot ka den ko manga mama ogaid na aya bo
a mapetero o ka na so pakipetero aken reka." Mandiyadi na tomiyaros monot si Balaam
ko manga siyogo i Balak.
Inalaw i Balak si Balaam
36 Kagiya maneg i Balak a pekaoma si Balaam na lominiyo sekaniyan ka pagalaon iyan

roo ko siti sa Mowab a matatago ko kilid a Lawasaig a Arnon sii ko temanaan o
masasakop iyan.
37 Na pitero i Balak ki Balaam a "Ino ka raken da song ko paganay a kiyapakisogoi aken
reka? Ba aken di kegaga a katendani reka sa tanto a mala?"
38 “Na, katii ako imanto a miyakaoma reka," a inisembag i Balaam, "ogaid na da a kapaar
aken sa kateroa ko apiya antonaa, ka so bo so pakipetero raken o Tohan."
39 Na miyonot si Balaam ki Balak na somiyong siran sa Kiriyat Hosot.
40 Miyangorban roo si Balak sa manga sapi ago manga bilibili, na inibegay niyan ki
Balaam so sabagi ko sapo, ago sii ko manga sanasanaan a moonot rekaniyan.
41 Sii ko kiyapita iyan na piyakaonot i Balak tomekedeg si Balaam sii sa Bamot Baal a
ron miyailay i Balaam so ped ko manga Israil.
MANGA BILANGAN 23
So Paganay a Miyaalamat i Balaam
Pitero i Balaam ki Balak a "Mbaalen ako ngka sii sa pito timan a aparan na witi ako ngka
sii pen sa pito timan a mama a sapi ago pito timan a mama a bilibili."
2 Na pinggolaola i Balak so pitero on i Balaam, na somiyapaat siran on ago si Balaam sa
nggagaisa a sapi ago bilibili ko oman i aparan.
3 Oriyan iyan na pitero i Balaam ki Balak a "Sii ka den ko kilid o inisapaat ka a

petotongen, na song ako roo pasin ka o ba ako roo talaboka o Allah. Na panotolen ko
reka bo so apiya antonaa i peyagen iyan raken." Mandiyadi na tomiyakedeg si Balaam ko
poro o bobongan,
4 Na tiyalabok sekaniyan roo o Tohan. Pitero rekaniyan i Balaam a "Mitiyagar ako sa
pito timan a aparan na miyanapaat ako ron sa nggagaisa a sapi ago bilibili ko oman i
aparan."
5 Na piyayag o Allah ki Balaam so lalag iyan na tig iyan a "Kasoy ka ki Balak na teroa
ngka so pakipetero aken reka."
6 Mandiyadi na komiyasoy si Balaam ki Balak na miyaoma niyan a tomitindeg pen ko
obay o manga petotongen a inisapaat iyan a ped iyan so langon a sanasanaan sa Mowab.
7 Na piyayag i Balaam angkai a lalag:
"Poon sa kapalawan sa sebangan roo sa Siriya

na ron ako piyakisogoi i Balak a dato sa Mowab a tig iyan a
'Song ka sii na sintaan ka raken so manga mbawataan o Yakob!
Song ka sii na tewapen ka so manga Israil!'
8 Ogaid na andamanaya i kipesintaan ko ko siran oto a da sintaan o Tohan?
Andamanaya i kipetewapen ko ko siran oto a da tewapen o Allah?
9 Poon ko manga poporo a pampang na peketolongan ko siran,
poon ko poro o manga bobongan na pekebantayan ko siran.
Isa siran ka bangsa a komakaden a somisibay
a di kibilang a isa ko ped a manga nasiyon.
10 Antawaa i pekaitong ko manga mbawataan o Yakob a lagid sa kadakel o bayanek,
o di na pekabilang ko apiya ikapat bagi bo ko manga Israil?
Pengnin ko a matay ako a datar sa kapematay o manga oontol;
mapos so kaoyagoyag aken a datar o keposan kiran!"
11 Na pitero i Balak ki Balaam a "Antonaa ngkai a inikidia ngka raken? Piyakisongowan

ko seka kaan ka misinta so manga ridoay aken, ogaid na ba ngka siran baden
riyakmatan!"
12 Na tig i Balaam a "Aya bo a mapetero aken na so pakipetero raken o Allah."
So Ikadowa a Miyaalamat i Balaam
13 Mandiyadi na pitero i Balak ki Balaam a "Onot ka raken ko salakaw a darpa a ron ka

siran keilay; sabagi bo kiran a keilay ngka roo a kena a ba langon iran, na ron ka siran
raken sintaan!"
14 Na piyakaonot i Balak si Balaam ko kapantaran sa Sopim sii ko poro o Palaw a
Pisgah, na roo peman mimbaal sa pito timan a aparan ago somiyapaat on sa nggagaisa a
mama a sapi ago mama a bilibili ko oman i aparan.
15 Na tig i Balaam ki Balak a "Sii ka den pasin ko obay o petotongen a inisapaat ka, ka
telaboken ko roo so Allah."
16 Tiyalabok o Allah si Balaam na piyayag iyan ki Balaam so lalag iyan na tig iyan a
"Kasoy ka ki Balak na teroa ngka so pakipetero aken reka."
17 Kagiya komasoy sekaniyan on na miyaoma niyan si Balak a tomitindeg pen ko obay o

petotongen a inisapaat iyan a ped iyan so manga sanasanaan sa Mowab. Na iniise i Balak
a "Antonaa i pitero o Allah?"
18 Na giyai i lalag a piyayag i Balaam:
"Pamakineg ka, hey Balak a wata i Sipor;

tagoa ngka sa ginawa so peteroon ko!
19 So Tohan na kena a ba taw a makapemokeg,
aya pen o ba manosiya a pekealin so pamikiran iyan.
Ba dii tero sa di niyan bo ipenggolalan?
Ba petopa na di niyan bo itoman?
20 Aya inisogo raken na perarakmat ako;
na romiyakmat so Tohan na di aken den ai kealin.
21 Da a ba niyan miyainengka a kadostaan sii ko manga mbawataan o Yakob
aya pen o ba aden a miyailay niyan a marata sii ko manga Israil.
Ka mipageepeda iran so Allah a Tohan iran;
na ipepemesag iran a sekaniyan i Dato iran.
22 Piyakaliyo niyan siran sa Misir;
datar siran sa kabager o maila a toro.
23 Da den a kapangatao a ba pekabinasa ko manga mbawataan o Yakob;
da den a rimaran a ba pekadorat ko manga Israil.
Aya mapetero imanto mipantag ko manga Israil a so mbawataan o Yakob na
'Mataan a piyakamemesa so inikidia kiran o Tohan!'
24 Giyangkai a manga taw na datar o mawaraw a arimaw;
mimbowat siran a datar o arimaw a di den ndeke
taman sa malamed iyan so miyasikem iyan
ago mainom iyan so rogo o miyapatay niyan."
25 Na pitero i Balak ki Balaam a "O di ngka siran ipesinta na di ngka baden perakmati!"
26 “Ba ko reka da teroa," a inisembag i Balaam, "a disomala a penggolaolaan ko so apiya

antonaa i peteroon raken o Allah?"
So Ikatelo a Miyaalamat i Balaam
27 Pitero i Balak ki Balaam a "Onot ka raken ka witen ko seka ko salakaw a darpa.

Masiken a ikesoat o Tohan a misinta a ka siran raken roo."
28 Na inowit i Balak si Balaam ko poro o Palaw a Piyor a katotolongan on so mitataog a
kaden.
29 Pitero peman i Balaam ki Balak a "Mbaalen ako ngka sii sa pito timan a aparan na
tiyagaren ako ngka sa pito timan a manga mama a sapi ago pito mambo a mama a
bilibili."
30 Na pinggolaola i Balak so pitero on i Balaam na somiyapaat sekaniyan sa sesatiman a
sapi ago bilibili ko oman i aparan.
MANGA BILANGAN 24
Kagiya kasabotan i Balaam a ikasosoat o Allah so kaperakmati ko manga Israil na da
sekaniyan osar sa kaperimar a datar o siyowa iyan gowani, ka somiyangor sekaniyan
baden ko mitataog a kaden
2 A ron iyan tiyolongi so manga Israil a kekampo siran a sisibaya so oman i mbatabataa.
Samaoto na minitemo rekaniyan so Roh o Tohan
3 Na piyayag iyan angkai a lalag:
"Giyai i miyaalamat i Balaam a wata i Biyor,

a so alamat o mama a marayag i kapangilailay;
4 So alamat o taw a pepekaneg ko manga katero o Tohan,
ago pepekailay sa pangingilain a poon ko Lebi a Mabager a Tohan
sii ko kapesodiyod iyan a mabebekar a manga mata niyan.
5 Sayana a mapiya i paras so manga barombarong iyo, hey mbawataan o Yakob;
a so kibabalingan iyo, hey manga Israil!
6 Giyanan na lagid o manga balintad a tanto a maolad
ago lagid o manga sapadan ko kilid o lawasaig;
a lagid mambo o manga korma a miyapamola o Allah,
ago manga kayo a sidro ko obay o manga ig.
7 Magondas so ig a poon ko manga sakdo iran;
pepekaigan piyapiya so manga oniin iran.
Pembaloy so dato iran a mala i gees a di si Agag,
na kebantogan so ndatoan iran.
8 Piyakaliyo siran o Tohan sa Misir;
datar siran sa kabager o maila a toro.
Pelalameden iran so manga nasiyon a manga ridoay iran
a peroropeten iran so manga tolan iran,
ago pesesaan iran so manga gasa iran.
9 Lomeleko siran a lagid o arimaw;
lagid o mawaraw a arimaw na antawaa i pekaraw kiran mokaw?
Kerakmatan so apiya antawaa i perakmat rekano,
na kesintaan so apiya antawaa i pesinta rekano!"
10 Na tanto a kiyararangitan i Balak si Balaam, na mangingimel sekaniyan a inipesong

iyan a "Piyakisogoan aken seka kaan ka misinta so manga ridoay aken! Ogaid na ba ngka
baden riyakmati sa miyakatelo den.
11 Awa ka sii den imanto! Baling ka den! Miyatero aken a tendanan ko seka sa tanto a
mapiya ogaid na da peroa o Allah a kaketendani reka."
12 Na simbag sekaniyan i Balaam a "Ba aken da teroa ko manga mama a siyogo o ka

raken a
13'Apiya pen o began raken i Balak so torogan iyan a mapepeno a pirak ago bolawan na
da den a mipenggolalan aken a baya a ginawa ko a mapiya o di na marata a misogok ko
inisogo o Allah'? Aya ko bo mapetero na so pakipetero raken o Allah!
14 Na mbeling ako imanto ko manga tonganay aken, ogaid na pekaiktiyaren ko seka daan
o antonaa i ikidia angkai a manga taw ko manga pagtaw ngka sii ko pemakatalingoma a
manga gawii."
So Kaposan a miyaalamat i Balaam
15 Na piyayag iyan angkai a lalag:
"Giyai i miyaalamat i Balaam a wata i Biyor,

a so alamat o mama a marayag i kapangilailay,
16 A pepekaneg ko manga katero o Tohan,
a aden a katao niyan a poon ko Lebi a Maporo,
a pepekailay sa pangingilain a poon ko Lebi a Mabager
sii ko kapesodiyod iyan a mabebekar a manga mata niyan.
17 Pekeilay aken so da pen manggolaola.
Pekeinengka aken sekaniyan ogaid na kena a ba marani.
Aden a dato a sebang a lagid o bitoon a pekapoon ko mbawataan o Yakob;
na nggemaw so tongkas iyan sa kadato sii sa Israil.
Sesaan iyan so beneng o manga Mowabiyo
ago so manga lagas a olo o manga mbawataan o Sit.
18 Tebanen iyan a Idomiya,
na tenganen iyan angkai a inged a Sair a ridoay niyan,
na pepekala so kabager o Israil.
19 Ndaagen siran o manga mbawataan o Yakob
na polangen iran so miyamakapagoyag sii ko manga siti."
20 Mandiyadi na miyailay i Balaam so manga taw sa Amalik na piyayag iyan angkai a

lalag:
"Giya Amalik na aya onaan o manga nasiyon,

ogaid na aya kaposan iyan na so kambinasaa on sa taman sa pakataman."
21 Mandiyadi na miyailay niyan so manga Kiniyo, na piyayag iyan angkai a lalag:
"Mabeken so babalingan iyo

a lagid o salag a matatago ko kilid a pampang.
22 Apiya pen oto na kelaslas so manga Kiniyo
amay ka pamiyagen kano o Asiriya."
23 Na pitero pen i Balaam a
"Aidaw! Antawaa i makapegoyag amay ka nggolaolaan ai o Tohan?

24 Pekaoma so manga awang a poon ko kilid a ragat sa Sipros
na ndaagen iran a Asiriya ago giya Ibir,
ogaid na kebinasaan siran mambo sa tarotop."
25 Oriyan iyan na gomiyanat si Balaam na miyaling, na miyaling mambo si Balak.
MANGA BILANGAN 25
So manga Israil roo sa Piyor
Sii ko katatareg pen o manga Israil sa Sitim na so ped ko manga mama na mirerembang
ko manga babay sa Mowab.
2 Na giyangkai a manga babay na biyoyo iran siran ko dii kakorbani ko manga katohanan
iran. Na komiyan so manga Israil ko sapo o manga korban ago miyamanimba ko manga
katohanan iran sa Mowab.
3 Na mimborngat so rarangit o Allah ko manga Israil sabap ko kiyapangeped iran ko
kapesimbaa ko katohanan a Baal roo sa Piyor.
4 Na pitero iyan ki Mosa a "Dakepa ngka so langon a olowan o manga taw a aya matao
sangkai a masosowa na pakipamonoon ka siran ko hadapan o Barombarong a ron
pekeilay o manga taw kaan mada so somosokeyaw a rarangit o Allah ko manga Israil."
5 Na pitero i Mosa ko manga pangongokom sa Israil a "Oman i isa rekano na pamonoa
niyo so oman i mama ko mbatabataa niyo a miyamangeped ko kapesimbaa ko Baal sa
Piyor."
6 Samaoto na aden a miyakaoma a mama a Israil a magowit ko pamiliya niyan sa babay a

taw sa Midiyan sii ko kapekeilaya on i Mosa ago so langon o isa ka maginged a Israil sii
den ko kapenggoraok iran ko gimowa o Barombarong a dii Telabokan.
7 Kagiya mailay ai i Pinihas a wata i Iliyasar ago apo i Aron na inawaan iyan so matitimo
a taw na kominowa sa bangkaw,
8 Na tiyondog iyan so mama ago so babay sii ko barombarong. Na inisoker iyan kiran a
dowa so bangkaw na lomiyambas ai ko mama ago sii ko tiyan o babay. Sabap sii na
minitareg so paniyakit a ipepamatay o manga Israil,
9 Ogaid na aya kadakel iran a miyamatay ko kasiksaan na dowa polo ago pat nggibo.
10 Na giyoto a pitero o Allah ki Mosa a

11 “Si Piniyas a wata i Iliyasar ago apo i Aron a imam na biyolongan iyan so rarangit
aken ko manga Israil, ka datar aken na piyanagontamanan iyan so bantogan aken sii kiran.
Na giyanan i sabap a da aken polanga so manga Israil sii ko kapepenaod aken.
12 Kagiya ka maoto na teroa ngka rekaniyan a pagembaalan aken on so kapasadan aken
sa kapetegompiya.
13 Sabap sangkai a kapasadan na sekaniyan ago so kebabadan on na dayon sa dayon so
kaiimami kiran ka kagiya piyanagontamanan iyan so bantogan o Tohan iyan na mimbaal
sekaniyan sa kakepapasa ko dosa o manga Israil."
14 Aya ngaran o mama a Israil a miyapatay a rakes o babay a taw sa Midiyan na si Simri
a wata i Salo a olowan o isa ka pamiliya ko mbatabataa a Simiyon.
15 Aya ngaran o babay a taw sa Midiyan a miyapatay na si Kosbi a wata i Sor a olowan
sekaniyan o isa ka bangsa roo sa Midiyan.
17 “Bilangen iyo a ridoay niyo so manga taw sa Midiyan na paminasaa niyo siran
18 Sabap sa pisemok kano iran ko kiyaagaka iran rekano ko kapesimbaa ko katohanan
iran sa Piyor, ago sabap ki Kosbi a wata a babay o isa a olowan sa Midiyan a miyapatay
ko gawii a kiyasiksaa rekano sabap ko pinggolaola niyo roo sa Piyor.
MANGA BILANGAN 26
So Ikadowa a Kiyabilanga ko manga Taw
Oriyan o kasiksaan na pitero o Allah ki Mosa ago si Iliyasar a wata i Aron a imam a
2 “Bilanga niyo so langon o isa ka maginged a Israil na listaan iyo so langon a mama ko
oman i pamiliya a miyakapagidad sa dowa polo ragon ago lawan pen a kepakay a
sondaro."
3-4 Samaoto na kekampo siran ko kapantaran sa Mowab sa sebangan a Lawasaig a
Yordan a pantag a Yariko. Na inisampay kiran i Mosa ago si Aron so pitero kiran o Allah
mipantag ko kambilanga ko manga Israil a miyadowa polo a idad iyan kiran ago lawan
pen a so den so inisogo o Allah ki Mosa ko kiyapakaliyo iran sa Misir. Na giyai so
kadakel iran a miyabilang:
5-7 Sii ko mbatabataa a Robin, a so kaka a wata o Yakob na:

pat polo ago telo nggibo ago pito gatos ago telo polo a manga mama a poon ko manga
mbawataan i siki Hanok, Palo, Hisron ago si Karmi.
8 Si Palo na ama i Iliyab,
9 Na si Iliyab na aya ama i siki Nimowil, Datan ago si Abiram. (Giyoto den si Datan ago
si Abiram a manga sanasanaan o isa ka maginged a miyato ki Mosa ago si Aron ago
miyangeped ko pepamangonot ki Korah isako somopak siran ko Allah.
10 Ogaid na mingganga so lopa na liyamed iyan siran a rakes i Korah, na dowa gatos ago
lima polo a pepamangonot on a miyamatay mambo sangkoto a gawii ko kiyalengana
kiran o apoy. Na miyabaloy siran a lalangan ko manga taw.
11 Apiya pen ai na da binasaa so manga mbawataan i Korah.)
12-14 Sii ko mbatabataa a Simiyon na:

dowa polo ago dowa nggibo ago dowa gatos a poon ko manga mbawataan i siki Nimowil,
Yamin, Yakin, Sirah ago si Siyaol.
15-18 Sii ko mbatabataa a Gad na:

pat polo nggibo ago lima gatos a poon ko manga mbawataan i siki Sipon, Hagi, Siyoni,
Osni, Iri, Arod ago si Arili.
19-22 Sii ko mbatabataa a Yodah na:

pito polo ago nem nggibo ago lima gatos a poon ko manga mbawataan i siki Siyalah,
Piris, Sirah, Hisron ago si Hamol. (So dowa kataw a manga wata i Yodah, a si Ir ago si
Onan, na miyamatay roo sa inged a Kanaan.)
23-25 Sii ko mbatabataa a Isakar na:
nempolo ago pat nggibo ago telo gatos a poon ko manga mbawataan i siki Tola, Powah,
Yasiyob ago si Simron.
26-27 Sii ko mbatabataa a Sibolon na:

nem polo nggibo ago lima gatos a poon ko manga mbawataan i siki Sirid, Ilon, ago si
Yakliil.
28 Aden a dowa ka mbatabataa a kiyababadan ko dowa a wata i Yosop a si Manasih ago

si Ipraim.
29-34 Sii ko mbatabataa a Manasih na:

lima polo ago dowa gatos nggibo ago pito gatos a poon ko manga mbawataan i Makir ago
so mbawataan i Giliyad a wata i Makir, ago poon ko manga mbawataan i siki Isir, Hilik,
Asriyal, Sikim, Siyamida ago si Hipir a so nem kataw a manga wata i Giliyad. So wata i
Hipir a si Silopihad na da a wata iyan a manga mama ka so bo so manga babay a aya
ngaran iran na siki Maklah, Nowah, Hoglah, Milkah ago si Tirsah.
35-37 Sii ko mbatabataa a Ipraim na:

telo polo ago dowa nggibo ago lima gatos a poon ko manga mbatawaan i siki Siyotilah,
Bikir, Tahan ago si Iron a wata i Siyotilah.
38-41 Sii ko mbatabataa a Baniyamin na:

pat polo ago lima nggibo ago nem gatos a poon ko manga mbawataan i siki Bila, Asbil,
Siyopam ago si Hopam, ago so manga mbawataan i Ard ago si Naaman a so dowa kataw
a wata i Bila.
42-43 Sii ko mbatabataa a Dan na:

nem polo ago pat nggibo ago pat gatos a poon ko mbawataan i Siyoham.
44-47 Sii ko mbatabataa a Asir na:

lima polo ago telo nggibo ago pat gatos a poon ko manga mbawataan i siki Imnah, Isbia
ago si Biriyas, ago so manga mbawataan i Hibir ago si Malkiyal a so manga wata i
Biriyas. Si Asir na aden a wata iyan a babay a aya ngaran iyan na si Sirah.
48-50 Sii ko mbatabataa a Naptali na:

pat polo ago lima nggibo ago pat gatos a poon ko manga mbawataan i siki Yaksiil, Goni,
Yasir ago si Silim.
51 Aya kadakel langon o manga Israil na nem gatos ago isa nggibo ago pito gatos ago telo
polo.

53 “So lopa a mapekewali angkai a manga taw na mapembagibagi kiran a mipepasod ko
kadakel iran.
54-56 Mbagibagia ngka a nggolalan ko kaperipa na begi ngka so mala a mbatabataa sa
mala a kawali, ago so maito on na begi ngka sa maito a kawali."
57 Miyabilang mambo so mbatabataa a Libi a aya maaped on na so manga mbawataan i

Girson, si Kohat ago si Mirari
58 A rakes o manga mbawataan i siki Libni, Hibron, Makli, Mosi ago si Korah.
Si Kohat na aya ama i Amram
59 Na aya ngaran o karoma i Amram na si Yokabid a moriyataw i Libi a inimbawata roo
sa Misir. Telo kataw a manga wata i Amram ago si Yokabid a si Aron, si Mosa ago so
babay iran a si Mariyam.
60 Si Aron na aya ama i siki Nadab, Abiho, Iliyasar ago si Itamar,
61 Ogaid na miyamatay si Nadab ago si Abiho isako somapaat siran ko Allah sa di sak a
apoy.
62 So langon a mama a miyabilang ko mbatabataa a Libi a miyakapagidad sa saolan ago

lawan pen na dowa polo ago telo nggibo. Da siran milista ko ped a manga Israil ka
kagiya da siran begi sa lopa a mapekewali ran sii sa Israil.
63 Giyai i miyabilang i Mosa ago si Iliyasar a so imam sii ko kakekampo o manga Israil
ko kapantaran sa Mowab sa sebangan a Yordan a pantag a Yariko.
64 Sii kiran na da a isa bo a mama a ba miyalamba ko miyabilang gowani i Mosa ago si
Aron roo sa Disirto sa Sinay.
65 Ka miyatero o Allah mipantag kiran a "Mataan a pematay siran sii ko mitataog a
kaden." Na da a isa kiran bo a ba miyalamba a rowar ki Kaleb a wata i Yaponih ago si
Yosowa a wata i Non.
MANGA BILANGAN 27
So manga Wata a Babay i Silopihad
Siki Maklah, Nowah, Hoglah, Milkah ago si Tirsah na manga wata a manga babay i
Silopihad a wata i Hipir, a wata i Giliyad, a wata i Makir, a wata i Manasih a aya wata i
Yosop.
2 Na somiyong angkai a manga babay ko Barombarong a dii Telabokan na roo siran
miyangadap ki Mosa ago si Iliyasar a imam ago so manga pelokelokesen ko langon o isa
ka maginged a Israil na pitero iran a
3 “Miyatay so ama ami sii ko mitataog a kaden. Kena a ba sekaniyan maaped ko
miyamangonot ki Korah a miyamanopak ko Allah ka miyatay sekaniyan sabap ko rek
iyan a dosa, na da a minibegak iyan a manga wata iyan a mama.
4 Ino keda so ngaran o ama ami sii ko manga tonganay niyan sabap bo sa da a wata iyan a
mama? Begi kami ngka sa lopa ko mapekewali o manga tonganay o ama ami."
5 Sabap roo na inipenon i Mosa ko Allah so awid a akal iran, na pitero on o Allah a
7 “Ontol so piyangni o manga wata i Silopihad a manga babay. Begi ngka siran sa lopa a
mapekewali ran a datar o manga tonganay o ama iran. Kitogalin ka kiran so kawali o ama
iran.
8 Na teroa ngka ko manga Israil a 'O matay so mama a da a wata iyan a mama na
kitogalin so kawali niyan ko wata iyan a babay.
9 Na o da a wata iyan a babay na kitogalin so kawali niyan ko manga pagari niyan.
10 O da a manga pagari niyan na kitogalin so kawali niyan ko manga pagari o ama iyan.
11 Na o so ama iyan na da a manga pagari niyan na kitogalin so kawali niyan ko lebi a
madaseg a tonganay niyan a aya on pekatangan. Giyai i kokoman a ipapaliyogat a
katomana on o manga Israil a so den so inisogo o Allah ki Mosa.' "
Si Yosowa na aya Pekasambi ki Mosa
12 Na pitero o Allah ki Mosa a "Takedeg ka sangkai a palaw sii ko manga palaw sa

Abarim na langkawa ngka roo so lopa a inibegay aken ko manga Israil.
13 Oriyan o kailaya ngka on na petay ka a datar o pagari ngka a si Aron,
14 Ka roo ko mitataog a kaden sa Sin isako kapanarotaroan ako o manga Israil roo ko
manga ig sa Miribah na ndatar kano a siyogok iyo so iniinsarat aken rekano, na da niyo
pakikilalaan ko manga Israil so kabarakat aken." (Giyai so manga ig sa Miribah sii sa
Kadis roo ko mitataog a kaden sa Sin.)
15 Na pitero i Mosa ko Allah a

16 “Ya Allah a Tohan o manga niyawa o langon a manosiya na toro ka sa mama a
makapegolowan sangkai a isa ka maginged
17 A makapengonaan ago makapemando kiran sii ko di iran dii kapakitidawa kaan di
kebaloy so manga pagtaw ngka a datar o manga bilibili a da a ba on tomatagikor."
18 Na pitero o Allah ki Mosa a "Kowaa ngka si Yosowa a wata i Non, a so mama a

sesenepen a Roh na dapeneten ka rekaniyan a lima ngka.
19 Pakatindega ngka sekaniyan ko hadapan i Iliyasar a imam ago sii ko langon o isa ka
maginged na sii ko kamamasai ran on na idini ngka sekaniyan a aya reka pekasambi.
20 Begi ngka sekaniyan ko kadato o ka kaan sekaniyan maparatiyaya o langon o isa ka
maginged a Israil.
21 Disomala a sii sekaniyan pepegise ki Iliyasar a so imam a aya pekatokaw ko kabaya o
Allah sii ko hadapan iyan a nggolalan ko Orim. Giyanan i kapeketokawi i Yosowa ago so
langon o manga Israil o antonaa i patot a penggolaolaan iran."
22 Na pinggolaola i Mosa so inisogo on o Allah; kinowa niyan si Yosowa ago

piyakatindeg iyan ko hadapan i Iliyasar ago sii ko langon o isa ka maginged.
23 Na inidapenet on i Mosa a lima niyan na inidinan iyan sekaniyan sa kaoolowani ron a
so den so inisogo o Allah ki Mosa.
MANGA BILANGAN 28
So dii Kakorban Oman Gawii

2 “Began ka angkai a sogoan ko manga Israil: Sii ko matetendo on a oras na piyapiyai
niyo raken somapaat so manga pangenengken a petotongen, ka mamot raken.
3 Teroa niyo kiran a: Giyai i gawii gawii a di niyo dii korbanen a pekisapaat iyo a
petotongen sii ko Allah: dowa timan a bilibili a sesaragon a idad iyan a da a daway niyan.
4 So isa on na mapekorban iyo ko kapipita na so isa on na sii ko perimon
5 Na kerakesan so oman i isa on sa isepaat a pangenengken a isa ka kilo a mapiya a arina
a sasaogan sa isa ka litro a lana a olibi.
6 Giyangkai a gawii gawii a di niyo dii korbanen sa ipesepaat a petotongen a mamot ko
Allah na inisogo iyan roo ko Palaw a Sinay.
7 Aya isepaat a panginginomen a kirakes ko oman i bilibili na isa ka litro a arak a keodod
sii ko soti a darpa a aya den isepaat a panginginomen ko Allah.
8 So ikadowa a bilibili na mapekorban ko perimon a perakesan sa datar o ipesepaat a
pangenengken ago so panginginomen sa kapipita. Giyai i dii korbanen a ipesepaat a
petotongen a mamot ko Allah.
So dii Kakorban ko Gawii a Idedeke
9 Sii ko Gawii a Idedeke na makapekorban kano sa dowa timan a mama a bilibili a

sesaragon a idad iyan ago da a daway niyan a kerakesan sa isepaat a pangenengken a
dowa ka kilo a mapiya a arina a sasaogan sa lana a olibi ago so isepaat a panginginomen.
10 Giyai i mapekorban iyo a isepaat a totongen ko oman Gawii a Idedeke a ipegoman ko
gawii gawii a dii korbanen a ipesepaat a petotongen ago so iperakes on a panginginomen.
So dii Kakorban ko Saribolan
11 Sii ko paganay a gawii ko oman olan na makapekorban kano ko Allah sa manga

isepaat a totongen a dowa timan a kangodaan a mama a sapi, satiman a mama a bilibili
ago pito timan a nati a bilibili a sesaragon a idad iyan a langon da a daway niyan.
12 Kerakesan ai sa ipesepaat a pangenengken a mapiya a arina a sasaogan sa lana a olibi:
telo ka kilo ko oman i mama a sapi, dowa ka kilo ko mama a bilibili
13 Ago isa ka kilo ko oman i nati a bilibili. Giyai i pekorbanen a isepaat a totongen a
mamot ko Allah.
14 Kerakesan ai pen sa ipesepaat a panginginomen a dowa ka litro a arak a kirakes ko
oman i mama a sapi, isa ka litro ago tenga a kirakes ko mama a bilibili, ago isa ka litro a
kirakes ko oman i nati a bilibili. Giyai i mapekorban a isepaat a totongen sii ko paganay a
gawii ko olanolan ko tenday a ragon.
15 Makapekorban kano pen ko Allah sa satiman a mandangan sabap ko dosa sangkai a
gawii a ipegoman ko gawii gawii a dii korbanen a ipesepaat a petotongen ago so iperakes
on a panginginomen.
So Dii Kakorban ko Pista a Paska
16 Sii ko ikasapolo ago pat gawii ko paganay a olanolan na mapeselasela on so Pista a

paska o Allah.
17 So ikasapolo ago lima gawii sangkai a olanolan na aya poonan o pista a pito gawii a
katey niyan, na aya bo a paan a peken on na so da a tapay ron.
18 Sii ko paganay a gawii sangkai a pista na talabok kano sa soti a kalilimod, na da a ba
niyo ron mapenggalebek.
19 Makapekorban kano ko Allah sa manga isepaat a totongen a dowa timan a kangodaan
a mama a sapi, satiman a mama a bilibili ago pito timan a nati a bilibili a sesaragon a idad
iyan a langon da a daway niyan.
20 Kerakesan ai sa isepaat a pangenengken a mapiya a arina a sasaogan sa lana a olibi;
telo ka kilo a kirakes ko oman i mama a sapi, dowa ka kilo a kirakes ko mama a bilibili,
21 Ago isa ka kilo a kirakes ko oman i nati a bilibili.
22 Makapekorban kano pen sa satiman a mandangan sabap ko dosa a aya den
kinggolalanen ko kakepapasa ko manga dosa niyo.
23 Pekisapaat iyo ini langon a ipegoman ko dii korbanen a ipesepaat a petotongen oman
kapipita.
24 Sii sangkai a okit ko soled o pito gawii na pekisapaat iyo so pangenengken a
petotongen a mamot ko Allah. Pekisapaat ai a ipegoman ko dii korbanen a ipesepaat a
petotongen sa gawii gawii a iperakes on so ipesepaat a panginginomen.
25 Na sii ko ikapito gawii na talabok kano sa soti a kalilimod na da a ba niyo
mapenggalebek.
So dii Kakorban ko Pista ko Kaperagon
26 Sii ko paganay a gawii ko Pista ko Kaperagon amay ka isepaat iyo ko Allah so

paganay a miyaragon a pereperan na talabok kano sa soti a kalilimod, na da a ba niyo
mapenggalebek.
27 Makapekorban kano sa manga isepaat a totongen a dowa timan a kangodaan a mama a
sapi, satiman a mama a bilibili, ago pito timan a nati a bilibili a sesaragon a idad iyan.
28 Kerakesan ai sa ipesepaat a pangenengken a mapiya a arina a sasaogan sa lana a olibi;
telo ka kilo ko oman i mama a sapi, dowa ka kilo ko mama a bilibili,
29 Ago isa ka kilo ko oman i nati a bilibili.
30 Makapekorban kano pen sa satiman a mandangan a isepaat sabap ko dosa a aya den
kinggolalanen ko kakepapasa ko manga dosa niyo.
31 Pananggilai niyo o ba aden a daway angkai a manga ayam. Pekisapaat ai langon a
ipegoman ko dii korbanen a ipesepaat a petotongen oman gawii a perakesan sa sapaat a
pangenengken ago panginginomen.
MANGA BILANGAN 29
So dii Kakorban ko Pista ko Kapekaoniya ko manga Bogiyong
Sii ko paganay a gawii ko ikapito a olanolan na talabok kano sa soti a kalilimod, na da a

ba niyo mapenggalebek. Giyai i gawii a kapemakaoniya niyo ko manga bogiyong.
2 Makapekorban kano ko Allah sa manga isepaat a totongen a mamot rekaniyan; satiman
a kangodaan a mama a sapi, satiman a mama a bilibili, ago pito timan a nati a mama a
bilibili a langon ai da a daway niyan.
3 Kerakesan ai sa manga ipesepaat a pangenengken a mapiya a arina a sasaogan sa lana a
olibi; telo ka kilo a kirakes ko mama a sapi, dowa ka kilo a kirakes ko mama a bilibili,
5 Pekasapaat kano pen sa satiman a mandangan sabap ko dosa a aya den kinggolalanen ko
kakepapasa ko manga dosa niyo.
6 Langon ai ipegoman ko kaseolan ago so gawii gawii a dii korbanen a ipesepaat a
petotongen a iperakes on so ipapaliyogat a manga sapaat a pangenengken ago
panginginomen. Giyai i manga ipesapaat ko Allah a petotongen a mamot rekaniyan.
So dii Kakorban ko Gawii a Kapepasa ko Dosa
7 Sii ko ikasapolo gawii sangkai a olanolan na talabok kano sa soti a kalilimod, na

powasa kano ago di kano penggalebek.
8 Makapekorban kano ko Allah sa manga isepaat a totongen a mamot rekaniyan a satiman
a kangodaan a mama a sapi, satiman a mama a bilibili, ago pito timan a nati a mama a
bilibili a sesaragon a idad iyan a langon ai da a daway niyan.
telo ka kilo a kirakes ko mama a sapi, dowa ka kilo a kirakes ko mama a bilibili,
11 Pekasapaat kano pen sa satiman a mandangan sabap ko dosa a liyo ko mandangan a
pekorbanen a aya den kinggolalanen ko kapepasa ko manga dosa
6 Ago liyo ko dii korbanen a ipesepaat a petotongen sa gawii gawii a perakesan sa sapaat
a pangenengken ago panginginomen.
So dii Kakorban ko Pista ko manga Lawig
12'Sii ko ikasapolo ago lima gawii ko ikapito a olanolan na talabok kano sa soti a
kalilimod, na da a ba niyo mapenggalebek. Na makapeselasela kano sa pista ko Tohan sii
ko soled o pito gawii.
13 Sii sangkoto a manga gawii na makapekorban kano ko Allah sa manga isepaat a
totongen a mamot rekaniyan a sapolo ago telo a kangodaan a mama a sapi, dowa timan a
mama a bilibili, ago sapolo ago pat a nati a mama a bilibili a sesaragon a idad iyan a
langon da a daway niyan.
telo ka kilo a kirakes ko oman i mama a sapi, dowa ka kilo a kirakes ko oman i mama a
bilibili,
16 Makapekorban kano pen sa satiman a mandangan sabap ko dosa a liyo ko dii korbanen
a ipesepaat a petotongen sa gawii gawii a perakesan sa ipesepaat a pangenengken ago
panginginomen.
17'Sii ko ikadowa gawii na makapekorban kano sa sapolo ago dowa a kangodaan a mama
a sapi, dowa timan a mama a bilibili, ago sapolo ago pat a nati a mama a bilibili a
sesaragon a idad iyan a langon da a daway niyan.
18 So oman i isa sangkai a manga ayam na perakesan sa ipapaliyogat on a sapaat a
19 Makapekorban kano pen sa satiman a mandangan sabap ko dosa. Langon ai ipegoman
ko dii korbanen a ipesepaat a petotongen sa gawii gawii a perakesan sa ipesepaat a
20'Sii ko ikatelo gawii na makapekorban kano sa sapolo ago isa a kangodaan a mama a
sapi, dowa timan a mama a bilibili, ago sapolo ago pat a nati a mama a bilibili a
23'Sii ko ikapat gawii na makapekorban kano sa sapolo timan a kangodaan a mama a

26'Sii ko ikalima gawii na makapekorban kano sa siyaw timan a kangodaan a mama a

sesaragon a idad iyan a langon ai da a daway niyan.
29'Sii ko ikanem gawii na makapekorban kano sa walo timan a kangodaan a mama a sapi,
dowa timan a mama a bilibili, ago sapolo ago pat a nati a mama a bilibili a sesaragon a
idad iyan a langon ai da a daway niyan.
32'Sii ko ikapito gawii na makapekorban kano sa pito timan a kangodaan a mama a sapi,
dowa timan a mama a bilibili, ago sapolo ago pat a nati a mama a bilibili a sesaragon a
idad iyan a langon ai na da a daway niyan.
35'Sii ko ikawalo gawii na timotimo kano sa soti a kalilimod, na da a ba niyo
mapenggalebek.
36 Makapekorban kano ko Allah sa manga isepaat a totongen a mamot rekaniyan a
satiman a kangodaan a mama a sapi, satiman a mama a bilibili, ago pito timan a nati a
mama a bilibili a sesaragon a idad iyan a langon ai da a daway niyan.
39'Langon ai na kisapaat iyo ko Allah sii ko miyanga tetendo a manga pista niyo, a so
manga di niyo dii korbanen a ipesepaat a petotongen, manga ipesepaat a pangenengken
ago panginginomen ago so di niyo dii korbanen pantag bo ko kanggiginawai. Ipegoman
ai ko ipesepaat iyo pantag bo ko samaya ago so manga iklas a ipesepaat iyo.' "
40 Na inisampay i Mosa ko manga Israil so langon taman a inisogo on o Allah.
MANGA BILANGAN 30
Manga Kokoman mipantag ko Samaya
Na pitero i Mosa ko manga olowan o manga mbatabataa sa Israil a "Giyai i inisogo o

Allah:
2 Igira a misemaya so mama ko Allah o di na misepa sa miniiket rekaniyan na di niyan
den kebaroba so manga katero iyan ka kitoman iyan baden so pitero iyan.
3'Igira a so raga a mababaling pen ko walay o ama iyan na misemaya ko Allah o di na

misepa sa miniiket on
4 Na o maneg o ama iyan so mipantag ko inisepa iyan a miniiket on ago man den a di
niyan katawan na kitoman o raga so langon a minisemaya ago minisepa iyan.
5 Ogaid na o isepar rekaniyan o ama iyan ko kiyanega niyan on na kena a ba paliyogat so
kitomanen o raga ko samaya o di na sapa iyan. Na pokasen ai rekaniyan ka kagiya
inisapar on o ama iyan.
6'O aden a babay a misemaya ko Allah o di na miyakanggagaan sepa so modol iyan na go

miyapangaroma,
7 Na o katokawi o karoma niyan so mipantag sii ago man iyan den a di katawan na
kitoman o babay so minisemaya iyan o di na minisepa.
8 Ogaid na o isepar rekaniyan o karoma niyan ko kiyatokawi niyan on na piyakadaan iyan
sa bali so minisemaya o babay o di na minisepa nggagaan o modol iyan na pokasen
rekaniyan o Allah.
9'Ogaid na oman i samaya o di na sapa o balo a babay o di na bitowanen na paliyogat a

kitomanen iyan on.
10'O so babay a mababaling ko karoma niyan na misemaya ko Allah o di na misepa
11 Na go miyaneg o karoma niyan so mipantag sii ago man iyan den a di katawan ago da
niyan sapari na kitoman o babay so minisemaya iyan o di na minisepa.
12 Ogaid na o pakadai sa bali o karoma niyan amay ka maneg iyan ai na kena a ba
paliyogat a kitomanen iyan ko apiya antonaa i samaya o di na sapa a miyatero iyan, ka
pokasen rekaniyan o Allah.
13 So karoma niyan na kapemataanan iyan o di na mapekada iyan sa kipantag so apiya
antonaa a minisemaya o babay o di na minisepa iyan a ikerasay o ginawa niyan.
14 Ogaid na o da den a pitero on o karoma niyan mipantag sii ko gawii gawii den na
nggolalan sii na kiyapemataanan iyan so langon a minisemaya o di na minisepa o babay a
miniiket on. Pimataanan iyan ai sabap sa da den a pitero iyan on ko gawii a kiyanega
niyan sii.
15 Ogaid na o piyakadaan iyan sa bali ko oriyan o gawii a kiyanega niyan on na sekaniyan
i makapembalogo ko sala o karoma niyan amay ka di niyan mitoman so sapa iyan.' "
16 Giyai i manga kokoman a inibegay o Allah ki Mosa mipantag ko mama ago so karoma
niyan, ago mipantag ko ama ago so kangodaan a wata iyan a babay a mababaling pen ko
walay o ama iyan.
MANGA BILANGAN 31
So Kiyasaopi ko manga Taw sa Midiyan

2 “Saopi ngka so manga taw sa Midiyan sabap ko pinggolaola iran ko manga Israil.
Maipos anan na petay ka den a kitapi ko manga apo o ka."
3 Mandiyadi na pitero i Mosa ko manga taw a "Tiyagar kano ko katidawa kaan iyo
magobat so manga taw sa Midiyan ago misaop iyo kiran so Allah.
4 Sesanggibo kataw ko oman i mbatabataa sa Israil a sogoon ko katidawa."
5 Sabap roo na sapolo ago dowa nggibo a manga mama a miyapili a sesanggibo ko oman
i mbatabataa sa Israil, na kiyagomaanan siran sa katidawa.
6 Na siyogo siran i Mosa sa kapakipetidawa iran a ped iran si Pinihas a wata i Iliyasar a
so imam a aya komikibir ko manga kasangkapan ko soti a darpa ago so manga bogiyong a
pepakaonin a tagotao ko kanggobat.
7 Na so den so inisogo o Allah ki Mosa na miyakitidawa siran ko manga taw sa Midiyan
na piyamono iran so langon o manga mama
8 Taman ko lima kataw a manga dato sa Midiyan a siki Ibi, Rikim, Sor, Hor ago si Riba.
Biyono iran pen si Balaam a wata i Biyor.
9 Na piyamiyag o manga Israil so manga babay sa Midiyan ago so manga wata iran, na
inawidan iran pen so manga sapi iran ago manga talon iran a manga bilibili ago manga
kambing, na piteban iran so langon a tamok iran,
10 Na piyanotong iran so langon o manga siti ago manga kampo a pagiingedan o manga
taw sa Midiyan.
11 Na initelon iran so langon o miyateban iran ago miyapamiyag a ndatar so manga taw
ago so manga ayam
12 Na piyangowit iran ai langon ki Mosa ago sii ki Iliyasar a imam ago sii ko isa ka
maginged a Israil roo ko kampo iran ko kapantaran sa Mowab sa sebangan a Lawasaig a
Yordan a pantag a Yariko.
13 Na lominiyo si Mosa ago si Iliyasar ago so langon a olowan ko isa ka maginged ka

pagalaon iran so manga sondaro ko liyo o kampo.
14 Ogaid na tanto a kiyararangitan i Mosa so manga komandir o manga sondaro a
miyakakasoy a poon ko katidawa.
15 “Ino niyo pakapegoyaga so langon o manga babay!" a iniise iyan kiran.
16 “Tanodi niyo a siran i miyamangonot ko mosawir i Balaam na inagak iran so manga
Israil ko kiyapakatalikod iran ko Allah roo sa Palaw a Piyor a aya kiyasabapan ko
paniyakit a inisiksa ko manga pagtaw o Allah.
17 Imanto na pamonoa niyo so langon o manga wata a mama ago so langon o manga
babay a miyakirembang sa mama,
18 Ogaid na so langon a kangodaan a babay a raga pen na pakapagoyaga niyo a rek iyo."
19 Na pitero pen i Mosa ko manga sondaro a "Apiya antawaa rekano i miyakapatay sa

taw o di na miyakaseko sa miyatay na pekatareg ko liyo o kampo sa makapito gawii. Na
sii ko ikatelo ago ikapito gawii na kesoti niyo a ginawa niyo a rakes o manga babay a
miyapamiyag iyo.
20 Na kepipian iyo so langon o manga nditaren iyo ago keonaban iyo langon so manga
nganin a inembaalan a kobal, bombol a kambing o di na kayo."
21 Oriyan iyan na pitero i Iliyasar a imam ko manga sondaro a miyakitidawa a "'Giyai i

ipapaliyogat o kokoman a inibegay o Allah ki Mosa: so bolawan, pirak, galang, potaw,
kitang ago timbega
23 Ago apiya antonaa pen a di ketotong na mapekaokit ko apoy kaan masoti. Ogaid na
kelompiyowan ai mambo ko ig a ipelompiyo. Na apiya antonaa i ketotong a apoy na
keonaban sangkai a ig a ipelompiyo.
24 Sii ko ikapito gawii na kepipian iyo so manga nditaren iyo na kesoti kano den. Oriyan
oto na pekasoled kano ko kampo."
So Kambagibagia ko Miyateban ko Katidawa

26 “Seka, ago si Iliyasar a imam, ago so manga olowan o manga pamiliya ko isa ka
maginged na listaan iyo so langon a miyateban iyo ko katidawa a rakes on so langon o
miyapamiyag iyo a manga taw ago manga pangangayamen.
27 Bagia ngka ini sa dowa, na began ka so sabagi on ko manga sondaro a miyakitidawa,
na so sabagi on na began ka ko ped a taw ko isa ka maginged.
28 Poon ko bagian o manga sondaro na kowa ka on sa bagian o Allah a satiman ko oman
i lima gatos a manga taw, manga sapi, manga kimar ago manga bilibili
29 Na began ka ini ki Iliyasar a imam a aya tindos a pamemegayan ko Allah.
30 Na poon ko bagian a rek o ped a manga Israil na kowa ka on sa satiman ko oman i
lima polo a manga taw, manga sapi, manga kimar, manga bilibili, manga kambing ago so
ped a manga pangangayamen, na began ka ini ko manga Libitiyo a aya komikibir ko
Barombarong o Allah."
31 Mandiyadi na ininggolalan i Mosa ago si Iliyasar so inisogo o Allah ki Mosa.
32-35 Giyai i listaan ko miyalamba ko miyateban o manga sondaro: nem gatos ago pito
polo ago lima nggibo a manga bilibili, pito polo ago dowa nggibo a manga sapi, nem polo
ago isa nggibo a manga kimar ago telo polo ago dowa nggibo a manga babay a da den
marembang a mama.
36-40 So sabagi on a miyakowa o manga sondaro na telo gatos ago telo polo ago pito
nggibo ago lima gatos a manga bilibili a aya miyambagian on o Allah na nem gatos ago
pito polo ago lima; telo polo ago nem nggibo a manga sapi a aya miyambagian on o Allah
na pito polo ago dowa; telo polo nggibo ago lima gatos a manga kimar a aya
miyambagian o Allah na nem polo ago isa; ago sapolo ago nem nggibo a manga taw a aya
miyambagian o Allah na telo polo ago dowa.
41 Na so miyambagian on o Allah a aya tindos a pamemegayan rekaniyan na inibegay i
Mosa ki Iliyasar a imam a so den so inisogo on o Allah.
42-46 So sabagi ko miyateban a rek o manga Israil na datar sa kadakel o rek o manga
sondaro: telo gatos ago telo polo ago pito nggibo ago lima gatos a manga bilibili; telo
polo ago nem nggibo a manga sapi; telo polo nggibo ago lima gatos a manga kimar, ago
sapolo ago nem nggibo a manga taw.
47 Na poon sangkai a rek o manga Israil na kinowa i Mosa so isa ko oman i lima polo a
manga taw ago manga pangangayamen, a so den so inisogo on o Allah, na inibegay niyan
ko manga Libitiyo a aya komikibir ko Barombarong o Allah.
48 Samaoto na so manga komandir o manga sondaro a so manga olowan o sesanggibo

ago mbabagatos na somiyong siran ki Mosa
49 A tig iran a "Sir, miyabilang ami so manga sondaro a mapapadalem ko kapaar ami na
da den a miyalebat rekami.
50 Sabap san na inowit ami sii so manga imbolawananan a manga rinti, manga tikes,
manga sising, manga aritis ago manga salay a miyanga teteban o oman i isa rekami, ka
peladen ami ko Allah. Giyai i pamemegayan ami ko Allah sabap ko kiyalindinga niyan
rekami."
51 Na tiyarima i Mosa ago si Iliyasar so langon o manga imbolawananan,
52 Na aya timbang o langon a bolawan a piyalad o manga komandir a pamemegayan ko
Allah na magatos ago siyaw polo ka kilo a kapened iyan
53 A di on maaped so manga nganin a inipanibay o oman i sondaro a rek iyan.
54 Na kagiya matarima i Mosa ago si Iliyasar so manga bolawan a poon ko manga
komandir na inowit iran ko Barombarong a dii Telabokan na inibetad iran ko hadapan o
Allah a aya pekitadem o manga Israil.
MANGA BILANGAN 32
So manga Mbatabataa sa Sebangan a Yordan
So manga mbatabataa a Robin ago Gad na tanto siran a madakel i pangangayamen, na

miyailay iran a so manga kalopaan sa Yasir ago giya Giliyad na tanto a mapiya ko manga
pangangayamen iran.
2 Kagiya ka maoto na somiyong siran ki Mosa ago si Iliyasar a imam, ago sii ko manga
olowan o isa ka maginged na pitero iran kiran a
3-4 “Giyangkai a lopa a piyakiagaw o Allah ko manga Israil, a so manga inged a Atarot,
Dibon, Yasir, Nimrah, Hisbon, Iliyalih, Sibam, Nibo ago giya Biyon, na mapiya ko
manga pangangayamen, na aden a manga pangangayamen ami a manga oripen ka.
5 O kelimoon kami ngka," a tig iran, "na pakitanganen ka rekami angkai a lopa na di
kami ngka pekaripaga ko Lawasaig a Yordan."
6 Na pitero i Mosa ko manga mbatabataa a Gad ago Robin a "Ba aya kabaya iyo na
kioontod kano sii baden na aya pekaripagen iyo na so manga pagari niyo sa
kapakipetidawa iran roo?
7 Ino niyo perenga so kateterangi ko manga Israil sa kaperipag iran sa Yordan ko kasong
iran ko lopa a inibegay kiran o Allah?
8 Giyai den i pinggolaola o manga lokes iyo roo sa Kadis Barniya isako pakasongen aken
siran sa kapariksaa iran ko lopa.
9 Na kagiya makasong siran ko Balintad a Iskol ago miyapariksa iran so inged na
piyareng iran so kateterangi ko manga Israil sa kasoled iran ko lopa a inibegay kiran o
Allah.
10 Na tanto a kiyararangitan so Allah sangkoto a gawii na inisepa iyan a
11'Da den a isa bo ko manga taw a miyakapagidad sa dowa polo ragon ago lawan pen ko
kiyapakaawa iran sa Misir a ba niyan mailay so lopa a inisepa aken a imbegay aken ko
Ibrahim, Iskak ago si Yakob, ka da ako iran paratiyayaa sa iklas ko poso iran
12 A rowar ki Kaleb a wata i Yaponih a taw sa Kinas ago si Yosowa a wata i Non, ka
piyaratiyaya iran so Allah sa iklas ko poso iran.'
13 Na sabap ko kapekerarangiti o Allah ko manga Israil na piyakateataap iyan siran ko
mitataog a kaden ko miyakapat polo ragon taman sa miyalengan mamatay so langon
angkoto a apid a miyamakandosa rekaniyan.
14 Imanto na sekano peman i sembi ko manga lokes iyo, a bowad o manga baradosa, a
pepekalonsan kano ko somosokeyaw a rarangit o Allah ko manga Israil!
15 O talikodi niyo imanto so kapetomana niyo ron na pagawaan iyan peman so manga
pagtaw niyan ko mitataog a kaden, na sekano i kesabapan ko kakebinasai kiran langon!"
16 Na inipenon iran ki Mosa a tig iran a "Peroa ngka a kapangembaal ami sii sa manga
kodal para ko manga pangangayamen ami, ago manga siti para ko manga karoma mi ago
manga wata.
17 Amay ka magiyoto na tiyagaren ami a ginawa mi sa kapakipetidawa, na pengonaan
kami ko ped a manga mbatabataa taman ko kapakakaden iran ko darpa iran. Na
petelimbagak sii so manga pamiliya mi na pekabaling siran ko kikakokotaan a manga siti
kaan siran malinding ko kibabaling sangkai a inged.
18 Di kami den mbeling taman sa matangan o langon o ped a manga Israil so lopa a
mapekewali ran.
19 Di kami den tengan sa apiya antonaa a lopa roo sa sabala a Yordan a maaped kiran ka
miyakowa ami so kawali ami sangkai a sabala sa sebangan a Yordan."
20 Mandiyadi na pitero kiran i Mosa a "O mataan a ipenggolalan iyo angkai a pitero iyo
na tiyagar kano sa kapakipetidawa iyo sii ko hadapan o Allah.
21 Na pekaripag so langon o manga sondaro niyo sa Yordan a pagoolowanan o Allah
taman sa mabogaw niyan so manga ridoay niyan
22 Ago mapeges so inged sii ko hadapan iyan. Mapasad ai na pekakasoy kano sii, ka
mininggolalan iyo den so atastanggongan iyo ko Allah ago sii ko ped a manga Israil. Na
giyangkai a lopa na rek iyo den sii ko hadapan o Allah.
23 Ogaid na o di niyo ai nggolaolaa na miyadosa kano den ko Allah na ketangked iyo a
kitana rekano so dosa niyo.
24 Na, mbabaal kano den sa manga siti para ko manga pamiliya niyo ago manga kodal o
manga pangangayamen iyo, ogaid na tomanen iyo so initopa niyo!"
25 Na somimbag so mbatabataa a Robin ago Gad a "Sir, manga oripen kami ngka, na
tomanen ami saden sa ipesogo o ka."
26 So manga karoma mi ago manga wata a rakes o manga talon ami a manga bilibili ago
manga sapi na kibagak sii sangkai a manga siti sa Giliyad.
27 Ogaid na meripag kami langon a kikagogomaanan na makipetidawa kami ko hadapan
o Allah a so den so miyatero o ka."
28 Mandiyadi na ininsaratan i Mosa si Iliyasar, si Yosowa ago so manga olowan ko

pamiliya ko manga mbatabataa sa Israil.
29 Pitero iyan kiran a "O so manga mama ko mbatabataa a Gad ago Robin na magonot
rekano romipag sa Yordan a kikagogomaanan siran sa kapakipetidawa ko hadapan o
Allah na amay ka maagaw niyo so lopa na began iyo kiran so inged a Giliyad a aya iran
rek.
30 Ogaid na o di siran rekano monot romipag sa Yordan a kikagogomaanan na kebegan
siran sa lopa roo sa inged a Kanaan a datar iyo."
31 Na pitero peman o manga mbatabataa a Gad ago Robin a "Manga oripen kami ngka,
na so den so inisogo o Allah i penggolaolaan ami!
32 Meripag kami sa Yordan roo sa Kanaan a kikagogomaanan sii ko hadapan o Allah,
ogaid na aya pekewalin ami a lopa na sii sangkai a sabala a Yordan."
33 Mandiyadi na inisenggay i Mosa a rek o manga mbatabataa a Gad ago Robin ago so
sabagi ko mbatabataa a Manasih a wata i Yosop so masasakop i Sihon a dato o manga
Amoritiyo ago so masasakop i Og a dato sa Basan, a so den so langon angkai a lopa a
rakes o manga siti ron ago so melilibeta on a manga pagingedingedan.
34 So mbatabataa a Gad na biyangon iran peroman so kikakokotaan a manga siti a Dibon,
Atarot, Arowir,
35 Atrot Siyopan, Yasir, Yogbihah,
36 Bit Nimrah ago Bit Haran, na mimbaal siran pen sa manga kodal o manga talon iran.
37 So mbatabataa a Robin na biyangon iran peroman so manga siti a Hisbon, Iliyalih,
Kiriyataim,
38 Nibo, Baal Miyon (kiyasambian ai sa ngaran) ago giya Sibmah. Na piyanambian iran
sa ngaran so manga siti a miyabangon iran peroman.
39 So manga mbawataan i Makir a wata i Manasih na giyobat iran a Giliyad na inagaw

iran ago biyogaw iran on so manga Amoriyo a kibabaling roo.
40 Sabap san na inibegay i Mosa a Giliyad ko mbawataan i Makir a so kiyababadan ki
Manasih na komiyaden siran on.
41 Si Yair a moriyataw mambo i Manasih na miyakaagaw ko manga iito a inged on na
bitowan iyan ai sa 'Manga iito a inged i Yair.'
42 Na si Nobah na miyaagaw niyan a Kinat ago so pagingedingedan on na inisangay
niyan sa ngaran iyan a Nobah.
MANGA BILANGAN 33
So manga Darpa a Kiyapanagadan o manga Israil
Madakel a darpa a piyanga kekampowan o manga Israil ko oriyan o kiyapakaawa iran sa

Misir a sesagorompong so oman i mbatabataa iran a pagoolowanan i Mosa ago si Aron.
2 Sabap ko sogoan o Allah na inipanorat i Mosa so manga ngaran angkoto a manga darpa,
na giyai i totolan ko kiyapanagadi iran on ko kiyalalakaw iran:
3 Miselingganat so manga Israil sa Ramisis sa inged a Misir sii ko ikasapolo ago lima
gawii ko paganay a olanolan a so den so gawii a miyakatalondog ko Pista a paska.
Gomiyanat siran on sa da den a kalek iran sii ko kambabantayi kiran o manga Imisiren.
4 Samaoto na ipelelebeng o manga Imisiren so langon o popaw sa lawas a manga wata
iran a manga mama a piyamono o Allah. Nggolalan sii na piyakiilay niyan a mala
sekaniyan i kapaar a di so manga katohanan iran.
5 Oriyan o kiyaganat o manga Israil sa Ramisis na mikempo siran sa Sokot.
6 Gomiyanat siran sa Sokot na mikempo siran sa Itam ko kilid o mitataog a kaden.
7 Gomiyanat siran sa Itam na mipeto siran sa Pi Hahirot sa tampar sa sebangan a Baal

Sipon na mikempo siran sa marani sa Migdol.
8 Gomiyanat siran sa Pi Hahirot na miyokit siran ko Mariga a Ragat ko kiyaopak iyan na

somiyoled siran ko mitataog a kaden. Tomiyaros siran on lomalakaw sa miyakatelo gawii
ko mitataog a kaden a Itam na mikempo sa Marah.
9 Gomiyanat siran sa Marah na somiyong sa Ilim a aden a sapolo ago dowa a bowalan on
ago pito polo a kayo ron a korma, na mikempo siran roo.
10 Gomiyanat siran sa Ilim na mikempo ko kilid o Mariga a Ragat.

11 Gomiyanat siran ko Mariga a Ragat na mikempo siran ko mitataog a kaden sa Sin.
12 Gomiyanat siran sa mitataog a kaden sa Sin na mikempo siran sa Dopkah.
13 Gomiyanat siran sa Dopkah na mikempo siran sa Alos.
14 Gomiyanat siran sa Alos na mikempo siran sa Ripidim a ron da a ig on a keinom o

manga taw.
15 Gomiyanat siran sa Ripidim na mikempo siran ko Disirto sa Sinay.
16-36 Sii ko kapelalakaw iran ipoon sa Disirto sa Sinay na taman sa Kadis ko mitataog a
kaden sa Sin na mikempo siran ko pemakatalondog sii a manga darpa: Kibrot Hataabah,
Hasirot, Ritmah, Rimon Piris, Libnah, Risah, Kihilatah, Palaw a Sipir, Haradah,
Makhilot, Tahat, Tirah, Mitkah, Hasmonah, Mosirot, Bini Yaakan, Hor Hagidgad,
Yotbatah, Abronah, Isiyon Gibir ago Kadis sii ko mitataog a kaden sa Sin.
37 Gomiyanat siran sa Kadis na mikempo siran sa Palaw a Hor sii ko temanaan a

Idomiya.
38 Na sabap ko sogoan o Allah na tomiyakedeg si Aron a so imam ko Palaw a Hor na roo
miyatay ko paganay a gawii ko ikalima olan ko ikapat polo ragon oriyan o kiyapakaawa o
manga Israil sa Misir.
39 Miyakamagatos ago dowa polo ago telo ragon a idad i Aron isako matay sa Palaw a
Hor.
40 Samaoto na so Ikanaanen a dato a si Arad a mababaling ko pagabagatan a Kanaan na

miyaneg iyan a pegantap so manga Israil ko inged iyan.
41-47 Ipoon sa Palaw a Hor taman ko kapantaran sa Mowab na mikempo so manga Israil
sii ko pemakatalondog a manga darpa: Salmonah, Ponon, Obot, Ay Abarim ko temanaan
a Mowab, Dibon Gad, Almon Diblataim, sii ko kapalawan a Abarim a marani ko Palaw a
Nibo,
48 Ago sii ko kapantaran sa Mowab ko kilid a Lawasaig a Yordan a pantag a Yariko.
49 Roo ko kilid a Yordan na mikempo siran ipoon sa Bit Yasimot taman sa Abil Sitim sii
ko kapantaran sa Mowab.
Manga Insarat i Mosa ko manga Israil sa di iran pen Kaperipag sa Yordan
50 Sii ko kapantaran sa Mowab ko kilid a Yordan a pantag a Yariko na pitero o Allah ki

Mosa a
51 “Pakimbitiyarai ka ko manga Israil na teroa ngka kiran a 'Amay ka romipag kano sa
Yordan sa kasong iyo sa Kanaan
52 Na pamogawa niyo so langon a taw a kibabaling roo. Paminasaa niyo langon so
piyangokiran ago piyamanowang a manga barahala iran, na nggegebaa niyo so langon o
manga aparan iran.
53 Agawa niyo angkoto a lopa na go niyo balingi ka inibegay aken rekano a matangan
iyo.
54 Mbagibagia niyo so lopa ko manga mbawataan a nggolalan ko kaperipa. So mala a
mbawataan na mala a kawali a kibegay ron, na so maito a mbawataan na maito a kawali a
kibegay ron. Apiya antonaa i lopa a keripa o oman i isa kiran na aya iran den rek. Giyai i
kapembagibagia ko lopa a mapekewali o manga mbatabataa.
55 Ogaid na o di niyo pamogawa so kibabaling ko inged na so siran oto a pelambaan iyo
na kebaloy a datar o manga banowit ko manga mata niyo ago manga sorok sii sa kilid iyo,
na pepekasamok siran rekano ko inged a babalingan iyo.
56 Na so miyapamikir aken a ikidia ko kiran na aya ko rekano ikidia.' "
MANGA BILANGAN 34
So manga Temanaan o Inged

2 “Teroa ngka ko manga Israil a 'Amay ka makasoled kano sa Kanaan a so inged a
imbegay aken rekano a kawali niyo, na giyai so manga temanaan iyan.
3 Sii sa tampar sa pagabagatan na mirarakes ko inged iyo so ped ko mitataog a kaden sa
Sin a midadair ko temanaan a Idomiya. So temanaan iyo sa pagabagatan na ipoon ko
kaposan o Maatay a ragat sa pagabagatan na manaros sa tampar sa sedepan.
4 Na kori ini sa tampar sa pagabagatan sa taman sa Okita a Akrabim, na pekaketas sa Sin
ago manaros taman sa Kadis Barniya. Ipoon roo na penaros sa Hasar Adar ago taman sa
Asmon.
5 Ipoon sa Asmon na kori so temanaan a kedeg ko baogan sa Misir na kepos roo ko Mala
a Ragat.
6 “ 'So temanaan iyo sa sedepan na so kilid o Mala a Ragat.
7 “ 'So temanaan iyo sa pagotaraan na ipoon ko Mala a Ragat na malalagoy taman ko

Palaw a Hor.
8 Ipoon roo na malalagoy ini taman sa Libo Hamat ago manaros roo sa Sidad
9 Ago Sipon, na kepos roo sa Hasar Inan. Giyai i temanaan iyo sii sa pagotaraan.
10 “ 'So temanaan iyo sa sebangan na ipoon sa Hasar Inan na malalagoy sa tampar sa

pagabagatan taman sa Sipam
11 Na manaros roo sa Riblah sa sebangan a Sain. Ipoon roo na malalagoy sa pagabagatan
taman ko manga bobongan sii sa sebangan a Ranao a Galili
12 Na manaros den a pekedeg ko Lawasaig a Yordan taman den ko Maatay a Ragat.
" 'Giyai i manga temanaan o lopa iyo.
13 Mandiyadi na pitero i Mosa ko manga Israil a "Giyai so lopa a mapembagibagi rekano

a nggolalan ko kaperipa. Inisogo o Allah a imbegay ini ko sapolo ago tenga ka
mbatabataa
14 Ka so manga mbatabataa a Robin ago Gad ago so sabagi ko mbatabataa a Manasih na
miyatarima iran den so kawali iran
15 Sii sa sebangan a Yordan a pantag a Yariko."
So manga Olowan a Pembagibagi ko Lopa

17 “Si Iliyasar a so imam ago si Yosowa a wata i Non na aya pembagibagi rekano ko
manga lopa a mapekawali niyo.
18 Kitoro so isa a olowan ko oman i mbatabataa a makaogop kiran ko kapembagibagia
on.
19-28 Giyai i manga ngaran iran:
Si Kaleb a wata i Yaponih a poon ko mbatabataa a Yodah,

si Simowil a wata i Amihod a poon ko mbatabataa a Simiyon,
si Ilidad a wata i Kislon a poon ko mbatabataa a Baniyamin,
si Boki a wata i Yogli a poon ko mbatabataa a Dan,
si Haniyal a wata i Ipod a poon ko mbatabataa a Manasih a wata i Yosop,
si Kimowil a wata i Siptan a poon ko mbatabataa a Ipraim,
si Ilisapan a wata i Parnak a poon ko mbatabataa a Sibolon,
si
Paltiyal a wata i Asan a poon ko mbatabataa a Isakar,
si Ahihod a wata i Siyalomi a poon ko mbatabataa a Asir,
ago si Pidahil a wata i Amihod a poon ko mbatabataa a Naptali.
29 Giyai i manga mama a initoro o Allah a pembagibagi ko lopa a mapekewali o manga

Israil sii sa inged a Kanaan.
MANGA BILANGAN 35
So manga Siti a Inisenggay a Rek o manga Imam
Sii ko katatago pen o manga Israil ko kilid a Yordan a pantag a Yariko na pitero o Allah
ki Mosa a
2 “Teroa ngka ini ko manga Israil: Poon ko lopa a mapembagian iyo na kebegan iyo so
manga Libitiyo sa manga siti a kebalingan iran. Kebegan iyo siran pen sa
pepemagonayonayan ko melilibeta ko oman i siti.
3 Rek iran angkai a manga siti a kebalingan iran, na so pepemagonayonayan ko oman i
isa on na para ko manga tamok ago so manga ayam iran.
4 Aya kaolad ai na lima gatos ka mitros ipoon ko pangeleban o siti ko oman i kilid iyan.
5 Makaliliyo sii na takes kano ron pen sa sanggibo ka mitros sii sa tampar sa sebangan
ago sii pen sa pagabagatan, sii sa sedepan, ago sii sa pagotaraan an matago sa look so siti.
Na rek iran angkai a lopa a aya pananateba ko manga siti.
6 “So nem a siti a imbegay niyo ko manga Libitiyo na aya kapepegapasan o taw a
miyakapatay sa taw a da niyan tibabaa. Liyo ron pen na kebegan iyo siran sa pat polo ago
dowa a ped a manga siti.
7 So langolangon angkai a manga siti a kibegay niyo kiran na pat polo ago walo a rakes o
manga pepemagonayonayan on.
8 Aya kadakel o manga siti a imbegay niyo kiran a poon ko lopa a mapekewali o manga
Israil na mipepasod ko kala o mapembagian o oman i mbatabataa. So mala on i bagian na
pekabegay sa mala, na so maito i bagian na pekabegay sa maito."
So manga Siti a Pekeapasan

10 “Teroa ngka ko manga Israil a 'Amay ka makaripag kano den sa Yordan sa kasoled iyo
sa Kanaan
11 Na pekasenggay kano sa manga siti a kapegapasan o taw a miyakapatay sa da niyan
tibabaa.
12 Roo makapegapas so miyakapatay kaan di kesaopi o seop rekaniyan sa da on pen
kakokoma o manga taw sii ko kalilimod.
13 Giyangkai a nem a manga siti a kisenggay niyo na pembaloy a kapepegapasan iyo,
14 A so telo ron na sii sangkai a sabala a Yordan na so telo ron na roo sa inged a Kanaan.
15 Kapegapasan ai o manga Israil ago so manga rait ago manga mananangga a kibabaling
rekano. Apiya antawaa i miyakapatay sa da niyan tibabaa na makapegapas roo.
16-18 “ 'Ogaid na amay ka aden a miyakapatay sa ped ko kiyabentola niyan on a potaw o

di na kayo, o di na sii ko kiyarobaki niyan on a ator na miyakapamono sekaniyan na
paliyogat a mbonoon.
19 So madaseg a tonganay o miyapatay niyan na aya pekabono ko miyamono. Amay ka
matoon iyan na kebono iyan sekaniyan.
20 Na amay ka aden a taw a ipekegowad iyan so ped iyan na go initolod iyan, o di na
pitibaba iyan a kiyalebada niyan on na go baden miyatay,
21 O di na o siyontok iyan sii ko kariridoa niyan on a aya niyan inipatay na paliyogat a
mbonoon angkoto a taw ka miyakapamono sekaniyan. Na so seop on na aya on pekabono
amay ka matoon iyan.
22 “ 'Ogaid na opama ka da tibabaa o taw a kiyapakapatay niyan ko ped a taw a kena a ba

niyan ridoay sii ko kinitoloden iyan on o di na sii ko kiyalebada niyan on sa apiya
antonaa,
23 O di na sii ko kiyaologa niyan ko ator a minisogat ko taw a da niyan mailay ago da
niyan tibabaa a kiyapakasakiti niyan on ago kena a ba niyan ridoay ogaid na inipatay
niyan ai,
24 Na o manggolaola ini na kekokom o kalilimod angkai a miyakapatay ago so seop on.
Na o makabenar so miyakapatay
25 Na kelinding sekaniyan o kalilimod sii ko somasaop, ka kikasoy iran ko siti a
piyagapasan iyan, na pekatareg sekaniyan roo taman sa kapatay o kapapantagan oto a
maporo a imam.
26 “ 'Ogaid na o lomiyo so miyakapatay ko siti a piyagapasan iyan

27 Na go sekaniyan matoon o somasaop ko liyo o siti na kepakay a mabono o somasaop,
na di kesala sa kapamono.
28 Pekatareg so miyakapatay ko siti a piyagapasan iyan sa taman sa kapatay o maporo a
imam. Ogaid na amay ka matay so imam na kepakay a makakasoy sekaniyan ko rek iyan
a lopa.
29 Giyangkai a manga kokoman na ipapaliyogat rekano taman ko kapepamagapidapidi
rekano apiya anda kano mababaling.
30 “ 'Apiya antawaa i miyakapamono na kebono mambo asar a kiyaseksian o kalalawanan

so sakataw bo a taw. Di kepakay a ba bonoa so taw sii ko kapeseksii ron o sakataw bo a
taw.
31 “ 'Di kano terima sa tendan a ipelekat ko kaoyagoyag o taw a kiyabenaran a

miyamano, ka disomala a mbonoon.
32 Na di kano mambo terima sa ipelekat ko taw a miyagapas ko siti a pepegapasan kaan
makakasoy ago makabaling ko lopa iyan sa da pen kapatay o maporo a imam.
33 “ 'Di niyo peresiki so inged a babalingan iyo ka so kapamono na ipekeresik o lopa. Di

den kepapas so kasalaan o inged a aden a kiyapamono on a makaliyoliyo ko kapatay o
miyamono.
34 Di niyo peresiki so inged a ron kano pekabaling a aya ko kakadenan, ka saken so Allah
a komakaken sii ko manga Israil.
MANGA BILANGAN 36
So manga Kokoman mipantag ko Lopa a Mapekewali o manga Babay
So manga olowan ko mbawataan i Giliyad, a wata i Makir ago apo i Manasih a wata i
Yosop na somiyong ki Mosa ago so ped ko manga olowan sa Israil
2 Na pitero iran on a "Inisogo reka o Allah a kambagibagia ko lopa sii ko manga Israil a
nggolalan ko kaperipa, na iniinsarat iyan reka a imbegay ngka so kawali o pagari ami a si
Silopihad ko manga wata iyan a manga babay.
3 Ogaid na opama ka mapangaroma siran o mama a maaped ko salakaw a mbatabataa na
so bagian iran ko lopa na kelebat ko kawali o manga apo ami ka kioman ko kawali o
mbatabataa o miyakapangaroma kiran. Na sabap san na kekorangan so bagian a
mapekewali ami.
4 Na amay ka mipangasoy so manga lopa ko manga asal a kikawali ron sii ko Ragon a
Kapakaasal na so kawali o manga wata i Silopihad na kitapi ko kawali o mbatabataa a
kepedan kiran, na kelebat ai ko kawali o manga apo ami."
5 Mandiyadi na inibegay i Mosa ko manga Israil angkai a sogoan a poon ko Allah: "Benar
so pitero o manga mama ko mbatabataa a Manasih.
6 Na giyai i inisogo o Allah mipantag ko manga wata i Silopihad a manga babay:
Makipengaroma siran ko apiya antawaa a kabaya iran asar a maaped ko mbatabataa o
manga tonganay o ama iran.
7 Da a lopa a kawali o manga Israil a ba mipetetepasa ko ped a manga mbatabataa, ka so
kawali o oman i mbatabataa na ketatap a katatangana iran on.
8 Oman i babay a makapekawali sa lopa ko apiya anda ko mbatabataa a Israil na disomala
a makipengaroma ko mama a maaped ko mbatabataa o ama iyan kaan so oman i Israil na
matangan iyan so kawali o manga apo iyan.
9 Da a lopa a ba mipetetepasa ko manga mbatabataa, ka oman i isa ka mbatabataa sa Israil
na ketangan iran so lopa a mapekewali ran."
10 Na tiyoman o manga wata i Silopihad a manga babay so inisogo o Allah ki Mosa.

11 Siki Maklah, Tirsah, Hoglah, Milkah ago si Nowah na miyakipangaroma siran langon
ko manga tonganay o ama iran
12 A maaped ko manga mbawataan ko mbatabataa a Manasih a wata o Yosop, na so lopa
iran na da mada ko kawali o mbatabataa o ama iran.
13 Giyai i manga sogoan ago manga kokoman a inibegay o Allah ko manga Israil a
nggolalan ki Mosa roo ko kapantaran sa Mowab ko kilid a Lawasaig a Yordan a pantag a
Yariko.
DOTIRONOMIYO
DOTIRONOMIYO 1
So Sogoan sa Kangganati sa Sinay
Aya madadalem sangkai a sorat na so kabasa o Nabi Mosa a miyatero iyan ko

kalangolangon a manga Israil roo ko disirto ko masesebangan a Lawasaig a Yordan. Sa
masa oto na kekampo siran ko Balintad a Yordan a marani sa siti a Sop sii sa pageletan a
Paran ago giya Topil, Laban, Hasirot ago Disahab. (2 Sapolo bo ago isa a gawii a
ipelalakaw ron ipoon sa Palaw a Sinay taman sa Kadis Barniya a sii pagokiti sa
kapalawan sa Idomiya.)
3 Giyangkai a masa na miyakapat polo den ragon ko kiyaipos o kiyapakaawa o manga

Israil sa Misir, na sii ko paganay a gawii ko ikasapolo a olanolan na piyakalangkap kiran
o Mosa so langon a inisogo on o Allah a peteroon iyan.
4 Miyanggolaola ini ko oriyan o kiyatabana o Mosa ki Sihon a dato o manga Amoriyo a
mindato sa Hisbon, ago so kiyatabana niyan ki Og a dato sa Basan a mindato sa Astarot
ago giya Idri.
5 Na sii sangkai a katatago iran ko masesebangan a Yordan roo sa inged a Mowab na

pipoonan o Mosa so di niyan dii kapamagosaya sangkai a kitab a tig iyan a:
6 “Isako sisii tano sa Palaw a Sinay na pitero rektano o Allah a Tohan tano a
‘Miyabolobolo den a katatareg iyo sangkai a palaw.
7 Timotimo kano na go kano den lalakaw ko kapalawan a inged o manga Amoriyo; song
kano ko langon a midadair on a manga inged roo ko Balintad a Yordan ago sii pen ko
manga kapalawan, so manga kapantaran ago so manga kalopaan sa pagotaraan ago sii pen
ko kilid a ragat a Miditiraniyo, na taros kano ko pagiingedan o manga Kanaaniyo ago roo
sa Libanon a taman den ko mala a Lawasaig a Yopratis.
8 Ilaya niyo, ka imbegay aken rekano angkai a lopa a pesongowan iyo. Ikano roo na go
niyo tangana angkoto a lopa a minisepa o Allah a imbegay niyan ko manga apoapoan iyo
a so Ibrahim, Iskak, ago Yakob ago so kebabadan kiran.’ ”
Tomiyoro so Mosa sa manga Pangongokom
9 Pitero pen o Mosa ko manga taw a “Sii ko katatago tano pen sa Palaw a Sinay na pitero
aken rekano a ‘Di aken kegaga so kapegawidi aken rekano a ba saken bo.
10 Piyakandakel kano den o Allah a Tohan iyo taman sa lagid kano imanto sa kadakel o
manga bitoon sa langit.
11 Na pengnin ko ko Allah a Tohan o manga apo iyo a pagomanomanan kano niyan sa
nggibonggibo takep ko kadakel iyo imanto na go kano niyan rakmati a giyoto so minitopa
niyan rekano!
12 Ogaid na andamanaya i kakeawidi aken ko manga awid a akal iyo, so manga
mindadamar iyo ago so manga rido iyo amay ka saken bo?
13 Pamili kano sa manga oongangen ago somasabot ago pageedatan a manga mama ko
oman i mbatabataa rekano ka siran i pekasanganen aken rekano.’
14 “Na inisembag iyo raken a ‘Mapiya so pitero o ka a penggolaolaan ami.’
15 “Mandiyadi na kinowa ko so manga oongangen ago pageedatan a manga mama a

miyapili iyo ko manga mbatabataa rekano na piyakipagolowanan aken kiran so oman i
sanggibo, so oman i magatos, so oman i lima polo ago so oman i sapolo, na tomiyoro ako
pen sa ped a manga sanasanaan a aya den maporo ko oman i mbatabataa.
16 Sa masa oto na ininsaratan aken angkoto a manga pengokom rekano a tig aken a
‘Pamakinega niyo so di pegayonayonan o manga pagari niyo na kokoma niyo sa matito a
apiya anda ko rido o manga pagari niyo o di na rido o isa a pagari niyo ago so
mananangga.
17 Di kano peramiramig ko kapepangokom iyo; pakapelagida niyo so kakokoma niyo ko
mababa ago so maporo. O ba niyo kaleken so apiya antawaa, ka so kokoman a ikokom
iyo na rek o Allah. So apiya antonaa a rido a tanto rekano a maregen na wita niyo raken
ka saken i kokom on.’
18 Na sii sangkoto a masa na iniinsarat aken rekano so langon taman a patot a
penggolaolaan iyo.
Siyogo so manga Penoriman
19 “Oriyan iyan na tiyoman tano so inisogo rektano o Allah a Tohan tano ka giyanatan
tano so Palaw a Sinay na miyantap tano ko kapalawan a inged o manga Amoriyo, na kitas
tano angkoto a maolad ago piyakalekelek a disirto a miyailay niyo. Kagiya misampay
tano sa Kadis Barniya
20 Na pitero aken rekano a ‘Miyakaoma tano den ko kapalawan a babalingan o manga
Amoriyo a imbegay rektano o Allah a Tohan tano.
21 Ilaya niyo, ka inibegay niyan rekano so lopa a pesongowan iyo. Na, ikano roo den na
go niyo tangana ka giyanan i inisogo rekano o Allah a Tohan o manga apo iyo. Di kano
pekelek o di na petelaw!’
22 “Ogaid na langon kano somimbag raken a pitero iyo a ‘Pakaonaan tano ko inged so
manga penoriman on kaan amay ka mamakakasoy na mapanotol iran rektano so
makapantag ko keokitan tano ago so manga inged a penga ooma tano.’
23 “Mapiya raken angkoto a pamikiran, na miyamili ako sa sesakataw ko oman i

mbatabataa a sapolo ago dowa.
24 Gomiyanat siran ago tomiyakedeg ko inged a kapalawan, na iniraot siran ko Balintad a
Iskol na piyagenebeneb iran mariksa.
25 Sii ko kiyakasoy iran rektano na iniawid tano iran ko onga sapad ko inged, na pitero
iran a ‘Tanto a mapiya angkoto a lopa a imbegay rektano o Allah a Tohan tano!’
Somiyopak ko Allah so manga Israil
26 “Ogaid na da kano materang sa kasong iyo ron, na siyopak iyo baden so sogoan o
Tohan iyo.
27 Na miyanarotaro kano sii ko manga barombarong iyo a di niyo dii teroon a
‘Ipekegowad tano o Allah! Giyanan i sabap a iniliyo tano niyan sa Misir kaan tano
niyan mapalad ko manga Amoriyo a pemamono rektano.
28 Andamanaya i kapekasong tano roo? Piyakalekan tano o manga pagari tano a tig iran
a “So manga taw roo na lebi rektano a manga babager ago manga poporo! Manga ala so
manga siti a kikokotaan sa maporo, na liyo ron pen na miyailay ami roo so manga iganti a
manga moriyataw o Anak!” ’
29 “Ogaid na pitero aken rekano a ‘Di kano tanto a pekewan; di niyo siran keleken.
30 So Allah a Tohan iyo a mangongonaan rekano i makipetidawa sabap rekano a datar o
inikidia niyan rekano sa Misir sii ko kiyamasai niyo ron
31 Ago sii pen ko disirto. Miyailay niyo roo o andamanaya i kiyaawidi rekano o Allah a
Tohan iyo a lagid o ama a aawidan iyan so wata iyan sii ko langon o kiyandalakawan iyo
taman sa minisampay kano sangkai a darpa.
32 Apiya pen oto na da niyo ron pen ai sarigi so Allah a Tohan iyo
33 A miyangonaan rekano ko kapelalakaw niyo a pepangiloba sa darpa a kapekempowan
iyo. Inipanoro iyan rekano so manga lalan a ipagokit iyo a dii makanggolalan ko gabon
igira a kadadaondaw a dii mbaloy a apoy ko kagagawii.
Diyaneg o Allah so manga Israil
34 “Kagiya maneg o Allah so kiyapanarotaro iyo na kiyararangitan sekaniyan, na inisepa

iyan a
35‘Da den a isa bo sangkai a kapapantagan imanto a manga rarata a taw a ba pekailay ko
mapiya a lopa a inisepa aken a imbegay aken ko manga apo iyo
36 Liyo ron si Kaleb a wata i Yaponi. Keilay niyan, na imbegay aken on ago sii ko
manga wata iyan so lopa a kiyapanadaan iyan ka kagiya miyangongonotan sekaniyan ko
Allah sa iklas ko poso iyan.’
37 “Na kiyararangitan ako mambo o Allah sabap rekano a tig iyan raken a ‘Apiya seka
pen na di on pekasoled.
38 Ogaid na so salinggogopa a ka a si Yosowa a wata i Non i pekasoled roo. Na
pakabagera ngka so niyat iyan, ka sekaniyan i makapegolowan ko manga Israil ko
kaketangana iran sangkoto a lopa.’
39 Na so manga wata iyo a miyatero iyo a penga bibiyag a di iran pen mapakapesenggaya
so mapiya ago so marata na siran i pekasoled ko inged. Siran i mbegan aken on na siran i
makapekewali ron.
40 Na so sekano ron peman na peto kano na antap kano lomalakaw ko disirto sii ko lalan
a ipesong ko Mariga a Ragat.’
41 “Mandiyadi na aya inisembag iyo na ‘Miyakandosa kami ko Allah! Tekedeg kami a

makipetidawa ka giyoto so inisogo rekami o Allah a Tohan tano.’ Na initakip o oman i
isa rekano so gomaan iyan sa katidawa a aya kapipikira niyo ron na malebod so kasondoli
niyo ko manga inged sii ko kapalawan.
42 “Ogaid na pitero raken o Allah a ‘Teroa ngka kiran a di siran tekedeg a ba

makipetidawa ka di ako kiran magonot, na tebanen siran o manga ridoay iran.’
43 Pitero aken rekano ai, ogaid na da ako niyo pakinega ka siyopak iyo baden so sogoan o
Allah, na sabap ko kategas iyo i olo na tomiyakedeg kano ko kapalawan.
44 Na mililiyo so manga Amoriyo a kibabaling sangkoto a manga palaw na giyobat kano
iran, na lagid o makapal a batiyokan a piyangeted kano iran ago diniyaman roo ko inged a
Idomiya taman den sa Hormah.
45 Na komiyasoy kano ago gomiyoraok sii ko kamamasaan o Allah, ogaid na da niyan
tagoa sa ginawa so kiyagoraok iyo aya pen o ba kano niyan siyagipa.
46 Na samaoto na tomiyareg kano roo sa Kadis, na miyatey a alongan a katatago iyo roo.
DOTIRONOMIYO 2
So Kiyapakapagenebeneb ko Disirto
“So kiyaipos oto na mipeto tano na miyantap lomalakaw ko ipemeteden a pekedegen

tano so lalan a ipesong ko Mariga a Ragat ka giyoto i iniinsarat raken o Allah. Na
miyatey a alongan a di tano dii kapakapagenebeneb ko kapalawan sa Idomiya.
2 “Na pitero raken o Allah a

3‘Miyabolobolo den a kiyapakapagenebeneb iyo sangkoto a kapalawan. Imanto na
antap kano sa pagotaraan.
4 Na teroa ngka ini ko manga taw a: "Magaan kano den makaokit ko inged o manga
tonganay niyo a kiyababadan ko Isaw a kibabaling sa Idomiya. Ikelek kano iran ogaid na
pagiingat kano
5 Na di niyo siran kekati ko katidawa, ka di aken sekano mbegan ko lopa iran a apiya so
bo so kedapoan iyo ron, ka inibegay aken den a Idomiya ko kiyababadan ko Isaw a kawali
iran.
6 Keparo rekano so kabayadi niyo kiran a pirak ko pangenengken a kekan iyo ago so ig a
keinom iyo.’
7 “Ka tatanodi niyo a kiyarakmatan kano o Allah a Tohan iyo ko langon a miyanggolaola
niyo. Siniyap kano niyan ko kiyalalakaw niyo sangkai a maolad a mitataog a kaden. Sii
ko soled angkai a miyakapat polo ragon na maaped rekano so Allah a Tohan iyo, na da a
ba rekano miyakorang a apiya antona onon." '
8 “Na kagiya malepas tano so inged o manga tonganay tano a kiyababadan ko Isaw a
kibabaling sa Idomiya na tiyailisan tano so lalan a ipoon sa Ilat a ipesong sa Isiyon Gibir
ka miyantap tano mokit ko lalan sa disirto sa Mowab.
9 Na pitero raken o Allah a ‘Di niyo pesemoka so manga Mowabiyo a kiyababadan ko
Lot aya pen o ba niyo siran kakati ko katidawa, ka inibegay aken kiran so siti a Ar a aya
iran kawali, na di aken sekano mbegan ko apiya anda ko lopa iran a ba niyo makewali.’ ”
10(Giya Ar na babalingan gowani o madakel a manga babager a iganti a bebetowan sa

Imim. Lagid siran sa kapangapoporo o manga Anakim a isa pen a bangsa a manga iganti.
11 Lagid o manga Anakim a ibibiling siran mambo a manga Ripaim, ogaid na bitowan
siran o manga Mowabiyo sa manga Imim.
12 Lagid oto mambo so manga Horiyo a kibabaling gowani sa Idomiya, ka so manga
kiyababadan ko Isaw na piyamogaw iran siran ago bininasa iran, na miyakasambi siran
maginged ko darpa iran a datar o pinggolaola o manga Israil roo ko lopa a inibegay kiran
o Allah a mapekewali ran.)
13 Pitero pen o Mosa a “Inisogo rektano o Allah a ‘Ganat kano na ripag kano sa Lawasaig
a Sirid.’ Na rominipag tano ko Lawasaig a Sirid.
14 Miyakatelo polo ago walo ragon a miyakasagad ipoon ko kiyaawa tano sa Kadis
Barniya taman ko kiyaripag tano sa Lawasaig a Sirid! Ka sii ko kiyaawa tano sa Kadis
Barniya na inisepa o Allah a disomala a makapegenebeneb tano ko disirto taman sa
mamatay so langon o kapapantagan oto a manga mama a makapesendaro a sisii ko kampo
tano.
15 Na so den so lima o Allah i rominido kiran taman sa bininasa niyan siran a da den a ba
niyan kiran miyalamba sii ko kampo.
16 “Kagiya mamatay so langon angkanan a manga sondaro a sisii rektano

17 Na pitero raken o Allah a
18‘Imanto a gawii na pekatarapas kano ko temanaan a Mowab roo sa siti a Ar.
19 Giyoto i kapekaoma niyo ko marani ko inged o manga Amoniyo a kiyababadan ko
Lot. Di niyo siran pesemoka aya pen o ba niyo kakati ko katidawa, ka inibegay aken so
lopa iran a aya iran kawali na di aken sekano mbegan ko apiya anda on a ba niyo
makewali.”
20(Giyangkoto a lopa na inibilang mambo a inged o manga Ripaim a kibabaling roo

gowani, ogaid na bitowan siran o manga Amoniyo sa Samsomim.
21 Ndadakel siran ago manga babager a taw a manga poporo a datar o manga Anakim.
Ogaid na bininasa siran o Allah kaan matangan o manga Amoniyo so lopa iran, na
miyakasambi siran roo maginged.
22 Lagid oto mambo so pinggolaola o Allah pantag ko manga moriyataw o Isaw a
kibabaling sa Idomiya. Ka bininasa niyan so manga Horiyo kaan matangan o
kiyababadan ko Isaw so lopa iran, na miyakasambi siran roo maginged taman den imanto.
23 Lagid oto mambo so miyanggolaola ko manga Abim a kibabaling sii ko manga inged a
iraraot sa inged a Gasa. Ka so manga Kaptorim a miyakapoon sa polo a Krita na
bininasa iran so manga Abim na miyakasambi siran maginged ko lopa iran.)
24 Pitero pen o Mosa a “Oriyan o kiyaokiti tano sa Mowab na pitero rektano o Allah a
‘Lalakaw kano na go kano ripag ko Lawasaig a Arnon. Ilaya niyo, ka miyapalad aken
rekano den si Sihon a so Amoriyo a dato sa Hisbon ago so inged iyan. Gobata niyo na
pooni niyo magaw so lopa iyan.
25 Ipoon sangkai a gawii na tegoan aken sa mala a kalek rekano so langon a nasiyon ko
dalem a doniya. Igira a pekeneg iran so manga totol mipantag rekano na penanabaden
siran sa kalek.’
Tiyaban o manga Israil si Sihon a Dato sa Hisbon
26 “Sii ko katatago tano ko Disirto sa Kidimot na somiyogo ako sa manga taw a

makasong ki Sihon a dato sa Hisbon a maawid sa katero a marinaw a peteroon iyan a
27‘Pakaokita kami ngka ko inged ka. Kedegen ami so mala a lalan na di kami penilasilay
sa kawanan diwang.
28 Mbayadan ami a pirak so pangenengken a kekan ami ago ig a keinom ami asar bo a
pakaokiten kami ngka a pelalag ko inged ka
29 A lagid o inikidia rekami o manga kiyababadan ko Isaw a kibabaling sa Idomiya ago
so manga Mowabiyo a kibabaling sa Ar. Pakaokita kami ngka bo taman sa makaripag
kami ko Lawasaig a Yordan a misampay kami ko lopa a imbegay rekami o Allah a Tohan
ami.’
30 Ogaid na minda si Sihon a dato sa Hisbon sa ba tano ron makaokit, ka so Allah a
Tohan iyo na piyakategas iyan a olo niyan ago piyakatopo niyan so poso iyan kaan
rektano mapalad o Allah so inged iyan a aya niyan den pinggolaola.
31 “Na pitero raken o Allah a ‘Ilaya ngka, ka pepeladen ko rekano si Sihon ago so inged
iyan. Na, pooni niyo den magaw so lopa iyan kaan iyo makewali!’
32 Samaoto na somiyampang rektano si Sihon ago so langon a sondaro niyan sa
kapakipetidawa iran sii sa Yahas.
33 Na so Allah a Tohan tano na piyalad iyan siran rektano, na miyapatay tano siran a
rakes o manga wata iyan ago so langon a sondaro niyan.
34 Sii sangkoto a masa na miyaagaw tano so langon a siti niyan, na miyabinasa tano siran
sa tarotop, a so manga mama, so manga babay ago so manga wata sii ko oman i siti, na da
den a ba tano kiran piyakapagoyag.
35 Ogaid na kinowa tano so manga pangangayamen ago so miyanga tetaban ko manga siti
a miyaagaw tano.
36 Ipoon sa Arowir sii ko kilid o Balintad a Arnon ago so siti a sii matatago ko balintad
na taman den sa Giliyad na da den a isa bo a kokotaan a siti a ba rektano mabager ka
palaya den rektano piyalad o Allah a Tohan tano.
37 Ogaid na da niyo ba bo obaya so lopa o manga Amoniyo roo ko kilid o Lawasaig a
Yabok aya pen so manga siti roo ko manga kapalawan a inisapar o Allah a Tohan tano a
kasongowi tano ron.
DOTIRONOMIYO 3
Tiyaban o manga Israil si Og a Dato sa Basan
“Aya tomiyalondog roo na miniseg tano sa tampar sa pagotaraan sii ko lalan a isong sa
Basan; na si Og a dato sa Basan ago so langon a sondaro niyan na somiyampang rektano
sii sa Idri sa kapakipetidawa iran.
2 Na pitero raken o Allah a ‘Di niyo sekaniyan ikelek ka piyalad aken ko lima niyo a
rakes o langon a manga pagtaw niyan ago so lopa iyan. Nggolaolaa niyo ron so inikidia
niyo ki Sihon a dato o manga Amoriyo a mindato sa Hisbon.’
3 “Mandiyadi na piyalad rektano o Allah a Tohan tano si Og a dato sa Basan a rakes den
o langon a pagtaw niyan, na miyapatay tano siran sa da den a ba kiran miyakapagoyag.
4 Sangkoto bo a masa na miyaagaw tano langon so manga siti niyan. Da den a isa bo ko
nem polo a siti a ba tano da makowa, a so dalem a inged a Argob a ndadatoan i Og sii sa
Basan.
5 Langon angkai a manga siti na kikakokotaan sa maporo a kitatanggalan sa potaw so
manga pintoan iyan; na aden pen a tanto a madakel a manga roroni a inged a da kakotai.
6 Bininasa tano siran sa tarotop a datar o inikidia tano ki Sihon a dato sa Hisbon; ka
bininasa tano so oman i siti a rakes on so manga mama, manga babay ago so manga wata.
7 Ogaid na so langon a pangangayamen ago so miyanga tetaban tano ko manga siti iran
na kinowa tano.
8 “Sii sangkoto a masa na miyaagaw tano so langon a lopa angkoto a dowa kataw a dato a
manga Amoriyo sii sa sebangan a Lawasaig a Yordan a ipoon sa Lawasaig a Arnon na
taman den sa Palaw a Hirmon.
9(Giya Hirmon na bebetowan sa Siriyon o manga taga Sidon, na aya ipembeto ron o
manga Amoriyo na Sinir.)
10 Miyaagaw tano so langon a manga siti ko kapantaran ago giya pen a dalem a Giliyad
ago Basan taman sa Salkah ago Idri a so manga siti sii ko ndatoan i Og sa Basan.”
11(Sa masa oto na si bo si Og a dato sa Basan i miyalamba ko manga iganti a bebetowan

sa manga Ripaim. So kantir iyan na inembaalan a potaw a manga pat ka mitros a katas
iyan ago dowa ka mitros a kaolad iyan. Sisii pen ai sa Rabah a siti o manga Amoniyo.)
So manga Mbatabataa a Miyaginged sa Sebangan a Yordan
12 “Isako makowa tano angkai a lopa na inisenggay aken a rek o manga mbatabataa a
Robin ago si Gad so lopa sii sa pagotaraan a siti a Arowir a marani ko Lawasaig a Arnon
ago so pen so sabaad ko kapalawan a Giliyad a rakes o manga siti on.
13 So miyalamba sa Giliyad ago so langon a inged a Basan a kiyandatoan i Og na
inisenggay aken a rek o sabaad ko mbatabataa a Manasih.” (So langon o kaingedan a
Argob sii sa Basan na bebetowan den gowani sa inged o manga Ripaim.)
14 Si Yair a moriyataw i Manasih na aya miyakakowa ko langon a inged a Argob sii sa
Basan taman den ko temanaan o manga Gisoriyo ago manga Maakatiyo, na
piyakipagingaran iyan ko manga inged on so ingaran iyan, na bebetowan ai pen imanto sa
‘Manga roroni a inged i Yair.’
15 Inisenggay aken a Giliyad a rek o mbawataan i Makir a ped ko mbatabataa a Manasih.
16 Ogaid na so manga mbatabataa a Robin ago Gad na inisenggay aken kiran so kalopaan
a ipoon sa Giliyad taman den ko Lawasaig a Arnon sii sa pagabagatan a aya temanaan
iyan na so look o lawasaig, na iraraot roo den ko Lawasaig a Yabok a aya temanaan o
manga Amoniyo.
17 Aya masesedepan a temanaan o lopa iran na so Lawasaig a Yordan a ipoon ko Ranaw
a Galili sii sa pagotaraan na taman ko Maatay a Ragat sii sa pagabagatan, na so rindib o
Palaw a Pisgah na aya masesebangan a temanaan iyan.
18 “Sa masa oto na ininsaratan aken sekano a tig aken a ‘So Allah a Tohan iyo na
inibegay niyan rekano angkai a lopa ko masesebangan a Yordan a mapekewali niyo.
Ogaid na so langon a manga mama rekano a makapesondaro na paliyogat a penggomaan
ago meripag sa Yordan a pengonaan ko manga pagari niyo a so manga ped a mbatabataa a
manga Israil.
19 Ogaid na so manga karoma niyo, so manga wata iyo ago so madakel a pangangayamen
iyo – katawan aken a madakel kano i pangangayamen – na makapetelimbagak sii ko
manga siti a inibegay aken rekano.
20 Paliyogat a pagogopan iyo so manga pagari niyo taman sa matangan iran mambo so
lopa a imbegay kiran o Allah a Tohan iyo roo ko sabala a Lawasaig a Yordan ago taman
sa pekalintaden siran roo o Allah a datar o pinggolaola niyan rekano sii. Amay ka magi-
yoto na pekakasoy so oman i isa rekano sii ko lopa a inibegay aken rekano.’
21 “Sangkoto a masa na ininsaratan aken si Yosowa a tig aken a ‘Kiyamasaan ka den so

langon a pinggolaola o Allah a Tohan ka sangkai a dowa kataw a dato a si Sihon ago si
Og. Na lagid oto mambo so ikidia o Allah ko langon a ndatoan roo ko sabala a Yordan a
pesongowan ka.
22 Di ngka siran keleken, ka so den so Allah a Tohan ka i makipetidawa kiran sabap
rekano.’
Inisapar ko Mosa so Kapakaripag iyan sa Yordan
23 “Sa masa oto na miyangangampedian ako ko Allah a tig aken a

24‘Ya Allah a Lebi a Mamaapaar, inepoonan ka den makiilay ko oripen ka so kala a ka
ago so manga babager a galebek ka. Ka antonaa tohan roo sa kasorgaan o di na sii sa
doniya i makapenggolaola ko manga ala i kabatowa a galebek a di ngka dii nggolaolaan?
25 Kapedipedi ka bo na pakaripaga ko ngka ko Lawasaig a Yordan kaan aken mailay
angkoto a mapiya a inged roo ko sabala on, a so manga pipiya a kapalawan ago giya
Libanon!’
26 “Ogaid na sabap rekano na kiyararangitan ako o Allah na da ako niyan pakinega.

Pitero iyan raken a ‘Giyanan bo! Di ngka raken den pegaloya so makapantag san.
27 Takedeg ka ko poro o Palaw a Pisgah na go ka pelangkalangkaw sa sedepan, sa
pagotaraan, sa pagabagatan ago sa sebangan. Langkaon ka a mata ngka sangkoto a
kalopaan, ka di ka pekaripag sa Yordan.
28 Ogaid na sogoa ngka si Yosowa na pakabagera ngka so niyat iyan, ka sekaniyan i
makapegolowan sangkai a manga taw ko kaperipag iran na pekitangan iyan kiran so lopa
a keilay ngka.’
29 “Mandiyadi na tomiyareg tano ko balintad a marani sa Bit Piyor.”
DOTIRONOMIYO 4
Inisogo o Mosa so Kaparatiyaya
Pitero pen o Mosa a “Hey manga Israil, pakinega niyo imanto so manga taritib ago manga
kokoman a ipemangendao aken rekano. Tomana niyo ai kaan kano pekeoyagoyag ago an
kano makasoled ago makakewali ko lopa a imbegay rekano o Allah a Tohan o manga apo
iyo.
2 Di niyo pagomani aya pen o ba niyo lebati angkai a manga sogoan o Allah a Tohan iyo
a ipembegay aken rekano sa ba niyo den tomana!
3 Miyailay niyo so pinggolaola o Allah a Tohan iyo roo ko Palaw a Piyor. Bininasa niyan
sii rekano so oman i isa a sominimba ko katohanan a Baal,
4 Ogaid na so langon iyo a mapaparatiyaya ko Allah a Tohan iyo na oyagoyag den
taman imanto.
5 “Ilaya niyo, ka inipamangendao aken rekano so manga taritib ago manga kokoman, ka
giyoto i iniinsarat raken o Allah a Tohan ko kaan iyo ai minggolalan sii ko inged a
pesongowan iyo a mapekewali niyo.
6 Kagiya ka maoto na piyapiyai niyo ai tomoman ka giyanan i kapekiilain iyo ko
ongangen iyo ago sabot sii ko ped a manga nasiyon. Ka amay ka maneg iran so
makapantag ko langon angkai a taritib na peteroon iran a ‘Matamataan a giyangkai a
kababantogan a nasiyon na maongangen ago somasabot a manga taw!’
7 Ka antonaa pen i ped a mala a nasiyon a aden a tohan iyan a marani kiran a ba datar sa
karani rektano o Allah a Tohan tano igira a pepangangarapan tano ron?
8 Na antonaa pen i ped a mala a nasiyon a aden a manga taritib iyan ago manga kokoman
a ba datar sa kaontol o langon o kitab a ipembegay aken rekano imanto?
9 “Ogaid na pakapananggilaa niyo piyapiya a ginawa niyo o ba niyo kalipati so manga

pinggolaola o Allah a kiyamasaan iyo den aya pen o ba niyo mapakada ko poso iyo ko
tenday a omor iyo. Ka panotola niyo baden ko manga wata iyo ago manga apo
10 A ba di labaw so makapantag ko gawii a katitindeg iyo ko kamamasaan o Allah a
Tohan iyo roo ko Palaw a Sinay isako teroon raken o Allah a ‘Limoda ngka so manga taw
ko hadapan aken ka pakineg aken kiran so manga katero aken kaan iran masowa so
kipekeleken raken taman ko kaooyagoyag iran pen ago an iran mipangendao ko manga
wata iran.’
11 Na miyobay kano ko palaw ago tominindeg ko kababaan iyan, na pekerab ai sa apoy a
pepamamanik roo sa langit a kakokoloban so palaw sa manga iitem a gabon ago makapal
a maliboteng.
12 Na miyakimbitiyarai rekano so Allah a poon ko look o apoy. Miyaneg iyo so sowara
niyan a dii tero, ogaid na da a ba niyo miyailay a ropaan iyan, ka sowara bo a miyaneg
iyo.
13 Piyayag iyan rekano so
kapasadan iyan a so sapolo a sogoan a inisogo iyan a tomanen iyo, na inisorat iyan ai sii
ko dowa timan a mapapapan a ator.
14 Samaoto na inisogo raken o Allah a ipemangendao aken rekano so manga taritib ago
manga kokoman a paliyogat a ipenggolalan iyo roo ko inged a soledan iyo a mapekewali
niyo.
Inisapar so Kasimba sa Barahala
15 “Sii ko gawii a miyakimbitiyarai rekano so Allah a poon ko apoy roo sa Palaw a Sinay
na da den a ba niyo miyailay a ropaan iyan. Kagiya ka maoto na pakapananggilaa niyo
piyapiya a ginawa niyo
16 O ba kano madosa ko kapagembaal iyo sa barahala a pesimbaan iyo a isasayan ko
apiya antonaa ropaan a apiya anda ko ropaan a mama o di na babay,
17 O di na ropaan o apiya antonaa a binatang sii sa kalopaan, o di na papanok a dii
melayolayog sa kawang,
18 O di na oled a pepamanola ko lopa o di na seda sii ko ig sa didalem a lopa.
19 Na igira a pelangag kano sa langit a pekeilay niyo so alongan, so olan ago so manga
bitoon, a so langon a pemanindaw sa langit, na di kano pakigawi sa kasodiyodi niyo ron
ago kasimbaa, ka giyanan so manga nganin a inisenggay o Allah a Tohan iyo a ipapantag
ko langon a manga taw ko dalem a doniya.
20 Ogaid na sekano i manga taw a kinowa o Allah a poon sangkoto a perapogan a potaw
a giya Misir kaan kano niyan mabaloy a kawali niyan a giyanan i kapakambebetad iyo
imanto.
21 “Ogaid na kiyararangitan ako o Allah sabap rekano, na inisepa iyan a di ako den
pekaripag sa Lawasaig a Yordan a ba ako makasoled ko mapiya a inged a imbegay rekano
o Allah a mapekewali niyo.
22 Ka sii ako petay sangkai a inged; di ako pekaripag sa Yordan, ogaid na sekano i
pekaripag on sa kapekewaliya niyo sangkoto a mapiya a lopa.
23 Na iktiyari niyo o ba niyo kalipati so kapasadan o Allah a Tohan iyo a inembaalan iyan
mipantag rekano; di niyo ai sogoka ko kipagembaalen iyo ko ginawa niyo sa barahala a
iroropa ko apiya antonaa a nganin, ka inisapar ai o Allah a Tohan iyo,
24 Ka so Allah a Tohan iyo na pepekalengan a apoy a tanaod sekaniyan a Tohan.
25 “Apiya sii ko pekatalingoma a masa amay ka mbabawata kano ago pamagapoan a

malokes kano den roo sangkoto a lopa na di kano pendosa ko kapangembaal iyo sa
barahala a iroropa ko apiya antonaa a nganin, ka marata oto a galebek ko kapekeilaya on
o Allah a Tohan iyo, na pakapekerangiten iyo sekaniyan.
26 Pakipemataanan aken ko kasorgaan ago so doniya sangkai a gawii a o nggolaolaa niyo
ai na magaan so magaan a kakeda iyo roo ko inged a pesongowan iyo sa ripag a Yordan
sa kapekewaliya niyo ron. Di bo ketey a kapeginetaw niyo ron, ka kebinasa kano sa
tarotop.
27 Isegomparak kano o Allah sii ko ped a manga taw, na maito rekano bo a makapegoyag
sii ko manga nasiyon a ron kano dendegen o Allah.
28 Roo kano pekasimba ko manga katohanan a pasad a manosiya, a so manga barahala a
kayo ago ator a di pekailay o di na pekaneg o di na pekakan aya pen o ba makabaw.
29 Ogaid na o mbabanoga niyo roo so Allah a Tohan iyo na ketoon iyo sekaniyan o
panagontamani niyo sa iklas ko poso iyo ago iklas ko niyawa niyo.
30 Amay ka karegenan kano a minitalingoma rekano den angkai a langon a manga nganin
sii ko penga oori a gawii na kesoy kano ko Allah a Tohan iyo na peratiyayaan iyo.
31 Ka masalinggagaw so Allah a Tohan iyo; di kano niyan itolak o di na mbinasaan aya
pen o ba niyan barobaa so kapasadan iyan ko manga apo iyo a pimataanan iyan sa sapa.
Isaisa bo a Tohan
32 “Pangingiseen iyo imanto so makapantag ko miyanga iipos a gawii a da pen so masa

niyo, a so manga gawii ipoon ko kiyaadena o Tohan ko manosiya sii sa doniya. Iseen iyo
sii ko pirowarowangan o doniya o ba aden den a mala i kabarakat a miyanggolaola a ba
datar ai aya pen o ba aden a miyaneg a ba datar ai.
33 Ba aden a ped a manga taw a miyakaneg ko sowara o Tohan a dii tero a poon ko look
o apoy a lagid o miyaneg iyo a ba siran on mambo miyakapagoyag?
34 Ba aden a ped a tohan a tomipeng komowa ko isa a nasiyon a poon ko ped a nasiyon
kaan iyan siran mapagtaw a lagid o kiyakowaa rekano o Allah a Tohan iyo a poon sa
Misir? Ka iniliyo kano niyan roo a nggolalan ko mala i kapaar a lima niyan ago mabager
a barokan iyan a miyangaden sa manga tiyoba, manga nanao, manga piyakamemesa,
katidawa ago so manga tanto a piyakalekelek a kiyamasaan iyo den.
35 “Piyakiilay ai rekano o Allah kaan iyo makenal a sekaniyan bo i Tohan a da den a

rimbang iyan.
36 Poon sa kasorgaan na piyakineg iyan rekano so sowara niyan kaan kano niyan
kainsarati; na sii sa doniya na piyakiilay niyan rekano so piyakalekelek a apoy niyan na
miyaneg iyo so manga katero iyan a pepekapoon ko look o apoy.
37 Sabap ko kapekebabayai niyan ko manga apo iyo na piyamili kano niyan a
kiyababadan kiran. Na iniliyo kano niyan sa Misir sii ko kamamasai niyan rekano a
nggolalan ko mala a kabatowa niyan.
38 Sii ko kapegantap iyo kiran na piyamogaw niyan so manga nasiyon a lebi rekano pen a
manga ala ago manga babager, na inowit kano niyan ko inged iran kaan iyan rekano
mibegay a kawali niyo, a so lopa a rek iyo den imanto a gawii.
39 “Sabota niyo ago padalema niyo imanto ko manga poso iyo a so Allah na aya Tohan
roo sa kasorgaan ago sii sa doniya; da den a rimbang iyan!
40 Tomana niyo so manga taritib iyan ago manga kokoman a ipembegay aken rekano
imanto a gawii kaan kano makategompiya ago so manga wata iyo ago an mapakalendo a
omor iyo sii ko lopa a imbegay rekano o Allah a Tohan iyo a kebaloy a rek iyo sa taman
sa pakataman.”
So manga Siti a Pekeapasan ko Masesebangan a Yordan
41 Sa masa oto na sominggay so Mosa sa telo a siti ko masesebangan a Yordan

42 A keapasan o apiya antawaa i miyakapatay sa ped a taw a kena a ba niyan riridoa
gowani aya pen o ba niyan tibabaa so kiyabonoa on. O makapagapas sekaniyan ko apiya
anda sangkai a manga siti na kesabet iyan so niyawa niyan.
43 So manga siti na giya Bisir sii ko maporo a kapantaran ko disirto a ipapantag ai ko
manga taw ko mbatabataa a Robin, ago giya Ramot sii sa Giliyad a ipapantag ko
mbatabataa a Gad, ago giya Golan sii sa Basan a ipapantag ko mbatabataa a Manasih.
So Pamekasan o Kitab
44 Giyai i kitab a inibegay o Mosa ko manga Israil.

45 Giyai so manga insarat, manga taritib ago so manga kokoman a inibegay kiran o Mosa
isako makaliyo siran sa Misir
46 Sii ko kakekampo iran ko balintad sa sebangan a Lawasaig a Yordan a marani sa siti a
Bit Piyor. Giyai so lopa a rek gowani i Sihon a dato o manga Amoriyo a mindato sa
Hisbon. Tiyaban sekaniyan o Mosa ago so manga Israil ko oriyan o kiyapakaliyo iran sa
Misir.
47 Inagaw iran so lopa iyan ago so lopa i Og a dato sa Basan a so dowa kataw a dato o
manga Amoriyo ko masesebangan a Yordan.
48 Giyangkai a lopa na ipoon sa siti a Arowir ko kilid a Lawasaig a Arnon taman ko
Palaw a Siriyon sii sa pagotaraan (giyanan na Palaw a Hirmon)
49 A rakes on pen so langon o kapantaran ko masesebangan a Yordan taman den ko
Maatay a Ragat sii sa pagabagatan, ago taman ko rindib o Palaw a Pisgah.
DOTIRONOMIYO 5
So Sapolo a Sogoan
Piyakisogoan o Mosa so kalangolangon a manga Israil sa kapelimolimod iran na pitero

iyan kiran a “Hey manga Israil, pamakinega niyo so manga taritib ago manga kokoman a
ipembegay aken rekano sangkai a gawii. Paganada niyo ai na inengkaa niyo sa o ba niyo
di tomana.
2 Isako tomatareg tano sa Palaw a Sinay na mimbaal so Allah a Tohan tano sa
kapasadan mipantag rektano.
3 Kena a ba so manga apo tano i papantagan iyan on ka sektano langon a oyagoyag a sisii
den imanto.
4 Poon ko look o apoy sii ko palaw na miyakimbitiyarai rekano so Allah a maka-
pageedapa kano.
5 Sa masa oto na sii ako makatitindeg ko pageletan iyo ago so Allah sa kapekalangkapa
ko rekano ko manga katero iyan, ka inikalek iyo so apoy na da kano takedeg ko palaw.
Na giyai i pitero o Allah:
6 “ ‘Saken so Allah a Tohan iyo a aya rekano miyakaliyo sa inged a Misir a ron kano
miyapangongoripen.
7 “ ‘Di ngka simbaa so apiya antonaa tohan a rowar raken.
8 “ ‘Di ngka pagembaalen a ginawa ngka sa barahala a iperopa ko apiya antonaa kaaden a
sii matatago ko kawang, o di na sii ko kalopaan, o di na sii ko ig ko didalem a lopa.
9 Di ngka siran sodiyodi aya pen o ba ngka simbaa, ka saken a so Allah a Tohan ka na
tanaod a Tohan. Ipetena aken ko manga wata so manga dosa o manga ama iran taman ko
ikatelo ago ikapat ka apid o siran oto a pekegowad raken.
10 Ogaid na ipekelimo aken so siran oto a pekebabaya raken a pepamanoman ko manga
sogoan aken apiya taman ko makasanggibo a kapepamagapidapidi kiran.
11 “ ‘Di ngka pegosara sa marata so Ingaran o Allah a Tohan ka, ka di pelepasen o Allah
so kasalaan o apiya antawaa a mirata ko Ingaran iyan.
12 “ ‘Selaselaa ngka so Gawii a Idedeke na senggain ka a soti, ka giyoto so inisogo reka o

Allah a Tohan ka.
13 Nem gawii a kipenggolalanen ka ko langon a galebek ka,
14 Ogaid na so ikapito gawii na Gawii a Idedeke a rek o Allah. Sii sangkoto a gawii na di
ngka on penggolalanen so apiya antonaa galebek ka, apiya seka o di na so wata a ka a
mama o di na babay, aya pen o ba so oripen ka a mama o di na babay, o di na so sapi i ka,
so kimar ka, o di na so apiya anda ko manga pangangayamen ka, aya pen o ba so mana-
nangga a mababaling ko inged ka, kaan mambo makadeke so oripen ka a mama o di na
babay a datar ka.
15 Tatanodi niyo a miyapangongoripen kano mambo roo sa Misir na iniliyo kano roo o
Allah a Tohan iyo a nggolalan ko mala i kapaar a lima niyan ago mabager a barokan iyan.
Giyoto i sabap a inisogo reka o Allah a Tohan ka so kaselaselaa ko Gawii a Idedeke.
16 “ ‘Pagadati ngka so ama a ka ago so ina a ka a aya reka inisogo o Allah a Tohan ka
kaan mapakalendo a omor ka ago makategompiya ka sii ko inged a imbegay reka o Allah
a Tohan ka.
17 “ ‘Di ka pemono.
18 “ ‘Di ka pesebo.
19 “ ‘Di ka pemanekew.
20 “ ‘Di ngka peseksiin so di benar mipantag ko siringan ka.

21 “ ‘Di ngka pesingayoa so karoma o siringan ka; di ngka penapsowi so walay niyan o di
na so lopa iyan, o di na so oripen iyan a mama o di na babay, o di na so sapi iyan, so
kimar iyan, o di na so apiya antonaa a rek o siringan ka.’
22 “Giyanan so manga sogoan a inibegay rekano o Allah isako matitimo kano langon roo
ko palaw. Tanto a matanog so sowara niyan a miyakapoon ko apoy, so gabon ago so
makapal a maliboteng, na da den a ba niyan sii inipagoman. Na inisorat iyan ai sii ko
dowa timan a mapapapan a ator na inibegay niyan raken.
So Kalek o manga Taw
23 “Isako maneg iyo so sowara a pepekapoon ko maliboteng sii ko kapekadeg o palaw sa

apoy na miyobay raken so langon a olowan ko oman i mbatabataa rekano ago so manga
pelokelokesen
24 Na pitero iyo a ‘Piyakiilay rektano o Allah a Tohan tano so bantogan iyan ago so kala
iyan, na miyaneg ami so sowara niyan a miyakapoon ko apoy. Miyailay ami sangkai a
gawii a pekeoyagoyag den so manosiya apiya pen o miyakimbitiyarai ron so Tohan!
25 Ogaid na ino kami pemageget imanto? Ka o maneg ami peroman so sowara o Allah a
Tohan tano na pematay kami den, na pelameden kami angkai a mala a apoy.
26 Ka antawaa den i matag manosiya a miyakaneg ko sowara o oyagoyag a Tohan a dii
tero a poon ko apoy a ba miyakapagoyag a datar ami?
27 Kasoy ka, Mosa, na seka den i pamakineg ko kabasa o Allah a Tohan tano, na seka
den mambo i tero rekami ko langon a peteroon iyan reka, na pemakinegen ami ago
ipenggolalan.’
28 “Miyaneg o Allah angkai a manga katero iyo na pitero iyan a ‘Miyaneg aken so pitero
reka angkanan a manga taw na mapiya den so langon a pitero iran.
29 O ba bo malalayon ko poso iran so datar anan a niyat sa kipekeleken iran raken ago so
kapetomana ko manga sogoan aken kaan iran mitegompiya ago so manga wata iran sa
taman sa pakataman!
30 Ika roo den na teroa ngka kiran a mbabaling siran den ko manga barombarong iran.
31 Ogaid na sii ka raken den, Mosa, ka imbegay aken reka so langon a sogoan, taritib ago
manga kokoman a mipemangendao ngka kiran kaan iran ai matoman sii ko inged a
imbegay aken kiran a mapekewali ran.’
32 “Kagiya ka maoto, hey manga Israil, na inengkaa niyo sa o ba niyo di tomana so

inisogo rekano o Allah a Tohan iyo. O ba kano silay sa diwang kawanan.
33 Kedega niyo so langon a manga lalan a inisogo rekano o Allah a Tohan iyo kaan
mapakalendo so omor iyo ago makategompiya kano roo ko inged a ketangan iyo.
DOTIRONOMIYO 6
So Mala a Sogoan
“Giyai i manga sogoan, manga taritib ago manga kokoman a iniinsarat raken o Allah a
Tohan iyo a ipemangendao aken rekano kaan iyo minggolalan roo ko inged a
pesongowan iyo a mapekewali niyo.
2 Paliyogat rekano ago so kebabadan rekano a sii ko tenday a omor iyo na ikalek iyo so
Allah a Tohan iyo ago tomana niyo so langon a taritib ago manga kokoman a ipembegay
aken rekano kaan mapakalendo a omor iyo.
3 Kagiya ka maoto, manga Israil, na pamakinega niyo ai na go niyo piyapiyai tomoman
kaan iyo mitegompiya ago ikababad sa tanto a madakel sii ko lopa a pekepakayan ago
oodaren, ka giyoto i initopa rekano o Allah a Tohan o manga apo iyo.
4 “Pamakinega niyo, hey manga Israil, a isaisa so Allah; so bo so Allah i Tohan tano!
5 Na kabebayai niyo so Allah a Tohan iyo sa iklas ko poso iyo, iklas ko niyawa niyo ago
iklas ko bager iyo.
6 Giyangkai a manga sogoan a ipembegay aken rekano imanto na padalema niyo sii ko
manga poso iyo.
7 Pamangendaon iyo ko manga wata iyo na pepagaloyaloya niyo igira a sisii kano sa
walay, igira a pelalakaw kano ko lalan, ago igira a miiga kano ago mimbowat.
8 Iketen iyo ini sii ko manga lima niyo a aya ipetedentadem, na babeden iyo sii ko beneng
iyo.
9 Soraten iyo sii ko mbala a kilid o pintoan o manga walay niyo ago sii ko manga gimowa
iyo.
Tiyapaosan so manga Israil mipantag ko di Kaparatiyaya
10 “Di ketey na pagowiten kano o Allah a Tohan iyo roo ko inged a inisepa iyan a
imbegay niyan ko manga apoapoan iyo a so Ibrahim, Iskak ago so Yakob. Giyoto so lopa
a aden a manga ala ago manga pipiya on a siti a da niyo bangona,
11 Ago manga walay a kikapepeno a pitibarangan a manga pipiya a ipamemetad a da niyo
ron tagoa, ago manga paridi a da niyo kalota, ago manga waged a obas ago kayo a olibi a
da niyo pamolaa. Na amay ka makakan kano ron ago manga oosog
12 Na pananggilai niyo o ba niyo kalipati so Allah a Tohan iyo a aya rekano miyakaliyo
sa Misir a ron kano miyapangongoripen.
13 “Kaleken iyo so Allah a Tohan iyo; sekaniyan bo i pangongonotani niyo, na sii kano
bo dii sepa ko Ingaran iyan.
14 Di kano simba sa salakaw a manga tohan, a so manga tohan o manga taw ko melilibeta
rekano;
15 Ka so Allah a Tohan iyo a maaped rekano na tanaod a Tohan, na pemborngat rekano
so gani niyan na penasen kano niyan ko liyawaw o lopa.
16 Di niyo tepengi so Allah a Tohan iyo a lagid o pinggolaola niyo roo sa Masah.
17 Piyapiyai niyo tomoman so manga sogoan iyan ago so manga insarat ago manga taritib
a inibegay niyan rekano.
18 Nggolaolaa niyo so ontol ago so mapiya sii ko kapekeilaya on o Allah kaan kano
makategompiya a makasoled ago makatangan ko mapiya a lopa a inisepa o Allah a
imbegay niyan ko manga apoapoan iyo
19 A pembogaon iyo so langon o manga ridoay niyo sii ko kapegantap iyo kiran ka giyoto
den i initopa o Allah.
20 “Sii ko pekatalingoma a manga gawii na ipagise rekano o manga wata iyo a ‘Ino
rektano sogoon o Allah a Tohan tano so katomana sangkai langon a manga insarat, manga
taritib ago manga kokoman?’
21 Na teroa niyo kiran a ‘Miyapangongoripen kami o Radiya Piraon roo sa Misir, ogaid
na iniliyo kami o Allah sa Misir a nggolalan ko mala i kapaar a lima niyan.
22 Kiyamasaan ami so piyakamemesa a manga nanao a piyakiilay niyan, ago so manga
ala i kabarakat ago piyakalekelek a pinggolaola niyan ko inged a Misir ago sii ko Piraon
ago so langon a manga pagtaw niyan.
23 Na iniliyo kami niyan roo na inowit kami niyan sii kaan iyan rekami mibegay angkai a
lopa a inisepa iyan ko manga apoapoan tano.
24 Na inisogo rektano o Allah so katomana sangkai langon a manga kitab ago so kika-
leken ko Allah a Tohan tano kaan tano lalayon tetagompiya ago an iyan kapagongowi so
kaoyagoyag tano a lagid o pesowaan iyan imanto.
25 Na o piyapiyai tano tomoman angkai langon a manga sogoan a inibegay rektano o
Allah a Tohan tano na imbilang iyan ai a kaontol tano.’
DOTIRONOMIYO 7
So Kasoti o manga Pagtaw o Allah
“Amay ka pekasoleden kano o Allah a Tohan iyo ko lopa a pesongowan iyo a

mapekewali niyo na pemogaon iyan roo so madakel a nasiyon sii ko kapegantap iyo kiran,
a so manga Hitiyo, manga Girgasiyo, manga Amoriyo, manga Kanaaniyo, manga Pirsiyo,
manga Hibiyo ago so manga Hibosiyo, a so pito a nasiyon a lebi rekano a mala ago
mabager.
2 Na amay ka peladen siran rekano o Allah a Tohan iyo a miyataban iyo siran den na
disomala a binasaa niyo siran sa tarotop. Di kano kiran pakipepesadanowai aya pen o ba
niyo siran kapediin.
3 Di kano kiran pakipekemonga. Di niyo pakipengaromaan so manga wata a iyo a babay
ko manga wata iran a mama, na di niyo pakapengaromaa so manga wata iyo a mama ko
manga wata iran a babay,
4 Ka pekatalikoden iran raken so manga wata iyo a manga mama sa kasimbaa iran ko
salakaw a manga tohan. O kegiyoto na pemborngat rekano so gani o Allah na magaan so
magaan a kambinasaa niyan rekano.
5 Giyai i penggolaolaa niyo kiran: Nggegebaa niyo so manga aparan iran, peroropeta niyo
so babarakaten kon a manga ator iran, pamataa niyo so manga polaos a toos ko katohanan
iran a Asirah na panotonga niyo ko apoy so manga barahala iran.
6 Ka soti kano a manga taw a isesenggay a rek o Allah a Tohan iyo. Pinili kano niyan ko
langon a taw ko dalem a doniya a mabaloy a mala on i arga a manga pagtaw niyan.
7 “So kiyababayai ago kiyapilia rekano o Allah na kena a ba sabap sa lebi kano a madakel
a di so ped a bangsa, ka lebi kano a maito ko langon a bangsa.
8 Ka aya sabap iyan na pekebabayaan kano o Allah ago ipetoman iyan so inisepa iyan ko
manga apoapoan iyo. Giyanan i sabap a siyabet kano niyan a nggolalan ko mala i kapaar
a lima niyan na piyokas kano niyan ko kapepangongoripena rekano o Piraon a dato sa
Misir.
9 Kagiya ka maoto na kilalaa niyo a so Allah a Tohan iyo na aya Tohan, a so
kasasarigan a Tohan a itotoman iyan so kapasadan iyan ago ipekelimo iyan so siran oto a
pekebabaya rekaniyan ago pepamanoman ko manga sogoan iyan apiya taman ko
makasanggibo a kapepamagapidapidi kiran.
10 Ogaid na so pepanga gogowad rekaniyan na mbadalan iyan siran sa kabinasaan sa di
niyan den isendod.
11 Kagiya ka maoto na piyapiyai niyo tomoman so manga sogoan, manga taritib ago
manga kokoman a ipembegay aken rekano sangkai a gawii.
So Balas o Kapakatotoman
12 O tagoa niyo sa ginawa angkai a manga kokoman na go niyo piyapiyai so kapetomana

niyo ron na itoman mambo o Allah a Tohan iyo so kapasadan iyan rekano na tetapen iyan
pen so kipelimoon iyan rekano a giyoto so inisepa iyan ko manga apoapoan iyo.
13 Kebabayaan kano niyan ago perakmatan, na pakapendakelen kano niyan. Perakmatan
iyan mambo so ipembabawata iyo ago so pekeaden o lopa iyo a so manga pereperan iyo,
so bago a arak iyo ago so lana a olibi; na perakmatan iyan pen so manga nati o manga
talon iyo a manga sapi, bilibili ago kambing sii ko inged a inisepa iyan a imbegay niyan
ko manga apoapoan iyo.
14 Kerakmatan kano a lawan pen ko apiya antawaa ped a manga taw. Da den a isa bo ko
manga mama rekano o di na babay a ba kebalek a lagid mambo o manga pangangayamen
iyo.
15 Ipelidas rekano o Allah so oman i gedamen. Di niyan rekano itena so apiya anda ko
piyakalekelek a manga paniyakit a kiyatokawan iyo roo sa Misir, ka pakipetelogedam
iyan baden ko langon a pepanga gogowad rekano.
16 “Disomala a polanga niyo langon so manga taw a peladen rekano o Allah a Tohan iyo.
Di niyo siran kepediin aya pen o ba niyo simbaa so manga katohanan iran, ka kilitag
rekano ai.
17 “Baanda niyo mapetero sa ginawa niyo a ‘Lebi rektano a mabager angkai a manga
nasiyon! Andamanaya i kakeagawa tano ko lopa iran?’
18 Ogaid na di niyo siran keleken! Tanodi niyo piyapiya so inikidia o Allah a Tohan iyo
ko Piroan ago so dalem a inged a Misir.
19 Tanodi niyo so piyakalekelek a manga kasiksaan a kiyamasaan iyo, ago so mala i
kabarakat ago piyakamemesa a manga galebek, ago so mala i kapaar a lima ago mabager
a barokan a ininggolalan o Allah a Tohan iyo ko kiniliyon iyan rekano roo. Datar oto
mambo a ikidia niyan ko langon a taw a ipekelek iyo.
20 Liyo ron pen na pagowitan siran o Allah a Tohan iyo sa manga taboowan taman sa
apiya so miyamakapagoyag kiran a miyamakatepok rekano na kebinasaan.
21 “Kagiya ka maoto na di niyo keleken angkoto a manga taw, ka so Allah a Tohan iyo a
maaped rekano na mala i gees ago piyakalekelek a Tohan.
22 Maito maito a kambogawa o Allah a Tohan iyo sangkoto a manga nasiyon sii ko
kapegantap iyo kiran. Di niyo kegaga a ba niyo siran mapolang sa makaisaisa, ka o
magiyoto na pendakel a tanto so manga iila a binatang a makalilibet rekano.
23 Ogaid na so Allah a Tohan iyo na peladen iyan siran rekano; tanto niyan siran a
pelibogen ko mala a kalek taman sa mabinasa siran.
24 Peladen iyan so manga dato iran ko kapaar iyo, na pepasen iyo so manga ngaran iran
ko dalem o doniya. Da den a isa kiran bo a ba makapemayandeg ko hadapan iyo;
mbinasaan iyo siran langon.
25 So manga barahala o manga katohanan iran na totonga niyo ko apoy; di niyo
pesingayoa aya pen o ba niyo pananamoka so matatago on a manga pirak ago bolawan, ka
kilitag rekano ai ka kagiya piyakagowagowad ko Allah a Tohan iyo.
26 Di niyo pegawidi ko walay niyo so apiya antonaa a piyakagowagowad a nganin ka
kisenggay kano a kebinasa a datar iyan. Kagowaden iyo baden ago kasisingain iyo, ka
isesenggay ini a kebinasa.
DOTIRONOMIYO 8
So Mapiya a Lopa a Mapekewali
“Piyapiyai niyo tomoman so langon a sogoan a ipembegay aken rekano imanto kaan kano
pekeoyagoyag ago mababad, na pekasoled kano ago pekatangan ko lopa a inisepa o Allah
a imbegay niyan ko manga apoapoan iyo.
2 Tatademi niyo o andamanaya i kiyaagaka rekano o Allah a Tohan iyo ko soled angkai a
miyakapat polo ragon a inilalakaw niyo sii ko disirto. Piyakapangalimbabaan kano niyan
sa katepengi niyan rekano kaan iyan mapariksa o antonaa i madadalem ko poso iyo o
tomana niyo so manga sogoan iyan ago so di.
3 Piyakamamaregenan kano niyan na pipero iyan a kapekeor iyo, na bigan kano niyan sa
roti a makan iyo a so pangenengken a di niyo katawan aya pen o ba so manga apo iyo.
Pinggolaola niyan ai kaan iyan rekano mipangendao a kena bo a ba paan i ipekeoyagoyag
o manosiya ka so pen so oman i katero a pepekapoon ko ngari o Allah.
4 Sii sangkai a miyakapat polo ragon na da den makisi so manga nditaren iyo aya pen o
ba milelebag so manga ai niyo.
5 Kagiya ka maoto na sabota niyo a lagid o ama a peparintaan iyan so wata iyan na
peparintaan kano mambo o Allah a Tohan iyo.
6 “Sabap roo na tomana niyo so manga sogoan o Allah a Tohan iyo; kedega niyo so
manga lalan iyan na kaleken iyo sekaniyan.
7 Ka pagowiten kano o Allah a Tohan iyo ko masibokar a lopa, a so lopa a madakel a
lawasaig on ago manga ranaranaw, ago manga bowalan a pegembowat sii ko manga
balintad ago manga bobongan;
8 A so lopa a aden a trigo ago bantad on, ago manga obas, manga higos, manga granada,
lana a olibi ago gola a teneb.
9 Giyai so lopa a di kano ron kegotem aya pen o ba kano korangi sa apiya antona onon, a
so lopa a masesembor a potaw so manga ator on ago kapeminaan sa tombaga so manga
bobongan on.
10 Na amay ka makakan kano ago manga oosog na panalamati niyo so Allah a Tohan
iyo sabap ko mapiya a lopa a inibegay niyan rekano.
Di niyo Pekalipati so Allah
11 “Inengkaa niyo sa o ba niyo pakalipati so Allah a Tohan iyo ko di niyo katomana ko

manga sogoan, manga kokoman ago manga taritib iyan a ipembegay aken rekano imanto.
12 Amay ka makakan kano ago manga oosog a miyakambaal kano den sa manga pipiya a
walay a babalingan iyo
13 Na amay ka ndakel den so manga talon iyo a sapi, bilibili ago manga kambing a
miyanga tatakep den so manga bolawan iyo, manga pirak ago so langon taman iyo
14 Na pananggilai niyo o ba miporo a ginawa niyo a pakalipatan iyo baden so Allah a
Tohan iyo a miyakaliyo rekano sa inged a Misir a ron kano miyapangongoripen.
15 Sekaniyan i miyagak rekano kometas sangkoto a maolad ago piyakalekelek a disirto a
babalingan o manga bibisa a nipay ago manga orang. Darpa oto a kamara a da a ig on,
ogaid na piyakambowalan iyan on so ig a mainom iyo a poon ko lakongan.
16 Sekaniyan i migay rekano sa roti a makan iyo roo ko disirto, a so pangenengken a di
den katawan o manga apo iyo. Piyakamamaregenan kano niyan sa katepengi niyan
rekano kaan kano niyan mapakategompiya sii ko oriyan oto.
17 Pananggilai niyo o ba migedi sa ginawa niyo a ‘So gees tano ago mala a kapaar na aya
tano inikowa sangkai a kakawasaan.’
18 Ka tatademi niyo a so Allah a Tohan iyo i pembegay rekano sa gees a mikowa niyo sa
kakawasaan, ka giyoto i kipetomanen iyan ko kapasadan a inisepa iyan ko manga
apoapoan iyo.
19 “O kalipati niyo so Allah a Tohan iyo ka mananangoran kano ko salakaw a manga

tohan sa kapenalagadi niyo ron ago kasimbaa na pemataanan ko rekano imanto a kebinasa
kano.
20 Na lagid o manga nasiyon a miyabinasa o Allah sii ko kapesorong iyo na lagid oto
mambo a kakebinasa niyo sabap ko da niyo kaparatiyayaa ko Allah a Tohan iyo.
DOTIRONOMIYO 9
Kena a ba Sabap ko Kaontol o manga Israil
“Pamakineg kano, hey manga Israil! Imanto na magaan kano den romipag ko Lawasaig a
Yordan sa kasoled iyo ago katengana niyo ko lopa o manga nasiyon a manga ala ago
manga babager a di sekano. Maolad so manga siti iran a kikakokotaan sa maporo.
2 Manga babager ago manga poporo so manga taw ron a manga moriyataw o manga
Anakim a manga iganti. Katawan iyo so makapantag kiran, na miyaneg iyo den so kabasa
a ‘Antawaa i makapemayandeg ko hadapan manga Anakim?’
3 Ogaid na tangkeda niyo sa ginawa niyo imanto a so Allah a Tohan iyo i pengonaan
rekano romipag a lagid o pepekalengan a apoy. Mbinasaan iyan siran; pegesen iyan siran
ko sii ko kapegantap iyo kiran kaan magaan so magaan a kapagagawa niyo ko lopa iran
ago so kapolanga niyo kiran a giyoto so initopa rekano o Allah.
4 “Maipos so kambogawa kiran o Allah a Tohan iyo sii ko kapegantap iyo kiran na o ba
niyo teroa sa ginawa niyo a ‘Inowit tano sii o Allah sangkai a inged a mapekewali tano
sabap ko kaontol tano.’ Kena, ka so kamarataan angkai a manga nasiyon na aya
kesabapan ko kapembogawa kiran o Allah sii ko kapegantap iyo kiran.
5 Kena a ba so kaontol iyo o di na so katito o poso iyo i kesabapan ko kaketangana niyo
ko lopa iran. Ka aya sabap iyan na so kamarataan iran ago sabap sa an mitoman o Allah a
Tohan iyo so inisepa iyan ko manga apoapoan iyo a so Ibrahim, Iskak ago Yakob.
6 Kagiya ka maoto na sabota niyo a kena a ba so kaontol iyo i sabap a imbegay rekano o
Allah a Tohan iyo angkai a mapiya a lopa a mapekewali niyo, ka manga tetegas kano man
i olo a manga taw.
So Bolawan a Nati a Sapi
7 “Tademi niyo ago di niyo pelipati so kiyapakaperangita niyo ko Allah a Tohan iyo sii
ko disirto. Ipoon ko gawii a kiyaawa iyo sa Misir taman sa iniraot kano sangkai a darpa
na pesopak kano ko Allah.
8 Apiya roo pen sa Palaw a Sinay na kiyakatan iyo so Allah sa tanto kano niyan a
kiyararangitan sa kapolanga niyan rekano.
9 Isako tomakedeg ako ko palaw sa katerimaa ko ko dowa a mapapapan a ator a
misosorat on so kapasadan a pimbaalan o Allah mipantag rekano na ndodoo ako den ko
palaw sa miyakapat polo ka kadadaondaw ago kagagawii, na da ako den kan aya pen o ba
miyakainom.
10 Na inibegay raken o Allah so dowa a mapapapan a ator a so den so tindoro o Tohan i
somiyorat on. Aya misosorat on na so langon a sogoan a piyakalangkap rekano o Allah
roo ko palaw a miyakapoon ko look o apoy sii ko gawii a kiyalimod iyo.
11 “Kagiya mapopos so pat polo ka kadadaondaw ago kagagawii na inibegay raken o

Allah so dowa timan a ator a ron misosorat so kapasadan.
12 Na pitero raken o Allah a ‘Tondagay ka nggagaan, ka so manga taw ngka a iniliyo
ngka sa Misir na piyakakerata iran a ginawa iran. Magaan bo a kiyapakasilay iran poon
ko lalan a inisogo aken kiran ka inimbaal iran a ginawa iran sa tiyowang a barahala.’
13 “Pitero raken pen o Allah a ‘Miyailay aken angkanan a manga taw na mataan a manga
tetegas siran i olo!
14 Na di ako ngka sepeyi ka polangen ko siran a pepasen aken so katatademi kiran ko
dalem o doniya. Na mbalowin ko so kebabadan reka a bangsa a lebi a madakel ago mala
i gees a di siran.’
15 “Mandiyadi na mipeto ako a tomiyondagay ko palaw a pekadeg pen sa apoy a

kaaawidan aken so dowa a mapapapan a ator a kasosoratan ko kapasadan.
16 Kagiya mangilailay ako na miyailay aken a miyakandosa kano ko Allah a Tohan iyo,
ka inimbaal iyo a ginawa niyo sa tiyowang a barahala a inisayan sa nati a sapi.
Miyakasilay kano nggagaan poon ko lalan a inisogo rekano o Allah.
17 Mandiyadi na inidebak aken ko lopa so dowa timan a ator a kakapetan ko na piroropet
aken den ko kamamasai niyo ron.
18 Na gomipe ako peroman ko kamamasaan o Allah sa miyakapat polo ka kadadaondaw
ago kagagawii. Da ako den kan aya pen o ba miyakainom sabap ko langon a manga dosa
a miyasogok iyo ko kiyanggolaola niyo sa marata ko kapekeilaya on o Allah a aya niyan
inikararangit.
19 Inikalek aken so piyakalekelek a gani o Allah ka kagiya kiyasokodan den so rarangit
iyan a ipolang iyan rekano. Ogaid na inampon ako bo o Allah sangkoto a masa.
20 Mala mambo a kararangit o Allah ki Aron sa kambinasaa niyan on, ogaid na inipanga-
ngarapan aken pen si Aron sa masa oto.
21 Na kinowa ko angkoto a inikadosa niyo a nati a sapi a pimbaalan iyo na inilebad aken
ko apoy. Oriyan iyan na piroropet aken taman sa miyagombiyombi a datar o bayanek, na
inilebad aken ai ko lawasaig a petoga sa beba a pepekapoon ko palaw.
22 “Piyakaperangit iyo pen so Allah roo sa Tabirah, roo sa Masah ago sa Kibrot Hataaba.
23 Na kagiya sogoon kano o Allah sa ngganat kano sa Kadis Barniya na pitero iyan a
‘Ikano roo den na go niyo tangana so lopa a inibegay aken rekano.’ Ogaid na siyopak iyo
baden so inisogo rekano o Allah a Tohan iyo. Da niyo sekaniyan sarigi aya pen o ba niyo
piyakineg so pitero iyan.
24 Lalayon kano somosopak ko Allah ipoon den ko gawii a kiyatokawi aken rekano.
25 “Na gomegepe ako ko kamamasaan o Allah ko soled angkoto a miyakapat polo ka

kadadaondaw ago kagagawii sabap ko kiyateroa o Allah sa polangen kano niyan.
26 Miyangangarapan ako ko Allah a tig aken a ‘Ya Allah a Lebi a Mamaapaar a Tohan, di
ngka mbinasaa so manga pagtaw ngka a aya ngka kawali a siyabet ka ago iniliyo ngka sa
Misir a nggolalan ko kabatowa a ka ago mala i kapaar a lima ngka.
27 Tademi ngka so manga oripen ka a so Ibrahim, Iskak ago Yakob. Di ngka pegilayani
so kategas i olo angkai a manga taw o di na so kamarataan iran ago so dosa iran.
28 Ka o ba baden matero o manga Imisiren sii ko inged a ron kami ngka iniliyo a ‘Da
magaga o Allah a kapagowita niyan kiran ko inged a initopa niyan kiran, na inowit iyan
siran ko disirto sa kapemonoa niyan kiran ka ipekegowad iyan siran.’
29 Ogaid na manga pagtaw ngka siran a aya ngka kawali a iniliyo ngka sa Misir a
nggolalan ko mala a kapaar ka ago so mabager a barokan ka.”
DOTIRONOMIYO 10
So Bago a manga Mapapapan a Ator
“Samaoto na pitero raken o Allah a ‘Panapil ka sa dowa timan a mapapapan a ator a

datar o miyaona, na mbaal ka sa Kaban a kayo a ketagoan on. Takedeg ka raken sangkai
a palaw
2 Ka isorat aken sangkoto a manga ator so manga katero a inisorat aken ko miyaona a
manga ator a riyopet ka. Mapasad oto na tagoa ngka sii ko Kaban.’
3 “Mandiyadi na mimbaal ako sa Kaban a kayo a akasiya na miyamanapil ako sa dowa

timan a mapapapan a ator a datar o miyaona, na tomiyakedeg ako ko palaw a kaaawidan
aken so dowa timan a ator.
4 Inisorat on o Allah so inisorat iyan ko miyaona, a so sapolo a sogoan a inibegay niyan
rekano sii ko palaw isako makimbitiyarai sekaniyan rekano a poon ko look o apoy sii ko
gawii a kiyalimod iyo. Inibegay raken o Allah so manga ator
5 Na mipeto ako a tomiyondagay ko palaw. Na inisoled aken so dowa timan a ator ko
Kaban a pimbaalan aken ka giyoto so inisogo raken o Allah, na ndodon den ai imanto.”
(6 Lomiyalakaw so manga Israil a poon ko manga paridi o manga Yaakaniyo ka
somiyong siran sa Mosirah. Roo miyatay si Aron na roo mambo minilebeng, na si
Iliyasar a wata iyan na aya on miyakasambi a imam.
7 Ipoon roo na somiyong siran sa Godgodah, na tomiyaros peman taman sa Yotbatah a
lopa a madakel a lawasaig on.
8 Sii sangkoto a masa na initoro o Allah so mbatabataa a Libi a aya pegawid ko Kaban sa
Kapasadan o Allah ago petelagad rekaniyan ago pepekarakmat ko manga taw sii ko
Ingaran iyan. Na giyanan i manga sangan iran taman den imanto.
9 Sabap sii na da a bagian o mbatabataa a Libi ko lopa a miyakewali o manga pagari ran.
So kapenalagadi iran ko Allah na aya iran kawali ka giyoto so initopa kiran o Allah a
Tohan iyo.)
10 “Tomiyareg ako ko palaw sa miyakapat polo ka kadadaondaw ago kagagawii a datar o

siyowa aken ko miyaona a masa. Na inampon ako pen o Allah sangkoto a masa ka
miniyog sa di kano niyan mbinasaan.
11 Na pitero iyan raken a ‘Ika roo den; pagolowani ngka so manga taw ko kapelalakaw
iran kaan siran makasoled ago makatangan ko lopa a inisepa aken a imbegay aken ko
manga apo iran.’
So Ipapaliyogat o Allah
12 “Imanto, hey manga Israil, na aya bo a ipapaliyogat rekano o Allah na kaleken iyo so
Allah a Tohan iyo; kedega niyo so langon a lalan iyan; kabebayai niyo sekaniyan ago
pangongonotani niyo so Allah a Tohan iyo sa iklas ko poso iyo ago iklas ko niyawa niyo,
13 Na tomana niyo so manga sogoan ago manga taritib iyan a ipembegay aken rekano
sangkai a gawii a aya niyo kamapiyaan.
14 Ilaya niyo, ka rek o Allah a Tohan iyo so langit a apiya so pipeporoan ko manga langit,
ago so pen so doniya a rakes o langon taman a matatago on.
15 Apiya pen oto na inikasoat o Allah so kapekebabayai niyan ko manga apoapoan iyo,
na sekano a kiyababadan kiran i piyamili iyan a di so apiya antonaa ped a bangsa a
mabaloy a manga pagtaw niyan, na giyoto i kapakambebetad iyo imanto a gawii.
16 Kagiya ka maoto na pakadaa niyo so kamarataan ko manga poso iyo na di niyo
pepakategasa a manga olo niyo.
17 Ka so Allah a Tohan iyo na aya Tohan o langon a tohan ago Kadnan o langon a
kadnan. Kababantogan sekaniyan a Tohan a mala i gees ago piyakalekelek, a di den
pegampilampil aya pen o ba tarima sa tendan.
18 Ipepaninindegan iyan so kabenar o manga ilo ago manga balo, na pekebabayaan iyan
so manga mananangga a kibabaling sii rekano a pembegan iyan siran sa pangenengken
ago manga nditaren.
19 Kagiya ka maoto na kabebayai niyo so manga mananangga, ka manga mananangga
kano mambo gowani roo sa Misir.
20 Kaleken iyo so Allah a Tohan iyo na sekaniyan bo i pangongonotani niyo. Kapeti niyo
sekaniyan sebenar na so bo so Ingaran iyan i sepaan iyo.
21 Sekaniyan i pepodiya niyo, a so Tohan iyo a aya minggolaola sabap rekano sangkoto a
manga ala ago piyakalekelek a piyakamemesa a kiyamasaan iyo.
22 Isako somong so manga apo iyo roo sa Misir na pito polo siran kataw langon, na
imanto na miyapakandakel kano den o Allah a Tohan iyo a lagid sa kadakel o manga
bitoon sa langit.
DOTIRONOMIYO 11
So Kala o Allah
“Kagiya ka maoto na kabebayai niyo so Allah a Tohan iyo na lalayon iyo nggolalanen so
ipapaliyogat iyan, so manga taritib iyan, so manga kokoman iyan ago so manga sogoan
iyan.
2 Tademi niyo sangkai a gawii so kiyaparintaa rekano o Allah a Tohan iyo ago so
kiyailaya niyo ko bantogan iyan ago so manga manga pinggolaola niyan a nggolalan ko
mala i kapaar a lima niyan ago mabager a barokan iyan. Kena a ba so manga wata iyo i
miyakaokit ago miyakailay sii, ka sekano den.
3 Miyailay niyo so manga nanao a piyakiilay niyan roo sa Misir ago so pinggolaola niyan
ko Piraon a dato sa Misir ago sii ko dalem a inged iyan.
4 Miyailay niyo so inikidia niyan ko manga sondaro a Imisiren a rakes o manga koda ago
manga karo iran sa katidawa, ka piyakikoloban iyan siran ko ig ko Mariga a Ragat sii ko
kapeselobaa iran rekano a aya kiran kiyabinasaa o Allah taman den imanto.
5 Miyailay niyo pen so pinggolaola niyan sabap rekano roo ko disirto taman ko
kinisampay niyo sangkai a darpa.
6 Katawan iyo so inikidia niyan ki Datan ago si Abiram a manga wata i Iliyab a aya
moriyataw o Robin, ka sii ko kamamasai ron o langon o manga Israil na mingganga so
lopa na liyamed iyan siran a rakes o manga pamiliya iran, so manga barombarong iran
ago so langon o manga baraniyawa a rek iran.
7 So den so manga mata niyo i miyakailay sangkai langon a manga ala a galebek a
pinggolaola o Allah.
So manga Kamapiyaan o Lopa a Initopa a Allah
8 “Kagiya ka maoto na tomana niyo langon angkai a manga sogoan a ipembegay aken
rekano imanto kaan kano katagoi sa bager sa kapakasoled iyo ago kapagegawa ko lopa a
pesongowan iyo sa ripag a Yordan a mapekewali niyo
9 Ago an malendo a omor iyo sii ko inged a inisepa o Allah a imbegay niyan ko manga
apoapoan iyo ago sii rekano a kiyababadan kiran, a so lopa a pakepakayan ago oodaren.
10 Ka so lopa a pesongowan iyo a mapekewali niyo na kena a ba datar o lopa roo sa inged
a Misir a kiyapoonan iyo a ron iyo piyamamola so manga oniin iyo ago minggalebek kano
sebenar sa kapekaigi niyo ron a lagid o sapadan a manga leletaan.
11 Ka so lopa a pesongowan iyo sa kapekewaliya niyo ron na lopa a aden a manga bobo-
ngan on ago manga balintad a pepakaigan o oran a poon sa langit.
12 Lopa oto a pegalimaan o Allah a Tohan iyo a lalayon iyan sisiyapen ipoon sa poonan o
ragon taman ko kapopos iyan.
13 “Kagiya ka maoto na o nggolalanen iyo piyapiya so manga sogoan a ipembegay aken
rekano imanto, na o kabebayai niyo so Allah a Tohan iyo ago pangongonotani niyo sa
iklas ko poso iyo ago iklas ko niyawa niyo
14 Na pekioranan iyan so lopa iyo igira a mosim iyan a ndatar so pangolaon ago so
pangoran kaan iyo ron makowa so pereperan iyo, so bago a arak ago lana a olibi.
15 Pekitoan iyan sa manga otan so pepanateban o manga ayam iyo, na pekakan kano ago
penga oosog.
16 “Pananggilai niyo o ba maagak so manga poso iyo tomalikod ko Allah sa kapenalagadi

niyo ago kasimbaa ko salakaw a manga tohan.
17 Ka o nggolaolaa niyo ai na pemborngat rekano so gani o Allah na pelekeben iyan so
langit kaan di pekaoran, na di pemangetoan so kalopaan sa pereperan na magaan den a
kapekeda iyo ko mapiya a lopa a imbegay rekano o Allah.
18 Kagiya ka maoto na padalema niyo angkai a manga katero aken sii ko pamikiran iyo
ago poso, na iketen iyo ko manga lima niyo a aya rekano ipenanadem, ago babeden iyo ko
manga beneng iyo.
19 Pamangendaon iyo pen ko manga wata iyo na pepagaloyaloya niyo igira a sisii kano sa
walay, igira a pelalakaw kano ko lalan, igira a miiga kano ago igira a mimbowat kano.
20 Soraten iyo ai ko mbala a kilid o manga pintoan o walay niyo ago sii ko manga
gimowa iyo.
21 Amay ka magiyoto na matey a kapepaginetaw niyo ago so manga wata iyo roo ko lopa
a inisepa o Allah a imbegay niyan ko manga apoapoan iyo a lagid sa katey o katatago pen
o langit ko kaporoan o doniya.
22 O piyapiyai niyo tomoman angkai langon a manga sogoan a ipembegay aken rekano a
ipenggolalan iyo, aya maana niyan na o pekebebayai niyo so Allah a Tohan iyo a
pekedegen iyo so langon a lalan iyan ago pekepetan iyo sekaniyan sebenar,
23 Na mbogaon o Allah so langon angkai a nasiyon ko sii ko kapegantap iyo kiran, na
ketangan iyo so lopa o manga nasiyon a lebi rekano a manga ala ago manga babager.
24 So oman i darpa a pendapoan o manga ai niyo na kebaloy a rek iyo ipoon ko disirto sii
sa pagabagatan na taman sa Libanon sii sa pagotaraan, ago ipoon ko Lawasaig a Yopratis
sa sebangan na taman den ko Ragat a Miditiraniyo sii sa sedepan.
25 Da den a taw a ba makapemayandeg ko hadapan iyo, ka tegoan o Allah a Tohan iyo
sa tanto a kalek rekano so manga taw ko langon a inged a kapenadaan iyo a giyoto i
initopa niyan rekano.
26 “Pamakinega niyo ka peladen ko rekano sangkai a gawii so kakepilia niyo ko rakmat o

di na so paninta.
27 Kerakmatan kano o tomana niyo so manga sogoan o Allah a Tohan iyo a ipembegay
aken rekano imanto,
28 Ogaid na kesintaan kano o di niyo tomana so manga sogoan o Allah a Tohan iyo ka ba
kano baden pekasilay a poon ko lalan a ipesogo aken rekano imanto sa kapenanangorani
niyo ko salakaw a manga tohan a di niyo katawan.
29 Amay ka witen kano o Allah a Tohan iyo ko inged a pesongowan iyo a mapekewali
niyo na pakalangkapa niyo so manga rakmat a sii pekapoon ko poro o Palaw a Girisim,
ago so manga paninta a sii pekapoon ko poro o Palaw a Ibal. (30 Giyangkai a dowa a
palaw na sii ko masesedepan o Lawasaig a Yordan sii ko inged o manga Kanaaniyo a
kibabaling ko Balintad a Yordan. Matatago siran sa tampar sa sedepan a kena a ba
mawatan ko manga ala a kayo sa Morih a marani sa Gilgal.)
31 Magaan kano den romipag ko Lawasaig a Yordan sa kakowaa niyo ko lopa a imbegay
rekano o Allah a Tohan iyo. Na amay ka matangan iyo a makabaling kano roo
32 Na piyapiyai niyo tomoman so langon a taritib ago manga kokoman a ipembegay aken
rekano imanto.
DOTIRONOMIYO 12
So Isaisa a Darpa a Pesimbaan
“Giyai so manga taritib ago manga kokoman a disomala a kapetomana niyo ron taman
den ko kapepaginetaw niyo sii ko lopa a imbegay rekano o Allah a Tohan o manga apo
iyo a mapekewali niyo.
2 Amay ka matangan iyo so lopa o manga taw a kibabaling roo na binasaa niyo sa tarotop
so langon a darpa a ron iran pesimbaa so manga katohanan iran sii ko poro o manga
palaw, sii ko manga bobongan ago sii ko atag o oman i marabong a kayo.
3 Nggegebaa niyo so manga aparan iran, peroropeta niyo so babarakaten kon a manga
ator iran, panotonga niyo so manga toos ko katohanan iran a Asirah na pamataa niyo so
ped a manga barahala o manga katohanan iran kaan mapapas so manga ngaran iran
sangkoto a manga darpa.
4 Di niyo penanayani so okitokit iran sii ko kapesimbaa niyo ko Allah a Tohan iyo.
5 Ka sii ko kaingedan o langon o manga mbatabataa rekano na piliin on o Allah a Tohan
iyo so isaisa a darpa a ron iyan tegoa so Ingaran iyan a aya niyan kebalingan, na roo kano
pekasong sa kasimbaa niyo rekaniyan.
6 Roo niyo kewit so manga sapaat iyo a penotongen, so manga pekorbanen iyo, so manga
diyakat iyo, so manga ipeselasela iyo, so manga soasoat a inisemaya iyo, so iklas a
manga pamemegayan iyo ago so manga paganay a inimbawata o manga talon iyo a sapi,
bilibili ago manga kambing.
7 Na roo ko kamamasaan o Allah a Tohan iyo na pekakan kano ago so manga pamiliya
niyo a ipekebabaya iyo so langon taman a miyanggalebek iyo sabap ko kiyarakmati
rekano o Allah a Tohan iyo.
8 “Sa masa oto na di niyo perawata so manga olaola tano sii imanto, ka aya dii
nggolaolaan o oman i isa rekano na so ontol ko kapipikira niyan on,
9 Ka da kano pen misampay ko inged a imbegay rekano o Allah a Tohan iyo a ron kano
pekakaden a lomilintad.
10 Ogaid na magaan kano den romipag ko Lawasaig a Yordan sa kambalingi niyo ko
inged a pakipekewali rekano o Allah a Tohan iyo, na pelindingen kano niyan ko langon a
ridoay niyo ko melilibeta rekano kaan kano makapaginetaw a lomilintad.
11 Sa masa oto na piliin o Allah a Tohan iyo so isaisa a darpa a pesimbaan rekaniyan, na
giyanan i kewitan iyo ko langon taman a inisogo aken rekano, a so manga sapaat iyo a
penotongen, so manga pekorbanen iyo, so manga diyakat iyo, so manga ipeselasela iyo
ago so langon a tindos a soasoat a inisemaya iyo ko Allah.
12 Na kabebaya kano roo baden ko kamamasaan o Allah a Tohan iyo a sekano ago so
manga wata iyo a manga mama ago manga babay, so manga oripen iyo a manga mama
ago manga babay ago so mambo so manga Libitiyo a sii babaling ko manga inged iyo, ka
tatademi niyo a da a ba iran bagian ko lopa a aya iran kawali a datar iyo.
13 Pananggilai niyo o ba niyo panompangen so manga sapaat iyo a petotongen ko apiya
anda i kabaya iyo.
14 Ka roo niyo bo panompangen sii ko isaisa a darpa a piliin o Allah sii ko pagiingedan o
isa ko mbatabataa rekano, na roo niyo nggolalanen so langon a inisogo aken rekano.
15 “Aya liyo ron na pekasombali kano ko manga pangangayamen iyo ko apiya anda ko
manga inged iyo, na pekakan kano ko sapo o langon ai a inibegay rekano o Allah a Tohan
iyo a rakmat iyan sa taman sa kebayaan iyo ron koman. Ndatar so siran oto a mibibilang
a kena a ba soti ago so masosoti a pekakan on a lagid bo o kapekena niyo ko sapo a
saladeng.
16 Aya bo a inisapar rekano na so kakena niyo ko rogo; ododa niyo ai baden ko lopa a
lagid o ig.
17 “Ogaid na so apiya antonaa i ipesepaat iyo ko Allah na di niyo kekan sii ko manga
inged iyo a aya maana niyan na so ikasapolo bagi ko pereperan iyo, bago a arak iyo ago
lana a olibi, o di na so paganay a inimbawata o manga talon iyo a manga sapi, manga
bilibili ago manga kambing, o di na so manga soasoat a inisemaya iyo a imbegay niyo, o
di na so iklas a pamemegayan iyo o di na so manga ped a di niyo di iselasela.
18 Ka disomala a kakena niyo ron sii ko kamamasaan o Allah a Tohan iyo ko isaisa a
darpa a piliin iyan, a sekano a rakes o manga wata iyo a manga mama ago manga babay,
so manga oripen iyo a manga mama ago manga babay ago so manga Libitiyo a sii
babaling ko inged iyo. Na kabebaya kano baden ko kamamasaan o Allah a Tohan iyo
sabap ko langon a miyanggalebek iyo.
19 Inengkaa niyo o ba niyo ndarainonen so manga Libitiyo taman ko kapakakakaden iyo
ko inged iyo.
20 “Amay ka pakaoladen o Allah a Tohan iyo so pagiingedan iyo a aya kaketoman o

initopa niyan rekano na o kebaya kano ron koman sa sapo na kekan iyo ko apiya anda i
kakebayai niyo ron.
21 Na o tanto rekano a mawatan so darpa a pinili o Allah a Tohan iyo a pesimbaan
rekaniyan na kesombali iyo so apiya antonaa sapi, bilibili o di na kambing a inibegay
rekano o Allah na kekan iyo sa taman sa kabaya iyo sii ko inged iyo a giyoto den i
miyatero aken rekano.
22 Ndatar so mibibilang a kena a ba soti ago so masosoti a pekakan on a lagid bo o
kapekena niyo ko sapo a saladeng.
23 Ogaid na pananggilai niyo o ba niyo kana so rogo, ka so rogo na aya kaoyagoyag, na
inisapar rekano so kakena niyo ko kaoyagoyag a rakes o sapo.
24 Di niyo den kena so rogo; ododa niyo baden ko lopa a lagid o ig
25 Sabap sa an kano makategompiya ago so manga wata iyo sii ko di niyo di kinggo-
lalanen ko ontol ko kapekeilaya on o Allah.
26 Ogaid na so manga soti a ipesepaat iyo ago so manga soasoat a inisemaya iyo a
imbegay niyo ko Allah na awidi niyo ko darpa a piliin iyan.
27 So manga sapaat iyo a petotongen na totonga niyo so sapo a rakes o rogo iyan sii ko
aparan o Allah a Tohan iyo. Ogaid na so rogo o ped a manga ipesepaat iyo a dii korbanen
na sii den keodod ko kilid o aparan o Allah a Tohan iyo, ogaid na kekan iyo so sapo iyan.
28 Piyapiyai niyo tomoman angkai langon a manga sogoan a ipembegay aken rekano
kaan kano makategompiya ago so manga wata iyo sa taman sa pakataman sabap ko di
niyo dii kinggolalanen ko mapiya ago maontol ko kapekeilaya on o Allah a Tohan iyo.
Inisapar so Kapesimba sa Salakaw a manga Tohan
29 “Mbinasaan o Allah a Tohan iyo so manga nasiyon a pesongowan iyo sa kapagegawa

niyo ko lopa iran. Ogaid na amay ka matangan iyo ago kebalingan
30 Sii ko oriyan o kiyabinasaa kiran o Allah na inengkaa niyo o ba kano kalitagi a
nggolalan ko kapenanayani niyo ko manga taw ron. Di niyo pegiseen mipantag ko
manga katohanan iran a ‘Andamanaya i kapesimbaa angkai manga nasiyon ko manga
tohan iran? Sowaan tano oto!’
31 Di niyo perawata so okitokit iran sii ko kapesimbaa niyo ko Allah a Tohan iyo! Ka sii
ko kapesimbaa iran ko manga katohanan iran na di iran dii nggolaolaan so oman i
piyakasisingay a ipekegowad o Allah. Apiya so manga wata iran a manga mama ago
manga babay na piyanotong iran ko apoy a inisoasoat ko manga katohanan iran.
32 “Piyapiyai niyo tomoman so langon a sogoan a ipembegay aken rekano; di niyo den
pegomani o di na ba pelebati.
DOTIRONOMIYO 13
“Opama ka aden a makagemaw sii rekano a pepekaalamat o di na makapemaana sa
taginepen a pepangalamaten iyan so kapekatalingoma o nanao o di na piyakamemesa.
2 Na apiya pen o miyakatalingoma angkoto a nanao o di na piyakamemesa na o teroa
niyan rekano a ‘Itano roo; mananangoran tano ko salakaw a manga tohan a di niyo
katawan na simbaan tano,’
3 Na di niyo pekinega angkoto a pepekaalamat o di na makapemaana sa taginepen, ka
giyanan i kapetepengi rekano o Allah a Tohan iyo kaan iyan mapariksa o pekebabayai
niyo sekaniyan sa iklas ko poso iyo ago iklas ko niyawa niyo.
4 So bo so Allah a Tohan iyo i pananangorani niyo ago kaleken; tomana niyo so manga
sogoan iyan na paratiyayaa niyo sekaniyan; simbaa niyo ago kapeti niyo sebenar.
5 Giyangkoto a pepekaalamat o di na makapemaana sa taginepen na disomala a
kambonoa on ka kagiya inidolon iyan rekano so kapakatalikod iyo ko Allah a Tohan iyo a
aya rekano miyakaliyo ko inged a Misir ago somiyabet ko kiyapangongoripena rekano
roo. Marata angkoto a mama a tipengan iyan a kapekasilaya niyan rekano poon ko lalan a
inisogo o Allah a Tohan iyo a kedegen iyo. Bonoa niyo kaan mapapas rekano angkanan a
kamarataan!
6 “Apiya so pagari ngka, o di na so wata a ka a mama o di na babay, o di na so karoma

ngka a pekebabayaan ka o di na so tanto ngka a dii ngginawai na o pamagayoki ka niyan
sa masolen a tig iyan a ‘Ita roo; somimba ta sa salakaw a manga tohan a da ngka den
masimba aya pen o ba so manga apo tano,’ (7 A so manga tohan o manga taw ko
melilibeta rekano a apiya anda ko marani o di na mawatan sii ko pirowarowangan o
doniya),
8 Na di ka on pagiyog aya pen o ba ngka pakinega sekaniyan. Di ngka kepediin o di na
pegongowi aya pen o ba ngka pelindinga,
9 Ka disomala a kambonoa niyo ron! So lima ngka i keona a pekapatay ron na go bo so
lima o langon a taw.
10 Robaka niyo sekaniyan a ator taman sa matay ka kagiya tipengan ka niyan tomalikod
ko Allah a Tohan iyo a miyakaliyo rekano ko inged a Misir a ron kano
miyapangongoripen.
11 Na keneg ai o langon o manga Israil na penga alek siran, na da den a isa rekano bo a
ba penggolaola peroman sa datar anan a marata.
12 “Amay ka kabalingan iyo so manga siti a imbegay rekano o Allah a Tohan iyo na o
maneg iyo a sii ko isa on
13 Na aden a manga rarata on a manga taw a ped ko nasiyon iyo a inagak iran so
kibabaling ko siti iran sa kapakasilay iran a tig iran a ‘Itano roo; somimba tano sa salakaw
a manga tohan a da niyo masimba,’
14 Na ondamaa niyo ago pariksaa niyo piyapiya kaan iyo maamad o ba ini benar. Na o
benar ago kiyapemataanan a miyanggolaola den sii rekano angkai a piyakasisingay
15 Na bonoa niyo so langon a magiinged sangkoto a siti; binasaa niyo sa tarotop so
langon taman a matatago on a rakes o manga pangangayamen.
16 Panimoa niyo san ko look o lamalama so langon a mapeteban ko siti na lengana niyo
tomotong so siti ago so langon taman a miyateban on a aya petotongen a ipesoasoat iyo
ko Allah a Tohan iyo. Na taman sa pakataman a kabibinasa niyan a di den kebangon
peroman.
17 Di niyo kowaa a rek iyo so apiya antonaa nganin san a inisenggay a mbinasaan kaan ai
mapakalenggaw o Allah so pesokeyaw a rarangit iyan. Ikepedi kano niyan ago ikelimo,
na pakapendakelen kano niyan a aya kaketoman o inisepa iyan ko manga apo iyo
18 Asar ka peparatiyayaan iyo so Allah a Tohan iyo a petomanen iyo so langon a sogoan
iyan a ipembegay aken rekano imanto a di niyo di inggolalan so ontol sii ko kapekeilaya
niyan on.
DOTIRONOMIYO 14
So Olaola a Inisapar sii ko Kapakamboboko
“Manga pagtaw kano o Allah a Tohan iyo. Sabap roo na di niyo penirasa a manga lawas
iyo aya pen o ba niyo opawi so panempang a olo niyo a toos ko kamboboko iyo ko
miyatay a datar o dii nggolaolaan o di niyo royod a manga taw.
2 Ka soti kano a manga taw a isesenggay a rek o Allah a Tohan iyo; ka sii ko langon a
manga nasiyon sa doniya na pinili kano niyan a mabaloy a mala on i arga a manga pagtaw
niyan.
So Soti ago so di Soti a Meranaranap

3 “Di niyo kena so apiya antona onon a piyakagowagowad.
4 Giyai so manga ayam a kekan iyo: so sapi, so bilibili, so kambing,
5 So pimbarambarangan a manga saladeng ago so manga iila a bilibili ago kambing.
6 Kekan iyo so apiya antonaa ayam a maoopak so kanoko niyan ago pepenepasepa sii ko
kapeken iyan.
7 Ogaid na so ayam a pepenepasepa a kena a ba maoopak so kanoko niyan na di kano ron
pekakan, a lagid o onta, so taksing ago so arnab. Karam ai rekano ka apiya pen o
pepenepasepa siran igira a pekan na kena a ba maoopak so kanoko iran.
8 Karam rekano mambo so baboy ka apiya pen maoopak so kanoko niyan na kena a ba
pepenepasepa sii ko kapeken iyan. Langon angkai a manga ayam na kena a ba soti
rekano; di kano den ken ko sapo iran aya pen o ba niyo sekoa so lawas iran a miyatay.
9 “Kekan iyo so apiya antonaa a kaaden sii ko manga ig asar ka aden a manga payang
iyan ago nap.
10 Ogaid na apiya antonaa a da a payang iyan ago nap na di niyo kekan; karam ai rekano.
11 “Kekan iyo so apiya antonaa a soti a papanok.

12-18 Ogaid na giyai so manga papanok a di kano ron pekakan: so garoda, so darayo, so
sikep, so banog, so manaol, so bayata, so romaragit, so kakowak, so agila, so bengit, so
kang, so laasan, so tabonan, so pilikano, so barawa, so talik, so talaong, so kabeg ago so
paniki.
19 “So langon a pelayog a paoledoled na karam rekano; di niyo ai kena.

20 Ogaid na so apiya antonaa a pepapak a soti na kepakay a ken iyo.
21 “Di niyo kena so apiya antonaa a matag den miyatay. Kepakay a ibegay niyo ko
mananangga a mababaling ko inged iyo a makan iyan, o di na mapepasa niyo ko rait.
Ogaid na sekano na soti a manga pagtaw o Allah a Tohan iyo. Di niyo tindaan so nati a
kambing sii ko gatas o ina iyan.
So Kokoman makapantag ko Ikasapolo Bagi
22 “Paliyogat rekano a isibay niyo so ikasapolo bagi ko langon a di niyo dii maperagon
ko lopa iyo oman ragon.
23 Na wita niyo ai ko darpa a piliin o Allah a Tohan iyo a pesimbaan rekaniyan, na roo
niyo kana sii ko kamamasaan iyan so ikasapolo bagi ko pereperan iyo, so bago a arak iyo
ago so lana a olibi, a lagid mambo o paganay a inimbawata o manga talon iyo a manga
sapi, bilibili ago kambing. Nggolaolaa niyo ai kaan iyo masowa so kipekeleken iyo
lalayon ko Allah a Tohan iyo.
24 O giyangkoto a darpa a piliin iyan a pesimbaan rekaniyan na tanto rekano a mawatan a
matey a ipelalakaw niyo ron a di niyo ron kegaga pegawid so ikasapolo bagi ko inirakmat
rekano o Allah a Tohan iyo na giyai i nggolaolaa niyo:
25 Pesaa niyo ai na awidi niyo so pirak sangkoto a darpa a piliin o Allah a Tohan iyo
26 Na pamasaan iyo ai sa apiya antonaa a kebayaan iyo a sapo a sapi, bilibili o di na
kambing, o di na arak o di na ped a mabisa a panginginomen. Na kan kano ago so
pamiliya niyo sii ko kamamasaan o Allah a Tohan iyo, na pakapiyaa niyo a ginawa niyo.
27 “Di niyo pendarainonen so manga Libitiyo a kibabaling ko manga inged iyo, ka da a

ba iran bagian ko lopa a aya iran kawali a datar iyo.
28 Sii ko kaposan o oman telo ragon na awidi niyo so langon o ikasapolo bagi ko
miyaragon iyo sangkoto a kiyaperagon na taliyonga niyo sii ko manga inged iyo.
29 Kekan ai o manga Libitiyo a da kasaadi sa lopa a kawali iran, a lagid mambo o manga
mananangga, manga ilo ago manga balo a kibabaling ko manga inged iyo. Ka roo siran
pekasong ago pemakakan sa taman sa kabaya iran kaan kano karakmati o Allah a Tohan
iyo ko langon a di niyo dii nggolaolaan.
DOTIRONOMIYO 15
So Ragon a Kiperilaan ko manga Otang
“Sii ko kaposan o oman pito ragon na paliyogat a iperila iyo so langon a otang.
2 Giyai i okit a kinggolalanen sii: so oman i miyagotang ko ped iyan a taw sa Israil na
rilaan iyan so otang; di niyan den tegela a kambayadi ron, ka giyanan i masa a tindo o
Allah a kiperilaan ko manga otang.
3 Kepakay a panekaten ka so otang o mananangga, ogaid na paliyogat a kiperilaan ka ko
otang o lagid ka a taw sa Israil.
4 “Kerakmatan kano sa mala sii ko inged a imbegay rekano o Allah a Tohan iyo a
ketangan iyo a kawali niyo na da den a ba rekano ron kekorangan
5 Asar ka pepanamaran iyo maratiyaya so Allah a Tohan iyo a petomanen iyo piyapiya so
langon angkai a sogoan a ipembegay aken rekano imanto.
6 Na amay ka perakmatan kano o Allah a aya kaketoman o initopa niyan na
pemagotangan iyo so madakel a nasiyon ogaid di kano den pengotang; na pendatoan iyo
so madakel a nasiyon ogaid na di kano iran kapendatoan.
7 “O aden a pagari ngka a miskin ko apiya anda ko manga siti niyo sii ko lopa a imbegay
rekano o Allah a Tohan iyo na di ngka peligeti aya pen o ba ka sangka sa katebangi ngka
ko pagari ngka a miskin.
8 Bekara ngka on baden a lima ngka na pagotangi ngka sa apiya antonaa a kailangan iyan.
9 Di ngka pemikira angkai a marata a ‘Marani den so ikapito ragon a iperila on so manga
otang!’ a aya kesabapan sa di ngka ikelimo so miskin a pagari ngka a da den a ba ngka on
kibegay. O nggolaolaa ngka ini na masiken a pepanonen ka niyan ko Allah na kesala ka a
miyakandosa.
10 Begi ngka sekaniyan baden sa iklas ko poso o ka sa da den a kasendit on, ka sabap roo
na perakmatan ka o Allah a Tohan ka ko langon a galebek ka ago so langon a pepoonan
ka nggolaola.
11 Kelalayon a kasisii o manga miskin sii ko manga inged iyo. Kagiya ka maoto na isogo
aken rekano a bekara niyo a lima niyo iyo ko kikakokorangan ago kamamaregenan a
pagari niyo sii ko inged iyo.
So Kabokai ko manga Oripen
12 “Opama ka so ped ka a taw sa Israil a mama o di na babay na pepasaan iyan reka a

ginawa niyan a mabaloy a oripen ka na makapenalagad sekaniyan reka ko soled o nem
ragon, ogaid na sii ko ikapito ragon na paliyogat a kapakamaradikaa ngka on.
13 Na amay ka mbokaan ka na di ngka pekalalakawa a da a ba niyan ikeoyag.
14 Pakapelotoa ngka sekaniyan piyapiya sa pamemegayan a poon ko manga bilibili ngka
ago kambing, ago so pereperan ka ago arak a aya reka inirakmat o Allah a Tohan ka.
15 Ka tademi niyo a oripen kano gowani roo sa inged a Misir na biyokaan kano o Allah a
Tohan iyo. Giyanan i sabap a kinisogoon aken sii rekano imanto.
16 “Ogaid na o teroa reka o oripen ka a ‘Di aken kabaya o ba aken seka awai,’ sabap sa
pekebabayaan ka niyan ago so pamiliya ngka ago masosoat sekaniyan ko
kapakambebetad iyan sii reka
17 Na kowa ka sa baletek na wita ngka sekaniyan ko paitaw o walay ngka na ron ka
pesowi so tangila niyan; na giyoto a kebaloy sekaniyan a oripen ka sa taman sa kaooya-
goyag iyan. Datar ai mambo a ikidia ngka ko oripen ka a babay.
18 Di ngka pemikira i ba kamaregenan ka so kabokai ngka ko oripen ka, ka
piyanalagadan ka niyan ko soled o miyakanem ragon a aya bo a miyanggasto ngka na
tenga ko patot a isokay ko gomagalebek. Na perakmatan ka o Allah a Tohan ka ko
langon a di ngka dii nggolaolaan.
So Paganay a Inimbawata o manga Pangangayamen
19 “Senggain iyo a rek o Allah a Tohan iyo so oman i mama a paganay a ipembawata o
manga sapi iyo, manga bilibili niyo ago manga kambing. Di niyo pakapenggalebeka so
kaka a wata o manga sapi iyo, na di niyo pagopawi sa bombol so kaka a wata o manga
bilibili niyo.
20 Ka oman ragon na sekano ago so manga pamiliya niyo na kana niyo siran ko kamama-
saan o Allah a Tohan iyo sii ko darpa a piliin iyan.
21 Ogaid na o aden a daway angkai a ayam, ka lepo, o di na bota o di na aden a ped a
pangensi niyan na di niyo pekorbana ko Allah a Tohan iyo.
22 Kekan iyo ai sa walay niyo sii ko manga inged iyo. So taw a mibibilang a kena a ba
soti ago so masosoti na palaya siran on pekakan a datar o kapekena niyo ko saladeng.
23 Ogaid na di niyo kena so rogo iyan; ododa niyo baden ko lopa a datar o ig.
DOTIRONOMIYO 16
So Kaselaselaa ko Paska
“Sii ko olanolan a Abib na selaselaa niyo so Paska a aya niyo ipembantog ko Allah a
Tohan iyo, ka sii ko olanolan a Abib na iniliyo kano niyan a poon sa Misir sii ko
kagagawii.
2 So ayam a mapekorban iyo ko Paska na apiya anda ko sapi, bilibili o di na kambing, na
korbana niyo ko Allah a Tohan iyo sii bo ko darpa a piliin iyan a pesimbaan rekaniyan.
3 Sii ko kapekena niyo ron na di niyo ron perakesen koman so paan a aden a tapay ron.
Ka sii ko soled o pito gawii na kana niyo so paan a da a tapay ron a datar isako magaan so
magaan a kiyaawa iyo sa inged a Misir. Kan kano sangkai a paan a aya toos ko kape-
romasay kaan sii ko tenday a omor iyo na peketademan iyo so gawii a kiyaawa iyo sa
inged a Misir a ron kano miyarasay.
4 Sii ko soled o pito gawii na paliyogat rekano a da a tapay a ba matoon ko apiya anda ko
pagiingedan iyo. Na so sapo o pekorbanen iyo ko kaperimon ko paganay a gawii na di
niyo pekapitai.
5 “Di niyo sombalia so ayam a ipeselasela ko Paska sii ko apiya anda ko manga inged a
imbegay rekano o Allah a Tohan iyo
6 Ka sii bo ko darpa a piliin o Allah a Tohan iyo a pesimbaan rekaniyan. Roo niyo
sombalia so ayam ko kapesedep o alongan sii ko dii katemegi ko gawii a kiyaawa iyo sa
Misir.
7 Pagiyawa niyo ai ago kana niyo sii ko darpa a piliin o Allah, na amay ka mapita na
mbabaling kano den ko manga barombarong iyo.
8 Sii ko soled o nem gawii a pekatalondog sii na kan kano sa paan a da a tapay ron, na sii
ko ikapito gawii na timotimo kano sa kapeselaselaa niyo ko Allah a Tohan iyo; na di kano
den penggalebek sangkoto a gawii.
Pista ko Kaperagon
9 “Bilang kano sa pito ka padian ipoon ko gawii a kiyapooni niyo meragon ko pereperan
iyo.
10 Amay ka mapopos ai na selaselaa niyo so Pista ko Kaperagon a aya niyo ipembantog
ko Allah a Tohan iyo. Awid kano ron sa iklas a pamemegayan a mapepatot ko kala o
inirakmat iyan rekano.
11 Na kabebaya kano baden ko kamamasaan o Allah a Tohan iyo roo ko darpa a piliin
iyan a pesimbaan rekaniyan. Kabebaya kano a rakes o manga wata iyo, so manga oripen
iyo, so manga Libitiyo a sii babaling ko inged iyo, ago so mananagga, so ilo ago so balo a
maaped rekano.
12 Tatanodi niyo a manga oripen kano gowani roo sa Misir na piyapiyai niyo tomoman
angkai a manga sogoan.
So Pista ko manga Lawig
13 “Amay ka maipos so kapepangegik sa pereperan a miyaragon iyo ago so katendasa ko

manga obas na selaselaa niyo so Pista ko manga Lawig sii ko soled o pito gawii.
14 Kabebaya kano sii ko di niyo dii kapista a rakes o manga wata iyo, so manga oripen
iyo, so manga Libitiyo, so mananangga, so ilo ago so balo a sii babaling ko inged iyo.
15 Sii ko soled o pito gawii na selaselaa niyo so pista a aya niyo ipembantog ko Allah a
Tohan iyo roo ko darpa a piliin iyan, ka perakmatan iyan so langon a pekeragon iyo ago
so langon a di niyo dii nggolaolaan kaan matarotop so kapekebabaya iyo.
16 Makatelo ko saragon na paliyogat ko langon a manga mama rekano a kapesong iran ko
darpa a piliin o Allah a Tohan iyo sa kapengadapa iran on, aya maana niyan na so kapistai
ko Kakan sa Paan a da a Tapay ron, so kapistai ko Kaperagon ago so kapistai ko manga
Lawig. Da den a mama a ba makapengadap ko Allah a ba da a awid iyan
17 Ka so oman i isa kiran na pekaawid den sa pamemegayan a mapepatot ko rakmat a
inibegay ron o Allah a Tohan iyan.
So manga Pangongokom
18 “"Toro kano pen sa manga pangongokom ago manga olowan a poon ko oman i
mbatabataa rekano sii ko oman i inged a imbegay rekano o Allah a Tohan iyo, na
disomala a maontol so kakokoma iran ko manga taw.
19 Di niyo mbibida so kokoman aya pen o ba kano peramiramig; di kano terima sa
tendan, ka so tendan na pekadalong ko mata o maongangen na pekabibid mambo ko
kapepangokom o maontol.
20 Panagontamani niyo piyapiya so maontol a kokoman kaan kano pekeoyag ago
mapekewali niyo so lopa a imbegay rekano o Allah a Tohan iyo.
21 “Di kano pemola sa kayo a toos ko katohanan a Asirah ko obay o aparan a

pagembaalan iyo a pesimbaan ko Allah a Tohan iyo
22 Aya pen o ba niyo pakatindega so apiya antonaa a babarakaten kon a polaos a ator, ka
ipekegowad ai o Allah a Tohan iyo.
DOTIRONOMIYO 17
“Di kano pekorban ko Allah a Tohan iyo sa sapi o di na bilibili a aden a daway niyan o di
na apiya antonaa pangensi niyan ka giyanan i piyakasisingay rekaniyan.
2 “Opama ka maneg iyo a sii ko isa ko manga siti a imbegay rekano o Allah a Tohan iyo
na aden a mama on o di na babay a miyakanggolaola sa marata ko kapekeilaya on o Allah
ka somiyopak ko kapasadan iyan
3 A miyananangoran ko salakaw a tohan, o di na sominimba ko alongan, so olan o di na
so manga bitoon a aya niyan kiyasogoka ko sogoan o Allah,
4 Na amay ka mapanotol ai rekano na ondamaa niyo piyapiya. O maamad a benar a
miyanggolaola den angkoto a piyakasisingay sii sa Israil
5 Na kowaa niyo angkoto a taw a miyakanggolaola sangkai a marata na wita niyo ko
gimowa o siti na robaka niyo a ator taman sa matay.
6 Ogaid na aya bo a kakebonoa on na o aden a dowa o di na telo kataw a miseksi
makapantag sii. Di kepakay a mbonoon o ba sasakataw bo a saksi on.
7 So manga saksi i magona romobak on sa ator na go bo so langon o manga taw.
Giyanan i kapekadaa niyo sangkai a kamarataan sii rekano.
So manga Taritib ko dii Kokoman
8 “O aden a rido sii ko isa a siti niyo a maregen kokomen o pangongokom roo a mipantag
ko kapamono, di pegayonan o di na kambobono na song kano ko darpa a piliin o Allah a
Tohan iyo
9 Na pakitokawi niyo so rido ko manga imam a manga Libitiyo ago so pangongokom a
ndodoo sangkoto a masa na pakikokomen iyo kiran.
10 Peyagen iran rekano so inikokom iran roo sangkoto a darpa a piliin o Allah, na
tomana niyo den so langon taman a peteroon iran rekano.
11 Nggolalanen iyo so inikokom iran a mipepasod ko kokoman a kitab a ipengendao iran
rekano. Di kano den silay a poon ko peteroon iran rekano apiya anda sa kawanan ago
diwang.
12 Saden sa iporo iyan a ginawa niyan ko di niyan kapekinega ko pangongokom o di na
so imam a makadadarpa roo ko kamamasaan o Allah a Tohan iyo na mbonoon angkoto a
taw. Giyanan i kapekadaa niyo sangkai a kamarataan sii sa Israil!
13 Na pemakineg so langon o manga taw makapantag sii na penga aalek, na da den a ba
pekaderes nggolaola peroman sa datar oto.
Manga Sogo makapantag ko Dato
14 “Magaan kano den makasoled ko inged a imbegay rekano o Allah a Tohan iyo a
ketangan iyo ago kebalingan. Amay ka magiyoto na mapetero iyo sa ginawa niyo a
‘Tomoro tano sa dato a makapendato rektano a lagid o ped a manga nasiyon a makalilibet
rektano!’
15 Na tangkeda niyo a aya mitoro iyo a makapendato rekano na so miyapili o Allah a
Tohan iyo; paliyogat a isa sekaniyan ko manga pagari niyo a taw sa Israil. Di kano den
pakipendato ko mananangga a kena o ba niyo rogo.
16 So dato iyo na di den pekakowa sa madakel a koda a ikesoat iyan aya pen o ba niyan
pakakasoya so manga pagtaw niyan roo sa Misir sa kapemasa iran on sa manga koda, ka
miyatero den o Allah a ‘Di kano den pekakasoy sa Misir!’
17 Di sekaniyan den makapengaroma sa madakel a babay ka mapekasilay iran so poso
iyan, aya pen o ba sekaniyan panamok sa mala a pirak ago bolawan.
18 “Amay ka makandato sekaniyan na kisorat iyan sii ko ribro so rek iyan a kopiya angkai
a manga sogoan a sii matatago ko kitab a matatangan o manga imam a so manga Libitiyo.
19 Ron den ai rekaniyan kaan iyan pekebatiya oman gawii taman ko kaooyagoyag iyan
kaan iyan makenal so kikaleken ko Allah a Tohan iyan ago matoman iyan piyapiya so
langon a sogoan sangkai a kitab.
20 O nggolaolaa niyan ai na di niyan mapemikir a makalelebi sekaniyan ko manga pagari
niyan a manga Israil na di niyan sogoken so kitab ko apiya antonaa a okit. Amay ka
magiyoto na matey a kapakapendato iyan ago so manga moriyataw niyan sii sa Israil.
DOTIRONOMIYO 18
So manga Sapaat a rek o manga Imam ago so Ped ko Mbatabataa a Libi
“So manga imam a so manga Libitiyo a rakes o langon a ped ko mbatabataa a Libi na di
kesaadan ko lopa a mapekewali ran a datar o ped a manga Israil. Aya ikeoyag iran na so
di iran dii mambagian ko petotongen a manga ipesepaat ko Allah ago so manga
pamemegayan a di on di isoasoat.
2 Da den a ba iran mapekewali sii ko manga pagari ran ka so Allah i kawali iran a aya
niyan initopa.
3 “Igira a dii korban so manga taw sa apiya anda ko sapi, bilibili ago kambing na aya
kibegay ko manga imam a bagian iran on na so waga, so dowa a tangagan ago so soled a
tiyan.
4 Began iyo kiran pen so paganay a bagian ko pereperan iyo, so bago a arak iyo, so lana a
olibi niyo ago so bombol a keopaw ko manga bilibili niyo.
5 Ka sii ko langon a mbatabataa rekano na pinili o Allah a Tohan iyo so mbatabataa a
Libi a makapenalagad sii ko Ingaran o Allah sa taman sa pakataman.
6 “Saden sa Libitiyo a mababaling ko apiya anda a siti sa Israil na o aden a iklas a kabaya
iyan na pekasong sekaniyan ko darpa a piliin o Allah a pesimbaan rekaniyan
7 Na roo den makapenalagad sii ko Ingaran o Allah a Tohan iyan a datar o ped iyan a
manga Libitiyo a ndodoo mambo a dii manalagad ko Allah.
8 Makapembagian sekaniyan ko pangenengken a datar den o bagian o ped a manga
Libitiyo apiya pen o aden a pantiyari niyan a initenan on o manga lokes iyan.
So Piyakasisingay a Olaola
9 “Amay ka ndodoo kano den ko inged a imbegay rekano o Allah a Tohan iyo na
pananggilai niyo o ba niyo perawata so piyakasisingay a manga olaola angkoto a manga
nasiyon.
10 Di niyo den sepaaten so manga wata iyo a mama o di na babay a petotongen sii ko
aparan, aya pen o ba niyo sowaa so galebek o pananaabir, o di na pangangatao, o di na
paririmar, o di na pamamantak,
11 O di na pangangambong, o di na pendarpaan, o di na so ana inikadowa niyan o di na
so pemangangay ko miyamatay.
12 Apiya antawaa i di sii dii nggalebek na ipekegowad o Allah, na sabap sangkai a
piyakasisingay a manga olaola na mbogaon o Allah a Tohan iyo angkoto a manga nasiyon
sii ko kapegantap iyo kiran.
13 Disomala a da a ba rekano kidaway ko kamamasaan o Allah a Tohan iyo.”
So Initopa a Nabi
14 Pitero pen o Mosa a “Sii ko inged a magaan iyo den ketangan na pepakinegen o manga
magiinged on so manga pangangatao ago manga paririmar ogaid na sekano peman na da
peroa o Allah a Tohan iyo o ba niyo ai nggolaolaa.
15 Ka so Allah a Tohan iyo na nggemawan kano niyan sa nabi a lagid aken a poon ko
rogo iyo a manga Israil, na sekaniyan den i mapemakineg iyo.
16 Ka giyanan i piyangni niyo ko Allah a Tohan iyo roo sa Palaw a Sinay sii ko gawii a
kiyalimod iyo isako teroon iyo a ‘Pengnin ami a di ami den maneg so sowara o Allah a
Tohan ami aya pen o ba ami mailay peroman angkai a piyakalekelek a apoy ka o ba kami
baden mamatay!’
17 “Na pitero raken o Allah a ‘Mapiya so piyangni iran.

18 Nggemawan aken siran sa nabi a poon ko rogo iran bo a lagid ka, Mosa, na pakipetero
aken rekaniyan so manga katero aken, na peteroon iyan kiran so langon taman a isogo
aken on.
19 Na apiya antawaa i di pemakineg ko manga katero aken a pemakalangkapen angkoto a
nabi sii ko Ingaran aken na saken den i ndaneg on.
20 Ogaid na so nabi a pekaderes tero sii ko Ingaran aken sa da aken on pakiteroon, o di na
so taw a petero sii ko ingaran o salakaw a tohan na mbonoon sekaniyan.'
21 “Masiken a ipagise iyo sa ginawa niyo a ‘Andamanaya i kaketokawi tano o ba so

pitero o nabi na poon ko Allah, o di na kena?’
22 O dii tero so nabi sii kon ko Ingaran o Allah a di mitoman so pitero iyan na kena a ba
nan katero o Allah; mitero angkoto a nabi sa sekaniyan bo i kilalag on; na di niyo
keleken.
DOTIRONOMIYO 19
So manga Siti a Kapegapasan
“So Allah a Tohan iyo na mbinasaan iyan so manga nasiyon a kibabaling ko lopa a
imbegay niyan rekano a ketangan iyo ago mapekewali. Na amay ka maagaw niyo a
makabaling kano ko manga siti iran ago manga walay na bagia niyo so lopa sa telo baad.
Na senggay kano sa telo a manga siti a so isa a siti sii ko lembak o oman i sabaad ko
inged. Mbaalen iyo so oman i siti sa lalan a isong on kaan roo makapegapas so
miyakapatay sa taw.
4 “Na giyai i taritib makapantag roo: so miyakapatay sa taw a da niyan tibabaa so

kiyabonoa on ago kena a ba niyan miyarido gowani na makapegapas roo kaan malinding.
5 Ibarat o aden a dowa kataw a somiyong sa kalasan ka pemata sa kayo, na sii ko
kipetidaon on o isa kiran ko patok iyan na miyaso so olo o patok na minisogat ko ped iyan
a aya niyan inipatay. Na makapegapas angkoto a mama ko isa sangkoto a telo a siti kaan
malinding.
6 Ka o ba baden salobaa o kebaya on somaop a tanto a pekerarangitan, na o tanto a
mawatan so siti a pepagapasan iyan na peraoten sekaniyan o seop na mbonoon iyan apiya
pen o kena a ba patot a kambonoa on, ka so miyapatay niyan na kena a ba niyan miyarido
gowani.
7 Giyanan i sabap a isogo aken rekano a senggay kano sa telo a siti a kapegapasan.
8 “Amay ka pakaoladen o Allah a Tohan iyo so inged iyo a aya niyan inisepa ko manga
apoapoan iyo ago ibegay niyan rekano so langon o lopa a initopa niyan kiran
9 Na senggay kano sa telo pen a manga siti on a kapegapasan. (Imbegay niyan rekano
angkai a lopa o piyapiyai niyo tomoman so langon a manga sogoan a ipembegay aken
rekano imanto a pekebabayaan iyo so Allah a Tohan iyo ago pekedegen iyo so manga
lalan iyan.)
10 Senggain iyo angkai a manga siti kaan da a rogo o da a sala iyan a ba maodod sii ko
inged a imbegay rekano o Allah a Tohan iyo a mapekewali niyo kaan di kano kesala ko
kiyapamono.
11 “Ogaid na ibarat na aden a taw a ipekegowad iyan so siringan iyan na inayanan iyan
ago biyono iyan na taros a miyagapas sekaniyan ko isa sangkai a manga siti a
kapegapasan.
12 O magiyoto na so manga olowan ko siti a babalingan o miyakabono na pekikowa iran
sekaniyan na peladen iran ko somasaop on kaan iyan mabono.
13 Di niyo sekaniyan kepediin. Pakadaa niyo sa Israil so kasalaan a kapembonoa ko da a
sala iyan kaan kano makategompiya.
So Andang a Temanaan
14 “Di niyo perangkireben so temanaan o lopa a aya kawali o siringan ka a inibetad roo o
miyanga oona a mimbagibagi ko inged a imbegay rekano o Allah a Tohan iyo a
mapekewali niyo.
Manga Kokoman makapantag ko Kaseksi
15 “Di kepakay o ba kabenari so taw sa apiya antonaa sala o di na kadostaan ko

kiyasenditi ron o sakataw bo a saksi. Disomala a kapemataani ron o dowa o di na telo a
saksi.
16 O aden a bokeg a saksi a pepenendisendit sa miyakasela so ped a taw
17 Na mapakapengadap siran a dowa ko kamamasaan o Allah sii ko hadapan o manga
imam ago manga pepangokom sa masa oto.
18 Na kapegondamaan piyapiya o manga pangongokom so makapantag roo na o maamad
a miyamamokeg so saksi a piseksian iyan sa di benar so ped niyan a taw sa Israil
19 Na nggolaolaa niyo rekaniyan so pikediyat iyan a indaneg ko pagari niyan a
pisebapan iyan. Giyanan i okit a kapekadaa niyo sangkanan a kamarataan sii rekano.
20 Ketokawan ai o ped a manga taw na penga aalek, na da den a isa rekano bo a ba
nggolaola peroman sa datar anan a marata.
21 Di kano pengapedi! Kibayad so niyawa ko niyawa, kibayad so mata ko mata, kibayad
so ngipen ko ngipen, kibayad so lima ko lima na kibayad so ai ko ai.
DOTIRONOMIYO 20
Manga Kokoman makapantag ko Kapakitidawa
“Igira a di kano dii makitidawa ko manga ridoay niyo ago pekeilay niyo so manga koda,
so manga karo ago so manga sondaro a lebi a madakel a di sekano na di niyo siran
keleken, ka maaped rekano so Allah a Tohan iyo a aya rekano miyakaliyo sa inged a
Misir!
2 Sii ko di niyo pen kapakitidawa na pekaobay rekano so imam ka makipembitiyarai ko
manga sondaro.
3 Mapetero iyan a ‘Pamakineg kano, hey manga Israil! Imanto na kesagobang iyo so
manga ridoay niyo. Di kano petelaw o di na kelek; di kano petebada aya pen o ba niyo
siran kawanen.
4 Ka so Allah a Tohan iyo i magonot rekano a makipetidawa ko manga ridoay niyo, na
imbegay niyan rekano so kapakataban!’
5 “So mambo so manga olowan o manga sondaro na makipembitiyarai siran ko manga

mama a peteroon iran a ‘Ba aden rekano a gopen mimbalay sa walay a da niyan pen
semanga? Pekabaling sekaniyan ka o ba baden matay ko katidawa na salakaw den a
makasemang on.
6 Ba aden rekano a gopen miyamola sa asinda a obas a da niyan pen kanggonai so onga
niyan? Pekabaling sekaniyan ka o ba baden matay ko katidawa na salakaw den a
makapenggona on.
7 Ba aden rekano a minipamalai ko babay a da niyan pen mapangaroma? Pekabaling
sekaniyan ka o ba baden matay ko katidawa na salakaw den a makapangaroma on.’
8 Na mapetero pen o manga olowan o manga sondaro a ‘Ba aden rekano a pekelek o di na
tetalaw? Pekabaling sekaniyan ka o ba baden telaw mambo so manga pagari niyan a
datar iyan.’
9 Amay ka makaipos tero so manga olowan o manga sondaro na pekatoro siran sa manga
maporo ko oman i salompok on.
10 “Amay ka nggobat kano ko isa a siti na pakalangkapa niyo daan ko manga taw ron so
kapakaparo iran somangkop.
11 O terimaa iran so kasengkop iran a pelekaan iran rekano so gimowa o siti na so langon
a magiinged on na ketegel nggalebek a penalagad rekano.
12 Ogaid na o di siran sengkop a ba rekano baden makipetidawa na likopi niyo so siti.
13 Na amay ka piyakiagaw rekano den o Allah a Tohan iyo na pamonoa niyo so langon a
manga mama on.
14 Ogaid na mapemiyag iyo so manga babay ago so manga wata, na mapeteban iyo so
manga pangangayamen a rakes o langon taman a matatago ko siti. Na kanggonaan iyo so
mapeteban iyo ko manga ridoay niyo ka inibegay rekano o Allah a Tohan iyo.
15 Giyanan i nggolaolaa niyo ko langon a manga siti a mawatan rekano a kena o ba sii ko
lopa a kebalingan iyo.
16 “Ogaid na makapantag ko manga siti sii ko lopa o manga nasiyon a imbegay rekano o
Allah a mapekewali niyo na da den a pengginawa a ba niyo ron pakapegoyaga.
17 Polanga niyo siran langon – a so manga Hitiyo, manga Amoriyo, manga Kanaaniyo,
manga Pirisiyo, manga Hibiyo ago so manga Hibosiyo ka giyoto i inisogo rekano o Allah
a Tohan iyo.
18 Nggolaolaa niyo ai kaan kano iran di keagak sa kapagiringi niyo ko langon a
piyakasisingay a olaola iran ko kapesimbaa ko manga katohanan iran, ka ikedosa niyo ai
ko Allah a Tohan iyo.
19 “Amay ka matey a kalilikopi niyo ko siti a pepanamaran iyo magaw na di niyo

mbinasaa so manga kayo a pepamangonga. Kekan iyo so manga onga niyan ogaid na di
niyo pemataa. Ka ba so manga kayo na maaped ko manga ridoay niyo a patot a kang-
gobata niyo ron?
20 Ogaid na kepakay a pamataan iyo
so manga kayo a katawan iyo a di kapenggonaan sa pangenengken. Keosar iyo ai ko
kapagembaali niyo ko manga tambak a ipelikop ko siti a pesorang rekano taman sa
maagaw niyo.
DOTIRONOMIYO 21
So Kiyapamono a Miyaibno
“O aden a miyabono a miyatoon ko pangomaan sii ko inged a imbegay rekano o Allah a

Tohan iyo a di katawan o antawaa i miyono on
2 Na pekasong roo so manga pelokelokesen rekano ago manga pangongokom na ketakes
iran so kawatan o bangkay ko manga rarani ron a siti.
3 So manga pelokelokesen ko siti a lebi a marani ron na pekakowa siran sa mangoda a
sapi a babay a da den maosar sa kanggalebek o di na kasangani sa kokoong.
4 Ketonda iran ai tomondagay ko balintad a da den mandado o di na kapamolai a aden a
petoga on a lawasaig, na roo iran lepoa so lig o sapi.
5 Pekasong roo den mambo so manga imam a Libitiyo ka siran i piyamili o Allah a Tohan
iyo a aya on makapenalagad ago makapengangarapan sa manga rakmat ko manga taw sii
ko Ingaran o Allah, na siran i pekakokom ko oman i rido ago kambobono.
6 Na so langon a pelokelokesen ko siti a aya bo marani ko bangkay na kapengonaban iran
a manga lima iran ko liyawaw o sapi a miyalepo so lig iyan roo ko balintad
7 Na mapetero iran a ‘Kena a ba so manga lima mi a miyakatoga sangkai a rogo aya pen o
ba miyailay o manga mata mi so kiyanggolaolaa on.
8 Rilai ngka, ya Allah, so manga pagtaw ngka a Israil a iniliyo ngka sa Misir na di ngka
rekami selaan so kiyabonoa ko da a sala iyan.'
9 Giyanan i kapekadaa niyo sii rekano ko kasalaan ko kiyabonoa ko da a sala iyan a
nggolalan ko kanggolaolaa niyo ko paliyogat rekano o Allah.
So Kapangaromaa ko Miyabiyag a Babay
10 “Amay ka mapalad rekano o Allah a Tohan iyo so manga ridoay niyo sii ko di niyo
kiran dii kapakitidawa a aden a miyanga bibiyag iyo ron
11 Na o mailay ngka kiran so mataid a babay a kebayaan ka mangaroma
12 Na kewit ka sekaniyan ko walay ngka. Pakiyopawi ngka on a olo niyan ago
pakikanokowi ngka on a manga kemer iyan
13 Na kesambian iyan so ndiditaren iyan isako mabiyag. Amay ka makakaden sekaniyan
ko walay ngka ko soled o saolan a di niyan dii mboko so ama iyan ago so ina iyan na
mapengaroma ngka.
14 Na di bo matey o di ngka sekaniyan ikesoat na begi ngka sa bayabaya, ogaid na di
ngka pepesaa o di na iseyan sa oripen ka kagiya miyapakaito o ka.
So Hak o Paganay a Inimbawata
15 “Ibarat na aden a mama a dowa i karoma a pekebabayaan iyan so isa on ogaid na di

niyan pekebabayaan so ikadowa na palaya siran on mimbawata sa mama ogaid na so kaka
kiran na wata o karoma niyan a kena a ba niyan pekebabayai.
16 Na amay ka mbagibagiin iyan kiran so manga tamok iyan na di niyan kibegay ko
paganay a inimbawata o pekebabayaan iyan so bagian ko tamok a aya hak o tito a kaka a
wata iyan a inimbawata o kena a ba niyan pekebabayai.
17 Ka disomala a kilalaa niyan so tito a kaka a wata iyan a inimbawata o kena a ba niyan
pekebabayai ko kimbegan iyan on ko dowa takep a bagian ko langon taman iyan, ka
giyangkoto a wata na aya paganay a nanao ko bager o ama iyan, na rek iyan so kabenar ko
kakakakai ron.
So Somosopak a Wata a Mama
18 “O aden a wata a mama a mategas i olo ago somosopak a di niyan peratiyayaan so

manga lokes iyan ago di niyan siran pekinegen apiya pen o pendanegen iran
19 Na kekapetan o manga lokes iyan na kewit iran ko manga pelokelokesen sii ko dii
kokoman o siti a babalingan iyan.
20 Na mapetero iran ko manga pelokelokesen a ‘Giyangkai a wata ami na mategas i olo
ago somosopak a wata. Di kami niyan peratiyayaan; marata sekaniyan i olaola ago dii
mamereg.’
21 Na kerobak sekaniyan den a ator o langon a manga mama ko siti taman sa matay.
Giyanan i kapekadaa niyo ko kamarataan sii rekano, na ketokawan ai o langon a taw sa
Israil na penga aalek.
So Pitibarangan a manga Sogoan
22 “O aden a miyakasela sa patot a kibono on a biyono sekaniyan ago binitin so bangkay

niyan ko kayo
23 Na di niyo ron pekapitai a mabibitin. Lebengen iyo den sii bo sangkoto a gawii, ka so
taw a mabibitin ko kayo na kasisintaan o Tohan. Lebengen iyo kaan di kakarami so inged
a imbegay rekano o Allah a Tohan iyo a mapekewali niyo.
DOTIRONOMIYO 22
“O mailay ngka so sapi o di na bilibili o pagari ngka a pekededadadag na di ka pegomanta
sa di ngka katawan; ba ngka den wita ko kirek on.
2 Ogaid na o mawatan so babalingan o pagari ngka o di na di ngka katawan o antawaa i
kirek on na wita ngka ko walay ngka na sisiyapa ngka taman sa makaoma so kirek on a di
on dii mbabanog, na began ka on.
3 Lagid oto mambo a sowaa ngka o matoon ka so kimar o pagari ngka, o di na so gerab
iyan o di na apiya antonaa a rek iyan a miyada. Di ngka ini pendarainonen.
4 “O mailay ngka so kimar o di na sapi o pagari ngka a miyaoteng ko lalan na di ngka ini
pendarainonen; ogopi ngka sekaniyan baden sa kapakatindega on.
5 “So babay na di den makapenditar sa nditaren a mama, na so mama na di makapenditar

sa nditaren a babay, ka so apiya antawaa i di sii dii nggolaola na piyakasisingay ko Allah
a Tohan iyo.
6 “O makatoon ka sa salag a papanok ko kilid a lalan apiya anda sii ko kayo o di na sa
lopa a aden a papanok on a lomelenes ko manga wata iyan o di na pelendem ko manga
orak na di ngka perakesen komowa so ina a papanok a ped o manga wata iyan.
7 Kepakay a kowaan ka so manga roroni a papanok, ogaid na bokai ngka so ina iran kaan
ka makategompiya ago malendo so omor ka.
8 “Amay ka makambalay ka sa walay na mbaali ngka sa alad ko melilibeta ko pantar a

atep iyan kaan di kesala so pamiliya ngka o aden a maolog on a matay.
9 “Di ngka pemolai sa dowa barang a oniin so asinda ngka a obas. O nggolaolaa ngka ini
na kekaraman so onga a obas ago so pen so keragon ka ko ped a pamomolan.
10 “Di ngka timoa somangan sa kokoong so sapi ago so kimar sa kapendado ngka.
11 “Di ka penditar sa nditaren sa ba piyakandair mamanai so alpaka ago so sotra.
12 “Tagoi ngka sa manga garigay so pat a rogo o sagayadan o kimon a ndiditaren ka.
Manga Kokoman makapantag ko Da Kabatali
13 “O mangaroma so mama sa babay na maipos so kiyarembanga niyan on na kedaan

sekaniyan on sa bebaya
14 Na o panotiyaa niyan a sebapan iyan so babay a tig iyan a ‘Piyangaroma ko angkai a
babay ogaid na kagiya marembang aken na kiyatokawan aken a kena den o ba sekaniyan
da kabatali,’
15 Na o magiyoto na so manga lokes o babay na kekowa iran so manga karina sa da den
makeroma so wata iran, na pakiilain iran ko manga pelokelokesen sii ko dii kokoman.
16 Na mapetero o ama o babay ko manga pelokelokesen a ‘Piyakipangaroma ko so wata
aken sangkai a mama, ogaid na imanto na da a kabaya iyan on.
17 Pisebapan iyan sekaniyan a pitero iyan a kiyatokawan iyan a kena den o ba da kabatali.
Ogaid na katii so manga karina sa da den makeroma so wata aken.’ Na giyoto a keyaten
o manga lokes iyan so dinis ko kamamasaan o manga pelokelokesen ko siti.
18 Na kekowa iran so mama na kelepedan iran
19 Ago kemoltaan iran sa magatos a pelata a pirak a kibegay ko ama o babay, ka kagiya
giya mama oto na piyakaito iyan so raga a taw sa Israil. Na kitaros o mama a
kakakaromai niyan on; di niyan den mipembelag ko tenday a omor iyan.
20 “Ogaid na o benar so inisendit on o mama ago da a karina sa da den makeroma so

babay a ba mapekiilay
21 Na kewit so babay ko paitaw o walay o ama iyan na roo sekaniyan den kerobak a ator
o manga mama ko siti taman sa kapatay niyan. Ka miyakanggolaola sekaniyan sa
piyakayaya sii sa Israil ko kiyapakikeroma niyan sa da niyan pen kapangaroma sii ko
kababaling iyan pen ko walay o ama iyan. Giyanan i kapekadaa niyo ko kamarataan sii
rekano.
22 “O katokawi a aden a mama a romimbang sa babay a ana karoma niyan na palaya den
mbonoon so mama ago so babay. Giyanan i kapekadaa niyo ko kamarataan sii sa Israil.
23 “O aden a mama a makatoon sa babay a da kabatali sii ko siti a matataalik a

kapengaromaa on o ped a mama na ba niyan den pikeroma
24 Na kewit iyo siran a dowa ko liyo o siti na robaki niyo a ator taman sa mamatay;
kerobak so babay ka apiya o ndodoo ko siti na da den kisek a pekitabang, na kerobak so
mama ka biyatalan iyan so babay a kewingen ko ped a mama. Giyanan i kapekadaa niyo
ko kamarataan sii rekano.
25 “Ogaid na o makatoon so mama sa babay ko mawatan ko siti a matataalik a

kapengaromaa on na go niyan liyobed na so bo so mama a lomiyobed on i mbonoon.
26 Di niyo petekora so babay ka da a ba niyan miyandosa a patot a imbono on. So
kokoman makapantag sii na lagid bo o kokoman makapantag ko taw a somiyondol ago
miyakapatay ko siringan iyan,
27 Ka miyatoon o mama so kewingen a babay ko mawatan ko siti, na apiya pen
kominisek na da a ba on makapenabang.
28 “O makatoon so mama sa raga a da makeroma a kena o ba kewinga na go niyan

liyobed na o katokawi den
29 Na pekabayad so mama sa lima polo a pelata a pirak ko ama o babay sabap sa
piyakakeya iyan so babay. Na disomala a mapengaroma niyan so babay a di niyan den
mipembelag ko tenday a omor iyan.
30 “Di kepakay o ba pakikeromai so mama ko karoma o ama iyan ka giyanan i

kakediyampaa niyan ko ama iyan.
DOTIRONOMIYO 23
So manga Taw a di Pekaped ko dii Kapelimolimod
“Da a mama a miyasasa so orak iyan o di na piyotolan sa sangoran a ba pekaped ko dii

kapelimolimod o manga pagtaw o Allah.
2 “So taw a inimbawata sa di kawing na di pekaped ko dii kapelimolimod o manga

pagtaw o Allah taman ko ikasapolo apid ko kebabadan on.
3 “Da a Amoniyo o di na Mowabiyo a apiya sii pen ko ikasapolo a apid o kebabadan on a

ba pekasoled ko dii kapelimolimod o manga pagtaw o Allah.
4 Aya sabap iyan na minda siran o ba siran rekano makabegay sa pangenengken ago ig
isako pelalakaw kano ko kiyapakaawa iyo sa Misir, na tindanan iran si Balaam a wata i
Biyor a taga Pitor sii sa Misopotamiya sa kapesintai niyan rekano.
5 Inonta bo na da pakinega o Allah a Tohan iyo si Balaam, ka kilid iyan so paninta na
biyaloy niyan baden a rakmat, ka pekebabayaan kano o Allah a Tohan iyo.
6 Di kano pakipengginawai ko manga Mowabiyo ago so manga Amoniyo aya pen o ba
kano nggolaola sa apiya antonaa a ipetegompiya iran sa taman sa pakataman.
7 “Di niyo kegowaden so manga taw sa Idomiya ka manga pagari niyo siran; na di niyo
kegowaden so manga Imisiren ka miyakabaling kano a manga mananangga sii ko inged
iran.
8 Ipoon ko ikatelo a apid o kebabadan kiran na pekaped siran ko dii kapelimolimod o
manga pagtaw o Allah.
So Kakeresiki ko Kampo
9 “Igira a kekampo kano sii ko di niyo dii kapakitidawa ko manga ridoay niyo na lidasi
niyo so apiya antonaa a pekakaram rekano.
10 O aden a mama sii rekano a miyadalem a hadas ka tiyogaan a biga sii ko katotoroga on
na pekaliyo sekaniyan ko kampo na pekatareg roo pasin.
11 Ogaid na amay ka kegabi na makapendiyonob sekaniyan, na sii ko kiyasedep o
alongan na pekasoled sekaniyan ko kampo.
12 “Senggay kano sa darpa ko liyo o kampo a diyamban iyo.

13 Rakesi niyo so manga kasangkapan iyo sa kali, na igira a pepekaodo kano na kalot
kano na go niyo petemboni so maresik.
14 Ka so Allah a Tohan iyo na dii magenebeneb ko kampo niyo sa kapelindinga niyan
rekano ago so kapelada niyan ko manga ridoay niyo sii rekano. Na paliyogat a
malolompiyo so kampo niyo kaan da a maresik sii rekano a ba niyan mailay a kitalikod
iyan rekano.
Pitibarangan a manga Kokoman
15 “O aden a oripen a miyakapalagoy a miyagapas reka na di ngka tegela komasoy ko

kadnan iyan.
16 Pakakadena ngka sekaniyan sii rekano ko apiya anda i kepili iyan sii ko manga inged
iyo a kebayaan iyan komaden. Di ngka sekaniyan pekabobologi.
17 “Da a babay o di na mama a taw sa Israil a ba makapesondal roo ko pesimbaan ko

barahala.
18 Di niyo pagowita ko Timplo o Allah a Tohan iyo so iniyapin ko sondal a babay o di na
mama a aya itoman ko inisemaya iyo, ka piyakagowagowad siran ko Allah a Tohan iyo.
19 “Di ngka pekaisega so pirak, kaoyagan o di na apiya antona onon a keotang o ped ka a
Israil.
20 Kepakay a pekaisegen ka so otang o mananangga, ogaid na di ngka pekaisega so otang
o ped ka a Israil kaan kano karakmati o Allah a Tohan iyo ko langon taman a di niyo dii
nggalebeken sii ko inged a pesongowan iyo sa katengana niyo ron.
21 “O pesemaya ka ko Allah a Tohan ka na di ngka pendarainonen a kitomanen ka on, ka

mataan den a sekaten ai o Allah a Tohan ka, na o di ngka tomanen na kesala ka a
miyakandosa.
22 So di ngka kapesemaya na kena a ba dosa,
23 Ogaid na apiya antonaa i inisemaya a ka ko Allah a Tohan ka a iklas a kiyateroa ngka
on na paliyogat a kipenggolalanen ka on.
24 “O somoled ka ko asinda a obas o siringan ka na pekakan ka on sa taman sa kabaya a

ka, ogaid na di ngka on ketagoan so balengkat ka.
25 O somoled ka ko pepamangeto a pereperan o siringan ka na pekaropo ka on, ogaid na
di ngka keosaran sa garab.
DOTIRONOMIYO 24
So Kambelag ago so Kapangaroma peroman
“Opama ka makapangaroma so mama sa babay a miniarong sa di niyan kebebayaan

sabap sa aden a kiyatokawan iyan a piyakayaya makapantag ko babay na o somorat so
mama sa kapasadan a kambelag a ibegay niyan ko babay ago pakaawaan iyan ko walay
niyan
2 Na amay ka makaawa ko walay niyan na o pangaromaa peman o salakaw a mama
3 Na o kagowaden pen so babay o miyaori a miyakapangaroma on a somorat mambo sa
kapasadan a kambelag a ibegay niyan on ago pakaawaan iyan ko walay niyan, o di na o
matay angkai a miyaori a karoma niyan
4 Na di kepakay o ba mapangaroma peroman so babay o miyaona a karoma niyan ko
oriyan o kiyabatali ron, ka piyakasisingay ini ko Allah. Di niyo tagoi sa dosa so inged a
imbegay rekano o Allah a Tohan iyo a mapekewali niyo.
Pitibarangan a manga Kokoman
5 “O gopen miyakapangaroma so mama na di mapekaonot ko manga sondaro a dii

makitidawa aya pen o ba kasangani ko ped a galebek. Ka kebegan sekaniyan sa bayabaya
ko soled o saragon kaan makatareg sa walay ago mapakapiya niyan a ginawa o babay a
piyangaroma niyan.
6 “Igira a pepangotang ka sa ped a taw na di ngka kowaa so galingan iyan a ator a kisanda
ko otang iyan, ka lagid bo o ba aya ngka on kinowa a sanda na so ipekeoyag o pamiliya
niyan.
7 “O aden a miyangidnap ko lagid iyan a Israil kaan iyan maoripen o di na mapesa na

mbonoon so miyangidnap. Giyanan i kapekadaa niyo sangkanan a kamarataan sii rekano.
8 “Makapantag ko paniyakit a bowa na piyapiyai niyo tomoman so ipaginsarat rekano o

manga imam a manga Libitiyo. Nggolalanen iyo piyapiya so inisogo aken kiran.
9 Tademi niyo so pinggolaola o Allah a Tohan iyo ki Mariyam sii ko kapelalakaw niyo a
poon sa Misir.
10 “Amay ka aden a pegotangen ka ko siringan ka na di ngka soledi so walay niyan sa
kakowaa ngka ko isenda iyan on.
11 Sii ka den sa liyo na nayawa ngka baden a kiliyon iyan ko isenda iyan reka.
12 O miskin sekaniyan na di ngka tengana ko walay ngka so nditaren a inisanda iyan ko
mababasa gawii.
13 Kasowin ka den ko di pen kasedep o alongan kaan iyan mipakatorog. Penalamatan ka
niyan na imbilang ai o Allah a Tohan ka a aya ngka kaontol.
14 “Di ngka pelimbongi so pesokayan ka a gomagalebek a miskin ago kadodowaanan

apiya anda ko lagid ka a Israil o di na mananangga a sii babaling ko isa ko manga siti
niyo.
15 Began ka on so sokay niyan sa oman gawii ko di pen kasedep o alongan, ka miskin
sekaniyan na sasanaan iyan ai. Ka o di ngka ini nggolaolaa na pepanonen ka niyan ko
Allah na kesala ka a miyakandosa.
16 “Di kebono so ama sabap ko sala o wata iyan aya pen o ba bonoa so wata sabap ko
sala o ama iyan. Aya bo a kibono ko taw na so rek iyan a kasalaan.
17 “Di niyo perampasi sa kabenar so mananangga o di na so ilo aya pen o ba niyo

kowaa so nditaren o balo a sanda.
18 Tatademi niyo a miyapangongoripen kano roo sa Misir na so Allah a Tohan iyo na
piyakamaradika kano niyan roo. Giyanan i sabap a inisogo aken rekano a nggolaolaa niyo
ai.
19 “Igira a petimoon iyo so manga pereperan a miyaragon iyo ko dii mbabasokan na o

aden a miyalepas iyo a sabekes a pereperan a minibegak iyo roo ko lopa iyo na di niyo
anan kesowi o ba niyo kowaa, ka begaken iyo ron den a kekowa o manga mananangga,
manga ilo ago so manga balo kaan kano karakmati o Allah a Tohan iyo ko langon a
manga galebek iyo.
20 “Igira a perebasen iyo so manga olibi niyo na di niyo pekesowi romopo so miyanga
lalamba ko manga sapak o kayo; begaken iyo so pekelamba on kaan makowa o manga
rait, manga ilo ago so manga balo.
21 Igira a perebasen iyo so manga obas iyo ko asinda na di niyo ai pengosipi; so
pekibegak ko manga obas na kekowa o manga mananangga, manga ilo ago so manga
balo.
22 Tatademi niyo a miyapangongoripen kano roo sa Misir. Giyanan i sabap a inisogo
aken rekano a nggolaolaa niyo ai.
DOTIRONOMIYO 25
“O aden a rido o dowa kataw na wita niyo ko dii kokoman kaan makokom o
pangongokom, na pekabenaren iyan so da a sala iyan ago selaan iyan so miyakasela.
2 O domadait ko miyakasela a kapelepedi ron na mapekagepe sekaniyan o pangongokom
ko hadapan iyan na pekilepedan iyan den sa taman sa kadakel o kibayad ko minisela iyan.
3 Ogaid na aya bo a kadakel a kileped on na sii bo taman ko pat polo. O pakilepedi sa
kalawanan ai na mapekaito sekaniyan ko kapegilaya ngka on.
4 “Di niyo pongesa so sapi igira a pegegiken iyan so ilaw.
So Atastanggongan o Pagari o Miyatay
5 “O matitimo sa darpa so dowa a magari a mama na matay so isa on a da a wata iyan a

mama na so babay a inikabalo niyan na di makipengaroma ko mama a kena a ba ped ko
pamiliya. So pagari o miyatay na aya makapengaroma ko babay a aya niyan kitomanen
ko atastanggongan o kaiipagi niyan on.
6 Na so paganay a ipembawata iran a mama na aya pekaawid ko ngaran o magari a
miyatay kaan di kepapas so ngaran iyan sii sa Israil.
7 Ogaid na o di pagiyog so mama sa kapengaromaa niyan ko inikabalo o pagari niyan na
pekasong so babay ko manga pelokelokesen sii ko gimowa o siti na mapetero iyan a ‘So
pagari o karoma ko na da iyog o ba niyan mabangon so ngaran o pagari niyan sii sa Israil.
Di niyan itoman so atastanggongan o ipag aken.’
8 Na pekitawag o manga pelokelokesen ko siti so mama a mipembitiyarai ran. O itegel
iyan tero a ‘Di aken kabaya o ba aken pangaromaa so babay,’
9 Na so bitowanen o pagari niyan na magobay rekaniyan ko hadapan o manga
pelokelokesen na kekowa niyan on so isa ko tinilas iyan na kedodaan iyan sa paras so
ipag iyan a peteroon iyan a ‘Giyai i penggolaolaan ko mama a minda sa kambangona
niyan ko walay o pagari niyan.’
10 Na so kebabadan sangkoto a mama sii sa Israil na pagingaranan sa ‘Pamiliya o
Kinowaan sa Tinilas.’
Ped a manga Kokoman
11 “O aden a dowa kataw a mama a dii mbono a miyobay kiran so karoma o isa on ka
tebangan iyan so karoma niyan na go niyan kapeti so orak o peperaneg ko karoma niyan
12 Na potola niyo ron so lima niyan. Di niyo sekaniyan kepediin.
13-14 “Di kano pegosar sa timbangan o di na panakes a di ontol.

15 Aya niyo bo osara so ontol ago tarotop a manga timbangan ago panakes kaan matey a
kapeginetaw niyo roo ko lopa a imbegay rekano o Allah a Tohan iyo.
16 Ka so apiya antawaa a dii melilimbong ko kapegosara niyan ko di ontol a timbangan
ago panakes na piyakagowagowad ko Allah a Tohan iyo.
So Sogoan sa Kambonoa ko manga Amalik
17 “Tademi niyo so pinggolaola rekano o manga Amalik sii ko kapelalakaw niyo isako
makaliyo kano sa Misir.
18 Sii ko tanto rekano a kiyadokawi na siyondolan kano iran ko kapelalakaw niyo na
piyamono iran so di pemakarag lomakad a maooriyan. Da a kalek iran ko Tohan!
19 Sabap roo na amay ka began kano o Allah a Tohan iyo sa kalilintad ko langon a ridoay
niyo ko melilibeta rekano sii ko inged a imbegay niyan rekano a ketangan iyo ago
mapekewali na polanga niyo so manga Amalik kaan da den a ipenanadem kiran ko dalem
a doniya. Di niyo den ai pelipati!
DOTIRONOMIYO 26
Manga Ipesoasoat a Miyanga raragon
“Amay ka matangan iyo so lopa a imbegay rekano o Allah a Tohan iyo a mapekewali
niyo ago makabaling kano ron
2 Na disomala a kowaan o oman i isa rekano so ped ko langon a paganay a miyaragon ko
lopa a imbegay reka o Allah a Tohan iyo, na awidi ngka ini a tatagoon ko reban roo ko
darpa a pinili o Allah a Tohan ka a pesimbaan rekaniyan.
3 Song ka ko imam a aya petelagad sa masa oto na teroa ngka on a ‘Penalamatan ko so
Allah a Tohan ko sangkai a gawii ka miyakatalingoma ko ko lopa a inisepa o Allah a
imbegay niyan ko manga apoapoan tano.’
4 “Na kowaan o imam so reban sii sa lima ngka na imbetad iyan ko danga o aparan o
Allah a Tohan ka.
5 Samaoto na teroa ngka ko kamamasaan o Allah a Tohan ka a ‘So apoapoan aken a so
Yakob na dii magenebeneb a taga Aramiya, na somiyong sekaniyan sa Misir a ped o
pamiliya niyan a kena a ba siran madakel. Komiyaden siran roo na miyabaloy a mala a
nasiyon a mabager ago mala i gees.
6 Ogaid na pimarataan tano o manga Imisiren ago riyasay iran a tigel tano iran
makanggalebek sa maregen.
7 Gomiyoraok tano a miyamangni sa tabang ko Allah a Tohan o manga apo tano na
miyaneg tano niyan a miyailay
niyan so kapepakabobologi ago kaperasaya rektano ago so kapakamboboko.
8 Na iniliyo tano o Allah sa Misir a nggolalan ko mala i kapaar a lima niyan ago so maba-
ger a barokan iyan a minggalebek sa manga ala a piyakalekelek ago piyakamemesa a
nanao.
9 Inowit tano niyan sangkai a darpa na inibegay niyan rektano angkai a pekepakayan ago
oodaren a lopa.
10 Imanto, ya Allah, na inawidan aken angkai a paganay a miyaragon ko lopa a inibegay
ngka raken.’ Na betaden ka so reban ko hadapan o Allah a Tohan ka na simbaa ngka
sekaniyan.
11 Samaoto na kabebaya ka baden sii ko langon a kamapiyaan a inibegay reka o Allah a
Tohan ka ago sii ko pamiliya ngka, na perakesen ka sii so manga Libitiyo ago so manga
mananangga a sii rekano babaling.
12 “Oman ikatelo ragon na giyoto so ragon a kimbegan ka ko ikasapolo bagi ko langon a

miyaragon ka sii ko manga Libitiyo, so manga mananangga, so manga ilo ago so manga
balo a kibabaling ko manga siti niyo kaan siran on makakan ago manga oosog.
13 Amay ka manggolaola ngka ini na teroa ngka ko Allah a Tohan ka a ‘Da den a ba aken
liyamba ko soti a ikasapolo bagi sii ko walay aken, ka inibegay aken den ko manga
Libitiyo ago sii ko manga mananangga, manga ilo ago so manga balo a giyoto so inisogo
o ka. Da aken den sogoka so manga sogoan ka aya pen o ba aken kiyalipati.
14 Da ako kan sangkai a soti a bagian sii ko kapakamboboko aken aya pen o ba aden a
siko aken on sii ko kadadalem aken a hadas, na da den a inisapaat aken on ko miyamatay.
Ka piyaratiyaya aken seka, ya Allah a Tohan ko, na ininggolalan aken so langon taman a
inisogo o ka raken.
15 Tolong ka san sa kasorgaan a so soti a kakadenan ka na rakmati ngka so manga pag-
taw ngka a Israil a lagid mambo angkai a pekepakayan ago oodaren a lopa a inibegay
ngka rekami a giyoto so inisepa a ka ko manga apo ami.
So manga Taw a Rek o Allah
16 “Sii sangkai a gawii na inisogo rekano o Allah a Tohan iyo so kinggolalanen iyo
sangkai a manga taritib ago manga kokoman. Kagiya ka maoto na tomana niyo ai
piyapiya sa iklas ko poso iyo ago iklas ko niyawa niyo.
17 Pimataanan iyo sangkai a gawii a so Allah i Tohan iyo. Initopa niyo a kedegen iyo so
manga lalan iyan ago tomanen iyo so manga taritib, manga sogoan ago so manga
kokoman iyan ago peratiyayaan iyo sekaniyan.
18 Na pimataanan mambo o Allah sangkai a gawii a sekano i mala on i arga a manga
pagtaw niyan ka giyoto so initopa niyan rekano, na disomala a katomana niyo ko langon a
sogoan iyan.
19 Na ipengkat kano niyan sa maporo a di so apiya antonaa a ped a nasiyon a inaden iyan,
na mbegan kano sa podi, bantogan ago menang. Kebaloy kano a soti a manga pagtaw o
Allah a Tohan iyo a giyoto so initopa niyan.”
DOTIRONOMIYO 27
So Aparan ko Palaw a Ibal
Si Mosa a ped iyan so manga pelokelokesen sa Israil na pitero iyan ko manga taw a
“Tomana niyo langon angkai a manga sogoan a inibegay aken rekano imanto.
2 Amay ka makaripag kano ko Lawasaig a Yordan a makasoled kano ko inged a imbegay
rekano o Allah a Tohan iyo na batiyong kano ron sa manga ala a ator na lapisi niyo sa
sominto.
3 Na soraten iyo ron so langon a manga katero angkai a kitab amay ka makaripag kano
ago makasoled ko pekepakayan ago oodaren a lopa a initopa o Allah a Tohan o manga
apo iyo a imbegay niyan rekano.
4 Amay ka inisampay kano ko sabala a Yordan na batiyonga niyo angkoto a manga ator
roo ko Palaw a Ibal a so den so inisogo aken rekano imanto, na lapisi niyo sa sominto.
5 Roo kano mbaal sa aparan a ator a pesepaatan sii ko Allah a Tohan iyo. Di niyo
pagosari so manga ator sa kasangkapan a potaw
6 Ka so aparan o Allah a Tohan iyo na disomala a aya on pagembaalan na so manga ator a
da panapili. Na sapaat kano ron sa petotongen a manga sapaat ko Allah a Tohan iyo.
7 Korban kano ron pen sa manga ayam pantag bo ko kanggiginawai, na kana niyo ai sa
kapekebabaya sii ko hadapan o Allah a Tohan iyo.
8 Na sii sangkoto a manga ator a lalapisan sa sominto na soraten iyo sa marinayag so
langon a manga katero angkai a kitab.”
9 Mandiyadi na so Mosa ago so manga imam a manga Libitiyo na pitero iran ko langon a
manga Israil a “Rerenek kano, hey manga Israil, na pamakineg kano! Imanto a gawii na
miyabaloy kano a manga pagtaw o Allah a Tohan iyo.
10 Kagiya ka maoto na paratiyayaa niyo so Allah a Tohan iyo na tomana niyo so manga
sogoan ago manga taritib a ipembegay aken rekano imanto.”
Manga Paninta a Pekalangkapen sii ko Palaw a Ibal
11 Sii den sangkoto a gawii na ininsaratan o Mosa so manga taw a tig iyan a
12 “Amay ka makaripag kano sa Yordan na giyangkai a manga mbatabataa na pekatindeg
ko Palaw a Girisim sa kapekalangkapa iran ko manga rakmat o Allah: so mbatabataa a
Simiyon, Libi, Yodah, Isakar, Yosop ago Baniyamin.
13 Na roo ko Palaw a Ibal na aya pekatindeg on sa kapekalangapa iran ko manga paninta
na: so mbatabataa a Robin, Gad, Asir, Sibolon, Dan ago Naptali.
14 Na so manga Libitiyo na mapetero iran sa matanog sii ko langon a Israil a:
15 “'Kemorkaan so taw a magembaal sa barahala a peteongen o di na towangen a

pekatindegen iyan sa masolen. Giyangkai a barahala a galebek o mapasang i kapenday na
piyakagowagowad ko Allah.’
“Na mapetero o langon a taw a ‘Amin!’
16 “‘Kemorkaan so taw a pekaitoon iyan so ama iyan o di na so ina iyan.’

“Na mapetero o langon a taw a ‘Amin!’
17 “‘Kemorkaan so taw a perangkireban iyan so temanaan o lopa o siringan iyan.’

Na mapetero o langon a taw a ‘Amin!’
18 “‘Kemorkaan so taw a pendadagen iyan so bota ko kapelalakaw niyan.’

19 “‘Kemorkaan so taw a perampasan iyan sa kabenar so mananangga, so ilo o di na so

balo.’
20 “Kemorkaan so mama a makipekeromai ko karoma o ama iyan ka giyoto i

kakediyampaa niyan ko ama iyan.’
21 “‘Kemorkaan so taw a makipekeromai ko apiya antonaa a binatang.’

22 “‘Kemorkaan so mama a makipekeromai ko babay niyan a pagari niyan sa ama o di na

babay niyan sa ina bo.’
23 “‘Kemorkaan so mama a makipekeromai ko panogangan iyan a babay.’
24 “‘Kemorkaan so taw a mbonoon iyan so ped a taw sa masolen.’

25 “‘Kemorkaan so taw a peterima sa tendan sa kambonoa niyan ko da a sala iyan.’

26 “‘Kemorkaan so taw a di makaaayon sa manga katero angkai a kitab sa kapetomana

niyan on.’
DOTIRONOMIYO 28
So Iperakmat ko Kaparatiyaya
“O paratiyayaa niyo so Allah a Tohan iyo ago piyapiyai niyo tomoman so langon a
sogoan iyan a ipembegay aken rekano sangkai a gawii na ipengkat kano niyan sa lebi
a maporo ko langon a nasiyon sa doniya.
2 Na so langon angkai a rakmat na kitemo ago ketatap rekano o paratiyayaa niyo so Allah
a Tohan iyo:
3 “Kerakmatan kano sii ko siti, na kerakmatan kano sii ko dii mbabasokan.
4 “Kerakmatan so pekebabadan rekano, so ipagonga o manga pamomolan ko lopa iyo ago

so di imbabawata o manga pangangayamen iyo a manga sapi, bilibili ago kambing.
5 “Kerakmatan so pereperan a pepanga raragon iyo ago so manga pangenengken a di on

dii mbaalan.
6 “Kerakmatan kano apiya anda kano pesong a melagid ko kapelalakaw niyo ago
kapembaling.
7 “Pekitaban rekano o Allah so manga ridoay niyo a makipetidawa rekano. Pegisaisa

siran ko kapesondoli ran rekano ogaid na pemalagoy siran a makapembelabelag sa pito
bagi.
8 “Penoon o Allah a pereperan so manga taliyong iyo, na perakmatan kano niyan ko

langon a di niyo dii nggalebeken roo ko inged a imbegay niyan rekano.
9 “O petomana niyo so manga sogoan o Allah a Tohan iyo ago pekedegen iyo so manga
lalan iyan na mbelowin kano niyan a soti a manga pagtaw niyan a giyoto so inisepa iyan
rekano.
10 Samaoto na keilay o langon a taw sa doniya a piyamili kano o Allah a rek iyan na
ikelek kano iran.
11 Na kitaralo a kapekapiyaa rekano o Allah sii ko inged a inisepa iyan ko manga apo iyo
a imbegay niyan rekano, ka mbegan kano niyan sa madakel a wata, madakel a
pangangayamen ago madakel a pereperan.
12 “Pelekaan o Allah so langit, a so katataliyongan ko manga kamapiyaan iyan, ka

pekioranan iyan so manga lopa iyo sii ko mosim iyan, na perakmatan iyan so langon a di
niyo dii nggalebeken. Makapemagotang kano ko madakel a ped a nasiyon, ogaid na di
kano kiran pekaotang.
13 O tagoa niyo sa ginawa so manga sogoan o Allah a Tohan iyo a ipembegay
aken rekano sangkai a gawii ago piyapiyaan iyo ai tomoman na mbelowin kano niyan a
keona a kena a ba keori, na kelalayon kano den mipoporo a kena a ba mibababa.
14 O ba kano silay sa kawanan diwang poon ko apiya antonaa sogoan a ipembegay aken
rekano imanto sa kasengora niyo ko salakaw a manga tohan sa kasimbaa niyo ron.
So manga Paninta ko di Kaperatiyaya
15 “Ogaid na o di niyo peratiyayaa so Allah a Tohan iyo ago di niyo piyapiyaan tomoman
so langon a sogoan ago manga taritib a ipembegay aken rekano imanto na so langon
angkai a paninta na kitana ago ketatap rekano:
16 “Kemorkaan kano sii ko siti ago sii ko dii mbabasokan.
17 “Kemorkaan so pepanga raragon iyo ago so manga pangenengken a di on dii mbaalan.
18 “Kemorkaan so pekebabadan rekano, so ipagonga o manga pamomolan ko lopa iyo

ago so di imbaba wata o manga sapi, manga bilibili ago manga kambing iyo.
19 “Kemorkaan kano apiya anda kano pesong a melagid ko kapelalakaw niyo ago
kapembaling.
20 “Tomparakan kano o Allah sa kamoralaan, kalilibog ago awid a akal ko langon a di

niyo dii nggalebeken taman sa tekaw den ago matarotop a kakebinasa niyo sabap ko
marata a pinggolaola niyo ko kiyatalikodi niyo ko Allah.
21 Pekagedamen kano o Allah sa manga paniyakit taman sa maiped kano niyan roo ko
inged a pesongowan iyo a ketangan iyo.
22 Siksaan kano o Allah sa kaperayor, panenggaw ago manga lebag, na itelingoma niyan
ko manga pereperan iyo so mayaw a ndo, taon, manga merat ago olabong, na ketatap
rekano angkai a manga kamoralaan taman sa mamatay kano.
23 Di den pekaoran so langit ko kaporoan iyo ka pembaloy a lagid o tombaga, na
pekategas so lopa ko kababaan iyo ka pembaloy a lagid o potaw.
24 Apiya o oran a imbegay o Allah ko lopa iyo na baden bayanek ago lopapek a
pekatanaan iyan rekano a poon sa langit taman sa mabinasa kano den.
25 “Pekitaban kano o Allah ko manga ridoay niyo. Pegisaisa kano ko kapesondoli niyo
kiran ogaid na pemalagoy kano a makapembelabelag sa pito bagi, na penga aalek so
langon a taw sa doniya amay ka mailay iran so miyasowa iyo.
26 So manga bangkay niyo na pegdasen o manga papanok ago manga iila a binatang na
da den a ba kiran mbogaw.
27 Siksaan kano o Allah sa manga lebag a datar o inisiksa iyan ko manga Imisiren, a
rakes o manga panido, manga ibol ago bogis a di den kepiya.
28 Siksaan kano niyan pen sa beteng, na piseken kano niyan ago pelibogen.
29 Pengapap kano ko kaooto a alongan a datar o bota a di pekailay ko pesongowan iyan.
Di kano den pekapiya i bobolos ko apiya antona onon a penggolaolaan iyo. Lalayon kano
sonsingen ago pemanekewan sa da den a ba rekano tebang.
30 “Mipenoksam ka ko babay ogaid na salakaw a mama a makapekeroma on. Pembalay

ka sa walay ogaid na di ngka den kebalingan. Pemola ka sa asinda a obas ogaid na di
ngka den kapenggonaan so onga niyan.
31 Kesombali so sapi i ka ko kapegilaya ngka on ogaid na di ka on pekakan. So kimar ka
na pagagaon reka na di reka den kikasoy. So bilibili ngka na imbegay ko manga ridoay
niyo a da den a ba reka tebang.
32 Ipemegay so manga wata iyo a manga mama ago manga babay ko manga rait. Oman
gawii na baden pendokawi so manga mata niyo sa kapepagalatawi niyo kiran na da a ba
niyo kiran kitabang.
33 So nasiyon a di niyo katawan na aya pengangan ko manga pereperan ko lopa iyo a
tanto niyo a pindokawan, na pekaregenan kano baden ago perasain ko tenday a
kaooyagoyag iyo.
34 Pekabeteng rekano so dii manggolaola a penga iilay niyo.
35 Pekagedamen o Allah so manga leb iyo ago manga ai sa malipedes a manga lebag a di
den kepiya a melangkap ko lawas iyo ipoon ko palad a ai niyo taman den sa poro o olo
niyo.
36 “Iteog kano o Allah a lagid mambo o dato iyo ko nasiyon a di niyo katawan aya pen o
ba so manga apo iyo, na roo kano pekasimba sa salakaw a manga tohan a so manga
barahala a kayo ago ator.
37 So kesowasowa iyo na ipememesa o langon a nasiyon a ron kano dendegen o Allah, na
pegongatongaten kano iran ago kowaan a kasablawan.
38 “Mala a kisaod iyo ogaid na maito bo a keragon iyo, ka pelenganen ai koman o manga
tarapan.
39 Pemamola kano sa manga asinda a obas na pagalimaan iyo ogaid na di niyo kerebas so
onga niyan aya pen o ba niyo mainom so arak a kembaalan on, ka pengangen o manga
oled so manga waged.
40 Melangkap ko dalem a inged iyo so manga kayo a olibi ogaid na di niyo den
kapenggonaan so lana niyan, ka baden penga rororo so manga onga niyan.
41 Pembabawata kano sa manga mama ago manga babay ogaid na penga ada siran rekano
ka penga bibiyag siran.
42 So langon a manga kayo niyo ago so manga pereperan ko dii mbabasokan na
mbinasaan o manga oled.
43 “So manga mananangga a kibabaling sii rekano na tanto siran a kiporo sii rekano,
ogaid na tanto kano a kibaba.
44 Pemagotang siran rekano ogaid na di kano kiran makapemagotang. Siran i pembaloy a
olo na sekano i pembaloy a ikog!
45 “O di niyo peratiyayaa so Allah a Tohan iyo sa katomana niyo ko manga sogoan iyan
ago manga taritib a inibegay niyan rekano na kitomparak rekano angkai langon a manga
kamoralaan, na keteden kano iran taman sa mabinasa kano.
46 Na mapenggolaola ini rekano a aya piyakamemesa a toos a ipegiktiyar iyo ago so
manga moriyataw niyo sa taman sa pakataman.
47 Apiya pen madakel a kamapiyaan a inibegay rekano o Allah a Tohan iyo na da niyo
panalagadi sa
kapekebabaya ago kapipiya a ginawa.
48 Sabap roo na kapenalagadan iyo so manga ridoay niyo a pekasondolen rekano o
Allah. Na keor kano ago kewaw, ketalandiyang ago kekorangan sa langon taman, na
senganan o Allah sa kokoong a potaw so manga lig iyo taman sa mabinasa kano niyan.
49 “Pekigobat kano o Allah ko nasiyon a mawatan rekano a poon ko kaposan a doniya a

seyab rekano a datar o garoda, a so nasiyon a so basa iran na di niyo kesabot,
50 A so masarangit a nasiyon a di iran pegadatan so manga lokes aya pen o ba iran
kapediin so manga wata.
51 Ken iran so manga pangangayamen iyo ago manga pamomolan ko lopa iyo taman sa
mamatay kano a ongos. Da den a ba iran rekano pelambaa a pereperan, bago a arak o di
na lana aya pen o ba nati o manga talon iyo a sapi, bilibili ago kambing taman sa
mabinasa kano iran.
52 Pelikopan iran so oman i siti niyo taman sa manga ooteng so manga poporo a kota a
iaalad on a sasarigan iyo. Pelikopan iran so oman i siti ko dalem a inged a inibegay
rekano o Allah.
53 “Sabap ko kareregeni rekano ko masa a kalilikopi rekano o manga ridoay niyo na ken
iyo apiya so sapo o manga wata iyo a manga mama ago manga babay a inibegay rekano o
Allah a Tohan iyo.
54-55 Apiya so mama a lebi rekano a baraadaten a tanto a taw na ken iyan so sapo o ped
ko manga wata iyan, ka da den a kelamba on a pangenengken sabap ko kareregeni ron sii
ko kalilikopi o manga ridoay niyo ko langon a siti niyo; na apiya so pagari niyan o di na
so pekebabayaan iyan a karoma niyan o di na so ped ko manga wata iyan na di niyan
ikepedi, ka da den a isa kiran bo a ba niyan begi ko apiya antonaa sapo o manga wata iyan
a peken iyan.
56 So mambo so babay sii rekano a bilang a taw ago barabangensaan a apiya so kisekoon
iyan ko palad a ai niyan ko bote na di niyan den penggolaolaan na peligetan iyan so
karoma niyan a pekebabayaan iyan ago so tito a wata iyan a mama o di na babay,
57 Ka ken iyan sa masolen so wata a gopen iyan inimbawata ago so inayanan iyan na di
niyan siran on mbegan ka da den a ped a ba niyan kekan sii ko kareregeni ron ko
kalilikopi o manga ridoay niyo ko manga siti.
58 “O di niyo piyapiyai tomoman langon angkai a sogoan a minisorat sangkai a kitab ago
di niyo ikelek angkai a kababantogan ago piyakalekelek a Ingaran o Allah a Tohan iyo
59 Na siksaan kano o Allah ago so kebabadan rekano sa piyakalekelek a manga
kamoralaan, a so maregen a manga kamoralaan a misasarta on so peninggas a manga
paniyakit a pegtey a tanto.
60 Itemo iyan rekano so langon a gedamen a inikalek iyo roo sa Misir, na kepet ai rekano
den.
61 Na itena iyan rekano pen so oman i pisosonan a paniyakit ago kamoralaan a da maaloy
sangkai a ribro a kitab taman sa mabinasa kano.
62 Na apiya pen lagid kano sa kadakel o manga bitoon sa langit na maito rekano bo a
kelamba sabap ko da niyo kaparatiyayaa ko Allah a Tohan iyo.
63 Lagid o inikabebaya gowani o Allah so kapepakapiyaa niyan ago kapepakandakela
niyan rekano na ikebabaya iyan mambo so kambinasaa niyan ago kapagilanga niyan
rekano, na kebadot kano ko lopa a pesongowan iyo sa katengana niyo ron.
64 “Isegomparak kano o Allah roo ko langon a nasiyon ko pirowarowangan o doniya; na

roo kano pekasimba ko salakaw a manga tohan, a so manga barahala a kayo ago ator a di
niyo katawan aya pen so manga apo iyo.
65 Roo sangkoto a manga nasiyon na da a kekadenan iyo ron a malilinding ago
lomilintad, na mbegan kano roo o Allah sa manga awid a akal, so kada a inam ago so
manga rata a ginawa.
66 Da a ketanaan o kapepaginetaw niyo; gagawii daondaw na penga aalek kano a di niyo
den ketangked so kaooyagoyag iyo.
67 Kepeno a kalek so manga poso iyo sabap ko dii manggolaola a pekeilay niyo. Igira a
miyapita na peteroon iyo a ‘O ba bo miyagagawii den!’ na igira a miyagagawii na
peteroon iyo a ‘O ba bo miyapita den!’
68 Pekakasowin kano o Allah roo sa Misir a mageeda kano ko manga kapal apiya pen
miyatero aken rekano a di kano roo den pekasong peroman; na roo niyo mapepasa so
manga ginawa niyo ko manga ridoay niyo a maoripen kano iran, ogaid na da den a ba
rekano pemasa.”
DOTIRONOMIYO 29
So Kapasadan a Inembaalan o Allah mipantag sa Israil sii sa Inged a Mowab
Giyai i manga rokon o kapasadan a inisogo o Allah ko Mosa a pagembaalan iyan

mipantag ko manga mbawataan o Israil sii sa inged a Mowab. Ipegoman ai ko kapasadan
a pimbaalan o Allah mipantag kiran roo ko Palaw a Sinay.
2 Tinimo o Mosa so langon o manga Israil na pitero iyan kiran a “Sekano den i
miyakailay ko langon a pinggolaola o Allah ko Piraon roo sa Misir ago sii ko langon a
sanasanaan iyan ago sii ko dalem a inged iyan.
3 Kiyamasaan iyo so piyakalekelek a manga tiyoba, manga nanao ago manga ala i
kabarakat a pinggolaola niyan.
4 Ogaid na taman den imanto na da kano den begi o Allah sa pamikiran a kisabot iyo o di
na manga mata a kiilay niyo o di na manga tangila a kineg iyo.
5‘Sii ko soled o pat polo ragon,’ a tig o Allah, ‘na inagak aken sekano sii ko disirto na da
den manga kikisi so manga nditaren iyo aya pen o ba miyanga bibinasa so manga tinilas
iyo.
6 Roo na da kano makakan sa paan aya pen o ba miyakainom sa arak o di na ped a mabisa
a panginginomen. Ogaid na bigan aken sekano sa ipekeoyag iyo kaan iyo katokawi a
saken so Allah a Tohan iyo.’
7 “Na isako makaoma kano sangkai a darpa na si Sihon a dato sa Hisbon ago si Og a dato
sa Basan na somiyampang rektano a makipetidawa, ogaid na tiyaban tano siran.
8 Inagaw tano so lopa iran na inibegay tano a mapekewali o manga mbatabataa a Robin,
Gad ago so sabaad ko mbatabataa a Manasih.
9 Kagiya ka maoto na tomana niyo piyapiya so manga rokon angkai a kapasadan kaan
kano makapiya i bobolos ko langon a di niyo dii nggolaolaan.
10 “Tomitindeg kano langon imanto ko kamamasaan o Allah a Tohan iyo, a so manga

olowan ko manga mbatabataa rekano, so manga pelokelokesen ago so manga sanasanaan
ago so langon a ped o manga Israil a manga mama
11 A rakes o manga wata iyo ago manga karoma niyo, ago so pen so manga mananangga
a kibabaling ko kampo niyo a aya dii nggogoray ko manga itagon iyo ago dii manageb sa
ig.
12 Sisii kano imanto kaan kano makasoled ko kapasadan o Allah a Tohan iyo a
pegembaalan iyan mipantag rekano sangkai a gawii a tiyangked iyan ko kiyasepa.
13 Ka tengkeden iyan sangkai a gawii a manga pagtaw kano niyan ago sekaniyan den i
Tohan iyo a giyoto so miyatero iyan rekano ago inisepa iyan ko manga apoapoan iyo a so
Ibrahim, Iskak ago so Yakob.
14-15 Kena a ba sekano bo a kititindeg sii imanto ko kamamasaan o Allah a Tohan tano i
papantagan iyan sangkai a kapasadan a inisepa iyan ka so mambo so kebabadan rektano a
kena a ba sisii imanto.
16 “Ketademan iyo so kiyapaginetaw tano roo sa Misir ago so kiyapakaokit tano ko

kalopaan o ped a manga nasiyon a inipanagad tano.
17 Miyailay niyo so piyakagowagowad a manga barhala iran a kayo, ator, pirak ago
bolawan.
18 Na pananggilai niyo o ba aden a mama o di na babay o di na pamiliya o di na mbata-
bataa sii rekano a ba makatalikod so poso iyan ko Allah a Tohan tano sa kasimbaa niyan
ko manga katohanan angkai a manga nasiyon; ka giyanan na lagid o bekaw sii rekano a
magto ago pekaonga sa mapait a towa.
19 Pananggilai niyo o ba aden a isa rekano a amay ka maneg iyan so manga katero angkai
a inisepa o Allah na ba niyan den pegakoli a ginawa niyan a peteroon iyan a ‘Tegompiya
ako apiya pen ipepaginetaw aken so baya a ginawa ko!’ Ka pekabinasa ini rekano langon
a manga pipiya ago manga rarata.
20 Di den perilaan o Allah angkoto a taw. Sokeyaw rekaniyan baden so rarangit ago so
kapanaod o Allah na kitana on so langon a paninta a minisorat sangkai a ribro, na
pepasen o Allah so ngaran angkoto a taw sii ko dalem a doniya.
21 Tendoon sekaniyan o Allah ko langon a mbatabataa sa Israil a kemorkaan o langon a
manga paninta o kapasadan a misosorat sangkai a ribro a Kitab.
22 “So pekatalingoma a manga apid a ndatar so kebabadan rekano ago so manga

mananangga a poon ko manga wawatan a darpa na keilay iran so manga kamoralaan ago
so manga paniyakit a inisiksa o Allah ko inged iyo.
23 Keilay iran a so langon a kalopaan on na miyatotong den a lalangkapen a sandawa ago
timos a da den a ba on mapemola ago da a ba on pegto a apiya so manga otan. Kelagid
oto o manga siti a Sodom ago Gomorah a rakes on a Admah ago Sibowim a piyaminasa o
Allah sii ko tanto a kapekerarangiti ron.
24 Na ipagise o langon o manga nasiyon a ‘Ino aya penggolaolaa o Allah sangkai a
inged? Antonaa i kiyasabapan sangkai a pesokeyaw a mala a rarangit iyan?’
25 “Na aya isembag kiran na ‘Sabap sa tiyalikodan angkoto a manga taw so kapasadan o
Allah a Tohan o manga apo iran a inembaalan iyan mipantag kiran isako miliyo niyan
siran sa Misir.
26 Somiyangor siran ko salakaw a manga tohan na miyanalagad siran on ago sominimba,
a so manga tohan a di iran katawan ago inisapar o Allah a kasimbaa iran on.
27 Sabap roo na mimborngat so gani o Allah sangkai a inged na piyakatana iyan on so
langon a paninta a minisorat sangkai a ribro.
28 Na sii ko minitaralo a kapekerarangiti ko Allah ago so di niyan dii kanggani na biyadot
iyan siran ko inged iran na initaog iyan siran ko ped a inged a ndodoo siran imanto.’
29 “Aden a manga pageemaan o Allah a Tohan tano a da niyan payaga, ogaid na piyayag
iyan rektano so manga sogoan sangkai a kitab kaan tano matoman ago so manga
moriyataw tano sa taman sa pakataman.”
DOTIRONOMIYO 30
Pangni sa Kakesoy ko Allah
“Inosay aken rekano den imanto angkai a manga rakmat ago manga paninta, na amay ka
minitana ini den langon sii rekano na ketanodan iyo angkai a pitero aken sii ko kandodoo
niyo ko manga inged a ron kano initaog o Allah a Tohan iyo.
2 Sa masa oto na o kasoy kano ago so manga wata iyo ko Allah a Tohan iyo sa iklas ko
poso iyo ago iklas ko niyawa niyo ago tomanen iyo so langon a sogoan iyan a ipembegay
aken rekano imanto
3 Na ipengalinggagaw kano o Allah a Tohan iyo na timoon kano niyan a poon ko langon
o manga inged a ron kano niyan minisagomparak, na mbelowin kano niyan peroman a
tetagompiya.
4 Apiya pen o minitaog kano den ko pinakamawatan a darpa ko doniya na timoon kano o
Allah a Tohan iyo na ikesoy kano niyan a poon roo,
5 Ka pagowiten kano niyan ko lopa a kiyabalingan gowani o manga apo iyo na ketangan
iyo peroman. Na pakapetegompiyaan ago pakapendakelen kano niyan a di so manga apo
iyo.
6 Sotin o Allah a Tohan iyo so manga poso iyo ago so poso o manga kebabadan rekano
kaan iyo sekaniyan kabebayai sa iklas ko poso iyo ago iklas ko niyawa niyo kaan kano
pekeoyagoyag.
7 Na itena o Allah a Tohan iyo angkai langon a manga paninta ko manga ridoay niyo a
pekegowad ago pepanatro rekano, na peratiyayaan iyo peroman so Allah a Tohan iyo na
tomanen iyo so langon o manga sogoan iyan a ipembegay aken rekano imanto.
9 Mbelowin kano o Allah a Tohan iyo a tanto a mapiya i bobolos sii ko langon a di niyo
dii nggolaolaan. Mbegan kano niyan sa madakel a wata ago manga pangangayamen ago
mala a pepanga raragon iyo; ka ikebabaya peroman o Allah so kapepakategompiyaa niyan
rekano a lagid mambo o kiyababayaan iyan mapakapetegompiya so manga apo iyo
10 Asar ka peparatiyayaan iyo so Allah a Tohan iyo ago petomanen iyo so manga sogoan
iyan ago manga taritib a minisorat sangkai a ribro a Kitab na o kasoy kano ko Allah a
Tohan iyo sa iklas ko poso iyo ago iklas ko niyawa niyo.
So Kapilia ko Kaoyagoyag o di na Kapatay
11 “Giyangkai a ipesogo aken rekano imanto na kena a ba tanto rekano a maregen o di na

mawatan.
12 Kena a ba ndodoo sa kasorgaan a disomala a ipagise iyo a ‘Antawaa i penik sa
kasorgaan a makawit on sii rektano kaan tano maneg ago matoman?’
13 Kena ini mambo a ba roo ko sabala a ragat a disomala a ipagise iyo a ‘Antawaa i
meripag sa ragat a makawit on sii rektano kaan tano maneg ago matoman?’
14 Ka tanto rekano a marani angkai a manga sogoan a sisii bo ko manga ngari iyo ago sii
ko pamikiran iyo kaan iyo matoman.
15 “Ilaya niyo man, ka piyalad aken rekano sangkai a gawii so kakepilia niyo ko
kamapiyaan ago kaoyagoyag, o di na so kamarataan ago kapapatay.
16 O nggolalanen iyo so ipesogo aken rekano imanto, a so kapekebabayai ko Allah a
Tohan iyo, so kapekedega ko manga lalan iyan ago so kapetomana ko manga sogoan,
manga taritib ago manga kokoman iyan, na keoyagoyag kano ago tanto a pendakel, na
perakmatan kano o Allah a Tohan iyo sii ko lopa a pesongowan iyo a ketangan iyo.
17 Ogaid na o tomalikod so manga poso iyo ago di kano peratiyaya ka ba kano den ma-
agak sa kapesimba ko salakaw a manga tohan ago so kapenalagadi ron
18 Na peyagen ko rekano sangkai a gawii a mataan den a kebinasa kano. Di ketey a
kapeginetaw niyo roo ko lopa ko sabala a Yordan a pesongowan iyo a mapekewali niyo.
19 Na pakapeseksiin ko so kasorgaan ago so doniya sa piyalad aken rekano den sangkai a
gawii so kapilia ko kaoyagoyag o di na so kapapatay, so rakmat o di na so paninta. Na,
pilia niyo so kaoyagoyag kaan kano pekeoyagoyag ago so manga wata iyo!
20 Kabebayai niyo so Allah a Tohan iyo ago paratiyayaa niyo, na kapeti niyo sebenar, ka
sekaniyan i kaoyagoyag iyo, na pekalendon iyan so kapeginetaw niyo sii ko lopa a
inisepa iyan a imbegay niyan ko manga apoapoan iyo a so Ibrahim, Iskak ago so Yakob."
DOTIRONOMIYO 31
Si Yosowa i Pekasambi ko Mosa
Tomiyaros den tero so Mosa ko manga Israil
2 A tig iyan a “Miyakamagatos ago dowa polo ragon a idad aken imanto na di ako rekano
den makapegolowan. Liyo ron pen na pitero raken o Allah a ‘Di ka pekaripag sa lawasaig
a Yordan.’
3 So den so Allah a Tohan iyo i pengonaan rekano ron romipag, na mbinasaan iyan
angkoto a manga nasiyon sii ko kapegantap iyo kiran na pagagaon iyo so lopa iran. Si
mambo si Yosowa na pengonaan rekano romipag a giyoto so pitero o Allah.
4 Na aya penggolaolaan o Allah sangkoto a manga nasiyon na datar o inikidia niyan ki
Sihon ago si Og a so manga dato o manga Amoriyo, isako binasaan iyan siran a rakes o
lopa iran.
5 Peladen siran rekano o Allah na nggolaolaa niyo kiran so langon a inisogo aken rekano.
6 Pakababager kano ago pakawawaraw! Di kano kelek aya pen o ba niyo siran kewanen,
ka so den so Allah a Tohan iyo i moonot rekano. Di kano niyan mbelagen aya pen o ba
niyan talikodi.”
7 Tiyawag o Mosa si Yosowa na pitero iyan on sii ko kamamasaan o langon o manga

Israil a “Pakababager ka ago pakawawaraw, ka seka i makapegolowan sangkai a manga
taw ko kasoled iran ko lopa a inisepa o Allah ko manga apo iran a imbegay niyan kiran,
na seka i pembagibagi kiran on sa kapekewaliya iran on.
8 So den so Allah i pepangonaan rekano, na keped sekaniyan rekano. Di ka niyan den
mbelagen aya pen o ba niyan talikodi. Di ka kelek aya pen o ba ka kadai sa akal.”
So Kabatiyaa ko Kitab
9 Inisorat o Mosa angkai a Kitab na piyalad iyan ko manga imam a manga Libitiyo a aya
pegawid ko Kaban sa Kapasadan o Allah ago sii ko langon a pelokelokesen sa Israil.
10 Na inisogo kiran o Mosa a “Sii ko kakepopos o oman pito ragon sii ko ragon a
kiperilaan ko manga otang sii ko masa a dii kaselaselaa ko Pista ko manga Lawig
11 Na batiyaa niyo angkai a Kitab ko kapekenega on o langon o manga Israil igira a di
siran dii timotimo ko kamamasaan o Allah a Tohan iyo roo ko darpa a piliin iyan a
pesimbaan on.
12 Timoa niyo langon so manga taw a manga mama, manga babay, manga wata ago so
manga mananangga a kibabaling sii ko manga inged iyo kaan iran ai mapakineg ago
masowa so kikaleken ko Allah a Tohan tano ago so katomana piyapiya ko langon a
sogoan sangkai a Kitab.
13 Nggolaolaa niyo ai kaan so manga wata iyo a di iran katawan angkai a Kitab na maneg
iran ago masowa iran so kipekeleken ko Allah a Tohan iyo taman ko kapepaginetaw niyo
sii ko lopa a keripag iyo a Yordan sa katengana niyo ron.”
So Moripori a manga Insarat o Allah ko Mosa
14 Pitero o Allah ko Mosa a “Magaan den makatalingoma so gawii a kapetay ngka.

Tawaga ngka si Yosowa na pangadap kano a dowa sii ko Barombarong a dii Telabokan
kaan aken sekaniyan kainsarati.” Na somiyong so Mosa ago si Yosowa ko Barombarong
na piyakaadap iran on a ginawa iran
15 Na mipeyag kiran so Allah sii ko mapopolaos a gabon a tomitindeg ko poro o gimowa
o Barombarong.
16 Na pitero o Allah ko Mosa a “Magaan ka den matay a kitapi ko manga apo o ka.
Maipos oto na magongkir angkanan a manga taw na pepoonan iran somimba so manga
katohanan o manga rait roo ko inged a pesongowan iran. Telikodan ako iran ago sogoken
iran so kapasadan a pimbaalan aken mipantag kiran.
17 Sa masa oto na pemborngat kiran so gani aken na telikodan aken siran; pegnaan ko
kiran a paras aken na kebinasa siran. Madakel a piyakalekelek a kamoralaan a itomparak
kiran, na ipagise iran sangkoto a masa a ‘Ba kena angkai a manga morala a
minitomparak rektano na sabap den sa kena a ba maaped rektano so Allah?’
18 Na mataan den a pegnaan ko kiran a paras aken sangkoto a masa sabap ko langon a
kamarataan a pinggolaola iran ko kiyapananangorana iran ko salakaw a manga tohan.
19 “Imanto na soraten ka angkai a bayok na go ngka pangendaon ko manga Israil; na

pakimbayoken ka kiran kaan ai mabaloy a peseksi sa kibenar kiran.
20 Pagowiten ko siran ko pekepakayan ago oodaren a lopa a inisepa aken a imbegay aken
ko manga apoapoan iran. Pengangan siran roo ago penga oosog ago penga oolitan, na
amay ka magiyoto na sengor siran ko salakaw a manga tohan ago simbaan iran, na
pesodiin ako iran ago sogoken iran so kapasadan aken.
21 Na amay ka mitomparak kiran so madakel a piyakalekelek a kamoralaan na giyangkai
a bayok na makapeseksi sa kibenar kiran, ka di ini kelipatan o manga wata iran. Ka apiya
imanto ko da ko kiran pen kawita ko inged a inisepa aken a imbegay aken kiran na
katawan aken o antonaa i maniniyat iran.”
22 Na sangkoto den a gawii na inisorat o Mosa angkai a bayok, na inipangendao niyan ko
manga Israil.
23 Samaoto na siyogo o Allah si Yosowa a wata i Non a tig iyan a “Pakababager ka ago
pakawawaraw, ka seka i pekawit ko manga Israil roo ko lopa a minisepa aken kiran, na
keped ako ngka.”
24 Inisorat o Mosa sii ko ribro so langon o manga katero angkai a Kitab a da den a ba
niyan on lipas.
25 Kagiya mapasad iyan ai na ininsaratan iyan so manga Libitiyo a aya pegawid ko Kaban
sa Kapasadan o Allah a tig iyan a
26 “Kowaa niyo angkai a ribro a Kitab na go niyo abain ko Kaban sa Kapasadan o Allah a
Tohan iyo kaan roo matago a aya peseksi sa kibenar ko manga pagtaw niyan.
27 Ka katawan aken so kasosopak iran ago so kategas i olo. Apiya imanto a oyagoyag
ako pen a ped ako iran na somiyopak siran ko Allah, na ay kakitaralo o kasosopak iran
amay ka matay ako!
28 Na pakapengadapa niyo raken so langon a manga olowan ago manga sanasanaan ko
manga mbatabataa rekano kaan aken matero angkai a manga lalag sii ko kapemakinega
iran on ago an aken mapakapeseksi so langit ago so lopa sa kibenar kiran.
29 Ka katawan aken a amay ka maipos so kapetay aken na pekekarata angkai a manga
taw, na keawaan iran so lalan a inisogo aken a kedegen iran; na sii ko pekatalingoma a
manga gawii na tomparakan siran sa kamoralaan, ka pakaperangiten iran so Allah ko
kapenggolaolaa iran sa marata ko kapekeilaya niyan on.”
So Bayok o Mosa
30 Na tiyontol o Mosa so manga katero angkai a bayok ipoon sa poonan na taman sa

kaposan sii ko kapepamakinega on o langon a malilimod a manga Israil:
DOTIRONOMIYO 32
“Lekai ngka a tangila ngka, hey langit, ka petero ako;
Pamakinega ngka, hey lopa, so manga katero o modol aken.
2 Keolog so manga ndao aken a datar o oran;
magetek so manga basa ko a lagid o namog,
ago lagid o tagitim sii ko pelolonaw a manga pamomolan,
ago lagid o tarintik sii ko paotanotan.
3 Pekalangkapen aken so Ingaran o Allah;
podiya niyo so kala o Tohan tano!
4 Sekaniyan i Lakongan; madidiyangka so manga galebek iyan,

na maontol so langon a okitokit iyan.
Tomotoman sekaniyan a Tohan a di den penggolaola sa ribat,
a maontol sekaniyan ago matito.
5 Ogaid na piyakakerata iyo a manga ginawa niyo;
kena den a ba kano mapapatot a kibilang a manga pagtaw niyan;
sekano a madodosa ago mabibibid a nasiyon!
6 Ba giyai i imbadal iyo ko Allah,
hey sekano a lalong a manga taw a da a manga akal iyan?
Ba kena a ba sekaniyan i ama iyo a miyaloy rekano a rek iyan,
a miyaden rekano ago miyakambeken?
7 “Tanodi niyo so miyanga oona a manga gawii,

pamimikirana niyo so miyanga iipos a manga masa.
Isei niyo so manga ama iyo makapantag sii, ka mapetero iran rekano;
Isei niyo so manga pelokelokesen ka mapegosay iran rekano.
8 Isako mbagibagiin o Lebi a Maporo ko manga nasiyon so lopa a mapekewali ran,
isako pakambelabelagen iyan so manga manosiya
na piyanendo iyan so manga temanaan o kakadenan iran
a mipepasod ko kadakel o manga ilangiten a kaaden.
9 Ogaid na so bagian o Allah na so manga pagtaw niyan;
so manga mbawataan o Yakob na aya niyan kawali.
10 “Miyatoon iyan siran roo ko disirto,

sii ko ilang a mitataog a kaden a pesemberan o ndo.
Lininding iyan siran ago tiyagikor;
siniyap iyan siran a datar o taw a mata niyan
11 A lagid o agila a pepangendao ko manga wata iyan ko kalayog
a pekeyaten iyan so manga papak iyan sa kapegalalanga niyan kiran,
a sii niyan siran pepekadaa ko manga apak iyan.
12 So bo so Allah i minggonanao ko manga pagtaw niyan;
da den a katohanan o manga rait a ba kiran miyaped.
13 “Piyakaketas iyan siran ko manga poporo a darpa ko doniya,

na piyakakan iyan siran ko pepamangeto ko manga pangomaan.
Piyageper iyan siran ko gola teneb a poon ko lakongan
ago so lana a poon ko batolakit a ator
14 a rakes o gatas ago mimbetik a gatas
a poon ko manga talon iran a sapi ago kambing
ago so manga kalemboan ko sapo o manga bilibili ago kambing.
Bigan iyan siran sa piyamagaraw a manga mandangan a poon sa Basan
ago so lebi a mapiya a trigo,
na ininom iyo so lebi a mapiya a bago a arak.
15 “Ogaid na kiyaolitan so manga Israil, na somiyopak siran;

mikeolit siran ago miyakalimegas a miyanga oosog sa pangenengken.
Tiyalikodan iran so Tohan a miyaden kiran,
na pisodi iran so Lakongan a somiyabet kiran.
16 Piyakapanaod iran so Allah ko kiyasimba iran sa manga katohanan o manga rait,
na piyakakerangit iran sekaniyan a nggolalan ko piyakasisingay a manga pinggolaola iran.
17 Pisoasoat iran so manga saitan a kena a ba so Tohan,
a so manga katohanan a da iran masimba gowani,
a so manga katohanan a gopen iran kiyatokawi
a da kaleken o manga apo iran.
18 Inindarainon iran so Lakongan a miyaloy kiran a manga wata iyan;
kiyalipatan iran so Tohan a migay kiran sa kaoyagoyag.
19 “Miyailay ai o Allah na tiyalikodan iyan siran

ka piyakakerangit sekaniyan o manga wata iyan a manga mama ago manga babay.
20 Na pitero iyan a ‘Pegnaan ko kiran a paras aken,
na ilain aken o antonaa i ketamanan kiran,
ka kagiya mabibibid siran a manga taw,
a so manga wata a kena a ba kasasanaan.
21 Piyakapanaod ako iran ko kiyasimba iran sa kena a ba Tohan;
piyakakerangit ako iran a nggolalan ko manga barahala iran.
Sabap roo na pakapenaoden aken siran a nggolalan ko manga taw a da aken mabaloy a
rek aken,
na pakaperangiten ko siran a nggolalan ko nasiyon a da a sabot iyan.
22 Miyakabiyag sa apoy so rarangit aken,
penotong ai taman ko pitidaleman ko darpa o miyamatay;
pelameden iyan so doniya ago so langon taman a matatago on,
na penotongen iyan so manga onayan o manga palaw.
23 Indakontor aken kiran so manga tiyoba,
pelenganen aken kiran mamana so manga gasa aken.
24 Kerakowag siran a ongos
na peserakalmaot siran sabap ko panenggaw ago piyakalekelek a manga paniyakit.
Pekisadayan aken siran ko manga iila a binatang,
na pakipenoka aken siran ko manga ala i bisa a nipay.
25 Pematay a pedang so kikatatagoon ko manga lalan,
na kalek a ipematay o siran oto a ndodoo ko soled o walay
a melagid so manga ngongoda a mama ago babay
ago so pen so manga wata ago so manga lokes.
26 Miyapamikir aken a isegomparak aken siran roo ko manga wawatan a darpa
taman sa mapapas so katatademi kiran o manga manosiya.
27 Ogaid na inikawan aken o ba baden di kasaboti o manga ridoay iran so kiyasabapan ko
miyanggolaola
na o ba siran baden makatekabor a mapetero iran a
“So kapaar tano i miyakadaag!
Kena a ba so Allah i minggolaola sii langon!”’
28 “Giya Israil na di pekimosawir a nasiyon ago di pekasabot.

29 O ba siran bo maongangen a kesabotan iran so kiyatabana kiran!
O ba iran bo ketago sa ginawa so keposan kiran!
30 Ino pekataban so sasakataw ko sanggibo kiran,
na ino mapekapalagoy o dowa kataw so sapolo kiran nggibo
o da siran kaawai o Lakongan iran;
o da siran sangkopen o Allah?
31 Ka katawan o manga ridoay tano a so lakongan iran
na kena a ba datar sa kapaar o Lakongan tano.
32 Lagid siran o waged a obas a aya poonan iyan
na so waged a miyapamola sii ko dii mbabasokan sa Sodom ago giya Gomorah.
So manga obas iran na mapait a towa
33 Na so arak a pepekapoon on
na tanto a pakatowa a lagid sa bisa o manga nipay.
34'Ba aken ai langon di tatanodi?' a tig o Allah,
ka matatago ini sii ko taliyong aken.
35 Rek aken so kasaop, na ndenegen aken so siran oto a mapapatot on.
Di ketey na kidolas so ai iran;
marani den so gawii a kakemoralai kiran
na magaan so magaan a kapepekatalingoma ini.
36 “Ka iseop o Allah so manga pagtaw niyan

na ikepedi iyan so manga oripen iyan
amay ka mailay niyan a miyada so bager iran
a da a ba miyalamba a maooripen o di na kena a ba oripen.
37 Ogaid na ipagise kiran daan o Allah a ‘Anda den so manga tohan iyo,
a so lakongan a inapasan iyo,
38 a so manga tohan a komiyan ko kalemboan ko manga ayam a pikorban iyo ron
ago minimon sa arak a inisapaat iyo ron?
Makagemaw siran baden a makaogop rekano
a ba siran den mabaloy a makalinding rekano!
39 “‘Kilalaa niyo imanto a saken den i benar a Tohan a da a rimbang aken.

Saken i pepekapatay ago saken i pepangoyag;
pepekapali ako ago pepamolong;
da a ba pekaagaw a poon ko kapaar aken.
40 Imbayaw aken a lima ko tampar sa langit na isepa aken a
"Mataan ko kaoyagoyag aken sa taman sa pakataman
41 A amay ka garangen aken so pekindat a pedang aken
a pagosaren aken ko kapendadaneg
na seopan ko so manga ridoay aken;
mbadalan ko so pepanga gogowad raken.
42 Pekainomen aken sa rogo so manga gasa aken,
na pekalamed so pedang aken sa sapo
a rakes o rogo o siran oto a piyamono ago so miyanga bibiyag,
ago so manga olo o manga olowan o ridoay."’
43 “Kabebaya kano, hey manga nasiyon, a rakes o manga pagtaw o Allah,

ka iseop iyan so kiyapamonoa ko manga oripen iyan;
seopan iyan so manga soranga iyan,
na iperila iyan so dosa o manga pagtaw niyan
ago sotin iyan so lopa iran.”
44 Na so Mosa ago si Yosowa a wata i Non na tiyontol iran so langon a katero angkai a
bayok ko kapepamakinega on o manga Israil.
So Moripori a manga Insarat o Mosa
45 Kagiya mapasad tero o Mosa so langon angkai a manga ndao o Allah ko langon o
manga Israil
46 Na pitero iyan kiran a “Pamolaa niyo ko manga poso iyo so langon angkai a sogoan a
inibegay aken rekano sangkai a gawii. Na sogoon ka ko manga wata iyo a piyapiyai ran
tomoman so langon a katero angkai a Kitab.
47 Kena ini a ba da a bali niyan rekano a manga insarat, ka aya niyo kaoyagoyag; na
sabap ko kapetomana niyo ron na pekalendo so omor iyo roo ko lopa a ketangan iyo sa
ripag a Yordan.”
So Kapetay o Mosa ko Palaw a Nibo
48 Sii den sangkoto a gawii na pitero o Allah ko Mosa a

49 “Takedeg ka ko kapalawan a Abarim taman ko Palaw a Nibo a sii matatago sa Mowab
a pantag o siti a Yariko, na langkawa ngka so lopa a Kanaan a imbegay aken ko manga
Israil a mapekewali ran.
50 Na roo ka petay sangkoto a palaw a tekedegen ka, na kitapi ka ko manga apo o ka a
datar o pagari ngka a so Aron a miyatay roo sa Palaw a Hor a minitapi mambo ko manga
apo iyan,
51 Ka kagiya sekano a dowa na da ako niyo paratiyayaa sii ko kamamasaan o manga
Israil sii ko ig sa Miribah a marani sa Kadis sii ko disirto a Sin, ka da niyo roo pagadati so
kasosoti aken ko kamamasaan o manga Israil.
52 Sabap roo na kelangkaw ngka baden so lopa sa mawatan, ogaid na di ka pekasoled
sangkoto a inged a imbegay aken ko manga Israil.”
DOTIRONOMIYO 33
Inipangangarapan o Mosa so manga Mbatabataa a Israil
Sa da pen kapatay o Mosa a aya miyapili o Allah na piyayag iyan ko manga Israil so
manga rakmat a imbegay kiran o Allah.
2 Aya pitero iyan na:
“Somiyong sii so Allah a poon sa Palaw a Sinay;

somibang sekaniyan a lagid o alongan sii sa Idomiya;
poon sa Palaw a Paran na somininar sekaniyan ko manga taw niyan.
Miyakaoma sekaniyan a oonotan o bariboribo a manga malaikat
a aden a pesokeyaw a apoy a sisii sa kawanan iyan.
3 Matamataan a pekebabayaan o Allah so manga pagtaw niyan;
lilindingen iyan so langon a manga kaom iyan.
Pepamanodiyod siran ko hadapan o manga ai niyan
a peterima sa manga insarat iyan
4 A so Kitab a inibegay rektano o Mosa
a aya kawali o manga mbawataan o Yakob.
5 So Allah na aya dato o manga Israil
isako malilimod so manga olowan o manga taw ago so manga mbatabataa a Israil.”
6 Na aya pitero o Mosa makapantag ko mbatabataa a Robin na

“Pengnin ko a makapegoyag so Robin a di petay
aya pen o ba makaito so manga moriyataw niyan.”
7 Makapantag ko mbatabataa a Yodah na aya pitero o Mosa a

“Pakinega ngka, ya Allah, so pangni o Yodah;
tapiin ka siran ko ped a manga mbatabataa.
Pakabagera ngka siran sa kipetindegen iran ko kabenar iran
na tabangi ngka siran makataban ko manga ridoay iran!”
8 Makapantag ko mbatabataa a Libi na pitero o Mosa a

“So Tomim ago so Orim a pegosaren sa kaketokawi ko kabaya a ka, ya Allah,
na inibegay ngka ko mapaparatiyaya a manga oripen ka a manga Libitiyo.
Tipengan ka siran roo sa Masah,
na pimbongetan ka siran roo ko ig sa Miribah.
9 Da iran tagoa sa ginawa so manga lokes iran,
ago da iran pagongowi so manga pagari ran
aya pen o ba iran piyangarga so tito a manga wata iran,
ka ininggolalan iran baden so manga sogoan ka,
na da iran sogoka so kapasadan ka.
10 Ipengendao iran so manga kokoman ka ko manga mbawataan o Yakob
ago so kitab ka ko manga Israil;
Sepaat siran sa doka ko kamamasaan ka,
ago so petotongen a manga soasoat sii ko aparan ka.
11 Rakmati ngka, ya Allah, so langon taman iran,
na tarimaa ngka so manga galebek iran.
Sasaa ngka so siran oto a romirido ago pepanga gogowad kiran
kaan siran di den makapembangon.”
12 Makapantag ko mbatabataa a Baniyamin na pitero o Mosa a

“So pekebabayaan o Allah na pekakaden a da a pekakaid on sii ko obay niyan.
Pelindingen siran o Allah ko mababasa alongan,
na sii sekaniyan mababaling ko pageletan o manga waga iran.”
13 Makapantag ko mbatabataa a Yosop na pitero o Mosa a

“Pengnin ko a karakmatan o Allah so lopa iran
sa mala i kipantag a oran ago namog a poon ko langit
ago so manga ig a matatago ko didalem o lopa
14 Ago so lebi a manga pipiya a onga a pepakatoon o alongan
ago so manga pipiya a pekeaden iyan on ko oman saolan,
15 A karakmatan pen so lopa iran sa tindos a manga pereperan
sii ko miyatey den a manga kapalawan
ago so mala i arga a pepanga raragon sii ko dayon sa dayon a manga bobongan
16 Ago so lebi a manga pipiya a pamemegayan o lopa
ago so langon taman a matatago on,
ago so limo o Allah a mitero a poon ko look o pekedeg a kayo.
Pengnin ko a makatana angkai a manga rakmat ko olo o Yosop,
sii ko beneng o mama a aya olowan ko manga pagari niyan.
17 Mabager sekaniyan a lagid o mangoda a mama a sapi,
na so manga panga niyan na lagid o panga o maila a todo
a aya niyan kisidong ko manga nasiyon taman ko pirowarowangan o doniya;
na so manga panga niyan na so bariboribo a manga taw sa Ipraim
ago so nggibonggibo a manga taw sa Manasih.”
18 Makapantag ko mbatabataa a Sibolon ago si Isakar na pitero o Mosa a

“Kabebaya ka baden, hey Sibolon, sii ko di ngka dii kapelayalayag,
ago seka mambo, Isakar, san ko manga barombarong ka!
19 Penawagen iran so manga taw sa kasong iran ko palaw
a ron siran sepaat sa patot a manga soasoat,
ka kowaan iran so madakel a tamok a poon ko peragatan,
ago so manga kakawasaan a igagadong sii ko disirto.”
20 Makapantag ko mbatabataa a Gad na aya pitero o Mosa na
“Podin so Allah a pepekaolad ko lopa a masesakop o Gad!
Magaayan so Gad a lagid o arimaw
sa kapekanga niyan ko barokan o di na olo o kesikem iyan.
21 Inipili iran a ginawa iran sa lebi a mapiya a lopa,
ka inisenggay kiran so bagian a olowan,
Igira a pekelimod so manga olowan o manga taw
na ininggolalan iran so maontol a kabaya o Allah
ago tiyoman iran so manga kokoman iyan mipantag ko Israil.”
22 Makapantag ko mbatabataa a Dan na aya pitero o Mosa na

“So Dan na mangoda a arimaw;
peseday sekaniyan a poon sa Basan.”
23 Makapantag ko mbatabataa a Naptali na pitero o Mosa a

“Tanto kano a pekesoat o limo o Allah
ago mapepeno pen a manga rakmat iyan.
Ketangan iyo so lopa sa tampar sa sedepan ago sa pagabagatan.”
24 Makapantag ko mbatabataa a Asir na aya pitero o Mosa na

“Lebi a rarakmatan so Asir a di so ped a manga mbatabataa;
pengnin ko a ikabebaya sekaniyan o manga pagari niyan,
ago isindot iyan so ai niyan ko lana.
25 So manga tanggal o manga pintoan ka na kembaalan a potaw ago tombaga,
na mabager ka den ko tenday a omor ka.”
26 “Da den a ba datar o Tohan ka, hey manga Israil

a peketas sa langit sa katebangi niyan rekano,
a meeda ko manga gabon sii ko bantogan iyan!
27 So da a poonan iyan ago da a kaposan iyan a Tohan
na aya niyo pekeapasan,
na sasalapidaon kano o da a kaposan iyan a manga barokan iyan.
Piyamogaw niyan so manga ridoay niyo sii ko kapegantap iyo kiran
a pitero iyan a ‘Binasaa niyo siran!’
28 Peginetaw so manga Israil sa da a ba kiran pekabinasa a mawatan ko kamarataan;
pekakaden so manga mbawataan o Yakob
ko lopa a mapepeno a pereperan ago bago a arak
a ron pegetek so namog a poon sa langit.
29 Tanto ka a mapipiya i ginawa, hey Israil!
Antawaa i datar iyo, hey manga taw a siyabet o Allah?
Sekaniyan i kelong iyo ago salinggogopa
ago kababantogan a pedang iyo.
Pekakipes so manga ridoay niyo ko hadapan ka,
na ndapodapoan iyo so manga likod iran.”
DOTIRONOMIYO 34
So Kiyapatay o Mosa
Ipoon ko kapantaran sa Mowab na tomiyakedeg so Mosa ko Palaw a Nibo taman ko poro-

poro o Palaw a Pisgah ko masesebangan a Yariko, na piyakiilay rekaniyan o Allah so
langon o lopa ipoon sa Giliyad na taman den sa Dan
2 Ago so dalem a lopa o Naptali, so lopa o Ipraim ago Manasih ago so langon o lopa o
Yodah taman den ko Ragat a Miditiraniyo roo sa sedepan
3 Ago giya Nigib a lopa sa pagabagatan a Yodah, ago so kapantaran a Yariko a so siti o
manga kayo a korma na taman den sa Sowar.
4 Na pitero rekaniyan o Allah a “Giyai so lopa a inisepa aken ko Ibrahim, Iskak ago so
Yakob a imbegay aken ko manga moriyataw iran. Piyakiilay aken reka den, ogaid na di
ka on pekasong.”
5 Na miyatay so Mosa a so oripen o Allah sa inged a Mowab a giyoto den so miyatero o

Allah.
6 Inilebeng sekaniyan o Allah roo ko balintad sii sa inged a Mowab ko mipepantag o siti
a Bit. Ogaid na apiya taman imanto na da den a ba matao o anda matatago so lebeng
iyan.
7 Miyakamagatos ago dowa polo ragon a idad o Mosa isako matay, na da makalobay so
kailay o manga mata niyan aya pen o ba kiyadai sa bager so lawas iyan.
8 So manga Israil na pindiyagaan iran so Mosa ko miyakatelo polo gawii sii ko
kapantaran sa Mowab taman sa miyapopos den so manga gawii a dii kandidiyagaw ago
kamboko.
9 Si Yosowa a wata i Non na mapepeno a ongangen a poon ko Roh o Allah ka kagiya

kiyadapenetan sekaniyan o Mosa isako mitoro iyan a pekasambi on.
Kagiya ka maoto na pepekinegen sekaniyan o manga Israil a petomanen iran so manga
sogoan a inibegay kiran o Allah a nggolalan ko Mosa.
10 Ipoon roo na da den a nabi a miyakagemaw sii sa Israil a ba datar o Mosa a

minimbitiyarai o Allah a makapageedapa siran.
11 Da a ped a nabi a ba miyakanggolaola sa manga nanao ago mala i kabarakat a galebek
a datar o inisogo on o Allah a penggolaolaan iyan sa Misir sii ko Piraon ago so langon a
manga sanasanaan iyan ago sii ko dalem a inged iyan.
12 Da a ba datar o Mosa a mala i kapaar ko langon a mala ago piyakalekelek a
pinggolaola niyan sii ko kamamasai ron o langon a manga Israil.
YOSOWA
YOSOWA 1
So Sogoan o Allah ki Yosowa
Sii ko oriyan o kiyapatay o Mosa a so oripen o Allah na miyakimbitiyarai so Allah ko
salinggogopa o Mosa a si Yosowa a wata i Non
2 A tig iyan a “Miyatay so Mosa a oripen
aken. Na paninimo kano imanto a seka ago so langon angkai a Israil na ripag kano ko
Lawasaig a Yordan sa kasoled iyo ko lopa a imbegay aken kiran.
3 Minitopa ko ko Mosa a so oman i darpa a kedapoan iyo na imbegay aken rekano
4 Ipoon ko disirto sa pagabagatan taman sa Libanon sii sa pagotaraan, na ipoon sa mala a
Lawasaig a Yopratis sii sa sebangan na taman den ko Ragat a Miditiraniyo sii sa sedepan
a rakes on so dalem a inged o manga Hitiyo.
5 Da den a ba makapemayandeg ko hadapan ka, Yosowa, sii ko tenday o kaooyagooyag
ka. Datar o kaaped aken ko Mosa na keped ako reka mambo. Di aken seka den mbelagen
aya pen o ba ko seka talikodi.
6 “Pakababager ka ago kekawaraw, ka seka i makapegolowan sangkai a manga taw sa

kapekewaliya iran ko lopa a inisepa aken ko manga apoapoan iran a imbegay aken kiran.
7 Pakababager ka ago tanto a kekawaraw! Nggolalanen ka piyapiya so langon o kitab a
inibegay reka o Mosa a oripen aken. O ba ka on silay sii sa kawanan o di na sa diwang
kaan ka makapiya i bobolos apiya anda ka song.
8 Di ngka pendarainonen so kapepangadii ngka sangkai a ribro a kitab; pepamimikirana
ngka ini sa gagawii daondaw kaan ka minggolalan piyapiya so langon taman a misosorat
on. Amay ka magiyoto na petegompiya so kapepaginetaw ngka na pepakapiya ka i
bobolos.
9 Ba ko reka da sogoon a ‘Pakababager ka ago kekawaraw’? Di ka kelek aya pen o ba ka
kadai sa akal, ka so Allah a Tohan ka na keped reka apiya anda ka song.”
Ininsaratan i Yosowa so manga Israil
10 Mandiyadi na ininsaratan i Yosowa so manga olowan o manga taw a tig iyan a

11 “Pagenebeneba niyo so kampo na teroa niyo ko manga taw a ‘Tiyagar kano sa manga
pelotoon iyo, ka amay ka makatelo gawii na pemakaripag kano ko Lawasaig a Yordan sa
kasoledi niyo ago katengana ko lopa a imbegay rekano o Allah a Tohan iyo a mapekewali
niyo.’ ”
12 Ogaid na so peman so mbatabataa Robin, so mbatabataa Gad ago so sabaad ko

mbatabataa Manasih na pitero kiran i Yosowa a
13 “Tatanodi niyo so pitero rekano o Mosa a oripen o Allah a ‘Inibegay rekano o Allah a
Tohan iyo angkai a lopa sii sa sebangan a Yordan a aya niyo kebalingan.
14 So manga karoma niyo ago manga wata ago so manga pangangayamen iyo na
makapetelimbegak sii sangkai a lopa a inibegay rekano o Mosa. Ogaid na so langon a
manga sondaro niyo na disomala a ripag siran a kikagogomaanan ko maoonaan o manga
pagari niyo kaan iran siran katabangi
15 Taman sa matangan iran mambo so lopa a imbegay kiran o Allah a Tohan iyo ago
mapakabaling siran roo a lomilintad a datar o inikidia niyan rekano. Oriyan oto na
pekakasoy kano den a makapeginged sangkai a lopa ko masesebangan a Yordan a
inibegay rekano o Mosa a oripen o Allah.”
16 Na somimbag siran ki Yosowa a tig iran a “Ipenggolalan ami so langon taman a
inisogo o ka rekami, na song kami ko apiya anda kami ngka pekasongowa.
17 Peratiyayaan ami seka a datar o kiyaparatiyayaa mi ko Mosa. Na pengnin ami na
maped reka so Allah a datar o kiyaped iyan ko Mosa.
18 Apiya antawaa i somopak ko peteroon ka a di niyan inggolalan so langon taman a
isogo o ka na mbonoon. Na, pakababager ka baden ago kekawaraw!
YOSOWA 2
Piyakipanoriman i Yosowa a Yariko
Samaoto na somiyogo si Yosowa sa dowa kataw a mama a poon ko kampo iran sii sa
Akasiya sa kapakapanoriman iran sa masolen a tig iyan a “Lalakaw kano na go niyo
pangilaya so lopa ko sabala a lawasaig a Yordan a ba di labaw ron so siti a Yariko.” Na
lomiyalakaw siran den na miyakaoma ko walay o isa a sondal a aya ngaran iyan na si
Rahab na miyolos siran roo.
2 Na miyatero ko dato sa Yariko a “Hey dato, aden a manga mama a poon ko manga
Israil a miyakaoma sii imanto a kagagawii sa kaperiksaa iran sangkai a inged tano!”
3 Na piyakiwit o dato angkai a katero ki Rahab a “Peliliyon ka so manga mama a
miyakaoma reka a miyolos ko walay ngka, ka aya inisong iran sii na periksaan iran so
dalem a inged.”
4 Ogaid na initapok o babay so dowa kataw a mama, na inisembag iyan a “Benar a aden a
miyakaoma raken a manga mama, ogaid na di aken katawan o anda siran poon.
5 Kagiya merimon ko oras a kapelekebi ko pintoan o siti na lominiyo siran na di aken
katawan o anda siran miyantap. Na, talokoni niyo nggagaan ka baanda niyo peraota!”
6(Ogaid na inipanik siran den i Rahab roo ko atep o walay ka piyagna iyan sii ko didalem
a ragami a kiyayar iyan roo.)
7 Mandiyadi na gomiyanat so manga siyogo o dato sa kapengilobaa iran ko manga
manonoriman sii ko lalan a ipesong ko kilid o lawasaig a Yordan; na so den so kiyaipos
iran na likeban so pintoan o siti.
8 Sii ko da pen kapakatorog o manga manonoriman ko kagagawii na miyanik kiran si

Rahab ko atep ka makipembitiyarai kiran.
9 “Katawan aken a inibegay rekano o Allah angkai a lopa,” a tig iyan, “na riyaot kami o
mala a kalek rekano, na so langon a kibabaling ko inged na pepananabaden sabap rekano.
10 Miyaneg ami o andamanaya i kiyapakamarai o Allah ko Mariga a Ragat isako
makaliyo kano sa Misir. Miyaneg ami pen so inikidia niyo ki Sihon ago si Og a so dowa
a manga dato o manga Amoriyo roo sa sebangan a Yordan a bininasa niyo sa tarotop.
11 Na so den so kiyanega mi sii na miyateno sa kalek so manga poso ami na kiyadaan
kami langon sa kawaraw sabap rekano, ka so Allah a Tohan iyo na aya Tohan sii sa
kasorgaan ago sii sa doniya.
12 Kapedipedi kano bo na sepaan iyo raken imanto sii ko Ingaran o Allah a sabap sa
inikalimo aken sekano na ikelimo iyo mambo so pamiliya ko. Begi ako niyo sa kasarigan
13 Sa pakapagoyagen iyo so ama ago so ina aken, so manga pagari aken a manga mama
ago manga babay, ago so langon a manga pamiliya iran! Pakalidasa kami niyo ko
kapatay!”
14 Na pitero on o manga mama a “So niyawa mi na ipelinding ami ko niyawa niyo! O di

ngka peyaga angkai a di ami dii nggolaolaan sii na pepiyapiyaan ami sekano ago
ipeginontolan amay ka ibegay rekami o Allah angkai a lopa.”
15 Mandiyadi na piyamakateyoton iyan siran ko tali sii ko dirowasa, ka so walay i Rahab

na maoonay ko keleb a mililibet ko siti.
16 “Agaw kano ko kapalawan,” a tig iyan kiran, “ka o ba kano baden matoon o manga
siyogo o dato a di rekano dii mbanog. Pagna kano roo sa mamakatelo gawii taman sa
makakasoy siran, na go kano bo taros ko lalakaw niyo.”
17 Na pitero on o manga mama a “Aya bo a kakitomanen ami sangkai a sapa a piyakisepa

ka rekami
18 Amay ka soled kami sangkai a inged na o miiket ka angkai a mariga a tali a mabitin
sangkai a dirowasa a tiyayotonan ka rekami. Pakasosoleden ka mambo ko walay ngka so
ama ago so ina a ka, so manga pagari ngka ago so langon o pamiliya o ama a ka.
19 O aden a lominiyo ko walay ngka a sisii sekaniyan ko lalan na sekaniyan i kilalag ko
kapetay niyan a kena ini a ba rekami kisala. Na so peman so apiya antawaa i
makasosoled ko walay a ped ka na sekami i matao ko kapetay niyan o aden a pekabono
on.
20 Ogaid na o panotola ngka ko apiya antawaa so di ami dii nggolaolaan na kepokas kami
ko piyakisepa a ka rekami.”
21 “So pitero iyo i mipenggolalan,” a tig o babay, na piyakalalakaw niyan siran den.
Kagiya maipos siran na iniiket iyan so mariga a tali ko dirowasa.
22 Somiyong so manga mama ko kapalawan na mitepok siran roo. So manga siyogo o

dato na pimbabanog iran siran ko soled o miyakatelo gawii ko dalem angkoto a darpa
ogaid na da iran matoon, na komiyasoy siran sa Yariko.
23 Oriyan iyan na tomiyondagay so dowa kataw a manonoriman ko kapalawan na
rominipag siran ko lawasaig ka komiyasoy ki Yosowa. Piyanotol iran on so langon taman
a miyanggolaola iran
24 Na pitero iran on pen a “Mataan den a piyalad rektano o Allah so dalem angkoto a
inged, ka so langon a kibabaling on na tanto a pepanga alek sabap rektano.”
YOSOWA 3
So Kiyaripag sa Yordan
Teked a kapipita na mimbowat si Yosowa ago so langon o manga Israil na gomiyanat

siran sa Akasiya sa kasong iran ko kilid o Lawasaig a Yordan, na mikempo siran roo ko
da iran pen karipag.
2 Kagiya mapopos so telo gawii na miyagenebeneb so manga olowan ko kampo
3 Na ininsaratan iran so manga taw a tig iran a “Anda den i kailaya niyo ko Kaban sa
Kapasadan o Allah a Tohan iyo a aawidan o manga imam a manga Libitiyo na ganat kano
poon ko katatagoan rekano na go niyo tondoga.
4 Giyanan i kaketokawi niyo o anda kano pagokit ka kagiya da kano sii pen makasong.
Ogaid na di kano pegobay ko Kaban; aawata niyo baden sa manga isa ka kilomitro.”
5 Na pitero i Yosowa ko manga taw a “Sotiya niyo a manga ginawa niyo, ka mapita na
penggolaola so Allah sa manga piyakamemesa sii rekano.”
6 Kagiya mapita na pitero i Yosowa ko manga imam a “Awidi niyo so Kaban sa

Kapasadan na go kano den lalakaw ko maoonaan o manga taw.” Na inawidan iran na
lomiyalakaw siran a pepangonaan ko manga taw.
7 Na pitero o Allah ki Yosowa a “Sangkai a gawii na pagepoonan aken a kipengkaten

aken reka ko kapekeilaya reka o langon o manga Israil kaan iran katokawi a ped ako
reka a datar o kiyaped aken ko Mosa.
8 Teroa ngka ko manga imam a pegawid ko Kaban sa Kapasadan a ‘Amay ka makaoma
kano ko kilid o lawasaig a Yordan na lakad kano den ko ig na tareg kano a marani bo ko
kilid iyan.’
9 Na pitero i Yosowa ko manga Israil a “Song kano sii na go niyo pamakinega so

peteroon o Allah a Tohan iyo.
10 Ketangked iyo a mbogaon iyan so manga Kanaaniyo, manga Hitiyo, manga Hibiyo,
manga Pirisiyo, manga Girgasiyo, manga Amoriyo ago so manga Hibosiyo sii ko
kapegantap iyo kiran na ketokawan iyo a maaped rekano so Oyagoyag a Tohan
11 Amay ka mailay niyo so Kaban sa Kapasadan o Kadnan o dalem a doniya a
pepangonaan rekano somong sii sa Yordan!
12 Na pamili kano imanto sa sapolo ago dowa kataw a mama a sesakataw ko oman i
mbatabataa manga Israil.
13 So den so kandapo o manga imam a pegawid ko Kaban o Allah a so Kadnan o dalem
a doniya sii ko lawasaig a Yordan na tereg tomoga so ig a pepakapoon sa raya, na
pepondo ini ko isa a darpa."
14 Mandiyadi na kagiya gomanat so manga taw poon ko kampo sa kaperipag iran sa

Yordan na pepangonaan kiran so manga imam a pegawid ko Kaban sa Kapasadan.
15 Ragonan oto a kaperagon na dii mbagiyaw a Yordan. Ogaid na so den so kiniseko o
manga ai o manga imam ko ig sii ko kilid o lawasaig
16 Na tomiyareg tomoga so ig na mipondo sa mawatan sa raya sii sa Adam a so siti a
marani sa Saritan. Na so ig a pegondas sa lilod ko Maatay a Ragat na tarotop a kiyada
iyan, na rominipag so manga taw ko lawasaig ko pantag o siti a Yariko.
17 So manga imam a pegawid ko Kaban sa Kapasadan o Allah na tomiyareg lomalakaw
ko look a Yordan na tomitindeg siran roo sii ko mamara a lopa taman sa miyamanagad
kiran so langon o manga Israil, na palaya siran den miyakaripag sa Yordan sii ko mamara
a lopa.
YOSOWA 4
So manga Ator a Ipenanadem
Sii ko kiyapakaripag o langon o manga taw sa Yordan na pitero o Allah ki Yosowa a

2 “Pamili ka sa sapolo ago dowa kataw a manga mama a sesakataw ko oman i mbatabataa
3 Na teroa ngka kiran a ‘Kowa kano sa sapolo ago dowa a manga ator sii ko titindegan o
manga imam ko look a Yordan na pangawidi niyo na go niyo pametaden ko darpa a
pekempowan iyo sangkai a kagagawii.’
4 Mandiyadi na tiyawag i Yosowa so sapolo ago dowa a mama a piyamili iyan a

sesakataw ko oman i mbatabataa
5 Na pitero iyan kiran a “Song kano ko look a Yordan ko katatagoan ko Kaban sa
Kapasadan o Allah a Tohan iyo. So oman i isa rekano na kowa on sa ator a satiman bo a
posain iyan a aya kadakel iyan na lagid sa kadakel o manga mbatabataa manga Israil.
6 Kebaloy ai a ipenanadem sii rekano ko pinggolaola o Allah, na sii ko pekatalingoma a
manga gawii amay ka ipagise rekano o manga wata iyo a ‘Antonaa i maana angkai a
manga ator?’
7 Na teroa niyo kiran a tomiyareg tomoga so lawasaig a Yordan isako iripag on so Kaban
sa Kapasadan o Allah. Na giyangkai a manga ator na ipepananadem ko manga Israil sa
taman sa pakataman.' "
8 Na ininggolalan o manga Israil so inisogo kiran i Yosowa. Kominowa siran sa sapolo

ago dowa a ator ko look a Yordan a sesatiman ko oman i mbatabataa manga Israil, na
inawidan iran ko darpa a pekempowan iran na inipametad iran roo.
9 Mitad mambo si Yosowa sa sapolo ago dowa a ator sii ko look a Yordan sii den ko
katitindegan o manga imam a pegawid ko Kaban sa Kapasadan, na ndodon den taman
imanto.
10 Da den pagalin so manga imam ko look a Yordan taman sa mininggolalan den so

langon taman a manga insarat o Allah a inibegay o Mosa ki Yosowa a peteroon iyan ko
manga taw. Na minggagaan romipag so manga taw ko lawasaig
11 Na kagiya makaripag siran langon na so manga imam a pegawid ko Kaban o Allah na
tomiyaros roo ko sabala o lawasaig a mbabantayan siran o manga taw.
12 So kagogomaanan a manga mama a ped ko mbatabataa Robin ago Gad ago so sabaad
ko mbatabataa Manasih na rominipag siran a pepangonaan ko ped a manga Israil ka
giyoto so iniinsarat kiran o Mosa.
13 Manga pat polo nggibo siran a makatitiyagar makitidawa a rominipag sii ko
kamamasai ron o Allah, na miyakaoma siran ko kapantaran a marani sa Yariko.
14 Sangkoto a gawii na inipangkat o Allah si Yosowa ko kapekeilaya on o langon o

manga Israil, na piyagadatan iran sekaniyan ko tenday a omor iyan a datar o kiyapagadati
ran ko Mosa.
15 Na pitero o Allah ki Yosowa a

16 “Teroa ngka ko manga imam a pegawid ko Kaban sa Kapasadan o Allah a gakap siran
ko Yordan.”
17 Pinggolaola ini i Yosowa
18 Na so den so kiyapakagakap on o manga imam a so den so kiyapakadapo iran ko
pangeba na miyakaasal so ig sa Yordan na miyakaondas a di niyan dii mbagiyawan so
manga pangeba on a datar gowani.
19 Rominipag so manga taw sa Yordan sii ko ikasapolo gawii ko paganay a olanolan, na

mikempo siran sa Gilgal ko masesebangan a Yariko.
20 Roo inampir i Yosowa sa Gilgal angkoto a sapolo ago dowa a ator a miyakowa a poon
sa Yordan.
21 Na pitero iyan ko manga Israil a “Sii ko pekatalingoma a manga gawii amay ka ipagise
rekano o manga wata iyo o antonaa i maana angkai a manga ator
22 Na teroa niyo kiran a rominipag so manga Israil sa Yordan a lomiyalag ko mamara a
lopa.
23 Ka so Allah a Tohan iyo na piyakamaraan iyan so lawasaig a Yordan ko hadapan iyo
taman ko kiyaripag iyo ron a datar o inikidia niyan ko Mariga a Ragat a piyakamaraan
iyan ko hadapan tano taman ko kiyaripag tano ron.
24 Pinggolaola niyan ai kaan katokawi o langon a taw ko doniya a mabager so lima o
Allah ago an iyo lalayon pekeleken so Allah a Tohan iyo.”
YOSOWA 5
So langon a dato o manga Amoriyo ko masesedepan a Yordan ago so langon a dato o
manga Kanaaniyo sii ko kilid a ragat na isako maneg iran o andamanaya i kiyapakamarai
o Allah ko lawasaig a Yordan ko hadapan o manga Israil taman ko kiyaripag iran on na
miyanga teteno so manga poso iran sa kalek na kiyadaan siran den sa kawaraw sabap ko
manga Israil.
So Kiyapanoria ko manga Mama sii sa Gilgal
2 Sa masa oto na pitero o Allah ki Yosowa a “Mbaal ka sa manga gelat a batolakit na go

ngka panoria peroman so manga Israil.”
3 Mandiyadi na mimbaal si Yosowa sa manga gelat a batolakit na piyanori iyan so manga
Israil sii sa GibiyatHaaralot.
4-5 Aya kiyapanoria niyan kiran na sabap sa isako makaawa so manga Israil sa Misir na
palaya miyatori so manga mama a kepakay a makasondaro ogaid na miyamatay siran
langon sii ko kiyapagenebeneb iran ko disirto. Na da pen matori so langon a manga
mama a sii inimbawata ko disirto ko oriyan o kiyapakaawa iran sa Misir.
6 Ka miyakapat polo ragon a dii kapagenebeneb o manga Israil ko disirto taman sa palaya
den miyamatay so langon a manga mama a kepakay a makasondaro isako mawa siran sa
Misir ka kagiya da iran paratiyayaa so Allah. Na inisepa kiran o Allah a di iran den keilay
so lopa a inisepa iyan ko manga apo iran a imbegay niyan rektano, a so lopa a
pekepakayan ago oodaren.
7 Na so manga wata a manga mama angkai a manga taw na aya miyapanori i Yosowa, ka
da siran pen ai mapanori sii ko disirto a giyoto so manga taw a piyamakala o Allah a
minisambi ko manga lokes iran.
8 Kagiya matori so langon a manga mama na tomiyareg siran ko kampo taman sa
miyamakapiya.
9 Pitero o Allah ki Yosowa a “Imanto a gawii na piyokas aken rekano so kaaayai rekano
a minisabap ko kiyapangongoripena rekano roo sa Misir.” Sabap roo na bitowan
angkoto a darpa sa Gilgal taman den imanto.
10 Sii ko kakekampo o manga Israil sa Gilgal sii ko kapantaran a marani sa Yariko na

piselasela iran so Pista a Paska sii ko kaperimon ko ikasapolo ago pat gawii ko olanolan.
11 Kagiya mapita ko kiyaipos o Paska na sii den sangkoto a gawii na komiyan siran ko
miyaragon sangkoto a inged, a so iniyaw a kamais ago paan a da a tapay ron.
12 Ipoon sangkoto a gawii a kiyakan iran ko miyaragon sangkoto a inged na minitareg so
roti na da den ai makan peroman o manga Israil, ka pekan siran ko pepanga raragon ko
inged a Kanaan.
Si Yosowa ago so Mama a Mabibibit sa Pedang
13 Sa masa oto a marani si Yosowa sa Yariko na miyangilailay sekaniyan na miyailay

niyan a mama a tomitindeg ko kasasangoran iyan a bibindasen iyan so pedang iyan.
Somiyong on si Yosowa na inisean iyan a tig iyan a “Tampil ka rekami o di na sii ko
manga ridoay ami?”
14 “Da a ba ko tatampilan,” a tig iyan, “ka sisii ako den a komandir o manga sondaro o
Allah!”
So kiyanega niyan sii na gomipe si Yosowa ko lopa sa kasimbaa niyan on a taros a tig
iyan a “Oripen ako ngka, sir. Antonaa i peteroon ka raken, Kadnan ko?”
15 Somimbag so komandir o manga sondaro o Allah a tig iyan a “Ndai ngka on so manga
tinilas ka ka soti so darpa a katitindegan ka.” Na pinggolaola ini i Yosowa.
YOSOWA 6
So Kiyatabana sa Yariko
Pakabebegeran a kalelekebi ko gimowa o siti a Yariko sabap ko kalek o manga taw ron
ko manga Israil. Da den a ba pekaliyo ago da den a ba pekasoled.
2 Na pitero o Allah ki Yosowa a “Ilaya ngka, ka piyalad aken den a Yariko ko lima ngka
a rakes on so dato on ago so manga wawaraw a sondaro niyan.
3 Seka ago so langon o manga sondaro ngka na lalakaw kano a pegalibeten iyo so siti sa
makaisa ko oman gawii sii ko soled o nem gawii.
4 Sogo ka sa pito kataw a manga imam a melalakaw a mangongonaan ko Kaban sa
Kapasadan a maawid so oman i isa kiran sa bogiyong. Sii ko ikapito gawii na alibeta
niyo so siti sa makapito a misasarta on so kapepakaoniya o manga imam ko manga
bogiyong.
5 Na anda den i kanega niyo ko matanog ago malayat a kiyapakaoniya iran ko manga
bogiyong na sartaan on o langon o manga taw so matanog a kapelalalis, na keoteng den so
keleb a mililibet ko siti! Na giyoto a pamantek den somoled so langon o manga sondaro.”
6 Na tiyawag i Yosowa so manga imam na pitero iyan kiran a “Awidi niyo so Kaban sa
Kapasadan na pakaawida niyo so pito rekano sa pito a bogiyong a melalakaw siran ko
maoonaan o Kaban o Allah."
7 Na giyoto a siyogo iyan so manga taw a tig iyan a “Ganat kano den! Alibeta niyo so siti
a so kagogomaanan a manga mama a pepangonaan ko Kaban o Allah.”
8 Kagiya makimbitiyarai si Yosowa ko manga taw na so pito kataw a imam a maawid sa

pito a bogiyong na gomiyanat lomalakaw ko kamamasai ron o Allah a pepakaonin iran so
manga bogiyong a tomotondog kiran so manga imam a pegawid ko Kaban sa Kapasadan
o Allah.
9 So kagogomaanan a manga mama na pepangonaan ko manga imam, na aden mambo a
manga gordiya a tomotondog ko Kaban, na misasarta on so kapepakaoniya ko manga
bogiyong.
10 Ogaid na miyapando den i Yosowa so manga taw a tig iyan a “O ba kano pelalalis o di
na ba niyo pakatanoga so manga lagam iyo aya pen o ba aden a peteroon iyo a sataga bo
taman sa di aken rekano isogo a pelalalis kano, na go kano bo pelalalis!”
11 Na piyakialibet iyan so Kaban o Allah ko siti sa miyakaisa. Oriyan iyan na komiyasoy
siran ko kampo na domike siran roo ko kiyagagawii niyan.
12 Teked a kapipita na mimbowat si Yosowa na inawidan o manga imam so Kaban o

Allah.
13 So pito kataw a imam a kiaawid ko pito a bogiyong na lomiyalakaw a maoonaan o
Kaban o Allah a pepakaonin iran so manga bogiyong. Pepangonaan kiran langon so
kagogomaanan a manga mama a tomotondog siran mambo ko Kaban o Allah a misasarta
on so kapepakaoniya o manga imam ko manga bogiyong.
14 Sii sangkoto a ikadowa gawii na inalibet iran peman so siti sa miyakaisa, na
komiyasoy siran bo ko kampo. Pinggolaola iran ai ko soled o nem gawii.
15 Sii ko ikapito gawii na mimbowat siran ko teked a kapipita na inalibet iran so siti a
lagid bo o pesowaan iran, ogaid na sangkoto a gawii na miyakapito a kiyapakaalibet iran
on.
16 So ikapito a kiyanggolaola iran on sii den ko kiyapakatanoga o manga imam ko oni o
manga bogiyong na inisogo i Yosowa ko manga taw a “Pelalalis kano! Piyalad rekano o
Allah so siti!
17 So siti ago so langon taman a matatago on na disomala a mbinasaan sa tarotop a aya
ipesoasoat ko Allah. Aya bo a pakalidasa niyo ron na so sondal a si Rahab ago so langon
a manga ped iyan sii ko walay niyan, ka kagiya initapok iyan so manga manonoriman a
siyogo tano.
18 Ogaid na pananggilai niyo o ba niyo kowaa so apiya antonaa ko manga nganin san a
inisenggay a mbinasaan, ka o ba niyo baden kapakatanai a ginawa niyo ago so kampo o
manga Israil sa paninta ago kamoralaan.
19 So langon a pirak, bolawan ago so manga ipamemetad a tombaga ago potaw na palaya
inisenggay a rek o Allah, na ketago ini ko baitalmal o Allah.”
20 Na giyoto a piyakaoni o manga imam so manga bogiyong, na so den so kiyanega sii o

manga taw na milalalis siran sa tanto a matanog na miyaoteng so keleb a mililibet ko siti.
Na sarta den a miyamantek somoled ko siti so oman i mama na inagaw iran den.
21 Piyamono iran a pedang so langon a baraniyawa ko siti a melagid den so manga mama
ago so manga babay a manga ngongoda ago miyanga lolokes a rakes on so manga sapi,
manga bilibili, manga kambing ago manga kimar.
22 Na pitero i Yosowa ko dowa kataw a mama a miyanoriman ko inged a “Song kano ko

walay o sondal na wita niyo sa liyo ago so langon o pamiliya niyan a so den so inisepa iyo
ron.”
23 Na somiyoled siran on na iniliyo iran si Rahab, so ama ago so ina iyan, so manga
pagari niyan ago so langon o pamiliya niyan na inowit iran siran ko darpa ko liyo o
kampo o manga Israil.
24 Oriyan iyan na tiyotong iran so dalem a siti ago so langon taman a matatago on, ogaid
na so pirak, so bolawan ago so manga ipamemetad a tombaga ago potaw na tiyago iran ko
baitalmal ko Walay o Allah.
25 Ogaid na piyakapagoyag i Yosowa si Rahab a so sondal a rakes o langon o pamiliya o
ama iyan sabap sa initapok iyan so manga siyogo i Yosowa a miyanoriman sa siti a
Yariko, na pepeginged sekaniyan den a ped o manga Israil taman imanto.
26 Samaoto na piyakalangkap i Yosowa angkai a paninta:
“Kemorkaan o Allah so apiya antawaa i tepengan iyan mangon peroman angkai a siti a
Yariko.
Aya imbayad iyan ko kambangona niyan ko onayan o siti
na so kaoyagoyag o kaka a wata iyan a mama,
na aya imbayad iyan ko kapakatindega niyan ko manga pinto on
na so kaoyagoyag o ari a wata iyan a mama.”
27 Na sisii so Allah ki Yosowa, na lomiyangkap so bantogan iyan sii ko dalem a inged.
YOSOWA 7
Tiyaban o manga Taw sa Ay so manga Israil
Ogaid na siyogok o manga Israil so sogoan o Allah mipantag ko manga nganin a

inisenggay a mbinasaan, ka aden a mama a bebetowan sa Akan a kominowa on; sabap
roo na mimborngat so gani o Allah ko manga Israil. (Si Akan na wata i Karmi a so
wata i Sabdi a wata peman i Sirah a ped ko mbatabataa Yodah).
2 Somiyogo si Yosowa sa manga mama a makasong sa Ay a poon sa Yariko. Giya Ay na

marani sa Bit Abin sii sa sebangan a Bitil. Na pitero kiran i Yosowa a “Lalakaw kano na
go niyo pariksaa so inged.” Na lomiyalakaw so manga mama na piyariksa iran a Ay.
3 Sii ko kiyakasoy iran ki Yosowa na pitero iran on a “Kena a ba langon o manga taw i ba
ngka pakasonga sa Ay. Aya bo a pakagobata ngka on na dowa o di na telo nggibo a
manga mama; di ngka pakapendokawa roo so langon o manga sondaro, ka maito bo a taw
ron.”
4 Kagiya ka maoto na baden manga telo nggibo a manga Israil a somiyong roo, ogaid na
miyapakatailis siran o manga mama sa Ay,
5 Na piyanaloba iran siran ipoon ko gimowa o siti taman den ko manga kowari, na
miyamakapatay siran sa manga telo polo ago nem kataw a manga Israil sii ko
kapepalagoy iran. Sabap sii na kiyadaan den sa kawaraw so manga Israil na miyanga alek
siran.
6 Samaoto na si Yosowa ago so manga pelokelokesen ko manga Israil na piyangisi iran so

manga nditaren iran ko kararata a ginawa iran. Piyamirikan iran sa bayanek so manga olo
iran ago gomipe siran ko lopa ko hadapan o Kaban o Allah, na gomegenek siran roo
taman ko kiyaperimon iyan.
7 Gomiyoraok si Yosowa a tig iyan a “Ya Allah a Kadnan ami, ino ngka pekaripaga sa
Yordan angkai a manga taw sa kapelada ngka rekami ko kambinasaa rekami o manga
Amoriyo? Tomo baden so kateterangi rekami komakaden roo sa sabala a Yordan!
8 Hey Kadnan, antonaa i mapetero aken imanto a kiyapalagoyan o manga Israil so manga
ridoay iran?
9 So manga Kanaaniyo ago so langon a ped a kibabaling ko inged na keneg iran so
makapantag sii, na pelikopan kami ran ago polangen. Na antonaa den i penggolaolaan ka
sa kapelindinga ngka ko kala o bantogan ka?”
10 Na pitero o Allah ki Yosowa a “Tindeg ka! Ino ka san gegepe?

11 Miyakandosa so Israil! Siyogok iran so kapasadan a inisogo aken a tomanen iran.
Kominowa siran ko manga nganin a inisenggay a mbinasaan. Piyanekew iran ai ago
miyamokeg siran mipantag sii, na inisaog iran ko manga ipamemetad iran.
12 Giyanan i sabap a di makapemayandeg so manga Israil ko hadapan o manga ridoay
iran. Miyakatailis siran sabap sa inisenggay imanto so manga Israil a mbinasaan! Na di
ako rekano den keped taman sa di niyo binasaan so inisenggay a mbinasaan a sisii rekano.
13 “Ika roo den! Sotiya ngka so manga taw! Teroa ngka kiran a ‘Sotiya niyo a manga
ginawa niyo a ipetiyagar rekano ko kapipita, ka pitero o Allah a Tohan o Israil a “Hey
manga Israil, matatago rekano so inisenggay a mbinasaan. Di kano makapemayandeg ko
hadapan o manga ridoay niyo taman sa ilebad iyo ai.” ’
14 “Teroa ngka kiran a ‘Amay ka mapita na pekadaseg so oman i mbatabataa rekano a

makapesosokli. So mbatabataa a kowaan o Allah na pekaiseg sa onaan so oman i isa on
ka mbawataan. Na so mbawataan a kowaan o Allah na pekaiseg sa onaan so oman i isa
on ka pamiliya, na so pamiliya a kowaan o Allah na pekaiseg sa onaan so oman i mama
on.
15 Na so mama a kowaan a ketoonan ko nganin san a inisenggay a mbinasaan na
totongen ko apoy a rakes o langon a rek iyan, ka siyogok iyan so Kapasadan o Allah ago
miyakanggolaola sa tanto a marata sii sa Israil.”
16 Teked a kapipita na piyakadaseg i Yosowa so oman i mbatatabaa a manga Israil na

miyakowa so mbatabataa Yodah.
17 Na piyakaiseg iyan sa onaan so oman i mbawataan ko mbatabataa Yodah, na
miyakowa so mbawataan i Sirah. Piyakaiseg iyan sa onaan so oman i pamiliya a ped ko
mbawataan i Sirah, na so pamiliya i Sabdi i miyakowa on.
18 Na piyakaiseg iyan sa onaan so oman i mama ko pamiliya i Sabdi na miyakowa si
Akan a wata i Karmi a wata i Sabdi a wata i Sirah a ped ko mbatabataa Yodah.
19 Na pitero i Yosowa ki Akan a “Wata aken, panotola ngka so tito a benar sii ko
kamamasaan o Allah a Tohan o Israil na teobat ka on. Teroa ngka raken o antonaa i
pinggolaola ngka; di ngka raken pegmaa.”
20 “Mataan den,” a tig i Akan ki Yosowa, “a miyakandosa ko ko Allah a Tohan o Israil,

na giyai i pinggolaola ko:
21 Sii ko manga tamok a miyateban tano na miyailay aken so mapiya i paras a kimon a
pasad sa Babilon, ago dowa gatos a pelata a pirak ago isa ka barita a tito a bolawan a
tenga sa kilo a timbang iyan. Tanto aken a kiyabebayaan na kinowa ko. Samanaya na
milelebeng ai ko soled o barombarong aken a matatampar sa didalem so pirak.”
22 Mandiyadi na somiyogo si Yosowa sa manga mama na miyalalagoy siran ko

barombarong, na miyatoon iran angkai a manga nganin a milelebeng roo a rakes den o
pirak a matatampar sa didalem.
23 Iniliyo iran ai ko barombarong na inowit iran ki Yosowa ago sii ko langon o manga
Israil, na inipametad iran ko lopa sii ko kamamasaan o Allah.
24 Mandiyadi na si Yosowa ago so langon o manga Israil na kinowa iran si Akan a wata i
Sirah ago so pirak, so kimon, so barita a bolawan, so manga wata iyan a manga mama ago
manga babay, so manga sapi iyan, manga kimar iyan, manga bilibili ago kambing iyan, so
barombarong iyan ago so langolangon a patemotamokan iyan na inowit iran ai langon sii
ko Balintad a Akor.
25 Na pitero i Yosowa ki Akan a “Ino ngka rekami pagowita angkai a kasiksaan?
Siksaan ka den o Allah sangkai a gawii!”
Na so langon o manga Israil na riyobak iran si Akan a manga ator a rakes o langon a
ped iyan. Oriyan iyan na tiyotong iran a apoy so manga bangkay iran.
26 Na diyakontoran iran sekaniyan sa madakel a manga ator a ndodon den taman imanto.
Giyanan i sabap a bitowan angkoto a darpa sa Balintad a Kasiksaan ipoon roo den.
Oriyan iyan na miyada ko Allah so pesokeyaw a rarangit iyan.
YOSOWA 8
Bininasa o manga Israil so Siti a Ay
Oriyan iyan na pitero o Allah ki Yosowa a “Di ka pekelek aya pen o ba ka kadai sa inam.
Pakaonota ngka so langon o manga sondaro na song kano sa Ay ka piyalad aken rekano
so dato sa Ay, so manga pagtaw niyan, so siti niyan ago so lopa iyan.
2 Nggolaolaa niyo sa Ay ago so dato on so datar o inikidia niyo sa Yariko ago so dato on
aya liyo ron na kekowa niyo a rek iyo den so mapeteban iyo ron ago so manga
pangangayamen. Na sogo ka sa manga sondaro a makapegayan sii ko talikodan o siti.”
3 Kagiya ka maoto na mitiyagar lomalakaw si Yosowa ago so langon o manga sondaro sa

kanggobata iran sa Ay. Miyamili sekaniyan sa telo polo nggibo a manga wawaraw a
sondaro na piyakalalakaw niyan siran ko kiyagagawii niyan
4 A aya niyan kiran inisogo na “Pakinega niyo piyapiya! Tepok kano ko talikodan o siti.
O ba kano ron tanto a pakawatan, na pagiiktiyar kano langon sa kanggobat iyo!
5 Saken ago so langon a ped aken na ndaseg ko siti. Na amay ka meliliyo so manga
mama on sa kapakipetidawa iran rekami a datar o miyaona a siyowa iran na pelagoyan
ami siran.
6 Selobaan kami ran taman sa maagak ami siran langon ko liyo o siti a pipikiren iran a
‘Pepalagoyan tano peman o manga Israil a datar o pinggolaola iran gowani.’
7 Samaoto na ganat kano ko katetapokan iyo na agawa niyo so siti, ka so Allah a Tohan
iyo na peladen iyan ko kapaar iyo.
8 Amay ka maagaw niyo so siti na totonga niyo ka giyoto so inisogo o Allah. Iktiyar
kano; giyai i manga insarat aken rekano!”
9 Na taros a piyakalalakaw siran i Yosowa, na somiyong siran ko darpa a petepokan iran

na nomiyayaw siran roo ko masesedepan a Ay sii ko pageletan a Bitil ago giya Ay. Ogaid
na mitelimbagak si Yosowa a maaped ko manga taw sii ko kiyagagawii niyan.
10 Teked a kapipita na tinimo iyan so manga sondaro na sekaniyan ago so manga olowan
sa Israil na lomiyalakaw a pepangonaan ko manga sondaro ko kapesong iran sa Ay.
11 Domiyaseg siran ko siti na miyakaoma ko mapapanempang iyan. Mikempo siran sa
tampar sa pagotaraan a Ay a aden a alog a miilet kiran ago so siti.
12 Na somiyogo si Yosowa sa manga lima nggibo a manga mama ka piyakatepok iyan
siran ko masesedepan o siti sii ko pageletan a Bitil ago giya Ay.
13 Kagiya matanor den so langon o manga sondaro, a so siran oto a kikatatago ko kampo
sa pagotaraan o siti ago so manga magaayan sii sa sedepan o siti, na domike si Yosowa sii
ko alog sangkoto a kagagawii.
14 So kiyailaya o dato sa Ay ko manga Israil na sekaniyan ago so langon o manga mama

ko siti na minggagaan lomiyo ko teked a kapipita sa kapakipetidawa iran ko manga Israil
sii ko darpa a katotolongan on so kapantaran a Yordan, ogaid na di niyan katawan a aden
a magaayan ko siti sii ko talikodan iyan.
15 Na omamanti na di pekaato si Yosowa ago so langon o manga Israil, na miyamalagoy
siran sa tampar sa disirto.
16 Tiyawag so langon o manga mama sa Ay sa kaselobaa iran kiran, na sii ko
kapeselobaa iran ki Yosowa na miyaagak siran baden ko liyo o siti.
17 Da den a sakataw bo a mama a ba mitelimbagak sa Ay o di na sii sa Bitil a ba da
saloba ko manga Israil, na inawaan iran so siti a kalelekaan ko kapeselobaa iran ko
manga Israil.
18 Samaoto na pitero o Allah ki Yosowa a “Antapen ka so bangkaw a kakapetan ka sa

tampar sa Ay, ka peladen ko so siti ko kapaar ka.” Mandiyadi na iniyantap i Yosowa so
bangkaw niyan sa tampar sa Ay
19 Na so den so kiyanggolaolaa niyan sii na minggagaan gomanat so manga magaayan ko
katetapokan iran na miyamiyakadayon siran somoled ko siti na inagaw iran. Na sarta den
a tiyotong iran.
20 Kagiya domingil sa talikodan so manga mama sa Ay na miyailay iran so bel ko siti a
pekigorong sa maporo, na da den a ba iran kapegapasan ko apiya anda, ka so manga
Israil a pepamalagoy a pegantap ko disirto na mipeto siran sa kapagatowi ran kiran.
21 Ka so den so kiyailaya i Yosowa ago so manga ped iyan a manga Israil sa miyaagaw o
manga magaayan so siti, ago so bel a pekigorong roo na mipeto siran na piyamono iran so
manga mama a lominiyo sa Ay.
22 So mambo so ped a manga Israil a miyagayan ko siti na lominiyo siran on a nggobat
kiran, na kiyaseletan so manga mama sa Ay a kambabalaan o manga Israil. Piyamono
siran o manga Israil a da den a ba iran piyakapagoyag aya pen o ba iran piyakapalagoy
23 A liyo ron so dato sa Ay, ka biniyag iran a oyagoyag na inowit iran ki Yosowa.
24 Kagiya mapasad mamomo a pedang o manga Israil so langon a manga mama a

kibabaling sa Ay a sisii ko liyo o siti taman sa miyapolang siran den na komiyasoy sa Ay
so langon o manga Israil na piyamono iran langon so manga taw a matatago on.
25 Sapolo ago dowa nggibo a kibabaling sa Ay a miyamatay sangkoto a gawii a melagid
den so manga mama ago manga babay.
26 Ka da den babaan i Yosowa so mabebeter a lima niyan a komakapet ko bangkaw niyan
taman sa da mapolang so langon a kibabaling sa Ay.
28 Ogaid na kinowa o manga Israil a rek iran den so manga pangangayamen ago so
miyateban iran ko siti ka aya iniinsarat o Allah ki Yosowa.
28 Tiyotong i Yosowa a Ay na biyaloy niyan a tatap a tabotod a miyanga bibinasa a

miyailang den taman imanto.
29 Binitin iyan ko kayo so dato sa Ay na da niyan roo den tekora taman ko kiyagabi
niyan. Sii den ko kiyasedep o alongan na inisogo i Yosowa a itana iran on so bangkay
niyan ago ilebad iran sii ko gimowa o siti. Na diyakontoran iran sa madakel a manga ator
a ndodon den taman imanto.
Biyatiya so Kitab Roo ko Palaw a Ibal
30 Oriyan iyan na roo ko Palaw a Ibal na mimbaal si Yosowa sa aparan a pesepaatan ko

manga soasoat ko Allah a Tohan o Israil.
31 Pimbaalan iyan ai a mipepasod ko manga insarat a inibegay o Mosa a oripen o Allah
sii ko manga Israil a minisorat ko Ribro a Kitab o Mosa – “a so aparan a da panapili so
manga ator on a da den osari sa kasangkapan.” Na somiyapaat siran on sa manga korban
a petotongen ago manga korban pantag bo ko kanggiginawai.
32 Na sii ko kamamasaan o manga Israil na kiyopiya i Yosowa so Kitab o Mosa a inisorat
iyan sii sangkoto a manga ator.
33 So langon o manga taw a melagid so manga mananangga ago so tenger a manga Israil
a rakes o manga pelokelokesen kiran, so manga olowan ago so manga pangongokom na
palaya kititindeg ko mbala a kilid o Kaban sa Kapasadan o Allah a somasangor siran ko
manga imam a manga Libitiyo a kiaawid ko Kaban. So sabagi ko manga taw na
kititindeg ko kababaan o Palaw a Girisim, na so sabagi kiran na sii ko kababaan o Palaw a
Ibal, ka giyoto so manga insarat a inibegay gowani o Mosa a oripen o Allah makapantag
ko kakerakmati ko manga Israil.
34 Mandiyadi na biyatiya kiran i Yosowa so langon a manga katero ko Kitab, a rakes o

manga rakmat ago so manga paninta a so den so minisorat ko Ribro a Kitab.
35 So oman i sogoan a inibegay o Mosa na biyatiya i Yosowa roo ko langon a
miyamakadarpa a manga Israil a rakes on so manga babay, so manga wata ago so manga
mananangga a pepeginged a maaped kiran.
YOSOWA 9
Piyanaliba so Israil o manga Taw sa Gibiyon
Samaoto na so langon a dato sii sa sedepan a Yordan na miyaneg iran so makapantag

sangkai a langon a miyanggolaola. Giyai so manga dato o manga Hitiyo, manga Amoriyo,
manga Kanaaniyo, manga Pirisiyo, manga Hibiyo ago manga Hibosiyo a kibabaling ko
manga kapalawan ago sii ko dalem o kapantaran ko kilid o Ragat a Miditiraniyo a taman
den sa Libanon sii sa pagotaraan.
2 Na mitimotimo siran a pemagabanga sa kapakipetidawa iran ki Yosowa ago so manga
Israil.
3 Ogaid na kagiya katokawan o manga taw sa Gibiyon so pinggolaola i Yosowa sa Yariko

ago sii sa Ay
4 Na miyapamikir iran a penaliba siran a somong ki Yosowa a omamanti na manga
siyogo siran. Na riyoranan iran so manga kimar iran sa manga roronot a sako ago manga
kobal a petegoan sa arak a miyanga kikisi ago kitatapakan.
5 Somiyolot siran sa miyanga bibinasa ago piyanapakan a manga tinilas ago miyanga
kikisi a manga nditaren, na so paan a mapeloto iran na palaya den kominimbel ago
inolabong.
6 Na somiyong siran ki Yosowa sii ko kampo sa Gilgal na pitero iran on ago sii ko manga
mama a Israil a “Miyakapoon kami sa mawatan a darpa. Na kabaya ami a
makipepasadanowai kami rekano imanto.”
7 Ogaid na pitero o manga Israil sangkai a manga Hibiyo a “Masiken a marani bo rekami
so babalingan iyo. O benar oto na di ami sekano den ipepasadanowai."
8 “Manga oripen kami ngka,” a tig iran ki Yosowa.

Na iniise kiran i Yosowa a “Antawaa kano ago anda kano poon?”
9 Inisembag iran a “Somiyong kami sii a poon ko mawatan a inged ka kagiya miyaneg
ami so makapantag ko bantogan o Allah a Tohan ka ago so langon a pinggolaola niyan
roo sa Misir
10 Ago so langon a pinggolaola niyan ko dowa kataw a dato o manga Amoriyo roo sa
sebangan a Yordan, a si Sihon a dato sa Hisbon ago si Og a dato sa Basan a mindato roo
sa Astarot.
11 So manga pelokelokesen ami ago so langon a kibabaling ko pagiingedan ami na pitero
iran rekami a ‘Awid kano sa manga pangenengken a mapeloto iyo ko kapelalakaw niyo
na songowi niyo so manga Israil na teroa niyo kiran a “Manga oripen kami niyo; na
pakipesadanowai kano rekami." '
12 “Giyangkai a paan a loto ami na mayaw pen isako alongan a kiyaganati ami ko
manga walay ami sa kasong rekano, ogaid na ilaya niyo man ka kominimbel imanto ago
inolabong!
13 Na giyangkai a manga kobal a petegoan sa arak na palaya bago isako tagoan ami,
ogaid na ilaya niyo man ka miyanga sisisi den, na go so manga nditaren ami ago manga
tinilas na miyanga roronot sabap ko tanto a mawatan a lalakaw ami!”
14 Na piyariksa o manga mama a Israil so manga pangenengken iran ogaid na da siran

pakimosawir ko Allah.
15 Na inipasadanowai siran i Yosowa sa kalilintad, na pimataanan a sapa o manga
olowan o Israil a di iran siran pemonoon.
16 Miyakatelo gawii ko kiyaipos o kiyapesadanowaiya iran ago so manga taw sa Gibiyon

na kiyatokawan o manga Israil a manga siringan siran a mababaling sa marani.
17 Sabap roo na lomiyalakaw so manga Israil, na sii ko ikatelo gawii na minisampay siran
ko manga siti a kibabalingan angkai a manga taw a giya Gibiyon, Kipira, Birot ago
Kiriyat Yarim.
18 Ogaid na da siran gobata o manga Israil ka kagiya miyakasepa siran kiran sii ko
Ingaran o Allah a Tohan o Israil.
Na so langon o manga Israil na piyanarotaroan iran so manga olowan
19 Ogaid na somimbag so manga olowan a tig iran a “Miyakasepa kami kiran den sii ko
Ingaran o Allah a Tohan o Israil. Di tano siran kapekasakitan imanto.
20 Ogaid na giyai i ikidia tano kiran: Pakapagoyagen tano siran kaan di rektano kitana so
rarangit o Allah sabap ko kiyabarobaa tano ko minisepa tano kiran.
21 Pakapagoyaga niyo siran, ogaid na mbelowin tano siran a dii nggogoray sa itagon ago
dii manageb sa ig a pegosaren tano langon a isa ka maginged.”
Giyanan i kinitomanen o manga olowan ko initopa iran,
22 Ogaid na piyakisogoan i Yosowa so manga taw sa Gibiyon na iniise iyan kiran a “Ino
kami niyo selibaa ko kiyateroa niyo sa ‘Miyakapoon kami sa mawatan a darpa,’ a marani
rekami bo bes so babalingan iyo?
23 Kasisintaan kano imanto! Di kano den kebokaan ko kapepanalagad iyo a so dii
kanggogoray sa itagon ago dii kapanageb sa ig a pegosaren ko Walay o Tohan aken.”
24 Simbag iran si Yosowa a tig iran a “Miyapanotol rekami den a inisogo o Allah a
Tohan iyo ko Mosa a imbegay niyan rekano so dalem angkai a lopa ago polangen iyan so
langon a kibabaling on sii ko kapegantap iyo kiran. Kagiya ka maoto na tanto ami a
inikalek so kakeda o manga niyawa ami. Giyoto i sabap a kiyanggolaolaa mi sii.
25 Sii kami den imanto ko kapaar ka; nggolaolaa ngka rekami so apiya antonaa i mapiya
reka ago ontol.”
26 Na piyakalidas siran i Yosowa ko manga Israil na da iran siran pamonoa.

27 Ogaid na sangkoto a gawii na biyaloy niyan so manga taw sa Gibiyon a dii nggogoray
sa itagon ago dii manageb sa ig a pegosaren o manga Israil ago sii ko aparan o Allah roo
ko darpa a pinili iyan a pesimbaan on. Na giyanan i kapakambebetad iran taman den
imanto.
YOSOWA 10
Tomiyareg so Alongan
Samaoto na si Adoni Sidik a dato sa Yarosalim na kiyatokawan iyan a miyaagaw i

Yosowa so siti a Ay ago bininasa niyan sa tarotop a biyono iyan so dato on a datar o
inikidia niyan sa Yariko ago so dato on. Kiyatokawan iyan pen a so manga taw sa
Gibiyon na miyakipesadanowai sa kalilintad ko manga Israil ago pepeginged siran a
maaped kiran.
2 Tanto ai a inikawan i AdoniSidik ago so manga pagtaw niyan, ka giya Gibiyon na mala
i kipantag a siti a datar o isa ko manga siti a babalingan o dato, na mala pen a di giya Ay,
na manga wawaraw so manga sondaro on.
3 Sabap roo na si AdoniSidik a dato sa Yarosalim na somiyogo sa manga mama sii ki
Hoham a dato sa Hibron, sii ki Piram a dato sa Yarmot, sii ki Yapiya a dato sa Lakis ago
sii ki Dibir a dato sa Iglon, na piyakitero iyan kiran a
4 “Song kano raken na go ako niyo ogopi sa kanggobata ko sa Gibiyon ka
miyakipesadanowai siran sa kalilintad ki Yosowa ago so manga
Israil.”
5 Mandiyadi na giyangkai a lima kataw a dato o manga Amoriyo a so dato sa Yarosalim,
sa Hibron, sa Yarmot, sa Lakis ago sa Iglon na piyakatimotimo iran so manga sondaro
iran na lomiyalakaw siran, na linikopan iran a Gibiyon sa kasondoli ran on.
6 Somiyogo so manga taw sa Gibiyon sa manga mama ki Yosowa roo ko kampo sa Gilgal
sa kapeteroa iran on a “Di ngka pendarainonen so manga oripen ka! Song ka rekami sii
nggagaan na tabangi kami ngka; sabeta kami ngka, ka so langon a manga dato o manga
Amoriyo a kibabaling ko kapalawan na piyakaisaisa iran so manga sondaro iran sa
kapakipetidawa iran rekami!"
7 Na gomiyanat si Yosowa sa Gilgal a oonotan o langon o manga sondaro niyan a rakes

on so langon a lebi kiran a mapasang i kapakitidawa.
8 Na pitero o Allah ki Yosowa a “Di ngka siran keleken, ka piyalad aken siran den ko
kapaar ka. Da den a isa kiran bo a ba makapemayandeg ko hadapan ka.”
9 Na miyababasa gawii a kiyalalakaw i Yosowa ago so manga sondaro niyan a ipoon sa
Gilgal taman den sa Gibiyon, na tikawan iyan gomobat so manga Amoriyo.
10 Piyakalekan siran o Allah ko kiyailaya iran ko manga Israil na tanto a minitaralo a
kiyapamonoa kiran o manga Israil roo sa Gibiyon, na piyanaloba iran siran sii ko lalan a
ipesong sa Bit Horon a pepamonoon iran siran taman den sa Asikah ago sa Makidah.
11 Na sii ko kapepalagowi ran ko manga Israil sii ko lalan a ipoon sa Bit Horon taman sa
Asikah na piyangologan siran o Allah sa giyaw a lagid o manga ala a ator a poon sa
langit, na lebi kiran pen a madakel a miyapatay o giyaw a di so miyapamono a pedang o
manga Israil.
12 Sii sangkoto a gawii a kiyapalada o Allah ko manga Amoriyo sii ko manga Israil na
miyangangarapan si Yosowa ko Allah a tig iyan ko kamamasai ron o manga Israil a:
“Hey alongan, tareg ka san ko kaporoan o Gibiyon;

hey olan, tareg ka san ko liyawaw o Balintad a Ayalon!”
13 Na tomiyareg so alongan a da den pagalin so olan taman sa da mataban o manga Israil

so manga ridoay iran. Ba ini da misorat sii ko Ribro a Yasar? Tomiyareg so alongan ko
kaooto niyan na somindod ko kapesedep iyan ko miyababasa alongan.
14 Da den a datar oto a gawii a ba niyan miyaonaan o di na miyaoriyan a kiyaampona o
Allah ko lagid oto a pangni o manosiya. Mataan den a miyakitidawa so Allah sabap ko
manga Israil!
15 Oriyan iyan na komiyasoy si Yosowa ago so langon a manga Israil sii ko kampo sa
Gilgal.
Piyamono i Yosowa so Lima kataw a Dato o manga Amoriyo
16 Sii ko dii katidawa na miyakapalagoy so lima a dato na mitepok siran ko liyang roo sa
Makidah.
17 Piyanotol ki Yosowa a “Miyatoon so lima a manga dato a sii tetapok ko liyang roo sa
Makidah.”
18 Na tig iyan a “Lilidi niyo sa manga ala a ator so ngari o liyang na pakinggordiyai niyo
sa manga mama.
19 Ogaid na di niyo nggeneki kometed so manga ridoay niyo; sondoli niyo siran sa
talikodan. O ba niyo siran pakapegapasa ko manga siti iran ka so Allah a Tohan iyo na
piyalad iyan siran rekano.”
20 Kagiya mapasad siran mamono i Yosowa ago so manga Israil a liyo ron so maito bo a
miyamakapalagoy a miyamakasoled ko kikakokotaan a manga siti iran
21 Na komiyasoy so langon o manga Israil ki Yosowa sii sa kampo sa Makidah a da a
kiyakaidan kiran.
22 Na pitero i Yosowa a “Lekai niyo so gimowa o liyang na wita niyo raken angkoto a
lima a dato.”
23 Na likaan iran so liyang na iniliyo iran on angkoto a manga dato a so dato sa
Yarosalim, so dato sa Hibron, so dato sa Yarmot, so dato sa Lakis ago so dato sa
Iglon.
24 Sii ko kiyawita iran kiran ki Yosowa na tinimo iyan so langon a manga mama sa Israil
na pitero iyan ko manga komandir o manga sondaro a miyamangonot rekaniyan a “Song
kano sii na dapoi niyo so manga lig angkai a manga dato.” Na domiyaseg siran na
piyandapoan iran so manga lig iran.
25 Na tig i Yosowa a “Di kano pekelek; di kano kedai sa inam! Pakababager kano ago
pakawawaraw, ka giyai i ikidia o Allah ko langon a ipetidawa iyo a manga ridoay.”
26 Na giyoto a biyono i Yosowa so manga dato na binitin iyan siran ko lima a kayo a da
den tekora so manga lawas iran taman ko kiyagabi niyan.
27 Sii ko kapesedep o alongan na somiyogo si Yosowa na initana iran so manga lawas
iran ko manga kayo na inilebad iran roo ko liyang a kiyatapokan iran gowani. Tiyagoan
iran sa manga ala a ator so gimowa o liyang na ndodon den ai taman imanto.
Miyataban i Yosowa so manga siti sa Pagabagatan
28 Sii den sangkoto a gawii na inagaw i Yosowa so siti a Makidah. Bininasa niyan sa
tarotop na biyono iyan a pedang so langon a manga taw ron a rakes o dato iran; da den a
ba niyan kiran piyakapagoyag. Na pinggolaola niyan ko dato sa Makidah so inikidia
niyan ko dato sa Yariko.
29 Oriyan oto na tomiyaros den si Yosowa ago so manga Israil a poon sa Makidah na
somiyong siran sa Libnah na giyobat iran.
30 Piyalad ai mambo o Allah ko manga Israil, na piyamono iran a pedang so langon a taw
ron a da den a ba iran on piyakapagoyag. Na pinggolaola i Yosowa ko dato iran so
inikidia niyan ko dato sa Yariko.
31 So kiyaipos oto na miyawa si Yosowa ago so manga Israil sa Libnah na miyantap sa

Lakis. Linikopan iran so siti na giyobat iran,
32 Na piyalad o Allah a Lakis ko manga Israil na inagaw iran ko ikadowa gawii a di iran
kii katidawa. Piyamono iran a pedang so langon a taw ron a datar o inikidia iran sa
Libnah.
33 Sii ko dii katidawa na miyakaoma roo si Horam a dato sa Gisir ka tebangan iyan
lominding a Lakis. Ogaid na tiyaban sekaniyan i Yosowa ago so manga sondaro niyan na
da den a ba niyan kiran piyakapagoyag.
34 Poon sa Lakis na tomiyaros si Yosowa ago so manga Israil sa Iglon. Linikopan iran
ago giyobat
35 Na inagaw iran sangkoto den a gawii. Bininasa iran sa tarotop na piyamono iran a
pedang so langon a taw ron a datar o inikidia iran sa Lakis.
36 Tomiyaros pen si Yosowa ago so manga Israil a poon sa Iglon na somiyong siran sa
Hibron na giyobat iran.
37 Inagaw iran na piyamono iran a pedang so langon o manga taw ron a rakes o dato iran
ago so pen so manga taw sii ko melilibeta on a manga inged. Bininasa iran sa tarotop a
da den a ba iran on piyakapagoyag a datar o pinggolaola iran sa Iglon.
38 Oriyan iyan na mipeto si Yosowa ago so manga Israil na giyobat iran a Dibir.
39 Inagaw iran so siti a rakes o dato on ago so langon a melilibeta on a manga inged. Na
piyamono iran a pedang so langon o manga taw ron. Tarotop a kiyabinasaa iran on a da
den a ba iran piyakapagoyag. Pinggolaola iran sa Dibir ago so dato on so inikidia iran sa
Hibron ago giya Libnah ago so dato on.
40 Giyanan i kiyatabana i Yosowa ko manga taw ko dalem a inged. Tiyaban iyan so

manga dato sii ko manga siti ko kapalawan, sii sa Nigib sa pagabagatan, sii ko kapantaran
sa sedepan ago sii ko kipakaiiris ko manga bobongan. Miyatarotop a kiyabinasaa niyan
ko langon a baraniyawa on a da den a ba niyan kiran piyakapagoyag ka giyoto den so
inisogo o Allah a Tohan o Israil.
41 Miyataban siran i Yosowa ipoon sa Kadis Barniya na taman den sa Gasa, ago sii ko
dalem a inged a Gosen taman sa Gibiyon.
42 Langon angkai a manga dato ago so lopa iran na miyataban i Yosowa sii ko soled o
miyakaisaisa bo a kiyapakitidawa iyan
ka so Allah a so Tohan o Israil na aya dii makitidawa sabap ko manga Israil.
43 So kiyaipos ai na komiyasoy si Yosowa ago so langon o manga Israil roo sa kampo

iran sa Gilgal.
YOSOWA 11
Tiyaban i Yosowa so manga Dato sa Pagotaraan
Kagiya maneg i Yabin a dato sa Hasor so makapantag sangkai a miyanggolaola na

piyakisogoan iyan si Yobab a dato sa Madan, ago so manga dato sa Simron ago sa Aksap
2 A lagid mambo o manga dato sa pagotaraan roo ko kapalawan ago sii ko Balintad a
Yordan sa pagabagatan o Ranaw a Galili, ago sii ko kapantaran sa sedepan a marani sa
Dor.
3 Piyakisogoan iyan pen so manga Ikanaanen a kibabaling sa sebangan ago sa sedepan
ago so manga Amoriyo, manga Hitiyo, manga Pirisiyo ago so manga Hibosiyo sii ko
kapalawan a manga inged, ago so manga Hibiyo sii sa rindib o Palaw a Hirmon sii ko
inged a Mispah.
4 Na mililiyo siran a rakes o langon o manga sondaro iran ago tanto a madakel a karo iran
sa katidawa ago manga koda, a so bariboribo a manga taw a datar sa kadakel o peted sa
kilid a ragat.
5 Mitelabok so langon angkai a manga dato na piyakaisaisa iran so bager iran na
mikempo siran langon sii ko Manga Bowalan sa Mirom sa kapakipetidawa iran ko manga
Israil.
6 Samaoto na pitero o Allah ki Yosowa a “Di ngka siran keleken, ka amay ka mapita sa
datar ai a oras na peladen ko siran rekano langon a miyamatay. Pelelepoa ngka so manga
koda iran na totonga ngka so manga karo iran.”
7 Mandiyadi na lomiyalakaw si Yosowa a oonotan o langon a sondaro niyan na tekaw den

a kiyagobata iran kiran sii ko Manga Bowalan sa Mirom.
8 Na piyakataban o Allah so manga Israil ko manga ridoay iran. Giyobat iran siran na
piyanaloba iran taman ko ‘Kalaan sa Sidon’ ago Misripot Maim sii sa pagotaraan ago
taman den ko Balintad a Mispah sii sa sebangan;
na piyamono iran siran taman sa da den a ba kiran miyalamba.
9 Na pinggolaola i Yosowa so iniinsarat on o Allah, ka pilelepo iyan so manga koda iran
ago piyanotong iyan so manga karo iran.
10 Oriyan iyan na mipeto si Yosowa na inagaw niyan a Hasor na biyono iyan a pedang so
dato on, ka giya Hasor na makandadato gowani sangkai a langon a ndatoan.
11 Bininasa o manga Israil so langon a taw ron; piyamono iran siran a pedang a da den a
ba iran liyamba a ba pengginawa. Na tiyotong i Yosowa so siti.
12 Inagaw i Yosowa so langon angkai a manga siti na piyamono iyan a pedang so langon
o manga dato on. Tarotop a kiyabinasaa niyan kiran a giyoto den i inisogo on o Mosa a
oripen o Allah.
13 Ogaid na da den a tiyotong o manga Israil ko manga siti a sii miyabangon ko manga
bobongan a liyo ron a Hasor a tiyotong i Yosowa.
14 Kinowa o manga Israil so langon a miyateban iran ago so manga pangangayamen sii
sangkoto a manga siti, ogaid na so langon o manga taw ron na piyamono iran a pedang.
Piyaminasa iran siran sa tarotop a da den a ba iran piyakapagoyag.
15 So den so inisogo o Allah ko Mosa a oripen iyan na inisogo mambo o Mosa ki
Yosowa, na ininggolalan den i Yosowa. Da den a ba on lipas i Yosowa ko langon a
inisogo o Allah ko Mosa.
So Lopa a Miyaagaw i Yosowa
16 Miyaagaw i Yosowa so dalem angkoto a lopa, a so manga kapalawan, so Nigib sa

pagabagatan, so dalem a inged a Gosen, so kapantaran roo sa sedepan, so Balintad a
Yordan ago so manga palaw a rakes o manga rindib iyan sii sa Israil.
1718 Giyangkai a lopa na ipoon sa Palaw a Halak a marani sa inged a Idomiya na taman
den sa Baal Gad sii ko Balintad a Libanon a matatago sa pagabagatan a Palaw a Hirmon.
Miyatey den a kiyapakitidawa i Yosowa ko langon o manga dato sangkai a manga inged,
ogaid na miyadakep iyan siran langon ago piyamono iyan.
19 Da den a isa bo ko manga siti sangkai a pagiingedan a ba miyakipesadanowai sa
kalilintad ko manga Israil liyo ron a Gibiyon a babalingan o manga Hibiyo. So langon a
ped a manga siti na palaya den miyataban o manga Israil sii ko dii katidawa.
20 Ka piyakategas o Allah so manga poso iran sa kapakipetidawa iran ko manga Israil
kaan matarotop a kambinasaa kiran sa da den a ba kiran kapedi, ka giyoto i inisogo o
Allah ko Mosa.
21 Sii sangkoto a masa na somiyong si Yosowa ko kapalawan na bininasa niyan so

manga Anakim a kibabaling roo sa Hibron, sa Dibir, sa Anab ago sii ko langon o manga
kapalawan sa Yodah ago giya Israil. Miyatarotop a kiyabinasaa kiran i Yosowa a rakes o
manga siti iran.
22 Da den a isa ko manga Anakim a ba miyalamba sii ko pagiingedan o manga Israil liyo
ron so maito a miyakapagoyag roo sa Gasa, sa Gat ago sa Asdod.
23 Miyaagaw i Yosowa so dalem angkoto a inged a giyoto so iniinsarat o Allah ko Mosa.

Na pimbagibagi iyan ai ko manga mbatabataa a manga Israil a aya iran kawali. Oriyan
oto na aden a kalilintad ko inged ka minitapelek on so dii katidawa.
YOSOWA 12
So manga Dato a Miyataban o Mosa sa Sebangan a Yordan
Sii sa sebangan a Lawasaig a Yordan na miyataban roo den gowani o manga Israil so
dowa a dato ago miyatangan iran so manga inged iran ipoon sa Lawasaig a Arnon taman
ko Palaw a Hirmon a rakes on so langon o Balintad a Yordan ko masesebangan o
lawasaig.
2 So paganay ron na si Sihon a dato o manga Amoriyo a miyakabaling sa Hisbon. So

lopa a pindatoan iyan na ipoon sa Arowir sii ko temanaan o Balintad a Arnon ago ipoon
sa lembak o balintad taman ko Lawasaig a Yabok a aya temanaan o manga Amoniyo.
Sabaad ai ko inged a Giliyad.
3 Maaped on so Balintad a Yordan ko masesebangan o lawasaig ipoon ko Ranaw a Galili
taman sa Bit Hisimot sa sebangan o Maatay a Ragat ago taman den ko rindib o Palaw a
Pisgah sa pagotaraan.
4 Tiyaban iran pen si Og a dato sa Basan a isa ko moripori a kiyababadan ko manga

Ripayo a miyakabaling sa Astarot ago sa Idri.
5 Aya maaped ko lopa a pindatoan iyan na so Palaw a Hirmon, Salikah ago so dalem a
Basan a iniraot ko temanaan o manga taw sa Gisor ago Maakah a lagid mambo o sabagi
sa Giliyad a iniraot ko temanaan o Sihon a dato sa Hisbon.
6 Giyangkai a dowa kataw a dato i miyataban o Mosa a so oripen o Allah ago so manga
Israil, na inibegay o Mosa so lopa iran ko manga mbatabataa Robin, Gad ago so sabagi ko
mbatabataa Manasih a aya iran kawali.
So manga Dato a Tiyaban i Yosowa sa Sedepan a Yordan
7 Tiyaban i Yosowa ago so manga Israil so langon a manga dato sii ko lopa sa sedepan a
Yordan ipoon sa Baal Gad sii ko Balintad a Libanon a iniraot ko Palaw a Halak sii sa
pagabagatan a marani sa Idomiya. Pimbagibagi i Yosowa angkai a lopa sii ko manga
mbatabataa manga Israil kaan iran makewali.
8 Mirarakes sangkai a lopa so manga kapalawan, so manga bobongan roo sa sedepan, so
Balintad a Yordan, so kikasisilid o manga palaw, so disirto ago so Nigib sii sa
pagabagatan. Babalingan ai o manga Hitiyo, manga Amoriyo, manga Kanaaniyo, manga
Pirisiyo, manga Hibiyo ago manga Hibosiyo.
9 Giyai so manga dato a miyataban o manga Israil:

So dato sa Yariko; so dato sa Ay (a marani sa Bitil);
10 So dato sa Yarosalim; so dato sa Hibron;
11 So dato sa Yarmot; so dato sa Lakis;
12 So dato sa Iglon; so dato sa Gisir;
13 So dato s Dibir; so dato sa Gidir;
14 So dato sa Horman; so dato sa Arad;
15 So dato sa Libnah; so dato sa Adolam;
16 So dato sa Makidah; so dato sa Bitil;
17 So dato sa Tapowah; so dato sa Hipir;
18 So dato sa Apik; so dato sa Lasaron;
19 So dato sa Madon; so dato sa Hasor;
20 So dato sa Simron Miron; so dato sa Aksap;
21 So dato sa Taanak; so dato sa Magido;
22 So dato sa Kidis; so dato sa Hokniyam (sii sa Karmil);
23 So dato sa Dor (sii sa Napot Dor); so dato sa Goyim (sii sa Gilgal);
24 Ago so dato sa Tirsah. Telo polo ago isa kataw langon a manga dato.
YOSOWA 13
So Da Pen Maagaw a Lopa
Kagiya malokes si Yosowa a minitolod den a idad iyan na pitero on o Allah a “Miyalokes
ka den, na aden a tanto a maolad a lopa a da pen maagaw.
2 Giyai so lopa a miyalamba: so langon o kikapagiingedan o manga Pilistiyo ago manga

Gisoriyo,
3 A lopa ini a mibibilang a rek o manga Ikanaanen. Giyangkai a lopa na ipoon sa baogan
a Sihor sii sa sebangan a Misir na iniraot ko temanaan a Ikron sii sa pagotaraan a
mirarakes on so lima a siti o manga Pilistin a giya Gasa, Asdod, Askilon ago Ikron. Da
pen mambo maagaw so lopa o manga Abimiyo
4 Roo sa pagabagatan. Na aden pen a da maagaw a so langon o lopa o manga Kanaaniyo
ago giya Miyarah (a rek o manga taw sa Sidon) a taman den sa Apik sii ko temanaan o
manga Amoriyo
5 A lagid mambo o lopa o manga Gibaliyo ago so dalem o inged a Libanon a matatampar
sa sebangan ipoon sa Baal Gad sii sa pagabagatan o Palaw a Hirmon na taman den sa
Libo Hamat.
6 Mirarakes on pen so langon a lopa o manga taw sa Sidon a kibaba
ling ko kapalawan sii ko pageletan a Libanon ago giya Misripot Maim.
"Mbogaon ko so langon angkai a manga taw sii ko kapegantap kiran o manga Israil.
Na inengkaa ngka o ba ngka di mibegay angkai a lopa sii ko manga Israil a makewali ran
a aya ko rekano den inisogo.
7 Mbagibagia ngka ini kiran sii ko siyaw ka mbatabataa kiran ago sii ko sabaad ko
mbatabataa Manasih."
So Kiyambagibagia ko Lopa sa Sebangan a Yordan
8 So sabaad ko mbatabataa Manasih ago so manga mbatabataa Robin ago Gad na

miyakowa iran den so lopa a inisenggay kiran o Mosa a oripen o Allah sii ko
masesebangan a Yordan.
9 Giyangkai a lopa na ipoon sa Arowir sii ko kilild o Balintad a Arnon ago ipoon ko siti
sii ko lembak o balintad a mirarakes on so dalem a kapantaran sa Midiba taman den sa
Dibon.
10 Iniraot ai ko temanaan o manga Amoniyo, na maaped on so dalem a pagiingedan a
kiyandatoan i Sihon a dato o manga Amoriyo a miyakandato sa Hisbon.
11 Mirarakes on pen a Giliyad a so inged a babalingan o manga taw sa Gisor ago Maakah
ago so pen so langon o Palaw a Hirmon ago so dalem a Basan taman den sa Salikah
12 A giyoto so langon o ndatoan i Og a miyakandato roo sa Astarot ago sa Idri. Isa
sekaniyan ko aya bo miyalamba a manga moriyataw o manga Ripaim (a so manga iganti).
Miyataban siran den o Mosa na miyaagaw niyan so lopa iran.
13 Ogaid na da bogawa o manga Israil so manga taw sa Gisor ago giya Maakah na
pepeginged siran den a maaped ko manga Israil taman imanto.
14 So mbatabataa Libi na da kasaadi o Mosa sa lopa, ka aya iran kawali na so bagian iran
ko manga ipesoasoat a petotongen ko aparan o Allah a Tohan o Israil ka giyoto i initopa
niyan kiran.
So Lopa a Inisenggay ko Mbatabataa Robin
15 Giyai so lopa a inisenggay o Mosa ko manga pamiliya a ped ko mbatabataa Robin:
16 So lopa iran na ipoon sa Arowir ko kilid o Balintad a Arnon ago ipoon ko siti ko
lembak o balintad a iniraot ko kapantaran a malelepas sa Midiba.
17 Mirarakes on a Hisbon a lagid mambo o langon a manga siti sii ko kapantaran, a giya
Dibon, Bamotbaal, Bitbaalmiyon,
18 Yahasah, Kidimot, Mipaat,
19 Kiriyataim, Sibmah, Siritsahar sii ko poro o bobongan ko balintad,
20 Bitpiyor, so kipakaiiris ko Palaw a Pisgah, ago giya Bithisimot.
21 Maaped on pen so kalangolangon a siti ko kapantaran ago so dalem a ndatoan i Sihon
a dato o manga Amoriyo a miyakandato sa Hisbon. Miyataban sekaniyan den o Mosa a
lagid mambo o manga dato a kibabaling sangkoto a inged a miyamakapagabanga a ped i
Sihon, a so manga dato sa Midiyan, Ibi, Rikim, Sor, Hor ago giya Riba.
22 Si Balaam a wata i Biyor a so pangangatao na isa sekaniyan ko miyapatay o manga
Israil ko dii katidawa.
23 So lawasaig a Yordan na aya masesedepan a temanaan o lopa o mbatabataa Robin.
Giyangkai a manga siti a rakes o pepamagonayonayan ko oman i siti na aya kawali o
manga pamiliya a ped ko mbatabataa Robin.
So Lopa a Inisenggay ko Mbatabataa Gad
24 Giyai so lopa a inisenggay o Mosa ko manga pamiliya a ped ko mbatabataa Gad:
25 Mirarakes ko lopa iran a Hasir ago so langon a manga siti sa Giliyad, ago so sabaad ko
lopa o manga Amoniyo a iniraot sa Arowir sii sa sebangan a Rabah.
26 So lopa iran na ipoon sa Hisbon
taman den sa Ramatmispah ago Bitonim, ago ipoon sa Mahanaim taman sa temanaan a
Dibir.
27 Sii ko Balintad a Yordan na mirarakes on a Bitharam, Bitnimrah, Sokot, Sapon, a
giyoto so miyalamba ko ndatoan i Sihon a dato sa Hisbon. So masesedepan a temanaan o
lopa iran na so Lawasaig a Yordan taman den sa Ranaw a Galili sii sa pagotaraan.
28 Giyangkai a manga siti a rakes o pepamagonayonayan ko oman i siti na aya kawali o
manga pamiliya a ped ko mbatabataa Gad.
So Lopa a Inisenggay ko Sabaad ko Mbatabataa Manasih
29 Giyai so lopa a inisenggay o Mosa ko manga pamiliya a ped ko sabaad ko mbatabataa

Manasih:
30 So lopa iran na ipoon sa Mahanaim a maaped on so langon o inged a Basan, so dalem

a ndatoan i Og a dato sa Basan ago so langon a manga siti sa Yair a matatago sa Basan, a
nem polo a manga siti.
31 Mirarakes on so sabagi sa Giliyad ago so pen so siti a Astarot ago giya Idri sii ko
ndatoan o Og sa Basan. Langon den ai na inibegay ko sabaad ko manga mbawataan i
Makir a wata i Manasih.
32 Giyai so kiyambagibagia o Mosa ko lopa sii ko sabala a Yordan sa sebangan a Yariko

isako sisii sekaniyan sa kapantaran sa Mowab.
33 Ogaid na da begi o Mosa sa lopa so mbatabataa Libi, ka aya kawali iran na so Allah a
Tohan o Israil ka giyoto i initopa niyan kiran.
YOSOWA 14
So Kiyambagibagia ko Lopa ko Masesedepan a Yordan
Giyai so totolan ko kiyambagibagia ko lopa sa inged a Kanaan sii ko manga Israil.

Pimbagibagi ini i Iliyasar a so imam, si Yosowa a wata i Non ago so manga olowan o
manga pamiliya a ped ko manga mbatabataa iran.
2 So manga kawali angkai a siyaw ago tenga ka mbatabataa na miyapakaseseng
gaya kiran a miyakanggolalan ko ripa a giyoto so inisogo o Allah ko Mosa.
34 So ped a manga mbatabataa kiran a so dowa ago tenga na kiyabegan den o Mosa sa
kawali iran roo ko masesebangan a Yordan. (So kiyababadan ko Yosop na miyabaloy a
dowa ka mbatabataa a so Manasih ago so Ipraim.) Ogaid na so manga moriyataw i Libi
na da kasaadi sa mapekewali ran ko inged a rowar ko manga siti a kebalingan iran a rakes
on so manga pangomaan a kapenataban o manga pangangayamen iran.
5 So den so inisogo o Allah ko Mosa na giyoto i kiyambagibagia o manga Israil ko lopa.
So Siti a Hibron na Inibegay ki Kaleb
6 Miyakaisa a gawii na aden a manga taw a poon ko mbatabataa Yodah a somiyong ki

Yosowa roo sa Gilgal. So isa kiran a si Kaleb a wata i Yaponih a so Kiniyo na pitero iyan
ki Yosowa a "Katawan ka so pitero o Allah ko Mosa a oripen o Allah roo sa Kadis
Barniya makapantag raken ago seka.
7 Pat polo ragon a idad aken sii ko kiyasogoa raken o Mosa ipoon sa Kadis Barniya sa
kaperiksaa ko ko inged. Na kagiya komasoy ako na piyanotol aken on so miyapamikir
aken a tito a osayan.
8 Ogaid na so manga pagari aken a miyonot raken na piyakalekan iran so manga taw na
piyakadaan iran sa inam. Inonta bo na miyaratiyaya ko ko Allah a Tohan ko sa iklas ko
poso aken.
9 Na inisepa raken o Mosa sangkoto a gawii a 'Mataan den a so lopa a kiyapanadaan ka
na mapekewali ngka ago so manga wata a ka sa taman sa pakataman sabap sa
piyaratiyaya ngka so Allah a Tohan ko sa iklas ko poso o ka.'
10 “Imanto na miyaipos den so pat polo ago lima ragon a kapegoyaga raken o Allah ipoon
ko kiyateroa sii o Allah ko Mosa sii ko dii kapagenebeneb o manga Israil ko disirto. Na,
ilaya ko ngka, ka miyakawalo polo ago lima ragon a idad aken
11 Na mabager ako pen imanto a lagid gowani ko kiyasogoa raken o
Mosa. Kegaga ko pen so kapakipetidawa ago so apiya antonaa a ped a penggalebeken.
12 Kagiya ka maoto na began ka raken imanto angkai a kapalawan a lopa a initopa raken
o Allah sa gawii oto. Piyanotol ami reka sa masa oto so makapantag ko manga iganti a
bebetowan sa Anakim a kibabaling roo sii ko manga ala ago kikokotaan a manga siti.
Ogaid na o keped raken so Allah na mbogaon ko siran sangkoto a inged a giyoto so
miyatero o Allah."
13 Na inipamangni i Yosowa sa rakmat si Kaleb a wata i Yaponih na inibegay niyan so

siti a Hibron a aya niyan kawali.
14 Giya Hibron na rek den o manga moriyataw i Kaleb a wata i Yaponih a so Kiniyo
taman imanto sabap sa miyaratiyaya sekaniyan ko Allah a Tohan o Israil sa iklas ko poso
iyan.
15 Gowani na bebetowan a Hibron sa Kiriyat Arba a aya maana niyan na Siti o Arba. (Si
Arba na aya lebi a kababantogan a mama ko manga Anakim.)
Na aden a kalilintad ko inged ka minitapelek on so dii katidawa.
YOSOWA 15
So Lopa a Miyambagian o Mbatabataa Yodah
So lopa a miyambagian o manga pamiliya a ped ko mbatabataa Yodah na iniraot ko

temanaan a Idomiya a aya pitemanan ko pagabagatan sii ko disirto a Sin.
2 Aya temanaan angkai a lopa sa pagabagatan na inipoon ko pagabagatan a kiyaposan ko

Maatay a Ragat
3 A miyakataros ko pagabagatan o Ipegokit sa Akrabim taman ko disirto sa Sin na
miyakadayon sii sa pagabagatan a Kadis Barniya taman den sa Hisron. Ipoon roo na
miyakadayon ai sa tampar sa pagotaraan taman sa Adar a ron den miyakakori a
miyakaantap sa Karkaa.
4 Ipoon roo na miyakataros ai taman sa Asmon ago roo pen ko Baogan sa Misir, na
miyakakedeg ko kilid o Baogan taman den ko
Ragat a Miditiraniyo. Giyanan i temanaan o inged a Yodah roo sa pagabagatan.
5 So temanaan iyan sa sebangan na so kilid o Maatay a Ragat taman den ko pekeantonan

on ko Lawasaig a Yordan.
So temanaan iyan sii sa pagotaraan na inipoon ko kiyaposan sa Yordan
6 Na miyakadayon sa pagotaraan taman sa Bit Hoglah, na miyakataros sii ko pagotaraan a
Bit Arabah a iniraot den ko Ator a Bohan (Si Bohan na wata a mama i Robin).
7 Ipoon roo na miyakatarapas ai ko Balintad a Akor taman sa Dibir a ron den miyakasilay
sa tampar sa pagotaraan ago miyakadayon sa Gilgal a mipepantag o Petekedegan sa
Adommim sii sa pagabagatan o balintad. Na miyakataros ai ko manga bowalan sa
Insimis na iniraot den sa Inrogil.
8 Ipoon roo na miyakatarapas ai ko Balintad a Hinom sii ko pagabagatan o bobongan a
ron so siti a Yarosalim a babalingan o manga Hibosiyo, na miyakataros ko poro o palaw
sii ko masesedepan o Balintad a Hinom sii ko pagotaraan a kiyaposan ko Balintad a
Ripaim.
9 Ipoon roo na miyakadayon so temanaan a iniraot ko manga bowalan sa Niptowah na
miyakataros roo ko manga siti a marani sa Palaw a Ipron, na roo miyakakori sa tampar sa
Baalah (a aya den Kiriyat Yarim).
10 Sii sa sedepan a Baalah na ron ai miyabangkiring a miyakaantap ko kapalawan sa
Idomiya na miyakataros ko pagotaraan o kababaan o Palaw a Yarim (a aya den Kisalon)
na miyakatondagay taman sa Bit Simis ago miyakataros den sa Timnah.
11 Iniraot so temanaan ko silid o bobongan sa pagotaraan a Ikron a roo miyakakori sa
tampar sa Sikron ago miyakasagad ko Palaw a Baalah na miyapos den sa Ragat a
Miditiraniyo.
12 Na so temanaan angkai a lopa sa sedepan na so kilid a Ragat a Miditiraniyo.

Giyai i manga temanaan ko mbabalibeta ko lopa o manga taw ko mbatabataa Yodah.
Miyaagaw i Kaleb a Hibron ago giya Dibir
13 Sabap ko inisogo o Allah ki Yosowa na inibegay niyan ki Kaleb a wata i Yaponih so

sabagi ko lopa o mbatabataa Yodah. Aya inibegay ron na giya Hibron a so siti a rek o
Arba a ama o Anak.
14 Na piyamogaw ron i Kaleb so telo a manga mbawataan o Anak, a so Sisay, so Ahiman
ago so Talmay.
15 Ipoon roo na somiyong sekaniyan sa Dibir sa kapakipetidawa iyan ko manga taw ron.
(Giyangakai a siti na bebetowan gowani sa Kiriyat Sipir.)
16 Na pitero i Kaleb a "Saden sa makagobat ago makaagaw sa Kiriyat Sipir na
pakipengaroma ko ron so wata aken a babay a si Aksah."
17 Na si Otniyal a wata i Kinis a pagari i Kaleb na aya miyakaagaw ko siti, na
piyakipangaroma on i Kaleb so wata iyan a si Aksah.
18 Kagiya makatepi siran na inisango i Aksah ki Otniyal a kapakapangni niyan ki ama
iyan sa lopa. Na somiyong si Aksah ki Kaleb na sii kiyatepad iyan ko kimar iyan na iniise
on i Kaleb a "Antonaa i pagangin ka raken?"
19 Inisembag iyan a "Begi ako ngka sa pamemegayan. Kiyabegan ako ngka den sa lopa
roo sa Nigib a kamara a darpa, na began ka raken pen so aden a manga pakaig on." Na
bigan sekaniyan pen i Kaleb sa lopa a aden a manga bowalan on ko kaporoan ago sa
kababaan.
So manga Siti a Miyakewali o Yodah
20 Giyai so miyakewali o manga pamiliya a ped ko mbatabataa Yodah:
21 So manga siti iran sii sa pagabagatan ko lopa iran a marani ko temanaan a Idomiya na
giya Kabsil, Idir, Yagor,
22 Kinah, Dimonah, Adadah,
25 Kidis, Hasor, Itnan,
24 Sip, Tilim, Biyalot,
25 Hasorhadatah, Kiriyothisron (a aya den Hasor),
26 Amam, Sima, Moladah,
27 Hasargadah, Hismon, Bitpilit,
28 Hasarsowal, Birsiba, Bisiyotiyas,
29 Baalah, Iim, Isim,
30 Iltolad, Kisil, Hormah,
31 Siklag, Madmanah, Sansanah,
32 Libaot, Silhim, Ain ago giya Rimon: dowa polo langon ago siyaw a manga siti a
mirarakes on so pepamagonayonayan ko oman i siti.
33 So manga siti iran sii ko kapantaran na giya Istaol, Sorah, Asnah,

34 Sanowah, Inganim, Tapowah, Inam,
35 Yarmot, Adolam, Sokoh, Asikah,
36 Saaraim, Aditaim, Gidirah ago giya Gidirotaim: sapolo ago pat a manga siti a
37 Aden pen a manga siti iran roo a giya Sinan, Hadasah, Migdalgad,
38 Diliyan, Mispah, Joktiil,
39 Lakis, Boskat, Iglon,
40 Kabon, Lamam, Kitlis,
41 Gidirot, Bitdagon, Naamah ago giya Makidah: sapolo ago nem a manga siti a
42 Aden pen a manga siti iran a giya Libnah, Itir, Asan,

43 Iptah, Asnah, Nisib,
44 Kailah, Aksib ago giya Marisah: siyaw a manga siti a mirarakes on so
pepamagonayonayan ko oman i siti.
45 Aden pen a rek iran a siti a Ikron ago so melilibeta on a manga inged
46 Ago so langon a siti a rakes o pepamagonayonayan on a marani sa Asdod ipoon sa
Ikron taman den sa Ragat a Miditiraniyo.
47 Rek iran pen so manga siti a Asdod ago Gasa a rakes o melilibeta on a manga inged
ago pepamagonayonayan on taman den sa Baogan sa Misir ago so kilid o Ragat a
Miditiraniyo.
48 Sii ko kapalawan na rek iran so manga siti a Siyamir, Yatir, Sokoh,

49 Danah, Kiriyatsanah (a aya den Dibir),
50 Anab, Istimowa, Anim,
51 Gosin, Holon ago giya Giloh: sapolo ago isa a siti a mirarakes on so
52 Aden pen a giya Arab, Domah, Isiyan,

53 Yanim, Bittapowah, Apikah,
54 Homtah, Hibron ago giya Siyor: siyaw a manga siti a mirarakes on so
55 Aden pen a giya Maon, Karmil, Sip, Yotah,

56 Yasriil, Yokdiyam, Sanowah,
57 Kain, Gibiyah ago giya Timnah: sapolo a manga siti a mirarakes on so
58 Aden pen a giya Halhol, Bitsor, Gidor,

59 Maarat, Bitanot ago giya Iltikon: nem a manga siti a mirarakes on so
60 Aden pen a Kiriyatbaal (a aya den Kiriyatyarim) ago giya Rabah: dowa a siti a
mirarakes on so pepamagonayonayan on.
61 Aya matatago ko disirto na giya Bitarabah, Midin, Sikakah,

62 Nibsan, Matimos a Siti ago giya Ingidi: nem a manga siti a mirarakes on so
63 Ogaid na so manga taw sa Yodah na di iran den kebogaw so manga Hibosiyo a

kibabaling sa Yarosalim, na pepeginged den so manga Hibosiyo a maaped ko manga
manga taw sa Yodah taman imanto.
YOSOWA 16
So Lopa a Miyambagian o Ipraim ago so Manasih
So temanaan o lopa a miyambagian o manga moriyataw o Yosop na inipoon sa Lawasaig

a Yordan a marani sa Yariko sii sa sebangan o manga bowalan sa Yariko na
miyakatarapas ko disirto taman den sa Bitil roo ko kapalawan.
2 Ipoon sa Bitil na miyakataros ai sa Los a iniraot sa Atarot a aya babalingan o manga
Arkitiyo
3 Na miyakadayon ai sa tampar sa sedepan taman ko inged o manga Yaplitiyo a taman
den sa Bithoron sa Baba. Ipoon roo na miyakataros ai sa Gisir na miyapos den roo ko
Ragat a Miditiraniyo.
4 So manga moriyataw o Yosop a so manga mbatabataa Ipraim ago Manasih sa sedepan
na miyatangan iran angkai a kawali iran.
So Lopa a Miyambagian o Ipraim
5 Giyai so lopa o manga pamiliya a ped ko mbatabataa Ipraim:

So temanaan iyan sa sebangan na inipoon sa Atarotadar na miyakadayon taman sa
Bithoron sa Poro.
6 Ipoon roo na miyakataros ai taman ko Ragat a Miditiraniyo. So siti a Mikmitah na roo
matatago sa pagotaraan o temanaan, na sii ko masesebangan a Mikmitah na miyakakori
so temanaan sa tampar sa Taanatsiloh na miyakasagad on sii sa sebangan ago miyakataros
den taman sa Yanohah.
7 Ipoon sa Yanohah na miyakadayon ai sa tampar sa pagabagatan taman sa Atarot ago
giya Naarah na iniraot sa Yariko na miyapos den ko Lawasaig a Yordan.
8 Ipoon sa Tapowah na miyakaantap so temanaan sa sedepan a miyakadayon taman ko
Baogan sa Kanah na miyapos den roo ko Ragat a Miditiraniyo.
Giyai so kawali o manga pamiliya a ped ko mbatabataa Ipraim
9 A mirarakes on pen so ped a manga siti ago so pepamagonayonayan on a inibegay kiran
sii ko lopa a miyakewali o mbatabataa Manasih.
10 Ogaid na da iran bogawa so manga Kanaaniyo a kibabaling sa Gisir. Sabap roo na so

manga Kanaaniyo na pepeginged den a maaped ko manga taw sa Ipraim taman imanto,
ogaid na miyapangongoripen siran o manga taw sa Ipraim.
YOSOWA 17
So Lopa a Miyambagian o Manasih sa Sedepan
Aden pen a lopa sa sedepan a Yordan a miyambagian o sabaad ko mbatabataa Manasih a

aya kaka a wata o Yosop. Giya Giliyad ago Basan roo sa sebangan a Yordan na
minibegay den ko manga mbawataan o Makir a aya kaka a wata o Manasih ago ama o
Giliiyad sabap sa mala sekaniyan a sondaro.
2 So ped a manga pamiliya a ped ko mbatabataa Manasih a miyakambagian ko lopa sa
sedepan a Yordan na so manga pamiliya o Abiyasir, Hilik, Asriyal, Sikim, Hipir ago
Simida. Manga moriyataw siran a manga mama o Manasih a wata o Yosop.
3 Ogaid na si Silopihad a wata i Hipir a wata i Giliyad a wata i Makir a aya wata o
Manasih na da a ba niyan manga wata a manga mama ka manga babay bo. Aya ngaran
iran na si Maklah, si Nowah, si Hoglah, si Milkah ago si Tirsah.
4 Na somiyong siran ki Iliyasar a imam ago sii ki Yosowa a wata i Non ago sii ko manga
olowan na pitero iran a "Inisogo o Allah ko Mosa a kambegi rekami sa lopa a makewali
ami a lagid mambo o kinibegan on ko manga mama a ped ko mbatabataa mi."
Kagiya ka maoto na bigan siran i Yosowa sa lopa a makewali ran a lagid mambo o
miyakewali o manga pagari o ama iran a manga mama, ka giyoto so sogoan o Allah.
5 Minisabap sii na miyakambagian so Manasih sa sapolo bagi ko lopa a inipagoman ko
manga inged a Giliyad ago Basan sii sa sabala a Yordan
6 Ka kagiya so manga moriyataw o Manasih a manga babay na miyakakewali sa lopa a
lagid mambo o manga moriyataw niyan a manga mama. (So inged a Giliyad na rek den o
ped a manga moriyataw o Manasih.)
7 So temanaan o lopa o mbatabataa Manasih na inipoon sa Asir a iniraot den sa Mikmitah

sii sa sebangan a Sikim. Ipoon roo na miyakadayon ai sa tampar sa pagabagatan taman
ko darpa o manga taw a kibabaling sa Intapowah.
8(So kalopaan ko melilibeta sa Tapowah na rek den o Manasih, ogaid na so siti a
Tapowah a matatago ko temanaan o lopa o Manasih na rek o mbatabataa Ipraim.)
9 Ipoon roo na miyakadayon so temanaan sa tampar sa pagabagatan taman sa Baogan a
Kanah. So ped ko manga siti sa pagabagatan o baogan na rek o mbatabataa Ipraim apiya
pen o sii siran ko soled o lopa o Manasih. Na miyakataros so temanaan o Manasih a
makakekedeg ko kilid o baogan sa pagotaraan na miyapos den ko Ragat a Miditiraniyo.
10 So lopa sa pagabagatan o baogan na rek o Ipraim, na so matatago ko pagotaraan iyan
na rek o Manasih, na so kilid o Ragat a Miditiraniyo na aya niyan temanaan roo sa
sedepan. So lopa o Asir na sii sa pagotaraan o Manasih, na so rek o Isakar na roo ko
masesebangan iyan.
11 Sii ko soled o lopa o Isakar ago Asir na aden a nem a manga siti on a inibegay ko
Manasih a mirarakes on so manga taw ron ago so pepamagonayonayan ko oman i siti:
giya Bitsiyan, Ibliyam, Dor, Indor, Taanak ago giya Migido.
12 Ogaid na so manga moriyataw o Manasih na di iran den kebogaw so manga Ikanaanen

a kibabaling sangkoto a manga siti ka totomegel siran den sa kapakababaling iran roo.
Apiya pen oto na sii ko kiyapakabager o manga Israil na tigel iran makanggalebek so
manga Ikanaanen, ogaid na da iran siran malengan mogaw.
Miyamangni so Mbawataan o Yosop sa Omanan so Lopa iran
14 So manga mbawataan o Yosop na pitero iran ki Yosowa a "Ino kami ngka baden
mbegi sa satiman a bagian ko lopa a makewali ami? Madakel kami a tanto sabap sa
kiyarakmatan kami den o Allah."
15 “O madakel kano," a inisembag i Yosowa, "a maito rekano bo so kapalawan a inged sa
Ipraim na takedeg kano ko manga kalasan na nggeba kano ron sa darpa a kebalingan iyo
roo ko lopa o manga Pirisiyo ago manga Ripaim."
16 Na pitero iran a "So kapalawan na di rekami petoon, na so langon a Ikanaanen a

kibabaling ko kapantaran na aden a manga karo iran a potaw sa katidawa a melagid so
kibabaling sa Bitsiyan ago so melilibeta on a manga darpa a lagid mambo o siran oto a
kibabaling ko Balintad a Yasriil."
17 Mandiyadi na pitero i Yosowa ko manga mbatabataa Ipraim ago Manasih a manga

moriyataw o Yosop a "Mataan a madakel kano ago tanto a mala i gees. Kena a ba isa bo
a darpa a mapembagian iyo.
18 Kekowa niyo pen so manga kapalawan a inged a ipangalasanen. Mapenggeba iyo ini
na kekowa niyo den taman ko pinakamawatan a manga temanaan iyan. Na makapantag
ko manga Ikanaanen na kebogaw niyo siran apiya pen aden a manga karo iran a potaw
ago mabager siran a manga taw."
YOSOWA 18
So Kiyambagibagia ko Miyalamba a Lopa
Sii ko kiyatabana iran ko inged na so langon o isa ka maginged a manga Israil na

mitimotimo roo sa Siloh na piyakatindeg iran so Barombarong a dii Telabokan.
2 Ogaid na aden pen a pito a mbatabataa manga Israil a da pen kasaadi ko lopa a
makewali ran.
3 Na pitero i Yosowa ko manga Israil a "Ay katey a kisendoden iyo ko katengana niyo ko
lopa a inibegay rekano o Allah a Tohan o manga apo iyo?
4 Pamili kano sa tetelo kataw a poon ko oman i mbatabataa. Pakipegenebeneb aken kiran
so dalem a kaingedan na isorat iran so manga temanaan o lopa a kebayaan kewali o oman
i mbatabataa; na kesoy siran raken bo.
5 Mapembaabaad iran so lopa sa pito bagi. So mbatabataa Yodah na di den keaog ko
lopa iran sa pagabagatan a lagid mambo o manga kiyababadan ko Yosop roo sa
pagotaraan.
6 Amay ka maipos iyo den somorat so manga temanaan o oman i bagian ko pito bagi ko
lopa na kewit iyo raken sii na peripaan aken sii ko kamamasai ron o Allah a Tohan tano
kaan matendo o antonaa i bagian on a makewali o oman i isa a mbatabataa.
7 Ogaid na so manga Libitiyo na di kesaadan sa lopa a lagid iyo ka so kapegimam iran
ko Allah i kawali iran. So manga mbatabataa Gad ago Robin ago so sabaad ko Manasih
na miyakowa iran den so kawali iran roo sa sebangan a Yordan a inibegay kiran o Mosa a
oripen o Allah."
8 Na sii ko kapengganat o manga mama ko lalakaw iran na ininsaratan siran i Yosowa a

tig iyan a "Ikano roo na pagenebeneba niyo so lopa na soraten iyo so manga temanaan
iyan. Maipos oto na kasoy kano raken ka peripaan aken sii ko kamamasai ron o Allah sii
sa Siloh sa katendoa ko bagian ko lopa a kekowa o oman i mbatabataa."
9 Na lomiyalakaw so manga mama na piyagenebeneb iran so inged na inisorat iran ko
ribro so manga temanaan o oman i bagian ko pito bagi on a rakes on so manga siti sii ko
oman i bagian. Na komiyasoy siran ki Yosowa roo ko kampo sa Siloh.
10 Roo sa Siloh na rinipa ini i Yosowa sii ko kamamasaan o Allah sa katendoa niyan ko
bagian ko lopa a pakipembagian iyan ko oman i mbatabataa manga Israil.
So Lopa a Inibegay ko Baniyamin
11 So paganay a bagian ko lopa a miyaripa na inibegay ko manga pamiliya a ped ko

mbatabataa Baniyamin. Giyai na sii ko pageletan o lopa o Yodah ago so lopa o manga
moriyataw o Yosop.
12 So temanaan o lopa iran sa pagotaraan na ipoon sa Lawasaig a Yordan na

miyakatakedeg ko silid sa pagotaraan a Yariko ago miyakataros sa tampar sa sedepan a
miyakatarapas ko manga kapalawan na iniraot den sa disirto sa Bitabin.
13 Ipoon roo na miyakadayon ai sa tampar sa pagabagatan a miyakaantap sa Los (a aya
den Bitil) na miyakataros taman sa Atarotadar sii ko bobongan a matatago sa pagabagatan
a BitHoron sa Baba.
14 Roo miyakakori so temanaan a miyakadayon sa tampar sa pagabagatan ipoon ko

masesedepan a kilid angkai a bobongan ago miyakataros taman den sa Kiriyatbaal (a aya
den Kiriyatyarim) a so isa a siti a rek o mbatabataa Yodah. Giyanan i temanaan o lopa
iran roo sa sedepan.
15 So temanaan iyan sa pagabagatan na ipoon ko kilid a Kiriyatyarim na miyakadayon sa

tampar sa sedepan taman ko Manga Bowalan sa Niptowah.
16 Miyakataros ai taman ko kababaan o palaw a makatotolong ko Balintad a Hinom sii ko
pagotaraan a kiyaposan ko Balintad a Ripaim. Ipoon roo na miyakadayon sa tampar sa
pagabagatan a miyakatarapas ko Balintad a Hinom sii ko pagabagatan o kilid o
babalingan o manga Hibosiyo, na miyakataros den taman sa Inrogil.
17 Sii den miyakakori so temanaan sa tampar sa pagotaraan a miyakadayon sa Insimis na
miyakataros taman den sa Gililot a mipepantag o Petekedegan sa Adomim. Ipoon roo na
miyakatondagay ini ko Ator a Bohan (si Bohan na wata i Robin)
18 Na miyakadayon ko pagotaraan o mabebakenal a makatotolong ko Balintad a Yordan.
Na miyakatondagay oto sii ko Balintad
19 Na miyakataros sii ko pagotaraan a kilid a BitHoglah na miyapos den ko pagotaraan a
kiyaposan ko Maatay a Ragat sii ko pekeantonan on o Lawasaig a Yordan. Giyanan i
pagabagatan a temanaan o lopa iran.
20 Na aya temanaan iyan sa sebangan na so Lawasaig a Yordan.

Giyai i manga temanaan o lopa a miyakewali o manga pamiliya a ped ko mbatabataa
Baniyamin.
So manga Siti a Rek o Baniyamin

21 So manga siti a rek o manga pamiliya a ped ko mbatabataa Baniyamin na giya Yariko,
Bithoglah, Imikkisis
22 Bitarabah, Simaraim, Bitil,
23 Abim, Parah, Oprah,
24 Kiparamoni, Opni ago giya Giba a sapolo ago dowa a manga siti a mirarakes on so
25 Aden pen a manga siti iran a Gibiyon, Ramah, Birot,

26 Mispih, Kipirah, Mosah,
27 Rikim, Irpiil, Taralah,
28 Sila, Hailip, Hibos (a aya den Yarosalim), Gibiyah ago giya Kiriyatyarim a sapolo ago
pat a manga siti a mirarakes on so pepamagonayonayan ko oman i siti.
Giyai so lopa a miyakewali o manga pamiliya a ped ko mbatabataa Baniyamin.
YOSOWA 19
So Lopa a Inibegay ko Simiyon
So ikadowa a bagian ko lopa na inibegay ko manga pamiliya a ped ko mbatabataa

Simiyon. Giyangkai a kawali iran na sii makasosoled ko lopa a aya kawali o mbatabataa
Yodah.
2 So manga siti a mirarakes on na giya Birsiba, Siba, Moladah,
3 Hasarsiyowal, Balah, Isim,
4 Iltolad, Bitol, Hormah,
5 Siklag, Bitmarkabot, Hasarsosah,
6 Bitlibaot ago giya Siyarohin: sapolo ago telo a manga siti a mirarakes on so
7 Aden pen a manga siti iran a Ain, Rimon, Itir ago giya Asiyan: pat a manga siti a rakes
o pepamagonayonayan ko oman i siti.
8 Mirarakes on pen so langon a inged ko melilibeta sangkai a manga siti taman sa
Baalatibir (a aya den Ramah) sii sa pagabagatan.
Giyai so lopa a inibegay ko manga pamiliya a ped ko mbatabataa Simiyon a makewali
ran.
9 Makasosoled ai ko lopa o mbatabataa Yodah ka kagiya so lopa a inibegay ko Yodah na
lebi kiran a maolad.
So Lopa a Inibegay ko Sibolon
10 So ikatelo a bagian ko lopa na inibegay ko manga pamiliya a ped ko mbatabataa

Sibolon.
So lopa iran na iniraot sa Sarid.
11 Ipoon roo na miyakadayon oto sa tampar sa sedepan a miyakasagad sa Mariyal taman
den sa Dabisit ago so baogan ko masesebangan a Yokniyam.
12 Na ipoon ko sabala a Sarid na miyakadayon so temanaan sa tampar sa sebangan taman
ko temanaan a Kislottabor a miyakataros oto taman sa Dabirat na miyakatakedeg taman
den sa Yapiya.
13 Ipoon roo na miyakataros ai sa tampar sa sebangan taman sa Gathipir ago Itkasin a roo
den miyakakori a miyakaantap sa Niyah sii ko kiyapakataros iyan sa Rimon.
14 Sii sa pagotaraan na miyakakori so temanaan a miyakaantap sa Hanaton a iniraot den
sa Balintad a Iptahil.
15 Mirarakes sangkai a lopa so manga siti a Katah, Nahalal, Simron, Idalah ago giya
Bitlihim: sapolo ago dowa a manga siti a rakes o pepamagonayonayan ko oman i siti.
16 Giyai so kawali o manga pamiliya a ped ko mbatabataa Sibolon.
So Lopa a Inibegay ko Isakar
17 So ikapat a bagian ko lopa na inibegay ko manga pamiliya a ped ko mbatabataa Isakar.

18 Mirarakes ko lopa iran so manga siti a Yasriil, Kisolot, Siyonim,
19 Haparaim, Siyon, Anaharat,
20 Rabit, Kisiyon, Ibis,
21 Rimit, Inganim, Inhadah ago giya Bitpasis.
22 So temanaan iyan na iniraot sa Tabor, Siyahasomah ago Bitsimis, na miyapos den roo
ko Lawasaig a Yordan: sapolo ini ago nem a manga siti a mirarakes on so
23 Giyai so lopa a miyakewali o manga pamiliya a ped ko mbatabataa Isakar.
So Lopa a Inibegay sa Asir
24 So ikalima a bagian ko lopa na inibegay ko manga pamiliya a ped ko mbatabataa Asir.

25 Mirarakes sangkai a lopa so manga siti a Hilkat, Hali, Bitin, Aksiyap,
26 Alamilik, Amad ago giya Misiyal. So temanaan iyan sa sedepan na ipoon sa Karmil a
miyakadayon sa Sihorlibnat
27 Na sii den miyakakori a miyakaantap sa sebangan a iniraot sa Bitdagon, na
miyakataros ai a miyakasagad sa Sibolon ago so Balintad a Iptahil sii ko kiyapakataros
iyan sa tampar sa pagotaraan taman den sa Bitimik ago Niyal. Miyakataros ai sa tampar
sa pagotaraan taman so manga siti a Kabol,
28 Ibron, Rihob, Hamon ago giya Kanah na iniraot den sa Mala a Sidon.
29 Sii den miyakakori so temanaan sa tampar sa Ramah a iniraot ko kokotaan a siti a Tiro
a sii den miyakakori sa Hosah na miyapos den ko Ragat a Miditiraniyo. Mirarakes
sangkai a lopa so manga siti a Mahalab, Aksib,
30 Omah, Apik ago giya Rihob: dowa polo ago dowa a manga siti a rakes on so
31 Giyai so lopa a miyakewali o manga pamiliya ko mbatabataa Asir.
So Lopa a Inibegay ko Naptali

32 So ikanem a bagian ko lopa na inibegay ko manga pamiliya a ped ko mbatabataa
Naptali.
33 So temanaan iyan na ipoon sa Hilip, ipoon ko kayo a Kalipapa roo sa Saananim na

miyakadayon ai taman sa Adaminikib ago Yabmil a iniraot sa Lakom na miyapos den ko
Lawasaig a Yordan.
34 Roo den miyakakori so temanaan sa tampar sa sedepan a miyakadayon taman sa
Asnottabor ago miyakataros ai sa Hokok a iniraot den sa lopa o Sibolon sii sa pagotaraan
ago so lopa o Asir sii sa sedepan ago so Lawasaig a Yordan sa sebangan.
35 So kikokotaan a manga siti a mirarakes sangkai a lopa na giya Sidim, Sir, Hamat,
Rakat, Kinirit,
36 Adamah, Ramah, Hasor,
37 Kidis, Idri, Inhasor,
38 Hiron, Migdalil, Horim, Bitanat ago Bitsimis: sapolo ago siyaw a manga siti a
39 Giyai so lopa a miyakewali o manga pamiliya a ped ko mbatabataa Naptali.
So Lopa a Inibegay ko Dan
40 So ikapito a bagian ko lopa na inibegay ko manga pamiliya a ped ko mbatabataa Dan.

41 So manga siti a mirarakes ko kawali iran na giya Sorah, Istaol, Irsimis,
42 Siyaalabim, Aihalon, Itlah,
43 Ilon, Timnah, Ikron,
44 Iltikih, Gibiton, Baalat,
45 Yahod, Binibirak, Gatrimon,
46 Miharkon, ago giya Rakon ago so kalopaan a makalilibet sa Yopa.
47 Ogaid na sabap sa maito kiran so lopa a miyambagian o mbatabataa Dan na somiyong

siran sa Lais na giyobat iran. Inagaw iran na piyamono iran a pedang so manga taw ron.
Kinowa iran so siti na biyalingan iran, na bitowan iran sa Dan a aya iran apoapoan.
48 Giyai so lopa a miyakewali o manga pamiliya a ped ko mbatabataa Dan a mirarakes on
angkai a manga siti ago so pepamagonayonayan ko oman i siti.
So Lopa a Inibegay ki Yosowa
49 Sii ko kiyaipos o dii kambagibagia ko lopa a miyakewali o manga taw sa Israil na

bigan iran si Yosowa a wata i Non sa lopa a mapekewali niyan a maaped kiran.
50 Miyatero den o Allah a imbegay rekaniyan so apiya antonaa a siti a piyangni niyan, na
giyanan so siti a Timnatsirah sii ko kapalawan sa Ipraim. Na biyangon iyan ai peroman
na miyaling roo.
51 Giyai so manga bagian ko lopa a miyakewali o manga pamiliya a ped ko manga

mbatabataa manga Israil. Miyambaabaad ai kiran i Iliyasar a imam, si Yosowa a wata i
Non ago so manga olowan o manga pamiliya iran a miyakanggolalan sa ripa roo sa Siloh
ko kamamasai ron o Allah sii ko kasasangoran o gimowa o Barombarong a dii Telabokan.
Na miyapasad iran den so kiyambagibagia ko lopa.
YOSOWA 20
So manga Siti a Pekeapasan
Sa masa oto na pitero o Allah ki Yosowa a

2 “Teroa ngka ko manga Israil a 'Pamili kano sa manga siti a pekeapasan a miyatero aken
rekano den a nggolalan ko Mosa.'
3 Saden sa miyakapatay sa taw a miyadigrasiya ago da niyan tibabaa na makapegapas roo
kaan malinding ko taw a iseop iyan so miyatay.
4 Amay ka miyakapagapas sekaniyan ko isa sangkoto a manga siti na pekatindeg

sekaniyan sii ko gimowa o siti na mapenotol iyan ko manga pelokelokesen ko siti so
miyasowasowa. Na pekasoleden iran sekaniyan ko siti ago kebegan iran sa darpa a
kebalingan iyan sii kiran.
5 O selobaa sekaniyan o seop on na so manga taw ko siti na di iran on kepalad so
miyakapatay sabap sa da tibabaa a kiyapataya niyan ko siringan iyan a kena a ba niyan
riridoa gowani.
6 Pekatareg sekaniyan sangkoto a siti taman sa makokom o manga pangongokom on ago
taman ko kapatay o maporo a imam a kapapantagan sa masa oto. Maipos ai na pekakasoy
den so miyakapatay ko babalingan iyan sii ko siti a piyalagoyan iyan."
7 So manga siti a inisenggay iran ko masesedepan a Yordan na giya Kidis sii sa Galili ko
kapalawan sa Naptali, giya Sikim sii ko kapalawan sa Ipraim ago giya Kiriyatarba (a aya
den Hibron) sii ko kapalawan sa Yodah.
8 Sii ko sabala a Yordan sa sebangan a Yariko na inisenggay iran on a Bisir sii ko
kapantaran a disirto sii ko lopa o mbatabataa Robin, giya Ramot sa Giliyad sii ko lopa o
mbatabataa Gad ago giya Golan sa Basan sii ko lopa o mbatabataa Manasih.
9 Giyai so manga siti a inisenggay a pekeapasan o langon o manga taw sa Israil a lagid
mambo o manga mananangga a pepeginged sii kiran. Na saden sa miyakapatay sa taw a
da tibabaa na pekapagapas roo ko isa sangkai a manga siti kaan makalidas ko kambonoa
on o seop on taman sa di sekaniyan pen makokom o manga pangongokom.
YOSOWA 21
So manga Siti a Inibegay ko manga Libitiyo
Sa masa oto na so manga olowan o manga pamiliya a ped ko mbatabataa Libi na

somiyong ki Iliyasar a imam, sii ki Yosowa a wata i Non ago sii ko manga olowan o
manga pamiliya a ped ko langon a mbatabataa manga Israil.
2 Na roo sa Siloh sa inged a Kanaan na pitero iran kiran a "Inisogo o Allah a nggolalan ko
Mosa a began kami sa manga siti a kebalingan ami a rakes on so manga pangomaan a
kapenateban o manga pangangayamen ami."
3 Kagiya ka maoto na sabap ko sogoan o Allah na bigan o manga Israil so manga Libitiyo
sa manga siti ago manga pepanateban a sii matatago ko lopa a miyakewali ran.
4 So manga Libitiyo a aya paganay a piyamegan sa manga siti na so mbawataan o Kohat a

wata o Libi. So manga mbawataan o Kohat a aya kiyababadan ko Aron a imam na bigan
sa sapolo ago telo a manga siti a matatago ko lopa o manga mbatabataa Yodah, Simiyon
ago Baniyamin.
5 So ped a manga mbawataan o Kohat na bigan sa sapolo a manga siti a matatago ko lopa
o manga mbatabataa Ipraim ago Dan ago so sabaad ko mbatabataa Manasih.
6 So manga mbawataan o Girson na bigan sa sapolo ago telo a manga siti a matatago ko
lopa o manga mbatabataa Isakar, Asir, Naptali ago so sabaad ko mbatabataa Manasih roo
sa Basan.
7 So manga mbawataan o Mirari na bigan sa sapolo ago dowa a manga siti a matatago ko
lopa o manga mbatabataa Robin, Gad ago Sibolon.
8 Giyangkai a manga siti a rakes o manga pepanateban ko mbalabala on na inibegay o

manga Israil ko manga Libitiyo a miyakanggolalan sa ripa, ka giyoto so sogoan o Allah a
nggolalan ko Mosa.
So manga Mbawataan o Kohat a manga Moriyataw o Aron
9 Giyai so manga siti a matatago ko lopa o manga mbatabataa Yodah ago Simiyon a
inibegay
10 Ko manga moriyataw o Aron a ped siran ko manga mbawataan o Kohat a isa ko
manga wata o Libi, ka siran i paganay a miyaripa.
11 Inibegay kiran so siti a Arba (so Arba na ama o Anak) a bebetowan imanto sa Hibron
sii ko kapalawan sa Yodah a rakes on so manga pepanateban ko mbalabala on.
12 Ogaid na so manga pangomaan ko liyo o siti ago so pepamagonayonayan on na
inibegay den ki Kaleb a wata i Yaponih a aya niyan kawali.
13 Liyo pen sa Hibron (giyanan na isa ko manga siti a pekeapasan o miyakapatay sa taw)
na aden pen a manga siti a inibegay ko manga moriyataw o Aron a imam: giya Libnah,
14 Yatir, Istimowa,
15 Holon, Dibir,
16 Ain, Yotah ago Bitsimis a mirarakes on so manga pepanateban on: siyaw a manga siti
a matatago ko lopa o manga mbatabataa Yodah ago Simiyon.
17 Bigan siran pen sa pat a manga siti a maaped ko lopa o Baniyamin a giya Gibiyon,
Giba,
18 Anatot ago Almon a rakes o manga pepanateban on.
19 Sapolo ini ago telo langon a manga siti a rakes o manga pepanateban on a inibegay ko
manga moriyataw o Aron a imam.
So ped a manga Mbawataan o Kohat
So ped a manga Libitiyo a ped ko mbawataan o Kohat na bigan sa manga siti a matatago
ko lopa o mbatabataa Ipraim.
21 Bigan siran sa pat a manga siti a giya Sikim a rakes o pepanateban on sii ko kapalawan
sa Ipraim (giyanan na isa ko manga siti a pekeapasan o miyakapatay sa taw), ago giya
Gisir,
22 Kibsaim ago Bithoron a mirarakes on so manga pepanateban on.
23 Bigan siran pen sa pat a manga siti a maaped ko lopa o Dan a giya Iltikih, Gibiton,
24 Aihalon ago Gatromin a rakes o manga pepanateban on.
25 Bigan siran pen sa dowa a manga siti a matatago ko lopa o sabaad ko mbatabataa
Manasih roo sa sedepan a giya Tanak ago salakaw a Gatrimon a rakes o manga
pepanateban on.
26 Sapolo langon a manga siti a mirarakes on so manga pepanateban on a inibegay ko ped

a manga mbawataan o Kohat.
So manga Mbawataan o Girson
27 So manga Libitiyo a ped ko mbawataan o Girson na bigan siran sa dowa a manga siti a
matatago ko lopa o sabaad ko mbatabataa Manasih roo sa sebangan a giya Golan sii sa
Basan (giyanan na isa ko manga siti a pekeapasan o miyakapatay) ago Biistirah a rakes o
manga pepanateban on.
28 Bigan siran sa pat a manga siti a matatago ko lopa o mbatabataa Isakar a giya Kison,
Dabirat,
29 Yarmot ago Inganim a rakes on so manga pepanateban on.
30 Bigan siran sa pat a manga siti a matatago ko lopa o mbatabataa Asir a giya Misiyal,
Abdon,
31 Hilkat ago Rihob a rakes o manga pepanateban on.
32 Na bigan siran pen sa telo a manga siti a matatago ko lopa o mbatabataa Naptali a giya
Kidis sii sa Galili (giyanan so isa ko manga siti a pekeapasan) ago giya Hamotdor ago
Kartan.
33 Sapolo ago telo langon a manga siti a rakes o manga pepanateban on a inibegay ko
manga mbawataan o Girson.
So manga Mbawataan o Mirari
34 So ped a manga Libitiyo a ped siran ko mbawataan o Mirari na bigan sa pat a manga
siti a poon ko lopa o mbatabataa Sibolon a giya Yoknaim, Kartah,
35 Dimnah ago Nahalal a rakes on so manga pepanateban on.
36 Bigan siran sa pat a manga siti a matatago ko lopa o mbatabataa Robin a giya Bisir,
Yahas,
37 Kidimot ago Mipaat a rakes o manga pepanateban on.
38 Na bigan siran pen sa pat a manga siti a matatago ko lopa o mbatabataa Gad a giya
Ramot sa Giliyad (giyanan so isa ko manga siti a pekeapasan), giya Mahanaim,
39 Hisbon, ago Yasir a rakes on so manga pepanateban on.
40 Sapolo ago dowa langon a manga siti a inibegay ko manga mbawataan o Mirari a so
ped pen ko manga Libitiyo.
41 Pat polo ago walo langon a manga siti a matatago ko lopa a matatangan o manga Israil
a inibegay ko manga Libitiyo a mirarakes on so manga pepanateban on.
42 Oman i isa sangkai a manga siti na aden a makalilibet on a manga pepanateban.
Miyatangan o manga Israil so Lopa
43 Inibegay o Allah ko manga Israil so langon a lopa a minitopa niyan a imbegay niyan
ko manga apoapoan iran, na miyatangan iran ai ago piyagingedan.
44 Na bigan siran o Allah sa kalilintad sii ko mbalabala kiran ka giyoto so minitopa niyan
ko manga apo iran. Da den a sakataw bo ko manga ridoay iran a ba miyakapamayandeg
ko hadapan iran ka piyalad kiran o Allah so langon a ridoay iran.
45 Da den a isa bo ko langon a manga pipiya a minitopa o Allah ko manga Israil a ba
miyailang. Langon den ai minitoman.
YOSOWA 22
Piyakabaling i Yosowa so manga Mbatabataa a Pepeginged sa Sebangan a Yordan
Sa masa oto na tinimo i Yosowa so manga taw ko mbatabataa Robin, Gad ago so sabaad
ko mbatabataa Manasih,
2 Na pitero iyan kiran a "Mininggolalan iyo so langon a inisogo rekano o Mosa a oripen o
Allah na miyatoman iyo pen so oman i inisogo aken rekano.
3 Da niyo den awai so manga pagari niyo ko ped a manga mbatabataa sangkai a miyatey
den a manga gawii taman den imanto. Pipiyapiyaan iyo tomoman so manga sogoan o
Allah a Tohan iyo.
4 Imanto na kiyabegan den o Allah a Tohan iyo sa kalilintad so manga pagari niyo a aya
niyan den minitopa. Sabap roo na baling kano den na kasoy kano ko lopa a miyakewali
niyo a inibegay rekano o Mosa a oripen o Allah roo ko sabala a Lawasaig a Yordan.
5 Ogaid na tanto kano a pagitktiyar sa kapetomana niyo ko manga sogoan ago so kitab a
inibegay rekano o Mosa, a giyoto so kapekebebayai ko Allah a Tohan iyo, so kapekedega
ko langon a manga lalan iyan, so kapeparatiyayaa ko manga sogoan iyan, so kakapeti
rekaniyan sebenar ago so kapepangongonotani ron sa iklas ko poso iyo ago niyawa."
68 Sii ko kiyapakabalinga kiran i Yosowa na inipamangni niyan siran sa rakmat, na pitero

iyan kiran a "Kasoy kano a rakes o mala a patemotamokan iyo a so madakel a manga
pangangayamen, pirak, bolawan, tombaga, potaw ago madakel a manga nditaren.
Mbagibagia niyo ko manga pagari niyo angkai a miyateban iyo ko manga ridoay niyo."
Na miselingganat siran maling.
Inibegay gowani o Mosa ko sabaad ko mbatabataa Manasih so inged a Basan roo sa
sebangan a Yordan. Ogaid na so isa a sabaad kiran na kiyabegan iyan den sa lopa sii sa
sedepan a Yordan a maaped ko manga pagari ran ko ped a manga mbatabataa.
9 Na miyaling so manga mbatabataa Robin, Gad ago so sabaad ko Manasih. Inawaan iran
so ped a manga Israil roo sa Siloh sa inged a Kanaan ka komiyasoy siran ko rek iran a
lopa roo sa Giliyad a miyakowa iran sabap ko inisogo o Allah a nggolalan ko Mosa.
So Aparan sa Kilid a Yordan
10 Ogaid na sii ko kiyapakaoma iran ko kilid a Yordan sa sedepan sa kasisii ran pen sa
inged a Kanaan na miyangon so manga mbatabataa Robin, Gad ago so sabaad ko Manasih
sa mala a aparan a piyakamemesa a pegilain sii ko darpa a bebetowan sa Gililot.
11 Na miyatero ko ped a manga Israil a "Ilaya niyo! So manga mbatabataa Robin, Gad
ago so sabaad ko Manasih na miyangon sa aparan roo sa Gililot sii ko inged tano a
Kanaan sa sedepan a Yordan!"
12 So kiyanega iran sii na mitimotimo so langon a manga Israil roo sa Siloh ka song siran
sa sebangan a Yordan sa kapakipetidawa iran ko manga pagari ran.
13 Ogaid na siyogo iran daan si Pinihas a wata i Iliyasar a imam ko manga mbatabataa
Robin, Gad ago so sabaad ko Manasih roo sa inged a Giliyad.
14 Inonotan si Pinihas o sapolo a manga sanasanaan a sesakataw a poon ko oman i
mbatabataa manga Israil a so oman i isa kiran na olowan o isa a pamiliya a ped ko manga
mbawataan o Israil.
15 Sii ko kiyapakaoma iran ko inged a Giliyad na pitero iran ko manga mbatabataa

Robin, Gad ago so sabaad ko Manasih a
16 “Iniise o kalangolangon a manga pagtaw o Allah o antonaa ngkai a kiyaongkira niyo
ko Tohan o Israil. Tiyalikodan iyo imanto so kapepangongonotani niyo ko Allah.
Somiyopak kano ko Allah ko kinimbaalen iyo sa aparan ko manga ginawa niyo.
17 Ba da pen kadiyangkai rektano so kiyapakandosa tano roo sa Piyor? Taman sangkai a
gawii na da tano ron masoti apiya pen inisiksa oto o langon o manga pagtaw o Allah.
18 Na petelikodan iyo bes imanto so Allah? O sopaka niyo so Allah imanto a gawii na
kerarangitan iyan so langon o isa ka maginged a Israil mapita.
19 O miyakaram so lopa a miyakowa niyo a di patot ko kapesimbai ron na ripag kano ko
sabala a Yordan sii ko lopa o Allah a ndodon so Barombarong a Pesimbaan on na
mbagian kano ko lopa a ped rekami. Ogaid na di niyo sopaka so Allah o di na sekami a
nggolalan ko kipembaalen iyo sa aparan ko manga ginawa niyo a liyo ko aparan o Allah a
Tohan tano.
20 Tademi niyo a initana so rarangit o Allah ko langon o isa ka maginged a Israil isako
makandosa si Akan a wata i Sirah ko kiyakowaa niyan ko manga nganin a inisenggay ko
kambinasaa on. Kena bo a ba sekaniyan i miyatay sabap ko dosa niyan!"
21 Na somimbag so manga mbatabataa Robin, Gad ago sa sabaad ko Manasih a tig iran
ko manga olowan o manga mbawataan o Israil a
22 “So Allah i Lebi a Mamaapaar a Tohan! So Allah a Lebi a Mamaapaar a Tohan na
katawan iyan o ino ami ai penggolaolaa, na ketokawan mambo o langon a manga Israil.
O somiyopak kami ko Allah o di na miyakandosa kami ron na di kami niyo pelepasa
sangkai a gawii ko kambonoa rekami!
23 O tiyalikodan ami so Allah ko kinimbaalen ami ko ginawa mi sa aparan a ketotongan
sa manga soasoat ago manga pamemegayan a pereperan, o di na manga korban pantag bo
ko kanggiginawai na pengnin ami a so den so Allah i somiksa rekami!
24 Kena oto a ba aya mi ron kiyambaali, ka aya sabap iyan na ipekelek ami a sii ko
pekatalingoma a manga gawii na masiken a peteroon o manga wata iyo ko manga
wata ami a 'Antonaa i labot iyo ko Allah a Tohan o Israil?
25 Ka biyaloy o Allah a Yordan a temanaan a mipapagelet rekami ago sekano a manga
mbatabataa Robin ago Gad. Da a bagian iyo ko Allah!' Na masiken a pekataregen o
manga wata iyo so manga wata ami ko kapesimbaa iran ko Allah.
26 Giyoto i sabap a miyapamikir ami a mbaal kami sa aparan a kena a ba ketotongan sa
manga soasoat ago manga korban
27 Ka sabap sa an mabaloy a ipenanadem ko manga mbawataan ami ago sii ko manga
mbawataan iyo sa pesimba kami mambo ko Allah sii ko darpa a pesimbaan on a
nggolalan ko kipesepaaten ami ron ko manga korban a petotongen ago ago manga korban
pantag bo ko kanggiginawai. Amay ka magiyoto na di mapetero o manga wata iyo ko
manga wata ami sii ko pekatalingoma a manga gawii a 'Da a ba niyo labot ko Allah!'
28 “Aya mapipikir ami na opama ka matero iran ai rekami o di na sii ko manga

mbawataan ami ko pekatalingoma a masa na mapetero ami a 'Ilaya niyo so kiyasayanan
ko aparan o Allah a miyabangon o manga apo ami. Kena oto a ba ketotongan sa manga
soasoat o di na manga korban, ka ipenanadem ai rekami ago sii rekano.
29 Makawatan rekami so kasopaka mi ko Allah ago so katelikodi ami ron ko
kapagembaal ami sa aparan a ketotongan sa manga soasoat ago manga pamemegayan a
pereperan ago manga korban a liyo ko aparan o Allah a Tohan tano a ndodon ko
kasasangoran o Barombarong a Pesimbaan on."
30 Kagiya maneg i Pinihas a imam ago so manga sanasanaan ko isa ka maginged ago so
manga olowan o manga mbawataan iran so pitero o manga mbatabataa Robin, Gad ago so
sabaad ko Manasih na miyasoat siran.
31 Na pitero kiran i Pinihas a wata i Iliyasar a imam a "Imanto na katawan ami a sisii
rektano so Allah. Da kano bes makandosa ko Allah sangkai a betad, na piyakalidas iyo so
manga taw sa Israil ko kapendadaneg o Allah."
32 Mandiyadi na si Pinihas a wata i Iliyasar a imam ago so manga sanasanaan na inawaan
iran so manga mbatabataa Robin ago Gad roo sa inged a Giliyad na komiyasoy siran sa
inged a Kanaan, na piyanotol iran ko manga Israil so makapantag ko miyanggolaola.
33 Na inikasoat ai o manga Israil na piyodi iran so Tohan; na da iran den aloya so
mipantag ko kapakipetidawa iran ko manga mbatabataa Robin ago Gad sa kambinasaa
iran ko inged a babalingan iran.
34 Na so manga mbatabataa Robin ago Gad na bitowan iran so aparan sa 'Saksi,' ka pitero
iran a "Giyanan na saksi rektano langon sa so Allah na aya den Tohan."
YOSOWA 23
Miyodas si Yosowa ko manga Olowan
Kagiya makasagad so miyatey a alongan a kiyabegan den o Allah so manga Israil sa

kalilintad ko langon o manga ridoay iran sii ko mbalabala na miyalokes si Yosowa a tanto
den a minitolod so idad iyan.
2 Na tinimo iyan so langon o manga Israil, a so manga pelokelokesen, manga olowan,
manga pangongokom ago manga sanasanaan iran na pitero iyan kiran a "Miyalokes ako
den imanto.
3 Miyailay niyo so langon taman a pinggolaola o Allah a kamapiyaan iyo sii sangkai a
langon a manga nasiyon, ka so den so Allah a Tohan iyo i miyakitidawa sabap rekano.
4 Na miyambagibagi aken den ko manga mbatabataa rekano so langon o lopa o manga
nasiyon a mapekewali niyo ipoon ko Lawasaig a Yordan sii sa sebangan na taman den ko
Ragat a Miditiraniyo roo sa sedepan a so lopa o manga nasiyon a miyataban aken den a
mirarakes on so lopa o ped a manga nasiyon a da pen mataban.
5 So den so Allah a Tohan iyo i mbogaw kiran. Ipenendeg iyan siran sii ko kapegantap
iyo kiran na tenganen iyo so lopa iran ka giyoto so minitopa rekano o Allah.
6 “Kagiya ka maoto na pakababager kano sa kapeparatiyayaa niyo ago kapetomana ko

langon a minisorat ko Ribro a Kitab o Mosa. Di kano den silay sa kawanan o di na sa
diwang.
7 Di kano pakipegepeda sangkai a manga nasiyon a miyalamba sii sangkai a inged iyo.
Di niyo mbetowa so ingaran o manga katohanan iran aya pen o ba niyo sepaan. Di niyo
siran simbaa aya pen o ba niyo sodiyodi.
8 Ka kapeti niyo baden sebenar so Allah a Tohan iyo a datar o di niyo dii nggolaolaan
taman imanto.
9 “Piyamogaw o Allah so manga ala ago manga babager a nasiyon sii ko kapegantap iyo
kiran, na taman imanto na da den a sakataw bo a ba miyakapamayandeg ko hadapan iyo.
10 So isa rekano na pekadendeg sa sanggibo ko manga ridoay niyo ka kagiya so Allah a
Tohan iyo i dii makitidawa sabap rekano a aya niyan rekano den minitopa.
11 Sabap roo na iktiyari niyo piyapiya a ginawa niyo sa kapekebabayai niyo ko Allah a
Tohan iyo.
12 Ka o tomalikod kano ron ago makipetepi kano sangkai a manga nasiyon a miyalamba
sii rekano ago makikemonga kano kiran
13 Na sabota niyo a matamataan den a so Allah a Tohan iyo na di niyan den mbogaon
angkai a manga nasiyon sii ko kapegantap iyo kiran. Ka kebaloy siran baden a kisampirot
ago kilitag rekano, ago manga lilit sii ko likod iyo ago manga sorok sii ko manga mata
niyo, na pekitaros den ai taman sa kakeda iyo sangkai a mapiya a lopa a inibegay rekano o
Allah a Tohan iyo.
14 “Di ketey na petay ako a aya keokitan o langon o manosiya. Oman i isa rekano na
katawan iyan sii ko poso iyan ago ginawa niyan a da den a isa bo ko langon a manga
pipiya a minitopa rekano o Allah a Tohan iyo a ba miyailang. Oman i isa on na
minitoman den!
15 Ogaid na datar den o kiyapakatalingoma rekano o langon a manga pipiya a minitopa
rekano o Allah a Tohan iyo na lagid oto mambo a kitomaparaken iyan rekano ko langon a
kamoralaan a piyakaiktiyaran iyan rekano taman sa mabinasa kano niyan sangkai a
mapiya a lopa a inibegay niyan rekano.
16 O sopaka niyo so kapasadan o Allah a Tohan iyo a inisogo iyan a katomana niyo
ron ka pengongonotan kano ko salakaw a manga tohan ago sodiyod kano ron na
pemborngat rekano so gani o Allah na magaan so magaan a kakeda iyo ko mapiya a lopa
a inibegay niyan rekano."
YOSOWA 24
So Kiyapemataani ko Kapasadan roo sa Sikim
Oriyan iyan na linimod i Yosowa so langon a mbatabataa manga Israil roo sa Sikim.
Piyakisogoan iyan so manga pelokelokesen, manga olowan, manga pangongokom ago so
manga sanasanaan iran, na miyangadap siran ko kamamasaan o Tohan.
2 Na pitero i Yosowa ko langon o manga taw a "Giyai i kabasa o Allah a so Tohan o

manga Israil: Sii ko miyanga oona a gawii na so manga apoapoan iyo a rakes i Tirah a
ama o Ibrahim ago Nahor na mababaling siran ko onaan o Lawasaig a Yopratis, na
sominimba siran ko salakaw a manga tohan.
3 Ogaid na kinowa ko so apo iyo a Ibrahim a poon ko inged ko sabala a lawasaig na
piyakapagenebeneb aken sekaniyan ko dalem a inged a Kanaan na bigan aken sa madakel
a manga mbawataan. Inibegay aken on si Iskak,
4 Na sii ki Iskak na inibegay aken si Yakob ago si Isaw. Inisenggay aken ki Isaw so
kapalawan a inged a Idomiya a mapekewali niyan, ogaid na si Yakob ago so manga wata
iyan na somiyong sa Misir.
5 “Oriyan iyan na siyogo aken roo so Mosa ago so Aron, na siniksa aken so manga
Imisiren a nggolalan ko pinggolaola ko sii kiran. Kagiya maipos oto na iniliyo aken
sekano roo.
6 Kagiya iliyo aken so manga apo iyo roo sa Misir na siyaloba siran o manga Imisiren a
kikakaro ago kikokoda. Kagiya iniraot so manga apo iyo ko Mariga a Ragat
7 Na gomiyoraok siran sa tabang ko Allah na piyageletan aken siran sa maliboteng ago so
manga Imisiren. Inikolob aken kiran so ragat na piyangeled aken siran on. So den so
manga mata niyo i miyakailay ko pinggolaola ko roo sa Misir.
"Miyatey kano a mababaling ko disirto.
8 Oriyan iyan na inowit aken sekano ko inged o manga Amoriyo a kibabaling sii sa
sebangan a Yordan. Miyakitidawa siran rekano ogaid na piyalad aken siran ko lima niyo.
Bininasa ko siran sii ko kapegantap iyo kiran, na miyatangan niyo so lopa iran.
9 Oriyan iyan na si Balak a wata i Sipor, a so dato sa Mowab, na mitiyagar sa
kapakipetidawa iyan sa Israil. Piyakisogoan iyan si Balam a wata i Biyor na piyangni
niyan on a isinta kano niyan.
10 Ogaid na da ko pakinega si Balam, na riyakmatan kano niyan baden, na piyakalidas
aken sekano ko kapaar i Balak.
11 “Rominipag kano sa Yordan na inisampay kano sa Yariko. Miyakitidawa rekano so

manga taw sa Yariko a lagid mambo o manga Amoriyo, manga Pirisiyo, manga
Kanaaniyo, manga Hitiyo, manga Girgasiyo, manga Hibiyo ago so manga Hibosiyo, ogaid
na piyalad aken siran rekano.
12 Somiyogo ako sa manga taboowan a keona rekano a inipanendeg iran so dowa kataw a
dato o manga Amoriyo sii ko kapegantap iyo kiran. Kena ini a ba miyakanggolalan ko
manga pedang iyo ago manga pana.
13 Bigan aken sekano sa lopa a da niyo ndokawi ago so manga siti a da niyo bangona a
babalingan iyo imanto. Pepangangan kano ko onga o manga waged a obas ago manga
kayo a olibi a da niyo pamolaa.
14 “Kagiya ka maoto," a tig i Yosowa, "na kaleken iyo so Allah na pangongonotani niyo
sa iklas ko ginawa niyo ko kapeparatiyayaa niyo ron. Lebaden iyo so manga katohanan o
manga apo iyo a sinimba iran roo ko sabala a Lawasaig a Yopratis ago roo sa Misir na so
bo so Allah i pangongonotani niyo.
15 Ogaid na o di kano kebaya mangongonotan ko Allah na pilia niyo imanto o antawaa i
pengongonotanan iyo apiya anda ko manga tohan a sinimba o manga apo iyo roo ko
sabala o lawasaig o di na so manga tohan o manga Amoriyo a sisii ko lopa a babalingan
iyo. Ogaid na so saken on peman ago so pamiliya ko na pengongonotanan ami so Allah."
16 Na somimbag so manga taw a tig iran a "Makawatan rekami so katelikodi ami ko

Allah sa kapengongonotani ami ko salakaw a manga tohan!
17 Ka so Allah a Tohan tano i miyakaliyo rektano ago so manga apo tano ko inged a
Misir a ron tano miyapangongoripen, na kiyamasaan tano angkoto a manga ala a nanao a
pinggolaola niyan roo. Lininding tano niyan ko langon o kiyapanadaan tano sii ko manga
nasiyon a inipanagad tano.
18 Sii ko kapesorongi tano sangkai a inged na inipanendeg o Allah so manga Amoriyo
ago so ped a manga nasiyon a kibabaling on. Kagiya ka maoto na pengongonotanan ami
mambo so Allah ka sekaniyan i Tohan tano."
19 Na pitero i Yosowa ko manga taw a "Masiken a di niyo kegaga so kapengongonotani

ko Allah ka soti sekaniyan a Tohan; tanaod sekaniyan a Tohan a di niyan iperila so manga
dosa niyo ago so kasosopak iyo.
20 O talikodi niyo sekaniyan ko kapengongonotani niyo ko manga tohan o manga rait na
sengoran kano niyan ago siksaan. Mbinasaan kano niyan apiya pen o piyakapiya kano
niyan gowani."
21 Na pitero o manga taw ki Yosowa a "Kena, ka pengongonotanan ami so Allah!"

22 Tig i Yosowa ko manga taw a "Sekano den i makapeseksi sa ginawa niyo a tiyomo iyo
so kapengongonotani ko Allah."
"Oway, sekami den i manga saksi on," a tig iran.
23 “Kagiya ka maoto," a tig i Yosowa, "na lebaden iyo imanto angkoto a manga
katohanan o manga rait a matatago rekano na go niyo pakapananangorani so manga poso
iyo ko Allah a Tohan o Israil."
24 Na tig o manga taw ki Yosowa a "So Allah a Tohan tano i peratiyayaan ami ago
pengongonotanan."
25 Mandiyadi na mimbaal si Yosowa sa kapasadan mipantag ko manga taw sii den

sangkoto a gawii roo sa Sikim, na bigan iyan siran sa manga kokoman ago manga sogoan
a ipenggolalan iran.
26 Na inisorat i Yosowa angkai a manga katero sii ko ribro a Kitab o Tohan. Oriyan iyan
na kominowa sekaniyan sa mala a ator na inibetad iyan ko atag o kayo a Kalipapa a
marani ko Soti a Darpa a pesimbaan ko Allah.
27 “Ilaya niyo," a tig iyan ko langon o manga taw, "ka giyangkai a ator na aya rektano
peseksi, ka miyaneg iyan so langon o manga katero a pitero rektano o Allah. Kebaloy ai a
peseksi sa kakebenari rekano o barobaa niyo so miyatero o Tohan iyo."
28 Na piyakabaling i Yosowa so manga taw na komiyasoy so oman i isa kiran ko darpa a

miyakewali niyan.
Inilebeng si Yosowa
29 Kagiya maipos ai langon na si Yosowa a wata i Non a so oripen o Allah na miyatay a

miyakapagidad sa magatos ago sapolo ragon.
30 Inilebeng iran sekaniyan sii ko lopa a miyakewali niyan roo sa Timnat Sirah sii ko
kapalawan a inged sa Ipraim sii sa pagotaraan o Palaw a Gaas.
31 Sii ko kaooyagoyag pen i Yosowa na pepangongonotanan o manga Israil so Allah, na

sii ko oriyan o kiyapatay niyan na initaros iran ai ko kapepaginetaw pen o manga
pelokelokesen a miyakailay ko langon taman a pinggolaola o Allah sabap ko manga Israil.
32 So manga tolan o Yosop a initelon o manga Israil a poon sa Misir na inilebeng iran sa
Sikim ko sabagi ko lopa a miyapamasa o Yakob a magatos a pelata a pirak sii ko Hamor a
ama i Sikim. Giyangkai a lopa na miyakewali den o manga mbawataan o Yosop.
33 Miyatay mambo si Iliyasar a so wata i Aron, na inilebeng iran sekaniyan ko kapalawan

a inged sa Ipraim sii sa inged a Gibiyah a inisenggay a rek o wata iyan a si Pinihas.
MANGA PANGONGOKOM
MANGA PANGONGOKOM 1
Miyakitidawa so manga Israil ko Da Pen Mabogaw a manga Ikanaanen
Sii ko oriyan o kiyapatay i Yosowa na inisean o manga Israil so Allah a "Antawaa rekami
i paganay a melalakaw a makipetidawa ko manga Ikanaanen?"
2 Inisembag o Allah a "So mbatabataa Yodah, ka piyalad aken kiran den so lopa."
3 Na pitero o manga taw sa Yodah ko manga pagari ran a mbatabataa Simiyon a "Onoti
kami niyo ko lopa a miyambagian ami sa kanggobata tano ko manga Ikanaanen. Oriyan
iyan na magonot kami rekano bo ko lopa iyo." Na miyonot kiran so manga taw sa
Simiyon.
4 Kagiya gomobat so Yodah na piyalad kiran o Allah so manga Ikanaanen ago so manga
Pirisiyo, na piyamono iran so sapolo nggibo a manga taw roo sa Bisik.
5 Miyatoon iran so dato Adonibisik roo sa Bisik na miyakitidawa siran on na tiyaban iran
so manga Ikanaanen ago manga Pirisiyo.
6 Miyalagoy si Adonibisik ogaid na riyaot iran sekaniyan na diyakep iran, na piyamotolan
iran sa manga ama a lima ago ama a ai.
7 Na pitero i Adonibisik a "Aden gowani a pito polo a manga dato a kiyapotolan aken sa
manga ama a lima ago ai a pepamorot sa pangenengken a pepanga oodod ko didalem a
lamisaan aken. Biyadalan ako imanto o Allah ko pinggolaola ko kiran." Na inowit iran
sekaniyan roo sa Yarosalim na roo den miyatay.
So Mbatabataa Yodah na Tiyaban iran a Yarosalim ago giya Hibron
8 Giyobat pen o manga taw sa Yodah so siti a Yarosalim na miyaagaw iran. Piyamono
iran a pedang so manga taw ron na tiyotong iran so siti.
9 So kiyaipos ai na tomiyaros siran makitidawa ko manga Ikanaanen a kibabaling ko
kapalawan ago roo sa Nigib ago sii ko kapantaran.
10 Siyondolan iran pen so manga Ikanaanen a kibabaling sa Hibron (a bebetowan gowani
sa KiriyatArba) na roo iran tiyaban so manga mbawataan o Sisiyay, si Ahiman ago si
Talmay.
Tiyaban i Otniyal so siti a Dibir
11 Ipoon roo na tomiyaros siran ko siti a Dibir (a bebetowan gowani sa KiriyatSipir).

12 Na pitero i Kaleb a "Pakipengaroma ko so wata aken a babay a si Aksah ko mama a
nggobat ago makaagaw ko siti a KiriyatSipir."
13 Na si Otniyal a wata i Kinas a so ari i Kaleb i miyakakowa on, na piyakipangaroma on
i Kaleb so wata iyan a si Aksah.
14 Sii ko gawii a kiyapakatepi iran den na inisango i Aksah ki Otniyal a kapakapangni
niyan ki ama iyan sa lopa. Na sii ko kiyatepad i Aksah ko kimar iyan na iniise on i Kaleb
a "Antonaa i pagangin ka raken?"
15 Inisembag iyan on a "Begi ako ngka sa pamemegayan. So lopa a inibegay ngka raken
roo sa Nigib na mamara a darpa. Kapedipedi ka bo na begi ako ngka pen sa aden a
pakaig on." Na inibegay ron i Kaleb so manga bowalan roo sa kaporoan ago sa kabebaan.
So Kiyapakataban o Mbatabataa Yodah ago Baniyamin
16 So manga Kiniyo a mbawataan o panogangan o Mosa na miyamangonot ko manga taw

sa Yodah ko kiyaawa iran sa Yariko a so siti a bebetowan sa 'Manga kayo a Rogan.' Na
roo siran komiyaden a maaped ko manga taw a kibabaling sa disirto sa Yodah sii sa Nigib
a marani ko siti a Arad.
17 Samaoto na miyonot so manga taw sa Yodah ko manga pagari ran a manga taw sa
Simiyon ka giyobat iran so manga Ikanaanen a kibabaling sa Sipat, na gibagiba iran so
siti. Sabap roo na bitowan ai sa Hormah.
18 Liyo ron pen na miyaagaw iran so manga siti a Gasa, Askilon ago Ikron a rakes o
19 Tiyabangan o Allah so manga taw sa Yodah na miyatangan iran so manga inged ko
kapalawan, ogaid na da iran mabogaw so manga taw a kibabaling ko kapantaran ka
kagiya aden a manga karo iran sa katidawa a potaw.
20 Giya Hibron na inibegay ki Kaleb ka giyoto so initopa o Mosa, na piyamogaw ron i
Kaleb so manga mbawataan o telo kataw a manga wata o Anak.
21 Ogaid na so manga taw sa Baniyamin na da iran mabogaw so manga Hibosiyo a
kibabaling sa Yarosalim, na taman imanto na pepeginged so manga Hibosiyo a maaped
ko manga taw sa Baniyamin roo sa Yarosalim.
Miyaagaw o Mbawataan o Yosop a Siti a Bitil
22 So manga mbawataan o Yosop na somiyong siran sa Bitil sa kanggobata iran on na

tiyabangan siran o Allah.
23 Somiyogo siran sa manga makapenoriman sa Bitil (a bebetowan gowani sa Lods).
24 Miyakailay so manga panonoriman sa mama a lominiyo ko siti na pitero iran on a
"Toroon ka rekami o andamanaya i kapekasoled ami ko siti ka pepiyapiyaan ami seka."
25 Mandiyadi na pinggonanao niyan kiran so kisoled iran ko siti, na piyamono iran a
pedang so langon a taw ron a liyo ron angkai a mama ago so langon o pamiliya niyan.
26 Oriyan iyan na somiyong angkai a mama ko pagiingedan o manga Hitiyo a roo den
miyangon sa siti a bitowan iyan sa Lods a aya niyan ngaran taman imanto.
So manga Taw a Da Mabogaw o manga Israil
27 So mbatabataa Manasih na da iran bogawa so manga magiinged sa Bit Siyan, Taanak,

Dor, Ibliyam ago sa Migido a rakes o manga pepamagonayonayan sangkai a manga siti ka
totomegel den so manga Ikanaanen sa kapakababaling iran sangkoto a lopa.
28 Sii ko kiyapakabager o manga Israil na tigel iran so manga Ikanaanen a dii
makanggalebek ogaid na da iran siran langon bogawa.
29 So pen so mbatabataa Ipraim na da iran bogawa so manga Ikanaanen a kibabaling sa

Gisir. Sabap roo na pepeginged roo den so manga Ikanaanen a maaped kiran.
30 So pen so mbatabataa Sibolon na da iran bogawa so manga magiinged sa Kitron ago

sa Nahalol na pepeginged roo den so manga Ikanaanen a maaped kiran. Ogaid na tigel
siran o manga Israil a dii makanggalebek.
31 So pen so mbatabataa a Asir na da iran bogawa so manga magiinged sa Ako, Sidon,

Aklab, Aksib, Hilbah, Apik ago sa Rihob.
32 Sabap roo na pepeginged den so manga taw sa Asir a maaped ko manga Ikanaanen ka
da iran siran bogawa.
33 So mambo so mbatabataa Naptali na da iran bogawa so manga magiinged sa Bit Simis

ago sa Bit Anat, na pepeginged den so manga taw sa Naptali a maaped ko manga
Ikanaanen a kibabaling sangkoto a lopa, ogaid na miyategel so manga taw sa Bit Simis
ago sa Bit Anat a dii makanggalebek.
34 So manga Amoriyo na tigel iran makatareg so mbatabataa Dan ko manga kapalawan.

Da iran peroa o ba siran makatondagay ko kapantaran.
35 Totomegel den so manga Amoriyo sa kapakababaling iran ko Palaw a Hiris, sa
Aidiyalon ago sa Siyaalbim. Ogaid na kagiya makala so kapaar o manga mbawataan o
Yosop na tigel iran so manga Amoriyo a dii makanggalebek.
36 So temanaan o manga Amoriyo na ipoon ko okita sa Akrabim a iniraot den sa Sila a
makalelepas on pen.
MANGA PANGONGOKOM 2
So Malaikat o Allah sii sa Bokim
So Malaikat o Allah na somiyong sa Bokim a poon sa Gilgal. Na pitero iyan ko manga

Israil a "Iniliyo aken sekano roo sa Misir na inowit aken sekano ko lopa a inisepa aken a
imbegay aken ko manga apo iyo. Tig aken a 'Di aken den mbarobaan so kapasadan a
inembaalan aken mipantag rekano.
2 Di kano pakipepasadanowai ko manga taw a kibabaling sangkai a lopa, ka ba niyo den
gebaa niyo so manga aparan iran.' Ogaid na da ako niyo paratiyayaa. Ino niyo ai
penggolaolaa?
3 Sabap roo na peteroon ko rekano imanto a di aken siran den mbogaon sii ko kapegantap
iyo kiran. Kebaloy siran a manga sorok sii ko kilid iyo, na pekalitag rekano so manga
katohanan iran."
4 Sii ko kiyateroa sii o Malaikat o Allah ko isa ka maginged a Israil na miyakagoraok

siran sa matanog.
5 Na bitowan iran angkoto a darpa sa Bokim (aya maana niyan na 'so dii
mamanggoraok'), na roo siran somiyapaat ko Allah sa manga korban.
So Kiyapatay i Yosowa
6 Na piyakalalakaw i Yosowa so manga Israil na somiyong so oman i isa kiran ko lopa a

mapekewali niyan kaan iyan matangan.
7 Sii ko kaooyagoyag pen i Yosowa na pepangongonotanan o manga Israil so Allah, na sii
ko oriyan o kiyapatay niyan na itataros iran ai sii ko kapepaginetaw pen o manga
pelokelokesen a miyakailay ko langon taman a pinggolaola o Allah sabap ko manga Israil.
8 Na si Yosowa a wata i Non a so oripen o Allah na miyatay a miyakamagatos ago sapolo

den ragon a idad iyan.
9 Inilebeng iran ko lopa a bagian iyan roo sa Timnat Hiris sii ko kapalawan a inged sa
Ipraim sii sa pagotaraan a Palaw a Gaas.
So da Kaparatiyayaa o manga Israil ko Tohan
10 Miyamatay mambo so langon a taw a miyaginetaw ko masa i Yosowa na miyamakala

so miyakasalono a manga taw a di iran kilalaan so Allah aya pen o ba iran katawi so
manga pinggolaola niyan a kamapiyaan o Israil.
11 Na minggolaola so manga Israil sa marata sii ko kapekeilaya on o Allah na
miyangongonotan siran ko katohanan a Baal.
12 Tiyalikodan iran so Allah a Tohan o manga apo iran a miyakaliyo kiran sa Misir na
miyananangoran siran ago miyamanimba ko salakaw a manga tohan o manga taw a
makalilibet kiran, na piyakakerangit iran so Allah.
13 Tiyalikodan iran sekaniyan na piyangongonotanan iran so Baal ago so manga Astorit.
14 Na mimborngat so gani o Allah ko manga Israil na piyalad iyan siran ko kapaar o di
kiran dii nggogobat a di iran siran dii tebanan. Piyakipaar iyan siran ko manga ridoay
iran ko melilibeta kiran na di siran kiran den pekaato.
15 Oman siran melalakaw a makipetidawa na peridoon siran o Allah ka giyoto i inisepa
iyan kiran, na tanto siran a kiyaregenan.
Piyanabangan o Allah so manga Pagtaw niyan
16 Apiya pen oto na inibegay kiran o Allah so manga pangongokom a pepekasabet kiran
ko kapaar o manga ridoay iran a di kiran dii teban.
17 Ogaid na di pekinegen o manga Israil so manga pangongokom iran ka
miyananangoran siran ko salakaw a manga tohan na sominimba siran on. Magaan so
magaan a kiyaawai ran ko lalan a kideg o manga apo iran a miyamanoman ko manga
sogoan o Allah,
18 Igira a bigan siran o Allah sa pangongokom na petebangan o Allah so pangongokom
na pesebeten iyan so manga taw ko kapaar o manga ridoay iran taman ko kaooyagoyag
pen o pangongokom. Ka ipekepedi siran o Allah sii ko kapeperego iran sabap ko siran
oto a di kiran dii mangarasi kiran ago peperarasay.
19 Ogaid na anda den i kapatay o pangongokom na kesoy bo peman so manga taw ko asal
a okitokit iran a lebi pen a marata a di so manga apo iran a di siran dii mangongonotan
ago pepamanimba ko salakaw a manga tohan. Di iran inggenek so marata a di iran dii
nggolaolaan ago so kategas i olo a manga okitokit iran.
20 Sabap roo na tanto a kiyararangitan o Allah so manga Israil na pitero iyan a "Siyogok
angkai a manga taw so kapasadan a inisogo aken ko manga apoapoan iran a kapetomana
on. Sabap sa da ako iran paratiyayaa
21 Na di aken den mbogaon ko kapegantap iran so apiya anda ko manga nasiyon a da pen
mabogaw i Yosowa isako matay.
22 Pagosaren aken angkai a manga nasiyon a kitepeng aken ko manga Israil kaan mailay
o ba iran pepiyapiyai komedeg so manga lalan aken a datar o pinggolaola o manga
apoapoan iran."
23 Giyoto i sabap a liyamba roo o Allah angkoto a manga nasiyon. Kena a ba
miyakaisaisa a kiyabogawa niyan kiran aya pen o ba niyan siran langon piyalad ko kapaar
i Yosowa.
MANGA PANGONGOKOM 3
So manga Nasiyon a Miyalamba sii ko Inged
Kagiya ka maoto na aden a manga nasiyon a liyamba o Allah sii ko inged kaan iyan
katepengi so manga Israil a da den makaokit ko apiya anda ko manga katidawa roo sa
Kanaan.
2 Pitibaba iyan ai ka giya bo a kipengendaon iyan ko kapakipetidawa sii ko manga Israil a
ba di labaw ko siran oto a da den a katawi ran on gowani.
3 Aya miyalamba a manga nasiyon na so manga taw a ndadatoan o lima a dato a Pilistiyo,
so langon a manga Ikanaanen, so manga taw sa Sidon ago so manga Hibiyo a kibabaling
ko kapalawan sa Libanon ipoon sa Palaw a Baalhirmon taman sa Libohamat.
4 Miyalamba siran roo a kitepeng ko manga Israil kaan mailay o ba iran tomana so manga
sogoan o Allah a inibegay niyan ko manga apo iran a miyakanggolalan ko Mosa.
5 Kagiya ka maoto na pepeginged so manga Israil a maaped ko manga Ikanaanen, manga

Hitiyo, manga Amoriyo, manga Pirisiyo, manga Hibiyo ago so manga Hibosiyo.
6 Miyakindedarodopai siran sangkai a manga taw na piyangongonotanan iran so manga
tohan iran.
Si Otniyal
7 Minggolaola so manga Israil sa kamarataan sii ko kapekeilaya on o Allah. Piyakalipat

iran so Allah a Tohan iran na sinimba iran so manga katohanan a Baal ago Asirah.
8 Sabap roo na mimborngat so gani o Allah ko manga Israil na piyakipeges iyan siran ko
dato sa Misopotamiya a si Kosiyan-Risiyataim. Na mipapaar iyan so manga Israil ko
miyakawalo ragon.
9 Ogaid na kagiya gomoraok so manga Israil ko Allah sa tabang na bigan iyan siran sa
mama a pekapanabang kiran a si Otniyal a wata i Kinas a so ari i Kaleb, na siyabet iyan
siran.
10 Minitemo rekaniyan so Roh o Allah na miyabaloy sekaniyan a pepangokom ko manga
Israil. Lomiyalakaw si Otniyal sa kapakipetidawa na piyalad on o Allah si Kosiyan-
Risiyataim a dato sa Misopotamiya na tiyaban sekaniyan i Otniyal.
11 Mandiyadi na lomilintad so inged ko soled o miyakapat polo ragon taman ko kiyapatay
i Otniyal a wata i Kinas.
Si Ihod
12 Minggolaola peman sa marata so manga Israil ko kapekeilaya on o Allah, na

piyakabager o Allah si Iglon a dato sa Mowab kaan iyan mipaar so Israil.
13 Miyakipagabanga si Iglon ko manga Amoniyo ago so manga Amalik na giyobat iran a
Israil na miyaagaw iran so siti a Yariko.
14 Na mipapaar i Iglon a dato sa Mowab so manga Israil ko miyakasapolo ago walo
ragon.
15 Gomiyoraok peman so manga Israil ko Allah sa tabang na bigan iyan siran sa

pekasabet kiran a si Ihod a padiwangan a mama a wata i Gira a ped ko mbatabataa
Baniyamin. Siyogo sekaniyan o manga Israil a aya pegawid ko pirak a imbowis iran sii ki
Iglon a dato sa Mowab.
16 Na mimbaal si Ihod sa gonong a dowa i garangan a tenga sa mitros a katas iyan na
initakip iyan ai ko kawanan a kilid iyan ko didalem o nditaren iyan.
17 Oriyan iyan na inawidan iyan so pirak a imbowis ki Iglon; na tanto a kaolit a mama si
Iglon.
18 Kagiya mibegay ron i Ihod so pirak na piyakabaling iyan so manga mama a kiaawid
on.
19 Miyonot sekaniyan kiran taman ko kowari sa Gilgal, ogaid na komiyasoy bo ko dato
Iglon na pitero iyan on a "Aden a pagenes a peteroon ko reka, dato."
Na pitero o dato ko manga orobarang iyan a renek siran, na lominiyo siran langon ko
rowang.
20 Miyobay si Ihod ki Iglon sii ko kaoontod iyan a da a ped iyan ko marenggay a milik
iyan ko kaporoan o torogan na pitero iyan on a "Aden a peteroon ko reka a poon ko
Tohan." Tominindeg so dato
21 Na biyokot i Ihod a diwang a lima so gonong a mitatakip ko kawanan a kilid iyan na
inibaseg iyan ko tiyan o dato.
22 Miyaalep on so gonong a rakes o soongan iyan na lomiyambas ai ko likod o dato. Da
ini badota i Ihod ko tiyan iyan na miyakandemet on so sibo.
23 Na lominiyo si Ihod ko rowang na likeban iyan so manga pintoan ago piyananggalan
iyan
24 Na miyawa roo.
Kagiya maipos sekaniyan na komiyasoy bo so manga orobarang i Iglon na miyailay
iran a tatanggalan so manga pintoan o rowang. Aya katao iran on na sii sa soled so dato a
pesong sa ig
25 Na nomiyayaw siran. Ogaid na kagiya matey a da niyan kalekai so manga pintoan na
kiyasasalakawan siran na kominowa siran sa gonsi na likaan iran, na makakekelit bes so
dato iran ko tabla a miyatay den!
26 Sii ko kiyanayaw iran na miyalagoy si Ihod. Somiyagad sekaniyan ko manga kowari

na miyagapas sa Sairat.
27 Sii ko kiyapakaoma niyan ko kapalawan sa Ipraim na miyamogiyong sekaniyan a
initawag iyan ko manga Israil ko kapetidawa, na piyakaonot iyan siran tomondagay ko
manga bobongan.
28 “Tondoga ko niyo," a tig iyan kiran, "ka piyalad o Allah so manga ridoay niyo a manga
Mowabiyo ko kapaar iyo." Na tiyondog iran sekaniyan a pesong ko kapantaran na inagaw
iran so darpa a peripagan o manga Mowabiyo ko lawasaig a Yordan, na da iran perowa o
ba aden a makaripag on a sakataw bo.
29 Na manga sapolo nggibo a manga Mowabiyo a miyapatay iran sangkoto a gawii a
langon oto manga wawaraw ago manga babager a manga sondaro. Da den a isa kiran bo
a ba miyakapalagoy.
30 Tiyaban o manga Israil a Mowab sangkoto a gawii na lominintad so inged ko soled o
miyakawalo polo ragon.
Siyamgar
31 Aya miyakatalondog a somiyabet ko manga Israil na si Siyamgar a wata i Anat.

Miyakapatay sekaniyan sa nem gatos a manga Pilistiyo a aya minipatay niyan kiran na so
ipenggaroti ko sapi.
MANGA PANGONGOKOM 4
Si Diborah ago si Barak
Sii ko oriyan o kiyapatay i Ihod na minggolaola peman so manga Israil sa marata ko

kapekeilaya on o Allah.
2 Na piyalad siran o Allah ko kapaar i Yabin a isa a dato a taga Kanaan a ndadato sii sa
siti a Hasor. So komandir o manga sondaro niyan na si Sisira a mababaling sa Harosit
Hagoyim.
3 Si Yabin na siyaw gatos a manga potaw a karo niyan sa katidawa na masarangit a
kapepangarasii niyan ko manga Israil ko soled o dowa polo ragon. Sabap roo na
gomiyoraok so manga Israil ko Allah sa tabang.
4 Aya pepangokom ko manga Israil sangkoto a masa na so babay a nabi a si Diborah a

karoma i Lapidot.
5 Di sekaniyan dii mangokom sii ko atag o kayo a korma a bebetowan sa Kayo a Diborah
sii sa pageletan a Ramah ago giya Bitil sii ko kapalawan sa Ipraim, na pepamanong roo so
manga Israil a pepekikokom siran on.
6 Miyakaisa a gawii na piyakisogoan iyan si Barak a wata i Abinowam a taga siti a Kidis
sa Naptali na pitero iyan on a "Giyai i inisogo reka o Allah a Tohan o Israil: 'Lalakaw ka
na timo ka sa sapolo nggibo a manga mama a ped ko manga mbatabataa Naptali ago
Sibolon na pakaonota ngka siran roo sa Palaw a Tabor.
7 Pagagaken ko si Sisira a komandir o manga sondaro i Yabin a rakes o manga karo niyan
ago manga sondaro sa kapakipetidawa iran reka roo ko Lawasaig a Kison, na peladen ko
siran sii ko kapaar ka. ' "
8 Na pitero on i Barak a "O pagonot ka raken na song ako roo, ogaid na o di ka raken
pagonot na di ako roo song."
9 Somimbag si Diborah a "Oway, magonot ako reka, ogaid na sabap sangkanan a

miyapamikir ka na di ka kebantogan sangkai a lalakaw ngka, ka peladen o Allah si Sisira
ko isa a babay." Mandiyadi na miyonot si Diborah ki Barak sa kasong iran sa Kidis
10 Na roo tinimo i Barak so manga mbatabataa Sibolon ago Naptali, na sapolo nggibo a
manga mama a miyamangonot rekaniyan, na miyonot mambo si Diborah.
11 Sa da pen ai kanggolaola na si Hibir a Kiniyo na biyangon iyan so barombarong iyan a

marani sa Kidis ko obay o kayo a Kalipapa roo sa Saanaim ka miyogalin sekaniyan sa
babalingan a mawatan ko ped a manga Kiniyo a aya kiyababadan ko Hobab a bati o
Mosa.
12 Kagiya katokawan i Sisira a tomiyakedeg si Barak ko Palaw a Tabor

13 Na tinimo iyan so siyaw gatos a manga potaw a karo niyan ago so langon o manga
sondaro niyan na lomiyalakaw siran a poon sa Harosithagoyim roo den ko Lawasaig a
Kison.
14 Na pitero i Diborah ki Barak a "Senser ka den! Giyai den i gawii a kapelada o Allah ki
Sisira ko kapaar ka, ka pepangonaan reka so Allah." Mandiyadi na tomiyondagay si
Barak ko Palaw a Tabor a oonotan o sapolo nggibo a manga sondaro niyan.
15 Sii ko kiyagobat i Barak na piyakalekan o Allah si Sisira ago so langon o manga
pangongolin ko manga karo niyan ago manga sondaro. Tomipad si Sisira ko karo niyan
na domiyarabay sa kapelagoy niyan.
16 Ogaid na inipananantal i Barak so manga karo ago manga sondaro i Sisira taman roo
sa Harosit Hagoyim. Na miyanga bobono so langon o manga sondaro i Sisira. Da den a
sakataw kiran bo a ba miyakapagoyag.
17 Si peman si Sisira na pepelalagoy a pepegapas ko barombarong i Hail a karoma i Hibir

a Kiniyo sabap sa dii ngginawai si Yabin a dato sa Hasor ago so pamiliya i Hibir.
18 Lominiyo si Hail a magalaw ki Sisira na pitero iyan on a "Bolos ka, kadnan ko; bolos
ka sii den; di ka pekelek." Na somiyoled si Sisira ko barombarong na siyapengan i Hail
sa tanggob.
19 “Pekewaw ako," a tig i Sisira. "Kapedipedi ka bo na pakainoma ko ngka sa ig." Na

lomika si Hail ko petegoan sa gatas na piyakainom iyan sekaniyan na tiyanggoban iyan
bo.
20 Tig pen i Sisira a "Tindeg ka san ko gimowa o barombarong na o aden a pekaoma a
ipagise iyan reka a 'Ba aden a taw san?' na teroa ngka on a da. "
21 Ogaid na kagiya kanekan sa torog si Sisira ka minikopay den na kominowa si Hail sa

lapek a barombarong ago bakbak na minanay mobay ki Sisira na piyopok iyan so lapek ko
kilid a olo niyan a piyakalambas iyan ko lopa, na miyatay sekaniyan.
22 Na sarta a miyakaoma si Barak a dii mbanog ki Sisira, na lominiyo si Hail ka inalaw

niyan. "Soled ka," a tig iyan on, "ka pekiilay aken reka so mama a pepangilobaan ka."
Na somiyoled sekaniyan na miyailay niyan si Sisira a makakekelit ko lopa a miyatay a
lomiyambas so lapek ko olo niyan.
23 Sii sangkoto a gawii na piyakitaban o Tohan ko manga Israil si Yabin a so Ikanaanen a

dato.
24 Na ipoon roo na pelonsanan den o manga Israil makitidawa so dato Yabin taman sa
miyabinasa iran den.
MANGA PANGONGOKOM 5
So Bayok i Diborah
Sii sangkoto a gawii na si Diborah ago si Barak a wata i Abinowam na inimbayok iran
angkai a bayok:
2 Igira a pegolowan so manga pendatoon sa Israil

na pekebabaya kiran tomondog so manga taw;
podin so Allah!
3 Pamakineg kano, hey manga dato!

Lekai niyo a manga tangila niyo, hey manga pegawidan!
Pegidaidaan ko ago pemboniboniyan so Allah a Tohan o Israil.
4 Ya Allah, isako awaan ka so kapalawan sa Sair,

sii ko kiyalalakaw ngka poon ko inged a Idom
na tiyabad so doniya ago miyoran so manga gabon sa langit.
5 Milinog so manga palaw ko kapepekaoma o Allah
apiya so Palaw a Sinay sii ko kamamasaan o Allah a Tohan o Israil.
6 Sii ko masa i Siyamgar a wata i Anat,

ago sii ko manga gawii i Hail
na da den kaokiti so manga ala a lalan,
ka sii pepekaokit so dii melayalayag ko manga iito a lalan.
7 Kiyadaan sa taw so pepamagonayonayan sii sa Israil;
kiyadaan den sa taw taman ko kiyapakagemaw aken a si Diborah,
a miyakagemaw a ina sii sa Israil.
8 Isako mili so manga Israil sa bago a manga katohanan
na kiyapoonan den so dii katidawa sii ko pepegingedingedan.
Ogaid na da den a kelong o di na bangkaw a ba miyailay
sii ko pat polo nggibo a manga Israil!
9 Maampil so poso aken ko manga olowan sa Israil
ago sii ko siran oto a miyababaya kiran tomondog.
Podin so Allah!
10 Sekano a kikokoda ko manga popoti a kimar

a kioontod ko manga ampido niyo,
ago sekano a dii ndilalag ko manga lalan na pamakinega niyo!
11 Pamakinega niyo so lagam o dii mbibitiyarai
a dii timotimo ko manga darpa a pesegeban.
Pepanotolen iran so manga oontol a kiyapakadaag o Allah
ago so manga kiyapakadaag o manga sondaro niyan sii sa Israil.
Samaoto na so manga pagtaw o Allah
na tomiyondagay ko manga gimowa o siti.
12 Pagnaw ka, hey Diborah, pagnaw ka!

Pagnaw ka na pagidaida ka sa bayok!
Mbowat ka, hey Barak!
Tondaa ngka so manga biyag ka, hey wata o Abinowam!
13 Samaoto na so miyalamba a manga mama

na miyamanong ko manga olowan;
so manga pagtaw o Allah na miyamanong raken
a rakes o manga babager.
14 So ped kiran na miyakapoon sa Ipraim
a so bekaw iran na sisii sa Amalik.
Somiyong reka pen so Baniyamin
a ped o manga pagtaw ngka.
Poon sa Makir na miyamanong so manga komandir,
na miyakapoon sa Sibolon so kiaawid sa tongkas a olowan.
15 So manga pendatoon sa Isakar na miyonot ki Diborah,
oway, miyonot on si Isakar ago si Barak, na tiyondog iran sekaniyan
a di siran dii nggagaan roo ko balintad.
Ogaid na sii ko mbatabataa Robin
na mala so kiyapakandowadowa iran.
16 Ino kano petelimbegak ko obay o manga tangkal
sa kapemakinega niyo ko manga tomameng a petelo ko manga bilibili?
Oway, sii ko mbatabataa Robin
na mala so kiyapakandowadowa iran.
17 Siran oto a komakaden sa Giliyad na mitelimbegak roo sa sebangan a Yordan.
So mbatabataa Dan na ino siran tereg ko manga kapal?
Mitelimbegak so mbatabataa a Asir sii ko kilid a ragat,
a komakaden den ko manga kikasosogod.
18 Ogaid na so manga taw sa Sibolon ago Naptali
na iniserakan iran a manga niyawa iran roo ko dii tidawaan.
19 Miyakatalingoma so manga dato na mitidawa siran.

Miyakitidawa so manga dato sa Kanaan
sii sa Taanak ko obay o manga bowalan sa Migido
ogaid na da a ba iran miyateban a pirak.
20 Poon sa langit na miyakitidawa so manga bitoon;
sii ko kapeketas iran ko langit na miyakitidawa siran ki Sisira.
21 So dii mbagiyaw a lawasaig a Kison na piyayopas iyan siran
a so tanto a mabandes a lawasaig a Kison.
Hey ginawa ko, senser ka sii ko bager ka!
22 Samaoto na domiyagedeb so manga kalamaging o pepelolompat a manga koda,
a so kapepelolompat o manga babager a koda.
23 “Kamorkaan so manga taw sa Miros," a tig o Malaikat o Allah.
"Kamorkaan siran sa tanto a masakit
ka da siran makatalingoma sa kapagogopi ran ko Allah
sa kapagogopi ran ko Allah ko di niyan dii kapakitidawa ko manga babager a sondaro."
24 Lebi a rarakmatan ko manga babay si Yail

a so karoma i Hibir a Kiniyo
lebi sekaniyan a rarakmatan ko manga babay a kibabaling ko manga barombarong.
25 Miyangni si Sisira sa ig,
na bigan i Yail sa gatas.
Inowitan iyan sa mbabatik a gatas a matatago ko ladiya a patot ko tanto a taw.
26 Komiyawa si Yail a diwang sa lapek a barombarong,
na komiyawa a kawanan sa bakbak o panday,
na piyopok iyan a bakbak si Sisira, na siyasa iyan so olo niyan;
biyowar ago biyaseg iyan so otek iyan.
27 Miyaoteng sekaniyan a minipayodas;
miyakakelit sekaniyan a miyatay ko obay o ai i Yail.
28 Lomiyangkaw ko dirowasa so ina i Sisira;

sii ko malilikod o diyalosi na inigoraok iyan a
"Ino matey a kapekaoma o karo niyan?
Ino tano di keneg so dagedeb o manga karo niyan?"
29 Somimbag rekaniyan so manga oongangen a raga niyan,
na omanoman iyan mambo dii teroon sa ginawa niyan a
30 “Di iran dii mbagibagiin so miyanga teteban iran
a so sakataw a babay o di na dowa para ko oman i sondaro
a so manga pipiya i paras a nditaren a kowaan i Sisira,
ago mbarambarang i warna a manga bobordaan a dinis a imbegay niyan raken."
31 Pangnin ta a manga dedadas sa lagid oto

so langon o manga ridoay ngka, ya Allah!
Ogaid na malagid o alongan so pepanga bebaya reka
igira a pesebang sii ko bager iyan!
Na lominintad so inged ko soled o pat polo ragon.
MANGA PANGONGOKOM 6
Si Gidiyon
Oriyan iyan na minggolaola peroman sa marata so manga Israil sii ko kapekeilaya on o

Allah, na sii ko soled o pito ragon na papaladen siran o Allah ko kapaar o manga taw sa
Midiyan.
2 Sabap ko kapesonsinga kiran o manga Midiyan na mitiyagar so manga Israil sa manga
kapegapasan sii ko manga liyang ago manga gireb roo ko manga palaw.
3 Igira a miyakapamola so manga Israil sa pereperan na so manga Midiyan, so manga
Amalik ago so manga kibabaling sa sebangan na penggobaten iran siran.
4 Di siran dii kempo ko kalopaan na pembinasaan iran so langon a peragonen apiya
taman sa Gasa. Da a ba iran pelambaan a ikeoyag o manga Israil ka pekowaan iran so
manga bilibili, manga kambing, manga sapi ago so manga kimar.
5 Pepekaoma siran a itetalon iran so manga pangangayamen ago manga barombarong iran
a lagid siran sa kakapal o manga tarapan. Di siran den kebilang ago so manga onta iran,
na pembinasaan iran so inged sii ko katatareg iran on.
6 Na gomiyoraok so manga Israil a pekitabang ko Allah sabap sa tanto siran a
pepakamiskinen o manga Midiyan.
7 Sii ko kiyagoraok iran ko Allah sabap ko manga Midiyan

8 Na somiyogo so Allah sa nabi ko manga Israil a pitero iyan kiran a "Giyai i kabasa o
Allah a Tohan o Israil: Iniliyo aken sekano roo sa Misir a ron kano miyapangongoripen.
9 Piyokas aken sekano ko kapaar o manga Imisiren ago poon ko bager o langon a
pepangarasi rekano sangkai a inged. Piyamogaw aken siran sii ko kapegantap iyo kiran
na inibegay aken rekano so lopa iran.
10 Pitero aken rekano a 'Saken so Allah a Tohan iyo; di kano simba ko manga katohanan
o manga Amoriyo a so inged iran i babalingan iyo imanto.' Ogaid na da ako niyo
pakinega."
11 Sa masa oto na miyakatalingoma so Malaikat o Allah sa Oprah na miyontod ko atag o

kayo a kalipapa a rek i Yowas a ped ko mbawataan o Abiyasar. So wata i Yowas a si
Gidiyon na pegegik sa trigo sii ko petemekan sa arak kaan iyan mitepok so pereperan ko
manga Midiyan.
12 Miyakiilay rekaniyan so Malaikat o Allah a tig iyan a "Hey mabager a mawaraw a
mama, sisii reka so Allah!"
13 “A, Kadnan ko," a inisembag i Gidiyon, "o sisii rekami so Allah na ino rekami ini
langon mapenggolaola? Anda den so langon a piyakamemesa a pinggolaola niyan a
miyapanotol rekami o manga apo ami? Ba iran da teroa a 'Inowit tano sii o Allah a poon
sa Misir'? Ogaid na samanaya na inawaan kami den o Allah na piyalad kami niyan ko
kapaar o manga Midiyan!"
14 Na inilay sekaniyan o Allah a tig iyan a "Ika roo sii ko bager ka na sabeta ngka so
Israil poon ko kapaar o manga Midiyan. Sogoon ko seka!"
15 “A, Kadnan ko," a tig i Gidiyon, "Andamanaya i kakesabeta ko ko Israil? So manga

tonganay aken na aya lebi a malobay ko mbatabataa Manasih, na saken i lebi a mababa ko
pamiliya ko."
16 Somimbag so Allah a "Keped ako reka na penasaan ka so manga Midiyan a lagid bo o

sasakataw siran."
17 Tig i Gidiyon a "O kelimoon ako ngka na begi ako ngka sa poriba sa so Allah i di
raken dii makimbitiyarai.
18 Kapedipedi ka bo na di ka sii pegawa taman sa makakasoy ako reka a maawid ko
selasela a isepaat aken reka."
Na tig iyan a "Penayaw ako sii taman ko kapakakasoy ngka."
19 Somiyoled si Gidiyon ko walay niyan na tomininda sa mangoda a kambing ago

mimbaal sa paan a da a tapay ron a manga isa ka gantang a arina. Inisoled iyan so sapo
ko balengkat ago so sawaw niyan sii ko koden na inowit iyan ko malaikat roo ko atag o
kayo a kalipapa na inenat iyan on.
20 Pitero on o malaikat o Tohan a "Betaden ka so sapo ago so paan sangkai a ator na go

ngka on ododa so sawaw." Na pinggolaola ini i Gidiyon.
21 Na iniseko o malaikat o Allah so poro o teken a kakapetan iyan ko sapo ago so paan.
Somiyokeyaw so apoy a poon ko ator na liyamed iyan so sapo ago so paan, na miyada so
malaikat.
22 Kagiya katokawan i Gidiyon a giyoto so malaikat o Allah na pitero iyan a "Ya Allah a
Kadnan ko, miyailay aken so malaikat o Allah a makapageedapa kami!"
23 “Sii reka so kalilintad," a tig o Allah. "Di ka pekelek. Kena o ba ka petay."

24 Na miyangon roo si Gidiyon sa aparan para ko Allah, na bitowan iyan ai sa "So Allah
na aya den Kalilintad." Na ndodoo den ai taman imanto roo sa Oprah sii ko inged o
mbawataan o Abiyasar.
25 Sii sangkoto a kagagawii na pitero o Allah ki Gidiyon a "Kowaa ngka so ikadowa a

mama a sapi ko talon o ama a ka a so miyakapito ron ragon a idad iyan. Gebaa ngka so
aparan a biyangon o ama a ka para ko katohanan a Baal na pataa ngka so polaos a toos ko
katohanan a Asirah a makatitindeg ko obay niyan.
26 Bangon ka sa aparan para ko Allah a Tohan ka ko poro angkai a bobongan a tenoren
ka piyapiya so manga ator on. Na kowaa ngka so ikadowa a sapi na sapaaten ka a
petotongen sangkai a aparan a aya itegon ka on na so polaos a Asirah a piyata ka."
27 Mandiyadi na piyakaonot i Gidiyon so sapolo kataw a talasogoay niyan na
ininggolalan iran so pitero on o Allah. Ogaid na sabap sa inikalek iyan so pamiliya o ama
iyan ago so manga mama sangkoto a siti na gagawii a kiyanggolaolaa niyan sii a kena a
ba kadadaondaw.
28 Sii ko teked a kapipita ko kiyapakambowat o manga mama ko siti na miyailay iran a

miyageba so aparan ko Baal ago miyapata so polaos a Asirah a matatago ko obay o
aparan. Miyailay iran pen so bago a aparan a kiyambaalan a ron miyatotong so ikadowa a
sapi.
29 Na miyamagisei siran a "Antawaa i minggolaola sii?" Kagiya ondamaan iran piyapiya
na kiyatokawan iran a si Gidiyon a wata i Yowas i minggolaola on.
30 Na piyantonan iran si Yowas a "Liyon ka so wata a ka kaan ami mabono! Giba iyan
so aparan ko Baal ago piyata iyan so polaos a Asirah a matatago ko obay niyan."
31 Ogaid na pitero i Yowas ko langon a pekerarangitan a manga taw a lomilibet on a "Ba

niyo petindegen so Baal? Ba niyo petepengi somabet? Apiya antawaa i penindeg on na
mbonoon sii den sangkai a kapipita! O tito a tohan so Baal na kitindeg iyan a ginawa
niyan amay ka aden a gomeba ko aparan iyan."
32 Sabap roo na ipoon sangkoto a gawii na bitowan si Gidiyon sa Yarobaal (aya maana
niyan na "Mitindeg o Baal a ginawa niyan") ka kagiya giba iyan so aparan o Baal.
33 Sa masa oto na so langon o manga Midiyan, manga Amalik ago so manga kibabaling
sa sebangan na piyakaisaisa iran so manga sondaro iran na rominipag siran sa Yordan ago
mikempo ko Balintad a Yasriil.
34 So Roh o Allah na minitemo ki Gidiyon na miyamogiyong sekaniyan a initawag iyan
ko manga mama ko mbawataan o Abiyasir sa kapetidawa na somiyong siran on.
35 Na piyakisogoan iyan so manga mama ko dalem a inged a Manasih ago so pen so
manga mama ko manga mbatabataa Asir, Sibolon ago Naptali, na somiyong siran on
mambo.
36 Mandiyadi na pitero i Gidiyon ko Tohan a "O sebeta ngka so manga Israil a nggolalan
ko bager aken a aya ngka den miyatero
37 Na ilaya ngka, ka mbetad ako sa bombol a bilibili sii ko lopa a pegegikan ami sa trigo.
Amay ka mapita na o aya bo a ketagoan sa namog na so bombol ogaid na mamara so lopa
ko melilibeta on na ketokawan ko a benar a sebeten ka so manga Israil a nggolalan ko
bager aken a aya ngka den initopa."
38 Na giyoto den i miyanggolaola. Mimbowat si Gidiyon ko teked a kapipita na timek
iyan so bombol na tomiyoga on so namog a miyakapeno so ig ko ladiya.
39 Pitero peman i Gidiyon ko Tohan a "Di ako ngka kerarangiti ka pemangni ako reka
pen sa makaisa. Kapedipedi ka bo na pakatepenga ko ngka peroman ko bombol sa
makaisa pen. Baloya ngka a mamara so bombol ago aya mabasa a namog na so lopa ko
melilibeta on."
40 Na sii sangkoto a kagagawii na pinggolaola oto o Tohan. So bo so bombol i mamara
ogaid na so lopa ko melilibeta on na miyabasa a namog.
MANGA PANGONGOKOM 7
Tiyaban i Gidiyon so manga Midiyan
Sii ko teked a kapipita na miyamangembowat si Yarobbaal (giyanan si Gidiyon) ago so

langon a manga mama niyan na mikempo siran ko obay o Bowalan a Harod. So
kekampowan o manga Midiyan na sii matatampar ko pagotaraan iran sii ko balintad a
marani ko Bobongan a Morih.
2 Pitero o Allah ki Gidiyon a "Tanto a madakel a manga mama a ped ka. Di aken siran
langon pekatabanen ko manga Midiyan ka o ba baden mitekabor o manga Israil a so bager
iran i miyakasabet kiran a kena a ba saken.
3 Kagiya ka maoto na panawatewagen ka kiran imanto a 'Apiya antawaa i pekelek a da a
kawaraw niyan na pekabaling a pekaganat sangkai a Palaw a Giliyad.' Na dowa polo ago
dowa nggibo a manga mama a miyaling na sapolo nggibo baden a miyalamba a
minibegak.
4 Pitero o Allah ki Gidiyon a "Madakel pen anan a tanto a manga mama. Pakaonota ngka
siran ko lawasaig ka atasan ko siran reka roo. O teroa ko reka a 'Giyai i pekaonot reka.'
na magonot reka. Ogaid na o teroa ko a 'Giyai na di reka pekaonot,' na di sekaniyan
magonot."
5 Na inowit i Gidiyon so manga mama ko lawasaig na pitero on o Allah a "Oman i isa a
ipesekdo niyan a lima niyan ko ig a pendilaan iyan a lagid o aso na belaga ngka ko siran
oto a tomitikoro a pesonsomen iran so ig ko lawasaig."
6 Na telo gatos a mama a inisakdo iran a lima iran ko ig a piyanilaan iran, na so langon o
ped na tominikoro a somiyonsom ko ig ko lawasaig.
7 Na pitero o Allah ki Gidiyon a "Nggolalan ko telo gatos a mama a dominila ko ig na
sebeten ko sekano na peladen ko reka so manga Midiyan. Pakalalakawa ngka so langon a
ped a manga mama a so oman i isa on ko darpa iyan."
8 Na piyakabaling i Gidiyon so langon a ped a manga Israil liyo ron so telo gatos a mama
a miyamakakepit ko langon a manga nganin a pelotoon ago so manga bogiyong.
Samaoto na so kampo o manga Midiyan na roo ko balintad ko kababaan iran.
9 Sii sangkoto a kagagawii na pitero o Allah ki Gidiyon a "Mbowat ka na go ngka
tondagayi gomobat so kampo o manga Midiyan, ka piyalad aken siran ko kapaar ka.
10 Ogaid na o pekelek ka gomobat na tondagay ka ko kampo a ped o talasogoay ngka a
si Porah.
11 Keneg ka so di iran dii mbibitiyaraiyan na oriyan ai na pekawaraw ka sa kanggobata
ngka kiran."
Na tomiyondagay siran ago si Porah a talasogoay niyan ko temanaan o kampo o manga
ridoay.
12 So manga Midiyan, so manga Amalik ago so ped a kibabaling sa sebangan na
lomalangkap siran ko balintad a datar sa kakapal o manga tarapan. Di den kebilang so
manga onta iran a lagid sa kadakel o peted ko kilid a ragat!
13 Sii den ko kiyapakaoma roo i Gidiyon na miyaneg iyan so sakataw a mama a
pepanotolen iyan so taginepen iyan ko ginawai niyan a aya kabasa niyan na "Piteginep
aken a aden a satompi a paan a bantad a pekelilid sa baba taman ko kampo o manga
Midiyan. Miyakatalingoma ini ko isa a tolda na miyasogat iyan sa tanto a mabager, na
miyaoteng so tolda ago miyalayang!"
14 Tig o ginawai niyan a "Giyanan so pedang i Gidiyon a wata i Yowas a taw sa Israil!
Da den a salakaw a kapemaanai ron! Piyalad rekaniyan o Tohan so manga Midiyan ago
so langon a sondaro tano!"
15 Kagiya maneg i Gidiyon so kiyapanotola ko taginepen ago so maana niyan na

sominimba sekaniyan ko Allah. Na komiyasoy den ko kekampowan o manga Israil na
inilalis iyan a "Mbowat kano! Piyalad rekano o Allah so manga sondaro a Midiyan!"
16 Biyagi iyan sa telo lompok so telo gatos a mama na bigan iyan so oman i isa kiran sa
bogiyong ago omoy a bote a aden a solo a isosoled on.
17 Na pitero iyan kiran a "Amay ka makaoma ako ko kilid o kampo na pegilaya ko niyo,
na so den so pesowaan aken na sowaa niyo mambo.
18 Sii den ko kapakaoniya ko ago so manga ped aken ko manga bogiyong ami na langon
kano a makalilibet ko kampo na pakaoniya niyo mambo so manga bogiyong iyo ago
pelalalisen iyo a 'So pedang o Allah ago ki Gidiyon!' "
19 Miyakaoma si Gidiyon ago so magatos a manga mama a moonot on ko kilid o kampo

ko kiyalooki sa gawii sii den ko oriyan o kiyasambii ko manga gordiya. Sarta den a
piyamakaoni ran so manga bogiyong ago piroropet iran so manga omoy a kikakapetan
iran
20 Na parengarengan a kiyapakaoniya o telo lompok ko manga bogiyong ago so
kiyaropeta iran ko manga omoy. Kakapetan iran a diwang so manga solo ago sa kawanan
so manga bogiyong a pemakaonin iran, na inipelalalis iran a "So pedang o Allah ago ki
Gidiyon!"
21 Na sii ko katitindeg o oman i isa kiran ko sangan iyan a darpa ko melilibeta ko kampo
na miyabosigaw ago miyamalagoy so langon o manga Midiyan a dii melalalis sa kalek.
22 Sii ko dii kapamogiyong o telo gatos a mama i Gidiyon na piyakapagonaya tidawa o
Allah a pedang so langon a manga Midiyan ko kampo, na miyamalagoy siran a pegagaw
sa Sirirat taman sa Bitsitah roo den ko temanaan a Abilmiholah a marani sa Tabat.
23 Samaoto na piyanawag i Gidiyon so manga Israil a poon ko manga mbatabataa

Naptali, Asir ago Manasih, na piyanaloba iran so manga Midiyan.
24 Somiyogo mambo si Gidiyon sa manga mama ko dalem o kapalawan sa Ipraim sa
kapeteroa iran a "Tondagay kano sii na ogop kano makitidawa ko manga Midiyan.
Talangani niyo so manga darpa a peripagan sa Yordan taman sa Bitbarah kaan iyo roo
maren so kaperipag iran on." Na mitimo so manga mama sa Ipraim na tiyalanganan iran
so manga peripagan sa Yordan taman sa Bitbarah.
25 Miyadakep iran so dowa ko manga olowan o manga Midiyan a si Orib ago si Siib.
Biyono iran si Orib roo ko Ator sa Orib, ago si pen si Siib sii ko Petemekan sa Arak o
Siib. Na tomiyaros siran somaloba ko manga Midiyan, na inowit iran so manga olo i
Orib ago si Siib sii ki Gidiyon a sisii den ko obay a Yordan.
MANGA PANGONGOKOM 8
So Kiyabonoa i Gidiyon ki Sibah ago si Salmona
Na iniise o manga taw sa Ipraim ki Gidiyon a "Ino ngka rekami ai kikidian? Ino kami
ngka da pakisogoi isako lomalakaw ka makitidawa ko manga Midiyan?" Na tanto iran
sekaniyan a piyanarotaroan.
2 Ogaid na pitero kiran i Gidiyon a "Antonaa i pinggolaola ko a kiabay ko pinggolaola

niyo? Ba di so inibegak a manga obas a piyangosip o manga taw sa Ipraim na mala i
kipantag a di so langon o manga obas a pirerebas o mbawataan o Abiyasar a maaped ako
ron?
3 Piyalad rekano o Tohan so manga olowan o manga Midiyan a si Orib ago si Siib.
Antonaa i miyagaga ko nggolaola a kiabay ron?" Kagiya teroon ai i Gidiyon na miyada
so rarangit iran.
4 Na rominipag si Gidiyon ko Lawasaig a Yordan a oonotan o telo gatos a manga mama

niyan, na apiya pen minikopay siran na itataros iran den somaloba so manga ridoay.
5 Kagiya makaoma siran sa Sokot na pitero i Gidiyon ko manga mama on a "Kapedipedi
kano bo na begi niyo so manga sondaro aken sa manga paan. Tanto siran a minikopay na
peselobaan ko pen si Siba ago si Salmona a manga dato sa Midiyan."
6 Ogaid na pitero o manga olowan sa Sokot a "Ino ami pekakana so manga sondaro ngka
a da ngka pen mabiyag si Sibah ago si Salmona."
7 Tig i Gidiyon a "Sabap sa giyanan kano na amay ka paladen raken o Allah si Sibah ago
si Salmona na nggomisain aken so manga sapo iyo a baletek ago wangay a poon ko
mitataog!"
8 Na tomiyaros si Gidiyon sa Piniyal na miyamangni roo peman sa datar iyan. Ogaid na

aya inisembag o manga mama on na lagid bo o inisembag o manga mama sa Sokot.
9 Na pitero kiran i Gidiyon a "Amay ka komasoy ako sii a miyakataban na nggebaan ko
angkai a lantawa."
10 Samaoto na si Sibah ago si Salmona na roo den sa Karkor a ped iran so manga sondaro
iran a manga sapolo ago lima nggibo. Giyanan bo i miyalamba ko langon a
mamagabanga a manga sondaro a poon sa sebangan, ka magatos ago dowa polo nggibo
kiran a miyanga bobono.
11 Na somiyalilit kiran si Gidiyon a sii miyokit ko lalan ko kilid o disirto ko
masesebangan a Nobah ago giya Yogbiyah na tikawan iyan gomobat so manga Midiyan a
aya katao iran on na malilinding.
12 Miyamalagoy si Sibah ago si Salmona a so dowa a dato sa Midiyan, ogaid na piseloba
siran i Gidiyon na piyamiyag iyan, na piyakalekan iyan pen so langon o manga sondaro
iran.
13 Oriyan iyan na komiyasoy si Gidiyon a miyakapoon ko kiyatidawa a sii miyokit ko

Okita sa Hiris.
14 Miyadakep iyan roo a mangoda a mama a poon sa Sokot na piyangingisean sekaniyan i
Gidiyon. Na inisorat o mangoda so manga ngaran o manga olowan ago so manga
pelokelokesen sa Sokot, a pito polo ago pito kataw.
15 Kagiya makaoma si Gidiyon sa Sokot na pitero iyan ko manga mama on a "Katii si
Sibah ago si Salmona a inipagongatongat iyo raken a tig iyo a 'Ino ami pekakana so
manga sondaro ngka a minikopay a da ngka pen mabiyag si Sibah ago si Salmona?"
16 Na kominowa si Gidiyon sa manga baletek ago wangay a poon ko mitataog na inosar
iyan ai sa kiyaperanega niyan ko manga olowan sa Sokot.
17 Giba iyan pen so lantawa sa Piniyal na piyamono iyan so manga mama ko siti.
18 Oriyan iyan na inisean iyan si Sibah ago si Salmona sa "Antonaa i kelagidan ko manga
mama a piyamono iyo roo sa Tabor?"
"Manga mama a lagid ka," a inisembag iran. "Oman i isa kiran na lagid sa paras o wata
o dato."
19 “Manga pagari aken oto," a tig i Gidiyon, "a manga wata den o ina aken. Mataan den
ko kaooyagoyag o Allah ka o da niyo siran pamonoa na di aken sekano mambo
pemonoon."
20 Na pitero i Gidiyon ko kaka a wata iyan a si Yatir a "Na, bonoa ngka siran!" Ogaid
na da bindasa i Yatir so pedang iyan ka miyalek, ka matag bago a mama.
21 Na pitero i Sibah ago si Salmona a "Na, seka den i bono rekami ka galebek ai o
mikesad a mama." Na giyoto a miyobay kiran si Gidiyon na biyono iyan siran, na kinowa
niyan so manga salay ko lig o manga onta iran.
So Bolawan a Barahala a Bebetowan sa Ipod a Pimbaalan i Gidiyon
22 Na pitero o manga Israil ki Gidiyon a "Seka den i pendato rekami, seka ago so wata a
ka ago so apo o ka, ka siyabet kami ngka ko kapaar o manga Midiyan!"
23 Ogaid na pitero kiran i Gidiyon a "Kena a ba saken i pendato rekano aya pen o ba so
wata aken, ka so Allah na aya niyo dato.
24 Ogaid na aden a pengnin ko rekano. Oman i isa rekano na began iyo raken so manga
aritis a miyateban iyo." (So manga Midiyan na kiyababadan ki Ismail, na adat iran so
kapagaritis sa bolawan.)
25 Tig iran a "Ikebabaya ami a kimbegan ami reka on!" Na komiyayat siran sa nditaren
na iniitog on o oman i mama so manga aritis a miyateban iyan.
26 Aya timbang o manga aritis a bolawan a miyakowa i Gidiyon na manga dowa polo ka
kilo a da on mibilang so manga arta, so manga salay, so manga loloto i kariga a nditaren a
sosoloten o manga dato sa Midiyan ago so manga salay ko lig o manga onta iran.
27 Pimbaalan ai i Gidiyon a bolawan a saliko a inisayan ko saliko o maporo a imam na
tiyago iyan sa Oprah a so siti niyan. Ogaid na so langon o manga Israil na pepamanong
roo a pepamanodiyod on, na miyabaloy ai a litag ki Gidiyon ago so pamiliya niyan.
28 Giyanan i kiyadaaga o manga Israil ko manga Midiyan, na da siran den makabager
peroman. Na lominintad so inged ko miyakapat polo ragon sii ko kaooyagoyag pen i
Gidiyon.
So Kiyapatay i Gidiyon
29 Na komiyasoy si Yarobbaal (giyanan si Gidiyon) a wata i Yowas ko siti niyan a

miyaling ko walay niyan.
30 Pito polo kataw a manga wata i Gidiyon a manga mama ka madakel sekaniyan i
karoma.
31 Aden pen a sandil iyan a mababaling sa Sikim, na mimbawata sekaniyan mambo sa
mama a bitowan i Gidiyon sa Abimilik.
32 Na miyatay si Gidiyon a miyalokes den, na roo inilebeng ko kobor o ama iyan a si
Yowas sii sa Oprah a siti o mbawataan o Abiyasar.
33 Sii den ko kiyapatay i Gidiyon na tomiyalikod peman ko Allah so manga Israil na

sominimba siran ko manga Baal. Biyaloy iran so Baalbirit a aya iran katohanan
34 Na piyakalipatan iran so Allah a Tohan iran a miyakapokas kiran ko kapaar o langon o
manga ridoay iran ko mbalabala.
35 Da iran mambo nggolaolai sa mapiya so pamiliya i Gidiyon a mibadal iran ko langon a
kamapiyaan a miyanggolaola niyan ko manga Israil.
MANGA PANGONGOKOM 9
Si Abimilik
Miyakaisa a gawii na si Abimilik a wata i Gidiyon na somiyong sa Sikim a ron babaling

so manga laki i ina iyan ago so langon a ped a manga tonganay o ina iyan. Na pitero iyan
kiran a
2 “Iseen niyo ko langon a manga mama sa Sikim a 'Anda i tomoon iyo; so kandatoi
rekano o langon o pito polo a manga wata i Gidiyon o di na sakataw bo a pendato
rekano?' Na tademi niyo a saken i rogo iyo!"
3 Na miyakimbitiyarai so manga tonganay i ina iyan ko manga mama sa Sikim

makapantag sangkai a manga katero i Abimilik. Kagiya maneg iran na tiyomo iran a aya
pagonotan iran na si Abimilik, ka pitero iran a "Pagari tano sekaniyan."
4 Na bigan iran sekaniyan sa pito polo a pelata a pirak a poon ko baitalmal ko timplo o
Baal Birit, na inosar ai i Abimilik a initendan ko da a oked iyan a manga labeg a
miyamangonot on.
5 Oriyan iyan na somiyong sekaniyan ko inged o ama iyan sii sa Oprah na roo ko liyawaw
o satiman a ator na piyamono iyan so pito polo a manga pagari niyan a manga wata i
Gidiyon. Ogaid na si Yotam a so ari a wata i Gidiyon na mitepok a miyakapalagoy.
6 Mandiyadi na so langon a manga mama sa Sikim ago sa Bitmilo na miyalimod ko atag
o babarakaten kon a mala a kayo roo sa Sikim na roo iran biyaloy a dato si Abimilik.
So Bayambayanan i Yotam
7 Kagiya maneg ai i Yotam na tomiyakedeg roo ko poro o Palaw a Girisim na liyalis iyan
siran a tig iyan a "Hey manga mama sa Sikim, pamakinega ko niyo o kabaya iyo a
pakinegen kano o Tohan!
8 Miyakaisa a gawii na lomiyalakaw so manga kayo sa kapemili iran sa makapendato
kiran. Pitero iran ko kayo a olibi a 'Ndatoi kami ngka!'
9 Somiyangka so kayo a olibi a tig iyan a 'Ba aken nggeneki megay so lana aken a ipesela
ko manga tohan ago so manga manosiya kaan aken kandatoi so manga kayo?'
10 “Oriyan iyan na pitero o manga kayo ko kayo a higos a 'Na, seka i ndato rekami!'
11 Ogaid na somiyangka mambo so kayo a higos a tig iyan kiran a 'Ba aken nggeneki
pegaden so mapiya ago mamis a onga ko kaan aken kandatoi so manga kayo?'
12 “Na taros a pitero o manga kayo ko waged a obas a 'Na, seka i ndato rekami!'
13 Ogaid na pitero kiran o waged a 'Ba aken nggeneki megay so arak aken a ipepekapiya
a ginawa o manga tohan ago so manga manosiya kaan aken kandatoi so manga kayo?'
14 “Moripori na pitero o langon o manga kayo ko wangay a 'Na, seka i ndato rekami!'
15 Na pitero o wangay ko manga kayo a 'O mataan den a aya kabaya iyo na mabaloy ako
a dato iyo na song kano sii na pagapas kano ko atag aken. Ogaid na o di niyo kabaya na
pengnin ko a makaliyo so apoy a poon ko baleteken a manga sapak aken a merabrab ko
manga kayo a sidro sa Libanon!'
16 Tig pen i Yotam a "Ba maontol ago inipagiklas so kiyabaloya niyo ki Abimilik a dato
iyo? Ba niyo kiyanggolaolaan sa mapiya si Gidiyon ago so pamiliya niyan? Ba niyo
kiyabadalan sa patot rekaniyan?
17 Tademi niyo a miyakitidawa so ama aken sabap rekano na iniserakan iyan a niyawa
niyan ko kiyasabeta niyan rekano ko kapaar o manga Midiyan.
18 Ogaid na imanto na rinido iyo so pamiliya o ama aken ka piyamono iyo so pito polo a
manga wata iyan sii ko satiman a ator. Na biyaloy niyo si Abimilik a wata o sandil iyan a
dato o manga taw sa Sikim sabap bo sa tonganay niyo sekaniyan.
19 O maontol ago iklas so inikidia niyo ki Gidiyon ago so pamiliya niyan sangkai a gawii
na pengnin ko a ikabebaya iyo si Abimilik ago ikabebaya kano niyan mambo.
20 Ogaid na o di, na pengnin ko a makaliyo so apoy a poon ki Abimilik a merarab ko
manga mama sa Sikim ago sa Bitmilo, ago makaliyo mambo so apoy a poon ko manga
mama sa Sikim ago Bitmilo a merarab ki Abimilik."
21 Na miyalagoy si Yotam a miyagapas sa Bir na komiyaden roo sabap ko kalek iyan ko
pagari niyan a si Abimilik.
Siyopak o manga Mama sa Sikim si Abimilik
22 Oriyan o kiyandatoi i Abimilik ko Israil ko miyakatelo ragon

23 Na biyaloy o Tohan a makaperidoay si Abimilik ago so manga mama sa Sikim na
siyopak iran si Abimilik.
24 Pinggolaola ini o Tohan kaan so kiyabonoa ko pito polo a manga wata i Gidiyon na
midaneg ki Abimilik a pagari ran ago so manga mama sa Sikim a miyogop on mono ko
manga pagari niyan.
25 Somiyogo so manga mama sa Sikim sa manga makaayan ki Abimilik sii ko poro o
manga bobongan, na pepanekewan iran so oman i isa a pesegad roo. Ogaid na
miyapakapagiktiyar si Abimilik makapantag sii.
26 Sa masa oto na si Gaal a wata i Ibid na miyogalin sa Sikim a ped iyan so manga pagari
niyan, na somiyarig rekaniyan so manga mama sa Sikim.
27 Kagiya mapasad so kiyarebasa o manga taw ron ko manga obas ko manga asinda iran
ago so kiyambaali ran on a arak na mipista siran sii ko walay o tohan iran. Na sii ko
kapeken iran ago kapeginom na inipamaninta iran si Abimilik.
28 “Antawaa si Abimilik?" a inilalis i Gaal. "Ino tano a manga taw sa Sikim a
makipendato rekaniyan? Matag sekaniyan wata i Gidiyon a si Sibal i pepekasaliyo ron.
Mangongonotan tano ko manga moriyataw o Hamor a ama o Sikim! Ino tano
makipendato ki Abimilik?
29 O ba bo saken i makapegolowan sangkai a manga taw! O magiyoto na imbowang
aken si Abimilik ago peteroon ko ron a 'Omani ngka so manga sondaro ngka na song ka
sii ka tidawa ta!' "
30 Na si Sibol a olowan o siti na tanto a kiyararangitan ko kiyanega niyan ko pitero i

Gaal.
31 Na pagenes a somiyogo sekaniyan ko manga mama ki Abimilik roo sa Aromah a
matero iran on a "Si Gaal a wata i Ibid ago so manga pagari niyan na sisii sa Sikim na
pepangondoin iran so manga taw ron sa kaperidoa reka.
32 Na, sii ko kagagawii na lalakaw kano ago so manga taw ngka na tetapok kano roo ko
manga pangomaan.
33 Amay ka mapita ko kasebang o alongan na mbowat kano na dasega niyo so siti. Na
amay ka meliliyo ron si kiki Gaal ago so manga taw niyan sa kapakipetidawa rekano na
mapenggolaola niyo kiran so apiya antonaa i kabaya iyo."
34 Mandiyadi na sii ko kiyagagawii niyan na lomiyalakaw si Abimilik ago so langon a

taw niyan na miperaparak siran a pat lompok na mitetapok ko liyo a Sikim.
35 Si peman si Gaal na miyasalak a katitindeg iyan ko gimowa o siti ko kiyambowat i
Abimilik ago so manga taw niyan a poon ko manga darpa a tetapokan iran.
36 So kiyailaya kiran i Gaal na pitero iyan ki Sibol a "Ilaya ngka man, ka aden a manga
taw a pepamanondagay a poon ko poro o manga palaw!"
Tig i Sibol a "Matag anan manga along ko kapalawan a pekeilay ngka a kena a ba
manga taw."
37 Ogaid na pitero peman i Gaal a "Di, ka aden a manga taw a pepamanondagay a poon
ko poro o bobongan ago aden pen a salompok a pepekapoon ko lalan a ipesong ko Kayo o
Paririmar!"
38 Na pitero on i Sibol a "Anda den imanto so kala a ka i katero! Ba di seka i mitero sa

'Antawaa si Abimilik a makipendato tano ron?' Giyoto so manga mama a piyagitowito o
ka! Na, liyo ka den na tidawaan ka siran!"
39 Na piyagolowanan i Gaal so manga mama sa Sikim na miyakitidawa siran ki

Abimilik.
40 Piyakatailis siran i Abimilik na miyalagoy si Gaal, na madakel a miyapamono ago
piyanga papalian roo den ko penggaka o siti.
41 Tomiyareg si Abimilik sa Aromah na biyogaw i Sibol si Gaal ago so manga pagari
niyan ko kapakababaling iran sa Sikim.
42 Sii ko tomiyalondog a gawii na mipoon meliliyo so manga taw ko siti a Sikim sa

kasong iran ko manga pangomaan, na miniripot ai ki Abimilik.
43 Mandiyadi na tinimo iyan so manga taw niyan na biyagi iyan siran sa telo lompok, na
mitetapok siran ko pangomaan. Na so kiyailaya i Abimilik ko manga taw a peliliyo ko
siti na miyamangembowat siran ago so manga taw niyan ko tetapokan iran na giyobat iran
siran.
44 Si Abimilik ago so salompok a ped iyan na minggagaan somong ko gimowa o siti sa
kapagalangi ran on, na so dowa a ped a lompok na somiyondol ko manga taw roo ko
pangomaan na piyamono iran.
45 Miyababasa alongan a dii kapakitidawa i Abimilik ko siti, na miyaagaw niyan na
piyamono iyan so manga taw ron. Pinggegeba iyan so siti na biyomboran iyan sa timos
so lopa.
46 Kagiya maneg ai o manga taw a sisii ko kota sa Sikim na miyagapas siran ko lindonga
ko timplo o Baal Birit.
47 Kagiya matero ki Abimilik a roo siran miyatimo
48 Na tomiyakedeg sekaniyan a ped o langon a manga taw niyan ko Palaw a Salmon.
Kominowa sekaniyan sa patok na miyamotol sa manga sapak a kayo a piyosai niyan.
Inisogo iyan ko manga ped iyan a "Nggagaan kano! Sowaa niyo so miyailay niyo a
pinggolaola ko!"
49 Na miyamotol mambo so oman i isa kiran sa manga sapak na tiyondog iran si
Abimilik. Piyamanarag iran ai ko manga keleb a mililibet ko lindonga na riyapogan iran
a makasosoled on so langon a manga taw a miyakapoon ko kota. Na palaya siran den
mambo miyamatay a manga sanggibo a manga mama ago manga babay.
50 Oriyan iyan na somiyong si Abimilik sa siti a Tibis na siyondolan iyan a inagaw niyan.
51 Ogaid na aden a mabager a lantawa ko siti na miyamagapas roo so langon o manga
taw ko siti a mama ago babay. Tiyanggalan iran on a ginawa iran na miyamanik siran ko
atep o lantawa.
52 Somiyong si Abimilik ko lantawa sa kanggobata niyan on. Ogaid na sii ko
kapendaseg iyan ko gimowa iyan ka totongen iyan
53 Na aden a babay ko atep a miyolog rekaniyan sa potola o galingan a ator a minisogat
ko olo i Abimilik a miyakasasa ko lagas a olo niyan.
54 Minggagaan sekaniyan tomalo ko mangoda a pegawid sa manga gomaan iyan a tig
iyan a "Bindasa ngka so pedang ka na bonoa ko ngka! Di aken kabaya o ba matero a so
babay i miyakapatay raken." Na biyaseg o mangoda si Abimilik na miyatay.
55 Kagiya mailay o manga Israil a miyatay den si Abimilik na mimbabaling siran langon.
56 Giyoto i kiyasiksaa o Tohan ki Abimilik sabap ko kamarataan a pinggolaola niyan ko

ama iyan ko kiyapamonoa niyan ko pito polo a manga pagari niyan.
57 Piyakatana pen o Tohan ko manga mama sa Sikim so langon a kamarataan iran ka
initana kiran so paninta i Yotam a wata i Gidiyon.
MANGA PANGONGOKOM 10
Si Tola
Kagiya matay si Abimilik na aya miyakagemaw a somiyabet sa Israil na si Tola a wata i

Powah a wata peman i Dodo a ped ko mbatabataa Isakar. Mababaling sekaniyan sa
Siyamir roo ko kapalawan sa Ipraim.
2 Pepangokom sekaniyan sa Israil ko miyakadowa polo ago telo ragon. Kagiya matay na
minilebeng sii sa Siyamir.
Si Yair
3 Aya miyakasambi on na si Yair a taga Giliyad. Pepangokom sekaniyan sa Israil ko

miyakadowa polo ago dowa ragon.
4 Telo polo a manga wata iyan a mama a oman i isa kiran na aden a kimar iyan. Telo
polo mambo a siti iran sa Giliyad a bebetowan sa manga siti i Yair taman imanto.
5 Na miyatay si Yair na inilebeng sa Kamon.
Si Yaptah
6 Minggolaola peman so manga Israil sa marata ko kamamasai ron o Allah. Sinimba iran
so manga Baal ago so manga Astarot ago so manga tohan o manga Isiriyan ago manga
taw sa Sidon, ago so manga tohan o manga Mowabiyo, manga Amoniyo ago so manga
Pilistiyo. Tiyalikodan iran so Allah na ginekan iran mangongonotan.
7 Sabap roo na tanto siran a kiyararangitan o Allah na piyalad iyan siran ko kapaar o
manga Pilistiyo ago so manga Amoriyo.
8 Sii ko soled o miyakasapolo ago walo ragon na pepangarasiyan ago peperasain iran so
langon o manga Israil a kibabaling ko inged o manga Amoriyo ko masesebangan o
Lawasaig a Yordan sii sa Giliyad.
9 Aya pen a miyanggolaola na rominipag so manga Amoriyo sa Yordan ka miyakitidawa
ko manga mbatabataa Yodah, Baniyamin ago Ipraim. Na tanto a kiyaregenan so manga
Israil.
10 Na gomiyoraok siran ko Allah a tig iran a "Miyakandosa kami reka! Kiyatalikodan
ami seka a Tohan ami na sinimba ami so manga Baal."
11 Somimbag so Allah a "Ba aken sekano da sabeta ko kapaar o manga Imisiren, manga
Amoriyo, manga Amoniyo, manga Pilistiyo,
12 Manga taw sa Sidon, manga Amalik ago so manga Maoniyo? Igira a piyangarasiyan
kano iran na gomiyoraok kano raken na siyabet aken sekano ko kapaar iran.
13 Ogaid na tiyalikodan ako niyo den a miyangongonotan kano ko salakaw a manga
tohan. Sabap san na di aken sekano den sebeten.
14 Ikano roo den na goraoka niyo so manga tohan a pitomo iyo. Pakisabet kano kiran
igira a kareregenan kano!"
15 Ogaid na miyangangampedian so manga Israil ko Allah a tig iran a "Miyakandosa

kami. Nggolaolaa ngka so apiya antonaa i mapipikir ka a patot rekami. Ogaid na
kapedipedi ka bo na panabangi kami ngka imanto!"
16 Na inibowang iran so manga katohanan a matatago kiran na piyangongonotanan iran
so Allah. Na da niyan maraw so kararata a ginawa o manga Israil.
17 Sa masa oto na miyalimod so manga sondaro a Amoniyo sa kapakipetidawa iran na

mikempo siran sa Giliyad, na mitimo mambo so manga Israil na mikempo siran sa
Mispah.
18 Na so manga olowan o manga taw sa Giliyad na miyamagisei siran a "Antawaa i
pegolowan rektano sa kapakipetidawa ko manga Amoniyo? Sekaniyan i kebaloy a
olowan o langon a taw sa Giliyad."
Si Yaptah a taga Giliyad na mawaraw a sondaro a aya ina iyan na sondal. So ama iyan a
si Giliyad
2 Na aden a ped a manga wata iyan a mama a inimbawata o karoma niyan; na kagiya
mamakala siran na piyakaawa iran si Yaptah a pitero iran a "Di ka den makapembagian
ko kawali o ama tano, ka wata ka man o salakaw a babay."
3 Mandiyadi na piyalagoyan i Yaptah so manga pagari niyan na komiyaden sa inged a
Tob. Aden a mitmotimo on roo a manga labeg a pepamangonot on.
4 So peman so manga Amoniyo na pipoonan iran so kapakipetidawa ko manga Israil.

5 So kiyanggolaola ini na so manga olowan sa Giliyad na miyamanong roo sa Tob sa
kakowaa iran ki Yaptah.
6 Pitero iran on a "Onot ka rekami na pagolowani kami ngka kaan tano mitidawa so
manga Amoniyo."
7 Ogaid na pitero i Yaptah ko manga olowan a "Ba kena a sekano i miyagowad raken ago
miyogaw ko walay o ama aken? Ino kano raken song imanto ko kareregeni rekano?"
8 “Pepekitabang kami reka imanto," a tig o manga olowan. "Onot ka rekami makitidawa
ko manga Amoniyo, ka seka i kebaloy a olowan o langon o manga taw sa Giliyad."
9 Tig i Yaptah a "Opama ka mapakaonot ako niyo sa kapakipetidawa ko manga Amoniyo

a pekitaban siran raken o Allah na ba mataan a saken i kebaloy a olowan iyo?"
10 Inisembag iran a "Oway, tomanen ami so pitero o ka. So Allah i saksi rektano."
11 Mandiyadi na miyonot si Yaptah ko manga olowan sa Giliyad na biyaloy sekaniyan o

manga taw a dato iran ago komandir o manga sondaro. Na roo sa Mispah sii ko
kamamasaan o Allah na siyoson tero i Yaptah so langon angkai a miyatero iyan.
12 Samaoto na somiyogo si Yaptah sa manga mama ko dato o manga Amoriyo a matero

iran on a "Antonaa i irirido ka rekami a inisondol ko inged aken?"
13 Somimbag so dato o manga Amoniyo ko manga siyogo i Yaptah a "Isako makaawa so

manga Israil sa Misir na inagaw iran so lopa aken ipoon ko Lawasaig a Arnon na roo den
ko Lawasaig a Yabok ago sii ko Lawasaig a Yordan. Na kasowin ka ini imanto sa
kalilintad!"
14 Na piyakakasoy i Yaptah so manga siyogo iyan roo ko dato o manga Amoniyo a tig
iran on a
15 “Giyai i kabasa i Yaptah: Da agawa o Israil so lopa a Mowab aya pen o ba so lopa o
manga Amoniyo.
16 Ka isako mawa so manga Israil sa Misir na komitas siran ko disirto taman ko Mariga a
Ragat na minisampay siran sa Kadis.
17 Somiyogo siran sa manga mama ko dato sa Idomiya a matero iran a 'Perowa ngka a
makatarapas kami ko inged ka.' Ogaid na da kiran iyogen o dato sa Idomiya. Sakamaoto
mambo a piyangi ran ai ko dato sa Mowab ogaid na da niyan mambo perowa a
kapakatarapas iran ko inged iyan. Sabap roo na tomiyareg so manga Israil sa Kadis.
18 “Da peman matey na komitas siran ko disirto na piyagambilid iran so inged a Idomiya
ago giya Mowab taman sa iniraot siran ko masesebangan a Lawasaig a Arnon a aya
temanaan a inged a Mowab na mikempo siran roo. Ogaid na da siran ripag sa Arnon sa
kasoled iran sa Mowab.
19 “Samaoto na somiyogo so Israil sa manga mama ki Sihon a dato o manga Amoriyo a

ndadato sa Hisbon a matero iran on a 'Perowa ngka a kapakatarapas ami ko inged ka ko
kapesong ami ko darpa ami.'
20 Ogaid na da sarigi i Sihon so Israil sa kapeterapas iran ko lopa iyan. Ka ba niyan den
piyagolowanan so langon a sondaro niyan na mikempo siran sa Yabas, na giyobat iran so
Israil.
21 Ogaid na piyalad o Allah a Tohan o Israil si Sihon ago so langon a sondaro niyan ko
manga Israil. Na kinowa iran so langon o lopa o manga Amoriyo a kibabaling sangkoto a
inged
22 Na miyatangan iran ai langon ipoon ko Lawasaig a Arnon taman ko Lawasaig a
Yabok, ago ipoon ko disirto roo sa Yordan.
23 “Na sabota ngka imanto a so Allah a so Tohan o Israil na aya kominowa ko lopa o
manga Amoriyo na inibegay niyan ko manga pagtaw niyan a manga Israil. Sabap roo na
ino ami reka kibegay?"
24 Ba ngka di tengana so apiya antonaa i pekitangan reka o tohan iyo a Kimos? Datar
iyan mambo na tenganen ami so langon a imbegay rekami o Allah a Tohan ami.
25 Ba ka lebi a mapiya a di si Balak a wata i Sipor a dato sa Mowab? Ba niyan inatowan
so Israil o di na miyakitidawa kiran? Kena.
26 Miyakatelo gatos ragon a kababaling o manga Israil sa Hisbon ago roo sa Arowir ago
sii ko langon a manga inged a mbabalibeta on, ago sii ko langon a siti ko kilid o
Lawasaig a Arnon. Na, ino ngka da tepengi komowa peroman angkai a lopa sii sangkoto
a masa?
27 Da ko seka ndosai, ogaid na peribaten ako ngka ko kipetidawaan ka raken. So den so
Allah a so Pangongokom na makokom iyan sangkai a gawii o antawaa i ontol, so manga
Israil o di na so manga Amoniyo."
28 Ogaid na so dato o manga Amoniyo na da niyan tagoa sa ginawa so manga katero a

piyakisampay ron i Yaptah.
So Samaya i Yaptah
29 Mandiyadi na minitemo ki Yaptah so Roh o Allah na kitas iyan a inged a Giliyad ago
giya Manasih na komiyasoy sa Mispah sa Giliyad, na poon roo na somiyorong sekaniyan
sa kapakipetidawa iyan ko manga Amoniyo.
30 Na misemaya si Yaptah ko Allah a tig iyan a "O pakidaagen ka raken so manga
Amoniyo
31 Na so keona a meliyo ko walay aken sa kapagalawa raken amay ka maling ako a
miyakataban ko manga Amoniyo na imbegay aken ko Allah. Ipeselasela aken ai
rekaniyan a totongen."
32 Na rominipag si Yaptah ko lawasaig sa kapakipetidawa iyan ko manga Amoniyo na

giyobat iyan, na piyalad siran o Allah ko kapaar iyan.
33 Siyondolan iyan siran sii ko dowa polo a siti sa minitaralo a kiyapamono ipoon sa
Arowir taman ko darpa a marani sa Minit sii ko mawatan a siti a Abilkiramim. Na
giyanan i kiyatabana o manga Israil ko manga Amoniyo.
So Wata a Babay i Yaptah
34 So kiyapakaoma i Yaptah ko walay niyan sa Mispah na aya lominiyo ron a miyalaw

rekaniyan na so wata iyan a babay a dii seyaw ago dii nggagaringking. Botong sekaniyan
a wata a da den a ped a wata i Yaptah a mama o di na babay.
35 Na so kiyailaya on i Yaptah na kinisi iyan so nditaren iyan ko kiyarata a ginawa niyan.
"Aidaw, wata aken," a minigoraok iyan. "Peperopeten ka so poso aken!
Pakapembokoon ako ngka, ka kagiya miyakasemaya ako ko Allah na di aken kebaroba"
36 “Ama aken," a tig iyan, "miyakasemaya ka ko Allah. Na, so den so minisemaya a ka

na nggolaolaa ngka raken, ka piyakasaop ka o Allah ko manga ridoay ngka a manga
Amoniyo.
37 Ogaid na isa bo a pengnin ko reka," a tig iyan ko ama iyan. "Sogoten ka raken so
dowa olan a mipagenebeneb aken ko kapalawan kaan ako roo makamboko a ped o manga
bolayoka aken sabap ko di raken den kapengaromaa."
38 “Ika roo den," a tig iyan. Na piyakalalakaw niyan so wata iyan ko soled o dowa olan.
Tomiyakedeg siran ago so manga bolayoka iyan ko kapalawan a ron iran inimboboko so
di on kapengaromaa.
39 Kagiya mapopos so dowa olan na komiyasoy sekaniyan ko ama iyan na ininggolalan i
Yaptah so minisemaya iyan. Da den kabatali so babay, na miyabaloy a adat sa Israil
40 A oman ragon na lomalakaw so manga bago a taw sa Israil ko soled o pat gawii a
ipenanadem ai ko wata a babay i Yaptah a taga Giliyad.
Si Yaptah ago so manga taw sa Ipraim
So manga mama sa Ipraim na tinimo iran so manga sondaro iran na rominipag siran sa
Yordan na miyamanong ki Yaptah roo sa Sapon. Pitero iran on a "Ino ka peripag sa
kapakipetidawa ko manga Amoniyo a da kami ngka tawaga sa kapakaonot ami reka?
Totongen ami so walay ngka a ndodon ka on!"
2 Na pitero kiran i Yaptah a "Saken ago so manga pagtaw aken na aden a tanto a
mapasang a kiyapepawala ami ago so manga Amoniyo. Piyakitawag aken sekano ogaid
na da kami niyo roo panabangi.
3 Kagiya mailay aken a di kano bo pekatabang na iniserakan aken a niyawa ko na
rominipag ako a miyakitidawa ko manga Amoniyo, na piyakitaban siran raken o Allah.
Kagiya ka maoto na ino kano sii song imanto sa kapakipetidawa raken?"
4 Mandiyadi na tinimo i Yaptah so langon a mama sa Giliyad na giyobat iran so manga

Ipraim a tiyaban iran siran. (Miyatero o manga Ipraim a "Sekano a manga taw sa Giliyad
na matag baden miyamakapalagoy a poon sa Ipraim ago sa Manasih.")
5 Inagaw o manga mama sa Giliyad so manga darpa a peripagan sa Yordan kaan di den
roo pekaripag so manga Ipraim a pepelagoy. Na igira aden a taga Ipraim a petepeng
malagoy a tig iyan a "Pakaripaga ko niyo," na ipepekaise on o manga mama sa Giliyad a
"Ba ka taga Ipraim?" O sembagen iyan a "Di"
6 Na peteroon iran on a "Teroa ngka a 'Syibolit,' " na o taga Ipraim na aya mapetero iyan
na 'Sibolit,' ka di niyan ai kebales piyapiya. O magiyoto na ndakepen iran sekaniyan ago
mbonoon sii ko peripagan sa Lawasaig a Yordan. Na pat polo ago dowa nggibo a manga
Ipraim a miyapamono sangkoto a gawii.
7 Miyakapangokom si Yaptah sa Israil ko soled o nem ragon. Na miyatay sekaniyan na

inilebeng ko isa ko manga siti sa Giliyad.
Si Ibsan, Ilon ago si Abdon
8 Oriyan iyan na si Ibsan a taga Bitlihim na miyakapangokom sa Israil. Aden a telo polo
a wata iyan a mama ago telo polo pen a wata iyan a babay. Piyakipangaroma niyan so
manga wata iyan a babay ko manga mama a kena a ba maaped ko manga tonganay niyan.
Na so manga wata iyan a mama na inowitan iyan siran sa telo polo a manga raga a
mapengaroma iran a kena a ba maaped ko manga tonganay niyan. Miyakapangokom si
Ibsan sa Israil ko miyakapito ragon.
10 Na miyatay sekaniyan na inilebeng sa Bitlihim.
11 Aya miyakasambi on na si Iglon a taga Sibolon, na miyakapangokom sekaniyan sa

Israil ko soled o sapolo ragon.
12 Kagiya matay na minilebeng sa Aihalon sa inged a Sibolon.
13 Aya miyakatalondog on a miyakapangokom sa Israil na si Abdon a wata a Hilil a

poon sa Piraton.
14 Aden a pat polo a wata iyan a mama ago telo polo a apo iyan a mama a aden a pito
polo a manga kimar iran. Miyakapangokom sekaniyan sa Israil ko miyakawalo ragon.
15 Na miyatay si Abdon a wata i Hilil na inilebeng sa Piraton sa inged a Ipraim roo ko
kapalawan a inged o manga Amalik.
So Kinimbawataan ki Samson
Minggolaola peman sa marata so manga Israil ko kapekeilaya on o Allah, na piyalad siran

o Allah ko kapaar o manga Pilistiyo ko soled o pat polo ragon.
2 Sangkoto a manga gawii na aden a sakataw a mama a aya ngaran iyan na si Manowah a
mababaling sa Sorah. Ped sekaniyan ko mbatabataa Dan. So karoma niyan na balek a da
den mbawata.
3 Na miyakiilay so malaikat o Allah ko karoma i Manowah na pitero iyan on a "Apiya
pen balek ka a da den mbawata na keogat ka a pembawata sa mama.
4 Ipoon imanto na pananggilai ngka o ba ka makainom sa arak o di na ped a pakabereg
aya pen o ba ka makakan sa apiya antona onon a karam.
5 Na amay ka imbawata so wata a ka na di den kepotolan so bok iyan ka isenggay
sekaniyan a rek o Tohan ipoon ko kipembawataan on. Na pagepoonan iyan somabet so
manga Israil ko kapaar o manga Pilistiyo."
6 Na miyalalagoy so babay ko karoma niyan na pitero iyan on a "Aden a mama a sogo o

Allah a miyakaoma raken! So mapeparas iyan na lagid o malaikat o Tohan a
piyakalekelek a pegilain. Da aken iseen o anda miyakapoon, na da niyan raken mambo
teroa i ngaran iyan.
7 Ogaid na pitero iyan raken a 'Keogat ka a pembawata sa mama. Ipoon imanto na di ka
peginom sa arak o di na ped a pakabereg aya pen o ba ka kan sa apiya antona onon a
karam. Ka so wata na isenggay a rek o Tohan ipoon ko kipembawataan on taman den ko
kapatay niyan.' "
8 Mandiyadi na miyangangarapan si Manowah ko Allah a tig iyan a "Hey Kadnan ko,

kapedepedi ka bo na pakakasoya ngka rekami so mama a sogo o Tohan sa kapeteroa
niyan rekami o antonaa i ikidia mi ko wata amay ka imbawata."
9 Na inampon o Tohan so pangni i Manowah na miyakiilay peroman so malaikat o Tohan

ko babay sii ko kaoontod iyan roo ko pangomaan. Ogaid na so karoma niyan a si
Manowah na kena a ba niyan ped.
10 Na minggagaan malalagoy so babay ko karoma niyan na pitero iyan on a "Ilaya ngka!
So mama a miyakaoma raken isako isa a gawii na sisii peman!"
11 Na tominindeg si Manowah na miyonot ko karoma niyan. Kagiya makaoma sekaniyan

ko mama na inisean iyan a "Ba seka so mama a miyakimbitiyarai ko karoma ko?"
"Oway, saken," a tig o mama.
12 Na iniise on i Manowah a "Amay ka matoman so miyatero o ka na antonaa i

ipekidikidia ko wata ago antonaa i patot a penggolaolaan iyan?"
13 Somimbag so malaikat o Allah a "Pakitomanen ka den ko karoma ngka so langon o

miyatero aken rekaniyan.
14 Di sekaniyan pekakan sa apiya antona onon a poon ko waged a obas aya pen o ba inom
sa arak o di na ped a pakabereg, ago di den pen pekakan sa apiya antona onon rikora
karam. Mipenggolalan iyan so langon taman a inisogo aken on."
15 Na pitero i Manowah ko malaikat o Allah a "Kapedipedi ka bo na tareg ka sii pasin

taman sa katiyagaran ami seka sa mangoda a kambing."
16 Somimbag so malaikat o Allah a "Apiya pen o pakataregen ako niyo sii na di ako ken
ko pangenengken iyo. Ogaid na o petiyagar ka den na totonga ngka baden a ipesoasoat ko
Allah." (Di katawan i Manowah a ba giyoto so malaikat o Allah.)
17 Na iniise i Manowah ko malaikat a "Anta i ngaran ka kaan ami seka mabantog amay
ka mitoman so manga katero o ka?"
18 Tig o malaikat a "Ino ngka pegiseen i ngaran aken? Piyakamemesa ini a ngaran."
19 Na kominowa si Manowah sa nati a kambing a rakes o pangenengken a soasoat na

inisapaat iyan ko Allah sii ko ator. Na minggolaola so Allah sa piyakamemesa sii ko
kamamasai ron i Manowah ago so karoma niyan.
20 Ka sii ko kapekigorong sa langit o manga kadeg o apoy a poon ko aparan na miniporo
so malaikat o Allah a sii makaoonot ko manga kadeg. So kiyailaya sii i Manowah ago so
karoma niyan na gomipe siran ko lopa.
21 Da den makiilay peroman so malaikat o Allah ki Manowah ago so karoma niyan. Na

kiyatokawan i Manowah a giyoto so malaikat o Allah
22 Na pitero iyan ko karoma niyan a "Mataan den a pematay ta, ka miyailay ta so Tohan!"
23 Ogaid na somimbag so karoma niyan a "O kabaya o Allah a mbonoon ta niyan na di

niyan terimaan so tiyotong a soasoat ago so pangenengken a inisapaat ta on aya pen o ba
niyan rekta pakiilain angkai a langon taman o di na ba niyan ai teroa imanto."
24 Na mimbawata so babay sa mama na bitowan iyan sa Samson. Miyakala sekaniyan a
rarakmatan o Allah.
25 Na sii ko kasisii niyan sa Mahanihdan ko pageletan a Sorah ago giya Istaol na so Roh
o Allah na pipoonan iyan den a kipapaaren iyan ki Samson.
Si Samson ago so Babay a taga Timnah
Miyakaisa a gawii na somiyong si Samson sa Timnah na miyailay niyan roo so isa a

babay a Pilistiyo.
2 Kagiya makabaling sekaniyan na pitero iyan ki ama iyan ago si ina iyan a "Miyailay
aken a babay a Pilistiyo roo sa Timnah. Na, kowaa niyo raken a mapangaroma ko."
3 Ogaid na somiyahewi so ama ago so ina iyan a tig iran a "Ba da den a kepakayan a
babay ko manga tonganay tano o di na sii ko langon a manga Israil? Ino ka pekasong ko
manga kapir a Pilistiyo a ron ka on pengaroma?"
Ogaid na pitero i Samson ki ama iyan a "Kowaa ngka raken. Sekaniyan i kebayaan
ko."
4 Na di katawan o manga lokes iyan a so bes so Allah i peseriat sangkai a mapenggolaola
ka magaden sekaniyan sa okit sa kaperidoa niyan ko manga Pilistiyo, ka sii sangkoto a
masa na ndadatoan o manga Pilistiyo so manga Israil.
5 Somiyong si Samson sa Timnah a ped iyan so ama ago so ina iyan. Sii ko kapepekarani
ran ko manga asinda a obas sa Timnah na tekaw den a siyadayan sekaniyan o mangoda a
arimaw.
6 Sarta den a minipaar si Samson o Roh o Allah na piyamekang iyan so arimaw a lagid bo
o nati a kambing, na da den a kasangkapan ko lima niyan. Ogaid na da niyan teroa ko
ama o di na so ina iyan so miyanggolaola niyan.
7 Sii ko kiyapakaoma i Samson sa Timnah na inimbitiyarai niyan so babay na kiyabayaan
iyan.
8 Sii ko kiyaipos o miyakapira gawii isako komasoy si Samson sa Timnah sa

kapengaromaa niyan on na sominilay sekaniyan sa lalan ka pagilain iyan so lawas o
arimaw. Na miyamemesa ko kiyailaya niyan ko makapal a batiyokan ago teneb a
matatago ko soled o lawas o arimaw,
9 Na somiyandok sekaniyan sa teneb na kiyan iyan sii ko kapelalakaw niyan. Riyaot iyan
so ama ago so ina iyan na bigan iyan siran on na komiyan siran on mambo. Ogaid na da
niyan kiran teroa i ba niyan kinowa ko badan o miyatay a arimaw.
10 Somiyong so ama iyan ko walay o babay na mikendori roo si Samson ka giyoto i adat
o mangangaroma.
11 Kagiya mailay o manga Pilistiyo si Samson na miyanto siran sa telo polo a manga
ngongoda a maped rekaniyan.
12 Na pitero kiran i Samson a "Panotolan ko sekano sa antoka, na o maantok iyo sii ko
soled o pito gawii a dii kakendori na mbegan ko sekano sa telo polo a gerab ago telo polo
ka sokoba a nditaren.
13 Ogaid na o di niyo raken maantok na kebegan ako niyo sa telo polo a gerab ago telo
polo ka sokoba a nditaren."
"Teroa ngka so antoka ka," a tig iran on. "Pakinegen ka rekami."
14 Na pitero iyan a
"Miyakapoon ko pepangangan so kekan;

miyakapoon ko mabager so mamis."
Na sii ko soled o telo gawii na da iran maantok so maana o antoka.
15 Sii ko ikapat gawii na pitero iran ko karoma i Samson a "Akala ngka so karoma ngka
sa kateroa niyan reka ko maana o antoka, ka o di, na totongen ami so walay o ama a ka a
rakes ka on! Ba aya kiyabantowi niyo rekami sii na an kami niyo kakowai sa pirak?"
16 Sabap roo na somiyong so babay ki Samson a peseged a tig iyan a "Ipekegowad ako
ngka! Kena bes o ba ako ngka pekebabayai! Piyanotolan ka sa antoka so manga
tonganay aken ogaid na da ngka raken teroa so ipagantok on."
Tig i Samson a "Ilaya ngka man, ka apiya si ama ago si ina aken na da ko kiran teroa,
na ino aken sii reka mapetero?"
17 Na lalayon penggoraok so babay ko kasisii niyan ki Samson ko soled o pito gawii a dii
kakendori, na sii ko ikapito gawii na inosay ron i Samson so ipagantok iyan sabap ko
kiyategela niyan on. Na giyoto a pitero ini mambo o babay ko manga Pilistiyo.
18 Sa da pen kasedep o alongan ko ikapito gawii na so manga mama ko siti na pitero iran
ki Samson a "Antonaa i lebi a mamis a di so teneb? Na antonaa i lebi a mabager a di so
arimaw?"
Na tig iyan kiran a "O da niyo ndadon so mangoda a sapi aken na di niyo den maantok
so antoka aken!"
19 Na sarta a minipaar si Samson o Roh o Allah na somiyong sekaniyan sa siti a Askilan

na miyamono roo sa telo polo a manga mama. Kinowa niyan so manga nditaren iran na
inipamegay niyan ko manga mama a miyakaosay ko antoka iyan. Ogaid na tanto
sekaniyan a pekerarangitan na miyaling ko walay o ama iyan.
20 Na so karoma i Samson na inibegay ko mama a ped iyan ko kiyakawinga on.
Siyaopan i Samson so manga Pilistiyo
Da peman matey sii ko dii kaperaragon sa trigo na mintel si Samson ko karoma niyan, na
inowitan iyan sa nati a kambing. Pitero iyan ko ama o babay a "Kebaya ako somoled ko
bilik o karoma ko." Ogaid na da on pakasoleda o ama o babay
2 Ka tig iyan a "Aya katao ko ron na tanto ngka sekaniyan a inikagowad. Sabap roo na
inibegay aken ko bolayoka a ka. Ogaid na ba kena a lebi a mataid so ari niyan?
Kapedipedi ka bo na aya ngka baden kowaa.”
3 Na pitero i Samson ko ginawa niyan makapantag kiran a "Imanto na di ako den ketaksil
sabap ko penggolaolaan ko ko manga Pilistiyo. Mataan den a pemarataan ko siran!"
4 Na miyagenebeneb sekaniyan na domiyakep sa telo gatos a manga iila a aso.
Piyakapamagiketa iyan so manga ikog o oman i dowa on na tiyambedan iyan sa barabad
so oman i isa ka paris a ikog.
5 Na tiyotodan iyan so manga barabad na piyakaantap iyan malalagoy so manga aso ko da
pen magarab a pereperan o manga Pilistiyo. Na kena bo a ba aya miyatotong na so
magaan den peragonen a pereperan ka so pen so miyagarab den a miyapamaginemong a
rakes on so manga waged a obas ago manga kayo a olibi.
6 Iniise o manga Pilistiyo a "Antawaa i minggolaola sii?' Na miyatero kiran a "Si

Samson, ka so karoma niyan na inibegay o panogangan iyan a mama sa Timnah ko
bolayoka i Samson." Na siyongowan o manga Pilistiyo so babay ago so ama iyan na
tiyotong iran siran a inipatay iran.
7 Pitero kiran i Samson a "Giyai kano bes! Di aken mbotagan a kapeseopi aken rekano!"
8 Na giyobat iyan siran sebenar na madakel a miyapatay niyan. Oriyan iyan na somiyong
sekaniyan ko liyang sii ko pampang roo sa Itam na tomiyareg roo.
Tiyaban i Samson so manga Pilistiyo
9 Mandiyadi na somiyong so manga Pilistiyo sa inged a Yodah na mikempo siran ko

marani sa siti a Lihi sa kanggobata iran on.
10 Iniise kiran o manga taga Yodah a "Ino kami niyo keoma a gobat?"
Somimbag siran a "Somiyong kami sii sa kandakepa ami ki Samson kaan ami kasaopi
ko pinggolaola niyan rekami."
11 Sabap roo na telo nggibo a manga mama a taga Yodah na somiyong ko liyang sii ko
pampang roo sa Itam na pitero iran ki Samson a "Ba ngka bes di katawi a so manga
Pilistiyo i ndadato rektano? Antona angkai a pinggolaola ngka rekami?"
Na tig i Samson a "Matag aken siran baden siyaopan ko pinggolaola iran raken."
12 Pitero iran on a "Aya inisong ami reka na petongen ami seka ago peladen ko manga
Pilistiyo."
Tig i Samson a "Sepaan iyo raken a kena a ba sekano den i mbono raken."
13 Tig iran a "Oway, giya bo a kapetonga ami reka na peladen ami seka kiran. Kena a ba
ami seka mbonoa!" Na taros a piyatong iran sekaniyan sa dowa timan a bago a tali na
inowit iran a poon ko pampang.
14 Sii ko kapepekarani niyan sa Lihi na so manga Pilistiyo na pepamalalagoy a pegagaw

rekaniyan a pepelalalis siran. Sarta den a minipaar si Samson o Roh o Allah na miyanga
popotol so manga tali a ipapatong on a lagid bo ini tanor a miyatotong, na miyanga oolog
ai a poon ko manga barokan iyan.
15 Na miyailay niyan so tolan a tangagan a kimar sii ko lopa, na piyorot iyan na
inipamono iyan ko sanggibo a manga Pilistiyo.
16 Oriyan iyan na mimbayok si Samson a tig iyan a
"Nggolalan ko tolan a tangagan a kimar na miyakapatay ako sa sanggibo a taw.

Nggolalan ko tolan a tangagan a kimar na biyatiyong aken siran ko manga tabotod."
17 So kiyaipos ai na inilebad iyan so tolan. Na giyangkoto a darpa na bitowan sa Ramat

Lihi.
18 Mandiyadi na pekewaw a tanto si Samson na gomiyoraok ko Allah a tig iyan a

"Inibegay ngka raken a oripen ka angkai a mala a kiyapakadaag. Ba ako petay imanto sa
kawaw ago maolog ko kapaar angkai a manga kapir a Pilistiyo?"
19 Na piyakaleti o Tohan so lopa roo sa Lihi na mimbowalan on so ig. Kagiya makainom
on si Samson na inoyag sekaniyan ago miyakabager. Giyoto i sabap a bitowan angkoto a
darpa sa In Hakor, na ndodoo den ai sa Lihi taman imanto.
20 Piyagolowanan i Samson so manga Israil ko miyakadowa polo ragon sii ko kandadatoi

kiran pen o manga Pilistiyo.
Si Samson roo sa Gasa
Miyakaisa a gawii na somiyong si Samson sa Gasa na minitoona iyan roo so isa a sondal
na romimbang sekaniyan on sangkoto a kagagawii.
2 Kiyatokawan o manga taga Gasa a ndodoo den si Samson, na mitimo siran na
nomiyayaw ko miyababasa gawii a pepagayanan iran sekaniyan sii ko gimowa o siti.
Romerenek siran sii ko kagagawii a di iran dii tetaroon a "Amay ka sobo na bonoon tano
sekaniyan."
3 Ogaid na miniga roo si Samson taman bo ko kiyalooki sa gawii. Sa oras oto na
mimbowat sekaniyan na kiyapetan iyan so manga pintoan ko gimowa o siti a rakes on so
dowa timan a tokod iyan ago so itatanggal on a potaw na piyamadot iyan ai langon na
piyosai niyan ago inowit iyan ko poro o bobongan a katotolongan iyan a Hibron.
Si Samson ago si Dilailah
4 Da oto matey na kiyababayaan i Samson so isa a babay a aya ngaran iyan na si Dilailah
a mababaling ko Balintad a Sorek.
5 Na so manga dato o manga Pilistiyo na miyamanong ki Dilailah na pitero iran on a
"Akala ngka si Samson sa kapakitokawi niyan reka o ino sekaniyan tanto a mabager ago
andamanaya i kakepegesa on kaan ami mapatong. So oman i isa rekami na mbegay reka
sa sanggibo ago isa a pelata a pirak."
6 Na pitero i Dilailah ki Samson a "Kapedipedi ka bo na teroa ngka raken o ino ka tanto a
mabager. Andamanaya i kakepegesa reka ago kapetonga?"
7 Tig i Samson a "O patonga ko iran sa pito timan a bago a iket a pana a da pen mamara
na pekalobay ako a lagid o apiya antawaa ped a mama."
8 Mandiyadi na so manga dato o manga Pilistiyo na inowitan iran si Dilailah sa pito

timan a bago a iket a pana a da pen kamarai, na inipatong iyan ai ki Samson.
9 Aden a manga mama a piyakatepok i Dilailah ko ped a rowang ko walay niyan, na
inilalis iyan a "Samson! Katii so manga Pilistiyo a ndakep reka!" Ogaid na ba niyan den
pireredot so manga iket a lagid o ba ini teod a miyararang ko apoy. Na da iran den ai
katokawi so pageemaan mipantag ko bager iyan.
10 Na pitero i Dilailah ki Samson a "Ba ako ngka den dii seblawi! Piyamerakan ako
ngka! Na kon; kapedipedi ka bo na teroa ngka raken o andamanaya i kakepatonga reka. "
11 Pitero rekaniyan i Samson a "O patonga ko iran sa mailot ko bago a manga tali a da
den maosar na pekalobay ako a lagid o apiya antawa a ped a mama."
12 Na kominowa si Dilailah sa bago a manga tali na inipatong iyan ai ki Samson. Aden

peman a manga mama a kitetapok ko ped a rowang, na inilalis i Dilailah a "Samson!
Katii so manga Pilistiyo a ndakep reka!" Ogaid na pireredot iyan so manga tali ko manga
barokan iyan a lagid bo o tanor.
13 Na pitero i Dilailah a "Pisendagan ako ngka peman ago piyamerakan! Na, teroa ngka
raken o andamanaya i kakepatonga reka."
Tig i Samson a "O pagaola ngka so pito lampid a bok aken sii ko titayan ko pegaolan
ago matekes ka a panesed na pekalobay ako a lagid o apiya antawa a ped a mama."
Sabap roo na sii ko katotoroga ki Samson na inaol i Dilailah so pito lampid a bok iyan
sii ko titayan ko pegaolan
14 Na tikes iyan ai a panesed. Na inilalis iyan peroman a "Hey Samson! Katii so manga
Pilistiyo a ndakep reka! Ogaid na miyagenaw sekaniyan na pinggagansing iyan gomamit
so bok iyan ko pegaolan.
15 Na pitero on i Dilailah a "Ino ngka dii teroa a pekebabayaan ako ngka a di ako ngka
senaan? Miyakatelo ako ngka kapelalolalongi a da ngka raken den teroa o antonaa i
pepekabaloy reka a tanto a mabager."
16 Oman gawii na iroroding iyan ai ki Samson ago ipembodiyok iyan on pen taman sa di
den ketiger i Samson ka lagid o ba ipetay niyan.
17 Sabap roo na pitero iyan on bo ki Dilailah so tito a benar. "Da den kapotoli so bok
aken," a tig iyan, "ka inisenggay ako den ko Tohan ipoon ko kinimbawataan raken. O
kaopawi a olo aken na kedaan ako sa bager na pekalobay ako a lagid o apiya antawa a ped
a mama."
18 So kiyatangkeda i Dilailah a miyatero iyan on so langon taman na piyakitawag iyan so
manga dato o manga Pilistiyo a tig iyan a "Kasoy kano peroman sa makaisa pen ka pitero
iyan raken so langon taman." Na komiyasoy siran a aawidan iran so pirak.
19 Piyakatorog i Dilailah si Samson a moolon ko bobon iyan, na tomiyawag sekaniyan sa
mama na piyakipotol iyan on so pito lampid a bok i Samson. Na taros a pikolengkoleng i
Dilailah si Samson, na miyada on so bager iyan.
20 Na inilalis i Dilailah a "Hey Samson! Katii so manga Pilistiyo a ndakep reka!"

Na miyagenaw si Samson a aya paninti a akal iyan na "Kokogen aken baden a ginawa
ko a datar gowani na pekaboka ako bo." Ogaid na di niyan katawan a bilag sekaniyan den
o Allah.
21 Na diyakep sekaniyan o manga Pilistiyo na kiyalowat iran on a manga mata niyan na

inowit iran sekaniyan sa Gasa a papatongen a manga rantay a tombaga, na piyakagaling
iran roo ko kalaboso.
22 Ogaid na mipoon bo meto so bok ko olo niyan ko oriyan o kiyaopawi ron.
So Kiyapatay i Samson
23 Samaoto na miyalimod so manga dato o manga Pilistiyo sa mala a kapekorbani ran ko

katohanan iran a si Dagon. Di siran dii selasela a di iran dii pagidaida a ”So tohan tano
na piyalad iyan rektano si Samson a ridoay tano!"
24 Kagiya mailay sekaniyan o manga taw na piyodi iran so tohan iran a tig iran a
"Piyalad o tohan tano ko kapaar tano so ridoay tano

a aya miyaminasa ko inged tano a madakel a miyapatay niyan rektano!"
25 Na sii ko di iran dii kakeriyala na inilalis iran a "Wita niyo sii si Samson kaan tano
kapekaradiyaani!" Na piyakaliyo iran si Samson ko kalaboso na biyaloy iran a
kasablawan.
Piyakatindeg iran sekaniyan sii ko pageletan o dowa a polaos a makaaaren ko torogan,
26 Na pitero i Samson ko wata a tomatayong ko lima niyan a "Pakiaperen ka raken so
manga polaos a makatotokod ko atep o torogan kaan ako ron makarenda."
27 Mabebensek so torogan a manga mama ago manga babay. Ndodoo so langon a dato o
manga Pilistiyo, na ndodoo pen ko atep iyan so manga telo nggibo a manga mama ago
manga babay a dii mbantay ki Samson a pekowaan iran a kasablawan.
28 Na miyangangarapan si Samson ko Allah a tig iyan a "Ya Allah a Kadnan ko,

kapedipedi ka bo na tagoa ko ngka sa ginawa! Hey Tohan ko, kapedipedi ka bo na
pakabagera ko ngka bo sa makaisa pen kaan ako makasaop ko manga Pilistiyo ko
kiyakalowata iran ko dowa a mata ko."
29 Na kiyapetan i Samson so dowa a polaos ko look o torogan a makaaaren on a so
kawanan a lima niyan na sii ko isa a polaos ago giya diwang iyan na sii ko sabala on.
30 Na milalis sekaniyan a "Pengnin ko a matay ako a ped o manga Pilistiyo!" na
somiyomag sekaniyan a lingan iyan so langon o bager iyan, na minigobar so torogan sii
ko manga dato ago so kalangolangon a taw ron. Na madakel a miyapatay i Samson sii ko
kiyapatay niyan a di isako oyagoyag pen.
31 Oriyan iyan na so manga pagari i Samson a manga mama ago so langon o pamiliya o
ama iyan na miyamanong roo a kowa ko bangkay niyan. Inibaling iran na inilebeng iran
ko pageletan a Sorah ago giya Istaol sii ko kobor o ama iyan a si Manowah.
Miyakapagolowan sekaniyan sa Israil ko miyakadowa polo ragon.
So manga Barahala i Mikah
Aden a mama a aya ngaran iyan na si Mikah a mababaling ko kapalawan sa Ipraim.

2 Miyakaisa a gawii na pitero iyan ki ina iyan a "Sii ko kiyatekewi reka sa sanggibo ago
isa a pirak na inipamaninta ka so tekew na miyaneg aken ai. Na, katii so pirak, ka saken i
kominowa on."
Na pitero i ina iyan a "Karakmatan ka o Allah, wata aken."
3 Inikasoy i Mikah so pirak ki ina iyan na aya tig o babay na "Gowani na inisenggay aken
angkai a pirak ko Allah kaan ai kambaali a towangen a barahala para ko wata aken. Na
imanto na ikesoy aken reka ini."
4 Mandiyadi na kinowa i ina iyan so dowa gatos ko pirak na inibegay niyan ko panday sa
pirak a pimbaalan iyan oto a tiyowang a barahala, na tiyago ini ko walay i Mikah.
5 Giyangkai a mama a si Mikah na aden a darpa a pesimbaan ko manga katohanan iyan

sii ko walay niyan. Na mimbaal sekaniyan sa barahala a bebetowan sa Ipod a rakes on
pen so ped a manga barahala para ko pamiliya na initoro iyan a imam iyan so isa ko
manga wata iyan.
6 Sii sangkoto a manga gawii na da a dato o manga Israil na dii nggolaolaan o oman i isa
kiran so apiya antonaa i mapipikir iyan a ontol.
7 Sa masa oto na aden a mangoda a moriyataw i Libi a mababaling sa inged a Bitlihim sa

Yodah.
8 Miyawa sekaniyan sa Bitlihim sa kapengiloba iyan sa ped a darpa a kebalingan, na sii
ko kapelalakaw niyan na minisampay sekaniyan ko walay i Mikah sii ko kapalawan sa
Ipraim.
9 “Anda ka poon," a iniise on i Mikah.

Somimbag so mangoda a ”Ped ako ko mbatabataa Libi a poon sa Bitlihim roo sa
Yodah, na pembanog ako sa darpa a kebalingan aken."
10 “Sii ka raken baling," a pitero on i Mikah, "ka kebaloy ka a lagid o ama aken a
pegimam raken. Mbegan ko seka sa sapolo a pirak oman saragon, ago so manga nditaren
ago kaoyagan."
11 Na miyayon so mangoda a Libi a ron maling, na mimbaloy sekaniyan a lagid o isa ko
manga wata i Mikah.
12 Inidinan sekaniyan i Mikah a imam iyan na sii den miyaling ko walay niyan.
13 Na pitero i Mikah a "Imanto na katawan aken a pepiyapiyaan ako o Allah ka aya imam
aken na Libitiyo."
Si Mikah ago so Mbatabataa Dan
Sa masa oto na da a dato o manga Israil. Sii sangkoto a manga gawii na so mbatabataa
Dan na dii mbanog sa lopa a kebalingan iran ka kagiya da siran pen makatangan ko lopa a
mapekewali ran sii ko manga mbatabataa manga Israil.
2 Sabap roo na miyamili so manga taw sa Dan sa lima kataw a manga wawaraw a mama a
poon ko langon o manga pamiliya iran a mababaling sa Sorah ago sa Istaol, na
piyakalalakaw iran sa kapageneba iran ago kaperiksaa ko lopa.
Somiyong siran ko kapalawan sa Ipraim na minisampay ko walay i Mikah na
tomiyareg siran roo ko kagagawii.
3 Sii ko kagegenek iran roo na miyakilala iran so sigeng o lago o mangoda a Libi, na
iniise iran on a "Antonaa i pesowaan ka sii? Antawaa i miwit reka sangkai a darpa?"
4 Piyanotol iyan kiran so inikidia rekaniyan i Mikah, na tig iyan a "Pesokayan ako niyan,
na saken i imam iyan."
5 Na pitero iran on a "Kapedipedi ka bo na isei ngka so Tohan kaan ami katokawi o

mapiya i bobolos so lalakaw ami."
6 “Ikano roo den sa da a kiawid a akal iyo" a inisembag o imam. "Sisiyapen kano o Allah
sangkai a lalakaw niyo."
7 Mandiyadi na lomiyalakaw so lima kataw a mama na somiyong siran sa siti a Lais.

Miyailay iran a mapiya a kapakambebetad o manga taw roo a lagid o manga taw sa Sidon.
Lomilintad siran a makasasarig ago kena a ba mengingilam. Na oodaren siran sabap sa
da a ba makokorang ko inged iran. Sii siran babaling sa mawatan ko manga taw sa Sidon
na da a ped a manga taw a ba iran dii mikoyapeta.
8 Sii ko kiyakasoy o lima kataw roo sa Sorah ago sa Istaol na inisean siran o ped iran a
magiinged a "Antonaa i miyailay niyo?"
9 Na pitero iran a "Itano roo! Gobaten tano siran! Miyailay ami so lopa na tanto a
mapiya. Di kano pegalangalang sa kasong iyo roo sa kapagagawa niyo ron!"
10 Amay ka song kano roo na keoma niyo so manga taw a kena a ba mengingilam.
Maolad angkoto a lopa a da den a makokorang on, na inibegay ai rekano o Tohan!"
11 Mandiyadi na nem gatos a mama a ped ko mbatabataa Dan a makatitiyagar sa

katidawa a gomiyanat sa Sorah ago sa Istaol.
12 Sii ko kapelalakaw iran na mikempo siran ko masesedepan a Kiriyat Yarim sii sa
Yodah. Giyoto i sabap a giyangkoto a darpa na bitowan sa 'Kampo o Dan' taman
imanto.
13 Ipoon roo na tomiyaros siran ko kapalawan sa Ipraim na minisampay siran ko walay i
Mikah.
14 Na so lima kataw a miyanoriman ko siti a Lais na pitero iran ko manga ped iran a "Sii
sangkai a walay na aden a barahala on a Ipod ago piteong ago tiyowang a manga barahala
ago ped pen a manga barahala para ko pamiliya. Imanto na katawan iyo o antonaa i
sowaan iyo!"
15 Mandiyadi na domiyaseg siran ko walay i Mikah a ron mababaling so mangoda a Libi,
na siyalam iran.
1617 Na sii ko katitindeg o nem gatos a sondaro sii ko liyo o gimowa a ped iran so imam
na so lima kataw a miyanoriman ko inged na somiyoled ko walay na piyangowa iran so
Ipod ago so ped a manga barahala para ko pamiliya a rakes o piteong ago tiyowang a
manga barahala.
18 Sii ko kiyaliyo iran ko walay i Mikah a aawidan iran angkai a manga barahala na
pitero kiran o imam a "Antonaa angkai a siyowa iyo?"
19 Na pitero iran on a "Renek ka! Di ka dii tero. Onot ka rekami ka kebaloy ka a ama
ami ago imam. Ba di lebi reka a mapiya a kapegimami ko isa ka mbatabataa ko manga
Israil a di sa ba sii ko isaisa bo ka pamiliya?"
20 Tanto ini a inikababaya o imam, na initelon iyan so Ipod ago so ped a manga barahala
na miyonot kiran.
21 Na tomiyaros siran lomalakaw a pakaoonaan iran so manga wata iran, manga
pangangayamen iran ago manga pagigimo.
22 Kagiya malo siran kawatanan ko walay i Mikah na tiyalowan iyan so manga siringan
iyan na kited iran so manga taw sa Dan na riyaot iran.
23 Liyalis iran so manga Dan na dominingil siran a pitero iran ki Mikah a "Ino ka nan?
Ino kami ngka selobaa a ped angkanan a madakel a taw?"
24 “Ino niyo raken peteroa a 'Ino ka nan?' " a inisembag i Mikah. "Kinowa niyo so manga
barahala a pimbaalan aken a rakes o imam aken na lomiyalakaw kano den! Na antonaa
den i miyalamba raken?"
25 Na pitero on o manga Dan a "Di ka rekami dii pakipewala, ka o ba ka baden tardaa

domaseng o marangit rekami a manga mama na kadaan ka sa niyawa a rakes o pamiliya
ngka!"
26 Na tomiyaros lomalakaw so manga Dan, na kagiya mailay i Mikah a mabager siran a
di sekaniyan na mipeto ago komiyasoy ko walay niyan.
27 So manga Dan a aawidan iran so manga barahala i Mikah ago oonotan siran o imam
iyan na miyakaoma siran sa siti a Lais a so manga taw ron na lomilintad ago kena a ba
mengingilam. Na piyamono iran a pedang so manga taw ron na tiyotong iran so siti.
28 Da den a ba kiran miyakapanabang ka kagiya mababaling siran sa mawatan sa Sidon,
na da a ped a manga taw a ba iran dii mikoyapeta. Giya Lais na sii matatago ko balintad a
marani sa Bit Rihob.
Na biyangon peroman o manga taw sa Dan so siti na roo siran den miyaling.
29 Bitowan iran ai sa Dan a inisangay iran ko apoapoan iran a Dan a wata o Yakob apiya
pen kabebetowan so siti sa Lais.
30 Roo iran piyakatindeg so manga barahala. Na si Yonatan a wata o Girsom a wata
peman o Mosa a lagid mambo o manga moriyataw i Yonotan na aya pegimam ko
mbatabataa Dan taman den ko kinitaogen ko manga taw a miyanga bibiyag a poon ko
lopa iran.
31 Na ndodon den so barahala a pimbaalan i Mikah sii ko katatago roo pen o Walay o
Tohan sa Siloh.
So Libitiyo ago so Sandil iyan
Sii sangkoto a manga gawii na da a dato o manga Israil. Na aden a isa a Libitiyo a roo
babaling ko mitataog a kaden ko kapalawan sa Ipraim. Kominowa sekaniyan sa babay a
taga Bitlihim sa Yodah a miyabaloy a sandil iyan.
2 Ogaid na da sekaniyan tomani o sandil iyan sa pasad, na miyawa on so babay ka
komiyasoy ko walay i ama iyan. Sii ko oriyan o kiyapakapat olan iyan roo
3 Na siyono sekaniyan o karoma niyan ka pagakolan iyan sa kakesoy niyan. Piyakaonot
iyan so oripen iyan ago dowa timan a kimar. Sii ko kiyapakaoma niyan na piyakabolos
sekaniyan o babay roo ko walay i ama iyan. So kiyailaya on o ama o babay na
miyababaya sa kiyapakatalingomaa niyan on.
4 Na initomegel den o ama o babay a katareg iyan roo pasin, na tomiyareg sekaniyan roo
ko miyakatelo gawii a pekan ago peginom ago pepekatorog.
5 Sii ko ikapat gawii na komiyabalaga siran mbowat na miyaninimo ko kapelalakaw iran,

ogaid na pitero o ama o babay ko miyakamong on a "Pakabagera ngka daan a ginawa
ngka ko maito a pangenengken na go ka bo lalakaw."
6 Na miyontod siran a dowa na mikekan ago mininom. Oriyan iyan na pitero o ama o
babay a "Kapedipedi ka bo na sii ka den pakatorog ago peribaribat ka."
7 Tominindeg so mama sa kangganat iyan ogaid na inakolan sekaniyan o panogangan
iyan na miyakatorog roo peman sangkoto a kagagawii.
8 Sii ko teked a kapipita ko ikalima gawii na mimbowat sekaniyan sa kapelalakaw niyan,
ogaid na pitero on o ama o babay a "Kapedipedi ka bo na kan ka pasin! Nayaw ka den
taman sa magabi!" Na komiyan siran a dowa.
9 Sii ko kiyagabi niyan na kagiya ngganat a melalakaw so mama a ped iyan so sandil iyan
ago oripen na pitero on o panogangan iyan a "Ilaya niyo man, ka miyagabi den imanto.
Sii kano den pakatorog ka magaan den magagawii. Sii kano den na ba kano den
pekebabaya. Mapita na kabalaga kano lomalakaw ko kambaling iyo."
10 Ogaid na da roo den mababaya makatorog so mama sangkoto a kagagawii. Na

gomiyanat sekaniyan melalakaw na miyantap sa Hibos (a aya den Yarosalim) a ped iyan
so sandil iyan ago so dowa timan a sisiyaan a kimar iyan.
11 Magaan den magagawii ko kinisampay iran ko marani sa Hibos na magaan den
mapopos so daondaw, na pitero o oripen ko kadnan iyan a "Sii tano domeke sangkai a siti
o manga Hibosiyo sangkai a kagagawii."
12 “Di," a inisembag o kadnan iyan. "Di tano tomareg ko siti o salakaw a manga taw a
kena a ba manga Israil. Ba tano den tomaros
13 A magapas sa Gibiyah o di na sa Ramah na sii tano pakatorog ko apiya anda sangkoto
a manga darpa."
14 Na tomiyaros siran ko kapelalakaw iran na kiyagagawiinan siran ko kapepekarani ran
sa Gibiyah sii sa inged a Baniyamin
15 Na roo siran tomiyareg sa kapekatorog iran. Somiyong siran ko lamalama o siti na
miyamangontod roo, ogaid na da a ba kiran miyakateotao ko apiya anda walay sangkoto a
kagagawii.
16 Sii ko kaoontod iran roo na miyakaoma a lokes a mama a pembaling a poon ko

galebek iyan ko dii mbabasokan. Tag sekaniyan a kapalawan sa Ipraim ogaid na
mababaling den sa Gibiyah. (So manga taw sangkoto a siti na ped ko mbatabataa
Baniyamin).
17 So kiyailaya niyan ko dii melayalayag a mama roo ko lamalama na inisean iyan a
"Anda kano song? Anda kano poon?"
18 Somimbag so Libi a "Poon kami sa Bitlihim, na pembaling kami ko mitataog a kaden

sa kapalawan sa Ipraim a ron ako babaling. Miyakasong ako sa Bitlihim sa Yodah na
pesong kami imanto ko Walay o Allah. Da a ba rekami miyakabolos ko walay niyan
19 Apiya pen makapeloloto kami. Aden a kompay ami a kekan o manga kimar a rakes o
paan ago arak a pelolotoon ami, a saken, so sandil aken ago so oripen aken."
20 “Pekabolos kano ko walay aken!" a tig o lokes. "Imbegay aken rekano so apiya
antonaa i makokorang rekano. Ogaid na di kano baden pekatorog ko lamalama."
21 Na piyakaonot iyan siran ko walay niyan na piyakakan iyan so manga kimar iran.
Kagiya kaonaban iran so manga ai iran na miyamagatoang siran koman.
22 Sii ko kapekebabaya iran na so ped ko manga rarata a mama ko siti na linikopan iran
so walay. Pendebakan iran so pintoan a lalalisen iran so lokes a mama a kirek ko walay a
tig iran a "Pakaliyowa ngka so mama a miyakaoma ko walay ngka kaan ami
mipemotaliya."
23 Ogaid na lominiyo so lokes na pitero iyan kiran a "Di, manga pagari ko! Kapedipedi
kano bo na di kano penggolaola sangkai a tanto a marata! Giyangkai a mama na banto
aken; di niyo penggolaolai sangkai a piyakayaya!
24 Ilaya niyo man, ka katii so wata aken a raga ago so sandil angkai a mama. Iliyo aken
siran rekano imanto. Kekowa niyo na apiya antonaa i kabaya iyo a ikidia niyo kiran.
Ogaid na di niyo penggolaolai angkai a mama sangkai a piyakayaya."
25 Ogaid na da sekaniyan pakinega angkoto a manga mama. Mandiyadi na kinowa o Libi
so sandil iyan na piyakaliyo niyan kiran. Na pilobeda iran ago pimarataan ko miyababasa
gawii, na kagiya sobo na biyokaan iran.
26 Sii ko kakepita iyan na komiyasoy so babay ko walay o lokes a tataregan o kadnan
iyan. Miyaoteng sekaniyan ko liyo o pintoan na makagegepe roo taman sa
miyakaliwanag.
27 Mimbowat so kadnan iyan ko kapipita na so kiyalekai niyan ko pintoan o walay a

lominiyo ron ka teros lomalakaw na roo den makakekelit so sandil iyan ko danga o
pintoan a so manga lima niyan na sii ko pekedapoan.
28 Pitero on o mama a "Mbowat ka! Lomalakaw tano den!" Ogaid na da den sembag so
babay. Na riyoran o mama so lawas o babay ko kimar na miyaling.
29 Kagiya makaoma sa walay na kominowa sekaniyan sa gelat na piyamool iyan so lawas

o sandil iyan sa sapolo ago dowa baad, na piyakiwit iyan so sabaad on ko oman i isa ko
sapolo ago dowa ka mbatabataa a manga Israil.
30 So langon a miyakailay ron na pitero iyan a "Pikembokembo na da den a datar ai a ba
miyanggolaola o di na miyailay ipoon ko kiyapakaawa o manga Israil sa Misir!
Pamimikiranen tano! Pemomosawiraan tano! Antonaa i sowaan tano makapantag sii!"
Mitiyagar so manga Israil ko Kapakipetidawa iran
Mandiyadi na so langon a taw a kibabaling sa Israil ipoon sa Dan na taman sa Birsiba a

rakes o siran oto a kibabaling sa inged a Giliyad na mitimotimo siran a miyaisaisa sii ko
kamamasaan o Allah roo sa Mispah.
2 So manga olowan o langon a mbatabataa manga Israil na mindadarpa sangkoto a
kalilimod o manga pagtaw o Tohan a rakes o pat gatos nggibo a manga sondaro a
kigogomaanan a pedang.
3(Miyaneg o manga taw sa Baniyamin a so langon a ped a manga Israil na miyalimod roo
sa Mispah.)
Samaoto na iniise o manga Israil a "Teroa ngka rekami o andamanaya i kiyanggolaolaa
sangkoto a kamarataan?"
4 Somimbag so Libi a so karoma o babay a "Saken ago so sandil aken na miyakaoma sa
Gibiyah ko inged a Baniyamin a ron kami pekatorog.
5 Sangkoto a kagagawii na so manga mama sa Gibiyah na miyamakaoma ko walay a
tataregan aken na linikopan iran a kekadiyaten iran a kambonoa raken. Ogaid na ba iran
den pilobeda so sandil aken na miyatay sekaniyan.
6 Na kinowa ko so bangkay niyan na piyamool aken sa sapolo ago dowa baad na
piyakiwit aken ai ko dalem a inged a Israil, ka giyangkoto a manga mama na minggolaola
sa piyakayaya a kamarataan sii sa Israil.
7 Na, sekano langon a manga Israil; teroa niyo i kokoman iyo makapantag sii."
8 Na parengan a kiyatindeg o langon o manga taw na pitero iran a "Da den a isa rektano
bo i ba baling, apiya sekaniyan a mababaling ko barombarong o di na walay!
9 Giyai i ikidia tano sa Gibiyah: ripaan tano so manga taw a nggobat on.
10 Mapemili so ikasapolo bagi ko manga taw ko langon a mbatabataa manga Israil a aya
pegasa sa loto o manga sondaro. Na amay ka makaoma so manga sondaro sa Gibiyah na
ndanegen iran siran sabap sangkai a piyakayaya a miyanggolaola iran sa Israil."
11 Na miyataayon a miyaisaisa so langon a manga mama sa Israil sa kanggobata iran ko
siti.
12 Somiyogo so manga Israil sa manga mama ko dalem a inged o mbatabataa Baniyamin

sa kapeteroa iran a "Antonaa ngkai a maasiya a miyanggolaola sii rekano?
13 Palada niyo rekami imanto angkoto a manga rarata a mama sa Giliyad kaan ami siran
mabono ago mapakada ami so kamarataan sii sa Israil."
Ogaid na da pakinega o manga Baniyamin so ped iran a manga Israil.
14 Ka ba siran den lominiyo a poon ko langon a manga siti sa Baniyamin na mitimotimo
siran sa Gibiyah sa kapakipetidawa iran ko ped a manga Israil.
15 Dowa polo ago nem nggibo a manga sondaro iran a miyakapoon ko manga siti iran a
miyamakaoma sa Gibiyah sangkoto a gawii a liyo ron so pito gatos a piyamagaraw a
manga sondaro a kibabaling sa Gibiyah.
16 Maaped sangkai langon a sondaro so pito gatos a padiwangan a manga mama a so
oman i isa kiran na pekasalibat a ator ko sawaro a bok a di den peliwagan.
17 Na so manga Israil a makaliyoliyo ko manga taw sa Baniyamin na pat gatos nggibo a
manga sondaro a tadiyam sa katidawa.
Miyakitidawa so Israil ko Baniyamin
18 Miyamanong so manga Israil ko darpa a pesimbaan ko Tohan roo sa Bitil na inisean

iran so Tohan a "Antawaa rekami i magona gomobat ko manga taw sa Baniyamin?" Na
somimbag so Allah a "So mbatabataa Yodah."
19 Sii ko tomiyalondog a gawii na lomiyalakaw so manga Israil na mikempo ko marani sa

Gibiyah.
20 Na domiyaseg siran ko siti na mitiyagar sa kapakipetidawa iran ko manga taw sa
Baniyamin.
21 Ogaid na lominiyo ko siti so manga Baniyamin na miyakapatay siran sa dowa polo ago
dowa nggibo a manga Israil sangkoto a gawii.
22-23 Sabap san na miyamanong peman so manga Israil sa Bitil a ron siran dii
makagoraok ko kamamasaan o Allah taman ko kiyaperimon iyan. Inisean iran sekaniyan
a "Ba kami makipetidawa peroman ko manga Baniyamin a manga pagari ami?"
Somimbag so Allah a "Oway, pakitidawa kano kiran."
Na giyoto a miyamagoyata so manga Israil na mitiyagar siran peman makipetidawa sii
ko darpa a kiyadenan iran ko paganay a gawii.
24 Na gomiyobat siran peman ko manga Baniyamin sii ko ikadowa gawii.
25 Mililiyo so manga Baniyamin sa Gibiyah na sii sangkai a ikadowa gawii na
miyakapatay siran sa sapolo ago walo nggibo a manga Israil a langon siran tiyadam sa
katidawa.
26 Mandiyadi na miyamanong so langon o manga Israil sa Bitil. Miyamangadap siran roo

ko kamamasaan o Allah a dii nggogoraok a da siran den makakan taman ko kiyaperimon
iyan. Somiyapaat siran ko Allah sa manga korban a petotongen ago manga korban pantag
bo ko kanggiginawai,
27 Na inisean iran sekaniyan. (Sa masa oto na ndodoo den sa Bitil so Kaban sa
Kapasadan o Tohan
28 A aya komikibir on na si Pinihas a wata i Iliyasar a wata peman i Aron.) Iniise iran ko
Allah a "Ba kami makipetidawa peroman ko manga pagari ami a manga Baniyamin o di
na ba kami nggenek?"
Na pitero o Allah a "Gobata niyo siran, ka mapita na pekitaban aken siran rekano."
29 Mandiyadi na piyakaayan o manga Israil so ped ko manga sondaro ko melilibeta sa

Gibiyah.
30 Na domiyaseg siran peman sa Gibiyah sii ko ikatelo gawii na mitiyagar siran sa
kapakipetidawa ko manga Baniyamin a lagid o siyowa iran gowani.
31 Na kagiya meliliyo so manga Baniyamin a makipetidawa kiran na miyaagak siran
makaawat ko siti. Mipoon siran mamono ko manga Israil a lagid gowani, na manga telo
polo a manga Israil a miyabono roo ko lalan a ipesong sa Bitil ago sii ko lalan a ipesong
sa Gibiyah.
32 Na pitero o manga Baniyamin a "Pendaagen tano siran a datar gowani!" Ogaid na aya
dii teroon o manga Israil na "Tomailis tano ka agaken tano siran a pepekaawat ko siti roo
ko manga lalan."
33 Na kagiya miraot so manga Israil sa Baal Tamar na mipeto siran, na so manga
magaayan a tetapok sii ko manga pangomaan ko melilibeta sa Gibiyah na minggagaan
siran lomiyo ko manga darpa a kitetapokan iran
34 Na gomiyobat siran sa Gibiyah a sapolo nggibo siran a piyamili a manga sondaro sa
Israil. Tanto a miyakaregen so dii katidawa, na di katawan o manga Baniyamin a iniraot
kiran den so kakebinasa iran.
35 Piyakitaban o Allah ko Israil so manga Baniyamin, na sii sangkoto a gawii na
miyakapatay so manga Israil sa dowa polo ago lima nggibo ago magatos a manga
Baniyamin a langon siran tadiyam sa katidawa.
36 Na miyailay o manga Baniyamin a tiyaban siran den.
So ompongan o salompok a manga Israil na kiyapalagoyan iran so manga Baniyamin
ka kagiya sasanaan iran so manga mama a piyakaayan iran ko melilibeta sa Gibiyah.
37 Giyangkai a manga magaayan na minggagaan somondol sa Gibiyah, na miperaparak
siran ko siti ago piyamono iran a pedang so langon a taw ron.
38 Miyakipesada so manga Israil ko manga magaayan a perapog siran kaan migorong a
bel ko siti.
39 Na anda den i kiyailaya on o pepekatailis a manga Israil na mipeto siran makitidawa.
40 Sii ko da pen oto kanggolaola na miyakapatay den so manga Baniyamin sa manga telo
polo a manga Israil a pitero iran a "Pendaagen tano siran a datar gowani!"
40 Ogaid na kagiya migorong so mapopolaos a bel a poon ko siti na dominingil so manga
Baniyamin na miyailay iran so bel ko dalem o siti a pekiporo sa kawang.
41 Na giyoto a mipeto so manga Israil na giyobat iran siran. Tanto a miyanga alek so
manga Baniyamin ka miyailay iran a riyaot siran a kamoralaan.
42 Sabap roo na piyalagoyan iran so manga Israil na miyamagantapantap ko disirto.
Ogaid na di iran kepalagoyan so katidawa ka minipagelet siran ko manga Israil a mipeto
gomobat ago so siran oto a pepeliliyo ko siti, na piyamono iran siran.
43 Linikopan iran so manga Baniyamin na da iran den lokei somaloba taman ko darpa sa
sebangan a Gibiyah.
44 Sapolo ago walo nggibo a manga Baniyamin a miyanga bobono a langon siran manga
wawaraw a sondaro.
45 So miyamakapagoyag kiran na miyamalagoy a pegagaw ko disirto roo sa Ator sa
Rimon. Lima nggibo pen a miyabono kiran o manga Israil sii ko manga lalan. Na
inipananantal iran taman den sa Gidom, na dowa nggibo pen a miyabono iran kiran.
46 Dowa polo ago lima nggibo langon a manga Baniyamin a miyabono sangkoto a gawii
a langon siran manga wawaraw a sondaro.
47 Ogaid na nem gatos a manga mama a miyamakapagapas ko disirto sa Ator sa Rimon
na komiyaden roo ko soled o miyakapat olan.
48 Na miyamangasoy so manga Israil ko miyalamba a manga Baniyamin na giyobat iran
siran na piyamono iran siran a rakes on so manga pangangayamen sii ko langon a siti a
miyaoma iran. Na tiyotong iran pen langon angkoto a manga siti.
Bigan so manga Baniyamin sa manga Babay a Mapengaroma iran
Isako malimod so manga Israil sa Mispah na misepa siran roo a "Da den a isa rektano bo
a ba niyan pakipangaromaan so wata iyan a babay ko mama a ped ko mbatabataa
Baniyamin."
2 Na miyamanong so manga Israil sa Bitil a ron siran miyangadap ko kamamasaan o
Allah taman ko kiyaperimon iyan a pepamanggoraok sebenar.
3 “Ya Allah a Tohan o Israil," a inigoraok iran. "Ino ai mapenggolaola? Ino keda so isa
ka mbatabataa sa Israil imanto?"
4 Sii ko kiyapita iyan na komiyabalaga siran mbowat na miyangon siran roo sa aparan na
somiyapaat siran on sa manga korban a petotongen ago manga korban pantag bo ko
kanggiginawai.
5 Na miyamagisei siran a tig iran a "Antawaa ko langon a mbatabataa sa Israil i da darpa
sii ko kiyalimod tano ko kamamasaan o Allah roo sa Mispah?" Ka minisepa iran a so
apiya antawaa i di ndarpa ko kamamasaan o Allah sii sa Mispah na mbonoon.
6 Mikerata a ginawa o manga Israil sabap ko manga pagari ran a Baniyamin a tig iran a
"Imanto a gawii na isa ka mbatabataa a miyapotol sa Israil!
7 Andamanaya i kaketoona tano ko manga babay a mapengaroma o miyalamba kiran, ka
minisepa tano ko Allah a di tano kiran den pakipengaroma so manga wata tano?"
8 Na sii ko kiniiseen iran a "Antawaa ko manga mbatabataa sa Israil i da darpa ko
kiyalimod ko Allah roo sa Mispah," na kiyatokawan iran a da a isa bo ko manga taga
Yabis Giliyad a ba roo domiyarpa.
9 Ka isako bilangen iran so manga taw na da a taga Yabis Giliyad a ba ndodoo.
10 Mandiyadi na so malilimod a manga taw na somiyogo sa sapolo ago dowa nggibo a
manga sondaro a inisogo iran kiran a "Song kano roo sa Yabis Giliyad na pamonoa niyo
so langon a kibabaling roo a rakes o manga babay ago manga wata.
11 Na giyai i penggolaolaa niyo: Bonoa niyo so oman i mama ago so oman i babay a kena
a ba raga."
12 Na miyakatoon siran sa pat gatos a manga ngongoda a babay a da den marembang a
mama sii ko manga kibabaling sa Yabis Giliyad, na inowit iran ko kampo sa Siloh roo sa
inged a Kanaan.
13 Oriyan iyan na so langon a malilimod na somiyogo sa manga pengangawid ko

kalilintad roo ko manga Baniyamin sa Ator sa Rimon.
14 Na miyamangasoy angkoto a manga Baniyamin na inipamegay kiran so manga babay a
poon sa Yabis Giliyad a piyakapagoyag o manga Israil. Ogaid na korang pen so manga
babay.
15 Na mikerata a ginawa o manga taw ko manga Baniyamin sabap sa inoparik o Allah so

kaiisaisa o manga mbatabataa sa Israil.
16 Na pitero o manga pelokelokesen ko malilimod a "Kagiya da den a miyalamba a
manga babay ko mbatabataa Baniyamin na antonaa i mapenggolaola tano kaan aden a
mapangaroma o manga mama a da on katokidi?"
17 Disomala a aden a kebabadan ko manga Baniyamin a miyamakapagoyag kaan di keda
so isa ko manga mbatabataa sa Israil.
18 Ogaid na di tano kiran mapakipengaroma so manga wata tano ka kagiya minisepa tano
a manga Israil a 'Kemorkaan so apiya antawaa i pakipengaroma niyan so wata iyan a
babay ko mama a ped ko mbatabataa Baniyamin.' "
19 Na giyoto a kiyatoosan iran so makapantag ko pista ko Allah oman ragon roo sa Siloh.
(Giya Siloh na sii sa pagotaraan a Bitil ago sa pagabagatan a Libonah ago sii sa sebangan
a lalan a ipesong sa Sikim a poon sa Bitil.)
20 Mandiyadi na ininsaratan iran so manga Baniyamin a tig iran a "Song kano roo na
tetapok kano ko manga asinda a obas
21 Na pemagayan kano roo. Na amay ka meliliyo so manga babay sa Siloh a pesesayaw
na nggagaan kano lomiyo ko manga asinda na so oman i isa rekano na sikem sa babay a
mabaloy a karoma niyan na wita niyo siran ko inged a Baniyamin.
22 Amay ka somong rekami so manga ama iran o di na manga laki sa kipepanonen iran
on na peteroon ami kiran a 'Kapedipedi kano bo na iyogen iyo kiran a mapangaroma iran
so manga wata iyo. Ka da ami makowa so madiyangka a manga babay a kitokid ko oman
i isa kiran sii ko dii katidawa. Na di rekano kitana so kakesogoka ko inisepa iyo ka
kagiya kena a ba sekano i migay kiran ko manga wata iyo."
23 Na giyoto den i pinggolaola o manga Baniyamin. Sii ko dii kasesayaw o manga raga
na so oman i mama na sominikem sa sakataw kiran na siyanggowit iyan roo a mabaloy a
karoma niyan. Komiyasoy siran ko lopa a miyakewali ran na biyangon iran peroman so
manga siti iran ago miyamaginged siran on.
24 Na gomiyanat roo so manga Israil na miyaling so oman i isa kiran ko manga tonganay
niyan sii ko inged a kawali o mbatabataa a maaped sekaniyan on.
25 Sii sangkoto a manga gawii na da den a dato o manga Israil, na so oman i isa na di
niyan dii nggolaolaan so mapipikir iyan a ontol.
ROTA
ROTA 1
Iniogalin i Ilimilik so Pamiliya niyan sa Mowab
Sii ko manga gawii a so manga pangongokom na aya ndadato sa Israil na tiyaon so inged.
Na aden a sakataw a mama a taga Bitlihim sa Yodah a somiyong sa inged a Mowab a ped
iyan so karoma niyan ago so dowa a wata iyan a mama ka tereg siran roo.
2 Aya ngaran o mama na si Ilimilik, na so karoma niyan na si Naomi, na aya manga
ngaran o dowa a wata iyan na si Malon ago si Kiliyon. Ped siran ko mbawataan o Iprat a
manga taga Bitlihim sa Yodah. Sii ko katatareg iran roo
3 Na miyatay si Ilimilik a karoma i Naomi na minibegak si Naoma ago so dowa a wata
iyan a mama.
4 Miyamakapangaroma siran sa manga babay a taga Mowab a aya ngaran o isa on na si
Orpah, na so isa on na si Rota. Kagiya makapaginged siran roo ko miyakasapolo ragon
5 Na miyatay mambo si Malon ago si Kiliyon na si bo si Naomi i miyalamba a da a
karoma niyan o di na wata.
Komiyasoy si Naomi ago si Rota sa Bitlihim
6 Da peman matey na miyaneg i Naomi roo sa inged a Mowab a kiyarakmatan o Allah so

manga pagtaw niyan sa Yodah ko kiyapakaodara niyan kiran ko pepanga raragon. Sabap
roo na mitiyagar siran ago so dowa a miyamakamong on a babay sa kapagawa iran sa
Mowab ka kesoy siran sa Yodah.
7 Na giyanatan iran so darpa a babalingan iran sa kapelalag iran ko lalan a ipesong sa
inged a Yodah.
8 Ogaid na pitero i Naomi ko miyamakamong on a "Kasoy kano bo sii ko manga walay o

manga ina iyo, na pengnin ko a ikalimo kano o Allah a datar o kinikalimoon iyo ko
miyamatay a karoma niyo ago saken.
9 Mapero o Allah ko oman i isa rekano a mapangaroma kano peroman a makabangon
kano sa walay."
Na inarekan siran i Naomi. Ogaid na miyakaotantang siran sebenar
10 A tig iran a "Di! Magonot kami reka roo ko manga tonganay ngka."
11 Ogaid na tig i Naomi a "Kasoy kano, manga wata aken. Ino kano raken pegonot? Ba
ako pen makambawata sa manga mama a makapangaroma rekano?
12 Kasoy kano ko manga walay o manga lokes iyo, manga wata aken, ka miyalokes ako
den a di den mapengaroma peroman. Na apiya pen o kepakay a mapangaroma ako
imanto a kagagawii a mbawata sa manga mama
13 Na ba niyo siran kenayawi taman ko kapakala iran a di kano den pakipengaroma ko
ped a manga mama? Kena, manga wata aken. Tiyanaan ako o Allah sa morka na tanto a
mararata a ginawa ko sabap rekano."
14 Na gomiyoraok siran peroman na inarekan i Orpah si panogangan iyan sa kapagodas

iyan on. Ogaid na si Rota na domiyareket rekaniyan.
15 Na pitero i Naomi ki Rota a "Ilaya ngka man, ka kesoy so idas ka roo ko manga
tonganay niyan ago sii ko manga tohan iyan. Na, onot ka rekaniyan maling."
16 Ogaid na somimbag si Rota a "Di ako ngka petegela mangimbelag reka! Di aken seka
den pagawaan. Apiya anda ka song na song ako ron mambo, na apiya anda ka keden na
ron ako mambo keden. So manga tonganay ngka na kebaloy mambo a manga tonganay
aken, na so Tohan ka na kebaloy a Tohan aken.
17 Apiya anda ka petay na ron ako mambo petay, na ron ako pen kilebeng. Kamorkaan
ako o Allah sa tanto a maregen o aden a kambelagan ta a liyo ron so kapatay!"
18 Na so kiyailaya i Naomi a mananabenar si Rota sa kapakaonot iyan on na ginekan iyan
somapar.
19 Mandiyadi na tomiyaros siran a dowa ko kapelalakaw iran taman sa minisampay sa

Bitlihim. Kiyasasalakawan so langon a magiinged on ko kiyapakaoma iran, na pitero iran
a "Ba giyai si Naomi?"
20 “Di ako niyo pembetowi sa Naomi," a tig iyan kiran. Betowi ako niyo sa Mara ka
tanto a piyakapait o Lebi a Mabager a Tohan so kapepaginetaw aken.
21 Sii ko kiyaganat aken sii na mapepeno ako, ogaid na piyakabaling ako o Allah a da a
tago iyan. Ino ako niyo pembetowi sa Naomi a riyomasay ako ago pimorkaan o Lebi a
Mabager?"
22 Giyanan i kiyapakakasoy i Naomi a poon sa Mowab a ped iyan so miyakamong on a si

Rota a taga Mowab. Na miyakaoma siran sa Bitlihim ko kiyapooni ko kaperaragon sa
bantad.
ROTA 2
Minggalebek si Rota ko dii Mbabasokan i Bowas
Aden a tonganay i Naomi a aya ngaran iyan na si Bowas, a mala i gees ago pakaalaan a
mama a ped ko pamiliya i Ilimilik a karoma i Naomi.
2 Miyakaisa a gawii na pitero i Rota ki Naomi a "Pakasonga ko ngka ko dii mbabasokan

kaan ako ron makapamodiyot sa manga pereperan a pekibegak o apiya antawaa a dii
meragon a peparo raken." Na tig i Naomi a "Ika roo den, wata ko."
3 Na somiyong si Rota ko dii mbabasokan na miyamodiyot ko pekeiposan o dii

meraragon sa bantad. Na miyasalak a giyangkai a dii mbabasokan na rek i Bowas a
tonganay i Ilimilik.
4 So katatago roo i Rota na miyakaoma si Bowas a poon sa Bitlihim, na siyalam iyan so

dii meraragon a "Malalayon rekano so Allah!"
"Karakmatan ka o Allah!" a inisembag iran.
5 Na inisean i Bowas so kapatas ko dii meraragon a "Antawaa angkoto a kangodaan a

babay?"
6 Somimbag so kapatas a "Giyoto so babay a taga Mowab a miyonot ki Naomi ko

kiyakasoy niyan sii a poon sa inged a Mowab.
7 Piyangni niyan raken o ba makapamodiyot ago makapanimo sa pereperan ko
pekeiposan o dii meraragon. Miyakaoma sekaniyan ko kapipita na minggalebek taman
imanto liyo ron igira a pendeke sa di matey sii ko kasisirongan."
8 Mandiyadi na pitero i Bowas ki Rota a "Pamakineg ka, wata aken. O ba ka sii awa sa
kapemodiyot sii ko ped a dii mbabasokan. Sii ka den a ped o kigagalebek aken a babay.
9 Pegilaya ngka so darpa a di iran dii nggalebekan na tondoga ngka siran. Inipamando
aken ko manga ngongoda a mama a di ka iran pekebota. Na igira a pekewaw ka na song
ka ko manga omoy na inom ka on ko ig a siyageb iran."
10 Na romiyoko si Rota a iniseko iyan a paras iyan ko lopa a pitero iyan ki Bowas a "Ino
ako ngka kelimoon ko kiyatagoa ngka raken sa ginawa a matag ako mananangga?"
11 Somimbag si Bowas a "Miyapanotol raken so langon a pinggolaola ngka a kamapiyaan

o panogangan ka ipoon ko kiyapatay o karoma ngka. Katawan aken a inawaan ka so ama
ago so ina a ka ago so inged a pimbawataan reka na sii ka miyaling ko manga taw a di
ngka katawan gowani.
12 Pengnin ko ko Allah a ibedal iyan reka so pinggolaola ngka. Kabalasan ka piyapiya o
Allah a Tohan o Israil a ron ka miyagapas ko didalem o manga papak iyan!"
13 “Tanto ako ngka a inikalimo, kadnan ko," a tig i Rota. "Piyakapiya ngka a ginawa ko
ko kala a ka i gagaw ko kinimbitiyarain ka raken a oripen ka apiya pen kena ako a ba
lagid o isa ko manga gomagalebek ka a babay."
14 Na sii ko kaken na pitero rekaniyan i Bowas a "Song ka sii na go ka kan sa paan na

diloten ka ko arak." Na miyontod si Rota ko obay o dii meraragon na bigan i Bowas sa
sindag a bantad. Komiyan sekaniyan na miyaosog na miyawid pen ko miyasama iyan.
15 Kagiya komasoy sekaniyan ko dii nggalebekan na piyamando i Bowas so manga

gomagalebek iyan a tig iyan a "Apiya pen o mangowa sekaniyan ko pepamangeto a
pereperan na di niyo separi.
16 Na tibabaa niyo a kapekeolog o ped ko manga saway na pembegaken iyo ron a
mapemodiyot iyan, na di niyo sekaniyan pembongeti."
17 Na giyoto a miyamodiyot si Rota sii ko dii mbabasokan taman ko kiyagabi niyan.

Oriyan iyan na inegik iyan so miyapanimo iyan, na manga sapolo ini ka kilo a bantad.
18 Inawidan iyan ai na miyaling ko siti na piyakiilay niyan ko panogangan iyan so kala a
miyatimo iyan. Inibegay ron pen i Rota so miyasama ko miyakan iyan.
19 Na iniise on i Naomi a "Anda ngka miyapamodiyot angkai a langon a pereperan

imanto a gawii! Anta kilopa i piyamodiyotan ka? Karakmatan so mama a tomiyago reka
sa ginawa!"
Pitero i Rota ko panogangan iyan so makapantag ko mama a kirek ko dii mbabasokan a
piyamodiyotan iyan a tig iyan a "Aya ngaran iyan na si Bowas."
20 “Karakmatan sekaniyan o Allah!" a tig i Naomi ko miyakamong on. "Da den geneken
o Allah so kipekelimoon iyan ko manga ooyagoyag ago so miyamatay!" Na tig iyan pen a
"Giyangkoto a mama na madaseg tano a tonganay a isa ko aden a kabenar iyan sa kaaona
ko pamiliya tano."
21 Na tig i Rota a "Pitero iyan raken pen a 'Sii ka den a ped o kigagalebek aken taman sa
mapasad iran meragon so langon a pereperan aken."
22 Tig i Naomi a "Mapiya reka, wata aken, a kapegonot ka den ko kigagalebek iyan a
babay ka o ba ka baden semoka sii ko ped a dii mbabasokan."
23 Sabap roo na sii den pegobay si Rota ko kigagalebek i Bowas a manga babay taman ko
kiyaimasada meragon ko bantad ago trigo. Na komakaden sekaniyan den ko panogangan
iyan.
ROTA 3
Si Rota ago si Bowas ko Pegegikan
Miyakaisa a gawii na pitero i Naomi ki Rota a "Wata ko, disomala a kipengilobaan aken
reka sa kebalingan ka a ron ka kapepiyapiyai.
2 Katawan ka a si Bowas a minipagepeda a ka so kigagalebek iyan a babay na tonganay
tano. Na, pakinega ngka; imanto a gagawii na magegik sekaniyan sa bantad roo ko
pegegikan.
3 Peigo ka na go ka kekamotan, na solota ngka so lebi a mapiya a nditaren ka. Na
songowi ngka sekaniyan roo ko pegegikan ogaid na o ba ngka on pakitokawi a ndodoo ka
taman sa di sekaniyan makapasad koman ago minom.
4 Amay ka magiga sekaniyan na ilaya ngka o anda i pagigaan iyan. Na amay ka
makatorog na song ka on na lekisa ngka so tanggob sii ko manga ai niyan na iga ka roo.
Na peteroon iyan reka i penggolaolaan ka."
5 “Nggolaolaan ko so langon a pitero o ka," a tig i Rota.
6 Na somiyong sekaniyan ko pegegikan na ininggolalan iyan so langon a iniinsarat on o

panogangan iyan.
7 Sii ko kiyapakapasad koman i Bowas a miyakapiya a ginawa niyan na somiyong

sekaniyan ko obay o aantiban sa pereperan na miniga ago miyakatorog. Na minanay ron
mobay si Rota na likis iyan so tanggob ko manga ai niyan na miniga roo.
8 Sii ko kiyalooki sa gawii na kiyatekawan si Bowas na tomiyakilid, na miyamemesa a
aden a babay a miiga ko dasigan iyan.
9 “Antawaa ka?" a iniise iyan.
"Saken si Rota a oripen ka," a tig iyan. "Sapengen ka raken so bibir o tanggob ka, ka
seka na madaseg a tonganay a makaaon ko pamiliya ami."
10 Tig i Bowas a "Karakmatan ka o Allah, wata aken! Lebi a mala a kipekelimoon ka ko

pamiliya ngka imanto a di so miyaona ka kagiya kena a ba aya ngka pegapasa na so
manga ngongoda a mama apiya anda ko tatamoken o di na miskin.
11 Na di ka pegawid a akal imanto, wata aken. Ipenggolalan aken reka so langon a
ipapaliyogat, ka so langon a taw roo ko siti na katawan iran a mapiya ka i paparangayan a
babay.
12 Benar den a saken na madaseg ka a tonganay a makaaon ko pamiliya niyo ogaid na
aden pen a madaseg ka a di saken.
13 Na, sii ka den ko mababasa gawii na amay ka mapita na imbitiyarai aken sekaniyan. O
kabaya iyan a pagaonen ka niyan na mapiya; pekaaonen aken sekaniyan. Ogaid na o di
niyan kabaya na isepa aken ko kaooyagoyag o Allah a saken i magaon reka. Na, iga ka sii
taman sa mapita."
14 Na miniga si Rota ko dasigan i Bowas taman ko kiyapita iyan ogaid na mimbowat

komabalaga sa di on pen kaketokawi o apiya antawaa, ka miyatero i Bowas a "Disomala a
da a ba makatokaw a aden a babay a miyakasong ko pegegikan."
15 Pitero iyan pen a "Wita ngka sii so kimon a sosoloten ka na kayata ngka." Pinggolaola
ini i Rota na inododan i Bowas sa nem ka asada a bantad. Na piyakiposai niyan ki Rota
na miyaling sekaniyan.
16 Kagiya makaoma si Rota ko walay na inisean o panogangan iyan a "Antonaa i

miyasowasowa, wata ko?"
Piyanotol on i Rota so langon taman a inikidia on i Bowas.
17 Tig iyan pen a "Inibegay niyan raken angkai a nem ka asada a bantad ka pitero iyan
raken a 'Di ka mbeling ko panogangan ka sa da a awid ka.'"
18 Na pitero on i Naomi a "Ba ka den sebar, wata aken, taman sa katokawan ka i

sendadan ai. Ka di den ndeke angkoto a mama taman sa mapasad iyan imanto angkai a
betad."
ROTA 4
Piyangaroma i Bowas si Rota
Somiyong si Bowas ko dii timotimoan ko gimowa o siti na miyontod roo. Samaoto na

somiyagad roo so madaseg a tonganay a makaaon ko pamiliya a miyaaloy i Bowas. Na
tiyalowan i Bowas a "Hey pagari ko, song ka sii man na go ka ontod." Na miyobay ron
na miyontod.
2 Na kominowa si Bowas sa sapolo a pelokelokesen ko siti na piyangni niyan kiran a
kaontod iran roo a peseksi.
3 Na pitero i Bowas ko tonganay a makaaon ko pamiliya a "Si Naomi a gopen
miyakakasoy sii a poon sa Mowab na di niyan dii pesaan so lopa a rek o tonganay tano a
si Ilimilik.
4 Na miyapamikir aken a pekitokawan ko reka ini ago peteroon ko reka a pamasaa ngka
ini ko kamamasaan angkai a kioontod sii ago sii ko hadapan angkai a manga
pelokelokesen. O pagaona ngka na nggolaolaa ngka den, ogaid na o di ka kebaya na teroa
ngka raken kaan aken katokawi. Ka da den a ped a kikabenar sa kapagaona on a rowar
reka, na saken i telondog reka."
"Pagaonen ko," a tig o mama.
5 Na pitero i Bowas a "Sii ko gawii a kapemasaa ngka ko lopa i Naomi na kekowa ngka
pen si Rota a taga Mowab a so miyabalo o miyatay a kebaloy a karoma ngka kaan
matatap so kapekewaliya ko lopa o manga mbawataan o miyatay."
6 Somimbag so madaseg a tonganay a "O giyanan na isengkop aken so kabenar aken sa

kapemasaa ko lopa ka masiken a kebatalan so rek aken a kawali. Seka den i kowa ko
kabenar aken ka di aken keaon."
7 Sa masa oto na giyai so adat o manga Israil sii ko kapepasai ago so kitogalinen ko
manga tamok: pagendaan o dii pesa so tinilas iyan na imbegay niyan ko pemasa. Giyai i
kiyapakatengkeda ko dii kapenigosiyo roo sa Israil.
8 Kagiya ka maoto na sii ko kiyagiraw o madaseg a tonganay ki Bowas a "Seka den i
pamasa on," na inendaan iyan on so tinilas iyan na inibegay niyan ki Bowas.
9 Mandiyadi na pitero i Bowas ko manga pelokelokesen ago so langon a miyalimod a

"Imanto a alongan na manga saksi kano sa miyapamasa ko poon ki Naomi so langon a rek
i Ilimilik ago so manga wata iyan a si Kiliyon ago si Malon.
10 Liyo ron pen na miyakowa ko si Rota a bitowanen i Malon a kebaloy a karoma ko
kaan sekaniyan makambawata sa pekaawid ko ngaran o miyatay a makapekewali pen ko
manga rek iyan. Sangkai a okit na di keda so ngaran o miyatay ko manga tonganay niyan
o di na sii ko kisosoraten on ko pimbawataan on a inged. Na manga saksi kano sii imanto
a gawii."
11 Na pitero o manga pelokelokesen ago so langon a ped a malilimod roo a "Oway,

manga saksi kami! Na pangnin ta ko Allah a mbalowin iyan angkai a babay a mbeling ko
walay ngka a lagid o Rakila ago si Liyah a aya miyamakabangon ko langon o nasiyon a
Israil! Na mabaloy ka a mala i gees san sa Ipratah ago kababantogan sii sa Bitlihim.
12 Pangnin ta a so kebabadan reka a imbegay reka o Allah a nggolalan sangkai a
mangoda a babay na mabaloy a datar o kiyababadan ko Piris a inimbawata o Tamar ago
so Yodah."
So Salsila ko Daod
13 Na inowit i Bowas si Rota ko walay niyan a karoma niyan. Na sii ko kapakatetapi iran
na inikalimo siran o Allah na miyaogat si Rota a mimbawata sa mama.
14 Na pitero o manga babay ki Naomi a "Podin so Allah a migay reka sangkai a gawii sa
madaseg a tonganay a miaon ko pamiliya ngka! Pangnin ta a mbeloy angkai a wata a
kikilalaan sii sa Israil!
15 Pembagowan iyan so kaoyagoyag ka ago tegikor reka ko kiyalokes ka, ka aya on
mimbawata na so miyakamong reka a pekebabaya reka a lebi reka a tomo a di so pito a
wata a mama."
16 Na kinowa i Naomi so wata na inaben a rinitan iyan.

17 Na so siringan iyan a manga babay na bitowan iran so wata sa Obid a tig iran a "Aden
a wata a mama a inimbawata para ki Naomi!" Na si Obid na aya ama o Yasay a aya ama
o Daod.
18 Giyai i salsila ko Daod ipoon ko apoapoan iyan a so Piris:
Si Piris na ama i Hisron,

19 Si Hisron na ama i Ram, si Ram na ama i Aminadab,
20 Si Aminadab na ama i Nason, si Nason na ama i Salmon,
21 Si Salmon na ama i Bowas, si Bowas na ama i Obid,
22 Si Obid na ama i Yasay, na si Yasay na ama i Daod.
1 SAMOWIL
1 SAMOWIL 1
So Pamiliya i Ilkanah
Aden a sakataw a mama a aya ngaran iyan na si Ilkanah a mababaling sa inged a Ramah
sii ko kapalawan a Ipraim. Wata sekaniyan o Yahoram a wata o Iliho a wata o Toho a aya
wata o Sop a ped ko mbatabataa o Ipraim.
2 Aden a dowa ka kataw a karoma i Ilkanah a si Hanah ago si Peninah. Si Peninah na den
a manga wata iyan, ogaid na si Hanah na da.
3 Oman ragon na pengganatan i Ilkanah so inged iyan ka pesimbaan iyan ago di niyan dii
korbanan so Allah a Lebi a Mamaapaar roo sa Siloh a ron pepegimam ko Allah si Hopni
ago si Pinihas a so dowa kataw a manga wata i Ili.
4 Igira a pekeoma so gawii a kapekorban i Ilkanah na penggomonan iyan sa ped ko sapo
so karoma niyan a si Peninah ago so oman i isa a wata iyan a mama ago babay.
5 Ogaid na si Hanah na petekepen iyan so ipembegay niyan on ka kagiya pakatatayaan
iyan, na da sekaniyan den pakambawataa o Allah.
6 Na si Peninah a dowaya iyan na lalayon iyan pekakatan si Hanah kaan iyan dii
mapakaperangit sabap sa da den pakambawataa o Allah,
7 Na di den ai dii manggolaola oman ragon. Igira a petekedeg si Hanah ko Walay o Allah
na pekakatan sekaniyan o dowaya iyan taman sa makasegad ago di den ken.
8 Na pegisean i Ilkanah a tig iyan a "Hanah, ino ka pesegad? Ino ka di ken? Ino mararata
a ginawa ngka? Ba ako ngka di tomoa a di so kaadeni reka sa sapolo kataw a manga wata
a mama?"
So Samaya i Hanah
9 Miyakaisa a gawii kagiya makapasad siran koman ago minom sii sa Siloh na
tominindeg si Hanah. Samaoto na si Ili a aya imam na moontod ko korsi ko kilid o
gimowa o Barombarong a Pesimbaan ko Allah.
10 Na sii ko kapapait ko niyawa i Hanah na pesegad sekaniyan sebenar a dii
mangangarapan ko Allah.
11 Na misemaya den a tig iyan a "Ya Allah a Lebi a Mamaapaar, ilaya ngka bo so
kararata a ginawa ko a oripen ka! Tatademi ako ngka! Di ako ngka pelipati! Ka o mbegi
ako ngka sa wata a mama na imbegay aken a iklas reka ko langon a
gawii o kaooyagoyag iyan, na di den potolan so bok iyan."
12 Na sii ko kapeteros iyan den mangangarapan ko Allah na pegilain i Ili so ngari iyan.
13 Pepangangarapan si Hanah sii bo ko poso iyan; pekekaog so manga modol iyan ogaid
na di keneg so lagam iyan. Aya katao ron i Ili na mabebereg sekaniyan,
14 Na pitero iyan on a "Ay katey a kapepamereg ka? Lebaden ka so arak ka!"
15 “Kena a ba ako mabebereg, Kadnan ko," a inisembag i Hanah. "Babay ako ai a tanto a
makandadamar a akal aken. Da ako makainom sa arak o di na pakabereg a
panginginomen. Pepayagen ko baden so manga awid a akal aken ko hadapan o Allah.
16 Di ngka pemikira a so oripen ka i ba marata a babay. Ipepangangarapan aken sii so
minitaralo a mimboboko ago ikekarata a ginawa ko."
17 “Baling ka den a mapipiya a ginawa ngka," a tig i Ili, "na pengnin ko a amponen o
Tohan o Israil so pepangnin ka on."
18 “Mapamikir ako ngka sa limo," a inisembag i Hanah. Oriyan iyan na miyawa

sekaniyan roo ago komiyan, na kena den a ba makaririmeng so paras iyan.
So Knimbawataan ki Samowil ago so Kinibegan on sii ko Allah
19 Teked a kapipita ko talondog a gawii na mimbowat siran ago miyamanimba ko Allah,

na komiyasoy siran ko walay iran sii sa Ramah. Rimbang i Ilkanah si Hanah a karoma
niyan na inampon o Allah so pangni niyan.
20 Da matey na miyaogat si Hanah ago mimbawata sa bago a mama. Bitowan iyan sa
Samowil a tig iyan a "Piyangni aken sekaniyan ko Allah."
21 Miyaoma peman so gawii a dii kakorban i Ilkanah sii ko Allah oman ragon ago so
kitomanen iyan ko samaya iyan on. Kagiya ka maoto na tomiyakedeg sekaniyan sa Siloh
a rakes o langon o pamiliya niyan.
22 Ogaid na da onot si Hanah ka pitero iyan ki karoma niyan a "Amay den ka gomenek
somoso so bago a mama na pagowiten aken roo sa kapekaadapa ko ron ko Allah, na roo
sekaniyan den mbeling lalayon."
23 Na pitero on i Ilkanah a "Nggolaolaa ngka so lebi reka a mapiya. Sii ka den taman sa
kanggenek iyan somoso; na mitoman bo o Allah so katero iyan!" Sabap roo na
mitelimbagak si Hanah sa walay na rinitan iyan so wata iyan taman sa miyapakagenek
iyan somoso.
24 Kagiya gomenek den somoso na inowit iyan so wata a bago a mama pen ko Walay o
Allah sii sa Siloh, na initelon iyan on so isa a mama a sapi a telo ragon a idad iyan, so isa
ka gantang a arina ago isa ka tagoay a ara.
25 Kagiya masombali iran so sapi na inowit iran so wata ki Ili
26 Na pitero on i Hanah a "Hey Kadnan ko, mataan den a saken so babay a tomitindeg sii
gowani ko obay ngka a pepangangarapan ko Allah.
27 Piyangangarapan aken angkai a wata na inampon o Allah so piyangni aken on.
28 Sabap roo na imbegay aken sekaniyan imanto a iklas ko Allah. Sii ko langon o
kaooyagoyag iyan na papaladen sekaniyan ko Allah." Na sominimba siran roo ko Allah.
1 SAMOWIL 2
So Pangangarapan i Hanah
Oriyan iyan na miyangangarapan si Hanah a tig iyan a
"Mabababaya so poso aken sii ko Allah;

sabap ko Allah na miniporo so pangkatan aken.
Di aken dii kela so manga ridoay aken
ka ikapipiya a ginawa ko so kiyapanabangi ngka raken.
2 “Da den a soti a ba lagid o Allah;

da den a ba ngka rimbang;
da den a Lakongan a ba lagid o Allah.
3 “Geneki ngka so mala a kapetekabor ka

aya pen o ba ngka pakiteroon ko ngari i ka so kapagambog,
ka so Allah na Tohan a matao,
na petimbangen iyan so dii nggolaolaan o manosiya.
4 “Miyapotol so manga pana o manga babager a sondaro,

ogaid na so manga lolobay na makandiditar sa bager.
5 So miyanga oosog gowani na pekisokayan iran a ginawa iran a ipekowa iran sa
pangenengken,
ogaid na so miyanga aaor na di den keoran.
So babay a balek gowani na mimbabawata sa pito kataw a manga wata,
ogaid na sekaniyan oto a madakel i wata na kiyadaan den sa wata.
6 “Pepakapatay so Allah ago pepangoyag;

pepekaalogan sekaniyan ko kobor ago pepekabaton bo.
7 Pepakatamoken ago pepakamiskinen iyan so taw;
ipembaba iyan ago ipepangkat iyan.
8 Pembowaten iyan so miskin poon ko bayanek
na ipembayaw niyan so minindarainon poon ko manga ombi;
pepakatapiin iyan siran ko manga dato,
ka pepakaontoden iyan ko korsi a mipapangkat.
"Ka so manga onayan o doniya na palaya rek o Allah

a ron iyan miyabangon so doniya.
9 Pegipaten iyan so kapepaginetaw o manga kaom iyan,
ogaid na pekarenek so manga rarata sii ko maliboteng,
ka di pekadaag so taw a nggolalan ko bager iyan.
10 Siran oto a pesopak ko Allah na penga sasasa;
pendadalendegan iyan siran sii ko langit.
So Allah i pengokom ko pirowarowangan o doniya.
"Pekabageren iyan so dato a miyapili iyan,

na ipengkat iyan so gees o kiyaidinan iyan."
11 Oriyan iyan na mimbalingan si Ilkanah sa Ramah, ogaid na mitelimbagak so wata a si

Samowil a dii telagad ko Allah sii ko kapepenonogoa on o imam a si Ili.
So Manga rarata a Wata i Ili
12 So manga wata i Ili na manga rarata a mama; di iran itatapian so Allah

13 Aya pen o ba so manga taritib o imam mipantag ko sapo a dii korbanen o manga taw.
Ka igira aden a pekorban na sii pen ko kapendidii ko sapo na pepekaoma so salinggogopa
o imam a komakapet sa panisok a telo i poro,
14 Na isisok iyan ai ko sapo sii ko kawa, na saden sa sapo a makowa o panisok na
kowaan o imam a rek iyan. Giyai i ipekidia iran ko langon a manga Israil a pepekaoma sa
Siloh.
15 Liyo ron pen na apiya sii ko da pen kaboola ko sibo ko sapo a totongen na pepekaoma
so salinggogopa o imam ko mama a pekorban na peteroon iyan on a "Begi ako ngka ko
sapo a maiyaw o imam; di niyan reka terimaan so miyaloto a sapo, ka so bo so mailaw."
16 Na o teroa on o mama a "Pakitotongen ka pasin so sibo kaan matoman so taritib na go

ngka bo kowaa so apiya antonaa i kabaya a ka," na sembag so salinggogopa a tig iyan a
"Di! Began ka raken den imanto! O di, na tegelen aken komowa!"
17 Tanto ai a mala a dosa o manga wata i Ili sii ko kapekeilaya on o Allah, ka di iran dii
sodiin so ipesepaat ko Allah.
So dii Katelagad i Samowil sii sa Siloh
18 Si peman si Samowil na pepanalagad ko hadapan o Allah a watawata pen sekaniyan a

ndiditar sa sotra a saliko.
19 Oman ragon na pegembaalan sekaniyan o ina iyan sa maito a kimon, na pegowiten
iyan on igira a petekedeg siran ago so karoma niyan ko di niyan dii kakorban oman ragon.
20 Samaoto na perakmatan i Ili si Ilkanah ago so karoma niyan a tig iyan a "Pengnin ko a
began ka o Allah sa madakel a wata a nggolalan sangkai a babay a misambi ko wata a
piyangni niyan a inibegay niyan a iklas ko Allah." Oriyan oto na pembaling siran.
21 Na inikalimo o Allah si Hanah, na mimbabawata sa telo kataw a mama ago dowa

kataw a babay. Sa masa oto na pepekala den mambo so wata a si Samowil sii ko
kamamasaan o Allah.
Si Ili ago so manga Wata iyan
22 Samaoto na tanto den a miyalokes si Ili, na pekeneg iyan so langon taman a dii
nggolaolaan o manga wata iyan ko manga Israil ago so kaperembanga iran ko manga
babay a dii nggalebek sii ko gimowa o Barombarong a dii Telabokan.
23 Sabap roo na pitero iyan kiran a "Ino kano dii nggolaola sa lagid oto? Miyaneg aken
sangkai langon a manga taw so manga rarata a sowasowai niyo.
24 Geneki niyo, manga wata aken! Kena a ba mapiya a pekeneg aken a pepekalangkap
ko manga pagtaw o Allah!
25 O makandosa so taw ko ped iyan na pekaogop on so Tohan, ogaid na amay ka
makandosa so taw ko Allah na antawaa pen i pekaogop rekaniyan?"
Ogaid na da pakinega o manga wata iyan so inimbonget kiran o ama iran, ka kabaya o
Allah a kambonoa niyan kiran.
26 Na pepekala den so wata a si Samowil a pekebabayaan o Allah ago so manga taw.
So Miyaalamat makapantag ko Pamiliya i Ili
27 Samaoto na aden a mama a siyogo o Tohan a miyakaoma ki Ili na pitero iyan on a

"Giyai i pitero o Allah: 'Ba aken da mapayag a ginawa ko ko pamiliya o apo o ka a si
Aron isako sisii siran pen sa Misir a pepangongoripenen o Radiya Piraon?
28 Inaraw aken sekaniyan sii ko langon a mbatabataa a Israil a aya aken makapegimam ko
di niyan dii katelagadi ko aparan aken, ago so kapetotonga niyan ko doka, ago so
kapesolota niyan ko saliko a imam sii ko hadapan aken. Inisenggay aken pen a rek o
manga mbawataan o apo o ka so sabagi ko langon a petotongen a ipesepaat o manga
pagtaw aken a Israil.
29 Kagiya ka maoto na ino niyo dii sodia so di raken dii korbanen ago manga ipesepaat a
ipapaliyogat aken sii ko Walay aken? Ino ngka pekalebiya so manga wata a ka a di saken
sii ko kapepegoliti niyo sa ginawa niyo ko lebi a mapiya a sapo ko oman i ipesepaat o
manga pagtaw aken a Israil?'
30 “Sabap roo na giyai so pitero o Allah a Tohan o manga Israil: 'Pitero aken sa miyaona
a so mbawataan ka ago so mbawataan o apo o ka na makapenalagad ko hadapan aken sa
taman sa pakataman.' Ogaid na imanto na aya pitero o Allah na 'Di aken den ai peparon!
Ka so siran oto a pepagadat raken na pegadatan ko, ogaid na siran oto a di raken dii
magitowito na pesodiin aken.
31 Ilaya ngka man, ka pekatalingoma so manga gawii a kapetoponga ko ko pamiliya ngka
ago so kebabadan reka kaan da den a kelokes kiran,
32 Na pekaokit ka sa karomasayan sii ko kakadenan ko. Apiya pen mapiya i bobolos so
ped a manga Israil na da den a ba kelokes ko kebabadan reka sa taman sa pakataman.
33 Na so isa kiran a di aken kowaan sa kapepegiman sii ko aparan aken na kesiksa sa
kabobota ago kapakamboko, na so langon a kebabadan reka na pematay sii ko
kapananabowi kiran pen.
34 “ 'So keokitan o dowa kataw a wata a ka a si Hopni ago si Pinihas na aya ngka kinanao
sa benar so langon a pitero aken reka, ka makaperengan siran matay ko salongan.
35 Na toro ako sa kesarigan aken a imam a ipenggolalan iyan so langon taman a ikesoat
aken ago pepamikiren aken. Pakapembekenen ko piyapiya so kebabadan on, na
penalagad sekaniyan lalayon sii ko hadapan o miyapili aken a dato.
36 Amay ka magiyanan na so apiya antawaa i kelamba ko mbawataan ka na song
sangkoto a imam ago sodiyod on a pengni ron sa salad a pirak ago satompi a paan, na
pengangampedian on pen a tig iyan a "Sangani ako ngka sa isa a galebek a kaiimami kaan
ako pepekakan sa maito a pangenengken." ' "
1 SAMOWIL 3
Tiyalowan o Tohan si Samowil
Sii sangkoto a manga gawii ko dii katelagad i Samowil ko Allah a pepenonogoon i Ili na
madelag so ipetoron a katero o Allah, na kena a ba madakel a pangingilain.
2 Miyakaisa a gagawii na si Ili, a pepekalobay so manga mata niyan a di tanto pekanono,

na miiga sii ko rowang iyan.
3 Da pen mapareng so solo o Tohan, na miiga si Samowil sii ko darpa ko pesimbaan ko
Allah a ron matatago so Kaban sa Kapasadan o Tohan.
4 Samaoto na tiyalowan o Allah si Samowil.
Somimbag si Samowil a tig iyan a "Katii ako bo."
5 Na minggagaan somong ki Ili na pitero iyan a "Katii ako bo ka tiyalowan ako ngka."
Ogaid na tig i Ili "Da ako pananalo; kasoy ka na go ka iga." Na komiyasoy sekaniyan ago
miniga.
6 Miperoman mananalo so Allah a tig iyan a "Samowil." Na mimbowat si Samowil a
somiyong ki Ili na pitero iyan on a "Katii ako bo ka tiyalowan ako ngka."
"Wata aken," a tig i Ili, "da ako pananalo. Kasoy ka na go ka iga."
7 Samaoto na di pen katawan i Samowil so Allah; da on pen toronen so katero o Allah.
8 Na tiyalowan o Allah si Samowil sa ikatelo den, na mimbowat sekaniyan ago somiyong

ki Ili a tig iyan a "Katii ako bo ka tiyalowan ako ngka."
Mandiyadi na miyatendo i Ili a so Allah i petelo ko wata.
9 Na pitero iyan ki Samowil a "Ika roo den na go ka iga, na o telowi ka niyan na teroa
ngka a 'Tero ka den, ya Allah, ka pepamakineg so oripen ka." Na komiyasoy si Samowil
ko darpa iyan na miniga.
10 Giyoto a miyakatalingoma so Allah na tominindeg roo, na miyananalo a datar o

miyaona a tig iyan a "Samowil! Samowil!"
Na tig i Samowil a "Tero ka den ka pepamakineg so oripen ka."
11 Na pitero o Allah ki Samowil a "Ilaya ngka, ka aden a magaan den a penggolaolaan

aken ko manga Israil a ipememesa o oman i pekaneg on.
12 Sangkoto a gawii na itoman aken so langon taman a miyatero aken a minisopak ki Ili
ago so pamiliya niyan ipoon sa poonan na taman sa kaposan.
13 Ka piyayag aken on a ndanegen ko so kebabadan rekaniyan sa taman sa pakataman
sabap ko kamarataan a katawan iyan den, ka pepagitowitoon o manga wata iyan so Tohan
na da niyan siran sapari.
14 Kagiya ka maoto na inisepa aken ko pamiliya i Ili a apiya i korbanen o di na isepaat i
ba niyan mapapas so kasalaan o pamiliya niyan sa taman sa pakataman."
15 Miiga si Samowil taman ko kiyapita iyan, na giyoto a likaan iyan so manga pintoan o
Walay o Allah. Pekelek sekaniyan o ba niyan panotola ki Ili so pangingilain,
16 Ogaid na tiyalowan i Ili a tig iyan a "Samowil, wata aken!"
Tig i Samowil a "Katii ako bo."
17 “Antonaa i pitero reka o Allah," a iniise on i Ili. "Di ngka raken pegmaa. Madaneg ka
o Tohan sa tanto a masakit o aden a pagemaan ka raken on ko pitero iyan reka!"
18 Mandiyadi na piyanotol on i Samowil so langon taman; da den a ba niyan on piyagma.
Na pitero i Ili a "Sekaniyan so Allah; mapenggolaola niyan so mapiya sii ko kapegilaya
niyan on."
19 Sii ko kapepakala i Samowil na lalayon rekaniyan so Allah, na da den a katero i

Samowil a ba da pakitomanen o Allah.
20 Na kikilalaan o langon o manga Israil a poon sa inged a Dan taman sa Birsiba a
piyamili si Samowil a nabi o Allah.
21 Itataros den o Allah a di niyan dii kapeyag sii sa Siloh, ka roo niyan pepayaga ki
Samowil a ginawa niyan a nggolalan ko katero iyan.
1 SAMOWIL 4
Na lomiyangkap ko langon o manga Israil so manga katero i Samowil.
Miyaagaw o manga Pilistiyo so Kaban sa Kapasadan
Sangkoto a manga gawii na mitimotimo so manga Pilistiyo sa kapakipetidawa iran ko

manga Israil, na lomiyalakaw so manga Israil sa kambalaka iran ko manga Pilistiyo.
Mikempo so manga Israil sii sa Ibinisir, na mikempo so manga Pilistiyo sa Apek.
2 Giyobat o manga Pilistiyo so manga Israil, na kagiya den a mitaralo so katidawa na
pekedaag o manga Pilistiyo so manga Israil, na miyakapatay siran sa manga pat nggibo
kiran sii ko dii tidawaan.
3 Kagiya makakasoy sa kampo so manga sondaro na iniise o manga pelokelokesen o
Israil a "Ino tano pekitabanen imanto o Allah ko manga Pilistiyo? Kowaan tano so Kaban
sa Kapasadan o Allah roo sa Siloh kaan makaoma sekaniyan sii rektano ago masabet tano
niyan ko kapaar o manga ridoay tano!"
4 Sabap roo na somiyogo siran sa makasong sa Siloh, na sii ko kiyakasoy iran na initelon
iran so Kaban sa Kapasadan o Allah a Lebi a Mamaapaar a kokorsi sii ko poro o dowa a
piyagtaotaw a malaikat. So dowa kataw a wata i Ili a si Hopni ago si Pinihas na miyonot
siran ko Kaban sa Kapasadan o Tohan.
5 Kagiya miyoma so Kaban sa Kapasadan o Allah sii ko kampo na miyamameseg so

langon o manga Israil sa tanto a matanog a initabeker ko lopa.
6 Kagiya maneg o manga Pilistiyo so ogiyab na iniise iran a "Antonaa ngkoto a
ipepelalalis roo sa kampo o manga Hibriyo?"
Kagiya katokawan iran a minioma so Kaban o Allah ko kampo
7 Na miyanga alek siran. "Aden a tohan a miyakaoma ko kampo iran," a tig iran.
"Kemoralaan tano! Pikembokembo na da den ai manggolaola!
8 Kemoralaan tano! Antawaa i pekalidas rektano ko lima angkai a manga ala i gees a
tohan? Giyoto so manga tohan a miyamono ko manga Imisiren a nggolalan ko
pitibarangan a kasiksaan sii ko disirto.
9 Na, pakababager kano, hey manga Pilistiyo! Pakawawaraw kano, ka o di, na
pengongoripenen tano o manga Hibriyo a datar o kiyapangongoripena tano kiran.
Pakawawaraw ago ato kano!"
10 Mandiyadi na miyakitidawa so manga Pilistiyo na tiyaban so manga Israil, na

miyamagapas so oman i isa kiran ko barombarong iyan. Tanto a madakel a miyamatay ka
miyamakakelit so telo polo nggibo a manga sondaro a Israil.
11 Miyaagaw so Kaban o Tohan na miyamatay so dowa kataw a wata i Ili a si Hopni ago
si Pinihas.
So Kiyapatay i Ili
12 Sii bo sangkoto a gawii na so sakataw a mama ko mbatabataa a Baniyamin na

miyalalagoy a poon ko dii tidawaan ka somiyong sa Siloh. Miyasekisi so nditaren iyan
ago katatagoan sa bayanek so olo niyan a toos ko kamboboko iyan.
13 Kagiya makaoma sekaniyan roo na moontod si Ili ko korsi iyan ko kilid o lalan a
pepenayaw a tatabaden so poso iyan sabap ko Kaban o Tohan. Kagiya makasoled so
mama ko inged ago mapanotol iyan so miyasowasowa na minigorong a kiyapakagoraok o
langon a taw ron.
14 Miyaneg i Ili so kiyagoraok na iniise iyan a "Antonaa i maana ngkoto a kagogorigaw?"

Na minggagaan somong so mama ki Ili sa kapenotola niyan on ko miyasowasowa.
15 Miyakasiyaw polo ago walo den ragon a idad i Ili, na tanto a di pekanono so manga
mata niyan.
16 Na pitero o mama ki Ili a "Sii ako den ai poon ko dii tidawaan a miyakapalagoy.
Na iniise i Ili a "Antonaa i miyasowasowa, wata ko?"
17 Somimbag so mama a tig iyan a "Piyalagoyan o manga Israil so manga Pilistiyo na

piyatayan so manga sondaro sa tanto a madakel. So mambo so dowa kataw a wata a ka a
si Hopni ago si Pinihas na palaya miyamatay, na miyaagaw so Kaban o Tohan."
18 Kagiya maaloy niyan so Kaban o Tohan na miyalengkaya si Ili ko korsi iyan sii ko
kilid o gimowa na miyalepo so lig iyan a aya niyan den inipatay, ka miyalokes a mama
ago mapened. Kiyapagolowanan iyan so manga Israil sa miyakapat polo ragon.
So Kiyapatay o Miyakamong ki Ili
19 So miyakamong ki Ili a babay a karoma i Pinihas na maogat a magaan den mbawata.

Kagiya maneg iyan so totol a miyaagaw so Kaban o Tohan ago miyamatay so panogangan
iyan a mama ago si karoma niyan na sagogona den a kiyabalilita on ago kiyambawata
iyan, ogaid na diyaag sekaniyan o kasakit o kiyambawata iyan.
20 Sii ko kapetay niyan na pitero on o babay a panggaway niyan a "Di ka pekelek;
mimbawata ka sa bago a mama." Ogaid na da sekaniyan sembag aya pen o ba niyan
tiyago sa ginawa.
21 Bitowan iyan so bago a mama sa Ikabod a tig iyan a "Miyada so bantogan sa Israil"
sabap ko kiyaagawa ko Kaban o Tohan ago so kiyapatay o panogangan iyan a mama ago
so karoma niyan.
22 “Miyada so bantogan sa Israil," a tig iyan, "ka miyaagaw so Kaban o Tohan."
1 SAMOWIL 5
So Kaban o Tohan sii sa Asdod ago Ikron
So den so kiyaagawa o manga Pilistiyo ko Kaban o Tohan na inowit iran a poon sa

Ibinisir taman sa Asdod a inged iran.
2 Inisoled iran so Kaban sii ko timplo o barahala a Dagon a katohanan iran na inibetad
iran sii ko kilid o Dagon.
3 Sii ko telondog a gawii ko teked a kapipita kagiya mamangembowat so manga taw sa
Asdod na miyailay iran a makagegepe si Dagon ko lopa sii ko hadapan o Kaban o Allah!
Na piyakatindeg iran ago tiyago iran bo ko darpa iyan.
4 Ogaid na sii ko telondog a kapipita kagiya mamangembowat siran na makagegepe
peman si Dagon ko lopa sii ko hadapan o Kaban o Allah a miyanga popotol on so olo
niyan ago manga barokan iyan a kikababaraser ko panempang o pintoan; so bo so lawas
iyan i miyalamba on.
5 Giyanan i sabap a taman imanto na so manga imam ko Dagon ago so pen so ped a
manga taw a soled ko timplo o Dagon sii sa Asdod na di siran den ndapo ko panempang o
pintoan on.
6 Tanto a mapened a kiyatanai a lima o Tohan ko manga taw sa Asdod ago sii ko
melilibeta on a manga inged; piyaminasaan iyan siran ago piyaniksa iyan sa manga lebag.
7 Kagiya mailay o manga taw sa Asdod so pekesowasowa na pitero iran a "Di kepakay o
ba rektano pen matatago so Kaban o Tohan o manga
Israil, ka tanto a marangit a kapendanega niyan rektano ago si Dagon a tohan tano."
8 Mandiyadi na piyakisongowan iran so langon a olowan o manga Pilistiyo na iniise iran
kiran a "Antonaa i ikidia mi ko Kaban o Tohan o manga Israil?" Inisembag iran a
"Ogalinen iyo so Kaban sii sa Gat." Kagiya ka maoto na iniogalin iran roo.
9 Ogaid na kagiya miogalin iran na pepekatana den so lima o Allah sangkoto a inged na
tanto niyan siran a piyakalekan. Siniksa iyan so langon a taw ko inged ndatar so wata ago
so lokes na pilelebagan siran.
10 Sabap roo na piyakiwit iran so Kaban o Tohan roo sa Ikron.
Ogaid na so den so kipesoleden ko Kaban o Tohan sa Ikron na gomiyoraok so manga
taw ron a tig iran a "Inowit iran sii so Kaban o Tohan o manga Israil sa kambonoa iran
rektano langon!"
11 Kagiya ka maoto na piyakisongowan iran peman so langon a olowan o manga Pilistiyo
na pitero iran a "Pakawatana niyo sii so Kaban o Tohan o Israil; kasowin iyo ko andang a
darpa iyan, ka o di, na pemonoon kami niyan a rakes o manga pamiliya mi." Ka aden a
morala a kapapatay ko dalem a inged; tanto a mapened a katatanai ron a lima o Tohan,
12 Na siran oto a kena a ba pepamatay na pesiksaan sa manga lebag, na minisampay sa
kasorgaan so kapenggoraok o inged.
1 SAMOWIL 6
Piyakakasoy sa Israil so Kaban sa Kapasadan
Kagiya makapito den olan a katatago o Kaban o Allah sii ko inged o manga Pilistiyo
2 Na tiyawag iran so manga imam ago manga paririmar na pitero iran a "Antonaa i ikidia
mi sangkai a Kaban o Allah? Pakitokawi niyo rekami o andamanaya i kikasowin ami ron
ko andang a darpa iyan."
3 Tig iran a "O kesowin iyo so Kaban o Tohan o Israil na di niyo roo pekiwiten a ba da
den a iperakes on, ka disomala a talonen iyo ron so panginsalaan ko Tohan a ikeda o
dosa. Amay ka magiyoto na penga bobolongan kano, na ketokawan iyo o ino niyan
rekano da pokasa so kapendadaneg iyan."
4 Na iniise o manga Pilistiyo a "Antonaa i panginsalaan a mipakawit ami ron?"
Tig iran a "Lima timan a bolawan a isasayan sa lebag ago lima timan a bolawan a
isasayan sa riya a aya kadakel iran na lagid sa kadakel o manga dato a Pilistiyo, ka ndatar
so morala a minitana rekano langon ago so manga dato iyo.
5 Mbaal kano sa manga kapeteongan sa lebag ago manga riya a pepaminasa ko lopa, na
selaa niyo so Tohan o manga Israil, ka baanda niyan taregi so kapesiksaa niyan rekano
ago so manga tohan iyo ago so pen so lopa iyo.
6 Ino niyo pekategasa so manga poso iyo a datar o pinggolaola o Radiya Piraon ago so
manga Imisiren? Isako maregen a inikidia kiran o Tohan na ba iran da mapakaliyo so
manga Israil sa Misir?
7 “Kagiya ka maoto na tiyagar kano imanto sa bago a karo a rakes o dowa timan a sapi a
aden a manga wata iyan ago da den kasangani sa kokoong. Sangani niyo so manga sapi
ko karo, ogaid na belaga niyo kiran so manga wata iran na kodala niyo.
8 Rorana niyo so Kaban o Allah ko karo, na sii ko soled o maito a kaon ko kilid iyan na
tagoa niyo ron so manga nganin a piteong a bolawan a ipekawit iyo ko Allah a aya den
panginsalaan. Na pakalalakawa niyo so manga sapi
9 Ogaid na pegilaya niyo. O tekedeg siran ko lalan a ipesong ko darpa a kiyapoonan o
Kaban sa tampar sa Bitsimis na aya maana niyan na so den so Allah i miyakawit rektano
sangkai a morala. Ogaid na o di, na ketokawan tano a kena a ba so lima niyan i
sominiksa rektano, ka matag baden ai miyasalak a miyanggolaola."
10 Mandiyadi na pinggolaola iran den ai: kominowa siran sa dowa timan a sapi a
pesosowan na inisangan iran on so karo ago kiyodal iran so manga nati a wata iran.
11 Riyoran iran ko karo so Kaban o Allah a rakes o maito a kaon a katatagoan ko
bolawan a manga riya ago so isasayan sa manga lebag iran.
12 Na miyamantek tomakedeg so manga sapi sa tampar sa Bitsimis a kekedegen iran den
so lalan a ipesong on a pepamangenga siran ko kapelalakaw iran; da siran kori sa
kawanan o di na sa diwang. Na so manga dato o manga Pilistiyo na tomiyondog kiran
taman den ko temanaan a Bitsimis.
13 Samaoto na peperagonen o manga taw sa Bitisimis so trigo iran sii ko balintad, na

lomiyangkaw siran na miyailay iran so Kaban, na miyabebaya siran ko kiyailaya iran on.
14 Miyakaoma so karo ko lopa i Yosowa a taw sa Bitsimis na roo den tomiyareg ko obay
o mala a lakongan. Na giyoray o manga taw so karo na pikorban iran so manga sapi a
tiyotong iran a inisapaat ko Allah.
15 So manga Libitiyo na initepad iran so Kaban o Allah a rakes o kaon a katatagoan sa
piteong a manga bolawan na inibetad iran ai ko mala a lakongan. Na sii sangkoto a gawii
na somiyapaat so manga taw sa Bitsimis sa petotongen a manga sapaat ko Allah ago
mikorban siran on pen.
16 So lima kataw a dato o manga Pilistiyo na pimbantayan iran ai langon, na
mimbalingan siran bo sangkoto a gawii sa Ikron.
17 Lima timan a piteong a bolawan a isasayan sa manga lebag a piyakiwit o manga

Pilistiyo a panginsalaan ko Allah, a so isa on na poon sa Asdod, so isa na poon sa Gasa,
so isa na poon sa Askilon, so isa na poon sa Gat ago so isa pen na poon sa Ikron.
18 Na so pen so kadakel o manga bolawan a isasayan sa riya na lagid sa kadakel o manga
siti a ndadatoan o lima kataw a manga dato a rakes on so kokotaan a manga siti ago so
manga roroni a inged. So mala a lakongan sii ko lopa i Yosowa a taw sa Bitsimis a ron
iran inibetad so Kaban o Allah na ndodon den taman imanto a aya toos ko miyanggolaola.
19 Ogaid na siniksa o Allah so ped ko manga mama sa Bitsimis; pito polo kataw a
piyamono iyan sabap sa inilay iran so soled o Kaban o Allah. Na miyamakamboko so
manga taw sabap ko mala a kiyadanega kiran o Allah.
20 Na iniise o manga mama sa Bitsimis a "Antawaa i makapemayandeg sii ko hadapan o
Allah a giyangkai a soti a Tohan? Antawaa peman i kewitan tano ko Kaban a poon sii?"
21 Na somiyogo siran sa makasong ko manga taw sa Kiriyat Yarim a tig iran a

"Piyakakasoy o manga Pilistiyo so Kaban o Allah; song kano sii na go niyo wita ko darpa
iyo."
1 SAMOWIL 7
Sabap roo na miyakaoma so manga taw sa Kiriyat Yarim na kinowa iran so Kaban o
Allah na inowit iran ko walay i Abinadab sii ko bobongan. Na siyanganan iran si Iliyasar
a wata iyan sa kapagipata niyan ko Kaban o Allah.
Pepangokom si Samowil ko manga Israil
2 Miyatey den a alongan a katatago o Kaban sii sa Kiriyat Yarim ka miyakadowa polo
ragon. Sii sangkoto a masa na dii mboko ago dii mbabanog ko Allah so langon o manga
Israil.
3 Na pitero i Samowil ko isa ka maginged a Israil a "O kebaya kano komasoy ko Allah sa
iklas ko poso iyo na lebaden iyo so manga katohanan o manga rait ago so manga barahala
a Astorit a matatago rekano. Mbayorantangen iyo a manga ginawa niyo ko Allah ago
sekaniyan bo i pangongonotani niyo, ka pokasen kano niyan ko lima o manga Pilistiyo."
4 Mandiyadi na inilebad o manga Israil so manga barahala iran a Baal ago Astorit na so
bo so Allah i piyangongonotanan iran.
5 Sa masa oto na pitero i Samowil a "Timo kano langon a manga Israil sa Mispah ka
ipengangarapan aken sekano ko Allah."
6 Kagiya makatimo siran sa Mispah na somiyageb siran sa ig na inodod iran a inisoasoat
ko Allah. Mipowasa siran sangkoto a gawii na miteobat siran roo a tig iran a
"Miyakandosa kami ko Allah!" Na piyangokom i Samowil so manga Israil sii sa Mispah.
7 Kagiya maneg o manga Pilistiyo a miyalimod so manga Israil sa Mispah na gomiyanat

lomalakaw so lima kataw a manga dato a Pilistiyo a rakes o manga sondaro iran sa
kanggobata iran kiran. Kagiya maneg ai o manga Israil na miyanga alek siran sabap ko
manga Pilistiyo,
8 Na pitero iran ki Samowil a "Di ka nggenek gomoraok ko Allah a Tohan tano sabap
rekami kaan kami niyan masabet ko kapaar o manga Pilistiyo!"
9 Na kominowa si Samowil sa nati a bilibili a pesoso pen na inisapaat iyan a tarotop a
kiyatotonga on sii ko Allah. Gomiyoraok sekaniyan ko Allah pantag ko manga Israil na
inampon o Allah.
10 Sii ko kipesepaaten i Samowil ko petotongen a soasoat na miyakarani den so manga

Pilistiyo sa kipetidawaan iran ko manga Israil. Ogaid na sarta den a pindadalendegan o
Allah so manga Pilistiyo sa tanto a matanog na biyaloy niyan siran a tanto a miyanga
nanaanaa a aya kiran kiyatabana o manga Israil.
11 Ka mililiyo sa Mispah so manga Israil a dii mamalalagoy, na piyanaloba iran so manga
Pilistiyo a pepamonoon iran siran sii ko lalan taman den ko pagabagatan a Bit Kar.
12 Oriyan iyan na kominowa si Samowil sa ator na inibetad iyan sii ko pageletan a

Mispah ago giya Siyan. Bitowanan iyan ai sa Ibinisir (maana a 'Ator a Pepekatabang') a
tig iyan a "Taman den imanto a kapetebangi rektano o Allah."
13 Kagiya ka maoto na miyadaag so manga Pilistiyo, na da iran den sondoli peroman so
pagiingedan o manga Israil.
Sii ko kaooyagoyag pen i Samowil na somosopak so lima o Allah ko manga Pilistiyo.
14 So langon a inged a miyaagaw gowani o manga Pilistiyo ipoon sa Ikron taman sa Gat
na minikasoy ko Israil, na miyapokas o Israil so midadair on a manga inged ko kapaar o
manga Pilistiyo. Na lomilintad mambo so manga Israil ago so manga Amoriyo.
15 Pepangokom si Samowil ko manga Israil sii ko tenday a omor iyan.

16 Oman ragon na pepegenebeneb sekaniyan ipoon sa inged a Bitil taman sa Gilgal ago
taman den sa Mispah a pepangokomen iyan so manga Israil sii sangkai langon a manga
darpa.
17 Ogaid na lalayon sekaniyan pekesoy sa Ramah a ron so walay niyan, na pekokomen
iyan roo mambo so manga Israil; na mimbaal sekaniyan roo sa aparan ko Allah.
1 SAMOWIL 8
Miyangni so manga Israil sa Dato
Kagiya den a malokes si Samowil na initoro iyan a manga pangongokom sa Israil so

manga wata iyan a manga mama.
2 Aya ngaran o kaka on na si Yowil, na so ikadowa na si Abihah, na sii siran
pepangokom sa Birsiba.
3 Ogaid na da iran sowaa so okitokit o ama iran; pepekasilay siran ko di ontol a
kapanamok, na peterima siran sa manga tendan ago pembibiden iran pen so kokoman.
4 Kagiya ka maoto na mitimo so langon a pelokelokesen o Israil na somiyong siran ki

Samowil sii sa Ramah,
5 Na pitero iran on a "Miyalokes ka den, na so manga wata a ka na di iran pesowaan so
okitokit ka; sabap roo na toro ka sa dato a makapagolowan rekami kaan kami madatar o
langon a ped a nasiyon."
6 Inikerata ini a ginawa i Samowil kagiya teroon iran a "Begi kami ngka sa dato a
makapagolowan rekami," na miyangangarapan sekaniyan ko Allah.
7 Na pitero on o Allah a "Pakinega ngka so langon a kabasa reka angkanan a manga taw;
ka kena a ba seka i inisili iran, ka saken i inisili iran a dato iran.
8 Ipoon ko kiyapakaliyowa ko kiran sa Misir taman den imanto na petelikodan ako iran
ago pepangongonotan siran sa ped a katohanan; na di iran reka dii nggolaolaan imanto so
pinggolaola iran raken.
9 Na pakinega ngka siran imanto, ogaid na lalangi ngka siran piyapiya ago pakitokawi
ngka kiran o antonaa i penggolaolaan o dato a pegolowan kiran."
10 Na pitero i Samowil so langon a kabasa o Allah sii ko manga taw a pepamangni

rekaniyan sa dato.
11 Tig iyan a "Giyai i ikidia rekano o dato a pegolowan rekano: kowaan iyan so manga
wata iyo a manga mama na mbalowin iyan siran a komakaro sa katidawa ago manga
komakoda ago so pemalalagoy ko onaan o manga karo niyan.
12 So ped kiran na itoro iyan a manga olowan o nggibo nggibowan a sondaro ago manga
olowan o nggagalimapolo, na so ped na itoro iyan a padadado ko lopa iyan ago pagagarab
ko pereperan iyan, na so ped pen na pakapembaalen iyan sa manga gomaan sa katidawa
ago manga kasangkapan ko manga karo niyan.
13 Kowaan iyan so manga wata iyo a manga babay ka mbalowin iyan siran a
pangengembaal sa ikekamotan ago paan, ago manga pepaninindaan.
14 Kowaan iyan so lebi a mapiya ko manga lopa iyo ago manga asinda a obas ago kayo a
olibi ka imbegay niyan ko manga sanasanaan iyan.
15 Kowaan iyan so ikasapolo bagi ko manga pereperan iyo ago manga obas ka imbegay
niyan ko manga olowan iyan ago manga sanasanaan.
16 Kowaan iyan so manga talasogoay niyo a manga mama ago manga babay ago so lebi a
mapiya ko pangangayamen iyo a manga sapi ago kimar ka senganan iyan siran ko galebek
iyan.
17 Kowaan iyan so ikasapolo bagi ko manga talon iyo a manga bilibili ago kambing, na
bapiya giya den a ginawa niyo na pembaloy a manga oripen iyan.
18 Amay ka magiyoto na pekagoraok kano sabap ko dato a miyatomo iyo, na di kano den
pagamponen o Allah sangkoto a gawii."
19 Ogaid na somiyangka mamakineg so manga taw ki Samowil. "Di," a tig iran, "kabaya
ami a aden a makandato rekami
20 Kaan kami madatar o langon a ped a nasiyon ago an rekami makapagolowan so dato
ami ago makapengonaan rekami sa kapengato niyan ko di ami dii kapakitidawa."
21 Kagiya maneg i Samowil so langon angkoto a pitero o manga taw na piperomanan

iyan tero ko Allah.
22 Na tig o Allah a "Pakinega ngka siran na begi ngka siran sa dato."
Na giyoto a pitero i Samowil ko manga Israil a manga mama a "Baling so oman i isa
rekano ko inged iyan."
1 SAMOWIL 9
Miyapili si Saolo a Makapendato
Aden a mala i gees a mama ko mbatabataa a Baniyamin a aya ngaran iyan na si Kis a
wata i Abiyal, a wata i Siror, a wata i Bikorat a aya wata i Apiyas a ped ko mbatabataa a
Baniyamin.
2 Aden a wata iyan a aya ngaran iyan na si Saolo a mapiya a mangoda a da den a ba niyan
rimbang ko manga Israil, na makaoombaw sekaniyan sa kaporo ko langon a ped a taw a
sii siran bo taman sa waga niyan.
3 Samaoto na miyadadag so manga kimar i Kis a ama i Saolo, na pitero i Kis ki Saolo a
"Pakaonota ngka so sakataw ko manga talasogoay na lalakaw kano sa kanggilobaa niyo
ko manga kimar."
4 Na miyokit siran ko kapalawan a Ipraim ago sii pen ko manga darpa a melilibeta ko
Salisah, ogaid na da iran roo matoon. Tomiyaros siran ko masasakop a Saalim, ogaid na
da roo so manga kimar. Oriyan iyan na miyokit siran ko inged a Baniyamin, ogaid na da
iran den matoon.
5 Kagiya mirampay siran ko masasakop a Sop na pitero i Saolo ko talasogoay a moonot

on a "Maling ta, ka o ba baden mada so kapipikira o ama aken ko manga kimar na sekta i
miawid a akal iyan."
6 Ogaid na pitero o talasogoay a "Ilaya ngka man ka sii sangkai a inged na aden a mama
on a siyogo o Tohan; tanto sekaniyan a pagaadatan na peketoman so oman i di niyan dii
matero. Ita roo imanto, ka baanda niyan rekta matero o anda ta ketoon so manga kimar."
7 “O somong ta rekaniyan na antonaa i kibegay ta on?" a iniise i Saolo. "Miyalengan so

pangenengken ko pontir ta, na da den a ba ta kewit a pamemegayan sangkoto a sogo o
Tohan. Antonaa pen i matatago rekta?"
8 Tig o talasogoay a "Aden a pelata aken a pirak. Ibegay aken ai rekaniyan na peteroon
iyan o anda i lalan a pagokitan ta."
9(Sa masa oto sii ko manga Israil na aya ibebeto ko nabi na 'wali,' na igira aya antap o taw
na so kapagisei niyan ko Tohan na mapetero iyan a "Somong ta ko wali.")
10 “Mapiya nan," a tig i Saolo ko talasogoay niyan, "ita roo den." Mandiyadi na
miyantap siran ko inged a ron mababaling so mama a sogo o Tohan.
11 Sii ko kapetekedeg iran ko bobongan ko kapesong iran ko inged na miyabalak iran so

manga babay a peliliyo ron a pemanageb sa ig, na iniise iran kiran a "Ba sisii so wali?"
12 “Oway," a inisembag iran. "Sii sekaniyan ko maoonaan iyo. Nggagaan kano; imanto
den i kiyapakaoma niyan ko inged ami ka pekorban so manga taw sii ko aparan ko poro o
bobongan.
13 Anda den i kapekasoled iyo ko inged na ketoon iyo sekaniyan sa di niyan pen
katekedeg ko poro o bobongan sa kaken iyan roo. Di pasin pekakan so manga taw o da
sekaniyan roo, ka disomala a kerakmatan iyan daan so pekorbanen na go bo pekakan so
manga banto. Na, takedeg kano den imanto ka baanda niyo matoon samanaya."
14 Na tomiyakedeg siran ko inged, na so den so kasoled iran on na ndodoo si Samowil a

pepekarani kiran sa katekedeg iyan ko aparan ko poro o bobongan.
15 Salongan pen a da roo kapakaoma i Saolo na piyayag den o Allah ki Samowil a

16 “Datar ai a oras mapita na pekabalak ka sa mama a pekasongen aken reka poon sa
inged a Baniyamin. Salawati ngka sekaniyan a aya makapegolowan ko manga pagtaw
aken a Israil. Sebeten iyan siran ko kapaar o manga Pilistiyo. Miyailay aken so
kapekerasay o manga pagtaw aken ka minirampay raken so kapenggoraok iran sa tabang."
17 So den so kiyailaya i Samowil ki Saolo na pitero rekaniyan o Allah a "Giyoto so mama

a pitero aken reka; sekaniyan i pendato ko manga pagtaw aken."
18 Na miyobay si Saolo ki Samowil a sisii ko marani ko gimowa o inged na pitero iyan

on a "Kapedipedi ka bo na teroa ngka raken o anda so walay o wali."
19 “Saken so wali," a inisembag i Samowil. "Ona ka raken tomakedeg ko poro o

bobongan ka pekaatoang ka raken imanto, na amay ka mapita na pekabalingen aken seka
ago teroon ko reka pen so langon a matatago ko poso o ka.
20 Makapantag ko manga kimar a miyadadag sa miyakatelo den gawii imanto na di ngka
siran aawiden a akal ka miyatoon siran den. Ogaid na antawaa i tanto a masisingayo o
manga Israil? Ba kena a ba seka ago so langon o pamiliya o ama a ka?"
21 Na tig i Saolo a "Matag ako baden ped ko mbatabataa a Baniyamin a so lebi a maito
ko manga Israil, na so pen so pamiliya ko na aya mitatanan ko langon a pamiliya ko
mbatabataa a Baniyamin. Ino ngka nan raken peteroa?"
22 Oriyan iyan na inowit i Samowil si Saolo ago so talasogoay niyan sii ko rowang a
pekelimodan na piyakaontod iyan siran ko lebi a mapiya a darpa sii ko manga taw a
piyamantowan a manga telo polo a kadakel iran.
23 Na pitero i Samowil ko pepaninindaan a "Wita ngka sii so sapo a inibegay aken reka, a
so pitero aken a isibay ngka."
24 Mandiyadi na kinowa o pepaninindaan so bobon na inenat iyan ki Saolo. Tig i

Samowil a "Katii so inisenggay a rek ka. Kana ngka ka kagiya ititiyagar reka ini taman
sangkai a kalilimod ipoon ko kiyapamantowi aken ko manga taw." Na miyatoang si
Saolo ki Samowil sangkoto a gawii.
25 Kagiya makatondagay siran ko inged a poon ko darpa a pesimbaan sii ko bobongan na

inimbitiyarai i Samowil si Saolo sii ko pantar a atep o walay niyan.
26 Mimbowat siran kagiya mapita na tiyalowan i Samowil si Saolo a sisii ko atep o walay
a tig iyan a "Paninimo kano ka pekaganaten ko sekano ko songowan iyo." Na kagiya
makapaninimo si Saolo na lominiyo siran ago si Samowil.
Inidinan i Samowil si Saolo
27 Sii ko kapesong iran ko temanaan o inged na pitero i Samowil ki Saolo a "Teroa ngka
ko talasogoay ngka a mona rekta," na pinggolaola ini o talasogoay. Na tig pen i Samowil
a "Sii ka den pasin kaan aken reka mapayag so miyatero o Tohan."
1 SAMOWIL 10
Na kominowa si Samowil sa maito a omoy a mapepeno a lana a olibi na inodod iyan ko
olo i Saolo; na inarekan iyan a tig iyan a "Siyalawatan ka o Allah a mabaloy a dato o
manga Israil a aya niyan kawali.
2 Amay ka awaan ako ngka imanto na pekabalak ka sa dowa kataw a manga mama ko
marani ko kobor o Rakila sii sa Silsah sii ko temanaan a inged a Baniyamin. Peteroon
iran reka a 'Miyatoon den so manga kimar a di ngka dii mbabanogen. Imanto na ginekan
siran mamimikiran i ama a ka ka seka den i miaawid a akal iyan, na ipepangingise iyan a
"Antonaa i mapenggolaola ko mipantag ko wata aken?"'
3 “Oriyan iyan na pekataros ka roo den taman sa maoma ngka so mala a kayo sa Tabor.
Roo ka kebalak o telo kataw a manga mama a pesong sa Bitil sa kapakaadap iran ko
Tohan. So isa on na tomotonda sa telo timan a mangoda a kambing, so isa on peman na
maawid sa telo tompi a paan, na so ikatelo na maawid sa isa ka tagoay a arak.
4 Selamen ka iran na mbegan ka iran sa dowa timan a paan a terimaan ka kiran.
5 “Maipos oto na pekasong ka ko Bobongan o Tohan sii sa Gibiyah a aden a kampo ron o
manga Pilistiyo. Sii ko kapekarani ngka ko inged na kebalak ka so sagorompong a manga
nabi a petondagay a poon ko aparan ko poro o bobongan a moona kiran so dii
mboboniboniyan sa manga kotiyapi, manga garingking, manga insi ago manga alpa a
pepangalamat siran.
6 Na kitemo reka so Roh o Allah na pengeped ka kiran a pepangalamat; na kesalin ka a
mibibida a mama.
7 Amay ka mitoman angkai a manga nanao na nggolaolaa ngka so apiya antonaa i
mapemikir ka a domadait ko masa ka sisii reka so Tohan.
8 “Na pekaona ka raken somong sa Gilgal, na matamataan a song ako reka roo sa
kapekorban aken sa manga isepaat a totongen ago manga isepaat pantag bo ko
kanggiginawai. Ogaid na disomala den a nayaon ako ngka roo sa mamakapito gawii
taman sa kapekatalingoma ko reka ago matero aken reka so sowaan ka."
Miyakaalamat si Saolo
9 So den so kiyaganati i Saolo ki Samowil na inalin o Tohan so poso i Saolo, na so

langon angkai a manga nanao na minitoman sangkoto a gawii.
10 Kagiya makaoma si Saolo ago so talasogoay niyan sa Gibiyah na miyabalak sekaniyan
o sesagorompong a manga nabi, na minitemo rekaniyan so Roh o Tohan na miyakaalamat
si Saolo a ped iran.
11 Na so manga taw a matao ki Saolo gowani na kagiya mailay iran a pepekaalamat
sekaniyan na miyamagisei siran a tig iran a "Antonaa ngkai a miyaolaola o wata i Kis?
Ba maaped mambo si Saolo ko manga nabi?"
12 Somimbag so sakataw a mama a mababaling roo a tig iyan a "Na antawaa mangaday i
ama iran?" Na miyabaloy ini a pananaroon a "Ba maaped mambo si Saolo ko manga
nabi?"
13 Kagiya makapasad mangalamat si Saolo na somiyong sekaniyan ko aparan sii ko
bobongan.
14 Na miyailay o bapa iyan si Saolo ago so talasogoay niyan na iniise iyan kiran a "Anda
kano somiyong?"
"Pimbabanog ami so manga kimar," a inisembag iyan, "ogaid na kagiya mailay ami a
da a toonan ami ron na somiyong kami ki Samowil."
15 Na tig o bapa iyan a "Teroa ngka raken o antonaa i pitero reka i Samowil."
16 “Tiyangked iyan rekami a miyatoon den so manga kimar," a inisembag i Saolo. Ogaid
na da niyan teroa ko bapa iyan so pitero i Samowil makapantag ko kakebaloy niyan a
dato.
So Kiyabaloya ki Saolo a Dato
17 Piyakisogoan i Samowil so manga Israil a timo sa Mispah sa kapakapangadap iran ko

Allah
18 Na pitero iyan kiran a "Giyai i kabasa o Allah a so Tohan o Israil: 'Saken i miyakaliyo
rekano sa Misir, na piyokas aken sekano ko lima o manga Imisiren ago so kapaar o
langon a ndatoan a somiyonsing rekano.'
19 Ogaid na sii sangkai a gawii na tiyalikodan iyo so Tohan iyo a somiyabet rekano ko
langon a kamoralaan iyo ago karomasayan, ka pitero iyo a 'Toroi kami ngka sa
makapendato rekami!' Kagiya ka maoto na pangadap kano ko Allah a oman i mbatabataa
rekano ago oman i pamiliya."
20 Na kagiya mapakadarpa i Samowil so langon a mbatabataa a manga Israil na aya

miyapili on na so mbatabataa a Baniyamin.
21 Oriyan iyan na piyakadarpa iyan so oman i pamiliya ko mbatabataa a Baniyamin na
miyapili so pamiliya i Matri, na aya miyapili kiran na si Saolo a wata i Kis. Na
piyangiloba iran sekaniyan, ogaid na kagiya di iran ketoon
22 Na inisean iran peroman so Allah a tig iran a "Ba sii pen da makadarpa so mama?"
Na tig o Allah a "Oway, tetapok sekaniyan sii ko manga ipamemetad."
23 Na miyalalagoy siran on na piyakaadap iran si Saolo ko manga taw, na kagiya

makatindeg kiran na kaoombawan iyan siran langon a sii siran bo taman sa waga niyan.
24 Na pitero i Samowil ko kalangolangon iran a "Ilaya niyo so mama a pinili o Allah! Da
den a ba niyan datar ko kalangolangon o manga taw."
Na miyameseg so langon a taw a tig iran a "Mamboway so dato!"
25 Inosay i Samowil ko manga taw so manga taritib ko kandato, na inisorat iyan ai ko
ribro na tiyago iyan ko soti a darpa. Oriyan iyan na piyakabaling iyan so langon a taw ko
oman i walay iran.
26 Miyaling mambo si Saolo ko walay niyan sii sa Gibiyah, na aden a miyonot on a

manga wawaraw a mama a piyamakaterang o Allah so manga poso iran.
27 Ogaid na aden pen a da a bali niyan a manga mama a pitero iran a "Andamanaya i
kakesabeta rektano angkai a mama?" Na pisodi iran si Saolo ago da iran witi sa
pamemegayan. Ogaid na romerenek baden si Saolo.
1 SAMOWIL 11
Tiyaban i Saolo so manga Amoniyo
Kagiya makasaolan na si Nahas a Amoniyo na piyagolowanan iyan so manga sondaro

niyan na mikempo siran ko liyo o inged a Yabis sii sa Giliyad sa kanggobata iran sii. Na
pitero rekaniyan o langon a mama sa Yabis a "Pakipesadanowa ka rekami ka kapendatoan
kami ngka."
2 Ogaid na somimbag si Nahas a tig iyan a "Aya bo a kapakipepasadanowa aken rekano

na o masowat aken so sabala ko manga mata sa kawanan o oman i isa rekano a aya ko
kaketagoi sa kayaan ko dalem a Israil."
3 Na pitero rekaniyan o manga pelokelokesen sa Yabis a "Peroi kami ngka sa makapito

gawii kaan ami kabembari sa sogo so dalem a Israil, na o da den a ba rekami pekasabet na
sengkop kami reka."
4 Miyakaoma so manga sogo sii sa Gibiyah a babalingan i Saolo, na kagiya mapanotol

iran ko manga taw angkai a miyanggolaola na palaya siran miyakagoraok sa matanog.
5 Aya den oto kiyapakaoma i Saolo a poon ko dii mbabasokan a totondogen iyan so
manga sapi iyan, na iniise iyan a "Ino angkai a manga taw? Ino siran penggoraok?" Na
kiyasoy iran on so pitero o manga mama a poon sa Yabis.
6 Kagiya maneg ai i Saolo na minitemo rekaniyan so Roh o Tohan na tanto sekaniyan a
kiyararangitan.
7 Na kominowa sa dowa timan a sapi na piyamotol iyan siran, na piyakiawidan iyan ko
manga sogo so miyapamotol a sapo ko dalem a Israil a di iran dii teroon a "Saden sa di
monot ki Saolo ago si Samowil sa kapakipetidawa na giyai i ikidia ko sapi iyan!" Na
riyaot so manga taw o kalek ko Allah na palaya siran lominiyo a maiisaisa a datar o
sakataw a mama.
8 Kagiya mabilang siran i Saolo sii sa Bisik na aya kadakel o manga mama sa Israil na
telo gatos nggibo, na go so manga mama sa Yodah na telo polo nggibo.
9 Na pitero iran ko manga sogo a poon sa Yabis a "Teroa niyo ko manga taw sa Yabis a
'Amay ka romanti so alongan mapita na kesabet kano.' " Na lomiyalakaw so manga sogo
na piyanotol iran ai ko manga taw sa Yabis na tanto
iran a inikababaya.
10 Na pitero iran ko manga Amoniyo a "Mapita na sengkop kami rekano na
mapenggolaola niyo rekami den so mapipikir iyo a mapiya."
11 Sii ko telondog a gawii na biyagi i Saolo sa telo lompok so manga mama niyan; kagiya
kepita na giyobat iran so kampo o manga Amoniyo na piyamono iran siran taman ko
kiyaranti o alongan. Miyamangiparak so miyamakapalagoy na da den a ba
makapagoonota ko miyalamba kiran.
Tiyangked so Kadadatoi ki Saolo
12 Oriyan iyan na pitero o manga Israil ki Samowil a "Antawaa ngkoto a manga mama a
minise sa 'Makapendato rektano bes si Saolo?' Wita ngka siran sii ka pamonoon ami."
13 Ogaid na pitero i Saolo a 'Da a ba kebono imanto, ka kagiya imanto a gawii na
piyanabangan o Allah so Israil."
14 Na pitero kiran pen i Samowil a "Itano; somong tano sa Gilgal ka tangkeden tano roo
so kadadatoi ki Saolo."
15 Mandiyadi na somiyong so langon a taw sa Gilgal na piyakandato iran si Saolo sii ko
kamamasaan o Allah. Mikorban siran roo sa manga ayam pantag bo ko kanggiginawai,
na tanto a miyababaya si Saolo ago so langon o manga Israil.
1 SAMOWIL 12
So Kaposan a Katero i Samowil
Pitero i Samowil ko langon o manga Israil a "Piyakineg aken so langon taman a

miyapangni niyo raken ka bigan aken sekano sa dato,
2 Na katii imanto so dato iyo a pepegolowan rekano. So saken on peman na miyalokes
ako den ago miyakapoti so bok aken, na so manga wata aken a manga mama na sisii
rekano.
3 Sii ako tomitindeg; seksii ako niyo ko kamamasaan o Allah ago so miyapili iyan a dato
o ba aden a kasalaan aken. Ba aden sii rekano a kiyakowaan aken sa sapi o di na kimar?
Ba aden a miyaalampas aken o di na romiyasay sii rekano? Ba aden rekano a tiyarimaan
aken sa tendan a misapeng ko manga mata ko? O aden a miyanggolaola ko sii na
pekaontolen aken."
4 Na pitero o manga taw a "Da kami ngka pangalampasi aya pen o ba kami ngka
riyomasay. Da den a ba ngka kinowa poon ko apiya antawaa rekami."
5 Tig i Samowil a "Peseksi so Allah sangkai a gawii, ago peseksi so dato a miyapili iyan
sa da ako niyo katooni sa sala."
"Sekaniyan den i saksi on," a inisembag iran.
6 Na pitero kiran pen i Samowil a "So den so Allah i minili ko Mosa ago so Aron, na
miyapakaliyo niyan so manga apo iyo sa Misir.
7 Na tindeg kano san, ka peyagen ko rekano so manga kasalaan iyo sii ko hadapan o
Allah ko kapekitademi aken rekano ko langon a ontol a pinggolaola o Allah sabap rekano
ago so manga apo iyo:
8 “Isako somong sa Misir si Yakob ago so pamiliya niyan a riyomasay siran o manga
Imisiren na miyakagoraok siran ko Allah sa tabang, na siyogo iyan kiran si Mosa ago si
Aron a piyakaliyo iran so manga apo iyo sa Misir ago piyakabaling iran siran sangkai a
darpa.
9 “Ogaid na piyakalipatan iran so Allah a Tohan iran, na piyalad iyan siran ko kapaar i
Sisira a so komandir o manga sondaro sa siti a Hasor, ago sii ko kapaar o manga Pilistiyo
ago so pen so dato sa Mowab a aya kiran miyamakitidawa ago miyamakataban.
10 Gomiyoraok siran ko Allah a tig iran a 'Miyakandosa kami; tiyalikodan ami seka, ya
Allah, ka piyangongonotanan ami so manga barahala a Baal ago Astorit. Ogaid na
pokasa kami ngka imanto ko lima o manga ridoay ami ka pengongonotanan ami seka!'
11 Kagiya ka maoto na piyamanogo o Allah si Gidiyon, si Barak, si Hiptah ago si
Samowil na piyamokas kano niyan ko lima o manga ridoay niyo ko mbalabala, na
miyakapaginetaw kano sa da a ba rekano miyakabinasa.
12 “Ogaid na kagiya mailay niyo a magaan kano magobat i Nahas a dato o manga
Amoniyo na pitero iyo raken a 'Kabaya ami a aden a dato a makapegolowan rekami,'
apiya pen so den so Allah a Tohan iyo i dato iyo.
13 Na katii imanto so dato a miyatomo iyo a aya niyo piyangni; ilaya niyo, ka bigan kano
o Allah sa dato.
14 O kaleken iyo so Allah ago pengongonotani niyo, na o pakinega niyo so peteroon iyan
rekano ago di niyo pesopaka so manga sogoan iyan, na o peparatiyaya kano ago so dato
iyo ko Allah a Tohan iyo, na mapiya nan!
15 Ogaid na o di niyo pekinega so peteroon rekano o Allah ka sopaken iyo baden so
manga sogoan iyan na tenaan kano niyan a lima a datar o manga apo iyo.
16 “Imanto na titindeg kano den na mbantayi niyo angkai a piyakamemesa a

penggolaolaan o Allah sii ko kamamasai niyo ron.
17 Ba di benar a pangolaon imanto a kaperagon sa trigo? Ogaid na pengni ako ko Allah
sa kambegay niyan sa dalendeg ago oran. Amay ka manggolaola ini na ketokawan iyo a
mala a kiyapakandosa niyo ko Allah ko kiyapangni niyo sa makandato rekano."
18 Mandiyadi na tomiyalo si Samowil ko Allah, na sii bo sangkoto a gawii na migay so

Allah sa dalendeg ago oran. Na tanto a inikalek o langon o manga taw so Allah ago si
Samowil,
19 Na pitero iran ki Samowil a "Pangangarapanen kami ngka ko Allah kaan kami di
pematay, ka minioman ami ko langon a dosa mi angkai a kamarataan a kiyapamangni ami
sa dato."
20 “Di kano pekelek," a inisembag i Samowil. "Apiya pen o miyanggolaola niyo angkai
langon a marata na di niyo telikodi so Allah, ka pangongonotani niyo baden sa iklas ko
poso iyo.
21 Di kano penanangoran ko di benar a manga tohan. Da den a mapiya a ba iran rekano
mapenggolaola aya pen o ba kano iran masabet, ka kena a ba siran manga benar.
22 Ka sabap ko kababantogan a Ingaran o Allah na di niyan isili so manga pagtaw niyan
ka kagiya inikasoat iyan a kiyabaloya niyan rekano a rek iyan.
23 So saken on peman na pengnin ko a makawatan raken o ba ako makandosa ko Allah
ko kitaregen aken rekano mangangarapan, ka ipengendao aken rekano so mapiya ago
matito a kapepaginetaw!
24 Ogaid na tangkeda niyo so kipekeleken iyo ko Allah, ago tatapa niyo a
kapepangongonotani niyo ron sa iklas ko poso iyo, ka pamimikirana niyo i kala o manga
pinggolaola niyan sabap rekano.
25 Ogaid na o tatarosen iyo pen so di niyo dii kanggolaola sa marata na kebagenas kano
ago so dato iyo.
1 SAMOWIL 13
So di Ontol a Kiyakandori i Saolo
Telo polo ragon a idad i Saolo isako poon ndato, na pindatoan iyan a Israil sa miyakapat
polo ago dowa ragon.
2 Miyamili si Saolo sa telo nggibo a manga mama ko manga Israil; dowa nggibo siran na
ped iyan sii sa Mikmas ago sii ko kapalawan sa Bitil, na so sanggibo kiran na ped i
Yonatan sii sa Gibiyah sa inged a Baniyamin. So lamba ko manga taw na piyakabaling
iyan ko manga walay iran.
3 Na giyobat i Yonatan so kampo o manga Pilistiyo a matatago sa Giba na miyaneg ai o

langon a Pilistiyo. Mandiyadi na piyakaoni i Saolo so bogiyong ko dalem a inged a tig
iyan a "Pamakineg so langon o manga Hibriyo!"
4 Na miyaneg o langon o manga Israil so totol a "Miyagobat i Saolo so kampo o manga
Pilistiyo na mimbaloy so manga Israil a ipekesisingay o manga Pilistiyo." Na
piyakisogoan so manga taw sa timo siran ki Saolo roo sa Gilgal.
5 Mitimo so manga Pilistiyo sa kapakipetidawa iran ko manga Israil; aden a telo polo
nggibo a karo iran ago nem nggibo a komokoda, na so pen so manga sondaro iran na
datar sa kadakel o peted sa kilid a ragat. Somiyong siran sa Mikmas sii sa sebangan a Bit
Abin na mikempo siran roo.
6 Kagiya mailay o manga Israil a miyakaregen so kapakambebetad iran (ka pepenga
pepeges so manga sondaro iran) na mitetapok siran sii ko manga liyang ago manga paket,
ago sii ko pageletan o manga lakongan, ago sii ko manga galebo ago manga peso a lopa.
7 So ped kiran na miyamakaripag ko lawasaig a Yordan ka somiyong siran sa inged a Gad
ago Giliyad.
Mitelimbagak si Saolo sa Gilgal, na so langon a sondaro a ped iyan na palaya den
pepananabaden sa kalek.
8 Nomiyayaw sekaniyan sa miyakapito gawii a giyoto so tiyaalikan on i Samowil, ogaid
na da makaoma si Samowil sa Gilgal na mipoon mbelabelag so manga taw a ped i Saolo.
9 Sabap roo na pitero iyan kiran a "Wita niyo raken so manga ayam a pekorbanen a
isepaat a totongen ago isepaat pantag bo ko kanggiginawai," na inisapaat iyan so pikorban
a petotongen.
10 So den so kiyapasada niyan on somapaat na miyakaoma si Samowil. Inalaw sekaniyan
i Saolo sa kaselama niyan on
11 Ogaid na pitero on i Samowil a "Antonaa ngkai a pinggolaola ngka?"
Tig i Saolo a "Kagiya mailay aken a pembelabelag so manga taw ago da ka pen
makaoma ko tiyaalikan ka on a gawii, ago so pen so manga Pilistiyo na titimo sa Mikmas
12 Na aya katao ko ron na nggobaten ako imanto o manga Pilistiyo sii sa Gilgal ko di
aken pen kapakapemangni sa limo ko Allah. Kagiya ka maoto na miyapamikir aken a di
mipendarainon a kisapaaten aken ko pikorban a petotongen."
13 “Miyakanggolaola ka sa kalalalongan," a tig i Samowil. "Da ngka tomana so sogoan a

inibegay reka o Allah a Tohan ka. O miyatoman ka den na miyapakatikna iyan den so
kandadatoi o manga kebabadan reka sa Israil sa taman sa pakataman.
14 Ogaid na imanto na di ketatap so kapendato o ka. Miyangiloba so Allah sa mama a
penggolaola ko madadalem ko poso iyan, na initoro iyan a makapegolowan ko manga
pagtaw niyan sabap sa da ngka tomana so inisogo reka o Allah."
15 Na inawaan i Samowil a Gilgal na lomiyalakaw. So ped a manga taw na miyonot ki

Saolo ko kapesong iyan sa kapengeped iyan ko manga sondaro niyan. Giyanatan iran a
Gilgal na somiyong siran sa Gibiyah sii sa inged a Baniyamin. Binilang i Saolo so manga
sondaro niyan na manga nem gatos siran.
Da a Gomaan o manga Israil
16 Si Saolo ago so wata iyan a si Yonatan ago so manga mama a ped iran na komakaden
sa Giba sa inged a Baniyamin; samanaya na kekampo so manga Pilistiyo sa Mikmas.
17 Aden a telo lompok a manga sondaro a Pilistiyo a dii tetaban a dii meliliyo a poon ko
kampo iran; so isa a lompok na pegantap sa Oprah sii ko inged a Sowal,
18 So isa on na sii pegantap sa Bit Horon, ago so ikatelo na sii sa temanaan a
katotolongan iyan a Balintad a Sibowim ago so disirto.
19 Da a sakataw bo a panenesel a ba ketoon sii ko dalem a inged a Israil ka kagiya

miyatero den o manga Pilistiyo a "O ba baden mbaal so manga Hibriyo sa manga pedang
ago manga bangkaw!"
20 Sabap roo na pepekasong so langon a manga Israil ko manga Pilistiyo sa
kapenggaranga iran ko manga dado, manga sakal, manga patok ago manga garab iran.
21 Aya bayad o kapenggaranga ko parabowat ago so sakal na dowa a pelata a pirak, ago
so kapenggaranga ko sadang ago patok ago so kapanarem sa sokot na isa a pelata.
22 Sabap roo na sii ko gawii a katidawa na da a isa bo ko manga sondaro i Saolo ago si
Yonatan a ba aden a pedang iyan o di na bangkaw; si bo si Saolo ago so wata iyan a
Yonatan i aden a gomaan iyan.
Giyobat i Yonatan so manga Pilistiyo

23 Samaoto na aden a salompok a manga sondaro a Pilistiyo a somiyong ko Pagokitan sa
Mikmas.
1 SAMOWIL 14
Miyakaisa a gawii na pitero i Yonatan ko mangoda a pegawid sa manga gomaan iyan a
"Song ka sii; somong ta roo ko kekampowan o manga Pilistiyo sa sabala." Ogaid na da
niyan ai pakitokawi ko ama iyan a si Saolo
2 A komakaden sii ko atag a kayo a granada sii sa Migron ko marani ko temanaan a
Gibiyah. Aya ped iyan na manga nem gatos a manga mama
3 A rakes on si Ahiyas a aya somosolot sa saliko a imam. Wata sekaniyan i Ahitob a
pagari i Ikabod a wata i Pinihas a so wata i Ili a aya imam ko Allah sii sa Siloh. Na da
den a miyakatokaw ko manga mama sa ba roo miyawa si Yonatan.
4 So pagokitan a mapipikir i Yonatan a peripagen iyan kaan mirampay ko kampo o

manga Pilistiyo na aden a makatetakilida on a manga pampang; so isa on na pembetowan
sa 'Bosis' na so sabala on na 'Sinih'.
5 So isa a pampang na matatago ko pagotaraan a sii makasasangor sa Mikmas, na so isa
on peman na sii tampar sa pagabagatan a makasasangor sa Giba.
6 Pitero i Yonatan ko mangoda a pegawid sa manga gomaan iyan a "Somong ta roo ko

kampo angkoto a manga kapir. Baanda ta ogopi o Allah. Da den a ba pekabangen ko
Allah sa kambegay niyan sa kapakataban apiya nggolalan ko madakel o di na maito."
7 Na pitero on o mangoda a "Nggolaolaa ngka den so langon o kabaya a ka. Tarosen ka

den, ka ped ako ngka a pepangongonotan ko matatago ko poso o ka."
8 “Mapiya nan," a tig i Yonatan. "Romipag ta roo sangkoto a manga mama ka makiilay
ta kiran.
9 O teroa iran rekta a 'Nayawa kami niyo san,' na tomareg ta ko katatagoan rekta na di ta
kiran tomakedeg.
10 Ogaid na o teroa iran a 'Song kano sii rekami,' na tomakedeg ta kiran, ka giyoto i
nanao ta sa piyalad siran o Allah ko lima ta."
11 Mandiyadi na miyakiilay siran a dowa ko kampo o manga Pilistiyo. "Ilaya niyo!" a tig
o manga Pilistiyo. "Pepamanola so manga Hibriyo a peliliyo ko manga galebo a
tetapokan iran."
12 Na liyalis o manga mama ko kampo si Yonatan ago so mangoda a tig iran a "Takedeg
kano rekami ka pakataamen ami sekano!"
Na giyoto a pitero i Yonatan ko mangoda a "Tondoga ko ngka tomakedeg, ka piyalad
siran o Allah ko lima o Israil."
13 Na tomiyakedeg si Yonatan a ipepananap iyan a manga lima niyan ago ai a totondogen

sekaniyan o mangoda; na pepanga ooteng so manga Pilistiyo ko danga i Yonatan, na so
mangoda a tomotondog on na pepamonoon iyan siran.
14 Sii sangkoto a paganay a kiyagobat i Yonatan ago so mangoda na manga dowa polo a
mama a miyapatay iran sii ko darpa a manga tenga sa iktariya.
15 Na tanto a miyanga alek so langon a Pilistiyo sangkoto a inged; so dii tetaban ago so
manga sondaro a sisii ko kampo na piyamanabad sa kalek, na lininog so lopa. Sayana oto
a mala a kayongkong.
So Kiyatabana o Israil ko manga Pilistiyo
16 So manga mama i Saolo a bantabantay sii sa Gibiyah sa inged a Baniyamin na

miyailay iran a pepamalagoy so manga Pilistiyo a pepanga tataap.
17 Na pitero i Saolo ko manga mama a ped iyan a "Bilanga niyo so manga sondaro na
ilaya niyo o antawaa i miyalebat rektano." Na kagiya mabilang iran na si bes si Yonatan
ago so pegawid sa gomaan iyan i da roo.
18 Na pitero i Saolo ko imam a si Ahiyas a "Wita ngka sii so Kaban o Tohan." (Sangkoto
a masa na sisii so Kaban o Tohan ko manga Israil.)
19 Sii ko dii kimbitiyarain i Saolo ko imam na baden pepekaiseg so kapekegorigaw ko
kampo o manga Pilistiyo. Na tig i Saolo ko imam a "Di tano pen melakay sa kapagisei
tano ko Allah!"
20 Na mitimo si Saolo ago so langon a ped iyan na lomiyalakaw siran sa kapakipetidawa

iran, na miyaoma iran so manga Pilistiyo a tanto a pepanga nanaanaa a siran bo i dii
pepedanga.
21 Na so manga Hibriyo a tomatampil gowani ko manga Pilistiyo ago miyamangonot
kiran ko kampo iran na miyangeped siran peman ko manga Israil a ped i Saolo ago si
Yonatan.
22 So pen so langon a manga Israil a kitatapok ko kapalawan a inged a Ipraim na kagiya
maneg iran a pepamalagoy so manga Pilistiyo na miyanaloba siran kiran mambo sebenar
ko katidawa,
23 Na miniseg so katidawa a miyalepas pen a Bit Abin. Na piyanabangan o Allah a Israil
sangkoto a gawii.
So Miyaolaola ko Oriyan o Katidawa
24 Na kekarata a ginawa o manga Israil sangkoto a gawii ka kagiya tiyapaosan siran i

Saolo a tig iyan a "Kamorkaan so apiya antawaa i koman sa pangenengken sa di pen
merimon sa di aken pen misaop a ginawa ko ko manga ridoay aken!" Sabap roo na da
den a ba kiran miyakataam sa pangenengken.
25 Na miyakasoled siran langon sa kalasan, na aden a gola a teneb sii ko lopa.
26 Kagiya makaoma siran ko walay a batiyokan na miyailay iran so gola a teneb a pegigis
on, ogaid na da den a ba kiran on miyakaraw mami ka ipekelek iran so sinta.
27 Ogaid na si Yonatan na da niyan maneg so kiyatapaosi o ama iyan a sinta ko manga
taw na inisisok iyan so teken iyan ko taro o gola a teneb na inami iyan, na sarta den a
miyakaliwanag a mata niyan.
28 Mandiyadi na pitero on o isa ko manga sondaro a "Tiyapaosan o ama a ka so manga
sondaro sa tanto a maregen a sapa a tig iyan a 'Kamorkaan so apiya antawaa i koman sa
pangenengken sangkai a gawii!' Giyanan i sabap a kikaadaan sa bager so manga mama."
29 Tig i Yonatan a "Piyakaregenan o ama aken so inged tano! Ilaya ngka man ka
miyakaliwanag a mata ko kagiya makataam ako sa maito sangkai a gola a teneb,
30 Aya pen o ba miyakakan so manga mama sangkai a gawii ko miyateban iran ko manga
ridoay iran! Inangin o di madakel pen a miyapatay tano a manga Pilistiyo imanto!"
31 Sangkoto a gawii na piyamono o manga Israil so manga Pilistiyo ipoon sa Mikmas

taman sa Aihalon, na tanto siran den a ikokopay.
32 Kagiya ka maoto na pinggagampanan iran so miyateban iran ko manga ridoay na
kominowa siran on sa manga kambing, manga sapi ago manga nati a sapi na piyanombali
iran sii ko lopa na piyangangan iran a rakes o rogo iyan.
33 Na miyatero ki Saolo a tig iyan a "Ilaya ngka ka pepanga dodosa so manga mama ko
Allah ko kapeken iran sa sapo a aden pen a rogo on."
"Miyakasela kano," a inilalis i Saolo. "Lilid kano sii imanto sa mala a ator."
34 Na tig iyan pen a "Lalakawi niyo so manga taw na go niyo kiran teroa a 'Oman i isa
rekano na wita niyo raken so sapi iyan ago kambing na sombalia niyo sii na go niyo kana.
Di kano pendosa ko Allah sa kapekena niyo ko sapo a di pen dii pirogo.' "
Mandiyadi sii sangkoto a kagagawii na inowit o oman i isa so sapi iyan na piyanombali
iran roo.
35 Oriyan iyan na inimbaal i Saolo sa aparan so Allah; giyoto i paganay a aparan a
inembaalan iyan ko Allah.
36 Na pitero i Saolo ko manga mama niyan a "Tondagayan tano so manga Pilistiyo ka

gobaten tano ko kagagawii; tebanan tano siran taman sa kepita na da den a ba tano kiran
pakapegoyagen."
"Nggolaolaa ngka so apiya antonaa i mapipikir ka a mapiya," a inisembag iran.
Ogaid na pitero o imam a "Makimosawir tano a daan ko Allah."
37 Mandiyadi na inisean i Saolo so Allah a tig iyan a "Ba aken nggobata so manga
Pilistiyo? Ba ngka siran pekitabanen ko manga Israil?" Ogaid na da sekaniyan sembaga
o Allah sangkoto a gawii.
38 Kagiya ka maoto na pitero i Saolo ko langon a olowan o manga sondaro a "Song kano
sii kaan tano katokawi o antonaa i miyandosa imanto a gawii.
39 Pesepa ako ko kaooyagoyag o Allah a pesebet sa Israil sa apiya pen o si Yonatan i
miyakandosa na mataan den a mbonoon." Ogaid na da den a sakataw bo ko langon o
mama a ba on somimbag.
40 Na pitero pen i Saolo ko langon a manga Israil a "Tindeg kano san, na saken ago si
Yonatan na tindeg sii."
"Nggolaolaa ngka so mapiya reka," a inisembag o manga mama.
41 Na miyangangarapan si Saolo ko Allah a so Tohan o Israil a tig iyan a "Began ka raken

so ontol a sembag." Na si Yonatan ago si Saolo na aya miyaripa na miyalepas on so
manga mama.
42 Tig i Saolo a "Ripaa kami niyo ago so wata aken a si Yonatan." Na aya miyaripa na si
Yonatan.
43 Tig i Saolo ki Yonatan a "Teroa ngka raken o antonaa i miyanggolaola ngka." Na

pitero on i Yonatan a "Tiyamaan aken baden so maito a gola a teneb sii ko poro o teken
aken, na katii ako bo a mbonoon!"
44 Na tig i Saolo a "Kamorkaan ako o Tohan sa tanto a maregen o di ka matay, Yonatan!"
45 Ogaid na pitero o manga mama ki Saolo a "Ba mbonoa si Yonatan a aya

kiyanggolalanan sangkai a mala a kiyapakataban o Israil? Di den kepakay! Matamataan
ko kaooyagoyag o Allah a da den a satiman bo ko bok i Yonatan a ba maroro ko lopa, ka
inogopan sekaniyan o Tohan ko kiyanggolaolaa niyan sii imanto." Na piyakalidas o
manga mama si Yonatan ko kambonoa on.
46 Oriyan iyan na ginekan seloba i Saolo so manga Pilistiyo na mindod so manga

Pilistiyo ko inged iran.
So Kapendato i Saolo ago so Pamiliya niyan
47 Oriyan o kiyapoon ndato i Saolo sa Israil na di sekaniyan dii makitidawa ko manga

ridoay iran ko mbalabala, a so manga Mowabiyo, manga Amoniyo, manga Idomiyan, so
manga dato sa Sobah ago so manga Pilistiyo. Bapiya anda sekaniyan pesengor na
pepekataban.
48 Di sekaniyan dii makitidawa sa kawaraw, na tiyaban iyan pen so manga Amalik na
piyokas iyan so Israil ko kapaar o siran oto a di kiran dii teban.
49 So manga wata i Saolo a manga mama na si Yonatan, si Isbi ago si Malkisowa. Aya
ngaran o kaka a wata iyan a babay na si Mirab, na so ari ron na si Mikal.
50 Aya ngaran o karoma niyan na si Ahinowam a wata i Ahimaas. Aya ngaran o
komandir o manga sondaro i Saolo na si Abnir a wata i Nir, na si Nir na bapa i Saolo.
51 Si Kis a ama i Saolo ago si Nir a ama i Abnir na manga wata i Abiyal.
52 Sii ko langon a manga gawii i Saolo na aden a mapait a dii katidawa ko manga
Pilistiyo, na igira a pepekailay si Saolo sa mabager o di na mawaraw a mama na
pekowaan iyan a sondaro.
1 SAMOWIL 15
Tiyaban i Saolo so manga Amalik
Pitero i Samowil ki Saolo a "Saken i siyogo o Allah sa kasalawati aken reka a madato ko
manga pagtaw niyan a Israil. Kagiya ka maoto na pamakinega ngka imanto angkai a
katero a initoron o Allah.
2 Giyai i kabasa o Allah a Lebi a Mamaapaar: 'Ndenegen ko so manga Amalik ko inikidia
iran ko manga Israil, ka siyopak iran siran sii ko kapelalakaw iran isako makaliyo siran
den sa Misir.
3 Ika roo den imanto na go ngka gobata so manga Amalik, na binasaa ngka sa tarotop so
langon taman a rek iran. Da den a pakapagoyaga ngka kiran; pamonoa ngka so langon a
manga mama ago manga babay, so manga wata ago manga ikaririga, so manga sapi ago
manga bilibili, ago so manga onta ago manga kimar.' "
4 Mandiyadi na tinimo i Saolo so manga sondaro niyan na binilang iyan siran sii sa
Tilaim, a dowa gatos nggibo a manga sondaro ago sapolo nggibo a manga mama a
miyakapoon sa Yodah.
5 Somiyong siran ko siti a Amalik na nomiyayaw siran a magaayan sii ko balintad.
6 Na pitero i Saolo ko manga Kiniyo a "Pamalagoy kano; awai niyo so manga Amalik ka
o ba aken sekano baden mirakes ko kambinasaa ko kiran, ka inikalimo o manga apo iyo
so langon a Israil isako makaliyo siran den sa Misir." Sabap roo na bilag o manga Kiniyo
so manga Amalik.
7 Oriyan iyan na giyobat i Saolo so manga Amalik ipoon sa Habilah taman den sa Sor sii
sa sebangan a Misir.
8 Diyakep iyan a oyagoyag si Agag a dato o manga Amalik, na palaya iyan den piyamono
a pedang so manga taw.
9 Ogaid na si Saolo ago so manga sondaro niyan na piyakapagoyag iran si Agag ago so
lebi a manga pipiya ko manga bilibili ago manga sapi, so kaolit a manga nati ago so
manga nati a bilibili, a so mapiya on langon. Da siran katerangi o ba iran ai paminasaa sa
tarotop, ogaid na so langon taman a ikasisingay o di na da a bali niyan na piyolang iran.
Miyada ki Saolo so Kandadato iyan
10 Samaoto na minitoron ki Samowil so katero o Allah:

11 “Misendit ako sa kiyabaloya ko ki Saolo a dato, ka tiyalikodan ako niyan ago da niyan
tomana so insarat aken." So kiyanega sii i Samowil na miyarata a ginawa niyan, na
gomiyoraok sekaniyan ko Allah sangkoto a miyababasa gawii.
12 Teked a kapipita na mimbowat si Samowil na lomiyalakaw sa kapembanoga

niyan ki Saolo, ogaid na aya miyatero on na "Miyakasong si Saolo sa Karmil a roo niyan
inimbaal a ginawa niyan sa monominto; oriyan oto na tomiyaros sa Gilgal."
13 Kagiya maoma i Samowil si Saolo na pitero on i Saolo a "Karakmatan ka o Allah!

Ininggolalan aken den so insarat o Allah."
14 Ogaid na tig i Samowil a "Antonaa bes angkoto a kapepamangenga o manga bilibili

ago manga sapi a pekeneg aken?"
15 Somimbag si Saolo a "Piyangowa oto o manga sondaro aken ko manga Amalik.

Piyakapagoyag iran so lebi a manga pipiya a bilibili ago manga sapi a mapekorban ko
Allah a Tohan ka, ogaid na tarotop a kiyabinasaa mi ko manga ped on."
16 “Renek ka!" a tig i Samowil ki Saolo, "ka teroon ko reka so pitero raken o Allah
kagiya ko gagawii."
"Teroa ngka den," a tig i Saolo.
17 Na pitero i Samowil a "Apiya pen gowani na ibibilang ka a ginawa ngka a mababa na

ba ka da mabaloy a olowan o manga mbatabataa a Israil? Siyalawatan ka o Allah a dato o
manga Israil.
18 Na siyogo ka niyan a tig iyan a 'Ika roo na go ngka binasaa sa tarotop angkoto a manga
baradosa a so manga Amalik; pakitidawa ka kiran taman sa malengan siran.'
19 Na, ino ngka da paratiyayaa so Allah? Ino ngka nggampani so manga tamok iran ago
minggolaola ka sa marata ko kapekeilaya on o Allah?"
20 “Piyaratiyaya ko den so Allah!" a inisembag i Saolo. "Somiyong ako ko siyogoan

raken o Allah. Palaya aken bininasa so manga Amalik, na inowit aken sii si Agag a dato
iran.
21 Ogaid na kominowa so manga sondaro ko lebi a manga pipiya a poon ko miyateban a
isesenggay a mbinasaan, a so manga bilibili ago manga sapi kaan iran makorban ko Allah
a Tohan ka sii sa Gilgal."
22 Ogaid na pitero i Samowil a "Ba lebi a ikasosoat o Allah so manga ipesepaat a

petotongen ago so dii korbanen a di so kapetomana ko katero o Allah? Mataan a kena, ka
so kaparatiyaya na tomo a di so kakorban, na so kapangongonotan na tomo a di so
kasepaat sa sibo o manga bilibili.
23 Ka so kasopak na datar bo o dosa a kapangangatao, na so kategas i olo na datar bo o
kamarataan o kapanakoto. Sabap sa tiyalikodan ka so katero o Allah na tiyalikodan ka
niyan mambo a dato."
24 Na pitero i Saolo ki Samowil a "Miyadosa ako; miyasogok aken so sogoan o Allah ago
so insarat ka, ka inikalek aken so manga taw na piyakineg aken so pitero iran.
25 Kapedipedi ka bo na rilai ngka imanto so dosa ko ago onot ka raken komasoy sa
Gilgal kaan aken masimba so Allah."
26 “Di ako reka magonot," a inisembag i Samowil. "Tiyalikodan ka so katero o Allah na

tiyalikodan ka mambo o Allah a dato o manga Israil!"
27 Na so den so katelikod i Samowil a mbaling na sinikem i Saolo so sisid o kimon iyan

na miyakisi.
28 Na pitero on i Samowil a "Kinisi reka o Allah sangkai a gawii so kandadatoi sa Israil
ka inibegay niyan ko isa a siringan ka a tomo a di seka.
29 So kababantogan a Tohan o Israil na di pemokeg aya pen o ba niyan alina so
pamikiran iyan; ka kena a ba sekaniyan manosiya a pekealin so pamikiran iyan."
30 Tig i Saolo a "Miyakandosa ko, ogaid na kapedipedi ka bo na pagadati ako ngka ko
kamamasaan o manga pelokelokesen o manga taw aken ago so langon a Israil; onot ka
raken komasoy kaan aken masimba so Allah a Tohan ka."
31 Mandiyadi na miyonot rekaniyan si Samowil komasoy sa Gilgal na sominimba si
Saolo ko Allah.
32 Oriyan iyan na pitero i Samowil a "Wita ngka raken si Agag a dato o manga Amalik."
Na miyakaoma si Agag a somasana, ka mapipikir iyan a "Matamataan a miyakalepas den
so mapait a kakeparo o kapatay!"
33 Ogaid na tig i Samowil a "Datar o kiyadai sa wata ko madakel a babay a nggolalan ko
pedang ka na kedaan mambo sa wata so ina a ka." Na biyono i Samowil si Agag ko
hadapan o Allah sii sa Gilgal.
34 Oriyan iyan na gomiyanat si Samowil sa kasong iyan sa Ramah, na miyaling si Saolo

ko babalingan iyan sii sa Gibiyah.
35 Na taman ko kaooyagoyag pen i Samowil na da niyan den songowi si Saolo sa
kimbentelen iyan on apiya pen inimboko iyan si Saolo. Na misendit so Allah sa
kiyabaloya niyan ki Saolo a dato sa Israil.
1 SAMOWIL 16
Inidinan i Samowil si Daod sa Kadato
Na pitero o Allah ki Samowil a "Ay katey pen a kimbobokoon ka ki Saolo ka tiyalikodan

aken sekaniyan a dato sa Israil? Penoa ngka a lana so tagoay ngka na go ka lalakaw, ka
pekasongen ko seka ki Yasay sii sa Bitlihim. Miyapili aken so isa ko manga wata iyan a
mabaloy a dato."
2 Na tig i Samowil a "Andamanaya i kapekasong aken roo? O maneg ai i Saolo na

mbonoon ako niyan."
Tig o Allah a "Pakaonota ngka so mangoda a sapi na teroa ngka a 'Miyakaoma ko sii sa
kapekorban aken ko Allah.'
3 Bantowi ngka si Yasay ko kakorban, na pekiilay aken reka o antonaa i penggolaolaan
ka. Salawati ngka raken so mama a itoro aken reka."
4 Ininggolalan i Samowil so pitero on o Allah. Kagiya makaoma sekaniyan sa Bitlihim

na pepananabaden so manga pelokelokesen ko inged kagiya mabalak iran on, na inisean
iran a tig iran a "Ba aya minioma ngka na kalilintad?"
5 Tig i Samowil a "Oway, kalilintad. Somiyong ako sii sa kapekorban aken ko Allah.
Sotiya niyo a ginawa niyo na go kano raken onot ko kapekorban." Na piyakasoti niyan si
Yasay ago so manga wata iyan a manga mama na biyantowan iyan siran ko kapekorban.
6 Kagiya makaoma siran na miyailay i Samowil so wata i Yasay a si Iliyab, na aya katao
niyan on na "Mataan a giyangkai a mama a tomitindeg sii ko kamamasaan o Allah i
miyapili iyan."
7 Ogaid na pitero o Allah ki Samowil a "Di ngka pegilayani so paras iyan o di na so

kaporo, ka da aken sekaniyan tarimaa. Kena a ba aya pegilayanan o Allah na so pekeilay
o manosiya, ka aya pegilain o manosiya na so bo so paratoboan o lawas, ogaid na aya
pegilain o Allah na so poso."
8 Oriyan iyan na tiyalowan i Yasay so wata iyan a si Abinadab na piyakaadap iyan ki

Samowil. Ogaid na tig i Samowil a "Kena pen ai o ba miyapili o Allah."
9 Piyakaadap pen i Yasay si Samah, ogaid na tig i Samowil "Aya pen ai o ba aya pinili o
Allah."
10 Pito kataw a manga wata i Yasay a manga mama a piyakaadap iyan ki Samowil, ogaid
na pitero on i Samowil a "Da a ba kiran miyapili o Allah."
11 Na iniise iyan ki Yasay a "Ba giyai bo langon i manga wata a ka?"
"Aden pen a ariyari ron," a inisembag i Yasay. "Ogaid na petegikoren iyan so manga
bilibili."
Tig i Samowil a "Pakisongowi ngka; di tano den pekaontod taman sa di makaoma."
12 Na piyakisongowan sekaniyan i Yasay, na marigariga i paras so mangoda, ago

maliwanag i mata ago mataid.
Na pitero o Allah ki Samowil a "Sekaniyan den i pinili aken; songowi ngka ago
salawati ngka!"
13 Mandiyadi na kinowa i Samowil so tagoay a petegoan sa lana na inisalawat iyan ki

Daod sii ko kamamasaan o manga pagari niyan. Sarta den a minitemo ki Daod so Roh o
Allah, na sisii rekaniyan den ipoon sangkoto a gawii. Oriyan iyan na komiyasoy si
Samowil sa Ramah.
So dii Katelagad i Daod ki Saolo
14 Samaoto na bilag o Roh o Allah si Saolo na aden a saitan a siyogo o Allah a peringasa
rekaniyan.
15 Na so manga talasogoay i Saolo na pitero iran on a "Ilaya ngka man, ka aden a saitan a
siyogo o Tohan a peringasa reka.
16 Sabap roo, Kadnan ami, na pakapangilobaa kami ngka sa mama a mapasang i
kapangotiyapi. Na igira a pekitemo reka so saitan a pesogoon o Tohan na
makapengotiyapi sekaniyan kaan pepekapiya a ginawa ngka."
17 Na pitero kiran i Saolo a "Nggiloba kano sa mama a mapasang i kapangotiyapi na wita

niyo raken sii."
18 Somimbag so isa ko manga talaogoay a "Miyailay aken so isa ko manga wata i Yasay
sii sa Bitlihim a matao mangotiyapi. Mawaraw sekaniyan ago mapiya a sondaro;
maongangen mambo ko di niyan dii katero ago mataid a mama, na lalayon on so Allah."
19 Mandiyadi na somiyogo si Saolo sa mama ki Yasay a tig iyan a "Pakasonga ngka

raken so wata a ka a si Daod a petegikor sa bilibili."
20 Na piyakasong on i Yasay si Daod a piyakitelon iyan on so isa a kimar a riyoranan sa
paan, isa ka tagoay a arak ago mangoda a kambing.
21 Miyakaoma si Daod ki Saolo na miyabaloy den a di on dii telagad. Tanto sekaniyan a

kiyababayaan i Saolo, na initoro iyan si Daod a pegawid sa kelong iyan.
22 Na somiyogo si Saolo sa mama ki Yasay a tig iyan a "Perowa ngka a di raken den dii
katelagadi i Daod ka miyasoat ako ron."
23 Igira a pekitemo ki Saolo so saitan a siyogo o Tohan na pekowaan i Daod so kotiyapi

iyan a pepakaonin iyan, na pepekapiya a ginawa i Saolo ago pepekaasal a pegawa on so
saitan.
1 SAMOWIL 17
Piyangerar i Goliyat so manga Israil
Sa masa oto na tinimo o manga Pilistiyo so manga sondaro iran sa kapakipetidawa iran,
na sii siran miyalimod sa Sokoh sii sa Yodah. Biyangon iran roo so kampo iran sii sa Ipis
Damim a pageletan a Sokoh ago Asikah.
2 Si Saolo ago so manga Israil na mitimo siran ago mikempo sii ko Balintad a Ilah, na
mitiyagar siran sa kapagatowi ran ko manga Pilistiyo.
3 Matatago so manga Pilistiyo ko isa a bobongan, na pekempo so manga Israil ko sabala a
bobongan a aya pageletan iran na balintad.
4 Aden a mabager a sondaro a aya ngaran iyan na si Goliyat a taw sa Gat a lominiyo a
poon ko kampo o manga Pilistiyo sa kapengerara niyan ko manga Israil. Manga telo ka
mitros a kaporo iyan,
5 Na kekalo sekaniyan sa ilmit a tombaga ago meraraben pen sa tombaga a aya kapened
iyan na manga lima polo ago pito ka kilo.
6 Ndadalapiyan so manga bengis iyan sa tombaga na bebawaan iyan so bangkaw niyan a
tombaga.
7 So bangkaw niyan na datar sa katiwaro o ndo, na so katatareman on a potaw na manga
pito ka kilo a kapened iyan. Na moona rekaniyan so sondaro a pegawid ko kelong iyan.
8 Tominindeg si Goliyat na liyalis iyan so manga sondaro a Israil a tig iyan a "Ino kano sii
song a mitiyagar sa kapakipetidawa? Ba kena ako Pilistiyo, na ba di sekano na manga
oripen i Saolo? Pamili kano sa mama na go niyo raken pakatondagaya sii.
9 O makaato sekaniyan raken ago mapatay ako niyan na kebaloy kami a manga oripen
iyo; ogaid na o daaga ko sekaniyan ago mapatay aken na kebaloy kano a manga oripen
ami sa kapetelagadi niyo rekami."
10 Na tig iyan pen a "Pengeraren aken so manga sondaro a Israil sangkai a gawii. Pamili
kano sa mama kaan kami makatidawa!"
11 Na kagiya maneg i Saolo ago so langon a Israil angkai a manga katero o Pilistiyo na
piyamanabad siran a tanto a pepanga aalek.
Si Daod sii ko Kampo i Saolo
12 Si peman si Daod na wata sekaniyan i Yasay a Ipraiten a poon sa Bitlihim sii sa

Yodah. Walo kataw a manga wata i Yasay a manga mama, na sii ko manga gawii i Saolo
na miyalokes sekaniyan a minitolod den a idad iyan.
13 So telo kataw a kaka a wata i Yasay na miyonot ki Saolo ko katidawa: so kaka on na si
Iliyab, so ikadowa na si Abinadab ago so ikatelo na si Siyamah.
14 Si Daod na aya kiran ariyari. So telo kataw a kaka na moonot ki Saolo,
15 Ogaid na si Daod na dii kekasokasoy sa Bitlihim a poon ki Saolo a petegikoren iyan so
manga bilibili o ama iyan.
16 Sii ko soled o pat polo gawii na peliyo si Goliyat oman mapita ago oman kegabi a
pepangeraren iyan so manga Israil.
17 Miyakaisa a gawii na pitero i Yasay ko wata iyan a si Daod a "Kowaa ngka ngkai a pat
ka gantang a sindeg a kamais ago sapolo timan a paan a makan o manga pagari ngka na
nggagaan ka somong ko kampo iran.
18 Awidi ngka pen angkai a sapolo timan a mimbatik a gatas na began ka ko komandir o
lompok iran. Kaipa ngka o antonaa i masosowa o manga pagari ngka na kasowin ka
raken so karina sa kapipiya a ginawa iran.
19 Ndodoo siran ki Saolo ago so langon a mama sa Israil sii sa Balintad a Ilah a di siran
dii makitidawa ko manga Pilistiyo."
20 Teked a kapipita na mimbowat si Daod na initadin iyan so manga bilibili ko ped a

pepanagikor, na kinowa niyan so manga awid iyan na gomiyanat a so den so iniinsarat on
i Yasay i siyowa iyan. Miyakaoma sekaniyan ko kampo sii den ko kapeliliyo ron o
manga sondaro a song ko petidawaan a di siran dii melalalis sa katidawa,
21 Ka perantar so manga sondaro a Israil ago so manga sondaro sa kapetidawa iran.
22 Inibegak i Daod so manga awid iyan ko komikibir ko pangenengken, na miyalalagoy
sekaniyan ko romarantar a manga sondaro a mitiyagar sa katidawa na miyatoon iyan so
manga pagari niyan na siyalam iyan.
23 Na sii ko di niyan pen kiran dii kimbitiyarain na si Goliyat a mabager a Pilistiyo a taw
sa Gat na lominiyo peman ko ped iyan a manga sondaro na kiyasoy niyan so ipepangerar
iyan, na miyaneg ai i Daod.
24 Kagiya mailay o manga Israil si Goliyat na palaya iran piyalagoyan a tanto siran a
pepanga aalek.
25 “Ilaya ngka ngkoto a mama a pepakiilay rektano a pepangeraren iyan so Israil!" a tig o
oman i isa ko ped iyan. "Mbegan o dato sa mala a kakawasaan so apiya antawaa i
pekabono on. Pakipengaroma niyan on pen so wata iyan a babay ago pelepasen iyan so
pamiliya o ama iyan ko kapembayadi iran ko bowis sii sa Israil."
26 Na inisean i Daod so manga mama a tomitindeg ko obay niyan a tig iyan a "Antonaa i
ikidia ko mama a pekabono sangkoto a Pilistiyo a mapekada iyan angkai a kayaan o
Israil? Antawaa ngkoto a kapir a Pilistiyo a mapengerar iyan so manga sondaro o
oyagoyag a Tohan?"
27 Na pitero iran on peroman so di iran dii teroon a tig iran on a "Giyai den i ikidia ko
mama a pekabono rekaniyan."
28 Si Iliyab a kaka i Daod na miyaneg iyan so dii kimbitiyarain i Daod ko manga mama
na tanto niyan a kiyararangitan si Daod a tig iyan a "Ino ka sii song? Antawaa i
biyagakan ka sangkoto a maito a manga bilibili sii ko mitataog a kaden? Katawan aken
so kaambog ka ago so karata o poso o ka. Aya bo a inisong ka sii na pembantay ka ko
katidawa."
29 “Antonaa bes i miyanggolaola ko imanto?" a tig i Daod. "Ba ako di patot a

makapetero?"
30 Na somiyangor sekaniyan ko ped na datar iyan bo a iniise iyan on, na datar mambo o
miyaona a inisembag on o manga mama.
31 Miyaontaling so pitero i Daod na miyapanotol ki Saolo, na piyakisongowan sekaniyan

i Saolo.
32 Na pitero i Daod ki Saolo a "Hey kadnan, o ba aden a pekelek sabap sangkoto a
Pilistiyo! Saken i song on a makipetidawa on."
33 “Di ka pekaato sangkoto a Pilistiyo," a tig i Saolo. "Di ka on pekagaga makitidawa, ka

matag ka baden wata na miyatey sekaniyan den a sondaro ipoon ko kangodai ron."
34 Ogaid na pitero i Daod ki Saolo a "Saken i petegikor ko manga bilibili o ama aken, na
igira aden a miyakatalingoma a arimaw o di na barowang a initangag iyan so nati a bilibili
ko talon
35 Na peselobaan ko, na pembentolen aken ago pekowaan aken so bilibili ko ngari iyan.
Igira a pesengoran ako o arimaw o di na so barowang na petepakan ko so lig iyan ago
peranegen aken taman sa matay.
36 Palaya aken miyapatay so manga arimaw ago so manga barowang, na giyangkoto a
kapir a Pilistiyo na kesowa iyan so isa kiran ka kagiya inerar iyan so manga sondaro o
oyagoyag a Tohan.
37 So Allah a somiyabet raken ko arimaw ago so barowang na sebeten ako niyan mambo
ko lima angkoto a Pilistiyo."
Na pitero i Saolo ki Daod a "Ika roo den, na makaogop reka so Allah!"
38 Na piyakinditar i Saolo ki Daod so nditaren iyan sa katidawa. Siyolotan iyan pen sa

raben a potaw na tiyagoan iyan sa ilmit a tombaga a olo niyan.
39 Initakip i Daod so pedang i Saolo ko liyo o raben na tipengan iyan melalakalakaw ka
kagiya kena a ba niyan kalalayami so kaosara sii.
"Di aken ai kilalakaw," a tig iyan ki Saolo, "ka kena a ba aken kalalayami;" na
inendaan iyan.
40 Oriyan iyan na kinowa niyan so teken iyan na miyamili sa lima timan a manga titilak a
ator a poon ko baogan na tiyago iyan ai ko pontir iyan. Na lominiyo sekaniyan a
kakapetan iyan so salibat iyan sa kapagatowi niyan ki Goliyat.
Biyono i Daod si Goliyat
41 Milalakalakad so Pilistiyo a pepekadaseg ki Daod a maoona rekaniyan so pegawid ko

kelong iyan.
42 Tintengan iyan si Daod na miyailay niyan a matag baden wata a marigariga i paras ago
mataid, na pisodi iyan.
43 Na pitero iyan ki Daod a "Ba aya katao ngka on na matag ako baden aso a pesongowan
ka a maawid ka sa teken?" Na pisintaan iyan si Daod a nggolalan ko manga katohanan
iyan.
44 “Song ka sii," a tig iyan ki Daod, "ka ibegay aken so sapo o ka a kapegedasan o manga
papanok ago so manga binatang!"
45 Na pitero on i Daod a "Pesong ka raken a kagogomaanan sa pedang ago bangkaw ago

sebat, ogaid na pesong ako reka sii ko Ingaran o Allah a Lebi a Mamaapaar a so Tohan o
manga sondaro a Israil a pepangeraren ka.
46 Sangkai a gawii na peladen ka o Allah ko lima ko, na mbonoon ko seka ago potolan
ko seka sa olo. Imanto a gawii na imbegay aken so manga bangkay o manga sondaro a
Pilistiyo a kapegedasan o manga papanok ago sii ko manga iila a binatang, na ketokawan
o dalem a doniya a aden a Tohan sii sa Israil.
47 Na so langon a malilimod sii na ketokawan iran a kena a ba nggolalan ko pedang o di
na bangkaw a kapepekasabet o Allah, ka so kapakipetidawa na rek o Allah, na peladen
kano niyan langon ko kapaar ami."
48 Na sii ko kapepekadaseg i Goliyat ki Daod a nggobat rekaniyan na minggagaan

malalagoy si Daod ko romarantar a manga sondaro a Pilistiyo sa kapagatowi niyan on.
49 Domiyodo ko oyot iyan sa ator na inisalibat iyan ki Goliyat. Miyasogat iyan sekaniyan
sa beneng na minitaled so ator ko beneng iyan, na minisomek a paras iyan ko lopa.
50 Giyoto den i kiyatabana i Daod ki Goliyat a aya minidaag iyan on na salibat ago ator.
Apiya pen o da den a ba niyan kaaawidi a pedang na miyasogat iyan si Goliyat na
miyapatay niyan.
51 Piyalalagoy sekaniyan i Daod na diyapoan iyan, na binindas iyan so pedang i Goliyat
ko tagoban iyan na inipotol iyan on ai ko olo niyan.
Kagiya mailay o manga Pilistiyo a miyatay so mabager a sondaro iran na tomiyalikod
siran a miyamalagoy.
52 Na sarta den a miyamangogiyab so manga mama sa Israil ago Yodah na piyanaloba
iran siran taman sa Gat ago sii ko manga gimowa a Ikron. Na kikakekelit so miyapamono
a manga Pilistiyo sii ko lalan a ipesong sa Siyaaraim taman den sa Gat ago Ikron.
53 Kagiya komasoy so manga Israil ko kiyapanalobaa iran ko manga Pilistiyo na
pitebanan iran so kampo iran.
54 Kinowa i Daod so olo i Goliyat na inowit iyan sa Yarosalim, ogaid na tiyago iyan ko
barombarong iyan so manga gomaan i Goliyat.
Piyakaadap si Daod ki Saolo
55 Sii ko kambabantayi i Saolo ki Daod ko kapembalaka niyan ki Goliyat na inisean iyan

si Abnir a so komandir o manga sondaro a tig iyan a "Antawaa i kiwata sangkoto a
mangoda?"
Tig i Abnir a "Mataan ko kaooyagoyag ka, Dato, a di aken katawan."
56 Na pitero on i Saolo a "Pangingiseen ka o antawaa i kiwata sangkoto a mangoda."
57 So den so kiyapakakasoy i Daod oriyan o kiyabonoa niyan ki Goliyat na kinowa

sekaniyan i Abnir ka piyakaadap iyan ki Saolo a kaaawidan pen i Daod so olo i Goliyat.
58 “Antawaa i kiwata reka, mangoda?" a iniise on i Saolo.
Tig i Daod a "Wata ako o oripen ka a si Yasay a taw sa Bitlihim."
1 SAMOWIL 18
Oriyan o kinimbitiyarain i Saolo ki Daod na so niyawa i Yonatan na lagid o ba miyaisaisa
ago so niyawa i Daod, na kiyababayaan sekaniyan i Yonatan a datar o kapekebabayai
niyan sa ginawa niyan.
2 Ipoon sangkoto a gawii na ipepegepeda i Saolo si Daod na da niyan den pakabalinga ko
walay o ama iyan.
3 Na miyakipesadanowa si Yonatan ki Daod ka kagiya pekebabayaan iyan a datar a
ginawa niyan.
4 Inendaan i Yonatan so kimon a sosoloten iyan na inibegay niyan ki Daod a rakes o
raben iyan, so pedang iyan, so pana iyan ago so sambitan iyan.
5 Mapiya i bobolos si Daod ko apiya antonaa i ipesogo on i Saolo a penggolaolaan iyan.

Sabap roo na biyaloy sekaniyan i Saolo a isa ko olowan o manga sondaro niyan.
Inikasoat ai o langon a taw ago so pen so manga sondaro i Saolo.
Riniit i Saolo si Daod
6 Sii ko kapembaling o manga sondaro ko oriyan o kiyabonoa i Daod ki Goliyat na

mililiyo so manga babay a miyamakapoon ko langon a inged sa Israil sa kapegalawa iran
ki Dato Saolo a di siran dii mamagidaida ago dii sesayaw sa kapekebabaya a rakes o dii
katembor ago dii kamboboniboniyan.
7 Sii ko di iran dii kakeriyala na di iran dii ipamagidaida a:
"Miyakapatay si Saolo sa kasenggibo,

na miyakapatay si Daod sa kasepolo nggibo!"
8 Inikarata a ginawa i Saolo angkai a idaida na tanto sekaniyan a kiyararangitan a tig iyan
ko ginawa niyan a "Inisela iran ki Daod so dii kateroa sa 'kasepolo nggibo,' ogaid na
saken na 'kasenggibo' baden, na aya pen o ba niyan di makowa so ndatoan?"
9 Na inipoon sangkoto a gawii na lalayon sisilegen i Saolo si Daod a periiten iyan.
10 Sii ko telondog a gawii na so saitan a poon ko Tohan na somiyook ki Saolo na

miyameteng sekaniyan sii ko walay niyan. Samaoto na pepangotiyapi si Daod a datar
gowani na makakakapet si Saolo sa bangkaw.
11 Na inibangkaw niyan ai ki Daod a aya paninti a akal iyan na "Ideket aken sekaniyan a
bangkaw ko keleb." Ogaid na miyakadowa den manggolaola a kiyapakalidas on i Daod.
12 Ipekelek i Saolo si Daod sabap sa so Allah na lalayon ki Daod a tiyalikodan iyan den
si Saolo.
13 Kagiya ka maoto na piyakaawa iyan si Daod ko di niyan on dii katelagadi ka biyaloy
niyan a komandir o sanggibo a manga sondaro, na pagoolowanan siran i Daod ko di iran
dii kanggogobat.
14 Mapiya sekaniyan i bobolos ko langon a di niyan dii nggolaolaan ka lalayon rekaniyan
so Allah.
15 Kagiya mailay i Saolo so kapiya i bobolos i Daod na kiyalonsanan baden so
kipekeleken iyan on.
16 Ogaid na so langon a taw sa Israil ago sa Yodah na pekebebayaan iran si Daod ka
sekaniyan i magoolowan kiran ko di iran dii kanggogobat.
Miyapangaroma i Daod so Wata a Babay i Saolo
17 Samaoto na pitero i Saolo ki Daod a "Katii so kaka a wata aken a babay a si Mirab.
Pakipengaroma ko reka asar a pakawawaraw ka sabap raken sii ko di ngka dii
kapakitidawa ko manga katidawa a takdir o Allah." Aya pipikiren i Saolo na "So den so
manga Pilistiyo i makabono on a kena a ba giya ginawa ko!"
18 Ogaid na pitero i Daod ki Saolo a "Antawaa ko ago antonaa i pamiliya ko sii sa Israil a
matag ako den kebaloy a miyakamong o dato?"
19 Ogaid na sii ko kiyaoma o taalik sa kimbegan ki Mirab ki Daod a mapengaroma niyan
na sii baden inibegay ki Adriyal a taw sa Miholah.
20 Ogaid na so wata a babay i Saolo a si Mikal na pekebabayaan iyan si Daod, na kagiya

matero ini ki Saolo na inikasoat iyan.
21 Ka aya paninti a akal iyan na "Ibegay aken si Mikal ki Daod a militag on kaan mabono
si Daod o manga Pilistiyo." Sabap roo na ikadowa den aya a kiyateroa on i Saolo a
"Kebaloy ka imanto a miyakamong raken."
22 Na siyogo i Saolo so manga talasogoay niyan a tig iyan on a "Mbitiyarain iyo si Daod
sa masolen na teroa niyo ron a 'Ilaya ngka man, ka miyasoat reka so dato na
pekebabayaan ka o langon a sanasanaan iyan. Aya mapiya na mabaloy ka imanto a
miyakamong ko dato.'"
23 Na pitero iran ai ki Daod, ogaid na tig i Daod a "Ba aya katao niyo ron na makep so
kabaloy a miyakamong ko dato a matag ako mama a miskin a da a bantogan iyan."
24 Kagiya matero o manga talasogoay ki Saolo so miyatero i Daod

25 Na tig i Saolo a "Teroa niyo ki Daod a 'Aya bo a kabaya o dato a mibetang ka na so
magatos timan a kobal ko sangoran o miyapamono a manga Pilistiyo kaan kasaopi so
manga ridoay niyan." Ogaid na aya kekadiyaten i Saolo na mapatay si Daod o manga
Pilistiyo.
26 Kagiya matero o manga talasogoay ki Daod angkai a pitero i Saolo na miyababaya

sekaniyan a mabaloy a miyakamong ko dato. Sabap roo na sa da pen kapopos o taalik
27 Na lomiyalakaw si Daod ago so manga mama niyan na miyakapatay siran sa dowa
gatos a manga Pilistiyo. Inowit iyan so manga kobal iran na inibegay niyan ko dato a
matatarotop so kadakel iran kaan sekaniyan mabaloy a miyakamong ko dato. Mandiyadi
na piyakipangaroma on i Saolo so wata iyan a si Mikal.
28 Kagiya mailay i Saolo a lalayon so Allah ki Daod ago kiyatokawan iyan a so wata iyan
a si Mikal na pekebabayaan iyan si Daod
29 Na baden kiyaomanan so kipekeleken on i Saolo, na lalayon iyan riridoon si Daod ko
kaooyagoyag iyan pen.
30 So manga olowan o manga sondaro a Pilistiyo na ipeteros iran den a di iran dii
kapakitidawa, na oman siran makipetidawa na lebi a mapiya i bobolos si Daod a di so
apiya antawaa ko ped a manga olowan o manga sondaro i Saolo. Sabap roo na miyabaloy
si Daod a tanto a kababantogan.
1 SAMOWIL 19
Miyangangampedian si Yonatan mipantag ki Daod
Pitero i Saolo ki Yonatan a wata iyan ago so langon a sanasanaan iyan a kekadiyaten iyan
so kabonoa ki Daod. Ogaid na pekebabayaan i Yonatan si Daod
2 Na piyakaiktiyar iyan den a tig iyan a "So ama aken na mananamar reka mono.
Kapedipedi ka bo na pananggila ka mapita; nggiloba ka sa katepokan ka na go ka on
gegenek.
3 Meliyo ako a tindeg ko obay o ama aken sii ko pangomaan a katatagoan reka.
Makimbitiyarai ako ron mipantag reka na o aden
a miyapariksa aken na teroon ko reka."
4 Na piyodi i Yonatan si Daod ki Saolo a tig iyan a "Kapedipedi ka bo, dato, na o ba ngka
nggolaolai sa marata so oripen ka a Daod, ka da reka den makandosa ago mala reka i
gona so langon a miyanggolaola niyan.
5 Iniserakan iyan so niyawa niyan isako bonoon iyan si Goliyat, na migay so Allah sa
mala a kiyapakataban para sa Israil. So kiyailaya ngka on na miyababaya ka. Ino ngka
baden kebayai memarata so da a sala iyan a mama sa kambonoa ngka ki Daod sa da a
sabap iyan?"
6 Na piyakineg i Saolo si Yonatan na inisepa iyan a tig iyan a "Mataan ko kaooyagoyag o

Allah a di den kebono si Daod."
7 Sabap roo na tiyalowan i Yonatan si Daod na piyanotol iyan on so langon a kabasa i
Saolo. Na inowit iyan si Daod ki Saolo na pepanalagadan iyan si Saolo a datar gowani.
Inogopan i Mikal si Daod sa Kapalagoy niyan ki Saolo
8 Aden peman a katidawa na somiyong on si Daod ka miyakitidawa ko manga Pilistiyo.

Tanto a mala a kiyatabana niyan kiran na kiyapalagoyan iran si Daod.
9 Miyakaisa a gawii na so saitan a poon ko Allah na somiyook ki Saolo sii ko kaoontod

iyan ko walay niyan a makakakapet sa bangkaw, na ndodoo si Daod a pepangotiyapi.
10 Tipengan i Saolo a ideket iyan sekaniyan a bangkaw ko keleb, ogaid na kiyalidasan i
Daod na minisogat so bangkaw ko keleb. Na miyakapalagoy si Daod sangkoto a
kagagawii.
11 Somiyogo si Saolo sa makapanoriman ko walay i Daod kaan iran sekaniyan mabono

iran sii ko kapipita. Ogaid na si Mikal a karoma i Daod na piyakaiktiyar iyan a tig iyan a
"O di ngka palagowin a ginawa ngka imanto a gagawii na kebono ka mapita!"
12 Mandiyadi na inalogan i Mikal si Daod ko rowasan na minggagaan roo mawa a
miyalagoy.
13 Oriyan iyan na kominowa si Mikal sa barahala a piyakaiga iyan ko igaan, na bitadan
iyan sa olona a bombol a kambing so olo niyan na tiyanggoban iyan.
14 Kagiya makaoma so manga mama a siyogo i Saolo a ndakepen iran si Daod na pitero i
Mikal a "Pekesakit sekaniyan."
15 Ogaid na piyakakasoy i Saolo so manga mama sa kailaya iran ki Daod a tig iyan a
"Wita niyo sekaniyan raken apiya makaiiga ko igaan iyan kaan aken mabono."
16 Ogaid na kagiya somoled so manga mama na aya iran bo miyatoon na so barahala ko
igaan iyan ago so olona a bombol a kambing sii ko olo niyan.
17 Na pitero i Saolo ki Mikal a "Ino ako ngka pegakali sa datar ai a piyakapalagoy ngka
so ridoay aken?" Na tig i Mikal a "Pitero iyan a mbonoon ako niyan o di aken sekaniyan
pakapalagoya."
Somiyong si Daod ki Samowil sii sa Ramah
18 Kagiya makapalagoy si Daod na somiyong ki Samowil sii sa Ramah, na piyanotol iyan

on so langon a pinggolaola on i Saolo. Oriyan iyan na somiyong siran ago si Samowil sa
Nayot na komiyaden siran roo.
19 Miyatero ki Saolo a ndodoo si Daod sa Nayot sii sa Ramah;
20 Sabap roo na somiyogo sekaniyan sa makadakep on. Ogaid na kagiya makailay siran
sa sesagorompong a manga nabi a pepangalamat a ped iran si Samowil a magoolowan
kiran na minitemo so Roh o Tohan ko manga siyogo i Saolo na miyangalamat siran
mambo.
21 Miyapanotol ai ki Saolo na somiyogo sekaniyan pen roo sa ped a manga mama na
miyangalamat siran mambo. Na ikatelo den manggolaola a somiyogo roo si Saolo sa
manga mama na baden miyamangalamat mambo.
22 Oriyan iyan na si den si Saolo i somiyong sa Ramah. Kagiya makaoma ko mala a
paridi sii sa Siko na miyangingise a tig iyan a "Anda si Samowil ago si Daod?"
"Ndodoo siran sa Nayot sii sa Ramah," a inisembag iran.
23 Na giyoto a miyantap sekaniyan sa Nayot sii sa Ramah, ogaid na minitemo rekaniyan

mambo so Roh o Tohan na lomiyalakaw sekaniyan a dii mangalamat taman ko
kiyapakaoma niyan sa Nayot.
24 Inendaan iyan so kimon iyan na miyangalamat mambo sii ko kamamasaan i Samowil.
Na miiga sekaniyan a da a nditaren iyan sangkoto a miyababasa alongan ago miyababasa
gawii. Giyoto i dii kateroa o manga taw sa "Ba ped mambo si Saolo ko manga nabi?"
1 SAMOWIL 20
Si Daod ago si Yonatan
Samaoto na miyalagoy si Daod a poon sa Nayot sii sa Ramah na somiyong ki Yonatan.

"Antonaa i miyanggolaola ko?" a iniise iyan on. "Antonaa i kasalaan aken? Antonaa i
minisela aken ki ama a ka a ipananamar iyan ko niyawa ko?"
2 “Di den ai benar!" a inisembag i Yonatan. "Di ka petay! Da den a penggolaolaan i ama
aken a maito mala a ba niyan raken di mapayag a daan. Ngkaino niyan raken mapegma?
Kena ini a ba benar!"
3 Ogaid na pitero i Daod a "Mataan den a katawan i ama a ka a ipekelimo ako ngka, na
miyatero iyan sa ginawa niyan a 'Di kapekitokawan ki Yonatan so kekadiyaten ko ka o ba
baden makamboko.' Ogaid na matamataan ko kaooyagoyag o Allah ago so kaooyagoyag
ka a sasalakad bo a let aken ko kapatay!"
4 Tig i Yonatan a "Apiya antonaa i kabaya a ka na inggolalan aken para reka."
5 Na pitero on i Daod a "Ilaya ngka man ka mapita na selasela ko saribolan na giyanan so

kapepekaatoang aken ko dato; ogaid na pakalalakawa ko ngka baden kaan ako makatepok
ko pangomaan taman sa merimon amay ka isa a gawii.
6 O isean ako o ama a ka na teroa ngka on a 'Miyangangampedian raken si Daod a
makabaling nggagaan sa Bitlihim a inged iyan sabap ko kiyatemeg o kapekorban roo o
langon a tonganay niyan.'
7 O teroa niyan a 'Mapiya nan,' na da a pekakaid raken. Ogaid na o tanto sekaniyan a
kerarangiti na ketokawan ka den a miyanget sa pikir iyan a kapemaratai niyan raken.
8 Kagiya ka maoto na kalimoon ako ngka na tomanen ka so inisemaya a ka raken ko
kiyapesadanowai ta sii ko hadapan o Allah. Ogaid na o miyakasela ako na seka den i
bono raken!
Ino ako ngka pen kepalad ko ama a ka?"
9 “Di den!" a tig i Yonatan. "O kiyatokawi aken a miyanget sa ginawa i ama a
kapemaratai niyan reka na ba aken reka di mapetero?"
10 Na iniise on i Daod a "Antawaa i makapetero raken on o sembaga ka o ama a ka sa

masarangit?"
11 “Ita roo," a tig i Yonatan; "somong ta ko pangomaan." Na somiyong siran on a dowa.
12 Pitero pen i Yonatan a "Isepa aken ko Allah a Tohan sa Israil a isean ko si ama mapita
sa datar ai a oras ago amay ka isa gawii! O mapipiya reka a ginawa niyan na ba aken seka
di kesogoi ago matero reka?
13 Ogaid na o kebaya reka memarata si ama na kamorkaan ako o Allah sa tanto a
maregen o di aken reka pakitokawi ago mapakapalagoy aken seka a da ka kapakasakiti!
Na pengnin ko a malalayon reka so Allah a datar sa miyaona a kalalayon iyan ki ama
aken!
14 Pakiilain ka raken so limo o Allah taman ko kaooyagoyag aken pen; ogaid na o petay
ako
15 Na di ngka den potola so limo o ka ko pamiliya ko, apiya pen amay ka miyapamotol o
Allah so oman i isa a ridoay ngka sii ko dalem a doniya."
16 Giyanan i kiyapakipesadanowai i Yonatan ko mbawataan i Daod, na pitero iyan pen a
"Mapakitaban o Allah si Daod ko manga ridoay niyan o barobaa niyan ai!"
17 Na piyakapemataan peroman i Yonatan si Daod ko inisepa iyan sabap ko
kapekebabayai niyan on, ka pekebabayaan i Yonatan si Daod a datar o kapekebabayai
niyan sa ginawa niyan.
18 Oriyan iyan na pitero i Yonatan ki Daod a "Mapita na selasela ko saribolan na

mipemagisei ka, ka da a pekaontod ko korsi i ka.
19 Amay ka isa a gawii ko kaperimon iyan na song ka ko darpa a pitepokan ka isako
miyaona na nayaw ka roo ko kilid o mitatabotod a ator.
20 Na penaan ko so ator sa telo a gasa ka aya katao ron na ba ako den dii tindo.
21 Oriyan iyan na sogo ako sa bago a mama a peteroon ko ron a 'Ika roo; nggilobaa ngka
so manga gasa.' O teroa ko ron a 'Ilaya ngka, ka so manga gasa na sii sa talikodan ka;
pangowaa ngka,' na amay ka magiyoto na song ka raken ka matamataan ko kaooyagoyag
o Allah a makasasarig ka a da den a ba reka pekakaid.
22 Ogaid na o teroa ko ko wata a "Ilaya ngka, ka so manga gasa na sii sa onaan ka,' na
palagoy ka den ka pekaawaan ka o Allah.
23 Na so peman so kapasadan a pimbitiyaraiyan ta na tatanodi ngka a so den so Allah i di
rekta dii seksi!"
24 Mandiyadi na mitepok si Daod ko pangomaan. Kagiya raoten so kapista ko saribolan

na miyontod so dato Saolo ka ken.
25 Miyontod sekaniyan ko kalalayaman a darpa iyan ko obay o keleb a mipepantag iyan si
Yonatan, na moontod si Abnir a maabay ki Saolo. So darpa i Daod na da a moontod on
26 Ogaid na da den a pitero i Saolo sangkoto a gawii ka aya katao niyan on na "Baanda
aden a miyasowasowa i Daod a minidalem on a hadas; mataan a di sekaniyan masosoti."
27 Ogaid na sii ko telondog a gawii ko ikadowa gawii ko olanolan na da den kaontodi so
darpa i Daod. Na iniise i Saolo ki Yonatan a "Ino da makatalingoma ko kakan so wata i
Yasay kagai ago imanto?"
28 Tig i Yonatan a "Miyangangampedian raken modas si Daod sa kapakasong iyan sa

Bitlihim.
29 Pitero iyan a 'Pakalalakawa ko ngka, ka so pamiliya mi na peselasela sa kakorban sii
ko siti, na piyantonan ako o pagari aken a somong ako roo. O kelimoon ako ngka na
pakalalakawa ko ngka kaan aken mipagilaya so manga pagari aken.' Giyanan i da niyan
kapakadarpa ko lamisaan o dato."
30 Na somiyokeyaw so rarangit i Saolo ki Yonatan na pitero iyan on a "Wata ka o bibid

ago pesopak a babay! Ba aken di katawi a pegampilan ka so wata i Yasay a di ngka dii
mikeya ago kayaan o ina a ka a mimbawata reka?
31 Taman sa kaooyagoyag o wata i Yasay sii ko doniya na di ka den makapembeken aya
pen o ba so kapendato o ka. Na, sogoi ngka sekaniyan ago wita ngka raken ka mataan
den a mbonoon!"
32 “Ino sekaniyan kebono? Antonaa i miyanggolaola niyan?" a iniise i Yonatan ko ama

iyan.
33 Ogaid na inibangkaw rekaniyan baden i Saolo so bangkaw niyan sa kambonoa niyan
on. Mandiyadi na kiyatokawan den i Yonatan a miyanget sa pikir o ama iyan a kambonoa
niyan ki Daod.
34 Na tominikeras si Yonatan ko oontodan iyan a tanto a pekerarangitan, na da den kan

sangkoto a gawii a so ikadowa gawii ko olanolan ka di niyan dii mboko si Daod sabap sa
piyakaito i ama iyan.
35 Kagiya mapita na somiyong si Yonatan ko pangomaan ka ipetelaboka iyan si Daod.

Aden a pakaoonoten iyan a bago a mama
36 Na pitero iyan ko wata a "Palalagoy ka na go ngka nggilobaa so manga gasa a ipena
aken," na sii ko kapepalalagoy o wata na inipana iyan so gasa a miyakalepas on.
37 Kagiya makaoma so wata ko kiyaologan ko gasa na tiyalowan i Yonatan a tig iyan a
"Ba reka di makalelepas so gasa?" Na liyalis peroman i Yonatan a tig iyan a "Nggagaan
ka malalagoy! Di ka den tereg!" Na piyorot o wata so gasa na komiyasoy ko kadnan
iyan.
39(Da den a peleng sii o wata; si bo si Yonatan ago si Daod i matao ron.)
40 Oriyan iyan na inibegay i Yonatan ko wata so pana iyan a tig iyan a "Ika roo den;
kasowin ka ini ko siti."
41 Kagiya maipos so wata na gomimaw si Daod a poon ko kilid o mitatabotod a ator na

romiyoko sa miyakatelo ko kiyasodiyodi niyan ki Yonatan. Oriyan iyan na miyagareka
ago misegeda siran, ogaid na mala a kiyapakasegad i Daod.
42 Na pitero i Yonatan ki Daod a "Lalakaw ka den sa da a rayorayo a ginawa, ka

miyakasepai ta sii ko Ingaran o Allah, na pekitoman rektano o Allah ago so moriyataw
ngka ago so moriyataw aken so kapasadan ta sa taman sa pakataman." Oriyan iyan na
lomiyalakaw si Daod na komiyasoy si Yonatan ko siti.
1 SAMOWIL 21
Si Daod ago so Soti a Paan
Somiyong si Daod ko imam a si Ahimilik sii sa Nob. Tiyabad si Ahimilik sa kalek

kagiya mailay niyan si Daod, na inisean iyan a "Ino seka bo a da a ped ka?"
2 Tig i Daod a "Aden a inisogo raken o dato a ipenggolalan aken, na pitero iyan raken a
'Da den a pekatokawa ngka mipantag ko pesogoan reka ago so iniinsarat aken reka.' So
peman so manga pagtaw aken a manga mama na miyatero aken kiran a talaboka ko iran
ko ped a darpa.
3 Na, antonaa i matatago reka sii? Begi ako ngka sa lima timan a paan, o di na apiya
antonaa i ketoon ka."
4 Na pitero on o imam a "Da den a kalilid a paan a matatago aken sii, ogaid na aden a soti
a paan a kekowa ngka asar a makalilidas so manga mama ngka ko kadadalemi kiran a
hadas."
5 Pitero i Daod a "Mataan a da den a babay a ba ami miyaobay, a datar gowani igira aden
a pelalakawan aken. Pesotin o manga mama a ginawa iran apiya sii ko kalilid a
kapelalakaw ami. Aya pen ari imanto i ba siran di masosoti sangkai a pesogoan rekami o
dato?"
6 Mandiyadi na inibegay o imam ki Daod so soti a paan, ka da den a paan roo a rowar ko
paan a inisapaat ko Allah a miyakowa den ko lamisaan a pesepaatan on ago kiyasambian
den sa mayaw.
7 Ndodoo so isa ko talasogoay i Saolo sangkoto a gawii ka aden a petomanen iyan ko

hadapan o Allah. Aya ngaran iyan na si Doweg a Idomiyan a olowan o manga
pananagikor sa bilibili i Saolo.
8 Na pitero pen i Daod ki Ahimilik a "Ba aden a bangkaw o di na pedang ka sii a kibegay
ngka raken? Da aken kaawidi so pedang aken o di na ped a gomaan ka kagiya
miyakapaso raken so kiyasogoa raken o dato."
9 Na tig o imam a "Sisii so pedang i Goliyat a so Pilistiyo a miyapatay ngka sii ko

balintad a Ilah; bobongkosan ai sa dinis sii ko talikodan o saliko o imam. O kebayai ngka
na kowaa ngka den; da den a gomaan sii a rowar san."
"Da den a datar iyan!" a tig i Daod. "Began ka raken."
Miyagapas si Daod sii sa Gat
10 Gomiyanat roo si Daod sangkoto a gawii a pepalagoyan iyan si Saolo, na somiyong

sekaniyan ki Akis a dato sa Gat.
11 Ogaid na so manga talasogoay o dato na pitero iran ki Akis a "Ba kena a giyai si Daod
a so dato ko inged iyan? Kena a giyai so mama a dii ipagidaida o manga babay ko di iran
dii kaseyaw a tig iran a 'Miyakapatay si Saolo sa kasenggibo, na miyakapatay si Daod sa
kasepolo nggibo?' "
12 Tiyago i Daod ko poso iyan angkai a manga katero na tanto niyan a inikalek so dato
Akis.
13 Sabap roo na inalin iyan so olaola niyan ko kapekeilaya iran on, ka miniring sa
pembetengen sii ko kasisii niyan kiran a di niyan dii pangokotan so manga lekeb o
gimowa ago pepakatogaan iyan so ayog iyan ko sompa iyan.
14 Na pitero i Akis ko manga talasogoay niyan a "Ilaya niyo angkoto a mama!

Pembetengen sekaniyan! Ino niyo raken pagowita?
15 Ba raken kokorang so manga pembetengen? Ba giyanan i kiyawita niyo sii sangkai a
mama kaan dii makanggolaola sa datar ai ko hadapan ko? Ba pen ai pekasoleda ko walay
aken?"
1 SAMOWIL 22
Si Daod ago so manga Pagtaw niyan sii sa Adolam ago sa Mispah
Miyawa si Daod sa Gat ka miyagapas ko liyang sii sa Adolam. Kagiya maneg ai o manga
pagari niyan ago so ped ko pamiliya o ama iyan na tomiyapi siran on roo.
2 So pen so langon a taw a kikareregenan, o di na ana manga otang iyan, o di na di
masosoat na mitimotimo siran ki Daod, na mimbaloy sekaniyan a nakoda iran. Manga
pat gatos a manga mama a miyangeped on.
3 Miyawa roo si Daod na somiyong sa Mispah sii sa Mowab, na pitero iyan ko dato sa
Mowab a "Kapedipedi ka bo na pakakadena ngka sii so ama aken ago ina aken taman ko
katokawi ko o antonaa i penggolaolaan raken o Tohan."
4 Mandiyadi na inibegak iyan siran roo ko dato sa Mowab, na komiyaden siran on taman
ko katetapok den i Daod sii ko liyang.
5 Samaoto na miyakaoma ki Daod so nabi Gad na pitero iyan on a "Di ka sii tatareg ko
liyang. Awa ka sii na go ka song sa inged a Yodah." Na giyoto a miyawa roo si Daod na
somiyong sa kalasan sa Hirit.
Piyamono i Saolo so manga Imam sa Nob
6 Miyakaisa a gawii na ndodoo si Saolo ko bobongan sii sa Gibiyah a moontod ko atag o

mala a kayo. Kakapetan iyan so bangkaw niyan na kititindeg so langon a sanasanaan iyan
a lomilibet on. Miyatero ki Saolo a kiyatokawan den so katatagoan ki Daod ago so
manga mama niyan,
7 Na pitero iyan ko manga sanasanaan iyan a "Pamakineg kano a manga taw sa
Baniyamin! Ba niyo mapipikir a mbegan kano langon o wata i Yasay sa pembabasokan
ago manga asinda a obas, ago mbelowin kano niyan langon a manga olowan o
nggibonggibowan ago gatosgatosan a manga sondaro niyan?
8 Ba giyanan i sabap a kiyapagitai niyo raken langon? Da den a isa rekano bo a ba raken
miyakatero ko kiyapakipesadanowa o wata aken ko wata i Yasay! Da den a ba rekano
raken tomatago sa ginawa o di na rominipot sa piyangondoy o wata aken si Daod sa
kapananamari niyan raken mono a aya niyan dii nggolaolaan imanto!"
9 Ogaid na si Doweg a Idomiyan na tomitindeg roo a maaped ko manga sanasanaan i

Saolo, na pitero iyan a "Miyailay aken so wata i Yasay a miyakatalingoma ki Ahimilik a
wata i Ahitob sii sa Nob.
10 Iniise i Ahimilik ko Allah o antonaa i patot a penggolaolaan i Daod na bigan iyan pen
sa pangenengken ago so pedang i Goliyat a Pilistiyo."
11 Mandiyadi na piyakisongowan o dato so imam a si Ahimilik a wata i Ahitob ago so

langon o pamiliya o ama iyan a aya manga imam sii sa Nob, na palaya siran miyakaoma
ko dato.
12 Na pitero i Saolo ki Ahimilik a "Pamakineg ka, wata i Ahitob!"
"Oway, Kadnan," a tig iyan.
13 Na iniise on i Saolo a "Ino ako niyo pemagitai, sekano ago so wata i Yasay? Ino ngka
sekaniyan mbegi sa pangenengken ago pedang, ago inisean ka pen so Tohan pantag
rekaniyan a giyoto i sabap sa kaperidoa niyan raken ago kapananamari raken mono
imanto?"
14 Somimbag si Ahimilik a "Antawaa ko langon a oripen ka i datar i Daod a lebi a

kasasanaan, a so miyakamong ko dato, a olowan o manga gordiya ngka ago pagaadatan
sii ko walay ngka?
15 Ba giyangkoto a gawii so paganay a kiyaisei aken ko Tohan pantag rekaniyan?
Mataan den a kena! Pengnin ko, Kadnan, a di ako ngka senditan mipantag sii aya pen o
ba so apiya antawaa ko pamiliya o ama aken, ka da den a katawi aken sangkai langon a
dii manggoloala."
16 Ogaid na pitero o dato a "Matamataan a petay ka, Ahimilik; seka ago so langon o
pamiliya o ama a ka."
17 Na siyogo o dato so manga gordiya a tomitindeg ko kilid iyan a tig iyan a "Songowi
niyo ago pamonoa niyo so manga imam ko Allah, ka inampilan iran mambo si Daod.
Kiyatokawan iran a pepalagoy si Daod ogaid na da iran raken ripoten."
Ogaid na somiyangka baden so manga gordiya o dato sa o ba iran bayaon a lima iran sa
kapemonoa ko manga imam ko Allah.
18 Mandiyadi na siyogo o dato si Doweg a tig iyan a "Seka den i pamono ko manga
imam!" Na somiyong kiran si Doweg a Idomiyan na piyamono iyan siran, na walo polo
ago lima kataw a mama a kisosolot sa manga nditaren a imam a piyamono iyan sangkoto
a gawii.
19 Piyakipamono mambo i Saolo a pedang so manga taw sa Nob a so inged o manga
imam; so den so manga mama ago manga babay a rakes o manga wata ago manga
ikaririga, ago so pen so manga sapi, manga kimar ago manga bilibili.
20 Ogaid na si Abiyatar a isa ko manga wata i Ahimilik na miyakapalagoy ago miyagapas

ki Daod.
21 Piyanotol iyan ki Daod so kiyapamonoa i Saolo ko manga imam ko Allah.
22 Na pitero on i Daod a "Kagiya mailay aken roo si Doweg a Idomiyan sangkoto a gawii
na katawan aken a mataan den a peteroon iyan ki Saolo. Saken i kiyasabapan ko
kiyapatay o langon o pamiliya i ama a ka.
23 Kaden ka raken; di ka pekelek, ka so mananamar ko niyawa ngka na pananamaran
iyan mambo so niyawa ko. Malilinding ka sii raken.
1 SAMOWIL 23
Siyabet i Daod a Siti a Kilah
Miyatero ki Daod a "Dii makitidawa so manga Pilistiyo sa Kilah na di iran dii tebanen so
gopen piragon a pereperan."
2 Na inisean i Daod so Allah a tig iyan a "Ba ako roo song sa kanggobata aken sangkoto a
manga Pilistiyo?"
"Ika roo den," a inisembag o Allah, "na go ngka gobata so manga Pilistiyo ago sabeta
ngka a Kilah."
3 Ogaid na pitero rekaniyan o manga mama i Daod a "Ilaya ngka man, ka sii sa Yodah na
pekelek kami. Aya pen o ba tano song sa Kilah sa kipetidawaan tano ko manga sondaro a
Pilistiyo!"
4 Sabap roo na piperomanan mise i Daod so Allah, na aya inisembag on o Allah na "Song
ka roo sa Kilah, ka peladen ko so manga Pilistiyo ko lima ngka."
5 Mandiyadi na somiyong roo si Daod ago so manga mama niyan na miyakitidawa siran
ko manga Pilistiyo. Tanto a madakel a miyapatay iran kiran, na piyangowa iran pen so
manga pangangayamen iran. Giyoto i kiyasabeta i Daod ko manga magiinged sa Kilah.
6(Isako makapagapas si Abiyatar a wata i Ahimilik ki Daod sii sa Kilah na minitelon iyan
so saliko a imam.)
Siyaloba i Saolo si Daod
7 Miyatero ki Saolo a somiyong den si Daod sa Kilah, na pitero i Saolo a "Piyalad

sekaniyan raken o Tohan, ka kiyatangkalan i Daod a ginawa niyan ko kiyasoled iyan ko
siti a tatanggalen so manga gimowa iyan sa potaw."
8 Na tiyawag i Saolo so langon a sondaro niyan sa kapakipetidawa iran, ka song siran sa
Kilah sa kapelikopi ran ki Daod ago so manga mama niyan.
9 Kagiya katokawan i Daod a kekadiyatan sekaniyan i Saolo sa marata na pitero iyan ko

imam a si Abiyatar a "Wita ngka sii so saliko a imam."
10 Kagiya mawit on na tig i Daod a "Ya Allah a Tohan sa Israil, miyaneg aken a pitekdir i
Saolo a kasong iyan sii sa Kilah ka peminasaan iyan so siti sabap raken a oripen ka.
11 Ba ako sengkopen o manga taw sa Kilah ko kapaar iyan? Ba sii song si Saolo a datar
o kiyanega ko ron? Pengnin ko reka, ya Allah a Tohan o Israil, a teroa ngka raken."
Na tig o Allah a "Song sekaniyan roo."
12 Iniise peroman i Daod a "Ba ako sengkopen ki Saolo o manga taw sa Kilah?
Na tig o Allah a "Oway, isengkop ka iran."
13 Sabap roo na si Daod ago so manga mama niyan a manga nem gatos a kadakel iran na
miyamangawa sa Kilah na piyakatetepasa iran so manga darpa. Kagiya matero ki Saolo a
miyakapalagoy si Daod a poon sa Kilah na da sekaniyan roo song.
14 Komiyaden si Daod ko malilinding a manga darpa sii ko manga bobongan ko Disirto
sa Sip. Gawii gawii den na dii mbabanogen i Saolo si Daod ogaid na da den palada o
Tohan ko lima i Saolo.
15 Na kiyasabotan i Daod a lalayon sekaniyan peselobaan i Saolo ka pananamaran iyan so
niyawa niyan.
Pepekalidas si Daod ki Saolo sii ko Disirto
Sii ko katatago i Daod sa Horis sii ko Disirto sa Sip

16 Na somiyong on si Yonatan a wata i Saolo na piyangoyatan iyan si Daod sii ko Tohan.
17 “Di ka pekelek;" a tig iyan, "di ka kapekasakitan i ama aken a Saolo. Seka i kedato sa
Israil na pekatalondog ako reka sa kadato. Apiya si ama aken na katawan iyan ai."
18 Na mimbaal siran a dowa sa kapasadan ko hadapan o Allah. Oriyan iyan na miyaling
si Yonatan ogaid na tomiyaros komaden si Daod sa Horis.
19 Samaoto na so ped ko manga taw sa Sip na somiyong ki Saolo sii sa Gibiyah na pitero
iran on a "Sii rekami tetapok si Daod sii ko malilinding a darpa sa Horis ko bobongan a
Hakilah sa pagabagatan a Yasimon.
20 Na apiya anda i kaketerangi reka on nggolaola, dato, na song ka roo na sekami den i
matao somangkop rekaniyan sii reka."
21 Na pitero i Saolo a "Karakmatan kano o Allah sabap ko kipelimoon iyo raken!

22 Ikano roo den na pariksaa niyo ai piyapiya. Tokawi niyo o anda lalayon pesong si
Daod ago antawaa i miyakailay ron roo, ka miyatero raken a tanto sekaniyan a baraakal.
23 Tokawi niyo ago ilaya niyo so langon a darpa a di niyan dii tepokan, na kasoy kano
raken kaan iyo raken kapenotoli sa mataan. Oriyan iyan na monot ako rekano, na o
matatago sekaniyan pen ko inged na mbabanogen aken ko dalem a inged a Yodah."
24 Mandiyadi na gomiyanat siran a kesoy sa Sip a maona a di si Saolo. Samaoto na
ndodoo si Daod ago so manga mama niyan ko Disirto sa Maon sii ko balintad sa
pagabagatan a Yasimon.
25 Na mipoon on den mbabanog si Saolo ago so manga sondaro niyan, ogaid na miyatero
ini ki Daod na somiyong sekaniyan ko lakongan sii ko Disirto sa Maon na tomiyareg roo.
Kagiya maneg ai i Saolo na somiyong roo ko Disirto sa Maon a dii seloba ki Daod.
26 Sii pelalakaw si Saolo ago so manga sondaro niyan ko kilid o bobongan, na si Daod
ago so manga mama niyan na sii mambo ko sabala a kilid o bobongan a di siran dii
nggagaan sa kapepalagowi ran ki Saolo. Na sii den ko kapepekadaseg kiran i Saolo ago
so manga sondaro niyan sa kandakepa iran kiran
27 Na aden a sogo a miyakaoma ki Saolo a tig iyan a "Kasoy ka nggagaan! Penggobaten
o manga Pilistiyo so inged!"
28 Na ginekan seloba i Saolo si Daod ka komiyasoy sa kapakipetidawa iyan ko manga
Pilistiyo. Giyanan i sabap a pembetowan angkoto a darpa sa 'Lakongan sa
Kiyapakapalagoy.'
29 Na miyawa roo si Daod ka somiyong sa Inggidi ko di niyan dii tepokan a manga darpa.
1 SAMOWIL 24
Piyanganogonan i Daod so Niyawa i Saolo
Kagiya makakasoy si Saolo ko inged iyan ko kiyapakitidawa iyan ko manga Pilistiyo na

miyatero on a "Ndodoo si Daod ko Disirto sa Inggidi."
2 Sabap roo na piyakaonot i Saolo so telo nggibo a piyamagaraw a manga sondaro ko
dalem a Israil na lomiyalakaw siran sa kapembabanoga iran ki Daod ago so manga mama
niyan ko marani ko 'Manga Ator o Manga iila a Kambing.'
3 Miyakaoma sekaniyan ko liyang a marani ko manga kodal sa bilibili ko kilid o lalan, na

somiyoled sekaniyan on ka pekasong sa desel. Na giyoto so liyang a ron tetapok si Daod
ago so manga mama niyan sii ko lomang o soled iyan.
4 Pitero on o manga mama niyan a "Giyai so gawii a miyatero o Allah isako teroon iyan
reka a 'Peladen ko reka so ridoay ngka, na mapenggolaola ngka on so apiya antonaa i
kabaya a ka.'" Na minanay si Daod na piyotolan iyan so sisid o kimon i Saolo sa di niyan
katawan.
5 Ogaid na oriyan oto na misendit si Daod ko kiyapotoli niyan ko sisid o kimon iyan
6 Na pitero iyan ko manga mama niyan a "Misapar raken o Allah sa kanggolaolaa ko
sangkai a marata sii ko kadnan aken a so miyapili o Allah! Di aken den kapekatanaan sa
lima, ka sekaniyan i kiyaidinan o Allah!"
7 Inimbonget i Daod ko manga mama niyan angkai a manga katero, na da niyan kiran
peroa o ba iran kasondoli si Saolo.
Na lominiyo si Saolo ko liyang na tomiyaros lomalakaw.
8 Ogaid na lominiyo mambo si Daod na tiyalowan iyan si Saolo a tig iyan a "Hey kadnan
ko a dato aken!" Dominingil si Saolo, na romiyoko si Daod ko lopa ko kiyasodiyodi
niyan on.
9 Pitero iyan ki Saolo a "Ino ngka pekinega so dii teroon o manga taw a 'Pananamaran i
Daod a kapekasakiti niyan reka'?
10 So den so mata ngka i miyakailay imanto o andamanaya i kiyapalada reka o Allah ko
kapaar aken sii ko soled o liyang. Tigel ako o ped ko manga mama ko sa kambonoa ko
reka, ogaid na piyanganogonan aken seka a tig aken a 'Di aken pekatanaan sa lima so
kadnan aken ka sekaniyan i kiyaidinan o Allah.' Ilaya ngka, ama ko, angkai a saredit ko
kimon ka sii sa lima ko!
11 Piyotolan aken baden angkanan a sisid o kimon ka, ogaid na da ko seka bonoa. Sabota
ngka sii ago tangkeda ngka a da a ba aken mapipikir a kapemaratai aken reka o di na
kasopaka. Da a minisela aken reka, ogaid na peganopen ako ngka sa kakowaa ngka ko
niyawa ko.
12 Makokom ta o Allah o antawaa rekta i miyaribat! Itana reka o Allah so pinggolaola
ngka raken ogaid na kena a ba so lima ko i pekatana reka.
13 Katawan ka ngkai a andang a pananaroon a 'Aya dii nggolaola sa kamarataan
na so manga rarata a taw.' Sabap roo na kena a ba so lima ko i pekatana reka.
14 Antawaa i pananamaran mono o dato sa Israil. Antawaa i peselobaan ka? So maatay a
aso! So matag baden koto a aso!
15 So Allah i makakokom rekta na makokom ta niyan o antawaa rekta i miyaribat!
Pengnin ko a matarima iyan so kabenar aken ago mipanindeg iyan, ago mapakabenar ako
niyan ko kapekalidasa niyan raken ko lima ngka!"
16 Kagiya mapasad ai tero i Daod na iniise i Saolo a "Ba ngka nan katero, Daod a wata
aken?" Na mipoon sekaniyan den gomoraok.
17 Tig iyan pen a "Lebi ka a maontol a di saken. Mapiya a inikidia ngka raken, ogaid na
marata a minikidia ko reka.
18 Miyapayag ka imanto a mapiya so di ngka raken dii nggolaolaan, ka piyalad ako o
Allah ko kapaar ka ogaid na da ako ngka bonoa.
19 Igira a peketoon o mama so ridoay niyan na ba niyan baden pekapalagoya sa
da kasakiti? Kabalasan ka o Allah sa mapiya ko inikidia ngka raken imanto!
20 Katawan aken a mataan den a kedato ka, na pekaosor so ndatoan a Israil sii ko
katatangana ngka on.
21 Na sepaan ka raken imanto sii ko Ingaran o Allah a di ngka tipoden so kebabadan
raken aya pen o ba ngka papasa so ngaran aken ko pamiliya o ama aken."
22 Na inisepa ini i Daod ki Saolo.
Oriyan iyan na miyaling si Saolo, ogaid na komiyasoy si Daod ago so manga mama
niyan ko darpa a di iran dii tepokan.
1 SAMOWIL 25
So Kiyapatay i Samowil
Samaoto na miyatay si Samowil na miyalimod so langon o manga Israil ka pindiyagaan

iran; na inilebeng iran ko babalingan iyan sii sa Ramah.
Si Daod ago si Abigail a Karoma i Nabal

Oriyan iyan na miniseg si Daod roo ko Disirto sa Maon.
2 Aden a sakataw a mama sii sa inged a Maon a aden a lopa iyan roo sa Karmil. Tanto
sekaniyan a kawasa a kirek ko sanggibo a kambing ago telo nggibo a bilibili a
pepangopawan iyan roo sa Karmil.
3 Aya ngaran iyan na si Nabal, na so karoma niyan na si Abigail. Maongangen sekaniyan
a babay ago mataid, ogaid na so karoma niyan a taw ko mbawataan o Kaleb na madigala i
modol ago marata i olaola.
4 Sii ko katatago i Daod ko disirto na miyaneg iyan a pepangopawan i Nabal so manga

bilibili niyan.
5 Kagiya ka maoto na somiyogo sekaniyan sa sapolo kataw a mangoda a tig iyan on a
"Song kano sa Karmil na nggilobaa niyo si Nabal na salamen ako niyo ron.
6 Teroa niyo ron a 'Mamboway ka! Mapipiya a ginawa ngka ago so pamiliya ngka na
mapipiya mambo so langon a rek ka!'
7 “Teroa niyo ron pen a 'Miyaneg i Daod a pepangopawan ka imanto so manga bilibili
ngka, na kebayaan iyan reka makitokaw a isako matatago rekami so manga pananagikor
ka sa bilibili na da ami siran nggolaolai sa marata. Sii ko langon a gawii a kasisii ami pen
sa Karmil na da den a miyada ko manga rek iran.
8 Isei kami ngka bo, ka mipemataan ami reka ini. Sabap roo na kalimoon kami ngka, ka
kagiya aya kiyapakaoma mi reka na masa a kapista. Kapedipedi ka bo na begi kami ngka
a manga oripen ka ago so ginawai ngka a si Daod sa apiya antonaa i matatago reka a
kibegay ngka rekami.' "
9 Kagiya makaoma roo so manga mama i Daod na inisampay iran langon ki Nabal angkai
a manga katero sii ko ingaran i Daod. Oriyan iyan na nomiyayaw siran,
10 Na simbag siran i Nabal a tig iyan a "Antawaa ngkai a Daod? Antawaa ngkai a wata i
Yasay? Madakel a oripen sangkai a masa a miyakaawa ko manga kadnan iran!
11 Kena man o ba ino aken kowaa so paan aken ago ig ago sapo a siyombali aken a para
ko manga pangongopaw aken na ba sii aken baden imbegay ko manga mama a di aken
katawan o anda poon?"
12 Na mipeto so manga siyogo ka komiyasoy ki Daod. Kagiya makaoma siran na

piyanotol iran langon so kabasa i Nabal.
13 Pitero kiran i Daod a "Takipen iyo so manga pedang iyo!" Na pinggolaola iran ai.
Initakip mambo i Daod so pedang iyan na piyakaonot iyan so manga pat gatos a manga
mama, na so peman so dowa gatos na mitelimbegak ko manga pagigimo.
14 Na so isa ko manga oripen i Nabal na pitero iyan ko karoma i Nabal a si Abagail a

"Somiyogo si Daod sa manga mama a miyakapoon sa disirto sa kaselama iran ko kadnan
ami, ogaid na ba niyan siran baden piyagongatongat.
15 Ogaid na manga pipiya a manga mama oto sii rekami. Da kami ran nggolaolai sa
marata, na sii ko langon a masa a katatago ami ko pananateba a marani kiran na da den a
miyapanekew rekami.
16 Gagawii daondaw na lilindingen kami ran ko langon o masa a kapepanagikora mi ko
manga bilibili a marani kiran.
17 Tagoa ngka ini imanto sa ginawa na go ngka pamikira o antonaa i mapenggolaola
ngka, ka aden a kasiksaan a kitana ko kadnan tano ago sii ko langon o pamiliya niyan.
Tanto sekaniyan a sobeng a mama a da den a ba on makipembitiyarai!"
18 Na minggagaan si Abigail ka kominowa sa dowa gatos timan a paan, dowa ka tagoay a

arak, lima timan a miyasombali a bilibili, sapolo ago dowa ka gantang a miyapagiyaw a
pereperan, magatos tompi a pasas ago dowa gatos tompi a higos, na piyakiroran iyan ai ko
manga kimar.
19 Na pitero iyan ko manga oripen iyan a "Ona kano, ka tondog ako rekano." Ogaid na
da niyan ai teroa ki karoma niyan a si Nabal.
20 Sii ko kakokoda iyan ko kimar iyan ko pikoan o lalan sii ko silid o bobongan na sarta
den a miyabalak iyan si Daod ago so manga mama niyan a pepekaobay rekaniyan.
21 Aya on den kiyateroa i Daod sa ginawa niyan sa "Matamataan a da den a bali o
kiyapagipata ko ko langon a rek a mama oto sii ko disirto kaan da den a ba mada ko
langon taman iyan. Biyadalan ako niyan sa marata ko mapiya!
22 Kamorkaan ako o Tohan sa tanto a maregen o aden a sakataw bo ko langon a manga
mama niyan a pelambaan aken a oyagoyag amay ka mapita!"
23 Kagiya mailay i Abigail si Daod na minggagaan tomepad ko kimar iyan ago

somiyodiyod ki Daod a miniarek iyan so paras iyan sii ko lopa.
24 Na gomipe sekaniyan ko hadapan iyan a tig iyan on a "Sii raken den misendit angkai a
miyanggolaola, kadnan ko! Kapedipedi ka bo na pakateroa ko ngka a oripen ka na
pakinega ngka so mapetero aken!
25 Kapedipedi ka bo na di ngka tegoa sa ginawa ngkoto a marata a mama a si Nabal!
Domadait on so ngaran iyan a 'Nabal' a aya maana niyan na 'Lalong,' na misasarta on
mambo so kalalalongan!
Ogaid na so saken on peman, kadnan ko, na da aken mailay so manga mama a siyogo o
ka.
26 “Na imanto, kadnan ko, sabap sa inilidas ka o Allah sa kapakapamono ago so kisaopen
ka sa ginawa ngka na mataan den ko kaooyagoyag o Allah ago so kaooyagoyag ka, ka so
manga ridoay ngka ago so langon a mananamar reka memarata na mabaloy a lagid i
Nabal sa kandanega on!
27 Na tarimaa ngka, kadnan ko, angkai a pamemegayan a inowit aken reka a imbegay ko
manga mama a pegonot reka.
28 Kapedipedi ka bo na rilai ngka so apiya antonaa sala aken, ka matamataan a
pakapembekenen o Allah so kapekebabad o pamiliya ngka sa taman sa pakataman sabap
sa di ka dii makitidawa ko manga katidawa a takdir o Allah. Na pengnin ko a da den a
marata a ba sisii reka taman ko kaooyagoyag ka!
29 Apiya pen o aden a perido reka a peseloba reka a mananamar ko niyawa ngka na
pekeped so niyawa ngka ko bekesan o kikaooyagoyag a sisiyapen o Allah a Tohan ka.
Ogaid na so niyawa o manga ridoay ngka na ipelantig iyan a datar o ator a mapopoyo ko
salibat.
30 Na amay ka ipetoman reka o Allah so oman i mapiya a initopa niyan mipantag reka
ago itoro ka niyan a dato sa Israil
31 Na kena a ba ipekerata a ginawa ngka aya pen o ba miyawid a akal ka so
kapakapamono sa da a sabap iyan o di na so kisaopen ka sa ginawa ngka. Na amay ka
began ka o Allah sa mapiya a bobolos na tatademi ako ngka a oripen ka."
32 Na pitero i Daod ki Abigail a "Podin so Allah a Tohan o manga Israil a somiyogo reka
sangkai a gawii sa kabalaka ngka raken.
33 Karakmatan ka sabap ko mapiya a panarima a ka ago so kiyapakalidasa ngka raken
imanto ko kapakapamono ago so kisaopen ko sa ginawa ko a nggolalan ko rek aken a
kapaar!
34 Siyaparan ako o Allah sa kapekasakiti aken rekano, ogaid na matamataan den ko
kaooyagoyag o Allah a Tohan o Israil ka o da ka nggagaan raken somong sa kabalaka
ngka raken na da den a sakataw bo a mama a rek i Nabal a ba kelamba a oyagoyag amay
ka mapita!"
35 Na giyoto a tiyarima i Daod so pamemegayan a inowit iyan on a tig iyan a "Baling ka

den a mapipiya a ginawa ngka, ka piyakineg aken so pitero o ka na inampon aken so
piyangni ngka."
36 Kagiya komasoy si Abigail ki Nabal na sii sekaniyan sa walay a dii mbangkiti a datar o
dato. Masosonor so poso iyan ka kagiya tanto sekaniyan a mabebereg. Sabap roo na da
den a ba on miyatero i Abigail taman ko kiyapita iyan.
37 Na kagiya mapita, kagiya kaliwawasan si Nabal, na piyanotol on o karoma niyan so
langon angkai a miyanggolaola. So kiyanega niyan on na kiyadaan den sa bager so poso
iyan na miyaninder so lawas iyan a datar o ator.
38 Na kagiya mamakasapolo den gawii na siniksa o Allah si Nabal a aya niyan inipatay.
39 Kagiya maneg i Daod a miyatay si Nabal na pitero iyan a "Podin so Allah a initindeg
iyan so kabenar aken ki Nabal sabap ko kiyapakaitoa niyan raken. Inilidas ako niyan a
oripen iyan ko kapakanggolaola ko sa marata na initana iyan ko olo i Nabal so
kamarataan iyan."
Na piyakisongowan i Daod si Abigail a piyangni niyan on a mabaloy a karoma niyan.
40 Kagiya makaoma so manga sogo i Daod ki Abigail sii sa Karmil na pitero iran on
"Siyogo kami reka i Daod sa kapakaonota mi reka kaan ka niyan mapangaroma."
41 Na romiyoko si Abigail a miniarek so paras iyan ko lopa a tig iyan a "Katii ako bo a
oripen iyan a makatitiyagar mangonab ko ai o manga oripen iyan."
42 Na minggagaan maninimo si Abigail na mikoda sa kimar a oonotan sekaniyan o lima
kataw a manga raga niyan; miyonot siran langon ko manga siyogo i Daod na miyabaloy
sekaniyan a karoma niyan.
43 Miyapangaroma mambo i Daod si Ahinowam a taga Yasriil, na miyabaloy siran a

dowa a karoma niyan.
44 Ogaid na si peman si Saolo na piyakipangaroma niyan so wata iyan a babay a si Mikal
a so karoma i Daod ki Palti a wata i Lais a taga Galim.
1 SAMOWIL 26
Piyanganogonan peman i Daod so Niyawa i Saolo
Aden a manga taw sa Sip a miyakaoma ki Saolo sii sa Gibiyah a tig iran a "Tetapok si
Daod sii ko bobongan sa Hakilah ko kilid o disirto."
2 Na somiyong somambot si Saolo ko Disirto sa Sip a oonotan o telo nggibo a

piyamagaraw a manga sondaro sa Israil ka penggilobaan iyan roo si Daod,
3 Na mikempo sekaniyan ko kilid a lalan sii ko bobongan sa Hakilah. Ndodoo den si
Daod ko disirto, na kagiya maneg iyan a siyono sekaniyan roo i Saolo
4 Na somiyogo sa makapanoriman na kiyatokawan iyan a mataan den a miyakaoma roo si
Saolo.
5 Mandiyadi na gomiyanat si Daod na somiyong ko kaden a pikempowan i Saolo, na

miyailay niyan so darpa a iigaan i Saolo ago si Abnir a wata i Nir, a so komandir o manga
sondaro. Miiga si Saolo ko look o kampo a lomilibet on so manga sondaro.
6 Na inisean i Daod si Ahimelek a Hitiyo ago si Abisay a pagari i Yowab a so manga

wata i Siroyah a tig iyan a "Antawaa i magonot raken somong roo ki Saolo ko soled o
kampo?"
"Magonot ako reka," a tig i Abisay.
7 Sabap roo, kagiya magagawii, na somiyoled si Daod ago si Abisay ko kampo

o manga sondaro na miyaoma iran si Saolo a miiga a totorogen ko look o kampo a
miseseked so bangkaw niyan ko lopa a marani ko olo niyan, na si Abnir ago so manga
sondaro na miiga siran a lomilibet on.
8 Pitero i Abisay ki Daod a "Piyalad o Tohan so ridoay ngka ko kapaar ka sangkai a

kagagawii! Na, pakibasegen ka raken sekaniyan imanto a bangkaw sa makaisa bo a
tomantel ko lopa; di aken mbangkawan sa ba makadowa!"
9 Ogaid na pitero on i Daod a "Di ngka den pekasakiti! Da den a pekatana sa lima ko
miyapili o Allah a dato a ba di kesala!
10 Matamataan ko kaooyagoyag o Allah," a tig iyan pen, "ka so Allah i mbono on; o di na
keoma so adiyal iyan na petay bo; o di na makipetidawa sekaniyan a kebono.
11 Misapar raken o Allah o ba ko kapakatanai a lima so miyapili o Allah a dato! Na,
nggagaan ka na go ngka kowaa so bangkaw a marani ko olo niyan ago so omoy a
petegoan sa ig ka mawa ta sii den."
12 Na kinowa i Daod so bangkaw ago so petegoan sa ig a marani ko olo i Saolo na

miyawa siran roo. Da a ba on miyakailay o di na miyakatokaw aya pen o ba aden a
miyakanaw kiran ka kagiya piyakipangenepan siran o Allah sa torog.
13 Kagiya romipag siran ko sabala o balintad na tominindeg si Daod ko poro o bobongan
a malo mawatan. Aden a maolad a darpa a mipapagelet kiran,
14 Na liyalis iyan so manga sondaro ago si Abnir a tig iyan a "Ba ako ngka di kesembag,
Abnir?"
Somimbag si Abnir a tig iyan a "Antawaa ka a pelalis ko dato?"
15 Tig i Daod a "Ba ka di mama a da a ba ngka datar sa kawaraw sii sa Israil? Ino ngka
da mapagipat so kadnan ka a so dato? Aden a miyakasoled ko kampo sa kambonoa niyan
ko dato a kadnan ka.
16 So miyanggolaola ngka na kena a ba mapiya, Abnir! Matamataan ko kaooyagoyag o
Allah ka sekano langon na patot a pemonoon ka da niyo pagipata so kadnan iyo a
piyakandato o Allah. Na, pangilailay ka sa mbalabala; anda so bangkaw o dato? Anda so
petegoan sa ig a marani ko olo niyan?"
17 Miyatendo i Saolo so lagam i Daod na tig iyan a "Lagam ka nan, Daod a wata ko?"
"Oway, kadnan ko a dato," a inisembag i Daod.
18 Na tig iyan pen a "Ino ako ngka pen peselobaa a oripen ka, kadnan ko? Antonaa i
miyanggolaola ko? Antonaa i marata a minisela aken?
19 Kapedipedi ka bo, kadnan ko a dato, na pakinega ngka so manga katero aken a oripen
ka. O so Allah i miyangondoy reka sa kaperidoa ngka raken na pengnin ko a makatarima
sekaniyan sa misapaat aken on a soasoat! Ogaid na o aya kilalag on na manga taw na
kasintaan siran ko hadapan o Allah! Ka miyabogaw ako iran den a poon ko kababaling
aken ko lopa a kawali o Allah a lagid o ba iran raken pitero a 'Awa ka sii; pangongonotan
ka baden sa salakaw a manga tohan!'
20 Kagiya ka maoto na di ngka pekatogaa so rogo aken ko lopa a mawatan ko
kamamasaan o Allah! Ino peliyo so dato sa Israil sa kapeselobaa niyan raken a matag
baden koto a aso a datar o kapeganop o taw sa papanok sii ko manga palaw?"
21 Na pitero i Saolo a "Miyadosa ko; kasoy ka, wata aken a Daod! Di aken
seka den tepengan memarata ka kagiya inibilang ka a mala i bali so niyawa ko
imanto a gawii. Miyalalong ako den ago tanto a miyaribat!"
22 “Katii so bangkaw o dato," a inisembag i Daod. "Pakasonga ngka sii so isa rekano a
mangoda kaan iyan makowa.
23 Pembalasan o Allah so oman i taw ko kaontol iyan ago so kapakatotoman iyan.
Piyalad ka imanto o Allah ko kapaar aken ogaid na somiyangka ako o ba aken tanai sa
lima so miyapili o Allah a dato.
24 Na lagid o kiyatagoi aken sa bali ko niyawa ngka sangkai a gawii na pengnin ko ko
Allah a tagoan iyan sa bali so niyawa ko ago mapokas ako niyan ko langon a
karomasayan."
25 Na pitero i Saolo ki Daod a "Karakmatan ka, wata aken a Daod! Pekapiya so bobolos
ka ko langon taman a penggolaolaan ka!"
Oriyan ai na tomiyaros si Daod ko pesongowan iyan, na miyaling si Saolo.
1 SAMOWIL 27
Si Daod sii ko manga Pilistiyo
Ogaid na aya mapipikir i Daod na "Pekatalingoma so gawii a kepatay ako bo i Saolo.

Aya lebi raken a mapiya na magapas ako nggagaan sii ko inged o manga Pilistiyo. Oriyan
iyan na nggenekan ako den mbabanog i Saolo apiya anda ko dalem a inged a Israil, na
kepalagoyan ko so lima niyan."
2 Na gomiyanat si Daod ago so nem gatos a manga mama a ped iyan ka somiyong siran ki
Akis a dato sa Gat.
3 Komiyaden si Daod ago so manga mama niyan a ped i Akis a wata i Maok sii sa Gat.
Oman i mama na ped iyan so pamiliya niyan, na ped mambo i Daod so dowa kataw a
karoma niyan a si Ahinowam a taga Yasriil ago si Abigail a taga Karmil a inikabalo i
Nabal.
4 Kagiya maneg i Saolo a miyagapas si Daod sa Gat na da niyan den mbanoga.
5 Na pitero i Daod ki Akis a "O kelimoon ako ngka na begi ako ngka sa darpa sii ko isa
ko manga iito a inged a kebalingan aken. Ino ako pekabaling sii ko siti o dato a ped ka?"
6 Na sii sangkoto a gawii na inibegay rekaniyan i Akis so siti a Siklag; sabap roo na ipoon
sa masa oto na giya Siklag na rek o manga dato sa Yodah.
7 Na miyakabaling si Daod ko pagiingedan o manga Pilistiyo ko miyakasaragon ago pat
olan.
8 Sangkoto a masa na si Daod ago so manga mama niyan na di iran dii nggogobaten so
manga taw sa Gisor, so manga taw sa Gisri ago so manga Amalik. (Ipoon ko masa o
manga apo na sii kibabaling angkai a manga taw ko kalopaan a sii matatampar sa Sor ago
taman den sa Misir.)
9 Igira a penggobaten i Daod angkai a manga inged na da den a pakapegoyagen iyan on a
mama o di na babay, ogaid na pepangowaan iyan so manga bilibili, manga sapi, manga
kimar, manga onta ago so manga nditaren na pekesoy sekaniyan bo ki Akis.
10 Na igira a ipegise i Akis a "Anda ka miteban imanto?" na aya dii teroon i Daod na
"Roo sa pagabagatan a Yodah," o di na "Sii ko inged o manga mbawataan o Yaramiil," o
di na "Sii ko pagiingedan o manga Kiniyo."
11 Da den a ba niyan pakapegoyaga a mama o di na babay a mawit sii sa Gat, ka
mapipikir iyan a "O ba kami ran baden mapenon a tig iran a 'Giyai i pinggolaola i Daod.'"
Na giyoto den i di niyan dii nggolaolaan taman ko kababaling iyan ko pagiingedan o
manga Pilistiyo.
12 Sasarigan i Akis si Daod na tig iyan sa ginawa niyan a "Miyabaloy niyan a ginawa
niyan a tanto a piyakasisingay ko ped iyan a manga taw sa Israil; kagiya ka maoto na
kebaloy sekaniyan a oripen aken taman den ko kaooyagoyag iyan."
1 SAMOWIL 28
Sii sangkoto a manga gawii na tinimo o manga Pilistiyo so manga sondaro iran sa
kipetidawaan iran sa Israil, na pitero i Akis ki Daod a "Disomala a saboten ka a seka ago
so manga mama ngka na pagonotan ako niyo sa kapakipetidawa ami."
2 "Oway," a inisembag i Daod, "na giyanan i kakemasai ngka o antonaa i mapenggolaola

ko a oripen ka."
Tig i Akis a "Mapiya nan! Mbalowin ko seka a lalayon aken den gordiya."
Miyakimosawir si Saolo sa Pendarpaan
3 Samaoto na miyatay den si Samowil na kiyandiyagaan sekaniyan den o langon o manga

Israil ago inilebeng iran ko inged iyan sii sa Ramah. Na miyapakaawa den i Saolo ko
inged so langon a pendarpaan ago so aden a inikadowa niyan.
4 Mitimotimo so manga sondaro a Pilistiyo na mikempo siran sii sa Sonim. Samaoto na

tinimo i Saolo so langon a Israil na mikempo siran sa Palaw a Gilbowa.
5 Kagiya mailay i Saolo so manga Pilistiyo na miyalek sekaniyan a tanto a piyananabad
so poso iyan.
6 Inisean iyan so Allah o antonaa i penggolaolaan iyan, ogaid na da den sembaga o Allah
apiya pen o nggolalan sa taginepen o di na sa kapegosara ko Orim ago Tomim aya pen o
ba nggolalan ko manga nabi.
7 Sabap roo na pitero i Saolo ko manga talasogoay niyan a "Nggilobaan ako niyo sa
babay a pendarpaan a kesongowan aken ago keisean."
"Aden a pendarpaan roo sa Indor," a tig iran.
8 Mandiyadi na miyanayasayan si Saolo ka somiyolot sa salakaw a nditaren, na sii ko

kagagawii na somiyong den ko babay a oonotan o dowa kataw a oripen
iyan. Na pitero iyan ko babay a "Pamangangain ako ngka na pakagemawa ngka raken so
mbeton aken a ngaran."
9 Ogaid na pitero on o babay a "Mataan a katawan ka o antonaa i pinggolaola i Saolo.

Piyamotol iyan ko inged so manga pendarpaan ago so aden a inikadowa niyan. Ino ngka
pelitagi so niyawa ko sa kapakibonoon ka raken?"
10 Misepa on si Saolo sii ko Allah a tig iyan a "Matamataan ko kaooyagoyag o Allah ka

di reka den ai indaneg."
11 Na iniise o babay a "Antawaa i pekagemaon ko reka?"

"Pakagemawa ngka raken si Samowil," a inisembag iyan.
12 Kagiya mailay o babay si Samowil na kominisek sekaniyan a pitero iyan ki Saolo a

"Ino ako ngka selibaa? Seka si Saolo!"
13 “Di ka pekelek," a tig o dato. "Antonaa i pekeilay ngka?"

Tig o babay a "Pepekailay ako sa arowak a pepekapoon ko lopa."
14 “Antonaa i maperoropaan iyan?" a iniise i Saolo.
"Lokes a mama so pepekagemaw," a inisembag iyan, "na ndiditar sa kimon."
Kiyatokawan i Saolo a giyoto si Samowil, na somiyodiyod sekaniyan ago gomipe ko
lopa.
15 Pitero i Samowil ki Saolo a "Ino ako ngka peringasaa sa kiyapakambowata ngka

raken?"
"Tanto a makandadamar a akal aken!" a tig i Saolo. "Makipetidawa raken so manga
Pilistiyo na kiyatalikodan ako den o Allah. Di ako niyan den sembagen apiya pen o
nggolalan ko manga nabi o di na taginepen. Giyanan i kiyatawaga ko reka kaan ka raken
matero o antonaa i penggolaolaan ko."
16 Pitero i Samowil a "Ino ako ngka pegisei imanto a kiyatalikodan ka o Allah ago
miyabaloy sekaniyan den a ridoay ngka?"
17 Initoman den o Allah so miyaalamat iyan a nggolalan raken. Miyakowa niyan den so
ndatoan sii sa lima ngka ka inibegay niyan ko siringan ka, sii ki Daod."
18 Aya sabap a pinggolaola ini reka o Allah imanto a gawii na sabap sa da ngka
paratiyayaa so inisogo o Allah ago da ngka nggolalanen so tanto niyan a kapekerarangiti
ko manga Amalik.
19 Liyo ron pen na peladen ka a rakes o Israil sii ko manga Pilistiyo, na amay ka mapita
na seka ago so manga wata a ka na kitapi raken. Peladen mambo o Allah so manga
sondaro a Israil ko manga Pilistiyo."
20 Magaan so magaan na miyaoteng si Saolo ko lopa a tanto a miyalek sabap

ko manga katero i Samowil. Kiyadaan sekaniyan sa bager ka da den a ba niyan
miyakan sa miyababasa alongan ago miyababasa gawii.
21 Miyobay ron so babay na kagiya mailay niyan a tanto sekaniyan a penanabaden na

pitero iyan on a "Piyakineg aken seka ago inisarakan aken so niyawa ko ka ininggolalan
aken so pitero o ka.
22 Kapedipedi ka bo na nggolaolaa ngka mambo imanto, kadnan ko, so peteroon ko reka.
Pakinaten ka raken sii reka sa maito a pangenengken a makan ka kaan ka katagoi sa bager
a mitaros ka ko songowan ka."
23 Na da sekaniyan iyog a tig iyan a "Di ako ken."

Ogaid na inogopan o manga oripen iyan so babay tomegel on na piyakineg iyan siran.
Na mimbowat sekaniyan poon ko lopa na miyontod ko igaan.
24 Aden a nati a sapi a pepagolitolitan o babay sa walay niyan na pinggagaanan iyan

somombali. Kominowa sekaniyan sa arina na pitiyagar iyan ka pimbaalan iyan a paan a
da a tapay ron.
25 Inenat iyan ai ki Saolo ago so manga oripen iyan na mikekan siran. Na gomiyanat
siran sangkoto a kagagawii.
1 SAMOWIL 29
Piyakakasoy i Akis si Daod sa Siklag
So peman so manga Pilistiyo na tinimo iran so langon a sondaro iran sii sa Apik, na
mikempo so manga Israil ko obay o bowalan sii sa Yasriil.
2 Sii ko kapelalakaw o manga dato a Pilistiyo a rakes o manga sondaro iran a mbabagatos
ago sesanggibo na si Daod ago so manga mama niyan na pelalakaw a mangongoriyan
kiran a ped iran si Akis.
3 So manga olowan a manga sondaro a Pilistiyo na miyailay iran siran na iniise iran a
"Ino sii angkai a manga Hibriyo?"
Somimbag si Akis a tig iyan a "Ba kena a giyai si Daod a sanasanaan gowani i Saolo a
dato sa Israil? Maaped sekaniyan raken den ko miyakalabi saragon, na ipoon ko
kiyapagapas iyan raken taman imanto na da den a ba ko ron kidaway."
4 Ogaid na kiyararangitan o manga olowan a Pilistiyo si Akis a tig iran a "Pakakasoya

ngka ngkanan a mama ko darpa a inibegay ngka on. Di kepakay o ba rektano makaonot
ko katidawa, ka o ba tano niyan baden soranga sii ko masa a dii katidawa. Ka antonaa i
lebi a pekagaga a okit a kakesoata niyan ko kadnan iyan? Ba kena a so kapamonoa niyan
sangkai a manga sondaro tano?
5 Ba kena a giyai si Daod a dii ipagidaida o manga babay ko di iran dii kaseyaw a tig iran
a 'Miyakapatay si Saolo sa kasenggibo, na miyakapatay si Daod sa kasepolo nggibo?' "
6 Sabap roo na tiyalowan i Akis si Daod na pitero iyan on a "Matamataan ko

kaooyagoyag o Allah ka matito ka, na ikesoat aken so kapekaonot ka raken sangkai a dii
katidawa. Da den a kidaway aken reka ipoon ko gawii a kiyapakaoma ngka raken taman
imanto, inonta bo na di ka terimaan o ped a manga dato.
7 Kagiya ka maoto na kasoy ka imanto sa da a rayorayo a ginawa; di ka penggolaola sa di
ikesoat o manga dato a Pilistiyo."
8 “Antonaa i miyanggolaola ko a ribat?" a iniise i Daod. "Ipoon ko gawii a kiyapakaoma

ko reka taman imanto na antonaa i kidaway ngka raken? Ino ako di pekaonot a
makipetidawa ko manga ridoay ngka a kadnan ko a dato?"
9 Tig i Akis a "Katawan aken den a mapiya ka ko kapekeilaya ko reka a datar o malaikat
o Tohan. Ogaid na pitero o manga olowan a Pilistiyo a di ka rekami pekaonot sa
kapakipetidawa ami.
10 Kagiya ka maoto na mbowat ka komabalaga ko kapipita a rakes o langon a makaoonot
reka a miyamakaawa ki Saolo a kadnan iyo, na ganat kano ko kasebang o alongan."
11 Sabap roo na si Daod ago so manga mama niyan na gomiyanat siran komabalaga ko
kapipita sa kakesoy iran ko pagiingedan o manga Pilistiyo, na tomiyaros lomalakaw so
manga Pilistiyo sa Yasriil.
1 SAMOWIL 30
So Kiyapakitidawa i Daod ko manga Amalik
Sii ko ikatelo gawii ko kiyalalakaw i Daod na miyakaoma siran ago so manga mama
niyan sa Siklag. Sii ko kaada iran pen sa Siklag na piteban o manga Amalik so
pagabagatan a Yodah. Giyobat iran a Siklag ago piyanotong iran,
2 Na biniyag iran so manga babay ago so langon a taw a matatago on a ndatar so wata ago
mala a taw. Da a ba iran kiran biyono, ka initelon iran siran baden ko kiyaawai ran roo.
3 Kagiya makaoma si Daod ago so manga mama niyan sa Siklag na miyailay iran a
miyatotong so inged ago miyabiyag den so manga karoma iran ago manga wata iran a
manga mama ago manga babay.
4 Na minggogoraok sa matanog si Daod ago so manga mama niyan taman sa da den a
bager iran a kigoraok iran.
5 Miyabiyag mambo so dowa kataw a manga karoma i Daod a si Ahinowam a taga
Yasriil ago si Abigail a inikabalo i Nabal a taw sa Karmil.
6 Tanto a makandadamar a akal i Daod ka kagiya pepanarotaroan sekaniyan o langon a
pagtaw niyan sa ba iran baden perobaka a ator, ka kekarata a ginawa o oman i isa kiran
sabap ko manga wata iran. Ogaid na piyakapiya i Daod a ginawa niyan sii ko Allah a
Tohan iyan.
7 Na pitero i Daod ko imam a si Abiyatar a wata i Ahimelek a "Wita ngka raken so saliko
a imam." Na inowit on i Ahimelek
8 Na inisean i Daod so Allah a tig iyan a "Ba aken selobaa angkai a minggogobat? Ba
aken siran peraota?"
"Salobaa ngka siran," a inisembag iyan, "ka mataan a peraoten ka siran ago kesabet ka
so langon a miyanga bibiyag iran."
9 Mandiyadi na gomiyanat si Daod a pegonot on so nem gatos a manga mama niyan na

miyakaoma siran ko Baogan a Besor a ron mitelimbagak so ped kiran,
10 Ka so dowa gatos a manga mama na tanto den a diyokawan a di pekaripag ko baogan.
Ogaid na tomiyaros den seloba si Daod ago so pat gatos a ped iyan.
11 Miyakatoon siran sa taw a Imisiren sii ko pangomaan na inowit iran ki Daod.
Piyakainom iran sa ig ago bigan iran sa pangenengken a makan iyan
12 A ped oto ko tiyompi a higos ago dowa tompi a pasas. Komiyan sekaniyan na
miyakabager ka kagiya da den a miyakan iyan o di na miyainom ko miyakatelo gawii.
13 Inisean sekaniyan i Daod a tig iyan a "Anda ka tatampil ago anda ka miyakapoon?"
Tig iyan a "Imisiren ako a oripen o sakataw a Amalik. Inawaan ako o kadnan aken
kagiya masakit ako ko miyakatelo den ai gawii.
14 Giyobat ami so pagiingedan o manga Kiritiyo sa pagabagatan a Yodah ago so inged o
mbawataan a Kaleb na tiyotong ami a Siklag."
15 “Ba ako ngka mapenggonanao sangkai a minggogobat?" a iniise on i Daod.

Tig iyan a "Sepaan ka raken sii ko Tohan a di ako ngka mbonoon o di na pelada ko
kadnan aken ka witen ko seka kiran."
16 Kagiya mawit iyan kiran si Daod na miyailay siran i Daod a mipaparak ko dalem
angkoto a darpa a dii kekan, dii mamanginom ago dii keriyala sabap ko tanto a mala a
miyateban iran ko inged o manga Pilistiyo ago sii sa inged a Yodah.
17 Na gomiyobat kiran si Daod ago miyakitidawa kiran ipoon o kasedep o alongan taman
ko perimon ko miyakatalondog a gawii, na da den a ba kiran miyakalidas a rowar ko pat
gatos a manga mangoda a mikokoda sa onta ago miyamakapalagoy.
18 Miyakowa peroman i Daod so langon taman a miyateban o manga Amalik a rakes o
dowa kataw a karoma niyan;
19 Da den a ba kiran miyalebat a mala maito a taw. Miyakowa niyan so langon a manga
wata a manga mama ago manga babay, ago so langon a miyateban o manga Amalik ago
apiya antonaa den i miyakowa iran.
20 Kinowa niyan mambo langon so manga talon a bilibili ago manga kambing, na
inidendeg o manga mama niyan ko onaan o ped a manga ayam a tig iran a "Giyai na rek i
Daod!"
21 Oriyan iyan na komiyasoy si Daod ko dowa gatos a manga mama a tanto siran a
diyokawan o ba siran on makaonot a aya mitelimbegak sa Baogan a Besor. Miniseg siran
sa kapagalawa iran ki Daod ago so manga ped iyan, na kagiya makarani kiran si Daod na
siyalam iyan siran.
22 Ogaid na so langon a manga rarata i olaola ago manga sasamok a mama ko
pepamangonot ki Daod na pitero iran a "Sabap sa da siran rektano onot na di tano siran
began sa apiya antonaa ko miyateban a miyakowa tano bo. Aya bo a kekowa o oman i isa
kiran na so karoma niyan ago so manga wata iyan, na pekalalakaw siran den."
23 Ogaid na somimbag si Daod a "Di kepakay, manga pagari ko, o ba niyo anan
nggolaolaa ko inibegay rektano o Allah! Lininding tano niyan ago piyakitaban iyan
rektano so dii tetaban a gomiyobat rektano.
24 Da a ba pekaayon sangkai a pitero iyo! So bagian o mama a mitelimbagak ko manga
pagigimo na ndatar ago so bagian o mama a tomiyaros ko katidawa. Palaya siran den
makapembagian sa ndatadatar."
25 Inembaalan ai i Daod a sogoan ko
manga Israil sangkoto a gawii na miyabaloy ini a taritib iran taman den imanto.
26 Kagiya makakasoy si Daod sa Siklag na piyakiwit iyan so ped ko miyateban ko manga

ginawai niyan a manga olowan sa Yodah a tig iyan a "Giyai so pamemegayan rekano a
ped ko miyateban ko manga ridoay o Allah."
27 Piyakiwit iyan ai ko manga kibabaling sa Bitil, sa Ramot sii sa pagabagatan a Yodah

ago so manga taw ko manga inged sa Yatir,
28 Sa Arowir, sa Sipmot, sa Istimowa
29 Ago sa Rakal; ago sii ko mbawataan a Hiramiil; so manga Kiniyo ago so pen so
kibabaling sa inged a Hormah, sa Borasan, sa Atak
31 Ago sa Hibron, ago sii ko langon a manga darpa a kiyapagenebeneban i Daod ago so
manga mama niyan.
1 SAMOWIL 31
So Kiyapatay i Saolo ago so manga Wata iyan
So peman so manga Pilistiyo na miyakitidawa siran ko Israil sii sa Palaw a Gilbowa. Na

piyalagoyan o manga Israil so manga Pilistiyo, na madakel kiran a miyapamono roo.
2 Tanto a piyanaloba o manga Pilistiyo si Saolo ago so manga wata iyan na piyamono
iran si Yonatan, si Abinadab ago si Malkisowa a so manga wata i Saolo.
3 Tanto a miyakaregen so dii katidawa ko melilibeta ki Saolo, na miyasogat sekaniyan o
manga pamamana na kiyapalian den sa papatayan.
4 Na pitero i Saolo ko mangoda a pegawid sa kelong iyan a "Bindasa ngka so pedang ka

na go ngka raken basegen, ka o di, na keoma ako angkai a manga kapir na siran i mbaseg
raken, na pemarataan ako iran pen."
Ogaid na somiyangka baden so mangoda ka tanto sekaniyan a miyalek. Sabap roo na
kinowa i Saolo so pedang iyan na inibaseg iyan sa ginawa niyan.
5 Kagiya mailay o mangoda a miyatay si Saolo na inipageget iyan mambo so pedang iyan
na miyatay a ped i Saolo.
6 Giyoto i kiyapamatay i Saolo ago so telo kataw a manga wata iyan, ago so mangoda a
pegawid sa kelong iyan, ago so langon a manga mama i Saolo sangkoto a gawii.
7 So manga Israil sii ko sabala a balintad ago so kibabaling a masesebangan o lawasaig a

Yordan na kagiya maneg iran a miyamalagoy so manga sondaro a Israil ago miyamatay si
Saolo ago so manga wata iyan na inawaan iran so manga inged iran na miyamalagoy
siran. Na miyakaoma on so manga Pilistiyo na biyalingan iran ai.
8 Sii ko telondog a gawii kagiya makaoma so manga Pilistiyo sa kapetebani ran ko

miyamatay na miyailay iran so manga bangkay i Saolo ago so telo kataw a wata iyan a
kikakekelit roo ko Palaw a Gilbowa.
9 Na piyotol iran on so olo niyan ago likas iran on so raben iyan, na somiyogo siran ko
dalem a inged o manga Pilistiyo ka pekalangkapen iran on so totol sii ko timplo o manga
barahala iran ago sii ko bangsa iran a manga taw.
10 Oriyan iyan na tiyago iran so raben iyan sii ko timplo o barahala a Astorit, na inideket
iran so lawas iyan ko keleb o siti a Bit San.
11 Kagiya maneg o manga taw sa Yabis Giliyad o antonaa i pinggolaola o manga

Pilistiyo ki Saolo
12 Na gomiyanat so langon a manga wawaraw a mama na lomiyalakaw siran ko
miyababasa gawii a somiyong sa Bit San. Kinowa iran so manga lawas i Saolo ago so
manga wata iyan sii ko keleb a Bit San na komiyasoy siran sa Yabis na roo iran siran
tiyotong.
13 Na kinowa iran so manga tolan iran na inilebeng iran ko atag o mala a kayo sii sa
Yabis, na mipowasa siran ko miyakapito gawii.
2 SAMOWIL
2 SAMOWIL 1
Miyaneg i Daod so Kiyapatay i Saolo
Oriyan o kiyapatay i Saolo na komiyasoy si Daod sa Siklag kagiya mataban iyan so

manga Amalik na tomiyareg roo sa miyakadowa gawii.
2 Sii ko miyakatalondog a gawii na aden a miyakaoma a mama a poon ko kampo i Saolo
a makikisi so nditaren iyan ago aden a bayanek ko olo niyan. Kagiya makaoma ki Daod
na somiyodiyod on.
3 “Anda ka miyakapoon?" a iniise on i Daod.

"Miyakapalagoy ako a poon ko kampo o manga Israil," a inisembag iyan.
4 “Antonaa i miyaolaola?" a iniise i Daod. "Teroa ngka raken!"

Tig iyan a "Piyalagoyan o manga sondaro so katidawa. Madakel kiran a miyanga
ooteng a miyamatay. Na miyatay mambo si Saolo ago so wata iyan a si Yonatan.
5 Na iniise i Daod ko mangoda a miyanotol on a "Andamanaya i kiyatokawi ngka on a

miyatay si Saolo ago si Yonatan?"
6 “Miyatabo a sisii ako ko palaw a Gilbowa," a tig o mangoda, "na miyailay aken si Saolo
a miteteken iyan so bangkaw niyan a pendasegen o kikakaro ago kikokoda a manga
ridoay niyan.
7 Kagiya domingil sekaniyan na miyailay ako niyan na tiyalowan ako niyan, na inisembag
aken a 'Oway, sir.'
"Tig iyan a 'Antawaa ka?'
" 'Amalik ako,' a inisembag aken.
9 “Mandiyadi na pitero iyan raken a 'Song ka sii na go ako ngka bonoa! Piyakapapatay
ako den ogaid na pengginawa ako pen.'
10 “Kagiya ka maoto na inobay aken sekaniyan na biyono aken, ka katawan aken a oriyan
angkoto a kiyapalii ron na di sekaniyan den makapegoyag. Na kinowa ko so sangkad a
sisii ko olo niyan ago so rinti ko barokan iyan na inowit aken sii reka, kadnan ko."
11 Na piyangisi i Daod so nditaren iyan na lagid oto mambo so pinggolaola o langon a

mama a ped iyan,
12 Ka inimboko ago kiyagoraokan iran si Saolo ago si Yonatan ago so manga sondaro o
Allah ago so pen so isa ka maginged a Israil sabap sa miyamatay siran ko katidawa. Na
mipowasa siran taman ko kiyaperimon.
13 Na iniise i Daod ko mangoda a miyanotol on a "Anda ka miyakapoon?"

"Amalik ako a mananangga sii sa inged iyo," a inisembag iyan.
14 Tig i Daod a "Ino ka da malek sa kiyabonoa ngka ko kiyaidinan o Allah?"

15 Na tiyalowan i Daod so isa ko mama niyan a tig iyan on a "Songowi ngka na go ngka
bonoa!" Na liyakot iyan so mangoda na miyatay.
16 Ka miyatero rekaniyan den i Daod a "Pimbaba a ka a kabonoa reka. Siyakab ka a
ngari i ka kagiya teroon ka a 'Biyono aken so kiyaidinan o Allah.' "
So Kiyandiyagawi i Daod ki Saolo ago si Yonatan
17 Giyai so bayobayok i Daod a inindiyaga niyan ki Saolo ago si Yonatan,

18 Na inisogo iyan a mipangendao ai ko manga taw sa Yodah; (misosorat ai sii ko Ribro
a Hasar):
19 “So manga olowan ka, hey Israil, na kikakekelit a miyamatay sii ko manga bobongan
ka!
Miyanga ooteng den so manga wawaraw a sondaro tano!
20 “Di niyo ai penotola sii sa Gat;

di niyo pen pekalangkapa sii ko manga lalan sa Askilon,
ka o ba baden ikababaya o manga raga a Pilistiyo,
na o ba baden ikasonor o manga wata a babay o manga kapir.
21 “Hey manga palaw sa Gilbowa, di kano den kanamogan o di na kaoranan,

aya pen o ba makaonga so pereperan ko manga pangomaan iyo!
Ka roo kiyaresikan so manga kelong o manga babager,
a so kelong i Saolo a di den keonasan a lana.
22 So rogo o miyapamono ago so sapo o manga babager
na da den panganogoni o pana i Yonatan,
na da on den makapeto so pedang i Saolo a ba di masosoat.
23 “Si Saolo ago si Yonatan;

pekebabayaan siran ago makalimoon ko kaooyagoyag iran,
na sii ko kiyapatay iran na da siran makambelag.
Magaan siran i kalayog a di so manga banog,
ago manga babager a di so manga arimaw.
24 “Hey manga babay a Israil, mbokoon iyo si Saolo

a minditar rekano sa manga pipiya a dinis a mariga,
ago piyagartaan iyan so manga nditaren iyo sa kabolawanan.
25 “Miyanga ooteng so manga wawaraw a sondaro a miyapamono ko katidawa!

Makakekelit si Yonatan a miyatay sii ko manga bobongan.
26 Ipemboko aken seka, Yonatan a pagari aken;
tanto aken seka a inikasoat!
Piyakamemesa so kiyababayai ngka raken,
lebi a mapiya a di so kapekebabaya o manga babay.
27 “Miyanga ooteng so manga wawaraw a manga sondaro!
Kiyadaan sa bali so manga gomaan iran ko katidawa!"
2 SAMOWIL 2
Miyabaloy si Daod a Dato sa Yodah
Da matey na inisean i Daod so Allah a tig iyan a "Ba aken songowi so isa ko manga inged
sa Yodah?"
Tig o Allah a "Oway, ika roo den."
"Antonaa inged," a iniise i Daod.
"Roo sa Hibron," a inisembag o Allah.
2 Kagiya ka maoto na somiyong roo si Daod a ped iyan so dowa kataw a karoma niyan a
si Ahinowam a taga Yasriil ago si Abigail a inikabalo i Nabal a taw sa Karmil.
3 Piyakaonot pen i Daod so manga mama niyan a rakes o oman i pamiliya iran, na
komiyaden siran sa Hibron ago so kikadadair on a manga inged.
4 Oriyan iyan na miyakaoma sa Hibron so manga taw sa Yodah na roo iran siyalawatan si
Daod a madato sa Yodah.
Kagiya matero ki Daod a so manga mama sa Yabis Giliyad i lomibeng ki Saolo
5 Na somiyogo sekaniyan roo sa makapetero kiran sa "Karakmatan kano o Allah ko
kinikalimoon iyo ko kadnan iyo a si Saolo ko kinilebengen iyo ron!
6 Na pengnin ko a pekiilay rekano imanto o Allah so limo iyan ago so kasasarigi ron, na
saken mambo na penggolaolaan ko sekano sa mapiya sabap sangkai a pinggolaola niyo.
7 Kagiya ka maoto na pakababager kano ago pakawawaraw! Miyatay si Saolo a kadnan
iyo, na biyaloy ako o manga taw sa Yodah a dato iran."
Miyabaloy si Isbosit a dato sa Israil
8 Samaoto na so komandir o manga sondaro i Saolo a si Abnir a wata i Nir na kinowa

niyan si Isbosit a wata i Saolo na inowit iyan ko ripag a lawasaig a Yordan sii sa
Mahanaim.
9 Na biyaloy niyan sekaniyan a dato sii sa Giliyad, sa Asori ago sa Yasriil ago sii pen sa
Ipraim, sa Baniyamin ago sii ko dalem a Israil.
10 Miyakapat polo ragon a idad i Isbosit isako makandato sa Israil, na mindato sa

miyakadowa ragon. Ogaid na so mbatabataa a Yodah na pepegonot ki Daod.
11 Aya kiyatey a kandadato i Daod sa Yodah sii sa Hibron na miyakapito ragon ago nem
olan.
So Kiyatidawa o Ndatoan a Israil ago so Ndatoan a Yodah
12 Si Abnir ago so manga mama i Isbosit na miyawa sa Mahanaim na somiyong siran

pasin sa Gibiyon.
13 Na lominiyo si Yowab a wata i Siroyah ago so manga mama i Daod na tiyalabok iran
siran sii ko ranaranaw sa Gibiyon. Miyamangontod siran langon, a so isa ka
sagorompong na sii ko sabala o ranaranaw, na so isa on na sii mambo ko sabala on.
14 Mandiyadi na pitero i Abnir ki Yowab a "Pakatindegen ta ago pakapelobelobeden so

manga ngongoda ko kamamasaan ta."
"Oway, sowaan ta nan," a tig i Yowab.
15 Na miyamanindeg siran a sapolo ago dowa kataw ko mbatabataa a Baniyamin a

tomatampil ki Isbosit a wata i Saolo, ago sapolo ago dowa a manga mama i Daod.
16 Na giyoto a tikes o oman i isa kiran so olo o sangan iyan na inisoker iyan so gonong
iyan ko kilid o sangan iyan, na palaya siran den miyamakakelit a miyamatay. Sabap roo
na giyangkoto a darpa sa Gibiyon na pembetowan sa "Pangomaan a manga Gonong."
17 Giyanan den i pasodan o tanto a masakit a kiyatidawa sangkoto a gawii, na si Abnir

ago so manga taw sa Israil na tiyaban o manga oripen i Daod.
18 Ndodoo so telo kataw a manga wata i Siroyah a manga mama, a si Yowab, si Abisay
ago si Asahil. Si Asahil na tanto a magaan i kapalalagoy a datar o saladeng.
19 Siyaloba iyan si Abnir na da den panilasilay sa kawanan o di na sa diwang ko
kapeselobaa niyan on.
20 Diningilan i Abnir a tig iyan a "Seka bes, Asahil?"
"Saken," a inisembag iyan.
21 Na tig i Abnir a "Kori ka sa kawanan o di na sa diwang na pegenga ngka so isa ko

manga ngongoda na agawa ngka on so gomaan iyan." Ogaid na da miyog si Asahil o ba
niyan geneki somaloba si Abnir.
22 Na tig peman i Abnir ki Asahil a "Geneki ako ngka somaloba! Ino aken seka kebono?
Andamanaya i kakerawa ko tomenteng ko paras i Yowab a pagari ngka?"
23 Ogaid na somiyangka baden si Asahil o ba genek sa kapeselobaa niyan on. Sabap roo
na inibaseg i Abnir so patag a poro o bangkaw niyan ko tiyan i Asahil, na lomiyambas sa
likod iiyan. Sagogona a miyakakelit sekaniyan a miyatay, na oman i isa a miyakaoma ko
darpa a kiyaotengan ki Asahil na petereg on.
24 Ogaid na si Yowab ago si Abisay na siyaloba iran den si Abnir, na sii ko kasedep o
alongan na miyakaoma siran ko bobongan sa Amah a marani sa Giyah sii ko lalan a
ipesong ko mitataog a kaden sa Gibiyon.
25 Samaoto na so manga mama ko mbatabataa a Baniyamin na pitimoan iran langon si
Abnir na miyamanindeg siran ko poro o bobongan.
26 Na liyalis i Abnir si Yowab a tig iyan a "Ba da a rintas o di tano dii kapolang? Ba
ngka di katawi a mapait a keposan sii? Ay katey pen a kasogoa ngka ko manga pagtaw
ngka sa kataregi ran seloba ko manga pagari ran?"
27 Somimbag si Yowab a tig iyan a "Mataan ko kaooyagoyag o Tohan ka o da ka tero na
di den tereg so manga mama ko sa kapeselobaa iran rekano taman sa mapita."
28 Mandiyadi na miyamogiyong si Yowab na tomiyareg so langon a mama niyan;

gominek siran den seloba ko manga Israil aya pen o ba siran tidawa peroman.
29 Lomiyalakaw si Abnir ago so manga mama niyan ko miyababasa gawii a pegokitan

iran so Kapantaran a Yordan. Rominipag siran sa lawasaig na tomiyaros siran lomalakaw
taman sa miyaoto a alongan, na miyakaoma siran sa Mahanaim.
30 Kagiya gomenek seloba si Yowab ki Abnir na tinimo iyan so langon a mama niyan, na
liyo ki Asahil na sapolo ago siyaw kataw a manga mama i Daod a miyatendo a miyada.
31 Ogaid na so manga mama i Daod na miyakapatay siran sa telo gatos ago nem polo a
manga ped i Abnir a manga taw sa Baniyamin.
32 Na kinowa i Yowab ago so manga mama niyan si Asahil na inilebeng iran ko kobor o
ama iyan sii sa Bitlihim. Oriyan iyan na lomiyalakaw siran ko miyababasa gawii, na
miyakaoma siran sa Hibron ko kakepita iyan.
2 SAMOWIL 3
So dii katidawa o ndatoan o pamiliya i Saolo ago so ndatoan i Daod na miyatey a
kagaganday niyan. Samanaya na pepekala a kapepekabager i Daod, ogaid na so ndatoan o
pamiliya i Saolo na mitataros den a kapepekalobay niyan.
So manga Wata i Daod
2 Aden a inimbabawata i Daod a manga mama sii sa Hibron. So kaka kiran na si Amon a
wata i Ahinowam a taga Yasriil;
3 Aya ikadowa na si Kiliyab a wata i Abigail a inikabalo i Nabal a taw sa Karmil; so
ikatelo na si Absalom a wata i Maakah a aya wata a babay i Talmay a dato sa Gisor;
4 So ikapat na si Adoniyas a wata i Hagit; so ikalima na si Sipatiyas a wata i Abital,
5 Na so ikanem na si Itriyam a wata o karoma i Daod a si Iglah. Palaya siran inimbawata
i Daod sii sa Hibron.
Tomiyampil si Abnir ki Daod
6 Sii ko masa a dii katidawa o ndatoan o pamiliya i Saolo ago so ndatoan i Daod na
pepakaosoren i Abnir so kapaar iyan sii ko ndatoan i Saolo.
7 Aden gowani a sandil i Saolo a aya ngaran iyan na si Rispah a wata i Ayas. Miyakaisa a
gawii na pitero i Isbosit ki Abnir a "Ino ngka perembanga so sandil o ama aken?"
8 Tanto a inikararangkit i Abnir angkai a pitero i Isbosit, na tig iyan a "Ba ako lagid o olo
a aso a maampil ako sa Yodah? Taman imanto a gawii na magiiklas ako ko ndatoan i
Saolo a ama a ka ago sii ko pamiliya niyan ago manga ginawai; na da ko seka pen palada
ko kapaar i Daod. Apiya pen oto na pesenditan ako ngka imanto sa kasalaan mipantag
sangkoto a babay!
9 Kamorkaan ako o Tohan sa tanto a maregen o di aken nggolalanen so kamapiyaan i
Daod a inisepa on o Allah
10 A giya kakowaa niyan ko ndatoan ki Saolo ago so pamiliya niyan ago so kabaloya
niyan ki Daod a dato sa Israil ago sa Yodah a ipoon sa Dan taman sa Birsiba."
11 Na da den makaraw somembag si Isbosit ki Abnir sa sataga bo a katero ka kagiya
ipekelek iyan sekaniyan.
12 Oriyan ai na somiyogo si Abnir sa makatero ki Daod a tig iyan a "Antawaa i kiinged

sangkai a inged? Pakipesadanowa ka raken, ka ogopan aken seka kaan reka mitampil so
dalem a inged a Israil."
13 “Mapiya nan," a tig i Daod. "Makipepesadanowa ko reka, ogaid na satiman a ipenton

aken reka: Di ka raken pekaadap taman sa di ngka raken mawit si Mikal a wata a babay i
Saolo amay ka ndarpa ka raken."
14 Na somiyogo mambo si Daod sa makatero ki Isbosit na piyantonan iyan a tig iyan a
"Began ka raken so karoma ko a si Mikal a siyonggodan aken sa betang a magatos timan
a kobal ko sangoran o manga Pilistiyo."
15 Sabap roo na piyakikowa i Isbosit si Mikal a poon ko karoma niyan a si Paltiyal a wata
i Lais.
16 Ogaid na tomiyondog on si Paltiyal a penggoraok taman den sa Bahorim. Mandiyadi
na pitero on i Abnir a "Kasoy ka sa walay!" na miyaling sekaniyan.
17 Miyakimbitiyarai si Abnir ko manga pelokelokesen sa Israil a tig iyan a "Miyatey den

a singaninen iyo a makandato rekano si Daod.
18 Na, nggolalanen iyo den imanto! Ka aya miyatero den o Allah makapantag ki Daod na
'Nggolalan ko oripen aken a Daod na pokasen aken so manga pagtaw aken a Israil ko
kapaar o manga Pilistiyo ago sii ko kapaar o langon a ridoay iran.' "
19 Miyakimbitiyarai pen si Abnir ko manga taw sa mbatabataa a Baniyamin. Oriyan iyan
na somiyong sekaniyan sa Hibron ka penotolen iyan ki Daod so langon taman a kebayaan
nggolaola o Israil ago so langon a taw sa Baniyamin.
20 Kagiya makaoma si Abnir ki Daod roo sa Hibron a ped iyan so dowa polo kataw a
mama na piselasela siran i Daod sa bangkiti.
21 Na pitero i Abnir ki Daod a "Pakalalakawa ko ngka nggagaan, kadnan ko a dato, kaan
aken reka mapakatampil so langon o manga Israil kaan siran reka makipesadanowa, ago
an ka makandato ko langon a masisingayo o poso o ka." Na piyakalalakaw i Daod si
Abnir na gomiyanat sekaniyan a da pakasakiti.
Biyono i Yowab si Abnir
22 Da peman matey na komiyasoy si Yowab ago so manga mama i Daod a poon ko

kiyanggogobat iran a kipakaaawid siran sa madakel a miyateban. Ogaid na da roo den si
Abner ki Daod sa Hibron ka miyapakalalakaw den i Daod a miyakaganat sekaniyan a da
pakasakiti.
23 Na kagiya makaoma si Yowab ago so manga sondaro a ped iyan na miyatero on a
miyakaoma den si Abnir ko dato na piyakalalakaw den o dato a gomiyanat sekaniyan a da
pakasakiti.
24 Sabap roo na somiyong si Yowab ko dato a tig iyan on a "Antonaa angkai a

pinggolaola ngka? Ilaya ngka man, ka miyakaoma reka si Abnir; ino ngka pekalalakawa
a miyaipos den sekaniyan!
25 Katawan ka si Abnir a wata i Nir! Aya inisong iyan sii na giya kaselibaa niyan reka
ago so kaketokawi niyan ko manga olaola ngka ago so langon taman a pesowaan ka."
26 Na kagiya ganatan i Yowab si Daod na somiyogo sekaniyan sa makasono ki Abnir, na

inikasoy iran a poon ko paridi sa Sirah. Ogaid na di ini katawan i Daod.
27 Kagiya mikasoy iran si Abnir sa Hibron na inisibay sekaniyan i Yowab ko kilid o
gimowa a lagid o ba on makipembitiyarai sa masolen, na roo niyan siyaopi sabap ko
kiyabonoa niyan ki Asahil a pagari niyan, ka giyonongan iyan si Abnir sa tiyan na
miyatay.
28 Da matey kagiya maneg ai i Daod na pitero iyan a "Katawan den o Allah a saken ago
so ndatoan aken na di den ketaksil sa taman sa pakataman mipantag ko kiyapatay i Abnir
a wata i Nir.
29 Mitana ini ko olo i Yowab ago sii ko langon o pamiliya i ama iyan! Pengnin ko a di
den kadaan so pekebabadan ki Yowab sa taw a pepanidoon, o di na pekebowa, o di na
makateteken, o di na mapatay a pedang, o di na kakorangan sa pangenengken!"
30(Ka si Yowab ago so pagari niyan a Abisay na siyaopan iran si Abnir sabap ko
kiyabonoa niyan ko pagari ran a Asahil ko kiyatidawa sii sa Gibiyon.)
Inilebeng si Abnir
31 Oriyan iyan na pitero i Daod ki Yowab ago so langon a ped iyan a "Kisia niyo so
manga nditaren iyo na solot kano sa sako ago mbokoon iyo si Abnir." Na si den si dato
Daod i tomotondog ko bangkay.
32 Inilebeng iran si Abnir sii sa Hibron, na gomiyoraok si Daod sa matanog sii ko kobor i
Abnir. Na minggogoraok mambo so langon o manga taw.
33 Migay so dato sangkai a bayobayok a inindiyaga ki Abnir:
"Ino baden petay si Abnir a datar o lalong?

34 Da mapatong so manga lima niyan,
na da karantai so manga ai niyan.
Miyakakelit sekaniyan a miyatay a datar o miyapatay o manga rarata a mama."
Na giyoraokan sekaniyan peman o langon o manga taw.

35 Mababasa alongan sangkoto a gawii na petegelen o manga taw si Daod a koman sa
pangenengken, ogaid na baden misepa a tig iyan a "Kamorkaan ako o Allah sa tanto a
maregen o taam ako sa paan o di na apiya antonaa sa di pen kasedep o alongan!"
36 Na tiyanodan ai o langon a taw na miyasoat siran; mataan den a so langon a dii
nggolaolaan o dato na ipekesoat iran.
37 Sangkoto a gawii na kiyasabotan o langon a pagtaw i Daod ago so langon a Israil a da
den a kimamaniyai o dato ko kiyabonoa ki Abnir.
38 Na pitero o dato ko manga sanasanaan iyan a "Ba niyo di kesaboti a aden a

kababantogan a olowan a miyatay sangkai a gawii sii sa Israil?
39 Na apiya ako pen dato a miyapili o Allah na malobay ako imanto. Giyangkai a manga
wata i Siroyah na manga tangarasi a di aken keren. Midaneg o Allah ko dii nggolaola sa
marata so manga rarata a pinggolaola niyan!"
2 SAMOWIL 4
Biyono si Isbosit
Kagiya maneg i Isbosit a wata i Saolo a miyatay si Abnir sii sa Hibron na kiyadaan den sa
inam na miyanga aalek so langon o manga Israil.
2 Samaoto na aden a dowa kataw a sanasanaan i Isbosit a manga olowan o manga
sagorompong a dii nggogobat. Aya manga ngaran iran na si Baanah ago si Rikab. Manga
wata siran i Rimon a taga Birot ago ped ko mbatabataa a Baniyamin. (Ibibilang a Birot a
ped ko inged a Baniyamin
3 Ka so andang a manga magiinged on na miyamagapas gowani sa Gitaim, na kibabaling
siran roo a manga mananangga taman imanto.)
4 Aden pen a moriyataw i Saolo a so wata a mama i Yonatan. Aya ngaran iyan na si
Mepibosit, na maatay so dowa mbala a ai niyan. Miyakalima ragon a idad iyan isako
mabono si Saolo ago si Yonatan, na kagiya misampay so totol makapantag sii a poon sa
Yasriil na piyorot sekaniyan o peritan on na inipalagoy niyan. Ogaid na sii ko di niyan dii
kanggagaan gomanat na miyaroseng iyan baden si Mepibosit na miyabaloy a lepo.
5 Si peman si Rihab ago si Baanah na lomiyalakaw siran a song sa walay i Isbosit.

Miyakaoma siran roo ko kararanti o alongan ko kadedeke i Isbosit ko kaooto o alongan.
67 Somiyoled siran ko look o walay a lagid o ba siran kowa sa arina, ogaid na kagiya
makasoled siran on na miyamantek siran ko rowang i Isbosit a miiga roo a totorogen.
Giyonongan iran sa tiyan na biyono iran, na piyotol iran on so olo niyan. Initelon iran ai
na miyalagoy siran a lomiyalakaw ko miyababasa gawii a sii siran miyokit ko Kapantaran
sa Yordan.
8 Inowit iran so olo niyan ki Daod sii sa Hibron na pitero iran ko dato a "Katii so olo i
Isbosit a wata o ridoay ngka a si Saolo a miyananamar ko niyawa ngka. Imanto a gawii,
kadnan ko a dato, na inisaop ka o Allah sii ki Saolo ago so kiyababadan on."
9 Simbag i Daod si Rikab ago so pagari niyan a si Baanah a "Matamataan ko

kaooyagoyag o Allah a miyanabang ko niyawa ko ko langon a karomasayan
10 Ka isako teroon raken o isa a mama a 'Miyatay si Saolo,' a aya katao niyan on na
kiyawitan ako niyan sa mapiya a totol na diyakep aken sekaniyan ago biyono aken sii sa
Siklag. Giyanan i kiyabadali aken on ko 'mapiya a totol' iyan!
11 Aya pen amay ka mamono so manga rarata a taw sa da a peleng iyan a mama a miiga
ko igaan iyan sii ko walay niyan! Ba aken sekano di seopi imanto ko kiyabonoa niyo ron
a peyopasen ko sekano ko doniya?"
12 Na siyogo i Daod so manga mama niyan na biyono iran siran. Piyamotol iran on so
manga lima iran ago manga ai, na binitin iran so manga lawas iran ko obay o ranaranaw
sii sa Hibron. Ogaid na kinowa iran so olo i Isbosit na inilebeng iran ko libengan ki
Abnir sii sa Hibron.
2 SAMOWIL 5
Miyabaloy si Daod a Dato sa Israil
Samaoto na somiyong so langon a mbatabataa sa Israil ki Daod sii sa Hibron na pitero

iran on a "Isaisa so rogo tano.
2 Gowani pen sii ko kandadatoi rekami pen i Saolo na seka i pepegolowan ko manga
sondaro a Israil ko kanggogobat iran. Na pitero reka o Allah a 'Seka i pekatagikor ko
manga pagtaw aken a Israil na kebaloy ka a dato iran.' "
3 Na kagiya makaoma so langon a pelokelokesen sa Israil ko dato Daod sii sa Hibron na

miyakipesadanowa sekaniyan kiran roo sii ko hadapan o Allah na siyalawatan iran si
Daod a madato sa Israil.
4 Miyakatelo polo ragon a idad i Daod kagiya mabaloy a dato na miyakandato sekaniyan
sa miyakapat polo ragon.
5 Sii sa Hibron na miyakandato sa Yodah ko miyakapito ragon ago nem olan, na sii sa
Yarosalim na pindatoan iyan so dalem a Israil ago giya Yodah sa miyakatelo polo ago telo
ragon.
Tiyaban i Daod a Yarosalim
6 Da matey na somiyong so dato Daod ago so manga sondaro niyan sa siti a Yarosalim ka
nggobaten iran. So kibabaling roo a manga Hibosiyo na aya katao iran on na di on
pekasoled si Daod, na pitero iran on a "Di ka sii pekasoled; apiya so manga bota ago
manga lepo na pagerenen ka iran!"
7 Apiya pen oto na miyaagaw i Daod so kokotaan iran a Siyon, a giyanan so Siti o Daod.
8 Ka miyatero i Daod sangkoto a gawii ko manga mama niyan a "Apiya antawaa rekano i
kebaya mono ko manga Hibosiyo na sii pekaokit ko kakar a ig sa kanggobata niyan
sangkoto a 'manga bota ago manga lepo' a manga ridoay aken!" (Giyanan i sabap a di on
dii kateroa sa "So bota ago so lepo na di pekasoled ko torogan o dato.")
9 Kagiya matangan i Daod angkanan a kota na komiyaden roo na bitowan iyan sa "Siti o
Daod." Na pimbabalayan iyan so darpa ko melilibeta on ipoon ko Milo a ipegagaw
tampar sa siti.
10 Na pepangosor so gees i Daod ka sisii rekaniyan so Allah a Mamaapaar a Tohan.
11 Samaoto na si Hiram a dato sa Tiro na somiyogo ki Daod sa manga mama a
kipakaaawid sa manga tarakayo a sidro, ago manga panday sa kayo ago ator, na inimbalay
iran si Daod sa torogan.
12 Na siyabot i Daod a piyakambeken sekaniyan o Allah a dato sa Israil ago inipangkat o
Allah so ndatoan iyan sabap ko manga pagtaw niyan a Israil.
13 Kagiya makatepas si Daod sa Yarosalim a poon sa Hibron na ron sekaniyan kominowa

sa ped pen a manga sandil ago manga karoma, na aden pen a manga wata a manga mama
ago manga babay a inimbabawata iyan.
14 Giyai so manga ngaran o manga wata a inimbabawata iyan roo: siki Samowa, Sobab,
Natan, Solaiman,
15 Ibhar, Ilisowa, Nipig, Yapiya,
16 Ilisama, Iliyada ago si Ilipelet.
Tiyaban i Daod so manga Pilistiyo
17 Kagiya maneg o manga Pilistiyo a miyabaloy si Daod a dato sa Israil na lomiyalakaw

so langon a sondaro iran sa kandakepa iran on. Ogaid na miyaneg ai i Daod na
tomiyondagay ko kokotaan a darpa.
18 Miyakaoma den so manga Pilistiyo ko Balintad sa Ripaim na roo siran mikempo.
19 Kagiya ka maoto na inisean i Daod so Allah a tig iyan a "Ba aken nggobata so manga
Pilistiyo? Ba ngka siran raken pekitabanen?"
"Oway, gobata ngka!" a inisembag o Allah. "Ka mataan den a pekitaban aken reka so
manga Pilistiyo!"
20 Sabap roo na somiyong si Daod sa Baal Pirasim na miyataban iyan siran roo. Na tig
iyan a "Diyasengan o Allah so manga ridoay aken sii ko hadapan aken a datar o bagiyaw."
Giyoto i kiyabetowi sangkoto a darpa sa 'Baal Pirasim.'
21 Inawaan roo o manga Pilistiyo so manga barahala iran, na piyangowa siran i Daod ago
so manga mama niyan.
22 Da peman matey na miyakaoma peman so manga Pilistiyo sa Balintad sa Ripaim na

mikempo siran on.
23 Sabap roo na inisean i Daod so Allah na somimbag sekaniyan a tig iyan a "Di niyo
siran penteka, ka alibeta niyo siran baden na go niyo sondoli ko katatalikodan iran a
marani ko manga kayo a balsam.
24 Na so den so kapakaneg iyo sa dalapek o pelalakaw sii ko poro o manga kayo a balsam
na gobata niyo siran ka aya maana niyan na pepangonaan rekano so Allah sa katebana
niyan ko manga sondaro a Pilistiyo."
25 Na ininggolalan i Daod so inisogo on o Allah na piyamono iyan so manga Pilistiyo
ipoon sa Giba taman den sa Giser.
2 SAMOWIL 6
Inowit sa Yarosalim so Kaban sa Kapasandan
Linimod peroman i Daod so piyamagaraw ko manga mama sa Israil a telo polo nggibo
langon
2 Na piyakaonot iyan siran sa Baalah sii sa Yodah a ron iran kowaa so Kaban sa
Kapasadan o Tohan a bebetowan sa Ingaran o Allah a Lebi a Mamaapaar a kokorsi ko
poro o piyagtaotaw a manga malaikat a matatago ko lekeb o Kaban.
3 Kinowa iran so Kaban o Tohan ko walay i Abinadab a sisii ko bobongan na riyoran iran
ko bago a karo. Si Osah ago si Ahiyo a manga wata i Abinadab na penanakodaan iran so
karo
4 A ndodon so Kaban a pangongonaanan i Ahiyo.
5 Si Daod ago so langon o manga Israil na palaya dii selasela ago dii mamagidaida a
rakes o langon a bager iran sii ko hadapan o Allah. Di siran dii mboboniboniyan sa
manga alpa, manga kotiyapi, manga garingking, manga bogiyong ago manga pandaopan.
6 Kagiya makaoma siran ko pegegikan i Nakon na minisosong so manga sapi, na biter i

Osah a lima niyan ka ineren iyan so Kaban o Tohan.
7 Na somiyokeyaw so gani o Allah ki Osah sabap ko kiyaribat iyan; na siniksa sekaniyan
o Tohan na miyatay sekaniyan roo ko kilid o Kaban.
8(Sabap roo na pembetowan angkoto a darpa sa 'Piris Osah' taman imanto a gawii.)
Inikararangit i Daod so kiyamborngat o gani o Allah ki Osah,
9 Na inikalek iyan so Allah sangkoto a gawii a tig iyan a "Andamanaya den i kakewita ko
pen ko Kaban o Allah ko kakadenan ko?"
10 Miyapamikir iyan a di niyan den iteros ai mawid taman sa siti a Yarosalim na inisilay
niyan baden ka tiyago iyan ko walay i Obid Idom a taw sa Gat.
11 Miyakatelo olan a katatago o Kaban o Allah roo ko walay i Obid Idom, na riyakmatan
sekaniyan o Allah a rakes o langon o pamiliya niyan.
12 Na miyatero ko dato Daod a "Rarakmatan o Allah so pamiliya i Obid Idom ago so

langon taman iyan sabap ko Kaban o Tohan." Kagiya ka maoto na somiyong si Daod ko
walay i Obid Idom na kinowa niyan on so Kaban o Tohan ka pagowiten iyan sa
Yarosalim a sarta o kapekebabaya.
13 Kagiya makalakad sa miyakanem so manga taw a maawid ko Kaban na piyakatareg
siran i Daod ka mikorban si Daod sa mama a sapi ago so kaolit a nati a sapi.
14 Na si Daod a titinambed sa sotra a dinis na dii segayan ko hadapan o Allah a rakes o
langon a bager iyan
15 Sii ko kapegowita niyan ko Kaban o Allah sa Yarosalim a pegonot on so langon o
manga Israil a di siran dii mameseg ago dii mamamogiyong.
16 Sii den ko kipesoleden iran ko Kaban o Allah sa siti na si Mikal a wata a babay i Saolo
na sisii ko rowasan a di niyan siran dii mbantayan. Na kagiya mailay niyan si Daod a dii
tepak ago dii sesayasayaw ko hadapan o Allah na pisodi iyan sii ko poso iyan.
17 Inawidan iran so Kaban na inibetad iran ko darpa iyan sii ko soled o barombarong a
biyangon i Daod a tegoan on. Na somiyapaat si Daod ko Allah sa manga korban a
petotongen ago manga korban pantag bo ko kanggiginawai.
18 Kagiya mapasad iyan ai somapaat na inipangangarapan iyan so manga taw sii ko
Ingaran o Allah a Lebi a Mamaapaar
19 Na piyamegan iyan sa pangenengken so langon a malilimod a manga Israil ndatar so
mama ago babay. Bigan iyan so oman i isa kiran sa satiman a paan, satompi a korma ago
satompi a pasas. Oriyan iyan na mimbabaling so langon a taw ko walay iran.
20 Kagiya maling si Daod sa kaperakmati niyan ko pamiliya niyan na lominiyo si Mikal

ka inalaw niyan a tig iyan a "Sayana a kiyapakibantogen o dato sa Israil sa ginawa niyan
sangkai a gawii ko kiyalekas iyan sa nditaren sii ko kapegilaya on o manga raga o manga
sanasanaan iyan a datar o dii nggolaolaan o da a kaya iyan a mama!"
21 Na pitero i Daod ki Mikal a "Sii oto ko hadapan o Allah a tiyomo ako niyan a di so
ama a ka aya pen o ba so apiya antawaa ko pamiliya niyan isako itoro ako niyan a madato
ko manga pagtaw niyan a Israil. Na ipendayon aken den so di aken dii kaselasela ko
hadapan o Allah,
22 Na mbalowin ko a ginawa ko a lebi pen a makep a di giyai, na pepekapangalimbabaan
ako sii ko kapegilaya ko sa ginawa ko. Ogaid na kipangkat ako angkoto a manga raga a
pitero o ka."
23 Na da a wata i Mikal a wata i Saolo taman ko kaooyagoyag iyan.
2 SAMOWIL 7
So Initopa o Allah ki Daod
Kagiya makatikna den so dato Daod ko torogan iyan na bigan den o Allah sa kalilintad ko
langon a ridoay niyan ko mbalabala.
2 Samaoto na pitero iyan ko nabi Natan a "Katii ako bo a mababaling ko torogan a
inembaalan a kayo a sidro, ogaid na so Kaban o Tohan na matatago pen ko
barombarong!"
3 Na pitero i Natan ko dato a "Apiya antonaa i mapipikir ka na nggolalanen ka den, ka

sisii reka so Allah."
4 Ogaid na sii den sangkoto a kagagawii na minitoron ki Natan so katero o Allah a tig
iyan a:
5 “Ika roo na go ngka teroa ko oripen aken a Daod a giyai i pitero o Allah: 'Kena a ba
seka i mbengon sa walay a mbelingan ko.
6 Ipoon ko gawii a kiyapakaliyowa ko ko manga Israil sa Misir taman imanto na da ako
den baling sa walay, ka di ako dii tetepatepas ko manga darpa a aya pekedenan ko na
barombarong.
7 Sii ko langon a peketepasan aken a ped o manga Israil na so langon a olowan iran a
siyogo aken sa katagikora ko manga pagtaw aken a Israil na da den a isa kiran bo a ba
aken pagisei o ino ako niyan da mbalain sa walay a kayo a sidro.'
8 “Na teroa ngka imanto ko oripen aken a Daod a 'Giyai i pitero o Allah a Lebi a
Mamaapaar: Kinowa ko seka poon ko kapetegikor ka sa manga bilibili sii ko pananateba
na biyaloy aken seka a olowan o manga pagtaw aken.
9 Sisii ako reka apiya anda ka miyakasong, na piyanaban aken so langon a ridoay ngka sii
ko kapegantap ka kiran. Imanto na pekibantog aken so Ingaran ka a datar o ngaran o lebi
a kababantogan a manga taw ko doniya.
10-11 Pitiyagaran aken sa darpa so manga pagtaw aken a Israil na piyamola aken siran on
kaan siran makabaling ko inged iran a di den keringasa. Inipoon den ko kiyapakasoled
iran on sii ko masa a kiyatoro aken sa manga makapengokom ko manga pagtaw aken a
Israil na perarasain siran o manga rarata a taw, ogaid na di den ai mapenggolaola. Na
pekadekeen ko seka pen ko langon a ridoay ngka.'
"Liyo ron pen na piyayag reka o Allah a mbegan ka niyan sa manga moriyataw, ka tig
iyan a
12'Amay ka mapopos so manga gawii ngka a mitapi ka ko manga apo o ka na
pakapendatoon ko so isa ko manga wata a ka a makasambi reka, na pekabageren ko so
ndatoan iyan.
13 Na sekaniyan den i mbangon sa timplo a kibantog ko Ingaran aken, na
pakapembekenen ko so dii kandato o kebabadan on sa taman sa pakataman.
14 Saken i keama iyan na sekaniyan i kewata aken. O makanggolaola sa bibid na
ndenegen ko a datar o ama a pelambit ko wata iyan.
15 Ogaid na di aken on mbelagen so limo aken a datar o kiyabelaga ko ron ki Saolo a
inipilak aken kaan ka madato.
16 So pamiliya ngka ago so ndatoan ka na ketatap sa taman sa pakataman sii ko hadapan
aken, na makapembeken so korsi i ka sa dayon sa dayon.' "
17 Na piyanotol i Natan ki Daod angkai langon a miyapayag rekaniyan o Allah.
So Pangangarapan i Daod a Kapanalamat
18 Oriyan iyan na somiyoled si Daod ko Barombarong a dii Telabokan na miyontod ko

hadapan o Allah na pitero iyan a:
"Antawaa ko, ya Allah a Kadnan ko, ago antonaa i pamiliya ko a kena a ba kami
mapapatot sangkai a kinipangkaten ka raken?
19 Ogaid na maito ini a pinggolaola ngka sii ko kapipikira ngka on, ya Allah a Kadnan
ko, ka pitero o ka pen so makapantag ko keoriyan ko kebabadan raken! Ba giyai i kalilid
a ipekidia ngka ko manosiya, ya Allah a Kadnan ko?
20 “Antonaa pen i mapetero aken reka! Ka katawan ako ngka a oripen ka, ya Allah a
Kadnan ko.
21 Sabap ko initopa ngka ago mipepasod ko kabaya a ka na pinggolaola ngka ngkai a
mala a nganin, na piyakitokawan ka raken den a oripen ka.
22 “Sayana ka a mipapangkat, ya Allah a Kadnan ko! Da den a ba ngka lagid; na

katawan ami so pekeneg o manga tangila mi a da den a Tohan a rowar reka.
23 Na antawaa i datar o manga pagtaw ngka a Israil? Giyanan bo i nasiyon ko doniya a
miyaaon ka, hey Tohan ko, kaan siran mabaloy a manga kaom ka ago an mabantog so
Ingaran ka a nggolalan ko manga ala ago piyakamemesa a pinggolaola ngka kiran. Ka
piyamogaw ngka so ped a manga nasiyon a rakes o manga katohanan iran sii ko
pegantapan o manga pagtaw ngka a miyapakaliyo ngka sa Misir.
24 Piyakambeken ka so manga Israil a rek ka den a manga taw sa taman sa pakataman, na
seka, ya Allah, i miyabaloy a Tohan iran.
25 “Imanto den, ya Allah a Tohan ko, na tomanen ka sa taman sa pakataman so pitero o

ka makapantag raken a oripen ka ago so kebabadan raken. Nggolalanen ka so initopa
ngka
26 Kaan mabantog so Ingaran ka sa dayon sa dayon. Amay ka magiyoto na mapetero o
manga taw a 'So Allah a Lebi a Mamaapaar na aya Tohan sii sa Israil!' Na so pamiliya i
Daod a oripen ka na makapembeken ko hadapan ka.
27 “Ya Allah a Lebi a Mamaapaar a so Tohan o Israil na miyapayag ka ini langon sii
raken a oripen ka a tig ka a 'Mbegan ko seka sa manga moriyataw a manga babaloy a
dato.' Sabap roo na kiyaoyatan ako sa kiniadapen aken reka sangkai a pangangarapan.
28 “Ya Allah a Kadnan ko, seka i Tohan! Kasasarigan so manga katero o ka, na initopa
ngka raken angkai a kamapiyaan.
29 Kagiya ka maoto na pengnin ko imanto a ikasoat ka so karakmati ngka ko pamiliya ko
kaan matatap sii ko hadapan ka. Ya Allah a Kadnan ko, seka i tomiyopa sii, na nggolalan
ko rakmat ka na perakmatan so pamiliya ko sa taman sa pakataman."
2 SAMOWIL 8
So dii Kapakitidawa i Daod
Oriyan ai sii ko kapepamanagad o manga gawii na giyobat peman i Daod so manga

Pilistiyo na tiyaban iyan siran, na piyokas iyan so inged ko kapaar iran.
2 Tiyaban pen i Daod so manga Mowabiyo. Piyamakaiga iyan siran ko lopa na piyanakes
iyan siran a tali. Oman i madowa takes kiran na pembonoon, na so ikatelo a takes na
pakapepagoyagen. Na miyasekop i Daod so manga Mowabiyo na pepekabowis siran on.
3 Liyo ron pen na tiyaban i Daod so dato sa Sobah a si Hadadisir a wata i Rihob sii ko
kapelalakaw i Hadadisir sa kipagasalen iyan ko kapaar iyan ko manga inged a midadair
ko lawasaig a Yopratis.
4 Diyakep i Daod so sanggibo ko manga karo niyan sa katidawa ago pito nggibo a
komakaro a rakes o dowa polo nggibo a manga sondaro. Pilelepo iyan so langon o manga
koda a tomotoyok ko karo a liyo ko magatos timan on.
5 Na somiyogo so manga Isiriyan sii sa Damaskos sa manga sondaro sa kapenabangi ran

ki Hadadisir, ogaid na giyobat siran i Daod na piyamono iyan so dowa polo ago dowa
nggibo kiran.
6 Tiyagoan iyan a inged a Siriya sa manga
kampo a sondaro na miyasekop iyan siran a pepekabowis on. Na migay so Allah ki Daod
sa kapakataban apiya anda sekaniyan pesengor.
7 Piteban i Daod so manga kelong a bolawan a rek o manga olowan i Hadadisir na inowit
iyan ai sa Yarosalim.
8 Kominowa sekaniyan pen sa tanto a madakel a tombaga a poon sa Bitah ago giya
Birotay a manga inged a dii ndatoan i Hadadisir.
9 Kagiya maneg i Toy a dato sa Hamat a tiyaban i Daod so langon a sondaro i Hadadisir
10 Na siyogo iyan so wata iyan a si Yoram ko dato Daod sa kaselama niyan ago kaselaa
niyan on ko kiyatabana niyan ki Hadadisir ko katidawa, ka dii mambo makitidawa si Toy
ki Hadadisir. Na inowitan i Yoram si Daod sa manga pamemegayan a bolawan, pirak ago
tombaga.
11 Inisenggay ini i Daod a rek o Allah a datar o inikidia niyan ko manga bolawan ago
pirak a poon ko langon a nasiyon a miyasekop iyan
12 A giya Idomiya,giya Mowab, so manga Isiriyan, so manga Pilistiyo ago so manga
Amalik. Inisenggay niyan on pen so miyateban iyan a poon ki Hadadisir a dato sa Sobah.
13 Na miyangosor den so bantogan i Daod kagiya makakasoy a poon ko kiyapamonoa

niyan ko sapolo ago walo nggibo a manga taw sa Idomiya sii ko Balintad a Timos.
14 Tiyagoan iyan a dalem a inged a Idomiya sa manga kampo a sondaro, na miyasekop i

Daod so langon a Idomiyan. Na migay so Allah ki Daod sa kapakataban apiya anda
pesengor.
So manga Sanasanaan i Daod
15 Dii ndatoan i Daod so dalem a Israil a aya di niyan dii indato ko langon a pagtaw niyan
na so kokoman ago kaontol.
16 Si Yowab a wata i Siroyah na aya olowan o manga sondaro; si Yahosapat a wata i
Ahilod na aya komikibir ko manga rikord;
17 Si Sadok a wata i Ahitob ago si Ahimilik a wata i Abiyatar na aya manga imam; si
Sirayas na aya panonorat;
18 Si Binayas a wata i Yahoyada na aya olowan o manga gordiya i Daod; na so manga
wata i Daod a manga mama na manga mosawira o dato.
2 SAMOWIL 9
Si Daod ago si Mepibosit
Miyakaisa a gawii na iniise i Daod o ba aden pen a lamba ko pamiliya i Saolo a mikalimo
iyan sabap ki Yonatan.
2 Samaoto na aden a talasogoay o pamiliya i Saolo a aya ngaran iyan na Siba.
Piyakisogoan iran a domarpa ki Daod, na iniiise on o dato a "Ba seka si Siba?"
"Oway, oripen ako ngka," a inisembag iyan.
3 Na iniise o dato a "Ba aden pen a miyalamba ko pamiliya i Saolo a mapakiilay aken on
so limo o Tohan?"
Tig i Siba a "Aden pen a wata i Yonatan a malelepo so mbala a ai niyan."
4 “Anda sekaniyan?" a iniise o dato.

"Ndodoo sekaniyan ko walay i Makir a wata i Amiyal sii sa Lo Debar," a inisembag i
Siba.
5 Mandiyadi na piyakirapit sekaniyan i Daod a poon sa Lo Debar sii ko walay i Makir a
wata i Amiyal.
6 Kagiya makaoma ki Daod si Mepibosit a wata i Yonatan a aya wata i Saolo na

somiyodiyod sekaniyan ki Daod a piyagadatan iyan.
Pitero i Daod a "Mepibosit!"
"So den so oripen ka," a inisembag iyan
7 “Di ka pekelek," a tig i Daod, "ka matamataan a ikelimo aken seka sabap ko ama a ka a
si Yonatan. Ikesoy aken reka so langon a lopa a miniganat o apo o ka a dato a si Saolo,
na lalayon ka pekakan sii ko lamisaan aken."
8 Somiyodiyod peman si Mepibosit a tig iyan a "Antonaa i kipantag aken a oripen ka a

aya sabap angkai a kiyasabapan sangkai a kiyainengkaa ngka raken a matag ako baden
lagid o maatay a aso?"
9 Mandiyadi na piyakitawag o dato si Siba a talasogoay i Saolo na pitero iyan on a

"Inibegay aken ko apo o kadnan ka so langon taman a rek i Saolo ago so pamiliya niyan.
10 Seka ago so manga wata a ka a manga mama ago so manga oripen ka na palaya kano
makapembasok sa lopa para rekaniyan na pegowiten iyo ron so pekeragon on kaan
kaadeni sa pangenengken so pamiliya o kadnan ka a si Saolo. Ogaid na si Mepibosit na
lalayon pepekakan sii ko lamisaan aken." (Si Siba na sapolo ago lima i wata a mama ago
dowa polo a oripen iyan.)
11 Na pitero i Siba a "Ipenggolalan aken, kadnan ko a dato, so langon taman a inisogo o

ka raken a oripen ka." Na sii pepekakan si Mepibosit ko lamisaan o dato a datar o isa ko
manga wata o dato.
12 Aden a wata i Mepibosit a bago a mama a aya ngaran iyan na si Mika, na so langon a
maaped ko pamiliya i Siba na palaya manga talasogoay i Mepibosit.
13 Na si Mepibosit a lepo so mbala a ai niyan na sii mababaling sa Yarosalim ka lalayon
pepekakan sii ko lamisaan o dato.
2 SAMOWIL 10
Tiyaban i Daod so manga Amoniyo ago so manga Isiriyan
Sii ko kapepamanagad o manga gawii na miyatay so dato o manga Amoniyo, na so wata

iyan a si Hanon i miyakasambi on a dato.
2 Miyapamikir i Daod a "Ipengginawai aken si Hanon a datar o kiningginawain raken o
ama iyan." Na somiyogo si Daod sa manga mama a makatibaw ki Hanon sabap ko
kiyapatay o ama iyan.
Kagiya makaoma siran ko inged o manga Amoniyo
3 Na so manga pelokelokesen a Amoniyo na pitero iran ki Hanon a kadnan iran a "Ba aya
katao ngka on na seselaan i Daod so ama a ka ko kiyasogoa niyan reka sangkai a manga
mama sa katibaw iran reka. Kena! Ka siyogo siran reka i Daod a makapenoriman ko siti
kaan iran magobat ago masakop!"
4 Na piyakidakep i Hanon so manga siyogo i Daod na piyangopawan iyan sa sesaopak ko

manga sompa iran ago piyanabas iyan so kababaan ko manga kimon iran kaan kasawai so
manga pitot iran na go niyan bo pakalalakawa.
5 Tanto siran a kiyayaan sa kapembaling iran, na kagiya maneg i Daod so miyanggolaola
na somiyogo sekaniyan sa makabalak kiran a tig iran a "Tareg kano roo sa Yariko taman
sa mamakato so manga sompa iyo na go kano bo baling."
6 Kagiya katokawan o manga Amoniyo a mimbaloy siran a ipekesisingay i Daod na

tomindan siran sa dowa polo nggibo a manga sondaro a Isiriyan a poon sa Bit Rihob ago
giya Sobah ago so pen so sanggibo a manga mama a poon ko dato sa Maakah, ago sapolo
ago dowa nggibo a poon sa Tob.
7 So kiyanega sii i Daod na siyogo iyan si Yowab a rakes o langon a sondaro niyan sa
kipetidawaan iran kiran.
8 Mililiyo so manga Amoniyo na mitiyagar siran makitidawa a romarantar sii ko gimowa
o siti ran, na so peman so manga Isiriyan a poon sa Sobah ago giya Rihob ago so pen so
manga mama a poon sa Tob ago Maakah na kisisibay a sisii ko liyo o siti.
9 Miyailay i Yowab a aden a nggobat rekaniyan sii ko onaan iyan ago sii pen sa talikodan;
sabap roo na piyagaraw niyan so lebi a manga papasang a sondaro sii sa Israil na aya
niyan piyakasarempang ko manga Isiriyan.
10 Piyakipagolowanan iyan so lamba a manga sondaro ko pagari niyan a si Abisay, na
piyakasarempang iyan siran ko manga Amoniyo.
11 Na pitero on i Yowab a "O mailay ngka a di ako pekaato ko manga Isiriyan na
panabangi ako ngka, ogaid na o di ka pekaato ko manga Amoniyo na penabangan ko
seka.
12 Pakababager kano; ipangato tano so manga taw tano a Israil ago so manga inged o
Tohan tano. Pengnin ko a minggolalan so kabaya o Allah!"
13 Na giyoto a somiyorong si Yowab ago so manga sondaro niyan sa kanggobata iran ko

manga Isiriyan, na piyalagoyan iran sekaniyan.
14 Kagiya mailay o manga Amoniyo a miyamalagoy so manga Isiriyan na piyalagoyan
iran mambo si Abisay ka miyamagapas ko siti. Kagiya ka maoto na gominek makitidawa
si Yowab ko manga Amoniyo na komiyasoy sa Yarosalim.
15 Kagiya mailay o manga Isiriyan a tiyaban siran o manga Israil na tinimo iran so
kalangolangon o manga sondaro iran.
16 Na piyakisogoan i Hadadisir so manga Isiriyan a makalelepas ko lawasaig a Yopratis,
na miyakaoma siran sa Hilam a penanakodaan i Sobak a komandir o manga sondaro i
Hadadisir.
17 Kagiya matero ini ki Daod na tinimo iyan so langon a sondaro a Israil na rominipag
siran sa lawasaig a Yordan a somiyong sa Hilam. Romiyantar so manga Isiriyan a
somasarempang ki Daod na initidawa iran sekaniyan.
18 Ogaid
na piyalagoyan iran bo so manga Israil, na miyakapatay si Daod sa pito gatos ko kikakaro
iran ago pat polo nggibo a kikokoda. Piyalian iyan pen si Sobak a komandir o manga
sondaro iran a aya niyan den inipatay.
19 Kagiya mailay o langon a dato a mipapaar i Hadadisir a miyataban siran o Israil na
piyangangapinan iran so manga Israil na miyakisakop siran kiran. Na miyalek den so
manga Isiriyan o ba iran peman abanga so manga Amoniyo.
2 SAMOWIL 11
Si Daod, si Batsiba ago si Oriyas
Sii ko pangolaon a masa a kapelalakaw o manga dato sa kapakipetidawa iran na siyogo i

Daod si Yowab a rakes o manga sanasanaan iyan ago so langon a sondaro a Israil.
Bininasa iran so manga Amoniyo na linikopan iran so siti a Rabah. Ogaid na
tetalimbagak si Daod sii sa Yarosalim.
2 Miyakaisa a gagawii na mimbowat si Daod ko igaan iyan na somiyong ko pantar a atep

o torogan iyan. Sii ko di niyan on dii kandadalakaw na kiyatolongan iyan a babay a dii
peigo sii ko walay niyan. Tanto a mataid angkoto a babay
3 Na somiyogo si Daod sa makapangingise sa makapantag rekaniyan. Tig o siyogo a
"Giyanan si Batsiba a wata i Iliyam ago karoma i Oriyas a Hitiyo."
4 Na somiyogo si Daod sa makarapit rekaniyan. Miyakaoma on so babay na rimbang i
Daod. (Aya den kiyasotiya o babay sa ginawa niyan poon ko kiyadalem iyan a hadas.)
Oriyan iyan na miyaling bo so babay sa walay.
5 Da matey na kiyatokawan iyan a miyaogat sekaniyan na piyakitero iyan ki Daod.
6 Sabap roo na piyakitero i Daod ki Yowab a "Pakasonga ngka raken si Oriyas a Hitiyo."
Na piyakasong sekaniyan i Yowab ki Daod.
7 Kagiya makaoma si Oriyas na iniise on i Daod o antonaa i kapakambebetad i Yowab
ago so manga sondaro ago makapantag ko pekebolosan o katidawa.
8 Oriyan iyan na pitero iyan ki Oriyas a "Song ka ko walay ngka na deke ka pasin." Na
giyanatan i Oriyas so torogan na aden a initondog on o dato a pamemegayan.
9 Ogaid na da baling si Oriyas ka sii baden miyakatorog ko gimowa o torogan o dato a
ped o langon a talasogoay o kadnan iyan.
10 Kagiya matero ki Daod a "Da song si Oriyas ko walay niyan," na iniise on i Daod a
"Ba kena a aya ngka den kiyapakapoon sa mawatan? Ino ka da baling?"
11 Tig i Oriyas a "So manga Israil ago so manga taw sa Yodah na palaya makakakaden
ko manga barombarong na ndodoo kiran so Kaban sa Kapasadan; na so olowan aken a si
Yowab a ped iyan so manga pagtaw o kadnan aken na kikakampo ko manga pangomaan.
Andamanaya i kambaling aken ko walay aken a kan ago maginom ako ron na taros a
perembangen ko so karoma ko? Matamataan ko kaooyagoyag ka, ka di aken den anan
mapenggolaola!"
12 Mandiyadi na pitero on i Daod a "Kaden ka sii sa salongan pen na pakakasowin ko

seka mapita." Komiyaden si Oriyas roo sa Yarosalim sangkoto a gawii ago sii ko
telondog on,
13 Na miyakipagatoang on si Daod na bireg iyan. Ogaid na kagiya magagawii na da den
baling si Oriyas ko walay niyan ka lominiyo baden sa kapekatorog iyan ko dempas iyan a
ped o manga talasogoay o kadnan iyan.
14 Sii ko kiyapita iyan na pisoratan i Daod si Yowab na inipakawit iyan ai a nggolalan ki

Oriyas.
15 Aya inisorat iyan na "Tagoa ngka si Oriyas ko panempang o manga sondaro a ron
tanto a maregen so katidawa na go ngka awai kaan mapana ago matay."
16 Sabap roo sii ko kalilikopi i Yowab ko siti na tiyago iyan si Oriyas ko darpa a katawan
iyan a ndodon so lebi a manga babager a pepangeren ko siti.
17 Na kagiya meliliyo siran ko siti a makipetidawa ki Yowab na miyapatay iran so ped ko
manga sondaro i Daod, na miyatay mambo si Oriyas a Hitiyo.
18 Oriyan iyan na somiyogo si Yowab sa makapanotol ki Daod ko langon a

miyasowasowa ko katidawa.
19 Ininsaratan iyan so sogo a tig iyan a "Amay ka mapasad ka manotol ko dato so langon
a miyasowasowa ko katidawa
20 Na baanda kerarangiti so dato na ipagise iyan reka a 'Ino niyo tanto a ndasega so siti ko
kiyapakitidawa iyo ron? Ba niyo di katawi a penaan kano iran a poon ko kota iyan?
21 Ba ngka di ketademi o antawaa i miyono ki Abimilik a wata i Gidiyon? Babay anan a
miolog on sa galingan a ator a poon ko pangeleban a aya niyan inipatay roo sa Tibis. Ino
kano tanto a ndaseg ko kota?' O iise iyan reka ini na teroa ngka on a 'So pen so oripen ka
a si Oriyas na miyatay.'"
22 Na gomiyanat den so siyogo na kagiya makaoma ki Daod na kiyasoy niyan on so

langon taman a pakipenotol on i Yowab
23 A tig iyan a "Lebi rekami a mabager so manga ridoay ami ka liniyowan kami ran a
poon ko siti sa kapakipetidawa iran rekami ko pangomaan, ogaid na minidendeg ami
siran peto ko gimowa o siti.
24 Na giyoto a piyamana kami ran a poon ko kota na miyamatay so ped ko manga
sondaro ngka; na miyatay mambo so oripen ka a si Oriyas a Hitiyo."
25 Na pitero i Daod ko siyogo a "Teroa ngka ki Yowab a 'O ba ngka ini aawiden a akal,
ka di den ketendo o ba giyai o di na giyanan a taw i kebono sii ko katidawa. Dasaa ngka
sebenar gomobat so siti na binasaa ngka!' Teroa ngka ini ki Yowab a ipagoyat on."
26 Kagiya maneg o karoma i Oriyas a miyatay so karoma niyan na inimboko iyan.

27 Kagiya mapasad so kiyandiyagai niyan on na piyakirapit sekaniyan i Daod ko torogan
iyan na miyabaloy a karoma niyan, na mimbawata ki Daod sa mama. Ogaid na so
pinggolaola i Daod na inikarata a ginawa o Allah.
2 SAMOWIL 12
Pimbongetan i Natan si Daod
Siyogo o Allah so nabi Natan ki Daod. Kagiya makaoma on na pitero iyan a "Aden a
dowa kataw a mama ko isa a inged. So isa on na kawasa na so isa peman na miskin.
2 So kawasa na tanto den a madakel i bilibili, kambing ago sapi.
3 Ogaid na da a ba rek o miskin a rowar ko satiman a nati a bilibili a piyamasa niyan.
Inoyag iyan na miyakala ini sii ko walay niyan a ped o manga wata iyan. Pepekakan ai ko
pangenengken iyan ago pepekainom ko tagayan iyan na pepekatorog pen sii ko bobon
iyan. Na datar o ba niyan wata a babay.
4 “Miyakaisa a gawii na aden a miyakaoma a lomalayag a pembisita ko kawasa a mama.

Na di niyan kabaya i ba niyan sombalia so apiya isa ko bilibili niyan o di na sapi a
ipagana niyan ko lomalayag, na kinowa niyan baden so nati a bilibili o miskin na aya
niyan pitiyagar ko mimbisita on."
5 So kiyanega sii i Daod na tanto niyan a kiyararangitan angkoto a kawasa, na pitero iyan
ki Natan a "Matamataan ko kaooyagoyag o Allah ka patot a mbonoon so mama a
minggolaola sii!
6 Disomala a kebayadan iyan sa pat takep angkoto a bilibili sabap ko da a kapedi iyan a
pinggolaola niyan."
7 “Seka so mama!" a tig i Natan ki Daod. "Na giyai i pitero o Allah a Tohan o Israil:
'Biyaloy aken seka a dato sa Israil na siyabet aken seka ko lima i Saolo.
8 Inibegay aken reka so pamiliya niyan ago so manga karoma niyan a masiyap ka;
inibegay aken reka pen so ndatoan a Israil ago giya Yodah, na o maito pen ai reka na
kebegan ko seka pen sa madakel!
9 Ino ngka pegongkira so manga katero aken sa kiyanggolaolaa ngka sangkai a marata sii
ko kapegilaya ko ron? Piyakibono o ka si Oriyas a Hitiyo ko katidawa na kinowa ngka so
karoma niyan a mapengaroma ngka! Inibono ka on so pedang o manga Amoriyo.
10 Kagiya ka maoto na di den kebelag ko pamiliya ngka so pedang sabap sa linimbanan
ako ngka ago kinowa ngka so karoma i Oriyas.'
11 Pitero pen o Allah a 'Pakiwitan ko seka sa morala a nggolalan ko pamiliya ngka. Sii
den ko kapegilaya ngka on na kowaan aken so manga karoma ngka ka imbegay aken ko
madaseg ka, na perembangen iyan siran sii ko kaliwanag o kadaondaw.
12 So pinggolaola ngka na sii sa masolen, ogaid na penggolaolaan ko ini ko kaliwanag o
kadaondaw sii ko kapekeilaya on o langon a Israil.'"
13 Na pitero i Daod ki Natan a "Miyadosa ko ko Allah!"

"Rinilaan mambo o Allah so dosa ngka," a inisembag i Natan, "na kena o ba ka petay.
14 Ogaid na sabap sa bigan ka so manga ridoay o Allah sa mipagitowito iran rekaniyan a
nggolalan ko pinggolaola ngka na mataan den a petay so bago a mama a inimbawata a
ka."
Miyatay so Wata a mama i Daod
15 So den so kiyapakabaling i Natan na piyakasekit o Allah so wata i Daod a inimbawata

on o karoma i Oriyas.
16 Inipangangampedian i Daod so wata ko Tohan. Mipowasa sekaniyan na oman
gagawii na pesoled ko walay niyan ka pegiga ko lopa sa mababas a gawii.
17 So manga sanasanaan iyan ko torogan na somiyong on ka pakapembowaten iran ko
lopa, ogaid na minda si Daod na da iyog o ba kiran atoang ko kapekan iran.
18 Sii ko ikapito gawii na miyatay so wata. Miyalek so manga sanasanaan i Daod o ba

iran on teroa a miyatay so wata, ka mapipikir iran a "Isako oyagoyag pen so wata na igira
a di tano dii makimbitiyarai ki Daod na di tano niyan pekinegen. Andamanaya i
kapeteroa tano ron sa miyatay so wata? Baanda niyan pakasakiti a ginawa niyan!"
19 Miyainengka i Daod a di siran dii mamagetonga na kiyasabotan iyan a miyatay so

wata. "Ba miyatay so wata?" a iniise iyan.
"Oway," a tig iran, "miyatay den."
20 Mandiyadi na mimbowat si Daod ko lopa, na kagiya makapeigo ago makakekamotan

ago makasambi sa nditaren na somiyoled ko Walay o Allah ka sominimba. Na kagiya
maling sekaniyan sa walay na miyangni sa pangenengken na inenatan iran na komiyan
den.
21 Na iniise on o manga sanasanaan iyan a "Ino ngka ini dii nggolaolaa? Sii ko
kaooyagoyag o wata na di ka dii powasa ago pesegad. Ogaid na sii den ko kiyapatay
niyan na mimbowat ka ago komiyan!"
22 “Oway," a tig i Daod, "isako oyagoyag pen so wata na mipowasa ako ago somigad, ka
mapipikir aken a 'Antawaa i matao ron, ka baanda ko ikalimo o Tohan na oyagen iyan so
wata.
23 Ogaid na imanto a miyatay sekaniyan den na ino ako pen pepowasa? Ba aken
mapekakasoy? Kesono aken sekaniyan ogaid na di raken kesoy."
Inimbawata si Solaiman
24 Oriyan ai na piteyotayoan i Daod si Batsiba a karoma niyan. Somiyong sekaniyan on

na romimbang on, na miyaogat si Batsiba ago mimbawata sa mama, na bitowan iran sa
ngaran a Solaiman. Pekebabayaan o Allah so wata
25 Na siyogo iyan so Nabi Natan sa kabetowi niyan on sa Yadidiyas, ka pekebabayaan
sekaniyan o Allah.
Inagaw i Daod so Siti a Rabah
26 Pamomolowan a dii makitidawa si Yowab ko tindos a siti o manga Amoniyo a giya

Rabah na magaan iyan maagaw.
27 Na somiyogo si Yowab sa makapetero ki Daod sa "Giyobat aken a Rabah na
miyaagaw aken so pekepoonan ko ig iran.
28 Na pagolowani ngka imanto so ped ko manga sondaro na likopi niyo so siti na go niyo
agawa, ka o di, na saken i pekaagaw ron na kisangay so siti sa ngaran aken."
29 Na giyoto a piyagolowanan i Daod so langon o manga sondaro na somiyong siran sa

Rabah na giyobat iran ago miyaagaw iran.
30 Kinowa niyan so sangkad a bolawan ko olo o dato iran a aya kapened iyan na manga
telo polo ago pat ka kilo a piyagartaan sa manga montiya, na tiyago ini ko olo i Daod. Na
tanto a mala a miyateban iyan ko siti.
31 Piyamakaliyo niyan so manga taw a kibabaling on na piyamakanggalebek iyan siran sa
kanggagabas, kapangebar, kapamatok ago kapamangembaal sa manga bata. Giyanan i
pinggolaola niyan ko langon a inged o manga Amoniyo. Oriyan iyan na komiyasoy si
Daod sa Yarosalim a rakes o langon a sondaro niyan.
2 SAMOWIL 13
Si Amnon ago si Tamar
So wata i Daod a si Absalom na aden a mataid a babay niyan a si Tamar. Si Amnon a isa
pen ko manga wata i Daod na kiyababayaan iyan si Tamar,
2 Na inikasakit iyan so kipekedaliin iyan ki Tamar ka kagiya raga pen, na maregen ki
Amnon o ba aden a manggolaola niyan on.
3 Ogaid na aden a layok i Amnon a aya ngaran iyan na si Yonadab a wata o pagari i Daod
a si Simiyas. Si Yonadab na tanto a baraakal a mama
4 Na iniise iyan ki Amnon a "Ino ka a wata o dato na lagid o ba mararata a ginawa ngka
oman gawii? Ba ngka raken di mapetero?"
"Pekebabayaan ko si Tamar a babay o pagari aken a Absalom," a inisembag i
Amnon.
5 “Iga ka ko igaan ka na go ka sesakisakit," a tig i Yonadab. "Na amay ka ibentel ka i

ama ka na teroa ngka on a 'Kapedipedi ka bo na pakasonga ngka raken si Tamar a babay
aken kaan ako niyan kanati sa pangenengken. Na pakitiyagaren ka on a kamamasaan
aken kaan aken pekeilay ago mapanongit ako niyan.'"
6 Na miniga si Amnon a misesakisakit. Kagiya ibentel o dato na pitero on i Amnon a
"Kapedipedi ka bo na pakasonga ngka raken si Tamar a babay aken kaan ako niyan
mimbaal sa maito a manga mamis ko kapekeilaya ko ron ago mipanongit iyan raken."
7 Na piyakisogoan i Daod si Tamar sii sa walay a tig iyan a "Song ka ko walay i Amnon a
pagari ngka na tiyagari ngka sa pangenengken."
8 Na somiyong roo si Tamar na miyaoma niyan si Amnon a miiga. Kominowa sekaniyan
sa arina na pitiyagar iyan ago pimbaalan iyan a manga mamis ko kapegilaya on i Amnon.
Oriyan iyan na pimamis iyan
9 Na kinowa niyan so kara na inenat iyan on so manga mamis, ogaid na minda si Amnon
o ba niyan kana. Pitero iyan baden a "Pakaliyowa ngka so langon a sisii," na mililiyo so
oman i isa.
10 Oriyan iyan na tig iyan ki Tamar a "Wita ngka raken so pangenengken sii ko rowang
aken kaan ka raken mipanongit." Na kinowa i Tamar so manga mamis na inowit iyan ki
Amnon sii ko rowang iyan.
11 Ogaid na kagiya isongit iyan on na giyander iyan sekaniyan a tig iyan a "Rembang ka
raken, Babay!"
12 “Di ka, laki ko!" a tig i Tamar. "Di ako ngka tegela! Di patot i ba mapenggolaola so
datar ai sii sa Israil! Di ngka sowaa angkai a marata!
13 Anda ko tegoa so kayaan aken? Ago seka! Kedatar ka o isa ko manga lalong sii sa
Israil. Kapedipedi ka bo na pakimbitiyarai ka ko dato ka di niyan isepar so kapangaromaa
ngka raken."
14 Ogaid na da niyan pakinega so dii teroon i Tamar, na sabap sa mabager si Amnon a di
sekaniyan na liyobed iyan.
15 Oriyan iyan na tanto sekaniyan a inikagowad i Amnon, ka so kipekegowaden iyan on
na lebi a mala a di so kiyababayai niyan on isako mona. Na pitero on i Amnon a
"Mbowat ka na go ka liyo!"
16 “Di," a tig i Tamar. "So kabogawa ngka raken na lebi a mala a kamarataan a di so
miyanggolaola ngka raken den!"
Ogaid na da den pakinega i Amnon.
17 Tiyalowan iyan so mangoda a di on dii telagad na tig iyan a "Pakaawaa ngka sii angkai
a babay! Pakaliyowa ngka na go ngka tanggali so pintoan!"
18 Na piyakaliyo o mangoda na tiyanggalan iyan so pinto. Somosolot si Tamar sa
mbarambarang i warna a kimon a matas i barokan, ka giyai i nditaren o da makeroma a
babay a wata o dato.
19 Na tiyagoan iyan sa ombi so olo niyan ago kinisi iyan so kimon iyan, na diyapengan
iyan a lima a paras iyan na lomiyalakaw a penggoraok sa matanog.
20 Kagiya mailay i Absalom a laki niyan na pitero iyan on a "Ba ka pitekor i Amnon a
pagari ngka? Rerenek ka baden, babay ko, ka laki ngka sekaniyan. Di ngka ndalema ko
poso o ka." Na sii den komakaden si Tamar ko walay i Absalom a laki niyan a kekarata a
ginawa niyan a babay.
21 Kagiya maneg ai langon i Daod na tanto a kiyararangitan. Ogaid na da niyan danega
so wata iyan a Amnon sabap sa pekebabayaan iyan ka popaw sekaniyan sa lawas iyan.
22 Na da den a ba pitero i Absalom ki Amnon apiya anda ko marata o di na mapiya ka
ipekegowad iyan si Amnon sabap ko kiyalobeda niyan ki Tamar a babay niyan.
Biyono i Absalom si Amnon
23 Kagiya makadowa den ragon na pepakipangopawan i Absalom so manga bilibili niyan

sii sa Baal Hasor a marani ko inged a Ipraim, na biyantowan iyan so langon a wata a
mama o dato a somong roo.
24 Na somiyong si Absalom ko dato Daod na pitero iyan on a "Hey kadnan ko,
pepakipangopawan aken so manga bilibili aken. Pengnin ko reka, dato, a roo kano raken
makadarpa ago so manga sanasanaan ka."
25 “Di, wata ko," a tig o dato. "Langon kami di pekadarpa ka ba kami reka baden
pekabangen." Na apiya pen tigel sekaniyan i Absalom na da den iyog o ba roo song, na
riyakmatan iyan baden si Absalom.
26 Ogaid na pitero i Absalom a "O di, na kapedipedi ka bo na pakaonota ngka rekami si

Amnon a pagari aken."
27 “Antonaa i pagonotan iyan reka?" a iniise i Daod.
27 Ogaid na tigel sekaniyan i Absalom na piyakaonot iyan on si Amnon ago so ped a
manga wata o dato a manga mama.
Mitiyagar si Absalom sa bangkiti a patot ko dato.
28 Na ininsaratan iyan so manga talasogoay niyan a tig iyan a "Pakinega ko niyo! Amay
ka mabereg sa arak si Amnon na go ko reka teroa a 'Lakota niyo si Amnon," na
nggolaolaa niyo den! Di kano pekelek. Ba kena a saken i somiyogo rekano?
Pakababager kano ago pakawawaraw!"
29 Na ininggolalan o manga talasogoay i Absalom so inisogo iyan kiran ka biyono iran si
Amnon. Na giyoto a tominikeras so langon a ped a manga wata o dato na mikokoda siran
ko manga kimar iran na miyamalagoy.
30 Sii ko kapekesoy iran sa Yarosalim na miniripot ki Daod a "Piyamono langon i

Absalom so manga wata o dato; da den a isa kiran bo a ba miyalamba."
31 Na tominindeg so dato na kinisi iyan so nditaren iyan na gomipe ko lopa; na so pen so
langon a talasogoay niyan a tomitindeg roo na piyamangisi iran mambo so manga
nditaren iran.
32 Ogaid na si Yonadab a wata o pagari i Daod a si Simiyas na pitero iyan a "Kadnan ko,
di ngka pemikira o ba iran piyamono langon so manga wata a ka; si bo si Amnon i
miyatay. Giyanan den i kekadiyaten i Absalom ipoon ko gawii a kiyalobeda i Amnon ki
Tamar a babay niyan.
33 Kagiya ka maoto, kadnan ko a dato, na di ngka pegawiden a akal so totol a palaya den
miyamatay so manga wata a ka, ka si bo si Amnon i miyatay."
34 Samaoto na miyalagoy si Absalom.
Na lomiyangkaw so mangoda a bantabantay na miyailay niyan a madakel a taw a
petondagay ko silid o bobongan sii ko lalan a ipesong sa Horonaim. Somiyong sekaniyan
ko dato na iniripot iyan on so miyailay niyan.
35 Na pitero i Yonadab a "Ilaya ngka man, ka pepekaoma so manga wata a ka, dato; so
den so pitero aken a oripen ka i miyanggolaola."
36 So den so kiyapakapasad iyan tero na miyakaoma so manga wata o dato a dii

nggogoraok sa matanog. So mambo so dato ago so langon a talasogoay niyan na tanto
siran a miyakagoraok.
37-38 Miyalagoy si Absalom na miyagapas ko dato sa Gisor a si Talmay a wata i Ahimod

na tomiyareg roo ko miyakatelo ragon. Gawii gawii den na dii imboboko i Daod so wata
iyan a Amnon.
39 Ogaid na kagiya mada den so kinimbokoon iyan ko kiyapatay i Amnon na tanto a
kipekedaliin iyan ki Absalom.
2 SAMOWIL 14
Komiyasoy si Absalom sa Yarosalim
Kagiya masipat i Yowab a ipekedali o dato si Absalom

2 Na piyakisongowan iyan so sakataw a baraakal a babay a mababaling sa Tikowa. Na
pitero iyan on "Omamanti ka sa di ka dii ndiyaga. Solot ka sa nditaren o dii ndiyaga na di
ka den petetanosan. Sayan ka sa babay a miyatey den a kimbobokoon iyan ko miyatay,
3 Na song ka ko dato na go ngka on teroa ngkai a totolan." Na giyoto a pitero on i Yowab
so totolan a mapetero o babay.
4 Kagiya makaoma so babay ko dato na somiyodiyod sekaniyan on a piyagadatan iyan, na

tig iyan a "Tabangi ako ngka, hey dato!"
5 “Antonaa i awid a akal ka?" a iniise iyan on.

"Mataan den a balo ako a babay," a inisembag iyan. "Miyatay so karoma ko.
6 Saken a oripen ka na aden a dowa a wata aken a manga mama. Miyakaisa a gawii na
mimbono siran a dowa sii ko pangomaan na da den a ba kiran miyakambelag. So isa on
na miyasogat iyan so ped na miyapatay niyan.
7 Imanto na so langon a tonganay aken na pekerarangitan ako iran a tig iran a 'Palada
ngka rekami so wata a ka a miyakapatay ko pagari niyan kaan ami mabono a imbadal ko
niyawa o pagari niyan a biyono iyan.' O penggolaolaa iran ai na da den a ba raken
kelamba a wata a makapekewali. Perengen iran so sasatiman bo a waga aken, na da den a
pelambaan iran ko karoma ko a ngaran o di na moriyataw sii ko doniya."
8 Na pitero o dato ko babay a "Baling ka, ka katao ko den angkai a masosowa."

9 Tig o babay a "Apiya antonaa i penggolaolaan ka, kadnan ko a dato, na pengnin ko a sii
raken misendit ago so pamiliya o ama aken na da a sala a ka on aya pen so ndatoan ka."
10 Somimbag so dato a tig iyan a "O aden a manarotaro reka na wita ngka raken, ka di ka
niyan den pesemoken."
11 Tig o babay a "Kapedipedi ka bo, dato, na pangniya ngka ko Allah a Tohan ka a so

tonganay aken a seop ko miyabono na di on maparo o ba niyan kaomani so kapekebinasa
kaan di petay so lamba a wata aken."
"Matamataan ko kaooyagoyag o Allah," a tig o dato, "ka da den a satiman bo a bok ko
olo o wata a ka a ba maroro ko lopa."
12 “Na pengnin ko reka, kadnan ko a dato, a aden pen a pakipetero o ka raken," a tig o
babay.
"Teroa ngka," a inisembag iyan.
13 Na pitero o babay a "Sii ko kiyateroa ngka sii langon na ba ngka da salaa a ginawa
ngka sabap ko da ngka kapakakasoya ko minitaog a wata a ka? Ino ngka penggolaolai
sangkai a ribat so manga pagtaw o Tohan?
14 Aya mataan na pematay tano langon, ka lagid tano o ig a pegododen ko lopa a di den
kekowa peroman. Apiya so Tohan na di niyan ikesoy so niyawa, ogaid na di sekaniyan
dii tekdir sa okit kaan so taw a minitaog iyan na di on kebelag.
15 “Na aya inisong aken reka imanto, kadnan ko a dato, sa kapeteroa ko sii na sabap sa
piyangangalek ako o manga taw; na pitero aken sa ginawa ko a 'Makimbitiyarai ako ko
dato ka baanda niyan penggolaolaa so pepamangnin on o oripen iyan.
16 Ka pekinegen ako o dato na pokasen kami niyan ago so wata aken ko kapaar o mama a
pepanamar rekami tomeped sangkai a inged a kawali o Tohan.'
17 Tig aken pen sa ginawa ko a 'Ipekalintad aken so katero o kadnan ko a dato, ka so dato
na datar o malaikat o Tohan a sasaboten iyan so mapiya ago so marata.' Malalayon reka
so Allah a Tohan ka!"
18 Somimbag so dato a tig iyan ko babay a "Aden a ipagise aken reka, na di ngka raken
pegmaa so tito a sembag."
"Isei ako ngka sa apiya antonaa, kadnan ko a dato," a tig o babay.
19 “Ba kena a si Yowab i somiyogo reka sangkai langon?" a iniise iyan.

Tig o babay a "Matamataan ko kaooyagoyag ka, kadnan ko a dato, ka di aken kelidasan
so kapeteroa ko reka ko tito a benar. Oway, si Yowab a oripen ka i somiyogo raken ago
miyangendao raken tero sangkai langon.
20 Ogaid na pinggolaola niyan ai kaan maalin so mambebetad a kapapantagan. Aden a
ongangen ka, kadnan, a datar o ongangen o malaikat o Tohan sa katokawi ngka ko langon
a dii manggolaola ko inged."
21 Oriyan ai na piyakisongowan o dato si Yowab na pitero iyan on a "Penggolaolaan ko
imanto angkai a kabaya a ka. Ika roo den na kasowin ka sii so mangoda a si Absalom."
22 Gomipe si Yowab ko lopa a piyagadatan iyan so dato, na piyanalamatan iyan a tig iyan
a "Imanto, kadnan ko a dato, na kiyatokawan aken a inikalimo ako ngka a oripen ka
kagiya inampon ka so piyangni aken."
23 Na gomiyanat si Yowab ka somiyong sa Gisor na inibaling iyan si Absalom sa

Yarosalim.
24 Ogaid na pitero o dato a "Disomala a sii sekaniyan tomaros ko walay niyan a di raken
pakipegilaya." Sabap roo na miyamantek si Absalom ko walay niyan a da niyan mailay
so dato.
Rinilaan i Daod si Absalom
25 Sii ko langon o manga Israil na da den a ba datar sa kataid i Absalom. Ipoon ko poro o
olo niyan na taman sa palad a ai niyan na da den a ba niyan daway.
26 Makaisa ko oman ragon a kapepotoli niyan ko bok ko olo niyan igira a miyakapened
rekaniyan. Na igira a pepotolan iyan na petimbangen iyan, na aya kapened iyan na dowa
ka kilo ago tenga a pepakaokiten ko timbangan a ontol ko ndatoan.
27 Telo kataw a wata a mama a inimbawata i Absalom ago sakataw a babay a aya ngaran
iyan na Tamar, na tanto sekaniyan a mataid a babay.
28 Miyakadowa ragon a kiyabaling i Absalom sa Yarosalim a da niyan den mailay so

dato.
29 Kagiya ka maoto na piyakisongowan iyan si Yowab kaan iyan mapakasong ko dato,
ogaid na da on song si Yowab. Sakamaoto a piyakisongowan iyan sa ikadowa ogaid na
minda si Yowab o ba on song.
30 Sabap roo na pitero i Absalom ko manga talasogoay niyan a "Katawan iyo so dii
mbasokan i Yowab a mindadair o rek aken a pegto on so bantad. Ikano roo na go niyo
bisoli." Na somiyong siran ko lopa iyan na binisolan iran.
31 Na giyoto a somiyong si Yowab ko walay i Absalom a tig iyan on a "Ino totonga o

manga talasogoay ngka so bantad aken?"
32 Tig i Absalom a "Sabap sa da ka sii song isako pakisongowan aken seka. Kabaya aken
a sogoon ko seka ko dato ka pakipetero aken reka on a 'Ino ako sii pekasong a poon sa
Gisor? Tomo a ba ako roo baden pen makakakaden!'" Tig pen i Absalom a "Imanto den
na kebaya ako makipegilaya ko dato, na o aden a miyasela aken na kebono ako niyan
den!"
33 Mandiyadi na somiyong si Yowab ko dato na piyanotol iyan on so pitero i Absalom.

Na piyakisongowan o dato si Absalom a somiyong on ago somiyodiyod ko hadapan iyan.
Na inarekan o dato si Absalom.
2 SAMOWIL 15
So Kiyasopak i Absalom
Da peman matey na kominowa si Absalom sa karo sa katidawa a rakes o manga koda ago
lima polo a manga mama a makapangongonaan rekaniyan pepalalagoy.
2 Aya olaola niyan na dii mbowat komabalaga ago petindeg ko kilid o lalan a ipesoled ko
gimowa o siti. Na igira aden a pepekaoma ko dato a pekikokom on ko masosowa iyan na
petelowan i Absalom a tig iyan a "Anda ka poon a inged?" Na igira a pitero o mama o
antonaa i mbatabataa ko Israil a kaapedan on
3 Na dii teroon i Absalom a "Ilaya ngka man, ka ontol ago wadib so kabenar ka, ogaid na
da a makasasaliyo ko dato a pekaneg reka."
4 Na ipegoman on pen i Absalom a tig iyan a "O ba ako bo minitoro a pangongokom
sangkai a inged! Samaoto na oman i aden a ipepanon o di na simoket iyan na pekasong
raken na penamaran aken a miyontol sekaniyan sa kokoman."
5 Na igira aden a pepekarani ki Absalom a pesodiyod on na pekewaan i Absalom na go
pegarekan iyan.
6 Giyanan i dii nggolaolaan i Absalom ko langon o manga Israil a pesong ko dato a
pepakikokom on, na piyakasoramig iyan ko ginawa niyan so poso o manga taw sa Israil.
7 Kagiya makapat den ragon na pitero i Absalom ko dato Daod a "Pakalalakawa ko ngka
sa Hibron kaan ako ron makatoman sa samaya aken ko Allah.
8 Ka isako komakaden ako pen sa Gisor sii sa Siriya na inisemaya aken a tig aken a 'O
pakakasoya ko o Allah sa Yarosalim na simbaan aken sekaniyan sii sa Hibron.' "
9 “Ika roo den sa da a rayorayo a ginawa," a tig o dato.

Na gomiyanat si Absalom na somiyong sa Hibron.
10 Ogaid na kagiya makaoma roo na miyanonogo sekaniyan sa makaneb sa masolen sii
ko langon a mbatabataa a Israil ka pakipetero iyan kiran a "So den so kanega niyo ko oni
o bogiyong na lalisen iyo a 'Miyabaloy si Absalom a dato sii sa Hibron!' "
11 Aden a dowa gatos a mama a miyamangonot den ki Absalom a poon sa Yarosalim.
Matag siran miyapamoyo a manga banto, na miyonot siran on a da a peleng iran on, ka da
den a katawi ran mipantag sii.
12 Na sii ko kapekorban i Absalom na piyakisongowan iyan pen si Ahitopil a mababaling
sa Giloh a isa ko mosawira i Daod. Na pepangosor so kapesopaka ko dato na
pepekadakel so petempil ki Absalom.
Miyalagoy si Daod a poon sa Yarosalim
13 Na aden a miyakaoma a miyanotol ki Daod a tig iyan a "Misoramig ki Absalom so

poso o manga taw sa Israil!"
14 Na pitero i Daod ko langon a sanasanaan iyan a maaped iyan sa Yarosalim a "Itano

roo! Malagoy tano den imanto, ka o di, na da den a isa rektano bo a ba pekalidas ki
Absalom! Nggagaan kano ka o ba tano niyan baden maoma nggagaan a siksaan tano
niyan ago pemonoon iyan a pedang so manga taw ko siti!"
15 “Oway, kadnan ami a dato," a inisembag iran. "Makatitiyagar kami nggolaola sa apiya
antonaa i kabaya a ka."
16 Na gomiyanat so dato a rakes o langon o pamiliya niyan, ogaid na inibegak iyan so

sapolo a manga sandil iyan a makakibir ko torogan.
17 Sii ko kapengganat o dato a ped iyan so langon o manga pagtaw niyan na tomiyareg
siran ko temanaan o siti.
18 So manga sanasanaan iyan na tomitindeg ko obay niyan sii ko kapepakaonaa niyan ko
manga sondaro niyan a di on dii nggogordiya. Ndodoo mambo so nem gatos a sondaro a
miyonot rekaniyan a poon sa Gat, na sii ko kapesegadi iran ko dato
19 Na pitero iyan ki Itay a olowan iran a "Ino kano rekami pekaonot? Kasoy kano na go
kano telimbagak a ped o dato Absalom. Mananangga ka a piyalagoyan ka so inged ka.
20 Babago a kiyapakaoma ngka sii, na ino aken seka mapakapegenebeneb imanto a ped
ami a di aken pen katawan o anda kami song? Kasoy ka na pakaonota ngka so ped ka a
manga taw. Na malalayon rekano so limo o Allah ago so kasasarigi rekaniyan!"
21 Ogaid na simbag i Itay so dato a tig iyan a "Matamataan ko kaooyagoyag o Allah ago
so kaooyagoyag ka, kadnan ko a dato, ka apiya anda ka ketago na ndodon ako mambo a
oripen ka apiya pen o sii kiyarong ko kapatay."
22 “Mapiya nan!" a inisembag on i Daod. "Taros kano lomalakaw!" Na tomiyaros

lomalakaw si Itay a rakes o langon a sondaro niyan ago so manga pamiliya iran a moonot
kiran.
23 Penggoraok sa matanog so langon a taw ko pagingedingedan sii ko kapesegadi kiran o

dato ago so langon a ped iyan a sii ko kapeterapasa iran ko Balintad a Kidron ago sii ko
kapegiseg iran sa tampar sa disirto.
24 Ndodoo mambo so manga imam a si Abiyatar ago si Sadok a ped iran so langon a
manga Libitiyo a maawid ko Kaban sa Kapasadan o Tohan. Na inibetad iran so Kaban o
Tohan taman sa di makaipos mawa so langon a taw ko siti.
25 Ogaid na pitero o dato ki Sadok a "Kasowin ka so Kaban o Tohan ko siti. O ikelimo
ako o Allah na pekakasowin ako niyan kaan aken mailay peroman so Kaban ago so
kakadenan iyan.
26 Ogaid na o teroa niyan raken a 'Di ako reka kesoat' na makatitiyagar ako sa ikidia
niyan raken ko kabaya iyan."
27 Tig pen o dato ki Sadok a "Giyai so antangan aken: kasoy kano ago si Abiyatar ko siti
sa kalilintad na pakaonota niyo so wata a ka a si Ahimaas ago si Yonatan a wata i
Abiyatar.
28 So saken on na menayaw ako ko keripagan ko lawasaig a Yordan sii ko disirto taman
sa misampay raken so pekitokawan iyo raken a katero."
29 Na giyoto a inikasoy i Sadok ago si Abiyatar so Kaban o Tohan sa Yarosalim na
mitelimbagak siran roo.
30 Ogaid na tomiyaros tomakedeg si Daod ko lalan a ipesong ko Palaw a Olibi a

penggoraok ko kapelalakaw niyan. Kasasapengan so olo niyan ago da a tinilas iyan a toos
ko kamboboko iyan. So mambo so manga taw a ped iyan na palaya den kasasapengan a
manga olo iran a di siran dii nggogoraok ko kapetekedeg iran.
31 Miyatero den ki Daod a "Minitampil si Ahitopil ko miyamanopak a ped i Absalom."
Na miyangangarapan si Daod a tig iyan a "Ya Allah, kapedipedi ka bo na baloya ngka a
da a rantek iyan so ipemosawir i Ahitopil!"
Miyabaloy si Hosay a Panonoriman i Daod
32 Kagiya makaoma si Daod ko poro o palaw a ron pesimbaa o manga taw so Tohan na
inalaw sekaniyan i Hosay a taw sa Arki a makikisi so nditaren iyan ago katatagoan sa
bayanek so olo niyan.
33 Pitero on i Daod a "O onot ka raken na ba ka raken baden pekabangen.
34 Ogaid na keogopan ako ngka o kasoy ka ko siti na go ngka teroa ki Absalom a 'Oripen
ako gowani o ama a ka, ogaid na pembaloy ako imanto a oripen ka.' Amay ka magiyoto
na kebinasa ngka so mosawir i Ahitopil.
35 Ndodoo a ped ka so manga imam a si Sadok ago si Abiyatar. Pakitokawi ngka kiran
so apiya antonaa i keneg ka sii ko torogan o dato.
36 Ndodoo mambo a ped iran si Ahimaas a wata i Sadok ago si Yonatan a wata i
Abiyatar. Sogoa ngka siran raken kaan iran raken matero so apiya antonaa i ketokawan
ka."
37 Mandiyadi na si Hosay a ginawai i Daod na komiyasoy sa Yarosalim a so

kiyapakaoma niyan roo na aya den kapesoled i Absalom ko siti.
2 SAMOWIL 16
Si Daod ago so Talasogoay i Mepibosit
Kagiya makalepas si Daod sa malo mawatan ko poro o palaw na ndodoo si Siba a so

talasogoay i Mepibosit a nomanayaw rekaniyan. Totondaan iyan so dowa a kimar a
rororanan sa dowa gatos timan a paan, magatos tompi a pasas, magatos ka giponga a onga
a pamomolan ago isa ka tagoay a arak.
2 Iniise o dato ki Siba a "Ino ngka ini sii pagowita?"

Tig i Siba a "So manga kimar na kapekodaan o pamiliya ngka, dato, na so paan ago so
manga onga a pamomolan na pekekan o manga mama, na so arak na keinom o siran oto a
tanto a inikopay sii ko disirto."
3 Na inisean pen o dato a tig iyan a "Anda si Mepibosit a apo i Saolo a kadnan ka?"
"Petelimbagak sa Yarosalim," a inisembag i Siba, "ka kagiya aya mapipikir iyan na
ikesoy rekaniyan imanto o manga Israil so ndatoan o ama iyan a dato a si Saolo."
4 Na pitero o dato ki Siba a "Ilaya ngka man, ka so langon taman a rek i Mepibosit na rek
ka imanto."
"Pepangalimbabaan ako a pesodiyod reka," a tig i Siba. "Masoat ka raken lalayon,
kadnan ko a dato!"
Inisinta i Simay si Daod
5 Sii ko kapepekarani i Daod sa inged a Bahorim na liniyowan o sakataw a mama a

tonganay i Saolo a aya ngaran iyan na si Simay a wata i Gira, na dii mamaninta sii ko
kapeliyo niyan.
6 Perobaken iyan a ator si Daod ago so langon a sanasanaan iyan apiya pen mbabalaan
sekaniyan sa kawanan diwang o manga mama niyan ago manga gordiya.
7 Sii ko kapepamaninta i Simay na di niyan dii pelalis a "Awa ka sii! Awa ka sii a
talibono ago marata a mama!
8 Peseopan ka o Allah sabap ko langon a piyamono o ka sii ko pamiliya i Saolo a
kiyaagawan ka sa kadato. Piyalad o Allah so ndatoan ki Absalom a wata a ka na
kiyasiksaan ka den, ka talibono ka a mama!"
9 Na pitero i Abisay a wata i Siroyah ko dato a "Ino makapepamaninta reka angkoto a

maatay a aso, kadnan ko a dato? Pakisongowi ngka raken ka potolan
ko sa olo!"
10 “Kena a ba niyo ini galebek!" a tig o dato ki Abisay ago si Yowab a pagari niyan. O
aya niyan dii kasinta na sabap sa pitero on o Allah a 'Sintaan ka si Daod,' na antawaa i
pekaise o ino niyan anan dii nggolaolaa?'"
11 Mandiyadi na pitero pen i Daod ki Abisay ago sii ko langon a sanasanaan iyan a "Ilaya
niyo man, ka so tito a wata aken a rogo aken bo i mananamar raken mono. Aya pen
angkai a taw sa Baniyamin! Di niyo petekora; pakasintaa niyo baden ka inisogo on o
Allah.
12 Baanda keilay o Allah so kaperasaya raken na balasan ako niyan sa mapiya sabap ko
kipepanintaan iyan raken sangkai a gawii."
13 Na tomiyaros lomalakaw si Daod ago so manga mama niyan sii ko lalan a misesakeb
iyan on pelalakaw si Simay sii ko silid o bobongan a pepamaninta ago pepalantigen iyan a
ator ago petepoyakan iyan pen sa bote.
14 Na diyokawan so dato ago so langon a ped iyan kagiya makaoma ko songowan iran, na
miyakadeke siran roo.
So Mosawir i Ahitopil
15 Si peman si Absalom na miyakaoma sa Yarosalim a rakes o langon a manga mama

niyan a ped iyan mambo si Ahitopil.
16 Na si Hosay a ginawai i Daod na somiyong ki Absalom a dii melalis sa "Mamboway
so dato! Mamboway so dato!"
17 Iniise on i Absalom a "Ba giyai i kipekelimoon ka ki Daod a ginawai ngka? Ino ka on

da onot?"
18 “Di kepakay," a tig i Hosay, "ka aya ko pagampilan na so miyatomo o Allah ago
giyangkai a manga taw ago so langon a mama sa Israil; keden ako sii reka den.
19 Liyo ron pen na antawaa i patot a penalagadan ko? Ba di so wata o kadnan aken?
Datar o kiyapanalagadi aken ki ama a ka na aya ko reka mambo kapenalagadi."
20 Na siyangoran i Absalom si Ahitopil na iniise iyan on a "Begi ako ngka sa mosawir;

antonaa i telondog a penggolaolaan tano?"
21 Tig i Ahitopil a "Rembanga ngka so manga sandil i ama a ka a inibegak iyan a kibir ko
torogan. Giyoto a ketokawan o langon a Israil a biyaloy ngka a ginawa ngka a
piyakasisingay ki ama a ka, na ipekabager ai o kapegabanga reka o langon a ped ka."
22 Sabap roo na inimbarombarong iran si Absalom sii ko pantar a atep o torogan; na
somiyoled sekaniyan on sii ko kapekeilaya on o langon a Israil na pirerembang iyan so
manga sandil i ama iyan.
23 Sangkoto a manga gawii na apiya antonaa a ipemosawir i Ahitopil na tatarimaan a

lagid o miyapayag o Tohan, ka ndatar si Daod ago si Absalom a petomanen iran so
mosawir iyan.
2 SAMOWIL 17
Aya pen a pitero i Ahitopil ki Absalom na "Pakapilia ko ngka sa sapolo ago dowa nggibo
a mama a ngganat imanto a gagawii sa kapeselobaa mi ki Daod.
2 Sondolan ko sekaniyan ko kadodokawi ron pen a da a bager iyan. Pekatanaan ko
sekaniyan sa kalek, na pemalagoy so langon a taw a ped iyan, na so bo so dato i mbonoon
ko.
3 Na ikesoy aken reka so langon a mama niyan, na amay ka komasoy siran a rowar ko
sakataw a di ngka dii mbanogen na makalintad so langon o manga taw."
4 Giyangkai a takdir na datar o ba mapiya ki Absalom ago so langon a pelokelokesen sa
Israil.
So Mosawir i Hosay
5 Ogaid na pitero i Absalom a "Talowi niyo mambo si Hosay ka pamakinegen tano o

antonaa i mapetero iyan."
6 Kagiya makaoma si Hosay na pitero on i Absalom a "Giyai so mosawir a inibegay
rekami i Ahitopil. Ba ami tomana so pitero iyan? O di, na teroa ngka rekami i lalag ka."
7 Tig i Hosay a "So inimosawir i Ahitopil na kena a ba mapiya sangkai a masa.

8 Katawan ka si Daod a ama a ka ago so manga mama niyan; manga wawaraw siran ago
pekerarangitan a lagid o arimaw a inagawan sa manga wata. Liyo ron pen na mababatak
sa katidawa si ama a ka, na di den keden ko manga sondaro niyan ko mababasa gawii.
9 Apiya imanto na masiken a tetapok sekaniyan ko liyang o di na sii ko ped a darpa. Na
so den so kanggobata i Daod ko manga sondaro ngka a so ped kiran na miyanga bobono
na so apiya antawaa i pekaneg on na ipelalis iyan a 'Pepamonoon so manga sondaro i
Absalom!'
10 Na giyoto a apiya so lebi a mawaraw a sondaro a so poso iyan na datar o poso a
arimaw na keteno sa kalek, ka katawan o langon o manga Israil a si ama a ka na
mapasang i kapakitidawa, na so manga ped iyan na palaya mawaraw.
11 Kagiya ka maoto na aya kimosawir aken reka na timoa ngka so langon a manga Israil
ipoon ko isa a temanaan o inged taman ko isa a temanaan a datar sa kadakel o peted sa
kilid a ragat; na seka den i pagolowan kiran ko katidawa.
12 Na keoma tano si Daod apiya anda matatago na sondolan tano sa di niyan pen katawan
i dii manggolaola. Na da den a pelambaan tano kiran a oyagoyag ndatar sekaniyan ago so
manga mama niyan.
13 Na o magapas sekaniyan ko siti na so langon o manga Israil na magawid sa manga tali
sangkoto a siti na toyoken tano ini ko baogan taman sa matarotop a kagebaa on."
14 Na pitero i Absalom ago so langon a mama sa Israil a "Tomo so mosawir i Hosay a di

so rek i Ahitopil," ka pikodarat o Allah a kebinasa so mapiya a
mosawir i Ahitopil kaan iyan kawiti sa morala si Absalom.
Piyakaiktiyar i Hosay si Daod
15 Mandiyadi na iniripot i Hosay ko manga imam a si Sadok ago si Abiyatar so

inimosawir iyan ki Absalom ago so manga pelokelokesen sa Israil, ago so pen so
inimosawir kiran i Ahitopil.
16 Na tig pen i Hosay a "Sogo kano nggagaan na teroa niyo ki Daod a 'Di ka tereg
sangkai a gagawii ko keripagan ko lawasaig a Yordan sii ko disirto; ripag ka on
nggagaan, ka o ba kano baden mamamatay ago so langon a taw a maaped ka.'"
17 Si peman si Yonatan ago si Ahimaas a so manga wata o manga imam na sii

komakaden sa In Rogil ko liyo a Yarosalim ka di iran kebaraw o ba siran mailay sii ko
soled o siti. Sabap roo na aden a somiyong kiran a raga a piyakitokawan iyan kiran so
pitero i Hosay kaan iran kasongowi so dato Daod sa kapeteroa iran on sii.
18 Ogaid na miyailay siran o bago a mama na iniripot iyan ai ki Absalom. Sabap sii na
minggagaan siran roo mawa a dowa a somiyong ko walay o mama sii sa Bahorim. Aden
a paridi iyan ko lamalama niyan na miyalosod siran on.
19 Na so karoma o mama na kominowa sa dempas na kiyayat iyan ko ngari o paridi, na
kiyayaran iyan ai sa manga pereperan. Na da den a ba sii matao.
20 Miyakaoma ko walay so manga talasogoay i Absalom na inisean iran so babay a tig
iran a "Anda si Ahimaas ago si Yonatan?"
"Rominipag siran ko baogan," a inisembag o babay. Mimbabanog so manga
talasogoay ogaid na da iran matoon, na komiyasoy siran sa Yarosalim.
21 Kagiya maipos siran na komiyalakat si Ahimaas ago si Yonatan ko paridi na tomiyaros

siran sa kapekatokawa iran ko dato Daod. Na pitero iran on a "Nggagaan ka! Ripag ka
ko lawasaig imanto a gagawii!" Na piyanotol iran on so inimosawir i Ahitopil a ikebinasa
niyan.
22 Na miyaninimo si Daod ago so langon a ped iyan na rominipag siran sa Yordan, na sii
ko kakepita iyan na da den a isa kiran bo a ba on da makaripag.
23 Si peman si Ahitopil na kagiya mailay niyan a da matoman so mosawir iyan na

siniyaan iyan so kimar iyan na miyaling ko inged iyan. Tiyanor iyan so langon taman
iyan na binitin iyan a ginawa niyan; miyatay sekaniyan na inilebeng sii ko kiyoboran ki
ama iyan.
24 Miyakaoma si Daod sa Mahanaim sii ko kiyapakaripag i Abasalom sa lawasaig a

Yordan a rakes o langon o manga Israil a pagoolowanan iyan. (25 Minitoro den i
Absalom si Amasa a komandir o manga sondaro a minisambi ki Yowab. Si Amasa na
wata i Itra a taw sa Ismail a si ina iyan na si Abigail a wata i Nahas ago pagari i Siroyah a
ina i Yowab.)
26 Na mikempo si Absalom ago so manga Israil sii sa kalopaan a Giliyad.
27 Kagiya makaoma si Daod sa Mahanaim na inalaw sekaniyan i Sobi a wata i Nahas a

poon sa Rabah a siti o manga Amoniyo, ago si Makir a wata i Amiyal a poon sa Lo Debar
ago si Barsilay a poon sa Rogelim sii sa Giliyad.
28-29 Inowitan iran sekaniyan sa manga dempas, manga ladiya, manga koden ago so
manga pangenengken a makan i Daod ago so manga taw a ped iyan a maana so margas,
bantad, arina, sindeg a pereperan, manga kodalis, manga bitowilas, gola a teneb, lana,
mimbatik a gatas ago manga bilibili, ka tig iran a "Miyanga aaor ago miyawaw ago
diyokawan so manga taw ko kiyapakatarapas iran ko disirto."
2 SAMOWIL 18
Tiyaban ago Miyabono si Absalom
Tinimo i Daod so manga mama a ped iyan na tiyoroan iyan siran sa manga olowan o
oman i sanggibo ago olowan o oman i magatos.
2 Na piyakalalakaw niyan siran a so ikatelo bagi na pagoolowanan i Yowab, so ikatelo
bagi na pagoolowanan i Abisay a pagari i Yowab, ago so ikatelo bagi na pagoolowanan i
Itay a taw sa Gat. Na pitero o dato sangkai a manga sondaro a "Saken den i magonot
rekano."
3 “Di ka pagonot," a inisembag iran. "O di ami kegaga ka kepalagoyan ami so manga
ridoay na kena a ba sekami i tegoon iran sa ginawa. Apiya pen o mamatay so sabagi
rekami na da a bali niyan kiran, ogaid na aya bali ngka na sapolo nggibo rekami. Aya
tomo reka imanto na tareg ka den ko siti a ron kami ngka pagowiti sa tabang."
4 Tig o dato a "So mapipikir iyo a mapiya i penggolaolaan ko." Na giyoto a tomitindeg
so dato ko kilid o gimowa o siti sii ko kapeliliyo o manga mama niyan a sesagorompong
sa mbabagatos ago sesanggibo.
5 Tiyapaosan o dato si Yowab ago si Abisay ago si Itay a tig iyan a "Piyapiyai niyo raken
so mangoda a si Absalom." Na miyaneg o langon a sondaro si Daod kagiya mapamando
iyan so manga olowan mipantag ki Absalom.
6 Na giyanatan o manga sondaro so siti na miyakitidawa siran ko manga Israil sii ko

kalasan sa Ipraim.
7 Na roo miyataban o manga mama i Daod so manga Israil, na tanto a madakel a
miyamatay sangkoto a gawii, a dowa polo nggibo a manga mama.
8 Miyakalaolad so katidawa ko dalem angkoto a darpa, na lebi a madakel a taw a
miyalamed o kalasan sangkoto a gawii a di so miyapatay a pedang.
9 Sii ko dii katidawa na so ped ko manga mama i Daod na miyaoma iran si Absalom a
kokoda ko kimar iyan. Na sii ko kapesolek iyan ko atag o mala a kayo a marabong i
sapak na minisadang so olo niyan ko manga sapak na miyaren roo, na pepalalagoy den so
kimar a minibegak si Absalom a mabibitin ko kayo.
10 Kagiya mailay ai o isa a mama na iniripot iyan ki Yowab a tig iyan a "Miyailay aken
den imanto si Absalom a mabibitin ko kayo!"
11 Pitero on i Yowab a "Miyailay ngka bes? Ino ngka da bonoa roo? O biyono o ka na
mbegan ko seka sa sapolo a pelata a pirak ago sambitan a sondaro."
12 Ogaid na tig o mama a "Apiya pen o mbegan ako sa sanggibo a pelata na di aken den
pekatanaan sa lima so wata o dato, ka miyaneg ami so dato ko kiyatapaosi niyan rekano
ago si Abisay ago si Itay a tig iyan a "Sabap raken na iktiyari niyo o ba niyo pakasakiti so
mangoda a si Absalom.
13 Na o miyatipo aken den so dato ko kiyabonoa ko ki Absalom, ka da den a ba mapegma
ko dato, na di ako ngka ipenindeg."
14 Tig i Yowab a "Di ako den pekalakay sii reka." Na miyawid sekaniyan sa telo timan a
gasa na inisoker iyan ko rareb i Absalom a pengginawa pen sii ko kayo.
15 Na sapolo kataw ko manga sondaro i Yowab na linibet iran si Absalom na liyakot iran
a biyono iran.
16 Oriyan iyan na miyamogiyong si Yowab ka piyakagenek iyan so dii katidawa, na

tomiyareg somaloba so manga sondaro niyan ko manga Israil.
17 Kinowa iran so badan i Absalom na inolog iran ko mala a galebo sii ko kalasan, na
diyakontoran iran sa madakel a manga ator. Na miyamagapas so langon o manga Israil
ko manga walay iran.
18 Sii ko kapepaginetaw i Absalom na inimbaal iyan a ginawa niyan sa monominto sii ko

Balintad o manga Dato, ka mapipikir iyan a "Da a wata aken a mama a ba pekataros ko
kapananademi ko ngaran aken." Inisangay niyan ai sa ginawa niyan, na pembetowan ai sa
Monominto i Absalom taman imanto a gawii.
Miyaneg i Daod so Kiyapatay i Absalom
19 Pitero i Ahimaas a wata i Sadok ki Yowab a "Pakapalalagoya ko ngka ka pagowiten

ko ko dato so mapiya a totol a piyokas sekaniyan o Allah ko kapaar o manga ridoay
niyan."
20 “Kena a ba seka i magowit sa totol sangkai a gawii," a tig i Yowab. "Sii den ko ped a
gawii i kapagowit ka sa totol; kena a ba imanto ka miyatay so wata o dato."
21 Na giyoto a pitero i Yowab ko talasogoay niyan a taw sa Kos a "Ika roo na go ngka
panotola ko dato so miyailay ngka." Somiyodiyod sekaniyan ki Yowab na taros a
miyalalagoy.
22 Na pitero peroman i Ahimaas ki Yowab a "Da a labet aken ko mapenggolaola;

kapedipedi ka bo na pakitondegen ka raken malalagoy so talasogoay."
"Ino ka kebaya roo somong, wata ko?" a iniise i Yowab. "Da a ba ngka roo mapenotol
a kebegan ka on sa tendan."
23 “Apiya antonaa i mapenggolaola," a tig iyan, "na kebaya ako roo malalagoy."
"Palalagoy ka den," a tig i Yowab. Na sii miyalalagoy si Ahimaas ko Kapantaran sa
Yordan, na da matey na miyalepas iyan so talasogoay.
24 Samaoto na moontod si Daod ko pageletan o dowa a gimowa o siti. Na miyanik so

bantabantay ko atep o gimowa sii ko poro o keleb o siti. Kagiya lomangkaw na miyailay
niyan so isa a mama a pepalalagoy a sekaniyan bo.
25 Na tiyalowan iyan so dato na iniripot iyan on, na tig o dato a "O da a ped iyan na
maawid sekaniyan sa totol." Na pepekarani den so mama.
26 Oriyan iyan na miyakailay so bantabantay sa salakaw a mama a pepalalagoy, na

tomiyalo sekaniyan sa baba ko gordiya ko gimowa a tig iyan a "Ilaya ngka man, ka aden
pen a salakaw a mama a pepalalagoy a sekaniyan bo!"
Na tig o dato a "Maawid pen anan sa totol."
27 Pitero o bantabantay a "Arangan ko ron na pepalalagoy so maoona a datar i Ahimaas a

wata i Sadok."
"Mapiya nan a mama," a tig o dato. "Aya kioma niyan na mapiya a totol."
28 Na initalo i Ahimaas ko dato a "Mapipiya langon!" Na miyanaros romoko si Ahimaas

ko lopa ko hadapan o dato a tig iyan a "Podin so Allah a Tohan ka a migay reka sa
kiyapakataban ko manga taw a somiyopak reka, kadnan ko a dato!"
29 “Ba da kakaidi so mangoda a si Absalom?" a iniise o dato.

Tig i Ahimaas a "Kagiya sogoon ako i Yowab na miyakailay ako sa manga taw a
magogorigaw, ogaid na di aken katawan i miyaolaola."
30 “Roo ka pasin," a tig o dato. Na lomiyakad si Ahimaas sa kilid na tominindeg roo.
31 Na giyoto a miyakaoma so talasogoay na pitero iyan a "Hey kadnan ko a dato,

pakinega ngka so mapiya a totol! Inisaop ka o Allah sangkai a gawii ko langon a
somiyopak reka!"
32 “Ba da a marata a miyaolaola o mangoda a si Absalom?" a iniise on o dato.

Tig o talasogoay a "Pengnin ko a so manga ridoay ngka ago so langon a somiyopak
reka na madatar angkoto a mangoda!"
Inimboko i Daod si Absalom
33 Na minipaar so dato o kamboko na miyanik ko rowang iyan ko poro o gimowa na

gomiyoraok. Sii ko kapesong iyan roo na tig iyan a "Hey wata ko a Absalom! Wata ko,
wata ko a Absalom! O ba bo saken i miyatay a di seka, wata kolay a Absalom! Wata
kolay!"
2 SAMOWIL 19
Na miyatero ki Yowab a "Penggoraok so dato a di niyan dii imboko si Absalom."
2 Mandiyadi na so kapekebabaya o langon a sondaro i Daod ko kiyapakataban iran na
kiyasambian sa rata a ginawa sangkoto a gawii sabap sa miyaneg iran so dii matero a "Dii
imboko o dato so wata iyan."
3 Na minanay siran somoled ko siti sangkoto a gawii a datar o dii meliso a pekeya ka
pepalagoy ko katidawa.
4 Sasapengan o dato a paras iyan na peteros gomoraok sa matanog a tig iyan a "Hey wata
kolay a Absalom! Hey Absalom a wata kolay! Wata kolay!
5 Na giyoto a somiyoled si Yowab ko walay o dato na pitero iyan on a "Sangkai a gawii

na piyakayaan ka so langon a sondaro ngka, a so manga mama a somiyabet ko niyawa
ngka ago so niyawa o manga wata a ka a manga mama ago manga babay, ago so niyawa o
manga karoma ngka ago manga sandil.
6 Lagid o ba ngka pekebabayai so siran oto a pepanga gogowad reka, ago ipekegowad ka
so pepanga babaya reka, ka piyakarayag ka imanto a gawii a da a bali niyan reka so
manga sondaro ngka ago so manga olowan iran. Pekeilay aken a masosoat ka o oyagoyag
imanto si Absalom ago langon kami na miyamatay.
7 Na, mbowat ka imanto na go ka liyo na pangoyati ngka so manga taw ngka! Ka ipesepa
aken sii ko Allah a o di ka lomiyo na da den a sakataw bo ko manga ped ka a ba kelamba
sangkai a kakegagawii niyan. Na lebi reka ini a maregen a di so langon a siksa a minitana
reka ipoon ko kangoda ngka taman imanto."
8 Na mimbowat so dato, na lominiyo ago miyontod ko obay o gimowa o siti. Kagiya

matero ko manga mama niyan a "Moontod so dato sii ko gimowa," na palaya siran on
miyangadap.
Komiyasoy si Daod sa Yarosalim
Samaoto na miyamakapagapas den so langon o manga Israil ko manga walay iran.

9 Na sii ko langon a mbatabataa sa Israil na dii ndadaowai so manga taw ron a tig iran ko
oman i isa kiran a "Piyokas tano o dato Daod ko lima o manga ridoay tano na sekaniyan i
somiyabet rektano ko kapaar o manga Pilistiyo. Ogaid na piyalagoyan iyan imanto so
inged sabap ki Absalom,
10 Na si Absalom a siyalawatan tano a madato na miyatay ko katidawa. Kagiya ka maoto
na ino tano di pengnii so dato Daod sa kapakakasoy niyan?"
11 Giyangkai a dii matero ko dalem a inged a Israil na minirampay ko dato Daod apiya sii
ko walay niyan. Kagiya ka maoto na inipakawit iyan ki Sadok ago si Abiyatar a so manga
imam so katero a "Isei niyo so manga pelokelokesen sa Yodah sa 'Ino sekano i keori sa
kapekakasoya niyo ko dato ko torogan iyan?
12 Sekano i rogo aken ago manga tonganay aken. Kagiya ka maoto na ino sekano i keori
sa kapekakasoya niyo ko dato?'
13 Na go teroa niyo ki Amasa a 'Ba di rogo ago tonganay aken seka? Kamorkaan ako o
Tohan sa tanto a maregen o di aken seka sambiin imanto ki Yowab a komandir o manga
sondaro.' "
14 Na kiyaayokan i Daod so manga poso o langon a mama sa Yodah a lagid o

o isaisa siran i pamikiran, na inipakawit iran ko dato so katero iran a "Kasoy ka, seka ago
so langon a ped ka."
15 Mandiyadi na gomiyanat so dato ka kesoy sa Yarosalim, na kagiya makaoma ko
lawasaig a Yordan na inalaw sekaniyan o langon a taw sa Yodah a miyakaoma roo sa
Gilgal sa kiperipagen iran ko dato sii ko lawasaig.
16 Samaoto mambo na minggagaan roo somong si Simay a wata i Gira a taw sa
Baniyamin a poon sa Bahorim sa kapagalawa niyan ko dato Daod.
17 Aya ped iyan na sanggibo a manga taw sa Baniyamin. Na miyakaoma mambo si Siba
a so talasogoay o pamiliya i Saolo a rakes o sapolo ago lima a manga wata iyan a manga
mama ago dowa polo a manga oripen iyan. Minggagaan siran somong sa Yordan a
ndodon so dato.
18 Na rominipag siran ko lawasaig kaan iran on miperipag so pamiliya o dato ago
mapenggolaola iran so apiya antonaa i kabaya iyan.
Inikalimo i Daod si Simay
Kagiya makaripag si Simay a wata i Gira sa Yordan na gomipe ko hadapan o dato

19 Na pitero iyan on a "Pengnin ko a di ako ngka salaan, kadnan ko. Di ngka tedemi so
pinggolaola ko a ribat sii ko gawii a kiyaawa a ka sa Yarosalim. Pengnin ko a di ngka
tegoon ko poso o ka
20 Ka katawan aken a miyakandosa ko a oripen ka, na giyanan i sabap a saken i
pagampaganay sii ko mbatabataa a Yosop a miyakaoma sii sa kiyaalawa niyan reka,
kadnan ko a dato."
21 Ogaid na pitero i Abisay a wata i Siroyah a "Piyanintaan i Simay so miyapili o Allah a
dato; ba ini rekaniyan di mbonoon?"
22 Na pitero i Daod ki Abisay ago so pagari niyan a Yowab a "Kena a ba tano ndatar sa
pamikiran, manga wata i Siroyah. Miyabaloy kano den a pepamanopak raken! Imanto na
saken i dato sa Israil, na da den a taw sa Israil a ba mbonoa sangkai a gawii."
23 Na pitero i Daod ki Simay a "Di ka petay," na inisepa on ai o dato.
Inikalimo i Daod si Mepibosit
24 Miyakaoma roo mambo si Mepibosit a apo i Saolo sa kapagalawa niyan ko dato. Da

niyan den onabi so ai niyan o di na pangopawi so sompa iyan aya pen o ba niyan pipii so
nditaren iyan ipoon ko gawii a kiyaawa o dato sa Yarosalim taman ko kiyapakakasoy
niyan sa da a rayorayo a ginawa niyan.
25 Kagiya makaoma si Mepibosit a poon sa Yarosalim na iniise on o dato a "Ino ka raken
da onot, Mepibosit?"
26 Tig iyan a "Kadnan ko a dato, sabap sa lepo ako na pitero aken ki Siba a talasogoay
aken a siyaan ako niyan sa kimar a kapegedaan aken kaan ako makaonot ko dato. Ogaid
na tinipo ako niyan
27 Ka piyamokegan ka niyan makapantag raken, kadnan ko a dato. Ogaid na datar ka o
malaikat o Tohan na
saden sa mapipikir ka a mapiya na nggolaolaa ngka den.
28 Aya bo a patot a ikidia ngka ko pamiliya o ama aken a dato na kapatay; apiya pen oto
na ineped ako ngka ko siran oto a pepekakan sii ko lamisaan ka. Na da den pen a sala a
mapengni aken reka, dato."
29 Na pitero on o dato a "Ino ka pen petero makapantag sii? Miyapamikir aken den a
mapembagi iyo ago si Siba so tamok i Saolo."
30 “Pakikowaan ka on so langon taman, kadnan ko a dato," a inisembag i Mepibosit,

"asar a miyakabaling ka a mapipiya a ginawa ngka."
Inikalimo i Daod si Barsilay
31 Si mambo si Barsilay a taw sa Giliyad na miyakaoma roo a poon sa Rogilim sa

kindologen iyan makaripag ko dato sa Yordan.
32 Tanto a miyalokes si Barsilay ka miyakawalo polo ragon a idad iyan. Tanto sekaniyan
a tatamoken na miyapageper iyan so dato isako komakaden sa Mahanaim.
33 Na pitero on o dato a "Onot ka raken ago kaden ka raken sa Yarosalim ka pageperen
ko seka roo."
34 Ogaid na pitero i Barsilay ko dato a "Pira pen ragon a katey aken ko doniya a ba ako
baden pagonot ko dato sii sa Yarosalim?
35 Miyakawalo polo ragon a idad aken na di aken den mapakapesenggaya so mapiya ago
so marata. Di aken den ketaam so pekekan aken ago pekeinom aya pen o ba ko pekeneg
so idaida o manga pababayok a manga mama o di na babay. Ino ako reka baden ai
pekabalang, kadnan ko a dato?
36 Ino raken pen ai mbalasen o dato? Magonot ako reka baden sa di bo mawatan a
malepas a Yordan.
37 Oriyan iyan na pakakasoya ko ngka ko inged aken kaan ako sii matay a marani ko
kobor o ama ago ina aken. Ogaid na katii so wata aken a si Kimham. Pakaonota ngka
den, kadnan ko a dato, na nggolaolaa ngka on so apiya antonaa i ikesoat ka."
38 Tig o dato a "Pekaonot raken si Kimham na penggolaolaan ko ron so mapipikir ka a

mapiya, na apiya antonaa i pengnin ka raken na ipenggolalan aken sabap reka."
39 Na giyoto a rominipag si Daod sa Yordan ago so langon a ped iyan. Inarekan iyan si
Barsilay ago riyakmatan iyan, na komiyasoy si Barsilay ko inged iyan.
40 Tomiyaros lomalakaw so dato sa Gilgal a moonot on si Kimham, na ipendolog so dato
o langon a taw sa Yodah ago so sabagi ko manga taw sa Israil.
So Kiyapepawala makapantag ko Dato
41 Samaoto na miyakaoma ko dato so langon a mama sa Israil na pitero iran on a "Ino so

bo so manga pagari ami a taw sa Yodah i romiyapit reka ago iniripag ka iran sa Yordan a
rakes o pamiliya ngka ago so langon a ped ka? Piyanekew ka iran rekami!"
42 Somimbag so langon a mama sa Yodah a tig iran ko manga mama sa Israil a

"Pinggolaola mi ai ka tonganay ami a madaseg so dato. Ino niyo kerarangiten? Da niyan
bayadi so pangenengken ami aya pen o ba kami niyan begi sa apiya antonaa."
43 Na tig o manga Israil a "Sapolo kami a mbatabataa a manga Israil a sapolo ai bagi ko
ndatoan. Kagiya ka maoto na mala a kipantag ami ki Daod a di sekano. Ino kami niyo
pelapisi? Ba di sekami i paganay a miyakatero ko kapekakasoya ko dato?"
Ogaid na somimbag so manga mama sa Yodah sa makeras a di so manga mama sa
Israil.
2 SAMOWIL 20
Somiyopak si Siba ki Daod
Miyatabo a ndodoo so da a oked iyan a mama a aya ngaran iyan na si Siba a wata i Bikri a
taw sa Baniyamin. Miyamogiyong sekaniyan na inilalis iyan a "Hey manga Israil, da a ba
tano bagian ki Daod! Da a kipantag rektano angkai a wata i Yasay! Song so oman i isa
rektano ko walay niyan!"
2 Mandiyadi na inawaan o langon o manga mama sa Israil si Daod ka miyonot siran ki

Siba a wata i Bikri. Ogaid na so manga mama sa Yodah na da iran belaga so dato iran, na
inidolog iran ipoon sa Yordan taman sa Yarosalim.
3 Kagiya makaoma si Daod ko torogan iyan sa Yarosalim na kinowa niyan so sapolo a
sandil iyan a inibegak iyan gowani a makakibir ko torogan na tiyago iyan siran ko walay a
nggogordiyaan. Pepageperen iyan siran ogaid na di niyan siran den perembangen. Na
makakalaboso siran den taman ko kiyapamatay iran a pepaginetaw siran a datar o manga
bitowanen.
4 Oriyan iyan na pitero o dato ki Amasa a "Sogoi ngka so manga mama sa Yodah sa
kasong iran raken sii ko soled o telo gawii, na song ka raken sii mambo."
5 Ogaid na sii ko kapelalakaw i Amasa sa kasogoi niyan kiran na miyatey sekaniyan a di
so tataalikan on o dato.
6 Sabap roo na pitero i dato ki Abisay a "Imanto na lebi rektano a pekabinasa si Siba a di
si Absalom. Pakaonota ngka so manga gordiya aken na telokoni niyo sekaniyan, ka o ba
baden makatoon sa kokotaan a siti na kepalagoyan tano niyan."
7 Na so manga sondaro i Yowab ago so manga gordiya o dato a rakes o langon a manga
wawaraw a sondaro na gomiyanat sa Yarosalim a pagoolowanan i Abisay sa kapeselobaa
iran ki Siba a wata i Bikri.
8 Kagiya makaoma siran ko mala a lakongan sii sa Gibiyon na minitoona iran si Amasa.
Somosolot si Yowab sa nditaren iyan a sondaro na sesambitan sekaniyan pen a sii niyan
tatakipen so gonong iyan ko tagoban iyan. Na sii ko kapelakad iyan sa kaselama niyan ki
Amasa na miyaolog so gonong ko tagoban iyan.
9 Pitero i Yowab ki Amasa a "Mapipiya a ginawa ngka, pagari ko?" Na kiyapetan i

Yowab a kawanan a lima so sompa i Amasa sa kapagareki niyan on.
10 Ogaid na da kaiktiyari i Amasa so gonong sii ko diwang a lima i Yowab, na inisoker ai
i Yowab ko tiyan i Amasa na minibontad so tinai niyan ko lopa. Da niyan den gonongi
peroman na miyatay si Amasa. Mandiyadi na tomiyaros somaloba si Yowab ago so
pagari niyan a Abisay ki Siba a wata i Bikri.
11 So isa ko manga mama i Yowab na tominindeg ko kilid o lawas i Amasa na tomiyalo

ko manga sondaro i Amasa a tig iyan a "Apiya antawaa i tomatampil ki Yowab ago
tomotoman ki Daod na onot ki Yowab!"
12 Ogaid na so lawas i Amasa na makakekelit ko look o lalan a makatotona ko rogo iyan.
Na kagiya mailay o mama a petereg roo so oman i isa a pepekaoma on na kinowa niyan
so lawas na pitonda iyan a poon ko lalan ka inowit iyan ko pangomaan, na kiyoloban iyan
sa nditaren.
13 Kagiya mada so lawas ko lalan na tomiyondog so langon a mama ki Yowab sa
kapeselobaa iran ki Siba.
14 Si peman si Siba a wata i Bikri na inipanagad iyan so manga inged o langon a

mbatabataa sa Israil taman den sa siti a Abil Bit Maaka, na so langon a taw ko mbawataan
i Bikri na mitimotimo siran na miyonot ki Siba somoled ko siti.
15 Da matey na miyakaoma roo si Yowab ago so langon a sondaro niyan na linikopan
iran so siti. Initambak iran so lopa ko liyo o kota iyan na peperompin iran ai sa
katempaga iran on.
16 Sarta den na aden a miyananalo a maongangen a babay sii ko poro o kota o siti a tig
iyan a "Pamakineg kano! Pamakineg kano! Teroa niyo ki Yowab a somong sii kaan aken
mimbitiyarai."
17 Kagiya makarani ron si Yowab na tig o babay a "Ba seka si Yowab?"
"Pamakinega ngka so peteroon o oripen ka a babay," a tig iyan.
"Pemakineg ako," a tig i Yowab.
18 Na pitero pen o babay a "Isako miyatey den na aya dii matero na 'Pekakowa kano sa
mosawir sa siti a Abil,' na giyanan i kakepasad o rido.
19 Sekami i lomilintad ago pepamaratiyaya sii sa Israil. Petepengan ka minasa so siti a
datar o ina sii sa Israil. Ino ngka kebayai lomamed so kawali o Allah?"
20 “Mawatan anan raken!" a inisembag i Yowab. "Mawatan raken o ba ko pelameda o di

na ba mbinasaa so siti niyo!
21 Kena a ba giyanan i takdir aken. Aden a mama a iningaranan sa Siba a wata i Bikri a
poon sa kapalawan a inged sa Ipraim na siyopak iyan si dato Daod. Palada niyo raken
angkai a sakataw a mama ka awaan aken so siti."
"Ipagitog ami reka so olo niyan sii ko keleb," a pitero o babay ki Yowab.
22 Mandiyadi na somiyong so babay ko langon a taw ko siti na miyosawiran iyan siran sa

kaongangen. Na piyotol iran so olo i Siba na iniitog iran ki Yowab. Sabap roo na
miyamogiyong sekaniyan a tanda sa kapagawai o manga mama niyan ko siti. Na
mimbabaling so oman i isa kiran ko walay niyan na komiyasoy si Yowab ko dato sa
Yarosalim.
23 Si Yowab i olowan o langon a sondaro sa Israil; si Binaya a wata i Yahoyada na aya

olowan o manga gordiya o dato;
24 Si Adoniram na aya kapatas ko piyamanegel nggalebek; si Yahosapat a wata i Ahilod
na aya komikibir ko manga rikord;
25 Si Siyaba na aya panonorat; si Sadok ago si Abiyatar na aya manga imam,
26 Na si Ira a taw sa Diyair na imam mambo i Daod.
2 SAMOWIL 21
Inisaop so manga taw sa Gibiyon
Sii ko kandadato i Daod na aden a maregen a taon ko inged a miyakatondotondog ko

miyakatelo ragon. Inisean i Daod so Allah mipantag sii na pitero on o Allah a
"Minisabap ai ko kasalaan i Saolo ago so pamiliya niyan, ka piyamono iyan so manga taw
sa Gibiyon.
2(So manga taw sa Gibiyon na kena a ba maaped ko manga Israil ka maito siran a
sagorompong a manga Amoriyo. Minisepa kiran gowani o manga Israil a di iran siran
mbonoon, ogaid na si Saolo sabap ko tindeg iyan ko manga taw niyan sa Israil ago giya
Yodah na tipengan iyan siran molang.)
3 Kagiya ka maoto na piyakisongowan i Daod so manga taw sa Gibiyon na inisean iyan
siran a tig iyan a "Antonaa i penggolaolaan ko rekano? Antonaa i panginsalaan a kibegay
aken rekano kaan kami niyo karakmati a manga taw o Allah?"
4 Tig o manga taw sa Gibiyon a "Di kami kapengangapinan sa pirak o di na bolawan a

rek i Saolo ago so pamiliya niyan aya pen o ba aden a kabenar ami sa kabonoa mi ko
apiya antawaa sii sa Israil."
"Apiya antonaa i pengnin iyo na penggolaolaan ko rekano," a iniise i Daod.
5 Tig iran a "Piyaminasa kami i Saolo ka piyagitaan kami niyan sa kaponasa niyan rekami
sa apiyia anda sii sa Israil.
6 Sabap roo na palada ngka rekami so pito kataw a manga mama ko mbawataan iyan ka
mbitinen ami siran ko hadapan o Allah sii sa Gibiyah a inged i Saolo a so dato a miyapili
o Allah."
"Peladen ko siran rekano," a tig o dato.
7 Na piyakalidas o dato so wata i Yonatan a si Mepibosit a apo i Saolo sabap ko

kiyapakasepai i Daod ago si Yonatan sii ko Allah.
8 Ogaid na aya kinowa o dato na so dowa kataw a wata i Saolo a si Armoni ago si
Mepibosit a inimbawata on o sandil iyan a si Rispah a wata i Ayas, ago so lima kataw a
manga wata o wata a babay i Saolo a si Mirab ago so karoma niyan a si Adriyal a wata i
Barsilay a taw sa Miholah.
9 Piyalad siran i Daod ko manga taw sa Gibiyon, na binitin iran siran sii ko bobongan ko
hadapan o Allah. Parengan a kiyapamatay iran langon a pito kataw. Piyamono siran sii
ko kiyapooni ko kaperagon sa bantad.
10 Si Rispah a aya sandil i Saolo na kominowa sa sako na kiyayat iyan a kaigaan iyan ko
obay o lakongan a ndodon so manga bangkay, na komiyaden roo ipoon ko kiyapooni ko
kaperagon taman ko kiyapakaoma o pangoran. Da niyan siran pakitanai sa manga banog
igira a kadaondaw, ago da niyan siran pakiobain sa maila a binatang igira a gagawii.
11 Kagiya maneg i Daod so pinggolaola i Rispah
12 Na lomiyalakaw sekaniyan ka kowaan iyan so manga tolan i Saolo ago so wata iyan a
si Yonatan a poon ko manga magiinged sa Yabis Giliyad. (Piyanekew iran ai gowani sii
ko poblasiyon sa Bit San a ron den binitin o manga Pilistiyo isako mabono iran si Saolo
sii sa Palaw a Gilbowa.)
13 Na kinowa roo i Daod so manga tolan i Saolo ago si Yonatan, na piyanimo iyan pen so
manga tolan o pito kataw a miyabitin.
14 Inilebeng iran so manga tolan i Saolo ago si Yonatan sii ko kobor o ama i Saolo a si
Kis sii sa Sila sa inged a Baniyamin, na ininggolalan iran so langon taman a inipaliyogat
kiran o dato. Kagiya maipos oto na tiyarima o Tohan so manga pangni iran mipantag ko
taon sii ko inged.
So Kiyapakatidawa o Israil ago so manga Pilistiyo
15 Miyakaisa peman a kiyapakatidawa o manga Pilistiyo ago so Israil. Miyonot si Daod

ko manga sondaro niyan sa kipetidawaan iran ko manga Pilistiyo, na tanto sekaniyan a
inikopay.
16 Ndodoo si Isbibinob a isa ko moriyataw o manga iganti a so sokot o bangkaw niyan a
tombaga na telo ago tenga ka kilo a kapened iyan, na makanggogomaan sekaniyan pen sa
bago a pedang, na aya antap iyan na mbonoon iyan si Daod.
17 Ogaid na si Abisay a wata i Siroyah na piyanabangan iyan si Daod ka giyobat iyan so
iganti a Pilistiyo na biyono iyan. Na misepa ki Daod so manga mama niyan a tig iran a
"Di ka rekami den pekaonot peroman ko katidawa kaan di kepareng so solo o Israil."
18 Da peman matey na aden peman a kiyapakatidawa iran ago so manga Pilistiyo sii sa
Gob. Sangkoto a masa na si Sibekay a taw sa Hosat na miyakapatay sa ped a iganti a aya
ngaran iyan na si Sap.
19 Sii ko miyakaisa pen a kiyapakatidawa iran ago so manga Pilistiyo sii sa Gob na si
Ilhanan a wata i Yair a taw sa Bitlihim na biyono iyan si Goliyat a taw sa Gat a
makaaawid sa bangkaw a so lawas iyan na datar sa katiwaro o ndo.
20 Sii pen ko ped a katidawa sii sa Gat na aden a tanto a mala a mama a ndenem i kemer
sa lima ago sa ai; dowa polo ago pat langon a kemer iyan. Moriyataw sekaniyan mambo
o manga iganti. Piyangerar iyan so manga Israil na biyono sekaniyan i Yonatan a wata i
Simayas a aya pagari i Daod.
22 Giyangkai a pat kataw a moriyataw o manga iganti sii sa Gat na miyapatay i Daod ago
so manga mama niyan.
2 SAMOWIL 22
So Idaida i Daod a Podi
Inidikir i Daod ko Allah angkai a manga katero ko kiyasabeta on o Allah ko lima i Saolo
ago so langon a ped a ridoay niyan.
2 Tig iyan a
So Allah i lakongan aken, kota aken ago pepekalidas raken.

3 So Tohan ko na aya ko lakongan a ron ako pepagapas,
so kelong aken ago so bager o kapekesabet aken.
Sekaniyan i maporo a lindonga aken
a aya ko pekeapasan ago pepanabet raken
pesebeten ako niyan ko manga tangarasi.
4 Igira a petelowan ko so Allah a patot a kapepodiya on
na pekesabet ako ko manga ridoay aken,
5 Kiyakoloban ako o manga begel o kapatay;

inikalek aken so pekabinasa a manga degan.
6 Minilikos raken so manga patong o kobor;
kiyalitagan ako o manga sampirot o kapatay.
7 Na sii ko kaiiloti raken na miyananalo ako ko Allah;
miyakagoraok ako ko Tohan ko.
Sii ko Timplo niyan na miyaneg iyan so lagam aken;
minisampay ko tangila niyan so kiyagoraok aken.
8 Mandiyadi na tiyabeker ago milinog so doniya;

so pen so manga kaoonayan ko manga langit na piyamanabad ago miyanga kokokog,
ka kiyararangitan sekaniyan.
9 Somiyalepot so bel ko ngirong iyan;
miyakapoon ko ngari iyan so pepekalengan a apoy,
na somiyokeyaw ron pen so pekedeg a waga.
10 Inikayang iyan so manga langit na miyanog sekaniyan
a matatago so makapal a maliboteng ko didalem o manga ai niyan.
11 Miyageda sekaniyan ko pepapak a kaaden na lomiyayog;
mipeyag sekaniyan sii ko manga papak o ndo.
12 Inibongkos iyan sa ginawa niyan so maliboteng;
mililibet on so domedatem a manga gabon sa langit a mapepeno a oran.
13 Sii ko sindaw ko hadapan iyan na miyamangiteras on so kilakilat.
14 Mandiyadi na mindadalendeg so Allah roo sa langit,

na minigorong so sowara o Lebi a Maporo.
15 Inipana iyan so manga gasa
na iniparak iyan so manga ridoay;
pikas iyan so manga kilakilat
na piyakigorigaw niyan siran on.
16 Na kiyasawaan so didalem a ragat,
ago miyapayag so manga onayan o doniya sabap ko kiyambonget o Allah,
ago sabap ko kiyapamisenga niyan sa mabager.
17 Kiyawa ako niyan a poon sa poro na kiyapetan ako niyan;

biyaton ako niyan ko madalem a ig.
18 Siyabet ako niyan ko marangit a ridoay aken,
ago sii ko siran oto a pekegowad raken
a tanto a manga babager a di saken.
19 Giyobat ako iran sii ko gawii a kamomoralai raken,
ogaid na so Allah i tomiyokod raken.
20 Inowit ako niyan ko madaya a darpa;
piyanabangan ako niyan
ka kagiya miyasoat sekaniyan raken.
21 Pipiyapiyaan ako o Allah sabap ko kaontol aken;

sabap ko kalolompiyo o manga lima ko na biyalasan ako niyan.
22 Ka miyakedeg aken so manga lalan o Allah;
da ako nggolaola sa marata a mitalikod aken ko Tohan ko.
23 Ka so langon a kokoman iyan na palaya aken tatagoon sa ginawa;
da aken den silin so manga taritib iyan.
24 Miyaginetaw ako a di kedawayan sii ko hadapan iyan,
na inilidas aken a ginawa ko ko kadostaan.
25 Biyalasan ako o Allah sabap ko kaontol aken
ago so kalolompiyo aken sii ko kapegilaya niyan on.
26 Sii ko siran oto a makalimoon

na pepakiilay ngka kiran a makalimoon ka,
na sii ko di penga dadawayan
na pepakiilay ngka kiran a di ka kedawayan;
27 Sii ko kikasosoti
na pepakiilay ngka kiran a masosoti ka,
ogaid na sii ko manga bibid
na pepakiilay ngka kiran a baraakal ka.
28 Pesebeten ka so dii mangangalimbabaan,
ogaid na totoliken ka so pepamangimporoan sa kipembabaan ka kiran.
29 Seka, ya Allah, i solo aken;

pepakaliwanagen o Allah so kalilibotengi raken.
30 Nggolalan reka na pekaato ako ko madakel a manga sondaro,
na nggolalan ko Tohan ko na pekalikin ako ko kota.
31 Makapantag ko Tohan na sayana a madidiyangka so okitokit iyan;

so manga initopa o Allah na katetepengan a benar;
kelong sekaniyan o langon a pepagapas rekaniyan.
32 Ka antawaa i Tohan a makaliyoliyo ko Allah;
na antawaa i Lakongan o di bo so Tohan tano?
33 So Tohan na aya raken dii sembitan sa bager,
na pepakadayaan iyan so lalan aken.
34 Pembalowin iyan so manga ai aken a lagid o ai a saladeng,
na pepakatindegen ako niyan ko manga poporo a darpa.
35 Pelayamen iyan so manga lima ko ko katidawa;
keirat o manga barokan aken so pana a tombaga.
36 Ya Allah, ililinding ka raken so kelong ka a ipepanabet ka,

na so limo o ka i ipepangosor aken.
37 Pepakaoladen ka so lalan a pelalakawan aken
kaan di kekelid so manga palo aken.
38 Piyanaloba aken so manga ridoay aken na bininasa ko siran;

da ako den peto taman sa da siran maiped.
39 Siyasa aken siran sa tarotop, na da siran den makambowat;
miyamakakelit siran ko danga aken.
40 Pisambitanan ako ngka sa bager ko katidawa;
na piyakipeges ka raken so siran oto a miyato raken.
41 Piyakipalagoyan ako ngka ko manga ridoay aken,
na miyabinasa ko so pepanga gogowad raken.
42 Miyangilailay siran sa pekatabang,
ogaid na da a ba kiran somiyabet
apiya so Allah i tiyalowan iran,
ogaid na da niyan siran ampona.
43 Piyakapagombiyombi aken siran a lagid o bayanek sa lopa;
pindadapoan ago pilolomeg aken siran
a datar o lonatay sii ko manga lalan.
44 Piyanabangan ako ngka ko kagogobata raken o manga taw,

na piyagipat ako ngka a olowan ako o manga nasiyon.
So manga taw a da a katawi ko ron gowani na pepamanalagad raken,
45 Na so manga rait na pepamanodiyod raken;
anda den i kanega iran raken na peratiyayaan ako iran;
46 Pepanga adaan siran langon sa kawaraw,
na pepeliliyo siran pen ko manga kota iran a kitatabaden.
47 Oyagoyag so Allah! Mapodi so Lakongan aken!

Mabantog so Tohan a so Lakongan a aya ko pananabet!
48 Sekaniyan so Tohan a ipeseop ako niyan
a pepakipaar iyan raken so manga nasiyon,
49 Ago pembelagen ako niyan ko manga ridoay aken!
Piyakidaag ka raken so siran oto a miyato raken;
piyanabangan ako ngka ko tanganiyaya a manga taw.
50 Kagiya ka maoto, ya Allah, na podin ko seka sii ko manga nasiyon,
na ndidaon ko a manga podi so Ingaran ka.
51 Pembegan o Tohan sa mangaala a kapakataban so dato iyan;
pepakiilay niyan so da a pitetamanan a gagaw niyan ko mama a kiyaidinan iyan,
a so Daod ago so pekebabadan on sa taman sa pakataman.
2 SAMOWIL 23
So Moripori a Katero i Daod
Si Daod a wata i Yasay na aya mama a inipangkat o Tohan sa maporo, a so miyapili o

Tohan o Yakob a madato, ago so pekebabayaan a padidikir sa manga sabor sii sa Israil.
Giyai i moripori a manga katero i Daod:
2 “Dii tero so Roh o Allah a nggolalan raken;

sisii so manga katero iyan ko dila aken.
3 Mitero so Tohan o Israil;
so Lakongan o Israil na pitero iyan raken a
'So dato a pendato ko manga taw sii ko kaontol
a aya ipendato iyan na so kalek ko Tohan
4 Na lagid sekaniyan o sinar o alongan ko kapesebang iyan
sii ko kada a gabon a kapipita,
ago lagid o kapekerap o paotanotan ko kiyaipos o oran.'
5 Mataan den a datar oto so kebabadan raken,

ka mimbaal so Tohan sa da a ikeda iyan a kapasadan mipantag raken
a matatanor ago di den kebaroba so langon a betad iyan.
Pekaosoren iyan so kapiya ko i bobolos
ago so langon a masisinganin aken.
6 Ogaid na so da a katohanan iyan a manga taw
na lagid o manga sorok a ipelambeg a di keseko a lima.
7 Apiya antawaa i seko sa manga sorok na pekaosar sa tongkas
o di na lawas o bangkaw,
na pembisolan ai baden sii ko katatagoan kiran."
So manga Wawaraw a mama i Daod
8 Giyai i manga ngaran o 'Telo Kataw' a lebi a manga wawaraw a mama i Daod: si Yosib
Basibit a poon sa Takimon na aya kiran olowan. Inatowan iyan a bangkaw so walo gatos
a mama a miyapatay niyan ko miyakaisa a katidawa.
9 Aya ikadowa ko 'Telo Kataw' na si Iliyasar a wata i Dodo a aya wata i Ahohi.
Miyakaisa a gawii na ped sekaniyan i Daod isako raren iran so manga Pilistiyo a titimo a
makipetidawa. Na tomiyailis so manga Israil
10 Ogaid na da den pagekar si Iliyasar ko titindegan iyan, na piyamono iyan so manga
Pilistiyo taman sa diyokawan a tanto a lima niyan a makakekempel ko pedang iyan. Na
migay roo so Allah sa mala a kiyapakataban sangkoto a gawii. Oriyan iyan na mipeto so
manga Israil ki Iliyasar ogaid na giya bo a kapetebani ran ko miyamatay.
11 Aya ikatelo ko 'Telo Kataw' na si Samah a wata i Agi a poon sa Harar. Isako
mbekebekes so manga Pilistiyo sii ko pangomaan a mapepeno a kodalis na piyalagoyan
siran o manga Israil.
12 Ogaid na baden titindeg si Samah ko look o pangomaan na lininding iyan, na
piyamono iyan so manga Pilistiyo. Na migay roo so Allah sa mala a kiyapakataban.
13 Sii ko masa a kaperagon na telo ko 'Telo Polo' kataw a manga poporo a olowan na
siyongowan iran si Daod sii ko liyang sa Adolam, na aden a sagorompong a manga
Pilistiyo a kekampo ko Balintad a Ripaim.
14 Sa masa oto na sisii si Daod ko kota na aya kakadenan o manga sondaro a Pilistiyo na
giya Bitlihim.
15 Na miyakasingayo si Daod a tig iyan a "O ba aden bo a makakowa raken sa ig a poon
ko paridi a marani ko gimowa a Bitlihim!"
16 Sabap roo na so telo a manga wawaraw a mama na inopak iran mokit so kampo o
manga Pilistiyo na somiyageb siran sa ig ko paridi a marani ko gimowa a Bitlihim, na
inowit iran ki Daod. Ogaid na di niyan kabaya o ba niyan inoma, ka ba niyan den inodod
a inisapaat ko Allah
17 A tig iyan a "Mawatan raken, ya Allah, o ba aken inoma! Ba ini di rogo o manga
mama a somiyong roo a iniserakan iran a niyawa iran?" Na da on den inom si Daod.
Giyanan i pinggolaola o telo kataw a manga wawaraw a sondaro.
18-19 Si Abisay a pagari i Yowab a wata i Siroyah na aya lebi a kababantogan sangkai a
telo kataw na miyabaloy a olowan iran. Inatowan iyan a bangkaw so telo gatos a manga
mama na piyamono iyan siran, na kiyabantogan sekaniyan a datar o paganay a 'Telo
Kataw' apiya pen kena a ba sekaniyan kiran maaped.
20 Si Binayas a wata i Yahoyada a poon sa Kabsil na isa mambo ko kababantogan a

manga sondaro a madakel a pinggolaola niyan a nggolalan ko kawaraw. Biyono iyan so
dowa kataw a lebi a mabager a sondaro sa Mowab. Miyalosod sekaniyan pen ko galebo
na miyakapatay ron sa arimaw sii ko kapengoran iyan sa ilo.
21 Na biyono iyan so mala a sondaro a Imisiren a makanggogomaan sa bangkaw. Aya bo
a iniato ron i Binayas na bentol, na inagaw niyan so bangkaw ko lima o Imisiren na aya
niyan on inibono.
22 Giyanan i manga pinggolaola i Binayas a wata i Yahoyada. Datar sekaniyan sa
bantogan o 'Telo Kataw' a manga wawaraw,
23 Na lebi sekaniyan a kiyabantogan a di so apiya antawaa ko 'Telo Polo Kataw' ogaid na
da sekaniyan mibilang ko 'Telo Kataw'. Na initoro sekaniyan i Daod a maporo ko manga
gordiya niyan.
Aya maaped ko 'Telo Polo' na:

si Asahil a pagari i Yowab,
si Ilhanan a wata i Dodo a poon sa Bitlihim,
25 Si Samah a poon sa Harod,
si Ilika a poon sa Harod,
26 Si Hilis a poon sa Pilit,
si Ira a wata i Ikis a poon sa Tikowa,
27 Si Abiyasar a poon sa Anatot,
si Mibonay a poon sa Hosiyah,
28 Si Salmon a poon sa Ahoh,
si Maharay a poon sa Nitopah,
29 Si Hilib a wata i Baanah a poon sa Nitopah,
si Itay a wata i Ribay a poon sa Gibiyah sa inged a Baniyamin,
30 Si Binayas a poon sa Piraton,
si Hiday a poon sa manga baogan sa Gaas,
31 Si Abiyalbon a poon sa Arabah,
si Asmabit a poon sa Bahorim,
32 Si Iliyaba a poon sa Siyaalbon,
so manga wata i Yasin,
si Yonatan,
33 Si Siyamah a poon sa Harar,
si Ahiyam a wata i Siyarar a poon sa Harar,
34 Si Ilipilit a wata i Ahasbay a poon sa Maakah,
si Iliyam a wata i Ahitopil a poon sa Gilo,
35 Si Hisray a poon sa Karmil,
si Paaray a poon sa Arab,
36 Si Igal a wata i Natan a poon sa Sobah,
si Bani a poon sa Gad,
37 Si Silik a so Amoniyo,
si Naharay a poon sa Birot a aya pegawid ko gomaan i Yowab a wata i Siroyah,
38 Si Ira a poon sa Yatir,
si Garib a poon sa Yatir,
39 Ago si Oriyas a Hitiyo.
Telo polo ago pito kataw langon a manga wawaraw a sondaro.
2 SAMOWIL 24
Binilang i Daod so manga Taw
1-2 Kiyararangitan peroman o Allah so manga Israil. Kagiya ka maoto na piyakaseriat

iyan si Daod sa kapakanggolaola niyan sa kidaneg kiran o Allah, ka pitero i Daod ki
Yowab a komandir o manga sondaro a "Lalakaw ka na go ka bilanga so manga taw sa
Israil ago sii sa Yodah. Neba ngka so langon a mbatabataa a Israil ko pirowarowangan o
inged na listaan ka so manga taw kaan aken katokawi i kadakel iran langon."
3 Ogaid na pitero i Yowab ko dato a "Pengnin ko ko Allah a pagomanan iyan so manga

taw sa magatos takep ko kadakel iran imanto ago mamboway ka, kadnan ko a dato, kaan
ka mailay! Ogaid na ino ngka ini kebayai nggolaola?"
4 Apiya pen oto na domiyaag so katero o dato ki Yowab ago so manga olowan a sondaro,
na gomiyanat siran ko dato ago lomiyalakaw sa kambilanga iran ko manga taw sa Israil.
5 Rominipag siran sa Yordan na mikempo sa pagabagatan o siti a Arowir sii ko look o

balintad sa inged a Gad. Ipoon roo na somiyong siran sa Yasir,
6 Na tomiyaros den sa Giliyad ago sii pen sa Kadis sii ko pagiingedan o manga Hitiyo.
Ipoon roo na somiyong siran sa Dan ago sii tampar sa sedepan taman sa Sidon.
7 Oriyan iyan na miyantap siran sa pagabagatan taman sa kokotaan a siti a Tiro ago sii
pen ko langon a inged o manga Hibiyo ago manga Ikanaanen, na sii sa moripori na
somiyong siran sa Birsiba sii sa pagabagatan a Yodah.
8 Kagiya mipanagad iran so dalem a inged na komiyasoy siran sa Yarosalim ko

kiyapopos o siyaw olan ago dowa polo gawii.
9 Na iniripot i Yowab ko dato so kadakel o manga taw; walo gatos nggibo a manga mama
a pekakena sa pedang sii sa Israil, ago lima gatos nggibo sii sa Yodah.
So Kiyandadaneg sabap ko Dosa i Daod

10 Na misendit bo si Daod kagiya mapasad iyan milang so manga taw, na pitero iyan ko
Allah a "Miyakandosa ko sa mala ko pinggolaola ko! Pengnin ko reka, ya Allah, a
pakadaa ngka so kasalaan aken a oripen ka, ka miyakanggolaola ko sa tanto a
kalalalongan!"
11 Sa da pen kapakambowat i Daod ko telondog a gawii na minitoron so katero o Allah

ki Gad a so nabi i Daod. Pitero on o Allah a
12 “Ika roo na go ngka teroa ki Daod a 'Giyai i pitero o Allah: Began ko seka sa telo a
pemilian. Pilia ngka so isa on a midaneg aken reka.' "
13 Na somiyong si Gad ki Daod na piyanotol iyan on so pitero o Allah, na iniise iyan a

"Antonaa i piliin ka? Telo ragon a taon sii ko inged ka, o di na telo olan a kapepalagowi
ngka ko manga ridoay ngka a peseloba reka, o di na telo gawii a kasiksaa sa paniyakit ko
inged ka? Na, pamimikirana ngka na teroa ngka o antonaa i misembag aken ko Allah a
somiyogo raken."
14 Tig i Daod a "Tanto ako a masososa. Tomo a sii kami maolog ko lima o Allah, ka
mala so kapedi iyan; pengnin ko a di ako maolog ko lima o manosiya!"
15 Sabap roo na inowitan o Allah sa paniyakit a Israil ipoon sangkoto a kapipita taman ko
kiyapopos o tiyaalikan iyan on, na pito polo nggibo a manga Israil a miyamatay sii ko
pirowarowangan o inged.
16 Kagiya beteren o malaikat a lima niyan sa kasiksaa niyan sa Yarosalim na mikerata a
ginawa bo o Allah sabap ko morala na pitero iyan ko malaikat a pepaminasa ko manga
taw a "Kiyatangkaan den! Taregen ka a lima ngka!" Sangkoto a oras na sisii so malaikat
o Allah ko obay o pegegikan sa pereperan a rek i Araonah a Hibosiyo.
17 Miyailay i Daod so malaikat a pepekapatay ko manga taw na pitero iyan ko Allah a

"Saken i miyakandosa ago miyakanggolaola sa ribat. Giyangkai a manga taw na lagid
baden o manga bilibili. Antonaa i miyanggolaola iran? Saken i pakatanai ngka sa lima
ago so pamiliya ko."
Mimbaal si Daod sa Aparan
18 Sii sangkoto a gawii na somiyong si Gad ki Daod na pitero iyan on a "Song ka ko

pegegikan i Araonah a Hibosiyo na mbaalen ka roo sa aparan so Allah."
19 Na somiyong roo si Daod ka ipenggolalan iyan so inisogo on o Allah a nggolalan ki
Gad.
20 Kagiya mailay i Araonah so dato ago so manga sanasanaan iyan a pepekaantap
rekaniyan na inalaw niyan siran. Gomipe sekaniyan ko lopa ko hadapan o dato
21 Na iniise iyan a "Ino ka sii pekaoma, kadnan ko a dato, ko oripen ka?"
"Pemasaan ko so pegegikan ka," a inisembag i Daod, "kaan aken on mimbaal sa aparan
so Allah kaan mitareg so kapesiksaa ko manga taw."
22 “Kowaa ngka den, kadnan ko a dato," a tig i Araonah, "na sapaaten ka on ko Allah so
apiya antonaa i kabaya a ka. Ilaya ngka, ka kataya so manga sapi a kisapaat a totongen,
na kataya pen so parabowat ago manga kokoong sa sapi a ipagitagon on.
23 Imbegay aken reka ini langon, dato, na pengnin ko a terimaan o Allah a Tohan ka so
ipesoasoat ka on."
24 Ogaid na pitero o dato ki Araonah a "Kena; mataan den a mbayadan ko reka saden sa
arga iyan. Ka di aken isepaat ko Allah a Tohan ko so manga korban a petotongen a ba da
a minibayad aken on."
Sabap roo na piyamasa i Daod so pegegikan ago so manga sapi sa arga a lima polo a
pelata a pirak.
25 Na mimbaal roo si Daod sa aparan ko Allah na somiyapaat sekaniyan on sa manga
korban a petotongen ago manga korban pantag bo ko kanggiginawai. Oriyan iyan na
inampon o Allah so pangni mipantag ko inged na minitareg so kasiksaan sa Israil.
1 MANGA DATO
1 MANGA DATO 1
So Kiyalokes i Daod
Kagiya malokes den so Dato Daod a minitolod a idad iyan na lalayon sekaniyan
tetenggaon apiya pen o petenggoban o manga talasogoay niyan.
2 Sabap roo na pitero iran on a "Dato, pakanggilobaa kami ngka sa raga a da makeroma a
makapenalagad ago makasiyap reka. Pepekarembang sekaniyan reka kaan ka kaayawi."
3 Na mimbabanog siran sa dalem a inged a Israil sa mataid a babay, na miyatoon iran si

Abisag a taw sa Sonam na inowit iran ko dato.
4 Tanto ini a mataid a babay, na pesiyapen iyan ago pepanalagadan iyan so dato, ogaid na
da den makebot o dato.
Diyato i Adoniyas a Ginawa niyan
5-6 So wata i Daod a si Adoniyas a aya ina iyan na si Hagit na tanto a mataid a mama a
inimbawata a tomalondog ki Absalom. Da sekaniyan den mbongeti o ama iyan sa kiiseen
iyan on a "Ino ka dii nggolaola sa datar anan?" Na iniporo iyan a ginawa niyan a tig iyan
a "Ndato ako den!" Na kominowa sa manga karo ago manga koda a rakes o lima polo
kataw a mama a makapangongonaan rekaniyan.
7 Miyakimosawir sekaniyan ki Yowab a wata i Siroyah ago si Abiyatar a imam na
inogopan iran.
8 Ogaid na si Sadok a imam, si Binayas a wata i Yahoyada, so nabi Natan, si Simay, si
Rey ago so manga gordiya i Daod na da siran tampil ki Adoniyas.
9 Na mikorban si Adoniyas sa manga bilibili, manga sapi ago manga kaolit a nati a sapi
sii ko lakongan sa Sohilit a marani sa In Rogil. Biyantowan iyan so langon a pagari niyan
a manga wata o dato ago so langon a mama sa Yodah a aya sanasanaan sa torogan,
10 Ogaid na da niyan bantowi so nabi Natan, o di na si Binayas o di na so manga gordiya
o dato o di na so pagari niyan a si Solaiman.
11 Mandiyadi na somiyong si Natan ki Batsiba a ina i Solaiman na iniise iyan on a "Ba

ngka da maneg a si Adoniyas a wata i Hagit na diyato iyan a ginawa niyan a di den
katawan o kadnan ta a Daod?
12 Na, mbegan ko seka sa osiyat a kilidas ka ko kapatay ago so wata a ka.
13 Song ka den nggagaan ko Dato Daod na teroa ngka on a 'Kadnan ko a dato, ba ngka
raken da sepaan a so wata aken a Solaiman na aya pekasambi reka a dato a magontod ko
korsi i ka? Na ino si Adoniyas i pendato?'
14 Na sii ko kandodoo ngka pen a dii makimbitiyarai ko dato na pekaoma ako na
pemataanan aken so di ngka dii teroon.”
15 Na somiyong si Batsiba ko miyalokes a dato na somiyoled ko rowang iyan a ron

sekaniyan pepanalagadi i Abisay a taw sa Sonam.
16 Na somiyodiyod si Batsiba ko dato a piyagadatan iyan.
"Antonaa i pagangin ka?" a iniise on o dato.
17 Pitero iyan a "Kadnan ko, inisepa ka raken sii ko Allah a Tohan ka a so wata aken a
Solaiman na aya telondog reka a dato a pekaontod ko korsi i ka.
18 Ogaid na miyakandato den imanto si Adoniyas na di ngka ini katawan.
19 Mikorban sekaniyan sa tanto a madakel a sapi ago manga kaolit a nati a sapi ago
manga bilibili, na biyantowan iyan langon so manga wata o dato a manga mama ago si
Abiyatar a imam ago si Yowab a komandir o manga sondaro, ogaid na da niyan bantowi
si Solaiman a wata a ka.
20 Na seka i pegilain o langon a manga Israil, kadnan ko a dato, ka nanayaon iran so
kapeteroa ngka kiran o antawaa i pekatalondog reka a magontod ko korsi i ka.
21 Ka o di, na amay den ka matay ka na saken ago so wata aken a Solaiman na iseyan sa
lagid o manga makatipo."
22 Na sii ko di niyan pen dii kimbitiyarain ko dato na miyakaoma so nabi Natan.

23 Miyatero ko dato a "Sisii so nabi Natan." Na miyangadap sekaniyan ko dato na
somiyodiyod on.
24 Tig i Natan a "Hey kadnan ko a dato, ba ngka pitero a si Adoniyas na aya sembi reka a
dato a magontod ko korsi i ka?
25 Ka sii den sangkai a gawii na lomiyalakaw sekaniyan a mikorban sa tanto a madakel a
sapi, manga kaolit a nati a sapi ago manga bilibili. Biyantowan iyan so langon a manga
wata o dato a manga mama ago so manga olowan o manga sondaro ago si Abiyatar a
imam. Imanto den na di siran dii kekan ago dii mamaginom a ped iyan a di iran dii
teroon a 'Mamboway si dato Adoniyas!'
26 Ogaid na saken a oripen ka ago si Sadok a imam ago si Binayas ago si Solaiman na da
niyan bantowi.
27 Ba giyai i pinggolaola ngka, kadnan ko a dato, a da ngka den pakatokawa so manga
sanasanaan ka o antawaa i pekatalondog reka montod ko korsi?"
Biyaloy i Daod si Solaiman a Dato
28 Mandiyadi na pitero o dato a "Pakasoleda niyo peman si Batsiba." Na somiyoled

sekaniyan ago tominindeg ko hadapan o dato.
29 Na misepa so dato a tig iyan a "Matamataan ko kaooyagoyag o Allah a aya raken

somiyabet ko langon a karomasayan
30 Ka itoman aken den imanto so minisepa aken reka sii ko Allah a Tohan o Israil a so
wata a ka a Solaiman i telondog raken a dato a sembi raken montod ko korsi aken."
31 Na somiyodiyod si Batsiba ko hadapan o dato sa kiyapagadati niyan on a tig iyan a

"Mamboway so kadnan aken a Dato Daod sa taman sa pakataman!"
32 Na pitero i Daod a "Tawaga niyo si Sadok a imam ago so nabi Natan ago si Binayas."
Kagiya makapangadap siran ko dato
33 Na tig iyan kiran a "Pakaonota niyo so manga sanasanaan aken na pakakodaa niyo si
Solaiman ko kimar aken na wita niyo sii sa Gihon.
34 Na sekano a si Sadok ago si Natan na salawati niyo sekaniyan roo a madato sa Israil.
Pakaoniya niyo so bogiyong na go niyo dii pelalalisen a 'Mamboway so Dato Solaiman!'
35 Oriyan iyan na onoti niyo sekaniyan ko kakesoy niyan sii, ka magontod ko korsi aken
ago pendato a kisambi raken. Sekaniyan i initoro aken a pendato sa Israil ago giya
Yodah."
36 “Matoman den," a inisembag on i Binayas, "na mapakatangked mambo o Allah a

Tohan o kadnan aken a dato!
37 Datar o kasisii reka o Allah, kadnan ko a dato, na madatar iyan mambo a kasisii niyan
ki Solaiman a mabaloy niyan so kandadato iyan a kababantogan a di so kiyandato o
kadnan aken a Dato Daod!"
38 Mandiyadi na si Sadok a imam ago so nabi Natan ago si Binayas ago so manga
gordiya o dato na piyakakoda iran si Solaiman ko kimar i Daod na inidolog iran roo sa
Gihon.
39 Inawidan i Sadok so omoy a petegoan sa lana a olibi a kinowa niyan sii ko
Barombarong a dii Telabokan na siyalawatan iyan on si Solaiman. Oriyan iyan na
miyamogiyong siran na inipelalalis o langon o manga taw a "Mamboway so Dato
Solaiman!"
40 Na miyonot on komasoy ko siti so langon a taw a pepamanginsi siran a tanto a
pepanga bababaya a ipetebeker o lopa so boniboniyan iran.
41 Si peman si Adoniyas ago so langon a biyantowan iyan na miyaneg iran ai sii ko

kapekapasad iran pista. So kiyanega iran ko oni o bogiyong na iniise i Yowab a "Antonaa
i maana angkoto a matanog a pakabowing sii ko siti?"
42 Sii pen ko di niyan dii katero na miyakaoma kiran si Yonatan a wata i Abiyatar a
imam. Pitero on i Adoniyas a "Soled ka. Mapiya ka a mama na mataan den a pegawid sa
mapiya a totol!"
43 “Kena ba," a inisembag i Yonatan. "So kadnan tano a Dato Daod na biyaloy niyan a
dato si Solaiman.
44 Siyogo o dato si Sadok ago si Natan ago si Binayas ago so manga gordiya o dato a
pekadolog rekaniyan. Piyakakoda iran si Solaiman ko kimar o dato
45 Na roo sa Gihon na si Sadok a imam ago so nabi Natan na siyalawatan iran sa kadato.
Poon roo na somiyong siran ko siti a dii mamameseg sa kapekebabaya, na magogorigaw
imanto so manga taw ron. Giyanan i bogembog a pekeneg iyo.
46 Liyo ron pen na miyontod den si Solaiman ko korsi o dato,
47 Na so manga sanasanaan o dato na miyamanong ko kadnan tano a Dato Daod na
siyalam iran a tig iran a 'Pengnin ami a mabaloy o Tohan ka so ngaran o Solaiman a
kababantogan a di so ngaran ka, ago so kandadato iyan na miosor a di so rek ka!' Na
sominimba so dato sii ko igaan iyan
48 A tig iyan a 'Podin so Allah a Tohan o Israil a migay imanto sa pekaontod ko korsi
aken a pekeilay o manga mata ko.' "
49 So kiyanega iran sii na miyanga alek so langon a banto i Adoniyas, na tominindeg

siran ago miyawa roo a somiyong so oman i isa ko walay niyan.
50 Ogaid na si Adoniyas, sabap ko kalek iyan ki Solaiman, na somiyong ko Barombarong
o Allah na kiyapetan iyan so manga pangapanga o aparan.
51 Na miyatero ki Solaiman a "Ipekelek ka i Adoniyas na pekepet sekaniyan ko manga
pangapanga o aparan a tig iyan a 'Pengnin ko a ipesepa raken imanto o Dato Solaiman a
di ako niyan pakibono.' "
52 Tig i Solaiman a "O pakiilay niyan a ginawa niyan a tomotoman a mama na da a

satiman bo ko bok iyan a ba maolog ko lopa, ogaid na o pemarata sekaniyan na petay bo."
53 Na piyakisogoan sekaniyan i Solaiman sa manga mama na kinowa iran a poon ko
aparan na inowit iran ko dato. Kagiya makaoma si Adoniyas na somiyodiyod ko Dato
Solaiman, na pitero on i Solaiman a "Baling ka ko walay ngka."
1 MANGA DATO 2
So Iniinsarat i Daod ki Solaiman
Kagiya makarani den so kapetay i Daod na ininsaratan iyan si Solaiman a wata iyan a tig
iyan a
2 “Magaan ako den somong ko kobor. Na pakababager ka ago pakiilain ka a ginawa ngka
a tito a mama
3 Na nggolalanen ka so ipepaliyogat reka o Allah: Kedega ngka so manga lalan iyan na
petomana ngka so manga taritib ago manga sogoan iyan, ago so manga kokoman iyan ago
manga insarat a misosorat ko Kitab o Mosa kaan mapiya i bobolos so langon a di ngka dii
nggolaolaan apiya anda ka pesong.
4 Amay ka magiyanan na itoman o Allah so initopa niyan raken a tig iyan a 'O inengkaa o
manga moriyataw ngka so manga okitokit iran ago peginetaw siran ko hadapan ko a
mapaparatiyaya sa iklas ko poso iran ago niyawa na lalayon aden a moriyataw ngka a
moontod ko korsi sa Israil a pendato on.'
5 “Na aden pen a ipaginsarat aken reka. Katawan ka den imanto o antonaa i inikidia
raken i Yowab, a so pinggolaola niyan ko dowa kataw a olowan o manga sondaro a Israil
a si Abnir a wata i Nir ago si Amasa a wata i Yatir. Biyono iyan siran; piyakatoga iyan so
rogo iran sii ko masa a kalilintad a datar o sii ko katidawa, na minidaket angkoto a rogo
ko sambitan ko kasadan iyan ago so manga tinilas ko ai niyan.
6 Sii ko kaongangen ka na kidian ka on so patot rekaniyan, ogaid na di ngka peroa i ba
makasong sekaniyan ko kobor a ba lomilintad ko kiyalokes iyan.
7 “Ogaid na kalimoon ka so manga wata i Barsilay a manga mama a taw sa Giliyad na

pakapeda ngka siran ko pepemakakan sii ko lamisaan ka. Inogopan ako iran isako
pepalagoyan aken so pagari ngka a Absalom.
8 “Na tatademi ngka a sisii reka pen si Simay a wata i Gira a poon sa Bahorim sa inged a
Baniyamin. Kiyapamanintaan ako niyan sa masakit sii ko gawii a kiyasong aken sa
Mahanaim. Ogaid na isako somong sekaniyan sa kiyaalawa niyan raken sa lawasaig a
Yordan na inisepa aken on sii ko Allah a di aken den bonoon.
9 Inonta bo na di ngka pelepasa sa kandanega on. Maongangen ka a mama na katawan ka
o antonaa i ikidia ngka rekaniyan. Pakiwiten ka ko kobor sa kapekatogaa ko rogo iyan."
So Kiyapatay i Daod
10 Oriyan iyan na miyatay si Daod na minitapi ko manga apo iyan a domedeke, na sii
sekaniyan inilebeng ko Siti o Daod.
11 Miyakapat polo ragon a kiyandato iyan sa Israil pito ragon sii sa Hibron ago telo polo
ragon sii sa Yarosalim.
12 Na miyakasambi si Solaiman ki Daod a ama iyan a dato na miyakambeken piyapiya so
kandadato iyan.
So Kiyabonoa ki Adoniyas
13 Samaoto na si Adoniyas a wata i Hagit na somiyong ki Batsiba a ina i Solaiman. Na

iniise on i Batsiba a "Ba kalilintad a minioma ngka?"
"Oway, kalilintad," a inisembag iyan.
14 Na tig iyan pen a "Aden a pengnin ko reka."
"Teroa ngka den," a inisembag i Batsiba.
15 “Katawan ka," a tig iyan, "a kabenar aken so kadadatoi, na miyainam o langon o
manga Israil a saken i madato kiran. Ogaid na baden miyaalin so kapakambebetad na
miyakowa o pagari aken so ndatoan ka minibegay ron o Allah.
16 Imanto na aden a satiman a pengnin ko reka; di ngka pagendai."
"Teroa ngka den," a tig i Batsiba.
17 Na tig iyan a "Kapedipedi ka bo na pangniya ngka ko Dato Solaiman, ka di niyan

pagendaan so katero o ka, a imbegay niyan raken si Abisag a taw sa Sonam a
mapengaroma ko."
18 “Oway den," a tig i Batsiba. "Imbitiyarai aken reka so dato."
19 Kagiya somong si Batsiba ko Dato Solaiman sa kipembitiyarain iyan on mipantag ki

Adoniyas na tominindeg so dato a inalaw niyan, na somiyodiyod on so dato na miyontod
ko korsi iyan. Na piyakiwitan iyan sa korsi so ina iyan na miyontod si Batsiba ko
kawanan iyan.
20 “Aden a maito a pengnin ko reka," a tig i Batsiba. "Di ngka pagendai."

"Teroa ngka den, ina ko," a tig o dato, "ka di aken pagendaan."
21 Na tig i Batsiba a "Pakipangaromaan ka ko pagari ngka a Adoniyas si Abisag a taw sa

Sonam."
22 Iniise o dato ki ina iyan a "Ino ngka pengniya a imbegay rekaniyan si Abisag? Datar o
ba aya piyangni ngka na imbegay ron so ndatoan! Katawan ka a kaka sekaniyan a pagari
aken, na sii rekaniyan tomiyampil si Abiyatar a imam ago si Yowab a wata i Sorayas!"
23-24 Na giyoto a misepa so Dato Solaiman a tig iyan a "Kamorkaan ako o Tohan sa
tanto a masakit o di mibayad i Adoniyas so niyawa niyan sabap sangkai a pangni niyan.
Matamataan ko kaooyagoyag o Allah ka mbonoon si Adoniyas sangkai a gawii! Isepa
aken ai sii ko Allah a piyakambeken ako niyan ko korsi o ama aken a Daod ago inibegay
niyan raken so ndatoan a aya kiyatoman o initopa niyan."
25 Mandiyadi na siyogo o Dato Solaiman si Binayas na siyongowan iyan si Adoniyas na
biyono iyan.
So Kiyakowai ki Abiyatar sa Kaiimami ago so Kiyabonoa ki Yowab
26 Si peman si Abiyatar a imam na pitero on o dato a "Kasoy ka ko lopa a ka sii sa

Anatot. Patot a kebono ka ogaid na di aken seka mbonoon imanto ka kagiya kikibiren ka
so Kaban sa Kapasadan o Allah sii ko masa o ama aken a Daod, na miyakambagian ka ko
langon a karomasayan iyan."
27 Na kinowaan i Solaiman si Abiyatar ko kaiimami ko Allah a aya kiyatoman o miyatero
o Allah sii sa Siloh makapantag ko pamiliya i Ili.
28 So kiyanega i Yowab ko miyanggolaola (tomiyampil sekaniyan ki Adoniyas ogaid na

kena a ba sii ki Absalom) na miyagapas sekaniyan ko Barombarong o Allah na kiyapetan
iyan so manga pangapanga o aparan.
29 Miyatero ki Dato Solaiman a miyagapas si Yowab ko Barombarong o Allah na sisii
sekaniyan ko kilid o aparan. Na siyogo i Solaiman si Binayas a tig iyan a "Ika roo na go
ngka bonoa!"
30 Somiyoled si Binayas ko Barombarong o Allah na pitero iyan ki Yowab a "Pitero o

dato a meliyo ka kon!"
Ogaid na tig i Yowab a "Di; sii ako den petay."
Komiyasoy si Binayas ko dato na iniripot iyan on so inisembag i Yowab.
31 Na inisogo o dato ki Binayas a "Nggolaolaa ngka so pitero iyan. Bonoa ngka na go

ngka lebengen kaan mapakada rekami ago so pamiliya o ama aken so kasalaan ami sabap
ko rogo o da a sala iyan a manga mama a piyakatoga i Yowab.
32 Ndanegen sekaniyan o Allah sabap ko rogo a piyakatoga iyan a da a katawi ron o ama
aken a Daod, ka biyono iyan a pedang so dowa kataw a mama a lebi a mapiya ago manga
oontol a di sekaniyan, a si Abnir a wata i Nir a komandir o manga sondaro a Israil ago si
Amasa a wata i Yatir a komandir o manga sondaro sa Yodah.
33 Mitana ko olo i Yowab ago so kebabadan on so kiyapakatogaa ko rogo iran sa taman
sa pakataman! Ogaid na mapakalintad o Allah sa taman sa pakataman so kebabadan ki
Daod ago so pepemakaontod ko korsi iyan sii ko ndatoan iyan!"
34 Mandiyadi na siyongowan i Binayas si Yowab na biyono iyan, na inilebeng sekaniyan

sii ko lopa iyan ko disirto.
35 Initoro o dato si Binayas a olowan o manga sondaro a minisambi ki Yowab, na
inisambi iyan si Sadok ki Abiyatar ko kaiimami.
36 Oriyan iyan na piyakisogoan o dato si Simay na pitero iyan on a "Mbaalen ka a ginawa

ngka sa walay sii sa Yarosalim na go ka on baling; di ka peliyo ko siti a pegenebeneb sa
apiya anda.
37 Sii ko gawii a meliyo ka on ago terapasen ka so Balintad a Kidron na ketangked ka a
petay ka, na mipembagolo ngka so kambonoa reka."
38 Tig i Simay a "Mapiya so pitero o ka. Tomanen ko a oripen ka so pitero o ka, kadnan
ko a dato." Na miyatey a kiyabaling i Simay sa Yarosalim.
39 Ogaid na oriyan o miyakatelo ragon na miyalagoy so dowa kataw ko manga oripen i

Simay a miyamagapas ko dato sa Gat a si Akis a wata i Maakah. Na miyatero ki Simay a
"So manga oripen ka na sii sa Gat."
40 Na siniyaan iyan so kimar iyan na somiyong ki Akis sii sa Gat sa kapenggilobaa niyan
ko manga oripen iyan. Miyatoon iyan siran na minimbalingan iyan.
41 Kagiya matero ki Solaiman a gomiyanat si Simay sa Yarosalim ka somiyong sa Gat

ago miyakakasoy
42 Na piyakisogoan sekaniyan o dato a tig iyan on a "Piyakasepa aken seka ko Allah ago
tiyapaosan aken seka sa 'Sii ko gawii a kapagawa a ka a song ka sa apiya anda na
ketangked ka a petay ka'. Sa masa oto na pitero o ka raken a 'Mapiya so pitero o ka na
tomanen aken.'
43 Na ino ngka da tomana so inisepa a ka ko Allah a da ngka paratiyayaa so inisogo aken
reka?"
44 Pitero pen o dato ki Simay a "Katawan ka sii ko poso o ka so langon a marata a

miyanggolaola ngka ko ama aken a Daod. Imanto na itena reka ini o Allah.
45 Ogaid na perakmatan ako niyan, na ketatap a kapakambebeken o ndatoan o Daod ko
hadapan o Allah sa taman sa pakataman."
46 Na siyogo o dato si Binayas, na iniliyo niyan si Simay na biyono iyan.

Na makambebeken piyapiya so ndatoan sii sa tangan i Solaiman.
1 MANGA DATO 3
Miyangni si Solaiman sa Ongangen
Miyakipagabanga si Solaiman ki Piraon a dato sa Misir na piyangaroma niyan so wata i

Piraon. Inowit iyan sekaniyan ko Siti o Daod taman sa da niyan mapasad mangon so
torogan iyan ago so Timplo o Allah ago so pangeleban ko melilibeta sa Yarosalim.
2 Sa masa oto na sii pen dii korban so manga taw sii ko manga aparan a kikatatago ko
manga bobongan ka kagiya da pen mabangon so timplo a kibantog ko Ingaran o Allah.
3 Pekebabayaan i Solaiman so Allah, na ipepaginetaw niyan so manga taritib o ama iyan,
ogaid na di sekaniyan pen dii korban ago petotong sa doka sii ko manga aparan roo ko
manga bobongan.
4 Miyakaisa a gawii na somiyong so dato sa Gibiyon sa kapekorban iyan roo ka giyanan i

lebi a mala i kipantag a aparan sii ko bobongan. Na sanggibo a petotongen a ipesepaat
iyan roo sangkoto a aparan.
5 Sii ko kiyagagawii niyan sii sa Gibiyon na mipeyag so Allah ki Solaiman a miyakaokit
sa taginepen, na pitero on o Tohan a "Pangniya ngka so apiya antonaa i kabaya a ka a
imbegay aken reka."
6 Tig i Solaiman a "Tanto ngka a inikalimo so oripen ka a so ama

aken a Daod sabap sa mapaparatiyaya sekaniyan reka a magiinontolan ago matito i poso.
Initaros ka on angkai a mala a limo ka bigan ka sa wata a pekaontod ko korsi iyan sangkai
a gawii.
7 “Imanto, ya Allah a Tohan ko, na miyabaloy ako ngka a dato a minisambi ko ama aken
a Daod. Ogaid na matag ako baden wata a di aken katawan o andamanaya i
kipenggolalanen aken ko sangan aken.
8 Katii ako a oripen ka sii ko manga pagtaw a piyamili i ka, a so kababantogan a manga
taw a di kebilang aya pen o ba pegitonga.
9 Sabap roo na begi ako ngka sa somasabot a poso a mikokom aken ko manga pagtaw
ngka kaan aken mapakapesenggaya so mapiya ago so marata. Ka o di, na andamanaya i
kapendatoi aken sangkai a kababantogan a manga pagtaw ngka?"
10 Miyasoat so Allah sangkai a pangni o Solaiman.

11 Sabap roo na pitero on o Tohan a "Sabap sa piyangni ngka ini a kena a ba so kalendo a
omor o di na manga kakawasaan aya pen o ba so kapatay o manga ridoay ngka ka so
sabot a mindato o ka sii ko kaontol
12 Na amponen aken so piyangni ngka. Mbegan ko seka sa maongangen ago somasabot
a poso kaan da den a ba ngka datar aya pen o ba aden a pekatalingoma a makarepang
reka.
13 Liyo ron pen na ibegay aken reka so da ngka pangniya ndatar so kakawasaan ago
pangkatan kaan sii ko kaooyagoyag ka na da den a ba reka pekatingki ko manga dato.
14 Na o komedeg ka ko manga lalan aken a petomanen ka so manga taritib ago manga
sogoan aken a datar o siyowa i Daod a ama a ka na mbegan ko seka sa malendo a omor."
15 Na giyoto a miyakanaw si Solaiman na kiyasabotan iyan a taginepen oto.
Komiyasoy sekaniyan sa Yarosalim na tomitindeg ko danga o Kaban sa Kapasadan o
Kadnan na somiyapaat sa manga korban a petotongen ago manga korban pantag bo ko
kanggiginawai. Oriyan iyan na migay sa kandori ko langon a sanasanaan iyan.
So Ongangen a Inikokom
16 Samaoto na aden a dowa ka taw a sondal a miyakaoma ko dato a tomitindeg ko

hadapan iyan.
17 Na pitero o isa kiran a "Kadnan ko, saken ago giyangkai a babay na mababaling ko
satiman a walay, na mimbawata ako isako sisii sekaniyan sa walay a ped aken.
18 Sii ko ikatelo gawii kagiya mimbawata so wata aken na mimbawata mambo angkai a
babay. Da den a ba mi ped ko walay ka sekami bo a dowa.
19 Sii ko kagagawii na miyatay so wata angkai a babay ka kiyaigaan iyan.

20 Sabap roo na mimbowat sekaniyan ko look a gawii na kinowa niyan so wata aken a
poon ko kilid aken ko katotoroga raken. Tiyago iyan ko rareb iyan na inibetad iyan so
miyatay a wata iyan sii ko rareb aken.
21 So kiyapita iyan kagiya magembowat ako a pekasoson ko so wata aken na miyatay bes
ai! Ogaid na kagiya imolengan aken ko kaliwanag o kapipita na miyailay aken a kena a
ba so wata a inimbawata aken."
22 Na tig o isa a babay a "Di! So oyagoyag na aya ko wata; so miyatay na aya ngka rek."
Ogaid na itetegel o paganay a babay a "Di! So miyatay i rek ka;
so oyagoyag i rek aken!" Na mipewala siran ko hadapan o dato.
23 Tig o dato a "Pitero o isa rekano a 'Oyagoyag so wata aken na so rek ka i miyatay,' na
tig o isa rekano peman a 'Di! So wata a ka i miyatay na so rek aken i oyagoyag.' "
24 Mandiyadi na somiyogo so dato sa mama a tig iyan a "Witi ako ngka sa pedang." Na
inowitan iyan sa pedang.
25 Na pitero o dato a "Opaka ngka so oyagoyag a wata a madowa na began ka so sabagi
on ko isa a babay na began iyo so sabagi on ko ped iyan."
26 Na so babay a aya oyagoyag so wata iyan na tanto sekaniyan a kiyagagawan ko wata

iyan, na tig iyan ko dato a "Kapedipedi ka bo, Kadnan ko, began ka rekaniyan den so
oyagoyag a wata! Di ngka mbonoa!"
Ogaid na tig o ped iyan a "Da den a ba rekta on pekakowa. Potola ngka den a
madowa!"
27 Na sarta a inibegay o dato so inikokom iyan on a tig iyan a "Began ka so oyagoyag a

wata ko miyaona a babay. Di niyo mbonoa ka sekaniyan i ina iyan."
28 Kagiya maneg o langon a taw sa Israil so inikokom on o dato na tanto siran a

miyamemesa ko dato sabap sa miyailay iran a aden a ongangen iyan a poon ko Tohan a
pekiokas iyan sa kokoman.
1 MANGA DATO 4
So manga Gobirnador i Solaiman
Dii ndatoan i Solaiman so dalem a inged a Israil.

2 Na giyai i manga olowan a sanasanaan iyan:
Si Asariyas a wata i Sadok a imam;

3 Si Ilihorip ago si Ahayas a manga wata i Sisa a manga panonorat;
Si Yahosapat a wata i Ahilod a komikibir ko manga rikord;
4 Si Binayas a wata i Yahoyada a komandir o manga sondaro;
Si Sadok ago si Abiyatar a manga imam;
5 Si Asariyas a wata i Natan a maporo o manga sanasanaan sii ko manga probinsiya;
Si Sabod a wata i Natan a imam ago mosawira o dato;
6 Si Ahisar na a komikibir ko torogan;
Si Adoniram a wata i Abda a tetandingan ko dii nggagalebek.
7 Aden a sapolo ago dowa a gobirnador i Solaiman sii ko manga probinsiya ko dalem a
Israil a aya pembegay sa pangenengken ko dato ago so pamiliya niyan. So oman i isa
kiran na pepekabegay sa pangenengken ko saolan sii ko saragon.
8 Katii so manga ngaran iran ago so manga inged a ndadatoan iran:
Si Bin Hor na sii ko kapalawan a inged sa Ipraim;

9 Si Bin Dikir na sii ko manga siti a Makas, Saalbim, Bitsimis ago giya Ilon Bithanan;
10 Si Bin Hisid na sii ko manga siti a Arobot ago Sokoh ago so dalem a inged a Hipir;
11 Si Bin Abinadab na sii ko dalem a inged a Dor (miyapangaroma niyan si Tapat a wata
i Solaiman);
12 Si Baana a wata i Ahilod na sii ko manga siti a Taanak, Migido ago so dalem a inged a
Bit San a marani sa Saritan sa pagabagatan a siti a Yasriil ago taman den sa siti a Abil
Mihola ago so siti a Yokmiyam;
13 Si Bin Gibir na sii ko siti a Ramot sa Giliyad ago so langon a manga iito a inged sa
Giliyad a rek o manga mbawataan o Yair a moriyataw o Manasih, ago so inged a Argot sii
sa Basan a rakes on so nem polo ago nem a manga ala a siti a kikokotaan a kitatanggalan
a potaw so manga pintoan on;
14 Si Abinadab a wata i Ido na sii ko inged a Mahanaim;
15 Si Ahimaas na sii ko inged a Naptali (miyapangaroma niyan si Basimat a ped ko wata
i Solaiman);
16 Si Baana a wata i Hosay na sii ko inged a Asir ago so siti a Alot;
17 Si Yahosapat a wata i Parowah na sii ko inged a Isakar;
18 Si Simey a wata i Ila na sii sa inged a Baniyamin;
19 Si Gibir a wata i Ori na sii ko inged a Giliyad a kiyandatoan
gowani i Sihon a dato o manga Amoriyo, ago si Og a dato sa Basan.
Liyo pen sangkai a sapolo ago dowa na aden a isa a gobirnador ko dalem a inged a
Yodah.
So Gawii gawii den a Pangenengken i Solaiman
20 So manga taw sa Yodah ago sa Israil na datar sa kadakel o peted sa kilid a ragat; di
siran dii kekan ago dii mamanginom na palaya siran kikapipiya a ginawa iran.
21 Dii ndatoan i Solaiman so langon a inged ipoon ko Lawasaig a Yopratis taman ko
inged o manga Pilistiyo ago taman den ko temanaan a Misir. Giyangkai a manga inged
na pepemakabowis ki Solaiman ago masasakop iyan taman ko kaooyagoyag iyan.
22 So tetalagaden a pangenengken ki Solaiman ago so manga sanasanaan iyan sa oman

gawii na sanggibo ago magatos ka gantang a arina, dowa nggibo ago dowa gatos ka
gantang a margas,
23 Sapolo timan a sapi a tatangkalen, dowa polo a sapi a tetalonen, magatos a manga
bilibili ago manga kambing a rakes o manga saladeng ago manga manok.
24 Dii ndatoan i Solaiman so langon a inged sii sa sedepan o Lawasaig a Yopratis ipoon
sa Tipsah taman sa Gasa, na lomilintad sekaniyan ago so langon a mbalabala on a inged.
25 Sii ko masa i Solaiman na so manga taw sa Yodah ago giya Israil ipoon sa Dan taman
sa Birsiba na pepaginetaw a makasasarig, a so oman i pamiliya a aden a sapadan iran a
waged a obas ago kayo a higos.
26 Aden a pat polo nggibo a pekodalan i Solaiman ko manga koda a petoyok sa karo, ago
sapolo ago dowa nggibo a manga koda.
27 So manga gobirnador ko manga probinsiya sii ko oman i sangan iran a olanolan na

ipembegay iran so manga pangenengken o Dato Solaiman ago so langon a dii kekan sii ko
lamisaan iyan. Pegiktiyaran iran o ba aden a makorang on.
28 Pegowiten mambo o oman i gobirnador ko miyatendo a darpa so sangan iyan a bantad
ago manga ragami a pekikan ko manga koda a petoyok sa karo ago so ped a manga koda.
So Ongangen i Solaiman
29 Bigan o Tohan si Solaiman sa ongangen ago tanto a mala a sabot ago madalem a
panarima a
di keteked.
30 So ongangen iyan na lebi pen a mala a di so langon a ongangen o manga mama sa
Sebangan ago mala a di so langon a ongangen sa Misir.
31 Maongangen sekaniyan a di so apiya antawaa a mama a rakes on si Itan a taw sa Isra,
maongangen a di si Himan, si Kalkol ago si Darda a manga wata i Mahol a manga mama.
Na so bantogan iyan na lomiyangkap ko langon a inged ko mbalabala.
32 Miyaantang iyan so telo nggibo a manga pananaroon ago sanggibo ago lima a bayok.
33 Penggogoden iyan so mipantag ko langon a pitibarangan a manga kayo ago manga
pamomolan ipoon sa kayo a sidro sii sa Libanon na taman ko manga iito a waged a hisop
a pegto ko manga alad. Di niyan pen dii matero so makapantag ko manga binatang,
manga papanok, manga paoledoled ago manga seda.
34 Pepamanong on so manga taw ko langon a nasiyon sa kapemakinega iran ko ongangen
i Solaiman a piyamanogo siran o langon o manga dato sa doniya a miyamakaneg
mipantag ko ongangen iyan.
1 MANGA DATO 5
So Kiyatiyagar ko Kambangona ko Timplo o Allah
Kagiya maneg i Hiram a dato sa Tiro a siyalawatan si Solaiman sa kadato a miyakasambi

ki ama iyan a Daod na somiyogo sekaniyan sa manga sanasanaan ki Solaiman sabap sa
lalayon sekaniyan dii makingginawai ki Daod gowani.
2 Na inipakawit i Solaiman angkai a lalag ki Hiram:
3 “Katawan ka a sabap ko dii kapakitidawa o ama aken a Daod ko manga ridoay niyan ko
mbalabala na di sekaniyan pekabangon sa timplo a kibantog ko Ingaran o Allah a Tohan
iyan taman sa da rekaniyan mibegay o Allah so kapakataban ko langon a ridoay niyan.
4 Ogaid na imanto na piyakalintad kami o Allah a Tohan ko ago so langon a nasiyon ko
mbalabala; da den a ba ko ridoay o di na kasiksaan.
5 Kagiya ka maoto na miyapamikir aken a mbangon ako sa timplo a kibantog ko Ingaran
o Allah a Tohan ko, ka giyoto i miyatero o Allah ko ama aken a Daod a tig iyan a 'So
wata a ka a pekaontoden aken ko korsi o ndatoan a kisambi reka na sekaniyan i mbengon
ko Timplo a kibantog ko Ingaran aken.'
6 “Sabap roo na pakipamataan ka para raken so manga kayo a sidro sa Libanon. So

manga mama ko na pagogopan iran so manga mama ngka, na tendanan ko seka ko manga
mama ngka sa apiya antonaa i peteroon ka a sokay. Katawan ka a da a ba rekami matao
mata sa manga kayo a datar o manga mama ngka roo sa Sidon."
7 Kagiya maneg i Hiram so katero i Solaiman na tanto niyan a inikasoat, na tig iyan a
"Podin so Allah imanto a gawii ka bigan iyan si Daod sa maongangen a wata a makandato
sangkai a kababantogan a nasiyon!"
8 Mandiyadi na piyakiwitan i Hiram sa katero si Solaiman a tig iyan a

"Miyatarima aken so inipakawit ka raken a lalag na ipenggolalan aken so langon a
kabaya a ka a kambegi aken reka sa manga tarakayo a sidro ago goo.
9 So manga mama ko na ipenggosod iran ai tomondagay ipoon sa Libanon na taman ko
ragat. Na pegaroren iran sii ko ragat taman ko darpa a kabaya a ka a pagowitan on. Roo
iran mapemoka a kesangan o manga mama ngka. Makapantag reka na tomana ngka so
kabaya aken a kambegi ngka ko manga pamiliya ko ko torogan aken sa pangenengken."
10 Sii sangkai a okit na ipembegay i Hiram so langon a tarakayo a sidro ago goo a kabaya
i Solaiman
11 Na ipembegay mambo i Solaiman ki Hiram so pito gatos ago pat polo nggibo ka
gantang a trigo ago pat gatos ago pat polo nggibo ka litro a da a simo iyan a lana a olibi sa
oman ragon a pekikan ko manga mama niyan.
12 Bigan o Allah si Solaiman sa ongangen a so den so initopa niyan on. Lomilintad a dii
kandolona i Hiram ago si Solaiman, na mimbaal siran sa kapasadan.
13 Piyantonan nggagalebek i Solaiman so telo polo nggibo a manga mama a poon ko

dalem a Israil.
14 Piyakasesaliob iyan siran makasong sa Libanon, a sapolo nggibo ko saolan kaan
saolan a katatago iran sa Libanon ago dowa olan sii sa walay. Si Adoniram na aya
tetandingan ko dii nggagalebek.
15 Aden a walo polo nggibo a pananapil i Solaiman sa ator sii ko manga bobongan ago
pito polo nggibo a di niyan on dii pakanggosoden
16 Ago taman den ko telo nggibo ago telo gatos a manga kapatas iran a aya pepagipat ko
galebek ago pepamando ko kigagalebek a manga mama.
17 Sabap ko sogoan o dato na pepamangowa siran a poon ko dii nggalebekan sa manga
ala a manga pipiya a piyanapilan a ator a pembaalan ko onayan o Timplo o Allah.
18 So manga panday i Solaiman ago si Hiram ago so manga mama sa Gibal na pitiyagar
iran so manga ator ago so manga tarakayo a pagosaren ko kambangona ko Timplo o
Allah.
1 MANGA DATO 6
Biyangon i Solaiman so Timplo o Allah
Sii ko ikapat gatos ago walo polo ragon ko oriyan o kiyapakaliyo o manga Israil sa inged
a Misir sii ko ikapat ragon a kiyapakandato i Solaiman sa ndatoan a Israil sii ko olaolan a
Sib a so ikadowa a olanolan na inepoonan iyan den mangon so Timplo o Allah.
2 Giyangkoto a Timplo na dowa polo ago pito ka mitros a katas iyan, siyaw ka mitros a
kabelang iyan ago sapolo ago telo ago tenga ka mitros a kaporo iyan.
3 So liyoliyowan sii ko onaan o Timplo na siyaw ka mitros a kabelang iyan a datar sa
kabelang o Timplo, na pat ago tenga ka mitros a katas iyan a minioman ko katas o
Timplo.
4 Pimbaalan pen i Solaiman sa manga sisimpit a manga dirowasa ko manga pangeleban
iyan.
5 So liyo o pangeleban sa talikodan o Timplo ago sii ko mbala on na pimbaalan iyan sa
telo ka andana a pirowarowangan a midedeket ko pangeleban.
6 So kababaan a andana na pito ago tenga ka piya a kabelang iyan, so ikadowa ka andana
na siyaw ka piya a kabelang iyan na so ikatelo ka andana na sapolo ago tenga ka piya a
kabelang iyan. Sii ko liyo o Timplo na pimbaalan iyan sa manga kepasigan o manga
dolog sii ko pangeleban kaan di kigaang ko pangeleban.
7 Sii ko kapembangona ko Timplo na aya bo a pekeosar on na manga ator a

kiyapanapilan den sii ko kowari kaan da den a ba on keneg a bakbak, panasang o di na
ped a kasangkapan a potaw sii ko di ron dii kambalaya.
8 So gimowa o kababaan a andana ko Timplo na sii tampar sa pagabagatan a aden a

towak on a ipepanik ko ikadowa andana, na lagid oto mambo ko ikatelo.
9 Na miyapasad i Solaiman so kiyambalaya niyan ko Timplo. Inalkobaan iyan a aya
manga dolog iyan ago manga papan na sidro.
10 So telo ka andana a pimbaalan iyan a midedeket ko pangeleban o Timplo sa liyo na
pito ago tenga ka piya a kaporo o oman i isa ka andana. Na midedeket ai ko pangeleban o
manga dolog a kayo a sidro.
11 Na miyakatalingoma so katero o Allah ki Solaiman a tig iyan a:

12 “Makapantag sangkai a Timplo a pembangonen ka na o petomana ngka so manga
taritib aken ago di ngka dii nggolalan so manga kokoman aken ago peparatiyayaan ka so
langon a sogoan aken na itoman aken reka so initopa ko ko ama a ka a Daod.
13 Ka keden ako sii ko manga Israil ago di aken den telikodan so manga pagtaw aken a
Israil."
14 Na biyangon i Solaiman so Timplo na inimasad iyan.
So Soled o Timplo
15 Liyapisan iyan so manga keleb iyan sa soled sa manga papan a sidro ipoon ko salasa
na taman sa alkoba, na siyalasaan iyan so Timplo sa manga papan a goo.
16 Siyaw ka mitros ipoon ko talikodan o Timplo na pimbaalan iyan sa pagelet a manga
papan a sidro ipoon ko salasa taman ko alkoba. Giyangkai a rowang sii sa tampar sa
talikodan na aya Lebi a Soti a Darpa.
17 So rowang sii ko onaan angkai a rowang na sapolo ago walo ka mitros a katas iyan.
18 So manga papan a kayo a sidro ko soled o Timplo na piyamangokiran sa inisayan sa
manga babasal ago kikabebekar a obarobar. So langon a manga keleb roo sa soled na
palaya den kilalapisan sa kayo a sidro a da den a ba on keilay a ator.
19 Pitiyagar i Solaiman so Lebi a Soti a Darpa sii ko soled o Timplo a ron tegoa so Kaban
sa Kapasadan o Allah.
20 So soled o Lebi a Soti a Darpa na siyaw ka mitros a katas iyan ago siyaw mambo ka
mitros a kaolad iyan ago siyaw ka mitros a kaporo iyan. Na liyapisan iyan langon so
soled iyan sa lombos a bolawan. Liyapisan iyan mambo sa bolawan so aparan a kayo a
sidro.
21 Liyapisan i Solaiman sa bolawan so soled o Timplo, na piyamalawagan iyan sa manga
rantay a bolawan so gimowa o Lebi a Soti a Darpa a lalapisan ai mambo sa bolawan.
22 Miyapasad iyan so kiyalapisi niyan ko langon o soled o Timplo a rakes on so aparan
a matatago ko obay o Lebi a Soti a Darpa.
23 Sii ko soled o Lebi a Soti a Darpa na pimbaalan iyan sa dowa timan a piyagtaotaw a
malaikat a kayo a olibi a so oman i isa on na pat ago tenga ka mitros a kaporo iyan.
24-26 So oman i papak o dowa a malaikat na kalalawanan so dowa ka mitros a katas iyan,
a pat ago tenga ka mitros ipoon ko poro o isa a papak taman ko sabala a poro o papak. So
dowa a malaikat na ndatar sa kala ago paras.
27 Tiyago i Solaiman so manga malaikat sii ko soled o Lebi a Soti a Darpa ko Timplo a
kikakayat so manga papak iran. So sabala a papak o isa ko malaikat na romaraot ko
sabala a keleb na so peman so papak o isa a malaikat na romaraot ko isa a keleb, na so
sabala a poro ko oman i isa ko papak iran na makasesekoay sii ko look o rowang.
28 Na liyapisan iyan mambo so manga malaikat sa bolawan.
29 So langon o manga keleb ko soled o Timplo a ndatar den so Lebi a Soti a Darpa ago so
Soti a Darpa na piyamangokiran iyan sa inisayan sa manga malaikat, manga kayo a korma
ago kikabebekar a obarobar.
30 Liyapisan iyan pen sa bolawan so manga salasa angkoto a dowa a rowang.
31 So gimowa o Lebi a Soti a Darpa na pimbaalan iyan sa pintoan a kayo a olibi a dowa i
keleb a so kaolad angkoto a dowa a keleb na ikalima bagi ko kaolad o keleb o rowang.
32 Giyangkai a pintoan na inokiran sa inisayan sa manga malaikat, manga kayo a korma
ago kikabebekar a obarobar, na liyapisan ai langon sa bolawan.
33 So pen so gimowa o kalaan ko Timplo na pimbaalan iyan sa pat i rogo a manga tokod
a kayo a olibi para ko gimowa iyan.
34 Na pimbaalan iyan ai sa dowa a pintoan a so oman i isa on na dowa silang a dii
makakekepa.
35 Inokiran iyan ai sa inisayan sa manga malaikat, manga kayo a korma ago kikabebekar
a obarobar na liyapisan iyan sa bolawan.
36 So lamalama ko onaan o Timplo na piyangeleban sa tetelo gontor a piyanapilan a

manga ator a oman i telo gontor na giyontoran sa dolog a kayo a sidro.
37 So onayan o Timplo o Allah na minibetad sii ko ikapat ragon sii ko olanolan a Sib.
38 Na sii ko ikasapolo ragon ago isa sii ko olanolan a Bol a so ikawalo a olanaolan na
miyapasad so Timplo a miyanggolaola so langon a galebek on a mipepasod ko kaantanga
on. Miyakapito ragon a kiyabangona on i Solaiman.
1 MANGA DATO 7
Biyangon i Solaiman so Torogan iyan
Biyangon mambo i Solaiman so torogan iyan na miyakasapolo ago telo ragon a
kiyapasada niyan on.
2 Mimbaal sekaniyan on sa rowang a bebetowan sa 'Rowang sa Kalasan sa Libanon' a pat
polo ago nem ka mitros a katas iyan ago dowa polo ago telo ka mitros a kaolad iyan ago
sapolo ago telo ago tenga ka mitros a kaporo iyan. Piyolaosan iyan sa telo koyog a manga
polaos a kayo a sidro a itotokod ko manga dolog a kayo a sidro.
3 Inatepan ai sa kayo a sidro ko liyawaw o manga dolog a tomatana ko poro o manga
polaos, a pat polo ago lima timan a manga dolog a sapolo ago lima ko oman i sakoyog
on.
4 So oman i sabala a keleb iyan na aden a telo koyog a manga rowasan on a
makasesangora.
5 So langon a pintoan on na pat pasagi a makapepantag so oman i telo ron.
6 Pimbaalan iyan pen sa rowang a bebetowan sa 'Rowang o manga Polaos' a dowa polo
ago telo ka mitros a katas iyan ago sapolo ago telo ago tenga ka mitros a kabelang iyan.
Sii ko panempang iyan na aden a liyoliyowan on a aden a manga polaos on a itotokod ko
atep iyan.
7 Pimbaalan iyan so torogan sa darpa a katatagoan ko korsi iyan a bebetowan sa 'Rowang

a Pengokoman' a ron sekaniyan pepangokom, na liyapisan iyan ai sa kayo a sidro ipoon
ko salasa iyan taman ko alkoba niyan.
8 So manga rowang a kedenan i Solaiman na matatago sii sa talikodan o Rowang a

Pengokoman a so kiyambaali ron na datar o manga ped iyan. Na inimbaal iyan pen so
karoma niyan a so wata a babay o Radiya Piraon sa datar oto a torogan.
9 Langon angkai a manga walay a rakes on so mala a lamalama na pimbaalan a manga

pipiya a manga ator ipoon ko onayan iyan taman ko atep iyan. Giyangkai a manga ator na
miyatiyagar ko kowari a piyanapilan ago tiyanor a gabas ko oman i pat a rogo niyan.
10 So kaoonayan on langon na manga ala ago manga pipiya a ator a so ped na pat ago
tenga ka mitros a katas iyan a so manga ped na tetelo ago tenga ka mitros.
11 So manga pipiya a ator a pimbaalan a manga pangeleban na pipendayan, na miyaosar
on mambo a manga tokod a kayo a sidro.
12 So mala a lamalama o torogan na piyangeleban sa tetelo gontor a piyanapilan a manga
ator a oman i telo gontor na giyontoran sa dolog a kayo a sidro a datar mambo o manga
pangeleban o lamalama o Timplo o Allah ago so liyoliyowan iyan.
So manga Galebek i Horam
13 Piyakisogoan i Solaiman si Horam roo sa siti a Tiro.

14 Wata sekaniyan o balo a babay a ped ko mbatabataa Naptali na so ama iyan na taga
Tiro a panday sekaniyan sa tombaga. Tanto a mapasang si Horam a tadiyam ko langon a
pitibarangan a kapenday sa tombaga. Miyakaoma sekaniyan ki Solaiman na pinggalebek
iyan so langon a galebek a piyakisangan on.
So Dowa Timan a Tombaga a Polaos

15 Tomiyowang sekaniyan sa dowa timan a polaos a tombaga a so oman i isa on na walo
ka mitros a katas iyan a aya takes o kalililin iyan na lima ago tenga ka mitros.
16 Mimbaal sekaniyan pen sa dowa timan a ipopondiyong ko polaos a tiyowang a
tombaga a imbatog ko poro o manga polaos a so oman i ipopondiyong on na manga dowa
ago tenga ka mitros a kaporo iyan.
17 Oman i ipopondiyong on na piyagartaan sa pito timan a inisayan sa siyobid a manga
rantay.
18 Mimbaal sekaniyan pen sa dowa koyog a inisayan sa manga granada a ililibet ko
siyobid a manga rantay a inipagarta ko ipopondiyong ko poro o oman i polaos.
19 So manga ipopondiyong ko poro o manga polaos ko soled o liyoliyowan na inisayan sa
obarobar a kayopo a manga dowa ka mitros a kaporo iyan.
20 Sii ko ipopondiyong ko oman i polaos sii sa tampar sa poro o katitiboron iyan ago sii
ko obay o siyobid a manga rantay na ndodon so inisayan sa dowa gatos a granada a
piyakakoyog sii ko melilibeta on.
21 Piyakatindeg i Horam so manga polaos ko danga o gimowa o Timplo. So polaos a
tampar sa pagabagatan na bitowan iyan sa Yakin, na so tampar sa pagotaraan na bitowan
iyan sa Bowas.
22 So manga ipopondiyong ko poro o manga polaos na mbobontal sa obarobar a kayopo.
Na miyapasad so kiyambaali ko manga polaos.
So Tangela a Pepangonaban
23 Mimbaal si Horam sa maolad a matiboron a tangela sa ig a pepangonaban a tiyonaw a

tombaga a pat ago tenga ka mitros a kaolad iyan ago manga dowa ago tenga ka mitros a
kaporo iyan. Na aya takes o kalililin iyan na sapolo ago telo ago tenga ka mitros.
24 Sii ko kababaan o bibir iyan na piyagartaan so tangela sa dowa koyog a inisayan sa
manga babasal a ililibet on a so oman i tenga ka mitros na sapolo a babasal on. Na
tiyowang ai a maoonay ko tangela.
25 Giyangkai a tangela na inibatog ko likod o sapolo ago dowa a manga mama a sapi a
tombaga, a so telo ron na somasangor sa pagotaraan, so telo ron na sii sa sebangan, so
telo ron peman na sii somasangor sa pagabagatan ago so telo ron pen na sii sa sedepan.
26 Manga telo ka porgada a kakapal o tangela, na so bibir iyan na lagid o ngari o tagayan
a inisayan sa obarobar a kayopo. Ketagoan ai sa pat polo ago pat nggibo ka litro a ig.
So Mapepegalinalin a manga Batoga
27 Mimbaal pen si Horam sa sapolo a mapepegalinalin a manga batoga a tombaga a so

oman i isa on na nem ka piya a katas iyan, nem ka piya a kabelang iyan ago pat ago tenga
kapiya a kaporo iyan.
28 Giyai i kiyambaali ko batoga: So manga keleb iyan na midedeket ko matatadeng a
manga tokod ko oman i rogo niyan.
29 Sii ko manga keleb iyan ago sii pen ko manga tokod na piyagartaan sa manga toladan
a manga arimaw, manga sapi ago manga malaikat. Na sii sa poro ago sa baba o manga
toladan a arimaw ago manga sapi na piyagartaan sa inisayan sa manga titiboron.
30 So oman i batoga na aden a pat on timan a tirikan a tombaga ago tombaga a manga
pansara. Sii ko pat a rogo niyan na aden a manga tombaga a pembatogan ko palanggana,
na piyagartaan so manga pembatogan sa manga titiboron ko oman i rogo niyan.
31 Sii ko poro o batoga na aden a matitiboron on a pembatogan ko palanggana. Aya
kaporo iyan na isa ago tenga ka piya, na aya kaolad iyan na kalalawanan so dowa ka piya.
Na inokiran ai langon ko melilibeta on.
32 So pat timan a manga tirikan o batoga na sii ko didalem o manga keleb on a so manga
pansar o tirikan na maoonay ko batoga. Aya kaolad o oman i isa a tirikan na dowa polo
ago lima ka porgada.
33 Pimbaalan ai a lagid o tirikan a karo. So pansar iyan, so manga toker iyan, so liyo o
totokeran on ago so look iyan na palaya den tiyowang a tombaga.
34 So oman i batoga na aden a pat timan a kapeta iyan a nggagaisa ko oman i rogo niyan
a kipakadodogar ko batoga ago maoonay ron.
35 Sii ko liyawaw o batoga na piyamalagenan so bibir iyan sa siyaw ka porgada a kaolad
iyan. So manga tokod ago manga keleb iyan na makapagoonaya ko poro o batoga.
36 So manga tokod ago manga keleb na piyagartaan sa manga toladan a manga malaikat,
manga arimaw ago manga kayo a korma sii ko oman i kepakay a keokiran on, na aden
mambo a manga inisayan sa titiboron ko melilibeta on.
37 Giyoto i kiyambaali ko sapolo a manga batoga. Langon ai na sasatiman a tiyowangan
on, na ndatadatar sa kala ago paras.
38 Mimbaal pen si Horam sa sapolo a tombaga a palanggana a oman i isa on na tiyago ko

oman i batoga. Oman i isa on na nem ka piya a kaolad iyan, na walo gatos ago walo polo
ka litro a peketago on.
39 Tiyago iyan so lima ko batoga sii sa tampar sa pagabagatan o Timplo, ago so lima on
na sii tampar sa pagotaraan. Na sii niyan inibetad so maolad a tangela sa tampar sa
pagabagatan sa sedepan a marorogo o Timplo.
So Langon a Ipamemetad ko Timplo
40 Mimbaal pen si Horam sa manga koden, manga sakerad ago manga ladiya. Na
miyapasad iyan so langon a galebek a piyakisangan on o Dato Solaiman para ko Timplo o
Allah.
41 So dowa timan a polaos;

so dowa timan a ipopondiyong a mbobontal sa ladiya a imbatog ko poro o manga polaos;
so dowa timan a inisayan sa manga siyobid a manga rantay a inipagarta ko dowa a
ipopondiyong ko manga polaos;
42 So pat gatos a tombaga a inisayan sa granada a bibitinen ko dowa a siyobid a manga
rantay (dowa koyog a granada a ililibet ko oman i siyobid a manga rantay a inipagarta ko
manga ipopondiyong ko manga polaos)
43 So sapolo a mapepegalinalin a manga batoga ago so sapolo a manga palanggana a
ipematog on.
44 So maolad a tangela sa ig ago so sapolo ago dowa a inisayan sa manga mama a sapi a
pembatogan on.
45 Ago so manga koden, manga sakerad ago so manga ladiya.
So langon angkai a pimbaalan i Hiram para ko Dato Solaiman a pegosaren ko Timplo o

Allah na palaya den piyakatenang a tombaga.
46 Piyakitowang ai o dato sii ko pelimbagan a lipaw sii ko kapantaran sa Yordan sa
pageletan a Sokot ago giya Saritan.
47 Da den ai timbanga i Solaiman sabap sa tanto a madakel; so timbang o tombaga na da
den matendo.
48 Piyakimbaalan pen i Solaiman so bolawan a manga kasangkapan a tegoon ko Timplo

o Allah:
so bolawan a aparan;
so bolawan a lamisaan a ron petegoa so paan a ipesepaat ko Allah;
49 So sapolo a petegoan sa solo a lombos a bolawan (so lima on na sii sa kawanan ago
lima sii sa diwang sii ko panempang o Lebi a Soti a Darpa);
so inisayan sa manga obarobar,
so manga palitaan ago manga sipit a palaya den bolawan;
50 So lombos a bolawan a manga sakedo, manga ipetenor sa sombowan, manga ladiya,
manga kaloda, manga tangela sa waga a apoy a palaya den lombos a bolawan;
ago so manga gikos o manga pintoan o Lebi a Soti a Darpa ago so manga pintoan a
ipesoled ko kalaan ko Timplo.
51 Kagiya mapasad nggalebek i Solaiman so langon o manga galebek ko Timplo o Allah

na inisoled iyan on so langon a ipamemetad a inisenggay a soti o ama iyan a Daod, a so
pirak, so bolawan ago so manga pagigimo, na tiyago iyan ai ko petegoan sa tamok sii ko
Timplo o Allah.
1 MANGA DATO 8
So Kaban sa Kapasadan na Inowit ko Timplo o Allah
Oriyan iyan na piyakisogoan o Dato Solaiman so langon a pelokelokesen sa Israil a

domarpa rekaniyan a rakes o langon a olowan ko mbatabataa ago so manga nakoda ko
oman i pamiliya a Israil, na inisogo iyan kiran a pagawidan iran so Kaban sa Kapasadan o
Allah a poon sa Siyon a Siti o Daod.
2 Miyalimod so langon o manga mama sa Israil ko Dato Solaiman sii ko gawii a kapista
sii ko olanolan a Itanim a so ikapito a olanolan.
3 Kagiya makaoma so langon a pelokelokesen sa Israil na kinowa o manga imam so

Kaban o Allah
4 Na inawidan iran ko Timplo o Allah. So manga imam ago so manga Libitiyo na
inawidan iran on mambo so Barombarong a dii Telabokan ago so langon a soti a
kasangkapan on.
5 Na so Dato Solaiman ago so langon o manga Israil a maaped iyan na miyalimod siran
ko hadapan o Kaban na mikorban siran sa tanto a madakel a bilibili ago manga sapi a di
den kisorat o di na keitong.
6 Oriyan iyan na inisoled o manga imam so Kaban sa Kapasadan o Allah sii ko darpa iyan
sa soled o Timplo sii ko Lebi a Soti a Darpa, na sii ran inibetad ko atag o manga papak o
dowa timan a piyagtaotaw a manga malaikat.
7 Kikakayat so manga papak o manga malaikat sii ko darpa a katatagoan ko Kaban na
kasasayapan iran so Kaban ago so manga tibal iyan.
8 Giyangkai a manga tibal iyan na matas, ka so manga poro iran na pekeilay sii ko Soti a
Darpa a matatago ko onaan o Lebi a Soti a Darpa, ogaid na kena a ba pekeilay sii sa liyo o
Soti a Darpa, na taman den imanto na ndodoo den.
9 Da den a ba matatago ko soled o Kaban a rowar ko dowa timan a mapapapan a ator a
tiyago on o Mosa sii sa Palaw a Sinay a ron mimbaal so Allah sa kapasadan mipantag ko
manga Israil kagiya makaliyo siran sa Misir.
10 Kagiya lomiyo so manga imam ko Soti a Darpa na minipeno so gabon ko Timplo o

Allah.
11 Na di mipenggolalan o manga imam so galebek iran on sabap ko gabon, ka so
bantogan o Allah na minipeno ko Timplo niyan.
12 Na giyoto a pitero i Solaiman a "Miyatero den o Allah a sii sekaniyan keden ko

maitem a gabon,
13 Na imanto, ya Allah, na matamataan a inimbaal aken seka sa mapiya i paras a Timplo
a so darpa a kedenan ka sa taman sa pakataman."
14 Sii ko katitindeg roo pen o langon a miyalimod a Israil na siyangoran siran o dato na
riyakmatan iyan siran.
15 Tig iyan a
"Podin so Allah a Tohan o Israil, ka nggolalan ko kapaar iyan na minitoman iyan

so initopa niyan ko ama aken a Daod. Ka tig iyan on a
16'Ipoon ko gawii a kiyapakaliyowa ko ko manga pagtaw aken a manga Israil sii sa
Misir na da ako den pamili sa siti sii ko apiya anda ko manga mbatabataa a Israil a
ron mabangon so Timplo a pesimbaan raken, ogaid na pinili aken seka, Daod, a
makandato ko manga pagtaw aken a Israil.'
17 “Miyapamola ko poso o ama aken a Daod sa kambangon iyan sa timplo a

kibantog ko Ingaran o Allah a Tohan o Israil.
18 Ogaid na pitero on o Allah a 'Sabap sa miyapamola ko poso o ka a kambangon ka
sa timplo a kibantog ko Ingaran aken na miyakanggolaola ka sa mapiya sa
kiyapamikira ngka on.
19 Ogaid na kena a ba seka i mbangon ko Timplo, ka so wata a ka a mama a rogo o
ka ago sapo o ka i pekabangon ko Timplo a kibantog ko Ingaran aken.'
20 “Na initoman den imanto o Allah so minitopa niyan: miyakasambi ako den ko
ama aken a Daod na moontod ako imanto ko korsi o Israil a so den so initopa o
Allah, na miyabangon aken so Timplo a pekibantog ko Ingaran o Allah a Tohan o
Israil.
21 Singgayan aken roo sa darpa o Kaban a ron matatago so kapasadan a pimbaalan o
Allah mipantag ko manga apo tano isako pakaliyon iyan siran sa Misir."
So Pangangarapan i Solaiman ko Kinisenggain iyan a Soti ko Timplo
22 Mandiyadi na tominindeg si Solaiman ko danga o aparan o Allah ko hadapan o

miyalimod a manga Israil na inibayaw niyan a lima niyan sii sa langit
23 Na pitero iyan a
"Ya Allah a Tohan o Israil, da den a ba ngka datar a tohan sii sa langit sa poro o di
na sii sa doniya sa kababaan, a lalayon ka dii inggolalan so kapasadan ka a pepakiilay
ngka so gagaw ngka ko manga oripen ka a mapaparatiyaya reka sa iklas ko manga
poso iran.
24 Initoman ka so initopa ngka sii ko oripen ka a Daod a ama aken; so initopa o ngari
i ka na initoman den o manga lima ngka a datar imanto a gawii.
25 “Imanto, ya Allah a Tohan o Israil, na tomanen ka sabap ko ama aken so minitopa

ngka on isako teroon ka a 'Lalayon aden a moriyataw ngka a pekaontod ko hadapan
aken sii ko korsi o Israil asar a pepiyapiyaan iran so olaola iran ko kapepaginetaw
iran ko hadapan aken a datar o siyowa a ka.'
26 Imanto, hey Tohan o Israil, na tomanen ka so katero o ka a initopa ngka ko oripen
ka a Daod a ama aken.
27 “Ogaid na ba mataan a keden so Tohan sii sa doniya? So manga langit apiya so

pipeporoan ko langit na di ka on kemin aya pen angkai a Timplo a biyangon aken!
28 Ogaid na pakinega ngka so kapepangangarapan aken a oripen ka ago so
kapepangangampedian aken, ya Allah a Tohan ko, na ampona ngka so pepangnin ko
reka sii sangkai a gawii.
29 Pengnin ko a pagipaten ka angkai a Timplo sa gagawii daondaw, a giyangkai a
darpa a pitero o ka a 'So Ingaran aken na ketago roo.' Pakinega ko ngka igira a
pesengor ako sangkai a Timplo a pepangangarapan.
30 Ampona ngka so manga pangni aken a oripen ka ago so manga pagtaw ngka a
Israil igira a pepangangarapan kami a somasangor sangkai a darpa; pakinega ngka
san sa kasorgaan a so kakadenan ka, na amay ka maneg ka na rila ka.
31 “Amay ka makasela so taw ko siringan iyan na go piyaliyogatan a makapesepa na

amay ka makaoma a pesepa sii ko hadapan o aparan ka sii sangkai a Timplo
32 Na pakinega ngka so sapa iyan san sa kasorgaan na go ngka siran kokoma a
manga oripen ka. Salaa ngka so miyakasela na sii ngka tanaan ko olo niyan so
pinggolaola niyan. Payaga ngka a miyakabenar so da a sala iyan na go ngka
pemataani so kada a peleng iyan on.
33 “Igira a tiyaban o manga ridoay iran so manga pagtaw ngka a Israil sabap sa
miyakandosa siran reka na amay ka mananangoran siran reka peroman ago petetaobat
sii ko Ingaran ka a pepangangarapan ago pepangangampedian reka sii sangkai a
Timplo
34 Na pakinega ngka san sa kasorgaan na rilaan ka so dosa o manga pagtaw ngka a
Israil na pakakasoya ngka siran ko inged a inibegay ngka ko manga apo iran.
35 “Igira a pangalelekeban so manga langit a da a oran sabap ko kiyapakandosa reka

o manga pagtaw ngka na amay ka mangangarapan siran a somasangor sangkai a
darpa ago teobat siran sii ko Ingaran ka ago talikodan iran so dosa iran sabap ko
kiyasiksaa ngka kiran
36 Na pakinega ngka san sa kasorgaan na rilaan ka so dosa o manga oripen ka a
manga pagtaw ngka a Israil. Pangendaon ka kiran so ontol a ipeginetaw iran na
pakiorani ngka so inged a inibegay ngka a kawali iran.
37 “Igira a miyakatalingoma so taon o di na kasiksaan ko inged, o di na manga

paniyakit, manga merat o di na manga tarapan, o di na kalikopan siran o manga
ridoay iran a gomiyobat ko apiya anda ko manga siti ran, a apiya antonaa a morala o
di na paniyakit a miyakatalingoma
38 Na amay ka mangangarapan o di na mangangampediyan so apiya antawaa ko
manga pagtaw ngka a Israil a tiyarima iyan so karomasayan o poso iyan ago
papaladen iyan a manga lima niyan a maantap sangkai a Timplo
39 Na pakinega ngka san sa kasorgaan a kakadenan ka. Rilai ngka sekaniyan ago
kokoma ngka. Kidian ka ko oman i taw so patot ko langon a miyanggolaola niyan
sabap ko katawi ngka ko mapeniniyat iyan (ka seka bo i matao ko poso o langon o
manosiya)
40 Kaan ka iran mikalek ko kaooyagoyag iran sii ko inged a inibegay ngka ko manga
apo ami.
41 “So peman so rait a kena a ba ped ko manga pagtaw ngka a Israil ka miyakapoon
sa mawatan a inged sa kasimbaa niyan reka
42(ka keneg o manga taw so kababantogan a Ingaran ka ago so kapaar ka ago so
mala i gees a barokan ka) na amay ka makaoma ago mangangarapan sekaniyan a
somasangor sangkai a Timplo
43 Na pakinega ngka san sa kasorgaan a kakadenan ka na nggolaolaa ngka ko rait so
apiya antonaa i piyangni niyan reka kaan katokawi o langon a taw sa doniya so
Ingaran ka ago ikelek ka iran a datar o siyowa o manga pagtaw ngka a Israil, ago
katokawan iran a giyangkai a Timplo a biyangon aken na aya darpa a pesimbaan
reka.
44 “Igira a dii makitidawa so manga pagtaw ngka ko manga ridoay iran apiya anda
ngka siran pakasonga na igira a pepangangarapan siran reka, ya Allah, a sii siran
somasangor sangkai a siti a inaraw ngka ago so Timplo a biyangon aken a pesimbaan
reka
45 Na pakinega ngka san sa kasorgaan so kapepangangarapan ago
kapepangangampedian iran na pamayandegen ka so kabenar iran.
46 “Igira a miyakandosa siran reka (ka da den a ba kena a dii makapendosa) a

kiyararangitan ka siran ago piyalad ka siran ko ridoay iran a tomiyaog kiran sii ko
inged iyan apiya anda ko mawatan o di na marani
47 Na pakinega ngka so kapepangangarapan o manga pagtaw ngka. O alina iran so
poso iran sii ko inged a initaog siran on na go miteobat ago miyangangampedian reka
sii ko inged o tomiyaban kiran a tig iran a 'Miyadosa kami; miyakanggolaola kami sa
marata,' na pakinega ngka siran, ya Allah.
48 O pananangoran siran reka peroman sa iklas ko poso ago niyawa iran sii ko inged
o manga ridoay ran a tomiyaog kiran na o mangangarapan siran a sii somasangor ko
inged a inibegay ngka ko manga apo iran ago sii ko siti a inaraw ngka ago so Timplo
a biyangon aken a pesimbaan reka
49 Na pakinega ngka so kapepamangni ran ago kapepangangampedian san sa
kasorgaan a kakadenan ka na pamayandegen ka so kabenar iran.
50 Rilai ngka so manga pagtaw ngka a miyakandosa reka na rilaan ka so langon a
sala iran a minisopak reka na pakikapediin ka siran ko tomiyaban kiran,
51 Ka manga pagtaw ngka siran ago manga kawali a piyakaliyo ngka sa Misir a
giyangkoto a rapog a pekatonag sa potaw.
52 “Pangnin ta a mailay ngka so kapangangampedian o manga pagtaw ngka a Israil

ago so dato iran ago mapakineg ka siran igira a penggoraok siran reka!
53 Ka inaraw ngka siran ko langon o manga nasiyion ko doniya a mabaloy a kawali
ngka a so den so miyatero o ka, ya Allah a Lebi a Mamaapaar, a nggolalan ko oripen
ka a si Mosa isako mapakaliyo ngka so manga apo ami sa Misir."
54 Kagiya makapasad mangangarapan ago mangangampedian si Solaiman sii langon na

gomiyanat sekaniyan sii ko hadapan o aparan o Allah a ron den romoroko a ibabayaw a
manga lima niyan a maantap sa kasorgaan.
55 Tominindeg sekaniyan ago riyakmatan iyan so langon a isa ka maginged a Israil, na
piyakatanog iyan so sowara niyan a tig iyan a
56 “Podin so Allah a piyakalintad iyan so manga pagtaw niyan a Israil a so den so

initopa niyan. Da den a satiman bo a ba da mitoman ko langon a manga pipiya a
initopa niyan a miyakanggolalan ko oripen iyan a si Mosa.
57 Pangnin ta a malalayon rektano so Allah a Tohan tano a datar o kiyalalayon iyan
ko manga apo tano; pangnin ta a di tano niyan belagen aya pen o ba tano niyan
talikodi.
58 Pangnin ta a pakasangoren iyan so manga poso tano sii rekaniyan kaan tano
makedeg so langon o manga lalan iyan ago matoman tano so manga sogoan, manga
taritib ago manga kokoman a inibegay niyan ko manga apo tano.
59 Na pangnin ta a giyangkai a manga katero aken a inipangangarapan aken sii ko
hadapan o Allah na misampay ko Allah a Tohan tano sa gagawii daondaw. Pangnin
ta a lalayon iyan ipekelimo so manga pagtaw niyan a Israil ago so dato iran a
mipepasod ko di iran dii kanggonaan oman gawii
60 Kaan so langon a taw sa doniya na katokawan iran a so Allah na aya Tohan a da
den a rimbang iyan.
61 Ogaid na paliyogat a a magiiklas sa tarotop so manga poso iyo sii ko Allah a
Tohan tano kaan iyo mipaginetaw so manga taritib iyan ago matoman iyo so manga
sogoan iyan a datar o di niyo dii nggolaolaan imanto."
So Kinisenggain a Soti ko Timplo o Allah
62 Oriyan iyan na so dato ago so langon o manga Israil a ped iyan na pikorbanan iran so
Allah.
63 Somiyapaat si Solaiman sa manga korban pantag bo ko kanggiginawai a dowa polo
ago dowa nggibo a manga sapi ago magatos ago dowa polo nggibo a bilibili ago manga
kambing. Na so dato ago so langon o manga Israil na inisenggay iran a soti so Timplo o
Allah.
64 Sii bo sangkoto a gawii na siyoti o dato so look o lamalama sii ko onaan o Timplo o
Allah, na somiyapaat sekaniyan roo sa manga korban a petotongen ago so manga sapaat a
pangenengken ago so sibo o manga ayam a piyangorban pantag bo ko kanggiginawai, ka
maito so tombaga a aparan o Allah a di on kemin so langon angkai a ipesepaat.
65 Na piselasela i Solaiman so kapista sangkoto a masa ago so langon o manga Israil a

ped iyan, a tanto a madakel a miyalimod a manga taw a so den so manga taw a poon sa
Libo Hamat sii sa pagotaraan na taman den sa temanaan a Misir sii sa pagabagatan.
Pipistaan iran sii ko hadapan o Allah a Tohan iran sii ko soled o miyakapito gawii ago
pito pen gawii a piyakatarosan on, sapolo ago pat gawii langon.
66 Sii ko miyakatalondog a gawii na piyamakabaling den i Solaiman so manga taw.
Riyakmatan iyan siran na mimbabaling siran den a pepanga bababaya ago kikapipiya a
ginawa iran sabap ko langon a miyanggolaola o Allah a kamapiyaan o oripen iyan a Daod
ago so manga pagtaw niyan a Israil.
1 MANGA DATO 9
Mipeyag so Allah ki Solaiman
Kagiya mapasad i Solaiman so kiyambalaya niyan ko Timplo o Allah ago so torogan o

dato ago miyatoman iyan so langon a miyasingayo iyan a sowaan iyan
2 Na mipeyag rekaniyan so Allah sa ikadowa a datar o kiyapeyag iyan on sii sa Gibiyon.
3 Na pitero rekaniyan o Allah a
"Miyaneg aken so kiyapangangarapan ago so kiyapangangampedian ka ko hadapan

aken. Inisenggay aken a soti angkai a Timplo a biyangon ka a aya raken pesimbaan
sa taman sa pakataman. Na kelalayon on so manga mata ko ago so poso aken.
4 “So seka on peman na o pepaginetaw ka ko hadapan ko a maiisaisa so poso o ka a
magiinontolan ka a datar o siyowa o ama a ka a Daod ago di ngka dii nggolalan so
langon a ipesogo aken ago petomanen ka so manga taritib ago manga kitab aken
5 Na pakapembekenen ko so di ngka dii kandato sii sa Israil sa taman sa pakataman a
so den so initopa ko ki Daod a ama a ka isako teroon ko ron a 'Lalayon aden a isa ko
moriyataw ngka a dii ndato sii ko korsi sa Israil.'
6 “Ogaid na o talikodi ako ngka o di na so manga moriyataw ngka ago di niyo

tomanen so manga sogoan aken ago manga taritib a inibegay aken rekano ka sii kano
baden pepangongonotan ko ped a manga katohanan sa kasimbaa niyo ron
7 Na pekaawaan aken so manga Israil ko lopa a inibegay aken kiran ago pagawaan ko
angkai a Timplo a inisenggay aken a soti a pekibantog ko Ingaran aken. Samaoto na
so manga Israil na pembaloy a pananaroon ago mapegongatonga o langon o manga
taw.
8 Na giyangkai a Timplo na kebaloy a batiyong a miyanga bibinasa, na so langon a
pepekasagad on na pekebengang a dii mananagetek a peteroon iran a 'Ino ai
penggolaolaa o Allah sangkai a inged ago giyangkai a Timplo?'
9 Na sembag so manga taw a tig iran a 'Sabap sa tiyalikodan iran so Allah a Tohan
iran a miyakaliyo ko manga apo iran sii sa Misir ka aya iran kiyababayaan so ped a
manga katohanan a pepangongonotanan ago pepamanimbaan iran; giyanan i sabap a
initana kiran o Allah angkai langon a morala.' "
So Kapasadan i Solaiman ago si Hiram
10 Kagiya maipos so miyakadowa polo ragon na miyapasad den mangon i Solaiman

angkai a dowa a walay, a so Timplo o Allah ago so torogan o dato.
11 Si Hiram a dato sa Tiro na miyapakiwit iyan on so langon a tarakayo a sidro ago kayo
a goo ago bolawan a kebayaan i Solaiman sangkai a galebek. Na kagiya mapasad den na
bigan o dato Solaiman si Hiram sa dowa polo a manga siti sii sa Galili.
12 Gomiyanat si Hiram sa Tiro ka pagilain iyan angkai a manga siti, ogaid na da
sekaniyan on masoat.
13 Na tig iyan a "Antona ini a manga siti a inibegay ngka raken, pagari ko!? na bitowan
iyan siran sa 'Lopa a Da a Bali niyan' a aya niyan den ngaran taman imanto.
14 Kiyapakiwitan den i Hiram si Solaiman sa pat nggibo ka kilo a bolawan.
So Madakel a Miyanga papasad i Solaiman
15 Inosar o Dato Solaiman so manga mama a piyantonan iyan nggagalebek sa

kiyabangona niyan ko Timplo o Allah, so torogan iyan, so Milo ago so pangeleban a
Yarosalim ago so manga siti a Hasor, Migido ago Gisir.
16(Giya Gisir na giyobat gowani o Piraon a dato sa Misir a inagaw niyan ago tiyotong.
Piyamono iyan so kibabaling on a manga Kanaaniyo na inibegay niyan so siti a
pamemegayan ko wata iyan a babay ko kiyakawinga on ki Solaiman.
17 Na biyangon peroman i Solaiman a Gisir.) Biyangon iyan pen a Kababaan a Bit
Horon,
18 Baalat ago giya Tadmor sii ko disirto sa Yodah a maaped ko inged iyan
19 Taman den ko langon a manga siti a petegoan sa manga tamok iyan, so manga karo
niyan ago so manga koda iyan. Biyangon iyan so apiya antonaa i kebayaan iyan sii sa
Yarosalim, sii sa Libanon ago sii ko dalem o inged a kandadatoan iyan.
20-21 So manga taw a piyantonan nggagalebek i Solaiman na kena a ba manga Israil, ka

manga moriyataw o manga Amoriyo, manga Hitiyo, manga Pirisiyo, manga Hibiyo ago
manga Hibosiyo a da pamonoa o manga Israil isako matangan iran so inged, na siran i
pepangongoripenen o Israil taman den imanto.
22 Ogaid na da den a piyangongoripen i Solaiman ko manga Israil; siran i manga sondaro
niyan, so manga sanasanaan iyan ko di niyan dii kandato, so manga olowan o manga
sondaro, so manga kapitan ago so manga komandir ko manga karo niyan ago manga
komokoda.
23 Aden mambo a lima gatos ago lima polo a maporo a sanasanaan a tetandingan ko
manga galebek i Solaiman a aya dii kepatas ko dii nggagalebek.
24 Kagiya makatogalin so karoma i Solaiman, a so wata a babay i Piraon, a poon ko siti o

Daod sii ko torogan a pimbalay niyan para rekaniyan na biyangon i Solaiman so Milo.
25 Makatelo ko saragon na pesepaat si Solaiman sa manga korban a petotongen ago

manga korban pantag bo ko kanggiginawai sii ko aparan a biyangon iyan ko Allah.
Petotong sekaniyan on pen sa doka ko hadapan o Allah. Na miyapasad iyan so
kapembangona niyan ko Timplo o Allah.
26 Miyangembaal mambo so Dato Solaiman sa manga kapal sii sa Isiyon Gibir a marani
sa Ilat sii sa Idomiya ko kilid o Mariga a Ragat.
27 Na piyakasong i Hiram so manga mama niyan a lomalayag a matao sa ragat a
makanggalebek siran ko kapal a ped ko manga mama i Solaiman.
28 Milayalayag siran sa Opir na sapolo ago pat nggibo ago lima gatos ka kilo a bolawan a
minibaling iran ko dato.
1 MANGA DATO 10
Mimbisita so Bai sa Siba ki Solaiman
Kagiya maneg o Bai sa Siba so bantogan i Solaiman ago so kipepantagen iyan ko Allah
na somiyong sekaniyan on ka tepengan iyan sa manga reregen a pakaise.
2 Miyakaoma sekaniyan sa Yarosalim a tanto a madakel a domadaramba on a manga taw
a rakes o manga onta a maawid sa manga palapa ago tanto a madakel a bolawan ago
manga montiya. Somiyong sekaniyan ki Solaiman ago miyakimbitiyarai ron makapantag
ko langon a mapipikir iyan.
3 Simbag i Solaiman so langon a pakaise iyan on; da den a tanto a maregen ko dato a di
niyan keosay.
4 Kagiya mailay o Bai sa Siba so langon o ongangen i Solaiman ago so torogan a
biyangon iyan,
5 So manga pangenengken ko lamisaan iyan, so katatanor o manga sanasanaan iyan, so
manga orobarang iyan a ndiditar ko manga kimon iran, so manga pananangel iyan sa arak
ago so manga ipesepaat iyan a petotongen sii ko Timplo o Allah na tanto sekaniyan a
miyamemesa.
6 Pitero iyan ko dato a "So langon a miyapanotol raken sii ko inged aken mipantag ko
miyapasad ka ago so ongangen ka na palaya den benar.
7 Ogaid na da aken paratiyayaa taman ko kiyapakaoma ko sii ago kiyamasaan o mbala a
mata ko. Matamataan a apiya so sabaad na da raken mapanotol; so ongangen ka ago so
kakawasaan ka na tanto a mala a di so totol a miyaneg aken.
8 Sayana a mabababaya so manga pagtaw ngka! Sayana a mabababaya so manga
sanasanaan ka a lalayon sisii ko hadapan ka a pepamakinegen iran so ongangen ka!
9 Podin so Allah a Tohan ka a miyasoat reka a piyakandato ka niyan sa Israil. Sabap ko
da a pitetamanan iyan a gagaw niyan ko manga Israil na biyaloy ka niyan a dato ka an ka
matatap so kokoman ago kaontol."
10 Na bigan o Bai so dato sa pat nggibo ka kilo a bolawan ago tanto a madakel a palapa
ago manga montiya. Pikembokembo na da sekaniyan den kawiti sa datar oto a kadakel
a palapa a inibegay o Bai sa Siba ko Dato Solaiman.
11(So manga kapal i Hiram a makaaawid sa bolawan a poon sa Opir na makaaawid pen
sa tanto a mala a roran a kayo a nara ago manga montiya.
12 Inosar o dato so kayo a nara sa kiyambaali niyan sa manga tokod ko Timplo o Allah
ago sii ko torogan o dato, ago so kiyapangembaal sa manga alpa ago manga kotiyapi a
pekeosar o manga dii mboboniboniyan. Tanto a madakel a kayo a nara a miyawit roo a
da den roo mawit o di na mailay ipoon sangkoto a gawii.)
13 Na inibegay o Dato Solaiman ko Bai sa Siba so langon a miyasingayo iyan ago

piyangni niyan on liyo ron pen so madakel a makakakalilid a pamemegayan a inibegay
niyan on. Oriyan iyan na gomiyanat roo so Bai na komiyasoy ko inged iyan a ped o
manga domadaramba on.
So Kakawasaan i Solaiman
14 So timbang o bolawan a peketarima i Solaiman oman ragon na dowa polo ago telo
nggibo ka kilo a bolawan
15 A di on ped so pekibowis o manga padagang ago dii mamamasaan ago so poon ko
langon o manga dato sa Arabiya ago so manga gobirnador ko manga probinsiya sa Israil.
16 Mimbaal si Solaiman sa dowa gatos a manga ala a kelong a piyanesel a bolawan a telo
ago tenga ka kilo a bolawan ko oman i isa a kelong.
17 Mimbaal sekaniyan pen sa telo gatos a manga kelong a maito a di giyoto a piyanesel a
bolawan a manga dowa ka kilo ko oman i isa a kelong. Tiyago ini langon o dato ko
Rowang sa Kalasan sa Libanon.
18 Oriyan iyan na miyakimbaal so dato sa mala a korsi a marpil a liyapisan sa lombos a
bolawan.
19 So korsi na nem kerit a ipepanik on, na malo makalilingko so poro o perendaan on.
Sii ko oman i kilid o ontoda na tatagoan sa pembatogan sa lima a aden a inisayan on sa
arimaw a pakatitindegen a iaabay ko oman i kilid iyan.
20 So pen so oman i mbala a poro o nem kerit na katatagoan sa inisayan sa arimaw a
sapolo ago dowa langon a kadakel iyan. Da den a datar oto a korsi a ba kiyambaali ko
apiya anda ko ped a manga ndatoan.
21 So langon a pepaginoman o Dato Solaiman na palaya den bolawan, na so langon a
kasangkapan sii ko torogan iyan ko Rowang sa Kalasan sa Libanon na palaya den lombos
a bolawan. Da den a ba on inembaalan a pirak, ka so pembataken a pirak na ibibilang a
maito i bali ko masa i Solaiman.
22 Aden a manga kapal o dato a dii ndagang sii ko peragatan a maaped on so manga
kapal i Hiram. Makaisa siran makabaling ko telo ragon a rororanan sa bolawan, pirak,
marpil, manga amo ago manga tarabosaw.
23 Tanto a mala i kakawasaan ago ongangen si Solaiman a di so langon o ped a manga

dato sa doniya.
24 So langon a taw ko dalem o doniya na pekebabayaan iran a kapakapepangadap iran ki
Solaiman sa kapepamakinega iran ko ongangen a diyalem o Tohan ko poso iyan.
25 Oman ragon na oman i isa a pepekatalingoma on na maawid sa pamemegayan a manga
kasangkapan a pirak ago bolawan, manga kimon, manga gomaan, manga palapa ago
manga koda ago manga mola.
26 Miyakipanimo si Solaiman sa madakel a manga karo ago manga koda; aden a

sanggibo ago pat gatos iyan a manga karo ago sapolo ago dowa nggibo a manga koda.
So ped on na piyanago iyan ko manga siti a petimoan sa karo ago so pen so ped on na sii
sa Yarosalim kaan malebod a kapekeosara niyan on.
27 Sii ko masa o dato na so pembataken a pirak na mipelagid bo sa kadakel o manga ator,
na so kayo a sidro na mipelagid bo mambo sa kadakel o pepamangeto a kayo sii ko
kababaan o manga bobongan.
28 So manga koda i Solaiman na sii kinowa a poon sa Misir ago poon sa Silisiya. So
manga padagang iyan na piyamamasa iran roo sa Silisiya.
29 Sa masa oto na so isa a karo a miyawit sa Yarosalim a poon sa Misir na mapemasa a
nem gatos a pelata a pirak, ago so koda, na magatos ago lima polo a pelata a pirak. Na di
ini mambo dii pesaan o manga padagang ko langon a dato o manga Hitiyo ago manga
Isiriyanen.
1 MANGA DATO 11
So manga Karoma i Solaiman
Ogaid na pekebabayaan o Dato Solaiman so madakel a babay a rait a ped on so wata o

Piraon, a so manga babay a Mowabiyo, manga Amoniyo, manga Idomiyan, manga taw sa
Sidon ago manga Hitiyo.
2 Magiinged siran ko manga nasiyon a miyatero o Allah ko manga Israil a tig iyan a "Di
kano kiran pakipembabalaiya, ka matamataan a pekasangoren iran so manga poso iyo ko
manga katohanan iran." Apiya pen oto na ba siran baden kiyababayai a tanto i
Solaiman.
3 Aden a pito gatos a manga karoma niyan a tenger a taw ago telo gatos a manga sandil
iyan, na piyakasilay sekaniyan o manga karoma niyan.
4 Sii ko kapekelokes den i Solaiman na piyakasangor o manga karoma niyan so poso iyan
ko salakaw a manga tohan. Na da tanto makapagiklas so poso iyan ko Allah a Tohan iyan
ka kena a ba datar o kapagiiklas o poso o ama iyan a Daod.
5 Piyananangoranan iyan so Astorit a katohanan a babay o manga taw sa Sidon, ago so

Molek a so tanto a piyakasisingay a katohanan o manga Amoniyo.
6 Giyanan i dii kapakanggolaola i Solaiman sa marata sii ko kapekeilaya on o Allah. Da
niyan pangongonotani sa tarotop so Allah a datar o siyowa o ama iyan a Daod.
7 Sii ko bobongan sa sebangan a Yarosalim na mimbaal on si Solaiman sa aparan a

pesepaatan ko Kimos a piyakasisingay a katohanan o manga Mowabiyo, ago sii ko Molek
a piyakasisingay a katohanan o manga Amoniyo.
8 Datar oto a siyowa iyan para ko langon o manga karoma niyan a rait a pepamanotong sa
doka ago pepamanapaat ko manga katohanan iran.
9 Na kiyararangitan o Allah si Solaiman sabap sa tomiyalikod so poso iyan ko Allah a

Tohan o Israil a miyakapeyag rekaniyan sa miyakadowa.
10 Apiya pen kiyasaparan o Allah si Solaiman sa kapangongonotan ko salakaw a manga
tohan na da den tomana i Solaiman so sogoan on o Allah.
11 Kagiya ka maoto na pitero o Allah ki Solaiman a "Sabap sa giyai i parangay ngka a da
ngka paratiyayaa so kapasadan aken mipantag reka ago so manga taritib a inisogo aken na
matamataan a kakaan ko reka so ndatoan, ka imbegay aken ko isa ko sanasanaan ka.
12 Ogaid na sabap ko ama a ka a Daod na di aken ai penggolaolaan ko kaooyagoyag ka.
Sii aken kakaa ko tangan o wata a ka a mama.
13 “Inonta bo na kena a ba so langon o ndatoan i kakaan ko ron, ka mbegan ko sekaniyan

sa isa ka mbatabataa sabap ko oripen aken a Daod ago sabap ko Yarosalim a siti a pinili
aken."
So manga Ridoay i Solaiman
14 Samaoto na piyakirido o Allah si Solaiman ki Hadad a Idomiyan a isa a tenger a taw

sii sa inged a Idomiya.
15-16 Isako miyaona a manga ragon isako mataban o Daod a inged a Idomiya na si
Yowab a komandir o manga sondaro niyan na somiyong sa Idomiya ka ipelebeng iyan so
miyamatay. Miyakanem olan a kiyatareg iran roo ago so manga sondaro niyan, na
piyamono iran so langon a manga mama sa Idomiya.
17 Ogaid na si Hadad a bago pen oto a mama ago so ped ko manga sanasanaan o ama
iyan na miyamakapalagoy a miyamangantap sa Misir.
18 Gomiyanat siran sa Midiyan na somiyong sa Paran a roo siran piyangepedan o ped a
manga taw. Na somiyong siran sa Misir sii ko Piraon a dato sa Misir a migay ki Hadad sa
lopa ago walay, na pepegeperen iyan sekaniyan.
19 Tanto a miyasoat so Piraon ki Hadad na inibegay niyan on a mapangaroma niyan so

pagari o karoma niyan a Bai Tapinis.
20 Mimbawata sekaniyan sa mama a bitowan iran sa Ginobat. Na piyakala si Ginobat i
Tapinis sii ko torogan o dato. Roo miyakabaling si Ginobat a ped o manga wata o Piraon.
21 Kagiya maneg i Hadad roo sa Misir a miyatay si Daod a miyatay mambo si Yowab a
komandir o manga sondaro na pitero i Hadad ko Piraon a "Pakalalakawa ko ngka kaan
ako makakasoy ko inged aken."
22 “Ngkaino?" a iniise on o Piraon, "antonaa i mikorang reka sii a kabaya a ka a kesoy ka

ko inged ka?"
"Da den," a inisembag i Hadad, "ogaid na pakalalakawa ko ngka baden!"
23 Na piyakirido pen o Allah si Solaiman ki Rison a wata i Iliyada a piyalagoyan iyan so

kadnan iyan a si Hadadisir a dato sa Sobah.
24 Gowani sii ko oriyan o kiyatabana o Daod ko manga sondaro sa Sobah na miyanimo si
Rison sa manga mama na mimbaloy sekaniyan a nakoda o sagorompong a manga kontra.
Somiyong siran sa Damasko a ron komiyaden, na piyakandato iran roo si Rison.
25 Si Rison na ridoay den o Israil sii ko kaooyagoyag pen i Solaiman a minioman ko awid
a akal a ipembegay rekaniyan i Hadad. Pindatoan i Rison a Siriya na ipekegowad iyan a
Israil.
So Kiyasopaka i Yarobowam ki Solaiman
26 Si pen si Yarobowam a wata i Nibat na siyopak iyan so dato. Isa sekaniyan ko manga
sanasanaan i Solaiman. Ped sekaniyan ko mbatabataa a Ipraim a aya ina iyan na balo a
bebetowan sa Sirowah.
27 Katii so totolan ko kiyasopaka niyan ko Dato Solaiman: Pembangonen peroman i

Solaiman so Milo ago pegompiyaan iyan so miyageba ko pangeleban o Siti o Daod a ama
iyan.
28 Si Yarobowam na kasasanaan a mangoda, na kagiya mailay i Solaiman so kapiya o
galebek iyan na piyakikepatasan iyan on so langon a dii nggagalebek ko inged a Ipraim
ago Manasih.
29 Miyakaisa a gawii kagiya meliyo si Yarobowam sa Yarosalim na miyabalak sekaniyan

i Ahidiyas a nabi sii sa Siloh a ndiditar sa bago a gerab. Siran bo i ndodoo a makaliliyo
ko inged,
30 Na kiyapetan i Ahidiyas so bago a gerab a ndiditaren iyan na piyangisi iyan sa sapolo
ago dowa.
31 Na pitero iyan ki Yarobowam a "Kowaa ngka a rek ka so sapolo on timan, ka giyai i
pitero o Allah a Tohan o Israil: 'Ilaya ngka, ka kakaan ko so ndatoan ko tangan i Solaiman
na imbegay aken reka so sapolo ka mbatabataa on.
32 Ogaid na sabap ko oripen aken a Daod ago giya siti a Yarosalim a pinili aken sii ko
dalem a Israil na rek iyan pen so isa ka mbatabataa.
33 Aya sabap a kapenggolaolaa ko sii na tiyalikodan ako i Solaiman, ka piyanimba niyan
so Astorit a katohanan a babay o manga taw sa Sidon ago so Kimos a katohanan o manga
Mowabiyo ago so Molek a katohanan o manga Amoniyo, na da niyan kedega so manga
lalan aken aya pen o ba niyan nggolaolaa so ontol ko kapekeilaya ko ron, na da niyan
tomana so manga sogoan aken ago kitab a datar o kiyatomana on o Daod a ama i
Solaiman.
34 “ 'Ogaid na di aken pagagaon so langon o ndatoan ko tangan i Solaiman. Biyaloy aken

sekaniyan a dato ko tenday a omor iyan sabap ko oripen aken a Daod a pinili aken a
tomiyoman ko manga sogoan ago taritib aken.
35 Ka kowaan ko so ndatoan ko tangan o wata iyan na imbegay aken reka so sapolo ka
mbatabataa on.
36 Imbegay aken ko wata iyan so isa ka mbatabataa kaan matatap a aden a moriyataw o
Daod a dii ndato sii ko hadapan aken sa Yarosalim a so siti a pinili aken a tegoan aken ko
Ingaran aken.
37 Ogaid na so seka on peman na mbaloin ko seka a dato sa Israil, na kapendatoan ka so
langon o kabaya a ka a inged.
38 O tomana ngka so langon a ipesogo aken reka ago kedegen ka so manga lalan aken
ago penggolaolaan ka so ontol ko kapekeilaya ko ron a petomanen ka so manga sogoan
aken ago manga taritib a datar o kapetomana on o oripen aken a Daod na kelalayon ako
reka. Mbegan ko seka ago so kebabadan reka sa da a ikeda iyan a kadato a ketatap a datar
o kadato a inibegay aken ki Daod, na imbegay aken reka a Israil.
39 Pakapengalimbabaanen aken so kebabadan ki Daod sabap ko dosa i Solaiman, ogaid
na kena a ba taman sa pakataman.' "
40 Na tipengan mono i Solaiman si Yarobowam ogaid na miyakapagapas sekaniyan sa

Misir sii ki Sisak a dato, na tomiyareg roo taman ko kiyapatay i Solaiman.
So Kiyapatay i Solaiman
41 So peman so ped a totolan ko kiyandato i Solaiman a so langon a miyanggolaola niyan

ago so langon a kaongangen a piyakiilay niyan na ba ini da mamangisorat ko ribro a
totolan ko kandadato i Solaiman?
42 Miyakapat polo ragon a kiyandato i Solaiman ko dalem a Israil.
43 Na minitapi sekaniyan ko manga apo iyan a domedeke na minilebeng sii ko Siti o
Daod a ama iyan. Na si Rihobowam a wata iyan na aya on miyakasambi a dato.
1 MANGA DATO 12
Somiyopak a Israil ki Dato Rihobowam
Somiyong si Rihobowam sa Sikim a ron matitimo so langon a manga Israil sa kapagidini

ran on sa kadato.
2 Kagiya maneg ai i Yarobowam na komiyasoy a poon sa Misir, ka miyakapagapas roo
isako palagoyan iyan so dato Solaiman.
3 Na so manga olowan sa Israil na piyakisogoan iran si Yarobowam, na sekaniyan ago so
langon a isa ka maginged a manga Israil na miyamanong ki Rihobowam na pitero iran on
a
4 “So ama a ka a Solaiman na siyanggolayan kami niyan sa mapened a kokoong. Na,
pakaleboda ngka so maregen a galebek ago pakakepa ngka so kokoong a inisanggolay
niyan rekami ka makipengongoripen kami reka."
5 “Kasoy kano raken amay ka mamakatelo gawii ka sembagen ko sekano," a inisembag i

Rihobowam. Na mimbabaling so manga taw.
6 Mandiyadi na miyakimosawir si Rihobowam ko manga pelokelokesen a inodasa o

Solaiman a ama iyan sii ko kaooyagoyag iyan pen. "Antonaa i kisembag aken sangkai a
manga taw?" a iniise iyan kiran.
7 Somimbag siran a "O makipengongoripen ka sangkai a manga taw imanto ago

penalagadan ka siran ago sembagen ka siran ko mapiya na kelalayon a manga oripen ka
siran."
8 Ogaid na inisili i Rihobowam so inimosawir on o manga pelokelokesen ka aya niyan

inisean so manga kangodaan a sareserese iyan a aya niyan manga mosawira sa masa oto.
9 Iniise iyan kiran a "Antonaa i kimosawir iyo raken? Antonaa i kisembag aken sangkai a
manga taw a pepangnin iran raken a kapakakep o kokoong a inisanggolay kiran o ama
aken?"
10 Na aya inisembag o manga kangodaan a manga rese iyan na "Giyai i patot a peteroon
ka kiran: 'So tingting aken na matiwaro a di so kasadan o ama aken.
11 Siyanggolayan kano o ama aken sa mapened a kokoong na pekapeneden ko pen.
Liyambit kano niyan a lilit, ogaid na peranegen ko sekano a bentol!"
12 Kagiya makatelo gawii na komiyasoy si Yarobowam ago so langon a taw ko dato

Rihobowam a giyoto den so iniinsarat iyan kiran.
13 Na mimbaas tero so dato ko manga taw ka inisili niyan den so inimosawir on o manga
pelokelokesen
14 Na piyaratiyaya niyan so inimosawir o manga kangodaan a tig iyan a "Siyanggolayan
kano o ama aken sa mapened a kokoong, na pekapeneden ko pen anan. Pilalambit kano
niyan a lilit, ogaid na peranegen ko sekano a bentol!"
15 Da den pakinega o dato so manga taw ka giyangkai a miyanggolaola na kabaya o Allah
kaan iyan mitoman so miyatero iyan ki Yarobowam a wata i Nibat a nggolalan ko nabi
Ahidiyas a taga Siloh.
16 Kagiya mailay o manga taw a da siran den pakinega o dato na inipelalis iran a
"Da den bes a bagian ami o

di na kawali
ko ndatoan o manga moriya
taw o Daod a wata i Yasay!
Hey manga Israil, maling
tano!
Seka den i matao ko ndatoan
ka, hey Rihobowam!"
Na mimbabaling so manga taw sa Israil

17 Na inawaan iran si Rihobowam a so bo so manga Israil a kibabaling ko manga siti sa
Yodah i kandadatoan iyan.
18 Mandiyadi na siyogo o dato Rihobowam si Adoniram a aya tetandingan ko dii

nggagalebek sa kasong iyan ko manga Israil. Ogaid na riyobak iran sekaniyan na
miyatay. Na giyoto a minggagaan meda si Rihobowam ko karo niyan na miyakapalagoy
sa Yarosalim.
19 Ipoon den sangkoto a gawii na so manga taw ko pagotaraan a ndatoan a Israil na
makasosopak ko dii kandato o manga moriyataw o Daod.
20 Na kagiya maneg o manga taw sa Israil a miyakakasoy si Yarobowam a poon sa Misir

na siyogoan iran sekaniyan ko kalilimod o manga taw na biyaloy iran a dato ko langon a
Israil. So bo so mbatabataa Yodah i miyalamba a dii makindato ko manga moriyataw o
Daod.
So Miyaalamat i Simayas
21 So kiyapakaoma i Rihobowam sa Yarosalim na tominimo sekaniyan sa magatos ago

walo polo nggibo a piyamagaraw a sondaro ko mbatabataa Yodah ago Baniyamin sa
kapakipetidawa iran ko ndatoan a Israil kaan makaasal so kandadatoi niyan on.
22 Ogaid na pitero o Allah ki Simayas a sogo o Tohan a
23 “Teroa ngka ki Rihobowam a wata i Solaiman a dato sa Yodah ago sii ko langon a taw
ko mbatabataa Yodah ago Baniyamin ago so ped ko manga pagtaw a
24'Giyai i kabasa o Allah: Di niyo nggobata so manga pagari niyo a manga Israil. Baling
kano langon, ka giyangkai a kapakambebetad na aya ko kabaya.' " Mandiyadi na tiyoman
iran so inisogo o Allah na mimbabaling siran langon.
Somiyopak si Yarobowam ko Tohan
25 Samaoto na pikotaan i Yarobowam a siti a Sikim ko kapalawan a inged sa Ipraim na

komiyaden roo sa da matey. Gomiyanat roo den na pikotaan iyan a siti a Piniyal.
26 Na pitero i Yarobowam ko ginawa niyan a "O ba baden makakasoy imanto ko
kiyababadan ko Daod so dii kandato,
27 Ka o pepamanong angkai a manga pagtaw aken sa Yarosalim sa kapekorban iran roo
ko Timplo o Allah na makipendato siran peman ki Rihobowam a dato sa Yodah, na
mbonoon ako iran."
28 Sii ko kiyapamimikirana niyan sii na mimbaal sekaniyan sa dowa timan a nati a sapi a
bolawan. Na pitero iyan ko manga pagtaw niyan a "Tanto rekano a maregen a kapesong
iyo pen sa Yarosalim sa kapesimba. Hey, manga taw sa Israil, katii so manga tohan iyo a
miyakaliyo rekano sa Misir!"
29 Na piyakatindeg iyan so isa ko bolawan a nati a sapi sii sa Bitil, na so isa on peman na
sii sa Dan.
30 Na inikadosa ini o manga taw ka pesimbaan iran angkai a manga sapi a pesong siran
on sa mawatan apiya taman sa Dan.
31 Miyangon pen si Yarobowam sa manga aparan ko manga barahala sii ko poro o manga
bobongan na miyamanoro sa manga imam a poon ko mbarambarang den a manga taw a
kena a ba manga Libitiyo.
32 Miyaden pen si Yarobowam sa kapista sii ko ikasapolo ago lima gawii ko ikawalo
olan a datar o dii kapista sii sa Yodah. Roo ko aparan sa Bitil na di niyan dii korbanan so
manga bolawan a sapi a pimbaalan iyan, na tiyagoan iyan pen a Bitil sa manga imam a
makapenalagad ko manga aparan ko manga barahala a miyabangon iyan sii ko manga
bobongan.
33 Na sii ko ikasapolo ago lima gawii ko ikawalo olan, a so gawii a tindo iyan, na
somiyapaat sekaniyan sii ko aparan a pimbaalan iyan sa Bitil a di niyan dii selaselaan so
pista a inaden iyan para ko manga Israil.
1 MANGA DATO 13
Sa kapapantagan oto na aden a sogo o Tohan a poon sa Yodah a piyakasong o Allah sa
Bitil, na miyakaoma roo sii den ko katitindeg i Yarobowam ko kilid o aparan a sepaat on
sa soasoat.
2 Na sabap ko sogoan o Allah na inipananalo o sogo o Tohan ko danga o aparan a "Hey
aparan! Aparan! Giyai i pitero o Allah: Aden a mama a mbetowan sa Yosiyas a
ipembawata o kiyababadan ko Daod. Sii niyan reka pekorbana so manga imam ko manga
aparan ko manga barahala a pepamanapaat sii reka imanto. Na sii reka ketotong so
manga tolan a manosiya!"
3 Mandiyadi na migay so sogo o Tohan sa nanao a ipemataan ko pitero iyan a tig iyan a
"Giyai i nanao a piyayag o Allah: 'Keopak angkai a aparan na kitayak so manga ombi ron.'
"
4 Kagiya maneg o dato Yarobowam so inipelalis o sogo o Tohan ko danga o aparan sa

Bitil na iniantap iyan on so barokan iyan a tig iyan a "Dakepa niyo!" Ogaid na sarta den a
komingkeng so barokan iyan a biter iyan na di niyan kegamit.
5 Na tekaw den a miyaopak so aparan na minitayak so manga ombi ron a giyoto den so
nanao a pitero o sogo o Tohan sii ko Ingaran o Allah.
6 Na pitero o dato ko sogo o Tohan a "Kapedipedi ka bo na pangnin ako ngka ko Allah a
Tohan ka kaan makapiya so barokan aken."
Na miyangangarapan so sogo o Tohan na miyakaasal so barokan o dato.
7 Mandiyadi na pitero on o dato a "Onot ka raken sa walay na kan ka roo ka mbalasan ko
seka sa pamemegayan."
8 Somimbag so sogo o Tohan a "Apiya ibegay ngka raken so sabaad ko tamok ka na di

ako reka den magonot aya pen o ba ko kan sa paan o di na maginom sa ig sangkai a darpa.
9 Ka inisogo raken o Allah a 'Di ka den ken sa paan o di na inom sa ig aya pen o ba ka
mbalingan a sii magokit ko lalan a inisong ka roo."
10 Sabap roo na da sekaniyan kasoy a ba sii miyokit ko inisong iyan roo sa Bitil ka sii ko
salakaw a lalan.
So Lokes a Nabi sa Bitil
11 Sa masa oto na aden a lokes a nabi a mababaling sa Bitil, na somiyong on so manga

wata iyan a manga mama na piyanotol iran on so langon a pinggolaola o sogo o Tohan sa
gawii oto sii sa Bitil ago so pitero iyan ko dato Yarobowam.
12 “Anda i lalan a inokitan iyan ko kiyaganat iyan?" a iniise kiran o lokes a nabi. Na
initoro iran on so lalan a inokitan o sogo o Tohan
13 Na pitero iyan kiran a "Siyai niyo raken so kimar." Pinggolaola iran na mikoda
sekaniyan on.
14 Siyono iyan so sogo o Tohan na miyaoma niyan a moontod ko atag a kayo a kalipapa.
Inisean iyan a "Ba seka so sogo o Tohan a miyakapoon sa Yodah?"
15 Tig o lokes a nabi a "Onot ka raken sa walay na go ka roo kan."
16 Na tig iyan a "Di ako pekakasoy a ped ka aya pen o ba ko kan sa paan o di na inom sa
ig a ped ka sangkai a darpa.
17 Ka inisogo raken o Allah a 'Di ka roo den ken sa paan o di na inom sa ig aya pen o ba
ka mbalingan a sii magokit ko lalan a inisong ka roo.' "
18 Somimbag so lokes a nabi a "Saken mambo na nabi a lagid ka na minitoron raken so

katero o Allah a nggolalan ko malaikat a tig iyan a 'Pakaonota ngka sekaniyan sa walay
kaan makakan ago makainom," ogaid na dii mamokeg so lokes a nabi.
19 Na miyonot on maling so sogo o Tohan na komiyan ago mininom sii ko walay niyan.
20 Sii ko kaoontod iran pen ko lamisaan na minitoron so katero o Allah ko lokes a nabi a
miyowit rekaniyan sa walay.
21 Na inipelalis iyan ko sogo o Tohan a poon sa Yodah a "Giyai i pitero o Allah: 'Da
ngka paratiyayaa so katero o Allah ago da ngka tomana so inisogo reka o Allah a Tohan
ka
22 Ka komiyasoy ka ago komiyan sa paan ago minimon sa ig sii ko darpa a pitero iyan
reka a di ka on ken o di na maginom. Sabap roo na so badan ka na di kilebeng ko kobor o
manga lokes ka.' "
23 So kiyapakapasad iran koman ago minom na siniyaan o lokes a nabi so kimar o sogo o
Tohan
24 A gomiyanat roo den. Sii ko kapelalakaw niyan na aden a somiyakew ron a arimaw a
miyakapatay rekaniyan. Na minibaraser ko lalan so lawas o mama a titindegen o arimaw
ago so kimar.
25 Aden a manga mama a somiyagad na miyailay iran so bangkay a mibabaraser ko lalan
a titindegen o arimaw, na tomiyaros siran ko siti a babalingan o lokes a nabi na piyanotol
iran ai roo.
26 So kiyanega sii o lokes a nabi na tig iyan a "Giyoto so sogo o Tohan a somiyogok ko
sogoan o Allah. Piyalad sekaniyan o Allah ko arimaw a somiyakew ron ago miyakapatay
a aya kiyatoman o miyatero on o Allah."
27 Na pitero iyan ko manga wata iyan a "Siyai niyo so kimar aken." Pinggolaola iran
28 Na lomiyalakaw sekaniyan. Miyailay niyan so bangkay a makaiiga ko lalan a ndodon
so kimar ago so arimaw a titindegen iran bo. Da den kana o arimaw so bangkay aya pen o
ba niyan siyakew so kimar.
29 Na kinowa o nabi so lawas o sogo o Tohan na riyoran iyan ko kimar na inikasoy niyan
ko siti niyan sa kipembokoon iyan on ago kipelebengen.
30 Inilebeng iyan so bangkay ko rek iyan a kobor, na pindiyagaan iran a di iran dii teroon
a "Inao, pagari ko!"
31 Kagiya maipos so kinilebengen on na pitero o nabi ko manga wata iyan a "Amay ka

matay ako na lebengen ako niyo ko kiyakoboran ko sogo o Tohan na betaden iyo so
lawas aken a iperembang ko manga tolan iyan.
32 Ka so piyayag iyan a manga katero o Allah a sopak ko aparan sa Bitil ago sopak ko
langon a aparan ko manga barahala sii ko manga inged sa Samariya na mataan a itoman."
So Dosa i Yarobowam a aya on Inisiksa
33 Apiya pen ai miyanggolaola na so dato Yarobowam sa Israil na da niyan alina so

manga rarata a sowasowai niyan. Ka itataros iyan baden so kapepamili iyan sa
mbarambarang a manga taw a dii makapegimam ko manga aparan ko manga barahala a
biyangon iyan ko manga bobongan. Pegidinan iyan sa kaiimami so apiya antawaa i
kebaya on.
34 Giyangkai a dosa niyan na aya kiyasabapan ko kiyabinasa o ndatoan i Yarobowam ago
so kiyapolanga ko langon o pamiliya niyan.
1 MANGA DATO 14
So Miyaalamat i Ahidiyas makapantag ki Yarobowam
Sa masa oto na miyasakit si Abihah a wata i Yarobowam
2 Na pitero i Yarobowam ko karoma niyan a "Lalakaw ka na sasayan ka sa ped a taw
kaan di kesarino a seka i karoma i Yarobowam. Na song ka sa Siloh a ron babaling so
nabi Abidiyas a so mama a mitero raken sa saken i kedato sa Israil.
3 Witi ngka sa pamemegayan a sapolo timan a paan, ago so manga mamis ago isa ka
omoy a teneb. Iseen ka on o antonaa i kesowa o wata ta ka peteroon iyan reka."
4 Mandiyadi na somiyong so karoma i Yarobowam ko babalingan i Ahidiyas sii sa Siloh.

Di pekanono si Ahidiyas sabap ko kiyalokes iyan
5 Ogaid na miyatero on den o Allah a pekaoma so karoma i Yarobowam a ipegise iyan
on so makapantag ko wata iyan a pekesakit. Na pitero pen o Allah ki Abidiyas o antonaa
i mapetero iyan ko babay.
So kiyapakaoma o karoma i Yarobowam na somasayan sa salakaw a babay.
6 Na so den so kiyanega i Ahidiyas ko dalepek iyan ko pintoan na inipananalo niyan a
"Soled ka, hey karoma i Yarobowam. Ino ka sasayan sa salakaw a taw? Inisogo raken so
kapetero aken reka sa marata a totol.
7 Ika roo den na teroa ngka ki Yarobowam a giyai i kabasa o Allah a Tohan o Israil:
'Inipangkat aken seka sii ko manga taw na biyaloy aken seka a olowan o manga pagtaw
aken a Israil.
8 Kiyaka aken so ndatoan ko manga moriyataw o Daod na inibegay aken reka. Ogaid na
da ka den sowa ko oripen aken a Daod a tiyoman iyan so manga sogoan aken ago
miyangongonotan raken sa iklas ko poso iyan a aya niyan bo dii nggolaolaan so ontol ko
kapekilaya ko ron.
9 Lebi a marata a miyanggolaola ngka a di so langon a miyanga oonaan ka a mindato.
Tiyalikodan ako ngka na piyakakerangit ako ngka ko kiyapangembaal ka sa salakaw a
manga tohan a so tiyowang a manga barahala.'
10 “ 'Sabap sii na tenaan ko sa morala so kebabadan reka ka polangen aken so oman i isa
a mama on sa Israil apiya anda ko oripen o di na kena a oripen. Totongen aken so
pamiliya ngka a datar o katotonga o mama sa popot taman sa mada langon.
11 Saden sa ped ko pamiliya ngka a petay sii ko siti na pegdasan o manga aso, na
saden sa matay ko pangomaan na kekan a manga banog. Giyai i kabasa o Allah!' ".
12 Na pitero pen i Abidiyas ko karoma i Yarobowam a "Baling ka den imanto na anda

den i kapakasoled ka ko siti na petay so wata a ka.
13 So langowan a manga Israil na ipemboko iran sekaniyan ago ipelebeng iran.
Sekaniyan bo i ped ko pamiliya i Yarobowam a kilebeng sabap sa sekaniyan bo i
kiyailayan kiran o Allah a Tohan o Israil sa mapiya.
14 Na tego so Allah sa dato sii sa Israil a polangen iyan so kiyababadan ki Yarobowam
apiya imanto den.
15 Na siksaan o Allah a Israil kaan malagid o bombong a pekepipapipay o reges o ig.
Mbadoten iyan so manga Israil sii sangkai a mapiya a lopa a inibegay niyan ko manga apo
iran, na iperak iyan siran ko sabala a lawasaig a Yopratis sabap sa piyakakerangit iran so
Allah ko kiyapamangembaal iran sa manga barahala a katohanan a Asirah.
16 Na telikodan o Allah so Israil sabap ko manga dosa a miyasogok i Yarobowam a
piyakisogok iyan pen ko manga Israil."
17 Na gomiyanat so karoma i Yarobowam na komiyasoy sa Tirsah. Na so den so

kiyapakaoma niyan ko pintoan o walay niyan na aya den kiyapatay o wata iyan.
18 Inilebeng iran sekaniyan na pindiyagaan sekaniyan o langon o manga Israil a giyoto
den so pitero o Allah a nggolalan ko oripen iyan a nabi Ahidiyas.
So Kiyapatay i Yarobowam
19 So langon a ped a miyanggolaola i Yarobowam, a so kiyapakitidawa iyan ago so

kiyandato na palaya den misosorat ko 'Ribro a Totolan ko manga Dato sa Israil.'
20 Miyakadowa polo ago dowa ragon a kiyapakandato i Yarobowam na miyatay a
minilebeng na so wata iyan a Nadab i miyakasambi on a dato.
Si Rihobowam a Dato sa Yodah
21 Si peman si Rihobowam a wata i Solaiman na pat polo ago isa ragon a idad iyan isako
mabaloy a dato sa Yodah na miyakandato ko miyakasapolo ago pito ragon sii sa
Yarosalim a so siti a pinili o Allah a poon ko langon a darpa o manga mbatabataa manga
Israil a ron iyan tegoa so Ingaran iyan. Aya ngaran o ina i Rihobowam na si Naamah a
taga Amon.
22 Sii ko kandadato i Rihobowam na miyakanggolaola so manga taw sa Yodah sa marata

sii ko kapekeilaya on o Allah. Na sabap ko kiyandosa iran na lebi iran sekaniyan a
kiyakakatan sa rarangit ago kapanaod a di so pinggolaola o manga apo iran.
23 Inimbaal iran a ginawa iran sa manga aparan ko manga barahala ago so manga polaos
a toos ko katohanan a Asirah sii ko oman i maporo a bobongan ago sii ko atag o oman i
marimpoong a kayo.
24 Aden pen a dii sondal a manga mama a dii telagad sangkoto a manga pepamanimbaan.
Siyowa o manga taw sa Yodah so langon a piyakagogowad a olaola o manga nasiyon a
piyamogaw o Allah sii ko kapesorongi o manga Israil ko manga inged iran.
25 Sii ko ikalima ragon a kandadato i Rihobowam na si Sisiyak a dato sa Misir na giyobat

iyan a Yarosalim.
26 Piteban iyan so langowan a patemotamokan ko Timplo o Allah ago sii ko torogan o
dato. Inawidan iyan so langon taman on a rakes on so bolawan a manga kelong a
pimbaalan o Solaiman.
27 Sabap roo na miyakisesel so dato Rihobowam sa tombaga a manga kelong a inisambi
on na inisarig iyan ko manga olowan o manga gordiya a petemeng ko pintoan o torogan.
28 Na igira a pesong so dato ko Timplo o Allah na pegawidan o manga gordiya so manga
kelong na ipekesoy iran bo ko rowang o manga gordiya.
29 So ped a miyanga sosowasowa ko kandadato i Rihobowam ago so langon a

pinggolaola niyan na misosorat ko 'Ribro a Totolan ko manga Dato sa Yodah.'
30 Lalayon so dii katidawa i Rihobowam ago si Yarobowam.
31 Miyatay si Rihobowam na minilebeng ko pekoboran ko manga apo iyan sii ko siti o
Daod. (Aya ngaran o ina iyan na si Naamah a taga Amon), na so Abihah a wata iyan na
aya on miyakasambi a dato.
1 MANGA DATO 15
Si Abihah a Dato sa Yodah
Sii ko ikasapolo ago walo ragon a kandadato i Yarobowam sa Israil na miyabaloy si

Abihah a dato sa Yodah
2 Na miyakandato ko miyakatelo ragon sii sa Yarosalim. Aya ina iyan na si Maakah a
wata i Absalom.
3 Siyoson iyan langon so manga dosa a miyasogok i Rihobowam a ama iyan. Kena a ba
magiiklas so poso iyan ko Allah a Tohan iyan a datar o poso o apo iyan a Daod.
4 Apiya pen oto na sabap ko Daod na bigan o Allah a Tohan iyan si Abihah sa wata a
sembi on a pendato sa Yarosalim a mapakapembeken iyan a Yarosalim.
5 Ka aya bo a miyanggolaola o Daod na so ontol ko kapekeilaya on o Allah na da niyan
den sogoka so apiya antona onon a sogoan a inisogo iyan on sii ko tenday a omor iyan
liyo ron sii ko miyasowasowa mipantag ki Oriyas a Hitiyo.
6 Mitataros den so dii katidawa i Abihah ago si Yarobowam ko tenday a kandadato i

Abihah.
7 Na so ped a miyanga sosowasowa ko kandadato i Abihah ago so langon a pinggolaola
niyan na misosorat ko 'Ribro a Totolan ko manga Dato sa Yodah.'
8 Miyatay si Abihah na minilebeng ko siti o Daod na so wata iyan a si Asa i miyakasambi
on a dato.
Si Asa a Dato sa Yodah
9 Sii ko ikadowa polo ragon a kandadato i Yarobowam sa Israil na miyabaloy si Asa a

dato sa Yodah
10 Na miyakandato sa miyakapat polo ago isa ragon sii sa Yarosalim. Aya ngaran o ina
iyan a bai na si Maakah a wata i Absalom.
11 Miyakanggolaola si Asa sa ontol ko kapekeilaya on o Allah a datar o apo iyan a Daod.
12 Piyamogaw niyan ko inged so langon a manga mama a dii sondal a dii telagad sii ko
manga darpa a pesimbaan sa barahala na piyakada iyan on so langon a barahala a
pimbaalan o manga apo iyan.
13 Apiya si ina iyan a bai a si Maakah na kinowaan iyan ko kababai niyan sabap ko
kiyambaal iyan sa piyakasisingay a barahala a katohanan a Asirah. Piyata i Asa so
barahala na tiyotong iyan sii ko balintad a Kidron.
14 Na apiya pen da mabinasa langon so manga aparan ko manga barahala sii ko manga
bobongan na so poso i Asa na magiiklas ko Allah sii ko tenday a omor iyan.
15 Tiyago iyan ko Timplo o Allah so manga pirak ago manga bolawan ago so manga
kasangkapan a inisenggay niyan ago si ama iyan a rek o Allah.
16 Lalayon so dii katidawa i Asa ago si Baasa a dato sa Israil sii ko tenday a kandadato
iran.
17 Na siyondolan i Baasa a Yodah na pikotaan iyan a siti a Ramah kaan iyan mitareg so
kapeliyo ago kapesoled o apiya antawaa ko masasakop i Asa a dato sa Yodah.
18 Sabap roo na kinowa i Asa so langowan a pirak ago manga bolawan a miyalamba ko
petegoan sa tamok ko Timplo o Allah ago sii ko torogan o dato na piyakiwit iyan ai ko
manga sanasanaan iyan roo sa Damasko ki Binhadad a dato sa Siriya a wata i Tabrimon a
aya wata i Hisiyon a piyakitero iyan on a
19 “Pesadanowa ta a dowa a datar o manga ama ta. Ilaya ngka man ka piyakiwitan ko
seka sa pamemegayan a pirak ago bolawan. Na oparika ngka so kapasadan ka ago si
Baasa a dato sa Israil kaan ako niyan kaawai."
20 Miyayon so dato Binhadad ko pitero o dato Asa na siyogo iyan so manga komandir o
manga sondaro niyan a nggobat ko manga siti sa Israil. Na miyaagaw iran a Idiyon, Dan,
Abil Bitmaakah ago so langon o darpa a marani sa Ranaw a Galili ago so dalem a inged a
Naptali.
21 So kiyanega o dato Baasa ko miyanggolaola na initareg iyan a kapekotai niyan sa
Ramah na miyangendod sa Tirsah.
22 Mandiyadi na migay so dato Asa sa sogoan a piyakalangkap ko dalem a inged a Yodah
a paliyogat ko oman i isa a da den a ba on kesalebo, na piyangawidan iran a poon sa
Ramah so manga ator ago manga tarakayo a inosar roo i Baasa a ipekota iyan. Na inikota
ini o dato Asa sa Giba sii ko inged a Baniyamin ago giya pen a Mispah.
23 So ped a miyanga sosowasowa ko kandadato i Asa ago so langon a miyanga papasad

iyan ago so pikotaan iyan a manga siti na palaya den misosorat ko 'Ribro a Totolan ko
manga Dato sa Yodah.' Ogaid na sii ko kiyalokes iyan den na misekit so manga ai niyan.
24 Na miyatay si Asa a inilebeng ko pekoboran ko manga apo iyan ko siti o Daod. Na so
wata iyan a si Yahosapat na aya on miyakasambi a dato.
Si Nadab a Dato sa Israil
25 Sii ko ikadowa ragon a kandadato i Asa sa Yodah na si Nadab a wata i Yarobowam i

miyadato sa Israil na miyakandato sa miyakadowa ragon.
26 Miyakanggolaola sekaniyan sa marata ko kapekeilaya on o Allah ka siyoson iyan so
manga okitokit o ama iyan ago so manga dosa niyan a piyakisogok iyan pen ko manga
Israil.
27 Samaoto na si Baasa a wata i Ahidiyas ko mbatabataa Isakar na mikediyat sa marata ki

Nadab na biyono iyan sii ko kalilikopi i Nadab ago so manga sondaro niyan sa siti a
Gibiton sa Pilistiya.
28 Miyanggolaola ini sii ko ikatelo ragon a kandadato i Asa sa Yodah na si Baasa i
miyakasambi ki Nadab a dato sa Israil.
29 Sii den ko kiyapoon iyan ndato na piyamono iyan langon so pamiliya i Yarobowam a
da den a ba niyan kiran piyakapagoyag, ka lingan iyan siran mamono a giyoto den so
miyatero o Allah a nggolalan ko oripen iyan a nabi Ahidiyas a taga Siloh.
30 Miyanggolaola ini sabap sa piyakakerangit i Yarobowam so Allah a Tohan o Israil a
nggolalan ko manga dosa a miyasogok iyan a piyakisogok iyan pen ko manga Israil.
31 So ped a miyanga sosowasowa sii ko kandadato i Nadab ago so langon a pinggolaola

niyan na misosorat ko 'Ribro a Totolan ko manga Dato sa Israil.'
32 Aden a dii katidawa i Asa ago si Baasa a dato sa Israil ko masa a kandadato iran pen.
Si Baasa a Dato sa Israil
33 Sii ko ikatelo ragon a kandadato i Asa sa Yodah na si Baasa a wata i Ahidiyas i

miyadato ko dalem a Israil na miyakandato sii sa Tirsah sa miyakadowa polo ago pat
ragon.
34 Ogaid na miyakanggolaola sekaniyan sa marata ko kapekeilaya on o Allah ka siyoson
iyan so manga okitokit i Yarobowam ago so manga dosa niyan a piyakisogok iyan pen ko
manga Israil.
1 MANGA DATO 16
Na minitoron ko nabi Diho a wata i Hanani angkai a katero o Allah makapantag ki Baasa
a tig iyan a
2 “Inipangkat aken seka a poon ko bayanek na biyaloy aken seka a olowan o manga
pagtaw aken a Israil. Ogaid na miyasoson ka so manga okitokit i Yarobowam na
piyakakerangit ako ngka ko kiyapakandosaa ngka ko manga pagtaw aken.
3 Sabap san na mbinasaan ko seka ago so pamiliya ngka a datar o kiyabinasaa ko ko
kiyababadan ki Yarobowam a wata i Nibat.
4 Saden sa ped ko pamiliya ngka a petay ko siti na pegdasan o manga aso na saden sa
matay ko pangomaan na kekan a manga banog.
5 So ped a miyanga sosowasowa ko kandadato i Baasa ago so manga pinggolaola niyan

ago miyanga papasad iyan na misosorat ko 'Ribro a Totolan ko manga Dato sa Israil.'
6 Na miyatay si Baasa na inilebeng sii sa Tirsah. Na so wata iyan a si Ilah i miyakasambi
on a dato.
7 Giyangkoto a katero o Allah makapantag ki Baasa ago so pamiliya niyan na inibegay

kiran a miyakanggolalan ko nabi Diho a wata i Hanani sabap ko langon a marata a
miyanggolaola i Baasa ko kapekeilaya on o Allah. Piyakakerangit iyan so Allah sabap ko
manga dosa niyan a lagid o pinggolaola o pamiliya i Yarobowam ago sabap mambo ko
kiyapamonoa niyan ko pamiliya i Yarobowam.
Si Ilah a dato sa Israil
8 Si Ilah a wata i Baasa na miyadato sa Israil sii ko ikadowa polo ago nem ragon a
kandadato i Asa sa Yodah, na mindato sekaniyan sa miyakadowa ragon sii sa Tirsah.
9 Na si Simri a isa ko manga sanasanaan iyan a magoolowan ko sabaad ko manga karo
niyan sa katidawa na pikediyatan iyan si Ilah sa marata. Miyakaisa a gawii sii sa Tirsah a
mabebereg si Ilah sii ko walay i Arsa a aya komikibir ko torogan
10 Na somiyoled roo si Simri na biyono iyan si Ilah na miyakasambi on a dato.
Miyangggolaola ini sii ko ikadowa polo ago pito ragon a kandadato i Asa sa Yodah.
11 Sii ko kiyapakapoon ndato i Simri na piyolang iyan langon so pamiliya i Baasa. Da

den a ba niyan kiran piyakapagoyag a sakataw bo a melagid so tonganay ago ginawai.
12 Giyanan i kiyabinasaa i Simri ko langon o pamiliya i Baasa a aya kiyatoman o
miyatero o Allah makapantag ki Baasa a miyakanggolalan ko nabi Diho.
13 Miyanggolaola ini sabap ko langon a manga dosa i Baasa ago so wata iyan a si Ilah a
piyakisogok iran pen ko manga Israil ka piyakakerangit iran so Allah a Tohan o Israil a
nggolalan ko manga barahala iran.
14 So ped a miyanga sosowasowa ko kandadato i Ilah ago so langon a miyanggolaola
Si Simri a Dato sa Israil
15 Sii ko ikadowa polo ago pito ragon a kandadato i Asa sa Yodah na miyakandato si
Simri sii sa Tirsah sa miyakapito gawii. Samaoto na so manga sondaro a Israil na
pekempo a marani sa Gibiton sa Pilistiya.
16 Na sii ko kiyanega iran a mikediyat si Simri ko dato a biyono iyan na pinili iran si
Omri a so komandir o manga sondaro a aya madato sa Israil sii sangkoto a gawii roo ko
kampo.
17 Na giyoto a miyawa si Omri ago so manga sondaro niyan sa Gibiton na siyondolan
iran a Tirsah.
18 Na so kiyailaya i Simri a miyaagaw so siti na somiyoled sekaniyan ko kokotaan a
darpa ko torogan o dato na mitotong sekaniyan on na miyatay.
19 Miyanggolaola ini sabap sa miyakandosa sekaniyan mambo ko Allah ko kiyanggolaola
niyan sa marata ko kapekeilaya niyan on ka miyasoson iyan so manga okitokit i
Yarobowam ago so manga dosa niyan a piyakisogok iyan pen ko manga Israil.
20 Na so ped a miyanga sosowasowa ko kandadato i Simri ago so kiyapakasopak iyan na
misosorat ko 'Ribro a Totolan ko manga Dato sa Israil.'
Si Omri a Dato sa Israil
21 Sa masa oto na miyaoparik so manga Israil sa dowa baad; so sabaad on na kabaya iran
a si Tibni a wata i Sinab i makandato, na so sabaad na tomatampil ki Omri.
22 Ogaid na so manga pagtaw i Omri na miyakadaag ko manga pagtaw i Tibni. Na
miyatay si Tibni na si Omri i miyadato.
23 Mipoon ndato si Omri sa Israil ko ikatelo polo ago isa ragon a kandadato i Asa sa
Yodah na miyakandato sa miyakasapolo ago dowa ragon a so nem kiran na sii sa Tirsah.
24 Sa masa oto na piyamasa niyan so bobongan sa Samariya a pito polo ka kilo a pirak ki
Simir. Biyangonan iyan sa siti so bobongan na inibeto niyan on a Samariya a inisangay ki
Simir a ngaran o andang a kirek ko bobongan.
25 Ogaid na miyakanggolaola si Omri sa marata ko kapekeilaya on o Allah a lebi pen a

miyakandosa a di so langon a miyanga oonaan iyan a dato.
26 Siyoson iyan so langon a okitokit i Yarobowam a wata i Nibat ago so manga dosa
niyan a piyakisogok iyan pen ko manga Israil ka piyakakerangit iran so Allah a Tohan o
Israil a nggolalan ko kapepanakoto iran.
27 So ped a miyanga sosowasowa ko kandadato i Omri ago so miyanggolaola niyan ago

miyanga papasad na misosorat ko 'Ribo a Totolan ko manga Dato sa Israil.'
28 Na miyatay si Omri na minilebeng sa Samariya, na so wata iyan a si Ahab i
miyakasambi on a dato.
Si Ahab a Dato sa Israil
29 Si Ahab a wata i Omri i miyadato sa Israil sii ko ikatelo polo ago walo ragon a
kandadato i Asa sa Yodah na kiyandatoan iyan a dalem a Israil sii sa Samariya sa
miyakadowa polo ago dowa ragon.
30 Na miyakanggolaola sekaniyan sa lebi pen a marata ko kapekeilaya on o Allah a di so
langon a miyanga oonaan iyan a dato.
31 Da sekaniyan katamani ko kapesosona niyan ko manga dosa i Yarobowam a wata i
Nibat ka piyangaroma niyan pen si Disibil a wata i Itbaal a dato sa Sidon na mipoon
somimba ago manalagad ko katohanan a Baal.
32 Miyangon sekaniyan sa walay a timplo o Baal sii sa Samariya na tiyagoan iyan sa
aparan para ko Baal.
33 Mimbaal mambo si Ahab sa barahala a katohanan a Asirah na miyakanggolaola sa lebi
pen a mala a inikerangit o Allah a Tohan o Israil a di so langon a miyanga oonaan iyan a
dato sa Israil.
34 Sii ko kandadato i Ahab na si Hiil a taga Bitil na biyangon iyan peroman a Yariko. Sii
ko kiyabangona niyan ko onayan o siti na miyatay so kaka a wata iyan a si Abiram, na sii
ko kiyapakatindega niyan ko manga pintoan iyan na miyatay so ari a wata iyan a si Sigob
a aya kiyatoman o miyatero o Allah a nggolalan ki Yosowa a wata i Non.
1 MANGA DATO 17
Si Iliyas na Inikatan o manga Kakowak
So nabi Iliyas a taga Tisbi sii sa Giliyad na pitero iyan ki Ahab a "Mataan ko
kaooyagoyag o Allah a Tohan o Israil a pepangongonotanan aken ka da den a ba namog o
di na oran sii ko pekatalondog a manga ragon taman sa di ko teroon."
2 Mandiyadi na minitoron so katero o Allah ki Iliyas a tig iyan a

3 “Awa ka sii na song ka sa tampar sa sebangan na tepok ka ko obay o baogan a Kirit a
masesebangan a Yordan.
4 Pekainom ka sa ig ko baogan na somiyogo ako sa manga kakowak sa kaikati ran reka
roo."
5 Na pinggolaola i Iliyas so pitero on o Allah ka somiyong ko baogan a Kirit a

masesebangan a Yordan na komiyaden roo.
6 Pegowitan sekaniyan o manga kakowak sa manga roti ago manga sapo igira a kapipita
ago igira a perimon, na pepekainom sa ig ko baogan.
7 Ogaid na da matey na kiyamaraan so baogan sabap sa da den a oran sii ko inged.
Si Iliyas ago So Balo sa Saripat
8 Samaoto na pitero o Allah ki Iliyas a

9 “Ganat ka na song ka den sa Saripat sa Sidon na kaden ka roo. Somiyogo ako sa balo a
babay sangkoto a darpa a pegeper reka."
10 Na somiyong sekaniyan sa Saripat na so kiniraot iyan ko gimowa o siti na ndodon so

balo a babay a pepanimo sa manga itagon. Na tiyalowan i Iliyas a tig iyan a "Kapedipedi
ka bo na witi ako ngka sa maito a ig a isa ka sakdo kaan ako makainom."
11 Na sii ko kapekowaa niyan on na inipananalo niyan a "Kapiyaan ka na witi ako ngka
pen sa satebi a paan."
12 Ogaid na tig o babay a "Mataan

ko kaooyagoyag o Allah a Tohan ka ka da den a ba aken paan. Aya bo a rek aken na
saakop a arina sii ko lata ago maito a lana ko omoy, na pepanimo ako sa maito a itagon a
imbaling aken ka peninindaan ako sa moripori a kekan ami ago so wata aken, na petay
kami."
13 Na pitero on i Iliyas a "Di ngka pegawiden a akal! Baling ka na nggolaolaa ngka so

pitero o ka. Ogaid na onai ako ngka lomoto ko rek ka sa maito a apang na wita ngka
raken na go ka bo loto sa makan ka ago so wata a ka.
14 Ka giyai i pitero o Allah a Tohan o Israil: So lata a petegoan sa arina na di kelenganan
na so omoy a pananagoay sa lana na di den kemaraan taman ko gawii a kambegay o Allah
sa oran ko inged."
15 Na miyaling so babay na pinggolaola niyan so pitero on i Iliyas. Na aden a

pangenengken a pekekan i Iliyas ago so babay ago so wata iyan ko madakel a gawii.
16 Ka so lata a petegoan sa arina na da den kalengani, ago so omoy a pananagoay sa lana
na da den kamarai a aya kiyatoman o miyatero o Allah a nggolalan ki Iliyas.
17 Miyakaisa a gawii na miyasakit so wata o balo a kirek ko walay na pekelonsanan so

sakit iyan taman sa kiyadaan sa napas.
18 Na pitero o babay ki Iliyas a "Ino ngka raken ai kidian? Ba aya inisong ka sii na
pekitademan ka raken so dosa ko ago bonoon ka so wata aken?"
19 “Began ka raken so wata a ka," a inisembag i Iliyas. Na kinowa niyan so wata ko

rareb o babay na inawidan iyan sa poro ko rowang a pekedenan iyan na piyakaiga iyan
ko katri niyan.
20 Gomiyoraok sekaniyan ko Allah a tig iyan a "Ya Allah a Tohan ko, ba ngka inowiti sa
morala angkai a balo a tataregan ko ko kiyapataya ngka ko wata iyan?"
21 Na inigepe iyan a lawas iyan ko wata sa miyakatelo a inigoraok iyan ko Allah a "Ya
Allah a Tohan ko, pakakasoya ngka sangkai a wata so niyawa niyan!"
22 Na inampon o Allah so pangni i Iliyas na miyakakasoy ko wata so niyawa niyan na

miyaoyag.
23 Piyorot i Iliyas so wata na inipanog iyan ko kababaan o walay na inibegay niyan ki ina
iyan a tig iyan a "Ilaya ngka man, ka miyaoyag so wata a ka!"
24 Na pitero o babay ki Iliyas a "Imanto na miyatangked aken a sogo ka o Tohan na

mataan den a dii tero so Allah a dii makanggolalan ko ngari i ka!"
1 MANGA DATO 18
Si Iliyas ago si Obadiyas
Sii ko kiyatey niyan den sii ko ikatelo ragon a pangolaon na pitero o Allah ki Iliyas a "Ika
roo na pakiilay ka ki Ahab ka pekioranan aken so inged."
2 Na lomiyalakaw si Iliyas a pengadap ki Ahab.
Samaoto na tanto den a masikot so taon sii sa Samariya.
3 Sabap roo na piyakisogoan i Ahab si Obadiyas a aya komikibir ko torogan o dato. Si
Obadiyas na baratapa a mapaparatiyaya ko Allah.
4 Ka sii ko kapepakipamonoon i Disibil ko manga nabi o Allah na piyakaonot i Obadiyas
so magatos a manga nabi na initapok iyan ko dowa a liyang a ndilima polo kataw ko
oman i isa on. Na pegikatan iyan siran sa pangenengken ago ig.
5 Na pitero i Ahab ki Obadiyas a "Neba ngka so dalem ai a inged roo ko langon a manga
bowalan ago manga baogan. Baanda tano makatoon sa otan a ipegoyag o manga koda
ago so manga mola kaan di siran kelengan mamamatay."
6 Na biyagi iran so inged a pelalakawan iran na somiyong si Ahab ko isa a pagagawan na
si Obadiyas na sii ko ped.
7 Sii ko kapelalakaw i Obadiyas na minitekaw a miyakitoona on si Iliyas. Miyakilala

sekaniyan i Obadiyas na somiyodiyod on a tig iyan a "Ba seka den anan a kadnan ko a
Iliyas?"
8 “Oway," a inisembag iyan. "Ika roo den na teroa ngka ko kadnan ka a 'Sisii si Iliyas.' "
9 Ogaid na iniise i Obadiyas a "Antonaa i miyanggolaola ko a ribat a pepeladen ako ngka

ki Ahab sa kambonoa niyan raken?
10 Mataan ko kaooyagoyag o Allah a Tohan ko ka da den a inged o di na ndatoan a ba da
a miyasogo on o kadnan ko a pembanog reka. Na igira a dii teroon o dato ko isa a inged o
di na ndatoan a da ka roo na piyakasepa sekaniyan i Ahab a da ka niyan matoon.
11 Na imanto na peteroon ka raken bes a song ako ko kadnan ko a peteroon ko ron a 'Sisii
si Iliyas?!
12 Ka so den so kangganati aken reka na pagowiten ka o Roh o Allah ko darpa a di aken
katawan. O song ako ki Ahab a peteroon ko ron a sisii ka a di ka niyan bo ketoon na
mbonoon ako niyan. Ogaid na saken a oripen ka na pepangongonotan ko Allah ipoon ko
kangoda ko.
13 Ba ngka da maneg, kadnan ko, o antonaa i pinggolaola ko sii ko kapepakipamonoon i
Disibil ko manga nabi o Allah? Initapok aken so magatos kiran ko dowa a liyang a
ndilima polo ko oman i isa on a pegikatan ko siran sa pangenengken ago ig.
14 Na peteroon ka raken bes imanto a song ako ko kadnan aken a peteroon ko ron a sisii
ka?! Mbonoon ako niyan!"
15 Na tig i Iliyas a "Mataan ko kaooyagoyag o Allah a Lebi a Mamaapaar a

pepangongonotanan ko ka ipagadap aken a ginawa ko imanto ki Ahab."
Si Iliyas sii ko Palaw a Karmil
16 Mandiyadi na somiyong si Obadiyas ki Ahab na pitero iyan on oto na lomiyalakaw si

Ahab a makipetoona ki Iliyas.
17 So kiyailaya niyan ki Iliyas na pitero iyan on a "Ba seka nan a dii semok sa Israil?"
18 “Kena a ba saken i miyakasamok sa Israil," a tig i Iliyas, "ka seka ago so pamiliya i
ama a ka. Ka tiyalikodan iyo so manga sogoan o Allah na pesimba kano ko manga
barahala a Baal.
19 Na, pakisogoi ngka imanto so langon a manga taw ko dalem a Israil sa kapakatalabok
iran raken ko Palaw a Karmil. Pakaonota ngka so pat gatos ago lima polo a manga nabi o
Baal ago so pat gatos a manga nabi o katohanan a Asirah a pepegeperen i Disibil.."
20 Na piyakisogoan i Ahab so langon a manga Israil ago so manga nabi sa katimo iran ko
Palaw a Karmil.
21 Inadap i Iliyas so manga taw na pitero iyan a "Ay katey a kaaalangalang iyo ko dowa a
pamikiran? O so Allah na Tohan na paratiyayaa niyo sekaniyan, ogaid na o so Baal na
Tohan na paratiyayaa niyo."
Ogaid na da den a sataga bo a ba inisembag o manga taw.
22 Pitero kiran pen i Iliyas a "Saken bo i miyalamba ko manga nabi o Allah, ogaid na so
Baal na aden a pat gatos ago lima polo a manga nabi niyan.
23 Kowaan kami niyo sa dowa a todo a sapi. Pilia o manga nabi o Baal so isa on a
pamekangen iran ago tegoon ko liyawaw o itagon, ogaid na di iran tentemi sa apoy.
Tiyagaren ko so ped na tegoon ko ko liyawaw o itagon a di aken tenteman sa apoy.
24 Maipos ai na talowi o manga nabi o Baal so ingaran o tohan iran, na talowan ko so
Ingaran o Allah. Na so tohan a pekasembag a nggolalan ko apoy na aya den Tohan."
24 Na pitero o langon o manga taw a "Mapiya so pitero o ka."
25 Pitero i Iliyas ko manga nabi o Baal a "Pilia niyo so isa ko manga sapi na sekano i ona
tiyagar, ka madakel kano. Talowi niyo so ingaran o tohan iyo ogaid na di niyo tentemi so
itagon sa apoy."
26 Na kinowa iran so sapi a inibegay kiran na pitiyagar iran.
Tiyalowan iran so ingaran o Baal ipoon ko kapipita na taman sa miyaoto a alongan a di
iran dii pelalalis a "Hey Baal, sembaga kami ngka!" Ogaid na da den a sembag.
Mitepatepak siran ko mbabalibeta ko aparan a pimbaalan iran, ogaid na da den a ba kiran
miyakasembag.
27 Sii ko kiyaoto a alongan na pipekaradiyaanan siran i Iliyas a tig iyan a "Pelalis kano
sebenar! Mataan a tohan sekaniyan! Baanda dii mamimikiran sa madalem o di na
matetembang o di na dii ndadalakaw! Masiken a totorogen a pakapegnaon!"
28 Mandiyadi na milalalis siran sa lebi pen a matanog na piyaniras iran a ginawa iran a
manga gelat ago manga pedang a aya iran adat taman sa tomiyoga so rogo iran.
29 Sii ko kiyapolid den o alongan na ipeteros iran den so di iran dii kapamoneg taman ko
oras a kapesepaat ko kaperimon. Ogaid na da den a ba kiran minisembag ago da den a ba
kiran miyakineg; da a ba kiran tomiyago sa ginawa.
30 Mandiyadi na pitero i Iliyas ko langon o manga taw a "Song kano sii." Somiyong
siran on na inompiyaan iyan so aparan o Allah a kiyabinasaan den.
31 Kominowa si Iliyas sa sapolo ago dowa a ator a isa ko oman i mbatabataa kiyababadan
ko Yakob a aya tiyoronan ko katero o Allah a tig iyan a "Aya ngaran ka na Israil."
32 Inosar iyan angkai a manga ator ko kiyabangona niyan peroman ko aparan o Allah na
kiyalotan iyan so mbabalibeta on sa kakar a ketangelan sa manga sapolo ago lima ka litro
a ig.
33 Inibatog iyan so manga itagon ko aparan na piyamekang iyan so sapi na liniyawaw
niyan ko itagon. Na pitero iyan kiran a "Pamenoa niyo a ig so pat timan a ganda na ododa
niyo ai ko ipesepaat ago so itagon. Pinggolaola iran ai
34 Na tig iyan a "Nggolaolaa niyo bo," na piperomanan iran. "Peromani niyo bo," a
inisogo iyan, na pinggolaola iran sa ikatelo.
35 Somiyolapay so ig ko melilibeta ko aparan taman sa minipeno ko kakar.
36 Na sii ko oras a kapesepaat ko kaperimon na domiyaseg si Iliyas ko aparan na

miyangangarapan a tig iyan a "Ya Allah a Tohan o Ibrahim ago Iskak ago Israil na
pakitokawi ngka imanto a seka i Tohan sa Israil ago saken i oripen ka a minggolaola sii
langon sabap ko sogoan ka.
37 Ampona ko ngka, ya Allah: ampona ko ngka kaan katokawi angkai a manga taw a
seka, ya Allah, i Tohan a pepekakasoy ko manga poso iran sii reka."
38 Na sarta den a miyakatana so apoy o Allah na tiyotong iyan so sapaat, so itagon, so

manga ator ago so lopa na inosip iyan pen so ig ko kakar!
39 So kiyailaya sii o manga taw na miyakasodiyod siran ago minigoraok iran a "So Allah
na aya Tohan! So Allah na aya Tohan!"
40 Na inisogo kiran i Iliyas a "Pandakepa niyo so manga nabi o Baal!. O ba aden a

pakapalagoya niyo kiran a sakataw bo." Na piyandakep iran siran na inowit siran i Iliyas
roo sa baba ko balintad a Kison na piyakipamono iyan siran roo.
41 Na pitero i Iliyas ki Ahab a "Ika roo na kan ka ago inom, ka aden a dagedeb o mala a
oran."
42 Na miyawa roo si Ahab a komiyan ago mininom ogaid na tomiyakedeg si Iliyas ko
poro o palaw a Karmil na romiyoko ko lopa a giya paras iyan na sii ko pageletan o
manga leb iyan.
43 Pitero iyan ko talasogoay niyan a "Ika roo na go ngka langkawa a kalodan." Na

tomiyakedeg sekaniyan na liyangkaw niyan."
"Da den a ba ndodoo," a tig iyan.
Na miyakapito ron matero i Iliyas a "Kasoy ka!"
44 Sii ko ikapito niyan komasoy na pitero o talasogoay a "Aden a maito a gabon a lagid
sa kala o lima o taw a pekiporo a poon ko kalodan."
Na tig i Iliyas a "Song ka ki Ahab na teroa ngka on a 'Sangani ngka so karo ngka na
tondagay ka nggagaan sa di reka pen kakebalangi o oran!"
45 Da matey na domiyatem so langit sa gabon na somiyamber so ndo na miyoran sa

mabager na gomiyanat si Ahab a song sa Yasriil.
46 Minitemo ki Iliyas so bager o Allah na initinambed iyan so gerab iyan ko sambitan
iyan na pepalalagoy a moona ki Ahab taman den sa gimowa a Yasriil.
1 MANGA DATO 19
Miyagapas si Iliyas sa Sinay
Piyanotol i Ahab ko karoma niyan a Disibil so langon a pinggolaola i Iliyas ago so

kiyapakipamonoon iyan ko langon a manga nabi o Baal.
2 Na miyakawit si Disibil ki Iliyas sa lalag a tig iyan a "Kamorkaan ako o Allah sa tanto a
malipedes o di ko seka mabono sa di pen kaoma o datar angkai a oras mapita a lagid o
kiyabonoa ngka ko manga nabi."
3 Na miyalek si Iliyas na inipagapas iyan a omor iyan. Sii ko kiyapakaoma niyan sa

Birsiba sa inged a Yodah na inibegak iyan roo so talasogoay niyan
4 Na miyakasalongan a inilalakaw niyan pen ko mitataog a sekaniyan bo.
4 Miyakaoma ko marimpoong a kayo na miyontod ko atag iyan a pepangnin iyan a matay
sekaniyan. "Ya Allah, tiyamanan ako den imanto," a tig iyan. "Kowaa ngka so niyawa ko
ka kena o ba ako lebi a mapiya a di so manga apo aken."
5 Na miniga sekaniyan ko atag o kayo na tiyorog roo.
Na minitekaw a somiko on so isa a malaikat a tig iyan a "Mbowat ka na go ka kan!"
6 Na miyangilailay si Iliyas ko mbalabala na sii ko kaolonan iyan na aden a apang on a
liyoto a manga waga, ago isa ka omoy a ig. Na komiyan sekaniyan ago mininom na
miniga bo.
7 Komiyasoy so malaikat o Allah na siko iyan a tig iyan a "Mbowat ka na go ka kan ka

maregen reka so lalakaw ngka."
8 Na mimbangon sekaniyan na komiyan ago mininom na nggolalan ko bager angkoto a
pangenengken na miyakalalakaw sa pat polo ka a kadadaondaw ago pat polo a kagagawii
taman sa minisampay sa Sinay a palaw o Tohan.
9 Somiyoled sekaniyan roo ko liyang na miyakatorog on ko kagagawii.
Na miyakatalingoma on so katero o Allah a tig iyan a "Antonaa i pesowaan ka san,
Iliyas?"
10 Tig iyan a "Miyangongonotan ako sebenar ko Allah a Lebi a Mamaapaar. Ogaid na so

manga Israil na tiyalikodan iran so kapasadan ka, pinggegeba iran so manga aparan ka na
piyamono iran pen so manga nabi ngka na saken bo i miyalamba. Na imanto na
pananamaran ako iran pen mono."
11 Na tig o Allah a "Liyo ka na go ka tindeg ko palaw sii ko kamamasaan o Allah."

Mandiyadi na somiyagad so Allah na domiyansal so mala ago mabager a ndo a tomimpag
ko manga bobongan ago romiyopet ko manga lakongan, ogaid na da so Allah sii ko ndo.
So kiyaipos o ndo na milinog, ogaid na da so Allah ko linog.
12 So kiyaipos o linog na miyakatalingoma so apoy, ogaid na da so Allah sii ko apoy. So
kiyaipos o apoy na aden a sowara a malenggaw.
13 So kiyanega on i Iliyas na inisapeng iyan ko paras iyan so gerab iyan na lominiyo a

tominindeg ko ngari o liyang. Na pitero rekaniyan o sowara a "Antonaa i pesowaan ka
sii, Iliyas?"
14 Tig iyan a "Miyangongonotan ako sebenar ko Allah a Lebi a Mamaapaar. Ogaid na so

manga Israil na tiyalikodan iran so kapasadan ka, pinggegeba iran so manga aparan ka na
piyamono iran pen so manga nabi ngka na saken bo i miyalamba. Na imanto na
pananamaran ako iran pen mono."
15 Na pitero on o Allah a "Kasoy ka a okit ko lalan a inisong ka sii na song ka ko

mitataog a marani sa Damasko. Amay ka makaoma ka roo na salawati ngka si Hasail a
madato sa Siriya
16 Na salawati ngka si Diho a wata i Nimsi a madato sa Israil, na salawati ngka pen si
Ilisas a wata i Siyapat a taga Abil Mihola a pekasambi reka a nabi.
17 Saden sa makalidas ko kambonoa on i Hasail na mbonoon i Diho, na saden sa
makalidas ko kambonoa on i Diho na mbonoon i Ilisas.
18 Ogaid na aden a pelindingen aken a pito nggibo a manga Israil a so langon a da
makasodiyod ko Baal aya pen o ba iran iniarek a manga ngari iran ko barahala niyan."
So Kiyatawaga ki Ilisas
19 Mandiyadi na miyawa roo si Iliyas na miyatoon iyan si Ilisas a wata i Siyapat ko dii
mbabasokan a dii ndado sa isa ka parisan a sapi a aden a sapolo ago isa ka parisan a sapi a
maoonaan iyan. Somiyong on si Iliyas na inisablay niyan so gerab iyan ko waga i
Ilisas na tomiyaros lomalakaw.
20 Na inibegak i Ilisas so manga sapi iyan na piyalalagoy niyan tomondog si Iliyas a tig
iyan a "Pakaodasa ko ngka pasin marek ki ama aken ago si ina na go ako reka bo
magonot."
"Kasoy ka," a inisembag i Iliyas. "Ogaid na tatanodi ngka so pinggolaola ko reka."
21 Na komiyasoy si Ilisas ko manga sapi na kinowa niyan so isa ka parisan a sapi iyan na
piyanombali iyan. Initinda iyan so sapo iran a initagon iyan on so manga kasangkapan a
dii ndado na inipamegay niyan ai ko manga taw na mikekan siran. Oriyan iyan na
miyonot sekaniyan ki Iliyas a mimbaloy a salinggogopa iyan.
1 MANGA DATO 20
Giyobat i Bin Hadad a Samariya
Sa masa oto na piyakitimo i Bin Hadad a dato sa Siriya so langon o manga sondaro niyan.
Lomiyalakaw siran a oonotan o telo polo ago dowa a ped a manga dato a rakes o manga
koda iran ago manga karo sa katidawa na linikopan ago giyobat iran a Samariya.
2 Somiyogo si Bin Hadad ki Ahab a dato sa Israil sii ko siti a piyakitero iyan on a "Giyai i
kabasa i Bin Hadad:
3 So manga pirak ka ago manga bolawan na rek aken, ago so pen so lebi a manga pipiya
ko manga karoma ngka ago manga wata."
4 Somimbag so dato sa Israil a "Oway, so den so pitero o ka, kadnan ko a dato, ka saken
ago so langon a sisii raken na rek ka."
5 Na miyakaoma peroman so manga siyogo a tig iran a "Giyai i kabasa i Bin Hadad:
Somiyogo ako reka sa manga mama a inipanton aken a kimbegan ka raken ko manga
pirak ka ago manga bolawan, ago so manga karoma ngka ago manga wata.
6 Ogaid na sii ko datar ai a oras mapita na sogoon ko reka so manga sanasanaan aken a
penisiken iran so torogan ka ago so manga walay o manga pagtaw ngka na pengowaan
iran so langon taman a mala rekano i arga na pagawidan iran."
7 Na piyakisogoan o dato sa Israil so langon a manga olowan ko inged na pitero iyan

kiran a "Ilaya niyo man a kapananamar angkoto a mama sa rido! Somiyogo raken a
ipepanton iyan a kimbegan ko ron ko manga karoma ko ago so manga wata aken, so
manga pirak aken ago manga bolawan na da ko sekaniyan sangkaa."
8 Na pitero on o langon o manga olowan ago so manga pagtaw a "Di ngka sekaniyan
pemakinega o di na ba pagayoni so panton iyan!"
9 Mandiyadi na simbag i Ahab so manga siyogo i Bin Hadad a tig iyan a "Teroa niyo ko
kadnan aken a dato a 'So paganay a inipanton ka raken na palaya aken ipenggolalan, ogaid
na giyangkai a miyaori a panton na di aken den ipagiyog.' " Na gomiyanat roo so manga
siyogo na inisampay iran so sembag ki Bin Hadad.
10 Somiyogo peman si Bin Hadad ki Ahab a piyakitero iyan on a "Kamorkaan ako o

manga tohan sa malipedes o di ko matarotop so kambinasaa ko sa Samariya taman sa di
petoon so bayanek on a baden masesagamak o oman i isa a manga sondaro aken!"
11 Somimbag so dato Ahab a tig iyan a "Teroa niyo ki Bin Hadad a so sondaro a
petiyagar sa katida
wa na di patot i ba magambog a lagid o sondaro a miyakataban den."
12 Minisampay ki Bin Hadad angkai a katero sii ko kapepaginom iran ago so ped a
manga dato sii ko manga barombarong iran. Na inisogo iyan ko manga sondaro niyan a
"Tiyagar kano ko kanggobat!" Na mitiyagar siran sa kanggobata iran ko siti.
Tiyaban i Ahab si Bin Hadad
13 Sa masa oto na miyakatalingoma a nabi ko dato Ahab a pitero iyan a "Giyai i kabasa o
Allah: Miyailay ngka angkai a makapal a manga sondaro? Imanto a gawii na peladen ko
siran ko lima ngka na ketokawan ka bo a saken so Allah."
14 “Antawaa i penggolaola sii?" a iniise i Ahab.

Inisembag o nabi a "Giyai i pitero o Allah: So manga kangodaan a sondaro a
pagoolowanan o manga komandir ko manga probinsiya na aya on penggolaola."
"Na antawaa i magepoon ko katidawa?" a iniise o dato.
"Seka den," a inisembag o nabi.
15 Mandiyadi na piyakitawag i Ahab so manga kangodaan a sondaro o manga komandir

ko manga probinsiya a dowa gatos ago telo polo ago dowa siran kataw a manga mama.
Oriyan iyan na tinimo iyan so ped a manga sondaro sa Israil a pito nggibo siran langon.
16 Na kagiya maoto a alongan na miparada siran a lominiyo ko siti a si Bin Hadad ago so
telo polo ago dowa a manga dato a miyakipagabanga on na sisii siran pen ko kampo iran
a pepamanginom a pepanga bebereg.
17 So manga kangodaan a sondaro o manga komandir ko manga probinsiya na aya
miyona lomiyo.
So manga panonoriman a miyasogo i Bin Hadad na iniripot iran on a "Aden a manga
sondaro a dii meliliyo sa Samariya!"
18 Na tig iyan a "O pepekaoma siran a makipengginawai na biyaga niyo a oyagoyag, na o

pepekaoma a makipetidawa na biyaga niyo a oyagoyag!"
19 So manga kangodaan a sondaro na dii meliliyo ko siti a moona ko ped a manga

sondaro
20 Na oman i isa kiran na biyono iyan so ridoay a minitidawa iyan. Miyamalagoy so
manga Isiriyanen a pepangeteden o manga Israil. Ogaid na miyakapalagoy si Bin Hadad a
makakokoda a rakes o ped a manga pangongoda iyan.
21 Na somiyorong si Ahab na bininasa niyan so manga koda ago manga karo a mala a
kiyatabana niyan ko manga Isiriyanen.
22 Kagiya maipos oto na somiyong so nabi ki dato Ahab a pitero iyan on a "Pakabagera
ngka so katitiyagar ka na ilaya ngka o antonaa i kioman ka on, ka sii ko pekatalingoma a
pangolaon na nggobaten ka peroman o dato sa Siriya."
So Ikadowa a Kanggobat i Bin Hadad
23 Sa masa oto na so manga sanasanaan o dato Bin Hadad na miyosawiran iran sekaniyan
a tig iran a "So manga tohan o manga Israil na manga tohan ko kapalawan. Giyanan i
sabap a miyataban tano iran. Ogaid na o makipetidawa tano kiran sii ko kapantaran na
mataan a tebanen tano siran.
24 Ogaid na nggolaolaa ngka ini: Sambii ngka so manga dato a magoolowan ko manga
sondaro sa salakaw a manga komandir.
25 Na panimo ka pen sa ped a manga sondaro, manga koda ago manga karo a lagid sa
kadakel o miyanga ada reka kaan tano makaato ko manga Israil sii ko kapantaran. Amay
ka magiyoto na matamataan a tebanen tano siran!" Miyayon kiran si Bin Hadad na
pinggolaola niyan ai.
26 So miyakatalondog a pangolaon na piyakitimo i Bin Hadad so manga sondaro a

Isiriyanen na somiyong siran sa Apik sa kapakipetidawa iran ko manga Israil.
27 Miyatimo mambo so manga sondaro a Israil na kiyakargadaan siran. Na lomiyalakaw
siran sa kapakaato iran na mikempo siran ko pantag o manga Isiriyanen a lagid o dowa a
maroni a talon a manga kambing, ogaid na minisapeng so manga Isiriyanen ko lopa.
28 Na miyakaoma so nabi o Tohan ki Ahab na pitero iyan on a "Giyai i pitero o Allah:

Sabap sa aya kapipikira on o manga Isiriyanen na so Allah na aya tohan ko manga
kapalawan a kena a ba so tohan ko manga kapantaran na peladen ko angkai langon a
makapal a sondaro ko lima ngka na ketokawan ka a saken so Allah."
29 Sii ko miyakapito gawii na makapepantag siran den a kikakampo na sii ko ikapito

gawii na mipoon siran tidawa. Na nggatosan nggibo a pelalag a manga sondaro a
Isiriyanen a miyapamono o manga Israil sii ko miyakasalongan.
30 So miyalamba kiran na miyamagapas ko siti a Apik a roo minitobak so pangeleban o
siti ko dowa polo ago pito nggibo kiran. Na miyakapagapas si Bin Hadad ko siti na
mitepok roo ko rowang sii sa soled.
31 Pitero rekaniyan o manga sanasanaan iyan a "Ilaya ngka man ka miyaneg ami a so
manga dato sa Israil na palaya makapediin. Pakasonga kami ngka ko dato sa Israil a
kisosolot sa manga sako ago kimbababad sa manga olo ami a tali ka baanda ka niyan
pakapagoyaga."
32 Na somiyong siran ki Ahab a kisosolot sa sako ago bababaden a olo iran a tali na tig
iran a "Pitero o oripen ka a si Bin Hadad a 'Kapedipedi ka bo na pakapagoyaga ko ngka.' "
Tig i Ahab a "Ba oyagoyag sekaniyan pen? Pagari aken sekaniyan!"
33 Na so manga sanasanaan i Bin Hidad na inibilang iran angkai a katero a mapiya a
nanao na minggagaan siran on somimbag a tig iran a "Oway, so pagari ngka a si Bin
Hadad!"
"Ika roo na rapita niyo," a inisogo i Ahab.
Kagiya makaoma si Bin Hadad na piyakapagda sekaniyan i Ahab ko karo niyan.
34 Pitero on i Bin Hadad a "Ikesoy aken reka so manga siti a miyaagaw o ama aken ko
ama a ka. Na kebangonan ka sa manga padian a siti a Damasko a datar o pinggolaola o
ama aken sii sa Samariya."
Tig i Ahab a "Sabap sangkai a manga inidiyandi i ka na pekamaradikaan ko seka." Na
mimbaal siran sa kapasadan na biyokaan iyan so Bin Hadad.
So Nabi a Kiyamorkaan iyan si Ahab
35 Sabap ko sogoan o Allah na so isa a mama ko sagorompong a manga nabi na pitero

iyan ko ped iyan a "Lakota ko ngka!" ogaid na da iyog so mama.
36 Sabap roo na tig o nabi a "Sabap sa da ngka paratiyayaa so Allah na anda den i
kangganati ngka raken na kepatay ka a arimaw." Na kagiya lomalakaw so mama na
miyasakew a arimaw a aya on miyakapatay.
37 Somiyong so nabi ko salakaw a mama na tig iyan on a "Lakota ko ngka!" Na liyakot

iyan a kiyapalian iyan.
38 Miyawa roo so nabi na tominindeg ko kilid a lalan a pepenayaw ko dato sa Israil.
Miyananayan sekaniyan a inisapeng iyan ko mata niyan so babad ko olo niyan.
39 Sii ko kapesegad o dato na tiyalowan sekaniyan o nabi a tig iyan a "Sir, somiyong ako
ko dii tidawaan na miyakaoma raken a mama a miyowit raken sa biyag a tig iyan a
'Gordiyai ngka a mama ini. O makapalagoy na so niyawa ngka i kibayad ko niyawa
niyan, o di na pekabayad ka sa telo polo ago pat ka kilo a pirak!'
40 Na sii ko katetembang aken sii ago roo na miyakapalagoy so biyag."
"Kisala reka nan," a tig o dato sa Israil. "Seka den i mitero san."
41 Na magaan a kiyapokasa o nabi ko babad a misasapeng ko mata niyan na miyakilala

sekaniyan o dato a isa ko manga nabi.
42 Na pitero iyan ko dato a "Giyai i pitero o Allah: Piyakapagoyag ka so mama a piyasad
aken a mbonoon. Sabap roo na so kaoyagoyag ka i kibayad ko kaoyagoyag iyan na so
manga pagtaw ngka i kibayad ko manga pagtaw niyan."
43 Na miyaling so dato sa Israil roo sa Samariya a pekerarangitan ago makaririmeng.
1 MANGA DATO 21
So Asinda i Nabot
Marani ko torogan o dato Ahab sii sa Yasriil na aden a asinda on a waged a obas a rek i
Nabot a taga Yasriil.
2 Miyakaisa a gawii na pitero i Ahab ki Nabot a "Began ka raken so asinda ngka a obas a
pesepadanan aken sa manga leletean, ka marani ko torogan aken. Imbegay aken reka so
lebi pen a mapiya a asinda a isembi on, o di na o tomoa ngka na mbayadan ko reka sa
apiya pira i arga iyan."
3 Ogaid na inisembag i Nabot a "Pengnin ko a isapar o Allah o ba aken reka began so

posaka a initenan o manga apo aken!"
4 Na miyaling si Ahab a pekerarangitan ago makaririmeng sabap ko pitero on i Nabot a

"Di aken reka imbegay so posaka o manga apo aken." Na miniga ko katri niyan a
somasangor ko keleb a pesengka koman.
5 Somiyong on si Disibil a karoma niyan na iniise iyan on a "Ino ka makaririmeng? Ino

ka di ken?"
6 Tig iyan a "Pitero aken ki Nabot a 'Pesaa ngka raken so asinda ngka a obas o di na o
tomoa ngka na began ko seka sa salakaw a asinda a isembi on.' Ogaid na pitero iyan a di
niyan raken imbegay so asinda niyan."
7 Na tig i Disibil a "Ba giyai i olaola ngka a di ngka dii indato sa Israil?! Mbangon ka na
go ka kan! Pakapiyaa ngka a ginawa ngka ka kowaan ko reka so asinda i Nabot."
8 Mandiyadi na misorat si Disibil sa manga sorat na inipirma iyan on so ngaran i Ahab.

Initombok iyan on so siliyo niyan na inipakawit iyan ko manga olowan ago manga
pelokelokesen sii ko siti a babalingan i Nabot.
9 Aya inisorat iyan sangkai a manga sorat na:
"Panawatewagen kano sa gawii a kapowasa na limoda niyo so manga taw na

pakaontoda niyo si Nabot ko seselaan a darpa.
10 Kowa kano sa dowa kataw a manga rarata a manga mama a makapengadap ki
Nabot a ipesendit iran on a inipaninta iyan so Tohan ago so dato. Na liyon iyo
sekaniyan ko siti na robaka niyo taman sa matay."
11 Ininggolalan o manga olowan ago so manga pelokelokesen so iniinsarat kiran i Disibil

ko manga sorat.
12 Inipanawatewag iran so gawii a kapowasa na linimod iran so manga taw na
piyakaontod iran si Nabot ko seselaan a darpa.
13 Na miyangadap rekaniyan so dowa kataw a manga rarata a mama na pisenditan iran si
Nabot sii ko kamamasaan o manga taw a tig iran a "Inipaninta i Nabot so Tohan ago so
dato." Na giyoto a iniliyo iran sekaniyan ko siti na riyobak iran taman sa miyatay.
14 Oriyan iyan na piyakitero iran ki Disibil a "Miyarobak si Nabot na miyatay!"
15 So den so kiyanega on i Disibil a miyatay sekaniyan na pitero iyan ki Ahab a "Ika roo
den na tangana ngka so asinda i Nabot a da miyog o ba niyan reka pesaa ka miyatay
sekaniyan den."
16 So kiyanega on i Ahab na minggagaan somong ko asinda sa katengana niyan on.
17 Samaoto na pitero o Allah ki Iliyas a taga Tisbi a

18 “Ika roo den na go ka pakitoona ki Ahab a dato sa Israil a ndadato sa Samariya. Sisii
sekaniyan imanto ko asinda i Nabot ka somiyong roo sa katengana niyan on.
19 Teroa ngka on a 'Giyai i pitero o Allah: Ba ka da katamani ko kiyabonoa ngka ko taw
ago miyagaw ko tamok iyan?' Teroa ngka on a 'Giyai i pitero o Allah: Sii ko darpa a
piyanilaan on o manga aso so rogo i Nabot na ron penilai o manga aso so rogo o ka!' "
20 Kagiya mailay i Ahab si Iliyas na tig iyan a "Hey ridoay aken, miyatoon ako ngka
bes!"
"Miyatoon aken seka," a inisembag iyan, "ka pipesa ngka a ginawa ngka ko
kanggolaola sa marata ko kapekeilaya on o Allah.
21 Na giyai i pitero o Allah a 'Tenaan ko seka sa morala. Pelenganen ko so langon a
kebabadan reka a pepasen ko ko pamiliya ngka so oman i mama sii sa Israil ndatar so
oripen ago so di.
22 Mbinasaan ko so pamiliya ngka a lagid o inikidia ko ko pamiliya i Yarobowam a wata
i Nibat ago so pamiliya i Baasa a wata i Ahidiyas sabap sa piyakakerangit ako ngka ago
piyakandosa ngka so manga Israil.'
23 Na makapantag mambo ki Disibil na pitero o Allah a 'Sekaben o manga aso si Disibil
sii ko siti a Yasriil.
24 Saden sa ped ko pamiliya i Ahab a pematay ko siti na pegdasan o manga aso, na saden
sa pematay ko pangomaan na pengengen o manga papanok.' "
25 Da den a mama a lagid i Ahab a di niyan dii pesaan a ginawa niyan ko kanggolaola sa
marata ko kapekeilaya on o Allah ka pepangondoin sekaniyan i Disibil.
26 Piyakasisingay so manga olaola niyan ko kapesimba niyan sa manga barahala a lagid o
dii nggolaolaan o manga Amoriyo a piyamogaw o Allah ko inged sii ko kapesorongi ron
o manga Israil.
27 Kagiya maneg i Ahab angkai a manga katero na kinisi iyan so manga nditaren iyan na
minditar sa sako ago mipowasa. Pepekatorog sekaniyan a somosolot sa sako na dii
ndadalakaw a dii mboko.
28 Na pitero o Allah ko nabi Iliyas a

29 “Miyainengka a ka o ay kinipangalimbabaanen i Ahab sa ginawa niyan ko hadapan
aken? Sabap sa inipangalimbabaan iyan raken a ginawa niyan na di aken itena angkai a
morala ko pamiliya niyan sii ko masa niyan ka itena aken sii ko manga gawii o wata
iyan."
1 MANGA DATO 22
Si Yahosapat ago si Ahab
Sii ko soled o miyakatelo ragon na da den tidawa a Siriya ago giya Israil.
2 Ogaid na sii ko ikatelo ragon na si Yahosapat a dato sa Yodah na mimbisita ki Ahab a
dato sa Israil.
3 Sii ko kandodoo niyan na pitero i Ahab ko manga sanasanaan iyan a "Ba niyo di katawi
a rek tano a siti a Ramot Giliyad na da den a ba tano pinggolaola sa kakowaa tano ron ko
katatangana on o dato sa Siriya?"
4 Na iniise i Ahab ki Yahosapat a "Ba ka raken pagonot sa kanggobat ami sa Ramot
Giliyad?"
Inisembag i Yahosapat ko dato sa Israil a "Oway, makatitiyagar ako a datar ka a lagid
mambo o manga sondaro aken ago manga koda.
5 Ogaid na makimosawir ta pasin ko Allah."
6 Mandiyadi na piyakisogoan i Ahab so langon a manga nabi a manga pat gatos siran a
manga mama, na iniise iyan kiran a "Ba aken gobata a Ramot Giliyad, o di?"
"Ika roo," a inisembag iran, ka peladen o Allah ko lima ngka."
7 Ogaid na iniise i Yahosapat a "Ba da a nabi o Allah sii a nggolalan on so kakeisei ta ko

Allah?"
8 Somimbag si Ahab a "Aden pen a isa a mama a si Mikayas a wata i Imlah ogaid na
ipekegowad aken ka da den a mapiya a pekealamat iyan makapantag raken ka palaya den
marata."
"Di wadib o ba anan teroa o dato," a tig i Yahosapat.
9 Mandiyadi na tiyalowan i Ahab so isa ko manga sanasanaan iyan na tig iyan a "Wita
ngka raken nggagaan si Mikayas a wata i Imlah!"
So Miyaalamat i Mikayas makapantag ki Ahab
10 Samaoto na kioontod si Ahab ago si Yahosapat ko manga korsi iran sii ko darpa a
pegegikan sii ko gimowa a Samaria a kindiditar sa manga kimon a dato, na so langon o
manga nabi na pepangalamat sii ko hadapan iran.
11 So isa kiran a si Sidikiyas a wata i Kinaanah na miyakambaal sa potaw a manga panga
na inipanawatewag iyan a "Giyai i pitero o Allah: Ipenidong ka ini ko manga Isiriyanen
taman sa mabinasa siran!"
12 Na datar ai mambo so pekealamat o langon a ped a manga nabi a di iran dii teroon a
"Gobata ngka a Ramot Giliyad ka pekatabanen ka on o Allah!"
13 Na so mama a siyogo a merapit ki Mikayas na pitero iyan on a "Ilaya ngka man ka

maiisaisa so ped a manga nabi a pegalamaten iran so kapekadaag o dato. Na pakaayona
ngka on so katero o ka na pagalamata ngka bo so mapiya."
14 Ogaid na pitero i Mikayas a "Matamataan ko kaooyagoyag o Allah ka aya bo a

mapetero aken on na so bo so peteroon raken o Allah."
15 So kiyapakaoma niyan ko dato na iniiise on o dato a "Ba kami pakipetidawa sa Ramot
Giliyad, o di?"
"Ika roo den na go ngka daaga,” a inisembag iyan, "ka peladen o Allah ko lima ngka."
16 Na pitero on o dato a "Miyakapira ko seka den mapakasepa sa aya bo a peteroon ka

raken na so tito a benar sii ko Ingaran o Allah!?"
17 Mandiyadi na pitero i Mikayas a "Miyailay aken so langon a manga Israil a

miyamangiparak ko manga bobongan a lagid o manga bilibili a da a ba on petegikor, na
pitero o Allah a 'Giyangkai a manga taw na da a kadnan iran. Pakabalinga niyo siran
langon sa kalilintad.' "
18 Na tig i Ahab ki Yahosapat a "Ba ko reka da matero a da den a pegalamaten iyan a

mapiya makapantag raken ka marata bo den!"
19 Na pitero pen i Mikayas a "Na, pakinega ngka pen imanto so pitero o Allah! Miyailay
aken so Allah a moontod ko korsi iyan a ped iyan so langon a pepanalagad on sa
kasorgaan a kititindeg ko melilibeta on sii ko kawanan iyan ago diwang.
20 Na pitero o Allah a 'Antawaa i pekaagak ki Ahab sa kanggobata niyan sa Ramot
Giliyad kaan roo matay?', na mimbarambarang a sembag iran.
21 Sa kaposan na aden a isa a niyawa a miyadap ko Allah a tig iyan a 'Saken i magagak
on.'
22 “ 'Andamanaya?' a iniise o Allah.

" 'Song ako roo a pakapeteroon ko sa manga kabokegan so manga nabi i Ahab.'
" 'Ika roo na nggolaolaa ngka ini ka keagak ka sekaniyan,' a tig o Allah."
23 Na pitero pen i Mikayas a "Na giyanan i miyanggolaola, ka piyakatero o Allah angkai

a pepamokeg a niyawa a nggolalan ko manga ngari o langon a manga nabi ngka. Ka
kiyokom den o Allah a pemoralaan ka niyan."
24 Na giyoto a si Sidikiyas a wata i Kinaanah na miyobay ki Mikayas na tingel iyan so

bies iyan a iniise iyan on a "Anda miyokit so Roh o Allah ko kiyapakapoon iyan raken sa
kapakipembitiyarai niyan reka?"
25 Inisembag on i Mikayas a "Ketokawan ka amay ka pekasoled ka ko pageemaan a

rowang sa kapetepok ka!"
26 Na giyoto a inisogo o dato Ahab a "Dakepa niyo si Mikayas na pakakasoya niyo ki

Amon a so gobirnador ko siti ago sii ki Yowas a wata o dato
27 Na teroa niyo a 'Giyai i sogoan o dato: Kalabosowa niyo angkai a mama a da den a ba
niyo ron imbegay a rowar ko paan ago ig taman sa makakasoy ako a da kakaidi.'"
28 Na tig i Mikayas a "O pen o makakasoy ka a da kakaidi na da tero so Allah a

nggolalan raken!" Na inipagoman iyan tero a "Tanodi niyo so manga katero aken, sekano
langon a manga taw!"
Miyabono si Ahab sa Ramot Giliyad
29 Mandiyadi na lomiyalakaw si Ahab a dato sa Israil ago si Yahosapat a dato sa Yodah a

nggobat sa Ramot Giliyad.
30 Pitero i Ahab ki Yahosapat a "Amay ka makaoma ta roo a makipetidawa na
somasayan ako sa salakaw a taw. Ogaid na seka, na solot ka sa nditaren a dato." Na
somiyong so dato sa Israil ko katidawa a somasayan.
31 Samanaya na siyogo o dato sa Siriya so telo polo ago dowa a manga komandir ko
manga karo niyan a tig iyan a "Di kano pakipetidawa ko apiya antawaa a maito o di na
mala a liyo bo ko dato sa Israil!"
32 Na so kiyailaya o manga komandir ki Yahosapat na aya katao iran on na "Mataan a
giyoto so dato sa Israil!" na miyantap siran on sa kanggobata on. Ogaid na so kiyagoraok
i Yahosapat
33 Na miyailay o manga olowan a kena a ba giyoto so dato sa Israil na ginekan iran
somaloba.
34 Ogaid na so isa a sondaro a Isiriyanen a miyanarbak mana na miyasalak iyan masogat

so dato sa Israil sii ko pageletan o sompatan o raben iyan. Na inigoraok o dato ko
mangongolin ko karo niyan a "Peto ka! Liyon ako ngka ko dii tidawaan ka kiyapalian
ako!"
35 Sii ko miyababasa alongan na pekeisegan so dii katidawa, na maaaray so dato Ahab sii
ko karo niyan a makasasangor ko manga Isiriyanen. So rogo o pali iyan na tomiyoga ko
didalem o karo, na sii ko kiyagagawii niyan na miyatay sekaniyan.
36 Sii ko kasedep o alongan na miyakalangkap so goraok sii ko manga sondaro a "Oman i
mama na baling den ko siti niyan sii ko inged iyan!"
37 Na miyatay so dato Ahab a miyawit sa Samariya na minilebeng roo.

38 Kiyaonaban so karo niyan sii ko ranaranaw roo sa Samariya (a dii pepaigoan o manga
sondal) na piyanilaan o manga aso so rogo iyan a aya kiyatoman o miyatero o Allah.
39 So ped a miyanga sosowasowa ko kandadato i Ahab a rakes on so langon a

pinggolaola niyan, so torogan a biyangon iyan a piyagaremaan a tipay ago so manga siti a
pikotaan iyan na palaya misosorat ko 'Ribro a Totolan ko manga Dato sa Israil.'
40 Kagiya matay si Ahab na si Ahasiyas a wata iyan i miyakasambi on a dato.
Si Yahosapat a Dato sa Yodah
41 Si peman si Yahosapat a wata i Asa i miyadato sa Yodah sii ko ikapat ragon a

kandadato i Ahab sa Israil.
42 Telo polo ago lima ragon a idad iyan ko kiyadato iyan na miyakandato sa Yodah sa
miyakadowa polo ago lima ragon. Aya ngaran i ina iyan na si Asobah a wata i Sili.
43 Siyoson iyan so langon a okitokit i Asa a ama iyan na da niyan den awai, ka
miyakanggolaola sekaniyan sa ontol ko kapekeilaya on o Allah. Apiya pen oto na da
mabinasa so manga aparan ko manga barahala sii ko manga bobongan, na itataros roo den
o manga taw so di iran on dii kakorban ago kapetotong sa doka.
44 Makalilintad mambo si Yahosapat ago so dato sa Israil.
45 So ped a miyanga sosowasowa ko kandadato i Yahosapat ago so miyanga papasad

iyan ago so kiyapakitidawa iyan na palaya den misosorat ko 'Ribro a Totolan ko manga
Dato sa Yodah.'
46 Piyakaawa iyan ko inged so lamba ko manga mama a dii sondal roo ko manga
pesimbaan ko barahala a ndodoo den sii ko kandadato o ama iyan.
47 Samaoto na da a dato roo sa Idomiya ka matag akila a dii ndato.
48 Miyakimbaal mambo si Yahosapat sa manga kapal a dii indagang a song sa Opir sa

kapekowa iran sa bolawan, ogaid na da siran den makapelayalayag ka kiyabinasaan.
49 Samaoto na si Ahasiyas a wata i Ahab na pitero iyan ki Yahosapat a "Pakapagonotaan
ta so manga pagtaw ta sa kapelayalayag iran, ogaid na da iyog si Yahosapat.
50 Kagiya matay si Yahosapat na inikobor ko pekoboran ko manga apo iyan sii ko siti o
Daod. Na si Yahoram a wata iyan i miyakasambi on a dato.
Si Ahasiyas a Dato sa Israil
51 Si Ahasiyas a wata i Ahab i miyadato sa Israil sii sa Samariya ko ikasapolo ago pito
ragon a kandadato i Yahosapat na miyakandato sa Israil sa miyakadowa ragon.
manga okitokit o ama iyan a si Ahab ago so ina iyan a Disibil ago so manga okitokit i
Yarobowam a wata i Nibat a piyakandosa niyan so manga Israil.
53 Miyangongonotan sekaniyan ago sominimba ko katohanan a Baal na piyakakerangit
iyan so Allah a Tohan o Israil a lagid den o pinggolaola o ama iyan.
2 MANGA DATO
2 MANGA DATO 1
Si Iliyas ago so Dato Ahasiyas
Sii ko kiyapatay i Ahab na somiyopak a inged a Mowab sa Israil.

2 Miyakaisa a gawii na miyaolog so dato Ahasiyas poon ko liyoliyowan ko rowang iyan
ko kaporoan o torogan iyan roo sa Samariya na kiyapalian den. Sabap roo na somiyogo
sekaniyan sa manga mama a tig iyan kiran a "Ikano roo na isei niyo so Baal Sibob a aya
tohan sa Ikron kaan aken katokawi o pekabager ako sangkai a pali."
3 Ogaid na so malaikat o Allah na pitero iyan ki Iliyas a taga Tisbi a "Lalakaw ka na go

ngka balaka so manga sogo o dato sa Samariya na iseen ka kiran a 'Ino kano song ko Baal
Sibob a tohan sa Ikron sa kapagado niyo ron? Ba da a Tohan sa Israil?'
4 Kagiya ka maoto na giyai i pitero o Allah: Di ka den keakar ko katri a iigaan ka.
Mataan a petay ka!' " Na pinggolaola i Iliyas so inisogo on o malaikat.
5 Kagiya komasoy so manga sogo ko dato na iniise iyan kiran a "Ino kano kesoy?"
6 “Aden a miyakitoona rekami a mama," a inisembag iran. "Na pitero iyan rekami a
'Kasoy kano ko dato a somiyogo rekano na teroa niyo ron a Giyai i pitero o Allah: Ino ka
sogo sa manga mama sa kapagado iran ko Baal Sibob a tohan sa Ikron? Ba da a Tohan sa
Israil? Sabap sa pinggolaola ngka ini na di ka den keakar ko katri a iigaan ka ka mataan a
petay ka!' "
7 Na iniise kiran o dato a "Antonaa i paras o mama a miyakitoona rekano a pitero iyan
ai?"
8 Inisembag iran a "Ndiditar sekaniyan sa bombol a ayam na sesambitan sa kobal."

"Giyoto si Iliyas a taga Tisbi!" a tig o dato.
9 Mandiyadi na somiyogo so dato ki Iliyas sa isa a kapitan a oonotan o lima polo kataw a
manga sondaro niyan. Miyaoma iran si Iliyas a moontod ko poro a bobongan, na
tiyakedegan o kapitan a tig iyan on a "Hey nabi o Tohan, inisogo o dato a tondagay ka!"
10 Inisembag on i Iliyas a "O sogo ako o Tohan na makatana so apoy a poon sa langit a
lenganen kano niyan a rakes o lima polo kataw a manga taw ngka!" Na sarta den a
miyakatana so apoy a poon sa langit na iniped iyan so kapitan ago so manga sondaro
niyan.
11 Na somiyogo peman so dato ki Iliyas sa salakaw a kapitan a rakes o lima polo kataw a
manga sondaro niyan. Na pitero o kapitan a "Hey nabi o Tohan, pitero o dato a tondagay
ka nggagaan!'"
12 “O sogo ako o Tohan," a tig i Iliyas, "na makatana so apoy a poon sa langit a lenganen
kano niyan a rakes o lima polo kataw a manga taw ngka!" Na sarta den a minitana so
apoy o Tohan a poon sa langit na iniped iyan so kapitan ago so manga sondaro niyan.
13 Na somiyogo peman so dato sa ikatelo a kapitan a rakes o lima polo kataw a manga
sondaro niyan. Tiyakedegan angkai a ikatelo a kapitan si Iliyas na somiyodiyod ko
hadapan iyan a miyangangampedian on a tig iyan a "Hey nabi o Tohan, kapediin ako ngka
ago so lima polo kataw a manga sondaro aken na pagongowi ngka so manga niyawa ami
a manga oripen ka!
14 Ilaya ngka man ka so paganay ago so ikadowa a kapitan a rakes o langon a manga taw
iran na iniped o apoy a miyakapoon sa langit. Ogaid na imanto na pagongowi ngka so
niyawa ko!"
15 Na pitero o malaikat o Allah ki Iliyas a "Tondagay ka den a ped iyan. Di ngka
sekaniyan keleken." Na miyonot on si Iliyas na somiyong ko dato.
16 Pitero i Iliyas ko dato a "Giyai i pitero o Allah: Ino ka sogo sa pemakaado ko Baal
Sibob a tohan sa Ikron? Ba da a Tohan sa Israil? Sabap sa miyanggolaola ngka ini na di
ka den keakar ko katri a iigaan ka. Mataan a petay ka!"
17 Na miyatay si Ahasiyas a aya kiyatoman o pitero o Allah a miyakanggolalan ki Iliyas.

Sabap sa da a wata iyan a mama na si Yoram na aya on miyakasambi a dato sii ko
ikadowa ragon ko kiyandato i Yahoram a wata i Yahosapat a dato sa Yodah.
18 So ped a miyanga sosowasowa ko kandadato i Ahasiyas ago so manga pinggolaola
niyan na palaya den misosorat ko 'Ribro a Totolan ko manga Dato sa Israil.'
2 MANGA DATO 2
Minibayaw si Iliyas sa Kasorgaan
Miyaoma so gawii a kimbayaon o Allah ki Iliyas sa kasorgaan a pegawidawidan o

mabager a ndo. Pelalakaw si Iliyas ago si Ilisas a poon sa Gilgal
2 Na pitero i Iliyas ki Ilisas a "Sii ka den, ka siyogo ako o Allah sa Bitil."
Ogaid na tig i Ilisas a "Mataan ko kaooyagoyag o Allah ago kaooyagoyag ka ka di ko
seka den ngganatan." Na tomiyaros siran sa Bitil.
3 So sagorompong a manga nabi sii sa Bitil na somiyong ki Ilisas na iniise iran on a

"Katawan ka a so Allah na mbelagen iyan reka imanto so kadnan ka?"
"Oway, katawan ko," a inisembag i Ilisas, "ogaid na di niyo dii teroa."
4 Na pitero i Iliyas ki Ilisas a "Sii ka den ka siyogo ako o Allah sa Yariko."

Ogaid na inisembag i Ilisas a "Mataan ko kaooyagoyag o Allah ago so kaooyagoyag ka
ka di ko seka den ngganatan." Na tomiyaros siran sa Yariko.
5 So sagorompong a manga nabi sa Yariko na somiyong ki Ilisas na iniise iran on a

"Katawan ka a mbelagen reka o Allah imanto so kadnan ka?"
"Oway, katawan ko," a tig i Ilisas, "ogaid na di niyo dii teroa."
6 Na pitero i Iliyas ki Ilisas a "Sii ka den ka siyogo ako o Allah sa Lawasaig a Yordan."
Na tig i Iliyas a "Mataan ko kaooyagoyag o Allah ago so kaooyagoyag ka ka di ko seka
den ngganatan." Na tomiyaros siran den lomalakaw.
7 So lima polo kataw ko sagorompong a manga nabi na miyamanondog kiran na

miyamanindeg a maawat ki Iliyas ago si Ilisas ko kiyatareg iran ko kilid a Yordan.
8 Inendaan i Iliyas so gerab iyan na liyolon iyan na inibadas iyan ko ig. Na miyabagi so
ig sa kawanan ago sa diwang na rominipag siran on a dowa ko mamara a lopa.
9 Kagiya makaripag siran na tig i Iliyas ki Ilisas a "Teroa ngka raken i kiyogop aken reka
sa di aken reka pen kakebelag?"
"Pengnin ko a kabegan ako sa dowa takep ko gees ka," a inisembag i Ilisas.
10 “Maregen a betad so piyangni ngka," a tig i Iliyas, "ogaid na o mailay ako ngka ko
kakebelag aken reka na rek ka anan. Na o di, na da."
11 Sii ko kapelalakaw iran a di siran dii mbitiyarai na tekaw den a miyakabayan a karo a
pekedeg sii ko pageletan iran a petoyoken o manga koda a pekedeg na minibayaw si Iliyas
sa langit a piyagawidawidan o mabager a ndo.
12 Miyailay ini i Iliyas na inipelalis iyan a "Ama aken! Ama aken! So karo o Israil ago
so manga koda on!" Na miyada a kapekeilaya niyan ki Iliyas, na kinisi iyan so gerab iyan
na miyabagi.
13 Piyorot iyan so gerab a miyaolog a poon ki Iliyas na komiyasoy a tominindeg ko kilid

a lawasaig a Yordan.
14 Na inibadas iyan so gerab i Iliyas ko ig a inilalis iyan a "Anda so Allah a Tohan i
Iliyas?" So kinibadasen iyan on ko ig na miyabagi sa kawanan ago sa diwang na
rominipag sekaniyan on.
15 So kiyailaya rekaniyan o sagorompong a manga nabi a poon sa Yariko na pitero iran a

"So gees i Iliyas na minitemo ki Ilisas!" na somiyong siran on a magalaw ron na
miyamanodiyod ko hadapan iyan.
16 “Ilaya ngka man," a tig iran, "ka aden a lima polo rekami a manga babager a mama.
Pakalalakawa ngka siran na pakimbanogen ka kiran so kadnan ka. Ka masiken a
inibayaw sekaniyan o Roh o Allah na inibetad iyan ko isa a palaw o di na sii ko isa a
balintad."
"Di," a tig i Ilisas, "di ngka siran sogoa."
17 Ogaid na tigel iran sekaniyan taman sa miyaya o ba da miyog. Na tig iyan a "Sogoa
ngka siran." Na piyakalalakaw iran so lima polo a manga mama a mimbabanog ko
miyakatelo gawii ogaid na da iran den matoon.
18 Kagiya komasoy siran ki Ilisas na pitero iyan kiran a "Ba aken rekano da teroa a di
kano pelalakaw?"
So Kiyabolongi ko Ig
19 So manga mama ko siti na pitero iran ki Ilisas a "Ilaya ngka man ka giyangkai a siti na
mapiya a kapakambebetad iyan a pekeilay ngka. Ogaid na marata so ig on na di
pagodaren so lopa."
20 “Witi ako niyo sa bago a ladiya," a tig i Ilisas, "na tagoi niyo sa timos." Na inowit iran
on.
21 Lominiyo sekaniyan ko bowalan a pekepoonan o ig na iniitog iyan on so timos a tig
iyan a "Giyai i pitero o Allah: Biyolongan aken angkai a ig. Di den peman kasabapan ko
kapatay o di na so di kapagodara ko lopa."
22 Na lalayon den mapiya angkoto a ig taman imanto a giyoto so pitero i Ilisas.
Piyagongatongat si Ilisas
23 Giyanatan i Ilisas a Yariko na somiyong sa Bitil. Sii ko kapelaakaw niyan ko lalan na

aden a mililiyo ko inged a manga bago a mama a piyagongatongat iran sekaniyan a di iran
dii teroon a "Hey opaw, awa ka sii! Opaw, awa ka sii!
24 Diningilan iyan siran a tintengan iyan na inisinta iyan siran sii ko Ingaran o Allah. Na
sarta den a dowa a barowang a lominiyo ko kalasan na piyangaros iran so pat polo ago
dowa ko manga bago a mama.
25 Na tomiyaros si Ilisas ko Palaw a Karmil na ipoon roo na komiyasoy sa Samariya.
2 MANGA DATO 3
Somiyopak a Mowab
Sii ko ikasapolo ago walo ragon ko kandadato i Yahosapat a dato sa Yodah na si Yoram a
wata i Ahab i miyadato sa Israil sii sa Samariya na miyakasapolo ago dowa ragon a
kiyandato iyan.
2 Miyakanggolaola sekaniyan sa marata ko kapekeilaya on o Allah ogaid na kena o ba
lagid o kamarataan a pinggolaola i ama iyan ago si iyan a Disibil. Giba iyan so barahala a
Baal a pimbaalan i ama iyan.
3 Apiya pen oto na pesogoken iyan so manga dosa i Yarobowam a wata i Nibat a
piyakisogok iyan pen ko manga Israil, na da niyan ai talikodi.
4 Samaoto na si Misa a dato sa Mowab na pepangoyag sa manga bilibili, na oman ragon

na pembayad sa bowis ko dato sa Israil a magatos nggibo a manga bilibili a rakes o
bombol o magatos nggibo a manga mama a bilibili.
5 Ogaid na sii ko kiyapatay i Ahab na somiyopak si Misa ko dato sa Israil.
6 Sabap roo na gomiyanat so dato Yoram a poon sa Samariya na tinimo iyan so langon a
manga sondaro sa Israil.
7 Na piyakiwit iyan pen angkai a katero ki Yahosapat a dato sa Yodah: "Somiyopak raken
so dato sa Mowab. Ba ako ngka pagonoti sa kipetidawaan tano ron?"
"Magonot ako reka," a inisembag iyan. "Makatitiyagar ako den a lagid ka ago so
mambo so manga pagtaw aken ago manga koda.
8 Anda tano pagokit sa kanggobat tano?"
"Sii tano magokit ko disirto sa Idom," a inisembag i Yoram.
9 Mandiyadi na lomiyalakaw so dato Yoram a oonotan o dato sa Yodah ago so dato sa

Idomiya. Kagiya maipos so pito gawii a pepekaalibit a kiyalalakaw iran na miyalengan so
ig iran na da den a ba keinom o manga sondaro o di na so manga ayam a pakaoonoten
iran.
10 “Aidaw, antonaa i sowaan tano?" a tig o dato sa Israil. "Ba aya initimo rektano o
Allah a telo a dato na giya bo a kapelada niyan rektano ko kapaar a Mowab?"
11 Ogaid na iniise i Yahosapat a "Ba da a nabi o Allah sii a nggolalan on so kakeisei tano
ko Allah?"
Inisembag o isa ko sanasanaan o dato sa Israil a "Sisii si Ilisas a wata i Siyapat a
salinggogopa gowani i Iliyas."
12 Tig i Yahosapat a "Mataan a tero so Allah a nggolalan rekaniyan!" Na somiyong on so

telo a manga dato.
13 Na pitero i Ilisas ko dato sa Israil a "Ino aken seka keogopi? Song ka ko manga nabi o
ama a ka ago so ina a ka."
"Di," a inisembag o dato Yoram, "ka so den so Allah i tominimo rekami a telo a dato sa
kapelada niyan rekami ko kapaar a Mowab."
14 Na tig i Ilisas a "Mataan ko kaooyagoyag o Allah a Lebi a Mamaapaar a

pepangongonotanan ko, ka o di aken pagaadatan si Yahosapat a dato sa Yodah na di ko
sekano den pagilain o di na tegoon sa ginawa.
15 Ogaid na witi ako ngka imanto sa pangongotiyapi."
Na so di niyan dii kapangotiyapi na minitemo ki Ilisas so gees o Allah
16 Na pitero iyan a "Giyai so kabasa o Allah: 'Penoa niyo a manga kakar angkai a
balintad,'
17 Ka pitero o Allah a 'Da den a ba niyo keilay a ndo aya pen o ba oran na bapiya pen oto
na kepeno a ig angkai a balintad, na sekano ago so manga pangangayamen iyo ago so ped
a manga ayam iyo na pekainom.'
18 Ogaid na malebod ai a mapenggolaola o Allah ka peladen iyan rekano pen a Mowab.
19 Tebanen iyo so oman i kokotaan a siti ago oman i mala a inged. Kepata iyo so oman i
mapiya a kayo, keolen iyo langon so manga paridi na kebinasa niyo a manga ator so oman
i dii mbabasokan."
20 Sii ko talondog a kapipita ko oras a kapesepaat sa soasoat na aden a ig a petoga roo a

makapopoon sa Idom! Na miyapeno a ig so kalopaan.
21 Kagiya maneg o manga Mowabiyo a miyakatalingoma so manga dato a nggobat kiran

na piyakitawag iran so oman i mama a matoa mangoda a pekakepit sa gomaan na
piyakakaden iran siran ko temanaan a Mowab.
22 Sii ko kiyapagnaw iran ko teked a kapipita na pesaleg so alongan ko ig roo ko sabala a
balintad, na mariga a kapekeilaya on o manga Mowabiyo a lagid o rogo.
23 “Rogo oto!" a tig iran. "Mitidawa angkoto a manga dato na biyono o oman i isa so
ped iyan. Itano roo ka tebanan tano so kampo iran!"
24 Ogaid na so kiyapakaoma iran ko kampo na mimbowat so manga Israil na

miyakitidawa kiran taman sa miyapakapalagoy iran siran, na peketeden iran so manga
Mowabiyo a pepamonoon iran sii ko inged iran.
25 Piyaminasa iran so manga siti iran, na so oman i mama na lomibad sa ator ko oman i
dii mbabasokan taman sa kiyasapengan. Piyangolen iran langon so manga paridi na
piyata iran so oman i mapiya a kayo. Sa kaposan na giya bo a Kir Harasit i miyalamba,
ogaid na linikopan ai o pepamanalibat na giyobat iran pen.
26 Kagiya mailay o dato sa Mowab a petebanen sekaniyan na piyakaonot iyan so pito

gatos a sondaro niyan a kipepedang na tipengan iran lomeseb so manga sondaro o dato sa
Idomiya kaan makapalagoy ogaid na da iran magaga.
27 Sabap roo na kinowa niyan so kaka a wata iyan a mama a aya on pekasambi a dato na
inisoasoat iyan a petotongen sii ko kota o siti. Sabap roo na tanto a kiyalekan so manga
Israil na mipeto siran a miyamangasoy ko inged iran.
2 MANGA DATO 4
So Lana o Balo
Miyakaisa a gawii na so balo o mama a ped ko sagorompong a manga nabi na somiyong

ki Ilisas a tig iyan on a "So oripen ka a karoma ko na miyatay, na katawan ka a inikalek
iyan so Allah. Ogaid na miyakaoma so miyagotang on ka kowaan iyan so dowa kataw a
wata aken a manga mama a pengongoripenen iyan."
2 “Andamanaya i kakeogopi aken reka?" a iniise on i Ilisas. "Teroa ngka raken o antonaa
i sisii ko walay ngka?"
"Da den a ba aken san rek," a tig o babay, "a liyo ko maito a lana."
3 Tig i Ilisas a "Pamanipanik ka ko manga siringan ka na pamangni ka kiran langon sa

manga omoy a da a tago iyan. O ba ka pangni sa matag maito.
4 Na soled kano ago so manga wata a ka ko walay na lekebi ngka so pintoan. Ododa
ngka so lana ko langon o manga omoy na igira a miyapeno so isa on na pesilin ka."
5 Na giyanatan iyan si Ilisas na ininggolalan iyan so pitero iyan. Piyangowit on o manga

wata iyan so manga omoy na pepangododan iyan sa lana.
6 Kagiya mapeno langon so manga omoy na pitero iyan ko wata iyan a "Witi ako ngka
pen sa ped."
Ogaid na tig iyan on a "Da den a miyalamba a omoy." Na gominek tomoga so lana.
7 Somiyong sekaniyan ko nabi Ilisas na piyanotol iyan on ai. Na tig iyan a "Ika roo na
pesaa ngka so lana na bayadi ngka so otang ka, na mipegoyag iyo ago so manga wata a ka
so miyalamba a pirak."
Si Ilisas ago so Babay sa Sonim
8 Miyakaisa alongan na somiyong si Ilisas sa Sonim. Aden a tatamoken a babay a

mababaling roo a miyoyo rekaniyan maot a ken. Ipoon den sangkoto a gawii na igira a
pesegad roo si Ilisas na pegaot roo koman.
9 Na pitero o babay ko karoma niyan a "Katawan ko a giyangkai a mama a lalayon sii
pegaot na soti a nabi o Tohan.
10 Mbaal ta sa maito a rowang ko paga na tagoan ta sa katri, lamisaan, korsi ago palitaan
para rekaniyan kaan on makatareg sekaniyan igira a pepekatalingoma rekta."
11 Miyakaisa alongan ko kiyapakaoma roo i Iliyas na miyanik ko rowang iyan sa poro na

miniga on.
12 Pitero iyan ki Gihasi a talasogoay niyan a "Tawaga ngka so babay." Na tiyawag iyan
na miyangadap on.
13 Na tig i Ilisas ki Gihasi a "Iseen ka on a 'Antonaa i kibalas ami reka sabap ko langon a
mapiya a pinggolaola ngka rekami a kiyamaregenan ka? Ba kami ndolon ko dato para
reka, o di na sii ko komandir o manga sondaro?' "
Inisembag o babay a "Rek aken so langon taman a kailangan aken sii ko manga taw
aken."
14 “Antonaa den i kibalas ta on?" a iniise i Ilisas ki Gihasi.

Tig i Gihasi a "Da a wata iyan a mama na miyalokes den so karoma niyan."
15 “Na, tawaga ngka peroman," a tig i Ilisas. Na kagiya komasoy na tominindeg so babay
ko pintoan
16 Na pitero on i Ilisas a "Lagid ai a masa ko telondog a ragon na pekasakopo ka sa wata
a ka a mama."
"Di, kadnan ko," a tig iyan, di ngka pemokegi so oripen ka, hey nabi o Tohan!"
17 Ogaid na miyaogat so babay na sii ko tomiyalondog a ragon a lagid den oto a masa na
mimbawata sa mama a giyoto den so miyatero on i Ilisas.
18 Miyakala so wata na miyakaisa alongan na lominiyo sekaniyan ki ama iyan a sisii ko

dii meraragon.
19 Na minitekaw den a minigoraok iyan a "Masakit a olo aken! Masakit a olo aken!"
"Awidi ngka ki ina iyan!" a tig o ama iyan ko isa a talasogoay.
20 Kagiya kaawidan iyan on so wata na aabenen i ina iyan taman ko kaoto a alongan na
miyatay.
21 Na inawidan iyan sa poro na piyakaiga iyan ko katri o nabi o Tohan na likeban iyan so
pintoan a lominiyo.
22 Piyakitawag iyan so karoma niyan na pitero iyan on a "Pakaonota ngka raken so isa ko
manga talasogoay ago kimar kaan ako makanggagaan somong ko nabi o Tohan ago
makakasoy."
23 “Ino ka on song imanto," a iniise iyan on. "Kena a ba saribolan imanto o di na gawii a
idedeke."
"Na den," a tig o babay.
24 Siniyaan iyan so kimar na pitero iyan ko talasogoay niyan a "Pengonaan ka na di ka
pekalombat taman sa di ko reka teroon."
25 Na gomiyanat sekaniyan a somiyong ko nabi o Tohan roo sa Palaw a Karmil.
25 So kiyailaya on i Ilisas ko mawatan pen na tig iyan ki Gihasi a "Ilaya ngka man, kaoto
so babay a taga Sonim!
26 Palalagowi ngka na go ngka alawa na iseen ka on a 'Mapipiya ka? Mapipiya so
karoma ngka? Mapipiya so wata a ka?' "
"Palaya den mapipiya," a tig o babay.
27 So kinisampay niyan ko nabi o Tohan na siyodiyodan iyan ago kiyapetan iyan so ai

niyan. Inobay i Gihasi ka itolod iyan, ogaid na tig i Ilisas a "Di ngka petekora ka tanto a
mararata a ginawa niyan na pepagemaan raken o Allah; da niyan raken teroa o ino to."
28 “Ba ako reka miyangni sa wata a mama, kadnan ko?" a tig o babay. "Ba ko reka da
matero a di ngka teralon so panginam aken?
29 Na pitero i Ilisas ki Gihasi a "Tiyagar ka den ko kapelalakaw! Awidi ngka so teken

aken na palalagoy ka! O aden a kebalak ka na di ngka selama, na o aden a selam reka na
di ngka den sembaga. Sekoon ka so teken aken ko paras o wata."
30 Ogaid na tig o ina o wata a "Matamataan ko kaooyagoyag o Allah ago so kaooyagoyag

ka ka di ko seka den ngganatan." Na giyoto a mimbangon si Ilisas na miyonot ko babay.
31 Miyona kiran si Gihasi na iniseko iyan so teken ko paras o wata ogaid na da den a ba
on karina ko kaoyagoyag. Mandiyadi na komiyasoy si Gihasi a makipetoona ki Ilisas na
pitero iyan on a "Da den makanaw so wata."
32-33 Kagiya misampay si Ilisas ko walay na somiyoled ko rowang a sekaniyan bo na

miyailay niyan so wata a makaiiga a maatay sii ko katri niyan. Na likeban iyan so pintoan
na miyangangarapan ko Allah.
34 Somiyong sekaniyan ko katri na gipean iyan so wata a makapepantag so ngari iran, so
manga mata iran ago so manga barokan iran. Na sii ko kagegepei niyan on na miyakayaw
so lawas o wata.
35 Mimbangon si Ilisas na milakalakad a dii kesakasoy ko rowang na komiyasoy ko katri
na gipean iyan peman so wata. Miyakambaan so wata sa miyakapito na bikar iyan a mata
niyan.
36 Tiyawag i Ilisas si Gihasi na pitero iyan on a "Talowi ngka so ina o wata" na

pinggolaola niyan. Kagiya makaoma so babay na tig i Ilisas a "Kowaa ngka so wata a
ka."
37 Na somiyodiyod so babay sii ko ai niyan, na kinowa niyan so wata iyan na lominiyo.
So Pakatowa sii ko Koden

38 Komiyasoy si Ilisas sa Gilgal na tataonen angkoto a inged sa masa oto. Miyakaisa a
gawii a malilimod so sagorompong a manga nabi a ped i Iliyas na pitero iyan ko
talasogoay niyan a "Datolen ka so mala a koden na tindai ngka sa biyobog a makan
angkai a manga mama."
39 So isa kiran na lominiyo ko pangomaan a penimo sa manga leletaan. Miyakatoon sa

matag baden pepamangto a waged na kominowa sekaniyan ko onga niyan a manga pangi
sa taman sa miyakena niyan. Kagiya komasoy na piyangarad iyan na tiyago iyan ko
biyobog a ititinda ko koden apiya pen di iran katawan o antonaa den oto.
40 Piyanangel so biyobog a ken o manga mama ogaid na so den so kiyataami ran on na
minigoraok iran a "Hey nabi o Tohan, aden a pekapatay sii ko koden!" Na di siran on
pekakan.
41 Tig i Ilisas a "Kowa kano sa arina." Tiyago iyan ai ko koden na tig iyan a "Pangenata
niyo ko manga mama a makan iran." Na da den a ba pekabinasa ko koden!
So Kiyapakakana ko Magatos a Taw
42 Miyakaisa peman a gawii na miyakaoma a mama a poon sa Baal Siyalisa a inowitan

iyan so nabi o Tohan sa sako a gopen piragon a manga onga a pereperan iyan ago dowa
polo timan a paan a pasad ko paganay a iniyonga o bantad iyan. Na tig i Ilisas ko
talasogoay niyan a "Began ka ko manga mama a makan iran."
43 “Andamanaya i kapekatokida ko sii ko magatos a taw?" a iniise iyan.

Na pitero peman i Ilisas a "Began ka ko manga mama a makan iran ka giyai i pitero o
Allah: Pekakan siran a aden pen a kesama on."
44 Na piyakatokid iyan kiran na komiyan siran a aden pen a miyasama on a aya
kiyatoman o miyatero o Allah.
2 MANGA DATO 5
So Kiyabolongi ko Bowa i Naaman
Samaoto na si Naaman a so komandir o manga sondaro o dato sa Siriya na mala ago

pageedatan a mama ko kapekeilaya on o kadnan iyan sabap sa nggolalan rekaniyan na
bigan o Allah a Siriya sa kiyapakataban. Mawaraw sekaniyan a sondaro ogaid na aden a
bowa niyan.
2 Sii ko isa a kiyasondoli o manga Isiriyanen sa Israil na miyakabiyag siran sa raga, na

pepanalagad sekaniyan ko karoma i Naaman.
3 Miyakaisa alongan na pitero o raga ko bai niyan a "O ba bo makasong so kadnan aken
ko nabi a sisii sa Samariya! Kebolongan iyan on so bowa niyan."
4 Na somiyong si Naaman ko dato sa Siriya na piyanotol iyan on so pitero o raga a poon

sa Israil.
5 “Ika roo den," a tig o dato, "song ka den ko dato sa Israil ka pekawit ako ron sa sorat a
keawidan ka."
Mandiyadi na gomiyanat si Naaman a maawid sa telo gatos ago pat polo ka kilo a
pirak, pito polo ka kilo a bolawan ago sapolo ka sokoba a nditaren.
6 Aya oni o sorat a inowit iyan ko dato sa Israil na "Giyangkai a sorat na aya ngka kikilala
ko oripen aken a si Naaman a siyogo aken reka kaan ka kabolongi so bowa niyan."
7 So den so kiyabatiyaa on o dato sa Israil na kinisi iyan so kimon iyan a tig iyan a " Ino
ako pekawiti o dato sa Siriya sa mama a pekibolongan iyan raken so bowa niyan? Ba ako
Tohan a ba pekapatay ago pekaoyag? Ilaya niyo man ka penabasabap sekaniyan sa
kapakambono ami!"
8 Kagiya maneg i Ilisas a kinisi o dato so kimon iyan na piyakitero iyan on "Ino ngka
kisia so kimon ka? Pakasonga ngka raken angkoto a mama kaan iyan katokawi a aden a
nabi sii sa Israil."
9 Mandiyadi na somiyong roo si Naaman a rakes o koda iyan ago karo na tomiyareg ko
pintoan o walay i Iliyas.
10 Na piyakiliyowan i Ilisas sa sogo a tig iyan ki Naaman a "Ika roo den na go ngka onabi
a ginawa ngka sa makapito sii ko lawasaig a Yordan ka mapekaasal so sapo o ka na
kelompiyowan ka."
11 Ogaid na miyawa roo si Naaman a pekerarangitan a ipenarotaro iyan a "Aya katao ko

ron na ba mataan a peliyowan ako niyan a tindeg ago petelo ko Ingaran o Allah a Tohan
iyan a ipemayapay niyan a lima niyan ko liyawaw o bowa na mbolongan ako niyan.
12 Ba di giya Abana ago giya Parpar a manga lawasaig sa Damasko i lebi a mapiya a di
so apiya antonaa a lawasaig sa Israil? Ba ako ron di makapengonab ago kelompiyowan?"
Na mipeto si Naaman na miyawa roo a pekerarangitan.
13 Ogaid na miyobay rekaniyan so manga oripen iyan a tig iran a "Ama ami, o iniinsarat
reka o nabi a nggolaola ka sa mala a nganin na ba ngka di penggolaolaa? Na ay taralebi
pen o teroa niyan reka a ba ka den pangonab na kelompiyowan ka?"
14 Na giyoto a tomiyondagay sekaniyan sa Yordan na inisineb iyan on a ginawa niyan sa
miyakapito a so den so pitero on o nabi o Tohan, na miyakaasal so sapo iyan a lagid o
sapo o bago a mama na miyapakapiya sekaniyan den.
15 Mandiyadi na komiyasoy si Naaman ko nabi o Tohan a rakes on so langon a manga

taw niyan. Miyangadap siran on na tig i Naaman a "Imanto na katawan ko a da den a
Tohan sa dalem a doniya a liyo ron a sisii sa Israil! Kapedipedi ka bo na tarimaa ngka so
manga pamemegayan aken."
16 Ogaid na tig i Ilisas a "Matamataan ko kaooyagoyag o Allah a pepangongonotanan ko

ka di ako den terima sa apiya antonaa." Na apiya pen tigel sekaniyan i Naaman na minda
den.
17 “O di ka pagiyog," a tig i Naaman, "na kapedipedi ka bo na pakakowaa ko ngka sa
bote a saden sa kekena o dowa a manga mola a kewit aken ko inged aken. Ka ipoon
imanto na di ako den sepaat sa petotongen a soasoat o di na ba ako pekorban sii ko apiya
antonaa a tohan, ka so bo so Allah.
18 Ogaid na pengini ko a karilaan ako o Allah sangkai a isa a betad a igira a somiyoled so
dato a kadnan aken ko timplo o katohanan a Rimon a sodiyod on a aarain sekaniyan a
barokan aken na pengnin ko a karilaan ako o Allah igira a pepekasodiyod ako ron
mambo."
19 “Baling ka den sa da a rayorayo a ginawa," a tig i Ilisas.

Kagiya malo den kawatanan si Naaman
20 Na si Gihasi a talasogoay i Ilisas a nabi o Tohan na miyapamikir iyan a "Tanto a
piyakalebodan o kadnan aken angkai a Isiriyanen a si Naaman ko da niyan katarimaa ko
witowit iyan on. Na, matamataan ko kaooyagoyag o Allah ka keteden ko sekaniyan na
kowa ako ron sa manga nganin."
21 Mandiyadi na pinggagaanan i Gihasi kometed si Naaman. So kiyailaya on i Naaman a

pepelalagoy rekaniyan na tomipad ko karo niyan a makipetoona on. "Mapipiya so langon
taman?" a iniise iyan on.
22 “Mapiya den," a tig i Gihasi, "ogaid na siyogo ako o kadnan aken sa kapeteroa ko reka
a aden a dowa kataw a mangoda a ped ko sagorompong a manga nabi a gopen miyakaoma
a poon ko kapalawan a inged sa Ipraim. Na kabaya iyan a mbegan ka siran sa telo polo
ago pat ka kilo a pirak ago dowa ka sokoba a nditaren."
23 “Kapedipedi ka bo na kowa ka sa pito ka kilo!" a tig i Naaman. Tigel iyan si Gihasi sa

katarimaa niyan on, na tiyago iyan so pito ka kilo a pirak ko dowa a sako na inirakes iyan
on so dowa ka sokoba a nditaren na piyakiawidan iyan ko dowa a oripen iyan, na
inawidan iran a moona siran ki Gihasi.
24 So kiyapakaoma i Gihasi ko bobongan a kakadenan i Ilisas na kinowa niyan ai ko
manga oripen na initapok iyan ko walay. Piyakakasoy niyan den so manga oripen na
gomiyanat siran.
25 Ogaid na so kiyasoled i Gihasi ki Ilisas a miyadap on na iniise on i Ilisas a "Anda ka
poon, Gihasi?"
"Da a siyongowan ko a oripen ka," a inisembag iyan.
26 Ogaid na pitero on i Ilisas a "Ba ngka di katawi a sisii reka so niyawa ko isako
tomepad so mama ko karo niyan a miyakitoona reka? Ba giyai i oras a kakowa sa pirak o
di manga nditaren, manga asinda a olibi ago asinda a obas, manga bilibili, manga sapi o
di na manga oripen a manga mama ago babay?
27 Sabap sa pinggolaola ngka ini na kiogalin reka so bowa i Naaman ago sii ko
kebabadan reka sa taman sa pakataman." Na miyawa roo si Gihasi ko hadapan i Ilisas, na
miyabowa a so kobal iyan na lagid sa kapoti a giyaw.
2 MANGA DATO 6
So Kiyaletaw o Potaw a Olo o Patok
Miyakaisa a gawii na pitero o sagorompong a manga nabi ki Ilisas a "Ilaya ngka so darpa
a petelabokan ami reka ka tanto rektano a maito.
2 Pakasonga kami ngka ko lawasaig a Yordan a ron pekakowa so oman i isa rekami sa
tarakayo na mbalay tano roo sa darpa a kabalingan tano."
Na tig iyan a "Ikano roo den."
3 Na pitero o isa kiran a "Kapedipedi ka bo na onoti kami ngka a manga oripen ka."
"Magonot ako," a tig i Ilisas.
4 Na somiyong siran sa Yordan na miyamata siran sa manga kayo.

5 Sii ko kapepata on o isa kiran na miyaso so olo o patok iyan na miyaolog ko ig.
"Aidaw, kadnan ko!" a minigoraok iyan. "Piyanembayan oto!"
6 “Anda miyaolog?" a iniise o nabi o Tohan. So kiyapakiilain iyan on ko darpa a

kiyaologan on na miyotol sa giyoray si Ilisas na inolog iyan roo, na miyakaletaw so
potaw.
7 “Kawaa ngka," a tig i Ilisas. Na kiyawa o mama na piyorot iyan.
Linitagan i Ilisas so Miyanga bobota a Isiriyanen
8 Sa masa oto na dii makitidawa so dato sa Siriya ko manga Israil. Igira a

pepakamosawiren iyan so manga sanasanaan iyan na pepamili sekaniyan sa darpa a
mbangonan iyan sa kampo o manga sondaro niyan.
9 Ogaid na dii teroon i Ilisas ko dato sa Israil a "Pananggilai ngka o ba ka makaokit
sangkoto a darpa ka kekampo roo so manga Isiriyanen."
10 Na pepakipariksa o dato sa Israil angkoto a manga darpa a petendoon o nabi o Tohan.
Omanoman pepakaiktiyaren i Ilisas so dato kaan iyan kalidasi angkoto a manga darpa.
11 Tanto ai a inikararangit o dato sa Siriya, na linimod iyan so manga sanasanaan iyan na

iniise iyan kiran a "Ba niyo raken di matero o antawaa rekano i tomatampil ko dato sa
Israil?"
12 “Da den a isa bo rekami, kadnan ko a dato," a tig o isa ko manga sanasanaan iyan.
"Ka si Ilisas a so nabi a sisii sa Israil na apiya so manga katero a di ngka dii teroon sii ko
rowang ka na pepayagen iyan ko dato sa Israil!"
13 “Ikano roo na mbabanoga niyo o anda sekaniyan," a inisogo o dato, "kaan ako
makasogo sa manga sondaro a ndakep on."
Na miyatero rekaniyan a "Sisii si Ilisas sa Dotan."
14 Sabap roo na somiyogo on so dato sa manga koda ago manga karo ago madakel a
manga sondaro. Somiyong siran on ko kagagawii na linikopan iran so siti.
15 Sii ko kiyapakambowat o talasogoay o nabi o Tohan a lominiyo ko teked a kapipita na
miyailay niyan so manga sondaro a rakes o manga koda ago manga karo iran a lomilikop
ko siti. "Aidaw kadnan ko, antonaa i sowaan ta?" a tig iyan ki Ilisas.
16 “Di ka pekelek," a inisembag o nabi. "So kiaampil rekta na madakel a di so kiaampil

kiran!"
17 Na miyangangarapan si Ilisas a tig iyan a "Ya Allah, lekai ngka a mata niyan kaan
makailay!" Na likaan o Allah so mata o talasogoay na lomiyangkaw sa mbalabala na
miyailay niyan so manga bobongan a mapepeno a pekedeg a manga koda ago manga karo
a lomilibet ki Ilisas.
18 Sii ko kapetondagayi rekaniyan o manga ridoay na miyangangarapan si Ilisas ko Allah

a tig iyan a "Pamotaa ngka a manga taw ai!" Na piyamota niyan siran a giyoto den so
piyangni i Ilisas.
19 Na pitero kiran i Ilisas a "Kena ini a ba so lalan na kena ini a ba so siti. Tondoga ko
niyo ka agaken ko sekano ko mama a di niyo dii mbabanogen." Na inagak iyan siran roo
sa Samariya.
20 So kiyapakasoled iyan ko siti na piyangni i Ilisas a "Ya Allah, lekai ngka so manga
mata angkai a manga mama kaan mamakailay!" Na likaan o Allah so manga mata iran na
miyakailay siran, na kiyatokawan iran a sisii siran sa soled a Samariya.
21 So kiyailaya o dato sa Israil ko manga Isiriyanen na inilalis iyan ki Ilisas a "Ama ko,
ba aken siran pemonoa! Ba aken siran pemonoa?"
22 “Di ngka siran pemonoa," a inisembag iyan. "Ba ngka mbonoa so manga taw a
miyabiyag ka ko dii katidawa? Begi ngka siran sa pangenengken ago ig kaan siran
makakan ago makainom ago mamakakasoy ko dato iran."
23 Na siyapaat iyan siran sa mala a kapista, na kagiya makapasad siran koman ago
mamanginom na piyakabaling iyan siran ko kadnan iran. Sabap roo na so manga sondaro
a Isiriyanen na initapelek iran so kapesondoli ko inged a Israil.
So Kiyataona ko siti a Samariya
24 Ogaid na da peman matey na si Bin Hadad a dato sa Siriya na tinimo iyan so langowan
a sondaro niyan na somiyong siran sa Samariya na linikopan iran.
25 Sabap roo na tanto a tiyaon so siti ka miyabolobolo a kalilikopi ron taman sa so olo a
kimar na dii mapesa sa walo polo a pelata a pirak, na isa ka libras a tai a marapatik na dii
mapesa sa lima timan a pelata a pirak.
26 Miyakaisa a gawii a dii ndalakaw so dato sa Israil ko kilid o pangeleban o siti na

tiyalowan sekaniyan o babay a tig iyan a "Hey dato a kadnan ko, tabangi ako ngka!"
27 Tig o dato a "O da ka tabangi o Allah na anda ko pekakowa sa kitabang aken reka? Ba
aden a pereperan aken o di na arak?
28 Antonaa i masosowa a ka?"
Inisembag o babay a "Pitero raken angkai a babay a 'Rilaan ka so wata a ka kaan ta
makan imanto, na mapita na ken tano so wata aken.'
29 Na initinda ami so wata aken na kiyan ami. Kagiya telondog a gawii na pitero aken
rekaniyan a 'Rilaan ka so wata a ka a ken tano,' ogaid na initapok iyan sekaniyan."
30 So kiyanega o dato ko manga katero o babay na kinisi iyan so gerab iyan ko kasososa a
pamikiran iyan. Na so manga taw ko marani ko pangeleban na miyailay iran a ndiditar
sekaniyan sa sako a mididalem ko kimon iyan.
31 Na pitero iyan a "Kamorkaan ako o Allah sa tanto a masopiit o di mapota so olo i
Ilisas imanto a gawii!"
32 Na somiyogo sekaniyan sa makarapit ki Ilisas.
Samanaya na moontod si Ilisas sii ko walay niyan a ped iyan so manga pelokelokesen
ko siti. Na pitero kiran i Ilisas a "Giyangkoto a talibono na somiyogo sa mama a
makapota ko olo aken. Amay ka makaoma na talangeben iyo ron so pinto na di niyo
pekasoleda. So dato a kadnan iyan na tomotondog on."
33 Sii ko di pen dii katero i Ilisas sii kiran na miyakaoma so dato na pitero iyan a
"Giyangkai a morala na poon ko Allah! Ino aken pen penayawa so kapeseriat iyan?"
2 MANGA DATO 7
Somimbag si Ilisas a tig iyan a "Pamakinega niyo so katero o Allah. Giyai i pitero o
Allah: Datar ai a oras mapita na so isa ka gantang a arina na mapepasa sa isa ka pelata a
pirak, ago so dowa ka gantang a bantad na mapepasa sa isa ka pelata a pirak sii ko manga
padian sa Samariya."
2 So olowan a sondaro a pepanalagad ko dato na pitero iyan ko nabi o Tohan a "Di ini
mapenggolaola apiya pen o lekai o Allah so manga pintoan sa langit!"
Na tig i Ilisas a "So den so manga mata ngka i pekailay sii, ogaid na di ka on den
pekakan!"
Kiyatamanan so Kalilikopi ko Siti
3 Samaoto na aden a pat kataw a aden a bowa niyan a komakaden ko gimowa o siti, na
pitero o oman i isa ko ped iyan a "Ino tano sii keden taman sa matay tano?
4 O gomegenek tano sii na pematay tano a ongos, na o somoled tano ko siti na ndodoo so
taon na pematay tano a ongos. Na somong tano ko kampo o manga Isiriyanen na moral
tano kiran. O pekapagoyaga tano iran na keoyag tano, na o bonoa tano iran na pematay
tano baden."
5 Sii ko kaperimon na somiyong siran ko kampo o manga Isiriyanen. So kinisampay iran

ko kilid o kampo na da den a ba roo taw
6 Ka piyakineg o Allah ko manga Isiriyanen so dalepek o madakel a manga karo ago
manga koda ago makapal a manga sondaro. Na pitero o oman i isa ko ped iyan a "Ilaya
ngka man, ka kiyatendanan o dato sa Israil so manga dato a Hitiyo ago Imisiren sa
kanggobata iran rektano!”
7 Na mimbowat siran na miyamalagoy sii ko kaliboteng iyan pen. Inawaan iran so manga
barombarong iran, manga koda iran ago manga kimar. Giyanatan iran so langon taman
sii ko kampo a da den maalin na inipagapas iran a ginawa iran.
8 Kagiya misampay so pepanga bobowa ko kilid o kampo na somiyoled siran ko isa ko

manga barombarong. Komiyan siran ago mininom na inawidan iran so manga pirak,
manga bolawan ago manga nditaren, na miyawa siran roo a inipanapok iran oto. Na
komiyasoy siran na somiyoled ko ped a barombarong na kominowa siran peman ko
manga nganin san na initapok iran pen.
9 Ogaid na oriyan iyan na pitero o oman i isa ko ped iyan a "Di ontol so di tano dii
nggolaolaan! Aden a mapiya a mapenotol tano imanto na ba tano den dii pagmaa. O
nayaw tano taman sa mapita na peraoten tano a morala. Na, itano roo! Somong tano
imanto ko torogan o dato na panotolen tano ron ai!"
10 Na komiyasoy siran ko siti na tiyalowan iran so manga gordiya ko gimowa iyan na

pitero iran kiran a "Somiyong kami ko kampo o manga Isiriyanen na da den a isa bo a taw
a ba ami miyailay aya pen o ba ami miyaneg ka so bo so kiiiket a manga koda ago manga
kimar, ago so manga barombarong a giyanatan a da den maalin."
11 Na inipanawatewag o manga gordiya so totol na minisampay ko torogan.
12 Mimbangon so dato ko kagagawii na pitero iyan ko manga sanasanaan iyan a "Teroon

ko rekano o antonaa i ikidia rektano o manga Isiriyanen. Katawan iran a oongosan tano,
na inawaan iran so kampo a petepok siran ko manga pangomaan, ka aya pipikiren iran na
meliyo tano ko siti, na mbiyagen tano iran a oyagoyag na soled siran ko siti."
13 Ogaid na pitero o isa ko manga sanasanaan iyan a "Somogo tano roo sa manga mama a
makaonot ko lima timan a koda a miyanga lalamba ko siti kaan iran mapariksa o antonaa
i miyanggolaola. O mamatay siran na datar siran bo sa kapetay o langon a manga Israil a
malalamba ko siti."
14 Mandiyadi na mitiyagar siran sa dowa a karo a rakes o manga koda iran, na somiyogo
so dato sa manga mama a makasono ko manga Isiriyanen a tig iyan a "Ikano roo na ilaya
niyo o antonaa i miyanggolaola."
15 Na siyono iran siran taman sa lawasaig a Yordan, na miyailay iran a so langon o lalan
na makakayar on so manga nditaren ago manga kasangkapan a miyamangilebad o manga
Isiriyanen sii ko kadilapet a kapepalagoy iran. Na komiyasoy so manga sogo na piyanotol
iran ai ko dato.
16 Na mililiyo so manga taw sa Samariya na pitebanan iran so kampo o manga Isiriyanen.
Sabap roo na so isa ka gantang a arina na dii pesaan sa isa ka pelata a pirak, ago so dowa
ka gantang a bantad na dii pesaan sa isa ka pelata a pirak a aya kiyatoman o pitero o
Allah.
17 Initoro o dato so sondaro a pepanalagad rekaniyan a aya petendingan ko gimowa o siti,
ogaid na minilampes sekaniyan ago pindapodapoan o manga taw a pepamangokit ko
gimowa a aya niyan inipatay a giyoto so pitero o nabi o Tohan isako somong so dato ko
walay niyan.
18 Minitoman den so miyaalamat o nabi o Tohan ko dato a "Datar ai a oras mapita na so
isa ka gantang a arina na mapepasa sa isa ka pelata a pirak, ago so dowa ka gantang a
bantad na mapepasa sa isa ka pelata a pirak sii ko manga padian sa Samariya."
19 Na aya miyatero o olowan a sondaro ko nabi o Tohan na "Di ini mapenggolaola apiya
pen o lekai o Allah so manga pintoan sa langit!" Na aya inisembag on o nabi o Tohan na
"So den so manga mata ngka i pekailay sii, ogaid na di ka on den pekakan!"
20 Na giyanan den i miyanggolaola rekaniyan, ka pindapodapoan o manga taw sii ko
gimowa a aya niyan inipatay.
2 MANGA DATO 8
Minikasoy so Lopa o Babay sa Sonim
Miyatero gowani i Ilisas ko babay a so wata iyan a mama na inoyag iyan a "Lalakaw kano
ago so pamiliya ngka na tareg kano pasin ko ped a darpa a ketaregan rekano, ka piyasad o
Allah a teonen so inged sa katey a pito ragon.
2 Na ininggolalan o babay so pitero on o nabi o Tohan. Lomiyalakaw siran ago so
pamiliya niyan na komiyaden sii ko inged o manga Pilistiyo sa miyakapito ragon.
3 Kagiya mapopos so pito ragon na komiyasoy so babay a poon ko inged o manga

Pilistiyo na somiyong ko dato ka pengnin iyan on a mapakakasoy rekaniyan so walay
niyan ago so lopa.
4 So dato na di niyan dii mbitiyarai si Gihasi a talasogoay o nabi o Tohan a tig iyan on a
"Panotola ngka raken so langon a piyakamemesa a miyanggolaola i Ilisas."
5 Na so den so kapepanotola i Gihasi ko dato ko kiyaoyaga i Ilisas ko miyatay a wata a
mama na aya den mambo kiyapakaoma o babay a ina o wata sa kapengniya niyan ko dato
ko walay niyan ago lopa.
Na tig i Gihasi a "Giyai so babay, kadnan ko a dato, ago giyai so wata a inoyag i
Ilisas!"
6 Iniise o dato ko babay so makapantag roo na piyanotol iyan on. Mandiyadi na
somiyogo so dato sa sanasanaan makapantag ko inipenon o babay a tig iyan a "Kasowin
ka on so langon taman a rek iyan a rakes on so langon a miyapantiyari ko lopa iyan ipoon
ko gawii a kiyaawai niyan ko inged taman imanto."
Biyono i Hasail si Bin Hadad a Dato sa Siriya
7 Somiyong si Ilisas sa Damasko, na samanaya na pekesakit si Bin Hadad a dato sa

Siriya. So kiyateroa ko dato a miyakaoma roo den si Ilisas
8 Na pitero iyan ki Hasail a "Awid ka sa pamemegayan na song ka ko nabi o Tohan na
pangniya ngka on a kaisei niyan ko Allah o ba ako pekabager sangkai a paniyakit."
9 Na lomiyalakaw si Hasail a song ki Ilisas a maawid sa pamemegayan a pat polo a onta a
kirororanan sa lebi a manga pipiya a nganin sii sa Damasko. Miyangadap sekaniyan ki
Ilisas na tig iyan a "So wata a ka a si Bin Hadad a dato sa Siriya na siyogo ako niyan a
ipagise aken reka o ba sekaniyan pekapiya ko paniyakit iyan."
10 Na pitero on i Ilisas a "Ika roo den na teroa ngka on a 'Mataan a pekapiya ka!' Ogaid
na piyayag raken o Allah a aya mataan na petay sekaniyan."
11 Na tintengan sebenar i Ilisas si Hasail taman sa miyaya si Hasail. Na taros a somigad
so nabi o Tohan.
12 “Ino pesegad so kadnan aken?" a iniise i Hasail.

"Ka kagiya katawan aken so manga piyakalekelek a penggolaolaan ka ko manga Israil.
Totongen ka so kikokotaan a manga siti iran, pemonoon ka so manga kangodaan kiran,
ipemapes ka so manga roroni a wata iran ko lopa ago pemensiin ka so tiyan o manga
oogat kiran a babay."
13 Tig i Hasail a "Andamanaya i kapenggolaolaa ko sangkoto a mala a galebek a matag

ako baden aso?"
"Piyayag raken o Allah a kedato
ka sa Siriya," a inisembag i Ilisas.
14 Na inawaan i Hasail si Ilisas na komiyasoy ko kadnan iyan. So kiyaisei ron i Bin

Hadad a "Antonaa i pitero reka i Ilisas?" na inisembag i Hasail a "Pitero iyan raken a
pekapiya ka."
15 Ogaid na sii ko telondog a gawii na kominowa si Hasail sa tanggob na inisomek iyan
ko ig na inipiles iyan ko paras o dato taman sa miyatay. Na miyabaloy si Hasail a dato sa
Siriya a miyakasambi ki Bin Hadad.
Si Yahoram a Dato sa Yodah
16 Sii ko ikalima ragon a kandadato i Yoram a wata i Ahab a dato sa Israil na si Yahoram
a wata i Yahosapat i miyadato sa Yodah.
17 Telo polo ago dowa ragon a idad iyan ko kiyadato iyan, na miyakandato sa
miyakawalo ragon sii sa Yarosalim.
18 Siyoson iyan so manga okitokit o manga dato sa Israil a lagid o pinggolaola o pamiliya
i Ahab, ka so karoma niyan na aya wata a babay i Ahab. Na miyakanggolaola sekaniyan
sa marata ko kapekeilaya on o Allah.
19 Ogaid na sabap ko oripen iyan a Daod na di kabaya o Allah o ba niyan binasaa a
Yodah ka initopa niyan ko Daod a taman sa pakataman so dii kapakandato o manga
moriyataw niyan.
20 Sii ko kandadato i Yahoram na so manga Idomiyan na somiyopak sa Yodah na

tomiyoro siran sa dato iran.
21 Sabap roo na somiyong si Yahoram sa Sair sa kanggobata niyan on a rakes o langon o
manga karo niyan. Ogaid na linikopan siran o manga Idomiyan, na sii ko kagagawii na
miyakapalagoy si Yahoram ago so manga komandir o manga karo niyan, na miyamagapas
so manga sondaro niyan ko manga walay iran.
22 Taman imanto na somosopak den a Idomiya sa Yodah. Na somiyopak mambo a siti a
Libnah sangkoto den a masa.
23 So ped a miyanga sosowasowa ko kandadato i Yahoram ago so langon a pinggolaola

niyan na palaya den misosorat ko 'Ribro a Totolan ko manga Dato sa Yodah.'
24 Kagiya matay si Yahoram na minilebeng ko pekoboran ko manga apo iyan sii ko siti o
Daod. Na si Ahasiyas a wata iyan na aya on miyakasambi a dato.
Si Ahasiyas a Dato sa Yodah
25 Sii ko ikasapolo ago dowa ragon a kandadato i Yoram a wata i Ahab a dato sa Israil na
si Ahasiyas a wata i Yahoram na miyadato sa Yodah.
26 Dowa polo ago dowa ragon a idad i Ahasiyas sii ko kiyadato iyan na mindato sa
miyakasaragon sii sa Yarosalim. Aya ngaran o ina iyan na si Ataliyas a wata i Ahab ago
apo i Omri a dato sa Israil.
27 Siyoson iyan so manga okitokit o pamiliya i Ahab na miyakanggolaola sa marata ko
kapekeilaya on o Allah a lagid o pamiliya i Ahab ka miyakamong sekaniyan i Ahab.
28 Si Ahasiyas na miyonot ki Yoram a wata i Ahab sa kinitidawaan iyan ki Hasail a dato

sa Siriya roo sa Ramot Giliyad. Kiyapalian si Yoram sii ko kiyatidawa
29 Na komiyasoy sa Yasriil kaan makapiya ko pali iyan. Sii ko kandodoo niyan pen na
mimbisita rekaniyan si Ahasiyas a dato sa Yodah sabap ko kiyapalii ron.
2 MANGA DATO 9
Kiyaidinan si Diho a Madato sa Israil
Piyakitawag o nabi Ilisas so isa ko sagorompong a manga nabi na pitero iyan on a

"Tiyagar ka sa kasong ka sa Ramot Giliyad. Awidi ngka angkai a omoy a petegoan sa
lana
2 Na amay ka misampay ka roo na mbanoga ngka si Diho a wata i Yahosapat ago apo i
Nimsi. Belaga ngka sekaniyan ko manga ped iyan na wita ngka ko misisibay a rowang.
3 Kowaa ngka so omoy na ododa ngka so lana ko olo niyan na teroa ngka on a
'Siyalawatan ko seka a madato sa Israil!' Maipos ai na lekai ngka so paitaw na palalagoy
ka a di pelangalangan!"
4 Na somiyong so kangodaan a nabi sa Ramot Giliyad.

5 So kiyapakaoma niyan na miyatoon iyan so manga olowan a sondaro a kioontod a
titimotimo. Na tig iyan a "Aden a peteroon ko reka, komandir."
"Antawaa rekami?" a iniise i Diho.
"Seka, komandir," a tig iyan.
6 Na tominindeg si Diho na somiyoled siran a dowa ko walay. Inodod o nabi so lana ko

olo i Diho a tig iyan a "Giyai i pitero o Allah a Tohan o Israil: Siyalawatan ko seka a
madato ko manga pagtaw aken a Israil.
7 Kebinasa ngka so pamiliya i Ahab a kadnan ka, ka iseop aken so kiyapamonoa ko
manga oripen aken a manga nabi ago so langon a ped a manga oripen aken a piyamono i
Disibil.
8 Kepolang so langon o pamiliya i Ahab. Pepasen ko so oman i mama ko pamiliya niyan
sii sa Israil a oripen ago so di.
9 Mbalowin ko so pamiliya i Ahab a lagid o pamiliya i Yarobowam a wata i Nibat ago
lagid o pamiliya i Baasa a wata i Ahidiyas.
10 Makapantag ki Disibil na pegdasan sekaniyan o manga aso sii ko isa a darpa sa Yasriil
na da den a ba on pekalebeng.' " Na giyoto a lominiyo so kangodaan a nabi na
miyalalagoy.
11 Sii ko kiyaliyowi i Diho ko manga ped iyan a manga olowan na iniise o isa on a
"Mapipiya so langon taman? Ino reka song angkoto a pembetengen?"
Tig i Diho a "Katawan iyo so lagid anan a mama ago so di niyan dii perakorayan."
12 “Kena a ba nan benar," a tig iran. "Teroa ngka rekami!"

Na tig i Diho a "Pitero iyan raken a aya kabasa o Allah na "Siyalawatan ko seka a
madato sa Israil."
13 So kiyanega iran sii na pinggagaanan iran komowa so manga gerab iran na kiyayat iran
ko kaporoan o manga kerit a tindegan i Diho. Na piyakaoni ran so manga bogiyong ago
milalalis sa "Dato si Diho!"
Biyono i Diho si Yoram a dato sa Israil
14-15 Na giyoto a si Diho a wata i Yahosapat ago apo i Nimsi na pikediyatan iyan sa
marata so dato Yoram. (Samanaya na ndodoo si Yoram sa Yasriil kaan makapiya ko
kiyapalii ron o manga Isiriyanen sii ko kiyatidawa a kiyalindinga i Yoram ago so manga
sondaro niyan sa Ramot Giliyad ko kanggobata on i Hasail a dato sa Siriya.) Na pitero i
Diho ko manga ped iyan a "O kabaya iyo a madato ako na da den a ba niyo pekaliyowa
sangkai a siti a Ramot Giliyad a ba makasong sa Yasriil a ba roo makapenotol ko
pinggolaola tano!"
16 Na mida si Diho ko karo niyan na somiyong sa Yasriil a ron pen dedeke si Yoram.
Ndodoo mambo si Ahasiyas a dato sa Yodah ka somiyong roo a mintel rekaniyan.
17 So bantabantay a tomitindeg ko lantawa sii sa Yasriil na miyalangkaw niyan si Diho

ago so manga taw niyan a pepekarani. Na tiyalowan iyan si Yoram a tig iyan a
"Miyakailay ako sa manga sondaro a pepekatalingoma!"
"Sogo ka sa pakokoda a mbalak kiran," a inisogo i Yoram, "a ipagise iyan a 'Ba
kalilintad a minitalingoma niyo?' "
18 Na lominiyo so pakokoda a mbalak ki Diho, na tig iyan on a "Giyai i pitero o dato: Ba

kalilintad a minitalingoma ngka?"
"Antonaa i ikidia ngka ko kalilintad?" a inisembag i Diho. "Tondoga ko ngka!"
Na inipananalo o bantabantay a "Minisampay kiran so siyogo ogaid na da makakasoy."
19 Mandiyadi na somiyogo so dato sa ikadowa a pakokoda. So kiyapakaoma niyan na tig

iyan a "Giyai i pitero o dato: Ba kalilintad a minitalingoma ngka?"
Tig i Diho a "Antonaa i ikidia ngka ko kalilintad? Tondoga ko ngka!"
20 Pitero o bantabantay a "Minisampay sekaniyan kiran ogaid na da mambo makakasoy.

So pepangolin ko karo na lagid i Diho a wata i Nimsi, ka pepangolin a lagid o
kasasaitanan a mama."
21 “Sangani niyo so karo aken!" a inisogo i Yoram. Na so kiyasangani ron na si Yoram a

dato sa Israil ago si Ahasiyas a dato sa Yodah na lomiyo siran a mageeda ko oman i karo
niyan sa kambalaka iran ki Diho, na miyabalak iran sii ko pangomaan a rek gowani i
Nabot a taga Yasriil.
22 So kiyailaya i Yoram ki Diho na iniise iyan on a "Ba kalilintad a minitalingoma ngka,
Diho?"
Tig i Diho a "Andamanaya i kakeaden o kalilintad taman sa mitataros den so
kapanakoto ago kapangatao i ina a ka a Disibil?"
23 Na tomiyalikod si Yoram kaan makapalagoy a ipetelo niyan ki Ahasiyas a "Katipo,

Ahasiyas!"
24 Na sarta a pikas i Diho so pana iyan na miyasogat iyan si Yoram ko pageletan a waga
niyan. Lomiyambas so gasa ko poso iyan na miyaoteng sekaniyan sii ko karo niyan.
25 Pitero i Diho ki Bidkar a pangongolin ko karo niyan a "Porota ngka sekaniyan na
lebaden ka ko pangomaan i Nabot a taga Yasriil. Tanodi ngka a isako mageeda ta sa
manga karo ko talikodan i Ahab a ama iyan na pitero o Allah makapantag rekaniyan a
26'Miyailay aken kagai so kiyapamonoa ki Nabot ago so manga wata iyan na mataan a
pekibayadan ko rekano oto sangkai a pangomaan.' Na porota ngka sekaniyan na lebaden
ka sangkai a lopa i Nabot a aya kaketoman o miyatero o Allah."
So Kiyabonoa ki Ahasiyas a dato sa Yodah
27 So den so kiyailaya i Ahasiyas a dato sa Yodah ko miyanggolaola na miyalagoy

sekaniyan sii ko lalan a ipesong sa Bit Hagan. Piseloba sekaniyan i Diho a dii melalis a
"Bonoa niyo pen!" Na piyalian iran sekaniyan ko karo niyan sii ko lalan a ipetekedeg sa
Gor a marani sa Iblim. Ogaid na miyakagaga manaros si Ahasiyas taman sa Migido na
miyatay roo.
28 So manga sanasanaan iyan na riyoran iran so lawas iyan sa karo na inowit iran sa
Yarosalim na inilebeng iran ko pekoboran ko manga apo iyan sii ko siti o Daod.
29(Miyabaloy si Ahasiyas a dato sa Yodah sii ko ikasapolo ago isa ragon a kandadato i
Yoram a wata i Ahab.)
Biyono so Bai Disibil

30 Kagiya maneg i Disibil a miyakaoma si Diho sa Yasriil na pitiyalokan iyan a mata
niyan ago tiyanor iyan so bok iyan na romiyongaw ko rowasan sii ko torogan.
31 So kiyapakasoled i Diho ko gimowa o torogan na liyalis i Disibil a tig iyan a "Ba
kalilintad a minitalingoma ngka? Lagid ka i Simri a miyono ko kadnan iyan!"
32 Na lomiyangag si Diho ko rowasan na initalo niyan a "Antawaa i magampil raken?

Antawaa?" Na dowa taman sa telo a orobarang na tomiyolong on.
33 Tig i Diho a "Itogen iyo sekaniyan sa baba!" Na iniitog iran a poon ko rowasan na
miyamangitarsik so rogo iyan ko pangeleban ago sii ko manga koda, na pindapodapoan o
manga koda so lawas iyan.
34 Somiyoled si Diho ko torogan na komiyan ago mininom. Na pitero iyan a "Siyapa

niyo angkanan a kiyamorkaan a babay na lebengen iyo, ka wata sekaniyan a dato."
35 Ogaid na so kiyaliyo iran sa kipelebengen on na so bo so lagas a olo niyan ago so
manga ai niyan ago lima i miyatoon iran.
36 Komiyasoy siran ki Diho na pitero iran on, na tig iyan a "Giyai so pitero o Allah a
nggolalan ko oripen iyan a Iliyas a taga Tisbi a 'Sii ko isa a darpa sa Yasriil na ron
pegdasi o manga aso so sapo i Disibil.
37 So badan iyan na kelagid o nadis lopa roo sa Yasriil kaan da den a ba makapetero sa
'Giyai si Disibil.' "
2 MANGA DATO 10
So Kiyapamonoa ko Pamiliya i Ahab
Samaoto na aden a pito polo a wata a mama i Ahab a mababaling sa Samariya. Na

misorat si Diho sa manga sorat na inipakawit iyan ai sa Samariya sii ko manga olowan ko
siti ago so manga pelokelokesen ago so manga tomatagikor ko manga wata i Ahab. Aya
oni o sorat na
2 “Ndodoo rekano so manga wata o kadnan iyo, na aden a manga koda iyo ago manga
karo, manga gomaan ago kikokotaan a siti. Na anda den i kisampay rekano angkai a sorat
na
3 Pilia niyo so lebi a mapiya ago kapapatotan ko manga wata o kadnan iyo na baloya niyo
a dato iyo. Maipos ai na tiyagar kano makitidawa sa kapelindinga niyo ko pamiliya o
kadnan iyo."
4 Ogaid na tanto a kiyalekan so manga olowan sa Samariya a tig iran a "So dowa a dato
na da makaato ki Diho! Na andamanaya i kakegagaa tano ron?"
5 Kagiya ka maoto na so komikibir ko torogan, so gobirnador ko siti a rakes o ped a

manga olowan ago so manga pepanagikor ko manga wata o dato na inipakawit iran
angkai a sorat ki Diho: "Manga oripen kami ngka. Penggolaolaan ami so langon taman a
peteroon ka. Di kami den toro sa apiya antawa onon a madato. Nggolaolaa ngka den so
apiya antonaa i pipikiren ka a mapiya."
6 Mandiyadi na piyakawitan siran peman i Diho sa ikadowa a sorat a aya oni niyan na "O
maampil kano raken ago peratiyayaan ako niyo na pangowita niyo raken sii sa Yasriil so
manga olo o manga wata o kadnan iyo sa datar ai a oras mapita."
Samaoto na so pito polo kataw a manga wata o dato na sisii ko manga olowan ko siti a
miyamakapagoyag kiran.
7 Na kagiya misampay kiran so sorat na kinowa iran so manga wata o dato na piyamono
iran siran a pito polo kataw, na tiyago iran so manga olo iran ko manga reban na
inipakawit iran ki Diho roo sa Yasriil.
8 Na miyatero ki Diho a "Miyapangowit iran sii so manga olo o manga wata o dato," na
inisogo i Diho a "Ampira niyo sa dowa ampir roo ko gimowa o siti na begaken iyo roo
taman ko kapipita."
9 Sii ko kiyapita iyan na lominiyo si Diho ko gimowa na pitero iyan ko manga taw a
ndodoo a "Da a sala iyo sangkai a miyanggolaola. Saken i mikediyat ko kadnan aken ago
miyono on. Ogaid na antawaa i miyono sii langon?
10 Ketangked iyo imanto a da den a miyatero o Allah makapantag ko pamiliya i Ahab a
ba di kitoman. Initoman den o Allah so minitopa niyan a nggolalan ko oripen iyan a si
Iliyas."
11 Na giyoto a piyamono i Diho so oman i isa a miyalamba ko pamiliya i Ahab sii sa
Yasriil a rakes o manga sanasanaan iyan, so manga madaseg a ginawai niyan ago so
manga imam iyan a da den a ba niyan kiran piyakapagoyag.
Miyanga bobono so manga Tonganay o Dato Ahasiyas
12 Oriyan iyan na lomiyalakaw si Diho na miyantap sa Samariya. Sii ko kapelalakaw

niyan roo ko darpa a bebetowan sa 'Kampo o manga Tomatagikor sa Bilibili'
13 Na miyabalak iyan so ped ko manga tonganay i Ahasiyas a dato sa Yodah. Iniise iyan
kiran a "Antawaa kano?"
Tig iran a "Manga tonganay kami i Ahasiyas, na pesong kami sa Yasriil ka selamen
ami so manga wata o dato Ahab ago so Bai Disibil."
14 “Dakepa niyo siran a oyagoyag," a inisogo i Diho ko manga taw niyan. Na diyakep
iran siran a pat polo ago dowa kataw na piyamono iran sii ko paridi roo sa Bit Ikid. Da
den a ba niyan kiran piyakapagoyag.
Miyanga bobono so Malalamba a manga Tonganay i Ahab
15 So kiyaawa iyan roo na biyalak iyan si Yahonadab a wata i Rikab a pelalakaw mambo
a makipetoona rekaniyan. Siyalam sekaniyan i Diho na pitero iyan on a "Magaayon ta sa
pamikiran. Ba ako ngka pegampili?"
"Oway," a inisembag i Yahonadab.
"O ba giyoto," a tig i Diho, "na ita sii a lima ngka." Pinggolaola niyan ai na piyakada
sekaniyan i Diho ko karo niyan.
16 Tig i Diho a "Onot ka raken na ilaya ngka so kasigi aken ko Allah." Na meeda siran a
dowa ko karo niyan taman sa Samariya.
17 So kiyapakaoma iran roo na piyamono i Diho so langon a miyalamba ko pamiliya i

Ahab; miyapolang iyan siran a aya kiyatoman o pitero o Allah a nggolalan ki Iliyas.
Miyanga bobono so Pepamanimba ko Baal
18 Oriyan iyan na tinimo i Diho so langon a taw sa Samariya na pitero iyan kiran a "Tanto
a kapengongonotani aken ko katohanan a Baal a di so kiyapangongonotani ron i Ahab!
19 Na pakisogoi niyo imanto so langon a manga nabi o Baal ago so langon a
pepamanimba on ago so langon a manga imam iyan. Di niyo pelepasi apiya isa kiran bo
ka aden a mala a kapekorban aken ko Baal. Saden sa di makadarpa na kebono." Ogaid
na pepamagakal si Diho kaan iyan malengan mamono so langon a pepamanimba ko Baal.
20 Na inisogo i Diho a "Pakalangkapa niyo a kapelimolimod a ipeselasela ko Baal." Na

piyakalangkap iran.
21 Mandiyadi na piyakitawag i Diho so langon a pepamanimba ko Baal sa dalem a Israil
na miyakaoma siran langon; da den a isa kiran bo a ba roo da makadarpa. Na
miyamanoled siran ko timplo o Baal taman sa miyapeno a manga taw ipoon ko sabala na
malalagoy ko bala iyan.
22 Na tig i Diho ko somisiyap ko manga nditaren sii ko timplo a "Kowa ka sa manga
kimon na begi ngka sa satiman so oman i pesimba ko Baal. Na inowitan iyan siran sa
manga kimon.
23 Na somiyoled si Diho ko timplo o Baal a miyonot on si Yahonadab a wata i Rikab, na

pitero i Diho ko manga taw roo a "Pangilailay kano na tangkeda niyo a da a misasangi
rekano a oripen o Allah, ka so bo so pepamanimba ko Baal."
24 Sa da pen roo kapakasoled i Diho sa kapekorban iyan ago katotong sa manga soasoat
na piyakinggordiyaan iyan so liyo o timplo sa walo polo a manga mama a inilalang iyan
kiran a "O aden a isa rekano a pakapalagowin iyan so isa bo ko manga taw a peladen ko
rekano na kibayad iyan on a niyawa niyan."
25 So den so kiyapakapasad tomotong i Diho ko manga soasoat na inisogo iyan ko manga

gordiya ago so manga olowan a "Soledi niyo siran na go niyo pamonoa! Da den a ba niyo
ron pakapalagoya!" Na piyamono iran siran langon a pedang na tiyoyok iran so manga
bangkay iran sa liyo. Somiyoled siran ko rowang a katatagoan ko barahala a Baal sii ko
timplo
26 Na iniliyo iran roo so manga barahala na tiyotong iran.
27 Riyopet iran so barahala a Baal na giba iran so timplo o Baal na biyaloy iran a
pegodowan taman imanto.
28 Giyanan i kiyapakadaa i Diho ko kapesimbaa ko Baal roo sa Israil.

29 Ogaid na da niyan talikodi so manga dosa i Yarobowam a wata i Nibat a piyakisogok
iyan pen ko manga Israil, a so kapesimbaa ko bolawan a manga nati a sapi roo sa Bitil ago
sa Dan.
30 Na pitero o Allah ki Diho a "Pinggolaola ngka so mapiya ko kapekeilaya ko ron ka

ininggolalan ka so langon a miyapamikir aken a ipendaneg ko pamiliya i Ahab. Sabap
roo na so manga moriyataw ngka na aya den makapendato sa Israil taman ko ikapat ka
apid."
31 Apiya pen oto na da den tomana i Diho so manga sogoan o Allah a Tohan o Israil sa
iklas ko poso iyan, ka da niyan talikodi so manga dosa i Yarobowam a piyakisogok iyan
ko manga Israil.
So Kiyapatay i Diho
32 Sii sangkoto a manga gawii na pipoonan o Allah a kapelebati niyan ko kaolad a Israil.
Si Hasail a dato sa Siriya na tiyaban iyan so manga Israil ko langon a masasakop iran
33 Roo sa sebangan a Yordan ipoon sa siti a Arowir ko kilid a lawasaig a Arnon roo sa
pagabagatan taman sa manga inged a Basan ago Giliyad roo sa pagotaraan (giyoto so
babalingan o manga mbatabataa Gad, Robin ago Manasih).
34 So ped a miyanga sosowasowa ko kandadato i Diho ago so langon a pinggolaola niyan

ago miyanga papasad iyan na palaya den misosorat ko 'Ribro a Totolan ko manga Dato sa
Israil.'
35 Miyatay si Diho na minilebeng roo sa Samariya, na si Yahowahas a wata iyan i

36 Miyakadowa polo ago walo ragon a kandadato i Diho sa Israil sii sa Samariya.
2 MANGA DATO 11
Si Ataliyah a Bai sa Yodah
Si Ataliyah a ina i Ahasiyas a dato sa Yodah na kagiya katokawan iyan a miyatay so wata
iyan na piyakipamono iyan langon so pamiliya o dato.
2 Ogaid na si Yahosiba a wata a babay i dato Yahoram ago pagari i Ahasiyas na tikew
niyan si Yowas a so maroni a wata i Ahasiyas a poon ko ped a manga wata o dato a
magaan den mabono. Na initapok iyan so wata ago so peritan on ko pageemaan a rowang
sabap ki Ataliyah, na da sekaniyan mapatay.
3 Na mitetapok den so wata a rakes o peritan on sii ko Timplo o Allah ko soled o
miyakanem ragon sii ko kandadato pen i Ataliyah ko inged.
So Kiyasopaka ki Ataliyah
4 Sii ko ikapito ragon na si Yahoyada a imam na piyakisogoan iyan so manga olowan o

manga gordiya ko dato ago so manga gordiya ko torogan na inowit iyan siran ko Timplo o
Allah. Miyakipesadanowa kiran si Yahoyada roo ko Timplo na piyakisepa iyan kiran a
tempil siran on. Na giyoto a piyakiilay niyan kiran so wata o dato a si Yowas.
5 Na inisogo iyan kiran a "Giyai i penggolaolaan iyo: so ikatelo bagi rekano a dii
nggagalebek ko Gawii a Idedeke na aya penggordiya ko torogan o dato,
6 So isa a ikatelo bagi rekano na penggordiya ko Gimowa a Sor, na so isa pen a ikatelo
bagi na sii ko gimowa ko talikodan o manga gordiya ko torogan.
7 Na so dowa reka lompok a da a galebek iyan ko Gawii a Idedeke na penggordiya ko
Timplo o Allah kaan malinding so dato.
8 Tindeg kano ko melilibeta ko dato a so oman i isa rekano a kakapetan iyan so gomaan
iyan. Apiya antawaa i ndaseg rekano na kebono. Oobaya niyo lalayon so dato apiya anda
pesong."
9 Na pinggolaola o manga olowan a sondaro so langon a inisogo kiran i Yahoyada a

imam. Oman i isa kiran na kinowa niyan so manga sondaro niyan a so siran oto a
penggalebek ko Gawii a Idedeke ago so manga pendeke ko galebek na miyamanong siran
ki Yahoyada a imam.
10 Inibegay niyan ko manga olowan so manga bangkaw ago manga kelong a rek gowani
o dato Daod a matatago ko Timplo o Allah.
11 Na tominindeg so manga gordiya ko melilibeta ko dato a kakapetan o oman i isa so
gomaan iyan a marani siran ko aparan ago so Timplo a ipoon ko pagabagatan a kilid iyan
taman ko pagotaraan a kilid iyan.
12 Na iniliyo i Yahoyada si Yowas a wata o dato na tiyago iyan on so sangkad na piyalad

iyan on so kopiya o kapasadan o Allah. Inipanawatewag iyan a sekaniyan na dato na
siyalawatan iyan. Mindaopay so manga taw ago milalalis a tig iran a "Mamboway so
Dato!"
So Kiyapatay i Ataliyah
13 Miyaneg i Ataliyah so bogembog o manga gordiya ago so manga taw na somiyong

sekaniyan ko Timplo a ron siran matitimo.
14 Miyailay niyan a ndodoo so dato a tomitindeg ko obay o polaos ko gimowa o Timplo a
aya iran adat ko kapegidini ko dato. So manga olowan ago manga pamomogiyong na
lomilibet ko dato, na so langon o manga taw na pepanga bababaya ago pepemogiyong.
Na kinisi i Ataliyah so kimon iyan na milalis a tig iyan a "Katipo! Katipo!"
15 Na siyogo i Yahoyada so manga olowan a sondaro a tig iyan a "Liyon iyo sekaniyan ko
lamalama o Timplo na bonoa niyo so apiya antawaa i petepeng on manabang. Di patot o
ba sekaniyan mabono sii ko Timplo o Allah."
16 Na diyakep iran na inowit iran ko ipesoled o manga koda ko lamalama o torogan na
roo iran biyono.
So Kiyapakaasala i Yahoyada ko Paratiyaya ko Allah
17 Mandiyadi na mimbaal si Yahoyada sa kapasadan mipantag ko Allah ago so dato ago

so manga taw a siran den so manga pagtaw o Allah. Mimbaal sekaniyan pen sa
kapasadan mipantag ko dato ago so manga pagtaw niyan.
18 Na so langon a taw ko inged na somiyong siran ko timplo o Baal na giba iran.
Piroropet iran so manga aparan ago so manga barahala na biyono iran si Matan a imam ko
Baal sii ko danga o manga aparan.
Piyakitamengan i Yahoyada sa manga gordiya so Timplo o Allah.
19 Na sekaniyan ago so manga olowan a sondaro, so manga gordiya ko dato, so manga
gordiya ko torogan ago so langon a taw ko inged na inidolog iran so dato ipoon ko
Timplo taman ko torogan o dato a roo siran miyokit ko gimowa o manga gordiya.
Miyontod si Yowas ko korsi
20 Na miyanga bababaya so langon a manga taw. Na lomilintad so siti sabap sa
miyabono si Ataliyah roo ko torogan o dato.
21 Pito ragon a idad i Yowas ko kiyapoon iyan ndato.
2 MANGA DATO 12
Inompiyaan i Yowas so Timplo o Allah
Sii ko ikapito ragon a kandadato i Diho sa Israil na miyabaloy si Yowas a dato sa Yodah,
na miyakandato sekaniyan sa miyakapat polo ragon sii sa Yarosalim. Aya ngaran o ina
iyan na si Sibiyas a taga Birsiba.
2 Miyakanggolaola si Yowas sa ontol ko kapekeilaya on o Allah ko langon o manga
ragon a kapegosiyati ron i Yahoyada a imam.
3 Ogaid na da mabinasa so manga aparan ko manga barahala sii ko manga bobongan na
ipeteros o manga taw so di iran on dii kakorban ago kapetotong on sa doka.
4 Na pitero i Yowas ko manga imam a "Timoa niyo so langon a pirak a pegowiten ko

Timplo o Allah a rakes on so manga bowis, manga diyakat ago so manga iklas a
pamemegayan ko Timplo.
5 So oman i imam i matao ko pirak a pegowiten on roo o manga kalayama iyan, na keosar
iyan ai ko kapagompiyai ko apiya antonaa a kiyabinasaan ko Timplo."
6 Ogaid na sii ko ikadowa polo ago telo ragon a kandadato i Yowas na da den a ba
inompiyaan o manga imam ko Timplo.
7 Sabap roo na piyakitawag o dato Yowas si Yahoyada ago so ped a manga imam na
iniise iyan kiran a "Ino niyo da ompiyai so kiyabinasaan ko Timplo? Ipoon imanto na
kena o ba sekano den i petego ko pirak a ipembegay rekano ka began iyo baden a
kiompiya ko Timplo."
8 Na miyayon roo so manga imam a di siran den penimo peroman sa pirak a poon ko
manga taw ago kena den a ba siran i pekaompiya ko Timplo.
9 Mandiyadi na kominowa si Yahoyada sa kaban na pisowan iyan so lekeb iyan. Tiyago

iyan ko makakawanan o aparan sii ko ipesoled ko Timplo. Na so manga imam a
petemeng ko gimowa iyan na petegoon iran ko kaban so langon a pirak a pegowiten ko
Timplo.
10 Na igira a miyakadakel den a pirak on na pekowaan oto o panonorat sa torogan ago so
maporo a imam na pembilangen iran so pirak a miyawit ko Timplo na petegoon iran ko
manga sako.
11 Igira a miyatendo so kadakel iyan na ipembegay iran ai ko manga tetandingan ko
galebek ko Timplo a ron iran pesokayi so kigagalebek a so manga panday sa kayo, so
manga penagombalay,
12 So manga paniniminto ago so manga pananapil sa ator. Pepamasa siran sa manga
tarakayo ago manga ator a ipegompiya ko Timplo ago so langon a penggastowan sa
kapekaasala on.
13 So pirak a pegowiten ko Timplo o Allah na da manggasto ko kapangembaal sa manga

tagayan a pirak, manga ipetenor ko sombowan, manga ladiya, manga bogiyong o di na so
ped a manga kasangkapan a bolawan o di na pirak a pegosaren ko Timplo
14 Ka ipesokay ai ko kigagalebek ago so manga gasto ko kapegompiyai ko Timplo.
15 So manga tetandingan a pembegan sa pirak a ipesokay ko kigagalebek na da kiran den
paliyogat so kipesoraten iran ko kiyaosara ko pirak a imbegay kiran ka kasasarigan siran.
16 Ogaid na so pirak a pepanekaten pantag ko ipesepaat a ipepapas ko kasalaan ago dosa
na kena a ba pegowita ko Timplo ka rek ai o manga imam.
So Kaposan o Kandadato i Yowas
17 Sa masa oto na si Hasail a dato sa Siriya na gomiyobat sa siti a Gat na miyaagaw

niyan. Oriyan iyan na miyantap sekaniyan gomobat sa Yarosalim.
18 Ogaid na si Yowas a dato sa Yodah na kinowa niyan langon so soti a manga nganin a
inisenggay ko Allah o manga apo iyan a si Yahosapat, si Yahoram ago si Ahasiyas a
manga dato sa Yodah a rakes o manga inisenggay niyan on ago so pen so langon a
bolawan a matatago ko petimoan sa tamok ko Timplo o Allah ago sii ko torogan o dato
na piyakiwit iyan ai a pamemegayan ki Hasail a dato sa Siriya, na da niyan bo tarosi a
Yarosalim.
19 So ped a miyanga sosowasowa ko kandadato i Yowas ago so langon a pinggolaola

20 Na so manga sanasanaan iyan na piyagopakatan iran sekaniyan sa marata na biyono
iran sii sa Bit Milo sii ko lalan a ipesong sa Sila.
21 So manga miyono on na si Yosakar a wata i Simiyat ago si Yahosabad a wata i Somir.
Na minilebeng si Yowas ko pekoboran ko manga apo iyan sii ko siti o Daod. Na si
Amasiyas a wata iyan i miyakasambi on a dato.
2 MANGA DATO 13
Si Yahowahas a Dato sa Israil
Sii ko ikadowa polo ago telo ragon a kandadato i Yowas a wata i Ahasiyas a dato sa
Yodah na si Yahowahas a wata i Diho na miyadato sa Israil sii sa Samariya, na
miyakandato sa miyakasapolo ago pito ragon.
manga dosa i Yarobowam a wata i Nibat a piyakisogok iyan pen ko manga Israil, na da
niyan den ai talikodi.
3 Sabap roo na tanto a kiyararangitan o Allah a Israil na omanoman iyan siran
pepakitaban ki Hasail a dato sa Siriya ago si Bin Hadad a wata iyan.
4 Miyangangampedian si Yahowahas ko Allah na piyakineg sekaniyan o Allah ka

miyailay niyan so tanto a masarangit a kapesonsinga o dato sa Siriya ko manga Israil.
5 Na bigan siran o Allah sa pekasabet a miyakapokas kiran ko kapaar o manga Isiriyan.
Na lomilintad so kapepaginetaw o manga Israil a lagid gowani.
6 Apiya pen oto na itataros iran baden somowa so manga dosa o dato Yarobowam a
piyakisogok iyan ko manga Israil. So pen so barahala o katohanan a Asirah na ndodoo
den sa Samariya.
7 Aya bo a miyalamba ko manga sondaro i Yahowahas na so lima polo a pangongoda,

sapolo a manga karo ago sapolo nggibo a sondaro a pelalag ka piyaminasa siran o dato sa
Siriya a pindapodapoan iyan siran a lagid o bayanek.
8 So ped a miyanga sosowasowa ko kandadato i Yahowahas ago so langon a pinggolaola

niyan ago miyanga papasad na palaya den misosorat ko 'Ribro a Totolan ko manga Dato
sa Israil.'
9 Na miyatay si Yahowahas a inilebeng roo sa Samariya, na si Yahowas a wata iyan i
Si Yahowas a Dato sa Israil
10 Sii ko ikatelo polo ago pito ragon a kandadato i Yowas sa Yodah na si Yahowas a
wata i Yahowahas i miyadato sa Israil sii sa Samariya, na miyakandato sa miyakasapolo
ago nem ragon.
11 Miyakanggolaola sekaniyan sa marata ko kapekeilaya on o Allah. Da niyan talikodi so
langon a manga dosa i Yarobowam a wata i Nibat a piyakisogok iyan pen ko manga Israil
ka initaros iyan den ai.
12 So ped a miyanga sosowasowa ko kandadato i Yahowas ago so langon a pinggolaola
niyan ago miyanga papasad a rakes on so kiyapakitidawa iyan ki Amasiyas a dato sa
Yodah na palaya den misosorat ko 'Ribro a Totolan ko manga Dato sa Israil.'
13 Kagiya matay si Yahowas na inilebeng roo sa Samariya ko pekoboran ko manga dato
sa Israil. So wata iyan a si Yarobowam na aya on miyakasambi a dato.
So Kiyapatay o Nabi Ilisas
14 Sa masa oto na miyasakit si Ilisas ko paniyakit a inipatay niyan. Si Yahowas a dato sa

Israil na mintel rekaniyan na gomiyoraok on a tig iyan a "Ama aken! Ama aken! Seka i
mala i gees a pelinding sa Israil!"
15 Na tig i Ilisas a "Kowa ka sa pana ago manga gasa," na kinowa niyan.

16 “Irata ngka so pana," a tig i Ilisas ko dato sa Israil. So kiyairata niyan on na inidapenet
i Ilisas a manga lima niyan ko manga lima o dato.
17 “Lekai ngka so rowasan sa tampar sa sebangan," a tig i Ilisas, na likaan iyan. "Panaan
ka so gasa!" a tig iyan, na inipana iyan. Na pitero i Ilisas a "Giyoto so domadaag a gasa o
Allah, a so gasa a pekataban sa Siriya! Ka tarotop a kakebinasaa ngka ko manga
Isiriyanen roo sa Apik."
18 Tig pen i Ilisas ko dato a "Kowaa ngka so ped a manga gasa na ilambit ka ko lopa."
Na miyakatelo niyan lambita so lopa na gominek.
19 Kiyararangitan sekaniyan o nabi o Tohan a tig iyan on a "Aya mapiya na makalima o
di na makanem ka malambit so lopa! O giyanan na tebanen ka a Siriya taman sa tarotop a
kambinasaa ngka on. Ogaid na imanto na makatelo ngka baden mataban."
20 Na miyatay si Ilisas na minikobor.

Oman pangolaon na pesondolan a Israil o manga sondaro a Mowabiyo.
21 Miyakaisa alongan na pekobor so manga Israil sa mama na tekaw den a miyakailay
siran sa sagorompong a manga Mowabiyo a penggobat. Na inilebad iran so badan o
mama ko kobor i Ilisas. Na so den so kiniseko o badan iyan ko manga tolan i Ilisas na
miyaoyag so mama na tominindeg.
So dii Katidawa a Israil ago giya Siriya
22 Si Hasail a dato sa Siriya na sosonsingen iyan so manga Israil ko tenday a kandadato i

Yahowahas.
23 Ogaid na inikalimo siran o Allah ago inipangalinggagaw niyan. Tiyago iyan siran sa
ginawa sabap ko kapasadan iyan ko Ibrahim, Iskak ago so Yakob. Na taman imanto na di
niyan kabaya o ba niyan siran binasaa aya pen o ba niyan bowangen.
24 Miyatay si Hasail a dato sa Siriya na si Bin Hadad a wata iyan i miyakasambi on a

dato.
25 Samaoto na si Yahowas a dato sa Israil na miyabawi iyan ki Bin Hadad so manga siti a
miyaagaw i Hasail ki Yahowahas a ama i Yahowas sii ko katidawa. Tiyaban i Yahowas
si Bin Hidad sa miyakatelo na miyakowa niyan peman so manga siti sa Israil.
2 MANGA DATO 14
Si Amasiyas a Dato sa Yodah
Sii ko ikadowa ragon a kandadato i Yahowas a wata i Yahowahas sii sa Israil na si

Amasiyas a wata i Yowas a dato sa Yodah na mipoon ndato.
2 Miyakadowa polo ago lima ragon a idad iyan ko kiyandato iyan na miyakandato sii sa
Yarosalim sa miyakadowa polo ago siyaw ragon. Aya ngaran o ina iyan na si Yahowadin
a taga Yarosalim.
3 Miyakanggolaola sekaniyan sa ontol ko kapekeilaya on o Allah ogaid na kena a ba datar
o pinggolaola o Daod a apo iyan ka siyoson iyan baden so langon taman a pinggolaola o
ama iyan a si Yowas.
4 Da mabinasa so manga aparan sii ko manga bobongan na itataros o manga taw so di
iran on dii kakorban ago kapetotong on sa doka.
5 Kagiya makambeken den so dii kandato i Amasiyas na piyamono iyan so manga

sanasanaan a miyamono ki ama iyan a dato.
6 Ogaid na da niyan peda mamono so manga wata o manga miyamono ka tiyoman iyan so
minisorat ko Kitab o Mosa a "Di kebono so ama a ba sabap ko dosa o wata iyan aya pen o
ba bonoa so wata a ba sabap ko dosa o ama iyan. Ka aya bo a kibono ko taw na so rek
iyan a dosa."
7 Miyakapatay si Amasiyas sa sapolo nggibo a manga Idomiyan roo sa Balintad a Timos.

Inagaw niyan a siti a Siloh sii ko kiyatidawa na bitowan iyan sa Yoktiil a aya niyan den
ngaran taman imanto.
8 Samaoto na miyakawit si Amasiyas sa lalag ko dato sa Israil a si Yahowas a wata i

Yahowahas ago apo i Diho ka inerar iyan sa katidawa.
9 Ogaid na aya inisembag i Yahowas ki Amasiyas na "Aden a sampingit roo sa
kapalawan sa Libanon a pitero iyan ko kayo a sidro a 'Pakipangaromaan ka so wata a ka a
babay ko wata aken a mama.' Ogaid na somiyagad roo a maila a binatang na liyagosak
iyan angkoto a sapingit.
10 Mataan a tiyaban ka a Idomiya na miyangimporoan ka. Patot a ikesoat ka so
kiyapakadaag ka a gegenek ka baden sa walay. Ino ka pegaden sa samok a ikebinasa
ngka ago so manga taw sa Yodah?"
11 Ogaid na da ini tagoa sa ginawa i Amasiyas. Sabap roo na tinimo i dato Yahowas so
manga sondaro niyan sa kanggobata iran ki Amasiyas na miyakasengata siran sii sa Bit
Simis sa Yodah.
12 Miyataban o manga Israil so manga sondaro i Amasiyas na miyamalagoy siran langon
a mimbabaling.
13 Miyabiyag i Yahowas si Amasiyas roo sa Bit Simis; na taros a siyondolan iyan a
Yarosalim na giba iyan so pangeleban on ipoon ko Gimowa a Ipraim taman ko Gimowa
ko Rogo, a dowa gatos ka mitros a katas iyan.
14 Kinowa niyan so langon a bolawan ago pirak ago so manga kasangkapan a miyatoon
iyan ko Timplo o Allah ago sii ko petegoan sa tamok ko torogan o dato. Miyamiyag
sekaniyan pen sa manga taw na komiyasoy sa Samariya.
15 So ped a miyanga sosowasowa ko kandadato i Yahowas ago so manga pinggolaola

niyan ago miyanga papasad iyan taman ko kiyapakitidawa iyan ki Amasiyas a dato sa
Yodah na palaya den misosorat ko 'Ribro a Totolan ko manga Dato sa Israil.'
16 Kagiya matay si Yahowas na inilebeng ko pekoboran ko manga dato sa Israil sii sa
Samariya. Na so wata iyan a si Yarobowam i miyakasambi on a dato.
So Kiyapatay i Amasiyas
17 Si Amasiyas a wata i Yowas a dato sa Yodah na pepaginetaw pen ko miyakasapolo

ago lima ragon ko kiyaipos o kiyapatay i Yahowas a dato sa Israil.
18 So ped a miyanga sosowasowa ko kandadato i Amasiyas na misosorat ko 'Ribro a
Totolan ko manga Dato sa Yodah.'
19 Piyagopakatan si Amasiyas sa marata roo sa Yarosalim na miyagapas sekaniyan sa

Lakis. Ogaid na siyono o manga ridoay niyan na biyono iran roo.
20 Inikasoy iran sekaniyan sa Yarosalim a rororanen ko koda na inilebeng iran sii ko
pekoboran ko manga dato sii ko siti o Daod.
21 Na kinowa o langon a taw sa Yodah so wata i Amasiyas a si Osiyas a aya idad iyan na
sapolo ago nem ragon na biyaloy iran a dato a somiyambi ki ama iyan.
22 Sekaniyan i miyangon peroman sa siti a Ilat a piyakaasal iyan ai a sakop a Yodah ko
kiyaipos o kiyapatay o ama iyan.
Si Yarobowam a dato sa Israil
23 Sii ko ikasapolo ago lima ragon a kandadato i Amasiyas a wata i Yowas sa Yodah na
si Yarobowam a wata i Yahowas a dato sa Israil na mipoon ndato sii sa Samariya na
miyakandato sa miyakapat polo ago isa ragon.
24 Miyakanggolaola sekaniyan sa marata ko kapekeilaya on o Allah a da niyan talikodi so
langon a manga dosa i Yarobowam a wata i Nibat a piyakisogok iyan pen ko manga
Israil.
25 Sekaniyan i miyakaasal ko manga temanaan a Israil ipoon sa Libo Hamat na taman ko
Maatay a Ragat a aya kiyatoman o initopa o Allah a Tohan o Israil a nggolalan ko oripen
iyan a si Yonas a wata i Amitay a so nabi a taga Gat Hipir.
26 Ka miyailay o Allah o ay kapait o kapekeromasay o langon a manga Israil a da den a
ba kiran pekaogop.
27 Na sabap sa da den mapamikir o Allah a ba niyan papasa so ngaran a Israil ko dalem a
doniya na siyabet iyan siran a nggolalan ko kapaar i Yarobowam a wata i Yowas.
28 So ped a miyanga sosowasowa ko kandadato i Yarobowam ago so langon a

pinggolaola niyan ago so kiyapakitidawa iyan a rakes on so kiyapakaasala niyan sa
Damasko ago giya Hamat a sakop a Israil na palaya den misosorat ko 'Ribro a Totolan ko
manga Dato sa Israil.'
29 Miyatay si Yarobowam na inilebeng ko pekoboran ko manga dato sa Israil, na si
Sakariyas a wata iyan na aya on miyakasambi a dato.
2 MANGA DATO 15
Si Osiyas a Dato sa Yodah
Sii ko ikadowa polo ago pito ragon a kandadato i Yarobowam a dato sa Israil na si Osiyas
a wata i Amasiyas na mipoon ndato sa Yodah.
2 Sapolo ago nem ragon a idad iyan isako mabaloy a dato, na miyakandato sa miyakalima
polo ago dowa ragon sii sa Yarosalim. Aya ngaran i ina iyan na si Yakoliyas a taga
Yarosalim.
3 Miyakanggolaola sekaniyan sa ontol ko kapekeilaya on o Allah a lagid o ama iyan a si
Amasiyas.
4 Ogaid na da mabinasa so manga aparan ko manag barahala sii ko manga bobongan na
ipeteros o manga taw so di iran on dii kakorban ago so kapetotong on sa doka.
5 Piyakasekit o Allah si Osiyas na pekebowa sekaniyan ko tenday a omor iyan. Miyaling
sekaniyan ko misisibay a walay na si Yotam a wata o dato na aya tetandingan ko torogan,
na pinggobirnowan iyan so manga pagtaw ko inged.
6 So ped a miyanga sosowasowa ko kandadato i Osiyas ago so langon a pinggolaola

7 Miyatay si Osiyas na minilebeng ko pekoboran ko manga apo iyan sii ko siti o Daod, na
si Yotam a wata iyan na aya on miyakasambi a dato.
Si Sakariyas a Dato sa Israil
8 Sii ko ikatelo polo ago walo ragon a kandadato i Osiyas sa Yodah na si Sakariyas a
wata i Yarobowam na miyadato sa Israil na miyakandato sa miyakanem olan.
9 Miyakanggolaola sekaniyan sa marata ko kapekeilaya on o Allah a datar o manga apo
iyan. Da niyan talikodi so manga dosa i Yarobowam a wata i Nibat a piyakisogok iyan
pen ko manga Israil.
10 Si Siyalom a wata i Yabis na pikediyatan iyan sa marata si Sakariyas na biyono iyan

ko kamamasai ron o madakel a taw na siyambian iyan sekaniyan a dato.
11 So ped a miyanga sosowasowa ko kandadato i Sakariyas na misosorat ko 'Ribro a
Totolan ko manga Dato sa Israil.'
12 Minitoman den so miyatero o Allah ki Diho a "So manga moriyataw ngka na aya
makapendato sa Israil taman ko ikapat ka apid."
Si Siyalom a Dato sa Israil
13 Si Siyalom a wata i Yabis na miyabaloy a dato sa Israil sii ko ikatelo polo ago siyaw
ragon a kandadato i Osiyas sa Yodah na miyakandato sa miyakasaolan sii sa Samariya.
14 Samanaya na si Minahim a wata i Gadi na somiyong sa Samariya a poon sa Tirsah na
biyono iyan roo si Siyalom a wata i Yabis na somiyambi on a dato.
15 So ped a miyanga sosowasowa ko kandadato i Siyalom a rakes on so kiyakadiyat iyan

sa marata na misosorat ko 'Ribro a Totolan ko manga Dato sa Israil.'
16 Sa masa oto na bininasa i Minahim a siti a Tapowah ago so mbabalibeta on a manga

inged a rakes o manga taw ron taman sa Tirsah ka kagiya da iran sekaniyan pakasoleda ko
siti. Apiya so kikaoogat a babay na piyamensi iyan so manga tiyan iran.
Si Minahim a Dato sa Israil
17 Si Minahim a wata i Gadi na mipoon ndato sa Israil sii ko ikatelo polo ago siyaw
ragon a kandadato i Osiyas sa Yodah, na miyakandato sa miyakasapolo ragon sii sa
Samariya.
18 Miyakanggolaola sekaniyan sa marata ko kapekeilaya on Allah. Sii ko langon o masa
a kandadato iyan na da niyan talikodi so manga dosa i Yarobowam a wata i Nibat a
piyakisogok iyan pen ko manga Israil.
19 Samaoto na si Tiglat Pilisir a dato sa Asiriya na gomiyobat sa Israil. Ogaid na migay
rekaniyan si Minahim sa telo polo ago pat nggibo ka kilo a pirak ka miyakitabang on si
Minahim kaan makambeken so kandadatoi niyan sa Israil.
20 Piyanekat i Minahim angkai a pirak ko manga kawasa a taw sa Israil. Tigel iyan so
oman i isa on sa kapakabayad iyan sa tenga sa kilo a pirak a imbegay ko dato sa Asiriya.
Sabap roo na da panareg si Tiglat Pilisir sa Israil na miyaling ko inged iyan.
21 So ped a miyanga sosowasowa ko kandadato i Minahim ago so langon a pinggolaola

22 Miyatay si Minahim na si Pikahiyas a wata iyan na aya on miyakasambi a dato.
Si Pikahiyas a Dato sa Israil
23 Si Pikahiyas a wata i Minahim na mipoon ndato sa Israil sii ko ikalima polo ragon a
kandadato i Osiyas sa Yodah. Na miyakandato sekaniyan sa miyakadowa ragon roo sa
Samariya.
manga dosa i Yarobowam a wata i Nibat a piyakisogok niyan pen ko manga Israil.
25 So isa a kapitan ko manga sondaro niyan si Pikah a wata i Rimaliyas na pikediyatan
iyan sa marata si Pikahiyas. Miyakaonot sekaniyan sa lima polo kataw a taga Giliyad na
biyono iyan si Pikahiyas a rakes i Argob ago si Ariyas sii ko kota ko torogan o dato roo sa
Samariya. Na si Pikah i miyakasambi on a dato.
26 So ped a miyanga sosowasowa ko kandadato i Pikahiyas ago so langon a pinggolaola

Si Pikah a Dato sa Israil
27 Sii ko ikalima polo ago dowa ragon a kandadato i Osiyas sa Yodah na si Pikah a wata i
Rimaliyas na miyabaloy a dato sa Israil sii sa Samariya na miyakandato sa miyakadowa
polo ragon.
manga dosa i Yarobowam a wata i Nibat a piyakisogok iyan pen ko manga Israil.
29 Sii ko kandadato i Pikah sa Israil na si Tiglat Pilisir a dato sa Asiriya na somiyondol sa

Israil na miyaagaw niyan so manga siti a Iyon, Abil Bit Maakah, Yanoah, Kidis ago
Hasor. Miyaagaw niyan pen so manga inged a Giliyad, Galili ago giya Naptali, na
biniyag iyan so manga taw na initaog iyan siran roo sa Asiriya.
30 Na si Hosiya a wata i Ilah na pikediyatan iyan sa marata si Pikah na biyono iyan ago
siyambian iyan a dato sii ko ikadowa polo ragon a kandadato i Yotam a wata i Osiyas.
31 So ped a miyanga sosowasowa ko kandadato i Pikah ago so langon a pinggolaola
Si Yotam a Dato sa Yodah
32 Sii ko ikadowa ragon a kandadato i Pikah a wata i Rimaliyas sa Israil na si Yotam a

wata i Osiyas na miyadato sa Yodah.
33 Miyakadowa polo ago lima ragon a idad iyan ko kiyandato iyan na miyakandato sa
miyakasapolo ago nem ragon sii sa Yarosalim. Aya ngaran o ina iyan na si Yarosa a wata
i Sadok.
34 Miyakanggolaola sekaniyan sa ontol ko kapekeilaya on Allah a datar o ama iyan a
Osiyas.
35 Ogaid na da mabinasa so manga aparan ko manga barahala sii ko manga bobongan na
itataros den o manga taw so di iran on dii kakorban ago kapetotong on sa doka. Si Yotam
i miyangon peroman sa Kaporoan a Gimowa o Timplo o Allah.
36 Na so ped a miyanga sosowasowa ko kandadato i Yotam ago so langon a pinggolaola

niyan na palaya misosorat ko 'Ribro a Totolan ko manga Dato sa Yodah.'
37 Giyangkoto a masa na aya paganay a kiyasogoa o Allah ki Risin a dato sa Siriya ago si
Pikah a dato sa Israil sa kanggobata iran sa Yodah.
38 Na miyatay si Yotam na inilebeng ko pekoboran ko manga dato sii ko siti o Daod a
apo iyan, na si Ahas a wata iyan i miyakasambi on a dato.
2 MANGA DATO 16
Si Ahas a Dato sa Yodah
Sii ko ikasapolo ago pito ragon a kandadato i Pikah a wata i Rimaliyas sa Israil na si Ahas
a wata i Yotam na miyadato sa Yodah.
2 Dowa polo ragon a idad iyan ko kiyapoon iyan ndato na miyakandato sa miyakasapolo
ago nem ragon roo sa Yarosalim. Da niyan sowaa so okitokit o apo iyan a Daod ka da
niyan nggolaolaa so ontol ko kapekeilaya on o Allah.
3 Siyoson iyan baden so okitokit o manga dato sa Israil ka apiya so wata iyan a mama na
inisoasoat iyan a petotongen ko apoy a aya niyan kiyasongkada ko piyakasisingay a
paparangayan o ped a manga nasiyon a biyogaw o Allah ko kapesorongi kiran o manga
Israil.
4 Di sekaniyan dii korban ago petotong sa doka roo ko manga aparan ko manga barahala
sii ko manga poporo a darpa ago sii ko manga bobongan ago sii ko atag oman i
marimpoong a kayo.
5 Si Risin a dato sa Siriya ago si Pikah a dato sa Israil na somiyong sa Yarosalim sa

kapakipetidawa iran ki Ahas. Na linikopan iran a Yarosalim ogaid na di iran kedaag si
Ahas.
6 Sa masa oto na so dato sa Idomiya na miyasakop iyan bo a siti a Ilat na biyogaw niyan
so manga taga Yodah a kibabaling roo. Na miyaling roo so manga Idomiyan na ron den
mababaling taman imanto.
7 Na somiyogo si Ahas roo ki Tiglat Pilisir a dato sa Asiriya a matero iyan on a "Oripen
ako ngka a kambabayaan reka. Song ka sii na sabeta ko ngka ko kapaar o dato sa Siriya
ago so dato sa Israil a gomiyobat raken."
8 Na kinowa i Ahas so manga pirak ago manga bolawan a matatago ko Timplo o Allah
ago sii ko petegoan sa tamok ko torogan o dato na piyakiwit iyan ai a pamemegayan ko
dato sa Asiriya.
9 Na tiyoman ai o dato sa Asiriya ka giyobat iyan a Damasko na miyaagaw niyan.
Biniyag iyan so manga taw ron na initaog iyan siran roo sa Kir na biyono iyan pen so dato
Risin.
10 Mandiyadi na somiyong so dato Ahas roo sa Damasko sa kipegilayaan iyan ki Tiglat

Pilisir a dato sa Asiriya. Roo sa Damasko na miyakailay si Ahas sa aparan na miyakawit
sekaniyan ki Oriyas a imam sa ladiyawan ko aparan a rakes o osayan ko kapagembaali
ron.
11 Na mimbaal si Oriyas sa aparan a inisayan ko ladiyawan a inipakawit on o dato Ahas a
poon sa Damasko, na inimasad iyan ai sa di pen kapekakasoy o dato Ahas.
12 Na sii ko kiyapakabaling o dato a poon sa Damasko na inilay niyan so aparan na
somiyapaat sekaniyan on
13 Sa manga korban ago manga pangenengken a petotongen, miyodod on sa soasoat a
panginginomen na inipirik iyan on so rogo o pikorban iyan pantag bo ko kanggiginawai.
14 Na kinowa i Ahas so tombaga a aparan a makatitindeg ko penggaka o Timplo o Allah
sii ko pageletan o bago a aparan ago so Timplo na inibetad iyan sa tampar sa pagotaraan o
bago a aparan.
15 Mandiyadi na inisogo iyan ki Oriyas a imam a "Osara ngka so bago a aparan ko
kapetotonga ngka ko manga korban igira a kapipita ago so kipesepaaten ko pangenengken
igira a kegabigabi ago so pen so kipesepaaten ko petotongen a korban o dato ago so
manga pangenengken iyan ago so pen so petotongen a korban o langon a taw ko inged a
rakes o manga pangenengken iran ago panginginomen. Na piriken ka sangkai a aparan so
langon a rogo o manga ayam a ipesepaat on a petotongen ago dii korbanen. Ogaid na
senggain ka raken so aparan a tombaga a maosar aken ko kaperimar."
16 Na ininggolalan i Oriyas so langon a inisogo o dato Ahas.
17 Piyanongkas o dato Ahas so mapepagalin a manga batoga na kinowa niyan on so

manga palanggana. Na kinowa niyan on so maolad a tangela sa ig a pepangonaban ko
pembatogan on a manga likod o manga mama sapi a tombaga na inibetad iyan ko manga
ator.
18 Kinowa niyan pen so sayap a miyabangon ko lamalama o Timplo o Allah a pegosaren
ko Gawii a Idedeke, na inolen iyan so gimowa o Timplo a isesenggay ko dato kaan
misoasoat ko dato sa Asiriya.
19 Na so ped a miyanga sosowasowa ko kandadato i Ahas ago so miyanggolaola niyan na

misosorat ko 'Ribro a Totolan ko manga Dato sa Yodah.'
20 Miyatay si Ahas na inilebeng ko pekoboran ko manga apo iyan sii ko siti o Daod, na si
Hisikiyas a wata iyan i miyakasambi on a dato.
2 MANGA DATO 17
Si Hosiya a so Moripori a Dato sa Israil
Sii ko ikasapolo ago dowa ragon a kandadato i Ahas sa Yodah na si Hosiya a wata i Ilah
na miyadato sa Israil, na miyakandato sa miyakasiyaw ragon sii sa Samariya.
2 Miyakanggolaola sekaniyan sa marata ko kapekeilaya on o Allah ogaid na kena a ba
datar o manga dato sa Israil a miyanga oonaan iyan.
3 Si Salmanisir a dato sa Asiriya na giyobat iyan si Hosiya na miyoral on si Hosiya ago

pembayad on sa bowis sa oman ragon.
4 Ogaid na miyakaisa a ragon na tinipo i Hosiya so dato sa Asiriya ka somiyogo
sekaniyan sa manga taw ki So a dato sa Misir a miyakitabang on na gominek mayad sa
bowis ko dato sa Asiriya a di niyan dii minggolalan ko oman ragon. Sabap roo na
piyakidakep sekaniyan i Salmanisir na piyakikalaboso niyan.
5 Mandiyadi na siyondolan i Salmanisir a dalem a Israil na linikopan iyan a Samariya. Sii
ko ikatelo ragon a kalilikopi niyan on,
6 A so ikasiyaw ragon ko kandadato i Hosiya, na miyaagaw a Samariya o dato sa Asiriya
na biniyag iyan so manga Israil ago initaog iran siran roo sa Asiriya. Na piyakabaling
iyan siran sii sa Halah, sii ko inged a Gosan a marani ko Lawasaig a Habor, ago sii ko
manga siti sa Midiya.
Miyamangitaog so manga Israil sabap ko Dosa
7 Langon ai miyanggolaola sabap ko kiyapakandosa o manga Israil ko Allah a Tohan iran

a aya kiran miyakaliyo sa inged a Misir a ron siran piyangongoripen o Piraon a dato sa
Misir. Sominimba siran sa ped a manga katohanan
8 Na siyoson iran so manga adat o manga nasiyon a piyamogaw o Allah sii ko
kapesorongi kiran o manga Israil, ago siyowa iran so manga olaola o manga dato sa Israil.
9 Miyakanggolaola pen so manga Israil sa manga pageemaan a minisopak iran ko Allah a
Tohan iran. Mimbaal siran sa manga aparan ko manga barahala sii ko manga bobongan
sii ko langon a inged iran a mala maito.
10 Na piyamakatindegan iran sa babarakaten kon a manga polaos a ator ago manga
polaos a toos ko katohanan a Asirah so oman i maporo a bobongan ago sii ko atag o oman
i marimpoong a kayo.
11 Petotong siran sa doka ko oman i aparan ko barahala a lagid o dii nggolaolaan o
manga nasiyon a piyamogaw o Allah ko kapepekaantap iran on. Piyakakerangit iran so
Allah ko langon a marata a pinggolaola iran.
12 Sominimba siran sa manga barahala apiya pen miyatero kiran o Allah a "Di niyo anan
penggolaolaa!"
13 Omanoman pesogoon o Allah so manga nabi niyan ago manga pepekaalamat a
piyakaiktiyar iran so manga taw sa Israil ago giya Yodah: "Panalikodi niyo so manga
rarata a olaola niyo. Tomana niyo so manga sogoan aken ago manga kokoman a
madadalem ko langon o kitab a inisogo aken ko manga apo iyo a initoron aken rekano a
nggolalan ko manga oripen aken a manga nabi."
14 Ogaid na da iran ai paratiyayaa ka manga tetegas siran i olo a lagid o manga apo iran a
da sarig ko Allah a Tohan iran.
15 Inisili iran so manga sogoan iyan ago so kapasadan a pimbaalan iyan mipantag ko
manga apo iran na da iran pakinega so kiyapakapagiktiyara niyan kiran. Sominimba siran
sa da a bali niyan a manga barahala na giya den a ginawa iran i miyabaloy a da a bali
niyan. Iniringan iran so manga nasiyon a mbabalibeta kiran ba di inisogo kiran o Allah a
"O ba niyo sowaa so di iran dii nggolaolaan!" na pinggolaola iran so inisapar kiran o
Allah.
16 Siyogok iran so langon a sogoan o Allah a Tohan iran na inimbaal iran a ginawa iran
sa dowa timan a tiyowang a barahala a inisayan sa manga nati a sapi. Mimbaal siran pen
sa barahala a katohanan a Asirah, na pesodiyodan iran so langon a kaaden sa langit ago
pesimbaan iran so katohanan a Baal.
17 Di iran dii soasoat so manga wata iran a manga mama ago manga babay a petotongen
ko apoy. Di iran dii nggolaolaan so kaperimar ago kapangatao na di iran dii pesaan a
ginawa iran ko kanggolaola sa marata ko kamamasai ron o Allah a aya iran on
kiyapakakerangita.
18 Na sabap ko tanto a kapekerarangiti o Allah ko manga Israil na piyakaawa iyan siran a

poon ko kamamasaan iyan, na so bo so mbatabataa Yodah i miyalamba.
19 Ogaid na apiya so manga taw sa Yodah na da iran tomana so manga sogoan o Allah a
Tohan iran ka siyoson iran so manga okitokit a mininggolalan o manga Israil.
20 Sabap roo na tiyalikodan o Allah so langon o manga Israil na siniksa iyan siran a
piyalad iyan siran ko manga di kiran dii nggogobat taman sa minibowang iyan siran ko a
poon ko kamamasaan iyan.
21 Isako kakaan o Allah a Israil a poon ko kandadatoi ron o manga mbawataan o Daod na
biyaloy o manga Israil si Yarobowam a wata i Nibat a dato iran. Inagak siran i
Yarobowam sa kaawai ran ko kapegonoti ran ko Allah, na piyakandosa niyan siran sa
mala a dosa.
22 Na itataros den o manga Israil somowa so langon a manga dosa i Yarobowam a da iran
den ai geneki
23 A iniarong ko kiyapakaawaa kiran o Allah a poon ko kamamasaan iyan a giyoto so
inipakaiktiyar iyan kiran a nggolalan ko langon a manga oripen iyan a manga nabi. Na
miyaakar so manga Israil a poon ko inged iran a miyamangitaog roo sa Asiriya, na
ndodoo siran den.
Kiyabalingan bo a Samariya
24 So dato sa Asiriya na miyakawit sa manga taw a poon ko manga siti sa Babilon,

Kotah, Aba, Hamat ago giya Siparbaim na piyakapaginged iyan siran sii ko manga siti sa
Samariya a minisambi ko manga Israil. Na miyatangan iran a inged a Samariya na
biyalingan iran roo so manga siti.
25 Ogaid na sii ko kiyapoon iran roo maling na da siran simba ko Allah. Sabap roo na
inowitan iyan siran sa manga arimaw a miyakapatay ko ped ko manga taw.
26 Miyapanotol ko dato sa Asiriya a "So manga taw a piyakapaginged ka ko manga siti sa
Samariya na di iran katawan o andamanaya i kasimbaa ko tohan a inged oto. Na
somiyogo sekaniyan sa manga arimaw a pepekapatay kiran, ka di iran katawan o antonaa i
ipapaliyogat iyan."
27 Na giyoto a inisogo o dato sa Asiriya a "So isa ko manga imam a miyabiyag a poon sa
Samariya na pakakasoya niyo ron maling kaan iyan mipangendao ko manga taw so
ipapaliyogat o tohan o inged."
28 Mandiyadi na so isa ko manga imam a minitaog a poon sa Samariya na komiyasoy roo
a miyaling sa Bitil na piyangendao niyan siran ko kasimbaa ko Allah.
29 Apiya pen oto na so oman i bangsa sii kiran na itataros iran somimba so rek iran a
manga katohanan sii ko oman i siti a babalingan iran. Pepakatindegen iran so manga
barahala iran sii ko manga darpa a pesimbaan a inembaalan o manga Israil sii ko manga
bobongan.
30 So manga taw a poon sa Babilon na miyangembaal sa barahala o Sokot Binot, so
manga taw a poon sa Kotah na miyangembaal sa Nirgal, so manga taga Hamat na
miyangembaal sa Asima,
31 So manga taga Abit na miyangembaal sa Nibhas ago Tartak, na so manga Siparbitiyo
na di iran dii soasoat so manga wata iran a petotongen ko apoy sii ko manga katohanan
iran a Adramilik ago Anamilik.
32 Pesimbaan iran mambo so Allah ogaid na ipetoro iran so pitibarangan a manga taw
iran a makapegimam ko manga aparan ko manga barahala sii ko manga bobongan a roo
iran siran pepakasapaata sa manga soasoat.
33 Apiya iran pesimbaan so Allah na pepangongonotanan iran pen so manga katohanan
iran ko manga okitokit o manga nasiyon a kiyapoonan iran.
34 Taman imanto na idadayon iran den so manga andang a adat iran. Kena a ba tito a
kapesimbaa iran ko Allah aya pen o ba iran petomanen so manga taritib, manga kokoman,
manga kitab ago manga sogoan a inibegay o Allah ko kiyababadan ko Yakob a bitowan
iyan sa Israil.
35 Sii ko kiyambaal o Allah sa kapasadan mipantag ko manga Israil na inisogo iyan kiran
a "Di kano simba sa ped a manga tohan o di na sodiyod kiran o di na penalagad on aya
pen o ba kano ron pekorban.
36 Ka so bo so Allah i simbaa niyo a aya rekano miyakaliyo sa Misir ko kala iyan i kapaar
ago kabatowa. Sekaniyan i sodiyodi niyo ago korbani.
37 Lalayon kano pagiiktiyar tomoman ko manga taritib, manga kokoman, manga kitab
ago manga sogoan a inisorat aken rekano. Di kano simba sa ped a manga tohan.
38 Di niyo pekalipati so kapasadan a inembaalan aken rekano aya pen o ba kano simba sa
ped a manga tohan.
39 Ka aya niyo simbaa na so Allah a Tohan iyo ka sekaniyan i pekasabet rekano ko
kapaar o langon a manga ridoay niyo."
40 Ogaid na da iran ai pakinega ka ipeteros iran den so andang a paparangayan iran.
41 Apiya pen pesimbaan angkai a manga taw so Allah na pesimbaan iran pen so manga
barahala iran, na taman imanto na so manga moriyataw iran na peteros nggolaola sa datar
oto.
2 MANGA DATO 18
Si Hisikiyas a Dato sa Yodah
Sii ko ikatelo ragon a kandadato i Hosiya a wata i Ilah sii sa Israil na si Hisikiyas a wata i
Ahas na miyabaloy a dato sa Yodah.
2 Miyakadowa polo ago lima ragon a idad iyan isako poon ndato na miyakandato sa
miyakadowa polo ago siyaw ragon sii sa Yarosalim. Na aya ngaran o ina iyan na si
Abihah a wata i Sakariyas.
3 Miyakanggolaola sekaniyan sa ontol ko kapekeilaya on o Allah a datar o apo iyan a
Daod.
4 Piyaminasa niyan so manga aparan ko manga barahala sii ko manga bobongan, na
piroropet iyan so babarakaten kon a manga ator ago piyamata iyan so manga polaos a toos
ko katohanan a Asirah. Siyasa iyan pen so tombaga a nipay a pimbaalan o Mosa, ka
taman den sangkoto a gawii na pepamanotong on so manga Israil sa doka a ipeselasela
on. (Bebetowan so nipay sa 'Nihostan.')
5 Sasarigan i Hisikiyas so Allah a Tohan o Israil. Da den a ba niyan datar ko

kalangolangon a manga dato sa Yodah apiya anda ko miyanga oonaan iyan ago so
miyanga ooriyan iyan.
6 Pepanagontaman sekaniyan ko Allah na da den silay ko kapegonoti niyan on ka
petomanen iyan piyapiya so manga sogoan a inibegay o Allah ko Mosa.
7 Sisii rekaniyan so Allah na tetagompiya sekaniyan ko apiya antonaa i di niyan dii
nggolaolaan. Siyopak iyan so dato sa Asiriya na da sekaniyan on pakimbayabaya.
8 Tiyaban iyan so manga Pilistiyo sii ko pagiingedan iran taman den sa Gasa ago so
manga sakop iyan a apiya anda ko lebi on a maito a siti ago so mala a kokotaan.
9 Sii ko ikapat ragon a kandadato i Hisikiyas a giyoto so ikapito ragon a kandadato i

Hosiya sa Israil na si Salmanisir a dato sa Asiriya na siyondolan iyan a Samariya na
linikopan iyan.
10 Sii ko kaposan o ikatelo ragon a kalilikopi ron na miyataban ai o manga taw sa
Asiriya. Miyaagaw a Samariya sii ko ikanem ragon a kandadato i Hisikiyas a giyoto so
ikasiyaw ragon a kandadato i Hosiya sa Israil.
11 So dato sa Asiriya na initaog iyan so manga Israil na piyakapaginged iyan siran roo sa
Halah, sii sa Gosan a marani ko Lawasaig a Habor ago sii ko manga siti sa Midiya.
12 Miyanggolaola ini sabap sa da iran paratiyayaa so Allah a Tohan iran, ka siyogok iran
so kapasadan iyan, a so langon a sogoan a inibegay o Allah a nggolalan ko oripen iyan a
Mosa. Da iran den ai pakinega aya pen o ba iran tiyoman.
Siyondolan o manga taw sa Asiriya a Yodah

13 Sii ko ikasapolo ago pat ragon a kandadato i Hisikiyas na si Sinakarib a dato sa
Asiriya na giyobat iyan langon so kikokotaan a siti sa Yodah na miyanga aagaw niyan.
14 Sabap roo na piyakiwit o dato Hisikiyas angkai a lalag ki Sinakarib roo sa Lakis a tig
iyan a "Miyakanggolaola ko sa ribat. Awai ako ngka ka mbayadan ko seka sa apiya
antonaa i kabaya a ka raken." Na aya inipanton on o dato sa Asiriya na sapolo nggibo ka
kilo a pirak ago sanggibo ka kilo a bolawan.
15 Sabap roo na inibegay rekaniyan i Hisikiyas so langowan a pirak a matatago ko
Timplo o Allah ago sii ko petegoan sa tamok ko torogan o dato.
16 Na piyangaka iyan pen so bolawan ko manga pintoan o Timplo o Allah na pilelekat
iyan so bolawan a inilapis iyan ko manga tokod o manga pintoan na piyakiwit iyan langon
ko dato sa Asiriya.
17 Apiya pen oto na somiyogo so dato sa Asiriya sa madakel a sondaro a poon sa Lakis
sa kasong iran ki Hisikiyas roo sa Yarosalim a pagoolowanan siran o telo kataw a manga
poporo a komandir iyan. Kagiya makaoma siran sa Yarosalim na tomiyareg siran ko obay
o lalan a ipesong sa pangomaan a pepamamipian a marani ko kakar a ipegokit o ig a poon
ko mipoporo a pepondowan on.
18 Tiyawag iran so dato na lominiyo kiran si Iliyakim a wata i Hilkiyas a so tetandingan
ko torogan, si Sibna a panonorat ago si Yowas a wata i Asap a aya komikibir ko manga
rikord.
19 Na pitero kiran o isa ko manga komandir a "Teroa niyo ki Hisikiyas angkai a kabasa o
kababantogan a dato sa Asiriya:
Antonaa i pepasodan ka sangkai a kasasana ngka?

20 Aya pitero o ka na aden a kapasang ka ago kabager sa katidawa, ogaid na da a
benar on. Anta i sasarigan ka a siyorang ako ngka?
21 Ilaya ngka man ka giya Misir a sasarigan ka na lagid o maoopak a teken a
pekabowar ago pekapali sa lima o taw a ndeken on. So Piraon a dato sa Misir na
lagid anan ko langon a somasarig on.
22 “Na o peteroa niyo raken a 'Aya sasarigan ami na so Allah a Tohan ami!" na ba di
sekaniyan i kirek ko manga aparan a pinggegeba i Hisikiyas sii ko manga bobongan a
tig iyan a "Sii kano bo pekasimba sangkai a aparan sa Yarosalim'?"
23 Tig pen o komandir a
"Na den, makipepesadanowai rekano so kadnan aken a dato sa Asiriya. Mbegan
kano niyan sa dowa nggibo a koda o aden a ketoon iyo a manga sondaro a
mapakakoda iyo ron!
24 Andamanaya den i kapekaato niyo ko apiya isa bo ko lebi a manga bababa a
kapitan o manga sondaro o kadnan aken bapiya pen aya niyo sasarigan na Misir sa
kabegi niyan rekano sa manga karo ago manga pangongoda?
25 Liyo san pen na ba aya katawi ngka on na miyakaoma ko sii a nggobat ago
mbinasa sangkai a darpa a ba da sogoon o Allah? Kena, ka so den so Allah i
somiyogo raken sa kanggobata ago kambinasaa ko ron."
26 Mandiyadi na si Iliyakim a wata i Hilkiyas, si Sibna ago si Yowas na pitero iran ko
komandir a "Kapedipedi ka bo na mbitiyarain kami ngka a manga oripen ka sa basa
Aramaik ka kesabotan ami. Di ngka rekami pakipembitiyarai sa basa a Hibriyo ko
kapekenega on o manga taw ko pangeleban o siti."
27 Ogaid na tig o komandir a "Ba aya katao niyo ron a so bo so dato iyo ago sekano i
siyogoan raken o kadnan aken sa kapeteroa ko sii? Kena, ka so pen so manga taw a
kioontod ko pangeleban a datar iyo a pekakan ko tai iran ago pekainom ko titi iran!"
28 Na giyoto a tominindeg so komandir na miyananalo sa matanog sa basa a Hibriyo a

"Pamakinega niyo so kabasa o kababantogan a dato, a so dato sa Asiriya!
29 Aya pitero iyan na: Di kano pekiakal ki Hisikiyas. Di kano niyan pekalidasen ko
kapaar aken.
30 Di kano pekiakol ki Hisikiyas sa kaserigi niyo ko Allah ko kapeteroa niyan a
'Matamataan a sebeten tano o Allah na giyangkai a siti na di den kepalad ko dato sa
Asiriya.'
31 “Di niyo pekinega si Hisikiyas! Giyai i pitero o dato sa Asiriya: Liyo kano ko siti na
oral kano raken, ka so oman i isa rekano na pekataros koman ko onga o waged iyan ago
kayo a higos ago pekainom pen sa ig ko paridi iyan
32 Taman sa makaoma ako sa kapagowita ko rekano ko inged a lagid angkai a inged iyo,
a so inged a oodaren sa pereperan ago bago a arak, a madakel a pangenengken on, manga
asinda a obas ago manga kayo a olibi, a so kateneban a inged. Pilia niyo so kaoyagoyag a
kena o ba so kapatay! Di niyo pekinega si Hisikiyas ka pendadagen kano niyan ko
kiyateroa niyan on a 'Sebeten tano o Allah!'
33 Ba aden a tohan o apiya anda a nasiyon a ba niyan piyakalidas so inged iyan ko tangan
o dato sa Asiriya?
34 Anda so manga tohan sa siti a Hamat ago giya Arpad? Anda so manga tohan sa
Siparbaim, Hina ago giya Ibah? Ba iran miyapakalidas a Samariya ko lima ko?
35 Antawaa ko kalangolangon a manga tohan sangkai a manga nasiyon i ba niyan raken
miyasabet so inged iyan? Na andamanaya den i kapakalidasa o Allah sa Yarosalim ko
kapaar aken?"
36 Ogaid na baden rerenek so manga taw a da a inisembag iran on ka kagiya inisogo o

dato a "Di niyo sembaga."
37 Mandiyadi na si Iliyakim a tetandingan ko torogan, si Sibna a panonorat ago si Yowas

a komikibir ko manga rikord na kinisi iran so manga nditaren iran sa kamboboko na
miyamanong ki Hisikiyas a piyanotol iran on so pitero o komandir.
2 MANGA DATO 19
Miyangni so Dato sa Mosawir
So kiyanega sii o dato Hisikiyas na kinisi iyan so manga nditaren iyan na minditar sa
sako, na somiyong ko Timplo o Allah.
2 Na siyogo iyan si kiki Iliyakim a so tetandingan ko torogan, si Sibna a panonorat ago so
manga olowan a manga imam a palaya kindiditar sa sako sa kasong iran ko nabi Isayas a
wata i Amos.
3 Pitero iran on angkai a kabasa i Hisikiyas: "Giyangkai a gawii na gawii a kamaregenan.
Pesiksaan tano ago pekowaan a diyaman a lagid igira a pekilotad so wata a da a bager o
ina iyan sa kipemberoten iyan on.
4 Masiken a pemakinegen o Allah a Tohan ka so langon a katero o komandir a siyogo o
kadnan iyan a dato sa Asiriya sa kapemagongatongata niyan ko oyagoyag a Tohan.
Pangnin ta a masiksa sekaniyan o Allah a Tohan ka sabap sangkai a manga katero a
miyaneg iyan. Na, pangangarapanen ka so lamba a manga taw a miyakapamagoyag."
5 So kiyawita o manga siyogo o dato Hisikiyas sangkai a lalag iyan ki Isayas

6 Na pitero kiran i Isayas a "Teroa niyo ko kadnan iyo a 'Giyai i kabasa o Allah: Di niyo
pekeleken so manga katero a miyaneg iyo a minipagitowito raken o manga oripen o dato
sa Asiriya.
7 Ilaya ngka man ka peseriat ako a sorang on ka pekineg aken ko dato so totol a
kesabapan ko kakesoy niyan ko inged iyan, na roo aken pekibono a pedang.' "
8 So peman so komandir a poon sa Asiriya na kiyatokawan iyan a inawaan o dato sa

Asiriya a siti a Lakis ka dii makitidawa ko manga taw sa Libnah. Sabap roo na somiyong
on so komandir a makpemosawir on.
9 Samanaya na miniripot ki Sinakarib a dato sa Asiriya a si Tirhakah a taga Kos a so dato
sa Misir na pepekaantap rekaniyan a magoolowan ko manga sondaro sa kapakipetidawa
iran on. Kagiya maneg ai i Sinakarib na miyakawit sekaniyan peman sa lalag ki Hisikiyas
a dato sa Yodah a tig iyan a
10 “Di ka pekiakal ko tohan a sasarigan ka ko kiyateroa niyan on reka a 'Giya Yarosalim
na di kepalad ko dato sa Asiriya.'
11 Katawan ko a miyaneg ka so inikidia o manga dato sa Asiriya ko langon a inged a
piyaminasa iran sa tarotop. Na kilidas ka bes?
12 Ba miyapakalidas o manga tohan iran so manga nasiyon a miyabinasa o manga apo
aken, a so manga tohan sa Gosan, Haran, Risip ago so manga taw sa Idin a kibabaling sa
Tilasar?
13 Anda den so dato sa Hamat, so dato sa Arpad ago so manga dato sa siti a Siparbaim
ago Hina ago giya Ibah?"
So Pangangarapan i Hisikiyas
14 Miyadawat i Hisikiyas so sorat a poon ko manga siyogo na biyatiya iyan. Mandiyadi

na somiyong sekaniyan ko Timplo o Allah na kiyayat iyan so sorat ko kamamasaan o
Allah.
15 Na miyangangarapan si Hisikiyas ko Allah a tig iyan a "Ya Allah a Tohan o Israil a
kokorsi ko poro o dowa a piyagtawtaw a manga malaikat, seka bo i Tohan o
kalangolangon a ndatoan ko doniya. Inaden ka so langit ago so lopa.
16 Lekai ngka, ya Allah, so tangila ngka na pakinegen ka; bekara ngka so mata ngka na
ilain ka; pamakinega ngka so manga katero a piyakiwit i Sinakarib a inipanonongka iyan
ko oyagoyag a Tohan!
17 “Benar den, ya Allah, a so manga dato sa Asiriya na miyalaslas iran angkai a manga
nasiyon ago so manga kaingedan iran.
18 Inilebad iran so manga tohan iran ko apoy na piyaminasa iran, ka kena ini o ba tito a
manga tohan ka matag baden manga barahala a kayo ago ator a piteong o lima o
manosiya.
19 Imanto, ya Allah a Tohan ami, na lidasen kami ngka ko kapaar o dato sa Asiriya kaan
katokawi o langon a ndatoan ko doniya a seka bo, ya Allah, i Tohan."
Miyaalamat i Isayas so Kakebinasa i Sinakarib
20 Mandiyadi na si Isayas a wata i Amos na miyakawit sa lalag ki Hisikiyas a tig iyan a

"Giyai i pitero o Allah a Tohan o Israil: Tiyarima aken so pangni ngka makapantag ki
Sinakarib a dato sa Asiriya.
21 Na giyai i pitero o Allah a inisopak rekaniyan:
Giya Siyon, a siti a Yarosalim, na di ka niyan dii sodiin

ago di reka dii mangelengkeleng ko kapepalagoy ngka.
22 Antawaa i mapipikir ka a piyagongatongat ka ago piyagitowito?
Antawaa i pipesongan ka ago pitekaboran?
So den so Soti a Tohan o Israil!
23 Miyakanggolalan ko manga siyogo o ka
na piyagitowito o ka so Kadnan
na miyatero o ka a 'Rakes o madakel a karo aken
na miyanik ako taman ko poro o manga palaw,
a so lebi a maporo a manga palaw roo sa Libanon.
Miyapata aken so lebi a manga poporo on a kayo a sidro
ago so lebi a manga pipiya on a kayo a kalipapa.
Miyaoma ko so pinakamawatan on a darpa
sii ko lebi a manga pipiya a kalasan on.
24 Miyakakalot ako sa manga paridi sii ko kaingedan o manga rait
ago miyakainom ko ig on.
Miyapakamara o palad a ai o manga sondaro aken
so langon a lawasaig sa Misir.'
25 “Di ngka bes katawan a miyatey den a inisogo aken ai?

Sii ko andang a manga gawii na miyatekdir aken,
na imanto na mininggolalan aken den,
ka bigan aken seka sa gees sa kiyabaloya ngka ko kikokotaan a manga siti a piyamatiyong
a ator.
26 Giyanan i sabap a manga lolobay so manga taw ron
a miyanga alek ago miyanga lilibog.
Lagid siran o manga pamomolan ko kalopaan
ago lagid o manga lonaw a malemek a otan,
na lagid mambo o otan a mireretok ko liyawaw o atep
a kelanes ko di niyan pen kapekala.
27 “Ogaid na katawan ko seka piyapiya

ago ay kapelalakaw ngka ago kapekesoy,
ago so di ngka raken dii kakerangiti.
28 Na sabap sa minisampay ko tangila ko
so di ngka raken dii kakerangiti ago so katetakabor ka
na sengiten aken so ngirong ka
ago kekangan aken so ngari i ka
na tondaan ko seka komasoy
ko iniokit ka ko kiyasong ka sii."
29 Na pitero i Isayas ki Hisikiyas a "Giyai i toos reka sa so Allah i mitero sii: Sii sangkai
a ragon ago so telondog a ragon na aya bo a kekan iyo na so pereperan a mangengeto a da
niyo pamolaa. Ogaid na sii ko ikatelo ragon na pekasaod kano ago makaperagon.
Pekapamola kano sa manga waged a obas na pekakan kano ko manga onga niyan.
30 Na so lamba ko manga taw sa Yodah a makapemagoyag na pembekaw peroman sa
madalem ago pemangonga sii sa poro.
31 Ka aden a kelamba a manga taw a makapegoyag a pekapoon sa Yarosalim ago so
Palaw a Siyon. So kasigi o Allah a Lebi a Mamaapaar na aya sii penggolalan.
32 “Giyai i kabasa o Allah makapantag ko dato sa Asiriya: Di sekaniyan pekasoled

sangkai a siti aya pen o ba sii makapana sa apiya isa bo a gasa. Di ron pekarani so manga
sondaro niyan a ba kekelong aya pen o ba iran kalikopi sa manga tambak.
33 Sii ko lalan a iniokit iyan ko kiyasong iyan sii na aya niyan bo kikasoy; di sekaniyan
pekasoled sangkai a siti" a tig o Allah
34 “ka pelindingen ko angkai a siti ago sebeten ko sabap ko bantogan aken ago sabap ko
Daod a oripen aken."
35 Sa kagagawii oto na somiyong so malaikat o Allah ko kampo o manga sondaro a

Asiriya na piyamono iyan roo so magatos ago walo polo ago lima nggibo a manga mama.
Na sii ko kiyapagnaw o manga taw ko kapipita na roo makakekelit so langon a
miyamatay a manga badan.
36 Na giyoto a inawaan i Sinakarib a dato sa Asiriya so kampo na komiyasoy sa Ninibah
a roo komiyaden.
37 Miyakaisa alongan sii ko kapesimba niyan sii ko pesimbaan ko tohan iyan a Nisrok na
so manga wata iyan a si Adramilik ago si Sarisir na biyono iran sekaniyan a pedang na
miyamagapas siran sa inged a Ararat. Na so isa a wata iyan a si Isarhadan na aya on
miyakasambi a dato.
2 MANGA DATO 20
So Sakit i Hisikiyas
Sangkoto a manga gawii na miyasakit si Hisikiyas a piyakapapatay. Somiyong on so nabi

Isayas a wata i Amos a tig iyan a "Giyai i pitero o Allah: Tanora ngka so langon taman ka
petay ka; di ka pekabager."
2 Na inidingil i Hisikiyas a paras iyan ko keleb na miyangangarapan ko Allah a

3 “Ya Allah, tanodi ngka so kiyapaginetaw aken a mapaparatiyaya reka ago iklas ko poso
aken a kambabayorantang reka a miyakanggolaola ko sa ontol ko kapekeilaya ngka on."
Na miyakasegad sebenar si Hisikiyas.
4 Sii ko da pen kaganati i Isayas ko lamalama o torogan na minitoron on so katero o Allah

a tig iyan a
5 “Kasoy ka ki Hisikiyas a so dato o manga pagtaw aken na teroa ngka on a 'Giyai i pitero
o Allah a Tohan o apo ka a Daod: Miyaneg aken so pangni ngka ago miyailay aken so
manga lo ka na mbolongan ko seka. Sii ko ikatelo gawii ipoon imanto na pekasong ka ko
Timplo o Allah.
6 Pagomanan ko sa sapolo ago lima ragon so omor ka na ipelidas aken seka ago
giyangkai a siti ko kapaar o dato sa Asiriya.' "
7 Na tig i Isayas a "Tiyagar kano sa tompi a manga higos na depilen iyo ko lebag iyan ka
pekapiya sekaniyan." Pinggolaola iran ai na miyakapiya.
8 Sa da pen ai minggolalan na iniise i Hisikiyas ki Isayas a "Antonaa i toos a pekapiyaan

ako o Allah ago pekasong ako ko Timplo o Allah amay ka makatelo den gawii?"
9 Inisembag i Isayas a "Giyai i toos a imbegay reka o Allah sa kitomanen iyan ko

minitopa niyan. Antonaa i kabaya a ka? Ba pekaonaa so along o alongan sa sapolo kerit
o di na pakapengendoden sa sapolo kerit?"
10 Tig i Hisikiyas a "Malebod so kapepakaona o along sa sapolo kerit. Pakipangendoden

ka bo sa sapolo kerit."
11 Na miyangni so nabi Isayas ko Allah na piyakapangendod o Allah so along sa sapolo

kerit a miniona niyan den sii ko towak i Ahas.
So manga Sogo a poon sa Babilon
12 Sa masa oto na so dato sa Babilon a si Mirodak Baladan a wata i Baladan na

miyakawit ki Hisikiyas sa sorat ago pamemegayan ka miyaneg iyan a pekesakit si
Hisikiyas.
13 Tiyarima i Hisikiyas so manga siyogo a poon sa Babilon na piyakiilay niyan kiran so
langon taman a matatago ko manga petegoan iyan sa tamok, a so manga pirak, manga
bolawan, manga palapa, manga pipiya a lana, so manga kasangkapan sa katidawa ago so
langon a ped a patemotamokan iyan. Da den a manga nganin sii ko torogan iyan o di na
sii ko dalem a ndatoan iyan a ba da kiran pakiilain i Hisikiyas.
14 Oriyan iyan na somiyong so nabi Isayas ko dato Hisikiyas na iniise iyan a "Antonaa i
pitero angkoto a manga mama ago anda siran poon?"
"Poon ko mawatan a inged," a inisembag i Hisikiyas. "Poon siran sa Babilon."
15 Na tig o nabi a "Antonaa i miyailay iran ko torogan ka?"

"Miyailay iran so langon taman ko torogan aken," a tig i Hisikiyas. "Da den a ba ko
kiran da pakiilain ko manga kakawasaan aken."
16 Mandiyadi na pitero i Isayas ki Hisikiyas a "Pakinega ngka so katero o Allah:

17 Mataan a pekatalingoma so masa a so langon taman ko torogan ka a rakes o langon a
miyatimo o manga apo o ka taman sangkai a gawii na keawidan roo sa Babilon. Da den a
ba on kelamba, a tig o Allah.
18 Na so ped ko manga moriyataw ngka a so den so rogo o ka na penga bibiyag a
pembabaloy a manga orobarang sii ko torogan o dato sa Babilon."
19 “So kabasa o Allah a miyatero o ka na mapiya," a tig i Hisikiyas. Ka aya mapipikir

iyan na "Naino, ka maaden pen a kalilintad ago kalilinding sii ko kaooyaoyag aken."
20 Na so ped a miyanga sosowasowa ko kandadato i Hisikiyas ago so langon a miyanga

papasad iyan a rakes on so kiyambaal iyan sa pondo a ig ago kakar a pendelegan o ig ko
siti na palaya den minisorat ko 'Ribro a Totolan ko manga Dato sa Yodah.'
21 Na miyatay si Hisikiyas na so wata iyan a si Manasih na aya on miyakasambi a dato.
2 MANGA DATO 21
Si Manasih a Dato sa Yodah
Sapolo ago dowa ragon a idad i Manasih ko kiyapoon iyan ndato na miyakandato sa
miyakalima polo ago lima ragon sii sa Yarosalim. Aya ngaran o ina iyan na si Hipsibah.
2 Miyakanggolaola sekaniyan sa marata ko kapekeilaya on o Allah a siyongkad iyan so
piyakasisingay a manga paparangayan o manga nasiyon a piyamogaw o Allah ko
kapesorongi kiran o manga Israil.
3 Biyangon iyan peroman so manga aparan ko manga barahala sii ko manga bobongan a
piyaminasa i Hisikiyas a ama iyan. Mimbaal sekaniyan pen sa manga aparan ko Baal ago
so barahala a katohanan a Asirah a lagid o pinggolaola i Ahab a dato sa Israil.
Pesodiyodan iyan langon so manga kaaden sa langit ago pesimbaan iyan.
4 Mimbaal sekaniyan sa manga aparan sii ko Timplo o Allah a so darpa a miyatero o
Allah a "Tegoon aken so Ingaran aken sii sa Yarosalim."
5 Na sii ko dowa a lamalama o Timplo o Allah na piyakatindegan iyan sa manga aparan a
pesimbaan ko manga bitoon.
6 Inisoasoat iyan pen so wata iyan a mama a tiyotong sii ko apoy. Di niyan dii
nggolaolaan so kapamantak ago kaperimar na pegodasan iyan so manga pepamangangay
ago manga pendarpaan. Tanto a madakel a marata a pinggolaola niyan ko kapekeilaya on
o Allah a inikararangit iyan.
7 So barahala a Asirah a pimbaalan iyan na piyakatindeg iyan sii ko Timplo o Allah a so

darpa a miyatero o Allah ko Daod ago so wata iyan a Solaiman a "Giyangkai a Timplo
ago giya Yarosalim i miyapili aken ko langon a inged o manga mbatabataa Israil a ron
aken tegoa so Ingaran aken sa taman sa pakataman.
8 Na o piyapiyai tomoman o manga Israil so langon taman a inisogo aken kiran ago
inggolalan iran so langon o Kitab a inibegay aken ko Mosa a oripen aken na di aken siran
pekitaog a poon ko lopa a inibegay aken ko manga apo iran."
9 Ogaid na da iran ai pakinega na piyakateridadag siran i Manasih sa di iran dii
kanggolaola sa lebi pen a marata a di so manga nasiyon a bininasa o Allah ko
kiyapakasoled o manga Israil ko inged.
10 Na pitero o Allah a nggolalan ko manga oripen iyan a manga nabi a

11 “Miyasogok i Manasih a dato sa Yodah angkai a piyakasisingay a manga dosa.
Minggolaola sekaniyan sa lebi pen a marata a di so manga Amoriyo a magiinged gowani
sangkai a lopa. Miyapakandosa niyan pen so manga taw sa Yodah a nggolalan ko manga
barahala niyan.
12 Kagiya ka maoto na giyai i kabasa o Allah a Tohan o Israil: Pagowitan ko sa morala a
Yarosalim ago giya Yodah a ikebengang o oman i pekaneg on.
13 Isiksa aken sa Yarosalim so inisiksa aken sa Samariya ago so pamiliya i Ahab.
Ponasen ko a Yarosalim a lagid o kapeponasi o taw ko pinggan a pelekeben iyan.
14 Telikodan aken so pemakapagoyag a manga pagtaw aken na peladen ko siran ko
manga ridoay iran a peges kiran ago peteban.
15 Ka miyakanggolaola siran sa marata ko kapekeilaya ko ron na di ako iran dii
pakakerangiten ipoon ko gawii a kiyapakaliyo o manga apo iran sa Misir taman sangkai a
gawii."
16 Liyo ron pen na piyamono i Manasih so tanto a madakel a da a manga sala iyan a
minipeno so rogo iran sa Yarosalim. Minipagoman ai ko kiyapakandosaa niyan ko
manga taw sa Yodah sa kiyanggolaola iran sa marata ko kapekeilaya on o Allah.
17 So ped a miyanga sosowasowa ko kandadato i Manasih ago so langon a

miyanggolaola niyan a rakes o kapekedosa niyan na palaya minisorat ko 'Ribro a Totolan
ko manga Dato sa Yodah.'
18 Miyatay si Manasih na sii minilebeng ko sapadan sa torogan a so sapadan i Osa. Na si
Amon a wata iyan i miyakasambi on a dato.
Si Amon a Dato sa Yodah
19 Dowa polo ago dowa ragon a idad i Amon isako mabaloy a dato na miyakandato sa
miyakadowa ragon sii sa Yarosalim. Aya ngaran o ina iyan na si Misolimit a wata i Haros
a taga Yotbah.
20 Miyakanggolaola sekaniyan sa marata ko kapekeilaya on o Allah a datar i Manasih a
ama iyan.
21 Siyoson iyan so langon a okitokit o ama iyan. Pesodiyodan iyan ago pesimbaan so
manga barahala a sinimba o ama iyan.
22 Tiyalikodan iyan so Allah a so Tohan o manga apo iyan na da niyan kedega so lalan o
Allah.
23 So manga sanasanaan i Amon na piyagopakatan iran sekaniyan sa marata na biyono

iran sii ko walay niyan.
24 Ogaid na so manga taw ko inged na biyono iran so langon a miyagopakat ko dato sa
marata na diyato iran si Yosiyas a wata iyan a misambi on.
25 So ped a miyanga sosowasowa ko kandadato i Amon ago so miyanggolaola niyan na

palaya misosorat ko 'Ribro a Totolan ko manga Dato sa Yodah.'
26 Minilebeng sekaniyan ko kobor iyan sii ko sapadan i Osa, na si Yosiyas a wata iyan na
aya on miyakasambi a dato.
2 MANGA DATO 22
Si Yosiyas a Dato sa Yodah
Miyakawalo ragon a idad i Yosiyas isako mipoon ndato na miyakandato sa miyakatelo

ago isa ragon sii sa Yarosalim. Aya ngaran o ina iyan na si Yadidah a wata i Adayas a
taga Boskat.
2 Miyakanggolaola sekaniyan sa ontol ko kapekeilaya on o Allah na siyoson iyan so
manga okitokit o apo iyan a so Daod na da on den panilasilay sa kawanan o di na sa
diwang.
3 Sii ko ikasapolo ago walo ragon ko kandadato i Yosiyas na siyogo iyan so panonorat a
si Sapan a wata i Asaliyas, a so wata i Misolam, sa kasong iyan ko Timplo o Allah a tig
iyan a
4 “Song ka ki Hilkiyas a maporo a imam na pakipagitongen ka on so pirak a
miyapangowit ko Timplo a miyapangowa o manga komikibir ko pintoan a poon ko
manga taw.
5 Teroa ngka on a imbegay niyan angkai a pirak ko manga tetandingan ko galebek ko
Timplo na isokay iran ai ko kigagalebek a magompiya ko Timplo,
6 A so manga panday sa kayo, so manga penagombalay ago so manga panonominto.
Pakapamasaa ngka siran pen sa manga tarakayo ago kiyapanapilan a manga ator a
ipegompiya ko Timplo.
7 Ogaid na kena a ba kiran den paliyogat so kipesoraten iran ko kiyaosara ko pirak a
imbegay kiran ka kasasarigan siran.
Miyatoon so Kitab o Allah
8 Na pitero i Hilkiyas a maporo a imam ki Sapan a panonorat a "Miyatoon aken so Ribro

a Kitab sii ko Timplo o Allah." Inibegay niyan ai ki Sapan na biyatiya iyan.
9 Mandiyadi na komiyasoy si Sapan a panonorat ko dato na piyakitokawan iyan on so
miyanggolaola a tig iyan a "So manga sanasanaan ka na kinowa iran so pirak a miyatimo
ko Timplo na inipamegay iran ko manga tetandingan ko kigagalebek on."
10 Na pitero pen i Sapan ko dato a "Si Hilkiyas a imam na bigan ako niyan sa ribro." Na
biyatiya ini i Sapan ko kamamasaan o dato.
11 So kiyanega o dato ko manga katero ko Ribro a Kitab na kinisi iyan so kimon iyan
12 Na piyandoan iyan si Hilkiyas a imam, si Ahikam a wata i Sapan, si Akbor a wata i
Mikayas, si Sapan a panonorat ago si Asayas a so dii manalagad ko dato a tig iyan a
13 “Ikano roo na go niyo isei so Allah para raken ago so langon a taw sa Yodah
makapantag ko misosorat sangkai a ribro a miyatoon. Tanto a mala so rarangit o Allah a
pesokeyaw rektano ka kagiya da paratiyayaa o manga apo tano so manga katero sangkai a
ribro. Da iran nggolalanen so misosorat on a ipapaliyogat rektano."
14 Mandiyadi na si Hilkiyas, si Ahikam, si Akbor, si Sapan ago si Asayas na

miyamanong ko nabi a babay a si Holdah a karoma i Salom a wata i Tikbah, a so wata i
Harbas, a aya komikibir ko manga kimon sii ko Timplo. Sii sekaniyan mababaling ko
miyambago a sabaad sa Yarosalim, na inimbitiyarai ran sekaniyan.
15 Na pitero iyan kiran a "Giyai i kabasa o Allah a Tohan o Israil: Teroa niyo ko mama a
somiyogo rekano sii raken a
16 Giyai i pitero o Allah: Pagowitan ko sa morala angkai a siti a Yarosalim ago so manga
taw ron a aya kaketoman o langon a misosorat ko ribro a miyabatiya o dato sa Yodah.
17 Tiyalikodan ako iran ago tomiyotong siran sa doka ko salakaw a manga tohan.
Piyakakerangit ako iran a nggolalan ko langon a miyanggolaola iran. So rarangit aken na
pesokeyaw sangkai a darpa na di den pekalenggaw.
18 “Ogaid na makapantag ko dato sa Yodah a somiyogo rekano sa kapagisei niyo ko

Allah na teroa niyo ron a Giyai i pitero o Allah a Tohan o Israil: Piyamakineg ka so
manga katero ko ribro
19 Na miteobat ka ago inipangalimbabaan ka a ginawa ngka ko kamamasaan o Allah na
kinisi i ka so kimon ka ago gomiyoraok ko hadapan aken isako maneg ka so miyatero
aken makapantag sangkai a darpa ago so manga taw ron a kemorkaan siran ago kelaslas.
Sabap roo na inampon aken seka," a tig o Allah,
20 “na itepi aken seka ko manga apo o ka na kilebeng ka a lomilintad. Di ngka keilay so
langon a morala a itena aken sangkai a darpa."
Na komiyasoy so manga mama ko dato na piyanotol iran on ai.
2 MANGA DATO 23
Pimataanan i Yosiyas so Kapasadan
Mandiyadi na piyakisogoan o dato so langon a manga olowan sii sa Yodah ago giya
Yarosalim
2 Na somiyong siran langon ko Timplo o Allah a oonotan o manga taw sa Yodah ago sa
Yarosalim a rakes o manga imam ago so manga nabi, a so langon a taw ipoon ko mababa
taman ko maporo. Na biyatiya o dato so langon a manga katero ko Ribro a Kapasadan a
miyatoon ko Timplo.
3 Tominindeg so dato a miabay ko polaos na inisepa iyan ko hadapan o Allah a peratiyaya
sekaniyan ko Allah ago toman ko langon a sogoan iyan, manga taritib iyan ago manga
kokoman sa iklas ko poso iyan ago iklas ko niyawa niyan. Giyanan i kinipemataanen
iyan ko langon a katero a misosorat ko Ribro a Kapasadan. Na misepa mambo so langon
a taw sa kapetomana iran ko kapasadan.
4 Inisogo o dato ki Hilkiyas a maporo a imam, so manga katib ago so manga gordiya ko
gimowa a kowaa iran ko Timplo o Allah so langon a kasangkapan a pegosaren ko
kapesimbaa ko Baal ago so katohanan a Asirah ago so langon a manga bitoon. Tiyotong
iyan ai langon sa liyo a Yarosalim sii ko Balintad a Kidron na piyakiwit iyan so manga
ombi roo sa Bitil.
5 Kinowaan iyan sa galebek so langon a pepegimam ko manga barahala a inipamanoro
gowani o manga dato sa Yodah sa kapenotong iran sa doka ko manga aparan sii ko manga
bobongan ko manga siti sa Yodah ago sii ko manga darpa ko melilibeta sa Yarosalim.
Petotong siran sa doka a dii soasoat ko Baal, sii ko alongan, so olan ago so manga bitoon
ago so langon a bager o kawang.
6 Kinowa niyan so barahala a Asirah a poon ko Timplo o Allah na inowit iyan ko
Balintad a Kidron sa liyo a Yarosalim na tiyotong iyan roo. Na tiyapotapong iyan na
iniparak iyan so tapong ko pelebengan ko komakalilid a manga taw.
7 Giba iyan pen so pekedenan o manga mama a dii sondal a sii matatago ko soled o
Timplo o Allah a ron dii mangaol so manga babay sa manga rending a para ko barahala a
Asirah.
8 Piyakikasoy i Yosiyas sa Yarosalim so langon a imam a kibabaling ko ped a manga siti

sa Yodah na piresikan iyan so manga aparan a piyanotongan iran sa doka ipoon sa Giba
na taman sa Birsiba. Pinggegeba iyan pen so manga aparan sii ko isoled ko gimowa a
pimbaalan i Yosowa a gobirnador ko siti a madidiwang o pintoan o siti.
9 Giyangkai a manga imam a miyamanalagad ko manga aparan ko manga barahala na di
keparo a kapenalagadi iran ko aparan ko Allah roo sa Yarosalim, ogaid na pepekakan
siran ko paan a da a tapay ron a peken o ped iran a manga imam.
10 Piresikan pen i Yosiyas so aparan ko Topit a sii matatago ko Balintad a Bin Hinom
kaan da den a ba on pekatotong sa wata iyan a mama o di na babay a soasoat ko
katohanan a Molik.
11 Kinowa niyan so inisayan sa manga koda a inisenggay o manga dato sa Yodah ko
kapesimbaa ko alongan na tiyotong iyan so manga karo a inisenggay mambo sangkai a
kapesimba. (Matatago ini ko lamalama o Timplo o Allah ko obay o gimowa iyan a
marani ko rowang i Natan Milik a maporo a opisiyal.)
12 Pinggegeba o dato so manga aparan a piyangembaalan o manga dato sa Yodah sii ko

atep o torogan ko kaporoan o rowang i Ahas, ago so pen so manga aparan a pimbaalan i
Manasih ko dowa a lamalama ko Timplo o Allah. Pirorompi niyan ai langon na iniparak
iyan sii ko Balintad a Kidron.
13 Piresikan pen i Yosiyas so manga aparan ko manga barahala a pimbaalan o Solaiman a
dato sa Israil sa sebangan a Yarosalim sii sa pagabagatan o Palaw a Olibi a pegosaren ko
kapesimbaa ko Astorit a so piyakasisingay a babay a katohanan o manga taw sa Sidon,
ago so Kimos a piyakasisingay a katohanan o manga Mowabiyo ago so Molik a
piyakasisingay a katohanan o manga Amoriyo.
14 Piroropet iyan so babarakaten kon a manga ator na piyamata iyan so manga polaos a
toos ko katohanan a Asirah na siyapengan iyan angkoto a manga darpa sa manga tolan a
manosiya.
15 Apiya so aparan ko barahala sii ko bobongan roo sa Bitil a biyangon i Yarobowam a

wata i Nibat a piyakandosa niyan on so manga Israil na bininasa i Yosiyas. Giba iyan so
aparan ago tiyapotapong iyan so manga ator on, na tiyotong iyan ai ago so polaos a toos
ko katohanan a Asirah.
16 Oriyan iyan na miyangilailay si Yosiyas ko mbalabala na miyailay niyan so manga
kobor sii ko silid o bobongan. Piyakipangowa niyan on so manga tolan na piyanotong
iyan ko aparan sa kaperisiki niyan on a aya kiyatoman o katero o Allah a piyayag o sogo o
Tohan a miyakaalamat sangkai a miyanggolaola.
17 Mandiyadi na iniise o dato a "Antona angkanan a monominto a pekeilay aken?"

"Itotoos anan ko kobor o sogo o Tohan a miyakapoon sa Yodah a miyakaalamat
sangkai a pinggolaola ngka ko aparan sa Bitil," a inisembag o manga taw ko siti.
18 “Di niyo petekora," a tig i Yosiyas. "O ba aden a pakaalina niyo ko manga tolan iyan."
Na lipas iran angkoto a manga tolan iyan ago so manga tolan o nabi a miyakapoon sa
Samariya.
19 So pen so langon a aparan ko manga barahala a miyabangon o manga dato sa Israil sii
ko oman i siti sa Samariya a piyakakerangit iran on so Allah na pinggegeba ini i Yosiyas
ago piresikan iyan a datar den o pinggolaola niyan sa Bitil.
20 Piyamono iyan so langon a manga imam ko manga barahala sii ko manga aparan a roo
siran pepagimam, na piyanotongan iyan ai sa manga tolan a manosiya. Oriyan iyan na
komiyasoy sekaniyan sa Yarosalim.
Piselasela i Yosiyas so Paska
21 Inisogo i Yosiyas ko langon o manga taw a "Selaselaa niyo so Paska a ipembantog ko

Allah a Tohan iyo a mipenggolalan iyo so misosorat sangkai a Ribro a Kapasadan."
22 Da den a ba datar iyan a kiyaselaselaa ko Paska sii ko langon o manga gawii o manga
dato sa Israil ago manga dato sa Yodah ipoon den ko masa a kandadato o manga
pangongokom sa Israil.
23 Na miyaselasela angkai a Paska ko Allah sii sa Yarosalim ko ikasapolo ago walo
ragon a kandadato i Yosiyas.
24 Liyo ron pen na piyakaawa i Yosiyas sa Yarosalim ago sa dalem a inged a Yodah so
manga pendarpaan ago so manga pepamangangay na piyakada iyan on pen so manga
katohanan sa walay, so manga barahala ago so langon a ped a piyakasisingay a manga
nganin. Pinggolaola niyan ai a aya niyan kininggolalanen ko manga sogoan a misosorat
ko Ribro a miyatoon i Hilkiyas a imam sii ko Timplo o Allah.
25 Da den a miyaonaan iyan o di na miyaoriyan iyan a dato a ba niyan lagid a
miyananangoran ko Allah sa iklas ko poso iyan, iklas ko niyawa niyan ago iklas ko bager
iyan a petoman ko langon o Kitab o Mosa.
26 Apiya pen oto na da den malenggaw so mala a rarangit o Allah a pesokeyaw sa Yodah
sabap ko langon a pinggolaola i Manasih a inikararangit o Allah.
27 Na pitero iyan a "Penggolaolaan ko sa Yodah so inikidia ko sa Israil. Imbowang aken
so manga taw ron a poon ko kamamasaan aken na telikodan aken pen angkai a siti a
Yarosalim a pinili aken ago so Timplo a miyatero aken a 'Roo aken tegoa so Ingaran
aken.' "
So Kaposan o Kandadato i Yosiyas
28 So ped a miyanga sosowasowa ko kandadato i Yosiyas ago so langon a pinggolaola

29 Sii ko kandadato pen i Yosiyas na si Piraon Niko a dato sa Misir na somiyong ko

lawasaig a Yopratis ka pagogopan iyan so dato sa Asiriya. Na lominiyo si Yosiyas a
makipetidawa on. Siyampang sekaniyan i Niko sii sa Migido na miyapatay niyan.
30 So manga oripen i Yosiyas na riyoran iran so lawas iyan ko karo na inikasoy iran sa
Yarosalim a poon sa Migido na inilebeng iran ko kobor iyan. Na so manga taw ko inged
na kinowa iran si Yahowahas a wata i Yosiyas na siyalawatan iran a madato a misambi ki
ama iyan.
Si Yahowahas a Dato sa Yodah
31 Si Yahowahas na miyakadowa polo ago telo ragon a idad iyan isako mabaloy a dato na
miyakandato sa miyakatelo olan sii sa Yarosalim. Aya ngaran o ina iyan na si Hamotal a
wata i Yaramiyas a taga Libnah.
32 Miyakanggolaola sekaniyan sa marata ko kapekeilaya on o Allah a lagid o manga apo
iyan.
33 Piyakikalaboso sekaniyan i Piraon Niko sii sa Riblah sa inged a Hamat kaan di den
makapendato sii sa Yarosalim. Piyamantonan pen o Piraon a Yodah a mbayad rekaniyan
sa bowis a telo nggibo ago lima gatos ka kilo a pirak ago telo polo ago lima ka kilo a
bolawan.
34 Biyaloy i Piraon Niko so wata i Yosiyas a si Iliyakim a dato a inisambi ki Yosiyas a
ama iyan na piyagalinan iyan sa ngaran a Yahoyakim ogaid na inowit iyan si Yahowahas
sa Misir a ron den miyatay.
35 Inibayad i Yahoyakim ko Piraon Niko so inipanton on a pirak ago bolawan ogaid na
an iyan ai mitoman na piyakabowis iyan so manga taw ko inged sa itongan ko pirak ago
bolawan a makaaayon ko kadakel o manga tamok iran.
Si Yahoyakim a Dato sa Yodah
36 Si Yahoyakim na miyakadowa polo ago lima ragon a idad iyan isako mabaloy a dato
na miyakandato sa miyakasapolo ago isa ragon sii sa Yarosalim. Aya ngaran o ina iyan
na si Sibidah a wata i Pidayas a taga Ramah.
37 Na miyakanggolaola sekaniyan sa marata ko kapekeilaya on o Allah a lagid o manga
apo iyan.
2 MANGA DATO 24
Sii ko kandadato i Yahoyakim na si Nibokadnisar a dato sa Babilon na gomiyobat sa
inged a Yodah na mimbaloy si Yahoyakim a sakop iyan ko miyakatelo ragon, ogaid na
miyaalin so pamikiran i Yahoyakim na siyopak iyan si Nibokadnisar.
2 Somiyogo so Allah sa manga sagorompong a pagogobat sa Yodah, a so manga taw sa
Babilon, manga Isiriyanen, manga Mowabiyo ago manga Amoniyo sa kambinasaa iran ko
inged a giyoto so pitero o Allah a penggolaolaan iyan a nggolalan ko manga oripen iyan a
manga nabi.
3 Mataan a miyanggolaola ini sa Yodah sabap ko inisogo o Allah kaan iyan mapakaawa
so manga taw sa Yodah a poon ko kamamasaan iyan sabap ko langon a miyandosa i
Manasih.
4 Ka madakel a miyapamono iyan a da a manga sala iyan a minipeno so rogo iran sa
Yarosalim, na di den keterangan so Allah o ba niyan ai rilaan.
5 So ped a miyanga sosowasowa ko kandadato i Yahoyakim ago so langon a

miyanggolaola niyan na palaya den misosorat ko 'Ribro a Totolan ko manga Dato sa
Yodah.'
6 Miyatay si Yahoyakim na so wata iyan a si Yahoyakin na aya on miyakasambi a dato.
7 So dato sa Misir ago so manga sondaro niyan na da den liyo peroman ko inged iran ka
kagiya so dato sa Babilon na miyaagaw niyan langon so masasakop o dato sa Misir ipoon
ko temanaan a Misir taman ko Lawasaig a Yopratis.
Si Yahoyakin a Dato sa Yodah
8 Miyakasapolo ago walo ragon a idad i Yahoyakin isako poon ndato na miyakandato sa
telo olan sa Yarosalim. Aya ngaran o ina iyan na si Nikosta a wata i Ilnatan a taga
Yarosalim.
9 Miyakanggolaola sekaniyan sa marata ko kapekeilaya on o Allah a lagid o ama iyan.
10 Sii ko kandadato iyan na so manga sondaro i Nibokadnisar a dato sa Babilon na

somiyong sa Yarosalim na linikopan iran,
11 Na si den si Nibokanisar i miyakaoma roo sii ko kalilikopi ran on.
12 Na so dato Yahoyakin a rakes o ina iyan, so manga mosawira iyan, so manga olowan
iyan ago so manga sanasanaan iyan na palaya siran den miyoral ko dato sa Babilon.
Sii ko ikawalo ragon a kandadato i Nibokadnisar a dato sa Babilon na biniyag iyan si
Yahoyakin.
13 Kinowa niyan langon so manga tamok ko Timplo o Allah ago sii ko torogan o dato, na
piyamotol iyan so langon a manga nganin san a bolawan a pimbaalan o Solaiman a dato
sa Israil a pegosaren ko Timplo a giyoto den so miyatero o Allah.
14 Miyamiyag si Nibokadnisar sa sapolo nggibo a manga taw sa Yarosalim na initaog
iyan siran, a so langon a manga olowan ago lebi a manga pipiya a sondaro, ago so langon
a manga panday ago manga panenesel.
15 Inowit i Nibokadnisar si Yahoyakin a biyag roo sa Babilon, na so pen so ina o dato, so

manga karoma niyan, so manga olowan iyan ago so manga tenger a taw sa Yarosalim na
initaog iyan sa Babilon.
16 Initaog iyan roo pen so langon o pito nggibo a manga wawaraw ago manga babager a
sondaro a tadiyam sa katidawa, ago sanggibo a manga panday ago manga panenesel.
17 Na initoro iyan si Mataniyas a bapa i Yahoyakin a dato a aya on inisambi, na
piyagalinan iyan sa ngaran a Sidikiyas.
Si Sidikiyas a Dato sa Yodah
18 Dowa polo ago isa ragon a idad i Sidikiyas isako mabaloy a dato na miyakandato sa
miyakasapolo ago isa ragon sii sa Yarosalim. Aya ngaran o ina iyan na si Hamotal a wata
i Yaramiyas a taga Libnah.
19 Miyakanggolaola sekaniyan sa marata ko kapekeilaya on o Allah a datar o pinggolaola
i Yahoyakin.
20 Langon ai miyanggolaola sa Yarosalim ago giya Yodah sabap ko rarangit kiran o
Allah na aya kiyaoriyan on na inibowang iyan siran a poon ko kamamasaan iyan.
So Kiyatabana sa Yarosalim
Na siyopak i Sidikiyas so dato sa Babilon.

2 MANGA DATO 25
Sabap roo sii ko ikasiyaw ragon ko kandadato i Sidikiyas sii ko ikasapolo gawii ko
ikasapolo olan na somiyong si Nibokadnisar sa Yarosalim a rakes o langon o manga
sondaro niyan. Pikempowan iran so liyo o siti na miyangon siran sa manga tambak ko
mbabalibeta on
2 Na lomilikop siran ko siti taman ko ikasapolo ago isa ragon a kandadato i Sidikiyas.
3 Sii ko ikasiyaw gawii ko ikapat olan a miyakaregen so taon ko siti a da den a kekan o
manga taw
4 Na miyabinasa so ped ko pangeleban o siti. Na sangkoto a kagagawii a apiya lomilikop
pen so manga taw sa Babilon ko siti na miyamalagoy so dato ago so langon a manga
sondaro a sii siran miyokit ko pintoan ko pegeletan o dowa a pangeleban a marani ko
sapadan o dato, na miyamagapas siran sa Balintad a Yordan.
5 Ogaid na siyaloba o manga sondaro a Babilon so dato Sidikiyas na riyaot iran ago
diyakep iran sii ko kapantaran sa Yariko, ka so langon a sondaro niyan na miyakabelag
rekaniyan den a miyamngiparak.
6 Inowit iran sekaniyan ko dato sa Babilon sii sa Riblah a ron miyakokom.
7 Biyono iran so manga wata i Sidikiyas ko kapegilaya niyan on, na iniresok iran so
manga mata i Sidikiyas, na piyatong iran a tombaga na inowit iran sa Babilon.
So Kiyabinasaa ko Timplo
8 Sii ko ikapito gawii ko ikalima olan sii ko ikasapolo ago siyaw ragon a kandadato i
Nibokadnisar sa Babilon na si Nibosaradan a komandir o manga gordiya ago sanasanaan
o dato sa Babilon na somiyong sa Yarosalim.
9 Piyanotong iyan so Timplo o Allah ago so torogan o dato ago so manga walay o langon
a manga ala a taw roo sa Yarosalim.
10 Na so langon a manga sondaro a Babilon a ped o komandir na initobak iran so
pangeleban a mililibet sa Yarosalim.
11 Initaog i Nibosaradan so langon a taw a miyalamba ko siti a rakes on so siran oto a
miyonot ko dato sa Babilon.
12 Ogaid na inibegak o komandir so ped ko lebi a manga miskin sii ko inged a
makapenggalebek ko manga asinda a obas ago so manga dii mbabasokan.
13 Piroropet o manga taw sa Babilon so manga polaos a tombaga ago so mapepegalinalin

a manga batoga ago so maolad a tangela a tombaga a pepengonaban a matatago ko
Timplo o Allah na inawidan iran so tombaga sa Babilon.
14 Inawidan iran roo pen so manga koden, manga sakerad, manga ipetenor ko sombowan,
manga kaloda, manga lapad ago so langon taman a manga tombaga a nganin san a
pegosaren ko dii kapanalagadi ko Timplo.
15 Inawidan pen o komandir so langon taman a inembaalan a lombos a bolawan ago pirak
a rakes on so manga tangela sa waga a apoy ago so manga ladiya.
16 So tombaga ko dowa a polaos ago so maolad a tangela ago so manga batoga a

inembaalan o Solaiman a pegosaren ko Timplo o Allah na di ketakes so kapened iyan.
17 So oman i polaos na walo ka mitros a kaporo iyan. Sii sa poro iyan na aden a
ipopondiyong on a tombaga a manga dowa ago tenga ka mitros a kaporo iyan.
Piyagartaan ai sa inisayan sa siyobid a tombaga ago so inisayan sa manga granada a
tombaga ko melilibeta on. So dowa a polaos na ndatar.
Initaog so manga Taw sa Yodah
18 Minioman sii na biniyag o komandir Nibosaradan si Sirayas a so maporo a imam, si

Sipaniyas a so katib ago so telo kataw a komikibir ko pintoan.
19 Na poon ko siran oto a sisii pen ko siti na kinowa niyan so isa a olowan o manga
sondaro, so lima kataw a manga mosawira o dato, so panonorat a aya komikibir ko manga
listaan ko manga sondaro ago so nem polo a ped a manga taw a miyatoon ko siti.
20 Na inowit siran langon o komandir Nibosaradan ko dato sa Babilon sii sa Riblah
21 Sa inged a Hamat. Na roo siran piyakipamono o dato sa Babilon.
Na miyamangitaog so manga taw sa Yodah a miyanga bebelag ko inged iran.
Si Gidaliyas a Gobirnador sa Yodah
22 Si Nibokadnisar a dato sa Babilon na initoro iyan si Gidaliyas a wata i Ahikam, a so

wata i Sapon, a aya gobirnador ko manga taw a minibegak sa Yodah.
23 Kagiya maneg o langon o manga olowan a sondaro sa Yodah ago so manga pagtaw
iran a initoro o dato sa Babilon si Gidaliyas a aya gobirnador na somiyong siran ki
Gidaliyas sii sa Mispah. Siran na si Ismail a wata i Nitaniyas, si Yohanan a wata i
Kariyas, si Sirayas a wata i Tanhomit a taga Nitopata ago si Yaasaniyas a poon sa
Maakah a rakes o manga taw iran.
24 Na misepa kiran si Gidaliyas a tig iyan a "Di niyo pekeleken so manga olowan sa
Babilon. Kakaden kano baden ko inged na pangongonotani niyo so dato sa Babilon ka da
a ba marata a kesowasowa iyo."
25 Ogaid na sii ko ikapito olan sangkoto a ragon na si Ismail a wata i Nitaniyas ago apo i
Ilisama a ped ko kiyababadan ko dato na somiyong sa Mispah a oonotan o sapolo kataw
na biyono iyan si Gidaliyas ago so mambo so manga Yahodi ago so manga taw sa
Babilon a ped iyan roo sa Mispah.
26 Sabap sii na so langon a taw sa Yodah ipoon sa mababa taman sa maporo a rakes on
so manga olowan a sondaro na miyamagapas siran sa Misir sabap ko kalek iran ko manga
taw sa Babilon.
Piyakaliyo si Yahohakin ko Kalaboso
27 Sii ko ikatelo polo ago pito ragon a kinitaog i Yahoyakin a dato sa Yodah sii ko ragon
a kiyabaloy i Ibilmirodak a dato sa Babilon na piyakaliyo niyan si Yahoyakin sa kalaboso
sii ko ikadowa polo ago pito gawii ko ikasapolo ago dowa olan.
28 Diyolon iyan sekaniyan a limo na bigan iyan sa maporo a pangkatan a di so ped a
manga dato a ped iyan sa Babilon.
29 Inendaan i Yahoyakin so nditaren iyan a kalaboso na sii ko lamba o omor iyan na
pepekakan sekaniyan sii ko lamisaan o dato.
30 Na gawii gawii den na pembegan o dato si Yahoyakin sa gasto niyan taman ko
kaooyagoyag iyan pen.
1 MANGA RIKORD
1 MANGA RIKORD 1
Ipoon ki Adam taman ko manga wata i Nok
1 So kiyababadan ki Adam na:

siki Sit, Inos,
2 Kinan, Mahalalil, Yarid,
3 Inok, Mitosilah, Lamik,
4 Ago si Nok.
So manga wata i Nok na siki Sim, Ham ago si Yapit.

So Kiyababadan ki Yapit
5 So manga wata i Yapit na:

siki Gomir, Magog, Maday, Yaban, Tobal, Misik ago si Tiras.
6 Si Gomir na aya apo o:

manga taw sa Askinas, sa Ripat ago sa Togarmah.
7 Si Yaban na aya apo o:

manga taw sa Ilisah, sa Tarsis, sa Kit ago sa Roda.
So Kiyababadan ki Ham
8 So manga wata i Ham na:

siki Kos, Misir, Pot ago si Kanaan.
9 Si Kos na aya apo o:

manga taw sa Siba, sa Habilah, sa Sabta, sa Raamah ago sa Sabtika.
Si Raamah na aya apo o:
manga taw sa Siba ago sa Didan.
(10 Si Kos na aya ama i Nimrod a so paganay a mala i gees a sondaro sii sa doniya.)
11 Si Misir na aya apo o:

manga taw sa Lod, sa Anam, sa Lihab, sa Napto,
12 Sa Patros, sa Kaslo (siran i manga apo o manga Pilistiyo), ago sa Kaptor.
13 So manga wata i Kanaan na:

si Sidon a kaka a wata iyan, ago si Hit (a aya manga apo o manga taw sa Sidon ago so
manga Hitiyo).
14 Si Kanaan na aya apo mambo o:
manga Hibosiyo, manga Amoriyo, manga Girgasiyo,
15 Manga Hibiyo, manga Arkiyo, manga Siniyo,
16 Manga Arbadiyo, manga Simariyo ago so manga Hamatiyo.
So Kiyababadan ki Sim
17 So manga wata i Sim na:

siki Ilam, Asor, Arpaksad, Lod ago si Aram.
So manga wata i Aram na:
siki Os, Hol, Gitir ago si Misik.
18 Si Arpaksad na aya ama i Silah,

na si Silah na ama i Ibir.
19 Si Ibir na aden a dowa a wata iyan:
aya ngaran o isa on na si Pilig ka kagiya sii ko masa niyan na miyabagi so manga taw ko
doniya. Aya ngaran o pagari niyan na si Yoktan.
20 Si Yoktan na aya ama i

siki Almodad, Silip, Hasarmabit, Yarah,
21 Hadoram, Osal, Diklah,
22 Ibal, Abimail, Siba,
23 Opir, Habilah ago si Yobab. Langon ai manga wata a mama i Yoktan.
24 Kagiya ka maoto na giyai i manga kiyababadan ipoon ki Sim taman ki Ibrahim:

si Sim, si Arpaksad, si Silah,
25 Si Ibir, si Pilig, si Riyo,
26 Si Sirog, si Nahor, si Tirah
27 Ago si Abram (sekaniyan den si Ibrahim).
28 Aya manga wata i Ibrahim na:

si Iskak ago si Ismail.
29 Giyai i manga kiyababadan kiran:
So Kiyababadan ki Ibrahim sii ki Hagar
Aya kaka a wata i Ismail na si Nibayot, na tomiyalondog on siki Kidar, Adbiil, Mibsam,
30 Misma, Domah, Masa, Hadad, Tima,
31 Yator, Napis ago si Kidimah. Giyai i manga wata i Ismail.
So Kiyababadan ki Ibrahim sii ki Kitorah a Sandil iyan
32 Aden a sandil i Ibrahim a aya ngaran iyan na si Kitorah. Aya manga wata iyan na:
siki Simran, Yoksan, Midan, Midiyan, Isbak ago si Siyowah.
Aya manga wata i Yoksan na:
si Siba ago si Didan.
33 Aya manga wata i Midiyan na:

siki Ipah, Ipir, Hanok, Abida ago si Ildaah.
Langon ai manga wata i Ibrahim ki Kitorah a sandil iyan.
So Kiyababadan ki Ibrahim sii ki Sarah
34 Si Ibrahim na aya ama i Iskak:

Aya manga wata i Iskak na:
si Isaw ago si Israil.
35 Aya manga wata i Isaw na:
siki Ilipas, Rowil, Yaos, Yalam ago si Korah.
36 Aya manga wata i Ilipas na:

siki Timan, Omar, Sipi, Gatam, Kinas ago si Amalik (a inimbawata i Timna).
37 Aya manga wata i Rowil na:

siki Nahat, Sirah, Siyamah ago si Misah.
So Kiyababadan ki Sair sii sa Idomiya
38 Aya manga wata i Sair na:

siki Lotan, Siyobal, Sibiyon, Anah, Disiyon, Isir ago si Disiyan.
39 Aya manga wata i Lotan na:

si Hori ago si Homam. Si Timna na aya babay i Lotan.
40 Aya manga wata i Siyobal na:

siki Alban, Manahat, Ibal, Sipo ago si Onam.
Aya manga wata i Sibiyon na:
si Ayas ago si Anah.
41 Aya wata i Anah na:

si Disiyon.
Aya manga wata i Disiyon na:
siki Himdan, Isban, Itran ago si Kiran.
42 Aya manga wata i Isir na:

siki Bilhan, Saaban ago si Akan.
Aya manga wata i Disiyan na:
si Os ago si Aran.
So manga Dato sa Idomiya
43 Giyai so manga dato a mindadato sii sa Idomiya ko da pen a miyakandadato ko manga

Israil:
Si Bila a wata i Biyor a aya ngaran o siti niyan na Dinhabah.
44 Kagiya matay si Bila na si Yobab a wata i Sirah a poon sa Bosrah na aya on

miyakasambi a dato.
45 Kagiya matay si Yobab na si Hosiyam a poon sa inged o manga Timaniyo na aya on

miyakasambi a dato.
46 Kagiya matay si Hosiyam na si Hadad a wata i Bidad na aya on miyakasambi a dato.
(Sekaniyan i miyakataban ko manga taw sa Midiyan sii ko inged a Mowab). Aya ngaran
o siti niyan na Abit.
47 Kagiya matay si Hadad na si Samlah a poon sa Masrikah na aya on miyakasambi a

dato.
48 Kagiya matay si Samlah na si Siyaol a poon sa Rihobot na aya on miyakasambi a dato.
49 Kagiya matay si Siyaol na si Baal Hanan a wata i Akbor na aya on miyakasambi a

dato.
50 Kagiya matay si Baal Hanan na si Hadad na aya on miyakasambi a dato. Aya siti
niyan na giya Paw. Aya ngaran o karoma niyan na si Mihitabil a wata a babay i Matrid, a
aya wata a babay i Misahab.
51 Na miyatay si Hadad.
So manga olowan o manga mbatabataa sa Idomiya na:
siki Timna, Albah, Yatit,
52 Oholibamah, Ilah, Pinon,
53 Kinas, Timan, Mibsar,
54 Magdiyal ago si Iram.
1 MANGA RIKORD 2
So manga wata i Israil
Giyai i manga wata i Israil a manga mama:

siki Robin, Simiyon, Libi, Yodah, Isakar, Sibolon
2 Dan, Yosop, Baniyamin, Naptali, Gad ago si Asir.
So Kiyababadan ki Yodah
3 Aya manga wata i Yodah na:

siki Ir, Onan ago si Silah. Giyangkai a telo kataw na inimbawata rekaniyan o Ikanaanen a
babay a si Batsiyowa. Si Ir, a kaka a wata i Yodah, na marata i olaola ko kapekeilaya on
o Allah na sabap san na biyono sekaniyan o Allah.
4 Si Piris ago si Sirah na manga wata mambo i Yodah sii ki Tamar a so miyakamong on a
babay. Lima kataw langon a manga wata i Yodah.
5 Aya manga wata i Piris na:

si Hisron ago si Hamol.
6 Aya manga wata i Sirah na:

siki Simri, Itan, Himan, Kalkol ago si Darda, a lima siran kataw langon.
7 Aya wata i Karmi, a so isa ko moriyataw i Sirah, na:
si Akan a miyakawit sa kamoralaan ko manga Israil a nggolalan ko kiyapanekewa niyan
ko manga nganin a isesenggay ko Allah.
8 Aya wata i Itan na:

si Asariyas.
9 Aya manga wata i Hisron na:

siki Yaramiil, Ram ago si Kaleb.
So Kiyababadan ki Ram a wata i Hisron
10 Si Ram na aya ama i Aminadab;

si Aminadab na aya ama i Nasiyon a aya olowan ko mbatabataa a Yodah;
11 Si Nasiyon na aya ama i Salmon;

si Salmon na aya ama i Bowas;
12 Si Bowas na aya ama i Obid;

si Obid na aya ama i Yasay.
13 Si Yasay na aya ama i Iliyab, a so kaka a wata iyan, na so ikadowa na si Abinadab, so

ikatelo na si Simiya,
14 So ikapat na si Natanil, so ikalima na si Raday,
15 So ikanem na si Osim na so ikapito na si Daod.
16 Aden mambo a dowa a wata a babay i Yasay a si Siroyah ago si Abigail.

Si Siroyah na aden a telo a manga wata iyan a siki Abisay, Yowab ago si Asahil.
Aya wata i Abigail na si Amasa, a aya ama iyan na si Yatir a moriyataw i Ismail.
So Kiyababadan i Kaleb a wata i Hisron
18 Si Kaleb a wata i Hisron na aden a manga wata iyan sii ko karoma niyan a si Asobah
(ago sii ki Yariyot). Aya manga wata i Asobah na siki Yasir, Siyobab ago si Ardon.
19 Kagiya matay si Asobah na piyangaroma i Kaleb si Iprat na aden a sakataw a wata iran
a si Hor.
20 Si Hor na aya ama i Ori, na si Ori na aya ama i Bisalil.
21 Kagiya makapagidad si Hisron sa nem polo ragon na miyapangaroma niyan so wata i

Makir a aya ama i Giliyad, na aden a isa a wata iran a si Sigob.
22 Si Sigob na aya ama i Yair a aya ndadato ko dowa polo ago telo a manga inged sa
Giliyad.
23 Ogaid na miyaagaw o manga ndatoan a Gisor ago Aram so manga inged i Yair taman
den sa inged a Kinat a rakes o nem polo a masasakop iyan a manga iito a inged. So
langon o kibabaling roo na palaya kiyababadan ki Makir a ama i Giliyad.
24 Oriyan o kiyapatay i Hisron na piyangaroma i Kaleb si Iprat a miyabalo o ama iyan na

inimbawata iyan on si Asor a aya ama i Tikowa.
So Kiyababadan ki Yaramiil a wata i Hisron
25 Aya manga wata i Yaramiil a so kaka a wata i Hisron na:

siki Ram (a aya kaka), Bonah, Orin, Osim ago si Ahiyas.
26 Si Yaramiil na aden a ped a karoma niyan a si Atarah. Sekaniyan i ina i Onam.
27 Aya manga wata i Ram a so kaka a wata i Yaramiil na:

siki Maas, Yamin ago si Ikir.
28 Aya manga wata i Onam na:

si Siyamay ago si Yada.
Aya manga wata i Siyamay na si Nadab ago si Abisor.
29 Aya karoma i Abisor na si Abihail a inimbawata iyan on si Akban ago si Molid.
30 Aya manga wata i Nadab na si Silid ago si Apaim. Miyatay si Silid a da a wata iyan.
31 Aya wata i Apaim na:

si Isi a aden a wata iyan a si Sisiyan.
Aya wata i Sisiyan na:
si Aklay.
32 Aya manga wata i Yada a pagari i Siyamay na:

si Yatir ago si Yonatan. Miyatay si Yatir a da a wata iyan.
33 Aya manga wata i Yonatan na:

si Pilit ago si Sasa.
Palaya den ai manga kiyababadan ki Yaramiil.
34 Si Sisiyan na da a manga wata iyan a manga mama, ka manga wata bo a manga babay.
Aden a oripen iyan a Imisiren a aya ngaran iyan na si Yarha.
35 Na piyakipangaroma i Sisiyan so wata iyan a babay ki Yarha, na mimbawata siran ki
Atay.
36 Si Atay na aya ama i Natan,

si Natan na aya ama i Sabad,
37 Si Sabad na aya ama i Iplal,

si Iplal na aya ama i Obid,
38 Si Obid na aya ama i Yaho,

si Yaho na aya ama i Asariyas,
39 Si Asariyas na aya ama i Hilis,

si Hilis na aya ama i Iliyasah,
40 Si Iliyasah na aya ama i Sismay,

si Sismay na aya ama i Siyalom,
41 Si Siyalom na aya ama i Yakamiyas,

na si Yakamiyas na aya ama i Ilisiyama.
So ped a Kiyababadan ki Kaleb
42 Aya manga wata i Kaleb a pagari i Yaramiil na:

si Misiya a kaka a wata iyan a aya ama i Sip, a ama i Marisiyas, a ama i Hibron.
43 Aya manga wata i Hibron na:

siki Koran, Tapowah, Rikim ago si Siyama.
44 Si Siyama na ama i Raham, a aya ama i Yorkiyam. Si Rikim na ama i Siyamay.
45 Aya wata i Siyamay na si Maon, na si Maon na ama i Bit Sor.
46 So sandil i Kaleb, a si Ipah, na aya ina i siki Haran, Modsa ago si Gasis. Na aden a
wata i Haran a bitowan iyan si Gasis.
(47 Aden a mama a aya ngaran iyan na si Yakday a nem kataw a manga wata iyan a
siki Rigim, Yotam, Gisiyan, Pilit, Ipah ago si Siyaap.)
48 So sandil i Kaleb, a si Maakah, na inimbawata iyan si Sibir ago si Tirhanah.

49 Inimbawata iyan pen si Siyaap a ama i Madmanah, ago si Siba a ama i Makbinah ago
si Gibiya. Si Kaleb na aden pen a wata iyan a babay a si Aksah.
50 Giyai mambo so manga kiyababadan ki Kaleb:

Aya manga wata i Hor a kaka a wata i Kaleb ago so karoma niyan a Iprat na:
si Siyobal a miyangon sa inged a Kiriyat Yarim,
51 Si Salma a miyangon sa Bitlihim ago si Harip a miyangon sa Bit Gadir.
52 Aya kiyababadan ki Siyobal a aya miyangon sa Kiriyat Yarim na:

so manga taw sa Harowih, so sabagi ko kibabaling sa Manahat
53 Ago so manga mbatabataa a kibabaling sa Kiriyat Yarim, a so manga Itriyo, manga
Potiyo, manga Siyomatiyo ago so manga Misratiyo. (So manga Soratiyo ago so manga
Istaoliyo na aya kiyababadan ko manga Misratiyo.)
54 Aya kiyababadan ki Salma a aya miyangon sa Bitlihim na:

so manga Nitopatiyo, so manga taw sa Atrot Bityowab, so sabagi ko kibabaling sa
Manahit, so manga Soritiyo
55 Ago so pen so manga mbawataan o manga panonorat a kibabaling sa Yabis, a so
manga Tiratiyo, manga Simiyatiyo ago so manga Sokatiyo. Palaya siran manga Kiniyo a
kiyababadan ki Hamat a apo mambo o manga Rikabiyo.
1 MANGA RIKORD 3
So manga Wata i Daod
Giyai so manga wata i Daod a inimbawata rekaniyan sii sa Hibron:

so kaka kiran na si Amnon a aya ina iyan na si Ahinowam a taw sa Yasriil;
so ikadowa na si Daniyal a aya ina iyan na si Abigail a taw sa Karmil;
2 So ikatelo na si Absalom a aya ina iyan na si Maakah a wata o Dato Talmay sa Gisor;
so ikapat na si Adoniyas a aya ina iyan na si Hagit;
3 So ikalima na si Siyapatiyas a aya ina iyan na si Abital;
so ikanem na si Itriyam a aya ina iyan na si Iglah.
4 Giyangkai a nem kataw na inimbawata ki Daod sii ko kandadato iyan sa Hibron ko
soled o pito ragon ago nem olan.
Oriyan iyan na mindato si Daod roo sa Yarosalim ko soled o telo polo ago telo ragon
5 Na giyai so manga wata a inimbawata rekaniyan roo: siki Simiya, Siyobab, Natan ago si
Solaiman a aya ina iran na si Batsiba a wata i Amiyal.
6 Aden pen a ped a manga wata iyan a siyaw kataw a siki Ibhar, Ilisiyowa, Ilpilit,
7 Nogah, Nipig, Yapiya,
8 Ilisiyama, Iliyada ago si Ilipilit.
9 Giyai langon so manga wata i Daod a liyo ko manga wata o manga sandil iyan. Aden
mambo a wata iyan a babay a si Tamar.
So Kiyababadan ko Dato Solaiman
10 Aya wata i Solaiman na si Rihobowam,

na aya miyamakatalondog on na:
si Abiyas a wata i Rihobowam,
si Asa a wata i Abiyas,
si Yahosapat a wata i Asa,
11 Si Yahoram a wata i Yahosapat,
si Ahasiyas a wata i Yahoram,
si Yowas a wata i Ahasiyas,
12 Si Amasiyas a wata i Yowas,
si Osiyas a wata i Amasiyas,
si Yotam a wata i Osiyas,
13 Si Ahas a wata i Yotam,
si Hisikiyas a wata i Ahas,
si Manasih a wata i Hisikiyas,
14 Si Amon a wata i Manasih
ago si Yosiyas a wata i Amon.
15 Aya manga wata i Yosiyas na:
si Yohanan, a so kaka,
si Yahoyakim a so ikadowa,
si Sidikiyas a so ikatelo,
ago si Siyalom a so ikapat.
16 Aya manga wata i Yahoyakim na:
si Yahoyakin ago si Sidikiyas.
So Kiyababadan ko Dato Yahoyakin
17 Aya manga wata i Yahoyakin oriyan o kiyabiyaga rekaniyan o manga taw sa Babilon
na:
siki Siyaltiyal,
18 Malkiram, Pidayas, Siyanasar, Yakamiyas, Hosiyama ago si Nidabiyas.
19 Aya manga wata i Pidayas na:

si Sirobabil ago si Simay.
Aya manga wata i Sorobabil na:
si Misiyolam ago si Hananiyas. Si Silomit na aya iran babay.
20 Aden pen a lima kataw a ped a manga wata iyan a siki Hasiyobah, Ohil, Birikiyas,
Hasadiyas ago Yosiyab Hisid.
21 Aya kiyababadan ki Hananiyas na:

si Pilatiyas ago si Yasiyayas ago so manga mbawataan a Ripayas, Aman, Obadiyas ago
Siyakaniyas.
22 Aya kiyababadan ki Siyakaniyas na:

si Siyamayas ago so lima kataw a manga wata iyan a siki Hatos, Igal, Bariyas, Niyariyas
ago si Siyapat.
23 Aden a telo kataw a manga wata i Niyariyas a siki Iliyonay, Hiskiyas ago si Asrikam.
24 Aden a pito kataw a manga wata i Iliyonay a siki Hodabiyas, Iliyasib, Pilayas, Akob,
Yohanan, Dilayas ago si Anani.
1 MANGA RIKORD 4
So Ped a manga Kiyababadan ki Yodah
So kiyababadan ki Yodah na:

siki Piris, Hisron, Karmi, Hor ago si Siyobal.
2 So wata i Siyobal, a si Riyayas na aya ama i Yahat, na si Yahat na aya ama i Ahomay
ago si Lahad. Manga apo siran o manga Soratiyo.
3,4 Si Hor na aya kaka a wata i Kaleb ago si Iprat, na so manga mbawataan iyan na aya
miyangon sa siti a Bitlihim. Aden a telo kataw a wata i Hor a siki Itam, Pinowil ago si
Isir. Aden a telo kataw a wata i Itam a manga mama a siki Yasriil, Isma ago si Idbas ago
sakataw a wata iyan a babay a si Hasiliponi. Si Pinowil na aya miyangon sa siti a Gidor,
na si Isir i miyangon sa Hosiyas.
5 Si Asor a miyangon sa inged a Tikowa na aden a dowa a karoma niyan a si Hilah ago si
Naarah.
6 Aden a pat kataw a manga wata i Asor ago si Naarah a siki Ahosam, Hipir, Timini ago
si Haastari.
7 Aya inimbawata rekaniyan i Hilah na:

siki Sirit, Ishar, Itnan,
8 Ago si Kos a ama i Anob ago si Hasobibah ago apo o manga mbawataan i Aharhil a
wata i Harom.
9 Aden a mama a aya ngaran iyan na si Yabis a lebi a pagaadatan a di so manga pagari
niyan. Bitowan sekaniyan i ina iyan sa Yabis, ka tig iyan a "Tanto ako a kiyasakitan ko
kinimbawataan ko ron."
10 Na miyangangarapan si Yabis ko Tohan o Israil a tig iyan a "O ba ako ngka bo
perakmati ago pakaoladen ka so masasakop aken! Pengnin ko a mipageepeda aken seka
ko langon a di aken dii nggolaolaan ago pakalidasen ako ngka ko marata kaan di ako ron
kesakiti!" Na inampon o Tohan so pangni niyan.
So Ped a manga Salsila
11 Si Kilob a pagari a Siyohah na aya ama i Mihir a ama i Iston.

12 Si Iston na ama i siki Bit Rapa, Pasiyas ago si Tahinah a aya miyangon sa siti a Nahas.
So manga mbawataan angkai a manga mama na mababaling sa siti a Rikah.
13 Aya manga wata i Kinas na:

si Otniyal ago si Sirayas.
Aya manga wata i Otniyal na:
si Hatat ago si Miyonotay.
14 Si Miyonotay na aya ama i Oprah.
Si Sirayas na ama i Yowab a aya miyangon sa 'Balintad o manga Panday' a ron
mababaling so manga papasang a panday.
15 Aya manga wata i Kaleb a wata i Yaponih na:

siki Iro, Ilah ago si Naam. Si Ilah na aya ama i Kinas.
16 Aya manga wata i Yahalilil na:
siki Sip, Sipah, Tina ago si Asaril.
17,18 Aya manga wata i Israh na:

siki Yatir, Mirid, Ipir ago si Yalon. Si Mirid na miyapangaroma niyan si Bitiyas a aya
wata o Piraon a dato sa Misir, na aden a wata iran a babay a si Miriyam ago dowa a wata
a mama a si Siyamay ago si Isbah. Si Isbah i miyangon sa inged a Istimowa.
Miyakapangaroma pen si Mirid sa babay sa Yodah na aden a telo kataw a wata iran, a si
Yarid a aya miyangon sa inged a Gidor, si Hibir a miyangon sa inged a Soko, ago si
Yakotiyal a miyangon sa inged a Sanowah.
19 Miyakapangaroma si Hodiyas ko babay i Naham, na aya kiyababadan kiran na:

so ama i Kilah a ped ko mbawataan i Garm, ago si Istimowa a ped ko mbawataan i
Maakat.
20 Aya manga wata i Simon na:

siki Amnon, Rinah, Bin Hanan ago si Tilon.
Aya manga wata i Isi na:
si Sohit ago si Bin Sohit.
So Kiyababadan ki Silah
21 Si Silah na isa ko manga wata i Yodah. Aya maaped ko manga kiyababadan ki Silah
na si Ir a aya miyangon sa inged a Likah, si Laadah a aya miyangon sa inged a Marisiyas,
so manga mbawataan o manga papasang i kapangaol a kibabaling sa inged a Bit Asbiya,
22 Si Yokim ago so manga kibabaling sa Kosiba, ago si Yowas ago si Sarap a
miyamakapangaroma sa manga babay a Mowabiyo ago miyaling roo sa Bitlihim. (Tanto
a andangandang angkai a manga rikord.)
23 Giyangkai a manga mbawataan na manga panday sa koden a bote a pepamanalagad ko
dato, na sii siran kibabaling sa Nitaim ago sa Gidirah.
So Kiyababadan ki Simiyon
24 Aya manga wata i Simiyon na:

siki Nimowil, Yamin, Yarib, Sirah ago si Siyaol.
25 Aya kiyababadan ki Siyaol na si Siyalom, so wata iyan a si Mibsam ago so wata iyan a
si Misma.
26 Aya kiyababadan ki Misma na si Hamowil, so wata iyan a si Sakor ago so wata iyan a
si Simay.
27 Si Simay na aden a sapolo ago nem a manga wata iyan a manga mama ago nem kataw
a manga wata a babay. Ogaid na so manga tonganay niyan na kena a ba siran madakel i
manga wata. Sabap san na da mababad so mbatabataa a Simiyon sa datar sa kadakel o
kiyababadan ki Yodah.
28 Roo siran kibabaling sa Birsiba, sa Moladah, sa Hasar, sa Siyowal,
29 Sa Bilhah, sa Isim, sa Tolad,
30 Sa Bitowil, sa Hormah, sa Siklag,
31 Sa Bit Markabot, sa Hasar Sosim, sa Bit Biri ago sii sa Siyaaraim. Giyai i manga siti a
kibabalingan iran taman ko kiyandato i Daod.
32 Aden pen a lima a siti iran a giya Itam, Ain, Rimon, Tokin ago giya Asan
33 A rakes o pagiingedan ko melilibeta sangkai a manga inged taman den sa Baalat.
Giyai i manga babalingan iran a misosorat so manga ngaran iran sii ko salsila ko
kiyababadan kiran.
34 So pemakatalondog na so manga olowan o manga mbawataan iran:

si Misiyobab, si Yamlik, si Yosah a wata i Amasiyas,
35 Si Yowil, si Yaho (a wata i Yosibiyas, a wata i Sirayas, a wata i Asiyal),
36 Si Iliyonay, si Yaakobah, si Yasiyohayas, si Asayas, si Adiyal, si Yasimiyal, si
Binayas,
37 Ago si Sisa (a wata i Sipi, a wata i Alon, a wata i Yadayas, a wata i Simri, a wata i
Simayas).
38 So manga ngaran a mililista sa onaan na aya manga olowan o manga mbawataan iran.
Na kagiya tanto a miyakadakel so manga pamiliya iran
39 Na sii siran lomiyalakaw sa tampar sa sedepan taman den ko masesebangan a kilid o
balintad a ron matatago a Gidor ka pepanggiloba siran sa kapenateban o manga bilibili
iran.
40 Na roo siran miyakatoon sa lombay ago pekepakayan a pananateba ko madaya a
kalopaan a romerenek ago lomilintad. Babalingan ai gowani o manga kiyababadan ki
Ham.
41 Sii ko kandadato i Hisikiyas sa Yodah na miyakaoma roo so manga mama a mililista

sa onaan na giyobat iran so manga kiyababadan ki Ham ago pinggegeba iran sa tarotop so
manga babalingan iran. Piyamogaw iran siran a poon ko lopa iran ago komiyaden siran
roo taman den imanto ka kagiya aden a kapepanateban on o manga talon iran.
42 Lima gatos a manga mama ko mbatabataa a Simiyon a somiyong sa kapalawan sa
Idomiya a pagoolowanan siran o manga wata i Isi, a siki Pilatiyas, Niyariyas, Ripayas ago
si Osiyal.
43 Na piyolang iran so miyalamba a manga Amalik a miyamakapalagoy, na komiyaden
siran roo taman den imanto.
1 MANGA RIKORD 5
So Kiyababadan ki Robin
Giyai so kiyababadan ki Robin a so popaw sa lawas i Israil: (Sekaniyan i kaka a wata,

ogaid na kagiya piyakayaan iyan so ama iyan ko kiyarimbanga niyan ko sandil i ama iyan
na so kawadib iyan ko kakakakai ron na minibegay ki Yosop a wata i Israil. Sabap san na
di kilista si Robin a aya kaka a wata sii ko salisila o kiyababadan ki Israil.
2 Na apiya pen miyabaloy so mbatabataa a Yodah a lebi a mabager a di so ped a manga
mbatabataa ago miyakapoon kiran so dato ko nasiyon na so kawadib o popaw sa lawas na
rek i Yosop.)
3 Si Robin a kaka a wata i Israil na aden a pat kataw a wata iyan a siki Hanok, Palo,
Hisron ago si Karmi.
4 So kiyababadan ki Yowil na si Simayas a ama i Gog, a ama i Simay,

5 A ama i Mikah, a ama i Riyayas, a ama i Baal,
6 A ama i Biirah a aya olowan ko mbatabataa a Robin. Si Biirah na biniyag ago initaog o
Dato Tiglat Pilisir sa Asiriya.
7 So manga tonganay iran na mililista a ipepasod ko manga salsila iran: si Yail na aya
olowan, si Sakariyas
8 Ago si Bila a wata i Asas, a wata i Siyama, a wata i Yowil. Roo siran kibabaling ko
darpa a ipoon sa Arowir na taman sa Nibo ago giya Baal Miyon.
9 Na sabap sa tanto a miyababad so manga sapi iran roo sa Giliyad na komiyaden siran ko
lopa sa tampar sa sebangan taman den ko kilid o disirto a mananaros roo sa Lawasaig a
Yopratis.
10 Sii ko kandadato i Saolo na giyobat o mbatabataa a Robin so manga Hagariyo na

tiyaban iran. Siyakop iran so kibabalingan o manga Hagariyo ko dalem o inged iran sii sa
sebangan a Giliyad.
So Kiyababadan ki Gad
11 So kiyababadan ki Gad na roo kibabaling ko pagingedingedan a Basan sii sa

pagotaraan o manga taw sa Robin taman den sa inged a Salikah:
12 Si Yowil na aya iran olowan roo sa Basan, si Siyapam i saliyo niyan, na aya
tomatalondog on na si Yanay ago si Siyapat.
13 So manga tonganay iran a aya manga olowan o pito a ped a manga mbawataan na siki
Mikail, Misiyolam, Siba, Yoray, Yakan, Siya ago si Ibir.
14 Giyai i manga kiyababadan ki Abihail a wata i Hori, a wata i Yarowah, a wata i

Giliyad, a wata i Mikail, a wata i Yasisay, a wata i Yakdo, a wata i Bos.
15 Si Ahi a wata i Abdiyal, a wata i Goni na aya olowan angkai a manga mbawataan.
16 So manga taw sa Gad na kibabaling sa Giliyad, sii sa Basan ago so manga

pagingedingan on ago sii ko langon o pepanateban roo sa Saron taman den ko manga
temanaan iran.
17 Minisoled ai langon ko manga salsila a miyamangisorat ko masa a kandadato i Yotam
sa Yodah, ago so kandadato i Yarobowan sa Israil.
So manga Sondaro o manga Mbatabataa sa Sebangan a Yordan
18 Sii ko manga mbatabataa a Robin, Gad ago so sabagi ko mbatabataa a Manasih na

aden a manga sondaro ron a pat polo ago pat nggibo ago pito gatos ago nem polo a
pepegawid sa pedang ago kelong ago mapasang mosar sa pana, na miyanga babatak siran
sa katidawa.
19 Miyakitidawa siran ko manga Hagariyo, manga Yatoriyo, manga Napisiyo ago so
manga Nodabiyo.
20 Gomiyoraok siran ko Tohan sa tabang sii ko kiyapakitidawa iran kiran na inogopan
iyan siran ago piyakitaban iyan kiran so manga Hagariyo ago so langon a abanga iran.
Inampon o Tohan so pangni iran ka kagiya sasarigan iran sekaniyan.
21 Miyaagaw iran so manga ayam o manga Hagariyo a lima polo nggibo a manga onta,
dowa gatos ago lima polo nggibo a manga bilibili, ago dowa nggibo a manga kimar.
Miyabiyag iran pen so magatos nggibo a manga taw,
22 Na madakel pen a manga Hagariyo a miyapamono ka kagiya so Tohan i miyakitidawa.
Na roo kibabaling ko lopa iran so manga mbatabataa a Robin, Gad ago so sabagi ko
mbatabataa a Manasih taman ko kinitaogen kiran.
So Sabagi ko Mbatabataa a Manasih sa Sebangan
23 So manga taw ko sabagi ko mbatabataa a Manasih na tanto a madakel, na kibabaling

siran ko lopa ipoon sa Basan na manaros sa tampar sa pagotaraan taman sa Baal Hirmon
ago sa Sinir (so Palaw a Hirmon).
24 Giyai i manga olowan o manga mbawataan iran: si Ipir, si Isi, si Iliyal, si Asriyal, si
Yaramiyas, si Hodabiyas ago si Yakdiyal. Manga wawaraw siran a manga sondaro ago
kababantogan a manga mama.
25 Ogaid na inongkir o manga taw so Tohan o manga apo iran ka tiyalikodan iran
sekaniyan ago miyamanimba siran ko manga katohanan o manga nasiyon a piyamogaw o
Tohan ko kapepekaantap iran on.
26 Sabap san na piyangondoy o Tohan o Israil so pamikiran i Pol (giyanan si Tiglat
Pilisar) a dato sa Asiriya na piyamiyag iyan so manga mbatabataa a Robin, Gad ago so
sabagi ko mbatabataa a Manasih na piyangowit iyan siran sa Halah, sa Habor, sa Hara ago
roo ko lawasaig a Gosan, na ndodoo siran pen taman imanto.
1 MANGA RIKORD 6
So Kiyababadan ki Libi
1 Aya manga wata i Libi na:

2 Aya manga wata i Kohat na:
siki Amram, Ishar, Hibron ago si Osiyal.
3 Aya manga wata i Amram na:

siki Aron, Mosa ago si Miriyam.
Aya manga wata i Aron na:
siki Nadab, Abiho, Iliyasar ago si Itamar.
4 Si Iliyasar na ama i Pinihas, a ama i Abisowa,
5 A ama i Boki, a ama i Osi,
6 A ama i Sirahiyas, a ama i Mirayot,
7 A ama i Amariyas, a ama i Ahitob,
8 A ama i Sadok, a ama i Ahimaas,
9 A ama i Asariyas, a ama i Yohanan.
10 Si Yohanan na aya ama i Asariyas (sekaniyan i miyakapagimam sii ko Timplo a
biyangon i Solaiman roo sa Yarosalim).
11 Si Asariyas na ama i Amariyas, a ama i Ahitob,
12 A ama i Sadok, a ama i Siyalom,
13 A aya i Hilkiyas, a ama i Asariyas,
14 A ama i Siriyas, a ama i Yahosadak.
15 Si Yahosadak na miyawit sa Babilon a ped o manga taw sa Yodah ago sa Yarosalim
isako mitaog siran o Tohan a nggolalan ko dato Nibokadnisar.
So Ped a Kiyababadan ki Libi
16 Aya manga wata i Libi na:

17 Aya manga wata i Girson na:

si Libni ago si Simay.
18 Aya manga wata i Kohat na:

siki Amram, Iskar, Hibron ago si Osiyal.
19 Aya manga wata i Mirari na:

si Makli ago si Mosi.
So pemakatalondog na so manga kiyababadan ki Libi a ipepasod ko oman i apo iran:
20 So kiyababadan ki Girson na:
siki Libni, Yahat, Simah,
21 Yowas, Ido, Sirah ago si Yatiray.
22 So kiyababadan ki Kohat na:

siki Aminadab, Korah, Asir,
23 Ilkanah, Abiyasap, Asir,
24 Tahat, Oriyal, Osiyas ago si Siyaol.
25 Si Ilkanah na aya ama i Amasay ago si Ahimot.
26 So kiyababadan ki Ahimot na siki Ilkanah, Sopay, Nahat,
27 Iliyab, Yaroham, Ilkanah ago si Samowil.
28 Aya manga wata i Samowil na:

si Yowil a aya kaka, ago si Abiyas.
29 So kiyababadan ki Mirari na:

siki Makli, Libni, Osah,
30 Simiya, Hagiyas ago si Asayas.
So manga Paboboniboniyan ko Timplo
31 Giyai so manga mama a piyakasangan i Daod ko boniboniyan sii ko Timplo o Allah

oriyan o kiyatagoa on ko Kaban sa Kapasadan.
32 Pepanalagad siran a dii mboboniboniyan sii ko Barombarong a dii Telabokan taman
ko kiyabangona i Solaiman ko Timplo o Allah roo sa Yarosalim. Di iran dii inggolalan
so manga sangan iran a mipepasod ko manga taritib a initenan kiran.
33 So pemakatalondog na so manga mama a miyanalagad a rakes o manga wata iran:

Sii ko mbawataan i Kohat:
si Himan a aya magoolowan ko dii mboboniboniyan na wata i Yowil, a wata i Samowil,
34 A wata i Ilkanah, a wata i Yaroham, a wata i Iliyal, a wata i Towas,
35 A wata i Sop, a wata i Ilkanah, a wata i Mahat, a wata i Amasay,
36 A wata i Ilkanah, a wata i Yowil, a wata i Asariyas, a wata i Sipaniyas,
37 A wata i Tahat, a wata i Asir, a wata i Abiyasap, a wata i Korah,
38 A wata i Iskar, a wata i Kohat, a wata i Libi, a wata i Israil.
39 Aya pegogop ki Himan na so tonganay niyan a si Asap, a wata i Birikiyas, a wata i

Simiya,
40 A wata i Mikail, a wata i Baasiyas, a wata i Malikiyas,
41 A wata i Itni, a wata i Sirah, a wata i Adayas,
42 A wata i Itan, a wata i Simah, a wata i Simay,
43 A wata i Yahat, a wata i Girson, a wata i Libi.
44 Aya pegogop kiran a manga Libitiyo mambo na so kiyababadan ki Mirari a

pagoolowanan siran i Itan, a wata i Kisi, a wata i Abdi, a wata i Malok,
45 A wata i Hasiyabiyas, a wata i Amasiyas, a wata i Hilkiyas,
46 A wata i Amsi, a wata i Bani, a wata i Simir,
47 A wata i Makli, a wata i Mirari, a wata i Libi.
48 So ped ko manga tonganay iran a manga Libitiyo na piyakisangan kiran so langon a

ped a manga galebek ko darpa a pesimbaan a so walay o Tohan.
So Kiyababadan ki Aron
49 Si bo si Aron ago so manga mbawataan iyan i pepekasapaat sii ko aparan a petotongan

sa manga sapaat, ago so aparan a petotongan sa doka, na piyakisangan kiran mambo so
langon o ped a galebek a mikokoyapet ko kasimba sii ko Lebi a Soti a Darpa. Na di iran
dii inggolalan so kakepapasa ko manga dosa o manga Israil a aya iran kapetomana ko
langon a sogoan o Tohan a inibegay niyan kiran a nggolalan ko oripen iyan a si Mosa.
50 Giyai i kiyababadan ki Aron:

so wata iyan a si Iliyasar, a ama i Pinihas, a ama i Abisiyowa,
51 A ama i Boki, a ama i Odsi, a ama i Sirahiyas,
52 A ama i Mirayot, a ama i Amariyas, a ama i Ahitob,
53 A ama i Sadok, a ama i Ahimaas.
So manga Darpa a Kibabalingan o manga Kiyababadan ki Libi
54 Giyai so manga darpa a inisenggay ko kiyababadan ki Aron a maaped ko mbatawaan i

Kohat, ka siran i paganay a miyaripa a kebegan sa lopa.
55 Inibegay kiran a Hibron sii sa inged a Yodah a rakes o melilibeta on a manga
pananateba.
56 Ogaid na so manga pangomaan ko liyo o siti ago so pepamagonayonayan on na
inibegay ki Kaleb a wata i Yaponih.
57 Giyai i manga siti a minibegay ko kiyababadan ki Aron a rakes o manga pananateba a

melilibeta ko oman i isa on: giya Hibron (a so siti a pekeapasan), Libnah, Yatir, Istimowa,
58 Hilin, Dibir,
59 Asan, Yotah ago giya Bit Simis.
60 Sii ko inged a Baniyamin na inibegay kiran a manga siti a Gibiyon, Giba, Alimit ago
giya Anatot a rakes o manga pananateba iran. Sapolo langon ago telo a manga siti a
inibegay ko kiyababadan ki Aron.
61 So ped ko mbawataan i Kohat na singgayan siran sa sapolo a manga siti sii ko inged o
sabagi ko mbatabataa a Manasih.
62 So mbawataan i Girson na singgayan siran sa sapolo ago telo a manga siti sii ko
manga inged a Isakar, Asir, Naptali ago Manasih roo sa Basan sa sebangan a Yordan.
63 So kiyababadan ki Mirari na singgayan sa sapolo ago dowa a manga siti sii ko manga
inged a Robin, Gad ago Sibolon.
64 Sangkai a okit na inisenggay o manga Israil ko kiyababadan ki Libi angkai a manga

siti a rakes o manga pananateba iran.
65 So manga siti sii ko manga inged a Yodah, Simiyon ago Baniyamin a miyanga aaloy
sa onaan na minisenggay mambo a nggolalan ko ripa.
66 So ped ko mbawataan i Kohat na inibegay kiran angkai a manga siti sii ko inged a
Ipraim:
67 Giya Sikim sii ko kapalawan a Ipraim (a so siti a pekeapasan), Gisir,
68 Yokmiyam, Bit Horon,
69 Ayalon ago Gat Rimon a rakes o manga pananateba a melilibeta ko oman i isa on.
70 Na inibegay kiran pen a Anir ago giya Biliyam a rakes o manga pananateba iran sii ko
inged o sabagi ko mbatabataa a Manasih.
71 So manga kiyababadan ki Girson na inibegay kiran angkai a manga siti a rakes o

manga pananateba iran:
sii ko inged o sabagi ko mbatabataa a Manasih na: giya Golan roo sa Basan ago giya
Asatarot;
72 Sii ko inged a Isakar na: giya Kidis, Dabirat,

73 Ramot ago giya Anim;
74 Sii ko inged a Asir na: giya Masiyal, Abdon,

75 Hokok ago giya Rihob;
76 Sii ko inged a Naptali na: giya Kidis roo sa Galili, Hamon ago giya Kiriyataim.
77 So ped ko mbawataa i Mirari na inibegay kiran angkai a manga siti a rakes o manga
pananateba iran:
sii ko inged a Sibolon na: giya Rimon ago giya Tabor;
78 Sii ko inged a Robin sa sebangan a Yordan ago pantag a Yariko na: giya Bisir sii sa
disirto, Yahas,
79 Kidimot ago giya Mipaat;
80 Na sii ko inged a Gad na: giya Ramot sii sa Giliyad, Mahanaim,

81 Hisbon ago giya Yasir.
1 MANGA RIKORD 7
So Kiyababadan ki Isakar
Pat kataw a manga wata i Isakar a:

siki Tola, Powah, Yasiyob ago si Simron.
2 Aya manga wata i Tola na:

siki Osi, Ripayas, Yariyal, Yakmay, Ibsam ago si Simowil. Siran i manga olowan o
manga pamiliya ko mbawataan i Tola. Sii ko masa i Daod na aya kadakel o kiyababadan
ki Tola a makapesondaro a mililista ko manga salsila iran na dow polo ago dowa nggibo
ago nem gatos.
3 Aya wata i Osi na si Israhiyas.
Aya manga wata i Israhiyas na:
siki Mikail, Obadiyas, Yowil ago si Iskiyas. Giyangkai a lima kataw na palaya den
manga olowan o manga pamiliya.
4 Aya mililista ko manga salsila iran na telo polo ago nem nggibo a manga mama a
makapesondaro, ka madakel siran i manga karoma ago manga wata.
5 Aya kadakel langon o manga mama a makapesondaro sii ko langon a pamiliya ko

mbatabataa a Isakar a mililista ko manga salsila iran na walo polo ago pito nggibo.
So Kiyababadan ki Baniyamin
6 Telo a manga wata i Baniyamin a:

siki Bila, Bikir ago si Yadiyail.
7 Lima kataw a manga wata i Bila a:

siki Isbon, Osi, Osiyal, Yarimot ago si Iri. Manga olowan siran o manga pamiliya ko
mbawataan o ama iran. Dowa polo ago dowa nggibo ago telo polo ago pat a manga
mama a makapesondaro a mililista ko manga salsila ko kiyababadan kiran.
8 Aya manga wata i Bikir na:

siki Simirah, Yowas, Iliyasar, Iliyowinay, Omri, Yarimot, Abiyas, Anatot ago si Alimit.
9 Manga olowan siran o manga pamiliya ko mbawataan o ama iran. Dowa polo nggibo
ago dowa gatos a manga mama a makapesondaro a mililista ko manga salsila ko
kiyababadan kiran.
10 Aya wata i Yadiail na si Bilhan.

Aya manga wata i Bilhan na:
siki Yaos, Baniyamin, Ihod, Kinaanah, Sitan, Tarsis ago si Ahisiyahar.
11 Langon siran manga olowan o manga pamiliya ko mbawataan o Yadiyail, na aden a
sapolo ago pito nggibo ago dowa gatos a manga mama a makatitiyagar makitidawa a
maaped ko kiyababadan kiran.
12 So manga Siyopiyo ago so manga Hopiyo na manga moriyataw i Ir, na so manga

Hosiyo na manga moriyataw i Ahir.
So Kiyababadan ki Naptali
13 Aya manga wata i Naptali na:

siki Yaksiyal, Goni, Yasir ago si Silim. Kiyababadan siran i Bilhah.
So Kiyababadan ki Manasih
14 Aya manga wata i Manasih sii ko sandil iyan a babay sa Aram na si Asriyal ago si
Makir. Si Makir na ama i Giliyad.
15 Miyangaroma si Makir ko moriyataw o manga Hopiyo ago manga Siyopiyo. Aya
ngaran o babay niyan na si Maakah. Aya ikadowa a wata i Makir na si Silopihad, na
langon babay so manga wata iyan.
16 Si Maakah a karoma i Makir na inimbawata iyan si Piris ago si Siyaris. Si Piris na

ama i Olam ago si Rakim.
17 Si Olam na ama i Bidan.
Langon siran manga kiyababadan ki Giliyad, a wata i Makir, a wata i Manasih.
18 So babay i Giliyad a si Hamolikit na inimbawata iyan siki Iskod, Abiyasir ago si
Maklah.
19 Aya manga wata i Simida na:

siki Ahiyan, Sikim, Liki ago si Aniyam.
So Kiyababadan ki Ipraim
20 So manga kiyababadan ki Ipraim na:

si Siyotilah, a ama i Birid, a ama i Tahat, a ama i Iliyadah,
21 A ama i Tahat, a ama i Sabad, a ama i Siyotilah.
Aden pen a dowa a wata i Ipraim a si Isir ago si Iliyas, ogaid na miyanga bobono siran
isako tepengan iran manekew so manga sapi o manga tenger a taw sangkoto a inged a
Gat.
22 Miyatey a manga gawii a kinimbokoon kiran o ama iran a si Ipraim, na somiyong on
so manga tonganay niyan kaan iran katayoi.
23 Oriyan iyan na rimbang iyan peroman so karoma niyan na miyaogat sekaniyan ago
mimbawata sa mama. Bitowan i Ipraim sa Biriyas sabap ko marata a miyaolaola o
pamiliya niyan.
24 Aya ngaran o wata a babay i Ipraim na si Siirah a aya miyangon ko manga siti a
kababaan ago kaporoan a Bit Horon, ago giya Osin Siirah.
25 Aden pen a wata i Ipraim a si Ripah, a aya ama i Risip, a ama i Tilah, a ama i Tahan,
26 A ama i Ladan, a ama i Amihod, a ama i Ilisiyama,
27 A ama i Non a ama i Yosowa.
28 So manga lopa iran ago so manga kibabalingan iran na aya maaped on na giya Bitil
ago so melilibeta on a pagingedingedan, giya Naaran sii sa tampar sa sebangan, giya Gisir
a rakes o pagingedingedan on sii sa tampar sa sedepan, ago giya Sikim a rakes o
pagingedingedan on ago taman roo den sa Ayas ago so pagingedingedan on.
29 Sii ko manga temanaan o inged a Manasih na matatago on so manga siti a Bit Siyan,
Taanak, Migido ago Dor a rakes on so manga pagiingedan a melilibeta kiran. So manga
kiyababadan ki Yosop a wata i Israil na aya kibabaling sangkai a manga inged.
So Kiyababadan ki Asir
30 Aya manga wata i Asir na:
siki Imnah, Isbah, Isbi ago si Biriyas. So pagari ran a babay na si Sirah.
31 Aya manga wata i Biriyas na:

si Hibir ago si Malkiyal a aya ama i Birsait.
32 Si Hibir na ama i Yaplit, si Siyomir, ago si Hotam, ago so babay iran a si Siyowa.
33 Aya manga wata i Yaplit na:

siki Pasak, Bimhal ago si Asbat.
34 Aya manga wata o pagari niyan a si Siyomir na:

siki Ahi, Rogah, Hobah ago si Aram.
35 Aya manga wata o pagari niyan a si Hotam na:

siki Sopah, Imna, Silis ago si Amal.
36 Aya manga wata i Sopah na:

siki Sowah, Harnipir, Siyowal, Biri, Imrah,
37 Bisir, Hod, Siyama, Silsiyas, Itran ago si Bira.
38 Aya manga wata i Yatir na:

siki Yaponih, Pispah ago si Ara.
39 Aya manga wata i Ola na:

siki Arah, Haniyal ago si Risiya.
40 Giyai langon so kiyababadan ki Asir. Manga olowan siran ko manga mbawataan o

apo iran. Piyamagaraw siran a manga mama, a manga wawaraw a sondaro ago makikilala
a manga pekeonotan. Sii ko mbatabataa a Asir na aden a dowa polo ago nem nggibo a
manga mama a makatitiyagar makitidawa a mililista ko manga salsila iran.
1 MANGA RIKORD 8
So Ped a manga Kiyababadan ki Baniyamin
Aya manga wata i Baniyamin na:

siki Bila a kaka a wata iyan, Asbil, Aharah,
2 Nohah ago si Rapa.
3 Aya manga wata i Bila na:

siki Adar, Gira, Abihod,
4 Abisiyowa, Naaman, Ahowah,
5 Gira, Sipopan ago si Horam.
6-7 Aya manga kiyababadan ki Ihod na:
siki Naaman, Ahiyas ago si Gira. Manga olowan siran o manga pamiliya a kibabaling sa
Giba, ogaid na piyamogaw siran roo na tomipas siran sa Manahat a pinakodaan siran i
Gira. Si Gira na aya ama i Osa ago si Ahihod.
8-11 Si Siyaharaim mambo na aden a manga wata iyan roo sa Mowab oriyan o kiyandai
niyan ko manga karoma niyan a si Hosim ago si Baara.
9 Aya manga wata iyan sii ko karoma niyan a si Hodis na siki Yobab, Sibiya, Misiya,
Malkam,
10 Yaos, Sakiya ago si Mirmah. Langon siran manga olowan o manga pamiliya.
11 Aden pen a dowa a wata iyan sii ki Hosim a si Ahitob ago si Ilpaal.
12 Aya manga wata i Ilpaal na:

siki Ibir, Misiyam, Simid (a miyangon sa manga siti a Ono ago giya Lod ago so manga
pagingedingedan on),
13 Biriyas ago si Siyama. Manga olowan siran o manga pamiliya a kibabaling sa
Aihalon, na piyamogaw iran so manga taw sa siti a Gat.
14-16 Aya manga kiyababadan ki Biriyas na:

siki Ahiyo, Siyasiyak, Yarimot, Sibadiyas, Arad, Idir, Mikail, Ispah ago si Yoha.
17-18 Aya manga kiyababadan ki Ilpaal na:

siki Sibadiyas, Misiyolam, Hiski, Hibir, Ismiray, Isliyas ago si Yobab.
19-21 Aya manga kiyababadan ki Simay na:

siki Yakim, Sikri, Sabdi, Iliyanay, Silitay, Iliyal, Adayas, Birayas ago si Simrat.
22-25 Aya manga kiyababadan ki Siyasiyak na:

siki Ispan, Ibir, Iliyal, Abdon, Sikri, Hanan, Hananiyas, Ilam, Antotiyas, Ipdiyas ago si
Pinowil.
26-27 Aya manga kiyababadan ki Yahoram na:

siki Siyamsiray, Sihariyas, Ataliyas, Yaarisiyas, Iliyas ago si Sikri.
28 Siran na manga olowan ko manga mbawataan o apo iran a mililista ko manga salsila
iran. Roo siran kibabaling sa Yarosalim.
29 Si Yail na miyangon sa siti a Gibiyon na roo sekaniyan miyaling. Aya ngaran o

karoma niyan na si Maakah.
30 Aya kaka a wata iyan na si Abdon, na tomiyalondog on siki Sor, Kis, Baal, Nir,
Nadab,
31 Gidor, Ahiyo, Sikir ago si Miklot,
32 Na si Miklot na aya ama i Simiyas. Mababaling siran mambo roo sa Yarosalim a
marani ko manga tonganay iran.
So Kiyababadan ko Dato Saolo
33 Si Nir na aya ama i Kis, na si Kis na ama i Saolo, na si Saolo na ama i siki Yonatan,
Malkisowa, Abinadab ago si Isbaal.
34 Si Yonatan na ama i Miribaal (a bebetowan mambo sa Isbosit), na si Miribaal na ama i

Mikah.
35 Aya manga wata i Mikah na: siki Piton, Milik, Takriya ago si Ahas.
36 Si Ahas na ama i Yahowadah, na si Yahowadah na ama i siki Alimit, Asmabit ago si
Simri. Si Simri na ama i Modsa,
37 Na si Modsa na ama i Biniya, a aya ama i Rapah, a ama i Iliyasah, a ama i Asil.
38 Nem kataw a manga wata i Asil a:

siki Asrikam, Bokiro, Ismail, Siyariyas, Obadiyas ago si Hanan.
39 Aya manga wata i Iskik a pagari i Asil na:

si Olam a so kaka, si Yaos a so ikadowa ago si Ilipilit a so ikatelo.
40 So manga wata i Olam na palaya den manga wawaraw a sondaro a manga papasang i
kapana. Madakel siran i manga wata ago manga apo a aya kadakel iran langon na
magatos ago lima polo.
Langon ai manga kiyababadan ki Baniyamin.
1 MANGA RIKORD 9
So langon o manga Israil na miyamangisorat ko manga salsila a matatago ko 'Kasosoratan
sa Totolan ko manga Dato sa Israil.'
So manga taw sa Yarosalim

So manga taw sa Yodah na minitaog sa Babilon sabap ko kiyapakandosa iran.
2 Aya miyaona mamakakasoy ko lopa iran sii ko manga siti iran na so ped ko manga
Israil, manga imam, manga Libitiyo ago manga pepanalagad ko Timplo.
3 Aden a manga taw a kikaaped ko manga mbatabataa a Yodah, Baniyamin, Ipraim ago
Manasih a mimbabaling sa Yarosalim a giyai:
4 Si Otay a wata i Amihod, a wata i Omri, a wata i Imri, a wata i Bani a manga moriyataw
siran i Piris a wata i Yodah,
5 Si Asayas ago so manga wata iyan a poon ko mbawataan i Silah a wata i Yodah.
6 Ago si Yowil ago so manga tonganay niyan a poon ko mbawataan i Sirah a wata i
Yodah. Aya kadakel o manga kiyababadan ki Yodah a mimbabaling sa Yarosalim na
nem gatos ago siyaw polo langon.
7 So mimbabaling roo a poon ko kiyababadan ki Baniyamin na:
si Salo a wata i Misolam, a wata i Hodabiyas, a wata i Hasinowas;
8 Si Ibniyas a wata i Yarohan; si Ilah a wata i Osi, a wata i Mikri;
ago si Misiyolam a wata i Sipatiyas, a wata i Riyowil, a wata i Ibniyas.
9 Langon angkai a manga taw na manga olowan o manga pamiliya a mililista ko manga
salisila kiran. Siyaw gatos ago lima polo ago nem langon a manga taw a poon ko
mbatabataa a Baniyamin a mimbabaling roo.
So manga Imam a Kibabaling sa Yarosalim
10 So manga imam na:

Si Yadayas, si Yahoyarib, si Yakin,
11 Si Asariyas a wata i Hilkiyas, a wata i Misiyolam, a wata i Sadok, a wata i Mirayot, a
wata i Ahitob a aya olowan sii ko walay o Tohan;
12 Si Adayas a wata i Yaroham, a wata i Pasor, a wata i Malkiyas; ago si Maasay a wata i
Adiyal, a wata i Yaksirah, a wata i Misiyolam, a wata i Misilimit a wata i Imir.
13 Aya kadakel langon o manga imam a mimbabaling na sanggibo ago pito gatos ago
nem polo. Manga olowan siran o manga pamiliya, na kasasanaan siran a manga mama a
pakisasangan kiran so kapanalagad sii ko walay o Tohan.
So manga Libitiyo a Kibabaling sa Yarosalim
14 So manga Libitiyo na:

siki Simayas a wata i Hasob, a wata i Asrikam, a wata i Hasiyabiyas a moriyataw i Mirari;
15 Si Bakbakar, si Hiris, si Galal, si Mataniyas a wata i Mika, a wata i Sikri, a wata i
Asap;
16 So Obadiyas a wata Simayas, a wata i Galal, a wata i Yadoton; ago si Birikiyas a wata
i Asa, a wata i Ilkanah a miyakabaling ko pagingedingedan o manga Nitopatiyo.
So manga Pepegipat ko Gimowa o Timplo a Kibabaling sa Yarosalim
17 So manga gordiya ko gimowa na:

siki Siyalom, Akob, Talmon, Ahiman a aya olowan iran na si Siyalom.
18 Sa da pen angkai a masa na pakisasangan ko manga tonganay iran so Gimowa o Dato
sii sa tampar sa sebangan. Siran i manga gordiya a maaped ko kampo o manga Libitiyo.
19 Si Siyalom a wata i Kori, a wata i Ibiyasap ago so manga tonganay niyan a maaped ko
mbawataan o Korah na aya makasasangan ko dii kanggordiya ko gimowa o soti a
Barombarong a datar o dii kanggordiya o manga apo iran ko gimowa o kakadenan o
Allah.
20 Si Pinihas a wata i Iliyasar na aya magoolowan kiran ko miyaipos a masa, na
mipageepeda iyan so Allah.
21 Si Sakariyas a wata i Misilimiyas na isa mambo ko manga gordiya ko gimowa o
Barombarong a dii Telabokan.
22 Aya kadakel o langon a miyaaraw a dii nggogordiya ko manga gimowa na dowa gatos
ago sapolo ago dowa. Inipelilista siran siran ko manga salsila sii ko manga inged iran. Si
dato Daod ago so nabi Samowil na aya tomiyoro ko manga apo iran sangkai a sangan
iran.
23 Siran ago so manga moriyataw iran na aya manga komikibir ko manga gimowa o
Walay o Allah, a giyoto so Barombarong.
24 Di siran dii nggordiya ko pat a mbalabala on, sa sebangan, sa sedepan, sa pagotaraan
ago sii sa pagabagatan.
25 So manga tonganay iran a kibabaling ko pagingedingedan na pepekaoma kiran
omanoman ka pepegogop siran nggordiya ko soled o pito gawii.
26 So pat kataw a olowan o manga gordiya na manga Libitiyo, na isasarig kiran so
kapekibira ko manga rowang sii ko Walay o Tohan ago so manga tamok a matatago on.
27 Pepekakaden siran ko marani ko Walay o Tohan ka kagiya misasana kiran so di on dii
kanggordiyaa ago so kapelekai ran on oman mapita.
So ped a manga Libitiyo
28 So ped kiran na aya komikibir ko manga kasangkapan a pegosaren ko kapepanalagad

ko Timplo. Pembilangen iran ai igira a ipesoled ago igira ipeliyo.
29 So ped kiran pen na initoro a pekibir ko manga kasangkapan ago so manga pagigimo
ko soti a darpa a rakes o arina, arak, lana a olibi, doka ago so manga palapa.
30 Ogaid na so bo so manga imam i kepakay a makaseosaog ko manga palapa a
pegosaren ko lana ago doka.
31 So isa ko manga Libitiyo a si Matitiyas, a kaka a wata i Siyalom a ped ko mbawataan i

Korah na siyarigan ko kapangembaal sa paan a ipesepaat.
32 Aden a ped ko manga tonganay iran ko mbawataan i Kohat a piyakisangan kiran so
kapetiyagara ko paan a ipembetad ko lamisaan ko hadapan o Tohan oman Gawii a
Idedeke.
33 So manga paboboniboniyan a manga olowan o manga pamiliya a Libitiyo na

komakaden siran ko manga rowang sii ko Timplo. Da den a labet iran ko manga ped a
atastanggongan ka kagiya masasangan iran angkoto a galebek sii ko kadaondaw ago
kagagawii.
34 Langon angkai a manga taw na manga olowan o manga pamiliya a Libitiyo a

inipelilista ko salsila ko mbatabataa iran, na kibabaling siran sa Yarosalim.
So manga Pelokelokesen ago Kiyababadan ki Dato Saolo
35 Si Yail na miyangon sa siti a Gibiyon ago roo sekaniyan miyaling. Aya ngaran o
karoma niyan na si Maakah.
36 Aya kaka a wata iyan na si Abdon, na tomiyalondog on siki Sor, Kis, Baal, Nir,
Nadab,
37 Gidor, Ahiyo, Sakariyas ago si Miklot,
38 Na si Miklot na aya ama i Simiyas. Mababaling siran mambo roo sa Yarosalim a
marani ko manga tonganay iran.
39 Si Nir na aya ama i Kis, na si Kis na ama i Saolo, na si Saolo na ama i siki Yonatan,
Malkisowa, Abinadab ago si Isbaal.
40 Si Yonatan na ama i Miribaal (a bebetowan mambo sa Isbosit), na si Miribaal na ama i

Mikah.
41 Aya manga wata i Mikah na: siki Piton, Milik, Takriya ago si Ahas.
42 Si Ahas na ama i Yahowadah, na si Yahowadah na ama i siki Alimit, Asmabit ago si
Simri. Si Simri na ama i Modsa,
43 Na si Modsa na ama i Biniya, a ama i Ripayas, a ama i Iliyasah, a ama i Asil.
44 Nem kataw a manga wata i Asil a:

siki Asrikam, Bokiro, Ismail, Siyariyas, Obadiyas ago si Hanan.
1 MANGA RIKORD 10
Miyatay si Dato Saolo
Miyakitidawa so manga Pilistiyo ko manga Israil roo ko Palaw a Gilbowa. Na

piyalagoyan siran o manga Israil ka madakel kiran a miyapamono roo. So manga
Pilistiyo na piyanaloba iran sebenar siki Saolo ago so manga wata iyan, na piyamono iran
so manga wata iyan a siki Yonatan, Abinadab ago si Malkisowa.
3 Tanto a miyakaregen so dii katidawa sii ko mbala sa takilidan i Saolo, na riyaot
sekaniyan o manga pamamana na miyasogat iran sa papatayan.
4 Na pitero i Saolo ko mangoda a pepegawid ko kelong iyan a "Bindasa ngka so pedang
ka na basegen ka raken! Di aken kabaya o ba ako maoma angkai a manga kapir a
pemarataan ako iran." Ogaid na da iyog so mangoda ka tanto a miyalek. Sabap roo na
kinowa i Saolo so pedang iyan na inibaseg iyan sa ginawa niyan.
5 Kagiya mailay o mangoda a miyatay den si Saolo na inipageget iyan mambo so pedang
iyan na miyatay.
6 Giyoto a parengarengan a kiyapamatay i Saolo ago so telo kataw a manga wata iyan a
rakes o langon o manga tonganay niyan a manga mama.
7 Kagiya maneg o manga Israil a kibabaling ko balintad a miyamalagoy so manga

sondaro ago miyamatay siki Saolo ago so manga wata iyan na piyalagoyan iran so manga
siti ran Na miyamakaoma so manga Pilistiyo na komiyaden siran roo.
8 Sii ko talondog a gawii kagiya makaoma so manga Pilistiyo a petebanan iran so

miyamatay na miyatoon iran so manga bangkay i siki Saolo ago so manga wata iyan roo
ko Palaw a Gilbowa.
9 Piyotolan iran sa olo si Saolo ago likas iran on so raben iyan na somiyogo siran ko
dalem a inged o manga Pilistiyo kaan iran on mapakalangkap so totol sii ko manga
barahala iran ago sii ko bangsa iran a manga taw.
10 Tiyago iran so raben i Saolo sii ko pesimbaan ko manga katohanan iran na binitin iran
so olo niyan sii ko pesimbaan ko barahala iran a si Dagon.
11 Kagiya maneg o langon a taw sa Yabis Giliyad o antonaa i inikidia o manga Pilistiyo
ki Saolo
12 Na so langon o manga wawaraw kiran a manga mama na gomiyanat siran na kinowa
iran so manga bangkay i siki Saolo ago so manga wata iyan na inowit iran sa Yabis. Na
inilebeng iran so manga tolan iran sii ko atag o mala a kayo, na mipowasa siran ko
miyakapito gawii.
13 Miyatay si Saolo ka inongkir iyan so Allah. Da niyan tomana so iniinsarat on o Allah

na sii sekaniyan pen miyangni sa mosawir ko pepamangangay
14 Ago kena a ba sii ko Allah. Sabap san na piyakibono sekaniyan o Allah na piyalad
iyan so ndatoan ki Daod a wata i Yasay.
1 MANGA RIKORD 11
Miyabaloy si Daod a Dato sa Israil ago giya Yodah
Samaoto na so langon o manga Israil na palaya siran somiyong ki Daod roo sa Hibron na
pitero iran on a "Isaisa bo so rogo tano.
2 Sii ko miyanga iipos a manga gawii apiya sii pen ko kandadato i Saolo na seka den i
pepegolowan ko manga sondaro a Israil ko di iran dii kapakitidawa. Na pitero reka o
Allah a Tohan ka a 'Seka i pekatagikor ko manga pagtaw aken a Israil, na kebaloy ka a
dato iran.' "
3 Kagiya makaoma ki dato Daod sa Hibron so langon a manga olowan sa Israil roo na roo
sekaniyan kiran miyakipesadanowa sii ko hadapan o Allah. Na siyalawatan iran si Daod
sa kadato sa Israil, a so den so initopa o Allah a nggolalan ki Samowil.
Miyaagaw i Daod a Yarosalim
4 Mandiyadi na somiyong si Daod ago so langon o manga Israil sa siti a Yarosalim

(giyanan na Hibos) a ron kibabaling so manga Hibosiyo a tenger a manga taw ko inged.
5 Na pitero o kibabaling sa Hibos ki Daod a "Di ka sii den pekasoled!" Ogaid na
miyaagaw i Daod so kota sa Siyon a bebetowan ai imanto sa Siti o Daod.
6 Na pitero i Daod a "Saden sa makaona makapatay sa Hibosiyon na aya kebaloy a
komandir o manga sondaro aken!" Na si Yowab, a wata i Siroyah, na aya paganay a
somiyondol na sekaniyan i miyabaloy a komandir.
7 Roo miyaling si Daod sangkoto a kota; sabap san na bitowan ai sa Siti o Daod.
8 Biyangonan iyan sa siti so melilibeta on ipoon sa Milo taman ko ililibet on a
pangeleban, na piyakaasal i Yowab so lamba ko siti.
9 Na pepangosor so gees i Daod ka mipageepeda iyan so Allah a Lebi a Mamaapaar.
So Manga wawaraw a manga Sondaro i Daod

10 Giyai so manga olowan o manga wawaraw a mama i Daod. Kalangolangon iran a
rakes o langon o manga Israil na mabager a katotokoda iran ko kandadato i Daod kaan
laolad ko dalem a inged a so den so initopa o Allah mipantag sa Israil.
11 Katii so listaan ko manga wawaraw a manga sondaro i Daod: si Yasobiyam a

moriyataw i Hakmon na aya lebi a maporo ko manga olowan. Telo gatos a manga mama
a miyanga bobono iyan a bangkaw sii ko miyakaisa a katidawa.
12 Aya talondog rekaniyan na si Iliyasar a wata i Dodo a moriyataw i Aho. Isa sekaniyan
ko telo a manga wawaraw a mama.
13 Ped sekaniyan i Daod sii sa Pas Damim isako timotimo roo so manga Pilistiyo sa
kiyapakipetidawa iran ko manga Israil. Sii ko pangomaan a piyamolaan sa bantad na
piyalagoyan o manga Israil so manga Pilistiyo
14 Ogaid na da palagoy si Iliyasar ka lininding iyan ago so manga pagtaw niyan angkoto a
darpa, na piyamono iran so manga Pilistiyo. Na siyabet siran o Allah ko kiyabegi niyan
kiran sa mala a kiyapakataban.
15 Miyakaisa a gawii na so telo kataw ko telo polo a manga olowan a sondaro na

somiyong ki Daod ko lakongan sii ko liyang sa Adolam a samaoto na kekampo so manga
sondaro a Pilistiyo ko Balintad sa Ripaim.
16 Sangkoto a masa na ndodoo si Daod ko kokotaan a darpa, na aden a kampo o manga
Pilistiyo a matatago sa siti a Bitlihim.
17 Na aden a tanto a inikadali i Daod a ig, na pitero iyan a "O ba bo aden a mikowa ko
niyan sa ig a mainom aken a poon ko paridi a marani ko gimowa a Bitlihim!"
18 Sabap roo na so telo a manga wawaraw a mama na liseb iran so kampo o manga
Pilistiyo na somiyageb siran sa ig ko paridi a marani ko gimowa a Bitlihim na inowit iran
ai ki Daod. Ogaid na da niyan inoma ka ba niyan den inodod a inisapaat iyan ko Allah
19 A tig iyan a "Mawatan raken o ba aken ai nggolaolaa! Ba patot a inomen aken so rogo
angkai a manga mama a iniserakan iran a ginawa iran sa kiyakowaa iran on para raken."
Sabap san na da on inom si Daod. Giyai den i miyanggolaola angkai a telo kataw a
manga wawaraw.
20 Si Abisay a wata i Yowab na aya magoolowan ko manga wawaraw a mama a

bebetowan sa 'So Telo Polo.' Telo gatos a manga mama a miyanga bobono iyan a
bangkaw na kiyabantogan sekaniyan a datar o 'Telo Kataw.'
21 Sekaniyan i lebi a kababantogan ko 'Telo Polo' ago miyabaloy a olowan iran apiya pen
kena a ba sekaniyan maaped ko 'Telo Kataw.'
22 Si Binayas a wata i Yahoyada na mawaraw a sondaro a poon sa Kabsiil, na madakel a

pakabengang a miyanggolaola niyan. Miyakabono sekaniyan sa dowa kataw a lebi a
mabager a sondaro sa Mowab. Miyalosod sekaniyan pen ko galebo sii ko gawii a
kapengoran iyan sa giyaw na miyakapatay ron sa arimaw.
23 Miyakapatay sekaniyan pen sa Imisiren a pito ago tenga kapiya a kaporo iyan a aden a
bangkaw niyan a datar sa katiwaro o ndo. Miyakitidawa rekaniyan si Binayas a maawid
baden sa bentol, ogaid na inagaw niyan so bangkaw sa lima o Imisiren na aya niyan on bo
inibono.
24 Giyai den i manga nganin a pinggolaola i Binayas a wata i Yahoyada, na kiyabantogan
sekaniyan a datar o 'Telo Kataw' a manga wawaraw a sondaro
25 Apiya pen kena a ba kiran mibibilang. Ogaid na minipangkat so bantogan iyan a di so
apiya antawaa ko 'Telo Polo,' na biyaloy sekaniyan i Daod a olowan o manga sagabay
niyan.
26 Giyai mambo i kikaaped ko manga wawaraw a sondaro i Daod:

si Asahil a wata i Yowab,
si Ilkanan a wata i Dodo a poon sa Bitlihim,
27 Si Siyamot a poon sa Harod,
si Hilis a poon sa Pilon,
28 Si Ira a wata i Ikis a poon sa Tikowa,
si Abiyasar a poon sa Anatot,
29 Si Sibikay a poon sa Hosah,
si Ilay a poon sa Ahowah,
30 Si Maharay a poon sa Nitopah,
si Hilid a wata i Baanah a poon sa Nitopah,
31 Si Itay a wata i Ribay a poon sa Gibiyah sa inged a Baniyamin,
si Binayas a poon sa Piraton,
32 Si Horay a poon ko madakel a baogan on sa Gaas,
si Abiyal a poon sa Arbah,
33 Si Asmabit a poon sa Bahorim,
si Iliyakba a poon sa Siyaalbon,
34 So manga wata i Hasim a poon sa Gison,
si Yonatan a wata i Siyagi a poon sa Harar,
35 Si Ahiyam a wata i Siyarar a poon sa Harar,
si Ilipal a wata i Or,
36 Si Hipir a poon sa Mikirah,
si Ahiyas a poon sa Pilon,
37 Si Hisro a poon sa Karmil,
si Paaray a wata i Isbay,
38 Si Yowil a pagari i Natan,
si Mibkar a wata i Hagri,
39 Si Silik a poon sa Amon,
si Naharay a poon sa Biiroth, a so pepegawid ko gomaan i Yowab a wata i Siroyah,
40 Si Ira a poon sa Yatir,
si Garib a poon sa Yatir,
41 Si Oriyas a Hitiyo,
si Sabad a wata i Aklay,
42 Si Adina a wata i Sisa a olowan o mbatabataa a Robin ago so telo polo a manga
pagtaw niyan,
43 Hanan a wata i Maakah,
si Yosiyapat a poon sa Mitna,
44 Si Osiya a poon sa Astarot,
si Siyama ago si Yail a manga wata i Hotam a poon sa Arowir,
45 Si Yadiail a poon sa Simri,
ago so pagari niyan a si Yoha a poon sa Tis,
46 Si Iliyal a poon sa Mahabah,
si Yaribay ago si Yosiyabiyas a manga wata i Ilnaam,
si Itmah a poon sa Mowab,
47 Si Iliyal, si Obid,
ago si Yaasiyal a poon sa Sobah.
1 MANGA RIKORD 12
So manga Tomiyapi ki Daod a poon ko Mbatabataa a Baniyamin
Giyai so manga mama a tomiyapi ki Daod sii sa Siklag isako palagoyan iyan si Saolo a
wata i Kis. Maaped siran ko manga wawaraw a mama a miyanabang rekaniyan
makitidawa.
2 Langon siran manga papasang i kapana, na pepekapana o di na pepekasalibat siran sa
apiya anda ko kawanan o di na diwang a manga lima iran. Manga tonganay siran i Saolo
a maaped ko mbatabataa a Baniyamin.
3 Aya manga olowan iran na si Ahiyasir ago si Yowas a manga wata i Simaah a taw sa
Gibiyah.
Giyai i manga sondaro iran:
si Yasiyal ago si Pilit a manga wata i Asmabit,
si Birakah ago si Yaho a poon sa Anatot,
4 Si Ismayas a poon sa Gibiyon a isa ko 'Telo Polo' a manga wawaraw a mama, ago aya
iran olowan,
siki Yaramiyas, Yahasiyal, Yohanan ago si Yosabad a poon sa Gidirah,
5 Siki Ilosay, Yarimot, Biyaliyas, Simariyas ago si Sipatiyas a poon sa Harop,
6 Siki Ilkanah, Isiyas, Asaril, Yowisir ago si Yasobiyam a maaped ko mbawataan i Korah,
7 Ago si Yowilah ago si Sibidiyas a manga wata i Yahoram a poon sa Gidor.
So Miyamangeped ki Daod a poon ko Mbatabataa a Gad
8 Aden pen a manga mama a poon ko mbatabataa a Gad a tomiyapi ki Daod sii ko
kandodoo niyan ko kota ko mitataog a kaden. Manga wawaraw siran a makatitiyagar
makitidawa a manga papasang i kaosar sa kelong ago bangkaw. Piyakalekelek siran a
lagid o manga arimaw, ago manga lagod a datar o manga saladeng ko kapalawan.
9 Aya olowan iran na si Isir na aya miyamakatalondog on sa kadato na siki Obadiyas,
Iliyab,
10 Mismanah, Yaramiyas,
11 Atay, Iliyal,
12 Yohanan, Ilsabad,
13 Yaramiyas, ago si Makbanay.
14 Giyangkai a manga taw sa Gad na manga olowan ko manga sondaro; so ped kiran na
manga poporo a opisiyal a kipagoolowan ko sesanggibo a manga sondaro, na so pen so
ped na manga bababa a opisiyal a kipagoolowan ko mbabagatos.
15 Rominipag siran sa Lawasaig a Yordan isako mbagiyawan so manga pangeba niyan sii
ko paganay a olanolan, na piyamakapalagoy iran so langon o kibabaling ko kapantaran sii
sa tampar sa sebangan o lawasaig ago sa sedepan.
So Miyamangeped ki Daod a poon sa Baniyamin ago giya Yodah
16 Aden mambo a manga mama a poon ko manga mbatabataa a Baniyamin ago Yodah a
miyamanong ko kota a katatagoan ki Daod.
17 Na lominiyo si Daod ka inalaw niyan siran a tig iyan a "O aya inisong iyo sii na
makipengginawai kano ago tebangan ako niyo na terimaan ko sekano a maisaisa tano.
Ogaid na o aya antap iyo na tipon ako niyo ko manga ridoay aken apiya pen da aken
sekano kamaratai na mimbina kano o Tohan o manga apo tano ago madaneg kano niyan!"
18 Na giyoto a minipaar o Roh si Amasay (a oriyan ai na miyabaloy sekaniyan a olowan o
'Telo Polo' a manga wawaraw) na pitero iyan a:
"Ped kami ngka, hey Daod!
Tampil kami reka, hey wata i Yasay!
Makapiya ka i bobolos,
ago mamakapiya i bobolos so pepegogop reka
ka pepegogopan ka o Tohan ka!"
Mandiyadi na tiyarima siran i Daod na biyaloy niyan siran a manga olowan o manga
sondaro niyan.
So Miyamangeped ki Daod a poon sa Manasih
19 Aden a manga mama a poon ko mbatabataa a Manasih a tomiyapi ki Daod isako

monot sekaniyan ko manga Pilistiyo sa kapakipetidawa iran ki Saolo. (Ogaid na da niyan
mitaros a kapagogopi niyan kiran ka kagiya penonen ai ko manga olowan o manga
Pilistiyo na piyakakasoy iran si Daod ago so manga pagtaw niyan roo sa Siklag, ka pitero
iran a "Pematay tano o tomampil sekaniyan ko kadnan iyan a si Saolo!")
20 Isako somong si Daod sa Siklag na giyai so manga mama a poon sa Manasih a
tomiyampil rekaniyan: siki Adnah, Yosabad, Yadiyail, Mikail, Yosabad, Iliho ago si
Silitay. Oman i isa kiran na aya olowan o sesanggibo a manga sondaro ko mbatabataa a
Manasih.
21 Inogopan iran si Daod sa kiyapakitidawa iyan ko manga ridoay a dii nggogobat, ka
langon siran manga wawaraw a mama ago manga olowan o manga sondaro niyan.
22 Gawii gawii den na pepekaoma a manga mama a petepi rekaniyan taman sa tanto a
miyakadakel so manga sondaro niyan a lagid o armi o Tohan.
So manga Ped a Tomiyapi ki Daod sa Hibron
23 Giyai so kadakel o kikagogomaanan a manga sondaro a miyamakaoma ki Daod sii sa

Hibron sa kapalada iran on ko ndatoan i Saolo a so den so miyatero o Allah:
poon sa Yodah na nem nggibo ago walo gatos a sondaro a maawid sa manga kelong ago
manga bangkaw,
25 Poon sa Simiyon na pito nggibo ago magatos,
26 Poon sa Libi na pat nggibo ago nem gatos
27 A rakes i Yahoyada a olowan ko mbawataan i Aron a oonotan o telo nggibo ago pito
gatos a manga sondaro,
28 Ago si Sadok a mawaraw a kangodaan a sondaro a ped iyan so dowa polo ago dowa a
manga tonganay niyan a palaya den manga olowan,
29 Poon sa Baniyamin na telo nggibo a manga tonganay i Saolo (so kadakelan ko manga
taw a poon sa Baniyamin na maampil ko pamiliya i Saolo taman sangkoto a masa),
30 Poon sa Ipraim na dowa polo nggibo ago walo gatos a kababantogan a manga sondaro
ko manga mbawataan iran,
31 Poon ko sabagi ko mbatabataa a Manasih roo sa sedepan na sapolo nggibo ago walo
gatos a miyanga pipili a song ki Daod sa kabaloya iran on a dato,
32 Poon sa Isakar na dowa gatos a manga olowan a ped iran so langon o manga tonganay
iran a pagoolowanan iran (sasaboten angkai a manga olowan o antonaa i patot a
penggolaolaan o Israil ago so ontol a masa a kapenggolaolaa iran on),
33 Poon sa Sibolon na lima polo nggibo a miyanga babatak a manga sondaro a
makatitiyagar makitidawa a miyalayam ko pitibarangan a manga gomaan, a iklas ko poso
iran so kapepangongonotani ran ki Daod,
34 Poon sa Naptali na sanggibo a manga olowan a rakes o telo polo nggibo a manga
sondaro iran a kiaawid sa manga kelong ago manga bangkaw,
35 Poon sa Dan na dowa polo ago walo nggibo ago nem gatos a manga sondaro a
miyasinanad sa katidawa,
36 Poon sa Asir na pat polo nggibo a tadiyam a manga sondaro a makatitiyagar
makitidawa,
37 Ago poon ko manga mbatabataa sa sebangan a Yordan a giya Robin, Gad ago so
sabagi ko Manasih na magatos ago dowa polo nggibo a sondaro a kikagogomaanan ko
pitibarangan a manga gomaan.
38 Langon angkai a manga mama a makatitiyagar makitidawa na miyamanong sa Hibron

a aya bo a antap iran na mbalowin iran si Daod a dato ko dalem a Israil. Na so pen so ped
a manga taw sa Israil na maiisaisa so pamikiran iran sa kambaloya iran ki Daod a dato
iran.
39 Sisii siran ki Daod ko miyakatelo gawii a di siran dii kekan ago dii mamanginom, ka
pepagikatan siran o manga tonganay iran.
40 Apiya so manga siringan iran a pepekapoon ko mawatan a manga inged a Isakar,
Sibolon ago giya Naptali na miyamakatalingoma a kirororanan sa pangenengken so
manga kimar iran, manga onta, manga mola ago manga sapi. Tanto a madakel a miniikat
a manga arina, manga higos, manga pasas, arak, lana a olibi ago manga sapi ago manga
bilibili a kekan iran, na tanto a pekebabaya so langon o manga Israil.
1 MANGA RIKORD 13
Minitepas so Kaban sa Kapasadan
Miyakimosawir si Daod ko langon a olowan o manga sondaro niyan a rakes o manga
komandir o sesanggibo ago mbabagatos.
2 Mandiyadi na pitero iyan ko langon o isa ka maginged a Israil a "Opama ka mapiya
rekano ago kabaya o Allah a Tohan tano na mamakawit tano sa manga katero ko langon o
manga pagari tano a ndodoo pen ko dalem a inged a Israil, a rakes o manga imam ago
manga Libitiyo sii ko manga pagingedingedan iran kaan siran sii mamakasong ago
makapangeped rektano,
3 Na ikasoy tano sii so Kaban o Tohan, ka minindarainon tano ai sii ko kandadato i
Saolo."
4 Na inikasoat ai o langon o isa ka maginged, na miyayon siran sa kanggolaolaa sii.
5 Mandiyadi na tinimo i Daod so langon o manga Israil ipoon sa Lawasaig a Sihor sii sa
Misir taman sa Libo Hamat kaan kaawidi so Kaban sa Kapasadan o Tohan poon sa
Kiriyat Yarim.
6 Na miyamanong siki Daod ago so langon o manga Israil roo sa Baalah (giyanan a
Kiriyat Yarim) sii sa Yodah kaan iran on makowa so Kaban o Tohan. Maawid ai ko
Ingaran o Allah a kokorsi ko poro o dowa a piyagtaotaw a manga malaikat.
7 Kinowa iran so Kaban o Tohan sii ko walay i Abinadab na riyoran iran ko bago a karo.
Si Osah ago si Ahiyo na pepangolinan iran so karo,
8 Na si Daod ago so langon o manga taw na di siran dii keriyala a rakes o langon o bager
iran sii ko hadapan o Tohan a di siran dii mamagidaida ago dii mboboniboniyan sa manga
alpa, manga kotiyapi, manga garingking, manga pandaopan ago manga bogiyong.
9 Kagiya makaoma siran ko pepegegikan i Kidon na minisosong so manga sapi na

kiyapetan i Osah so Kaban ka pagerenen iyan.
10 Na mimborngat so rarangit o Allah ki Osah na biyono iyan sabap sa siko iyan so
Kaban. Na roo sekaniyan miyatay sii ko hadapan o Tohan.
11 Inikararangit i Daod so kiyamborngat o gani o Allah ki Osah, na bitowan iyan angkoto
a darpa sa 'Piris Osah,' a aya niyan den ngaran taman imanto.
12 Inikalek i Daod so Tohan sangkoto a gawii na iniise iyan a "Andamanaya den i

kakewita ko pen ko Kaban o Tohan ko kakadenan ko?"
13 Sabap san na da wita i Daod so Kaban roo sa Yarosalim a so siti niyan ka inibegak
iyan baden ko walay i Obid Idom a taw sa Gat.
14 Na miyakatareg roo den so Kaban o Tohan ko walay o Obid Idom sii ko soled o telo
olan, na riyakmatan o Allah so pamiliya niyan ago so langon taman a rek iyan.
1 MANGA RIKORD 14
So Torogan ago so Pamiliya i Daod
Samaoto na si Hiram a dato sa Tiro na somiyogo ki Daod sa manga mama a rakes o

manga pananapil sa ator ago manga panday sa kayo kaan iran mimbalay si Daod sa
torogan. Na miyakiwit sekaniyan roo pen sa manga tarakayo a sidro.
2 Kiyasabotan i Daod a piyakambeken o Allah so kandadatoi niyan sa Israil ago tanto a
inipangkat o Allah so ndatoan iyan sabap ko manga pagtaw niyan a Israil.
3 Sii sa Yarosalim na miyangaroma pen si Daod sa manga babay na aden pen a manga
wata iyan a manga mama ago manga babay.
4 Giyai so manga ngaran o manga wata iyan a inimbabawata roo sa Yarosalim: siki
Siyamowa, Siyobab, Natan, Solaiman,
5 Ibhar, Ilisiyowa, Ilpilit,
6 Nogah, Nipig, Yapiya,
7 Ilisiyama, Biiliyada ago si Ilipilit.
Tiyaban i Daod so manga Pilistiyo
8 Kagiya maneg o manga Pilistiyo a siyalawatan si Daod a madato sa dalem a Israil na

mililiyo so langon o manga sondaro iran sa kandakepa iran on. Ogaid na kiyatokawan ai i
Daod na lominiyo sekaniyan ka inalaw niyan siran.
9 Samaoto na miyakaoma den so manga Pilistiyo ko Balintad sa Ripaim na pitebanan iran
so manga inged on.
10 Na inisean i Daod so Tohan a "Ba aken nggobata so manga Pilistiyo? Ba ngka siran
raken pekitabanen?"
Na pitero on o Allah a "Oway, gobata ngka siran ka peladen ko siran reka."
11 Mandiyadi na somiyong si Daod ago so manga pagtaw niyan sa Baal Pirasim na roo
iran tiyaban so manga Pilistiyo. Na pitero iyan a "Miyakanggolalan raken na biyagenas o
Tohan so manga ridoay aken a datar o mareges a bagiyaw!" Na bitowan angkoto a darpa
sa Baal Pirasim.
12 Kiyaawaan roo o manga Pilistiyo so manga barahala iran na inisogo i Daod a
kapanotonga on.
13 Da peman matey na komiyasoy so manga Pilistiyo ko balintad na pitebanan iran.

14 Na inisean peroman i Daod so Tohan na somimbag so Tohan a "Di niyo siran sondoli
sa panempang iran ka alilita niyo siran baden na sii niyo siran gobata ko katatalikodan
iran ko marani ko manga kayo a balsam.
15 So den so kapakaneg iyo sa manga dalepek o dii melalalakaw sii ko poro o manga
kayo a balsam na gobata niyo siran! Giyai i nanao a pepangonaan rekano so Tohan sa
katebana niyan ko manga sondaro a Pilistiyo."
16 Na tiyoman i Daod so inisogo on o Tohan na piyanaloba ago piyamono iyan so manga
Pilistiyo ipoon sa Gibiyon taman den sa Gisir.
17 Na lomiyangkap ko mbalabala so bantogan i Daod, na biyaloy o Allah si Daod a

ipekelek o langon o manga nasiyon.
1 MANGA RIKORD 15
Miyawit so Kaban sa Kapasadan sa Yarosalim
Kagiya makabangon si Daod sa manga walay niyan sii ko siti i Daod na mitiyagar
sekaniyan sa darpa a mbetadan ko Kaban sa Kapasadan o Tohan na piyakatindeg iyan on
a barombarong a tegoan on.
2 Oriyan iyan na pitero iyan a "So bo so manga Libitiyo i kepakay a makaawid ko Kaban
o Allah, ka siran i piyamili o Allah a pekaawid on ago makapenalagad rekaniyan sa taman
sa pakataman."
3 Mandiyadi na piyakisogoan i Daod so langon o manga Israil sa kasong iran sa

Yarosalim kaan iran kaawidi so Kaban o Allah sii ko miyatiyagar iyan a tegoan on.
4 Piyakitawag iyan pen so manga moriyataw i Aron ago so manga Libitiyo:
5 Poon ko mbawataan i Kohat na si Oriyal a olowan on a rakes o magatos ago dowa polo
a manga tonganay niyan;
6 Poon ko mbawataan i Mirari na si Asayas a olowan on a rakes o dowa gatos ago dowa
polo a manga tonganay niyan;
7 Poon ko mbawataan i Girson na si Yowil a olowan on a rakes o magatos ago telo polo a
manga tonganay niyan;
8 Poon ko mbawataan i Ilisapan na si Siyamayas a olowan on a rakes o dowa gatos a
manga tonganay niyan;
9 Poon ko mbawataan i Hibron na si Iliyal a olowan on a rakes o walo polo a manga
tonganay niyan;
10 Poon ko mbawataan i Osiyal na si Aminadab a olowan on a rakes o magatos ago
sapolo ago dowa a manga tonganay niyan.
11 Piyakitawag i Daod so manga imam a si Sadok ago si Abiyatar ago so nem kataw a
manga Libitiyo a siki Oriyal, Asayas, Yowil, Siyamayas, Iliyal ago si Aminadab.
12 Na pitero iyan kiran a "Manga olowan kano o manga mbawataan sii ko mbatabataa a
Libi. Sekano a rakes o manga tonganay niyo na disomala a kesoti niyo a manga ginawa
niyo kaan iyo kaawidi so Kaban o Allah a Tohan o Israil sii ko darpa a pitiyagar aken on.
13 Sabap sa kena a ba sekano a manga Libitiyo i miyakaawid on isako paganay na giyoto
i sabap a kiyamborngati rektano o rarangit o Allah a Tohan tano. Da tano sekaniyan den
isei o antonaa i patot a kaawidi tano ron."
14 Na so imam ago so manga Libitiyo na siyoti iran a manga ginawa iran kaan iran
kaawidi so Kaban o Allah a Tohan o Israil
15 A sesegesegedan iran mosai so manga tibal iyan, ka giyoto i inisogo o Allah a
nggolalan ki Mosa.
16 Piyandoan pen i Daod so manga olowan ko Libitiyo a mamili siran ko manga tonganay
iran a aya dii mamagidaida sa matanog a rakes o kapekebabaya a sasarenganen o
boniboniyan o manga kotiyapi, manga alpa ago manga pandaopan
17 Na pinili o manga Libitiyo si Himan a wata i Yowil, so tonganay niyan a si Asap a
wata i Birikiyas, ago si Itan a wata i Kosiyayas a poon ko mbawataan i Mirari
18 A rakes o ped ko manga tonganay iran a pepegogop kiran a: siki Sikariyas, Yaasiyal,
Siyamiramot, Yahiyal, Oni, Iliyab, Binayas, Maasiyas, Matitiyas, Ilipiliho, Mikniyas,
Asasiyas ago si Obid Idom ago si Yail a manga gordiya ko gimowa.
19 So manga paboboniboniyan a siki Himan, Asap ago si Itan na aya pepekaoni ko manga
tombaga a pandaopan.
20 Siki Sakariyas, Yaasiyal, Siyamiramot, Yahiyal, Oni, Iliyab, Maasiyas ago si Binayas
na aya pepekaoni ko manga kotiyapi a matileng i oni;
21 Na siki Matitiyas, Ilipiliho, Mikniyas, Obid Idom, Yail ago si Asasiyas na aya
pepekaoni ko manga kotiyapi a mababa i oni.
22 Si Kinaniyas a olowan o manga Libitiyo na aya magoolowan ko kamboboniboniyan ka
kiyalayaman iyan ai.
23 Si Birikiyas ago si Ilkanah na aya nggogordiya ko Kaban.

24 So manga imam a siki Siyabaniyas, Yosapat, Nitanil, Amasay, Sakariyas, Binayas ago
si Iliyasar na aya pepekaoni ko manga bogiyong sii ko onaan o Kaban o Tohan. Si Obid
Idom ago si Yahiyas na nggogordiya mambo ko Kaban.
Inowit so Kaban sa Yarosalim
25 Mandiyadi na si Daod ago so manga olowan sa Israil ago so manga komandir ko

sesanggibo a sondaro na lomiyalakaw siran ka kowaan iran so Kaban sa Kapasadan o
Allah sii ko walay i Obid Idom a masosonor siran.
26 Inogopan o Tohan so manga Libitiyo a maawid ko Kaban sa Kapasadan o Allah; sabap
roo na mikorban siran sa pito a mama a sapi ago pito a mama a bilibili.
27 Si Daod na ndiditar sa kimon a mapiya a sotra taman den ko langon o manga Libitiyo
a maawid ko Kaban ago so pen so dii mboboniboniyan ago si Kinaniyas a aya kiran
magoolowan. Somosolot pen si Daod sa saliko a sotra.
28 So langon o manga Israil na dodoyogan iran so Kaban sa Kapasadan roo sa Yarosalim
a di siran dii mamameseg a rakes o kapepamogiyong ago so kapepakaoniya ko manga
pandaopan, manga kotiyapi ago manga alpa.
29 Sii ko kipesoleden ko Kaban sa Kapasadan o Allah ko siti i Daod na si Mikal, a wata a

babay i Saolo, na mbabantayan iyan siran ko dirowasa. Na kagiya mailay niyan si Daod a
dii tepak ago dii keriyala na tanto niyan a pisodi.
1 MANGA RIKORD 16
Na inawidan iran so Kaban o Tohan ago inisoled iran ko barombarong a pitiyagar i Daod
a tegoan on, na mikorban siran sa manga ipesepaat a petotongen ago ipesepaat pantag bo
ko kanggiginawai sii ko hadapan o Tohan.
2 Kagiya mapasad iyan ai somapaat na riyakmatan i Daod so manga taw sii ko Ingaran o
Allah,
3 Na piyamegan iyan sa satiman a paan, sabool a sapo ago satompi a pasas so oman i
mama ago babay a Israil.
4 Initoro iyan so ped ko manga Libitiyo a makapanalagad ko hadapan o Kaban o Allah sa

kapepangangarapan iran ko Allah a Tohan o Israil ago so kapepanalamati ago kapepodia
iran on.
5 Si Asap i maporo kiran na aya tomalondog on na si Sakariyas. Siki Yail, Siyamiramot,
Yahiyal, Matitiyas, Iliyab, Binayas, Obid Idom ago si Yail na aya dii mboboniboniyan sa
manga kotiyapi ago manga alpa. Si Asap i pepekaoni ko manga pandaopan,
6 Na so manga imam a si Binayas ago si Yahasiyal i manga pabobogiyong sa oman gawii
ko hadapan o Kaban sa Kapasadan o Tohan.
So Dikir i Daod a Ipepodi
7 Sangkoto a gawii na inibegay i Daod ki Asap ago so ped iyan a manga Libitiyo angkai a
dikir a ipepenalamat ko Tohan:
8 Panalamati niyo so Allah, na talowi niyo so Ingaran iyan!

Pakitokawi niyo ko manga nasiyon so miyanggolaola niyan!
9 Pagidaidai niyo sekaniyan sa kapamodi;
ndagidaya niyo so langon a piyakamemesa a galebek iyan!
10 Bantoga niyo so soti a Ingaran iyan;
makapiya a ginawa o siran oto a pepamanimba ko Allah!
11 Panagontamani niyo so Allah ago so bager iyan,
na lalayon iyo mbabanoga so paras iyan!
12 Tatanodi niyo so piyakamemesa a manga galebek iyan,
so manga kabarakat iyan ago so manga kokoman a piyakalangkap iyan,
13 Hey sekano a manga mbawataan o Yakob a miyapamili o Tohan,
a so kiyababadan ko Israil a oripen o Tohan!
14 Sekaniyan so Allah a Tohan tano;
lomalangkap ko doniya so manga kokoman iyan.
15 Tatademi niyo lalayon so kapasadan iyan,
a so initopa niyan ko sanggibo a manga apidapid;
16 So kapasadan a inembaalan iyan mipantag ko Ibrahim
ago inisepa iyan pen ko Iskak.
17 Pimataanan iyan mambo ko Yakob a aya den kitab,
a so da a ikeda iyan a kapasadan ko Israil,
18 A tig iyan a "Imbegay aken reka so inged a Kanaan
a aya ngka bagian a mapekewali ngka."
19 Samaoto na kena a ba siran madakel;

mataan a maito siran i bilangan ago manga mananangga sangkoto a inged.
20 Miyagenebeneb siran a di iran dii pakatetepasaan so manga nasiyon,
a poon ko isa a ndatoan na taman ko isa.
21 Ogaid na da perowa o Tohan o ba siran masatro o apiya antawaa;
liyalangan iyan baden so manga dato mipantag kiran
22 A tig iyan a "Di niyo petekora so miyapamili aken a manga taw!
Di niyo pemaratai so manga nabi aken!"
23 Pagidaidai niyo so Allah, hey dalem a doniya!

Gawii gawii den na pakalangkapa niyo so kapepanabet iyan!
24 Payaga niyo so bantogan iyan sii ko manga nasiyon
ago so piyakamemesa a manga galebek iyan ko langon o manga taw.
25 Mala so Allah a mapapatot so mala a kapepodiya on;
mapapatot so lebi a kipekeleken on a di so langon a katohanan!
26 Ka so langon a katohanan o manga nasiyon na matag baden barahala,
ogaid na so Allah na aya mimbaal ko manga langit.
27 Rek iyan so pangkatan ago so bantogan;
so gees ago so kapipiya a ginawa na sisii ko kakadenan iyan.
28 Podiya niyo so Allah, hey manga bangsa o manga nasiyon,

podiya niyo so menang o Allah ago so bager iyan!
29 Began iyo ko Allah so bantogan a hak o Ingaran iyan.
Awid kano sa pamemegayan na pangadap kano rekaniyan;
simbaa niyo so Allah a nggolalan ko kakasi o kasosoti.
30 Tabeker kano ko hadapan iyan, hey langon o manga inged!
Makambebeken so doniya a di den kiiseg.
31 Mababaya so manga langit, makakeriyala so doniya!
Teroa niyo sii ko manga nasiyon a "Ndadato so Allah!"
32 Domaleg so ragat ago so langon a madadalem on;
Makaselasela so manga kalopaan a rakes o langon taman on!
33 Na pemagidaida sa kakebabaya so manga kayo ko kalasan ko kamamasaan o Allah,
ka pekaoma sekaniyan sa kakokoma niyan ko doniya.
34 Panalamati niyo so Allah ka mapiya sekaniyan;

tatap so gagaw niyan sa taman sa pakataman.
35 Teroa niyo ron a "Sabeta kami ngka, hey Tohan a Pananabet ami!
Panimoa kami ngka; panabangi kami ngka ko manga nasiyon
kaan ami kapanalamati so soti a Ingaran ka
ago mabantog ami so manga ipepodi reka.
36 Podin so Allah a so Tohan o Israil
ipoon ko da a poonan iyan na taman sa pakataman!
Na pitero o langon o manga taw a "Amin! Podin so Allah!"
So Kasimba roo sa Yarosalim ago sa Gibiyon
37 Piyakikibir i Daod ki Asap ago so ped iyan a manga Libitiyo so kapepanalagad roo ko
hadapan o Kaban sa Kapasadan o Allah kaan lalayon iran peketoman so paliyogat on a
galebek oman gawii.
38 Maaped kiran si Obid Idom ago so nem polo ago walo a manga tonganay niyan. Si
Obid Idom a wata i Yadoton ago si Hosah na aya nggogordiya ko manga gimowa.
39 So imam a si Sadok ago so manga tonganay niyan a imam na aya makapepanalagad ko

Barombarong o Allah sii ko darpa a pesimbaan roo sa Gibiyon.
40 Oman kapipita ago oman perimon na pepekapalad siran ko Allah sa manga petotongen
a ipesepaat sii ko aparan a ipepasod ko langon taman a misosorat ko kitab o Allah a
inisogo iyan sa Israil sa kapetomana iran on.
41 Aya ped iran na si Himan ago si Yadoton ago so manga ped a piyamagaraw a
makapenalamat ko Allah sabap ko gagaw niyan a tatap sa taman sa pakataman.
42 Si Himan ago si Yadoton na aya makasasangan ko kapepakaoniya ko manga bogiyong
ago manga pandaopan ago so pen so ped a manga boniboniyan a pegosaren ko
kapepodiya ko Tohan. So manga wata i Yadoton na aya pepagipat ko manga gimowa.
43 Oriyan oto na mimbabaling so langon o manga taw ko oman i walay iran, na miyaling
mambo si Daod ka perakmatan iyan so pamiliya niyan.
1 MANGA RIKORD 17
So Initopa o Tohan ki Daod
Kagiya makatikna si Daod ko torogan iyan na pitero iyan ki Natan a so nabi a "Katii ako
bo a mababaling sangkai a torogan a inembaalan a kayo a sidro ogaid na so Kaban sa
Kapasadan o Allah na sii pen matatago ko barombarong!"
2 Tig i Natan ki Daod a "Apiya antonaa i mapipikir ka na nggolaolaa ngka den, ka

mipageepeda a ka so Tohan."
3 Ogaid na sii den sangkoto a kagagawii na minitoron ki Natan so katero o Allah a tig
iyan a
4 “Ika roo na go ngka teroa ko oripen aken a si Daod a 'Giyai i kabasa o Allah: Kena a ba
seka i mbengon ko timplo a kedenan aken.
5 Ipoon ko kiyapakaliyowa ko ko manga Israil sa Misir taman imanto na da ako den
kaden sa timplo. Ka aya pekedenan ko na barombarong a ipepegogalin ko manga darpa.
6 Na sii ko langon o manga darpa a peketepasan ko a ped o manga Israil na da aken den
iseen ko manga olowan iran a siyogo aken sa katagikora iran ko manga pagtaw aken a
"Ino ako niyo da mbalain sa timplo a kayo a sidro?" '
7 “Na teroa ngka ko oripen aken a Daod a 'Giyai i pitero o Allah a Lebi a Mala i Gees:
Kinowa ko seka poon ko kapetegikora ngka ko manga bilibili sii ko pananateba na
biyaloy aken seka a madato ko manga pagtaw aken.
8 Minipagepeda ko ngka den apiya anda ka miyakasong, na tiyaban aken so manga ridoay
ngka sii ko kapepekaantap ka kiran. Imanto na pekibantog aken so ngaran ka a datar o
lebi a kababantogan a manga mama sa doniya.
9 Piyakakaden aken so manga pagtaw aken a Israil ko darpa a di siran on den
mapesemok. Rek iran angkai a lopa, na di siran den kesatro o manga rarata a taw a datar
o miyanggolaola gowani
10 Sii ko masa a pipero aken a so manga pangongokom i makapagoolowan ko manga
pagtaw aken a Israil. Ndaagen aken so langon o manga ridoay niyo, na saken, a so Allah,
na itopa ko reka a mbegan ko seka sa madakel a moriyataw.
11 Amay ka mapopos den so omor ka a mitapi ka ko manga apo o ka na pakapendatoon
ko so isa ko manga wata a ka a makasambi reka, na pekabageren ko so ndatoan iyan.
12 Sekaniyan i mbangon sa timplo para raken na pakapembekenen ko so dii kandato o
kebabadan on sa taman sa pakataman.
13 Pembaloy ako a ama iyan, na pembaloy sekaniyan a wata aken. Di aken rekaniyan den
mbelagen so gagaw aken a datar o kiyabelaga ko ron ki Saolo a so dato a kiyasambian ka.
14 Pekikibir aken rekaniyan so manga pagtaw aken ago so ndatoan aken sa dayon sa
dayon. So dii kandato o kebabadan rekaniyan na ketatap sa taman sa pakataman.'"
15 Na piyanotol i Natan ki Daod so langon angkai a miyapayag on o Tohan.
So Pangangarapan i Daod a Ipepanalamat
16 Mandiyadi na somiyoled si Daod ko Barombarong a matatago on so soti a Kaban na

miyontod roo ko hadapan o Allah, na pitero iyan a "Antawaa ko, ya Allah a Tohan ko,
ago antawaa i pamiliya ko a pinggolaola ngka raken angkai a langon taman?
17 Ogaid na kena a ba sii bo taman a pinggolaola ngka, hey Tohan ko, ka piyayag ka pen
so mipantag ko kebolosan o manga moriyataw aken. Aya ikikidia ngka raken na datar o
ba ako tanto a mipapangkat ko manga manosiya, ya Allah a Tohan ko!
18 Antonaa pen i mapetero aken a oripen ka sabap ko kiyapakibantogi ngka raken, apiya
pen mikakaip ako ngka den piyapiya?
19 Kabaya a ka, ya Allah, so kiyanggolaolaa ngka sangkai a piyakamemesa a manga
nganin sabap raken ago so kiyapakitokawi ngka sangkai langon a manga ala a topa.
20 Da den a ba ngka datar, ya Allah; da den a Tohan a rowar reka. Tito a benar so langon
taman a miyaneg ami mipantag reka!
21 Da den a ped a nasiyon ko doniya a ba datar o manga pagtaw ngka a Israil a biyokaan
ka ko di kiran dii kapangongoripena sa Misir kaan siran mabaloy a rek ka den a manga
pagtaw. Piyakibantog ka a ginawa ngka a nggolalan ko manga ala ago piyakalekelek a
siyowa a ka ko kiyabogawa ngka ko ped a manga nasiyon sii ko kapepekaantap kiran o
manga pagtaw ngka!
22 Biyaloy ngka so Israil a rek ka den a manga pagtaw sa taman sa pakataman, na seka,
ya Allah, i miyabaloy a Tohan iran.
23 “Imanto, ya Allah, na pengnin ko a makambeken sa dayon sa dayon so initopa ngka

mipantag raken a oripen ka ago so kebabadan raken! Tomanen ka so initopa ngka
24 Kaan kabantogi so Ingaran ka sa taman sa pakataman ago an matero o manga taw a 'So
Allah a Lebi a Mamaapaar na aya Tohan o Israil!" Ketatap so dii kandato o kebabadan
raken,
25 Hey Tohan ko, ka kagiya piyayag ka raken a oripen ka a mbalowin ka so manga
moriyataw aken a manga dato. Giyanan i sabap a kiyaoyatan ako sa kiniadapen aken reka
sangkai a ipepangangarapan aken.
26 Seka, ya Allah, i tito a Tohan, na initopa ngka ko oripen ka angkai a kamapiyaan.
27 Inikasoat ka so kiyarakamati ngka ko kebabadan raken kaan matatap ko hadapan ka.
Kiyarakmatan ka siran den, ya Allah, na mitataros den so kaperakmati ngka kiran sa
dayon sa dayon!"
1 MANGA RIKORD 18
So manga Kiyapakataban i Daod
Oriyan ai na giyobat i Daod so manga Pilistiyo ago tiyaban iyan siran. Piyangagaw niyan
so siti a Gat ago so midadair on a manga pagingedingedan.
2 Tiyaban iyan pen a Mowab, na miyabaloy so manga Mowabiyo a manga sakop i Daod
na pepekabowis siran on.
3 Liyo ron pen na tiyaban i Daod si Hadadisir a dato sa Sobah roo sa Hamat isako
tepengan i Hadadisir a kapekalaolada niyan ko ndatoan iyan taman ko Lawasaig a
Yopratis.
4 Na miyaagaw rekaniyan i Daod so sanggibo a manga karo sa katidawa, ago miyabiyag
iyan so pito nggibo a manga komokoda ago dowa polo nggibo a manga sondaro. Na
pilelepo iyan langon so manga koda liyo ron so magatos a koda a pesenganan sa karo.
5 Kagiya makaoma roo so manga Isiriyan a poon sa Damaskos ka penabangan iran si

Hadadisir a dato sa Sobah na piyamono i Daod so dowa polo ago dowa nggibo kiran.
6 Na tiyagoan i Daod a Damaskos sa manga kampo o manga sondaro, na miyabaloy a
manga sakop i Daod so manga Isiriyan, na pepekabowis siran rekaniyan. Pepakadaagen o
Allah si Daod apiya anda sekaniyan dii makitidawa.
7 Kinowa i Daod so manga kelong a bolawan a kiaawidan o manga sanasanaan i
Hadadisir na inowit iyan ai sa Yarosalim.
8 Inowit iyan roo pen so tanto a madakel a tombaga a poon sa Tibat ago giya Kon a
manga siti i Hadadisir. Giyai so inosar i Solaiman sa kiyambaalai niyan ko maolad a
palanggana a tombaga a pepangonaban, ago so manga polaos ago manga kasangkapan a
tombaga para ko Timplo.
9 Kagiya maneg i Toy a dato sa Hamat a tiyaban i Daod so langon o manga sondaro i
Hadadisir
10 Na siyogo iyan so wata iyan a si Hadoram sii ki Daod sa kasalama ago kaselaselaa
niyan on ko kiyatabana niyan ki Hadadisir ko katidawa, ka dii mambo makitidawa si
Hadadisir ki Toy. Na inowitan i Hadoram si Daod sa manga pamemegayan a pimbaalan a
bolawan, pirak ago tombaga.
11 Inisenggay i dato Daod a rek o Allah angkai a manga pamemegayan a datar o inikidia
niyan ko pirak ago manga bolawan a miyakowa niyan ko langon a manga nasiyon a
miyasakop iyan, a giya Idomiya, Mowab, so manga Amoniyo, so manga Pilistiyo ago giya
Amalik.
12 Si Abisay a aya ina iyan na si Siroyah na tiyaban iyan so manga Idomiyan sii ko
Balintad a Timos, na miyapatay niyan so sapolo ago walo nggibo kiran.
13 Tiyagoan iyan a Idomiya sa manga kampo o manga sondaro, na miyabaloy so langon a
taw ron a manga sakop i Daod. Na pepakadaagen o Allah si Daod apiya anda sekaniyan
dii makitidawa.
14 Dii ndatoan i Daod so dalem a Israil a di niyan dii inggolalan so kokoman ago kaontol
ko langon o manga pagtaw niyan.
15 Si Yowab a aya ina iyan na si Siroyah na aya komandir o manga sondaro; si Yahosapat
a wata i Ahilod na aya komikibir ko manga rikord;
16 Si Sadok a wata i Ahitob ago si Ahimilik a wata i Abiyatar na aya manga imam; si
Siyabsiya na aya panonorat;
17 Si Binayas a wata i Yahoyada na aya olowan o manga sagabay i Daod; na so manga
wata i Daod na aya manga poporo a sanasanaan iyan.
1 MANGA RIKORD 19
Tiyaban i Daod so manga Amoniyo ago so manga Isiriyan
Da matey ko oriyan ai na miyatay si Nahas a dato o manga Amoniyo, na so wata iyan a si

Hanon na aya on somiyambi a dato.
2 Na pitero i Daod a "Ipengginawai aken si Hanon a wata i Nahas ka kagiya iningginawai
ako o ama iyan." Na somiyogo si Daod sa manga mama a makatibaw ki Hanon sabap ko
kiyapatay o ama iyan.
Ogaid na kagiya makaoma so manga siyogo i Daod sa inged o manga Amoniyo sa
katibaw iran ki Hanon
3 Na pitero o manga pelokelokesen o manga Amoniyo ki Hanon a "Ba aya katao ngka on
na seselaan i Daod so ama a ka ko kiyasogoa niyan reka sangkai a manga mama sa
katibaw iran reka? Kena! Aya minioma reka angkai a manga mama na so kapanorimani
ko inged kaan iyan magobat ago masakop!"
4 Sabap roo na pindadakep i Hanon so manga siyogo i Daod na piyangopawan iyan so
manga sompa iran ago piyanabas iyan so kababaan ko manga kimon iran kaan kasawai so
manga pitot iran, na piyakabaling iyan siran.
5 Kagiya aden a miyakaoma ki Daod a miyakapanotol on ko miyasowasowa o manga
mama na somiyogo si Daod sa makabalak kiran ka kagiya tanto siran a kiyadiyamanan, na
initoma kiran o dato a "Sii kano den pasin sa Yariko taman sa mamakato so manga sompa
iyo."
6 Kagiya kasabotan o manga Amoniyo a mimbaloy siran a tanto a mado ki Daod na

miyakiwit si Hanon ago so manga Amoniyo sa pat polo nggibo ka kilo a pirak a ipagapin
iran sa manga karo sa katidawa ago manga komokaro a poon sa Misopotamiya ago giya
Maakah ago Sobah roo sa Siriya.
7 Na so telo polo nggibo a manga karo a kiyaapinan iran taman den ko dato sa Maakah a
rakes o manga sondaro niyan na miyakatalingoma ago mikempo ko marani sa Midiba.
Mitimotimo roo mambo so manga Amoniyo a poon ko manga siti iran sa kapakipetidawa
iran.
8 So kiyanega sii i Daod na piyakasong iyan roo si Yowab a rakes o langon o manga
sondaro niyan.
9 Mililiyo so manga Amoniyo na mitiyagar siran makitidawa a romarantar sii ko gimowa
o siti iran, na so peman so manga dato a miyabang kiran na titimo ko manga pangomaan.
10 Kagiya mailay i Yowab a aden a manga ridoay a sondaro a meririgra makitidawa sii ko
onaan iyan ago sii pen sa talikodan na miyamili sekaniyan ko lebi a manga papasang a
sondaro sa Israil na piyakasagobang iyan siran ko manga Isiriyan.
11 Na so lamba ko manga sondaro na piyakipagolowanan iyan ko pagari niyan a si
Abisay na piyakasarempang iyan siran ko manga Amoniyo.
12 Na pitero i Yowab a "O di ako pekaato ko manga Isiriyan na panabangi ako ngka, na o
di ka pekaato ko manga Amoniyo na penabangan ko seka.
13 Pakababager kano! Ipanindeg tano a kawaraw so manga pagtaw tano ago so manga
siti o Tohan tano! Na nggolaolaan o Allah so mapiya rekaniyan."
14 Na somiyondol si Yowab ago so manga sondaro niyan sa kanggobata iran ko manga

Isiriyan, na miyamalagoy so manga Isiriyan.
15 Kagiya mailay o manga Amoniyo a miyamalagoy siran na piyalagoyan iran mambo so
pagari niyan a si Abisay ka miyamagapas siran ko siti iran. Oriyan iyan na komiyasoy si
Yowab sa Yarosalim.
16 Kagiya mailay o manga Isiriyan a miyadaag siran o manga Israil na miyakitabang siran
ko manga Isiriyan a roo kibabaling ko sabala a Lawasaig a Yopratis. Na miyakaoma so
manga sondaro iran a pagoolowanan i Siyobak a aya komandir o manga sondaro i
Hadadisir.
17 Kagiya matero ini ki Daod na tinimo iyan so kalangolangon o manga sondaro a Israil
na rominipag siran sa Lawasaig a Yordan. Diyaseg iyan so manga Isiriyan ago
piyakasarempang kiran i Daod so manga sondaro niyan. Mipoon den so dii katidawa
18 Na piyalagoyan peman o manga Isiriyan so manga Israil, na miyakapatay si Daod sa
pito nggibo ko kikakaro iran ago pat polo nggibo a manga sondaro; miyapatay niyan pen
si Siyobak a so komandir iran.
19 Kagiya mailay o manga taw a ndadatoan i Hadadisir a tiyaban siran den o Israil na
miyakipesada siran baden ki Daod ago miyakisakop siran on. Oriyan ai na so manga
Isiriyan na da den iyog o ba iran peman abanga so manga Amoniyo.
1 MANGA RIKORD 20
Miyaagaw i Daod a Rabah
Sii ko pangolaon a masa a dii kapakitidawa o manga dato na piyagolowanan i Yowab so

manga sondaro na liyaslas iyan so inged o manga Amoniyo. Linikopan iyan a Rabah,
ogaid na tetalimbagak si Daod sa Yarosalim. Na tiyaban i Yowab a Rabah ago giba iyan.
2 Kagiya makaoma si Daod sa Rabah na kinowa niyan so sangkad a bolawan ko olo o
dato iran (aya kapened iyan na manga telo polo ago pat ka kilo a piyagartaan sa manga
montiya) na inisangkad ko olo i Daod. Na tanto a mala a miyateban iyan ko siti,
3 Na kinowa niyan so manga kibabaling ko siti na piyamakanggalebek iyan siran sa
kanggagabas, kapangebar ago kapamatok. Giyai i inikidia i Daod ko manga taw ko
langon o manga siti o manga Amoniyo. Oriyan iyan na si Daod ago so langon o manga
sondaro niyan na mimbabaling siran sa Yarosalim.
So Kinitidawaan ko manga Pilistiyo

4 Oriyan ai na aden a katidawa roo sa Gisir. Sii ko dii katidawa na si Sibikay a poon sa
Hosah na miyapatay niyan si Sipay a isa ko kiyababadan ko manga iganti, na miyataban
so manga Pilistiyo.
5 Sii ko isa a kiyapakitidawa na si Ilhanan a wata i Yair na miyapatay niyan si Lakmi a

pagari i Goliyat a poon sa Gat a aden a bangkaw niyan a datar sa katiwaro o ndo.
6 Sii ko isa pen a kiyapakitidawa roo sa Gat na aden a tanto a mala a mama a a ndenem i
kemer sa lima ago sa ai, a dowa polo ago pat langon a kemer iyan. Moriyataw sekaniyan
pen o manga iganti.
7 Kagiya pangeraren iyan so manga Israil na biyono sekaniyan i Yonatan a wata o pagari i
Daod a si Simiya.
8 Giyangkai a manga Pilistiyo na kiyababadan ko manga iganti sa Gat, na piyamono siran
i Daod ago so manga sondaro niyan.
1 MANGA RIKORD 21
Binilang i Daod so manga Taw
So Iblis na somiyorang sa Israil na piyakipamikir iyan ki Daod so kabilanga niyan ko

manga Israil.
2 Na pitero i Daod ki Yowab ago so ped a manga olowan a sondaro a "Ikano roo na
pamilanga niyo so langon o manga Israil, ipoon sa Birsiba taman sa Dan. Amay ka
mapasad oto na kasoy kano raken kaan aken katokawi o pira i kadakel iran."
3 Ogaid na somimbag si Yowab a "Pengnin ko a takepen o Allah so manga pagtaw niyan

sa makamagatos takep! Ogaid na ino ngka ini kebayai nggolaola, kadnan ko a dato? Ba
siran di langon manga oripen o kadnan ko? Ino ngka pagowiti sa kasalaan so manga
Israil?"
4 Ogaid na tigel o dato so katomana i Yowab ko katero iyan, na gomiyanat si Yowab na
piyagenebeneb iyan so dalem a Israil. Oriyan iyan na komiyasoy sekaniyan sa Yarosalim
5 Na iniripot iyan ki Daod a so kadakel o manga mama sa Israil a makapesondaro na isa
ka miliyon ago magatos nggibo, a rakes o pat gatos ago pito polo nggibo sii sa Yodah.
6 Ogaid na da on rakesen i Yowab so manga mbatabataa a Libi ago Baniyamin ko
kiyambilang iyan ka kagiya piyakasisingay rekaniyan so inisogo on o dato.
Siniksa o Tohan a Israil
7 Inikararangit o Tohan angkai a kiyabilanga ko manga taw na siniksa iyan a Israil.

8 Na pitero i Daod ko Tohan a "Miyakandosa ko sa mala sa kiyanggolaolaa ko sii.
Kapedipedi ka bo na papasa ngka so kadostaan o oripen ka, ka tanto a kalalalongan
angkai a miyanggolaola ko!
9 Na pitero o Tohan ki Gad a so nabi i Daod a

10 “Song ka ki Daod na teroa ngka on a 'Giyai i kabasa o Allah: Pamili ka sii sangkai a
telo a kasiksaan, na so kepili i ka i penggolaolaan ko.'"
11 Mandiyadi na somiyong si Gad ki Daod na piyanotol iyan on so kabasa o Allah, na

iniise iyan on a "Pagaraw ka sii:
12 Telo ragon a taon, o di na telo olan a katebana ago kapemonoa rekano o manga
sondaro o manga ridoay niyo, o di na telo gawii a kasiksaa rekano o pedang o Allah, a so
paniyakit sii ko inged a pagowiten roo o malaikat o Allah a pekapatay ini ko manga taw
ko dalem a Israil. Na, pamikira ngka o antonaa i isembag aken ko somiyogo raken."
13 Pitero i Daod ki Gad a "Tanto a mararata a ginawa ko! Ogaid na di aken kabaya o ba
ako danega o manga taw. Tomo a ndanegen ako o Allah ka mala so limo iyan."
14 Sabap san na inowitan o Allah sa paniyakit so manga Israil na aya miyamatay kiran na
pito polo nggibo.
15 Na somiyogo so Allah sa malaikat sa kambinasaa niyan sa Yarosalim. Ogaid na sii ko
di ron dii kinggolalanen o malaikat na miyailay ini o Allah na mikerata a ginawa niyan
sabap ko morala na pitero iyan ko malaikat a pepaminasa a "Genek ka den! Kiyatangkaan
den!" Sii oto tomitindeg so malaikat o Allah ko obay o pegegikan i Araonah a Hibosiyo.
16 Lomiyangag si Daod na miyailay niyan so malaikat o Allah a tomitindeg ko pageletan

a langit ago so lopa a kakapetan iyan so pedang iyan a ikakayaw niyan ko liyawaw a
Yarosalim. Na si Daod ago so manga pelokelokesen sa Israil a kindiditar sa manga sako
na minggegepe ko lopa.
17 Pitero i Daod ko Tohan a "Saken i somiyogo sa kambilanga ko manga taw. Saken i
miyakandosa ago minggolaola sa tanto a marata. Antonaa i miyanggolaola angkai a
manga taw a matag baden manga bilibili? Ya Allah a Tohan ko, saken i pakatanai ngka
sa lima ago so pamiliya ko, ogaid na taregen ka den angkai a kapesiksaa ngka ko manga
pagtaw ngka!
18 Na siyogo o malaikat o Allah si Gad sa kateroa niyan on ki Daod a lomalakaw

sekaniyan ago mbaal sa aparan ko Allah sii ko pegegikan i Araonah a so Hibosiyo.
19 Na somiyong roo si Daod ka tiyoman iyan so pitero on i Gad sii ko Ingaran o Allah.
20 Samaoto na pegegik si Araonah sa trigo, na dominingil sekaniyan na miyailay niyan so
malaikat; na so pat kataw a manga wata iyan a ped iyan na mitetapok.
21 Sii ko kapepekaoma roo i Daod na lomiyangkaw si Araonah na miyailay niyan si
Daod, na inawaan iyan so pegegikan na somiyodiyod ki Daod a miniseko so paras iyan ko
lopa.
22 Pitero i Daod ki Araonah a "Pesaa ngka raken angkai a darpa a katatagoan ko

pegegikan ka kaan ako ron makambaal sa aparan ko Allah kaan mitareg so paniyakit a
ipesiksa ko manga taw. Pemasaan ko ini a terotopen ko so arga iyan."
23 Na tig i Araonah ki Daod a "Kowaa ngka den, kadnan ko, na nggolaolaa ngka so apiya
antonaa a ikesoat ka. Imbegay aken reka pen so manga sapi a mapekorban ago isepaat a
totongen, ago so manga kasangkapan a ipegegik a mipangitagon on, ago so trigo a isepaat
a pangenengken. Imbegay aken reka ini langon."
24 Ogaid na simbag o dato Daod si Araonah a "Di, mbayadan ko ini sa tarotop a arga
iyan. Di aken isepaat ko Allah so rek ka, o di na di aken pekorbanen so isepaat a
totongen a da aken kabayadi."
25 Na bigan i Daod si Araonah sa nem gatos a pelata a bolawan a inibayad iyan ko darpa.
26 Inimbaal roo i Daod sa aparan so Allah na mikorban sekaniyan sa ipesepaat a
petotongen ago somiyapaat roo pen sa pikorban iyan pantag bo ko kanggiginawai. Na
tiyalowan iyan so Allah na simbag sekaniyan o Allah a nggolalan ko apoy a poon sa
langit a tomiyotong ko ipesepaat ko aparan.
27 Piyandoan o Allah so malaikat sa katanggoba niyan ko pedang iyan,

28 Na kagiya mailay i Daod a inampon o Allah so pangni niyan roo ko pegegikan i
Araonah na somiyapaat sekaniyan pen sa manga korban.
29 Sangkoto a masa na so Barombarong o Allah a pimbaalan i Mosa roo ko mitataog a
kaden ago so aparan a petotongan sa manga sapaat na ndodoo ko darpa a pesimbaan sii sa
Gibiyon.
30 Ogaid na da roo makasong si Daod sa kasimbaa niyan ko Tohan ka kagiya inikalek
iyan so pedang o malaikat o Allah.
1 MANGA RIKORD 22
Na pitero i Daod a "Sii mbangona so Timplo o Allah a Tohan ago so pen so aparan a
petotongan sa ipesepaat o manga Israil."
So Kapetiyagar ko Kambangona ko Timplo
2 Mandiyadi na migay si Daod sa sogoan sa kalimoda ko manga mananangga a

kibabaling sa Israil, na siyanganan iyan siran sa galebek a katiyagara ko kisasapilan a
manga ator a keosar ko kambangona ko Timplo.
3 Mitiyagar si Daod sa tanto a madakel a manga potaw a pagembaalan a manga totok ago
manga gikos a pagosaren ko manga pintoan o manga gimowa, ago madakel pen a manga
tombaga a di den ketimbang.
4 Mitiyagar sekaniyan pen sa di kebilang a madakel a teroso a sidro, ka inowitan
sekaniyan o manga taw sa Sidon ago sa Tiro sa madakel a kayo a sidro.
5 Tig i Daod a "Patot a so Timplo a mbangonen para ko Allah na tanto a mapiya i paras
ago piyakamemesa ago kababantogan sii ko dalem a doniya. Ogaid na so wata aken a si
Solaiman na kangodaan ago da mabarasa. Kagiya ka maoto na saken i petiyagar sa
kambangona on." Sabap san na pitiyagaran ai piyapiya i Daod sa da niyan pen kapatay.
6 Piyakitawag i Daod si Solaiman a wata iyan na inisarig iyan on so kambangona ko

Timplo para ko Allah a Tohan o Israil.
7 Na pitero on i Daod a "Wata ko, masisingayo aken a kambangona ko ko Timplo a
kibantog ko Ingaran o Allah a Tohan ko.
8 Ogaid na pitero raken o Allah a 'Madakel a taw a miyapatay ngka sii ko di ngka dii
kapakitidawa. Di ka pekabangon sa Timplo a kibantog ko Ingaran aken ka kagiya mala a
miyapakatoga a ka a rogo ko doniya sii ko hadapan aken.
9 Ogaid na aden a ipembawata reka a pembaloy a lomilintad a mama, na pekadekean ko
sekaniyan ko langon o manga ridoay niyan ko mbalabala. Aya imbeto ngka on na
Solaiman, na sii ko kandadato iyan na mbegan ko a Israil sa kalilintad ago kalilinding.
10 Sekaniyan i mbangon ko Timplo a kibantog ko Ingaran aken. Pembaloy sekaniyan a
wata aken na saken i ama iyan. Na pakapembekenen ko so dii kandato o kebabadan
rekaniyan sa taman sa pakataman.' "
11 Na pitero pen i Daod a "Pengnin ko, wata ko, a malalayon reka so Allah ago mitoman
iyan so initopa niyan a mbegan ka niyan sa mapiya a bobolos sii ko kapembangona ngka
ko Timplo para ko Allah a Tohan ka.
12 Pengnin ko pen a began ka o Allah sa ongangen ago sabot amay ka pakandatoon ka
niyan sa Israil kaan ka matoman so kitab o Allah a Tohan ka.
13 Ka pekapiya ka i bobolos o tomana ngka piyapiya so manga sogoan ago manga
kokoman a inibegay o Allah sa Israil a nggolalan ki Mosa. Ogaid na pakababager ka ago
kekawaraw; di ka pekelek aya pen o ba ka kadai sa inam!
14 Pindokawan aken so kiyapanimo aken sa manga pat nggibo ka kilo a bolawan, pat
polo nggibo ka kilo a pirak, ago tanto a madakel a manga tombaga ago potaw a di
ketimbang a keosar ko kambangona ko Timplo o Tohan. Aden pen a pitiyagar aken a
tanto a madakel a manga ator ago manga kayo, na keomanan ka pen ai.
15 Madakel a mapakapenggalebek ka a pemangowa ago pemanapil sa manga ator, manga
panday sa kayo ago so di kebilang a manga mama a mapasang i kapenday
16 Sa bolawan, pirak, tombaga ago potaw. Na, pooni ngka den so galebek! Pengnin ko a
mipageepeda a ka so Allah!"
17 Mandiyadi na piyandoan i Daod so langon o manga olowan sa Israil sa kaogopi ran ki

Solaiman.
18 Pitero iyan kiran a "Lalayon rekano so Allah a Tohan iyo. Bigan kano niyan sa
kalilintad ko mbalabala, ka piyalad iyan raken so langon a kibabaling sangkai a inged, na
mapapadalem so inged ko kapaar o Allah ago so manga pagtaw niyan.
19 Imanto na pagiklasen iyo so manga pamikiran iyo ago manga poso sa
kapepangongonotani niyo ko Allah a Tohan iyo. Pooni niyo mangon so Timplo o Allah a
so Tohan kaan iyo ron mawit so Kaban sa Kapasadan o Allah ago so manga ipamemetad
a isesenggay ko kapesimbaa ko Tohan sii ko Timplo a mbangonen a kibantog ko Ingaran
o Allah."
1 MANGA RIKORD 23
Kagiya den a malokes a tanto si Daod na biyaloy niyan a dato sa Israil so wata iyan a si
Solaiman.
Siyanganan i Daod sa Galebek so manga Libitiyo
2 Tinimo i Daod so langon o manga olowan sa Israil taman ko manga imam ago so
manga Libitiyo.
3 Piyakibilang iyan so manga Libitiyo a miyakapagidad sa telo polo ragon ago lawan pen,
na aya kadakel iran na telo polo ago walo nggibo.
4 Na tig i Daod a "So dowa polo ago pat kiran nggibo na aya makapetandingan ko manga
galebek sii ko Timplo o Allah; so nem on nggibo na aya manga sanasanaan ago manga
pangongokom;
5 So pat on nggibo na aya manga gordiya ko Timplo, na so pat on pen nggibo na aya
pepodi ko Allah a pegosaren iran so manga boniboniyan a inibegay aken kiran."
6 Na pimbagibagi i Daod so manga Libitiyo sa telo lompok a ipepasod ko manga
mbawataan o manga wata i Libi a siki Girson, Kohat ago si Mirari.
So Mbawataan i Girson
7 So manga wata i Girson na:

si Ladan ago si Simay.
8 So manga wata i Ladan na:
si Yahiyal a aya kaka, si Sitam ago si Yowil; telo kataw siran langon.
9 So telo kataw a manga wata i Simay na:
siki Silomot, Hasiyal ago si Haran.
Siran i manga olowan ko pamiliya i Ladan.
10 Na so pat pen kataw a manga wata i Simay na:
siki Yahat, Sisa, Yaos ago si Biriyas.
11 Si Yahat na aya kaka a wata, na aya tomalondog on na si Sisa. Kena a ba madakel i
manga wata si Yaos ago si Biriyas, sabap san na inibilang siran a isa ka pamiliya ago
isaisa a sangan iran.
So Mbawataan i Kohat
12 So manga wata i Kohat na:

siki Amram, Iskar, Hibron ago si Osiyal; pat kataw siran langon.
13 So manga wata i Amram na:
si Aron ago si Mosa.
Si Aron ago so kiyababadan on na aya miiyapili a pepekasenggay ko lebi a soti a manga
ipamemetad sa taman sa pakataman, ago aya pepekasapaat sa manga soasoat ko Allah,
ago aya makapepanalagad ko Allah ago pepekarakmat ko manga taw sii ko Ingaran iyan
sa dayon sa dayon.
14 So manga kiyababadan ki Mosa a so mama a pinili o Tohan na siran i ibibilang a
manga Libitiyo.
15 So manga wata i Mosa na:
si Girsom ago si Iliyasar.
16 So wata i Girsom na:
si Sibowil a so olowan o pamiliya.
17 So wata i Iliyasar na:
si Rihabiyas a so olowan o pamiliya.
Da a ped a wata i Iliyasar ogaid na madakel i manga wata si Rihabiyas.
18 So wata i Iskar na:
si Silomit a so olowan o pamiliya.
19 So manga wata i Hibron na:
si Yariyas a aya kaka, si Amariyas a aya ikadowa, si Yahasiyal a aya ikatelo ago si
Yakamiyam a aya ikapat.
20 So manga wata i Osiyal na:
si Mikah a aya kaka, ago si Isiyayas a aya ikadowa.
So Mbawataan i Mirari
21 So manga wata i Mirari na:

So manga wata i Makli na:
si Iliyasar ago si Kis.
22 Miyatay si Iliyasar a da a wata iyan a manga mama ka manga wata bo a manga babay,
na piyamangaroma siran o manga tenged iran a manga wata i Kis.
23 So manga wata i Mosi na:
siki Makli, Idir ago si Yarimot; telo kataw siran langon.
24 Giyai so manga kiyababadan ki Libi a mipepasod ko manga mbawataan iran ago

manga pamiliya a inipelilista so ngaran o oman i isa kiran. Siran oto a miyakapagidad sa
dowa polo ragon o di na lawan pen na aya piyakasangan sa manga galebek ko Timplo o
Allah.
25 Pitero i Daod a "So Allah a Tohan o Israil na piyakadeke iyan so manga pagtaw niyan,
na keden sekaniyan sii sa Yarosalim sa taman sa pakataman.
26 Sabap roo na di den kailangan o ba pepegawid so manga Libitiyo ko Barombarong a
dii Telabokan o di na apiya antonaa a manga kasangkapan a pegosaren ko kapepanalagad
on."
27 So kiyabilanga ko manga Libitiyo a miyakapagidad sa dowa polo ragon ago lawan pen
na aya kininggolalanen ko moripori a manga insarat i Daod.
28 So sangan o manga Libitiyo na so kapegogopi ko manga imam, a so kiyababadan ki

Aron, sii ko kapepanalagad ko Timplo o Allah; siran i pekibir ko manga lamalama ago so
manga rowang on, so kapelompiyowi ko langon a isesenggay a soti, ago so kinggolalanen
ko ped a manga galebek ko Timplo o Tohan.
29 Siran pen i pekibir ko paan a ipesepaat sii ko lamisaan, so arina a pegosaren ko
ipesepaat a pangenengken, so da a tapay ron a manga biskowit, so manga apang, so arina
a bobonaon a lana a olibi, ago so kapetekesa ko kala ago kadakel o langon ai.
30 Oman kepita na pepamakatindeg siran pen ko matetendo a darpa sa kapepanalamati
ago kapepodiya iran ko Allah. Di iran pen ai dii nggolaolaan ko kaperimon iyan
31 Ago igira aden a ipesepaat a petotongen sii ko Allah ko Gawii a Idedeke, ago sii ko
pista ko saribolan, ago sii ko ped a miyanga tetendo a manga pista. Paliyogat a lalayon
ontol a kadakel iran igira a pepanalagad siran sii ko hadapan o Allah a petomanen iran so
manga taritib a inibegay kiran.
32 Kagiya ka maoto na dii inggolalan o manga Libitiyo so manga atastanggongan iran ko

Barombarong a dii Telabokan ago sii ko Soti a Darpa a pepegogop siran ko manga
tonganay iran a so kiyababadan ki Aron ko kapepanalagad sii ko Timplo o Allah.
1 MANGA RIKORD 24
Pimbagibagi i Daod so manga Imam
Giyai i kiyambagibagia ko kiyababadan ki Aron, a so manga imam: Aya manga wata i

Aron na siki Nadab, Abiho, Iliyasar ago si Itamar. Ogaid na miyaona pen matay si Nadab
ago si Abiho a di si ama iran, na da a ba iran manga wata. Sabap san na aya mimbaloy a
manga imam na si Iliyasar ago si Itamar.
3 Na pimbagibagi i Daod so manga kiyababadan ki Aron ka pisegorompong iyan siran a
ipepasod ko manga galebek a inisangan kiran. Si Sadok a isa ko manga moriyataw i
Iliyasar, ago si Ahimilik a isa ko manga moriyataw i Itamar na inogopan iran si Daod.
4 So manga moriyataw i Iliyasar na pimbagibagi ko sapolo ago nem lompok, na
pimbagibagi mambo so manga moriyataw i Itamar ko walo lompok. Aya sabap ai na lebi
pen a madakel a manga olowan ko pamiliya a maaped ko kiyababadan ki Iliyasar a di sii
ko kiyababadan ki Itamar.
5 So galebek o oman i lompok na piyakisangan kiran a nggolalan ko kaperipa, ka kagiya
ndatar so manga moriyataw i Iliyasar ago so manga moriyataw i Itamar a aden a maaped
on a manga sanasanaan ko Soti a Darpa ago manga sanasanaan ko Tohan.
6 Kanggilis a kipesenganen ko manga galebek o oman i lompok ko manga moriyataw i
Iliyasar ago sii ko manga moriyataw i Itamar. So panonorat a si Simayas a wata i Nitanil
a Libitiyo na inisorat iyan so ngaran o olowan o oman i lompok sii ko hadapan o dato ago
so manga sanasanaan iyan, ago sii ki Sadok a so imam, sii ki Ahimilik a wata i Abiyatar,
ago sii ko manga olowan ko manga pamiliya o manga imam ago so manga Libitiyo.
7-18 Giyai so kasesaliyob o kinisenganen ko galebek o oman i olowan o dowa polo ago
pat lompok a manga imam: siki Yahoyarib, Yadayas, Harim, Siyorim, Malkiyas,
Miyamin, Hakos, Abiyas, Yasowa, Sikaniyas, Iliyasib, Yakim, Hopah, Yasibiyab, Bilgah,
Imir, Hisir, Hapisis, Pitahiyas, Yahiskil, Yakin, Gamol, Dilayas, ago si Maasiyas.
19 Dii inggolalan o oman i lompok so manga galebek a inisangan on sii ko Timplo o

Allah a makaaayon ko manga taritib a initenan kiran o apoapoan iran a si Aron ko
kinisogoon on o Allah a so Tohan o Israil.
So Ped a manga Libitiyo
20 Giyai i ped a manga olowan ko pamiliya sii ko kiyababadan ki Libi:

si Siyobail a poon ko kiyababadan ki Amram;
si Yakdiyas a poon ko kiyababadan ki Siyobail;
21 Si Isiyas a poon ko kiyababadan ki Rihabiyas.
22 Si Silomot a poon ko kiyababadan ki Ishar;
agi si Yahat a poon ko kiyababadan ki Silomot.
23 So manga wata i Hibron a:
si Yariyas, si Amariyas a so ikadowa, si Yahasiyal a so ikatelo ago si Yakmiyam a so
ikapat.
24 So wata i Osiyal a:
si Mikah;
si Siyamir a poon ko kiyababadan ki Mikah.
25 So pagari i Mikah a:
si Isiyas;
si Sakariyas a poon ko kiyababadan ki Isiyas.
26 So manga wata i Mirari a:
So wata i Yaasiyas a:
si Bino.
27 So manga wata i Mirari a poon ko kiyababadan ki Yaasiyas a:
siki Bino, Siyohan, Sakor ago si Ibri.
28 Poon ko kiyababadan ki Makli na:
si Iliyasar a da a wata iyan a mama.
29 Poon ko kiyababadan ki Kis na:
si Yarakmiil.
30 So manga wata i Mosi a:
siki Makli, Idir ago si Yarimot.
Giyai so manga Libitiyo a mililista a mipepasod ko manga pamiliya iran.

31 Di iran mambo dii peripaan so manga galebek iran a datar o pesowaan o manga
kiyababadan ki Aron sii ko hadapan o dato Daod, ago sii ki Sadok, si Ahimilik ago so
manga olowan ko manga pamiliya o manga imam ago so manga Libitiyo. Ndatar den so
ipekidia ko manga pamiliya o kaka a wata ago so manga pamiliya o ariyari a pagari niyan.
1 MANGA RIKORD 25
So manga Paboboniboniyan ko Timplo
Si Daod ago so manga olowan o manga sondaro na miyapili iran so manga wata i Asap,
Himan ago si Yadoton kaan siran i makapepanalagad ko kapepayaga ko lalag o Allah a
sasarenganen o boniboniyan o manga alpa, manga kotiyapi ago manga pandaopan. Katii
so lisataan ko manga paboboniboniyan ago so manga sangan iran:
2 So manga wata i Asap a:

siki Sakor, Yosip, Nitaniyas ago si Asarilah. So manga wata i Asap na pagoolowanan i
Asap a pepekapayag ko lalag o Allah ko kipesogoon on o dato.
3 So nem kataw a manga wata i Yadoton a:
siki Gidaliyas, Siri, Yasayas, Hasabiyas ago si Matitiyas a pagoolowanan siran o ama iran
a si Yadoton. Pepekapayag siran ko lalag o Allah a pepanalamatan ago pepodin iran so
Allah a sasartaan o boniboniyan o manga kotiyapi.
4 So manga wata i Himan a:
siki Bokiyas, Mataniyas, Osiyal, Siyobail, Yarimot, Hananiyas, Hanani, Iliyatah, Gidalti,
Romamtiyasar, Yosbikasah, Maloti, Hotir, ago si Mahasiyot.
5 Langon siran manga wata i Himan a so nabi o dato. Initopa rekaniyan o Allah a
imbegay niyan on angkai a manga wata kaan iyan sekaniyan mipangkat. Bigan o Tohan
si Himan sa sapolo ago pat a manga wata a manga mama ago telo kataw a manga wata a
manga babay.
6 Langon angkai a manga mama na pagoolowanan siran o oman i manga ama iran.
Manga paboboniboniyan siran sii ko Timplo o Allah a pepakaonin iran so manga
pandaopan, manga kotiyapi ago manga alpa ko kapepanalagad iran sii ko Timplo o
Tohan. Si Asap, si Yadoton ago si Himan na pagoolowanan siran o dato.
7 Siran ago so manga tonganay iran a miyanga babatak ago manga papasang ko
kamboboniboniyan para ko Allah na dowa gatos ago walo polo ago walo a kadakel iran
langon.
8 Miripa siran sa manga sangan iran a galebek a ndatar den so manga ngongoda ago so
manga lokes, ago so manga goro taman ko manga morit.
9-31 Giyangkai a dowa gatos ago walo polo ago walo a paboboniboniyan na pimbagibagi
ko dowa polo ago pat lompok a sesapolo ago dowa kataw ko oman i lompok, na so
olowan o pamiliya ko oman i lompok na aya komikibir kiran. Giyai i manga ngaran
angkai a manga olowan a miyakasosokli a kiyapamilia kiran a nggolalan ko kaperipa: si
Yosip, si Gidaliyas, si Sakor, si Siri, si Nitaniyas, si Bokiyas, si Asarilah, si Yasayas, si
Mataniyas, si Simay, si Osiyal, si Hasabiyas, si Sibowil, si Matitiyas, si Yarimot, si
Hananiyas, si Yosbikasah, si Hanani, si Maloti, si Iliyatah, si Hotir, si Gidalti, si
Mahasiyot ago si Romomtiyasir.
1 MANGA RIKORD 26
So manga Gordiya ko Timplo
So manga Libitiyo a manga gordiya ko Timplo na pimbagibagi mambo:

Poon ko mbawataan i Korah na si Misilimiyas a wata i Kori a wata i Asap. Si
Misilimiyas na aden a pito a manga wata iyan a si Sakariyas a aya kaka, si Yadiyail, si
Sibadiyas, si Yatniyal,
3 Si Ilam, si Yahohanan ago si Iliyahonay.
4-5 Si Obid Idom na riyakmatan o Tohan ko kinibegan iyan on ko walo kataw a wata iyan
a siki Simayas, Yahosabad, Yowah, Sakar, Nitanil, Amiyal, Isakar ago si Piyolitay.
6 Si Simayas a wata i Obid Idom na aden a manga wata iyan a miyanga babaloy a manga
olowan ko mbawataan o apo iran ka kagiya manga papasang siran a mama.
7 Aya manga ngaran iyan na siki Otni, Ripail, Obid ago si Ilsabad. So manga tonganay
iran a si Iliho ago si Simakiyas na manga papasang mambo a manga mama.
8 Giyai langon so kiyababadan ki Obid Idom. Siran ago so manga wata iran ago so
manga tonganay iran na manga papasang a mama a pekegaga iran so galebek iran. Nem
polo ago dowa langon angkai a manga kiyababadan ki Obid Idom.
9 Si Misilimiyas na aden a manga wata iyan ago manga tonganay a palaya kepakayan
sangkai a galebek, na sapolo ago walo siran langon.
10 Poon ko mbawataan i Mirari na si Hosah a aden a pat kataw a wata iyan a: si Simri i
olowan iran (ka apiya kena a ba sekaniyan i kaka na initoro sekaniyan i ama iyan a aya
olowan),
11 So ikadowa na si Hilkiyas, so ikatelo na si Tibaliyas ago so ikapat na si Sikariyas.
Sapolo ago telo kataw langon ko manga wata i Hosah ago manga tonganay niyan a
kiyasanganan a manga gordiya ko Timplo.
12 Giyangkai a manga gordiya ko Timplo na pimbagibagi a mipepasod ko manga olowan

o manga pamiliya iran, na aden a manga sangan iran ko kapepanalagadi ko Timplo o
Allah a datar o ped a manga Libitiyo.
13 So oman i pamiliya apiya i kadakel iran na piripa iran so gimowa a kapenggordiyaan
iran.
14 Aya miyakaripa ko gimowa sa tampar sa sebangan na si Misilimiyas. Na so wata iyan
a si Sakariyas, a so maongangen a mosawira, na aya miyakaripa ko gimowa sa tampar sa
pagotaraan.
15 Si Obid Idom na aya miyakaripa ko gimowa sa tampar sa pagabagatan, na miyaripa o
manga wata iyan so manga rowang a peteliyongan sa manga tamok.
16 Si Sopim ago si Hosah na miyaripa iran so gimowa sa tampar sa sedepan ago so
Gimowa a Salikit sii ko karsada sa kaporoan.
Giyai so katatanor o di iran dii kanggordiya:
17 Sii sa tampar sa sebangan na nem a nggogordiya on oman gawii, pat sa tampar sa
pagotaraan, pat mambo sa tampar sa pagabagatan ago ndodowa ko oman i peteliyongan
ko tamok.
18 Sii ko lamalama sa tampar sa sedepan na pat a nggogordiya on ko karsada ago dowa
sii ko lamalama.
19 Giyai i manga lompok o manga gordiya ko Timplo a poon ko manga mbawataan i
Korah ago si Mirari.
So manga Komikibir ko Peteliyongan sa Tamok
20 So ped ko manga tonganay iran a Libitiyo na aya komikibir ko manga peteliyongan sa

tamok ko Timplo ago so peteliyongan sa manga pamemegayan a isesenggay a rek o
Tohan.
21 So manga moriyataw i Laban a kiyababadan ki Girson na aya manga olowan ko manga
pamiliya i Ladan ago si Girson. Ped kiran si Yahiyal
22 Ago so manga wata i Yahiyal a si Sitam ago so pagari niyan a si Yowil. Manga
komikibir siran ko manga peteliyongan sa tamok sii ko Timplo o Allah.
23 Aden pen a ped a manga gordiya a poon ko kiyababadan ki Amran, Iskar, Hibron ago
si Osiyal.
24 Si Sibowil a moriyataw i Girson a so wata i Mosa na aya olowan o manga komikibir

ko manga peteliyongan sa tamok.
25 So manga tonganay niyan a manga moriyataw i Iliyasar a pagari i Girson na siki
Rihabiyas, Yasiyayas, Yoram, Sikri ago si Silimot.
26 Si Silomot ago so manga tongangay niyan na aya manga komikibir ko manga
peteliyongan sa manga pamemegayan a isesenggay a rek o Allah a rakes on so manga
pamemegayan a inipanenggay i Dato Daod, so manga olowan ko pamiliya ago so manga
komandir taman ko manga olowan o manga sondaro.
27 Miyakowa angkai a manga mama so ped ko miyateban iran ko katidawa na inisenggay
iran a ipagompiya ko Timplo o Allah.
28 So pen so langon taman a inisenggay a keosar ko Timplo a rakes on so manga nganin a
inipanenggay o nabi Samowil, si Saolo a wata i Kis, si Abnir a wata i Nir ago si Yowab a
wata i Siroyah, na aya komikibir sii langon na si Silomit ago so manga tonganay niyan.
So manga Sangan o Ped a manga Libitiyo
29 Poon ko kiyababadan ki Iskar na si Kinaniyas ago so manga wata iyan na kena a ba sii
ko Timplo so miyasangan iran, ka manga sanasanaan siran ko gobirno ago manga
pangongokom ko manga Israil.
30 Poon ko kiyababadan ki Hibron na si Hasiyabiyas ago so manga tonganay niyan a

sanggibo ago pito gatos a manga papasang a mama na piyakikibir kiran so langon o
galebek ko Allah ago pantag ko dato sii sa Israil roo sa sedepan a Lawasaig a Yordan.
31 Si Yariyas a poon mambo ko kiyababadan ki Hibron na aya kiran maporo a olowan a
mipepasod ko salsila o manga pamiliya iran. Na sii ko ikapat polo ragon a kandadato i
Daod na miyaiksamin so manga rikord na kiyatokawan den a aden a tanto a pagaadatan a
manga mama a maaped ko kiyababadan ki Hibron sii sa Yasir sa inged a Giliyad.
32 Aden a dowa nggibo ago pito gatos a manga olowan ko pamiliya, a manga papasang
siran a mama a maaped ko manga tonganay i Yariyas, na piyakikibir kiran i Daod so
langon a galebek ko Tohan ago pantag ko dato sii ko manga mbatabataa a Robin, Gad ago
so sabaad ko mbatabataa a Manasih roo sa sebangan a Yordan.
1 MANGA RIKORD 27
Giyai i listaan ko manga taw sa Israil a manga olowan ko pamiliya, ago manga komandir
ko nggibongibo ago mbabagatos a manga sondaro taman ko manga olowan iran a manga
sanasanaan siran o dato ko langon a galebek a mipantag ko manga bataliyon a manga
sondaro a dii sesaliyob manalagad a sesaolan oman saragon. Oman i bataliyon na dowa
polo ago pat nggibo a manga mama.
2 Aya sanasanaan ko paganay a bataliyon sii ko paganay a olanolan na si Yasobiyam a

wata i Sabdiyal
3 A moriyataw i Piris.
4 Aya sanasanaan ko ikadowa a bataliyon sii ko ikadowa olan na si Doday a moriyataw i

Ahohi (si Miklot i tomatalondog rekaniyan a olowan).
5 Aya sanasanaan ko ikatelo a bataliyon sii ko ikatelo olan na si Binayas a wata i
Yahoyada a imam.
6 Sekaniyan i olowan o "Telo Polo" a manga sondaro; so wata iyan a si Imisabad na sisii
ko bataliyon iyan.
7 Aya sanasanaan ko ikapat a bataliyon sii ko ikapat olan na si Asahil a pagari i Yowab.
So wata iyan a si Sibadiyas na aya on miyakasambi.
8 Aya sanasanaan ko ikalima a bataliyon sii ko ikalima olan na si Samhot a kiyababadan

ki Israh.
9 Aya sanasanaan ko ikanem a bataliyon sii ko ikanem olan na si Ira a wata i Ikis a taw sa
Tikowa.
10 Aya sanasanaan ko ikapito a bataliyon sii ko ikapito olan na si Hilis a kiyababadan ki

Ipraim a poon sa Pilon.
11 Aya sanasanaan ko ikawalo a bataliyon sii ko ikawalo olan na si Sibikay a

kiyababadan ki Sirah a poon sa Hosah.
12 Aya sanasanaan ko ikasiyaw a bataliyon sii ko ikasiyaw olan na si Abiyasir a poon sa

Anatot sii ko inged a Baniyamim.
13 Aya sanasanaan ko ikasapolo a bataliyon sii ko ikasapolo olan na si Maharay a

kiyababadan ki Sirah a poon sa Nitopah.
14 Aya sanasanaan ko ikasapolo ago isa a bataliyon sii ko ikasapolo ago isa olan na si
Binayas a poon sa Piraton sii sa inged a Ipraim.
15 Aya sanasanaan ko ikasapolo ago dowa a bataliyon sii ko ikasapolo ago dowa olan na
si Hilday a kiyababadan ki Otniyal a poon sa Nitopah.
So Kitetandingan ko manga Mbatabataa a Israil
16-22 Giyai i listaan ko kitetandingan ko manga mbatabataa a Israil:
sii ko mbatabataa a Robin: si Iliyasar a wata i Sikri na aya on makatetandingan;

sii ko mbatabataa a Simiyon: si Sipatiyas a wata i Maakah;
sii ko mbatabataa a Libi: si Hasabiyas a wata i Kimowil;
sii ko kiyababadan ki Aron: si Sadok;
sii ko mbatabataa a Yodah: si Iliho a pagari i Daod;
sii ko mbatabataa a Isakar: si Omri a wata i Mikail;
sii ko mbatabataa a Sibolon: si Isamiyas a wata i Obadiyas;
sii ko mbatabataa a Naptali: si Yarimot a wata i Asriyal;
sii ko mbatabataa a Ipraim: si Hosiya a wata i Asasiyas;
sii ko sabaad ko mbatabataa a Manasih sa sedepan: si Yowil a wata i Pidayas;
sii ko sabaad ko mbatabataa a Manasih sa sebangan: si Ido a wata i Sakariyas;
sii ko mbatabataa a Baniyamin: si Yaasiyal a wata i Abnir;
sii ko mbatabataa a Dan: si Asaril a wata i Yahoram.
23 Da on peda milang i Daod so da pen makapagidad sa dowa polo ragon, ka kagiya

minitopa o Allah a mbabaden iyan so manga Israil a datar sa kadakel o manga bitoon sa
langit.
24 Si Yowab a wata i Siroyah na pipoonan iyan milang so manga taw ogaid na da niyan
mapasad. Minitana so rarangit o Tohan ko manga Israil sabap sangkai a kiyabilanga
kiran, na so kadakel iran na da misorat ko manga rikord o Dato Daod.
So manga Komikibir ko manga Tamok o Ndatoan
25 Giyai i listaan ko manga komikibir ko tamok o ndatoan:
si Asmabit a wata i Adiyal na aya komikibir ko manga walay a petimoan ko tamok o dato;
si Yonatan a wata i Osiyas i komikibir ko manga peteliyongan sii ko manga bariyo ko
pagingedingedan ago sii ko manga kota;
26 Si Isri a wata i Kilob i komikibir ko manga taribasok a dii nggalebek ko lopa;
27 Si Simay a poon sa Ramah i komikibir ko manga asinda a obas;
si Sabdi a poon sa Sipam i komikibir ko manga petegoan sa arak sii ko manga asinda.
28 Si Baal Hanan a poon sa Gidir i komikibir ko manga kayo a olibi ago manga onga
sapad sii ko manga bobongan sa sedepan;
si Yowas i komikibir ko manga peteliyongan sa lana a olibi;
29 Si Sitray a poon sa Saron i komikibir ko manga talon a sapi a pepanateb roo sa Saron;
si Sapat a wata i Adlay i komikibir ko manga talon a sapi sii ko manga balintad;
30 Si Obil a moriyataw i Ismail i komikibir ko manga onta;
si Yadiyas a poon sa Mironot i komikibir ko manga kimar;
31 Si Yasis a moriyataw i Hagir i komikibir ko manga talon a bilibili ago manga
kambing.
Langon ai manga komikibir ko manga tamok o Dato Daod.
So manga Mosawira i Daod
32 Si Yonatan a bapa i Daod na maongangen a mosawira o dato, ago panonorat sekaniyan

pen.
Si Hahiyal a wata i Hakmoni na aya pepangendao ko manga wata o dato.
33 Si Ahitopil na aya mosawira mambo o dato,
na si Hosay a so Arkitiyo na aya ginawai o dato.
34 Oriyan o kiyapatay i Ahitopil na si Yahoyada a wata i Binayas ago si Abiyatar na
miyabaloy a manga mosawira.
Si Yowab na aya komandir o manga sondaro sa Israil.
1 MANGA RIKORD 28
So manga Insarat i Daod mipantag ko Timplo
Piyakisogoan i Daod so langon o manga opisiyal sa Israil a matimo siran sa Yarosalim: so

manga olowan ko manga mbatabataa, so manga sanasanaan ko sapolo ago dowa a
bataliyon a dii manalagad ko dato, so manga komandir ko pisenggibowan ago
pimbagatosan a manga sondaro, so manga komikibir ko langon a tamok ago manga
pangangayamen a rek o dato ago so manga wata iyan, a rakes on so langon o manga
opisiyal ko torogan, so manga ala i gees a mama ago so langon a ped a manga wawaraw a
sondaro.
2 Kagiya malimod siran langon na tominindeg si Dato Daod na pitero iyan a "Pamakinega
ko niyo, manga pagari ko ago manga pagtaw aken! Miyasingayo aken a kambangon aken
sa timplo a tatap a ketagoan ko Kaban sa Kapasadan ago kedapoan o Tohan tano.
Pitiyagar aken so langon a kailangan ko kambangona on.
3 Ogaid na pitero raken o Tohan a 'Kena a ba seka i pekabangon sa timplo a kibantog ko
Ingaran aken ka kagiya madakel a miyapatay ngka ko manga katidawa.'
4 “Inonta bo na so Allah a Tohan o Israil na miyapili ako niyan ago so kebabadan raken a
aya mamakapendato sa Israil sa taman sa pakataman. Ka pinili iyan so mbatabataa a
Yodah a aya olowan, na poon sa Yodah na pinili iyan so pamiliya o ama aken, na poon ko
manga wata o ama aken na inikasoat iyan a kiyapilia niyan raken a madato ko dalem a
Israil.
5 Na sii ko langon o madakel a manga wata a mama a inibegay raken o Allah na pinili
iyan si Solaiman a aya raken pekasambi a pendato ko ndatoan o Allah sa Israil.
6 Ka pitero iyan raken a 'So wata a ka a si Solaiman na aya pekabangon ko Timplo aken
ago so manga lamalama ko, ka pinili aken sekaniyan a wata aken ago saken i ama iyan.
7 Na pakapembekenen ko so ndatoan iyan sa taman sa pakataman o tatapa niyan so
kapetomana ko manga sogoan ago so manga kokoman aken a datar o di niyan dii
nggolaolaan imanto.'
8 “Kagiya ka maoto, manga pagari ko, na sii ko hadapan o Tohan tano ago so langon
angkai a isa ka maginged a Israil, a so manga pagtaw o Allah, na peliyogatan ko sekano
imanto a piyapiyai niyo tomoman so langon a sogoan o Allah a Tohan iyo kaan matatap a
katatangana niyo sangkai a mapiya a lopa ago an iyo mapakikewali ko kebabadan rekano
sa dayon sa dayon.
9 “Na seka, Solaiman a wata ko, kilalaa ngka so Tohan o ama a ka na pangongonotani
ngka sekaniyan sa iklas ko poso o ka ago rakes o kasosomayodi ko iman ka. Ka pesisain
o Allah so madadalem ko poso o oman i taw ago peseboten iyan so oman i mapeniniyat
iyan. O mbabanoga ngka sekaniyan na ketoon ka, ogaid na o talikodi ngka sekaniyan na
isili ka niyan sa taman sa pakataman.
10 Imanto na iktiyari ngka a ginawa ngka, ka pinili ka o Allah a aya pekabangon ko soti a
Timplo niyan. Pakababager ka na go ngka nggolalanen so galebek!"
11 Kagiya makapasad tero si Daod na inibegay niyan ki Solaiman so manga plano ko
Timplo ago so liyoliyowan iyan, so manga rowang a peteliyongan, so manga rowang sa
poro, manga rowang sa soled ago so Lebi a Soti a Darpa a ron pepapasa so manga dosa.
12 Inibegay niyan pen ki Solaiman so manga plano ko ko langon a pegantanganen iyan
mipantag ko manga lamalama o Timplo o Allah, so langon a rowang ko melilibeta on,
ago so manga peteliyongan sa tamok ko Timplo o Tohan ago so manga nganin a
isesenggay a soti.
13 Inibegay niyan pen ki Solaiman so manga insarat mipantag ko manga galebek o oman
i lompok o manga imam ago manga Libitiyo sii ko kapepanalagad iran ko Timplo o Allah
taman ko kapekibira iran ko langon a kasangkapan on a pegosaren ko kapesimba.
14 Iniinsarat rekaniyan pen i Daod so kapened o bolawan ago so pirak a keosar ko
kapagembaali ko mbarambarang a kasangkapan a pagosaren ko kapepanalagad
15 Maana a so manga petegoan sa solo ago so manga solo on,
16 So manga lamisaan a pirak ago so bolawan a lamisaan a pembetadan sa soti a paan,
17 So manga tinidor para sa sapo, so manga ladiya, so manga omoy, ago so bolawan ago
pirak a manga lapad.
18 Oriyan iyan na iniinsarat iyan so kapened o lombos a bolawan a pagosaren ko aparan a
petotongan sa doka, ago so piyagtaotaw a manga malaikat a mabebekar so manga papak
iran a makasasayap ko Kaban sa Kapasadan o Allah.
19 Na tig i Daod a "Langon ai na inisorat aken sii ko kipapaaren raken o Allah, na bigan
ako niyan sa sabot ko langon a ipekidikidia sangkai a plano."
20 Pitero pen i Daod ki Solaiman a wata iyan a "Pakababager ka ago kekawaraw!

Nggolalanen ka so galebek! Di ka pekelek aya pen o ba ka kadai sa inam, ka so Allah a
Tohan, a aya ko Tohan, na sisii reka. Di ka niyan ipendarainon aya pen o ba ka niyan
talikodi, ka pagogopan ka niyan mimasad ko langon a galebek mipantag ko Timplo o
Allah.
21 So mbarambarang a manga lompok o manga imam ago manga Libitiyo na
makatitiyagar nggolaola ko langon a galebek a inisangan kiran sii ko Timplo o Tohan.
Na aden pen a madakel a taw a kateterangan ago manga papasang i kanggalebek ko
mbarambarang a papandayan a magogop reka ko langon a galebek. So langon a taw ago
so manga olowan iran na tomanen iran so oman i isogo o ka."
1 MANGA RIKORD 29
So manga Pamemegayan a Imbangon ko Timplo
Oriyan iyan na pitero o dato Daod ko langon a malilimod a manga taw a "So wata aken a
si Solaiman a aya miyapili o Tohan na kangodaan pen ago da mabarasa. Tanto a mala
angkai a galebek, ka kena a ba matag baden torogan o taw, ka Timplo para ko Allah a
Tohan!
2 Sabap san na taman sa miyagaga ko ron na miyapanimo aken so langon taman a
kailangan ko kambangona ko Timplo o Tohan aken, a so bolawan, pirak, tombaga, potaw
ago kayo taman ko madakel a manga montiya ago manga ala i arga a bato a
mbarambarang i warna, ago manga marpil.
3 Liyo ko langon taman a miyatiyagar aken den para sangkai a soti a Timplo na
inipagoman aken on pen so rek aken a manga tamok a bolawan ago pirak sabap ko
kapekebabayai aken ko Timplo o Tohan aken.
4 Miyakabegay ako sa magatos ago lima nggibo ka kilo a bolawan a poon sa Opir, ago
dowa gatos ago pat polo nggibo ka kilo a lombos a pirak a pagosaren a ipelapis ko manga
keleb o Timplo
5 Ago sii ko kapagembaali o manga panday ko manga nganin a bolawan ago pirak. Na,
antawaa pen i kebayaan iyan a isenggay niyan so manga rek iyan ko Allah imanto?
6 Mandiyadi na so manga olowan ko manga pamiliya ago sii ko manga mbatabataa a
Israil, so manga komandir o manga sondaro, ago so manga sanasanaan ko galebek o dato
na miyamagiklas siran mamamegay.
7 Aya minibegay iran para ko kambangona ko Timplo o Tohan na miniraot sa magatos
ago pito polo nggibo ka kilo a bolawan ago sapolo nggibo a pelata a bolawan, telo gatos
ago lima polo nggibo ka kilo a pirak, nem gatos nggibo ka kilo a tombaga ago telo ka
miliyon ago pat gatos nggibo ka kilo a potaw.
8 Na apiya antawaa kiran i aden a manga ala i arga a bato niyan na inibegay iran ko
peteliyongan sa tamok ko Timplo a kikibiren i Yahiyal a moriyataw i Girson.
9 Miyababaya so manga taw, ka kagiya mateterang siran ko kiyabegay iran ko Allah sa
iklas ko poso iran, na tanto mambo a miyababaya si Dato Daod.
Piyodi i Daod so Tohan
10 Na piyodi i Daod so Allah sii ko kamamasaan o langon o malilimod a tig iyan a
"Ya Allah a so Tohan o apo ami a si Yakob

na rek ka so podi ipoon sa pagampaganay ago taman sa pakataman!
11 Rek ka, ya Allah, so kala ago so kabatowa
ago so bantogan ago so kapakadaag ago so menang.
Rek ka so langon taman a matatago ko langit ago so doniya
ago rek ka pen, ya Allah, so kapakandadato;
mipapangkat ka a pangolo ko langon taman.
12 Poon reka so kakawasaan ago so bantogan;
seka i ndadato ko kalangolangon.
Sii sa lima ngka so kapaar ago so gaga
sa kiporoon ka ago kapakabagera ngka ko apiya antawaa.
13 Imanto, hey Tohan ami, na penalamatan ami seka,
ago podin ami so kababantogan a Ingaran ka.
14 “Ogaid na antawaa ko, ago antawaa so manga pagtaw aken a kegaga mi reka megay
angkai a iklas a manga pamemegayan? So langon taman na pepekapoon reka, na aya
minibegay ami reka na so bo so poon sa lima ngka.
15 Matag kami baden gomegenek ago kipananangga sii ko kamamasaan ka a datar o
manga apo ami. Somasagad baden so omor ami sii ko doniya a datar o along.
16 Ya Allah a Tohan ami, langon angkai a tamok a miyapanimo ami a pagosaren ko
kambangona ko Timplo a ipeselasela ko soti a Ingaran ka na palaya reka den miyakapoon;
na rek ka ini langon.
17 Katawan aken, Tohan ko, a petepengan ka so poso o taw na ikasosoat ka so
kapagiinontolan. Matito so niyat aken ko kapelada ko reka sangkai langon a manga
nganin, na pekebabaya ako imanto ka miyailay aken so kateterangi ko manga pagtaw
ngka ko kiyapamegay iran reka.
18 Ya Allah a Tohan o manga apo ami a so Ibrahim, Iskak ago so Yakob, na tatapa ngka
ngkai a mapeniniyat sii ko poso o manga pagtaw ngka sa taman sa pakataman, na
pakapembekena ngka so kapengongonotani ran reka.
19 Begi ngka so wata aken a Solaiman sa iklas a kasisingayoa niyan ko katomana niyan
ko manga sogoan ka, manga pandoan ago manga kokoman, ago so kinggolalanen iyan ko
langon taman a kailangan sa kambangona ko Timplo a pitiyagaran aken."
20 Oriyan iyan na pitero i Daod ko langon a malilimod a "Podiya niyo so Allah a Tohan
iyo!" Na palaya siran miyodi ko Allah a so Tohan o manga apo iran, na somiyodiyod
siran sii ko hadapan o Allah ago so dato.
21 Sii ko talondog a gawii na miyangorban siran sa sanggibo a manga mama a sapi,

sanggibo a manga mama a bilibili ago sanggibo a manga nati a bilibili na inipanapaat iran
ai a pepenotongen sii ko Allah a rakes o manga ipesapaat a panginginomen, na madakel
pen a piyangorban iran para ko langon o manga Israil.
22 Mikekan siran ago miyamanginom ko hadapan o Allah sangkoto a gawii a tanto siran
a masosonor. Na tiyarima iran peroman si Solaiman a wata i Daod a aya dato iran, na sii
ko hadapan o Allah na siyalawatan iran sekaniyan a aya iran olowan ago si Sadok a aya
iran imam.
23 Na miyabaloy si Solaiman a dato ko ndatoan o Allah a minisambi ki ama iyan a Daod.
Pepegosor sekaniyan, na petomanen sekaniyan o langon o manga Israil.
24 So langon o manga sanasanaan ago manga sondaro taman den ko langon o ped a
manga wata i Daod na misepa sa kapengongonotani ran ko Dato Solaiman.
25 Na tanto a piyakibantogan o Allah si Solaiman sii ko dalem a Israil, na bigan iyan sa
lebi pen a mala a kakawasaan ago pangkatan a di so apiya antawaa ko miyanga oonaan
iyan a dato sa Israil.
So Kiyapatay i Daod
26 Si Daod a wata i Yasay na mindato ko dalem a Israil

27 Sa miyakapat polo ragon. Miyakapito ragon a kiyandato iyan sa Hibron, ago
miyakatelo polo ago telo ragon sii sa Yarosalim.
28 Miyatay sekaniyan a miyalokes a miyasoat ko kiyalendo a omor, manga kakawasaan
ago pangkatan. Na si Solaiman a wata iyan na aya on somiyambi a dato.
29 So langon a miyanggolaola i Dato Daod ipoon sa poonan taman ko kaposan na
miyamangisorat sii ko manga rikord o manga nabi a siki Samowil, Natan ago si Gad.
30 Inisorat iran so tarotop a totolan ko mala i gees a kandadato iyan ago so piyanga
ookitan iyan ago giya Israil taman ko langon a melilibeta on a manga ndatoan.
2 MANGA RIKORD
2 MANGA RIKORD 1
Miyangni si Solaiman sa Ongangen
Si Solaiman a wata i Daod na miyakambeken piyapiya so kandadato iyan sa Israil, na sisii

rekaniyan so Allah a Tohan iyan na biyaloy niyan sekaniyan a tanto a mala i gees.
2 Mandiyadi na piyakisogoan i Solaiman so langon o manga Israil a rakes o manga

komandir ko pisenggibowan ago pimbagatosan ko manga sondaro, so manga
pangongokom, ago so langon a pelokelokesen ago manga olowan ko pamiliya sii sa
dalem a Israil.
3 Na piyakaonot siran langon i Solaiman ko bobongan roo sa Gibiyon a ndodon so
Barombarong a dii Telabokan o Tohan a pimbaalan i Mosa a oripen o Allah roo ko
mitataog a kaden.
4(Samaoto na so Kaban sa Kapasadan o Tohan na ndodoo sa Yarosalim sii ko isa a
barombarong a pitiyagar on i Daod isako awidan iyan so Kaban a poon sa Kiriyat Yarim.)
5 Ogaid na so aparan a tombaga a inembaalan i Bisalil a wata i Ori a so wata i Hor na
ndodoo pen sa Gibiyon sii ko danga o Barombarong o Allah. Na si Solaiman ago so
langon o manga taw na miyamanimba siran roo ko Allah.
6 Roo ko hadapan o Allah ko danga o Barombarong na mikorban siran sa sanggibo a
manga ayam a inisapaat i Solaiman a petotongen sii ko aparan a tombaga.
7 Sangkoto a kagagawii na mipeyag so Allah ki Solaiman na tig iyan on a "Pangni ka

raken sa saden sa kabaya a ka a imbegay aken reka."
8 Somimbag si Solaiman a "Tanto ngka a inikalimo so ama aken a si Daod, na biyaloy

ako ngka a dato a minisambi rekaniyan.
9 Ya Allah a Tohan ko, tomanen ka imanto so initopa ngka ko ama aken a Daod, ka
piyakandato ako ngka ko manga taw a datar sa kadakel o bayanek ko lopa.
10 Begi ako ngka sa ongangen ago katao a mipagolowan aken sangkai a nasiyon, ka
antawaa i pekagaga ndato sangkai a mala a manga pagtaw ngka?"
11 Na tig o Tohan ki Solaiman a "Sabap sa giyai i masisingayo o ka ago da ka pangni sa

kakawasaan, manga tamok, pangkatan, o di na so kapamatay o manga ridoay ngka aya
pen o ba ka pangni sa kalendo a omor ka aya ngka baden piyangni na ongangen ago katao
a minggorbirno ngka ko manga pagtaw aken a piyakindato aken reka
12 Na sabap san na mataan a imbegay aken reka so ongangen ago so katao a piyangni
ngka. Liyo ron pen na mbegan ko seka sa kakawasaan, manga tamok, ago pangkatan a
lawan pen ko apiya antawaa a miyaonaan ka a dato o di na keoriyan ka a dato."
13 Oriyan iyan na inawaan i Solaiman so Barombarong a dii Telabokan roo ko bobongan
sa Gibiyon na miyaling sekaniyan sa Yarosalim, na mindato den sa Israil.
14 Miyakipanimo si Solaiman sa madakel a manga karo ago manga koda. Aden a

sanggibo ago pat gatos iyan a karo ago sapolo ago dowa nggibo a manga koda. So ped on
na piyanago iyan sa Yarosalim ago so ped pen na sii ko manga siti a petimoan sa karo.
15 Sii ko kandadato i Solaiman na miyabaloy so pirak ago so bolawan a komakalilid sa
Yarosalim a datar o manga ator, ago so manga kayo a sidro a datar baden o komakalilid a
manga kayo a pepamangeto sii ko silid o manga bobongan sa Yodah.
16 So manga koda i Solaiman na sii miyakapoon sa Misir ago sa Kowi. So manga
padagang o dato na piyamamasa iran ai roo sa Kowi.
17 Aya arga o oman i isa a karo a piyamasa iran roo sa Misir ago inowit iran sa Yarosalim
na nem gatos a pelata a pirak, na oman i koda na magatos ago lima polo a pelata a pirak.
Na so ped sii na di iran mambo dii pesaan ko manga dato o manga Hitiyo ago so manga
dato sa Siriya.
2 MANGA RIKORD 2
Mitiyagar si Solaiman ko Kambangona ko Timplo
Piyasad i Solaiman sa ginawa niyan a mbangonen iyan so Timplo a kibantog ko Ingaran o

Allah ago so torogan o dato a mbalingan iyan.
2 Tomiyoro sekaniyan sa pito polo nggibo a manga mama a makapenggosod ko manga
nganin a pagosaren on, ago walo polo nggibo a pepamanapil sa manga ator roo ko manga
kapalawan, ago telo nggibo ago nem gatos a manga kapatas iran.
3 Inipakawit i Solaiman angkai a sorat ki Hiram a dato sa Tiro a aya oni niyan na: "Ogopi
ako ngka a datar o inikidia ngka ko ama aken a si Daod isako pangowitan ka sekaniyan sa
manga teroso a kayo a sidro para ko kiyabangona niyan ko torogan iyan.
4 Imanto na mbengon ako sa timplo a kibantog ko Ingaran o Allah a Tohan ko. Isenggay
ini a rek iyan, a so soti a darpa a petotongan sa mamot a doka ko hadapan iyan ago ron
ami ipembetad so paan a lalayon rekaniyan isasapaat, ago ron ami rekaniyan pepaladen so
manga petotongen a ipesepaat oman mapita ago perimon, ago sii ko manga Gawii a
Idedeke, sii ko manga saribolan, ago sii pen ko miyanga tetendo a pista a ipeselasela ko
Allah a Tohan ami. Giyai i inisogo iyan a dii nggolaolaan o manga Israil sa taman sa
pakataman.
5 “Mala so Timplo a mbengonen aken ka kagiya so Tohan ami na lebi a mala a di so

langon a ped a katohanan.
6 Ogaid na antawaa i pekagaga mbaal sa walay a kedenan iyan, ka apiya so manga langit
taman ko pipeporoan ko manga langit na di sekaniyan on kemin? Antawaa ko ai a
ipembalay aken sekaniyan sa walay a makaliyoliyo ko darpa a petotongan sa manga
sapaat ko hadapan iyan?
7 “Na, witi ako ngka imanto sa mama a mapasang i kapenday sa bolawan, pirak, tombaga
ago potaw, ago sii ko kapengiloto sa manga dinis a mariga, kasomba ago biro, ago
tadiyam ko kapangokir. Makapenggalebek sekaniyan a ped o manga papasang a panday
aken sii sa Yodah ago sa Yarosalim a piyamili o ama aken.
8 Witi ako ngka pen sa manga teroso a sidro, goo ago nara a poon sa Libanon, ka katawan
ko a so manga gomagalebek ka na manga tadiyam ko kapamata sa manga kayo san. So
manga gomagalebek aken na magogop kiran
9 Sa kipetiyagaren iran raken ko tanto a madakel a tarakayo, ka tanto a mala ago mapiya i
paras angkai a timplo a mbengonen aken.
10 Mbegan ko so manga mama ngka a pemata sa manga kayo sa isa ka miliyon ago pat
gatos nggibo ka gantang a trigo, isa ka miliyon ago pat gatos nggibo ka gantang a bantad,
pat gatos ago walo polo nggibo ka litro a arak, ago pat gatos ago walo polo nggibo ka
litro a lana a olibi."
11 Na inisembag i Hiram a dato sa Tiro angkai a sorat ki Solaiman: "Sabap sa

pekebabayaan o Allah so manga pagtaw niyan na biyaloy ka niyan a dato iran!
12 Podin so Allah a Tohan o Israil a aya miyaden ko langit ago so doniya! Bigan iyan si
Daod sa maongangen a wata a madalem i panarima ago somasabot a aya pekabangon ko
timplo para ko Allah ago torogan a mbalingan o dato.
13 “Pekiwitan ko seka sa maongangen a mama a mapasang i kapenday, a si Hirom

14 A aya ina iyan na ped ko mbatabataa a Dan ago so ama iyan na taw sa Tiro. Tadiyam
sekaniyan ko kapenday sa bolawan, pirak, tombaga, potaw, ator ago kayo ago sii pen ko
kapenggalebeka ko manga dinis a mariga, kasomba, ago biro, ago so landap a sotra.
Miyabatak sekaniyan pen ko langon a pitibarangan a kapangokir na mipenggolalan iyan
so apiya antonaa a ikidia ko manga galebek a imbegay ron. Makapenggalebek sekaniyan
a ped o manga panday ngka ago siran oto a piyamili o kadnan aken a si Daod a ama a ka.
15 “Pengnin ko, kadnan ko, a pakiwiten ka den rekami so manga trigo, bantad, lana a
olibi ago so arak a miyaaloy ngka.
16 Na pemataan ami sii sa Libanon so langon a kayo a keosar ka na pegaroren ami ai sa
ragat taman den sa Yopa, na poon roo na pakinggosoden ka ini sa taman sa Yarosalim."
17 Na binilang i Solaiman so langon a mananangga a kibabaling sa Israil a datar o

kiyambilanga kiran i Daod a ama iyan, na manga magatos ago lima polo ago telo nggibo
ago nem gatos a kadakel iran.
18 So pito polo nggibo kiran na piyakisangan iyan kiran so dii kinggosoden ko manga
nganin a ipembalay, so walo polo nggibo ron na pepamanapil sa manga ator sii ko manga
bobongan, na so telo polo nggibo ago nem gatos na manga kapatas ko manga
gomagalebek.
2 MANGA RIKORD 3
So Kiyabangona ko Timplo
Mandiyadi na pipoonan i Solaiman mangon so Timplo o Allah roo sa Yarosalim sii ko

Palaw a Moriyah a ron mipeyag so Allah ko ama iyan a si Daod. Giyai so darpa a
miyatiyagar i Daod sii ko katatagoan ko pegegikan i Araonah a Hibosiyo.
2 Inepoonan iyan den mangon sii ko ikadowa gawii ko ikadowa olan ko ikapat ragon a
kandadato iyan.
3 Aya takes o Timplo o Tohan na dowa polo ago pito ka mitros a katas iyan, ago siyaw ka
mitros a kaolad iyan.
4 So liyoliyowan sii ko onaan o Timplo na siyaw ka mitros a kabelang iyan a datar sa
kabelang o Timplo, ago siyaw ka mitros a kaporo iyan. So manga keleb iyan sa soled na
liyapisan sa lombos a bolawan.
5 So manga keleb ko kalaan ko Timplo na riyantaran sa manga papan a goo, na liyapisan
ai sa bolawan ago piyangokiran sa manga kayo a korma ago manga rantay.
6 Pipendaraan iyan so Timplo sa mapiya i paras a manga montiya, na so bolawan a inosar
iyan on na poon sa Parbaim.
7 Liyapisan iyan sa bolawan so intiro a Timplo, so manga keleb, so manga mirag, so
manga kilid o pintoan ago so manga pintoan, na piyangokiran iyan sa manga malaikat so
manga keleb iyan.
8 So rowang sa soled a bebetowan sa Lebi a Soti a Darpa na siyaw ka mitros a katas iyan
iyan ago siyaw ka mitros a kaolad iyan a datar sa kaolad o Timplo, na liyapisan so soled
iyan sa dowa polo ago telo nggibo ka kilo a bolawan.
9 Aya timbang o oman i totok a bolawan na kalalawanan so tenga sa kilo. Liyapisan
mambo sa bolawan so manga keleb o manga rowang sa poro.
10 Mimbaal sekaniyan sa dowa timan a piyagtaotaw a manga malaikat na liyapisan iyan

siran sa bolawan ago inibetad iyan ko soled o Lebi a Soti a Darpa.
11-13 Roo siran tomitindeg a makatatangkiriay a somasangor ko kalaan ko Timplo.
Kikabebekar so manga papak iran a so katas o oman i isa on na kalalawanan so dowa ka
mitros. Aya katas iran langon na siyaw ka mitros ipoon ko poro o papak o isa a malaikat
taman ko sabala a poro o papak o isa on. Makasesekoay so manga papak iran sii ko look
o rowang ago miraraot ko mbala a keleb on.
14 Pimbaalan iyan so kortina a biro ago mariga ago kasomba a dinis ago landap a sotra a
kiyabordaan sa inisayan sa manga malaikat.
So Dowa Timan a Tombaga a Polaos
15 Sii ko danga o Timplo na mimbaal sekaniyan on sa dowa a polaos a aya katas ai

langon na sapolo ago nem ka mitros, na sii ko poro o oman i isa on na aden a
ipopondiyong on a dowa ago tenga ka mitros a kaporo iyan.
16 Mimbaal sekaniyan pen sa inisayan sa siyobid a manga rantay a inipagarta ko
ipopondiyong ko oman i polaos, na mimbaal sekaniyan pen sa inisayan sa manga granada
a magatos timan na inipaneket iyan ai ko manga rantay.
17 Na piyakatindeg iyan so manga polaos ko danga o gimowa o Timplo, a so isa on na sii
sa tampar sa pagabagatan na bitowan iyan sa Yakin, na so isa on na sii sa pagotaraan, na
bitowan iyan sa Bowas.
2 MANGA RIKORD 4
So manga Ipamemetad para ko Timplo
Mimbaal si Solaiman sa aparan a tombaga a aya katas iyan na siyaw ka mitros ago siyaw
mambo ka mitros a kaolad iyan, ago pat ago tenga ka mitros a kaporo iyan.
2 Oriyan iyan na mimbaal sekaniyan sa matiboron a tangela sa ig a tiyowang a tombaga a
bebetowan sa 'Ragat' a aya kadalem iyan na manga dowa ago tenga ka mitros. Aya
kaolad iyan na pat ago tenga ka mitros, na aya likes iyan na sapolo ago telo ago tenga ka
mitros.
3 Sii ko kababaan o bibir o tangela na aden a dowa koyog on a inisayan sa manga roroni a
mama a sapi a mililibet on a sesapolo timan ko oman i tenga sa mitros. Na tiyowang ai a
maoonay ko tangela.
4 Mibabatog so tangela ko likod o sapolo ago dowa a manga ala a mama a sapi a
tombaga, a so telo ron na somasangor sa pagotaraan, so telo ron na sii sa sedepan, so telo
ron peman na sii somasangor sa pagabagatan, ago so telo ron pen na sii sa sebangan, na
palaya matatampar sa look so manga ikog iran.
5 Manga telo ka porgada a kakapal o tangela, na so bibir iyan na lagid o ngari o tagayan a
inisayan sa obarobar a mananaw. Ketagoan ai sa pat polo ago pat nggibo ka litro a ig.
6 Mimbaal sekaniyan pen sa sapolo a manga palanggana a pepangonaban. So lima timan
on na sii niyan inibetad sa tampar sa pagabagatan, na so lima on na sii sa tampar sa
pagotaraan. Ron pepangonabi so manga ipesepaat a petotongen, na so ig ko maolad a
tangela na pegosaren o manga imam ko kapepamangonab iran.
7-8 Oriyan iyan na mimbaal sekaniyan sa sapolo timan a bolawan a petegoan sa solo a
mipepasod ko insarat o Tohan, ago sapolo a lamisaan, na inipametad iyan ai roo ko
Timplo, a so lima timan ko manga petegoan sa solo ago lima a lamisaan na sii tampar sa
pagabagatan, ago so lima on mambo na sii sa tampar sa pagotaraan. Na mimbaal
sekaniyan pen sa magatos timan a ladiya a bolawan.
9 Mimbaal sekaniyan pen sa lamalama a para ko manga imam, ago isa pen a mala a
lamalama. So manga lekeb o manga gimowa angkai a manga lamalama na pilalapisan sa
tombaga.
10 Sii niyan inibetad so maolad a tangela sa pagabagatan ko masesebangan a rogo o
Timplo.
11-16 Mimbaal pen si Hiram sa manga koden, manga sakrad ago manga ladiya.
Miyapasad iyan so langon a galebek a piyakisangan on i Dato Solaiman para ko Timplo o
Tohan a:
so dowa a timan a polaos,

so dowa timan a ipopondiyong ko manga polaos a inisayan sa manga ladiya,
so dowa timan a inisayan sa siyobid a manga rantay a inipagarta ko dowa a manga
pondiyong o manga polaos,
so pat gatos a inisayan sa manga granada a inipaneket ko dowa a siyobid a manga rantay
(dowa koyog a granada a ililibet ko oman i siyobid a manga rantay a inipagarta ko manga
pondiyong o manga polaos),
so sapolo a manga pembatogan ago so manga palanggana on,
so maolad a tangela ago so sapolo ago dowa a inisayan sa manga mama a sapi a
pembatogan on,
so manga koden, manga sakrad ago so manga tinidor sa sapo.
So langon angkai a manga betad a pimbaalan i Hiram a inisogo on i Dato Solaiman a
pagosaren ko Timplo o Allah na palaya den piyakatenang a tombaga.
17 Piyakimbaalan ai o dato sii ko towanga sii ko kapantaran sa Yordan ko pageletan a
Sokot ago giya Saritan.
18 Kagiya tanto a madakel angkai a manga nganin a piyakimbaalan i Solaiman na di den
ketendo o pira i kala o timbang o tombaga.
19 Piyakimbaalan pen i Solaiman so langon a ipamemetad a bolawan a tegoon ko Timplo

o Tohan: so aparan a bolawan, so manga lamisaan a pembetadan sa manga paan a
ipesepaat ko Tohan,
20 So manga petegoan sa solo a lombos a bolawan a rakes o manga solo on a
pepakasindaon ko danga o Lebi a Soti a Darpa a so den so iniinsarat o Tohan,
21 So inisayan sa manga obarobar, so manga palitaan, so manga sipit,
22 So manga ipetenor ko sombowan, so manga ladiya, so manga lapad ago so manga
tangela sa waga a palaya den lombos a bolawan. So manga pintoan a ipesoled ko Lebi a
Soti a Darpa ago so kalaan a rowang ko Timplo na palaya pilalapisan sa bolawan.
2 MANGA RIKORD 5
Kagiya mapasad i Solaiman so langon a galebek ko kiyabangona niyan ko Timplo o Allah
na inisoled iyan on so manga nganin san a inisenggay ron o ama iyan a Daod, a so manga
pirak, manga bolawan ago so langon a pagigimo, na tiyago iyan ai ko manga rowang a
peteliyongan sa tamok sii ko Timplo o Tohan.
Inowit ko Timplo so Kaban sa Kapasadan
2 Oriyan iyan na piyakisogoan i Solaiman so manga pelokelokesen sa Israil a rakes o

manga olowan ko manga mbatabataa a Israil ago so manga nakoda ko manga pamiliya a
domarpa siran sa Yarosalim kaan iran mawit ko Timplo so Kaban sa Kapasadan o Allah a
poon ko siti o Daod, a giya Siyon.
3 Na so langon a manga mama sa Israil na miyalimod ko dato sii ko masa o kapista ko
ikapito a olanolan.
4 Kagiya mamakaoma so langon a pelokelokesen sa Israil na kinowa o manga Libitiyo so
Kaban
5 Na inawidan iran ai ko Timplo. So manga imam ago so manga Libitiyo na inawidan
iran roo pen so Barombarong a dii Telabokan a rakes o langon o manga soti a
kasangkapan on.
6 Na si Solaiman ago so langon o manga Israil a moonot on a mitimotimo ko hadapan o
Kaban na mikorban siran sa tanto a madakel a manga bilibili ago manga sapi a di iran den
kisorat o di na keitong i kadakel iyan.
7 Oriyan iyan na inisoled o manga imam so Kaban sa Kapasadan o Allah ko Timplo sii
ko darpa iyan ko Lebi a Soti a Darpa na sii ran inibetad ko atag o manga papak o
piyagtaotaw a manga malaikat.
8 Kikabebekar so manga papak iran ko liyawaw o bebetadan ko Kaban na kasasayapan
iran so Kaban ago so manga ipetibal on.
9 Matas angkai a manga tibal a domodogar a poon ko Kaban, na pekeilay so manga poro
iran sii ko onaan o Lebi a Soti a Darpa ogaid na kena a ba pekeilay sii sa liyo o Soti a
Darpa. Na ndodoo den ai sa taman imanto.
10 Da den a matatago ko soled o Kaban a rowar ko dowa timan a mapapapan a manga
ator a inisoled on i Mosa sii sa Palaw a Sinay a ron mimbaal so Allah sa kapasadan
mipantag ko manga Israil isako makaliyo siran sa Misir.
11-13 So langon o manga imam a ndodoo na miyasoti iran den a ginawa iran bapiya anda
siran maaped a lompok. Na so langon o manga Libitiyo a manga paboboniboniyan, a si
Asap, si Himan ago si Yadoton a rakes o manga wata iran ago manga tonganay iran na
mindiditar siran sa manga pipiya a sotra, na tomitindeg siran sa tampar sa sebangan o
aparan a pepakaonin iran so manga pandaopan, manga kotiyapi ago manga alpa.
Sasarenganen siran o magatos ago dowa polo a manga imam a pepakaonin iran so manga
bogiyong. So manga pepamagidaida na aayonan siran o manga bogiyong, manga
pandaopan ago so ped pen a manga boniboniyan sii ko matanog a kapepodiya ago
kapepanalamat iran ko Allah a tig iran a:
"Mapiya so Allah!
Tatap so limo iyan sa taman sa pakataman!"
Na kagiya lomiyo so manga imam ko Timplo o Allah na sarta den a miyapeno ai a

gabon
14 Na da mitaros o manga imam so kapepanalagad iran sabap ko gabon, ka kagiya so
bantogan o Allah na minipeno ko Timplo o Tohan.
2 MANGA RIKORD 6
Mandiyadi na miyangangarapan si Solaiman a tig iyan a "Ya Allah, miyatero o ka a keden
ka ko makapal a maliboteng.
2 Ogaid na inibangon aken seka sa mala i bantogan a Timplo a kekadenan ka sa taman sa
pakataman."
So Kabasa i Solaiman ko manga Taw
3 Na giyoto a somiyangor si Solaiman ko langon o manga taw sa Israil a kititindeg roo na

riyakmatan iyan siran a tig iyan
4 “Podin so Allah a Tohan o Israil a nggolalan ko kapaar iyan na minitoman iyan so
initopa niyan ko ama aken Daod. Ka pitero iyan on a
5'Ipoon ko kiyapakaliyowa ko ko manga pagtaw aken sa Misir na da ako den toro sa siti
sii ko apiya anda ko manga mbatabataa a Israil a mbangonan sa timplo a kibantog ko
Ingaran aken, aya pen o ba ako toro sa dato a makapegolowan ko manga pagtaw aken a
Israil.
6 Ogaid na imanto na pinili aken a Yarosalim a ron matago so Ingaran aken, ago initoro
aken si Daod a makandato ko manga pagtaw aken a Israil.' "
7 Na pitero pen i Solaiman a "Miyakasingayo so ama aken a Daod sa kambangon iyan sa

timplo a kibantog ko Ingaran o Allah a Tohan o Israil.
8 Ogaid na pitero on o Allah a 'Mapiya so kasisingayoa ngka ko kambangon ka sa timplo
a kibantog ko Ingaran aken.
9 Inonta bo na kena a ba seka i pekabangon on, ka so wata a ka a rogo o ka. Sekaniyan i
pekabangon ko Timplo a kibantog ko Ingaran aken.'
10 “Na initoman den o Allah so minitopa niyan. Kiyasambian aken so ama aken a Daod
na moontod ako imanto ko korsi o ndatoan a Israil a so den so initopa o Allah, na
biyangon aken so Timplo a pekibantog ko Ingaran o Allah a Tohan o Israil,
11 Na ron aken inibetad so Kaban a aya katatagoan ko Kapasadan a pimbaalan o Allah
mipantag ko manga Israil."
So Inipangangarapan i Solaiman
12 Mandiyadi na tominindeg si Solaiman ko danga o aparan o Allah sii ko hadapan o

malilimod a manga Israil na inibayaw niyan a manga lima niyan. (13 Aden a
kiyambaalan i Solaiman a tombaga a pelataporma a dowa ago tenga ka mitros a katas iyan
ago kaolad iyan, ago isa ago tenga ka mitros a kaporo iyan, na inibetad iyan ai ko lembak
o lamalama sa liyo. Miyanik sekaniyan on ago somiyodiyod ko pekeilay ron o langon o
manga taw, na inibayaw niyan sa langit a manga lima niyan.) Na pitero iyan a:
"Ya Allah a Tohan o Israil, da den a ba ngka datar a tohan sii sa langit o di na sii sa
doniya. Lalayon ka dii nggolalan so kapasadan ka sii ko kapepakiilain ka ko gagaw ngka
ko manga oripen ka a mapaparatiyaya reka sa iklas ko manga poso iran.
15 Ininggolalan ka so pitero o ka ko oripen ka a si Daod a ama aken; sii sangkai a gawii
na nggolalan ko kapaar ka na initoman ka so initopa ngka rekaniyan.
16 Na imanto, ya Allah a Tohan o Israil, na tomanen ka pen sabap ko ama aken so initopa
ngka on isako teroon ka a 'Di ka den kedaan sa kebabadan a makapendato sa Israil sii ko
hadapan aken asar a pepiyapiyaan iran magiktiyar so kapepaginetaw iran ago tomanen
iran so kitab aken a datar o siyowa a ka.'
17 Imanto, ya Allah a Tohan o Israil, na pengnin ko a mitoman den so langon taman a
minitopa ngka ko oripen ka a si Daod.
18 “Ogaid na ba mataan a keden so Tohan sii sa doniya a ped o manga manosiya? Apiya
so langit taman ko pipeporoan a manga langit na di ka on kemin aya pen angkai a Timplo
a biyangon aken!
19 Ogaid na tagoa ngka sa ginawa ngka so kapepangangarapan aken a oripen ka ago so
kapepangangampedian aken, ya Allah a Tohan ko, na ampona ngka so ipenggoraok aken
a pepangnin ko reka.
20 Pengnin ko a siyapen ka angkai a Timplo sa gagawii daondaw, a so darpa a pitero o ka
a tegoon ka on so Ingaran ka. Pakinega ko ngka igira a pesengor ako sangkai a darpa a
pepangangarapan.
21 Pengnin ko a amponen ka so pepamangin ami a oripen ka ago so manga pagtaw ngka a
Israil igira a pepangangarapan siran a somasangor sangkai a darpa. Pakinega ngka san sa
kasorgaan a so kakadenan ka, na amay ka maneg ka na rilai kami ngka.
22 “O aden a taw a kiyasenditan sa miyakasela ko ped a taw ago inipaliyogat on a

kapakasepa iyan na amay ka makaoma sii a sepa ko hadapan o aparan ka sangkai a
Timplo
23 Na pakinega ngka san sa kasorgaan na go ngka kokoma so manga oripen ka. Salaa
ngka so miyakasela na sii ngka tanaan ko olo niyan so pinggolaola niyan. Na pakabenara
ngka so da a sala iyan na pemataani ngka a da a peleng iyan on.
24 “O tabana o manga ridoay so manga pagtaw ngka a Israil sabap ko kiyapakandosa iran
reka na amay ka somangor siran reka peroman ago teobat sii ko Ingaran ka a
pepangangarapan ago pepangangampedian ko hadapan ka sii sangkai a Timplo
25 Na pakinega ngka siran san sa kasorgaan na rilai ngka so manga dosa iran ago
pakakasoya ngka siran ko inged a inibegay ngka kiran ago so manga apo iran.
26 O pangalelekebi so manga langit ago da den a oran sabap sa miyakandosa siran reka
na amay ka mangangarapan siran a somasangor sangkai a Timplo ago teobat siran sii ko
Ingaran ka ago panalikodan iran so manga dosa iran sabap ko kiyadanega ngka kiran
27 Na pakinega ngka san sa kasorgaan na rilai ngka so dosa o manga oripen ka a manga
pagtaw ngka a Israil. Pangendaon ka kiran so ontol a okitokit iran a ipeginetaw iran na
pakiorani ngka so lopa a inibegay ngka ko manga pagtaw ngka a mapekewali ran.
28 “O siniksa so inged a taon, manga paniyakit, manga merat, manga oled, manga
tarapan, o di na kiyalikopan o manga ridoay so manga siti iran, a apiya antonaa a morala o
di na paniyakit a miyakatalingoma,
29 Na amay ka mangangarapan ago mamangni sa limo so apiya antawaa ko manga
pagtaw ngka a Israil a tiyarima iyan so masakit a kaperasaya on na go inibayaw niyan a
manga lima niyan a maantap sangkai a Timplo
30 Na pakinega ngka san sa kasorgaan a kakadenan ka na rilai ngka sekaniyan ago kidian
ka ko oman i taw so patot ko langon a miyanggolaola niyan, ka katawan ka so
mapeniniyat iyan (ka seka bo i matao ko oman i poso o manosiya.)
31 Amay ka magiyoto na ikelek ka iran ago kedegen iran so manga lalan ka sii ko langon
o kapepaginetaw iran ko inged a inibegay ngka ko manga apo ami.
32 “Na makapantag ko rait a kena a ba tenger a taw sa Israil ka makapopoon ko mawatan

a inged na o somong sekaniyan sii sabap ko kiyanega niyan ko totolan ko mala a bantogan
ka ago so kala a ka i gees ago kapaar, na amay ka makaoma sekaniyan ago
mangangarapan sii sangkai a Timplo
33 Na pakinega ngka san sa kasorgaan a kakadenan ka na nggolaolaa ngka so apiya
antonaa i pepangnin iyan reka kaan so langon o manga taw sa doniya na makilala ka iran
ago ikalek ka iran a datar o manga pagtaw ngka a Israil ago an iran katokawi a giyangkai
a Timplo a biyangon aken na maawid ko Ingaran ka.
34 “Igira a dii makitidawa so manga pagtaw ngka ko manga ridoay iran apiya anda ngka
siran pekasonga na igira a pepangangarapan siran reka a sii siran somasangor sangkai a
siti a inaraw ngka ago giyangkai a Timplo a biyangon aken a pekibantog ko Ingaran ka
35 Na pakinega ngka san sa kasorgaan so kapepangangarapan ago kapepamangni ran sa
tabang na begi ngka siran sa kapakataban.
36 “O makandosa reka so manga pagtaw ngka (ka da den a sakataw bo a ba di
makapendosa) ago kerarangitan ka siran ago pekitaban ka siran ko manga ridoay iran a
pemiyag kiran ago iteog iran siran ko mawatan o di na marani a inged
37 Na o alina iran so poso iran sii ko inged a ron siran minitaog, ago teobat siran ago
mamangni siran reka sa limo a tig iran a 'Miyakandosa kami, miyaribat kami ago
miyakanggolaola kami sa marata,'
38 Na o pananangoran siran reka peroman sa iklas ko poso ago niyawa iran sii ko inged a
tiyaogan kiran ko kiyabiyaga kiran na o mangangarapan siran a somasangor ko inged a
inibegay ngka ko manga apo iran ago sii ko siti a inaraw ngka ago so Timplo a biyangon
aken a pekibantog ko Ingaran ka
39 Na san sa kasorgaan a kakadenan ka na pakinega ngka so kapepangangampedian iran,
na kalimoon ka siran ago rilai ngka so manga pagtaw ngka a miyamakandosa reka.
40 “Imanto, hey Tohan ko, na pengnin ko a pepakinegen ka ago petegoon ka sa ginawa so

langon a ipepangangarapan sii sangkai a darpa.
41 Na, mbowat ka imanto, ya Allah a Tohan, na go ka den soled sangkai a pendekean ka
a darpa a ron matatago so Kaban sa Kapasadan a nanao ko kabatowa a ka. Manditar o
manga imam ka so kakesabet, ya Allah a Tohan, ago mababaya so soti a manga pagtaw
ngka sii ko kamapiyaan ka.
42 Ya Allah a Tohan, di ngka den silin so dato a pinili i ka. Tatanodi ngka so limo a
initopa ngka ki Daod a oripen ka."
2 MANGA RIKORD 7
So Kinisenggain a Soti ko Timplo
Sii den ko kiyapakapasad i Solaiman mangangarapan na aden a apoy a miyakatana a

poon sa langit na tiyotong iyan so pikorban a manga ayam a inipanapaat, na miyapeno a
bantogan o Allah so Timplo.
2 Na di pekasoled so manga imam ko Timplo o Allah sabap ko bantogan o Allah a
minipeno on.
3 Kagiya mailay o langon o manga Israil so kiyapakatana o apoy ago so bantogan o Allah
a minipeno ko Timplo na somiyodiyod siran a miseseko a manga paras iran ko lopa ago
sinimba iran ago piyodi iran so Allah a tig iran a
"Mapiya sekaniyan;
tatap so gagaw niyan sa taman sa pakataman!"
4 Oriyan iyan na so dato ago so langon o manga taw na somiyapaat siran ko Allah sa
manga ayam a piyangorban iran.
5 Mikorban ago somiyapaat si Dato Solaiman sa dowa polo ago dowa nggibo a manga
sapi ago magatos ago dowa polo nggibo a manga bilibili ago manga kambing. Na si
Solaiman ago so langon o manga taw na inisenggay iran a soti so Timplo o Tohan.
6 Kititindeg so manga imam ko manga darpa a inisenggay kiran, a datar mambo o manga
Libitiyo a kiaawid ko manga boniboniyan a inembaalan i Daod a ipepodi ko Allah.
Pegosaren iyan ai igira a pepanalamat sekaniyan a tig iyan a "Tatap so gagaw niyan sa
taman sa pakataman!" Sii sa pantag o manga Libitiyo na pepakaonin o manga imam so
manga bogiyong iran a kititindeg roo so langon o manga Israil.
7 Siyoti i Solaiman so look o lamalama sii ko danga o Timplo o Allah na roo sekaniyan
somiyapaat sa manga korban a petotongen, so manga sapaat a pangenengken ago so sibo
o manga ayam a dii korbanen pantag bo ko kanggiginawai, ka kagiya so aparan a tombaga
a pimbaalan iyan na di on kemin so langon angkai a manga sapaat.
8 Sa masa oto sii ko soled o pito gawii na piselasela i Solaiman ago so langon o manga
Israil so Pista ko manga Lawig. Mala ini a miyalimod a manga taw a maaped on so
manga taw a poon sa Libo Hamat sii sa pagotaraan taman den ko baogan sa Misir sii sa
pagabagatan.
9 Miyakapito den gawii a kinisenggain iran a soti ko aparan, ago miyakapito pen gawii so
kiyaselaselaa iran ko pista, na sii ko ikawalo gawii ko kapipista na mitimo siran ko soti a
kalilimod.
10 Na sii ko tomiyalondog a gawii, sii ko ikadowa polo ago telo gawii ko ikapito olan, na
piyamakabaling i Solaiman so manga taw a kikabababaya ago kikapipiya a ginawa iran
sabap ko manga pipiya a pinggolaola o Allah para ki Daod ago si Solaiman taman ko
manga pagtaw niyan a Israil.
Mipeyag Peroman so Allah ki Solaiman
11 Kagiya mapasad den i Solaiman so kiyabangona niyan ko Timplo o Allah ago so

torogan o dato ago mininggolalan iyan pen so langon taman a miyapikir iyan a
penggolaolaan iyan on
12 Na mipeyag rekaniyan so Allah sii ko kagagawii na pitero iyan on a "Inampon aken so
inipangangarapan ka, na inaraw aken angkai a Timplo a aya den darpa a ron ako
pekesepaati sa manga korban.
13 Igira a pelekeban ko so langit kaan di pagoran o di na sogoon ko so manga tarapan a
mangangan ko manga pereperan, o di na pagowitan aken sa paniyakit so manga pagtaw
aken
14 Na o so manga pagtaw aken a bebetowan sa ngaran aken na ipangalimbabaan iran a
ginawa iran ago mangangarapan siran ago panagontamanan iran so limo aken ago
panalikodan iran pen so manga rarata a olaola iran na pekinegen aken siran sii sa
kasorgaan, na perilaan ko so manga dosa iran ago pekapiyaan aken pen so inged iran.
15 Pemakinegen aken ago tegoon aken sa ginawa so langon a ipepangangarapan sii
sangkai a darpa.
16 Pinili aken angkai a Timplo ago inisenggay aken a tegoan ko Ingaran aken sa taman sa
pakataman. Pegipaten ko ago kebabayaan ko sa dayon sa dayon.
17 “So seka on peman, na o pepaginetaw ka ko hadapan ko a datar o siyowa o Daod a

ama a ka a di ngka dii nggolaolaan so langon a inisogo aken reka ago petomanen ka so
manga pandoan ago manga kokoman aken
18 Na pakapembekenen ko so dii kandato o kebabadan reka a so den so initopa ko ko
ama a ka a Daod isako teroon ko ron a 'Di ka den kedaan sa moriyataw a makapendato sa
Israil.'
19 “Ogaid na o talikod kano ago indarainon iyo so manga kokoman ago manga sogoan a
inibegay aken rekano ago manalagad ago somimba kano ko salakaw a manga tohan
20 Na mbadoten ko so manga Israil poon ko lopa aken a inibegay aken kiran, ago isili
aken angkai a Timplo a inisenggay aken a soti a pekibantog ko Ingaran aken, na
pakipetototola aken sekano ago pakipesodi aken ko langon o manga nasiyon.
21 Na apiya pen tanto a kababantogan imanto angkai a Timplo na so langon o
pepekasagad on na pekebengang na ipagise iran a 'Ino ai penggolaolaa o Allah sangkai a
inged ago sangkai a Timplo?'
22 Na aya isembag o manga taw na 'Sabap sa tiyalikodan iran so Allah a Tohan o manga
apo iran a aya kiran miyakaliyo sa Misir ka ba iran baden kiyababayaan so salakaw a
manga tohan a piyangongonotanan ago piyamanimba iran. Giyanan i sabap a initana
kiran o Allah angkai langon a manga morala.' "
2 MANGA RIKORD 8
So Miyanga papasad i Solaiman
Sii ko kiyapos o dowa polo ragon na miyapasad den mangon i Solaiman so Timplo o
Allah ago so torogan o dato.
2 Oriyan iyan na biyangon iyan peroman so manga siti a inibegay rekaniyan o dato Hiram
ago piyakibalingan iyan ko manga Israil.
3 Na giyobat i Solaiman a Hamat Sobah na inagaw niyan.
4 Biyangon iyan pen a Tadmor sii ko disirto ago so kitataliyongan a manga siti roo sa
Hamat.
5 Inompiyaan iyan a kaporoan a Bit Horon ago kababaan a Bit Horon a kikokotaan a
manga siti a aden a pangeleban on ago manga gimowa a tatanggalan sa potaw.
6 Biyangon iyan pen a Baalat ago so langon o ped a manga siti a kitatagoan iyan sa manga
tamok iyan, manga karo niyan ago manga koda. Saden sa kebayaan iyan mangon na
piyamangon iyan roo sa Yarosalim, sa Libanon ago sii ko dalem o ndatoan iyan.
7 Aden a kibabaling ko inged a kena a ba siran manga Israil a maaped on so manga

Hitiyo, manga Amoriyo, manga Pirisiyo, manga Hibiyo ago so manga Hibosiyo.
8 Manga kiyababadan siran ko manga nasiyon a da mapolang sa tarotop o manga Israil
isako matangan iran so inged, na siran i piyantonan i Solaiman a dii pakanggagalebeken
sa taman den imanto.
9 Ogaid na da tegela makanggalebek i Solaiman so manga Israil, ka siran i manga
sondaro niyan, manga olowan ko manga sondaro, manga kapitan ko manga karo niyan,
ago manga komokoda.
10 Siran pen i manga sanasanaan i Dato Solaiman, a dowa gatos ago lima polo a dii
makatendingan ko manga gomagalebek iyan.
11 Poon ko Siti o Daod na piyakaogalin i Solaiman so karoma niyan, a so wata o Piraon,

sii ko torogan a biyangon iyan para ko karoma niyan, ka pitero iyan a "Di patot a ba
makabaling so karoma ko ko torogan o Dato Daod, ka soti so manga darpa a kiyabetadan
ko Kaban sa Kapasadan o Allah."
12 Samaoto na somiyapaat si Solaiman ko Allah sa manga korban a petotongen sii ko

aparan a pimbaalan iyan ko danga o liyoliyowan o Timplo.
13 Petomanen iyan so inisogo i Mosa mipantag ko ipapaliyogat a kapesapaat ko oman
gawii ago sii ko manga Gawii a Idedeke, sii ko manga Saribolan ago sii ko telo a kapista
ko saragon, a so Pista ko Kakan sa Paan a da a Tapay ron, so Pista ko Kaperagon ago so
Pista ko manga Lawig.
14 Na sii ko kapetomana i Solaiman ko manga pandoan o ama iyan a Daod na inipanoro
iyan so manga lompok a imam sa kitomanen iran ko manga sangan iran, ago so pen so
manga Libitiyo ko manga sangan iran a dii kapagolowani ko kapepodi ago so kapegogopi
ko manga imam ko manga galebek iran oman gawii. Piyakisangan iyan pen ko manga
lompok a dii nggogordiya ko manga gimowa o Timplo so manga galebek iran sii ko oman
i gimowa, ka giyai i inisogo i Daod a so mama a miyapili o Tohan.
15 Da iran ndarainonen so kinggolalanen ko apiya antonaa a pandoan i Daod mipantag ko
manga imam, ago so manga Libitiyo ago so manga peteliyongan sa tamok.
16 Mininggolalan den so langon o manga galebek a miyatekdir i Solaiman ipoon ko

kinibetaden ko onayan o Timplo taman ko kiyapasad iyan.
17 Oriyan iyan na somiyong si Solaiman sa Isiyon Gibir ago sa Ilat a sii matatago ko kilid
a ragat sa inged a Idomiya.
18 Na inowitan sekaniyan o dato Hiram sa manga kapal a pagoolowanan o manga
sanasanaan iyan ago kekepitan o manga mama niyan a manga batak lomayag.
Milayalayag siran sa Opir a ped o manga lomalayag i Solaiman na kominowa siran roo sa
sapolo ago pat nggibo ago lima gatos ka kilo a bolawan a inibaling iran ki Dato Solaiman.
2 MANGA RIKORD 9
Mimbisita so Bai sa Siba ki Solaiman
Kagiya maneg o bai sa Siba so totolan ko bantogan i Solaiman na somiyong sekaniyan sa

Yarosalim ka tepengan iyan sekaniyan sa manga reregen a pakaise. Oonotan so bai o
tanto a madakel a sanasanaan iyan a rakes o manga onta a kirororanan sa manga palapa,
madakel a manga bolawan, ago manga montiya. Kagiya makaoma sekaniyan ki Solaiman
na miyakimbitiyarai ron mipantag ko langon a mapipikir iyan.
2 Simbag i Solaiman so langon o manga pakaise iyan; da den a ba maregen rekaniyan a
ba niyan di keosay ko bai.
3 Kagiya mapariksa o bai sa Siba so ongangen i Solaiman ago so torogan iyan a
miyabangon iyan,
4 So manga pangenengken sii ko lamisaan iyan, so katatanor o manga sanasanaan iyan, so
manga orobarang iyan ago manga pananangel iyan sa arak a kindiditar ko manga kimon
iran, ago so petotongen a manga ipesepaat i Solaiman sii ko Timplo o Allah na tanto a
miyabengan so bai.
5 Na pitero iyan ko dato a "Benar so totolan reka a miyaneg aken sii ko inged aken
mipantag ko miyanga papasad ka ago so ongangen ka!
6 Ogaid na da aken den paratiyayaa taman ko kiyapakaoma ko sii ago kiyamasaan o
manga mata ko. Matamataan a apiya so sabagi ko kala o ongangen ka na da raken
mapanotol, ka tanto a mala a di so miyaneg aken mipantag on.
7 Sayana a miyakaokor so manga pagtaw ngka! Sayana a miyakaokor so manga
sanasanaan ka a lalayon sisii ko hadapan ka a pepakaneg ko ongangen ka!
8 Podin so Allah a Tohan ka a inikasoat ka niyan ago piyakaontod ka niyan ko korsi iyan
a makandato sii ko Ingaran iyan. Sabap ko kapekebabayai o Tohan ka ko manga pagtaw
niyan a Israil ago so takdir iyan a pakapembekenen iyan siran sa taman sa pakataman na
biyaloy ka niyan a dato iran kaan ka mindato so kokoman ago so kaontol."
9 Na bigan o Bai so dato sa pat nggibo ka kilo a bolawan ago tanto a madakel a manga
palapa ago manga ala i arga a bato. Da den a ba datar sa kapiya angkoto a manga palapa
a inibegay o Bai sa Siba ko Dato Solaiman.
10(So manga lomalayag i Hiram ago so manga lomalayag i Solaiman a miyakaawid sa

bolawan a poon sa Opir na miyakaawid pen sa manga tarakayo a nara ago manga
montiya.
11 So kayo a nara na inembaalan o dato a manga towak o Timplo o Allah ago sii ko
torogan o dato, ago so manga alpa ago manga kotiyapi a pekeosar o manga dii
mboboniboniyan. Sa da pen ai na da den a datar oto a ba miyailay sii sa Yodah.)
12 Na inibegay o Dato Solaiman ko Bai sa Siba so langon a miyasingayo iyan ago

piyangni niyan on. Bigan iyan sekaniyan sa lawan pen ko miyawit on o bai. Oriyan iyan
na gomiyanat roo so Bai na komiyasoy ko inged iyan a rakes o manga sanasanaan iyan.
13 So timbang o bolawan a peketarima i Solaiman oman ragon na dowa polo ago telo
nggibo ka kilo a bolawan
14 A di on ped so pekibowis o manga padagang ago dii mamamasaan. So pen so langon
o manga dato sa Arabiya ago so manga gobirnador ko manga probinsiya sa Israil na
pegowitan iran si Solaiman sa manga bolawan ago manga pirak.
15 Mimbaal si Solaiman sa dowa gatos a manga ala a kelong a piyanesel a bolawan a aya
kapened o oman i kelong na telo ago tenga ka kilo.
16 Mimbaal sekaniyan pen sa telo gatos a manga iito a kelong a piyanesel a bolawan a
aya kapened o oman i isa on na manga dowa ka kilo. Na tiyago o dato angkai a manga
kelong sii ko torogan iyan sii ko Rowang sa Kalasan sa Libanon.
17 Mimbaal so dato sa mala a korsi a marpil a liyapisan sa lombos a bolawan.

18 Nem kerit a ipepanik on, na aden a pendapoan on a bolawan a oonain on. So mbala a
kilid o ontoda na tatagoan sa pembatogan sa barokan a aden a inisayan on sa arimaw a
pakatitindegen a iaabay ko oman i kilid iyan.
19 Sapolo pen ago dowa a inisayan sa manga arimaw a matatago ko nem kerit o korsi a
nggagaisa ko poro o oman i kerit. Da den a datar oto a korsi a ba kiyambaali ko apiya
anda ko ped a manga ndatoan.
20 So langon o pepeginoman i Solaiman na palaya pimbaalan a bolawan, na so langon o

manga ikanan a pegosaren sii ko torogan iyan ko Rowang sa Kalasan sa Libanon na
palaya den lombos a bolawan. Da den a pimbaalan on a pirak ka kagiya ibibilang ai a
maito i bali sii ko masa i Solaiman.
21 Aden a manga kapal o dato a kekepitan o manga pagtaw i Hiram. Sii ko oman telo
ragon na makaisa makadongko angkai a manga kapal a rororanan sa manga bolawan,
pirak, marpil, manga amo ago manga tarabosaw.
22 Mala i kakawasaan ago ongangen si Solaiman a di so apiya antawaa ko ped a manga

dato ko doniya.
23 So langon a dato ko doniya na kebayaan iran mangadap si Solaiman kaan iran
mapamakineg so ongangen a inibegay ron o Tohan.
24 So oman i isa a pepekatalingoma on oman ragon na maawid sa pamemegayan, a
manga kasangkapan a pirak ago bolawan, manga nditaren, manga gomaan, manga palapa,
manga koda ago manga mola.
25 Aden a pat nggibo a manga kodal i Solaiman a ron pekodala so manga koda iyan ago
manga karo sa katidawa, ago sapolo ago dowa nggibo a manga koda. So ped on na
piyanago iyan ko manga siti a petimoan sa karo, na so pen so ped on na sii sa Yarosalim.
26 Kandadatoan iyan so langon o manga dato ko masasakop iyan ipoon ko Lawasaig a
Yopratis taman den ko inged o manga Pilistiyo ago so temanaan a Misir.
27 Sii ko kandadato i Solaiman na biyaloy niyan so manga pirak a lagid sa kadakel o
manga ator, ago so manga kayo a sidro na lagid sa kadakel o komakalilid a manga kayo a
pepamangeto sii ko kababaan o manga bobongan.
28 So manga koda i Solaiman na sii miyapamasa sa Misir ago sii ko langon a ped a
manga inged.
So Kiyapatay i Solaiman
29 So ped a miyanga sosowasowa sii ko kandadato i Solaiman, ipoon sa poonan taman sa

kaposan, na misosorat ko 'Manga Rikord o Nabi Natan,' ago sii ko 'Miyaalamat i Ahiyas a
taw sa Silo,' ago sii ko 'Manga Pangingilain i Ido a Paririmar' a inisorat iyan mipantag ki
Yarobowam a wata i Nibat.
30 Miyakapat polo ragon a kiyandato i Solaiman sa Yarosalim sii ko dalem a inged a
Israil.
31 Miyatay sekaniyan a initapi ko manga apo iyan, na sii minilebeng ko siti o Daod a ama
iyan. So wata iyan a si Rihobowam na aya on miyakasambi a dato.
2 MANGA RIKORD 10
Somiyopak ki Rihobowam so manga Mbatabataa sa Pagotaraan
Somiyong si Rihobowam sa Sikim a ron matitimo so langon a manga Israil sa kapagidini
ran on sa kadato.
2 Samaoto na si Yarobowam a wata i Nibat na ndodoo sa Misir ka miyakapagapas roo
isako palagoyan iyan so dato Solaiman, na kagiya maneg iyan so makapantag sii na
miyaling sekaniyan.
3 Na piyakitawag o manga Israil si Yarobowam, na sekaniyan ago so langon o manga
Israil na somiyong ki Rihobowam ka miyakimbitiyarai siran on a tig iran a
4 “So ama a ka a Solaiman na siyanggolayan kami niyan sa mapened a kokoong! Na,
pakaleboda ngka so maregen a galebek ago pakakepa ngka so kokoong a inisanggolay
niyan rekami ka makipengongoripen kami reka."
5 “Kasoy kano raken amay ka mamakatelo gawii," a inisembag i Rihobowam. Na

mimbabaling so manga taw.
6 Mandiyadi na miyakimosawir si Rihobowam ko manga pelokelokesen a odasa o

Solaiman a ama iyan sii ko kaooyagoyag iyan pen. "Antonaa i kimosawir iyo raken a
isembag aken sangkai a manga taw?" a iniise iyan kiran.
7 Somimbag siran a "O kalimoon ka angkai a manga taw ago tepengan ka siran somoat
ko kasembaga ngka kiran sa mapiya na kelalayon siran manga oripen ka."
8 Ogaid na da pakinega i Rihobowam so inimosawir on o manga pelokelokesen na sii

baden miyakimosawir ko manga kangodaan a rese iyan a aya niyan manga mosawira sa
masa oto.
9 Iniise iyan kiran a "Antonaa i kimosawir iyo raken? Antonaa i kisembag aken sangkai a
manga taw a pepangnin iran raken a kapakakep o kokoong a inisanggolay kiran o ama
aken?"
10 Na somimbag so manga kangodaan a "Giyai i patot a peteroon ka ko manga taw a tig

iran reka a 'So ama a ka na kiyokongan kami niyan sa mapened, ogaid na pakakepa ngka
so kokoong ami,' na teroa ngka kiran a 'So tingting aken na matiwaro a di so kasadan o
ama aken!
11 Siyanggolayan kano o ama aken sa mapened a kokoong, ogaid na pekapeneden ko pen.
Liyambit kano niyan a lilit, ogaid na peranegen ko sekano a bentol!"
12 Kagiya makatelo gawii na komiyasoy si Yarobowam ago so langon a taw ki

Rihobowam a giyoto den so iniinsarat iyan kiran.
13 Na da tomana o dato Rihobowam so inimosawir on o manga pelokelokesen, ka
miyakimbitiyarai sa masarangit ko manga taw
14 A aya tiyoman iyan na so mosawir on o manga kangodaan a tig iyan a "Siyanggolayan
kano o ama aken sa mapened a kokoong, ogaid na pekapeneden ko pen. Liyambit kano
niyan a lilit, ogaid na peranegen ko sekano a bentol!"
15 Aya sabap a da kapakinega o dato ko manga taw na kodarat o Allah angkai a
miyanggolaola kaan iyan mitoman so miyatero iyan ki Yarobowam a wata i Nibat a
nggolalan ko nabi Ahidiyas a taw sa Siloh.
16 Kagiya mailay o langon o manga Israil a da siran den pakinega o dato na inipelalis iran
a "Da den bes a mapembagian tano o di na mapekewali ko ndatoan o Daod a wata i
Yasay! Hey manga Israil, maling tano! Seka den i matao ko ndatoan ka, hey
Rihobowam!" Na mimbabaling so langon o manga Israil.
17(Ogaid na mitataros a kandadatoi i Rihobowam ko manga Israil a kibabaling ko manga
siti sa Yodah.)
18 Mandiyadi na siyogo o dato Rihobowam si Adoniram a aya tetandingan ko dii

nggagalebek a somong ko manga Israil. Ogaid na riyobak iran sekaniyan a ator taman sa
miyatay. Na giyoto a minggagaan mageda si Rihobowam ko karo niyan na
miyakapalagoy sa Yarosalim.
19 Ipoon sangkoto a gawii taman den imanto na so manga taw ko pagotaraan a ndatoan a
Israil na makasosopak ko dii kandato o manga moriyataw o Daod.
2 MANGA RIKORD 11
So Miyaalamat i Simayas
Kagiya makaoma si Rihobowam sa Yarosalim na tominimo sekaniyan sa magatos ago

walo polo nggibo a piyamagaraw a sondaro ko mbatabataa Yodah ago Baniyamin sa
kapakipetidawa iran ko ndatoan a Israil kaan iyan mapakaasal so kandadatoi niyan on.
2 Ogaid na pitero o Allah ki Simayas a sogo o Tohan a
3 “Teroa ngka ki Rihobowam a wata i Solaiman a dato sa Yodah ago sii ko langon o
manga Israil ko mbatabataa a Yodah ago Baniyamin a
2'Giyai i kabasa o Allah: Di kano pakipetidawa ko manga tonganay niyo. Baling kano
langon, ka giyangkai a miyanggolaola na takdir aken.' " Na tiyoman iran so inisogo o
Allah na mimbabaling siran a da iran gobata si Yarobowam.
Piyangotaan i Rihobowam so manga Siti sa Yodah
5 Komiyaden si Rihobowam sa Yarosalim na piyangotaan iyan angkai a manga siti a

milinding sa inged a Yodah:
6 Giya Bitlihim, Itam, Tikowa,
7 Bit Sor, Soko, Adolam,
8 Gat, Marisah, Sip,
9 Adoraim, Asikah,
10 Sorah, Aiyalon ago giya Hibron. Giyai i kikakokotaan a manga siti sii ko masasakop a
Yodah ago Baniyamin.
11 Piyakabageran iyan mbaal so manga kota on ago piyamakikadenan iyan sa manga
komandir a sondaro. Piyanaliyongan iyan angkai a manga siti sa manga pangenengken,
lana a olibi ago arak
12 Ago piyanagoan iyan pen sa manga kelong ago manga bangkaw, ka tanto niyan a
piyakabager angkai a masasakop iyan a Yodah ago giya Baniyamin.
13 So manga imam ago so manga Libitiyo a kibabaling ko dalem a inged a Israil na

tomatampil ki Rihobowam.
14 Inawaan o manga Libitiyo so manga lopa iran a pananateba ago so manga tamok iran
na miyamanong siran sa Yodah ago sa Yarosalim ka kagiya si Yarobowam a dato sa Israil
ago so manga wata iyan na da iran peroa o ba siran makapagimam ko Allah.
15 Tomiyoro si Yarobowam sa rek iyan a manga imam a makapanalagad sii ko manga
aparan ko manga barahala a kambing ago manga sapi a inembaalan iyan.
16 Mandiyadi na so manga taw sii ko oman i mbatabataa sa Israil a kebayaan iran
mangongonotan so Allah a Tohan o Israil sa iklas ko poso iran na miyamanondog siran
ko manga Libitiyo sii sa Yarosalim a ron siran makasapaat sa manga korban ko Allah a
Tohan o manga apo iran.
17 Piyakabager iran so ndatoan a Yodah ago tiyokod iran si Rihobowam a wata i
Solaiman ko miyakatelo ragon, ka petomanen iran sekaniyan a datar o kiyatomana iran ki
Daod ago si Solaiman.
So Pamiliya i Rihobowam
18 Piyangaroma i Rihobowam si Mahalat a wata i Yarimot a wata i Daod, na aya ina iyan
na si Abihal a wata i Iliyab ago apo i Yasay.
19 Na mimbawata si Mahalat sa telo a wata a manga mama a siki Yaos, Simariyas ago si
Saham.
20 Oriyan iyan na piyangaroma pen i Rihobowam si Maakah a wata i Absalom, na
inimbawata iyan on siki Abiyas, Atay, Sisa ago si Silomit.
21 Aden a sapolo ago walo a manga karoma i Rihobowam ago nem polo a manga sandil
iyan, na aden a dowa polo ago walo a manga wata iyan a mama ago nem polo a manga
wata iyan a babay. Na mala a kapekebabayai niyan ki Maakah a wata i Absalom a di so
apiya antawaa ko ped a manga karoma niyan ago manga sandil.
22 Kagiya ka maoto na initoro iyan si Abiyas a wata i Maakah a aya olowan o manga
pagari niyan kaan iyan mabaloy a dato.
23 Na kaongangen so pinggolaola i Rihobowam ka iniparak iyan so ped a manga wata
iyan sii ko dalem a inged a Yodah ago giya Baniyamin na piyakikibir iyan kiran so langon
a kikokotaan a manga siti. Pepagikatan iyan siran sa madakel a pangenengken na
piyamakapangaroma niyan siran sa madakel.
2 MANGA RIKORD 12
Giyobat o manga Imisiren a Yarosalim
Kagiya makambeken ago makabager so kandadato i Rihobowam na sekaniyan ago so

langon o manga Israil na inindarainon iran so Kitab o Allah.
2 Na sabap ko kiyaongkira iran ko Allah na si Sisak a dato sa Misir na giyobat iyan a
Yarosalim sii ko ikalima ragon a kandadato i Rihobowam.
3 Aya ped iyan na sanggibo ago dowa gatos a manga karo sa katidawa, nem polo nggibo a
kikokoda ago so di keitong a manga sondaro a taw sa Libiya, Sokot ago Itiyopiya a
piyakaonot iyan a poon sa Misir.
4 Miyaagaw niyan so kikokotaan a manga siti sa Yodah na miyaoma niyan so temanaan a
Yarosalim.
5 Na somiyong so nabi Simayas ki Rihobowam ago sii ko manga olowan sa Yodah a
miyalimod sa Yarosalim sabap ko kinikaleken iran ki Sisak, na pitero iyan kiran a "Giyai
i kabasa o Allah: Tiyalikodan ako niyo; kagiya ka maoto na tiyalikodan aken sekano
mambo na peladen ko sekano ki Sisak."
6 Na so dato ago so manga olowan sa Yodah na inipangalimbabaan iran a ginawa iran a

tig iran a "Maontol so Allah!"
7 Kagiya mailay ini o Allah na pitero iyan ki Simayas a "Sabap ko kinipangalimbabaanen

iran sa ginawa iran na di aken siran mbinasaan, ogaid na kena a ba tarotop a kapekalidasa
ko kiran Di aken pakapemborngaten so gani aken sa Yarosalim a nggolalan ki Sisak,
8 Ogaid na kedalem siran ko kadato iyan kaan iran katokawi so mbidaan o
kapepanalagadi iran raken ago so kapepanalagadi iran ko manga dato o manga nasiyon sa
doniya."
9 Na giyobat i Sisak a dato sa Misir a Yarosalim na kinowa niyan so manga ala i arga a
manga tamok a matatago ko Timplo o Allah ago so matatago ko torogan o dato.
Inawidan iyan ai langon a rakes o bolawan a manga kelong a inembaalan i Solaiman.
10 Sabap roo na mimbaal so dato Rihobowam sa tombaga a manga kelong a misambi
iyan on, na inisarig iyan ai ko olowan o manga gordiya ko gimowa o torogan o dato.
11 Igira a pesong so dato ko Timplo o Allah na pegonot on so manga gordiya a aawidan
iran so manga kelong, na ipekesoy iran bo ko rowang o manga gordiya.
12 Sabap sa inipangalimbabaan i Rihobowam a ginawa niyan na lominggaw so rarangit
on o Allah na da niyan sekaniyan binasaa sa tarotop, na mapiya den a kapakambebetad a
Yodah.
13 Pepekabeken so kapaar o dato Rihobowan sii sa Yarosalim sii ko kandadato iyan. Pat
polo ago isa ragon a idad iyan isako mabaloy a dato na mindato sekaniyan ko
miyakasapolo ago pito ragon sii sa Yarosalim a so siti a pinili o Allah ko langon a darpa o
manga mbatabataa a Israil a ron iyan tegoa so Ingaran iyan. Aya ngaran o ina iyan na si
Naamah a taw sa Amon.
14 Miyakanggolaola sekaniyan sa marata ka kagiya da niyan pagiklasen so poso iyan ko
kapepangongonotani niyan ko Allah.
15 So ped a miyanga sosowasowa ko kandadato i Rihobowam ipoon sa poonan na taman

sa kaposan na misosorat ko ribro o nabi Simayas ago so nabi Ido a kasosoratan ko manga
salsila. Lalayon so dii katidawa i Rihobowam ago si Yarobowam.
16 Isako matay si Rihobowam na inilebeng sekaniyan sii ko Siti o Daod. Na si Abiyas a
wata iyan na aya on somiyambi a dato.
2 MANGA RIKORD 13
Si Abiyas a dato sa Yodah
Sii ko ikasapolo ago walo ragon a kandadato i Yarobowam sa Israil na miyabaloy si
Abiyas a dato sa Yodah
2 Na miyakandato ko miyakatelo ragon sii sa Yarosalim. Aya ngaran o ina iyan na si
Maakah a wata i Oriyal a taw sa Gibiyah.
Mitidawa si Abiyas ago si Yarobowam. Miyakitidawa si Abiyas a ped iyan so pat
gatos nggibo a manga sondaro niyan, na inatowan sekaniyan i Yarobowam a aya ped iyan
na walo gatos nggibo a manga sondaro niyan.
4 Miyakasengata so manga armi sii ko kapalawan sa Ipraim. Na tomiyakedeg si Abiyas

ko poro o Palaw a Simaraim ago inipelalis iyan a "Hey Yarobowam ago so langon o
manga Israil! Pamakinega ko niyo!
5 Ba niyo di katawi a so Allah a Tohan o Israil na inibegay niyan ki Daod ago sii ko
kebabadan on so kadadatoi sa Israil sa taman sa pakataman a nggolalan ko di den
kebaroba a kapasadan?
6 Ogaid na si Yarobowam a wata i Nibat a so sanasanaan i Solaiman a wata i Daod na
siyopak iyan baden so kadnan iyan.
7 Miyakipagepeda sekaniyan ko da a manga oked iyan a manga rarata a taw na siyorang
iran si Rihobowam a wata i Solaiman isako kangodaan sekaniyan pen a da matadiyam
ago da a bager iyan sa kaatowi niyan kiran.
8 Na imanto na miyatekdir iyo a kapagatowi niyo ko ndatoan o Allah a matatangan
imanto o manga moriyataw i Daod. Mataan a aden a makapal a manga sondaro niyo, na
aawidan iyo so manga bolawan a nati a sapi a inembaalan i Yarobowam a aya niyo manga
tohan.
9 Ogaid na piyamogaw niyo baden so manga imam o Allah a manga moriyataw i Aron,
ago so manga Libitiyo, na tomiyoro kano sa rek iyo a manga imam a datar o pesowaan o
manga taw ko salakaw a manga nasiyon. Na apiya antawaa i pekaoma a maawid sa
mangoda a mama a sapi o di na pito timan a mama a bilibili a ipagidin iyan sa ginawa
niyan na pembaloy sekaniyan a imam sangkoto a kena a ba tito a manga tohan iyo.
10 “Ogaid na so sekami ron peman na so Allah i Tohan ami na da ami sekaniyan talikodi.
So manga imam a pepanalagad ko Allah na manga moriyataw i Aron, na so manga
Libitiyo i pegogop kiran.
11 Oman kapipita ago perimon na pesepaat siran ko Allah sa petotongen a manga korban
ago mamot a doka. Ipembetad iran so paan a ipesepaat ko Allah sii ko soti a lamisaan, na
petenteman iran so manga palitaan ko bolawan a petegoan sa solo oman perimon.
Petomanen ami so manga taritib o Allah, ogaid na tiyalikodan iyo sekaniyan!
12 So den so Tohan i mipageepeda ami; sekaniyan i olowan ami. So manga imam iyan a
kiaawid sa manga bogiyong na pekaonin iran ai sa signal sa kipetidawaan ami rekano.
Hey manga Israil, di niyo pagatowi so Allah a Tohan o manga apo iyo, ka di kano den
pekataban!"
13 Samaoto na siyogo i Yarobowam so ped a manga sondaro niyan a makaalilit ko manga

sondaro a Yodah kaan iran siran magobat roo sa likod, na makasondol so lamba ko
manga sondaro niyan sii sa panempang iran.
14 Dominingil so manga sondaro a Yodah na miyailay iran a pesondolan siran sa
sangoran talikodan na gomiyoraok siran ko Allah sa tabang. Na giyoto a miyamogiyong
so manga imam
15 Na milalalis sa matanog so manga mama sa Yodah sa kapakipetidawa iran. Sii ko
kiyapelalalis iran na tiyaban o Tohan si Yarabowam ago so langon o manga Israil sii ko
kamamasaan i Abiyas ago so manga sondaro a Yodah.
16 Piyalagoyan o manga Israil so manga sondaro a Yodah na piyalad siran o Tohan sa
Yodah.
17 Tanto a mala a kiyatabana kiran i Abiyas ago so manga pagtaw niyan na lima gatos
nggibo a manga pipiya a sondaro a Israil a miyapamono iran.
18 Miyadaag so manga Israil sangkoto a masa, na miyakataban so manga taw sa Yodah
ka kagiya siyarigan iran so Allah a so Tohan o manga apo iran.
19 Piyanaloba i Abiyas so manga sondaro i Yarobowam na miyaagaw niyan ki

Yarobowam so manga siti a Bitil, Yasanah ago giya Ipron a rakes o melilibeta on a manga
paginegingedan.
20 Sii ko masa a kandadato i Abiyas na da den kakapeti peroman i Yarobowam so kapaar
iyan a datar gowani, na siniksa sekaniyan o Allah na miyatay.
21 Ogaid na miosor so kapaar i Abiyas; sapolo ago pat a karoma niyan, ago dowa polo
ago dowa a manga wata iyan a mama ago sapolo ago nem a manga wata a babay.
22 So ped a miyanga sosowasowa sii ko kiyandato i Abiyas a rakes o manga
miyanggolaola ago miyanga tetaro iyan na miyamangisorat ko manga rikord o nabi Ido.
2 MANGA RIKORD 14
Si Asa a Dato sa Yodah
Miyatay si Abiyas na sii minilebeng ko siti o Daod. Si Asa a wata iyan na aya on
somiyambi a dato, na sii ko kandadato iyan na lomilintad a Yodah ko miyakasapolo
ragon.
2 Mapiya ago ontol so dii nggolaolaan i Asa ko hadapan o Allah a Tohan iyan.
3 Piyangowa niyan on so manga aparan ko salakaw a manga tohan ago so manga aparan
ko manga barahala sii ko manga bobongan. Piroropet iyan so babarakaten kon a manga
ator ago piyamata iyan so manga polaos a toos ko katohanan a si Asirah.
4 Inipando iyan ko manga taw sa Yodah so kambabanoga iran ko Allah a Tohan o manga
apo iran ago so katomana iran ko manga kitab ago manga sogoan iyan.
5 Piyangowa niyan on so manga aparan ko manga barahala sii ko manga bobongan taman
ko manga aparan a petotongan sa doka sii ko langon o manga siti sa Yodah, na lomilintad
so ndatoan sii ko kandadatoi niyan on. Miyangon sekaniyan sa manga siti sa dalem a
Yodah ka kagiya lomilintad so inged. Da den a ba rekaniyan miyakitidawa sii sangkoto a
masa ka piyakadeke sekaniyan o Allah.
7 Pitero iyan ko manga taw sa Yodah a "Pamangonen tano angkai a manga siti ago
mbaalan tano so melilibeta on sa manga kota a rakes o manga lantawa on ago manga
pintoan a petanggalan sa potaw. Rektano pen angkai a inged ka kagiya
piyangongonotanan tano so Allah a Tohan tano, na bigan tano niyan sa kalilintad ko
mbalabala." Na miyamangon siran sa manga siti ago mitegompiya siran.
8 Si Asa na aden a manga sondaro niyan a poon sa Yodah a telo gatos nggibo a
kikagogomaanan sa manga ala a kelong ago manga bangkaw, ago dowa gatos ago walo
polo nggibo a poon ko mbatabataa a Baniyamin a aden mambo a manga roroni a kelong
iran a rakes o manga pana. Langon ai mawaraw a manga sondaro.
Tiyaban i Asa so manga Itiyopiyan
9 Si Sirah a Itiyopiyan na siyondolan iyan a Yodah a ped iyan so isa ka miliyon a manga
sondaro niyan ago telo gatos a manga karo sa katidawa, na miyaoma iran a siti a Marisah.
10 Lominiyo si Asa sa kapagatowi niyan kiran na miyakasengata siran sii ko Balintad sa
Sipatah a marani sa Marisah.
11 Na tiyalowan i Asa so Allah a Tohan iyan a tig iyan a "Ya Allah, da den a isa bo a ba
pekatabang a rowar reka ko da a manga bager iran sa katabana iran ko manga ala i bager a
di siran. Tabangi kami ngka, ya Allah a Tohan ami ka seka i sasanaan ami, na sii ko
Ingaran ka na pagatowan ami angkai a makapal a manga sondaro. Ya Allah, seka i Tohan
ami; di ngka pekidaagen a ginawa ngka ko manosiya."
12 Na tiyaban o Allah so manga sondaro a Itiyopiyan sii ko kamamasaan i Asa ago so

manga sondaro a Yodah. Miyamalagoy so manga Itiyopiyan
13 Ogaid na piyanaloba siran i Asa ago so manga sondaro niyan taman den sa Gerar.
Miyapolang so manga Itiyopiyan; miyanga sasasa siran ko hadapan o Allah ago so armi
niyan. Na tanto a mala a miyateban o manga sondaro a Yodah.
14 Piyaminasa iran so manga siti ko melilibeta sa Gerar ka riyaot a kalek ko Allah so
manga taw ron. Pitebanan iran so langon angkai a manga siti, ka tanto a madakel a tamok
roo.
15 Giyobat iran pen so manga kampo o manga pananagikor sa pangangayamen na
inawidan iran so tanto a madakel a manga bilibili, kambing ago manga onta. Oriyan iyan
na komiyasoy siran sa Yarosalim.
2 MANGA RIKORD 15
So manga Galebek i Asa
Mitemo so Roh o Allah ki Asariyas a wata i Odid

2 Na lominiyo sekaniyan ka inalaw niyan si Asa na pitero iyan on a "Pamakinega ko niyo,
hey Asa ago sekano langon a manga taw sa Yodah ago Baniyamin! Sisii rekano so Allah
sii ko kapepangongonotani niyo ron. O di niyo sekaniyan dii mbanogen na ketoon iyo,
ogaid na o talikodi niyo sekaniyan na telikodan kano niyan mambo.
3 Miyatey den a da a tito a Tohan o manga Israil, da a imam a makapengendao kiran ago
da kitab iran.
4 Ogaid na igira a pekeregenan siran na pesengor siran ko Allah a Tohan o Israil.
Pembabanogen iran sekaniyan na peketoon iran.
5 Sangkoto a manga gawii na da a ba pekalalakaw sa mawatan a makasasarig, ka tanto a
masasamok so langon o manga taw ko manga inged.
6 So isa a nasiyon na peridoon iyan so isa a nasiyon, na so isa a siti na peridoon mambo o
ped a siti ka pepakaawiden o Tohan a akal iran ko mbarambarang a kamaregenan.
7 So sekano ron peman na pakababager kano ago di kano peloke, ka mbalasan so galebek
iyo."
8 Kagiya maneg i Asa angkai a katero ago so miyaalamat o nabi Asariyas a wata i Odid
na kiyaoyatan sekaniyan. Piyangowa niyan on so langon o manga barahala sii ko dalem a
Yodah ago giya Baniyamin ago sii ko manga siti a miyaagaw niyan ko kapalawan a inged
sa Ipraim. Na inompiyaan iyan so aparan o Allah a matatago ko danga o liyoliyowan o
Timplo o Allah.
9 Linimod i Asa so langon a taw sa Yodah ago sa Baniyamin taman ko manga taw a poon
ko manga inged a Ipraim, Manasih ago Simiyon a kibabaling kiran, ka kagiya madakel a
manga taw sa Israil a tomiyapi kiran sii ko kiyailaya iran a sisii so Allah ki Asa.
10 Miyalimod siran sa Yarosalim ko ikatelo olan ko ikasapolo ago lima ragon a
kandadato i Asa.
11 Sangkoto a gawii na mikorban siran ko Allah sa pito gatos a manga sapi ago pito
nggibo a manga bilibili ago manga kambing a poon ko miyateban iran sa Gerar.
12 Mimbaal siran sa kapasadan sa pengongonotanan iran so Allah a Tohan o manga apo
iran sa iklas ko poso iran ago niyawa iran.
13 So apiya antawaa i menda mangongonotan ko Allah a Tohan o Israil na kebono apiya
anda ko maito o di na mala ndatar so mama ago so babay.
14 Misemaya siran ko Allah a rakes o tanto a matanog a kapepemeseg iran a oonotan o
kapepakaoniya ko manga bogiyong.
15 Inikababaya o langon a taw sa Yodah so kiyasemaya iran ka kagiya misemaya siran sa
iklas ko poso iran. Mateterang siran mangongonotan ko Allah na inampon iyan siran, na
bigan iyan siran sa kalilintad ko mbalabala.
16 Kinowaan mambo i Asa sa kababaii so ina iyan a bai a si Maakah ka kagiya mimbaal
sekaniyan sa piyakasisingay a polaos a toos ko katohanan a Asirah. Piyata ini i Asa ago
riyopet iyan ago tiyotong iyan sii ko Balintad a Kidron.
17 Apiya pen da pangowaa on i Asa so langon a aparan ko manga barahala sii ko manga
bobongan na iklas a kambabayorantang iyan ko Allah ko tenday a omor iyan.
18 Inisoled iyan ko Timplo o Tohan so manga pirak, bolawan ago manga kasangkapan a
inisenggay niyan on ago so ama iyan.
19 Da den peman a katidawa taman ko ikatelo polo ago lima ragon a kandadato iyan.
2 MANGA RIKORD 16
So Kaposan a manga Ragon i Asa
Sii ko ikatelo polo ago nem ragon a kandadato i Asa na si Baasa a dato sa Israil na
siyondolan iyan a Yodah. Pikotaan iyan so siti a Ramah kaan iyan maren so kapeliyo ago
kapesoled o apiya antawaa ko masasakop i Asa a dato sa Yodah.
2 Sabap roo na kinowa i Asa so manga pirak ago bolawan ko petegoan sa tamok ko
Timplo o Allah na piyakiwit iyan ai ki Binhadad a dato sa Siriya a ndadato sii sa
Damasko a piyakitero iyan on a
3 “Pesadanowa ta a dowa a datar o ama aken ago so ama a ka. Katii a piyakiwitan ko
seka sa bolawan ago pirak. Na, barobaa ngka so kapasadan ka ago si Baasa a dato sa
Israil kaan iyan kawai so inged aken."
4 Miyayon so dato Binhadad ko pitero o dato Asa na siyogo iyan so manga olowan o
manga sondaro niyan a nggobat ko manga siti sa Israil. Na miyaagaw iran a Idiyon, Dan,
Abilbitmaakah taman ko langon a peteliyongan a manga siti sa inged a Naptali.
5 Kagiya maneg ai i Baasa na ginekan iyan a kapekotai niyan sa Ramah na inawaan iyan
angkai a galebek.
6 Mandiyadi na siyogo i Asa so langon a manga mama sa Yodah na piyangawidan iran a
poon sa Ramah so manga ator ago manga tarakayo a inosar roo i Baasa a ipekota iyan on.
Na inikota ini o dato Asa ko manga siti a Giba ago Mispah.
7 Sangkoto a masa na so nabi Hanani na somiyong ki Asa ago pitero iyan on a "Sabap sa
aya siyanaan ka na so dato sa Siriya a kena a ba so Allah a Tohan ka na miyakapelos
baden ko lima ngka so manga sondaro o dato sa Siriya.
8 Ba di manga babager so manga sondaro a Itiyopiya ago giya Libiya a tanto a madakel i
manga karo ago manga koda? Ogaid na sabap sa siyanaan ka so Allah na piyalad iyan
siran reka.
9 Ka pepelayasen milay o Allah so dalem a doniya kaan iyan mapakabager so siran oto a
mbabayorantang rekaniyan so manga poso iran. Minggolaola ka sa kalalalongan, na
ipoon imanto na tatap den a di ngka dii kapakatidawa."
10 Kagiya maneg ai i Asa na kiyararangitan iyan so nabi na kiyalaboso niyan. Sa masa
oto na piyangarasiyan iyan pen so ped ko manga pagtaw niyan.
11 So langon o miyanga sosowasowa sii ko kiyandato i Asa ipoon sa poonan taman sa

kaposan na miyamangisorat ko Ribro a Totolan ko manga Dato sa Yodah ago sa Israil.
12 Sii ko ikatelo polo ago siyaw ragon a kandadato i Asa na tiyanaan a sakit so manga ai
niyan. Na apiya pen miyakaregen na da sekaniyan pagapas ko Allah, ka sii baden
miyagapas ko manga pamomolong.
13 Na sii ko ikapat polo ago isa ragon a kandadato i Asa na miyatay sekaniyan a initapi
ko manga apo iyan a domedeke.
14 Inilebeng iran ko kobor a piyakimbaalan iyan a rek iyan sii ko Siti o Daod. Piyakaiga
iran sekaniyan ko kaban a tatagoan sa manga palapa ago pitibarangan a manga
ikekamotan, na mirapog siran sa tanto a mala a iniselasela iran on.
2 MANGA RIKORD 17
Si Yahosapat a dato sa Yodah
So wata i Asa a si Yahosapat na aya on miyakasambi a dato, na piyakabager iyan so

tindeg iyan sa kapakipetidawa iyan sa Israil.
2 Piyanagoan iyan sa manga sondaro so langon a kikokotaan a manga siti sa Yodah ago
mimbaal sekaniyan pen sa manga kampo a sondaro sii sa dalem a Yodah taman ko manga
siti sa Ipraim a miyaagaw i Asa a ama iyan.
3 Sisii so Allah ki Yahosapat ka kagiya sii ko kangoda niyan pen na siyowa iyan so
manga okitokit o Daod a apo iyan. Da niyan angaya so katohanan a Baal
4 Ka pepangongonotanan iyan baden so Tohan o ama iyan ago petomanen iyan so manga
sogoan iyan a kena a ba niyan pesowaa so manga okitokit o manga dato sa Israil.
5 Piyakambeken o Allah so ndatoan a Yodah sii ko kandadatoi niyan on. So langon o
manga taw ron na pegowitan iran si Yahosapat sa manga pamemegayan, na tanto a
miyakala so kakawasaan iyan ago bantogan.
6 Mipagiiklas so poso iyan ko manga okitokit o Allah. Piyangowa iyan on sa Yodah so
manga aparan ko manga barahala sii ko manga bobongan, ago so manga polaos a toos ko
katohanan a Asirah.
7 Sii ko ikatelo ragon a kandadato iyan na siyogo iyan so manga sanasanaan iyan a siki
Binhail, Obadiyas, Sakariyas, Nitanil ago si Mikayas a makapangendao sii ko manga siti
sa Yodah.
8 Moonot kiran so manga Libitiyo a siki Simayas, Nitaniyas, Sibadiyas, Asahil, Tobiyas
ago si Tobadoniyas, ago so manga imam a si Ilisama ago si Yahoram.
9 Aawidan iran so Ribro a so Kitab o Allah na pegeneben iran so langon o manga siti sa
Yodah a ipepengendao iran ai ko manga taw.
10 Tomiyana so kalek ko Allah ko langon a ndatoan ko melilibeta sa Yodah na da siran

pakitidawa ki Yahosapat.
11 So ped a manga Pilistiyo na inowitan iran sekaniyan sa manga pamemegayan ago
manga pirak a bowis, na inowitan sekaniyan o manga taw sa Arabiya sa manga
pangangayamen a pito nggibo ago pito gatos a manga bilibili ago pito nggibo ago pito
gatos a manga kambing.
12 Tanto a pepegosor so gees i Yahosapat, na miyangon sekaniyan sa manga kota ago so

manga siti sii sa Yodah
13 A peteliyongan iyan sa madakel a manga tamok.
Sii sa Yarosalim na tatagoan iyan pen sa manga tadiyam a manga sondaro
14 A so kinilistaan kiran na mipepasod ko manga mbawataan a kaapedan kiran. Si
Adnah na aya komandir o manga sondaro a poon ko manga mbawataan sa Yodah na aden
a telo gatos nggibo a manga sondaro niyan.
15 Aya talondog on a komandir na si Yahohanan a aden a dowa gatos ago walo polo
nggibo a manga sondaro niyan;
16 Tomalondog on na si Amasiyas a wata i Sikri a piyalad iyan a ginawa niyan ko
kapepanalagad ko Allah, na aden a dowa gatos nggibo a manga sondaro niyan.
17 Aya komandir o manga sondaro a poon ko manga mbawataan sa Baniyamin na si

Iliyada a mawaraw a sondaro a pagoolowanan iyan so dowa gatos nggibo a manga
sondaro a kikagogomaanan sa manga pana ago manga kelong.
18 Aya talondog on na si Yahosabad a aden a magatos ago walo polo nggibo a manga
sondaro niyan a makatitiyagar makitidawa.
19 Giyai so manga sondaro a pepanalagad ko dato sii sa Yarosalim a liyo ko manga
sondaro a piyanago iyan ko kikokotaan a manga siti sa dalem a Yodah.
2 MANGA RIKORD 18
Si Yahosapat ago si Ahab
Samaoto na tanto a miyakala so kakawasaan ago bantogan i Yahosapat, na

miyakipagabanga sekaniyan ki Ahab a dato sa Israil a nggolalan ko kiyapakakemonga.
2 Kagiya da mamakapira ragon na somiyong sekaniyan ki Ahab ka inibentel iyan roo sa
Samariya. Somiyombali si Ahab sa madakel a bilibili ago manga sapi a inikandori iyan ki
Yahosapat ago so manga ped iyan, na inakolan iyan sekaniyan sa kagobata iran sa Ramot
Giliyad.
3 Iniise i Ahab ki Yahosapat a "Ba ako ngka pagonoti sa kapakipetidawa aken sa Ramot
Giliyad?"
Inisembag i Yahosapat a "Oway, saken na datar ka, na so manga sondaro aken na datar
o manga sondaro ngka; pagonotan ami seka ko katidawa.
4 Ogaid na tig pen i Yahosapat a "Makimosawir ta a daan ko Tohan."
5 Mandiyadi na linimod i Ahab so manga nabi, a pat gatos langon a manga mama na
iniise iyan kiran a "Ba ami nggobata a Ramot Giliyad o di na di den?"
"Ika roo den," a inisembag iran, "ka peladen ai o Tohan ko lima ngka."
6 Ogaid na iniise i Yahosapat a "Ba da a nabi o Allah sii a ron makaokit a kakeisei ta ko
Allah?"
7 Tig i Ahab a "Aden pen a sakataw a mama a ron tano kiise so Allah, ogaid na
ipekegowad aken sekaniyan ka da a pekealamat iyan mipantag raken a ba mapiya, ka
lalayon den marata. Sekaniyan si Mikayas a wata i Imlah."
"Di patot o ba anan teroa o dato!" a tig i Yahosapat.
Mandiyadi na tiyalowan i Ahab so isa ko manga sanasanaan iyan na tig iyan a "Wita
ngka sii nggagaan si Mikayas a wata i Imlah!"
Liyalangan o Nabi Mikayas si Ahab
9 Samaoto na so dato sa Israil ago si Yahosapat a dato sa Yodah a kindiditar sa manga

kimon iran ko kadadatoi na kioontod ko manga korsi iran ko darpa a pegegikan ko marani
ko gimowa a isoled sa Samariya, na pepangalamat so langon o manga nabi ko hadapan
iran.
10 So isa kiran a si Sidikiyas a wata i Kinaanah na miyakambaal sa manga panga a potaw
na pitero iyan a "Giyai i pitero o Allah: Ipenidong ka ini ko manga Isiriyan taman sa
mabinasa siran!"
11 Na datar ai mambo so pekealamat o langon a ped a manga nabi a di iran dii teroon a
"Gobata ngka a Ramot Giliyad ka pekataban ka, ka peladen ai o Allah ko dato!"
12 Na so mama a siyogo a merapit ki Mikayas na pitero iyan on a "Ilaya ngka man ka

maiisaisa so ped a manga nabi a pegalamaten iran so kapiya a bobolos o dato. Na
pakaayona ngka on so katero o ka na alamata ngka mambo so mapiya."
13 Ogaid na pitero i Mikayas a "Matamataan ko kaooyagoyag o Allah ka aya bo a
mapetero aken on na so bo so pakipetero raken o Tohan aken."
14 Sii ko kiyapakapangadap iyan ko dato Ahab na iniise on o dato a "Ba kami

pakipetidawa sa Ramot Giliyad o di na di den?"
"Gobata ngka ka pekataban ka," a inisembag i Mikayas; "kepalad siran reka den."
15 Na pitero on o dato a "Ba di miyakapira ko seka den mapakasepa sa aya bo a peteroon

ka raken na so tito a benar sii ko Ingaran o Allah?"
16 Tig i Mikayas a "Miyailay aken so langon a manga Israil a miyamangiparak ko manga

bobongan a lagid o manga bilibili a da a ba on petegikor, na pitero o Allah a 'Giyangkai a
manga taw na da a kadnan iran. Mbabaling so oman i isa kiran a lomilintad.' "
17 Na pitero o dato sa Israil ki Yahosapat a "Ba ko reka da matero a da den a pegalamaten

iyan a mapiya makapantag raken ka marata bo den?"
18 Pitero pen i Mikayas a "Na, pakinega ngka pen imanto so pitero o Allah! Miyailay
aken so Allah a moontod ko korsi iyan a ped iyan so langon a pepanalagad on sa
kasorgaan a kititindeg ko melilibeta on sii ko kawanan iyan ago diwang.
19 Na pitero o Allah a 'Antawaa i pekaagak ki Ahab sa kanggobata niyan sa Ramot
Giliyad kaan roo matay?', na so isa on na miyosawir sa datar ai na so isa na miyosawir sa
datar oto.
20 Sa kaposan na aden a isa a niyawa a miyadap ko Allah a tig iyan a 'Saken i magagak
on.'
" 'Andamanaya?' a iniise o Allah.
21 “ 'Song ako roo a pakapeteroon ko sa manga kabokegan so langon o manga nabi i

Ahab.'
" 'Ika roo na nggolaolaa ngka ini ka keagak ka sekaniyan,' a tig o Allah."
22 Pitero pen i Mikayas a "Na giyanan i miyanggolaola, ka tiyagoan o Allah sa bokeg a

niyawa so manga ngari o langon angkai a manga nabi ngka. Ka kiyokom den o Allah so
kapemoralai reka."
23 Na giyoto a si Sidikiyas a wata i Kinaanah na miyobay ki Mikayas na tingel iyan sa

bies a iniise iyan on a "Anda miyokit so Roh o Allah ko kiyapakapoon iyan raken sa
kapakipembitiyarai niyan reka?"
24 Inisembag on i Mikayas a "Ketokawan ka sii ko gawii a petepok ka ko soled o

pageemaan a rowang!"
25 Na giyoto a inisogo o dato Ahab a "Dakepa niyo si Mikayas na pakakasoya niyo ki

Amon a so gobirnador ko siti ago sii ki Yowas a wata o dato
26 Na teroa niyo a 'Giyai i inisogo o dato: Kalabosowa niyo angkai a mama a da den a ba
niyo ron imbegay a rowar ko paan ago ig taman sa makakasoy ako a da kakaidi.' "
27 Na tig i Mikayas a "O pen o makakasoy ka a da kakaidi na da tero so Allah a

nggolalan raken!" Na inipagoman iyan tero a "Tanodi niyo so manga katero aken, sekano
langon a manga taw!"
So Kiyapatay i Ahab
28 Mandiyadi na lomiyalakaw si Ahab a dato sa Israil ago si Yahosapat a dato sa Yodah

sa kanggobata iran sa Ramot Giliyad.
29 Pitero i Ahab ki Yahosapat a "Amay ka makaoma ta roo a makipetidawa na magiring
ako sa salakaw a taw. Ogaid na sosolota ngka den so nditaren ka sa kadadatoi." Na
somiyong so dato sa Israil ko katidawa a miiring sa kena a ba dato.
30 Samaoto na piyandoan o dato sa Siriya so manga olowan ko manga karo niyan a tig
iyan a "Di kano pakipetidawa ko apiya antawaa a maito o di na mala a makaliyoliyo ko
dato sa Israil!"
31 Na kagiya mailay o manga komandir ko manga karo si Yahosapat na pitero iran a
"Kaoto so dato sa Israil!" na miyantap siran on sa kasondoli ran iran on. Ogaid na
miyakagoraok si Yahosapat na inogopan sekaniyan o Allah. Piyakawatan siran rekaniyan
o Tohan
32 Ka miyasarino o manga olowan a kena a ba giyoto so dato sa Israil na ginekan iran
somaloba.
33 Ogaid na so isa a sondaro a Isiriyan a miyanarbak mana na miyasalak iyan masogat so

dato sa Israil sii ko pageletan o sompatan o raben iyan. Na inigoraok o dato ko
mangongolin ko karo niyan a "Peto ka! Palagowin ako ngka ko dii tidawaan ka
kiyapalian ako!"
34 Sii ko miyababas a alongan na pekeisegan so dii katidawa, na maaaray so dato Ahab

sii ko karo niyan a makasasangor ko manga Isiriyan taman ko kiyaperimon iyan. Na
kagiya sedep so alongan na miyatay sekaniyan.
2 MANGA RIKORD 19
Miyakakasoy si Yahosapat a dato sa Yodah sii ko torogan iyan sa Yarosalim a da a
rayorayo a ginawa.
2 Ogaid na inalaw sekaniyan o nabi Diho a wata i Hanani na pitero iyan ko dato a "Ba
patot a kapagogopi ngka ko manga rarata ago so kapagampili ko siran oto a ipekegowad
iran so Allah? Sabap sa pinggolaola ngka ini na kiyararangitan ka o Allah.
3 Inonta bo na aden a madadalem reka a mapiya, ka kagiya piyamenas ka ko inged so
manga polaos a toos ko katohanan a si Asirah na mananamar ka sa kapepangongonotani
ngka ko Tohan.
Tomiyoro si Yahosapat sa manga Pangongokom

4 Roo mababaling si Yahosapat sa Yarosalim, ogaid na omanoman sekaniyan lomalakaw
sii ko manga pagtaw niyan ipoon sa Birsiba na taman ko kapalawan a inged sa Ipraim ka
pepamakakasowin iyan siran peroman sii ko Allah a Tohan o manga apo iran.
5 Piyanoroan iyan sa manga pangongokom so dalem a inged sii ko oman i kokotaan a siti
sa Yodah.
6 Pitero iyan kiran a "Pendapati niyo piyapiya so kapepangokom iyo, ka kena a ba kano
pepangokom pantag ko manosiya ka pantag ko Allah a sisii rekano igira a pegokasen iyo
so kokoman.
7 Kagiya ka maoto na kaleken iyo so Allah ago piyapiya kano mangokom, ka sii ko Allah
a Tohan tano na da den a bibid on a kokoman o di na kaperamiramig aya pen o ba so
katarima sa tendan.
8 Sii pen sa Yarosalim na initoro i Yahosapat so ped ko manga Libitiyo, manga imam ago
manga olowan o manga mbawataan sa Israil kaan iran pekekokom so kapekesogoka ko
Kitab o Allah ago so manga di pegayonayonan o manga magiinged sa Yarosalim.
9 Na piyandoan iyan siran a tig iyan a "Tomana niyo so manga sangan iyo sa kalek ko
Allah sii ko kasasarigi rekano ago iklas ko poso iyo.
10 So oman i rido a pekikokom rekano o ped iyo a manga magiinged sii ko manga siti a
apiya anda ko kapamono o di na mipantag ko kasogoka ko kitab, manga sogoan, manga
kokoman o di na manga taritib na paliyogat a pakaiktiyaren iyo siran sa di iran
kapakandosa ko Allah, ka o ba baden makatana rekano so rarangit iyan ago sii ko manga
pagari niyo. O nggolaolaa niyo ai na di kano kesala.
11 Si Amariyas a so maporo a imam na aya rekano magoolowan ko apiya antonaa
mipantag ko Allah, na si Sibadiyas a wata i Ismail, a so olowan o mbatabataa a Yodah,
na aya rekano magoolowan mipantag ko dato. So manga Libitiyo na aya niyo manga
sanasanaan a pepegogop rekano. Kekawaraw kano na nggolalanen iyo angkai a manga
insarat! Na pengnin ko a sisii so Allah ko siran oto a dii nggolaola sa ontol!"
2 MANGA RIKORD 20
Tiyaban i Yahosapat a Mowab ago giya Amon
Kagiya maipos ai na so manga Mowabiyo, manga Amoniyo a rakes o ped ko manga

Miyoniyo na miyakitidawa siran ki Yahosapat.
2 Na aden a manga mama a miyakaoma ki Yahosapat a pitero iran on a "Aden a makapal
a manga sondaro a pesondol reka a makapopoon sa Idomiya roo sa sabala a Maatay a
Ragat. Sisii siran den imanto sa Hasason Tamar" (Giyanan a In Gidi).
3 Miyalek si Yahosapat na kiyokom iyan sa ginawa niyan a pagisean iyan so Allah, na
inipanton iyan so kapowasa ko dalem a Yodah.
4 Mandiyadi na so manga taw sa Yodah na miyalimod sii sa Yarosalim sa kapemangni
ran ko Allah sa tabang; miyakaoma siran a poon ko langon o manga siti sa Yodah.
5 Na tominindeg si Yahosapat ko malilimod a manga taw sa Yodah ago sa Yarosalim sii

ko Timplo o Allah ko onaan o bago a lamalama
6 Na miyangangarapan a tig iyan a "Ya Allah a Tohan o manga apo ami, seka i Tohan a
sesan sa kasorgaan; seka i ndadato ko langon a ndatoan o manga nasiyon. Sisii reka so
kapaar ago gees, na da den a ba reka pekaato.
7 Hey Tohan ami, piyamogaw ngka so kibabaling sangkai a lopa sii ko kapepekaantap
kiran o manga pagtaw ngka a manga Israil, na inibegay ngka ini ko kiyababadan ki
Ibrahim a matangan iran sa taman sa pakataman.
8 Imanto na mababaling siran on na miyangon siran on sa Timplo a pesimbaan reka.
9 Pitero iran a 'O aden a makatalingoma rekami a morala apiya anda ko katidawa,
paniyakit o di na taon na song kami sangkai a Timplo ago tindeg kami ko danga iyan sii
ko hadapan ka, ka sisii ka sangkai a Timplo. Na nggoraok kami reka sa tabang sii ko
kareregeni rekami na pagamponen kami ngka ago sebeten.'
10 “Ogaid na imanto na pepekaoma so manga sondaro a Amoniyo, manga Mowabiyo ago

manga Idomiyan! Isako makaliyo so manga Israil sa Misir na da ngka kiran pakigobaten
angkai a manga inged. Sabap roo na sinilayan siran baden o manga apo ami na da iran
siran binasaa.
11 Na ilaya ngka so imbalas iran rekami! Pekaoma siran sii sa kambogawa iran rekami
ko lopa a inibegay ngka a kawali ami!
12 Hey Tohan ami, ba ngka siran di ndanega? Da a gees ami a ipagato ami sangkai a
makapal a manga sondaro a penggobat rekami. Di ami katawan o antonaa i
mapenggolaola mi, ogaid na pepangniyan ami seka sa tabang."
13 Samaoto na tomitindeg roo ko hadapan o Allah so langon o manga mama sa Yodah a

rakes o manga karoma iran ago manga wata.
14 Mandiyadi na mitemo so Roh o Allah ko isa a Libitiyo a tomitindeg roo. Aya ngaran
iyan na si Yahasiyal a wata i Sakariyas, a wata i Binayas, a wata i Yayal a wata i
Mataniyas a manga moriyataw i Asap.
15 Na pitero iyan a "Hey Dato Yahosapat, pamakineg ka ago sekano langon a kibabaling
sa Yodah ago sa Yarosalim! Giyai i kabasa o Allah sii rekano: Di kano pekelek o di na
pekedai sa inam sabap sangkai a makapal a manga sondaro, ka so katidawa na kena a ba
niyo rek, ka rek o Allah.
16 Mapita na dasega niyo siran ko kapetekedeg iran ko okita sii sa Sis. Keoma niyo siran
ko kaposan o alog a ipesong ko Disirto sa Yarowil.
17 Di den kailangan o ba kano kiran pakitidawa. Pagayan kano baden; sii kano den ko
katatagoan rekano na mbantayi niyo so kasebeta rekano o Allah. Hey manga taw sa
Yodah ago giya Yarosalim, di kano pekelek o di na pekedai sa inam! Mapita na dasega
niyo siran ka sisii rekano so Allah!' "
18 Somiyodiyod si Yahosapat a miseseko so paras iyan ko lopa a lagid mambo o langon o

manga taw sa Yodah ago sa Yarosalim na miyamanimba siran ko Allah.
19 Mandiyadi na miyamanindeg so ped a manga Libitiyo a maaped ko manga mbawataan
i Kohat ago si Korah na piyodi iran so Allah a Tohan o Israil sa tanto a matanog.
20 Sii ko teked a kapipita na somiyong siran ko Disirto sa Tikowa. So den so kangganat
iran na tominindeg si Yahosapat na pitero iyan a "Pamakinega ko niyo, hey manga taw sa
Yodah ago Yarosalim! Sarigi niyo so Allah a Tohan iyo ka pekabeken kano. Paratiyayaa
niyo so katero o manga nabi niyan ka pekapiya so bobolos iyo."
21 Oriyan o kiyapakisinabota iyan ko manga taw na tomiyoro sekaniyan sa manga
makapegidaida ko Allah sa kapodiya iran ko kakasi o kasosoti niyan. Sii ko kapelalakaw
iran a pepangonaan siran ko manga sondaro na giyai i ipepamagidaida iran: "Panalamati
niyo so Allah, ka ketatap so limo iyan sa taman sa pakataman!"
22 So den so kiyapoon iran mamagidaida ago modi na linibog o Allah so manga sondaro
a Amoniyo, manga Mowabiyo ago manga Idomiyan a somiyondol sa Yodah na tiyaban
siran.
23 So manga Amoniyo ago manga Mowabiyo na sii siran baden miyakitidawa ko manga
Idomiyan na piyamono iran siran. Oriyan o kiyapolanga iran ko manga Idomiyan na
miyagonaya siran tidawa taman sa miyalengan siran mamatay.
24 Kagiya makaoma so manga sondaro a Yodah sii ko darpa a kelangkaw iran on so
disirto na miyailay iran a kikakekelit ko lopa so langon a bangkay o manga ridoay iran a
da den a ba kiran miyakapagoyag.
25 Somiyong roo si Yahosapat ago so manga pagtaw niyan ka pengowaan iran so

mapeteban iran. Miyatoon iran so tanto a madakel a manga kasangkapan, manga nditaren
ago ped pen a manga nganin a mala i arga a mala ini a di so kekena iran mawid. Telo
gawii a kapepanimoa iran on sabap ko kadakel iyan.
26 Sii ko ikapat gawii na mitimotimo siran ko Balintad sa Birakah a ron iran piyodi so
Allah. Giyanan i sabap a pembetowan den angkoto a darpa sa Balintad a Birakah taman
imanto.
27 Oriyan iyan na komiyasoy sa Yarosalim so langon a taw sa Yodah ago giya Yarosalim
a pagoolowanan siran i Yahosapat. Kikabababaya siran ka piyakidaag kiran o Allah so
manga ridoay iran.
28 Somiyoled siran sa Yarosalim ago miyamanaros ko Timplo o Allah a oonotan o dii
mboboniboniyan sa manga kotiyapi, manga alpa ago manga bogiyong.
29 Kagiya maneg o langon a ndatoan ko ped a manga nasiyon o andamanaya i
kiyapakitidawa o Allah ko manga ridoay o Israil na riyaot siran a kalek ko Tohan.
30 Sabap roo na lomilintad so ndatoan i Yahosapat ka bigan o Tohan iyan sa kapakadeke
ko mbalabala.
So Kaposan o Kandadato i Yahosapat
31 Isako mabaloy si Yahosapat a dato sa Yodah na telo polo ago lima ragon a idad iyan,
na mindato sekaniyan sa Yarosalim sa miyakadowa polo ago lima ragon. Si ina iyan na si
Asobah a wata i Sili.
32 Siyowa iyan so manga okitokit i Asa a ama iyan na da niyan den awai, ka
miyakanggolaola sekaniyan sa ontol ko hadapan o Allah.
33 Apiya pen oto na da pangowaa so manga aparan ko manga barahala sii ko manga
bobongan ka da pen makapagiklas so manga poso o manga taw ko kapepangongonotani
ran ko Tohan o manga apo iran.
34 So ped a miyanga sosowasowa ko kandadato i Yahosapat ipoon sa poonan taman sa

kaposan na misosorat ko manga rikord i Diho a wata i Hanani a sii madadalem ko 'Ribro
a Totolan ko manga Dato sa Israil.'
35 Miyakaisa a masa na miyakipagabanga si Yahosapat ki Ahasiyas a dato sa Israil a dii

nggolaola sa madakel a kamarataan.
36 Miyagogopa siran mangembaal sa manga kapal a dii indagang, na piyangembaalan ai
roo sa Isiyon Gibir.
37 Ogaid na si Iliyasir a wata i Dodabaho a taw sa Marisah na miyaalamat iyan so marata
mipantag ki Yahosapat a tig iyan a "Sabap sa miyakipagabanga ka ki Ahasiyas na
mbinasaan o Allah so pimbaalan iyo." Na miyanga gegeba so manga kapal na da den
makalayag ko kapendagang iran.
2 MANGA RIKORD 21
Miyatay si Yahosapat na minilebeng sekaniyan a ped o manga apo iyan sii ko Siti o Daod,
na si Yahoram a wata iyan na aya on somiyambi a dato.
Si Yahoram a dato sa Yodah
2 Aya manga pagari i Yahoram na siki Asariyas, Yakiyal, Sakariyas, Asariyaho, Mikail
ago si Sipatiyas; langon siran manga wata i Yahosapat a dato sa Yodah.
3 Piyamegan siran o ama iran sa madakel a manga pamemegayan a pirak, bolawan ago
ped pen a manga ala i arga a nganin, na piyakikibir iyan ko oman i isa kiran so isa ko
kikokotaan a manga siti sa Yodah. Ogaid na inibegay niyan so kadato ki Yahoram ka
sekaniyan i kaka a wata iyan.
4 Ogaid na kagiya mapakambeken piyapiya i Yahoram a ginawa niyan sii ko ndatoan o
ama iyan na piyamono iyan langon so manga pagari niyan a rakes o ped ko manga olowan
sa Israil.
5 Miyakatelo polo ago dowa ragon a idad i Yahoram isako mabaloy a dato na mindato sa
Yarosalim ko miyakawalo ragon.
6 Siyowa iyan so manga okitokit o manga dato sa Israil a datar o sowasowai o pamiliya i
Ahab ka kagiya miyapangaroma niyan so wata i Ahab. Minggolaola sekaniyan sa marata
sii ko hadapan o Allah
7 Ogaid na di kabaya o Allah o ba niyan binasaa so dii kapakandato o manga kebabadan
ki Daod, ka mimbaal sekaniyan sa kapasadan mipantag ki Daod ago minitopa niyan on a
taman sa pakataman a dii kapakandato o manga moriyataw niyan.
8 Sii ko kandadato i Yahoram na somiyopak a Idomiya sa Yodah na tomiyoro siran sa rek

iran a dato.
9 Sabap roo na si Yahoram a rakes o manga olowan o manga sondaro niyan ago so langon
a karo niyan na giyobat iran a Idomiya. Na linikopan siran o manga Idomiyan ogaid na
kiyaleseban iyan siran sii ko kagagawii ago miyakapalagoy.
10 Taman den imanto na somosopak a Idomiya sa Yodah. Na somiyopak mambo a siti a
Libnah sangkoto den a masa ka kagiya tiyalikodan i Yahoram so Allah a Tohan o manga
apo iyan.
11 Liyo san pen na miyangembaal sekaniyan sa manga aparan ko manga barahala sii ko
manga bobongan sa Yodah na piyakandosa niyan so manga taw sa Yarosalim a nggolalan
ko kapesimbaa iran on, na diyadag iyan so manga taw sa Yodah.
12 Na miyakatarima si Yahoram sa sorat a poon ko nabi Iliyas a aya oni niyan na "Giyai i
pitero o Allah a Tohan o apo ka a si Daod: Da ngka sowaa so manga okitokit o ama a ka a
si Yahosapat o di na si Asa a dato sa Yodah.
13 Ka aya siyowa a ka na manga okitokit o manga dato sa Israil na inagak ka so manga
taw sa Yodah ago sa Yarosalim sa kasimba iran sa manga barahala a datar o siyowa o
pamiliya i Ahab. Piyamono o ka pen so manga pagari ngka a ped ko pamiliya i ama a ka
a manga pipiya siran a di seka.
14 Kagiya ka maoto na siksaan ka o Allah ago so manga pagtaw ngka sa tanto a maregen
a rakes o manga wata a ka, so manga karoma ngka ago so langon taman a rek ka.
15 So seka peman na ikerasay ngka so malipedes a paniyakit sa tinai a pekelonsanan
oman gawii taman sa mapakaliyo niyan so manga tinai ngka."
16 Na piyakirido o Allah si Yahoram ko manga Pilistiyo ago manga Arab a kibabaling ko

marani ko manga taw sa Itiyopiya.
17 Giyobat iran a Yodah ago siyoledan iran, na piteban iran so langon a tamok a
miyatoon iran ko torogan o dato ago piyamiyag iran pen so manga wata iyan ago manga
karoma. Sabap roo na da den a ba miyalamba rekaniyan ko manga wata iyan a rowar ki
Ahasiyas a so ariyari.
18 Kagiya maipos ai langon na piyakatelogedam o Allah si Yahoram sa di kebolongan a

paniyakit sii ko tinai niyan.
19 Da matey sii ko kiyapopos o dowa ragon na miyakaliyo a tinai niyan na miyatay
sekaniyan a tanto a mararasay. Na da perapog so manga pagtaw niyan sa ipeselasela iran
on a datar o kiyaperapogi ran ko manga apo iyan.
20 Telo polo ago dowa ragon a idad i Yahoram isako mabaloy a dato na mindato
sekaniyan sii sa Yarosalim ko miyakawalo ragon. Miyatay sekaniyan a da den a ba
rekaniyan mimboko; minilebeng sekaniyan ko Siti o Daod ogaid na kena a ba sii ko
pekoboran ko manga dato.
2 MANGA RIKORD 22
Si Ahasiyas a Dato sa Yodah
Sa da pen ai isako aden a gomiyobat sa Yodah a ped o manga Arab na miyapamono iran
langon so manga wata i Yahoram a rowar ki Ahasiyas a so ariyari. Sabap san na so
manga taw sa Yarosalim na biyaloy iran sekaniyan a dato sa Yodah a makasambi ko ama
iyan.
2 Dowa polo ago dowa ragon a idad i Ahasiyas kagiya poon ndato na mindato sekaniyan
sa miyakasaragon roo sa Yarosalim. Aya ina iyan na si Ataliyas a apo i Omri a dato sa
Israil.
3 Siyowa iyan mambo so manga okitokit o pamiliya i Ahab ka kagiya inipangendao
rekaniyan i ina iyan so kanggolaola sa marata.
4 Miyakandosa si Ahasiyas ko Allah a datar o pesowaan o pamiliya a Ahab, ka oriyan o
kiyapatay o ama iyan na siran i mimbaloy a manga mosawira iyan na inagak iran
sekaniyan ko kakebinasa niyan.
5 Tiyoman iyan so mosawir iran kagiya monot sekaniyan ki Yoram a wata i Ahab a dato
sa Israil sa kiyapakitidawa iran ki Hasail a dato sa Siriya roo sa Ramot Giliyad.
Miyaangel o manga Isiriyan si Yoram
6 Na komiyasoy sekaniyan sa Yasriil kaan kapamolongi so kiyapalii ron o manga Isiriyan
roo sa Ramot ko kiyapakatidawa iran ki Hasail a dato sa Siriya. Na si Ahasiyas a wata i
Yahoram a dato sa Yodah na inibentel iyan si Yoram a wata i Ahab roo sa Yasriil ka
kagiya kiyapalian.
7 Sii ko kinibentelen iyan ki Yoram na ininggolalan o Tohan so kiyabinasaa niyan ki

Ahasiyas. Kagiya makaoma si Ahasiyas na miyonot sekaniyan ki Yoram sa kambalaka
iran ki Diho a wata i Nimsi a pinili o Allah a aya pekapolang ko pamiliya i Ahab.
8 Kagiya dii nggolalan i Diho so indaneg ko pamiliya i Ahab na minitoona iyan so ped a
manga olowan sa Yodah ago so manga wata o manga tonganay i Ahasiyas a
miyamangonot rekaniyan na piyamono siran langon i Diho.
9 Oriyan iyan na pimbabanog iyan si Ahasiyas, na so manga pagtaw niyan na miyatoon
iran sekaniyan sii ko katetapok iyan sa Samariya. Inowit iran ki Diho na biyono iran
sekaniyan. Ogaid na inilebeng iran so bangkay niyan ka kagiya tig iran a "Apo sekaniyan
i Yahosapat a miyangongonotan ko Allah sa iklas ko poso iyan."
Na da a sakataw bo a miyalamba ko pamiliya i Ahasiyas a ba makapendato ko ndatoan.
Si Ataliyas a Bai sa Yodah
10 Kagiya katokawan i Ataliyas a ina i Ahasiyas a miyatay so wata iyan na inisogo iyan a
kapamonoa ko langon a kiyababadan ko apiya antonaa a dato a miyakandato sa Yodah.
112 Ogaid na si Yahosiba a wata a babay i dato Yahoram ago pagari i Ahasiyas na
piyanekew niyan si Yowas a so maroni a wata i Ahasiyas a poon ko ped a manga
moriyataw o dato a magaan den mabono. Na initapok iyan so wata ago so peritan on sii
ko rowang a pegigaan sii ko Timplo. Sabap san na si Yahosiba a karoma o imam a si
Yahoyada na piyagena iyan so wata a poon ki Ataliyas kaan iyan di kebono.
3 Na mitatapok den so wata sii ko Timplo o Tohan ko soled o miyakanem ragon sii ko
kandadato pen i Ataliyas ko inged.
2 MANGA RIKORD 23
So Kiyasopaka ki Ataliyas
Sii ko ikapito ragon na inasa i Yahoyada so kawaraw niyan, na miyakipesadanowa

sekaniyan ko lima kataw a manga olowan a sondaro a si Asariyas a wata i Yahoram, si
Ismail a wata i Yahohanan, si Asariyas a wata i Obid, si Maasiyas a wata i Adayas ago si
Ilisapat a wata i Sikri.
2 Ineneb iran a Yodah na tinimo iran so manga Libitiyo ago so manga olowan ko
mbawataan a poon ko langon a manga inged sa Yodah na piyakaonot iran siran sa
Yarosalim.
3 Na langon siran miyalimod ago mimbaal sa kapasadan mipantag ko dato Yowas sii ko
Timplo o Tohan. Pitero kiran i Yahoyada a "Katii so wata o dato, na makapendato
sekaniyan a aya kakitoman o initopa o Allah mipantag ko manga moriyataw i Daod.
4 Giyai i penggolaolaan niyo: Amay ka somong sii so manga imam ago so manga Libitiyo
a aya pekasangan ko Gawii a Idedeke na so ikatelo bagi rekano na penggordiya ko manga
gimowa o Timplo;
5 So isa a ikatelo bagi rekano na penggordiya ko torogan o dato, na so pen so isa a ikatelo
bagi na sii ko Onayan a Gimowa. So langon o ped a manga taw na sisii ko lamalama o
Timplo o Allah.
6 Da a sakataw bo a ba pekasoled ko Timplo o Allah a liyo ko manga imam ago so manga
Libitiyo a somasangan on. Pekasoled siran on ka kagiya masosoti siran, ogaid na so
langon a ped a manga mama na sii bo sa liyo a so den so sogoan o Allah.
7 Sekano a manga Libitiyo na sii pekakaden ko melilibeta ko dato sa kaipata niyo ron a so
oman i isa rekano na kikabibindas so pedang iyan. Apiya antawaa i tomepeng somoled
ko Timplo na disomala a mbonoon. Pekesagabay niyo so dato apiya anda pesong."
8 So manga Libitiyo ago so langon a manga mama sa Yodah na so den so inisogo kiran i
Yahoyada i pinggolaola iran. So oman i isa a komandir na kinowa niyan so manga
pagataw niyan, a so siran oto a pekasangan ko Gawii a Idedeke ago so pen so siran oto a
pekadekean, ka da den bokai i Yahoyada so apiya antawaa ko sangan iyan.
9 Na inipamegay niyan ko manga komandir so manga bangkaw ago manga kelong a rek
gowani i dato Daod a matatago ini ko Timplo o Tohan.
10 Piyakakaden iyan so manga gordiya sii ko melilibeta ko Timplo ago so aparan a
kakapetan o oman i isa kiran so pedang iyan sa kapelindinga iran ko dato.
11 Mandiyadi na iniliyo i Yahoyada si Yowas, na siyangkadan iyan sekaniyan ago bigan
iyan sa kopiya o manga kokoman mipantag ko kadadatoi ko nasiyon. Inidinan iran
sekaniyan a dato, na siyalawatan sekaniyan i Yahoyada ago so manga wata iyan, na
inipelalis o langon o manga taw a "Mamboway so dato!"
12 Kagiya maneg i Ataliyas so kabobosigaw o manga taw a pepelalagoy ago pembesegan

iran so dato na minggagaan sekaniyan somong ko manga taw roo ko Timplo.
13 Miyailay niyan so dato a tomitindeg ko obay o polaos ko gimowa o Timplo a so darpa
a isesenggay ko manga dato. Lilibeten sekaniyan o manga komandir ago so manga
pamomogiyong. So langon o manga taw na pepanga bababaya ago pepakaonin iran so
manga bogiyong, na so pepamagidaida a rakes o dii mboboniboniyan i magoolowan ko
kapepemodi. Na kinisi i Ataliyas so nditaren iyan sa kiyararangiti ron na inipelalis iyan a
"Kapakatipo ai! Kapakatipo!"
14 Na siyogo i Yahoyada so manga komandir o manga sondaro a tig iyan a "Liyon iyo
sekaniyan ko lamalama o Timplo roo ko manga gordiya, na bonoa niyo so apiya antawaa i
tepeng on manabang!" Ka miyatero den i Yahoyada "Di niyo sekaniyan bonoa ko obay o
Timplo o Allah."
15 Na diyakep iran na inowit iran ko ipesoled o manga koda ko lamalama o torogan na

roo iran biyono.
16 Oriyan iyan na mimbaal si Yahoyada sa kapasadan mipantag rekaniyan ago so manga
taw ago so dato a siran den so manga pagtaw o Allah.
17 Mandiyadi na siyongowan o langon o manga taw so timplo o Baal na giba iran.
Piroropet iran so manga aparan on ago so manga barahala na biyono iran si Matan a so
imam o Baal sii ko danga o manga aparan.
18 Na piyakisangan i Yahoyada ko manga imam ago so manga Libitiyo so manga galebek
iran ko Timplo kaan iran matoman so manga insarat a inibegay kiran i Daod. Aya
sangan iran na so kipesepaaten ko manga korban a petotongen sii ko Allah a mipepasod
ko misosorat ko Kitab o Mosa a rakes o kapekebabaya ago kapepamagidaida a so den so
iniinsarat i Daod.
19 Piyanagoan iyan so manga gimowa o Timplo sa manga gordiya kaan da den a ba on
pekasoled a di masosoti.
20 Piyamakaonot iyan so manga olowan a sondaro, so kiseselaan a manga taw, so manga

sanasanaan ago so langon a ped a manga taw ko inged na inidolog iran so dato ipoon ko
Timplo taman ko torogan o dato a roo siran miyokit ko Gimowa sa Poro. Piyakaontod
iran so dato sii ko korsi iyan
21 Na miyanga bababaya so langon a manga taw ko inged. Na lominintad so siti sabap
ko kiyabonoa ki Ataliyas.
2 MANGA RIKORD 24
Inompiyaan i Yowas so Timplo
Miyakapagidad si Yowas sa pito ragon isako mabaloy a dato na mindato sekaniyan ko

miyakapat polo ragon sii sa Yarosalim. Aya ina iyan na si Sibiyas a taw sa Birsiba.
2 Minggolaola si Yowas sa ontol ko hadapan o Allah sii ko kaooyagoyag pen i Yahoyada
a imam.
3 Bigan sekaniyan i Yahoyada sa dowa a karoma, na mimbabawata sa manga wata a
4 Kagiya malo matey na miyatekdir i Yowas a pagompiyaan iyan so Timplo o Allah.

5 Tinimo iyan so manga imam ago so manga Libitiyo na iniinsarat iyan kiran a
"Pamanong kano ko manga siti sa Yodah na panekata niyo ko langon o manga taw so
bowis a paliyogat kiran oman ragon kaan miyompiya ko Timplo o Tohan iyo. Na,
nggagaani niyo ai!" Ogaid na da nggagaani o manga Libitiyo.
6 Kagiya ka maoto na piyakitawag o dato si Yahoyada na iniise iyan on a "Ino ngka da

sogoa so manga Libitiyo sa kapanekata iran ko bowis sii sa Yodah ago sa Yarosalim?
Inipaliyogat ai i Mosa a so oripen o Allah ko isa ka maginged a Israil para ko
kapegompiyai ko Barombarong a katatagoan ko Kapasadan.
(7 So manga sakop angkoto a marata a babay a si Ataliyas na siyoledan iran gowani
ago bininasa iran so Timplo o Tohan na inosar iran so langon o soti on a manga nganin sii
ko kapesimbaa iran ko katohanan a Baal.)
8 Mandiyadi na inisogo i Yowas a mbaal so manga Libitiyo sa kaban a imbetad ko liyo o
gimowa o Timplo o Allah.
9 Na piyakalangkap ko dalem a Yodah ago sa Yarosalim a disomala a witen o manga taw
ko Allah so bowis a inipaliyogat i Mosa a oripen o Allah ko manga Israil isako ndodoo
siran ko mitataog a kaden.
10 Inikasoat ai o langon o manga taw ago so manga olowan iran na piyangowit iran so
pirak iran na piyangolog iran ko kaban taman sa miyapeno.
11 Igira a pepegawidan o manga Libitiyo so kaban ko manga sanasanaan o dato ago
pekeilay iran a aden a mala on a pirak na so panonorat o dato ago so opisiyal o maporo a
imam na pekowaan iran so matatago ko kaban na ipekesoy iran ko bebetadan on. Giyai
den i di iran dii nggolaolaan oman gawii na mala a pirak a miyatimo iran.
12 Inibegay ini o dato ago si Yahoyada ko manga sanasanaan ko galebek ko Timplo o
Allah. Na somiyokay siran sa manga pananapil sa ator, manga panday sa kayo ago manga
pagagalebek sa potaw ago tombaga kaan iran kaompiyai so Timplo.
13 Misebenar siran nggalebek na pepegosor so kapegompiyai ran on, na piyakabager iran
ai ago miyapakaasal so paras iyan.
14 Kagiya mapasad iran ai na inowit iran so miyalamba a pirak ko dato ago sii ki
Yahoyada na pimbaalan iran ai a manga ladiya ago ped a manga kasangkapan a bolawan
ago pirak a keosar ko kapepanalagad sii ko Timplo ago sii ko kapesepaat sa manga
korban a petotongen. Sii ko tenday a omor i Yahoyada na lalayon so kapesepaat sa
manga korban a petotongen sii ko Timplo o Allah.
15 Tanto den a miyalokes si Yahoyada a miyatarotop so omor iyan, na miyakapagidad
sekaniyan sa magatos ago telo polo ragon kagiya matay.
16 Sii sekaniyan inilebeng ko pekoboran ko manga dato ko Siti o Daod sabap ko manga
pipiya a pinggolaola niyan sii sa Israil para ko Tohan ago so Timplo niyan.
So Kamarataan i Yowas
17 Oriyan o kiyapatay i Yahoyada na so manga olowan sa Yodah na iyamanong ki Yowas

na piselasela iran, na piyakineg siran o dato.
18 Tiyalikodan iran so Timplo o Allah a so Tohan o manga apo iran na miyamanimba
siran baden sa manga poloas a toos ko katohanan a Asirah ago so manga barahala. Sabap
ko kasalaan iran sangkai a manga dosa na minitana so rarangit o Tohan sa Yodah ago sa
Yarosalim.
19 Siyogoan siran o Allah sa manga nabi kaan iran siran mapakakasoy rekaniyan.
Liyalangan siran o manga nabi ogaid na da iran den pakinega.
20 Sominep so Roh o Tohan ki Sakariyas a wata i Yahoyada a so imam na tominindeg
sekaniyan ko seronsarongan o manga taw na pitero iyan a "Giyai i pitero o Tohan: Ino
niyo pesogoka so manga sogoan o Allah? Di kano den pekabolos sa mapiya. Sabap sa
tiyalikodan iyo so Allah na tiyalikodan kano niyan mambo!"
21 Ogaid na pikediyatan iran sekaniyan sa marata na sabap ko sogoan o dato na riyobakan
iran sekaniyan a ator taman sa miyatay sii ko lamalama o Timplo.
22 Linimbanan o dato Yowas so kinikalimoon rekaniyan o ama i Sakariyas a si Yahoyada
ka ba niyan baden biyono so wata iyan. Na kagiya petay den si Sakariyas na tig iyan a
"Pengnin ko a mailay ai o Allah ago saopan kano niyan."
So Kaposan o Kandadato i Yowas
23 Kagiya mapopos so ragon na so manga sondaro sa Siriya na giyobat iran si Yowas.

Miyaleseb iran a Yodah ago giya Yarosalim na piyolang iran so langon o manga olowan o
manga taw. Na inawidan iran ko dato iran sa Damasko so langon a miyateban iran.
24 Apiya pen maito so manga sondaro a Isiriyan a miyakatalingoma na piyakitaban kiran
o Allah so lebi pen a madakel a di siran a manga sondaro a Yodah, ka tiyalikodan iran so
Allah a Tohan o manga apo iran. Sii sangkai a okit na ininggolalan o Allah so daneg iyan
ki Yowas.
25 Kagiya maling so manga Isiriyan na giyanatan iran si Yowas a kapapalian a
kapapasangan. Na pikediyatan sekaniyan sa marata o manga sanasanaan iyan na biyono
iran sii ko igaan iyan sabap ko kiyabonoa niyan ko wata i Yahoyada. Inilebeng sekaniyan
sii ko Siti o Daod ogaid na kena a ba sii ko pekoboran ko manga dato.
26 Aya tominipo rekaniyan na si Sabad a wata i Simiyat a so Amoniyo a babay, ago si
Yahosabad a wata i Simrit a so Mowabiyo a babay.
27 So totolan ko manga wata iyan, so madakel a miyaalamat mipantag rekaniyan ago so
rikord o kiyaompiyai niyan ko Timplo o Tohan na palaya den minisorat ko 'Ribro a
Totolan ko manga Dato sa Yodah.' Si Amasiyas a wata iyan na aya on miyakasambi a
dato.
2 MANGA RIKORD 25
Si Amasiyas a Dato sa Yodah
Si Amasiyas na dowa polo ago lima ragon a idad iyan isako mabaloy a dato na
miyakandato sekaniyan sii sa Yarosalim ko miyakadowa polo ago siyaw ragon. Aya ina
iyan na si Yahowadin a taw sa Yarosalim.
2 Minggolaola sekaniyan sa ontol sii ko hadapan o Allah ogaid na kena a ba iklas ko poso
iyan.
3 Kagiya mapakambeken iyan piyapiya so kandadato iyan na piyamono iyan so manga
sanasanaan a miyono ko ama iyan.
4 Ogaid na da niyan pamonoa so manga wata iran ka kagiya tiyoman iyan so misosorat ko
Kitab o Mosa a "Di kebono so ama a ba sabap ko dosa o wata iyan aya pen o ba bonoa so
wata a ba sabap ko dosa o ama iyan. Ka aya bo a kibono ko taw na so rek iyan a dosa."
So Kiyapakitidawa sa Idomiya
5 Linimod i Amasiyas so langon o manga mama sa Yodah ago giya Baniyamin na

piyakipagolowanan iyan so oman i mbawataan iran ko manga komandir ko sesanggibo
ago manga komandir ko mbabagatos. Na binilang iyan so siran oto a miyakapagidad sa
dowa polo ragon o di na lawan pen na miniraot siran sa telo gatos nggibo a kepakay a
masondaro a mapasang i kaosar sa bangkaw ago kelong.
6 Tindanan iyan pen sa telo nggibo ago pat gatos ka kilo a pirak so magatos nggibo a
manga sondaro a Israil.
7 Ogaid na somiyong rekaniyan so isa a nabi o Tohan a tig iyan a "Hey dato, di ngka
pekaonota angkai a manga sondaro a poon sa Israil, ka so Allah na kena a ba
mipageepada o manga Israil, a apiya antawaa roo sa Ipraim.
8 Apiya pen o tomaros kano ago makitidawa sa kawaraw na pekitaban kano o Tohan ko
manga ridoay niyo, ka aden a kapaar iyan sa katabangi o di na so kapakitabanen iyan
rekano."
9 Na iniise i Amasiyas ko nabi a "Antonaa i kesowa angkoto a pirak a minibegay aken ko

manga sondaro a Israil?"
"Kepakay a kabegan ka o Allah sa lawan san pen," a inisembag o nabi.
10 Kagiya ka maoto na piyamakabaling i Amasiyas so manga sondaro a kiyatendanan

iyan a poon sa Ipraim. Inikararangit iran ai ko manga taw sa Yodah na mimbabaling siran
a tanto a nggagani.
11 Na inasa i Amasiyas so kawaraw niyan na piyagolowanan iyan so manga sondaro

niyan ko Balintad a Timos a ron iyan miyapamono so sapolo nggibo a manga sondaro a
Idomiyan.
12 Miyakadakep pen so manga sondaro a Yodah sa sapolo nggibo pen a manga mama na
tiyonda iran siran ko poro o pampang ago piyangolog iran on kaan siran manga roropet ko
manga ator roo sa kababaan.
13 Sa kapapantagan oto na so manga sondaro a Israil a piyamakabaling i Amasiyas a da

niyan pakaonota ko katidawa na giyobat iran baden so manga siti sa Yodah ipoon sa
Samariya na taman sa Bit Horon. Miyakapatay siran sa telo nggibo a manga taw ago
miyakateban siran sa tanto a madakel.
14 Kagiya makabaling si Amasiyas ko oriyan o kiyatabana niyan ko manga Idomiyan na

initelon iyan so manga barahala o manga taw sa Sair. Piyamakatindeg iyan ai a manga
katohanan iyan na pesodiyod sekaniyan on ago pesepaat on sa petotongen a soasoat.
15 Tanto ai a inikararangit o Allah na somiyogo sekaniyan ki Amasiyas sa nabi a tig iyan
a "Ino ngka simbaa angkai a manga katohanan o salakaw a taw a da iran mapakalidas so
manga pagtaw iran sii sa lima ngka?"
16 Ogaid na sii ko di niyan pen dii katero na pitero rekaniyan o dato a "Ba ami seka
initoro a mosawira o dato? Kemed ka san; ba ka pekibono?"
Na tomiyareg so nabi, ogaid na tig iyan pen a "Katawan ko a miyakediyat o Tohan a
kambinasaa niyan reka sabap sa pinggolaola ngka ini ago da ngka pakinega so mosawir
aken."
So Kiyapakitidawa sa Israil
17 Oriyan o kiyaisei i Amasiyas a dato sa Yodah ko manga mosawira iyan na inipakawit

iyan angkai a katero ko dato sa Israil a si Yahowas, a wata i Yahowahas, a wata i Diho ka
inerar iyan sa katidawa a tig iyan a "Talaboka ko ngka na magadapa ta!"
18 Ogaid na aya inisembag i Yahowas ki Amasiyas na "Aden a soroken a paket roo sa
Libanon a miyakiwit sa lalag ko kayo a sidro a tig iyan a 'Pakipangaromaan ka so wata a
ka a babay ko wata aken a mama.' Ogaid na somiyagad roo a maila a binatang sa Libanon
na pindepodapoan iyan angkoto a paket.
19 Pitero o ka sa ginawa ngka a tiyaban ka a Idomiya, na mitekabor ka imanto ago
miyangimporoan. Ogaid na gegenek ka baden sa walay! Ino ngka dii nggigiloba sa rido a
ikebinasa ngka ago so manga taw sa Yodah?"
20 Ogaid na da pakineg si Amasiyas ka kagiya takdir o Tohan a peladen iyan sekaniyan

ko lima o ridoay niyan sabap ko kiyasimbaa niyan ko manga katohanan sa Idomiya.
21 Mandiyadi na gomiyobat si Yahowas a dato sa Israil, na miyakaserempanga siran sii sa
Bit Simis sa Yodah.
22 Miyataban o manga Israil so manga sondaro a Yodah na miyamalagoy siran langon a
mimbabaling.
23 Diyakep i dato Yahowas si dato Amasiyas roo sa Bit Simis na inowit iyan sa
Yarosalim, na giba iyan so pangeleban a Yarosalim ipoon ko Gimowa a Ipraim taman ko
Gimowa ko Rogo, a dowa gatos ka mitros a katas iyan.
24 Piteban iyan so langon a bolawan ago pirak ago so manga kasangkapan a miyatoon
iyan ko Timplo o Tohan a kikibiren i Obid Idom. Kinowa niyan pen so manga ala i arga
a tamok ko torogan o dato ago miyamiyag sekaniyan pen sa manga taw na komiyasoy sa
Samariya.
So Kiyapatay i Amasiyas
25 Si Amasiyas a wata i Yowas a dato sa Yodah na miyakapaginetaw pen ko

miyakasapolo ago lima ragon oriyan o kiyapatay i Yahowas a wata i Yahowahas a dato sa
Israil.
26 So ped a miyanga sosowasowa ko kandadato i Amasiyas na palaya den misosorat ko
'Ribro a Totolan ko manga Dato sa Yodah ago Israil.'
27 Ipoon ko kiyatalikodi i Amasiyas ko kapepangongonotani niyan ko Allah na di
sekaniyan dii kediyatan sa marata o manga taw roo sa Yarosalim na miyagapas sekaniyan
sa Lakis. Ogaid na pitelokonan o manga ridoay niyan na biyono iran roo.
28 Inikasoy iran sekaniyan sa Yarosalim a rororanen ko koda na inilebeng iran sii ko
pekoboran ko manga dato sii ko siti o Daod.
2 MANGA RIKORD 26
Si Osiyas a Dato sa Yodah
Oriyan iyan na so langon a taw sa Yodah na kinowa iran si Osiyas, a sapolo ago nem
ragon a idad iyan, na biyaloy iran a dato a misambi ko ama iyan a si Amasiyas. (2
Sekaniyan i miyangon peroman sa siti a Ilat ago inikasoy niyan ai sa Yodah ko oriyan o
kiyapatay i Amasiyas.)
3 Sapolo ago nem ragon a idad i Osiyas kagiya poon ndato na mindato sekaniyan sa
Yarosalim ko miyakalima polo ago dowa ragon. Aya ngaran o ina iyan na si Yakoliyas a
taw sa Yarosalim.
4 Minggolaola sekaniyan sa ontol ko hadapan o Allah a datar o pinggolaola o ama iyan a
si Amasiyas.
5 Miyangongonotan sekaniyan ko Tohan sii ko kaooyagoyag pen i Sakariyas a aya on
miyangendao sa kipekeleken iyan ko Tohan. Taman ko kapepangongonotani niyan ko
Allah na pepakapiyaan o Tohan so bobolos iyan.
6 Miyakitidawa sekaniyan ko manga Pilistiyo na pinggegeba iyan so manga pangeleban a

Gat, Yabnih ago giya Asdod. Oriyan iyan na piyamangon iyan peroman so manga siti ko
marani sa Asdod ago sii ko ped pen a manga darpa sa Pilistiya.
7 Inogopan sekaniyan o Tohan ko di niyan dii kitidawaan ko manga Pilistiyo, ago so
manga Arab a kibabaling sa Gorbaal, ago so manga Miyoniyo.
8 So manga Amoniyo na pembayad sa bowis ki Osiyas, na lomiyangkap so bantogan iyan
taman den ko temanaan a Misir ka kagiya tanto sekaniyan a miyakala i kapaar.
9 Sii sa Yarosalim na miyangembaal si Osiyas sa manga lantawa on sii ko Gimowa ko

Rogo, sii ko Gimowa ko Balintad ago sii ko kiyakorian o pangeleban.
10 Liyo ron pen na miyangembaal sekaniyan sa manga lantawa sii ko disirto, na
komiyalot roo sa madakel a paridi ka kagiya madakel a ayam iyan sii ko kababaan o
manga bobongan sa Yodah taman ko kapantaran. Aden a kigagalebek iyan sii ko manga
pangomaan iyan ago manga asinda a obas ko manga bobongan ago sii ko masibokar a
lopa, ka mababaya sekaniyan mbasok.
11 Aden a madakel a manga sondaro i Osiyas a tadiyam makitidawa. Pimbagibagi siran

sa manga lompok a ipepasod ko manga rikord o bilangan iran a pekibiren i Yail a
panonorat ago si Maasiyas a so olowan a peginsaratan i Hananiyas a isa ko sanasanaan o
dato.
12 Aden a dowa nggibo ago nem gatos a manga olowan o manga pamiliya a menanakoda
ko manga sondaro.
13 Aya kadakel langon o manga sondaro na telo gatos ago pito nggibo ago lima gatos a
manga mama a miyabatak ko katidawa a makatitiyagar lominding ko dato ko manga
ridoay niyan.
14 Piyamegan i Osiyas so langon o manga sondaro sa manga kelong, manga bangkaw,
manga hilmit, manga raben a potaw, manga pana ago manga salibat.
15 Sii sa Yarosalim na piyakimbaalan iyan ko manga papasang i kapenday so manga
makina a pekapekas sa manga gasa ago pekapalantig sa manga ala a ator, na inipametad
iyan ai sii ko manga lantawa ago sii ko manga rogo o pangeleban o siti. Na lomiyangkap
so bantogan iyan sa mawatan marani ka mala a kiyatabangi ron o Tohan taman sa
miyakala so gees iyan.
Diyaneg si Osiyas sabap ko Kiyapangimporoan iyan
16 Ogaid na kagiya makala den i gees si Osiyas na miyangimporoan sekaniyan a aya

niyan inikaroseng. Miyakandosa sekaniyan ko Allah a Tohan iyan ka somiyoled
sekaniyan ko Timplo o Allah sa katotong iyan on sa doka sii ko aparan a petotongan sa
doka.
17 Ogaid na tiyondog sekaniyan i Asariyas a so imam a oonotan o walo polo a manga
wawaraw a manga imam o Allah.
18 Siyaparan iyan so dato a tig iran a "Di reka mapapatot, Osiyas, a ba ka totong sa doka
sii ko Allah! So bo so manga imam a kiyababadan ki Aron i singgayan a pepekatotong sa
doka. Liyo ka sangkai a soti a darpa, ka miyakandosa ka ko Allah a Tohan, na di ka niyan
den ipengkat!"
19 Na kiyararangitan si Osiyas a tomitindeg roo a komakapet sa petegoan sa doka a

titiyagaren iyan sa katotonga niyan on. Na sii ko di niyan dii kaperangiti ko manga imam
roo ko Timplo o Allah ko obay o aparan a petotongan sa doka na diyapoan a bowa so
beneng iyan.
20 Kagiya mailay i Asariyas a maporo a imam ago so langon a ped a imam a miyabowa
so beneng iyan na iniliyo iran sekaniyan nggagaan. Na mataan a kabaya iyan a makaliyo
den mambo ka kagiya siniksa sekaniyan o Allah.
21 Pekebowa den so dato Osiyas taman ko gawii a kiyapatay niyan. Miyakakaden
sekaniyan ko misisibay a walay a di den peman pekasoleden ko Timplo o Allah. So wata
iyan a si Yotam na aya kiyasanaan ko torogan o dato, na pindatoan iyan so manga pagtaw
ko inged.
22 So ped a miyanga sosowasowa sii ko kandadato i Osiyas a ipoon sa poonan na taman

sa kaposan na miyamangisorat o nabi Isayas a wata i Amos.
23 Miyatay si Osiyas na inilebeng sii ko pangomaan a pelebengan a misesenggay ko
manga dato a kena a ba sii ko pekoboran ko manga dato, ka pitero o manga taw a "Aden a
bowa niyan." Si Yotam a wata iyan na aya on miyakasambi a dato.
2 MANGA RIKORD 27
Si Yotam a Dato sa Yodah
Miyakapagidad si Yotam sa dowa polo ago lima ragon kagiya poon ndato na mindato
sekaniyan sa Yarosalim ko miyakasapolo ago nem ragon. Aya ngaran o ina iyan na si
Yarosah a wata i Sadok.
2 Minggolaola sekaniyan sa ontol sii ko hadapan o Allah a so den so siyowa i Osiyas a
ama iyan, ogaid na kena a ba niyan datar, ka da sekaniyan soled ko Timplo o Allah sa
katotong iyan sa doka. Ogaid na itataros den o manga taw sa Yodah so marata a manga
okitokit iran.
3 Biyangon peroman i Yotam so Gimowa sa Poro sii ko Timplo o Allah na mala a

kiyanggalebeka niyan ko kiyaompiyai ko pangeleban ko bobongan sa Opil.
4 Miyamangon sekaniyan sa manga siti sii ko kapalawan sa Yodah, ago manga kota ago
manga lantawa sii ko manga kalasan on.
5 Miyakitidawa si Yotam ko dato o manga Amoniyo ago so manga sondaro niyan na
tiyaban iyan siran. Sangkoto a ragon miyakabayad siran on sa telo nggibo ago pat gatos
ka kilo a pirak ago telo gatos ago nem polo nggibo ka gantang a trigo ago telo gatos ago
nem polo nggibo ka gantang a bantad. Na datar oto mambo sa kadakel so inowit iran on
sii ko ikadowa ago ikatelo ragon.
6 Pepekala so gees i Yotam ka kagiya pipiyapiyaan iyan so manga okitokit iyan ko

hadapan o Allah a Tohan iyan.
7 So ped a miyanga sosowasowa ko kandadato i Yotam a rakes on so langon a
kiyapakitidawa iyan ago so ped a manga miyanggolaola niyan na misosorat ko 'Ribro a
Totolan ko manga Dato sa Israil ago Yodah.'
8 Dowa polo ago lima ragon a idad iyan kagiya poon ndato na mindato sekaniyan sii sa
Yarosalim ko miyakasapolo ago nem ragon.
9 Miyatay si Yotam na sii minilebeng ko Siti o Daod. Na si Ahas a wata iyan na aya on
somiyambi a dato.
2 MANGA RIKORD 28
Si Ahas a Dato sa Yodah
Dowa polo ragon a idad i Ahas isako mabaloy a dato na mindato sekaniyan ko
miyakasapolo ago nem ragon sii sa Yarosalim. Kena a ba sekaniyan datar i Daod a apo
iyan, ka da sekaniyan nggolaola sa ontol sii ko hadapan o Allah.
2 Siyowa iyan baden so manga okitokit o manga dato sa Israil, na miyangembaal
sekaniyan sa manga barahala o katohanan a Baal.
3 Somiyapaat sekaniyan sa manga soasoat a petotongen sii ko Balintad a Hinom, na apiya
so manga wata iyan na inisoasoat iyan a petotongen ko apoy a aya niyan kiyasongkada ko
piyakasisingay a paparangayan o manga nasiyon a piyamogaw o Allah ko kapepekaantap
kiran o manga Israil.
4 Di sekaniyan dii korban ago petotong sa doka roo ko manga aparan ko manga barahala
sii ko manga bobongan, ago sii ko atag o oman i marimpoong a kayo.
5 Sabap sii na piyalad sekaniyan o Allah a Tohan iyan ko kapaar o dato sa Siriya.
Tiyaban si Ahas o manga Isiriyan na madakel a manga pagtaw niyan a piyamiyag iran ago
piyangowit roo sa Damasko. Tiyaban pen si Ahas o dato sa Israil na tanto a madakel a
miyapatay o manga sondaro niyan ko manga sondaro i Ahas.
6 Sii ko soled o salongan bo na so dato sa Israil a si Pikah a wata i Rimaliyas na
miyakapatay sekaniyan sa magatos ago dowa polo nggibo a manga sondaro a Yodah ka
kagiya tiyalikodan a Yodah so Allah a Tohan o manga apo iran.
7 Si Sikri a sondaro a Israil na biyono iyan si Maasiyas a so wata o dato, ago si Asrikam a
aya sanasanaan ko torogan, ago si Ilkanah a so tomalondog ko dato.
8 Na piyamiyag o manga sondaro a Israil so dowa gatos nggibo a manga babay ago
manga wata o manga tonganay iran a taw sa Yodah. Pitebanan iran siran pen sa tanto a
mala, na minibaling iran ai sa Samariya.
So Nabi Odid
9 Ogaid na so nabi o Tohan a aya ngaran iyan na si Odid na ndodoo, na lominiyo

sekaniyan ka inalaw niyan so manga sondaro a Israil ko kapekaoma iran sa Samariya. Na
pitero iyan kiran a "Sabap sa kiyararangitan o Allah a Yodah na piyakitaban iyan siran
rekano. Ogaid na piyamono iyo siran sa kararangit a somiyoko sa langit!"
10 Na aya pamikiran iyo imanto na pengongoripenen iyo so manga mama ago manga
babay sa Yodah ago sa Yarosalim. Ogaid na ba kano mambo da mamakandosa ko Allah
a Tohan iyo?
11 Na, pamakinega ko niyo! Pakabalinga niyo so manga tonganay niyo a miyanga
bibiyag iyo ka pekatanaan rekano o Allah so rarangit iyan."
12 Ndodoo mambo so ped ko manga olowan sa Israil a si Asariyas a wata i Yohanan, si

Birikiyas a wata i Misilimot, si Yahiskiyas a wata i Salom ago si Amasa a wata i Hadlay
na pimbongetan iran pen so manga sondaro a Israil a pepemakaoma a poon ko katidawa
13 A tig iran kiran a "Di niyo sii pagowita angkoto a miyanga bibiyag iyo, ka kesala tano
sii ko hadapan o Allah! Ba aya kabaya iyo na pelonsanan iyo baden so dosa ago sala
tano? Ka mala den so kasalaan tano na tanto a pekerarangitan o Allah a Israil."
14 Kagiya ka maoto na piyamokaan o manga sondaro so miyanga bibiyag na giyanatan

iran so miyanga tetaban iran sii ko danga o manga olowan ago so langon o miyalimod a
manga taw.
15 Na piyangowa angkoto a pat kataw a olowan so manga biyag na poon ko manga
nganin a miyanga tetaban na piyamakanditar iran so kikatatalandiyang kiran. Piyamegan
iran sa manga nditaren, manga tinilas, manga pangenengken ago panginginomen, na
piyamolongan iran so kikapapalian. So langon o manga lolobay kiran na piyamakakoda
iran sa manga kimar, na inidolog iran siran langon ko manga tonganay iran roo sa Yariko
a so siti a manga kayo a korma, na komiyasoy bo so manga Israil sa Samariya.
Miyakitabang si Ahas sa Asiriya
16 Sangkoto a masa na miyakitabang si dato Ahas ko dato sa Asiriya,

17 Ka so manga Idomiyan na piperomanan iran gomobat a Yodah na miyakabiyag siran
roo sa manga taw.
18 Sa kapapantagan oto na pinggogobat o manga Pilistiyo so manga inged ko kababaan o
manga bobongan sa Yodah ago sii sa Nigib a sakop a Yodah. Miyanga aagaw iran so
manga siti a Bit Simis, Aiyalon, Gidirot taman den sa Soko, Timnah ago Gimso a rakes o
manga pagingedingedan ko melilibeta on, na roo den mimbabaling so manga Pilistiya.
19 Giyai i kinibabaan o Allah sa Yodah sabap ki Ahas a dato on, ka ipepegoyat iyan
baden so dii kandosa o manga pagtaw niyan, na mala a kapegongkira niyan ko Allah.
20 Na miyakaoma rekaniyan si Tiglat Pilisir a dato sa Asiriya, ogaid na da niyan tabangi
si Ahas ka ba niyan den bigan sa awid a akal.
21 Na piyangowa i Ahas so ped a manga ala i arga a betad ko Timplo o Allah ago sii ko
torogan o dato ago sii pen ko manga walay o manga olowan na inibegay niyan ai a tendan
ko dato sa Asiriya, ogaid na da on den ai makaogop.
So manga Dosa i Ahas
22 Sii ko masa a kareregeni ki Ahas na minitaralo baden a kapegongkira niyan ko Allah.

23 Somiyapaat sekaniyan sa manga korban ko manga katohanan o manga Isiriyan a
miyakataban rekaniyan, ka tig iyan sa ginawa niyan a "Sabap sa inogopan o manga
katohanan iran so manga dato sa Siriya na korbanan ko siran kaan ako iran kaogopi."
Ogaid na giyai i kiyasabapan ko kiyapepad iyan ago so kiyabinasai ko ndatoan iyan.
24 Piyanimo i Ahas so manga pagigimo ko Timplo o Tohan ago piroropet iyan ai. Na
pilelekeban iyan so manga pintoan o Timplo na miyangembaal sekaniyan sa manga
aparan ko oman i mbalakaan sii sa Yarosalim.
25 Sii ko manga bobongan ko oman i inged sa Yodah na miyangon sekaniyan on sa
manga aparan a pepenotongan sa doka ko salakaw a manga tohan, na piyakakerangit iyan
so Allah a Tohan o manga apo iyan.
26 So ped a miyanga sosowasowa ko kandadato i Ahas ago so langon a miyanggolaola

niyan ipoon sa poonan na taman sa kaposan na miyamangisorat ko 'Ribro a Totolan ko
manga Dato sa Yodah ago Israil.'
27 Miyatay si Ahas na minilebeng sii sa siti a Yarosalim ogaid na kena a ba sii ko
pekoboran ko manga dato. Si Hisikiyas a wata iyan na aya on miyakasambi a dato.
2 MANGA RIKORD 29
Si Hisikiyas a Dato sa Yodah
Miyakadowa polo ago lima ragon a idad i Hisikiyas kagiya poon ndato na mindato
sekaniyan ko miyakadowa polo ago siyaw ragon sii sa Yarosalim. Aya ina iyan na si
Abiyas a wata i Sakariyas.
2 Minggolaola sekaniyan sa ontol sii ko hadapan o Allah a datar o pinggolaola i Daod a
apo iyan.
3 Sii ko paganay a olanolan ko paganay a ragon ko kiyandato iyan na pilelekaan iyan so

manga pintoan o Timplo o Allah na inompiyaan iyan ai.
4 Piyakisogoan iyan so manga imam ago so manga Libitiyo na tinimo iyan siran ko
lamalama o Timplo sa tampar sa sebangan.
5 Pitero iyan kiran a "Pamakinega ko niyo, hey manga Libitiyo! Sotiya niyo imanto a
manga ginawa niyo ago lompiyowi niyo so Timplo o Allah a Tohan o manga apo iyo.
Pangowaa niyo ron so langon o manga reresik ko soti a darpa.
6 So manga apo tano na manga taongkir, na minggolaola siran sa marata ko hadapan o
Allah a Tohan tano. Inindarainon iran so darpa a kakadenan o Allah na tiyalikodan iran
sekaniyan.
7 Pilelekeban iran so manga pintoan o liyoliyowan o Timplo na piyamareng iran so
manga solo. Da siran den pamanotong sa doka aya pen o ba siran pamanapaat sa
petotongen a manga soasoat sii ko soti a darpa o Tohan o Israil.
8 Giyanan i sabap a minitana so rarangit o Allah sa Yodah ago sa Yarosalim na biyaloy
niyan siran a piyakalekelek a ipekebengang ago dii sodiin. Na mataan a
kabebelembelengan iyo ai piyapiya.
9 So manga lokes tano na miyanga bobono sa katidawa, na so manga wata tano a manga
mama ago manga babay ago so manga karoma tano na miyanga bibiyag sabap sii.
10 “Aya niyat aken na magembaal ako sa kapasadan ko Allah a so Tohan o Israil kaan
rektano mapokas so somosokeyaw a rarangit iyan.
11 Hey manga wata ko, di kano imanto pepemokebokel, ka sekano i miyapamili o Allah a
pemakatindeg ko hadapan iyan ago makapenalagad on ago pemakasapaat on sa
petotongen a doka."
12 Mandiyadi na miyakasangan angkai a manga Libitiyo sa galebek:

Poon ko mbawataan i Kohat,
na si Mahat a wata i Amasay ago si Yowil a wata i Asariyas.
Poon ko mbawataan i Mirari,
na si Kis a wata i Abdi ago si Asariyas a wata i Yahalilil.
Poon ko mbawataan i Girson,
na si Yowas a wata i Simah ago si Idin a wata i Yowas.
13 Poon ko mbawataan i Ilisapan,
na si Simri ago si Yail.
Poon ko mbawataan i Asap,
na si Sakariyas ago si Mataniyas.
14 Poon ko mbawataan i Himan,
na si Yahiyal ago si Simay.
Poon ko mbawataan i Yadoton,
na si Simayas ago si Osiyal.
15 Giyangkai a manga taw na linimod iran so ped iran a manga Libitiyo na piyamanoti
ran a manga ginawa iran. Oriyan iyan na inepoonan iran a kapelompiyowi ko Timplo o
Allah a so den so inisogo o dato a ipepasod ko kitab o Allah.
16 Somiyoled so manga imam ko Timplo o Allah ka pelompiyowan iran, na so langon
taman a kena a ba soti a miyatoon iran roo na inipeliliyo iran ko lamalama o Timplo, na
kinowa ini o manga Libitiyo na inowit iran ko Balintad sa Kidron.
Inisenggay Peroman so Timplo a Soti
17 Inepoonan iran so galebek iran ko paganay a gawii ko paganay a olanolan, na sii ko

ikawalo gawii na miyaoma iran so liyoliyowan o Timplo. Miyakawalo pen gawii a
kiyasotiya iran ko Timplo o Allah na miyapasad ai ko ikasapolo ago nem gawii ko
paganay a olanolan.
18 Mandiyadi na somiyong siran ki dato Hisikiyas na iniripot iran on a "Kiyalompiyowan
ami den so intiro o Timplo o Allah a rakes o aparan a petotongan sa manga sapaat taman
ko langon a kasangkapan on, ago so lamisaan a pembetadan sa soti a paan a rakes o
langon a igagama on.
19 Liyo ron pen na minikasoy ami den ago miyasoti so langon a manga nganin a kinowa
on i Dato Ahas ko masa a kandadato iyan sabap ko kapegongkira niyan ko Tohan. Na
sisii den ai langon ko danga o aparan o Allah."
20 Sii ko teked a kapipita ko talondog a gawii na linimod i dato Hisikiyas so manga

sanasanaan ko siti na somiyong siran ko Timplo o Allah.
21 Miyawid siran roo sa pito a mama a sapi, pito a mama a bilibili, pito a nati a bilibili
ago pito a mandangan a pekorbanen sabap ko dosa mipantag ko ndatoan, ago so pamiliya
o dato, ago so Timplo. Siyogo o dato so manga imam a so kiyababadan ki Aron sa
kisapaaten iran ko manga ayam sii ko aparan o Allah.
22 Kagiya ka maoto na piyangorban iran so manga sapi na kominowa so manga imam ko
rogo na inipamesipesik iran ko aparan, na datar ai mambo a pinggolaoloa iran ko manga
mama a bilibili ago so manga nati a inipamesipesik iran so rogo o manga ayam ko aparan.
23 Oriyan iyan na so manga mandangan a pekorbanen sabap ko dosa na inowit ko
hadapan o dato ago so malilimod a manga taw na inipanepenet iran on a manga lima iran.
24 Na piyanombali o manga imam so manga mandangan na inododan iran so aparan ko
rogo o manga ayam a aya kakepapasa ko manga dosa o langon o manga taw, ka inisogo o
dato angkai a kapekorban sa petotongen ago kapekorban sabap ko dosa para ko langon o
manga Israil.
25 Piyakakaden i Hisikiyas so manga Libitiyo ko manga darpa iran sii ko Timplo o Allah
a kiaawid sa manga pandaopan, manga kotiyapi ago manga alpa a ipepasod ko manga
insarat a inibegay o Allah ko dato Daod a nggolalan ki Gad, a nabi o dato, ago so nabi
Natan.
26 Kititindeg roo so manga Libitiyo a kikakapetan iran angkai a manga boniboniyan i
Daod, na kititindeg roo mambo so manga imam a kikakapet sa manga bogiyong.
27 Inisogo i Hisikiyas a isepaat ko aparan so korban a totongen. Na so den so kiyapooni

ko kasapaat na inipoonan mambo so kapamagidaida ko Allah a sasarenganen o
kapepakaoniya ko manga bogiyong ago so manga boniboniyan o Daod a dato sa Israil.
28 Pepamanimba so langon a taw a malilimod roo sii ko kapepamagidaida ago so
kapepamogiyong o manga dii mboboniboniyan, na itataros den ai taman ko kiyapasad o
kipesepaaten ko manga korban.
29 Kagiya mapasad ai na so dato ago so langon a malilimod roo na miyamanodiyod ago
miyamanimba.
30 Na iniinsarat o dato Hisikiyas ago so manga sanasanaan iyan ko manga Libitiyo a
mamagidaida siran sa manga podi ko Allah a pegosaren iran so manga sabor a inisorat i
Daod ago si Asap a nabi. Na miyamagidaida siran sa podi a kikabababaya siran sii ko
kapesodiyod iran ago kapepamanimba.
31 Oriyan iyan na pitero i Hisikiyas ko manga taw a "Imanto a inipagiklas iyo a ginawa
niyo ko Allah na song kano sii na pamangawid kano sa manga ayam a pekorbanen para
ko panalamat sii ko Timplo o Allah." Na pinggolaola ini o manga taw, na so langon a
kikateterangan na miyamangawid mambo sa manga ayam a pekorbanen ago isepaat a
totongen sii ko Allah.
32 Na aya kadakel a piyamangawidan o manga taw a ipenapaat a penotongen sii ko Allah
na pito polo a mama a sapi, magatos a mama a bilibili ago dowa gatos a nati a bilibili.
33 Na miyamangawid siran roo mambo sa nem gatos a manga mama a sapi ago telo
nggibo a manga bilibili ago kambing a minisenggay ko Allah.
34 Sabap sa korang so kadakel o manga imam a makatiyagar ko langon angkai a ayam sa
kisepaaten on na inogopan siran o manga tonganay iran a Libitiyo taman sa miyapasad so
galebek ago taman sa miyasoti so ped pen a manga imam. Ka so manga Libitiyo na lebi
pen a petoman ko kapesotiya iran sa ginawa iran a di so manga imam.
35 Oman i isa sangkai a madakel a ipesepaat a petotongen na perakesan sa paliyogat on a
ipesepaat a panginginomen, na aden pen a ipesepaat a manga sibo o manga ayam a dii
korbanen pantag bo ko kanggiginawai.
Nggolalan sii na miniasal so kapesimba sii ko Timplo o Allah.
36 Na si Hisikiyas ago so langon o manga taw na miyanga bababaya sabap ko pinggolaola
o Tohan para ko manga pagtaw niyan ka kagiya magaan so magaan a kininggolalanen on.
2 MANGA RIKORD 30
Piselasela i Hisikiyas so Paska
Miyakawit si Hisikiyas sa lalag ko dalem a Israil ago Yodah ago pisoratan iyan pen so
manga mbatabataa a Ipraim ago Manasih ka biyantowan iyan siran sa kapakadarpa iran ko
Timplo o Allah sii sa Yarosalim kaan iran maselasela so Paska o Allah a Tohan o Israil.
2 So dato ago so manga sanasanaan iyan ago so manga taw sa Yarosalim na miyakokom
iran den sa ginawa iran a peselaselaan iran den so Paska sii ko ikadowa a olanolan.
3 Da iran maselasela sii ko miyatendo a masa ko paganay a olanolan ka kagiya da pen
katarotopi so kadakel o manga imam a miyasoti ran a ginawa iran, ago da pen malimod so
manga taw sa Yarosalim.
4 Giyangkai a takdir na inikasoat o dato ago so langon a taw.
5 Sabap roo na inisogo iran a pakalangkapen ko manga taw ko dalem a Israil ipoon sa
Birsiba na taman den sa Dan a domarpa siran langon sa Yarosalim sa kapeselaselaa iran
ko Paska o Allah a Tohan o Israil, ka kena a ba kadakelan ko manga taw a ba sii dii
selasela gowani a mipepasod ko manga sogoan a misosorat ko Kitab.
6 Sabap ko sogoan o dato na piyakalalakaw ko dalem a Israil ago giya Yodah so manga
sogo a kiaawid sa manga sorat a poon ko dato ago so manga sanasanaan iyan, na giyai i
misosorat on:
"Hey manga taw sa Israil, kasoy kano ko Allah a Tohan o Ibrahim, Iskak ago Yakob
kaan sekaniyan makakasoy sii rekano a miyalamba a miyakalidas ko kapaar o manga dato
sa Asiriya.
7 Di niyo seyani so manga apo iyo ago so manga tonganay niyo a miyamangongkir ko
Allah a Tohan o manga apo iran. Sabap san na piyalad iyan siran ko kiyalaslasa kiran a
so den so pekeilay niyo.
8 Di kano petegas i olo a datar o manga apo iyo ka pakimbabaya kano baden ko Allah!
Song kano sii ko Timplo niyan a inisenggay niyan a soti sa taman sa pakataman.
Pangongonotani niyo so Allah a Tohan iyo kaan rekano mapokas so pesokeyaw a rarangit
iyan.
9 O kasoy kano ko Allah na so manga pagari niyo ago manga wata iyo na ikepedi o
manga taw a miyamakabiyag kiran na pekakasowin iran siran sangkai a inged, ka
makalimoon ago masalinggagaw so Allah a Tohan iyo. Di kano niyan den telikodan o
kasoy kano rekaniyan."
10 Piyakatetepasa lomalakaw o manga sogo so manga siti sii sa Ipraim ago Manasih
taman den sa Sibolon, ogaid na ba siran den pisosodisodi ago piyagongatongat o manga
taw.
11 Apiya pen oto na aden a ped ko manga taw a poon ko manga mbatabataa a Asir,
Manasih ago Sibolon a tomiyoman ko pandoan o dato na domiyarpa siran sa Yarosalim.
12 Sii pen sa Yodah na miseriat so Allah ka bigan iyan so manga taw sa maiisaisa a
pamikiran sa katomana iran ko inisogo o dato ago so manga sanasanaan iyan a ipepasod
ai ko katero o Allah.
13 Tanto a madakel a manga taw a miyalimod roo sa Yarosalim sii ko ikadowa a olanolan
sa kapeselaselaa iran ko Pista ko Kakan sa Paan a da a Tapay ron.
14 Piyangowa iran so langon a aparan o manga barahala ago so manga aparan a
petotongan sa doka na inipelelebad iran sii ko Balintad sa Kidron.
15 Sii ko ikasapolo ago pat gawii ko ikadowa a olanolan na piyanombali o manga taw so
manga nati a bilibili para ko Paska. Na miyangaaya so manga imam ago so manga
Libitiyo; sabap san na piyanoti ran a ginawa iran kaan siran makaawid sa manga korban a
isepaat a totongen sii ko Timplo o Allah.
16 Miyamanindeg siran ko manga darpa sii ko Timplo a inisenggay kiran o Kitab o Mosa
a oripen o Allah, na ipepamesipesik o manga imam sii ko aparan so rogo o manga korban
sii ko kipendawagen on kiran o manga Libitiyo.
17 Madakel ko malilimod a manga taw a da iran pen manga sosoti a ginawa iran; sabap
san na di iran mapekorban so manga nati iran a bilibili para ko Paska. Kagiya ka maoto
na so manga Libitiyo i miyakakorban ko manga bilibili iran na inisenggay iran ai a soti ko
Allah.
18 Liyo ron pen na so kadakelan ko manga taw a poon sa Ipraim, Manasih, Isakar ago
Sibolon na da iran manga sosoti a ginawa iran na da sa kitab i ba iran makan so
pangenengken sa Paska. Ogaid na inipangangarapan siran i Hisikiyas a tig iyan a "Ya
Allah a Lebi a Mapiya, pengnin ko a karilaan ka so oman i isa
19 A inipagiklas iyan so poso iyan sa kapepangongonotani niyan ko Allah a Tohan o
manga apo iyan apiya pen o kena a ba sekaniyan masosoti ko kiyatomana niyan ko manga
taritib o Timplo."
20 Na inampon o Allah so pangni i Hisikiyas na da niyan danega so manga taw.
21 So manga taw a miyamakadarpa sa Yarosalim na piselasela iran so Pista ko Kakan sa

Paan a da a Tapay ron sii ko soled o pito gawii a tanto siran a masosonor. Oman gawii na
so manga Libitiyo ago so manga imam na pepodin iran so Allah a sasarenganen siran o
matanog a dii kamboboniboniyan.
22 Piyanalamatan i Hisikiyas so langon o manga Libitiyo sabap ko kapasang iran ko
kapepanalagadi iran ko Allah. Sii ko soled o pito gawii ko dii kapista na peken iran so
isesenggay a bagian iran, ago pesepaat siran sa manga korban pantag bo ko
kanggiginawai, ago pepodin iran so Allah a Tohan o manga apo iran.
23 Mandiyadi na miyagayonayon so langon o malilimod sa pito pen gawii a kapeselaselaa

iran ko pista. Sabap roo na miyakapito pen gawii a kiyaselasela iran on sa mala a
kasosonor.
24 Migay si Hisikiyas sa sanggibo a manga mama a sapi ago pito nggibo a manga bilibili
ago kambing a pekikan ko kalilimod, na migay kiran so manga sanasanaan sa sanggibo a
mama a sapi ago sapolo nggibo a manga bilibili ago kambing. Na madakel a manga
imam a ininggolalan iran a kiyasotiya ko ginawa iran.
25 Mikeriyala so langon o isa ka maginged a Yodah a rakes o manga imam ago so manga
Libitiyo, ago so langon o miyalimod a poon sa Israil, ago so pen so manga mananangga a
kibabaling sa Israil ago sa Yodah.
26 Tanto a mala a kapekebabaya sii sa Yarosalim, ka pikembokembo ipoon ko masa o
dato Solaiman a wata i Daod a dato sa Israil na da den a miyanggolaola a ba datar ai sii sa
Yarosalim.
27 Miyamanindeg so manga imam ago so manga Libitiyo na inipangangarapan iran a
karakmatan o Tohan so manga pagtaw, na iniraot ai ko soti a kakadenan iyan roo sa
kasorgaan, na inampon iyan siran.
2 MANGA RIKORD 31
Kagiya mapasad so kiyapista na so manga Israil a ndodoo na piyanongowan iran so
langon o manga siti sa Yodah na piroropet iran so babarakaten kon a manga ator, na
piyamata iran so manga polaos a toos ko katohanan a Asirah. Piyaminasa iran so manga
aparan ko manga barahala sii ko manga bobongan sa dalem a Yodah, Baniyamin, Ipraim
ago giya Manasih. Kagiya mabinasa iran ai langon na mimbabaling so manga Israil ko
oman i inged iyan ago sii ko walay niyan.
2 Pilompolompok i Hisikiyas so manga imam ago so manga Libitiyo a mipepasod ko

manga sangan iran. So oman i salompok na aden a galebek iyan, a so kipesepaaten ko
manga korban a petotongen ago so manga korban pantag bo ko kanggiginawai, so
kapepanalagad, ago so kapepanalamat ago kapepamodi sii ko manga gimowa o
kakadenan o Allah.
3 Migay so dato ko rek iyan a manga ayam para ko manga ipesepaat a petotongen ko
kapipita ago perimon oman gawii, ago para ko manga ipesepaat a petotongen ko manga
Gawii a Idedeke, sii ko manga kapeseribolan ago sii ko miyanga tetendo a pista a
mipepasod ko misosorat ko Kitab o Allah.
4 Liyo ron pen na inisogo iyan ko manga taw a kibabaling sa Yarosalim a ipesidka iran ko
manga imam ago sii ko manga Libitiyo so ipapaliyogat a bagian iran kaan iran mipagiklas
a ginawa iran ko kapetomana iran ko Kitab o Allah.
5 So den so kiyapakalangkapa ko sogoan na miyamamegay so manga Israil sa madakel a
pamemegayan, a so lebi a mapiya ko pereperan iran, bago a arak, lana a olibi, gola a teneb
ago so langon a ped a inionga o lopa iran. Tanto a mala a kiyaawidan o manga taw a so
ikasapolo bagi ko langon taman iran.
6 So langon a taw a kibabaling ko manga siti sa Yodah na inawidan iran roo pen so
ikasapolo bagi ko manga sapi iran, manga bilibili ago manga kambing a rakes o ikasapolo
bagi ko manga nganin a inisenggay iran ko Allah a Tohan iran, na inipanabotod iran ai.
7 Pipoonan iran ai nggolaola sii ko ikatelo a olanolan na miyapasad iran sii ko ikapito a
olanolan.
8 Kagiya makaoma si Hisikiyas ago so manga sanasanaan iyan na miyailay iran so manga
mitatabotod na piyodi iran so Allah ago piyanalamatan iran so manga pagtaw niyan a
Israil.
9 Na iniise i Hisikiyas ko manga imam ago so manga Libitiyo so makapantag ko
kitatabotod a manga pamemegayan.
10 Somimbag si Asariyas a maporo a imam a so moriyataw i Sadok a tig iyan a "Ipoon ko
kapepangowit o manga taw sa manga pamemegayan iran sii ko Timplo o Allah na
kiyataralowan so kekan ami ago tanto a mala angkai a miyalamba on, ka riyakmatan o
Allah so manga pagtaw niyan."
11 Inisogo i Hisikiyas a tiyagar siran sa manga rowang sii ko Timplo o Allah a

peteliyongan. Pinggolaola iran ai
12 Na inisoled iran on so manga pamemegayan ago so manga ikasapolo bagi a inisidka.
Aya siyanaan sangkai a manga nganin na si Konaniyas a Libitiyo, na so pagari niyan a si
Simay na aya niyan saliyo.
13 Aya manga komikibir a madadalem ko kadato i Konaniyas ago si Simay na siki
Yahiyal, Asasiyas, Nahat, Asahil, Yarimot, Yosabad, Iliyal, Ismakiyas, Mahat ago si
Binayas a initoro siran o dato Hisikiyas ago si Asariyas a so sanasanaan ko Timplo o
Tohan.
14 Si Kori a wata i Imnah a Libitiyo a so gordiya ko Gimowa sa Sebangan na aya
piyakasangan ko kapeterimaa ago so dii kambagibagia ko iklas a manga pamemegayan ko
Tohan ago so manga nganin a inisenggay ko Allah.
15 Aya kasasarigan a manga pegogop rekaniyan sii ko manga siti o manga imam na siki
Idin, Miniyamin, Yasowa, Simayas, Amariyas ago si Sikaniyas. Di iran dii mbagibagiin
so manga pamemegayan sii ko ped iran a manga imam a mipepasod ko oman i lompok a
kaapedan kiran a ndatar so lokes ago so kangodaan.
16 Pembegan iran on pen so langon a manga mama a miyakatelo ragon a idad iyan ago
lawan pen a so manga ngaran iyan na mililista ko salsila, a giyoto so langon a pekasoled
ko Timplo o Allah a di iran dii minggolalan so manga sangan iran oman gawii a
mipepasod ko lompok a kaapedan kiran.
17 So kinilistaan ko manga imam ko manga salsila na mipepasod ko manga mbawataan o
manga apo iran, na so manga Libitiyo a miyakadowa polo ragon a idad iyan ago lawan
pen na mililista a mipepasod ko sangan o lompok iran.
18 Langon siran mililista ko manga salsila taman ko manga roroni a wata iran, so manga
karoma iran ago so manga wata iran a manga mama ago babay ka kagiya pipiyapiyaan
iran nggolalan so kapesotiya iran ko manga ginawa iran.
19 So peman so manga kiyababadan ki Aron a manga imam a kibabaling ko manga siti a
inisenggay kiran o di na sii ko manga pepamagonayonayan sangkai a manga siti, na aden
a manga mama kiran a initoro a pembagibagi ko manga bagian o oman i mama kiran ago
sii ko langon o manga Libitiyo a mililista ko manga salsila.
20 Sii sa dalem a Yodah na aya pinggolaola o dato Hisikiyas na mapiya, ago matito ago
ontol sii ko hadapan o Allah a Tohan iyan.
21 Sii ko langon o manga galebek iyan para ko Timplo o Tohan, ago sii ko kapetomana
niyan ko Kitab ago so manga sogoan, na piyangongonotanan iyan so Tohan iyan sa iklas
ko poso iyan, na miyakapiya sekaniyan i bobolos.
2 MANGA RIKORD 32
Siyondolan i Sinakarib a Yarosalim
Oriyan angkai langon a miyanggolaola i Hisikiyas sii ko kiyapangongonotan iyan na

miyakaoma si Sinakarib a dato sa Asiriya na siyondolan iyan a Yodah. Piyakilikopan
iyan sa manga sondaro so kikokotaan a manga siti a aya pamikiran iyan on na keagaw
niyan ai.
2 Kagiya mailay i Hisikiyas a miyakaoma si Sinakarib a aya antap iyan na makipetidawa
sa Yarosalim
3 Na miyapamikir iran ago so manga sanasanaan iyan ago so manga olowan a sondaro a
pagolenen iran so manga bowalan a pekepoonan o ig a pepegondas roo ko liyo o siti.
4 Na miyatimo so madakel a taw na piyangolen iran so langon o manga bowalan ago so
lawasaig a pegondas sangkoto a darpa. Ka tig iran a "Ino pekatoona sa mala a ig so
manga taw sa Asiriya amay ka makaoma sii?"
5 Na minggalebek sebenar si Hisikiyas ka piyangompiyaan iyan so langon o kikatetempag
ko pangeleben o siti na piyamangonan iyan pen sa manga lantawa. Mimbaal sekaniyan sa
ikadowa a pangeleban ko liyo o paganay, na piyakabageran iyan so Milo sii ko Siti o
Daod. Mimbaal sekaniyan sa madakel a gomaan ago manga kelong
6 Ago tomiyoro pen sa manga komandir a sondaro a aya makapagolowan ko manga taw.
Oriyan iyan na tinimo iyan siran sii ko madaya a darpa ko danga o gimowa o siti, na
piyangoyatan iyan siran a tig iyan a
7 “Pakababager kano ago pakawawaraw! Di kano kelek aya pen o ba kano kadai sa inam
sabap ko dato sa Asiriya ago so makapal a manga sondaro niyan, ka sisii rektano so lebi a
mala i gees a di so sisii rekaniyan.
8 Aya sisii rekaniyan na so bager o manosiya, ogaid na sisii rektano so Allah a Tohan
tano a pagogopan tano niyan ago makipetidawa ko manga ridoay tano." Na siyarigan o
manga taw so manga katero i Hisikiyas a dato sa Yodah.
9 Da matey sii ko kalilikopi i Sinakarib ago so manga sondaro niyan ko siti a Lakis na
siyogo iyan so manga sanasanaan iyan sa Yarosalim a piyakiawidan iyan kiran angkai a
katero sii ki Hisikiyas ago so langon a taw sa Yodah a ndodoo sa Yarosalim a tig iyan a
"Giyai i pitero i Sinakarib a dato sa Asiriya: Antonaa i sasarigan iyo a gomegenek kano
pen sa Yarosalim a malilikop?
11 Aya pitero rekano i Hisikiyas na 'Pekalidasen tano o Allah a Tohan tano ko kapaar o
dato sa Asiriya.' Ogaid na pegakalan kano niyan baden, na pematay kano a ongos ago
kawaw.
12 Ba di si den si Hisikiyas i miyangowa on ko manga aparan o Tohan ago so manga
darpa a pesimbaan on sii ko manga bobongan a tig iyan ko manga taw sa Yodah ago sa
Yarosalim a 'Sii bo ko isaisa a aparan na ron kano pakasimba ago ron kano pen
pekatotong ko manga sapaat iyo.'?
13 Ba niyo di katawi so inikidia ko ago so manga dato a miyaonaan aken sii ko langon a
taw ko ped a manga nasiyon? Ba mapekalidas o manga tohan iran so manga taw ron ko
kapaar aken?
14 Antawaa ko langon o manga tohan angkai a manga nasiyon a miyabinasa mi a ba
niyan mapakalidas so manga pagtaw niyan ko kapaar aken? Andamanaya den i
kapakalidasa rekano o tohan iyo ko kapaar aken?
15 Di kano pekiakal o di na pekidadag ki Hisikiyas sa datar ai! Di niyo sekaniyan
peratiyayaa, ka da a tohan o apiya anda a nasiyon o di na ndatoan a ba niyan mapakalidas
so manga pagtaw niyan ko kapaar aken o di na so kapaar o miyanga oonaan aken a manga
dato, aya pen o ba kano mapakalidas o tohan iyo ko kapaar aken!"
16 Na initaros o manga sanasanaan i Sinakarib so di iran dii kambabasai sa marata

mipantag ko Allah a Tohan ago sii ko oripen iyan a si Hisikiyas.
17 Misorat pen si Sinakarib sa inipamagitowito iyan ko Allah a Tohan o Israil a tig iyan a
"So manga tohan o ped a manga nasiyon na da iran mapakalidas so manga pagtaw iran ko
kapaar aken, na datar oto mambo a di mapekalidas o tohan i Hisikiyas so manga pagtaw
niyan ko kapaar aken."
18 So manga sanasanaan na inipelalalis iran ai sa matanog sa basa a Hibriyo ko manga
taw a sisii ko pangeleban o siti ka pengangaleken iran siran kaan makalebod a kakeagawa
iran ko siti.
19 Di iran dii mbabasaan so mipantag ko Tohan a Yarosalim a datar o matag sekaniyan
baden barahala a katohanan o ped a nasiyon a pasad o manga lima o manosiya.
20 Sabap roo na miyangangarapan so dato Hisikiyas ago so nabi Isayas a wata i Amos na
inigoraok iran ai ko Tohan a ndodoo sa kasorgaan.
21 Na somiyogo so Allah sa malaikat na piyamono iyan so langon o manga sondaro o
dato a rakes o langon o manga komandir ago manga olowan iran sii ko kampo o dato sa
Asiriya. Kagiya ka maoto na komiyasoy si Sinakarib ko inged iyan a tanto a kiyayaan.
Na miyakaisa a gawii a ndodoo sekaniyan ko timplo o tohan iyan na so ped ko manga
wata iyan na biyono iran a pedang.
22 Giyanan i okit a kiyapakalidasa o Allah ki Hisikiyas ago so manga taw sa Yarosalim

ko kapaar i Sinakarib a dato sa Asiriya ago sii pen ko kapaar o ped a manga nasiyon. Na
piyagipat iyan siran ko mbalabala.
23 Madakel a miyamangowit sa manga pamemegayan ko Allah sii sa Yarosalim ago
manga ala i arga a manga nganin sii ki Hisikiyas a dato sa Yodah. Ipoon roo den na tanto
sekaniyan a pagaadatan o langon o manga nasiyon.
Miyasakit si Hisikiyas
24 Sangkoto a masa na miyasakit si Hisikiyas na magaan den matay. Miyangangarapan

sekaniyan ko Allah, na inampon iyan ago bigan iyan sa nanao a pekapiya sekaniyan.
25 Ogaid na da panalamat si Hisikiyas ko Tohan ka miyangimporoan baden. Kagiya ka
maoto na kiyararangitan sekaniyan o Allah ago giya Yodah ago Yarosalim.
26 Ogaid na piteobat i Hisikiyas so kiyapangimporoan iyan a datar mambo o manga
manga taw sa Yarosalim, na da kiran mitana so rarangit o Allah sii ko kaooyagoyag pen i
Hisikiyas.
So Kakawasaan i Hisikiyas
27 Tanto a mala a kakawasaan i Hisikiyas ago tanto sekaniyan a kababantogan. Na
inimbaal iyan a ginawa niyan sa manga petegoan sa manga pirak iyan, manga bolawan,
manga ala i arga a montiya, manga palapa, manga kelong ago pitibarangan a manga ala i
bali.
28 Mimbaal sekaniyan pen sa manga taliyong a petegoan ko pekeragon a manga
pereperan iyan, bago a arak ago lana a olibi. Na mimbaal sekaniyan pen sa manga kodal
o pitibarangan a manga ayam iyan ago manga talon iyan.
29 Miyangon sekaniyan sa manga siti ago miyakapantiyari sa madakel a manga sapi,
bilibili ago kambing, ka bigan sekaniyan o Tohan sa tanto a mala a tamok.
30 Si Hisikiyas i miyakapelit ko pegondasan o ig o lawasaig sa kaporoan sii sa Gihon na
piyakaokit iyan ai sii ko didalem o lopa taman den ko sedepan o Siti o Daod. Mapiya i
bobolos so langon a pinggalebek iyan.
31 Ogaid na kagiya makaoma ki Hisikiyas so manga siyogo o manga sanasanaan sa
Babilon sa kaisei ran on mipantag ko piyakamemesa a nanao a miyanggolaola ko inged na
piyakambayabaya sekaniyan o Tohan kaan iyan katepengi ago mapariksa so langon o
madadalem ko poso iyan.
32 So ped a miyanga sosowasowa ko kandadato i Hisikiyas ago so manga galebek iyan ko

kapetomana niyan ko Allah na misosorat ko 'Manga Pangingilain o nabi Isayas a wata i
Amos' a madadalem ai ko 'Ribro a Totolan ko manga Dato sa Yodah ago Israil.'
33 Miyatay si Hisikiyas na inilebeng sii ko kaporoan a darpa ko pekoboran ko manga
kiyababadan ki Daod. So langon o manga taw sa Yodah ago sa Yarosalim na piselasela
iran sekaniyan ko kiyapatay niyan, na so wata iyan a si Manasih na aya on miyakasambi a
dato.
2 MANGA RIKORD 33
Si Manasih a Dato sa Yodah
Miyakasapolo ago dowa ragon a idad i Manasih kagiya poon ndato na mindato sekaniyan
sii sa Yarosalim ko miyakalima polo ago lima ragon.
2 Minggolaola sekaniyan sa marata sii ko hadapan o Allah na siyowa iyan so
piyakasisingay a manga olaola o manga nasiyon a piyamogaw o Allah ko kapepekaantap
kiran o manga Israil.
3 Piyamangon iyan peroman so manga aparan ko manga barahala sii ko manga bobongan
a piyaminasa i Hisikiyas a ama iyan; mimbaal sekaniyan sa manga aparan ko katohanan a
Baal ago piyamakatindeg iyan so manga polaos a aya toos ko katohanan a Asirah.
Pesodiyodan ago pesimbaan iyan so langon a pamimitoonen roo sa langit.
4 Mimbaal sekaniyan sa manga aparan ko manga barahala sii ko Timplo o Allah a so
darpa a ba di miyatero gowani o Allah a "Roo ketatap so Ingaran aken sa Yarosalim sa
dayon sa dayon."
5 Sii ko dowa a lamalama o Timplo o Allah na mimbaal sekaniyan on sa manga aparan
ko langon o manga bitoon sa langit.
6 Piyanotong iyan so manga wata iyan a inisoasoat roo ko Balintad a Bin Hinom. Di
sekaniyan dii nggolaola sa kapamantak, kaperimar, kapangatao na pegisean iyan so
manga pendarpaan ago manga pepamangangay. Tanto a mala a kamarataan a pinggolaola
niyan ko hadapan o Allah a minikakat ko rarangit iyan. Piyakatindegan iyan sa barahala a
inembaalan iyan so Timplo o Tohan a ba di miyatero o Tohan ki Daod ago so wata iyan a
Solaiman a "Giyangkai a Timplo ago giya Yarosalim i miyapili aken ko langon a inged o
manga mbatabataa a Israil a ron aken tegoa so Ingaran aken sa taman sa pakataman.
8 O piyapiyai tomoman o manga Israil so langon taman a inisogo aken kiran, a so Kitab,
so manga kokoman ago so manga taritib a minitoron ki Mosa, na di aken siran den
pekaawaan peroman ko lopa a inisenggay aken a rek o manga apo iran."
9 Ogaid na piyakateridadag i Manasih so manga taw sa Yodah ago sa Yarosalim sa di iran
dii kanggolaola sa lebi pen a marata a di so manga nasiyon a piyaminasa o Allah sii ko
kapepekaantap kiran o manga Israil.
Miteobat si Manasih
10 Liyalangan o Allah si Manasih ago so manga pagtaw niyan ogaid na da iran ai

pakinega.
11 Sabap roo na piyakigobat siran o Allah ko manga komandir o manga sondaro o dato sa
Asiriya na diyakep iran si Manasih. Kiyaningkiran iran so ngirong iyan ago piyatong iran
a rantay a tombaga na inowit iran sa Babilon.
12 Sii ko kapekerasay niyan na miyangangampedian sekaniyan ko Allah na tanto niyan a
inipangalimbabaan a ginawa niyan ko hadapan o Tohan o manga apo iyan.
13 Na kagiya mangangarapan sekaniyan na miyatarima o Allah so inipangangampedian
iyan na inampon iyan na inibaling sekaniyan o Allah sa Yarosalim ago sii ko ndatoan
iyan. Na ipoon roo den na katawan den i Manasih a so Allah bes i Tohan.
14 Oriyan oto na biyangon iyan peroman so makaliliyo a pangeleban o Siti o Daod ipoon
ko masesedepan a kilid o Bowalan a Gihon sii ko balintad na manaros ko gimowa a
bebetowan sa Gimowa a Seda, na piyakaalibet iyan ai ko bobongan a Opil, na pimbaalan
iyan ai a tanto a maporo. Tiyagoan iyan pen sa manga kapitan a sondaro so langon o
kikokotaan a manga siti sa Yodah.
15 Piyangowa niyan on ko Timplo o Allah so manga katohanan o ped a nasiyon ago so
barahala a piyakatindeg iyan roo taman den ko langon o manga aparan a pimbaalan iyan
ko bobongan a katatagoan ko Timplo ago sii sa Yarosalim, na inipelelebad iyan ai ko liyo
o siti.
16 Oriyan iyan na inompiyaan iyan so aparan o Allah na somiyapaat sekaniyan on sa
manga korban pantag bo ko kanggiginawai. Na inisogo iyan ko langon a taw sa Yodah so
kapangongonotani ran ko Allah a Tohan o Israil.
17 Apiya pen oto na initaros o manga taw so di iran dii kakorban sii ko manga aparan ko
manga bobongan ogaid na para bo ko Allah a Tohan iran.
18 So ped a miyanga sosowasowa ko kandadato i Manasih a rakes on so

inipangangarapan iyan ko Tohan iyan ago so manga katero a pitetaro on o manga nabi sii
ko Ingaran o Allah a Tohan o Israil na miyamangisorat ko 'Ribro a Totolan ko manga
Dato sa Israil.'
19 So kiyapangangarapan iyan ago so kiyaampona on o Tohan, ago so pen so langon o
manga dosa niyan ago so di niyan kaperatiyaya, taman ko listaan ko manga darpa a
piyamangonan iyan sa manga aparan ko manga barahala roo ko manga bobongan ago so
manga darpa a piyamakatindegan iyan sa manga polaos a toos ko katohanan a Asirah ago
so ped a manga barahala sa da niyan pen kipangalimbabaanen sa ginawa niyan na palaya
den miyamangisorat ko manga rikord o manga nabi.
20 Miyatay si Manasih na inilebeng ko torogan iyan. Na so wata iyan a si Amon na aya
on miyakasambi a dato.
Si Amon a Dato sa Yodah
21 Miyakadowa polo ago dowa ragon a idad i Amon kagiya poon ndato na mindato
sekaniyan ko miyakadowa ragon sii sa Yarosalim.
22 Minggolaola sekaniyan sa marata ko hadapan o Allah a datar o pinggolaola o ama
iyan. Piyangorbanan iyan ago sinimba niyan so langon a manga barahala a pimbaalan o
ama iyan,
23 Ogaid na kena a ba sekaniyan datar i Manasih a ama iyan ka da niyan
pangalimbabaanen a ginawa niyan ko hadapan o Allah, na initaralo niyan baden a di
niyan dii kambaradosa
24 So ped ko manga sanasanaan i Amon na pikediyatan iran sekaniyan sa marata na
biyono iran sii ko torogan iyan.
25 Ogaid na piyamono o manga taw sa Yodah so langon a mikediyat sa marata ko dato
Amon na biyaloy iran a dato si Yosiyas a wata iyan a aya iran on inisambi.
2 MANGA RIKORD 34
Si Yosiyas a Dato sa Yodah
Miyakawalo ragon a idad i Yosiyas kagiya poon ndato na miyakandato sekaniyan ko

miyakatelo polo ago isa ragon sii sa Yarosalim.
2 Pinggolaola niyan so ontol sii ko hadapan o Allah na siyowa iyan so manga okitokit o
apo iyan a Daod; da sekaniyan den silay sa kawanan o di na sa diwang.
3 Sii ko ikawalo ragon ko kandadato iyan a kangodaan sekaniyan pen na pipoonan iyan
den mangongonotan so Tohan o apo iyan a si Daod. Sii ko ikasapolo ago dowa niyan
ragon na pipoonan iyan on den komowa sii sa Yodah ago sa Yarosalim so manga aparan
ko manga barahala roo ko manga bobongan, so manga polaos a toos ko katohanan a
Asirah, ago so langon a ped a manga barahala.
4 Sii ko kamamasai niyan on na piyanempag iran so manga aparan ko katohanan a Baal.
Pinggegeba iyan so manga aparan a pesepaatan sa doka sii ko kaporoan iran na piroropet
iyan ago piyakapagombiyombi niyan so manga polaos a toos ko katohanan a Asirah ago
so langon o ped a manga barahala na inikayamber iyan ai ko liyawaw o manga kobor o
siran oto a mikorban on.
5 Piyanotong iyan pen so manga tolan o manga imam ko manga barahala sii ko liyawaw o
manga aparan. Sii sangkai a okit na linimpiyowan iyan a Yodah ago Yarosalim.
6 Sii ko manga pagingedingedan sa Manasih, sa Ipraim ago sii sa Simiyon taman den sa
Naptali a rakes o miyanga bibinasa a darpa ko mbalabala on
7 Na pinggegeba iyan so manga aparan on ago so manga polaos a toos ko katohanan a
Asirah ago piyakapagombiyombi niyan so manga barahala ago piroropet iyan so manga
aparan sa doka sii sa dalem a inged a Israil. Oriyan ai na komiyasoy sa Yarosalim.
Miyatoon so Kitab o Allah
8 Sii ko ikasapolo ago walo ragon a kandadato i Yosiyas oriyan o kiyalimpiyowi niyan ko
lopa ago so Timplo na somiyogo sekaniyan sa telo kataw ko manga sanasanaan iyan sa
kaompiyai ran ko Timplo o Allah a Tohan iyan, a si Sapan a wata i Asaliyas, si Maasiyas
a gobirnador ko siti ago si Yowas a wata i Yowahas a so panonorat.
9 Somiyong siran ki Hilkiyas a so maporo a imam na inibegay iran on so pirak a
miyapangowit ko Timplo o Tohan. So manga Libitiyo a pepegipat ko manga pintoan na
aya miyakatarima sii a poon ko manga taw sa Manasih ago sa Ipraim ago so langon a ped
a manga taw sa Israil, ago poon ko langon a taw sa Yodah ago Baniyamin ago so
kibabaling sa Yarosalim.
10 Na piyalad iran so pirak ko manga mama a makatetandingan ko galebek ko Timplo o
Allah na inibegay iran ai ko manga gomagalebek a magompiya ago pekaasal ko Timplo.
11 Bigan iran pen sa pirak so manga panday sa kayo ago manga gomagalebek a ipamasa
iran sa piyanapilan a manga ator ago manga kayo para ko manga mirag ago manga dolog
ko manga walay a miyanga bibinasa sabap ko kinindarainonen on o manga dato sa
Yodah.
12 Kasasarigan so manga mama a dii nggagalebek, na aya manga tetandingan kiran na si
Yahat ago si Obadiyas a manga Libitiyo a poon ko mbawataan i Mirari, ago si Sakariyas
ago si Misolam a poon ko mbawataan i Kohat. (So langon o manga Libitiyo na mapasang
i kamboboniboniyan.)
13 So ped ko manga Libitiyo na aya manga sanasanaan ko dii nggosod ko manga awid,
ago so langon o manga kapatas ko dii nggagalebek sa apiya antonaa. Na so ped ko manga
Libitiyo na manga panonorat o di na manga pepegipat ko manga gimowa.
14 Sii ko kipeliyon iran ko pirak a miyapangowit ko Timplo o Allah na miyatoon o imam

a si Hilkiyas so ribro a kasosoratan ko Kitab o Allah a minitoron iyan a nggolalan ki
Mosa.
15 Na pitero i Hilkiyas ki Sapan a panonorat a "Miyatoon aken so ribro a kasosoratan ko
Kitab sii ko Timplo o Allah." Inibegay niyan so ribro ki Sapan
16 Na inowit i Sapan so ribro ko dato. Iniripot iyan on a "So manga sanasanaan ka na di
iran dii nggolalan so langon taman a piyakisangan ka kiran.
17 Kinowa iran so pirak a matatago ko Timplo o Allah na inibegay iran ko manga
tetandingan ko galebek ago so kigagalebek."
18 Na pitero pen i Sapan ko dato a "Inibegay raken i Hilkiyas a imam angkai a ribro," na
biyatiya ini i Sapan ko kapekenega on o dato.
19 Kagiya maneg o dato so manga katero o Kitab na kinisi iyan so nditaren iyan sa
kiyarata a ginawa niyan.
20 Na siyogo iyan siki Hilkiyas, Ahikam a wata i Sapan, Abdon a wata i Mikah, Sapan a
panonorat ago si Asayas a so talasogoay o dato na pitero iyan kiran a
21 “Ikano roo na go niyo isei so Allah para raken ago so langon a taw a miyalamba sa
Israil ago sa Yodah. Kenala niyo so makapantag ko manga katero a misosorat sangkai a
ribro a miyatoon. Ka tanto a mala so rarangit o Allah a initana iyan rektano sabap ko da
katomana o manga apo tano ko katero o Allah. Da iran nggolalanen so langon o
misosorat sangkai a ribro!"
22 Mandiyadi na lomiyalakaw si Hilkiyas ago so ped a manga siyogo o dato na somiyong

siran ko babay a nabi a si Holda a mababaling ko miyambago a pengampong sa
Yarosalim. So karoma niyan a si Salom a wata i Tokat a wata i Hasrah na aya komikibir
ko manga nditaren. Piyanotol iran ko babay so miyanggolaola
23 Na pitero iyan kiran a "Aya pitero o Allah a Tohan o Israil na: 'Teroa niyo ko mama a
somiyogo rekano sii raken a
24 Giyai i kabasa o Allah: Pagowitan ko sa morala angkai a darpa ago so kibabaling on a
aya kakitoman o langon o manga sinta a misosorat ko ribro a miyabatiya ko kamamasaan
o dato sa Yodah.
25 Tiyalikodan ako o manga taw sa Yodah ago tomiyotong siran sa doka ko salakaw a
manga tohan na piyakakerangit ako iran a nggolalan ko langon a pinggolaola iran. Sabap
roo na itena aken so pesokeyaw a rarangit aken sangkai a darpa na di den kepareng.'
26 “Ogaid na makapantag ko dato sa Yodah a somiyogo rekano sa kaisei ko Allah na

teroa niyo ron a 'Giyai i kabasa o Allah a Tohan o Israil makapantag ko manga katero a
miyaneg ka: Miteobat ka ago miyangalimbabaan ko hadapan o Tohan sii ko kiyanega
ngka ko manga katero iyan makapantag ko kapemoralai niyan sangkai a darpa ago so
manga taw ron, na sabap sa inipangalimbabaan ka a ginawa ngka ago kinisi i ka pen so
manga nditaren ka ago gomiyoraok ka sii ko hadapan aken na inampon aken seka,' a tig o
Allah,
28'ka itepi aken seka ko manga apo o ka na kilebeng ka a lomilintad. Di ngka kemasaan
so langon o morala a pagowiten ko sangkai a darpa ago so manga kibabaling on.' "
Na komiyasoy ko dato so manga siyogo na piyanotol iran on so sembag o babay.
Mimbaal si Yosiyas sa Kapasadan a Katomana ko Allah
29 Mandiyadi na piyakisogoan o dato Yosiyas so langon a manga olowan sa Yodah ago

sa Yarosalim
30 Na somiyong siran ko Timplo o Allah a oonotan o manga imam ago so manga Libitiyo
ago so langon a taw sa Yodah ago so kibabaling sa Yarosalim ipoon ko mababa taman ko
maporo. Na biyatiya o dato sii ko kapekenega iran on so langon o manga katero a
madadalem ko Ribro a Kapasadan a miyatoon ko Timplo o Allah.
31 Tominindeg so dato ko obay o polaos iyan na mimbaal sa kapasadan ko hadapan o
Allah sa kapangongonotani niyan ko Allah ago so katomana ko manga sogoan iyan,
manga taritib ago manga kokoman iyan sa iklas ko poso iyan ago iklas ko niyawa niyan,
ago so kinggolalanen iyan ko manga ipapaliyogat o Kapasadan a misosorat ko ribro.
32 Na piyakasepa iyan on so langon a taw sa Yarosalim ago so manga taw sa Baniyamin.
Pinggolaola ini o manga kibabaling sa Yarosalim a mipepasod ko Kapasadan o Tohan, a
so Tohan o manga apo iran.
33 Piyangowa on i Yosiyas so langon a piyakasisingay a barahala ko dalem a inged a
Israil na piyandoan iyan so langon a taw ron sa kasimbaa iran ko Allah a Tohan iran. Na
taman ko kaooyagoyag iyan pen na da iran den ndarainonen so kapepangongonotani ran
ko Allah a Tohan iran.
2 MANGA RIKORD 35
Piselasela i Yosiyas so Paska
Piselasela i Yosiyas so Paska o Allah sii sa Yarosalim, na so manga bilibili ko Paska na

piyanombali sii ko ikasapolo ago pat gawii ko paganay a olanolan.
2 Piyakisangan iyan ko manga imam so manga galebek iran na piyangoyatan iyan siran sa
kapanalagadi iran ko Timplo o Allah.
3 Na pitero iyan ko manga Libitiyo a misesenggay a soti ko Allah a aya pepamangendao
ko manga Israil a "Betaden iyo so soti a Kaban sa Kapasadan sii ko Timplo a biyangon i
Solaiman a wata i Daod a dato sa Israil. Di den kailangan a kapeposaiya niyo ron ipoon
ko isa a darpa taman ko ped a darpa. Na, panalagadi niyo so Allah a Tohan iyo ago so
manga pagtaw niyan a Israil.
4 Tiyagara niyo a manga ginawa niyo sa kapakanggalebek o oman i mbawataan iyo ago
so manga lompok iyo a mipepasod ko manga insarat a inisorat i Daod a dato sa Israil ago
si Solaiman a wata iyan.
5 Tindeg kano ko manga darpa iyo sii ko Timplo kaan iyo kaogopi so oman i pamiliya o
manga ped iyo a manga Israil.
6 Panombalia niyo so manga nati a bilibili ko Paska. Na sotiya niyo a manga ginawa niyo
kaan iyo matiyagar so manga bilibili para ko manga ped iyo ago an iran matoman so
manga insarat a inibegay o Allah a nggolalan ki Mosa."
7 Migay si Yosiyas para ko manga taw sa madakel a manga ayam a pekorbanen ko Paska
a poon ko rek iyan a tamok, a telo polo nggibo a manga nati a bilibili ago manga
kambing, ago telo nggibo pen a manga sapi.
8 Migay mambo so manga sanasanaan o dato sa iklas a manga pamemegayan iran a
manga ayam sii ko manga taw, ago sii ko manga imam ago so manga Libitiyo. Si
Hilkiyas, si Sakariyas ago si Yahiyal a so manga komikibir ko Timplo o Tohan na
miyamamegay siran ko manga imam sa dowa nggibo ago nem gatos a manga bilibili ago
manga kambing, ago telo gatos a manga sapi a mapekorban ko Paska.
9 So pen so manga olowan a Libitiyo a si Konaniyas ago so dowa kataw a pagari niyan a
si Simayas ago si Nitanil taman ki Hasabiyas, si Yail ago si Yosabad na migay siran ko
manga Libitiyo sa lima nggibo a manga bilibili ago kambing, ago lima gatos a manga sapi
a mapekorban ko Paska.
10 Kagiya matiyagar den so langon taman sa kapeselaselaa ko pista na miyamanindeg so

manga imam ko oman i darpa iran a rakes o manga Libitiyo sii ko oman i lompok iran a
aya kiran inisogo o dato.
11 Na piyanombali o manga Libitiyo so manga bilibili ago so manga kambing a
pekorbanen ko Paska na ipendawag iran ko manga imam so ped ko rogo a ipepemesipesik
o manga imam ko aparan sii ko kapeloniti o manga Libitiyo ko manga ayam.
12 Inipanibay iran so manga ayam a isepaat a totongen kaan iran ai mambagibagi ko
manga taw a ipepasod ko pitilokesan ko manga pamiliya iran an iran ai misapaat ko Allah
a so den so misosorat ko Kitab o Mosa. Datar oto mambo a inikidia iran ko manga sapi.
13 Piyagiyaw iran ko apoy so manga ayam a piyangorban ko Paska a so den so okit a
iniinsarat, na piyakadidi iran so soti a manga sapaat sii ko manga koden ago manga
lagaan ago manga kawa, na pinggagaan iran ai mangenat ko langon o manga taw.
14 Kagiya mapasad ai na mitiyagar so manga Libitiyo sa manga ayam para sa ginawa iran
ago so manga imam, ka matetembang so manga imam, a so kiyababadan ki Aron, ko
kipesepaaten iran ko manga korban a petotongen ago so manga sibo iyan taman den ko
kiyagagawii niyan.
15 So manga paboboniboniyan, a so manga kiyababadan ki Asap, na sisii siran den ko
manga darpa a inisenggay kiran i Daod, si Asap, si Himan ago si Yadoton a so nabi o
dato. Na so manga gordiya ko manga gimowa na di den kailangan a ba iran awai so
manga darpa iran ka so ped iran a manga Libitiyo na pitiyagaran iran siran.
16 Sii sangkoto a gawii na ininggolalan so langon a okitokit mipantag ko kapesimbaa ko
Allah, so kapeselaselaa ko Paska, ago so kipesepaaten ko manga korban a petotongen a so
den so inisogo o dato Yosiyas.
17 So langon o manga Israil a miyamakadarpa na piselasela iran so Paska sangkoto a
masa ago initoman iran so Pista ko Kaken sa Paan a da a Tapay ron ko soled o miyakapito
gawii.
18 Da den a kiyaselaselaa ko Paska a ba datar oto ipoon ko masa o nabi Samowil. Da den
a isa bo ko manga dato sa Israil a ba miyakaselasela sa Paska a ba datar angkai a
kiyaselaselaa on i Yosiyas a rakes o manga imam, so manga Libitiyo ago so langon a taw
sa Yodah ago sa Israil a miyamakadarpa roo a ped o manga taw sa Yarosalim.
19 Piselasela angkai a Paska sii ko ikasapolo ago walo ragon a kandadato i Yosiyas.
So Kaposan o Kandadato i Yosiyas
20 Kagiya maipos ai na sii ko oriyan o kiyaompiyai i Yosiyas ko Timplo na si Niko a dato

sa Misir na somiyong sa Karkimis sii ko obay o Lawasaig a Yopratis ka nggobaten iyan
ai. Lomiyalakaw si Yosiyas ago so manga sondaro niyan sa kapakipetidawa iran ko
manga Imisiren,
21 Ogaid na somiyogo on si Niko sa manga sogo kaan iran on matero a "Da den a labet
ka sangkai a kapakipetidawa aken, hey dato sa Yodah. Kena a ba seka i nggobata ko
sangkai a gawii ka so ndatoan a di aken dii itidawa, na pitero raken o Tohan a penggagaan
ako. Di ngka pesopaka so Tohan a mipageepada aken, ka o ba ka niyan baden binasaa."
22 Ogaid na da awai i Yosiyas so dato Niko; da niyan pakinega so pitero o Tohan a

nggolalan ki Niko, ka baden miyanangin ago tomiyaros lomalakaw sa kapakipetidawa
iyan on sii ko Kapantaran sa Migido.
23 Sii ko di iran dii katidawa na miyasogat a pana so dato Yosiyas, na pitero iyan ko
manga oripen iyan a "Palagowin ako niyo ka mala so pali aken!"
24 Na kinowa iran si Yosiyas ko karo niyan na riyoran iran ko isa a karo niyan na inowit
iran sa Yarosalim a ron sekaniyan miyatay. Inilebeng sekaniyan ko pekoboran ko manga
apo iyan, na inimboko sekaniyan o langon a taw sa Yodah ago sa Yarosalim.
25 Miyangantang so nabi Yaramiyas sa manga bayok a kinimbokoon ki Yosiyas, na

taman den imanto na pegosaren ai o langon a pababayok a manga mama ago manga babay
sii ko di iran dii kimbokoon ki Yosiyas. Miyabaloy ai a adatadat sii sa Israil, na
miyamangisorat ai sii ko Ribro a manga Kamboboko.
26 So ped a miyanga sosowasowa ko kandadato i Yosiyas ago so kapetomana niyan ko

misosorat ko Kitab o Allah
27 Ago so ped a manga galebek iyan ipoon sa poonan na taman sa kaposan na palaya
miyamangisorat ko 'Ribro a Totolan ko manga Dato sa Israil ago Yodah.'
2 MANGA RIKORD 36
Si Yahowahas a Dato sa Yodah
Kinowa o langon a taw ko inged si Yahowahas a wata i Yosiyas na biyaloy iran a dato a
minisambi ki ama iyan sii sa Yarosalim.
2 Dowa polo ago telo ragon a idad i Yahowahas kagiya poon ndato na mindato sekaniyan
sa Yarosalim ko miyakatelo olan.
3 Si Niko a dato sa Misir na likasan iyan si Yahowahas sa kadato sii sa Yarosalim na
piyakabayad iyan a Yodah sa bowis a telo nggibo ago pat gatos ka kilo a pirak ago telo
polo ago pat ka kilo a bolawan.
4 Na biyaloy i Niko si Iliyakim a pagari i Yahowahas a dato sa Yodah ago sa Yarosalim,
na siyambian iyan so ngaran i Iliyakim sa Yahoyakim. Na biniyag i Niko si Yahowahas a
pagari i Iliyakim na inowit iyan sa Misir.
Si Yahoyakim a Dato sa Yodah
5 Dowa polo ago lima ragon a idad i Iliyakim kagiya poon ndato na mindato sekaniyan ko
miyakasapolo ago isa ragon roo sa Yarosalim. Minggolaola sekaniyan sa marata sii ko
hadapan o Allah a Tohan iyan.
6 Giyobat sekaniyan i Nibokadnisar a dato sa Babilon na piyatong iyan si Iliyakim a
rantay na inowit iyan sa Babilon.
7 Inawidan pen i Nibokadnisar sa Babilon so ped ko manga kasangkapan ko Timplo o
Allah na tiyago iyan ai sii ko torogan iyan sa Babilon.
8 So ped a miyanga sosowasowa ko kandadato i Yahoyakim a rakes o piyakasisingay a
manga pinggolaola niyan ago so langon a marata a olaola niyan na misosorat ko 'Ribro a
Totolan ko manga Dato sa Israil ago Yodah.' So wata iyan a si Yahoyakin na aya on
miyakasambi a dato.
Si Yahoyakin a Dato sa Yodah
9 Miyakasapolo ago walo ragon a idad i Yahoyakin kagiya poon ndato na mindato
sekaniyan ko miyakatelo olan ago sapolo gawii roo sa Yarosalim. Minggolaola sekaniyan
sa marata sii ko hadapan o Allah.
10 Sii ko kiyapooni ko ragon na piyakidakep sekaniyan o dato Nibokadnisar ago
piyakiwit iyan sa Babilon a rakes o manga ala i arga a kasangkapan ko Timplo o Allah.
Na biyaloy i Nibokadnisar so bapa i Yahoyakin a si Sidikiyas a dato sa Yodah ago
Yarosalim.
Si Sidikiyas a Dato sa Yodah
11 Miyakadowa polo ago isa ragon a idad i Sidikiyas isako mabaloy a dato na mindato
sekaniyan ko miyakasapolo ago isa ragon sii sa Yarosalim.
12 Minggolaola sekaniyan sa marata sii ko hadapan o Allah a Tohan iyan na da niyan
pangalimbabaanen a ginawa niyan apiya pen liyalangan sekaniyan o nabi Yaramiyas a aya
on mitero ko manga katero o Allah.
13 Siyopak iyan pen so dato Nibokadnisar apiya pen miyapakasepa sekaniyan i
Nibokadnisar sii ko Ingaran o Tohan a tomanen iyan so dato sa Babilon. Na miyakategas
so olo i Sidikiyas ago piyakategas iyan so poso iyan na da den sangor ko Allah a Tohan o
Israil.
14 Liyo ron pen na pekitaralo so kapegongkir o manga olowan sa Yodah a rakes o manga
imam ago so langon a taw. Pesowaan iran so langon a piyakasisingay a manga olaola o
manga nasiyon ago pekekaraman iran so Timplo o Allah a inisenggay niyan a soti sii sa
Yarosalim.
15 So Allah a Tohan o manga apo iran na lalayon iyan kiran pesegoon so manga nabi
niyan a pepakaiktiyaren iran so manga pagtaw niyan ka kagiya ipepangalinggagaw niyan
siran ago so Timplo a kakadenan iyan.
16 Ogaid na ba iran den pepegongatongata so manga siyogo o Tohan ago di iran dii
sodiin so manga katero iyan ago pesetroon iran so manga nabi niyan taman sa
mimborngat so pesokeyaw a rarangit o Allah ko manga pagtaw niyan na di den ai
mapekalenggaw.
Miyabinasa a Yarosalim
17 Inowit kiran o Allah so dato sa Babilon a nggobat kiran, na piyamono iyan so manga
kangodaan kiran sii ko Timplo. Da den a kapedi iyan apiya anda ko manga ngongoda o
di na manga raga aya pen o ba so manga totoa o di na miyanga lolokes. Palaya siran den
piyalad o Tohan sii ki Nibokadnisar.
18 Inawidan iyan so langon o manga kasangkapan a pegosaren ko Timplo o Tohan a
ndatar so mala ago so maito a rakes o langon a tamok sii ko manga peteliyongan ko
Timplo o Allah, ago so pen so manga tamok o dato ago so manga sanasanaan iyan, na
piyangowit iyan ai langon roo sa Babilon.
19 Piyanotong o manga sondaro niyan so Timplo o Tohan ago so langon o manga torogan
sa Yarosalim na piyaminasa iran so langon taman a aden a bali niyan roo, na initobak iran
so pangeleban o siti.
20 Piyamiyag iyan so langon a miyamakapagoyag ko katidawa na piyangowit iyan siran
langon sa Babilon. Na miyabaloy siran a manga oripen o dato ago so manga wata iyan
taman ko kiyapakatindeg o ndatoan a Pirsiya.
21 Miyalaslas den so lopa na mitataros den angkai a kapakambebetad iyan ko soled o
miyakapito polo ragon taman ko kiyatarotop o kapakadedeke iyan a aya kinitomanen ko
pitero o Allah a nggolalan ko nabi Yaramiyas.
Piyakabaling i Siros so manga Israil ko Inged iran
22 Sii ko paganay a ragon ko kandadato i Siros sa Pirsiya na initoman o Allah so pitero

iyan a nggolalan ki Yaramiyas, ka inoyatan iyan si Siros a dato sa Pirsiya sa kisoraten
iyan sangkai a sogoan kaan iyan mapakalangkap ko dalem a ndatoan iyan. Aya oni niyan
na:
23 “Giyai i kabasa i Siros a dato sa Pirsiya: Inibegay raken o Allah a Tohan sa langit so
langon a ndatoan sa doniya, na siyanganan ako niyan a aya pekabangon sa Timplo para
rekaniyan roo sa Yarosalim sa inged a Yodah. Apiya antawaa rekano a manga pagtaw
niyan na pekakasoy roo, na pengnin ko a sisii rekano so Allah a Tohan iyo!"
ISRAS
ISRAS 1
Piyakabaling i Siros so manga Yahodi a Minitaog
Sii ko paganay a ragon ko kandadato i Siros sa Pirsiya na ininggolalan o Allah so

miyatero iyan a nggolalan ko nabi Yaramiyas. Tiyawapikan iyan so poso i Siros sa
kapekalangkapa niyan sangkai a sogoan ko dalem a ndatoan iyan ago so kisoraten iyan
on:
2 “Giyai i pitero i Siros a dato sa Pirsiya: So Allah a Tohan sa langit na inibegay niyan
raken so langon a ndatoan ko doniya na initoro ako niyan a aya pekabangon sa pesimbaan
rekaniyan roo sa Yarosalim sa inged a Yodah.
3 Apiya antawaa rekano i manga pagtaw niyan na pekasong sa Yarosalim sii sa Yodah sa
kambonga niyan ko Timplo o Allah a Tohan o Israil, a so Tohan a sisii sa Yarosalim. Na
pengnin ko a maped rekano so Tohan iyo!
4 Na so manga taw ko apiya anda a darpa a ron mababaling so manga Yahodi a minitaog
na kebegan iyo siran sa pirak ago bolawan, manga loto ago manga pangangayamen a
rakes o iklas a manga pamemegayan a isepaat iran sii ko Timplo o Tohan roo sa
Yarosalim."
5 Mandiyadi na so manga olowan o manga mbatabataa Yodah ago Baniyamin, ago so

manga imam ago manga Libitiyo a rakes o oman i isa a tirang o Tohan so poso iyan na
mitiyagar siran somong sa Yarosalim sa kambangona iran ko Timplo o Allah.
6 Inogopan siran o langon o manga siringan iran ka piyamegan iran sa manga igagama a
pirak ago bolawan, manga loto, manga pangangayamen ago manga ala i arga a nganin a
rakes o iklas a manga pamemegayan a isepaat roo ko Timplo.
7 Liyo ron pen na inibegay kiran o dato Siros so manga kasangkapan a miyakowa i
Nibokadnisar ko Timplo o Allah sii sa Yarosalim a miyatago iyan ko pesimbaan ko
manga tohan iyan.
8 Piyalad ai i Siros ki Mitridat a trisoriro ko ndatoan, na binilang iyan ai ago inibegay
niyan ki Sisbasar a isa a olowan sa Yodah.
9 Giyai i kadakel iran:
lapad a bolawan..............telo polo

lapad a pirak................sanggibo
kara a pirak...................dowa polo ago siyaw
10 Ladiya a bolawan...............telo polo
ladiya a pirak...............pat gatos ago sapolo
so ped a kasangkapan.........sanggibo
11 So kalangolangon ai na lima nggibo ago pat gatos a manga kasangkapan a bolawan

ago pirak. Initelon ai langon i Sisbasar a poon sa Babilon roo sa Yarosalim ko kiyakasoy
roo o miyamangitaog a manga Yahodi.
ISRAS 2
So Listaan ko Miyamangitaog a Miyamakakasoy
Giyai so minitaog a manga Yahodi a miyakaawa ko probinsiya a Babilon a

miyamakakasoy sa Yarosalim ago sa Yodah a so oman i isa kiran na sii ko inged iyan.
Minitaog gowani so manga pamiliya iran a miyanga bibiyag i Nibokadnisar a dato sa
Babilon.
2 So manga magoolowan kiran na si Sirobabil, si Yosowa, si Nihimiyas, si Sirayas, si
Riilayas, si Mordikay, si Bilsan, si Mispar, si Bigbay, si Rihom ago si Baanah.
Katii so itongan ko manga Israil a miyakakasoy:
3 Manga mbawataan i Paros.............dowa nggibo ago magatos ago pito polo ago dowa
4 Manga mbawataan i Sipatiyas........ telo gatos ago pito polo ago dowa
5 Manga mbawataan i Arah..............pito gatos ago pito polo ago lima
6 Manga mbawataan i Pahatmowab a maaped ko manga pamiliya i Yosowa ago si
Yowab....................dowa nggibo ago walo gatos ago sapolo ago dowa
7 Manga mbawataan i Ilam...............sanggibo ago dowa gatos ago lima polo ago pat
8 Manga mbawataan i Sato................siyaw gatos ago pat polo ago lima
9 Manga mbawataan i Sakay.............pito gatos ago nem polo
10 Manga mbawataan i Bani..............nem gatos ago pat polo ago dowa
11 Manga mbawataan i Bibay.............nem gatos ago dowa polo ago telo
12 Manga mbawataan i Asgad........... sanggibo ago dowa gatos ago dowa polo ago dowa
13 Manga mbawataan i Adonikam......nem gatos ago nem polo ago nem
14 Manga mbawataan i Bigbay............dowa nggibo ago lima polo ago nem
15 Manga mbawataan i Adin................pat gatos ago lima polo ago pat
16 Manga mbawataan i Atir a maaped ko pamiliya i Hisikiyas..siyaw polo ago walo
17 Manga mbawataan i Bisay...............telo gatos ago dowa polo ago telo
18 Manga mbawataan i Yorah..............sapolo ago dowa
19 Manga mbawataan i Hasom............dowa gatos ago dowa polo ago telo
20 Manga mbawataan i Gibar...............siyaw polo ago lima
21 Giyai pen so itongan ko manga mama a miyakakasoy a poon sa Bitlihim......magatos

ago dowa polo ago telo
22 Poon sa Nitopah....lima polo ago nem
23 Poon sa Anatot.........magatos ago dowa polo ago walo
24 Poon sa Asmabitpat.......polo ago dowa
25 Poon sa Kiriyat Yarim, Kipirah ago giya Birot........pito gatos ago pat polo ago telo
26 Poon sa Ramah ago giya Giba........nem gatos ago dowa polo ago isa
27 Poon sa Mikmas.......magatos ago dowa polo ago dowa
28 Poon sa Bitil ago giya Ay...............dowa gatos ago dowa polo ago telo
29 Poon sa Nibo...........lima polo ago dowa
30 Poon sa Magbis........magatos ago lima polo ago nem
31 Poon sa Ilam............sanggibo ago dowa gatos ago lima polo ago pat
32 Poon sa Harim.......telo gatos ago dowa polo
33 Poon sa Lod, Hadid ago giya Ono......pito gatos ago dowa polo ago lima
34 Poon sa Yariko......telo gatos ago pat polo ago lima
35 Poon sa Sinaah...........telo nggibo ago nem gatos ago telo polo
36 Giyai so itongan ko manga imam a miyakakasoy:
manga moriyataw i Yadayas a maaped ko pamiliya i Yosowa.......siyaw gatos ago pito

polo ago telo
37 Manga moriyataw i Imir................sanggibo ago lima polo ago dowa
38 Manga moriyataw i Pasor.............sanggibo ago dowa gatos ago pat polo ago pito
39 Manga moriyataw i Harim............ sanggibo ago sapolo ago pito
40 Giyai so itongan ko manga Libitiyo a miyakakasoy:
so manga moriyataw i Yosowa ago si Kadmiil (a manga moriyataw i

Hodabiyas)............pito polo ago pat
41 So manga padidikir ko Timplo a manga moriyataw i Asap.....magatos ago dowa polo
ago walo
42 So manga gordiya ko Timplo a manga moriyataw i Salom, Atir,
Talmon, Akob, Hatita ago si Sobay.........magatos ago telo polo ago siyaw
43 Giyai so manga talasogoay ko Timplo a miyakakasoy:
so manga moriyataw i Siha, Hasopa, Tabaot,

44 Kiros, Siyaha, Padon,
45 Libanah, Hagabah, Akob,
46 Hagab, Salmay, Hanan.
47 Gidil, Gahor, Riyayas,
48 Risin, Nikoda, Gasam,
49 Osa, Pasiyas, Bisay,
50 Asnah, Miyonim, Niposim,
51 Bakbok, Hakopa, Harhor,
52 Baslot, Mihida, Harsa,
53 Barkos, Sisira, Timah,
54 Nisiyas ago si Hatipa.
55 Giyai so manga moriyataw o manga oripen i Solaiman a miyamakakasoy:
so manga moriyataw i
Sotay, Hasopirit, Piroda,
56 Yaala, Darhon, Gidil,
57 Sipatiyas, Hatil,
Pokirit Hasibaim ago si Ami.
58 So itongan ko langon a talasogoay ko Timplo ago so manga moriyataw o manga

oripen o Solaiman a miyamakakasoy.................telo gatos ago siyaw polo ago dowa.
59 Aden a ped a miyamakakasoy a poon ko manga siti a Til Milah, Til Harsa, Kirob,
Adon ago giya Imir a di iran kapemataanan i ba so manga pamiliya iran na kiyababadan
ko Israil.
60 Siran na manga moriyataw i Dilayas, Tobiyas ago si Nikoda a aya kadakel iran na nem
gatos ago lima polo ago dowa.
61 Aden pen a manga imam a miyakakasoy sa Yarosalim a manga moriyataw i Hobayas,

Hakas, ago si Barsilay. (Giyangkai a Barsilay na miyakapangaroma sa wata a babay i
Barsilay a taga Giliyad na bitowan sekaniyan sangkoto a ngaran).
62 Na sabap sa di iran ketoon so salsila ko manga pamiliya iran na di siran maaped ko
manga pekeimam, ka kena a ba soti.
63 Na inisogo o gobirnador Sirobabil a di siran pekakan ko pangenengken a bagian o
manga imam ko manga inisoasoat ko Tohan taman sa aden a imam a mapariksa iyan so
kabaya o Allah a nggolalan ko Orim ago Tomim.
64 So kadakel o kalangolangon a miyamangitaog a miyamakakasoy na pat polo ago dowa

nggibo ago telo gatos ago nem polo
65 A liyo ron so pito nggibo ago telo gatos ago telo polo ago pito a manga talasogoay iran
a manga mama ago manga babay ago dowa gatos a manga padidikir a manga mama ago
manga babay.
3 Miyowit siran roo pen sa pito gatos ago telo polo ago nem a manga koda, dowa gatos
ago pat polo ago lima a manga mola,
67 Pat gatos ago telo polo ago lima a manga onta ago nem nggibo ago pito gatos ago
dowa polo a manga kimar.
68 Kagiya makaoma siran ko Timplo o Allah sa Yarosalim na so ped ko manga olowan

ko pamiliya na miyamamegay sa iklas a manga pamemegayan a kitabang ko kambangona
ko Timplo o Tohan ko asal a katitindegan iyan.
69 Oman i isa kiran na inibegay niyan so taman a miyagaga niyan para sangkai a galebek
a lima gatos ka kilo a bolawan, dowa nggibo ago siyaw gatos ka kilo a pirak ago magatos
timan a manga nditaren a imam.
70 So manga imam, so manga Libitiyo, so manga padidikir, so manga gordiya ko Timplo,

so manga talasogoay ko Timplo ago so ped pen a manga taw na mimbabaling sii ko
manga inged a marani sa Yarosalim. Na so ped ko manga Israil na miyaling ko manga
siti a kiyabalingan o manga apo iran.
ISRAS 3
So Kiyabangona ko Aparan
Kagiya maoma so ikapito olan na miyakakaden den so manga Israil ko manga inged iran.
Samaoto na mitimotimo so manga taw sa kaiisaisa sa Yarosalim
2 Na si Yosowah a wata i Yosadak ago so ped iyan a manga imam, ago si Sirobabil a
wata i Siyaltiyal a rakes o manga tonganay niyan na pipoonan iran mangon so aparan o
Tohan o Israil kaan siran on makasapaat sa petotongen a manga soasoat a aya iran
kapetomana ko misosorat ko Kitab o Mosa a sogo o Allah.
3 Apiya pen ipekelek iran so manga taw a kibabaling ko melilibeta kiran na biyangon iran
den so aparan sii ko kaoonayan on. Na pesepaat siran on sa petotongen a manga soasoat
ko Allah a melagid ko kapipita ago kaperimon.
4 Na tiyoman iran so misosorat ko Kitab ka piselasela iran so Pista ko manga Lawig a
ipesepaat iran on so paliyogat a kadakel o petotongen a soasoat oman gawii.
5 Maipos oto na initaros iran so kipesepaaten ko makakakalilid a petotongen a soasoat, a
rakes o manga soasoat a paliyogat ko Pista ko Saribolan ago sii ko langon a miyanga
tetendo a soti a kapista ko Allah, ago so pen so langon a iklas a pamemegayan o manga
taw a ipesoasoat ko Allah.
6 Ipoon ko paganay a gawii ko ikapito olan na pesepaat siran ko Allah sa petotongen a
manga soasoat apiya pen da pen mibetad so onayan o Timplo o Allah.
So Kiyambalaya ko Timplo
7 Somiyokay so manga taw sa manga panonominto ago manga panday sa kayo. Na

migay siran sa pangenengken, panginginomen ago lana ko manga taw sa Sidon ago giya
Tiro a imbayad ko manga troso a sidro a pegaroren iran ipoon sa Libanon taman sa Yopa,
ka giyoto i miyapero kiran i Siros a dato sa Pirsiya.
8 Sii ko ikadowa olan ko ikadowa ragon ko kiyapakaoma iran ko darpa o Timplo sii sa
Yarosalim na mipoon siran nggalebek. Si Sirobabil a wata i Siyaltiyal, si Yosowa a wata
i Yosadak ago so ped ko manga pagari ran a rakes on so manga imam, so manga Libitiyo
ago so langon a miyamakakasoy sa Yarosalim poon ko kinitaogen kiran na
miyamangogop ko galebek. So manga Libitiyo a miyakadowa polo ragon a idad iyan ago
so manga totoa on na miyamangitoro a manga tetandingan ko dii kambalaya ko Timplo o
Allah.
9 Si Yosowa ago so manga wata iyan ago manga tonganay niyan, ago si Kadmiyal a rakes
o manga wata iyan (a kiyababadan siran ko Hodabiyas) na miyamagepeda siran sa
kapekibira ko kigagalebek ko Timplo. Na inogopan siran o manga Libitiyo a maaped ko
pamiliya i Hinadad.
10 Sii ko kinibetaden o manga panday ko onayan o Timplo o Allah na so manga imam a

kisosolot sa nditaren a imam a kikakapet sa manga bogiyong, ago so manga Libitiyo a
kiyababadan ko Asap a kiaawid sa manga pandaopan na tominindeg siran ko darpa iran sa
kapodiya iran ko Allah a giyoto den so iniinsarat o Daod a dato sa Israil.
11 Piyagidaidaan iran so Allah a rakes o podi ago panalamat a tig iran a
"Mapiya sekaniyan;
so limo iyan sa Israil na matatap sa taman sa pakataman!"
Na milalalis so langon a taw sa tanto a matanog a podipodi ko Allah sabap sa minibetad

den so onayan o Timplo o Allah.
12 Ogaid na madakel ko miyalokes a manga imam ago manga Libitiyo ago manga olowan
o pamiliya a miyakailay ko andang a Timplo na miyamakagoraok sa matanog ko kiyailaya
iran ko kinibetaden ko onayan angkai a bago a Timplo. Ogaid na madakel ko manga ped
na dii melalalis sa kapekebabaya.
13 Da a ba pekatendo ko sowara o kapelalalis sa kapekebabaya ago so sowara o
kapenggoraok ka kagiya tanto ini a pakabowing. Na miyaneg sa mawatan so lagam iran.
ISRAS 4
So Kiyasoranga ko Kambangona ko Timplo
So manga ridoay o manga taw sa Yodah ago Baniyamin na miyaneg iran a so

miyamangitaog a miyamakakasoy na pembangon sa pesimbaan ko Allah a Tohan o Israil.
2 Sabap roo na somiyong siran ki Sirobabil ago sii ko manga olowan ko pamiliya na
pitero iran a "Pakaogopa kami niyo mbalay, ka pesimbaan ami so Tohan iyo a datar iyo
na di kami ron den dii korban ipoon ko kiyapakabalinga rekami sii i Isarhadon a dato sa
Asiriya."
3 Ogaid na si Sirobabil, si Yosowa ago so ped a manga olowan ko pamiliya sa Israil na

inisembag iran a "Da den a ba niyo labet sii rekami ko dii kambalaya ko pesimbaan ko
Allah a Tohan o Israil. Sekami bo i mbangon on ka giyoto i inisogo rekami i Siros a dato
sa Pirsiya."
4 Mandiyadi na so manga taw a kibabaling ko melilibeta kiran na tipengan iran komowa

sa inam so manga taw sa Yodah a pepekalekan iran siran sii ko di iran dii kambalay.
5 Tomindan siran sa manga mama a makasorang kiran kaan mailang so manga antangan o
manga Yahodi. Itataros iran ai ko langon o masa a kandadato i Siros sa Pirsiya taman den
ko kiyapakandato i Dariyos sa Pirsiya.
So Miyaoriyan oto a Kapakasosorang sii ko Kandadato i Artasirksis
6 Sii ko kiyapoon ndato i Sirksis na so manga ridoay o manga taw sa Yodah ago sa
Yarosalim na misorat ko dato sa dimanda a kisopak kiran.
7 Oriyan ai sii ko kandadato i Artasirksis sa Prisiya na si Bislam, si Mitridat, si Tabiil ago

so manga ped iran na misorat sa sorat ki Artasirksis. Inisorat ai sa basa Aramaik na
pindiyorobasaan ko dato.
8 Si Rihom a gobirnador ago si Simsay a panonorat i misorat sangkai a sorat ki
Artasirksis makapantag sa Yarosalim. Aya oni niyan na:
9 Sorat ai i Rihom a so gobirnador ago si Simsay a panonorat ago so manga ped iran a so
manga pangongokom ago manga olowan sii sa Tripolis, Pirsiya, Irik, Babilon ago giya
Sosa sii ko inged a Ilam
10 A rakes o ped a manga taw a piyakatogalin o kababantogan ago seselaan a Asorbanipal
a sii niyan piyakabaling sa siti a Samariya ago sii ko ped a manga inged ko masesedepan
a Lawasaig a Yopratis.
11(Giyai i kopiya o sorat a inipakawit iran rekaniyan.)
Makasampay ko Dato Artasirksis poon ko manga pagtaw ngka sa probinsiya ko

masesedepan a Yopratis:
12 Kabaya ami a katokawan o dato a so manga Yahodi a miyakasong sii a poon sa

Babilon na miyaling sa Yarosalim na pembangonen iran peroman angkoto a somosopak
ago marata a siti. Minibetad iran den so onayan o manga pangeleban iyan na magaan den
a kakepasada iran on.
13 Ogaid na kabaya ami a katokawan ka, Dato, a o mabangon angkai a siti ago
mapakaasal so manga pangeleban iyan na so manga taw ron na gominek reka mayad sa
manga bowis na pekaito so manga pirak ko baitalmal o ndatoan.
14 Na sabap ko kaoonoti ami reka na kena a ba mapiya rekami o ba ami mailay a mitanan
so dato. Sabap roo na inipakawit ami reka angkai a sorat kaan makatokaw so dato.
15 Aya ipagoyaw ami reka na pakimbanogen ka so manga rikord o miyanga oonaan ka a
dato na keilay ngka on a lalayon somosopak angkai a siti a pesemok ago peperido ko
manga dato ago manga gobirnador ko ped a manga inged ipoon ko miyanga oona a masa.
Giyanan i sabap a kiyabinasaa sangkai a siti.
16 Pekitokawan ami reka, Dato, a o mabangon peroman angkai a siti ago mapakaasal so
manga pangeleban iyan na da den a ba reka kelamba sangkai a probinsiya ko masedepan a
Lawasaig a Yopratis.
17 Inipakawit o dato angkai a sembag iyan:
Makasampay ki Rihom a gobirnador, si Simsay a panonorat ago so manga ped iran a

kibabaling sa Samariya ago sii ko dalem a probinsiya ko masesedepan a Yopratis:
Asalamo alaikom.
18 So sorat a inipakawit iyo raken na miyabatiya ago pindiyorobasaan ko hadapan ko.

19 Na somiyogo ako sa kambanoga ko manga rikord na kiyatokawan den a sii ko
miyanga iipos a gawii na giyangkanan a siti na romirido ko manga dato, na darpa oto a
pepekasopak ago pepekasamok.
20 Aden gowani a manga ala i kapaar a dato sa Yarosalim a miyamakandato ko dalem a
probinsiya ko masesedepan a Yopratis a piyamegan siran sa manga ala a bowis ago
manga bayad.
21 Kagiya ka maoto na begay kano imanto sa sogoan sangkanan a manga mama sa
tomareg siran nggalebek kaan di kebangon angkanan a siti taman sa isogo aken.
22 Pagiktiyari niyo o ba niyo ndarainonen angkai a betad. Ino pen mitataros angkai a
pepekabinasa ko ndatoan?
23 So den so kiyabatiyaa ko sorat o Dato Artasirksis ki Rihom ago si Simsay ago sii ko
manga ped iran na somiyong siran nggagaan sa Yarosalim na tigel iran a makatareg so
manga Yahodi ko di iran dii kambalay.
So Kinitarosen ko Galebek ko Timplo
24 So dii kanggalebeka ko Timplo o Tohan sii sa Yarosalim na minitareg den a da

mitaros taman ko ikadowa ragon a kandadato i Dariyos sa Pirsiya.
ISRAS 5
Samaoto na so manga nabi a si Hagay ago si Sakariyas a wata i Ido na pepangosiyat ko
manga Yahodi sii sa Yodah ago sa Yarosalim sii ko Ingaran o Tohan o Israil.
2 Sabap roo na si Sirobabil a wata i Siyatiyal ago si Yosowa a wata i Yosadak na mipoon
siran nggalebek sa kambangona peroman ko Timplo roo sa Yarosalim, na ped iran angkai
a dowa a nabi o Tohan a pegogop kiran.
3 Ogaid na da matey na somiyong kiran si Tatnay a gobirnador ko probinsiya sa sedepan

a Yopratis ago si Sitar Bosinay ago so manga ped iran na iniise iran a "Antawaa i mipero
rekano sa kambangona niyo sangkai a pesimbaan ago so kapakaasala ko manga keleb
iyan?
4 Na antawaa i manga ngaran o manga taw a dii mbalay sangkai a pesimbaan?"
5 Ogaid na pagiipaten o Tohan iran so manga olowan o manga Yahodi na da siran
mapakatareg o gobirnador ago so manga ped iyan taman sa di iran kasoratan si Dariyos
makapantag sii ago madawat iran so inisorat a sembag iyan.
6 Giyai so sorat a inipakawit o gobirnador Tatnay, si Sitar Bosinay ago so ped a manga
nakoda ko probinsiya sa sedepan a Yopratis sii ko Dato Dariyos:
7 Makasampay ko Dato Dariyos, Asalamo alaikom:
8 Kabaya ami a katokawan ka, Dato, a somiyong kami ko darpa a pembangonan ko

Timplo o kababantogan a Tohan sii sa probinsiya a Yodah. Di ini dii mbalain a manga
ala a ator, na petegoan sa manga tarakayo so manga pangeleban iyan. Matotordo angkai a
dii kanggalebek na madilapet a kapepangosor iyan.
9 Inondamaan ami so manga olowan na iniise ami kiran a "Antawaa i mipero rekano sa
kambangona niyo sangkai a Timplo ago so kapakaasala ko manga keleb iyan?"
10 Iniise ami kiran pen so manga ngaran iran kaan ami reka matero o antawaa i manga
olowan iran.
11 Giyai i inisembag iran rekami:
"Sekami i manga oripen o Tohan sa langit ago sa doniya na pembangonen ami peroman
so Timplo a miyabangon den isako miyatey den a manga ragon o kababantogan a dato sa
Israil.
12 Ogaid na sabap sa piyakakerangit o manga apo ami so Tohan sa sorga na piyalad iyan
siran ki Nibokadnisar a dato sa Babilon. Bininasa niyan angkai a Timplo na initaog iyan
so manga taw roo sa Babilon.
13 “Ogaid na sii ko paganay a ragon ko kandadato i Siros sa Babilon na migay sekaniyan

sa sogoan sa kambangona ko Timplo o Tohan.
14 Na kinowa niyan ko pesimbaan roo sa Babilon so manga kasangkapan a bolawan ago
pirak a miyakowa i Nibokadnisar poon
ko Timplo o Tohan sii sa Yarosalim a miyatago iyan ko pesimbaan roo sa Babilon. Na
piyalad ai o Dato Siros ko mama a bebetowan sa Sisbasar a minitoro iyan a gobirnador
15 A tig iyan on a 'Awidi ngka ngkai a manga igagama na ika roo den na tagoa ngka ko
Timplo roo sa Yarosalim. Na bangona ngka so Timplo o Tohan ko asal a katitindegan
iyan.'
16 Sabap roo na somiyong sii si Sisbasar na inibetad iyan so onayan iyan, na ipoon
sangkoto a gawii taman imanto na di den dii mbalain, ogaid na da pen mapasad."
17 Imanto, o ikesoat o dato, na pakimbanogen ka so manga rikord o manga dato sa

Babilon kaan mailay o benar a migay so Dato Siros sa sogoan sa kambangona sangkai a
Timplo sii sa Yarosalim. Na pengnin ami a pakitokawan ka rekami o antonaa i kabaya a
ka sangkai a betad.
ISRAS 6
So Sogoan i Dariyos
Mandiyadi na migay so Dato Dariyos sa sogoan na mimbanog siran sii ko walay a

pepenimoan ko manga rikord o ndatoan roo sa Babilon.
2 Ogaid na so torogan sa siti a Ikbatana sii sa probinsiya a Midiya na aya kiyatoonan sa
kasosoratan a minisorat on angkai a rikord:
3 Sii ko paganay a ragon ko kandadato o Dato Siros na migay sekaniyan sa sogoan

mipantag ko Timplo o Tohan sii sa Yarosalim. Aya pitero iyan na:
Inisogo aken a mbangonen so Timplo o darpa a pesepaatan gowani o manga Yahodi sa
manga korban. Kibetad a makambeken so manga onayan iyan. Aya kaporo iyan na siyaw
polo ka piya, ago siyaw polo ka piya a kaolad iyan.
4 Aya kambaali ko manga pangeleban iyan na tetelo gontor a manga ala a ator a so oman i
telo gontor na giyontoran sa manga tarakayo. So manga gasto na kebayadan poon ko
pantiyari o ndatoan.
5 So pen so manga kasangkapan a bolawan ago pirak a miyakowa i Nibokadnisar ko
Timplo roo sa Yarosalim a piyangowit iyan pen sa Babilon na ikesoy tomago sii ko
manga darpa iran ko Timplo o Tohan roo sa Yarosalim.
6 Mandiyadi na inipakawit o Dato Dariyos angkai a sembag:
Makasampay ki Tatnay a gobirnador sa probinsiya sa sedepan a Yopratis ago sii ki Sitar

Bosinay ago so ped iyo a manga nakoda sangkanan a probinsiya:
7 Aawat kano sangkanan a Timplo o Tohan! Di niyo petekora so di on dii kanggalebeka.

Pakibangonen iyo ko gobirnador o manga Yahodi ago so manga olowan iran so Timplo
sii ko andang a kababangonan on.
8 Liyo ron pen na inisogo aken a tabangi niyo angkanan a manga olowan a Yahodi sii ko
kapembalaya iran on. So manga gasto iran na palaya kebayadan poon ko manga bowis a
pekekowa o ndatoan
roo ko probinsiya sa sedepan a Yopratis.
9 Apiya antonaa i kailangan iran a manga todo a sapi, manga mama a bilibili ago manga
nati a bilibili a peketotong a dii soasoat ko Tohan sa sorga, ago so pen so trigo, timos,
arak ago lana a pepangnin o manga imam roo sa Yarosalim na pamegan iyo kiran den ko
oman gawii sa da den a ba on kelepas
10 Kaan siran dii makakorban sa ikasosoat o Tohan sa sorga ago makapepamangni sa
kapetegompiya aken ago so manga wata aken.
11 Mipegoman on pen na inisogo aken a apiya antawaa i di tomoman sangkai a sogoan na

mbadotan sa polaos so walay niyan. Na iiket on so lawas iyan ago mbadasan, na kebaloy
so walay niyan a batiyong a miyanga bibinasa.
12 Pengnin ko a so Tohan a miyamili sa Yarosalim a kekadenan o Ingaran iyan na
mabinasa niyan so apiya antawaa a dato o di na manga taw a magalin sangkai a sogoan
aya pen o ba iran tepengi minasa angkanan a Timplo sa Yarosalim.
Saken a si Dariyos i somiyogo sii, na paliyogat a mitoman ai sa magaan.
So Kiyapasada ago Kinisenggain ko Timplo
13 Mandiyadi na si Titnay a gobirnador sa probinsiya sa sedepan a Yopratis ago si Sitar

Bosinay ago so manga ped iran na ininggolalan iran piyapiya so sogoan o Dato Dariyos.
14 Sabap roo na initaros o manga olowan a Yahodi so di iran dii kambalay a
pepangoyatan siran o manga nabi a si Hagay ago si Sakariyas a wata i Ido. Na miyapasad
iran so kapembangona ko Timplo a giyoto den so inisogo kiran o Tohan o Israil ago so
manga dato sa Pirsiya a si Siros, si Dariyos ago si Artasirksis.
15 Miyapasad so Timplo sii ko ikatelo gawii ko olanolan a Adar sii ko ikanem ragon a
kandadato i Dariyos.
16 Samaoto na so manga taw sa Israil, a so manga imam, so manga Libitiyo ago so ped a
miyamangitaog a miyamakakasoy na piselasela iran so kinisenggain ko Timplo o Tohan
sa kapekebabaya.
17 Sii ko di iran on dii kaselaselaa na mikorban siran sa magatos a manga todo a sapi,
dowa gatos a manga mama a bilibili ago pat gatos a manga nati a bilibili. Na somiyapaat
siran pen sa sapolo ago dowa a mandangan a pikorban sa kakepapas o dosa, a nggagaisa
ko oman i mbatabataa Israil.
18 Na pimbaabaad iran so manga imam ago so manga Libitiyo sii ko oman i
sagorompong kiran sa kapenalagad iran sii ko Timplo sa Yarosalim a ininggolalan iran so
misosorat ko Kitab o Mosa.
So Paska
19 Sii ko ikasapolo ago pat gawii ko paganay a olanolan na so miyamangitaog a

miyamakakasoy na piselasela iran so Paska.
20 So manga imam ago so manga Libitiyo na miyalompiyo iran a manga ginawa iran na
palaya siran den miyanga sosoti.
20 Piyanombali o manga Libitiyo so manga bilibili sa Paska para ko langon a
miyamakakasoy, para ko manga pagari ran a manga imam ago para ko manga ginawa
iran.
21 Na komiyan on so manga Israil a ped iran so langon a kibabaling ko inged a
tomiyalikod ko marsik a manga paparangayan o manga siringan iran a di royod o manga
Yahodi kaan iran masimba so Allah a Tohan o Israil.
22 Miyakapito gawii a kiyaselaselaa iran ko Pista ko Kakan sa Paan a Da a Tapay ron.
Tanto siran a pekebabaya ka kagiya piyakipangalimo siran o Allah ko dato sa Asiriya a
minisabap on so kiyaogopi niyan kiran ko galebek ko Timplo o Tohan, a so Tohan o
Israil.
ISRAS 7
Miyakatalingoma si Isras sa Yarosalim
So kiyaipos o madakel a ragon sii ko masa a kandadato i Artasirksis sa Pirsiya na aden a

mama a aya ngaran iyan na si Isras. Moriyataw sekaniyan o Aron a maporo a imam na
giyai i salsila on: Si Isras na wata i Sirayas, a wata i Asariyas, a wata i Hilkiyas,
2 A wata i Siyalom, a wata i Sadok, a wata i Ahitob,
3 A wata i Amariyas, a wata i Asariyas, a wata i Mirayot,
4 A wata i Sirahiyas, a wata i Osi, a wata i Boki,
5 A wata i Abisowa, a wata i Pinihas, a wata i Iliyasar, a wata i Aron a so maporo a
imam.
6-7 Giyangkai a Isras na goro a mapiya i kenal ko Kitab o Mosa a initoron o Allah a
Tohan o Israil. Inibegay ron o dato so langon taman a piyangni niyan on ka sisii ki Isras
so limo o Allah a Tohan iyan. Sii ko ikapito ragon a kandadato i Artasirksis na
gomiyanat si Isras a poon sa Babilon a miyamangonot on so ped ko manga Israil a rakes
on so manga imam, so manga Libitiyo, so manga padidikir, so manga gordiya ko Timplo
ago so manga talasogoay ko Timplo.
8-9 Giyanatan iyan a Babilon sii ko paganay a gawii ko paganay a olanolan na
minisampay sekaniyan sa Yarosalim sii ko paganay a gawii ko ikalima olan ka inogopan
o Tohan iyan.
10 Inipanagontaman i Isras a ginawa niyan ko kapepangenala ago kapetomana niyan ko
Kitab o Allah ago so kipepangendaon iyan ko manga bitikan iyan ago manga kokoman sii
sa Israil.
So Sorat i Artasirksis ki Isras
11 Giyai i oni o sorat o Dato Artasirksis a inibegay niyan ki Isras a so imam ago goro, a
so mama a miyakakenal piyapiya ko manga sogoan ago manga bitikan a inibegay o Allah
sa Israil:
12 Sorat ai i Artasirksis a dato o manga dato makasampay ki Isras a imam ago goro ko
Kitab o Tohan sa sorga: Asalamo alaikom.
13 Inisogo aken a apiya antawaa ko manga Israil sii ko ndatoan aken a rakes on so manga
imam ago manga Libitiyo a kebaya reka monot sa kasong ka sa Yarosalim na keparo ron.
14 Saken ago so pito kataw a manga mosawira aken i somiyogo reka kaan ka mapariksa o
antonaa i kapakambebetad roo sa Yodah ago giya Yarosalim o dii nggolalan piyapiya so
Kitab o Tohan ka a sisii reka.
15 Keawidan ka so pirak ago so bolawan a kebayaan ko ago so manga mosawira aken a
imbegay ami ko Tohan o Israil a komakaden sa Yarosalim.
16 Keawidan ka pen so langon a pirak ago bolawan a kekowa ngka ko dalem a probinsiya
a Babilon a rakes on so manga iklas a pamemegayan o manga taw ago manga imam para
ko Timplo o Tohan iran roo sa Yarosalim.
17 O ba ngka di mipamasa angkai a pirak sa manga todo a sapi, manga mama a bilibili
ago manga nati a bilibili a rakes o manga pangenengken ago panginginomen a isepaat sii
ko aparan ko Timplo o Tohan ka roo sa Yarosalim.
18 So kelamba ko manga pirak ago manga bolawan na keosar ka ago so manga pagari
ngka a manga Yahodi ko apiya antonaa i mapipikir iyo a mapiya ko katomana niyo ko
kabaya o Tohan iyo.
19 Na so langon a kasangkapan a isasarig reka a pegosaren ko kapesimba sii ko Timplo
na senggain ka ko Tohan roo sa Yarosalim.
20 Apiya antonaa pen a mala i kipantag ko Timplo a disomala a kimbegan ka on na
kekowa ngka ini poon ko baitalmal o ndatoan.
21 Saken, a si Dato Artasirksis, na inisogo aken imanto ko kalangolangon a trisoriro sa

probinsiya roo sa sedepan a Lawasaig a Yopratis a began iyo nggagaan ki Isras so apiya
antonaa i pengnin iyan rekano, ka imam sekaniyan a goro ko Kitab o Tohan sa sorga.
22 Began iyo ron taman sa telo nggibo ago pat gatos ka kilo a pirak, dowa polo nggibo ka
gantang a trigo, dowa nggibo ago dowa gatos ka litro a arak, dowa nggibo ago dowa gatos
ka litro a lana a olibi, ago timos a da den a ba niyan diyangka.
23 Saden sa inipaliyogat o Tohan sa Sorga para ko Timplo on na pagiktiyari niyo
nggolaola kaan di kitana so rarangit iyan ko ndatoan aken ago so manga wata aken.
24 Pekitokawan ko rekano pen a ipesepar rekano so kapengowai niyo sa bowis, saidola o
di na bayad ko apiya antawaa ko manga imam, manga Libitiyo, manga padidikir, manga
gordiya, manga talasogoay o di na so ped a pepamanalagad sangkoto a Timplo o Tohan.
25 Na seka, Isras, na nggolalanen ka so ongangen a inibegay reka o Tohan ka sa katoro o

ka sa manga olowan ago manga pangongokom a manga tatao ko manga sogoan o Tohan
ka a makapenggobirno siran ko langon a manga taw ko probinsiya sa sedepan a Lawasaig
a Yopratis. Na saden sa di matao sangkoto a manga sogoan na pamangendaowa ngka
siran.
26 Apiya antawaa i di tomoman ko manga sogoan o Tohan ago so manga sogoan o
ndatoan na mataan den a ndanegen a kebono, o di na kitaog, o di na kowaan sa tamok o di
na kelaboson.
Piyodi i Isras so Allah
27 Podin so Allah a Tohan o manga apo tano! Tiyawapikan iyan so poso o dato sa
kaselaa niyan ko Timplo o Allah sii sa Yarosalim sangkai a okit.
28 Bigan ako o Allah sa limo sii ko hadapan o dato ago so manga mosawira iyan ago so
langon a manga ala i kadato a manga sanasanaan iyan. Miyakawaraw ako sabap ko
kiyapangoyati raken o Allah a Tohan ko, na tominimo ako sa manga olowan o manga taw
sa Israil a magonot raken sa Yarosalim.
ISRAS 8
So manga Olowan ko Pamiliya a Miyonot ki Isras ko Kiyakasoy niyan sa Yarosalim
Giyai i listaan ko manga olowan ko pamiliya ago so manga ped iran a miyamangonot
raken ko kiyakasoy aken sa Yarosalim a poon sa Babilon sii ko kandadato o Dato
Artasirksis:
2 Si Girsom a poon ko mbawataan i Pinihas.

Si Daniyal a poon ko mbawataan i Itamar.
Si Hatos a wata i Sikaniyas a poon ko mbawataan i Daod.
3 Si Sakariyas ago so magatos ago lima polo a manga mama a ped iyan a poon ko
mbawataan i Paros.
4 Si Iliyahonay a wata i Sirahiyas ago so dowa gatos a manga mama a ped iyan a poon ko
mbawataan i Pahatmowab.
Si Sikaniyas a wata i Yahasiyal ago so telo gatos a manga mama a ped iyan a poon ko
mbawataan i Sato.
6 Si Ibid a wata i Yonatan ago so lima polo a manga mama a ped iyan a poon ko
mbawataan i Adin.
7 Si Yasayas a wata i Ataliyas ago so pito polo a manga mama a ped iyan a poon ko
mbawataan i Ilam.
8 Si Sibadiyas a wata i Mikail ago so walo polo a manga mama a ped iyan a poon ko
mbawataan i Sipatiyas.
9 Si Obadiyas a wata i Yahiil ago so dowa gatos ago sapolo ago walo a manga mama a
ped iyan a poon ko mbawataan i Yowab.
10 Si Silomit a wata i Yosipiyas ago so magatos ago nem polo a manga mama a ped iyan
a poon ko mbawataan i Bani.
11 Si Sakariyan a wata i Bibay ago so dowa polo ago walo a manga mama a ped iyan a
poon ko mbawataan i Bibay.
12 Si Yohanan a wata i Hakatan ago so magatos ago sapolo a manga mama a ped iyan a
poon ko mbawataan i Asgad.
13 Si Ilipilit, si Diyowil ago so Simayas ago so nem polo a manga mama a ped iran a
poon ko mbawataan i Adonikam (oriyan ai a kiyakasoy iran).
14 Si Otay ago si Sakor ago so pito polo a manga mama a ped iran a poon ko mbawataan
i Bigbay.
Piyakisongowan i Isras so manga Libitiyo
15 Tinimo aken angkai a miyamangitaog sii ko kakar a petogaan o ig a moondas sa

Ahaba, na mikempo kami roo sa miyakatelo gawii. Kagiya pariksaan ko so kadakel a
manga taw ago so manga imam na miyailay aken a da den a ba kiran Libitiyo.
16 Sabap roo na piyakitawag aken si Iliyasar, si Ariyal, si Simayas, si Ilnatan, si Yarib, si
Ilnatan, si Natan, si Sakariyas ago si Misolam a aya manga nakoda ago si Hoyarib ago si
Ilnatan a manga oongangen a manga mama.
17 Na siyogo aken siran ki Ido a olowan ko manga Libitiyo sii sa Kasipiya. Piyakipangni
aken kiran ki Ido ago so manga tonganay niyan a manga talasogoay ko Timplo a
pagowitan kami ran sa manga makapenalagad sii ko Timplo o Tohan tano roo sa
Yarosalim.
18 Na sabap sa sisii rekami so limo o Tohan tano na inowit iran rekami si Siribiyas a
rakes o sapolo ago walo kataw a manga wata iyan a mama ago manga pagari niyan.
Pekagaga sekaniyan a mama a ped ko mbawataan o Makli a wata o Libi a wata peman o
Israil.
19 Inowit iran rekami pen si Hasabiyas ago si Yasayas a manga ped ko mbawataan o
Mirari a rakes o dowa polo a manga mama a tonganay iran.
20 Miyowit siran pen sa dowa gatos ago dowa polo a talasogoay ko Timplo a so manga
apo iran na initoro o Daod ago so manga sanasanaan iyan a pepekaogop ko manga
Libitiyo. Na minilista langon so manga ngaran iran.
Mipowasa ago Miyangangarapan so manga Taw
21 Roo ko Kakar sa Ahaba na somiyogo ako sa kapowasa kaan ami mipangalimbabaan a

manga ginawa mi ko hadapan o Tohan tano ago mapangni ami ron so masisiyap a
lalakaw ami ago so manga wata a rakes o langon a patemotamokan ami.
22 Ka miyaya ako o ba ko pangni ko dato sa manga sondaro ago manga pangongoda a
makalinding rekami ko manga ridoay sii ko lalan ka kagiya miyatero ami ko dato a "So
limo o Tohan na sisii ko oman i isa a peserig rekaniyan, ogaid na so mala a rarangit iyan
na pekitana ko langon a petelikod on."
23 Na mipowasa kami ago miyamangni sa kapesiyapa rekami o Tohan tano na inampon
kami niyan.
So manga Pamemegayan para ko Timplo
24 Oriyan iyan na minili ako sa sapolo ago dowa ko manga olowan a imam a si
Siribiyas, si Hasabiyas ago sapolo ko manga pagari ran.
25 Na piyakikibir aken kiran so manga pirak, manga bolawan ago manga kasangkapan a
inibegay o dato ago so manga mosawira iyan ago manga sanasanaan iyan ago so langon a
kapapantagan roo a manga Israil a keosar ko Timplo.
26 Tinimbang aken so langon taman a piyalad aken kiran na aya kapened iyan na:
dowa polo ago dowa nggibo ka kilo a pirak,

telo nggibo ago pat gatos ka kilo a manga kasangkapan a pirak,
telo nggibo ago pat gatos ka kilo a bolawan,
27 Dowa polo timan a ladiya a bolawan a walo ago tenga ka kilo a timbang iyan
dowa timan a kasangkapan a kaoonasan a galang a lagid sa arga o bolawan.
28 Na pitero aken sangkai a manga imam a "Sekano ago giyangkai a manga nganin na
isesenggay a rek o Allah. So pirak ago so bolawan na iklas a pamemegayan ko Allah a so
Tohan o manga apo iyo.
29 Siyapa niyo ini piyapiya taman sa misampay kano ko Timplo o Allah roo sa
Yarosalim. Na roo ko manga rowang o manga imam na timbanga niyo ago palada niyo ai
ko manga olowan a imam ago manga Libitiyo ago sii ko manga olowan ko pamiliya sa
Israil."
30 Na giyoto a tiyarima o manga imam ago so manga Libitiyo so pirak, so bolawan ago
so soti a manga kasangkapan a miyatimbang a kewit ko Timplo sii sa Yarosalim.
So Kiyakasoy sa Yarosalim
31 Sii ko ikasapolo ago dowa gawii ko paganay a olanolan na gomiyanat kami a poon ko
Kakar sa Ahaba na miyantap kami sa Yarosalim. Lininding kami o Tohan tano ko manga
ridoay ago manga pepamagayan sii ko kapelalakaw ami.
32 Na miyakaoma kami sa Yarosalim a ron kami miyakadeke ko telo gawii.
33 Sii ko ikapat gawii na somiyong kami ko Timplo na tinimbang ami ron so pirak, so
bolawan ago so manga soti a kasangkapan na inisana ami ki Mirimot a wata i Oriyas a
imam. Ped iyan si Iliyasar a wata i Pinihas ago so dowa kataw a Libitiyo a si Yosabad a
wata i Yosowa ago si Nowadiyas a wata i Binowi.
34 So langon taman na miyapagitong ago miyatimbang, na minisorat so langon o kapened
iyan sa oras oto.
35 Oriyan iyan na so miyamangitaog a miyamakakasoy a poon ko kiyabiyag iran na
mikokorban sa petotongen a manga soasoat ko Tohan o Israil: sapolo ago dowa a manga
todo a sapi para ko langon o manga Israil, siyaw polo ago nem a manga mama a bilibili,
ago pito polo ago pito a manga nati a bilibili. Mikorban siran pen sa sapolo ago dowa a
mandangan a ipepapas ko dosa. Langon ai na piyanotong a inisoasoat ko Allah.
36 Na so manga sogoan a inibegay kiran o dato na piyalad iran ko manga sanasanaan iyan
ago manga gobirnador ko probinsiya ko masesedepan a Lawasaig a Yopratis na giyoto a
migay siran sa tabang ko manga taw ago so Timplo.
ISRAS 9
So Pangangarapan i Isras makapantag ko Kambabalaiya
So kiyaipos angkai langon a miyanggolaola na somiyong raken so ped ko manga olowan

o manga taw sa Israil a tig iran a "So manga taw sa Israil a rakes on so manga imam ago
manga Libitiyo na da iran sibain a ginawa iran ko ped a manga taw a kibabaling ko inged
na pesosonen iran so piyakasisingay a olaola o manga Kanaaniyo, manga Hitiyo, manga
Pirisiyo, manga Hibosiyo, manga Amoniyo, manga Mowabiyo, manga Imisiren ago so
manga Amoniyo.
2 Miyakapangaroma so manga mama sa Israil ko manga wata iran a babay na minipelook
iran so soti a bangsa ko mbabalibeta rektano a manga taw. Na so manga nakoda ago
manga olowan na aya paganay a miyamakasela sangkai a okit."
3 So kiyanega ko sii na kinisi aken so manga nditaren aken ago gininit aken so bok ko olo
aken ago sompa, na miyontod ako a tanto a makamboboko.
4 Makaoontod ako roo a makamboboko taman ko oras a kasepaat ko kegabi, na mitimo
raken so langon a taw a maaleken ko manga katero o Tohan o Israil sabap sangkai a
kiyapakasela o miyamangitaog a miyamakakasoy.
5 Sii ko oras a kasepaat ko kegabi na tominindeg ako ko kararata a ginawa ko a makikisi

so manga nditaren aken na miyakatarbang ako a tomatapnay ko Allah a Tohan ko
6 Na miyangangarapan a tig aken a
"Hey Tohan ko, tanto ako a pekeya ago pekemamala sa ba ako reka makalangag, ka so
manga dosa mi na makaoombaw ko manga olo ami, na so kasalaan ami na minisampay
ko manga langit.
7 Ipoon ko masa o manga apo ami taman imanto na tanto a mala so kasalaan ami. Sabap
ko manga dosa mi na sekami, so manga dato ami ago so manga imam na miyanga
papalad ko kapaar o di ami royod a manga dato. Miyapamono kami, miyapamiyag,
piyanga tetabanan ago piyakadapanas kami a lagid imanto.
8 “Ogaid na imanto sii ko makampet a masa na ipekelimo kami ngka, ya Allah a Tohan
ami, ka liyamba a ka so ped rekami a makapagoyag na piyakambeken kami ngka sangkai
a soti a darpa. Piyakaliwanag ka so manga mata mi na piyakasengka kami ngka ko
kaooripeni rekami.
9 Apiya pen manga oripen kami na da kami ngka awai ko kaooripeni rekami.
Piyakipangalimo kami ngka ko manga dato sa Pirsiya. Pipero ngka a maooyagoyag kami
pen kaan ami mabangon so Timplo ka, hey Tohan ami, ago kaompiyaan ami so
miyabinasa on, na lilindingen kami ngka sii sa Yodah ago Yarosalim.
10 “Ogaid na imanto, Tohan ami, antonaa pen i mapetero ami ko kiyaipos ai langon? Ka
da ami tagoa sa ginawa so manga sogoan
11 A inibegay ngka a miyakanggolalan ko manga oripen ka a manga nabi. Pitero o ka
rekami a 'So lopa a soledan iyo a tenganen na miyakaram a lopa a minipeno on so
piyakasisingay ago maresik a paparangayan o manga taw ron.
12 Kagiya ka maoto na di niyo pakipengaromaan so manga wata iyo a babay ko manga
wata iran a mama aya pen o ba niyo pakapangaromaa so manga wata iyo a mama ko
manga wata iran a babay. Di niyo penamari so kamapiyaan iran o di na kapepangosor
kaan kano makabager ago makakan ko manga pipiya a ipegonga o lopa a mitenan iyo ko
manga wata iyo a kawali iran sa taman sa pakataman.'
13 “So langon a miyanggolaola rekami na minisabap ko manga rarata a galebek ami ago
mala a kasalaan. Apiya pen oto, Tohan ami, na so kiyadanega ngka rekami na maito a di
so patot ko manga dosa mi, ka piyakapagoyag ka so miyalamba rekami.
14 Ogaid na imanto na pesogoken ami peroman so manga sogoan ka a di kami dii
makitepitapi ko manga taw a dii nggolaola sangkai a piyakasisingay. Ba kami ngka di
kerarangiti a tanto sa kabinasaa ngka rekami a da den a ba malamba o di na
makapegoyag?
15 Ya Allah a Tohan o Israil, maontol ka! Lomiyamba ka sa ped rekami a
miyakapagoyag! Na katii kami sii ko hadapan ka a kipakasesala apiya pen o da den a isa
rekami bo a ba makapemayandeg ko kamamasaan ka."
ISRAS 10
Piteobat o manga Taw so manga Dosa iran
Sii ko kapepangangarapan i Isras a dii teobat ago penggoraok a gomegepe ko danga o

Timplo o Tohan na madakel a manga Israil a manga mama, manga babay ago manga wata
a mitimo rekaniyan a pepamanggoraok mambo.
2 Mandiyadi na si Sikaniyas a wata i Yahiyal a isa ko moriyataw o Ilam na pitero iyan ki
Isras a "Miyamakasela kami ko Tohan ami ko kiyapamangaromaa ko di tano royod a
manga babay a kibabaling sangkai a inged. Ogaid na apiya pen ai na aden pen a inam sa
Israil.
3 Disomala a itopa ami imanto ko Tohan tano a pakaawaan ami langon angkai a manga
babay ago so manga wata iran. Onotan ami so mosawir ka ago so siran oto a maaleken
ko manga sogoan o Tohan tano. Inggolalan ami so ipapaliyogat o Kitab o Tohan tano.
4 Na den, pakawawaraw ka, ka seka i kisangan sii! Nggolaolaa ngka den ka onotan ami
seka."
5 Mandiyadi na tominindeg si Isras na piyakasepa iyan so manga olowan a imam ago

manga Libitiyo a rakes o kalangolangon a manga Israil sa nggolaolaan iran so inimosawir
i Sikaniyas, na misesapa siran.
6 Na giyoto a miyawa si Isras ko danga o Timplo o Tohan na somiyoled ko rowang i
Yahohanan a wata i Iliyasib. Sii ko kandodoo niyan na da a ba niyan miyakan o di na
miyainom ka ipeteros iyan so kimbobokoon iyan ko kiyapakasela o miyamangitaog a
miyamakakasoy.
7 Na piyakalangkap ko dalem a Yodah ago Yarosalim a so langon a miyamangasoy ko

kinitaog iran na malimod sa Yarosalim.
8 Saden sa di ron makatelabok ko soled o telo gawii na kowaan on so langon a tamok
iyan o giyanan i ipekokom o manga olowan ago manga pelokelokesen, na kebelag
sekaniyan ko kalilimod o miyamangitaog.
9 Sii ko soled o telo gawii na pepemakaoma sa Yarosalim so langon a manga mama sa

Yodah ago Baniyamin, na sii ko ikadowa polo gawii ko ikasiyaw a olanolan na
mitimotimo siran ko lamalama o Timplo o Tohan. Pepananabaden siran sabap ko
kapened angkoto a kalilimod ago sabap ko oran.
10 Na tominindeg si Isras a imam na pitero iyan kiran a "Miyamakasela kano ka
miyakapangaroma kano sa di niyo royod a manga babay a inomanan iyo pen so kasalaan a
Israil.
11 Kagiya ka maoto na teobat kano imanto ko Allah a so Tohan o manga apo tano na
nggolaolaa niyo so kabaya iyan. Belaga niyo a ginawa niyo ko manga taw a kibabaling
ko inged ago poon ko manga karoma niyo a di niyo royod."
12 Na so langon a malilimod na somimbag sa matanog a tig iran a "Benar ka! So den so

pitero o ka i penggolaolaan ami.
13 Ogaid na madakel a taw sii na masa imanto a pangoran; di kami pekatindeg sa liyo.
Liyo ron pen na di ini kepasad ko salongan o di na dowa gawii ka mala a minindosa ami
sangkai a masosowa.
14 Perowa ngka a so manga olowan ami i penggalebek para ko langon o malilimod. Na
so oman i mama sii ko manga siti tano a miyakapangaroma sa rait a babay na pekasong sii
ko miyatendo a gawii a ped iyan so manga pelokelokesen ago manga pangongokom ko
siti niyan taman sa mada rektano so mala a rarangit o Tohan tano sabap sangkai a
masosowa."
15 Na si bo si Yonatan a wata i Asahil ago si Yahasiyas a wata i Tikbah i somiyopak
sangkai a antangan a aayonan siran i Misolam ago si Sabitay a Libitiyo.
16 Na ininggolalan o manga taw so miyapagantangan. Miyamili si Isras a imam sa

manga olowan ko pamiliya a sakataw a poon ko oman i mbawataan, na miyamangisorat
so manga ngaran iran. Na sii ko paganay a gawii ko ikasapolo olan na miyontod siran sa
kapenomariyaa iran ko manga kaso,
17 Na sii ko paganay a gawii ko paganay a olanolan na miyapasad iran domolon so
langon o manga mama a miyakapangaroma sa manga rait a babay.
So manga Mama a Miyakasela ko Kiyambabalaiya

18 Giyai i listaan ko manga imam a miyakapangaroma ko manga rait a babay:
So manga moriyataw i Yosowa ago so manga pagari niyan a manga wata i Yahosadak
a si Maasayas, si Iliyasar, si Yarib ago si Gidaliyas.
19 Miyakasepa siran sa pagawaan iran so manga karoma iran na komiyorban so oman i
isa kiran sa mama a bilibili poon ko talon iran a ipepapas ko kasalaan iran.
20 So manga moriyatow i Imir a si Hanani ago si Sibadiyas.
21 So manga moriyataw i Harim a si Maasayas, si Iliyas, si Simayas, si Yahiyal ago si
Osiyas.
22 So manga moriyataw i Pasor a si Iliwanay, si Maasayas, si Ismail, si Nitaniil, si
Yosabad ago si Ilasah.
23 So manga Libitiyo a miyamakasela na si Yosabad, si Simay, Si Kilayas (a bebetowan

sa Kilita), si Pitahiyas, si Yodah ago si Iliyasar.
24 So padidikir a miyakasela na si Iliyasib.
So manga gordiya ko Timplo a miyamakasela na si Salom, si Tilim ago si Ori.
25 Giyai so ped a manga Israil a miyamakasela:
So manga moriyataw i Paros a si Ramiyas, si Yasiyas, si Malkiyas, si Mihamin, si

Iliyasar, si Malkihah ago si Binayas.
26 So manga moriyataw i Ilam a si Mataniyas, si Sakariyas, si Yahiyal, si Abdi, si
Yarimot ago si Iliyas.
27 So manga moriyataw i Sato a si Iliwanay, si Iliyasib, si Mataniyas, si Yarimot, si
Sabad ago si Asisa.
28 So manga moriyataw i Bibay a si Yahohanan, si Hananiyas, si Sabay ago si Atlay.
29 So manga moriyataw i Bani a si Misolam, si Malok, si Adayas, si Yasob, si Siyal ago
si Ramot.
30 So manga moriyataw i Pahatmowab a si Adna, si Kilal, si Binayas, si Maasiyas, si
Mataniyas, si Bisaliil, si Binoy ago si Manasih.
31 So manga moriyataw i Harim a si Iliyasar, si Isihah, si Malkiyas, si Simayas, si
Simiyon,
32 Si Baniyamin, si Malok ago si Simariyas.
33 So manga moriataw i Hasom a si Matinay, si Matalah, si Sabad, si Ilipilit, si Yarimay,
si Manasih ago si Simay.
34 So manga moriyataw i Bani a si Maaday, si Amram, si Owil,
35 Si Binayas, si Bidayas, si Kiloh,
36 Si Baniyas, si Mirimot, si Iliyasib,
37 Si Mataniyas, si Matinay ago si Yaaso.
38 So manga moriyataw i Binoy a si Simay,
39 Si Silimiyas, si Natan, si Adayas,
40 Si Maknadibay, si Sasay, si Saray,
41 Si Asaril, si Silimiyas, si Simariyas,
42 Si Salom, si Amariyas ago si Yosop.
43 So manga moriyataw i Nibo a si Yail, si Matitiyas, si Sabad, si Sibina, si Yaday, si
Yowil ago si Binayas.
44 Langon aya na miyakapangaroma ko manga rait a manga babay na mimbabawata so

ped ko manga karoma iran.
NIHIMIYAS
NIHIMIYAS 1
So Pangangarapan i Nihimiyas
Giyai so manga katero i Nihimiyas a wata i Hakaliyas:
Sii ko olanolan a Kislib ko ikadowa polo ragon ko kandadato i Artasirksis sa Pirsiya na

sisii ako ko torogan o dato sa siti a Sosa.
2 Si Hanani a isa ko manga pagari aken na miyakaoma a poon sa Yodah a oonotan o ped
a manga mama. Inisean aken siran makapantag ko manga Yahodi a miyakakasoy ko
kinitaogen kiran ago so makapantag sa Yarosalim.
3 Pitero iran raken a "So manga taw a miyakapagoyag ko kinitaog iran a miyamakakasoy
ko inged na tanto siran a kareregenan ago makadadapanas. Minitobak so pangeleban a
Yarosalim ago miyanga tototong so manga pintoan iyan."
4 So kiyanega ko sii na miyakaontod ako a miyakasegad. Miyamakapira gawii na

makamboboko ako ago dii powasa. Na miyangangarapan ako ko Tohan sa sorga
5 A tig aken a
"Ya Allah a Tohan sa sorga! Mala ka ago piyakalekelek a ipetoman ka so kapasadan sa

kipekelimoon ka ko siran oto a pekebabaya reka ago peparatiyaya ko manga sogoan ka.
6 Ilaya ko ngka, na pakinega ngka ago tagoa ngka sa ginawa so manga pangni aken sii ko
kipepangangarapanen ko sa gagawii daondaw ko manga pagtaw aken a manga Israil.
Peteobaten ko so manga dosa o manga taw sa Israil a minindosa ami reka. Saken ago so
manga apo aken na miyakandosa!
7 Miyakanggolaola kami sa tanto a marata a miyakasopak reka. Da ami tomana so manga
sogoan, manga bitikan ago manga kokoman a inibegay ngka rekami a nggolalan ko oripen
ka a so Mosa.
8 “Pengnin ko a tanodi ngka so pitero o ka ko oripen ka a Mosa a 'O magongkir kano a

manga taw sa Israil na iperak aken sekano ko manga nasiyon.
9 Ogaid na o kesoy kano raken a paratiyayaan iyo ago tomanen iyo so manga sogoan aken
na bapiya pen miyamangitaog kano ko pirowarowangan o doniya na timoon ko sekano
ago pagowiten ko sekano ko darpa a miyapili aken a kedenan o Ingaran aken.'
10 “Manga oripen kami ngka ago manga pagtaw a inaon ka a nggolalan ko mala a bager
ka ago so mala i kapaar a lima ngka.
11 Ya Allah, pengnin ko a tagoa ngka sa ginawa angkai a pangangarapan aken a oripen ka
ago so pangangarapan o ped a manga oripen ka a pekebabaya mantog ko Ingaran ka.
Imanto a gawii na begi ako ngka sa kapiya i bobolos na pakipangalimoon ako ngka ko
dato."
Sii sangkoto a masa na pangengenat ako sa arak o dato.
NIHIMIYAS 2
Siyogo i Artasirksis si Nihimiyas sa Yarosalim

Sii ko olanolan a Nisan sii ko ikadowa polo ragon a kandadato i Artasirksis isako witan
sekaniyan sa arak na kinowa ko ago piyalad aken ko dato. Da ako niyan den mailay a
mararata a ginawa ko,
2 Na inisean ako niyan a "Ino makaririmeng so paras ka a da a pekegedam ka? Maana bo
sa aden a awid a akal ka."
Na tanto ako a miyalek,
3 Ogaid na pitero aken ko dato a "Pengnin ko a mamboway so dato! Ino di makarimeng
so paras aken a so siti a ron minikobor so manga apo aken na mabibinasa a so manga
pintoan iyan na miyanga tototong a apoy?"
4 Na iniise raken o dato a "Antonaa i kebayaan ka nggolaola?"

Miyangangarapan ako ko Tohan sa Sorga
5 Na inisembag aken ko dato a "O ikelimo ako ngka, Dato, ago ikesoat ka na pakasonga
ko ngka ko siti sa Yodah a ron minikobor so manga apo aken kaan aken mabangon
peroman."
6 Na so dato a makaaabay ron so bai a moontod na iniise iyan raken a "Ay katey a
kapekatareg ka roo na anda i kapekakasoy ngka?" Na inikasoat o dato a kasogoa niyan
raken na tomindo ako sa gawii.
7 Pitero aken on pen a "O ikesoat o dato na begi ako ngka sa manga sorat a imbegay aken
ko manga gobirnador sa probinsiya ko masesedepan o Lawasaig a Yopratis kaan ako iran
kaperowi sa malilinding a lalakaw taman sa makaoma ako sa Yodah.
8 Pengni ako reka pen sa sorat a imbegay aken ki Asap a somisiyap ko kalasan o dato
kaan ako niyan kabegi sa manga tarakayo a kambaalan a manga dolog o manga pintoan o
kota ko obay o Timplo ago so pangeleban o siti ago so walay a mbalingan aken." Na
sabap sa sisii raken so limo o Tohan aken na inibegay raken o dato so manga pangni aken.
9 Somiyogo so dato sa manga olowan a sondaro ago manga pangongoda a moonot raken
na somiyong ako sa probinsiya ko masesedepan a Yopratis a ron aken inibegay so manga
sorat o dato ko manga gobirnador.
10 Ogaid na kagiya maneg i Sanbalat a taga Horon ago si Tobiyas a nakoda a Amoniyo a
aden a miyakatalingoma a makapengosor ko kamapiyaan o manga Israil na tanto siran a
kiyararangitan.
Inilay i Nihimiyas so Pangeleban a Yarosalim
11 Miyakaoma ko sa Yarosalim, na kagiya makatareg ako roo sa miyakatelo gawii

12 Na mimbowat ako ko kagagawii na lominiyo ako a oonotan o da mapira kataw a
manga mama. Da den a ba ko kiyateroan makapantag ko miyapadalem o Tohan ko ko
poso aken a penggolaolaan ko sa Yarosalim. Da den a ped ami a ayam a liyo bo ko
kokodaan aken.
13 Lominiyo ako ko siti a miyokit ko Gimowa ko Balintad na somiyagad ako ko Paridi a
Naga na tomiyaros taman ko Gimowa ko Popot a pegamasamasen aken so manga
pangeleban a Yarosalim a miyanga gegeba ago so manga pintoan iyan a miyabinasa a
apoy.
14 Na miniseg ako ko Gimowa ko Bowalan ago so Papaigoay o Dato, ogaid na da den a
ba roo keokitan o kimar aken.
15 Sabap roo na liyalakawan ko so Baogan a Kidron a pepagamasamasen ko so
pangeleban. Na giyoto a komiyasoy ako na somiyoled ko siti a miyokit bo ko Gimowa ko
Balintad.
16 Di katawan o manga nakoda ko siti o anda ko miyakasong o di na antonaa i di aken dii

nggolaolaan, ka taman sangkoto a oras na da aken den teroa ko manga Yahodi a manga
imam, manga olowan, manga nakoda o di na so apiya antawa onon a makapenggolaola ko
galebek.
17 Ogaid na samanaya na pitero aken kiran a "Pekeilay niyo so kamomoralai ko siti tano.
Mabibinasa a Yarosalim ago miyanga tototong so manga pintoan iyan. Na den, bangonen
tano peroman so pangeleban a Yarosalim kaan mada so kapakadadapanas tano."
18 Pitero aken kiran pen so makapantag ko limo o Tohan a sisii raken ago so miyatero
raken o dato.
Na somimbag siran a "Poon tano mangon!" Na mitiyagar siran nggolaola sangkai a
mapiya a galebek.
19 Ogaid na kagiya maneg ai i Sanbalat a taga Horon, si Tobiyas a nakoda a Amoniyo

ago si Gisim a Arab na piyagongatongat kami ran ago pisodi. "Antona angkai a
pesowaan iyo?" a iniise iran. "Ba kano pesopak ko dato?"
20 Somimbag ako kiran a tig aken a "So Tohan sa sorga na mbegan kami niyan sa kapiya
i bobolos. Manga oripen kami niyan na magepoon kami mangon, ogaid na sekano ron
peman na da a bagian iyo o di na mapetontot sii sa Yarosalim ago da a kaaped iyo ko
totolan on."
NIHIMIYAS 3
So Kapembangona Peroman ko Pangeleban
Mandiyadi na si Iliyasib a maporo a imam ago so manga ped iyan a manga imam na
mipoon nggalebek, na biyangon iran peroman so Gimowa o manga Bilibili. Inisenggay
iran a soti na tiyago iran on so manga keleb iyan. Biyangon iran pen so pangeleban taman
ko Lantawa o Magatos, a inisenggay iran, ago taman roo den ko Lantawa o Hananil.
2 So manga taw sa Yariko na biyangon iran so misosompat on a pangeleban, na si Sakor a
wata i Imri i miyangon ko telondog a sasilang on.
3 So Gimowa a Seda na miyabangon peroman o manga wata i Hasinaah. Diyologan iran

ago piyanagoan iran sa manga keleb ago manga potaw a tanggal.
4 Si Mirimot a wata i Oriyas ago apo i Hakos i miyompiya ko telondog a sasilang ko

pangeleban.
Si Misolam a wata i Birikiyas ago apo i Misisabil i miyompiya ko telondog a sasilang
on.
Si Sadok a wata i Baana i miyompiya ko telondog on.
5 So manga mama a manga taga Tikowa na inompiyaan iran so telondog a sasilang on,
ogaid na so timpo kiran a manga taw na somiyangka mogop ko galebek.
6 Si Hoyada a wata i Pasiyas ago si Misolam a wata i Bisodiyas na biyangon iran

peroman so Andang a Gimowa. Diyologan iran ago tiyagoan sa manga keleb ago manga
potaw a tanggal.
7 Si Milatiyas a taga Gibiyon, si Yadon a taga Mironot ago so manga taw sa Gibiyon ago
giya Mispah i miyompiya ko telondog a sasilang ko pangeleban. Giyoto i manga darpa
a ndadatoan o gobirnador sa probinsiya sa sedepan a Yopratis.
8 Si Osiyal a wata i Harhayas a panday sa bolawan na inompiyaan iyan so telondog a

sasilang on, na si Hananiyas a pangengembaal sa lana mamot i miyompiya ko
tomiyalondog on. Na lipas iran so sabaad ko siti a Yarosalim taman ko Maolad a
Pangeleban.
9 Si Ripayas a wata i Hor a so olowan o sabaad a darpa sa Yarosalim na inompiyaan iyan

so telondog a sasilang on.
10 Si Hidayas a wata i Haromap na inompiyaan iyan so pangeleban a mipepantag o walay

niyan.
Si Hatos a wata i Hasabniyas i miyompiya ko telondog a sasilang on.
11 Si Malkihah a wata i Harim ago si Hasob a wata i Pahatmowab na inompiyaan iran so

telondog a sasilang on ago so pen so Lantawa ko Pogon.
12 Si Salom a wata i Halohis a so olowan o sabaad a darpa sa Yarosalim na inompiyaan

iyan so telondog a sasilang on a inogopan sekaniyan o manga wata iyan a manga babay.
13 Si Hanon ago so manga taw sa siti a Sanowah na biyangon iran peroman so Gimowa
ko Balintad. Piyanagoan iran sa manga keleb ago manga potaw a tanggal. Inompiyaan
iran pen so pat gatos ago lima polo ka mitros ko pangeleban taman den ko Gimowa ko
Popot.
14 Si Malkiyas a wata i Rikab a ndadato ko masasakop a Bit Hakirim na biyangon iyan

peroman so Gimowa ko Popot, na piyanagoan iyan sa manga keleb ago manga potaw a
tanggal.
15 Si Salon a wata i Kolhosih a ndadato ko masasakop a Mispah na biyangon iyan

peroman so Gimowa ko Bowalan na inatepan iyan ago piyanagoan sa manga keleb ago
manga potaw a tanggal. Sii ko Papaigoay sa Silowam na inompiyaan iyan so pangeleban
ko obay o Sapadan o Dato taman den ko towak a ipetondagay ipoon ko siti o Daod.
16 Si Nihimiyas a wata i Asbok a ndadato ko sabaad ko masasakop a Bit Sor na

inompiyaan iyan so telondog a sasilang on taman ko darpa a mipepantag o kobor o Daod
na mananaros roo den ko pepondoan sa ig ago so Walay o Kikababantogan a manga
mama.
17 So manga Libitiyo i miyangompiya ko telondog a sasilang on a pagoolowanan siran i

Rihom a wata i Bani.
Si Hasabiyas a ndadato ko sabaad ko masasakop a Kilah na inompiyaan iyan so
telondog a sasilang ko pangeleban para ko masasakop iyan.
18 So manga ped iyan a magiinged i miyangompiya ko telondog a sasilang on a
pagoolowanan siran i Binoy a wata i Hinadad a aya ndadato ko ped a sabaad ko
masasakop a Kilah.
19 Si Isir a wata i Yosowa a aya ndadato sa Mispah na inompiyaan iyan so ped a sasilang
ko pangeleban a mipepantag o walay a petegoan sa manga gomaan taman den ko
kalilingkoan iyan.
20 Si Barok a wata i Sabay na piyanagontamanan iyan mompiya so telondog a sasilang on

ipoon ko kalilingkoan o pangeleban taman ko pintoan o walay i Iliyasib a maporo a
imam.
21 Si Mirimot a wata i Oriyas ago apo i Kos i miyompiya ko telondog a sasilang on ipoon
ko pintoan o walay i Iliyasib taman den ko kiyaposan on.
22 So manga imam a poon ko manga mbalabala a inged i miyangompiya ko telondog a

sasilang on.
23 Si Baniyamin ago si Hasob na inompiyaan iran so telondog a sasilang on a mipepantag

o manga walay iran.
Si Asariyas a wata i Maasiyas ago apo i Ananiyas i miyompiya ko telondog a sasilang
on ko obay o walay niyan.
24 Si Binoy a wata i Hinadad na inompiyaan iyan so telondog a sasilang ko pangeleban

ipoon ko walay i Asariyas na taman den ko kalilingkoan iyan ago so rogo niyan.
25 Si Palal a wata i Osay i miyompiya ko telondog a sasilang ko pangeleban ko

mipepantag o kalilingkoan iyan ago so lantawa a makaboborod ko mipoporo a torogan o
dato a marani ko lamalama o manga gordiya.
Si Pidayas a wata i Paros
26 Ago so manga talasogoay ko Timplo a kibabaling ko bobongan sa Opil i
miyangompiya ko telondog a sasilang on sa tampar sa sebangan taman den ko Gimowa
ko Ig ago so lantawa a makaboborod roo.
27 So manga mama sa Tikowa na inompiyaan iran so telondong a sasilang on ipoon ko

mala a lantawa a makaboborod roo taman den ko pangeleban sa Opil.
28 So manga imam na inompiyaan iran so telondog a sasilang on a mananaros sa tampar

sa pagotaraan ipoon ko Gimowa o manga Koda a so oman i isa kiran na miyompiya ko
mipepantag o walay niyan.
29 Si Sadok a wata i Imir na inompiyaan iyan so telondong a sasilang on ko obay o walay

niyan.
Si Simayas a wata i Sikaniyas a so gordiya ko Gimowa sa Sedepan i miyompiya ko
telondog a sasilang on.
30 Si Hananiyas a wata i Silimiyas ago si Hanon a so ikanem a wata a mama i Salap na

inompiyaan iran so telondog a sasilang ko pangeleban.
Si Misolam a wata i Birikiyas i miyompiya ko telondog a sasilang on a mipepantag o
walay niyan.
31 Si Malkihah a panday sa bolawan na inompiyaan iyan so telondog a sasilang ko

pangeleban taman den ko pekedenan o manga talasogoay ko Timplo ago so manga
padagang a mipepantag o Gimowa o manga Pepagipat ago mananaros roo den taman ko
mipoporo a rowang sii ko rogo niyan.
32 So manga panday sa bolawan ago so manga padagang na inompiyaan iran so kaposan

a sasilang ko pangeleban ipoon ko mipoporo a rowang sii ko rogo niyan na taman den ko
Gimowa o manga Bilibili.
NIHIMIYAS 4
So Kiyasopaka ko Kambangona ko Pangeleban
Kagiya maneg i Sanbalat a pembangonen ami peroman so pangeleban na kiyararangitan

sekaniyan a tanto a ootegan na piyagongatongat iyan so manga Yahodi.
2 Sii ko hadapan o manga ped iyan ago so manga sondaro sa Samariya na pitero iyan a
"Antonaa i mapipikir angkoto a pepanga raraparapay a manga Yahodi a sowaan iran? Ba
aya iran singanin na so kambangona peroman ko siti iran? Ba aya katao iran on na
kepasad iran so galebek on ko salongan bo o kediyangkaan iran so di iran dii kakorban?
Ba iran mapekaasal so manga ator a pekowaan iran ko piyamatiyong a popot a miyanga
tototong?"
3 Si Tobiyas a Amoniyo a sisii ko obay niyan na tig iyan a "Amay ka apiya lako bo i
pekatabid sangkoto a pangeleban a pembangonen iran na kitobak so manga ator on!"
4 Na miyangangarapan ako a tig aken a "Ampona kami ngka, hey Tohan ami, ka di kami
ran dii sodiin. Pengnin ko a mitana ko olo iran so kapegitowitoa iran rekami! Mabiyag
siran sii ko mawatan a inged a mateban siran on!
5 Di ngka sepengi so kasalaan iran aya pen o ba ngka papasa so manga dosa iran ko
kapegilaya ngka on, ka piyamakaito kami ran a dii nggagalebek."
6 Mandiyadi na initaros ami so kapembangona ko pangeleban, na da matey na iniraot ai

langon ko kiyalooki ko kaporo iyan, ka minggalebek so manga taw sa iklas ko poso iran.
7 Ogaid na kagiya maneg i Sanbalat, si Tobiyas, so manga Arab, so manga Amoniyo ago
so manga taw sa Asdod a pepangosor so kapembangona ko pangeleban ago peterotopen
so manga sabaad on a da panga tatarotopi na tanto siran a kiyararangitan.
8 Na palaya siran den miyagopakat sa marata sa kanggobata iran sa Yarosalim ago
peribogaren iran so manga taw ron.
9 Ogaid na miyangangarapan kami ko Tohan ami ago piyakakaden ami so manga gordiya
a makalinding rekami ko ridoay sii ko gagawii daondaw.
10 Samanaya na pitero o manga taw sa Yodah a "Pekedarodos so bager o kigagalebek na

tanto a madakel a popot a kewit roo den a di ami kitaros mangon so pangeleban."
11 Na aya dii teroon o manga ridoay tano na "Sa di iran rektano pen kaketokawi o di na
kakeilaya na pesondolan tano siran na pemonoon tano siran ago itapelek tano so galebek."
12 Ogaid na so manga Yahodi a kibabaling ko marani ko ridoay na omanoman kami ran
piyakapagiktiyar a tig iran a "Pekapoon siran ko langon a darpa ko mbalabala a nggobat
rektano!"
13 Sabap roo na piyakakaden aken so ped ko manga taw a pipemiliya sii ko talikodan o
bansayan a manga darpa a lebi ron a mababa so pangeleban, a kigogomaanan siran sa
manga pedang, manga bangkaw ago manga pana.
14 Na kagiya mangilailay ako ko langon taman na pitero aken ko manga taw ago so
manga olowan iran ago manga nakoda a "Tatanodi niyo so Allah a mala ago
piyakalekelek, na pangaton iyo so manga pagari niyo, so manga wata iyo, so manga
karoma niyo ago so manga walay niyo!"
15 Kagiya maneg o manga ridoay tano a kiyatokawan ami so pekediyaten iran na siyabot
iran a piyakada ini o Tohan sa gona, na palaya kami komiyasoy ko oman i isa a galebek
iyan ko pangeleban.
16 Ipoon sangkoto a gawii na so sabagi ko manga mama aken na dii nggalebek, na so

sabagi on na meraraben a kigogomaanan sa manga bangkaw, manga kelong ago manga
pana. So manga olowan na pekeden ko talikodan o manga taw sa Yodah
17 A pembangon ko pangeleban. So siran oto a pepamangawid sa manga awid na di iran
dii nggolaolaan so galebek iran a sasabala a lima, a so sabala on na komakapet sa
gomaan,
18 Na so oman i panday na itatakip iyan so pedang iyan sii ko di niyan dii kanggalebek.
Ogaid na so mama a pepekaoni ko bogiyong na pegonot raken.
19 Pitero aken ko manga taw ago so manga olowan iran ago manga nakoda a "So galebek
na mala ago mipapayapat, na makambebelabelag tano ko pangeleban a kakekawatanaan
tano.
20 Na so den so kanega niyo ko oni o bogiyong na timo kano rekami sangkoto a darpa, ka
so Tohan tano i makipetidawa para rektano!"
21 Oman gawii ipoon ko kasebang o alongan taman ko kapekagemaw o manga bitoon na

so sabagi rekami na dii nggalebek ago so sabagi on na kikakapet sa manga bangkaw.
22 Samaoto na pitero aken pen ko manga taw a "Disomala a pepekatorog so oman i
mama ago so talasogoay niyan ko soled a Yarosalim igira a gagawii kaan dii
makanggordiya ko siti ko kagagawii ago dii makanggalebek ko kadadaondaw."
23 Sii sangkai a manga gawii na apiya saken o di na so manga pagari aken o di na manga
talasogoay aken o di na so manga gordiya a moonot raken na di den makapengenda sa
nditaren. Oman i isa rekami na makanggogomaan apiya pen igira a pesong sa ig.
NIHIMIYAS 5
Inogopan i Nihimiyas so manga Miskin
Samaoto na so kadakelan ko manga mama a rakes o manga karoma iran na tanto iran a
piyanarotaroan so manga pagari ran a manga Yahodi.
2 So manga ped na di iran dii teroon a "Madakel kami ago so manga wata ami.
Kailangan a kapakakowa ami sa pangenengken kaan kami makakan ago makapagoyag."
3 Na dii teroon o manga ped a "Inisanda ami so manga lopa ami, manga asinda a obas ago
so manga walay ami kaan kami makakowa sa pereperan sii ko masa a taon."
4 Aden pen a dii tero sa "Miyakaotang kami sa pirak a mibayad ko bowis a pepanekaten o
dato para ko lopa ami ago manga asinda a obas.
5 Melagid kami sa rogo ago so ped ami a manga Yahodi, na so manga wata ami na lagid
sa kapiya o manga wata iran. Apiya pen oto na kailangan a di ami dii mapesa so manga
wata ami a pengongoripenen. So ped ko manga wata ami a babay na miyapangongoripen
den na da a kitabang ami kiran ka so manga lopa ami ago manga asinda a obas na
matatangan o manga ped."
6 So kiyanega ko ko inipanarotaro iran ago manga panon na tanto ako a kiyararangitan
7 Na piyasad aken sa ginawa ko a penggolaola ako. Pimbongetan aken so manga olowan
ago so manga nakoda a tig aken a "Di niyo dii toboan so manga pagari niyo!"
Mandiyadi na tomiyawag ako sa mala a kalilimod sa kimbitiyarain aken kiran na pitero
aken a "Taman sa magaga tano na miyaaon tano so manga pagari tano a manga Yahodi a
miyapepasa iran a ginawa iran ko di tano royod. Ogaid na imanto na petegelen iyo so
manga pagari niyo sa di iran dii kapesaa ko ginawa iran sii rekano a ped iran a manga
Yahodi!" Na makarerenek siran ka da den a ba iran kisembag.
9 Na pitero aken pen a "Kena a ba ontol so di niyo dii nggolaolaan! Ba di patot a

peginetaw kano a maaleken ko Tohan tano kaan tano makalidas ko kapegongatongata
rektano o manga ridoay tano a di tano royod?
10 Saken ago so manga pagari aken ago manga pagtaw na pepamagotang mambo ko
manga taw sa pirak ago pereperan. Ogaid na geneken iyo so kaperiba!
11 Imanto den na kasowin iyo kiran so manga lopa iran, manga asinda a obas, manga
kayo a olibi ago so manga walay iran, na kasowin iyo pen so miyatobo iyo kiran ko pirak
iran, pereperan iran, bago a arak ago lana."
12 “Ikasoy ami," a tig iran, "na da den a ped a ba ami kiran ipenton. Inggolalan ami so
pitero o ka."
Na giyoto a piyakitawag aken so manga imam na piyakasepa aken so manga olowan
ago so manga nakoda ko hadapan o manga imam a inggolalan iran so initopa iran.
13 Inikekeng aken pen so matatago ko gerab aken a tig aken a "Sii sangkai a okit na
mikekeng o Tohan ko walay niyan ago tamok iyan so oman i mama a di toman sangkai a
initopa niyan. Kedaan sekaniyan ko langon taman iyan!"
So kiyanega iran sii na so langon a malilimod na tig iran a "Amin," na piyodi iran so
Allah. Na ininggolalan iran so initopa iran.
So Kaginawa i Nihimiyas
14 Sii ko soled o miyakasapolo ago dowa ragon a kanggogobirno aken sa inged a Yodah,
ipoon ko ikadowa polo ragon ko kandadato i Artasirksis na taman ko ikatelo polo ago
dowa ragon, na saken ago so manga tonganay aken na da kami den kan ko pangenengken
a isesenggay a rek o gobirnador.
15 Ogaid na so miyanga oonaan aken a manga gobirnador na pepelolopiten iran so manga
taw na pepantonan iran siran sa tenga sa kilo a pirak sa oman gawii a pekioman ko
pangenengken ago arak. Apiya so manga sanasanaan iran na pelawanan iran so manga
taw. Ogaid na kena anan a ba ko olaola ka kagiya maaleken ako ko Tohan.
16 Inipanagontaman aken a ginawa ko ko galebek sangkai a pangeleban na da ako pamasa
sa apiya antonaa lopa. So langon a manga pagtaw aken na pepamangeped mambo ko dii
nggagalebek.
17 Liyo ron pen na magatos ago lima polo a manga Yahodi ago so manga olowan iran na
pepekakan sii ko lamisaan aken a rakes o siran oto a pepekaoma raken a poon ko
mbalabala a manga inged.
18 Aya di raken dii tiyagaren sa oman gawii na satiman a sapi, nem timan a piyamili a
bilibili ago madakel a manok, na oman sapolo gawi na mitataralo a pitibarangan a arak.
Apiya pen ai na da ako den pangni sa pangenengken a isesenggay a rek o gobirnador
sabap sa pepanga reregenan den angkai a manga taw.
19 “Hey Tohan ko, tatademi ako ngka sabap ko langon a miyanggolaola ko a kamapiyaan
angkai a manga na taw na kalimoon ako ngka.
NIHIMIYAS 6
Pikediyatan si Nihimiyas sa Marata
Miyaneg i Sanbalat, si Tobiyas, si Gisim a Arab ago so ped a manga ridoay ami a
miyapasad aken mangon so pangeleban a da a ba on miyalamba a ba da matarotop apiya
pen taman sa masa oto na da aken pen makeleb so manga gimowa.
2 Sabap roo na si Sanbalat ago si Gisim na inipakawit iran raken angkai a katero: "Song
ka sii. Makatetalaboka tano sii ko isa ko maito a inged roo ko kapantaran sa Ono."
Ogaid na kekadiyatan ako iran sa marata.
3 Sabap roo na inipakawit aken kiran angkai a sembag: "Di ako roo pekasong ka aden a
mala i kipantag a galebek aken. Ino aken teregen so galebek ago pagawaan ko kaan ako
rekano makasong?"
4 Miyakapat ako iran kapakawiti sa datar oto a katero na aya ko bo ipesembag kiran so
datar oto mambo a sembag.
5 Na ikalima den na siyogo raken i Sanbalat so sanasanaan iyan a maawid sa sorat a da

masobri.
6 Aya oni niyan na:
"Pitero raken i Gisim a aya mapepanotol sii ko manga taw ko mbalabala a manga inged
na seka ago so manga Yahodi na pepamagopakat sa kasopak, na giyoto i sabap a
pembangonen iyo peroman so pangeleban. Liyo ron pen na aya kabasa kon angkai a
totolan na seka i pembaloy a dato iran
7 Na tomiyoro ka pen sa manga nabi a pekalangkap sii sa Yarosalim sa "Aden a dato sii
sa Yodah!" Mataan den a giyangkai a totol na kisampay ko dato. Sabap roo na song ka
sii kaan ta makambitiyarai."
8 Inipakawit aken rekaniyan angkai a sembag: "Da a ba dii manggolaola a ba lagid o di

ngka dii teroon. Matag anan baden piyangembaalan o pamikiran ka."
9 Petepengan kami ran mangangalek a pipikiren iran a "Kedaan siran sa panagontaman ko

galebek na di kepasad." Ogaid na miyangangarapan ako a tig aken a "Pakabagera ko ngka
imanto, hey Tohan ko!"
10 Samaoto na somiyong ako ko walay i Simayas a wata i Dilayas ago apo i Mihitabil, a
di peliyoliyo ko walay niyan. Pitero iyan a "Telabok ta sii ko Timplo o Tohan ko soled o
pesimbaan na lekeban ta so manga pintoan ka pekaoma so manga ridoay ngka a mbono
reka. Pekatalingoma siran ko kagagawii sa kambonoa iran reka."
11 Ogaid na tig aken a "Ba patot a kapelagoy o taw a lagid aken? Ba patot a kapegapas
aken ko pesimbaan sa kasebeta ko ko ginawa ko? Di ako ron song!"
12 Na siyabot aken a da sekaniyan sogoa o Tohan. Ka giyangkai a miyaalamat iyan
makapantag raken na sabap sa tindanan sekaniyan i Tobiyas ago si Sanbalat.
13 Petepengan ako iran mangangalek kaan ako makandosa ko kanggolaolaa ko ko pitero
iran, na amay ka magiyanan na mapekarata iran so Ingaran aken ago mapagitowito ako
iran.
14 Hey Tohan ko, tademi ngka so langon a manga rarata a pinggolaola i Tobiyas ago si
Sanbalat. Tademi ngka pen so babay a nabi a si Nowadiyas ago so ped a manga nabi a
petepengan ako iran mangangalek.
So Kiyapasad o Pangeleban
15 Miyakalima polo ago dowa gawii a kapembangona ko pangeleban, na miyapasad ai sii

ko ikadowa polo ago lima gawii ko olanolan a Ibol.
16 Kagiya maneg ai o langon o manga ridoay ami sii ko langon a nasiyon ko melilibeta
rekami na tanto siran a miyakarondan ka siyabot iran a giyangkai a galebek na
miyanggolaola sabap ko tabang o Tohan tano.
17 Sii sangkoto a manga gawii ko kapembangona ko pangeleban na so ped ko manga

olowan sa Yodah na pepamakawit sa madakel a sorat ki Tobiyas na madakel mambo a
manga sembag a ipepakawit iyan kiran.
18 Ka madakel ko manga Yahodi sa Yodah a maampil ki Tobiyas ka kagiya miyakamong
sekaniyan o Yahodi a si Sikaniyas a wata i Arah, na so wata iyan, a si Yahohanan, na
miyapangaroma niyan so wata a babay i Misolam a wata i Birikiyas.
19 Liyo ron pen na lalayon iran raken dii panotolen so manga pipiya a galebek i Tobiyas
na di iran on dii panotolen so di aken dii matero. Na pepakawit raken si Tobiyas sa
madakel a manga sorat a ipepangangalek raken.
NIHIMIYAS 7
Kagiya mabangon den so pangeleban ago miyakeleb aken den so manga gimowa iyan na
so manga gordiya ko manga gimowa, so manga padidikir ago so manga Libitiyo na
piyanga sasanganan sa galebek.
2 Piyakinggobirnowan aken ko pagari aken a Hanani a Yarosalim a ped iyan si Hananiyas
a aya komandir ko kota, ka kasasarigan sekaniyan a mama a lebi a maaleken ko Tohan a
di so kadakelan ko manga taw.
3 Pitero aken kiran a "Di niyo pakilelekai so manga pintoan a Yarosalim taman sa di
romanti so alongan. Na sii ko di pen dii kanggalebek o manga gordiya on na pakilelekebi
niyo kiran so manga pintoan ago kapepananggalan. Na toro kano pen ko kibabaling sa
Yarosalim sa manga gordiya a so ped kiran na sii siran ko sangan iran a darpa ago so ped
na sii ko marani ko walay iran."
So Listaan ko Miyamangitaog a Miyamakakasoy
4 Sa masa oto na maolad ago madaya so siti ogaid na maito a kibabaling on, na kena pen
a ba madakel a manga walay ron.
5 Mandiyadi na piyakipamikir raken o Tohan ko a limoden aken so manga taw a rakes o
manga olowan iran ago manga nakoda kaan siran milista a pipemiliya. Miyatoon aken so
kasosoratan ko salsila ko siran oto a paganay a miyamakakasoy. Na giyai i misosorat on:
6 Giyai so manga taw a miyakaawa ko probinsiya a Babilon a miyamakakasoy sa

Yarosalim ago sa Yodah a so oman i isa kiran na sii ko inged iyan. Miyamangitaog
gowani so manga pamiliya iran a miyanga bibiyag i Nibokadnisar a dato sa Babilon.
7 So manga magoolowan kiran na si Sirobabil, si Yosowa, si Nihimiyas, si Asariyas, si
Raamiyas, si Nahamani, si Mordikay, si Bilsan, si Mispirit, si Bigbay, si Nihom ago si
Baanah.
Katii so itongan ko manga Israil a miyakakasoy:
8 Manga mbawataan i Paros.............dowa nggibo ago magatos ago pito polo ago dowa
9 Manga mbawataan i Sipatiyas....... telo gatos ago pito polo ago dowa
10 Manga mbawataan i Arah.............nem gatos ago lima polo ago dowa
11 Manga mbawataan i Pahatmowab a maaped ko manga pamiliya i Yosowa ago si
Yowab...... dowa nggibo ago walo gatos ago sapolo ago walo
12 Manga mbawataan i Ilam.............. sanggibo ago dowa gatos ago lima polo ago pat
13 Manga mbawataan i Sato..............walo gatos ago pat polo ago lima
14 Manga mbawataan i Sakay...........pito gatos ago nem polo
15 Manga mbawataan i Binoy............nem gatos ago pat polo ago walo
16 Manga mbawataan i Bibay............nem gatos ago dowa polo ago walo
17 Manga mbawataan i Asgad...........dowa nggibo ago telo gatos ago dowa polo ago
dowa
18 Manga mbawataan i Adonikam... nem gatos ago nem polo ago pito
19 Manga mbawataan i Bigbay.......... dowa nggibo ago nem polo ago pito
20 Manga mbawataan i Adin............. nem gatos ago lima polo ago lima
21 Manga mbawataan i Atir a maaped ko pamiliya i Hisikiyas..siyaw polo ago walo
22 Manga mbawataan i Hasom......... telo gatos ago dowa polo ago walo
23 Manga mbawataan i Bisay............ telo gatos ago dowa polo ago pat
24 Manga mbawataan i Harip............ magatos ago sapolo ago dowa
25 Manga mbawataan i Gibiyon........ siyaw polo ago lima
26 Giyai pen so itongan ko manga mama a miyakakasoy a poon sa Bitlihim ago giya
Nitopah...........magatos ago walo polo ago walo
27 Poon sa Anatot.........magatos ago dowa polo ago walo
28 Poon sa Bit Asmabit........pat polo ago dowa
29 Poon sa Kiriyat Yarim, Kipirah ago giya Birot........pito gatos ago pat polo ago telo
30 Poon sa Ramah ago giya Giba...... nem gatos ago dowa polo ago isa
31 Poon sa Mikmas.......magatos ago dowa polo ago dowa
32 Poon sa Bitil ago giya Ay............... magatos ago dowa polo ago telo
33 Poon sa Nibo...........lima polo ago dowa
34 Poon sa Ilam............sanggibo ago dowa gatos ago lima polo ago pat
35 Poon sa Harim.......telo gatos ago dowa polo
36 Poon sa Yariko......telo gatos ago dowa polo
37 Poon sa Lod, Hadid ago giya Ono......pito gatos ago dowa polo ago isa
38 Poon sa Sinaah...telo nggibo ago siyaw gatos ago telo polo.
39 Giyai so itongan ko manga imam a miyakakasoy:
manga moriyataw i Yadayas a maaped ko pamiliya i Yosowa.....siyaw gatos ago pito polo
ago telo
40 Manga moriyataw i Imir................ sanggibo ago lima polo ago dowa
41 Manga moriyataw i Pasor............. sanggibo ago dowa gatos ago pat polo ago pito
42 Manga moriyataw i Harim............ sanggibo ago sapolo ago pito
43 Giyai so itongan ko manga Libitiyo a miyakakasoy:

manga moriyataw i Yosowa ago si Kadmiil (a manga moriyataw i Hodabiyas).......pito
polo ago pat
44 So manga padidikir ko Timplo a manga moriyataw i Asap.....magatos ago pat polo ago
walo.
45 So manga gordiya ko manga gimowa o Timplo a manga moriyataw i Salom, Atir,

Talmon, Akob, Hatita ago si Sobay........magatos ago telo polo ago walo.
46 Giyai so manga talasogoay ko Timplo a miyakakasoy:

so manga moriyataw i Siha, Hasopa, Tabaot,
47 Kiros, Siya, Padon,
48 Libana, Hagaba, Salmay,
49 Hanan, Gidil, Gahir,
50 Riyayas, Risin, Nikoda,
51 Gasam, Osa, Pasiyas,
52 Bisay, Miyonim, Niposim,
53 Bakbok, Hakopa, Harhor,
54 Baslot, Mihida, Harsa,
55 Barkos, Sisira, Timah,
56 Nisiyas ago si Hatipa.
57 Giyai so manga moriyataw o manga oripen o Solaiman a miyamakakasoy:
so manga moriyataw i Sotay, Sopirit, Pirida,

58 Yaala, Darkon, Gidil,
59 Sipatiyas, Hatil, Pokirit-Hasibaim ago si Amon.
60 So itongan ko langon a talasogoay ko Timplo ago so manga moriyataw o manga
oripen o Solaiman a miyamakakasoy............telo gatos ago siyaw polo ago dowa.
61 Aden a ped a miyamakakasoy a poon ko manga siti a Til Milah, Til Harsa, Kirob,
Adon ago giya Imir a di iran kapemataanan i ba so manga pamiliya iran na kiyababadan
ko Israil.
62 Siran na manga moriyataw i Dilayas, Tobiyas ago si Nikoda a aya kadakel iran na nem
gatos ago pat polo ago dowa.
63 Aden pen a manga imam a miyakakasoy sa Yarosalim a manga moriyataw i Hobayas,

Hakos, ago si Barsilay. (Giyangkai a Barsilay na miyakapangaroma sa wata a babay i
Barsilay a taga Giliyad na bitowan sekaniyan sangkoto a ngaran).
64 Na sabap sa di iran ketoon so salsila ko manga pamiliya iran na di siran maaped ko
manga pekeimam, ka kena a ba soti.
65 Na inisogo o gobirnador Sirobabil a di siran pekakan ko pangenengken a bagian o
manga imam ko manga inisoasoat ko Tohan taman sa aden a imam a mapariksa iyan so
kabaya o Allah a nggolalan ko Orim ago Tomim.
66 So kadakel o kalangolangon a miyamangitaog a miyamakakasoy na pat polo ago dowa

nggibo ago telo gatos ago nem polo
67 A liyo ron so pito nggibo ago telo gatos ago telo polo ago pito a manga talasogoay
iran a manga mama ago manga babay ago dowa gatos ago pat polo ago lima a manga
padidikir a manga mama ago manga babay.
68 Miyowit siran roo pen sa pito gatos ago telo polo ago nem a manga koda, dowa gatos
ago pat polo ago lima a manga mola,
69 Pat gatos ago telo polo ago lima a manga onta ago nem nggibo ago pito gatos ago
dowa polo a manga kimar.
70 So ped ko manga olowan ko pamiliya na miyamamegay sa manga pamemegayan para

ko galebek. So gobirnador na migay sa walo ago tenga sa kilo a bolawan, lima polo a
ladiya ago lima gatos ago telo polo a nditaren a imam.
71 Aya inipamegay o ped a manga olowan ko pamiliya para ko galebek na magatos ago
pito polo ka kilo a bolawan ago sanggibo ago dowa gatos ka kilo a pirak.
72 Na so langon o inipamegay o miyalamba a manga taw na magatos ago pito polo ka
kilo a bolawan, sanggibo ago magatos ka kilo a pirak ago nem polo ago pito a manga
nditaren a imam.
73 So manga imam, so manga Libitiyo, so manga gordiya ko gimowa, so manga padidikir

ago so manga talasogoay ko Timplo ago so langon a ped a manga Israil na mimbabaling
sii ko manga inged iran.
NIHIMIYAS 8
Piyamatiya i Isras so Kitab
Isako maoma so ikapito olan na miyakapaginged so manga Israil ko manga siti iran. Sii
ko paganay a gawii sangkoto a olanolan na miyalimod so langon a taw a maiisaisa sii ko
dii timotimoan ko danga o Gimowa ko Ig. Pitero iran ki Isras a imam ago alim ko Kitab a
kowaan iyan so Ribro a Kitab a inibegay o Allah ko Israil a nggolalan ko Mosa.
2 Na giyoto a inowit i Isras so Kitab ko hadapan o malilimod a manga mama, manga
babay ago so langon a manga wata a pekasabot on.
3 Roo ko dii timoan ko danga o Gimowa ko Ig na biyatiya iyan kiran so Kitab ipoon ko
kiyapita iyan taman ko miyaoto a alongan sii ko kamamasaan o langon iran a pekasabot
on na palaya iran den pipiyapiyaan mamamakineg.
4 Si Isras a alim ko Kitab na tomitindeg ko panggapanggaw a kayo a pimbaalan sabap

sangkoto a kapelimolimod. Sii sa kilid iyan sa tampar sa kawanan na tomitindeg on si
Matitiyas, si Sima, si Anayas, si Oriyas, si Hilkiyas ago si Maasiyas, na sii sa kilid iyan sa
diwang na si Pidayas, si Misail, si Malkiyas, si Hasom, si Hasbadanah, si Sakariyas ago si
Misolam.
5 Si Isras na keilay o langon a taw ka tomitindeg sekaniyan a mipapanggaw kiran, na so
den so kiyaokaba niyan ko ribro na palaya siran den miyamanindeg.
6 Piyodi i Isras so Allah a so kababantogan a Tohan, na inibayaw o langon a taw a manga
lima iran na somimbag sa "Amin! Amin!" Na giyoto a somiyodiyod siran ago
miyamanimba ko Allah a so manga paras iran na miseseko ko lopa.
7 So manga Libitiyo a si Yosowa, si Bani, si Siribiyas, si Yamin, si Akob, si Sabitay, si

Hodiyas, si Maasiyas, si Kilita, si Asariiyas, si Yosabad, si Hanan ago si Pilayas na
pegosain iran so Kitab ko manga taw sii ko katitindeg iran roo.
8 Pepangadian iran so Ribro a Kitab o Tohan a penggogoden iran ago pembatonan sa
maana kaan kasaboti o manga taw so pepangadian.
9 Mandiyadi na si Nihimiyas a so gobirnador ago si Isras a imam ago alim ko Kitab ago
so manga Libitiyo a pepangosiyat ko manga taw na pitero iran kiran langon a "Giyangkai
a gawii na soti ko Allah a Tohan iyo. Di kano mboboko ago pepamanegad!" Ka so
langon o manga taw na pepekasagad sii ko kapepamakinega iran ko manga katero o
Kitab.
10 Pitero pen i Nihimiyas a "Ikano roo na go kano selasela a pepista ko manga pipiya a
pangenengken ago mamis a panginginomen, na begi niyo ron so manga taw a da a
mapetiyagar iran. Giyangkai a gawii na soti ko Allah. Di niyo rarataa ginawa niyo ka so
kapekebabaya a ipembegay o Allah na aya niyo bager!"
11 So mambo so manga Libitiyo na pirinarinawan iran so langon o manga taw a tig iran a
"Rerenek kano! Di kano pemboko! Ka giyai na soti a gawii."
12 Mandiyadi na mimbabaling so langon a taw na mikekan ago miyamanginom na
miyamemegay siran ko pangenengken iran ko manga ped. Miselasela siran a tanto a
mabababaya ka kagiya siyabot iran so manga katero a piyangadian kiran.
So Kapista ko manga Lawig

13 Sii ko tomiyalondog a gawii na so langon o manga olowan ko pamiliya a rakes o
manga imam ago so manga Libitiyo na mitimo siran ki Isras a alim ko Kitab kaan iran
makenal piyapiya so manga ndao o Kitab.
14 Na kiyatokawan iran a aya misosorat ko Kitab a inibegay o Allah a nggolalan ko Mosa
na pekakaden so manga taw sa Israil ko manga lawig sii ko dii kapista ko ikapito olan.
15 Na misosorat roo pen a mapakalangkap iran sii ko manga siti iran ago sii sa Yarosalim
angkai a katero a "Song kano ko manga bobongan na kowa kano ron sa manga sapak a
kayo a olibi, kayo a goo, kayo a korma, kayo a rogan ago ped a manga kayo a
marimpoong a kambaalan iyo a manga lawig," a giyoto i minisorat ko Kitab.
16 Sabap roo na milalalakaw so manga taw na miyangowa sa manga sapak, na

piyangembaalan iran a manga lawig sii ko mapapantar a atep o manga walay iran, sii ko
manga lamalama iran, sii ko lamalama o Timplo o Tohan ago sii ko peketimotimoan ko
danga o Gimowa ko Ig ago so Gimowa o Ipraim.
17 So langon o isa ka maginged a miyamakakasoy a poon ko kinitaog iran na
miyangembaal sa manga lawig a kiyadenan iran sii ko miyakapito gawii a dii kapista.
Giyai i paganay a kiyanggolaolaa sii o manga Israil ipoon ko masa o Yosowa a wata i
Non na taman sangkoto a gawii, na tanto siran a mabababaya.
18 Oman gawii ipoon ko paganay a gawii taman ko moripori na biyatiya kiran i Isras so
sabaad ko Ribro a Kitab o Allah. Piselasela iran so kapista ko miyakapito gawii, na sii ko
ikawalo gawii na aden a kapelimolimod ka giyoto so taritib o Kitab.
NIHIMIYAS 9
Piteobat o manga Israil so manga Dosa iran
Sii ko ikadowa polo ago pat gawii sangkoto bo a olanolan na miyalimod so manga Israil a
dii popowasa a kindiditar sa manga sako ago kikatatagoan sa bayanek so manga olo iran.
2 Siran oto a kiyababadan ko Israil na miyangimbelag siran den ko langon a di iran royod
a manga taw. Na sii ko katitindeg iran roo na di iran dii teobaten so manga dosa iran ago
so manga kadostaan o manga apo iran.
3 Sii ko soled o telo ka oras na pepangadian kiran so Kitab o Allah a Tohan iran na
miyakatelo pen ka oras a ipepenaobat iran ago ipepamanimba ko Allah a Tohan iran.
4 Aden a panggaw roo a katitindegan o manga Libitiyo a aya kititindeg on na si Yosowa,
si Bani, si Kadmiyal, si Sibaniyas, si Boni, si Siribiyas, si Bani ago si Kinani.
Pepangangarapan siran sa matanog ko Allah a Tohan iran.
5 Mandiyadi na so manga olowan o manga Libitiyo a si Yosowa, si Kadmiyal, si Bani, si

Hasabniyas, si Siribiyas, si Hodiyas, si Sibaniyas ago si Pitahiyas na pitero iran ko manga
taw a "Tindeg kano na podiya niyo so Allah a Tohan iyo a oyagoyag sa taman sa
pakataman!"
Tig iran pen a "Mapodi so kababantogan a Ingaran ka a lebi a mipapangkat a di so
langon a pembantogen ago pepodin.
6 Da a rimbang ka, ya Allah! Seka i miyaden ko kawang ago so manga langit a rakes o
langon o manga bitoon on. Seka i miyaden ko lopa ago so langon a mapapadalem on, so
manga ragat ago so langon a ndodon. Seka i pembegay ko kaoyagoyag ko langon taman,
na so langon a kaaden sa langit na pepamanimba reka.
7 “Seka so Allah a so Tohan a minili ko Abram ago miyakaawa rekaniyan sa Or sii sa

inged a Babilon, na bitowan ka sa Ibrahim.
8 Miyapariksa ka a mapaparatiyaya reka so poso iyan na mimbaal ka sa kapasadan sii
rekaniyan a imbegay ngka ko kebabadan on so kaingedan o manga Kanaaniyo, Hitiyo,
Amoriyo, Pirisiyo, Hibosiyo ago manga Girgasiyo. Na initoman ka so minitopa ngka
sabap sa maontol ka.
9 “Miyailay ngka so kiyaromasay o manga apo ami sii sa Misir, na tiyarima a ka so

kiyagoraok iran sii ko Mariga a Ragat.
10 Piyakatalingomaan ka sa piyakamemesa a manga nanao so Piraon, so langon a manga
sanasanaan iyan ago so langon a taw ko inged iyan ka katawan ka o ay kiyapelolopita iran
ko manga pagtaw ngka. Piyakibantog ka roo a ginawa ngka sa bantogan a da a ikeda iyan
taman den imanto.
11 Siray ngka so ragat ko hadapan iran kaan siran on makaripag ko mamara a lopa, ogaid
na inilebad ka so pepanaloba kiran ko kadaleman na miyamangigaled siran on a lagid o
ator sii ko manga babager a ig.
12 Sii ko kadaondaw na pepekiagak ka siran ko mapopolaos a gabon, ago sii ko
kagagawii na mapopolaos a apoy a pesindaw ko lalan a pegokitan iran.
13 “Tomiyana ka ko Palaw a Sinay na miyakimbitiyarai ka kiran a poon sa langit. Bigan

ka siran sa manga kokoman ago manga kitab a maontol ago matito, ago manga pipiya a
bitikan ago sogoan.
14 Ininsaratan ka siran makapantag ko Soti a Gawii ngka a Idedeke ago bigan ka siran sa
manga sogoan, manga bitikan ago manga kokoman a nggolalan ko oripen ka a so Mosa.
15 Igira a miyaor siran na bigan ka siran sa roti a poon sa langit, na igira a miyawaw na
siyabapan ka siran sa ig a poon ko lakongan. Pitero o ka kiran a soledan iran ago
tanganen so lopa a minisepa a ka a imbegay ngka kiran.
16 “Ogaid na mitekabor so manga apo ami ago miyamakategas a olo iran a da iran
paratiyayaa so manga sogoan ka.
17 Minda siran mamakineg na da iran katademi so manga piyakamemesa a pinggolaola
ngka sii kiran. Miyakategas baden a manga olo iran, na sii ko kiyasopak iran na tomiyoro
siran sa nakoda kaan siran makakasoy ko kaooripeni kiran. Ogaid na paririla ka a Tohan
a makalimoon ago masalinggagaw a kena a ba malebod kararangiti ago mala i kapedi.
Sabap roo na da ngka siran talikodi
18 Apiya pen inimbaal iran a ginawa iran sa tiyowang a barahala a nati a sapi a tig iran a
'Giyai i Tohan iyo a miyakaliyo rekano sa Misir!' Tanto ka iran a piyagitowito!
19 “Ogaid na sabap ko kala a ka i gagaw na da ngka siran awai sii ko mitataog a kaden.
Da kiran den mada so mapopolaos a gabon a pegagak kiran ko lalan sii ko kadadaondaw
aya pen o ba so mapopolaos a apoy a pelindaw ko pegokitan iran sii ko kagagawii.
20 Siyogo o ka pen so mapiya a Roh ka a makapenginsarat kiran. Da ngka den taregen so
kipembegan ka kiran ko roti ngka a pekekan iran na bigan ka siran sa ig ko kapekewaw
iran.
21 Sii ko soled o pat polo ragon na pepegeperen ka siran ko mitataog a kaden. Da a ba
kiran mikorang na da den maronot so manga nditaren iran aya pen o ba lomibag so manga
ai iran.
22 “Piyakataban ka siran ko manga ndatoan ago manga nasiyon na piyakakaden ka siran

sii ko mbalabala on. Miyaagaw iran so inged i Sihon a dato sa Hisbon ago so inged i Og
a dato sa Basan.
23 Piyakandakel ka so manga moriyataw iran a lagid sa kadakel o manga bitoon sa langit,
na inowit ka siran ko kaingedan a miyatero o ka ko manga apo iran a soledan iran ago
tenganen.
24 Na somiyoled siran on a tiyangan iran. Piyakidaag ka kiran so manga Ikanaanen a
kibabaling roo na piyalad ka siran a rakes o manga dato iran sii ko kapaar o manga
pagtaw ngka kaan iran kiran mikidia so kabaya iran.
25 Miyaagaw o manga pagtaw ngka so kikokotaan a manga siti ago so oodaren a manga
lopa na tiyangan iran so manga walay ron a kikapepeno o langon a pisosonan a manga
pipiya a nganin ago so pen so manga paridi a kikakalotan, manga asinda a obas, manga
kayo a olibi ago tanto a madakel a onga a sapad. Mikekan siran ago miyanga oosog ago
piyanga oolitan, na inikababaya iran so kala o kamapiyaan ka.
26 “Ogaid na da siran pamaratiyaya a somiyopak reka. Inilebad iran so Kitab ka ko

talikodan iran, piyamono iran so manga nabi ngka a piyakapagiktiyar iran siran sa
kapakakasoy iran reka. Mala a kiyapagitowitoa iran reka!
27 Sabap roo na piyalad ka siran sii ko manga ridoay iran a lomiyopit kiran. Ogaid na sii
ko kapelolopita kiran na tomiyalo siran reka sa tabang, na inampon ka siran sii sa sorga.
Sii ko kala a ka i gagaw na somiyogo ka kiran sa manga makapanabang kiran a siyabet
iran siran ko kapaar o manga ridoay iran.
28 “Ogaid na so den so kiyapakalintad iran na minggolaola siran peman sa marata na
piyakitaban ka siran peman ko manga ridoay iran. Ogaid na igira a gomiyoraok siran reka
peman sa tabang na pegamponen ka siran sii sa sorga na omanoman ka siran masabet
sabap ko gagaw ngka.
29 “Piyakaiktiyar ka siran sa kapakakasoya ngka kiran ko Kitab ka ogaid na

miyangimporoan siran na da iran paratiyayaa so manga sogoan ka. Miyakandosa siran a
somiyopak ko manga kokoman ka a aya ipekaoyag o taw o petomana niyan. Tiyalikodan
ka iran ko katetegas iran i olo na minda siran mamamakineg.
30 Sii ko miyatey den a manga ragon na pisebaran ka siran. Piyakaiktiyar ka siran a
nggolalan ko Roh ka a sisii ko manga nabi ngka, ogaid na da iran tagoa sa ginawa.
Sabap roo na piyakipaar ka siran ko ped a manga nasiyon.
31 Ogaid na sabap ko kala a ka i gagaw na da ngka siran ipeda aya pen o ba ngka siran
tiyalikodi ka makalimoon ka ago masalinggagaw a Tohan.
32 “Hey Tohan ami a so kababantogan ago mala i kabatowa ago piyakalekelek a Tohan a
petoman ko kapasadan ka sa kapangalimo na di ngka bilangen a baliwala so langon a
karomasayan a miyakatalingoma rekami. Pepanga rarasay kami a rakes o manga dato
ami, manga olowan, manga imam, manga nabi ago manga apo ami ago so langon a
manga pagtaw ngka ipoon ko manga gawii o manga dato sa Asiriya taman imanto.
33 Ogaid na maontol ka ko langon a kiyadanega ngka rekami. Tomotoman ka sa pasad
apiya pen miyamakandosa kami.
34 So manga dato ami, manga olowan, manga imam ago so manga apo ami na da iran
paratiyayaa so Kitab ka. Da iran tagoa sa ginawa so manga sogoan ka ago so manga
initapaos ka kiran.
35 Apiya isako sisii siran pen ko ndatoan iran a ipekebabaya iran so mala a kamapiyaan
ka kiran sii ko maolad ago oodaren a lopa a inibegay ngka kiran na da ka iran
pangongonotani aya pen o ba iran tiyalkodi so manga rarata a olaola iran.
36 “Na manga oripen kami imanto sii sangkai a inged a inibegay ngka ko manga apo ami
kaan siran on makakan ko onga niyan ago so ped a manga pipiya a nganin on. Ilaya ngka
man ka manga oripen kami sii!
37 Na sabap ko manga dosa ami na so mala a pekeragon on na pekekowa o manga dato a
piyakandato o ka rekami. Ipepaar iran so manga ginawa mi ago so manga ayam ami sa
saden sa ipekesoat iran. Na tanto a mararata a ginawa mi!
38 “Sabap sii langon na pegembaal kami sa kapasadan a isorat a di den kebaroba a

kepirmaan o manga olowan ami, so manga Libitiyo ago so manga imam ami."
NIHIMIYAS 10
Siran oto a miyakapirma on na:
so gobirnador a si Nihimiyas a wata i Hakaliyas,
so manga imam na:
si Sidikiyas,
2 Si Sirayas, si Asariyas, si Yaramiyas,
3 Si Pasor, si Amariyas, si Malkihah,
4 Si Hatos, si Sibaniyas, si Malok,
5 Si Harim, si Mirimot, si Obadiyas,
6 Si Daniyal, si Giniton, si Barok,
7 Si Misolam, si Abihah, Mihamin,
8 Si Maasiyas, si Bilgay ago si Simayas.

si Yosowa a wata i Asaniyas, si Binoy a ped ko mbawataan i Hinadad, si Kadmiyal,
10 Ago so manga ped iran a si Sibaniyas, si Hodiyas, si Kilita, si Pilayas, si Hanan,
11 Si Mika, si Rihob, si Hasabiyas,
12 Si Sakor, si Siribiyas, si Sibaniyas,
13 Si Hodiyas, si Bani ago si Binino.
14 So manga olowan o manga taw na:

si Paros, si Pahatmowab, si Ilam, si Sato, si Bani,
15 Si Boni, si Asgad, si Bibay,
16 Si Adoniyas, si Bigbay, si Adin,
17 Si Atir, si Hisikiyas, si Asor,
18 Si Hodiyas, so Hasom, si Bisay,
19 Si Harip, si Anatot, si Nibay,
20 Si Magpiyas, si Misolam, si Hisir,
21 Si Misisabil, si Sadok, si Yadowa,
22 Si Pilatiyas, si Hanan, si Anayas,
23 Si Hosiya, si Hananiyas, si Hasob,
24 Si Halohis, si Pilha, si Sobik,
25 Si Rihom, si Hasabnah, si Maasiyas,
26 Si Ahiyas, si Hanan, si Anan,
27 Si Malok, si Harim ago si Baanah.
So Kapasadan
28 “Sektano a manga taw sa Israil a rakes o manga imam, manga Libitiyo, manga
gordiya ko gimowa, manga padidikir, manga talasogoay ko Timplo ago so langon o
manga ped a bilag iran a ginawa iran ko manga rait a kibabaling sangkai a inged ko
kiyatomana tano ko Kitab o Tohan na sektano a rakes o manga karoma tano ago so
langon a manga wata tano a aden a sowa iyan ago sabot
29 Na langon tano pemangeped ko manga olowan tano sa kapesepa. Na pangnin tano a
kamorkaan tano o Tohan o di tano petomana so Kitab iyan a inibegay niyan a nggolalan
ko oripen iyan a so Mosa. Ipesepa tano a ipenggolalan tano piyapiya so langon a manga
sogoan, manga kokoman ago manga bitikan o Allah a Kadnan tano.
30 “Ipesepa tano a di tano pakipengaroma so manga wata tano a manga babay ko manga
rait sangkai a inged aya pen o ba tano pakipangaromaan ko manga wata tano a manga
mama so manga wata iran a manga babay.
31 “Igira a pegowit so manga rait sii ko inged sa manga dagangan o di na pereperan a

pepasaan iran sii ko Gawii a Idedeke o di na sii ko apiya antonaa ped a soti a gawii na di
tano kiran pemasa.
"Oman ikapito ragon na di tano pembasok ko lopa, na iperila tano so langon a manga
otang.
32 “Ipesepa tano a tomanen tano so kokoman a mbegay tano sa pat ka gramo a pirak sa
oman ragon a itebang ko Timplo o Tohan tano.
33 Imbegay tano so paan a ipesepaat ko Allah sii ko lamisaan, so manga pereperan ago
manga petotongen a ipesepaat ko aparan sa oman gawii, so manga ipesepaat sii ko Gawii
a Idedeke, sii ko pista ko Saribolan ago sii ko ped a miyanga tetendo a pista, ago so ped a
manga soti a ipesepaat, so manga korban a ipepapas ko dosa o manga Israil ago so apiya
antonaa ped a kailangan para ko kapepanalagad sii ko Timplo o Tohan tano.
34 “Sektano a manga pagtaw a rakes on so manga imam ago manga Libitiyo na peripaan
tano o antawaa ko manga pamiliya tano i pekawit ko Timplo sa manga itagon a totongen
ko aparan o Allah a Tohan tano ko matetendo a masa ko oman ragon a aya kaketoman o
misosorat ko Kitab.
35 “Ipesepa tano a pegowiten tano ko Timplo o Allah ko oman ragon so paganay a

miyaragon tano a pereperan ago so paganay a inionga o langon o manga kayo tano.
36 “So pen so paganay a inimbawata tano a mama ago so paganay a inimbawata o manga
pangangayamen tano a manga sapi, bilibili ago kambing na pegowiten tano ko Timplo o
Tohan tano a aya kipenggolalanen ko misosorat ko Kitab, na peladen tano ai ko manga
imam a di roo dii manalagad.
37 “Liyo ron pen na pegowiten tano ko manga imam sii ko Timplo o Tohan tano so lebi a
mapiya ko tapong tano ago so ped a pangenengken a ipesepaat, ago so lebi a mapiya ko
langon a onga a sapad tano, bago a arak ago lana a olibi.
"Na pegowiten tano ko manga Libitiyo so ikasapolo bagi ko pereperan tano, ka so
manga Libitiyo na aya pepanimo ko diyakat sii ko langon a pepamagonayonayan a di tano
dii nggalebekan.
38 So isa a imam a moriyataw o Aron na pegonotan iyan so manga Libitiyo igira a
pekowaan iran so manga diyakat, na pekewit mambo o manga Libitiyo so ikasapolo bagi
sangkai a manga diyakat a peketago ko manga rowang sii ko Timplo o Tohan tano.
39 So manga taw sa Israil a rakes on so manga Libitiyo na pekewit iran so manga
pamemegayan iran a pereperan, bago a arak ago lana a olibi sii ko manga rowang a ron
tatagoa so manga kasangkapan a pegosaren ko Timplo a ron mambo kakaden so manga
imam a dii manalagad, so manga gordiya ko gimowa ago so manga padidikir.
"Ipesepa tano a di tano den ipendarainon so Timplo o Tohan tano."
NIHIMIYAS 11
So manga taw a Miyakabaling sa Yarosalim
Samaoto na so manga olowan o manga Yahodi na miyamakabaling sa Yarosalim, na so

ped ko manga taw na rominipa siran o antawaa i isa a taw ko oman i sapolo a pekabaling
sii sa Yarosalim a so soti a siti. Ogaid na so kelamba a siyaw kataw na sii siran den ko
inged a tataregan iran.
2 Na piyodi o manga taw so langon o manga ped a miyagiklas a pekabaling sa Yarosalim.
3 Giyai so listaan ko manga nakoda ko manga probinsiya a mimbabaling sa Yarosalim.

So kadakelan ko manga taw, so manga imam, so manga Libitiyo, so manga talasogoay ko
Timplo ago so manga moriyataw o manga oripen o Solaiman na miyamakabaling ko rek
iran a lopa sii ko pimbarambarangan a manga inged sa Yodah,
4 Ogaid na so ped ko manga taw a poon sa probinsiya a Yodah ago giya Baniyamin na
miyaling siran sa Yarosalim:
So manga taw a ped ko mbatabataa Yodah na:

Si Atayas a wata i Osiyas, a wata i Sakariyas, a wata i Amariyas, a wata i Sipatiyas, a
wata i Mahalalil a moriyataw o Piris,
5 Ago si Maasiyas a wata i Barok, a wata i Kolhosih, a wata i Hasayas, a wata i Adayas, a
wata i Hoyarib, a wata i Sakariyas a moriyataw i Silah.
6 Aden a pat gatos ago nem polo ago walo a manga moriyataw o Piris a kibabaling sa
Yarosalim a palaya siran den pageedatan a manga taw.
7 So manga taw a ped ko mbatabataa Baniyamin na:

si Salo a wata i Misolam, a wata i Yowid, a wata i Pidayas, a wata i Kolayas, a wata i
Maasiyas, a wata i Itiyal, a wata i Yasayas
8 Ago si pen si Gabay ago si Salay a madaseg a manga tonganay i Salo. So langon a
manga moriyataw o Baniyamin a kibabaling sa Yarosalim na siyaw gatos ago dowa polo
ago walo.
9 So maporo a olowan iran na si Yowil a wata i Sikri a aya pegogop on sa siti na si Yodah
a wata i Hasinowah.
10 So manga imam na:

si Yadayas a wata i Yoyarib, si Yakin,
11 Si Sirayas a wata i Hilkiyas, a wata i Misolam, a wata i Sadok, a wata i Mirayot a wata
i Ahitob a so maporo a imam sii ko Timplo o Tohan
12 A rakes o walo gatos ago dowa polo ago dowa a manga ped iran a dii nggagalebek ko
Timplo, ago si mambo si Adayas a wata i Yaroham, a wata i Pilaliyas, a wata i Amsi, a
wata i Sakariyas, a wata i Pasor, a wata i Malkihah
13 Ago so pen so dowa gatos ago pat polo ago dowa a manga ped iyan a manga olowan
ko pamiliya, ago si mambo si Amasay a wata i Asaril, a wata i Asay, a wata i Misilimot, a
wata i Imir
14 Ago magatos ago dowa polo ago walo a kababantogan a manga ped iyan. So olowan
iran na si Sabdiyal a wata i Hagidolim.

si Simayas a wata i Hasob, a wata i Asrikam, a wata i Hasabiyas, a wata i Boni,
16 Ago si mambo si Sabitay ago si Yosabad a so dowa ko manga olowan o manga
Libitiyo a aya komikibir ko manga galebek sa liyo o Timplo o Tohan,
17 Ago si mambo si Mataniyas a wata i Mika, a wata i Sabdi, a wata i Asap, a aya
pepanakoda ko kapepanalamat ago so kapepangangarapan o malilimod, ago si
Bakbokiyas a aya pegogop ki Mataniyas, ago si mambo si Abda a wata i Samowa, a wata
i Galal, a wata i Yadoton.
18 So langon o manga Libitiyo a kibabaling ko soti a siti na dowa gatos ago walo polo
ago pat.
19 So manga gordiya ko gimowa na:

si Akob ago si Talmon ago so manga ped iran a petemeng ko manga pintoan, a magatos
ago pito polo ago dowa kataw langon.
20 So ped ko manga Israil a rakes on so manga imam ago so manga Libitiyo na

kibabaling ko manga inged sa Yodah a so oman i isa kiran na sii ko lopa a kawali niyan.
21 Ogaid na so manga talasogay ko Timplo na kibabaling ko bobongan a Opil na si Siha
ago si Gispa na aya iran manga olowan.
22 So maporo a nakoda o manga Libitiyo a kibabaling sa Yarosalim na si Osi a wata i

Bani, a wata i Hasabiyas, a wata i Mataniyas, a wata i Mika. Si Osi na ped ko manga
moriyataw o Asap a aya makasasangan ko dii kandikir sii ko Timplo o Tohan.
23 So galebek o manga padidikir sa oman gawii na mipapaar o manga sogoan o dato.
24 Si Pitahiyas a wata i Mihisabil a so isa a moriyataw o Sirah a wata o Yodah na aya

saliyanti o dato sii ko langon a pekesowasowa mipantag ko manga taw.
So manga Taw a Kibabaling ko ped a manga Inged
25 So ped ko manga taw ko mbatabataa Yodah na kibabaling sa Kiriyat Arba, sa Dibon

ago giya Yakabsiil ago sii ko mbabalibeta kiran a manga inged.
26 Mababaling siran pen sii sa Yasowa, sa Mokadah, sa Bit Pilit,
27 Sa Hasar Sowal, sa Birsiba ago sii ko mbabalibeta on a manga inged
28 Ago sii sa Siklag ago giya Mikonah ago sii ko mbabalibeta on a manga inged,
29 Ago sii sa Inrimon, sa Sorah, sa Yarmot,
30 Sa Sanoah, sa Adolam ago sii ko mbabalibeta kiran a manga inged, ago sii sa Likish
ago so pepamagonayonan on, ago sii sa Asikah ago so mbabalibeta on a manga inged.
Giyangai a manga inged a babalingan o manga taw sa Yodah na ipoon sa Birsiba sii sa
pagabagatan na taman den sa Balintad a Hinom sii sa pagotaraan.
31 So ped ko manga taw ko mbatabataa Baniyamin na kibabaling sa Giba, sa Mikmas, sa

Aiha, sa Bitil ago sii ko mbabalibeta on a manga inged,
32 Ago sii sa Anatot, sa Nob, sa Ananiyas,
33 Sa Hasor, sa Ramah, sa Gitaim,
34 Sa Hadid, sa Sibowim, sa Nibalat,
35 Sa Lod, sa Ono ago sii ko Balintad a manga Panday.
36 Na so ped ko manga Libitiyo a kibabaling sa Yodah na piyamakabaling sa inged a
babalingan o manga Baniyamin.
NIHIMIYAS 12
So Listaan ko manga Imam ago so manga Libitiyo
Giyai i listaan ko manga imam ago manga Libitiyo a miyamakakasoy ko inged a ped i
Sirobabil a wata i Siyaltiyal ago si Yosowa a so maporo a imam:
Manga Imam:
si Sirayas, si Yaramiyas, si Isras,
2 Si Amariyas, si Malok, si Hatos,
3 Si Sikaniyas, si Rihom, si Mirimot,
4 Si Ido, si Giniton, si Abihah,
5 Si Mihamin, si Maadiyas, si Bilgah,
6 Si Simayas, si Yoyarib, si Yadayas,
7 Si Salo, si Amok, si Hilkiyas ago
si Yadayas.
Giyangkai a manga mama na aya manga olowan o manga imam ago so manga ped iran sii
ko masa o Yosowa.
8 Manga Libitiyo:
si Yosowa, si Binoy, si Kadmiyal, si Siribiyas, si Yodah ago si Mataniyas a aya
pepanakoda ko dii kapamagidaida sa kapanalamat a pegogopan sekaniyan o manga pagari
niyan.
9 Na so manga somasalapidaw kiran a si Bakbokiyas ago si Oni na tomitindeg a
mipepantag iran sii ko kapesimba ko kalilimodan.
So manga Moriyataw o Yosowa a Maporo a Imam
10 Si Yosowa na aya ama i Hoyakim, si Hoyakim na aya ama i Iliyasib, si Iliyasib na aya
ama i Hoyada,
11 Si Hoyada na aya ama i Yonatan, na si Yonatan na aya ama i Yadowa.
So manga Imam a manga Olowan ko Pamiliya
12 Sii ko manga gawii a kapegimam i Hoyakim na giyai so manga olowan ko pamiliya o

manga Imam:
si Miyarayas na olowan o pamiliya i Sirayas,
si Hananiyas na olowan o pamiliya i Yaramiyas,
13 Si Misolam na olowan o pamiliya i Isras,
si Yahohanan na olowan o pamiliya i Amariyas,
14 Si Yonatan na olowan o pamiliya i Malok,
si Yosip na olowan o pamiliya i Sikaniyas,
15 Si Adna na olowan o pamiliya i Harim,
si Hilkay na olowan o pamiliya i Mirimot,
16 Si Sakariyas na olowan o pamiliya i Ido,
si Misolam na olowan o pamiliya i Giniton,
17 Si Sikri na olowan o pamiliya i Abiyas,
aden pen a olowan o pamiliya i Miniyamin,
si Piltay na olowan o pamiliya i Maadiyas,
18 Si Samowa na olowan o pamiliya i Bilgah,
si Yahonatan na olowan o pamiliya i Simayas,
19 Si Matinay na olowan o pamiliya i Yoyarib,
si Osi na olowan o pamiliya i Yadayas,
20 Si Kalay na olowan o pamiliya i Salo,
si Ibir na olowan o pamiliya i Amok,
21 Si Hasabiyas na olowan o pamiliya i Hilkiyas,
si Nitanil na olowan o pamiliya i Yadayas.
So Listaan ko manga Pamiliya o manga Imam ago so manga Libitiyo
22 Pepamangisorat so manga olowan ko pamiliya o manga Libitiyo ago so manga imam

sii ko kapegimam angkai a manga poporo a imam: si Iliyasib, si Hoyada, si Yohanan ago
si Yadowa. Di ini dii nggolaolaan taman den ko kandadato i Dariyos sa Pirsiya.
23 Ogaid na so manga olowan ko pamiliya o manga Libitiyo na pepamangisorat ko ribro

a totolan sii bo taman ko manga gawii i Yohanan a wata i Iliyasib.
So manga Sangan sii ko Timplo
24 Si Hasabiyas, si Siribiyas, si Yosowa, si Binoy ago si Kadmiyal na aya pepanakoda ko

dowa lompok a manga Libitiyo a pepodi ago pepanalamat sii ko kapesimba ko malilimod.
So dowa lompok na kititindeg a makasesangora a dii sinembaga so oman i salompok a
giyoto i sogoan o Dato Daod a oripen o Tohan.
25 Si Mataniyas, si Bakbokiyas, si Obadiyas, si Misolam, si Talmon ago si Akob na

manga gordiya ko gimowa a dii nggogordiya ko manga rowang a petegoan sa tamok ko
obay o manga gimowa o Timplo.
26 Langon angkai a manga taw na di iran dii nggolalan so galebek iran sii ko manga
gawii i Yoyakim a wata i Yosowa ago apo i Yosadak, ago sii ko manga gawii i Nihimiyas
a gobirnador ago si Isras a imam ago alim ko Kitab.
So Kinisenggain ko Pangeleban a Yarosalim
27 Sii ko kinisenggain ko pangeleban a Yarosalim na so manga Libitiyo na siyogo sa

lomiyo ko kibabalingan iran ago somong sa Yarosalim kaan siran makapangeped ko dii
kaselaselaa ko kasenggay sa kapekebabaya a rakes o kapagidaida sa kapanalamat a
sasartaan a boniboniyan a manga pandaopan, manga kotiyapi ago manga alpa.
28 Miyatimo mambo so manga padidikir a poon ko manga darpa a makalilibet sa
Yarosalim ago poon ko manga iito a inged sa Nitopat
29 Ago poon sa Bit Gilgal, Giba ago giya Asmabit, ka miyakambangon so manga
padidikir sa rek iran a manga inged ko melilibeta sa Yarosalim.
30 So manga imam ago so manga Libitiyo na siyoti iran mona a ginawa iran na go iran bo
sotiya so manga taw ago so manga gimowa ago so pangeleban o siti.
31 Tinimo aken so manga olowan sa Yodah sii ko liyawaw o pangeleban na tomiyoro ako
sa dowa lompok a padidikir a pemagidaida sa kapanalamat. So salompok na roo
lomiyalakaw ko liyawaw o pangeleban a pegagaw sa kawanan sa tampar sa Gimowa ko
Popot.
32 Si Hosayas ago so sabaad ko manga olowan sa Yodah na tomiyondog kiran
33 A ped iran si Asariyas, si Isras, si Misolam,
34 Si Yodah, si Baniyamin, si Simayas, si Yaramiyas
35 Ago so ped a manga imam a pepamogiyong. Tomiyalondog kiran si Sakariyas a wata
i Yonatan, a wata i Simayas, a wata i Mataniyas, a wata i Mikayas a wata i Sakor a aya
moriyataw i Asap
36 Ago so manga ped iyan a si Simayas, si Asarail, si Milalay, si Gilalay, si Maay, si
Natanil, si Yodah ago si Hanan a kiaawid sa manga boniboniyan a iniinsarat o Dato Daod
a oripen o Tohan. Na si Isras a alim ko Kitab i moona kiran perada.
37 Sii ko Gimowa ko Bowalan na tomiyaros siran manik ko towak sii ko darpa a
pekitakedeg on so pangeleban a ipegantap ko siti o Daod. Na miyakasagad siran ko
torogan o Dato na tomiyaros ko Gimowa ko Ig sa tampar sa sebangan.
38 So ikadowa a lompok a dii mamagidaida sa kapanalamat na lomiyalakaw sa tampar sa

diwang. Tiyondog aken siran a ped so sabaad ko manga taw sii ko liyawaw o pangeleban,
na somiyagad kami ko Lantawa ko Pogon na tomiyaros taman ko Maolad a Pangeleban,
39 Na ipoon roo na somiyagad kami ko Gimowa o Ipraim, so Andang a Gimowa, so
Gimowa a Seda, so Lantawa o Hananil ago so Lantawa o Magatos na taman den ko
Gimowa o manga Bilibili, na tomiyareg kami ko obay o Gimowa o manga Gordiya.
40 Na so dowa lompok a dii mamagidaida sa kapanalamat na minisampay ko Timplo o

Tohan. Minisampay ako roo mamo a ped aken so sabaad ko manga olowan
41 A rakes o manga imam a pepamogiyong a si Iliyakim, si Maasiyas, si Miniamin, si
Mikayas, si Iliyonay, si Sakariyas ago si Hananiyas,
42 Ago so pen so tomotondog kiran a si Maasiyas, si Simayas, si Iliyasar, si Osi, si
Yahohanan, si Malkihah, si Ilam ago si Isir. Na miyamagidaida so manga padidikir sa
matanog a pepanakodaan siran i Yasrahiyas.
43 Sii sangkoto a gawii na madakel a pikorban iran a pepanga bababaya so manga taw
sabap sa bigan siran o Tohan sa tanto a mala a kapipiya a ginawa. Pepanga bababaya
mambo so manga babay ago so manga wata, na so sowara o kapekebabaya o manga taw
sa Yarosalim na pekeneg sa mawatan.
So Kipembegan ko Kailangan ko Kapesimba sii ko Timplo
44 Sa masa oto na miyamangitoro so manga mama a kibir ko manga rowang a petegoan

ko manga pamemegayan ko Timplo a rakes on so paganay a inionga o manga pamomolan
ago so manga diyakat. Pekewit iran ipoon ko manga babasoka ko mbabalibeta ko manga
siti so bagian o manga imam ago so manga Libitiyo a inisogo o Kitab. Ipekababaya o
langon a taw sa Yodah so dii kapanalagad o manga imam ago manga Libitiyo
45 Ka di iran dii nggolalan so inisangan kiran o Tohan iran a rakes on so kapesoti. So
mambo so manga padidikir ago so manga gordiya ko pintoan na petomanen iran so
manga sogoan o Dato Daod ago so wata iyan a Solaiman.
46 Ipoon ko miyatey a alongan sii ko masa o Dato Daod ago si Asap na aden den a manga
pepanakoda ko manga padidikir a dii mamagidaida sa podi ago panalamat ko Tohan.
47 Na sii pen ko masa i Sirobabil ago si Nihimiyas na so langon o manga Israil na
ipembegay iran so oman gawii a manga bagian a ipegeper o manga padidikir ago so
manga gordiya ko gimowa. Na ipesenggay iran on pen so manga bagian on para ko
manga Libitiyo na ipesenggay mambo o manga Libitiyo so bagian on para ko manga
imam a manga moriyataw o Aron.
NIHIMIYAS 13
So manga Betad a Miyaalin i Nihimiyas
Sii sangkoto a gawii na sii ko kapembatiyaa ko Kitab o Mosa ko kapekenega on o manga

taw na kiyatokawan den a misosorat on a da den a Amoniyo o di na Mowabiyo a ba
makapengeped ko dii kapelimolimod o manga pagtaw o Tohan sa taman sa pakataman.
2 Aya sabap ai na da iran mbegi sa pangenengken ago ig so manga Israil sii ko
kiyapakaliyo iran sa Misir ka ba iran den tindani si Balaam sa kisintaan iyan ko manga
Israil. Ogaid na so Tohan tano na biyaloy niyan baden so sinta a rakmat.
3 Kagiya maneg o manga taw angkai a kitab na piyakambelag iran ko isa ka maginged a
manga Israil so langon o kiyababadan ko manga rait.
4 Sii ko da pen ai kanggolaola na so imam a si Iliyasib a aya piyakakibir ko manga

rowang a petegoan sa tamok ko Timplo o Tohan tano na dii makingginawai ki Tobiyas.
5 Na singgayan iyan si Tobiyas sa mala a rowang a andang a pegosaren a petimoan sa
manga pereperan a dii soasoat, ago so manga doka ago so manga kasangkapan para ko
Timplo, ago so pen so ikasapolo bagi ko manga pereperan, bago a arak ago lana a olibi a
inisogo o Mosa a pemangibegay ko manga Libitiyo, so manga padidikir ago so manga
gordiya ko gimowa a rakes on so bagian on o manga imam.
6 Ogaid na sii ko masa a di ini dii kanggolaola na da ako sa Yarosalim, ka sii ko ikatelo
polo ago dowa ragon a kandadato i Artasirksis a dato sa Babilon na miyakakasoy ako ko
dato. Na da peman matey na inisango aken rekaniyan so kapekakasoy aken
7 Sa Yarosalim. Na kagiya makaoma ako a kiyatokawan ko so marata a pinggolaola i
Iliyasib ko kiyabegi niyan ki Tobiyas sa rowang sii ko lamalama o Timplo o Tohan
8 Na tanto ako a kiyararangitan. Na inipelelebad aken ko liyo o rowang so langon a
pagigimo i Tobiyas.
9 Inisogo aken so kalompiyowi ko manga rowang na oriyan iyan na inikasoy aken on so
manga kasangkapan o Timplo a rakes o manga isepaat a pereperan ago doka.
10 Kiyatokawan ko pen a so manga bagian a isesenggay para ko manga Libitiyo na da

kiran mibegay, na sabap roo na siran ago so manga padidikir a mangangako ko dii
kapanalagadi ko Timplo na miyamangasoy ko manga lopa iran.
11 Na pimbongetan aken so manga nakoda na iniise aken kiran a "Ino pendarainonen so
Timplo o Tohan?" Mandiyadi na piyakitawag aken so manga Libitiyo ago so manga
padidikir sa kakesoy iran na piyakaasal aken kiran so galebek iran.
12 Na giyoto a piperomanan o langon a taw sa Yodah so kapegowita iran ko ikasapolo
bagi ko manga pereperan iran, bago a arak ago lana a olibi roo ko manga petegoan sa
tamok.
13 Piyakakibir aken angkai a manga mama ko manga petegoan sa tamok, a si Silimiyas a
imam, si Sadok a alim ko Kitab ago si Pidayas a isa ko manga Libitiyo, na initoro aken si
Hanan a wata i Sakor ago apo i Mataniyas a salinggogopa iran. Mibibilang angkai a
manga mama a kikasasarigan na piyakisangan kiran so dii kambaabaada ko kaoyagan sii
ko manga pagari ran.
14 Tatademi ako ngka, hey Tohan ko, na di ngka pelipati so langon a pinggolaola ko a
initagompiya ko Timplo o Tohan ko ago so di on dii kapanalagadi.
15 Miyakaisa a gawii a Idedeke na miyakailay ako sa manga mama sa Yodah a

pepamangegik sii ko petemekan sa ig a obas a kambaalan a arak. Aden pen a manga
mama a peroranan iran so manga kimar iran sa manga pereperan, arak, manga obas,
manga higos ago so ped a pimbarambarangan a manga roran na pepangowiten iran ai
langon roo sa Yarosalim sii ko Gawii a Idedeke. Na tiyapaosan aken siran sa o ba siran
dii pepasa sa manga pangenengken sangkoto a gawii.
16 Aden a manga mama a poon sa siti a Tair a kibabaling sa Yarosalim a pepamangawid
sa Yarosalim sa manga seda ago so langon a pitibarangan a dagangan a di iran dii pesaan
ko manga taw sa Yodah sii ko Gawii a Idedeke.
17 Na pimbongetan aken so manga olowan sa Yodah a tig aken a "Ino niyo pesogoka so
Gawii a Idedeke a nggolalan sangkai a marata a di niyo dii nggolaolaan?
18 Ba da nggolaolaa o manga apo iyo so lagid ai a aya kiyasabapan ko langon angkai a
kamoralaan a piyakatalingoma rektano o Tohan tano ago sii sangkai a siti? Na imanto na
pekesabapan kano sa mala pen a rarangit o Tohan sii sa Israil ko kapesogoka niyo ko
Gawii a Idedeke!"
19 Inisogo aken a pelekeban so manga pintoan a Yarosalim igira a perimon sii ko

kapagepoon o Gawii a Idedeke na di den ai kalekaan taman sa di mapopos so Gawii a
Idedeke. Na piyakanggordiya aken so ped ko manga pagtaw aken ko manga gimowa
kaan da den a roran a ba misoled ko siti sii ko Gawii a Idedeke.
20 So manga padagang ago so manga dii pepasa ko langon a pitibarangan a dagangan na
tiyorog siran sa miyakaisa o di na miyakadowa sa liyo a Yarosalim ko kagagawii.
21 Ogaid na piyakaiktiyar aken siran a tig aken a "Ino kano pepekatorog sii ko obay o
pangeleban? O nggolaolaa niyo ai peroman na pekatanaan ko sekano sa lima!" Na ipoon
sangkoto a gawii na da siran den kasoy roo ko Gawii a Idedeke.
22 Mandiyadi na inisogo aken ko manga Libitiyo a sotiya iran a ginawa iran ago
nggordiyai ran so manga gimowa kaan iran masiyap so kasosoti o Gawii a Idedeke.
Tatademi ako ngka bo sabap sii, hey Tohan ko, na kalimoon ako ngka sii ko kala a ka i
gagaw.
23 Liyo ron pen na sii sangkoto a masa na kiyatokawan ko a madakel a manga mama sa
Yodah a miyamangaroma sa manga babay a manga taw sa Asdod, Amon ago giya
Mowab.
24 So sabaad ko manga wata iran na di iran dii mambasa so basa a Asdod o di na so basa
o salakaw a manga taw ago di matao tero sa basa a Yahodi.
25 Pimbongetan ko siran ago piyamanintaan. Liyambit aken so ped kiran na gininit aken
a bok iran. Piyakasepa aken siran sii ko Ingaran o Tohan a tig aken a "Di niyo
pakipengaromaan so manga wata iyo a babay ko manga wata iran a mama aya pen o ba
mapangaroma o manga wata iyo a mama so manga wata iran a babay o di na giya ginawa
niyo.
26 Ba ini da kasabapi ko kiyapakandosa o Solaiman a dato sa Israil? Da den a ba niyan
datar a dato ko apiya antonaa ped a nasiyon. Pekebabayaan sekaniyan o Tohan iyan na
biyaloy sekaniyan o Tohan a dato ko dalem a Israil. Ogaid na apiya sekaniyan den i
miyaagak o manga rait a manga babay sa kiyapakandosa niyan.
27 Na imanto na sekano mambo i dii nggolaola sangkai a mala a kadostaan a
kapakaongkir ko Tohan tano ko di niyo dii kapamangaroma sa manga rait a manga
babay!"
28 So isa ko manga wata a mama i Hoyada a wata i Iliyasib a so maporo a imam na

miyapangaroma niyan so wata a babay i Sanbalat a taw sa Horon, na biyogaw aken
sekaniyan sii raken.
29 Toosi ngka siran, hey Tohan ko, ka piresikan iran so kaiimami ago so kapasadan a
pimbaalan ka mipantag ko manga imam ago so manga Libitiyo.
30 Giyanan i kiyabelaga ko ko manga taw ko langon a manga rait. Na piyakisangan aken

ko manga imam ago so manga Libitiyo so galebek o oman i isa kiran.
31 Mimbaal ako pen sa manga sogoan mipantag ko miyanga tetendo a oras a kapegowita
o manga taw ko kayo a itegon ko kapesepaat, ago mipantag ko kipembegan iran ko
paganay a inionga o pereperan iran ago manga onga sapad.
Tatademi ngka ini langon, hey Tohan ko, na kalimoon ako ngka.
ISTIRA
ISTIRA 1
So Bai Basti na Kinowaan sa Kababai
Giyai i miyasowasowa sii ko masa o Dato Sirksis a miyakandato ko magatos ago dowa
polo ago pito a probinsiya ipoon sa Indiya na iraraot sa Itiyopiya.
2 Sa masa oto na so torogan ago so korsi o Dato Sirksis na ndodoo sa Sosa a so
ompongan a siti sa inged a Pirsiya.
3 Sii ko ikatelo ragon a kandadato iyan na miyaden sekaniyan sa kakendori para ko

langon a manga olowan iyan ago manga sanasanaan. So manga olowan a sondaro sa
Pirsiya ago giya Midiya na makadadarpa roo a rakes o kiseselaan a manga mama ago
manga gobirnador ko manga probinsiya.
4 Sii ko soled o magatos ago walo polo gawii na ipaparada niyan den so mala a
kakawasaan o ndatoan iyan ago so podi ago bantogan o menang iyan.
5 Kagiya mapos angkai a manga gawii na migay peman so dato sa kakendori para ko
langon a manga mama ipoon ko mababa na taman ko mala a matatago ko ompongan a siti
a Sosa. Miyakapito gawii a kiyatey niyan sii ko kalalamai ko sapadan o torogan o dato.
6 Kipapandaraan so lamalama sa mapoti ago biro a manga kortina a sotra a dinis a
kiiiketan sa manga tali a mariga sii ko manga daporan a pirak a matatago ko manga
polaos a marpil. Aden a manga ontoda roo a manga bolawan ago manga pirak a ibebetad
ko lamalama a aatoren ai sa pimbarambarangan i warna a marmol, manga pirlas ago so
ped a manga ala i arga a bato.
7 Pepengenaten so arak a tatangelen ko pitibarangan a baso a bolawan a mbidabida i
paras, na mitataralo so arak a pamemegayan o dato.
8 Da den a diyangka ko kapepakainom o manga banto, ka inisogo o dato ko langon a
pepengenat sa arak a pembegan iran so oman i banto sa saden sa kabaya iyan on.
9 Samaoto na miyaden mambo so Bai a si Basti sa kakendori para ko manga babay sii ko
torogan o Dato Sirksis.
10 Sii ko ikapito gawii ko dii kakendori o Dato Sirksis sii ko kiyapakapiya a ginawa
niyan sabap ko arak na inisogo iyan ko pito kataw a manga orobarang a pepanalagad
rekaniyan a sikiki Mihoman, Bista, Harbona, Bigta, Abagta, Sitar ago si Karkas
11 A witen iran ko hadapan iyan so Bai Basti a sesangkad sa kababai kaan iyan
mapakiilay so kataid iyan ko langon a manga olowan ago manga banto niyan, ka manisan
a pegilain.
12 Ogaid na kagiya misampay o manga orobarang ko Bai Basti so sogoan o dato na
minda sekaniyan o ba on song. Na tanto ai a inikararangit o dato na somiyokeyaw so gani
niyan.
13 Sabap sa aya adat o dato na pepekikokom ko manga tadiyam ko kitab ago kokoman na
inimbitiyarai niyan so manga oongangen a somasabot ko manga kitab.
14 Aya manga ngaran iran na sikiki Karsina, Sitar, Adinata, Tarsis, Miris, Marsina ago si
Mimokan a so pito kataw a nakoda sa Pirsiya ago sa Midiya. Madaseg siran ko dato a
lalayon sisii ko hadapan iyan na siran i lebi a manga poporo ko ndatoan.
15 Inisean siran o dato a "Antonaa i kabasa o kitab a ikidia ko Bai Basti a da niyan onoti
so sogoan o Dato Sirksis a inisampay ron o manga orobarang?"
16 Somimbag si Mimokan ko kamamasaan o dato ago so manga nakoda a "So Bai Basti
na miyakanggolaola sa ribat a kena bo o ba sopak ko dato ka sopak pen ko langon a
manga olowan iyan ago manga taw ko langon a probinsiya o Dato Sirksis.
17 Ka giyangkai a pinggolaola o Bai na ketokawan o langon o manga babay ko dalem o
ndatoan ka. Sabap roo na pekaitoon iran so manga karoma iran a tig iran a 'Piyakisogoan
o Dato Sirksis so Bai Basti a mangadap on na minda sekaniyan o ba on song.'
18 Na sii den sangkai a gawii na so manga karoma o langon a manga olowan o dato sa
Pirsiya ago Midiya a miyakaneg ko pinggolaola o Bai na datar oto mambo a ikidia iran ko
manga karoma iran. Na da den a ikepos o di kapemagadata ago kararangit.
19 Kagiya ka maoto na o pekasoat ko dato na begay ka sa sogoan a misorat ko manga
kitab o Pirsiya ago Midiya, a di den kealin, a si Basti na di den makapengadap ko Dato
Sirksis. Liyo ron pen na began ka so kababai niyan ko salakaw a babay a lebi a
mapapatot a di sekaniyan.
20 Mandiyadi na amay ka mapakalangkap angkai a sogoan o dato ko dalem o mala a
ndatoan iyan na so langon o manga babay na kapegadatan iran so manga karoma iran
ipoon ko mababa na taman ko maporo.”
21 Miyasoat so dato ago so manga olowan iyan sangkai a mosawir, na ininggolalan o dato
so takdir i Mimokan.
22 Miyakawit sekaniyan sa manga sorat sii ko langon o manga probinsiya ko
pirowarowangan o ndatoan iyan a inisorat ko rek iran a kasorat ago sii ko basa o oman i
bangsa on a piyakalangkap iyan a so oman i mama na aya den ndadato ko pamiliya niyan.
ISTIRA 2
Miyabaloy si Istira a Bai
Da matey ko kiyapakalenggaw o gani o Dato Sirksis na kiyatoosan iyan si Basti ago so

miyanggolaola niyan ago so inisogo iyan a kokoman makapantag rekaniyan.
2 Samanaya na so manga pepanalagad ko dato na inipangoyaw iran on a "Pakimbanog ka
sa manga tataid a raga a da kabatali.
3 Pekatendo ka sa manga nakoda ko oman i probinsiya sii ko ndatoan ka a mawit iran so
langon angkai a manga tataid a raga sii ko walay o manga karoma ngka sangkai a siti a
Sosa. Pakisiyapen ka siran ki Higay a orobarang ka a komikibir ko manga babay, na
petetanosanan iyan siran.
4 Na so bago a taw a pekasoat ko dato i kebai a pekasambi ki Basti." Giyangkai a
mosawir na inikasoat o dato na ininggolalan iyan.
5 Samaoto na aden a Yahodi sii ko siti a Sosa a ped ko mbatabataa Baniyamin a aya
ngaran iyan na si Mordikay a wata i Yair a wata i Simay a aya wata i Kis.
6 Minitaog sekaniyan a poon sa Yarosalim i Nibokadnisar a dato sa Babilon a miyaped ko
miyanga bibiyag isako mitaog si Yakoniyas a dato sa Yodah.
7 Aden a tenged i Mordikay a aya ngaran iyan na si Hadasah a piyagoyagoyag iyan sabap
sa da a ama iyan ago ina. Giyangkai a bago a taw, a bebetowan pen sa Istira, na mataid
ago pakabarayat ko bontal, na kinowa sekaniyan i Mordikay a wata iyan isako matay so
ama iyan ago so ina iyan.
8 Kagiya mapakalangkap so sogoan o dato na madakel a manga raga a miyapangowit roo

ko siti a Sosa a piyakisiyap siran ki Higay. Miyaped kiran si Istira a miyawit mambo ko
torogan o dato, na inisarig ki Higay a komikibir ko manga karoma o dato.
9 Inikababaya iyan si Istira na inampilan iyan. Magaan so magaan na bigan iyan sa
manga itetanosan ago manga pipiya a pangenengken. Piyakikibir iyan si Istira sa pito
kataw ko manga talasogoay a babay a piyamamili poon ko torogan o dato, na
piyakaogalin iyan si Istira ago so manga talasogoay niyan ko lebi a mapiya a darpa ko
walay o manga karoma o dato.
10 Da marinayag i Istira so bangsa niyan ago manga tonganay niyan ka kagiya inisapar on
i Mordikay o ba niyan teroa.
11 Oman gawii na dii ndalakaw si Mordikay ko marani ko lamalama o walay o manga
karoma o dato sa kaketokawi niyan ko kapakambebetad i Istira ago so pekesowasowa
iyan.
12 Sii ko di pen kapekasong o isa ko manga raga ko Dato Sirksis na paliyogat a ketarotop
iyan a daan so sapolo ago dowa olan a di on dii katetanosani i Higay, ka giyoto i taritib
mipantag ko manga babay, a nem olan a kapetetanosani ron sa lana a mira ago nem olan
pen ko ikekamotan ago ped a manga itetatanosan.
13 Na sii ko gawii a kapekasong iyan ko torogan o dato a poon ko walay o manga karoma
niyan na kesolot iyan saden sa kabaya iyan a nditaren ago kabolawanan.
14 Song sekaniyan ko dato sii ko kaperimon iyan na sii ko kakepita iyan na kesoy ko
salakaw a darpa ko walay o manga karoma o dato a kesiyap i Saasgas a so orobarang o
dato a komikibir ko manga sandil iyan. Na di sekaniyan pekakasoy ko dato taman sa di
on masoat so dato ka pekitalowan iyan bo so ngaran iyan.
15 Kagiya maoma so oras a kasong i Istira ko dato (a so babay a inoyag i Mordikay ago
wata o bapa iyan a si Abihail) na da den a piyangni niyan a rowar ko inipangoyaw ron i
Higay a so orobarang a komikibir ko manga karoma o dato. Na inikasigi si Istira o oman
i isa a miyakailay ron.
16 Miyawit sekaniyan ko Dato Sirksis sii ko torogan iyan ko ikasapolo a olanolan a Tibit
sii ko ikapito ragon a kandadato iyan.
17 Na miyabarayat so dato ki Istira a makalelebi ko apiya antawaa ko ped a manga babay,
na tanto niyan a kiyababayaan a di so langon o ped a manga raga. Sabap roo na tiyagoan
iyan so olo niyan sa sangkad na biyaloy niyan a bai a inisambi ki Basti.
18 Na migay so dato sa mala a kakendori a iniselasela ki Istira para ko langon a olowan
iyan ago manga sanasanaan. Piyakalangkap iyan a mala a gawii ko dalem o manga
probinsiya, na minggomonggomon sekaniyan sa manga pamemegayan a mapepatot a
imbegay o dato.
Kiyatokawan i Mordikay so Piyagopakatan a Marata
19 Apiya sii ko oriyan o kinitogalinen ko langon o manga raga ko ikadowa a darpa ago
kiyabegan den o dato si Mordikay sa sangan sii ko torogan
20 Na itataros i Istira so kapageemaa niyan ko bangsa niyan ago manga tonganay niyan ka
petomanen iyan baden so insarat on i Mordikay a datar o isako kapepekalaa niyan on.
21 Sii sangkoto a masa a dii kinggolalanen i Mordikay ko sangan iyan sii ko torogan o
dato na si Bigtana ago si Tiris a dowa ko manga orobarang o dato a dii nggordiya ko
pintoan o manga rowang iyan na kiyararangitan iran so Dato Sirksis na miyagopakat siran
sa kambonoa iran on.
22 Ogaid na kiyatokawan ai i Mordikay na pitero iyan ko Bai Istira na iniripot iyan so
totol ko dato a minibantog ki Mordikay.
23 Na kagiya mailes so totol ago maamad a benar na binitin so dowa a orobarang ko
pembitinan sa taw. Langon ai na minisorat ko kamamasaan o dato sii ko ribro a totolan
ko miyanga sosowasowa ko ndatoan.
ISTIRA 3
So Kadiyat a Marata i Haman sa Kapolanga ko manga Yahodi
Kagiya maipos angkai a manga miyaolaola na piselasela o Dato Sirksis si Haman a wata i
Hamidata a moriyataw i Agag. Bigan iyan sa pangkatan ago kadato a maporo a di so
langon a ped a manga olowan ko ndatoan.
2 So langowan a manga sanasanaan o dato sa torogan na pepekasodiyod ki Haman sa
kapageedati ran on ka inisogo ai o dato makapantag rekaniyan. Ogaid na si Mordikay na
minda o ba niyan sodiyodi aya pen o ba pagadati.
3 Mandiyadi na so manga sanasanaan o dato roo ko torogan iyan na iniise iran ki

Mordikay a "Ino ngka di peratiyayaa so sogoan o dato?"
4 Oman gawii na pegakolan iran sekaniyan sa katomana niyan on ogaid na da niyan siran
pakinega. Sabap roo na inimbitiyarai ran si Haman makapantag sii kaan iran mailay o ba
pekasabar sekaniyan ko olaola i Mordikay, ka miyatero kiran i Mordikay a Yahodi
sekaniyan.
5 Kagiya mailay i Haman a si Mordikay na di niyan sodiyodan o di na pegadatan na tanto
sekaniyan a kiyararangitan.
6 Na sabap sa kiyatokawan iyan a Yahodi si Mordikay na miyapamikir iyan a kena bo a
ba si Mordikay i pemonoon iyan, na baden mikediyat sa okit a kapolanga niyan langon ko
manga taw i Mordikay a so manga Yahodi sii ko pirowarowangan o ndatoan i Sirksis.
7 Sii ko ikasapolo ago dowa ragon ko kandadato i Dato Sirksis sii ko paganay a olanolan
a Nisan, na somiyogo si Haman sa kaperipa (a bebetowan ai sa 'Porim') kaan matendo so
gawii ago olanolan a ron mipenggolalan so kadiyat iyan. Na aya miyaripa na so ikasapolo
ago telo gawii ko ikasapolo ago dowa a olan, a so olanolan a Adar.
8 Mandiyadi na pitero i Haman ko Dato Sirksis a "Aden a isa a bangsa a mipaparak sii ko
langon o manga probinsiya ko ndatoan ka. So manga taritib iran na mibibida ko manga
taritib o langon o ped a manga taw. Liyo ron pen na di iran pagonotan so manga
kokoman o ndatoan. Kagiya ka maoto na kena a ba ngka ipetegompiya o ba ngka siran
baden peperoa a kapekeoyagoyag iran.
9 O pekasoat ko dato na begay ka sa sogoan a mbinasaan siran. O nggolaolaa ngka ini na
itopa ko reka a pekatago ako sa telo gatos ago pat polo nggibo ka kilo a pirak ko
baitalmal o ndatoan para ko dii kinggolalanen ko galebek on."
10 Mandiyadi na pilas o dato ko kemer iyan so sising a ipetombok ko manga sogoan o

dato na inibegay niyan ki Haman a so ridoay o manga Yahodi, a wata i Hamidata a
moriyataw i Agag.
11 “Tagoa ngka den so pirak," a tig o dato ki Haman, "na nggolaolaa ngka sangkoto a
manga taw so ikasosoat ka."
12 Sabap roo na sii ko ikasapolo ago telo gawii ko paganay a olanolan na piyakitawag i
Haman so manga panonorat o dato. Na piyakisorat iyan kiran so langon o manga sogoan
iyan ko manga gobirnador, manga nakoda ago manga olowan ko oman i probinsiya sii ko
rek iran a kasorat ago basa o manga taw ron. Inisorat ai sii ko ingaran o dato Sirksis na
go kiyatombokan o sising iyan.
13 Na piyangowit ai o manga pangangawid sa sorat sii ko langon a manga probinsiya ko
ndatoan. Mapadadalem on so sogoan a so langon a manga Yahodi a mangoda ago lokes a
rakes o manga babay ago manga wata na mbinasaan, pemonoon ago polangen sii ko
salongan bo a so ikasapolo ago telo gawii ko ikasapolo ago dowa olan a olanolan a Adar,
na mapeteban so manga rek iran.
14 Giyangkai a sogoan na mapekalangkap ko oman i probinsiya a pekitokawan ko langon
a taw ron kaan siran makatiyagar sangkoto a gawii.
15 Na lominiyo so manga pangangawid sa sorat a piyakiansenan siran o dato, na

piyakalangkap so sogoan ko ompongan a siti a Sosa. So dato ago si Haman na miyontod
a peginom ogaid na miyanga aalangalang so pamikiran o manga taw ko siti a Sosa.
ISTIRA 4
Miyakitabang si Mordikay ki Istira
So kiyatokawi ron i Mordikay ko langon a miyanggolaola na kinisi iyan so nditaren iyan

na somiyolot sa sako ago piyangombiyan iyan so olo niyan, na miyagenebeneb ko siti a
dii ndidiyagaw sa matanog a kapakamboko.
2 Miyakaoma sekaniyan ko gimowa o torogan o dato ogaid na da niyan soledi ka da a ba
roo pekasoleden a somosolot sa sako.
3 Sii ko oman i probinsiya a kiyasampayan ko sogoan o dato na tanto ron a mimboboko
so manga Yahodi. Mipopowasa siran a pepamanegad ago dii ndidiyagaw, na madakel
kiran a miyamanolot sa sako ago miyamangontod sa ombi.
4 Kagiya somong ki Istira so manga raga niyan ago so manga orobarang a pepanalagad on
a pitero iran on so makapantag ki Mordikay na tanto a miyasosa a pamikiran iyan. Na
piyakiwitan iyan sa nditaren a soloten iyan a isembi ko sako, ogaid na minda sekaniyan o
ba niyan matarima.
5 Mandiyadi na piyakitawag i Istira si Hatak a isa ko manga orobarang o dato a
pakapenalagaden iyan ki Istira na piyakasong iyan ki Mordikay kaan iyan katokawi o
antonaa i pekesowasowa ago ngkaino to.
6 Na liniyowan i Hatak si Mordikay sii ko lamalama o siti ko panempang o gimowa o
torogan.
7 Piyanotol on i Mordikay so langon taman a miyanggolaola a rakes on so kadakel o pirak

a initopa i Haman a imbayad iyan ko baitalmal o ndatoan ko kapemonoa ko manga
Yahodi.
8 Bigan sekaniyan pen i Mordikay ko kopiya o sorat a miyapakalangkap den sa siti a Sosa
a matatago on so sogoan sa kapolanga kiran. Piyangni niyan ki Hatak a pakiilain iyan ai
ki Istira ago pagosain iyan on ago pagakolan iyan pen a somong si Istira ko dato kaan on
makapangangampedian ago makapangni sa limo mipantag ko bangsa niyan a manga taw.
9 Na komiyasoy si Hatak na piyanotol iyan ki Istira so langon taman a pitero on i
Mordikay.
10 Mandiyadi na iniinsarat on i Istira a teroa niyan ki Mordikay a

11 “So langon a mosawira o dato ago so manga taw ko manga probinsiya niyan na
katawan iran a saden sa mama o di na babay a mangadap ko dato sii ko lamalama niyan
ko soled o torogan a da pakisogoi o dato na isa bo a kokoman on o dato, a so kambonoa
on. Aya bo a liyo sii a pekalidas ko kapatay na sa bo sa pekaantapan o dato ko bolawan a
tongkas iyan. Ogaid na da ako den pakitawagen o dato a somong on sa miyakatelo polo
den gawii."
12 Kagiya misampay i Hatak ki Mordikay so manga katero i Istira

13 Na piyakiwit iyan ki Istira angkai a sembag: "Di ngka pipikira a seka bo i pekalidas ko
penggolaolaan ko langon o manga Yahodi sabap ko kapakababaling ka ko torogan o dato.
14 Ka o ba ka sii baden rerenek sangkai a masa na so kaketabangi ago kakesabet o manga
Yahodi na pekapoon ko salakaw a darpa. Ogaid na seka ago so pamiliya o ama a ka na
pematay. Ogaid na anta i matao ron o aya inikabaloy ngka a bai ko ndatoan na sabap ko
datar ai a masosowa?"
15 Mandiyadi na inipakawit i Istira ki Mordikay angkai a sembag iyan:

16 “Ika roo na timoa ngka langon so manga Yahodi a sisii sa Sosa na powasa kano ago
pamangnin ako niyo. Di kano ken o di na paginom ko telo a kadadaondaw ago
kagagawii. Na saken ago so manga raga aken na pepowasa mambo a datar iyo. Oriyan
iyan na song ako ko dato apiya pen misogok ai ko kokoman, na o matay ako na miyatay
ako!"
17 Na miyawa roo si Mordikay na ininggolalan iyan so langon a iniinsarat on i Istira.
ISTIRA 5
So Pangni i Istira ko Dato

Sii ko ikatelo gawii na siyolot i Istira so nditaren a kababai a labi na tominindeg sii ko
lamalama ko soled o torogan sii ko panempang o rowang o dato. Moontod so dato ko
korsi iyan sii ko rowang iyan a somasangor sekaniyan ko gimowa iyan.
2 So kiyailaya niyan ko Bai Istira a tomitindeg ko lamalama na miyasoat sekaniyan on na
iniantap iyan on so bolawan a tongkas a kakapetan iyan. Na miyobay ron si Istira na siko
iyan so poro o tongkas.
3 Mandiyadi na iniise on o dato a "Antonaa i kabaya a ka, Bai Istira? Antonaa i pengnin
ka, ka apiya pen taman ko sabaad ko ndatoan aken na kibegay reka."
4 “O pekasoat ko dato," a inisembag i Istira, "na domarpa ka imanto a ped si Haman ko

kakendori a pitiyagar aken para rekano."
5 Na tig o dato ko manga talasogoay niyan a "Wita niyo sii nggagaan si Haman kaan ami
matoman so pangni i Istira." Na somiyong so dato ago si Haman ko kakendori a pitiyagar
i Istira.
6 Sii ko kapeginom iran sa arak na iniise peman o dato ki Istira a "Antonaa i kabaya a ka,
ka kibegay reka? Antonaa i pengnin ka? Apiya pen taman ko sabaad ko ndatoan aken na
kibegay reka."
7 Tig i Istira a "So pangni aken na giyai:

8 O ikelimo ako o dato ago ikebabaya iyan a tomanen iyan so kabaya aken na pengnin ko
a domarpa ka mapita ago si Haman ko isa pen a kapekendori a petiyagaren ko rekano. Na
amay ka mapita na sembagen ko so pakaise a ka."
Pikediyat i Haman so Kambonoa ki Mordikay
9 Lominiyo si Haman sa gawii oto a tanto a pekebabaya ago mapipiya a ginawa niyan.
Ogaid na kagiya mailay niyan si Mordikay ko gimowa o torogan o dato ago miyainengka
iyan a da den tindeg aya pen o ba miyakiilay a pekelek ko hadapan iyan na miyapeno
sekaniyan a gani ki Mordikay.
10 Ogaid na ginggen i Haman a ginawa niyan na miyaling. Na tiyawag iyan roo tomimo
so manga bolayoka iyan ago si Siris a karoma niyan
11 Na mimbentogan kiran si Haman makapantag ko kala o kakawasaan iyan, so kadakel o
manga wata iyan ago so langon a okit a kiyabantoga on o dato ago so kinipangkaten iyan
on sa maporo a di so ped a manga olowan ago sanasanaan o dato.
12 “Na kena a ba giyoto bo," a inipagoman on i Haman, "ka saken bo i biyantowan o Bai
Istira a mipagepeda o dato ko kiyakandori iyan. Na biyantowan ako niyan bo a makaonot
peman ko dato mapita.
13 Ogaid na da ini ikapiya a ginawa ko taman sa pekeilay aken angkanan a Yahodi a si
Mordikay a moontod ko gimowa o torogan!"
14 Na giyoto a inipangoyaw rekaniyan i Siris a karoma niyan ago so langon a bolayoka

iyan a "Pakimbaal ka sa mbitinan sa taw a dowa polo ago lima ka mitros a kaporo iyan,
na mapita na pangniya ngka ko dato a bitinen on si Mordikay. Oriyan iyan na onot ka ko
dato ko kakendori a pekebabaya ka." Giyangkai a mosawir na inikababaya i Haman, na
piyakimbaalan iyan so pembitinan.
ISTIRA 6
Kiyabantogan si Mordikay
Sa kagagawii oto na di torogen so dato, na inisogo iyan a mawit on so ribro a kasosoratan

ko miyasowasowa ko kandadato iyan kaan on mabatiya.
2 Na miyailay a misosorat roo a rininayag i Mordikay so kadiyat i Bigtana ago si Tiris a
so dowa kataw a orobarang o dato a petemeng ko pintoan o rowang o dato, ka
piyagopakatan iran sa marata so Dato Sirksis sa kambonoa iran on.
3 “Andamanaya i kiniselaan ago kiyabantoga ki Mordikay sabap sii?" a iniise o dato.

"Da den a miyanggolaola a kamapiyaan iyan," a tig o manga talasogoay niyan.
4 Na pitero o dato a "Antawaa i sesan ko lamalama?" Samaoto na aya den kiyapakasoled

i Haman ko lamalama sii ko liyo o rowang o dato kaan iyan mapangni a pakibitinen iyan
si Mordikay ko pembitinan a pitiyagar iyan.
5 Tig o manga talasogoay niyan a "Si Haman i tomitindeg ko lamalama."

"Wita niyo sii," a inisogo o dato.
6 So kiyasoled i Haman na iniise on o dato a "Antonaa i mapiya a ikidia ko mama a

kabaya o dato a selaan iyan?"
Aya katao ron i Haman na "Antawaa pen i salakaw a kabaya o dato a selaan iyan a
rowar raken?"
7 Kagiya ka maoto na inisembag iyan ko dato a "Aya mapiya a sowaan o dato para ko
mama a selaan iyan
8 Na pakiwiten iyan sii so kimon a pesoloten o dato, ago so koda a di niyan dii kodaan a
sisii ko olo niyan so tanda o dato.
9 Na sogoon o dato ko isa ko lebi a maporo a olowan iyan a soloten iyan so kimon
sangkai a mama ago agaken iyan a kokoda sii ko manga lalan ko siti a ipepanawatewag
iyan sii ko kapelalakaw iran a "Giyai i ikidia ko mama a kabaya o dato a selaan iyan!"
10 “Song ka roo den," a inisogo o dato ki Haman. "Kowaa ngka so kimon ago so koda na
so den so pitero o ka na nggolaolaa ngka ki Mordikay a Yahodi a moontod ko gimowa o
torogan. Di ngka pelepasi so apiya antonaa a pitero o ka!"
11 Na kinowa i Haman so kimon ago so koda. Piyakikimon iyan ki Mordikay ago

piyakakoda iyan ko koda o dato na tiyonda iyan so koda a kokodaan i Mordikay sii ko
manga lalan o siti a ipepanawatewag iyan ko manga taw a "Giyai i ikidia ko mama a
kabaya o dato a selaan iyan!"
12 So kiyaipos ai na komiyasoy si Mordikay ko gimowa o torogan, ogaid na minggagaan

maling si Haman a sasapengan iyan so olo niyan ko kapakadadapanas iyan.
13 Piyanotol iyan ki Siris a karoma niyan ago so langon o manga ginawai niyan so langon
taman a miyasowasowa iyan. Na pitero iran on a "Pipoonan den so kipembabaan ka ko
kamamasaan i Mordikay. Na kagiya Yahodi sekaniyan na di ngka den kedaag. Mataan a
tebanen ka niyan!"
14 Na sii ko di iran pen dii kambibitiyarai na miyakaoma so manga orobarang o dato na
piyakanggagaan iran somong si Haman ko kakendori a pitiyagar i Istira.
ISTIRA 7
Miyabitin si Haman
Tomiyalabok so dato ago si Haman a magatoang ko Bai Istira.

2 Na sii ko kapeginom iran sa arak sangkoto a ikadowa gawii na iniise peman o dato ki
Istira a "Antonaa i kebayaan ka, Bai Istira? Antonaa i pengnin ka? Ka imbegay aken reka
den apiya pen taman ko sabagi ko ndatoan."
3 Somimbag so Bai Istira a "O pelimoa ko ngka, Dato, ago pekasoat reka na pengnin ko a
pakapagoyaga ko ngka ago so bangsa ko a manga taw.
4 Ka saken ago so manga taw aken na miyapepasa ko kapemonoa rekami. O matag kami
pipepasa a manga oripen na di ako den petero ka kagiya maito bo ini a nganin a pekaawid
on a akal o dato. Ogaid na magaan kami den mbinasaan ago polangen!"
5 Na iniise o Dato Sirksis ko Bai Istira a "Antawaa i miyakaraw a penggolaola sa datar

anan? Anda sekaniyan?"
6 Tig i Istira a "So soranga ami ago ridoay na giyangkai a marata a mama a si Haman!"
So kiyanega on i Haman na tanto sekaniyan a miyalek ko kamamasaan o dato ago so
bai.
7 Na tominikeras so dato a tanto a pekerarangitan na lominiyo ko rowang a somiyong ko
sapadan o torogan. Ogaid na mitelimbegak si Haman sa kipengangampedianen iyan ko
Bai Istira ko niyawa niyan, ka miyailay iyan a piyasad o dato sa ginawa niyan a mbonoon
sekaniyan.
8 Na so kiyakasoy o dato ko rowang a poon ko sapadan na aya den kapenggepe i Haman
ko ontoda a ron somasandang si Istira. So kiyailaya on o dato na inipesong iyan a "Ba
pelobeda angkai a mama so bai ko kamamasai aken on sii sa walay?"
So den so kiyateroa on o dato na siyapengan o manga orobarang iyan so paras i Haman.
9 Na pitero o isa kiran, a si Harbona, a "Aden a pembitinan sa taw a dowa polo ago lima
ka mitros a kaporo iyan a makatitindeg ko obay o walay i Haman. Piyakimbaalan iyan a
mbitinan ki Mordikay a miyakatero sa miniogop iyan ko dato."
"Bitina niyo sekaniyan on!" a inisogo o dato.
10 Na binitin iran si Haman ko pembitinan a miyatiyagar iyan ki Mordikay. Na giyoto a
lominggaw so rarangit o dato.
ISTIRA 8
So Sogoan o Dato a Pekaogop ko manga Yahodi
Sii den sangkoto a gawii na inibegay o Dato Sirksis ko Bai Istira so manga kalopaan i
Haman a so ridoay o manga Yahodi. Na inowit si Mordikay ko hadapan o dato ka
rininayag i Istira o antonaa i katotonganayai niyan on.
2 Pilas o dato so sising iyan a ipetombok a tanda o kadato (a biyawi iyan ki Haman) na
inibegay niyan ki Mordikay. Na piyakakibir sekaniyan i Istira ko lopa i Haman.
3 Miyangangampedian peman si Istira ko dato a gomegepe ko hadapan iyan ago

penggoraok. Piyangni niyan on a tamanan iyan so marata a kadiyat i Haman a moriyataw
o Agag a pitekdir iyan a sopak ko manga Yahodi.
4 Na iniantap on o dato so bolawan a tongkas iyan, na mimbowat si Istira na tominindeg
ko hadapan iyan
5 A tig iyan a "O ikasosoat ako ngka, Dato, ago mapipikir ka a ontol na pakisorat ka sa
sogoan a pekabaroba ko manga sogoan i Haman a wata i Hamidata a moriyataw o Agag a
minisorat iyan ago piyakalangkap iyan a mibinasa ko langon a manga Yahodi ko ndatoan
ka.
6 Ka andamanaya i kaketigera ko ron o kitalingoma angkai a kamoralaan ko bangsa ko a
manga taw ago pemonoon so manga tonganay aken?"
7 Inisembag o Dato Sirksis ko Bai Istira ago si Mordikay a Yahodi a "Ilaya niyo man ka
inibegay aken ki Istira so lopa i Haman ago piyakibitin aken sekaniyan sabap ko
kiyakediyati niyan sa marata ko manga Yahodi.
8 Ogaid na tanodi niyo a so apiya antonaa i inisorat sii ko ingaran o dato ago
kiyatombokan ko sising iyan na di den kebaroba. Ogaid na kepakay a sorat kano sa
salakaw a sogoan ko manga Yahodi sii ko ingaran o dato a mapetero iyo kiran on so apiya
antonaa i pipikiren iyo a mapiya, na tomboken iyo ron so sising o dato."
9 Na magaan so magaan na piyakitawag so manga panonorat o dato sii ko ikadowa polo

ago telo gawii ko ikatelo a olanolan a Siban. Piyakisorat kiran i Mordikay so langon a
sogoan iyan ko manga gobirnador, manga nakoda ago manga olowan ko langowan o
magatos ago dowa polo ago pito a probinsiya ipoon sa Indiya na iraraot sa Itiyopiya.
Inisorat ai sii ko kasorat o oman i probinsiya ago sii ko basa o oman i bangsa on, ago sii
mambo ko manga Yahodi ko rek iran a kasorat ago basa.
10 Piyakisorat ai i Mordikay sii ko ingaran o Dato Sirksis na initombok on so sising o
dato. Piyamakiwit iyan ai ko manga pangangawid sa sorat a kikokoda ko manga gagaan a
koda a tindos a bowad o manga koda o dato.
11 Giyangkai a sogoan o dato na miyakabegay ko manga Yahodi ko oman i siti ko

kabenar sa kapelimolimod ago so kalindinga iran ko ginawa iran. Pipero kiran a
kabinasaa ago kapolanga iran ko apiya antawaa a kigogomaan a manga taw a apiya
antonaa i bangsa niyan o di na probinsiya a dii nggogobat ko manga Yahodi a manga
mama, manga babay o di na manga wata ago so kapetebana iran pen ko rek o manga
ridoay iran.
12 So gawii a miyatendo sa kapenggolaolaa sii o manga Yahodi ko langon o manga
probinsiya o Dato Sirksis na so ikasapolo ago telo gawii ko ikasapolo ago dowa olan a so
olanolan a Adar.
13 So manga katero sangkai a sorat na kekilala a sogoan sii ko oman i probinsiya ago
pekalangkapen ko langon o manga taw ron kaan makatiyagar so manga Yahodi sangkoto
a gawii sa kasaopi ran ko manga ridoay iran.
14 So manga pangangawid sa sorat a kikokoda ko manga koda o dato na minggagaan

siran malalagoy a pekeansenan siran o sogoan o dato. Na piyakalangkap mambo angkai a
sogoan sii ko ompongan a siti a Sosa.
15 Lominiyo si Mordikay ko hadapan o dato a somosolot sa nditaren a dato a biro ago

mapoti ago so kimon a mapiya a sotra a mararambayong, ago sesangkad sa bolawan. Na
miselasela so manga taw sa Sosa sa kapekebabaya.
16 Sii ko manga Yahodi na masa oto a kapipiya a ginawa, dii kakeriyala, kakelamilami
ago so kapekebantogi kiran.
17 Sii ko oman i siti ago probinsiya a kiyasampayan ko sogoan o dato na pekebabaya so
manga Yahodi ago dii kelamilami a di siran dii pista ago dii selasela. Na madakel a
manga taw ko ped a manga bangsa a tomiyapi ko bangsa Yahodi ka kagiya riyaot siran a
kalek ko manga Yahodi.
ISTIRA 9
Miyataban o manga Yahodi so manga Ridoay iran
So ikasapolo ago telo gawii ko ikasapolo ago dowa olanolan a Adar na gawii a
mipenggolalan on so sogoan o dato. Sa gawii oto na iinamen o manga ridoay o manga
Yahodi a tebanen iran siran. Ogaid na miyakelid so antap iran ka so manga Yahodi i
tomiyaban ko siran oto a pekegowad kiran.
2 Mitimotimo so manga Yahodi sii ko manga siti a babalingan iran sii ko langon a
probinsiya o Dato Sirksis sa kanggobata iran ko manga taw a petepengan iran siran
minasa. Da a sakataw bo a ba kiran makaato ka ipekelek siran o langon a manga taw.
3 Na so langon o manga olowan ko manga probinsiya a rakes o manga gobirnador, manga
nakoda ago manga sanasanaan o dato na tiyabangan iran so manga Yahodi sabap ko kalek
iran ki Mordikay.
4 Ka mala i kadato si Mordikay sii ko torogan na miyakalangkap so bantogan iyan ko
langon a manga probinsiya, na pepekala so kapaar iyan.
5 Sabap roo na miyagaga nggolaola o manga Yahodi so ikasosoat iran sii ko siran oto a
pekegowad kiran. Na piyamono iran a pedang so langon a manga ridoay iran ago
piyaminasa iran.
6 Sii ko ompongan a siti a Sosa na miyakapatay siran sa lima gatos a manga mama.
710 Piyamono iran roo pen so sapolo kataw a manga wata i Haman a wata i Hamidata, a
so ridoay o manga Yahodi a sikiki Parsandata, Dalpon, Aspata, Porata, Adaliya, Aridata,
Parmasta, Arisay, Ariday ago si Bahisata. Ogaid na da a ba iran piteban.
11 Sangkoto bo a gawii na miniripot ko dato so kadakel o miyabono sii sa Sosa.

12 Na pitero o dato ko Bai Istira a "Miyakapatay so manga Yahodi sa lima gatos a manga
mama sii sa Sosa a rakes o sapolo kataw a manga wata i Haman a manga mama. O
miyagiyanan na antonaa bes i miyanggolaola iran ko ped a manga probinsiya!? Na,
antonaa i pengnin ka imanto ka kibegay reka? Antonaa pen i kabaya a ka, ka ketoman
den?"
13 Inisembag i Istira a "O makasoat ko dato na peroa ngka ko manga Yahodi sii sa Sosa a
minggolalan iran peman mapita so sogoan a ininggolalan iran sangkai a gawii, ago
pakibitinen ka ko pembitinan so manga lawas o sapolo a manga wata i Haman."
14 Na inisogo o dato a minggolalan ai na piyakalangkap so sogoan roo sa Sosa. Binitin
iran pen so manga lawas o sapolo kataw a manga wata i Haman.
15 Na mitimotimo peman so manga Yahodi sa Sosa sii ko ikasapolo ago pat gawii ko
olanolan a Adar na miyakapatay siran sa telo pen gatos a manga mama sa siti, ogaid na da
iran siran tebani.
16 So mambo so ped a manga Yahodi a sisii ko manga probinsiya na miyatimo a

melinding ko ginawa iran. Na miyapokas siran den ko manga ridoay iran ka miyakapatay
siran sa pito polo ago lima nggibo ko siran oto a pekegowad kiran. Ogaid na da a ba iran
piteban.
17 Miyanggolaola ini sii ko ikasapolo ago telo gawii ko olanolan a Adar, na sii ko ikapat
gawii na domike siran na biyaloy iran a gawii a kapista ago kapekebabaya.
18 Ogaid na so manga Yahodi sii sa Sosa na initaros iran so kapepamonoa ko manga
ridoay iran sii ko ikasapolo ago pat gawii, na domike siran ko ikasapolo ago lima gawii a
aya iran biyaloy a gawii a kapista ago kapekebabaya.
19 Giyoto i sabap a so manga Yahodi a kibabaling ko pepamagonayonayan na di iran dii
selaselaan so ikasapolo ago pat gawii ko olanolan a Adar a so mala a gawii a pekebabaya
siran on a dii pista ago dii mbebegaya so oman i isa sa manga pamemegayan.
So Pista a Porim
20 Inisorat i Mordikay angkai a miyasowasowa na miyakawit sa manga sorat ko

kalangolangon a manga Yahodi ko marani ago mawatan sii ko pirowarowangan o ndatoan
o Dato Sirksis.
21 Iniinsarat iyan kiran a selaselaa iran ko oman ragon so ikasapolo ago pat ago ikasapolo
ago lima gawii ko olanolan a Adar
22 A giyoto so manga gawii a kiyapokas o manga Yahodi ko manga ridoay iran. Giyoto
so olanolan a so kararata a ginawa iran ago kapakamboboko na kiyasaliyowan sa kapipiya
a ginawa ago kapekebabaya. Pitero iyan kiran a selaselaa iran angkoto a manga gawii sa
kapista ago dii kakeriyala ago dii kambebegaya o oman i isa ko ped iyan ago so manga
miskin sa manga pangenengken.
23 Mandiyadi na ininggolalan o manga Yahodi so iniinsarat kiran i Mordikay na initaros

iran angkai a dii kaselasela a aya iran adat sa oman ragon.
24 Ka si Haman a wata o Hamidata, a moriyataw i Agag, a so ridoay o langon o manga
Yahodi na pikediyatan iyan sa marata so manga Yahodi, na miripa sekaniyan (so kaperipa
na bebetowan sa 'Porim') kaan iyan matendo so gawii ago olanolan a kambinasaa niyan
ago kapolanga niyan kiran.
25 Ogaid na kagiya mangadap si Istira ko dato na misorat so dato sa sogoan a aya ondas
iyan na sii bo mipeto ko olo i Haman so marata a miyaantangan iyan a sopak ko manga
Yahodi, na si Haman ago so manga wata iyan na miyabitin ko pembitinan.
26 Giyoto i sabap a bitowan angkai a manga gawii sa Porim a aya maana niyan na karipa.
Na sabap ko langon taman a minisorat sangkai a sorat ago sabap ko langon a miyailay o
manga Yahodi ago so miyanggolaola kiran
27 Na biyaloy iran a taritib iran ago so manga moriyataw iran ago so langon a pemanapi
kiran a di iran den mipendarainon so kapeselaselaa sangkai a dowa gawii ko oman ragon
sii ko okit a inisorat i Mordiday ago sii ko miyatendo on a masa.
28 Giyangkai a taritib na ketademan ago mipenggolalan o oman i pamiliya sii ko oman i
siti ago oman i probinsiya sii ko langon a kapepamagapidapidi kiran. Giyangkai a manga
gawii a Porim na di den kitareg so di ron dii kaselaselaa o manga Yahodi aya pen o ba
mada so kapeketademi ron o kebabadan kiran.
29 Mandiyadi na so Bai Istira a wata i Abihail ago si Mordiday a Yahodi na misorat

mambo sa sorat sii ko tarotop a kapaar iyan sa kipemataanen iyan ko paganay a sorat
makapantag ko Porim a inisorat i Mordikay.
30 Inipakawit ai ko langon o manga Yahodi sii ko magatos ago dowa polo ago pito a
manga probinsiya ko ndatoan i Sirksis. Madadalem on so manga katero a kalilintad ago
kalilinding.
31 Piyakambeken angkai a sorat so kapeselaselaa sangkai a manga gawii a Porim sii ko
miyatendo a masa a so den so inisogo kiran i Mordikay ago so Bai Istira. Datar ai mambo
so kapetomana iran ko manga taritib a inaden iran para ko ginawa iran ago so kebabadan
kiran makapantag ko manga masa a kapowasa ago kapakamboboko.
32 So sogoan i Istira na piyakambeken iyan angkai a manga taritib makapantag ko Porim,
na minisorat ai ko manga rikord.
ISTIRA 10
So Kala o Mordikay
So Dato Sirksis na piyakabowis iyan so dalem o ndatoan iyan taman ko manga wawatan a
darpa on sa kilid a ragat.
2 So langon a miyanggolaola niyan sii ko kapaar iyan ago gees a rakes o tarotop a totolan
ko kala i Mordikay a inipangkat sekaniyan on o dato na miyamangisorat ai langon sii ko
ribro a totolan ko manga dato sa Midiya ago giya Pirsiya.
3 Si Mordikay a so Yahodi na tomalondog ko Dato Sirksis sa kapaar na pembantogen ago
seselaan o kadakelan ko manga ped iyan a Yahodi sabap sa pinggalebek iyan so
kamapiyaan o manga taw niyan ago so kalilintad o manga moriyataw iran.
AYOB
AYOB 1
Si Ayob ago so Pamiliya niyan sa Os
Sii sa inged a Os na aden a mababaling on a mama a aya ngaran iyan na Ayob. Da a

daway niyan ago matito angkai a mama a maaleken ko Tohan ago pelidasan iyan so
kanggolaola sa marata.
2 Aden a pito kataw a manga wata iyan a manga mama ago telo kataw a wata a babay.
3 Aden a pito nggibo a manga bilibili niyan, telo nggibo a manga onta, sanggibo a manga
sapi ago lima gatos a manga kimar. Tanto pen a madakel a manga talasogoay niyan.
Sekaniyan i lebi a tatamoken ko langon a manga mama a kibabaling sa sebangan.
4 Aya adat o manga wata iyan a mama na so di iran dii kasosokli kendori ko manga walay
iran sii ko gawii a kinimbawataan ko oman i isa kiran, na pembantowan iran so telo
kataw a manga pagari ran a babay kaan kiran makapangeped koman ago minom.
5 Na igira a miyaipos so manga gawii a kiyakendori iran na pepakisogoan i Ayob so
manga wata iyan a di niyan siran dii pakasotin. Pepangabalaga sekaniyan mbowat ko
kapipita a pesepaat sa petotongen a soasoat para ko oman i isa kiran, ka aya mapipikir
iyan na "Baanda miyakandosa so manga wata aken a kiyasintaan iran so Tohan sa da
tibabaa." Giyai i lalayon a adatadat i Ayob.
So Paganay a Kiyatepengi ki Ayob
6 Miyakaisa alongan na so manga malaikat o Tohan na miyangadap ko Allah na ndodoo

mambo so Iblis a ped iran.
7 Na inisean o Allah so Iblis a "Anda ka makapopoon?"
Tig o Iblis ko Allah a "Poon ako ko di aken dii kapagenebeneb ko doniya a
pepegaloyaloyan ako ron."
8 Na iniise o Allah ko Iblis a "Miyainengka a ka so oripen aken a si Ayob? Da den a

lagid iyan sa doniya a da a daway niyan ago matito a mama a maaleken raken ago
pelidasan iyan so kanggolaola sa marata."
9 “Ba ka ipekelek i Ayob sa da a sabap iyan"? a inisembag o Iblis.

10 “Lalayon ka sekaniyan lilindingen ago so pamiliya niyan ago so langon taman iyan sii
ko mbalabala. Pepakapiyaan ka so bobolos o langon o di niyan dii nggolaolaan, na tanto
ngka a piyakandakel so manga pangangayamen iyan sii ko inged.
11 Ogaid na betera ngka on a lima ngka na binasaa ngka so langon a rek iyan na mataan a
mbardaan ka niyan pesinta!"
12 Na pitero o Allah ko Iblis a "Na den; peladen ko imanto ko kapaar ka so langon taman
iyan, ogaid na giya ginawa niyan na di ngka on pekatanaa a lima ngka."
Na giyoto a lominiyo so Iblis ko kamamasaan o Allah.
Miyabinasa so manga Wata i Ayob ago so manga Rek iyan
13 Miyakaisa a gawii a dii kendori so manga wata i Ayob sii ko walay o kaka kiran a
mama
14 Na aden a miyakaoma a pepelalagoy ki Ayob a miyanotol on a tig iyan a "Sii ko dii
kandado o manga sapi ago so kapepanateb o manga kimar ko marani a pangomaan
15 Na tekaw den a giyobat kami o manga taw sa Sabiya. Inagaw iran so langon a manga
pangangayamen na piyamono iran so manga talasogoay ngka, na saken bo i
miyakapalagoy a makapenotol reka on!"
16 Sii ko di niyan pen dii katero na miyakaoma peman a talasogoay a tig iyan a
"Miyakatana so apoy o Tohan a poon sa langit na miyatotong iyan langon so manga
bilibili ngka a rakes o manga petegikor on, na saken bo i miyakalidas on a makapenotol
reka on!"
17 Da sekaniyan pen makapos tero na aden pen a miyakaoma a ped a talasogoay a tig iyan
a "Siyondolan kami o telo ka sagorompong a manga taw sa Kaldiya na inagaw iran so
manga onta ngka ago piyamono iran so manga talasogoay, na saken bo i miyakapagoyag a
makapenotol reka on!"
18 Sii ko di niyan pen dii katero na aden peman a ped a miyakaoma a talasogoay a tig
iyan a "Sii ko dii kakendori o manga wata a ka roo ko walay o kaka a pagari ran
19 Na tekaw den a somiyamber so mabager a ndo a poon ko disirto na minisogat ko
walay. Na miyageba ini ago minigobar kiran na miyamatay siran langon, na saken bo i
miyakapagoyag a makapenotol reka on!"
20 Na tominindeg si Ayob na kinisi iyan so nditaren iyan ko kapakamboboko. Inopawan

iyan so olo niyan na gomipe ko lopa a sominimba
21 A tig iyan a
"Minimbawata ako a da a rek aken,

na petay ako mambo a da a rek aken.
So Allah i migay ko langon taman aken,
na sekaniyan bo i kominowa on.
Mapodi so Ingaran iyan!"
22 Sii sangkai langon a miyanggolaola na da makandosa si Ayob sa ba niyan piyangobaan

so Tohan.
AYOB 2
So Ikadowa a Kiyatepengi ki Ayob
Miyakaisa alongan na miyangadap peman ko Allah so manga malaikat o Tohan, na

ndodoo mambo so Iblis a inipangadap iyan on a ginawa niyan.
2 Na inisean o Allah so Iblis a "Anda ka makapopoon?"
"Poon ako ko di aken dii kapagenebeneb ko doniya a pepegaloyaloyan ako ron" a
inisembag o Iblis.
3 Na pitero o Allah ko Iblis a "Ba ngka di maiinengka so oripen aken a si Ayob? Da den
a lagid iyan sa doniya a da a daway niyan ago matito a mama a maaleken raken ago
pelidasan iyan so kanggolaola sa marata. Na apiya pen piyamagayokan ako ngka sa
kambinasaa ko rekaniyan sa da a sabap iyan na tatap so kakakapeti niyan ko di niyan
kapakapesela."
4 “Aya bayad o kobal na kobal mambo," a inisembag o Iblis. "Imbegay o mama so

langon taman iyan a ipagaon ko niyawa niyan.
5 Ogaid na betera ngka on a lima ngka na pakatanaa ngka ko lawas iyan, na mataan a
mbardaan ka niyan pesinta!"
6 “Na den," a tig o Allah ko Iblis, "peladen ko sekaniyan ko kapaar ka, ogaid na
pagongowi ngka so niyawa niyan."
7 Na lominiyo so Iblis ko hadapan o Allah na piyakatelogedam iyan si Ayob sa masakit a

manga lebag ipoon ko palad a ai niyan na taman ko poro a olo niyan.
8 Na kominowa si Ayob ko miyaropet a koden a bote na inikikis iyan ko kobal iyan ko
kaoontodi niyan ko ombi.
9 Na pitero on o karoma niyan a "Ba ngka kakapeti den so kada a sala a ka? Sintai ngka
baden so Tohan kaan ka matay!"
10 Ogaid na inisembag i Ayob a "Di ka dii tero a lagid o dii katero o isa ko lalong a
manga babay. Ba aya bo a peterimaan ta a poon ko Tohan na mapiya a kena o ba so
marata?" Na apiya pen sangkoto a langon a karomasayan i Ayob na da sekaniyan den
makandosa ko miyatero iyan.
So Telo Kataw a Ginawai i Ayob
11 Aden a telo kataw ko manga ginawai i Ayob a si Ilipas a taga Timan, si Bildad a taga
Sowah ago si Sopar a taga Naamat. Na kagiya maneg iran so makapantag ko langon
angkai a karomasayan a miyakatalingoma ki Ayob na mitimo siran na mirengarengan roo
somong kaan iran mipangalinggagaw ago mapakapiya a ginawa niyan.
12 Kagiya malangkaw iran sekaniyan a mawatan siran pen na maregen a kiyakilalaa iran
on, na minggogoraok siran sa matanog na kinisi iran so manga kimon iran ago pinirikan
iran sa bayanek a manga olo iran ko kapakamboboko.
13 Na miyamangontod siran ko lopa a ped iran sekaniyan ko miyakapito a kadadaondaw
ago pito a kagagawii a da den a ba kiran miyakatero ki Ayob sa apiya sataga bo a katero,
ka pekeilay iran a tanto a mala a kapekerasay niyan.
AYOB 3
So Paganay a Katero i Ayob
Kagiya maipos ai na miyakatero si Ayob na inisinta iyan so gawii a kinimbawataan on.

2 Pitero iyan a
3 “Pengnin ko a mada so gawii a kinimbawataan raken,

ago so kagagawii a miyatero on a 'Inimbawata a bago a mama!'
4 Pengnin ko a makaliboteng angkoto a kadadaondaw
a di den ketademan o Tohan roo sa langit
ago di den kesindawan o maliwanag.
5 Matangan oto bo o datem ago so along o kapatay,
ago kasapengan o manga gabon,
a kalangkoloban o maliboteng so kaliwanag iyan.
6 Pengnin ko a maagaw angkoto a kagagawii o makapal a maliboteng
ago di den mirakes ko manga gawii ko ragon
aya pen o ba miped ko apiya andaon ko manga olanolan.
7 Matarambisa angkoto a kagagawii
a di on den maneg so lalis sa kapekebabaya.
8 Pengnin ko a misinta angkoto a gawii o manga pangangatao,
a manga papasang sa kipekipaaren iran ko Libiyatan.
9 Di den makasindaw so makabanges sii ko kakepita iyan,
na kaalatawan angkoto a kagagawii so kaliwanag sa da a gona niyan
a di niyan mailay so paganay a sinar o kalibabas.
10 Kamorkaan angkoto a gawii ka da niyan kalekebi so roranan a wata o ina aken
kaan di ako pekaokit ko karomasayan.
11 “Ino ako da matay ko tiyan o ina aken

o di na sii ko kiyaliyo aken ko roranan a wata?
12 Ino ako pen pegabenabena o ina aken?
Ino ako niyan pekasosowa?
13 Opama ka miyatay ako den na makaiiga ako den ai a lomilintad
a makatotorog ago makadedeke
14 A mirarakes ko manga dato ago manga pangolo ko doniya
a inibangon iran a ginawa iran sa manga torogan a miyanga bibinasa imanto,
15 Ago rakes o manga olowan
a binsek iran so manga walay iran sa manga bolawan ago pirak.
16 Ino ako baden da milebeng ko bote a lagid o miyarapas a wata,
a lagid o ikaririga a da den makailay ko kaliwanag.
17 Sii ko kobor na minitapelek o manga rarata so kasasagala iran,
na makadedeke so kikadodokawan.
18 So pen so miyanga bibiyag na makalilintad roo
a di iran pekeneg so lalis o pepemeges kiran.
19 So maito ago mala na palaya den ndodoo,
na miyakamaradika so oripen ko kadnan iyan.
20 “Ino mbegan so kaliwanag ko siran oto a tetalogedam,

ago so kaoyagoyag ko kikamboboko
21 A masisingayo iran so kapatay a di bo pekatalingoma,
a di iran dii mbenogen a makalelebi ko igagadong a tamok,
22 A tanto siran a pekebabaya ago mapipiya a ginawa iran
amay ka misampay ko kobor?
23 Ino mbegi so taw sa kaoyagoyag a piyagma so bobolos iyan
sabap sa piyangalangan o Tohan so manga lalan iyan?
24 Di ako pekakan sabap ko kapakamboko,
na pegondas so kapakapeperego aken a lagid o lawasaig.
25 Minitemo raken so tanto aken a ipekelek,
na so ipekewan aken na miyanggolaola raken.
26 Da raken so kalilintad; da a kapakadeke aken,
da a katitikna o pamikiran aken, ka kasososa bo den."
AYOB 4
Si Ilipas
Mandiyadi na somimbag si Ilipas a taga Timan a tig iyan a
2 “O aden a makaraw reka makimbitiyarai na ba ka pagotegi?

Ka di ako matag makapepererenek.
3 Ilaya ngka man, ka madakel a piyangosiyatan ka,
piyakabager ka so manga lolobay.
4 Igira aden a pekirepang sabap ko kada a bager iyan
na so manga katero o ka na pepekaoyat rekaniyan sa kapepakatindeg iyan.
5 Ogaid na imanto a seka i kiyatalingomaan sa kasiksaan na kiyadaan ka sa inam;
miyakatana reka ini na pekelalongan ka.
6 Ba di so ibadat ka i pepekabegay reka sa sarig,
ago so kapagiinontolan o kapepaginetaw ngka
na pepekabegay reka sa panginam?
7 “Pamimikirana ngka imanto; antawaa i da a sala iyan a ba miyadadas?

Antawaa i matito a ba kiyabinasaan?
8 Miyainengka aken a so siran oto a dii nggalebek sa kamarataan
ago pepamola sa kasamok
na giyoto mambo i maperagon iran.
9 Pekebinasa siran o sengaw o Tohan,
a pepanga popolang ko kapemborngat o gani niyan.
10 Pegengger ago pegeker so manga baradosa a lagid o manga arimaw,
ogaid na peroropeten o Tohan so manga ngipen iran.
11 Pematay siran a lagid o manga arimaw a da a kesikem iran ago kekan,
a pemangiparak so manga wata iran.
12 “Aden a katero a pageemaan a aya kinisampay niyan raken

na lagid o ba minitong ko tangila ko.
13 Miyakatalingoma ini a nggolalan ko odem
sii ko kaaneki ko manga taw sa torog.
14 Miyalek ako ago tiyabad,
na palaya tiyabeker so manga tolan aken.
15 Na giyoto a aden a sagosob a miyakasagad sa paras aken,
na miyamanindeg so manga baraibon ko lawas aken.
16 Tomiyareg ai, na tintengan aken,
ogaid na da aken makilala o antona onon.
Na miyakaneg ako sa malenggaw a sowara a tig iyan a
17'Ba maontol so manosiya ko kapegilaya on o Tohan?
Ba soti so taw ko hadapan o Miyaden rekaniyan?'
18 Apiya so manga malaikat o Tohan na di niyan sasarigan
na pekedawayan iyan siran;
19 Na taralebi pen a di niyan kaserigi ko manosiya a aden a lawas iran a bote,
a so manga onayan iran na sii ko bayanek,
a malebod siran makemel a lagid o geeb!
20 Apiya pen o pekeoyagoyag so manga taw ko kapipita
na maatay siran ko kakegegawii niyan,
a maada sa taman sa pakataman a da den a ba on miyakainengka.
21 Ba di mapemadot so manga lapek o barombarong iran
a pematay siran a da a ongangen iran?
AYOB 5
"Pananalo ka, Ayob, o kabaya a ka, ogaid na antawaa i sembag reka?
Antawaa ko manga malaikat i keangayan ka?
2 So gani na pepekabono ko lalong,
ago so kasiig na pepekapatay ko da a peleng iyan.
3 Miyakailay ako sa lalong a dii makambekaw,
ogaid na tekaw den a kiyamorkai ko babalingan iyan.
4 So manga wata iyan na mawatan ko kalilinding,
na pendaagen siran ko dii kokoman a da a ba kiran peninindegan.
5 So pepanga aaor na pekan ko pereperan o pekelalolalong,
apiya pen so pepamangeto ko manga soroken,
na so pepanga aawaw na pelameden iran so tamok iyan.
6 Ogaid na so kamarataan na di pekato ko lopa
aya pen o ba so karomasayan i lomonaw ko bote.
7 Ka matamataan den a so manga taw na inimbawata a maperomasay
a datar o kapepelalayog o manga kotokoto a apoy sa poro.
8 “O saken seka na pegapas ako ko Tohan

na peladen ko ron so panon aken.
9 Di sekaniyan dii nggolaola sa manga piyakamemesa a di mapenggedageda,
ago so manga ala a galebek a di keitong.
10 Pepakioranan iyan so lopa
ago pepakaigan iyan so manga pangomaan.
11 Ipeporo iyan so manga bababa
na pekesabet iyan so dii mboboko.
12 Pegilangen iyan so manga kadiyat o manga tangakal
kaan di iran mipenggolalan so manga atap iran.
13 Pelitagan iyan so manga oonganen sii ko katatangakal iran
na pekealangan so manga plano o manga madoraten.
14 Pepakalibotengan siran sii ko kadadaondaw,
na apiya o miyaoto a alongan na pepangapap siran a datar igira a gagawii.
15 Pesebeten o Tohan so manga miskin ko manga gagarang a katero o manga tangakal;
pesebeten iyan siran ko kapaar o manga tangarasi.
16 Sabap roo na katatagoan sa panginam so manga miskin,
na miyapakakemed so ngari o manga rarata.
17 “Rarakmatan so taw a pepakatanoren o Tohan;

kagiya ka maoto na di ka kenamai ko kapepamarintaa reka o Lebi a Mabager.
18 Ka pepamali sekaniyan ogaid na pembongkosan iyan bo so manga pali,
na pepamakasakit sekaniyan ogaid na pepekabolong mambo so manga lima niyan.
19 Pokasen ka niyan ko nem a morala;
sii ko pito a morala na da a marata a ba reka pekatana.
20 Sii ko masa a taon na pegoyagen ka niyan,
na sii ko katidawa na ipelidas ka niyan ko kapatay.
21 Kelinding ka ko kapegitowitoa reka,
na di ngka den ikelek so morala
igira a pepekatalingoma.
22 Ba ngka den isinga so morala ago so taon,
ago di ngka den ikelek so manga iila a binatang.
23 Kena den o ba atoren so manga babasoka a ka,
na di ka den petekoren o manga iila a binatang sa kalasan.
24 Ketokawan ka a malilinding so babalingan ka,
na igira a pekaipen ka so manga pepanateban o manga talon ka,
na pekeilay ngka a da a ba on miyada.
25 Ketokawan ka pen a pendakel so manga wata a ka,
ago so kebabadan reka na kelagid sa kadakel o manga otan ko kalopaan.
26 Na kisampay ka ko kobor amay ka matarotop so omor ka,
a lagid o pereperan a miyaragon ko kiyapakatoa niyan.
27 Ilaya ngka man, ka miyapariksa ami ini na benar.
Na, pakinega ngka, Ayob, ago tarimaa ngka a kamapiyaan o ginawa ngka."
AYOB 6
Ayob
Mandiyadi na somimbag si Ayob a tig iyan a:

2 “O ba bo ketimbang so kapakamboboko aken
ago mibetad ko timbangan so langon o karomasayan aken!
3 Mataan a lebi ini a mapened a di so peted sa ragat;
giyoto i sabap a da aken genggena so manga katero aken.
4 So manga gasa o Lebi a Mabager na milalapek raken;
na pepekalangkap so bisa iran ko niyawa ko.
So manga piyakalekelek o Tohan na matitiyagar a sondol raken.
5 Ba di aden a kabenar aken sa kapepegaataat aken?
Ba di pekekeg so kimar a da a kapenateban iyan,
o di na pegenga so sapi a da a kompay niyan?
6 Antawaa i kebabaya koman ko da a taam iyan a pangenengken a da katimosi?
Antonaa i taam o mapoti ko orak?
7 Pegendaan ko peseko so lagid anan a pangenengken
ka ikesekit aken.
8 “O ba bo maampon o Tohan so pepangnin ko ron

ago mibegay niyan raken so aarapen aken!
9 O ba bo kabaya o Tohan a kasesaa niyan raken
a beteren iyan a lima niyan ago bonoon ako niyan!
10 Ogaid na maaaden den raken angkai a ipekapiya a ginawa ko
a pepekabegay raken sa kapekebabaya
minsan pen sisii raken angkai a rintas iyan a masakit, a giyai:
da aken ongkira so manga katero o Soti a Tohan!
11 “Ogaid na kiyadaan ako sa bager; ino ako pen pepekainam?
Da a bobolos aken a mapiya; ino pekalendo so omor aken?
12 Ba mategas ako a datar o ator?
Ba tombaga so sapo aken?
13 Da a kiyogop raken a ba sisii sa ginawa ko
imanto a piyapas raken so langon a gees aken.
14 “Aya patot ko mama a kiyadaan sa inam

na ipekelimo o manga ginawai niyan
apiya pen o ba niyan den tiyalikodan so kalek ko Lebi a Mabager.
15 Ogaid na sekano a manga pagari aken na miyakaakal raken
a lagid o pekemaraan a manga lawasaig,
a lagid o manga baogan a pesolapay
16 Igira a pekepeno a peketonag a giyaw ago ilo
17 Ogaid na petereg tomoga igira pangolaon
ka peketiyan o kayaw o alongan.
18 So tometembeng a manga padagang
na pesilay ko okita iran a dii mbabanog sa ig,
na pepegantapantap siran ko disirto a pepamatay.
19 So pelalalag a manga padagang a poon sa Tima ago Siba
na miyamangiloba sangkoto a manga baogan
20 A tatangkeden iran a pekatoon siran on sa ig.
Ogaid na so kiyapakaoma iran on na kiyaolaan siran
ago kiyadaan den sa inam.
21 Na lagid kano imanto o kiyamaraan a lawasaig a da a kiyogop iyo raken.
Pekeilay niyo so kamomoralai raken na pekelek kano raken maleb.
22 Ngkainoto? Ba aken rekano den miyatero a 'Witi ako niyo sa pamemegayan,'?
o di na 'Tendani ako niyo ko tamok iyo,'?
23 O di na 'Sabeta ko niyo ko manga ridoay aken,'?
o di na 'Aona ko niyo ko kapaar o pepangarasi raken'?
24 “Na den, pangendaowa ko niyo;

osaya ngka raken o antonaa i karibatan aken,
ka merenek ako ago pemakineg rekano.
25 Sayana a pekaayok so manga oontol a katero!
Ogaid na antonaa i gona o kisasagdaan iyo raken?
26 Ba niyo pipikira a ontol so manga katero iyo
ago matag baden somasagad a ndo so manga katero aken a kiyadaan sa inam?
27 Aya ngena iyo na apiya so kapengongoripena niyo ko manga ilo
ago so kasambii niyo ko manga ginawai niyo!
28 Na, kapedipedi kano bo na ilaya ko niyo,
ka mataan den a di ako rekano pemokeg.
29 Taregen iyo so di ontol a kapekokoma niyo raken.
Di ako niyo selaa, ka maontol ako den.
30 Ba niyo pipikira a pepamokeg ako?
Ba ko di mapakapetendoay so ribat ago so ontol?
AYOB 7
"Ba di so kapepeginetaw o manosiya ko doniya
na lagid o manga gawii o taw a pakareregenan nggalebek?
2 Lagid o oripen a pangingindaon iyan so kasisirongan,
ago lagid o gomagalebek a penayaon iyan so sokay niyan
3 Na babagianan ako mambo sa manga olanolan a da a oked iyan,
na iaantag raken so manga kagagawii a kaperomasay.
4 Igira a miniga ako a pekatorog na pipikiren ko a 'Ay katey pen a kapakambowat aken?'
na sii ko kagegenday o kagagawii na pepagariwara ako taman ko kepita.
5 So lawas aken na mapopotos a lowati ago kegang;
miyapeno so kobal aken a manga panido a dii ndadana.
6 “Pepamanagad so manga gawii aken sa magaan a di so barira o pegaol,

a pepanga popopos sa da den a arap on.
7 Tanodi ngka, hey Tohan, a so kaoyagoyag aken na matag sengaw;
so manga mata ko na di den pekailay peroman sa kapipiya a ginawa.
8 So mata ngka a pegilay raken imanto na di ako niyan den keilay,
na o pengilobaa ko ngka na miyaipos ako den.
9 Lagid o gabon a pekibayog ago pekeda
na so mambo so taw a ketago ko kobor na di den makapepeto;
10 Di den pekakasoy ko babalingan iyan,
na kelipatan sekaniyan o manga ginawai niyan.
11 “Kagiya ka maoto na di aken nggenggenen so ngari aken;

penarotaro ako sii ko kapekerasay o niyawa ko;
pegataat ako sii ko kapapaiti ko ginawa ko.
12 Ba ako piyakalekelek a naga sa kalodan
a disomala a pakinggordiyaan ka?
13 O pamikira ko a pekapiya a ginawa ko ko igaan aken
ago mapekakep o kapakatorog so di aken dii mipagataat,
14 Na apiya pen oto na pepakitekawan ako ngka ko manga taginepen,
ago pepakalekan ako ngka sa manga pangingilain.
15 Sabap sii na tomoon ko a ba ako den pageget a matay
a di sa ba ako maooyagoyag sii sangkai a lawas.
16 Ipekegowad aken so kaoyagoyag aken; di ko kabaya o ba ako makadayon maginetaw.
Taregi ako ngka, ka ba den somasagad so manga gawii aken.
17 “Ino mala reka i kipantag so manga manosiya

a tatagoon ka siran sa ginawa ngka?
18 Ka pekaipen ka siran oman kapita,
ago petiyobaan ka ko oman i sakotika.
19 Ba ngka di teregen so kapegilaya ngka raken;
ba ako ngka di ngganati apiya ko sakadiyap?
20 O miyakandosa ako na antonaa i minibinasa ko reka,
hey petolik ko manosiya?
Ino ako ngka mbaloya a di ngka dii tindoan?
Ba ako awid a akal ka?
21 Ino ngka di perilaan so manga sala aken
ago pepasa so manga dosa ko?
Ka di ketey na kikayokot ako ko lopa,
na pembenogen ako ngka sebenar, ogaid na miyaipos ako den.
AYOB 8
Si Bildad
Mandiyadi na somimbag si Bildad a taga Sowah a tig iyan a
2 “Ay katey pen a di ngka san dii kapanaroa?

So manga katero o ka na lagid bo o kapesember o mabandes a ndo.
3 Ba pembibida o Tohan so kokoman;
ba pembibida o Lebi a Mabager so ontol?
4 Isako makandosa ko Tohan so manga wata a ka
na piyalad iyan siran ko kiyasiksaa kiran a miyapetot ko kasalaan iran.
5 Ogaid na o pagapas ka ko Tohan
ago pengangampedian ka ko Lebi a Mabager,
6 Na o pembaloy ka a soti ago matito
na apiya imanto na peseriat sekaniyan ko kamapiyaan ka
na pekaasalen iyan so ontol a babalingan ka.
7 Na so miyaipos a rek ka sa paganay na lagid bo o maito
ko kipegabain on ko mala a ipetegompiya ngka sii sa kaposan.
8 “Isei ngka so manga lokes tano,

na pamimikirana ngka so miyakenal o manga apo iran,
9 Ka babago tano pen inimbawata na da den a ba tano katao,
na so manga gawii tano ko doniya na matag baden alongalong.
10 Ogaid na pakipangendao ka ko manga apo tano,
ka ipembayan iran reka so manga katero a poon ko ongangen iran:
11 Ba pekato so bombong ko darpa a kena a ba babasaken?
Ba pekarimpoong so anes ko da a ig on?
12 O mati so ig sii ko kapegto iran a da pen makatoa
na magaan a kakelayon iyan a di so apiya antonaa ped a pamomolan.
13 Giyanan i keokitan o langon a lominipat ko Tohan,
na keda so panginam o taw a pegongkir rekaniyan.
14 Aya peserigan iyan na maroropet,
na aya pesanaan iyan na matag ayog a lalawa.
15 O renda sekaniyan on na di rekaniyan pekaren,
na o komapet sekaniyan on na keda bo.
16 Lagid sekaniyan o pamomolan a pekeigan piyapiya sii ko bansayan sa alongan
a pendonapa so manga temos iyan ko sapadan;
17 Pekoliket so manga bekaw niyan ko batiyong a manga ator
a dii mbanog sa kakapetan iran sii ko manga ator.
18 Ogaid na amay ka miyabadot ai ko katatagoan on
na keloon den o darpa iyan a peteroon iyan a 'Da ko seka den mailay!'
19 Mataan a giyai bo i ikapipiya a ginawa o marata a taw sii ko kapepaginetaw niyan!
Na magto so ped a manga pamomolan sii ko lopa a isembi on.
20 “Ogaid na di den telikodan o Tohan so taw a da a daway niyan

aya pen o ba niyan tabangi so manga rarata.
21 Penoon iyan peman so ngari i ka a singa
ago so manga modol ka a kapelalis sa kapekebabaya.
22 Na siran oto a pekegowad reka na pakapekeyaan,
na keda so manga barombarong o manga rarata."
AYOB 9
Si Ayob
Mandiyadi na somimbag si Ayob a tig iyan a
2 “Oway, katawan ko a tito anan a benar.

Ogaid na andamanaya i kapekaontol o manosiya ko hadapan o Tohan?
3 O aden a kebaya on makipendaowa
na di sekaniyan on pekasembag sa apiya makaisa bo ko sanggibo.
4 Madalem i ongangen so Tohan ago mala i gees;
antawaa i miyakasopak on a ba da kabinasai?
5 Tekaw den a kipegisegen iyan ko manga palaw,
na pekeliden iyan siran ko rarangit iyan.
6 Pekokogen iyan so doniya ko katatagoan on
na petebekeren so manga polaos a aya on kaoonayan.
7 Kesaparan iyan so alongan kaan di pekasebang,
ago so manga bitoon kaan di pekasindaw.
8 Sekaniyan bo i komiyayat ko manga langit
ago pelalakaw ko liyawaw o manga begel o ragat.
9 Miyangaden sekaniyan ko langon o manga bitoon
a so Laya, so Oriyon, so Pliyadis ago so manga lompokan o manga bitoon sa
Pagabagatan.
10 Di sekaniyan dii nggolaola sa manga ala a galebek a di mapenggedageda
ago so manga piyakamemesa a di den kebilang.
11 Ogaid na igira a pesegad raken so Tohan na di aken pekeilay,

na igira a pegawa na di aken maiinengka.
12 O pengagaw sekaniyan na antawaa i pekasapar on?
Antawaa i pekaraw ron mise a 'Antonaa i pesowaan ka?'
13 So Tohan na di niyan nggenggenen so rarangit iyan;
apiya so lebi a manga wawaraw a somiyopak on na miyalagosak o manga ai niyan.
14 “Kagiya ka maoto na antawa ako a makipendaowa rekaniyan?
Andamanaya i kapekapili aken sa manga katero a kipawal aken on?
15 Apiya pen da a sala aken na di aken sekaniyan kesembag
ka giya bo a kapengangampedian aken ko limo o Tohan a pekokom raken.
16 Na apiya pen o talowi aken sekaniyan ago simbag ako niyan mambo
na di ako makapengimbenar o ba ako niyan pamakinega.
17 Ka pepakilangkoloban ako niyan ko barabarat,
ago peteketakepen iyan so manga pali aken sa da a sabap iyan.
18 Di niyan raken pekasoliin so kapenapas,
ka pepenoon ako niyan baden a manga papait a rata a ginawa.
19 Opama ka kebayaan ko sekaniyan tomegel
na mataan den a sekaniyan i lebi a mala i kabager.
Na o kebayaan ko domimanda
na peteroon iyan a 'Antawaa i pekawit raken ko dii kokoman?'
20 Da a sala aken ogaid na lagid o ba ako peselaa o ngari aken;
na apiya da a kidaway raken na lagid o ba pepayaga o manga katero aken a miyakasela
ako den.
21 “Da a kidaway raken, ogaid na di aken anan pakarerengeden

ka di aken dii masodi so kaoyagoyag aken.
22 Sala sa di sala na palaya ndatar ko Tohan.
Giyoto i sabap a di aken dii teroon a
'Pembinasaan iyan a melagid so da a daway niyan ago so manga rarata.'
23 Igira a minitekaw a kiyapakatalingoma o pepekapatay a morala
na ipesinga o Tohan so kapekerasay o da a manga sala iyan.
24 Igira a minipaar o manga rarata so inged
na pembotaan iyan so manga pangongokom.
O kena o ba sekaniyan i di on dii nggolaola, na antawaa bes?
25 “Magaan so kapepemanagad o manga gawii aken a di so pangoya,

na di ini dii melayolayog sa da den a ba on kamapiyaan.
26 Pepamanagad ai a pepanga iipos a lagid o madilapet a manga awang
o di na lagid o garoda a peseyab ko sikemen iyan.
27 O teroa ko a 'Pekalipatan ko so panon aken
ago sembian ko so kapakaiibi aken sa kapakalalangas,'
28 Na ipekewan aken pen so langon a pekatalingoma raken a manga karomasayan,
ka katawan ko a di ako ngka ibibilang a da a sala aken.
29 Na sabap sa mibibilang ako den a miyakasela
na ino ako penagontaman sa baden ilang?
30 Apiya pen o onabi aken a lawas aken sa sabon
ago pagonaban ko a manga lima ko sa balogo
31 Na inggaled ako ngka sii ko maresik a galebo
sa apiya so manga nditaren aken na ikengingiri ako niyan.
32 “So Tohan na kena a ba manosiya a datar aken
a makapegatobanga kami ko dii kokoman a kedaowa aken sekaniyan.
33 O ba bo aden a tomanor rekami a pekakokom rekami a dowa
34 A mapakigenek iyan ko Tohan so kapelepedi niyan raken
kaan raken mada so kalek ko piyakalekelek iyan!
35 Amay ka magiyoto na makipembitiyarai ako rekaniyan sa da a kalek aken,
ogaid na aya masosowa aken imanto na di ini mapepero.
AYOB 10
"Biyokel ako ko kaooyagoyag aken.
Kagiya ka maoto na pekeno ako sa da a sangkaan iyan,
na petero ako sii ko kapapaiti ko niyawa ko.
2 Peteroon ko ko Tohan a 'Di ako ngka selaa;
pakitokawi ngka raken baden o antonaa i ipesendit ka raken.
3 Ba ngka ikasosoat so kaperasaya ngka raken
ago so katalikodi ngka ko pasad o manga lima ngka
a ba ka baden lalangas ko kapegilaya ngka ko manga kadiyat o manga rarata?
4 Ba so manga mata ngka na ba matag mata a manosiya?
Ba ngka pekeilay so langon taman a lagid o kapekeilaya on o taw?
5 Ba so manga gawii ngka na datar o manga gawii o manosiya?
Ba makampet so omor ka
6 A aya reka pepekaansen ko kapembanoga ngka ko kasalaan aken
ago so kapepangilesa ko manga dosa ko
7 A ba di katawan ka a da a sala aken
a da a ba raken pekapokas a poon ko kapaar ka?
8 “Piteong ako ago pimbaalan o manga lima ngka;

ogaid na pembinasaan ako ngka imanto sa tarotop.
9 Tanodi ngka a linimbag ako ngka a lagid o bote;
na ba ako ngka peman pekakasoya ko lopa?
10 Inisabap ka a kinikeraringen raken,
na piteong ako ngka sii ko tiyan o ina aken.
11 Piyakatootoora a ka so manga tolan aken ago ogat
ago pinditaran ako ngka sa kobal ago sapo.
12 Bigan ako ngka sa kaoyagoyag ago limo,
na piyagongowan ka so niyawa ko ko kasisiyapa ngka on.
13 “Ogaid na katawan ko imanto a aden bes a antap ka makapantag raken

a pageemaan ka ko poso o ka a poon ko pagampaganay a giyai:
14 O makandosa ko na di ako ngka dii simaan,
na magenda ka bo sa kiperilaan ka ko dosa ko.
15 O miyakasela ako na kemorkaan ako den!
Na apiya pen o da a sala aken na di aken kebangon a olo aken
ka mapepeno ako a kayaan ago maaled ko kapakatetalogedam aken.
16 O tetagompiya ako na pepamagayanan ako ngka a lagid o arimaw,
na perinayagen ka peman so piyakamemesa a gees ka a pekabinasa raken.
17 Di ako ngka dii pakiseksian sa bago a manga saksi,
na pepakaosoren ka so rarangit ka raken;
na di raken dii makasosokli somondol so manga sondaro ngka.
18 “Ino ako ngka pekaliyowa ko tiyan o ina aken?

Tomo a ba ako den miyatay a da a miyakailay raken!
19 O ba ako bo miyarapas a mapantek a kiyaawidi raken ko kobor ipoon ko roronan a
wata!
20 Ba di magaan den mapopos so omor aken?
Di ako ngka den dii tekora!
Taregi ako ngka kaan ako makataam sa maito a kapipiya a ginawa
21 Sa di aken pen kangganat a di ako den pekakasoy
roo ko darpa a domadatem ago maliboteng,
22 A so darpa a ikapatatalin ko dalem
ago so along o kapatay ago so kasisimoket
a apiya so maliwanag on na lagid o maliboteng.' "
AYOB 11
Si Sopar
Mandiyadi na somimbag si Sopar a taga Naamat a tig iyan a
2 “Ba da a kisembag sangkai a bariboribo a manga katero?

Ba mapetero a makabebenar angkai a dii mberak?
3 Hey Ayob, ba ngka pipikira a so da a oked iyan a di ngka dii katero i pekarenek rekami?
Ba da a pembonget reka igira a pepagongatongat ka ko Tohan?
4 Pitero o ka a 'Da a daway o kepit aken,'
ago 'Soti ako ko kapekeilaya raken o Tohan.'
5 O ba bo sembaga ka o Tohan
ago teroon iyan reka so mapipikir iyan!
6 O ba niyan reka bo payaga so migagaib a ongangen,
ka so tito a ongangen na madakel i kilangan.
Na sabota ngka ini: so kapendanega reka o Tohan
na maito a di so miyapetot ko kadostaan ka.
7 “Ba ngka mapenggedageda so manga pageemaan o Tohan?

Kegaga ngka mariksa so manga temanaan o kala o Lebi a Mabager?
8 Maporo ini a di so manga langit; antonaa i kesowa a ka?
Madalem mambo a di so kaden o miyamatay; antonaa i katawi ngka on?
9 So takes iyan na maolad a di so doniya
ago mabelang a di so ragat.
10 O makatalingoma so Tohan a kalaboson ka niyan ago pekikokom
na antawaa i pekasapar rekaniyan?
11 Mataan a makikilala o Tohan so da a oked iyan a manga taw,
na igira a miyailay niyan so kamarataan na ba niyan di tegoa sa ginawa?
12 Ogaid na di den kebaloy so pekelalolalong a mama a maongangen
a lagid o maila a kimar a mostakil o ba mbawata sa manosiya!"
13 “Ogaid na makapantag reka, o panagontamanen ka ko Tohan so poso o ka

ago itapnay ngka rekaniyan so manga lima ngka,
14 Na o ilapik ka so dosa a sisii sa lima ngka,
a da a marata a pekakadenen ka ko babalingan ka,
15 Na giyoto i kakikayaon ka ko paras ka sa da den a ba on kayaan,
na makapembeken ka sa da a ba ngka kalek.
16 Mataan den a kelipatan ka so karomasayan ka
a aya kapeketademi ngka on na lagid bo o bagiyaw a miyakasagad den.
17 So kapepaginetaw ngka na pekaliwanag a makalelebi a di so maooto a alongan,
na apiya pen aden a maliboteng on na kelagid baden o kapekelibabas.
18 Pekasarig ka, ka ketagoan ka sa panginam;
pagipaten ka o Tohan na pekadeke ka a malilinding.
19 Pekaiga ka a da a ba reka pengangalek,
na madakel a pekitabang reka.
20 Ogaid na so manga rarata a taw na kedaan sa inam
a di siran pekatoon sa keagawan iran,
na aya bo a keinam iran na ba siran den pematay."
AYOB 12
Ayob
2 “Di mipendowadowa a sekano i makambibisa ko ongangen

na petay oto amay ka mamatay kano!
3 Ogaid na aden mambo a sabot aken a datar iyo
a kena a ba mibababa ko rek iyo.
Antawaa i di matao sangkai a langon a manga nganin?
4 Miyabaloy ako a piyakakayakayad o manga bolayoka aken
apiya pen pepamangni ako gowani ko Tohan a pegamponen iyan;
ipekekayad ako iran a maontol ago di kedawayan a mama!
5 So manga taw a makadadaya na pepamagitowito ko siran oto a kamomoralaan;
pipikiren iran a matag ai okoran ko manga taw a pepamangidolas so parapara iran.
6 Ogaid na lomilintad so manga babalingan o manga tanganiyaya,
na aya baden malilinding so siran oto a pekekat ko rarangit o Tohan
a aya bo a katohanan iran na so bager iran.
7 “Ogaid na isei niyo so manga binatang, ka pemangendaon kano iran,

o di na so manga papanok sa kawang, ka peteroon iran rekano,
8 O di na mbitiyarain iyo so lopa, ka pemangendaon kano niyan,
o di na pakitokaw kano ko manga seda ko ragat.
9 So kalangolangon ai na katawan iyan a so lima o Allah i minggolaola sii.
10 Sisii sa lima niyan so kaoyagoyag o oman i baraniyawa
ago so napas o langon o manga manosiya.
11 Pesisayan o tangila so manga katero
a datar o kapeteami o dila ko pangenengken.
12 Sii peketoon so ongangen ko manga totoa,
na so kapekelendo o omor na pepekabegay sa sabot.
13 “Ogaid na so bo so Tohan i kirek ko tito a ongangen ago kapaar;

rek iyan so mosawir ago so sabot.
14 Saden sa giba iyan na di den kebangon peroman;
so taw a kiyalaboso niyan na di den mapekaliyo.
15 O rena niyan so oran na melaon;
o bokai niyan so manga ig na pekabagenas ko kalopaan.
16 “Rek iyan so bager ago so kapakadaag;

melagid so pekedadag ago so pendadag on
a palaya sisii ko kapaar iyan.
17 Petondaan iyan so manga mosawira a makalelekas,
na pembalowin iyan so manga pangongokom a pekelalolalong.
18 Pekowaan iyan on so manga pipiya a kimon o manga dato
na pembabeden iyan so kasadan iran sa tali a lagid o oripen.
19 Petondaan iyan so manga imam a makalelekas,
na pembakeliden iyan so makambebeken a manga taw.
20 Pepakareneken iyan so kisasanaan a mosawira,
na pekowaan iyan sa sipat so manga pelokelokesen.
21 Pepakaitoon iyan so kiseselaan,
na pepakalobain iyan so manga babager.
22 Pesewaan iyan so kikatatago ko pitidaleman ko maliboteng,
na pepakaliwanagen iyan so along o kapatay.
23 Pepakalaan iyan so manga nasiyon na pembinasaan iyan siran bo;
pepakalaoladen iyan siran na pepakambelabelagen iyan siran bo.
24 Pekowaan iyan sa sabot so manga olowan ko doniya,
na pepakateridadagen iyan siran ko mitataog a kaden a da a kedegan on.
25 Di siran dii mangapap ko maliboteng,
na pepakapagotengotengen iyan siran a lagid o kikabebereg."
AYOB 13
Peteros den tero si Ayob a
"Ilaya niyo man, ka palaya aken den ai miyailay;
miyaneg aken so di niyo dii teroon na siyabot aken.
2 So katawan iyo na katawan ko mambo;
da a milalawan iyo raken.
3 Ogaid na masisingayo aken a mimbitiyarai so Lebi a Mabager;
kebayaan ko domaowa so Tohan mipantag ko pepenonen ko,
4 Ka sekano na pepangembaal sa manga kabokegan;
langon kano da a gona niyan a manga pamomolong!
5 O ba kano bo rerenek!
Giyanan bo i kaongangen iyo.
6 Pamakinega niyo imanto so kabenar aken;
tagoa niyo sa ginawa so manga daowa aken.
7 Ba niyo pipikira a ipetindeg iyo so Tohan
a nggolalan ko kapepamokeg iyo ago kapepanaliba?
8 Ba niyo sekaniyan pegampili?
Ba niyo penembagen so Tohan?
9 O pegilesa niyan so di niyo dii nggolaolaan na ba niyan kepariksa a mapiya?
Ba niyo pipikira a keakal iyo sekaniyan a lagid o manosiya a pekeakal?
10 Matamataan a pembongetan kano niyan
apiya pen o migagaib a kapeparamiramig iyo.
11 Ba di so menang iyan i pepekalek rekano?
Ba rekano di pekatana so kalek rekaniyan?
12 So manga pananaroon iyo na lagid bo sa bali o manga ombi;
so manga daowa niyo na maroropet a datar o koden a bote.
13 “Rerenek kano na go ako niyo pakateroa,

na saden sa mapenggolaola ko.
14 Oway, ipeserakan aken a ginawa ko
na pakimpembayaan ko ko Tohan so niyawa ko.
15 Naino o bonoa ko niyan, ka kiyadaan ako den sa inam;
itindeg aken so kabenar aken sii ko hadapan iyan!
16 Ogaid na giyoto na aya raken pekasabet,
ka da den a baradosa a ba on pekaraw makipegatobanga.
17 Na, pamakinega niyo piyapiya so manga katero aken;
tagoa niyo sa ginawa so osayan aken.
18 Ilaya niyo man, ka miyatiyagar aken so pepenonen ko,
na katawan ko a pekabenar ako.
19 Ba aden a pekabegay sa karina a miyakasela ako?
O aden, na merenek ako baden a pegeget.
20 “Hey Tohan ko, perowa ngka raken angkai a dowa a betad,

na amay ka magiyanan na di ko seka petepokan:
21 Pokasa ngka raken a lima ngka,
na taregi ako ngka mangangalek ko manga piyakalekelek ka.
22 Oriyan iyan na tawaga ko ngka ka sembagen ko seka,
o di na pakateroa ko ngka na sembaga ko ngka.
23 Pira i kadakel o manga karibatan ago manga dosa a miyasogok aken?
Pakitokawi ngka raken so kasosopak aken reka ago kasalaan.
24 Ino ngka pepagmaa a paras ka
ago ipembilang ako ngka a ridoay ngka?
25 Ba ka kebaya somiksa sa matag raon a pekibayog a ndo?
Selobaan ka i matag miyagango a ragami?
26 Ka ipendaptar ka so manga papait a ipesendit ka raken,
na piyakimbalogo ngka raken so manga dosa ko ko kangodai raken pen!
27 Pepatongen ka so manga ai aken,
na di ngka dii simaan so langon a kapelakad aken
ko kiyatagoi ngka on sa tanda ko palad a ai aken.
28 Sabap roo na pekepos ako a lagid o pekeredak a kayo
ago lagid o nditaren a pepangengen o manga gaab.
AYOB 14
"So taw a inimbawata o babay na makampet i omor
ago mapepeno a kasasansara.
2 Meretok sekaniyan a lagid o obarobar a magaan bo kelanes;
lagid o somasagad a along na di sekaniyan kemboway.
3 Ba ngka bes totorosi milay so datar oto a taw?
Ba ako ngka pekaadapa sa kakokoma ngka raken?
4 Antawaa i pekawit ko soti a nganin a poon ko kena a ba soti?
Da, da den!
5 Matetendo so kalendo o omor o manosiya;
ipepaar ka so kadakel o manga olanolan iyan;
tiyamanan ka ini na di kelawanan.
6 Kagiya ka maoto na taregi ngka sekaniyan pegilay na di ngka dii tekora
taman sa mapopos iyan so manga gawii niyan a datar o sosokayan a mama.
7 “O mapata so kayo na aden pen a inam a pegombos peroman

a pagtoan sa bago a manga sapak.
8 Apiya pen miketoa so manga bekaw niyan ko lopa
ago pepatay so tod iyan sii ko bote
9 Na amay ka marames oto a ig na pegombos
ago pekarimpoong a datar o pamomolan.
10 Ogaid na petay so manosiya a ipelebeng.
Pepotos sekaniyan na miyada den.
11 Lagid o ig a peketi ko ragat
ago lagid o lawasaig a petereg tomoga ago pekemaraan
12 Na pepekaiga so manga taw a di den makapembowat;
taman sa di mada so manga langit na di siran pekanaw
aya pen o ba siran mapokaw ko katotoroga kiran.
13 “O ba ako ngka bo mitapok ko darpa o miyamatay

ago isolen ako ngka taman sa makalepas so rarangit ka!
O ba bo makatendo ka sa oras
na go ako ngka bo katademi!
14 O matay so taw na ba keoyag peroman?
O benar oto, na petigeren ko so langon angkai a manga gawii a kamaregenan aken
taman sa mapokas ako ron.
15 Samaoto na telowan ako ngka na sembagen ko seka;
na ikedali ako ngka a pasad o manga lima ngka.
16 Matamataan a imanto na pembilangen ka so manga lakad aken,
ogaid na sa masa oto na di ngka den tegoon sa ginawa so manga dosa ko.
17 Kepotos so manga sala aken sa sako,
na tembonan ka so manga dosa ko.
18 “Ogaid na lagid o kapekebengkag ago kapeketempag o palaw,

ago lagid o kipegisegen ko lakongan ko katatagoan on,
19 Ago lagid o kapeketiya o ig ko manga ator
ago so kapembagenasa o manga bagiyaw ko lopa
na giyanan mambo i kapembinasaa ngka ko panginam o taw.
20 Pendaagen ka sekaniyan lalayon, na kapekeipos iyan;
pesembian ka so bontal iyan ko kiyapatay niyan
na pekasongen ka sekaniyan roo sa mawatan.
21 O kabantogi so manga wata iyan na di niyan ketokawan;
o mitanan siran na di niyan ai keilay.
22 Aya bo a pekegedam iyan na so kasakit o lawas iyan,
na so bo so ginawa niyan i ipemboko iyan."
AYOB 15
si Ilipas
2 “Hey Ayob, ba ka baden dii mberak sa da a od iyan a manga katero!

3 Ba ndaowaan o maongangen a mama so lagid anan a da a gona niyan
ago di pekaogop a manga katero?
4 Lagid o ba ngka pekowai sa kipantag so kalek ko Tohan
ago pegilangen ka so kapengangarapan rekaniyan.
5 So kamarataan ka i pepekapaar ko ngari i ka,
na pepiliin ka so basa o pepangikmat.
6 So den so ngari i ka i pepakibenar reka, a kena a ba saken;
so den so manga modol ka i peseksi sa sopak reka.
7 “Ba seka i miyaona a taw a inimbawata?

Ba ka inilotad ko da pen kaadena ko manga bobongan?
8 Ba ngka piyamakineg so misosolen a mosawir o Tohan?
Ba seka bo i kirek ko ongangen?
9 Antonaa i katawan ka a di ami katawan?
Antonaa i pekesabot ka a da ami masabot?
10 Aampilan kami o manga mama a miyakapoti i bok ago miyanga lolokes
a so manga taw a miyanga lolokes a di so ama a ka.
11 “Ba di reka kiyadiyangkaan so kiyarinawai o Tohan ko ginawa ngka

a so mainanek a manga katero a miyatero ami reka sii ko Ingaran iyan?
12 Ino ka pepekipaar ko manga gedageda a ka,
ago pepakaotengen ka rekami so manga mata ngka
13 Sii ko kapemborngati ngka ko Tohan sa gani ngka
ko di ngka dii kateroa sangkoto langon a marata?
14 “Ba kebaloy so manosiya a soti;

ba kebaloy a maontol so inimbawata o babay?
15 Apiya so manga malaikat o Tohan na di niyan serigan,
na apiya so manga langit na kena a ba soti ko kapegilaya niyan on,
16 Na taralebi pen a di soti so piyakasisingay ago madodosa a taw
a peginom sa marata a isasayan iyan ko kapeginoma niyan ko ig!
17 “Na, pamakinega ko ngka, Ayob,
ka teroon ko reka ago pagosain so miyakenal aken.
18 Giyangkai a manga benar na piyakalangkap o manga oongen
a da den a ba iran piyagma ko miyanga sosowa iran ko manga apo iran
19 A so siran oto a kiyabegan ko lopa
isako da a kibabaling kiran a manga rait.
20 So marata a taw a pepangarasiyan iyan so manga ped
na pekeromasay ko tenday a omor iyan
sii ko langon o manga ragon a isesenggay ron.
21 Lalayon sekaniyan pepekaneg sa piyakalekelek a manga sowara,
na sii ko kapakalilintad iyan na nggobaten sekaniyan o manga tanganiyaya.
22 Da a arap iyan o ba sekaniyan makapalagoy ko maliboteng,
ka tanda sekaniyan a pedang.
23 Peketaataap sekaniyan a pepangiloba sa pangenengken
a di niyan dii teroon a 'Anda onon?'
Katawan iyan a magaan den so gawii a maliboteng.
24 Pepakalekan sekaniyan o karomasayan ago kapakamboko;
pekelangkoloban iran sekaniyan a lagid o dato a makatitiyagar on gobat,
25 Ka di niyan dii mbarokanan so Tohan
ago pegato sekaniyan ko Lebi a Mabager
26 A penggagaanan iyan somondol ko katetegas iyan i olo
a kekelong sa makapal ago mabager.
27 “Apiya pen kaolit ago kawasa angkoto a marata a taw

na pekabaling sekaniyan ko miyanga bibinasa a manga siti
ago sii ko manga walay a piyangawaan
a so manga walay a peketempag bo.
29 Keda so kakawasaan iyan;
na di kemboway so manga pantiyariyan iyan
aya pen o ba makapayapat so patemotamokan iyan ko lopa.
30 Di niyan kepalagoyan so maliboteng;
so manga lonaw niyan na kelayon a apoy.
na kibayog sekaniyan o sengaw o ngari o Tohan.
31 O ba sekaniyan pakiakal ko kaserigi niyan ko da a bali niyan
ka so da a bali niyan i badal iyan.
32 Sii pen ko kaooyagoyag iyan na kebadalan sekaniyan ko miyapetot on,
na di pekarimpoong so manga sapak iyan.
33 Kelagid sekaniyan o waged a obas
a pekeroro so manga onga niyan ko da on pen kalotoi,
ago lagid o kayo a olibi a pepanga tatatak so manga obarobar iyan.
34 Penga babalek so manga baradosa,
na pelenganen a apoy so manga barombarong a miyabangon a miyakanggolalan ko
katendan.
35 Giyai so manga taw a ipekeraring iran so kasamok ago dii makambabawata sa marata;
so manga poso iran na pepekaaden sa kapanaliba."
AYOB 16
Ayob
2 “Andang aken a miyaneg so madakel a katero a lagid anan;

da a bali niyo langon a paririnarinaw!
3 Ba di kepos so malayat a manga katero iyo?
Antonaa i ipekeyongkat rekano ko kapenembag iyo?
4 Opama o sisii kano ko mambebetad aken
na mapetero aken langon mambo so pitetaro iyo.
Kapengelengkelengan ko sekano mambo
ago makapetero ako sa madakel a kidaway rekano.
5 Ogaid na o saken i dii tero na makapengoyat rekano so ngari aken
ago mapekada o manga katero aken so kapakamboboko iyo.
6 “Ogaid na o tetaro ako den na di kepinda so kapekerasay aken,

na o rerenek ako baden na di ini keda.
7 Mataan den a inikopay ako ngka, hey Tohan;
miyalaslas ka so langon o pamiliya ko.
8 Miyasikem ako ngka, na karina ini o kiyamoralai raken;
so kararakowaga raken na aya kon poriba o kiyapakasela aken.
9 Pesondolan ako ago pepamekangen o Tohan ko rarangit iyan.
Di niyan raken dii pakakitebaan a manga ngipen iyan
ago pepakaotengan ako niyan sa mata.
10 Pepamoliatan ako o manga taw;
pepamagarobangaan ako iran tomengel
a pekowaan ako iran a diyaman.
11 Piyalad ako o Tohan ko manga baradosa
ago iniitog ako niyan ko manga lima o manga rarata a taw.
12 Gowani na pepaginetaw ako a masosorot ogaid na riyopet ako niyan;
pikel ako niyan ago inipamalempaleng.
Biyaloy ako niyan baden a dii pentasan
13 Na kalilikopan ako o manga pamamana iyan.
Da den a kapedi o kapekebasega raken o manga pana iyan,
na pekeodod iyan ko lopa so rogo aken.
14 Omanoman ako niyan pepamalian
a penggobaten ako niyan a lagid o mawaraw a sondaro.
15 “Somosolot ako sa sako na lagid o ba ini piyamanai ko kobal aken;

miyarega ako den a moontod ako a sii ko bayanek.
16 Miyakariga den so paras aken sa kagoraok bo den
na mindadagem so manga mata ko,
17 Ogaid na da ako den makapangarasi,
na iklas so kapepangangarapan aken.
18 “Hey lopa, di ngka temboni so manga karibatan a pinggolaola raken;

pengnin ko a di den mapakarenek so kapenggoraoka ko ko kokoman!
19 Apiya imanto na so saksi aken na sisii sa kasorgaan;
so magabang raken na roo sa poro.
20 Di ako dii sodiin o manga ginawai aken
sii ko kapekeododa o manga mata ko ko lo sii ko kapepamangi aken ko Tohan.
21 O ba bo aden a magabang raken sii ko hadapan o Tohan
a lagid o kapegabanga o taw ko ginawai niyan!
22 “Amay ka makapira bo ragon

na melalakaw ako ko lalan a di ako ron den pekakasoy.
AYOB 17
Miyabinasa so niyawa ko;
magaan den mapopos so manga gawii aken
na penayaw raken so kobor.
2 Mataan a malilibet ako o dii mamakasodi,
na pekeilay aken so tanto iran raken a kapepagongatongata.
3 “Hey Tohan ko, pangimbenara ngka so kada a sala aken,

ka da den a ped a peseksi a ba raken pemayandeg.
4 Kiyalekeban ka so manga pamikiran iran ko kapakasabot;
di ako ngka kiran pekidaagen imanto!
5 Aden a pananaroon iran a
'Saden sa dii mbasa sa marata makapantag ko manga layok iyan kaan makalaba
na keongosan so manga wata iyan.'
6 Na miyabaloy ako mambo o Tohan a pananaroon o langon a taw,
na pendodaan ako iran sa paras.
7 Miyakalobay so manga mata ko sabap ko kapakamboboko;
so langon o lawas aken na lagid bo o alongalong.
8 Inikabengang ai o manga titito a taw,
na so da a manga sala iyan na pekerarangitan iran so manga baradosa.
9 Ogaid na so manga oontol na tatatapen iran so manga okitokit iran,
na siran oto a lompiyo i lima na pepekabager.
10 “Na sekano langon na song kano sii peman imanto!
Da a ketoon aken rekano a maongangen a mama.
11 Miyamanagad den so manga gawii aken; miyanga iilang so manga antangan aken,
na miyapotol so iinamen o poso aken.
12 Dii teroon o manga ginawai aken a so kagagawii na aya kadadaondaw;
apiya sii pen ko masa a maliboteng na tig iran a 'Magaan den so maliwanag.'
13 O aya bo a penayaon ko a kebalingan na so darpa o miyamatay
a ron aken kekayat so igaan aken ko maliboteng,
14 Na o teroa ko ko kapekeredak a 'Seka i ama aken,'
ago sii ko manga lowati a 'Sekano i ina aken, o di na 'Sekano i babay aken,'
15 Na anda bes so panginam aken?
Ba aden a pekailay sa apiya antonaa a panginam aken?
16 Kena, ka mipetelon aken manog so panginam aken ko darpa o miyamatay
amay ka ipembaba kami sii ko bayanek."
AYOB 18
Si Bildad
Mandiyadi na somimbag si Bildad a taga Sowah a tig iyan a
2 “Ayob, ay kapageposa ngka sangkanan a dii katero?

Pakaongangen ka na oriyan iyan na kesembag ami seka.
3 Ino ngka pipikira a lagid kami o manga binatang
a da a manga lalag iyan?
4 Seka a pesekisi sa ginawa ngka ko rarangit ka
na ba pagawai so doniya sabap ko kapekerarangiti reka?
Ba tempaga so manga pampang sabap reka?
5 “Mataan a kepareng so solo o marata a taw

na tereg komadeg so apoy niyan.
6 Pekaliboteng so solo ko barombarong iyan;
kepareng so palitaan a matatago ko kilid iyan.
7 So makasag a kapelakad iyan na ketimpang,
na so rek iyan a manga antangan i pekaoteng rekaniyan.
8,9 Pekadapo so marata a taw ko litag
a kesakem iyan sekaniyan sa palo, na keilotan sekaniyan on.
10 Aden a sampirot a itatapok ko lopa
ago tataanen a litag a matatago ko pagokitan iyan a kilitag rekaniyan.
11 “Peketekawan sekaniyan ko manga piyakalekelek sii ko balabala,

na peketeden iran sekaniyan oman lomakad.
12 Pekekodep so bager iyan sabap ko ongos,
na pepenayaw rekaniyan so morala sii ko kilid iyan.
13 So piyakalekelek a paniyakit na pepangangan ko kobal iyan
a pelameden iyan so manga barokan iyan ago ai.
14 Pengginsingen sekaniyan a poon ko barombarong iyan a ron babaling a malilinding,
na petondaan ko Malakalmaot.
15 Na so kena a ba niyan tonganay i mbaling ko barombarong iyan
ko oriyan o kinipiriken on ko sandawa kaan kalompiyowi.
16 Pekemara so manga bekaw niyan sa didalem,
na pekelayon so manga sapak iyan sa poro.
17 Miyada den so totolan on sii ko inged
na di sekaniyan den ketoosan ko doniya.
18 Mbogaon sekaniyan poon ko maliwanag na roo den ko maliboteng
na iteog a poon ko kakadenan o kikaooyag.
19 Da a ba niyan mbawataan o di na kababadan
ka da den a ba kiran miyalamba a pekeoyagoyag ko inged a kiyabalingan iyan.
20 Pekebengang so manga taw sa sedepan ko kapekenega iran ko miyasowasowa iyan,
na siran oto sa sebangan na pepananabaden sa kalek a tig iran a
21'Matamataan a giyoto i keokoran ko marata a taw;
giyoto i ketamanan ko taw a di niyan katawan so Tohan.' "
AYOB 19
Ayob
2 “Ay katey pen a kapepakasakiti niyo raken

ago kaperanega a nggolalan ko manga katero?
3 Miyakasapolo ako niyo den mapagitowito imanto,
na da kano den maya ko kapepamabai niyo raken.
4 Na apiya pen o benar a miyakandosa ko
na so karibatan ko na kena a ba niyo awid a akal, ka rek aken bo!
5 Ipeporo iyo raken a manga ginawa niyo,
na pipikiren iyo a so kadidiyamani raken na aya karina o kasalaan aken.
6 Ogaid na sabota niyo a so Tohan i minggolaola raken sii
na inikokos iyan raken so poket iyan.
7 “Apiya pen ipenggoraok aken a 'Miyaribat ako den!' na da den a sembag raken.
Pepananalo ako sa tabang ogaid na da ako mipaginontolan.
8 Inalangan o Tohan so lalan aken na di ako pekalawang;
liyangkoloban iyan sa maliboteng so ipagokit aken.
9 Likas iyan raken so bantogan aken
na kinowa niyan on so sangkad ko olo aken.
10 Pembinasaan ako niyan ko mbalabala raken taman sa miyada ako.
Biyadot iyan so panginam aken a lagid o kayo.
11 Pesokeyaw raken so gani niyan;
ipembilang ako niyan a ped ko manga ridoay niyan.
12 Pegabanti so manga sondaro niyan a maiisaisa;
pepangembaal siran sa manga tambak a ipelikop raken,
na pekempowan iran so melilibeta ko barombarong aken.
13 “Piyakapangimbelag raken o Tohan so manga pagari aken

na tomiyalikod raken so manga ginawai aken.
14 Tomiyawas raken so manga tonganay aken,
na piyanga lilipatan ako o manga layok aken.
15 So manga banto aken ago so manga talasogoay na ibibilang ako iran a mananangga;
aya kapegilaya iran raken na datar ako o rait.
16 Igira a pepakisogoan ko so oripen aken na di ako niyan den sembagen
apiya pen ipepangangampedian ko ron a ngari aken.
17 So sengaw aken na piyakangingiri ko karoma ko,
na piyakagowagowad ako ko manga pagari ko.
18 Apiya so manga wata na pepakaradiyaanen ako iran;
igira a miyakagemaw ako na pepagongatongaten iran.
19 Ipekesisingay ako o manga dadaseg aken a ginawai,
na tiyalikodan ako o siran oto a pekebabayaan ko.
20 Tolan bo ago kobal a lamba raken
na miyakaitoito a kiyapalagowi aken ko kapatay.
21 “Kapediin ako niyo, manga ginawai aken, kapediin ako niyo!

Ka miyasiksa ako o lima o Tohan.
22 Ino ako niyo peselobaa a datar o pesowaan o Tohan?
Ino rekano pen da kadiyangkai so kapepakasakiti niyo raken?
23 “O ba bo minisorat so manga katero aken!

O ba bo minitombok ko ribro
24 O di na minirarik o panasang a potaw sii ko timbega,
o di na minigaang ko lakongan sa dayon sa dayon!
25 “Ogaid na makapantag raken, na katawan ko a pekeoyagoyag so Pangangaon aken,

na sii sa kaposan na tindeg sekaniyan ko doniya.
26 Na amay ka miyaredak so kobal aken
na naino ka keilay bo o ginawa ko so Tohan a sisii ako ko badan aken.
27 Giya den a ginawa ko i pekailay rekaniyan;
so den so manga mata ko i pekamasa rekaniyan a kena a ba salakaw.
Tanto ai a masisingayo o poso aken!
28 “O teroa niyo a 'Tanto pen a kapepakasakiti tano rekaniyan

ka so kiyasabapan ko masosowa iyan na sisii rekaniyan,'
29 Na kaleken iyo so pedang,
a so kapendanega rekano o Tohan sii ko rarangit iyan
kaan iyo katokawi a aden bes a kapengokom."
AYOB 20
Si Sopar
Mandiyadi na somimbag si Sopar a taga Naamat a tig iyan a
2 “Disomala a kasembaga ko reka,

ka tanto a mariringasa so pamikiran aken.
3 Miyaneg aken so kambonget a inipakaito raken,
na petegelen ako o niyawa ko sa kasembag aken.
4 “Mataan den a katawan ka a ipoon ko miyanga oona a gawii

sii ko kiyaadena ko manosiya ko doniya
5 Na di ketey so kapepekadaag o manga rarata,
ago so kapekebabaya o manga baradosa na baden sagad.
6 Apiya pen o makaaayaw so maratabat iyan ko manga langit
ago so olo niyan na miseseko ko manga gabon
7 Na keda sekaniyan sa taman sa pakataman a lagid o tai niyan,
na so siran oto a miyakailay rekaniyan na peteroon iran a 'Anda sekaniyan?'
8 Pesedep sekaniyan a lagid o taginepen
ago kedadas a lagid o pangingilain ko kagagawii, na di den ketoon.
9 So manga ginawai niyan ago so manga magiinged ko darpa iyan
na di iran den keilay peroman.
10 So manga wata iyan na mbadalan iran so manga miskin
ka ikesoy iran so piyamanekew iyan kiran.
11 So bager a sisii ko lawas iyan ko kangoda niyan
na mipetelon iyan miga ko bayanek.
12 “So kamarataan na mamis sii ko ngari iyan

na petepesen o dila iyan.
13 Na apiya pen di niyan kabaya o ba niyan maota
a eegemen iyan baden ko ngari iyan
14 Na so pangenengken iyan na kebaloy a masem sii ko tiyan iyan
a lagid o bisa a nipay sii rekaniyan.
15 Keota iyan so kakawasaan a miyalamed iyan
ka pekigowa o Tohan ko tiyan iyan.
16 Sosopen iyan so bisa o manga nipay;
so katokaa rekaniyan o nipay na aya on pekapatay.
17 Di niyan den ikebabaya so manga lawasaig,
a so manga baogan a ipetoga on na teneb ago gatas.
18 Ikesoy niyan so pindokawan iyan nggalebek a da a miyaosba niyan on;
di den ikepiya a ginawa niyan so miyalaba niyan ko kandagang.
19 Na siyonsing iyan ago inindarainon so manga miskin;
na piyangagaw niyan so manga walay a da niyan mabangon.
20 Di den keonseran so kadadalo iyan;
pepenimoon iyan so apiya antonaa i pekebabayaan iyan.
21 Da den a miyalamba a ba niyan da malamed,
ogaid na di tetas so katetagompiya niyan.
22 Sii ko katatabowi ko kaoodara on na keregenan sekaniyan,
na pekatana on so tarotop a kapened o kapetelogedam iyan.
23 Sii ko kapepenoa niyan ko pisembaan iyan
na pakapemborngaten rekaniyan o Tohan so pesokeyaw a gani niyan
na pekaoranen iyan on so manga daneg iyan.
24 O tepeng sekaniyan malagoy ko pedang a potaw
na pelambasan sekaniyan o gasa a tombaga.
25 Amay ka mbadoten iyan ko likod iyan,
a so pekindat a sokot iyan a poon ko atay niyan
na peraoten sekaniyan o mala a kalek.
26 So oman i kabinasaan na magaayan ko langon a miyapanimo iyan.
So apoy a da mabiyag o manosiya i melengan rekaniyan
ago melamed ko miyalamba ko barombarong iyan.
27 Perinayagen o manga langit so kadostaan iyan,
na ipeseksi ini mambo o doniya.
28 So bagiyaw na pekabagenas ko walay niyan
a ndasengan o mabandes a ig sii ko gawii o rarangit o Tohan.
29 Giyoto i bagian o manga rarata a taw,
a inisenggay a okoran kiran o Tohan."
AYOB 21
Ayob
2 “Pamakinega niyo piyapiya so manga katero aken;

giyanan bo i kapangalinggagaw a pengnin ko rekano.
3 Sabari ako niyo ko di aken dii katero,
na makapos ako tero na pagongatongat kano den!
4 “Kena a ba so manosiya i pepanonan aken ka so Tohan;

giyanan i sabap o di aken kapakasabar.
5 Ilaya ko niyo na pamemesa kano;
dapengen iyo a palad iyo ko ngari iyo ko katetekawi rekano.
6 Igira a pepamimikiranen ko so miyanggolaola raken
na petebekeren so lawas aken.
7 “Ino pen pekeoyagoyag so manga rarata a taw

a pepanga lolokes ago pepangosor so gees iran?
8 Makaboborod so manga wata iran ko mbabalibeta kiran,
na pekeilay iran so manga mbawataan iran.
9 Malilinding so manga walay iran a da a kalek on,
na kena a ba siran pendanega o Tohan.
10 Pepamowadan so langon o manga sapi iran
a kena o ba pepanga apasi.
11 Dii pepalalagoyan ago dii sogay so manga wata iran
a lagid o manga nati a kambing.
12 Pepagidaida siran a pegayonan o boniboniyan o manga garingking ago manga
kotiyapi,
na di siran dii makakeriyala a sasartaan o oni o insi.
13 Pepaginetaw siran a tetagompiya,
na pematay siran a lomilintad.
14 “Apiya pen oto na peteroon o manga rarata ko Tohan a

'Awai kami ngka!
Di ami kabaya o ba ami katokawi so manga lalan ka.
15 Antawaa i Lebi a Mabager a kailangan iyan so kapangongonotani ami ron?
Antonaa i keosba ami ko kapepangangarapani ami rekaniyan?'
16 Ogaid na so katetagompiya o manga rarata na kena a ba minisabap ko manga galebek
iran;
giyoto i sabap a di aken ketarima so lagid anan a pamikiran iran.
17 “Ogaid na tanto a madelag a kapeparenga ko solo iran!

Tanto a madelag a kitatana kiran o kamoralaan
ago so kapepakasakiti kiran o Tohan sii ko rarangit iyan!
18 Ba pekibayomber siran o ndo a lagid o ragami?
Ba pekeawidi sa mawatan o mabager a ndo a lagid o okap?
Na di!
19 “Aya di niyo dii teroon na

'Pepenimoon o Tohan so indaneg ko marata a taw a itena iyan ko manga wata iyan.'
Ogaid na pangnin ta a madaneg iyan baden so aya den miyakandosa kaan iyan oto
magedam!
20 Pangnin ta a kametekan iyan milay so kambinasaa rekaniyan;
makainom sekaniyan ko rarangit o Lebi a Mabager!
21 Ka da a tatagoon o mama makapantag ko pamiliya a miniganat iyan
amay ka miyapopos den so manga olanolan a minisenggay ron.
22 “Ba aden a makapengendao sa katao ko Tohan

a aya pepangokom ko apiya siran oto a lebi a maporo?
23-24 Aden a taw a miyatay ko katatarotop o bager iyan,
a mapiya pen i lawas ago malimegas so manga tolan iyan
a tanto sekaniyan a makadadaya ago da a mindadamar a akal iyan.
25 Na aden pen a ped a miyatay a kapapaitan so niyawa niyan
a da den makataam sa apiya antonaa kamapiyaan.
26 Na ndatar siran a kilebeng ko bayanek
a kesapengan o manga oled so manga lawas iran.
27 “Katawan ko so pepamikiren iyo,

a so manga kadiyat a iperibat iyo raken.
28 Tig iyo a 'Anda imanto so walay o mala a taw,
a so manga barombarong a kiyabalingan o manga baradosa?'
29 Ba niyo da kaisei so manga taw a dii melayalayag?
Ba niyo da tagoa sa ginawa so pepanotolen iran
30 A so marata a taw na aya pelepasen sii ko gawii a kapendadaneg o Tohan
na pekalidasen sekaniyan ko kamoralaan?
31 Da den a ba rekaniyan mbonget sabap ko manga okitokit iyan;
da a ba on mbadal ko miyanggolaola niyan.
32,33 Na sii ko kapegowita on ko pelebengan
na tanto a madakel a pepamangonot on
a melagid so pepamanondog on ago pepangonaan.
Lalayon pepegipaten so kobor iyan
na apiya so bote sii ko balintad na mamis rekaniyan.
34 “Kagiya ka maoto na andamanaya i kapakapiyaa niyo sa ginawa ko

ko da a oked iyan a manga katero iyo?
So langon a di niyo dii teroon na baden kapamokeg!
AYOB 22
Si Ilipas
2 “Ba aden a taw a apiya so lebi a maongangen a ba pekaosba ko Tohan?

3 O maontol ka a mama na ba ini kamapiyaan ko Lebi a Mabager?
O di kedawayan so kapepaginetaw ngka na ba aden a kelaba niyan on?
4 Ba so ibadat ka i di niyan reka dii imbonget ago ipesela?
5 Di! Ka sabap ko mala a kamarataan ka
ago so da a pitetamanan iyan a kadostaan ka.
6 Da ngka kasowin so manga nditaren o manga pagari ngka a inisanda iran reka sabap ko
otang
na giyanatan ka siran a kipakalelekas.
7 Da ngka begi sa ig so kikakokopay
na minda ka o ba ngka mapakakan so pepanga aaor.
8 Apiya pen mala ka i gees ago seselaan a mama
a aden a lopa iyan a ron ka babaling
9 Na piyamakaawa ka so manga balo a da a miyakokowaan iyan
na miyateped ka so bager o da a manga ama iyan.
10 Giyanan i sabap a lilibeten ka o manga litag
ago pekealapan ka o panekaw a manga piyakalekelek.
11 Giyanan pen i sabap a tanto ka a kalilibotengan a di ka den pekailay
ago kokoloban ka o mala a bagiyaw.
12 “Ba di ndodoo so Tohan ko pipeporoan a langit

a tanto a maporo a di so pinakamaporo a manga bitoon?
13 Ogaid na pitero o ka a 'Antonaa i katawan o Tohan?
Ba makapengokom sekaniyan a makalambas sangkoto a tanto a maliboteng?'
14 Pipikiren ka a di tano niyan keilay sabap ko makapal a manga gabon a makasasapeng
rekaniyan
sii ko kapepagaloyan alobak iyan roo ko kaporoan o kawang.
15 “Ba ka peteros den komedeg ko andang a lalan

a inokitan o manga baradosa
16 A pinggiginsing ko doniya ko da pen kapopos o omor iran,
a miyabagenas o bagiyaw so manga onayan iran?
17 Pitero iran ko Tohan a 'Awai kami ngka den!
Antonaa i mapenggolaola rektano o Lebi a Mabager!'
18 Ogaid na sekaniyan den i miyameno ko manga walay iran sa manga pipiya a nganin;
sabap roo na pelidasan aken so lagid anan a manga pamikiran o manga baradosa.
19 Pekeilay o manga oontol so kapekebinasaa kiran na pepanga bababaya;
na pepagongatongaten siran o da a manga sala iyan a di iran dii teroon a
20'Mataan den a miyabinasa so manga ridoay tano,
na pelaslasen a apoy so manga tamok iran.'
21 “Hey Ayob, na pakingginawai ka ko Tohan na di ngka den pipikira a ridoay ngka;
amay ka magiyanan na pekatalingoma reka so kamapiyaan.
22 Tarimaa ngka so ipaginsarat iyan reka
na padalema ngka ko poso o ka so manga katero iyan.
23 O mbalingan ka ko Lebi a Mabager na mapekaasal ka.
O awata ngka sa mawatan ko walay ngka so kambaradosa
24 Ago lebaden ka so bolawan ka ko bayanek,
ago itogen ka so lombos a bolawan ka sii ko manga ator ko baogan
25 Na so den so Tohan a Lebi a Mabager na aya ngka bolawan
ago so piyamagaraw a pirak ka.
26 Mataan a oriyan oto na so Lebi a Mabager i ipekebabaya a ka,
na kebangon ka a paras ka ko Tohan.
27 Igira a pepangangarapan ka na pekinegen ka niyan
na itoman ka so manga samaya a ka rekaniyan.
28 Saden sa pasaden ka sa ginawa ngka na aya den mipenggolalan,
na keliwanagan o sindaw so manga lalan ka.
29 Igira a minibaba so manga taw a peteroon ka a 'Pakambowata ngka siran!'
na sebeten o Tohan so miyamangalimbabaan.
30 Apiya so aden a sala iyan na penabangan iyan,
ka penabangan a nggolalan ko kalolompiyo o manga lima ngka.
AYOB 23
Ayob

2 “Apiya imanto na tanto pen a mapait a kapakapepegataat aken,
na pepekapened raken a lima niyan apiya pen makapeperego ako.
3 O ba ko bo katawi o anda ko sekaniyan ketoon
kaan ako makadarpa ko pepangokoman iyan!
4 Kabaya aken a mapayag aken rekaniyan so pepenonen ko sii ko hadapan iyan
ago matero aken on so langon o manga daowa aken.
5 Kabaya aken a katokawi ko o antonaa i kisembag iyan raken
ago so kasaboti aken ko mapetero iyan raken.
6 Ba raken makipepewala ko mala a kapaar iyan?
Di, ka pekinegen ako niyan baden.
7 Roo rekaniyan kepalad o matito a taw so manga daowa niyan,
na o mapenggolaola ko ini na pekabenaren ako o pekokom raken sa taman sa pakataman.
8 “Ogaid na o song ako sa sebangan na da sekaniyan roo,

na o song ako sa sedepan na di aken roo ketoon.
9 Igira a di sekaniyan dii nggalebek sa pagotaraan na di aken keilay,
na igira a miyabangkiring sa pagabagatan na di aken kesagipa.
10 Ogaid na katawan o Tohan so lalan a ipegokit aken,
na o tepengi ako niyan na ketokawan iyan a lagid ako o miyalombos a bolawan.
11 Siyoson aken piyapiya so manga lakad iyan;
kideg aken so lalan iyan a da ako den panilasilay.
12 Da aken den talikodi so manga sogoan o manga modol iyan;
Inibilang aken so manga katero o ngari iyan a lebi a di mipendarainon a di so
pangenengken aken sa oman gawii.
13 “Ogaid na di pekealinalin so Tohan, na antawaa i pekasangka on?

Saden sa kabaya iyan na aya di niyan dii nggolaolaan.
14 Ka di niyan dii nggolalan so pitekdir iyan mipantag raken,
na madakel pen a lagid oto a manga antangan a matatago rekaniyan.
15 Sabap roo na petebaden ako sa kalek ko hadapan iyan,
na igira a pepamimikiranen aken ai langon na ipekewan aken sekaniyan.
16 Biyaloy o Tohan so poso aken a malobay;
tanto ako a piyakalekan o Lebi a Mabager.
17 Apiya pen oto na kena a ba ako piyakarenek o maliboteng,
a so makapal a maliboteng a makasasapeng ko paras aken.
AYOB 24
"Ino di petendo so Lebi a Mabager sa manga gawii a kapengokom iyan?
Ino da a bali o kapepanayawa o manga taw a matao rekaniyan sangkoto a manga gawii?
2 So manga rarata a taw na ipepengiseg iran so manga ator a tanda o temanaan;
pepamanekew siran sa manga pangangayamen na ipelook iran ko manga talon iran.
3 Pembogaon iran so manga kimar o da a manga ama iyan
na pekowaan iran so sapi o balo taman sa kabayadan iyan so otang iyan.
4 Ipesomag iran so kikakokorangan poon ko lalan
ago pepenegelen iran makatepok so langon o manga miskin ko inged.
5 Lagid o manga iila a kimar sii ko disirto
na pepegenebeneb so manga miskin a pepanamar mbanog sa manga kaoyagan iran;
so bo so kabagabagas a lopa i pekekowaan iran sa pangenengken para ko manga wata
iran.
6 Pepanimo siran sa miyamangibegak a pereperan ko dii mbabasokan
na pepangosipen iran so da marebas a manga obas sii ko asinda o manga rarata a taw.
7 Sii ko kagagawii na pepekatorog siran a makalelekas, ka korang siran sa nditaren;
da a ba iran kisapeng ko ginawa iran ko kapepanenggaw.
8 Peketomes siran o tagitim ko manga kapalawan
na pesorip siran ko manga lakongan ka da a ba iran kesirongan.
9 Pengginsingen o manga rarata so da a ama iyan a wata o miskin ko rareb o ina iyan;
pekowaan iran so ikaririga a wata a kisanda sabap ko otang.
10 Pepekalalakaw so manga miskin a kitatalandiyang, ka korang siran sa nditaren,
na pekegotem siran apiya sii ko kapepakaperagona kiran ko manga pereperan.
11 Petemek siran sa manga olibi a pekowaan sa lana
ago pegegik ko manga obas a pepangembaalan sa arak
ogaid na pepanga awaw siran bo.
12 Sii ko siti na pekeneg on so kapeperego o pepamatay
ago so kapenggoraok sa tabang o kikapapalian,
ogaid na da a ba pesenditan o Tohan sa ribat.
13 “So manga rarata a taw na petelikodan iran so sindaw;

di iran kekilala so manga okitokit iyan
aya pen o ba siran pekeden ko manga lalan iyan.
14 Amay ka pekelibabas na pembowat so talibono
na pepamonoon iyan so manga miskin ago so kikadodowaanan,
na igira a gagawii na pepamanekew sekaniyan.
15 So dii sebo na penayaon iyan so kapekaliboteng iyan
a aya katao niyan on na 'Da a mata a ba raken pekailay,'
na ipeseliba iyan a paras iyan.
16 Igira a miyakaliboteng na penegel somoled so tekew ko manga walay,
ogaid na sii ko kadadaondaw na manananggal siran sa walay a pelikay ko maliwanag.
17 Ka so kalangolangon iran na so makapal a maliboteng na aya iran kapipita;
malalayam siran ko manga piyakalekelek ko maliboteng.
18 “Ogaid na matag baden didi so marata a taw ko liyawaw o ig;

so lopa iyan na misisinta,
na da a sakataw bo a ba pesong ko asinda niyan a obas.
19 So pangolaon ago so mayaw na mapepakati iran so lomiyanag a giyaw,
na lagid mambo o kobor a pepakadaan iyan so manga baradosa.
20 Apiya so ina iran na kelipatan iran siran
na ken siran o manga oled;
di den ketademan so manga rarata
ka lagid siran o kayo a minidaropar.
21 Ka pinggagasab iran so manga balo
na da iran kapediin so manga babay a da makambabawata.
22 Ogaid na ikakamagas o Tohan so manga ala i gees a nggolalan ko bager iyan;
apiya pen o miyakambeken siran den na da a ba iran kapakatatangked ko kaoyagoyag
iran.
23 Masiken a mapekadeke siran o Tohan a gegedamen iran a da a ba kiran pekakaid,
ogaid na di niyan dii simaan so langon a okitokit iran.
24 Di bo katey a kakipangkat iran ogaid na keda siran bo;
kibaba siran ago ketimo a datar o manga ped;
kegarab siran a lagid o manga onga a pereperan.
25 Na, ba aden a makapetero sa di ini benar?
Ba aden a makapemataan sa pepamokeg ako baden?"
AYOB 25
Si Bildad
Mandiyadi na somimbag si Bildad a taw sa Sowah a tig iyan a
2 “So kadato ago so kalek na rek o Tohan;

pepakambekenen iyan so kalilintad sii ko pipeporoan a langit.
3 Ba kebilang so manga malaikat iyan?
Antawaa i di pekeliwanagan o sindaw niyan?
4 Andamanaya den i kakebaloy o taw a maontol ko kapegilaya on o Tohan?
Andamanaya i kakesoti o apiya antawaa a inimbawata o babay?
5 Ilaya ngka man, ka sii ko arangan iyan on na apiya so olan na di masindaw
aya pen o ba soti so manga bitoon;
6 Na taralebi pen a di soti so manosiya
a matag baden oled ko kapegilaya niyan on!"
AYOB 26
Ayob
Na somimbag si Ayob a tig iyan a
2 “Sayana a mala a kiyatabangi ngka ko taw a da a kapekagaga niyan!

Sayana a mapiya a kiyasabeta ngka ko da a bager iyan!
3 Sayana a mapiya so manga osiyat ka ko da a ongangen iyan
ago so tanto a mala a sabot ka a miyapayag ka raken!
4 Antawaa i miyakaogop reka mengat sangkanan a manga katero?
Na antawaa niyawa i miyakatero a nggolalan ko ngari i ka?
5 “So manga arowak o miyamatay na pepananabaden

sii ko darpa iran ko didalem a ig a rakes o langon o komakaden roo.
6 So kaden o miyamatay na mamamayas ko Tohan;
kasasawaan angkoto a darpa a kabinasaan.
7 Pekeyaten iyan so manga langit sa pagotaraan ko darpa a da a ndodon,
na aalangalangen iyan so doniya ko da den.
8 Pepamotosen iyan so manga ig ko manga gabon iyan,
na di ini penga bebengkag sabap ko kapened iran.
9 Pesepengan iyan so mbibiring a olan
a pekeyaren iyan on so manga gabon iyan.
10 Tiyandaan iyan sa goris so liyawaw o ig
a aya temanaan a ipageelet ko maliwanag ago so maliboteng.
11 Tatabekeren so manga polaos o langit
a pepanga bebengang ko di niyan kiran dii kambongeti.
12 Nggolalan ko kapaar o Tohan na pekolikaon iyan so ragat,
na nggolalan ko kapasang iyan na bininasa niyan so piyakalekelek a binatang a si Rahab.
13 Nggolalan ko kapengginawa niyan na dii teid so kawangkawangan;
so lima niyan na aya miyakalapek ko pepelagoy a nipay.
14 Ogaid na maito ai a sambesamber o manga galebek iyan,
a matag baden kapangetongetong a miyaneg tano makapantag rekaniyan.
Na antawaa den i pekasabot ko dalendeg o kapekagaga niyan!"
AYOB 27
Na initaros den i Ayob so di niyan dii teroon a
2 “Sii ko Ingaran o oyagoyag a Tohan a lipas iyan so manga kabenar aken

ago so Lebi a Mabager a piyakapait iyan so niyawa ko
3 Na ipesepa aken a taman ko kasisii raken o kaoyagoyag aken
ago sisii ko ngirong aken so napas o Tohan
4 Na di den petero so ngari aken sa marata
na di den mbengat so manga modol aken sa kapamagakal.
5 Di ko den terimaan a sekano na aya benar;
taman sa matay ako na petindegan ko so kada a sala aken!
6 Tatapen ko so kapakaoontol aken na di aken den ai pekalepasen;
di ako mapesongka o poso aken taman ko kaooyagoyag aken pen.
7 “Pengnin ko a madaneg so ridoay aken a lagid o manga rarata a taw,

ago so soranga aken a lagid o di maontol!
8 Ka antonaa i keinam o baradosa amay ka keteped,
amay ka bawiin o Tohan so niyawa niyan?
9 Ba pekinega o Tohan so kapenggoraok iyan
amay ka makatalingoma on so karomasayan?
10 Ba niyan ikebabaya so Lebi a Mabager?
Ba niyan ketalowi so Tohan ko apiya antonaa wakto?
11 “Ndaon ko sekano makapantag ko kapaar o Tohan;

pagosain ko rekano so manga okitokit o Lebi a Mabager.
12 Ogaid na o langon kano den sii miyakamasa
na ino niyo raken pen dii teroa angkai a da a oked iyan?
13 “Peyagen ko rekano o antonaa i bagian o marata a taw a itetalagad on o Tohan,

a so kawali niyan a imbegay ron o Lebi a Mabager:
14 Apiya i kadakel o manga wata iyan na aya keoriyanan kiran na pematay a bono;
so manga mbawataan iyan na di siran den kediyangkaan sa pangenengken.
15 Siran oto a makapegoyag sii na pekapatay kiran so paniyakit,
na di siran ipemboko o manga karoma iran.
16 Apiya pen o miyakatabotod so marata a taw sa pirak a lagid o bayanek
ago miyamanimo sa manga nditaren a lagid o aampiren a bote
17 Na so manga oontol na aya pemanolot ko miyapanimo iyan,
na so da a manga sala iyan i makapembagibagi ko pirak iyan.
18 So walay a pembalain iyan na magegeba a lagid o walawalay o paroparo
ago lagid o lawig a pimbaalan o petemeng.
19 Pekatorog sekaniyan a kawasa,
ogaid na di niyan den ai kapeparomanan;
amay ka mbekaren iyan a manga mata niyan na langon den ai miyada.
20 Pendaseng rekaniyan so manga piyakalekelek a lagid o bagiyaw,
na pekibayog sekaniyan o sobosobo sii ko kagagawii.
21 Pekibomber sekaniyan o ndo a poon sa sebangan na keda,
ka pepayopasen o ndo a poon ko darpa iyan.
22 Pekibetay ini rekaniyan sa da den a ba on kapedi
sii ko kapepanamari niyan malagoy ko bager iyan.
23 Pendaopay so ndo a pepagongatongat rekaniyan
a perigeng on pen sii ko kapepalagoy niyan.
AYOB 28
Piyodi i Ayob so Ongangen
"Aden a manga mina sa pirak

ago aden a manga tonawa sa bolawan.
2 So potaw na pekekowa poon ko lopa
na so tombaga na peketonag a poon ko manga ator.
3 Pesindawan o manga taw so maliboteng
sii ko kapembabanoga iran ko manga ator a aden a mina on ko didalem o lopa
sii ko lebi a makapal a maliboteng.
4 Mawatan ko kibabalingan o manga taw
na pepangalot siran sa manga mina ko kikatatanaw a manga darpa.
Roo ko manga galebo na di siran dii nggalebek a kibobolongen
a kitatambitin ko manga tali a pekisasayosayod.
5 So lopa na aya pegtoan o manga pangenengken,
ogaid na sii ko didalem iyan na di ini dii mbaroba a lagid o dii makanggolalan ko apoy.
6 So manga ator roo ko didalem o lopa na katatagoan ko manga montiya a sapiro,
na ron mambo so bayanek a masasaog a manga bolawan.
7 Da a banog a ba matao sangkoto a lalan a ipesong ko mina,
ago da den a agila a ba on miyakailay.
8 Da a mawaraw a binatang a ba on miyakapanada,
na da a arimaw a ba roo miyakapagenebeneb.
9 Pepanasangan o manga taw a pamimina so manga tetegas a lakongan,
na pekelotan iran so manga itado o manga palaw.
10 Sii ko kapelebowi ran ko manga lakongan
na pekeilay iran so oman i mala on i arga.
11 Pekelotan iran apiya so pekepoonan o manga lawasaig,
na ipenggemaw iran ko maliwanag so pageemaan a manga nganin.
12 “Ogaid na anda ketoon so ongangen?

Anda matatago so kapakasabot?
13 Di katawan o manga taw so darpa iyan
ka di ini ketoon sii ko kakadenan o manga oyagoyag.
14 Pitero o pitidaleman ko ragat a 'Da raken';
na tig o kalodan a 'Kena a ba sisii raken.'
15 Di ini mapemasa a lombos a bolawan,
aya pen o ba so arga iyan na matimbang a pirak.
16 So lebi a mapiya a bolawan sa Opir
o di na so manga ala i arga a montiya
na di pekarepeng ko arga iyan.
17 So bolawan o di na so gilanggomilang a batowintan na di kiyabay ko ongangen
aya pen o ba ini mapemasa a manga montiya a idadaporan ko bolawan.
18 Apiya so manga pirlas ago so montiya a haspir na di on pekatingki;
so arga o ongangen na makalalawan ko manga robi.
19 Di on kiyabay so lebi a mapiya a topas a poon sa Itiyopiya;
di ini ketimbang a lombos a bolawan.
20 “Anda bes pekapoon so ongangen?

Anda matatago so kapakasabot?
21 Ka pageemaan ai ko manga mata o oman i baraniyawa;
apiya so manga papanok sa kawang na di iran keilay.
22 So Kabinasaan ago so Kapatay na tig iran a
'So bo so totol on i minisampay ko manga tangila ami.'
23 “Sasaboten o Tohan so lalan a ipagokit ko ongangen;

sekaniyan bo i matao ko katatagoan on.
24 Ka pekeilay niyan so manga kiyaposan ko doniya
na pepegamasamasen iyan so langon taman a matatago ko atag a langit.
25 Isako imbegay niyan ko ndo so bager iyan
ago takesen iyan so kala o manga ragat,
26 Isako pakambekenen iyan so diyangka o manga oran
ago mbaalan iyan so lalan o kilakilat,
27 Na sangkoto a masa na miyailay niyan so ongangen na piyagamasamas iyan;
piyariksa iyan so arga iyan ago piyakambeken iyan.
28 Na pitero iyan ko manga manosiya a
'So kalek ko Kadnan na giyanan i ongangen,
na so katalikodi ko marata na giyanan i kapakasabot.' "
AYOB 29
Na tomiyaros den tero si Ayob a tig iyan a
2 “Tanto aken a masisingayo so kapepaginetaw aken gowani

ko miyanga iipos a manga olanolan,
sii ko manga gawii a kasisiyapa raken o Tohan
3 Isako somisindaw so solo iyan ko olo aken
a pepakaliwanagan ako niyan ko kapelalakaw aken ko maliboteng!
4 Giyanan so manga gawii a kaoodara raken
gowani ko kararakmati ko pamiliya ko ko di on dii kapakingginawai o Tohan.
5 Sa masa oto na sisii raken pen so Lebi a Mabager
na lilibeten ako o manga wata aken.
6 Madakel i gatas so manga sapi aken ago kambing
na so manga kayo aken a olibi na pegododan ako iran sa mala a lana.
7 “Igira a somiyong ako ko gimowa o siti

a miyontod ko pekelimodan ko manga pelokelokesen
8 Na penggikas so manga kangodaan ko kapekeilaya iran raken
na pepamanindeg so manga totoa sa kapepagadati ran raken.
9 Petereg tetaro so manga olowan
na pendapengen iran a lima so manga ngari iran.
10 So kiseselaan na pepekarenek,
na so manga dila iran na pekeparkat ko pelak iran.
11 “Saden sa pepekaneg makapantag raken na pepodin ako niyan,

na so siran oto a pepekailay raken na pembantogen ako iran.
12 Ka pepanabangan aken so manga miskin igira a penggoraok sa tabang,
ago so pen so manga ilo a da a ba on pekaogop.
13 Pepanalamatan ako o manga taw a magaan den matay,
na pepakapiyaan aken so ginawa o manga balo.
14 Somiyolot ako sa kaontol a aya ko nditaren,
na so kokoman na aya ko kimon ago sorban.
15 Saken i mata o manga bota ago ai o manga sadir.
16 Lagid ako o ama o kikakokorangan,
na ipetindeg aken so kabenar o mananangga.
17 Peropeten ko so pangitegan o manga baradosa
na pengganderen ko poon ko manga ngipen iran so pepanga sisikem iran.
18 “Samaoto na aya mapipikir aken na 'Petay ako sii ko walay aken

a so manga gawii aken na lagid sa kadakel o manga peted sa ragat.
19 So manga bekaw aken na mirarampay ko manga ig
na peketomes o namog so manga sapak aken ko mababasa gawii.
20 So bantogan aken na baden dii pagomareg,
na lalayon pekebagowan so bager aken.'
21 “Gowani ko kapepangosiyat aken na romerenek so manga taw
a pepamamakineg ko di aken dii teroon.
22 Sii ko kapepekaipos aken tero na da a ba iran on mipegoman.
Samaoto na pegetek so manga katero aken ko manga tangila iran,
23 Na penayaon iran oto a lagid o kapenayawa o manga taw ko tarintik,
ka pesingayoon iran a lagid o oran sii ko pangolaon.
24 Igira a kiyadaan siran sa sarig na pelangasan ko siran,
na miyakapangoyat kiran so kaliwanag o paras aken.
25 Pinggonanao aken siran ago piyagolowanan;
komiyaden ako kiran a datar o dato a maaped ko manga sondaro niyan
ago datar o pepekarinaw ko dii makamboko.
AYOB 30
"Ogaid na imanto na di ako dii pekaradiyaanan o manga taw a manga gongoda a di saken
a miyasodi aken so manga ama iran
a da aken bilangen a ba mapapatot a pekaogop ko manga aso a pepagipat ko manga
bilibili aken.
2 Antonaa i gona raken o bager o manga lima iran,
ka kiyadaan siran den sa kapekagaga?
3 Piyagti siran sabap ko kakokorangi kiran ago kapegongosi,
na pegenebeneb siran ko kikatataog a kabagabagas a manga darpa sii ko kagagawii.
4 Sii ko paket na pepanimo siran sa manga a raon a pamomolan a pepamangeto roo
ago penggaon siran sa manga gaar a makan iran.
5 Pembogaon siran a poon ko manga ped iran a maginged
a pelalisen siran a datar o ba manga tekew.
6 Petegelen siran komaden ko piyanga mamaraan a manga baogan
ago sii ko manga gireb ago sii ko seronsarongan o manga lakongan.
7 Roo ko kikatataog a manga darpa na petegaw siran a lagid o manga binatang,
ago dii timo ko didalem o manga paket.
8 Manga mbawataan siran o da a oked iyan ago da a kitadem kiran a manga taw!
Na piyamogaw siran ko inged.
9 “Na imanto na pepagongatongaten ako o manga wata iran a nggolalan ko bayobayok;

mimbaloy ako a iringa iran.
10 Ipekengingiri ako iran ago aawaten;
di siran keya sa kapendodai ran ko paras aken.
11 Imanto a kinowaan ako den o Tohan sa bager ago riyasay niyan
na da a panaransam iran ko ipekidia iran raken.
12 Petelandogen ako lomonggom o manga mondo a kangodaan;
peteanan iran sa manga litag so manga ai aken;
pepangembaal siran sa manga tambak a ipelikop raken.
13 Pepangalangan iran so lalan a ipegokit aken,
na pekegaga ako iran minasa sa da den a ba kiran pegogop.
14 Pekeseseb ako iran a pepamangokit ko mala a lebo ko ililinding raken,
na sii ko kiyagebaa iran on na pinggoronggorongan ako iran.
15 Kalalangkoloban ako o manga piyakalekelek;
pekidendeg so bantogan aken a lagid o ba pekibayog o ndo;
miyadadas so kamapiyaan aken a lagid o gabon.
16 “Imanto na pekepos so kaoyagoyag aken;

so manga gawii a kapekeromasay i makatetekes raken.
17 Igira a miyagagawii na pepamanakit so manga tolan aken;
da den a rintas o kapegalal o lawas aken.
18 Tanto a mabager a kapengginsinga o Tohan ko nditaren aken,
na petekesen iyan so lig o bangkala aken.
19 Inilampes ako niyan ko tonai na miyalagid ako o bayanek ago ombi.
20 “Pepananalo ako reka sa tabang, hey Tohan, ogaid na kena a ba ako ngka pesembaga;
igira a pepangadap ako reka na kena a ba ako ngka pesegipaa.
21 Masarangit a ipekidia ngka raken;
pesetroon ako ngka a nggolalan ko mala a kapaar ka.
22 Pepekibayog ako ngka ko ndo,
na pepakimbokebokelid ako ngka ko barabarat.
23 Na katawan ko a ipegarong ako ngka ko kapatay,
roo ko darpa a isesenggay ko langon a oyagoyag.
24 “Mataan a da a pekatana sa lima ko taw a mabibinasa

sii ko kapepananalo niyan sa katabangan ko kapakamboboko iyan.
25 Ba aken da misegad so manga taw a pekemamaregenan?
Ba da kerata a ginawa ko sabap ko manga miskin?
26 Ogaid na igira a iinamen aken so mapiya na pepekatalingoma so marata,
na igira a pegarapen aken so maliwanag na maliboteng i pepakatalingoma.
27 Di den melintad so kapekekolibog o poso aken;
gawii gawii den so kapekeromasay aken.
28 Pepegenebeneb ako ko domadatem a da den a ba on sindaw o alongan;
petindeg ako ko kalilimod a pepakitabang kiran.
29 Mimbaloy ako a pagari o manga lako
ago ingempeda o manga bengit.
30 Domiyagem so kobal aken,
na pepanenggaon so lawas aken.
31 So kotiyapi aken na pegosaren ko kapakamboko,
na so insi aken na pegosaren ko kalendag.
AYOB 31
"Miyakipesadanowai ako ko manga mata ko
sa di ako den magilay sa babay a rakes o gedi.
2 Ka antonaa i ikidia rektano o Tohan a Lebi a Mabager sa poro?
Antonaa i imbadal iyan rektano ko miyanggolaola tano?
3 Ba di kamoralaan ko manga baradosa
ago tomparak a kasiksaan ko siran oto a dii nggolaola sa marata?
4 Ba di pekeilay o Tohan so manga okitokit aken
ago pembilangen iyan so oman i lakad aken?
5 “Ba ako miyakapamokeg o di na miyakapanaliba?

6 Pengnin ko a timbangen ako o Tohan ko ontol a timbangan
ka ketokawan iyan a da a sala aken.
7 O miyakasilay ako a poon ko lalan iyan
o di na miyakigawi so poso aken ko miyailay o manga mata ko
aya pen o ba kiyadaketan sa dosa so manga lima ko
8 Na pengnin ko a makowa o ped a taw so miyapamola aken
ago mailang so manga pereperan aken.
9 “O miyabarayat so poso aken ko babay,

aya pen o ba ko inikasigi so karoma o siringan aken
10 Na pengnin ko a mabowayo o karoma ko so pereperan o salakaw a mama
ago marembang sekaniyan o ped a manga mama.
11 Ka o miyanggolaola ko anan na tanto a marata a maasiya,
a so dosa a disomala a kakokoma on.
12 Ka lagid anan o pekabinasa a apoy ko kanarakaan
a pekalengan ko langon taman a rek aken.
13 “O da aken peroa so kabenar o talasogoay aken a mama o di na babay

igira aden a minipenon iran raken
14 Na antonaa i sowaan ko amay ka makipegatobanga raken so Tohan?
Antonaa i isembag aken on amay ka somariyaan ako niyan?
15 Ba di so mimbaal raken sii ko roranan a wata i mimbaal kiran mambo?
Ba di sekaniyan i miteong rekami langon ko tiyan o ina ami?
16 “Ba ako minda megay ko masisingayo o manga miskin,

o di na piyakalepas aken so panginam o manga balo?
17 Ba aken inigaked so pangenengken aken
a da aken on pakambagiana so manga ilo?
18 Kena! Ka ipoon ko kangoda ko na pesiyapen ko so manga ilo,
na sii ko tenday a kaoyagoyag aken na di aken dii nggonanaon so manga balo.
19 Igira aden a miyailay aken a piyakapapatay sabap ko da a nditaren,
o di na so miskin a taw a da a gerab iyan
20 Na pepakayawan ko sekaniyan ko nditaren a pimbaalan a bombol o manga bilibili
aken,
na pepanalamatan ako niyan sa iklas ko poso iyan.
21 O kiyasalimbotan ko so ilo
ko katotokawi aken sa pegampil raken so kokoman
22 Na pengnin ko a mabadot so barokan aken ko waga ko
a mabelag ko sooran iyan.
23 Ka ipekelek aken so kasiksaan a poon ko Tohan,
na sabap ko kalek aken ko pangkatan iyan na di ako den makapenggolaola sa
lagid oto.
24 “O siyarigan aken so bolawan

o di na pitero aken ko lombos a bolawan a 'Seka i lomilinding raken,'
25 Aya pen o ba ko inikababaya so kala o kakawasaan aken,
a so mala a tamok a miyapantiyari o manga lima ko,
26 Na o mambo o inilay aken so alongan ko kapesinang iyan
o di na so olan a pegiseg sii ko kasigay niyan
27 A miyabarayat on sa masolen so poso aken
ago inarekan ko so lima ko a selasela kiran
28 Na giyanan mambo i kadostaan a disomala a kokomen,
ka aya maana niyan na miyakaongkir ako ko Tohan sa poro.
29 “Ba aken inikababaya so kiyabinasai ko ridoay aken

o di na inikela aken so kiyapakatalingoma on o morala?
30 Kena; da aken den pakandosaa so ngari aken
sa kipesintaan aken ko kaoyagoyag iyan.
31 Katawan o langon o manga talasogoay aken
a da den a ba da maosog ko pangenengken a inibegay aken kiran.
32 Da den a mananangga a ba aken piyakatorog ko manga lalan,
ka lalayon aken pepakabolosen ko walay aken so dii melayalayag.
33 Da aken pagemaa so manga dosa ko a lagid o pesowaan o ped a manga taw
a nggolalan ko kipetepoken aken ko sala aken sii ko poso aken
34 Sabap ko kalek aken ko kapesodia raken o madakel a taw
a kiyasabapan sa rominek ako ago da ako den liyo.
35 “O ba aden bo a pemakineg raken!

O ba ako bo masembag o Lebi a Mabager
ago midaptar o pesendit raken so manga inidimanda niyan raken sii ko ribro!
36 O miyagiyanan na mataan den a posain aken oto a ipepangandag,
ago tegoon aken ko olo aken a lagid o sangkad.
37 Na peyagen ko ko Tohan so oman i isa a pinggolaola ko;
na magadap ako rekaniyan a lagid o dato.
38 “O penggoraok so lopa aken ko kapesenditi niyan raken

ago so langon a pangaras on na miyabasa a lo
39 Na o miyalamed aken so manga pereperan on a da aken bayadi
ago piyakiimatay aken so manga kirek on
40 Na pengnin ko a mamangeto on so manga soroken a kena o ba trigo,
ago manga sampingit a kena o ba bantad."
Miyapos den so manga katero i Ayob.
AYOB 32
So manga Katero i Iliho
Mandiyadi na giyangkai a telo kataw a manga ginawai i Ayob na gominek siran
somembag ki Ayob ka kagiya miyakatomangked sekaniyan sa da a sala iyan.
2 Ogaid na si Iliho a wata o Barakil a moriyataw o Bos ago ped ko mbawataan o Ram na
tanto niyan a kiyararangitan si Ayob ka kagiya ibibilang iyan a sekaniyan i maontol a di
so Tohan.
3 Kiyararangitan iyan pen so telo kataw a manga ginawai i Ayob ka kagiya da a ba iran
miyatoon a kidaowa ki Ayob a lagid o ba iran miyatarima a so Tohan i miyaribat.
4 Miyakanayaw si Iliho taman sa miyakapasad siran tero ka matoa siran a di sekaniyan.
5 Ogaid na kagiya mailay niyan a da den a ped a kisembag angkai a telo kataw na
mimborngat so gani niyan.
6 Na pitero i Iliho a wata o Barakil a aya moriyataw o Bos a
"Mangoda ako na manga lokes kano den.

Giyanan i sabap a maaleken ako
a da aken maraw o ba ko rekano teroa so katawan ko.
7 Aya katao ko ron na 'Aya patot a makapetero na so manga lokes,
ka so minitolod a idad iyan i makapengendao sa ongangen.'
8 Ogaid na so niyawa a sisii ko manga taw
a minisengaw ron o Lebi a Mabager i pepekabegay kiran sa sabot.
9 Kena bo a ba so manga lokes i maongangen,
na kena bo a ba so minitolod i idad i pekasabot ko ontol.
10 “Kagiya ka maoto na pamakinega ko niyo

ka pagosain ko rekano so pamikiran aken.
11 Ilaya niyo man, ka sesabar ako sii ko di niyo dii katero;
piyamakineg aken piyapiya so manga daowa niyo
sii ko di niyo pen dii kambanog sa manga katero.
12 Mataan den a tiyolangedan ko sekano,
ogaid na da a isa rekano bo a ba miyakapemataan sa miyaribat si Ayob;
da a ba rekano miyakasembag ko manga daowa niyan.
13 O ba niyo teroa a 'Miyakenal ami so ongangen,
ogaid na so bo so Tohan i makapoporiba sa miyaribat sekaniyan, a kena a ba
manosiya.'
14 Kena a ba saken i kiyaimponan i Ayob ko manga katero iyan;
sabap roo na di ako ron sembag a ba lagid o kasembag iyo.
15 Kiyayaan kano a di den pen pekasembag;
da den pen a ba niyo mapetero.
16 Miyakanayaw ako baden; ogaid na sabap sa romerenek kano den imanto
a makatitindeg roo baden a da den a ped a mapetero iyo
17 Na saken den i petero;
peyagen ko mambo so pamikiran ko.
18 Ka mapepeno ako a manga katero,
na pembaasen ako o niyawa a sisii raken.
19 Sii sa soled na lagid ako o popooten a arak,
a lagid o bago a kobal a petegoan sa arak a pembeto sa tago.
20 Disomala a petero ako den kaan ako makasengka;
mbengaten ko a modol aken a sembag.
21 Da a pagampilan ko,
aya pen o ba aden a pagorayorain.
22 Ka di ako matao magorayoray,
na o di aken oto dii nggolaolaan na magaan ako den siksaan o Miyaden raken.
AYOB 33
"Na imanto, hey Ayob, na pamakinega ngka so manga katero aken;
tagoa ngka sa ginawa so langon a peteroon ko.
2 Miyabengat aken so ngari aken
sa kapeteroa ko reka ko sisii ko pamikiran ko.
3 Pepekapoon so manga katero aken ko matito a poso aken
na iklas so di aken dii kateroa ko katawan aken.
4 So Roh o Tohan i miyaden raken,
na so sengaw o Lebi a Mabager i pepangoyag raken.
5 Na den, sembaga ko ngka o kegaga ngka;

tiyagara ngka so manga daowa ngka na pangatobang ka raken.
6 Ilaya ngka man, ka ndatar ta ko hadapan o Tohan;
linimbag ako mambo a poon ko bote.
7 Sabap roo na o ba ako ngka kaleken;
kena o ba ko seka ndaaga.
8 “Ogaid na mataan a miyatero o ka ko kapekenega ko ron a

9'Soti ako a da a dosa ko;
lompiyo ako a da a kasalaan aken.
10 Ogaid na peketoonan ako o Tohan sa manga sabap a pekisondol iyan raken,
na ibibilang ako niyan a ridoay niyan.
11 Riyantayan iyan so manga ai aken,
na totoliken iyan so langon a di aken dii nggolaolaan.'
12 “Ogaid na teroon ko reka, Ayob, a miyaribat ka sii;

ka so Tohan na lebi a mala a di so apiya antawaa taw.
13 Na ino ngka rekaniyan pesenditen
a di niyan den sembagen so pepanonen on o taw?
14 Ka mataan den a dii tero so Tohan ko mbarambarang a okit
apiya pen o di oto masasarino o manga taw.
15 Di sekaniyan dii tero a nggolalan ko manga taginepen
ago manga pangingilain sii ko kagagawii
igira a piyangenepan a torog so manga taw
sii ko kaiiga iran ko manga katri iran.
16 Pepayagen iyan kiran so manga lalag iyan
na pepangangaleken iyan siran ko manga lalangan iyan
17 Kaan iyan mapakatalikod so taw ko manga rarata a galebek iyan
ago mapakalikay niyan pen ko kapepangimporoan
18 Ago an iyan milidas so niyawa niyan ko kabinasaan
ago so kaoyagoyag iyan ko kapataya on a pedang.
19 Liyo ron pen na pepakatanoren o Tohan so taw a nggolalan ko kasasakit sii ko igaan
iyan
ago so da a rintas iyan a kaaalal o manga tolan iyan
20 Sa taros a ipekegowad iyan so pangenengken;
apiya so lebi a mapiya a pangenengken na di niyan kebayaan.
21 Dii merakowag so lawas iyan
na mileletaw so manga tolan iyan.
22 Pepekarani so kaoyagoyag iyan ko darpa o miyamatay;
pepanayaon o Malakalmaot so niyawa niyan.
23 “Ogaid na o aden a pekaoma on a malaikat a tebang rekaniyan,

a isa ini ko nggibowan a manga malaikat o Tohan
a mapayag iyan ko taw o antonaa i ontol a penggolaolaan iyan
24 Na pengalimo rekaniyan so Tohan a peteroon iyan a
'Lidasen ka sekaniyan ko kakeolog iyan ko darpa o miyamatay
ka miyakatoon ako sa ipagaon rekaniyan.'
25 Na giyoto a mapembago so sapo iyan a lagid o wata;
pekaasal ai a datar o sii ko manga gawii ko kangoda niyan.
26 Igira a pepangangarapan sekaniyan na pegamponen o Tohan;
pekeilay niyan so paras o Tohan sa kapekebabaya,
na pekiasal o Tohan so kapagiinontolan iyan.
27 Na peteroon iyan ko madakel a taw a
'Miyakandosa ko; binibid aken so matito,
ogaid na da raken danegen so mapapatot raken.
28 Siyabet o Tohan so niyawa ko ko kapepanog iyan ko darpa o miyamatay
na pepaginetaw ako sii ko maliwanag.'
29 “Mataan a pepeparomanan ai langon nggolaola o Tohan ko taw.

30 Pepakalidasen iyan so niyawa niyan ko kapekasong iyan ko darpa o miyamatay
kaan sekaniyan kaliwanagi o sindaw o kaoyagoyag.
31 “Na den, tolangedi ako ngka, Ayob, na pamakinega ko ngka;

rerenek ka, ka petero ako pen.
32 Ogaid na o aden a mapetero o ka na sembaga ko ngka;
tero ka, ka kabaya aken a mapakabenar ka.
33 Ogaid na o da, na ba ka den rerenek
na pamakineg ka raken ka pengendaon ko seka sa ongangen."
AYOB 34
Na tomiyaros tero si Iliho a tig iyan a
2 “Pamakineg kano raken, hey sekano a manga oongangen;

tagoa niyo sa ginawa so manga katero aken, sekano a manga ala i sowa.
3 So dila na peteam ko mapiya a pangenengken
na lagid oto mambo so kapetokatokawi o tangila ko kabebenar o manga katero.
4 Kagiya ka maoto na pariksaan tano sa ginawa tano o antonaa i benar;
katokawan tano bo o antonaa i mapiya.
5 Ka pitero i Ayob a 'Da a sala aken,
ogaid na da ako pakaokita o Tohan ko kokoman.
6 Apiya pen maontol ako na ibibilang ako a bokeg;
di den kebolongan so kiyapalii raken o gasa iyan
apiya pen da a sala aken.'
7 “Ba aden a miyailay niyo a taw a datar i Ayob

a ipeseyan iyan so kapepagitowitoa niyan ko Tohan sa kapeginom iyan sa ig?
8 Di sekaniyan dii makipelomameka ko manga baradosa
ago dii makipagepeda ko manga rarata a taw.
9 Ka tig iyan a 'Da a gona niyan ko taw
so kapetepengi niyan somoat ko Tohan.'
10 “Na pamakinega ko niyo a sekano a somasabot a manga mama.

Mostahil ko Tohan so kanggolaola sa marata;
di kepakay o ba makandosa so Lebi a Mabager!
11 Ka pembadalan iyan so taw ko manga pinggolaola niyan
ago ipetena iyan on so patot ko manga okitokit iyan.
12 Matamataan den a di penggolaola so Tohan sa ribat
aya pen o ba bibida o Lebi a Mabager so kokoman!
13 Antawaa i tomiyoro rekaniyan a komikibir ko doniya?
Antawaa i miyakitandingan on ko maklok?
14 O bawia o Tohan so Roh iyan ago napas
15 Na pematay so langon o manga baraniyawa
na pembaloy peman so manosiya a bayanek.
16 “O aden a sabot ka, Ayob, na pakinega ngka ini;

pamakinega ngka so manga katero aken.
17 Ba ngka bes pipikira a makapendato so Tohan o ipekegowad iyan so maontol a
kokoman?
Ba aya ngka dii teroon na miyaribat so Lebi a Maontol a Tohan?
18 Ba di sekaniyan i petero ko manga dato a 'Da a oked iyo,'
ago sii ko kiseselaan a 'Manga rarata kano!' ?
19 Di niyan pagampilan so manga olowan
aya pen o ba niyan ramigi so manga kawasa a di so manga miskin,
ka palaya siran den pimbaalan o manga lima niyan.
20 Sii ko sakotika na pepamatay siran ko look a gawii;
pekokogen o Tohan so manga taw na pepanga dadadas siran;
so manga ala i gees na pepamakadaan a da osari sa lima a manosiya.
21 “Ka pegilain o Tohan so manga okitokit o manosiya;
peginengkaan iyan so oman i kapeko kabeter iran.
22 Da den a domadatem o di na makapal a maliboteng
a ba on makapetepok so baradosa ko kapekeilaya on o Tohan.
23 Di den kailangan a petendo so Tohan sa oras
a mawit so taw ko hadapan iyan sa kakokoma niyan on.
24 Ka peropeten iyan so manga ala i gees sa da den a ba somariya
na pesambian iyan siran sa salakaw.
25 Kagiya katawan iyan so di iran dii nggolaolaan
na pendaagen iyan siran sii ko kagagawii na pepanga bibinasa siran.
26 Ipendaneg iyan kiran so kamarataan iran
sii ko kamamasaan o manga taw
27 Sabap sa tiyalikodan iran so kaoonoti ran rekaniyan
na da iran sabota so apiya anda ko manga okitokit iyan.
28 Sabap kiran na miyategel so manga miskin mamangni sa tabang ko Tohan
na miyaneg iyan so kapenggoraok iran.
29 Ogaid na o rerenek sekaniyan baden na antawaa i pekadaway rekaniyan?
Na o dingil sekaniyan na antawaa i pekailay rekaniyan?
Apiya pen oto na ndatar so sakataw ago so nasiyon a ipepaar iyan,
30 Ka ipesepar iyan so kapakapendato o baradosa
kaan iyan di kelitagi so manga pagtaw.
31 “Hey Ayob, ba ngka miyatero ko

Tohan a
'Miyadaneg ako den na di ako pendosa peroman,'
32 O di na 'Pakiilay ngka raken o antonaa i karibatan ko a da ko makilala,
na o miyakasela ako na di aken den peparomanan nggolaola'?
33 Ba ngka pepantonen ko Tohan a so ipendaneg iyan reka na makaaayon ko kabaya a
ka?
Ba giyanan i sabap a pegenda ka teobat?
Seka den i pekakokom sii a kena a ba saken.
Na den, teroa ngka rekami o antonaa i pamikiran ka.
34 “So manga taw a somasabot ago so manga oongangen a pepekaneg raken

na peteroon iran raken a
35'Si Ayob na dii tero sa da a katawi niyan on;
da a moayan o manga katero iyan.'
36 Mataan a kidayon den so kapetiyobaa ki Ayob taman sa kaposan
sabap ko kapepanembag iyan a lagid o marata a taw!
37 Inipagoman iyan so kasosopak ko manga dosa niyan;
sii ko kamamasaan tano na di niyan dii sodiin so Tohan
ko di niyan on dii kapanarotaroi."
AYOB 35
2 “Hey Ayob, ba aya mapipikir ka na ontol so kiyateroa ngka on a
'Makabebenar ako a di so Tohan,'
3 O di na so kipegiseen ka ko Tohan a
'Antonaa i gona reka o di aken kapakapendosa
ago antonaa i osba niyan raken?'?
4 “Na, saken i pekasembag reka

ago sii pen ko manga bolayoka a ka.
5 Langaga ngka so langit
na nggedagedaa ngka o ay kaporo o manga gabon ko kaporoan ka.
6 Andamanaya i kakenansiki ko Tohan o di ngka dii kapakandosa?
O pepekasela ka sa madakel na antonaa i di ngka rekaniyan dii nggolaolaan?
7 O magiinontolan ka na antonaa i pekibegay ngka rekaniyan sangkai a okitokit,
o di na antonaa i pekekowa niyan a poon reka?
8 So di ngka dii kambaradosa na sii bo pekanansik ko lagid ka a manga manosiya,
na so kapagiinontolan ka na sii kiran bo pekatabang.
9 “Pepekagoraok so manga taw sabap ko kapened o kasosonsingi kiran;

pepamamangni siran sa tabang sabap ko kapaar o manga ala i gees.
10 Ogaid na da den a ba kiran petero sa 'Anda so Tohan a Miyaden raken
a pembegay rektano sa manga idaida ko kagagawii,
11 A aya rektano pepangendao sa madakel a di sii ko manga binatang ko doniya,
ago pepakaongangenen tano niyan a di so manga papanok sa kawang?'
12 Na igira a miyakagoraok siran na di sembag so Tohan
ka petekabor siran a manga baradosa.
13 Mataan a di niyan pekinegen so da a oked iyan a pangni iran;
di ini tegoon sa ginawa o Lebi a Mabager.
14 Aya pen o ba ka niyan pakinega, Ayob,
ko di ngka dii kateroa a di ngka sekaniyan keilay,
ago so panon ka na miniadap rekaniyan den,
na penayaon ka sekaniyan baden imanto,
15 A aya pipikiren ka na di pendadaneg so Tohan sii ko rarangit iyan,
ago di niyan peginengkaan so kambaradosa.
16 Da a bali o di ngka dii kamberak, Ayob;

da a peleng ka ko madakel a di ngka dii teroon."
AYOB 36
2 “Panginsabari ako ngka sa di matey na pangendaon ko seka,

ka aden pen a mapetero aken a ipemayandeg ko Tohan.
3 Mala so katao aken, na pagosaren ko so ilmo aken
sa kapemataani aken on a maontol so Tohan a aya raken Miyaden.
4 Ketangked ka a da den a ba di benar ko di aken reka dii teroon,
ka sii ko hadapan ka so madidiyangka i katao.
5 “Ilaya ngka man, ka mala i kapaar so Tohan,
ogaid na da a taw a ba niyan dii sodia;
mala sekaniyan i gees a di den kealin so niyat iyan.
6 Di niyan pakapegoyagen so manga baradosa,
ogaid na ipembegay niyan ko manga miskin so kabenar iran.
7 Di niyan pelikatan sa mata so manga oontol,
na pakapendatoon niyan siran a ped o manga dato
ago ipepangkat iyan siran sa taman sa pakataman.
8 Ogaid na o papatonga so manga taw a manga rantay
a iiketan siran o manga karomasayan
9 Na pepayagen iyan kiran o antonaa i miyanggolaola iran,
a so kiyapakasela iran ko katatakabor.
10 Pepakisabotan iyan kiran ai kaan iyan siran mapakaontol,
na ipesogo iyan kiran a talikodi iran so kamarataan iran.
11 O pakinega iran so Tohan ago pangongonotanan iran
na mipeginetaw iran so lamba ko omor iran a tetagompiya
ago mapipiya a ginawa iran.
12 Ogaid na o di siran pemakineg na mbonoon siran a pedang
ago pepamatay ko kada a sabot iran.
13 Ka siran oto a pepamangongkir ko Tohan
na petetapen iran so gani ko poso iran,
na di siran nggoraok sa tabang
apiya sii ko kapesiksaa niyan kiran.
14 Pepamatay siran a manga kangodaan pen
a miyailang so kaoyagoyag iran ko piyakayaya a kapepaginetaw.
15 Ogaid na pepanabangan o Tohan so pepanga rarasay a nggolalan ko kaperasaya kiran,
na pendolonen iyan siran a nggolalan ko kapepakaregeni kiran.
16 “Mataan a kabaya o Tohan a pokasen ka niyan ko kamaregenan ka

ago pagowiten ka niyan ko madaya a darpa a da a ba on simoket
a ron mapepeno so lamisaan ka sa lebi a manga pipiya a pangenengken.
17 Ogaid na imanto na aya mibebensek ko pamikiran ka na so kapendadaneg a patot ko
manga rarata;
aya ngka bo tatagoon sa ginawa so mipantag ko kapekokoma ago kapendanega kiran.
18 Di ngka peperoa o ba so gani ngka i kasabapan ko kapesodiya ngka ko kapendanega
reka o Tohan
aya pen o ba ka mapakasilay o karegen o kararasay ngka a aya reka ipagaon.
19 Ba so kakawasaan ka
o di na apiya so langon o bager ka na pekapanabang reka ko kareregeni reka?
20 Di ngka pangingindawa so kagagawii
a so masa a kapembinasaa ko manga taw sii ko darpa iran.
21 Pananggilai ngka o ba ka makasangor ko marata,
ka minitana reka angkai a karomasayan kaan ka mapakatalikod o Tohan ko marata.
22 “Tanodi ngka o ay kala o kapaar o Tohan!
Antawaa i pepangendao a ba niyan lagid?
23 Antawaa i miyakanggonanao rekaniyan ko manga okitokit iyan
o di na miyakatero on sa 'Minggolaola ka sa ribat' ?
24 Di ngka pendarainonen so kapembantoga ngka ko manga galebek iyan
a pepodin o manga taw a nggolalan ko kapendikir.
25 Miyakailay so langon o manosiya ko miyanggolaola niyan,
ogaid na pekelangkaw tano baden a poon sa mawatan.
26 Oway, tanto a mala so Tohan a di so kakesaboti tano ron!
Di den kebilang so kadakel o manga ragon iyan.
27 “Sekaniyan i pepekasepot ko ig a poon ko doniya

na pembalowin iyan ai a manga tek a oran,
28 Na pegododen iyan ai a poon ko manga gabon
a mala a ipegoran iyan sii ko manga manosiya.
29 Antawaa i pekasabot ko kapekeyata niyan ko manga gabon,
o di na so dii kandadalendeg sii ko langit a kakadenan iyan.
30 Ilaya ngka so kipeparaken iyan ko kilakilat iyan ko mbalabala on
a pelindawan iyan so pitidaleman ko ragat.
31 Giyangkai a manga ala a galebek i ipendato iyan ko manga taw;
na pembegan iyan siran sa mitataralo a pangenengken.
32 Pegakopen iyan so kilakilat
na pesogoon iyan sa kasogata niyan ko titindoan iyan.
33 So dalendeg iyan i pepanawatewag ko kapekatalingoma o barabarat;
apiya so manga pangangayamen na pepakitokawan iran ai.
AYOB 37
Na sabap ko kapekatalingoma niyan na pekebowayo so poso aken
ago tanto a pekikiyakiyab sii ko rareb aken.
2 Pamakineg kano! Pamakinega niyo so dii kandedalendeg o sowara o Tohan,
a so dagedeb a pepekapoon ko ngari iyan.
3 Pesogoon iyan tomeras so kilakilat ko dalem o langit
taman ko pirowarowangan o doniya.
4 Maipos oto na keneg so kapendagedeb o sowara niyan,
a so piyakalekelek a dii kapeparti o lagam iyan.
Na igira a dii tero so sowara niyan
na kena a ba niyan penggenggena so kabager iyan.
5 Piyakamemesa so dii kandedalendeg o sowara o Tohan;
Di sekaniyan dii nggolaola sa manga ala a galebek a di tano den peraoten a gedageda.
6 Di niyan dii teroon ko giyaw a 'Patiyolog ka ko lopa,'
ago sii ko tarintik a 'Mabaloy ka a mabager a oran.'
7 Giyoto i kapepakatarega niyan ko langon a taw ko galebek iran
kaan iran makilala so kapekagaga niyan.
8 Samaoto na pendalong so manga iila a binatang
na tomatareg siran ko manga lekowa iran.
9 Pesember so sobosobo a poon ko darpa iyan;
so lebi a matenggaw na pepekaonot ko mabager a ndo.
10 Pepakategasen o sengaw o Tohan so manga oolad a manga ig,
na pepanga babaloy ai a ilo.
11 Pepakapenedan iyan sa ig so manga gabon,
na pepakaterasen iyan so manga kilakilat iyan sii kiran.
12 Pekeboliyok so manga gabon a pepakaantapen iyan siran
kaan iran minggolalan so apiya antonaa i ipesogo iyan kiran
sii ko langon a manga inged sa doniya.
13 Pepakatalingomaan iyan so manga gabon a misiksa ko manosiya
o di na so kapakaigi niyan ko kalopaan sa kaperakmati niyan kiran.
14 “Hey Ayob, pamakinega ngka ini;

gegenek ka ago nggedagedaa ngka so piyakamemesa a manga galebek o Tohan.
15 Ba ngka katawi o andamanaya i kipepearen iyan ko barabarat
ago so di niyan dii kapakakilakilata san ko manga gabon?
16 Katawan ka o andamanaya i kaaalangalang o manga gabon,
a giyoto so piyakamemesa a galebek o Tohan a madidiyangka i katao?
17 Seka a dii mamakayaw sii ko manga nditaren ka
igira a miyapakateid so doniya sabap ko abagat
18 Na ba ngka sekaniyan keogopi komayat ko kawang
a mategas ai a lagid o pagalongan a tiyonag a tombaga?
19 “Na pakitokawi ngka rekami, Ayob,

o antonaa i patot a peteroon ami ko Tohan;
Di kami ron pekadaowa sabap ko kalilibotengi ko pamikiran ami.
20 Ba patot a kapeteroa on a kebaya ako tero?
Opama ka petero so taw na mataan a kebinasaan sekaniyan!
21 Ogaid na imanto na da a ba pekatenteng ko alongan
a tanto a masindaw so kapesinang iyan
ko oriyan o kiyapayopasa o ndo ko langit.
22 Pepekapoon sekaniyan sa pagotaraan a pekindat a datar o bolawan;
pepekaoma so Tohan sii ko piyakamemesa a bantogan iyan!
23 Di tano peraoten a gedageda so tanto a mala a kabatowa o Lebi a Mabager;
tanto sekaniyan a maontol ko kapepangokom iyan
na di sekaniyan den peramiramig.
24 Kagiya ka maoto na ipekelek sekaniyan o langon a taw
ka di niyan tegoon sa ginawa so siran oto a pipikiren iran a maongangen."
AYOB 38
Somimbag so Allah ki Ayob
Samaoto na somimbag so Allah ki Ayob a nggolalan ko sobosobo a tig iyan a:
2 “Antawaa ka a pepekaliboteng ko ongangen aken

a nggolalan ko da a lalag on a manga katero?
3 Na den, tiyagara ngka a ginawa ngka a datar o tito a mama,
ka pagisean ko seka na kesembag ako ngka den!
4 “Anda ka matatago isako ibetad aken so kaoonayan ko doniya?

Teroa ngka raken o aden a sabot ka!
5 Antawaa i tomindo ko kala o doniya?
Antawaa i komiter on sa takes?
Teroa ngka o katawan ka!
6 Antonaa i kaoontodan o manga polaos iyan,
na antawaa i mitad ko ator ko rogo o onayan iyan
7 Sii ko kapeperengarengan magidaida o manga bitoon ko kapipita,
ago so kapepelalalis sa kapekebabaya o manga malaikat?
8 “Antawaa i lomikeb ko manga pintoan a miiren ko ragat

isako miboraya a poon ko pitidaleman ko lopa?
9 Siyayapan aken so ragat sa manga gabon
ago piyotos aken sa makapal a maliboteng.
10 Bitadan aken sa manga temanaan
ago tiyagoan aken sa manga pintoan a tatanggalan
11 Na pitero aken on a 'Sii ka bo taman na di ngka kelepas;
giyai bo i ketamanan ko manga ala a begel ka.'
12 “Hey Ayob, ba ngka miyasogo den so kapipita,

o di na minisenggay ngka ko sobo so darpa iyan
13 Kaan iyan kakapeti so manga rogo o doniya
a mikekeng iyan on so manga rarata a sisii ko maliboteng?
14 Sii ko dii kakelibabas na pekealin so paras o doniya a lagid o taro a peketombokan ko
tanda,
na pepekarayag so bontal iyan a lagid o manga warna o nditaren.
15 Samaoto na pelagoyan o manga rarata so kaliwanag
a pekagenggen kiran sa kanggolaola iran sa kapanganiyaya.
16 “Ba ka miyakasong den ko manga bowalan a pekepoonan o manga ig ko ragat,

o di na ba ngka kiyapanadai so pitidaleman ko kalodan?
17 Ba reka miyapakiilay so manga pintoan o kapatay?
Ba ngka miyailay so gimowa o maliboteng a darpa o miyamatay?
18 Ba ngka kiyasabotan o ay kaolad o doniya?
Teroa ngka raken o katawi ngka ini langon!
19 “Anda matatampar so gegenekan o maliwanag?

Anda komakaden so maliboteng?
20 Ba ngka siran kewit ko manga darpa iran?
Katawan ka so manga lalan a ipesong ko katatagoan kiran?
21 Katawan ka den, ka tanto a minitolod so idad ka!
Maaaden ka den ko da sii pen kaadena!
22 “Ba ka miyakasoled ko peteliyongan sa giyaw,
o di na miyailay ngka so manga rowang a petegoan sa ilo
23 A titiyagaren ko a para ko masa a kasamok
ko manga gawii a kambonoay ago katidawa?
24 Andamanaya i kapembembara ko kilakilat,
o di na so kapepakaneba ko ndo a poon sa sebangan sii ko doniya?
25 “Antawaa i komiyalot ko pegokitan o degan

o di na mitiyagar ko lalan o mabager a barabarat
26 Kaan iyan kapakiorani so lopa a da a mababaling on,
sii ko tanaw a darpa a da a taw ron
27 Sa kapekaigi niyan ko kabagabagas ago mamara a lopa
kaan on makato so manga otan?
28 Ba aden a ama o oran?
Antawaa i kiama ko pemangetek a namog?
29 Antawaa i ina o ilo?
Antawaa i dii mbawata ko giyaw a pepekapoon sa langit
30 Igira a pepekategas so ig a lagid o ator,
igira a dii mbaloy a ilo so liyawaw o kalodan?
31 “Ba ngka kebekes so sagorompong a manga bitoon a Pliyadis

o di na keboka so manga iket o Oriyon?
32 Ba ngka mapenggonanao so manga bitoon sii ko manga mosim iran
o di na keolini so mala ago so maito a laya?
33 Ba ngka katawi so manga bitikan a mapapaar ko manga langit,
ago ba ngka kiran mapekipaar so doniya?
34 “Ba ngka kepasong so manga gabon

kaan ka iran matomes a mala a oran?
35 Ba ngka kesogo so kapekiteras o kilakilat?
Ba reka ini peripot a tig iran a 'Katii kami bo' ?
36 Antawaa i somiyabap ko ongangen sii ko poso
o di na migay sa kapakasabot ko pamikiran?
37 Antawaa i aden a ongangen iyan sa kabilanga niyan ko manga gabon?
Antawaa i pekakelid ko manga pananagoay sa ig roo sa langit
38 A kesabapan ko kapembetik o bayanek
a pekebaloy a kikapoporon a bote a dii makapepeketa.
39 “Ba seka i pepanganop ko kekan o manga arimaw

ago pepekaosog ko pepanga aor a manga wata iran
40 Igira a lomeleko siran ko manga lowak iran
o di na magaayan ko maripes a manga otan?
41 Antawaa i pepekakan ko manga kakowak
igira a pepegenebeneb siran a pepanga aor
igira a pepamangi so manga pipis iran ko Tohan sa pangenengken?
AYOB 39
"Ba ngka katawi o ay kapembawata o manga iila a kambing roo ko palaw?
Ba ngka dii mbantayi so saladeng igira a dii mbawata?
2 Ba ngka dii mbilanga so manga olanolan taman ko di iran dii kambawata.
Ba ngka katawi so gawii a kapembawata iran?
3 Peleko siran ago ipelotad iran so wata iran,
na miyapos so balilit iran.
4 Pepekala ago pepekabager so manga wata iran ko dalem a kalasan,
na pepagawa siran ko ina iran na di ron den kesoy.
5 “Antawaa i miyotawan ko maila a kimar?

Antawaa i miyoka ko manga iket iyan?
6 Inisenggay aken on a darpa iyan so mitataog a kaden,
a so kabagabagas a lopa a aya niyan pembalingan.
7 Di niyan dii sodiin so kabobosigaw o siti,
na di sekaniyan pekaneg sa lalis o pendendeg.
8 Pepegenebeneb ko manga bobongan a aya niyan pepanateban
a pepangiloba sa apiya antonaa pepelolonaw.
9 “Ba magiyog so maila a todo a sapi sa kipenggalebeken iyan reka,

o di na ba keden ko kodal ka sii ko kagagawii?
10 Ba ngka kebalsani so maila a todo a sapi sa kipendadon ka on
aya pen o ba ngka mipangaras sii ko pangomaan ka?
11 Ba ngka sekaniyan kesarigi sabap ko mala a bager iyan?
Ba ngka on kisana so maregen a galebek ka?
12 Ba ngka iinama a sekaniyan i nggosod ko miyaragon ka
a penimoon iyan ko pegegikan ka?
13 “So ostris na ipepamarapak iyan so manga papak iyan sa kapekebabaya,

ogaid na da a ostris a ba pekalayog a lagid o talik!
14 So ostris na pegawaan iyan so manga orak iyan ko lopa kaan kapakayawi o peted.
15 Di niyan mapemikir o ba oto baden kadapoi a masasa,
o di na maopak o maila a binatang.
16 Di niyan dii indarainonen so manga wata iyan a lagid o ba kena iyan a ba rek;
di niyan tegoon sa ginawa a baden ilang so dokaw niyan
17 Ka rarampasan sekaniyan o Tohan sa ongangen,
na da niyan pakambagiana sa kapakasabot.
18 Ogaid na amay ka tikeras sa kapelalagoy niyan
na ba niyan den pekekayaden so koda ago so kokoda on.
19 Ba seka i migay ko koda ko bager iyan,

ago komiyokos ko lig iyan sa matilak a kaboray?
20 Ba ngka pepakatepaka a lagid o tarapan?
Pepakalekan iyan so manga taw ko matanog a kapekakeg iyan.
21 Pepamasig sekaniyan ko lopa sii ko balintad a ipekebabaya iyan so bager iyan,
na madilapet a kadadarabay niyan ko katidawa.
22 Ipesenga iyan so kalek, ka da den a ipekelek iyan;
di niyan teilisan so pedang.
23 So pananagoay sa manga gasa na pekidepidepi ko kilid iyan
a rakes o pekindat a kelong ago bangkaw o kokoda on.
24 Magaan a kapepelalagoy niyan a penanabaden sekaniyan ko kateterangi ron;
di makalalanat igira a pegoni so bogiyong.
25 Sii ko kapepakaoniya ko bogiyong na pepemisenga a tig iyan a 'Aha!'
Pekesarino niyan so katidawa roo sa mawatan,
ago so sowara o manga olowan a pepelalalis sii ko dii tidawaan.
26 “Ba seka i miyangendao lomayog ko banog

igira a ipekeyaw niyan so manga papak iyan a magagaw sa pagabagatan?
27 Ba pepekalantap sa poro so agila ko kapesogoa ngka on
sa kapeselag iyan ko kapalawan?
28 Pekeden sekaniyan ko pampang sii ko poroporo o palaw,
sii ko lakongan a aya niyan dii kotaan.
29 Roo sekaniyan peninimaan ko penga sasayab iyan;
a pekeinengka o manga mata niyan sa mawatan.
30 Dii timoan o manga garoda so badan a maatay,
na peginomen o manga wata iran so rogo iyan."
AYOB 40
Na pitero pen o Allah ki Ayob a
2 “Seka a pepenon ko Lebi a Mabager,

na ba ngka sekaniyan pekowai sa daway?
Seka a pekokom ko Tohan na sembag ka den!"
3 Mandiyadi na simbag i Ayob so Allah a tig iyan a
"Mataan den a da a oked aken!

Andamanaya i kakesembaga ko reka?
Dapengen aken a lima so ngari aken a iperenek aken.
5 Miyatero aken den so lawan pen ko wadib a peteroon ko,
na di aken pagomanan; da den a kisembag aken."
6 Mandiyadi na simbag o Allah si Ayob a nggolalan ko sobosobo a tig iyan a
7 “Tiyagara ngka a ginawa ngka a datar o tito a mama;

pagisean ko seka, na sembaga ko ngka!
8 “Ba ngka petepengi memataan a di ako maontol?

Ba ngka peteroa a miyaribat ako kaan ka makabenar?
9 Ba ka lagid o Tohan sa kapaar?
Ba makapendadalendeg so sowara ngka a lagid o sowara niyan?
10 O benar oto na soloti ngka a ginawa ngka sa bantogan ago pangkatan
ago nditari ngka a ginawa ngka sa menang ago tihaya.
11 Na ilaya ngka so oman i pepangimporoan
na mborngati ngka ko mala a gani ngka na go ngka babaan.
12 Oway, ilaya ngka siran na pakapangalimbabaana ngka;
lomega ngka so manga rarata san ko titindegan iran.
13 Lebengen ka siran langon ko lopa,
na kalabosowa ngka roo ko kobor.
14 O mapenggolaola ngka ini na saken den i podi reka,
na terimaan ko a so rek ka den a kapaar i pekasabet reka.
15 Ilaya ngka so mala a binatang a so Bihimot

a inaden aken a lagid o kiyaadena ko reka;
pepangangan sekaniyan ko otan a lagid o sapi.
16 Tanto a mala so kabager o witan iyan
ago so kapekagaga o manga sapo ko tiyan iyan.
17 Igira a petindeg so ikog iyan na lagid o kayo a sidro;
mabebekes so manga ala a ogat ko bobon iyan.
18 So manga tolan iyan na lagid sa kabager o tombaga,
na so manga ai niyan na lagid o manga polaos a potaw.
19 Sekaniyan i lebi a piyakamemesa a inaden o Tohan;
so bo so miyaden on i pekapatay ron.
20 So manga bobongan na aya pegtoan o peken iyan
a ron dii sola so langon a manga iila a binatang.
21 Pegiga sekaniyan ko atag o manga rarabong a kayo,
na dii tepok sii ko manga riripes a otan san ko babasokan.
22 So manga rarabong a kayo a makalilibet on sii ko kilid a lawasaig
na aya niyan pekesirongan.
23 Igira a miyakareges so lawasaig na di sekaniyan pekiringasa
ka makaririnaw a ginawa niyan apiya pen pendansal so ig ko paras iyan.
24 Ba aden a pekabota rekaniyan kaan iyan madakep,
o di na pekalitag on ago kekaningkiran iyan?
AYOB 41
"Ba ngka kekowa so bowaya a nggolalan ko banowit,
o di na keiketan ka a tali so dila iyan?
2 Ba ngka ketagoi sa kaningkir so simod iyan,
o di na kesaiti sa banowit so pangitegan iyan?
3 Ba sekaniyan reka makapengangampedian?
Ba ka niyan pagakoli sa manga ririnaw a katero?
4 Ba sekaniyan reka makipepasadanowai
a makipengongoripen reka ko tenday a omor iyan?
5 Ba ngka sekaniyan mipenggitagita a lagid o papanok,
o di na keiketan ka a ipelilang ko manga wata a ka a manga babay?
6 Ba pegakol mamamasaan rekaniyan so manga panginginseda?
Ba sekaniyan mapembagibagi o manga padagang?
7 Ba ngka kebangkawi so kobal iyan,
o di na ba pagotengi a osod so olo niyan?
8 O tanai ngka sekaniyan sa lima na ketademan ka so kiyapakandamar ka
na di ngka den penggolaolaan peroman!
9 Da a gona o kaiinama o taw ko kandakepa on,
ka apiya so kailaya niyan on na ipetelaw rekaniyan.
10 Kagiya da a ba pekaraw tekor ko bowaya
na antawaa den i makaraw raken mato?
11 Antawaa i pekasekat raken sa apiya antonaa den a kebayadan ko?
So langon taman ko dalem a doniya na rek aken.
12 “Di aken pelepasen maloy so manga bobon o bowaya,

so kapekagaga niyan ago so kapiya o bontal iyan.
13 Antawaa i pekalokedas ko maliliyawaw ko kobal iyan
o di na ba makaleseb ko dowa lapis a raben iyan?
14 Antawaa i kebenga iyan so ngari o bowaya
a maaneb o piyakalekelek a manga ngipen iyan?
15 So likod iyan na madakel a mararantar on a nap a lagid o manga kelong
a mabager a kapakandedeketa iran.
16 Oman i satiman on na masipeg ko ped iyan
a da den a ba on pekaletos a ndo ko pageleteletan iran.
17 Tanto a madades a kapakandedemeta iran
a miyakapipiketa a di mapakapembelabelag.
18 Pepekapoon on so manga kedab

igira a pepemisenga sekaniyan;
pesinar so manga mata niyan a lagid o kapesinar o kalibabas.
19 Pepekapoon so manga kadeg a apoy ko ngari iyan
a di ron dii meliyoliyo so manga kotokoto niyan.
20 Pegebel so manga sengaan iyan
a datar o kapegebel o bisol ko didalem o pendidi a koden.
21 Ipekedeg o manga waga so kapengginawa niyan
na peliliyo so apoy ko ngari iyan.
22 So kala a bager o lig iyan
na pepekaalap ko langon a pepekabalak rekaniyan.
23 Da den a malemek ko sapo iyan;
mategas ai a di mapegalinalin..
24 So poso iyan na mategas a lagid o ator;
oway, lagid sa kategas o galingan a ator.
25 Igira a dii mbowat na apiya so lebi a manga wawaraw na pepanga alek;
pepelagoyan iran igira a dii tebed.
26 So katidawa on o pedang na di on pekapali,
aya pen so bangkaw, gasa o di na osod.
27 Aya kapekegedama niyan ko potaw na datar o ragami,
ago so tombaga na lagid bo o repok a kayo.
28 So manga gasa na di niyan den ipelagoy,
na so ipepanalibat on a manga ator na datar rekaniyan bo o okap.
29 Sii rekaniyan na so bentol na lagid bo o satiman a ragami,
na ba niyan den pesingaan so sageseng o bangkaw.
30 So tiyan iyan na kasasapengan sa manga nap a lagid sa kagarang o miyanga oopak a
pinggan
a pepekatoris ko lapot a lagid o pangaras.
31 Pekolibogen iyan a ragat a lagid o pendidi a ig;
pakapemberoberotaan iyan a datar o lana ko kara.
32 Pepamangerap so iniokit iyan ko ig
a aya katao ron o taw na miyagbok so ragat sa mapoti.
33 Da a ba datar iyan ko doniya,
a so kaaden a da a kalek iyan.
34 Di niyan dii sodiin so oman i pepangimporoan a kaaden;
sekaniyan i dato ko langon iran a manga tangandag.
AYOB 42
Ayob
Mandiyadi na simbag i Ayob so Allah a tig iyan a
2 “Katawan ko a mapenggolaola ngka so langon taman;

da den a takdir ka a ba kebangen.
3 Iniise a ka raken a 'Antawaa ini a pepekalamok ko mosawir
aken a nggolalan ko da a sowa iyan a manga katero?'
Mataan den a miyakatero ako ko makapantag ko manga nganin a di aken sasaboten
a lebi a piyakamemesa a di so kaketokawi ko ron.
4 “Pitero o ka raken a 'Pamakineg ka imanto, ka petero ako;

pagisean ko seka na kesembag ako ngka den.'
5 Miyaneg den o manga tangila ko so makapantag reka,
ogaid na imanto na miyailay ka o manga mata ko.
6 Kagiya ka maoto na ipekeya aken so langon a miyatero aken
na di ako dii teobat a moontod ko bayanek ago ombi."
Polimposan
7 Kagiya matero ini o Allah ki Ayob na pitero iyan ki Ilipas a taw sa Timan a
"Pekerarangitan ko seka ago so dowa kataw a layok ka, ka kagiya da niyo teroa so benar
makapantag raken a lagid o pinggolaola o oripen aken a Ayob.
8 Imanto na kowa kano sa pito timan a mama sapi ago pito a manga bilibili na song kano
ko oripen aken a Ayob na korbana niyo ai a petotongen a ipesepaat para ko manga ginawa
niyo. Ipengangarapan kano i Ayob na pagamponen ko so pangni niyan na di aken rekano
ikidia so patot ko kalalalongan iyo, ka da niyo teroa so benar makapantag raken a lagid o
pinggolaola i Ayob."
9 Mandiyadi na ininggolalan i Ilipas, si Bildad ago si Sopar so inisogo kiran o Allah, na

tiyarima o Allah so pangangarapan i Ayob.
10 Na piyakaasal o Allah so katetagompiya i Ayob ko oriyan o kinipangangarapanen iyan

ko telo kataw a ginawai niyan, na bigan sekaniyan o Allah sa takep ko rek iyan gowani.
11 Na miyakaoma ki Ayob so langon a manga pagari niyan ago so manga babay niyan a
rakes o langon a matao ron gowani na miyatoang siran rekaniyan sii ko walay niyan.
Inipangalinggagaw iran sekaniyan ago pirinarinawan sabap ko langon a tiyoba a initana
on o Allah. Na miyamamegay rekaniyan so oman i isa kiran sa pirak ago sesatiman a
sising a bolawan.
12 Riyakmatan o Allah si Ayob ko kaposan ko kapepaginetaw niyan sa makalelebi a di sii

ko poonan iyan. Aden a sapolo ago pat nggibo a bilibili niyan, nem nggibo a manga onta,
dowa nggibo a pekesanganan a manga sapi ago sanggibo a kimar.
13 Aden pen a pito kataw a wata iyan a manga mama ago telo kataw a manga wata a
babay.
14 So kaka a wata iyan a babay na bitowan iyan sa Yamimah, so ikadaowa na si Kisiyas
ago so ikatelo na si Kirin Hapok.
15 Sii ko dalem a inged na da a babay a ba datar sa kataid o manga wata i Ayob a manga
babay. Na minirakes siran ko manga laki ran a bigan o ama iran sa kawali.
16 Oriyan ai na miyakapaginetaw pen si Ayob sa miyakamagatos ago pat polo ragon, na

miyailay niyan so manga wata iyan ago manga apo taman ko ikapat ka apid.
17 Na miyatay sekaniyan a tanto a miyalokes ago miyasoat ko manga gawii niyan.
SABOR
PAGANAY A BAGI
Sabor
1-41
SABOR 1
So Manga oontol ago so Manga rarata
Rarakmatan so taw a kena a ba pelalakaw ko mosawir o manga rarata

o di na tomitindeg ko lalan o manga baradosa
aya pen o ba moontod ko ontoda o dii mamagongatongat.
2 Ka aya ikapipiya a ginawa niyan na so Kitab o Allah,
na perasamen iyan so Kitab iyan sa gagawii daondaw.
3 Lagid sekaniyan o kayo a miyapamola ko kilid a lawasaig a dii teribonga sii ko mosim
iyan,
ago di den kelayon so manga raon iyan.
Mapiya i bobolos so langon taman a di niyan dii nggolaolaan.
4 Kena a ba niyan datar so manga rarata a taw

a lagid siran baden o okap a ipembayog a ndo.
5 Sabap roo na di makapemayandeg so manga rarata ko kapengokom,
aya pen o ba maped so manga baradosa ko kalilimod o manga oontol.
6 Ka pagiipaten o Allah so lalan o manga oontol,

ogaid na kedadas so lalan o manga rarata.
SABOR 2
So Dato a Miyapili o Tohan
Ino dii nggagani so manga nasiyon

ago pepagantangan so manga taw sa ilang baden?
2 Pegato so manga dato sa doniya
ago pepegopakat so manga olowan on sa sopak ko Allah,
ago sopak ko miyapili iyan a dato, a tig iran a
3 “Potolen tano so manga rantay iran,
ago ilebad tano so ipepematong iran rektano."
4 So kokorsi roo sa kasorgaan na dii kela;

so Kadnan na di niyan siran dii masodi.
5 Na giyoto a pembongetan iyan siran sii ko kakerarangiti ron,
ago pekalekan iyan siran ko kapenggani niyan a peteroon iyan a
6 “Piyakandato aken den so miyapili aken a Dato
sii sa Siyon a so soti a palaw aken."
7 “Peyagen ko," a tig o dato, "so inisogo o Allah:

Pitero iyan raken a 'Seka i Wata aken;
imanto a gawii na saken den i ama a ka.
8 Pangni ka raken, ka pakipekewali aken reka so manga nasiyon,
na taman den ko pirowarowangan o doniya na pekitangan aken reka.
9 Sesaan ka siran a bentol a potaw;
peroropeten ka siran a lagid o koden a bote.' "
10 Kagiya ka maoto, hey manga dato, na pagongangen kano baden imanto;

pakiinsarat kano, hey manga olowan sa doniya.
11 Pangongonotani niyo so Allah a rakes o kalek,
ago pakapiyaa niyo a ginawa niyo a kitatabaden.
12 Areki niyo so Wata, ka o ba sekaniyan baden kararangiti
na mabinasa kano ko lalan iyo,
ka pekasokeyaw so gani niyan ko sakotika.
Rarakmatan so langon a pepegapas rekaniyan.
SABOR 3
Pangni sa Tabang igira a Kapipita
Ya Allah, sayana a madakel a soranga aken.

Tanto a madakel a perido raken.
2 Madakel a dii tero makapantag raken a
"Da den a tabang on o Tohan."
3 Ogaid na seka, ya Allah, i kelong a makalilibet raken,

ago so bantogan aken, ago so pembangon ko olo aken.
4 Penggoraok ako sa matanog ko Allah,
na pegamponen ako niyan roo ko soti a palaw niyan.
5 Pepekaiga ako ago petorogen,

na pepekanaw ako peman ka pelindingen ako o Allah.
6 Di aken ikelek so bariboribo a manga taw
a pesondol raken ko mbalabala.
7 Mbowat ka, ya Allah!

Sabeta ko ngka, hey Tohan ko!
Ka miyasontok ka sa bies so langon a manga ridoay aken;
miyaropet ka so manga ngipen o manga rarata a taw.
8 So kakesabet na poon ko Allah.
Pengnin ko a karakmatan ka so manga pagtaw ngka.
SABOR 4
Pangni sa Tabang ko Kakegagawii
Ampona ko ngka igira a pepenanalo ako reka, hey Tohan ko a aya ko kaontol.
Isako kailotan ako na liyoagan ako ngka;
na, kalimoon ako ngka imanto ago ampona ngka so pangangarapan aken.
2 Hey sekano a manga taw, ay katey pen a kapepagitowitoa niyo ko bantogan aken?
Ay katey pen a kapekebabayai niyo ko da a bali niyan ago so kapananamari niyo ko di
benar?
3 Sabota niyo a inisenggay o Allah a rek iyan so taw a magiiklas on;
pepamakinegen ako o Allah igira a pepenanalo ako ron.
4 Tebeker kano baden sa kalek, na di kano pendosa;

pamimikirana niyo so madadalem ko poso iyo
igira a romerenek kano a sisii ko igaan iyo.
5 Palada niyo ko Allah so patot a ipesoasoat on
na go sarigi niyo sekaniyan.
6 Madakel a pepekaise sa "Antawaa pen i mapekailay kami niyan sa mapiya?
Pakaliwanaga ngka rekami so paras ka, ya Allah."
7 Miyapadalem ka ko poso aken so mala a kapekebabaya
a di sii ko masa a kitataralo o pereperan ago bago a arak iran.
8 Magiga ako ago torogen a lomilintad,
ka kagiya seka bo, ya Allah, i pepekapaginetaw raken sa da a ba raken pekabinasa.
SABOR 5
Pangni sa Kalilinding
Lekai ngka so tangila ngka ko manga katero aken, ya Allah;

tagoa ngka sa ginawa so kapeperego aken.
2 Pamakinega ngka so kapenggoraok aken sa tabang, hey Tohan ko a Dato aken,
ka sii ako reka pepangangarapan.
3 Oman mapita, ya Allah, na pekeneg ka so sowara ko.
Oman mapita na ipegadap aken reka so manga pangni aken
ago nomanayaw ako a miinam.
4 Kena a ba ka Tohan a masosoat ko kamarataan;

da den a marata a ba reka makapeniyampo.
5 Di den pekatindeg so manga takabor ko kamamasaan ka;
ipekegowad ka so langon a dii mbabaradosa.
6 Pembinasaan ka so siran oto a dii mamanaro sa di benar;
so manga talibono ago dii mamanaliba na ipekesisingay o Allah.
7 Ogaid na so saken on peman,

na sabap ko kala a ka i gagaw na soled ako ko walay ngka;
sodiyod ako sii ko soti a Timplo ngka ko kapagaadati aken reka.
8 Nggonanaowa ko ngka, ya Allah, sii ko kaontol ka

sabap ko manga ridoay aken;
pantara ngka so lalan ka a pekedegen aken.
9 Ka da den a katero a pepekapoon ko ngari iran a ba kesarigi;
aya mipepeno ko poso iran na kapaminasa.
So bakereng iran na lagid o kobor a kalelekaan,
na aya pekipekas ko dila iran na kapamagakal.
10 Tanaan ka kiran, hey Tohan ko, so kasalaan iran.
Pengnin ko a ikaroseng iran so manga kadiyat iran a marata.
Bowangen ka siran sabap ko kadakel o dosa iran,
ka miyasopak ka iran.
11 Ogaid na makapiya a ginawa o langon a pepagapas reka;

makapagidaida siran lalayon sa kasosonor.
Lindinga ngka siran
kaan mabebebaya sii reka so siran oto a pekebabaya ko Ingaran ka.
12 Ka matamataan, ya Allah, a rarakmatan ka so manga oontol;
ililikop ka kiran so limo o ka a mikekelong iran.
SABOR 6
Pangni sa Tabang ko Kasasamok
Ya Allah, di ako ngka pembongeti a ba ka pekerarangiti.

Di ako ngka ndanega a ba ka dii nggani.
2 Kalimoon ako ngka, ya Allah, ka ikokopay ako.
Ya Allah, bolongi ako ngka, ka pepekagedam so pito lapis a bago aken,
3 Na sayana a masososa a ginawa ko.
Ay katey ai, ya Allah, ay katey niyan?
4 Kasowi ako ngka na panabangi ngka so niyawa ko;

sabeta ko ngka, ya Allah, sabap ko da a pitetamanan iyan a gagaw ngka,
5 Ka da den a ba reka petedem sii ko kaden o miyamatay.
Antawaa i pekapodi reka roo?
6 Inapos ako den merego;

mababasa gawii na pelapayan so olona aken sa kapesegad aken,
na pekerames aken a lo so igaan aken.
7 Pepekalobay a manga mata ko ko kapakamboboko aken,
na pekedaan ai sa kanono sabap ko langon o manga ridoay aken.
8 Awai ako niyo langon a dii nggolaola sa marata,

ka miyaneg o Allah so di aken dii kasenganseng.
9 Piyakineg o Allah so kapenggoraok aken sa tabang,
na pagamponen o Allah so kapepangangarapan aken.
10 Pengaayaan ago tanto a kelek so langon a ridoay aken;
magaan so magaan na makapepato siran a penga didiyamanan.
SABOR 7
Pangni ko Kapangokom
Ya Allah a Tohan ko, sii ako reka pepagapas;

pakalidasa ko ngka ko langon a peseloba raken na go sabeta ko ngka,
2 Ka o ba ako iran baden masekisi a datar o arimaw,
ago mapamekang ako iran a da a ba raken pekasabet.
3 Ya Allah a Tohan ko, o miyanggolaola aken ai

ago miyakasela so manga lima ko,
4 O kiyapemarataan aken so bolayoka aken
o di na kiyapamabaan aken so ridoay aken
5 Na pakisalobaan ago pakiraoten ako ngka ko ridoay aken
na go ngka on pakilomegen ko lopa so kaoyagoyag aken
a mibegak iyan ko bayanek so badan aken.
6 Mbowat ka, ya Allah, a kekarangit.

Mbowat ka sa kapagerena ngka ko dii kanggani o manga ridoay aken;
pagnaw ka na tabangi ako ngka.
Inisogo o ka so kapengokom;
7 Limoda ngka sa ginawa ngka so langon a taw,
na ndatoi ngka siran san sa poro.
8 So Allah i pengokom ko langon a manosiya;
kokomen ka raken so kaontol aken, ya Allah a Lebi a Maporo,
ago so kapagiinontolan o poso aken.
9 Tapeleken ka so dii kandosa o manga rarata a taw,
ago pakambekena ngka so manga oontol,
ka maontol ka a Tohan
a pepariksa ko manga pamikiran ago manga poso.
10 Aya kelong aken na so Lebi a Maporo a Tohan

a pesebet ko manga titito i poso.
11 Maontol so Tohan i kapangokom,
na pekerarangitan o Tohan so manga rarata a taw oman gawii.
12 O di iran telikodi so manga dosa iran
na nggarangen o Tohan so pedang iyan.
Maiirat iyan a kagagasaan so pana iyan;
13 Matitiyagar iyan so manga gomaan iyan a pekapatay
ago iaarang iyan so pekedeg a manga gasa iyan.
14 Ilaya ngka so marata a taw

a inikaogat on so samok ago aya ipembalilit on na kadostaan,
a aya di niyan dii mbawata na manga kabokegan.
15 Komiyalot sekaniyan sa madalem,
na sekaniyan bo i miyaolog ko galebo a kiyalot iyan.
16 Keonay sekaniyan ko di niyan dii kasemok,
na itena ko olo niyan so kapepanganiyaya niyan.
17 Penalamatan ko so Allah sabap ko kaontol iyan,

na ndidaon ko a podi so Ingaran o Allah a Lebi a Maporo.
SABOR 8
So Bantogan o Tohan ago so Pangkatan o Manosiya
Ya Allah a Kadnan ami,

sayana a kababantogan so Ingaran ka ko dalem a doniya.
Inipangkat ka so menang ka ko poro o manga langit.

2 So manga modol o manga wata ago manga ikaririga
na piyakipodi ngka on a ginawa ngka sabap ko manga ridoay ngka,
kaan ka mapakarenek so ridoay ago so peseop.
3 Igira a pelangagen ko so manga langit ka a pasad o manga kemer ka,

so olan ago so manga bitoon a miyanga tatago o ka ko manga darpa iran
4 Na antawaa so matag baden manosiya a ba ngka pipikira,
ago so wata o manosiya a ba ngka pagiipata?
5 Inonta na biyaloy ngka sekaniyan a malo mababa i pangkatan a di so Tohan,
na siyangkadan ka sa bantogan ago menang.
6 Piyakindatoan ka rekaniyan so manga pasad o lima ngka,

na langon ai na dinidalem ka ko kapaar iyan:
7 So manga bilibili ago manga sapi taman ko manga iila a binatang;
8 So manga papanok sa kawang ago so manga seda ko ragat,
ago so langon a kaaden a pepelalangoy ko manga okita sii ko manga ragat.
9 Ya Allah a Kadnan ami,

sayana a kababantogan so Ingaran ka ko dalem o doniya.
SABOR 9
Kapanalamat ko Tohan sabap ko Kokoman iyan
Podin ko seka, ya Allah, sa iklas ko poso aken;

pemanotolen aken so langon a piyakamemesa a pinggolaola ngka.
2 Ikebabaya aken seka ago ipekapiya a ginawa ko;
ndidaon ko a podi so Ingaran ka, hey Lebi a Maporo.
3 Pepekatalikod so manga ridoay aken;

pekirepang siran ago pepanga dadadas sii ko kamamasaan ka.
4 Ka inipamayandeg ka so kabenar aken ago tindeg;
moontod ka ko korsi i ka a pepengokom sa ontol.
5 Pimbongetan ka so manga nasiyon
ago bininasa ngka so manga rarata a taw;
piyonas ka so ngaran iran sa taman sa pakataman.
6 Miyaipos so manga ridoay,
na da a kaposan iyan a kapekebinasa iran;
pinggegeba a ka so manga siti iran,
na apiya so katatademi kiran na miyada.
7 Ogaid na ndadato so Allah sa dayon sa dayon;

pitiyagar iyan so korsi iyan ko kapangokom.
8 Ipengokom iyan ko doniya so kaontol;
na ipendato iyan ko manga taw so matito.
9 So Allah na pekeapasan o siran oto a pepelopiten,
ago aya maporo a lindonga sii ko masa a kasasamok.
10 Siran oto a matao ko Ingaran ka, ya Allah, na serig reka,
ka da ngka den katalikodi so apiya antawaa a di reka dii mbabanog.
11 Pagidaidai niyo sa podi so Allah a kokorsi sa Siyon.

Pakalangkapa niyo sii ko manga nasiyon so pinggolaola niyan.
12 Igira a peseop sekaniyan sa bono na tatagoon iyan sa ginawa so pepanga rarasay;
di niyan indadarainon so kapenggoraok iran.
13 Kalimoon ako ngka, ya Allah.

Ilaya ngka so kapekerasay aken a pekisabap ko siran oto a pekegowad raken.
Panabangi ako ngka ko manga gimowa o kapatay
14 Kaan aken mandagiday so langon a podi ngka
sii ko manga gimowa o siti a Yarosalim
ago kebebaya roo sabap ko kiyasabeta ngka raken.
15 Miyaolog so manga nasiyon ko galebo a kiyalot iran;

miyasikem so manga ai ran o litag a tiyaan iran.
16 Pepakikilala o Allah a ginawa niyan sii ko kapegokasa niyan ko kokoman;
pekelitagan so manga rarata a taw ko galebek o manga lima iran.
17 Sii pekaantapa so manga rarata ko kanarakaan,

so den so langon a nasiyon a pepakalipatan iran so Tohan.
18 Ogaid na so kikadodowaanan na kena a ba lalayon pakalilipati,
aya pen o ba taman sa pakataman a kaada o inam o pepanga rarasay.
19 Mbowat ka, ya Allah. Di ka pekiato ko manga manosiya.

Pakapangadapa ngka ko ginawa ngka so manga nasiyon
na go ngka siran kokoma.
20 Tanai ngka siran a kalek, ya Allah.
Pakitokawi ngka ko manga nasiyon a matag siran baden manosiya.
SABOR 10
Pangni ko Kandanega ko Manga rarata
Ino ka titindeg sa mawatan, ya Allah?

Ino ngka pageenaa a ginawa ngka igira a masa a kasasamok?
2 So marata a taw sii ko kapepangimporoan iyan na pesetroon iyan so manga lolobay
a pepanga lilitagan o manga rarata a kadiyat a pegembaalan iyan.
3 Ipetekabor o marata a taw so manga baya a ginawa niyan;

pepodin iyan so mala i napso, na di niyan dii sodiin so Allah.
4 Sabap ko kipoporoon o marata a taw sa ginawa niyan
na di niyan pembanogen so Allah;
sii ko langon a kapepagantangan iyan na da den a ba niyan pamikiran ko Tohan.
5 Lalayon bibid so manga okitokit iyan;
lebi a maporo so manga kokoman ka, ya Allah, a di so pekesabotan iyan;
ba niyan den pepagompata so langon a somosorang on.
6 Tig iyan ko ginawa niyan a "Di ako den keoteng;
da den a kamaregenan a ba ko keokiti."
7 Mapepeno so ngari iyan a kandadaora, kapamokeg ago kapamagita;
sisii ko didalem o dila iyan so kasasamok ago kadostaan.
8 Pepemagayan sekaniyan ko marani ko manga iito a inged;

sii ko manga orooro na pembonoon iyan on so da a manga sala iyan.
Di niyan dii simaan so kekaidan iyan;
9 Pepenayaw sekaniyan ko tapoka iyan a datar o arimaw;
Pepagayan sekaniyan sa kasikema niyan ko da a ba on pekatabang;
pesikemen iyan siran ago petoyoken iyan pen sii ko poket iyan.
10 So pepanga kakaidan iyan na pepanga sasasa ago pepamangilampes,
ka pekepeges siran o bager iyan.
11 Di niyan dii teroon ko ginawa niyan a "Di ini katawan o Tohan.
Sasapengan iyan a paras iyan na di ako niyan pekeilay."
12 Mbowat ka, ya Allah! Kolaten ka a lima ngka, hey Tohan ko!

Di ngka pekalipati so da a ba on pekatabang.
13 Ino dii masodi o marata a taw so Tohan a di niyan dii teroon ko ginawa niyan a
"Di ako niyan den ndanegen"?
14 Ogaid na benar a pekeilay ngka, hey Tohan ko, so samok ago so karomasayan;
tatagoon ka sa ginawa, ka aden a ikidia ngka san.
So pekekaidan na iseserakan iyan reka a ginawa niyan;
seka i pepekatabang ko manga ilo.
15 Potola ngka so barokan o marata ago baradosa a taw;
danegen ka on so kamarataan iyan taman sa di ini mada.
16 So Allah na Dato sa taman sa pakataman.

So manga kapir na penga ada ko inged iyan.
17 Miyaneg ka, ya Allah, so ikakadali o pepanga rarasay;
pepakabageren ka so manga poso iran ago tatagoon ka sa ginawa so kapenggoraok iran.
18 Pegabangen ka so manga ilo ago so kilolopiten
kaan so manga taw a matag dii doniya na di den peman makapengangalek.
SABOR 11
So Kapagapas ko Allah
Sii ako pepagapas ko Allah.

Ino niyo raken pen peteroa a
"Palagoy ka a lagid o papanok roo ko manga palaw,
2 Ka miyairat o manga rarata so pana iran ago kiyagasaan iran den,
ka ipena iran a poon ko maliboteng ko manga titito i poso.
3 Igira a pekegeba so manga onayan
na antonaa pen i mapenggolaola o maontol a taw"?
4 Ndodoo so Allah ko soti a Timplo niyan;

kokorsi so Allah roo sa kasorgaan.
Mbabantayan iyan so manga manosiya;
pepariksaan siran o manga mata niyan.
5 Palaya den pepariksaan o Allah so manga oontol ago so manga rarata,
na ipekegowad iyan so taw a mabebaya manganiyaya.
6 Pekioranan iyan so manga rarata sa pekedeg a manga waga ago sandawa a peketotong;
so pekalowis a ndo na aya iran bagian.
7 Ka maontol so Allah, na pekebabayaan iyan so kapaginontolan;

so manga titito a taw na keilay iran so paras iyan.
SABOR 12
Pangni sa Tabang
Tabang ka, ya Allah, ka da den a ba miyalamba a magiiklas reka;

ka miyanga ada so mapaparatiyaya a manga manosiya.
2 Oman i isa na pepemokegan iyan so siringan iyan;
matilak a dii kateroa o modol iran ko kapanaliba.
3 Mapakarenek o Allah so langon a modol a dii tero sa matilak a garengkang sa didalem,

ago so oman i dila a di niyan dii tekabor a
4 “Kidaag ami so dila ami;
rek ami so manga modol ami; antawaa i pekapaar rekami?".
5 “Sabap ko dii katebani ko manga miskin,

ago so dii kapakaperego o manga kadodowaanan
na pembowat ako imanto," a tig o Allah,
"ka pelindengen aken siran, a so den so masisingayo iran."
6 Na so manga katero o Allah na da a daway niyan a katero
a datar o pirak a miyakapito malombos ko kiyaoria on sii ko tonaga.
7 Pagipata kami ngka, ya Allah,

na go kami ngka lilindinga sangkanan a manga taw sa taman sa pakataman.
8 Ka pepegenebeneb so manga rarata a da a ba kiran pekibalang
igira so maresik na aya ipeporo o manga manosiya.
SABOR 13
Pangni sa Tabang o Allah
Ay katey ai, ya Allah? Ba ako ngka pakalilipati sa taman sa pakataman?

Ay katey a kapageenaa ngka raken ko paras ka?
2 Ay katey a kapakaaawid a akal aken ago so kararata a ginawa ko sa gawii gawii den?
Ay katey pen a kadadaaga raken o ridoay aken?
3 Ilaya ko ngka, ya Allah a Tohan ko, na go ako ngka ampona.

Pakalimegasa ngka so manga mata ko, ka o ba ako baden toroga ko kapatay,
4 Ago matero o ridoay aken a "Miyapeges aken sekaniyan,"
na amayamay na mabebaya so manga soranga aken ko kakeoteng aken.
5 Ogaid na sasarigan ko so kapepangalinggagaw ngka;

ipekebabaya o poso aken so kapepenabet ka.
6 Pegidaidaan ko so Allah, ka pinggolaolaan ako niyan sa mapiya.
SABOR 14
So Kalalalongan ago Kamarataan o manga Taw
Aya pekigedi ko pamikiran o lalong na "Da a Tohan."

Miyamakaratarata siran ago piyakasisingay so manga galebek iran;
da den a isa bo a ba dii nggolaola sa mapiya.
2 Sii sa kasorgaan na totolongan o Allah so manga manosiya

sa kapegilaya niyan o ba aden a somasabot kiran a dii mbabanog ko Tohan.
3 Miyamakasilay siran langon; palaya siran melagilagid a kikatitinoan i poso.
Da den a isa bo a ba dii nggolaola sa mapiya,
apiya sakataw bo.
4 “Ba di den pekakenal angkai langon a dii mbabaradosa," a tig o Allah,

"a pepelalamed ko manga pagtaw aken a datar o kapekan iran sa paan
ago di ako iran pen telowan?"
5 Roo siran tanto a pepanga aalek
ka kagiya tomatampil so Tohan ko manga oontol.
6 Kabaya o manga baradosa a kapembangena iran ko manga antap o manga miskin,
ogaid na so Allah i pelinding kiran.
7 O ba bo pekapoon sa Siyon so kakesabet o Israil.

Amay ka pekaasalen o Allah so kamapiyaan o manga pagtaw niyan
na tanto a kebebaya so Yakob, ago pekapiya a ginawa o Israil.
SABOR 15
Ya Allah, antawaa i pekabolos ko Timplo ngka?

Antawaa i pekabaling ko soti a palaw ngka?
2 So taw a pepaginetaw sa da a daway niyan

ago dii nggolaola sa ontol,
ago dii tero sa tito a benar sa iklas ko poso iyan,
3 Ago di pemaganta so dila iyan.
Di niyan pemarataan so layok iyan
aya pen o ba niyan pagitowitoa so siringan iyan.
4 Di niyan dii sodiin so taw a maresik i poso,
ogaid na pagaadatan iyan so siran oto a maaleken ko Allah.
Di niyan den mbarobaan so minisepa iyan apiya pen o ikelaga niyan.
5 Pepagotangen iyan so pirak iyan a da a iseg iyan,
ago di sekaniyan terima sa tendan a ikebinasa o da a sala iyan.
So taw a di sii dii nggolaola na di den kiiseg.
SABOR 16
Pangni o Somasarig
Lilindinga ko ngka, hey Tohan ko,

ka sii ako reka pepegapas.
2 Pitero aken ko Allah a "Seka i Kadnan aken;
da den a kamapiyaan aken o di bo seka."
3 “Makapantag ko manga kaom aken a sisii sa doniya," a tig o Allah,

"na siran i tindos a manga taw a tanto aken a ipekebabaya."
4 Petaketakepen so manga rata a ginawa o siran oto

a pepananangoran ko salakaw a manga tohan.
Di ako pemangeped ko kapesepaati sa rogo a pangingonomen sangkoto a manga tohan
aya pen o ba mabeto o modol aken so manga ngaran iran.
5 Seka, ya Allah, i sominggay ko kawali aken ago so bagian aken;

piyakatikna a ka so kebolosan aken.
6 So manga temanaan a minisenggay raken na sisii ko manga darpa a ikasosoat aken;
matamataan den a mapiya so posaka aken.
7 Podin ko so Allah a peparinta raken;

apiya sii ko kagagawii na pepanginsaratan ako o poso aken.
8 Tatap a kipageepedaan aken ko Allah;
kagiya sisii sekaniyan ko kawanan aken na di ako den kidolas.
9 Sabap roo na mapipiya a ginawa ko ago mabebebaya so niyawa ko.

Makasasarig mambo so badan aken,
10 Ka di ngka ipendarainon so niyawa ko sii ko darpa o miyamatay
aya pen o ba ngka pakiredaken so Soti a Siyogo o ka.
11 Pekiilay ngka raken so lalan ko kaoyagoyag;

madidiyangka so kapekebabaya aken sii ko kamamasaan ka,
na sisii ko kawanan ka so matatatap a manga ikasosoat aken.
SABOR 17
Pangni o Da a Sala iyan
Pamakinega ngka, ya Allah, so kapepamangni aken sa kokoman;

tagoa ngka sa ginawa so kapenggoraok aken.
Lekai ngka so tangila ngka ko kapepangangarapan aken,
ka kena a ba ini pepekapoon ko manga modol a dii mamagakal.
2 Katao ngka den so kapekabenar aken,
ka pekeilay o manga mata ngka so ontol.
3 Miyapariksa ka den so poso aken; miyakaip ako ngka ko kagagawii;

kiyatepengan ako ngka na da den a miyatoon ka raken a kamarataan.
Piyasad aken sa ginawa ko a di den makapendosa so ngari aken
4 A datar o dii nggolaolaan o ped a taw.
Nggolalan ko katero o manga modol ka
na linidasan aken so manga lalan o manga tanganiyaya.
5 Miyakakedeg ko manga lalan ka so manga lakad aken,
na da on silay so manga ai aken.
6 Sii ako reka pepananalo, hey Tohan ko, ka kagiya pagamponen ako ngka;
lekai ngka raken so tangila ngka na go ngka pamakinega so manga katero aken.
7 Pakiilain ka so piyakamemesa a gagaw ngka, hey Tohan ko,
a aya pepekasabet ko siran oto a pepagapas ko kawanan ka sabap ko manga ridoay iran.
8 Lindinga ko ngka a datar o od a mata ngka;

Tapoken ako ngka sii ko didalem a manga papak ka
9 Sabap ko manga rarata a pesondol raken.
Lilikopan ako o pemakapatay a manga ridoay aken;

10 Tiyotopan iran so manga poso iran na petekabor so manga ngari iran.
11 Mbabalabalaan ako iran imanto apiya anda ako sengor;
pepengilayan iran sa okit a kipapesen iran raken ko lopa.
12 Lagid siran o arimaw a pepanganop sa masikem iyan,
ago lagid o mabager a arimaw a magaayan sii ko di keinengka a darpa.
13 Mbowat ka, ya Allah. Atowi ngka siran ago pepada ngka siran.
Sabeten ka so pedang ka ko niyawa ko ko manga rarata a taw.
14 Nggolalan ko lima ngka, ya Allah, na panabangi ako ngka sangkai a manga taw
a aya bo a mapembagian iran na giyangkai a kapepaginetaw iran ko doniya.
Penoon ka ko tiyan iran so ititiyagar ka a kandanega kiran
a manga sesemo ron so manga wata iran
ago aden pen a malamba on ko manga roroni a wata iran.
15 Ogaid na so saken on peman

na sabap ko kaontol aken na pagilain ko so paras ka;
amay ka makanaw ako na kesoat ako ko kakepayag raken o ginawa ngka.
SABOR 18
So Inidikir o Daod ko Kapakataban
Pekebabayaan ko seka, ya Allah, a aya ko bager.
2 So Allah i lakongan aken, kota aken ago pepekalidas raken.

So Tohan ko na aya ko lakongan a ron ako pepagapas,
so kelong aken ago so bager o kapekesabet aken,
ago aya pen maporo a lindonga aken.
3 Igira a petelowan ko so Allah a patot a kapepodiya on
na pekesabet ako ko manga ridoay aken.
4 Minilibed raken so manga tali o kapatay;

minitekaw raken mikolob so pekabinasa a manga degan.
5 Minilikos raken so manga patong o kobor;
kiyalitagan ako o manga sampirot o kapatay.
6 Na sii ko kaiiloti raken na miyananalo ako ko Allah;
miyakagoraok ako sa tabang ko Tohan ko.
Sii ko timplo niyan na miyaneg iyan so lagam aken;
minisampay ko tangila niyan so kiyagoraok aken.
7 Mandiyadi na tiyabeker ago milinog so doniya;

so pen so manga kaoonayan ko manga palaw na piyamanabad ago miyanga kokokog,
ka kiyararangitan sekaniyan.
8 Somiyalepot so bel ko ngirong iyan;
miyakapoon ko ngari iyan so pepekalengan a apoy,
na somiyokeyaw ron pen so pekedeg a waga.
9 Inikayang iyan so manga langit na miyanog sekaniyan
a matatago so makapal a maliboteng ko didalem o manga ai niyan.
10 Miyagda sekaniyan ko pepapak a kaaden na lomiyayog;
kilakilat den a kapelayog iyan sii ko manga papak o ndo.
11 Inibongkos iyan sa ginawa niyan so maliboteng;
mililibet on so domedatem a manga gabon sa langit a mapepeno a oran.
12 Miniteras so sindaw ko hadapan iyan na lomiyambas ko manga gabon on,
na miyoran sa giyaw ago pekedeg a manga waga.
13 Mandiyadi na mindadalendeg so Allah roo sa langit,

na minigorong so sowara o Lebi a Maporo.
14 Inipana iyan so manga gasa iyan na miyamangiparak iyan so manga ridoay;
pikas iyan so manga kilakilat na piyakigorigaw niyan siran on.
15 Na kiyasawaan so didalem a ragat,
ago miyapayag so manga onayan o doniya
sabap ko kiyambonget ka, ya Allah,
ago sabap ko kiyapamisenga ngka sa mabager.
16 Kiyawa ako niyan a poon sa poro na kiyapetan ako niyan;

biyaton ako niyan ko madalem a ig.
17 Siyabet ako niyan ko marangit a ridoay aken
ago sii ko siran oto a pekegowad raken a tanto a manga babager a di saken.
18 Giyobat ako iran sii ko gawii a kamomoralai raken,
ogaid na so Allah i tomiyokod raken.
19 Inowit ako niyan ko madaya a darpa;
piyanabangan ako niyan ka kagiya miyasoat sekaniyan raken.
20 Pipiyapiyaan ako o Allah sabap ko kaontol aken;

sabap ko kalolompiyo o sowasowai aken na biyalasan ako niyan.
21 Ka miyakedeg aken so manga lalan o Allah;
da ako nggolaola sa marata a mitalikod aken ko Tohan ko.
22 Ka so langon a kokoman iyan na palaya aken tatagoon sa ginawa;
da aken den silin so manga taritib iyan.
23 Miyaginetaw ako a di kedawayan sii ko hadapan iyan,
na inilidas aken a ginawa ko ko kadostaan.
24 Biyalasan ako o Allah sabap ko kaontol aken,
ago so kalolompiyo o manga lima ko sii ko hadapan iyan.
25 Sii ko siran oto a makalimoon na pepakiilay ngka kiran a makalimoon ka,

na sii ko di penga dadawayan na pepakiilay ngka kiran a di ka kedawayan;
26 Sii ko kikasosoti na pepakiilay ngka kiran a masosoti ka,
ogaid na sii ko manga bibid na pepakiilay ngka kiran a baraakal ka.
27 Pesebeten ka so dii mangangalimbabaan,
ogaid na ipembaba a ka so siran oto a mipoporo so manga mata iran.
28 Seka, ya Allah, i ipesindaw o solo aken;

pepekaliwanagen o Tohan ko so kalilibotengi raken.
29 Nggolalan reka na pekaato ako ko madakel a manga sondaro,
na nggolalan ko Tohan ko na pekalikin ako ko kota.
30 Makapantag ko Tohan na sayana a madidiyangka so okitokit iyan.

So manga initopa o Allah na katetepengan a benar;
kelong sekaniyan o langon a pepagapas rekaniyan.
31 Ka antawaa i Tohan a makaliyoliyo ko Allah?
Na antawaa i Lakongan o di bo so Tohan tano?
32 So Tohan na aya raken dii sembitan sa bager
na pepakadayaan iyan so lalan aken.
33 Pembalowin iyan so manga ai aken a lagid o ai a saladeng,
na pepakatindegen ako niyan ko manga poporo a darpa.
34 Pelayamen iyan so manga lima aken ko katidawa;
keirat o manga barokan aken so pana a tombaga.
35 Ya Allah, ililinding ka raken so kelong ka a ipepanabet ka;

so kawanan a lima ngka i itotokod ka raken,
so limo o ka i ipepekala aken.
36 Pepakaoladen ka so lalan a pelalakawan aken
kaan di kekelid so manga palo aken.
37 Piyanaloba aken so manga ridoay aken na riyaot aken siran;

da ako den peto taman sa da siran mapolang.
38 Giyomek aken siran, na da siran den makambowat;
miyanga ooteng siran ko danga aken.
39 Pisambitanan ako ngka sa bager ko katidawa;
na piyakidaag ka raken so siran oto a miyato raken.
40 Piyakipalagoyan ako ngka ko manga ridoay aken,
na miyabinasa ko so pepanga gogowad raken.
41 Gomiyoraok siran sa tabang, ogaid na da a ba kiran somiyabet;
apiya so Allah i tiyalowan iran, ogaid na da niyan siran ampona.
42 Piyakapagombiyombi aken siran a lagid o bayanek a ipembayog a ndo;
tiyowal aken siran a datar o tonai sii ko manga lalan.
43 Piyanabangan ako ngka ko kagogobata raken o manga taw,

na biyaloy ako ngka a olowan o manga nasiyon;
so manga taw a da a katawi ko ron gowani na pepamanalagad raken.
44 Anda den i kanega iran raken na peratiyayaan ako iran;
so manga rait na pepamanodiyod raken;
45 Pepanga adaan siran langon sa kawaraw,
na pepeliliyo siran pen ko manga kota iran a kitatabaden.
46 Oyagoyag so Allah! Mapodi so Lakongan aken!

Mabantog so Tohan a pepekasabet raken.
47 Sekaniyan so Tohan a ipeseop ako niyan
a pepakidaag iyan raken so manga nasiyon,
48 Ago pepekalidas raken ko manga ridoay aken.
Piyakidaag ka raken so siran oto a miyato raken;
piyanabangan ako ngka ko manga tanganiyaya.
49 Kagiya ka maoto, ya Allah, na podin ko seka sii ko manga nasiyon,
na ndidaon ko a manga podi so Ingaran ka.
50 Pembegan o Tohan sa mangaala a kapakataban so dato iyan;
pepakiilay niyan so da a pitetamanan a gagaw niyan ko mama a kiyaidinan iyan,
a so Daod ago so pekebabadan on sa taman sa pakataman.
SABOR 19
So Bantogan o Allah sii ko Miyanga aaden iyan
Pepayagen o manga langit so bantogan o Tohan,
na pepakalangkapen o kawang so galebek o manga lima niyan.
2 Gawii gawii den na pepamanotol siran,
na oman gagawii na pepakiilay iran so katao.
3 Da a katero o di na basa a ba on di keneg so sowara iran;
4 So sowara iran na pelangkap ko dalem a doniya,
na so manga katero iran na taman den ko pirowarowangan o doniya.
Tiyago iyan ko manga langit so kekadenan o alongan;

5 Peliyo ini a lagid o kewingen a poon ko rowang iyan,
ago lagid o pakokoya a mabebebaya malalagoy ko pasoay niyan.
6 Di ini dii pesod ko sabala o langit na pelibet roo ko isa a poro iyan;
da den a mapegna ko karanti iyan.
So Kitab o Allah
7 Madidiyangka so Kitab o Allah a pepekaoyag ko niyawa.

Kasasarigan so manga insarat o Allah a pepemakabegay sa ongangen ko da a peleng iyan.
8 Matito so manga taritib o Allah a ipekebabaya o poso.
Masagogod so manga sogoan o Allah a pepekaliwanag ko pamikiran.
9 Soti so kipekeleken ko Allah a tatap sa taman sa pakataman.
Benar so manga kokoman o Allah ago palaya den manga oontol.
10 Lebi ini a kebabayaan a di so bolawan,
a lawan pen ko madakel a lombos a bolawan;
mamis pen a di so gola a teneb,
apiya pen so gola a teneb sii ko taro niyan.
11 Liyo ron pen na pepekalalang ai ko oripen ka,
na mala i balas so kapetomana on.
12 Antawaa i pepekatendo ko rek iyan a manga ribat?

Rilai ako ngka ko mapageema a manga sala aken.
13 Lidasen ako ngka pen a oripen ka ko dii matibaba a manga dosa,
na di ako ngka kiran pekipaaren.
Amay ka magiyoto na makadidiyangka ako,
ago di ako ketaksil ko mala a kasalaan.
14 Pengnin ko a so manga katero o ngari aken

ago so mapepamikir o poso aken
na ikasoat ka, ya Allah, a Lakongan aken ago Pegaon raken.
SABOR 20
Pangni sa Kapakataban
Maampon ka o Allah ko gawii a kamaregenan.

Makalinding reka so Ingaran o Tohan o Yakob.
2 Kawitan ka niyan sa tabang a poon ko soti a darpa iyan,
na poon sa Siyon na matokod ka niyan.
3 Katademan iyan so langon a soasoat ka,
ago matarima iyan so manga ipesepaat ka on a petotongen.
4 Mibegay niyan reka so masisingayo o poso o ka
ago mapakabolos iyan sa mapiya so langon a manga kadiyat ka.
5 Pelalalis kami sa kapekebabaya igira a miyakataban ka,
na go imbayaw ami so manga pandi ami sii ko Ingaran o Tohan tano.
Maampon o Allah so langon a pepengnin ka on.
6 Imanto na katawan aken a pepakatabanen o Allah so miyapili iyan a dato;

poon ko soti a kasorgaan iyan na pegamponen iyan sekaniyan
a nggolalan ko pepekasabet a bager o kawanan a lima niyan.
7 So ped na sasanaan iran so manga karo sa katidawa,
ago so pen so ped na sii ko manga koda,
ogaid na aya sasarigan tano na so Ingaran o Allah a Tohan tano.
8 Pemangirepang ago penga ooteng angkoto a manga taw,
ogaid na pembangon tano ago pemayandeg.
9 Ya Allah, pakatabana ngka so dato.

Ampona kami ngka igira a pepananalo kami reka.
SABOR 21
Podi ko Kiyapakataban
Ipekebabaya o dato so bager ka, ya Allah;

sayana a ikapipiya a ginawa niyan so kiyapakatabana ngka on.
2 Inibegay ngka on so masisingayo o poso iyan,
ka so piyangni o manga modol iyan na da ngka on sangkaa megay.
3 Inowitan ka sekaniyan sa manga pipiya a rakmat,
ago siyangkadan ka sa lombos a bolawan so olo niyan.
4 Piyangni niyan reka so kaoyagoyag na inibegay ngka on,
apiya so kapakalendo o omor iyan sa dayon sa dayon.
5 Miyakala so bantogan iyan sabap ko kiyatabangi ngka on;
inidinan ka sekaniyan sa menang ago pangkatan.
6 Bigan ka sa da a ikeda iyan a manga rakmat,
na tanto ngka a piyakapiya a ginawa niyan sabap ko kasisii ngka on.
7 Ka somasarig so dato ko Allah,
na sabap ko da a ikeda iyan a gagaw o Lebi a Maporo
na di sekaniyan den kiiseg.
8 Tena so lima ngka, ya Allah, ko langon o manga ridoay ngka;

tena so kawanan a lima ngka ko siran oto a pekegowad reka.
9 Amay ka makagemaw ka na pekakaraben ka siran a lagid o rapog.
Sii ko kakerarangiti ko Allah na sekaben iyan siran,
na kelengan siran o apoy.
10 Mbinasaan ka so kebabadan kiran sii sa doniya,
ago so manga moriyataw iran ko manosiya.
11 Apiya pen kediyatan ka iran sa marata
ago pegantangan siran sa samok na di iran den ai kitoman;
12 Ka pekalekan ka siran a pemalagoy
amay ka iarang ka kiran so pana a ka.
13 Poroon ka, ya Allah, a ginawa ngka a nggolalan ko bager ka;

ipagidaida ago podin ami so gees ka..
SABOR 22
So Kagoraok ko Kararasay ago so Kapodipodi
Hey Tohan ko, Tohan ko, ino ako ngka telikodi?

Ino ka tanto a pekawatan a di ako ngka den tebangan,
ago di ngka den keneg so kapeperego aken?
2 Hey Tohan ko, sii ko kadadaondaw na penggoraok ako reka,
ogaid na di ka den sembag,
ago sii pen ko kagagawii, ogaid na di ako den keparinan.
3 Ogaid na masosoti ka a kokorsi sii ko manga podi reka o Israil.

4 Seka i siyarigan o manga apo ami;
somiyarig siran na piyanabangan ka siran.
5 Gomiyoraok siran reka na miyasabet siran;
siyarigan ka iran na da siran kaolai.
6 Ogaid na matag ako baden oled a kena den a ba mama,

a pepegitowitoon o manosiya ago dii sodiin o manga taw.
7 So langon a pepekailay raken na di ako iran dii pekaradiyaanan;
pepanonongkaan ako iran a pepengelengkeleng siran:
8 “Somasarig sekaniyan kon ko Allah," a tig iran,
"na so den so Allah i makapenabang rekaniyan.
Sekaniyan den i makasabet on o masosoat on."
9 Ogaid na seka i miyakaliyo raken ko tiyan o ina aken,

na piyakasarig ako ngka apiya isako ikaririga ako pen.
10 Sii ako reka inisana ipoon ko kinimbawataan raken;
ipoon den ko kinikarimbiten raken o ina aken na seka den i Tohan aken.
11 Di ka raken pekawatan ka miyakadaseg raken so samok,
na da den a ba raken pekatabang.
12 Lilibeten ako o madakel a ridoay

a lagid o manga wawaraw a mama a sapi;
so manga babager a sapi a poon sa Basan na kalilikopan ako iran.
13 Pepakanggangaan iran raken a ngari iran
a lagid o manga arimaw a pepemangengger a dii sekisi ko miyasikem iran.
14 Datar o ig a miyaodod so bager aken,

na miyanga lelepo so langon a tolan aken;
lomiyanag so poso aken a lagid o taro sii ko rareb aken.
15 Kiyamaraan so bakereng aken a lagid o pirapogan a koden a bote,
na minideket so dila aken ko pelak aken;
inibaba ako ngka ko bayanek a ron ako petay.
16 Lilikopan ako o madakel a manga rarata a mama;

diyaseg ako iran a datar o sagorompong a manga aso;
pilalambasan iran a manga palad aken ago manga ai.
17 Pekealong so langon a tolan aken;
mbabantayan ago papandangen ako iran.
18 Mbabagibagiin iran so manga nditaren aken
ago peripaan iran so kimon aken.
19 Ya Allah, di ka raken pekawatan.

Hey Bager aken, tabangi ako ngka nggagaan.
20 Lidasen ako ngka ko pedang;
pokasa ngka so da a rowar on a niyawa ko ko kapaar angkai a manga aso.
21 Sabeta ko ngka ko ngari angkai a manga arimaw
ago lidasen ako ngka ko manga panga angkai a manga iila a sapi.
22 Peyagen ko so Ingaran ka ko manga pagari aken,

na go podin ko seka sii ko kalilimod iran:
23 “Sekano a maaleken ko Allah na podiya niyo sekaniyan.
Langon iyo a kiyababadan ko Yakob na bantoga niyo.
Simbaa niyo pen, hey langon a mbawataan o Israil.
24 Ka da niyan ndarainonen so mararasay
aya pen o ba niyan sodia so kapekerasay niyan;
da niyan on pagnaa so paras iyan
ka piyamakineg iyan den so kiyagoraok iyan sa tabang."
25 Pepekapoon reka so kapepakapodi aken sii ko mala a kalilimod;

itoman aken so manga samaya aken sii ko kamamasaan o siran oto a maaleken reka.
26 So manga miskin na kan siran ago penga oosog;
siran oto a dii mbabanog ko Allah na podin iran sekaniyan,
maoyag so manga poso iyo sa taman sa pakataman!
27 Pekatadem so langon a taw ko pirowarowangan o doniya
ago sengor siran ko Allah,
na pemanodiyod ko hadapan iyan so langon a bangsa ko manga nasiyon,
28 Ka rek o Allah so kadadato, na ndadatoan iyan so manga nasiyon.
29 So langon a kawasa sa doniya na kan siran ago pemanimba;
so langon a pepekasonod ko bayanek na pemanodiyod ko hadapan iyan,
a so siran oto a di iran mapekamboway so kaoyagoyag iran.
30 So pemakatalingoma a manga apid na pengongonotan siran ko Allah;
mapenotol ko pekasalono a manga taw so makapantang ko Allah,
31 Na pekalangkapen iran so kiyapanabet iyan sii ko manga taw a da pen mbawataan
a peteroon iran a "Miyanggolaola niyan den ai."
SABOR 23
So Allah a Tomatagikor Rektano
So Allah i tomatagikor raken;

di ako den kekorangan sa apiya antonaa.
2 Pepakadekeen ako niyan ko manga pananateba a manga lolombay a otan on;
pegagaken ako niyan ko kilid o lomilintad a manga ig,
3 Na pegoyagen iyan so niyawa ko.
Di ako niyan dii nggonanaon ko ontol a manga lalan sabap ko Ingaran iyan.
4 Apiya pen o sii ako pelalakaw ko balintad a kasisirongan o kapatay
na da den a ikelek aken a marata ka mipageepeda aken seka;
so badas ka ago teken na pekerinawan ako iran.
5 Pegenatan ako ngka sii ko kamamasaan o manga ridoay aken.

Pegododan ka sa lana a olo aken;
pesolapay so tagayan aken.
6 Matamataan den a ketatap raken so kamapiyaan ago gagaw
ko langon a manga gawii o kaooyagoyag aken,
na sii ako pekakaden ko Walay o Allah sa taman sa pakataman.
SABOR 24
So Kababantogan a Dato
Rek o Allah so alam ago so langon taman a matatago on,

giya doniya ago so langon a taw a komakaden on;
2 Ka sekaniyan i miyangon ko doniya ko liyawaw o manga kalodan,
ago miyakambeken on sii ko manga ig.
3 Antawaa i mapapatot a tekedeg ko palaw o Allah?

Anta i pekatindeg ko soti a darpa iyan?
4 So taw a lompiyo i lima ago mapoti i poso
a di penakoto aya pen o ba niyan sepaan so di benar.
5 Terima sekaniyan sa rakmat a poon ko Allah
ago kaontol a poon ko Tohan a pesebet on.
6 Giyanan den so manga taw a pepamanimba rekaniyan,
a so siran oto a dii mbabanog ko paras ka, hey Tohan o Yakob.
7 Bangona niyo a manga olo niyo, hey manga gimowa;
pakileka kano, hey andangandang a manga pintoan
kaan makasoled so kababantogan a Dato.
8 Antawaa angkai a kababantogan a Dato?
So Allah a pekagaga ago mabager;
so Allah a mabager ko katidawa.
9 Bangona niyo a manga olo niyo, hey manga gimowa;
pakileka kano, hey andangandang a manga pintoan
kaan makasoled so kababantogan a Dato.
10 Antawaa so kababantogan a Dato?
So Allah a Lebi a Mamaapaar, sekaniyan i kababantogan a Dato.
SABOR 25
Pangni sa Kanggonanao ago Kalilinding
Sii aken reka ipepangadap so niyawa ko, ya Allah;

2 Sasarigan ko seka, hey Tohan ko.
Di ako ngka pakapekeyaa aya pen o ba ako ngka pakidaagen
ko manga ridoay aken.
3 Da den a mbabayorantang reka a ba keyai,
ka aya makakeya na so siran oto a pepenipo sa da a sabap iyan.
4 Toroon ka raken, ya Allah, so manga lalan ka;

pangendaon ka raken so manga okitokit ka.
5 Nggonanaowa ko ngka ko tito a benar ka na go ako ngka pangendaowa,
ka seka i Tohan a pesebet raken,
na seka i peserigan aken ko mababasa alongan.
6 Tatanodi ngka, ya Allah, so kala a ka i kapedi ago gagaw,
ka inipoon den ai ko miyanga oona a gawii.
7 Di ngka tedemi so manga dosa ko ko kangodai raken pen
aya pen o ba so manga sala a minisopak aken reka,
ka tademi ako ngka baden a makaaayon ko gagaw ngka
sabap ko kapiya ngka, ya Allah.
8 Mapiya ago magiinontolan so Allah;

sabap roo na ipetoro iyan ko manga baradosa so lalan a kedegen iran.
9 Di niyan dii nggonanaon so pepangangalimbabaan ko kaontol,
na ipepangendao niyan kiran so lalan iyan.
10 Sii ko langon a okitokit o Allah na masalinggagaw sekaniyan ago kasasarigan
ko siran oto a petoman ko kapasadan iyan ago so manga insarat iyan.
11 Sabap ko Ingaran ka, ya Allah,

na rilai ngka so kadostaan aken apiya pen ai mala.
12 Antawaa so taw a maaleken ko Allah?
Itoro on o Allah so lalan a piliin iyan rekaniyan.
13 Lalayon sekaniyan pekekowa a mapiya,
na ketangan o manga wata iyan so lopa.
14 So dii kingginawain ko Allah na rek o siran oto a maaleken on,
na penggogoden iyan kiran so kapasadan iyan.
15 Di aken pelikatan sa mata so Allah,
ka sekaniyan bo i pekapokas ko manga ai aken ko litag.
16 Sangori ako ngka na go ako ngka kalimoon,

ka matatawantawan ako ago mararasay.
17 Miyakadakel so manga awid a akal aken;
pokasa ko ngka ko manga kamaregenan aken.
18 Tagoa ngka sa ginawa so kararasay aken ago so kararata a ginawa ko,
na rilai ngka so langon a dosa ko.
19 Ilaya ngka so kiyapakadakel o manga ridoay aken

ago so masarangit a kipekegowaden iran raken.
20 Ipata ngka so niyawa ko na go ako ngka panabangi;
di ako ngka pakapekeyaa, ka sii ako reka pepegapas.
21 Malinding ako o kada a sala aken ago katito,
ka kagiya mbabayorantang ako reka.
22 Sabeta ngka a Israil, hey Tohan ko, ko langon a karomasayan iran.
SABOR 26
Pangni o Mapiya a Taw
Pakikilalaan ka, ya Allah, a da a sala aken,

ka miyaginetaw ako a di kedawayan,
na siyarigan aken so Allah sa da a kandowadowa.
2 Pariksaa ko ngka, ya Allah, na go ako ngka tepengi;
tokawi ngka so poso aken ago pamikiran.
3 Ka so gagaw ngka na lalayon aken pagiimanen,,
na aya ipepaginetaw aken na so tito a benar ka.
4 Di ako pengeped ko pepamagakal a manga taw

aya pen o ba ako pakikoyapeta ko dii mamagomanta.
5 Ipekegowad aken so kalilimod o manga rarata i olaola,
na di ako tepi ko manga baradosa.
6 Pagonaban ko a manga lima ko a mipemataan a da a sala aken

na go aken bo pelibeta so aparan ka, ya Allah,
7 A pepagidaida ako sa matanog a kapanalamat
ago pepanotolen aken so langon a piyakamemesa a manga galebek ka.
8 Pekebabayaan ko so Walay a babalingan ka, ya Allah,

a so darpa a kakadenan o bantogan ka.
9 Di ngka perakesen mayopas so niyawa ko sii ko manga baradosa,
aya pen o ba ngka rakesen so kaoyagoyag aken ko manga talibono,
10 A so manga taw a sisii ko manga lima iran so manga rarata a kadiyat,
ago so kawanan a lima iran na mapepeno a manga tendan.
11 Ogaid na so saken on peman na pepaginetaw ako a di kedawayan;

kalimoon ako ngka ago sabeta ko ngka.
12 Tomitindeg ako ko pantar a lopa;

sii ko kalilimod o manga pagtaw niyan na podin ko ron so Allah.
SABOR 27
So da a Kalek iyan a Sarig ko Allah
So Allah i solo aken ago pepekasabet raken; antawaa den i ikelek aken?
So Allah i pelinding ko niyawa ko; antawaa den i ikewan aken?
2 Amay ka pesondol raken so manga rarata a taw sa kasekaba iran ko sapo aken,
a so den so manga soranga aken ago manga ridoay,
na kirepang siran baden ago penga ooteng.
3 Apiya pen o kalikopi ako o madakel a manga sondaro na di den kelek so poso aken;
na apiya pen o mitidawa ako o manga ridoay aken na makasasarig ako pen.
4 Sabetad a miyapangni aken ko Allah na giyai i pananagontamanan aken:
so kapakakaden aken ko walay o Allah
ko langon a manga gawii ko kaooyagoyag aken
kaan aken kabantayi so kakasi o Allah
ago kaisean aken sekaniyan sii ko Timplo niyan.
5 Ka sii ko masa a kamoralaan na pekadalongen ako niyan ko kadena iyan;
itepok ako niyan ko lindonga sii ko barombarong iyan,
na imbatog ako niyan ko lakongan.
6 Mandiyadi na pekaombaw so olo aken ko manga ridoay a lomilibet raken,
na sii ko Timplo niyan na pekorban ako ron
a di ako dii melalis sa kapekebabaya;
pegidaidaan ago pemboboniboniyanan ko so Allah.
7 Pakinega ngka so lagam aken igira a pepananalo ako, ya Allah;

kalimoon ago ampona ko ngka.
8 Isako teroon ka a "Mbabanoga ngka so paras aken,"
na pitero reka o poso aken a "So paras ka, ya Allah, i pembanogen ko."
9 Di ngka raken pegnaa so paras ka.
Di ako ngka mbowangen a oripen ka a ba ka pekerarangiti.

Seka den i miyakatabang raken;
di ako ngka silin aya pen o ba ako ngka talikodi, hey Tohan ko a pesebet raken.
10 Apiya pen o talikodi ako o ama aken ago so ina aken
na so Allah i tegikor raken.
11 Toroon ka raken so lalan ka, ya Allah;

agaka ko ngka ko pantar a pagokitan sabap ko manga ridoay aken.
12 Di ako ngka pelada ko kabaya o manga soranga aken,
ka riridoon ako o manga bokeg a saksi
a aya ipesengaw iran na kapanganiyaya.
13 Matatangked sa ginawa ko a keilay aken so kapiya o Allah
sii sangkai a inged o kikaooyag.
14 Mbabayorantang ka ko Allah;
pakababager ka ago pakakewarawa ngka so poso o ka,
na mbabayorantang ka ko Allah.
SABOR 28
Pangni sa Tabang
Pepananalowan ko seka, ya Allah a Lakongan aken;

di ako ngka pengimbengeli.
Ka o rerenek ka baden na kebaloy ako a lagid o siran oto a miyanga oolog ko kobor.
2 Pamakinega ngka so kapenggoraok aken sa kapedi
igira a pepananalo ako reka sa tabang
a ibabayaw aken so manga lima ko a iaantap ko Lebi a Soti a Darpa a ka.
3 Di ako ngka pengarasen a ped o manga rarata a taw,

a rakes o siran oto a dii mbabaradosa,
a marinaw so di iran dii kapakimbitiyarai ko manga siringan iran
ogaid na migagaib ko poso iran so kagowad.
4 Badalen ka kiran so galebek iran
ago so kamarataan o manga siyowa iran.
Badalen ka kiran so miyanggolaola o manga lima iran,
na tanaan ka kiran so mapapatot kiran.
5 Sabap sa di iran tegoon sa ginawa so miyanga papasad o Allah
ago so pinggolaola o manga lima niyan
na nggebaan iyan siran
a di niyan siran den mbangonen peroman.
6 Mapopodi so Allah
ka miyaneg iyan so kiyapangangampedian aken.
7 So Allah i bager aken ago kelong;
somasarig on so poso aken na peketabangan ako.
Tanto a mabebebaya so poso aken,
na ipenalamat aken rekaniyan so idaida aken.
8 So Allah i bager o manga pagtaw niyan

ago lindonga a pepekasabet ko miyapili iyan a dato.
9 Sabeta ngka so manga pagtaw ngka
ago rakmati ngka siran a aya ngka manga kawali.
Tagikora ngka siran ago sakopowa ngka sa taman sa pakataman.
SABOR 29
So Sowara o Allah sii ko Barabarat
Palada niyo ko Allah, hey manga ala i gees sa sorga;

palada niyo ko Allah so bantogan ago so kabatowa.
Palada niyo ko Allah so bantogan a ron bo mapapatot ko Ingaran iyan;
simbaa niyo so Allah a nggolalan ko kakasi o kasosoti.
3 So sowara o Allah na sii ko liyawaw o manga ig;

dii ndadalendeg so kababantogan a Tohan,
a so den so Allah, ko liyawaw o manga ala a kalodan.
4 So sowara o Allah na pekagaga,
so sowara o Allah na mapepeno a gees.
5 So sowara o Allah na pekeopak iyan so manga kayo a sidro;

pekesarisa o Allah so manga sidro sa Libanon.
6 Pepakatepaken iyan a Libanon a datar o nati a sapi,
ago so Palaw a Hirmon a datar o mangoda a maila a sapi.
7 So sowara o Allah na pepekasogat a rakes o pepamangiteras a kilakilat.

8 So sowara o Allah na pekokogen iyan so disirto;
pekokogen o Allah so Disirto sa Kadis.
9 So sowara o Allah na pembibiden iyan so manga ala a kayo,
ago pepanapaken iyan so manga kalasan;
na so langon a sisii ko Timplo niyan
na palaya dii melalalis sa "Bantogen so Allah!"
10 Kokorsi so Allah ko liyawaw o bagiyaw;

kokorsi so Allah a ndadato sa taman sa pakataman.
11 Pembegan o Allah sa bager so manga pagtaw niyan;
peperakmatan o Allah so manga pagtaw niyan sa kalilintad.
SABOR 30
Kapangangarapan a Panalamat
Seselaan ko seka, ya Allah, ka inigakap ako ngka poon ko madalem,

na da ako ngka pakikowaan a diyaman ko manga ridoay aken.
2 Ya Allah a Tohan ko, gomiyoraok ako reka sa tabang
na biyolongan ako ngka.
3 Kiyawa ako ngka ko kapekealogan aken ko darpa o miyamatay;
inoyag ako ngka ko kakeolog aken ko kobor.
4 Pagidaidai niyo sa podi so Allah, hey manga kaom iyan;
pepanalamat kano ko katatademi niyo ko kasosoti niyan.
5 Ka saperek baden so rarangit iyan,
ogaid na tatap so limo iyan taman den ko omor.
So kasegad na baanda taman bo ko kagagawii,
ogaid na pekatalingoma so kakebebaya amay ka kepita.
6 Isako magedam aken a malilinding ako na pitero aken a

"Di ako den kiiseg."
7 Ka sabap ko limo o ka, ya Allah,
na piyakambeken ako ngka a datar o mabager a palaw,
ogaid na isako pagenaan ka raken so paras ka na miyasosa ako.
8 Mandiyadi na sii ako reka miyananalo, ya Allah;

sii ako miyangangampedian ko Kadnan:
9 “Antonaa i keparoli ngka ko kapetay aken,
sii ko kakeolog aken ko kobor?
Kepodi ka o bayanek?
Ba niyan mapekalangkap so kasasarigi reka?
10 Pakinega ngka, ya Allah, na go ako ngka kapediin.
Ya Allah, ogopi ako ngka."
11 Siyambian ka so kapakamboboko aken sa dii kapakaseyaw;

likas ka raken so nditaren aken a sako
na pinditaran ako ngka sa kapipiya a ginawa
12 Kaan madidaw ka a manga podi o poso aken
a kena a ba ako baden rerenek.
Ya Allah a Tohan ko, penalamatan ko seka sa taman sa pakataman.
SABOR 31
Pangni sa Sarig ko Allah
Sii ako reka pepagapas, ya Allah;

di ako ngka den pakapekeyaa;
sabeta ngka sabap ko kaontol ka.
2 Lekai ngka raken so tangila ngka
na go ako ngka panabangi nggagaan.
Mabaloy ka a lakongan a lindonga aken,
a mabager a kota a ron ako kelinding.
3 Matamataan den a seka i lakongan ago kota aken;

nggonanaowa ko ngka ago agaka ngka sabap ko Ingaran ka.
4 Lidasen ako ngka ko litag a matataan raken,
ka seka i lindonga aken.
5 Ipembayorantang aken sa lima ngka so niyawa ko;
aona ko ngka, ya Allah a Tohan a kasasarigan.
6 Ipekegowad ka so siran oto a pesimba ko da a bali niyan a manga barahala;

ogaid na sasarigan aken so Allah.
7 Ikebabaya aken ago ipekapiya a ginawa ko so gagaw ngka,
ka miyailay ngka so kararasay aken
na katawan ka den so manga awid a akal aken.
8 Da ako ngka palada ko lima o manga ridoay,
ka piyakatindeg ako ngka baden ko madaya a darpa.
9 Kalimoon ako ngka, ya Allah, ka masisiksa ako;

pepekalobay so manga mata ko sabap ko kapakamboboko aken
taman den ko niyawa ko ago so badan aken.
10 Pekepos so kaoyagoyag aken sii ko rata a ginawa,
ago so omor aken sii ko kapakapererego.
Pekedaan ako sa bager sabap ko kapekerasay aken,
na apiya so manga tolan aken na pekelobayan.
11 Sabap ko langon o manga ridoay aken

na tanto ako a dii sodiin o manga siringan aken.
Ipekelek ako o manga ginawai aken,
na igira a pekeilay ako iran ko lalan na pepelagoyan ako iran.
12 Lagid o miyatay a di den tedeman a kiyalipatan ako iran;
miyabaloy ako a datar o miyaropet a koden.
13 Pekeneg aken so dii kapamaganta o madakel a taw,
ago so kapagiitai ran raken ko mbalabala.
Pepegopakatan ako iran sa marata,
ka di iran dii kediyaten a kambonoa iran raken.
14 Ogaid na sasarigan ko seka, ya Allah;

tig aken a "Seka i Tohan aken."
15 So okoran raken na sisii sa lima ngka;
lidasen ako ngka ko lima o manga ridoay aken
ago sii ko siran oto a peseloba raken.
16 Pakaliwanaga ngka so paras ka ko oripen ka;
sabeta ko ngka ko da a ikeda iyan a limo o ka.
17 Di ako ngka pakapekayaa, ya Allah, ka gomiyoraok ako reka.
Aya makakeya na so manga rarata a taw,
na mikobor siran a kipakagegenek.
18 Mapakakemed angkai a manga bokeg i modol,
ka di siran dii mamanakabor ago dii mamakasodi
ko di iran dii kapangimporoan tero sa sopak ko manga oontol.
19 Sayana a mala so kapiya ngka

a ititiyagar ka ko siran oto a maaleken reka
a di ngka ini dii nggolalan ko kamamasaan o manga taw
sii ko siran oto a pepagapas reka.
20 Sii ko kalilindongan a kamamasaan ka na itatapok ka siran on
a mabebelag ko dii kediyaten o manga taw;
sii ko kakadenan ka na lilindingen ka siran on
ko dii kapakiperidoay o manga dila.
21 Podin so Allah,
ka piyakiilay niyan raken so piyakamemesa a gagaw niyan
isako sisii ako ko penggobaten a siti.
22 Sii ko kiyatekawi raken na pitero aken a
"Miyabelag ako den ko kamamasaan ka."
Ogaid na miyaneg ka so kiyapangangampedian aken
isako mananalo ako reka sa tabang.
23 Kababayai niyo so Allah, hey langon iyo a manga kaom iyan.

Pepagipaten o Allah so mapaparatiyaya a manga taw,
ogaid na ipetena iyan ko pepangimporoan so tarotop a mapapatot on.
24 Pakababager kano ago pakapipiyaa niyo so manga poso iyo,
hey langon iyo a miinam ko Allah.
SABOR 32
Kateobat ago Karila
Mapipiya a ginawa o taw a kiyarilaan so manga sala iyan,

ago kiyasapengan so manga dosa niyan.
2 Mapipiya a ginawa o taw a di on imbilang o Allah so kadostaan iyan,
ago da a kapamagakal ko pamikiran iyan.
3 Isako da ako teobat na pepekalobay so manga tolan aken

sabap ko di aken dii kapakaperego ko mababasa alongan.
4 Ka gagawii daondaw na pekidag raken so lima ngka,
na miyati so bager aken a datar o liyaonan.
5 Samaoto na tiyarima aken a miyakandosa ko reka

na da aken pen pagmaa so kadostaan aken.
Tig aken a "Peteobaten ko ko Allah so manga dosa ko,"
na rinilaan ka so kasalaan aken.
6 Sabap roo na makapengangarapan reka so oman i mapaparatiyaya
sii ko masa a kareregeni ron.
Na apiya pen mbagiyaw so mangaala a ig
na di iran sekaniyan den keoma.
7 Seka i di aken dii katepokan;
pekalidasen ako ngka ko samok
ago pelibeten ako ngka a manga lalis sa kakesabet.
8 Tig o Allah a "Paginsaratan ko seka

ago itoro aken reka so lalan a patot a kedegen ka,
na pagosiyatan ko seka ago siyapen.
9 Di ka seyan sa koda o di na kimar a da a sabot iyan
a aya bo a kakipaaren on na osaran sa kakang ago tali,
kaan ka kambayabayai."
10 Madakel a karomasayan o manga rarata,

ogaid na so taw a somasarig ko Allah
na lilibeten o da a ikeda iyan a gagaw niyan.
11 Pakapipiyaa niyo a ginawa niyo ko Allah ago kabebaya kano baden, hey mangaoontol.
Pelalalis kano sa kapekebabaya, hey langon a manga titito i poso.
SABOR 33
Idaida a Podi
Pelalalis kano sa kapekebabaya ko Allah, hey manga oontol;

mapapatot ko manga titito so kapepodiya iran on.
2 Podiya niyo so Allah a sasartaan a boniboniyan a alpa;
didawa niyo a podi a rakes o boniboniyan a kotiyapi a sapolo i tapes.
3 Pagidaidai niyo sa bago a dikir;
mboboniboniyan kano piyapiya a dii melalalis sa kapekebabaya.
4 Ka ontol so katero o Allah,
na kasasarigan sekaniyan ko langon a di niyan dii nggolaolaan.
5 Pekebabayaan o Allah so kaontol ago matito a kokoman,
na mipepeno sa doniya so da a ikeda iyan a gagaw niyan.
6 Nggolalan ko katero o Allah na kiyambaalan so manga langit

taman ko langon a pepamanindaw ron a nggolalan ko napas a poon ko ngari iyan.
7 Tinimo iyan so manga ig sa kalodan a datar bo o sii ko manga omoy,
ago piyanaliyong iyan so manga posed a ragat.
8 Kaleken ka ko Allah, hey dalem a doniya.
Pagadati niyo, hey langon a kibabaling ko doniya.
9 Ka mitero sekaniyan na miyaaden ai;
somiyogo sekaniyan na minibayan so langon taman.
10 Pegilangen o Allah so manga antangan o manga nasiyon;

di niyan pekaondasen so manga antap o manga taw.
11 Ogaid na tomitikna so manga antangan o Allah sa taman sa pakataman,
na pekitoman so manga antap o poso iyan
ko langon a kapepamagapidapid o masa.
12 Rarakmatan so nasiyon a aya Tohan iyan na so Allah,
a so manga taw a piyamili iyan a makewali niyan.
13 Roo sa kasorgaan na tomotolong so Allah
ka mbabantayan iyan so langon a manosiya.
14 Roo ko darpa a kakadenan iyan na pegilain iyan so langon a kibabaling ko doniya.
15 Na sabap sa pelimbagen iyan so poso o oman i isa kiran
na katawan iyan so langon taman a di iran dii nggolaolaan.
16 Da a dato a ba kesabet a nggolalan ko kadakel o manga sondaro niyan,

na da a sondaro a ba pekalidas sabap ko mala a bager iyan.
17 So koda na di kesanaan a ba makapenabang,
ka apiya pen ko kala iyan i bager na kena ini a ba pekasabet.
18 Ogaid na sisiyapen o Allah so manga taw a maaleken on,
a so siran oto a miinam ko da a ikeda iyan a gagaw niyan
19 Sa kapekalidasa niyan kiran ko kapatay
ago so kapegoyaga niyan kiran ko masa a taon.
20 Mbabayorantang tano ko Allah,

ka sekaniyan i pegogop rektano ago kelong.
21 Sekaniyan i ikapipiya a ginawa tano
ka sasarigan tano so soti a Ingaran iyan.
22 Matatap rekami so da a ikeda iyan a gagaw ngka, ya Allah,

sii ko kaiinama mi reka.
SABOR 34
So Ipepodi ko Kapiya o Allah
Simbaan aken so Allah ko langon a masa;

ketatap so kapepodiya on o manga modol aken.
2 Ipengandag o ginawa ko so Allah;
pamakineg kano a kikararasay ago kabebaya kano baden.
3 Pangeped kano raken mantog ko Allah;
selaselaan tano langon so Ingaran iyan.
4 Pimbabanog aken so Allah na simbag ako niyan;

piyokas ako niyan ko langon o kalek aken.
5 Siran oto a makasasangor rekaniyan
na pepekalangas so manga paras iran a di den pekarondan.
6 Miyananalo angkai a kadodowaanan a mama na miyaneg o Allah,
na siyabet iyan sekaniyan ko langon a karomasayan iyan.
7 Pepagipat so malaikat o Allah ko melilibeta ko siran oto a maaleken ko Allah
na pepakalidasen iyan siran.
8 Tepengi niyo kaan iyo katokawi so kapiya o Allah;

rarakmatan so taw a pepegapas on.
9 Kaleken iyo so Allah, hey manga kaom iyan,
ka da a ba makokorang ko siran oto a maaleken on.
10 Apiya so manga arimaw na kekorangan siran ago penga aaor,
ogaid na so siran oto a mananagontaman ko Allah
na di den kekorangan sa apiya antonaa a kamapiyaan.
11 Song kano sii, manga wata aken, na pamakinega ko niyo;

ipengendao aken rekano so kikaleken ko Allah.
12 O kabebebayai ngka so kaoyagoyag
ago masisingayo o ka so kalendo a omor ago kapipiya a ginawa
13 Na genggena ngka baden so dila a ka ko marata,
ago so manga modol ka ko kapakatero sa kapamagakal;
14 Talikodi ngka so marata na nggolaolaa ngka so mapiya;
panagontamani ngka so kalilintad ago apasa ngka pen.
15 Sisiyapen o Allah so manga oontol

na go pepamakinegen iyan so kapenggoraok iran.
16 Ogaid na pesopaken o Allah so siran oto a dii nggolaola sa marata
sa kapapasa niyan ko katatademi kiran sii sa doniya.
17 Igira a penggoraok so manga oontol na pepamakinegen siran o Allah,
na pepokasen iyan siran ko langon a awid a akal iran.
18 Marani so Allah ko langon a kikaroropet i poso,
na pesebeten iyan so siran oto a kiyadaan sa inam.
19 Apiya pen o madakel a kamaregenan o maontol a taw

na pepokasen sekaniyan kiran langon o Allah;
20 Pelindingen iyan so langon a manga tolan iyan;
da den a satiman bo a ba on kepotol.
21 So kamarataan na aya pepekapatay ko manga rarata a taw,

na siran oto a pekegowad ko manga oontol na kesala.
22 Pegaonen o Allah so manga oripen iyan,
na da den a sakataw bo ko pepegapas on a ba kesala.
SABOR 35
Pangni sa Tabang
Ridoa ngka, ya Allah, so siran oto a romirido raken;

tidawaan ka so di raken dii makitidawa.
2 Kapeti ngka so kelong ka ago raben,
na mbowat ka sa kapagabanga ngka raken.
3 Kolaten ka so bangkaw ngka ago patok ko siran oto a peseloba raken.
Teroa ngka ko niyawa ko a "Saken so pesebet reka."
4 Pengnin ko a makakeya ago kadiyamanan so siran oto a mananamar ko niyawa ko.

Mamakapeto a miyamakadapanas so siran oto a kekadiyat sa kabinasa ko.
5 Malagid siran o okap a ipembayog o ndo a ipendendeg siran o malaikat o Allah.
6 Makaliboteng ago makalindeg so lalan iran ko kapepanalobaa kiran o malaikat o Allah.
7 Tiyaan iran raken so litag iran sa da a sabap iyan
ago komiyalot siran pen sa galebo a keologan raken.
8 Sabap san na mitekaw den a katanai kiran o kasiksaan.
Militag kiran so litag a tiyaan iran
ago maolog siran pen ko galebo a kebinasa siran on.
9 Amay ka magiyoto na kebebaya so niyawa ko sii ko Allah

ago pekapiya a ginawa ko sabap ko kiyasabeta niyan raken.
10 So den so dalem o ginawa ko i nggiraw a
"Antawaa i lagid ka, ya Allah?
Pesebeten ka so miskin ko mabager a di sekaniyan;
apiya so miskin ago so kadodowaanan sii ko di on dii teban."
11 Pesenditan ako o bokeg a manga saksi;

ipegise iran raken so di aken katawan.
12 Aya ipembadal iran raken na marata ko mapiya
sa kapakapekerataa iran ko ginawa ko.
13 Ogaid na isako manga sasakit siran na minditar ako sa sako
ago inipangalimbabaan aken a ginawa ko a nggolalan ko kiyapowasa ko.
Na isako mangangarapan ako a da maampon
14 Na miyakamboko ako a datar o dii mboko sa bolayoka iyan o di na pagari.
Miyagenebeneb ako a domodosong a mararata a ginawa ko
a datar o aya ipesegad aken na so ina aken.
15 Ogaid na isako mirepang ako na mitimo siran a miyanga bebebaya;

pitimoan ako o manga penggobat raken a di aken katawan,
na da den a ayat a kapepagitowitoa iran raken.
16 Lagid o manga kapir a lilibeten ako iran a pepamagongatongat
a di iran raken dii pakakitebaan a ngipen iran.
17 Ya Allah, ay katey pen a kambabantayi ngka sii baden?
Panabangi ngka so niyawa ko ko kapesiksaa iran on,
a so den so da a rowar on a kaoyagoyag aken sangkai a manga arimaw.
18 Amay ka magiyoto na penalamatan ko seka sii ko mala a kalilimod;
sii ko hadapan o madakel a taw na podin ko seka on.
19 Di ako ngka pakipepekaradiyaani ko pepamokeg a manga ridoay aken.

So pepanga gogowad raken sa da a sabap iyan
na di ngka siran pakapengerakerata sa marata a pamikiran.
20 Kena a ba marinaw a di iran dii kapakimbitiyarai,
ka pepagantangan siran baden sa di benar a kisendit iran
ko siran oto a makalilintad ko inged.
21 Pepamoliatan ako iran a di iran dii teroon a
"Nari! Nari! Kiyabelembelengan ami so pinggolaola niyan."
22 Miyailay ngka ini, ya Allah. Di ka baden rerenek.

Di ako ngka aawata, hey Kadnan.
23 Pagnaw ka ago mbowat ka sa kakokoma ngka ko rido aken.
Panindegen ako ngka, hey Tohan ko a aya ko Kadnan.
24 Pakabenara ko ngka sabap ko kaontol ka, ya Allah a Tohan ko;
di ako ngka pakipepekaradiyaani ko manga ridoay aken.
25 Di ngka kiran pakipeteroon ko ginawa iran a
"Na, miyaipos tano sekaniyan! So den so kabaya tano."
26 Makakeya ago makadapanas so langon a mabebebaya ko kasisiksa aken;

kakokosan sa kayaan ago kapakaito so langon a pepangimporoan raken.
27 Makapelalalis sa kapekebabaya ago kapipiya a ginawa
so siran oto a kebayaan iran so kapakabenar aken;
malalayon iran matero a "Mabantog so Allah a masosoat ko kamapiyaan o oripen iyan."
28 Samaoto na pekalangkapen o dila aken so kaontol ka
ago so manga podi reka ko mababasa alongan.
SABOR 36
So Kadostaan o Manosiya ago so Kapiya o Allah
Aden a migegedi ko poso aken makapantag ko kadostaan o marata a taw:

Di niyan kepikir so kalek ko Allah;
2 Ka sabap sa ibibiling iyan a ginawa niyan a tanto a mapiya
na di niyan keinengka so kadostaan iyan aya pen o ba niyan kagowaden.
3 So manga katero o ngari iyan na pepekasamok ago pepamagakal;
gominek sekaniyan magongangen ago nggolaola sa mapiya.
4 Apiya sii ko kaiiga iyan na pepagantangan sekaniyan sa samok;
di mapiya so lalan a kekedegen iyan,
na di niyan den sengkaan so kamarataan.
5 So gagaw ngka, ya Allah, na somosoko ko manga langit,

ago so kasasarigi reka na taman den ko kawang.
6 So kaontol ka na datar o manga babager a palaw,
so katito ngka i kokoman na datar o mala a kalodan.
Ya Allah, so manosiya ago so manga binatang na palaya ngka den pepegongowan.
7 Sayana a da a lawan iyan so da a ikeda iyan a gagaw ngka, hey Tohan ko.
Pepekalindong so manga manosiya ko along o manga papak ka.
8 Pekeosog siran piyapiya ko mitataralo a manga pangenengken ko walay ngka,
na pepakainomen ka siran ko lawasaig ka a ipekesoat iran.
9 Ka sisii reka so bowalan o kaoyagoyag,
na sii ko sindaw ngka na pekeliwanagan kami.
10 Tatapa ngka so gagaw ngka ko siran oto a matao reka

ago so kapagiinontolan ka ko manga titito i poso.
11 Di ako ngka pekidapoi ko ai o takabor,
aya pen o ba ko ngka pakibogaon ko lima o manga rarata.
12 Ilaya niyo o anda miyaoteng so manga rarata i olaola;

minipapes siran a di mamakapembowat.
SABOR 37
So Kebolosan o Marata a Taw ago so Maontol
Di ka pegoteg sabap ko manga rarata a taw

aya pen o ba ngka siiga so dii mbabaradosa.
2 Ka lagid o manga otan a magaan bo a kakelayon iran
na kelas siran a lagid o gadong a manga pamomolan.
3 Sasarigi ngka baden so Allah na go ka nggolaola sa mapiya;

kaden ka ko inged, ka keoyag ka on a malilinding.
4 Tapiin ka a ikapipiya a ginawa ngka so Allah
ka imbegay niyan reka so masisingayo o poso o ka.
5 Mbabayorantangen ka ko Allah so kapepaginetaw ngka;

sarigi ngka pen, ka sekaniyan i pekatoman sii:
6 Pekasigain iyan so kapagiinontolan ka a lagid o solo,
ago so katito o tindeg ka a lagid o igira maoto a alongan.
7 Rerenek ka baden ko hadapan o Allah ago sesabar ka rekaniyan

di ka pegoteg sabap ko taw a pepekapiya so bobolos iyan
ko di niyan dii kinggolalanen ko manga rarata a antangan iyan.
8 Di ngka pengonoti so rarangit, na pakalilipati ngka so gani.

Di ka dii pagoteg, ka kiarong baden ai ko marata.
9 Ka ketipod so manga rarata i olaola,
ogaid na siran oto a mbabayorantang ko Allah na ketangan iran so lopa.
10 Di bo matey na penga ada so manga rarata a taw;

apiya pen mbabanogen ka siran na da den a ketoonan kiran.
11 Ogaid na so dii mangangalimbabaan na ketangan iran so lopa
ago ikepiya a ginawa iran on so lomalangkap a kalilintad.
12 So marata a taw na kekadiyat sa sopak ko maontol

ago di niyan on dii pakakitebaan a ngipen iyan;
13 Ogaid na dii kela o Allah so marata a taw
ka kagiya katawan iyan a pekatalingoma so gawii niyan.
14 Ipekolat o manga rarata so pedang ago pegiraten iran so pana iran

sa kapepada iran ko manga miskin ago so kikadodowaanan,
ago so kambonoa iran pen ko manga titito i olaola.
15 Ogaid na so pedang iran na kisoker baden ko rek iran a manga poso,
na penga popotol so manga pana iran.
16 Tomo so maito a rek o maontol a taw

a di so kakawasaan o madakel a manga rarata;
17 Ka ketipod so kapaar o manga rarata,
ogaid na totokoden o Allah so manga oontol.
18 Katawan den o Allah so manga gawii o da a manga daway niyan,

na ketatap so kawali iran sa taman sa pakataman.
19 Di siran makapekeya ko masa a kasiksaan,
na apiya sii ko manga gawii a taon na penga oosog siran.
20 Ogaid na kedadas so manga rarata;
keda so manga ridoay o Allah a lagid o manga obarobar ko pangomaan;
pesenaw siran a lagid o bel.
21 Pepamangotang so marata a taw na di den mbayad,

ogaid na so maontol na maginawa i kapamegay.
22 Siran oto a rarakmatan o Allah na ketangan iran so lopa,
ogaid na ketipod so siran oto a di niyan dii sinta.
23 So Allah i pepekabeken ko kapelakad o taw,

na ikasosoat o Allah so lalan iyan;
24 Apiya pen o mirepang sekaniyan na di kipayodas,
ka kakapetan sekaniyan sa lima o Allah.
25 Gowani na mangoda ako, na imanto na miyalokes ako den,

ogaid na da ako den mailay so maontol a taw a ba ndarainonen
aya pen o ba makapamangni sa pangenengken so manga wata iyan.
26 Lalayon sekaniyan maginawa ago dii sesembay,
na perakmatan so manga wata iyan.
27 Talikodi ngka so marata na nggolaola ka sa mapiya,

kaan ka mamboway ko doniya.
28 Ka pekebabayaan o Allah so ontol a kokoman,
na di niyan ipendarainon so manga kaom iyan.
Kelinding siran sa taman sa pakataman,
ogaid na ketipod so pekebabadan ko manga rarata.
29 Ketangan o manga oontol so lopa,
ago pekakaden siran on sa taman sa pakataman.
30 So ngari o maontol na dii tero sa kaongangen,

na pekipekas ko dila iyan so ontol.
31 So kitab o Tohan iyan na madadalem ko poso iyan,
na di den kepangka so kapelakad iyan.
32 So marata a taw na pepanorimanen iyan so maontol,

ka pepanamaran iyan a kambonoa niyan on;
33 Ogaid na so Allah na di niyan ipendarainon so maontol sii ko lima o ridoay niyan
aya pen o ba niyan pakibenari amay ka mawit sekaniyan ko dii kokoman.
34 Mbabayorantang ka ko Allah na go ngka kedega so lalan iyan,

ka iporo ka niyan sa katangana ngka ko lopa,
na amay ka matipod so manga rarata na kemasaan ka nan.
35 Miyailay aken so marata a taw a dii mangarasi

a pepekarimpoong a lagid o lomolombay a kayo sii ko kiyatoan iyan a lopa,
36 Ogaid na somiyagad sekaniyan baden, na miyada,
na apiya pen pimbabanog aken na di sekaniyan den ketoon.
37 Pandapati ngka so madidiyangka a taw

ago paginengkaa ngka so magiinontolan,
ka aya kebolosan angkoto a taw na kalilintad.
38 Ogaid na kebinasa langon so manga baradosa;
ketipod so bobolos o manga rarata i olaola.
39 So kakesabet o manga oontol na poon ko Allah;

sekaniyan i lindonga iran sii ko masa a kasasamok.
40 Petebangan ago ipelidas siran o Allah;
pepakalidasen iyan siran ko manga rarata ago pesebeten iyan siran pen
ka ron siran dii magapas.
SABOR 38
Pangni o Taw a Mararasay
Ya Allah, di ako ngka pembongeti a ba ka pekerarangiti

aya pen o ba ako ngka danega ko kagaganiya reka.
2 Ka minibaseg raken so manga gasa a ka,
na minidag raken pen so lima ngka.
3 Da a bager o lawas aken sabap ko rarangit ka;
da den a kapiya o pito lapis a bago aken sabap ko dosa ko.
4 Kiyaombawan ako o manga kadostaan aken;
datar ini o mapened a awid a di aken kekena.
5 Miyanga ado ago miyanga reredak so manga pali aken sabap ko kalalalongan aken.
6 Mabebekong ako a tanto a minibaba;
sii ko mababasa alongan na pepegenebeneb ako a makamboboko.
7 Lalangkapen a mayaw so badan aken,
na da den a kapiya o lawas aken.
8 Minikopay ako ago tanto a miyagomek;
makapeperego ako a masososa so poso aken.
9 Katawan ka den, ya Allah, so langon a masisingayo aken,

na kena a ba reka mapageema so kapakapeperego aken.
10 Pekiorogorog so poso aken, na pekekodep so bager aken;
apiya so kaliwanag o manga mata ko na miyada raken pen.
11 So manga ginawai aken ago manga siringan
na pelidasan ako iran sabap ko manga pali aken,
na pepekaawat raken so manga tonganay aken.
12 Siran mambo a mananamar ko niyawa ko na peteanan ako iran sa manga litag;
siran oto a kebaya raken makasakit na ipepamagita iran so kambinasaa iran raken,
na kekadiyat siran sa kapakatipo ko mababasa alongan.
13 Ogaid na lagid ako o bengel a di pekaneg,

ago datar o pengaw a di niyan kebengat so ngari iyan.
14 Oway, mimbaloy ako den a lagid o mama a di pekaneg a di pekasembag so ngari iyan.
15 Ogaid na seka, ya Allah, i iinamen ko.

Seka i pekasembag, hey Kadnan a Tohan ko.
16 Ka aya pitero aken na
"Di ako ngka kiran pakipepakaradiyaani
aya pen o ba ngka kiran pakipagandisanen amay ka midolas so ai aken."
17 Ka magaan ako den maoteng,
na tatap raken so kararasay aken.
18 Peteobaten ko so kadostaan aken;

miaawid a akal aken so dosa ko.
19 Ogaid na manga tetegas so manga ridoay aken ago manga babager;
madakel a pekegowad raken sa da a sabap iyan.
20 Siran mambo a pembadalan ako iran sa marata ko mapiya
na pesopaken ako iran sabap ko kapananamari aken ko mapiya.
21 Ya Allah, di ako ngka telikodi;

di ako ngka pagawata, hey Tohan ko.
22 Tabangi ako ngka nggagaan, ya Allah a pesebet raken.
SABOR 39
So Kateobat o Masososa i Pamikiran
Pitero aken a "Magiktiyar ako ko manga okitokit aken

kaan aken di mipendosa so dila aken;
pongesen ko so ngari aken taman ko kasisii raken pen o manga rarata."
2 Ogaid na isako da aken pekasa a dila aken
a apiya so kapakatero aken sa mapiya na da den ka rominek ako den
na miyakala baden so kasososa aken.
3 Mikeyaw raken so poso aken,
na sii ko kapepamimikiran aken na komiyadeg raken so apoy,
na giyoto a pikas aken a dila aken:
4 Tig aken a "Pakitokawi ngka raken, ya Allah,

o antonaa i diyandi aken ago so kakepopos o manga gawii aken;
pakitokawi ngka raken i kapakasasagad aken."
5 Biyaloy ngka so omor aken a sasarangaw bo,
na so mapegidad aken na sakotika bo ko kapekeilaya on.
Matamataan a so kaooyagoyag o oman i isa a taw na lagid bo o sengaw.
6 Aya mataan na matag baden along so manosiya sii ko kapepaginetaw niyan.
Da den a kipantag o langon a di niyan dii nggolaolaan;
pepenimo sekaniyan sa kakawasaan, ogaid na di niyan katawan i pekaosba on.
7 “Na imanto, hey Kadnan, antonaa pen i kearap aken?

Seka i iinamen ko.
8 Sabeta ko ngka ko langon a manga sala aken;
di ako ngka pakipegongatongaten ko manga lalong.
9 Romerenek ako; di aken mbengaten so ngari aken
ka seka i kilalag sangkai a kararasay aken.
10 Pokasa ngka raken angkai a ipesiksa a ka raken;
magaan ako matay sabap ko kiyasogata raken o lima ngka.
11 Igira a ipembonget ago ipendaneg ka ko taw so kadostaan iyan;
na lagid o gaab a pelenganen ka so langon a ipekesoat iyan.
Matamataan den a so oman i manosiya na matag baden sengaw.
12 “Pamakinega ngka so kapepangangarapan aken, ya Allah;

lekai ngka so tangila ngka ko kapenggoraok aken sa tabang;
di ka baden rerenek ko kapesegad aken,
ka mananangga ako a mabobolos ako reka baden a datar o langon o manga apo aken.
13 Lokei ako ngka kaan makapiya peroman a ginawa ko
sa di aken pen kangganat a keipos ako den."
SABOR 40
Idaida a Podi
Miyakasebar ako ko Allah na diningilan ako niyan

ka piyamakineg iyan so kapenggoraok aken.
2 Inigakap ako niyan ko piyakalekelek a galebo, a poon ko mariket a tonai.
Piyakadapo ako niyan ko lakongan
na piyakatikna iyan so kapelakad aken.
3 Tiyagoan iyan pen sa bago a idaida so ngari aken,
a so dikir a ipepodi ko Tohan tano.
Madakel a pekailay sii ago pememesa,
na serigan iran so Allah.
4 Rarakmatan so taw a aya niyan sasarigan na so Allah
a kena a ba peramig ko siran oto a pepangimporoan,
a pepananangoran siran ko di tito a manga tohan.
5 Madakel a piyakamemesa a miyanggolaola ngka, ya Allah a Tohan ko;
da den a ba ngka tingki.
Madakel a pitekdir ka a kamapiyaan ami;
o payaga ko ini ago panotolen na madakel ai a di so kapemagitonga on.
6 Kena a ba ngka inikasoat so kakorban ago kaselasela,

ka pisowan ka baden so manga tangila ko.
So totongen a sapaat o di na soasoat sabap ko dosa
na da ngka paliyogaten.
7 Mandiyadi na pitero aken a "Katii ako bo, miyakaoma ko;
sii ko kitab na misosorat on so makapantag raken.
8 Ipekebabaya aken so di aken dii kanggolaolaa ko kabaya a ka, hey Tohan ko.
so kitab ka na madadalem ko poso aken."
9 Piyakalangkap aken so mapiya a totol makapantag ko kaontol

sii ko mala a kalilimod;
da aken genggena so manga modol aken;
katawan ka den ai, ya Allah.
10 Da aken pagmaa so kapagiinontolan ka sii ko poso aken;
piyayag aken so kasasarigi reka ago so kapepenabet ka.
Da aken pagmaa so da a ikeda iyan a gagaw ngka ago so tito a benar ka
ko mala a kalilimod.
11 Di ngka raken penganogoni so kapedi i ka, ya Allah;

pengnin ko a lalayon raken makalilinding so gagaw ngka ago so tito a benar ka.
12 Ka kalilikopan ako o di keitong a manga karomasayan;
riyaot ako o manga dosa ko, na di ako pekanono.
Madakel ai a di so manga bok ko olo aken,
na kiyadaan ako den sa inam.
13 Masoat ka, ya Allah, sa kasabeta ngka raken.

Ya Allah, tabangi ako ngka nggagaan.
14 Makakeya ago makadapanas
so langon a sesabenar raken mono.
Makapeto a kadidiyamanan
so siran oto a kabaya iran a kamoralai raken.
15 Mabengang ko kiyayai kiran
so siran oto a di iran raken dii teroon a "Nari! Nari!"
16 Makapiya bo a ginawa o langon a mananagontaman reka,

ago ikabebaya ka iran.
Siran oto a pekebabaya ko kapepenabet ka
na malalayon iran matero a "Mbantogen so Allah."
17 Ogaid na makapantag raken na malobay ako ago kadodowaanan;

mapikir ako o Kadnan.
Seka i pepekatabang raken ago ago pepekasabet;
di ngka sendoden, hey Tohan ko.
SABOR 41
Pangni o Pekesakit
Rarakmatan so taw a tatagoon iyan sa ginawa so manga miskin;

penabangan sekaniyan o Allah ko masa a morala.
2 Pelindingen sekaniyan o Allah ago pegongowan iyan so kaoyagoyag iyan;
pekapiyaan iyan pen so bobolos iyan sii ko doniya
ago di niyan peladen ko kabaya o manga ridoay niyan.
3 Petebalen sekaniyan o Allah ko igaan iyan igira a pekesakit
na pekabageren iyan ko langon a gedamen iyan.
4 Pitero aken a "Ya Allah, kalimoon ako ngka;

bolongi ako ngka, ka miyakandosa ko reka."
5 Aya dii teroon o manga ridoay aken makapantag raken ko kagogowad iran na:
"Ino pen di petay an mitaman so Ingaran iyan?"
6 Igira a ipembentel ako o isa kiran
na kena a ba iklas so di niyan dii kapakimbitiyarai,
ka petimoon iyan baden ko pamikiran iyan so mipemaganta iyan raken,
na makaliyo na pekalangkapen iyan ko mbalabala.
7 Langon a pekegowad raken na ipepamagetonga ako iran;

aya arangan iran raken na tanto ako a kapapasangan, a tig iran a:
8 “Kiyapetan sekaniyan o piyakalekelek a paniyakit;
di sekaniyan den makapembowat ko kaiigaan iyan."
9 Apiya so tanto aken a ginawai a sasarigan aken
a minipagatoang aken ko paan aken,
na inibayaw niyan a palo niyan sa kiyaridoa niyan raken.
10 Ogaid na seka, ya Allah, na kalimoon ako ngka;

pakabagera ko ngka kaan aken siran kabadali.
11 Aya pekitokaw aken sa masosoat ka raken
na kena a ba raken pepekadaag so ridoay aken.
12 Pegogopan ako ngka sii ko kapagiinontolan aken,
na petegoon ako ngka ko kamamasaan ka sa taman sa pakataman.
13 Mapopodi so Allah a so Tohan o Israil

ipoon sa poonan iyan na taman sa pakataman.
Amin. Amin.
IKADOWA BAGI
Sabor
42-72
SABOR 42
So Pangangarapan o Mama a Minitaog
Lagid o saladeng a pekedali minom ko ig ko manga lawasaig

a pekedali reka so niyawa ko, hey Tohan ko.
2 Ikaawaw o niyawa ko so Tohan, a so oyagoyag a Tohan.
Anda i kapekasong aken san sa kapakaadap aken ko Tohan?
3 So manga lo aken na aya ko pangenengken
sa gagawii daondaw
sii ko kapepegiseisei raken o manga taw ko mababasa alongan a
"Anda so Tohan ka?"
4 Pesolapayan so niyawa ko o kapakamboboko

igira a peketademan aken angkai a miyasowasowa:
so kapepekaonot aken gowani ko madakel a taw
a pagoolowanan ko siran a dii perada ko Walay o Tohan
a dii melalalis sa kapekebaya ago kapanalamat,
so den so madakel a taw a dii selasela ko kapista.
5 Ino ka kaadai sa inam, hey niyawa ko?
Ino ka raken masososa?
Inama ngka baden so Tohan
ka podin ko sekaniyan pen,
a so pepekasabet raken ago Tohan ko.
6 Kiyadaan den sa inam a ginawa ko;

kagiya ka maoto na petedentademan ko seka sii sa inged a Yordan
ago sii ko kapalawan sa Hirmon, roo sa palaw a Misar.
7 Dii mamagolalenga so manga landeng
sii ko kapendaleg o manga abaga ngka;
minikolob raken so langon a manga ala a begel ka ago manga degan.
8 Sii ko kadadaondaw na ipesogo o Allah so gagaw niyan,

na sii ko kagagawii na sisii raken so ipegidaida aken on
a aya ko kapepangangarapan ko Tohan o kaoyagoyag aken.
9 Peteroon ko ko Tohan a Lakongan aken a

"Ino ako ngka pekalipati?
Ino ako makapepegenebeneb a makamboboko
a perasain o manga ridoay aken?"
10 Lagid o pesesaan so manga tolan aken
ko kapepegompata raken o manga soranga aken
a ipepegiseise iran raken ko mababasa alongan a
"Anda so Tohan ka?"
11 Ino ka kaadai sa inam, hey ginawa ko?

Inama ngka baden so Tohan
ka podin ko sekaniyan pen
a pepekasabet raken ago Tohan ko.
SABOR 43
Pakikilalaan ka a da a sala aken, hey Tohan ko,
na panindegen ka so kabenar aken ko da a katohanan iyan a nasiyon;
panabangi ako ngka ko pepamagakal ago manga rarata a mama.
2 Ka seka i Tohan a lindonga aken.
Ino ako ngka mbowangen?
Ino ako makapepegenebeneb a makamboboko
a perasain o manga ridoay aken?
3 Toronen ka so sindaw ngka ago so tito a benar ka

a makanggonanao siran raken
ago makawit siran raken ko soti a palaw ngka,
sii ko kakadenan ka.
4 Mandiyadi na song ako ko aparan o Tohan,
sii ko Tohan a tanto a ikapipiya a ginawa ko ago ikabebebaya.
Podin aken seka a boniboniyan a kotiyapi,
hey Tohan a aya ko Tohan.
5 Ino ka kaadai sa inam, hey ginawa ko?

Inama ngka baden ko Tohan,
ka podin aken sekaniyan pen
a pepekasabet raken ago Tohan ko.
SABOR 44
Pangni sa Kalinding
Miyaneg o tangila mi, hey Tohan ami,

ka miyapanotol rekami o manga lokes ami
so manga ala a galebek a miyanggolaola ngka ko masa o manga apo ami,
gowani ko miyanga oona a gawii.
2 Piyamogaw ngka a lima so manga nasiyon
na piyakambeken ka so manga apo ami ko inged iran;
giyomek ka angkoto a salakaw a manga taw
ogaid na piyakarimpoong ka so manga apo ami.
3 Kena a ba miyakanggolalan ko pedang iran so kiyaagawa iran ko inged,
ago kena pen o ba so barokan iran i minitaban iran on,
ka miyakanggolalan ai ko kawanan a lima ngka ago so barokan ka
ago so pen so sindaw o paras ka, ka kagiya kiyababayaan ka siran.
4 Seka i Dato aken ago Tohan ko

a aya dii kodarat sa kapepakataban
o manga mbawataan o Yakob.
5 Nggolalan reka na ipendendeg ami so manga soranga ami;
na nggolalan ko Ingaran ka na pelomegen ami so kirirido rekami.
6 Kena a ba so pana aken i sasarigan ko,
aya pen o ba so pedang aken i pepekasabet raken,
7 Ka miyasabet kami ngka ko manga ridoay ami,
ago piyakakeya a ka so kikagogowad rekami.
8 So Tohan i ipepangandag ami ko mababasa alongan,
na podin ami so Ingaran ka sa taman sa pakataman.
9 Ogaid na imanto na inibowang ago piyakidiyamanan kami ngka;

gominek ka den monot ko manga sondaro ami.
10 Piyakipanaloba kami ngka ko manga ridoay ami,
na pitebanan kami o kikagogowad rekami.
11 Piyakipanombali kami ngka a datar o manga bilibili
na iniparak kami ngka ko salakaw a manga nasiyon.
12 Pipesa ngka so manga pagtaw ngka ko maito a arga,
na da a ba ngka miyalaba ko kiyapesaa ngka kiran.
13 Biyaloy kami ngka a dii mapagongatongat sii ko manga siringan ami,

na di kami dii sodiin ago dii kela o manga taw ko melilibeta rekami.
14 Biyaloy kami ngka a kasablawan o manga nasiyon;
na di kami dii ipangelengkeleng o manga taw.
15 Mababasa alongan a kabebelengi aken ko kapakadadapanas aken,
na pepekakapal a paras aken sa kaya
16 Sii ko kapekenega ko ko kapepagongatongata ago kapepamagitoitoa raken o manga
taw
ago sabap ko ridoay a mananamar sa kasaopi niyan raken.
17 Langon den rekami ai miyanggoloala

apiya pen da ami seka den pakalipati,
aya pen o ba ami miyasogok so kapasadan ka.
18 Da den makelid so manga poso ami
aya pen o ba makasilay so manga ai ami ko lalan ka.
19 Apiya pen oto na siyasa kami ngka ko darpa o manga iila a binatang,
na inikolob ka rekami so along o kapatay.
20 O piyakalipati ami so Ingaran o Tohan ami
o di na initapenay ami so manga lima mi ko salakaw a tohan
21 Na ba ini da mapariksa o Tohan
a aya matao ko migagaib ko poso o taw?
22 Ogaid na sabap reka a kapepamonoa rekami sa mababasa alongan;
ibibilang kami a datar o manga bilibili a penombaliin.
23 Pagnaw ka, hey Kadnan. Ino ka baden pakatotorog?

Oyati ngka a ginawa ngka. Di kami ngka bobowangen sa taman sa pakataman.
24 Ino ngka pageenaa a paras ka
ago pakalilipatan ka so kaperasaya rekami ago kapakamboboko ami?
25 Minisomek kami ko bayanek;

makakekelit ko lopa so manga badan ami.
26 Mbowat ka na tabangi kami ngka.
Sabeta kami ngka sabap ko da a ikeda iyan a gagaw ngka.
SABOR 45
Bayok ko Kakewing o Dato
Pesolapay so poso aken sa manga pipiya a katero

sii sangkai a kapetontola ko ko bayok aken makapantag ko dato;
so dila aken na lagid o pansom o mapasang a panonorat.
2 Seka i lebi a mataid a mama ko manga manosiya,

na pegondas so limo ko manga modol ka,
ka rarakmatan ka o Tohan sa taman sa pakataman.
3 Takipen ka so pedang ka, hey mabager a dato;
mala ka i menang ago pangkatan.
4 Sii ko kala a ka i pangkatan na koda ka a pepekadaag
sa kipenindegen ka ko tito a benar ago so kapangalimbabaan ago so kaontol;
makanggolaola so kawanan a lima ngka sa piyakalekelek a manga galebek.
5 Mibaseg so manga gagarang a gasa a ka ko poso o manga ridoay o dato.
Maoteng so manga nasiyon ko danga a ka.
6 So ndatoan ka, hey Tohan, na ketatap sa taman sa pakataman;

so katito na aya lilit a ipendato o ka;
7 Pekebabayaan ka so kaontol na ipekegowad ka so kamarataan;
sabap roo na so Tohan, a aya ngka Tohan,
na kiyasalawatan ka niyan sa lana a kapipiya a ginawa
a milalawan ka ko ped a manga dato.
8 Mamot so langon a nditaren ka sa manga ikekamotan a mira ago alos ago kasiya;
sii ko manga torogan a pipendaraan sa marpil
na pekelilang ka on o boniboniyan a ipepengotiyapi.
9 Aden a manga wata a babay o manga dato a ped ko pagaadatan a manga babay ko
torogan ka;
na tomitindeg sa kawanan ka so bai a pipendaraan sa manga imbolawananan a poon sa
Opir.
10 Pamakineg ka, hey pengaromaan o dato;

tagoa ngka sa ginawa ago pakinega ngka ini:
Pakalipati ngka so manga taw ngka ago so pamiliya o ama a ka.
11 Mababarayat so dato ko kataid ka;
sodiyodi ngka, ka sekaniyan i kadnan ka.
12 So manga taw sa Tiro na pekaoma a magowit reka sa pamemegayan;
so lebi a manga kawasa ko manga taw na penamaran iran so kikalimoon ka kiran.
13 Sayana a mataid so potri a sisii ko lamin iyan;

so kimon iyan na inaol a bolawan.
14 Ndiditar sekaniyan sa piyamordaan sii ko kapegagaka on ko dato
a totondogen sekaniyan o manga raga niyan
a pegowiten siran pen ko dato.
15 Pegagaken siran on a kikabebebaya ago kikapipiya a ginawa iran
ko kasoled iran ko torogan o dato.
16 So manga wata a ka a manga mama, hey dato,

na pemakatondog ko manga apo o ka a makapendato;
mbalowin ka siran a manga olowan ko mbalabala ko doniya.
17 Pekipananademan ko so Ingaran ka ko langon a kapepamagapidapid o masa;
kagiya ka maoto na podin ka o manga nasiyon sa taman sa pakataman.
SABOR 46
Sisii Rektano so Allah
So Tohan na aya tano lindonga ago bager,

a lalayon makatitiyagar manabang ko masa a kasasamok.
2 Kagiya ka maoto na di tano malek apiya o miiseg so doniya
ago mamangidaropar so manga palaw ko posed a ragat,
3 Apiya pen o pendagedeb ago pendidi so manga ig on
a mitabeker ko manga palaw so di niyan dii kambegel.
4 Aden a lawasaig a so manga baogan iyan na ipekebabaya o siti o Tohan

a so den so soti a kakadenan o Lebi a Maporo.
5 Ndodoo so Tohan ko soled iyan; di ini kebinasa;
tebangan ai o Tohan sii ko sobo.
6 Dii nggorigaw so manga nasiyon; pepanga ooteng so manga ndatoan;
pekigorong o Tohan so sowara niyan na peketonag so doniya.
7 Sisii rektano so Allah a Lebi a Mamaapaar;

so Tohan o Yakob i maporo a lindonga tano.
8 Song kano sii na go niyo mbentayi so manga galebek o Allah;

ilaya niyo so piyakamemesa a manga pinggolaola niyan sa doniya.
9 Ipetepelek iyan so manga katidawa ko dalem o doniya;
pepamotolen iyan so manga pana ago pepenepeden iyan so manga bangkaw,
na pepenotongen iyan pen ko apoy so manga karo sa katidawa.
10 “Rerenek kano baden ago kilalaa niyo a saken so Tohan;
mapeselasela ako sii ko manga nasiyon;
mapeselasela ako ko doniya."
11 Sisii rektano so Allah a Lebi a Mamaapaar;

so Tohan o Yakob i maporo a lindonga tano.
SABOR 47
So Lebi a Maporo a Dato
Ndaopay kano langon a manga bangsa.

Pameseg kano ko Tohan a dii melalalis sa kapekebabaya.
2 Ka sayana a piyakalekelek so Allah a Lebi a Maporo,
a aya kababantogan a Dato ko dalem a doniya.
3 Piyakidaag iyan rektano so manga nasiyon,
ago piyakidapoan iyan rektano so manga taw.
4 Inipamili tano niyan sa makewali tano a inged
a dii mipangandag o manga mbawataan o Yakob a pakatatayaan iyan.
5 Miyanik so Tohan ko korsi iyan a sasartaan o kapepameseg sa kapekebabaya;

miyanik so Allah a sasartaan o oni o manga bogiyong.
6 Didawa niyo a manga podi so Tohan, didawa niyo a podi.
Didawa niyo a manga podi so Dato tano, didawa niyo a podi.
7 Ka so Tohan na aya Dato ko dalem o doniya;
didawa niyo a manga idadida.
8 Ndadato so Tohan ko manga nasiyon;

moontod so Tohan ko soti a korsi iyan.
9 Dii timotimo so manga olowan o manga nasiyon,
a so manga pagtaw o Tohan o Ibrahim.
Ka rek o Tohan so manga dato ko doniya;
tanto sekaniyan a mipapangkat.
SABOR 48
Giya Siyon a Siti o Tohan
Mala so Allah a lebi a mapapatot a pepodin

roo ko siti o Tohan tano a so soti a palaw niyan.
2 Mapiya ini i paras ko kipoporo iyan,
a so ipekebabaya o dalem a doniya.
Giyanan so Palaw a Siyon a matatampar sa pagotaraan,
a so siti o kababantogan a Dato.
3 Ndodon so Tohan ko manga torogan iyan,
na piyakiilay niyan a sekaniyan den i kota on.
4 Ka mitimotimo so manga dato

na miyamanondol ko siti a maiisaisa siran.
5 Ogaid na kagiya mailay iran na miyabengang siran den,
na miyamalagoy siran nggagaan a miyanga aalek.
6 Kiyapetan siran roo a tabeker ago masakit a datar o pembaliliten a babay.
7 Na bininasa ngka siran a lagid o manga kapal sii sa Tarsis
a piroropet o sobosobo a poon sa sebangan.
8 So miyaneg ami gowani na miyailay ami den imanto

sii ko siti o Allah a Lebi a Mamaapaar,
a so siti o Tohan tano:
pepakambekenen ai o Tohan sa taman sa pakataman.
9 Sii ko soled o Timplo ngka, hey Tohan ami,

na pepamasaken ami so da a ikeda iyan a gagaw ngka.
10 Datar o Ingaran ka, hey Tohan ami,
a lomalangkap so kapepodiya reka taman ko pirowarowangan o doniya.
mapepeno a kaontol so kawanan a lima ngka.
11 Mabebebaya so Palaw a Siyon,
na mapipiya a ginawa o kipagiinged sa Yodah
sabap ko manga kokoman ka.
12 Pagenebenebi niyo a Siyon na alibeta niyo;

bilanga niyo so manga lantawa iyan;
13 Pagamasamasa niyo so manga kota iyan
ago inengkaa niyo so manga torogan on
kaan iyo mapanotol ko pekasalono a manga taw.
14 Ka giyangkai a Tohan na aya tano Tohan sa taman sa pakataman;
sekaniyan i makapenggonanao rektano taman den sa kaposan.
SABOR 49
Kalalalongan so Kasarigi ko Kakawasaan
Pamakinega niyo ai, hey langon a manga taw.

Pamakineg kano langon a kibabaling sa doniya,
2 Ndatar so mababa ago so maporo,
ago so pen so kawasa ago so miskin.
3 Petero so ngari aken sa ongangen;
so dii pemasaken o poso aken na pepekabegay sa kapakasabot.
4 Pemimikiranen aken so isa a pananaroon,
na pemaanaan ko so pasoalan aken a sarta o boniboniyan a kotiyapi.
5 Ino ako pen kelek sii ko manga gawii a kasiksaan

igira a kalilikopan ako o manga rarata a pepamanatro raken,
6 A so siran oto a somasarig ko kakawasaan iran
ago ipepangandag iran pen so kala o tamok iran?
7 Di den keaon o taw so niyawa niyan
aya pen o ba niyan mapamasa ko Tohan,
8 Ka tanto a mala i arga so kiaon ko niyawa o taw,
na da den a kibayad iyan on a ba pekatarotop
9 Kaan sekaniyan makapaginetaw sa taman sa pakataman
a di niyan den keokitan so kakeredak iyan.
10 Pekeilay o langon a taw a apiya so manga oongangen na pepematay,

ago so pen so manga lalong ago manga boda na palaya siran den pepanga dadadas,
na pekeganatan iran so kakawasaan iran ko ped a manga taw.
11 Apiya pen oto na aya mapipikir iran na ketatap so kebabadan kiran,
ago kemboway so kikakadenan iran ko langon a kapepamagapidapid o masa;
na ipesengay iran ko manga ngaran iran so manga lopa iran.
12 Ogaid na apiya i kala pen o kakawasaan o taw na di sekaniyan den kemboway
ka datar o manga binatang a pepanga dadadas.
13 Giyai i bagian o siran oto a somasarig sa ginawa iran

ago so pekasalono kiran a manga taw a terima ko manga katero iran.
14 Datar o manga bilibili a pepekaantap siran ko darpa o miyamatay,
na aya pekatagikor kiran na so kapatay.
So manga titito na makapendato kiran ko kapipita,
na keredak bo so manga badan iran sii ko kobor
a maaawat ko manga torogan iran.
15 Ogaid na pagaonen o Tohan so niyawa ko ko kapaar o kobor
ka terimaan ako niyan.
16 Di ngka pegawiden a akal igira a miyakatamok so ped,

igira a miyakala den so kakawasaan o walay niyan,
17 Ka da den a mipetelon iyan on amay ka matay;
di rekaniyan pekaonot ko kobor so kakawasaan iyan.
18 Apiya pen gowani ko oyagoyag sekaniyan
na ibibilang iyan a ginawa niyan a ririskiyan
ago pembantogen sekaniyan o manga taw ko kapiya niyan i bobolos
19 Na kitapi bo ko langon o manga apo iyan
a di iran den keilay so kaliwanag.
20 So tao a aden a kakawasaan iyan a da a sabot iyan

na datar o manga binatang a pepanga dadadas.
SABOR 50
So Tito a Kasimba
So Allah a Lebi a Mamaapaar a Tohan na dii tero,

ka petewagen iyan so doniya
poon ko pesebangan o alongan na taman ko pesedepan iyan.
2 Sii sa Siyon a madidiyangka i kataid
na pesigay ron so Tohan.
3 Pepekatalingoma so Tohan tano, na di sekaniyan merenek;

aden a apoy a komakarab sii ko onaan iyan,
ago lilibeten sekaniyan o tanto a mabager a barabarat.
4 Petewagen iyan so manga langit sa poro ago giya doniya
sa kaseksia iran ko kakokoma niyan ko manga pagtaw niyan:
5 Tig iyan a "Timotimo kano raken, hey manga kaom aken
a miyakipesadanowa raken a nggolalan ko kakorban."
6 Na pepakalangkapen o manga langit so kaontol o Tohan,
ka sekaniyan den i pangongokom.
7 “Pamakineg kano, hey manga pagtaw aken, ka petero ako;

peseksi ako ko karata iyo, hey manga Israil:
saken den so Tohan a aya niyo Tohan.
8 Kena a ba sabap ko manga korban iyo a kapembongeti aken rekano
aya pen o ba so pepanotongen a soasoat a lalayon iyo raken ipesepaat.
9 Ogaid na kena a ba raken mala i kipantag so mama a sapi a poon ko kodal iyo
aya pen o ba so manga kambing a poon ko manga talon iyo,
10 Ka so oman i binatang sa kalasan na rek aken,
ago so pen so manga pangangayamen ko nggibonggibo a manga bobongan.
11 Katawan aken so oman i papanok ko kapalawan,
na go rek aken so langon a baraniyawa ko kalopaan.
12 Opama ka pekeor ako na di aken rekano peteroon,
ka rek aken so doniya ago so langon taman a matatago on.
13 Ba ako ken ko sapo o manga sapi a mama
o di na maginom ko rogo o manga kambing?
14 Began iyo baden ko Tohan so panalamat a aya di niyo ron den dii soasoat,
na tomanen iyo so manga samaya iyo ko Lebi a Maporo.
15 Na talowi ako niyo ko gawii a kasasamok
ka penabangan ko sekano, na mbentogen ako niyo."
16 Ogaid na so manga rarata na pitero on o Tohan a:

"Antonaa i kipantag reka o kapetontola ngka ko manga taritib aken,
aya pen o ba so kapembandinga ngka ko kapasadan aken?
17 Ka ipekegowad ka so kapeginsarati aken reka
na go ipelebad ka sa likod so manga katero aken.
18 Di ka dii makipelayok ko oman i tekew a pekeilay ngka,
na petepi ka ko manga pasisina.
19 Pegosaren ka so ngari i ka ko marata,
na go so dila a ka na ipapaar o kapamokeg.
20 Lalayon ka dii tero sa misosopak ko pagari ngka;
pepemagantaan ka so wata a mama o ina a ka.
21 Giyanan den i miyanggolaola ngka, na romerenek ako baden;
sabap san na aya pipikiren ka na datar ako ngka.
Ogaid na imanto na pembongetan aken seka
ago pakipembalogo aken reka so manga sala a ka.
22 “Tanodi niyo ai, sekano a pepakalipatan iyan so Tohan.

ka o di, na pemekangen aken sekano sa da den a ba rekano pekalidas.
23 Saden sa pembegay raken sa panalamat a aya di niyan raken den dii soasoat
na pekebantog ako niyan,
na saden sa ontol so kapepaginetaw niyan
na pekiilay aken on so kapepanabet o Tohan."
SABOR 51
Pangni sa Rila
Kalimoon ako ngka, hey Tohan ko sabap ko da a ikeda iyan a gagaw ngka,
Sabap ko kala a ka i kapedi na papasa ngka so manga sala aken.
2 Onabi ako ngka piyapiya ko langon o kadostaan aken,
ago lompiyowa ko ngka pen ko dosa ko.
3 Ka katawan aken so manga sala aken,

na tatap a kabebelengi aken ko dosa ko.
4 Seka, a seka bo, i kiyandosaan ko,
ka miyakanggolaola ko sa marata sii ko hadapan ka.
Sabap san na benar ka ko kiyakokoma ngka raken,
ago maontol ka ko kiyasalaa ngka raken.
5 Matamataan a inimbawata ako a madodosa,

ka makapendosa ako ipoon ko kinikarimbiten raken o ina aken.
6 Ogaid na aya kabaya a ka na so tito a benar a madadalem raken;
kagiya ka maoto na pakisaboti ngka ko poso aken so ongangen.
7 Pangimoi ako ngka sa hisop, ka kelompiyo ako;
onabi ako ngka, ka pekapoti ako a lawan pen ko giyaw.
8 Pakinegen ka raken so oni o kasosonor ago kapipiya a ginawa
kaan mabebaya so manga tolan aken a siyasa a ka.
9 Di ngka pagilaya so manga dosa ko,
na ponasa ngka so langon a kadostaan aken.
10 Adeni ako ngka sa soti a poso, hey Tohan ko,
na dalemi ako ngka sa bago ago tomitikna a niyat.
11 Di ako ngka mbowangen ko kamamasaan ka
aya pen o ba ngka raken kowaa so Soti a Roh ka.
12 Pakaasala ngka raken so kapipiya a ginawa a pekisabap ko kapepanabet ka,
na begi ako ngka sa mateterang a niyat a makatokod raken.
13 Amay ka magiyoto na ipemangendao aken ko dii mamakasela so manga okitokit ka,
na penanangoran reka peroman so manga baradosa.
14 Pakalidasa ko ngka ko kapakapemono, hey Tohan ko,

a so Tohan a pesebet raken,
ka ipagidaida o dila aken so kaontol ka.
15 Hey Kadnan, bengata ngka so modol aken,
ka pekalangkapen o ngari aken so manga podi ngka.
16 Di ka kebaya ko manga korban,

ka o giyanan na witan ko seka on;
na di ka kesoat ko manga ipesepaat a pepanotongen.
17 So soasoat a terimaan o Tohan na so maroropet a niyawa;
so masosoni ago tetaobat a poso, hey Tohan ko, na di ngka pesodiin.
18 Sabap ko limo o ka na piyapiyai ngka a Siyon;

bangona ngka peroman so manga kota a Yarosalim.
19 Amay ka magiyanan na peladen reka so wadib a manga korban,
ago so tarotop a manga korban a penotongen a ikesoat ka;
samaoto na isepaat reka so manga mama a sapi sii ko aparan ka.
SABOR 52
So Daneg ago so Limo o Tohan
Ino ka dii tekabor makapantag ko kamarataan,

hey mabager a mama a piyakayaya ko Allah?
Mababasa alongan a
2 Kakekadiyat ka sa kabinasaan;
so dila a ka na lagid o magarang a gelat,
hey seka a dii manipo.
3 Pekebabayaan ka so marata a di so mapiya,
na tomoon ka so kapamokeg a di so katero sa benar.
4 Pekebabayaan ka so oman i pekabinasa a katero,
hey dila a pepanaliba!
5 Sabap sii na pepaden ka o Tohan ko da a kaposan iyan a kabinasaan;

kepetan ka niyan ka ngganderen ka niyan a poon ko babalingan ka,
na mbadoten ka niyan pen ko inged o kikaooyag.
6 So manga oontol na keilay iran ai ago penga aalek;
ipekela iran sekaniyan a tig iran a
7 “Ilaya niyo, ka kaoto so mama
a da niyan den baloya so Tohan a aya niyan lindonga,
ka ba niyan den siyarigi so kitataralo o tamok iyan
ago piyakabager iyan a ginawa niyan ko kapembinasaa niyan ko manga ped."
8 Ogaid na so saken on peman na datar ako o kayo a olibi

a pepekarimpoong ko Walay o Tohan.
Sasarigan ko so da a ikeda iyan a gagaw o Tohan sa taman sa pakataman.
9 Penalamatan ko seka lalayon, hey Tohan, sabap ko miyanggolaola ngka;
na sii ako maginam ko Ingaran ka, ka mapiya nan
na podin ko seka sii ko kamamasaan o manga kaom ka.
SABOR 53
So Kalalalongan ago Kamarataan o Manosiya
So lalong na aya igegedi o pamikiran iyan na

"Da a ba Tohan."
Miyamakaratarata so langon a taw, na minggolaola siran sa piyakasisingay a kadostaan;
da den a ba dii nggolaola sa mapiya.
2 Sii sa kasorgaan na totolongan o Tohan so manga manosiya

ka pegilain iyan o ba aden a somasabot kiran a dii mbabanog ko Tohan.
3 Ogaid na miyamakasilay siran langon;
palaya siran den melagilagid a manga reresik i poso;
da den a ba kiran dii nggolaola sa mapiya, apiya sakataw bo.
4 “Ba da a katao angkai a dii mbabaradosa," a tig o Tohan,

"a pepelalamed ko manga pagtaw aken a datar siran on o pekan sa paan
ago di iran pen telowan so Tohan?"
5 Roo siran den tanto a penga aalek

a so kalek a da a lagid iyan gowani.
Ka ikeyamber o Tohan so manga tolan o siran oto a nggobat ko manga pagtaw niyan;
makapekeya siran, ka tiyalikodan siran o Tohan.
6 O ba bo pekapoon sa Siyon so kakesabet o Israil.

Amay ka pekaasalen o Tohan so kamapiyaan o manga pagtaw niyan,
na kebebaya so Yakob, ago kesonor a Israil.
SABOR 54
Pangni sa Kalilinding ko manga Ridoay
Sabeten ka raken so Ingaran ka, hey Tohan ko;

panindegen ako ngka a nggolalan ko gees ka.
2 Hey Tohan ko, tagoa ngka sa ginawa so pangni aken;
pamakinega ngka so manga katero o ngari aken.
3 Riridoon ako o manga rait;

pepanamaran o masopiit a manga taw so niyawa ko,
a di iran itatapian so Tohan.
4 Matamataan den a so Tohan i lomilinding raken;

so Kadnan na aya tomotokod ko niyawa ko;
5 Imbadal iyan so marata ko manga ridoay aken.
Sii ko kasasarigi reka na binasaa ngka siran.
6 Pegiklas ako reka somapaat sa korban;

podin ko so Ingaran ka, ya Allah, ka mapiya nan.
7 Ka piyanabangan ako ngka ko langon a awid a akal aken,
na miyailay o manga mata ko so kiyatabana ko manga ridoay aken.
SABOR 55
Pangni o Taw a Tinipo o Ginawai niyan
Pamakinega ngka so pangni aken, hey Tohan ko,

di ngka pendarainonen so kapepangampedian aken;
2 Pakinega ko ngka na go ngka ampona.
Ikekarata a ginawa ko so manga pamikiran aken,
na ikasososa aken
3 So kapelalalis o manga ridoay aken
ago so kapepamagita o manga rarata a taw;
ka ipetena iran raken so karomasayan,
na ipesetro iran raken pen so rarangit iran.
4 Tanto raken a pekikiyab so poso aken,

na tomiyana raken so manga kalek ko kapatay.
5 Riyaot ako a kawan ago tabeker,
na tanto ako den a kiyaalapan.
6 Na pitero aken "O ba bo aden a manga papak aken a lagid o marapatik.
Ka pekalayog ako roo ago pekadeke,
7 Oway, pakapelagoy ako sa mawatan
na sii ako den pekabaling ko mitataog a kaden.
8 Pekalindong ako ron nggagaan
a maawat ako ko mabager a ndo ago sobosobo."
9 Liboga ngka, hey Kadnan, so manga rarata a taw;

limpanga ngka so bitiyara iran,
ka pekeilay aken so kapanganiyaya ago kambobono sii ko siti.
10 Gagawii daondaw na pepegenebeneban iran so melilibeta ko pangeleban iyan,
na misosoled on so kasasamok ago kararata a ginawa.
11 Ndodon pen so kabinasaan,
na so kapamagita ago kapamokeg na di den keda ko manga lalan on.
12 Kena a ba ridoay a pepamagitowito raken;

o giyanan na ketiger aken den;
kena a ba so pekegowad raken a pepangimporoan raken,
ka o giyanan na kapetapokan aken sekaniyan.
13 Kena ini, ka seka den, a so mama a datar aken,
a ped aken ago tito a ginawai,
14 A mamis gowani a di ta dii kapakambitiyarai
sii ko di ta dii kandalakaw a ped o madakel a taw, sii ko Walay o Tohan.
15 Mitekaw a kakowaa o kapatay ko manga ridoay aken;

manga oolog siran a oyagoyag pen ko darpa o miyamatay,
ka sii kiran komakaden so kamarataan.
16 So saken on peman na pepananalowan ko so Tohan,

na pesebeten ako o Allah.
17 Kagabi, kapita ago kaoto a alongan
na pepangangarapan ako ago penggoraok sa matanog,
na pekeneg iyan so lagam aken.
18 Pepanabangan ako niyan a da ako kasakiti ko siran oto a penggobat raken
apiya pen madakel a somosorang raken.
19 So Tohan a ndadato sa taman sa pakataman
na keneg iyan siran ago siksaan,
a so manga mama a di iran den kealin so manga olaola iran
ago da a kalek iran ko Tohan.
20 So ped aken gowani na piyamabaan iyan so manga ginawai niyan;

biyaroba niyan so kapasadan iyan.
21 So manga bitiyara o ngari iyan na matilak a di so mimbatik a gatas,
ogaid na kapakiperidoay a madadalem ko poso iyan;
so manga katero iyan na malemek a di so lana,
ogaid na matataan ai a manga pedang.
22 Sanaan ka ko Allah so manga awid a akal ka

ka petokoden ka niyan;
di niyan den pekioteng so manga oontol.
23 Ogaid na seka, hey Tohan, na pagologen ka so manga rarata
ko galebo a kabinasaan.
So manga talibono ago so dii mamagakal
na di iran kelookan maginetaw so manga omor iran.
Ogaid na so saken on peman na sasarigan ko seka.
SABOR 56
Kapangangarapan a Sarig ko Tohan
Kalimoon ako ngka, hey Tohan ko,

ka pananamaran ako somatro o manga taw;
gawii gawii den na penggobaten ako iran sebenar.
2 Mababasa alongan na peselobaan ako o manga ridoay aken;
sayana a madakel a di raken dii makitidawa ko kapepangimporoan iran.
3 Igira a pekelek ako na sii ako reka peserig.
4 So Tohan, a pepodin ko so katero iyan,
so Tohan i sasarigan ko; di ako kelek.
Antonaa i mapenggolaola raken o matag manosiya?
5 Mababasa alongan na pembibiden iran so manga katero aken;

lalayon ako iran kekadiyatan sa marata.
6 Pepagopakat siran ago magaayan
a totoliken iran so oman i kapelakad aken
a iinamen iran a kabonoa iran raken.
7 Di ngka siran den pelepasa domaneg sa apiya antonaa sabap;
sii ko rarangit ka, hey Tohan ko, na pepada ngka angkoto a manga taw.
8 Katawan ka so kapakamboboko aken;

tiyago o ka so manga lo aken ko katiya a ka;
ba ini langon da misorat ko rikord ka?
9 Sii ko gawii a kapenanalo aken sa tabang
na makapepepato so manga ridoay aken;
katawan aken ai, ka aampilan ako o Tohan.
10 So Tohan, a pepodin ko so katero iyan,
so Allah, a pepodin ko so katero iyan,
11 So Tohan i sasarigan ko; di ako kelek.
Antonaa i mapenggolaola raken o matag manosiya?
12 Disomala a mitoman aken so manga samaya aken reka, hey Tohan ko;
ipesoasoat aken reka so manga panalamat aken.
13 Ka inilidas ka so niyawa ko ko kapatay
ago so ai aken ko kakisosong iyan
kaan ako makalalakaw ko kamamasaan o Tohan
sii ko sindaw a pepekaliwanag ko kikaooyag.
SABOR 57
Pangni sa Tabang
Kalimoon ako ngka, hey Tohan ko, kalimoon ako ngka,

ka sii reka pepagapas so niyawa ko.
Melindong ako ko along o manga papak ka
taman sa di maipos so pekabinasa a manga barabarat.
2 Pepananalo ako ko Tohan a Lebi a Maporo,

a so Tohan a ipetoman iyan so singanin iyan raken.
3 Roo sa kasorgaan na sogo sekaniyan ka sebeten ako niyan;
pakapekeyaan iyan so siran oto a sesebenar raken somatro.
Pekiilay raken o Tohan so limo iyan ago so kasasarigi rekaniyan.
4 Makaiiga ako ko look o manga arimaw a bobosabosaon,

a so manga mama a so manga ngipen iran na manga bangkaw ago manga gasa,
na so manga dila iran na manga gagarang a pedang.
5 Pakiilay ngka, hey Tohan, so pangkatan ka a maporo a di so manga langit.

Makalangkap so bantogan ka ko dalem o doniya.
6 Tomiyaan siran sa poket a kilitag ko ai aken;

mabebekong ako sa rata a ginawa.
Komiyalot siran sa galebo ko pagokitan aken,
ogaid na siran i miyangaoolog on.
7 Tetana so poso aken, hey Tohan ko, tetana so poso aken;

pegidaida ako ago pemboboniboniyan.
8 Pagnaw ka, hey ginawa ko!
Pagnaw kano, hey kotiyapi ago alpa!
Pokaon ko so sobo.
9 Penalamatan ko seka, hey Kadnan, sii ko manga nasiyon;

ndidaon ko seka sii ko madakel a taw.
10 Ka tanto a mala so gagaw ngka a somosoko ko manga langit,
na misasampay so kasasarigi reka ko manga gabon.
11 Pakiilay ngka, hey Tohan, so pangkatan ka a maporo a di so manga langit.

Makalangkap so bantogan ka ko dalem o doniya.
SABOR 58
Pangni sa Kadanega o Tohan ko manga Baradosa
Ba mataan a ipegording iyo so maontol, hey sekano a manga olowan?

Ba matito a kapekokoma niyo ko langon a taw?
2 Kena, ka ba kano baden kekadiyat sa di ontol sii ko manga poso iyo.
na ipepangarasi niyo so manga lima niyo sii ko doniya.
3 Pepamakasilay so manga rarata a taw taman den ko kaooyagoyag iran;
ipoon ko kinimbawataan kiran na pepanga dadadag siran a dii tetaro sa manga kabokegan.
4 So bisa iran na lagid o bisa a nipay;
lagid siran o bengel a darpo a oolenen iyan so tangila niyan
5 A di niyan den pemakinegen so sowara o pepemotar sa nipay
apiya pen i kapasang iyan lomilang.
6 Peroropeta ngka, hey Tohan, so manga ngipen ko manga ngari iran;

pamadota ngka so manga panasek angkoto a manga arimaw.
7 Manga aada siran a datar o peketirak a ig.
Igira a pegiraten iran so manga pana iran na madepong so manga gasa iran.
8 Madatar siran o mangangalap a dii senaw ko kapepananap iyan,
ago lagid o rapas a wata a di niyan den keilay so alongan.
9 Sa di pen kakegedama o manga koden iyo ko kayaw o manga soroken a itagon,

apiya anda ko mailaw pen o di na gango, na imbayog o Tohan so manga rarata a taw.
10 Kebebaya so manga oontol amay ka mailay iran so kinisaopen kiran,
amay ka pagonaban iran so manga ai ran sii ko rogo o manga rarata.
11 Samaoto na mapetero o langon a taw a
"Matamataan a pembalasan so manga oontol;
matamataan a aden a Tohan a pepengokom ko doniya.
SABOR 59
Pangni sa Kalilinding
Sabeta ko ngka ko manga ridoay aken, hey Tohan ko;

lindinga ko ngka ko siran oto a pesondol raken.
2 Sabeta ko ngka sangkoto a dii mbabaradosa,
na pakalidasa ko ngka ko manga talibono.
3 Ilaya ngka, ka pepegayanan iran so niyawa ko.

So manga rarangit a mama na pepagopakatan ako iran sa marata
a kena a ba sabap ko sala aken o di na dosa ko, ya Allah,
4 Apiya pen da a pinggolaola ko a ribat na matitiyagar siran raken gomabat.
Mbowat ka sa kapagogopi ngka raken; ilaya ngka so masosowa aken.

5 Seka, ya Allah, i Lebi a Mamaapaar a Tohan, a so Tohan o Israil.
Pagnaw ka sa kadanega ngka ko langon a nasiyon;
di ngka kepediin so sakataw bo ko manga rarata a makatipo.
6 Pekesoy siran igira a perimon a ngomengenger a lagid o manga aso,

na pepegenebeneb siran ko dalem o siti.
7 Ilaya ngka o antonaa i pekitope o manga ngari iran,
ka lagid o manga pedang so pepekapoon ko manga modol iran;
na aya pepamikiren iran na "Antawaa i pekaneg rekami?"
8 Ogaid na ba ngka siran baden dii kelaan, ya Allah;
pepegongatongaten ka angkoto langon a manga nasiyon.
9 Sasanaan ko so bager ka, ka seka, Tohan i lindonga aken,

10 A so Tohan a pekebabaya raken.
Magona raken so Tohan

ka pekiilay niyan raken so katebana ko manga ridoay aken.
11 Ogaid na di ngka siran pemonoa, hey Kadnan a kelong ami,
ka o ba baden kalipati o manga taw aken so pinggolaola iran.
Panawiringen ka siran baden a nggolalan ko kapaar ka
na go ngka siran pepada.
12 Sabap ko manga dosa o ngari iran ago so manga katero o modol iran
na militag kiran so kapepangimporoan iran.
Sabap ko manga sinta ago kabokegan a di iran dii mbasaan
13 Na polanga ngka siran sii ko rarangit ka;
lengana ngka siran taman sa da den a ba kiran malamba.
Oriyan iyan na ketokawan a ndadato so Tohan ko manga mbawataan o Yakob,
ago taman den ko pirowarowangan o doniya.
14 Pekesoy siran igira a perimon a ngomengenger a lagid o manga aso,

na pepegenebeneban iran so siti.
15 Pepagandawandaw siran a pepamanimol,
na nggoraok siran o di manga oosog.
16 Ogaid na saken peman na ipegidaida aken so bager ka;

sii ko kapipita na indidaw aken sa matanog so gagaw ngka.
Ka seka i lindonga aken
a aya ko pepegapasan ko masa a kareregeni raken.
17 Hey bager aken, ndidaon ko seka a podi;

seka, Tohan, i lindonga aken,
a so Tohan a pekebabaya raken.
SABOR 60
Pangni sa Kapakalidas
Inibowang kami ngka, hey Tohan ko,

ago siyasa kami ngka ko kiyararangiti reka;
na, asalen kami ngka bo imanto.
2 Miyakokog ka so doniya ago miyabengkag ka;
pakandemeta ngka so miyanga bebensi on, ka pekisasawiring ai.
3 Piyakaokit ka so manga pagtaw ngka ko kamaregenan;
piyakainom kami ngka sa arak a inikabereg ami.
4 Ogaid na piyakatindegan ka sa pandi so siran oto a maaleken reka
a kapegapasan iran igira a pesondolan siran o manga pamamana.
5 Sabeten ka rekami so kawanan a lima ngka;
ampona kami ngka
kaan kapanabangi so siran oto a pekebabayaan ka.
6 Mitero so Tohan sii ko Soti a Darpa iyan:
"Sii ko kakebebaya aken na pembaabaaden ko a Sikim
ago pembagibagiin aken a Balintad a Sokot.
7 Rek aken a Giliyad ago giya pen a Manasih;
giya Ipraim i linding o olo aken;
giya Yodah na aya ko lilit a ipendato.
8 Giya Mowab na aya ko pepangonaban;
ipagitog aken sa Idomiya so tinilas aken,
na sii sa Pilistiya na ipelalis aken on so kiyapakataban."
9 Antawaa i magowit raken roo ko kokotaan a siti?

Antawaa i ndolog raken taman sa Idomiya?
10 Ba kena a seka, hey Tohan, a miyowang rekami
ago di den magonot ko manga sondaro ami?
11 Ogopi kami ngka ko manga ridoay ami,
ka da a bali o tabang o manosiya.
12 Nggolalan ko Tohan na pekataban tano,
ka sekaniyan i melomeg ko manga ridoay tano.
SABOR 61
Pangni sa Kalinding
Hey Tohan ko, pamakinega ngka so kapenggoraok aken;

tagoa ngka sa ginawa so kapepangangarapan aken.
2 Poon ko titib o doniya na petelowan ko seka sii ko kapekikopay o poso aken.
Nggonanaowa ko ngka ko lakongan a maporo a di saken;

3 Ka seka i apasa aken
ago mabager a lantawa a miaawat aken ko ridoay.
4 O ba ako bo pekakaden ko barombarong ka sa taman sa pakataman
ago sii ako makapagapas ko atag o manga papak ka.
5 Ka miyaneg ka so manga samaya aken, hey Tohan ko,
inibegay ngka raken so kawali o siran oto a maaleken ko Ingaran ka.
6 Pakalendowa ngka so omor o dato;

mamboway sekaniyan ko kapepamagapidapid o manga ragon.
7 Makakorsi sekaniyan a dato sa taman sa pakataman sii ko hadapan o Tohan.
Pakipagipaten ka sekaniyan ko gagaw ngka ago so kasasarigi reka.
8 Samaoto na lalayon aken ndidaon a podi so Ingaran ka

sii ko kipetomanen ko sa oman gawii ko manga samaya aken.
SABOR 62
Sarig ko Linding o Tohan
Sii bo ko Tohan so kapakalilintad o niyawa ko;
sii rekaniyan pepekapoon so kapekesabet aken.
2 Sekaniyan bo i lakongan aken ago pepekasabet,
a maporo a lindonga aken, na di ako tanto a kekaog.
3 Ay katey pen a kapesondoli niyo ko mama sa kitobaken iyo ron langon

a lagid o miirag a pangeleban o di na peketongatonga a alad?
4 Aya bo a kekadiyaten iyo na giya kapepada niyo ron ko pangkatan iyan;
ipekebabaya iyo so manga kabokegan.
Aya pekibengat ko manga ngari iyo na manga pipiya a katero,
ogaid na di kano bo dii sinta sii ko manga poso iyo.
5 Hey niyawa ko, so bo so Tohan i pelobai ngka sa kapakalintad;

sii rekaniyan pepekapoon so panginam aken.
6 Sekaniyan bo i lakongan aken ago pepekasabet raken,
a maporo a lindonga aken, na di ako den kekaog.
7 Matitimo ko Tohan so kakesabet aken ago so pangkatan aken;
so Tohan i mabager a lakongan aken ago apasa.
8 Sasarigi niyo sekaniyan, hey manga taw, ko langon a masa;

sawai niyo ron so langon a mapapadalem ko poso iyo,
ka so Tohan i apasa tano.
9 So da a bangsa niyan a manga manosiya na matag sepot,

na so manga barabangensa a taw na matag baden kapamagomanta.
Opama ka makaokit siran ko timbangan na da a kapened iran,
ka palaya siran makep a di so sepot.
10 Di niyo serigi so kanggagasab
aya pen o ba niyo inama a makalaba kano a nggolalan ko kapamanekew.
Apiya pen o mitaralo so kakawasaan iyo
na di niyo ron pekaonota so poso iyo.
11 Satiman a miyatero o Tohan,
na dowa a miyakenal aken on a giyai:
so kapaar na rek o Tohan,
12 Na rek ka pen, Kadnan, so gagaw;
ka imbalas ka ko oman i isa so miyanggolaola niyan.
SABOR 63
Kadali ko Tohan
Hey Tohan, seka i Tohan ko;

pananamaran aken seka mbabanog;
ikaawaw ka o niyawa ko, na ikakadali ka o badan aken
a datar o sisii ako ko mamara ago komigaw a lopa a da a ig on.
2 Masisingayo aken a kailaya ko reka sii ko soti a pesimbaan reka
kaan aken kabantayi so kabatowa a ka ago bantogan.
3 Kagiya tomo so gagaw ngka a di so kaoyagoyag
na podin ka o manga modol aken.
4 Penalamatan ko seka taman ko kaooyagoyag aken,
na imbayaw aken a manga lima ko ko kasimbaa ko reka.
5 Kesoat so niyawa ko a lagid o miyaosog ko manga lelembo a pangenengken,
na podin ka o ngari aken ko kapepegidaida o manga modol aken.
6 Sii ko igaan aken na pepenanademan ko seka;

rarasamen aken seka ko mababasa gawii.
7 Sabap sa seka i pepekatabang raken
na pepegidaida ako sa kapekebabaya sii ko along o manga papak ka.
8 Pananagontamanan aken seka;
totokoden ako o kawanan a lima ngka.
9 So siran oto a sesabenar ko niyawa ko na kebinasa;
pekapanog siran ko lebi a madalem ko doniya.
10 Kepalad siran ko kapemonoa kiran o pedang
na kapegedasan siran o manga iila a aso.
11 Ogaid na kebebaya so dato sii ko Tohan,

na so oman i isa a dii sepa sii ko Ingaran o Tohan na podin iran sekaniyan,
ogaid na pekakemeden so ngari o manga bokeg.
SABOR 64
Pangni sa Kalinding
Hey Tohan ko, pamakinega ngka so lagam aken sii ko kapepangangarapan aken.
Lindinga ngka so kaoyagoyag aken ko kapagiitai raken o manga ridoay.
2 Tapoken ako ngka ko kapepagopakati raken o manga rarata a taw
ago sii ko magogorigaw o dii mbabaradosa.
3 Penggarangen iran a lagid o manga pedang so manga dila iran,
na ipegantap iran so manga papait a katero iran a datar o manga gasa.
4 Ipepamana iran ko da a sala iyan a taw sii ko kapepanibowa iran;
kitekaw a kapenaa iran on sa da den a kalek iran.
5 Di siran dii mamagoyata sa kapakakediyat iran sa marata;

di iran dii mbibitiyaraiyan so kateana iran ko manga litag iran sa masolen
a tig iran a "Antawaa i pekainengka on?"
6 Pepamagantang siran sa di ontol, a tig iran a
"Miyakambaal tano sa tarotop a pekadorat."
Ka mataan den a baraakal so pamikiran ago so poso o taw.
7 Ogaid na penaan siran o Tohan;

sakadiyap den na penga papalian siran.
8 Keonay siran o manga dila iran,
na makapengelengkeleng so langon o pekailay kiran.
9 Samaoto na penga aalek so langon o manosiya;
mapetero iran a "Giyai na galebek o Tohan,"
na mapemikir iran so miyanggolaola niyan.
10 Kebabaya so manga oontol sii ko Allah
ago ron siran makapegapas.
Podin sekaniyan o langon a manga titito i poso.
SABOR 65
So Kapodi ago Kapanalamat
Mapapatot reka so manga podi, hey Tohan, sii sa Siyon;

itoman ami reka so manga samaya ami,
2 Hey seka a pepamakineg ko kapangangarapan.
Sii reka pengadap so langon a taw
3 Sabap ko manga dosa iran.
Dadaagen kami o manga sala ami
ogaid na pepapasen ka ini.
4 Rarakmatan so taw a piliin ka
a pekaobain ka a pekakaden ko lamalama ngka.
Penga sosoat kami ko manga pipiya a nganin ko walay ngka,
a so soti a Timplo ngka.
5 Pegamponen kami ngka a nggolalan ko manga piyakamemesa sii ko kaontol ka,

hey Tohan a pepekasabet rekami,
a aya sasanaan o manga taw ko pat a pidoro o doniya
ago roo ko manga wawatan a ragat.
6 Piyakambeken ka so manga palaw a nggolalan ko bager ka
ko kasesambitani reka sa gees.
7 Pepakalengenen ka so kapendaleg o manga ragat
ago so kapendagedeb o manga begel iran
ago so pen so kapekegorigaw o manga nasiyon.
8 Siran oto a kibabaling sa mawatan na pepanga aalek ko piyakamemesa a manga nanao
ngka;
roo ko pesebangan ago so pesedepan o alongan
na pepakilalis ka kiran sa kapekebebaya.
9 Pekibiren ka so lopa ago pepakioranan ka;

pepakaodaren ka sa tanto a mala.
So manga baogan o Tohan na kikapepeno a ig
kaan kapagadili sa manga pereperan so lopa,
ka giyanan i miyatekdir ka.
10 Pembasaan ka piyapiya so manga dadowan
taman sa manga papantar so manga bakenal on;
pepakilemek ka ini ko oran
ago peparakmatan ka so manga pereti on.
11 Pesengkadan ka sa kamapiyaan so ragon,
na so manga lalan ka na miboborar on so mala a miyanga raragon.
12 So manga pangomaan na sisipilan a paotanotan;
so manga bobongan na ndiditar sa kasosonor.
13 So manga pananateba na mapepeno a manga talon,
na so pen so manga balintad na kasasapengan sa pereperan;
pepelalalis siran ago dii mamagidaida sa kapekebebaya iran.
SABOR 66
Dikir sa Podi ago Panalamat
Ogiyab kano sa kapekebebaya ko Tohan, hey dalem a doniya!

2 Pagidaidaan iyo so bantogan o Ingaran iyan;
bantoga niyo sekaniyan a dikir.
3 Teroa niyo ko Tohan a "Sayana a piyakamemesa so manga galebek ka.
Sabap ko kala a ka i gees
na pepekakipes so manga ridoay ngka ko hadapan ka.
4 So dalem o doniya na pepekasodiyod reka;
pepegidaida siran reka sa podi,
na pendidaon iran a podi so Ingaran ka."
5 Song kano sii na go niyo ilaya so miyanggolaola o Tohan;

sayana a piyakamemesa so manga galebek iyan sii ko manga manosiya.
6 Biyaloy niyan so ragat a mamara a lopa;
rinipag iran so lawasaig a pelalakaw siran on;
na, mabebaya tano sii rekaniyan!
7 Di niyan dii ndato so kapaar iyan sa taman sa pakataman;
pagaayanan o manga mata niyan so manga nasiyon,
da a somosopak a ba makapangimporoan rekaniyan.
8 Podiya niyo so Tohan tano, hey manga taw,

na pakinegen iyo so oni o kapepodiya niyo ron.
9 Pepegoyagen iyan so niyawa tano
ago di niyan peparon o ba midolas so manga ai tano.
10 Ka tipengan kami ngka, hey Tohan;

datar o kiyaoria ko pirak a siyoti kami ngka.
11 Piyakilitagan kami ngka ko poket;
piyakibawa ngka rekami so manga pepened a awid.
12 Piyakiliseg ka ko manga taw so manga olo ami;
miyakaokit kami ko apoy ago ig,
ogaid na piyakaliyo kami ngka on ko madaya a darpa.
13 Song ako ko Walay ngka a maawid sa isepaat aken a totongen;
itoman aken so manga samaya aken reka,
14 A so manga samaya a minibengat ko modol aken ago pitero o ngari aken
isako kareregenan ako.
15 Isepaat aken reka so kaolit a manga ayam a penotongen
a rakes o mamot a bel o manga bilibili;
pekorban ako sa manga sapi a mama ago manga kambing.
16 Song kano sii ago pamakineg, hey langon a maaleken ko Tohan,

ka penotolen ko rekano so miyanggolaola niyan raken.
17 Inipananalo aken rekaniyan so ngari aken,
na inipodi aken on so dila aken.
18 O aden a kadostaan a minigaib ko poso aken
na da ako den ai pamakinega o Kadnan.
19 Ogaid na matamataan a piyamakineg ako o Tohan
na tiyago iyan sa ginawa so kapepangangarapan aken.
20 Mapopodi so Tohan
a da niyan limbani so kapepangangarapan aken
aya pen o ba niyan raken panganogoni so gagaw niyan.
SABOR 67
Idaida sa Kapanalamat
Kalimoon kami ngka, hey Tohan, ago rakmati kami ngka,

pakaliwanaga ngka rekami so paras ka
2 Kaan katokawi so manga okitokit ka sii sa doniya
ago so kapepanabet ka sii ko langon a nasiyon.
3 Mapodi ka o madakel a taw, hey Tohan ko;

mapodi ka o langon a manga taw.
4 Mabebaya so manga nasiyon a makapagidaida siran sa kapipiya a ginawa,
ka so katito na aya ngka ipepangokom ko manga taw,
na di ngka dii nggonanaon so manga nasiyon sa doniya.
5 Mapodi ka o madakel a taw, hey Tohan ko;
mapodi ka o langon o manga taw.
6 Samaoto na pagodaren so lopa sa pereperan,

na so Tohan, a Tohan tano, na perakmatan tano niyan.
7 Perakmatan tano o Tohan,
na ikelek sekaniyan o pat a pidoro o doniya.
SABOR 68
So Dikir o Nasiyon ko Kapakataban
Makambowat so Tohan; mamangiparak so manga ridoay niyan;
makapemalagoy ko kamamasaan iyan so siran oto a pekegowad on.
2 Mabogaw ngka siran a lagid o bel a ipembayog a ndo.
Madadas so manga rarata a taw ko kamamasaan o Tohan
a datar o kapelanag o taro ko kayaw o apoy.
3 Ogaid na makapiya a ginawa o manga oontol
ago mamanga bebaya sii ko hadapan o Tohan;
makalangas siran ago mamanga sonor.
4 Pagidaidai niyo so Tohan, didawa niyo a podi so Ingaran iyan;

bantoga niyo sekaniyan a mageeda ko manga gabon,
so Allah i ngaran iyan,
na kabebaya kano baden ko hadapan iyan.
5 Ama o manga ilo ago abanga o manga balo;

giyanan so Tohan a ndodoo ko soti a kakadenan iyan.
6 Pepakabalingen o Tohan so kitatawantawan ko manga pamiliya;
pepakaliyon iyan sa kapekapiya iran so kikakalaboson,
ogaid na so kisosopak na mapekabaling ko komekegaw a kalopaan.
7 Hey Tohan, isako pagolowanan ka so manga pagtaw ngka,

isako lomalakaw ka a miyokit ko disirto
8 Na lininog so doniya,
ago miyodod so manga langit sa oran
ko kamamasaan o Tohan, a Tohan sa Sinay,
ko kiyapakaoma o Tohan, a so Tohan o Israil.
9 Piyakaoran ka sa mabager, hey Tohan;
piyakalenggawan ka so minikopay a lopa a kawali ngka.
10 Miyaginged on so manga pagtaw ngka,
na sabap ko kapiya ngka, hey Tohan,
na piyageper ka so kikakokorangan kiran.
11 Inibegay o Kadnan so sogoan,

na tanto a madakel a miyakalangkap ko totol:
12 “So manga dato ago so manga sondaro iran na pepemalagoy siran nggagaan."
So manga babay a komakaden ko kampo na pimbagibagi iran so miyanga tataban
13 Apiya pen petelimbagak siran baden ko katatagoan ko manga kodal a pangangayamen;
so manga papak a marapatik a kilalapisan sa pirak,
ago so manga tomapes iyan a pemangerap sa bolawan.
14 Isako pakambelabelagen o Tohan a Lebi a Mabager so manga dato sangkoto a inged
na liyontanaan a giyaw so Palaw a Salmon.
15 So palaw a Basan na mabager a palaw;

madakel i pontor so palaw a Basan.
16 Hey madakel i poro a manga palaw,
ino niyo tetentengi a pekesiig ko palaw a pinili o Tohan a kedenan iyan
a ron den mbaling so Allah sa taman sa pakataman?
17 Pipira den nggibo so manga karo o Tohan

ago nggibonggibo pen;
miyakapoon so Kadnan sa Sinay na somiyoled ko soti a darpa iyan.
18 Isako manik ka sa poro
na minitalon ka so madakel a miyanga bibiyag;
tomiyarima ka sa manga pamemegayan a ipapantag ko manosiya
a ped on pen so kikasosopak,
kaan seka, ya Allah a Tohan, na makakaden roo.
19 Mapopodi so Kadnan, a so Tohan a pepekasabet rektano,

a gawii gawii den a kapegawidi niyan ko manga awid a akal tano,
20 So Tohan tano i Tohan a pepekasabet,
na nggolalan ko Allah a Kadnan tano so kapekelidasi ko kapatay.
21 Matamataan a sesaan o Tohan so manga olo o manga ridoay niyan,
a so manga rarabong i bok a olo o siran oto a peteros ko di iran dii kasela.
22 Pitero o Kadnan a "Pekakasowin ko a poon sa Basan so manga ridoay niyo;
pekakasowin ko siran a poon ko didalem o ragat
23 Kaan iyo misombo so manga ai niyo ko rogo iran
ago an kapanimoli o manga aso niyo so bagian iran on."
24 Miyabinentay so parada ngka, hey Tohan,

a so dii kaperada o Tohan aken a aya ko Dato a pesoled ko soti a pesimbaan on.
25 Sii sa onaan so dii mamagidaida; sii sa oriyan so dii mboboniboniyan,
na pageeletan siran o manga raga a dii nggaringking.
26 “Podiya niyo so Tohan sii ko mala a kalilimod;
podiya niyo so Allah, hey langon iyo a kiyababadan ko Israil."
27 Ndodon so maito a mbatabataa a Baniyamin a pepangonaan kiran;
ndodon so sagorompong a manga olowan sa Yodah,
ago ndodon pen so manga olowan sa Sibolon ago Naptali.
28 Nggolalanen ka so kapaar ka, hey Tohan;

pakiilain ka so bager ka, hey Tohan,
a datar o miyanggolaola ngka rekami gowani.
29 Samaoto na pagowitan ka o manga dato sa manga pamemegayan
sabap ko Timplo ngka sii sa Yarosalim.
30 Mbongeti ngka a Misir a giyangkanan a binatang sii ko manga otan ko kilid a
lawasaig;
ago so pen so manga nasiyon
a giyangkanan a talon a manga todo a sapi a rakes o manga nati iran
taman sa di siran makapangalimbabaan a magowit reka sa manga pirak.
Paraken ka so manga nasiyon a mabebaya makitidawa.
31 So manga ambasador na pekapoon sa Misir;
giya Itiyopiya na makipembayabaya nggagaan ko Tohan.
32 Pagidaidai niyo so Tohan, sekano a manga ndatoan sa doniya;

didawa niyo a manga podi so Kadnan
33 A so mageeda ko miyanga oona a manga langit.
Pamakineg kano, ka ipenggorong iyan so mala i gees a sowara niyan.
34 Papalada niyo ko Tohan so kapaar;
so bantogan iyan na sii sa poro o Israil
ago so kapaar iyan na sii ko manga langit.
35 Sayana ka a piyakalekelek, hey Tohan, sii ko soti a darpa a ka.
So Tohan o Israil i pembegay sa gees ago bager ko manga pagtaw niyan.
Podin so Tohan!
SABOR 69
Kagoraok sa Tabang
Sabeta ko ngka, hey Tohan ko,

ka miyataman den sa lig aken so manga ig.
2 Pekigaled ako den ko madalem a tonai
a da a ba on kepasigan.
Minibolog ako den ko madalem a ig,
na pesengkapen ako o manga bagiyaw.
3 Diyokawan ako den mananalo sa tabang;
kiyamaraan den a bakereng aken;
miyakalobay a manga mata ko
ko kapepagalatawi ko ko Tohan ko.
4 Siran oto a pekegowad raken sa da a sabap iyan

na lebi a madakel a di so manga bok sa olo aken;
manga babager so siran oto a mananamar raken minasa
a riridoon ako iran sa da a benar on.
Miyabaas ako iran sa kabayadi ko ko da aken panekewa.
5 Hey Tohan, seka i matao ko kalalalongan aken;

so manga sala aken na kena a ba reka mapageema.
6 Pengnin ko a so siran oto a mbabayorantang reka na di kayaan sabap raken,

ya Allah a Kadnan a Lebi a Mamaapaar.
Pengnin ko a so siran oto a mananagontaman reka na di makowa a diyaman sabap raken,
hey Tohan o Israil.
7 Ka sabap reka na di ako dii mapagongatongat,
na mipapanagop aken so kaya.
8 Lagid ako o salakaw a taw ko manga pagari aken,
ago lagid o rait ko manga wata a mama o ina aken;
9 Ka so kasigi ko Walay ngka na aya raken pepekapos,
na sii raken pepekatana so ipepenonongka o siran oto a pepenonongka reka.
10 Igira a ipepangalimbabaan aken a ginawa ko sa kapowasa
na aya raken ipepegompat o manga taw;
11 Na igira a di ako dii nditar sa sako
na di ako iran dii pekaradiyaanan.
12 Di ako dii mbabantaanan o siran oto a kioontod ko gimowa o siti
na go ipepegidaida ako o kikabebereg.
13 Ogaid na pepangangarapan ako reka baden, ya Allah.

Sii ko masa a ikesoat ka, hey Tohan,
na ampona ko ngka sabap ko kala a ka i gagaw
a nggolalan ko kasasarigan a kapepenabet ka.
14 Pokasa ko ngka ko tonai,
di ako ngka on pekagaleda;
sabeta ko ngka ko siran oto a pekegowad raken,
ago sii ko manga dadalem a ig.
15 Di ako ngka pekisangkapen ko bagiyaw,
ago di ako ngka pekilameden ko kadaleman
aya pen o ba ko ngka pakitamboni ko kobor.
16 Ampona ko ngka, ya Allah, ka mapiya bes so gagaw ngka;
sabap ko kala a ka i kapedi na dingili ako ngka.
17 Di ngka baden pegnaa a paras ka ko oripen ka,
ka masisiksa ako; ampona ko ngka nggagaan.
18 Obay ka raken na go ako ngka panabangi;
sabeta ko ngka ko manga ridoay aken.
19 Katawan ka den so di raken dii kapagongatongata, so kapepakayai ago kapepakaitoa

raken;
pekeilay ngka so langon o manga ridoay aken.
20 Inikaropet o poso aken so di raken dii kapagongatongata,
na tanto ako den a kapepenedan.
Ininam aken so kapedi, ogaid na da den,
ago so pemakarinarinaw sa ginawa ko, ogaid na da den a miyatoon aken.
21 Tiyagoan iran sa gamot so ken aken,
na soka a piyakiinom iran raken ko kaaawaw aken.
22 Mabaloy a litag so lamisaan a inenatan kiran,

mabaloy pen a misampirot kiran so ipekepiya a ginawa iran.
23 Kalibotengan so manga mata iran kaan siran di pekanono,
ago malalayon mabekong so manga likod iran.
24 Pakamborngata ngka kiran so gani ngka;
na pakatanaa ngka kiran so pesokeyaw a rarangit ka.
25 Kaawaan so kampo iran
a da den a ba pekakaden ko manga barombarong iran.
26 Ka pesetroon iran sekaniyan a siyogat ka,
na di iran dii tototolaan so kapekerasay o siran oto a piyamalian ka.
27 Danegen ka kiran so langon a sala iran,
na di ngka siran pakapembagiana ko kapenabet ka.
28 Maponas so manga ngaran iran ko ribro a kasosoratan ko kikaooyag,
na di siran den mitapi ko listaan ko manga oontol.
29 Ogaid na mararasay ago makamboboko ako;

malinding ako o kapepenabet ka, hey Tohan ko.
30 Podin ko a idaida so Ingaran o Tohan

ago mbantogen aken sekaniyan sa kapanalamat.
31 Lebi ini a ikesoat o Allah a di so pekorbanen on a sapi
ago lebi pen a di so mama a sapi a aden a manga panga niyan ago kanoko.
32 So dii mamangalimbabaan na pekailay sii ago penga bebebaya;
sekano a dii mbabanog ko Allah, na pengnin ko a manga ooyag so manga poso iyo.
33 Ka pepakinegen o Allah so siran oto a pepakitabang,
na di niyan ipendarainon so manga pagtaw niyan a miyanga bibiyag.
34 Podiya niyo sekaniyan, hey manga langit ago so doniya,

taman ko manga ragat ago so langon o manga baraniyawa on.
35 Ka sebeten o Tohan a Siyon
ago mbengonen iyan peroman so manga siti sa Yodah.
Oriyan iyan na pekakaden roo so manga pagtaw niyan ka ketangan iran so inged;
36 So kebabadan ko manga oripen iyan na mapekewali ran ai,
na pekabaling roo so siran oto a pekebabaya ko Ingaran iyan.
SABOR 70
Pangni sa Tabang
Nggagaan ka, hey Tohan ko, sa kasabeta ngka raken.

Ya Allah, tabangi ako ngka nggagaan.
2 Makakeya ago makadapanas so siran oto a sesabenar ko niyawa ko.
Makapeto a kadidiyamanan so siran oto a kabaya iran a kamoralai raken.
3 Mamakapeto ko kiyayai kiran so siran oto a di iran raken dii teroon a
"Nari! Nari!"
4 Ogaid na makapiya bo a ginawa o langon a mananagontaman reka,
ago ikabebaya ka iran.
So siran oto a pekebabaya ko kapepanabet ka
na malalayon iran matero a "Mabantog so Tohan."
5 Ogaid na makapantag raken na malobay ako ago kadodowaanan;

song ka raken nggagaan, hey Tohan ko.
Seka i pepekatabang raken ago pepekasabet, ya Allah;
di ngka sendoden.
SABOR 71
Pangni o Pekelokes
Sii ako reka pepagapas, ya Allah;

di ako ngka den pakapekeyaa.
2 Sii ko kapagiinontolan ka na panabangi ako ngka ago pakalidasa ko ngka;
lekai ngka raken so tangila ngka na go ako ngka sabeta.
3 Pengnin ko a mabaloy ka a lakongan a apasa aken
a lalayon ako ron pepekasong.
Sogoon ka a kakesabet aken,
ka seka i lakongan ago kota aken.
4 Pokasa ko ngka, hey Tohan ko, ko lima o manga rarata,

a so lima o di maontol ago marangit a manga taw.
5 Ka seka bo i iinamen ko, ya Allah a Kadnan aken,
a aya ko sasarigan ipoon ko kangoda ko.
6 Sii ako reka romerenda inipoon ko kinimbawataan raken;
seka i lomiyotad raken ko tiyan o ina aken.
Podin ko seka lalayon.
7 Ipepememesa ako o madakel a taw,

ka seka i mabager a lindonga aken.
8 Mipepeno ko ngari aken so podi reka,
na pepayagen aken sa mababasa alongan so bantogan ka.
9 Di ako ngka mbowangen amay ka malokes ako;
di ako ngka pendarainonen amay ka mada so bager aken.
10 Ka mananamar raken mono so manga ridoay aken;
pepamagantaan ako iran ago pepagopakatan sa marata
11 A tig iran a "Inawaan sekaniyan den o Tohan:
na, salobaan tano ago dakepen,
ka da den a ba on makapenabang."
12 Hey Tohan, di ako ngka aawata;
tabangi ako ngka nggagaan, hey Tohan ko.
13 Makakeya ago mapolang so langon a penggobat raken;
katambonan a kayaan ago kaitoan so langon a sesebenar raken memarata.
14 Ogaid na so saken on peman na ketatap a kaiinam aken;

pegomanomanan ko so kapepodiya ko reka.
15 Peteroon o ngari aken so kapagiinontolan ka
ago so kapepanabet ka sa mababasa alongan
apiya pen di aken katawan i kala iyan.
16 Pekaoma ko sa kapenotola ko ko manga kabarakat ka, ya Allah a Kadnan aken,
ago so kapekalangkapa ko ko kaontol ka, a so bo so rek ka.
17 Ipoon ko kangoda ko, hey Tohan, na pepangendaon ako ngka,
na taman imanto na pepayagen aken so piyakamemesa a manga galebek ka.
18 Na apiya amay ka malokes ako ago makapoti so bok aken
na di ako ngka pagawai, hey Tohan,
taman sa di aken mapakalangkap so kabarakat ka ago so gees ka
ko langon a pekasalono a manga taw.
19 So kaontol ka, hey Tohan, na somosoko sa langit.

Minggolaola ka sa manga ala a galebek;
antawaa i datar ka, hey Tohan?
20 Apiya pen piyakaokit ako ngka sa madakel ago mapait a manga karomasayan
na pekaasalen ka so kaoyagoyag aken;
poon ko didalem o doniya na inggakap ako ngka on bo.
21 Pekaosoren ka so pangkatan aken
ago pekapiyaan ka bo peroman a ginawa ko.
22 Podin ko seka sii ko kapepangotiyapi sabap ko kasasarigi reka, hey Tohan ko.
Ndidaon ko seka a podi a sasartaan o boniboniyan a alpa, hey Soti a Tohan o Israil.
23 Pelalis sa kapekebebaya so manga modol aken sii ko kapendidawa ko reka,
a rakes on so dalem a ginawa ko a miyaaon ka.
24 So pen so dila aken na penotolen iyan so kaontol ka sa mababasa alongan,
ka siran oto a miyanamar raken memarata
na miyakakeya ago miyakadapanas.
SABOR 72
Pangni pantag ko Dato
Began ka ko dato so manga kokoman ka, hey Tohan, ago so kaontol ka

sii rekaniyan a inimbawata a dato
2 Kaan iyan kandatoi so manga pagtaw ngka sa kapaginontolan
ago so kikararasay kiran sa katito.
3 So manga palaw na magawid sa kalilintad ko manga taw
ago so pen so manga bobongan, a nggolalan ko kaontol.
4 Ipenindeg o dato so kabenar o manga miskin ko manga taw,

na sebeten iyan so manga wata o kikadodowaanan;
sesaan iyan so dii melolopit.
5 Ikelek sekaniyan o manga taw taman sa aden pen a alongan
ago taman sa aden a olan, sii ko langon a kapepamagapidapid o masa.
6 Kebaloy sekaniyan a lagid o oran a pepenga oolog ko dii mbabasokan,
ago datar o tarintik a pepekabasa ko lopa.
7 Pekarimpoong so manga oontol sii ko masa niyan,
na kitaralo so kalilintad taman sa di mada so olan.
8 Pekalangkap so kandadatoan iyan poon ko isa a ragat na taman den ko sabala a ragat
ago poon ko lawasaig a Yopratis na taman den ko manga titib a doniya.
9 Pemanodiyod rekaniyan so manga bangsa a kibabaling ko disirto,
na so manga ridoay niyan na pemakadila ko bayanek.
10 So manga dato sa Tarsis taman ko manga polo ko ragat
na pemangowit rekaniyan sa bowis,
na so manga dato sa Arabiya ago giya Itiyopiya
na mbegay ron sa manga pamemegayan.
11 Pemanodiyod rekaniyan so langon o manga dato,
na pemanalagad on pen so langon o manga nasiyon.
12 Ka penabangan iyan so manga miskin a penggoraok rekaniyan

ago so pen so kikadodowaanan a da a ba kiran tebang.
13 Ipengalinggagaw niyan so manga lolobay ago so kikadodowaanan,
na sebeten iyan so kaoyagoyag o manga miskin.
14 Penabangan iyan siran ko kapekelopita ago kapekeaniyayaa kiran.
ka mala rekaniyan i gona so rogo iran.
15 Kemboway so dato,
na mbegan sekaniyan sa bolawan a poon sa Arabiya;
ipemangni sekaniyan lalayon o manga taw,
ago perakmatan mambo o Tohan ko mababasa alongan.
16 Kitaralo so pereperan ko dalem a inged;
pemangipipapipay ini ko poro o manga bobongan,
ago peteribonga pen a datar roo sa Libanon.
Pemakalombay so kipagiinged on a lagid o tanageb ko gilopa.
17 Ketatap so Ingaran o dato sa taman sa pakataman;
kitaros so bantogan iyan sa taman sa kaaaden pen o alongan.
Perakmatan so langon a nasiyon a nggolalan rekaniyan,
na mbetowan iran sekaniyan sa rarakmatan.
18 Podin so Allah a Tohan, a so Tohan o Israil.

Sekaniyan bo i dii nggolaola sa piyakamemesa a manga galebek.
19 Podin so kababantogan a Ingaran iyan sa taman sa pakataman.
Mapeno a bantogan iyan so dalem o doniya.
Amin ago Amin.
20 Giyai i kaposan o manga pangangarapan o Daod

a wata o Yasay.
IKATELO BAGI
(Sabor
73-89)
SABOR 73
So Kapengokom o Tohan
Matamataan a so Tohan na mapiya ko Israil,
sii ko siran oto a da a saninsaning o poso iyan.
2 Ogaid na makapantag raken na samabo da midolas so ai aken;
maito bo na mada so pekedapoan aken
3 Ka kagiya inikasigi aken so manga takabor
isako mailay aken so kapiya i bobolos o manga rarata a taw.
4 Ka di siran den kepasangan sa paniyakit;

manga lilimegas so manga lawas iran.
5 Da a ba iran manga awid a akal a komakalilid ko manga taw,
aya pen o ba siran pekesiksa a datar o ped a manosiya.
6 Sabap roo na sesalain iran so kapangimporoan,
ago sosoloten iran so kapanganiyaya a lagid o gerab.
7 So bo so lebi a pakabarayat i sisingayoon milay o manga mata iran;
da den a diyangka o baya a ginawa iran.
8 Di siran dii mamagompat ago dii tetaro sa kamarataan;
sii ko kapepangimporoan iran na di siran dii mamagita sa kapangarasi.
9 Petegoon iran so manga ngari iran roo sa kasorgaan
na pepegenebeneb so manga katero iran ko dalem o doniya.
10 Sabap san na pesengoran siran o manga taw
a pepangosipen iran lomamed so manga katero iran a lagid o ig.
11 Na penggiraw siran pen a
"Andamanaya i kaketokawi sii o Tohan?
Ba aden a katao o Lebi a Maporo?"
12 Giyanan den i sowasowai o manga rarata a taw;
lalayon siran makadadaya, na pepekala pen so kakawasaan iran.
13 Mataan den a da a gona o kapepakaliwanaga ko ko poso aken

ago so kapesotiya ko manga olaola ko.
14 Ka pesiksaan ako ko mababasa alongan
ago pendanegen pen oman mapita.
15 Opama ka miyakatero ako sa datar anan

na miyatipo aken den so kapapantagan a manga pagtaw ngka.
16 Na igira a pepanamaran aken ai langon somabot
na tanto aken a pekiawid a akal
17 Taman ko kiyapakasoled aken ko Timplo o Tohan
na go aken bo kasaboti so keakiran sangkoto manga rarata a taw.
18 Matamataan a sii ngka siran petegoon ko manga lilindeg a darpa;

pepepaden ka siran pen ko kabinasaan iran.
19 Sakadiyap den a kapekemoralai kiran.
Tarotop a kapekeipeda kiran o piyamakalekelek.
20 Lagid siran o taginepen a kelipatan o taw amay ka makanaw,
ka amay ka mbowat ka, hey Kadnan,
na pesodiin ka baden so kapakiilailain iran.
21 Isako kapaitan so pamikiran aken ago kasakitan so poso aken

22 Na da a lalag aken ago da a sabot;
lagid ako o maila a binatang sii reka.
23 Apiya pen oto na tatap a kaaped aken reka;
kakapetan ka so kawanan a lima ko.
24 Pepakinggonanao ako ngka ko manga toma ngka,
na oriyan oto na terimaan ako ngka a kebantogan.
25 Antonaa i bagian aken san sa kasorgaan a rowar reka?
Na da den a ba ko kebayaan sii sa doniya a makaliyoliyo reka.
26 Apiya pen pekedaan sa bager so lawas aken ago so poso aken
na so Tohan i bager o poso aken
ago aya ko den bagian sa taman sa pakataman.
27 Siran oto a maaawat reka na penga dadadas bo;

pembinasaan ka so langon a petelikod reka.
28 Ogaid na kamapiyaan aken so kapakararani aken ko Tohan.
Biyaloy aken a aya ko lindonga so Allah a Kadnan aken,
na peyagen ko so langon a manga galebek ka.
SABOR 74
Pangni sa Kabokai ko Nasiyon
Hey Tohan, ino kami ngka mbobowangen sa taman sa pakataman?

Ino petegebel so rarangit ka ko talon a tatagikoren ka gowani?
2 Tademi ngka so manga pagtaw ngka a miyatangan ka sii ko miyanga oona a gawii,
a so bangsa a miyaaon ka a makewali ngka.
Tademi ngka so Palaw a Siyon a ron ka miyakakaden.
3 Pagenebenebi ngka angkai a tarotop a kiyagebaa on;
miyanga bibinasa o ridoay so langon taman sii ko Soti a Timplo.
4 Miyamameseg so manga ridoay ngka sii ko darpa a petelabokan ka rekami gowani;

piyakatindeg iran on so manga pandi iran a aya toos ko kiyapakataban iran.
5 Siyayanan iran so manga pamamatok a pepemamata sa marabong a manga kayo.
6 Piroropet iran a manga patok ago rompi so langon a ookiran a pangeleban.
7 Tiyotong iran so Timplo ngka a somiyarta ko lopa;
piresikan iran so pekedenan o Ingaran ka.
8 Aya minigedi ko pamikiran iran na
"Binabinasaan tano siran piyapiya."
Piyanotong iran so oman i darpa a pesimbaan ko Tohan sii ko dalem a inged.
9 Da den a kitoos rekami a ba pekeilay;

da den a miyalamba a nabi,
na da den a matao rekami ron o ay katey pen angkai a masosowa.
10 Ay katey pen, hey Tohan, a kapepagitowitoa reka o manga ridoay ngka?
Ba da a kaposan o di iran dii kasodia ko Ingaran ka?
11 Ino ngka penggenggena a lima ngka, apiya so kawanan a lima ngka?
Kowaa ngka ko lililipan ka on ko nditaren ka na go ngka siran polanga.
12 Ogaid na seka den, Tohan, i dato aken ipoon ko miyanga oona a gawii
a dii nggolalan ko kapepanabet ko dalem a doniya.
13 Seka i somiray ko ragat a nggolalan ko kabarakat ka;
piroropet ka so manga olo o naga sii ko kalodan.
14 Seka i somiyasa ko manga olo o Lebiyatan, a so mala a binatang sa kalodan
na inibegay ngka ini a pangenengken ko manga kaaden ko disirto.
15 Seka i mileleka ko manga bowalan ago manga tataya,
na piyakamaraan ka so manga ala a lawasaig.
16 Rek ka so kadaondaw, na rek ka pen so kagagawii;
piyakambeken ka so alongan ago so olan.
17 Seka i miyanendo ko langon a temanaan ko doniya;
inembaalan ka so laon ago so rendeng.
18 Tademi ngka ini, ya Allah, a piyagitowito ka o manga ridoay,

ago pisodi o manga lalong so Ingaran ka.
19 Di ngka pelada ko manga iila a binatang so niyawa o pakatatayaan ka;
di ngka pekalipati sa taman sa pakataman so kaoyagoyag o manga pagtaw ngka
a kikararasay.
20 Tademi ngka so kapasadan ka,
ka so manga liliboteng a darpa ko inged na mapepeno a kibabalingan
a ndodon so kapanganiyaya.
21 Di ngka peparoa a kapakapepato a kikaayaan so siran oto a pepelopiten;
mapodi o manga miskin ago so kikadodowaanan so Ingaran ka.
22 Mbowat ka, hey Tohan, na pakabenara ngka so titindegan ka.

Tademi ngka so kapepagongatongata reka o manga lalong ko mababasa alongan.
23 Di ngka perendana so dii kapelalalis o manga ridoay ngka,
a so kapendaleg o kisosorang reka a lalayon a kapekigorong iyan.
SABOR 75
So Tohan i Pepengokom
Pepanalamatan ami seka, hey Tohan, pepanalamatan ami;

marani so Ingaran ka, na pepeyagen ai o piyakamemesa a manga galebek ka.
2 “Tindo aken so gawii a kapengokom," a tig o Tohan,
"na saken i pepangokom sa matito.
3 Apiya pen pekeiragirag so doniya ago so langon a kibabaling on
na saken i pepekabeken ko manga polaos iyan.
4 Peteroon ko ko manga ambog a 'Genek kano den tekabor,'
ago sii ko manga rarata a taw a 'Di niyo pembayaon so manga panga niyo.
5 Di niyo pembayaon so manga panga niyo a sopak ko kasorgaan,
aya pen o ba kano petero sa kapepangimporoan.' "
6 Ka so kakiporo na kena a ba sii pekapoon sa sebangan o di na sii sa sedepan

aya pen o ba sii sa pagabagatan,
7 Ka so den so Tohan i pepangokom;
ipembaba iyan so isa, na ipeporo iyan so ped.
8 Ka sisii ko lima o Allah so isa a tagayan
a tetebira sa mabisa a arak a katitimplaan.
Pegododen iyan,
na so langon o manga rarata a taw sa doniya
na pengongosipen iran ai minom taman ko bageber iyan.
9 Ogaid na so saken on peman na kelalayon ako tero makapantag ko Tohan o Yakob;

ndidaon ko sekaniyan a manga podi.
10 Potolen iyan so langon o manga panga o manga rarata a taw,
ogaid na kiporo so manga panga o manga oontol.
SABOR 76
So Tohan a Pepekataban
Katawan den so Tohan sii sa Yoda;

kababantogan so Ingaran iyan sii sa Israil.
2 So barombarong iyan na sii sa Yarosalim;
so kadena iyan na ndodoo sa Siyon.
3 Roo niyan piyamotol so pepamangikilat a manga gasa,
ago so manga kelong taman ko manga pedang,
a so manga gomaan ko katidawa.
4 Sayana ka a pesigay ago mala i gees, hey Tohan,

ko kapetondagay ngka ko manga palaw
a miyakataban ka ko manga ridoay ngka.
5 So manga wawaraw a sondaro na miyamakakelit a piyanabanan,
ipakatotorog iran so kaposposan a torog iran;
da den a isa bo sangkoto a manga sondaro
a ba niyan magaga nggolalan so kapasang iyan.
6 Sii ko kiyambongeti ngka kiran, hey Tohan o Yakob,
na ndatar so manga koda ago so kikokoda on
a palaya den minilampes a kipipinsanen.
7 Seka bo, seka den i patot a ikelek.

Antawaa i pekatindeg ko hadapan ka igira a kiyararangitan ka?
8 Poon sa kasorgaan na miyokas ka sa kokoman;
na miyalek so doniya ago rominek
9 Isako mbowat ka a pengokom, hey Tohan,
sa kasebeta ngka ko langon a peperasain ko doniya.
10 Matamataan a pekipodi reka baden so kapekerarangiti ngka ko manosiya

na siran oto a pepekapagoyag ko rarangit ka na pepanga gegenggen.
11 Semaya kano baden ko Allah a Tohan iyo na go niyo tomanen.

Hey langon iyo a miyakandaidair a manga inged,
na witi niyo sekaniyan sa manga pamemegayan, a sekaniyan a patot a ikelek.
12 Pepemotolen iyan so kapepangimporoan o manga olowan;
ipekelek sekaniyan o manga dato sa doniya.
SABOR 77
So Kapipiya a Ginawa ko Masa a Kamaregenan
Penggoraok ako ko Tohan sa tabang;

penggoraok ako ko Tohan sa kapakinega niyan raken.
2 Sii ko manga masa a kareregeni raken na di aken dii mbabanogen so Kadnan;
igira a gagawii na ipembayaw aken a manga lima ko a di den ndokawan,
ogaid na minda so ginawa ko o ba karinawi.
3 Igira a petedeman ko seka, hey Tohan, na makapeperego ako;

igira a pepamimikiran ako na pekikopay so niyawa ko.
4 Pegenggenen ka a kakepideng o manga mata ko,
na di ako makapetero sa tanto aken a kasososa.
5 Pepamikiren aken so miyanga iipos a gawii,
a so miyanga atey den a ragon.
6 Petademan ko so manga idaida aken igira a gagawii;
di ako dii makimbitiyarai ko poso aken
na giyai i ipegise aken sa ginawa ko:
7 “Ino mangaday so Kadnan,
ba lalayon a katatalikodi niyan rektano?
Ba di sekaniyan den pengalimo peroman?
8 Ba miyada den so gagaw niyan sa di den pekaasal?
Ba dayon sa dayon a di kakitoman o manga initopa niyan?
9 Ba miyakalipat mangapedi so Tohan?
Ba gominek sekaniyan mangalinggagaw ko kapekerarangiti ron?"
10 Na pitero aken pen a "Giyanan den i ikararata a ginawa ko,

ogaid na tedeman ko so manga ragon a kiyapayag o kapaar o Lebi a Maporo."
11 Penanademan ko so manga galebek o Allah;
oway, tedeman ko so manga kabarakat ka ko miyanga oona a gawii.
12 Perasamen aken so langon a miyanga papasad ka,
ago di aken dii pendapatan so manga ala i gees a pinggolaola ngka.
13 So manga okitokit ka, hey Tohan, na palaya soti.
Antonaa a tohan i datar sa kala o Tohan tano?
14 Seka so Tohan a dii nggolaola sa manga kabarakat;
pepakiilay ngka so kapaar ka sii ko manga taw.
15 Iniaon ka ko manga pagtaw ngka so bager ka,
a so manga mbawataan o Yakob ago so Yosop.
16 Miyailay ka o manga ig, hey Tohan,

miyailay ka o manga ig na miyalek siran;
na so pen so kadaleman on na tiyabeker.
17 So manga gabon na miyamangodod sa oran,
na go mindadalendeg so manga langit;
miyamangiteras ko mbalabala so manga gasa a ka.
18 Miyaneg so dalendeg ka sii ko barabarat,
na linindawan o manga kilakilat ka so doniya;
tiyabad so lopa ago lininog.
19 Minikentay ko ragat so lalan ka,
na so kiyaokitan ka na sisii ko manga ala a ig
apiya pen da on masarino so manga lakaw ngka.
20 Inagak ka so manga pagtaw ngka a lagid o talon a manga bilibili

a nggolalan ko lima o Mosa ago so Aron.
SABOR 78
So Tohan ago so manga Pagtaw niyan
Pamakinega niyo a manga pagtaw aken so manga ndao aken;

tagoa niyo sa ginawa so manga katero aken.
2 Pekaokiten aken so peteroon ko ko manga bayambayanan;
penggogod ako sa manga pageemaan ipoon ko miyanga oona a gawii,
3 A so manga nganin a miyanga aneg tano ago piyanga totokawan,
ka miyapamanotol rektano den o manga lokes tano.
4 Di tano ini pagemaan ko manga mbawataan iran,
ka peyagen tano mambo ko pekasalono a manga taw so mapopodi a manga galebek o
Allah,
so gees iyan ago so manga piyakamemesa a pinggolaola niyan.
5 Inimbaal iyan sa manga taritib so mbawataan o Yakob

ago bigan iyan sa kitab so manga Israil,
na piyamando iyan pen so manga apo tano
sa kipamangendaon iran on ko manga wata iran
6 Kaan katokawi mambo o pekasalono a manga taw,
a so manga wata a da pen milotad;
kaan iran peman matero ko manga wata iran.
7 Aya sabap iyan na an iran kasarigi so Tohan,
ago di iran den kelipatan so manga galebek o Tohan
ka ba iran baden tomana so manga sogoan iyan,
8 Ago an siran pen di sowa ko manga apo iran,
a mangatetegas ai i olo ago kisosopak a manga taw
a da iran den pakaiklasa so poso iran ko Tohan ago so niyawa iran
na kena a ba on mapaparatiyaya.
9 So manga mbawataan o Ipraim

na apiya pen kikagogomaanan sa manga pana
na miyakapeto siran ko gawii a kiyatidawa;
10 Da iran nggolalanen so kapasadan o Tohan
ago siyangka iran pen a kipaginetaon iran ko kitab iyan.
11 Kiyalipatan iran so miyanggolaola niyan,
a so manga piyakamemesa a piyakiilay niyan kiran.
12 Ka sii ko kamamasaan o manga apo iran
na miyangembaal so Tohan sa manga kabarakat
sii sa inged a Misir, sii ko kapantaran sa Sowan.
13 Siray niyan so ragat na go piyakaokit iyan siran on,
ka piyakatindeg iyan so ig a datar o keleb.
14 Piyakiagak iyan siran ko gabon sii ko kadadaondaw,
ago so sindaw o apoy sii ko kagagawii.
15 Piyamensad iyan so manga ator roo ko disirto
ka bigan iyan siran on sa ig a poon ko pitidaleman ko lopa;
16 Piyakaliyo niyan so manga ig a sii miyakapoon ko mibobobong a lakongan
na piyakaondas iyan on sa kababaan a datar o manga lawasaig.
17 Apiya pen ai na itataros iran den so di iran rekaniyan dii kapakandosa,

a pesopaken iran sii ko disirto so Lebi a Maporo.
18 Pitibaba iran a kiyatepengi ran ko Tohan
ko kiyapamanton iran on sa pangenengken a maiinam iran.
19 Piyagitowito iran so Tohan a tig iran a
"Ba makagaga menat so Tohan sa pangenengken sii sangkai a disirto?
20 Matamataan den a isako mabasal iyan so lakongan na minibogowak on so ig
na miyakapoon on mamangondas so manga lawasaig;
ogaid na ba tano niyan mambo kabegi sa paan?
Ba niyan kapagadili sa sapo so manga pagtaw niyan?"
21 Kagiya maneg siran o Allah na tanto sekaniyan a kiyararangitan;

piyakakadegan iyan sa apoy so manga mbawataan o Yakob,
na kiyalonsanan baden so gani niyan ko manga Israil,
22 Ka da iran paratiyayaa so Tohan
aya pen o ba iran sarigi so kapepanabet iyan.
23 Apiya pen oto na siyogo iyan so manga langit sa poro
na likaan iyan so manga gimowa o kasorgaan,
24 Ka piyakioranan iyan siran sa roti a makan iran;
bigan iyan siran sa pereperan a poon sa kasorgaan.
25 Na komiyan den so manosiya ko paan o manga malaikat;
inipakawit kiran o Tohan so ipenga oosog iran a pangenengken.
26 Piyakasamber iyan pen so ndo a poon sa sebangan,
na nggolalan ko kapaar iyan na inidendeg iyan so ndo a poon sa pagabagatan.
27 Piyakaoranan iyan siran sa manga sapo a lagid o bayanek,
a so manga papanok a lagid sa kadakel o peted sa kilid a ragat.
28 Piyamakatana iyan siran ko soled o kampo iran
sii den ko melilibeta ko manga barombarong iran.
29 Na mikekan siran on taman sa miyanga oosog piyapiya,
ka inibegay kiran o Tohan so ikakadali iran.
30 Ogaid na kagiya da siran pen masemo ko pangenengken a ikakadali iran
a sisii pen ko manga ngari iran,
31 Na somiyokeyaw kiran so rarangit o Tohan,
ka piyamono iyan so tanto kiran a mabager,
a so manga ngongoda a mama sii sa Israil.
32 Apiya pen oto na initaros iran baden so di iran dii kapakandosa;

na da iran paratiyayaa so manga piyakamemesa niyan.
33 Kagiya ka maoto na piyakaipos iyan a datar o sengaw so manga gawii iran
ago so pen so omor iran sii ko kalek.
34 Igira a biyonoan siran o Tohan na pimbabanog iran sekaniyan
a miyananangoran siran on sebenar.
35 Kiyatademan iran pen a so Tohan i Lakongan iran,
ago so Lebi a Maporo a Tohan i miyakaaon kiran.
36 Ogaid na ba iran on baden inipagorayoray so manga ngari iran,
ago inipamokeg iran on so manga dila iran,
37 Ka kena a ba magiiklas rekaniyan so manga poso iran
aya pen o ba siran petoman ko kapasadan iyan.
38 Apiya oto na sabap sa masalinggagaw sekaniyan,

na rinilaan iyan so kadostaan iran
ago da niyan siran binasaa.
Omanoman iyan igenggen so rarangit iyan
ka da niyan pokawa langon so gani niyan.
39 Kiyatanodan iyan a matag siran baden manosiya
a lagid o ndo a baden somasagad na di den kesoy.
40 Sayana a madakel a kiyasopaka iran rekaniyan sii ko disirto

ago so kiyapakakerataa iran sa ginawa niyan roo ko mitataog a kaden.
41 Omanoman iran tepengan so Tohan;
tiyopowan iran so Soti a Tohan o Israil.
42 Da iran katademi so kapaar a ininggolalan iyan
sii ko gawii a kiyapokasa niyan kiran ko manga ridoay iran
43 Ago giya kiyapakiilain iyan ko manga kabarakat iyan sii sa Misir,
a so manga piyakamemesa niyan roo ko kapantaran sa Sowan.
44 Ka biyaloy niyan a rogo so manga lawasaig iran,
na da iran kainomi so manga baogan iran.
45 Inowitan iyan siran sa makapal a manga rengit a miyangangan kiran,
ago manga babak a mirata kiran.
46 Inibegay niyan ko manga oled so manga pamomolan iran
ago so manga pereperan iran sii ko manga tarapan.
47 Bininasa niyan a giyaw so manga waged iran a obas
ago sii ko tenggaw so manga kayo iran a korma.
48 Piyamono iyan pen a giyaw so manga pangangayamen iran
ago so manga talon iran sii ko manga kilakilat.
49 Piyakamborngat iyan kiran so pesokeyaw a gani niyan,
so rarangit iyan, so oteg iyan ago so kariridoa niyan kiran,
a so manga siyogo iyan kiran a pepeminasa.
50 Inimbaal iyan sa lalan so rarangit iyan;
da niyan siran lepasa ko kapatay
ka piyalad iyan siran baden ko kasiksaan.
51 Piyamono iyan so oman i kaka a wata a mama sii sa Misir,
a so paganay a inionga o bager iran sii ko manga barombarong o Ham.
52 Ogaid na piyakaliyo niyan roo so manga pagtaw niyan a lagid o talon;

inagak iyan siran a datar o manga bilibili ko kapegokit iran ko disirto.
53 Malilinding siran ko di niyan kiran on dii kanggonanaowa,
na da siran manga aalek,
ogaid na minikolob so ragat ko manga ridoay iran.
54 Inowit iyan siran ko soti a lopa iyan,
sii den ko kapalawan a miyatangan iyan a nggolalan ko kawanan a lima niyan.
55 Piyamogaw niyan so manga nasiyon sii ko kapepekaantap kiran o manga pagtaw
niyan,
na pimbagibagi iyan so manga lopa iran a mapekewali o manga mbatabataa a Israil
na piyakabaling iyan siran ko manga babalingan iran.
56 Ogaid na tipengan iran so Tohan

ago siyopak iran pen so Lebi a Maporo,
ka da iran nggolalanen so manga insarat iyan.
57 Miyamangonkir siran a da pamaratiyaya
a datar mambo o manga apo iran,
na miyakasilay siran a lagid o bekog a gasa.
58 Piyakapagoteg iran so Tohan sabap ko manga aparan iran sii ko manga bobongan,
ago piyakapanaod iran pen ko manga barahala iran.
59 Miyailay ini o Tohan, na kiyararangitan sekaniyan,
na tanto niyan a inibowang so manga Israil.
60 Inawaan iyan so Barombarong a pesimbaan rekaniyan sii sa Siloh
a aya niyan kakadenan sii ko manga manosiya.
61 Piyakiagaw niyan ko manga ridoay so Kaban sa Kapasadan
a aya toos ko kabatowa niyan ago bantogan.
62 Piyakipamono iyan a pedang so manga pagtaw niyan,
ka kiyararangitan iyan siran a kawali niyan.
63 Miyanga iiped a apoy so manga ngongoda kiran,
na da den a makapangaroma ko manga raga kiran.
64 So manga imam kiran na miyamatay a pedang,
na da siran den mimboko o miyanga babalo kiran.
65 Samaoto na miyakanaw so Allah a datar o totorogen,

na lagid sekaniyan o mabager a mama a miyapangoyat a arak.
66 Piyakapalagoy niyan so manga ridoay niyan,
na tiyagoan iyan siran sa da a ikepos iyan a kayaan.
67 Liyo ron pen na inisili niyan so kiyababadan ko Yosop,
na da niyan pilia so mbatabataa a Ipraim,
68 Ka aya niyan pinili so mbatabataa a Yodah,
ago so Palaw a Siyon a pekebabayaan iyan.
69 Roo niyan biyangon so Timplo niyan a lagid o ndodoo sa kasorgaan,
a da den a ikepos iyan a datar o doniya a piyakambeken iyan.
70 Pinili iyan mambo so Daod a oripen iyan

na kinowa niyan sii ko pananateba
71 A roo niyan petemengi so manga bilibili,
ka kinowa niyan den a mabaloy a pananagikor ko manga pagtaw niyan a manga
mbawataan o Yakob
a so kawali niyan a manga Israil.
72 Na inipanagikor kiran o Daod so kapagiinontolan a poso iyan,
ago piyagolowanan iyan siran ko kapasang iyan i kandato.
SABOR 79
Pangni sa Kabokai ko Nasiyon
Hey Tohan, tiyarapas o manga kapir so inged a aya ngka kawali;

piseboan iran so soti a Timplo ngka,
na pinggegeba iran a Yarosalim.
2 So manga bangkay o manga oripen ka
na piyakikan iran ko manga papanok sa kawang;
so sapo o manga kaom ka na inenat iran ko manga iila a binatang.
3 Piyakatoga iran a lagid o ig so rogo o manga pagtaw ngka
sii ko mbalabala sa Yarosalim,
na da den a pekalebeng ko miyamatay.
4 Miyabaloy kami a songkai o manga siringan ami
a di kami dii sodiin ago dii kela o melilibeta rekami a manga taw.
5 Ay katey niyan, ya Allah? Ba taman sa pakataman a kapekerarangiti reka?

Ba mitataros so kapekerab o kapepanaod ka a datar o apoy?
6 Pakamborngata ngka so gani ngka ko manga nasiyon a di ka iran kikilalaan,
ago sii ko manga ndatoan a di telo ko Ingaran ka.
7 Ka siyakab iran so manga mbawataan o Yakob
ago liyaslas iran so inged a babalingan iran.
8 Di ngka rekami tenaan so manga dosa o manga apo ami;

kapediin kami ngka nggagaan
ka tanto kami den a minibaba.
9 Lindinga kami ngka, hey Tohan a pepekasabet rekami,
sabap ko bantogan o Ingaran ka;
panabangi kami ngka ago rilaan ka so manga dosa mi
sabap ko Ingaran ka.
10 Ino kami pen miise o manga nasiyon a
"Anda so Tohan iyo?"
Pakitokawi ngka ko manga nasiyon sii ko kakemasai ami ron
a ipeseop ka so kapekatogaa ko rogo o manga oripen ka.
11 Misampay reka so dii kapakaperego o miyanga bibiyag.

Nggolalan ko kala a ka i kapaar
na pakapagoyaga ngka so siran oto a miyatendo a pemamonoon.
12 Badali ngka sa makapito takep ko manga siringan ami
so manga songka a inipanonongka iran reka, hey Kadnan.
13 Samaoto na sekami a manga pagtaw ngka,
a so manga bilibili ko talon ka
na penalamatan ami seka sa taman sa pakataman;
na sii ko kapepamagapidapidi rekami
na pemanotolen ami so manga podi ngka.
SABOR 80
Pangni sa Kapakaasal o Nasiyon
Pamakinega kami ngka, hey Tomatagikor sa Israil,

seka a pegagak ko manga mbawataan o Yosop a lagid o talon.
Hey seka a kokorsi sii ko poro o piyagtaotaw a manga malaikat,
na sindaw ka
2 Sii ko kamamasaan o Ipraim, Baniyamin ago Manasih.
Pokawa ngka so bager ka,
na songowi kami ngka sa kasabeta ngka rekami.
3 Pakaasala kami ngka, hey Tohan.

Pakaliwanaga ngka rekami so paras ka
kaan kami masabet.
4 Ya Allah a Lebi a Mamaapaar a Tohan,

ay katey pen a kapekerarangiti reka
ko kapepangangarapan o manga pagtaw ngka?
5 Aya pangenengken a piyakikan ka kiran na manga lo;
piyakiinoman ka kiran so manga ladiya a kikapepeno a lo.
6 Biyaloy kami ngka a dii pepawalaan o manga siringan ami,
na pepagongatongaten kami o manga ridoay ami.
7 Pakaasala kami ngka, hey Tohan a Lebi a Mamaapaar.

kaan kami masabet.
8 Piyakaliyo ngka sa Misir so isa a waged a obas;

piyamogaw ngka so manga nasiyon ko inged iran na ron ka ini piyamola.
9 Tiyagaran ka sa kaden a ketoan iyan,
na mimbekaw ini sa madalem, na minipeno ko dalem a inged.
10 Kiyasapengan so manga palaw o along iyan,
na kiyatanongan o manga sapak iyan so manga ala a kayo a sidro.
11 Domiyonapa pen so manga sapak iyan ko Ragat
ago so manga roroni a sapak iyan na taman den ko Lawasaig a Yopratis.
12 Ino ngka nggebaa so manga alad iyan?
Ka imanto na so langon a pepekasagad on na peperoropo ko onga niyan;
13 So manga baboy sa kalasan na pepelomegen iran ai
ago pepenganganen o manga iila a binatang.
14 Kasoy ka rekami, hey Tohan a Lebi a Mamaapaar.

Tolongi kami ngka san sa kasorgaan.
Kibira ngka angkai a waged,
15 A so bekaw a piyamola o kawanan a lima ngka,
a giyangkai a sapak a piyakagemaw ngka para sa ginawa ngka.
16 Miyapata so waged ka ago kiyabisolan;

pepanga dadadas so manga pagtaw ngka ko di ngka kiran dii kambongeti.
17 Misarta so kapaar ka ko mama a sisii ko kawanan ka,
a so wata o manosiya a piyakagemaw ngka para sa ginawa ngka.
18 Samaoto na di ami seka den telikodan;
oyaga kami ngka, ka telowan ami so Ingaran ka.
19 Pakaasala kami ngka, ya Allah a Lebi a Mamaapaar a Tohan.

kaan kami masabet.
SABOR 81
So Idaida ko Kapista
Pagidaida kano sa kapekebabaya ko Tohan a bager tano;

ogiyab kano sa matanog ko Tohan o Yakob.
2 Pooni niyo so dii kamboboniboniyan; tepia niyo so manga garingking,
na pakaoniya niyo so manga pipiya i oni a alpa ago kotiyapi.
3 Pegiyopa niyo so bogiyong igira a miseribolan

ago igira mimbiring so olan, sii ko gawii a kapepista tano,
4 Ka giyai i taritib sa Israil, a so sogoan o Tohan o Yakob.
5 Inibegay niyan ai a insarat ko manga mbawataan o Yosop
isako magenebeneb siran sa inged a Misir
a ron iran miyaneg so basa a da iran sabota.
6 Pitero iyan a "Piyokas aken ko waga niyo so awid;

miyada rekano so kaaawid sa reban.
7 Sii ko kareregeni rekano na miyananalo kano na piyanabangan ko sekano.
Poon ko gabon a dii ndadalendeg na inampon aken sekano;
tipengan aken sekano sii ko manga ig sa Miribah.
8 “Pamakineg kano, hey manga pagtaw aken, ka pekaiktiyaren ko sekano,

hey Israil, o ba ako niyo bo pekinega!
9 Di kano den tatago sa barahala,
aya pen o ba kano sodiyod ko katohanan o manga rait.
10 Saken so Allah a Tohan iyo a miyakaliyo rekano sa inged a Misir.
Ngganga kano sebenar, ka penoon ko so ngari iyo.
11 “Ogaid na da ako pakinega o manga pagtaw aken;

giya Israil na di iran kabaya a kaparatiyayaa iran raken.
12 Kagiya ka maoto na inindarainon aken siran den ko kategas o poso iran
kaan iran kapangonoti so baya a ginawa iran.
13 “O ba ako bo pemakinega o manga pagtaw aken!

O ba bo kedega o Israil so manga lalan aken!
14 Ka o magiyanan na kedaag aken somambot so manga ridoay iran
ago kitana aken pen so lima ko ko manga soranga iran.
15 Siran oto a pekegowad ko Allah na pemakakipes ko hadapan iyan,
na ketatap so kandanega kiran sa taman sa pakataman.
16 Na sekano peman na mapekakan aken ko lebi a mapiya a trigo,
ago mapekaosog aken pen ko gola a teneb a poon ko lakongan."
SABOR 82
So Tohan a Lebi a Maporo a Dato
Makadadarpa so Tohan ko kalilimodan sa kasorgaan;

sii ko look o manga pangongokom na pegokasan iyan siran sa kokoman:
2 “Ay katey o bibid a kapepangokom iyo

ago so kaaampili niyo ko manga rarata a taw?
3 Panindegen iyo so kabenar o manga lolobay ago so manga ilo;
paginontolanen iyo so kikararasay ago so pepamakitabang.
4 Panabangi niyo so manga lolobay ago so manga miskin;
pokasa niyo siran ko lima o manga rarata.
5 “Da den a katawan iyo. Da den a sasaboten iyo.

Sii kano pelalakaw ko maliboteng;
so langon a manga onayan o doniya na palaya pekekokog.
6 “Pitero aken a 'Manga tohan kano;

palaya kano manga wata o Lebi a Maporo.'
7 Ogaid na pematay kano bo a datar o matag manosiya;
penga ooteng kano a lagid o ped a manga olowan."
8 Mbowat ka, hey Tohan, na kokoma ngka so doniya,

ka seka i kikawali ko langon a nasiyon.
SABOR 83
Pangni sa Katabana ko manga Ridoay o Israil
Hey Tohan ko, di ka baden rerenek;

di ka ndadarainon, hey Tohan; di ka baden gegenek.
2 Ilaya ngka, ka dii mamisenga so manga ridoay ngka;
siran oto a pekegowad reka na pepamangimporoan.
3 Pepegopakat siran sa kiakal iran ko manga pagtaw ngka;
kekadiyatan iran sa marata so siran oto a pelindigen ka.
4 “Itano roo," a tig iran, "ka polangen tano so bangsa iran
kaan di den kapenanademi so ngaran a 'Israil'."
5 Maiisaisa so pamikiran iran ko kapepagopakat iran;

piyamagabangaan ka iran,
6 So manga Idomiyo ago so manga Ismail,
so manga Mowabiyo ago so manga mbawataan o Hagar,
7 So manga taw sa Gibal, so manga Amoniyo, so manga Amalik
ago so manga Pilistiyo a rakes o manga kibabaling sa Tiro.
8 Lagid mambo a Asiriya a tomiyapi kiran
a aya mabager a abanga o kiyababadan ki Lot.
9 Nggolaolaa ngka kiran so inikidia ngka ko manga taw sa Midiyan,

ago datar o pinggolaola ngka ki Sisira ago si Yabin sii ko lawasaig a Kison.
10 Bininasa ngka siran roo sa Indor,
na miyaredak so manga bangkay iran sii ko lopa.
11 Baloya ngka so manga olowan iran a lagid i Orib ago si Siib,
ago so langon a manga dato iran a lagid i Sibah ago si Salmona
12 A miyatero iran a "Tanganen tano so manga pananateba o Tohan."
13 Hey Tohan ko, baloya ngka siran a lagid o pekeporipis a bayanek
ago lagid o okap a ipembayog o ndo.
14 Datar o apoy a petotongen iyan so kalasan,
ago datar o kadeg a pepakakaraben iyan so manga palaw
15 A pakisalobaan ka siran ko barabarat ka,
na pakipangangaleken ka siran ko sobosobo ngka.
16 Pakapanagopa ngka siran sa kaya
taman sa di mambanog o manga taw so Ingaran ka, ya Allah.
17 Makakeya siran ago manga aalek sa taman sa pakataman;

madadas siran a kikadidiyamanan.
18 Pakitokawi ngka kiran a seka bo, a aya Ingaran ka na so Allah,
i Lebi a Maporo ko dalem a doniya.
SABOR 84
Kadali ko Walay o Tohan
Sayana a kebabayaan so kakadenan ka,

ya Allah a Lebi a Mamaapaar!
2 Pekikopay so niyawa ko ko kikakadaliin iyan ko manga lamalama o Timplo o Allah;
so poso ago so badan aken na ipenggoraok iran so oyagoyag a Tohan.
3 Apiya so kenti na miyakatoon sa walay,

ago so pen so ogona na mimbaal sa salag
a ron iyan kelendemi so manga wata iyan
sii ko obay o manga aparan ka,
ya Allah a Lebi a Mamaapaar a Dato aken ago Tohan ko.
4 Rarakmatan so siran oto a komakaden ko Walay ngka;
tatap a kapepodiya iran reka.
5 Rarakmatan so taw a sisii reka so bager iyan,

a madadalem ko poso iyan so kalawia niyan ko Palaw a Siyon.
6 Sii ko kapeterapas iran ko mamara a Balintad a Baka
na pembalowin iran ai a darpa o manga bowalan;
so pen so pepenga babalaga a oran na mapepakapelinaw niyan ai.
7 Pepekabager siran sii ko kapelalakaw iran
taman ko kapakapangadap o oman i isa kiran ko Tohan sii sa Siyon.
8 Pamakinega ngka so kapepangangarapan aken, ya Allah a Lebi a Mamaapaar;

lekai ngka a tangila ngka, hey Tohan o Yakob.
9 Ilaya ngka so dato a aya rekami pelinding, hey Tohan;
kalimoon ka sekaniyan a miyapili i ka.
10 Lebi a mapiya so salongan sii ko manga lamalama ngka

a di so sanggibo a gawii ko salakaw a darpa.
Tomoon ko a kapakatitindeg aken ko pintoan o Walay o Tohan aken
a di so kapakababaling aken ko manga kakadenan o manga rarata.
11 Ka so Allah a so Tohan na aya alongan ago kelong;
pembegay so Allah sa limo ago pangkatan;
da den a mapiya a nganin a ba niyan pepanganogoni
ko siran oto a pepaginetaw a da a daway niyan.
12 Ya Allah a Lebi a Mamaapaar,

rarakmatan so taw a somasarig reka.
SABOR 85
Pangni sa Kamapiyaan o Inged
Inikalimo o ka den so inged ka, ya Allah;

piyakaasal ka so kapepekapiya o manga mbawataan o Yakob.
2 Inirila a ka so kadostaan o manga pagtaw ngka
ago tiyambonan ka so langon a dosa iran.
3 Piyakada a ka so langon o rarangit ka
ago piyakalenggaw ngka so pesokeyaw a gani ngka.
4 Pakaasala kami ngka peroman, hey Tohan a pepekasabet rekami,

na geneki ngka so kapagootegi ngka rekami.
5 Ba dayon sa dayon a kapekerarangiti ngka rekami?
Ba ngka tatarosen so gani ngka taman ko kapepamagapidapid o masa?
6 Ba kami ngka di pagoyaga peroman
kaan mabebaya reka so manga pagtaw ngka?
7 Pakiilain ka rekami so da a ikeda iyan a gagaw ngka, ya Allah,
na nggolalanen ka rekami so kapepanabet ka.
8 Pemakinegen ko so peteroon o Tohan a so Allah,

ka ipetopa niyan so kapakalilintad o manga pagtaw niyan, a so manga kaom iyan,
ogaid na disomala a di siran den kesoy ko kalalalongan.
9 Matamataan a marani so kapepanabet iyan ko siran oto a maaleken rekaniyan,
kaan makakaden so bantogan iyan sii ko inged tano.
10 So gagaw ago so tito a benar na makapetoona siran;

so kaontol ago so kalilintad na makapagareka.
11 So tito a benar na meretok sii sa doniya,
na tolong so kaontol roo sa kasorgaan.
12 Matamataan a imbegay o Allah so kamapiyaan,
na pagodaren so lopa tano.
13 Moona rekaniyan so kapaginontolan
ka aya petiyagar ko lalan a pelalakawan iyan.
SABOR 86
Pangni sa Tabang
Lekai ngka a tangila ngka, ya Allah, na go ako ngka pamakinega,

ka miskin ako ago kadodowaanan.
2 Ipata ngka so kaoyagoyag aken, ka magiiklas ako reka.
Seka i Tohan ko; sabeta ko ngka a oripen ka
ka somasarig ako reka.
3 Kalimoon ako ngka, hey Kadnan,
ka sii ako reka pepananalo sa mababasa alongan.
4 Pakapiyaa ngka so ginawa o oripen ka,
ka sii aken reka ipepangadap so niyawa ko, hey Kadnan.
5 Mapiya ka, Kadnan, ago dii meririla;

mitataralo reka so kapepangalinggagaw ko langon a pepananalo reka.
6 Pamakinega ngka so kapepangangarapan aken, ya Allah;
tagoa ngka sa ginawa so kapenggoraok aken sa kapedi.
7 Sii ko masa a kakeregeni raken na telowan ko seka,
ka pagamponen ako ngka.
8 Sii ko manga tohan na da den a ba ngka on datar, hey Kadnan,

aya pen o ba aden a manga galebek a ba miabay ko manga galebek ka.
9 So langon o manga bangsa a inaden ka
na pemakaoma ago pemanodiyod ko hadapan ka, hey Kadnan,
na mbantogen iran so Ingaran ka.
10 Ka mala ka i gees a dii nggolaola sa manga piyakamemesa;
seka bo i Tohan.
11 Toroon ka raken so lalan ka, ya Allah,

ka lomalakaw ako ko tito ngka a benar;
timana ngka so poso aken sa kikaleken iyan ko Ingaran ka.
12 Podin ko seka, hey Kadnan a Tohan ko, sa iklas ko poso aken,
na mbantogen aken so Ingaran ka sa taman sa pakataman.
13 Ka tanto a mala so kapepangalinggagaw ngka raken;
siyabet ka so niyawa ko ko pitidaleman ko darpa o miyamatay.
14 Hey Tohan, so manga pepangimporoan na riridoon ako iran;

aden a sagorompong a manga sosopiit a manga taw a mananamar ko niyawa ko,
a so manga mama a di ka iran tatagoon sa ginawa.
15 Ogaid na seka, hey Kadnan, na makapediin ago makalimoon a Tohan,
a kena a ba malebod kararangiti, mala i gagaw ago tanto a kasasarigan.
16 Dingili ako ngka na go ngka kalimoon;
begi ngka ko bager ka so oripen ka
na go ngka sabeta so wata o oripen ka a babay.
17 Pakailaya ko ngka sa toos ko kamapiyaan
kaan ai mailay o siran oto a pekegowad raken ago an siran kayai,
ka seka, ya Allah, i tomiyabang raken ago miyakarinaw raken.
SABOR 87
So Kapodiya sa Yarosalim
Biyangon o Allah so onayan o siti niyan sii ko Soti a Palaw.

2 Tanto niyan a pekebabayaan so manga gimowa a Siyon
a di so langon a babalingan o manga Israil.
3 Kababantogan so manga nganin a dii matero makapantag reka, hey siti o Tohan:
4 “Pagalowin ko a Misir ago Babiloniya
a ped ko siran oto a makakikilala raken,
so pen so Pilistiya ago giya Tiro a rakes o Itiyopiya,
na peteroon ko a 'Giyangkai a taw na inimbawata roo sa Siyon.' "
5 Matamataan a aya mapetero makapantag sa Siyon na

"Giyangkai ago giyangkanan a taw na minimbawata on,
na so den so Lebi a Maporo i makapembeken on."
6 Isorat o Allah ko kasosoratan ko manga bangsa a
"Giyangkai a taw na inimbawata sa Siyon."
7 Sii ko kapemboboniboniyan iran na ipegidaida iran a
"So langon a pekepoonan o manga rakmat aken na ndodoo sa Siyon."
SABOR 88
Kapenggoraok sa Tabang
Ya Allah a Tohan a pesebet raken,

gagawii daondaw na penggoraok ako sii ko hadapan ka.
2 Misampay reka so kapepangangarapan aken;
lekai ngka so tangila ngka ko kapenggoraok aken.
3 Ka miyasemo so niyawa ko ko manga karomasayan,

na pepekadaseg so kaoyagoyag aken ko kobor.
4 Ibibilang ako a ped ko siran oto a pepanga aaloganen ko galebo;
lagid ako o mama a da den a bager iyan.
5 Maaped ako ko miyamatay a minindarainon,
a datar ako o siran oto a miyapamono a kikaiiga ko kobor a di ngka den ketademan,
a miyabelag siran ko kapetebangi ngka kiran.
6 Tiyago ako ngka ko didadidalem o galebo

sii den ko miyakaliboliboteng ko kadaleman.
7 Tanto raken a pekidag so gani ngka;
inikolob ka raken so langon o manga begel ka.
8 Piyakitalikodan ako ngka ko manga ginawai aken
ka miyabaloy ako ngka a ipekesisingay iran.
Kaseseletan ako na di ako pekaliyo;
9 Miyakalobay so manga mata ko sabap ko kapakamboboko aken.
Oman gawii na petelowan ko seka, ya Allah,

na ipapalad aken reka so manga lima ko.
10 Ba ngka dii nggolaolai sa manga kabarakat so miyamatay?
Ba pepamangembowat so miyamatay sa kapodiya iran reka?
11 Ba dii matero so kapepangalinggagaw ngka sii ko kobor,
o di na so kasasarigi reka sii ko darpa o kabinasaan?
12 Ba sii peketokawi so manga kabarakat ka ko darpa a maliboteng,
o di na so kapagiinontolan ka sii ko inged a da den a katatanodan on?
13 Ogaid na sii ako reka pepananalo sa tabang, ya Allah;

oman kapipita na pekitalingoma reka so kapepangangarapan aken.
14 Ya Allah, ino ako ngka bobowangen
ago pageenaan ka raken so paras ka?
15 Ipoon den ko kangoda ko na pekerasay ako ago sama bo di petay;

kiyapanagadan aken so piyamakalekelek ka, na kiyadaan ako den sa inam.
16 So pesokeyaw a gani ngka na minipayopas raken;
so piyamakatekatekaw ngka na miyakabinasa raken.
17 Mababasa alongan na lilikopan ako iran a lagid o bagiyaw
a pendasaan ako iran ko mbala sa takilidan.
18 Piyakitalikodan ako ngka ko manga ginawai aken ago siran oto a pekebabayaan ko;
na aya bo a mipageepeda aken na so maliboteng.
SABOR 89
So Kapasadan o Allah ko Daod
Indikir aken so da a ikeda iyan a gagaw o Allah sa taman sa pakataman;

pekitokawan o ngari aken so kasasarigi reka sii ko langon a kapepamagapidapid o masa.
2 Ka katawan aken a makambebeken sa dayon sa dayon so gagaw ngka,
ago piyakatikna a ka so kasasarigi reka sii ko manga langit.
3 Pitero o ka a "Inimbaal aken sa kapasadan so mama a miyapili aken,

ka inisepa aken ko Daod a oripen aken a
4'Tetapen ko sa dayon sa dayon so kebabadan reka,
na pakapembekenen ko so korsi i ka sii ko langon a kapepemagapidapid o masa.'"
5 Pepodin o manga langit so manga piyakamemesa ngka, ya Allah,

ago so pen so kasasarigi reka sii ko kalilimod o kikasosoti.
6 Ka antawaa sii sa kawang i kiabay ko Allah?
Antawaa ko manga kaaden sa kasorgaan i kelagidan ko Allah,
7 A so Tohan a tanto a ipekelek sii ko pepagopakat a kikasosoti;
ago lebi a pagaadatan a di so langon a lomilibet on?
8 Ya Allah a Lebi a Mamaapaar a Tohan, antawaa i datar ka?
Mabager ka, ya Allah, na lilibeten ka o kasasarigi reka.
9 Seka i makapapaar ko pendaleg a ragat;
igira a dii mbegel sa manga ala na seka i pepekalengen on.
10 Seka i somiyasa ko Rahab a so piyakalekelek a binatang a aya niyan inipatay;
iniparak ka so manga ridoay ngka a nggolalan ko mabager a barokan ka.
11 Rek ka so manga langit, na rek ka pen so lopa;
seka i miyangon ko doniya ago so langon o matatago on.
12 Seka i miyaden ko pagotaraan ago so pagabagatan;
so palaw a Tabor ago giya Hirmon na pepelalalis sa kapekebabaya sabap ko Ingaran ka.
13 Mala i gees so barokan ka.
Mabager so lima ngka; maporo so kawanan a lima ngka.
14 So kaontol ago so kokoman na aya kaoonayan o korsi i ka;

so kapangalinggagaw ago so tito a benar na pepangonaan reka.
15 Sayana a mapipiya a ginawa o siran oto a miyasowa iran so kapamesegi ran reka sa
kapekebabaya,
a pelalakaw siran, ya Allah, ko kaliwanag o paras ka.
16 Ipekebabaya iran so Ingaran ka sa mababasa alongan;
na ipepangandag iran so kaontol ka.
17 Ka seka i kababantogan a bager iran,
na sabap ko limo o ka na pekipangkat so gees ami.
18 Matamataan a rek o Allah so dato ami a aya mi kelong,
sekaniyan na rek o Soti a Tohan o Israil.
19 Miyakaisa a mitero ka a miyakanggolalan ko pangingilain;

sii ko manga kaom ka na pitero o ka a
"Bigan aken sa tabang so mabager a sondaro;
inipangkat aken ko manga taw so sakataw a mangoda.
20 Miyapili aken so Daod a oripen aken;
siyalawatan aken sekaniyan sa kadato ko soti a lana ko.
21 Tokoden sekaniyan o lima ko,
na pekabageren pen o barokan aken.
22 Da den a ridoay a ba rekaniyan pekabinta
aya pen o ba aden a makarasay ron a marata a taw.
23 Sesaan ko so manga soranga iyan sii ko danga iyan,
ago siksaan ko so siran oto a pekegowad on.
24 Magonot rekaniyan so kasasarigi raken ago so gagaw aken,
na nggolalan ko Ingaran aken na kipangkat so gees iyan.
25 Pakapengoladen aken so kapaar iyan taman ko ragat,
ago so kadato iyan taman ko lawasaig a Yopratis.
26 Itelo niyan raken a 'Seka i Ama aken, so Tohan aken
ago so Lakongan a pepekasabet raken.'
27 Itoro aken sekaniyan a kaka a wata aken
a aya lebi a maporo ko manga dato sa doniya.
28 Iteros aken so kapepangalingagaw aken on sa dayon sa dayon,
na da den a ikepos o kapasadan aken mipantag rekaniyan.
29 Tetapen ko so kebabadan rekaniyan sa taman sa pakataman
ago so korsi iyan sa taman ko kaaaden o manga langit.
30 “O pekalipati o manga wata iyan so Kitab aken

ago di iran ipenggolalan so manga kokoman aken;
31 O sogoka iran so manga taritib aken
ago di iran tomanen so manga sogoan aken,
32 Na ipemadas aken kiran so manga sala iran
ago ipeleped aken kiran so kadostaan iran;
33 Ogaid na di aken den rekaniyan mbelagen so gagaw aken,
aya pen o ba aken barobaa so kasasarigi raken.
34 Di aken den sogoken so kapasadan aken
aya pen o ba aken alina so miyatero o modol aken.
35 Miyakaisa a minisepa aken ko kasosoti aken;
di ako den pemokeg ko Daod.
36 So kebabadan rekaniyan na ketatap sa taman sa pakataman,
ago so pen so korsi iyan sii ko hadapan aken a lagid o alongan.
37 Pakapembekenen ai sa dayon sa dayon a lagid o olan
a giyangkoto a kasasanaan a saksi sii sa kawang."
38 Ogaid na tanto ngka a kiyararangitan so miyapili i ka a dato;

na inibowang ka sekaniyan ago tiyalikodan ka.
39 Piyakadaan ka sa bali so kapasadan ka ko oripen ka,
na piresikan ka ko bayanek so sangkad iyan.
40 Initobak ka so langon a manga pangeleban o siti niyan,
na pinggegeba a ka so manga kota iyan.
41 Di sekaniyan dii tebanan o langon a pepamanagad on;
pekowaan sekaniyan a diyaman o manga siringan iyan.
42 Iniporo o ka so kawanan a lima o manga soranga iyan;
piyakikeriyalaan ka so langon a ridoay niyan.
43 Kilid ka pen so garangan o pedang iyan
na da ngka sekaniyan pamayandegen ko katidawa.
44 Piyakada a ka so bantongan iyan,
ago pipad ka so korsi iyan ko lopa.
45 Sipok ka so manga gawii a kangodai ron;
piyotos ka sekaniyan a kayaan.
46 Ay katey niyan, ya Allah?

Ba taman sa pakataman a kapageenaa ngka ko ginawa ngka?
Ay katey a kasosokeyaw o rarangit ka a datar o apoy?
47 Tatademi ngka so kasasagad o omor aken.
Sayana den a da a gona niyan a iniaden ka ko langon a manosiya!
48 Antawaa i makapeginetaw a di pekaokit ko kapatay
aya pen o ba niyan milidas so niyawa niyan ko kapaar o kobor?
49 Hey Kadnan, anda den so miyanga oona a poriba o gagaw ngka

a minisepa a ka ko Daod ko kasasarigi reka?
50 Tanodi ngka, Kadnan, so kapepanonongkaa raken a oripen ka,
ago so kiaawiden a akal aken ko manga panonongka o madakel a taw
51 A inipagongatongat o manga ridoay ngka, ya Allah,
a inipagongatongat iran ko oman i kapelakad o miyapili i ka a dato.
52 Mapopodi so Allah sa taman sa pakataman.

Amin. Amin.
IKAPAT BAGI
Sabor
90-106
SABOR 90
Pangangarapan o Mosa
Hey Kadnan, seka den i babalingan ami

ko langon o miyanga iipos a kapepamagapidapid o masa.
2 Sa da pen kibayanen ko manga palaw
o di na so kiyalimbaga ngka ko lopa ago so doniya,
apiya ipoon sa poonan ago taman sa pakataman na seka den i Tohan.
3 Pepakasonoden ka so manosiya ko bayanek a di ngka dii teroon a

"Sonod kano, hey manga wata o manosiya."
4 Ka so makasanggibo ragon ko kapembilanga ngka on
na datar bo o kagai a miyaipos den,
o di na lagid o sapokaw sii ko kagagawii.
5 Pepayopasen ka so manosiya a datar o reges;
somasagad siran baden a datar o kapakatorog.
Lagid siran o otan a pereti ko kapipita
6 A apiya pen sii ko kapipita na pegto ini ago lomolombay
na amay ka magabi na kelas ago kelayon.
7 Matamataan a pekeiped kami o rarangit ka

ago pepanga aalek sabap ko gani ngka.
8 Tiyago o ka ko kabebelengan ka so manga kadostaan ami
ago so mapageema a manga dosa mi sii ko kalilindawan on o kamamasaan ka.
9 Ka pepamanagad so langon o manga gawii ami a mapapadalem ko rarangit ka;
pekepopos so manga ragon ami a lagid o kapengginawa sa madalem.
10 Aya kalendo o omor ami na pito polo ragon,
o di na walo polo ragon o aden pen a bager ami.
Ogaid na so kipepaginetaon ami ron na baden kandokaw ago rata a ginawa.
ka magaan bo a kasegad iran, na kedadas kami bo.
11 Antawaa i matao ko bager o rarangit ka?

Ka so gani ngka na lagid sa kala o kipekeleken reka a mapapatot reka.
12 Kagiya ka maoto na pangendaon ka rekami so kapamagitong ko manga gawii ami
kaan mapamola so ongangen ko poso ami.
13 Lokei kami ngka, ya Allah! Ay katey niyan?

Pangalinggagaon ka so manga oripen ka.
14 Pakaosoga kami ngka ko gagaw ngka oman mapita
kaan kami makapagidaida sa kapekebabaya
ago makapiya a ginawa mi ko langon o manga gawii ami.
15 Pakapiyaa ngka a ginawa mi a lagid sa kadakel o manga gawii a kiyarasaya ngka
rekami,
a lagid sa kadakel o manga ragon a kiyapakapanagad ami ron sa marata.
16 Mapakiilay ko manga oripen ka so galebek ka
ago so bantogan ka sii ko manga moriyataw iran.
17 Misarta rektano so limo o Kadnan a Tohan tano.

Pakabolosa ngka sa mapiya so galebek o manga lima mi,
oway, pakabolosa ngka sa mapiya so galebek o manga lima mi.
SABOR 91
So Tohan a Magiipat Rektano
Saden sa komakaden ko kalilindongan o Lebi a Maporo

na pekadarpa ko along o Lebi a Mabager.
2 Peteroon ko ko Allah a "Seka i apasa aken ago kota,
a aya ko Tohan a sasarigan aken."
3 Matamataan a sekaniyan i pekalidas reka ko litag o panganganop

ago sii ko pekapatay a paniyakit.
4 Ndalongan ka niyan ko bombol iyan,
na sii ko didalem o manga papak iyan na ron ka pekaapas;
so kasasarigi rekaniyan na aya ngka kelong ago raben.
5 Di ngka den ikewan so piyakalekelek igira a kagagawii
o di na so gasa a pelayog ko kadadaondaw,
6 O di na so paniyakit a magaayan ko maliboteng,
aya pen o ba so kabinasaan a pemakalaslas ko keoto a alongan.
7 Ka apiya pen penga ooteng so nggibowan ko kilid ka
ago sapolo nggibo sii ko kawanan ka
na di reka den ai pekadaseg.
8 Pakapembantay baden so manga mata ngka
ko kapagilaya ngka ko kandanega ko manga rarata.
9 Kagiya so Lebi a Maporo a aya ngka apasa na miyabaloy ngka pen a babalingan ka
10 Na da den a marata a ba reka pekatana
aya pen o ba aden a kasiksaan a makadaseg ko barombarong ka.
11 Ka sogoon iyan so manga malaikat iyan mipantag reka
sa kapagipata iran reka ko langon a di ngka dii nggolaolaan.
12 Papaladen ka o manga lima iran
kaan di kisosong so ai ngka ko ator.
13 Ndapoan ka so arimaw ago so darpo;
pelomegen ka so mangoda a arimaw ago so nipay.
14 “Sabap sa pekebabayaan ako niyan," a tig o Allah, "na penabangan ko sekaniyan;

pelindingen aken den ka kagiya kikilalaan iyan so Ingaran aken.
15 Telowan ako niyan na pagamponen ko sekaniyan;
keped ako niyan sii ko masa a kasasamok;
pokasen aken ago ipengkat aken sekaniyan.
16 Ipesoasoat aken on so malendo a omor
na pekiilay aken on so kapepanabet aken."
SABOR 92
Kadikir sa Podi
Sayana a mapiya so kapepanalamati reka, ya Allah

ago so kapendidawa a manga podi ko Ingaran ka, hey Lebi a Maporo,
2 Ago so kapepakalangkapa ko gagaw ngka oman mapita
ago so kasasarigi reka oman gagawii
3 A sasartaan o sengkoan o sapolo i tapes a kotiyapi
ago so boniboniyan a alpa.
4 Ka piyakapiya ngka a ginawa ko a nggolalan ko miyanggolaola ngka, ya Allah;

pepagidaida ako sa kapekebabaya sabap ko miyanga papasad o manga lima ngka.
5 Sayana a kababantogan so manga pasad ka, ya Allah;

tanto a madalem so manga pamikiran ka!
6 So boda a taw na di niyan katawan,
ago so pen so manga lalong na di iran kesabot
7 A apiya pen mereretok so manga rarata a taw a datar o otan
ago pepekarimpoong so langon a dii mbabaradosa
na ba siran baden kebinasa sa dayon sa dayon.
8 Ogaid na seka, ya Allah, na lebi a maporo sa taman sa pakataman.
9 Ka matamataan a so manga ridoay ngka,

matamataan a so manga ridoay ngka na penga dadadas;
kiparak so langon a dii mbabaradosa.
10 Ogaid na inipangkat ka so panga aken a lagid o manga panga o maila a mama a sapi;
kiyalanaan ako sa bago a lana.
11 Kiyabantayan o manga mata ko so kiyatabana ko manga soranga aken,
na miyaneg o tangila ko so kiyabinasa o manga rarata a romirido raken.
12 So manga oontol a taw na pemakarimpoong a lagid o kayo a korma;

pemangeto siran a datar o kayo a sidro sa Libanon.
13 Sii siran miyapamola ko Walay o Allah,
na pekarimpoong siran ko manga lamalama o Tohan tano.
14 Pemangonga siran pen sii ko kapenga lolokes iran
a lalayon siran malimegas ago pepemakalombay
15 A pepayagen iran a "Matito so Allah;
sekaniyan i Lakongan aken, na da den a ba on di ontol."
SABOR 93
So Allah i Dato
Ndadato so Allah, ndiditar sekaniyan sa menang;

ndiditar so Allah sa menang na sesambitan pen sa bager.
So doniya na makambebeken piyapiya a di den kiiseg.
2 Makambebeken so korsi i ka ipoon ko miyanga oona a gawii;
kapapantagan ka den ipoon ko da a poonan iyan a masa.
3 Minigorong o manga ragat, ya Allah,

minigorong o manga ragat so kapendaleg iran;
minigorong o manga ragat so manga ala a begel iran.
4 Ogaid na mabager a di so daleg o madakel a ig,
ago mabager a di so manga ala a begel sa ragat,
na mabager so Allah roo sa poro.
5 Tanto a matatangked so manga taritib ka;

so kasosoti na aya domadait ko Timplo ngka, ya Allah, sa taman sa pakataman.
SABOR 94
So Tohan i Pepangokom ko Langon Taman
Ya Allah, a so Tohan a peseop,

hey Tohan a peseop, na peyag ka.
2 Mbowat ka, hey Pepangokom ko doniya;
badalen ka ko pepamangimporoan so patot kiran.
3 Ay katey a dii kakeriyala o manga rarata a taw;
ay katey niyan, ya Allah?
4 Di siran dii teyak sa katekabor;

dii mbantogan so langon a dii mbabaradosa.
5 Pesesaan iran so manga pagtaw ngka, ya Allah;
pepelolopiten iran so kawali ngka.
6 Pegimatain iran so manga balo ago manga mananangga,
na pembonoon iran so manga ilo.
7 Na di iran dii teroon a "Kena a ba ini pekeilay o Allah
aya pen o ba ini tatagoa sa ginawa o Tohan o Yakob."
8 Sabota niyo ai, sekano a manga boda ko manga taw;

sekano a manga lalong, anda i kapekaongangen iyo?
9 Ba so miyamola ko tangila na di pekaneg?
Ba so miteong ko mata na di pekailay?
10 So dii mbonget ko manga nasiyon na ba di pendadaneg?
So pepangendao ko manosiya na ba korang i katao?
11 Katawan den o Allah so manga pamikiran o manosiya;
katawan iyan a matag baden ai sengaw.
12 Rarakmatan so taw a pepakatanoren ka, ya Allah,
a ipepangendao ngka on so kitab ka
13 Kaan ka sekaniyan mapakadeke sii ko manga gawii a kamaregenan
taman sa makalot so galebo a keologan ko manga rarata a taw.
14 Ka di imbowang o Allah so manga pagtaw niyan
aya pen o ba niyan talikodi so kawali niyan.
15 So kapangokom na pembaloy peroman a maontol,
na so langon o manga titito i poso na pemangonot on.
16 Antawaa i magampil raken sa kasopaka ko ko manga rarata a taw?

Antawaa i pemayandeg raken sa kasopaka ko ko dii mbabaradosa?
17 Opama ka da ako katabangi o Allah
na magaan ako den ai makakaden ko darpa o karerenek o kapatay.
18 Isako teroon ko a "Pekidolas so ai aken,"
na so gagaw ngka, ya Allah, na minitokod raken.
19 Igira a tanto a miyakaawid a akal aken
na so kaperinawi ngka raken na aya ko ipekebabaya.
20 Ba ka mipageepeda o di ontol a manga pangongokom

a pepemakambaal sa kasasamok a dii makanggolalan ko manga kokoman?
21 Pepagopakatan iran sa marata so manga oontol
na peselaan iran sa kapatay so da a sala iyan.
22 Ogaid na so Allah i lindonga aken,
a so Tohan ko a aya ko lakongan a apasa aken.
23 Itena iyan kiran so manga dosa iran
na mbinasaan iyan siran sabap ko kamarataan iran;
so Allah a Tohan tano na polangen iyan siran.
SABOR 95
Idaida a Podi
Itano, ka pagidaidaan tano sa kapipiya a ginawa so Allah;

melalalis tano sa kapekebabaya ko Lakongan a pesebet rektano.
2 Mangadap tano rekaniyan a pepanalamat,
na pagidaidaan tano sekaniyan sa matanog
a sasartaan o dii kamboboniboniyan.
3 Ka so Allah na aya mala a Tohan,

ago so mala a Dato a maporo a di so langon a tohan.
4 Sii sa lima niyan so manga kadaleman ko doniya,
na rek iyan so manga lipompongan o manga palaw.
5 Rek iyan pen so kalodan, ka sekaniyan i mimbaal on,
na linimbag o lima niyan so kalopaan.
6 Itano roo, ka romoko tano sa kasimba;

somodiyod tano ko hadapan o Allah a miyaden rektano.
7 Ka sekaniyan i Tohan tano,
na manga taw tano a aya niyan talon,
a so manga bilibili a tatagikoren iyan.
O ba niyo bo pekinega imanto so sowara niyan!

8 Di niyo pekategasa so manga poso iyo a datar o manga apo iyo sii sa Miribah,
a datar o siyowa iran sangkoto a gawii sii sa Masah ko disirto
9 A ron ako iran tipengan ago tiyokawan
apiya pen kiyabantayan iran so miyanggolaola ko.
10 Sii ko soled o miyakapat polo ragon na kiyararangitan aken angkoto a manga taw;
pitero aken a "Siran so manga taw a pekedadag so manga poso iran,
na da iran den katokawi so manga okitokit aken."
11 Kagiya ka maoto na inisepa aken ko kiyararangiti raken
a "Di siran den pekasoled ko dedekean ko."
SABOR 96
So Tohan a Pipeporoan a Dato
Pagidaidai niyo so Allah sa bago a dikir;

pagidaidai niyo so Allah, hey dalem a doniya.
2 Pagidaidai niyo so Allah, na podiya niyo so Ingaran iyan;
gawii gawii den na pakalangkapa niyo so kapepanabet iyan.
3 Payaga niyo so bantogan iyan sii ko manga nasiyon
ago so manga piyakamemesa niyan sii ko langon a manga bangsa.
4 Ka mala so Allah a sayana a mapopodi;

patot a lebi a kipekeleken on a di so langon a tohan.
5 Ka so langon a katohanan o manga nasiyon na matag baden barahala,
ogaid na so Allah i miyakambaal ko manga langit.
6 Oonotan sekaniyan o menang ago pangkatan;
so bager ago kataid na sisii ko soti a darpa iyan.
7 Papalada niyo ko Allah, hey manga bangsa o manga taw,
papalada niyo ko Allah so bantogan ago bager.
8 Papalada niyo ko Allah so bantogan a kak o Ingaran iyan;
wit kano sa pamemegayan na soled kano ko manga lamalama niyan.
9 Simba kano ko Allah a ndiditar kano sa kasosoti;
tebeker kano ko hadapan iyan, hey dalem a doniya.
10 Teroa niyo sii ko manga nasiyon a "Ndadato so Allah."

Miyapakambeken so doniya a di den kiiseg;
kokomen iyan so manga taw sii ko katito.
11 Mabebaya so manga langit, makapiya a ginawa o doniya;
domaleg so ragat ago so langon a madadalem on;
12 Makakeriyala so manga pangomaan ago so langon taman on.
Samaoto na pemagidaida sa kakebebaya so langon a kayo sa kalasan;
13 Pemagidaida siran sii ko hadapan o Allah, ka pekaoma sekaniyan;
pekaoma sekaniyan sa kakokoma niyan ko doniya.
Kokomen iyan so doniya sii ko kaontol,
ago so manga taw sii ko katitito niyan a benar.
SABOR 97
So Tohan a Lebi a Mamaapaar a Dato
Ndadato so Allah; pakapiyaa ngka a ginawa ngka, hey doniya;

kabebaya kano langon a manga polo sa ragat.
2 Mililibet rekaniyan so manga gabon ago maliboteng;

so kaontol ago so katito na aya kaoonayan ko korsi iyan.
3 Manongonaan rekaniyan so apoy
a pepamanotong ko manga ridoay niyan ko mbalabala.
4 So manga kilakilat iyan na pepekalindaw ko doniya;
pekeilay ini o lopa na petebaden.
5 Pekelanag so manga palaw a datar o taro sii ko hadapan o Allah,
sii ko hadapan o Kadnan o dalem o doniya.
6 Pepakalangkapen o manga langit so kaontol iyan,
na pekeilay o langon o manga bangsa so bantogan iyan.
7 Makapekeya so langon a pepamanimba sa pimbobontalan a manga katohanan,

a so siran oto a ipetekabor iran so manga barahala iran.
Sodiyodi niyo so Allah, hey langon iyo a manga tohan!
8 Pekeneg a Siyon na mapipiya a ginawa niyan,

na mabebebaya so manga iito a inged sa Yodah
sabap ko manga kokoman ka, ya Allah.
9 Ka seka, ya Allah, i Lebi a Maporo ko dalem a doniya;
lebi ka a maporo a di so langon a tohan.
10 Sekano a pekebabaya ko Allah, na kagowaden iyo so marata,
ka pepagipaten iyan so kaoyagoyag o manga kaom iyan,
na pembokaan iyan siran ko lima o manga rarata.
11 So kaliwanag na pesindaw ko manga oontol
ago so kapipiya a ginawa sii ko manga titito i poso.
12 Kabebaya kano sii ko Allah, hey manga oontol,
na panalamati niyo sekaniyan ko kapeketademi niyo ko kasosoti niyan.
SABOR 98
So Allah i Pengokom ko Doniya
Pagidaidai niyo sa bago a dikir so Allah,

ka minggolaola sekaniyan sa manga piyakamemesa.
Ininggolalan o kawanan a lima niyan ago so soti a barokan iyan so kiyapakataban iyan.
2 Piyakitokawan den o Allah so kapepanabet iyan,
ago miyapayag iyan so kaontol iyan ko kapegilaya on o manga nasiyon.
3 Kiyatademan iyan so da a ikeda iyan a gagaw niyan
ago so kasasarigi rekaniyan sii ko manga mbawataan o Israil,
na miyailay o langon a taw ko pirowarowangan o doniya
so kapepanabet o Tohan tano.
4 Pelalalis kano sa kapekebabaya ko Allah, hey dalem o doniya;

pameseg kano sa matanog ago pagidaida kano sa manga podi
a sasartaan o dii kamboboniboniyan.
5 Pangotiyapii niyo so Allah,
pangotiyapii niyo, a rakes o oni a kapamagidaida,
6 A sasarenganen o manga kornita ago so oni a kapepamogiyong;
pelalalis kano sa kapekebabaya ko hadapan o Allah a so Dato.
7 Daleg ka, hey ragat ago so langon a madadalem reka,

giya doniya ago so langon a kibabaling on.
8 Ndadaopay kano a manga lawasaig,
pagidaida sa kapekebabaya, hey langon iyo a manga palaw;
9 Pagidaida kano sii ko hadapan o Allah
ka pekaoma sekaniyan sa kakokoma niyan ko doniya.
Kokomen iyan so doniya ko kaontol,
ago so manga taw sa da a kaperamiramig on.
SABOR 99
So Tohan a Lebi a Mamaapaar a Dato
Ndadato so Allah;
Tebeker kano a manga nasiyon.
Kokorsi sekaniyan ko kaporoan o piyagtaotaw a manga malaikat ko Kaban sa Kapasadan;
pelinog ka, hey doniya.
2 Mala so Allah sii sa Siyon;
mipapangkat sekaniyan a maporo ko langon a nasiyon.
3 Mapodi iran so kababantogan ago piyakalekelek a Ingaran iyan,
ka soti sekaniyan.
4 Hey mabager a Dato, pekebabayaan ka so kokoman,

miyapakambeken ka den so katitito;
ininggolalan ka so kokoman ago kaontol
sii ko manga mbawataan o Yakob.
5 Bantoga niyo so Allah a Tohan tano
ago simba kano sii ko dadapoan iyan;
soti sekaniyan.
6 So Mosa ago so Aron na ped ko manga imam iyan,
na so Samowil na ped ko miyamananalo ko Ingaran iyan;
miyananalo siran ko Allah na inampon iyan siran.
7 Sii ko mapopolaos a gabon na inimbitiyarai niyan siran,
na tiyoman iran so manga sogoan iyan ago manga taritib a inibegay niyan kiran.
8 Ya Allah a Tohan ami, na inampon ka so manga pagtaw ngka;

sii ka kiran a paririla a Tohan
apiya pen inidaneg ka kiran so manga dosa iran.
9 Bantoga niyo so Allah a Tohan tano

ago simba kano roo ko soti a palaw niyan,
ka soti so Allah a Tohan tano.
SABOR 100
So Kadikir sa Podi
Pelalalis kano sa kapekebabaya ko Allah, hey dalem a doniya.

2 Panalagadi niyo so Allah sa kapipiya a ginawa;
pangadap kano ron a pepamagidaida sa kapekebabaya.
3 Kilalaa niyo a so Allah i Tohan.
Sekaniyan i mimbaal rektano, na rek tano niyan;
sektano i manga pagtaw niyan, a so manga bilibili a tatagikoren iyan.
4 Soled kano ko manga gimowa iyan a rakes o kapepanalamat,

ago sii ko manga lamalama niyan a sarta o kapepemodi;
panalamati niyo sekaniyan ago podiya niyo so Ingaran iyan.
5 Ka mapiya so Allah; da a ikeda o gagaw niyan,
na matatatap so kasasarigi ron sii ko langon a kapepamagapidapid o masa.
SABOR 101
So Initopa o Dato
Ipegidaida aken so gagaw ago so katito;
seka, ya Allah, i pegidaidaan ko sa podi.
2 Pagiktiyaran ko o ba o ba aden a daway o sowasowai aken;
anda i kapekatalingoma ngka raken?
Maginetaw ako a maliwanag i poso sii ko soled o walay aken.

3 Da den a tegoon ko a marata ko danga o manga mata ko.
Ipekegowad aken so manga olaola o siran oto a petelikod ko Allah;

di raken den ai pekakapet.
4 So bibid a poso na pengimbelag raken;
da den a kamarataan a ba aken tegoa sa ginawa.
5 Apiya antawaa i pepamaganta ko siringan iyan sa masolen
na mbinasaan ko sekaniyan;
saden sa mipoporo so manga mata niyan ago dii tekabor so poso iyan
na di aken pesebaran.
6 Aya pagilain ko a limo sii ko inged na so kipaparatiyaya

kaan siran raken makakaden;
saden sa da a daway o sowasowai niyan
na aya raken makapenalagad.
7 Da den a pepagakal a ba pekakaden ko walay aken;

da den a pepamokeg a ba makatindeg ko kamamasaan aken.
8 Oman kapita na pembinasaan ko so langon a manga rarata ko inged

sa kapegosipa ko ko oman i dii mbaradosa sii ko siti o Allah.
SABOR 102
Pamakinega ngka so kapepangangarapan aken, ya Allah;
misampay reka so kapenggoraok aken sa tabang.
2 Di ngka raken pegmaa so paras ka igira a kareregenan ako.
Lekai ngka raken so tangila ngka;
ampona ko ngka nggagaan ko katelowi aken reka.
3 Ka dii senaw so manga gawii aken a lagid o bel,

na pepowaga so manga tolan aken a datar o sisii ko apoy.
4 Pesekit so poso aken ago pekelayon a lagid o otan
ka apiya so kakena ko ko pangenengken aken na pekelipatan ko.
5 Sabap ko matanog a di aken dii kapakaperego
na domedeket so kobal ko tolan aken.
6 Lagid ako o banog sii ko disirto,
ago lagid o bengit ko matatanaw a kaden.
7 Pegiga ako a di torogen;
miyabaloy ako a lagid o matatawantawan a kenti sii ko atep o walay.
8 Mababasa alongan a kapepagitowitoa raken o manga ridoay aken;

so pepemagongatongat raken na miyakowa iran a sinta so ngaran aken.
9 Ka aya peken aken a pangenengken na so ombi,
na pekisaog so manga lo aken ko peginomen aken
10 Sabap ko tanto reka a kapekerarangiti,
ka piyorot ako ngka ago inidebak.
11 So manga gawii aken na lagid o along ko perimon,
na pekelayon ako a lagid o otan.
12 Ogaid na seka, ya Allah, na matatatap sa taman sa pakataman,

ago so kababantogi reka sii ko langon o kapepamagapidapid o masa.
13 Magembowat ka ago ikepedi i ka a Siyon,
ka imanto i masa a kipengalimoon ka on;
miyakatalingoma den so miyatendo a masa.
14 Ka pekebabayaan o manga oripen ka so manga ator on;
apiya so bayanek on na ipekepedi iran.
15 Matamataan a ikelek o manga nasiyon so Ingaran o Allah,
na peselaselaan o langon a dato sa doniya so bantogan iyan
16 Amay ka mbangonen peroman o Allah a Siyon
ago gomemaw sekaniyan sii ko bantogan iyan.
17 Pegamponen iyan so kapepangangarapan o kikadodowaanan,
ka di niyan pesodiin so manga pangni iran.
18 Misorat ai ko pekasalono a manga taw

kaan makapodi ko Allah so da pen mimbabawata:
19 “Tomiyolong so Allah roo ko soti a darpa iyan sa poro;
roo sa kasorgaan na tiyobos iyan milay a doniya
20 Sa kapemamakinega niyan ko kapakapeperego o kikabibiyag
ago an iyan kabokai so siran oto a miyatendo a mbonoon."
21 Samaoto na peselaselaan so Ingaran o Allah sa Siyon
ago so podi niyan sii sa Yarosalim
22 Igira a dii makatetalabok so manga bangsa ago so manga ndatoan
sa kasimbaa iran ko Allah."
23 Sipok iyan so bager aken ko kangodai raken pen;

piyakababa iyan so omor aken.
24 Na pitero aken a "Hey Tohan ko, di ako ngka terimaa imanto a da pen kalooki so omor
aken,
hey seka a matatatap so manga ragon ka ko langon a kapepamagapidapid o masa."
25 Sii ko miyanga oona a gawii na miyabangon ka so manga onayan o doniya,

na so manga langit na pasad o manga lima ngka.
26 Penga ada siran, ogaid na tatap ka den;
palaya siran penga roronot a lagid o nditaren.
Datar o bangkala a sembian ka siran
na kipilak siran baden.
27 Ogaid na di ka den kealin,
na da den a kaposan o manga ragon ka.
28 So manga wata o manga oripen ka na pemakakaden ko kamamasaan ka,
na so penga babadan kiran na pakapetiknaan sii ko hadapan ka."
SABOR 103
So Gagaw o Allah
Podiya ngka so Allah, hey niyawa ko.

Hey, dalem a ginawa ko, podiya ngka so soti a Ingaran iyan.
2 Podiya ngka so Allah, hey niyawa ko,
na di ngka pelipati so langon a kamapiyaan iyan reka.
3 Iperila iyan so langon a dosa ko,

ago pembolongan iyan so langon a gedamen aken.
4 Pegaonen iyan so kaoyagoyag aken ko kobor
ago pesengkadan ako niyan sa gagaw ago kapedi.
5 Pepakaosogen iyan so kaoyagoyag aken sa manga pipiya a nganin
a aya kapepekaasal o kangoda ko a datar o agila.
6 Dii nggolalan o Allah so kaontol ago kokoman

para ko langon a kilolopiten.
7 Piyakitokawan iyan ko Mosa so manga takdir iyan,
na piyakiilay niyan ko manga taw sa Israil so manga galebek iyan.
8 Masalinggagaw ago makalimoon so Allah,
a kena a ba malebod kararangiti ago mala i kapedi.
9 Kena a ba sekaniyan lalayon dii mbonget
aya pen o ba niyan pakaangeda sa ginawa sa dayon sa dayon so oteg iyan.
10 Kena a ba niyan rektano ipetena so patot ko manga dosa tano
aya pen o ba niyan rektano badalen so makaaayon ko manga kamarataan tano.
11 Ka lagid sa kaporo a langit sii sa doniya
so kala o gagaw niyan ko siran oto a maaleken on;
12 Na so kawatan a sebangan sa sedepan
na aya den kawatan a kiyabelaga niyan rektano ko manga sala tano.
13 So kikakapediin o ama ko manga wata iyan
na aya mambo kipekepediin o Allah ko siran oto a maaleken on.
14 Ka katawan iyan o antonaa i pimbaalan rektano;
katatanodan iyan a matag tano baden bayanek.
15 Makapantag ko manosiya na so omor iyan na lagid o otan,

ka pepekalombay sekaniyan a datar o obarobar ko pangomaan,
16 Na amay ka samberen a ndo na keda bo ini,
na di den ketademan o darpa iyan.
17 Ogaid na ipoon sa poonan na taman den sa pakataman
so kipepangalinggagaon o Allah ko siran oto a maaleken on,
na tatap pen so kapagiinontolani niyan ko manga wata o manga wata iran
18 A so siran oto a petoman ko kapasadan iyan
ago tomatanod ko manga sogoan iyan sa kapeperatiyayaa iran on.
19 Piyakambeken o Allah so korsi iyan roo sa kasorgaan,

na so ndatoan iyan na aya mamaapaar ko kalangolangon.
20 Podiya niyo so Allah, hey manga malaikat iyan
a mangaala i gees a tomotoman ko ipesogo iyan
ago pepamaratiyaya ko manga katero iyan.
21 Podiya niyo so Allah, hey langon a manga kaaden iyan sa kasorgaan,
a so pepamanalagad on a dii nggolaola ko kabaya iyan.
22 Podiya niyo so Allah, hey langon a miyanga papasad iyan
sii ko pirowarowangan o ndatoan iyan.
SABOR 104
So Podi ko Miyangaden

Ya Allah a Tohan ko, tanto ka a kababantogan.
Ndiditar ka sa menang ago pangkatan;
2 Kokokosan ka a ginawa ngka sa tihaya a datar o gerab.
Kiyayat ka so manga langit a datar o sayap
3 Na inibetad ka ko manga ig on so manga dolog o manga rowang ka sa poro.
Pembalowin ka a karo ngka so manga gabon,
na pepegeda ka ko manga papak o ndo.
4 Pembalowin ka so manga ndo a manga talasogoay ngka,
ago so manga kadeg o apoy a aya reka pepemanalagad.
5 Biyangon ka so doniya ko manga kaoonayan on,

na di den kiiseg sa taman sa pakataman.
6 Inisapeng ka on so kalodan a lagid o nditaren,
na somiyangkap so manga ig ko poro o manga palaw.
7 Ogaid na sii ko kiyambonget ka na miyamalagoy so manga ig;
sii ko kiyaoni o dalendeg ka na miyamangawa siran nggagaan.
8 Miyamanoga siran ko liyawaw o manga palaw,
na miyamangondas sa baba ko manga balintad
roo ko darpa a singgayan ka kiran.
9 Mitad ka sa temanaan a di iran kelepas
kaan di den kapeperomani a kiyalapayi ran ko doniya.
10 Pepamakambowaten ka so manga bowalan,
na pepemanoga so ig ko manga baogan
ago pepemangondas ko pageleteletan o manga bobongan.
11 Pepekabegay ini sa panginginomen ko langon a binatang sa kalasan;
so manga iila a kimar na pepemolong siran on sa kawaw.
12 Dii sesalag so manga papanok ko marani ron a manga kayo;
di siran dii mamagoniyoniya sii ko manga sapak.
13 Poon ko manga rowang ka sa poro na pepakioranan ka so manga bobongan;

mipepeno ko doniya so onga o manga galebek ka.
14 Pepakatoon ka so manga otan a mapepenateb o manga pangangayamen,
ago so manga pamomolan a pekealimaan o manosiya
kaan siran makakowa sa pereperan ko lopa,
15 A so arak a ipekapiya o poso o taw,
so lana a ipekatenang o paras iyan,
ago paan a ipekabager o poso iyan.
16 So manga kayo o Allah na pepanga rarames piyapiya,

a so manga kayo a sidro sa Libanon a piyamola niyan.
17 Di on dii sesalag so manga papanok;
so talik na aden a walay niyan ko manga kayo a goo.
18 So manga poporo a palaw na aya kakadenan o manga saladeng,
na so manga ala a ator na aya apasa o manga taksing.
19 Inaden ka so olan a ipenanao ko manga mosim,

na katao den o alongan i kasedep iyan.
20 Ipetelingoma ngka so maliboteng, na pekegagawii
a mipegenebeneb o langon a binatang sa kalasan.
21 Pepemangengger so kangodaan a manga arimaw sii ko kapepanganopa iran ko
kesikem iran
a pepelolobaan iran so pangenengken a ipepegeper kiran o Allah.
22 Igira a pesebang so alongan na peliso siran komasoy
sa kapeleko iran ko manga lowak iran.
23 Samaoto na peliyo so taw sa kapenggalebek iyan
a matetembang sekaniyan on taman ko perimon.
24 Sayana a madakel a manga pasad ka, ya Allah.

Nggolalan ko ongangen na kiyambaalan ka ini langon;
mapepeno so doniya a manga kaaden ka.
25 Ndodon so ragat a mala ago maolad
a madadalem on so di den keitong a dii melalangoy,
a so manga baraniyawa a manga ala ago manga roroni.
26 Di on dii melayalayag so manga kapal,
na ndodon pen so Lebiyatan, a so mala a binatang
a linimbag ka a makapesola on.
27 Palaya ini reka somasana
sa kambegi ngka kiran sa makan iran sii ko matetendo a manga wakto.
28 Ipembegay ngka kiran na peken iran;
pembekaren ka so lima ngka
na pepanga oosog siran sa manga pipiya a nganin.
29 Igira a pepagemaan ka so paras ka na pepanga sososa siran;
igira a pepangowaan ka siran sa napas
na pepematay siran ago pepemakasonod ko bayanek a kiyapoonan iran.
30 Na igira a pepakalayagen ka so Roh ka na pepanga aaden siran,
na pembagon ka so matatago ko liyawaw o kalopaan.
31 Matatap so bantogan o Allah sa dayon sa dayon;

mabebaya so Allah ko manga pasad iyan.
32 Petobosen iyan a doniya na petebaden ai;
pesekoon iyan so manga palaw na petegebel siran.
33 Pegidaidaan ko so Allah ko tenday a omor aken.

Ndidaon aken a manga podi so Tohan aken taman ko kaooyaoyag aken pen.
34 Masoat sekaniyan sangkai a manga pamikiran aken,
ka ipekebabaya aken so Allah.
35 Maosip so manga baradosa ko doniya,
ago mada den so manga rarata a taw.
36 Podiya ngka so Allah, hey niyawa ko.

Podin so Allah.
SABOR 105
So Tohan ago so manga Pagtaw niyan
Panalamati niyo so Allah, na talowi niyo so Ingaran iyan;

pakitokawi niyo ko manga nasiyon so miyanggolaola niyan.
2 Pagidaidai niyo sekaniyan, didawa niyo a podi;
bantaani niyo so langon a piyakamemesa niyan.
3 Selaselaa niyo so soti a Ingaran iyan;
makapiya a ginawa o siran oto a dii mbabanog ko Allah.
4 Panagontamani niyo so Allah ago so bager iyan;
mbabanoga niyo lalayon so paras iyan.
5 Tatademi niyo so piyakamemesa a manga galebek iyan,
so manga kabarakat iyan ago manga kokoman a miyatero iyan,
6 Hey sekano a miyapamili iyan a manga mbawataan o Yakob
a so kiyababadan ko Ibrahim a oripen iyan.
7 Sekaniyan so Allah a Tohan tano;

lomalangkap ko doniya so manga kokoman iyan.
8 Tatanodan iyan so kapasadan iyan sa taman sa pakataman,
a so manga katero a inisogo iyan ko sanggibo a manga apid;
9 A so kapasadan a inembaalan iyan mipantag ko Ibrahim,
ago inisepa iyan pen ko Iskak.
10 Pimataanan iyan ai mambo ko Yakob a aya den kitab,
a so da a ikeda iyan a kapasadan ko Israil
11 A tig iyan a "Imbegay aken reka so inged a Kanaan
a aya ngka bagian a makewali ngka."
12 Samaoto na kena a ba siran madakel;

mataan a maito siran i bilangan, na go mananangga siran roo.
13 Miyagenebeneb siran a di iran dii pakatetepasaan so manga nasiyon,
a poon ko isa a ndatoan na taman ko salakaw a ndatoan.
14 Ogaid na da den a sakataw bo a ba on piperowi o Tohan a makalopit kiran,
na pimbongetan iyan so manga dato sabap kiran,
15 A tig iyan a "Di niyo petekora so miyapamili aken a manga taw;
di niyo pemaratai so manga nabi aken."
16 Piyakitanaan iyan sa taon ko inged iran,

na bininasa niyan so langon a pereperan a ipekeoyag iran.
17 Ogaid na piyakaona niyan kiran so sakataw a mama,
a so Yosop a pipesa a oripen.
18 Tigel iran romantay so manga ai niyan,
na tiyagoan sa potaw a lig iyan;
19 Na taman ko kiyatoman o miyaalamat iyan
na tipengan sekaniyan o ba benar so miyatero o Allah.
20 Piyakisogoan sekaniyan o Solotan sa Misir na biyokaan iyan;
so ndadato ko manga taw na piyakaliyo niyan sekaniyan.
21 Piyakitendingan iyan ko Yosop so walay niyan,
na piyakindatoan iyan on so langon a kaaden iyan
22 Kaan iyan mipaar so manga sanasanaan o solotan ko kabaya iyan,
ago an iyan mipengendao so kaongangen ko manga pelokelokesen kiran.
23 Samaoto na miyakasong so Yakob sa Misir,

na komiyaden roo a mananangga ko inged a Ham.
24 Na tanto a biyabad o Allah so manga pagtaw niyan;
piyakandakel iyan siran ago biyaloy niyan a mabager a di so manga ridoay iran.
25 Kilid iyan so poso o manga Imisiren sa kikagowaden iran ko manga pagtaw niyan
ago giya kapegopakati ran sa marata ko manga oripen iyan.
26 Mandiyadi na siyogo o Allah so oripen iyan a so Mosa
ago so Aron a pinili iyan.
27 Piyakiilay iran ko manga Imisiren so manga nanao o Allah,
a so manga kabarakat iyan sii sa inged a Ham.
28 Tiyalingomaan ai o Tohan sa maliboteng
na piyakalibotengan iyan so inged,
ka ba iran da masopak so manga katero iyan?
29 Biyaloy niyan a rogo so manga ig iran
a inipamatay o manga seda on.
30 Miyapeno a babak so kalopaan iran
taman ko manga rowang o manga olowan iran.
31 Mitero so Tohan, na miyakatalingoma so makapal a manga rengit
ago manga tendek ko pirowarowangan o lopa iran.
32 Biyaloy niyan a manga giyaw so oran iran
a rakes o kilakilat a pepemangitras ko inged iran;
33 Piyaminasa niyan so manga waged iran a obas ago manga kayo a higos
ago piyanarisa iyan langon so manga kayo ko lopa iran.
34 Mitero sekaniyan, na miyakatalingoma so manga tarapan,
a so bariboribo a manga roroni a tarapan,
35 Na piyangangan iran so oman i pamomolan ko inged;
piyangangan iran so langon a pereperan ko lopa iran.
36 Na piyamono iyan pen so oman i kaka a wata a mama ko inged iran,
a so paganay a onga o langon a bager iran.
37 Oriyan iyan na piyakaliyo niyan so manga Israil a makaaawid sa pirak ago bolawan,
na da den a sakataw bo ko manga mbatabataa kiran a ba pepekalobay.
38 Miyabebaya so manga Imisiren ko kiyaawa o manga Israil
ka miyaraot siran den a kalek kiran.
39 Miyaden so Tohan sa gabon a mirending kiran,
ago apoy a pepekalindaw kiran ko kagagawii.
40 Miyangni siran na tiyalingomaan iyan sa manga pogowa
ago piyakaosog iyan siran ko roti a poon sa kasorgaan.
41 Tiyokaban iyan so lakongan na mimbowat on so ig,
na datar o lawasaig a kiyatoga iyan sii ko disirto.
42 Ka kiyatademan iyan so soti a initopa niyan
sii ko Ibrahim a oripen iyan.
43 Piyakaliyo niyan so manga pagtaw niyan a kikapipiya a ginawa iran,

a so piyamili iyan a manga taw a dii melalalis sa kapekebabaya iran.
44 Inibegay niyan kiran so manga lopa o ped a manga nasiyon,
na miyatangan iran so kiyanggagalebekan o salakaw a manga taw
45 Kaan matoman o manga pagtaw niyan so manga taritib iyan
ago maparatiyaya iran so manga kitab iyan.
Podiya niyo so Allah.
SABOR 106
So Kapiya o Allah ko manga Pagtaw niyan

Panalamati niyo so Allah, ka mapiya sekaniyan;
2 Antawaa i makapetero ko manga ala i gees a galebek o Allah
aya pen o ba niyan mapayag so langon a ipepodi ron?
3 Rarakmatan so siran oto a mananamar sa matito a kokoman
a lalayon siran magiinontolan.
4 Tatademi ako ngka, ya Allah, amay ka ikelimo o ka so manga pagtaw ngka;

tabangi ako ngka amay ka sebeten ka siran
5 Kaan aken mailay so kapiya i bobolos o siran oto a piyamili i ka,
kaan ako makambagian ko kapekapiya a ginawa o nasiyon ka
ago an ako makapangeped ko kapepamodi o kawali ngka.
6 Miyakandosa kami a datar o manga apo ami;
miyakasilay kami ago miyamakanggolaola sa kamarataan.
7 Isako ndodoo so manga apo ami sa Misir
na da iran tagoa sa ginawa so manga piyakamemesa ngka roo;
da iran tademi so madakel a kinipangalinggagaon ka kiran
ka ba siran den somiyopak roo ko kilid o Mariga a Ragat.
8 Apiya pen oto na siyabet iyan siran sabap ko Ingaran iyan

kaan iyan kapakitokawi so kala iyan i kapaar.
9 Siyaparan iyan so Mariga a Ragat na kiyamaraan,
na go inagak iyan siran romipag ko kalodan a datar bo o sii pegokit ko disirto.
10 Siyabet iyan siran ko lima o siran oto a pekegowad kiran;
inaon iyan siran ko kapaar o manga ridoay iran.
11 Minikolob so ig ko manga ridoay iran;
da den a sakataw bo a ba kiran miyasama.
12 Mandiyadi na piyaratiyaya iran so manga katero iyan,
na inidikir iran so manga podi niyan.
13 Ogaid na da bo matey a kiyalipati ran ko pinggolaola niyan,

na da iran nayawa so toma niyan,
14 Ka tanto siran a miyakala i napso sii ko disirto,
na tipengan iran so Tohan roo ko mitataog a kaden.
15 Kagiya ka maoto na inibegay niyan kiran so piyangni iran,
ogaid na tiyanaan iyan siran sa piyakalekelek a paniyakit.
16 Sii ko kampo iran na riniit iran so Mosa

ago so Aron a masosoti ko Allah.
17 Na mingganga so lopa na liyamed iyan si Datan
ago kiyatambonan on so pamiliya i Abiram.
18 Na sominila so apoy ko kitatampil kiran,
na riyarab o kadeg angkoto a manga rarata a taw.
19 Roo sa Horeb na mimbaal siran sa inisayan sa nati a sapi

na sinimba iran angkoto a barahala a tiyowang.
20 Pisembi iran so kababantogan a Tohan iran
ko inisayan sa sapi a pepanateb sa otan.
21 Piyakalipatan iran so Allah a somiyabet kiran
ko kiyanggolaola niyan sa manga kabarakat roo sa Misir,
22 A so manga piyakamemesa roo ko inged a Ham
ago so piyamakalekelek a nganin sii ko Mariga a Ragat.
23 Sabap roo na pitero iyan a mbinasaan iyan so manga pagtaw niyan,
ogaid na tominindeg so Mosa a pinili iyan sii ko pageletan o Allah ago so manga pagtaw
niyan
a nggenggen sekaniyan ko gani niyan kaan iran di ikebinasa.
24 Oriyan oto na pisodi iran so mapiya a inged,

ka da iran paratiyayaa so initopa niyan.
25 Miyanarotaro siran baden ko soled o manga barombarong iran,
na da iran pakinega so sowara o Allah.
26 Kagiya ka maoto na inisepa iyan kiran
a pakapepetapatain iyan siran roo ko disirto
27 Ago iperak iyan pen so kebabadan kiran sii ko manga inged
a pakapepetapatain iyan siran sii ko salakaw a manga nasiyon.
28 Roo sa Piyor na miyangeped siran somimba ko barahala a Baal

ago komiyan siran ko miyamangisapaat ko da a niyawa niyan a manga katohanan.
29 Piyakaperangit iran ko Allah ko manga pinggolaola iran,
na kiyatanaan siran a piyakalekelek a paniyakit.
30 Ogaid na tominindeg si Pinihas na ininggolalan iyan so kokoman,
na miyaren so paniyakit.
31 Na minibilang rekaniyan ai a kaontol iyan
ko langon a masa sa taman sa pakataman.
32 Piyakaperangit iran peman so Allah sii ko manga bowalan sa Miribah,

na kiyabinasaan so Mosa sabap kiran,
33 Ka piyakapagoteg iran so pamikiran iyan,
na inolopan sekaniyan tero sa di patot.
34 Da iran paminasaa so manga taw ko kinisogoon on kiran o Allah

35 Ka ba siran baden miyakipelook ko manga nasiyon
ago siyowa iran so manga olaola iran.
36 Sinimba iran so manga barahala iran a aya kiran minilitag.
37 Piyangorban iran so manga wata iran a manga mama ago manga babay sii ko manga
saitan.
38 Piyakatoga iran so rogo o da a manga peleng iyan,
a so rogo o manga wata iran a mama ago babay
a inikorban iran ko manga barahala roo sa Kanaan;
na kiyaresikan sa rogo angkoto a lopa.
39 Piseboan iran a ginawa iran a nggolalan ko manga galebek iran,
na miyakasakoto siran sii ko miyanggolaola iran.
40 Sabap roo na somiyokeyaw so rarangit o Allah ko manga pagtaw niyan,

na inikasisingay niyan so kawali niyan.
41 Piyalad iyan siran ko lima o manga nasiyon,
na kiyandatoan siran o manga taw a pekegowad kiran.
42 Piyangarasiyan siran o manga ridoay iran
ago miyapadalem siran pen ko kapaar iran.
43 Madakel den a kiyabokai o Allah ko manga pagtaw niyan,
ogaid na sii siran kakal ko kasopak,
na miyapepad siran baden sabap ko di iran dii kambaradosa.
44 Apiya pen oto na pekeinengka o Allah so kapekerasay iran

igira a pekeneg iyan so kapenggoraok iran.
45 Sabap kiran na tiyademan iyan so kapasadan iyan,
na lomiyoke sekaniyan sabap ko kala iyan i gagaw;
46 Na piyakikapedi iyan siran ko langon a miyamakabiyag kiran.
47 Sabeta kami ngka, ya Allah a Tohan ami,

na panimoa kami ngka poon ko manga nasiyon
kaan ami kapanalamati so soti a Ingaran ka
ago mabantog ami so manga ipepodi reka.
48 Mapopodi so Allah a so Tohan o Israil

ipoon sa pagampaganay na taman sa pakataman.
Matero o langon o manga taw a "Amin."
IKALIMA BAGI
107-150
SABOR 107
So Podi ko Kapiya o Tohan

2 Matero ini o siran oto a miyanga aaon o Allah
a miyanga aaon iyan ko kapaar o ridoay,
3 A piyanimo iyan a poon ko salakaw a manga inged,
a poon sa sebangan ago sa sedepan,
ago poon sa pagotaraan ago sa pagabagatan.
4 So ped kiran na miyanga tataap ko matatanaw a disirto

a da den a ketoon iran on a lalan a kisong ko siti a kebalingan iran.
5 Miyaor siran ago miyawaw, na pekikopay so niyawa iran.
6 Samaoto na gomiyoraok siran ko Allah ko kareregeni kiran,
na piyokas iyan siran ko karomasayan iran.
7 Inagak iyan siran ko mapantek a lalan
taman sa minisampay siran ko siti a kebalingan iran.
8 Makapanalamat siran ko Allah ko da a ikeda iyan a gagaw niyan
ago so manga piyakamemesa a pinggolaola niyan ko manosiya.
9 Ka pembolongan iyan so kawaw o pekewaw
ago pepakaosogen iyan so pekeor ko manga pipiya a nganin.
10 So manga ped na kioontod ko maliboteng ago sii ko along o kapatay

a kikakalaboson ago pepanga rarasay ko manga rantay,
11 Sabap sa miyasopak iran so manga katero o Tohan
ago miyasodi iran so toma o Lebi a Maporo.
12 Kagiya ka maoto na piyakipangalimbabaan iyan so ginawa iran ko pakadokaw a
galebek;
miyamangirepang siran na da den a ba kiran pekaogop.
13 Samaoto na gomiyoraok siran ko Allah ko kareregeni kiran
na siyabet iyan siran ko karomasayan iran.
14 Piyakaliyo niyan siran ko maliboteng ago so along o kapatay
na piseredot iyan so manga rantay iran.
16 Ka penggegebaan iyan so manga pintoan a tombaga
ago pepamotolen iyan so manga galid a potaw.
17 Aden a ped a miyanga lalalong ko manga olaola iran a makasosopak,

na miyanga rarasay siran sabap ko manga dosa iran.
18 Miyagowad siran ko oman i pisosonan a pangenengken,
na miyakadaseg siran den ko gimowa o kapatay.
19 Samaoto na gomiyoraok siran ko Allah ko kareregeni kiran
na siyabet iyan siran ko karomasayan iran.
20 Initoron iyan so katero iyan na biyolongan iyan siran,
na inilidas iyan siran ko kobor.
22 Makapalad siran on sa manga soasoat a panalamat
ago mapamanotol iran so manga galebek iyan a rakes o idaida a kapekebabaya.
23 So peman so manga ped na milayalayag ko kalodan a kipageeda sa manga kapal

a di siran dii ndadagang sii ko manga ala a ragat.
24 Miyailay iran so manga galebek o Allah
ago so manga piyakamemesa niyan roo ko kalodan.
25 Ka mitero sekaniyan na miyapakasamber iyan so sobosobo
a inipamakala o manga bagel.
26 Pekibayaw siran ko langit, ago pekibaba siran sa didalem;
na miyateno so inam iran sii ko piyakalekelek a miyaolaola iran.
27 Pekisasawiring siran ago pekeotengoteng a datar o kikabebereg,
na kiyadaan sa gona so langon a kapasang iran.
28 Mandiyadi na gomiyoraok siran ko Allah ko kareregeni kiran,
na piyakaliyo niyan siran ko karomasayan iran.
29 Piyakatareg iyan so sobosobo,
na lomingen so manga bagel.
30 Na miyabebaya siran kagiya makalintad,
na inowit iyan siran ko misosogod a kebayaan iran domongko.
32 Mabantog iran sekaniyan sii ko kalilimodan ko madakel a taw
ago mapodi iran ko dii timotimoan o manga pelokelokesen.
33 Pembalowin iyan so manga lawasaig a disirto,

ago so manga bowalan a mamara a lopa;
34 So oodaren a lopa na pembalowin iyan a matimos a da a bali niyan
sabap ko kamarataan o kibabaling on.
35 Pembalowin iyan so disirto a babasaken,
ago so mamara a lopa a manga bowalan,
36 Na roo niyan pepakabalinga so kikaaaor
kaan iran kabangoni sa siti a kapegingedan iran.
37 Peseod siran ko dii mbabasokan
ago pepamolaan iran sa manga sapadan,
na mala a pekeragon iran on.
38 Rarakmatan iyan siran na tanto siran a pepekadakel,
na di niyan peperon o ba kekes so manga pangangayamen iran.
39 Igira a pekekekesan so kadakel o manga pagtaw o Tohan

ago di siran dii mangalimbabaaan a nggolalan ko kapelolopit, kapemorala ago kararasay
40 Na pepegitowitoon iyan so manga dato,
ago di niyan siran dii pakateataapen ko da den a lalan on a mitataog a kaden.
41 Ogaid na ipenggakap iyan so kikadodowaanan a poon ko karomasayan iran
na pepakadakelen iyan so manga pamiliya iran a lagid o manga talon.
42 Pekeilay ini o manga titito ago pekebabaya siran,
ogaid na pepekakemed so langon o madodosa a taw.
43 Apiya antawaa i maongangen na tagoa niyan sa ginawa angkai a manga nganin

ago sabota niyan so da a ikeda iyan a gagaw o Allah.
SABOR 108
Pangni sa Kapakalidas ko Ridoay
Tetana so poso aken, hey Tohan ko.

Pegidaida ako ago pemboboniboniyan sa iklas ko ginawa ko.
2 Pagnaw kano, hey kotiyapi ago alpa;
pokaon ko so sobo.
3 Penalamatan ko seka, ya Allah, sii ko madakel a taw;
ndidaon ko seka a podi sii ko manga nasiyon.
4 Ka makaoombaw ko manga langit so mala a gagaw ngka;
na go somosoko ko manga gabon so kasasarigi reka.
5 Pakiilain ka, hey Tohan ko, so pangkatan ka a maporo a di so manga langit,
lomangkap so bantogan ka ko dalem a doniya.
6 Sabeten ka rekami so kawanan a lima ngka;
ampona ngka so pangni aken kaan kapanabangi so siran oto a pekebabayaan ka.
7 Mitero so Tohan sii ko soti a darpa iyan:

"Sii ko kakebabaya aken na pembaabaaden ko a Sikim
ago pembagibagiin aken a Balintad a Sokot.
8 Rek aken a Giliyad ago giya pen a Manasih.
Giya Ipraim i linding o olo aken;
giya Yodah na aya ko lilit a ipendato.
9 Giya Mowab na aya ko pepangonaban;
ipagitog aken sa Idomiya so tinilas aken,
na sii sa Pilistiya na ipelalis aken on so kiyapakataban."
10 Antawaa i magowit raken roo ko kokotaan a siti?

Antawaa i ndolog raken taman sa Idomiya?
11 Ba kena a seka, hey Tohan, a miyowang rekami
ago di den magonot ko manga sondaro ami?
12 Ogopi kami ngka ko manga ridoay ami
ka da a bali o tabang o manosiya.
13 Nggolalan ko Tohan na pekataban tano,
ka sekaniyan i melomeg ko manga ridoay tano.
SABOR 109
So Inipenon o Mama a Kareregenan
Hey Tohan ko a pepodin aken, di ka baden rerenek.

2 Ka so manga rarata ago pepamagakal a manga taw
na piyakangganga iran raken a manga ngari iran;
inisopak iran raken tero so pepamokeg a dila iran.
3 Ililikop iran raken so manga katero iran a kagowad,
na pepemabaan ako iran sa da a sabap iyan.
4 Di ako iran dii sebapan apiya pen pekebabayaan ko siran
ogaid na ipepangangarapan aken siran baden.
5 Pembadalan ako iran sa marata ko mapiya,
na kagowad a ipembadal iran ko gagaw aken.
6 Toro ka sa marata a pekakokom ko ridoay aken,
na pakatindegi ngka sa pekadimanda on so kawanan a lima niyan.
7 Amay ka kokomen sekaniyan na pakisalaan ka;
apiya so kapepangangampedian iyan na mibilang a kasalaan.
8 Makababa so omor iyan;
na makowa o salakaw a mama so sangan iyan.
9 Mailo so manga wata iyan,
ago mabalo so karoma niyan.
10 Makapagenebeneb mamangni so manga wata iyan;
mabogaw siran ko miyanga bibinasa a kakadenan iran.
11 Makowa o dii totobo so langon taman iyan,
na mateban o manga mananangga so pekepantiyari niyan.
12 Da den a isa bo a makapangalinggagaw ron
aya pen o ba aden a mangalimo ko miyanga iilo a manga wata iyan.
13 Matipod so kebabadan rekaniyan,
na mapeneng so manga ngaran iran ko pekatalondog a manga taw.
14 Katademan o Allah so kamarataan o manga apo iyan,
ago di den mapeneng so dosa o ina iyan.
15 Matatap a kapekemasai o Allah ko manga dosa iran
kaan iyan matipod so kapetedemi sangkoto a manga taw ko doniya.
16 Da den pamikira angkanan a mama so kapekiilain iyan ko limo,

ka ba niyan den piyanatro so miskin a taw,
so kadodowaanan ago so maroropet i poso sa kambonoa niyan on.
17 Miyabebaya sekaniyan mamaninta;
mapato ini rekaniyan.
Da den mabebaya megay sa kamapiyaan;
makawatan rekaniyan so kamapiyaan.
18 Somiyolot sekaniyan sa sinta a lagid o ba aya niyan den nditaren;
somenep ko pito lapis a bago niyan so manga sinta iyan a datar o ig,
taman ko manga tolan iyan a datar o lana.
19 Madatar ini o gerab a manditar iyan
ago lagid o sambitan a lalayon mililibed rekaniyan.
20 Pengnin ko a giyanan den i ibalas o Allah ko siran oto a pesebap raken
a di ako iran dii mbabasaan sa marata.
21 Ogaid na seka, ya Allah a Kadnan ko,

na piyapiyai ako ngka sabap ko Ingaran ka;
sabap ko kapiya o gagaw ngka na panabangi ako ngka.
22 Ka miskin ako ago kadodowaanan,
na kiyapalian pen so poso aken.
23 Somasagad ako a lagid o along ko perimon;
miyapopog ako a datar o tarapan.
24 Kiyadaan den sa bager so manga leb aken sabap ko kiyapowasa;
piyagti ago riyakowag so lawas aken.
25 Di ako dii kela o manga taw;
igira a pekeilay ako iran na pepengelengkeleng siran baden.
26 Tabangi ako ngka, ya Allah a Tohan ko.

Sabeta ko ngka sabap ko da a ikepos iyan a gagaw ngka.
27 Na pakitokawi ngka ko manga ridoay aken a giyai na kapaar ka,
a seka den, ya Allah, i minggolaola sii.
28 Apiya o sinta siran na rakmat ka baden.
Pengnin ko a amay ka nggobat siran na makakeya siran
ogaid na mabebaya ako a oripen ka.
29 Kanditaran sa kadiyamanan so pepamanabap raken
ago kakokosan siran sa kayaan iran a datar o aya iran den gerab.
30 Tanto aken a ipenalamat ko Allah so ngari aken;

podin ko sekaniyan sii ko look o madakel a taw.
31 Ka petindeg sekaniyan ko kawanan o miskin
sa kasebeta niyan on ko siran oto a pesela on sa kapatay.
SABOR 110
So Tohan ago so Pinili iyan a Dato
Pitero o Allah ko Kadnan aken a

"Ontod ka sii sa kawanan aken
taman sa mabaloy aken so manga ridoay ngka a dapoay o manga ai ngka."
2 Pekaoladen o Allah a ipoon sa Siyon so mala i gees a kadadatoi reka;

"Ndato ka," a tig iyan, "ko look o manga ridoay ngka."
3 Iklas a kapelada reka o manga pagtaw ngka ko ginawa iran
sii ko gawii a kapegolowani ngka ko manga sondaro ngka
a pepandaraan siran sa kasosoti.
Lagid o namog ko teked a kapipita
na pemanong reka so manga ngongoda ngka.
4 Miyakasepa so Allah, na di niyan den mberobaan:

"Seka i imam sa taman sa pakataman
a datar sa kaiimami ko Milkisidik."
5 So Kadnan na sisii ko kawanan ka;

sesaan iyan so manga dato ko gawii a kakerarangiti ron.
6 Pagokasan iyan sa kokoman so manga nasiyon,
ka penoon iyan siran a manga bangkay
ago sesaan iyan so manga olowan ko dalem a doniya.
7 Maginom sekaniyan ko tataya ko kilid a lalan;
sabap san na ipelangag iyan so olo niyan.
SABOR 111
So Podi ko Allah
Penalamatan ko so Allah ko dalem o poso aken

sii ko kalilimod o manga titito a manga pagtaw niyan.
2 Mala so manga pasad o Allah;

di ini dii pendapatan o langon a mabebabaya sii.
3 Kababantogan ago mipapangkat so manga galebek iyan,
na tatap so kaontol iyan sa dayon sa dayon.
4 Pepakitademan iyan so manga piyakamemesa niyan;
makalimoon ago masalinggagaw so Allah.
5 Petiyagaran iyan sa pangenengken so siran oto a maaleken on;
lalayon iyan tatanodan so kapasadan iyan.
6 Piyakiilay niyan ko manga pagtaw niyan so kapaar o manga galebek iyan
ko kinibegan iyan kiran ko manga lopa o salakaw a manga nasiyon.
7 Kasasarigan sekaniyan ago magiinontolan ko langon a di niyan dii nggolaolaan;

palaya den totomangked so manga sogoan iyan.
8 Tomitikna ini sa taman sa pakataman
a minipamegay a nggolalan ko tito a benar ago katito.
9 Pitiyagar iyan so kapagaona ko manga pagtaw niyan;
inembaalan iyan so kapasadan iyan a di den kebaroba sa taman sa pakataman;
soti ago piyakalekelek so Ingaran iyan.
10 So kikaleken ko Allah na aya pekepoonan o kaongangen;

mala i sabot so langon a petoman ko manga sogoan iyan.
Rek iyan so da a kaposan iyan a podi.
SABOR 112
So Kapipiya a Ginawa o Mapiya a Taw
Rarakmatan so taw a maaleken ko Allah,

a tanto niyan a ipekebabaya so manga sogoan iyan.
2 Penga babaloy a mala i gees so manga wata iyan sa doniya;
perakamatan so pekebabadan ko matito a taw.
3 So mala a tamok ago kakawasaan na ketago ko walay niyan,
na ketatap so kaontol iyan sa dayon sa dayon.
4 Apiya so maliboteng na pekaliwanagen para ko matito a taw,

a makalimoon, masalinggagaw ago maontol.
5 Pepekapiya so taw a maginawa ago pepamagotang,
a pepatiis ko di niyan dii kapaningkawiyagen.
6 Matamataan a di sekaniyan den keoteng;
ketademan so mapiya a taw sa taman sa pakataman.
7 Da den a ikelek iyan a marata a totol;
tetana so poso iyan a somasarig ko Allah.
8 Tomitikna so poso iyan, na di sekaniyan den kelek;
matamataan a kemasaan iyan so katebana ko manga ridoay niyan.
9 Iklas so kapepemegay niyan ko manga miskin;
ketatap so kaontol iyan sa taman sa pakataman;
kipangkat so gees iyan ago kebantogan.
10 Keilay ini o marata a taw na pagotegan;

pakapekikitebaan iyan a manga ngipen iyan
ago keonaos den so niyawa niyan;
so masisingayo o manga rarata na di den kitoman.
SABOR 113
Podi ko Kapiya o Tohan
Podi kano, hey manga oripen o Allah,

podiya niyo so Ingaran o Allah.
2 Mapodi so Ingaran o Allah
imanto ago taman sa pakataman.
3 Ipoon ko pesebangan o alongan taman den ko pesedepan iyan
na mapodi ron so Ingaran o Allah.
4 Mipapangkat so Allah ko poro o langon o manga nasiyon,
na go makaoombaw so bantogan iyan ko manga langit.
5 Antawaa i lagid o Allah a Tohan tano

a apiya pen kokorsi sa poro
6 Na pepangalimbabaan sekaniyan sa kapegilaya niyan ko manga langit ago so doniya?
7 Ipenggakap iyan so manga lolobay a poon ko bayanek
ago pekowaan iyan so manga miskin ko manga ombi,
8 Ka pepakaontoden iyan siran a ped o manga dato,
a so manga dato o manga pagtaw niyan.
9 Pepakakadenen iyan so balek a babay sa walay,
ka mbalowin iyan a mabebebaya a ina o manga wata.
SABOR 114
Dikir ko Kiyapakaliyo sa Misir
Isako makaliyo so manga Israil sa Misir
ko kiyaawai o manga mbawataan o Yakob ko salakaw i basa a manga taw
2 Na giya Yodah na miyabaloy a soti a kakadenan o Tohan,
ago giya Israil na aya niyan ndadatoan.
3 Miyakainengka so Mariga a ragat na miyalagoy,
ago mipeto so lawasaig a Yordan.
4 Miyamanepak so manga palaw a lagid o manga kambing
ago so pen so manga bobongan a lagid o manga nati a kambing.
5 Antonaa i miyanggolaola a inipalagoy ngka, hey ragat,

ago inipeto o ka, hey Yordan?
6 Hey manga palaw, ino kano pemanepak a lagid o manga kambing,
ago sekano pen a manga bobongan a lagid o manga nati ran?
7 Tebeker ka, hey doniya, ko kamamasaan o Kadnan,

sii ko kamamasaan o Tohan o Yakob
8 A biyaloy niyan a linaw so lakongan;
so batolakit na biyaloy niyan a bowalan a pegembowat on so ig.
SABOR 115
So Isaisa a Tito a Tohan
Kena a ba sekami, ya Allah, kena a ba sekami,

ka so Ingaran ka i kabantogan
sabap ko gagaw ngka ago so kasasarigi reka.
2 Ino rektano pekiise o manga nasiyon a

"Anda so Tohan iyo?"
3 So Tohan tano na ndodoo sa kasorgaan;
di niyan dii nggolaolaan so apiya antonaa i ikesoat iyan.
4 Ogaid na so manga katohanan iran na manga barahala a pirak ago bolawan
a pasad o manga lima o manosiya.
5 Aden a ngari iran, ogaid na di makapetero;
aden a manga mata iran, ogaid na di pemakailay.
6 Aden a manga tangila iran, ogaid na di pemakaneg;
aden a ngirong iran, ogaid na di pekabaw.
7 Aden a manga lima iran, ogaid na di pemakagedam;
aden a manga ai ran, ogaid na di pemakalalakaw,
aya pen o ba iran miyoni so manga bakereng iran.
8 Kedatar iran so pepamangembaal kiran,
ago so pen so oman i isa a somasarig kiran.
9 Hey manga Israil, sarigi niyo so Allah;

sekaniyan i petebang rekano ago so kelong iyo.
10 Hey manga mbawataan o Aron, sarigi niyo so Allah;
11 Sekano a kikaaalek ko Allah, sarigi niyo so Allah;
12 Tatademan tano o Allah ago perakmatan tano niyan;

perakmatan iyan so manga mbawataan o Israil;
perakmatan iyan so manga mbawataan o Aron,
13 Na perakmatan iyan so langon a kikaaalek ko Allah
ndatadatar on so manga ala ago so manga iito.
14 Kapagomanomanan o Allah so kamapiyaan iyo,

sekano langon ago so manga wata iyo.
15 Karakmatan kano o Allah a miyaden ko langit ago so doniya.
16 So bo so Allah i kirek ko manga langit,

ogaid na inibegay niyan so doniya ko manga manosiya.
17 Kena a ba so miyamatay i pekapodi ko Allah,
a so siran oto a miyanga aalogan ko darpa o kikarerenek,
18 Ka sektano i pepodi ko Allah
SABOR 116
So Mama a Miyasabet ko Kapatay
Pekebabayaan ko so Allah, ka miyaneg iyan so lagam aken;

miyaneg iyan so kiyapangangampedian aken.
2 Kagiya likaan iyan raken so tangila niyan
na penanalowan ko sekaniyan den taman ko kaooyagoyag aken.
3 Minikolibed raken so manga tali o kapatay,

na minitemo raken so piyamakalekelek ko kobor;
kiyailotan ako ago miyarata a ginawa ko.
4 Samaoto na tiyalowan aken so Ingaran o Allah:
"Pengnin ko reka, ya Allah, a sabeta ngka so niyawa ko."
5 Makalimoon so Allah ago maontol;

masalinggagaw so Tohan tano.
6 Lilindingen o Allah so da a manga peleng iyan;
isako mikopay ako na siyabet ako niyan.
7 Sonod ka ko kapakalilintad ka, hey niyawa ko,
ka kiyapiyapiyaan ka den o Allah.
8 Ka piyakalidas ako ngka ko kapatay, ya Allah,
ago so kapepegelo o manga mata ko,
ago so kapekirepang o manga ai aken
9 Kaan ako makalalakaw ko hadapan o Allah sii ko inged o kikaooyag.
10 Peparatiyaya ako apiya sii ko kiyateroa ko sa
"Tanto ako a mararasay."
11 Na sii ko kiyaadai raken sa inam na tig aken a
"Manga bokeg so langon a manosiya."
12 Antonaa i kibadal aken ko Allah

ko langon a kamapiyaan iyan raken?
13 Magawid ako sa panginginomen a ipeselasela on sabap ko kiyasabet aken
na telowan ko so Ingaran iyan.
14 Itoman aken so manga samaya aken ko Allah
sii ko kamamasaan o langon o manga pagtaw niyan.
15 Mala i bali ko kipembilangen on o Allah

so kapatay o manga kaom iyan.
16 Ya Allah, matamataan a saken so oripen ka;
oripen ako ngka a so wata o oripen ka a babay;
biyoka ako ngka ko manga rantay a ipapatong raken.
17 Mbegan ko seka sa ipesoasoat aken reka a panalamat,

na telowan ko so Ingaran o Allah.
18 Itoman aken so manga samaya aken ko Allah
sii ko kamamasaan o langon o manga pagtaw niyan
19 Sii ko lamalama o Timplo o Allah,
sii ko lembak ka hey Yarosalim.
20 Podiya niyo so Allah.
SABOR 117
So Kapodiya ko Allah
Podiya niyo so Allah, hey langon a manga nasiyon;

bantoga niyo, hey langon a manga bangsa.
2 Ka da a ikeda o kapepangalinggagaw niyan rektano,
na tatap so kasasarigi ko Allah sa taman sa pakataman.
SABOR 118
Kapanalamat ko Kiyapakataban

2 Matero o manga Israil a

"Tatap so gagaw niyan sa taman sa pakataman."
3 Matero o manga mbawataan o Aron a
4 Matero o siran oto a maaleken ko Allah a
5 Sii ko kaiiloti raken na miyananalo ako ko Allah,

na inampon ako niyan ka piyakadaya ako niyan.
6 Mipageepeda aken so Allah; di ako kelek.
Antonaa i mapenggolaola raken a marata o matag manosiya?
7 Mipageepeda aken so Allah a aya raken pegogop,
na kemasaan aken so katebana ko siran oto a pekegowad raken.
8 Tomo so kapagapas ko Allah a di so kasanai ko manosiya.

9 Tomo so kapagapas ko Allah a di so kasanai ko manga olowan.
10 Minilikop raken so langon o manga nasiyon,

ogaid na sii ko Ingaran o Allah na bininasa ko siran.
11 Minilikop siran raken ko mbalabala,
ogaid na sii ko Ingaran o Allah na bininasa ko siran.
12 Giniporonan ako iran a lagid o manga batiyokan,
ogaid na miyapondaw siran sa magaan a datar o binisolan a manga paket,
ka sii ko Ingaran o Allan na bininasa ko siran.
13 Tanto ako den a inisaromag, ka sama ko bo da maoteng,
ogaid na inogopan ako o Allah.
14 So Allah na aya ko bager ago ipepagidaida;
siyabet ako niyan.
15 Sii ko manga barombarong o manga oontol

na pekeneg on so kapepamangogiyab sa kapekebabaya ko kiyapakataban:
"Tanto a mala i gees so pinggolaola o kawanan a lima o Allah.
16 Mipoporo so kawanan a lima o Allah;
tanto a mala i gees so pinggolaola o kawanan a lima o Allah."
17 Di ako petay, ka keoyag ako bo,

na pekalangkapen aken so miyanggolaola o Allah.
18 Tanto ako den a miyadaneg o Allah,
ogaid na da ako niyan palada ko kapatay.
19 Lekai ngka raken so manga pintoan ko kaontol;

soled ako ron ka penalamatan ko so Allah.
20 Giyanan so gimowa o Allah a ron pekasoled so manga oontol.
21 Penalamatan ko seka, ya Allah, ka inampon ako ngka,
na seka i miyakasabet raken.
22 So ator a da mapakay o manga panday sa walay

na miyabaloy a aya kaoonayan ko kaoontodan o walay.
23 So Allah i minggolaola sii,
na tanto ini rektano a piyakamemesa.
24 Giyai so gawii a inembaalan o Allah;
pakapiyaan tano ron a ginawa tano ago ikabebaya tano.
25 Pengnin ko reka, ya Allah; sabeta kami ngka;
pakabolosa kami ngka sa mapiya, ya Allah.
26 Karakmatan so pepekaoma sii ko Ingaran o Allah.

Sii ko Timplo o Allah na perakmatan ami seka.
27 So Allah na aya Tohan,
na piyakilindawan tano niyan ko solo iyan.
Iketi niyo a tali so pekorbanen ko pista
na wita niyo taman den ko manga pangapanga o aparan.
28 Seka i Tohan aken, na penalamatan ko seka;

seka i Tohan aken, na mbentogen ko seka.
29 Panalamati niyo so Allah, ka mapiya sekaniyan;

SABOR 119
So Kitab o Allah
Rarakmatan so siran oto a da a daway o sowasowai ran

a ipepaginetaw iran so kitab o Allah.
2 Rarakmatan so siran oto a petoman ko manga insarat iyan
a di rekaniyan dii mbabanog sa iklas ko poso iran.
3 Da den a di ontol a ba iran dii nggolaolaa
ka pekedegen iran baden so manga lalan iyan.
4 Migay ka, ya Allah, sa manga pandoan
a disomala a tomanen sa tarotop.
5 O ba bo makambeken so manga okitokit aken
ko kapetomana ko ko manga taritib ka.
6 O magiyoto na di ako den makapekeya
amay ka petordon aken so langon a manga sogoan ka.
7 Podin ko seka a tomitito so poso aken
sii ko kapekenala ko ko manga oontol a kokoman ka.
8 Tomanen aken so manga taritib ka;
di ako ngka den pagawai.
9 Andamanaya i kapekesotiya o kangodaan a mama ko sowasowai niyan?
Mokit ko kipepaginetaon iyan ko manga katero o ka.
10 Iklas ko poso aken so di aken reka dii kambabanoga;
o ba ako ngka pakasogoka ko manga sogoan ka.
11 Miyapadalem aken den ko poso aken so manga katero o ka
kaan ako reka di makapendosa.
12 Rek ka so podi, ya Allah;
pangendaon ka raken so manga taritib ka.
13 Petontolen o manga modol aken
so langon a manga kokoman a miyatero o ka.
14 Lebi pen a ipekebabaya aken so kapetomana ko ko manga insarat ka
a di so apiya antonaa a kakawasaan.
15 Rarasamen aken so manga pandoan ka
ago tatagoon ko sa ginawa so manga lalan ka.
16 Ikapipiya a ginawa ko so manga taritib ka;
di aken den pelipatan so manga katero o ka.
17 Piyapiyai ako ngka a oripen ka kaan ako pekeoyagoyag

ago makapaparatiyaya ko manga katero o ka.
18 Bekara ngka so manga mata ko kaan aken mainengka
so piyakamemesa a manga nganin sii ko kitab ka.
19 Matag ako mananangga sangkai a doniya;
di ngka raken pegmaa so manga sogoan ka.
20 Ipeketeno o niyawa ko so kikakadaliin iyan
ko manga kokoman ka ko langon a masa.
21 Di ngka dii mbongetan so manga takabor,
a giyangkoto a manga naraka a pepamanogok ko manga sogoan ka.
22 Pokasa ko ngka ko di iran raken dii kasodia ago kapepagongatongata
ka petomanen aken so manga insarat ka.
23 Apiya pen pepagopakat so manga olowan a pepagitowitoon ako iran
na rarasamen aken a oripen ka so manga taritib ka.
24 So manga insarat ka na aya aken ipekebabaya;
manga mosawira aken siran.
25 Midedeket so niyawa ko ko bayanek;

oyaga ko ngka a mitoman so initopa ngka.
26 Piteobat aken so manga olaola ko, na inampon ako ngka;
27 Pakisaboti ngka raken so manga olaola a ipapaliyogat o manga pandoan ka;
samaoto na pemasaken aken so manga piyakamemesa ngka.
28 Pekikopay so niyawa ko ko kapakamboboko;
pakabagera ko ngka a nggolalan ko katero o ka.
29 Pakalidasa ko ngka ko okitokit a kapamokeg;
sii ko limo o ka na pangendaon ka raken so kitab ka.
30 Miyapili aken den so lalan a tito a benar;
miyadalem aken ko poso aken so manga kokoman ka.
31 Kakapetan aken sebenar so manga insarat ka, ya Allah;
o ba ako ngka pakayai.
32 Pepelalagoyan aken so lalan o manga sogoan ka
sii ko kapepakalaa ngka so sabot aken.
33 Pangendaon ka raken, ya Allah, so kipaginetaon ko ko manga taritib ka,

ka ipenggolalan aken taman sa kaposan.
34 Begi ako ngka sa sabot, ka peratiyayaan ko so kitab ka
na go tomanen aken sa iklas ko poso aken.
35 Pakikedegen ka raken so lalan o manga sogoan ka,
ka ndodon so ikapipiya a ginawa ko.
36 Kelida ngka so poso aken ko manga insarat ka,
a kena a ba sii ko kapakatamok.
37 Pakalipaya ngka a manga mata ko kapegilaya iran ko da a manga bali niyan;
ongowi ngka so kaoyagoyag aken sii ko lalan ka.
38 Tomanen ka raken a oripen ka so initopa ngka
a inibegay ko siran oto a maaleken reka.
39 Pakalepasa ngka raken so manga panonongka a ipekewan aken,
ka mapiya so manga kokoman ka.
40 Sayana aken a ikakadali so manga pandoan ka.
Sabap ko kaontol ka na ongowi ngka so omor aken.
41 Mitemo raken, ya Allah, so da a ikeda iyan a gagaw ngka,

na panabangi ako ngka a mitoman so minitopa ngka.
42 Amay ka magiyoto na aden a kisembag aken ko siran oto a pepagongatongat raken,
ka sasarigan ko so katero o ka.
43 Di ngka den kowaa ko ngari aken so dii kateroa ko tito a benar,
ka iinamen ko so manga kokoman ka.
44 Lalayon aken peratiyayaan so kitab ka sa taman sa pakataman.
45 Peginetaw ako a makadadaya,
ka pananagontamanan aken so manga pandoan ka.
46 Peteroon ko so makapantag ko manga insarat ka ko hadapan o manga dato
na di ako keyaan.
47 Ikapipiya a ginawa ko so manga sogoan ka a pekebabayaan ko.
48 Imbayaw aken a manga lima ko ko kapagaadati aken ko manga sogoan ka a
pekebabayaan ko,
na perasamen ko so manga taritib ka.
49 Tatademi ngka so miyatero o ka raken a oripen ka

a ron ako ngka piyakainam.
50 Giyai i pepekarinaw raken ko kapekerasay aken:
pepekaoyag raken so initopa ngka.
51 So manga takabor na tanto ako iran a pepagongatongaten,
ogaid na da ako den makatipas ko kitab ka.
52 Tatademan ko so miyanga oona a manga kokoman ka, ya Allah,
na ikapipiya ini a ginawa ko.
53 Minipaar ako a rarangit sabap ko manga rarata a taw
a miyamanalikod ko kitab ka.
54 So manga taritib ka na aya ko ipepamagidaida
apiya anda ko pepekakaden.
55 Apiya sii ko kagagawii na petedeman aken so Ingaran ka, ya Allah,
na peparatiyayaan ko so kitab ka.
56 Giyai i pepekarakmat raken:
mininggolalan aken den so manga pandoan ka.
57 Seka i bagian aken, ya Allah;

minitopa ko a peratiyayaan ko so manga katero o ka.
58 Miyangangampedian ako reka sa iklas ko poso aken;
kalimoon ako ngka a mitoman so minitopa ngka.
59 Miyapemasak aken so manga okitokit aken
na piyakaantap aken so kapelakad aken ko manga insarat ka.
60 Da aken sendoden, ka pinggagaanan aken tomoman so manga sogoan ka.
61 Apiya o mikolibed raken so manga tali o manga rarata,
na di aken den pelipatan so kitab ka.
62 Sii ko look a gawii na pegembowat ako sa kapepenalamati aken reka
sabap ko manga oontol a kokoman ka.
63 Pepengeped ako ko langon a kikaaalek reka,
a so siran oto a petoman ko manga pandoan ka.
64 Mipepeno ko doniya so gagaw ngka, ya Allah;
65 Pipiyapiyaan ako ngka a oripen ka, ya Allah,

a minitoman so katero o ka.
66 Pangendaon ka raken so mapiya a panarima ago katao,
ka sasanaan ko so manga sogoan ka.
67 Sii ko da raken pen karasaya na peketaridadag ako,
ogaid na peparatiyayaan ko imanto so katero o ka.
68 Mapiya ka ago dii nggolaola sa mapiya.
Pangendaon ka raken so manga taritib ka.
69 Apiya pen pisebapan ako sa manga kabokegan o manga takabor
na ba aken den petomana so manga pandoan ka sa iklas ko poso aken.
70 Makapal so manga poso iran ago di pemakagedam,
ogaid na ikapipiya a ginawa ko so kitab ka.
71 Kamapiyaan aken so kiyarasaya raken,
ka aya ko kiyakenala ko manga taritib ka.
72 Lebi a mala raken i bali so kitab a miyakapoon ko ngari i ka
a di so pipira nggibo a pirak ago bolawan.
73 So manga lima ngka i mimbaal ago lominimbag raken;

begi ako ngka sa sabot a mikenal aken ko manga sogoan ka.
74 Siran oto a maaleken reka na penga babebaya amay ka mailay ako iran,
ka kagiya sasanaan ko so minitopa ngka.
75 Katawan aken, ya Allah, a maontol so manga kokoman ka,
ago sabap ko kasasarigi reka na diyaneg ako ngka.
76 Pengnin ko a makarinaw raken so kapepangalinggagaw ngka
a mitoman so initopa ngka raken a oripen ka.
77 Mitalingoma raken so limo o ka kaan ako pekeoyagoyag,
ka ipekebabaya aken so kitab ka.
78 Makakeya so manga takabor, ka pimarataan ako iran sa kapamokeg,
ogaid na rarasamen aken so manga pandoan ka.
79 Matimo raken so siran oto a maaleken reka,
a so langon o manga tatao ko manga insarat ka.
80 Madiyangka so poso aken ko kapetomana ko ko manga taritib ka
kaan ako di makapekeya.
81 Pekikopay so niyawa ko ko kikakadaliin aken ko kapenabet ka;

iinamen aken so katero o ka.
82 Diyokawan den magalataw so manga mata ko ko initopa ngka;
na ipegise aken a "Anda i karinawi ngka raken?"
83 Apiya pen lagid ako o pananagoay a kobal a komingkeng sii ko bel,
na da aken den lipati so manga taritib ka.
84 Ay katey pen a disomala a kapepenayaw aken a oripen ka?
Anda i kandanega ngka ko pepemanatro raken?
85 Miyamangalot so manga takabor sa manga galebo a keologan raken;
pesogoken iran so kitab ka.
86 So manga sogoan ka na palaya kasasarigan;
tabangi ako ngka, ka pesetroon ako o manga taw sa da a sabap iyan.
87 Maito bo na masapol ako iran ko doniya,
ogaid na da aken ndarainonen so manga pandoan ka.
88 Sabap ko gagaw ngka na oyaga ko ngka,
kaan aken minggolalan so manga insarat a miyakapoon ko ngari i ka.
89 Da a ikeda o katero o ka, ya Allah,

a tomitikna roo sa kasorgaan.
90 So kasasarigi reka na taman den ko langon a kapepamagapidapid o masa;
piyakambeken ka so doniya, na matatatap ini.
91 Nggolalan ko manga kokoman ka na matatatap so kalangolangon taman sangkai a
gawii,
ka so langon taman na pepamanalagad reka.
92 O di aken ipekebabaya so kitab ka
na inipatay aken den ai so kiyaromasay aken.
93 Di aken den pelipatan so manga pandoan ka,
ka nggolalan kiran na inoyag ako ngka.
94 Sabeta ko ngka, ka rek ako ngka.
Piyanagontamanan aken so manga pandoan ka.
95 Pepegayanan ako o manga rarata a taw sa kambonoa iran raken,
ogaid na tatanodan ko so manga insarat ka.
96 Miyainengka aken a so langon taman na aden a kaposan iyan,
ogaid na so manga sogoan ka na da den a pitetamanan iyan.
97 Sayana aken a pekebabayaan so kitab ka!

Mababasa alongan a kaperasama ko ron.
98 So manga sogoan ka na ipekeongangen aken a di so manga ridoay aken,
ka lalayon raken ai.
99 Madalem ako i panarima a di so langon o manga goro aken,
ka so manga insarat ka na aya ko perasamen.
100 Somasabot ako a di so manga pelokelokesen,
ka petomanen aken so manga pandoan ka.
101 Pekegenggen aken so manga ai aken ko oman i marata a lalan
kaan aken dii minggolalan so katero o ka.
102 Da ako den tipas ko manga kokoman ka,
ka seka den i miyakapangendao raken.
103 Sayana a mamis so manga katero o ka ko panaantaaman aken;
lebi pen a mamis ko ngari aken a di so gola a teneb.
104 So manga pandoan ka na aya ko ipepakasabot;
sabap san na ipekegowad aken so oman i ribat a lalan.
105 So katero o ka i solo o manga ai aken

a lomilindaw ko lalan aken.
106 Miyakasepa ako ago inisemaya aken
a tomanen ko so manga oontol a kokoman ka.
107 Tanto ako a mararasay;
oyaga ko ngka, ya Allah, a mitoman so initopa ngka.
108 Tarimaa ngka, ya Allah, so iklas a kapepamodi o ngari aken,
ago pangendaon ka raken so manga kokoman ka.
109 Apiya pen lalayon aken dii miserakan so niyawa ko
na di aken pelipatan so kitab ka.
110 Tomiyaan so manga rarata a taw sa ipelitag raken,
ogaid na da aken den lepasa so manga pandoan ka.
111 So manga insarat ka na aya ko den kawali sa taman sa pakataman;
ipepekalangas ini o poso aken.
112 Kiyokom aken sa ginawa ko a lalayon aken ipenggolalan so manga taritib ka
apiya taman den sa kaposan.
113 Ipekegowad aken so siran oto a pekedowadowa i pamikiran,

ogaid na pekebabayaan ko so kitab ka.
114 Seka i lindonga aken ago kelong;
iinamen aken so katero o ka.
115 Awai ako niyo, hey manga baradosa,
ka tomanen ko so manga sogoan o Tohan aken.
116 Tokoda ko ngka a so den so initopa ngka kaan ako pekeoyagoyag;
o ba ako ngka pakaolai ko kapakaiinam aken.di ako ngka pagolai/o ba ako ngka pakaitoa
117 Kakapeti ako ngka ka kelinding ako,
na tetapen ko sa ginawa ko so manga taritib ka.
118 Petelikodan ka so langon a pepamakasilay ko manga taritib ka;
da a oked o kapepagomanta iran.
119 So langon a manga rarata ko doniya na ipelebad ka a datar o popot;
giyanan i sabap a kapekebabayai aken ko manga insarat ka.
120 Petebekeren so lawas aken ko kipekeleken aken reka;
ipekewan aken so manga kokoman ka.
121 Miyanggolaola ko so ontol ago so matito;

di ako ngka pendarainonen ko siran oto a pepelopit raken.
122 Tangkeda ngka so kapekapiya ko a oripen ka;
di ako ngka pekilopiten ko pepamangimporoan.
123 Diyokawan den magalataw so manga mata ko ko kapenabet ka
ago so kakitoman o maontol a initopa ngka.
124 Nggolaolai ako ngka a oripen ka sa makaaayon ko gagaw ngka,
ago pangendaon ka raken so manga taritib ka.
125 Saken so oripen ka; begi ako ngka sa sabot
kaan aken makenal so manga insarat ka.
126 Giyai den so masa a disomala a kapenggimowat ka, ya Allah,
ka pesogoken o manga taw so kitab ka.
127 Pekebabayaan ko so manga sogoan ka a di so bolawan,
a lebi pen a di so lombos a bolawan.
128 Kagiya ka maoto na tatarimaan aken a matito so langon a pandoan ka,
na ipekegowad aken so oman i ribat a lalan.
129 Piyakamemesa so manga insarat ka;

sabap san na petomanen aken sa iklas ko poso aken.
130 So kapesenep raken o manga katero o ka na pepekalindaw,
ago ipepakasabot o da a manga peleng iyan.
131 Di ako dii mbaka a sasakaan
ko kikakadaliin aken ko manga sogoan ka.
132 Sangori ako ngka na go ako ngka kalimoon
a aya ngka ipekidia ko siran oto a pekebabaya ko Ingaran ka.
133 Pakatiknaa ngka so kapelakad aken a nggolalan ko katero o ka
na di ako ngka pekipaaren ko apiya antonaa dosa.
134 Pokasa ko ngka ko kapesonsinga raken o manga taw
kaan aken peketoman so manga pandoan ka.
135 Pakaliwanaga ngka so paras ka ko oripen ka,
na pangendaon ka raken so manga taritib ka.
136 Mareges a kapetoga o lo ko manga mata ko
sabap sa di paparatiyayaan o manga taw so kitab ka.
137 Maontol ka, ya Allah,
ago matito so manga kokoman ka.
138 Maontol so biter ka a manga insarat,
na tanto a kakesarigi ron.
139 So rarangit aken na pepekapos raken,
ka pelimbanan o manga ridoay aken so manga katero o ka.
140 Tarotop a kiyatepengi ko manga initopa ngka,
na saken a oripen ka na pekebabayaan ko ini.
141 Apiya pen mitatanan ako ago dii sodiin
na di aken indadarainon so manga pandoan ka.
142 So kaontol ka na da den a ikepos iyan a kaontol,
na tito a benar so kitab ka.
143 Minitemo raken so kasasamok ago karomasayan,
ogaid na ipekebabaya aken so manga sogoan ka.
144 So manga insarat ka na ontol sa taman sa pakataman;
begi ako ngka sa sabot kaan ako pekeoyagoyag.
145 Pepananalo ako sa iklas ko poso aken; ampona ko ngka, ya Allah,

ka tomanen ko so manga taritib ka.
146 Pepananalowan ko seka; sabeta ko ngka
ka ipenggolalan aken so manga insarat ka.
147 Pegembowat ako ko sobo a penggoraok sa tabang;
iinamen ko so katero o ka.
148 Pepegnaw ako ko mababasa gawii
kaan aken mapemimikiran so manga initopa ngka.
149 Pamakinega ngka so lagam aken sabap ko gagaw ngka;
oyaga ko ngka, ya Allah, a nggolalan ko kokoman ka.
150 Siran oto a kekadiyat sa marata na pepamakadaseg raken;
mabebelag siran ko kitab ka.
151 Ogaid na marani ka, ya Allah,
na so langon a sogoan ka na palaya kasasarigan.
152 Miyatey den a kiyatokawi ko sii makapantag ko manga insarat ka:
piyakatikna a ka ini a ketatap sa taman sa pakataman.
153 Ilaya ngka so kararasay aken na go ako ngka panabangi

ka da aken den lipati so kitab ka.
154 Panindegen ka so kabenar aken ago aona ko ngka;
oyaga ko ngka a mitoman so initopa ngka.
155 Mawatan ko manga rarata a taw so kakesabet
ka di iran peratiyayaan so manga taritib ka.
156 Mala ka i kapedi, ya Allah;
oyaga ko ngka a nggolalan ko manga kokoman ka.
157 Madakel a ridoay aken a pepamanatro raken,
ogaid na da aken den lepasa so manga insarat ka.
158 Igira a pekeilay aken angkoto a mamakatipo na ipekesisingay aken siran
ka kagiya di iran paparatiyayaan so katero o ka.
159 Ilaya ngka so kapekebabayai aken ko manga pandoan ka;
oyaga ko ngka, ya Allah, sabap ko gagaw ngka.
160 Aya katitimoan ko manga katero o ka na so tito a benar,
na oman i isa ko manga oontol a kokoman ka na da den a ikepos iyan.
161 Pesetroon ako o manga olowan sa da a sabap iyan,

ogaid na ipetebad o poso aken so katero o ka.
162 Sayana ako a mababebaya sabap ko initopa ngka
a datar o taw a pepekatoon sa mala a igagadong.
163 Ipekegowad ago ipekesisingay aken so kapamokeg,
ogaid na pekebabayaan ko so kitab ka.
164 Makapito ko salongan na pepodin ko seka
sabap ko manga oontol a kokoman ka.
165 Tanto a lomilintad so siran oto a pekebabaya ko kitab ka,
na da den a ba kiran pekarepang.
166 Pakatatalingomaan aken so kapenabet ka, ya Allah,
na di aken dii nggolalan so manga sogoan ka.
167 Iklas a kapetomana ko ko manga insarat ka,
ka tanto aken ai a pekebabayaan.
168 Petomanen ko so manga pandoan ka ago so manga insarat ka,
ka so langon a okitokit aken na palaya ngka den kabebelengan.
169 Misampay reka so kapenggoraok aken, ya Allah.

Begi ako ngka sa sabot a nggolalan ko katero o ka.
170 Makatalingoma reka so kapepangangampedian aken,
na sabeta ko ngka a mitoman so initopa ngka.
171 Solapayan sa podi so manga modol aken
ka ipepamangendao ngka raken so manga taritib ka.
172 Ipegidaida o dila aken so katero o ka,
ka maontol so langon a sogoan ka.
173 Pengnin ko a makaikral so lima ngka sa katebangi ngka raken,
ka miyatomo aken den so manga pandoan ka.
174 Sayana aken a ikakadali so kapenabet ka, ya Allah;
so kitab ka na aya ko ipekebabaya.
175 Pakapagoyaga ko ngka kaan aken seka mapodi;
makatabang raken so manga kokoman ka.
176 Miyataap ako a datar o miyadadag a bilibili;
mbanoga ko ngka a oripen ka,
ka da aken den lipati so manga sogoan ka.
SABOR 120
Pangni sa Tabang
Sii ko kaiiloti raken na pepananalo ako ko Allah
na pegamponen ako niyan.
2 “Lidasen ako ngka, ya Allah, ko pepamokeg a manga modol
ago pepamagakal a dila."
3 Antonaa i ikidia reka o Allah,

ago antonaa pen i ipagoman iyan sii, hey, seka a pepamagakal a dila?
4 Indaneg iyan reka so manga gagarang a gasa o sondaro
a rakes o pekedeg a manga waga.
5 Kadodowaanan ako sabap ko kakakaden aken sa Misik

ago so kababaling aken a misisiringana aken so manga taw sa Kidar.
6 Tanto a miyatey a kapagiinged aken
sii ko siran oto a pekegowad ko kalilintad.
7 Taw ako a mabebebaya sa kalilintad,
ogaid na igira a di aken ai dii teroon na aya kabaya iran na kapakitidawa.
SABOR 121
So Allah a Magiipat rektano
Ipelangkaw aken a manga mata ko ko manga palaw;

anda pepekapoon so tabang raken?
2 So tabang raken na poon ko Allah
a so Mimbaal ko langit ago so lopa.
3 Di niyan pekidolas so ai ngka,

sekaniyan a magiipat reka na di toratoden;
4 Matamataan a so magiipat sa Israil
na di den toratoden aya pen o ba toroga.
5 So Allah i magiipat reka,

so Allah i pekesirongan ka a sisii ko kawanan ka.
6 Di ka kapekasakitan o alongan ko kadaondaw,
aya pen o ba so olan ko kagagawii.
7 Pelindingen ka o Allah ko langon a pekakaid,

pelindingen iyan so niyawa ngka.
8 Pelindingen ka o Allah ko kapelalakaw ngka ago so kapembaling ka
SABOR 122
So Kapodiya sa Yarosalim
Miyabebaya ako isako teroon iran raken a

"Somong tano ko Walay o Allah."
2 Na katii kami imanto a tomitindeg
ko soled o manga gimowa a ka, hey Yarosalim.
3 Giya Yarosalim na piyakaasal a siti a matitiman ago maiisaisa.

4 Roo petekedeg so manga mbatabataa,
a so manga mbatabataa o Allah
sa kapenalamati ran ko Ingaran o Allah
a kaketoman o iniinsarat iyan ko Israil.
5 Ka roo matatago so manga korsi ko kapengokom,
a so manga korsi o manga moriyataw o Daod.
6 Pangangarapanen iyo so kalilintad a Yarosalim:

"Mamakapiya i bobolos so siran oto a pekebabaya reka.
7 Madalem so kalilintad ko soled o manga pangeleban ka,
ago so kalilinding ko soled o manga torogan ka."
8 Sabap ko kamapiyaan o manga tonganay aken ago manga ginawai
na peteroon ko den sa Yarosalim a
"Madalem reka so kalilintad."
9 Sabap ko Walay o Allah a Tohan tano
na penagontamanan aken so kamapiyaan ka.
SABOR 123
Pangni sa Limo
Sii aken reka ipelangag a manga mata ko,

hey seka a kokorsi san sa kasorgaan.
2 Datar o oripen a di niyan pelikatan sa mata so lima o kadnan iyan,
ago datar o raga a di niyan pelikatan sa mata so lima o kadnan iyan a babay
a di tano mambo pelikatan sa mata so Allah a Tohan tano
taman sa kikalimoon iyan rektano.
3 Kalimoon kami ngka, ya Allah, kalimoon kami ngka,

ka tanto kami den a miyasemo ko di rekami dii kasodia.
4 Tanto a kiyasemowan a ginawa mi ko kapepagongatongata rekami o dii
mamangimporoan
ago so di rekami dii kasodia o manga takabor.
SABOR 124
So Allah a Magiipat ko manga Pagtaw niyan
O di so Allah i miniampil rektano

na mapetero o Israil a
2 “O di so Allah i miniampil rektano
isako gobaten tano o manga ridoay tano
3 Na miyapelalamed tano iran den ai a oyagoyag
ko kasosokeyaw o rarangit iran sii rektano;
4 Kiyakoloban tano den ai o bagiyaw
ago miyanga aaled tano den ko manga ig
5 Ago miyanga aanod tano den pen ai ko mabandes a reges."
6 Panalamatan tano so Allah

ka da tano niyan pakisekisiin ko manga ngipen iran.
7 Miyakapelos tano a lagid o papanok ko litag o panganganop;
miyabinasa so litag na miyakapalagoy tano ron.
8 So tabang rektano na sii ko Ingaran o Allah
a so Mimbaal ko langit ago so lopa.
SABOR 125
So Kalilinding o manga Pagtaw o Allah
Siran oto a somasarig ko Allah na lagid o Palaw a Siyon

a di den kiiseg, ka tatap sa taman sa pakataman.
2 Lagid o manga palaw a mililibet sa Yarosalim
na tetalikop so Allah ko manga pagtaw niyan
imanto ago dayon sa dayon.
3 So lilit o manga rarata na di ketatap a ipendato ko inged a bagian o manga oontol,

ka o giyanan, na apiya so manga oontol na o ba baden pakanggolaolaa sa marata.
4 Nggolaolai ngka sa mapiya, ya Allah, so manga pipiya a taw,

a so manga titito i poso.
5 Ogaid na siran oto a pepekasilay sa kapekedega ko bekog a manga lalan iran
na imbowang o Allah a iperakes ko dii mbabaradosa.
Matatap so kalilintad sa Israil.
SABOR 126
So Kiyapakakasoy sa Siyon
Isako pakakasowin o Allah sa Siyon so miyanga bibiyag

na datar tano o manga taw a dii tetaginep.
2 Samaoto na mapepeno a kapesinga so manga ngari tano,
na miyamagidaida so dila tano sa kapekebabaya.
Samaoto na aya dii matero o ped a manga nasiyon na
"Manga ala a pinggolaola kiran o Allah."
3 Mataan den a manga ala a pinggolaola rektano o Allah
a sayana a inipakapiya a ginawa tano.
4 Pakaasala ngka rekami, ya Allah, so kamapiyaan ami,

a lagid o ig a pekipeno ko manga baogan sa Nigib.
5 Siran oto a pesegad sii ko kapeseod iran
na pemagidaida sa kapekebabaya ko kaperaragon iran.
6 Sekaniyan a peliyo a pesegad a maawid sa oniin a iseod
na matamataan a pekakasoy a dii mamagidaida sa kapekebabaya
a maawid sa miyanga bebekes a miyaragon iyan.
SABOR 127
So Podi ko Kapiya o Allah
O di so Allah i pembalay ko walay

na da a kipantag o di ron dii kanggalebeka o manga panday.
O di so Allah i magiipat ko inged,
na ilang baden so dii katoday o pepagipat on.
2 Da a lalaw o kapegembowat ka komabalaga
ago so di ngka dii kanggagabina
a di ka dii ndokaw sa kapaningkawiyagen,
ka pembegay so Allah ko siran oto a pekebabayaan iyan
apiya sii ko kapepekatorog iran.
3 So manga wata na posaka a poon ko Allah;

so onga o lawas na aya niyan ipembalas.
4 So inimbabawata o mama ko kangongodai ron pen
na lagid mambo o manga gasa a sisii ko lima o sondaro.
5 Rarakmatan so mama a mipepeno ko pananagoay niyan angkoto a manga gasa.
Di sekaniyan den keyaan
igira a minindolona iyan so manga ridoay niyan sii ko dii kokoman.
SABOR 128
So Balas o Kapangongonotan ko Allah
Rarakmatan so oman i isa a maaleken ko Allah

a pekedeg ko manga lalan iyan.
2 Kekan ka so ipagonga o galebek o manga lima ngka;
kebebaya ka ago pekapiya so bobolos ka.
3 So karoma ngka na kelagid o taribonga a waged a obas
sii ko soled o walay ngka;
so manga wata a ka na kelagid o manga retok a kayo a olibi
a makalilibet ko lamisaan ka.
4 Giyanan i kakerakmati ko taw a maaleken ko Allah.
5 Karakmatan ka o Allah a ndodoo sa Siyon.

Kamasaan ka so kamapiyaan a Yarosalim
ko langon o manga gawii ko kaooyagoyag ka.
6 Mamboway ka sa kailaya ngka ko manga wata o manga wata a ka.
Makalintad a Israil.
SABOR 129
Pangni a Sopak ko manga Ridoay
"Tanto ako den a perasain o manga ridoay aken inipoon ko kangoda ko."
Mapetero a Israil a
2 “Tanto ako den a perasain o manga ridoay aken inipoon ko kangoda ko,
ogaid na da ako iran den daaga.
3 Piyamadasan iran a likod aken na piyamakatas iran so kiyapalii ran on;
biyaloy iran a lagid o miyadado a pangomaan.
4 Ogaid na maontol so Allah,
ka piyamotol iyan so ipapatong raken o manga rarata a taw."
5 Mamakapeto a kaayaan so langon a pekegowad sa Siyon.

6 Madatar siran o manga otan a pepelonaw ko mapapantar a atep a walay
a penga lalanes sa di iran pen kapekala
7 A di ini petoon ko lima o pagagarab
aya pen o ba on kepenedi so pepenimo on.
8 Na di den matero o siran oto a pepekasagad kiran a
"Mitemo rekano so riski o Allah.
Perakmatan ami sekano sii ko Ingaran o Allah."
SABOR 130
Pangni sa Tabang
Poon ko madalem na pepananalo ako reka, ya Allah;

2 Hey Kadnan, pamakinega ngka so lagam aken.
Maneg o tangila ngka so kapenggoraok aken sa kapedi.
3 Ya Allah, o pesoraten ka so manga dosa,
na antawaa pen, Kadnan, i makapamayandeg?
4 Ogaid na sisii reka so rila kaan ka mikalek.
5 Pepanayaon ko so Allah, pepanayaw so niyawa ko,

na iinamen aken so katero iyan.
6 Pepenayaon o niyawa ko so Allah
a lawan pen ko kapepenayawa o manga gordiya ko sobo;
oway, lawan pen ko kapepenayawa o manga gordiya ko kakepita iyan.
7 Hey Israil, inama niyo so Allah.

Ka sisii ko Allah so kapangalinggagaw,
na ndodon so tarotop a kapenabet.
8 Na sekaniyan den i pokas ko manga pagtaw niyan a Israil
ko langon o manga kadostaan iran.
SABOR 131
Kapangangarapan a Kapangalimbabaan
Ya Allah, kena a ba dii tekabor so poso aken

aya pen o ba mipoporo i pangilailayan so manga mata ko.
Di aken pekitembang a ginawa ko ko manga ala a nganin
aya pen o ba so tanto raken a piyakamemesa.
2 Ka piyakarinaw ago piyakalintad aken baden a ginawa ko
a datar o ikaririga a wata a karirinawan sii ko rareb o ina iyan--
na giya ginawa ko na datar o karirinawan a wata.
3 Hey Israil, iinama niyo so Allah,

SABOR 132
So Kapodiya ko Walay o Allah
Ya Allah, tatademi ngka so Daod

ago so langon a kiyaregeni ron;
2 Ka inisepa iyan ko Allah
ago inisemaya iyan ko Mala i Gees a Tohan o Yakob a
3 “Di ako den soled ko walay aken
aya pen o ba ako iga ko igaan aken,
4 Di aken den peparon o ba ako pakatorog
aya pen o ba ako toratoda
5 Taman sa di ako makatoon sa darpa a pantag ko Allah,
a kekadenan o Mala i Gees a Tohan o Yakob."
6 Sii sa Iprata na miyaneg tano so mipantag ko Kaban sa Kapasadan,

na miyatoon tano ko manga pangomaan roo sa Diyaar.
7 Tig tano a "Somong tano ko kakadenan o Allah;
somimba tano sii ko dapoay niyan."
8 Mbowat ka, ya Allah, na song ka ko ndekean ka,

seka ago so Kaban sa Kapasadan a nanao ko gees ka.
9 Makanditar so manga imam ka sa kaontol,
na makapelalalis sa kapekebabaya so manga kaom ka.
10 Sabap ko Daod a oripen ka

na di ngka telikodi so miyapili i ka a dato.
11 Minisepa o Allah ko Daod
so matatangked a sapa a di niyan den mbarobaan:
"So isa ko kebabadan reka
na pekaontoden aken ko korsi i ka.
12 O nggolalanen o manga wata a ka so kapasadan aken
ago so manga insarat a ipemangendao aken kiran
na so mambo so manga wata iran na pemakaontod
ko korsi i ka sa dayon sa dayon."
13 Ka miyapili o Allah a Siyon;

miyasingayo iyan ai a kedenan iyan:
14 “Giyai i pendekean aken sa taman sa pakataman;
sii ako pekorsi, ka miyasingayo aken ai.
15 Perakmatan ko a Siyon sa mitataralo a kaoyagan;
pekaosogen aken sa pangenengken so manga miskin on.
16 Penditaran aken pen sa kakesabet so manga imam on,
na pemagidaida ago pelalalis sa kapekebabaya so manga kaom aken roo.
17 “Roo aken pekalaa so gees o Daod

ago pekatindegan aken sa solo o miyapili aken a dato.
18 Penditaran aken sa kayaan so manga ridoay niyan,
ogaid na pemangerap so sangkad ko olo niyan."
SABOR 133
So Podi ko Katataayon o Magariyari
Sayana a mapiya ago tanto a ikasosoat

igira a matitimo a matataayon so magariyari.
2 Lagid anan o mamot a lana a pegododen ko olo
a petiris ko sompa, a so sompa o Aron,
a petiris taman den ko lig o kimon iyan.
3 Datar ini o manga namog sa palaw a Hirmon
a pepanga oolog ko manga palaw sa Siyon.
4 Ka roo ipembegay o Allah so iperakmat iyan,
a so kaoyagoyag a da a kaposan iyan.
SABOR 134
So Kipananalon sa Kapodiya ko Allah
Podiya niyo so Allah, hey langon iyo a manga oripen o Allah

a pepamanalagad ko kagagawii sii ko Timplo o Allah.
2 Bayaon iyo a manga lima niyo ko soti a darpa
ago podiya niyo so Allah.
3 So Allah a mimbaal ko langit ago so lopa

na karakmatan kano niyan a poon sa Siyon.
SABOR 135
Kadikir sa Podi
Podiya niyo so Ingaran o Allah;

Podiya niyo sekaniyan, hey manga oripen o Allah
2 A pepamanalagad sii ko Walay o Allah,
sii ko lamalama o Timplo o Tohan tano.
3 Podiya niyo so Allah, ka so Allah na mapiya;

didawa niyo a podi so Ingaran iyan, ka ikasosoat ai.
4 Ka pinili o Allah so Yakob a rek iyan,
ago so Israil a da a lawan iyan a ketangan iyan.
5 Katawan aken a mala so Allah,

so Kadnan tano na lawan pen ko langon a tohan.
6 Dii nggolaolaan o Allah so apiya antonaa i ipekesoat iyan
sii sa manga langit ago sa doniya,
sii ko manga ragat ago so langon a manga dadalem.
7 Pepakaporoon iyan so manga gabon a poon ko manga titib a doniya;
pesogoon iyan so kilakilat a rakes o oran
ago pepakaliyon iyan so manga ndo a poon ko tatagoan iyan on.
8 Roo sa Misir na piyamono iyan so manga kaka on a wata

ndatar so manga manosiya ago manga pangangayamen.
9 Initalingoma niyan so manga nanao niyan ago manga kabarakat ko dalem a inged ka,
hey Misir,
a inisiksa iyan ko Piraon ago so langon a sanasanaan iyan.
10 Piyaniksa iyan so madakel a manga nasiyon
ago piyamono iyan so manga babager a dato,
11 A si Sihon a dato o manga Amoriyo,
si Og a dato sa Basan
ago so langon o manga dato sa Kanaan,
12 Na inibegay niyan so lopa iran a posaka
a makewali o manga pagtaw niyan a Israil.
13 Matatatap so Ingaran ka, ya Allah, sa taman sa pakataman;

so kababantogi reka na taman ko langon a kapepamagapidapid o masa.
14 Ka ipeginontolan o Allah so manga pagtaw niyan,
ago ipengalinggagaw niyan so manga oripen iyan.
15 So manga katohanan o manga nasiyon na manga barahala a pirak ago bolawan

a pasad o manga lima a manosiya.
16 Aden a ngari iran, ogaid na di makapetero;
ago manga mata, ogaid na di pemakanono;
17 Aden a manga tangila iran, ogaid na di pemakaneg,
aya pen o ba aden a napas ko ngari iran.
18 Pekasayan kiran so pepamangembaal kiran
ago so pen so oman i isa a somasarig on.
19 Hey manga mbawataan o Israil, podiya niyo so Allah;

sekano a manga mbawataan o Aron, podiya niyo so Allah.
20 Hey manga Libitiyo, podiya niyo so Allah;
sekano a maaleken ko Allah, na podiya niyo sekaniyan.
21 Mapopodi so Allah sii sa Siyon,
a sekaniyan a komakaden sa Yarosalim.
SABOR 136
Dikir sa Kapanalamat
Pepanalamati niyo so Allah ka mapiya sekaniyan.

Tatap so gagaw niyan sa taman sa pakataman.
2 Pepanalamati niyo so Tohan o manga tohan.
3 Pepanalamati niyo so Kadnan o manga kadnan.
4 Sekaniyan bo i dii makanggolaola sa manga ala a piyakamemesa.

5 Inembaalan iyan so manga langit a nggolalan ko ongangen iyan;
6 Na kiyayat iyan so lopa sii ko liyawaw o manga ig.
7 Inembaalan iyan so manga ala a solo,
8 A so alongan a makandato ko kadaondaw,
9 Ago so olan ago so manga bitoon a mamakandato ko kagagawii.
10 Piyamono iyan so manga kaka a wata sii sa Misir,

11 Na piyakaliyo niyan kiran so manga Israil
12 A nggolalan ko mabager a lima niyan ago mabebeter a barokan iyan.
13 Sinisi iyan so Mariga a Ragat na miyabagi;
14 Na piyakaripag iyan on so manga Israil ko look iyan;
15 Ogaid na piyangeled iyan on so Piraon ago so manga sondaro niyan sii ko Mariga a
Ragat.
16 Inagak iyan so manga pagtaw niyan sii ko disirto.
17 Piyaniksa iyan so manga ala i gees a dato;
18 Ago piyamono iyan so kikababantogan a manga dato,
19 Si Sihon a dato o manga Amoriyo;
20 Ago si Og a dato sa Basan;
21 Na inibegay niyan so manga lopa iran a posaka
22 A makewali o oripen iyan a Israil.
23 Kiyatademan tano niyan sii ko kiyapakadapanas tano;

24 Ka biyokaan tano niyan ko manga ridoay tano.
25 Pembegan iyan sa pangenengken so oman i baraniyawa.
26 Pepanalamati niyo so Tohan sa kasorgaan.

SABOR 137
So dii Miperego o manga Israil ko Kabibiyag iran
Sii ko kilid o manga lawasaig sa Babilon

na miyamangontod tano ron a miyamakasegad
igira a kiyatademan tano a Siyon.
2 Roo ko manga sapak a kayo

na piyamitin tano ron so manga kotiyapi tano,
3 Ka piyangniyan tano roo o miyamamiyag rektano sa kapelilanga tano kiran;
so peperarasay rektano na piyantonan tano iran sa kakeriyala
a tig iran a "Mbayoki kami niyo ko manga idaida sa Siyon."
4 Andamanaya i kipembayoken tano ko idaida o Allah

sii ko inged o manga rait?
5 O kalipati aken seka, hey Yarosalim,
na kalipatan o kawanan a lima ko so kapasang iyan.
6 Domeket so dila aken ko pelak aken
o di aken seka tatademi;
o di aken tatarimaa a Yarosalim a lebi aken a ipekebabaya.
7 Tademi ngka, ya Allah, so pinggolaola o manga Idomiyan

sii ko gawii a kiyatabana sa Yarosalim:
"Gebaa niyo." a inipelalalis iran,
"Gebaa niyo taman den ko manga onayan iyan."
8 Hey siti a Babilon a miyatendo a mbinasaan,

sayana a kebebaya so seop reka
sabap ko inikidia ngka rekami,
9 Sayana a kebebaya so pepemanikem ko manga iito a wata a ka
na go ipemapes iyan siran ko manga ator.
SABOR 138
Kapangangarapan sa Kapanalamat
Penalamatan ko seka, ya Allah, sa iklas ko poso aken;

sii ko hadapan o manga tohan na ndidaon ko seka a podi.
2 Sodiyod ako a somasangor ko soti a Timplo ngka
na podin ko so Ingaran ka
sabap ko gagaw ngka ago so kasasarigi reka,
ka inipangkat ka a lawan ko langon taman
so Ingaran ka ago so katero o ka.
3 Isako mananalo ako reka na inampon ako ngka,
na piyakawaraw ako ngka ko kiyapakabagera ngka ko niyawa ko.
4 Podin ka o langon a manga dato sa doniya, ya Allah,

igira a miyaneg iran so manga katero a poon ko ngari i ka.
5 Ipemagidaida iran so manga okitokit o Allah,
ka mala so bantogan o Allah.
6 Apiya pen roo sa poro so Allah
na tatagoon iyan sa ginawa so pepangalimbabaan;
na katawan iyan san sa mawatan so pepangimporoan.
7 Apiya pen pepaginetaw ako a kalilikopan a kasasamok

na lilindingen ka so kaoyagoyag aken;
pembeteren ka so barokan ka a pepekaren ko rarangit o manga ridoay aken,
ago ipesebet ka raken so kawanan a lima ngka.
8 Itoman raken o Allah so takdir iyan;
tatap so gagaw ngka sa taman sa pakataman, ya Allah,
di ngka pendarainonen so miyanga papasad o manga lima ngka.
SABOR 139
So Tarotop a Ongangen ago Kasiyap o Allah
Ya Allah, miyapariksa ako ngka den,
na katawan ako ngka.
2 Katawan ka so kapeko kabinteng aken;
sasaboten ka san sa mawatan so manga pamikiran aken.
3 Pekeilay ngka so kapeliyo ago so kapegiga aken;
kalalayaman ka so langon o manga okitokit aken.
4 Apiya da pen mipekas ko dila aken
na katawan ka den sa tarotop so peteroon ko, ya Allah.
5 Tetalikop ka raken ko mbalabala,
na ililinding ka raken a palad ka.
6 Sayana raken a piyakamemesa angkai a katao;
tanto anan a maporo a di so keoma ko a akal.
7 Anda ako den mangaday makasong a mabelag ako ko Roh ka?

Anda ko kapalagoyi so kamamasaan ka?
8 Opama ka manik ako sa kasorgaan na matatago ka roo;
o mbaal ako sa igaan ko kaden o miyamatay na ndodon ka pen.
9 O pen o lomayog ako ko pesebangan o alongan
o di na komaden ako sii sa sedepan ko sabala a ragat
10 Na apiya roo na pagagaken ako o lima ngka
ago kepetan ako ron o kawanan a lima ngka.
11 Opama ka mapangni aken ko maliboteng a itapok ako niyan,
o di na mbeloy a kagagawii so maliwanag a mikokokos raken
12 Na apiya so maliboteng na kena o ba reka maliboteng;
maliwanag reka so kagagawii a datar o kadaondaw,
ka ndatar reka so maliboteng ago so maliwanag.
13 Ka seka i miyaden ko pindalendaleman ko ginawa ko;

piyakatotoora ko ngka sii ko tiyan o ina aken.
14 Pepodin aken seka, ka sabelek ago piyakamemesa a kiyambaali raken;
piyakamemesa so manga pasad ka;
katawan ako ngka piyapiya.
15 Ka da reka mapagena so pito lapis a bago aken
isako kambaalan ako sa masolen
ago linimbag sii sangkai a didalem o doniya.
16 Miyailay ako o manga mata ngka sa da ako pen milotad,
na so langon a manga gawii a ookoran raken
na palaya den misosorat ko ribro ngka
sii ko da pen a ba on minipanagipoon.
17 Sayana raken a mala i bali so manga pamikiran ka, hey Tohan ko.
Tanto ini a miyakadakedakel.
18 O bilanga ko ini na lawan pen sa kadakel o manga peted.
Igira a pepekanaw ako na sisii ako reka pen.
19 O ba ngka bo pemonoa so manga rarata a taw, hey Tohan ko.
O ba raken bo pekaawa so manga talibono.
20 Di siran dii tetaro sa marata makapantag reka,
na ipeporo iran reka a ginawa iran a ipesopak iran reka so marata.
21 Ba aken di pekegowaden so siran oto a pekegowad reka, ya Allah,
ago ipekesisingay aken so pepamanopak reka?
22 Matatarotop a kipekegowaden aken kiran;
ibibilang aken siran a manga ridoay aken.
23 Pariksaa ko ngka, hey Tohan ko, na tokawi ngka so poso aken.

Tepengi ako ngka na tokawi ngka so manga pamikiran aken.
24 Ilaya ngka o ba aden a okitokit aken a makasisilay,
na nggonanaowa ko ngka ko lalan a da a ikepos iyan.
SABOR 140
Pangni sa Kalinding
Sabeta ko ngka, ya Allah, ko manga rarata a taw;

lindinga ko ngka ko manga tanganiyaya
2 A pepamagantangan sa marata sii ko manga poso iran
ago lalayon pepengondoy sa katitidawa.
3 Tatareman iran so manga dila iran a lagid o nipay;
so bisa a darpo na sisii ko manga modol iran.
4 Lidasen ako ngka, ya Allah, ko lima o manga rarata;

lindinga ko ngka ko manga tanganiyaya a kekadiyat sa kakirepang aken.
5 Miyakataan so manga takabor sa ipelitag iran raken;
miyakentay iran so manga iket o poket iran,
na go miyametad siran sa manga sampirot sii ko lalan a pagokitan ko.
6 Ya Allah, peteroon ko reka a "Seka i Tohan aken."

Pamakinega ngka, ya Allah, so kapenggoraok aken sa tabang.
7 Ya Allah a Mamaapaar, a so mabager a pepekasabet raken,
a pelinding ko olo aken sii ko gawii a katidawa,
8 Na di ngka mbegan ko manga rarata so masisingayo iran, ya Allah;
di ngka kiran pakipenggolalanen so ikekadiyat iran a marata,
ka o ba siran baden pangimporoan.
9 Pengnin ko a mitana ko olo o siran oto a lomilikop raken

so kasamok a ipepangangalek iran raken.
10 Manga oolog kiran so pekedeg a manga waga;
mamangilebad siran ko manga dadalem a galebo
a di siran on den pekagakap.
11 Di makambeken ko doniya so manga taliyantaan;
maraot o ikebinasa iran a morala so manga tanganiyaya.
12 Katawan aken a dii nggolalan o Allah so kokoman a matito sabap ko manga miskin
ago ipepanindeg iyan so kabenar o kikadodowaanan.
13 Matamataan a podin o manga oontol so Ingaran ka,
na keden so manga titito ko kamamasaan ka.
SABOR 141
Dowaa ko Magarib
Ya Allah, petelowan ko seka; nggagaani ako ngka somong.

Pamakinega ngka so lagam aken igira a pepananalo ako reka.
2 Matarima so kapendowaa aken a datar o doka a ipegadap reka,
ago so kapetapenay aken a datar o di reka dii soasoat igira a magarib.
3 Pakinggordiyai ngka so ngari aken, ya Allah;
pagipata ngka so pintoan o manga modol aken.
4 Di ngka pekiagaken so poso aken ko apiya antonaa kamarataan
sa kapakanggolaola ko sa bibid a manga galebek
a mirakes ako ko manga mama a dii mbabaradosa;
na di ako ngka pekaatoanga ko kapeken iran ko manga pipiya a pangenengken iran.
5 Pakisogaten ako ngka ko maontol a mama, ka limo anan;

pakimbongeti ako ngka on, ka lana anan ko olo aken.
Di den ai sengkaan o olo aken.
Ogaid na so pepangangarapanen aken

na tatap a sopak ko dii nggolaolaan o manga rarata.
6 Amay ka pengologen so manga olowan iran ko manga pampang
na ketokawan o manga baradosa a domadait kiran so manga katero aken.
7 Peteroon iran a
"Datar o dii kandadowa ago kapepangarasa ko lopa
a kiyapamangitagigay ko manga tolan aken ko ngari o kobor."
8 Ogaid na sii aken reka itotobos so manga mata ko, ya Allah a Kadnan aken;
sii ako reka pepagapas; di ako ngka peserakanen a ba di malilinding.
9 Lidasen ako ngka ko litag a tiyaan iran raken,
ago so manga sampirot angkoto a dii mbabaradosa.
10 Pakisikemen ka so manga rarata a taw ko rek iran bo a manga litag
a makalidas ako ron baden a da a rayorayo a ginawa ko.
SABOR 142
Pangni sa Tabang
Penggoraok ako sa matanog ko Allah;
ipekorot aken a lagam aken a pepangangampedian ako ron.
2 Pepanotolen ko ko hadapan iyan so panon aken;
sii ko hadapan iyan na pepayagen aken on so awid a akal aken.
3 Igira a pekikopay so niyawa ko

na seka i matao ko pekeokitan aken.
Sii ko lalan a pelalakawan aken
na kiyataanan o manga taw sa ipelitag raken.
4 Inengkaa ngka so kawanan aken na go ngka ilaya;
ka da den a ba raken tego sa ginawa.
Da den a keapasan aken;
da den a pegongo sa niyawa ko.
5 Penggoraok ako reka, ya Allah;

peteroon ko a "Seka i lindonga aken
ago aya ko bagian ko pagiingedan o kikaooyag."
6 Pakinega ngka so kapenggoraok aken,
ka tanto ako den a lolopiten.
Sabeta ko ngka ko pepamanatro raken,
ka tanto siran raken a mabager.
7 Pakaliyowa ko ngka ko kakalabosowan raken
kaan aken mapodi so Ingaran ka.
Samaoto na petimotimoan ako o manga oontol
sabap ko kiyapiyapiyai ngka raken.
SABOR 143
Pangni sa Tabang
Ya Allah, pamakinega ngka so kapepangangarapan aken;

tagoa ngka sa ginawa so kapenggoraok aken sa tabang.
Sabap ko kasasarigi reka ago so kapagiinontolan ka
na ampona ko ngka.
2 Di ako ngka pagokasi sa kokoman, a oripen ka,
ka da den a sakataw bo a oyagoyag a ba maontol sii ko hadapan ka.
3 Miyasatro ako o ridoay aken;

minisomek iyan so kaoyagoyag aken sii ko bote,
na miyapakakaden ako niyan ko maliboteng
a datar o siran oto a miyatey den miyamatay.
4 Sabap san na pekikopay so niyawa ko;
kiyadaan den sa inam so poso aken.
5 Peketademan aken so miyanga iipos a gawii;

perasamen ko so langon a galebek ka,
na pepamasaken ko so manga pasad o lima ngka.
6 Ipapalad aken reka so manga lima ko;
ikaawaw ka o niyawa ko a lagid o komigaw a lopa.
7 Ampona ko ngka nggagaan, ya Allah; pekepos so niyawa ko.
Di ngka raken pegenaa so paras ka
ka o ba ako baden madatar o siran oto a penga oolog ko kobor.
8 Pakitademi ngka raken oman mapita so da a ikeda iyan a gagaw ngka,
ka seka i sasarigan ko.
Toroon ka raken so lalan a kekedeg aken,
ka sii aken reka imbabayorantang so niyawa ko.
9 Sabeta ko ngka, ya Allah, ko manga ridoay aken;
sii ako reka pepekalindong.
10 Pangendaon ka raken so kanggolaolaa ko kabaya a ka,
ka seka i Tohan aken.
Maagak ako o Mapiya a Roh ka ko pantar a lopa.
11 Sabap ko Ingaran ka, ya Allah, na ongowi ngka so kaoyagoyag aken.

Sii ko kaontol ka na pokasa ko ngka ko karomasayan aken.
12 Na sabap ko gagaw ngka raken na polanga ngka so manga ridoay aken,
na binasaa ngka siran langon a perarasay raken,
ka oripen ako ngka.
SABOR 144
Kapepanalamat o Dato ko Kiyapakataban
Podin so Allah a Lakongan aken,

a pesinanaden iyan so manga lima ko ko kanggira,
ago so manga kemer aken sa katidawa.
2 Sekaniyan i masalinggagaw a Tohan aken ago kota,
a maporo a lindonga aken ago pepekalidas raken,
a aya ko kelong a ron ako pepagapas.
Pepakidaag iyan raken so manga nasiyon.
3 Ya Allah, antawaa so manosiya a pipikiren ka,

o di na so wata o manosiya a tatagoon ka sa ginawa?
4 So manosiya na lagid bo o sengaw;
so omor iyan na lagid o somasagad a along.
5 Kayangen ka so manga langit ka, ya Allah, na panog ka;

sekoa ngka so manga palaw, ka pemangebel siran.
6 Sogoa ngka so kilakilat na tayaken ka so manga ridoay;
panaan ka so manga gasa a ka na go ngka siran pakagorigawa.
7 Kawaa ko ngka san sa poro;
panabangi ako ngka ago kowaa ko ngka
a poon ko manga ala a ig,
a poon ko lima o manga rait
8 A so manga ngari iran na mapepeno a kapamokeg,
ago so kawanan a lima iran na dii sepa sa di benar.
9 Pegidaidaan ko seka sa bago a bayok, hey Tohan ko;

sii ko sapolo i tapes a kotiyapi na pemboboniboniyanan ko seka;
10 Seka a pembegay sa kapakataban ko manga dato,
ago pepekalidas ko Daod a oripen ka ko pekapatay a kampilan.
11 Panabangi ako ngka ago pokasa ko ngka ko lima o manga rait
a so manga ngari iran na mapepeno a kapamokeg,
ago so kawanan a lima iran na dii sepa sa di benar.
12 Mandiyadi na pembaloy so manga wata tano a manga mama

a lagid o manga pamomolan a mabager i kato sii ko kangoda iran,
ago so manga wata tano a manga babay
na penga lalagid o ookiran a manga polaos
ko rogo o torogan a ipepandara on.
13 So manga taliyong tano na penga pepeno a pitibarangan a pereperan.
So manga talon tano na penga bababad sa nggibonggibo
ago sesapolo nggibo sii ko manga pananateba tano,
14 Na so manga mama a sapi tano na pemakagoyod sa manga pepened.
Di den kegeba so manga kota tano, ago da den a kebiyag
aya pen o ba aden a makagoraok sa kapakamboboko sii ko manga lalan tano.
15 Rarakmatan so manga taw a giyanan i masosowa iran.

Rarakmatan so manga taw a aya iran Tohan na so Allah.
SABOR 145
Dikir a Podi
Mbentogen aken seka, hey Tohan ko a aya Dato;

podin ko so Ingaran ka sa taman sa pakataman.
2 Oman gawii na podin ko seka,
ago peselaselaan ko so Ingaran ka sa dayon sa dayon.
3 Mala so Allah a lebi a kepodi;

so kala iyan na di den ketakes.
4 So isa a apid na pemanotolen iran ko pekasalono a manga taw so manga pasad ka,
na pekalangkapen iran on so manga ala i gees a galebek ka.
5 Pembantaanan iran so kababantogan a menang o pangkatan ka,
na pendapatan so manga piyakamemesa ngka.
6 Pemanotolen iran so kapakagaga o piyakalekelek a manga pinggolaola ngka,
na saken peman na peyagen ko so kala a ka.
7 Peselaselaan iran so kala o kapiya ngka
ago ipegidaida iran sa kapekebebaya so kaontol ka.
8 Makalimoon ago masalinggagaw so Allah

a malanat i rarangit ago mala i limo.
9 Mapiya so Allah ko kalangolangon,
na ipepangalinggagaw niyan so langon a kaaden iyan.
10 So langon a inaden ka na podi reka, ya Allah,

na penalamatan ka o manga kaom ka.
11 Pemanotolen iran so bantogan o ndatoan ka,
ago pembantaanan iran so kabatowa a ka
12 Kaan katokawi o langon a taw so manga ala i gees a galebek ka
ago so kababantogan a pangkatan o ndatoan ka.
13 So ndatoan ka na da den a kaposan iyan a ndatoan,
na matatatap so kandadato o ka ko langon a kapepamagapidapid o masa.
Ipetoman o Allah so langon a initopa niyan,

na makalimoon sekaniyan ko langon a di niyan dii nggolaolaan.
14 Pegarain o Allah so oman i pekeoteng
ago pepakatindegen iyan piyapiya so oman i mabebekong.
15 Pegilay reka so langon a kaaden a mamakaiinam,
ka seka i pembegay kiran sa pangenengken iran sii ko osto a oras.
16 Pembekaren ka so lima ngka
na go pepakaosogen ka so oman i isa a baraniyawa ko kabaya iyan.
17 Magiinontolan so Allah ko langon a okitokit iyan,

ago makalimoon ko langon a di niyan dii nggolaolaan.
18 Marani so Allah ko langon a pepananalo rekaniyan,
a so langon a petelo ron sa iklas.
19 Ipetoman iyan so manga kabaya o siran oto a maaleken on;
pepamakinegen iyan so kapenggoraok iran sa tabang ago pesebeten iyan siran.
20 Pepagipaten o Allah so oman i isa a pekebabaya rekaniyan;
ogaid na so langon o manga rarata na peminasaan iyan.
21 Peteroon o ngari aken so podi ko Allah.

Mapodi o oman i kaaden so soti a Ingaran iyan
sa taman sa pakataman.
SABOR 146
So Podi ko Allah a Pepenabet

2 Podin ko so Allah taman den ko kaooyagoyag aken;
ndidaon ko a podi so Tohan aken taman ko kaooyagoyag aken pen.
3 Di niyo serigi so manga olowan,

a so matag baden manosiya a di makapenabang.
4 Amay ka lomiyo so niyawa iran na sonod siran ko bayanek;
sii den sangkoto a gawii na ketamanan so manga antangan iran.
5 Rarakmatan so taw a aya petebang on na so Tohan o Yakob,

a so panginam iyan na sii ko Allah a Tohan iyan
6 A Mimbaal ko langit, so lopa ago so ragat
a rakes o langon taman a madadalem on.
Lalayon sekaniyan kasasarigan;
7 Ipepanindeg iyan so kabenar o kikalolopit,
na pembegan iyan sa pangenengken so pepanga aaor.
Pepakaliyon o Allah so kikakalaboso;

8 Pepekanonon o Allah so kikabobota.
Pepakapamayandegen o Allah so kikabebekong;
pekebabayaan o Allah so manga oontol.
9 Pepagipaten o Allah so manga rait;
tatagikoren iyan so manga ilo ago so manga balo,
ogaid na pekeliden iyan so lalan o manga rarata.
10 Ndadato so Allah sa taman sa pakataman,

a so Tohan ka, hey Siyon, taman den ko langon a kapepamagapidapid o masa.
SABOR 147
So Podi ko Allah a Lebi a Mamaapaar

Sayana a mapiya so kadidaw sa manga podi ko Tohan tano,
ka ikasosoat ago mapapatot so kapepodiya on.
2 Pepakaasalen o Allah a Yarosalim;

pepakakasowin iyan so miyamangitaog a manga Israil.
3 Pepamolongan iyan so siran oto a maroropet i poso,
ago pepamabeden iyan so manga pali iran.
4 Tetendoon iyan so kadakel o manga bitoon,

na kabebetowan iyan sa ngaran so oman i isa kiran.
5 Kababantogan so Kadnan tano ago mala i kabarakat;
da den a pitetamanan o ongangen iyan.
6 Ipeporo o Allah so dii mangangalimbabaan,
ogaid na pepepaden iyan so manga rarata taman den ko bote.
7 Pagidaidai niyo so Allah sa kapanalamat;

mboboniboniyani niyo so Tohan tano ko kotiyapi.
8 Pesepengan iyan sa manga gabon so langit;
pepakioranan iyan so kalopaan,
ago pepakatoan iyan sa otan so manga bobongan.
9 Pembegan iyan sa pangenengken so manga binatang
ago so manga wata a kakowak igira a pepamaniyak siran.
10 Di niyan ipekebabaya so bager o koda,

aya pen o ba niyan ikasososat so kagaan i kapalalagoy o mama,
11 Ka aya ipekebabaya o Allah na so kikaaalek on,
a so siran oto a miinam ko da a ikeda iyan a gagaw niyan.
12 Selaselaa ngka so Allah, hey Yarosalim;

podiya ngka so Tohan ka, hey Siyon.
13 Ka pepakabageren iyan so manga galid o manga gimowa a ka,
ago peperakmatan iyan so manga taw a sisii reka.
14 Pepakalintaden iyan so manga temanaan ka,
ago pepakaosogen ka niyan ko lebi a malimegas a trigo.
15 Ipetoron iyan so sogoan iyan sa doniya;

tanto a magaan a kapekisampay o katero iyan.
16 Pekeyaten iyan so ilo a datar o tanggob,
na pekeyaren iyan so ating o lopa a datar o manga ombi.
17 Pepengologen iyan so giyaw niyan a datar o grabas;
antawaa i pekatiger ko matenggaw a pesogoon iyan?
18 Amay ka ipetoron iyan peman so katero iyan na petenoon iyan ai langon,
na pepakasamberen iyan so ndo iyan na pepamangondas so manga ig.
19 Miyapayag iyan so katero iyan ko Yakob,

a so manga taritib iyan ago manga kokoman sii ko Israil.
20 Da den a pinggolaolaan iyan sii a ped a nasiyon;
di iran katawan so manga kokoman iyan.
SABOR 148
Katawaga ko Alam sa Kapodiya ko Allah

Podiya niyo so Allah san sa kasorgaan,
podiya niyo san sa poro.
2 Podiya niyo sekaniyan, hey langon iyo a manga malaikat iyan,
podiya niyo, hey miyakadakedakel a kaaden iyan.
3 Podiya niyo sekaniyan, hey alongan ago olan,

podiya niyo, hey langon a pepamanindaw a manga bitoon.
4 Podiya niyo sekaniyan, hey pipeporoan a manga langit,
ago sekano a manga ig san sa kaporoan o manga langit.
5 Podiya iran langon so Ingaran o Allah,

ka somiyogo sekaniyan na miyanga aaden siran.
6 Tiyago iyan siran ko manga darpa iran sa taman sa pakataman,
ka migay sekaniyan sa sogoan a di iran den kelepas.
7 Podiya niyo so Allah sii sa doniya,

hey sekano a manga ala a binatang sa ragat
ago so langon a manga dadalem a kalodan,
8 So kilat ago so giyaw, so ilo ago so manga gabon,
so manga babager a ndo a pepanoman ko ipesogo iyan;
9 Sekano a manga palaw ago so langon a manga bobongan,
so manga kayo a pepamangonga ago so langon a kayo a sidro,
10 So manga binatang ago so langon a pangangayamen,
so manga pepamanola, ago so dii melalayog a manga papanok,
11 So manga dato sa doniya ago so langon a bangsa,
sekano a manga olowan ago so langon a ped a manga nakoda ko doniya,
12 So manga ngongoda ago so manga raga,
so miyanga lolokes ago so manga wata.
13 Podiya iran langon so Ingaran o Allah,

ka so bo so Ingaran iyan i lebi a maporo;
so bantogan iyan na sii ko poro o doniya ago so manga langit.
14 Inipangkat iyan so gees o manga pagtaw niyan;
pepodin sekaniyan o langon o manga kaom iyan,
ago so manga mbawataan o Israil, a so manga taw a marani rekaniyan.
SABOR 149
So Dikir a Podi
Pagidaidai niyo so Allah sa bago a dikir,

a so kapepodiya on sii ko kalilimod o manga kaom iyan.
2 Kabebaya ka, hey Israil, sii ko Tohan a Miyaden reka;

pakapiyaa niyo a ginawa niyo, manga taw sa Siyon, sabap ko Dato iyo.
3 Podiya niyo so Ingaran iyan a rakes o kaseyaw,
ago mboboniboniyani niyo sekaniyan ko garingking ago kotiyapi.
4 Ka ikasosoat o Allah so manga pagtaw niyan;
pepandaraan iyan so mangangalimbabaan sa kapakadaag.
5 Kabebaya baden so manga kaom iyan sangkai a bantogan;

pagidaida siran sa kapipiya a ginawa san ko manga igaan iran.
6 Matago ko manga ngari iran so manga podi ko Tohan
ago so dowa i garangan a pedang sii ko lima iran,
7 Sa kaseopi ran ko manga nasiyon
ago so kandanega iran ko madakel a taw,
8 Kaan iran mapatong sa manga rantay so manga dato iran
ago so manga sanasanaan iran sa manga sangkali a potaw,
9 Kaan iran matoman so misosorat a inikokom ko manga nasiyon.
Giyai so bantogan o langon o manga kaom o Allah.
SABOR 150
Podi ko Allah.

Podiya niyo so Tohan sii ko Timplo niyan;
podiya niyo sii ko mala i gees a kawang iyan.
2 Podiya niyo sekaniyan sabap ko manga kabarakat iyan;
podiya niyo sabap ko makalalawan a kala iyan.
3 Podin iyo ron so kapekaoniya ko bogiyong;

podin iyo ron so kotiyapi ago so alpa.
4 Podin iyo ron so garingking ago kaseyaw;
podin iyo ron so tatapesan a boniboniyan ago insi.
5 Podin iyo ron so kapekaoniya ko manga pandaopan;
podin iyo ron so matanog a kapembeting o manga pandaopan.
6 So oman i isa a aden a napas iyan

na podiya iran so Allah.
MANGA PANANAROON
MANGA PANANAROON 1
So Kipantag o manga Pananaroon
So manga pananaroon o Solaiman a wata o Daod ago dato sa Israil:
2 Inisorat ai a mikenal o manga taw ko kaongangen ago kapindiyara,

ago misabot iran ko manga katero a madalem i maana,
3 Ago misowa iran ko kambilangataw, kapagiinontolan, kapakatitito ago kapetiis.
4 Pekabegay ai sa sipat ko da a peleng iyan,
ago so pen so katao ko kangodaan a rakes o kapananggila.
5 O pemakineg sii so maongangen na keomanan so ilmo iyan,
na pekakowa on so somasabot sa ilaham
6 A kisabot iyan ko manga pananaroon ago manga bayambayanan,
ago so manga lalag o manga alim a rakes o manga pasoalan iran.
7 So kalek ko Allah na aya pekepoonan o katao,

ogaid na dii sodiin o manga lalong so ongangen ago so kapindiyara.
Manga Osiyat ko manga Kangodaan
8 Pakinega ngka, wata aken, so manga insarat o ama a ka,

na di ngka mbowangen so manga ndao o ina a ka,
9 Ka kelagid oto o mapiya i paras a sangkad o olo ngka,
ago manga salay o lig ka.
10 Wata aken, o maagak ka o manga baradosa

na di ka kiran pagayon.
11 Opama ka gomiraw siran a
"Onot ka rekami ka mamagayan tano sa mabono tano;

tibabaan tano sa da a matao ron so da a sala iyan;
12 Somayan tano sa darpa o miyamatay a lalameden tano siran a oyagoyag;
kedatar siran o piyangalogan ko galebo sii ko kabager iran pen.
13 Pengowaan tano so langon a pitibarangan a manga ala i arga a tamok
na pamenoon tano so manga walay tano ko mapeteban tano.
14 Na, pangeped ka rekami,
ka mbagibagiin tano langon so pekekowa tano"
15 Na di ka kiran pagonot, wata aken,

aya pen o ba ka dapo ko manga lalan iran,
16 Ka pepelalagoy so manga ai ran sa kanggolaola sa marata
na makatitiyagar siran den sa kapemono iran.
17 Matamataan a baden ilang so kateana ko ipelitag ko papanok
igira a pekeilay o papanok.
18 Ogaid na giyangkanan a manga taw na aya peteanan iran sa litag na giya ginawa iran;
aya pagaayanan iran mono sa masolen na so rek iran a manga niyawa.
19 Giyoto man i okoran ko langon a pepekalaba a nggolalan ko kapanganiyaya;
ipekowa ini ko niyawa o siran oto a di sii dii nggolaola.
Pepananalo so Ongangen
20 Pepelalis so ongangen sii ko manga lalan;

pepakatanogen iyan so lagam iyan sii ko manga padian,
21 Sii ko magogorigaw a mbalakan o manga karsada na pepananalo sekaniyan;
san ko manga gimowa o siti na di niyan dii teroon a:
22 “Hey sekano a manga aakala, ay katey a kapekebabayai niyo ko kada a peleng iyo?
Ay katey a kapipiyai ko mamakasodi ko kapakasodi iran,
ago so kipekegowaden o manga lalong ko ilmo?
23 O teobat kano ko di aken rekano dii kambongeti
na matamataan a pagododan ko sekano ko Roh aken,
ago pekitokawan ko rekano so manga lalag aken.
24 Ogaid na sabap sa minda kano mamakineg ko kiyapananalo aken,
ago da den a ba rekano miyakainengka ko kiyakawaa ko rekano,
25 Ago sabap sa da niyo tatapianen so langon a toma ko,
ago da niyo tarimaa so kiyambonget aken
26 Na singa ako baden ko kakemoralai rekano;
pegongatongat ako amay ka maoma kano o piyakalekelek,
27 Amay ka maoma kano o piyakalekelek a datar o kapekaoma o mabager a sobosobo,
ago masogat kano o kasiksaan a datar o barabarat,
amay ka mitemo rekano so karomasayan ago rata a ginawa.
28 “Amay ka magiyanan na penanalowan ako iran, ogaid na di ako sembag;

pembanogen ako iran sebenar, ogaid na di ako iran ketoon.
29 Kagiya inikagowad iran so katao,
ago da iran tomana so kalek ko Allah,
30 Ago sabap sa da iran tarimaa so toma ko,
ago pisodi iran so kiyambongeti aken kiran
31 Na ken iran baden so ipagonga o manga olaola iran,
na ikesemo iran so onga o manga rarata a kadiyat iran.
32 Ka so kapeteridadag o manga aakala na ipetay iran,
ago so dii kandarainon o manga lalong na aya kiran pekabinasa;
33 Ogaid na saden sa pepamakineg raken na makapeginetaw a malilinding ago
makalilintad,
a da a kalek iyan ko pekakaid."
MANGA PANANAROON 2
So Gona o Ongangen
Wata aken, tarimaa ngka so manga katero aken,

ago dalema ngka ko ginawa ngka so manga sogoan aken;
2 Pakinegen ka so tangila ngka ko ongangen
ago layama ngka so poso o ka ko kapepekasabot;
3 Pananalo ka sa kapakakowa ngka sa sipat
ago goraok ka sa matanog sa kabegi reka sa sabot;
4 Pangilobaa ngka ini a datar o pirak
ago mbanoga ngka a datar o igagadong;
5 Ka o nggolaolaa ngka ini na seboten ka so kalek ko Allah,
ago kekowa ngka so katao ko Tohan.
6 Ka so Allah i pembegay sa ongangen,
na pepekapoon ko ngari iyan so katao ago so sabot.
7 Titiyagaran iyan sa tabang so manga titito a taw;
sekaniyan i kelong o siran oto a magiinontolan,
8 Sa kapelindinga niyan kiran sii ko manga titito a lalan,
ka sisiyapen iyan so kapepaginetaw o manga kaom iyan.
9 Samaoto na kesabotan ka so kaontol, so katito

ago so kapetiis, a so oman i mapiya a okitokit.
10 Ka soled so ongangen ko poso o ka,
na ikesoat o niyawa ngka so katao.
11 So kapananggila na pegipat reka,
na so sabot na pekalinding reka
12 Sa kapekalidasa iran reka ko marata a lalan,
ago sii ko manga taw a bibid i katero
13 A pepamangawa ko manga titito a okita
sa kapelalakaw iran ko manga liliboteng a lalan,
14 A so siran oto a ikapipiya a ginawa iran so dii kambaradosa
ago ipekebabaya iran so kabibibid o manga rarata a taw,
15 A so manga taw a bekog so manga okita iran,
ago pekedadag siran sii ko manga lalan iran.
16 So ongangen na pekalidas reka ko babay a sebo,

a so barasina a pakagegedi so manga katero iyan,
17 A miyakaawa ko miyangaroma on sii ko kangoda niyan
ago miyakalipat pen ko inisepa iyan ko hadapan o Allah.
18 Ka so walay niyan na ipetondagay ko kapatay,
ago so manga lalan iyan na mitotompa ko darpa o miyamatay.
19 Da den a pekasong rekaniyan a ba makaasal
aya pen o ba sampain ko manga lalan ko kaoyagoyag.
20 Kagiya ka maoto na okiti ngka baden so manga lalan o manga pipiya a taw
ago kedega ngka so manga okita o manga oontol.
21 Ka so manga titito na aya pekakaden ko inged,
na so da a manga daway niyan i ketatap on;
22 Ogaid na so manga rarata na pepasen ko inged,
ago so dii mamakasela na pemadoten on.
MANGA PANANAROON 3
Manga Toma ko manga Kangodaan
Wata aken, di ngka pekalipati so inipangendao aken reka,

na tatapa ngka ko poso o ka so manga pandoan aken,
2 Ka ipekalendo siran o omor ka ko madakel a ragon,
ago pekabegay reka sa kamapiyaan.
3 Di ngka mbelaga sa ginawa ngka so kapepangalinggagaw ago so kapetoman sa pasad;
senggalain ka siran ko lig ka,
ago titiken ka ko pekesoratan ko poso o ka.
4 Amay ka magiyanan na ikelimo ka ago pemataanan a mapiya
sii ko hadapan o Tohan ago so manosiya.
5 Sarigi ngka so Allah sa iklas ko poso o ka

na di ngka senai so sabot ka.
6 Sii ko langon a di ngka dii nggolaolaan na pakinggonanao ka ko Allah,
ka pekatiton iyan so manga lalan ka.
7 Di ngka mbilangen a ginawa ngka a maongangen;

kaleken ka baden so Allah ago talikodi ngka so kamarataan,
8 Ka pekabolong ai ko lawas ka
ago ipelimegas o manga tolan ka.
9 Selaselaan ka ko Allah so tamok ka

ago so paganay a bagian ko langon a pekepantiyari ngka.
10 O nggolaolaa ngka ini na penga pepeno so manga taliyong ka a mitataralo a pereperan,
na solapayan so manga pananagoay ngka sa bago a arak.
11 Wata aken, di ngka pesodia so kapeparintaa reka o Allah

aya pen o ba ngka kararangiten so kapendanega niyan reka
12 Ka aya pepakatanoren o Allah na so pekebabayaan iyan
a datar o ipekidia o ama ko wata iyan a ikapipiya a ginawa niyan.
13 Rarakmatan so taw a miyabaloy a maongangen,

ago so miyakakowa sa sabot,
14 Ka tomo so pekelaba on a di so kelaba ko pirak,
na so ipegonga niyan na tomo a di so bolawan.
15 Mala pen i arga so kaongangen a di so manga montiya,
na da den a ba ngka mapesinganin a ba on pekalagid.
16 So kamboway a omor na sisii ko kawanan a lima niyan,
na sisii ko diwang a lima niyan so kakawasaan ago bantogan.
17 So manga lalan iyan na ikasosoat a manga lalan,
na so manga okita iyan na palaya lomilintad.
18 So kaongangen na kayo a pepangoyag ko siran oto a gomagakes on,
na mapiya i bobolos so siran oto a mananamar on komapet.
19 Miyakanggolalan ko ongangen na miyabangon o Allah so kaoonayan ko doniya,

na nggolalan ko sabot na piyakambeken iyan so manga langit ko darpa iran.
20 Nggolalan ko katao niyan na kiyapanga lelekaan so manga kadaleman,
na pegetek so manga gabon sa namog.
21 Wata aken, tatapa ngka sa ginawa ngka so kaongangen ago so kasipat
di ngka ini peliwata ko pamikiran ka;
22 Ikeoyag ai o ginawa ngka,
ago parahiyasan ko lig ka.
23 Mandiyadi na pekalalakaw ka ko lalan ka a sa da a ba reka pekabinasa,
na di den pen kisosong so manga ai ngka.
24 Igira a pegiga ka na di ka kelek,
ka amay ka magiga ka na pengenepan ka a torog.
25 Di ka kelek ko pekitekaw a piyakalekelek,
o di na so morala a ipetena ko manga rarata a taw,
26 Ka so Allah i melinding reka,
na di niyan pekilitagan so ai ngka.
27 Di ka pagenda nggolaola sa mapiya ko siran oto a kapapatotan on

igira a pekegaga ngka nggolaola.
28 Di ngka peteroa ko siringan ka a
"Kena a ba imanto; kasoy ka bo, ka ibegay aken reka mapita,"
igira aden a rek ka on a kibegay ngka.
29 Di ka pekediyat sa marata a ikebinasa o siringan ka

a mababaling ko marani reka a makasasarig.
30 Di ka pakipepewala ko apiya antawaa sa da a sabap iyan
amay ka da ka niyan kanggolaolai sa marata.
31 Di ngka kesigin so masarangit a taw

aya pen o ba ngka sowaa so apiya isa bo ko manga okitokit iyan,
32 Ka ipekesisingay o Allah so somisilay a taw,
ogaid na di niyan dii ngginawai so manga titito.
33 Pekisinta o Allah so walay o marata a taw,

ogaid na rarakmatan iyan so babalingan o manga oontol.
34 Di niyan dii sodiin so mamakasodi a manga takabor
ogaid na ipekelimo iyan so pepamangalimbabaan.
35 Makapekewali so manga oongangen sa bantogan,
ogaid na aya bo a mapekewali o manga lalong na kayaan.
MANGA PANANAROON 4
Mala i Kipantag so Ongangen
Pamakinega niyo, manga wata aken, so ipepanginsarat rekano o ama iyo;

tagoa niyo sa ginawa, ka aya niyo kapekasabot.
2 Mapiya so ilmo a ipembegay aken rekano,
kagiya ka maoto na di niyo pendarainonen so ipepangendao aken.
3 Isako wata ako pen sii ko walay o ama aken
a bago ako pen a mama a pakatatayaan o ina aken,
4 Na piyamando ako o ama aken, na pitero iyan raken a
"Tatapa ngka ko pamikiran ka so manga katero aken;
tomana ngka so manga sogoan aken, ka keoyag ka.
5 Kowa ka sa ongangen, kowa ka sa sabot;
di ngka pekalipati so di aken dii teroon aya pen o ba ngka silayi.
6 Di ngka telikodi so ongangen, ka pelindingen ka niyan;
kababayai ngka baden, ka siyapen ka niyan.
7 So ongangen na lebi a mala i kipantag;
sabap roo na pananamari ngka so ongangen,
na peda ngka ko langon a pananamaran ka so sabot.
8 Pakalebiya ngka so ongangen, ka ipengkat ka niyan;
mbentogen ka niyan amay ka nggakesen ka sekaniyan.
9 Ipepandara iyan ko olo ngka so limo,
ago mbegan ka niyan sa sangkad a parahiyasan."
10 Pamakineg ka, hey wata aken, na tarimaa ngka so di aken dii teroon,
ka pekadakel so manga ragon o kaooyagoyag ka.
11 Di aken seka dii nggonanaon ko lalan a kaongangen,
ago pegagaken aken seka ko manga oontol a okita.
12 Sii ko kapelalakaw ngka on na da den a ba pekabalang ko kapelakad ka,
na sii ko kapelalagoy ngka on na di ka kirepang.
13 Kakapeti ngka sebenar so minipanginsarat reka na di ngka den mbokai,
paratiyayaa ngka ini piyapiya, ka aya ngka kaoyagoyag.
14 Di ka ndapo ko pagokitan o manga rarata a taw
aya pen o ba ka lalakaw ko lalan o manga darowaka.
15 Lidasi ngka ini, di ka on pekarani;
silayi ngka baden na go ka taros.
16 Ka di siran pekatorog taman sa di siran makanggolaola sa marata,
na pekedaan siran sa torog taman sa aden a minilampes iran.
17 Ka aya iran pangenengken so kamarataan,
ago aya iran panginginomen so kapanganiyaya.
18 So pegokitan o manga oontol na datar o sinar o alongan ko kapekelibabas iyan

a pepekaliwanag taman sa mapita piyapiya.
19 Ogaid na so lalan o manga rarata a taw na datar o makapal a maliboteng;
di iran den katawan o antonaa i pekerepangan kiran.
20 Wata aken, tagoa ngka sa ginawa so di aken dii teroon;

pamakinega ngka piyapiya so manga katero aken.
21 Di ngka siran peliwati sa pamikiran ka;
pakasenepa ngka ko dalem o poso o ka,
22 Ka ipekeoyagoyag ai o siran oto a pepekakamal on
ago ipepekapiya o pito lapis a bago iran.
23 Totordowa ngka magipat so poso o ka,
ka aya pegembowatan o kaoyaoyag ka,
24 Belaga ngka ko ngari i ka so bibid a katero,
na pakawatana ngka sa ginawa ngka so manga modol a pepanaliba.
25 Pakatitowa ngka milay sa onaan so manga mata ngka
a aya ngka bo pegilain so pegantapan ka.
26 Rikima ngka piyapiya so lalan a pagokitan o manga ai ngka
na go aya ngka bo okiti so makambebeken on.
27 Di ka kori sa kawanan o di na sa diwang;
lidasen ka so ai ngka ko kamarataan.
MANGA PANANAROON 5
So Kapenanggilai ko Kasebo
Wata aken, tagoa ngka sa ginawa so ongangen aken

ago pamakinega ngka piyapiya so sipat aken
2 Kaan ka masowa so kapananggila
ago an katagoi sa katao so manga modol ka.
3 Ka so manga modol o babay a dii sina na pegetek on so gola a teneb,
na lebi a matilak so manga katero iyan a di so lana a olibi.
4 Ogaid na sii sa kaposan na mapait sekaniyan a di so teka,
ago magarang a lagid o pedang a dowa i garangan.
5 Petondagay so manga ai niyan ko kapatay;
pepemantek so kapelakad iyan ko kanarakaan.
6 Di niyan pepandapatan so lalan ko kaoyagoyag;
pemakadadag so manga lalan iyan, na di niyan den katawan.
7 Kagiya ka maoto na pamakinega ko niyo imanto, wata aken;

di ngka telikodi so peteroon ko.
8 Pakawatana ngka sangkoto a babay so lalan ka;
di ka den pekarani ko gimowa o walay niyan
9 Ka o ba ngka baden mibegay so bager ka ko salakaw a manga taw,
ago so kapepaginetaw ngka ko da a kapedi iyan,
10 Ago o ba baden maosog so manga mananangga ko kakawasaan ka
ago mitamok o salakaw a taw so di ngka dii kandokaw.
11 Na sii ko kapetay ngka na makaperego ka
amay ka mapos so sapo o ka ago so pito lapis a bago ngka,
12 Na peteroon ka a
"Ainaw, sayana aken a inikagowad so parinta
ago baden pisodi o poso aken so kapepakatanora raken.
13 Da aken paratiyayaa so manga goro aken
aya pen o ba aken piyakineg so siran oto a miyamanginsarat raken,
14 Na magaan den matarotop so kakebinasa ko
sii ko kamamasaan o langon o isa ka maginged."
15 Sii ka bo peginom ko rek ka a paridi

ago sii bo ko ig a pegembowat ko rek ka a bowalan.
16 Ba patot a pakalapain ka so bowalan ka sii ko manga lalan
ago so pepamangondas on a ig sii ko kaoladan?
17 Mbisai ngka ini a di den pakipembagian ko manga mananangga.
18 Pakirakmati ngka so bowalan ka,
na pakapipiyaa ngka a ginawa ngka sii ko babay
a miyapangaroma ngka isako kangoda ngka pen
19 A lagid sekaniyan o kakasiyan a bangelos ago mataid a saladeng.
Pakisoaten ka a ginawa ngka ko rareb iyan ko langon a masa
a pekegedian ka lalayon o kapekebabayai niyan reka.
20 Ino ka pekigedi, wata aken, ko sebo a babay?
Ino ngka nggakesa so rareb o karoma o salakaw a mama?
21 Ka so manga lalan o taw na dii mbantayan piyapiya o Allah,

na totoliken iyan so langon a di niyan dii nggolaolaan.
22 Ipelitag ko darowaka so manga olaola niyan a marata,
na tekesen sekaniyan o manga rantay o dosa niyan.
23 Ipetay niyan so kada a kipapaaren iyan sa ginawa,
a miyadadag sekaniyan sabap ko kala iyan i kalalalongan.
MANGA PANANAROON 6
So Kapakalidas ko Kalalalongan
Wata aken, o aden a piyangako ngka a otang o siringan ka,

o pisepaan ka so kapasadan o ped a taw,
2 O miyasakem ka o miyatero o ka
ago kiyalitagan o manga katero o ngari i ka
3 Na nggolaolaa ngka ini imanto den, wata aken, sa kapokasa ngka sa ginawa ngka
sabap sa miyapadalem ka ko kapaar o siringan ka:
Song ka on nggagaan; pangalimbabaanen ka a ginawa ngka
na go ngka sekaniyan akoli.
4 O ba ka baden pakatorog aya pen o ba ka deke.
5 Pokasa ngka a ginawa ngka a lagid o saladeng a pelagoy ko lima o panganganop,
ago lagid o papanok a pelagoy ko kiyalitagi ron o palilitag sa papanok.
6 Hey seka a mala i bokel, song ka ko manga pila

na inengkaa ngka so okitokit iran ago sowaa ngka on so kaongangen.
7 Ka apiya da a ba iran nakoda, o di na kapatas,
aya pen o ba dato
8 Na petimoon iran so kaoyagan iran igira a laon,
ka di iran dii tiyagaren iran so kekan iran ko rendeng.
9 Ay katey a kaiiga ka san, hey tapolan?
Anda i kapegnaw ngka ko katotoroga reka?
10 “Pekatorog ako pasin;" a mapetero o ka,
"di bo matey a kasaropa raken a torog;
pengalingkakep ako pasin a ndeke;"
11 Na giyoto i kapekatalingoma reka o kamimiskini a datar o tanganiyaya
ago so pen so kakokorangi reka sa kaoyagan a datar o mamonobono.
12 So da a oked iyan a taw a marata i olaola

na dii magenebeneb a dii tero sa bibid;
13 Pepamangerakerat sekaniyan,
ago ipetiniyas iyan so manga ai niyan,
ago ipeperopa niyan so manga kemer iyan.
14 Pekediyat sekaniyan sa marata sii ko dii mamagakal a poso iyan,
na lalayon sekaniyan pepangondoy ko manga taw sa kapakipepawala.
15 Sabap roo na kitekaw a katenai ron o morala,
na sakadiyap den a kambinasaa on sa da den a pekabolong on.
16 Aden a nem betad a ipekegowad o Allah,

mataan den a pito a ipekesisingay niyan:
17 So mipoporo a manga mata,
so bokeg a dila,
so manga lima a pepakatogaan iyan so rogo o da a sala iyan,
18 So pamikiran a pepagantangan sa marata,
so manga ai a madilapet a kapepelalagoy niyan ko kanggolaola sa samok,
19 So dii seksi sa di benar, a aya ipesengaw niyan na so manga kabokegan,
ago so taw a pepamola sa di kapagayonayon o manga magariyari.
So Kapakalidas ko Kasebo
20 Wata aken, paratiyayaa ngka so manga sogoan o ama a ka

na di ngka pekalipati so manga ndao o ina a ka.
21 Tetekesa ngka ini lalayon ko poso o ka,
na senggalain ka pen ko lig ka.
22 Igira a pelalakaw ka na makapenggonanao siran reka,
igira a pepekatorog ka na makapegipat reka ini,
na igira a pepekanaw ka na makipembitiyarai reka pen.
23 Ka giyangkai a manga sogoan na solo,
ago giyangkai a manga ndao na sindaw,
na so kapepakatitowa reka o manga toma iran
na aya lalan ko kaoyagoyag
24 A pepekalidas reka ko marata a babay,
a so pepekagawi a dila o sebo a babay a aden a karoma niyan.
25 Di ka pekigedi ko kataid iyan
aya pen o ba ka pakilitag ko maroyo a kapemata niyan.
26 Ka so sondal na siyasiyaan ka niyan
sa taman sa satebi bo a paan a malamba reka,
na so dii sina a babay na pepagayanan iyan so da a rowar on a niyawa ngka.
27 Ba aden a taw a mapangakop iyan so apoy ko bobon iyan
a ba di matotong so manga nditaren iyan?
28 Ba aden a taw a lomalakaw ko manga waga
a ba di malowis so manga ai niyan?
29 Na datar oto so mama a perembangen iyan so karoma o siringan iyan;
apiya antawaa i miyakakebot on na di den pekalidas ko kandanega on.
30 Di pesodiin o manga taw so tekew

o miyamanekew sa kabolongi niyan ko kaor iyan amay ka kiyaongosan.
31 Ogaid na o madakep sekaniyan na disomala a makapembayad sa pito takep a kadakel
iyan;
kibadal iyan on so langon a tamok ko walay niyan.
32 Ogaid na saden sa mama a makapesebo ko babay na da den a sabot iyan;
so di sii dii nggolaola na pembinasaan iyan a ginawa niyan.
33 Pelepedan sekaniyan ago kediyamanan,
na di den keponas so kayaan iyan;
34 Ka so kapenaod o karoma o babay na pepekaondoy ko gani niyan,
na da den a kapedi iyan ko kaseop iyan.
35 Di terima sa apiya antonaa a panginsalaan
aya pen o ba sekaniyan kapangangapini
apiya pen pembegan sa madakel a pamemegayan.
MANGA PANANAROON 7
So Sebo a Babay
Wata aken, paratiyayaa ngka so manga katero aken

ago tagoa ngka sa ginawa so manga sogoan aken.
2 Tomana ngka so manga sogoan aken, ka keoyag ka;
siyapa ngka so manga ndao aken a datar o od a mata ngka.
3 Gakota ngka ini ko manga kemer ka;
na titiken ka den ko pekesoratan ko poso o ka.
4 Bilangen ka so kaongangen a pagari ngka a babay
ago baloya ngka so sabot a madaseg ka;
5 Ka mapekalidas ka iran ko sebo a babay,
a so karoma o salakaw a mama a pekagawi so manga katero iyan.
6 Miyakaisa a gawii a romorongaw ako ko dirowasa o walay aken

7 Na miyailay aken so manga aakala a kangodaan.
Miyainengka aken kiran so isa a mangoda a mama a korang sa sabot
8 A pegokit ko lalan a ipesong ko mbalakaan a ron mababaling so isa a babay.
Di sekaniyan dii ndalakaw ko marani ko walay niyan
9 Sii ko kaperimon a pesedep so alongan,
a so den so kiyapakaliboteng iyan.
10 Na sarta den a lominiyo so babay a magalaw rekaniyan
a ndiditar a lagid o sondal ago makaakala i poso.
11 Kapasongan sekaniyan a babay ago somisilay;
di den tereg so manga ai niyan sa walay.
12 Igira kowan na sisii sekaniyan ko manga lalan,
na aden peman a sii matatago ko pekelimodan ko taw;
pepamagayan sekaniyan sii ko oman i mbalakaan a lalan.
13 Na giyakes iyan so mangoda ago inarekan iyan,

na sarta o makapal a paras,
na pitero iyan on a
14 “Aden a sapo o pikorban ko Allah sii sa walay,
ka initoman aken so manga samaya aken,
15 Na giyoto i sabap a kiyaliyo aken sa kapakipetoona aken reka;
pinggiloba aken seka na miyatoon aken.
16 Kiyadempasan aken so igaan aken
sa mbarambarang i warna a dinis a poon sa Misir,
17 Na kiyakekamotanan aken den sa mira, alos ago borok.
18 Na, ita roo. Pakasemosemon ta a ginawa ta ko kabebaya ko mababasa gawii;
pakapiyaan ta a ginawa ta ko kabebaya!
19 So karoma ko na da sa walay,
ka lomiyalakaw sa mawatan.
20 Miyawid sekaniyan sa pontir a mapepeno a pirak
na di mbeling taman sa mbiring so olan."
21 Na nggolalan ko kiyapamagayoki niyan on sebenar na miyaagak iyan so mangoda;

miyategel iyan sekaniyan a nggolalan ko manga titilak a katero iyan.
22 Sarta den a miyonot sekaniyan on
a lagid o mama a sapi a pesong ko sombalian on,
o di na lagid o saladeng a pekadapo ko sampirot
23 A kelitagan on taman sa kabasegan sa gasa so poso iyan,
ago lagid o papanok a magaan a kapegantap iyan ko litag
a di niyan katawan a kerambit on so niyawa niyan.
24 Kagiya ka maoto, wata aken, na pamakinega ko ngka imanto;

tagoa ngka sa ginawa so peteroon ko:
25 Di ngka pekigawiin so poso o ka ko olaola o babay a datar ai
aya pen o ba ka madadag ko manga lalan iyan.
26 Ka madakel a taw a miyapepad iyan a miyanga aangel;
bariboribo a manga mama a miyanga papatay niyan.
27 So walay niyan na aya lalan ko kanarakaan
a ipetondagay ko darpa o miyamatay.
MANGA PANANAROON 8
Pepananalo so Ongangen
Ba di pepananalo so ongangen?
Ba di pepakatanoga o sabot so sowara niyan?
2 Sii ko maporo a darpa a marani ko karsada
a ron dii makambabalaka so manga lalan na tomitindeg sekaniyan on;
3 Sii ko gimowa o siti ko obay o manga pintoan a ipesoled on
na ipepelalis iyan on a:
4 “Hey manga mama, sekano i petelowan ko;
pepakalangkapen aken so sowara ko ko langon o manosiya.
5 Sekano a manga aakala na paganada niyo so kapakasipat;
sekano a manga lalong, na sowaa niyo so kapakasabot.
6 Pamakineg kano, ka aya peteroon ko na lebi a mapiya;
aya kibengat ko manga modol aken na so manga titito a nganin.
7 So dii teroon o ngari aken na tito a benar,
ka ipekesisingay o modol aken so kateroa ko kamarataan.
8 So langon a katero o ngari aken na palaya ontol;
da den a ba on bibid aya pen o ba kapamagakal.
9 Palaya den ini masagogod ko taw a somasabot,
ago matito ko siran oto a ana ilmo iyan.
10 Aya ngka tomoa so ipepanginsarat aken a di so pirak,
ago so katao a di so lombos a bolawan,
11 Ka lebi a mala i arga so ongangen a di so manga montiya,
na da den a ba ngka mapesingayo a ba on pekatimbang.
12 “Saken, a so ongangen, na makatitimo kami ago so sipat;

makatatangan ako sa katao ago kapananggila.
13 So kalek ko Allah na aya den kipekegowaden ko marata.
So katekabor, so kapepangimporoan,
so marata a olaola ago so kabibida ko katero
na palaya aken den ipekegowad.
14 Rek aken so osiyat ago so kapepandapat;
aden a sabot aken ago gees.
15 Nggolalan raken na dii makandato so manga solotan,
ago dii makambaal so manga dato sa manga oontol a kokoman.
16 Nggolalan raken na makapepamaapaar so manga olowan,
a rakes o langon o manga ala i kadato ago manga pangongokom sa doniya.
17 Pekebabayaan ko so siran oto a pekebabaya raken,
na peketoon ako o langon a mananamar raken mbabanog.
18 Sisii raken so kakawasaan ago bantogan
a rakes o kemboway a kaadilan ago kapetegompiya.
19 Aya ipegonga ko na lebi pen a mapiya a di so bolawan, apiya pen so lombos a
bolawan,
ago so pantiyari a ipembegay aken na mala i gona a di so piyagaraw a pirak.
20 Pelalakaw ako ko lalan ko kaontol, sii ko manga pagokitan ko matito a kokoman
21 A pembegay ako sa kakawasaan ko siran oto a pekebabaya raken,
ago pepenoon ko so manga taliyonga iran.
22 “Matatangan ako o Allah ko kiyapooni niyan ko galebek iyan

sa da niyan pen kanggolaolaa ko miyanga oona a manga galebek iyan.
23 Ipoon ko da a poonan iyan a masa na minitoro ako den,
sii ko pagampaganay sa da pen kaadena ko doniya.
24 Isako da pen a manga kalodan na piyakagemaw ako den,
isako da pen a manga bowalan a pepamangembowat on so ig.
25 Isako da pen mabangon so manga palaw ko kikatatagoan kiran,
isako da pen a manga bobongan na piyakagemaw ako den,
26 Isako da pen mbaali o Allah so doniya a rakes o manga kalopaan on
o di na so bapiya antonaa a bayanek ko doniya.
27 Isako pakabekenen iyan so manga langit ko darpa iran na ndodoo ako den,
isako torisen iyan sa matiboron so liyawaw o kalodan,
28 Isako tagoon iyan so manga gabon sa poro
ago piyakambeken iyan piyapiya so manga bowalan ko kadaleman,
29 Isako ibetad iyan ko ragat so temanaan iyan
kaan di pekalepas so manga ig ko sogoan iyan.
Sii ko kiyapakatiknaa niyan ko manga onayan o doniya
30 Na kapapantagan ako den a makaaabay ron a datar o mapasang a panday;
gawii gawii den na ipekebabaya ako niyan
a lalayon mapipiya a ginawa ko sii ko kamamasaan iyan
31 Ago ikapipiya a ginawa ko so dalem a doniya a inaden iyan,
ago ipekebabaya aken so manga manosiya.
32 “Imanto den, manga wata aken, na pamakinega ko niyo;

rarakmatan so siran oto a pekedeg ko manga lalan aken.
33 Pamakinega niyo so ipepanginsarat aken ago pagongangen kano baden;
di niyo ai pendarainonen.
34 Rarakmatan so taw a pepamakineg raken
a gawii gawii den a kapakapagaalataw niyan ko manga gimowa aken
a pepanayaon ako niyan sii ko manga pintoan aken.
35 Ka apiya antawaa i miyakatoon raken na ketoon iyan so kaoyagoyag,
na kekowa niyan so limo o Allah.
36 Ogaid na apiya antawaa i di raken makatoon na pepakasakitan iyan a ginawa niyan;
na so langon a pekegowad raken na pekebabayaan iran so kapatay."
MANGA PANANAROON 9
So Kapenolon o Ongangen ago so Kalalalongan
Miyakambalay den so ongangen sa walay niyan,

na miyapakatindeg iyan on so pito timan a polaos iyan.
2 Miyatiyagar iyan so pangenengken a pagenaten iyan
ago miyapakaseosaog iyan so manga arak on,
na kiyanatan iyan pen so lamisaan iyan.
3 Miyasogo iyan den so talasogoay niyan a manga raga,
na pepananalo sekaniyan sii ko mipoporo a darpa ko siti:
4 “Bolos kano sii, hey langon iyo a manga aakala!"
Na sii ko taw a korang sa sabot na di niyan on dii teroon a:
5 “Song ka sii, na kan ka ko pangenengken aken
ago inom ka ko arak a tinimplaan aken.
6 Talikodi ngka so kalalalongan a manga olaola ngka, ka keoyag ka,
na kedega ngka baden so lalan ko kapakasabot."
7 Apiya antawaa i pembonget ko makasodi

na ba niyan den pakipenonongka a ginawa niyan,
na saden sa ndaway ko marata a taw na baden kekowa a sendita.
8 Di ngka pendawayi so makasodi, ka ikegowad ka niyan;
dawayi ngka so maongangen a taw, ka kebabayaan ka niyan.
9 Insarati ngka so maongangen, ka baden pepekaongangen;
pangendaowa ngka so magiinontolan, ka ipegoman iyan baden ko ilmo iyan.
10 So kalek ko Allah na aya kapepakapoon o kaongangen,

na so kakekenala ko Soti a Tohan na aya kapakasasabot.
11 Ka nggolalan ko ongangen na pendakel so manga gawii ngka,
ago pekalendo so omor ka.
12 O maongangen ka na mbalasan ka o kaongangen ka
ogaid na o makasodi ka na seka bo i kebadalan sii.
13 So kalalalongan na datar o kapasongan a babay

a aakala ago da a miyasowa iyan.
14 Moontod sekaniyan ko pintoan o walay niyan,
sii ko ontoda ko mipoporo a darpa ko siti
15 A pepananalowan iyan so manga taw a pepamanagad roo
a mapantek a kapelalakaw iran ko manga lalan iran:
16 “Bolos kano sii, hey langon iyo a da a peleng iyan!"
Na sii ko taw a korang sa sabot na di niyan on dii teroon a
17 “So piyanekaw a ig na mikepiyapiya,
na ikasosoat so paan a pageemaan a kapekena on!"
18 Ogaid na di katawan o pepemakaneg on a ndodon so miyamatay,
ka so manga banto niyan na sii ko kadaleman ko kanarakaan.
MANGA PANANAROON 10
So manga Pananaroon o Solaiman
Giyai so manga pananaroon o Solaiman:
So wata a maongangen na aya ipekebabaya o ama iyan,

ogaid na so lalong a wata na ipekerata a ginawa o ina iyan.
2 So kakawasaan a aya minikowa on na kamarataan na da a kelaba on,

ogaid na so kapaginontolan na mapekalidas ka niyan ko kapatay.
3 So Allah na di niyan pekiongosan so maontol a taw,

ogaid na pegalangan iyan so singanin o manga rarata.
4 So lima a bobokelen sa kanggalebek na ipekemiskin o taw,

ogaid na so lima o matordon na ipekewasa niyan.
5 So pepenimo sa pereperan igira a pangolaon na maongangen a wata a mama,

ogaid na so baden pakatotorog sii ko iraragon na piyakayaya a wata.
6 So manga rakmat na pepekatana ko olo o maontol a taw,

ogaid na so ngari o manga rarata na ipesolen iyan so kapanganiyaya.
7 Rakmat so katatademi ko magiinontolan,

ogaid na keredak bo so ngaran o manga rarata.
8 So maongangen i poso na peterima sa manga sogoan on,

ogaid na so dii mberak a lalong na kebinasa.
9 Saden sa pepaginetaw a magiinontolan na pepaginetaw a makasasarig,

ogaid na saden sa pembibiden iyan so manga okitokit iyan na kerinayag.
10 So taw a pepangerakerat sa marata a pamikiran na pepekambaal sa samok,

na so dii mberak a lalong na kebinasa.
11 So ngari o maontol a taw na bowalan o kaoyagoyag,

ogaid na so ngari o manga rarata na ipesolen iyan so kapanganiyaya.
12 So kagowad na pepekaondoy sa kambobono,

ogaid na so kakekalimoay na pepekasapeng ko langon a manga ribat.
13 So ongangen na sisii ko manga modol o somasabot,

ogaid na so badas na titiyagaren ko likod o da a sabot iyan.
14 Pepanaliyong so manga oongangen sa ilmo sa ginawa iran,

ogaid na so ngari o lalong a taw na ikebinasa niyan sa magaan.
15 So tamok o kawasa na aya niyan mabager a kota,

ogaid na aya ipekebinasa o manga miskin na so kamimiskini kiran.
16 Aya pekibayad ko maontol a taw na kaoyagoyag,

ogaid na aya pekesokat o marata a taw na daneg.
17 So taw a tatagoon iyan sa ginawa so parinta na pekedeg ko lalan ko kaoyagoyag,

ogaid na saden sa di terima sa kapepakatanora on na pekedadag.
18 So taw a pepagemaan iyan so kagowad na bokeg i modol,

na so pepekalangkap sa kapamaganta na lalong.
19 Igira a pepakadakelen so manga katero na di on den mabebelag so kapakasela,

ogaid na so penggenggenen iyan so manga modol iyan na maongangen.
20 So manga katero o maontol a taw na lagid o piyagaraw a pirak,

ogaid na so manga pamikiran o marata a taw na maito a kasodaan iyan.
21 So manga modol o maontol na ipekeoyag o madakel a taw,

ogaid na pepematay so manga lalong sabap ko kada a sabot iran.
22 So rakmat o Allah na aya ipekewasa,

na di niyan ai pagomanan sa awid a akal.
23 Aya ipeketembang o lalong na so dii kanggolaola sa samok,

ogaid na aya ikasosoat o somasabot na so kapegongangen.
24 So ipekelek o marata a taw na aya on pekatana,

ogaid na so masisingayo o manga oontol na aya on imbegay.
25 Igira a miyaipos so mabager a barabarat na miyada mambo so marata a taw,

ogaid na makambebeken so magiinontolan sa taman sa pakataman.
26 Lagid o masem ko manga ngipen o di na so bel ko manga mata,

na datar oto mambo so mala i bokel ko siran oto a pesogo on.
27 So kikaleken ko Allah na ipekalendo o omor,

ogaid na pepakilebatan so manga ragon o manga rarata.
28 So panginam o manga oontol na pekiarong ko kapipiya a ginawa,

ogaid na da a keondasan o pakatatalingomaan o manga rarata.
29 So lalan o Allah na aya kota o taw a magiinontolan,

ogaid na ikebinasa ini o siran oto a dii mbabaradosa.
30 Di den kebadot so maontol,

ogaid na di ketatap so manga rarata ko inged.
31 So ngari o maontol na pekibayan on so ongangen,

ogaid na kepotol so dila a bibid i katero.
32 Katawan o modol o maontol so patot a peteroon,

ogaid na so bo so bibid i katawan tero o ngari o manga rarata.
MANGA PANANAROON 11
Ipekegowad o Allah so di ontol a timbangan,
ka so tarotop a panimbang na aya niyan ipekebabaya.
2 Igira a miyangimporoan ka na magaan ka makakeya,

ogaid na so pepangalimbabaan na ndodon so ongangen.
3 So kapetiis o manga titito na aya kiran makapenggonanao,

ogaid na so kabibibid o manga lalim na ikebinasa iran.
4 So kakawasaan o taw na da a gona niyan sii ko gawii a kapakapemborngat o rarangit o

Allah,
ogaid na so kaontol iyan i pekalidas on ko kapatay.
5 So kaontol o kikadidiyangka na pepekatito ko lalan iran,

ogaid na so marata a taw na ikepepad iyan so kamarataan iyan.
6 So kaontol o manga titito i pepekapanabang kiran,

ogaid na so manga lalim na kilitag kiran so marata a singanin iran.
7 Amay ka matay so marata a taw na kionong on so panginam iyan;

keda on bo so langon a iinamen ago pananamaran iyan.
8 Pekepokas so maontol a taw ko samok

ka sii baden pepekatana ko marata a taw.
9 Nggolalan ko ngari iyan na pekebinasa o madodosa a taw so siringan iyan,

ogaid na so katao i pekilidas o maontol.
10 Igira a mapiya i bobolos so manga oontol na mapipiya a ginawa o siti,

na igira a miyanga aada so manga rarata na madakel a pepamangogiyab sa kapekebabaya.
11 So kararakmati ko manga titito na ipepangosor o siti,

ogaid na so ngari o manga rarata na ipekebinasa niyan.
12 Saden sa pepagitowitoon so siringan iyan na korang i sabot,

ogaid na so maongangen a taw na baden romerenek.
13 So tomangondor na pepayagen iyan so manga pageenesen,

ogaid na so kasasarigan a taw na ba niyan den petongkopa.
14 O di manggonanao so nasiyon na keoteng ini,

ogaid na so madakel a mosawira on na aya niyan kalilinding.
15 Saden sa pegako ko otang o ped a taw na mataan den a kelapis,

ogaid na so pesengka sa kapengakowi ron na di kekaidan.
16 So makalimoon a babay na kebantogan,
ogaid na so dii mangarasi a manga mama na aya bo a pekekowa iran na tamok.
17 So masalinggagaw a mama na di niyan dii kapiyapiyaan a ginawa niyan,

ogaid na so masingit a mama na ba niyan den pekebinasai a ginawa niyan.
18 So pekesokat o marata a taw na baden pepekaakal,

ogaid na saden sa pepamola sa kapaginontolan na pekesokat iyan so tito a sokay.
19 Pekiarong so kapaginontolan ko kaoyagoyag,

ogaid na saden sa mananamar sa kamarataan na kiarong ai ko kapetay niyan.
20 Ipekesisingay o Allah so siran oto a mabibibid i poso,

ogaid ipekebabaya iyan so kikadidiyangka i olaola.
21 Matatangked a di den kelepas so marata a taw ko kandanega on,

ogaid na pekalidas on so manga oontol.
22 Lagid o kaningkir a bolawan ko ngirong o baboy

so mataid a babay a di matao makasenggaya.
23 So singanin o manga oontol na aya bo a ondas iyan na kamapiyaan,

ogaid na so panginam o manga rarata na sii bo pekiarong ko kararangit.
24 Aden a ped a taw a pepemegay sa madakel a baden pekeomanan so

rek iyan;
na aden mambo a tatagoon iyan so patot a kibegay niyan na baden pekemiskini.
25 So maloag i poso na pekapiya so bobolos iyan;

na apiya antawaa i petebangan iyan so ped na tebangan mambo.
26 Kesintaan o manga taw so mama a pegakeren iyan so pereperan a di pepesa,

ogaid na perakmatan so mama a di on dii pesa.
27 So taw a pepanagontaman sa mapiya na ipekelimo,

ogaid na saden sa dii mbabanog sa kamarataan na kitana on den.
28 Apiya antawaa i sasanaan iyan so kakawasaan iyan na baden kepepad.

ogaid na so manga oontol na pekarimpoong a datar o lomolombay a raon.
29 So taw a pepakaawiden iyan a akal so pamiliya niyan

na da den a ba niyan mapekewali a rowar ko ndo,
na so lalong na mapengongoripen o maongangen a taw.
30 Aya ipegonga o maontol na lagid o kayo a pepangoyag,
na so pepekasabet ko manga niyawa o manga ped na maongangen.
31 O mbalasi so manga oontol sii sa doniya

na taralebi pen a mbadalan on so manga rarata ago so manga baradosa.
MANGA PANANAROON 12
So pekebabaya sa parinta na pekebabayaan iyan so katao,
ogaid na so pekegowad ko kapepakatanora on na lagid o binatang.
2 So mapiya a taw na pekekowa niyan so limo o Allah,

ogaid na peselaan o Allah so dii magantangan sa marata.
3 Di mapakapembeken so taw a nggolalan ko kadostaan,

ogaid na di den kebadot so bekaw o manga oontol.
4 So mapiya i parangay a babay na aya sangkad o karoma niyan,

ogaid na so ipekaito a babay na ipeperedak o manga tolan iyan.
5 So manga antap o manga oontol na palaya den matito,

ogaid na baden kapamagakal so mosawir o manga rarata.
6 So manga katero o manga rarata na matataan a pekapatay,

ogaid na so ngari o manga titito na aya iran kilidas.
7 Pekepepad so manga rarata a taw a da den a kebabadan kiran,

ogaid na ketatap so kapekebabad o manga oontol.
8 Pekipodi ko taw so kaongangen iyan,

ogaid na mapesodi so bibid i poso.
9 Tomo pen ko mitatanan a taw a dii nggalebek sa kaoyagan iyan

a di sa ba niyan baden pembantoga a ginawa niyan a da a ba niyan pangenengken.
10 So maontol a taw na pepagongowan iyan so kaoyagoyag o ayam iyan,

ogaid na apiya so kapepangalinggagaw o manga rarata na kasingit.
11 So dii mbasok ko lopa iyan na kitaralo so kekan iyan,

ogaid na so mananagontaman ko da a gona niyan na da a sabot iyan.
12 Ipekebabaya o marata a taw so pekekowa niyan a nggolalan ko kamarataan iyan,

ogaid na peteribonga so bekaw o manga oontol.
13 So marata a taw na pekelitagan o dii kapakandosa o manga modol iyan,

ogaid na pekepalagoyan o maontol so kamaregenan.
14 Ipekeosog o taw so manga pipiya a nganin a nggolalan ko onga o ngari iyan,

na so galebek o manga lima niyan na aya on ipembadal.
15 Aya katao ron o lalong na ontol so kapepaginetaw niyan,

ogaid na so maongangen na pepamakineg ko toma.
16 So kapepegoteg o lalong na pekerinayag sa magaan,

ogaid na so taw a maongangen na pepakalepasen iyan so ipegitowito on.
17 So benar a saksi na ontol so ipeseksi iyan,

ogaid na so bokeg a saksi na dii mamagakal.
18 Aden a pekeolopan tero a pepekapali so manga katero iyan a datar o pedang,

ogaid na pepekabolong so dila o maongangen.
19 So modol a dii tero sa tito a benar na ketatap sa taman sa pakataman,

ogaid na so bokeg a dila na baden somasagad.
20 Sisii so kapamagakal ko poso o siran oto a kekadiyat sa marata,

ogaid na mabebebaya so siran oto a pepenolon sa kalilintad.
21 Da a pekakaid a ba kitemo ko maontol a taw,

ogaid na so manga rarata na pekesemo ko kamarataan.
22 Ipekesisingay o Allah so pepamokeg a manga modol,

ogaid na ipekebabaya iyan so siran oto a petoman sa pasad.
23 So masanggila na pepagemaan iyan so katawan iyan,

ogaid na pekepayag o manga lalong so kalalalongan iran.
24 Makapemaapaar so lima a matordon i galebek,

ogaid na so kala i bokel o taw na pekiarong ko kapengongoripena on.
25 So rata a ginawa o taw na aya on pepekadag,

ogaid na so balilimoon a katero na ipekapiya niyan.
26 So magiinontolan a taw na aya dii makanggonanao ko siringan iyan,

ogaid na so lalan o manga rarata na pekadadag kiran.
27 So tapolan na di niyan kesikem so peganopen iyan,

ogaid na so matordon i galebek na kekowa niyan so mala i arga a tamok.
28 Sii ko lalan ko kaontol na ndodon so kaoyagoyag,

na sii ko kapekedega on na da on so kapatay.
MANGA PANANAROON 13
So maongangen a wata na peterimaan iyan so ipepanginsarat o ama iyan,
ogaid na so makasodi na di pemakineg ko di ron dii kambongeti.
2 Ipekebabaya o taw so manga pipiya a nganin a aya ipegonga o ngari iyan.

ogaid na aya masisingayo o manga tagakal na kapanalimbot.
3 So taw a penggenggenen iyan so manga modol iyan na pelindingen iyan so kaoyagoyag

iyan,
ogaid na saden sa pekeyaten iyan so ngari iyan a mala na kebinasaan.
4 So mala i bokel na da den a ba niyan kekowa ko sisingayoon iyan

ogaid na so manga kabaya o matotordo i galebek na peketoman sa tarotop.
5 Ipekegowad o maontol a taw so kapamokeg,

ogaid na piyakasisingay ago piyakayaya so olaola o marata a taw.
6 So kaontol na aya pepekaipat ko taw a magiinontolan i olaola,

ogaid na so kamarataan i pepekadaag ko baradosa.
7 Aden a somasayan sa tatamoken ogaid na da den a rek iyan;

na aden pen a ped a somasayan sa miskin, ogaid na mala a kakawasaan iyan.
8 So kakawasaan o taw na pekaaon ko kaoyagoyag iyan,

ogaid na so miskin na di pemakineg ko apiya antonaa a ipepagita on.
9 So solo o manga oontol na masigay a kapesindaw niyan,

ogaid na pekepaparempareng so palitaan o manga rarata.
10 So maratabat na aya bo a pekionga niyan na rido,

ogaid na so ongangen na sii peketoon ko siran oto a peterima sa osiyat.
11 Pekeagos so kakawasaan a malebod a kiyakowaa on,

ogaid na saden sa pepegerot sa pirak na mapekadakel iyan baden.
12 So kapekesendod o iinamen na ipesekit o poso,

ogaid na so kapeketoman o sisingayoon na lagid o kayo a pepangoyag.
13 Saden sa dii sodi ko toma na ipetemo iyan sa ginawa niyan so kabinasaan,

ogaid na mbalasan so pekelek ko sogoan.
14 So manga ndao o maongangen na aya bowalan a pepangoyag

a pepekalidas ko taw ko manga litag o kapatay.
15 So mapiya a kapakasabot na pekikowa sa limo,

ogaid na maregen so lalan o dii mamakatipo.
16 Oman i maongangen a taw na pepakipaar iyan ko katao so di niyan dii nggolaolaan,

ogaid na so lalong na pesewaan iyan so kalalalongan iyan.
17 So marata a pesogoon na pekeolog ko kamarataan,

ogaid na so kasasanaan a ambasador na pepekabegay sa kalilintad.
18 Kemiskinan ago keyaan so taw a pesengkaan iyan so parinta,

ogaid na saden sa tegoon iyan sa ginawa so kapetenora on na kebantogan.
19 So kapeketoman o kabaya na mamis ko niyawa,

ogaid na ipekesisingay o manga lalong so kageneki ran ko marata.
20 So taw a dii makipelayok ko manga oongangen na pepekaongangen mambo,

ogaid na saden sa ipageepeda iyan so manga lalong na kebinasaan.
21 So morala na petelokon ko manga baradosa,

ogaid na so kamapiyaan na aya imbalas ko manga oontol.
22 Kebegakan o mapiya a mama sa posaka so manga wata o manga wata iyan,

ogaid na so manga tamok o manga baradosa na titimoon a keosbaan o manga oontol.
23 Masiken a magodar so dii mbasokan o miskin sa madakel a pereperan,

ogaid na pepayopasen ai sabap ko kakokorang o kaontol.
24 So taw a di niyan dii ndarainon lomilit so wata iyan na ipekegowad iyan,

ogaid na so pekebabaya ko wata iyan na pipiyapiyaan iyan marinta.
25 So maontol a taw na pepekakan sa ipekesemo niyan,

ogaid na pekeoran so tiyan o manga rarata.
MANGA PANANAROON 14
So maongangen a babay na pekebangon iyan so walay niyan,
ogaid na kebinasa ini o lalong a babay a nggolalan ko niyan dii nggolaolaan.
2 So kapagiinontolan o taw na aya niyan kipekeleken ko Allah.

ogaid na so kapekebibid iyan i olaola na aya di niyan on dii kasodia.
3 Ipeleped ko lalong so ngari iyan a pepangimporoan,

ogaid na so modol o manga oongangen na pepekalinding kiran.
4 Lompiyo so kodal a da a ba on karabaw,
ogaid na so kapekeragon ko madakel a pereperan na nggolalan ko bager o karabaw.
5 So kasasarigan a saksi na di pegakal,

ogaid na so peseksi sa di benar na ipesengaw niyan so manga kabokegan.
6 So makasodi na apiya pen mananamar sa ongangen na di niyan kekamal,

ogaid na so katao na malebod a kapekekowaa on o makasasabot.
7 Pakawatan ka ko lalong a taw,

ka da den a keneg ka a kaongangen a poon ko manga modol iyan.
8 So kaongangen o masanggila a taw na so kaperasama niyan ko manga okitokit iyan,

ogaid na so kalalalongan o manga lalong na di kiran dii mamagakal.
9 So manga lalong na di iran tegoon sa ginawa so kapepakasela iran,

ogaid na ikasosoat o Allah so kapagiinontolan o manga taw.
10 So bo so poso o taw i matao ko kapekepapaiti ron,

na da den a ped a ba makapembagian ko kapekebabaya iyan.
11 So walay o marata a taw na kegeba,

ogaid na pepangosor so kakadenan o maontol.
12 Aden a lalan a aya katao ron o taw na ontol,

ogaid na sii ko keposan on na lalan bes ko kapatay!
13 Apiya sii ko kapepakasinga o taw na masiken a makandadamar pen so poso iyan,

na igira a miyaipos so dii kakeriyala na masiken a aden pen a kararata a ginawa niyan.
14 So taw a dii teridadag na tarotop a kibadal on so manga olaola niyan,

na mbalasan so mapiya a taw ko rek iyan a okitokit.
15 So aakala na peparatiyaya ko oman i katero a pekeneg iyan,

ogaid na so masanggila na perikimen iyan piyapiya so pesongowan iyan.
16 Masanggila so maongangen a taw ago pelidasan iyan so kamarataan,

ogaid na so lalong na pekeonaona ago masarakanen.
17 So raboraboten na dii makanggolaola sa kalalalongan,

na ipekegowad o manga taw so kekadiyat sa marata.
18 So manga aakala na mapeposaka iran so kalalalongan,

ogaid na pesengkadan sa katao so madalem i panarima.
19 Pekasodiyod so manga rarata ko hadapan o manga pipiya,
ago pekasodiyod so manga baradosa sii ko manga gimowa o manga oontol.
20 Apiya so manga siringan o miskin na ipekegowad iran sekaniyan,

ogaid na so kawasa na madakel a pekebabaya on.
21 So di niyan dii sodiin so siringan iyan na dii makandosa,

ogaid na rarakmatan so ana kapedi iyan ko kikadodowaanan.
22 Ba di pekedadag so siran oto a pepagantangan sa marata?

Ogaid na ikelimo ago kesarigan so siran oto a pepagantangan sa mapiya.
23 Apiya antonaa a galebek na ipekalaba,

ogaid na amay ka katero bo na pekiarong ko kamimiskini.
24 Aya sangkad o manga oongangen na so kaongangen iran,

ogaid na so kalalalongan o manga lalong na aya iran ipekalalong.
25 So dii seksi sa tito a benar na pepekasabet ko manga niyawa,

ogaid na so dii tero sa manga kabokegan na baden pepekatipo.
26 So kalek ko Allah na pepekabegay sa mabager a kapakasasarig,

na pekalindong on so manga wata iyan.
27 So kalek ko Allah na aya bowalan a pepangoyag

a pepekalidas ko taw ko manga litag o kapatay.
28 So madakel a pagtaw o dato na aya on pekibantog,

ogaid na so kada a pagtaw o dato na aya niyan ikebinasa.
29 So taw a kena a ba malebod kararangiti na mala i sabot,

ogaid na so malebod makanggani na ipepangkat iyan so kalalalongan.
30 So tetana a poso na aya ipekeoyagoyag o lawas,

ogaid na so kariit na aya ipekeredak o manga tolan.
31 So taw a pepangasaben iyan so manga miskin na mapepekaito iyan so Allah a

Miyaden kiran,
ogaid na saden sa ipekelimo iyan so mindadarainon na pembantogen iyan so Allah.
32 Ipembaba so marata a taw sii ko di niyan dii kandosa,

ogaid na so maontol na apiya sii ko kapetay niyan na aden a pekeapasan iyan.
33 Tomitikna so ongangen ko poso o somasabot,

na apiya sii ko look o manga lalong na pepakikilala ini.
34 Nggolalan ko kapagiinontolan na pekipangkat so nasiyon,

ogaid na so dii kapakandosa na ipepakaito o apiya antonaa inged.
35 Ipekelimo o dato so mapasang a sanasanaan,

ogaid na pekerarangitan iyan so sanasanaan a piyakayaya on.
MANGA PANANAROON 15
So malemek a kasembag na mapekalenggaw niyan so kararangit,
ogaid na so masarangit a katero na pekaondoy sa gani.
2 So dila o maongangen na mapiya so di niyan dii kateroa ko katao,

ogaid na so ngari o lalong na dii makamberak sa kalalalongan.
3 So manga mata o Allah na sisii ko apiya anda

a tetentengan iyan so manga rarata a taw ago so manga pipiya.
4 So dila a ipetegompiya na lagid o kayo a pepangoyag,

ogaid na amay ka ndodon so kabibibid na pekeropet iyan so niyawa.
5 Dii sodiin o lalong so kapeparintaa on o ama iyan,

ogaid na saden sa tatagoon iyan sa ginawa so kapetenora on na madalem i panarima.
6 So walay o maontol a taw na matatago on so mala a kakawasaan,

ogaid na so pekepantiyari o marata a taw na pepekaosod on sa awid a akal.
7 So manga modol o manga oongangen na pepekalangkap ko katao,

ogaid na kena a ba datar oto so pamikiran o manga lalong.
8 Ipekesisingay o Allah so korban a ipesepaat on o rarata a taw,

ka aya ipekesoat iyan na so kapepangangarapan o manga titito.
9 Ipekesisingay o Allah so okitokit o marata a taw,

ogaid na pekebabayaan iyan so taw a mananamar maginontolan.
10 Masakit a kapendanega ko taw a miyawa ko ontol a lalan,

na saden sa pekegowad ko kapetenora on na petay bo.
11 So kanarakaan ago so kabinasaan na pekemasaan o Allah,

na aya pen so manga poso o manosiya.
12 So makasodi na di niyan kabaya o ba pekedaway,

aya pen o ba pakimosawir ko manga oongangen.
13 So mapipiya a ginawa na pepekalangas ko paras,
ogaid na so kararata a ginawa na pepekaropet ko niyawa.
14 So pamikiran o somasabot na dii mbabanog sa katao,

ogaid na so ngari o manga lalong na pepekaken sa kalalalongan.
15 So langon a manga gawii o pepanga rarasay na kamaregenan,

ogaid na so masosonor i poso na lalayon den so di niyan dii kakelamilami.
16 Tomo so maito a rek a rakes on so kalek ko Allah

a di so mala a tamok a ndodon so awid a akal.
17 Tomo so kakan sa manga leletaan a ndodon so kanggiginawai

a di so kaseda sa malembo a sapo a sapi a ndodon so kapekegowad.
18 So marangit a taw na pepangerar sa kambobono,

ogaid na so kena a ba malebod kararangiti na mapepakalintad iyan so rido.
19 So lalan o tapolan na kaaalangan sa manga sorok,

ogaid na so pegokitan o manga titito na madaya a karsada.
20 So maongangen a wata na ipekebabaya o ama iyan,

ogaid na so lalong a mama na di niyan pegadatan so ina iyan.
21 So kalalalongan na aya ipekebabaya o taw a korang i ongangen,

ogaid na so somasabot na matito a kapepaginetaw niyan.
22 Pekeilang baden so manga antangan igira a da a kapamagodasa on,

ogaid na igira a madakel i mosawira na pepekabolos den.
23 Ipekebabaya o taw so kapembegay niyan sa osto a sembag,

na sayana a mapiya so katero a domadait ko betad.
24 Pekedegen o maongangen so lalan a ipetekedeg ko kaoyagoyag

kaan iyan kalidasi so lalan a ipetondagay ko kanarakaan.
25 Nggebaan o Allah so walay o pepangimporoan,

ogaid na pepakabekenen iyan so manga temanaan o lopa o balo a babay.
26 Ipekesisingay o Allah so manga pamikiran o manga rarata a taw,

ogaid na ikasosoat iyan so iklas a manga katero.
27 Saden sa dii menapso ko laba na pegowitan iyan sa samok so pamiliya niyan,

ogaid na saden sa pekegowad sa manga tendan na kelendo a omor iyan.
28 So maontol a taw na perikimen iyan i isembag iyan,
ogaid na so ngari o marata a taw na pekisengaw niyan so manga rarata a nganin.
29 Mawatan so Allah ko manga rarata a taw,

ogaid na pegamponen iyan so kapepangangarapan o manga oontol.
30 So kalangas o paras na ipekebabaya o poso,

na so mapiya a totol na ipekalimegas o manga tolan.
31 So pepamakineg ko parinta a pepekabegay sa kaoyagoyag

na pekabaling a keped ko manga oongangen.
32 So taw a pesengkaan iyan so kapeparintaa on on na di niyan dii masodi a ginawa

niyan,
ogaid na saden sa peterimaan iyan so kapetenora on na pepekasabot.
33 So kikaleken ko Allah na mipemangendao niyan ko taw so kaongangen,

mapengendao niyan pepangendaon iyan so
na pekeona so kapepangalimbabaan na go bo so kakipangkat.
MANGA PANANAROON 16
Rek o manosiya so manga antangan o poso iyan,
ogaid na poon ko Allah so ipesembag iyan on.
2 So langon a dii nggolaolaan o taw na tatarimaan iyan a da a saninsaning iyan,

ogaid na petimbangen o Allah so manga niyat iyan.
3 Sanaan ka ko Allah so apiya antonaa i penggolaolaan ka,

ka kibolos sa mapiya so manga antangan ka.
4 Inembaalan o Allah so langon taman a ipapantag ko ookoran on,

apiya so manga rarata a taw a ipapantag ko gawii a kamoralaan.
5 Ipekesisingay o Allah so oman i ipoporo iyan a ginawa niyan;

matatangked a di siran den kelepas ko kandanega kiran.
6 So gagaw ago so kaontol na pepekapapas ko kadostaan,

na sabap ko kalek ko Allah na pelidasan o manga taw so kamarataan.
7 Igira a miyasoat so Allah ko manga okitokit o taw

na apiya so manga ridoay niyan na mapakapengginawai siran on o Allah.
8 Tomo so maito a miyapantiyari sa ontol

a di so mala a tamok a miyakowa ko kapanalimbot.
9 So pamikiran o manosiya na aya pepagantangan ko pagokitan iyan,

ogaid na so Allah i petendo ko kapelakad iyan.
10 So dii teroon o dato na lagid o lalag o Tohan;

di keribat so ngari iyan ko kapekokom.
11 So ontol a asada ago timbangan na rek o Allah;

so langon a manga panimbang na aya pasad iyan.
12 Piyakasisingay ko dato so kanggolaola sa marata,

ka so kapaginontolan na aya ipepekabeken o ndatoan iyan.
13 Ikapipiya a ginawa o manga dato so maontol a manga modol,

na pekebabayaan iran so taw a dii tero sa tito a benar.
14 So kararangit o dato na lagid o siyogo a pekapatay,

ogaid na so maongangen a mama na mapekalenggaw niyan ai.
15 Sii ko kapepekaliwanag o paras o dato na ndodon so kaoyagoyag,

na so kapangalimo iyan na lagid o gabon a pembegay sa oran sii ko pangolaon.
16 Lebi a mala i kipantag so kakowaa ko ongangen a di so bolawan.

So kakowaa ko sabot na tomo a piliin a di so pirak.
17 So lalan o manga titito na mililidas ko kamarataan;

saden sa iinengkaan iyan so pagokitan iyan na pelindingen iyan so niyawa niyan.
18 Pekaona so kapetekabor na go bo so kakebinasa,

ago pekaona so kipoporoon sa ginawa na go bo so kakirepang.
19 Tomo so taw a ibababa iyan a ginawa niyan a maaped ko manga mitatanan

a di so dii makambagian ko pepanganiyayaan o manga pepangimporoan.
20 Apiya antawaa i petegoon iyan sa ginawa so insarat na pekakowa sa kamapiyaan,

na saden sa somasarig ko Allah na sayana a mapipiya a ginawa niyan.
21 So maongangen i poso na makikilala a makasasabot,

na so manga pipiya a katero o taw na pepekaoman ko kapepakaayok iyan.
22 So kapakasasabot na bowalan a pepangoyag ko taw a kapapadaleman on,

ogaid na aya pepekadaneg ko manga lalong na so kalalalongan iran.
23 So poso o maongangen na dii nggonanao ko ngari iyan

ago pepekaoman ko kapepekaayok o manga modol iyan.
24 So ikasosoat a manga katero na lagid o gola a teneb

a mamis ko ginawa ago pepekabolong ko lawas.
25 Aden a lalan a aya katao ron o taw na ontol

ogaid na sa kaposan iyan na lalan bes ko kapatay.
26 So kaiinama o gomagalebek ko kakan na aya di niyan dii minggalebek,

ka peketegel sekaniyan o kaor iyan.
27 So da a oked iyan a mama na dii kediyat sa marata,

na so manga katero o modol iyan na lagid o pesokeyaw a apoy.
28 So taw a bibid i olaola na pepangondoy sa kambobono,

na so tangondor na di niyan dii pakambelagen so manga dadaseg a dii nggiginawai.
29 So tanganiyaya na pepagakalan iyan so siringan iyan,

ka pegagaken iyan ko lalan a kena a ba mapiya.
30 Pipipideng sekaniyan sa kapemikirana niyan ko bibid,

na itotoro iyan a manga modol iyan a dii meniyat sa marata.
31 So miyakapoti a bok na sangkad a bantogan

a sii miyakowa ko kapaginetaw a kapaginontolan.
32 Tomo so taw a kena a ba malebod kararangiti a di so mabager a sondaro;

na tomo pen so taw a pekegenggen iyan so gani niyan a di so pepekaagaw ko siti.
33 Peripaan o manga taw so penggolaolaan iran,

ogaid na so bo so Allah i pepaar ko pekesowasowa.
MANGA PANANAROON 17
Tomo so kapekan sa miyagango a satebi a paan sii ko kalilintad
a di so dii kapelamilami sii ko walay a mipepeno on so kapepawala.
2 So maongangen a oripen na pakapendatoon ko piyakayaya a wata a mama o kadnan

iyan,
ago makapembagian pen ko posaka o magariyari.
3 So pirak ago so bolawan na pegoriin o apoy sii ko tonaga,

ogaid na so manga poso o manosiya na petepengan o Allah.
4 So baradosa na petegoon iyan sa ginawa so da a bali niyan a manga katero,
ago so bokeg na pepakineg ko dila a pepekasamok.
5 Apiya antawaa i dii magongatongat ko manga miskin na pepanonongkaan iyan so

Tohan a Miyaden kiran,
na saden sa ipekebabaya iyan so kiyasiksaa ko ped na di kelepas ko kandanega on.
6 So manga wata o manga wata na aya sangkad o manga totoa a taw,

na aya ipepangandag o manga wata na so manga lokes iran.
7 So manga pipiya a katero na kena a ba domadait ko lalong

na taralebi pen a di patot ko dato so pepamokeg a manga modol.
8 So tendan na lagid o mala i arga a montiya ko kapipikira on o pembegay ron;

apiya anda sekaniyan song na pepekapiya so bobolos iyan.
9 So taw a pesepeng ko minisela na pepanagontaman ko kakekalimoay,

ogaid na saden sa ba niyan den pembantaani na di niyan dii mapakambelag so tanto a dii
nggiginawai.
10 So kambonget na lebi a pepekandao ko maongangen a taw

a di so magatos a lambit ko lalong.
11 Aya bo a pepanagontamanan o marata a taw na so kapakasosopak;

kagiya ka maoto na sogoon rekaniyan so da a kapedi iyan a sogo o Tohan.
12 Tomo a aya mitoona o taw na so arimaw a inagawan sa wata

a di so lalong sii ko kapelalalong iyan.
13 O mbadali o taw sa marata so mapiya

na di den magawa so marata ko walay niyan.
14 So kapooni ko kapepawala na datar o kapepekabowak o ig ko miyaopak a pelit;

sabap sii na tapeleken ka so kapakipetitidawa sa di niyan pen kakitabolog.
15 So taw a pepakabenaren iyan so miyakasela ago so pen so peteksilen iyan so da a sala

iyan
na melagid siran bo a ipekegowad o Allah.
16 Antonaa i gona o pirak sii ko lima o lalong a mipemasa niyan sa kaongangen,

ka di niyan pekebabayaan?
17 Lalayon so kapekebabayai reka o ginawai ngka,

na so pagari ngka na inimbawata a pekaogop reka ko kamaregenan.
18 So bo so korang i sabot i pesepa sa kapengakowa niyan ko otang o siringan iyan.
19 So taw a mabebaya makimbobono na mabebaya ndosa;

so pepagembaal sa maporo a pangeleban na pepekaboyo sa kabinasaan.
20 So bibid i pamikiran na di den pekakowa sa kamapiyaan,

na so aden a dila iyan a somosopak na keroseng ko kasiksaan.
21 Ipekerata a ginawa o taw so kinimbawataan iyan ko lalong,

na so ama o boda na da den a kapekebabaya iyan.
22 So masosonor a poso na mapiya a pekabolong,

ogaid na so kaada o inam na iperayor o lawas.
23 So marata a taw na peterima sa tendan sa masolen

sa kambibida niyan ko kapengokom.
24 Pegantap so somasabot ko kapepekaongangen,

ogaid na so lalong na ba niyan den ipepegenebeneb so manga mata niyan ko apiya anda
ko doniya.
25 So lalong a wata na ipegoteg o ama iyan

ago ipekerata a ginawa o ina iyan.
26 Kena a ba mapiya so kaselaa ko magiinontolan,

aya pen o ba so kapelepedi ko manga sanasanaan ko kapakatitito iran.
27 So mala i katao na gomegenggen ko manga katero iyan,

na so maongangen a taw na maririnaw a ginawa niyan.
28 Apiya so lalong na mibibilang a maongangen igira a romerenek,

ago aya katao ron na somasabot igira a kemekemed.
MANGA PANANAROON 18
So di makaroroyoda ko manga ped na aya bo a tatagoon iyan sa ginawa na so ipekesoat
iyan;
di sekaniyan den pagayon ko apiya antonaa i dii nggolaolaan.
2 Da den a kabaya o lalong ko kapakasabot,

ka so bo so kapesawai niyan ko mapipikir iyan.
3 Igira a miyakatalingoma so kadostaan na pekatalingoma mambo so kapakasodi,

na so kayaan na oonotan o kapakadapanas.
4 So manga katero ko ngari o taw na lagid o madalem a ig
a aya bowalan o ongangen a pegondas on a datar o lawasaig.
5 Kena a ba ontol so kaperamigi ko miyakasela

a nggolalan ko kaperampasi ko da a sala iyan ko maontol a kokoman.
6 So manga modol o lalong na pepekaagak rekaniyan ko kambobono,

na pepekaboyo so ngari iyan sa leped.
7 So ngari o lalong na aya on pekabinasa,

ago so manga modol iyan na pekilitag ko ginawa niyan.
8 So manga katero o tangondor na lagid o manga pipiya i taam a isongit

a ipekebabaya o taw a kapelameda niyan on.
9 So taw a bobokelen nggalebek

na pagari sekaniyan o dii mamagola.
10 So Ingaran o Allah na aya mabager a lantawa;

a ron pepagapas roo so maontol a taw, na malilinding sekaniyan on.
11 So kakawasaan o tatamoken a taw na pipikiren iyan a aya niyan makokota a siti,

ago lagid o maporo a alad a di den kekalakat.
12 Sii ko da on pen kabinasai na ipeporo o taw a ginawa niyan,

ogaid na pekaona so kapangalimbabaan na go bo so kakipangkat.
13 So pesembag sa da niyan pen kapakapamakineg

na kalalalongan iyan oto ago kayaan.
14 So tomitikna a pamikiran na pekitobay o taw igira a pekesakit,

ogaid na so maroropet a pamikiran na antawaa i pekakena on.
15 So poso o makasasabot na pepekakamal sa ilmo,

na so manga tangila o maongangen na dii mbabanog ko katao.
16 So pamemegayan na pepakadayaan iyan so pagokitan o pepemegay ron

ago pepakaadapen iyan sekaniyan ko manga ala a taw.
17 Saden sa keona tero sii ko kapengokom na lagid o ba aya ontol

taman sa di makadarpa so mimbabala iyan a pengingise on.
18 So kaperipa na pekatareg ko kapepawala

ago kekokom iyan so rido o manga ala i gees.
19 Tanto a maregen so kingginawain peroman ko kiyaselaan ka a pagari a di so kaagawa
ko kokotaan a siti,
ka so manga rido na lagid o katatanggalan a pintoan o torogan.
20 Aya ikeosog o tiyan o taw na so onga o ngari iyan,

na ikesoat iyan so pekisabap ko manga katero iyan.
21 Apiya anda ko kapatay ago so kaoyagoyag na sii ko kapaar o dila,

na siran oto a pekebabaya sii na ken iran so onga o manga katero iran.
22 So mama a miyakatoon sa karoma na miyatoon iyan so mapiya

ago miyakatarima sa limo o Allah.
23 Dii mangangampedian so miskin,

ogaid na so kawasa na makeras so kapesembag iyan.
24 Aden a manga ginawai o taw a ba on den pepekabinasa,

ogaid na aden a ginawai a lebi reka a marani a di so tito a pagari ngka.
MANGA PANANAROON 19
Tomo so miskin a pepaginetaw a magiinontolan
a di so lalong a bibid i katero.
2 Di mapiya so kapepanagontaman amay ka da a sowa on,

na saden sa magaanggaanen i kalakad na pekelepas iyan so lalan.
3 So kalalalongan o taw na aya pepekabinasa ko kapepaginetaw niyan,

ogaid na so Allah i pepangobaan iyan.
4 So kakawasaan o taw na pepekaaden on sa madakel a ginawai,

ogaid na so miskin na apiya so sakataw a ginawai niyan na pembelag on.
5 So dii seksi sa di benar na di kelepas ko kaselaa on,

na saden sa ipesengaw niyan so manga kabokegan na di pekalidas.
6 Makadel a pepanamar sa kalimoa on o mala a taw,

na oman i isa na dii makingginawai ko pepamamegay sa manga pamemegayan.
7 So miskin na ipekeya o langon a manga tonganay niyan,

na aya pen so matag iyan ginawai a pelidas on.
Apiya o peselobaa niyan siran a pepangangampedian
na da den a ketoonan iyan kiran.
8 Apiya antawaa i pepekakamal sa kaongangen na pekebabayaan iyan so ginawa niyan,

na saden sa mananamar sa kapakasabot na pekapiya so bobolos iyan.
9 So dii seksi sa di benar na di kelepas ko kaselaa on,
na saden sa ipesengaw niyan so manga kabokegan na kebinasa.
10 Kena a ba domadait ko lalong so kapepaginetaw a dii tebowakar,

na lebi pen a di patot ko oripen so kandadatoi niyan ko manga olowan.
11 So ongangen o taw na ipepekalenggaw o gani niyan,

na aya niyan bantogan so kapepakalepasa niyan ko minisela on.
12 So kararangit o dato na lagid o kapegengger o arimaw,

ogaid na so kapangalimo iyan na datar o namog sii ko otan.
13 So lalong a wata a mama na aya ikebinasa o ama iyan,

na so kapakipepawala o karoma a babay na lagid o da a rintas iyan a kapegetek o ig.
14 Mapeposaka o mama so walay ago so tamok o manga lokes iyan,

ogaid na so bo so Allah i pekabegay ron sa maongangen a karoma.
15 So kabobokel na ipekanek a torog,

ago so tapolan na keongosan.
16 So petoman ko manga sogoan o Allah na pelindingen iyan so niyawa niyan,

ogaid na saden sa dii sodi ko manga lalan o Allah na petay.
17 Igira a pembegan o taw so manga miskin na pepagotangan iyan so Allah,

na imbadal iyan on so mapiya a pinggolaola niyan.
18 Parintaa ngka so wata a ka sii ko kapepekaarap ka on pen,

ka o di ngka ini nggolaolaan na kabaya a ka a kapetay niyan.
19 So raboraboten na kisala on ai,

na o kapanabangan ka sekaniyan na disomala a peromanan ka bo.
20 Pakinega ngka so toma ago tarimaa ngka so parinta

kaan ka makaongangen ko oriyan iyan.
21 Madakel a antangan sii ko pamikiran o taw,

ogaid na so bo so takdir o Allah i pekatoman.
22 Aya kakasi o taw na so kapangalinggagaw niyan,

na tomo so kapembaloy o taw a miskin a di so bokeg.
23 So kipekeleken ko Allah na ipekeoyagoyag o taw,

na saden sa miyakasowa sii na makadedeke a masosoat a di ketalingomaan a marata.
24 So tapolan na pekilebeng a lima niyan ko ladiya,
ogaid na apiya so kapakakasoya niyan on ko ngari iyan na bobokelen iyan.
25 Amay ka pelepedan so makasodi na pekapanganggila so da a peleng iyan;

na amay ka kedawayan so makasasabot na pengenalen iyan so katao.
26 So wata a ipekeya ago piyakamamala

na di niyan dii pemarataan so ama iyan ago pembogaon iyan so ina iyan.
27 O genek ka mamakineg, wata aken, ko insarat

na pekasilay ka ko manga katero a katao.
28 So da a gona niyan a saksi na di niyan dii masodi so kokoman,

na so ngari o marata a taw na pelameden iyan so kadostaan.
29 So kapendaneg na titiyagaren ko mamakasodi,

ago so kapembadas na titiyagaren ko likod o manga lalong.
MANGA PANANAROON 20
So arak na pembalowin iyan so taw a pekelalolalong,
na so mabisa a panginginomen na ipekebaloy niyan a kapasongan
na apiya antawaa i pekedadadadag sa sabap on na kena a ba maongangen.
2 So pekerarangitan a dato na datar o pegengger a arimaw

na apiya antawaa i makakerangit on na lileb iyan so niyawa niyan.
3 Bantogan o taw so kapananggilai niyan ko kambobono,

ogaid na oman i lalong na mababaya makititidawa.
4 So mala i bokel na di niyan pendadon so lopa iyan ko misesenggay a mosim;

sabap roo na amay ka iraragon na pagilain iyan, ogaid na da bes a ba niyan on keragon.
5 So manga niyat ko poso o taw na lagid o madalem a ig,

ogaid na so ana sabot iyan na pekasageb on.
6 Madakel a taw a ipetewatawag o oman i isa on so kapiya niyan i ginawa,

ogaid na antawaa i pekatoon sa kasasarigan a taw?
7 So matito a taw a pepaginetaw a magiinontolan

na perakmatan so pekasalono on a manga wata iyan.
8 Igira a pegontod so dato ko korsi iyan a pepangokom

na pesimaan o manga mata niyan so langon a kamarataan.
9 Antawaa i makapetero sa "Miyalompiyo aken den so poso aken;
masosoti ako a da a dosa ko"?
10 So pepekalabit a manga panimbang ago manga asada

na palaya ini ipekesisingay o Allah.
11 Apiya so dii nggolaolaan o wata na aya on pekikilala

o soti ago matito so parangay niyan.
12 So tangila a ipepemamakineg ago so mata a ipepangilailay,

na palaya ini inembaalan o Allah.
13 Di ngka kebabayai so kapakatorog ka o ba ngka ikamiskin;

pageenaw ka baden, ka pekakowa ka sa madakel a pangenengken
14 “Kena ini a ba mapiya, kena a ba mapiya," a tig o pepemasa,

ogaid na amay ka miyaipos na di niyan dii tekabor so miyapamasa niyan.
15 Aden a bolawan ago madakel a manga pirlas,

ogaid na so modol a dii tero sa katao na datar o mala i arga a montiya.
16 Saden sa miyangako ko otang o mananangga

na patot a kowaan on so gerab iyan a aya sanda ko kapekabayad iyan.
17 So pangenengken a miyakowa o taw ko kapanalimbot na mamis rekaniyan i taam,

ogaid na aya keoriyanan on na lagid o saami a peted.
18 Igira a pegembaal ka sa manga antangan na pakimosawir ka,

na pakinggonanao ka amay ka makipetidawa.
19 So dii magenebeneb a taremo na pesewaan iyan so pageenesen;

sabap roo na di ka pakipegepeda ko taw a madakel i katero.
20 Apiya antawaa i pesintaan iyan so ama iyan o di na ina iyan

na kepareng so solo iyan sii ko tanto a maliboteng.
21 So kakawasaan a malebod so kiyakowaa ngka on sii sa poonan

na oriyan iyan na di reka ini kirakmat.
22 Di ngka peteroa a "Mbadalan ko so marata."

Mbabayorantang ka baden ko Allah, ka sebeten ka niyan.
23 Ipekesisingay o Allah so pepekalabit a manga panimbang,

na so ipepanaliba a timbangan na di niyan ikesoat.
24 So kapelakad o taw na peketendo o Allah;
kagiya ka maoto na andamanaya i kakesaboti o taw ko lalan iyan?
25 Litag ko taw so magaanggaanen a kinisenggain iyan ko soasoat ko Allah

na go niyan bo misendit so samaya iyan on.
26 So maongangen a dato na pepariksaan iyan o antawaa i marata

na pekibagolong iyan siran.
27 So hatin o taw na aya solo o Allah

a pepariksa ko langon a mapapadalem ko ginawa niyan.
28 So limo ago so kasasarigi ron na pepekalinding ko dato,

na ipepakabager o ndatoan iyan so kapangalinggagaw.
29 So bantogan o manga ngongoda a mama na so bager iran,

na so parahiyasan o manga totoa na so kapoti o bok iran.
30 So manga baneg ago manga pali na pekionab ko kamarataan,

na so mambo so manga leped na pekasoti ko dalem a ginawa.
MANGA PANANAROON 21
So poso o dato na sisii sa lima o Allah
a datar o lawasaig a apiya anda niyan pekaondasa ko kabaya iyan.
2 So oman i okitokit o taw na ontol ko kapipikira niyan on,

ogaid na petimbangen o Allah so mapapadalem ko poso.
3 So kanggolaola sa ontol ago matito

na lebi a tatarimaan o Allah a di so manga korban.
4 So mipoporo a manga mata ago so takabor a poso

a aya den sigay o manga rarata na palaya den dosa.
5 So manga antap o matordon i galebek na matamataan a pekiarong ko kapakalaba,

ogaid na oman i magaanggaanen na baden kemiskin.
6 So tamok a miyakowa o pepamokeg a dila

na matag baden sepot a magaan bo keda ago pekapatay a litag.
7 So kapanganiyaya o manga rarata na aya kiran pekabinasa

ka kagiya pesengkaan iran nggolaola so ontol.
8 Dii silasilay so lalan o manga baradosa,
ogaid na matito so okitokit o da a sala iyan.
9 Tomo so kagegenek ko rogo o atep a walay

a di so kisoledaan ko talibatak a babay ko maolad a walay.
10 Aya peniniyaten o marata a taw na so kanggolaola niyan sa kamarataan.

da den a ba niyan limo ko siringan iyan.
11 Amay ka miyadaneg so makasodi na pekaongangen so da a peleng iyan,

na igira a mapepangendao so maongangen na pekeomanan so katao niyan.
12 So Allah a aya Maontol na katawan iyan den so pekesowasowa sii ko walay o marata a
taw
na pepepaden iyan so manga rarata sii ko kakebinasai ron.
13 O olena o taw so tangila niyan ko kapenggoraok o manga miskin

na pekagoraok sekaniyan mambo a di keinengka.
14 So kabegay sa pamemegayan sa da a matao ron na pekalenggaw ko kararangit,

ago so pen so tendan a pageemaan a kimbegan on na pekalenggaw sa mala a gani.
15 Igira a pegokasan sa kokoman so manga taw na ipekebabaya o manga oontol

ogaid na kisiksa ini ko siran oto a dii mbabaradosa.
16 So pekasilay ko lalan ko kapakasabot

na keped ko kalilimodan ko miyamatay.
17 Saden sa mabebaya manembatembang na kemiskin;

na apiya antawaa i pekebabaya sa arak ago manga lelembo a pangenengken na di den
kekawasa.
18 So manga rarata a taw na pekiaon ko manga oontol,

ago so makatipo na pekiaon ko manga titito.
19 Tomo so kagegenek ko disirto

a di so kaaped ko talibatak ago raboraboten a babay.
20 So walay o maongangen na katitimoan sa manga pipiya a pangenengken ago lana a

olibi,
ogaid na so lalong a mama na pelameden iyan langon so rek iyan.
21 Saden sa pepanagontaman ko kapaginontolan ago kapangalinggagaw

na pekakowa sa kaoyagoyag, kamapiyaan ago bantogan.
22 So maongangen a mama na pekakalakat ko soled o siti o manga babager a sondaro
ago kegeba iyan so kota a sasarigan iran.
23 So taw a penggenggenen iyan so ngari iyan ago so dila iyan

na ipelidas iyan a ginawa niyan ko kasamok.
24 So takabor a pepangimporoan, a aya ngaran iyan na "Makasodi,"

na tanto niyan a pepakibantog a ginawa niyan.
25 So singayo o mala i bokel na aya on pekapatay,

ka kagiya pegenda o ba makanggalebek so manga lima niyan;
26 Mababasa alongan na kapenapso bo den.
Ogaid na so maontol a taw na pembegay sa da a sangkaan iyan.
27 So ipesoasoat o marata a taw na piyakasisingay,

ba di labaw igira a marata so niyat iyan ko kinisapaaten iyan on.
28 Di ketarima so ipeseksi o bokeg,

ogaid na da a ikeda o dii teroon o taw a pepakineg.
29 So marata a taw na peseyan sa da a ikelek iyan,

ogaid na so matito a taw na perasamen iyan so manga okitokit iyan.
30 Da a kaongangen, o di na kapakasabot, o di na mosawir

a ba pekabangen ko Allah.
31 So koda na mapetiyagar ko gawii a katidawa,

ogaid na rek o Allah so kapakataban.
MANGA PANANAROON 22
So mapiya a kapekenega reka na tomo a di so mala a kakawasaan,
ago so kaaadati reka na tomo a di so pirak ago bolawan.
2 So manga kawasa ago so manga miskin na aden a ndataran iran:

so Allah i Miyaden kiran langon.
3 So masanggila a taw na pekeilay niyan so marata a pekatalingoma, na ipetepok iyan a

ginawa niyan.
ogaid na so lalong a baden pananaros na kesiksa.
4 Aya imbalas o kapangalimbabaan ago so kalek ko Allah

na kakawasaan ago bantogan ago so kaoyagoyag.
5 So manga sorok ago manga litag na sisii ko lalan o bibid a taw;

ogaid na saden sa pesiyap ko rek iyan a niyawa na pegawaten iyan ai.
6 Layama ngka so wata ko kapepaginetaw a mapapatot rekaniyan,

na amay ka mikesad den na di niyan ai pagawaan.
7 Makapendato so kawasa ko manga miskin,

na so pepangotang na mapengongoripen o dii mamagotang.
8 So taw a ipepamola iyan so kamarataan na aya pekeragon iyan na kasiksaan,

na kitareg so kapepekaleped o rarangit iyan.
9 So maginawa a taw na perakmatan,

ka pepamegay ko pangenengken iyan ko manga miskin.
10 O pakaawaa ngka so makasodi na magonot on mambo so kapepawala,

na kitareg so kaperido ago so kapepakaito.
11 Saden sa pekebabayaan iyan so soti a poso, a makalimoon pen so di niyan dii katero
na mipengginawai niyan so dato.
12 So manga mata o Allah na pepekasiyap ko katao,

ogaid na pekeliden iyan so manga katero o makatipo.
13 Aya dii teroon o mala i bokel na "Aden a arimaw sa liyo,"

o di na "Kebono ako sii ko manga lalan."
14 So ngari o babay a sebo na madalem a galebo;

so taw a pekerarangitan o Allah na keolog on.
15 So kalalalongan na misasarta ko poso o wata,

ogaid na so badas a ipendaneg on na pembelagen iyan ai rekaniyan.
16 Apiya antawaa a pepanalimbot ko miskin sa kapepakalaa niyan ko tamok iyan,

ago so pembegay sa manga pamemegayan ko kawasa, na ndatar siran a kekorangan.
Telo polo a Pananaroon o Manga oongangen

17 Lekai ngka so tangila ngka na go ngka pamakinega so manga pananaroon o manga
oongangen;
pakikenalen ka ko poso o ka so manga ndao aken,
18 Ka ikasosoat ka o pagiimana ngka
ago makatitiyagar on langon tomontol so manga modol ka.
19 Piyakitokawan aken reka ini sangkai a gawii, apiya sii reka den,
kaan so Allah i kasarigan ka.
20 Minisorat aken reka so telo polo a pananaroon
a kikatatagoan sa osiyat ago ilmo
21 A pekatokaw reka so kapakatomangked o manga katero a tito a benar
kaan ka misembag so tito a benar ko siran oto a somiyogo reka.
22 Di ngka pelabiti so miskin sabap sa miskin,,

aya pen o ba ngka pagiloti so da a ba on pekaogop sii ko kapengokom,
23 Ka ipenindeg o Allah so kabenar iran,
na petebanan iyan so siran oto a pepamanekew kiran.
24 Di ka pakipengginawai ko raboraboten a mama,

ago so marangit na di ka on pekipagepeda,
25 Ka o ba ngka baden masowa so paparangayan iyan
ago kalitagan ka a ginawa ngka.
26 Di ngka topaan a kapengakowa ngka ko otang o ped a taw,

27 Ka o da a kibayad ka on na apiya so dempas a pegigaan ka na kekowa reka.
28 Di ngka pegalina so andang a temanaan

a minibetad den o manga apo o ka.
29 Ba ka miyakailay sa taw a mapasang i kanggalebek?

Sii sekaniyan penalagad ko hadapan o manga dato;
di niyan penalagadan so matag makakakalilid a taw.
MANGA PANANAROON 23
Igira a piyakaatoang ka o dato
na paginengkaa ngka piyapiya o antonaa i inipagana reka,
2 Na genggenen ka so kaor ka o mala ka i kakan.
3 Di ka kebimban ko manga pipiya i taam a pangenengken iyan
ka masiken anan a matag reka ipepagakal.
4 Di ngka pekopain a ginawa ngka nggalebek kaan ka makakewasa;

pagongangen ka ago taregen ka.
5 Ka apiya giya bo a kasirapa ngka ko manga kakawasaan na miyada den,
ka aya mataan na pegetoan siran a manga papak
na pekalayog sa kawang a datar o agila.
6 Di ka ken ko pangenengken o maliget a taw,

aya pen o ba ka madalodalo ko kapiya niyan i taam,
7 Ka aya parangay niyan na lalayon iyan pipikiren so penggaston iyan.
"Kan ka ago inom," a peteroon iyan reka,
ogaid na kena a ba reka iklas so poso iyan.
8 Kegowa a ka so maito a miyakan ka,
na ilang baden so kiyambabantobantoga ngka on.
9 Di ka pakipembitiyarai ko lalong,
ka ba niyan den pesodia so kaongangen o manga katero o ka.
10 Di ngka pegalina so andang a ndolonan

aya pen o ba ngka kalabiti so manga lopa o manga ilo,
11 Ka mabager so Allah a pelinding kiran,
na ipenindeg iyan so kabenar iran reka.
12 Pakikenalen ka ko poso o ka so ipepamangendao reka,

ago piyapiyai ngka mamakineg so manga katero a ilmo.
13 Di ngka pendarainonen so kapeparintaa ngka ko wata,

ka so kapembadasi ngka on na di on pekapatay.
14 Danega ngka sekaniyan den a badas,
ka pekalidasen ka so niyawa niyan ko kanarakaan.
15 Wata aken, o pagongangen so poso o ka

na tanto a ikebabaya o poso aken,
16 Tanto a ikapipiya o ginawa ko
igira a dii matero o modol ka so ontol.
17 Di ngka pakapesigin ko poso o ka so manga baradosa,

ka tatapa ngka baden so kipekeleken ka ko Allah.
18 Ka matamataan den na mapiya so keakiran reka,
na di den kepotol so panginam ka.
19 Pamakineg ka, wata aken, ago pagongangen ka,

na pakaantapa ngka so poso o ka ko ontol a lalan.
20 Di ka pengeped ko manga palainom
ago so manga bosaw a pepangangan sa manga sapo.
21 Ka so tamereg ago so bosaw na kemiskin,
na so katoratod na makapenditar iyan so taw sa manga togak.
22 Pakinega ngka so ama a ka a mimbawata reka,

na pagaadati ngka so ina a ka apiya amay ka malokes den.
23 Pamasaa ngka so tito a benar na di ngka den pepasaa;
kowa ka sa kaongangen ago kapindiyara ago so kapakasabot.
24 Tanto a mapipiya a ginawa o ama o magiinontolan,
na so mimbawata sa maongangen a wata na ipekebabaya iyan sekaniyan.
25 Mabebaya baden so ama a ka ago so ina a ka,
na makapiya a ginawa o babay a mimbawata reka.
26 Wata aken, palada ngka raken so poso o ka,

ago di ngka pelikati sa mata so manga lalan aken,
27 Ka so sondal na aya madalem a galebo,
ago so babay a sebo na aya masimpit a paridi.
28 Pepamagayan sekaniyan a datar o tanganiyaya,
na pekeomanan iyan so miyamakandosa a manga mama.
29 Antawaa i dii mboboko?

Antawaa i mararata a ginawa niyan?
Antawaa i dii makimbobono?
Antawaa i lalayon makapepagataat?
Antawaa i aden a manga pali iyan sa da a ba niyan sabap?
Antawaa i romiriga so manga mata niyan?
30 So siran oto a miyalayam minom sa arak,
a so siran oto a lalayon iran petetaantaaman so piyakaseoseog a manga arak.
31 Di ngka den pegilaya so arak igira a miyakariga,
igira a pepamangerap sii ko tagayan,
igira a mapiya a kakelinowa on.
32 Ka so keakiran on na pepanoka a lagid o nipay,
ago pepangebot a lagid o orang.
33 Keilay o manga mata ngka so mibibida a manga nganin,
na kelibog so pamikiran ka ago so di ngka dii katero.
34 Kedatar ka o totorogen sii ko look o kalodan
a miiga ka ko poro o manga kalat o layag o kapal.
35 “Miyaperaneg ako iran," a peteroon ka, "ogaid na da ako kasakiti.
Biyadasan ako iran, ogaid na da aken magedam.
Anda i kapekanaw aken? Nggiloba ako peman sa keinom aken."
MANGA PANANAROON 24
Di ngka kesigin so manga rarata a taw
aya pen o ba ngka kabayai a kapangeped ka iran,
2 Ka aya iran bo mapipikir na so kapanganiyaya,
ago aya iran dii mbantaanan na kasemok.
3 Nggolalan ko kaongangen na pekebangon so walay,

ago nggolalan ko kapakasabot na makapembeken ai;
4 Nggolalan ko katao na pekepeno so manga rowang on
a langon a pitibarangan a mala i arga ago ipekebabaya a tamok.
5 Mala i gees so maongangen a mama,

na so mala i katao na pepangosor so kapaar iyan;
6 Mala reka i kipantag so kapakipemosawira ko kapakipetidawa a ka,
na so kapakataban na makapenggolalan ko madakel a odasa.
7 So kaongangen na di peraoten o lalong;

sii ko peketimotimoan ko manga taw na da den a ba niyan kisambong a lalag.
8 Saden sa pekediyat sa marata na keingaranan sa tangakal.
9 So kapegantangana ko kapelalalong na dosa,
na piyakasisingay ko manga taw so makasodi.
10 O pelokeloke ka sii ko gawii a kamaregenan

na sayana a maito so bager ka.
11 Sabeta ngka so manga taw a pekeagak ko kapatay,

na rena ngka so siran oto a pekisasawiring manaros ko kapembonoa kiran.
12 O teroa ngka a "Da den a ba aken sii katawi."
na ba ini di tegoa sa ginawa o Allah a aya petimbang ko madadalem ko manga poso?
Ba niyan ai di katawi a aya pesiyap ko niyawa ngka,
na ba niyan di mbadalen ko oman i isa a taw so pinggolaola niyan?
13 Kan ka sa gola a teneb, wata aken, ka mapiya ini,

ago so gola a teneb a poon ko taro a mamis ko panaantaaman ka.
14 Na lagid oto mambo so kasowaa ngka ko kaongangen sii ko niyawa ngka;
o makowa ngka na mapiya so bobolos ka,
na di den kepotol so panginam ka.
15 Hey marata a taw, di ka pepagayan ko walay o maontol;

di ngka mbinasai so dedekean iyan,
16 Ka apiya pen makapito maoteng so maontol a taw na pepekatindeg bo,
ogaid na ikepepad o manga rarata so morala.
17 Di ka kebabaya igira a miyaoteng so ridoay ngka,

ago di ikepiya a ginawa ngka igira a minirepang sekaniyan,
18 Ka keilay ai o Allah ago di niyan ikesoat,
na o ba niyan baden pakalenggawa so kararangit iyan ko ridoay ngka.
19 Di ka pegoteg sabap ko manga baradosa

aya pen o ba ngka kasigin so manga rarata a taw,
20 Ka da a bobolos o baradosa,
na kepareng so solo o marata a taw.
21 Kaleken ka so Allah ago so dato, wata aken,

na di ka pengeped ko siran oto a pepamanopak,
22 Ka kitalingoma kiran tomekaw so kambinasaa kiran,
na antawaa den i pekatokaw sa kasiksaan a kitana kiran o Allah o di na so dato?
23 Giyai mambo i manga pananaroon o manga oongangen a taw:
So kaperamiramig sii ko kapengokom na kena a ba mapiya.

24 Apiya antawaa i petero ko miyakasela sa "Miyakabenar ka"
na pesintaan sekaniyan o manga taw ago kerarangitan o manga nasiyon.
25 Ogaid na mapiya i bobolos so siran oto a pekebenaran iran so miyakasela,
na iperakmat kiran so kamapiyaan.
26 So pembegay sa ontol a sembag

na lagid o pekaarek sa modol.
27 Imasada ngka pasin so galebek ka sa liyo ko kapetiyagara ngka ko lopa a ka,

na go ngka bo balaya so walay ngka.
28 Di ka peseksi sa misopak ko siringan ka sa da a sabap iyan,
aya pen o ba ka tero sa kapamagakal.
29 Di ngka peteroa a "So den so inikidia niyan raken na aya ko ron mambo ikidia;
seopan ko angkoto a mama ko pinggolaola niyan."
30 Siyagadan aken so lopa o mala i bokel,

a so sapadan o mama a da a sabot iyan.
31 Na piyamangetoan ai langon a manga sorok;
miyapeno so lopa a teneken a otan,
na miyatempag den so alad a ator a mililibet on.
32 Na sii ko kapegilaya ko ron na piyamimikiran aken piyapiya,
na miyakasowa ako ron sa ndao:
33 So di bo matey a kapakatorog, di bo matey a kasarop o torog,
ago di bo matey a kaiiga a kadedeke,
34 Na giyoto den i kapekatalingoma reka o kamimiskini a lagid o tanganiyaya,
ago so kakokorangi reka sa kaoyagan a datar o kagogomaanan a tekew.
MANGA PANANAROON 25
Giyai pen so ped a manga pananaroon o Solaiman
a kiyopiya o manga pagtaw i Hisikiyas a dato sa Yodah:
2 Pekibantog ko Allah so kapageemaa niyan ko ped a manga nganin,

ogaid na pekibantog ko manga dato so kapepariksaa iran ko manga nganin.
3 Datar o kaporo o langit ago so kadalem o lopa

so di kaketekeda ko pamikiran o manga dato.
4 Amay ka oriin so pirak a mada so marata on

na so kelamba on na aya kapependayan o panday sa pirak;
5 Na amay ka miyakowa ko kamamasaan o dato so manga rarata a taw
na makapembeken so ndatoan iyan ko kaontol.
6 Di ngka poporoon a ginawa ngka ko hadapan o dato

ago di ka petindeg ko darpa o manga ala a taw,
7 Ka tomo a matero iyan reka a "Panik ka sii"
a di sa ba ka niyan pakadapanasa sii ko hadapan o olowan.
8 So miyasowasowa a miyailay ngka
na di ka magaanggaanen sa kipeseksiin ka on ko pepangokoman,
ka oriyan oto na antonaa i kesowa a ka
amay ka makapemataan so ped a miseksi on sa miyaribat ka?
9 O aden a di niyo dii pewalaan ago so siringan ka

na di ngka pesawai so pageenesen o ped a taw,
10 Ka so pekaneg on na o ba ka niyan baden mbongeti,
na di reka den keda so kayaan ka.
11 So miyatero a domadait ko kapakambebetad

na lagid o ookiran a bolawan a piyamalagenan sa pirak.
12 Lagid o aritis a bolawan o di na so batawi a lombos a bolawan

so osiyat o maongangen ko tangila a pepamakineg.
13 Lagid o matenggaw a ig a pekeinom ko maranti a alongan

so kasasarigan a talasogoay ko siran oto a pepamanogo on;
ka mapepakapiya niyan so kanggiginawa o kadnan iyan.
14 Lagid o manga gabon ago ndo a di makaaawid sa oran

so dii tekabor sa manga pamemegayan a di niyan bo imbegay.
15 Nggolalan ko kapepanginsabar na keayokan so dato,

na so malemek a katero na pekaropet ko tolan.
16 O makatoon ka sa gola a teneb

na so bo so kediyangkaan reka i kana ngka on,
ka o ba ka on baden masemo na makagowa ka on.
17 Di ka lalayon pesong ko walay o siringan ka,
ka o ba reka baden bongasa na ikagowad ka niyan.
18 So taw a di niyan dii seksian sa di benar so siringan iyan

na datar o rompi, o di na pedang, o di na magarang a gasa.
19 So kasanai ko di kesarigan a taw ko masa a kamaregenan

na lagid o miyaropet a ngipen o di na lepo a ai.
20 Saden sa pepagidaidaan iyan so mararata a ginawa niyan

na lagid o pegagaw sa gerab o ped a taw igira a matenggaw a doniya,
o di na lagid o kapagibongi sa timos ko pali.
21 O pekeor so ridoay ngka na begi ngka sa kekan,

na o pekewaw na begi ngka sa ig a keinom.
22 Ka so kapenggolaolaa ngka sii na aya ngka kategoi sa pekadeg a waga sii ko olo niyan,
na mbelasan ka on o Allah.
23 So kapesember o otara a pepekaawid sa oran

na lagid mambo o dila a taliyantaan a mapepakarimeng iyan so paras o ped a taw.
24 Tomo so kakakaden ko rogo o atep o walay

a di so kisoledaan ko talibatak a babay ko maolad a walay.
25 So mapiya a totol a poon sa mawatan a inged

na lagid o panginginomen a matenggaw a ig ko mikokopay a taw.
26 So maontol a taw a pepakiwitowit ko manga rarata

na lagid o lebog a bowalan o di na kiyarimogan a paridi.
27 Kena a ba mapiya so minitaralo a kakan sa gola a teneb

na kena a ba pekabantog ko taw so di niyan dii kambantogan.
28 So taw a di niyan kipaar a ginawa niyan

na datar o siti a minigobar so manga pangeleban iyan.
MANGA PANANAROON 26
Lagid o giyaw sii ko mosim a pangolaon o di na oran sii ko kaperaragon
na lagid mambo o bantogan a kena a ba domadait ko lalong.
2 Lagid o kenti o di na kalogay a dii melayolayog ko mbalabala

a di pekatana so sinta amay ka da a sabap iyan.
3 So badas na patot ko koda, so kakang na patot ko kimar,

ago so bentol na patot ko likod o manga lalong.
4 Di ngka sembagen ko lalong so makaaayon ko kalalalongan iyan,

ka o ba ka baden mbaloy a datar iyan.
5 Sembagen ka ko lalong so pekaompiya ko kalalalongan iyan,

ka o di, na mapemikir iyan a maongangen sekaniyan.
6 So pepekawit sa toma a nggolalan ko lima o lalong

na lagid bo o pepotol ko rek iyan a ai o di na peginom ko kakebinasai ron.
7 Lagid o manga ai o lepo a baden kikabibitin a di keosar

so bayambayanan sii ko ngari o lalong.
8 So kapembegi sa bantogan ko lalong

na lagid o kipegiketen ko ator ko pegingalan ko pitik.
9 Lagid o soroken a waged a ipepamayapay o lima o palaobog

so bayambayanan sii ko ngari o lalong.
10 Lagid o pamamana a pepekapali ko manga ped a baden pepemekas sa da den a antap

iyan
na lagid mambo o taw a pakapenggalebeken iyan so lalong, o di na so apiya antawaa a
matag somasagad.
11 Lagid o aso a pekesoyan iyan so gowa iyan

so lalong a di niyan dii peromanan so kapekelalolalong iyan.
12 Ba ka miyakailay sa taw a ibibiling iyan kon a maongangen?

Mala a panginam para ko lalong a di sekaniyan.
13 Tig o mala i bokel a "Aden a arimaw roo ko lalan.

Aden a mawaraw a arimaw a dii magenebeneb sa liyo."
14 So kapekekelid o gikos o pintoan igira a pekelekeban

na aya mambo kapekelid o tapolan ko igaan iyan.
15 So tapolan na pekiboso a lima niyan ko ladiya,

ogaid na apiya so kaami na mbokelen iyan.
16 So mala i bokel na ibibiling iyan kon a maongangen

a di so pito kataw a pepekabegay sa ontol a sembag.
17 Saden sa pepanginesop ko kambobono a da a kimamaniyai niyan on

na lagid o taw a pekepetan iyan so mawaraw a aso sa tangila.
18 Lagid o biteng a mama a pepamana sa pekedeg ago pepekapatay a manga gasa

19 Na lagid mambo o taw a pegakalan iyan so siringan iyan
na go niyan bo teroa a "Di ako baden dii sendag."
20 O da a itagon na kepareng so apoy,

na o da a kapamaganta na kitapelek so kapepawala.
21 Lagid o oring a dii powaga, ago lagid o kayo a ipetegon ko apoy

so taw a mabebaya makipewala a pepakasilaan iyan so katidawa.
22 So manga katero o tangondor na lagid o manga pipiya i taam a isongit;

pepekasenep ai ko pisembaan.
23 So matilak a manga modol a ipesepeng ko marata a pamikiran

na lagid o koden a bote a liyapisan sa inisayan sa pirak.
24 So taw a pekegowad na dii magomanta a nggolalan ko manga modol iyan,

na pagiipesen iyan so kapamagakal ko dalem a ginawa niyan.
25 Apiya o malangas so di niyan dii katero na di ngka sekaniyan mbenara,
ka aden a pito a pakasisingay a antangan a madadalem ko poso iyan.
26 Masiken a pekesapengan iyan sa kapanaliba so kapekegowad iyan,
ogaid na kerinayag so karata iyan sii ko madakel a taw.
27 So pekalot sa galebo na aya on bo keolog,

na so pelilid sa ator na kepato on malilid.
28 So bokeg a dila na ipekegowad iyan so siran oto a pekekaidan iyan,

na so dii mamagorayoray a ngari na pepekabinasa.
MANGA PANANAROON 27
Di ka petekabor makapantag ko mapita,
ka di ngka katawan o antonaa i kesowasowa ko pekatalingoma a gawii.
2 Aya ngka pakapodiya sa ginawa ngka so ped a taw, a kena a ba giya ngari i ka,
a so salakaw a taw, a kena a ba so manga modol ka.
3 Mapened so ator ago matibeng so peted,

ogaid na so kapepekakakat o lalong na lebi a mapened a di giyoto langon.
4 So gani na piyakalekelek, ago so kararangit na pekalangokolob ko niyawa,

ogaid na antawaa i pekatiger ko kapanaod?
5 Tomo so marinayag a kambongeti ko ped a taw

a di so pagiipesen a kapekebabayai ron.
6 Kesarigan ka so kapekasakiti reka o ginawai ngka,

ogaid na kapangakal so kapagareki reka o ridoay.
7 So maoosog a taw na di niyan kebayaan so gola a teneb,

ogaid na so pekeor na apiya so mapait na mamis ko panaantaaman iyan.
8 So taw a pepagenebeneb sa mawatan a poon ko mbalingan iyan

na lagid o papanok a kawawatanan ko salag iyan.
9 So ikekamotan ago so doka na ipepakapiya a ginawa,

na lagid oto mambo so ikasosoat a osiyat o ginawai a pepekapoon ko poso iyan.
10 Di ngka pekalipati so ginawai ngka o di na so ginawai o ama a ka,

na di ka song ko walay o pagari ngka ko gawii a kamomoralai reka,
ka tomo so siringan ka a marani a di so tito a pagari a kawawatanan.
11 Pagongangen ka, wata aken, ka ikebabaya o poso aken,

ka giyoto i kakesembaga ko ko apiya antawaa a pegitowito raken.
12 So masanggila na pekeilay niyan so marata a pekatalingoma na ipetepok iyan a ginawa

niyan,
ogaid na so boda a baden pananaros na kesiksa.
13 Saden sa miyangako ko otang o mananangga

na patot a kowaan on so gerab iyan a aya sanda ko kapekabayad iyan.
14 Igira a piyokaw o taw so siringan iyan sii ko teked a kapipita ko kasalama niyan on sa
matanog
na datar o ba niyan on kiyandaorai.
15 Melagid so da a rintas iyan a kapegetek o ig ko gawii a kapepangoran iyan

ago so babay a mababaya makipepawala.
16 So kapetepengi ron meren na lagid o kapagerena ko ndo
o di na so kagamaka ko lana.
17 Lagid o potaw a mapekagarang iyan so ped a potaw,

a pekegarang o taw so ginawai niyan.
18 Apiya antawaa i pegalima ko kayo a korma na pekakan ko onga niyan,

na so talasogoay a totordon iyan so kadnan iyan na kebantogan.
19 So ig a pekealong on so paras o taw,

na lagid mambo o poso o taw a pekeilay ron so parangay niyan.
20 So kobor ago so darpa a kabinasaan na di den kepeno,

na lagid mambo o manga mata o taw a di den kesoat.
21 So pirak ago so bolawan na pegoriin o apoy sii ko tonaga,

ogaid na petepengan so taw a nggolalan ko kapepodiya on.
22 Apiya o rosoi ngka so lalong ko lesong

o di na mbowayon ka a endo a datar o ilaw
na di ngka on den kebelag so kalalalongan iyan.
23 Panamari ngka a katokawi ngka ko masosowa o manga talon ka a manga bilibili ago
kambing,
ago tagoa ngka sa ginawa so manga pangangayamen ka;
24 Ka kagiya di matatatap so kakawasaan,
ago so kadato na kena a ba pegtey ko langon a kapepamagapidapid o masa.
25 Igira a miyaririk so otan a mitemos bo
ago miyatimo so leletaan a poon ko manga bobongan
26 Na pekambaal ka sa nditaren ko bombol a bilibili
ago makapemasa ka sa lopa ko arga o manga kambing.
27 Pekabegay so manga kambing sa gatas a diyangka a keinom iyo ago so pamiliya ngka
ago ikeoyag pen o manga talasogoay ngka a manga babay.
MANGA PANANAROON 28
Pepelagoy so marata a taw apiya pen da a peseloba on,
ogaid na so manga oontol na datar o arimaw a da a ipekelek iran.
2 Sii ko nasiyon a pesopaken on so gobirno

na madakel a magoolowan on.
ogaid na so dato a aden a sabot iyan ago katao na peketatap iyan so kapakambebeken o
inged.
3 So olowan a pepangarasiyan iyan so manga lolobay

na lagid o mabager a oran a da den a pelambaan iyan a pereperan.
4 So siran oto a petelikod ko manga sogoan na pepodin iran so manga rarata a taw,
ogaid na siran oto a petoman ko sogoan na pesorangen iran so manga rarata.
5 So manga baradosa na di pekasabot ko kokoman,

ogaid na siran oto a mananagontaman ko Allah na pepekasabot ko langon taman.
6 Tomo so miskin a pepaginetaw a magiinontolan

a di so bibid i olaola apiya pen kawasa sekaniyan.
7 So kangodaan a petoman ko sogoan na aya maongangen a wata,

ogaid na so dii makipagepeda ko da a oked iyan a manga taw
na mapepakaito iyan so ama iyan.
8 So taw a pepakadakelen iyan so tamok iyan a nggolalan ko kapamakaiseg ago katobo

na peketimo iyan ai a keosar o ped a taw a ikelimo iyan so manga miskin.
9 Apiya antawaa i dii mangimbengelen ko kitab

na apiya so kapangangarapan iyan na piyakasisingay.
10 Saden sa pendadag ko matito a taw sa kapepakikedegen iyan on ko marata a lalan

na keolog sekaniyan ko galebo a kiyalot iyan,
ogaid na so da a manga daway niyan na makapekewali siran ko kamapiyaan.
11 So kawasa a taw na ibibilang iyan kon a maongangen,

ogaid na so miskin a aden a sipat iyan na kepariksa iyan.
12 Igira a miyakadaag so manga oontol na mala a kapekeriyala,

ogaid na igira a miniporo so manga rarata na baden dii tetapok so manga taw.
13 Apiya antawaa i pepagemaan iyan so manga dosa niyan na di den pekapiya so bobolos
iyan,
ogaid na saden sa di niyan oto dii teobaten ago petelikodan iyan na ipengalinggagaw.
14 Rarakmatan so taw a lalayon so kipekeleken iyan ko Allah,

ogaid na so pepakategasen iyan a poso iyan na pekeolog ko kamoralaan.
15 Lagid o pegengger a arimaw o di na pendeseng a tingkalong

so marata a mama a dii ndato ko manga lolobay a taw.
16 So pepangarasi a olowan na korang i sabot,

ogaid na so pekegowad ko kanggagasab na kelendo a omor iyan.
17 So mama a kabebenaran ko kiyapamono na pepalagoy taman sa kapatay niyan;

da den a ba on makaogop.
18 Saden sa pepaginetaw a madidiyangka na malilinding,

ogaid na so bibid i olaola na kitekaw a kakeoteng iyan.
19 So dii nggalebek ko lopa iyan na kitaralo ron so pangenengken,

ogaid na so peseloba ko da a bali niyan na tanto a kemiskin.
20 So mapaparatiyaya a taw na pekadakel so manga riski on,

ogaid na so di niyan dii nggagaanan a kapekatamok iyan na di den kelepas ko kataksilaan.
21 So kasoramig na kena a ba mapiya,

ogaid na aden a taw a ketendanan sa apiya satebi bo a paan.
22 So mala i napso na magaanggaanen sa kapakatamok iyan,

na di niyan katawan a peraoten sekaniyan o kamimiskin.
23 So pembonget ko ped a taw na amay ka mibolog na lebi sekaniyan a kebabayaan

a di so taw a dii magorayoray so dila iyan.
24 Apiya antawaa i pepanekewan iyan so ama iyan o di na ina iyan

a tig iyan pen a "Kena ini a sala,"
na ped sekaniyan o tanganiyaya.
25 So dalo a taw na pepekaondoy ko katitidawa,

ogaid na so peserig ko Allah na kesoat piyapiya.
26 Saden sa peserig ko ginawa niyan na lalong,
ogaid na so taw a ipepaginetaw niyan so kaoongangen na malilinding.
27 So pembegay ko manga miskin na di den pekorangan,

ogaid na saden sa pipidengan iyan siran na kesintaan sa madakel.
28 Igira a miniporo so manga rarata i adat na baden dii tetapok so manga taw,
ogaid na igira a miyapepad siran na pepekarimpoong so manga oontol.
MANGA PANANAROON 29
So taw a omanoman lalangan a ba niyan den pepakategasa a olo niyan,
na kitekaw a kasiksaa on a da den a pekabolong on.
2 Igira a ipepangkat so manga oontol ko nasiyon na mabebebaya so manga magiinged,

ogaid na igira a dii ndato so manga rarata na dii makaperego so manga taw.
3 So mangoda a pekebabayaan iyan so ongangen na ikapipiya a ginawa o ama iyan,

ogaid na so dii makipagepeda ko manga sondal na pelagaan iyan so tamok iyan.
4 Nggolalan ko maontol a kapengokom na mapakapembeken o dato so inged,

ogaid na so dato a peterima sa manga tendan na penggobaren iyan ai.
5 Apiya antawaa i pepamagorayoray ko siringan iyan

na pekeyat sa poket a kikolibed ko ai niyan.
6 So dosa o marata a taw na aya on pekilitag,

ogaid na so magiinontolan na pepagidaida ago mapipiya a ginawa niyan.
7 So maontol a taw na pepaginengkaan iyan so kabenar o manga miskin,

ogaid na so marata a taw na da a sabot iyan sa kaketokawi niyan sii.
8 So manga makasodi na mapakapegondoya iran so manga taw ko siti,

ogaid na so manga oongangen na mapekalenggaw iran so kararangit.
9 O makipendaowa so maongangen a taw ko lalong

na baden kerarangiti o di na pegompat so lalong, na da a keondasan iyan.
10 So manga talibono na ipekegowad iran so madidiyangka a taw,

na pepanamaran iran so niyawa o manga titito.
11 Pepakamborngaten o lalong so langon a gani niyan,

ogaid na so maongangen na pepanginsabar ago gegenggenen iyan ai.
12 O tagoa o dato sa ginawa so di benar
na so langon a manga sanasanaan iyan na pembabaloy a marata.
13 So miskin ago so tangarasi na aden a ndataran iran;

so Allah i migay kiran langon sa kapakanono.
14 O ipengokom o dato ko manga miskin so tito a benar

na lalayon makambebeken so ndatoan iyan.
15 So badas ago so parinta na pepekabegay sa kaongangen,

ogaid na so bobotawanan a wata na mapakapekeya iyan so ina iyan.
16 Igira a miniporo so manga rarata a taw na pendakel so kapepakandosa,

ogaid na keilay o manga oontol so kakepepad iran.
17 Pinaa ngka so wata a ka, ka ipekalintad ka sekaniyan

ago ipekapiya pen a ginawa ngka.
18 Igira a da a miyapayag a lalag o Allah ko inged na pekebotawanan so manga taw ron

ogaid na rarakmatan so taw a petomanen iyan so Kitab.
19 So oripen na di kepina ko katero bo,

ka apiya pen o siyabot iyan na di niyan tegoon sa ginawa.
20 Ba ka miyakailay sa taw a magaanggaanen i katero?

Mala a panginam ko lalong a di sekaniyan.
21 So taw a di niyan dii pakateyaan so oripen iyan ipoon ko kawawatai ron

na amay ka mibolog na kebaloy den so oripen a makapekewali.
22 So raboraboten a mama na pekepokaw niyan so katitidawa,

na so mala i gani na dii makasela sa madakel.
23 So maratabat o taw na ipekababa iyan,

ogaid na so ibababa iyan a ginawa niyan na pekakowa sa bantogan.
24 So dokapila o tekew na giya ginawa niyan i ridoay niyan,

ka amay ka pakapesepaan sekaniyan na di niyan keraw tero so benar.
25 So kalek ko manosiya na pepekaosod on ko litag,

ogaid na apiya antawaa i peserig ko Allah na malilinding.
26 Madakel a pepanamar ko limo o olowan,

ogaid na pepekapoon ko Allah so kapaginontolani ko taw.
27 So di maontol a taw na ipekegowad o manga oontol,
na so matito i olaola na ipekegowad o manga rarata.
MANGA PANANAROON 30
So manga katero i Agor a wata i Yakih a aya lalag iyan on na:
Giyangkai a mama na pitero iyan ki Itiyal, sii ki Itiyal ago si Okal a:

2 Lebi ako a boda a di so apiya antawaa a taw;
da raken so kapakasasabot a patot a sisii ko manosiya.
3 Da ako den makapaganad sa kaongangen
aya pen o ba makakenal sa katawi ko Soti a Tohan.
4 Antawaa i miyakapanik sa kasorgaan a miyakapanog bo?

Antawaa i miyatimo iyan so ndo sii ko palad a lima niyan?
Antawaa i miyapotos iyan so manga ig sii ko gerab iyan?
Antawaa i miyapakambeken iyan so langon a manga temanaan o doniya?
Antawaa i ngaran iyan, ago antawaa i ngaran o wata iyan?
Teroa ngka raken o katawi ngka.
5 Oman i katero o Tohan na kiyatepengan a tito a benar;

kelong sekaniyan o siran oto a pepagapas rekaniyan.
6 Di ngka pagomani so manga katero iyan,
ka o ba ka niyan baden taksila ago mapekiilay niyan a bokeg ka.
7 Ya Allah, pengnin ko reka a nggolaolaa ngka raken angkai a dowa a betad sa di aken
pen kapetay:
8 Pakawatana ngka raken so kapamagakal ago so kapamokeg,
na di ngka raken mbegan so kamimiskini aya pen o ba kakawasaan;
began ka raken baden so katatangkaan a pekekan aken.
9 Ka o mitaralo so rek aken na o ba aken seka baden mipelaw
ago peteroon ko a "Antawaa so Allah?"
na o mamiskin ako na o ba ako baden makapamanekew
ago ipekaito aken so Ingaran o Tohan aken.
10 Di ngka pegitowitoa so oripen sii ko kadnan iyan,

ka pesintaan ka niyan na ketokawan a miyakasela ka.
11 Aden a manga taw a di iran dii sintaan so manga ama iran

ago di iran pen pelimoon so manga ina iran.
12 Aden a manga taw a a pipikiren iran a masosoti siran
ogaid na da siran den malompiyo ko karesik iran.
13 Aden a manga taw a sayana a mipoporo so manga mata iran
ago makasodi so kapepangilailay iran.
14 Aden pen a manga taw a so manga ngipen iran na lagid o manga pedang,
ago datar o manga gelat so manga bagang iran
sa kapesekaba iran so manga miskin sii sa doniya
ago so kikadodowaanan ko manga manosiya.
15 So salimatek na dowa kataw i wata a babay a pepelalalis sa

"Begay ka! Begay ka!"
Telo a nganin a di den kesemo, ago pat a di den petero sa "Kiyatangkaan!":
16 So darpa o miyamatay,
so roranan a wata o balek a babay,
so lopa a da den masemo a ig,
ago so apoy a di den petero sa "Kiyatangkaan!"
17 Saden sa pepagongatongat ko ama iyan ago dii sodi ko kapeparatiyayaa niyan ko ina
iyan
na patot a penokaan o manga kakowak so manga mata o bangkay niyan
ago pegdasan sekaniyan o manga banog.
18 Telo betad a tanto raken a piyakamemesa,ago pat a di aken kesabotan:

19 So kapelayog o garoda sii sa kawang,
so kapendola o nipay ko liyawaw o ator,
so kapelayalayag o kapal sii sa kalodan,
ago so kapanganakani o mangoda a mama ko raga.
20 Giyai i olaola o sebo a babay:

pekan sekaniyan ago pesising ko ngari iyan
a tig iyan a "Da a pinggolaola ko a marata."
21 Telo a nganin a ipetebad o doniya, ago pat a di niyan kekena:

22 So oripen a miyabaloy a dato,
so lalong a maoosog sa pangenengken,
23 So piyakagowagowad a babay a miyapangaroma,
ago so oripen a babay a kiyaagawan iyan so kadnan iyan a babay.
24 Pat a nganin a manga roroni sii sa doniya,

ogaid na tanto siran a maongangen:
25 So manga pila na kena a ba manga babager a kaaden,
ogaid na di iran dii tiyagaren so pangenegken iran igira a pangolaon;
26 So manga taksing na manga iito i gees a kaaden,
ogaid na pegembaalan iran so manga walay iran sii ko manga lakongan,
27 So manga tarapan na da a olowan iran,
ogaid na parengarengan siran i kalayog a masasagorompong;
28 Ago so manga tagetek na kedakep a lima,
ogaid na peketoon ai sii ko manga torogan o dato.
29 Telo pen a nganin a mapiya siran i kalakad,

ago pat a mapiya a pegilain ko kapelalakaw iran:
30 So arimaw a mabager ko langon a manga binatang a da den a telikodan iyan;
31 So domadangkag a lomesed, so mandangan,
ago so dato igira a ped iyan so manga sondaro niyan.
32 Opama ka milalolalong ka ko kiniporoon ka sa ginawa ngka,

o di na so kiyapagantangan ka sa kamarataan
na dapengen ka a lima ngka sa ngari i ka.
33 Ka so kakambora ko gatas na ipembatik o gatas
ago so kabibida ko ngirong na ipepirogo iyan ai,
na lagid mambo o kakolikawa ko gani na kesabapan ko katitidawa.
MANGA PANANAROON 31
So manga pananaroon o Dato Limowil,
a so mapened a manga katero a inipangendao ron o ina iyan:
2 Hey wata aken, hey wata a miyakapoon ko tiyan aken,

hey wata a ampon o manga pangangarapan aken,
3 Di ngka pelagaa so bager ka ko manga babay
aya pen o ba so kapaginetaw ngka ko siran oto a pepaminasa ko manga dato.
4 Kena a ba wadib, hey Limowil,

kena a ba wadib ko manga dato so kainom sa arak
aya pen o ba so kapekebabayai o manga olowan ko mabisa a panginginomen.
5 Ka igira a mininom siran na o ba iran baden kalipati so iniording o manga sogoan,
ago o ba iran karampasi so manga miskin ko manga kabenar iran.
6 Begi ngka sa mabisa a panginginomen so siran oto a magaan den mamatay,
ago begi ngka sa arak so siran oto a tetalogedam so poso iran.
7 Peroa ngka a kapakainom iran on kaan iran kalipati so karomasayan iran,
ago di iran den ketanodan so kararata a ginawa iran.
8 Teroon ka so siran oto a di iran mipetero a ginawa iran

sa kapenindegen ka ko kabenar o langon a da a ba on pekaogop a manga taw.
9 Teroon ka siran ago kokomen ka so kaontol;
na panindegen ka so manga kabenar o manga miskin ago manga kadodowaanan.
So Karoma a Babay a Mapiya i Parangay
10 Antawaa i pekatoon sa mapiya i parangay a karoma a babay?

Mala sekaniyan i arga a di so manga montiya.
11 Makasasarig on so poso o darodopa iyan,
na di sekaniyan den pekorangan ko kapakalaba.
12 Pegowitan angkai a babay sa kamapiyaan so karoma niyan, a kena a ba kamarataan,
ko langon a gawii o kaooyagoyag iyan.
13 Pepagaraon iyan so alpaka ago sida a dinis,
na ikasosoat iyan so dii kanggalebek o manga lima niyan.
14 Lagid sekaniyan o manga kapal a dii meroran sa manga dagangan;

pegawid sekaniyan sa pangenengken iyan a poon ko manga wawatan.
15 Pegembowat sekaniyan sa di pen pekelibabas
a di niyan dii tiyagaran sa pangenengken so pamiliya niyan
ago pesenganan iyan sa galebek so manga talasogoay niyan a manga raga.
16 Pepamangiloba sekaniyan sa lopa
na ipepamasa niyan on so pekepantiyari niyan,
na di niyan dii sesapadanan sa manga obas.
17 Mategas sekaniyan i kanggalebek,
na di ndokawan so manga barokan iyan.
18 Katawan iyan a pekelabaan iyan so di niyan dii kandagang;
na di kepareng so solo iyan igira a gagawii.
19 Pepagembaal sekaniyan sa tiniker,
ago pegaol on.
20 Bebekaren iyan a manga lima niyan ko manga miskin,
ago kakawaan iyan a lima so kikadodowaanan.
21 Da a kalek iyan mipantag ko pamiliya niyan igira a masa a matenggaw,
ka langon siran makandiditar sa makapal.
22 Pegaol sekaniyan sa manga tanggob ko igaan iyan;
ndiditar sekaniyan sa maomel a sida a rambayong.
23 Pagaadatan so karoma niyan a mama sii ko gimowa o siti
a ron sekaniyan pegontod a ped o manga pelokelokesen ko inged.
24 Pepagembaal angkai a babay sa manga nditaren a sida ago manga sambitan
a di niyan dii pepasaan ko manga padagang.
25 Mandiditar iyan so bager ago menang,
na ba niyan den pesingaan so pekatalingoma a manga gawii.
26 Sasartaan a ongangen so di niyan dii katero,
na so limo na aya makapepaar ko dila iyan.
27 Sisiyapen iyan piyapiya so kapakambebetad o pamiliya niyan,
na di sekaniyan den mbokelen.
28 Pepamangembowat so manga wata iyan a perakmat on,
ago so karoma niyan mambo, na pepodin iyan pen a tig iyan a
29 “Madakel den a babay a dii nggolaola sa tanto a mapiya,
ogaid na seka i tindos kiran langon."
30 So kakasi na pepamagakal, na pekelas bo so kataid,

ogaid na kepodi so babay a maaleken ko Allah.
31 Balasen ka on so domadait ko langon a pinggolaola niyan,
na podiya ngka sekaniyan sii ko madakel a taw sabap ko manga galebek iyan.
SO PANGONGOSIYAT
SO PANGONGOSIYAT 1
So Langon Taman na da a Lalaw niyan
So manga katero o Pangongosiyat, a so wata o Daod ago dato sa Yarosalim:
2 “Da a lalaw niyan! Da a lalaw niyan!"

a tig o Pangongosiyat.
"Da den a lalaw niyan;
so kalangolangon na mataan a da den a ba niyan lalaw."
3 Antonaa i mapenggona o taw ko langon a galebek iyan

a pananamaran iyan sii sa doniya?
4 Dii pamagapidapidan so manga taw ago pepanga ada bo,
ogaid na di den kealin so doniya sa taman sa pakataman.
5 Pesebang so alongan ago pesedep,
na dii nggagaan komasoy ko pesebangan iyan.
6 Pesember so ndo sa pagabagatan,
ago pesember sa pagotaraan
a di den dii magalibet
ago di bo dii peto ko lalan iyan.
7 So langon o lawasaig na pepamangondas ko ragat,
ogaid na da bo ini solapay;
na so manga bowalan o manga lawasaig
na ron bo pekesoy so manga ig.
8 Langon angkai a pekesowasowa
na palaya den pakasemo;
di siran den mapekentay o apiya antawaa.
Di den peteman milay so manga mata tano
aya pen o ba masemo mamakineg so manga tangila tano.
9 So miyasowasowa gowani na kesowasowa peroman,
na so pinggolaola gowani na penggolaolaan peroman;
da den a ba bago sii ko dalem a doniya.
10 Ba aden a kimbina o apiya antawaa a tig iyan a
"Ilaya ngka man! Bago ini"?
Kena, ka kapapantagan den gowani ko miyatey den a oleg
ko da pen so masa tano.
11 Da a ba pekatadem ko miyanga iipos a miyasowasowa,
na so pepanga sosowa imanto
na di den ketademan ko pekatalingoma a manga gawii.
So Ongangen na da a Lalaw niyan
12 Saken, a so Pangangosiyat na aya dato sa Israil a mababaling sa Yarosalim.

13 Nggolalan ko ongangen na piyanagontamanan aken so kapepaganadi ago so di aken dii
kapandapati ko langon taman a dii manggolaola sii sa doniya. Mataan a karomasayan ai a
kapaginetaw a inisanggolay o Tohan ko manga manosiya!
14 Miyailay aken so langon taman a dii nggolaolaan o manosiya sii sa doniya, na langon
ai da a lalaw niyan a lagid o kaseloba sa ndo.
15 So bibid na di mapekatito;
so kakokorangan na di keganap.
16 Pitero aken sa ginawa ko a "Miyabaloy ako a lebi a maongangen a di so apiya antawaa

ko miyanga oonaan aken a mindato sa Yarosalim. Kiyatokawan aken piyapiya o antonaa
i tito a ongangen ago katao."
17 Na piyanamaran ko somabot o antonaa i mbidaan o kaongangen ago so kabebetengan
ago kalalalongan ogaid na kiyatokawan ko a apiya ngkai a kapekenala ko ron na datar o
kaseloba sa ndo.
18 Ka so mala a ongangen na oonotan o madakel a awid a akal,

na apiya antawaa i pegomanan iyan so katao niyan
na pepegomanan iyan mambo so kararasay niyan.
SO PANGONGOSIYAT 2
So Kakeriyala na da a Lalaw niyan
Na pitero aken sa ginawa ko a "Tepengan ko so kakeriyala kaan aken katokawi o antonaa

i tito a kapipiya a ginawa." Ogaid na da mambo a lalaw niyan.
2 “Kalalalongan so kapekekayad," a tig aken, "na antonaa i gona o kakeriyala?"
3 Sii ko oriyan o kiyanggedagedaa ko ron na piyasad aken sa ginawa ko a pekapiyaan ko
a ginawa ko ko arak ago pekipaar ako ko kalalalongan. Pinggolaola ko ini sii ko di raken
dii kanggonanaowa o pamikiran aken a nggolalan ko ongangen kaan aken mapariksa o
antonaa i mapiya a mapenggolaola o manga manosiya sii ko makampet a kaooyagoyag
iran sii sa doniya.
4 Minggalebek ako sa manga ala a galebek: inibangon aken a ginawa ko sa manga walay
ago inipamamola ko a ginawa ko sa manga asinda a obas.
5 Mimbaal ako sa manga sapadan ago miyamamola ko sa manga onga sapad ago langon a
pitibarangan a manga kayo.
6 Mimbaal ako pen sa manga petangelan sa ig a pepakaondasen ko madakel a manga
kayo aken a marimpoong.
7 Miyamasa ko sa manga oripen a manga mama ago manga babay, na aden pen a manga
oripen a sii inimbabawata ko torogan aken. Tanto a madakel a manga ayam aken a
manga sapi, bilibili ago kambing a lebi pen a di so rek o apiya antawaa ko miyanga
oonaan aken a miyamaginetaw sa Yarosalim.
8 Miyanimo ako pen sa madakel a manga pirak ago bolawan ago so manga kakawasaan o
manga dato ago so manga probinsiya. Miyangowa ko sa manga pababayok a manga
mama ago manga babay taman sa madakel a manga tataid a sandil a ikebabaya o poso o
manga manosiya.
9 Miyabaloy ako a lebi a mala i gees a di so apiya antawaa ko miyanga oonaan aken a
miyamaginetaw sa Yarosalim. Na sii sangkai a langon taman na da raken den mabelag so
ongangen aken.
10 Apiya antonaa i miyailay o mata ko a masisingayo aken na miyakowa ko;

da aken den nggenggena a ginawa ko ko kanggolaolaa ko apiya antonaa a ikebabaya o
poso aken.
Inikapiya a ginawa ko so langon o galebek aken,
na giyai i minibalas ko langon a pisebenaran aken.
11 Ogaid na kagiya pamimikiranen aken so langon o miyanga papasad o manga lima ko
ago so tanto raken a kiyadokawi ko kiyanggolaolaa ko ron,
na kiyasabotan ko a palaya den ai da a lalaw niyan,
ka datar bo o kaseloba sa ndo;
da den a ba ini bali sii sa doniya.
So Kaongangen ago so Kalalalongan na Palaya da a Lalaw niyan
12 Mandiyadi na piyasad aken sa ginawa ko a pemasaken ko so kaongangen

ago so kabebetengan taman ko kalalalongan.
Ka antonaa pen i mapenggolaola o pekasambi ko dato
a liyo ko miyanggolaola den?
13 Na miyailay aken a tomo so kaongangen a di so kalalalongan
a datar bo o kaliwanag a tomo a di so kaliboteng.
14 So maongangen na pekeilay niyan so pelalakawan iyan,
na so lalong na sii pelalakaw ko maliboteng.
Ogaid na miyapariksa aken a ndatadatar bo so keokitan iran langon.
15 Mandiyadi na pitero aken sa ginawa ko a

"So kerosengan ko lalong na aya ko mambo keokitan.
Sabap san na antonaa i gona niyan raken so kala aken i kaongangen?"
Na aya minigedi ko poso aken na
"Giyai mambo na da a lalaw niyan."
16 Ka so maongangen a datar mambo o lalong
na di bo ketey a katatademi kiran;
sii ko pekatalingoma a manga gawii na palaya siran kelipatan;
datar o lalong a so mambo so maongangen na petay.
17 Kagiya ka maoto na inikagowad aken so kaoyagoyag,
ka so langon a dii nggolaolaan sii sa doniya na ikasososa aken baden;
palaya ini da a lalaw niyan a datar bo o kaseloba sa ndo.
Da a Gona o Kapananamari ko Galebek
18 Inikagowad aken so langon taman a pindokawan aken sii sa doniya ka katawan ko a

kibagak aken ai baden ko pekatalondog raken.
19 Na antawaa i matao o maongangen o di na lalong sekaniyan? Na sekaniyan i
pekatangan ko langon a miyapasad o piyagatingan aken a galebek a rakes o kapasang
aken sii sa doniya. Giyai mambo na da a lalaw niyan!
20 Sabap roo na kiyadaan ako den sa inam mipantag ko langon o pindokawan ko sii sa
doniya.
21 Ka apiya pen mipenggolalan o taw so langon o kaongangen iyan, katao ago kapasang
iyan ko di niyan dii kanggolaolaa ko galebek iyan na kibegak iyan ai a mapekewali o ped
a taw a da on nggalebek. Da a lalaw ai ago tanto a bibid.
22 Antonaa den i mapenggona o taw ko kapananamar iyan ago rata a ginawa sii ko
langon a galebek a di niyan dii ndokawan sa doniya?
23 Mababasa alongan na so galebek iyan na karomasayan ago awid a akal, na apiya igira
a gagawii na di den pekadeke so pamikiran iyan. Giyai mambo na da a lalaw niyan.
24 Da den a mapenggolaola o taw a ba tomo a di so kakan ago kainom ago so kapekowaa

niyan ko kapipiya a ginawa sii ko galebek iyan. Na kiyatokawan ko a apiya ini na
pepekapoon ko Tohan.
25 Ka o di bo so Tohan na antawaa den i pekakan o di na pekatoon sa kapipiya a ginawa?
26 So taw a ikasosoat iyan na pembegan o Tohan sa ongangen, katao ago kapipiya a
ginawa. Ogaid na so baradosa na pembegan iyan sa sangan sa kapanimo sa kakawasaan a
kepalad o Tohan ko taw a ikasosoat iyan. Giyai pen na da a lalaw niyan a datar o
kaseloba sa ndo.
SO PANGONGOSIYAT 3
Aden a Oras o Langon Taman
So oman i pekesowasowa sii sa doniya na aden a oras iyan, na so oman i mapenggolaola

na aden a katitimpoi ron:
aden a oras a kipembawataan ago oras a kapetay,

aden a oras a kapemola ago oras a kapemadot,
3 Aden a oras a kapamono ago oras a kapamolong,
aden a oras a kakegeba ago oras a kakebangon,
4 Aden a oras a kapekasegad ago oras a kapakapekela,
aden a oras a kapakamboko ago oras a kakeriyala,
5 Aden a oras a kakeyara ko manga ator ago oras a kapenimoa on,
aden a oras a kanggakes ago oras a kambelag,
6 Aden a oras a kapakatoon ago oras a kakeda,
aden a oras a kapanimo ago oras a kapelebad,
7 Aden a oras a kakekisi ago oras a kapamanai,
aden a oras a karerenek ago oras a kapetero,
8 Aden a oras a kababaya ago oras a kagowad,
aden a oras a katidawa ago oras a kalilintad.
9 Antonaa i keparoli o taw ko langon o pindokawan iyan?
10 Miyailay aken so pimbarambarangan a manga galebek a pepakipanamaran o Tohan ko
manga manosiya.
11 Tindo o Tohan so osto a masa a kakesagadi ko langon taman. Ogaid na tiyagoan iyan
pen sa kada a peleng so poso o manga manosiya kaan iran di keteked o antonaa i dii
nggolaolaan o Tohan ipoon ko poonan o kapepaginetaw iran taman den sa kaposan.
12 Kagiya ka maoto na kiyatokawan ko a da den a mapiya ko manosiya a ba lawan ko
kapekebabaya iyan ago so kanggolaola sa mapiya sii ko tenday a omor iyan,
13 Ka aya pamemegayan o Tohan ko oman i isa na so kapekakan ago kapekainom iyan
ago so kapipiya a ginawa niyan ko langon o galebek iyan.
14 Katawan ko a saden sa dii nggolaolaan o Tohan na ketatap sa taman sa pakataman; da

den a kioman on aya pen o ba aden a malebat on. Aya antap sii o Tohan na an sekaniyan
mikalek o manga taw.
15 Apiya antonaa i dii manggolaola imanto

ago sii ko pemakatalingoma a manga gawii
na miyanggolaola den gowani;
ka pakipenggolaola peparoman o Tohan so miyanggolaola den.
16 Na aden pen a miyailay aken sii sa doniya:

so katito na kiyasambian sa kamarataan,
na so kaontol na kiyasambian sa kadostaan.
17 Na pitero aken sa ginawa ko a:

"So Tohan na palaya iyan kokomen so manga oontol ago so manga rarata,
ka aden a miyatendo a masa ko oman i galebek
ago so oman i penggolaolaan."
18 Miyapamikir aken pen a so manga manosiya na petepengan o Tohan kaan iyan kiran
mapakikilala a datar siran bo o manga binatang.
19 Ka ndatar bo a kerosengan ko manosiya ago so manga binatang; ndatar so manga
niyawa iran na palaya siran pematay. Da a milalawan o manosiya ko binatang, ka palaya
siran somasagad.
20 Ndatar so darpa a pekeantapan iran; langon siran poon ko bayanek, na palaya kesoy ko
bayanek.
21 Antawaa i matao o song sa poro so niyawa o manosiya ago song sa didalem o lopa so
niyawa o binatang?
22 Kagiya ka maoto na kiyasabotan ko a da den a lebi a mapiya ko taw a ba pen lawan ko

kikapiyaan a ginawa niyan ko manga galebek iyan, ka giyanan i sangan iyan; ka da den a
taw a ba niyan katokawi o antonaa i keolaola niyan oriyan o kapatay niyan.
SO PANGONGOSIYAT 4
Na miyangilailay ako peroman na miyailay aken pen so langon a kapesetro sii sa doniya:
Miyailay aken so manga lo o manga pesetroon

na da den a ba kiran pekatayo
aya pen o ba aden a makapanabang kiran,
ka so kapaar na tomatampil ko pesetro kiran.
2 Sabap san na aya katao ko ron na so manga taw a miyamatay den
na mala i okor a di so siran oto a oyagoyag pen.
3 Ogaid na aya lebi a miyakaokor a di siran
na so da mimbawata,
ka da iran mailay so manga kamarataan
a dii nggolaolaan sii sa doniya.
4 Na miyainengka aken a aya pepekaoyat ko manga taw ko langon a manga galebek a

pepanamaran iran na so kipekesigin iran ko manga siringan iran. Giyai pen na da a lalaw
niyan a datar o kaseloba sa ndo.
5 So lalong na lomalangag baden na pepetay a ongos.

6 Oway, ogaid na tomo so sagamak a pangenengken a rakes o kapakadeke
a di so dowa on gamak a rakes o da den a kapakadeke
ago so kapeselobaa ko ndo.
7 Aden pen a miyainengka aken a da a lalaw niyan sii sa doniya:

8 Aden a toron a mama
a da a ba niyan wata o di na pagari,
ogaid na lalayon sekaniyan sesabenar nggalebek
a di den keonseran ko kakawasaan iyan.
"Antawaa i ipepanamar aken nggalebek?" a iniise iyan sa ginawa niyan,
"na ino aken peligeti a ginawa ko ko kapipiya a ginawa?"
Giyai pen na da a lalaw niyan
ka karomasayan ai a kapaginetaw!
9 So dowa kataw na tomo a di so sakataw

ka mala pen a kapakagaga o galebek iran.
10 O maoteng so isa
na mapekambowat o ped iyan.
Ogaid na dowaan iyan so taw a keoteng
a da den a pekabowat on!
11 Na o merembang so dowa kataw na makapekeyawa siran,
ogaid na andamanaya i kakeyawi ko sakataw bo?
12 Apiya pen o madaag o gomogobat so sakataw
na makapengato rekaniyan so dowa.
So tali a telo a binibid na kena a ba malebod mapotol.
So Kapakalalawan na da a Gona niyan
13 Tomo so miskin ago maongangen a kangodaan a di so lokes ago lalong a dato a di den
pekimosawir.
14 Apiya o inimbawata a miskin angkoto a kangodaan ago miyakalaboso na kepakay a
mabaloy sekaniyan a dato sii ko ndatoan iyan.
15 Pinggedageda aken so langon a taw a pepaginetaw ko doniya na kiyatanodan aken a
aden a mangoda kiran a pekasambi ko dato.
16 Ogaid na apiya pen da den a pitetamanan o kadakel o manga taw a kapendatoan o dato
na amay ka matay sekaniyan na da den a ba on podi. Giyai pen na da a lalaw niyan a
datar o kaseloba sa ndo.
SO PANGONGOSIYAT 5
Di ka Penggagaan Semaya
Iktiyari ngka so okitokit ka amay ka somoled ka ko Walay o Tohan. Tomo a somong ka

roo a pemakineg a di sa ba ka korban a datar o lalong a di niyan katawan o antonaa i ontol
ago antonaa i ribat.
2 Pamikira ngka pasin sa di ngka pen kapetero

na di ka penggagaan semaya ko Tohan;
ka sisii so Tohan sa langit na sisii ka sa doniya.
Sabap san na pakainota ngka so manga katero o ka.
3 So madakel a awid a akal na pekesabapan sa kapeteginep sa manga rarata a taginepen,
na datar oto mambo a so dii kamberak
na pekesabapan ko dii kapakatero sa kalalalongan.
4 Igira a misemaya ka ko Tohan na di ngka sendoden so kitomanen ka on. Di niyan

ikesoat so manga lalong; tomanen ka so samaya a ka.
5 Tomo a da ka den semaya a di sa ba ka misemaya a di ngka bo tomanen.
6 Di ngka peparoa a ikadosa ngka so manga katero o ka kaan ka di mapetero ko imam a
"Miyaribat so samaya aken." Ikerarangit ai o Tohan na masiken a mbinasaan iyan so
langon a galebek o manga lima ngka.
7 So madakel a taginepen ago madakel a manga katero na palaya den da a lalaw niyan;
kaleken ka baden so Tohan.
Da a Gona o Kakawasaan
8 O mailay ngka so kapenggasaba ko manga miskin ago so kapembibida o gobirno ko

kokoman ago so kaontol na di ngka ini pememesan; ka so oman i opisiyal na pepenogoon
o maporo iyan, na pepenogoon siran pen o manga poporo kiran.
9 So pekepantiyari o inged na pepamagagaon o langon iran; na so den so dato i pekalaba
ko manga lopa on.
10 Apiya antawaa i pekebabaya sa pirak na di den keosog sa pirak;
na saden sa pekebabaya sa kakawasaan na di den kesoat ko pekepantiyari niyan.
Giyai pen na da a lalaw niyan.
11 Igira a pepekadakel so manga tamok o taw

na pepekadakel mambo so melengan on.
Na antonaa i bali niyan ko kirek on
a liyo ko kapekebabaya iyan ko di niyan on dii kambantayi?
12 Petorogen piyapiya so gomagalebek
ndatar o makakan sa maito o di na mala,
ogaid na di torogen so kawasa sabap ko kitataralo o tamok iyan.
13 Aden pen a marata a miyanggolaola a miyailay aken sa doniya:

miyapanimo o taw so kakawasaan na inikabinasa niyan ai,
14 O di na miyada rekaniyan angkai a kakawasaan sabap ko kada a okor,
a miniarong baden sa da a miyalamba on
a kibegak iyan ko manga wata iyan.
15 Talandiyang so taw isako poon ko tiyan o ina iyan,
na saden sa kiyapakatalingoma niyan ko doniya na datar oto mambo a kangganat iyan on;
da den a ba niyan mipetelon ko pindokawan iyan.
16 Tanto ini pen a marata:

datar o kiyapakatalingoma o taw ko doniya na giyoto den i kangganat iyan on,
na antonaa i miyaparoli niyan
sii ko kiyapagatingi niyan ko ndo?
17 Liyo ron pen na pekan sekaniyan sii ko maliboteng ko tenday a omor iyan
a mararata a ginawa niyan ago pekerarangitan ago pekesakit.
18 Apiya pen oto na kiyatokawan ko a aya mapiya ago patot a penggolaolaan o taw na so
kakan ago kainom ago so kapipiya a ginawa niyan ko galebek a pepagatingan iyan sa
doniya sii ko makampet a kaooyagoyag a inibegay rekaniyan o Tohan, ka giyanan i okor
iyan.
19 Liyo ron pen na igira a pembegan o Tohan sa kakawasaan ago tamok so taw ago
peparon iyan on a ikapiya ini a ginawa niyan, ago ikesoat iyan so ookoran on, ago
ikababaya iyan so galebek iyan, na giyai den i pamemegayan on o Tohan.
20 Kena a ba lalayon iaawid a akal iyan so makapantag ko kakampet o kaooyagoyag iyan
ka kagiya pembegan sekaniyan o Tohan sa manga katembangan a ikapipiya a ginawa
niyan.
SO PANGONGOSIYAT 6
Aden pen a kamarataan a miyainengka aken sii sa doniya, na tanto ini a mipepened ko
manga manosiya.
2 Mbegan o Tohan so isa a mama sa kakawasaan, manga tamok ago bantogan kaan da
den a kekorang ko masisingayo iyan, ogaid na di rekaniyan peparon o Tohan o ba niyan ai
kaosbai, ka so baden so salakaw a taw i pekaosba on. Da a lalaw ai ago tanto a marata.
3 Kepakay a mbabawata so mama sa magatos a wata ago makapeginetaw sa madakel a

manga ragon, ogaid na apiya i kalendo o omor iyan na o da a kapipiya a ginawa niyan ago
di mikobor piyapiya na mapetero aken a tomo so inimbawata a maatay den a di
sekaniyan.
4 Da a lalaw o kinimbawataan sangkoto a wata ka kedadas sekaniyan baden ko
maliboteng ago kelipatan.
5 Di niyan keilay so sinang o alongan aya pen o ba niyan katokawi o antonaa i
kapaginetaw, ogaid na mala a kadedeke iyan a di giyangkoto a mama
6 A apiya pen makapagidad sekaniyan sa dowa nggibo ragon na da mapiya a ginawa
niyan ko kiyapaginetaw niyan. Ba di ndatar a songowan iran a darpa?
7 So langon o panamar o taw na sabap sa an iyan makowa so ken iyan,

ogaid na di sekaniyan keosog.
8 Kagiya ka maoto na antonaa i milalabit o maongangen ko lalong?
Antonaa i keparoli o miskin sa katokawi niyan
o antonaa i patot a paparangayan iyan?
9 Tomo a ikapiya a ginawa ngka so sisii reka
a di sa ba ngka singayoa so da reka,
ka da a lalaw ai a lagid bo o kaseloba sa ndo.
10 So langon a pekeolaola na miyanga tatakdir den gowani,

na palaya tano ron matao a da a bali o kapepawala o taw ko Tohan mipantag ko
kerosengan on
ka mala i kapaar so Tohan a di sekaniyan.
11 Sii ko kapepakalayata o taw ko kapemawal iyan
na pepekaito mambo i bali so manga katero iyan,
na antonaa i keparoli niyan sii?
12 Ka antawaa i matao ko lebi a mapiya ko taw ko kaooyagoyag iyan sii ko makampet

ago somasagad a manga gawii niyan a baden pepanga ada a lagid o along? Antawaa i
makapetero rekaniyan ko keoriyan on sii sa doniya?
SO PANGONGOSIYAT 7
Kaongangen
So mapiya a totolan ko taw na mala i bali a di so lebi a mala i arga a ikekamotan,

na so gawii a kapetay niyan na tomo a di so gawii a kinimbawataan on.
2 Tomo so kasong ko walay a dii ndiyagaan
a di so kasong ko walay a dii kandorian,
ka so kapatay na aya keoriyan ko oman i taw
na patot ko oyagoyag a tatanodan iyan ai.
3 So kapakamboko na tomo a di so kakela,
ka apiya o ipekerata ini a paras
na pepekasoti ko poso.
4 Madadalem ko poso o maongangen so kapakamboko,
ogaid na madadalem ko poso o lalong so dii kakeriyala.
5 Tomo ko taw so kapembongeti ron o maongangen

a di so kapepodiya on o lalong.
6 So dii kakekala o lalong
na datar o kapelalagti o petotongen a manga soroken sii ko apoy
na da den a ba ini maana.
7 Amay ka manalimbot so maongangen na datar sekaniyan o lalong,

na amay ka tomarima ka sa tendan na mbinasaan ka so parangay ngka.
8 So kiyaimasada ko galebek na tomo a di so kiyapooni ron;

so kasebar na tomo a di so katekabor.
9 Di ka malebod otegan,
ka so rarangit na komakaden ko poso o manga lalong.
10 Di ngka pegisean a "Ino tomo so kapakambebetad tano gowani a di sa imanto?"

Kena oto a ba kaongangen a pakaise.
11 So ongangen na datar sa kapiya o kawali,

na dii kanggonaan o langon a taw.
12 So ongangen na pepekalinding ko taw
a datar o kapelindinga on o pirak.
Ogaid na aya kaoona o katao na giyai:
so ongangen na pepegongowan iyan so kaoyagoyag o kirek on.
13 Pamimikirana ngka so miyanggolaola o Tohan:

Antawaa i pekabeter ko biyaloy niyan a bekog?
14 Igira a mapiya so kapakambebetad ka na kababaya ka,
ogaid na igira a marata na tanodi ngka ini:
palaya den ai pegowiten o Tohan.
Sabap roo na da den a taw a ba niyan katokawi
o antonaa i telondog a keolaola.
15 Sii sangkai a da a lalaw niyan a kapepaginetaw aken na miyailay aken angkai a dowa a
miyaolaola:
Aden a taw a petay ko kangodai ron apiya pen maontol sekaniyan,
na aden mambo a malendo i omor apiya pen baradosa sekaniyan.
16 Kagiya ka maoto na di ngka teralon so kaontol ka,
aya pen so kaongangen ka.
Ino ngka on pekibinasaan a ginawa ngka?
17 Na di ngka mambo teralon so kamarataan ka,
na di ka pelalong.
Ino ka petay ko di ngka pen oras?
18 Aya tomo na kakapeti ngka so isa sangkai a lalangan
ago di ngka mbokai so ped iyan.
So taw a maaleken ko Tohan na tomanen iyan ai langon.
19 So ongangen na ikebaloy o maongangen a mabager

a di so sapolo kataw a dato sii ko siti.
20 Da den a maontol a taw sii ko doniya

a ba lalayon dii nggolaola sa ontol ago di den makapendosa.
21 Di ngka tegoa sa ginawa so langon a dii teroon o manga taw,
ka o ba ngka baden maneg so oripen ka a pepagongatongat reka.
22 Ka katawan ka den sii ko poso o ka
a di ngka mambo dii mapagongatongat so manga ped.
23 Langon aken ai kiyatepengan a nggolalan ko ongangen aken. Pitero aken sa ginawa ko

a:
"Pesebenaran ko a kapakaongangen aken,"
ogaid na mawatan ai raken.
24 So ongangen na lalayon tanto a mawatan ago maregen saboten;
antawaa i pekatoon on?
25 Sabap san na piyanagontamanan aken so kapaganadi, kasaboti ago so kakenala ko ko
ongangen
ago so tod o manga nganin,
ago so pen so kasaboti ko ko kada a lalag o kamarataan
ago so kabebetengi ko kalalalongan.
26 Kiyatokawan ko a aya lebi pen a mapait a di so kapatay

na so babay a so kababaya a imbegay niyan reka na lagid o litag ago sampirot,
na so manga barokan iyan na lagid o manga rantay a ipetong reka.
So mama a ikasosoat o Tohan na pekalidas sangkoto a babay,
ogaid na so baradosa na kelitagan rekaniyan baden.
27 “Oway, giyai i kiyatokawan ko," a tig o Pangongosiyat,
"sii ko kapepanamari ko somabot ko maana o langon o manga nganin.
28 Da aken ai magaga,
ogaid na sii ko kapepanamar aken
na kiyatokawan ko a sii ko sanggibo a manga taw na sasakataw bo a matito ron a mama,
ogaid na da den a isa bo a ba on matito a babay ko langon iran.
29 Giyai bo i kiyasabotan ko:
Inaden o Tohan so manga manosiya a matito
ogaid na madakel a manga rarata a miyasinganin iran."
SO PANGONGOSIYAT 8
So maongangen a taw i matao ko maana o manga nganin.
So ongangen o taw na ipekalangas o paras iyan
ka ipekeda ini o kapakaririmeng iyan.
Paratiyayaa ngka so Dato
2 Tomana ngka so isogo o dato, ka kagiya miyakasepa ka ko hadapan o Tohan a sowaan

ka ini.
3 Di ka penggagaan mangadap ko dato. Di ngka tindegen so marata a kadiyat, ka
mapenggolaola o dato so apiya antonaa i kabaya iyan.
4 Na kagiya di kelawanan so kapaar o sogoan o dato na da den a ba on makapetero sa
"Antonaa ngkai a pesowaan ka?"
5 Saden sa petoman ko sogoan iyan na di pekatintim ko marata,

na katawan o maongangen a taw so osto a oras ago okit sa kapenggolaolaa niyan sii.
6 Ka aden a osto a oras ago okit sa kipenggolalanen ko oman i antap
apiya pen mipepened ko manga taw so manga awid a akal iran.
7 Da den a taw a ba matao ko pekatalingoma,

na da a ba kiran makapetero o antonaa i keolaola.
8 Da a taw a ba aden a kapaar iyan sa kapagrena niyan ko ndo,
na datar oto mambo a da den a taw a ba niyan ketendo so gawii a kapetay niyan.
Da a sondaro a ba mbalokasi ko masa a katidawa,
na sakamaoto mambo a so kamarataan na di niyan mbokaan so siran oto a di on dii
nggolaola.
9 Sii ko di aken dii kanggedagedaa ko langon taman a dii manggolaola sii sa doniya na
miyailay aken ai: Igira kowan na makapepaar so isa a taw ko manga ped iyan a ikebinasa
ini o ginawa niyan.
10 Miyailay aken pen so manga rarata a taw a omanoman somong ko soti a timplo, na
oriyan o kinilebengen kiran na pembantogen siran sii ko siti a ron iran pinggolaola so
manga kamarataan iran! Giyai pen na da a lalaw niyan.
11 Igira a da kanggagaani domaneg so kasalaan na matotordo baden so dii kakediyata o

manga manosiya ko kanggolaola iran sa marata.
12 Inonta bo na apiya o makanggolaola so baradosa sa makamagatos a kasalaan ago
malendo pen a omor iyan na katawan ko a tomo so bobolos o manga taw a maaleken ko
Tohan a pagaadatan iran sekaniyan.
13 Ogaid na kena a ba mapiya i bobolos so manga baradosa ka kagiya kena a ba iran
ipekelek so Tohan, na di pekalendo so omor iran a lagid o along.
14 Aden pen a maregen saboten a dii manggolaola sii sa doniya: aden a manga oontol a
pekibadal kiran so mapapatot ko manga galebek o manga baradosa, na aden pen a manga
baradosa a pekekowa iran so mapapatot ko manga galebek o manga oontol. Pitero aken a
giyai mambo na da a lalaw niyan!
15 Kagiya ka maoto na ipemosawir aken so dii kakeriyala, ka da den a lebi pen a mapiya
ko taw sii sa doniya a ba pen lawan ko kakan ago kainom ago so kapekebabaya iyan.
Sabap sii na magonot rekaniyan so kapipiya a ginawa sii ko kapepanamar iyan nggalebek
ko tenday a omor iyan a inibegay ron o Tohan sii sa doniya.
16 Gagawii daondaw na da ako den toroga sii ko kapepanamari aken ko kapakaongangen

aken ago so kakenala ko ko langon a pekeolaola sii sa doniya
17 Na kiyatokawan ko a da den a ba pekaseseb ko langon o dii nggolaolaan o Tohan sii sa
doniya. Apiya pen pepanabenaran ai mbanog o manosiya na di niyan ketokawan so
maana niyan. Apiya pen o matero o maongangen a katawan iyan na mataan a di niyan ai
kesabot.
SO PANGONGOSIYAT 9
So Kapatay na aya Keoriyan ko Langon o Manosiya
Pinggedageda aken ai langon piyapiya na tiyarima aken sa ginawa ko a so manga oontol

ago so manga oongangen a rakes o di iran dii nggolaolaan na ipapaar o Tohan. Ogaid na
da den a matao ron o ba sekaniyan kebabayai o di na ikegowad, o di na apiya antonaa i
keokitan iyan.
2 Ndatadatar sa kerosengan so langon o manga taw apiya anda ko manga oontol o di na so
manga baradosa, so manga pipiya o di na so manga rarata, so manga baraamal o di na so
manga kapir, so dii soasoat o di na so kena a ba dii soasoat. Ndatar bo so mapiya a taw
ago so baradosa, ago so pen so dii semaya ago so kena a ba dii semaya.
3 Giyai i lebi a bibid ko langon a pekesowasowa sii sa doniya: ndatadatar a pagokoran ko

oman i isa a taw. Sii ko kaooyagoyag pen o manga manosiya na mapepeno a kamarataan
ago kalalalongan so poso iran, na maipos oto na kitapi siran ko miyamatay.
4 Ogaid na apiya antawaa i maaped ko manga oyagoyag na aden a panginam iyan; tomo
pen so oyagoyag a aso a di so arimaw a miyatay den!
5 Ka so manga oyagoyag na katawan iran a pematay siran,

ogaid na da den a katawan o miyamatay;
da den a ped a imbalas kiran, na di siran den ketademan.
6 So kababaya iran, so kagowad iran ago so kasigi iran
na minitelon iran a miyadadas;
da den pen a labot iran ko apiya antonaa a dii manggolaola sa doniya.
7 Ika roo den na kana ngka so pangenengken ka a mapipiya a ginawa ngka

ago inoma ngka so arak ka a masosonor ka,
ka mapiya a katatarimaa on o Tohan.
8 Lalayon ka dii nditar sa mapiya
ago pakaamota ngka pen a olo ngka.
9 Pakapipiyaa ngka a ginawa ngka ko kapepaginetaw ngka a ped ka so karoma ngka a
pekebabayaan ka sii ko langon o manga gawii angkai a somasagad a kaooyagoyag a
inibegay reka o Tohan sii sa doniya, sii ko langon a da a lalaw niyan a manga gawii ngka.
Ka giyai i bagian ka sii ko pepagatingan ka a galebek ka sa doniya.
10 Apiya antonaa i di ngka dii nggalebeken na nggolaolaa ngka taman sa kegaga ngka on,
ka sii ko kaden o miyamatay a songowan ka na da den a ba on galebek o di na takdir aya
pen o ba aden a katao roo o di na ongangen.
11 Aden pen a ped a miyainengka aken sa doniya a giyai:

so manga lagod na kena a ba lalayon pepekataban ko kakoya,
na so manga babager na kena a ba lalayon pepekataban ko katidawa.
So manga oongangen na kena a ba lalayon pepekasokat sa kaoyagan iran,
na so manga ala i sabot na kena a ba lalayon dii kewasa,
na so manga papasang na kena a ba lalayon pepekapiya i bobolos.
Langon siran kesarbak o kada a okor.
12 Liyo ron pen na da a taw a ba niyan katawi o anda i kakeokiti niyan sii.
Datar o manga papanok a pekelitagan,
o di na so manga seda a pekepoketan
na pekelitagan mambo so manga taw ko manga rarata a masosowa
a pekitomparak kiran.
Manga Pamikiran mipantag ko Ongangen ago so Kalalalongan
13 Aden pen a ped a kiyamasaan aken mipantag ko ongangen sii sa doniya a tanto aken a
inipamemesa a giyai:
14 Aden gowani a maito a siti a maito bo a manga taw ron. Na giyobat ai o mabager a
dato; linikopan ai o manga sondaro niyan na miyangembaal siran sa manga babager a
tambak ko melilibeta ko siti.
15 Samaoto na aden a mababaling on a miskin a mama ogaid na maongangen sekaniyan,
na miyasabet iyan so siti a nggolalan ko ongangen iyan. Ogaid na oriyan iyan na da den a
ba pekatadem sangkoto a miskin a mama.
16 Sabap san na tiyarima aken sa ginawa ko a so ongangen na tomo a di so bager. Apiya
pen oto na so ongangen o miskin a mama na dii sodiin, na di den pekinegen so manga
katero iyan.
17 So mananay a dii teroon o maongangen na tomo a pemakinegen

a di so ipepelalis o dato sii ko kalilimod o manga lalong.
18 Lebi a pakagaga so ongangen a di so manga gomaan ko katidawa,
ogaid na so isa a baradosa na pekabinasa ko madakel a mapiya.
SO PANGONGOSIYAT 10
So miyamatay a manga tendek na ikebaloy o ikekamotan a mado,
na datar oto mambo na so maito a kalalalongan na pekatanong ko mala a kaongangen.
2 So poso o maongangen na pepekaagak rekaniyan sa kanggolaola sa ontol,
na so poso o lalong na pepekaagak on sa kanggolaola sa ribat.
3 Apiya igira a pelalakaw so lalong sii ko lalan
na marayag so kada a panarima iyan,
ka pepakiilay niyan ko oman i isa so kaboboda niyan.
4 O kararangiti ka o kapatas ka
na di ngka pagawai so galebek ka;
o rerenek ka baden na kerilaan so mapened a ribat.
5 Aden pen a ped a marata a miyailay aken sii sa doniya

a giyoto so ribat a dii nggolaolaan o manga dato:
6 So manga lalong na pembegan sa manga poporo i pangkatan a sangan
ogaid na so manga kawasa na ipembegay kiran so manga bababa on.
7 Miyailay aken so manga oripen a kikokoda sa koda,
ago so manga pendatoon a pelalag a datar o manga oripen.
8 Apiya antawaa i kelot sa galebo na masiken a sekaniyan i keolog on,

na so nggeba ko pangeleban na baanda tokaan a nipay.
9 So pepanimo sa manga ator na masiken a keologan sa lakongan,
na so penggoray sa itagon na baanda on kapalii.
10 O tepol so basay ago di ini garangen

na kailangan a mala a bager a pekeosar on,
ogaid na o maongangen so dii mbasay
na katawan iyan o antonaa i patot a penggolaolaan iyan.
11 O toka so nipay sa da on pen kalamata

na da a bali o kalamata on.
12 Pekibantog ko maongangen so manga katero iyan

ogaid na pekibinasa ko lalong so rek iyan a manga katero.
13 Sii sa paganay na kalalalongan so manga katero iyan,
na sii sa kaposan na marata ini a kabebetengan.
14 Peteketakepen o lalong so manga katero iyan.
Da den a matao ron o antonaa i pekatalingoma.

Antawaa i makapetero ko mapenggolaola oriyan o kapatay niyan?
15 So galebek o lalong na ipekopay rekaniyan,

ka apiya so kasong iyan ko siti na di niyan katawan o andamanaya.
16 Kemoralaan so nasiyon a so dato on na wata

ago so manga olowan on na dii melamilami sii ko mababasa gawii.
17 Ogaid na rarakmatan so nasiyon a so dato on na wata o barabangensa a taw,
ago so manga olowan on na dii melamilami sii ko katitimpoi ron a masa
a pekegenggen iran a manga ginawa iran ago di siran pemereg.
18 O bobokelen so taw mangorip ko atep o walay niyan na peletosan ai

na keredak so manga saragonting on.
19 Ikebabaya so kakendori na ipekeriyala so arak,

ogaid na so pirak na pekabegay ko langon taman.
20 Di ngka pegantaa so dato apiya sii bo ko pamikiran ka,

na di ngka pepaawinga so kawasa apiya sii ko rowang ka,
ka baanda pagawidi o papanok so manga katero o ka
ago pekalangkapen iyan ai.
SO PANGONGOSIYAT 11
So dii Nggolaolaan o Maongangen
Pamegay ka ko kaoyagan ka ko manga ped,

ka oriyan o madakel a gawii na pekakasoy ini reka.
2 Mbagibagia ngka ko pito o di na walo,
ka di ngka katawan o antonaa i kamoralaan a masiken a pekatalingoma ko doniya.
3 Igira a mapepeno a ig so manga gabon na pepakaoranen iran ko lopa.

Apiya anda keoteng so kayo sii sa pagabagatan o di na sa pagotaraan
na ron den ko darpa a keotengan on.
4 Apiya antawaa i pepagiktiyar ko ndo na di den makapemola;
apiya antawaa i dii sima ko manga gabon na di den makaperagon.
5 Di ngka katawan o anda song so ndo,

o di na andamanaya i kapegto o lawas o wata sii ko soled a tiyan o ina iyan,
na datar iyan mambo na di ngka kesabotan so dii nggolaolaan o Tohan
a aya Mimbaal ko langon taman.
6 Saoden ka so oniin ka sii ko kapipita,
na di ngka nggeneki nggalebek taman ko perimon,
ka di ngka katawan o anda i mapiya i bobolos ko manga galebek ka,
o giyai o di na giyanan,
o di na o ba baden petegompiya so kalangolangon iran.
Tatanodi ngka so Miyaden reka ko Kangoda ngka pen
7 So kaliwanag na mamis,
na ikasosoat o taw so kapekeilaya niyan ko alongan.
8 O madakel a ragon a kaooyagoyag o taw
na pakapipiyaa niyan a ginawa niyan ko oman i isa on;
ogaid na tatanodi niyan a so manga gawii ron a maliboteng na madakel.
So langon taman a pekatalingoma na da a lalaw niyan.
9 Kababaya ka, hey mangoda, sii ko kangoda ngka,
na pakapipiyaa ngka a ginawa ngka sii ko manga gawii a kangodai reka pen.
Pangonoti ngka so manga kabaya o poso o ka
ago so apiya antonaa i pekeilay ngka,
ogaid na tatanodi ngka a kokomen ka o Tohan
ko kalangolangon a penggolaolaan ka.
10 Kagiya ka maoto na papasa ngka ko ginawa ngka so manga awid a akal ka
ago di ngka peparowa so apiya antonaa a kesakitan on a lawas ka.
ka kagiya somasagad baden so kangodai reka ago so bager ka.
SO PANGONGOSIYAT 12
Tatanodi ngka so Miyaden reka sii ko manga gawii a kangodai reka pen
sa di pen kapekaoma o manga gawii a kakeregeni reka on
ago so kapekadaseg o manga ragon a mapetero o ka on a
"Da a ikapipiya a ginawa ko ron."
2 Sangkoto a masa na lagid reka o ba pekaliboteng so alongan,
ago so kaliwanag o olan ago so manga bitoon,
ago domadatem den a doniya apiya pen oriyan o kiyaoran o manga gabon.
3 Samaoto na so manga barokan ka a pelinding reka na petebaden,
na so manga ai ngka a mabager pen imanto na kedaan sa bager.
Maito den mambo so manga ngipen ka a ipesepa piyapiya ko peken ka,
ago di den pekenono piyapiya so manga mata ngka.
4 Kebengel so manga tangila ngka a di ka den pekaneg ko bogembog sii ko manga lalan
ago maregen ka maneg so dagedeb o manga galingan
na pekananay reka so langon a dii kamboniboniyan ago dii kapagidada o manga taw
ogaid na apiya so bo so oni o papanok na pekapokaw reka igira a totorogen ka.
5 Ikewan ka den so manga poporo a darpa
ago so manga piyakalekelek sii ko lalan.
Pekapoti so manga bok ka a lagid o obarobar o kayo a almondo
na keregenan ka lomalakaw a lagid o miyalokes a tarapan
ago kedaan ka den sa langon o manga singanin.
Oriyan iyan na song tano ko taman sa pakataman a pendekean tano
na melalakaw so pendidiyaga sii ko manga lalan.
6 Oway, tatanodi ngka so Miyaden reka sa di pen kakereped o tanor a pirak

ago sa di pen kakeopak o bolawan a ladiya,
sa di pen kakepotol o tali sii ko paridi
ago so kakeropet o omoy a ipesegeb sa ig,
7 Ka samaoto na kesoy so manga lawas tano ko bayanek a poonan iran
ago kesoy so niyawa tano ko Tohan a aya on migay.
8 “Da a lalaw niyan! Da a lalaw niyan!" a tig o Pangongosiyat.

"So langon taman na da a lalaw niyan!"
So Pamotosan ko Kalangolangon ai
9 Kagiya maongangen so Pangongosiyat na itataros iyan so kapemangendaowa niyan ko

manga taw ko katao. Pimbabanog iyan ago piyamimikiran iyan piyapiya so madakel a
pananaroon, na tiyanor iyan ai.
10 Piyanamaran o Pangongosiyat so kapakatoon iyan sa manga katero a ipekepiya a
ginawa, na tito a benar so inisorat iyan.
11 So manga katero o manga oongangen na datar o manga dandal, na so miyapanimo iran

a pananaroon na datar o manga totok a miyaandep piyapiya a inibegay o isaisa bo a
Pananagikor.
12 Na pananggila ka, wata ko, ko apiya antonaa a kioman sii.
Da den a kaposan o kapangembaal sa manga ribro na pekikopay reka so kapaganadi
ron sebenar.
13 Imanto den a palaya ka den miyaneg angkai a manga katero

na katii so kiyatimoan on:
Kaleken ka so Tohan ago tomana ngka so manga sogoan iyan,
ka giyai i tarotop a sangan o manga taw.
14 Ka kokomen o Tohan so langon taman a pinggolaola tano
taman ko oman i migagaib a nganin
a ndatar so mapiya ago so marata.
BAYOK O SOLAIMAN
BAYOK O SOLAIMAN 1
So lebi a mapiya a bayok o Solaiman.
So Babay
2 Areki ako ngka omanoman;

so babaya a ka na lebi a mapiya a di so arak.
3 Ikasosoat so kamot o ikekamotan ka;
so ngaran ka na datar o ikekamotan a pekebembar so kamot iyan.
Di den mipememesa a kapekebabayai reka o manga raga!
4 Pakaonota ko ngka; nggagaan ta!
Wita ko ngka, dato aken, sii ko rowang ka.
So manga Raga sa Yarosalim
Ipekebabaya ami ago ikapipiya a ginawa mi seka;

podin ami so babaya a ka a lebi pen a di so arak.
Mataan a patot a pekebabayaan ami seka!
So Babay
5 Maitem ako ogaid na manisan,

hey manga babay sa Yarosalim;
maitem a lagid o manga barombarong sa Kidar,
ago lagid o manga kortina ko torogan o Solaiman.
6 Di ako ngka tentengi sabap ko kaitem aken
ka kagiya miyakaitem ako ko alongan.
Kiyararangitan ako o manga pagari aken
na piyakanggalebek ako iran ko asinda a obas;
na inindarainon aken so rek aken a asinda.
7 Teroa ngka raken, hey pekebaayaan ko;

anda ngka pepakapanateba so manga bilibili ngka?
Anda ngka siran pepakadekea ko kaoto a alongan?
Teroa ngka, ka o ba ako baden makapagandawandaw
sii ko manga talon o ped a manga pananagikor.
So Mama
8 O di ngka katawi, hey lebi a mataid ko manga babay,

na kedega ngka baden so lakaw o manga bilibili aken
taman ko manga barombarong o manga pananagikor
na roo ngka pakapanateba so manga ngongoda a kambing ka.
9 Hey pagidaan ko, lagid ka o babay a koda

a pepekabarayat ko manga mama a koda o Piraon.
10 Mapiya i paras so manga bies ka a ipetenos on so manga aritis ka;
manisan so lig ka a sesalay sa imbolawananan.
11 Ipagembaal ami seka sa manga imbolawananan
a pepandaraan sa pirak.
So Babay
12 Sii ko kasisii o dato aken ko igaan iyan

na miyabembar so kamot o ikekamotan aken.
13 So pekebabaya raken na lagid o oyot a mapepeno a ambar
sii ko kasasandang iyan sa rareb aken.
14 Lagid sekaniyan o manga obarobar
a pepamangeto ko manga sapadan sa In Gidi.
So Mama
15 Tanto ka a mataid, pagidaan ko! Tanto ka a mataid!

Maronok so manga mata ngka a lagid o mata a marapatik.
So Babay
16 Mataid ka a mama, pekebabayaan ko!

Tanto ka a ikasosoat!
So lomolombay a otan na aya ta igaan
sii ko kasisirongan o manga kayo a sidro
ago kayo a goo.
BAYOK O SOLAIMAN 2
Matag ako obarobar a baden pepegto sa Saron,
ago rembabak a poon ko manga balintad.
So Mama
2 Datar o obarobar ko look o manga sorok

so pagidaan ko sii ko manga raga.
So Babay
3 Datar o kayo a koldi ko manga kayo sa kalasan so pekebabayaan ko

sii ko manga ngongoda a mama.
Pekebabaya ako montod ko kasisirongan iyan,
na mamis raken so onga sapad iyan.
4 Inowit ako niyan ko rowang a dii kendorian
na so pandi iyan ko kaporoan aken na kababaya.
5 Pakambagera ko ngka ko manga pasas;
pakapipiyaa ngka a ginawa ko ko manga koldi,
ka kiyadaan ako sa bager sabap ko kababaya.
6 So diwang a lima niyan na kaoolonan aken,
na so kawanan iyan na igagakes raken.
7 Hey manga babay sa Yarosalim,
topaan iyo raken sii ko kapaar o manga ngongoda a saladeng ko pangomaan
a di niyo den pokaon o di na peraratan so kababaya
taman sa di ini masingayo.
So Babay
8 Pekeneg aken so sowara o pagidaan ko!

Ilaya niyo! Pepekaoma sekaniyan
a pelikin ago petepak
a peketasen iyan so manga kapalawan!
9 So pekebabayaan ko na datar o mangoda a saladeng.
Ilaya niyo! Tomitindeg sekaniyan ko liyo o alad
a pesorongen iyan so dirowasa,
a tetentengen iyan so soled o rowang.
10 Na mitero so pagidaan aken a tig iyan raken a:
So Mama
Mbowat ka, taya, so mataid a pekebabayaan ko,

na go ka raken onot!
11 Miyaipos den so pangoran,
na gominek den so oran.
12 Penggegemaw so manga obarobar ko pangomaan.
Masa imanto a kapagidaida,
pekeneg den so kapemangoni o manga marapatik
sii ko inged tano.
13 Mipoon den panga lolotoan so manga korma;
pekebembar so kamot o pepamagobarobar a obas.
Mbowat ka, taya, so mataid a pekebabayaan ko,
na go ka raken onot!
14 Datar ka o marapatik a mageena sii ko manga lakongan,
sii ko mitatapok a manga gireb ko pampang.
Pakiilain ka raken so paras ka;
pakinegen ka raken so sowara ngka,
ka ikasosoat so lagam ka,
ago mataid so paras ka.
So Babay
15 Dakepa ngka so manga tingkalong;

so manga roroni a manga tingkalong
a pekabinasa ko manga asinda a obas,
ka pepamagobarobar so manga obas.
16 Rek ako o pagidaan aken, na rek aken sekaniyan mambo;

pepakapenateben iyan so talon iyan sii ko manga obarobar
17 Taman sa somamber so ndo ko kepita
ago mada den so maliboteng.
Kasoy ka, pekebabayaan ko, a datar o babay a saladeng,
o di na mangoda a mama a saladeng
sii ko manga kapalawan sa Bitir.
BAYOK O SOLAIMAN 3
So Babay
Mababasa gawii sii ko igaan aken

na ipekedali aken so pekebabayaan ko;
ipekedali aken ogaid na da sekaniyan roo.
2 Tig aken a "Mbowat ako imanto
ago magenebeneb ako ko siti,
sii ko manga lalan ago so manga dii timotimoan;
pembabanogen aken so pekebabayaan ko."
Na pimbabanog aken, ogaid na da ko sekaniyan matoon.
3 Miyabalak ako o manga gordiya
sii ko kapepegenebeneb iran ko siti.
"Ba niyo miyailay so pekebabayaan ko? a iniise aken.
4 Ogaid na sii den ko kiyasagad aken kiran
na miyatoon aken so pekebabayaan ko.
Kiyapetan aken sekaniyan na da aken den bokai
taman sa da aken mawit ko walay o ina aken,
sii ko rowang o mimbawata raken.

topaan iyo raken sii ko kapaar o manga ngongoda a saladeng ko pangomaan
So Babay
6 Antawaa oto a pepekapoon ko disirto

a datar o magagabon a bel
a mikekamotan sa mira ago doka
ago so mbarambarang den a manga palapa o manga padagang?
7 Ilaya niyo! Giyoto so karo o Solaiman
a oonotan o nem polo kataw a manga sondaro
a lebi a manga pipiya a sondaro sa Israil.
8 Langon siran mapasang sa pedang,
ago langon miyasinanad sa katidawa.
So oman i isa na itatakip iyan so pedang iyan
a makatitiyagar siran o aden a nggobat kiran sii ko kagagawii.
9 So karo i Solaiman na piyakimbaalan iyan sa kayo
a miyakapoon sa Libanon.
10 So manga pasek iyan na inembaalan a pirak,
na so onayan iyan na bolawan.
So pegontodan on na sasapengan sa mariga a dinis,
na so soled iyan na pipendaraan o manga babay sa Yarosalim
sabap ko kababaya iran.
11 Liyo kano, hey manga babay sa Siyon,
na go niyo ilaya so Dato Solaiman!
Sosoloten iyan so sangkad a inisangkad on o ina iyan
sii ko gawii a kiyakawinga on,
a so gawii a inikababaya o poso iyan.
BAYOK O SOLAIMAN 4
So Mama
Tanto ka a mataid, pagidaan ko! Tanto a mataid!

So manga mata ngka ko didalem o salimoot ka
na lagid o manga mata a marapatik.
Dii seyaw so bok ka a lagid o talon a manga kambing
a petondagay ko Palaw a Giliyad.
2 Mapoti so manga ngipen ka a lagid o talon a bilibili
a gopen piyangopawan ago pipeigoan;
so oman i isa na aden a ikadowa niyan
na da a ba on magigintas.
3 So manga modol ka na lagid o mariga a ribon;
tanto ini a mataid igira di ka dii tero.
Pesimag so manga bies ka ko didalem o salimoot ka.
4 So lig ka na datar o lantawa o Daod
a mapiya a kiyambaali ron
a sasalayan ai sa sanggibo a kelong a manga sondaro.
5 So manga soso ngka na datar o dowa a saladeng,
datar o miyadowa a saladeng
a pepanateb sii ko manga obarobar.
6 Tereg ako den ko palaw a mira
sii ko bobongan a doka
taman sa somamber so ndo ko kepita
ago mada den so maliboteng.
7 Tanto ka a mataid, taya aken;
mataan a tarotop so kataid ka!
8 Onot ka raken, pengaromaan ko;

awaan ta a Libanon!
Tomondagay ta a poon ko poro o palaw a Amana,
a poon ko poro o palaw a Sinir ago palaw a Hirmon
a ndodon den so manga lowak o manga arimaw,
ago so dii pagenebeneban o manga tingkalong.
9 Miyabiyag ka so poso aken, babay aken, so pengaromaan ko!
Miyabiyag ka so poso aken
sii ko miyakaisa a kiyasirapa raken o manga mata ngka,
ago so kapemangerap o salay ngka.
10 Tanto a mamis so babaya a ka, babay aken, a so pengaromaan ko!
Lebi a ikasosoat so babaya a ka a di so arak,
na lebi a mamot so ikekamotan ka a di so apiya antonaa a palapa!
11 Datar o kamis o gola teneb so modol ka, pengaromaan ko;
gatas ago gola teneb a matatago ko didalem o dila a ka.
So kamot o nditaren ka na datar o baw a Libanon.
12 Sapadan ka a lelekeban, babay aken, a so pengaromaan ko;
aaladen ka a sapadan, ago pageemaan a bowalan
13 A ron pepamangeto so marimpoong a manga kayo a granada
a rakes o manga palapa a
14 Nardo ago sapron,
kalamo ago kemi
ago so pitibarangan a kayo a doka,
ago mira ago alos
a rakes o langon o lebi a mapiya a ipesembor.
15 Na pepakaigan so sapadan o manga bowalan
ago paridi a mapiya a ig
a pegondas a poon sa palaw a Libanon.
So Babay
16 Pagnaw ka den, otara;

na song ka sii, hey abagat!
Samber ka den ko sapadan aken
kaan mabembar so kamot iyan.
Makasoled so pekebabaya raken ko sapadan iyan
a makakan ko lebi a mapiya a onga niyan!
BAYOK O SOLAIMAN 5
So Mama
Katii ako ko sapadan aken, pekebabayaan ko a karoma ko;

pepanimoon aken so mira ko ago so manga palapa aken.
Peken aken so gola teneb aken,
ago peginomen aken so arak aken ago so gatas.
So manga Banto ko Kakewing
Kan kano, manga ginawai, ago inom kano!

Pangondaya kano minom, hey manga pepangabaya!
So Babay
2 Miyakaisa a gagawii na tiyorog ako

ogaid na mageenaw so poso aken.
Pamakineg ka! So pekebabayaan ko na pepenonotok ko pintoan a tig iyan a:
So Mama
"Hey babay aken, pagidaan ko, marapatik aken,

taya aken; lekai ngka raken!
Miyabasa a olo aken sa namog,
ago so bok aken sabap ko kalelekepi ko kagagawii."
So Babay
3 “Inendaan aken den so nditaren aken;

ino aken pen solota peroman?
Inonaban aken den so manga ai aken;
ino aken pen mboringi peroman?"
4 Na diyodo o pekebabayaan ko so tanggal o pintoan
na miyakokog den rekaniyan so poso aken.
5 Mimbowat ako sa kapelekai ko ko pagidaan ko,
na so mamot a mira na pegetek a poon ko manga lima ko ago sii ko manga kemer
sii ko kiyakapeti ko ko tanggal.
6 Likaan aken so pintoan ko pekebabayaan ko,
ogaid na miyakaganat sekaniyan, na da roo.
Inikadali aken a kakenega ko ko sowara niyan!
Pinggiloba aken sekaniyan ogaid na da aken matoon;
tiyalowan ko sekaniyan ogaid na da ako niyan sembaga.
7 Miyabalak ako o manga sirino
a dii magenebeneb ko siti.
Piraneg ako iran ago piyalian iran;
giyander iran pen so gerab aken,
giyangkoto a manga gordiya ko pangeleban o siti!
topaan iyo raken a o matoon iyo so pagidaan ko
na peteroon iyo ron a tetalogedam ako sabap ko kipekedaliin aken on.
So manga Babay sa Yarosalim
9 Hey lebi a mataid ko manga babay,

antonaa i milalawan o pekebabayaan ka ko manga ped?
Andamanaya i lebi a katitindos iyan a di so manga ped
a pesepaan kami ngka sa datar ai?
So Babay
10 Mataid ago mabager a mama so pekebabayaan ko;

da a ba niyan datar ko sapolo nggibo.
11 So olo niyan na lagid o lombos a bolawan;
malo korot so bok iyan
ago maitem a datar o kakowak.
12 So manga mata niyan na datar o manga marapatik sii ko kilid o lawasaig,
a pipeigoan sa gatas ago kiyasokodan a datar o manga montiya.
13 So manga bies iyan na lagid o sapadan a manga palapa
a pekebembar on so kamot iran.
So manga modol iyan na datar o obarobar
a pegetek on so mamot a mira.
14 So manga barokan iyan na lagid o manga tongkas a bolawan
a tatataan sa manga montiya.
So lawas iyan na datar o piyakatenang a ibori
a pipendaraan sa manga sapiro.
15 So manga bobon iyan na lagid o manga polaos a marpil
a pakatitindegen ko manga onayan a lombos a bolawan.
Mapiya sekaniyan a pegilain a lagid o Palaw a Libanon
a da a lawan iyan a lagid o manga kayo ron a sidro.
16 Tanto a mamis so ngari iyan;
mataan a tarotop sekaniyan a kakasiyan!
Datar ai so pekebabayaan ko, a so pagidaan ko,
hey manga babay sa Yarosalim.
BAYOK O SOLAIMAN 6
So manga Babay
Anda somiyong so pekebabayaan ka,

hey lebi a mataid ko manga babay?
Teroa ngka rekami o anda miyantap so pagidaan ka
kaan ami seka kaogopi mbabanog.
So Babay
2 So pekebabayaan ko na somiyong ko sapadan iyan

a ron pepamangeto so manga palapa
ka pakapenateben iyan on so manga bilibili niyan
ago pengowa on sa manga obarobar.
3 Rek ako o pekebabayaan ko ago rek aken sekaniyan mambo;
pakapepenateben iyan so talon iyan roo ko manga obarobar.
So Mama
4 Mataid ka, pagidaan ko, a datar sa kataid a Tirsah,

ago datar sa kapiya i paras a Yarosalim.
Ipekebengang ka a datar o pepandi a manga sondaro.
5 Pokasa ngka raken so manga mata ngka,
ka pendaagen ako iran.
Dii seyaw so bok ka a lagid o talon a manga kambing
a petondagay ko Palaw a Giliyad.
6 So manga ngipen ka na datar sa kapoti o talon a bilibili
a gopen pipeigoan;
so oman i isa na aden a ikadowa niyan
na da a a ba on magigintas.
7 Pesimag so manga bies ka ko didalem o salimoot ka.
8 Apiya pen o aden a nem polo a bai
ago walo polo a manga sandil
ago da a pitetamanan iyan a manga raga
9 Na sasatiman bo a pekebabayaan ko;
so marapatik aken, so da a daway niyan!
Botong sekaniyan a wata o ina iyan,
a so pakatatayaan o mimbawata on.
Miyailay sekaniyan o manga raga na bitowan iran sa rarakmatan;
na piyodi sekaniyan o manga bai ago manga sandil.
10 “Antawaa sekaniyan," a iniise iran, "a pepekagemaw a datar o sobo,
a lagid sa kataid o olan ago so kasindaw o alongan,
ago ipememesa a lagid o manga bitoon a totondotondog?"
11 Tomiyondagay ako ko sapadan a manga kayo a korma

an aken mailay so gopen miyamangeto ko balintad,
ka pagilain ko o lomiyombay so manga obas
ago o ba miyagobarobar so manga kayo a granada.
12 Ogaid na sa da aken on pen katokawi
na sisingayoon aken a kapageda aken ko kababantogan a karo o manga pagtaw aken.
So manga Babay
13 Kasoy ka, kasoy ka, hey babay sa Solam;

kasoy ka, kasoy ka kaan ami seka katentengi!
So Babay
Ino niyo kabaya a katentengi niyo ko babay sa Solam
a datar o kakebantayi niyo ko kaseyaw sa Mahanaim?
BAYOK O SOLAIMAN 7
So Mama
Tanto a mapiya i paras so manga ai ngka a somosolot sa sandal,

hey wata o pendatoon!
So lomalantik a manga bobon ka na lagid o manga imbolawananan
a galebek o mapasang i kapanday.
2 So posed ka na lagid o matiboron a ladiya
a lalayon mapepeno a mamot a arak.
So kasadan ka na lagid o bebekesen a ilaw
a lilibeten a manga obarobar.
3 So manga soso ngka na lagid o miyadowa a nati o babay a saladeng.
4 So lig ka na lagid o lamin a ibori.
So manga mata ngka na lagid o manga papaigoay sa Hisbon
a marani ko gimowa sa Bat Rabim.
So ngirong ka na datar sa kapiya i paras o lantawa a Libanon
a makatotolong sa Damasko.
5 So olo ngka na misasangkad reka a lagid o Palaw a Karmil.
So manga bok ka na lagid o lebi a mapiya a dinis ko torogan o dato;
pekebiyag so dato o kapiya niyan i paras.
6 Mataan a tanto ka a mataid! Tanto ka a kakasiyan,
na lebi a ikasosoat so babaya a ka!
7 So bontal o lawas ka na datar o kayo a korma,
na so manga soso ngka na datar o manga oolig a korma.
8 Tig aken a "Pemaniken ko so kayo a korma
ago peropoon ko so onga niyan."
Mabaloy so manga soso ngka a datar o manga pingi a obas,
ago so sengaw ngka na madatar sa kamot o manga koldi,
9 Ago so ngari i ka na madatar sa kapiya i taam o lebi a mapiya a arak.
So Babay
Makapanaros so arak aken ko pekebabayaan ko

ago mondas sa mananay ko manga modol iyan ago manga ngipen.
10 Rek ako o pekebabayaan ko,
na saken i sisingayoon iyan.
11 Onot ka raken, pekebabayaan ko, somong ta ko pagonayonayan,
na roo ta makatorog ko manga iito a inged.
12 Mbowat ta komabalaga ago somong ta ko manga pamomolaan a obas
an ta mailay o mireretok den ai
ago miyanga bebekar so manga obarobar,
na o miyagobarobar den so manga granada,
na ron aken reka imbegay so babaya aken.
13 Pekebembar so kamot o pamomolan a manderik,
na sii ko pintoan ta na ndodon so langon o pitibarangan a mapiya i taam a manga onga
sapad
a ndatar so andang ago so bago
a miyataliyong aken para reka, pekebabayaan ko.
BAYOK O SOLAIMAN 8
O ba ka bo laki aken
a piyakasoso o ina aken!
Na o mabalak aken seka sa liyo na kearekan ko seka
na da a ba raken pesodi.
2 Kewit aken seka ko walay o ina aken
a aya raken miyangendao.
Mapekainom aken seka sa piyalapaan a arak,
a so ig o manga onga aken a granada.
3 So diwang a lima niyan na kaoolonan aken,

na so kawanan iyan na igagakes raken.
4 Hey manga babay sa Yarosalim, topaan iyo raken
5 Antawaa angkai a pepekaoma a poon ko disirto

a romerenda ko pagidaan iyan?
So Babay
Riyaratan aken seka sii ko atag o kayo a koldi

a ron ka inikeraring o ina a ka,
ago ron ka niyan inimbawata.
6 Tomboken ako ngka ko poso o ka a datar o tiyap,
ago datar o tanda sii sa barokan ka.
Ka so kababaya na datar sa bager o kapatay,
ago so kapanaod na datar sa kapaar o kobor.
So kayaw niyan na datar o apoy
a pesokeyaw so manga kadeg iyan.
7 So mala a ig na di pekapareng ko babaya
aya pen o ba ini sangkapa o bagiyaw.
Opama ka imbegay o taw so langon o tamok iyan a ipemasa niyan ko kababaya
na mapesodi ini baden.
So manga Laki o Babay
8 Aden a peragaraga a babay ami

a da pen makala so manga soso niyan.
Antonaa i ikidia mi ko babay ami
amay ka aden a pemalai rekaniyan?
9 O kota sekaniyan
na mbangonan ami sa lantawa a pirak;
ogaid na o pintoan sekaniyan
na koopen ami a manga papan a sidro.
So Babay
10 Kota ako,
na so manga soso aken na lagid o manga lantawa;
na ikasosoat ako o pekebabaya raken.
11 Aden a asinda a obas i Solaiman roo sa Baal Hamon;

piyakikibir iyan ai ko manga taribasok
a so oman i isa kiran na pegapin on sa sanggibo a pelata a pirak.
12 Ogaid na saken bo i kirek ko asinda ko a obas,
na saken bo i pekabegay ron!
Rek ka, hey Solaiman, so sanggibo a pelata a pirak,
na dowa gatos baden na para ko siran oto a pekibir ko onga niyan.
So Mama
13 Hey pagidaan ko a komakaden ko manga sapadan,

mapiya a kapekenega o manga ped ka ko sowara ngka;
pakinegen ka raken mambo!
So Babay
14 Song ka raken nggagaan, pekebabayaan ko!

Sayan ka sa mangoda a mama a saladeng
sii ko manga palaw a pepengeto on so manga palapa.
ISAYAS
ISAYAS 1
Giyai so manga katero a miyapayag o Allah ko nabi Isayas a wata i Amos makapantag ko
inged a Yodah ago giya Yarosalim sii ko masa a kapakandadato i Osiyas, si Yotam, si
Ahas ago si Hisikiyas a manga dato sa Yodah.
Pimbongetan o Allah so manga Pagtaw niyan
2 Hey langit ago giya doniya, na pamakinega niyo so miyatero o Allah:

"So manga wata a piyamakala aken ago piyangoyag na miyamanopak raken.
3 So sapi na katawan iyan so kirek on,
na katawan o kimar so pekodalan o kadnan iyan,
ogaid na so manga Israil na di iran katawan;
di pekasabot so manga pagtaw aken."
4 Ndowandowaan kano a madodosa a nasiyon,

a so manga taw a dedekegan sa kasalaan,
a so kiyababadan ko dii nggolaola sa marata,
a so manga wata a mipapaar o kamarataan!
Inindarainon iyo so Allah;
pisodi iyo so Soti a Tohan o Israil
ago tiyalikodan iyo sekaniyan.
5 Ino kano pen pekileped? Ino kano peteros somopak?

So olo ngka, hey Israil, na miyalangkap a manga pali,
na misekit so dalem o poso o ka.
6 Ipoon ko palad a ai ngka taman ko poro o olo ngka
na da den a ba on tetagompiya,
ka so bo so manga pali ago manga baneg ago meengganga a manga lebag
a di malolompiyo ago di mabababed
aya pen o ba maiibong a lana.
7 Miyalaslas so inged iyo;

so manga siti niyo na miyanga rorokrok a apoy.
Sii den ko kamamasai niyo ron
na petebanen o manga mananangga so di niyo dii mbabasokan
a pekedaan ai sa bali ka pekebinasaan o manga rait.
8 So bo so siti a Yarosalim i miyalamba
a lagid o sayap sii ko sapadan a kiyaragonan den,
ago lagid o lawig ko pamomolaan sa dagita,
a datar o siti a kalilikopan o manga gomogobat.
9 O da a ba rektano pakapagoyaga o Allah a Lebi a Mamaapaar
na tarotop den so kiyabinasa tano, a datar o inged a Sodom ago giya Gomorah.
10 Sekano a manga olowan sa Yarosalim a pembetowan sa Sodom,

na pakinega niyo so peteroon rekano o Allah;
sekano a manga taw sa Yarosalim a pembetowan sa Gomorah,
na pakinega niyo so manga ndao o Tohan tano!
11 “So miyakadakedakel a di niyo raken dii korbanen,
na antonaa i bali niyan raken?" a tig o Allah.
"Miyasemo ako den ko petotongen a ipesepaat iyo raken a manga bilibili
ago so sibo o piyakaolitan a manga ayam.
Di aken den ikasosoat so rogo o manga sapi ago manga bilibili ago manga kambing.
12 Igira a pepangadap kano raken a pemanimba
na antawaa i miyaliyogat rekano sii,
a giyangkai a kapelagosaka niyo ko lamalama o Timplo aken?
13 Geneki niyo raken mawid so da a gona niyan a manga sapaat!
"So baw o doka niyo na piyakasisingay raken.

Di aken den kekena so di niyo dii kaselaselaa ko saribolan
ago so manga gawii niyo a idedeke
ago so di niyo dii katelabok sa soti a kalilimod,
a so manga kalilimod a mapepakarata baden o manga dosa niyo.
14 Ipekegowad aken so manga pista niyo ko saribolan
ago so miyanga tetendo a manga ala a gawii niyo.
Mimbaloy anan a awid a akal aken;
ndodokawan ako ron den maawid.
15 Igira a petepnay kano a dii ndowaa
na pidengen ko rekano a mata ko;
apiya mangangarapan kano pen sa madakel
na di aken pemakinegen,
ka so manga lima niyo na masasalapot a rogo.
16 Onabi niyo ago lompiyowi niyo a ginawa niyo;
pagawaan iyo so manga rarata a galebek iyo ko pangilailayan aken!
Genek kano nggolaola sa ribat
17 Na sowaa niyo so kanggolaola sa ontol!
Panamari niyo so matito a kokoman;
panabangi niyo so pelolopiten.
Paninindegen iyo so kabenar o manga ilo,
na go niyo pangakowa so rido o manga balo.
18 “Sangor kano raken den ka mbibitiyaraiya tano," a tig o Allah.

"Apiya pen lagid o mariga so manga dosa niyo
na pekapoti baden a lagid o giyaw;
apiya pen miyakalotoloto ini i kariga na kelagid o gapas.
19 O kateterangi kano ago tomotoman
na kekan iyo so lebi a mapiya a pekeragon ko kalopaan,
20 Ogaid na o somangka kano a mongkir na kepolang kano a pedang."
Giyanan i miyatero o Allah.
So Madodosa a Siti
21 Ilaya niyo so mapaparatiyaya a siti a Yarosalim ka mimbaloy a sondal!

Gowani na mipepeno on so kapagiinontolan
a aya on kibabaling so manga titito a taw,
ogaid na imanto na manga talibono!
22 Lagid ka gowani o lombos a pirak,
ogaid na miyalagid den imanto o tai a potaw
o di na piyamili a arak a kiyasaogan sa ig.
23 So manga olowan ka na kisosopak a ipageepeda o manga tekew.
Langon siran mabababaya sa manga tendan
ago pepengeted sa manga pamemegayan.
Di iran den ipeninindeg so kabenar o manga ilo
aya pen o ba iran tagoa sa ginawa so rido o manga balo.
24 Kagiya ka maoto na so Kadnan, a so Allah a Lebi a Mamaapaar,

a so Mala i Gees a Tohan o Israil na pitero iyan a:
"Mborngatan ko sekano a manga soranga aken ko gani aken
na iseop aken a ginawa ko ko manga ridoay aken.
25 Sii aken rekano itena a lima ko;
pelombosen aken sekano a lagid o kapegoria ko ko pirak
ka pekadaan ko rekano so langon a di niyo ikasosoti.
26 Mbegan ko sekano peman sa manga pangongokom a datar o miyaona,
ago so manga mosawira a lagid gowani.
Maipos oto na kebetowan ka sa 'Siti a ndodon so Kaontol,'
ago so 'Mapaparatiyaya a Siti.' "
27 Giya Siyon na keaon o Allah sii ko kaontol iyan;
keaon so di on dii teteobat a nggolalan ko katito niyan.
28 Ogaid na so kisosopak ago manga baradosa na palaya den penga sasasa,
na siran oto a petelikod ko Allah na penga iiped.
29 Keyaan kano sabap ko babarakaten iyo a manga kayo a aya niyo ipekebabaya;
na kediyamanan kano sabap ko manga sapadan
a ron kano pesimba ko manga barahala a miyatomo iyo.
30 Kelagid kano o kayo a pekelayon so manga raon iyan,
ago lagid o sapadan a da den kaigi.
31 So mabager a mama na pembaloy a lagid o gango a otan,
ago so manga galebek iyan na lagid o sila a pekabiyag;
na palaya siran ketotong a da den a ba on pekapareng.
ISAYAS 2
So Pekatalingoma a Timplo o Allah
Giyai so isa pen a miyapayag o Allah ki Isayas a wata i Amos makapantag sa Yodah ago
giya Yarosalim:
2 Sii ko penga oori a manga gawii na so palaw a ndodon so Timplo o Allah

na pekabekenen a aya lebi a mala i kipantag ko manga palaw,
na pekaombaw ai ko manga bobongan.
Pemanong on so langon a manga nasiyon
3 Ka peteroon o madakel a taw a
"Itano roo, ka tomakedeg tano ko palaw o Allah
sii ko Walay o Tohan o manga mbawataan o Yakob.
Ipengendao niyan rektano so manga okitokit iyan
kaan tano makakedeg ko manga lalan iyan."
Ka melangkap so ndao o kitab a poon sa Siyon,
na pekapoon sa Yarosalim so manga katero o Allah.
4 Pengokomen iyan so manga nasiyon
na pesaden iyan so di pegayonayonan o madakel a taw.
Seselen iran a dado so manga pedang iran
na pagembaalan iran a ipesepak so manga bangkaw iran.
Di den ipetidawa o manga nasiyon so ped a nasiyon
aya pen o ba siran pembatalo sa katidawa.
5 Hey manga mbawataan o Yakob, lomalakaw tano sii ko

sindaw o Allah!
So Gawii a Kasiksaan a Miyatendo o Allah
6 Inibowang ka den, ya Allah, so manga pagtaw ngka

a so manga mbawataan o Yakob.
Mabebensek so inged a kapangangatao a poon sa Sebangan
na peparirimar siran a datar o manga Pilistiyo
ago pesowaan iran so paparangayan o manga kapir.
7 So inged iran na mapepeno a pirak ago bolawan;
da den a ba pitetamanan o manga tamok iran.
Mapepeno so inged iran a manga koda,
na da den a pitetamanan o manga karo iran.
8 Na mapepeno ai mambo a manga barahala;
pepamanimbaan iran so pasad o manga lima iran,
a so inembaalan o manga kemer iran.
9 Kagiya ka maoto na kibaba so manga manosiya
na pakapengalimbabaanen so oman i taw;
di ngka siran perilai, ya Allah!
10 Solek kano ko manga liyang; tepok kano ko manga galebo ko lopa

sabap ko piyakalekelek a rarangit o Allah ago so sigay o kabatowa niyan!
11 So maporo i pangilailayan a mata o manga taw na pakapengalimabaanen,
na imbaba so katatakabor o manga manosiya,
ka so bo so Allah i mipapangkat sangkoto a gawii.
12 Ka aden a gawii a miyatendo o Allah a Lebi a Mamaapaar

a ipembaba iyan on so langon a manga takabor ago dii mbentogan
a rakes o oman i isa a pepangimporoan,
13 Ago so pen so langon a manga poporo a kayo a sidro sa Libanon
a rakes o langon o manga ala a kayo sa Basan,
14 Ago so langon a makaoombaw a manga palaw ago manga poporo a bobongan,
15 Ago so oman i maporo a barit a rakes o oman i pangeleban o manga kota,
16 Ago so pen so oman i kapal a dii ndagang ago so oman i mapiya on i paras.
17 Kibaba so kapepangimporoan o manosiya,
na pakapengalimbabaanen so katatakabor o manga taw
ka so bo so Allah i mipapangkat sangkoto a gawii,
18 Na so manga barahala na palaya den pengaada.
19 Pemanolek so manga taw ko manga liyang sii ko manga lakongan

ago sii ko manga galebo ko lopa
sabap ko rarangit o Allah ago so sigay o kabatowa niyan
amay ka mbowat sekaniyan a kokogen iyan so doniya.
20 Sii sangkoto a gawii na ipelebad iran ko manga riya ago manga kabeg
so manga barahala iran a pirak ago bolawan
a pimbaalan iran a pesimbaan
21 Sa kapemanolek iran ko manga liyang sii ko manga lakongan
ago sii ko kikasosonggireb ko manga pampang
sabap ko rarangit o Allah ago so sigay o kabatowa niyan
amay ka mbowat a kokogen iyan so doniya.
22 Genek kano somarig ko manosiya
a so kaoyagoyag iyan na matag baden sengaw ko ngirong iyan,
ka antonaa i bali niyan?
ISAYAS 3
So Kapendadaneg sa Yodah ago giya Yarosalim
So Kadnan a so Allah a Lebi a Mamaapaar

na kowaan iyan den a poon sa Yarosalim ago sa Yodah
so langon a ipepegeper iran ago sasanaan;
kowaan iyan kiran so langon a ipekeoyag iran a pangenengken ago ig,
2 Ago so pen so manga ala i gees ago so manga sondaro,
so manga pangongokom ago so manga nabi,
so manga paririmar ago so manga pelokelokesen,
3 So manga kapitan a sondaro ago so manga timpo a taw,
so manga pamomosawir, so manga papasang a panday
ago so manga oongangen a pangangatao.
4 Mbalowin o Allah so manga wata a mama a manga olowan iran;
so matag manga bago a wata i pendato kiran.
5 Pelopiten o oman i isa so ped iyan;
periridoay so manga sisiringana.
So mangoda na pagatowan iyan so miyalokes,
na so mibababa na magato ko seselaan a taw.
6 Sangkoto a manga gawii na kepetan o mama so isa ko tonganay niyan ko pamiliya o

ama iyan
na peteroon iyan a "Aden a gerab ka, olowan ka rekami!
Pangataowi kami ngka sangkai a masa a kasasanaat!
7 Ogaid na nggoraok sekaniyan somembag sa
"Da den a kibolong aken on!
Da a kaoyagan aya pen o ba nditaren sii ko walay aken;
di ako ngka mbaloya a olowan o manga taw!"
8 Pekeotengoteng a Yarosalim! Pekeroseng a Yodah!

Ka so manga katero iran ago galebek na sopak ko Allah
a petopowan iran so kababantogan a kapakamamasa niyan.
9 So kapekeilaya ko manga paras iran i pepekarinayag ko kasalaan iran,
na pekeyaren iran so dosa iran a datar a Sodom;
di iran ai pegemaan.
Ndowandowaan siran; piyakimoralaan iran a manga ginawa iran!
10 Teroa niyo ko manga oontol a pekapiya siran i bobolos,

ka ikebabaya iran so ipegonga o manga galebek iran.
11 Ogaid na ndowandowaan so manga baradosa!
Kitana kiran so morala, ka kibadal kiran so miyanggolaola o manga lima iran.
12 So manga pagtaw aken na pelolopiten o manga kangodaan;
pendatoan siran o manga babay.
Hey manga pagtaw aken, siran oto a magoolowan rekano
na pepekadadag rekano;
pepakasilain kano iran ko ontol a lalan.
Pepangokomen o Allah so manga Taw niyan

13 Domiyarpa so Allah ko dii pangokoman,
na mimbangon sa kakokoma niyan ko manga taw.
14 Pepangokomen iyan so manga pelokelokesen
ago so manga olowan o manga taw niyan a tig iyan a:
"Sekano i miyakabinasa ko asinda ko a obas;
so miyanga teteban iyo ko manga miskin na sisii ko manga walay niyo.
15 Ino niyo pepanasaa so manga pagtaw aken
ago ipepangamagas iyo so paras o manga miskin?"
a tig o Kadnan a so Allah a Lebi a Mabager.
So Kandanega o Allah ko manga Babay sa Yarosalim
16 Pitero pen o Allah a

"So manga babay sa Siyon na pepamangimporoan
a pelalakaw a idedepo iran a rareb iran
ago tetelaan a manga mata iran.
Pelakad siran a dii kinikini,
a dii nggagarinking so manga rinti sii ko manga panintilan iran.
17 Kagiya ka maoto na pakapegibolen o Kadnan so poro o manga olo iran
ka mbalowin siran o Allah a karoropawan."
18 Sii sangkoto a gawii na kowaan kiran o Kadnan so manga imbolawanan a isosolot iran
ko manga panintilan iran, manga olo iran ago manga lig iran
19 A rakes on so manga aritis iran, manga salenda ago manga salimoot,
20 So manga kombong, manga rinti sa panintilan, manga sambitan, manga omoy a
ikekamotan ago manga adimat,
21 So manga sising ago manga kaningkir,
22 So manga pipiya a malong, manga gerab, manga kimon ago manga pitaka,
23 So manga pagalongan, manga sida a bangkala, manga lilit ago manga babed.
24 Sa gawii oto na kena siran den a ba mamot i baw, ka baden mado;

kena den a ba sesambitan sa mapiya i paras, ka makerang a tali;
kena den a ba pipinalot piyapiya, ka karoropawan baden;
kena den a ba dii nditar sa mapiya, ka manga togak;
kena den a ba mataid, ka katatagoan baden sa kayaan.
25 So manga karoma iran na pemonoon a pedang;
apiya so manga babager kiran sii ko katidawa.
26 So manga gimowa a Siyon na pendidiyagaw ago pemboko,
ka pembaloy so siti a lagid o kiyabatalan a babay a moontod ko lopa.
ISAYAS 4
Sangkoto a masa na pito kataw a manga babay
na peporomporonan iran so sakataw a mama a tig iran a
"Ken ami so rek ami a pangenengken ago nggiloba kami sa manditar ami
asar a pakipangaroma ka rekami kaan kami kabetowi ko ngaran ka!
Kowai kami ngka sa kayaan!"
Pekaasalen a Yarosalim
2 Sii sa gawii oto na so Sapak o Allah na pekataid ago kebantogan, na so ipagonga o lopa
na ipengandag ago ikebabaya o langon a miyamakapagoyag a manga Israil.
3 Oman i isa a miyalamba sii sa Yarosalim a mililista a keped ko mamakapegoyag roo na
kebetowan sa soti,
4 Ka nggolalan ko Roh o Allah a pepangokom ago pepekatotong na pagonaben iyan so
karesikan o manga taw sa Yarosalim, na pelompiyon iyan so daket o rogo a piyakatoga
roo.
5 Sa masa oto na sii ko poro o langon o darpa a katatagoan ko palaw a Siyon ago sii ko
poro o di roo dii tetalabok na magaden on so Allah sa magagabon a bel igira a daondaw
ago so sindaw o pekerab a apoy igira a kagagawii. Na kesayapan o bantogan o Allah so
dalem a siti.
6 Ketagoan ai sa pekelindongan a aya pekesirongan sii ko kayaw o kadadaondaw, ago
pepagapasan ago dii tepokan ko oran ago barabarat.
ISAYAS 5
So Idaida makapantag ko Asinda a Obas
Imanto na pegidaidaan ko so pekebabayaan aken sa idaida makapantag ko asinda niyan a

obas:
So pekebabayaan ko na aden a asinda niyan a obas
sii ko masibokar a bobongan.
2 Pindado iyan ago piyangowaan sa manga ator,
na go piyamolaan iyan sa piyamimili a manga waged a obas.
Pimbalayan iyan sa lantawa,
na kiyalotan iyan sa petemekan sa manga obas.
Mapasad oto na iinamen iyan so manga pipiya a obas a ipagonga niyan,
ogaid na aya bo a inionga niyan na marata.
3 “Hey sekano a kibabaling sa Yarosalim ago manga taw sa Yodah," a tig o Allah,
"na kokoma kami niyo ago so asinda ko a obas
o antawaa i makapengatao sii.
4 Antonaa pen i mapenggolaola a kamapiyaan o asinda ko
a liyo ko pingolaola ko ron?
Isako mainam aken so manga pipiya a obas a ipagonga niyan
na inoto baden pagonga sa manga rarata?
5 Imanto na teroon ko rekano o antonaa i ikidia ko ko asinda ko:
Kowaan ko ron so ililinding on, na kesambat ai,
itobak aken so alad ko melilibeta on, na kelagosak.
6 Mbelowin ko so asinda ko a da a oked iyan
a di den kapengombosan so manga waged on
aya pen o ba mandado so lopa on,
ka baden pekogowan ago pagetoan a manga sorok.
Na sogoon ko so manga gabon sa di iran den pagoranan."
7 So asinda a obas o Allah a Lebi a Mabager na so ndatoan a Israil;

so manga taw sa Yodah na aya pamomolaan a ipekebabaya iyan.
Iinamen iyan a so kapaginontolan i ipagonga iran,
ogaid na baden kapamono;
iinamen iyan so kapakatitito,
ogaid na kapenggoraok baden kamboboko i miyaneg iyan.
Kemorkaan so dii Nggogolaola sa Marata
8 Kemorkaan kano a dii mamamasaan sa manga walay

ago manga kalopaan a mipagoman ko manga rek iyo den
taman sa da den a miyalamba a kebalingan sii ko inged,
na komakaden kano ron a tetarambisa!
9 Pitero o Allah a Lebi a Mabager ko kiyanega ko ron a:
"Mataan den a keawasan so madakel a manga walay,
na kedaan sa taw so manga ala ago mapiya i paras a manga torogan.
10 So sapolo ka iktariya a waged a obas na aya bo a keragon on na lima ka galon a ig a
obas,
na so pat polo ka gantang a oniin na pat bo ka gantang a keragon on."
11 Kemorkaan kano a pekebalaga mbowat igira kapipita

a pepoon peginom sa pakabereg a panginginomen,
ago dii nggagabina taman sa manga oobog a arak!
12 Aden a kapepangotiyapi sii ko di niyo dii kambangkiti,
ago manga garingking, manga insi, ago arak,
ogaid na di niyo itatapian so manga galebek o Allah,
aya pen o ba niyo tatagoa sa ginawa so manga pasad o lima niyan.
13 Kagiya ka maoto na pemangitaog so manga taw aken,
ka korang siran i sabot;
so seselaan kiran a manga taw na pematay a ongos,
na so kadakelan kiran na pemangikopay sa kawaw.
14 Sabap sii na miyakala so darpa o miyamatay,
na meengganga sebenar;
pesekaben iyan so manga ala i bantogan a manga taw sa Yarosalim
a rakes o makakakalilid kiran a piyakabowimbowing.
15 Pemangibaba so manga taw;
pakapengalimbabaanen so oman i isa,
na kibaba so kapangilailay o manga takabor.
16 Ogaid na mipapangkat so Allah a Lebi a Mabager sii ko kapepangokom iyan,
ka pepakiilay o Soti a Tohan so kasosoti niyan ko kapagiinontolan iyan.
17 Sa masa oto na penateb so manga bilibili sii ko miyanga bibinasa a manga inged;
so manga ngongoda a kambing ago manga sapi na makapepangangan roo.
18 Kemorkaan kano a pepekaiseg ko kamarataan

ko kapetondaa niyo ron ko tali a kapamagakal ago so kadostaan,
a lagid o kapenggoyoda niyo sii ko karo!
19 Di niyo dii teroon a "Makanggagaan so Tohan!
Makapamakot sekaniyan nggalebek kaan ami mailay!
Makasipeg so pitekdir o Soti a Tohan o Israil!
Matoman den ai kaan ami katokawi!"
20 Kemorkaan kano a pembetowan iyo sa mapiya so marata

ago pembetowan iyo sa marata so mapiya!
Pesembian iyo sa maliboteng so maliwanag,
na so maliboteng na pesembian iyo sa maliwanag,
pembalowin iyo so mamis a mapait
na pembalowin iyo so mapait a mamis.
21 Kemorkaan kano a aya katao niyo sa ginawa niyo

na maongangen ago baraakal!
22 Kemoraan kano a mapasang i kapaginom sa arak

ago lomalawan ko kapakapelooka ko pakabereg a panginginomen!
23 Pepakabenaren iyo so miyamakasela sabap ko tendan,
ogaid na pekowaan iyo so kabenar o da a manga sala iyan.
24 Kagiya ka maoto na lagid o ragami a pegosipen o apoy
ago so gango a otan a pelenganen o manga kadeg
na lagid oto mambo so manga bekaw niyo a penga reredak,
ago so manga obarobar iyo a pemangibayog a datar o bayanek,
ka kagiya inibowang iyo so iniinsarat o Allah a Lebi a Mabager
ago pisodi iyo so katero o Soti a Tohan o Israil.
25 Sabap sii na pesokeyawan o gani o Allah so manga taw niyan;
mikakayaw so lima niyan sa kandanega niyan kiran.
Tebekeren so manga palaw,
na mipendarainon so manga badan o pepamatay
sii ko manga karsada a lagid o popot.
Ogaid na apiya pen ai langon na di keda so rarangit iyan
ka mikakayaw den a lima niyan.
26 Mbegay sekaniyan sa signal

a ipetewag iyan ko manga wawatan a nasiyon;
pemopoyan iyan siran ko pirowarowangan a doniya.
Katii siran den a pepekaoma a dii nggagaan ago pepamakot!
27 Da a sakataw bo kiran a ba ndokawi aya pen o ba misosong;
da den a ba toratoda aya pen o ba toroga;
da a isa bo kiran a ba on pekaloag so sambitan iyan
aya pen o ba kapotoli sa iket so sandal iyan.
28 Manga gagarang so manga gasa iran
na misasangka so langon a pana iran;
manga tetegas so kalamaging o manga koda iran a datar o batolakit,
na petinger so manga tirikan o karo iran
a lagid sa kapetinger o mabager a ndo.
29 So kapegengger iran na lagid o kapegengger o manga arimaw
a pengenger ko kapegawidi iran ko miyasikem iran
a ken iran ko da a ba kiran on pekaginsing.
30 Sa gawii oto na pengengeran iran so manga Israil
a lagid o kapendaleg o ragat;
na o aden a tomenteng ko inged
na keilay niyan so maliboteng ago karomasayan;
bapiya so maliwanag na pekalibotengen o manga gabon.
ISAYAS 6
So Kiyasogoa ki Isayas
Sii ko ragon a kiyapatay o dato Osiyas na miyailay aken so Kadnan a moontod ko korsi a
maporo ago mipapangkat, na so kagagayadan ko kimon iyan na mipepeno ko Timplo.
2 Sii ko poro iyan so komakadeg a manga kaaden a lagid o malaikat a ndenem i papak so
oman i isa kiran. So dowa on a papak na isasapeng iran ko manga paras iran, na so dowa
on na isasapeng iran ko manga ai ran, na so dowa on na ipelayog iran.
3 Na di iran dii tetalowa ko oman i isa a tig iran a
"Soti, soti, soti so Allah a Lebi a Mabager;

so dalem o doniya na mapepeno o bantogan iyan."
4 So oni o sowara iran na initabeker ko onayan o Timplo, na miyapeno ai a bel.
5 “Kemorkaan ako!" a inigoraok aken. "Kedadas ako den, ka taw ako a kena a ba
lompiyo i modol, na komakaden ako ko manga taw a kena a ba manga lolompiyo i modol,
na miyailay o manga mata ko so Dato, a so Allah a Lebi a Mabager!"
6 Mandiyadi na lomiyayog raken somong so isa ko manga kaaden a maawid sa pekedeg a

waga a piyanipit iyan a poon ko aparan.
7 Na iniseko iyan ko ngari aken a tig iyan a "Ilaya ngka, ka miniseko ai ko modol ka na
miyada so kasalaan ka na minirila so manga dosa ngka."
8 Sarta den na miyaneg aken so sowara o Allah a tig iyan a "Antawaa i sogoon aken?
Antawaa i melalakaw a mapanonogo ami?"
Na pitero aken a "Katii ako bo; sogoa ko ngka!"
9 Tig iyan a "Ika roo den na go ngka teroa sangkai a manga taw aken a:
" 'Pamakineg kano ago pamamakineg peparoman a di den pemakasabot;

pangilay kano ago pamangilailay peparoman a di den pemakakilala.'
10 Baloya ngka a makapal so poso angkai a manga taw;
na baloya ngka a di pekaneg so manga tangila iran
ago sapengi ngka so manga mata iran.
Ka o ba iran baden miilay so manga mata iran
ago mineg iran so manga tangila iran
ago misabot iran so poso iran
na o ba siran teklid ago mapakapiya."
11 Mandiyadi na pitero aken a "Ay katey angkai a kapakambebetad, ya Allah?"

Na inisembag iyan a:
"Taman sa manga bibinasa so manga siti a da a ba on magiinged

taman sa kaawaan so manga walay a da a ba on pekabaling,
ago taman sa mapanas so dii mbabasokan a kiyadaan den sa bali.
12 Ka iteog aken sa mawatan so manga taw ron,
na madakel a keawasan a darpa sii ko inged.
13 Na apiya pen o makatelimbagak on so ikasapolo kiran bagi
na kebinasaan siran den.
Ogaid na lagid o mala a kayo a mimbaloy a tod ko kiyapataa on
na so Israil na aya soti a tod sii ko inged
a magto on peroman a lagid o oniin."
ISAYAS 7
Siyogo si Isayas ko Dato Ahas
Sii ko kandadato sa Yodah i Ahas a wata i Yotam, a aya wata i Osiyas, na si Risin a dato
sa Siriya ago so dato sa Israil, a si Pikah a wata i Rimaliyas, na lomiyalakaw a gomiyobat
sa Yarosalim, ogaid na da iran maagaw.
2 Ogaid na kagiya maneg i Ahas a dato sa Yodah a miyakipagabanga a Siriya ko Israil na

piyamanabad so poso iyan ago so manga pagtaw niyan a lagid o manga kayo sa kalasan a
pepanga kokokog o ndo.
3 Samaoto na pitero o Allah ki Isayas a "Pakaonota ngka so wata a ka a si Siyar Yasob na

lalakaw kano sa kabalaka niyo ki Ahas. Mitoona iyo sii ko lalan a ipesong ko lopa a
pegagagan sa nditaren sii ko kiyaposan o kakar a petogaan o ig a poon ko pondo a ig sii sa
kaporoan.
4 Na teroa ngka on a 'Pagiktiyar ka; ba ka den rerenek, na di ka pekelek. Di ngka
pegawiden a akal so pesokeyaw a rarangit i Risin ago so ndatoan iyan a Siriya, ago si
Pikah, ka matag siran baden lagid o dowa a dii pondaw a barabad.
5 Giya Siriya ago si Pikah a dato sa Israil na pikediyatan ka iran sa marata a tig iran a
6 “Gobaten tano a Yodah; pakalekan tano so manga taw ron, na itobak tano so
pangeleban a Yarosalim, na pakandatoon tano ron so wata i Tabiil."
7 Ogaid na giyai i kabasa o Allah a Lebi a Mamaapaar:
" 'Di ini mapenggolaola; di ini kitoman,

8 Ka aya olo o Syria na giya siti a Damasko,
na aya olo a Damasko na si bo si dato Risin.
So peman so ndatoan a Israil,
na sii ko di niyan pen kakenem polo ago lima ragon
na tanto ai a keroperopet a kena den a ba isa ka maginged.
9 So olo a Israil na giya siti a Samariya,
na aya olo a Samariya na si bo si dato Pikah.
O di pekatikna so paratiyaya ngka
na di ka den makapembeken.' "
Inibegay i Isayas ki Ahas so Nanao a so Imanowil
10 Miyakimbitiyarai peroman so Allah ki Ahas a nggolalan ki Isayas a tig iyan a

11 “Pangni ka ko Allah a Tohan ka sa nanao apiya anda poon ko didadidalem o doniya o
di na sii ko pipeporoan ko langit."
12 Ogaid na pitero i Ahas a "Di ako pengni; di aken tepengan so Allah."
13 Mandiyadi na tig i Isayas a "Pakineg ka imanto a moriyataw o Daod! Ba kena a

kiyatangkaan so kapetepengi ngka ko dii kasebar o manosiya? Ino ngka pen petepengi so
dii kasebar o Tohan aken?
14 Kagiya ka maoto na so den so Kadnan i mbegay reka sa nanao na giyai: Keogat so raga
ago pembawata sa mama, na mbetowan iyan sa Imanowil.
15 Ken sekaniyan sa mimbatik a gatas ago teneb amay ka makasowa senggaya ko marata
ago so mapiya.
16 Ogaid na
sii ko di pen tanto masowa o bago a mama so kapakasenggayaa ko marata ago so mapiya
na kelaslas so manga inged o dowa a dato a ipekelek ka.
17 “Ogaid na sii ko pekatalingoma a gawii na pagowitan kano o Allah ago so pamiliya

ngka ago so manga pagtaw ngka sa masa a karomasayan a da a datar iyan ipoon ko
kiyabelag o ndatoan a Israil sa Yodah, ka pagowiten iyan rekano so dato sa Asiriya."
18 Sii sa gawii oto na pemopoyan o Allah so manga Imisiren a pemakatalingoma a lagid

o manga langaw a poon ko manga wawatan a lawasaig sa Misir ago so manga taw sa
Asiriya a pemakapoon ko inged iran a lagid o manga batiyokan.
19 Palaya siran den pekatalingoma a pemanana ko dalem a inged ka, apiya taman ko
mitataog a manga baogan ago so manga gireb ko manga lakongan, ago so pen so langon o
manga soroken a paket a rakes o oman i pananateba.
20 “Sangkoto a gawii na magosar so Kadnan sa pangopaw a tendanan iyan sii ko sabala a

lawasaig a Yopratis, a so dato sa Asiriya, ka pagopawan iyan so manga olo niyo ago so
bombol ko manga ai niyo na kowaan iyan pen so manga sompa iyo.
21 “Amay ka makatalingoma ngkoto a gawii na apiya pen o aya bo a mapakapegoyag o

mama ko pangangayamen iyan na satiman a kangodaan a sapi ago dowa timan a kambing
22 Na sabap ko kadakel a pekibegay iran a gatas na aden a mimbatik a gatas a kekan iyan.
Na so langon o kelamba ko inged na pemakakan sa mimbatik a gatas ago teneb.
23 “Aya kesowasowa sangkoto a gawii na oman i asinda a aden a sanggibo ron a manga
waged a obas a magaarga sa sanggibo a pirak na pekogowan baden ago kepeno a soroken
a manga otan.
24 Pemanong roo so manga taw a maganop a kipapana, ka so kalopaan na ipelepen a
kogo ago soroken a otan.
25 So peman so manga bobongan a kiyambasokan gowani na da den a ba roo pekasong
sabap ko kiyakogowi ron ago kiyapeno iyan a soroken a otan. Pembaloy ai a darpa a
pepanateb on so manga sapi ago manga kambing.
ISAYAS 8
So Wata i Isayas na Nanao sii ko manga Taw
Pitero raken o Allah a "Kowa ka sa maolad a kesoratan na go ngka on soraten a manga ala
a batang a 'Mahir Salal Has Bas.'
2 Na pakisogoi ngka si Oriyas a imam ago si Sakariyas a wata i Yabirikiyas a kesanaan a
manga peseksi on."
2 Da peman matey na miyaogat so karoma ko, na mimbawata sa mama. Na pitero raken

o Allah a "Betowi ngka sa Mahir Salal Has Bas.
4 Ka sii ko di pen kapekabales o wata sa 'Ama aken' o di na 'Ina aken' na so manga tamok
sa Damasko ago so mapeteban sa Samariya na keagaw ago ipetelon o dato sa Asiriya."
So Kapekaoma o Dato sa Asiriya
5 Miyakimbitiyarai raken peman so Allah a tig iyan a

6 “Sabap sa tiyalikodan angkai a manga taw so malengen a kapegondas iyan a manga ig
sa Silowah ago ipepamanabad kiran so dato Risin ago so dato Pikah
7 Na saken, a so Kadnan, na magaan aken kiran den kitalingoma so mabager a kabandes o
lawasaig a Yopratis, a giyoto so dato sa Asiriya, a rakes o langon a manga babager a
sondaro niyan. Pekaombaw angkai a lawasaig ko langon a pirowarowangan on, ago
melapay ko langon a pangeba on.
8 Na magondas ai ko inged a Yodah a lagid o bagiyaw, ka magokit on a taman sa lig a
kadalem iyan. So makakakayat a manga papak iyan na pekasapeng ko dalem a inged ka,
hey Imanowil!"
9 Nggolaolaa niyo so taman a kegaga niyo a marata, hey manga nasiyon,

ogaid na ba kano den penga sasasa!
Pakineg kano langon a manga wawatan a inged;
tiyagar kano sa katidawa, ogaid na penga sasasa kano!
Oway, tiyagar kano, ogaid na penga sasasa kano baden!
10 Mosawirai niyo so akal iyo, ogaid na keilang ai;
Mbaali niyo so antangan iyo, ogaid na di den kitoman,
ka sisii rektano so Tohan!
Piyakaiktiyar o Allah so Nabi Isayas
11 Miyakimbitiyarai raken so Allah a makatatana raken so mabager a lima niyan, ka

piyakaiktiyar ako niyan sa di aken sowaan so okitokit o manga taw sa Yodah. Tig iyan a
12 “Di ngka pagayoni so langon a pekediyaten iran; di ngka pekeleken so ipekelek iran
ago di ngka den kewanen.
13 So Allah a Lebi a Mabager na aya ngka bilangen a soti; sekaniyan bo i kaleken ka ago
kawanen,
14 Ka sekaniyan i pekelindongan ka. Ogaid na sii ko manga ndatoan a Israil ago giya
Yodah na sekaniyan i ator a kisosong on so manga taw, ago lakongan a ikeoteng iran.
Kilitag sekaniyan pen ago kisampirot ko kibabaling sa Yarosalim.
15 Madakel kiran a pemangirepang; keoteng siran ago penga roropet. Kesampirotan siran
a penga lilitagan."
Manga Insarat ko manga Morit i Isayas
16 Sekano a manga morit aken na pagipata niyo ago siyapa niyo so manga insarat ago
manga kokoman a inibegay raken o Allah.
17 Pageenaan iyan so paras iyan ko manga Israil, ogaid na penayaon aken sekaniyan ago
paginamen.
18 Katii ako bo ago so manga wata a inibegay raken o Allah. Sekami i manga nanao ago
pepegilayanan sii sa Israil a inibegay o Allah a Lebi a Mabager a komakaden sa Palaw a
Siyon.
19 Na igira di rekano dii teroon o manga taw a "Isei niyo so manga pendarpaan ago ana
inikadowa niyan a pepemangetongtong ago pepamanawar," na inoto, ba di keisei o manga
taw so Tohan iran? Ino aya pegisei so miyamatay pantag ko kikaooyag?
20 O di bo makaaayon so di iran dii teroon ko kitab o Allah ago so manga ndao niyan na
da den a ba kiran maliwanag.
So Masa a Karomasayan
21 Pekanebeneb angkoto a manga taw ko dalem a inged a pepanga reregenan ago pepanga
oongosan; na amay ka pepanga oongosan na kerarangitan siran, na melangag siran ago
ipesinta iran so dato iran ago so Tohan iran.
22 Na pagilain iran so doniya a aya bo a keilay iran on na siksa ago kapakamboboko ago
so kaliboteng o kapekerasay; na kibowang siran ko makapal a maliboteng.
ISAYAS 9
So Pekatalingoma a Dato
Apiya pen oto na kena a ba ketatap so kaliboteng o siran oto a kikararasay. Gowani na
miyapakapangalimbabaan so inged a Sibolon ago giya Naptali, ogaid na sii ko masa a
pekatalingoma na kebantogan angkai a inged a sii tampar sa ragat ago makalelepas ko
lawasaig a Yordan, sii sa Galili a babalingan o manga di royod o Yahodi--
2 So manga taw a pepaginetaw ko maliboteng

na miyamakailay sa tanto a masindaw;
siran oto a kibabaling ko inged a kasisirongan o kapatay
na kiyalindawan o sindaw.
3 Initegompiya ngka so nasiyon, hey Tohan,
na piyakaosor ka so kapipiya a ginawa iran;
pekebabaya siran ko hadapan ka
a datar o manga taw a pekebabaya igira a dii kaperagon
ago datar o manga mama a dii keriyala
igira a di iran dii mbagibagiin so miyateban iran.
4 Riyopet ka so kokoong a mipepened kiran,
ago so lilit a potaw a ipembadas ko manga waga iran,
ka tiyaban ka so pepemameges kiran
a lagid o kiyatabana ngka sa Midiyan ko miyaipos a gawii.
5 So oman i talompa o sondaro a miyaosar ko katidawa,
ago so oman i nditaren a karorogoan
na ipagitagon ko apoy a penotongen.
6 Ka aden a wata a inimbawata rektano,
aden a wata a mama a inibegay rektano,
na pekiposai rekaniyan so dii kandato.
Kebetowan sekaniyan sa
"Piyakamemesa a Mosawira," "Mala i Gees a Tohan,"
"Da a Ikepos iyan a Ama," "Pendatoon ko Kalilintad."
7 So kapegosor o kandadato iyan ago kalilintad
na da den a kaposan iyan.
Pendato sekaniyan ko korsi o Daod sii ko ndatoan iyan
a pekepiten ago pepakabageren iyan
a nggolalan ko matito a kokoman ago kaontol
ipoon sangkoto a masa ago taman sa pakataman.
So kasigi o Allah a Lebi a Mabager
na aya sii penggolaola.
Ndanegen o Allah a Israil
8 Miyatero o Kadnan so ikokom iyan sa mbawataan o Yakob,

na kitana ini ko ndatoan a Israil.
9 So langon a taw sa Israil ago so kibabaling sa Samariya
na ketokawan iran a sekaniyan i minggolaola sii.
Imanto na pepangimporoan siran baden ago petekabor
a di iran dii teroon a
10 “Minitobak so manga walay a inembaalan a bote,
ogaid na pembangonen tano bo a pirorompi a ator;
Miyanga papata so manga kayo a lawaan,
ogaid na sembian tano ai sa manga kayo a sidro."
11 Ogaid na piyakabager o Allah so manga ridoay iran,
na piyangondoy niyan siran a nggobat kiran.
12 So manga Isiriyan sii sa sebangan
ago so manga Pilistiyo sii sa sedepan
na miyamangengganga sa kasambata iran sa Israil.
Apiya pen ai langon na da den mada so rarangit o Allah;

mabebeter den a lima niyan a pendaneg.
13 Ogaid na kena a ba dii teobat so manga taw;

di siran den sangor ko Allah a Lebi a Mabager a sominiksa kiran
aya pen o ba iran mbabanoga.
14 Kagiya ka maoto na sii ko salongan bo
na potolen o Allah sa Israil so olo ago so ikog,
a ndatar so sapak a kayo ago so sesed.
15 So manga pelokelokesen ago so kiseselaan a taw na aya olo,
na so manga nabi a pepamangendao sa manga kabokegan na aya ikog.
16 So dii nggogonanao sangkai a manga taw na pendadagen iran siran,
na siran oto a dii nggonanaon na pepanga dadadas.
17 Giyanan i sabap a di ikelimo o Allah so manga ngongoda kiran,
aya pen o ba niyan kapediin so manga ilo iran ago manga balo,
ka so oman i isa na madodosa ago dii nggolaola sa marata,
na dii tero so oman i ngari iran sa maresik.
Apiya pen ai langon na da den mada so rarangit iyan;

18 Mataan a so kamarataan na pepanotong a datar o apoy;

pelenganen iyan so manga kogo ago soroken a otan,
ipekarab iyan so manga kalasan
a pekegorongan a mala a bel.
19 Sabap ko rarangit o Allah a Lebi a Mabager
na kerokrok so inged,
na so manga taw na aya kitagon ko apoy;
da den a taw a ba niyan penganogoni so pagari niyan;
20 Apiya anda sii ko inged na pagagaon ago sekaben o manga taw
so apiya antonaa a makan iran,
ogaid na keor siran den a di den keosog;
na apiya so sapo o manga wata iran na ken iran!
21 Sekaben o manga taw sa Manasih so manga taw sa Ipraim,
na sekaben mambo o Ipraim so Manasih;
na palaya siran merido sa Yodah.
Apiya pen ai langon na da den mada so rarangit iyan;

ISAYAS 10
Kemorkaan kano a dii mbaal sa di ontol a manga kitab
ago pepangaden sa manga iilot a kokoman,
2 A pekeliden iyo so kapekokoma ko manga miskin
ago pepakadaan iyo so kabenar o kikararasay ko manga pagtaw aken,
kaan iyo magasab so manga balo
ago kapanekewan iyo so manga ilo.
3 Antonaa i sowaan iyo ko gawii a kapendadaneg
amay ka makatalingoma so kamoralaan a poon sa mawatan?
Antawaa i kapegapasan iyo a pekatabang rekano?
Anda i mbegakan iyo ko kakawasaan iyo?
4 Da den a ba niyo kesowasowa a rowar ko kapekakipes iyo a kitapi ko miyanga bibiyag
o di na so kapekakelit iyo a ped o miyamatay.
Apiya pen ai na di den mada so rarangit o Allah;

mabebeter den a lima niyan a dii ndadaneg.
So Kapekokoma sa Asiriya a dii Tekabor
5 Pitero o Allah a
"Kemorkaan so manga taw sa Asiriya a aya lilit a indaneg o rarangit aken,
a sii sa lima iran so bentol a ipenggolalan o gani aken!
6 Pekasongen ko siran a nggobat ko madodosa a nasiyon;
sogoon aken siran ko manga taw a ipekerarangit aken
sa kapeteban iran ago kapengagaw sa tamok,
a melagosak kiran a lagid o lonatay sii ko lalan."
7 Ogaid na kena a ba giyai i niyat o dato sa Asiriya;

kena a ba giyai i mapipikir iyan,
ka aya antap iyan na so kapaminasaa niyan
ago kapolanga niyan ko madakel a nasiyon.
8 “Ngkaino," a tig iyan,
"ka ba di so langon a komandir o manga sondaro aken na palaya manga dato?
9 Tiyaban aken a manga siti a Kalno ago giya Karkemis;
tiyaban aken a manga siti a Hamat ago giya Arpad
a lagid mambo a Samariya ago giya Damasko.
10 Miyatangan o bager aken so manga ndatoan a pepamanimba sa manga barahala,
a so manga barahala iran na manga ala i gees a di so sisii sa Yarosalim ago giya
Samariya.
11 Na kagiya miyabinasa ko a Samariya ago so manga barahala on,
na ba di datar iyan mambo a ikidia aken sa Yarosalim ago so manga barahala on?"
12 Ogaid na pitero o Kadnan a "Amay ka miyapasad so langon a galebek aken a kidaneg

ko Palaw a Siyon ago giya Yarosalim na ndanegen aken so dato sa Aysiriya sabap ko
kipoporoon iyan sa ginawa niyan ago so kapemata niyan a takabor,"
13 Ka aya pitero o dato sa Asiriya na

"Nggolalan ko bager o lima ko na miyanggolaola ko ai,
ago nggolalan ko ongangen aken, ka aden a sabot aken.
Piyanapol aken on so manga temanaan o manga nasiyon;
piteban aken so manga tamok iran,
na datar o mala i gees na miyadaag aken so dato on.
14 Lagid o pekewa ko salag a kowaan iyan so inawaan a manga orak
na miyaaker aken so kakawasaan o manga nasiyon ko dalem o doniya;
da den a ba on makapemarapak
aya pen o ba pekangganga a magoni."
15 Ogaid na pitero o Allah a

"Ba mitekabor o patok a mala sekaniyan i gees a di so pekolat on,
o di na ba makapembentogan so gabas sa mala i kipantag a di so pegosar on?
So bentol na di niyan kikolat so pekolat on,
na di mapakapembangon o teken so kirek on!"
16 Kagiya ka maoto na so Allah a Lebi a Mamaapaar

na sogo sa paniyakit a pekarayor sii ko manga babager a sondaro a taw sa Asiriya;
sii ko sirong o di iran dii mbentogan na kebiyag on so apoy a pembaloy a pesokeyaw a
kadeg.
17 So Soti a Tohan o Israil a aya iran solo
na pembaloy a pekedeg a apoy,
na sii ko salongan bo na ketotong iyan ago kelengan
so langon taman a rakes o pikokogowan on ago manga soroken.
18 Pengosipen iyan so tetagompiya a manga kalasan on ago so di on dii mbabasokan
a lagid o kaperakowaga ko lawas o taw a pekesakit.
19 Na tanto a madelag so kelamba a manga kayo ko kalasan on,
a kebilang o wata so kadakel iyan.
So Miyalamba a manga Israil
20 Sii sangkoto a gawii na so miyalamba a manga Israil,

a so miyamakapagoyag ko mbawataan o Yakob,
na di den sena ko nasiyon a miyakasiksa kiran,
ka mataan den a sii siran penarig ko Allah
a so Soti a Tohan o Israil.
21 So miyalamba ko manga mbawataan o Yakob
na kesoy peman ko Tohan a Lebi a Mala i Gees.
22 Apiya pen so manga taw ngka, hey Israil, na lagid sa kadakel o peted ko kilid a ragat
na so bo so bilambilangen kiran i pekakasoy.
Miyapekas den so kabinasaan a domadaag ago ontol.
23 So Allah a Lebi a Mamaapaar na ipenggolalan iyan
angkai a miyapekas a kabinasaan a kitana ko dalem a inged.
Ndanegen o Allah a Asiriya
24 Kagiya ka maoto na giyai i kabasa o Allah a Lebi a Mamaapaar:

"Hey manga pagtaw aken a kibabaling sa Siyon,
di niyo ikelek so manga taw sa Asiriya
amay ka pembadasan kano iran a potaw,
amay ka pekolat siran rekano sa bentol a datar o pinggolaola a Misir.
25 Ka di bo matey na keda so rarangit aken rekano,
na pekasangor kiran so gani aken sa kakebinasa iran."
26 So Allah a Lebi a Mabager i melambit kiran sa lilit

a lagid o kiyapamonoa niyan ko manga taw sa Midiyan sii ko lakongan sa Orib;
na ikeyaw niyan kiran so balala niyan sa kambinasaa niyan kiran
a lagid o siyowa iyan ko manga taw sa Misir sii ko ragat.
27 Sii sangkoto a gawii na kekowa ko manga waga niyo
so mapened a piyakiposai ran rekano;
kepokas ko lig iyo so kokoong a inisangan iran rekano, ka potolen.
So Kanggobata sa Yodah o manga Sondaro a Asiriya
28 Miyakaoma so manga sondaro a Asiriya sa Ayat sii sa Yodah.

Miyokit siran sa Migron!
Inibegak iran sa Mikmas so ped ko ipamemetad iran!
29 Miyokit siran ko pegokitan, na mikempo ko kagagawii sii sa Giba!
So manga taw sa Ramah na tatabaden sa kalek;
miyamalagoy so manga taw sa Gibiyah a siti o Saolo.
30 Lalis kano, hey manga taw sa Galim!
Pamakineg kano a manga taw sa Laisah!
Ndowandowaan so manga taw sa Anatot!
31 Pepamalagoy so manga taw sa Madminah;
pepeloloba so manga taw sa Gibim sa keapasan iran.
32 Sii sangkai a gawii na tereg so manga ridoay sa inged a Nob;
peyagen iran so rarangit iran ko Palaw a Siyon
a so bobongan sii sa Yarosalim.
33 Ogaid na ilaya niyo! Ka so Allah a Lebi a Mamaapaar

na pemotolen iyan siran sa mala a kabager
a lagid o manga sapak a kayo.
Penga ooteng so manga poporo kiran,
na pemangibaba so manga lelekeyog on.
34 Petaan iyan siran a lagid o kapepemataa o patok ko kakapalan ko kalasan,
na penga ooteng siran a lagid o manga ala a kayo sa Libanon.
ISAYAS 11
So Lomilintad a Kapendato o Moriyataw i Yasay
So kiyababadan ko Daod a wata o Yasay na lagid o tod o kayo

a pekapoon on so isa a moriyataw niyan,
a so Sapak a meretok ko bekaw niyan.
2 Kitemo ron so Roh o Allah,
a so Roh a pembegay sa ongangen ago sabot;
so Roh a pembegay sa mosawir ago gees,
so Roh a pembegay sa katao ago kalek ko Allah.
3 Ikebabaya iyan so kalek ko Allah,

na di niyan ipengokom so pekeilay o mata niyan,
aya pen o ba niyan ipasad so pekeneg o tangila niyan;
4 Ka so kaontol i ikokom iyan ko manga miskin,
na so katito i ipesad iyan ko rido o da a ba on pekatabang sii sa doniya.
Indaneg iyan ko doniya so bentol a pepekapoon ko ngari iyan,
na imbono iyan ko manga rarata a taw so sengaw o modol iyan.
5 Pesembitanen iyan so kaontol,
na so kasasarigi ron na aya niyan ipetinambed.
6 Sa gawii oto na so nati a bilibili na makipegepeda ko maila a aso,

na so nati a kambing na makiperembang ko mawaraw a tingkalong;
pamagepeda so mangoda a sapi ago so arimaw,
na so maroni a wata i magagak kiran.
7 So sapi na makipegatoang ko maila a binatang,
na perembarembang so manga nati ran,
na ken so arimaw sa manga otan a datar o sapi.
8 So ikaririga na penggitagita ko obay o gireb o darpo,
na so bago a wata na ndodoon iyan so salag o nipay.
9 Da den a pekasakit aya pen o ba pekabinasa
sii ko dalem o soti a palaw aken,
ka kipeno ko doniya so katawi ko Allah
a lagid o kapakalalangkap o ig ko ragat.
Kesoy so Miyalamba a Miyamangitaog
10 Sii sangkoto a gawii na so moriyataw o Yasay a meretok ko bekaw niyan na pembaloy

a pandi a signal ko manga taw; pengongonotan on so manga nasiyon, na kebantogan so
darpa a kedenan iyan.
11 Sa gawii oto na ikewa o Kadnan a lima niyan sa ikadowa sa kakowaa niyan peroman
ko miyalamba a manga pagtaw niyan, ka ikesoy niyan siran a poon sa Asiriya, sa Misir, sa
Patros, sa Itiyopiya, sa Ilam, sa Babiloniya, sa Hamat ago poon ko manga wawatan a
inged ko kilid a ragat.
12 Tongkol so Kadnan sa pandi a signal ko manga nasiyon,

na penimoon iyan so miyamangitaog a manga Israil;
pelimoden iyan so miyamangiparak a manga taw sa Yodah
a poon ko pirowarowangan o doniya.
13 Keda so kariit o ndatoan a Israil,
na kepotol so manga ridoay a Yodah;
di den periiten a Israil a Yodah
aya pen o ba peridoa a Yodah a Israil.
14 Keisaisa siran gomobat ko inged o manga Pilistiyo sii sa sedepan,
na petebanan iran so manga taw sa sebangan iran.
Pegesen iran a Idomiya ago giya Mowab,
na makipesekop kiran pen so manga Amoniyo.
15 Pekamaraan o Allah so sogod a Mariga a Ragat sa Misir,
na ikeyaw niyan a lima niyan ko Lawasaig a Yopratis
ka pagowitan iyan sa mabager a ndo
a mapembagibagi iyan ai sa pito a baogan
a malebod maripag o manga taw a pelalakaw.
16 Magembaal sekaniyan sa mala a lalan
a keokitan o miyalamba ko manga pagtaw niyan a pekapoon sa Asiriya
a datar o pinggolaola niyan sabap ko manga Israil
isako makaliyo siran sa Misir.
ISAYAS 12
Idaida a Podi
Sangkoto a gawii na peteroon ka a:

"Podin aken seka, ya Allah!
Apiya pen o kiyararangitan ako ngka
na miyada so rarangit ka, na piyakapiya ngka bo a ginawa ko.
2 Mataan a so Tohan i pesebet raken;
serigan aken na di ako kelek.
So Allah na aya ko bager ago ipepagidaida;
sekaniyan i Pananabet aken."
3 Segeb kano ko ig sii ko manga paridi a pembegay sa kakesabet.

4 Na sii sangkoto a gawii na peteroon iyo a:
"Panalamati niyo so Allah; talowi niyo so Ingaran iyan!
Pakitokawi niyo ko manga nasiyon so manga galebek iyan;
teroa niyo kiran a mipapangkat so Ingaran iyan!
5 Pagidaidai niyo so Allah sa manga podi,
ka kababantogan so manga pinggolaola niyan;
pakalangkapa niyo ai ko dalem a doniya!
6 Pelalalis kano ago pagidaida sa kapekebabaya, hey manga taw sa Siyon,
ka mala so Soti a Tohan o Israil a sisii rekano!"
ISAYAS 13
Ndanegen o Allah a Babilon
Giyai so miyaalamat makapantag sa Babilon a miyapayag o Tohan ki Isayas a wata i

Amos:
2 “Sii ko poro o bobongan na tongkol kano sa pandi a signal sa katidawa!

Lalisa niyo so manga sondaro,
kapaya ngka siran sa kanggobata iran ko manga gimowa o dii mbentogan a siti.
3 Saken, a so Allah, na miyasogo aken so manga sondaro a kisesenggay aken;
piyakisogoan ko siran a makapenggolalan ko gani aken,
so siran oto a ipekebabaya iran so kapakataban aken."
4 Pakinega niyo so bogembog sii ko manga palaw

a lagid o bogembog o bariboribo a manga taw!
Pamakinega niyo so kabobosigaw o manga ndatoan
ago manga nasiyon a dii timotimo!
So Allah a Lebi a Mabager i magoolowan ko manga sondaro
sa kapakipetidawa iran.
5 Pepekapoon siran ko manga wawatan a inged,
a poon ko pirowarowangan o doniya.
Manga gomaan ai o Allah a makapenggolalan ko rarangit iyan
sa kambinasaa niyan ko dalem a inged.
6 Otantang kano, ka kiyasipegan den so gawii a miyatendo o Allah;

pekatalingoma ini a datar o morala a poon ko Lebi a Mabager!
7 Sabap sii na kedaan sa bager so manga lima o langon a taw
na melanag so poso o oman i isa,
8 Ka peraoten siran a kalek.
Kemesen siran o kasakit ago karangka,
na makapelikoway siran a datar o pembaliliten a babay.
petetentenga siran a kikabebengang
a manga ririgangat a manga paras iran.
9 Ilaya niyo ka pekatalingoma so gawii o Allah,

a so piyakalekelek a gawii
a sasartaan o gani ago somosokeyaw a rarangit
a ikelaslas o inged ago ikebinasa o manga baradosa on.
10 So manga bitoon sa langit ago so manga pemitoonen na di den sindaw.
Pekaliboteng so pesebang a alongan,
na di pekabegay so olan sa sindaw.
11 Tig o Allah a
"Ndanegen aken so doniya sabap ko kamarataan iyan,
ago so manga baradosa sabap ko manga dosa iran.
Pageposen aken so katatakabor o pepamangimporoan,
na imbaba aken so dii kambentogan o pepamangarasi.
12 Pekainot so manga manosiya a di so lombos a bolawan,
mabaloy siran a lebi pen a madelag a di so bolawan sa Opir.
13 Ka tebekeren aken so manga langit,
na kekokog so doniya a kealin ko kaoonayan on
sabap ko gani aken, a so Allah a Lebi a Mabager,
sii ko gawii a kasosokeyaw o rarangit aken.
14 Lagid o peganopen a saladeng,
ago lagid o bilibili a da a petegikor on
na kesoy so oman i isa ko manga tonganay niyan;
pegapas so oman i isa ko asal a inged iyan.
15 Saden sa maraot na kebaseg,
na oman i madakep na kebono a pedang.
16 So manga ikaririga kiran na ipemapes ko lopa ko kapegilaya iran on;
petebanan so manga walay iran,
na pelobeden so manga karoma iran."
17 Tig o Allah a
"Ilaya niyo, ka pengondoin aken so manga taw sa Midiya a nggobat sa Babilon,
na di iran den pesegipaan so pirak
aya pen o ba siran katendani sa bolawan.
18 Pemonoon o manga pamamana iran so manga ngongoda;
di iran ikelimo so manga ikaririga
aya pen o ba iran kapediin so manga wata.
19 Na giya Babilon a aya lebi a kababantogan ko manga ndatoan,
a so kataid iyan na ipepangandag o manga taw ron,
na mbinasaan o Tohan
a datar o manga siti a Sodom ago giya Gomorah.
20 Di den kebalingan o di na kekadenan o taw ko kapepamagapidapid o masa;
da a Arab a ba on pembarombarong,
aya pen o ba aden a pananagikor sa bilibili a ba niyan roo pekadekea so manga talon iyan.
21 Ka mabaloy baden a pekedekean o manga iila a binatang
sa disirto,
na kepeno a manga laog a ayam so manga walay ron;
so manga bengit na keden roo,
na pesola roo so manga iila a kambing.
22 Pemanagaw so manga iila a aso sii ko manga barit on,
ago so manga tingkalong sii ko manga pipiya on a torogan.
Kiyasipegan den so miyatendo a oras pantag ko Babilon,
na di den keomanan so manga gawii niyan.
ISAYAS 14
So Kakasoy o manga Israil ko Kinitaogen kiran
Ikepedi o Allah so manga Israil, ka piliin iyan siran peroman a manga pagtaw niyan na
pekabalingen iyan siran ko inged iran. Pengeped kiran so manga rait a makipetepitapi ko
manga mbawataan o Yakob.
2 Pagogopan o madakel a manga nasiyon so manga Isarail sa kapekakasoy iran ko lopa a
inibegay kiran o Allah, na ketangan siran o Israil a manga oripen iran a manga mama ago
manga babay. Pemiyagen iran so miyamiyag kiran gowani, na pendatoan iran so
miyameges kiran.
So Dato sa Babilon sii ko Darpa o Miyamatay
3 Sii sangkoto a gawii a pekadekeen o Allah so manga taw niyan ko kararasay iran ago
kasakit ago maregen a galebek a pekitegel kiran,
4 Na mapetero iran angkai a pananaroon makapantag ko dato sa Babilon:
Mataan a miyapos den so pepangarasi!

Kiyatamanan den so katatangarasi niyan!
5 Riyopet o Allah so bentol a inindato o marata a dato
6 A inibentol iyan ko manga taw sa da a diyangka iyan sii ko rarangit iyan;
piyangarasiyan iyan so manga nasiyon ko gani niyan
a di den meloke a kaperarasaya niyan kiran.
7 Ogaid na imanto na miyakadeke ago lomilintad so dalem a doniya,
na mipoon den mamagidaida so manga taw ron.
8 Apiya so manga kayo a goo ago sidro sii sa Libanon
na miyanga bababaya sabap ko dato sa Babilon a miyapos den, a tig iran a
"Imanto a miyakakelit ka, na da den a penarakayo a ba rekami pekapata."
9 Tanto a kateterangan so darpa o miyamatay sa didalem

sa kapagalawa niyan reka ko kapekatalingoma ngka;
pepokaon iyan so manga arowak sa kaselama iran reka,
a so langon a magoolowan gowani sa doniya;
so manga arowak o langon a miyanga dadato ko manga nasiyon
na pembabangon ko manga korsi iran.
10 Palaya siran reka den penanalo a tig iran a
"Miyabaloy ka mambo a da a bager iyan a lagid ami!
Miyadatar kami ngka!"
11 So kalangolangon a bantogan ka na minibaba ko kobor
a rakes o kamboboniboniyan o manga kotiyapi i ka.
Aya pegigaan ka na manga oled a makasasapeng pen ko lawas ka.
12 Miyaolog ka den a poon sa kasorgaan, hey Makabanges a wata o sobo!

Minipapes ka ko lopa, seka a miyameges ko manga nasiyon!
13 Pitero o poso o ka a "Penik ako sa kasorgaan;
iporo aken so korsi aken ko kaporoan o manga bitoon o Tohan;
magontod ako a kokorsi sii ko palaw a dii telabokan roo sa pagotaraan.
14 Penik ako ko liyawaw o manga gabon,
na kebaloy ako a datar o Lebi a Maporo."
15 Ogaid na kibaba ka baden ko kanarakaan
taman ko didadidalem o galebo.
16 So miyamatay roo a pemakailay reka na tentengan ka iran

na ipepamagisei ran a "Ba giyai so mama a komiyokog ko doniya
a miyatabeker iyan so manga ndatoan,
17 A so mama a biyaloy niyan so doniya a disirto
na piyaminasa niyan so manga siti ron
ago da niyan pakabalinga so manga biyag iyan?"
18 So langon a dato ko manga nasiyon na miyanga lalantang,

a so oman i isa on na sii ko mapiya i paras a kobor iyan.
19 Ogaid na baden minibowang so bangkay ngka a da a kobor iyan
a lagid o piyakangingiri a miyaredak a sapo.
Kasasapengan ka o piyamamono ko katidawa a pilalambasan a pedang
ago miyamangilebad ko atoren a galebo.
Lagid o bangkay a liyagosak
20 Na di ka kilebeng a datar o ped a manga dato,
ka kagiya bininasa ngka so inged ka
ago piyamono o ka so manga pagtaw ngka.
Di den kealoy so ngaran o manga moriyataw angkai a marata a dato.

21 Matiyagar so darpa a penombalian ko manga wata iyan
sabap ko kamarataan o ama iran!
Da a isa kiran bo a ba makambowat a makatangan ko doniya
aya pen o ba niyan kasapengi ko manga siti!
Mbinasaan o Allah a Babilon
22 “Mbangon ako a sondol sa Babilon," a tig o Allah a Lebi a Mabager.

"Tipoden aken on so ingaran iyan ago so miyamakapagoyag on
a rakes o manga wata iran ago kiyababadan kiran," a tig o Allah.
23 “Mbalowin ko so siti a kakadenan o manga bengit ago babasaken a darpa;
peyopasen aken a payopas a pepekamorala,"
a tig o Allah a Lebi a Mabager.
Miyaalamat makapantag sa Asiriya
24 Misepa so Allah a Lebi a Mabager a tig iyan a
"Mataan den a mapenggolaola so antap aken,

na ketoman den so pitekdir aken.
25 Sesaan aken so manga taw sa Asiriya sii ko inged aken a Israil;
sii ko manga palaw aken na pelagosaken aken siran on.
Kepokas so kokoong a inisangan iran ko manga pagtaw aken,
na kekowa so mapened a awid ko manga waga iran.
26 Giyai i antangan a pitekdir aken pantag ko dalem a doniya;
na mabebeter a lima ko sa kasiksaa ko ko manga nasiyon."
27 Ka mitekdir so Allah a Lebi a Mabager na antawaa i pekagenggen rekaniyan?
Mabebeter a lima niyan na antawaa i pekaren on?
Mbinasaan o Allah so manga Pilistiyo
28 Giyai i miyaalamat a minitoron o Allah sii ko ragon a kiyapatay o Dato Ahas:
29 “Hey langon iyo a manga Pilistiyo, di kano kebabaya

sabap ko kiyaropeta ko bentol a minileped rekano,
ka poon ko bekaw angkoto a nipay na meretok on so mangengebot
a kebabad sa dii meromparompak a mala i bisa a nipay.
30 Tegikoren aken so manga miskin ko manga pagtaw aken
na pengangan siran ko pananateba aken;
so kikadodowaanan kiran na pemakaiga a da a ba kiran pekabinasa.
Ogaid na so bekaw niyo a manga Pilistiyo na mbinasaan aken a taon
a pemakapatay rekano sa da den a pekapagoyagen iyan.
31 Ndiyagaw ago tegaw kano a manga siti a Pilistiyo!
Lanag kano sa kalek, hey langon iyo!
So magagabon a lopapek na pepekapoon sa pagotaraan,
giyanan so manga sondaro a da den a ba kiran pekeraparapay ko kapeparada iran."
32 Antonaa i kisembag ami ko manga siyogo o nasiyon a Pilistiya?

Teroon ami kiran a "Piyakambeken o Allah a Siyon,
na ron makapegapas so mararasay a manga pagtaw niyan."
ISAYAS 15
Miyaalamat makapantag sa Mowab
Giyai so miyaalamat mipantag sa Mowab:
1 So siti a Ar ago giya Kir sii sa Mowab na miyalaslas,

a miyabinasa ko miyakaisa bo a kagagawii!
2 So manga taw sa Dibon na petekedeg ko timplo iran a pepamanegad;
di indidiyagaw o manga Mowabiyo a Nibo ago giya Midiba;
oman i olo na kiyaopawan, na miyakikis so oman i sompa.
3 Sii ko manga lalan na ndiditar so manga taw ron sa sako;
sii ko manga atep a walay ago sii ko manga padian
na palaya siran on dii ndidiyagaw ago pepamanegad.
4 Dii nggogoraok so manga taw sa Hisbon ago giya Iliyalih;
so manga lagam iran na pepang aaneg taman den sa Yahas.
Apiya so manga sondaro a Mowabiyo na pepelelendag
a pepanabaden so manga niyawa iran.
5 “Ipesegad o poso aken a Mowab!

So miyamakapalagoy kiran na pepamagapas
sa taman sa Sowar ago taman sa Iglat Silisiyah.
Petekedeg siran sa Lohit a pepamanegad ko kapesong iran on;
sii ko lalan sa Horonaim na di iran di indidiyagaw so kasisiksa iran.
6 So manga ig sa Nimrim na kiyamaraan,
na miyagango so paotanotan on;
miyada so pepamangeto on a da den a gadong a ba miyalamba.
7 Sabap san na so manga tamok a miyapantiyari ran ago miyatimo
na ipetelon iran ko kaperipaga iran ko 'Baogan a manga Kayo a Poplar.'
8 So kapenggoraok iran na pekeneg ko mbalabala sa Mowab;
so di iran dii kandidiyagaw na ipesempay sa Iglaim
na iperaot so kapelelendag iran taman den sa Bir Ilim.
9 So manga ig sa Dibon na mapepeno a rogo,
ogaid na pelonsanan aken pen somiksa a Dibon,
pagowitan ko sa manga arimaw so manga Mowabiyo a miyamakapalagoy
ago so miyanga lalamba sii ko inged."
ISAYAS 16
So da a Arap on a Masosowa a Mowab
Ipoon sa siti a Sila sii ko disirto

na pepakawit so manga Mowabiyo sa manga bilibili
a pamemegayan ko dato sa Yodah sii sa Yarosalim.
2 Penayaw siran sii ko iperipag sa lawasaig a Arnon
a lagid o pelayolayog a manga papanok a piyamogaw ko salag iran.
3 Dii teroon o manga siyogo a Mowabiyo ko manga taw sa Yodah a

"Begi kami niyo sa mosawir; paginontolani kami niyo.
Lindingen iyo rekami so along iyo
a madatar o kagagawii sii ko kaoto a alongan.
Tapoken kami niyo a miyamangitaog;
di niyo tipowa so pepamalagoy.
4 Pakatarega kami niyo sii rekano;
pakalindonga kami niyo ko peminasa."
Kepos so kapeperarasay, na mitapelek so kapekebinasa;

keda so dii mamangarasi sii ko inged.
5 Sa masa oto na pakapendatoon so isa a Moriyataw o Daod,
na pekabeken so kandadato iyan a nggolalan ko gagaw niyan ago kasasarigi ron.
Ipengokom iyan so matito a kokoman,
na penggagaanan iyan nggolaola so kaontol.
6 Na dii teroon o manga taw sa Yodah a

"Miyaneg ami so katatakabor o manga Mowabiyo,
a so mitataralo a kaaambog iran ago dii kambentogan,
a so dangkowagan iran ago maratabat,
ogaid na da den a benar ko katatakabor iran."
7 Kagiya ka maoto na dii ndidiyagaw so manga Mowabiyo;

palaya iran den di indidiyagaw a inged a Mowab.
Di siran dii mboboko ko kapetedemi ran ko manga pipiya a peken iran sii sa Kir Harisit.
8 Kiyaawaan den so manga dii mbabasokan sa Hisbon
ago so manga asinda a obas sa Sibmah.
So manga dato o manga nasiyon na pilalagosak iran so piyamagaraw a manga waged on a
obas
a minisampay gowani sa siti a Yasir
ago miyabembar taman ko disirto;
lomiyaolad so kapendonapa iran a iniraot taman sa ragat.
9 Sabap roo na ipesegad aken so manga asinda a obas sa Sibmah
a datar o kipesegaden on a Yasir.
Hey siti a Hisbon ago giya Iliyalih, pelomesen aken sekano a lo!
Ka piyakarenek so kapelalalis iyo sa kapipiya a ginawa
sabap ko kiyada o piyanga lolotoan a onga niyo ago so pekeragon iyo.
10 Miyada so kapekebabaya ago kasosonor sii ko dii mbabasokan;
da den a pegidaida o di na pelalalis sii ko manga asinda;
da den a ba pegegik ko manga obas sii ko petemekan on,
ka minitapelek so kapelalalis sa kapekebabaya.
11 Ipelendag o poso aken a Mowab a lagid o kapegoni o kotiyapi;
pelendag so dalem a ginawa ko sabap sa Kir Harisit.
12 Igira a pepamangadap so manga Mowabiyo ko aparan iran sii ko bobongan
na ba iran den pekopain a ginawa iran;
igira a pesong siran ko timplo iran a pengangarapan
na da a bali niyan.
13 Giyai i kabasa o Allah a miyatero iyan den gowani mipantag sa Mowab.
14 Ogaid na pitero imanto o Allah a "Sii ko soled o telo ragon na so bantogan a Mowab
na mapesodi, na so langon o madakel a taw ron na maito bo a makapegoyag on, na
pemakalobay siran."
ISAYAS 17
Ndanegen o Allah a Siriya ago giya Israil
So miyaalamat makapantag sa Damasko:
"Ilaya niyo ka giya Damasko na kena den a ba siti,

ka kebaloy baden a mitatabotod a miyabinasa.
2 Keawaan so manga siti sa Arowir
a pemangibegak ko manga pangangayamen
a pemangiga on a da den a ba kiran pekabogaw.
3 Keda so kikokotaan a siti sii sa Israil,
na kepos so kandadato o siti a Damasko;
na so kelamba a manga Isiriyan na kedaan sa bantogan
a datar o manga Israil,"
4 “Oway, sii sa gawii oto na kelas so bantogan o manga mbawataan o Yakob,

na kekekes so kakawasaan iran.
5 Kebaloy so Israil a lagid o dii mbasokan a pinggagarab,
a miyaragon den so pereperan on,
ago lagid o pangomaan sa Balintad a Ripaim
a inosip on so minibegak on a pereperan.
6 Maito bo a kelamba a manga Israil,
ka kelagid siran o kiyaropoan den a kayo a olibi
a aden bo a minibegak on a dowa o di na telo a onga ko poroporo a manga sapak iyan,
na pat o di na lima sii ko peteribonga a manga sapak,"
a tig o Allah a so Tohan o Israil.
7 Sa gawii oto na sengor so manga taw ko Miyaden kiran,

na serigan iran so Soti a Tohan o Israil.
8 Di iran den sengoran so manga aparan a inembaalan o manga lima iran,
aya pen o ba iran sarigi so pasad o manga kemer iyan,
a so manga polaos a toos ko katohanan iran a Asirah
ago so manga aparan a pepenotongan sa doka.
9 Sii sangkoto a gawii na keawaan so manga babager a siti iran, na palaya den ai kelaslas
a lagid o manga siti o manga Hibiyo ago manga Amoriyo a tiyalikodan iran gowani sabap
ko manga Israil.
10 Kiyalipatan iyo den so Tohan a Pananabet iyo;
da niyo katoosi so Lakongan a kota iyo.
Kagiya ka maoto na apiya pen pemolaan iyo so piyamamili a pamomolan
a kinowa niyo a poon ko salakaw a inged,
11 Na apiya pen mapekato iyo siran ko gawii a kapemolaa niyo ron
a pepoon den monga sii den sangkoto a kapipita
na da den a ba on keragon sii ko gawii a kamboboko ago di kepinda a karomasayan.
Tebanen so Ridoay a manga Nasiyon
12 Aden a kapendagedeb o magogorigaw a madakel a taw

a lagid sa kapendagedeb o ragat!
Aden a kapendaleg o manga nasiyon
a lagid sa daleg o manga babager a ig!
13 Ogaid na apiya pendaleg so manga nasiyon a lagid o manga ala a begel sa kalodan,
na pembongetan siran o Allah, na pemalagoy siran sa mawatan
a peselobaan a lagid o bayanek a pekibayog o ndo sii ko bobongan
ago lagid o okap a ipembayomber o sobosobo.
14 Sii ko kagagawii na piyakalekelek siran,
ogaid na sii ko kakepita iyan na miyanga ada siran den!
Giyoto so bagian o siran oto a di rektano dii teban,
a so ketamanan o siran oto a pepamanekew rektano.
ISAYAS 18
Ndanegen o Allah a Itiyopiya
Kemorkaan so inged a pekeneg on so kapeparapak o manga papak

a malelepas ko manga lawasaig sa Itiyopiya
2 A pepamanogo sa manga ambasador a pelayalayag ko lawasaig a Nail
sii ko manga awang a inembaalan a balagen!
Ikano roo a manga gagaan a sogo;

song kano ko manga taw a manga poporo ago manga titilak i kobal
a so manga taw a ipekelek sa marani ago roo sa mawatan,
a so nasiyon a mabager ago pepangarasi,
a so lopa iran na mababagi o manga lawasaig!
3 Hey langon kano a kibabaling sa doniya,

amay ka mitongkol so pandi sii ko poro o manga palaw na ilaya niyo,
na amay ka pakaonin so bogiyong na pakinega iyo!
4 Ka giyai i pitero raken o Allah:
"Sii ko kakadenan ko na tolong ako a baden romerenek
a lagid o pekerap a senang o alongan
ago lagid o kapekenamogi ko manga otan sii ko mayaw a kagagawii ko kapeparagon.
5 Ka sii ko di pen kaperopoa ko manga obas
amay ka miyaroro so manga obarobar ago pepanga lolotoan so manga onga,
na penga popotol siran o manga ridoay
a lagid o kapotola ko manga ombos a gelat a magarang
ago so kapenakapa ko pendonapa a manga waged a baden ipelebad.
6 So manga badan iran na palaya den mipendarainon ko manga banog ko kapalawan
ago so manga iila a binatang;
pegdasan siran o manga papanok sii ko pangolaon,
ago so langon a manga iila a binatang sii ko masa a panenggaw.
7 Sa masa oto na pegowitan so Allah a Lebi a Mabager sa manga pamemegayan

a poon ko manga taw a manga poporo ago manga titilak i kobal
a so manga taw a ipekelek ko marani mawatan,
a so nasiyon a mabager ago pepangarasi,
a so lopa iran na miyambagibagi o manga lawasaig.
Kewit angkai a pamemegayan ko Palaw a Siyon
a katatagoan ko Ingaran o Allah a Lebi a Mabager.
ISAYAS 19
Ndanegen o Allah a Misir
Giyai i miyaalamat makapantag sa Misir:
Ilaya niyo, ka mageeda so Allah ko madilapet a gabon a pepekatalingoma sa Misir.

Petebekeren ko kamamasaan iyan so manga barahala
sa Misir,
na pekelanag so poso o manga Imisiren sa kalek.
2 “Pakapemagondoyaan aken so manga Imisiren,

makapemagonaya so magariyari ago so sisiringana,
na ipetidawa o siti so ped iyan a siti,
ago ipetidawa o ndatoan so ped iyan a ndatoan.
3 Kedaan so manga Imisiren sa arap
na kowaan aken sa bali so manga antangan iran;
pemangangay siran ko manga barahala ago so manga arowak o miyamatay,
ago so manga pendarpaan ago aden a manga inikadowa niyan.
4 Peladen aken so manga Imisiren ko kapaar o masarangit a dato
a pendato kiran sa kapangarasi,"
a tig o Allah a Lebi a Mamaapaar.
5 Penga ati so manga ig sa lawasaig a Nail

na kemara ago kegaw so ipegondas iyan.
6 Penga ado so manga kakar,
na penga atian ago penga mamaraan so manga baogan.
Penga lalayon so manga otan ago manga sesed
7 A rakes o langon o manga pamomolan ko kilid a lawasaig a Nail
ago sii ko minanga niyan.
Oman i dii mbabasokan ko kilid a lawasaig
na penga gagango so pereperan on a pemangibayog o ndo ago penga ada.
8 Pererego ago pelelendag so manga panginginseda,
a so langon a pepamanowit ko Nail;
na pemboboko so siran oto a pepamoket on.
9 So manga pananali sa tanor na pekekarata a ginawa iran,
na penga adaan sa inam so manga pangangaol sa sotra.
10 So manga pemamanai sa nditaren na penga lalalong,
na penga sososa so manga pamikiran o langon a pesokayan.
11 Mataan a so manga sanasanaan sa siti a Sowan na palaya den manga lalong!

So manga oongangen a manga mosawira o Radiya Piraon
na pepemegay sa da a oked iyan a osiyat.
Andamanaya i kapeteroa niyo ron ko Piraon a
"Isa ako ko manga oongangen a taw,
a so morit o miyanga oona a dato?"
12 Hey Piraon, anda den so manga oongangen ka a taw imanto?
Pangniya ngka kiran a pekiilay ago pekitokawan iran reka
o antonaa i miyatekdir o Allah a Lebi a Mabager a ikebinasa a Misir.
13 So manga olowan sa Sowan na mimbabaloy a lalong;
na miyaakal so manga olowan sa Mimpis.
Apiya siran pen i manga ala i kipantag a pekeonotan o manga taw sa Misir
na diyadag iran siran baden.
14 Kiyatemowan siran o Allah sa niyawa a pakalibog;
biyaloy iran a Misir a pekisasawiring ko langon a pesowaan iyan
a datar o mabebereg a pekisasawiring ko gowa iyan.
15 Da den a ba pekaogop sa Misir a maporo o di na maito a taw,
aya pen o ba so seselaan o di na mitatana.
16 Sii sangkoto a gawii na kesayanan o manga Imisiren so manga babay. Penabaden

siran sa kalek sabap ko lima o Allah a Lebi a Mabager a ikakayaw niyan kiran.
17 Na giya inged a Yodah na kebaloy a piyakalekelek ko manga Imisiren; so oman i isa
kiran a kealoy ron a Yodah na kelek sabap ko pitekdir o Allah a Lebi a Mabager a
ikebinasa iran.
Kerakmatan a Misir, Asiriya ago giya Israil
18 Sa gawii oto na sii ko lima a manga siti sa Misir na petero siran sa basa a Hibriyo, na
pesepa siran sa kapagiiklas iran ko Allah a Lebi a Mabager. Isa kiran na kebetowan sa
'Siti o Alongan.'
19 Sangkoto a gawii na ketago so isa a aparan a pesepaatan ko Allah sa lembak a Misir,

ago monominto a ipepananadem ko Allah sii ko temanaan iyan.
20 Toos ai ago saksi ko Allah a Lebi a Mabager sii sa Misir. Igira a penggoraok siran ko
Allah sabap ko manga pepemameges kiran na pegowitan iyan siran sa mala i gees a
pananabet, na penabangan iyan siran.
21 Pekitokawan o Allah a ginawa niyan ko manga Imisiren, na sii sangkoto a gawii na
kilalaan iran so Allah, ago simbaan iran sa di iran on dii kakorbani ago kapesepaati sa
manga soasoat. Pesepa siran pen ko Allah na itoman iran so ipesepa iran on.
22 Siksaan o Allah a Misir, ogaid na pembolongan iyan siran bo! Sengor siran ko Allah,
na terimaan iyan so manga pangni iran ago pekapiyaan iyan siran.
23 Sa gawii oto na keaden a mala a lalan a ipoon sa Misir taman sa Asiriya. So manga
taw sa Asiriya na pemanong sa Misir, na pemanong so manga Imisiren sa Asiriya. So
manga Imisiren ago so manga taw sa Asiriya na pegisaisa siran somimba.
24 Sangkoto a gawii na giyangkai a telo a nasiyon a Israil, Misir ago giya Asiriya na
penga babaloy a perarakmat ko dalem a doniya.
25 Na perakmatan siran o Allah a Lebi a Mabager a tig iyan a "Rarakmatan a Misir a
manga pagtaw aken, ago giya Asiriya a pasad o manga lima ko, ago giya Israil a kawali
aken."
ISAYAS 20
Si Isayas na Nanao ko Katebana sa Misir ago giya Itiyopiya
Sii ko ragon a si Sargon a dato sa Asiriya na siyogo iyan so maporo a komandir o manga
sondaro niyan sa Asdod a siti o manga Pilistiyo a giyobat iyan den ago miyataban iyan
2 Na sangkoto a masa na pitero o Allah ki Isayas a wata i Amos a "Ndai ngka so sako a
isosolot ka na pokasa ngka sa ai ngka so sandal ka." Na pinggolaola niyan ai a di
sekaniyan dii magenebeneb a makalelekas ago da a sandal iyan.
3 Mandiyadi na pitero o Allah a "So oripen aken a Isayas na dii magenebeneb a

makalelekas ago da a sandal iyan ko miyakatelo den ragon. Giyai na nanao ago toos ko
keokitan a Misir ago giya Itiyopiya,
4 Ka so dato sa Asiriya na tondaan iyan a makalelekas ago da a sandal iyan so miyanga
bibiyag iyan a manga Imisiren ago manga taw sa Itiyopiya, ndatar so mangoda ago so
lokes, a kasasawaan so manga pitot iran a piyakayaya ini sa Misir.
5 Siran oto a somiyarig sa Itiyopiya ago inipangandag iran a Misir na penga alek ago
penga ayaan.
6 Sangkoto a gawii na so kibabaling ko kilid a ragat na peteroon iran a "Ilaya niyo so
miyasowasowa o siran oto a siyanaan tano ago piyagapasan kaan tano iran katabangi ago
malinding ko dato sa Asiriya! Na, andamanaya den i kapakapalagoy tano?"
ISAYAS 21
Miyaalamat makapantag sa Babilon
Giyai i miyaalamat makapantag sa Babilon:
Lagid o sobosobo a pesember sii sa pagabagatan a Yodah

na pekatalingoma so gomogobat a poon ko disirto,
a poon ko piyakalekelek a inged.
2 Aden a mapened a pangingilain a piyakiilay raken
makapantag ko katipo ago kapaminasa.
Gobat kano, hey manga sondaro sa Ilam!
Likop kano ko manga siti, hey manga sondaro sa Midiya!
Itepelek o Tohan so langon a kapeperego a minisabap sa Babilon.
3 Sabap sangkai a pangingilain na tanto a petebaden a lawas aken sa kalek;

malipedes a masakit a makagagapos raken a lagid o masakit o babay a pembaliliten.
Pekisasawiring ako sabap ko miyaneg aken,
na matetengang ako sabap ko miyailay aken.
4 Magaan a kapekikiyab a poso aken, so kawan i ipetebeker raken;
so kaperimon a ikakadali aken na miyabaloy raken a piyakalekelek.
5 Pegenatan iran so manga lamisaan,

pekeyaten iran so manga paramadali a pagontodan o manga banto,
pekan siran ago peginom!
Mbowat kano, hey manga olowan o manga sondaro,
tiyagara niyo so manga gomaan iyo!
6 Giyai i pitero raken o Kadnan:

"Ika roo na go ka tago sa bantabantay
na pakiripoten ka on so pekeilay niyan.
7 Amay ka makailay sekaniyan sa manga taw a kikakaro
a penggoyoden o manga koda,
ago so kikokoda sa manga kimar ago manga onta
na mainengka iyan siran piyapiya!"
8 Na milalis so bantabantay a tig iyan a:

"Hey kadnan ko, gawii gawii den na tomitindeg ako ko dii mbantabantayan,
na oman gagawii na komakaden ako ko darpa aken.
9 Ilaya niyo! Kaoto so pepekaoma a mama a mageeda sa karo
a penggoyoden o manga koda,
na somimbag sekaniyan raken a tig iyan a
'Miyataban a Babilon, miyataban den!
So langon a manga barahala a katohanan iran
na kikayanteng ko lopa a miyanga roropet!'"
10 Hey manga pagtaw aken a miyanga lolomeg ko pegegikan,

miyapanotol aken rekano den so miyaneg aken
a poon ko Allah a Lebi a Mabager a Tohan o Israil.
Miyaalamat makapantag sa Idomiya
11 Giyai i miyaalamat makapantag sa Idomiya:

Aden a pepananalo raken sii sa Idomiya a tig iyan a
"Hey bantabantay, antonaa i lamba ko kagagawii?
Bantabantay, ay lamba ko kagagawii?"
12 Somimbag so bantabantay a tig iyan a
"Pepekatalingoma so kapipita ago so pen so kagagawii;
na o kebaya ka magise na ise ka den
ago kasoy ka bo peroman."
Miyaalamat makapantag sa Arabiya
13 Giyai i miyaalamat makapantag sa Arabiya
Hey sekano a tometembeng a manga padagang sa Didan

a kikekampo ko manga kalasan sa Arabiya,
14 Na witi niyo sa ig so kikaawaw.
Sekano a kibabaling sa Tima,
na witi niyo sa pangenengken so pepamagapas.
15 Ka pepamalagoyan iran so pedang, a so mabibindas a pedang,
ago so maiirat a pana, ago so manga piyakalekelek o katidawa.
16 Giyai i pitero raken o Kadnan: "Sii ko tarotop den a saragon na keda so langon o
bantogan o manga mbatabataa sa Kidar.
17 So miyamakapagoyag a manga pamamana a manga sondaro sa Kidar na pekadelag,"
ka miyatero den o Allah a Tohan o Israil.
ISAYAS 22
Miyaalamaat makapantag sa Yarosalim
Giyai i miyaalamat makapantag sa Balintad a Pangingilain:
Antonaa i ikasososa niyo imanto

a miyamanik kano langon ko atep o manga walay,
2 Hey inged a tanto a magogorigaw,
a so siti a mapepeno a pakabowing ago dii kakeriyala?
So miyanga bobono rekano na da mabono a pedang,
aya pen o ba siran miyamatay ko katidawa.
3 So langon a olowan ka na palaya den miyamalagoy,
ogaid na miyanga dadakep siran a da osari sa pana.
So pen so langon a taw ngka a miyamalagoy sa mawatan
na miyanga raraot ago palaya den miyanga dadakep
4 Kagiya ka maoto na pitero aken a "Awai ako niyo;
pekagoraok ako sa mapait.
Di niyo penamari a kapeteyoi raken
mipantag ko kiyamoralai ko ped aken a manga taw."
5 Ka giyai so gawii a kabobosigaw, ago kapepemeges, ago kalilibog
a miyatendo o Allah a Lebi a Mamaapaar sii ko Balintad a Pangingilain,
a so gawii a katempaga ko manga pangeleban o siti
ago kapepenanalo sa tabang sii ko manga palaw.
6 Miyakaoma so manga sondaro a poon sa Ilam
a kikakaro ago kikokoda ago kigogomaanan sa manga pana iran,
na so pen so manga sondaro a poon sa Kir
na matitiyagar den so manga kelong iran.
7 So lebi a masibokar a manga balintad sa Yodah na mapepeno a manga karo sa
katidawa,
na so manga sondaro a kikokoda na kigegenek ko manga gimowa a Yarosalim.
8 Kiyadaan den a Yodah ko ililinding on.
Sangkoto a gawii na siyanaan iyo so manga gomaan sii ko Torogan sa Kalasan.

9 Miyailay niyo a so siti o Daod a giya Yarosalim
na madakel a miyanga bobowar ko pangeleban a ililinding on,
na tinimoan iyo sa ig so Kababaan a Pondowan sa ig.
10 Binilang iyo so manga walay sii sa Yarosalim
na pinggegeba iyo siran a iniompiya ko pangeleban o siti.
11 Pimbaalan iyo sa pondo a ig so pageletan o dowa a keleb o siti
a petegoan sa ig a poon ko Andang a Pepondowan,
ogaid na da niyo ilaya so Tohan a mitekdir sii langon ko miyatey den a oleg,
aya pen o ba niyo sekaniyan kilalaa a aya sii minggolalan.
12 So Allah a Lebi a Mamaapaar na piyananalowan kano niyan sangkoto a gawii

sa kasegad iyo ago kapemboko,
ago so kapagopawa niyo ko olo niyo ago so kapenditar iyo sa sako.
13 Ogaid na masosonor kano baden ago dii keriyala
a pepanombali sa manga sapi ago manga bilibili,
a pekan kano sa manga sapo ago peginom sa arak!
"Koman tano ago minom," a tig iyo,
"ka mapita na pematay tano!"
14 Na miyapayag ai o Allah a Lebi a Mabager ko kapepamakinega ko ron a tig iyan a

"Mataan den a giyangkai a kamarataan na di rekano den kirila taman ko kaooyagoyag iyo
pen," a tig o Allah a Lebi a Mamaapaar.
So Kandanega ki Sibna
15 So Allah a Lebi a Mamaapaar na piyakasong ako niyan ko komikibir a si Sibna a aya

tetandingan ko torogan o dato sa kapeteroa ko ron a
16 “Antonaa i kabenar ka sa kapesowaa ngka sii? Antawaa i mipero reka sa kipembaalen
ka sa ginawa ngka sa kobor sangkai a bobongan a pepanasangan ka so ndekean ka a darpa
sii ko lakongan?
17 Ilaya ngka man, ka magaan ka den kepetan o Allah a ipirik ka niyan, hey mala i gees a
mama!
18 Tompiin ka niyan a lagid o bola na ipelebad ka niyan ko maolad a inged a ron ka petay
ago roo kibegak so manga pipiya a karo ngka, hey seka a piyakayaya ko pamiliya o
kadnan ka!
19 “Kowaan aken seka sa inisangan reka a galebek," a tig o Allah, "na kibaba ka ko
maporo a pangkatan ka.
20 Amay ka magiyanan na pekisogoan aken so oripen aken a Iliyakim a wata i Hilkiyas.
21 Ipenditar aken rekaniyan so kimon ka, na imbabed aken on so sambitan ka. Peladen
aken on so kapaar ka, na kebaloy sekaniyan a lagid o ama o siran oto a kibabaling sa
Yarosalim ago so manga taw sa Yodah.
22 Isengan aken rekaniyan so atastanggongan ko ndatoan o mbawataan o Daod. Imbegay
aken on so gonsi o ndatoan na saden sa pelekaan iyan na da a pekalekeb on, na saden sa
pelekeban iyan na da a pekaleka on.
23 Popoken aken sekaniyan a datar o lapek sii ko mbebeken a darpa, na kebaloy
sekaniyan a kesabapan ko bantogan o pamiliya o ama iyan.
24 “Ogaid na so manga tonganay niyan ago so ped a pepegeperen o pamiliya o ama iyan
na kiawid siran a akal iyan. Kebitin siran on a datar o manga ladiya ago manga koden a
mabibitin ko lapek!
25 Amay ka magiyanan," a tig o Allah a Lebi a Mabager, "na so lapek a miyapopok ko
mbebeken a darpa na kebadot on, na kepotol ago keolog, na keda so awid a bibitinen on,"
ka miyatero den o Allah.
ISAYAS 23
Miyaalamat makapantag sa Siti a Tiro
Giyai i miyaalamat makapantag sa Tiro:
Ndidiyagaw kano, hey manga kapal sa Tarsis!

Ka miyabinasa so siti a Tiro
a da den a miyalamba on a walay o di na pendongkoan.
Minisampay rekano angkai a totol sii sa inged a Sipros.
2 Rerenek kano a kibabaling ko kilid a ragat

ago sekano a manga padagang sa Sidon
a miyamakatamok ko di niyo dii kandagang ko manga palalayag.
3 Sii ko mala a ragat na piyangowit iran rekano so pereperan a poon sa Misir;
so pekeragon sii ko kilid o lawasaig a Nail na aya pekepantiyari a Tiro,
na mimbaloy ai a padian o manga nasiyon.
4 Keya ka pen, hey Sidon, ka mitero so ragat, a so mabager a kalodan,

a tig iyan a "Da ako den balilita aya pen o ba mimbawata;
da ako den makaritan sa manga wata a mama
aya pen o ba ako makaoyag sa manga wata a babay."
5 Amay ka misampay sa Misir so totol makapantag sa Tiro
na tanto iran a imboko.
6 Palagoy kano sa Tarsis!

Ndidiyagaw kano a manga taw ko kilid a ragat!
7 Ba giyai bes so mabababaya a siti a Tiro,
a so andangandang a siti?
Ba giyai so siti a piyakasong iyan so manga taw
a pakapegingeden ko manga wawatan a darpa?
8 Antawaa i miyagantangan sangkai a kiyasiksaa sa Tiro
a aya pepekabangon sa manga ndatoan,
a so manga padagang iyan na manga dato,
ago so manga patetembeng on na kiseselaan ko doniya?
9 So Allah a Lebi a Mabager i mitekdir sii
kaan iyan mibaba so kapetekabor ko langon a bantogan,
ago an iyan mapakipesodi so langon a mala i pangkatan sii ko doniya.
10 Mbasoki niyo so kalopaan iyo a lagid o sii ko kilid o lawasaig a Nail,
hey sekano a manga taw sa Tarsis,
ka da den a ba reka pendongkoan.
11 Biter o Allah a lima niyan ko liyawaw o ragat
na kiyokog iyan so manga ndatoan.
Migay sekaniyan sa sogoan makapantag sa Kanaan
a nggebaan so manga kota iyan.
12 Pitero iyan a "Di kano den pekeriyala,
hey manga taw sa Sidon a pesonsingen imanto!
Mbowat kano na go kano ripag sa Sipros,
ogaid na apiya roo na da a ketoon iyo a ndekean.
13 So manga taw sa inged a Babilon na aya manga taw a miyakabaloy sa Tiro a darpa o
manga iila a binatang,
ka kena a ba so manga taw sa Asiriya.
Piyakatindeg iran on so inigobat iran a manga lantawa,
na initobak iran so manga kota a Tiro
na biyaloy iran a miyanga bibinasa.
14 Lendag kano, hey manga palalayag sa ragat,

ka miyalaslas den so siti a Tiro a siyanaan iyo!
15 Amay ka miyatoman den ai langon na kelipatan a Tiro ko makapito polo ragon, a aya
omor o dato. Ogaid na amay ka mapopos angkoto a pito polo ragon na kebaloy a Tiro a
datar o sondal a ipepagidaida sangkai a bayok:
16 “Kowa ka sa kotiyapi, na lalakawi ngka so siti,

hey sondal a kiyalipatan!
Pangotiyapi ka piyapiya na pagidaida ka sa madakel a bayok
kaan ka katademi."
17 Sii ko oriyan o pito polo rago na pekaasalen o Allah a Tiro, na pekakasoy angkai a siti
ko pepekisokay a sondal, ka ipendagang iyan peman so langon a ndatoan ko dalem a
doniya.
18 Ogaid na so pekelaba niyan ago pekepantiyari na isenggay a rek o Allah; di ini timoon
aya pen o ba penimbela. Ka so pekelaba niyan na pekaosba ko siran oto a komakaden ko
kamamasaan o Allah a ipemasa ko madakel a pangenengken ago manga pipiya a nditaren.
ISAYAS 24
Siksaan o Allah so Doniya
Ilaya niyo, ka pagilangen o Allah so doniya ago pelaslasen iyan;

penasen iyan so paras iyan
na pakapembelabelagen iyan so kibabaling on.
2 Na makapelagid so keokitan o manga imam ago so manga taw,
so kadnan ago so oripen,
so bai ago so raga a talasogoay,
so padagang ago so pemamasaan,
so penembay ago so pesembay,
ago so pen so pegangkat ago so magotang.
3 Tarotop so kakeilang o doniya, na tanto den a petebanan,
ka so Allah i mitero sii.
4 Pekemaraan so kalopaan ago pekegaw,

pepekalobay so doniya ago pekelas;
so lopa ago so langit na palaya den pepekalobay.
5 Piresikan so doniya o manga taw ron,
ka siyogok iran so manga sogoan o Tohan;
da iran tomana so manga kokoman iyan
ago siyopak iran so da a ikepos iyan a kapasadan.
6 Kagiya ka maoto na so sinta o Tohan na pegosipen iyan so doniya,
na ipembadal ko manga taw ron so kasalaan iran.
Sabap san na pepanga iipos so kibabaling ko doniya,
na maito kiran bo a miyalamba.
7 Pepanga lalanes so manga waged a obas,
na pepanga ati so bago a arak,
na makapeperego so langon a masosonor gowani.
8 Minitapelek so mapiya a oni o manga garingking,
na minitareg so bogembog o manga dii kekariyala;
miyakagenek so ipekebabaya a kapepangotiyapi.
9 Di siran den pekainom sa arak a sasartaan o kapepagidaida;
so pakabereg a panginginomen na mapait ko pepamanginom on.
10 Kalilibogan so miyabinasa a siti;
kikatatanggalan so oman i pintoan o walay kaan da a pekasondol on.
11 Penggoraok siran mangni sa arak sii ko manga lalan;
so langon a kapekebabaya na kiyasambian sa rata a ginawa,
so langon a kasosonor na minitaog ko doniya.
12 Aya bo a miyalamba ko siti na so kiyabinasaan on,
na miyarompi so manga gimowa iyan a piroropet.
13 Giyanan i kesowasowa ko dalem o doniya sii ko langon a nasiyon.
Kelagid ai o kapekoyonga ko kayo a olibi kaan maroro so manga onga niyan,
ago lagid o kapepakaosipi ko manga waged a obas igira a miyaipos so kaperebasa ko
onga niyan.
14 Ogaid na siran oto a mamakapagoyag

na pelalalis ago pepamagidaida sa kapekebabaya;
sii sa sedepan na pepodin iran so kala o Allah,
15 Na sii sa sebangan na mbentogen iran sekaniyan;
so kibabaling ko kilid a ragat na mbentogen iran so Ingaran o Allah a Tohan o Israil.
16 Sii ko pirowarowangan o doniya na pekaneg tano sa manga idaida a podi
a ipembantog ko Tohan a Maontol.
Ogaid na tig aken a "Pegilangen ako den! Pegilangen ako!

Ndowandowaan ako den!
So mamakatipo na pepanipo! Dayondayon den so kapepanipo iran!"
17 So piyakalekelek, ago so galebo, ago so litag
na nomanayaw rekano, hey manga taw ko doniya.
18 Saden sa pekapalagoy ko daleg o piyakalekelek na keolog ko galebo,
na saden sa penggakap ko galebo na kelitagan.
Ka penga lelekaan so manga gimowa o ig sa langit,
na pemangipipay so manga kaoonayan ko doniya.
19 Kebensad so doniya, keopak so doniya,
tanto a kekokog so doniya!
20 Kisasawiring so doniya a lagid o palaobog,
na kelangilangi mambo a lagid o lawig sii ko mabager a ndo.
Tanto ron a midedekeg so kasalaan o manga dosa niyan
a ikeoteng iyan a di den makapembangon peroman.
21 Sii sangkoto a gawii na ndanegen o Allah so manga kaaden sa langit a aden a kapaar
iyan roo sa poro,
ago so pen so manga dato ko doniya sii sa kababaan.
22 Ketimo siran a datar o miyanga dadakep,
na pelekeban siran ko tongkop a kalaboso,
ka ndanegen siran amay ka maipos so madakel a gawii.
23 Sa masa oto na kemamala so olan ago pekeya so alongan,
ka so Allah a Lebi a Mabager na pendato sa Yarosalim sii ko Palaw a Siyon;
na pekiilay niyan so bantogan iyan
sii ko kamamasai ron o manga pelokelokesen iyan.
ISAYAS 25
Idaida a Podi
Ya Allah, seka i Tohan aken;

selaan aken seka ago podin aken so Ingaran ka,
ka sii ko madidiyangka a kasasarigi reka
na miyakanggolaola ka sa piyakamemesa a manga nganin
a piyagantanganan ka ko miyanga atey a gawii.
2 Biyaloy ngka so manga siti a mitatabotod a manga ator,
na pinggegeba a ka so kikokotaan a manga inged.
Miyanga ada so manga torogan o manga ridoay ami
a di den kebangon peroman.
3 Kagiya ka maoto na mbentogen ka o manga babager a taw;
ikelek ka sii ko manga siti o pepangarasi a manga nasiyon.
4 Ka seka i pepekalinding ko manga miskin,
ago pekeapasan o kikadodowaanan ko kapekerasay iran.
Seka i pekelindongan iran sii ko barabarat,
ago pekesirongan sii ko maranti.
Ka so napas o manga masarangit na lagid o barabarat sii ko rendeng
5 Ago lagid o kayaw o disirto.
Ogaid na piyakarenek ka so kabobosigaw o manga ridoay ami;
pepakageneken ka so kapepagidaida o manga tangarasi
a lagid o ranti a pekebabasan o along o gabon.
Petiyagar so Allah sa Bangkiti
6 Sii sangkai a Palaw a Siyon na so Allah a Lebi a Mabager

na petiyagaran iyan sa bangkiti so langon a manga nasiyon,
a so bangkiti a ipegana on so manga lelembo a pangenengken
ago so lebi a manga pipiya a sapo ago manga arak.
7 Sii sangkai a palaw na mbinasaan iyan so kombong a misasapeng ko langon a taw,
a so onong a mibobongkos ko langon a nasiyon,
8 Ka pelameden iyan so kapatay sa taman sa pakataman!
Sisingen o Allah a Lebi a Mamaapaar so manga lo ko langon o manga paras,
na kowaan iyan so kayaan o manga pagtaw niyan ko dalem o doniya,
ka miyatero den o Allah.
9 Amay ka magiyoto na mapetero o manga taw a
"Matamataan a giyai i Tohan tano;
Mimbayorantang tano ron na siyabet tano niyan!
Giyai so Allah a siyarigan tano;
mababaya tano ago pakapipiyaan a ginawa tano ko kiyapanabet iyan!"
Ndanegen o Tohan a Mowab

10 Ka pelindingen o Allah ngkai a Palaw a Siyon,
ogaid na penga lolomeg so manga Mowabiyo
a lagid o ragami a pekelomeg sii ko tai.
11 Ipereparepa iran on a manga barokan iran
a datar o pelangoy a ipereparepa niyan a barokan iyan ko kapelangoy niyan.
Ogaid na imbaba o Tohan so dangkowagan iran
apiya i kapanagontaman o manga barokan iran.
12 Itobak iyan so manga kota sa Mowab
a rakes o manga poporo a pangeleban iran,
na nggebaan iyan taman ko lopa apiya sii den ko bayanek.
ISAYAS 26
Mbegan o Tohan sa Kapakataban so manga Pagtaw niyan
Sii sangkoto a gawii na giyangkai a bayok na ipegidaida sii sa inged a Yodah:
Mabager so siti tano!

So kapepanabet o Tohan na aya kota iyan ago manga tambak a ililinding on!
2 Lekai niyo so manga gimowa o siti
kaan makasoled on so maontol a nasiyon
a so nasiyon a tatap so kapaparatiyaya niyan.
3 Pepakalintaden ka piyapiya, ya Allah,
so apiya antawaa a titikna so pamikiran iyan sabap ko kasasarigi niyan reka.
4 Sarigi niyo so Allah sa taman sa pakataman,
ka so bo so Allah i Lakongan a da a ikeda iyan.
5 Piyakapangalimbabaan iyan so kibabaling sa poro,
inibaba iyan so mabager a siti a kakadenan iran;
inipantar iyan ko lopa, ka pinggeba iyan taman ko bayanek.
6 Di ini dii ndapodapoan imanto o manga miskin
ago so kikadodowandowaanan.
7 Mapapantar so lalan o dii mamaginontolan;

hey Tohan a Matito, na pepakatilaken ka so lalan iran.
8 Oway, ya Allah, sii ko kapetomana mi ko manga kokoman ka na iinamen ami seka;
so kapekebantogi ko Ingaran ka na aya masisingayo o manga poso ami.
9 Ikakadali ka o ginawa ko sii ko kagagawii;
sabenar a di reka dii kambanoga o niyawa ko.
Ka igira a miyakatalingoma ko doniya so manga siksa a ipekokom ka
na giyanan bo i kapekasowa o manga taw ron sa kaontol.
10 Apiya pen o ipekelimo o ka so manga rarata
na di siran den pekasowa sa kaontol;
apiya sii ko inged o manga oontol a taw na di siran den dii ndosa,
ago di iran tegoon sa ginawa so menang o Allah.
11 Apiya pen mikakayaw so lima ngka, ya Allah, sa kandanega ngka kiran
na di iran den pekeilay.
Pakiilain ka kiran so kasisigi ngka pantag ko manga pagtaw ngka
kaan siran mapakapekeya!
Mipolang kiran so apoy a isesenggay ko manga ridoay ngka!
12 Ya Allah, pembegan kami ngka sa mapiya a bobolos;

ka so langon a pekepasad ami na aya ngka dii nggolaolaan sii rekami.
13 Ya Allah a Tohan ami, aden a ped a manga kadnan a liyo reka a miyakandato rekami,
ogaid na so bo so Ingaran ka i seselaan ami.
14 Miyamatay siran den a da den a ba on maooyag;
di den makapembowat so manga arowak iran.
Siniksa a ka siran ago piyaminasa,
na piyanas ka so langon a katatademi kiran.
15 Piyakala a ka so nasiyon ami, ya Allah!
Piyakala a ka so nasiyon a inibantog ai ko ginawa ngka;
piyakalaolad ka ko mbalabala so manga temanaan iyan.
16 Mimbabanog reka so manga pagtaw ngka, ya Allah, ko kareregeni kiran.

Sii ko kapendanega ngka kiran
na apiya so kapepekaranges iran reka mangangarapan na maregen.
17 Datar o maogat a babay a magaan den mbawata
a dii makapelikoay ago pepekagoraok ko kapembalilita on
na datar kami anan gowani sabap reka, ya Allah.
18 Miyaogat kami a miyakapelikoay sa masakit,
ogaid na mimbawata kami baden sa ndo.
Da a kiyapakataban ami a kamapiyaan o inged ami,
na da den a mininggolalan ami.
19 Ogaid na so miyamatay a manga taw ngka na penga ooyag peroman;

pembobowat so manga lawas iran!
Hey sekano a kikatotorog ko manga kobor iyo,
na pagnaw kano ago pelalalis sa kapekebabaya!
Ka so namog ka na lagid o namog ko kapipita,
na ipembawata o doniya so miyamatay ron.
20 Ikano roo, manga pagtaw aken; soled kano ko manga rowang iyo
na talangeben iyo ron so manga pintoan.
Tapoken iyo pasin a ginawa niyo
taman sa da makalepas so rarangit o Allah.
21 Ka meliyo so Allah ko darpa iyan
sa kandanega niyan ko manga taw ko doniya sabap ko manga dosa iran.
Pesewaan o doniya so rogo a piyakateros on;
di niyan den pegnaan so miyanga bobono on.
ISAYAS 27
Pekaasalen so Israil
Sii sangkoto a gawii na so Allah na ndanegen iyan a pedang,
a so marangit, ago mala ago mabager a pedang iyan,
so Libiyatan a so pendola ago dii mborikis a nipay;
mbonoon iyan so piyakalekelek a binatang a sisii sa ragat.
2 Sa gawii oto na peteroon o Allah makapantag ko dii teribonga a asinda niyan a obas a:
3 “Saken i pekibir on; lalayon aken pepakaigan.
Pagiipaten aken ko gagawii daondaw kaan da a pekabinasa on;
4 Kena den a ba aken pekerarangiti.
O aden a manga soroken a otan on ago manga kogo a ipetidawa aken
na kesondolan aken ago kebisolan sa tarotop.
5 Ogaid na o kebaya raken mamagapas angkai a manga ridoay o manga taw aken
na makapengangapin siran raken!
Oway, makapengangapin siran raken!"
6 Pekatalingoma so manga gawii a pembekaw so manga Israil, a so manga mbawataan o

Yakob,
na magombos siran ago pemagobarobar,
na penoon iran a onga so dalem a doniya.
7 Da siksaa o Allah so manga Israil

a datar sa kapened o kiyasiksaa niyan ko manga ridoay a sominiksa kiran.
Na so miyapamono a manga Israil
na kena a ba datar sa kadakel o miyapamono a manga ridoay a miyamono kiran.
8 Matengka a kiyasiksaa o Allah ko manga taw niyan ko kinitaogen iyan kiran.
Biyogaw niyan siran a nggolalan ko mabager a ndo iyan
a datar o sii ko gawii a kapesember a ndo a poon sa sebangan.
9 Ogaid na aya bo a kapekadaa ko kasalaan o Israil,
a so tarotop a galebek a ipapaliyogat on kaan mapapas so manga dosa niyan
na giya kaperoperopeta niyan ko manga ator o manga aparan ko salakaw a tohan
kaan da den a polaos a toos ko katohanan a Asirah o di na aparan a pepanotongan on sa
doka
a ba makatitindeg pen.
10 Ka so kokotaan a siti na kiyaawasan den,
a kiyatalikodan ago mindadarainon a datar o disirto;
pepanateb roo so manga sapi, na ron siran den pepamangiga
a pepamanimol ko manga raon o manga sapak on.
11 Amay ka magango so manga roroni a sapak on na penga popotol siran,
na pemakaoma so manga babay, ka pengitagonen iran.
Ka so manga taw sa Israil na da den a manga sabot iyan;
sabap san na di siran ipengalinggagaw o Tohan a Mimbaal kiran,
na di siran ikelimo o Lominimbag kiran.
12 Ogaid na pekatalingoma so gawii, hey manga Israil, a penimoon kano o Allah sa
nggagaisa ipoon ko lawasaig a Yopratis taman ko temanaan a Misir a lagid o kapegegika
niyan on ko ilaw kaan misibay so malimegas on ko ragami.
13 Sa gawii oto na pekaonin so mala a bogiyong, na pekatalingoma so siran oto a
pepanga dadadas sii ko inged a Asiriya ago so miyamangitaog sa Misir, ka pemanimba
siran ko Allah sii ko soti a palaw sa Yarosalim.
ISAYAS 28
Kemorkaan a Ipraim
Kemorkaan so siti Samariya,

a so sangkad a ipepangandag o manga palaobog sa Ipraim,
a so kababantogan a kataid iyan na pekelas a lagid o obarobar,
a mababangon den ko poro o bobongan a makatotolong ko masibokar a balintad,
a so siti a ipepangandag o manga mama a mapepeges o arak!
2 Ilaya niyo, ka so Kadnan na aden a sogoon iyan reka a pepangarasi ago mabager,
a pekatalingoma a lagid o barabarat a giyaw ago pekabinasa a sobosobo
ago lagid o tanto a mabager a oran a dii mbabagiyaw,
na indebak ka niyan sa mabager sii ko lopa.
3 Na kelomeg angkai a siti a Samariya
a ipepangandag o manga palaobog sa Ipraim.
4 Giya siti, a so kababantogan a kataid iyan na lagid o pekelas a obarobar,
a mababangon den ko poro o bobongan a makatotolong ko masibokar a balintad,
na kelagid den o miyaona a kiyalotoan a onga a higos ko di pen kaperagon
a anda den i kailaya on o taw na peropoon iyan ago pelameden.
5 Ogaid na pekatalingoma so gawii a so Allah a Lebi a Mabager

na aya kebaloy a kababantogan a sangkad,
ago mapiya i paras a salay a obarobar
ko miyalamba a manga pagtaw niyan.
6 Mbegan iyan so pepangokom sa kasisingayoa ko matito a kokoman
na mbegan iyan sa kawaraw so pepamakalinding ko gimowa o siti
sii ko kapenggobata on o manga ridoay.
Si Isayas ago so Pepanga bebereg a manga Nabi sa Yodah
7 Apiya so manga imam ago so manga nabi

na kikabebereg sa arak, a pekisasawiring siran sabap ko mabisa a panginginomen.
Pepanga lilibog so olo iran, na pekeotengoteng siran
sabap ko arak ago pakabereg a panginginomen.
Pepekaribat kiran so manga pangingilain iran,
na pekenaanaa siran igira a pegokas sa kokoman.
8 So langon a lamisaan na miyanga pepeno a gowa
a da den a ba on da kasalapoti o maresik.
9 Na dii teroon angkai a manga taw a
"Antawaa i petepengan iyan mangendao?
Antawaa i pegosayan iyan ko osiyat iyan?
Ba niyan mapipikir a manga iito tano a manga wata
a aya tano den kiyapakagenek somoso?
10 Ka aya di niyan dii teroon na
'Sowaa niyo ai ago sowaa niyo;
sowaa niyo anan ago sowaa niyo,'
a petontolen iyan baden peparoman so manga katero a ipepangosiyat iyan
a so maito sii ago so maito roo."
11 Sabap sa giyanan i parangay angkai a manga taw

na makipembitiyarai kiran so Allah a nggolalan ko manga modol o manga rait
a mibibida i basa.
12 Ka pitero kiran gowani o Allah a
"Giyai i darpa a pendekean a pekadeke on so kidodokawan";
ago "Giyai so darpa a kapakadadaya,"
ogaid na da iran den pakinega.
13 Giyanan i sabap a aya kisampay kiran a katero o Allah na
"Sowaa niyo ai ago sowaa niyo;
sowaa niyo anan ago sowaa niyo,"
na pepaparomanan kiran baden tomontol so manga osiyat
a so maito sii ago so maito roo
kaan sii ko kapelalakaw iran na kirepang siran
a penga papalian, ago penga lilitagan ago penga bibiyag.
So Ator ko Rogo o Onayan sii sa Siyon
14 Kagiya ka maoto na pakinega niyo so katero o Allah,

hey sekano a dii mamagongatongat a ndadato sangkai a manga taw sa Yarosalim!
15 Di niyo di itekabor a "Miyakipesadanowa kami ko kapatay,
ago miyakambaal kami sa kapasadan ago so darpa o miyamatay;
na amay ka pekatalingoma so domadaag a morala na di kami niyan keseko,
ka kagiya biyaloy ami a lindonga ami so manga kabokegan,
ago so kapanaliba na aya mi dii tepokan."
16 Ogaid na giyai i pitero o Kadnan a so Allah:

"Ilaya niyo, ka mbetadan aken a Siyon sa ator a keonayan,
a so kiyatepengan ago mala i arga a ator a kebaloy a mbebeken a onayan;
na saden sa peserig on na di den kenaanaa.
17 Mbalowin ko so matito a kokoman a panakes,
na mbalowin ko so kaontol a tonton ko katatadeng.
So barabarat a giyaw na peyopasen iyan so manga kabokegan a aya niyo lindonga,
na pelapayan a ig so di niyo dii tepokan.
18 Keilang so kapasadan iyo ago so kapatay,
na di den ketoman so kapasadan iyo ago so darpa o miyamatay.
Amay ka pekatana rekano so domadaag a morala
na pelomegen kano niyan.
19 Gawii gawii den a kapepekatalingoma niyan sii ko kadadaondaw ago kagagawii,
na ipetelon kano niyan;
na so bo so kasabota sangkai a katero na tanto a piyakalekelek!"
20 Lagid kano o mama a tanto a mababa so igaan iyan a kapemeteran iyan,

a so tanggob iyan na tanto a maninit a ipekokos iyan.
21 Ka peseriat so Allah a lagid o pinggolaola niyan sa Palaw a Pirasim;
penggani sekaniyan a datar o isako sii sa Balintad a Gibiyon
sa kapenggolaolaa niyan ko galebek iyan, a so mibibida a galebek iyan,
ago so kapagimasada niyan ko sowaan iyan, a so migagaib a sowaan iyan.
22 Kagiya ka maoto na geneki niyo so kapepagongatongat iyo
ka o ba baden makatekes so ipapatong rekano.
Ka pitero raken o Kadnan a Allah a Lebi a Mabager
so inikokom iyan a kambinasaa ko dalem a inged.
So Ongangen o Tohan
23 Pamakineg kano na go niyo pakinega so sowara ko;

tagoa niyo sa ginawa so peteroon ko:
24 Amay ka ndado so taribasok sa lopa a pemolaan iyan
na ba omanoman den a di niyan on dii kandado?
Ba niyan tatarosen baden a kaperopeta niyan ko lopa
ago so kapepangarasa niyan on?
25 Kena! Ka amay ka miyapakapepantara iyan so lopa
na peseodan iyan sa oniin a karaway
ago pepirikan iyan sa oniin a komin.
Pemolaan iyan on so trigo ago bantad sii ko inisenggay ron a darpa,
ago so ped a manga oniin a pereperan sii ko manga kilid o lopa iyan.
26 Ka peginsaratan sekaniyan o Tohan iyan;
ipepangendao niyan on so tito a okit.
27 Ka so manga iito a oniin a karaway na kena a ba pegegika a rompi

aya pen o ba iligis so tirikan a karo ko oniin a komin;
ka aya pegosaren on na matag baden bentol o di na lilit
a domadait on a kala iyan.
28 So pereperan a pegegiken na malebod mabinasa;
sabap sii na kena a ba omanoman den a kapegegika on.
Na apiya pen o iligis iyan on so manga tirikan o karo niyan
na di niyan pekisasaan ko manga kalamaging o koda iyan.
29 Langon mambo angkai a kaongangen na palaya den poon ko Allah a Lebi a Mabager
a piyakamemesa i mosawir ago lebi a pekagaga.
ISAYAS 29
Kemorkaan a Yarosalim
Kemorkaan a Ariyal, a giya den a Yarosalim,

a siti a kiyabalingan o Daod!
Apiya pen itataros oman ragon so di ron dii kaselaselaa ko manga pista
2 Na siksaan aken angkai a siti a pembetowan sa 'Aparan o Tohan.'
Ketagoan sa kamboboko ago dii kandidiyagaw,
na kelagid raken o aparan a kasasapengan sa rogo.
3 Ka sondolan o Tohan so siti, na pelikopan iyan sa manga kota ago manga tambak a
inggobat on.
4 Kibaba a Yarosalim, na pekapoon so lagam iyan ko lopa a lagid o lagam o arowak,
a pekaranges so kapetero iyan a poon ko bayanek.
5 Ogaid na so madakel a manga rait a penggobat reka, hey Yarosalim,

na penga babaloy a lagid o lopapek,
na so piyakalekelek a manga sondaro iran na kibayog a lagid o okap.
Ka kitekaw baden ko sakotika
6 Na pekatalingoma reka so Allah a Lebi a Mabager
a oonotan o dalendeg, ago linog ago mala a piyakabowimbowing
a sarta o barabarat ago sobosobo ago pesokeyaw a pekaosip a apoy.
7 Na giyoto a so manga sondaro o langon a nasiyon
a mitimotimo a makalilikop sa Yarosalim a nggobat on,
a rakes o manga gomaan iran,
na penga ada langon a lagid o pangingilain o taw
ko taginepen iyan sii ko kagagawii.
8 Ka so kesowasowa sa masa oto na lagid o pegongosan a mama a mitetaginep sa pekan,
ogaid na miyakanaw a pekeor den,
ago lagid o pekewaw a mama a mitetaginep sa peginom,
ogaid na miyakanaw a kaadaan sa bager
a da kabolongi so kawaw niyan.
Kelagid anan so langon a nasiyon a petimotimo
a nggobat sa Yarosalim.
So Kabobota a Kiyasabapan o da Kaparatiyaya
9 Pakabebengang kano baden ago pamemesa;

bobotaa niyo a ginawa niyo kaan di pemakanono!
Pamereg kano, ogaid na kena a ba sabap ko arak;
pakasasawiring kano ogaid na kena a ba sabap ko mala i bisa a panginginomen!
10 Ka piyakipangenepan kano o Allah sa torog;
piyakipideng iyan a manga mata niyo, hey manga nabi;
na siyapengan iyan so manga olo niyo, hey manga nabi.
11 Ka sii rekano na so langon angkai a miyanga papayag mipantag ko da pen
mitalingoma na lagid baden o manga katero a inisorat ko kasisiliyowan a ribro. O ibegay
ko taw a matao mangadi a mapetero on a "Batiyaa ngka kon ai," na isembag iyan a "Di
kepakay, ka kasisiliyowan."
12 O di na o ibegay so ribro ko di pekabatiya a mapetero on a "Pangadii ngka kon ai," na
isembag iyan a "Di ako matao mangadi."
13 Sabap san na pitero o Kadnan a

"Katero bo a kapepakarani raken angkai a manga taw,
na seselaan ako iran a sii bo ko modol iran,
ka mawatan raken so manga poso iran.
So kapesimbaa iran raken na matag baden manga kokoman a ipepangendao o manosiya.
14 Kagiya ka maoto na peparoman ako nggolaola
sa piyakamemesa ago piyakabengang a manga nganin sangkai a manga taw;
na keilang so ongangen o manga oongangen kiran,
ago keda so kapakasasabot o manga somasabot."
15 Kemorkaan so siran oto a pananamaran iran pegma ko Allah so kekadiyaten iran,

a di siran dii nggalebek sii ko maliboteng
a aya pipikiren iran na "Antawaa i pekailay rektano? Anta i pekatokaw ron?"
16 Pekeliden iyo so tito a benar!
Ba mala i kipantag so bote a di so pangengembaal sa koden?
Ba mapetero o pimbaalan sii ko mimbaal on a "Da ako ngka mbaali"?
Ba mapetero o piteong sii ko miteong on a "Da a sabot ka"?
Panginam ko Pekatalingoma a manga Gawii
17 Di bo matey na giya Libanon na kebaloy a oodaren a lopa,

na so oodaren a lopa na kibilang a lagid o ba kalasan.
18 Sa gawii oto na keneg o manga bengel so kapepangadii ko manga katero ko ribro,
na pekanono so manga mata o manga bota a sisii ko datem ago maliboteng.
19 Pagomanan den so kapekebabaya o dii mangangalimbabaan sii ko Allah,
na so manga miskin na ipekapiya a ginawa iran so Soti a Tohan o Israil.
20 Ka penga iilang so manga tangarasi,
na penga ada so dii mamagongatongat,
ago penga popotol so langon a kekadiyat sa marata,
21 A so siran oto a pesenditan iran so da a sala iyan,
ago pelitagan iran so pegabang on ko dii kokoman,
ago pembibiden iran so kapekokoma ko da a sala iyan ko di benar a ipeseksi iran.
22 Kagiya ka maoto na so Allah, a aya miyaon ko Ibrahim, na giyai i pitero iyan

makapantag ko manga mbawataan o Yakob:
"Di den keyaan so manga pagtaw aken,

na di den pemamoti so manga paras iran sa kalek.
23 Amay ka mailay iran so manga wata a imbegay aken kiran
na pegadatan iran so Ingaran aken;
kilalaan iran so kasosoti aken a so Tohan o Yakob,
na ikelek ako iran a so Tohan o Israil.
24 Siran oto a miyakasilay so niyawa iran na pemakasabot,
na so dii mamanarotaro na pemakatarima sa parinta.
ISAYAS 30
So da a Bali niyan a Sarig sa Misir
Pitero o Allah a
"Kemorkaan kano a pepamanopak a manga wata aken,
a di niyo di inggolalan so manga antangan a kena a ba ko rek,
ago dii makipagabanga ko di aken kebayaan,
a pegomanan iyo baden so manga dosa niyo.
2 Pepamanong kano sa Misir a da kano raken pakimosawir;
pepagapas kano ko Piraon a pemakitabang
sa kapekipelindingen iyo ron sa manga ginawa niyo sii ko along a Misir.
3 Ogaid na ipekeya iyo so kapelindinga rekano o Piraon,
ago ikediyaman iyo so sarig iyo sii ko along a Misir.
4 Ka apiya pen miyakaoma den so manga sanasanaan
a siyogo iyo sa siti a Sowan ago giya Hanis sa Misir
5 Na pakapekeyaan kano langon sabap sangkoto a nasiyon a da a bali niyan rekano,
a di pekatabang aya pen o ba pekabegay sa kamapiyaan,
ka so bo so kayaan ago kadiyamanan."
6 Giyai i katero makapantag ko manga binatang sii ko disirto sa pagabagatan a peketasen

o manga siyogo:
Giyanan so darpa a kamaregenan ago karasayan,
a aden a matatago on a manga arimaw a mama ago babay,
ago so manga didilapet a manga ala i bisa a nipay.
Roo pegokit so manga siyogo
a aawidan iran so manga tamok ago pamemegayan iran
a rororanen sa manga kimar ago manga onta
taman ko kapekaoma iran ko da a bali niyan kiran a nasiyon,
7 Taman sa Misir a ilang baden a tabang iyan a da a gona niyan.
Kagiya ka maoto na bitowan aken sekaniyan a "Rahab a da a Kesowa iyan."
So Pepamanopak a manga Taw
8 Pitero raken o Tohan a

"Ika roo den na soraten ka ko ribro so kamarataan o manga taw sii ko kamamasai ran on
kaan sii ko pemakatalingoma a gawii
na kebaloy ai a saksi sa taman sa pakataman.
9 Ka giyai i somosopak a manga taw, a di pemaratiyaya a manga wata,
a so manga wata a di den pemakineg ko manga insarat o Allah.
10 Di iran dii teroon ko manga nabi a
'Di kano den pagilay sa manga pangingilain!'
ago sii ko manga nabi a
'Di niyo rekami den peteroa so ontol!
Teroa niyo rekami baden so ikasososat;
so bo so poon sa pamikiran i pagalamata niyo!
11 Awai niyo so tito a okita,
silayi niyo baden so lalan!
Geneki niyo rekami tero so makapantag ko Soti a Tohan o Israil!'"
12 Kagiya ka maoto na giyai i pitero o Soti a Tohan o Israil:

"Sabap sa da niyo tagoa sa ginawa angkai a pitero aken
ka somiyarig kano baden ko kapameges ago somiyana ko kapanaliba
13 Na giyangkai a kadostaan na kebaloy rekano
a lagid o kiyabantaan a maporo a keleb a makikibi,
a kitekaw a kakirobar iyan sa sakotika.
14 Na keroperopet ai a datar o koden a tarotop den a kiyaroperopeta on
a da den a ba on satebi a kepakay a ketangelan sa waga poon ko apoy
o di na kisandok sa ig sii ko kararaw."
15 Giyai i pitero o Allah a Lebi a Mamaapaar a so Soti a Tohan o Israil:

"So kakesoy niyo raken ago kandeke iyo raken i kakesabet iyo;
so mabetad a kasasarigi niyo raken na aya niyo bager.
Ogaid na somiyangka kano baden
16 A tig iyo a 'Di, ka pelagoy kami a kikokoda.'
Sabap san na pemalagoy kano den ko manga ridoay niyo!
Tig iyo a 'Pekakoda kami ko manga gagaan a koda.'
Sabap sii na lebi a magaan so pemanaloba rekano!
17 So sanggibo rekano na pemalagoy amay ka pagatowan o sakataw bo kiran,
na amay ka pagatowan kano o lima kataw na palaya kano den pemalagoy
taman sa so malamba rekano na kelagid o tawantawan a tokod o pandi sii ko poro o
bobongan."
18 Apiya pen oto na ipekedali o Allah a kikalimoon iyan rekano;

makatitiyagar sekaniyan rekano mangalinggagaw.
Ka so Allah na Tohan a maontol.
Rarakmatan so langon a penayaw rekaniyan!
Perakmatan o Allah so manga Taw niyan
19 Hey sekano a manga taw sa Siyon a kibabaling sa Yarosalim, di kano den pekasegad.
Mataan den a ikelimo kano o Allah amay ka nggoraok kano sa tabang. Anda den i
kanega niyan on na pagamponen kano niyan!
20 Apiya pen o
ipembegay rekano o Kadnan so pangenengken a kamaregenan, ago so ig a karomasayan,
na di den pegnaan peroman so manga goro niyo, ka so den so manga mata niyo i pekailay
kiran.
21 Na o pekasilay kano sa kawanan o di na sa diwang na pekaneg so manga tangila niyo
sa sowara ko talikodan iyo a dii tero sa "Giyai i lalan; kedega niyo ai!
22 Sa masa oto na ikegowad iyo so manga barahala niyo a lalapisan sa pirak, ago so
tiyowang a manga katohanan iyo a lalapisan sa bolawan, na ipelebad iyo siran a datar o
maresik a togak a peteroon iyo a "Awa kano raken!"
23 Na igira a ipeseod iyo so oniin iyo ko lopa na pepakioranan o Tohan, na so pereperan a

pekeragon iyo na manga pipiya ago pekitaralo. Sa gawii oto na makapenateb so manga
pangangayamen iyo ko manga oolad a pananateba.
24 So pen so manga sapi iyo ago manga kimar a dii nggagalebek ko lopa na pemakakan
sa manga pipiya a otan ago ragami a pekeyaren a sadang ago sakrad.
25 Na pemangondas so manga lawasaig a poon ko oman i maporo a palaw ago bobongan
sii sangkoto a gawii a mala a kapemonoa ko manga ridoay niyo amay ka mamangirobar
so manga torogan iran.
26 So olan na kelagid sa sindaw o alongan, na makapito matakep so kasindaw o alongan a
datar o sindaw o timoa so pito gawii sii ko gawii a babeden ago pamolongan o Allah so
manga pali o manga pagtaw niyan a inisiksa iyan kiran.
Ndanegen o Allah a Asiriya
27 Ilaya niyo ka pepekatalingoma so Allah a mala i gees a poon sa mawatan

a pesokeyaw so gani niyan a sarta o makapal a bel.
So manga modol iyan na mapepeno a rarangit
na go so dila iyan na lagid o pepekalengan a apoy.
28 So kapengginawa niyan na lagid o dii mbagiyaw a ig a pekiporo taman sa lig
kaan maayak so manga nasiyon ko ayaka a kabinasaan
ago an katagoi so ngari o manga taw sa kakang a pekateridadag kiran.
29 Ogaid na pemagidaida kano a manga pagtaw o Allah
a datar igira a miyagagawii a di niyo dii kaselaselaa ko soti a kapista.
Kebabaya so manga poso iyo a datar o manga taw a pepenginsi
a petekedeg ko palaw o Allah a so Lakongan o Israil.
30 Pekineg o Allah ko manga taw so mala i gees a sowara niyan,
na pekiilay niyan kiran so kapetena o barokan iyan sii ko tanto rekaniyan a
kapekerarangiti
a sarta o pesokeyaw a pekaosip a apoy,
ago mabager a barabarat, ago bagiyaw ago oran a ilo.
31 Na tanto a penga alek so manga taw sa Asiriya ko kanega iran ko sowara o Allah
amay ka mbadasan iyan siran.
32 Na oman i kapembadasi kiran o Allah a ipesiksa iyan ko badas iyan
na pegayonan o manga pagtaw niyan
sa dii kamboboniboniyan a oni o manga garingking ago manga kotiyapi
sii ko dii kitidawaan o Allah ko Asiriya ko pepekatana a barokan iyan.
33 Miyatey den a mapapasad a Topit
a so darpa a miyatiyagar a totongan ko dato.
Piyakadalem ai ago piyakaolad, na madakel a itagon on,
na so kapengginawa o Allah, a lagid o lawasaig a peketotong a sandawa, i pembiyag on.
ISAYAS 31
Da a Bali o Sarig sa Misir
Kemorkaan so dii mamanong sa Misir a pemakitabang

a somasana siran ko manga koda,
ago somasarig ko kadakel o manga karo
ago sii ko kala i bager o manga komokoda
a da iran bo sanai so Soti a Tohan o Israil
aya pen o ba iran pangnii so Allah sa tabang!
2 Ogaid na maongangen sekaniyan mambo a pepagowit sa kamoralaan.
Di niyan den mbakowiin so manga katero iyan
ka merido sekaniyan ko manga rarata a taw
ago so siran oto a pepegogop ko manga baradosa.
3 Ka so manga Imisiren na matag manosiya a kena a ba Tohan;
so manga koda iran na matag baden ayam a kena a ba manga babager a niyawa.
Na amay ka mbeteren o Allah a lima iyan
na kisosong so pepegogop, ago keoteng so pegogopan,
na palaya siran den penga dadadas.
Pelindingen o Allah a Yarosalim
4 Giyai i pitero raken o Allah:

"Lagid o arimaw a pegengger ko kiyasikema niyan ko bilibili
a di kelek ko kapepelalalis o manga pananagikor a mitimotimo a sondol on
aya pen o ba kasapari o kapekabowing iran
na lagid oto mambo so Allah a Lebi a Mabager a da a ba on pekaren,
ka penog a makipetidawa sii ko Palaw a Siyon, a sii ko kaporoan ai.
5 Ka lagid o papanok a magaalangalang lomayog ko poro o salag iyan
na so Allah a Lebi a Mabager na melinding sa Yarosalim;
pelindingen iyan ago sebeten iyan;
penganogonan iyan ago penabangan."
6 Hey manga Israil; kasoy kano rekaniyan a tanto niyo a kiyaselaan!

7 Ka pekaoma so gawii a so oman i isa rekano na ipelebad iyan so manga barahala a pirak
ago bolawan a pasad o manga lima niyo a kikadodosa.
8 “Ketaban a Asiriya a pedang a kena a ba rek o manga taw,

so pedang a kena a ba rek o manosiya na aya kiran melamed.
Pelagoyan iran so katidawa,
na mapengongoripen so manga kangodaan kiran.
9 Pelagoy so maporo a komandir iran sabap ko kalek,
na tanto a penga nanaanaa so manga olowan iran a sondaro
a pagawaan iran so pandi iran sa katidawa."
Giyanan i pitero o Allah a ndodoo so apoy niyan sa Siyon
ago sisii so perapogan iyan sa Yarosalim.
ISAYAS 32
So Maontol a Kandadato
Ilaya niyo ka aden a pekatalingoma a dato a ipendato iyan so kaontol,

ago so pen so manga olowan a ipendato iran so matito a kokoman.
2 So isa a mama na kelagid o dalonga sii ko mabager a ndo,
ago so dii tepokan sii ko barabarat,
ago lagid o manga lawasaig sii ko disirto,
ago so along o mala a lakongan sii ko rarantian a darpa.
3 Sa masa oto na so manga mata o pepamakanono na kena den a ba mapipideng,
na so manga tangila o pepamakaneg na pemamakineg.
4 So pamikiran o da a pangali iyan na pekasowa ago pekasabot,
na so dila a pekekilo na pekabales ago masagogod i katero.
5 Di den mbetowan so lalong sa seselaan
aya pen o ba kabetowi so makaiisega sa mala i ginawa.
6 Ka so lalong na dii tero sa kalalalongan;
kekadiyat sekaniyan sa kamarataan, ago dii makanggolaola sa maresik,
ago dii magitowito ko Allah;
di niyan mbolongan so ongos o pekeor
ago di niyan pekainoma so pekewaw.
7 So okitokit o makaiisega na marata;
pepangembaal sekaniyan sa manga rarata a antangan
a ikebinasa o manga miskin a nggolalan ko manga kabokegan
apiya pen ontol so kabenar iran.
8 Ogaid na so mapiya a taw na pepangembaal sa manga pipiya a antangan,
na sabap ko manga pipiya a galebek iyan na makapembeken sekaniyan.
9 Hey sekano a kipakadadaya a manga babay,

na mbangon kano na go ako niyo pakinega!
Sekano a da a miaawid a akal iyan a manga babay,
na pamakinega niyo so peteroon ko!
10 Maito bo da malabi saragon na penga sososa kano,
a sekano a da a kiawid a akal iyan,
ka keilang so manga waged a obas a da den a ba on kerebas.
11 Pamanabad kano baden sa kalek, hey manga babay a kipakadadaya!
Pakasosaa niyo a pamikiran iyo, sekano a da a manga awid a akal iyan!
Pangendai niyo so manga nditaren iyo
na solot kano sa manga sako!
12 Gandangi niyo a manga rareb iyo ko kapakamboboko iyo
sabap ko manga oodaren a dii mbabasokan
ago so tetaribonga a waged a obas a palaya den penga ada,
13 Ago sabap ko lopa o manga pagtaw aken
a pengetoan a soroken a manga otan ago pekokogowan;
oway, mbokoon iyo so langon a walay a dii kelamilamiyan
ago giyangkai a siti a dii keriyalaan.
14 Ka apiya so torogan na keawaan,
na kedaan den sa taw so pakambowimboing a siti.
So manga bobongan ago manga lantawa na pembaloy a manga lekowa a ayam sa taman
sa pakataman
a ipekebabaya o manga iila a kimar, ago pepanateban o manga talon
15 Taman sa maodod rektano so Roh a poon sa poro,
ago mabaloy so disirto a oodaren a kalopaan,
na so oodaren a kalopaan na kibilang a lagid o ba kalasan.
So Lomilintad a Kandadato o Allah
16 Sa masa oto na keden so matito a kokoman sii ko disirto

na tereg so kaontol ko oodaren a kalopaan.
17 Na aya onga o kaontol na kalilintad,
ago so ondas o kaontol na karerenek o mokarna
ago sarig sa taman sa pakataman.
18 So manga pagtaw aken na mbaling ko lomilintad a kaden,
sii ko malilinding a manga walay,
sii ko da a pekasamok on a manga darpa a pendekean.
19 Na apiya pen o pekioranan sa giyaw so kalasan
ago kibaba so siti a tarotop a kapentara on
20 Na sayana a pekapiya a ginawa niyo
a ipeseod iyo so oniin iyo ko kilid o oman i lawasaig,
ago tetalonen iyo so manga sapi ago manga kimar iyo a kibobotawanan.
ISAYAS 33
So Pangni sa Tabang
Kemorkaan ka, hey Asiriya, a pepaminasa a da den mabinasa!

Kemorkaan ka a petipo a da den matipo!
Amay ka gomenek ka maminasa na kebinasa ka,
na amay ka gomenek ka manipo na ketipo ka mambo.
2 Ya Allah, kalimoon kami ngka; seka i iinamen ami.

Mabaloy ka a bager ami oman kapipita
ago so pananabet ami ko masa a kamaregenan!
3 Igira a dii ndadalendeg so sowara ngka na pepamalagoy so manga taw;
igira a pegembowat ka na pepamangiparak so manga nasiyon.
4 So mapeteban rekano, hey manga nasiyon,
na kekowa den a lagid o kapengangana on o manga ngongoda a tarapan;
pengagaon ai o manga taw
a lagid o kapetena on o makapal a pelalayolayog a manga tarapan.
5 Mipapangkat so Allah, ka sii komakaden ko maporo;

penoon iyan a Siyon sa matito a kokoman ago kaontol.
6 Sekaniyan den i mbebeken a onayan sii ko masa ngka;
sekaniyan i katitimoan sa mitataralo a kakesabet ago ongangen ago katao,
na so kalek ko Allah i gonsi sangkai a kakawasaan.
7 Pamakineg kano! So manga wawaraw kiran na penggoraok sa matanog sii ko manga

lalan;
tanto a pesegad so manga siyogo a miyamanamar sa kalilintad.
8 Kiyadaan sa taw so manga karsada; da den a ba on dii melakalakaw.
Miyabaroba so kapasadan;
pelimbanen so manga sapa on;
da den a taw a ba pegadati.
9 Dii makamboko so lopa ago pekedaan sa bali,
na pekeyaan a Libanon ago pekelayon.
So masibokar a balintad a Saron na miyalagid o disirto,
na pepanga rororo so manga raon a kayo sii sa Basan ago sa Palaw a Karmil.
Piyakaiktiyar o Tohan so manga Ridoay niyan
10 “Pembowat ako imanto," a pitero o Allah.

"Ipengkat aken imanto a ginawa ko; kiporo ako imanto!
11 Aya ikeogat iyo na okap,
aya ipembawata iyo na ragami;
so sengaw niyo na datar o apoy a pekaosip rekano.
12 Ketotong so manga taw, na penga babaloy a lagid o apog,
ago lagid o miyagarab a manga soroken a otan a mbisolan sa apoy.
13 Sekano a manga wawatan na pamakinega niyo so pinggolaola ko!
Sekano a manga rarani na kilalaa niyo so gees aken!"
14 Pepanga alek so manga baradosa sii sa Siyon;

mipapaar so manga rarata o kapetebada kiran.
Di iran dii teroon a
"Antawaa rektano i pekakaden ko pepekaosip a apoy?
Antawaa rektano i pekabaling ko da a ikepos iyan a pekerapog?"
15 Aya makanggolaola san na so taw a magiinontolan a dii tero sa benar,
a di niyan penagaporonen so pirak a piyanegel,
ago di terima sa tendan,
ago di pemakineg ko marata a kadiyat sa kapamono,
ago pelidas ko kapekeilaya niyan ko marata.
16 Giyai so taw a pekakaden ko maporo,
a aya apasa iyan na so kokotaan a palaw.
Pegeperen sekaniyan a pangenengken,
na di den kedaan sa ig.
So Mapiya ago Kababantogan a Kebolosan
17 Keilay o manga mata niyo so Dato sii ko kakasi niyan,

na pekailay kano sa inged a lomalaolad ko mbalabala.
18 Pemimikiranen iyo so inikalek iyo gowani;
"Anda den angkoto a rait a komikibir sa manga rikord?
Anda so pepanekat sa bowis?
Anda so pepanoriman ko manga torogan tano?"
19 Di niyo den keilay angkoto a manga takabor,
a so manga taw a salakaw i katero,
a mibibida so basa iran a di niyo kesabotan.
20 Tentengi niyo a Siyon a so siti a ron tano dii selaselaa so manga pista!
Keilay o manga mata niyo a Yarosalim,
a lomilintad a babalingan a lagid o barombarong a di den kealin;
di den kebadot so manga lapek iyan
aya pen o ba aden a maredot ko manga tali niyan.
21 Roo na pekiilay rektano o Allah so bantogan iyan;
ketagoan angkoto a darpa sa manga bebelang a lawasaig ago manga bowalan
a da a ba on magokit a peporaan a awang o manga ridoay
aya pen o ba aden a makapelayalayag on a mabager a kapal.
22 Ka so Allah i pengokom rektano;
so Allah i pembegay rektano sa manga sogoan;
so Allah i dato tano, sekaniyan i sebet rektano!
23 So manga kalat o layag o manga ridoay na manga loloag a kikabibitin;

so tokod on na di kapipiyapiyaan, na di kekayat so layag.
Giyoto a petebanen ago pembagibagiin so tamok iran,
na apiya so manga lepo na makapembagian sii sabap ko kadakel iyan.
24 Da den a maginged sa Siyon a ba niyan peteroa a "Pekesakit ako,"
na perilaan so kibabaling on ko manga dosa iran.
ISAYAS 34
Ndanegen o Allah so manga Nasiyon
Obay kano raken a manga nasiyon na pamakineg kano!

Tagoa niyo sa ginawa niyo, hey manga taw!
Pakineg so doniya a rakes o langon a matatago on ago pepekapoon on!
2 Ka pekerarangitan o Allah so langon a nasiyon;
so gani niyan na sisii ko langon a sondaro iran.
Mbinasaan iyan siran sa tarotop;
inisenggay niyan siran a kepolang.
3 Di pemangilebeng so penga bobono kiran,
na penga ado so manga bangkay iran;
penga lolomes so manga palaw o manga rogo iran.
4 So langon a bitoon ko manga langit na penga totonaw,
na pelolonen so kawang a lagid o karatas.
Penga oolog so langon a pamimitoonen
a lagid o miyanga lalayon a raon a pekeroro ko waged,
o di na so manga onga a poon ko kayo a higos.
5 “Na amay ka pagimasaden o pedang aken so langon a galebek iyan sii ko langit," a tig o
Allah,
"na ilaya niyo, ka tena ini sa kasiksaa niyan sa Idomiya,
a so manga taw a inisenggay aken a kebinasa.
6 So pedang o Allah na kerogoan ago kepeno a sapo
a lagid o ba inisombali sa manga bilibili ago kambing a pengorbanen.
Ka aden a pekorbanen o Allah sa siti a Bosrah,
a so mala a kapenombali sii sa inged a Idomiya.
7 Pemakakelit so manga taw a lagid o manga iila a sapi a rakes o manga nati iran.
So inged iran na kebasa a rogo,
na kesapengan so lopa iran sa sibo."
8 Ka giyai so gawii a kaseop o Allah,

a so ragon a kambadali niyan ko manga ridoay o Siyon.
9 So manga lawasaig sa Idomiya na pembaloy a ispalto,
na so manga bayanek on na pembaloy a peketotong a sandawa;
kebaloy so dalem a inged a pekedeg a lita!
10 Di ini kepareng sa gagawii daondaw,
na pengimporoan so bel iyan sa taman sa pakataman.
Pekedaan sa taw so inged ko kapepamagapidapid o masa,
na da den a ba on pekaokit peparoman.
11 Ketangan ai o manga bengit ago manga kakowak,
ka keden siran on.
Mbalowin o Allah a Idomiya a da a bali niyan a lopa a da a matatago on.
12 Da den a kelamba on a ba kabetowi o manga tantowataw ron sa ndatoan,
na penga ada so langon a olowan on.
13 Pemangetoan so manga torogan on sa soroken a otan,
na pekogowan so manga kota on.
Pembaloy ai a kebalingan o manga tingkalong ago manga bengit.
14 Makapetotoona roo so manga binatang a komakaden sa disirto, ago so manga iila a
aso,
na pegengaan o manga iila a kambing so manga ped iran.
Roo pen tereg so tomitima sa kagagawii
a dii mbanog sa ndekean iyan.
15 Peseselag roo so manga bengit a pemagorak,
na pelendeman iran so manga wata iran,
ago siyapen iran ko didalem o manga papak iran.
Roo pen petimotimo so manga garoda
a so oman i isa on na ped iyan so karoma niyan.
16 Ilaya niyo so ribro o Allah na batiyaa niyo so misosorat on a:

Da den a isa kiran bo i ba malebat
aya pen o ba kadaan sa karoma niyan.
Ka so ngari o Allah i migay ko sogoan,
na so Roh iyan i timo kiran langon.
17 Sekaniyan den i pembagibagi ko inged a tatakesen,
ago pembegay ko oman i isa kiran ko bagian iran.
Ketangan iran ai sa taman sa pakataman
na mbeling siran roo ko kapepamagapidapid o masa.
ISAYAS 35
Pekakasoy sa Siyon so Miyanga aaon o Allah
Kesonor so disirto ago so mamara a lopa;

kebabaya so mitataog a kaden, na pegobarobar.
2 Pemangetoan sa madakel a obarobar so disirto
a pegidaida ago pelalis sa tanto a kapekebabaya.
Pembaloy ai a lagid sa bantogan o Palaw a Libanon
ago lagid sa kataid o manga pangomaan sii sa Karmil ago giya Saron.
Keilay o manga taw so bantogan o Allah, a so sigay o Tohan tano.
3 Pakababagera niyo so manga lolobay a lima,

na pakabekena niyo so manga leb a petebekeren sa kada a bager iyan.
4 Teroa niyo ko siran oto a kiyadaan den sa inam a
"Pakababager kano, di kano pekelek!
Ilaya niyo, ka pekatalingoma so Tohan iyo a seop;
pekatalingoma a pembadal ko manga ridoay niyo,
na sebeten kano niyan."
5 Sa masa oto na pekanono so manga mata o bota

ago kelekaan so manga tangila o bengel.
6 Sa masa oto na petepatepak so lepo a lagid o saladeng,
na pelalis so dila o pengaw sa kapekebabaya;
ka pembowalan so ig sii ko mitataog a kaden,
na magondas so manga lawasaig ko disirto.
7 So komigaw a lopa na pembaloy a ranaranaw,
na so mamara a lopa na pembobowalan.
So manga darpa a kakadenan gowani o manga iila a binatang
na pemangetoan a manga sesed ago paotanotan.
8 Na ketago roo so mala a pagokitan a kebetowan sa 'Lalan o Kasosoti.'

Da den a di soti a ba on pekaokit
ka rek ai o siran oto a singgayan on;
di on pekalalakaw so manga rarata a manga lalong.
9 Da a arimaw a ba roo ketago,
aya pen o ba aden a pekasong on a piyakalekelek a binatang,
di siran roo penga iilay.
Ka so bo so miyanga aaon o Allah i pekalalakaw sangkai a lalan;
10 So miyanga sasabet iyan na pemakakasoy ago pemakasoled sa Siyon a pepamagidaida,
na so da a ikeda iyan a kapipiya a ginawa na isengkad ko manga olo iran.
Pekakowa siran sa kapipiya a ginawa ago kapekebabaya,
na keda so kararata a ginawa ago kapakamboboko.
ISAYAS 36
Piyagitaan i Sinakarib a Yarosalim
Sii ko ikasapolo ago pat ragon a kandadato i dato Hisikiyas na si Sinakarib a dato sa
Asiriya na giyobat iyan so langon a kikokotaan a siti sa Yodah na miyanga tataban iyan.
2 Mandiyadi na siyogo i Sinakarib so komandir o manga sondaro niyan a rakes o madakel
a sondaro sa kasong iran a poon sa Lakis sii ko dato Hisikiyas sa Yarosalim. Tomiyareg
so komandir sii ko lalan a ipesong ko pangomaan a pepemipian sa nditaren, sii ko obay o
kakar a ipegokit o ig a poon ko mipoporo a pepondowan on.
3 Na lominiyo rekaniyan so tetandingan ko torogan, a si Iliyakim a wata i Hilkiyas, ago si
Sibna a panonorat ago so komikibir ko manga rikord, a si Yowas a wata i Asap.
4 Na pitero kiran o komandir a "Teroa niyo ki Hisikiyas angkai a kabasa o mala a dato, a
so dato sa Asiriya:
'Antonaa i pepasodan ka sangkai a sarig ka?

5 Di ngka dii teroon a aden a akal ka ago bager sa katidawa, ogaid na katero bo anan.
Antawaa i sasarigan ka a siyopak ako ngka?
6 Ilaya ngka man, ka aya sasarigan ka na so miyapotol a teken a balagan a giya Misir, a
pekasoker ago pekapali ko lima o taw o kaindagi niyan. Lagid anan so Piraon a dato sa
Misir ko langon a somasarig on.
7 Ogaid na o peteroa ngka raken a "Sii kami somasarig ko Allah a Tohan ami," na ba di
sekaniyan i kirek ko manga aparan roo ko manga bobongan ago so ped a manga aparan a
inisapar rekano i Hisikiyas ko kiyateroa niyan ko manga taw sa Yodah ago giya
Yarosalim a "Sii kano bo simba sangkai a isa a aparan"?'
8 Tig pen o komondir a "Na, pakiilain ka ko kadnan aken a dato sa Asiriya so bager ka!
Ba ka makatoon sa apiya dowa nggibo a manga mama a mapakapekoda a ka? O kepakay,
na mbegan aken seka sa dowa nggibo a koda a pekodaan iran!
9 Andamanaya den i kaketabana ngka ko apiya isa bo ko lebi a manga bababa a kapitan o
manga sondaro o kadnan aken? Ka aya ngka sasarigan na so kambegi reka a Misir sa
manga karo sa katidawa ago manga pangongoda!
10 Na ba ngka pipikira a miyakaoma ako sii a nggobat ago peminasa sangkai a inged a da
on bo so Allah? Kena, ka so Allah i somiyogo raken sa kanggobata ago kabinasaa ko
ron."
11 Mandiyadi na si Iliyakim, si Sibna ago si Yowas na pitero iran ko komandir a

"Kapedipedi ka bo na pakimbitiyarai ka rekami a manga oripen ka sa basa a Aramiyo, ka
kesabot ami den. Di ka petero sa basa a Hibriyo ko kapekenega on o manga taw ko keleb
o siti."
12 Ogaid na tig o komandir a "Ba so bo so dato iyo ago sekano i siyogoan raken o kadnan
aken sa kapeteroa ko sii? Kena, ka so pen so manga mama a kioontod ko keleb, a datar
iyo a pekakan siran ko tai iran ago pekainom ko titi iran!"
13 Na giyoto a tominindeg so komandir na miyananalo sa matanog sa basa a Hibriyo a tig

iyan a "Pamakinega niyo so kabasa o mala a dato, a so dato sa Asiriya!
14 Aya pitero iyan na: Di kano pekiakal ki Hisikiyas, ka di kano niyan kesabet!
15 Di kano den pekiakol ki Hisikiyas sa kasarigi niyo ko Allah ko kiyateroa niyan sa
'Mataan den a ipelidas tano o Allah, ka giyangkai a siti na di kepalad ko lima o dato sa
Asiriya.'
16 “Di kano pengimbenar ki Hisikiyas. Giyai i pitero o dato sa Asiriya: Liyo kano ko siti
na ampo kano raken! Amay ka magiyoto na pekakan so oman i isa rekano ko onga o
waged iyan ago kayo a higos, ago pekainom pen ko ig ko paridi iyan
17 Taman sa makaoma ako a magowit rekano ko inged a datar o ba niyo rek, a so inged a
aden a manga asinda on a obas a pembegay sa bago a arak, ago manga pereperan a
pepangembaalan a paan.
18 “Di kano pekisaliba ki Hisikiyas ko kapeteroa niyan rekano sa 'So Allah i sebet
rektano.' Ba aden a katohanan o apiya anda inged a miyakalidas ko inged iyan ko lima o
dato sa Asiriya?
19 Anda so manga katohanan a Hamat ago giya Arpad? Anda so manga katohanan a
Siparbaim? Ba aden a miyakalidas sa Samariya ko lima ko?
20 Antawaa ko langon o katohanan sangkai a manga inged i ba miyakalidas ko inged iyan
ko lima ko? Na andamanaya den i kapekalidasa o Allah sa Yarosalim ko lima ko?"
21 Ogaid na romerenek baden so manga taw a da den a inisembag iran on, ka aya inisogo
o dato Hisikiyas na "Di niyo sekaniyan sembaga."
22 Mandiyadi na si Iliyakim a tetandingan ko torogan, si Sibna a panonorat ago si Yowas
a komikibir ko manga rikord na piyangisi iran so manga nditaren iran sa kamboboko, na
somiyong siran ki Hisikiyas ago piyanotol iran on so manga katero o komandir.
ISAYAS 37
Miyakimosawir si Hisikiyas ki Isayas
So kiyanega sii o dato Hisikiyas na kinisi iyan so nditaren iyan na somiyolot sa sako, na
somiyong ko Timplo o Allah.
2 Siyogo iyan si kiki Iliyakim a so tetandingan ko torogan, si Sibna a panonorat ago so
manga pelokelokesen ko manga imam a palaya kisosolot sa sako sa kasong iran ko nabi
Isayas a wata i Amos.
3 Na pitero iran on angkai a kabasa i Hisikiyas: "Giyangkai a gawii na gawii a
kamaregenan; pesiksaan tano ago pekowaan a diyaman. Lagid tano o wata a kilotad den,
na da a bager o ina iyan sa kipemberoten iyan on.
4 Siyogo o dato sa Asiriya so komandir o manga sondaro niyan sa kapegitoitoa niyan ko
oyagoyag a Tohan. Pangnin ta a maneg o Allah a Tohan ka angkai a manga katero ago
masiksa iyan so mitero on! Na, pangangarapanen ka so ped tano a manga taw a
makapegoyag."
5 Kagiya matero ai o manga siyogo o dato Hisikiyas ki Isayas

6 Na pitero kiran i Isayas a "Teroa niyo ko kadnan iyo a 'Giyai i kabasa o Allah: Di ngka
keleken so manga katero a miyaneg ka a inipagongatongat raken o manga talasogoay o
dato sa Asiriya.
7 Pamakineg ka, ka tegoan aken sekaniyan sa saitan kaan amay ka makaneg sekaniyan sa
isa a totol na kesoy ko inged iyan, na roo aken pekibono a pedang.'"
Piyagitaan Peman i Sinakarib si Hisikiyas
8 So peman so komandir o dato sa Asiriya na miyaneg iyan a miyakaawa so dato iyan sa

Lakis, ka dii makitidawa sa siti a Libnah, na somiyong sekaniyan on a makipemosawir
on.
9 Ogaid na miniripot ki Sinakarib a si Tirhakah a dato sa Itiyopiya na pesong on a
magoolowan ko manga sondaro, ka makipetidawa on. Kagiya maneg ai i Sinakarib na
somiyogo sekaniyan sa manga talasogoay a makasong ki Hisikiyas, na pitero iyan kiran a
10 “Teroa niyo ki Hisikiyas a dato sa Yodah a: Di ka pekiakal ko Tohan ka a sasarigan ka
ko kiyateroa niyan on reka a 'Giya Yarosalim na di den kepalad ko kapaar o dato sa
Asiriya.'
11 Mataan a miyaneg ka so inikidia o manga dato sa Asiriya ko langon o manga inged, a
so tarotop den a kiyapaminasaa iran kiran! Na, ba ka kilidas?
12 Ba miyapakalidas o manga katohanan iran so manga nasiyon a bininasa o manga apo
aken, a giya Gosan, Haran, Risip ago so manga taw sa Idin a kibabaling sa Til Asar?
13 Anda den so manga dato sa manga siti a Hamat, Arpad, Siparbaim, Hina ago giya
Ibah?"
So Pangangarapan i Hisikiyas
14 Miyadawat i Hisikiyas so sorat a poon ko manga siyogo o dato sa Asiriya na biyatiya

iyan. Mandiyadi na somiyong sekaniyan ko Timplo o Allah na kiyayat iyan so sorat ko
kamamasaan o Allah.
15 Na miyangangarapan si Hisikiyas a tig iyan a
16 “Ya Allah a Lebi a Mabager a Tohan o Israil a kokorsi ko poro o dowa a piyagtawtaw
a manga malaikat, na seka bo i Tohan o kalangolangon a ndatoan ko doniya. Seka i
mimbaal ko langit ago so lopa.
17 Pamakinega ko ngka, ya Allah, na ilaya ngka ngkai a sorat a inipakawit i Sinakarib;
pamakinega ngka so langon a katero a inipagitowito iyan ko oyagoyag a Tohan.
18 Benar den, ya Allah, a so manga dato sa Asiriya na liyaslas iran so madakel a nasiyon
ago so manga kaingedan iran
19 Na inilebad iran pen ko apoy so manga katohanan iran na piyaminasa iran den, ka kena
ini a ba tito a tohan, ka matag manga barahala a kayo ago ator a piyasad a lima o manga
taw.
20 Kagiya ka maoto, ya Allah a Tohan ami, na pakalidasa kami ngka imanto ko kapaar o
dato sa Asiriya kaan katokawi o langon a ndatoan sa doniya a seka bo i Tohan."
So Katero o Allah makapantag ki Sinakarib
21 Mandiyadi na si Isayas a wata i Amos na miyakawit sa sorat ki Hisikiyas a aya oni

niyan na "Giyai i pitero o Allah a Tohan o Israil: Sabap sa miyangangarapan ka raken
mipantag ki Sinakarib a dato sa Asiriya
22 Na giyai i kabasa o Allah makapantag rekaniyan:
"So siti a Siyon a giya Yarosalim

na di ka niyan dii sodiin ago ipesinga, hey Sinakarib,
ago di reka dii mangelengkeleng ko kapepalagoy ngka.
23 Antawaa i pipikiren ka a piyagitoito o ka ago piyagongatongat?
Antawaa i miyapasong ka ko kipeporoon ka on sa mata ngka a di ka dii tekabor?
So Soti a Tohan o Israil i pisodi i ka!
24 Nggolalan ko manga siyogo o ka na piyagitoito o ka so Kadnan.
Pitero o ka a
'Sii ko kaaped raken o madakel a karo aken sa katidawa
na miyatakedeg aken so kaporoan o kapalawan,
apiya sii ko pinakamaporo sa Libanon,
na miyapamata aken so lebi a manga aatas on a kayo a sidro
ago so piyamimili on a manga kayo a goo.
Minisampay ako ko manga wawatan a maporo roo,
sii ko lebi a makapal a manga kalasan on.
25 Miyakakalot ako sa manga paridi ko manga pegingedan o manga rait
ago miyakainom ko ig on;
na miyapakamara o manga palad a ai aken so langon a lawasaig sa Misir.'
26 “Ba ngka da maneg a saken a so Allah i mitekdir sii sa miyatey den?

Sii ko miyanga oona a gawii na piyagantangan aken ai,
na imanto na mininggolalan aken angkai a kiyagebaa ngka ko kikokotaan a manga siti
a miyanga babaloy a miyamangidakontor a ator.
27 Giyanan i sabap a so manga maginged on na manga iito i bager;
miyanga alek siran ago miyanga lilibog.
Lagid siran o manga pamomolan sii ko pangomaan,
ago lagid o manga lonaw a malemek a otan,
a lagid o otan a mireretok ko liyawaw o atep
a penga lalayon ko da niyan pen kapakala.
28 “Ogaid na katawan aken o anda ka kakaden

ago ay kapekaoma ngka ago kapelalakaw,
ago so di ngka raken dii kangganii.
29 Na sabap ko di ngka raken dii kangganii
ago sabap sa minisampay ko tangila ko so di ngka dii katekabor
na sengiten aken so ngirong ka, ago kekangan aken so ngari i ka,
na tondaan aken seka komasoy ko iniokit ka ko kiyasong ka sii."
30 Mandiyadi na pitero i Isayas ko dato Hisikiyas a "Giyai i poriba reka sa so Allah i

mitero sii: Sii sangkai a ragon ago so tondog a ragon na aya bo a kekan iyo na pereperan a
baden pemangeto, a da saoden o di na pamolaa. Ogaid na sii ko ikatelo ragon na
pekasaod kano ago makaperagon; makapemola kano sa manga asinda a obas, na pekakan
kano sa manga onga niyan.
31 Na so lamba ko manga taw sa Yodah a mamakapegoyag na pembekaw peroman sa
madalem ago pemangonga sii sa poro.
32 Ka aden a lamba ko manga taw a makapegoyag a pekapoon sa Yarosalim ago sii sa
Palaw a Siyon. So kasigi o Allah a Lebi a Mabager na aya sii toman.
33 “Sabap san na giyai i kabasa o Allah makapantag ko dato sa Asiriya: Di sekaniyan

soled sangkai a siti, aya pen o ba sii makapana sa apiya isa bo a gasa. Di niyan
kesondolan so siti a kekelong, aya pen o ba niyan kalikopi sa manga tambak.
34 Sii ko lalan a iniokit iyan ko kiyasong iyan sii na aya niyan bo kikasoy. Di sekaniyan
pekasoled sangkai a siti," a tig o Allah.
35 “Ka pelindingen ago sebeten aken angkai a siti sabap raken ago sabap ko oripen aken a
Daod!"
36 Na somiyong so malaikat o Allah ko kampo o manga sondaro a Asiriya na piyamono

iyan on so magatos ago walo polo ago lima nggibo a manga mama. Na sii ko kiyapagnaw
o manga taw ko kapipita na roo miyamakakelit so miyamatay.
37 Na giyoto a miyawa roo si Sinakarib a dato sa Asiriya ka komiyasoy sa siti a Ninibah,
na komiyaden roo.
38 Miyakaisa a gawii sii ko kapesimba niyan ko walay o katohanan iyan a si Nisrok na so

manga wata iyan a manga mama, a si Adramilik ago si Sarisir, na biyono iran sekaniyan a
pedang, na miyamagapas siran roo sa inged a Ararat. Na so ped a wata iyan a si
Isarhadon i miyakasambi on a dato.
ISAYAS 38
So Kiyasakit ago Kiyapakabager i Hisikiyas
Sangkoto a manga gawii na miyasakit si Hisikiyas a pakapapatain. Na somiyong on si

Isayas a wata i Amos na pitero iyan on a "Giyai i kabasa o Allah: Tanora ngka so langon
taman ka, ka petay ka; di ka pekabager."
2 Na inidingil i Hisikiyas a paras iyan ko keleb na miyangangarapan ko Allah

3 A tig iyan a "Pepangangampedian ako reka, ya Allah; tanodi ngka man so
kapepaginetaw aken ko hadapan ka a mapaparatiyaya a iklas reka so poso aken,
ago miyakanggolaola ako sa mapiya ko kapegilaya ngka on." Na gomiyoraok sebenar si
Hisikiyas.
4 Mandiyadi na minisampay ki Isayas so katero o Allah a tig iyan a

5 “Ika roo na teroa ngka ki Hisikiyas a 'Giyai i kabasa o Allah a Tohan o Daod a apo o ka:
Miyaneg aken so pangni ngka ago miyailay aken so manga lo o ka, na pagomanan aken sa
sapolo ago lima ragon so omor ka.
6 Pekalidasen aken seka ago giyangkai a siti ko kapaar o dato sa Asiriya, na pelindingen
aken angkai a siti.'"
7 Na tig pen i Isayas a "Giyai i nanao a imbegay reka o Allah sa kitomanen iyan sangkai a
minitopa niyan:
8 Pekakasowin iyan sa sapolo kerit so along o pesedep a alongan sii ko towak i Ahas."
Mandiyadi na komiyasoy so along o alongan sa sapolo kerit a miniona niyan den!
9 Giyai so inisorat i Hisikiyas a dato sa Yodah ko oriyan o kiyapakabager iyan ko

paniyakit:
10 Aya katao ko ron na sii ko lebi a mapiya ko kaooyagoyag aken

na pekasong ako ko darpa o miyamatay,
ka ipelebat ko omor aken so lamba ko manga ragon aken.
11 Mapipikir aken a sii sangkai a darpa o kikaooyagoyag
na di aken den keilay so Allah;
di aken den keilay so manga manosiya
aya pen o ba ako maped ko kibabaling imanto ko doniya.
12 Miyapotol so kapepaginetaw aken ago miyakowa raken den
a lagid o barombarong o tomatagikor sa bilibili a biyadot ago inagaw,
ago lagid o dinis a kiyatabasan ago miyalolon o pepangaol on;
gagawii daondaw na pegeposen ako o Allah.
13 Gomiyoraok ako sa tabang taman sa sobo,
ogaid na lagid o arimaw na piroropet iyan so langon a tolan aken;
gagawii daondaw na pegeposen ako niyan.
14 Miyakakiit ako a lagid o tabonan o di na kalipindo;
miyakaperego ako a lagid o mboboko a marapatik.
Miyakalobay so manga mata ko ko kalalangaga sa langit.
Ya Allah, na masososa ako; panabangi ako ngka!
15 Ogaid na antonaa i mapetero aken?
Ka miyatero ai raken o Allah, na sekaniyan i minggolaola sii.
Peginetaw ako a mangangalimbabaan ko langon o manga ragon aken
sabap sangkai a kararata a ginawa ko.
16 Hey Kadnan ko, datar anan so kapepaginetaw o manosiya;

na giyanan mambo i ipepaginetaw o niyawa ko.
Na, pakabagera ko ngka ago oyaga!
17 Mataan a kamapiyaan aken so tanto aken a kiyarasay;
seka i miyakalidas raken ko kakeolog aken ko galebo a kabinasaan sabap ko gagaw ngka,
ka inilebad ka langon ko talikodan ka so manga dosa ko.
18 Ka siran oto a sisii ko darpa o miyamatay na di reka pekapodi
aya pen o ba makaselasela reka so miyamatay;
na siran oto a pekealogan ko galebo
na di pekaarap ko kasasarigi reka.
19 So bo so kikaooyagoyag i pepodi reka
a lagid o di aken dii nggolaolaan imanto;
so manga ama na pepayagen iran ko manga wata iran so kasasarigi reka.
20 Ya Allah, piyakapiya ako ngka den!

Pegidaida kami a pegayonan o kapepangotiyapi
sii ko Timplo o Allah
ko langon a gawii o kaooyagoyag ami.
21 Miyatero den gowani i Isayas ko manga talasogoay i Hisikiyas a "Tiyagar kano sa

parkat a onga higos na ibongen iyo ko lebag, ka ipekapiya niyan."
22 Na inipakaise mambo i Hisikiyas a "Antonaa i nanao sa benar a kapekasong aken ko

Timplo o Allah?"
ISAYAS 39
So manga Siyogo a poon sa Babilon
Kiyapantagan sa masa oto na so dato sa Babilon a si Mirodak Baladan a wata i Baladan

na piyakawitan iyan si Hisikiyas sa sorat ago pamemegayan, ka miyaneg iyan a miyasakit
a gopen miyakabager.
2 Miyababaya si Hisikiyas ko kiyapakaingomaa niyan ko manga siyogo a poon sa
Babilon, na piyakiilay niyan kiran so langon taman ko manga taliyong iyan, a so manga
pirak, manga bolawan, manga palapa, manga ala i arga a lana ago so langon a titimoon a
gomaan iyan a rakes o langon a ped a patemotamokan iyan. Da den a ba matatago ko
torogan iyan o di na sii ko apiya anda ko ndatoan iyan a ba da kiran pakiilain i Hisikiyas.
3 Oriyan iyan na somiyong so nabi Isayas ko dato Hisikiyas na iniise iyan on a "Anda
miyakapoon angkoto a manga mama, na antonaa i pitero iran reka?"
"Poon sa mawatan a inged," a tig i Hisikiyas, "ka somiyong siran raken a poon sa
Babilon."
4 “Antonaa i miyailay iran ko torogan ka?" a iniise o nabi.

"Miyailay iran so kalangolangon ko torogan aken," a tig i Hisikiyas. "Da den a nganin
ko patemotamokan aken a ba aken kiran da pakiilain."
5 Mandiyadi na pitero i Isayas ki Hisikiyas a "Pamakinega ngka so kabasa o Allah a Lebi

a Mabager:
6 Pekatalingoma den so manga gawii a so langon taman sii ko torogan ka ago so
kalangolangon o miyanga titimo o manga apo o ka taman imanto na pengawidan roo sa
Babilon; da den a ba on kelamba," a tig o Allah.
7 “Na so ped ko manga wata a ka a manga mama a ipembawata a ka na pemiyagen, na
kebaloy siran a manga kapon a orobarang sii ko torogan o dato sa
Babilon."
8 “Mapiya so kabasa o Allah a pitero o ka," a inisembag i Hisikiyas, ka pipikiren iyan a

"Aden a kalilintad ago kalilinding sii ko kapepaginetaw aken pen."
ISAYAS 40
Piyakapiya a Ginawa o manga Pagtaw o Allah
"Pakapiyaa niyo a ginawa o manga pagtaw aken,

pakapiyaa niyo a ginawa iran!" a tig o Tohan tano.
2 “Pangoyati niyo so manga taw sa Yarosalim
na pakalangkapa niyo kiran a miyatarotop den so kapepakaregeni kiran,
ago kiyabayadan den so kadostaan iran;
ka miyatarima iran a poon ko lima o Allah
so takep a kadaneg ko langon o manga dosa iran."
3 Aden a pepananalo a di niyan dii teroon a

"Sii ko mitataog a kaden na tiyagari niyo so Allah sa lalan!
Pakatitowa niyo sii ko disirto so manga pagokitan o Tohan tano!
4 Kiporo so oman i balintad,
na pekababaan so oman i palaw ago bobongan;
kepantar so kikalelena a lopa,
na pekatilaken so minggeranggarang a manga darpa.
5 Kepayag so bantogan o Allah,
na keilay o kalangolangon a manosiya,
ka so den so Allah i mitero sii."
6 Aden a mitero sa "Panawatewag ka!"

"Antonaa i ipetewatawag aken?" a iniise aken.
"Teroa ngka a so langon a manosiya na lagid bo o otan,
na so langon a kakasi iran na lagid bo o manga obarobar ko pangomaan.
7 Pepanga lalayon so otan ago pekelas so manga obarobar
igira a pesemberen o sengaw o Allah.
Mataan a so manga taw na matag baden otan.
8 Pepanga lalayon so otan ago pekelas so manga obarobar
ogaid na makamomoayan so katero o Tohan tano sa taman sa pakataman."
9 Hey seka a pepakalangkap sa mapiya a totol sa Siyon,

na takedeg ka ko maporo a palaw;
Seka a pepakalangkap sa mapiya a totol sa Yarosalim,
na gorongen ka so sowara ngka sa matanog.
Na den, pelalis ka na di ka pekelek;
teroa ngka ko manga inged sa Yodah a
"Katii den so Tohan iyo!"
10 Ilaya niyo, ka pepekaoma so Allah a Lebi a Mamaapaar a sasartaan o bager
a aya ipendato iyan na so barokan iyan.
Ilaya niyo, ka aawidan iyan so imbalas iyan
na oonotan sekaniyan o imbadal iyan.
11 Datar o tomatagikor sa bilibili na pakapepanateben iyan so talon iyan;
pepanimoon iyan so manga nati kiran ago pepanakopon iyan siran,
na malanat a kapegagaka niyan ko aden a manga wata iyan.
So da a Lawan iyan a Tohan o Israil
12 Antawaa i miyakatinkong ko manga ragat ko palad iyan,

o di na miyakatakes ko langit ko rangaw o lima niyan?
Antawaa i miyaalosod iyan so manga bayanek ko doniya sii ko reban
o di na miyakatimbang ko manga palaw ago manga bobongan sii ko timbangan?
13 Antawaa i miyakateked ko pamikiran o Allah
o di na miyakainsarat on a aya niyan odasa?
14 Antawaa i inimosawira o Allah kaan makatokaw,
na antawaa i miyakapangendao ron sa ontol a okitokit?
Antawaa i miyangendao ron sa ilmo
o di na miyakiilay ron ko lalan ko kapakasabot?
15 Apiya so manga nasiyon na ibibilang o Allah a lagid bo o sa tek a ig a poon ko sakedo

ago lagid bo o bayanek sii ko timbangan;
ipembayaw niyan so manga polo a lagid bo o da den a ba iran timbang.
16 So langon a ayam ko manga kalasan sa Libanon
na di petoon a penotongen a ipenapaat ko Allah
aya pen o ba ketangkaan so manga kayo ron
a ipengitagon ko manga aparan.
17 So langon a nasiyon na lagid bo o da den sii ko kamamasai niyan on,
na ibibilang iyan siran a da a bali niyan.
18 Kagiya ka maoto na antawaa i kelagidan iyo ko Tohan?

Andamanaya i kapagosaya niyo ko ropaan iyan?
19 Kena sekaniyan a ba lagid o barahala a tiyowang o panday,
a liyapisan sa bolowan ago inalop sa manga rantay a pirak!
20 So miskin a taw a di pekabalebeg sa datar anan a pamemegayan
na pemili sa kayo a di pesesak;
na pengiloba sekaniyan sa mapasang a panday
a magembaal sa barahala a di keoteng.
21 Ba niyo di katawi? Ba niyo da maneg?

Ba rekano da matero ipoon sa poonan?
Ba niyo da sabota ipoon ko kiyabangona ko doniya?
22 Kokorsi so Allah ko poro o katiboron o doniya,
na so manga taw ron na lagid bo o manga pila.
Sekaniyan i pekeyat ko langit a lagid o sayap,
na pembirangen iyan ai a lagid o barombarong a mbalingan.
23 Pegilangen iyan so mala i gees a manga taw,
na pembalowin iyan so manga dato sa doniya a da a kipantag iyan.
24 Anda den i kiyapamolaa kiran,
anda den i kinisaoden kiran,
anda den i kiyambekaw iran ko lopa
na pagiyopen siran o Allah, na penga lalanes,
na kibayog siran o sobosobo a lagid bo o ragami.
25 “Antawaa den i kelagidan iyo raken?

Antawaa i pekatingki raken?" a tig o Soti a Tohan.
26 Langag kano sa langit!
Antawaa i miyaden ko manga bitoon a pekeilay ngka?
Pepakagemaon iyan siran langon sa kanggaisa,
na petelowan iyan so oman i isa on ko ngaran iyan.
Sabap ko kala iyan i gees ago mabager a kapaar
na da den a isa kiran bo a ba miyalepas!
27 Hey Israil a mbawataan o Yakob, ino kano pepenon,

a di niyo dii teroon a
"So masosowa tano na pageemaan ko Allah;
so kabenar tano na indadarainon o Tohan tano?"
28 Ba niyo di katawi? Ba niyo da maneg
a so da a kaposan iyan a Tohan, a so Allah,
a aya miyangaden ko pirowarowangan o doniya
na di den ndokawan aya pen o ba mikopay?
Di keteked so ongangen iyan.
29 Pembegan iyan sa bager so kikakokopay,
na pepakalaan iyan so kapekagaga o manga lolobay.
30 Apiya so manga ngongoda na ndokawan ago ikopay,
ago so manga kangodaan na kirepang ago keoteng.
31 Ogaid na siran oto a mbabayorantang ko Allah na makapembago sa bager.
Makapepaporo siran a makapepapak a datar o manga darayo;
makapelalagoy siran a di ikopay,
ago makapendadalakaw a di ndokawan.
ISAYAS 41
Keogopan o Tohan a Israil
Pitero o Tohan a
"Rerenek kano ko danga aken, hey manga wawatan a inged!
Pembagowa niyo so bager iyo sa kapakikokom, hey manga nasiyon!
Daseg kano ka mbibitiyarai tano;
ndadarpaiya tano ko kaan makokom o antawaa i ontol.
2 “Antawaa i miyakagemaw ko mama a domadaag a poon sa sebangan

ago tomiyawag rekaniyan a penalagad on?
Saken den! Pepeladen aken on so manga nasiyon,
na pepakidaag aken on so manga dato.
Pembalowin iyan siran a lagid o bayanek a nggolalan ko pedang iyan
ago lagid mambo o pekibayog a okap a nggolalan ko pana iyan.
3 Peselobaan iyan siran, na peteros sekaniyan a da kakaidi
sii ko lalan a da on den makadapo so ai niyan gowani.
4 Antawaa i miyakanggolaola sii ago miyakanggolalan,
a aya pepamaapaar ko pekesowasowa
sii ko kapepamagapidapid o masa ipoon sa poonan?
Saken a so Allah, a sisan den ko poonan
ago sisii mambo ko kaposan, saken den."
5 “Miyailay o manga taw ko manga wawatan a inged so miyanggolaola ko,

na petebaden siran sa kalek;
pepekaoma siran a dii timotimo.
6 Pepamagogopa siran
a dii teroon o oman i isa ko pagari niyan a 'Pakawawaraw ka!'
7 So pangongokir na pegoyatan iyan so panday sa bolawan,
na so pepekatilak ko barahala sa bakbak
na pegoyatan iyan so pesesel sa potaw
a tig iyan makapantag ko kiyapatria on a "Mapiya nan!"
Na petotoken iran so barahala kaan di keoteng.
8 “Ogaid na seka, hey Israil a oripen aken,

a so mbawataan o Yakob a miyapili aken;
seka a moriyataw o Ibrahim a ginawai aken,
9 Na kinowa ko seka ko pirowarowangan o doniya;
poon ko miyakawatawatan a darpa on na tiyalowan aken seka
a tig aken a 'Oripen aken seka;'
pinili aken seka na da aken den bowangen.
10 Di ka pekelek ka sisii ako reka;
di ka kedai sa inam, ka saken i Tohan ka.
Pekabageren ko seka ago pagogopan;
kepetan aken seka ko domadaag a kawanan a lima ko.
11 “So langon a peparangit reka

na makapekeya ago kekowa a diyaman;
penga iilang ago penga dadadas so siran oto a pesopak reka.
12 Apiya pen mbabanogen ka so manga ridoay ngka na di ngka siran ketoon;
so siran oto a di reka dii makitidawa na palaya den penga ada.
13 Ka saken so Allah a Tohan ka a komakapet ko kawanan a lima ngka
a di aken reka dii teroon a 'Di ka pekelek;
tebangan ko seka!'
14 “Hey mbawataan o Yakob a matag oled; hey maito a Israil,

di ka pekelek ka saken den i magogop reka,"
a tig o Allah a aya ngka Pangangaon, a so soti a Tohan o Israil.
15 “Ilaya ngka man, ka mbalowin aken seka a pangaras
a bago ago tarem a madakel i tinga.
Pengarasen ka so manga palaw ago sesaan ka siran,
na kebaloy so manga bobongan a lagid o okap.
16 Pelidan ka siran, na kibayog siran o ndo
ago pemangiparak o sobosobo.
Samaoto na kebabaya ka sii ko Allah
ago mbentogen ka so soti a Tohan o Israil.
17 “Igira a so manga miskin ago so kikadodowaanan na pembabanog sa ig a da den,

a kiyamaraan den sa kawaw so manga pelak iran,
na saken a so Allah i magampon ko pangni iran;
saken a Tohan o Israil na di aken siran den indarainon.
18 Pemakatogaan aken so manga lawasaig sii ko manga poporo a darpa,
na pakapembowalanan aken so manga balintad.
Mbalowin aken a ranaranaw so disirto,
na pagadenan ko sa manga paridi so kamamaraan a kalopaan.
19 Pakapemangetoan aken sa manga kayo a sidro so disirto
a rakes o manga kayo a akasiya, ago mirtel ago olibi,
na tegoan aken so ilang a kalopaan sa manga kayo a goo,
ago pir ago sipris.
20 Keilay ai o manga taw na ketokawan iran
a so lima o Allah i miyakanggolaola sii;
tegoon iran den sa ginawa, na seboten iran
a so soti a Tohan o Israil i miyaden on."
So Kapegerara o Allah ko di Benar a manga Tohan

21 “Itindeg iyo so kaso niyo, hey sekano a manga barahala," a tig o Allah.
"Pamagosaya niyo so manga karina niyo," a tig o dato o Israil.
22 “Song kano sii na go niyo teroa o antonaa i kesowasowa.
Panotola niyo so miyanga iipos a miyanggolaola kaan ami mapemasak
ago katokawi so tito a keondasan iyan.
O di na payaga niyo rekami so da pen mitalingoma;
23 Teroa niyo rekami o antonaa i keolaola ko kaposan
kaan ami katokawi a sekano bes na manga tohan.
Oway, nggolaola kano sa pekaompiya o di na baden pekabinasa
kaan kami mabengang ago mapeno a kalek!
24 Mataan a sekano na da den a gona niyo
a da den a mapenggalebek iyo!
Saden sa pesimba rekano na piyakasisingay.
25 “Aden a piyakambowat aken a mama sii sa sebangan,

na pepekaoma sekaniyan a poon sa pagotaraan.
Petelowan iyan so iIngaran aken,
na pelagosaken iyan so manga dato a lagid o lonatay,
a datar o pangengembaal sa koden igira a di niyan dii ndapodapoan so bote.
26 Antawaa rekano a manga barahala i miyayag sii ipoon sa poonan sa di niyan pen
kanggolaola
kaan ami katokawi ago matero a 'Benar iyan'?
Da a isa rekano bo a ba sii miyakapayag;
da den a miyakaalamat sii,
da den a miyakaneg reka sa katero.
27 Saken a so Allah na aya miyaona a mitero sa Siyon a
'Ilaya niyo; katii so manga taw ngka!'
Na somiyogo ako sa Yarosalim sa pekalangkap sa mapiya a totol.
28 Kagiya ilain aken so manga barahala
na da a isa kiran bo a ba pekabegay sa mosawir;
da den a pekasembag igira a pegisean aken.
29 Ilaya niyo; langon angkai a katohanan na di benar,
da den a ba iran mapenggolaola!
Giyangkai a manga barahala na matag ndo a da a kipantag iyan.
ISAYAS 42
So Oripen o Allah
"Katii so oripen aken a pepakabageren aken," a tig o Allah,

"a so miyapili aken a tanto aken a ikasosoat.
Initemo aken on so Roh aken,
na pagowiten iyan so matito a kokoman ko oman i nasiyon.
2 Di sekaniyan pelalis o di na pekatanogen iyan so lagam iyan
aya pen o ba niyan nggorongen sii ko manga lalan.
3 So miyagomek a sesed na di niyan potolen,
ago so pemirepirek a sombowan na di niyan perengen.
Sii ko kasasarigi ron na pekagemaon iyan so matito a kokoman.
4 Di sekaniyan kelobayan aya pen o ba kadai sa inam
taman sa di niyan mapakambeken so matito a kokoman sii ko doniya.
So manga wawatan a inged na pakatatalingomaan iran so kitab iyan."
5 Giyai i pitero o Tohan, a so Allah,

a so miyaden ko manga langit ago komiyayat on,
a so miteong ko doniya ago so langon taman on,
a aya pembegay sa napas ko manga taw ron
ago niyawa ko siran oto a pelalakaw ron:
6 “Saken a so Allah i tomiyawag reka sii ko kaontol,
na kepetan ko so lima ngka ago siyapen aken seka;
imbegay aken seka a kitangked ko kapasadan aken mipantag ko langon a taw,
na mbalowin ko seka a solo ko manga nasiyon.
7 Mbekaren ka so mabobota a manga mata,
na pekaliyon ka so manga biyag a kioontod ko maliboteng a manga kalaboso.
8 “Saken so Allah; giyanan i Ingaran aken!

Di aken imbegay so bantogan aken ko ped,
aya pen o ba aken pakimbagianen so podi aken ko manga barahala.
9 Ilaya niyo, ka so miyaalamat aken gowani na miyatoman den,
na pepayagen aken imanto so bago a manga nganin;
sii ko di iran pen kapekatalingoma na pepakitokawan ko rekano."
So Idaida a Podi ko Allah
10 Pagidaidai niyo so Allah sa bago a idaida;

pagidaidaan iyo so podi niyan, hey manga taw ko pirowarowangan o doniya!
Podiya niyo, hey sekano a dii melayalayag ko ragat,
ago so langon a kaaden a matatago on!
Pagidaida kano a manga wawatan a inged a rakes o langon a kibabaling on!
11 Pakatanoga niyo so sowara niyo, hey disirto,
ago so manga pagiingedan on a kibabalingan o manga taw sa Kidar!
Pagidaida kano sa kapekebabaya, hey manga kibabaling sa Sila;
lalis kano sii ko poro o manga palaw!
12 Sekano a ndodoo ko manga wawatan a inged,
na bantoga niyo so Allah ago payaga niyo so podi niyan!
13 Meliyo so Allah a lagid o mawaraw a mama;
datar o sondaro na pekolikaon iyan so rarangit iyan.
ipagogiyab iyan sa matanog so lalis sa katidawa,
na ndaagen iyan so manga ridoay niyan.
Minitopa o Allah a Pegogopan iyan so manga Pagtaw niyan

14 Pitero o Allah a
"Miyatey den a karerenek aken;
gomegenek ako a penggenggenen aken a ginawa ko.
Ogaid na miyakatalingoma den so masa a kapeseriat aken;
petegaw ako ago pesekaan a lagid o babay a pembaliliten.
15 Mbinasaan aken so manga palaw ago manga bobongan,
ka nggangon aken so langon a pepamangeto on.
Mbalowin aken a kalopaan so manga lawasaig,
ago pekatiyan aken so manga ranaranaw.
16 Pagagaken aken so manga bota ko lalan a di iran katawan;
penggonanaon ko siran sii ko da iran kalayami a manga okita.
Pekaliwanagen aken so maliboteng ko onaan iran,
na pekatilaken aken so minggeranggarang a manga darpa.
Giyai i manga penggolaolaan ko, na di aken siran den indarainon..
17 Ogaid na siran oto a somasarig ko manga barahala
a di iran dii teroon ko tiyonag a manga toladan a 'Sekano i manga tohan ami,'
na pekandoden siran a tanto a miyakakeya.
So Israil na Bota ago Bengel
18 “Pamakineg kano a manga bengel!

Tenteng kano a manga bota kaan kano makailay!
19 Antawaa i lebi a bota ago lebi a bengel
a di so oripen aken, a so siyogo aken?
Ba aden a lagid sa kabobota o oripen aken a sisiyapen ko?" a tig o Allah.
20 “Madakel a pekeilay ngka, hey Israil,
ogaid na di ngka tegoon sa ginawa;
kalelekaan so manga tangila ngka,
ogaid na da a pekeneg ka."
21 Sabap ko kaontol o Allah na inikasoat iyan

so kiyabaloya niyan ko kitab iyan a mala ago kababantogan.
22 Ogaid na so manga pagtaw niyan na pitebanan ago piyamanekewan;
kalilitagan siran langon ko manga galebo,
ago pepamangitapok ko manga kalaboso.
Pitebanan siran a da den a ba kiran makapenabang;
piyanekewan siran a da den a ba makapetero sa "Mapakaasal siran!"
23 Antawaa rekano i pemakineg sii; antawaa i pekinegen iyan piyapiya

ago tegoon iyan sa ginawa sii ko pekatalingoma a masa?
24 Antawaa i miyalad ko mbawataan o Yakob ko kapetebani ron,
ago so Israil sii ko manga tekew?
Ba di so Allah a kiyandosaan tano?
Ka da tano kabayai i ba tano kedega so manga lalan iyan
aya pen o ba tano paratiyayaa so manga kokoman iyan.
25 Sabap san na piyakamborngat iyan rektano so pekedeg a gani niyan,
na piyakaokit tano niyan ko kamaregenan o katidawa.
Somiyokeyaw so rarangit iyan ko mbalabala rektano
ogaid na da tano den sabota;
miyatotong tano niyan ogaid na da tano tagoa sa ginawa.
ISAYAS 43
Minitopa o Allah a Penabangan iyan so manga Pagtaw niyan
Ogaid na imanto na giyai i pitero o Allah

a aya reka miyaden, hey Yakob,
a so miteong reka, hey Israil:
"Di ka pekelek, ka inaon aken seka;
initalo aken reka so ngaran ka, na rek aken seka.
2 Igira a pegokit ka ko manga dadalem a ig na ped ako ngka,
na igira a peripag ka ko manga lawasaig na di ka iran keanod.
Igira a pelalakaw ka a pegokit ko apoy na di ka kelowis
aya pen o ba ka matotong o kadeg.
3 Ka saken so Allah a Tohan ka,
a so Soti a Tohan o Israil a aya reka Pepanabet.
Inibegay aken a Misir a iniaon reka,
ago giya Itiyopiya ago Siba a inisambi reka.
4 Kagiya mala ka i arga ago ipepangkat ko kapegilaya ko reka,
ago pekebabayaan ko seka
na imbegay aken so manga taw a iseliyo reka,
ago so manga nasiyon a isembi ko kaoyagoyag ka.
5 Di ka pekelek, ka ped ako ngka.
Pagowiten aken so manga mbawataan ka a poon sa sebangan,
na timoon aken siran a poon sa sedepan.
6 Peteroon ko sa pagotaraan a 'Pakaliyowa ngka siran!'
ago sii sa pagabagatan a 'Di ngka siran penggenggena!'
Wita niyo sii so manga wata aken a manga mama a poon san sa mawatan,
ago so manga wata aken a babay a poon ko pirowarowangan o doniya,
7 A so oman i isa a ipembeto ron so Ingaran aken;
ka inaden aken siran a kibantog raken;
piteong aken siran ago pimbaalan."
So Israil a Saksi o Allah
Pitero o Allah a
8 “Ketawag so manga taw aken a aden a mata niyan ogaid na di pemakailay,
a aden a tangila iran ogaid na di pemakaneg!
9 Ketimo so kalangolangon a nasiyon; kelimod so manga taw!
Antawaa ko manga katohanan iran i pekaalamat ko pekatalingoma
o di na makapenotol ko miyanga iipos?
Hey manga katohanan, wita niyo sii so manga saksi iyo a makapemataan sa benar kano
kaan makaneg so manga ped ago matero iran a "Benar den so katero iyo"!
10 Sekano, hey Israil, i manga saksi aken," a tig o Allah,
"a so oripen aken a pinili aken
kaan ako ngka katokawi ago maparatiyaya,
ago an ka masabot a saken bo i Tohan.
Da den a ped a sesaya a Tohan
a miyaipos den o di na pekatalingoma.
11 Saken den so Allah,
na da a Pananabet a makaliyoliyo raken.
12 Saken i miyakaalamat ko da pen mitalingoma, ago miyakasabet rekano,
na piyakitokawan aken rekano a saken i minggolaola sii,
a kena a ba so salakaw a tohan a sisii rekano.
Sekano i manga saksi aken," a tig o Allah, "sa saken i Tohan.
13 Oway, na ketatap ako den a Tohan.
Da den a pekapokas ko apiya antonaa a sisii sa lima ko;
antawaa i makabangen ko di aken dii nggalebeken?"
So Limo o Allah ago so da Kaparatiyaya o Israil
14 Giyai i pitero o Allah a so Pangangaon ka, a so Soti a Tohan o Israil:

"Sabap sa an ka masabet na sogo ako sa manga sondaro a nggobat sa Babilon,
na pemiyagen aken so langon a taw sa Babilon;
na so kapepagogiyab iran na kesambian sa kandidiyagaw.
15 Saken so Allah a so Soti a Tohan ka.
Inaden aken seka, hey Israil, na Dato ako ngka."
16 Giyai i pitero o Allah:

"Sii ko miyatey den a gawii na mimbaal ako sa lalan sii ko ragat,
a so pagokitan san ko manga babager a ig.
17 Piyakaliyo aken sa Misir so manga karo iran ago manga koda
a rakes o manga babager a sondaro iran,
na palaya siran miyakakelit a di den pemakambowat;
miyada siran, a miyanga papareng a lagid o sombowan.
18 Ogaid na di niyo den penanademi so andang a miyasowasowa
aya pen o ba ngka pamimikirana so miyanga iipos!
19 Ka aden a bago a penggolaolaan ko, na kiyapoonan den imanto!
Ba ngka di makikilala?
Magembaal ako sa lalan sii ko disirto,
ago so manga lawasaig sii ko mitataog a kaden.
20 So manga iila a binatang na seselaan ako iran,
a rakes on so manga tingkalong ago manga bengit
ka kagiya pembegay ako sa ig sii ko disirto
ago so manga lawasaig roo ko mitatog a darpa
kaan makainom on so manga pagtaw aken a piyamili aken.
21 A so manga taw a piteong aken sabap ko ginawa ko
kaan iran mapekalangkap so podi aken.
22 “Ogaid na da ako ngka talowi, hey Yakob;

ka ba ka raken den biyongas, hey Israil!
23 Da ako ngka witi sa manga bilibili a totongen a isepaat
aya pen o ba ngka raken iniselasela so manga ayam a dii korbanen.
Da aken pakaawida a akal ka sa kapepaliyogati reka sa madakel a pamemegayan
aya pen o ba aken seka piyakandokaw sa kapepangnii reka sa doka.
24 Da ako ngka mipamasa sa apiya antona onon a borok
aya pen o ba ako ngka miyasoat ko sibo o manga ayam a dii korbanen,
ka ba ngka raken den piyakiawidan a akal so manga dosa ngka,
ago piyakandokaw ako ngka ko manga kamarataan ka.
25 “Saken den i penas ko manga sala a ka sabap raken,

na di aken den petedentademan.
26 Somong ta sa dii kokoman; ndarpaiya ta!
Osaya ngka so daowa ngka a ipekabenar ka!
27 So paganay a apoapoan ka na miyakandosa,
na somiyopak raken so manga olowan ka.
28 Kagiya ka maoto na piyakaito aken so manga imam
ko timplo ngka,
na piyalad aken so Yakob ko kamoralaan,
ago so Israil ko kapegongatongata on.
ISAYAS 44
So Kaperakmati o Allah ko Israil
Pitero o Allah a
"Pamakineg ka imanto, hey Israil a oripen aken,
a so mbawataan o Yakob a miyapili aken.
2 Saken so Allah a miyaden reka ago miteong sii ko tiyan o ina a ka,
na pagogopan ko seka.
Di ka pekelek, hey Israil a oripen aken, a so miyapili aken.
3 Pagododan aken sa ig so pekewaw a lopa,
na pekatogaan aken sa manga lawasaig so mamara a lopa.
Pagododen aken so Roh aken sii ko manga wata a ka
ago so manga rakmat aken ko kebabadan reka.
4 Pekarimpoong siran a lagid o manga otan a pepakioranan,
ago lagid o manga kayo ko kilid o lawasaig.
5 Peteroon o isa kiran a 'Rek ako o Allah';
so ped na imbeto niyan sa ginawa niyan so ngaran a Yakob;
na so pen so ped na isorat iyan ko lima niyan a 'Rek o Allah,'
na nggemit sekaniyan ko Ingaran a Israil."
Da den a Ped a Tohan
6 Giyai i pitero o Allah a Dato o Israil ago so Pangangaon iyan,

a so Allah a Lebi a Mabager:
"Saken i monapona ago saken i moripori;
makaliyoliyo raken na da den a ped a Tohan.
7 Antawaa i makatingki raken?
O aden, na payaga niyan ai!
Panotola niyan raken baden so miyasowasowa
ipoon ko kiyaadena ko ko miyanga oona a taw,
ago so pen so da pen mitalingoma,
oway, alamata niyan baden so pekatalingoma!
8 Di kano petebada aya pen o ba kano malek, hey manga pagtaw aken!
Katawan iyo a ipoon den ko poonan na miyapayag aken
ago miyaalamat so langon a kesowasowa.
Sekano i manga saksi aken: ba aden pen a Tohan a makaliyoliyo raken?
Kena; da a ped a Lakongan; da den a ba isa bo a katawan aken."
Kalalalongan so Kapesimbaa ko Barahala
9 Ilang baden so langon a pangengembaal sa barahala,

na da a gona angkai a manga nganin a ipekebabaya iran.
Siran oto a pepamanimba on na bota ago da a sabot iyan, na keyaan siran.
10 Antawaa den a rowar bo ko lalong i magembaal sa katohanan a pesimbaan iyan,
a so tiyowang a barahala a da a oked iyan?
11 Makapekeya sekaniyan ago so langon a datar iyan;
so manga panday a pangengembaal sa barahala na matag baden manosiya.
Timotimo siran langon kaan makokom!
Palaya siran den penga alek ago penga ayaan.
12 So panday sa potaw na pekowaan iyan so kasangkapan iyan

na di niyan di inggalebek sii ko manga waga.
Peteong sekaniyan sa barahala ko bakbak iyan,
na peseselen iyan ko bager o barokan iyan.
Sii ko di niyan on dii kanggalebek na pekeoran sekaniyan ago pekedaan sa bager,
na kagiya da a pekeinom iyan a ig na pekikopay den.
13 So panday sa kayo na petekesen iyan so kayo
na ipetolad iyan on so bontal o barahala.
Pepanasangan iyan a panasang ago perarikan iyan a kompas
ka peteongen iyan a paras a manosiya, a so mataid a mama
kaan matago ko walay niyan.
14 Masiken a pemata sekanian sa kayo a sidro a pegosaren iyan,
o di na pemili sa kalipapa o di na gisok sii ko manga kayo sa kalasan,
o di na masiken a pemola sa kayo a goo a pekatoon o oran.
15 Na kitagon iyan angkai a kayo,
ka so sabaad on na ipepamakayaw niyan ko ginawa niyan,
o di na ipembiyag iyan sa apoy a petindaan iyan sa paan.
Ogaid na so pen so sabaad on na pegembaalan iyan a barahala,
a so katohanan iyan a pesodiyodan iyan ago pesimbaan!
16 So ped ko kayo na ipetegon iyan ko apoy,
a pegiyawan iyan sa sapo a peken iyan taman sa maosog,
na so sabaad on na pepakayawan iyan on pen a ginawa niyan a tig iyan a
"Na, kiyayawan ako! Pekeilay aken so apoy!"
17 Na so lamba on na pegembaalan iyan a barahala,
a so katohanan iyan a pesodiyodan iyan ago pesimbaan.
Pepamangni sekaniyan on a tig iyan a
"Sabeta ko ngka, ka seka i tohan aken!"
18 Giyangkai a manga taw na da den a katawan iran;
da den a sasaboten iran.
Siyapengan o Tohan so manga mata iran kaan di siran pekailay,
na kalelekeban so pamikiran iran kaan di siran pekasabot.
19 Da den a isa kiran bo i ba sii makapemikir;
da den a ba aden a sowa iyan o di na sabot sa kapeteroa niyan a
"So sabaad ko kayo na initagon aken ko apoy,
na tinindaan aken sa paan so manga waga niyan,
ago iniyawan aken pen sa sapo a kiyan aken.
Na ba aken pagembaalan a ipekesisingay a nganin so lamba on?
Sodiyod ako bes ko sapotol a kayo?"
20 Kalalalongan ai a datar o ba niyan pepegeperen sa ginawa niyan so manga ombi!
Miyadadag sekaniyan o miyaakal a poso iyan.
Di niyan kesabet a ginawa niyan aya pen o ba niyan mipakaise a
"Ba di so barahala ini sii sa kawanan a lima ko na di benar a tohan?"
Da Pakalipati so Israil
21 Pitero o Allah a
"Tademi ngka, hey Israil a mbawataan o Yakob, a seka i oripen aken.
Inembaalan aken seka a oripen aken, na di aken seka den pekalipatan.
22 Piyayopas aken den so manga sala a ka a lagid o gabon,
ago so manga dosa ngka a lagid o lekep sa kapipita.
Kasoy ka raken, ka inaon aken seka."
23 Pagidaida kano sa kapekebabaya, hey manga langit,

ka pinggolaola ini o Allah!
Lalis kano sa matanog, hey manga kadaleman ko doniya!
Gorongen iyo so idaida, sekano a manga palaw,
ago so manga kalasan a rakes o langon a kayo ron!
Ka piyakiilay o Allah so bantogan iyan
ko kiyaaona niyan ko Israil a so mbawataan o Yakob.
Pekaasalen a Yodah, na Kebalingan a Yarosalim
24 Giyai i pitero o Allah

a so Pangangaon ka ago lominimbag reka roo pen ko tiyan o ina a ka:
"Saken so Allah a mimbaal ko langon taman;
saken bo i komiyayat ko manga langit,
na binirang aken so lopa sa da a ped aken.
25 Pegilangen aken so kapepagalamat o bokeg a manga nabi,
na pembalowin aken a pembetengen so manga paririmar;
pekeliden aken so katao o manga oongangen,
ka pembalowin aken a kalalalongan.
26 Ogaid na ipepamataan aken so katero o manga oripen aken,
na di aken di inggolalan so pepanga alamat o manga siyogo aken.
Di aken dii teroon makapantag sa Yarosalim a 'Kebalingan den,'
ago makapantag ko manga inged sa Yodah a 'Kebangon siran peroman,'
ka pekaasalen aken so miyanga bibinasa on.
27 Di aken dii teroon ko kalodan a 'Pakamara ka;
pekatiyan aken so manga lawasaig a pepamangondas reka.'
28 Pitero aken makapantag ki Siros a 'Sekaniyan i tomatagikor aken
a penggolalan ko langon a ikesoat aken.
Peteroon iyan sa Yarosalim a 'Mbangonen ka peroman,'
ago sii pen sa Timplo a 'Imbetad peroman so manga onayan ka.'"
ISAYAS 45
Si Siros a Initoro o Allah
Pitero pen o Allah a "Pinili aken si Siros,

na kakapetan aken so kawanan a lima niyan
kaan madaag so manga nasiyon ko pepagantapan iyan,
kaan kakowai sa kapaar so manga dato
ago an kalekai so manga pintoan ko hadapan iyan a di den kelekeban,
2 Ka pitero aken rekaniyan a
'Pengonaan ako reka, na pentaren aken so manga palaw;
nggebaan aken so manga gimowa a tombaga,
na potolen aken so manga tanggal a potaw.
3 Imbegay aken reka so igagadong sii ko maliboteng,
a so kakawasaan a titimoon ko mitatapok a manga darpa
kaan ka katokawi a saken, a so Allah a Tohan o Israil, i petelo reka ko ngaran ka.
4 Sabap ko Yakob a oripen aken, a so Israil a pinili aken,
na tiyalowan aken seka ko ngaran ka,
na bigan aken seka sa mala a bantogan
apiya pen di ako ngka katawan.
5 Saken so Allah a da den a rimbang aken;
da den a ped a Tohan a rowar raken.
Pekabageren ko seka apiya di ako ngka pen katawan
6 Kaan ipoon sa sebangan na taman sa sedepan
na katokawan o manga taw a da den a Tohan a makaliyoliyo raken.
Saken so Allah a da den a rimbang aken.
7 Saken i dii teong ko maliwanag ago so pegaden ko maliboteng;
pegowit ako sa kamapiyaan ago pegaden mambo sa kamoralaan.
Saken a so Allah i dii nggolaola sa langon ai.'
8 “Tarintik kano a manga langit roo sa poro,

na oran kano sa kaontol, hey manga gabon!
Ngganga ka sa mala, hey lopa, kaan makato on so kakesabet ago so kapaginontolan!
Saken a so Allah i magaden sii.
9 “Kemorkaan so dii makipewala ko Mimbaal rekaniyan!

Ba makipepewala so koden a bote ko pegembaal on?
Ba pekagiraw so bote ko pangengembaal sa koden a
'Antonaa i pegembaalan ka?'
Ba mapetero o pegembaalan ko di on dii nggalebek a
'Da a kapasang o manga lima ngka'?
10 Kemorkaan so peteroon iyan ko ama iyan a
'Antonaa bes i inimbawata a ka?'
o di na sii ko ina iyan a
'Antonaa bes i minilotad ka?'"
11 Giyai i pitero o Allah a Soti a Tohan o Israil ago so Mimbaal rekaniyan:

"Da a kabenar ka sa kapegisei ngka raken makapantag ko mapenggolaola o manga wata
aken ko pekatalingoma a masa,
o di na so kapendoi ngka raken mipantag ko galebek o manga lima ko.
12 Saken i mimbaal ko doniya ago miyaden ko manosiya a pekabaling on;
giya den a lima ko i komiyayat ko manga langit,
na ipepaar aken so langon a pamimitoonen on.
13 Piyakagemaw aken si Siros sa kipenggolalanen iyan ko maontol a kabaya aken,
na pekatiton aken so langon a lalan a pagokitan iyan.
Mbengonen iyan peroman so siti aken a Yarosalim,
na mbalokasan iyan so miyanga bibiyag a manga pagtaw aken
a kena a ba sabap sa pesokayan sekaniyan o di na tendanan,"
14 Giyai i pitero o Allah ko Israil:

"Kerek ka so manga tamok sa Misir ago so manga dagangan sa Itiyopiya,
na pemanong reka so manga atas a taw sa Siba a penga ooripen ka,
na petondog siran reka a kikakadinaan.
Sodiyod siran ko hadapan ka a pepangangampedian a tig iran a
'Mataan a sisii reka so Tohan, na da den a Tohan a makaliyoliyo rekaniyan.'"
15 Benar den a seka i Tohan a pageenaan iyan a ginawa niyan, hey Tohan a Pepanabet ko
Israil.
16 So langon a pangengembaal sa barahala na keyaan ago pekaitoon;
palaya siran den kekowa a diyaman.
17 Ogaid na so Israil na sebeten o Allah sa da a ikepos iyan a kapekesabet;
di sekaniyan den pakapekeyaan aya pen o ba mapakaito sa taman sa pakataman.
18 So Allah i miyaden ko manga langit,

sekaniyan so Tohan a miteong ago mimbaal ko doniya, ago so miyonayan on.
Da niyan adena a ba da a ndodon, ka linimbag iyan a kebalingan.
Na pitero iyan a
"Saken so Allah, na da den a ped a Tohan.
19 Kena a ba ako mitero sa masolen san ko maliboteng a darpa ko doniya.
Da aken teroa ko manga mbawataan o Yakob a
'Panagontamani ako ngka sa ba da a ondas iyan.'
Saken a so Allah na dii tero sa tito a benar;
pepayagen aken so manga oontol a nganin.
20 “Timotimo kano na song kano sii;

daseg kano sii langon a miyamakapagoyag sii ko manga nasiyon.
Da a manga sowa iyan so dii mamagawidawid ko manga barahala iran a kayo
a pepangangarapan siran ko manga katohanan a di pekasabet.
21 Mbibitiyaraiya kano langon,
na payaga niyo ago pakitokawi niyo so manga poriba sa kapekagaga o manga katohanan
iyo!
Antawaa i miyakaalamat gowani isako miyatey den o antonaa i mapenggolaola?
Antawaa i miyakapayag on sii ko miyaipos a masa?
Ba kena a saken, a so Allah?
Da da den a Tohan a rowar raken, a so maontol a Tohan ago Pananabet;
da den a rimbang aken.
22 “Sangor kano raken kaan kano masabet,

hey langon kano ko pirowarowangan o doniya!
Ka saken i Tohan, na da den a salakaw.
23 Pisepaan aken a ginawa ko;
miyakapoon ko ngari aken so katero a di den kebakowi, ka tito a benar:
'Pesodiyod raken so oman i isa a taw,
na pesepa so oman i dila sa kapagiiklas iyan raken.'
24 Peteroon iran a 'So bo so Allah i pekepoonan ko kaontol ago bager.' "
So langon a mirangit rekaniyan na makapengadap on ago keyaan.
25 Ogaid na sii ko Allah na kibilang a manga oontol so langon a kiyababadan ko Israil,
na peselasela siran.
ISAYAS 46
So manga Katohanan sa Babilon
So manga barahala sa Babilon a so Bel ago so Nibo a pepanimbaan gowani
na pegawidan baden imanto o manga asno ago manga sapi
a mapened ai a roran ko likod o ndodokawan a manga ayam!
2 Di iran kapenabangan a ginawa iran;
miyabiyag siran den a pegowiten sa mawatan.
3 “Pakinega ko niyo, hey manga mbawataan o Yakob,

a so langon a miyalamba ko manga pagtaw aken a Israil.
Rinitan aken seka ipoon ko kinilotaden reka,
na sisiyapen aken seka ipoon ko kinimbawataan reka.
4 Apiya taman ko kalokes ka na saken i Tohan ka;
apiya taman ko kapakapoti o bok ka na saken i pepangoyag reka.
Inembaalan aken seka na siyapen ko seka;
pagoyagen aken seka ago penabangan.
5 “Antawaa i kelagidan iyo raken o di na ketingkian?" a tig o Allah.

"Ba aden a keabayan iyo raken a mipendatar ako niyan?
6 Aden a manga taw a pegodod sa bolawan a poon ko sako iran,
ago pepamanimbang sa pirak ko timbangan,
ka pesokay siran sa panday kaan iyan ai kambaali a barahala
a pesodiyodan iran ago pesimbaan.
7 Peposain iran, na ipembetad iran ko petegoan on
a makatitindeg roo den a di den pekaiseg ko darpa iyan.
O aden a gomoraok on sa tabang na di den pekasembag
aya pen o ba makasabet rekaniyan ko karomasayan iyan.
8 “Tademi niyo ai; dalema niyo ko pamikiran iyo

ago tagoa niyo ko poso iyo, sekano a pepamanopak.
9 Tademi niyo so miyasowasowa ko miyanga atey den a gawii;
saken so Tohan a da den a rimbang iyan;
saken so Tohan a da den a ba niyan datar.
10 Pepayagen aken so kaposan sii bo ko poonan;
ipoon ko andang a masa na pepagalamaten aken so da pen mitalingoma,
a di aken dii teroon a 'Di den keilang so piyagantangan aken,
ka penggolaolaan ko so langon a ikesoat aken.'
11 Tewag ako sa mama a pekaoma a poon sa mawatan a inged roo sa sebangan;
seyab sekaniyan a lagid o darayo, na ipenggolalan iyan so singanin aken.
So miyatero aken na giyanan i itoman aken;
so miyatekdir aken na giyanan den i penggolaolaan ko.
12 “Pamakinega ko niyo a manga tetegas i olo,

a sekano a mawatan rekano so kapakadaag!
13 Pepakaranin aken rekano so kapakadaag aken; kena den
a ba matey.
Di kesendod so kapenabet aken, ka sebeten aken a Yarosalim,
na imbegay aken ko Israil so bantogan aken.'
ISAYAS 47
Pakapengalimbabaanen a Babilon
Pitero o Allah a
"Hey siti a Babilon a lagid o da kabatali a raga,
panog ko ko korsi i ka na ontod ka ko bayanek sii ko lopa!
Hey siti a lagid o wata a babay o manga taw sa Babilon,
di ka den kebetowan sa malemek ago masosomay!
2 Kowa ka sa galingan na galing ka on sa arina;
kowaa ngka on so kombong ka!
Ndai ngka so manga pipiya a nditaren ka;
lekis ka, na sosaw ka ko manga lawasaig!
3 Kerinayag so katatalandiyang ka, na keilay so kiyayai reka.
Seop ako, na da den a ba ko pekalidasa a apiya antawaa."
4 So Soti a Tohan o Israil na aya tano Pangangaon;

so Allah a Lebi a Mabager i Ingaran iyan.
5 Pitero o Allah sa Babilon a

"Ontod ka a romerenek sii ko maliboteng;
di ka den kebetowan sa bai o manga ndatoan!
6 Kiyararangitan aken so manga pagtaw aken;
na diyaneg aken siran a aya ko kawali,
ka piyalad aken siran ko kapaar ka.
Ogaid na da den a kapedi i ka kiran;
apiya so manga lokes na siyanganan ka sa tanto a mapened a kokoong.
7 Pitero o ka a 'Ketatap ako den a da a ikepos iyan a bai!'
Ogaid na da ngka tagoa sa ginawa angkai a manga pinggolaola ngka
aya pen o ba ngka piyamikir o antonaa i keondasan iyan.
8 “Kagiya ka maoto na pamakinega ngka ini imanto,

seka a mababaya sa kakeriyala,
a aya katao ngka on na da a pekakaid reka:
Di ngka dii teroon sa ginawa ngka a
'Saken i tohan na da den a salakaw a liyo raken.
Di ako den kebalo aya pen o ba ako kadai sa manga wata.'
9 Ogaid na langon ai reka meraot ko sakotika sii ko salongan bo:
a so kakedai reka sa wata ago so kakebalo ngka.
Kitemo ini reka sa tarotop apiya pen o madakel ka i kapangatao
ago so langon a kapasang ka ko kapamantak.
10 Makasasarig ka sii ko kamarataan ka;
pitero o ka a 'Da a pekailay raken.'
So ongangen ka ago ilmo na pepekadadag reka,
na pitero o ka ko ginawa ngka a
'Saken bo i tohan, na da den a salakaw a ba ko datar.'
11 Kagiya ka maoto na keoma ka a tiyoba
a di ka on matao lomidas a nggolalan ko kasasalamangka.
Tenaan ka sa morala a di ngka keren a nggolalan ko tendan;
tekaw reka den pekatalingoma so siksa a di ngka keinengka.
12 “Tatarosen ka baden so kapepamantak ka ago so madakel a kapepangatao ngka

a pepanamaran ka ipoon ko kawawatai reka!
Baanda reka ini pekaogop;
baanda ngka kasabapi sa piyakalekelek.
13 Da den a kegaga ngka apiya pen madakel a manga mosawira a ka.
Pakisogoi ngka imanto so manga pamimitoon
a pepamangilay ko manga toos sii ko kawang
ago peperirimar igira a peseribolan,
na pakisabet ka kiran ko manga nganin a pekatalingoma reka!
14 Mataan a lagid siran o ragami a totongen o apoy.
Apiya so ginawa iran na di iran den kesabet ko kapaar o kadeg,
ka kena ini a ba baden manga waga a pekararang ko taw
aya pen o ba kadeg a pekaobay sekaniyan on montod.
15 Giyanan bo i kipantag reka angkai a manga pamimitoon
a di ngka di ipemosawira ipoon ko kawawatai reka!
Oman i isa kiran na ipeteros iyan baden so kariribat iyan;
da den a ba reka pekasabet."
ISAYAS 48
Mategas i Olo so Israil
Pakinega niyo ai, hey manga mbawataan o Yakob

a bebetowan sa manga Israil,
ago so kiyababadan ko Yodah!
Di kano dii sepa sii ko Ingaran o Allah
ago pepamangangay kano ko Tohan o Israil,
ogaid na kena ini a ba totoo o di na ontol.
2 Apiya pen oto na ipetekabor iyo a manga magiinged kano ko soti a siti
ago somasana ko Tohan o Israil,
3 Pitero o Allah ko Israil a
"Gowani ko miyatey a alongan na miyaalamat aken o antonaa i kesowasowa.
Miyakapoon ai ko ngari aken, na piyakitokawan aken,
na tekaw den a piyakinggolaola ko den.
4 Ka katawan aken a mategas ka i olo;
so tengo o ka na lagid o potaw,
ago so beneng ka na lagid o tombaga.
5 Giyanan i sabap a miyapayag aken reka den gowani o antonaa i kesowasowa;
piyakitokawan aken sa da niyan pen kanggolaola
kaan ka di mapetero a
'So barahala aken na aya sii minggolaola;
so tiyowang aken a katohanan i somiyogo on.'
6 “Miyaneg ka ngkai a miyanga alamat aken,

na miyailay ngka den so kinitomanen on langon.
Ba ngka ini di terimaa?
Ipoon imanto na pekitokawan ko reka so bago a kesowasowa
a pageemaan gowani ago di ngka katawan.
7 Imanto den i kapakipenggolaolaan ko sii, a so da den manggolaola gowani.
Da ngka maneg so makapantag on ko da pen angkai a gawii
kaan ka di mapetero a 'Oway, katawan aken den ai!'
8 Mataan den a da ka makaneg aya pen o ba makasabot;
ipoon ko manga apo na da den kalekai so tangila ngka.
Ka katawan aken so tanto ngka a kapakatipo,
na pembetowan ka sa somosopak ipoon ko kinimbawataan reka.
9 “Apiya pen oto na sabap ko Ingaran aken na isendod aken so rarangit aken;
pagerenen aken, na di aken seka mbinasaan kaan ako mapodi.
10 Kiyatepengan ko seka sii ko rapog o karomasayan
a lagid o kapetonawa ko pirak,
ogaid na kiyatokawan aken a di ka den kelombos.
11 So di aken dii nggolaolaan na pantag raken bo,
ka di aken den pakipegitowito so Ingaran aken;
di aken den pakipembagian sa ped so bantogan aken!"
Si Siros a Pinili o Allah
12 “Pakinega ko ngka, hey Israil a so manga taw a tiyalowan aken!

Saken so Tohan a so monapona ago so moripori!
13 So den so lima ko i mitad ko manga onayan o doniya,
na so kawanan a lima ko i komiyayat ko manga langit.
Anda den i katelowi aken kiran
na palaya siran den nggemaw.
14 “Timotimo kano langon na pamakineg kano!

Antawaa ko manga barahala i miyakaalamat sii:
'Pekebabayaan o Allah si Siros,
na inggolalan iyan so singanin o Allah sa kanggobata niyan sa Babilon;
kitana ko manga taw ron so mabebeter a barokan iyan.'
15 Saken den i mitero ago tomiyalo rekaniyan;
pekaonoten aken sekaniyan, na pekapiya so bobolos iyan.
16 Obay kano raken na pamakinega niyo ai:
Ipoon ko paganay na da ako tero sa masolen;
ipoon ko kinitomanen ko katero aken na ndodon ako den."
Imanto den na so Allah a Lebi a Mamaapaar
na siyogo ako niyan a nggolalan ko Roh iyan.
17 Giyai i pitero o Allah a Pangangaon ka,

a so Soti a Tohan o Israil:
"Saken so Allah a Tohan ka a pepangendao reka o antonaa i lebi reka a mapiya,
a di ako reka dii nggonanao ko lalan a patot a pekedegen ka.
18 O ba ngka bo tiyago sa ginawa so manga sogoan aken!
O miyagiyanan na pekatoga reka so kapiya a ginawa a lagid o lawasaig,
ago makapendansal reka so kapepakadaag a lagid o manga begel sa ragat!
19 So manga wata a ka ago so kebabadadan reka na kelagid sa kadakel o peted;
di siran den ketipod aya pen o ba mabinasa ko hadapan aken."
20 Liyo kano sa Babilon! Awai niyo so manga taw ron

a pepelalalis kano sa kapekebabaya!
Pakalangkapa niyo ai na go niyo panawatewagen;
sampain iyo ko pirowarowangan o doniya
a di niyo dii teroon a "Inaon o Allah so oripen iyan a Israil!"
21 Isako agaken o Allah so manga taw niyan ko kiyaokit iran ko disirto, na da siran
mawaw.
Piyakatogaan iyan siran sa ig a poon ko lakongan;
inopak iyan so lakongan na miyakapoon on so ig a miniboraya.
22 “Da den a kalilintad o manga baradosa," a tig o Allah.
ISAYAS 49
So Oripen o Allah
Pamakineg kano raken, hey manga inged ko kilid a ragat;

pakinega niyo ai, a manga nasiyon a ndodoo sa mawatan!
Sa da raken pen kimbawataan na tiyalowan ako o Allah;
sii ko kandodoo aken pen ko tiyan o ina aken
na inibeto niyan so ngaran aken.
2 Biyaloy niyan so dila aken a lagid o magarang a pedang,
initapok ako niyan sii ko sirong o palad iyan;
inembaalan ako niyan a makindat a gasa,
na inisolen ako niyan ko tentang iyan sa gasa.
3 Na pitero iyan raken a "Oripen aken seka, Israil,
na kebantogan ako a nggolalan reka."
4 Ogaid na pitero aken a "Ilang baden so kiyanggalebek aken;

miyalengan aken so bager aken sa da a kipantag iyan ago da den a ondas iyan.
Ogaid na so Allah i matao ron,
na so imbalas raken na sisii ko Tohan aken."
5 Na mitero raken pen so Allah,

a so lominimbag raken ko roranan a wata a mabaloy a oripen iyan
sa kikasowin aken ko mbawataan o Yakob sii rekaniyan
kaan matimo on so miyakambelabelag a manga pagtaw niyan a Israil
(ka inipangkat ako sii ko kapegilaya on o Allah,
na so Tohan aken i pekepoonan ko bager aken).
6 Aya pitero iyan raken na
"Apiya pen oripen aken seka sa kapekaasala ngka ko manga mbatabataa o Yakob
ago so kikasowin ka sii raken ko manga Israil a miyakapagoyag
na aden pen a lebi a mala a pakipenggalebek aken reka,
ka mbelowin ko seka pen a solo ko manga nasiyon
kaan misampay so kapepanabet aken ko pirowarowangan o doniya."
7 Mitero so Pangangaon o Israil, a so soti a Tohan iyan

sii rekaniyan a dii sodiin ago ipekegowad o manga nasiyon,
a so oripen o manga olowan,
a tig iyan a "Keilay ka o manga dato na pemanindeg siran sa kapagaadati ran reka;
keilay ka o manga pendatoon, na sodiyodan ka iran.
Mapenggolaola ini sabap ko Allah a kasasarigan,
a so Soti a Tohan o Israil a aya reka minili."
So Kapekaasala ko Israil

"Sii ko masa a kikelimoon aken reka na pagamponen aken seka;
sii ko gawii a kapenabet na tebangan ko seka.
Pelindingen aken seka,
na nggolalan reka na magembaal ako sa kapasadan mipantag ko manga Israil,
ka pekaasalen aken so inged iran,
ago pekitangan aken kiran peroman so miyanga bibinasa a manga kawali iran on.
9 Nggolalan reka na peteroon aken ko kikakalaboson a
'Liyo kano!'
ago sii ko siran oto a sisii ko maliboteng a
'Gemaw kano ko maliwanag!'
Kelagid siran o manga bilibili a pemangangan sii ko kilid o manga lalan
ago mamakapenateb ko oman i madadaya a bobongan.
10 Di siran den keor o di na kewaw
aya pen o ba siran masogat o kayaw o disirto o di na so ranti o alongan,
ka so Allah a aden a gagaw niyan kiran i penggonanao kiran,
na pagagaken iyan siran ko obay o manga bowalan.
11 Mbelowin ko so oman i palaw aken a lalan,
a pemangiporo so manga karsada aken.
12 Ilaya niyo, ka pekaoma so manga taw aken a poon sa mawatan,
a so ped na poon sa pagotaraan, ago so ped a poon sa sedepan,
ago so pen so ped a poon ko inged a Sinim."
13 Lalis kano sa kapekebabaya, hey manga langit!

Keriyala ka, hey doniya!
Poon kano magidaida, hey manga palaw!
Ka piyakapiya o Allah sa ginawa o manga taw niyan,
na ipengalinggagaw niyan so perarasain kiran.
Tedeman o Allah a Yarosalim
14 Ogaid na so manga taw sa Yarosalim na pitero iran a

"Tiyalikodan tano o Allah; kiyalipatan tano den o Kadnan tano!"
15 Na tig o Allah a
"Ba kelipati o ina so wata a pepakasoson iyan
a ba da a gagaw niyan ko wata a inimbawata iyan?
Apiya pen o kalipati niyan na di aken sekano den pelipatan!
16 Ilaya ngka man, hey Yarosalim, ka initiyap aken so ngaran ka ko manga palad a lima
ko;
so manga pangeleban ka na sii lalayon ko kamamasai ko ron.
17 Pepekaoma nggagaan so siran oto a pembangon reka peroman,
na pemangawa reka so minggegeba reka ago lomiyaslas.
18 Pangilailay ka sa mbalabala!!
Titimo so langon o manga taw ngka a pepamanong reka!
Mataan ko kaooyagoyag aken," a tig o Allah,
"na soloten ka siran langon a lagid o manga piyagartaan;
inditar ka siran a datar o babay a kewingen.
19 “Apiya pen kiyabinasaan so inged ka a miyalaslas ago kiyaawasan

na kebaloy ai imanto a pekaliget a di on kemin so pemakabaling on,
na pekawatanen reka so siran oto a mininasa reka.
20 So manga wata a inimbabawata o manga taw ngka sii ko kaadai reka sa taw
na pemakaoma a peteroon iran ko kapekenega ngka on a
'Tanto rekami a maito angkai a darpa,
begi kami ngka pen sa darpa a kebalingan ami!'
21 Na giyoto a peteroon ka sii ko poso o ka a
'Antawaa i miyakambawata raken sangkai langon a manga wata?
Ka kiyadaan ako den sa wata ago da den makambawata;
minitaog ako ago kiyatalikodan, na inawaan ako a miyatawantawan.
Ogaid na giyangkai a manga taw, antawaa i mikeritan kiran?
Anda siran bes miyakapoon?'"
22 Giyai i pitero o Allah a Lebi a Mamaapaar:

Ilaya ngka man, ka kepay ako ko manga nasiyon,
na itongkol aken so pandi aken a keilay o manga taw;
na pagowiten iran reka so manga wata a ka a manga mama a pesokopon iran,
ago so manga wata a ka a babay a pembarongen iran.
23 So manga dato na penga babaloy a lagid o manga ama a ka,
ago so manga bai ran a lagid o periritan reka a manga ina.
Sodiyod siran ko hadapan ka a iroroko iran a paras iran ko lopa,
na ndilaan iran so bayanek sii ko danga o ai ngka.
Mandiyadi na ketokawan ka a saken so Allah;
di den keolaan so siran oto a domadara raken."
24 Ba keagaw so piteban o mawaraw a sondaro,

o di na ba kesabet so miyanga bibiyag o tangarasi?
25 Ogaid na giyai i pitero o Allah:
"Oway, kowaan ko manga wawaraw a sondaro so miyanga bibiyag iran,
ago pagagaon ko manga tangarasi so miyanga tataban iran.
Ka makipetidawa ako ko apiya antawaa i di reka dii makitidawa,
na sebeten aken so manga wata a ka.
26 Pekikan aken ko pepemameges reka so rek iran a badan;
penga bebereg siran ko manga rogo iran a lagid o arak.
Mandiyadi na ketokawan o langon a manosiya a saken so Allah a Pepanabet reka,
a so Pangangaon ka, a so Mabager a Tohan o Israil."
ISAYAS 50
So Dosa o Israil
Giyai i pitero o Allah:

"Anda so sorat a kapasadan ko kambelag a iniawa aken ko ina a ka?
O di na antawaa ko pepamagotang raken i kiyapesaan ko reka?
Da den a benar on, ka so manga dosa ngka i kiyasabapan ko kiyapesaa reka,
na so manga sala a ka i kiyasabapan ko kiyapakaawaa ko ina a ka.
2 Inoto da a taw a kiyaomaan aken isako makaoma ko?
Inoto da a somimbag raken isako mananalo ako?
Ba tanto a mababa so barokan aken a di pekasabet?
Ba ako korang sa bager a di makapenabang?
Nggolalan ko matag kambonget na kapekamaraan aken so ragat;
kebaloy aken a disirto so manga lawasaig
a pematay a kawaw so manga seda on ka korang sa ig,
na penga ado siran.
3 Di aken dii nditaran so manga langit sa maliboteng,
na pesepengan aken sa dinis a sako."
So Kaparatiyaya o Oripen o Allah
4 So Allah a Lebi a Mamaapaar na bigan ako niyan sa dila o maongangen

kaan ako matao tero sa patot ko siran oto a kidodokawan.
Mapita mapita den na pepokaon ako niyan,
pepokaon iyan so tangila ko kaan makaneg
a datar o siran oto a pepangendaon.
5 Likaan o Allah so manga tangila ko,
na da ako den makasopak aya pen o ba makatalikod.
6 Piyalad aken so likod aken ko pepamadas on,
ago so baka aken ko siran oto a pembadot ko sompa aken.
Da aken sapengi a paras aken ko kapepanodai ron
o siran oto a pepagongatongat raken.
7 Ka petebangan ako o Allah a Lebi a Mamaapaar,
na di ako kebinasaan o kapepanonongkaa iran raken.
Kagiya ka maoto na piyakategas aken a paras aken a lagid o batolakit,
na katawan aken a di ako den pakapekeyaan.
8 Marani raken so Tohan a aya raken pepekabenar.
Antawaa den i pendimanda raken? Pakindarpai sekaniyan raken!
Antawaa i pesendit raken? Pakipagatobanga raken!
9 Ipepananindegan ako o Allah a Lebi a Mamaapaar.
Antawaa i makapemataan sa aden a sala aken?
So langon a pesendit raken na palaya den penga ada
a lagid o nditaren a pekelengan koman o manga gaab.
10 Antawaa rekano i maaleken ko Allah

ago peparatiyaya ko katero o oripen iyan
a pelalakaw baden ko maliboteng a da a maliwanag iyan?
Sarigi niyan so Allah, ago mbayorantangen iyan a ginawa niyan ko Tohan iyan!
11 Ogaid na so kalangolangon iyo a pembiyag sa apoy,
a ipelinding iyo sa ginawa niyo so pekedeg a manga barabad
na lalakaw kano baden ko sindaw o apoy niyo
ago so manga barabad a piyakakadeg iyo!
Aya terimaan iyo a poon ko lima o Allah
na pemakaiga kano a tanto a penga rarasay.
ISAYAS 51
Perakmatan o Allah a Siyon
Pitero o Allah a:
"Pamakinega ko niyo, sekano a mananamar ko kapaginontolan
ago mananagontaman ko Allah!
Pendapati niyo so lakongan a kiyasapilan iyo,
ago so kowari a kiyalotan rekano.
2 Oway, pendapati niyo so Ibrahim a ama iyo,
ago so Sarah a mimbawata rekano.
Sii ko kiyatalowi ko ko Ibrahim na da pen a wata iyan,
ogaid na riyakmatan aken ago piyakandakel aken so kiyababadan on."
3 Na mataan den a ipengalinggagaw o Allah a Siyon,

na pekapiyaan iyan so ginawa o langon a kibabaling ko miyanga bibinasa on a darpa.
Mbelowin iyan so disirto niyan a lagid o Iden,
ago so mitataog a kaden on a lagid o sapadan o Allah.
So kasosonor ago kapekebabaya na ketoon roo,
a lagid mambo o kapepanalamat ago so oni o dii kapagidaida.
4 “Pamakineg kano raken, hey manga pagtaw aken;

pakinega ko niyo a nasiyon aken:
Imbegay aken so manga ndao aken ko manga nasiyon,
na so manga kokoman aken na kebaloy kiran a solo.
5 Pepakadaseg so kaontol aken;
pepekaoma den so kapenabet aken,
na so kapaar o barokan aken i ndato ko manga taw.
Pakatatalingomaan ako o manga wawatan a inged,
na nomanayaw siran a miinam ko kapaar o barokan aken.
6 Langag kano ko manga langit,
na ilaya niyo a doniya sa kababaan,
ka kedadas so langit a lagid o bel,
na keronot so doniya a lagid o nditaren,
na pematay so langon a kibabaling on a lagid o manga tendek.
Ogaid na ketatap so kapepanabet aken sa taman sa pakataman,
na da den a ikepos o kaontol aken.
7 “Pamakinega ko niyo a manga tatao ko kapaginontolan,

a so manga taw a matatago ko poso iran so manga ndao aken:
Di niyo pekewanen so kapepagongatongati rekano o manga taw,
aya pen o ba niyo kaleken so di iran dii kapagitowito.
8 Ka keda siran a lagid o manga nditaren a peken o manga gaab,
ago lagid o dilana a peloloken o manga oled.
Ogaid na ketatap so kaontol aken sa taman sa pakataman,
ago so pen so kapepanabet aken sii ko kapepamagapidapid o masa."
9 Pagnaw ka, pagnaw ka!

Soloti ngka a ginawa ngka sa bager, hey barokan o Allah!
Pagnaw ka a datar o sii ko miyanga iipos a gawii,
sii ko andangandang a manga masa.
Ba kena a seka so tomiyated ko Rahab,
ago miyaseg sangkanan a naga?
10 Ba kena a seka i miyakati ko ragat,
a so manga ala a ig a manga dadalem,
ago mimbaal sa lalan sii ko kalodan
a iperipag o siran oto a miyanga aaon?
11 So miyanga aaon o Allah na pemakakasoy sa Siyon,
na soled siran on a dii mamagidaida.
So da a ikepos iyan a kapekebabaya na kisangkad ko manga olo iran;
pekakowa siran sa kasosonor ago kapipiya a ginawa,
na keda den so rata a ginawa ago kapakamboko.
12 Pitero o Allah a:
"Saken, apiya saken den, i pepekapiya sa ginawa niyo.
Antawaa ka a ipekelek iyan so manga taw a pematay bo,
a so mbawataan o manosiya a di kemboway a datar o otan?
13 Ba ngka kiyalipati so Allah a Mimbaal reka
a aya komiyayat ko manga langit ago mitad ko manga onayan o doniya?
Ino ka lalayon den pekelek oman gawii
sabap ko rarangit o pepemeges a matitiyagar sa kapaminasa?
Na anda den so rarangit o pepemeges?
14 Ka magaan den kebokaan so manga biyag;
di siran pematay sii ko kalaboso iran
aya pen o ba kakorangi sa pangenengken.
15 Ka saken so Allah a Tohan ka
a aya pekolikaw ko ragat kaan makadaleg so manga begel on,
so Allah a Lebi a Mabager i Ingaran aken!
16 Tiyago aken ko ngari i ka so manga katero aken,
na lininding aken seka ko sirong o palad aken,
saken a aya miyakambeken ko manga langit
ago mitad ko manga onayan o doniya,
ago mitero sa Siyon sa 'Sekano i manga pagtaw aken.' "
So Tagayan a Katatagoan ko Gani o Allah
17 Pagnaw ka, pagnaw ka! Mbangon ka, hey Yarosalim

a miyakainom ko tagayan sii sa lima o Allah
a matatago on so gani niyan.
Kiyaosipan ka minom so tago o tagayan a ipekeotengoteng.
18 Sii ko langon o manga wata a inimbabawata a ka
na da den a ba reka on pekaagak;
sii ko langon a wata a inimbaromitan ka
na den a ba on kepet ko lima ngka.
19 Dowa a morala a minitemo reka, na antawaa i kepedi reka,
a so kalaslas ago kabinasaan, so katidawa ago so taon,
na antawaa i pekapiyaan iyan a ginawa ngka?
20 Ka pililipadengan so manga wata a ka;
miyamakakelit siran ko oman i mbalakan a manga lalan
a lagid o manga saladeng a piyanga sasarimpoketan o litag o panganganop.
Tomiyana kiran so gani o Allah, a so kiyambonget o Tohan iran.
21 Kagiya ka maoto na pakinega ngka ini imanto,

a seka a mararasay, ago mabebereg ogaid na kena a ba sabap ko arak;
22 Giyai i pitero o Allah a Lebi a Mamaapaar,
a so Tohan ka a pelinding ko manga pagtaw niyan:
"Ilaya ngka, ka miyakowa ko den ko lima ngka so tagayan a inikaotengoteng ka;
giyangkoto a tagayan a mapepeno a gani aken
na di ka on den pekainom peroman.
23 Ka tegoon aken baden ko manga lima o perarasay reka
a miyatero iran reka a
'Gepe ka ko lalan kaan ami seka kalalakawi,'
na miyaloseg iran so likod ka a lagid o ba ka bote."
ISAYAS 52
Penabangan o Allah a Yarosalim
Pagnaw ka, pagnaw ka, hey Siyon, na pakabagera ngka a ginawa ngka!
Solota ngka so manga pipiya i paras a nditaren ka,
hey Yarosalim a soti a siti!
So manga kapir ago so manga reresik na di reka den pekasoled peroman.
2 Popoga ngka so manga bayanek a matatago ko ginawa ngka!
Mbangon ka ago ontod ka a kokorsi, hey Yarosalim!
Pokasa ngka a ginawa ngka ko manga rantay ko lig ka,
hey miyanga bibiyag a manga taw sa Siyon!
3 Ka giyai i pitero o Allah:
"Miyapesa ka sa da a bayad iyan,
na kena a ba pirak i ipagaon reka."
4 Ka giyai i pitero o Allah a Lebi a Mamaapaar:

"Sii ko miyatey den a gawii na somiyong sa Misir so manga taw aken a mbaling roo a
manga mananangga;
oriyan oto na siyonsing siran o manga taw sa Asiriya.
5 Na antonaa ini imanto?" a tig o Allah
"Ka miyaagaw siran a Babilon sa da den a bayad;
siran oto a di kiran dii ndato na pepamagongatongat,
na mababas a alongan na lalayon mapepakaito so Ingaran aken.
6 Ogaid na pekatalingoma so gawii a kekilala o manga pagtaw aken
a saken so Tohan a aya kiran miyakatero;
oway, saken den."
7 Sayana a mataid sii ko liyawaw o manga palaw

so manga ai o siran oto a maawid sa mapiya a totol,
a ipepanawatewag iran so kalilintad ago so kakesabet
a di iran dii teroon sa Siyon a "So Tohan ka na dii ndato!"
8 Pamakineg kano! Pepelalalis so manga bantabantay o siti;
pepamagidaida siran langon sa kapekebabaya;
ka so den so manga mata iran i pepekailay ko kapekesoy o Allah sa Siyon.
9 Pagidaida kano sa matanog sa kapekebabaya,
hey miyanga bibinasa a darpa sii sa Yarosalim!
Ka piyakapiya o Allah a ginawa o manga pagtaw niyan,
na inaon iyan a Yarosalim.
10 Siyawaan o Allah so soti a barokan iyan
sii ko kapegilaya on o kalangolangon a nasiyon,
na keilay o langon o pirowarowangan o doniya
so kapenabet o Tohan tano.
11 Ganat kano, ganat kano roo! Liyo kano san sa Babilon!

Di kano seko ko kena a ba soti a nganin!
Liyo kano san na go kano soti,
hey sekano a maawid ko manga kasangkapan o Walay o Allah!
12 Ogaid na di kano ron penggagaan lomiyo
aya pen o ba kano gomanat a lagid o pepamalagoy;
ka pengonaan rekano so Allah,
na sekaniyan, a so Tohan o Israil, i pegipat rekano ko talikodan iyo.
So Karomasayan ago so Bantogan o Oripen o Allah
13 Pitero o Allah a:
"Ilaya niyo, ka pegongangen so oripen aken;
kipangkat sekaniyan sa maporo ago tanto a kebantogan.
14 Madakel a inawir rekaniyan ko kiyailaya iran on,
ka lebi a piyakakerata a paras iyan a di so apiya antawaa a mama,
ago so bontal Iyan a lagid o kena a ba bontal a manosiya.
15 Ogaid na lagid oto mambo a pememesa on so madakel a nasiyon;
penga bebengang so manga dato sabap rekaniyan,
ka so da kiran den mapanotol na keilay iran,
ago so da iran maneg na kesabotan iran."
ISAYAS 53
Antawaa i miyaratiyaya ko totol ami,
ago antawaa i kiyapayagan ko barokan o Allah?
2 Miyakala ko kamamasaan o Allah so oripen iyan a lagid o reti
ago lagid o bekaw a mito ko mamara a lopa.
Da a ba niyan kataid o di na bantogan a ba tano ron kebarayat
aya pen o ba aden a ikesigi tano ko paras iyan.
3 Pisodi sekaniyan ago tiyalikodan o manga taw--
a so mama a pekeromasay ago malalayam sa kapakamboko.
Datar o mama a ipekegowad milay o manga taw na miyasodi sekaniyan,
na inibilang tano baden a da a oked iyan.
4 Ogaid na so kapakamboboko tano na aya niyan kinowa,

ago so manga karomasayan tano na aya niyan inawidan.
Inonta bo na aya kapipikira tano ron na petiyobaan sekaniyan,
a pendanegen o Tohan ago peperasain.
5 Ogaid na piyanga papalian sekaniyan sabap ko manga sala tano,
miyasasa sekaniyan sabap ko manga kadostaan tano;
piyakatana on so daneg a miyakaawid rektano sa kalilintad,
na miyakanggolalan ko manga pali iyan a kiyapamolongi rektano.
6 Lagid tano langon o manga bilibili a miyanga dadadag,
ka pekedeg so oman i isa rektano ko rek iyan a lalan,
na piyakatana rekaniyan o Allah so kadostaan tano langon.
7 Biyaas sekaniyan ago riyasay,

ogaid na da niyan bengata a ngari iyan;
inowit sekaniyan a lagid o nati a bilibili ko penombalian on,
na datar o bilibili a da den oni ko hadapan o magopaw ron
na da den a ba niyan miyatero a sataga bo.
8 Miyadakep sekaniyan, na lipas on so ontol a kokoman,
na da den a taw sangkoto a masa a ba miyakapamikir
sa miyagetas sekaniyan ko darpa o kikaooyag
sabap ko manga dosa o manga pagtaw niyan a aya kapapatotan sangkoto a siksa.
9 Minilebeng sekaniyan a mirarakes ko manga baradosa
ago sii ko kobor o kawasa a mama
apiya pen da sekaniyan den miyakasela
aya pen o ba miyakatero sa kapamagakal.
10 Ogaid na kabaya o Allah a kiyasasaa niyan on ago kiyarasaya,

na apiya pen inibegay o Allah so niyawa niyan a inisoasoat sabap ko dosa
na keilay niyan so manga mbawataan iyan, na mapekalendo so omor iyan,
na makapenggolalan rekaniyan so kakitoman o kabaya o Allah.
11 Keilay niyan so ondas o kiyaromasay o niyawa niyan
na kesoat sekaniyan on;
na nggolalan ko kaketokawi o madakel a taw ko maontol a oripen aken
na mbelowin iyan siran a manga oontol,
ka keawidan iyan so manga dosa iran.
12 Kagiya ka maoto na ipengkat aken sekaniyan a keped o kikababantogan,
na makapembagian sekaniyan ko mapeteban o manga ala i gees
ka kagiya inirila iyan so niyawa niyan ko kapatay,
ago minirakes sekaniyan ko manga baradosa;
ka inawidan iyan so dosa o madakel a taw
na inipangangarapan iyan so manga baradosa.
ISAYAS 54
So Kapekebabayai o Allah ko Israil
"Pagidaida ka, hey balek a babay a da den mbawata!

Tekaw ka magidaida; lalis ka sa kapekebabaya, seka a da den balilita!
Ka keadenan so tiyalikodan a babay sa madakel a wata
a di so aden a karoma niyan," a tig o Allah.
2 “Pakaolada ngka so darpa a babalingan ka,
na biranga ngka on so barombarong ka;
di ngka teregen, pakatasa ngka so manga tali niyan,
na pakabagera ngka so manga lapek iyan.
3 Ka pekalaolad ka ko kawanan ago sa diwang;
ketangan o kebabadan reka so pagiingedan o manga nasiyon,
na mbeling siran ko kiyaawaan a manga siti iran.
4 “Di ka pekelek, ka di ka den keyaan.

Di ka pekedai sa inam, ka di ka den pekaitoon.
Kelipatan ka so kayaan ka gowani ko kangodai reka,
na di ngka den ketademan so kapakamboboko o ka ko kabibitowanen ka.
5 Ka so Mimbaal reka na aya ngka karoma,
So soti a Tohan o Israil i Pangangaon ka;
bebetowan sekaniyan sa Tohan o dalem a doniya.
6 Ka tiyalowan ka o Allah sa kapekakasoy ngka on
a datar o karoma a inimbelag ago mararata a ginawa niyan,
a datar o babay a miyapangaroma ko kangodai ron a baden inipilak," a tig o Tohan ka.
7 “Inimbelag aken seka sa di bo matey,
ogaid na sii ko kala aken i gagaw na pekakasowin aken seka.
8 Sii ko kiyamborngat o gani aken
na piyagna aken reka a paras aken sa sakotika bo,
ogaid na sii ko da a pitetamanan iyan a limo aken
na ipengalinggagaw aken seka,"
a tig o Allah a Pangangaon ka.
9 “Giya masa ini na lagid raken o manga gawii o Nok

ko kiyasepa aken sa di den kaperomanan so kapelapay o ig ko doniya;
ka imanto na inisepa aken a di aken seka den kerarangitan
aya pen o ba ko seka mbongeti peroman.
10 Ka apiya pen malinog ago matempag so manga palaw ago manga bobongan
na so da a ikeda iyan a limo aken na di reka nggamiten
aya pen o ba kebaroba so initopa ko reka a kalilintad,"
a tig o Allah a mala reka i gagaw.
So Pekatalingoma a Bantogan a Yarosalim
11 “Hey siti a peperasain, a pekesogat o manga barabarat ago da karinawi

na mbangonen aken peroman so manga onayan ka
sa manga ala i arga a manga ator.
12 Mbaalan aken so manga lantawa a ka a manga robi
ago so manga pintoan ka a pepamangerap a montiya,
ago so manga pangeleban ka a manga komara.
13 So langon o manga taw ngka na mapengendao o Allah,
na ketagoan siran sa mala a kalilintad.
14 Nggolalan ko kaontol na makapembeken ka;
pekawatan reka so kapangarasi na di ka den kelek;
di reka pekaobay so piyakalekelek.
15 O aden a nggobat reka na kena o ba aken galebek;
saden sa nggobat reka na pekasangkop reka.
16 “Ilaya ngka ka saken den i miyaden ko panday sa potaw

a pegiyop ko manga waga sii ko apoy
ago pesesel sa gomaan a domadait ko kapegosara on.
Na saken den i miyaden ko pelaslas sa kapeminasa niyan,
17 Ogaid na da a gomaan a inembaalan sa kapeminasaa reka a ba pekadaag;
na kesembag ka so oman i dila a pesendit reka ko dii kokoman.
Giyai i kawali o manga oripen o Allah,
na so kapepakabenara kiran na galebek aken,"
a tig o Allah
ISAYAS 55
So Kabantowi ko Kikaaawaw
Pitero o Allah a
"Hey langon kano a kikaaawaw, song kano sii ko manga ig!
Na sekano a da a manga pirak iyan,
song kano sii na pamamasaan kano ago kan!
Song kano sii na pamasa kano sa arak ago gatas
a da a pirak a imbayad on!
2 Ino niyo penggastowi sa pirak so kena a ba pangenengken
ago di niyo dii nggalebeken so di rekano pekasoat?
Pakinega ko niyo ago paratiyayaa, ka pekakan kano ko mapiya,
na kesoat so niyawa niyo o malembo a pangenengken.
3 “Pamakineg kano na song kano raken!

Pakinega ko niyo kaan maoyag so niyawa niyo!
Magembaal ako sa da a ikepos iyan a kapasadan mipantag rekano,
ka imbegay aken rekano so totomangked a manga rakmat a initopa ko ko Daod.
4 Biyaloy aken sekaniyan a saksi sii ko manga taw,
ago nakoda ago olowan ko manga taw.
5 Mataan a tewagen ka so manga nasiyon a di ngka katawan,
na so manga nasiyon a di reka matao na penggagaan reka somong
sabap ko Allah a Tohan ka, a so soti a Tohan o Israil,
ka kagiya bigan ka niyan sa bantogan."
6 Mbabanoga niyo so Allah sii ko kapeketoona on pen;

talowi niyo sii ko karani niyan pen.
7 Hey baradosa, na talikodi ngka so okitokit ka;
ago seka a marata a taw, na talikodi ngka so manga pamikiran ka
na sangor ka ko Allah a Tohan tano, ka ipengalinggagaw niyan,
na mitataralo so kaperirila iyan.
8 “Ka so manga pamikiran aken na kena a ba niyo pamikiran,

na so manga okitokit iyo na kena a ba ko okitokit,"
a tig o Allah.
9 “Ka lagid o kapakaoombaw o langit ko lopa
na lagid mambo o kapakaoombaw o okitokit aken ko manga okitokit iyo,
ago so kapakaoombaw o manga pamikiran aken ko manga pamikiran iyo.
10 “Lagid o oran ago so giyaw a pepanga oolog a poon sa langit a di on den kesoy
ka ba iran den pepakaigi so lopa kaan katoi sa manga pereperan
a pepekabegay sa oniin ko peseod, ago pangenengken ko pepekan on
11 Na lagid oto mambo so katero a pepekapoon ko ngari aken;
di ini raken kesoy a ba ilang,
ka ipenggolalan iyan baden so kabaya aken,
ago pakapengosoren iyan so kaangin a inisogo aken on.
12 “Pekaliyo kano a pekebabaya ago penggonanaon kano a lomilintad;

so manga palaw ago so manga bobongan na pemagidaida sa matanog ko maoonaan iyo,
na so langon a kayo sa kalasan na pendadaopay ko manga lima iran.
13 So kayo a goo i mageto a kisambi ko soroken a paket,
na so kayo a mirtil i mageto a kisambi ko manga kogo.
Kebaloy ai a da a ikebinasa niyan a toos
a ipepananadem ko Allah sa taman sa pakataman."
ISAYAS 56
So Kakesabet o manga Taw ko Ped a manga Nasiyon

"Panamari niyo so matito a kokoman ago paginontolan kano,
ka magaan den makatalingoma so kapenabet aken,
na di den ketey a kakepayag o kaontol aken.
2 Sayana a rarakmatan so taw a di sii dii nggolaola
a sesabenar sekaniyan on komapet,
a so dii selasela ko Gawii a Idedeke ago di pesogok ko kokoman on,
a ipelidas iyan a ginawa niyan sa kanggolaola sa apiya antonaa marata."
3 So mananangga a ineped iyan a ginawa niyan ko Allah

na o ba niyan teroa a
'Mataan a nggetasen ako o Allah ko manga pagtaw niyan.'
So mambo so kapon a taw na o ba niyan teroa a
'Lagid ako baden o gango a kayo.'
"So manga kapon a dii selasela ko manga Gawii aken a Idedeke
ago petomo ko ikasosoat aken,
ago komekepit sebenar ko kapasadan aken
5 Na mbegan ko siran sii ko Timplo aken ago sii ko soled o manga pangeleban aken
sa ipetedentadem ago da a kaposan iyan a Ingaran a di den kelipatan
a tomo a di so ngaran o aden a manga wata iyan a manga mama ago manga babay."
6 So mambo so manga rait a ineped iran a ginawa iran ko Allah

a pepanalagad siran on
ago pekebabaya ko Ingaran o Allah ago pepamanimba on,
a so langon a dii selasela ko Gawii a Idedeke a di pesogok ko kokoman on
ago komekepit sebenar ko kapasadan iyan,
na aya pitero kiran o Allah na
7 “Pagowiten aken sekano ko soti a palaw aken,
na mbegan ko sekano sa kapipiya a ginawa sii ko Walay a pepangangarapanan raken.
So manga ipesepaat iyo a pepanotongen ago so manga ipekorban iyo
na ketarima sii ko aparan aken;
ka so Timplo aken na mbetowan sa walay
a pepangangarapanan o kalangolangon a nasiyon."
8 So Allah a Lebi a Mamaapaar a miyanimo ko miyamangitaog a manga Israil
na pitero iyan a
"Aden pen a penimoon aken a pagepeden aken ko siran oto a miyapanimo den."
So Kaselaa o Allah ko manga Olowan o manga Israil
9 Pitero o Allah ko manga nasiyon a

"Song kano sii langon a lagid o manga iila a binatang;
song kano sii na sakaba niyo so manga pagtaw aken,
hey langon kano a manga binatang sa kalasan!
10 So langon a olowan o Israil na manga bota a da den a sowa iran.
Palaya siran lagid o manga aso a pengaw a di pekagebo;
pepamangiga siran a dii tetaginep a mababaya siran makatorog;
11 Mala siran i kakan a manga aso a di den penga oosog.
Manga tomatagikor siran a di pekasabot;
pekedegen iran langon so rek iran a manga lalan,
na pepanamaran o oman i isa on so kapekalaba niyan.
12'Na den,' a tig iran, 'komowa tano sa arak!
'Minom tano ago mamereg!
Mapita na kelagid bo o imanto,
o di na lebi pen a kapiya niyan!'"
ISAYAS 57
So Marata a Kapanakoto o Israil
Pepanga ada so manga oontol na da den a ba on tomatago sa ginawa;

pepamatay so manga pipiya a taw na da den a ba pekasabot
sa giyai i kapekelepasa ko manga oontol ko pekatalingoma a morala.
2 Siran oto a dii mamaginontolan na pemakasoled ko kalilintad;
pekadeke siran amay ka mamakaiga ko kapatay.
3 “Ogaid na sekano, a tig o Allah, "na song kano sii,

a manga wata o pangangatao,
sekano a mbawataan o sebo a babay a dii sondal!
4 Antawaa i pepagongatongaten iyo?
Antawaa i pepamoliatan iyo ago pelotadan sa dila?
Ba kena a manga wata kano o pepamanopak,
a so kiyababadan ko pepamamokeg?
5 Lagid o ba kano lalatogan ko kapesimbaa niyo ko manga barahala niyo
sii ko atag o oman i marimpoong a kayo;
pepanombaliin iyo so manga wata iyo a ipekorban sii ko manga baogan,
sii ko atag o mamakatotowas a lakongan.
6 So manga barahala a ndodoo ko manga titilak a ator sii ko baogan na aya niyo bagian;
siran bo i kawali niyo!
Oway, siran i piyangododan iyo sa manga sapaat a panginginomen
ago piyangowitan iyo sa manga soasoat a pangenengken.
Ba aya katao niyo ron na inikasoat aken anan langon?
7 “Tiyago iyo so manga igaan iyo sii ko manga poporo ago makaoombaw a manga
bobongan
a ron kano petekedeg sa di niyo dii kasebo,
a so di ngka dii kakorbani ko manga barahala niyo.
8 Tiyago iyo so ipepananadem kiran sii den ko likod o manga pintoan iyo.
Tiyalikodan ako niyo, ka siyawaan iyo so manga igaan iyo
na tomiyabid kano ron ago piyakaolad iyo den;
miyakipesadanowai kano sangkai a manga dii sebo,
ka kiyababayaan iyo so manga igaan iran,
na miyailay ngka so kalelekas iran.
9 Somiyong kano ko katohanan a Molik sa kapesimbaa niyo ron
a maawid kano sa lana,
na tanto kano a pikekamokamotan.
Piyakasong iyo sa mawatan so manga sogo iyo
a pemangiloba sa manga katohanan a kesimba niyo
apiya roo ko darpa o miyamatay.
10 Inidokaw rekano so langon a iniokit iyo ko di niyo dii kambanog sa ped a manga
katohanan,
ogaid na da niyo den teroa a 'Da den a arap on.'
Miyageda iyo a miyakambago kano sa bager,
na sabap san na da kano den kalobayi.
11 “Antawaa i inikawan iyo ago tanto a inikalek

a aya niyo raken minipamokeg ago inipakalipat,
a da ako niyo den tagoa sa ginawa?
Ba so miyatey den a karerenek aken i kiyasabapan ko di niyo raken kipekeleken?
12 Sewaan aken so manga galebek iyo a pipikiren iyo a manga oontol,
ogaid na da a kitabang iran reka.
13 Amay ka gomoraok kano sa tabang
na pakisabet kano baden ko piyanimo iyo a manga barahala!
Kibayomber siran langon o ndo;
so matag sengaw i pekabayog kiran sa mawatan!
Ogaid na saden sa pepagapas raken i makapekewali ko inged,
ago pekatangan ko soti a palaw aken.
14 Na peteroon ko a 'Bangona niyo, bangona niyo, tiyagara niyo so lalan!
Kowaa niyo ron so manga alang ko pagokitan o manga taw aken!' "
So Initopa o Allah a Katabang ago Kapamolong
15 Ka giyai i pitero o maporo ago mipapangkat a Tohan

a pekeoyaoyag sa taman sa pakataman, a aya Ingaran iyan na soti:
"Komakaden ako ko maporo ago soti a darpa,
ago sii rekaniyan mambo a dii teobat ago pepangalimbabaan
kaan aken pekeoyag so niyawa o dii mangalimbabaan
ago pekeoyag so poso o dii teobat.
16 Ka kena a ba taman sa pakataman so kapeselaa ko ko manga taw,
aya pen o ba tatap so kapekerarangiti raken,
ka o magiyoto na kelobayan so niyawa o manosiya sii ko hadapan aken,
a so makato o manga taw a inaden aken.
17 Inikararangit aken so kadostaan o kananapso iran,
na siniksa aken siran;
piyagna aken kiran so paras aken ko kapekerarangiti raken,
ogaid na initaros iran so kapepakasilay iran
a petomanen iran baden so baya a ginawa iran.
18 “Miyailay aken so manga okitokit iran, ogaid na mbolongan ko siran;

penggonanaon aken siran ago pekaasalen aken kiran so kapipiyia a ginawa
19 A pegadenen aken so podi sii ko manga modol o dii mboboko sii sa Israil.
Kalilintad, kalilintad i imbegay aken ko siran oto a ndodoo sa mawatan ago so sisii sa
marani,"
a tig o Allah, "na pemolongan ko siran."
20 Ogaid na so manga rarata na lagid o dii mbegel a ragat a di den pekadeke,
a ipendansal o manga begel on so lapot ago maresik.
21 “Da den a kalilintad o manga rarata," a tig o Tohan aken.
ISAYAS 58
So Tito a Kapowasa a Ikasosoat o Allah
"Lalis ka sa tanto a matanog!
Nggorongen ka so sowara ngka a lagid o bogiyong!
Payaga ngka ko manga taw aken so kasosopak iran,
a so manga dosa o manga mbawataan o Yakob!
2 Oman gawii na di siran dii sembayang
a datar o ba siran kateterangi makatokaw ko manga lalan aken,
ago datar o ba siran nasiyon a dii nggolaola sa ontol
a da iran den talikodi so manga sogoan o Tohan iran.
Pepangnin iran raken so matito a manga kokoman,
na datar o ba iran ipekebabaya so kapakarani ko Tohan.
3'Ino kami pepowasa,' a tig iran, 'a da ngka ilaya?
Ino ami pepangalimbabaanen a ginawa mi a da ngka inengkaa?'"
Na pitero kiran o Allah a

"Ilaya niyo man, ka sii ko gawii a di niyo dii kapowasa
na pepanamaran iyo so ipekesoat iyo,
ago peperomasain iyo so langon a gomagalebek iyo.
4 Aya bo a pekeondasan o di niyo dii kapowasa
na so di niyo dii kapepawala ago kambobono
a peperanegen o oman i isa so ped iyan sa marata a pamikiran.
So kapowasa a lagid o pesowaan iyo imanto
na di den kesabapan ko kapekenega ko ko manga pangni niyo sii sa kasorgaan.
5 Ba giyai so kapowasa a miyapili aken:
a so gawii a kipepangalimbabaanen o taw sa ginawa niyan
a baden pendosong so olo niyan a lagid o gi,
ago pegiga sekaniyan sii ko manga ombi a ndiditar sa sako?
Ba giyai i pembetowan iyo sa gawii a kapowasa a ikasosoat i Allah?
6 “So kapowasa a miyapili aken na giyai:

potola niyo so manga patong a di ontol,
ago bokai niyo so manga tali o manga kokoong;
mbalokasi niyo so pepemegesen,
ago ropeta niyo so oman i kokoong.
7 Pakimbagianen ka ko pekeor so pangenengken ka,
na pangowita ngka ko walay ngka so da a kebalingan iyan a manga miskin;
amay ka makailay ka sa matatalandiyang na begi ngka sa manga nditaren,
na di ngka den telikodan so manga tonganay ngka.
8 Amay ka magiyoto na pekaborantak so sindaw ngka a lagid o kakepita,
na magaan den peretok so kakebolongi reka;
pengonaan reka so kaontol ka,
na so bantogan o Allah i pelinding reka sa likod.
9 Samaoto na igira a pepananalo ka na pagamponen ka o Allah;
igira a penggoraok ka sa tabang na peteroon iyan a
'Katii ako bo!'
"O pekadaa ngka so kokoong a peroromasay
ago itepelek ka so kipepanonoroon ko manga ped ago so kapepamaganta,
10 Na o pakipembagianen ka so ipekeoyag ka ko kikaaaor,
ago pakaosogen ka so kikakokorangan
na giyoto a pesigay so sindaw ngka sii ko maliboteng;
na so kadedelemi reka na pembaloy a lagid o kaoto o alongan.
11 Penggonanaon ka lalayon o Allah,
na pekasemon ka niyan ko manga pipiya a nganin sii ko mariwara a manga darpa,
ago pekabageren iyan so manga tolan ka.
Kelagid ka o sapadan a pepakaigan piyapiya,
ago lagid o bowalan a di den keda so ig on.
12 Mbangonen peroman o manga taw ngka so manga siti a miyatey den a kiyabinasaa on,
na pekatindegen iran so andang a manga onayan;
kebetowan ka sa 'Pangongompiya ko Miyanga gegeba a Pangeleban'
ago 'Pangangasal ko manga Lalan a Kebalingan.'
So Balas ko Kapetomana ko Gawii a Idedeke
13 “O ipetelenggen ka a ginawa ngka ko kasogoka ko kokoman o Gawii a Idedeke

ago so kanggolaolaa ko ikasosoat ka ko soti a gawii aken,
na o mbetowi ngka so Gawii a Idedeke sa ipekebabaya,
ago pagadatan ka ngkai a soti a gawii o Allah
a di ngka on ipenggolalan so okitokit ka
ago di ngka penamaran so ikasosoat ka
aya pen o ba ngka on teroa so da a oked iyan a manga katero
14 Na amay ka magiyoto na so Allah i ikebabaya a ka,
na pakapegedaan ko seka sii ko manga poporo a darpa ko doniya,
ago pekikan aken reka so manga rakmat a initopa ko ko apo o ka a Yakob,"
ka miyatero o ngari o Allah.
ISAYAS 59
So Dosa o manga Taw o Allah
Mataan a so barokan o Allah na kena a ba mababa a di pekasabet

aya pen o ba bengel so tangila niyan a ba di pekaneg.
2 Ka so manga kamarataan iyo na aya niyo minipangimbelag ko Tohan iyo,
ago so manga dosa niyo i pepekapagna rekano ko paras iyan
kaan kano niyan di keneg.
3 Ka so manga lima niyo na kiyaresikan sa rogo,
ago so manga kemer iyo sa kamarataan;
so manga modol ka na dii tero sa kapamokeg
na penemotemod sa bibid so manga dila iyo.
4 Da den a ba pendimanda ko maontol a okit;
da den a ba niyan ipepangokom so tito a benar.
Sasanaan iyo baden so da a oked iyan a manga daowa,
na kapamokeg bo a di niyo dii teroon.
Ipekeogat iyo so kasamok,
na di niyo di imbawata so kamarataan!
5 Lagid o ba kano pelendem sa manga orak o manga nipay,
ago pepangembaal sa walay a ayog a lalawa.
Saden sa koman sangkai a orak na petay,
na amay ka maopak ai na meliyo ron so nipay!
6 So manga walay niyo a lalawa na di kepakay a nditaren;

di niyo kesapengan a ginawa niyo ko pegembaalan iyo.
Manga rarata so manga galebek iyo,
na kapanganiyaya so dii nggolaolaan o manga lima niyo.
7 Pepalalagoy kano sa kapenggolaola niyo sa marata,
ago dii nggagaan sa kapembonoa niyo ko da a sala iyan.
Tanto a manga rarata so manga pamikiran iyo;
apiya anda kano pesong na pepanganiyaya ago pepaminasa kano.
8 Di niyo katawan so okitokit a lomilintad
na da a kaontol ko di niyo dii nggolaolaan.
Binibid iyo so manga lalan iyo,
na da den a pekedeg sii a ba niyan katawi so kalilintad.
Piteobat o manga Taw so Dosa iran
9 Na pitero o manga taw a

"Sabap sii langon na mawatan rektano so kaontol,
na di rektano kisampay so katito.
Miinam tano sa sindaw, ogaid na aya bo a pekeilay tano na so maliboteng,
miinam tano sa kaliwanag, ogaid na sii tano bo pelalakaw ko datem.
10 Lagid tano o manga bota a pepangaper ko keleb,
di tano dii mangapap a datar o da a mata niyan.
Sii ko kaoto a alongan na pekisosong tano a lagid o sii ko kagagawii;
igira a pekiabay tano ko manga babager a taw na datar tano o miyamatay!
11 Palaya tano pengenger a lagid o manga aso,
ago pepamangoni tano a lagid o tanto a mboboko a manga marapatik.
Iinamen tano so kaontol, ogaid na da den;
ago so kakesabet, ogaid na mawatan ai rektano.
12 “Tanto a madakel a manga sala ami ko kapegilaya ngka on, ya Allah,

na di kami dii seksian o manga dosa mi.
Di ami mipembelag so manga sala ami,
na kikilalaan ami so manga kadostaan ami,
13 Ka siyopak ami seka, ya Allah, ago inipelaw ami;
tiyalikodan ami seka, hey Tohan ami.
Ipepangondoy ami so kapameges ago kapangelid,
na di kami dii tero sa manga kabokegan a ikapepeno o manga poso ami.
14 Sabap san na miyabogaw den so kaontol,
na tomitindeg sa mawatan so katito;
so tito a benar na minitarepang sii ko poblasiyon,
na di den pekasoled so kapetiis.
15 Oway, so tito a benar na da den a ba on ketoonan,
na saden sa pelidas ko kamarataan na pemarataan o manga ped."
Penabangan o Tohan so manga Taw niyan
Inilay ai o Allah na mikerata a ginawa niyan ko kaada o kaontol.

16 Miyailay niyan a da a sakataw bo a pegogop,
na miyamemesa sekaniyan sa da den a ba sii pekatalenggen;
kagiya ka maoto na giya den a barokan iyan i minggolalan ko kiyapanabet iyan,
na so kaontol iyan i minidaag iyan.
17 Ka iniperaben o Allah so kaontol ko rareb iyan,
ago piyagilmit iyan ko olo niyan so kapenabet;
na siyolot iyan so nditaren a kapanaop,
ago inikokos iyan so kasigi a datar o kimon.
18 Imbadal iyan ko manga ridoay niyan so rarangit
a mapapatot ko miyanggolaola iran;
seopan iyan so manga soranga iyan
apiya taman ko kibabaling ko manga wawatan a inged.
19 Sabap san na ipoon sa sedepan taman sa sebangan
na ikelek o manga taw so Ingaran o Allah ago so bantogan iyan;
ka pekatalingoma sekaniyan a lagid o miboboraya a bagiyaw
a ipendendeg o sengaw o Allah.
20 “So Pangangaon na pekatalingoma sa Siyon,

sii ko manga mbawataan o Yakob a petelikod ko manga dosa iran,"
a tig o Allah.
21 “Na makapantag raken, na giyai den i initopa ko kiran," a tig o Allah: "So Roh aken a
sisii reka, ago so manga katero aken a tiyago aken ko ngari i ka na di den pengimbelag ko
ngari i ka aya pen so manga ngari o manga wata a ka ago kebabadan reka ipoon imanto
ago taman sa pakataman," a tig o Allah.
ISAYAS 60
So Pekatalingoma a Bantogan a Yarosalim
Mbowat ka, sindaw ka, ka miyakatalingoma den so solo o ka,

na so bantogan o Allah na lomilindaw reka!
2 Ilaya ngka, ka so maliboteng na kikolob ko doniya,
ago so makapal a maliboteng na pekasapeng ko langon a taw,
ogaid na pelindaw reka so Allah,
na keilay so bantogan iyan a sisii reka.
3 Pemanong so manga nasiyon sii ko solo o ka,
ago so manga dato sii ko kasigay o kalilindawi reka.
4 “Kayaon ka so manga mata ngka na go ka pangilailay ko mbalabala;

petimo so langon a manga taw ngka a pepamanong reka!
So manga wata a ka a manga mama na pemakaoma a poon sa mawatan,
ago so manga wata a ka a babay a kisasakopon.
5 Sa masa oto na pekailay ka sii ago pekalangas;
pememesa so poso o ka ago kepeno a kapekebabaya.
So kakawasaan sa ragat na kebaloy a rek ka,
na mapengowit reka so patemotamokan o manga nasiyon.
6 Madakel a onta a pemanong reka;
a so manga ngongoda a onta a poon sa Midiyan ago sa Ipah;
so langon a manga mama sa Siba na pemakaoma reka
a kiaawid sa manga bolawan ago manga doka,
a pepakalangkapen iran so manga podi o Allah.
7 Mapengowit reka so langon a manga bilibili sa Kidar ago sa Nibayot a ipetelagad reka;
pemangisapaat siran ko aparan aken a ipesoasoat raken,
na pekibantog aken so kababantogan a Timplo aken.
8 “Antonaa ngkai a manga kapal a dii melayalayag a lagid o manga gabon,

a pepelalayog a lagid o manga marapatik a pekesoy ko manga salag iran?
9 Giyanan so manga kapal a pekapoon ko manga wawatan a inged
a pepanayaon iran so kapeseriat aken.
Pengonaan kiran so manga kapal sa Tarsis
a aawidan iran reka so manga taw ngka a poon sa mawatan,
a rakes o manga pirak ago bolawan iran
a ipeselasela ko Ingaran o Allah a Tohan ka
a so Soti a Tohan o Israil,
ka piyakibantog ka niyan.
10 “Mbangonen peroman o manga rait so manga pangeleban ka,

na penalagad reka so manga dato iran.
Apiya pen siniksa aken seka gowani ko rarangit aken
na ikelimo aken seka sabap ko gagaw aken.
11 Lalayon den kelekaan so manga gimowa a ka
a di den kelekeban ko gagawii daondaw
kaan mapangowit reka o manga dato so patemotamokan o manga nasiyon.
12 Ka so nasiyon o di na ndatoan a di reka petelagad na kedadas;
tarotop den a kakebinasaa sangkoto a manga nasiyon.
13 “So lebi a manga pipiya a kayo sa Libanon na mapengowit reka,

a so kayo a sipris, so goo ago so sidro
a ipegarta ko darpa o Timplo aken,
na pekibantog aken angkoto a darpa a pendapoan aken.
14 So manga mbawataan o siran oto a romiyasay reka
na pemanong reka a peperoroko;
so langon a misodi reka na pemakasodiyod ko danga o ai ngka,
na mbetowan ka iran sa 'Siti o Allah,'
a 'Giya Siyon a siti o Soti a Tohan o Israil.'
15 “Apiya pen kiyatalikodan ka ago inikagowad

a da a ba reka pegokit,
na mbalowin ko seka a kababantogan sa taman sa pakataman
ago ipekebabaya o manga taw ko langon a masa.
16 Pegeperen ka o manga nasiyon,
na siyapen ka o manga dato a lagid o ina a peritanen iyan so wata iyan,
na ketokawan ka a saken a so Allah i Pepanabet reka,
a so Pangangaon ka, a so Mala i Gees a Tohan o Yakob.
17 “Pagowitan ko seka sa bolawan a kena a ba tombaga,

ago pirak a kena a ba potaw;
pagowitan ko seka sa tombaga a kena a ba kayo,
ago so potaw a kena a ba ator.
Itoro aken so Kalilintad a aya ngka olowan,
ago so Kaontol a aya ngka kapatas.
18 Di den keneg peroman so katanganiyaya sii ko inged ka
aya pen o ba so kamoralaan o di na kabinasaan i ba maneg ko soled o manga temanaan
ka,
ka mbetowan ka so manga pangeleban ka sa 'Kapekesabet,'
ago so manga gimowa a ka sa 'Kapepodi.'
So Allah i Bantogan a Siyon
19 “Kena den a ba so alongan i solo o ka ko kadaondaw

aya pen o ba ka kalindawi o olan ko kagagawii,
ka so Allah i solo o ka sa taman sa pakataman,
ago so Tohan ka i bantogan ka.
20 Di den sedep so alongan ka
aya pen o ba pekaito so paras o olan ka,
ka so Allah i da a ikepos iyan a solo o ka,
na kepos so manga gawii ngka a kamboboko.
21 Samaoto na palaya den peginontolan so manga taw ngka,
na ketangan iran so inged sa taman sa pakataman.
Siran i lonaw a miyapamola aken,
ago so pasad o lima ko a kepayagan ko bantogan aken.
22 So lebi a maito a pamiliya sii reka na pembaloy a sanggibo,
na so maito on i kipantag na pembaloy a mala i gees a nasiyon.
Saken so Allah, na madilapet a kipenggolalanen aken
sii ko patot on a masa."
ISAYAS 61
So Mapiya a Totol makapantag ko Kakesabet
Sisii raken so Roh o Allah a Lebi a Mamaapaar

ka pinili ako niyan sa kapekalangkapa ko ko mapiya a totol sii ko manga miskin.
Siyogo ako niyan sa kambolongi aken ko miyanga roropet i poso,
ago so kipetewatawagen aken sii ko manga biyag ko kambalokasi kiran,
ago so kapekaliyowa ko kikakalaboson,
2 Ago so kapekitokawi aken sa giyai i ragon a kasebeta o Allah ko manga taw niyan
ago so gawii a kaseopi o Tohan tano ko manga ridoay iran.
Siyogo ako niyan sa kaperinawi ko pamikiran o siran oto a kikaboboko,
3 Ago so kambegi ko ko kimboboko sii sa Siyon
sa mataid a sangkad a isembi ko manga ombi,
ago so lana a kapipiya a ginawa a isembi ko dii kandiyagaw,
ago so nditaren a kapepodi a isembi ko rata a ginawa.
Kebetowan siran sa mabager i kapagiinontolan
a lagid sa kabager o manga kayo a miyapamola o Allah
a kepayagan ko bantogan iyan.
4 Mbangonen iran peroman so andang den a miyanga bibinasa,
na pekaasalen iran so manga darpa a miyatey den a miyapanas,
ago pagompiyaan iran so miyanga gegeba a manga siti
a miyalaslas den ko madakel a masa.
5 So manga mananangga i tegikor ko manga talon iyo a pangangayamen,

na so manga rait i pendado ko di niyo dii mbabasokan
ago pekibir ko manga asinda niyo a obas.
6 So sekano peman na kebetowan kano sa manga imam ko Allah,
na pagingaranan kano sa pepamanalagad ko Tohan tano.
Ipegeper rekano so pantiyari o manga nasiyon,
na ipengandag iyo so kakawasaan iran a miyakowa niyo.
7 Keda so kayaan iyo, ka isembi on so takep a bagian ko bantogan;
kepos so kapepakaitoa rekano,
ka kebabaya kano baden ko bagian niyo.
Kagiya ka maoto na dowa bagi a mapekewali niyo ko inged iyo,
na da a ikepos iyan a kapipiya a ginawa i kerek iyo.
8 “Ka saken, a so Allah, na mababaya ko matito a kokoman;

ipekegowad aken so kapamanekew ago so kapakasela.
Sabap ko kasasarigi raken na mbalasan ko so manga taw aken
ago magembaal ako sa da a ikepos iyan a kapasadan mipantag kiran.
9 So kebabadan kiran na kekilala sii ko manga nasiyon,
na ketokawan so manga mbawataan iran sii ko manga bangsa.
So langon a pekailay kiran na terimaan iran
a manga taw siran a rarakmatan o Allah."
10 Tanto aken a ipekebabaya so Allah;

ikapipiya a ginawa ko so Tohan aken.
Ka pinditaran ako niyan sa nditaren a kapanabet,
ago siyolotan ako niyan sa kimon a kaontol
a datar o pengaroma a sesalay sa manga obarobar
ago datar o pengaromaan a pipendaraan sa manga imbolawananan.
11 Ka lagid o bote a pepakaretiin iyan so oniin,
ago lagid o sapadan a pepakatoon iyan so miyapamola on
na lagid iyan mambo a pekaretoken o Allah a Lebi a Mamaapaar
so kaontol ago kapepodi ko kapegilaya on o langon a nasiyon.
ISAYAS 62
So Kakesabeta sa Siyon
Sabap ko kapekebabayai aken sa Siyon na di ako pepereremek;

sabap ko kapekebabayai aken sa Yarosalim na di ako den ndeke
taman sa somindaw so kiyapakapiya niyan a datar o sobo,
ago so kiyapakadaag iyan a datar o pekerab a barabad.
2 Hey Yarosalim, keilay o manga nasiyon so kiyapakapiya ngka;
so langon a dato na pekailay ko bantogan ka,
na kebetowan ka ko bago a ngaran,
a so ngaran a imbeto reka o ngari o Allah.
3 Kelagid ka o mataid a sangkad sii sa tangan o Allah,
a so tobaw a dato sii sa lima o Tohan ka.
4 Di ka den kebetowan sa 'Kiyatalikodan,'
aya pen o ba kabetowi so inged ka sa 'Miyapanas.'
Ka kebetowan ka sa 'Ipekebabaya o Allah,'
ago so inged ka sa 'Miyapangaroma;'
ka ikasosoat ka o Allah,
na mapengaroma so inged ka.
5 Datar o kangodaan a mama a pengaroma sa raga
na so Tohan a aya reka Mimbaal na pengaroma reka;
na datar o mangoda a ipekebabaya iyan so pengaromaan iyan
na ikebabaya ka mambo o Tohan ka.
6 Tiyagoan aken sa manga bantabantay so manga pangeleban ka, hey Yarosalim,

na di siran den pepereremek ko gagawii daondaw.
Sekano a pepananalo ko Allah a pepakitademan iyo ron so initopa niyan
na di kano den rerenek
7 A di niyo sekaniyan den pekadekea taman sa mapakambeken iyan a Yarosalim,
ago mabaloy niyan den a siti a pepodin o dalem a doniya!
8 Pisepaan o Allah so kawanan a lima niyan

ago so mala i kapaar a barokan iyan a tig iyan a
"Di den kapeparomanan o ba aken ibegay so pereperan iyo
a makan o manga ridoay niyo,
na di den pekainom so manga rait sa bago a arak a pinggalebek iyo;
9 Ka siran oto a peraragon ko pereperan i pekakan on,
na podin iran so Allah,
na so pererebas sa manga obas i pekainom ko arak ai
sii ko lamalama o soti a darpa aken."
10 Liyo kano, okit kano ko manga gimowa!

Tiyagara niyo so lalan a pagokitan o manga taw!
Mbaalen iyo, mbaalen iyo sa maolad a karsada,
na kowai niyo sa manga ator!
Pakatindega niyo so signal kaan katokawi o manga nasiyon
11 A initewatawag o Allah sii ko pirowarowangan o doniya
a tig iyan a "Teroa niyo ko manga taw sa Siyon a
'Ilaya niyo, ka pekaoma so Allah a sebet rekano!
Ilaya niyo, ka so imbalas iyan na sisii rekaniyan,
ago so imbadal iyan na makaoonot on.'"
12 Kebetowan siran sa 'Soti a manga Taw,'
ago 'Miyanga aaon o Allah.'
Na seka, Yarosalim, na mbetowan sa 'Dii Mbanogen,'
ago 'Siti a da Talikodi.'
ISAYAS 63
So Gawii a Kapenaop ago Kapenabet o Allah
Antawaa ngkai a pepekaoma a poon sa siti a Bosrah sii sa Idomiya

a miyatina sa mariga so nditaren iyan?
Antawaa ngkai a ndiditar sa mataragandang,
a pelalakaw ko kala iyan i bager?
Giyai so Allah a mala i gees sa kapenabet

a ipetewatawag iyan so kapakadaag iyan.
2 “Ino mariga so nditaren ka,

a lagid sa kariga o nditaren o pegegik sa obas?"
3 Tig o Allah a "Mitarambisa ako megik ko manga nasiyon a lagid o manga obas,
na da den a miyogop raken.
Inegik aken siran ko gani aken,
ago liyomeg aken sii ko rarangit aken;
na minitarsik ko nditaren aken so manga rogo iran
a minidaket ko langon o kimon aken.
4 Ka piyasad aken sa ginawa ko a miyakatalingoma den so gawii
a kaseopi aken ko manga ridoay o manga taw aken,
a so ragon a kapengaona ko ko manga taw aken.
5 Miyangilailay ako, ogaid na da den a ba pekaogop,
na miyamemesa ko sa da den a ba raken makapemayandeg.
Sabap san na giya den a lima ko i miyakadaag,
na so rarangit aken i miyakapamayandeg raken.
6 Liyagosak aken so manga nasiyon sii ko gani aken,
na piyakabereg aken siran sii ko rarangit aken,
na inodod aken ko lopa so rogo iran."
So Limo o Allah ko Israil
7 Pemagosain aken so manga ala i limo a pinggolaola o Allah

a aya on pekipodi,
a so langon o kamapiyaan a inirakmat iyan rektano a manga mbawataan o Israil
sabap ko kapedi iyan ago da a pitetamanan iyan a gagaw niyan.
8 Ka pitero iyan a "Mataan a manga taw aken siran,
a so manga wata a kena a ba mamakatipo."
Na giyoto a mimbaloy sekaniyan a pepanabet kiran
9 Ko kalangolangon a karomasayan iran,
ka iaawid mambo a akal iyan.
So Malaikat a pepangadap ko Allah i somiyabet kiran;
sabap ko gagaw niyan ago kapedi na inaon iyan siran,
a pesekopon iyan siran ago pegawidan ipoon ko miyanga oona a gawii.
10 Apiya pen oto na somiyopak siran
ago piyakakerata iran a ginawa o Soti a Roh iyan.
Kagiya ka maoto na mimbaloy sekaniyan a ridoay iran,
na giya ginawa niyan i miyakitidawa kiran.
11 Mandiyadi na kiyatademan o manga taw niyan so miyanga iipos a gawii,

a so manga gawii o Mosa a oripen iyan,
na inigoraok iran a "Anda den so Allah a miyakagakap ko manga apo tano ko ragat
a rakes o Mosa a tomatagikor kiran?
Anda so tomiyago kiran ko Soti a Roh iyan,
12 A piyakaonot iyan sii ko kawanan o Mosa
so kababantogan a barokan iyan
a aya miyakaopak ko ragat ko hadapan iran
a minibantog iyan ai ko ginawa niyan sa taman sa pakataman,
13 A sekaniyan a miyagak kiran sii ko kiyaokit iran ko kalodan
kaan lagid o koda a pelalakaw ko madaya a kalopaan
na da siran misosong?"
14 Lagid o manga sapi a petondagay ko balintad

na piyakadeke o Roh o Allah so manga pagtaw niyan.
Giyanan i kiyanggonanaowa ngka kiran, ya Allah,
a minibantog ka ko Ingaran ka.
Kapamangni sa Kapedi ago Tabang
15 Tolong ka san sa kasorgaan na go ka pangilailay,

san ko soti ago kababantogan a kakadenan ka!
Anda den so kasigi ngka ago gees?
So gagaw ngka ago limo na mapopokas rekami!
16 Ogaid na seka i ama ami;
apiya pen o ba kami baden kekeloa o manga apo ami a Ibrahim ago Yakob
na seka, ya Allah, i ama ami;
so 'Pangangaon ami ipoon den ko pagampaganay' na aya ngka ingaran.
17 Ya Allah, ino ngka rekami pekiawai so manga lalan ka?
Ino ngka pekategasa so manga poso ami a minigenek ko kipekeleken ami reka?
Kasoy ka sabap rekami a manga oripen ka,
a so manga mbatabataa a aya ngka kawali!
18 Da bo matey a katatangana o manga taw ngka ko soti a darpa a ka;
so manga ridoay ami na liyagosak iran den.
19 Miyadatar kami reka o manga taw a da ngka den ndatoi,
a da den kabetowi ko Ingaran ka.
ISAYAS 64
O ba ngka bo kisia so langit na manog ka
a milinog ko manga palaw sii ko kamamasaan ka!
2 Lagid o kapetotonga o apoy ko manga otan,
ago so kapepakandidia niyan ko ig
na panog ka sa kapakitokawi ngka ko gees ka ko manga ridoay ngka
kaan pananabada so manga nasiyon ko hadapan ka!
3 Igira a miyanog ka gowani sa kanggolaola ngka sa manga piyakememesa a di ami
mapipikir
na pelinogen so manga palaw ko kamamasaan ka.
4 Ipoon den sa poonan na da den a ba miyakaneg o di na ba miyakasarino,
aya pen o ba miyakailay ko apiya antonaa Tohan a makaliyoliyo reka
a dii nggalebek ko kamapiyaan o siran oto a penayaw ron.
5 Pegogopan ka so siran oto a mababaya maginontolan
a tatanodan iran so manga okitokit ka.
Kiyararangitan ka, ka miyakandosa kami,
ogaid na initaros ami baden so di ami dii kandosa.
Andamanaya den i kakesabeta rekami?
6 Langon kami miyadatar o taw a kiyadaleman sa hadas,
na so langon o manga oontol a galebek ami
na lagid bo o maresik a manga togak;
palaya kami pekelanes a lagid o raon,
na pepekabayog rekami so manga dosa mi a lagid o ndo.
7 Da den a petelo ko Ingaran ka,
aya pen o ba aden a mananamar sa kakakapeti niyan reka;
ka piyagna a ka a paras ka sii rekami,
ago piyalad kami ngka ko kapaar o manga kadostaan ami.
8 Apiya pen oto, ya Allah, na seka i ama ami.

Sekami i bote, na seka so pangengembaal sa koden;
palaya kami den pasad o manga lima ngka.
9 Di ka tanto a pekerarangiti, ya Allah,
aya pen o ba ngka pepananademi so manga dosa mi sa taman sa pakataman.
Kapedipedi ka bo na kalimoon kami ngka,
ka langon kami manga taw ngka.
10 So manga soti a siti ngka na miyabaloy a datar o disirto;
apiya giya Siyon na disirto, na kiyaawasan den a Yarosalim.
11 So soti ago mapiya i paras a Timplo ami a ron ka pepodiya o manga apo ami
na miyatotong a apoy,
na miyanga bibinasa so langon a darpa a kiyababayaan ami.
12 Ba ngka di den tegoa sa ginawa ngkai a manga kamoralaan, ya Allah?
Ba ka pagenda pen sa kapagogopi rekami?
Ba ka baden rerenek a tanto kami ngka a pendanegen?
ISAYAS 65
So Kandanega o Allah ko Pepamanopak
Tig o Allah a "Piyayag aken a ginawa ko ko manga taw a kena a ba raken pepangingise;
miyatoon ako o manga taw a kena a ba raken dii mbabanog.
Sii ko nasiyon a kena a ba petelo ko Ingaran aken
na pitero aken on a 'Katii ako bo, katii ako bo.'
2 Ogaid na so manga pagtaw aken, na pekewaan aken siran a lima ko mababas a alongan;
manga tetegas siran i olo a manga taw
a sii pelalakaw ko manga lalan a kena a ba mapiya
a di iran dii nggolaolaan so rek iran a pamikiran.
3 Lalayon ako iran dii pakakerangiten a da a manga kaya iran,
a pesepaatan iran so manga barahala ko manga sapadan
ago pepamanotongan sa doka sii ko manga aparan a ator.
4 Igira a miyagagawii na pesong siran ko manga liyang ago manga kobor
sa kapemangangayi ran ko manga arowak;
pekan siran ko sapo o manga baboy,
ago peginom sa sawaw a inembaalan a karam a sapo.
5 Na di iran dii teroon ko manga ped a 'Pakawatan ka!
Di ka raken pegobay, ka tanto ako a soti a di seka!'
Ngkanan a manga taw na lagid o bel sii ko ngirong aken,
ago lagid o apoy a pekedeg ko mababasa alongan.
6 “Ilaya niyo, ka piyasad aken sa ginawa ko a kena a ba ako lalayon rerenek,

ka mbadalan aken siran sa tarotop.
Imbadal aken sii ko manga bobon iran
7 So manga dosa iran a ndatar so dosa o manga apo iran,"
a tig o Allah,
"ka tomiyotong siran sa doka roo ko manga palaw,
ago piyagitowito ako iran sii ko manga bobongan.
Sabap san na imbadal aken sii ko bobon iran
so mapapatot ko miyanga iipos a galebek iran.
8 “Ogaid na kena a ba langon siran i mbinasaan aken,"

a tig o Allah,
"ka igira aden pen a manga pipiya a obas a sisii ko sapingi a manga rarata on,
na dii teroon o manga taw a 'Di ngka mbinasaa, ka aden pen a mapiya on,'
na lagid oto mambo a di aken pelenganen minasa so manga taw aken,
ka aden pen a sisii kiran a manga totoo a oripen aken.
9 Na sii ko manga Israil a maaped ko mbatabataa a Yodah
na pekagemaon ko ron so moriyataw a pekatangan ko manga palaw aken;
so piyamili aken a manga taw i makapekewali sii,
na roo pekabaling so manga oripen aken.
10 So Kapantaran a Saron na kebaloy a pepanateban o manga talon iran,
na giya Balintad a Akor na kebaloy a darpa a pendekean o manga pangangayamen iran,
ka kamapiyaan ai o manga taw aken a pepangongonotan raken.
11 “Ogaid na so sekano ron peman a petelikod ko Allah,

a pepamakalipat ko soti a palaw aken
ago pepamanapaat sa manga pangenengken ago panginginomen
ko manga katohanan a pepekabegay kon sa 'Ontong' ago 'Mapiya a Okoran'
12 Na pagokoren aken sekano ko kambonoa rekano a pedang,
na palaya kano den pekadosong a penombaliin;
ka kagiya igira a miyananalo ako rekano na da kano sembag,
na igira a mitero ako na da kano pamakineg.
Minggolaola kano baden sa marata ko kapegilaya ko ron,
na tiyomo iyo so di raken pekasoat."
13 Kagiya ka maoto na giyai i pitero o Allah a Lebi a Mamaapaar:
"So manga oripen aken na pekakan, ogaid na keoran kano;
pekainom so manga oripen aken, na ba kano den kewaw;
kebabaya so manga oripen aken, ogaid na pakapekeyaan kano.
14 Pegidaida so manga oripen aken ko kapipiya a ginawa iran,
ogaid na nggoraok kano ko kararata a ginawa niyo,
ago pendidiyagaw kano ko kabibinasa o niyawa niyo.
15 So ngaran iyo na keosar a paninta o piyamili aken a manga taw;
pemonoon kano o Allah a Lebi a Mamaapaar,
ogaid na so manga oripen iyan na mbegan iyan sa salakaw a ngaran.
16 Apiya antawaa sii ko inged i pemangni sa rakmat
na aya pemangniyan iyan na so kasasarigan a Tohan,
na apiya antawaa sii ko inged i pesepa
na aya pesepaan iyan na so Ingaran o kasasarigan a Tohan;
ka kelipatan so miyaipos a manga karomasayan,
ago kitapok ai ko manga mata ko."
Bago a manga Langit ago Bago a Doniya
17 Pitero o Allah a
"Ilaya niyo, ka magaden ako sa bago a manga langit ago bago a doniya,
na di den pepenanademan so miyanga oona a nganin
aya pen o ba matago ko pamikiran.
18 Pakapipiya kano baden ago kababaya sa taman sa pakataman sabap ko pegadenen ko,
ka pagadenen ko a Yarosalim a ikebabaya,
na penga sosonor so manga taw niyan.
19 Ikebabaya aken a Yarosalim
na ipekapiya a ginawa ko so manga pagtaw aken;
so oni o kapesegad ago kapenggoraok sa tabang
na di on den keneg.
20 “Di den kaperomanan a aden a ikaririga on

a pekapira bo gawii a kapekeoyagoyag iyan,
o di na so matoa taw ron a di ketarotopan sa omor;
ka so petay a miyakapagidad sa magatos ragon
na kibilang a matag kangodaan;
na saden sa di pekaraot ko magatos
na pemikiren a misisinta.
21 Pembabalay siran sa manga walay na pekabaling siran on;
pemamola siran sa manga obas na pekakan siran ko onga niyan.
22 Di siran den pembabalay sa walay a salakaw a pekabaling on,
aya pen o ba siran pemamomolaan na salakaw a pekakan sii.
Ka lagid sa katey o manga gawii o kayo
na lagid oto mambo so manga gawii o manga pagtaw aken;
matey a kapenggonai o piyamili aken a manga taw
so pinggalebek o manga lima iran.
23 Kena a ba baden keilang so kapendokaw iran nggalebek
aya pen o ba iran imbawata so ookoren ko morala,
ka manga taw siran a kerakmatan o Allah,
siran ago so manga kebabadan kiran.
24 Sii ko di iran raken pen katelowi na sembag ako;
sii pen ko di iran dii katero na keneg aken.
25 So tingkalong ago so nati a bilibili na pegatoang koman,
na so arimaw na ken sa ragami a datar o sapi,
ogaid na so bayanek i pangenengken o nipay.
Di siran den pekasakit aya pen o ba pekabinasa
sii ko dalem o soti a palaw aken," a tig o Allah.
ISAYAS 66
So Tito ago so di Benar a Kasimba

"So langit i korsi aken, na so doniya i dadapoan ko.
Antonaa walay i mapembalay niyo raken?
Antonaa darpa i kedekean aken?
2 Ka langon ai pasad o manga lima ko
ko kiyaadena ko ko langon taman," a tig o Allah
"Ogaid na aya ikesoat aken na so taw a dii mangalimbabaan
ago dii teobat, ago petebaden sabap ko katero aken.
3 “Ogaid na ndanegen aken so manga taw a piyamili iran so rek iran a okitokit
ago ikasosoat iran so maresik a pesowaan iran;
piyakasisingay raken langon angkai a manga taw,
ka sii ko kipembilangen aken kiran na so dii korban sa sapi
na lagid bo o miyono sa taw,
ago so pesepaat sa bilibili
na lagid bo o lomipo ko lig a aso,
ago so dii soasoat sa pereperan
na lagid bo o pesepaat sa rogo o baboy,
ago so petotong sa doka a ipepananadem
na lagid bo o pesimba sa barahala.
4 Kagiya ka maoto na piliin aken mambo so masopiit a ikidia ko kiran,
na itena aken kiran so morala a ipekelek iran.
Ka igira a miyananalo ako na da den a ba kiran somimbag,
na igira a mitero ako na da den a ba miyamakineg.
Pinggolaola iran baden so marata ko kapegilaya ko ron,
na tiyomo iran so da aken kasoaten."
So Kapakadayaa sa Yarosalim
5 Pakinega niyo so katero o Allah, hey sekano a petebaden sii ko katero iyan:
"So manga pagari niyo a pekegowad rekano
a inibowang kano iran sabap ko kapagiiklas iyo raken
na piyagongatongat kano iran a tig iran a
'Mabantog so Allah kaan ami mailay so kapekebabaya iyo!';
ogaid na siran i pakapekeyaan."
6 Pamakinega niyo! Aden a kabobosigaw sii ko siti!

Aden a pakabowing sii ko Timplo!
Giyanan so oni o Allah
a pembadalan iyan so manga ridoay niyan ko mapapatot kiran!
7 “Sii ko da pen kabalilita ko babay na miyakambawata den;

sii ko da on pen kapakatalingoma o masakit
na miyakalotad den sa bago a mama.
8 Ba aden a miyakaneg sa datar anan a miyanggolaola?
Ba aden a miyakailay sa lagid oto?
Ba kepakay a kipembawataan ko inged sii ko salongan,
o di na so kipelotaden ko nasiyon ko sakotika?
Ogaid na so den so kiyabalilita sa Siyon
na miyakambawata den sa manga wata iyan.
9 Ba aken mbegan so wakto a kapembawata
a di aken pekaliyon so wata?" a tig o Allah.
"Ba aken pelekebi so tiyan sii ko kapekagemaon aken ko wata?" a tig o Tohan iyo.
10 “Pangeped kano ko kapekebabaya a Yarosalim,

na pakapipiya kano sa sabap on, hey langon kano a pekebabaya on!
Kababaya kano sa mala a ped iyan, sekano langon a di ron dii mboko!
11 Ka keritan kano ago keosog sii ko matayaan a rareb iyan;
tanto kano a pekainom ago kepiyapiyaan ko kala o pepekapoon on."

"Mbembaren aken rekaniyan so kapiya i bobolos a lagid o lawasaig,
na pegondas on so kakawasaan o manga nasiyon
a lagid o dii mbagiyaw a lawasaig;
keritan kano ago kesakopo o barokan iyan ago keaben sii ko bobon iyan.
13 Lagid o wata a dii piyapiyaan o ina iyan
a pekapiyaan aken mambo a ginawa niyo,
na pepiyapiyaan kano sii sa Yarosalim."
14 Amay ka mailay niyo ai na kebabaya so poso iyo,

na pekarimpoong so manga lawas iyo a lagid o otan;
na kerinayag a so lima o Allah na pegogop ko manga oripen aken,
ogaid na pekitana so rarangit iyan ko manga ridoay niyan.
15 Ka pekaoma so Allah a oonotan o apoy,
a rakes o manga tanggasana iyan a lagid o sobosobo;
ka itena iyan so pesokeyaw a rarangit iyan
ago so kapembonget iyan a sasartaan o pekedeg a apoy.
16 Ka nggolalan ko apoy ago so pedang iyan
na pagokasan o Allah sa kokoman so langon a manosiya,
na madakel a penga bobono o Allah.
17 “Siran oto a pelompiyowan iran ago pesotin a ginawa iran sa kapekasoled iran ko
manga sapadan sa kasimbaa ko manga barahala on, a so siran oto a pepangangan sa sapo
a baboy ago manga riya ago ped pen a piyakasisingay, na palaya siran den penga iiped," a
tig o Allah.
18 “Katawan aken so manga galebek iran ago pamikiran, na pekatalingoma so oras a

katimoa ko ko manga taw ko langon a nasiyon ago bangsa, na pekaoma siran ago keilay
iran so bantogan aken
19 Ka sii ako kiran magembaal sa mala i kabarakat a nanao.
Na so ped ko miyamakapagoyag on na sogoon ko ko manga nasiyon, sii sa Ispaniya, sa
Libiya ago giya Lidiya (a maririnayag a manga pamamana on), sii sa Tobal ago giya
Grisiya, ago roo ko manga wawatan a inged sa kilid a ragat a da den mamakaneg ko
karirinayag aken aya pen o ba mamakailay ko bantogan aken, na pemakalangkapen iran
so bantogan aken sii ko manga nasiyon.
20 Na poon ko langon a nasiyon na pagowiten iran so langon a manga pagari niyo sii ko
soti a palaw aken sa Yarosalim a aya iran den ipesoasoat ko Allah, a meeda siran sa
manga koda, manga karo, manga toyoka, manga mola ago manga onta," a tig o Allah.
"Pagowiten iran siran a lagid igira a pegowiten o manga Israil sii ko soti a pananagoay so
manga pereperan iran a ipesepaat ko Allah sii ko Timplo niyan.
21 Na ipetoro aken pen so ped kiran a mabaloy a manga imam ago manga katib a manga
Libitiyo," a tig o Allah.
22 “Lagid o ketatap ko hadapan aken so bago a manga langit ago bago a doniya a
pagembaalan aken na lagid iyan mambo a ketatap so ngaran ka ago so manga kebabadan
reka.
23 Ipoon ko isa a bago a kasebang o olan taman ko ped, ago ipoon ko isa a Gawii a
Idedeke taman ko ped na so manga taw ko langon a nasiyon na pemakaoma sa kasimbaa
iran raken," a tig o Allah. "Na peliliyo siran ago keilay iran so manga bangkay o siran oto
a rominido raken; ka di pematay so manga oled iran aya pen o ba mapareng so manga
apoy iran, na kengingiri siran ko langon o manosiya."
YARAMIYAS
YARAMIYAS 1
Giyai so rikord o manga katero i Yaramiyas a wata i Hilkiyas. Isa sekaniyan ko manga
imam sa Anatot sii ko inged a Baniyamin.
2 Minisampay rekaniyan so katero o Allah sii ko ikasapolo ago telo ragon ko kandadato i
Yosiyas a wata i Amon a dato sa Yodah.
3 Minisampay rekaniyan peman sii ko kandadato i Yahoyakim a wata i Yosiyas, na
mitataros den ai taman ko ikasapolo ago isa ragon ko kandadato i Sidikiyas a wata i
Yosiyas sii sa Yodah. Na sii ko ikalima olan sangkoto a ragon na miyanga bibiyag ago
miyamangitaog so manga taw sa Yarosalim.
So Kiyatawaga ki Yaramiyas
4 Pitero raken o Allah a
5 “Sii ko da ko reka pen kalimbaga ko tiyan o ina a ka, na pinili aken seka.
Da ka pen mbawataan, na inisenggay aken seka a rek aken.
na initoro aken seka a nabi a makapengosiyat ko manga nasiyon."
6 “Ya Allah a Kadnan ko," a tig aken, "di ako matao tero, ka matag ako kangodaan!"
7 Ogaid na pitero raken o Allah a "Di ngka dii teroa a matag ka kangodaan, ka pekasong
ka ko apiya antawaa i sogoan ko reka sa kapeteroa ngka kiran ko apiya antonaa a isogo
aken reka.
8 Di ngka siran keleken, ka mipageepeda ako ngka a pelinding reka, a tig o Allah!"
9 Na biter o Allah a barokan iyan na siko iyan so ngari aken, na pitero iyan raken a "Na,
tiyago aken den so manga katero aken sii ko modol ka.
10 Tatanodi ngka a imanto a gawii na mbegan ko seka sa kapaar sa kapekalangkapa ngka
ko manga nasiyon ago manga ndatoan a pemadoten siran ago penggegebaan, peminasaan
siran ago pelaslasen a pemangonen ago pakapembekenen peroman."
So Dowa a Pangingilain i Yaramiyas
11 Na pitero raken o Allah a "Antonaa i pekeilay ngka, Yaramiyas?"

"So sapak a kayo a almondo," a tig aken.
12 Pitero raken o Allah a "Ontol so kiyailaya ngka on. Aya maana ini na pegipaten ko so
katero aken kaan matangked so kakitoman iyan."
13 Na iniise raken peroman o Allah a "Antonaa i pekeilay ngka?"

Tig aken a "Pekeilay aken so koden a pendidi sii sa pagotaraan a makikiling sa tampar
rekami."
14 Na pitero raken o Allah a "Aya maana ini na poon sa pagotaraan na aden a kamoralaan
a keodod ko langon a kibabaling ko inged.
15 Ka magaan aken den tawagen so langon a taw ko manga ndatoan sa pagotaraan sa
kagobata iran sa Yarosalim. Pekaoma siran na tegoon o manga dato iran so manga korsi
iran sii ko danga o manga gimowa iyan. Na nggobaten iran so langon o manga pangele-
ban ko melilibeta on, na nggobaten iran pen so langon o manga inged sa Yodah.
16 Sangkai a okit na ndanegen ko so manga pagtaw aken sabap ko kamarataan iran. Ka
tiyalikodan ako iran ago somiyapaat siran sa manga soasoat ko salakaw a manga tohan
ago sominimba sa manga barahala a pimbaalan o lima iran.
17 “Na tiyagar ka, Yaramiyas! Song ka sangkai a manga taw na teroa ngka kiran so apiya
antonaa i isogo aken reka. Di ngka siran keleken, ka o ba ko seka baden pakalekan ko
hadapan iran.
18 Pamakineg ka, Yaramiyas! Ka imanto na biyaloy aken seka a lagid sa kabager o
kokotaan a siti, ago polaos a potaw, ago pangeleban a tombaga kaan ka kaatowi so langon
a taw ko dalem a inged taman ko manga dato sa Yodah, ago so manga olowan, ago so
manga imam.
19 Makiperidoay siran reka ogaid na di ka iran kedaag, ka mipageepeda ako ngka na
penabangan ko seka," a tig o Allah.
YARAMIYAS 2
Kiyababayaan o Allah so Israil
Na pitero raken o Allah a

2 “Ika roo den na pakalangkapa ngka roo sa Yarosalim a
"Peketademan aken so kambabayorantang ka raken isako kangodaan ka pen,

ago so kapekebabayai ngka raken ko paganay ta pen makatepi
sii ko kapegonoti ngka raken ko mitataog a kaden
ko lopa a da kasaodi.
3 Hey Israil, sa masa oto na soti ka a rek aken,
a lagid o keto ko manga pereperan a inisenggay raken;
diyaneg aken so langon a miyakasakit reka,
na riyaot siran a balaola."
a tig o Allah
So Dosa o manga Apo o Israil
4 Pamakinega niyo so manga katero o Allah, hey sekano a manga mbawataan o Yakob, a
so langon o manga mbatabataa sa Israil!
"Antonaa i daway a miyatoon raken o manga apo iyo

a iniawa iran raken?
Miyangongonotan siran sa da a oked iyan a manga barahala,
na miyabaloy siran mambo a da a oked iyan.
6 Da iran isean a 'Anda so Allah
a miyakaliyo rektano roo sa Misir
ago miyakaagak rektano kometas ko mitataog a kaden
a ron so manga disirto ago manga landeng,
a so komekegaw a kalopaan a tanto a maliboteng
a da a taw a ba on melalag o di na keden?'
7 Inowit aken sekano ko oodaren a lopa
kaan iyo ron ikababaya so manga pangenengken on
ago so ped a manga kamapiyaan.
Ogaid na sii ko kiyasoledi niyo ron na piseboan iyo so lopa aken
na biyaloy niyo a piyakasisingay so inged a inibegay aken rekano a kawali niyo.
8 So manga imam na da iran isean a 'Anda so Allah?'
So manga alim ko Kitab na da ako iran tagoa sa ginawa,
na miyongkir raken so manga olowan.
So manga nabi na miyamangalamat sii ko ingaran o Baal,
na miyangongonotan siran ko manga barahala a di kiran pekatabang.
So Kiyataksila o Allah ko manga Pagtaw niyan
9 “Kagiya ka maoto na teksilen ko peroman so manga pagtaw aken,"

a tig o Allah,
"na teksilen ko mambo so manga wata iran ago manga apo.
10 Song kano sa sedepan ko polo a Sipros na go niyo ilaya,
na sogo ka sa makasong roo sa sebangan sa Kidar kaan iyan mapariksa piyapiya
o aden a miyanggolaola a lagid ai:
11 Ba aden a nasiyon a siyambian iran so manga tohan iran,
apiya pen kena a ba oto tito a tohan?
Ogaid na so manga pagtaw aken na pisembi iran so Kababantogan a Tohan iran
ko manga katohanan a di kiran den pekatabang!
12 Pamemesa kano sii, hey manga langit,
na tebeker kano a tanto a mabebengang."
a tig o Allah.
13 “Ka kagiya dowa a kamarataan a miyanggolaola o manga pagtaw aken:
Tiyalikodan ako iran a so bowalan a pepangoyag a ig,
na ba siran den komiyalot sa rek iran a manga paridi,
a so mabebensi a manga paridi a di ketatapan sa ig.
So Kiyaimponan ko manga Dosa o manga Israil
14 “Kena man a ba oripen so Israil; kena a ba oripen ko kinimbawataan on.

Na inoto sekaniyan dii tebani o manga ridoay niyan?
15 Ginggeran iran sekaniyan a lagid o manga arimaw;
inikorot iran so manga lago iran sa kapakataban.
Liyaslas iran so inged iyan,
na miyanga tototong so manga siti niyan a kiyaawaan den.
16 So pen so manga taw a poon sa Mimpis ago Tapanis
na inopawan iran so poro o olo ngka, hey Israil.
17 Ba di ini minisabap ko manga miyanggolaola ngka
ko kiyatalikodi ngka ko Allah a Tohan ka,
apiya sii ko di niyan reka dii kanggonanaowa ko lalan iyan?
18 Antonaa i gona reka o kasong ka sa Misir
a pekitabang ko manga Imisiren?
Na antonaa i gona reka o kasong ka sa Asiriya
a pekitabang ko manga taw sa Asiriya?
19 So bo so kamarataan ka i magonay reka domaneg,
na so kiyatalikodi ngka raken i magonay reka mbonget.
Na keilay ngka ago kesabot o ay karata ago kapait
o kiyaawai ngka ko Allah a Tohan ka
ago so kiyada o kalek ka raken,"
a tig o Kadnan, a so Lebi a Maporo a Tohan.
Minda so Israil Mangongonotan ko Allah
20 “Miyatey ka den a somiyopak ko kandadatoi aken reka,

ago minda ka raken makipengongoripen.
Pitero o ka a 'Di ako reka pengongonotan!'
Ka mataan a sii ko oman i maporo a bobongan
ago sii ko atag o oman i marimpoong a kayo
na miniring ka sa sondal ko kapesimba ngka sa manga barahala.
21 Inangin na piyamola ko seka a piyagaraw a waged a obas
a mapiya ago malimegas a oniin.
Andamanaya den i kiyabaloy ngka a baden pepegto a waged
a pegonga sa miyaredak ago mado a manga obas?
22 Apiya pen sisingen ka a ginawa ngka a apog
ago peparomanan ka sesabonsabon
na so daket o kadostaan ka na sisii pen ko hadapan aken."
a tig o Lebi a Mamaapaar a Tohan.
23 “Andamanaya i kapeteroa ngka sa 'Da ako kaseboi;
da ako pagapas ko katohanan a Baal'?
Tanodi ngka so manga sowasowai ngka sii ko balintad;
pemasaka ngka so miyanggolaola ngka roo.
Lagid ka o makilas a babay a onta
a dii pepasopaso ko mbalabala,
24 A lagid o maila a babay a kimar a miyalayam ko disirto
a pengingileken iyan so ndo sa kapegebawa niyan ko mama a kimar,
na sii ko kaperakagi ron na antawaa i pekaren on?
Apiya antonaa mama a kimar i pepangiloba on na di on ndokawan,
ka sii ko masa a kapemowadi ron na malebod sekaniyan matoon.
25 Hey Israil, di ka seloba sa salakaw a manga tohan
taman sa kadaan sa tinilas so manga ai ngka,
ago kamaraan so bakerang ka.
Ogaid na di ngka dii teroon a 'Da a lalaw a kapetepengi ngka raken somapar!
Di anan kepakay, ka kagiya pekebabayaan ko angkoto a salakaw a manga tohan,
na kebaya ako kiran magapas.'
Patot a Ndanegen so Israil
26 “Lagid igira a kiyayaan so tekew a miyadakep na lagid iyan mambo a kakeyai ko

manga Israil sabap ko miyanggolaola iran taman ko manga dato iran, manga olowan,
manga imam ago manga nabi ran.
27 Di iran dii teroon ko kayo a 'Seka i ama aken,' ago roo ko ator a 'Seka i mimbawata
raken.' Tiyampar iran raken so likod iran a kena a ba so paras iran, ogaid na igira a
pekeregenan siran na peteroon iran a 'Mbowat ka na sabeta kami ngka!'
28 “Ogaid na anda bes so manga tohan a piyangembaalan iyo para ko ginawa niyo? Igira
a pekeregenan kano na pangnii niyo siran sa kasong iran rekano ago kasebeta, o kegaga
iran! Ka madakel kano i manga tohan a lagid sa kadakel o manga siti niyo, hey Yodah.
29 “Ino niyo raken pepenenditen a ribat ako? Somiyopak kano raken langon," a tig o
Allah.
30 “Ilang baden so kiyadanega ko rekano. Da niyo tarimaa so kapepakatanora ko rekano.
Na piyamono iyo so manga nabi niyo a lagid kano o pepanga aaor a manga arimaw.
31 “Hey manga taw sa Israil, pakinega niyo so manga katero o Allah! Ba ako datar a
disirto sii rekano, o di na lagid o darpa a tanto a maliboteng? Ino niyo dii teroa a
'Kabobotawanan kami a makapagenebeneb; di kami reka den kesoy'?
32 Ba kelipati somolot o raga so manga imbolawananan iyan, o di na so babay a
pengaromaan na ba niyan kelipati somolot so nditaren iyan sa kakewing? Kena! Ogaid
na so manga pagtaw aken na kiyalipatan ako iran ko di den keitong a manga gawii.
33 Tanto kano a mapasang somaloba ko manga pepangabaya reka! Apiya so lebi a
manga rarata a babay na pekasowa ko manga okitokit iyo!
34 So manga nditaren iyo na kadadaketan sa rogo o da a peleng iyan a manga miskin.
Piyamono iyo siran apiya da niyo siran matibowa ko kapenekewi ran ko manga walay
niyo.
"Ogaid na apiya pen ai langon na
35 Di ngka dii teroon a 'Da a pinggolaola ko a marata. Mataan a kena a ba ako
pekerarangiti o Allah!' Ogaid na tomparakan ko seka sa daneg sabap ko kiyateroa ngka sa
'Da ako den makandosa.'
36 Ino ka lalayon pepegenebeneb a pepakipagabanga ko ped a manga nasiyon? Keolaan
ka a Misir a lagid o kiyaolai rekano a Asiriya.
37 Keawaan ka pen a Misir a makadodosong ka sa kapakamboboko ago kaya, ka di
pekibolos o Allah sa mapiya so kasasarigi ngka kiran; da den a kiogop iran reka."
YARAMIYAS 3
Pitero o Allah a "O mimbelag o mama so karoma niyan na o magawa rekaniyan so babay
ago makipengaroma sa salakaw a mama na di niyan den kebalingan so miyaona a karoma
niyan. O magiyoto na keseboan sa tarotop so dalem a inged. Ogaid na seka, hey Israil, na
miniring ka sa sondal ko madakel pepangabaya reka. Na andamanaya i kapipikira niyo sa
kapekakasoy ngka raken?
2 “Langag ka na go ngka ilaya so poro o manga bobongan. Ba aden a darpa a da ka on

kaseboi ko di ngka dii kasina ko salakaw a manga tohan? Nanayaon ka siran a lagid o
sondal a moontod ko kilid a lalan, o di na lagid o tanganiyaya a pepamagayan roo ko
disirto ko kapanekewan iyan. Kiyaseboan ka so inged ko kasosondal ka ago kamarataan.
3 Giyanan i sabap a miyaren so oran taman ko tarintik sii ko pangolaon. Apiya pen oto na
mategas ka pen i olo a datar o sondal, na di ngka den ikeya so pinggolaola ngka.
4“
Ogaid na imanto na di niyo raken dii teroon a 'Seka i ama aken, a so ginawai aken ipoon
ko kawawatai raken.
5 Kena a ba tatap so gani ngka; kena a ba dayon sa dayon so rarangit ka raken!' Giyanan i
pitero o ka, hey Israil, ogaid na pepanabenar ka baden nggolaola sa marata."
So Israil a di Toman sa Pasad
6 Sii ko kandadato o Dato Yosiyas na pitero raken o Allah a "Miyailay ngka so

pinggolaola o Israil a so babay a di toman sa pasad? Sii ko oman i maporo a bobongan
ago sii ko atag o oman i marimpoong a kayo na miniring sekaniyan sa sondal ko
kapesimba niyan sa manga barahala.
7 Na miyapikir aken a sii ko oriyan o kiyanggolaolaa niyan sii langon na kesoy sekaniyan
raken bo. Ogaid na da den kasoy, na so di toman sa pasad a pagari niyan a so Yodah na
miyailay niyan ai.
8 Miyailay niyan pen a inendaan aken so Israil ago bigan aken sa sorat sa kapakambelag
sabap ko kiyatalikodi niyan raken ago so di niyan dii kasina. Na oriyan o kiyailaya niyan
sii na so di toman sa pasad a pagari niyan a Yodah na da den malek, na misondal mambo.
9 Na sabap sa da niyan den kayaan so kasosondal iyan na piseboan iyan so inged a
nggolalan ko di niyan dii kasina ko manga barahala a inembaalan a ator ago kayo.
10 Na sii sangkai langon a miyanggolaola niyan na so pagari o Israil, a so di toman sa
pasad a Yodah, na kena a iklas so kiyakasoy niyan raken, ka baden dii magomanta," a
pitero o Allah.
11 Na pitero raken pen o Allah a "Apiya pen tomiyalikod raken so Israil na minos
sekaniyan i kasalaan a di so pepanaliba a Yodah.
12 Na, ika roo den na pakalangkapa ngka angkai a manga katero ko manga pagtaw aken a
Israil:
"Giyai i pitero o Allah:

Hey Israil a di toman sa pasad, na kasoy ka raken.
Di aken seka den pagilain a rarangit, ka makalimoon ako man,"
a tig o Allah,
"na kena a ba taman sa pakataman so rarangit aken.
13 Tarimaa ngka baden a miyakasela ka,
ka somiyopak ka ko Allah a Tohan ka,
na omanoman ka mangabaya sa salakaw a manga tohan
sii ko atag o oman i marimpoong a kayo,
na da ngka pakinega so manga katero aken,"
a tig o Allah
14 “Hey dii teridadag a manga taw na mbalingan kano raken," a tig o Allah, "ka saken i
tito a kadnan iyo. Kowa ko rekano sa nggagisa ko oman i siti ago ndodowa ko oman i
mbatabataa na pagowiten ko sekano sa Siyon.
15 Mbegan ko sekano sa manga olowan a mapaparatiyaya raken, na tegikoren kano iran a
nggolalan ko katao ago ongangen.
16 Sii sangkoto a manga gawii amay ka tanto kano a miyakandakel sii ko inged iyo," a tig
o Allah, "na di den pagaloin o manga taw so Kaban sa Kapasadan o Allah. Di iran den
oto pipikiren aya pen o ba iran katademi. Di iran den oto kailangan aya pen o ba siran
mbaal sa ped.
17 Sangkoto a masa na giya Yarosalim na mbetowan sa 'So Korsi o Allah,' na
pelimolimod roo so langon o manga nasiyon sa kambantoga iran ko Ingaran o Allah. Di
iran den pegonotan so mategas ago marata a manga poso iran.
18 Sii sangkoto a manga gawii na keisaisa so Yodah ago so Israil na pemagepeda siran
gomanat ko inged sa pagotaraan na kesoy siran ko lopa a inibegay aken ko manga
apoapoan iran a aya iran kawali."
19 Pitero o Allah a
"Hey Israil, tanto aken a ikebabaya so kiseyanen aken reka sa tito a wata aken
ago so kambegi aken reka sa mapiya a lopa
a so lebi a mapiya a lopa a mapekewali o apiya anda ko manga nasiyon.
Aya miyapikir aken na mbetowan ako ngka sa 'Ama,'
a di ako ngka den telikodan.
20 Ogaid na tinipo ako niyo, hey Israil!
Somiyayan ka sa babay a da niyan tomani sa pasad so karoma niyan,"
a tig o Allah.
21 Aden a bogembog a pekeneg ko kipapayasan a poro o manga bobongan.

Giyanan so kapenggoraok ago so kapepangangampedian o
manga Israil ko manga tohan iran,
ka binibid iran so manga okitokit iran
ago piyakalipatan iran so Allah a Tohan iran.
22 “Hey sekano a tomiyalikod a manga taw na kasoy kano raken,

ka bolongan ko so dii teridadag a manga poso iyo."
"Teroa niyo a
'Oway, kesoy kami reka,
ka seka i Allah a Tohan ami.
23 Katawan ami a so pakabowing a kapesimba ami ko manga barahala sii ko manga
bobongan ago manga palaw
na da a minitabang iyan rekami.
Matamataan a aya bo a pekatabang ko Israil na so Allah a Tohan ami.
24 Ipoon ko kawawatai rekami na so kapesimbaa mi sangkoto a piyakayaya a katohanan a
Baal
na miyalengan iyan so langon a pindokawan o manga lokes ami,
a so manga talon ami a manga bilibili ago sapi,
ago so manga wata ami a manga mama ago manga babay.
25 Na, gomepe tano sabap ko kayaan tano
na makisapeng tano ko kadidiyamani rektano.
Ka miyakandosa tano ko Allah a Tohan tano;
sekami ago so manga apo tano.
Ipoon ko kawawatai rektano na taman imanto
na da tano den tomana so manga sogoan o Allah a Tohan tano.'
YARAMIYAS 4
So Pangni sa Kateobat
Pitero o Allah a
"O kebaya kano tomalikod ko piyakayaya a manga okitokit iyo, hey Israil,
na disomala a kasoy kano raken.
Disomala a ipelebad iyo so piyakasisingay a manga barahala niyo ko pangilailayan aken
ago di ka den peteridadag,
2 Na disomala so kateroa ngka ko tito a benar, so maontol ago so matito
igira a ipesepa a ka so Ingaran o Allah.
O nggolaolaa ngka ini na pemangnin raken o manga nasiyon a kerakmatan siran a datar
iyo,
na mbentogen ako iran."
3 Giyai i pitero o Allah ko manga taw sa Yodah ago Yarosalim:
"Ndadowa niyo so mategas a lopa ko manga poso iyo!

Di niyo seoden so oniin iyo ko manga soroken.
4 Sotia niyo raken so manga ginawa niyo;
papasa niyo so langon a manga rarata ko manga poso iyo,
hey sekano a manga taw sa Yodah ago kibabaling sa Yarosalim!
O di niyo ai nggolaolaa na pemborngat so gani aken a lagid o pesokeyaw a apoy
sabap ko manga rarata a pinggolaola niyo,
na kerab ai a da den a ba on pekapareng.
So Morala a poon sa Pagotaraan
5 “Pakalangkapa niyo sa Yodah ago panawatewagen iyo sii sa Yarosalim a

'Pakaoniya niyo so bogiyong ko dalem a inged!'
Lalis kano sa matanog na teroa niyo a:
'Timotimo tano! Somong tano ko kikokotaan a manga siti!'
6 Bayaon iyo so pandi a toos sa kasong sa Siyon.
Palalagoy kano roo mamagapas! Di niyo sendoden!
Ka magowit ako sa morala a poon sa pagotaraan,
a so piyakalekelek a kabinasaan."
7 Lagid o arimaw a lominiyo den ko lekowa iyan
na so pepaminasa ko manga nasiyon na miyakaganat ko darpa iyan.
Pekaoma sekaniyan sa kapelaslasa niyan ko inged iyo.
Penga bibinasa so manga siti niyo a da den a ba on mbaling.
8 Sabap san na solot kano sa sako.
Mboko kano a dii ndidiyagaw a di niyo dii teroon a
'Da pen lenggaw so pekerab a rarangit rektano o Allah.'
9 “Amay ka manggolaola ini," a tig o Allah,

"na kedaan sa kawaraw so dato ago so manga olowan;
ketekawan so manga imam,
na ketengang so manga nabi."
10 Na pitero aken a "Ya Allah a Kadnan ko, mataan a piyagakalan ka so manga taw sa
Yodah ago giya Yarosalim. Pitero o ka a 'Kelinding kano,' ogaid na imanto na miiilil den
so pedang ko bakerang ami."
11 Sii Sangkoto a oras na peteroon o Allah ko manga taw sa Yodah ago sa Yarosalim a
"Aden a pekalowis a ndo a poon ko disirto a sember ko manga pagtaw aken. Kena ini a
ba matag sambesamber a pepekapalid ko okap,
12 Ka tanto den a mabager a ndo a di giyoto a pekapoon raken, ka imanto na saken den i
tena ko kandanega ko kiran."
Linikopan a Yodah o Ridoay
13 Ilaya niyo! Pegagaw sii den so ridoay a lagid o manga gabon.

Pepekaoma so manga karo niyan sa katidawa a lagid o sobosobo,
na so manga koda iyan na magaan a di so manga darayo.
Kemoralaan tano! Kebinasa tano!
14 Hey manga taw sa Yarosalim, lompiyowi niyo sa marata so manga poso iyo kaan kano
masabet.
Ay katey pen a kipeterosen iyo ko marata a pamikiran iyo?
15 So manga siyogo a poon sa inged a Dan ago poon ko kapalawan sa Ipraim
na pepekalangkapen iran so kakemoralai rekano.
16 Di iran dii teroon a "Panawatewagen iyo sa Yarosalim ago sii ko melilibeta on a
manga nasiyon a
'Makatatalingoma so dii nggogobat ko manga siti a poon ko mawatan a inged.
Pelalalis siran sa kapakipetidawa iran ko manga siti sa Yodah.
17 Pelikopan iran a Yarosalim a lagid o manga magiipat ko mbabasokan
sabap sa somiyopak raken so manga taw niyan,' "
a tig o Allah.
18 “Hey Yodah, piyakatana a ka ini ko ginawa ngka a nggolalan ko manga olaola ngka
ago manga galebek.
Giyai so daneg a mapapatot reka, na sayana ini a mapait!
So kasakit iyan na melambas taman ko poso o ka!"
Dii Imboko o Yaramiyas so manga Taw niyan
19 Aidaw! Aidaw! Tanto a masakit so poso aken!

Di ako dii makapelikoay ko kapakamboboko aken!
Lagid o pembowayon so poso aken.
Di ako pekarenek,
ka pekeneg aken so oni o bogiyong
ago so manga lalis sa katidawa.
20 Pekeilay aken a petondotondog so manga morala
a miniarong ko kiyalaslasa ko dalem a inged.
Tekaw den a miyanga bibinasa so manga barombarong ami;
sii ko sakotika na miyanga kikisi so manga rending iran.
21 Ay katey pen a kapekeilaya ko ko manga pandi sa katidawa o manga ridoay
ago so kapekenega ko ko oni o manga bogiyong iran?
22 Somimbag so Allah a
"Mapenggolaola ini ka so manga pagtaw aken na manga lalong;
di ako iran katawan.
Lagid siran o da a manga lalag iyan a manga wata a da a sabot iran.
Mapasang siran ko kanggolaola sa marata,
ogaid na di siran matao nggolaola ko mapiya."
So Pangingilain i Yaramiyas ko Pekatalingoma a Morala
23 Inilay aken so doniya,

na da a mambobontal iyan ago da a matatago on;
lomiyangag ako sa langit na da a ba on maliwanag.
24 Inilay aken so manga palaw na pepanga kokokog siran,
na pekisibesibeg so langon o manga bobongan.
25 Miyangilailay ako na miyailay aken a da den a manosiya;
na miyamakalayog den sa mawatan so langowan a manga papanok.
26 Miyabaloy den a disirto so oodaren a lopa,
na miyanga gegeba so langon a manga inged on.
So Allah i minggolaola sii langon sabap ko pesokeyaw a rarangit iyan.
"Kelaslas so dalem a inged,

apiya pen di aken ai terotopen minasa.
28 Sabap sii na makapemboko so doniya
na pekaitem so manga langit sa kawang,
ka miyapayag aken so takdir aken na di aken pagalinen so pamikiran aken;
piyasad aken ai sa ginawa ko na mataan a ipenggolalan aken."
29 Sabap ko bogembog o kikokoda ago so manga pamamana

na pepamalagoy so manga taw a poon ko oman i siti.
So ped na pepamagapas ko kalasan,
na so ped na roo ko manga lakongan ko kapalawan.
Kiyaawaan den so langon o manga siti
a da den a ba on mababaling.
30 Na seka Yarosalim a kemoralaan a siti,
ino ka sosolot sa lebi a manga pipiya a nditaren ka ago manga imbolawananan?
Ino ngka pemintali a manga mata ngka?
Da a gona o kapetenosa ngka sa ginawa ngka.
So manga pepanga bababayaan ka na pesodiin ka iran;
kebayaan ka iran mono.
31 Pekeneg aken so goraok a lagid o pembaliliten a babay,
a so kisek a lagid o pembawata sa popaw sa lawas iyan.
Giyanan so goraok a Yarosalim a dii mbaka
ago komakawa a pepamangni sa tabang
a tig iyan a "Aidaw! Pekepos so niyawa ko sabap sangkai a manga talibono."
YARAMIYAS 5
So manga Dosa o Yodah
Pitero o Allah a
"Pagenebeneb kano ko manga lalan sa Yarosalim,
pangilailay kano ko mbalabala na pariksaa niyo;
sisika niyo so manga peketimoan sa taw.
O aden a matoon iyo a sakataw bo
a dii nggolaola sa maontol ago mananagontaman raken maratiyaya
na di aken siksaan angkai a siti.
2 Apiya pen di iran dii teroon a 'Matamataan ko kaooyagoyag o Allah,'
na so di iran dii sepa na di benar."
3 Ya Allah, ba di so katoman sa pasad i di ngka dii mbabanogen?

Siniksa a ka ngkai a manga taw, ogaid na da iran tagoa sa ginawa;
bininasa ngka siran, ogaid na minda siran o ba mapakaontol.
Piyakategas iran so olo iran a mategas a di so ator
na minda siran tomalikod ko manga dosa iran.
4 Aya katao ko ron na "Mataan a so bo so manga miskin ago da a manga sowa iyan i dii
nggolaola sa datar aya.
Di siran dii melalolalong ka kagiya di iran kawatan so ipapaliyogat kiran o Allah
o di na so manga sogoan o Tohan iran.
5 Sabap san na song ako ko manga olowan na makipembitiyarai ako kiran.
Matatangked a katawan iran so ipapaliyogat kiran o Allah,
a so manga sogoan o Tohan iran."
Ogaid na palaya siran den somiyopak ko kandadatoi kiran o Allah na di siran on
pengongonotan.
6 Kagiya ka maoto na mbonoon siran o arimaw a poon sa kalasan,
mbinasaan siran o maila a aso a poon ko disirto,
na pemagayanan siran o lako ko liyo o manga siti iran
a pesekisi ko apiya antawaa a meliyo roo;
ka minitaralo so kiyasopak iran,
na omanoman siran tomalikod ko Tohan.
7 Na iniise o Allah a
"Andamanaya i kapelepasa ko ko kandanega reka, hey Yarosalim?
Tiyalikodan ako o manga taw ngka
ago misepa siran ko ingaran o manga tohan a kena a ba tito a Tohan.
Apiya pen inibegay aken kiran so langon a ipekeoyag iran na misina siran
a dii makipelomameka ko manga sondal.
8 Lagid siran o manga lilimegas a mama a koda a tanto a perakagan,
a so oman i isa kiran na pekekegen iyan so karoma o siringan iyan.
9 Ba di patot a kandanega ko kiran sabap roo?"
a pitero o Allah.
"Ba di patot a kipeseopen ko ko ginawa ko sa datar oto a manga taw?
10 “Neba niyo so manga asinda a Israil ago giya Yodah na go niyo paminasaa,
ogaid na di niyo bo terotopa so kapeminasaa niyo ron.
Pamotola niyo so manga sapak iran
ka kena ini a ba rek o Allah.
11 Ka so manga taw sa Israil ago sa Yodah
na minitaralo a da ako iran tomani sa pasad,"
a pitero o Allah.
12 Mipelaw angkai a manga taw ko katero o Allah;

ka pitero iran a "Da a penggolaolaan iyan!
Da a kitana rektano a pekabinasa;
di tano den pekaokit ko katidawa o di na taon.
13 So manga katero o manga nabi na matag baden ndo;
kena a ba so katero o Allah i pepayagen iran;
na makatana kiran so manga morala a pekealamat iran!'
14 Kagiya ka maoto na pitero raken o Allah a so Tohan a Lebi a Mamaapaar a:
"Hey Yaramiyas, kagiya pitetaro ini angkai a manga taw

na mbelowin ko so manga katero aken a lagid o apoy a sisii ko ngari i ka,
na mbelowin ko angkai a manga taw a lagid o itagon a peketotong o apoy ago pekepos.
15 Hey manga taw sa Israil," a pitero o Allah,
"Pagowitan ko sekano sa nasiyon a poon sa mawatan a nggobat rekano,
a so andang ago mabager a nasiyon,
a so manga taw a di niyo katawan so basa iran,
ago di niyo seboten so manga katero iran.
16 Langon siran manga wawaraw a sondaro
a pepekapatay so manga gasa iran.
17 Pelenganen iran so penga raragon iyo ago manga pangenengken,
pemonoon iran so manga wata iyo a manga mama ago manga babay,
sombaliin iran so manga talon iyo a bilibili, kambing ago manga sapi,
na mbinasaan iran so manga asinda niyo a obas ago manga kayo a higos.
Nggebaan iran so kikokotaan a manga siti a sasarigan iyo.
18 “Ogaid na apiya sii sangkoto a manga gawii na di aken terotopen minasa so manga
pagtaw aken," a pitero o Allah.
19 “Na amay ka ipagise iran a 'Ino rektano ai langon penggolaolaa o Allah a Tohan tano?'
na teroa ngka kiran, Yaramiyas, a 'Sabap sa tiyalikodan iyo sekaniyan ago
miyangongonotan kano baden ko salakaw a manga tohan sii ko inged iyo, na imanto na
kapenalagadan iyo so manga mananangga sii ko inged a kena a ba niyo rek.'
20 “Panawatewagen ka angkai a katero ko manga mbawataan o Yakob

ago pakalangkapa ngka sii sa Yodah:
21 Pamakinega niyo ai, sekano a manga lalong ago da a lalag iyan a manga taw
a aden a manga mata niyan ogaid na di pemakailay,
ago aden a manga tangila niyan ogaid na di pemakaneg.
22 Ba di patot a kipekeleken iyo raken?" a pitero o Allah.
"Ba di patot a kapenanabada rekano sii ko hadapan aken?
Saken i mitad ko peted a temanaan o ragat,
a so tanitiyasa a temanaan a di den kelepas.
Apiya pen pekala so manga begel na di iran ai kegaga,
na apiya pen pendaleg na di den pekalepas ko temanaan.
23 Ogaid na giyangkai a manga taw na manga tetegas i olo ago pepamanopak i poso;
Miyamanilay siran ago inawaan ako iran.
24 Da iran teroa sa ginawa iran a
'Ikalek tano so Allah a Tohan tano,
ka sekaniyan i pembegay rektano sa oran igira a pangoran ago mosim a kapeseod,
ago petengkeden iyan rektano so pekeragon ko oman ragon.
25 So manga karataan iyo i miyakasapar rekano sangkai a manga rakmat;
so manga dosa niyo i miyakarampas rekano sangkai langon a kamapiyaan.
26 “Aden a manga rarata a mama ko manga pagtaw aken

a pepamagayan a lagid o pesikem sa manga papanok.
Petean siran sa pekapatay a manga litag a indakep ko manga taw.
27 Lagid o doreng a mapepeno a papanok a miyanga sisikem
na mapepeno mambo so manga walay iran a miyanga tetaban iran a nggolalan ko
kapanaliba.
Giyanan i okit a kiyabaloy iran a kawasa ago manga ala i gees
28 a lalayon pepanga oosog ago pepanga oolitan.
Da den a pitetamanan o manga rarata a galebek iran;
di iran ipemayandeg so manga ilo ko dii kokoman kaan mapakabenar,
na di iran imbegay ko manga miskin so kabenar iran.
29 Ba di patot a kandanega ko kiran sabap roo?"
a pitero o Allah.
"Ba di patot a kipeseopen ko ko ginawa ko sa datar oto a manga taw?
30 “Aden a pakabengang ago piyakalekelek a miyanggolaola sii ko inged:

31 So manga nabi na pepangalamat sa di benar;
so manga imam na aya ipendato iran na so rek iran a kabaya,
na pekebabayaan o manga pagtaw aken angkai a masosowa!
Ogaid na antonaa i penggolaolaan iyo sii sa kaposan?
YARAMIYAS 6
Linikopan a Yarosalim o manga Ridoay
"Ipalagoy niyo a manga ginawa niyo, hey manga taw sa Baniyamin!

Palagowi niyo a Yarosalim!
Pakaoniya niyo so bogiyong roo sa Tikowa!
Biyag kano sa apoy a signal roo sa Bit Hakirim!
Ka magaan den makatalingoma so balaola a pekapoon sa pagotaraan,
a so mala a kabinasaan.
2 Hey Yarosalim, lagid ka o miyakataitaid ago pembayongen a wata aken,
ogaid na mbinasaan ko seka.
3 Sondolan ka o manga dato a rakes o manga sondaro iran;
ipelikop iran reka so manga kampo iran,
na petebanen o oman i isa kiran so kebabayaan iran."
4 Peteroon iran a
"Tiyagar tano makitidawa sa Yarosalim!
Itano roo, gobaten tano ko keoto a alongan!
Ogaid na ilaya niyo man, ka magaan den maipos so maliwanag,
na pesembi den so maliboteng.
5 Sabap san na gomobat tano ko kagagawii niyan
ago binasaan tano so manga kota iyan!"
6 Mapenggolaola ini ka inisogo kiran o Allah a Lebi a Mamaapaar a:
"Pamata kano sa manga kayo

na go kano mbaal sa manga tambak a ipelikop ago inggobat sa Yarosalim."
Ka pitero o Allah a
"Disomala a madaneg angkai a siti
ka mapepeno ini a kapangarasi.
7 Lagid o bowalan a pemboraya on so ig iyan
na pemboraya mambo sangkai a siti so kamarataan iyan.
Sii rekaniyan pekeneg so oni o kapanganiyaya ago kabinasaan;
na so paniyakit iyan ago manga pali na sii lalayon ko kapekeilaya ko ron.
8 Hey manga taw sa Yarosalim,
tagoa niyo sa ginawa so lalangan aken rekano,
ka o di, na telikodan ko sekano
ago pelaslasen ko so inged iyo
sa taros a da a sakataw bo a ba on den pekabaling."
Makasosopaka so manga Israil
9 Na pitero raken o Allah a Lebi a Mamaapaar:

"Siran oto a penga lalamba sii sa Israil na pengosipen
a lagid o manga obas sii ko waged.
So peropo ko manga onga niyan na peperosen iyan peroman so manga sapak iyan."
10 Na somimbag ako a
"Antawaa i kelalangan aken? Antawaa i pekineg raken?
Inolen iran so manga tangila iran kaan siran di pemakaneg.
Ilaya ngka, ka di iran dii sodiin so katero o Allah;
di iran ai kebabayaan.
11 Sabap roo, ya Allah, na so rarangit ka na aya raken mambo mipepeno,
na di aken ai keren."
Na pitero o Allah a
"Pakapemborngaten ko so rarangit aken ko manga wata sii ko manga lalan
ago sii ko malilimod a manga kangodaan;
na kirakes sii mambo so manga kekaromai
ago so manga lokes ago so siran oto a minitolod so idad iyan.
12 So manga walay iran na kepalad ko salakaw a manga taw,
a lagid mambo o manga lopa iran ago manga karoma,
ka ndanegen ko so manga taw a kibabaling sangkai a inged,"
a pitero o Allah.
13 “Ipoon ko mababa na taman ko maporo
na palaya siran mala i napso;
apiya so manga nabi ago so manga imam na ndatar siran
a palaya den pepanalimbot.
14 Pemolongan iran so pali o manga pagtaw aken
a lagid o ba matag garas.
'Mapiya, mapiya so langon taman," a di iran dii teroon,
apiya pen igira a kena a ba mapiya so langon taman.
15 Ba siran miyaya sabap sangkai a piyakagowagowad a miyanggolaola iran?
Da, da siran den maya apiya maito bo;
di siran matao mamamala.
Sabap san na pematay siran a lagid o manga ped a miyamatay den;
Imbaba siran amay ka ndanegen ko siran,"
a tig o Allah.
Tiyalikodan o Israil so Lalan o Allah
16 Pitero o Allah ko manga pagtaw niyan a
"Tomitindeg kano ko mbalakaan o lalan;

kagiya ka maoto na, pamimikirana niyo so pegokitan iyo.
Iseen iyo so makapantag ko andang a manga lalan;
iseen iyo o anda so lalan a ipesong ko kamapiyaan, na kedega niyo ai,
ka kekowa niyo so kapakadeke o manga ginawa niyo.
Ogaid na pitero iyo a 'Di ami anan kedegen.'
17 Tomiyoro ako sa manga sirino a pekaiktiyar rekano a pitero iran a
'Pakinega niyo so oni o bogiyong a pekaiktiyar rekano!'
Ogaid na pitero iyo a 'Di ami pekinegen.' "
18 Sabap sii na pitero o Allah a
"Pamakineg kano, hey manga nasiyon!
Ilaya niyo, hey manga saksi, o antonaa mapenggolaola angkai a manga taw.
19 Pamakineg ka, hey doniya!
Telembaan aken sa morala angkai a manga taw
a aya ko kiran indaneg
sabap sa da iran paratiyayaa so manga katero aken
ago inisili iran so manga sogoan aken.
20 Antonaa i bali raken o manga doka a poon sa Siba a pegowiten iran raken,
o di na so manga borok a poon sa mawatan a inged?
Di aken terimaan so petotongen iran a ipenapaat
na di aken ikesoat so manga korban iran."
21 Kagiya ka maoto na giyai i pitero o Allah:
"Pekirepang ago pekioteng aken angkai a manga taw.

Pematay den so manga lokes ago so manga wata
a rakes o manga ginawai iran ago manga siringan."
"Aden a pekatalingoma a manga sondaro

a makapopoon ko inged sa pagotaraan,
a so mabager a nasiyon a ndodoo sa mawatan
a pekaoma a makipetidawa rekano.
23 Kikagogomaanan siran sa manga pana ago manga bangkaw;
manga rarangit siran a da a ba iran kapedi.
Pendagedeb siran a lagid o ragat sii ko kakokoda iran.
Pekaoma siran a titiyagar sa katidawa
sa kanggobata iran reka, hey Yarosalim!"
24 “Miyaneg tano so manga totolan makapantag kiran,"

a tig o manga magiinged sa Yarosalim,
"na kiyadaan tano sa bager.
Riyaot tano a kalek ago masakit
a lagid sa kasakit o pembaliliten a babay.
25 Di tano pekaraw somong ko manga pangomaan
aya pen o ba tano pagenebeneb ko manga lalan,
ka kasasandiyataan sa pedang so ridoay
na aden a piyakalekelek ko mbalabala."
26 Pitero o Allah a
"Hey manga pagtaw aken,
nditar kano sa sako ago tembalilid kano ko ombi.
Mboko kano sa mapait a kandidiyagaw a datar o piyatayan sa botong a wata,
ka magaan so magaan na pekatalingoma rekano so pepaminasa a manga sondaro!
27 “Hey Yaramiyas, biyaloy aken seka a lagid o pepangori sa potaw

a sisii ko manga pagtaw aken
kaan ka katokawi ago katepengi so manga okitokit iran.
28 Langon siran manga tetegas i olo a manga taongkir
a lalayon pepamaganta.
Mategas siran a lagid o tombaga ago potaw;
palaya siran pepamanakoto.
29 Minitaralo so kayaw o apoy ko tonaga,
ogaid na di den ketonag ago keda so tangis o pirak.
Da a gona niyan so lalayon kapegoria ko manga pagtaw aken,
ka di kiran den kekowa so manga rarata a taw.
30 Mbetowan siran sa 'Inisili a Pirak'
ka kagiya inisili siran o Allah"
YARAMIYAS 7
Da a Gona niyan so di Benar a Agama
Na pitero o Allah ki Yaramiyas a

2 “Tindeg ka ko gimowa o Timplo o Allah na pakalangkapa ngka roo angkai a katero:
"Hey langon kano a manga taw sa Yodah a pegokit sangkai a manga pintoan sa
kapesimbaa niyo ko Allah, na pamakinega niyo so katero o Allah.
3 Giyai i pitero o Allah a Lebi a Mamaapaar a Tohan o Israil: Alina niyo so manga
okitokit iyo ago pakatitoa niyo so di niyo dii nggolaolaan, ka pakapeginetaon ko sekano
pen sangkai a inged.
4 Di niyo den serigi so kapanaliba a manga katero a 'Malilinding tano ka sisii so Timplo o
Allah! Sisii so Timplo o Allah! Sisii so Timplo o Allah!'
5 “Disomala a kaalina niyo ko manga okitokit iyo ago so di niyo dii nggolaolaan.
Pakaontola niyo so ipekidia niyo ko manga ped iyo.
6 Di niyo den pegotobi so kabenar o manga mananangga, so manga ilo ago so manga
balo, ago di niyo den pemonoa so da a manga sala iyan sii sangkai a inged. Di kano den
simba sa salakaw a manga tohan, ka ikebinasa niyo ai.
7 O tomana niyo ai langon na pakapaginetaon ko sekano pen sangkai a inged a inibegay
aken ko manga apoapoan iyo a kedenan iran sa taman sa pakataman.
8 “Ogaid na ilaya niyo man ka ba niyo den sasarigi so di benar a manga pamikiran a di
rekano den pekaogop.
9 Ba aya pipikiren iyo na makapemanekew kano, makapemono, makapesina,
makapemokeg ko di niyo dii kasepa, makapenapaat ko katohanan a Baal ago
makapemanimba ko salakaw a manga tohan a di niyo katawan
10 Na go kano sii bo makapemanong a pemanindeg ko hadapan aken sangkai a Timplo a
pesimbaan raken a peteroon iyo a 'Malilinding tano!', a malilinding kaan iyo pekitaros so
langon angkai a piyakasisingay a sowasowai?
11 Ba niyo pipikira a giyangkai a Timplo a pesimbaan raken na tapoka o manga tekew?
Ilaya niyo man, ka sisimaan ko so langon a di niyo dii nggolaolaan!" a pitero o Allah.
12 “Na, song kano sa Siloh, a aya paganay a darpa a pinili aken a ron ako kesimba, na
ilaya niyo o antonaa i inikidia ko ron sabap ko kamarataan o manga pagtaw aken a Israil.
13 Sii ko di niyo dii kanggolaolaa langon sangkai a manga dosa na apiya miyakapira ko
sekano den katapaosi na da niyo pakinega. Minda kano raken somembag sii ko
kiyatalowi ko rekano.
14 Kagiya ka maoto na mbinasaan ko imanto angkai a Timplo a pesimbaan raken a
sasarigan iyo a pekalinding rekano. Mbinasaan ko angkai a darpa a inibegay aken rekano
ago so manga apoapoan iyo a datar o kiyabinasaa ko sa Siloh.
15 Mbogaon ko sekano sii ko kamamasaan aken a datar o inikidia ko ko langon o manga
pagari niyo a manga Israil.”
So tanto a Kasosopak o manga Taw
16 Na pitero raken o Allah a “Hey Yaramiyas, di ngka pengangarapanen angkai a manga

taw. Di ka raken penggoraok aya pen o ba ako ngka akoli sabap kiran. Di ako ngka
pengangampediani sa kasabeta ko kiran, ka di aken seka pemakinegen.
17 Ba ngka di pekeilay so di iran dii nggolaolaan roo ko manga siti sa Yodah ago sii ko
manga lalan sa Yarosalim?
18 Dii mangitagon so manga wata, na dii magapoy so manga mama, na dii tiyagar so
manga babay sa arina a pagembaalan a paan a ipesepaat iran ko katohanan a pembetowan
iran sa ‘Bai sa Langit.’ Pesepaat siran pen sa manga panginginomen ko ped a manga
katohanan sa kaperataa iran sa ginawa ko.
19 Ogaid na ba so ginawa ko i peperataan iran?” a tig o Allah. Ba di aya pepekasakitan
ago pepekadapanasen iran na giya ginawa iran?
20 “Kagiya ka maoto na giyai i pitero o Tohan a so Kadnan: So pesokeyaw a gani aken na

pemborngat sangkai a darpa. Itelemba aken ai sii ko manga manosiya ago so manga
pangangayamen, sii ko manga pakayokayowan ago so manga pereperan. Pekatotong so
rarangit aken a lagid o apoy a di den kepareng.
21 “Giyai i pitero o Allah a Lebi a Mamaapaar a so Tohan o Israil: Di aken den ikesoat so
manga ipesepaat iyo a petotongen a isesenggay raken! Tekai niyo den oto a rakes o sapo
o manga korban a mapaparo a ken iyo!
22 Ka sii ko gawii a kiyapakaliyowa ko sa Misir ko manga apo iyo na da aken siran begi
sa manga sogoan mipantag ko petotongen a manga ipesepaat ago manga korban.
23 Ka aya inisogo aken kiran na ‘Paratiyayaa ko niyo kaan ako pekabaloy a Tohan iyo na
sekano i pekabaloy a manga pagtaw aken. Na paginetaon iyo so langon o manga okitokit
a ipesogo aken rekano kaan mapiya kano i bobolos.'
24 Ogaid na da iran pakinega aya pen o ba iran tiyago sa ginawa, ka ba iran baden
inonotan so manga baya a ginawa o mategas ago marata a manga poso iran. Na baden
miyakala so karataan iran a da den makaito.
25 Ipoon ko kiyaawai o manga apo iyo sa Misir taman imanto na gawii gawii den na
lalayon aken rekano pesogoon so manga oripen aken a manga nabi.
26 Ogaid na da ako pamakinega o manga pagtaw aken aya pen o ba iran tiyago sa ginawa.
Na baden minitaralo so kategas iran i olo na minggolaola siran sa lebi pen a marata a di
so manga apo iran."
27 Na pitero raken o Allah a “Amay ka teroon ka kiran ai langon, Yaramiyas, na di ka

iran pekinegen. Amay ka tawagen ka siran na di siran sembag.
28 Teroa ngka kiran a: Giyai so nasiyon a da iran paratiyayaa so Allah a Tohan iran aya
pen o ba iran tiyarima so kiyaparintaa niyan kiran. Miyada kiran so kaparatiyaya; di iran
den pagaloin so makapantag on.
29 Mboko kano, hey manga taw sangkai a nasiyon. Potoli niyo so manga bok iyo na go
niyo lebaden. Ndiyaga kano sii ko poro o manga bobongan, ka inikagowad ago
tiyalikodan o Allah angkai a manga taw a pekerarangitan iyan.
So Balintad a Penombalian
30 “Tiyalikodan ko siran sabap sa miyakanggolaola so manga taw sa Yodah sa marata sii

ko kapekeilaya ko kiran, a tig o Allah. Piyakatindeg iran so piyakasisingay a manga
barahala iran sii ko Timplo a pesimbaan raken, na piseboan iran.
31 Miyangon siran pen sa manga aparan ko manga barahala roo sa Topit sii sa Balintad a
Hinom a ron iran dii korbana so manga wata iran a manga mama ago manga babay sii ko
apoy. Da aken ai kiran den sogoon aya pen o ba ko oto miyapamikir.
32 Kagiya ka maoto na iktiyar kano, ka pekatalingoma den so manga gawii, a tig o Allah,
a amay ka di den mbetowan o manga taw angkoto a manga darpa sa Topit, o di na
Balintad a Hinom, ka mbetowan iran sa Balintad a Penombalian. Na ipelebeng iran roo
so madakel a miyamatay taman sa da den a keminan on.
33 Samaoto na so manga bangkay angkai a manga taw na pegedasan baden o manga
papanok ago so manga iila a binatang, na da den a ba kelamba a taw a ba kiran
pekabogaw.
34 Na roo ko manga siti sa Yodah ago so manga lalan sa Yarosalim na itepelek aken so
bogembog a kapekebabaya ago kasosonor ago so manga sowara a kapipiya a ginawa o
gopen kiyawing ka kagiya kelaslas so dalem a inged.
YARAMIYAS 8
“Sii sangkoto a masa, a tig o Allah, na so manga tolan o manga dato sa Yodah ago so
manga olowan on, a lagid mambo o manga tolan o manga imam ago so manga nabi a
rakes o manga tolan o manga taw sa Yarosalim na keloten ko kokoboran kiran.
2 Keyaren siran ko lopa ko bansayan sa alongan, so olan ago so langon o manga bitoon, a
giyoto so manga katohanan a pekebabayaan iran a pepanalagadan, pepangongonotanan,
pegodasan ago pesimbaan iran. So manga tolan angkai a manga taw na di den ketimo aya
pen o ba milebeng ka kelagid o tai a mibebetad ko lopa.
3 Na so langon o manga taw sangkai a marata a nasiyon a kelamba a makapegoyag sii ko
manga darpa a ron aken siran iperak na tomoon iran a matay a di sa ba maooyag, a tig o
Allah a Lebi a Mamaapaar."
So Dosa ago so Daneg
4 Na pitero raken o Allah a “Hey Yaramiyas, teroa ngka sangkai a manga taw a giyai i
pitero o Allah: Igira a pekeoteng so taw na ba di den pagembowat? Igira a miyakakedeg
ko ribat a lalan na ba di den pepeto?
5 Kagiya ka maoto, manga pagtaw aken, na ino kano raken lalayon petelikod a di raken
den pepeto? Kakapetan iyo so di benar a manga tohan iyo na pegenda kano raken
komasoy.
6 Piyamakineg aken sekano piyapiya, ogaid na kena a ba niyo dii teroa so benar. Da a ba
isa rekano bo a ba miteobat ko kamarataan iyan aya pen o ba aden a miyakaise sa
'Antonaa i ribat a miyanggolaola ko?' Oman i isa rekano na mananamar komedeg ko rek
iyan a lalan a lagid o koda a misasarsar a pegagaw ko katidawa.
7 Apiya so kagingking na katawan iyan o ay kapembalingan iyan. Na so marapatik, so
kenti ago so ogona na petomanen iran so masa a kapetogalin iran. Ogaid na sekano a
manga pagtaw aken na di niyo tegoon sa ginawa so manga ipapaliyogat rekano o Allah.
8 “Andamanaya i kapeteroa niyo ron a 'Maongangen kami ka sisii rekami so manga kitab
o Allah'? Ka aya mataan na piyamekog so maana niyan o pepamokeg a manga goro niyo
sa kitab.
9 Keyaan den so manga oongangen sii rekano; penga ririmbotan siran ago penga lilitagan.
Sabap sa inisili iran so katero o Allah na antonaa i ongangen i matatago kiran imanto?
10 Kagiya ka maoto na imbegay aken so manga karoma iran ko ped a manga mama na
tenganen o manga ped so lopa iran. Ka so kalangolangon iran a mala maito na
pepanamar manamok a nggolalan ko kapelilinsong; ndatar so manga nabi ago so manga
imam a palaya dii manalimbot.
11 Inindarainon iran so kapemolongi ko pali o manga pagtaw aken a datar o ba matag
garas. Aya di iran dii teroon na 'Mapiya so langon taman, mapiya so langon taman! apiya
pen kena a ba mapiya.
12 Manga pagtaw aken, ba niyo ipekeya so piyakasisingay a olaola niyo? Di, da den a ba
niyo kaya! Di kano matao lomimpenong. Sabap san na pematay kano a datar o
kiyapamatay o manga ped. Kebinasaan kano amay ka ndanegen ko sekano, a tig o Allah.
13 “Kowaan ko rekano so manga onga a perebasen iyo, a tig o Allah. Penga ada so onga
o manga waged iyo a obas ago so manga kayo niyo a higos, na penga gagango so manga
raon iran. So minibegay aken rekano na kowaan rekano”.
14 “Ino tano sii baden kioontod?” a ipegise o manga pagtaw o Tohan. “Na, timo tano;
itano roo a mamagapas ko kikakokotaan a siti na ron tano den mamatay! Ka so Allah a
Tohan tano na inikokom iyan a pematay tano. Bigan tano niyan sa pakatowa a ig a
mainom tano sabap ko kiyandosa tano sii rekaniyan.
15 Miinam tano sa masa a kalilintad ago kapamolong, ogaid na da a ba mapiya a
miyakatalingoma ka so bo so piyakalekelek.
16 So kapemisenga o manga koda o manga ridoay na pekeneg den roo sa pagotaraan sii
ko siti a Dan. Petebekeren so dalem a inged sii ko kapekekeg o manga koda iran.
Pekaoma so manga ridoay a peminasa ko inged tano ago so langon taman on, a so manga
siti ago so langon a manga taw ron.”
17 Na pitero o Allah a “Mataan den a pekiwitan ko sekano sa ridoay a lagid siran o

manga ala i bisa a manga nipay a di kapengangapinan, na penokaan kano iran a ipematay
niyo.”
So Kiyapakamboko i Yaramiyas sabap ko manga Taw niyan
18 Di den kebolongan so kapakamboboko aken,

pekelanag raken so poso aken.
19 Pamakineg kano! Sii ko dalem a inged
na pekeneg so kapenggoraok o manga taw aken.
“Ba da den sa Siyon so Allah?” a ipegise o manga taw.
"Ba inawaan o Allah a Yarosalim?”
Na iniise o Allah a
“Ino ako niyo dii pakakerangita ko manga barahala niyo
ago so da a manga gona niyan a katohanan o manga rait?”
20 Na ipenggoraok iran a
“Miyapasad so kaperagon; miyaipos so pangolaon,
na da tano den masabet.”
21 Miyaropet so poso aken sabap sa miyaropet so manga taw aken.

Miyabengang ako a di ako dii mboko; kiyadaan ako den sa inam.
22 Ba da a bolong roo sa Giliyad?
Ba da den a pamomolong roo?
Ino da kabolongi so pali o manga taw aken?
YARAMIYAS 9
O ba bo paridi so olo aken a mapepeno a ig,
ago so manga mata ko na pembowalan sa manga lo
kaan aken kasegadi ko gagawii daondaw so manga taw aken a piyamono!
2 O ba bo aden a ketaregan aken roo ko tanaw a kaden
a ron ako makasong sa kapagawai aken ko manga taw aken!
Ka langon siran dii sebo,
a so madakel a taw a di pemanoman sa pasad.
Daneg sabap ko da a Kaparatiyaya
3 Pitero o Allah a
"Pegiraten o manga pagtaw aken so dila iran a lagid o pana sa kipenaan iran on ko manga
kabokegan,
kena a ba iran ipepamayandeg so tito a benar sii ko inged.
Dii tondotondog so di iran dii kanggolaola sa marata,
na di ako iran kilalaan a Tohan iran.
4 Pananggilai niyo so manga siringan iyo,
na di niyo serigi so manga pagari niyo.
Ka so oman i pagari na pepanalimbot,
na so oman i siringan na pepamaganta.
5 Oman i isa na pegakalen iyan so ped iyan,
na da den a ba dii tero sa benar;
Sininanad iran a ginawa iran sa kapamokeg
na pepamangikopay siran ko di iran dii kambaradosa.
6 Dii tondotondog so kanggolaola iran sa kapangarasi ago kapanaliba.
Pegenda siran sa kakilalaa iran raken,”
a tig o Allah.
7 Kagiya ka maoto na giyai i pitero o Allah a Lebi a Mamaapaar:
“Tonaon ko so manga pagtaw aken sii ko tonaga na pagoriin ko siran,

ka giyai bo i ikidia ko kiran sabap ko kamarataan iran.
8 So manga dila iran na lagid o pekapatay a manga gasa
a dii tetaro sa kapamagakal.
So kapakinggiginawai i dii teroon o oman i isa ko siringan iyan,
ogaid na aya makekadiyat o poso iyan na so kapelitagi niyan rekaniyan.
9 Ba di patot a indaneg aken kiran angkai a manga olaola?”
a tig o Allah.
“Ba di patot a kisaopen aken ko ginawa ko ko datar ai a nasiyon?”
10 Na pitero aken a
Isegad aken ago ipemboko so manga bobongan,
na ipelendag aken so manga pepanateban ko mitataog a manga kaden.
Ka kiyamaraan den ai a kiyadaan sa taw ago da a penada on.
Di on den keneg so kapegenga o manga sapi;
miyamangawa on so manga papanok
ago miyanga ada on so manga iila a binatang.
11 Pitero o Allah a
“Nggebaan ko a Yarosalim a kebaloy a tabotod a miyanga bibinasa
a kebalingan o manga iila a binatang.
Pelaslasen ko so manga siti sa Yodah kaan da den a ba roo pekabaling.”
12 Iniise aken a
"Ya Allah, antawaa i madiyangka i ongangen a pekasabot sii?
Antawaa i piyayagan ka on kaan iyan maosay ko manga ped?
Ino mabinasa so inged?
Ino mailang a lagid o disirto a da a ba on magokit?
13 Somimbag so Allah a “Miyanggolaola ini sabap sa tiyalikodan o manga pagtaw aken

so manga ndao a inibegay aken kiran. Da ako iran paratiyayaa aya pen o ba iran
miyatoman so manga sogoan aken.
14 Ka ba iran den inonoti so manga kabaya o manga tetagas a poso iran; piyamanimba
iran so manga barahala a Baal a giyoto den so inipamangendao kiran o manga lokes iran.
15 Kagiya ka maoto na pamakinega ngka so kabasa ko, a so Allah a Lebi a Mamaapaar a
Tohan o Israil: ‘Pekaken aken angkai a manga taw sa teka, ago pekainomen ko siran sa
towa.
16 Iperak aken siran sii ko ped a manga inged a di iran katawan aya pen so manga apo
iran, na pekisaloba aken siran ko manga ridoay a makipetidawa kiran taman sa matarotop
a kambinasaa ko kiran."
"Pamimikirana niyo o antonaa i dii manggolaola!

Pakitawagen ka so manga babay a makapendiyaga;
pakisogoi ngka so manga papasang lomendag.”
18 Na pitero o manga taw a

“Pakanggagaana ngka siran sii somong kaan kami ran milendag
taman sa makagoraok kami sebenar
ago pamangeloan so manga mata mi.”
19 Pamakinega niyo so kapenggoraok roo sa Siyon:

"Miyatarotop a kiyabinasaa rektano!
Tanto tano a piyakakeya!
Ka miyanga gegeba so manga walay tano
na disomala a pagawaan tano so inged tano!”
20 Na pitero aken a
“Hey manga babay, pamakinega niyo so kabasa o Allah;
tagoa niyo sa ginawa so manga katero iyan.
Pangendaowa niyo lomendag so manga wata iyo a manga babay,
na pengendaowa niyo so manga siringan iyo sa dikir a kandiyaga.
21 Miyakasoled so kapatay ko manga walay tano
a miyokit ko manga rowasan tano.
Piyapas iyan so manga wata tano san ko manga lalan,
a lagid mambo o manga kangodaan sii ko manga padian.
22 Pemangibaraser so manga bangkay o manga taw
a lagid o tai sii ko kalopaan,
a lagid o miyagarab a pereperan a minibegak o peperagon
a da a ba on timo.”
Giyai i inisogo raken o Allah a peteroon ko.
23 Na pitero o Allah a
“O ba tekaboren o maongangen a taw so ongangen iyan

aya pen o ba pagambogen o mala i gees so gees iyan
aya pen o ba mipangandag o kawasa so kakawasaan iyan.
24 Ogaid na o aden a kebaya tekabor
na aya domadait a ipetekabor iyan na giyai:
katawan ako niyan ago siyabot iyan a saken so Allah a masalinggagaw
a dii nggolaola sa ontol ago matito sii ko doniya,
ka giyai i manga olaola a ikasosoat aken,”
a tig o Allah.
25 Pitero o Allah a “Pekatalingoma so manga gawii a ndanegen ko so langon o manga

taw a so bo so lawas iran i miyanga totori a kena a ba so poso iran,
26 A so manga taw sa Misir, sa Idomiya, sa Amon ago sa Mowab, a so langon a
kibabaling ko manga wawatan a darpa, ago apiya so manga taw sa Yodah. Langon angkai
a manga taw a lagid mambo o langon a taw sa Israil na da matori so poso iran.
YARAMIYAS 10
So Kapesimba sa manga Barahala ago so Tito a Simba
Hey manga taw sa Israil, pakinega niyo so peteroon rekano o Allah.

2 Giyai i kabasa niyan:
“Di niyo sowaa so okitokit o manga kapir;

di niyo keleken so manga nanao sii ko langit
apiya pen ipekelek ini o ped a manga nasiyon.
3 Ka so manga igma angkai a manga taw na da a gona niyan.
Pepata siran sa kayo roo sa kalasan
na di ini dii pendayan o panday a pagembaalan iyan a barahala.
4 So kiyapasad iyan na pepandaraan iran sa pirak ago bolawan,
na tekesen iran a totok kaan di den keoteng.
5 Giyangkoto a manga barahala na lagid o manga parayong sii ko peseodan;
di siran makapetero
na pekeawidan siran ka kagiya di pekalalakaw.
Di niyo siran keleken
ka di kano iran kapekasakitan
aya pen o ba kano iran kanggolaolai sa mapiya."
6 Da a ba ngka datar, ya Allah;

mala ka i gees,
na mala i kapaar so Ingaran ka.
7 Antawaa i di reka malek, hey Dato o langon a nasiyon?
Mapapatot reka ini.
Sii ko langon o manga oongangen ko manga nasiyon
ago sii ko langon o manga dato iran
na da a ba ngka on lagid.
8 Langon siran manga boneg ago manga lalong;
miyapangendao siran o da a bali niyan a kayo a manga barahala.
9 So biyatak a pirak na pegawidan a poon sa Tarsis,
ago bolawan a poon sa Opas a ipelapis sangkai a manga barahala
a pepangembaalan o manga panday sa kayo ago bolawan.
Na penditaran siran sa biro ago mariga a dinis
a inaol o manga papasang i kapangaol.
10 Ogaid na so Allah na aya tito a Tohan,
a so oyagoyag a Tohan.
Sekaniyan i Dato sa taman sa pakataman!
Igira a kiyararangitan na petebekeren so doniya;
di pekatiger so manga nasiyon ko rarangit iyan.
11 “Teroa niyo kiran a: “Giyangkai a manga katohanan a kena o ba aya miyangaden ko

manga langit ago so lopa na penga ada ko doniya ago sii ko atag o manga langit.”
So Dikir a Podipodi ko Allah
12 So Allah i miyaden ko lopa a nggolalan ko kapaar iyan;

piyakambeken iyan so doniya a nggolalalan ko ongangen iyan
na kiyayat iyan so manga langit a nggolalan ko sabot iyan.
13 Igira a pakapendadalendegen iyan so sowara niyan na pendagedeb so manga ig a
ndodoo sa kawang;
pepakagemaon iyan so manga gabon ko manga kaposan o doniya.
Pakapekilakilaten iyan igira a pegoran,
na pepakasamberen iyan so ndo a poon ko manga taliyong iyan.
14 Oman i manosiya na boda a da a katao niyan;

oman i panday sa bolawan na ipekeya iyan so manga barahala niyan.
So piteong a manga barahala a pepangembaalan iyan na baden pepekasaliba;
da a ba iran napas.
15 Baden da a oked iran a mapepagongatongat;
amay ka makatalingoma so oras a kandanega kiran na penga ada siran.
16 So Tohan o Yakob na kena a ba iran lagid,
ka sekaniyan i mimbaal ko langon taman,
na so manga Israil i pinili iyan a rek iyan a manga pagtaw.
So Allah a Lebi a Mamaapaar na aya niyan ingaran.
So Pekatalingoma a Morala
17 “Hey sekano a manga taw sa Yarosalim a kalilikopan o ridoay,

panimoa niyo so langon taman iyo sa kapagawai niyo ko inged,”
18 A tig o Allah,
“ka imanto den na ipelebad aken so kibabaling sangkai a inged.
Tanto aken siran a pekaregenan,
na mataan den a ketintiman iran so rarangit aken.”
19 Na inigoraok o manga taw sa Yarosalim a

“Kemorkaan tano!
Di den kebolongan so pali tano!
Aya pamikiran tano ron gowani na ‘Gedamen tano bo ini
na kekena tano.’
20 Ogaid na miyanga bibinasa so manga barombarong tano;
miyanga popotol so langon a gakot iyan.
Inawaan tano den o manga wata tano na miyanga ada siran;
da a ba kiran miyalamba a pekatindeg peroman ko manga barombarong tano;
da den a ba pekabitin ko manga rending on.”
21 Na pitero aken a
"Aya sabap iyan na miyanga babaloy a lalong so manga olowan tano;
kena a ba siran dii makinggonanao ko Allah.
Sabap san na kena a ba kaongangen so di iran dii nggolaolaan,
na miyamangiparak so langon a taw a pepagolowanan iran.
22 Pamakineg kano! Pekatalingoma so totol!
Pekeneg so kapendaleg o madakel a sondaro a poon ko nasiyon sa pagotaraan.
Pelaslasen iran so manga inged sa Yodah
a penga babaloy a kedenan o manga iila a binatang.
So Pangangarapan o Yaramiyas
23 “Ya Allah, katawan ko a kena a ba so manosiya i mamaapaar ko kapepaginetaw niyan;

da a taw a ba niyan kitangked so da on pen makatalingoma.
24 Danega kami ngka, ya Allah, ogaid na di ngka teralon,
a kena a ba sii ko rarangkit ka,
ka o ba kami ngka baden mapapas.
25 Tanaan ka so rarangit ka ko manga nasiyon a di ka iran kilalaan,
sii ko manga taw a kena o ba reka pesimba.
Ka piyaminasa iran so manga mbawataan o Yakob;
piyaminasa kami ran sa tarotop
ago liyaslas iran so inged a babalingan ami."
YARAMIYAS 11
Biyaroba so Kapasadan

2 “Pakinega ngka so manga katero sangkai a kapasadan na palada ngka ini ko manga taw
sa Yodah ago sii ko kipagiinged sa Yarosalim.
3 Teroa ngka a giyai i pitero o Allah a Tohan o Israil: 'Kesintaan so taw a di toman ko
manga pandoan sangkai a kapasadan.
4 Giyai so manga pandoan a inibegay aken ko manga apo iyo ko kiniliyon aken kiran a
poon sa Misir a so darpa a lagid kiran o pekerab a tonaga.' Pitero aken kiran a
'Paratiyayaa ko niyo ago tomana niyo so langon taman a ipesogo aken rekano, ka
pekabaloy kano a manga pagtaw aken ago pekabaloy ako a Tohan iyo.
5 Na itoman aken so inisepa aken ko manga apo iyo sa kambegi aken kiran sa lopa a
pekepakayan ago oodaren, a giyai den so lopa a matatangan iyo imanto."
Na somimbag ako a "Oway, Kadnan!"
6 Mandiyadi na pitero raken o Allah a "Pakalangkapa ngka langon angkai a manga katero
sii ko manga siti sa Yodah ago sii ko manga lalan sa Yarosalim. Teroa ngka a 'Pakinega
niyo so manga pandoan sangkai a kapasadan na tomana niyo.
7 Sii ko kiniliyon aken ko manga apo iyo poon sa Misir na inilalang aken kiran a
"Paratiyayaa ko niyo!" na apiya taman den imanto na lalayon aken siran pelalangan.
8 Ogaid na da ako iran pakinega aya pen o ba iran tiyago sa ginawa, ka ba iran den
initaros so kategas o manga rarata a poso iran. Na sabap sa somiyangka siran tomoman
ko kapasadan na initana aken kiran so langon a kasiksaan a minisorat on.' "
9 Mandiyadi na pitero raken o Allah a "So manga taw sa Yodah ago so manga magiinged
sa Yarosalim na miyamagopakat siran sa kasopaka iran raken.
10 Komiyasoy siran nggolaola sa manga kadostaan o manga apo iran a minda mamakineg
ko manga katero aken. Miyangongonotan siran ko salakaw a manga tohan na sinimba
iran. So ndatoan a Israil ago so ndatoan a Yodah na palaya siran den miyaroba ko
kapasadan a inembaalan aken ko manga apo iran.
11 Kagiya ka maoto na saken, a so Allah, na itena aken kiran so kamoralaan a di iran
kepalagoyan. Na apiya pen gomoraok siran sa tabang na di aken siran den pemakinegen.
12 Na so manga taw sa Yodah ago giya Yarosalim na pegapas siran ko manga katohanan
a pepangaparan iran sa manga soasoat ago nggoraok siran on sa tabang. Ogaid na
giyangkoto a katohanan iran na di kiran den pekasabet amay ka kemoralaan siran.
13 Hey manga taw sa Yodah, so manga katohanan iyo na lagid sa kadakel o manga inged
iyo, na so manga aparan a piyamakatindeg o manga taw sa Yarosalim a pesepaatan sa
manga soasoat sangkoto a piyakayaya a katohanan a Baal na lagid sa kadakel o manga
lalan ko siti.'
14 “Kagiya ka maoto, Yaramiyas, na di ngka pemangnin angkai a manga taw aya pen o ba
ngka pangangampedianen, ka di aken siran pemakinegen amay ka mamangni siran raken
sa tabang sii ko kakemoralai kiran."
15 Pitero o Allah ko manga taw sa Yodah a
"Hey pekebabayaan ko a manga taw, antonaa i kabenar iyo sa kapesong iyo ko Timplo
aken
apiya sii ko di niyo dii kanggolaola sa madakel a kamarataan?
Ba aya katao niyo ron na pekalidas kano ko indaneg rekano
a nggolalan ko kapepanapaat iyo sa manga korban?
Ipekebabaya iyo baden so di niyo dii kanggolaola sa marata!
16 “Saken, a so Allah, na bitowan aken seka gowani sa marimpoong a kayo a olibi

a mapiya a pegilain ago peteribonga sa mapiya.
Ogaid na imanto na totongen aken seka a apoy
a sokeyaw sa mala a kakerab iyan,
na giyoto a kedaan sa bali so manga sapak ka.
17 “Ka apiya saken, a so Allah a Lebi a Mamaapaar, na aya miyamola rekano sii ko inged
iyo, na imanto na minisogo aken den so kapemoralai rekano. Aya sabap iyan na
miyakanggolaola so manga taw sa Israil ago giya Yodah sa kamarataan ago
piyakakerangit ako iran a nggolalan ko kipesepaaten iran ko manga soasoat ko katohanan
a Baal."
Pikediyatan sa Marata si Yaramiyas
18 Sabap sa piyayag raken o Allah so pikediyat raken o manga taw na kiyatokawan aken
ai, ka piyakiilay niyan raken so di iran dii nggolaolaan.
19 Isako da pen ai kanggolaola na lagid ako o layam a bilibili a petondaan ko
pesombalian. Di aken bes katawan a kekadiyat siran sa kambonoa iran raken a tig iran a
"Binasaan tano so kayo ago so onga niyan;

papasen tano si Yaramiyas ko inged o manga oyagoyag
kaan di den ketoosi so ngaran iyan."
20 Na giyoto a miyangangarapan ako a tig aken a "Ya Allah a Lebi a Mamaapaar; ontol
ka i kapangokom na petepengan ka so poso ago pamikiran o manga taw. Pakiilain ka
raken so kaseopi ngka kiran ka sii aken reka inisarig so panon aken!
21 “Kabaya o manga taw sa Anatot a mbonoon ako iran, na pitero iran raken a 'O di ngka
taregen so kapepangalamat ka sii ko Ingaran o Allah na mbonoon ami seka!' "
22 Kagiya ka maoto na pitero o Allah a Lebi a Mamaapaar a "Ndanegen ko siran! So

manga kangodaan kiran na pematay ko katidawa, na so manga wata iran a manga mama
ago manga babay na pematay a ongos.
23 Pagowitan ko sa morala angkanan a mikekadiyat reka sa marata sii sa Anatot.
Pekatalingoma so gawii a kandanega ko kiran, na da den a ba kiran kelamba."
YARAMIYAS 12
So Inipakaise i Yaramiyas ko Allah
Lalayon ka maontol, ya Allah,

igira a pepenon ako reka.
Ogaid na kebaya ako reka mise makapantag ko kapepangokom ka:
Ino pepangosor so kapepaginetaw o manga rarata?
Ino makadadaya so langon a pepanalimbot?
2 Piyamola ngka siran na mimbebekaw;
pepamangeto siran ago pepamangonga.
Lalayon ka iran dii mbibitiyaraiyan
ogaid na di ka iran tatagoon sa ginawa.
3 Ogaid na makapantag raken, ya Allah, na katawan ako ngka;
pegilain ako ngka ago petepengan ka so kapepagiklas reka o poso aken.
Tondaa ngka ngkai a manga rarata a taw a lagid o manga bilibili a penombaliin!
Senggain ka siran ko gawii a ipenombali.
4 Ay katey pen a kamamarai ko lopa
ago so kapekelayon o paotanotan ko oman i pangomaan?
Ay katey pen a kapepamatay o manga ayam ago so manga papanok
sabap ko karata o manga taw a kibabaling sangkai a inged?
a so manga taw a di iran dii teroon a
'Kena a ba pekeilay o Tohan so di tano dii nggolaolaan.' "
So Sembag o Allah ki Yaramiyas
5 Mandiyadi na pitero raken o Allah a

"O inikopay reka so kiyapakikoya ngka ko manga taw
na andamanaya i kapakipekoya ngka ko manga koda?
Na o pekisosong ka ago pekilampes sii ko madaya a kalopaan
na andamanaya i kapagokiti ngka ko manga kalasan ko kilid a lawasaig a Yordan?
6 Ka aya mataan na apiya so manga pagari ngka den, a so manga ped ko pamiliya ngka
na tominipo reka.
Di iran dii pelalis sa matanog a kapesoranga iran reka.
Di ngka siran serigi
apiya pen mapiya so di iran reka dii kimbitiyarain."
Miyarata a Ginawa o Allah sabap ko manga Pagtaw niyan
7 Pitero o Allah a
"Pagawaan ko so nasiyon aken a Israil,
telikodan ko so miyapili aken a manga taw.
Peladen ko so manga pekebabayaan ko ko kapaar o manga ridoay iran.
8 So miyapili aken a manga taw na miyabaloy raken a lagid o arimaw sa kalasan;
Ngingeran ako iran sa kapegatowi raken.
Sabap san na ipekegowad aken siran.
9 So miyapili aken a manga taw na lagid o papanok
a pinggoronggorongan o manga banog a penggobat on.
Ika roo den na timoa ngka langon so manga iila a binatang
kaan siran makaoma sa kasekaba iran ko manga taw aken!
10 Madakel a manga rait a dato a peminasa ko pangomaan a piyamolaan aken ko manga
pagtaw aken,
na pelagosaken iran so lopa a miyapili aken.
Mbelowin iran a ilang a disirto so lopa a ikasosoat aken.
11 Pembaloy ini a da a bali niyan a lopa
a kiyaawaan den ago komekegaw ko kapekeilaya ko ron.
Kelaslas so dalem a inged
ka kagiya da den a ba on pesegipa.
12 Pemakaoma so pepaminasa a sondaro
sii ko langon a manga poporo a bobongan sii ko disirto,
ka pakipemono kiran o Allah so manga taw
a poon ko isa a temanaan o inged taman ko sabala on.
Da den a ba kiran kelinding!
13 Pemola so manga taw aken sa bantad ogaid na manga sorok bo a keragon iran.
Pemangikopay siran ogaid na da den a ba iran mapenggona.
Keilang so manga pereperan iran
sabap ko pesokeyaw a rarangit o Allah."
So Katero o Allah ko manga Siringan o manga Israil
14 Pitero o Allah a "Aden pen a peteroon ko makapantag ko langon a manga rarata a

nasiyon a makadadair ko lopa aken, ka siyondolan ago pitebanan iran angkai a lopa a
inibegay aken ko manga pagtaw aken a Israil a kawali iran. Pemadoten ko angkoto a
manga rarata a taw ko manga inged iran, na pemaradikaan ko so manga taw sa Yodah a
poon kiran.
15 Ogaid na oriyan o kiyapamadota ko kiran na ipengalinggagaw aken siran peman ago
pekakasowin ko so oman i isa kiran ko rek iyan a kawali ago inged.
16 Na o masowa iran piyapiya so manga okitokit o manga pagtaw aken ko kapesepa iran
sii ko Ingaran aken a tig iran a 'Matamataan ko kaooyagoyag o Allah,' a datar o
minipangendao iran gowani ko manga pagtaw aken so kiyasepa iran sii ko ingaran o Baal,
na amay ka giyoto na kirapeg siran ko manga pagtaw aken.
17 Ogaid na apiya antonaa a nasiyon a sengka raken mamakineg na mbadoten ko ago
mbinasaan ko sa tarotop," a tig o Allah.
YARAMIYAS 13
So Karsinsiliyo a Sotra
Pitero raken o Allah a “Ika roo na go ka pamasa sa karsinsiliyo a sotra na solota ngka,
ogaid na di ngka pekibasaan sa ig.”
2 Mandiyadi na miyamasa ako sa karsinsiliyo a so den so iniinsarat raken o Allah na
siyolot aken.
3 Na giyoto a miyakimbitiyarai raken peman so Allah a tig iyan a

4 “Song ka roo ko lawasaig a Yopratis na ndai ngka angkanan a karsinsiliyo a piyamasa
ngka a sosoloten ka na tapoken ka roo ko semba o lakongan.”
5 Na lomiyalakaw ako ago initapok aken ai roo sa Yopratis a so den so pitero raken o
Allah.
6 Kagiya den a matey na pitero raken o Allah a “Kasoy ka sa Yopratis na go ngka kowaa
so karsinsiliyo a iniisarat aken reka a itepok ka roo.”
7 Na somiyong ako sa Yopratis na kinowa ko ini ko semba a tiyapokan ko ron, na
miyailay aken a miyaredak ai a kiyadaan den sa bali.
8 Na pitero raken peman o Allah a “Giyai i kabasa ko:

9 Datar anan a okit a kambinasaa ko ko ipepangandag a Yodah ago giya Yarosalim.
10 Giyangkai a manga rarata a taw na pesengka mamakineg ko manga katero aken.
Pegonotan iran so manga kabaya o manga tetegas a poso iran a dii mangongonotan ago
pesimba siran ko salakaw a manga tohan. Kagiya ka maoto na pembaloy siran a lagid
angkai a karsinsiliyo a kiyadaan den sa bali!
11 Ka lagid o karsinsiliyo a maiines ko lawas o taw na aya antap aken na makapananamar
raken komapet so langon o manga taw sa Israil ago giya Yodah,” a tig o Allah, “kaan
siran mabaloy a miyapili aken a manga pagtaw a mbentog raken, podi raken ago
peselasela raken, ogaid na da ako iran pamakinega."
So manga Petegoan sa Arak
12 Na pitero raken o Allah a Tohan o Israil a “Hey Yaramiyas, na teroa ngka ko manga
taw a ‘Patot a so oman i petegoan sa arak na penoon a arak.’ Na masiken a peteroon iran
reka a ‘Ba ami di katawi a aya patot na so oman i petegoan sa arak na penoon a arak!?
13 Na teroa ngka kiran a ‘Giyai i pitero o Allah: Penoon aken a arak so langon a
kibabaling sangkai a inged a ikebereg iran a rakes o manga dato a mbawataan o Daod, so
manga imam, so manga nabi ago so langon a magiinged sa Yarosalim.
14 Pakapetetebalaan ko siran na penga roropet a lagid o manga omoy a ndatadatar den so
manga ago so manga wata, a tig o Allah. Da a kapedi aken, limo o di na
kapangalinggagaw a ba raken pekasepey sa kambinasaa ko kiran.’ “
Lalangan ko Katekabor
15 Mandiyadi na pitero aken ko manga taw sa Yodah a

“Pamakinega niyo ai ago tagoa niyo sa ginawa,
ka mitero so Allah.
16 Selaa niyo so Allah a Tohan iyo
sa di niyan rekano pen kapagowita sa maliboteng
a ron kano pemangisosong sii ko manga palaw.
Ka samaoto na so maliwanag a iinamen iyo
na mbelowin iyan a tanto a makapal a maliboteng.
17 Ogaid na o di kano pemakineg
na seged ako sa masolen
sabap ko katatakabor iyo;
nggoraok ako sebenar
na solapayan a lo so manga mata ko
ka kagiya sekano, a talon o Allah na pemangitaog a penga bibiyag.”

“Teroa ngka ko dato ago si ina iyan a
‘Tepad kano ko manga korsi iyo,
ka so matanos a manga sangkad iyo
na kepokas ko manga olo niyo.
19 So manga gimowa o manga inged sii ko pagabagatan a Yodah na penga lelekeban,
na da den a ba on pekaleka.
So langon o manga taw sa Yodah
na palaya siran den pemangitaog.’ "
20 Hey Yarosalim, langkaon iyo a manga mata niyo na go niyo ilaya

so manga ridoay a pepekaoma a poon sa pagotaraan!
Anda so manga taw a piyakisiyap reka,
a so talon a bilibili a ipepangandag ka?
21 Antonaa i kegedam ka amay ka pakidaag ka o Allah
ko manga taw a biyaloy ngka gowani a manga abanga a ka?
Ba ka di nggedam sa masakit a lagid o babay a pembaliliten?
22 Na o isei ngka a ginawa ngka a
"Ino raken ai mapenggolaola?
Ino raken ngginita so manga nditaren aken ago liyobed ako pen?"
na aya sabap iyan na so madakel a manga dosa ngka.
23 Ba mapegalin o taw sa Itiyopiya so kaitem o kobal iyan
o di na ba malowas o tingkalong so kambobortikan o bombol iyan?
Aya pen o ba ka makanggolaola sa mapiya
a malalayam nggolaola sa marata.
24 Pitero o Allah a
“Sabap roo na iperak aken so manga taw ngka a datar o okap
a ipembayog o ndo a poon ko disirto.
25 Giyai i bagian ka,
a so keokoran reka a inisenggay aken reka
sabap sa piyakalipatan ako ngka
ago siyarigan ka so di benar a manga tohan.
26 Saken den i melekas reka ko manga nditaren ka
kaan ka madiyampa.
27 Hey manga taw sa Yarosalim,

miyailay aken den so piyakagowagowad a manga olaola niyo.
Miyailay aken so kapesimbaa niyo ko salakaw a manga tohan
sii ko manga bobongan ago sii ko manga pangomaan
a lagid o mama a tetelaan ko karoma o ped iyan.
Kemorkaan kano!
Ay katey pen a di niyo kasosoti?
YARAMIYAS 14
So Laon, so Taon ago so Katidawa
Giyai i pitero o Allah ki Yaramiyas makapantag ko laon:
2 Dii ndidiyagaw so manga taw sa Yodah,

tetalogedam so manga magiinged ko manga siti on.
Pepamangiga siran ko lopa a dii mboboko,
na minisampay raken so kapenggoraok iran a poon sa Yarosalim.
3 Pesogoon o manga seselaan a taw so manga talasogoay iran sa kasageb,
na pemanong siran ko manga paridi
ogaid na da a ketoon iran on a ig.
Pepekakasoy siran a da katagoi so manga omoy iran.
Kiyaolaan siran ago kiyadaan sa inam
na kisasapengan iran a manga paras iran.
4 Miyanga oopak so lopa
ka da kaorani.
Kiyadaan mambo sa inam so manga taribasok,
na kisasapengan iran a manga paras iran.
5 Apiya so manga saladeng sii ko pangomaan
na pegawaan iran so manga wata iran a gopen inimbabawata
ka da den a otan on.
6 So manga iila a kimar na pepamanindeg ko poro o manga bobongan
a sasakaan siran a lagid o manga aso.
Kikaadaan sa bager so manga mata iran
ka da a ketateb iran."
7 Mandiyadi na pitero aken a

“Ya Allah, tabangi ngka so manga pagtaw ngka sabap ko bantogan o Ingaran ka
apiya pen so manga dosa ami i pepekarinayag ko kamarataan ami!
Mataan a omanoman ami seka talikodan;
miyakandosa kami reka.
8 Hey seka a iinamen o Israil,
a Pepanabet rekami ko masa a kamaregenan,
ino ka seyan sa mananangga sii ko inged ami,
a datar o dii melayalayag a ndeke pasin ko kagagawii?
9 Ino ka seyan sa mama a piyakatekawan
a datar o sondaro a di pekatabang?
Mataan den a maaped ka rekami, ya Allah,
na aawidan ami so Ingaran ka;
di kami ngka ngganati!”
10 Na giyoto a mitero so Allah makapantag sangkai a manga taw a tig iyan a
“Pekebabayaan iran so kateridadag;

kena a ba iran penggenggena so manga ai ran
Sabap roo na di aken siran terimaan.
Peketademan aken imanto so kadostaan iran,
na indaneg aken kiran so manga dosa iran.”
11 Oriyan iyan na pitero raken o Allah a “Di ngka pengniya so kamapiyaan angkai a
manga taw.
12 Apiya pen powasa siran na di aken den pemakinegen so kapenggoraok iran sa tabang.
Na apiya pen sapaatan ako iran sa manga soasoat a petotongen ago manga pangenengken
na di ako kiran kesoat, ka pemonoon ko siran baden a nggolalan ko katidawa, taon ago
paniyakit.”
13 Na pitero aken a “Ya Allah a Lebi a Mamaapaar, katawan ka a di kiran dii teroon o
manga nabi a ‘Da a pekatalingoma rekano a katidawa o di na ongos, ka mbegan kano o
Allah sa da a ikepos iyan a kalilintad sangkai a inged.’"
14 Ogaid na somimbag so Allah a “Giyangkoto a manga nabi na pepangalamat siran sa di

benar sii ko Ingaran aken. Da aken siran toroon o di na sogoa aya pen o ba ako kiran
miyakimbitiyarai. So manga pangingilain a pepayagen iran rekano na kena a ba raken
poon. Da a bali niyan so peperimaren iran a matag iran baden pamikiran.
15 Kagiya ka maoto na aya peteroon ko rekano makapantag sangkoto a manga nabi a da
aken sogoa a pepamangalamat sii ko Ingaran aken a di iran dii teroon a ‘Da a katidawa o
di na taon a pekatalingoma sangkai a inged,’ na so katidawa ago ongos na aya iran ipetay!
16 Na so manga taw a pepayagan iran sangkai a manga katero na pematay mambo sabap
ko katidawa ago ongos, na ipelelebad so manga badan iran san ko manga lalan sa
Yarosalim na da a ba kiran pekalebeng. Mapenggolaola ini kiran langon a rakes o manga
karoma iran ago manga wata iran a manga mama ago manga babay. Itena aken kiran so
kamoralaan a mapapatot kiran.
17 “Hey Yaramiyas, teroa ngka ini sangkai a manga taw makapantag ko kamboboko o ka:
‘Petogaan a lo so manga mata ko

sa da a rintas iyan ko gagawii daondaw.
Ka so manga pagtaw aken, a so pakatatayaan a manga wata
na miyasasa siran ko mala a minisogat kiran,
na kiyapalian siran a tanto a kapapasangan.
18 O song ako ko pepagonayonayan
na pekeilay aken so manga badan o miyamatay sa katidawa,
na o soled ako ko siti na pekeilay aken so manga taw a pepamatay a ongos.
Ndatar so manga nabi ago so manga imam
a palaya siran den petaros ko galebek iran
a da den a sabot iran.' "
Inipangangampedian i Yaramiyas ko Allah so manga Taw niyan
19 Mandiyadi na pitero aken a

"Ya Allah, ba matatarotop a kiyatalikodi ngka sa Yodah?
Ba ngka ipekegowad so manga taw sa Siyon?
Ino kami ngka tanto a pekasakiti
a di kami den kebolongan?
Miyakainam kami sa kalilintad,
ogaid na da a mapiya a miyakatalingoma.
Miyakainam kami sa masa a kapetegompiya,
ogaid na piyakalekelek baden a miyanggolaola rekami.
20 Ya Allah na miyakandosa kami reka;
peteobaten ami so manga dosa ami
a lagid mambo o manga dosa o manga apo ami.
21 Sabap ko bantogan o Ingaran ka na di ngka pesodia a Yarosalim;
di ngka pekadapanasa so darpa a ron matatago so kababantogan a korsi i ka.
Tatanodi ngka so kapasadan a pimbaalan ka mipantag rekami,
na di ngka ini mbarobaa.
22 Ba aden ko apiya antonaa a da a bali niyan a manga barahala o ped a manga nasiyon a
pekasogo ko oran?
Ba so den so manga langit i pepekabegay sa tarintik?
Kena, ka seka den, ya Allah a Tohan ami!
Kagiya ka maoto na seka i iinamen ami,
ka seka bo i dii makanggolaola sangkai langon a manga nganin."
YARAMIYAS 15
So Kapemoralai ko manga taw sa Yodah
Na pitero raken o Allah a "Apiya pen o mangadap raken so Mosa ago so Samowil a
pengangampedian raken na di aken den ikepedi angkai a manga taw. Bogawa ngka siran
ko pangilailayan aken! Pakaawaa ngka siran!
2 Na o iseen iran reka a 'Anda kami pekasong?' na teroa ngka kiran a 'Giyai i kabasa o
Allah:
" 'So ped rekano na pekasong ko kapatay a nggolalan ko paniyakit,

so manga ped na pekasong ko kapatay ko katidawa,
so pen so ped na pekasong ko kapatay sabap ko ongos,
na so ped na pemangitaog a penga bibiyag.'
3 “Pagowitan ko siran sa pat barang a pepaminasa," a tig o Allah, "a so katidawa a

pekapatay kiran, so manga aso a pemanonda ko miyapamono kiran ago so manga banog
ago manga binatang a pemangangan ko manga bangkay iran.
4 Mbelowin ko siran a ikebengang o langon o manga ndatoan ko doniya sabap ko
pinggolaola o wata o Hisikiyas a so Manasih sii ko kandadato iyan roo sa Yarosalim."
5 Pitero o Allah a
"Antawaa i kepedi rekano, hey manga taw sa Yarosalim?
Antawaa i ipemboko kano niyan?
Antawaa i tereg sa kipegiseen iyan o antonaa i mambebetad ka?
6 Inawaan ako niyo;
itataros iyo a katatalikodi niyo raken.
Sabap san na tenaan ko sekano a lima ago mbinasaan ko sekano.
Di aken sekano den ipengalinggagaw.
7 Sii ko oman i siti ko lopa iyo na pekibayog aken sekano sa ndo a lagid o okap.
Mbinasaan ko so manga pagtaw aken;
pemonoon ko so manga wata iran
ka da iran alina so manga okitokit iran.
8 Pakapendakelen ko so miyanga babalo kiran a babay
a lawan pen sa kadakel a di so peted sa kilid a ragat.
Sii ko kaooto a alongan na pagowitan ko sa pepaminasa
so manga ina o manga ngongoda kiran.
Tomparakan ko siran tomekaw
sa karomasayan ago piyakalekelek.
9 So ina a piyatayan sa pito a wata na pekikopay
a pekeregenan den menapas.
Sedep so alongan iyan sii ko kadadaondaw pen;
keyaan sekaniyan ago kekowa a diyaman.
Na so ped kiran a oyagoyag pen na pekibono aken ko katidawa
ko hadapan o manga ridoay iran."
a tig o Allah.
Mipenon si Yaramiyas ko Allah
Pitero aken a
10 “Hey ina ko; tanto a ikekarata a ginawa ko so kinimbawataan ka raken!
Lalayon ako den dii imbono ago dii ipewala o langon a taw sangkai a inged.
Da a ba aken piyagotang a pirak aya pen o ba ako miyangotang,
ogaid na di ako dii isinta o oman i isa."
11 Na pitero o Allah a
"Matamataan a sebeten ko seka, hey Yaramiyas, ko mapiya a antap;

matamataan a pakapengangampedianen ko reka so manga ridoay ngka
sii ko masa a kamoralaan ago kamaregenan.
12 “Hey manga taw sa Yarosalim, ba aden a pekaropet ko potaw,

a so potaw a pekapoon sa pagotaraan, o di na so tombaga?
13 So manga tamok iyo ago manga kakawasaan na imbegay aken a petebanen o manga
ridoay niyo sa da den a bayad iyan
sabap ko langon o manga dosa a miyasogok iyo sii ko dalem a inged iyo.
14 Pakipengongoripen aken sekano ko manga ridoay niyo
sii ko inged a di niyo katawan.
Ka so rarangit aken na ikepos iyo
a lagid o apoy."
15 Na pitero aken a
"Katawan ka, ya Allah, so kaperasaya raken.
Tademi ako ngka ago siyapa ko ngka
Saopen ako ngka ko siran oto a pesetro raken.
Di ako ngka kiran pekibonoon sii ko kapepanginsabar ka;
tanodi ngka a so di aken dii kapakakeya na sabap reka.
16 Igira a miyakatalingoma raken so manga katero o ka na piyangangan aken,
na pino iran so poso aken a kapekebabaya ago kapipiya a ginawa,
ka kagiya aawidan ko so Ingaran ka, ya Allah a Lebi a Mamaapaar a Tohan.
17 Da ako den pakipagepeda ko manga taw a dii keriyala ago dii sandag.
Miterambisa ako montod sabap sa sisii raken so lima ngka
ago sabap sa tanto ako a kiyararangitan ko pinggolaola iran.
18 Ino di kepos so kapekerasay aken,
a marangka ago di kebolongan so pali aken?
Ba ka raken datar o di kesarigan a paridi,
a datar o bowalan a pekemaraan ko pangolaon?"
19 Na somimbag raken so Allah a tig iyan a
"O teobat ka sangkanan a manga katero na pekaasalen ko seka

kaan ako ngka kapanalagadi.
O tero ka sa mala i bali, a kena a ba da a lalaw niyan a manga katero,
na pakapeteroon ko seka peman ko manga lalag aken.
Disomala a kebaloy angkai a manga taw a lagid ka,
ogaid na di ka baden pembaloy a lagid iran.
20 Makipembono siran reka
ogaid na mbelowin ko seka a lagid o pangeleban a tombaga sangkai a manga taw.
Di ka iran kedaag
ka lalayon ako reka sa kapelindinga ago kasebeta ko reka,"
a tig o Allah.
21 “Sebeten ko seka ko kapaar o manga rarata ago manga tanganiyaya,
na ipelidas aken seka ko manga lima iran."
YARAMIYAS 16
Minisapar ki Yaramiyas so Kapangaroma, Kamboboko ago Kakendori
Na miyakimbitiyarai raken peman so Allah a tig iyan a
2 “Di ka pengaroma aya pen o ba ka mbabawata sangkai a darpa.
3 Ka saken, a so Allah, na teroon ko reka o antonaa i mapenggolaola ko manga wata a
ipembawata sangkai a inged ago sii ko manga ina iran ago so manga ama iran.
4 Pematay siran ko piyakalekelek a manga paniyakit. Da a ba kiran pendiyaga na di siran
ipelebeng, ka so manga badan iran na kelagid o tai a mipepalat ko lopa. Pemonoon siran
ko katidawa o di na pematay a ongos, na so manga bangkay iran na pengengen o manga
papanok ago so manga iila a binatang.
5 “Di ka soled ko walay a dii ndiyagaan. Di ka on song a pemboko aya pen o ba ngka
karanonen so piyatayan, ka di aken den perakmatan angkai a manga taw aya pen o ba ko
siran pangalinggagaon o di na kapediin," a tig o Allah.
6 “Ndatar so manga poporo ago so manga bababa a palaya den pematay sangkai a inged.
Di siran pemangilebeng aya pen o ba kandiyagai. Da den a isa kiran bo a ba tiras ko
lawas iyan o di na magopaw ko olo niyan ko kapakamboboko iyan.
7 Da den a mbegay sa pangenengken a mitayo ko siran oto a mboboko ko miyatay, aya
pen o ba aden a megay kiran sa panginginomen a arak a ikepiya a ginawa iran apiya sii ko
piyatayan sa ama o di na ina.
8 “Na di ka soled ko walay a dii kendorian sa kapagontod ka on a magatoang kiran.

9 Ka saken, a so Allah a Lebi a Mamaapaar a so Tohan o Israil, na teroon ko reka a sii ko
manga gawii ngka ago sii ko kapegilaya ngka on na pagposen ko so manga oni o dii
kekariyala ago kikasosonor sangkai a inged. So manga lagam o kewingen a mama ago
babay na di den keneg.
10 “Amay ka teroon ka ini langon ko manga taw na ipagise iran reka a 'Ino kokomen o
Allah angkai a mala a ipemorala niyan rekami? Antonaa i ribat a miyanggolaola mi?
Antonaa i dosa a miyasogok ami ko Allah a Tohan tano?'
11 Na teroa ngka kiran a giyai i pitero o Allah: Aya sabap ai na tiyalikodan ako o manga
apo iyo, na miyangongonotan siran ko salakaw a manga tohan ago sinimba iran. Inawaan
ako iran na da iran nggolalanen so manga sogoan aken.
12 Na sekano peman, na miyamakasogok sa lebi pen a marata a di so manga apo iyo.
Ilaya niyo man, ka so oman i isa rekano na di ako niyan peparatiyayaan ka pegonotan iyan
so mategas ago marata a poso iyan.
13 Sabap san na pekaawaan ko sekano sangkai a inged ka iteog aken sekano ko inged a di
niyo katawan aya pen so manga apo iyo. Na roo niyo kesimba so salakaw a manga tohan
ko daondaw gagawii, ka di aken sekano den ikelimo."
So Kakesoy o manga Taw poon ko Kiyataogan kiran
14 Ogaid na pitero pen o Allah a "Apiya pen oto na pekatalingoma so manga gawii a so
manga taw na di iran den ipesepa a 'Matamataan sii ko kaooyagoyag o Allah a
miyakaliyo ko manga taw sa Israil a poon sa Misir,'
15 Ka aya ipesepa iran na 'Matamataan ko kaooyagoyag o Allah a miyakaliyo ko manga
taw sa Israil a poon ko inged sa pagotaraan ago poon ko langon o manga inged a tiyaogan
iyan kiran.' Ka pekakasowin ko siran ko lopa a inibegay aken ko manga apo iran.
So Pekatalingoma a Kapendadaneg
16 “Ogaid na imanto na pepakisogoan ko so madakel a pangingintoges a pengitoges

kiran," a tig o Allah. Na oriyan oto na pekisogoan ko so madakel a panganganop a
penganop kiran sii ko oman i palaw ago bobongan ago sii ko manga liyang ko manga
lakongan.
17 Ka pekeilay aken so langon a okitokit iran. Da den a ba kiran mapapagna ko
pangilailayan ko aya pen so manga dosa iran.
18 Ndanegen ko siran sa tarotop ko kamarataan iran ago manga dosa. Piseboan iran so
lopa a kawali aken, ka pino iran a piyakasisingay a manga barahala iran a da a manga
napas iyan."
So Pangangarapan i Yaramiyas a Sarig iyan ko Allah
19 Na giyoto a pitero aken a

"Ya Allah a bager ago kota aken
a so apasa aken sii ko masa a kamaregenan,
na song reka so manga nasiyon a poon ko pirowarowangan o doniya a peteroon iran a
'So manga apo ami na da den a sasarigan iran a rowar ko di benar a manga tohan,
a so da a bali niyan a manga barahala a da a miyanggolaola iran kiran a kamapiyaan.
20 Ba bes kapembaali o manga taw so rek iran a manga katohanan?
Oway, ogaid na kena a ba anan tito a manga tohan!"
21 “Kagiya ka maoto," a tig o Allah, "na pakatokaon ko so manga nasiyon,

ka pekikilala aken kiran so kapaar aken ago gees.
Oriyan oto na kekilala iran a aya Ingaran aken na so Allah."
YARAMIYAS 17
So Dosa ago so Daneg sa Yodah
Pitero o Allah a "Hey manga taw sa Yodah, so dosa niyo na minigaang o panasang a
potaw
sii ko mategas a manga poso iyo,
ago minitombok o tarem a batolakit
sii ko manga pangapanga o manga aparan iyo.
2 Apiya so manga wata iyo na pepamanimba sii ko manga aparan iyo
ago sii ko manga polaos a toos ko katohanan a Asirah
sii ko atag o oman i marimpoong a kayo ago sii ko poro o manga bobongan
3 Ago sii ko manga kapalawan ago manga pangomaan.
So manga tamok iyo ago manga kakawasaan
na palaya aken den pakipeteban ko manga ridoay niyo
sabap ko manga dosa a miyasogok iyo ko dalem a inged.
4 Isengkop iyo so katatangana niyo ko lopa
a inibegay aken rekano a dayon sa dayon a kawali niyo.
Pakipengongoripen aken sekano ko manga ridoay niyo
sii ko inged a di niyo katawan,
ka biniyag iyo so rarangit aken,
na sokeyaw ini sa taman sa pakataman."
So Ongangen a poon ko Allah
"Misisinta so taw a somasarig ko manosiya

ago somasana ko bager o lawas iyan
a petelikodan o poso iyan so Allah.
6 Lagid sekaniyan o paket sii ko disirto;

di niyan keilay so kamapiyaan igira a miyakaoma.
Pekakaden sekaniyan sii ko komekegaw a lopa ko mitataog a kaden,
sii ko matimos a lopa a da den a ba on magto.
7 “Ogaid na rarakmatan so taw a somasarig ko Allah

a aya niyan sasanaan.
8 Lagid sekaniyan o kayo a miyapamola ko kilid a lawasaig
a pendonapa so manga bekaw niyan a pepekarani ko ig.
Di sekaniyan kelek igira a miyakaoma so paninang,
na lalayon lomolombay so manga raon iyan.
Kena a ba niyan awid a akal so ragon a pangolaon,
na di den melepas monga.
9 “So poso o manosiya na lebi pen a dii manaliba a di so langon taman

a di den kebolongan so karata iyan.
Antawaa i pekasabot on?
10 Saken, a so Allah, na pepariksaan ko so manga pamikiran
ago petepengan ko so poso o manga taw,
ka aya ipekidia ko ko oman i isa na makaaayon ko manga okitokit iyan,
na imbalas aken on so mapapatot ko miyanggolaola niyan."
11 So taw a mikewasa a nggolalan ko kapanalimbot

na lagid o papanok a pelendem sa manga orak a kena o ba niyan rek.
Sii ko kakelooki ko kapepaginetaw niyan na keda on so tamok iyan
na sii sa keposan on na kerinayag den a lalong sekaniyan.
12 So Timplo tano na lagid o kababantogan a korsi

a ipapangkat sa maporo ipoon sa poonan.
13 Ya Allah, sii reka so panginam o Israil;
keyaan den so langon a petelikod reka.
Siran oto a pembelag reka na keda a lagid o manga ngaran a minisorat ko bayanek
ka kagiya inawaan ka iran, ya Allah,
a so bowalan o pepangoyag a ig.
So Pangni i Yaramiyas sa Tabang
14 Bolongi ako ngka, ya Allah, ka kebolongan ako;

sabeta ko ngka kaan ako masabet,
ka seka bo i pepodin ko!
15 Lalayon raken dii teroon o manga taw a
"Ino pen di kitoman so manga katero o Allah?
Pangnin ta a mitoman den ai imanto!"
16 Ogaid, Kadnan, na kena o ba aken reka petegelen so kitanaan ka kiran ko morala
aya pen o ba aken pisingayo so gawii a kapakamboko iran.
Katawan ka ini; katawan ka den so oman i katero a miyakaliyo ko manga modol aken.
17 Di ako ngka pekadai sa inam;
seka i apasa aken ko gawii a kamoralaan!
18 Pakakeyaa ngka so pepamanatro raken,
ogaid na di ako ngka pakapekeyaa.
Pakaleki ngka siran,
ogaid na di ako ngka pekaleki.
Talingomaan ka kiran so gawii a kamoralaan
na takepa ngka so kambinasaa ngka kiran.
So Katomana ko manga Kokoman ko Gawii a Idedeke
19 Mandiyadi na pitero raken o Allah a "Ika roo na go ka tindeg ko gimowa a Yarosalim

a bebetowan sa "Gimowa o manga Taw," a ron pesoled ago peliyo so manga dato sa
Yodah na pakalangkapa ngka roo so katero aken. Oriyan iyan na nggolaolaa ngka ini pen
sii ko langon o ped a manga gimowa o siti.
20 Teroa ngka a 'Pamakinega niyo so katero o Allah, hey manga dato sa Yodah ago so
langon o manga taw sa Yodah ago so langon a magiinged sa Yarosalim a pepamangokit
sangkai a manga gimowa.
21 Giyai i pitero o Allah: Iktiyari niyo a ginawa niyo; di kano pegawid sa apiya antonaa
roran sii ko Gawii a Idedeke aya pen o ba niyo soleden ko manga gimowa a Yarosalim.
22 Na di niyo peliyon ko manga walay niyo so apiya antonaa a awid ko Gawii a Idedeke,
na di kano penggalebek, ka senggain niyo baden so Gawii a Idedeke a soti ko Allah, a
giyoto den i inisogo aken ko manga apo iyo.
23 Ogaid na da ako pamakinega o manga apo iyo aya pen o ba iran tiyago sa ginawa.
Manga tetegas siran i olo na minda siran mamaratiyaya o di na tomoman ko
kapepakaontola ko kiran.
24 Ogaid na o paratiyayaa ko niyo piyapiya, a tig o Allah, ago di niyo isoled so apiya
antonaa roran ko manga gimowa angkai a siti sii ko Gawii a Idedeke ka isenggay niyo
raken ai a soti a gawii ko di niyo ron kapenggalebek sa apiya antona onon
25 Na o nggolaolaa niyo ai na so manga dato a manga mbawataan o Daod a rakes o
manga sanasanaan iran na pemanoled sangkai a siti a magokit ko manga gimowa iyan a
mageeda siran sa manga karo ago sii ko manga koda ago oonotan o manga taw sa Yodah
ago so kipagiinged sa Yarosalim, na giyangkai a siti na kebalingan sa taman sa
pakataman.
26 Na pemakaoma on so manga taw a poon ko manga siti sa Yodah ago so manga roroni
a inged ko melilibeta sa Yarosalim, ago pekapoon siran pen ko inged a Baniyamin, ago so
kapantaran sa kilid a ragat ago so manga kapalawan ago so pagabagatan sa inged a
Yodah. Magawid siran sa manga soasoat a isepaat iran a petotongen ago manga korban,
manga ipesoasoat a manga pangenengken, ago manga doka ago so pen so ped a manga
soasoat a ipenalamat iran roo ko Timplo o Allah.
27 Ogaid na o di ako niyo peratiyayaa ago di niyo isenggay a rek aken so Gawii a Idedeke
a nggolalan ko di niyo kapagawid sa apiya antonaa a roran a magokit ko manga gimowa
sa Yarosalim ko Gawii a Idedeke na totongen aken so manga gimowa sa Yarosalim sa di
den kepareng a apoy a pekalengan ko langon o manga torogan on."
YARAMIYAS 18
Si Yaramiyas sii ko Walay o Pangengembaal sa Koden a Bote

2 “Song ka roo ko walay o pangengembaal sa koden na roo aken reka mbegan so katero
aken."
3 Na somiyong ako ron na miyailay aken so pangengembaal sa koden a dii nggalebek ko
galingan.
4 Ogaid na igira a kiyadawayan so koden a inembaalan iyan na pelimbagen iyan peroman
so bote na magembaal sekaniyan sa salakaw a koden a lebi rekaniyan a mapiya.
5 Mandiyadi na pitero raken o Allah a

6 “Hey manga taw sa Israil, ba aken rekano di mapenggolaola so datar o inikidia o
pangengembaal sa koden ko bote? Sisii kano sa lima ko a datar o bote a matatago ko
lima o pangengembaal sa koden.
7 Igira aden a miyatero aken makapantag ko isa a nasiyon o di na ndatoan a mbedoten
aken ago nggebaan o di na mbinasaan
8 Na o teobat angkoto a nasiyon a tiyapaosan ko ago nggenek nggolaola sa marata na di
aken kiran pekatanaan so miyatekdir aken a kasiksaan.
9 Na o teroa ko a mbengonen aken ago pakapembekenen so isa a nasiyon o di na ndatoan
10 Ogaid na o nggolaola siran sa marata ago di raken peratiyaya na di aken kiran mambo
itoman so mapiya a miyatero aken.
11 “Kagiya ka maoto, hey Yaramiyas, na teroa ngka ko manga taw sa Yodah ago so
kipagiinged sa Yarosalim a 'Giyai i pitero o Allah: Titiyagaran ko sekano sa morala ago
pekediyat ako sa kandanega ko rekano. Sabap san na so oman i isa rekano na talikodi
niyo so di niyo dii kambaradosa ago alina niyo so manga okitokit iyo ago manga galebek.'
12 Ogaid na sembag siran a 'Di kami ngka mapekatareg. Iteros ami baden monot so
manga kabaya o manga rarata ago manga tetegas a poso ami.' "
13 Kagiya ka maoto na giyai i pitero o Allah:
"Isei ngka so ped a manga nasiyon:

Antawaa den i miyakaneg sa datar ai a miyanggolaola?
Tanto a piyakalekelek a pinggolaola
o manga pagtaw aken a Israil!
14 Ba kedai sa giyaw so poro o manga palaw sa Libanon?
Ba gominek mondas so matenggaw a manga ig a poon sangkoto a manga palaw?
15 Kena! Ogaid na piyakalipatan ako o manga pagtaw aken
na somiyapaat siran sa manga soasoat ko da a oked iyan a manga barahala.
Minisosong siran sii ko lalan a patot a pegokitan iran
na miyamakasilay siran a poon ko andang a manga pipiya a lalan
ka pelalakaw siran sii ko makerang a manga okita
a kena a ba tito a lalan.
16 Sabap roo na kelaslas so inged iran
a kebaloy a dii sodiin sa taman sa pakataman.
So langon a pekasagad on na penga bebengang
ago makapengelengkeleng siran ko kapememesa iran.
17 Pekiparak aken so manga pagtaw aken ko manga ridoay iran
a lagid o bayanek a pekibayog o ndo a pepekapoon sa sebangan.
Telikodan ko siran na di ko siran tebangan
sii ko gawii a kapemoralai kiran."
So Kadiyat ki Yaramiyas
18 Na pitero o manga taw a "Itano roo, ka kediyatan tano si Yaramiyas sa marata! Aden
pen a rek tano a manga imam a makapengendao rektano ko kitab, ago manga oongangen
a pekamosawir rektano, ago ped a manga nabi a pekapayag ko lalag o Allah. Na,
idimanda tano sekaniyan na di tano tagoon sa ginawa so apiya antonaa a peteroon iyan."
19 Na pitero aken a
"Ya Allah, tagoa ko ngka sa ginawa;
pamakinega ngka so dii teroon o manga ridoay aken!
20 Ba patot a mbedalan iran so mapiya sa marata?
Ka komiyalot siran sa galebo a keologan raken.
Tademi ngka so kiyaadap aken reka
a inipangangampedian aken siran
kaan mitareg so kapekerarangiti ngka kiran.
21 Ogaid na imanto na pengnin ko a mamatay a ongos so manga wata iran
ago manga papalad siran ko kapaar o pedang!
Pengnin ko a manga babalo so manga babay ago panga adaan sa manga wata!
Pengnin ko a mamatay a paniyakit so manga totoa a mama
ago mapamono so manga kangodaan ko katidawa!
22 Pengnin ko a maneg so kapemanisek sa kalek sii ko manga walay iran
amay ka mitekaw a kapakisondoli ngka kiran sa manga sondaro,
ka inikalot ako iran sa galebo kaan ako iran madakep,
ago tomiyaan siran sa militag ko manga ai aken.
23 Ogaid na katawan ka, ya Allah,
so langon a kadiyat iran sa kambonoa raken.
Di ngka siran perilai ko manga sala iran
aya pen o ba ngka papasa so manga dosa iran.
Pakidaagen ka siran ko hadapan ka,
na kidian ka kiran so lagid ai sii ko kapekerarangiti reka.
YARAMIYAS 19
So Miyaropet a Omoy
Pitero raken o Allah a "Ika roo na go ka pamasa sa omoy a bote. Na pakaonota ngka so
ped ko manga pelokelokesen ko manga taw ago manga totoa a imam
2 Na song kano ko Balintad a Bin Himon a marani ko isoled ko siti a bebetowan sa
'Gimowa a Tebi a Koden' na pakalangkapa ngka roo so manga katero a imbegay aken
reka.
3 Teroa ngka a 'Hey manga dato sa Yodah ago manga magiinged sa Yarosalim, giyai i
pitero o Allah a Lebi a Mamaapaar a so Tohan o Israil: Telingomaan aken angkai a darpa
sa morala a ikeseleng o manga tangila o oman i isa a pekaneg on.
4 Ka tomiyalikod raken angkai a manga taw na kiyaseboan iran angkai a darpa.
Miyamanapaat siran on sa manga soasoat ko salakaw a manga tohan a di iran katawan aya
pen o ba so manga apo iran o di na so manga dato sa Yodah. Pino iran angkai a darpa a
rogo o da a manga peleng iyan a manga wata.
5 Miyangon siran sa manga aparan ko katohanan a Baal a pepanotongan iran ko manga
wata iran a soasoat ko Baal sii ko apoy. Da ko kiran ai sogoon aya pen o ba aken
miyaaloy o di na miyapamikir.
6 Kagiya ka maoto na pekatalingoma so manga gawii, a tig o Allah, a di den mbetowan o
manga taw angkai a darpa sa 'Topit' o di na so 'Balintad a Bin Hinom,' ka aya imbeto iran
on na 'Balintad a Penombalian.'
7 “Sii sangkai a darpa na kowaan ko sa gona so manga kadiyat o manga taw sa Yodah
ago giya Yarosalim. Peladen ko siran ko kapaar o siran oto a kebaya kiran mono, ka
pakipemono aken siran ko manga ridoay iran sii ko katidawa. Pekikan aken so manga
bangkay iran ko manga papanok ago manga iila a binatang.
8 Pelaslasen ko angkai a siti ago mbelowin ko a radawan o manga taw. Penga bebengang
so langon a pepamanagad on na makapengelengkeleng siran sabap ko langon o inisiksa
on.
9 Tanto aken a pekaregenan so manga taw sangkai a siti sii ko kalilikopi ron o manga
ridoay iran a kebaya kiran mono, na sabap ko kareregeni kiran na ken iran so sapo o
manga wata iran a manga mama ago manga babay ago so sapo o manga ped iran."
10 Na pitero pen o Allah a "Yaramiyas, ropeta ngka so omoy sii ko kamamasai ron o
miyamangonot reka
11 Na teroa ngka kiran a 'Giyai i pitero o Allah a Lebi a Mamaapaar: Peropeten ko angkai
a manga taw ago giyangkai a siti a lagid o kaperopeta o taw ko bote a omoy a di den
keompiyaan. So miyamatay na ipelelebeng sii sa Topit taman sa da den a keminan on.
12 Giyai i penggolaolaan ko sangkai a siti ago so manga kibabaling on, a tig o Allah.
Mbelowin ko ini a datar a Topit.
13 So manga walay sa Yarosalim ago so manga walay o manga dato sa Yodah na
keresikan a datar angkai a darpa a Topit, ka kagiya sii ko atep angkoto a manga walay na
miyamanotong siran sa manga soasoat sii ko manga bitoon a aya iran katohanan, ago ron
siran miyamanapaat sa manga panginginoman ko salakaw a manga tohan."
14 Oriyan iyan na inawaan i Yaramiyas a Topit a ron sekaniyan siyogo o Allah sa

kapagalamat iyan. Na tominindeg sekaniyan ko lamalama o Timplo o Allah na pitero
iyan ko langon o manga taw roo a
15 “Giyai i pitero o Allah a Lebi a Mamaapaar a Tohan o Israil: Pamakineg kano! Itena
aken sangkai a siti ago sii ko manga inged ko melilibeta on so langon a morala a miyatero
aken a indaneg aken rekano, ka kagiya manga tetegas kano i olo a di niyo pekinegen so
manga katero aken."
YARAMIYAS 20
Si Yaramiyas ago si Pasor
Na si Pasor a wata i Imir a aya komikibir ko Timplo na kagiya maneg iyan angkai a
pepangalamaten i Yaramiyas
2 Na piyakipamadasan iyan so nabi Yaramiyas ago piyakipatong iyan a rantay sii ko
gimowa o Timplo a bebetowan sa 'Gimowa o Baniyamin.'
3 Sii ko miyakatalondog a gawii ko kiyabokai i Pasor ki Yaramiyas sa rantay na pitero
rekaniyan i Yaramiyas a "Ipoon imanto na aya imbeto reka o Allah na kena a ba Pasor, ka
'Piyakalekelek ko Mbalabala.'
4 Ka pitero o Allah a 'Pagowitan ko seka ago so langon a ginawai ngka sa piyakalekelek,
na keilay ngka so kapemonoa kiran a pedang o manga ridoay iran. Peladen ko so langon
o manga taw sa Yodah ko kapaar o dato sa Babilon na pemiyagen ago ipenaog iyan so
ped kiran roo sa Babilon, na so ped na pemonoon iyan a pedang.
5 Pekiagaw aken angkai a siti ko manga ridoay iran na petebanen iran langon so
kakawasaan on, a so langon a pitemotamokan, so langon o manga ala i arga, ago so pen
so langon a manga nganin sii ko petegoan sa tamok o manga dato sa Yodah. Na kowaan
iran ai ago pagowiten iran roo sa Babilon.
6 Na seka, Pasor, ago so langon a pamiliya ngka na mbiyagen ago iteog sa Babilon. Roo
ka petay ago kilebeng, seka ago so langon o manga ginawai ngka a piteroan ka sa manga
kabokegan.' "
Mipenon si Yaramiyas ko Allah

7 Ya Allah, piyagayokan ako ngka sa kambaloy aken a nabi na piyakiayokan aken reka a
ginawa ko.
Lebi ka a mabager a di saken na diyaag ako ngka.
Di ako dii ikela o manga taw ko mababasa alongan;
pepagongatongaten ako o oman i isa.
8 Igira a pepangalamat ako na di aken dii pelalis a 'Pekatalingoma so kapangarasi ago
kapaminasa!'
Na lalayon ako pepagitowitoon ago dii sodiin
sabap ko kapepakalangkapa ko ko katero o ka, ya Allah.
9 Ogaid na igira a di aken dii teroon a 'Di aken den pagaloin so Allah,'
o di na 'Di aken sekaniyan peman ipetero,'
na kebaloy so katero o ka a lagid o apoy a pekeboro ko dalem a ginawa ko
a pekerab sii ko poso aken ago manga tolan.
Diyokawan ako sa kapegerena ko ron,
na da aken den ai magaga.
10 Pepekaneg ako sa madakel a dii mamagetonga a di iran dii teroon a
"Aya pepakalangkapen iyan na aden a piyakalekelek ko mbalabala!
Na, pakayaan tano sekaniyan! Pakaitoon tano!'
Apiya pen so manga ginawai aken gowani
na penayaon iran so kakisosong aken a tig iran a
'Masiken a masaliba sekaniyan
kaan tano madaag ago kasaopi.' "
11 Ogaid na mipageepeda aken seka, ya Allah,

a pepanabang raken a lagid o mabager a sondaro;
sabap roo na so siran oto a pepamanatro raken na kisosong ago keolaan.
Tanto siran a pekadapanas, ka di ako iran kedaag,
na di den kelipatan so kakeyai kiran.
12 Ya Allah a Lebi a Mamaapaar, maontol so kapetepengi ngka ko manga taw,
ka pepariksaan ka so madadalem ko poso iran ago pamikiran.
Na, pakiilain ka raken so kasaopi ngka ko manga ridoay aken,
ka sii aken reka inimbayorantang so panon aken.
13 Pagidaidai niyo so Allah!

Podiya niyo so Allah!
Ka pepokasen iyan so manga miskin
ko kapaar o manga rarata a taw.
14 Pangnin ta a kasintaan so gawii a kinimbawataan raken!

Pangnin ta a pakalipatan so gawii a inimbawata ako ron o ina aken!
15 Kasintaan so mama a miyapakapiya niyan a ginawa o ama aken
ko kiyateroa niyan on a
"Aden a wata a ka a bago a mama!"
16 Pangnin ta a giyangkoto a mama na madatar o manga inged a bininasa o Allah sa da
den a ba niyan on kapedi.
Pangnin ta a makaneg sekaniyan sa kandidiyagaw ko kapipita
ago so lalis sa katidawa ko kaoto a alongan
17 Sabap sa da ako niyan bonoa ko da raken pen kimbawataan
kaan mabaloy so tiyan o ina aken a kobor aken
ko kikaoogaten iyan raken sa taman sa pakataman.
18 Ino ako pen pekaliyo ko tiyan o ina aken
sa kapekaokit aken sa karomasayan ago kapakamboboko
ago so kapetay ko kayaan.
YARAMIYAS 21
Da Tarimaa o Allah so Pangni o dato Sidikiyas
Minitalingoma so katero o Allah ki Yaramiyas isako pakasongen rekaniyan o dato

Sidikiyas si Pasor a wata i Malkihas, ago so imam a si Sipaniyas a wata i Maasiyas sa
kateroa iran on a
2 “Kapedipedi ka bo na pangniya ngka ko Allah a tabangi kami niyan, ka penggobaten
kami i Nibokadnisar a dato sa Babilon. Baanda nggolaolaa o Allah so isa ko manga ala a
galebek iyan para rekami kaan iyan mabaas si Nibokadnisar sa kapakaawaa niyan ko
manga sondaro niyan sangkai a siti."
3 Na pitero kiran i Yaramiyas a "Kasoy kano ko dato Sidikiyas na teroa niyo ron a
4'Giyai i pitero a Allah a so Tohan o Israil: Mbelowin ko a da a oked iyan so manga
gomaan iyo a pegosaren iyo ko di niyo dii kapakitidawa ko dato Nibokadnisar ago so
manga sondaro niyan a lomilikop imanto ko pangeleban o siti. Na pekasoleden ko so
manga ridoay niyo ko lembak angkai a siti.
5 Saken den i makipetidawa rekano a nggolalan ko kala aken i kapaar ago bager sii ko
tanto aken rekano a kapekerarangiti.
6 Siksaan ko so langon a kibabaling sangkai a siti a ndatar so manosiya ago so manga
ayam, na pematay siran ko piyakalekelek a paniyakit.
7 Oriyan iyan, a tig o Allah, na si Sidikiyas a dato sa Yodah ago so manga sanasanaan
iyan ago so ped a manga taw sangkai a siti a miyakapagoyag ko katidawa, paniyakit ago
ongos na palaya aken siran den peladen ki Nibokadnisar a dato sa Babilon ago sii ko
manga ridoay iran a kebaya kiran mono. Pemonoon iyan siran langon sa da den a ba on
limo, kapedi o di na gagaw.'
8 “Liyo ron pen na teroa niyo ko manga taw sa Yarosalim a 'Giyai i pitero o Allah: Apiya
pen oto na mbegan ko sekano sa bayabaya sa kapemilia niyo ko sowaan a ikeoyag iyo, o
di na so sowaan a ipetay niyo.
9 Apiya antawaa i telimbagak sangkai a siti na petay a pedang, taon o di na paniyakit.
Ogaid na apiya antawaa i meliyo ago sengkop ko manga taw sa Babilon a lomilikop
rekano na makapegoyag; kilidas iyan so kaoyagoyag iyan.
10 Ka piyasad aken den sa ginawa ko a kasiksaa ko sangkai a siti, a tig o Allah, a kena a
ba so kapagongowi ko ron. Kepalad ai ko kapaar o dato sa Babilon na totongen iyan sa
tarotop.' "
Manga Lalangan ko Dato sa Yodah
11 Na siyogo ako o Allah sa kapeteroa ko ko pamiliya o dato sa Yodah a "Pamakinega

niyo so katero o Allah!
12 Hey mbawataan o dato Daod, giyai i pitero o Allah:
"Pagokasen iyo so ontol a kokoman oman mapita;

lindinga niyo so manga taw a pepanalimbotan
ko pepamanalimbot kiran,
ka o di, na pemborngat rekano so gani aken
a lagid o pekerab a apoy a da den a ba on pekapareng
sabap ko manga rarata a miyanggolaola niyo.
13 “Hey Yarosalim a mababangon ko mapapantar a lakongan

sii ko kaporoan o balintad,
na pesorangen ko seka, a tig o Allah
seka a dii tero sa "Antawaa i pekasondol rekami?
Antawaa i pekasoled ko kota ami?"
14 Indaneg aken reka so patot ko miyanggolaola ngka, a tig o Allah.
Totongen aken so torogan ka
ko apoy a melaslas ko langon taman a melilibeta on."
YARAMIYAS 22
So Kandanega ko Manga rarata a Dato
Pitero raken o Allah a "Song ka ko torogan o dato sa Yodah na teroa ngka rekaniyan a
2'Pamakinega ngka angkai a katero o Allah, hey dato sa Yodah a moontod ko korsi o
Daod, a seka ago so pen so manga sanasanaan ka ago so manga pagtaw ngka a
pepamangokit sangkai a manga paitaw.
3 Giyai i pitero o Allah: Nggolaola kano sa maontol ago matito. Lindinga niyo so taw a
peselimbotan ko peselimbot on. Di niyo pemaratai o di na pengarasii so manga
mananangga, so da a manga ama iyan o di na so manga balo, na di niyo pemonoa so da a
manga sala iyan sii sangkai a darpa.
4 O tomana niyo angkai a manga sogoan na so manga dato a mbawataan o Daod na
mitataros den a kapepekaokit iran ko manga gimowa angkai a torogan a mageeda sa
manga karo o di na kikokoda a oonotan o manga sanasanaan iran ago manga pagtaw.
5 Ogaid na o di niyo tomana angkai a manga sogoan, a tig o Allah, na ipesepa aken a
giyangkai a torogan na kebinasa.' "
6 Ka giyai i pitero o Allah makapantag ko torogan o dato sa Yodah:
"Apiya pen sii raken na giyangkai a torogan na lagid sa kataid o lopa a Giliyad
ago so manga kapalawan sa Libanon,
na matamataan a mbelowin ko ini a lagid o disirto,
lagid o manga inged a da a ba on mababaling.
7 Sogo ako sa manga taw a nggeba on
a aawidan o oman i isa so patok iyan,
na nggorain iran so manga pipiya a tokod iyan ago dolog a kayo a sidro
na ipagitog iran ko apoy.
8 “So manga taw a poon ko ped a manga nasiyon na pemanagad sangkai a siti na
pemagisei siran a tig iran a 'Ino ai penggolaolaa o Allah sangkai a kababantogan a siti?'
9 Na aya isembag iran na 'Sabap sa tiyalikodan iran so kapasadan a inembaalan kiran o
Allah a Tohan iran na sominimba siran ago miyanonoatan ko salakaw a manga tohan.' "
So Pitero i Yaramiyas makapantag ki Yahowahas
10 Hey manga taw sa Yodah, di niyo pelendagen so dato Yosiyas a miyabono

aya pen o ba niyo mbokoon so kiyada iyan;
ka nggoraoken iyo baden sebenar si Yahowahas a wata iyan a minitaog den,
ka di sekaniyan den pekakasoy
aya pen o ba niyan mailay so inged a pimbawataan on.
11 Ka giyai i pitero o Allah makapantag ki Yahowahas a wata i Yosiyas a aya

miyakasambi ki ama iyan a dato sa Yodah: "Miyada sekaniyan sangkai a darpa na di den
pekakasoy.
12 Ka petay sekaniyan ko darpa a inowitan iran on ko kiyabiyaga on, na di niyan den
keilay angkai a inged."
So Pitero o Allah makapantag ki Yahoyakim
13 “Kemorkaan so dato a pembangonen iyan so torogan iyan a nggolalan ko di ontol,

ago pepekalaan iyan a nggolalan ko kapangarasi,
a di niyan dii pakanggalebeken so manga pagtaw niyan
a kena a ba niyan siran pesokayan.
14 Aya di niyan dii teroon na 'Ipagembaal aken a ginawa ko sa mala a torogan
a aden a manga dadaya a rowang on sa poro.'
Na tegoan iyan ai sa manga ala a rowasan
ago manga pangeleban a sidro
na pintoraan iyan a mariga so manga rowang iyan.
15 “Ba aya ikebaloy ngka a mapiya a dato

na so kapembangona ngka ko walay a sidro a matanos a di so manga ped a walay?
Pamimikirana ngka so ama a ka.
Ba niyan da kasoaten so matag bo pangenengken ago panginginomen?
Maontol sekaniyan ago matito ko langon a di niyan dii nggolaolaan,
na giyanan i sabap o kapetegompiya niyan.
16 Inipaninindeg iyan so kabenar o manga miskin ago so kikadodowaanan
na inipakapiya niyan ai langon.
Na ba di giyanan i ibarat o kapepangongonotani raken?" a tig o Allah.
17 “Ogaid na seka, na aya bo a pananamaran ka
na so di ontol a kapakalaba
ago so kapamonoa ko da a manga sala iyan
ago so kapangalampas ago kapangarasi."
18 Kagiya ka maoto na giyai i pitero o Allah makapantag ki Yahoyakim, a wata i

Yosiyas, a dato sa Yodah:
"Di den ipemboko o manga taw so kiyapatay niyan

aya pen o ba iran teroa a
'Inikarata oto a ginawa ko, hey pagari aken!'
o di na 'Inikarata a ginawa ko, hey babay aken!'
Di iran sekaniyan ipelendag a tig iran
'Aidaw, so kadnan aken! Aidaw, so dato aken!'
19 Ipelebad sekaniyan a lagid o kimar
a tondaan na ipelebad ko liyo o manga gimowa a Yarosalim"
So Katero i Yaramiyas makapantag ko Indaneg sa Yarosalim
20 Pitero o Allah a "Hey manga taw sa Yarosalim, song kano sa Libanon na goraok kano
sa kapakamboboko,
song kano sa Basan na pelalalis kano sa matanog,
goraok kano sa kapakamboboko roo ko kapalawan sa Mowab,
ka tiyaban so langon o manga abanga iyo.
21 Liyalangan aken sekano sii ko katetagompiya niyo pen,
ogaid na pitero iyo a 'Di ami seka pekinegen.'
Giyai den i olaola niyo ko tenday a omor iyo;
da ako niyo den paratiyayaa.
22 Imbayog o ndo so langon o manga olowan iyo,
na penga bibiyag so manga abanga iyo.
Samaoto na kediyamanan kano ago keyaan
sabap ko langon a marata a miyanggolaola niyo.
23 Aya katao niyo ron na malilinding kano a lagid o papanok
a sesalag sii ko manga kayo a sidro sa Libanon,
ogaid na sayana kano a makaperego
amay ka makatalingoma rekano so manga masakit
a lagid o penggedamen o babay a pembaliliten!
So Kandanega ki Yahoyakin
24 “Mataan ko kaooyagoyag aken," a tig o Allah, "ka pagawaan ko seka, hey Yahoyakin a
wata i Yahoyakim, a dato sa Yodah. Apiya pen seka i sising a ipesiliyo a misosolot sa
kawanan a lima ko na pelasen ko seka den.
25 Peladen ko seka ko siran oto a mananamar reka mono a tanto ngka a ipekelek, a si
Nibokadnisar a dato sa Babilon ago so manga sondaro niyan.
26 Ipelebad aken seka ago si ina a ka sii ko ped a inged a da kano ron mbawataan, na roo
kano palaya petay.
27 Di kano den pekakasoy ko inged a pekedali kano ron komasoy!"
28 Ba giyangkai a mama a si Yahohakin na lagid o miyaropet a koden a inipilak,

a so nganin a da den a ba on kebaya?
Ino teogen sekaniyan ago so manga wata iyan,
a ipelebad roo ko inged a da den a katawi ran on?
29 Hey inged a Yodah, inged a Yodah, inged a Yodah!
Pamakinega ngka so pitero o Allah:
"Bilangen iyo angkai a mama a datar o da a wata iyan,
a so mama a di den petegompiya ko tenday a omor iyan,
ka da den a isa bo ko kebabadan on a ba pekaontod ko korsi o Daod
a makapendato sa Yodah."
YARAMIYAS 23
So Maontol a Moriyataw o Daod
Pitero o Allah a "Kemorkaan so manga olowan o manga pagtaw aken, a giyoto so manga
pananagikor ko manga bilibili aken, ka pembinasaan iran siran baden ago ipeperak!"
2 Kagiya ka maoto na giyai i pitero o Allah a Tohan o Israil sangkai a manga
pananagikor: "Da niyo tagikora so manga pagtaw aken, ka iniparak iyo baden ago
piyamogaw. Sabap san na itena aken rekano so marata a miyanggolaola niyo.
3 Ogaid na timoon aken so miyalamba a manga pagtaw aken a poon ko langon o manga
inged a piyarakan aken kiran na ikesoy aken siran ko inged iran, na kebabad siran on ago
tanto a pendakel.
4 Sa masa oto na pakapegolowanen ko kiran so manga pananagikor a siyap kiran, na di
siran den kewan o di na kelek aya pen o ba aden a mada kiran," a tig o Allah.
5 “Ka pekatalingoma so manga gawii," a tig o Allah,

"a pakapendatoon ko kiran so maontol a moriyataw o Daod
a so Dato a aya ipendato iyan na kaongangen,
na ipenggolalan iyan so kokoman ago so kaontol sii ko inged.
6 Sii ko manga gawii niyan na kesabet so manga taw sa Yodah
na makapeginetaw so manga Israil a malilinding.
Na giyai i ngaran a imbeto rekaniyan: 'So Tohan a so Kapekaontol tano.'
7 “Sii ko pekatalingoma a manga gawii," a tig o Allah, "na so manga taw na di iran den
ipesepa a 'Matamataan ko kaooyagoyag o Allah a miyakaliyo ko manga Israil sa inged a
Misir,'
8 Ka aya ipesepa iran na 'Matamataan ko kaooyagoyag o Allah a miyakakasoy ko
mbawataan o Israil ko rek iran a inged a poon sa pagotaraan ago poon ko langon a inged a
piyarakan iyan kiran.' Sa masa oto na pekabaling siran ko rek iran a inged."
So Pitero i Yaramiyas makapantag ko manga Nabi
9 Lagid o miyaropet so poso aken sabap ko pepamokeg a manga nabi,

na petebaden so langon o lawas aken.
Sabap ko Allah,
sabap ko soti a manga katero iyan
na lagid ako o pekebereg a mama,
a lagid o mama a diyaag o arak.
10 So inged na mapepeno a manga taw a di toman sa pasad,
na sabap ko paninta o Allah na komekegaw so lopa
ago miyanga lalayon so manga pananateba.
So manga nabi na dii nggolaola sa marata
na ipepangarasi iran so kapaar iran.
11 “Ndatar so manga nabi ago so manga imam a da a simba iran;

apiya sii den ko Timplo aken na miyailay aken siran a dii nggolaola sa marata," a tig o
Allah.
12 “Kagiya ka maoto na so manga lalan a pekedegen iran na pekalindeg ago
pekaliboteng,
na kisosong siran on ago pemangiponsad.
Ka pekatanaan ko siran sa morala
amay ka pekatalingoma so masa a kandanega kiran,"
a tig o Allah.
13 Miyailay aken a piyakagowagowad so dii nggolaolaan o manga nabi sa Samariya;

pepangalamat siran sii ko ngaran o katohanan a Baal
na diyadag iran so manga pagtaw aken a Israil.
14 Ogaid na pekeilay aken so manga nabi sa Yarosalim a dii nggolaola sa lebi pen a
marata a di giyoto!
Di siran dii sina ago pepangalamat sa manga kabokegan.
Pepangoyatan iran so siran oto a dii nggolaola sa marata
sa taros a da den a ba kiran gominek nggolaola sa kamarataan iyan.
Sii raken na lagid siran langon sa karata o manga taw sa Sodom ago giya Gomorah."
15 Kagiya ka maoto na giyai i pitero o Allah a Lebi a Mamaapaar makapantag ko manga

nabi sa Yarosalim:
"Pekaken ko siran sa teka

ago pekainomen ko sa ig a totowaan
ka kagiya miyakapoon ko manga nabi sa Yarosalim
na lomiyangkap so kambaradosa ko dalem a inged."
16 Giyai i pitero o Allah a Lebi a Mamaapaar ko manga taw sa Yarosalim:

"Di niyo pemakinega so di rekano dii teroon angkoto a manga nabi;
di benar so pepakipanginam iran rekano.
So di iran rekano dii teroon na matag baden arangan o pamikiran iran
a kena a ba so piyakitero aken kiran.
17 Lalayon iran dii teroon ko siran oto a pepamangongkir ko manga katero aken a
'Pitero o Allah a pekapiya so bobolos iyo!'
na sii ko langon a pepamangonot ko kategas iran i olo na tig iran a
'Da den a marata a pekatalingoma rekano!'
18 Ogaid na antawaa sangkai a manga nabi i ba niyan katawi so lalag o Allah?
Da a ba kiran miyakaneg o di na miyakasabot ko pitero iyan
aya pen o ba niyan tiyago sa ginawa.
19 Ogaid na ilaya niyo man, ka pemborngat so gani o Allah a lagid o barabarat
Lagid o sobosobo na tanto a mabager a kapesember iyan
sii ko manga olo o manga rarata a taw.
20 Na di den keda so rarangit o Allah
taman sa di niyan minggolalan so langon o manga antap iyan.
Sii ko pekatalingoma a manga gawii na seboten iyo ai piyapiya.
21 Da aken sogoa angkai a manga nabi,
ogaid na piyakalangkap iran baden so manga katero iran;
da ako kiran pakimbitiyarai,
ogaid na inipangalamat iran baden so lalag aken kon.
22 Ogaid na o katawi iran so manga lalag aken
na mipenolon iran so manga katero aken ko manga pagtaw aken
ago mapekatalikod iran siran ko manga rarata a okitokit iran
ago so di iran dii kambaradosa.
23 “Ba aya katao ron o manga taw na Tohan ako a sii bo ko isa a darpa," a tig o Allah,
"a kena a ba Tohan a sisii ko langon a darpa?
24 Ba aya katao iran on na makapetepok so taw ko misosolen a darpa
a di aken on den keilay?
Ba iran di katawi a sisii ako ko mbalabala ko manga langit ago sii ko doniya?" a tig o
Allah.
25 “Miyaneg aken so dii teroon angkoto a manga nabi a dii mangalamat sa di benar sii ko
Ingaran aken a tig iran a 'Aden a taginepen aken! Aden a taginepen aken!'
26 Ay katey pen a kapendadaga iran ko manga pagtaw aken a nggolalan ko manga
kabokegan a sarag a akal iran?
27 Pipikiren iran a so manga taginepen a pepanotolen iran ko oman i isa na kesabapan sa
kakelipati raken o manga pagtaw aken a lagid mambo o manga apo iran a miyakalipat
raken ko kapesimbaa iran ko katohanan a Baal.
28 So nabi a miteginep na mapanotol iyan so taginepen iyan, ogaid na so nabi a
kiyabegan ko katero aken na disomala a ipenolon iyan ai sa ontol. Ka antonaa i bali o
ragami ko kipegabain on ko kapenggonai ko malimegas a pereperan?" a tig o Allah.
29 Ba di so katero aken na lagid o apoy a pepangori ko pirak," a tig o Allah, "ago lagid o
rompi a pepekaropet ko lakongan?
30 “Kagiya ka maoto," a tig o Allah, "na peridoon ko so manga nabi a so oman i isa kiran
na pepenekeon iyan so manga katero o ped iyan a di niyan dii teroon a poon raken kon.
31 Oway," a tig o Allah, "na peridoon ko so manga nabi a pepekasen iran so manga dila
iran a di iran dii teroon a 'Giyai i pitero o Allah.'
32 Mataan a peridoon ko angkoto a manga nabi a ipepangalamat iran so manga taginepen
iran a di benar," a tig o Allah. "Sii ko kapepanotola iran on na pendadagen iran so manga
pagtaw aken a nggolalan ko di iran dii kapamokeg ago katekabor. Da aken siran toroon
aya pen o ba aken siyogo. Da den a kitabang iran sangkai a manga taw," a tig o Allah.
So di Benar a manga Nabi ago so di Benar a manga Katero iran
33 Pitero raken o Allah a "Hey Yaramiyas, amay ka isean ka o manga pagtaw aken o di
na isa a nabi o di na imam a tig iran a 'Antonaa i mapened a pengalamaten a piyakiawidan
reka a akal o Allah imanto?' na teroa ngka kiran a 'Sekano den i miaawid a akal o Allah,
na imbowang kano niyan!'
34 O aden a nabi o di na imam o di na isa ko manga pagtaw aken a peteroon iyan a 'Aden
a mapened a pengalamaten aken a poon ko Allah,' na ndenegen ko angkoto a mama ago
so pamiliya niyan.
35 Ka aya patot a peteroon o oman i isa rekano ko ginawai niyan o di na tonganay niyan
na 'Antonaa i inisembag o Allah?' o di na 'Antonaa i pitero o Allah?'
36 Ogaid na o ba niyo den teroa peroman a 'So mapened a pengalamaten a poon ko
Allah.' Ka pegosaren o oman i isa a taw angkai a manga katero kaan iyan
mapakapangimbenar so manga ped a so manga katero iyan na poon ko Allah. Na giyai i
kapembibida niyo ko manga katero o oyagoyag a Tohan, a so Allah a Lebi a Mamaapaar a
Tohan.
37 “Hey Yaramiyas, iseen ka ko manga nabi a 'Antonaa i inisembag reka o Allah?' o di na

'Antonaa i pitero o Allah?'
38 Na opama ka aya isembag iran na 'Giyai na mapened a pengalamaten a poon ko Allah,'
apiya pen inisogo aken a di iran den ai teroon peroman na teroa ngka kiran a
39'Matamataan a iteog aken sekano ago ipelebad aken sekano poon ko kamamasaan aken
a rakes o siti a inibegay aken rekano ago so manga apo iyo.
40 Na pagowitan ko sekano sa da a ikepos iyan a kayaan, a so da a ikepos iyan a
kadiyamanan a di den kelipatan.' "
YARAMIYAS 24
So Dowa ka Reban a Onga a Higos
Na sii ko pangingilain na piyakailay ako o Allah sa dowa ka reban a manga higos a

ibebetad ko danga o Timplo o Allah. (Miyanggolaola ini sii ko oriyan o kinitaogen i
Nibokadnisar a dato sa Babilon ki Yahoyakin a wata i Yahoyakim a dato sa Yodah a
inowit iyan siran sa Babilon a poon sa Yarosalim a rakes o manga olowan sa Yodah ago
so manga panday ago manga panenesel.)
2 So isa ka reban na manga pipiya a higos a aya on den kiyalotoi, na so isa on ka reban na
manga rarata a higos a di den kekan.
3 Na iniise raken o Allah a "Antonaa i pekeilay ngka, Yaramiyas?"

"Manga higos," a inisembag aken. "So manga pipiya on na tanto a mapiya, ogaid na
so di on mapiya na lebi a marata ko kakena on."

5 “Giyai i pitero o Allah a Tohan o Israil: So manga taw a piyakaawa aken sangkai a
darpa a minitaog roo sa Babilon na ibibilang aken a mapiya a lagid angkai a manga pipiya
a higos.
6 Siyapen ko siran kaan tetagompiya, na ikesoy aken siran sangkai a inged. Mbengonen
ko siran na di aken siran nggebaan; pemolaan ko siran na di aken siran den mbedoten.
7 Mbegan ko siran sa poso a kebaya raken komilala, a saken so Allah. Pekabaloy siran a
manga pagtaw aken, na pekabaloy ako a Tohan iran, ka kesoy siran raken a iklas ko poso
iran.
8 “Ogaid na si Sidikiyas a dato sa Yodah ago so manga sanasanaan iyan ago so langon a
taw a miyamakapagoyag sa Yarosalim a minibegak sangkai a inged o di na miyaling roo
sa Misir na iseyan aken siran sangkai a manga rarata a higos a di den kekan," a tig o
Allah.
9 “Ka mbelowin ko siran a ipekengingiri ago ipekegowad o oman i nasiyon sa doniya.
Pesodiin siran, pegongatongaten, pegompaten ago ipesinta apiya anda ko siran mbogawa.
10 Pagowitan ko siran sa katidawa, ongos ago paniyakit taman sa maiped siran ko inged a
inibegay aken kiran ago so manga apo iran.
YARAMIYAS 25
So Ridoay a poon sa Pagotaraan
Sii ko ikapat ragon a kandadato i Yahoyakim a wata i Yosiyas sii sa Yodah na

minisampay angkai a katero ki Yaramiyas makapantag ko langon o manga taw sa Yodah.
Giyoto mambo i paganay a ragon a kandadato i Nibokadnisar sa Babilon.
2 Na pitero o nabi Yaramiyas ko langon o manga taw sii sa Yodah ago so langon a
kibabaling sa Yarosalim a
3 “Sii ko soled o miyakadowa polo ago telo ragon a ipoon ko ikasapolo ago telo ragon a
kandadato i Yosiyas a wata i Amon sii sa Yodah taman imanto a gawii na ipetoron raken
so katero o Allah na lalayon aken ai rekano pepakasampain ogaid na da kano den
pamamakineg.
4 Na apiya omanoman rekano sogoon o Allah so manga oripen iyan a manga nabi na da
niyo siran den pamakinega aya pen o ba niyo tagoa sa ginawa.
5 Miyakanggolalan kiran na pitero rekano o Allah a 'Talikodi o oman i isa rekano so
manga rarata a okitokit iyan ago manga galebek kaan kano makataros komaden sii ko
inged a inibegay aken rekano ago so manga apo iyo a matangan iyo sa taman sa
pakataman.
6 Di niyo pengongonotani o di na simbaa so salakaw a manga tohan aya pen o ba ako
niyo pakakerangita ko kapesimbaa niyo ko manga barahala a piyangembaalan iyo. O
magiyoto na di aken sekano ndanegen."
7 “Ogaid na da ako niyo pakinega," a tig o Allah, "ka ba niyo den kiyakatan so rarangit
aken a nggolalan ko manga barahala niyo na piyakitanaan iyo a ginawa niyo sa
kapendanega rekano."
8 Kagiya ka maoto na giyai i pitero o Allah a Lebi a Mamaapaar: "Sabap sa da niyo

tomana so manga katero aken
9 Na tewagen aken so langon o manga taw sa pagotaraan ago so oripen aken a si
Nibokadnisar a dato sa Babilon," a tig o Allah, ”na pekigobat aken kiran angkai a inged
ago so manga kibabaling on ago so langon a melilibeta on a manga inged. Na tarotop a
kambinasaa ko kiran, na mbelowin ko siran a piyakabengang ago mapesodi a kelaslas sa
taman sa pakataman.
10 Pekitapelek aken sii kiran so manga sowara a kasosonor ago kapipiya a ginawa, ago so
kakelamilami o manga pengaromaan ago so manga pengaroma. Pekitapelek aken so
daleg o manga galingan, na perengen aken so manga solo iran.
11 Giyangkai a dalem a inged na kebinasa ago keawaan, na mapengongoripen angkai a
manga nasiyon o dato sa Babilon ko soled o pito polo ragon.
12 “Ogaid na amay ka maipos so pito polo ragon na ndenegen ko so dato sa Babilon ago
so manga pagtaw niyan sabap ko kasalaan iran," a tig o Allah, "na mbelowin ko so inged
a Babilon a kelaslas sa taman sa pakataman.
13 Itena aken sangkoto a inged so langon a minisinta aken on, a so langon a minisorat
sangkai a ribro ago so miyaalamat i Yaramiyas a isiksa ko langon o manga nasiyon.
14 Na seopan ko so manga taw sa Babilon ko langon a miyanggolaola iran, ka siran
mambo na pengongoripenen o madakel a manga nasiyon ago manga ala a dato.
So Kasiksaa o Allah ko manga Nasiyon
15 So Allah a Tohan o Israil na pitero iyan raken a "Kataya so tagayan sa arak a

mapepeno a rarangit aken. Kowaa ngka ini sa lima ko na pakiinomen ka ko langon a
manga nasiyon a pekisongowan ko reka.
16 Amay ka makainom siran on na pemangisasawiring siran ago pemametengen sabap ko
katidawa a itelemba aken kiran."
17 Na taros a kinowa ko so tagayan ko lima o Allah na piyakiinom aken ai ko langon o

manga nasiyon a piyakisongowan iyan raken.
18 Piyakainom aken on a Yarosalim ago so langon a manga siti sa Yodah a rakes o
manga dato ago so manga olowan on kaan siran mabinasa ago mabaloy a piyakalekelek a
pegilain a dii sodiin ago dii isinta, a di ini dii manggolaola taman imanto.
19 Na piyakainom aken on pen so langon angkai a ped a manga taw: So Piraon a dato sa
Misir, so manga orobarang iyan, so manga olowan iyan ago so langon o manga pagtaw
niyan
20 A rakes o manga mananangga a kibabaling sa Misir; so langon a dato sa inged a Os; so
langon a dato sa inged a Pilistiya, ago so manga taw sa Askilon, Gasa, Ikron ago so
miyanga lalamba roo sa Asdod;
21 So langon o manga taw sa Idomiya, Mowab ago giya Amon;
22 So langon a dato sa Tiro ago giya Sidon ago so manga dato ko manga inged ko kilid a
ragat;
23 So manga taw sa Didan, Tima, Bos ago so langon a kibabaling ko manga wawatan a
darpa;
24 So langon a dato sa Arabiya ago so manga dato o manga mbatabataa a kibabaling sa
disirto;
25 So langon a dato sa Simri, Ilam ago giya Midiya
26 Ago so langon o manga dato roo sa pagotaraan ko marani mawatan a darpa, na
mitondotondog siran on minom, ago so langon a ped a ndatoan ko dalem a doniya. Na
amay ka magiyoto langon na disomala a maginom on mambo so dato sa Babilon.
27 Na pitero raken o Allah "Teroa ngka kiran a 'Giyai i pitero o Allah a Lebi a
Mamaapaar a so Tohan o Israil: Inom kano sangkai a tagayan taman sa manga bebereg
kano ago mamakagowa ago manga ooteng kano a di den makatindeg sabap ko katidawa a
itena aken rekano.'
28 Ogaid na o somangka siran komowa ago minom ko tagayan a imbegay ngka kiran na
teroa ngka kiran a 'Giyai i pitero o Allah a Lebi a Mamaapaar: Disomala a minom kano
ron!
29 Ka ilaya niyo man, ka so rek aken a siti a Yarosalim na aya ko pagonaan somiksa, na
ba aya katao niyo ron na pelepasen kano domaneg? Kena! Di kano den pelepasen, ka
pagowitan ko sa katidawa so langon a kibabaling ko doniya, a tig o Allah a Lebi a
Mamaapaar.'
30 “Na, Yaramiyas, alamaten ka kiran angkai langon a manga katero, na teroa ngka kiran
a
" 'Sii ko soti a kakadenan iyan sa kasorgaan na pengengeran o Allah sa matanog so inged
iyan.
Pelalisen iyan so langon o kibabaling ko doniya a lagid o siran oto a pepemangegik sa
manga obas.
31 So lalis iyan sa kapengokom na iperaot ko pirowarowangan o doniya,
ka ipendimanda niyan so manga nasiyon.
Kokomen iyan so langon o manosiya
na pekibono iyan so manga rarata ko katidawa,
a tig o Allah.
"Ilaya niyo! Pekalangkap so manga morala

ipoon ko isa a nasiyon taman ko isa pen a nasiyon;
so mabager a barabarat na pepekatalingoma
poon ko manga kaposan o doniya."
33 Sangkoto a masa na so siran oto a miyapamono o Allah na pemangitayak ko lopa a
poon ko kaposan o doniya taman ko kaposan iyan. Di siran pelendagan aya pen o ba siran
panimoa a ipelebeng. Penga kakayar so manga badan iran a lagid o tai sii ko lopa.
34 Tagaw kano ago ndidiyagaw, hey manga olowan!

Tambalilid kano ko bayanek, hey manga tomatagikor ko talon a manga pagtaw aken!
Ka miyakatalingoma den so masa a kasombalia rekano;
keolog kano ago keropet a lagid o mala i arga a omoy.
35 So manga olowan na da a kepalagoyan iran;
so manga tomatagikor ko talon na da a kepagapasan iran.
36 Pamakinega niyo so kapemangisek o manga olowan
ago so dii kandidiyagaw o manga tomatagikor ko talon,
ka pembinasaan o Allah so pepenateban iran.
37 So lomilintad a manga kakadenan iran na keawaan
sabap ko somosokeyaw a rarangit o Allah.
38 So Allah na lagid o arimaw a inawaan iyan so lekowa iyan,
na mataan a kelaslas so inged iran
sabap ko kapakipetidawa o ridoay
ago sabap ko kasosokeyaw o rarangit o Allah.
YARAMIYAS 26
Piyagitaan si Yaramiyas sa Kapatay
Da matey ko oriyan o kiyandato i Yahoyakim a wata i Yosiyas sii sa Yodah

2 Na pitero raken o Allah a "Tindeg ka ko lamalama o Timplo o Allah na pakalangkapa
ngka so langon taman a inisogo aken a peteroon ka ko manga taw a pepamanong roo a
poon ko manga inged sa Yodah sa kasimba iran sii ko Timplo o Allah. Di ngka pelebati
sa sataga bo a katero.
3 O ba iran tagoa sa ginawa ago talikodan o oman i isa kiran so manga rarata a olaola
niyan. Ka o nggolaolaa iran ai na meloke ako ago di aken kiran pagowiten so morala a
miyatekdir aken sabap ko manga rarata a miyanggolaola iran.
4 Teroa ngka kiran a 'Giyai i pitero o Allah: Disomala a peparatiyayaan ako niyo a
petomanen iyo so manga kitab a inibegay aken rekano!
5 Disomala a tagoon iyo sa ginawa so manga osiyat o manga oripen aken a manga nabi a
omanoman aken rekano sogoon. Ogaid na da niyo tagoa sa ginawa,
6 Na o ipendayon iyo so di niyo raken kaparatiyayaa na mbinasaan ko angkai a Timplo a
datar o kiyabinasaa ko sa Siloh. Na mbelowin ko angkai a siti a radawan ko misisinta sii
ko manga taw ko langon a nasiyon sa doniya."
7 So manga imam, so manga nabi ago so langon o manga taw na pepamakinegen iran si
Yaramiyas sii ko di niyan dii kateroa sangkai a manga nganin sii ko Timplo o Allah.
8 Ogaid na so den so kiyapasada niyan tero ko langon a inisogo on o Allah a peteroon
iyan sii ko manga taw na so manga imam, so manga nabi ago so langon o manga taw na
giyander iran sekaniyan na inilalis iran a "Petay ka den!
9 Ino ngka pagalamata sii ko Ingaran o Allah a giyangkai a pesimbaan na kebinasa a datar
a Siloh, ago kebinasa ngkai a siti a kedaan sa taw?" Na so langon o manga taw na
pinggoronggorongan iran si Yaramiyas sii ko Timplo o Allah.
10 So kiyatokawi ron o manga olowan sa Yodah sangkai a miyanggolaola na minggagaan

siran somong ko Timplo o Allah poon ko torogan o dato na miyontod siran ko manga
darpa iran ko 'Bago a Pintoan' o Timplo o Allah.
11 Na giyoto a so manga imam ago so manga nabi na pitero iran ko manga olowan ago so
langon o manga taw a "Giyangkai a mama na patot a selaan a mbonoon ka kagiya
inalamat iyan a siksaan angkai a siti. Sekano den i miyamakaneg rekaniyan!"
12 Na giyoto a pitero i Yaramiyas ko langon o manga olowan ago so langon o manga taw
a "So Allah i somiyogo raken sa kapekalangkapa ko langon a miyaneg iyo a pitero aken a
kibinasa sangkai a Timplo ago giyangkai a siti.
13 Na imanto na alina niyo so manga okitokit iyo ago so manga galebek iyo na tomana
niyo so Allah a Tohan iyo. O nggolaolaa niyo ai na meloke so Allah na di niyan rekano
pagowiten so morala a miyatero iyan a itena iyan rekano.
14 So saken on peman na sisii ako ko kapaar iyo. Nggolaolaa niyo raken so apiya
antonaa i pipikiren iyo a mapiya ago ontol.
15 Ogaid na tanodi niyo a o mbonoa ko niyo na itena iyo sa ginawa niyo ago sii sangkai a
siti ago sii ko kibabaling on so kasalaan a kiyabonoa ko da a sala iyan a mama. Ka
matamataan den a siyogo ako o Allah sa kapeteroa ko langon angkai a manga katero a
miyaneg iyo.”
16 Na giyoto a pitero o manga olowan ago so langon o manga taw ko manga imam ago so
manga nabi a "Di patot o ba salaa angkai a mama sa kambonoa on ka mitero sekaniyan
rektano sii ko Ingaran o Allah a Tohan tano."
17 Oriyan iyan na tominindeg so ped ko manga pelokelokesen sa Yodah na pitero iran ko

langon a malilimod roo a manga taw a
18 “Sii ko kandadato i Hisikiyas sa Yodah na miyangalamat si Mikas a taga Morisit na
pitero iyan ko langon o manga taw sa Yodah a 'Giyai i pitero o Allah a Lebi a
Mamaapaar:
Giya Siyon na pendadon a lagid o pangomaan;

giya Yarosalim na kebaloy a mitatabotod a ator,
na so bobongan a katatagoan ko Timplo na pembaloy a marimeng.'
19 Ba biyono sekaniyan o dato Hisikiyas o di na so apiya antawaa sa Yodah sabap ko

kiyateroa niyan sii? Kena! Ka inikalek i Hisikiyas so Allah ago miyamangni ron sa limo.
Na inalin o Allah so pamikiran iyan na da niyan kiran tanaan so siksa a inipagita iyan
kiran. Ogaid na imanto na kewitan tano a ginawa tano sa piyakalekelek a morala!
20(Aden pen a ped a mama a si Oriyas a wata i Simayas a taga Kiriyat Yarim a
miyangalamat sii ko Ingaran o Allah sa kibinasa sangkai a siti ago giyangkai a inged a
lagid o siyowa i Yaramiyas.
21 Na sii ko kiyanega on o dato Yahoyakim ago so manga sondaro niyan ago so manga
olowan ko manga katero i Oriyas na piyanamaran o dato so kabonoa on. Ogaid na
kiyatokawan ai i Oriyas na miyalek ago miyagapas sa Misir.
22 Ogaid na siyogo o dato Yaramiyas si Ilnatan a wata i Akbor sa Misir a makaoonot on
so ped a manga mama.
23 Diyakep iran si Oriyas na inikasoy iran a poon sa Misir ago inowit iran ko dato
Yahoyakim. Na piyakibono sekaniyan o dato ago piyakiitog iyan so badan iran ko
pelebengan ko manga miskin.)
24 Liyo ron pen na si Ahikam a wata i Sapan na inampilan iyan si Yaramiyas na sabap
roo na da sekaniyan mapalad ko manga taw sa kabonoa iran on.
YARAMIYAS 27
Mapengongoripen i Nibokadnisar a Yodah
Da matey ko oriyan o kiyapakapoon ndato i Sidikiyas a wata i Yosiyas sa Yodah na

minisampay ki Yaramiyas angkai a katero o Allah.
2 Pitero raken o Allah a "Mbaal ka sa kokoong a kayo a tatalian sa kobal na sanggolain
ka.
3 Oriyan iyan na pangowiti ngka sa lalag so manga dato sa Idomiya, Mowab, Amon, Tiro
ago giya Sidon a nggolalan ko manga sogo a miyamakaoma sa Yarosalim sii ki Sidikiyas
a dato sa Yodah.
4 Began ka kiran angkai a katero a pekasampain iran ko manga dato iran: 'Giyai i pitero o
Allah a Lebi a Mamaapaar a Tohan o Israil:
5 Nggolalan ko mala a kabatowa aken ago kapaar na inembaalan aken so doniya ago so
manga manosiya ago so manga binatang a matatago on, na kibegay aken ai langon ko
apiya antawaa i kabaya aken.
6 Imanto na piyalad aken den so langon o manga inged iyo ko kapaar o oripen aken a si
Nibokadnisar a dato sa Babilon, na apiya so manga iila a binatang na piyakimbayabayaan
aken rekaniyan.
7 Pemanalagad on so langon o manga nasiyon, na penalagadan iran pen so wata iyan ago
so apo iyan taman ko masa a kandaaga ko rek iyan a nasiyon. Sa masa oto na madakel a
manga nasiyon ago manga ala i kapaar a dato a pekadaag ago makapendato ko inged a
Babilon.
8'Ogaid na o aden a nasiyon o di na ndatoan a di mangongonotan ki Nibokadnisar a dato

sa Babilon aya pen o ba on di pekisakop na siksaan aken a nggolalan ko katidawa, ongos
ago paniyakit, a tig o Allah, taman sa pakibinasa ko ki Nibokadnisar angkoto a nasiyon.
9 Sabap san na di niyo pekinega so di benar a manga nabi niyo, manga paririmar, manga
pananaabir sa taginepen, manga pepamangangay ago manga pangangatao niyo a di iran
rekano dii teroon a "Kena a ba disomala a kapakimbayabaya iyo ko dato sa Babilon.'
10 Manga kabokegan a pepagalamaten iran rekano, na so kapemakinega niyo kiran na aya
kesabapan ko kapekaawaa rekano ko inged iyo, ka pemogaon ko sekano ron sa mawatan
na pematay kano.
11 Ogaid na so manga taw ko nasiyon a makipesakop ko dato sa Babilon ago
makipembayabaya on na peperon aken a kapakatatareg iran ko rek iran a inged an iran
kambasoki ago kabalingi, a tig o Allah.' "
12 Na giyai mambo i pitero aken ki Sidikiyas a dato sa Yodah, a tig aken a "Sangkop ka
ko dato sa Babilon na pakimbayabaya ka on ago so manga pagtaw niyan o kabaya a ka a
pekeoyagoyag ka.
13 Ino ka pekipatay a rakes o manga pagtaw ngka ko katidawa, ongos o di na paniyakit, a
giyai den i pitero o Allah a mapenggolaola ko inged a di pekisakop ko dato sa Babilon?
14 Di niyo pekinega so manga katero o di benar a manga nabi a di iran rekano dii teroon a
'Kena a ba paliyogat a kapekisakop iyo ko dato sa Babilon,' ka ipepangalamat iran rekano
so manga kabokegan.
15 Da aken siran sogoa,' a tig o Allah, 'na pepamamamokeg siran baden sii ko Ingaran
aken. O pakinega niyo siran na mbogaon ko sekano a poon sangkai a inged a rakes o di
benar a manga nabi a pepangalamat rekano, na kepolang kano langon."
16 Oriyan iyan na pitero aken ko manga imam ago sii ko manga taw a "Giyai i pitero o
Allah: Di niyo pemakinega so di benar a manga nabi a di iran dii teroon a di matey na so
manga ala i arga a manga kasangkapan a miyakowa a poon ko Timplo o Allah na ikesoy
sii a poon sa Babilon. Ba kano iran baden pepamokegi!
17 Di niyo siran pemakinega; pakisakop kano ko dato sa Babilon kaan kano
pekeoyagoyag Ino pekibinasaan angkai a siti?"
18 Na pitero aken kiran pen a "O tito siran a manga nabi a sisii kiran so katero o Allah, na
aya patot na ipengangampedian iran ko Allah a Lebi a Mamaapaar a di niyan peron o ba
mawit roo sa Babilon so ped a manga ala i arga a kasangkapan a malalamba ko Timplo o
Allah ago sii ko torogan o dato sa Yodah ago sii sa Yarosalim."
(19-20 Isako biyagen o dato Nibokadnisar si Yahoyakin a wata i Yahoyakim a dato sa
Yodah a rakes o kiseselaan a manga taw sa Yodah ago sa Yarosalim a initaog iyan siran
sa Babilon na inibegak iyan so dowa timan a tombaga a polaos, so tangela sa ig a
pepangonaban, so manga batoga ago so ped ko manga ala i arga a kasangkapan ko
Timplo.)
21 “Oway, giyai i pitero o Allah a Lebi a Mamaapaar makapantag ko manga kasangkapan

a miyalamba sii ko Timplo o Allah ago sii ko torogan o dato sa Yodah ago sii sa
Yarosalim:
22'Pangowiten ai sa Babilon, na roo den taman ko gawii a pakikowa ko ini,' a tig o Allah.
'Samaoto na pekaasalen ko siran sangkai a darpa.' "
YARAMIYAS 28
So di Benar a Nabi a si Hananiyas
Sii bo sangkoto a ragon, sii ko ikalima olan ko ikapat ragon a kandadato i Sidikiyas sa
Yodah, na si Hananiyas a wata i Asor, a isa a di benar a nabi a taga Gibiyon, na
miyakimbitiyarai raken sii ko Timplo o Allah ko kamamasaan o manga imam ago so
langon o manga taw. Pitero iyan a
2 “Giyai i pitero o Allah a Lebi a Mamaapaar a so Tohan o Israil: Potolen ko so kokoong
a inisanggolay o dato sa Babilon sangkai a manga taw.
3 Sa di pen makadowa ragon na pekakasowin ko sangkai a darpa so langon o manga
kasangkapan a miyakowa i Nibokadnisar a poon ko Timplo o Allah a inowit iyan roo sa
Babilon.
4 Na pekakasowin ko pen sangkai a darpa si Yahoyakin a wata i Yahoyakim a dato sa
Yodah ago so langon o manga taw sa Yodah a minitaog sa Babilon," a tig o Allah, "ka
mataan a potolen ko so kokoong a inisanggolay kiran o dato sa Babilon."
5 Na giyoto a somimbag so nabi Yaramiyas ko nabi Hananiyas sii ko kamamasaan o

manga imam ago so langon a taw a kititindeg ko Timplo o Allah
6 A tig iyan a "Amin! Pengnin ko a mapenggolaola ini o Allah! Pengnin ko a mitoman o
Allah so miyaalamat ka a ikesoy niyan sangkai a darpa so manga kasangkapan o Timplo
niyan ago so langon a taw a minitaog sa Babilon.
7 Ogaid na pamakinega ngka so peteroon ko reka ago sii ko langon angkai a manga taw.
8 So miyanga oonaan ta a manga nabi na miyakaalamat siran makapantag ko katidawa,
morala ago paniyakit a kisiksa ko madakel a manga inged ago manga ala a ndatoan.
9 Ogaid na so nabi a miyangalamat sa kalilintad na aya bo a kakekilalaa on sa tito
sekaniyan a siyogo o Allah na amay ka matoman so miyaalamat iyan."
10 Mandiyadi na piyokas o nabi Hananiyas so kokoong ko waga o nabi Yaramiyas na

piyotol iyan ai.
11 Na pitero iyan peman ko kamamasaan o langon o manga taw a "Giyai i pitero o Allah:
Sii sa lagid ai a okit sa di pen makadowa ragon imanto na potolen ko so kokoong a
inisanggolay ko langon o manga nasiyon a pepangongoripenen imanto o Nibokadnisar a
dato sa Babilon." Na giyoto a miyawa si Yaramiyas sangkoto a darpa.
12 Da matey a kiyapotola o nabi Hananiyas ko kokoong sa lig o nabi Yaramiyas na pitero

o Allah ki Yaramiyas a
13 “Songowi ngka si Hananiyas na teroa ngka on a 'Giyai i pitero o Allah: Miyapotol ka
sa kokoong a kayo, ogaid na siyambian aken baden sa kokoong a potaw!
14 Ka giyai i pitero o Allah a Lebi a Mamaapaar a so Tohan o Israil: senganan aken sa
kokoong a potaw so manga lig o langon angkai a manga nasiyon, ka pakipengongoripen
aken siran ki Nibokadnisar a dato sa Babilon. Apiya so manga iila a binatang na pekipaar
aken rekaniyan.
15 Na pitero pen o nabi Yaramiyas ki Hananiyas a "Pamakineg ka, Hananiyas! Da ka

sogoa o Allah, ogaid na pepegayokan ka angkai a manga taw sa kasarigi ran ko di benar.
16 Kagiya ka maoto na giyai i pitero o Allah: Magaan aken seka den papasen ko doniya.
Sii den sangkai a ragon na petay ka, ka miyangosiyat ka sa kasopaka ko Allah."
17 Na sii ko ikapito olan sangkoto a ragon na miyatay so nabi Hananiyas.
YARAMIYAS 29
So Sorat i Yaramiyas ko manga Yahodi a Minitaog sa Babilon
Giyai so oni o sorat a inipakawit i Yaramiyas a poon sa Yarosalim roo ko manga olowan,
manga imam, manga nabi ago so langon o ped a manga taw a piyamiyag i Nibokadnisar
sii sa Yarosalim a miyamangitaog iyan sa Babilon.
2(Inisorat iyan ai ko oriyan o kinitaogen ko dato Yahoyakin ago so ina iyan, a rakes o
manga sanasanaan iyan, so manga olowan sa Yodah ago sa Yarosalim ago so manga
panday ago manga panenesel a palaya siran poon sa Yarosalim.)
3 Inisana niyan so sorat ki Ilasas a wata i Sapan ago si Gimariyas a wata i Hilkiyas a
siyogo siran i Sidikiyas a dato sa Yodah sii ko dato Nibokadnisar sa Babilon. Aya oni o
sorat na:
4 “Giyai i pitero o Allah a Lebi a Mamaapaar a Tohan o Israil sii ko langon a taw a
piyakibiyag iyan ki Nibokadnisar sii sa Yarosalim a miyamangitaog sa Babilon:
5'Mbabalay kano sa manga walay a kebalingan iyo. Pamamolaan kano kaan aden a kekan
iyo.
6 Pamangaroma kano ago mbabawata sa manga mama ago manga babay. Pangilobaan
iyo so manga wata iyo a mama sa mapangaroma iran, na pakipangaromaan iyo so manga
wata iyo a babay kaan siran mambo makambabawata sa manga mama ago manga babay.
Disomala a ndakedakel kano san a kena o ba kano kekekes.
7 Panamari niyo so kalilintad ago kapetegompiya o siti a tiyaogan aken rekano.
Pangangarapanen iyo sii raken angkoto a siti, ka o tegompiya ini na pekategompiya kano
mambo.'
8 “Pitero o Allah a Lebi a Mamaapaar a Tohan o Israil a 'Di kano pekisaliba ko manga
nabi ago manga paririmar a maaped rekano. Di niyo pekinega so manga taginepen a
ipetegel iyo a peteginepen iran
9 Ka kagiya kapamokeg a di iran dii teroon sii ko Ingaran aken. Na da aken siran sogoa,'
a tig o Allah.
10 “Ka giyai i pitero o Allah: 'Aya mataan na aya kapekatareg iyo sa Babilon na pito polo
ragon. Ogaid na amay ka mapopos ai na pekaoma ako rekano na itoman aken so
makalimoon a initopa ko rekano a so kapekaasala rekano sangkai a darpa.
11 Ka saken bo i matao ko manga kadiyat aken mipantag rekano,' a tig o Allah, 'a so
manga kadiyat aken a ipekapiya niyo a kena a ba niyo ikebinasa, a so manga kadiyat sa
kambegi rekano sa panginam ago mapiya a bobolos iyo.
12 Sa masa oto na igira a petelowan ako niyo ago pepangadap kano raken a
pepangangarapan na pemakinegen aken sekano.
13 Pembabanogen ako niyo na ketoon ako niyo den igira a pepanagontamanan ako niyo
sa iklas ko poso iyo.
14 Ketoon ako niyo,' a tig o Allah, 'na pekaasalen ko rekano so kapetegompiya niyo na
penimoon ko sekano a poon ko langon o manga inged ago manga darpa a
piyakasongowan ko rekano,' a tig o Allah, 'na ikesoy aken sekano ko inged a babalingan
iyo ko da ko rekano pen kitaogen.
15 “Masiken a di niyo dii teroon a 'Bigan tano o Allah sa manga nabi sii sa Babilon.'
16 Ogaid na pamakineg kano ko pitero o Allah makapantag ko dato a moontod ko korsi o
Daod ago makapantag ko langon o manga ped iyo a magiinged a kibabaling pen sangkai a
siti a Yarosalim a da rekano makaonot ko kinitaogen rekano.
17 Oway, giyai i pitero o Allah a Lebi a Mamaapaar: 'Itena aken kiran so katidawa, taon
ago paniyakit, na mbelowin ko siran a lagid o manga higos a miyanga aado a di kekan.
18 Iseloba aken kiran so katidawa, taon ago paniyakit. Mbelowin ko siran a pakasisingay
ko langon a ndatoan ko doniya, na ketekawan angkai a manga ndatoan sabap ko keolaola
iran. Kesintaan siran, pesodiin ago pegongatongaten sii ko oman i nasiyon a teogan aken
kiran.
19 Aya sabap iyan na da iran tagoa sa ginawa so manga katero aken a piyangowit aken
kiran omanoman a nggolalan ko manga oripen aken a manga nabi,' a tig o Allah. 'Sekano
mambo a miyamangitaog na da niyo pakinega,' a tig o Allah.
20'Kagiya ka maoto na langon kano a minitaog aken sa Babilon a poon sa Yarosalim na
tagoa niyo sa ginawa so pitero aken.'
21 “Giyai i pitero o Allah a Lebi a Mamaapaar a Tohan o Israil makapantag ki Ahab a

wata i Kolayas ago si Sidikiyas a wata i Masiyas a pepemangalamat rekano sa di benar sii
ko Ingaran aken: 'Peladen ko siran ki Nibokadnisar a dato sa Babilon na mbonoon iyan
siran sii ko kapegilaya niyo ron.
22 Sabap sangkai a keolaola iran na so langon a miyamangitaog a poon sa Yodah a
matatago sa Babilon na pagosaren iran angkai a paninta: "Pengnin ko a mikidia reka o
Allah so datar o inikidia niyan ki Sidikiyas ago si Ahab a tiyotong a oyagoyag o dato sa
Babilon sii ko apoy!"
23 Giyai i keolaola iran ka kagiya tanto a miyakaratarata a pinggolaola iran sii sa Israil;
pisinaan iran so manga karoma o manga ped iran na mitero siran sa manga kabokegan sii
ko Ingaran aken a da aken kiran sogoon. Katawan aken so pinggolaola iran. Saken i
miyakasaksi on,' a tig o Allah."
So Katero o Allah ki Simayas
24 Na pitero o Allah ki Yaramiyas a "Teroa ngka ki Simayas a taga Nihilam a

25'Giyai i pitero o Allah a Lebi a Mamaapaar a Tohan o Israil: Miyakawit ka sa sorat sii
ko ingaran ka sii ki Sipanayas a wata i Masiyas a so imam, ago sii ko langon a ped a
manga imam ago sii ko langon a kibabaling sa Yarosalim. Aya inisorat ka ki Sipaniyas
na
26 “Initoro ka o Allah a maimam a inisambi ki Yahoyada, na seka den imanto i komikibir
ko Timplo o Allah. Sabap roo na so apiya antawaa a pembetengen a pepeseyan sa nabi na
katao ngka den so kapatonga on a rantay ago kaiketi ron a potaw ko lig iyan.
27 Sabap roo na ino ngka da mbongeti si Yaramiyas a taga Anatot a dii menanabinabi sii
rekano?
28 Disomala a saparan sekaniyan, ka pitero iyan rekami sii sa Babilon a matey pen a
kitataog ami sii. Tig iyan a disomala a pemangon kami sa manga walay a mbelingan ami
ago pemamolaan kami kaan aden a makan ami." '
29 Ogaid na kagiya matarima i Sipaniyas angkai a sorat i Simayas na biyatiya iyan ki nabi
Yaramiyas.
30 Na giyoto a pitero o Allah ki Yaramiyas a "Pakiwiten ka angkai a katero ko langon a
miyamangitaog sa Babilon. Teroa ngka kiran a 'Giyai i pitero o Allah makapantag ki
Simayas a taw sa Nihilam: Miyangalamat rekano si Simayas apiya pen da aken sekaniyan
sogoa, na piyakiparatiyaya niyan rekano so di benar.
32 Sabap roo,' a tig o Allah, 'na ndenegen ko si Simayas ago so kebabadan on. Da a ba
kiran kelamba a makapeginetaw sii sangkai a manga taw aya pen o ba aden a makailay
ron ko manga pipiya a nganin a penggolaolaan ko para ko manga pagtaw aken,' a tig o
Allah, 'sabap sa inipangosiyat iyan kiran so kasopaka ko Allah.' "
YARAMIYAS 30
So Kapakaasala ko manga Israil
Minisampay angkai a katero o Allah ki Yaramiyas:

2 “Giyai i katero o Allah a so Tohan o Israil: Panoraten ka sii ko ribro so langon o manga
katero a miyatero aken reka.
3 Ka pekatalingoma so manga gawii," a tig o Allah, "a pekaasalen aken so kapetegompiya
o manga pagtaw aken a Israil ago Yodah. Pekakasowin aken siran ko lopa a inibegay
aken ko manga apo iran, na tenganen iran ai peroman," a tig o Allah.
4 Giyai i manga katero a kabasa o Allah makapantag sa Israil ago giya Yodah:
"Miyaneg aken so kapenggoraok o manga taw,

a so manga kagoraok sa kalek a kena a ba kalilintad.
6 Iseen iyo ago pamimikirana niyo
Ba makapembawata so mama?
Ino aken den pekeilay so oman i mabager a mama a tetekenen iyan a tiyan iyan a lagid o
pembaliliten a babay?
Ino miyamoti langon so manga paras iran?
7 Aidaw! Tanto a piyakalekelek angkoto a gawii!
Da den a ba datar oto a gawii
a masa a kapekerasay o manga mbawataan o Yakob,
ogaid na kesabet siran on.
8 Sii sangkoto a gawii," a tig o Allah a Lebi a Mamaapaar,

"na potolen ko so kokoong a isasangan ko lig iran,
na pokasen ko so manga rantay a ipapatong kiran.
Di siran den mapengongoripen o manga rait
9 Ka ba siran den pengongonotan ko Allah a Tohan iran,
ago so moriyataw o Daod a pakapendatoon ko kiran.
10 “Di kano kelek, hey manga mbawataan o Yakob a oripen aken;

di kano kedai sa inam, hey manga Israil," a tig o Allah.
"Ka mataan a sebeten ko sekano a poon sangkoto a mawatan a darpa,
ago so manga mbawataan iyo a poon ko inged a tiyaogan kiran.
Mbeling bo so manga mbawataan o Yakob
na peginetaw siran a lomilintad ago malilinding,
na da den a ba kiran makapengangalek.
11 Lalayon ako rekano na sebeten aken sekano,"
a tig o Allah.
"Apiya pen matarotop a kambinasaa ko ko langon a nasiyon
a ron aken sekano iniparak
na di aken sekano mbinasaan sa tarotop.
Disomala a ndenegen ko sekano, ogaid na sii bo ko kaontol;
di aken sekano kelepas a da madaneg."
12 Giyai i pitero o Allah ko manga pagtaw niyan:
"So manga baneg iyo na di kebolongan;

di den kepiya so manga pali iyo.
13 Da den a ba rekano pekaogop
a ba pekabongkos ko manga pali iyo;
da a ba rekano kibolong.
14 Kiyalipatan kano o langon o manga abanga iyo;
di kano iran den tegoon sa ginawa.
Giyobat aken sekano a lagid o ridoay niyo,
ago diyaneg aken sekano a lagid o da a kapedi iyan a taw
ka kagiya mala so kamarataan iyo
ago madakel so manga dosa niyo.
15 Ino kano pegataat sabap ko manga pali iyo
a di kepinda so karangka iyan?
Inidaneg aken ai rekano
sabap ko kala o kamarataan iyo
ago so kadakel o manga dosa niyo.
16 Ogaid na so langon a peminasa rekano na mbinasaan;

pemiyagen so langon o manga ridoay niyo.
Siran oto a pengarasi rekano na pengarasiyan mambo,
na siran oto a peteban rekano na petebanan.
17 Pekaasalen aken so kalimegas iyo
ago mbolongan ko so manga pali iyo,"
a tig o Allah,
"apiya pen aya dii matero makapantag rekano na
'Minitolak den a Siyon;
da den a ba petego sa ginawa.' "
"Pekaasalen ko so manga mbawataan o Yakob ko manga kadena iran,

na ikepedi aken so manga pamiliya iran.
Mbangonen peroman a Yarosalim ko andang a katatagoan on.
na pekatindeg so torogan ko tito a darpa iyan.
19 So manga kibabaling on na pemagidaida sa manga podipodi,

ago pelalalis sa kapekebabaya.
Pakapendakelen aken siran,
na di kekes so bilangan iran.
Mbegan aken siran sa bantogan,
na di siran den mapesodi.
20 Petegompiya so kebabadan kiran a datar gowani,
na pekabekenen ko so nasiyon iran sii ko hadapan aken,
na ndenegen aken so langon a pengarasi kiran.
21 So bo so bangsa iran a taw na aya kiran makapegolowan,
so dato iran na pekagemaw a poon kiran.
Pekaobain aken sekaniyan na ndeseg sekaniyan raken,
ka antawaa i pekaraw raken mobay o di aken sekaniyan boyoa?
22 Samaoto na pekabaloy kano a manga pagtaw aken,
na pekabaloy ako a Tohan iyo.
23 Ilaya niyo man, ka pemborngat so gani o Allah a lagid o barat,

a lagid o sobosobo a pegiyopen iyan sa mabager so manga olo o manga rarata.
24 Na di keda so pesokeyaw a rarangit o Allah
taman sa di niyan mitoman sa tarotop
so manga antap o poso iyan.
Sii ko pekatalingoma a manga gawii
na kesabotan ai o manga pagtaw niyan.
YARAMIYAS 31
So Kakesoy o manga Israil ko Inged iran
"Sangkoto a masa," a tig o Allah, "na pekabaloy ako a Tohan o langon a mbatabataa a
manga Israil, na pekabaloy siran a manga pagtaw aken."
"Siran oto a miyakapagoyag ko katidawa

na ikelimo aken sii ko mitataog a kaden;
pekaoma ako a mbegan ko sa kapakadeke so manga Israil.
3 Mipeyag rektano so Allah isako miyatey den a tig iyan a
"Pekebabayaan ko sekano sa da a ikeda iyan a babaya;

sabap roo na tiyonda aken sekano a limo sa ginawa ko.
4 Mbengonen aken sekano peroman, hey raga a Israil,
na kebangon kano den.
Kekowa niyo peroman so manga garingking iyo
na meliliyo kano a dii seyaw a ped ko dii kekariyala.
5 Pemomolaan kano peroman sa manga asinda a obas roo ko manga bobongan sa
Samariya;
pemolaan ai o manga taribasok
na ikebabaya iran so manga onga niyan.
6 Oway, pekatalingoma so gawii a pelalis so manga sirino
sii ko manga bobongan sa Ipraim a tig iran a
'Itano roo, somong tano sa Siyon
sa kasimbaa tano ko Allah a Tohan tano!' "
"Pagidaida kano sa kapekebabaya sabap ko Israil!

Pamesag kano para sangkoto a lebi a maporo ko manga nasiyon!
Pakalangkapa niyo so manga podi niyo ago teroa niyo a
'Ya Allah, sabeta ngka so manga pagtaw ngka a miyalamba ko manga Israil!'
8 Ka pagowiten ko siran a poon ko inged sa pagotaraan,
na timoon aken siran a poon ko pirowarowangan o doniya.
Keped kiran so manga bota ago so manga lepo
a so mambo so manga oogat a babay ago manga pembaliliten.
Tanto a madakel a taw a pemangasoy sii.
9 Pekaoma siran a pepamanegad
a pepangangarapan siran sii ko kipekesowin aken kiran.
Pegagaken aken siran ko kilid o manga lawasaig
sii ko pantar a manga lalan a di siran on kisosong,
ka kagiya saken i ama o Israil,
na so Ipraim na kaka a wata aken.
10 “Hey manga nasiyon, pamakinega niyo so katero o Allah;

pakalangkapa niyo ai sii ko manga wawatan a darpa ko kilid a ragat.
Teroa niyo a 'So Allah a miyarak ko manga Israil na timoon iyan siran
ago pesiyapen iyan siran a lagid o pepanagikor ko talon iyan a bilibili.'
11 Ka mbokaan o Allah so manga mbawataan o Yakob
ago sebeten iyan siran ko kapaar o siran oto a manga babager a di siran.
12 Pekaoma siran ago pemagidaida sa kapekebabaya sii ko Palaw a Siyon
na ipekapiya a ginawa iran so manga kamapiyaan a pamemegayan o Allah
a so pereperan, so bago a arak, so lana a olibi,
ago so manga bilibili ago manga sapi.
Kedatar siran o pepakaigan piyapiya a sapadan,
na da den a ipekerata a ginawa iran.
13 Sa masa oto na peseseyaw so manga raga a makalalangas
a lagid mambo o manga mama a manga kangodaan ago manga lokes.
Sembian aken so kapakamboboko iran sa kapekebabaya;
pekapiyaan ko a ginawa iran na sembian aken so kararata a ginawa iran sa kasosonor.
14 Soaten ko so manga imam ko manga lelembo a pangenengken,
na penga oosog so manga pagtaw aken ko manga kamapiyaan aken,"
a tig o Allah.
"Aden a lagam a pekeneg roo sa Ramah

a penggoraok ago tanto a mboboko;
si Rakil na ipenggoraok iyan so manga wata iyan,
na di kebaya o ba katayoi
ka kagiya miyanga ada so manga wata iyan."
16 Na giyai i pitero o Allah:
"Di ka den penggoraok

na genek ka somegad,
ka kebalasan so galebek ka,"
a tig o Allah.
"Pekakasoy so manga wata a ka poon ko inged o ridoay.
17 Sabap roo na aden a keinam ka ko bobolos ka."
a tig o Allah.
"Pembabaling bo so manga wata a ka ko rek iran a inged.
18 “Mataan den a miyaneg aken so manga Israil a di iran dii teroon sa kapakamboboko a
'Lagid kami gowani o nati a sapi a da malayam ko kokoong,
ogaid na sininanad kami ngka sa kapetomana mi reka.
Pakakasoya kami ngka sii reka, ka komasoy kami,
ka seka so Allah a Tohan ami.
19 Oriyan o kiyatalikodi ami reka na miteobat kami,
na oriyan o kiyapakasabot ami
na giyandangan ami a rareb ami sa kiyapakamboko.
Miyaya kami ago miyakowa a diyaman
sabap ko piyakayaya a manga pinggolaola ami ko kangodai rekami pen.'
20 Mataan den a so manga Israil na pakatatayaan ko a manga wata aken, a so manga wata
a ipekebabaya aken.
Apiya pen lalayon aken siran dii mbongetan
na peketademan aken pen.
Kagiya ka maoto na ipekedali aken siran
na matamataan a ipengalinggagaw aken siran,"
a tig o Allah.
21 “Hey raga a Israil,

tagoi niyo sa manga tanda ago manga toos so lalan.
Tanodi niyo piyapiya so pagokitan a iniokit iyo ko kinitaogen rekano
na kasoy kano ko manga inged iyo.
22 Ay katey a kapekedowadowai rekano,
hey wata aken a babay a di toman sa pasad?
Ka magaden ako sa bago ago mibibida a mapenggolaola sii ko doniya
a lagid sa kibibida o babay a pelinding sa mama."
So Pekatalingoma a Kapetegompiya o manga Taw sa Yodah
23 Giyai i pitero o Allah a Lebi a Mamaapaar a Tohan o Israil: "Amay ka pakakasowin

aken so manga taw poon ko kinitaogen kiran na so manga taw ko inged a Yodah ago so
manga pagingedingedan on na mapetero iran peroman a 'Pangnin ta a karakmatan so soti
a palaw sa Yarosalim, a so darpa a babalingan o kaontol.'
24 Mbeling so manga taw sii sa Yodah ago sii ko langon a manga siti niyan a rakes on so
manga taribasok ago so manga pananagikor sa bilibili a ped o manga talon iran.
25 Pekadenggawan ko so kidodokawan na pekaosogen aken so langon a kiyalobayan
sabap ko ongos.
26 Sa masa oto na mapetero o manga taw a 'Miyakatorog ako na miyakanaw a mapipiya a
ginawa ko.'
27 “Pekatalingoma so manga gawii," a tig o Allah, "a penoon aken a manga taw ago
manga pangangayamen so manga inged a Israil ago giya Yodah.
28 Gowani na biyadot aken ago initobak aken angkai a nasiyon. Giba aken, ago bininasa
ago siniksa, ogaid na amay den na mbangonen aken ai ago pakapembekenen piyapiya," a
tig o Allah.
29 “Sii sangkoto a manga gawii na di den mapetero o manga taw angkai a pananaroon:
'So manga ama na komiyan sa masem a manga obas,

na aya miyangingilo na so manga ngipen o manga wata iran.'
30 Ka so oman i isa na ipetay niyan so rek iyan a manga dosa, na saden sa koman sa
masem a manga obas na so rek iyan a manga ngipen i kengingilo.
31 “Pekatalingoma so manga gawii,' a tig o Allah, "a magembaal ako sa bago a kapasadan
mipantag ko manga taw sa Israil ago so manga taw sa Yodah.
32 Kena ini o ba datar o kapasadan a inembaalan aken mipantag ko manga apo iran isako
agaken ko siran a lima ko kiniliyon ko kiran sa inged a Misir. Ka siyogok iran angkoto a
kapasadan apiya pen datar ako kiran a karoma iran," a tig o Allah.
33 “Ka giyai i kapasadan a pagembaalan ko mipantag ko manga taw sa Israil sii sangkoto
a manga gawii," a tig o Allah. "Ndalemen aken ko ginawa iran so manga sogoan aken na
isorat aken ai sii ko manga pamikiran iran ago manga poso. Na kebaloy ako a Tohan iran
na kebaloy siran a manga pagtaw aken.
34 Di den kailangan a mapengendao o taw so manga siringan iyan o di na so manga
tonganay niyan ko kapeteroa niyan kiran a 'Kenala niyo so Tohan,' ka palaya siran raken
pekakilala ipoon ko lebi kiran a mitatanan na taman ko lebi kiran a maporo," a tig o
Allah. "Ka perilaan aken so kamarataan iran na di aken den tedeman so manga dosa
iran."
35 Giyai i pitero o Allah a aya somiyogo ko alongan sa kapesindaw niyan ko kadaondaw,
ago so olan ago so manga bitoon sa kapesindaw iran ko kagagawii.
Sekaniyan i pesikar ko ragat kaan pendaleg so manga begel on.
So Allah a Lebi a Mamaapaar i Ingaran iyan,
na giyai i pitero iyan:
36 “Saden sa katey a kaaaden pen angkai a manga kokoman aken a pepekapaar ko
alongan, so olan ago so manga bitoon
na giyoto mambo i katey a kaaaden o nasiyon o manga mbawataan o Israil sii ko hadapan
aken.
37 O ketakes so manga langit
ago mapariksa so manga onayan o doniya
na aya ko bo kitolaken ko manga mbawataan o Israil
sabap ko langon a miyanggolaola iran,"
a tig o Allah.
38 “Pekatalingoma so manga gawii," a tig o Allah, "a mbangonen peroman so dalem a siti
a Yarosalim para raken ipoon ko Lantawa o Hananil a manaros sa tampar sa sedepan
taman ko Gimowa ko Rogo.
39 Na pemantek roo so temanaan iyan sa tampar sa sedepan taman ko Bobongan a Gareb,
na kori roo sa tampar sa pagotaraan taman sa Gowah.
40 So langon o balintad a pelebengan ko miyamatay ago pelebadan ko manga ombi, ago
so pen so langon o manga pangomaan taman ko Balintad a Kidron sii sa sedepan taman
den ko Gimowa o Manga Koda sa pagotaraan na palaya ini kisenggay a rek o Allah. Na
di den kegeba so siti aya pen o ba mabinasa peroman."
YARAMIYAS 32
Miyamasa si Yaramiyas sa Lopa
Giyai i katero a minisampay ki Yaramiyas a poon ko Allah sii ko ikasapolo ragon a

kandadato i Sidikiyas sii sa Yodah a aya mambo ikasapolo ago walo rangon a kandadato i
Nibokadnisar sa Babilon.
2 Sa masa oto na kalilikopan a Yarosalim o manga sondaro o dato sa Babilon, na
kakalaboson so nabi Yaramiyas sii ko lamalama o walay o manga gordiya ko torogan o
dato.
3 Kiyalaboso sekaniyan roo i Sidikiyas a dato sa Yodah sabap ko kapepangalamat i
Yaramiyas a di niyan dii teroon a "Giyai i pitero o Allah: Peladen ko angkai a siti ko
kapaar o dato sa Babilon na keagaw niyan.
4 Si Sidikiyas a dato sa Yodah na di niyan kepalagoyan so manga taw sa Babilon, ka
mataan a kepalad sekaniyan ko dato sa Babilon na makapendarpai siran ago
makapembitiyarai.
5 Na kewit sekaniyan roo sa Babilon a ron ketatap taman ko aden a mikidia ko ron, a tig o
Allah. Apiya pen makitidawa kano ko manga taw sa Babilon na di kano pekataban."
6 Na pitero i Yaramiyas a "Giyai i pitero raken o Allah: Si Hanamil a wata i Siyalom a

bapa a ka na song reka na peteroon iyan reka a 'Pamasaa ngka so lopa aken roo sa Anatot,
ka seka i lebi aken a madaseg a tonganay na aden a kabenar ka sa kapemasaa ngka on.' "
8 Na minitoman so pitero o Allah, ka so tenged aken a si Hanamil na mintel raken sii ko

lamalama o walay o manga gordiya na tig iyan a "Pamasaa ngka so lopa aken a ndodoo sa
Anatot sa inged a Baniyamin, ka ana kabenar ka sa kaaona on ago katangana; na, pamasaa
ngka sa ginawa ngka." Na roo aken bo kiyatokawan a giyoto so katero o Allah.
9 Mandiyadi na piyamasa ko so lopa sa Anatot ko tenged aken a si Hanamil, na tinimbang
aken on so sapolo ago pito a pelata a pirak a minibayad on.
10 Pinirmaan aken ago siniliyowan so papilis na piyakiseksian aken ai ko manga taw, na
tinimbang aken so pirak ko timbangan.
11 Na kinowa ko so dowa a kopiya a kapasadan sa kapesai, a so isa on na kiyasiliyowan a
matatago on so manga taritib ago manga ording o kapasadan, ago so isa on na da
kasiliyowi
12 Na inibegay aken ai ki Barok a wata i Niriyas a so wata i Masiyas sii ko kamamasaan
o tenged aken a si Hanamil ago so manga saksi a miyakapirma ko papilis ago so langon o
manga Yahodi a moontod ko lamalama o manga gordiya.
13 Na sii ko hadapan iran na iniinsarat aken ki Barok a
14 “Giyai i pitero o Allah a Lebi a Mamaapaar a Tohan o Israil: Kowaa ngka angkai a
dowa a papilis a kapasadan sa kiyapesai, a so isa on na kiyasiliyowan ago so isa on na da
kasiliyowi, na tagoa ngka ko omoy kaan mamboway sa matey.
15 Ka pitero o Allah a Lebi a Mamaapaar a Tohan o Israil a 'So manga walay, manga
kalopaan ago manga asinda a obas na mapemasa peroman sangkai a inged.' "
So Kiyapangangarapan i Yaramiyas
16 Oriyan o kinibegan ko ron ki Barok a wata i Niriyas ko kapasadan ko kiyapesai na

miyangangarapan ako ko Allah:
17 “Ya Allah a Tohan ko, seka i mimbaal ko manga langit ago so doniya a nggolalan ko
kala a ka i gees ago kapaar. Da a ba ngka di kegaga!
18 Ipekelimo o ka so nggibonggibo a manga taw, ogaid na ipendaneg ka mambo ko
manga taw so manga dosa o lokes iran. Hey kababantogan ago mala i gees a Tohan a aya
Ingaran iyan na so Allah a Lebi a Mamaapaar,
19 Mala ka i kaongangen ko langon a peniyaten ka na piyakamemesa so manga galebek
ka. Pekeilay ngka so langon taman a dii nggolaolaan o manga manosiya, na pembalasan
ka so oman i isa mipantag ko manga okitokit iyan a aya ipekidia ngka on na mapapatot ko
manga galebek iyan.
20 Minggolaola ka sa manga nanao ago manga piyakamemesa na ipeteros ka den
nggolaola, ndatar sii sa Israil ago sii ko langon a ped a nasiyon. Sabap sii na
kababantogan ka imanto ko mbalabala.
21 Piyakaliyo ngka so manga pagtaw ngka a Israil sa Misir a nggolalan ko manga nanao
ago manga piyakamemesa, ago so kala a ka i gees ago kapaar a rakes o mala a
piyakalekelek.
22 Inibegay ngka kiran angkai a lopa a minisepa a ka a imbegay ngka ko manga apo iran,
a so pekepakayan ago oodaren a lopa.
23 Ogaid na sii ko kiyasoled iran sangkai a inged a miyatangan iran den na da iran
pakinega so pitero o ka kiran aya pen o ba iran tiyoman so manga sogoan ka. Da den a
iniinsarat ka kiran a ba iran nggolalanen! Sabap san na piyakatana a ka kiran angkai
langon a morala.
24 “Apiya imanto na mimbaal so manga taw sa Babilon sa manga tambak a inilikop ko

siti kaan iran maagaw, na pesondolan iran ai. Na sabap ko katidawa, ongos ago paniyakit
na kepalad kiran so siti. Pekeilay ngka a miyatoman den so langon a miyatero o ka.
25 Ogaid na pitero o ka raken, ya Allah a Tohan ko, a 'Pamasaa ngka a pirak so lopa na
pakiseksii ngka so kapepasai,' apiya pen magaan den maagaw o manga taw sa Babilon so
siti!"

27 “Saken so Allah a so Tohan o langon a manosiya. Ba aden a di aken kegaga?
28 Mataan den a peladen ko angkai a siti ki Nibokadnisar a dato sa Babilon ago so manga
taw niyan na keagaw iran.
29 So manga sondaro a somosondol sangkai a siti na pekasoled on ago perapogen iran.
Totongen iran ai sa tarotop a rakes on so manga walay a ron ako piyakakerangit o manga
taw ko kapetotong iran on sa doka a di iran dii soasoat ko Baal sii ko manga atep iran,
ago so kapesepaat iran sa manga panginginomen ko salakaw a manga tohan.
30 “So manga taw sa Israil ago sa Yodah na da den a miyanggolaola iran a rowar sa
marata ko kapekeilaya ko ron ipoon ko manga apo iran. Piyakakerangit ako iran ko
manga barahala a pimbaalan o manga lima iran, a tig o Allah.
31 Ipoon ko gawii a kiyabangona sangkai a siti na taman imanto na tanto ako a dii
pakaperangiten o manga taw ron. Na piyasad aken sa ginawa ko a payopasen ko ini sa
danga aken
32 Sabap ko langon a marata a miyanggolaola o manga taw sa Yodah ago sa Yarosalim
taman ko manga dato iran, manga olowan iran, manga imam iran ago manga nabi.
33 Tiyalikodan ako iran ka di siran raken sengor. Apiya pen lalayon aken siran
pepangendaon na di iran den pemakinegen aya pen o ba iran tomana so manga insarat
aken.
34 Piyamakatindeg iran so piyakasisingay a manga barahala sii ko Timplo a Pesimbaan
raken na piseboan iran oto.
35 Miyamangon siran sa manga aparan a pesimbaan ko Baal sii ko Balintad sa Bin
Hinom a ron iran dii korbana so manga wata iran a manga mama ago manga babay ko
katohanan iran a si Molik. Da aken kiran sogoon so kiyanggolaola iran sangkai a
piyakasisingay aya pen o ba ko pipikira a nggolaolaan iran ai ago mapakandosa iran so
manga taw sa Yodah.
So Initopa a Kapakaasal
36 “Benar ka ago so manga taw ko di niyo dii kateroa makapantag sangkai a siti a
'Nggolalan ko katidawa, ongos ago paniyakit na kepalad ai ko dato sa Babilon.' Ogaid na
giyai i pitero o Allah a so Tohan o Israil:
37 Matamataan a timoon ko so manga pagtaw aken a poon ko langon a manga inged a ron
aken siran iniparak sabap ko tanto aken a kiyapakanggani ago pesokeyaw a rarangit, na
ikesoy aken siran sangkai a darpa ago pakapeginetaon ko siran a lomilintad ago
malilinding.
38 Pekabaloy siran a manga pagtaw aken na pekabaloy ako a Tohan iran.
39 Mbegan ko siran sa matitiman a antap o poso iran a mipeginetaw iran, a giyoto so
kipekeleken iran raken lalayon kaan siran makategompiya ago so manga mbawataan iran.
40 Pagembaalan aken siran sa da a kaposan iyan a kapasadan. Di ako den tereg ko di
aken kiran dii kanggolaolai sa mapiya, na ndalemen aken ko poso iran so niyat sa
kipekeleken iran raken kaan ako iran di den ketalikodi.
41 Ikebabaya aken so kanggolaolai ko kiran sa mapiya, na mataan a pemolaan ko siran
sangkai a lopa sa iklas ko poso aken ago niyawa.
42 “Lagid o kiyapakatanaa ko kiran ko langon angkai a manga ala a morala," a tig o

Allah, "na lagid oto mambo o kimbegan ko kiran ko langon a kamapiyaan a minitopa ko
kiran.
43 Aya dii teroon o manga taw na giyangkai a inged na kelaslas a da a ba on taw o di na
ayam, na kepalad ai ko kapaar o manga taw sa Babilon. Ogaid na aden bo a kapepasai sa
manga lopa sangkai a inged.
44 Pemamasa peman so manga taw sa manga kalopaan, na pirmaan iran ago siliyowan so
manga kapasadan ko pasai, ago pakipeseksian iran oto. Mapenggolaola ini sii ko inged a
Baniyamin, sii ko manga paginedingedan ko melilibeta sa Yarosalim, sii ko manga siti sa
Yodah ago sa kapalawan a inged, sii ko manga siti ko manga bobongan sa sedepan ago
roo sa pagabagatan a inged a Yodah, ka pekaasalen aken so kapetegompiya iran, a tig o
Allah."
YARAMIYAS 33
Ikadowa a Initopa ko Kapakaasal
Sii ko kakakalaboso pen i Yaramiyas ko lamalama o walay o manga gordiya na

minisampay ron peman so katero o Allah:
2 “Saken, a so Allah, a mimbaal ko doniya a aya on miyakalimbag ago miyakambeken so
Allah i Ingaran aken na giyai i peteroon ko reka:
3'Talowi ako ngka na sembagen ko seka den, ka peyagen ko reka so piyakamemesa a
migagaib a manga nganin a di ngka katawan.'
4 Ka giyai i pitero o Allah a Tohan o Israil: so manga walay sii sa Yarosalim ago so
manga torogan o dato sa Yodah na penggegebaan sabap ko kalilikopi ago kagogobata o
manga Babilon ko siti.
5 So manga sondaro a pelinding ko siti na peliliyo a makipetidawa ko manga Babilon.
Ogaid na penoon baden o manga Babilon angkoto a manga walay sa manga bangkay o
manga taw a pemonoon aken sabap ko pesokeyaw a rarangit aken. Tiyalikodan ko angkai
a siti sabap ko langon a kamarataan o manga taw ron.
6 “Apiya pen oto na pembolongan ko angkai a siti ago so manga taw niyan na pekapiyaan
ko a ginawa iran. Mbegan ko siran sa mala a kalilintad ago kalilinding.
7 Pekaasalen aken so kapetegompiya a Yodah ago Israil, na mbengonen aken siran bo
peroman a datar gowani.
8 Pelompiyon ko siran ko langon o manga dosa a minisopak iran raken, na perilaan ko so
langon a dosa iran ago kasosopak.
9 Sa masa oto na giyangkai a siti a Yarosalim na ikebabaya aken, ago kipodi raken ago
kibantog sii ko langon a nasiyon sa doniya a pekaneg ko makapantag ko langon a mapiya
a di aken kiran dii nggolaolaan. Na penanabaden siran sa kapememesa sabap ko mala a
kapakaosor ago kalilintad a ipembegay aken kiran.'
10 Pitero o Allah a "Aya dii teroon o manga taw na 'Miyalaslas angkai a darpa a da den a
mababaling on a taw aya pen o ba manga ayam.' Na benar oto; so manga siti sa Yodah
ago so manga lalan sa Yarosalim na kiyaawaan den a da a ba on taw o di na ayam. Ogaid
na sii sangkai a manga darpa na keneg on peroman
11 So bogembog o kapekebabaya ago kasosonor, so manga sowara o pemangaroma ago
pemangaromaan, ago so manga lagam o siran oto a pegowit sa manga soasoat a
ipenalamat sii ko Timplo o Allah a di iran dii teroon a
'Panalamatan tano so Allah a Lebi a Mamaapaar,

ka mapiya so Allah
na tatap so gagaw niyan sa taman sa pakataman!'
Ka pekaasalen ko so kapetegompiya angkai a inged a datar gowani," a tig o Allah
12 Pitero o Allah a Lebi a Mamaapaar a "Sii sangkai a darpa a lagid o mitataog a da a taw
ron o di na ayam ago sii ko langon a pagingedingedan on na ketagoan bo sa manga
pananateba a ron mapekadeke o manga pananagikor sa bilibili so manga talon iran.
13 Sii ko manga inged sa kapalawan, sii ko manga bobongan sa sedepan, sii sa
pagotaraan sa inged Yodah, sii ko inged a Baniyamin, sii ko manga inged ko melilibeta sa
Yarosalim ago sii ko manga inged sa Yodah na pembilangen peman o manga pananagikor
so manga bilibili iran," a tig o Allah.
14 Pitero o Allah a "Pekatalingoma so manga gawii a penggolaolaan ko ko manga taw sa

Israil ago giya Yodah so langon a mapiya a initopa ko kiran.
15 “Sii sangkoto a manga gawii ago sangkoto a masa

na pakapendatoon ko kiran so maontol a mbawataan o Daod,
na penggolaolaan iyan so maontol ago matito sii ko inged.
16 Sangkoto a manga gawii na kesabet so manga taw sa Yodah
na so manga taw sa Yarosalim na makapeginetaw sa da a ba kiran pekabinasa.
Na aya ngaran a imbeto ko siti na
'So Allah i Kaontol tano.'
17 Ka saken, a so Allah, na initopa ko a di den kedaan so Daod sa mbawataan a

makapendato sa nasiyon a Israil
18 Aya pen o ba kadai sa mama so manga imam, a so manga Libitiyo, a lalayon raken
makapenalagad a pesepaat sa manga soasoat a petotongen, so manga pangenengken ago
so manga korban."
19 Na minisampay angkai a katero ki Yaramiyas a poon ko Allah:

20 “O kebaroba o manga taw so kapasadan aken mipantag ko daondaw ago so gagawii
kaan di ini makatalingoma ko miyatendo on a oras
21 Na giyoto bo i kakebaroba o kapasadan aken mipantag ko Daod a oripen aken. Giyoto
bo i kakedai ko Daod sa mbawataan a makapendato ko korsi iyan. Na datar oto mambo
so mipantag ko manga imam, a so manga Libitiyo, a pepamanalagad raken.
22 Na pakapendakelen ko so kebabadan ko Daod a oripen aken ago so manga Libitiyo a
pepamanalagad raken a lagid sa kadakel o manga bitoon a di keitong ago lagid o peted ko
kilid a ragat a di kebilang."
23 Na pitero o Allah ki Yaramiyas a

24 “Ba ngka da maneg a dii teroon o manga taw a 'Inisili o Allah so dowa a ndatoan a
manga taw sa Israil ago sa Yodah a pinili iyan? Sabap san na di iran dii sodiin so manga
pagtaw aken na di iran siran den ibibilang a nasiyon.
25 Ogaid na saken a so Allah na mimbaal sa kapasadan mipantag ko kadadaondaw ago so
kagagawii, ago saken i miyaden ko manga kokoman a mapapaar ko langit ago so doniya.
26 Na lagid o kapakatatangked o kiyanggolaolaa ko sii na matatangked mambo a di aken
den isili so manga mbawataan o Yakob ago so Daod a oripen aken. Piliin aken so isa ko
mbawataan o Daod a makapendato ko manga mbawataan o Ibrahim, Iskak ago so Yakob.
Pekaasalen aken so kapetegompiya o manga pagtaw aken na ipengalinggagaw aken
siran."
YARAMIYAS 34
So Lalangan ki Sidikiyas
Minisampay ki Yaramiyas so katero o Allah sii ko masa a si Nibokadnisar a dato sa

Babilon ago so langon o manga sondaro niyan a pegogopan o manga sondaro ko langon a
manga ndatoan ago manga bangsa a kasesakopan iyan na penggobaten iran a Yarosalim
ago so melilibeta on a pagingedingedan.
2 “Pitero rekaniyan o Allah a "Giyai i pitero o Allah a Tohan o Israil: Song ka ki
Sidikiyas a dato sa Yodah na teroa ngka on a 'Giyai i pitero o Allah: Peladen aken den
angkai a siti ko kapaar o dato sa Babilon na totongen iyan ai.
3 Di ngka sekaniyan kepalagoyan, ka kedakep ka den ago kepalad ka rekaniyan. Keilay
ngka so dato sa Babilon a makipembitiyarai reka a ndadangai kano. Oriyan iyan na
pagowiten ka sa Babilon.
4 Ogaid na pakinega ngka so itopa reka o Allah, hey Sidikiyas a dato sa Yodah! Ka
pitero o Allah makapantag reka a di ka petay ko katidawa
5 Ka petay ka a lomilintad. Na lagid o dii kaperapog o manga taw a ipeselasela iran ko
manga apo o ka a so miyanga oona a manga dato na perapog siran mambo sa
kipeselaselaan iran reka. Na pendiyaga siran a tig iran a 'Inao, miyatay den so Pangolo
tano!' Saken a so Allah i mitero sii."
6 Na pitero ini langon o nabi Yaramiyas ki Sidikiyas a dato sa Yodah sii sa Yarosalim.
7 Pinggolaola niyan ai sii ko kasosondoli o manga sondaro o dato sa Babilon sa
Yarosalim, Lakis ago giya Asikah a giya bo i miyalamba a kikokotaan a manga siti sa
Yodah a da pen tabana.
So Kakebokai ko manga Oripen
8 Giyangkai a katero o Allah na minisampay ki Yaramiyas ko oriyan o kiyambaal o dato

Sidikiyas ago so langon o manga taw sa Yarosalim sa kapasadan sa kabokai ran ko manga
oripen iran.
9 Paliyogat ko oman i isa a bokai niyan so manga oripen iyan a Hibriyo a palaya den so
manga mama ago manga babay. Da den a ba makapengongoripen ko royod iyan a
Yahodi.
10 Na so langon o manga taw ago so manga olowan iran a minisoled sangkai a kapasadan
na miniyog siran sa kabokai ran ko manga oripen iran a manga mama ago manga babay
ago so di kiran den kapengongoripeni peroman. Na tiyoman iran ai ka piyamokaan iran.
11 Ogaid na oriyan oto na inalin iran so manga pamikiran iran. Kinowa iran peroman so
manga oripen a biyokaan iran na piyangongoripen iran peroman.
12 Pitero o Allah ki Yaramiyas a teroa niyan ko manga taw a

13 “Giyai i pitero o Allah a Tohan o Israil: Mimbaal ako sa kapasadan mipantag ko
manga apo iyo ko kiniliyon aken kiran sa inged a Misir a ron siran miyapangongoripen.
Pitero aken kiran a
14'Oman pito ragon na disomala a mbokaan o oman i isa rekano so apiya antawaa a royod
iyan a Hibriyo a miyapesa niyan a ginawa niyan sii rekano. Oriyan o kiyapakapanalagad
iyan rekano sa nem ragon na disomala a mbokaan iyo. Ogaid na da ako pamakinega o
manga apo iyo aya pen o ba ako iran tiyago sa ginawa.
15 Da ini matey na miteobat kano na minggolaola kano sa ontol ko hadapan aken.
Piyamokaan iyo so manga oripen iyo na mimbaal kano pen sa kapasadan sii ko
kamamasaan aken sii ko Timplo a Pesimbaan raken.
16 Ogaid na imanto na inalin iyo peroman so manga pamikiran iyo na piyakaito ako niyo.
Langon kano na kinowa niyo peroman so manga oripen iyo a mama ago babay a
biyotawanan iyo ko kabaya iran na tigel iyo siran peman mangongoripen.
17 “Kagiya ka maoto na giyai i pitero rekano o Allah: Da ako niyo paratiyayaa; da niyo
botawani so manga royod iyo a manga Israil. Sabap san na mbotawanan ko sekano," a tig
o Allah; kebotawanan kano a mamatay a pedang, ongos ago paniyakit. Pakapememesaan
ko so langon o manga nasiyon sa doniya a nggolalan ko penggolaolaan ko rekano.
18 Ndenegen aken angkoto a manga taw a miyakasogok ko kapasadan aken. Ikidia ko
kiran so inikidia iran ko nati a sapi sii ko kiyaopaka iran on kaan siran makaokit ko
pageletan o dowa opak on sa kipemataanen iran ko manga samaya iran, ka kagiya da iran
tomana so manga kokoman o kapasadan a inembaalan iran sii ko hadapan aken.
19 Oway, ndenegen aken so manga olowan sa Yodah ago sa Yarosalim a rakes o manga
sanasanaan o dato, so manga imam ago so langon o manga taw ko inged a miyamangokit
ko dowa opak o nati.
20 Peladen ko siran ko manga ridoay iran a kebaya kiran mamono, na pengengen so
manga bangkay iran o manga papanok sa kawang ago so manga iila a binatang.
21 Peladen ko si Sidikiyas a dato sa Yodah ago so manga sanasanaan iyan ko manga
ridoay iran a kebaya kiran mamono, ka peladen ko siran ko manga sondaro o dato sa
Babilon apiya pen inawaan kano iran pasin.
22 Sogoon ko siran, a tig o Allah, na pemangasoy siran sangkai a siti. Na nggobaten iran
ai ago pagagaon iran ago totongen. Pekilaslas aken so manga inged sa Yodah kaan da
den a ba on pekabaling."
YARAMIYAS 35
So Kapetoman o manga Mbawataan o Rikab
Sii ko kandadato i Yahoyakim a wata i Yosiyas sii sa Yodah na pitero o Allah ki

Yaramiyas a
2 “Song ka ko inged a kababalingan o manga mbawataan o Rikab na bantowi ngka siran a
domarpa siran ko isa a rowang ko kilid o Timplo o Allah na paganaa ngka siran a arak a
mainom iran."
3 Na somiyong ako roo na kinowa ko si Yaasaniyas a wata i Yaramiyas ago apo i
Habasiniyas a rakes o langon o manga pagari niyan ago manga wata, a so langon o
mbawataan o Rikab
4 Na inowit aken siran ko Timplo o Allah.
4 Inisoled aken siran ko rowang a isesenggay ko manga sokbat o nabi Hanan a wata i
Igdaliyas. Giyangkoto a rowang na tomalondog ko rowang o manga opisiyal ago sii ko
kaporoan o rowang o Maasiyas a wata i Siyalom a so komikibir ko pintoan.
5 Na inenatan aken so manga mbawataan o Rikab sa manga omoy a kikapepeno a arak
ago manga tagayan na pitero aken kiran a "Pamanginom kano ko arak."
6 Ogaid na somimbag siran a "Di kami maginom sa arak, ka so apo ami a si Yonadab a
wata i Rikab na inisogo iyan rekami a 'Sekano ago so manga kebabadan rekano na di
kano den paginom sa arak sa taman sa pakataman.
7 Di kano pen pekabangon sa manga walay ago di pemakasaod sa pereperan aya pen o ba
kano makapamamola sa manga obas; di kano pekakowa sa apiya anda sangkai a manga
nganin, ka disomala a sii kano pekakaden ko manga barombarong ko tenday a omor iyo.
O tomana niyo angkai a manga sogoan na kemboway kano ko inged a panananggaan iyo.'
8 Tiyoman ami so langon taman a inisogo rekami o apo ami a si Yonadab a wata i Rikab.
Da kami den makainom sa arak, apiya sekami o di na so manga karoma ami aya pen o ba
so manga wata ami a manga mama ago manga babay,
9 Na da kami den makabangon sa manga walay aya pen o ba aden a manga asinda mi a
obas, manga dii mbasokan o di na manga pereperan.
10 Sii kami bo babaling ko manga barombarong, na tiyoman ami piyapiya so langon a
inisogo rekami i Yonadab a apo ami.
11 Ogaid na isako gobaten i Nibokadnisar a dato sa Babilon angkai a inged na pitero ami
a 'Itano, somong tano sa Yarosalim kaan tano kalidasi so manga sondaro a poon sa
Babilon ago sa Siriya.' Giyoto i sabap a sisii kami den sa Yarosalim.
12 Na giyoto a minisampay so katero o Allah ki Yaramiyas a tig iyan a
13 “Giyai i pitero o Allah a Lebi a Mamaapaar a Tohan o Israil: Ika roo na teroa ngka ko
manga taw sa Yodah ago sa Yarosalim a 'Ino ako niyo di pemakinega ago di petomana so
manga katero aken?
14 Si Yonadab a wata i Rikab na inisogo iyan a so manga mbawataan iyan na di siran
minom sa arak na di iran dii nggolalan angkai a sogoan. Taman imanto a gawii na da den
a ba kiran maginom sa arak ka kagiya petomanen iran so sogoan o apo iran. Ogaid na
omanoman ako rekano dii makimbitiyarai na da ako niyo den paratiyayaa.
15 Omanoman aken rekano den pepekasongen so langon a manga oripen aken a manga
nabi sa kapeteroa iran rekano a "Talikodi o oman i isa rekano so manga rarata a okitokit
iyo ago alina niyo so manga olaola niyo. Di niyo simbaa ago di niyo pengongontani so
salakaw a manga tohan kaan kano makataros maginetaw ko lopa a inibegay aken rekano
ago so manga apo iyo." Ogaid na da ako niyo pamakinega aya pen o ba niyo tiyago sa
ginawa.
16 Oway, so manga mbawataan i Yonadab a wata i Rikab na di iran dii nggolalan so
sogoan a inibegay kiran o apo iran, ogaid na sekano na da ako niyo paratiyayaa.
17 Kagiya ka maoto na giyai i pitero aken, a so Allah a Lebi a Mamaapaar a Tohan o
Israil: Pekatanaan ko rekano a manga taw sa Yodah ago sa Yarosalim so langon a morala
a miyatero aken a isiksa rekano. Penggolaolaan ko ai ka da niyo pamakinega so pitero
aken rekano aya pen o ba kano somimbag ko kiyatalowi ko rekano.' "
18 Na pitero i Yaramiyas ko manga mbawataan o Rikab a "Giyai i pitero o Allah a Lebi a

Mamaapaar a Tohan o Israil: Tiyoman iyo so sogoan o apo iyo a si Yonadab.
Ininggolalan iyo so langon a insarat iyan ago miyanggolaola niyo so langon taman a
inisogo iyan rekano.
19 Kagiya ka maoto na giyai i pitero o Allah a Lebi a Mamaapaar a Tohan o Israil: So
Yonadab a wata i Rikab na di den kedaan sa moriyataw a mama a makapenalagad raken.
YARAMIYAS 36
Tiyotong i Yahoyakim so Pesoratan a Minisorat on so manga Katero o Allah
Sii ko ikapat ragon a kandadato i Yahoyakim a wata i Yosiyas sii sa Yodah na pitero o
Allah ki Yaramiyas a
2 “Kowa ka sa pesoratan na soraten ka on so langon a manga katero a miyatero aken reka
makapantag sa Israil, Yodah ago so langon a ped a manga nasiyon ipoon ko paganay a
kiyapakimbitiyarai aken reka sii ko kandadato i Yosiyas na taman imanto.
3 Ka kalokalo o ba amay ka maneg o manga taw sa Yodah so makapantag ko langon a
morala a kekadiyaten aken a itena aken kiran na genekan nggolaola o oman i isa kiran so
manga rarata a galebek iyan. Amay ka magiyoto na perilaan aken so kamarataan iran ago
so manga dosa iran."
4 Mandiyadi na piyakisogoan i Yaramiyas si Barok a wata i Niriyas, na sii ko di ron dii

kateroa i Yaramiyas ko langon a manga katero a miyatero on o Allah na ipesorat ini i
Barok ko pesoratan.
5 Oriyan iyan na pitero i Yaramiyas ki Barok a "Lagid ako sii a kalaboso na di ako
pekasong ko Timplo o Allah.
6 Sabap roo na song ka ko Timplo sii ko gawii a dii kapowasa na batiyaa ngka ko manga
taw so manga katero o Allah a piyakisorat aken reka sangkai a ribro. Batiyaa ngka ko
kapekenega on o langon a manga taw sa Yodah a pepemakaoma roo a poon ko manga siti
iran.
7 Baanda siran pamangni ko Allah sa limo na talikodan iran so manga rarata a okitokit
iran, ka piyakalekelek so pesokeyaw a rarangit o Allah a pikediyat iyan a
pakapemborngaten iyan kiran."
8 Na ininggolalan i Barok a wata i Niriyas so langon taman a inisogo on o nabi

Yaramiyas, ka sii ko Timplo na biyatiya iyan so manga katero o Allah a minisorat ko
pesoratan.
9 Miyanggolaola ini sii ko ikasiyaw olan ko ikalima ragon a kandadato i Yahoyakim a
wata i Yosiyas sii sa Yodah. Sa gawii oto na so langon a kibabaling sa Yarosalim ago so
langon a taw a miyamakapoon ko manga inged sa Yodah na mipowasa siran sii ko
hadapan o Allah.
10 Na sii ko kapepamamakineg o manga taw na biyatiya i Barok so manga katero i
Yaramiyas a minisorat ko pesoratan. Pinggolaola niyan ai sii ko Timplo sii ko rowang i
Gimariyas a wata i Siyapan a panonorat a sii matatago ko kaporoan ko lamalama a marani
ko gimowa a bebetowan sa Bago a Gimowa.
Biyatiya so Sorat ko manga Olowan
11 Si Mikayas a wata i Gimariyas ago apo i Siyapan na miyaneg iyan so langon o manga
katero o Allah a biyatiya i Barok a inisorat ko pesoratan.
12 Na somiyong sekaniyan ko torogan o dato sii ko rowang o panonorat a ron mitimo so
langon o manga olowan: si Ilisiyama a so panonorat o dato, si Dilayas a wata i Simayas,
si Ilnatan a wata i Akbor, si Gimariyas a wata i Siyapan, si Sidikiyas a wata i Hananiyas
ago so langon a ped o manga olowan.
13 Na piyanotol kiran i Mikayas so langon a miyaneg iyan sii ko kapembatiya i Barok ko
manga taw.
14 Mandiyadi na so langon o manga opisiyal na piyakasong iran si Yihodi (a wata i
Nitaniyas a so wata i Silimiyas a so wata i Kosi) sii ki Barok sa kapeteroa niyan on a wita
niyan kiran so ribro a biyatiya iyan ko manga taw. Na kinowa ini i Barok na somiyong
kiran.
15 Na pitero iran on a "Kapedipedi ka bo na ontod ka na batiyaa ngka rekami so sorat," na
biyatiya ini kiran i Barok.
16 So kiyapasada niyan on na miyakatetentenga siran a miyanga alek, na pitero iran ki
Barok a "Disomala a pakitokawan ami langon angkai a manga katero sii ko dato."
17 Na iniise iran ki Barok a "Teroa ngka rekami o andamanaya i kinisoraten ka sii
langon? Ba piyakisorat reka i Yaramiyas?"
18 “Oway," a inisembag i Barok. "Pitero iyan raken langon angkai a manga katero, na
inisorat aken a dawat sangkai a pesoratan."
19 Na pitero o manga olowan ki Barok a "Ikano roo ago si Yaramiyas na tepok kano, na o
ba aden a pakatokaon iyo o anda kano."
20 Na tiyago o manga olowan so ribro roo ko rowang i Ilisiyama a panonorat na
somiyong siran ko dato sii ko torogan na piyanotol iran on so langon taman.
Tiyotong o Dato so Sorat
21 Mandiyadi na piyakikowa o dato ki Yihodi so sorat. Na kinowa ini i Yihodi ko

rowang i Ilisiyama na biyatiya iyan ko dato ago sii ko langon o manga sanasanaan a
kititindeg ko kilid iyan.
22 Ikasiyaw oto a olan na panenggaw, na moontod so dato ko rowang iyan a aden a apoy
sii ko apoya ko danga iyan.
23 Oman on makabatiya si Yihodi sa telo o di na pat ka ayat na pegabisen on o dato a
gelat na ipegitog iyan ko apoy taman sa palaya den miyatotong so sorat.
24 Ogaid na so dato ago so langon a sanasanaan iyan na da den a kalek iran aya pen o ba
aden a kateobat a miyapakiilay iran sii ko kapekenega iran sangkai langon a manga
katero.
25 Apiya pen inakolan i Ilnatan, si Dilayas ago si Gimariyas so dato sa di niyan totonga
so sorat na da niyan siran pakinega.
26 Ka baden inisogo o dato ki Yarakmiil a wata o dato, si Sirayas a wata i Asriyal ago si
Siyalimiyas a wata i Abdiil a dakepen iran si Barok a so pananorat ago so nabi
Yaramiyas, ogaid na initapok siran den o Allah.
Misorat peroman si Yaramiyas sa Sorat
27 Oriyan o kiyatotonga o dato ko ribro a matatago on so manga katero a piyakisorat i

Yaramiyas ki Barok na pitero o Allah ki Yaramiyas a
28 “Kowa ka sa ped a pesoratan na soraten ka on so langon o manga katero a misosorat
ko paganay a sorat a tiyotong i Yahoyakim a dato sa Yodah.
29 Na teroa ngka ki Yahoyakim a 'Giyai i kabasa o Allah: tiyotong ka so ribro na iniise a
ka ki Yaramiyas o ino niyan on soraten a matamataan den a song sii so dato sa Babilon a
mbinasaan iyan angkai a inged ago polangen iyan so langon o manga taw ron taman ko
manga ayam.'
30 Kagiya ka maoto na giyai i pitero o Allah makapantag ki Yahoyakim a dato sa Yodah:
''So badan iyan na ipelebad ko darpa a ron kebansayan ko karanti o alongan ko
kadadaondaw ago so katenggaw ko kagagawii.
31 Ndenegen ko sekaniyan ago so manga wata iyan ago so manga sanasanaan iyan sabap
ko kamarataan iran. Itena aken kiran ago so kibabaling sa Yarosalim ago so manga taw
sa Yodah so langon a miyatero aken a ipemorala ko kiran sabap sa da ako iran pakinega."
32 Na kominowa si Yaramiyas sa ped a pesoratan na inibegay niyan ko panonorat iyan a

si Barok a wata i Niriyas, na inisorat iyan on so di on dii teroon i Yaramiyas. Inisorat
iyan so langon taman a matatago ko miyaona a sorat a tiyotong i Yahoyakim a dato sa
Yodah, na madakel a manga katero a minioman on.
YARAMIYAS 37
So Pangni i Sidikiyas ki Yaramiyas
Si Sidikiyas a wata i Yosiyas na aya miyakandato a minisambi ki Yahoyakin a wata i

Yahoyakim. Minitoro sekaniyan i Nibokadnisar a dato sa Babilon a aya pendato sa
Yodah.
2 Ogaid na so dato Sidikiyas ago so manga sanasanaan iyan a rakes o manga taw sa inged
na da iran tagoa sa ginawa so manga katero o Allah a inisampay niyan kiran a
miyakanggolalan ko nabi Yaramiyas.
3 Apiya pen oto na siyogo o dato Sidikiyas si Yahokal a wata i Siyalimiyas ago si
Sipaniyas a wata i Maasiyas sa somong siran ko nabi Yaramiyas sa kapeteroa iran on a
"Kapedipedi ka bo na pangnin kami ngka ko Allah a Tohan tano."
4 Sa masa oto na da pen makalaboso si Yaramiyas; sabap roo na kabobotawanan
sekaniyan pen sa kapakipagepeda iyan ko manga taw.
5 Sa kapapantagan oto na so manga sondaro o Piraon na lomiyalakaw den a poon sa Misir
a pegantap sa Yarosalim, na kagiya maneg o manga taw sa Babilon a gomogobat sa
Yarosalim so makapantag sii na inawaan iran so siti.
6 Samaoto na pitero o Allah a Tohan o Israil ko nabi Yaramiyas a

7 “Pakimbitiyarai ka ki Sidikiyas a dato sa Yodah a somiyogo reka sa kapagisei raken na
teroa ngka on a 'So manga sondaro o Piraon a pesong sa Yarosalim sa katebangi ran
rekano na kesoy siran ko inged iran a Misir.
8 Na kesoy sii so manga taw sa Babilon na nggobaten iran angkai a siti, na keagaw iran
ago totongen iran sa tarotop.
9 Saken, a so Allah, na ipelalang aken rekano a di niyo pegakali a ginawa niyo sa
kapipikira niyo ron a mataan a di den kesoy sii so manga taw sa Babilon, ka kesoy siran
den!
10 Apiya pen o mataban iyo so langon o manga sondaro a Babilon a gomogobat rekano a
aya bo a kelamba kiran na so kikaaangel a kipakaiiga ko manga barombarong iran na
magembowat siran na totongen iran den angkai a siti."
Diyakep ago Kiyalaboso si Yaramiyas
11 Sii ko kaaawai o manga sondaro a Babilon sa Yarosalim sabap ko kapegagaw ron o

manga sondaro o Piraon
12 Na miyaninimo si Yaramiyas sa kangganati niyan ko siti, ka song ko inged a
Baniyamin sa kakowaa niyan ko bagian iyan ko ganat o manga lokes iyan.
13 Ogaid na so kiyapakaoma niyan ko Gimowa o Baniyamin na piyakatareg sekaniyan o
kapitan o manga gordiya a aya ngaran iyan na si Iridiyas a wata i Siyalimiyas a so wata i
Hananiyas. Na pitero iyan ki Yaramiyas a "Pelagoy ka kaan ka makatampil ko manga
taw sa Babilon!"
14 “Di anan benar!" a tig i Yaramiyas. "Di ako tempil ko manga taw sa Babilon." Ogaid
na da pakinega i Iridiyas si Yaramiyas, na diyakep iyan ago inowit iyan ko manga olowan.
15 Na tanto iran a kiyararangitan si Yaramiyas, na piyakipamadasan iran na kiyalaboso
iran ko walay i Yonatan a so panonorat o dato, ka so walay niyan na biyaloy iran a
kalaboso.
16 Tiyago iran si Yaramiyas ko koop a kalaboso ko didalem o lopa a ron sekaniyan
miyatago sa miyatey.
17 Sii sangkoto a manga gawii na piyakisogoan sekaniyan o dato Sidikiyas ago piyakiwit
iyan ko torogan o dato a ron iyan inisei sa masolen a tig iyan a "Ba aden a katero a poon
ko Allah?"
"Oway, aden," a tig i Yaramiyas, "kepalad ka ko dato sa Babilon."
18 Na pitero pen i Yaramiyas a "Antonaa a kasalaan i miyasogok aken reka o di na sii ko

manga olowan ka o di na giyangkai a manga taw a inikalaboso ngka raken?
19 Antonaa i miyasowasowa ko manga nabi ngka a mitero reka a so dato sa Babilon na di
ka niyan nggobaten o di na giyangkai a siti?
20 Ogaid na imanto, kadnan ko a dato, na kapedipedi ka bo na pakinega ko ngka.
Tarimaa ngka ngkai a pangni aken reka na di ako ngka kesowin ko walay i Yonatan a
panonorat, ka petay ako roo."
21 Na inisogo o dato Sidikiyas a roo kalabosowa si Yaramiyas ko lamalama o walay o

manga gordiya ko torogan o dato. Inisogo pen o dato a oman gawii na pembegan
sekaniyan sa paan a poon ko pepangembaal sa paan taman sa miyalengan so langon o
paan ko siti. Na roo den matatago si Yaramiyas ko lamalama o walay o manga gordiya.
YARAMIYAS 38
Inalogan si Yaramiyas ko Kiyamaraan a Paridi
Si Siyapatiyas a wata i Mattan, si Gidaliyas a wata i Pasiyor, si Yokal a wata i Siyalimiyas

ago si Pasiyor a wata i Malkihas na miyaneg iran den so miyatero i Yaramiyas ko manga
taw ko kiyateroa niyan sa
2 “Giyai i pitero o Allah: 'Saden sa telimbegak sangkai a siti na petay den ko katidawa,
ongos o di na paniyakit, ogaid na apiya antawaa i meliyo ko siti a sengkop ko manga taw
sa Babilon na di petay, ka makapegoyag.' "
3 Miyaneg iran pen angkai pitero i Yaramiyas a "Giyai i pitero o Allah: 'Mataan a kepalad
angkai a siti ko manga sondaro o dato sa Babilon a aya on pekataban.' "
4 Na somiyong angkai a manga olowan ko dato na pitero iran on a "Disomala a mbonoon

angkai a mama. So di niyan dii teroon na ipetelaw o manga sondaro a miyalamba sangkai
a siti taman ko langon o manga taw. Giyangkai a mama na kena a ba niyan pepanamari
so kamapiyaan angkai a manga taw, ka so kabinasaan kiran."
5 “Oway," a tig o Dato Sidikiyas, "na saden sa kabaya iyo na mapenggolaola niyo ron; da
a ba ko rekano kisangka."
6 Mandiyadi na kinowa o manga olowan si Yaramiyas na inalogan iran a tali sii ko paridi
i Malkihas a wata o dato a matatago ko lamalama o manga gordiya. Kiyadaan den sa ig
so paridi ogaid na lapot den a ndodoo sa soled, na minigaled si Yaramiyas ko latay.
7 Ogaid na si Ibid-Milik a taw sa Itiyopiya a so isa a kapon a pepanalagad ko dato na

kiyatokawan iyan a tiyago iran si Yaramiyas ko paridi. Samaoto na sii moontod so dato
ko penggaka ko Gimowa o Baniyamin,
8 Na lominiyo si IbidMilik ko torogan na somiyong ko dato a tig iyan on a
9 “Hey kadnan ko a dato, marata so pinggolaola angkai a manga mama ko nabi
Yaramiyas. Inolog iran ko paridi a ron sekaniyan petay a ongos, ka da den a
pangenengken ko siti."
10 Na inisogo o dato ki Ibid-Milik a "Pakaonot ka sa telo polo kataw a mama na gakapen

iyo si Yaramiyas a poon ko paridi kaan di petay."
11 Na piyakaonot i Ibid-Milik so manga mama na somiyong siran ko rowang sii ko

didalem o petimoan sa tamok sii ko torogan, na kominowa siran on sa andang a manga
togak ago ronot a manga nditaren na tiyayoton iran a tali ki Yaramiyas sii ko paridi.
12 Na pitero i Ibid-Milik ki Yaramiyas a "Tagoa ngka angkai a manga togak ko irek ka
kaan di kesakiti o tali," na pinggolaola ini i Yaramiyas.
13 Na giyamit iran sekaniyan a tali na miyakagakap sekaniyan ko paridi. Oriyan iyan na
roo den si Yaramiyas ko lamalama o walay o manga gordiya.
Inisean peroman i Sidikiyas ki Yaramiyas
14 Da peman ai matey na piyakisogoan o dato Sidikiyas si Yaramiyas na piyakiwit iyan

sekaniyan ko ikatelo a gimowa ko Timplo na pitero on o dato a "Aden a ipagise aken
reka, na di ngka raken pegmaa so apiya antonaa."
15 Na tig i Yaramiyas ki Sidikiyas a "O teroa ko reka so benar na pekibono ako ngka. Na
o mosawiri ko seka na di ako ngka pekinegen."
16 Ogaid na inisepa o dato Sidikiyas sa masolen ki Yaramiyas a tig iyan a "Matamataan

ko kaooyagoyag o Allah a migay rektano sa niyawa ka di aken seka mbonoon aya pen o
ba aken seka palada ko manga taw a kebaya reka mono."
17 Na pitero i Yaramiyas ki Sidikiyas a "Giyai i pitero o Allah a Lebi a Mamaapaar a so

Tohan o Israil: O sangkop ka ko manga olowan o dato sa Babilon na makapegoyag kano
ago so pamiliya ngka, na di ketotong angkai a siti.
18 Ogaid na o di ka sengkop na kepalad angkai a siti ko manga taw sa Babilon na
totongen iran ai, na apiya seka na di kiran pekapalagoy."
19 Na pitero o dato Sidikiyas ki Yaramiyas a "Ipekelek aken so manga Yahodi a

tomiyampil ko manga taw sa Babilon, ka o ba ako baden palada kiran o manga taw sa
Babilon na peranegen ako iran."
20 “Di ka iran peladen kiran," a inisembag i Yaramiyas. "Pengnin ko reka den a
paratiyayaa ngka so Allah sa kinggolalanen ka ko pitero aken reka na ipekapiya ngka ini
ago pekalidas so niyawa ngka
21 Ogaid na o sangka ka somangkop na giyai i piyayag raken o Allah a kesowasowa:
22 So langon o manga babay a kibegak ko torogan o dato sa Yodah na ipeliyo ron ago
imbegay ko manga olowan o dato sa Babilon. Na pegongatongaten ka iran a di iran dii
teroon a
'Miyaakal ka angkoto a madaseg a manga ginawai ngka

ago diyaag ka iran.
Minigaled ko latay so manga ai ngka
na tiyalikodan ka iran ago inawaan.' "
23 Pitero pen i Yaramiyas a "So langon o manga karoma ngka ago manga wata a ka na
pengowiten roo ko manga taw sa Babilon, na giya den a ginawa ngka na di kiran
pekapalagoy, ka kebiyag ka baden o dato sa Babilon, na ketotong angkai a siti."
24 Na pitero i Sidikiyas ki Yaramiyas a "Di ngka teroa ko apiya antawaa angkai a

pimbitiyaraiyan ta ka o ba ka baden mabono.
25 Ogaid na o katokawi o manga olowan a miyakimbitiyarai ako reka na songowan ka
iran na peteroon iran reka a 'Teroa ngka rekami o antonaa i pimbitiyaraiyan iyo ago so
dato. Di ngka rekami pegmaa, ka o magiyoto na mbonoon ami seka.'
26 Na teroa ngka kiran a 'Miyangangampedian ako ko dato sa di ako niyan pekakasowin
ko walay i Yonatan, ka o ba ako roo baden matay.'
27 Na giyanan i miyanggolaola, ka somiyong ki Yaramiyas so langon o manga olowan na

inisean iran sekaniyan. Na pitero iyan kiran so langon a iniinsarat on o dato a peteroon
iyan. Sabap roo na da den a ped a miyatero iran on ka da den a miyakaontaling ko
pimbitiyaraiyan iran ago so dato.
28 Na roo den kakalabosowa si Yaramiyas ko lamalama o walay o manga gordiya taman
ko gawii a kiyatabana sa Yarosalim.
YARAMIYAS 39
Sii ko ikasiyaw ragon a kandadato i Sidikiyas sa Yodah, sii ko ikasapolo olan, na si

Nibokadnisar a dato sa Babilon a rakes o langon a sondaro niyan na komiyasoy siran sa
Yarosalim na linikopan iran.
2 Na sii ko ikasapolo ago isa ragon ko kandadato i Sidikiyas, sii ko ikasiyaw gawii ko
ikapat olan, na miyakaleseb siran ko pangeleban o siti.
3 Na giyoto a so langon o manga olowan o dato sa Babilon na miyamanoled ko siti na
miyamangontod sii ko gimowa iyan a bebetowan sa Gimowa sa Look: si Nirgal-Siyarisir
a taga Samgar, si Nibo-Sarsikim a maporo a olowan, si Nirgal-Siyarisir a maporo a
sanasanaan ago so langon o manga ped a sanasanaan o dato sa Babilon.
4 Kagiya mailay siran o dato Sidikiyas ago so langon o manga sondaro niyan na tipengan
iran a kapalagoy iran a poon ko siti ko kagagawii. Lominiyo siran on a miyamangokit ko
sapadan o dato ago so gimowa a isosompat ko dowa a pangeleban na miyagaw siran sa
tampar sa Balintad ko Lawasaig a Yordan.
5 Ogaid na piseloba siran o manga sondaro a Babilon na riyaot iran si Sidikiyas sii ko
kapantaran sa Yariko. Diyakep iran sekaniyan na inowit iran ko Nibokadnisar a dato sa
Babilon sii sa Riblah ko inged a Hamat a ron sekaniyan siyala o dato sa Babilon.
6 Roo sa Riblah na piyamono iyan so manga wata a mama i Sidikiyas sii ko kamamasai
niyan on, na piyakipamono iyan pen so langon o manga sanasanaan sa Yodah.
7 Oriyan iyan na piyakisowat iyan on so manga mata i Sidikiyas ago piyakipatong iyan a
rantay ka pagowiten iyan sa Babilon.
8 Samaoto na tiyotong o manga taw sa Babilon so torogan o dato ago so manga walay o
manga taw na piyanempag iran so manga pangeleban a Yarosalim.
9 Si Nibosaradan a so komandir o manga gordiya o dato na piyamiyag iyan so miyalamba
a manga taw sii ko siti a rakes o siran oto a tomiyampil rekaniyan na initaog iyan siran sa
Babilon.
10 Ogaid na inibegak iyan ko inged a Yodah so ped ko manga taw a tanto den a miskin a
da den a ba niyan rek na piyamegan iyan siran sa manga asinda a obas ago manga
kalopaan sa masa oto.
Biyokaan si Yaramiyas
11 Na piyandoan o dato Nibokadnisar si Nibosaradan a komandir o manga gordiya

makapantag ki Yaramiyas a tig iyan a
12 “Kowaa ngka sekaniyan na siyapa ngka. Di ngka pekasakiti, ka nggolaolaa ngka on so
apiya antonaa i pengnin iyan."
13 Mandiyadi na si Nibosaradan ago so manga poporo a olowan a si Nibosiyasban ago si
Nirgal-Sarisir a rakes o langon o manga sanasanaan o dato sa Babilon
14 Na piyakikowa iran si Yaramiyas a poon ko lamalama o walay o manga gordiya.
Piyakisiyap iran sekaniyan ki Gidaliyas a wata i Ahikam ago apo i Siyapan kaan iyan
mibaling ko walay niyan. Na roo den komakaden si Yaramiyas sii ko ped iyan a manga
taw.
So Initopa o Allah ki Ibid-Milik
15 Sii pen ko kakakalaboso i Yaramiyas ko lamalama o manga gordiya na pitero on o

Allah a
16 “Ika roo na teroa ngka ki Ibid-Milik a taga Itiyopiya a 'Giyai i kabasa o Allah a Lebi a
Mamaapaar a so Tohan o Israil: Magaan aken den itoman so miyatero aken makapantag
sangkai a siti na pemoralaan aken a kena a ba pakapetegompiyaa. Amay ka manggolaola
ini na kemasaan ka den,
17 Ogaid na pelindingen ko seka sangkoto a gawii," a tig o Allah, "na di ka kepalad ko
manga taw a ipekelek ka.
18 Mataan a sebeten ko seka na di ka kebono; pekalidas so niyawa ngka sabap sa
sasarigan ako ngka, a tig o Allah."
YARAMIYAS 40
Ikadowa a Kiyabokai ki Yaramiyas
Minisampay so katero o Allah ki Yaramiyas sii ko oriyan o kiyabokai ron i Nibosaradan a

so komandir o manga gordiya sii sa Ramah. Roo niyan miyatoon si Yaramiyas a
papatongen a rantay a maaped ko langon a miyanga bibiyag a poon sa Yarosalim ago sa
Yodah a pagowiten sa Babilon.
2 Na inisibay o komandir o manga gordiya si Yaramiyas na pitero iyan on a "So Allah a
Tohan ka na pitekdir iyan angkai a kamoralai sangkai a darpa
3 Na imanto na initoman o Allah so miyatero iyan a penggolaolaan iyan. Langon ai
miyanggolaola ka sabap sa sekano a manga pagtaw niyan na miyamakandosa ko Allah na
da niyo sekaniyan paratiyayaa.
4 Ogaid na imanto na pokasen ko reka so rantay a ipapatong ko manga lima ngka.
Kepakay a monot ka raken sa Babilon o kabaya a ka, ka siyapen ko seka. Ogaid na o di
ngka kabaya na di ka den pagonot. Pekasong ka ko apiya anda ko dalem a inged sa
saden sa kebayaan ka on somong.
5 Ogaid na sii ko da pen katalikod i Yaramiyas sa kapelalakaw niyan den na tig pen i
Nibosaradan a "Kasoy ka ki Gidaliyas a wata i Ahikam ago apo i Siyapan a aya initoro o
dato sa Babilon a gobirnador ko manga inged sa Yodah na sii ka rekaniyan baling sii ko
manga pagtaw niyan, o di na song ka ko apiya anda a kebayaan ka somong." Na bigan i
Nibosaradan si Yaramiyas sa loto ago pirak na piyakalalakaw niyan den.
6 Mandiyadi na somiyong si Yaramiyas ki Gidaliyas roo sa Mispah na ron komiyaden sii
ko manga taw a miyamangibegak ko inged.
Si Gidaliyas a Gobirnador sa Yodah
7 Aden a ped a manga olowan a sondaro a taw sa Yodah a rakes o manga pagtaw iran a
da sangkop ko dato sa Babilon, na tetapok siran pen sii ko mitataog a kaden. Na miyaneg
iran a initoro o dato sa Babilon si Gidaliyas a gobirnador sii ko inged ago piyakikibir iyan
on so manga mama, manga babay ago manga wata a lebi a manga miskin a da mawit roo
sa Babilon.
8 Kagiya ka maoto na somiyong siran ki Gidaliyas roo sa Mispah, a si Ismail a wata i
Nitaniyas, si Yohanan ago si Yonatan a manga wata i Kariyas, si Sirayas a wata i
Tanhomit, so manga wata i Ipay a taga Nitopah, ago si Yasaniyas a poon sa Maakah, na
somiyong siran ki Gidaliyas a ped so manga sondaro iran.
9 Na tiyangked kiran i Gidaliyas a rakes o sapa a da den a marata a mapenggolaola kiran a
tig iyan a "Di niyo keleken so kapenalagadi niyo ko manga taw sa Babilon. Paginged
kano sii na pangongonotani niyo so dato sa Babilon ka ipekapiya niyo ai.
10 Makapantag raken na sii ako den keden sa Mispah a aya niyo dipotado ko manga taw
sa Babilon a pepekaoma rektano. Na sekano peman na kaden kano ko manga inged a
miyatangan iyo na panimo kano ron sa manga arak, manga onga sapad ago lana a olibi."
11 Na kagiya maneg o langon a manga Yahodi a kibabaling sa Mowab, Amon, Idomiya
ago so langon a ped a manga inged a aden a miyalamba a manga Yahodi a minibegak o
dato sa Babilon roo sa Yodah ago initoro iyan si Gidaliyas a gobirnador iran
12 Na komiyasoy siran sa Yodah a poon ko langon a manga darpa a ron siran
miyamagapas na somiyong siran ki Gidiliyas roo sa Mispah. Na miragon siran sa
madakel a obas a pagembaalan a arak ago manga onga sapad.
Biyono si Gidaliyas
13 Da ini matey na si Yohanan a wata i Kariyas ago so langon o manga olowan a sondaro
a tetapok pen ko mitataog a kaden na somiyong siran ki Gidiliyas sa Mispah
14 Na pitero iran on a "Ba ngka di katawi a si Baalis a dato sa Amon na siyogo iyan si
Ismail a wata i Nitaniyas sa kambonoa reka?" Ogaid na da oto benara i Gidaliyas.
15 Na miyakimbitiyarai si Yohanan ki Gidaliyas sa masolen sii sa Misaph a tig iyan a
"Pakalalakawa ko ngka kaan aken mabono si Ismail sa da den a ba on makatokaw. Ino ka
on pekibono a kesabapan ko kakiparak o langon o manga Yahodi a komiyasoy sii a
tomatapi reka? O magiyanan na kelengan so miyanga lalamba a kibabaling sa Yodah.
16 Ogaid na somimbag si Gidaliyas a "Di ngka anan penggolaolaa! Di benar angkanan a

pitero o ka makapantag ki Ismail."
YARAMIYAS 41
Ogaid na sii ko ikapito olan sangkoto a ragon na si Ismail a wata i Nitaniyas ago apo i
Ilisiyama, a ped ko mbawataan o dato ago isa gowani ko manga sanasanaan o dato na
miyakaoma a oonotan o sapolo kataw a manga mama sii ki Gidaliyas sa Mispah. Na sii
ko kapepagatoang iran
2 Na tekaw den a piyamindas i Ismail ago so sapolo a mama a ped iyan so manga pedang
iran na biyono iran si Gidaliyas a aya itotoro o dato sa Babilon a gobirnador ko inged.
3 Oriyan iyan na lominiyo siran na piyamono iran pen so langon o manga Yahodi a
maaped i Gidiliyas roo sa Mispah ago so mambo so manga sondaro a manga Babilon a
kiyapantagan roo.
4 Sii ko tomiyalondog a gawii ko da pen katokawi o apiya antawaa so makapantag ko

kiyabonoa ki Gidiliyas
5 Na miyakaoma roo so walo polo kataw a manga mama a poon sa Sikim, Siloh ago
Samariya a kiaawid sa manga pangenengken ago manga doka a ipesoasoat iran sii ko
Timplo o Allah. Miyapangopaw so manga sompa iran, miyapangisi so manga nditaren
iran ago kikapapalian a manga lawas iran a toos ko kamboboko iran.
6 Na lominiyo si Ismail sa Mispah sa kapagalawa niyan kiran a pesegad sekaniyan ko
kapelalakaw niyan. Kagiya mabalak iyan siran na pitero iyan kiran a "Onot kano raken sa
kimbentelen iyo ki Gidaliyas!"
7 Ogaid na so den so kiyapakasoled iran ko siti na si Ismail ago so manga mama a ped
iyan na piyamono iran siran na piyangolog iran so manga badan sii ko paridi.
8 Ogaid na aden a sapolo kiran a pitero iran ki Ismail a "Di kami ngka pemonoa! Aden a
manga trigo, bantad, lana a olibi ago gola teneb ami a mitatapok ko pangomaan." Sabap
san na da niyan siran pamonoa a rakes o manga ped iran.
9 So paridi a inologan i Ismail ko manga bangkay o manga mama a piyamono iyan na
giyoto so mala a paridi a pimbaalan o dato Asa isako gobaten sekaniyan o Baasa a dato sa
Israil. Na pino ai i Ismail a manga bangkay.
10 Mandiyadi na piyamiyag i Ismail so manga wata a babay o dato ago so langon a
miyalamba ko manga taw sa Mispah a piyakikibir i komandir Nibosaradan ki Gidaliyas.
Biniyag siran i Ismail na gomiyanat roo sa kapagowita niyan kiran sa inged a Amon.
11 Ogaid na kagiya maneg i Yohanan a wata i Kariyas ago so langon o manga olowan a
sondaro a ped iyan so makapantag ko manga rarata a pinggolaola i Ismail a wata i
Nitaniyas
12 Na piyakaonot iran so langon a pagtaw iran na siyaloba iran si Ismail, na riyaot iran ko
marani ko mala a ranaranaw sii sa Gibiyon.
13 Na miyababaya so langon o manga taw a miyabiyag i Ismail sii ko kiyailaya iran ki
Yohanan ago so manga olowan a sondaro a ped iyan
14 Na miyamalagoy siran a somiyong ki Yohanan.
15 Ogaid na si Ismail ago so walo kataw a manga pagtaw niyan na kiyapalagoyan iran si
Yohanan na miyagapas siran sa inged a Amon.
So Kiyapagapas sa Misir
16 Na si Yohanan ago so manga olowan a sondaro a ped iyan na piyagolowanan iran so

manga taw a miyabiyag i Ismail a poon sa Mispah ko oriyan o kiyabonoa niyan ki
Gidaliyas, a so manga sondaro, so manga babay, so manga wata ago so manga sanasanaan
o dato.
17-18 Na lomiyalakaw siran a pegagaw sa Misir kaan siran makalidas ko manga taw sa
Babilon, ka ipekelek iran siran sabap ko kiyabonoa i Ismail ki Gidaliyas a initoro o dato
sa Babilon a gobirnador ko inged. Sii ko kapelalakaw iran na tomiyareg siran roo sa
Girot Kimham a marani sa Bitlihim.
YARAMIYAS 42
Samaoto na so langon o manga olowan a sondaro a rakes on si Yohanan a wata i Kariyas
ago si Yasamiyas a wata i Hosiyayas ago so langon a manga taw ipoon ko mababa taman
ko mala na diyolon iran
2 So nabi Yaramiyas a tig iran a "Kapedipedi ka bo na pakinega ngka so pengnin ami
reka na pangangarapanen kami ngka ko Allah a Tohan ka. Pangangarapanen ka so langon
kami a miyamakapagoyag, ka madakel kami gowani ogaid na keilay ngka a maito kami
bo a malalamba imanto.
3 Pangniya ngka a mitoro rekami o Allah a Tohan ka o anda i patot a songowan ami ago
antonaa i penggolaolaan ami."
4 “Oway," a inisembag i nabi Yaramiyas, "penggolaolaan ko den so piyangni niyo na

pengangarapan ako ko Allah a Tohan iyo. Na so langon taman a peteroon iyan na
peyagen ko rekano. Da den a ba ko rekano pegmaa."
5 Na pitero iran ki Yaramiyas a "Pengnin ami a so Allah a matito ago kesarigan na

kasiksaan kami niyan o di ami tomana piyapiya so langon taman a pakipetero iyan reka sii
rekami.
6 Apiya ikesoat ami ai ago so di na peratiyayaan ami so Allah a Tohan tano a
pakipangniyan ami reka. Ka o paratiyayaa mi sekaniyan na petegompiya kami."
7 Sii ko kiyaipos o sapolo gawii na minisampay ki Yaramiyas so katero o Allah.

8 Na piyakisongowan iyan si Yohanan ago so langon a olowan a sondaro a ped iyan ago
so langon o manga taw a mala mababa
9 Na pitero iyan kiran a ”Siyogo ako niyo ko Allah a Tohan o Israil sa kisampain ko ron
ko pangni niyo, na giyai i pitero iyan:
10'O tareg kano den sangkai a inged na mbengonen ko sekano a kena a ba nggebaa;
pemolaan ko sekano a kena a ba mbadota, ka inikaboko aken so kasiksaan a initana aken
rekano.
11 Di niyo den pekeleken so dato sa Babilon,' a tig o Allah, 'ka mipageepeda ako niyo na
sebeten ko sekano ago pekalidasen ko kapaar iyan.
12 Ikepedi aken sekano ka mbelowin ko sekaniyan a makapediin rekano na pekaasalen
kano niyan ko inged iyo.'
13 Na tig i Yaramiyas a "O di niyo tomana so Allah a Tohan iyo a peteroon iyo baden a
'Di kami keden sangkai a inged,
14 Ka song kami sa Misir a di kami roo pekailay sa katidawa aya pen o ba kami makaneg
ko kapemogiyong o ridoay o di na kaongosi,'
15 Na o magiyoto na giyai i pitero o Allah sii rekano a miyanga lalamba a taw sa Yodah:
'O piyasad iyo den sa ginawa niyo a song kano sa Misir sa kambaling iyo ron
16 Na iperaot rekano roo so katidawa a ipekelek iyo ago tondogen kano o ongos a
ipekewan iyo na pematay kano roo.
17 Matamataan a so langon o manga taw a piyasad iran sa ginawa iran a song siran sa
Misir ka keden roo na pematay ko katidawa, ongos ago paniyakit. Da den a sakataw
kiran bo a ba makapegoyag o di na pekalidas ko morala a itena aken kiran.'
18 “Giyai i pitero o Allah a Lebi a Mamaapaar a Tohan o Israil: 'Datar o kiyamborngat o

pesokeyaw a gani aken ko manga taw sa Yarosalim na datar iyan mambo so
kapemborngat rekano o gani aken amay ka somong kano sa Misir. Ipesinta kano ago
kebaloy a piyakalekelek, na pendaoraan kano ago pegongatongaten, na di niyo den keilay
angkai a darpa.' "
19 Pitero pen i Yaramiyas a "Hey sekano a miyalamba a manga taw sa Yodah, pitero
rekano o Allah a 'Di kano song sa Misir!' Na tatanodi niyo angkai a kiyalalangi aken
rekano imanto.
20 Ka pepamagakal kano ko kiyasogoa niyo raken ko Allah a Tohan iyo a pitero iyo a
'Pangangarapanen kami ka ko Allah a Tohan ka. Teroa ngka rekami so langon taman a
kabasa niyan ka ipenggolalan ami.'
21 Na miyatero aken rekano den ai imanto ogaid na di niyo pen tomanen so Allah a
Tohan iyo ko langon a inisogo iyan raken a peteroon rekano.
22 Kagiya ka maoto na tanodi niyo a matamataan a pematay kano ko katidawa, ongos o di
na paniyakit roo ko inged a kebayaan iyo komaden."
YARAMIYAS 43
Kagiya mapasad tero i Yaramiyas ko manga taw so langon o manga katero o Allah a
Tohan iran a inisogo on o Allah a pekasampain iyan kiran
2 Na si Asariyas a wata i Hosiyayas ago si Yohanan a wata i Kariyas ago so langon a ped
a ambog a manga mama na pitero iran ki Yaramiyas a “Miyamokeg ka! Da ka sogoa o
Allah a Tohan tano sa kapeteroa rekami a ‘Di kano song sa Misir sa kambaling iyo roo.’
Ka inondoy ka i Barok a wata i Niriyas sa kapeteroa ngka sii kaan kami mapalad ko
kapaar o manga taw sa Babilon a mapamono kami ran o di na mapangowit roo sa
Babilon.”
4N
a da tomana i Yohanan ago so langon a olowan a sondaro ago so langon a ped a manga
taw so sogoan o Allah a tomareg siran ko inged a Yodah.
5 Ka si Yohanan ago so manga olowan a sondaro na piyakaonot iran sa Misir so langon o
manga taw a miyalamba sa Yodah a rakes on so miyamakakasoy ron a poon ko langon a
inged a ron siran miniparak.
6 Maaped kiran so langon a manga mama, manga babay, manga wata ago manga wata a
babay o dato a piyakikibir i Nibosaradan a komandir o gordiya ki Gidaliyas. Na maaped
kiran mambo so Nabi Yaramiyas ago si Barok a wata i Niriyas.
7 Na somiyong siran sa Misir a da iran tomana so sogoan o Allah, na somiyoled siran ko
inged sa taman sa siti a Tapanis.
8 Sii sa Tapanis na minisampay ki Yaramiyas so katero o Allah a tig iyan a

9 “Kowa ka sa manga ala a ator na lebengen ka sii ko bote ko piyagatoran a penggaka o
torogan o Piraon roo sa Tapanis sii ko kambabantayi ron o manga Yahodi.
10 Na teroa ngka kiran a ‘Giyai i pitero o Allah a Lebi a Mamaapaar a so Tohan o Israil:
Pagowiten ko sii so oripen aken a si Nibokadnisar a dato sa Babilon na imbetad aken so
korsi iyan ko liyawaw angkai a manga ator a inilebeng aken sii, na keyaten iyan sii so
sayap o korsi iyan.
11 Song sii den si Nibokadnisar na nggobaten iyan a Misir, na pematay a paniyakit so
siran oto a miyatendo a pematay a paniyakit, pemiyagen so siran oto a miyatendo a
pemiyagen na pematay ko katidawa so siran oto a miyatendo a pematay ko katidawa.
12 Tentemen iyan so manga pesimbaan ko manga katohanan sa Misir, na penotongen
iyan so manga barahala iran o di na ipetelon iyan siran. Pagosipan iyan so dalem a inged
a Misir a lagid o pananagikor sa bilibili a pepangetoman iyan so nditaren iyan kaan
malompiyo, na pagawaan iyan oto a da den kasakiti.
13 Penggegebaan iyan so babarakaten kon a manga polaos a matatago ko pesimbaan ko
alongan roo sa Misir, na penotongen iyan so manga pesimbaan ko manga katohanan sa
Misir.
YARAMIYAS 44
So Kasiksaa ko manga Israil sabap ko Kapanakoto
Minisampay ki Yaramiyas so katero o Allah makapantag ko langon o manga Israil a
kibabaling sa inged a Misir sii ko manga siti a Migdol, Tapanis ago Mimpis ago sii sa
pagabagatan a Misir a tig iyan a
2 “Giyai i pitero o Allah a Lebi a Mamaapaar a so Tohan o Israil: Miyailay niyo so
kabinasaan a initana aken sa Yarosalim ago so langon a ped a manga siti sa Yodah.
Imanto na magegeba ini ago kiyadaan sa taw
3 Sabap ko manga rarata a pinggolaola o manga taw ron. Piyakakerangit ako iran ko
kapesimbaa iran ago kapesepaati ran sa manga soasoat ko salakaw a manga tohan a di
iran katawan aya pen sekano ago so manga apo iyo.
4 Omanoman aken kiran sogoon so manga oripen aken a so manga nabi sa kapeteroa iran
on a ‘Di niyo penggolaolaa ngkai a piyakasisingay a ipekegowad aken!’
5 Ogaid na da iran pakinega aya pen o ba iran tiyago sa ginawa. Da iran talikodi so
kamarataan iran a kapesepaati sa manga soasoat ko salakaw a manga tohan.
6 Sabap roo na mimborngat so gani aken na komiyarab so rarangit aken sii ko manga siti
sa Yodah ago sii ko manga lalan sa Yarosalim a aya kiran kiyabaloya kiran a mabibinasa
a piyakalekelek a pegilain taman den imanto.
7 “Na saken a so Allah a Lebi a Mamaapaar a Tohan o Israil na ipagise aken rekano
imanto a ‘Ino niyo pekiwiti sa mala a morala a ginawa niyo? Ba niyo kabaya a
kabinasaan so oman i mama, babay, wata ago ikaririga sii ko manga taw sa Yodah taman
sa da den a ba rekano kelamba?
8 Ino ako niyo dii pakakerangita ko kapesimba niyo sa manga barahala ago so kapesepaati
niyo sa soasoat ko salakaw a manga tohan sii ko inged a Misir a ron kano komiyaden?
Pekibinasa niyo baden a ginawa niyo ko di niyo ron dii kanggolaolaa, na ipesinta kano
ago kediyamanan sii ko langon a nasiyon ko doniya.
9 Ba niyo kiyalipati so manga dosa o manga apo iyo, so manga dosa o manga dato ago
manga bai sa Yodah, ago so manga dosa niyo ago so manga karoma niyo sii sa Yodah ago
sii ko manga lalan sa Yarosalim?
10 Ogaid na taman imanto na da niyo den pangalimbabaanen a manga ginawa niyo aya
pen o ba ako niyo kaleken. Da niyo tomana so manga sogoan ago manga kokoman a
inibegay aken rekano ago so manga apo iyo.
11 “Kagiya ka maoto na giyai i pitero a Allah a Lebi a Mamaapaar a so Tohan o Israil:

Piyasad aken sa ginawa ko a pagowitan ko sekano sa morala na mbinasaan aken so
langon a Yodah.
12 Na makapantag sangkai a miyalamba a manga taw sa Yodah a piyasad iran sa ginawa
iran a song sa Misir sa kambeling iran on na kepolang siran langon roo sa inged a Misir;
ipoon ko mababa taman ko mala na pematay siran langon ko katidawa o di na sabap ko
ongos. Na kebaloy siran a piyakalekelek a pegilain; ipesinta siran, pegongatongaten ago
pendaoraan.
13 Ndenegen ko so siran oto a mimbabaling sa Misir a datar o kiyadanega ko sa
Yarosalim a nggolalan ko katidawa, ongos ago paniyakit.
14 Da den a sakataw bo ko malalamba a manga taw sa Yodah a somiyong ago komiyaden
sa Misir a ba makapelagoy o di na makapegoyag sa kapakakasoy niyan sa inged a Yodah.
Apiya ipekedali iran a kapakakasoy iran roo sa kambeling iran on na da a ba pekakasoy
liyo bo ko da mapira kataw a miyakapalagoy.”
15 Mandiyadi na so langon a manga mama a katawan iran a so manga karoma iran na

pepamanapaat sa soasoat ko salakaw a manga tohan taman ko langon o manga babay a
makadadarpa roo, a tanto siran a madakel a taw a rakes on so langon a mababaling sa
pagabagatan a inged a Misir, na simbag iran si Yaramiyas a tig iran a
16 “Di ami pekinegen so manga katero o ka a minisampay reka kon a poon ko Allah!
17 Ka penggolaolaan ami baden so langon taman a miyatero ami a sowaan ami. Sepaat
kami sa manga soasoat ko katohanan ami a so Bai sa Langit ago ipeselasela ami ron so
manga panginginomen a datar o pinggolaola mi gowani ago so manga apo ami, so manga
dato ami ago manga olowan sii ko manga siti sa Yodah ago sii ko manga lalan sa
Yarosalim. Ka sii sangkoto a masa na mitataralo so manga pangenengken ami na
tetagompiya kami ago da a ba ami inikabinasa!
18 Ogaid na ipoon ko kiyageneki ami somapaat sa soasoat ko Bai sa Langit ago so
kipeselaselaan ami ron ko panginginomen na da a ba mi rek na pepamatay so manga taw
ami sabap ko katidawa ago ongos.”
19 Na pitero o manga babay a “Sii ko di ami dii kambaal sa manga paan a isasayan ko
bontal o Bai sa Langit ago so kapesepaat ami ron sa soasoat ago so di ami ron dii
kaselaselaa sa panginginomen na pepagayon so manga karoma ami ko di ami dii
nggolaolaan.”
20 Na pitero i Yaramiyas ko langon o manga taw ndatar so manga mama ago manga
babay a somimbag rekaniyan sa lagid oto a
21 “Ba aya katao niyo ron na di katawan o Allah o di na kiyalipatan iyan so makapantag
ko manga soasoat a inisapaat iyo ago so manga apo iyo ago so langon a taw ko inged a
rakes o manga dato iyo ago manga olowan sii ko manga siti sa Yodah ago so manga lalan
sa Yarosalim?
22 Isako di den kesabar o Allah so manga rarata ago piyakasisingay a di niyo dii
nggolaolaan na biyaloy niyan so inged iyo a dii sinta ago miyalaslas a piyakalekelek a
pegilain a da den a ba on mababaling a datar imanto.
23 Giyangkai a kiyamoralai rekano a maaaden den taman imanto na sabap ko kapesapaat
iyo sa manga soasoat ko salakaw a manga tohan ago so kiyapakandosa niyo ko Allah a da
niyo sekaniyan paratiyayaa aya pen o ba niyo tomana so manga sogoan iyan, manga
kokoman iyan ago manga taritib.”
24 Na pitero pen i Yaramiyas ko langon o manga taw taman ko manga babay a “Hey
langon kano a manga taw sa Yodah a sisii sa Misir, pamakinega niyo angkai a kabasa o
Allah.
25 Giyai i pitero o Allah a Lebi a Mamaapaar a so Tohan o Israil: Sekano ago so manga
karoma niyo na misemaya kano ko katohanan iyo a Bai sa Langit. Inisamaya iyo a
pesepaat kano ron sa manga soasoat ago manga selasela a panginginomen na initoman iyo
den ai. Na den, tatarosen iyo den ai! Tomana niyo ago nggolalanen iyo so manga samaya
iyo!
26 Ogaid na pamakinega niyo imanto so inisepa o Allah sii ko kababantogan a Ingaran
iyan ko langon a manga taw sa Yodah a ndodoo sa Misir a ‘Di aken den peperon ko apiya
antawaa taw sa Yodah a mababaling ko apiya anda sa Misir a ipesepa iyan so Ingaran
aken a peteroon iyan a “Matamataan ko kaooyagoyag o Kadnan a so Allah.”
27 Ka petoday ako sa kapagowiti ko kiran sa kabinasaan a kena a ba kamapiyaan. So
langon a taw sa Yodah a ndodoo sa Misir na pematay ko katidawa ago taon taman sa
malengan siran langon.
28 Tanto a maito a pekalidas ko kapatay sa katidawa sii sa Misir ago pekakasoy sa inged
a Yodah! Samaoto na so langon a miyamakapagoyag a taw sa Yodah a somiyong sa
Misir na ketokawan iran o anda i manga katero a pekitoman, so rek aken o di na so rek
iran.
29 “Giyai i nanao a imbegay aken rekano a ndanegen ko sekano sangkai a darpa,” a tig o
Allah, “kaan iyo katokawi a so inipagita aken rekano a kakemoralai rekano na mataan a
kitoman:
30 Peladen ko si Piraon-Hopra a dato sa Misir ko manga ridoay niyan a mananamar sa
kambonoa on a lagid o kiyapalada ko ki Sidikiyas a dato sa Yodah ki Nibokadnisar a dato
sa Babilon a ridoay niyan a miyananamar sa kambonoa niyan on. Saken a so Allah i
mitero sii.”
YARAMIYAS 45
So Katero o Allah ki Barok
Sii ko ikapat ragon a kandadato i Yahoyakim a wata i Yosiyas sii sa Yodah na inipanorat
i Barok a wata i Niriyas sii ko pesoratan so langon o manga katero a di on dii ndagidain o
nabi Yaramiyas. Oriyan iyan na pitero rekaniyan i Yaramiyas a
2 “Giyai i pitero reka o Allah a so Tohan o Israil: ‘Hey Barok,
3 Pitero o ka a ‘Dowandowaan ako den! Inomanan o Allah sa rata a ginawa so
kapekerasay aken. Inikopay ako dii makaperego, na di aken pekadeke!’
4 “Ogaid na saken, a so Allah, na itobak aken so miyabangon aken na mbadoten ko so

miyapamola ko. Penggolaolaan ko ini ko dalem a doniya.
5 Na ba patot a pipikiren ka a di ini reka mapenggolaola? Di ngka ini pipikira. Ogaid na
di ka kedai sa inam. Pagowitan ko sa tiyoba so langon o manga manosiya, a tig o Allah,
ogaid na apiya anda ka song na pekalidasen ko so niyawa ngka.”
YARAMIYAS 46
So manga Katero o Allah makapantag ko manga Nasiyon ko Doniya
Giyai pitero o Allah ko nabi Yaramiyas makapantag ko manga nasiyon:
2 Giyai i pitero iyan makapantag ko manga sondaro o Piraon Niko a dato sa Misir a
tiyaban i Nibokadnisar a dato sa Babilon sii sa Karkimis a marani sa lawasaig a Yopratis
sii ko ikapat ragon a kandadato i Yahoyakim a wata i Yosiyas sii sa Yodah:
3 “Dii ipelalis o manga olowan a sondaro a Imisiren a
‘Tiyagara niyo so manga kelong iyo
na abanti kano ko katidawa.
4 Kakangi niyo so manga koda,
na kokoda kano ron a manga komokoda!
Rantar kano na pagilmit kano!
Onasi niyo so manga bangkaw niyo
na solota niyo so manga raben iyo!’
5 “Ogaid na antonaa i pekeilay aken?” a inipakaise o Allah.

“Pepamangendod so manga sondaro a Imisiren
a tanto a miyanga alek.
Piyamanaban so lebi kiran a manga wawaraw,
na pepamalagoy siran nggagaan
a di siran den ndingil sa talikodan
ka aden a piyakalekelek ko mbalabala.
6 Ogaid na apiya so lagod na di pekapalagoy
aya pen o ba makalidas so mabager.
Sii sa pagotaraan a marani ko lawasaig a Yopratis
na pepamangisosong siran ago pepamangirepang.
7 “Antawaa ini a pepegorog a lagid o lawasaig a Nail

a lagid o lawasaig a pesolapay ko manga pangba niyan?
8 Giyai i Misir a pepegorog a lagid o lawasaig a Nail
a lagid o lawasaig a pesolapay ko manga pangba niyan.
Ka pitero a Misir a 'Magorog ako a solapay ko dalem a doniya;
na mbinasaan ko so manga siti ago so manga taw ron.'
9 Palalagoy kano, hey manga koda!
Pakanggagaana niyo so manga karo niyo sa katidawa, hey manga pangongolin on!
Sondol kano, hey manga wawaraw a sondaro
a manga mama a poon sa Itiyopiya ago Libiya a kiaawid sa manga kelong,
ago so manga papasang i kapana a poon sa Libiya.
10 Ogaid na giyangkoto a gawii na rek o Kadnan a so Allah a Lebi a Mamaapaar,
a so gawii a kapanaop a so kandanega niyan ko manga ridoay niyan.
Pemomonoan kiran so pedang iyan taman sa maosog,
na paginomen iyan so rogo iran taman sa kabolongan sa rogo so kawaw niyan.
Ka aden a korban a ipesoasoat ko Kadnan a so Allah a Lebi a Mamaapaar sangkai a gawii
sii sa pagotaraan a marani sa lawasaig a Yopratis.
11 “Hey manga taw sa Misir,

song kano sa Giliyad na kowa ka on sa indepil iyo.
Ogaid na apiya i kadakel o manga bolong iyo
na da a ba rekano ron pekapiya.
12 Miyaneg o manga nasiyon so makapantag ko kiyapakakeyaa rekano.
Lomiyangkap sa doniya so kapenggoraok iyo sa kareregeni rekano.
So isa a sondaro na kisalepit ko ped a sondaro na palaya siran den penga ooteng.
13 Giyai so katero o Allah a minisampay ko nabi Yaramiyas makapantag ko kapekaoma o

Nibokadnisar a dato sa Babilon sa kanggobata niyan sa Misir:
14 “Pakalangkapa ngka ini sa Misir

na panawatewagen ka sii ko manga siti a Migdol, Mimpis ago Tapanis;
Teroa ngka a
'Tiyagar kano sa kapelindinga niyo sa ginawa niyo
ka pekepolang a pedang so siran oto a makalilibet rekano.
15 Ino tebana so manga wawaraw a sondaro niyo?
Di siran makapemayandeg ka ipeyodas siran o Allah.
16 Omanoman siran kisosong;
makapemagotenga siran.
Peteroon iran a 'Nggagaan tano! Komasoy tano
ko manga tonganay tano sii ko poonan tano a manga inged
a mawatan ko pedang o ridoay.'
17 Na peteroon iran roo a 'So Piraon a dato sa Misir na baden dii mberak!
Da niyan osbai so kapekaparo niyan.'
18 “Matamataan ko kaooyagoyag aken," a tig o Dato

a aya ngaran iyan na so Allah a Lebi a Mamaapar,
"ka aden a pepekataban a pekaoma sa Misir
a lagid sa kabager o palaw a Tabor sii ko kapalawan
ago so palaw a Karmil ko obay o ragat.
19 Tiyagar kano sa kapemiyaga rekano,
hey manga kibabaling sa Misir!
Ka kelaslas so siti a Mimpis
a kebaloy a mabibinasa a da a mababaling on.
20 “Giya Misir na lagid o tanto a malimegas a nati a sapi,

ogaid na aden a pekaoma rekaniyan a pelayog a mangengebot a poon sa pagotaraan.
21 Apiya so kisosokayan a manga sondaro niyan
na da a mapenggolaola iran a lagid o manga nati a sapi.
Di siran magato makipetidawa;
telikod siran mambo na go palaya siran pemalagoy.
Ka pekaoma sa Misir so gawii a kasiksaan,
a so masa a kandanega kiran.
22 Pemalagoy a Misir a pepengiis a lagid o nipay
sii ko kapendasega on o manga sondaro o ridoay.
Nggobaten iran sekaniyan a kiaawid sa manga patok
a lagid o manga pepamata sa kayo.
23 Pemataan iran so kalasan iyan,"
a tig o Allah,
"apiya pen tanto a marabong.
Ka di kebilang so manga sondaro o ridoay
ka lebi pen a madakel a di so manga tarapan.
24 Pakapekeyaan so manga taw sa Misir;
tebanen siran o manga taw a poon sa pagotaraan."
25 Pitero o Allah a Lebi a Mamaapaar a Tohan o Israil a "Ndenegen ko den so Amon a so

katohanan o siti a Tibis, ago so langon o manga ped a katohanan sa Misir. Ndenegen ko
pen so manga dato on a rakes o Piraon ago so langon a somasana rekaniyan.
26 Peladen ko siran ko manga taw a kebaya kiran mono, a si Nibokadnisar a dato sa
Babilon ago so manga sondaro niyan. Ogaid na oriyan iyan ko pekatalingoma a masa na
kebalingan bo a Misir a datar gowani." a tig o Allah.
Sebeten o Allah so manga Pagtaw niyan
27 “Ogaid na sekano peman a manga mbawataan o Yakob a manga oripen aken,

na di kano pekelek; di kano pekedai sa inam, hey manga Israil!
Ka sebeten ko sekano ago so kebabadan rekano sangkanan a manga wawatan a darpa
a ron kano minitaog a miyanga bibiyag.
Makapembabaling kano ko inged iyo
ago makapeginetaw a lomilintad ago malilinding
a da den a ba rekano makapengangalek.
28 Di kano kelek, hey mbawataan o Yakob a oripen aken,"
"ka mipageepeda ako niyo," a tig o Allah,
"Mbinasaan ko sa tarotop so langon o manga nasiyon
a ron aken sekano initaog,
ogaid na kena a ba tarotop a kambinasaa ko rekano.
Mataan a ndenegen ko sekano, ogaid na so bo so mapapatot a karegen iyan;
ka di aken sekano pelepasen a da madaneg."
YARAMIYAS 47
So Katero o Allah makapantag ko manga Pilistiyo
Giyai i katero o Allah a minisampay ko nabi Yaramiyas makapantag ko manga Pilistiyo a

kibabaling sa Gasa sa da on pen kagobata o Piraon.
2 Pitero o Allah a
"Ilaya niyo man so kapegorog o ig roo sa pagotaraan;

kebaloy ini a mabandes a lawasaig a dii mbagiyawan
a melapay ko lopa ago so langon taman a matatago on,
a so manga siti ago so manga kibabaling on.
Pemangisek so manga taw sa kalek,
na pendidiyagaw so langon a kikakaden ko inged.
3 Keneg iran so kandalepek o manga ai o pepelompat a manga koda
ago so kapenggarokot o manga karo sa katidawa o ridoay,
ago so kapendaleg o manga tirikan iran.
So manga ama na di iran den kesoyan so manga wata iran,
ka penga adaan sa bager so manga lima iran sabap ko kalek.
4 Ka miyaoma den so gawii a mbinasaan so langon o manga Pilistiyo
kaan mapotol so langon a miyalamba a pekatabang sa Tiro ago giya Sidon.
Magaan den mabinasa o Allah so manga Pilistiyo,
a giyangkoto a manga taw a poon ko kilid a ragat sa Krita.
5 Pegopaw so manga taw sa Gasa ko kararata a ginawa iran.
Pekareneken so manga taw sa Askilon.
Hey sekano a miyalamba a manga Pilistiyo,
ay katey a kapemalii niyo ko manga lawas iyo ko kapakamboboko iyo?
6 Ipepelalis iyo a 'Hey pedang o Allah,
ay kanggenek ka mamono?
Kasoy ka ko tagoban ka!
Tikna ka ago tareg ka roo!'
7 Ogaid na andamanaya i kapekatareg iyan,
a bigan o Allah sa sangan?
Siyogo iyan sa kanggobata sa Askilon
ago so manga taw a kibabaling ko kilid a ragat."
YARAMIYAS 48
So Katero o Allah makapantag sa Mowab
Giyai i pitero a Allah a Lebi a Mamaapaar a so Tohan o Israil makapantag sa Mowab:
"Kemorkaan so siti a Nibo.

Keyaan so siti a Kiriyataim ago keagaw;
keyaan so kota iyan ago kitobak.
2 Di den kepodi a Mowab.
Keagaw a Hisbon o manga ridoay
na pekediyaten iran so kabinasaa sa Mowab
a tig iran a 'Itano, laslasen tano angkoto a nasiyon!'
Seka pen, hey siti a Madmin, na pekareneken ka.
Sondolan ka o manga sondaro a makipetidawa reka.
3 So manga taw sa Horonaim na ipepelalalis iran a
'Kapanganiyaya! Kabinasaan!'
4 “Kebinasa a Mowab;
penggoraok so manga wata iyan.
5 Petekedeg siran ko lalan a isong sa Lohit
a pesegad siran ko kapelalakaw iran.
Sii ko lalan a ipetondagay sa Horonaim
na pekeneg iran so kapelendag ko kiyabinasa.
6 Tig iran a 'Palagoy kano! Pagapasen iyo a ginawa niyo
apiya pen o pembaloy kano a lagid o paket sii ko mitataog a kaden!
7 “Hey Mowab, sabap ko kasasarigi niyo ko manga galebek iyo ago kakawasaan
na tebanen kano mambo,
na kitaog so katohanan iyo a si Kimos
a rakes o manga imam iyan ago so manga olowan.
8 Da a siti a ba di kebinasa.
Kebinasa so oman i siti ko balintad,
na kelaslas so manga inged ko kapantaran,
ka so Allah i mitero on.
9 O ba bo aden a manga papak a Mowab
kaan makapagapas ago makapalagoy!
Ka kebinasa den so inged,
a kelaslas so manga siti ron
a da den a ba on mbaling.
10 “Mipesinta so taw a ndadarainon nggolaola ko galebek o Allah!

Mipesinta so taw a di niyan pagosaren so pedang iyan sa kapamono!"
Miyanga gegeba so manga Siti sa Mowab
11 “Giya Mowab na lomilintad ipoon ko kangoda niyan a da den mabiyag o di na mitaog.

Lagid ini o arak a tometeke a da den miyogalin ko manga pananagoay. Sabap san na da
den maalin so kapiya niyan i taam ago kamot.
12 “Ogaid na pekatalingoma so manga gawii," a tig o Allah, "a sogoon ko so manga taw a
pagododen iran a Mowab a poon ko pananagoay niyan. Peninitisen iran so arak on na
peropeten iran so pananagoay!
13 Sa masa oto na kedaan so manga Mowabiyo sa kasasarigi ran ko katohanan iran a si
Kimos a datar o kiyadai ko manga taw sa Israil sa sarig ko bolawan a nati a sapi a
katohanan iran roo sa Bitil.
14 “Hey manga mama sa Mowab,

andamanaya i di niyo ron dii kateroa sa 'Manga babager
ago manga wawaraw tano a sondaro'?
15 Kebinasa a Mowab ago kesoledan so manga siti niyan.
Penombaliin so lebi a manga pipiya a kangodaan iyan,"
a tig o Dato a aya ngaran iyan na so Allah a Lebi a Mamaapaar.
16 Magaan den so kakebinasa a Mowab;
baden kitekaw a kapemoralai ron.
17 “Mbokoon iyo angkoto a nasiyon, hey langon a midadair on a manga inged,

ago sekano langon a matao ko kadar iyan.
Teroa niyo a 'Miyapotol den so mabager a kadadatoi ron;
miyada on so kababantogan a kapaar iyan!'
18 Tepad kano ko mala i pangkatan a darpa iyo, hey manga kibabaling sa Dibon,
na ontod kano ko bayanek,
ka so mbinasa sa Mowab na sondolan kano niyan mambo
ago nggeba ko manga kota iyo.
19 Na sekano a kibabaling sa Arowir,
tindeg kano ko kilid a lalan na paginengka kano.
Isei niyo so mama a pepelagoy ago so babay a pepegapas
a tig ka a 'Antonaa i miyasowasowa?'
20'Tiyaban den a Mowab,' a isembag iran,
'goraok kano ago ndidiyagaw, ka kiyayaan den ai.
Pakalangkapa niyo ko kilid a Lawasaig a Arnon
a miyabinasa a Mowab!'
21 Pindadaneg mambo so langon o manga siti ko kapantaran
a giya Holon, Yasah, ago Mipaat
22 Dibon, Nibo ago Bit Diblataim,
23 Kiriyataim, Bit Gamol ago Bit Miyon,
24 Kiriyot ago Bosrah,
a so den so langon o manga siti sa Mowab a marani mawatan.
25 Miyapotol so gees a Mowab;
miyaropet so kapaar iyan,"
a tig o Allah.
26 “Pakapaginoma niyo a Mowab taman sa maberebereg,

ka inatowan iyan so Allah.
Pekelikelid a Mowab ko gowa iyan
na ipekela o manga taw.
27 Hey Mowab, ba ngka da mikela so manga Israil?
Ba aya katao ngka on na matag siran baden manga tekew
a pepengelengkeleng kano sa di ngka kiran dii kasodia
igira a pepenotolen ka siran?
28 Awai niyo so manga siti niyo na baling kano ko manga pampang,
hey manga taw sa Mowab!
Sayan kano sa manga kalogay a dii selag ko gimowa o manga gireb.
29 Miyaneg ami so kala o dii katetakabor o manga taw sa Mowab.
Katawan ami so di iran dii kambantogan, kapepegambog ago kapepangimporoan.
30 Katawan aken so kapepegambog iran," a tig o Allah,
ogaid na da a lalaw niyan;
da a ondasan o di iran dii katetakabor.
31 Kagiya ka maoto na nggoraokan aken so langon a taw sa Mowab,
na ipemboko aken so manga taw sa Kir Hiris.
32 Lebi pen a nggoraokan aken so manga taw sa Sibmah
a di so kibabaling sa Yasir.
Seka a siti a Sibmah, na lagid ka o waged a iniraot so manga sapak iyan
sa sabala o Maatay a Ragat taman den sa Yasir.
Ogaid na imanto na miyanga bibinasa so manga onga a sapad ka ago so manga obas ka.
33 So kapipiya a ginawa ago kasosonor na miyanga ada
ko oodaren a inged a Mowab.
Piyakagenek aken so kapetoga o arak a poon ko penemekan on;
da den a pepangembaal sa arak a ba makapelalis sa kapekebabaya.
Aden a kapelalis ogaid na kena a ba sabap ko kapekebabaya.
34 “So katanog o kapenggoraok iran na minigorong

a pepekapoon sa Hisbon taman den sa Iliyali ago Yahas,
ipoon sa Sowar taman den sa Horonaim ago Iglat Siyalisiyah,
ka apiya so manga ig sa Nimrim na miyati den.
35 Sii sa Mowab na pekageneken ko so manga taw
a pepamanapaat sa manga soasoat sii ko manga aparan ko barahala
ago pepamanotong sa doka ko manga katohanan iran,"
a tig o Allah.
36 “Ipekerata a ginawa ko a Mowab
ago so manga taw sa Kir Harisit
a lagid o pepenginsi sa kapelebeng,
ka miyada den so langon a kakawasaan a miyapantiyari iran.
37 Miyamagopaw siran langon
ago miyamamotol ko manga sompa iran.
Piyamalian iran so manga lima iran
na mindiditar siran sa sako.
38 Sii ko langon o manga atep a walay sa Mowab
ago sii ko langon a pekelimodan sa taw
na da den, a rowar ko kapakamboboko,
ka riyopet aken a Mowab
a lagid o omoy a kiyadaan sa bali," a tig o Allah.
39 “Sayana a miyaropet a Mowab!
Tanto a dii ndidiyagaw!
Kiyayaan a Mowab
na miyabaloy a piyakakeyakayad
ago piyakalekelek a pegilain ko langon a melilibeta on a inged."
"Aden a nasiyon a seyab sa Mowab a lagid o garoda

a makakayat so manga papak iyan,
41 Na keagaw so manga siti niyan ago manga kota.
Sii sangkoto a gawii na kelek so manga sondaro sa Mowab
a lagid o pembaliliten a babay.
42 Kebinasa a Mowab a kebaloy a kena den a ba nasiyon,
ka inatowan iyan so Allah.
43 So manga piyakalekelek ago manga galebo ago manga litag na matataan rekano
a manga taw sa Mowab,"
a tig o Allah.
44 “Saden sa pepelagoy ko piyakalekelek
na keolog ko galebo,
na saden sa penggakap ko galebo
na kelitagan ko litag.
Ka tiyaalik aken so oras a kandanega ko sa Mowab,"
a tig o Allah.
45 So da a pekaogop on a pepamalagoy na pepegagaw sa Hisbon
a so siti a kandadatoan gowani o Dato Sihon,
ogaid na pepekapoon on so apoy
a petotongen iyan so dalem a inged a Mowab
a rakes o langon a taw ron a mababaya makitidawa.
46 Dowandowaan ka, hey Mowab!
Miyabinasa so manga taw a pepamanimba sa katohanan a si Kimos.
Miyanga bibiyag ago miyamangitaog so manga wata a ka
a manga mama ago manga babay.
47 Ogaid na pekaasalen ko so kapetegompiya a Mowab
sii ko pemakatalingoma a manga gawii," a tig o Allah.
Sii den miyapos so kapepangalamat i Yaramiyas makapantag sa Mowab.
YARAMIYAS 49
So Katero o Allah makapantag sa Amon
Giyai i pitero o Allah makapantag ko manga Amoniyo:
"Ba aya katao niyo ron na da a miyalamba a manga Israil?

Ba aya katao niyo ron na da a kiyababadan kiran a makatangan peroman ko lopa iran?
Ba giyanan i sabap a sekano a pepamanimba sa katohanan a si Milkom
na miyatangan iyo so inged a Gad
ago kikakaden kano ko manga siti ron?
2 Sabap sangkai a pinggolaola niyo," a tig o Allah,
"na pekatalingoma so manga gawii a pekigobat aken a Rabah
a so tindos a siti o manga Amoniyo.
Kebaloy ai a mitatabotod a miyanga bibinasa,
na penotongen so melilibeta on a manga inged.
Oriyan oto na kekowa peroman a Israil so lopa
a inagaw niyo kiran."
a tig o Allah.
3 Ndidiyagaw ka, hey Hisbon, ka miyabinasa den so siti a Ai!
Goraok kano, hey kibabaling sa Rabah!
Nditar kano sa sako ago mboko kano;
palalagoy kano a pekenaanaa,
ka iteog so katohanan iyo a si Molik
a rakes o manga imam iyan ago manga sanasanaan.
4 Ipepangandag iyo so oodaren a manga balintad iyo,
ogaid na magaan den ai mabinasa.
Hey pegongkir a manga Amoniyo,
na sasarigan iyo so kakawasaan iyo a tig iyo a
'Antawaa i pekaraw rekami gomobat?'
5 Pagowitan ko sekano sa piyakalekelek a poon ko mbalabala rekano,"
a tig o Kadnan a so Allah a Lebi a Mamaapaar.
"Mbogaon so oman i isa rekano,
na da den a ba makapenimo rekano a manga pepalagoy.
6 Ogaid na oriyan iyan na pekaasalen ko so kapetegompiya o manga Amoniyo,"
a tig o Allah.
So Katero o Allah makapantag sa Idomiya
7 Giyai so pitero o Allah a Lebi a Mamaapaar makapantag sa Idomiya
"Ba kiyadai den sa ongangen so manga taw sa Idomiya?

Ba da den a pekamosawir kiran ko patot a penggolaolaan iran?
Ba miyadarodos so ongangen iran?
8 Hey manga taw sa Didan, telikod kano ago pemalagoy!
Tetapok kano ko manga dadalem a liyang!
Pemoralaan ko so kiyababadan ko Isaw
ka miyaoma so taalik a kandanega ko kiran.
9 Amay ka merebas so manga taw sa obas
na ba siran on di pelamba sa maito?
Amay ka pemanekew so manga tekew ko kagagawii
na ba di aya bo a pemanekeon iran na so bo so kabaya iran?
10 Ogaid na pengosipen aken komowa so langon a rek o kiyababadan ko Isaw;
na sewaan ko so manga darpa a kapetepokan iran
kaan iran di mapegna a manga ginawa iran.
So manga wata iran, manga tonganay ago manga siringan iran na palaya den pematay,
na da den a kelamba kiran.
11 Begaken iyo so manga ilo niyo, ka pagoyagen aken siran.
So pen so manga balo niyo na kesarigan ako iran."
12 Giyai i pitero o Allah: "O siran oto a di mapapatot minom ko tagayan a rarangit aken
na pekainom on na ba aya katao niyo ron na pelepasen kano domaneg? Di kano
pelepasen domaneg, ka disomala a makainom kano ron.
13 Pesepa ako sa ginawa ko," a tig o Allah, "ka so siti a Bosrah na kebaloy a mitatabotod
a miyanga bibinasa a piyakalekelek a pegilain a pegongatongaten ago pagosaren a sinta so
ngaran iyan. Na so langon a midadair on a manga inged na ketatap mambo a mabibinasa
sa taman sa pakataman."
14 Aden a miyaneg aken a katero a poon ko Allah a tig iyan a:

"Aden a siyogo aken ko manga nasiyon a pakapeteroon sa
'Timoa niyo so manga sondaro niyo sa kanggobata niyo sa Idomiya!
Tiyagar kano ron makitidawa!' "
15 Pitero o Allah sa Idomiya a "Mbelowin ko sekano a maito ko manga nasiyon,
a dii sodiin o langon a taw.
16 So kapengangaleka ngka ko manga ped
ago so katatakabor o poso o ka na miyakasaliba reka,
hey seka a mababaling san ko manga gireb ko manga pampang
ago komakaden ko poro o manga palaw.
Apiya pen maporo so kakadenan ka a datar sa kaporo o salag o manga garoda
na imbaba aken seka a poon roo," a tig o Allah.
17 “Kebaloy a Idomiya a piyakalekelek a pegilain;
kebengang so oman i isa a pekasagad on,
na makapenenentek siran ko kailaya iran ko langon a kiyasiksaa on.
18 Kebinasa a Idomiya a datar o kiyabinasaa sa Sodom ago giya Gomorah
a rakes o midadair on a manga inged," a tig o Allah.
"Da den a ba on pekabaling
aya pen o ba on keden.
19 Lagid o arimaw a pekagemaw a poon ko kalasan ko kilid a Lawasaig a Yordan

a pakapemalagowin iyan so manga bilibili ko pananateba
na kitekaw a pekipalagoyan ko komanga taw sa Idomiya so inged iran.
Oriyan oto na toroan aken angkoto a inged sa makapegolowan kiran a piliin aken.
Ka antawaa i datar aken, ago antawaa i pekaato raken?
Antawaa i dato a ba raken makasopak?"
20 Kagiya ka maoto na pakinega niyo so pitekdir o Allah mipantag sa Idomiya,
a so pikediyat iyan a mapenggolaola ko kibabaling sa siti a Timan.
Apiya so manga wata iran na pemanondaan sa mawatan,
na pelaslasen iyan so inged iran sabap ko miyanggolaola iran.
21 Tebaden so doniya sabap ko daleg o katebana sa Idomiya,
na magolaleng so kapendidiyagaw niyan ko Mariga a Ragat.
22 So ridoay na nggobat sa Bosrah a lagid o garoda a seyab on
a makakayat so manga papak iyan.
Sii sangkoto a gawii na penga alek so manga sondaro sa Idomiya
a datar o babay a pembaliliten.
So Katero o Allah makapantag sa Damasko
23 Giyai i pitero o Allah makapantag sa Damasko:
Masososa so pamikiran o kibabaling sa Hamat ago Arpad

sabap ko marata a totol a miyaneg iran.
Kiyadaan siran sa kawaraw
a kiaawid a akal iran a lagid o dii mbegel a ragat
a di mapekalengen.
24 Miyamakalobay so manga taw sa Damasko,
miyamalagoy siran a pepanga aalek.
Kiyokosan siran o kararasay ago masakit a datar o pembaliliten a babay.
25 Keawaan den angkoto a kababantogan a siti
a mapepeno gowani a kasosonor!
26 So manga ngongoda niyan na penga ooteng ko manga lalan,
na pemonoon so langon o manga sondaro niyan sangkoto a gawii,"
a tig o Allah
27 “Totongen aken a apoy so manga pangeleban a Damasko
na kelengan iyan komarab so manga torogan o dato Binhadad."
Ndenegen so Mbawataan o Kidar ago so Ndatoan a Hasor
28 Giyai i pitero o Allah makapantag ko mbawataan o Kidar ago so ndatoan a Hasor a

giyobat i Nibokadnisar a dato sa Babilon:
"Ikano roo na gobata niyo so mbawataan o Kidar!

Binasaa niyo angkoto a manga taw a kibabaling sa sebangan!
29 Keagaw so manga barombarong iran ago manga pangangayamen;
pengawidan so manga pekelindongan iran
a rakes o langon a kasangkapan iran, ago so pen so manga onta iran.
Na pelalalis siran sa
'Apiya anda ko mbalabala na piyakalekelek!'
30 Hey manga taw sa Hasor, nggagaan kano malagoy!"

a tig o Allah.
"Tepok kano ko manga didalem a liyang,
ka si Nibokadnisar a dato sa Babilon na mikediyat rekano sa marata,
na petiyagar rekano gomobat.
31 “Ikano roo na gobata ngka so manga taw a lomilintad

a pepaginetaw a makasasarig,"
a tig o Allah.
Misisibay siran a da a manga alad o di na manga tanggal
a pekalinding kiran.
32 Mapeteban ka so manga onta iran
ago so tanto a madakel a pangangayamen iran.
Pakapembelabelagen ko ko pirowarowangan a doniya
angkoto a manga taw a mababaling ko manga wawatan a darpa,
na pagowitan ko siran sa morala a poon ko mbalabala,"
a tig o Allah.
33 “Giya Hasor na kebaloy a babalingan o manga iila a binatang,
a mitataog a kaden sa taman sa pakataman.
Da den a mbeling roo;
da a taw a ba on keden."
So Katero o Allah makapantag sa Ilam

34 Da matey a kiyandatoi i Sidikiyas sa Yodah na minisampay angkai a katero o Allah ko
nabi Yaramiyas makapantag sa Ilam:
35 Giyai i pitero o Allah a Lebi Mamaapaar:
"Pemonoon ko so langon a pamamana sii sa Ilam

a aya miyakabaloy sa Ilam a lebi a mala i kapaar.
36 Pagowitan ko a Ilam sa manga ridoay a pemakapoon ko mbalabala
a lagid o manga ndo a pesember a poon ko pat a pidoro o langit.
Na iperak aken so manga taw sa Ilam ko mbalabala,
na da den a inged a ba di kiran ketaogi.
37 Itegigay aken so manga taw sa Ilam sii ko danga o manga ridoay iran
a mananamar ko niyawa iran.
Sii ko mala a rarangit aken
na pemoralaan ko siran,"
a tig o Allah,
"na pekiseloba aken siran ko pedang o manga ridoay iran
taman sa mapolang aken siran.
38 Mbinasaan ko so dato ago so manga olowan sa Ilam
na roo aken pekatindegen so korsi o dato aken.
39 Ogaid na sii ko pekatalingoma a manga gawii
na pekaasalen ko so kapetegompiya a Ilam,"
a tig o Allah.
YARAMIYAS 50
So Katero o Allah makapantag sa Babilon
Giyai so katero o Allah makapantag sa Babilon ago so manga taw ron a piyakasampay
niyan a miyakanggolalan ko nabi Yaramiyas. Tig iyan a
2 “Panawatewagen ka ago pakalangkapa ngka sii ko manga nasiyon!

Begi ngka siran sa nanao na pakitokawi ngka so totol!
Di ngka ini pegmaa, ka teroa ngka a
'Keagaw a Babilon!
Penga roropet so manga barahala iran
na keyaan so manga katohanan iyan a si Bel ago si Mardok.
3 Nggobaten a Babilon o nasiyon a poon sa pagotaraan
na pagilangen iyan so lopa iyan.
Ndatar so manosiya ago so manga ayam a palaya on den pemalagoy
na da den a ba on keden.
So Kakesoy o manga Israil ago so manga taw sa Yodah
4 “Sii sa masa oto a manga gawii,"

a tig o Allah,
"na so manga taw sa Israil ago so manga taw sa Yodah
na palaya siran melalakaw a pesegad sa kapembanoga iran ko Allah a Tohan iran.
5 Ipengingise iran so lalan a isong sa Siyon
na magantap siran on.
Pekaoma siran on na ipetepi iran a ginawa iran ko Allah
a nggolalan ko da a kaposan iyan a kapasadan
a di den kelipatan.
6 “So manga pagtaw aken na miyadadag a manga bilibili.

Diyadag siran o manga pananagikor
na piyakapagenebeneb iran siran ko manga kapalawan.
Miyanga tataap siran ko manga palaw ago manga bobongan,
na kiyalipatan iran o anda so darpa a pendekean iran.
7 Siyondolan siran o langon a miyamakatoon kiran,
na so manga ridoay iran a minggolaola sii na tig iran a 'Da tano makasela,
ka kagiya miyakandosa siran ko Allah a so tito a pendekean iran,
a so Allah a siyarigan o manga apo iran.'
8 “Hey manga Israil, palagowi niyo a Babilon!

Awa kano sangkoto a inged!
Panamari niyo a sekano i paganay a makaawa on.
Sayan kano sa manga mandangan a pegolowan ko talon.
9 Ka pengondowin ko
so dii mamagabanga a manga ala a nasiyon roo sa pagotaraan
na pekigobat aken kiran a Babilon.
Perigra siran on sa kasondoli ran on na keagaw iran.
So manga gasa iran na lagid o rek o sondaro a matondo i kapana
a di den keola somogat.
10 Na petebanan a inged a Babilon
na siran oto peteban on na pagawidan iran so langon taman a kebayaan iran,"
a tig o Allah.
11 “Hey manga taw sa Babilon, pitebanan iyo so kawali aken a manga pagtaw.
Giyanan na inikapiya a ginawa niyo ago inikababaya
a di kano dii tetepatepak a lagid o manga nati a sapi sii ko pananateba
ago pekekeg kano a lagid o manga mama a koda.
12 Ogaid na so inged iyo a ron kano inimbawata
na tanto a pakapekeyaan ago kediyamanan.
Kebaloy a Babilon a lebi a mitatanan ko manga nasiyon,
a pembaloy a disirto, a mamara ago da a bali niyan a lopa.
13 Sabap ko rarangit o Allah na di ini kekadenan
ka kelaslas sa tarotop.
So langon a pekasagad sa Babilon na kebengang ago makapengelengkeleng
sabap ko langon a kiyasiksaa on.
14 “Hey langon kano a pamamana, likopi niyo a Babilon
ago perigrai niyo gomobat.
Panaa niyo sekaniyan! Di niyo perintasa a kapepanaa niyo ron,
ka miyakandosa sekaniyan ko Allah.
15 Lalisen iyo so lalis sa katidawa ko mbalabala on!
Sengkop sekaniyan; miyaleseb ago miyageba so manga pangeleban iyan
Giyai na saop o Allah;
sabap san na saopi niyo sekaniyan.
Kidian iyo ron so inikidiya niyan ko ped!
16 Di niyo peparowa o ba aden a misaod a oniin sa Babilon
aya pen o ba aden a maragon a pereperan.
Penga alek so langon a kibabaling roo a mananangga
sabap ko manga sondaro a penggobat on,
na pembabaling siran ko poonan iran a manga inged."
So Kakesoy o manga Israil ko Inged iran
17 “So manga Israil na lagid o manga bilibili

a piyanaloba ago miyapakambelabelag o manga arimaw.
So paganay a lomiyamed kiran na so dato sa Asiriya,
na so miyaori a gomiyarenget ko manga tolan iran
na si Nibokadnisar a dato sa Babilon.
18 Sabap sii na saken, a so Allah a Lebi a Mamaapaar a Tohan o Israil
na ndenegen ko so dato sa Babilon ago so inged iyan
a datar o kiyadanega ko ko dato sa Asiriya.
19 Na pekakasowin ko so talon a manga Israil ko inged iran
na penateb siran roo sa Karmil ago Basan;
ken siran taman sa penga oosog
sii ko kapalawan a Ipraim ago Giliyad.
20 Amay ka makatalingoma angkoto a manga gawii,"
a tig o Allah,
"na apiya pen o katokawi so kamarataan a Israil
na da den a ba on ketoon,
aya pen o ba aden a manga dosa roo sa Yodah,
ka perilaan ko so miyalamba kiran a manga taw a piyakapagoyag aken.
20 “Gobata niyo so inged a Mirataim

ago so manga taw a kibabaling sa Pikod.
Salobaa niyo siran, pamonoa niyo ago polanga niyo,"
a tig o Allah.
"Nggolaolaa niyo so langon taman a inisogo aken rekano.
22 Pekeneg so kabobosigaw o katidawa sii ko inged a Babilon,
ago so daleg o mala a kabinasaan!
23 Riyompi a Babilon so dalem a doniya,
ogaid na sayana a miyapotol ago miyaropet angkoto a rompi imanto!
Sayana a piyakalekelek a pegilain a Babilon sii ko manga nasiyon!
24 Tiyaanan aken seka sa litag, hey Babilon,
na kiyalitagan ka on sa da ngka on pen katokawi.
Miyatoon ago miyadakep ka
ka kagiya somiyopak ka ko Allah.
25 Likaan o Allah so petegoan iyan sa manga gomaan
na iniliyo niyan on so manga gomaan o rarangit iyan,
ka aden a galebek o Allah a Lebi a Mamaapaar sii sa inged a Babilon.
26 Songowi niyo, hey sekano a sisii ko manga wawatan a inged
ago gobata niyo!
Lekai niyo so manga taliyong iyan,
na tabotoden iyo sekaniyan a lagid o manga inemong a ilaw!
Binasaa ngka sekaniyan sa tarotop
a da den a ba niyo ron a miyalamba!
27 Pamonoa niyo langon so manga sapi iran;
tondaa niyo siran ko penombalian!
Dowandowaan iyan so manga taw sa Babilon,
ka miyakatalingoma den so masa a kandanega kiran.
(28 So miyamakapagoyag a miyamakapalagoy a poon sa Babilon
na miyamakaoma sa Yarosalim,
na pepanotolen iran roo so kiyasaopi o Allah a Tohan tano
ko manga taw sabap ko pinggolaola iran ko Timplo niyan.)
29 “Sogoa niyo so manga pamamana sa kagobata iran sa Babilon!

Pakisogoi niyo so langon a mapasang i kapana!
Likopi niyo so siti na o ba niyo pakapalagoya so apiya antawaa.
Pakibayadi niyo ron so manga galebek iyan;
kidian iyo ron so inikidia niyan ko ped,
ka miyangimporoan sekaniyan ko Allah
a so Soti a Tohan o Israil.
30 Kagiya ka maoto na pemonoon so manga kangodaan iyan sii ko manga lalan;
kepolang so langon o manga sondaro niyan sangkoto a gawii,"
a tig o Allah.
31 “Ilaya ngka man, ka riridoon ko seka, hey siti a Babilon a dii tekabor!"
a tig o Kadnan a so Allah a Lebi a Mamaapaar.
"Miyakatalingoma den so gawii a kandanega ko reka.
32 Kisosong ago keoteng angkoto a takabor a siti
na da den a ba on magogop makatindeg.
Tenteman aken sa apoy so manga inged iyan
a pekatotong ko langon taman a melilibeta on."
33 Giyai i kabasa o Allah a Lebi a Mamaapaar:
"Pesonsingen so manga taw sa Israil

taman ko manga taw sa Yodah.
So langon o miyamiyag kiran na pananamaran iran siran komapet
na di iran siran den mbokaan.
34 Ogaid na so Penabang kiran na mabager;
so Allah a Lebi a Mamaapaar i Ingaran iyan.
Pesebenaran iyan manindeg so kabenar iran
kaan iyan siran mapakadeke sii ko inged iran,
ago masemok iyan so manga taw sa Babilon.
35 “Kesiksa a pedang so manga taw sa Babilon,"

a tig o Allah
"a so manga kibabaling on, so manga olowan iyan ago so manga oongangen!
36 Kesiksa a pedang so di benar a manga nabi niyan
kebaloy siran a manga lalong!
Kesiksa a pedang so manga sondaro niyan
tanto siran a penga aalek!
37 Kesiksa a pedang so manga koda iyan ago manga karo sa katidawa
ago so langon o manga mananangga a sondaro a pesokayan iyan
kedatar siran o manga babay!
Kesiksa a pedang so manga kakawasaan iyan na mapeteban ai!
38 Kesiksa a laon so inged iyan
na penga ati so manga lawasaig iyan ago manga bowalan!
Mapenggolaola ini langon sa inged a Babilon
ka kagiya mapepeno ini a manga barahala
a ipembeteng ko manga taw a maaleken kiran.
39 “Kagiya ka maoto na keden roo so manga iila a binatang a poon ko disirto

a rakes o manga tingkalong ago manga bengit.
Di den oto kekadenan o manga taw
aya pen o ba kabalingi sa taman sa pakataman.
40 Mbinasaan ko a Babilon
a datar o kiyabinasaa ko sa Sodom ago Gomorah a rakes o midadair on a manga inged,"
a tig o Allah,
"na da den a taw a ba roo keden peroman.
41 “Ilaya ngka! Aden a manga sondaro a pekaoma a poon sa pagotaraan!

So mala a nasiyon ago madakel a manga dato ko manga wawatan a darpa
na petiyagar siran makitidawa reka.
42 Kikagogomaanan siran sa manga pana ago manga bangkaw.
Masarangit siran a da a manga kapedi iyan.
So kapendagedeb iran na lagid o kapendaleg a ragat
sii ko kakokoda iran
a pepekaoma siran a lagid o manga mama a kirarantar sa katidawa
sa kanggobata iran reka, hey Babilon.
43 Miyaneg o dato sa Babilon so totol makapantag sii
na kiyadaan sekaniyan sa bager
ka kiyakoloban a kalek ago masakit
a datar o pembaliliten a babay.
44 Lagid o arimaw a pekagemaw a poon ko kalasan ko kilid a Lawasaig a Yordan
a pakapemalagowin iyan so manga bilibili ko pananateba
na kitekaw a pekipalagoyan ko ko manga taw sa Babilon so inged iran.
Oriyan oto na toroan aken angkoto a inged sa makapegolowan kiran a piliin aken.
Ka antawaa i datar aken, ago antawaa i pekaato raken?
Antawaa i dato a ba raken makasopak?"
45 Kagiya ka maoto na pakinega niyo so pitekdir o Allah mipantag sa Babilon,
a so pikediyat iyan a mapenggolaola ko manga kibabaling on.
Apiya so manga wata iran na pemanondaan sa mawatan,
na pelaslasen iyan so inged iran sabap ko miyanggolaola iran.
46 Tebaden so doniya sabap ko daleg o katebana sa Babilon,
na keneg o ped a manga nasiyon so kapendidiyagaw niyan.
YARAMIYAS 51
So Ped a Indaneg sa Babilon
"Pekasamberan ko a Babilon ago so manga taw ron

sa pekabinasa a ndo.
2 Pekisongowan aken a Babilon sa manga mananangga
makalaslas on a lagid o ndo a ipembayog iyan so okap.
Pekaoma siran a poon ko mbalabala sa kanggobata iran on
sii ko gawii a kakemoralai ron.
3 Di niyo pekisoloten ko manga pamamana so raben iran
aya pen o ba niyo kiran pakipanaan so manga gasa iran.
Di niyo pegongowi so manga ngongoda niyan!
Binasaa niyo sa tarotop so manga sondaro niyan!
4 Penga ooteng siran a pematay sii sa Babilon,
a kikapapalian sii ko manga lalan iyan.
5 Ka giya Israil ago Yodah
na da den talikodi o Tohan iran a so Allah a Lebi a Mamaapaar
apiya pen mapepeno a dosa so inged iran
ko hadapan o Soti a Tohan o Israil.
6 “Palagowi niyo a Babilon!

Pagapasen iyo so manga niyawa niyo!
Di kano pekibinasa sabap ko manga dosa niyan!
Ka masa imanto a kaseop o Allah;
imbadal iyan on so mapapatot ko miyanggolaola niyan.
7 Giya Babilon na datar o tagayan a bolawan sii sa lima o Allah
a so tagayan a piyakiinoman iyan ko dalem a doniya.
Ininom o manga nasiyon so arak on, na inikabereg iran,
na sabap san na biteng siran langon imanto.
8 Magaan so magaan a kiyatabana sa Babilon ago so kiyaropet iyan.
Ndidiyagawi niyo sekaniyan!
Kowa kano sa indepil ko masakit iyan;
ka o ba sekaniyan baden kabolongi.
9 “Tig o manga mananangga a kibabaling roo a

'Tipengan ami mamolong a Babilon
ogaid na di sekaniyan kepiya.
Na, awaan tano sekaniyan ago kasoy so oman i isa rektano ko inged iyan,
ka so indaneg on na somosoko sa langit
ago midadakontor taman ko manga gabon.'
10 “Peteroon o manga biyag a poon sa Yodah a

'Piyakabenar tano o Allah.
Itano roo; panotolen tano ko manga taw sa Yarosalim
so pinggolaola o Allah a Tohan tano.'
11 “Taremi niyo so manga gasa iyo!

Kowaa niyo so manga kelong iyo!
Inondoy o Allah so manga dato sa Midiya
ka aya kadiyat iyan na so kapakibinasaan iyan kiran sa Babilon.
Giyanan i kaseopi niyan ko siran oto a mininasa ko Timplo niyan.
12 Begay kano sa nanao sa kagebaa ko manga pangeleban a Yarosalim!
Pakinggordiyai niyo piyapiya!
Pakakadena niyo so manga sirino ko manga posto iran!
Tiyagar kano sa kapamagayani ron!
Ka itoman o Allah so antap iyan.
Penggolaolaan iyan so langon taman a pitero iyan
a ikidia niyan ko manga taw sa Babilon.
13 Hey Babilon a madakel i manga lawasaig ago manga kakawasaan,
na minitalingoma den so kaposan ka,
a so masa a katepeda ko kaoyagoyag ka.
14 Misepa so Allah a Lebi a Mamaapaar sa ginawa niyan a
"Mataan a penoon ko seka a manga sondaro a ridoay
a lagid sa kakapal o manga tarapan,
na ipelalis iran so kiyatabana iran reka."
Dikir a Ipepodi ko Allah
15 Pimbaalan o Allah so doniya ko gees iyan

na piyakambeken iyan a nggolalan ko ongangen iyan.
Kiyayat iyan so manga langit a nggolalan ko sabot iyan.
16 Igira a di sekaniyan dii ndadalendeg na pendagedeb so manga ig a sisii sa kawang.
Pepakagemaon iyan so manga gabon a poon ko manga pidoro a doniya.
Pesogoon iyan so kilakilat a rakes o oran
ago pepakaliyon iyan so ndo a poon ko tataliyongan iyan on.
17 “Oman i manosiya na boda a da den a sowa iyan o pagabain ko Allah.

So langon a pepagembaal sa manga barahala na pepanga oolaan a sabap on
ka kagiya kena a ba tito a tohan so manga barahala iran;
da den a napas iran.
18 Da a manga bali iran a patot a pesodiin siran;
amay ka maoma so kandanega kiran na penga ada siran.
19 Ogaid na so Tohan o manga mbawataan o Yakob na kena a ba di tito a Tohan!
Sekaniyan i miyangaden ko langon taman,
a rakes on so manga taw sa Israil a aya niyan kawali.
So Allah a Lebi a Mamaapaar i Ingaran iyan!"
So Maso o Allah
20 Pitero o Allah a
"Hey Babilon, seka i maso aken,
a aya ko gomaan ko katidawa.
Inosar aken seka sa kiyaropeta ko ko manga nasiyon
ago so kiyabinasaa ko ko manga ndatoan.
21 Inosar aken seka sa kiyaropeta ko ko manga koda ago so kikokoda on,
ago so kiyaropeta ko ko manga karo sa katidawa ago so pepangolin on.
22 Inosar aken seka sa kiyapamonoa ko ko manga mama ago manga babay,
so manga lokes ago manga wata
taman ko manga ngongoda ago so manga raga.
23 Inosar aken seka sa kiyapanombalia ko ko manga pananagikor sa bilibili ago so manga
talon iran,
so manga taribasok ago so manga sapi iran a dii ndado,
ago so manga gobirnador a rakes o manga sanasanaan iran.
24 “Ogaid na sii ko kamamasai niyo ron na pakapembayaden ko a Babilon ago so langon

a kibabaling on sabap ko langon a marata a miyanggolaola iran sa Yarosalim," a tig o
Allah.
25 “Ilaya ngka man, hey Babilon a so mala a palaw

a pepaminasa ko dalem a doniya,
saken i ridoay ngka," a tig o Allah.
"Pekatanaan ko seka a lima
na peliliden ko seka sa baba a poon ko poro o pampang,
ago mbelowin ko seka a miyararab a palaw.
26 Da den a ba reka kekowa a ator a kebaloy a keontodan ko rogo o walay
aya pen o ba maosar sa kambalay,
ka kebaloy ka a ilang baden a darpa sa taman sa pakataman,"
a tig o Allah.
27 “Begay kano sa tiniyas sa kanggobat!

Pakaoniya niyo so manga bogiyong sii ko manga nasiyon!
Pakatiyagara niyo siran sa kapakipetidawa sa Babilon!
Sogoa niyo so manga ndatoan a Ararat, Mini ago Askinas sa kagobat iran,
ago toro kano sa komandir a makapegolowan kiran.
Pakigobaten iyo ko manga koda a lagid sa kadakel o makapal a manga tarapan!
28 Pakatiyagara niyo so manga nasiyon sa kipetidawaan iran sa Babilon
so manga dato o manga taw sa Midiya,
so manga gobirnador iran a rakes o manga sanasanaan,
ago so langon a sondaro ko manga inged a ndadatoan iran.
29 Petebaden ago pekealial a Babilon
ka ipenggolalan den o Allah so takdir iyan mipantag on,
ka mbelowin iyan so inged a Babilon a disirto
a da den a ba on pekabaling.
30 Gominek makitidawa so manga sondaro a Babilon;
gomegenek siran baden ko manga kota iran.
Kiyadaan siran sa kawaraw,
na miyabaloy siran a lagid o manga babay.
Miyageba den so manga pintoan o siti
na pepanga tototong so manga walay iran.
31 Pepamalalagoy so manga sogo a poon ko mbalabala sii ko dato sa Babilon
sa kapenotola iran on a miyaagaw den so dalem a siti niyan,
32 Kiyaalangan so manga lalan a ron pekapalagoy so manga taw,
pepanga tototong so manga kota
ago pepanga aalek so manga sondaro."
33 Ka giyai i pitero o Allah a Lebi a Mamaapaar a so Tohan o Israil:

"Di den matey na nggaraben siran o ridoay
ago pagegiken siran a lagid o ilaw sii ko pegegikan."
34 Si Nibokadnisar a dato sa Babilon

na piyangarad iyan a Yarosalim na kiyan iyan.
Biyaloy niyan so siti a lagid o omoy a da a tago iyan
ka lagid o maila a binatang a kiyalameda niyan ko matatago on.
Inosog iyan so tiyan iyan ko manga pipiya a nganin on
na inilebad iyan baden so miyalamba on.
35 Na peteroon o manga taw sa Siyon a
'Mitana sa Babilon so marata a inikidia niyan rektano!'
ago peteroon o manga taw sa Yarosalim a
'Kasekatan so manga taw sa Babilon
sabap ko rogo tano a piyakatoga iran!' "
So Kiyasaopi o Allah sa Babilon

36 Kagiya ka maoto na giyai i pitero o Allah ko manga taw sa Yarosalim:
"Ilaya niyo, ka itindeg aken so kabenar iyo

ago iseop aken sekano sabap ko pinggolaola rekano o manga taw sa Babilon.
Pemakatiyan ko so manga bowalan iyan
ago pemakamaraan ko so manga lawasaig iyan.
37 Kebaloy a Babilon a mitatabotod a miyanga bibinasa,
a kadena o manga iila a binatang,
a piyakalekelek a pegilain a dii sodiin,
a da den a ba on pekakaden.
38 Pegengger so langon a taw sa Babilon a lagid o manga arimaw,
na penggebo siran a lagid o manga roroni a arimaw.
39 Na amay ka makala so kapekeor iran
na pembengkitiyan ko siran.
Mberegen ko siran ago pakapesonoren
kaan siran toroga sa dayon sa dayon
a di den pekanaw," a tig o Allah.
40 “Pagowiten ko siran ko penombalian
a lagid o manga bilibili ago manga kambing.
41 “Miyaagaw den a Babilon,

tiyaban so siti a pembantogen o dalem a doniya!
Sayana a piyakalekelek a pegilain a Babilon sii ko manga nasiyon!
42 Miyorog so ragat ko poro a Babilon;
biyagenas ai o pendaleg a manga begel iyan.
43 Miyalaslas so pagingedingedan on
a miyalagid o mamara a mitataog a kaden
a da a taw a ba on mababaling
aya pen o ba aden a magokit on.
44 Ndenegen ko si Bel a so katohanan sa Babilon
na pekiota aken on so miyalamed iyan.
Di on den pemanong so manga nasiyon sa kasimba iran on.
Na ketempag so manga pangeleban a Babilon.
45 “Liyo kano sa Babilon, hey manga pagtaw aken!

Pagapasen iyo so manga niyawa niyo!
Palagowi niyo so dii mborngat a rarangit o Allah!
46 O ba kano kadai sa inam aya pen o ba malek
sabap ko manga totol a pekeneg iyo sii ko inged;
aden a isa a totol a keneg iyo sangkai a ragon,
na salakaw a totol ko telondog a ragon
a so manga totol makapantag ko kambobonoay sii ko inged,
a so isa a dato a miyakitidawa ko isa a dato.
47 Ka mataan a pekaoma so masa
a ndenegen ko angkai a siti ago so langon o manga barahala niyan.
Pakapekeyaan so dalem a inged
na so langon o miyamatay ron na pemangibaraser sii ko manga lalan.
48 So manga langit ago so doniya ago so langon taman a matatago on
na pelalalis sa kapekebabaya,
amay ka magobat a Babilon
o manga sondaro a poon sa pagotaraan
sa kambinasaa iran on."
a tig o Allah.
49 Disomala a pemonoon so manga taw sa Babilon
sabap ko manga taw sa Israil a piyamono iyan
a datar o kiyapamonoa ko manga taw ko dalem a doniya
sabap sa Babilon."
50 Pitero o Allah ko manga pagtaw niyan sa Babilon a

"Sekano a miyakalidas ko kapatay sa katidawa,
na awa kano den! Di kano pesesendosendod!
Tatanodi niyo so Allah apiya pen mawatan kano ko inged iyo,
na pamimikirana niyo a Yarosalim.
51 Pitero iyo a 'Kiyadiyamanan kami;
miyapakaito kami ago minipanagop ami so kaya ami
ka kagiya miyakasoled so manga rait
ko soti a manga darpa ko Timplo o Allah.'
52 Oway," a tig o Allah, "ogaid na pekatalingoma so manga gawii
a mbinasaan ko so manga barahala a Babilon,
na sii ko dalem a inged
na keneg on so kapakapeperego o miyanga aangel a manga taw niyan.
53 Apiya pen makapanik a Babilon sa langit
ago makambaal roo sa mabager a kota
na pekisongowan aken sekaniyan den sa manga taw a mbinasa rekaniyan,"
a tig o Allah.
54 “Pamakinega niyo so dii kandiyagaw a pepekapoon sa Babilon,

a so kapakamboboko sabap ko mala a kabinasaan sii ko inged.
55 Ka pembinasaan o Allah a Babilon;
pekareneken iyan so matanog a bogembog iyan.
Pepekadansal rekaniyan so manga ridoay a lagid o manga ala a begel sa ragat
a pekigorong so kapendaleg o manga lalis iran.
56 So peminasa a manga sondaro na nggobat sa Babilon
na pendadakepen so manga sondaro niyan
ago penga popotol so manga pana iran.
Ka so Allah na Tohan a ndaneg ko marata,
na mataan a indaneg iyan sa Babilon so patot rekaniyan.
57 Mberegen ko so manga olowan iyan, manga oongangen a mama,
manga nakoda, manga gobirnador ago so manga sondaro niyan.
Torogen siran sa dayon sa dayon ago di den pemakanaw."
a tig o Dato a aya ngaran iyan na so Allah a Lebi a Mamaapaar.
"Penempagen sa tarotop so mabelang a manga pangeleban a Babilon,

na totongen so manga poporo a manga gimowa iyan.
Ilang baden so pasad o manga gomagalebek a poon ko ped a manga nasiyon
ka ketotong sa apoy so pindokawan iran."
So Katero i Yaramiyas na Inipakawit roo sa Babilon
59 Si Sirayas a wata i Niriyas ago apo i Maksiyas na aya sanasanaan o dato Sidikiyas. Sii
ko ikapat ragon a kandadato i Sidikiyas sa Yodah na somiyong si Sirayas sa Babilon a
ped o dato Sidikiyas na aden a iniinsarat rekaniyan i Yaramiyas.
60 Inisorat den i Yaramiyas ko pesoratan so langon o manga morala a kitana sa Babilon a
so langon a miyaalamat iyan makapantag sa Babilon.
61 Na iniinsarat i Yaramiyas ki Siriyas a "Amay ka makaoma ka sa Babilon na o ba ngka
ini di mabatiya sa matanog ko manga taw.
62 Oriyan iyan na teroa ngka a 'Ya Allah, pitero o ka a mbinasaan ka angkai a darpa kaan
da den a pekakaden on a taw o di na ayam, ka pembaloy a lagid o disirto sa taman sa
pakataman.'
63 Amay ka mapasad ka matiya angkai a sorat na iketi ngka sa ator na itogen ka ko
Lawasaig a Yopratis,
64 Na teroa ngka a 'Datar anan a kakigaled a Babilon ago so manga taw niyan, a di den
pekagemaw sabap ko morala a itena on o Allah.'
Sii miyapos so manga katero i Yaramiyas.
YARAMIYAS 52
Dowa polo ago isa ragon a idad i Sidikiyas isako mabaloy a dato sa Yodah na
miyakandato sa Yarosalim ko miyakasapolo ago isa ragon. Aya ngaran o ina iyan na si
Hamotal a wata i Yaramiyas a taw sa Libnah.
2 Miyakanggolaola sekaniyan sa marata sii ko kapekeilaya on o Allah a datar o
pinggolaola o Dato Yahoyakim.
3 Na sabap sa tanto a kiyararangitan o Allah a Yarosalim ago giya Yodah na inibowang
iyan siran a poon ko kamamasaan iyan.
Na siyopak i Sidikiyas si Nibokanisar a dato sa Babilon.
4 Sabap roo na sii ko ikasiyaw ragon ko kandadato i Sidikiyas sii ko ikasapolo gawii ko
ikasapolo olan na siyondolan i Nibokadnisar a Yarosalim a rakes o langon o manga
sondaro niyan. Mikempo siran ko liyo o siti na mimbaal siran sa manga tambak ko
melilibeta on,
5 Na kalilikopan den so siti taman ko ikasapolo ago isa a ragon a kandadato i Sidikiyas.
6 Sii ko ikasiyaw gawii ko ikapat olan a miyakaregen so taon ko siti a da den a kekan o
manga taw
7 Na miyaleseb so pangeleban o siti. Na apiya pen lomilikop so manga taw sa Babilon ko
siti na miyanamar mamalagoy so langon o manga sondaro ko kagagawii a sii siran
miyokit ko gimowa ko pageletan o dowa a manga pangeleban a marani ko sapadan o
dato, na miyantap siran ko Balintad a Yordan.
8 Ogaid na siyaloba o manga sondaro a Babilon so dato Sidikiyas na riyaot iran sekaniyan
sii ko kapantaran sa Yariko, na inawaan sekaniyan o langon a sondaro niyan.
9 Diyakep iran so dato na inowit iran sekaniyan ko dato sa Babilon sii sa Riblah a roo
sekaniyan siyala i Nibokadnisar.
10 Roo sa Riblah na piyamono iyan so manga wata a mama i Sidikiyas sii sa danga iyan,
na piyakipamono iyan pen so langon o manga olowan sa Yodah.
11 Oriyan iyan na iniresok iran so manga mata i Sidikiyas ago piyatong iran a tombaga na
inowit iran sa Babilon a roo sekaniyan den kakalaboson taman ko gawii a kiyapatay
niyan.
So Kiyagebaa ko Timplo o Allah
12 Sii ko ikasapolo gawii ko ikalima olan, a so ikasapolo ago siyaw ragon a kandadato i
Nibokadnisar sa Babilon, na si Nibosaradan a komandir o manga gordiya ago sanasanaan
o dato sa Babilon na miyakaoma sa Yarosalim.
13 Piyanotong iyan so Timplo o Allah ago so torogan o dato ago so langon o manga
walay sa Yarosalim a rakes o oman i mala i kipantag a walay.
14 Na so langon o manga sondaro a Babilon a pagoolowanan o komandir o gordiya na
piyanempag iran so manga pangeleban a mililibet sa Yarosalim.
15 Na piyamiyag ago inipanaog i Nibosaradan so ped ko manga miskin ko manga taw ago
siran oto a miyalamba ko siti a rakes on so lamba a manga panday ago siran oto a
miyampil ko dato sa Babilon.
16 Ogaid na inibegak iyan sa Yodah so lebi a manga miskin a makanggalebek ko manga
asinda a obas ago manga dii mbabasokan.
17 Na piroropet o manga taw sa Babilon so manga polaos a tombaga ago so

mapepegalinalin a manga batoga ago so maolad a palanggana a tombaga a pepangonaban
a matatago ko Timplo o Allah na inawidan iran sa Babilon so langon a tombaga.
18 Initelon iran roo pen so manga koden, manga sakerad, manga ipetenor sa sombowan,
manga ladiya, manga lapad ago so langon o manga kasangkapan a tombaga a pegosaren
ko dii kapanalagadi ko Timplo.
19 Inirakes pen o komandir so langon taman a inembaalan a lombos a bolawan ago pirak
a so manga roroni a ladiya, manga tangela sa waga, manga palanggana, manga koden,
manga petegoan sa solo ago so manga kaloda ago manga ladiya a pegosaren ko ipesepaat
a panginginomen.
20 So manga nganin a tombaga a piyakimbaalan o Dato Solaiman a para ko Timplo o

Allah a so dowa a manga polaos, so mapepagalinalin a manga batoga ago so maolad a
palanggana a rakes on so sapolo ago dowa a tombaga a inisayan sa manga mama a sapi a
pembatogan on na di ketimbang sabap ko kapened iyan.
21 Oman i isa ko polaos na walo ka mitros a kaporo iyan ago lima ka mitros ago tenga a
likes iyan. Sesemba ini na dowa ka porgada a kakapal o tombaga on.
22 Sii ko poro o oman i polaos na aden a ipopondiyong on a tombaga a dowa ago tenga
ka mitros a kaporo iyan. Pipendaraan ai sa inisayan sa siyobid a manga rantay ago manga
onga a granada a palaya tombaga a ililibet ko ipopondiyong.
23 Aden a siyaw polo ago nem a granada a matatago ko tangkirian iyan, na magatos
langon a manga pomagranito ko siyobid a manga rantay a ililibet on.
24 Minioman sii na biniyag o komandir Nibosaradan si Sirayas a so maporo a imam, si

Sipaniyas a so katib ago so telo kataw a komikibir ko manga pintoan o Timplo.
25 Na poon ko manga taw a sisii pen ko siti na kinowa niyan so isa a olowan o manga
sondaro, so pito kataw a manga mosawira o dato, so panonorat a komikibir ko manga
listaan ko manga sondaro ago nem polo a ped a manga taw a miyatoon ko siti.
26 Inowit siran langon o Nibosaradan ko dato sa Babilon sii sa Riblah
27 Sa inged a Hamat, na roo siran piyakipamono o dato sa Babilon.
Miyamangitaog so manga taw sa Yodah a miyanga bebelag siran ko inged iran.
28 Giyai i kadakel o manga taw a inipanaog i Nibokadnisar: sii ko ikapito ragon a
kandadato iyan na telo nggibo ago dowa polo ago telo a manga Yahodi;
29 Sii ko ikasapolo ago walo ragon a kandadato iyan na walo gatos ago telo polo ago
dowa a poon sa Yarosalim;
30 Na sii ko ikadowa polo ago telo ragon a kandadato iyan na pito gatos ago pat polo ago
lima a minitaog i Nibosaradan a so komandir o gordiya. Langon siran na pat nggibo a
kadakel iyan a manga taw.
Biyokaan si Yahoyakin
31 Sii ko ikatelo polo ago pito ragon a kitataogen ki Yahoyakin a dato sa Yodah na
miyabaloy si Ibilmirodak a dato sa Babilon. Biyokaan iyan si Yahoyakin na piyakaliyo
niyan sekaniyan ko kalaboso sii ko ikadowa polo ago lima gawii ko ikasapolo ago dowa
olan sangkoto a ragon.
32 Diyolon iyan sekaniyan a limo na bigan iyan sa maporo a pangkatan a di so ped o
minitaog a manga dato a ped iyan sa Babilon.
33 Inendaan i Yahoyakin so nditaren iyan a kalaboso na sii ko lamba o omor iyan na sii
sekaniyan tatap a pekan ko lamisaan o dato.
34 Na gawii gawii den a pembegan o dato sa Babilon si Yahoyakin sa gasto niyan taman
ko kaooyagoyag iyan pen taman ko gawii a kiyapatay niyan.
KAMBOBOKO
KAMBOBOKO 1
So Kamboboko Mipantag sa Yarosalim
Sayana a matatanaw a siti a Yarosalim

a mapepeno gowani a manga taw!
Sekaniyan a kababantogan gowani ko manga nasiyon
na datar o balo imanto!
So bai a miyakandato ko ped a manga inged
na miyabaloy a oripen!
2 Penggoraok sekaniyan sebenar sii ko kagagawii,

lalayon mawasa a lo so manga bies iyan.
Sii ko langon o pekebabaya on gowani
na da den a ba on teyo.
Tominipo ron so langon o manga ginawai niyan,
na miyabaloy siran a manga ridoay niyan.
3 Miyamangitaog so manga taw sa Yodah

a peperarasain siran ago pepangongoripenen.
Komakaden siran ko ped a manga nasiyon
a da den a darpa a ba iran kedekei.
Riyaot siran o langon o pepanaloba kiran
sii ko kapamomolowi ko kareregeni kiran.
4 Mboboko so manga lalan a isong sa Yarosalim,

ka da a ba on pelalakaw
sa kapeselaselaa niyan ko manga pista sii ko Timplo.
Kiyadaan sa taw so langon o manga gimowa o siti;
dii makaperego so manga imam iyan,
tanto den a mararata a ginawa o manga raga niyan
na mapait a kararasay a Siyon!
5 Mapapaar sekaniyan o manga soranga iyan,

na pepangosor so manga ridoay niyan.
Ka inidaneg o Allah sa Yarosalim
so madakel a manga dosa niyan.
Piyamiyag o ridoay so manga wata iyan
ago inipanaog iran ko manga wawatan a inged.
6 Miyada den so langon a kakasi a Yarosalim.

So manga olowan iyan na lagid o manga saladeng
a da a ketoon iran a kapenateban
a tanto a miyamangikopay
a di iran kepalagoyan so panganganop.
7 Na imanto, sii ko manga gawii a kararata a ginawa niyan ago kapeketaataap iyan
na peketademan a Yarosalim so langon a kamapiyaan iyan ago kakawasaan
sii ko andang a manga gawii.
Ogaid na miyaagaw sekaniyan den o manga ridoay
na da a ba rekaniyan tomiyabang.
Inilay sekaniyan o manga ridoay niyan
na inikela iran baden so kiyabinasa niyan.
8 Tanto a mala a kiyapakandosa a Yarosalim;

sabap roo na miyabaloy sekaniyan a maresik.
Dii sodiin o langon a somesela on gowani,
ka miyailay iran so katatalandiyang iyan.
Na di sekaniyan baden dii makaperego
ago ipetepok iyan a paras iyan sii ko kaya iyan.
9 Marayag a tanto so karesik iyan

ogaid na da niyan pemasaka so keimponan ko dosa niyan.
Pakabengang so kiyatabana on
na da den a ba rekaniyan teyo
Inigoraok iyan a "Ya Allah, ilaya ngka so kapekerasay aken,
ka miyakadaag so ridoay!"
10 Gininit on o manga ridoay niyan so langon o manga tamok iyan.

Miyailay niyan so manga kapir
a miyamanoled ko soti a darpa ko Timplo niyan
a so siran oto a inisapar o Allah o ba on soled on.
11 Dii makaperego so manga o manga taw niyan

sii ko di iran dii kambabanog sa paan.
Ipesembi iran sa pangenengken so manga kakawasaan iran
kaan siran pekeoyag.
"Ilaya ko ngka, ya Allah," a ipenggoraok o siti,
"na tagoa ko ngka sa ginawa
ka di ako dii sodiin."
12 “Hey langon kano a pepekasagad raken,

ba da a bali niyan reka so maoolaola ko?
Pangilailay kano na go niyo inengkaa
o ba aden a kapekerasay a datar o kararasay aken
a initana raken o Allah sii ko gawii a kiyamborngat o rarangit iyan!
13 “Poon sa poro na somiyogo sekaniyan sa apoy

a so apoy a petotong sii ko manga tolan aken.
Tiyaanan iyan sa sampirot so manga ai aken
na riyoseng ako niyan.
Inawaan ako niyan a kadodowaanan
ago petelogedam ko mababasa alongan.
14 “Siyolapid o manga lima niyan so manga dosa ko

na inisanggolay niyan ai ko lig aken a lagid o kokoong,
na kiyadaan ako sa bager sabap ko kapened iyan.
Piyalad ako o Allah ko manga ridoay aken,
na di aken siran keatowan.
15 “Ibibilang o Allah a da a bali niyan

so langon o manga wawaraw a mama a sisii raken.
Piyakisogoan iyan so manga sondaro a gobaten ako iran
kaan iran masasa so manga kangodaan aken.
Miyaloseg o Allah so pakatatayaan iyan a siti
a lagid o kapelosega ko manga obas
sii ko petemekan sa arak.
16 “Giyanan i sabap a kapesegad aken

na pesolapayan a lo so manga mata ko.
Da den a ba marani a pekatayo raken
aya pen o ba aden a pekapiya ko ginawa ko.
Da den a miyalamba ko manga wata aken
ka miyadaag ako o ridoay."
So Katero o Nabi
17 “Pepekitabang a Siyon,
ogaid na da a ba rekaniyan tebang.
Pitero o Allah makapantag ko kiyababadan ko Yakob a
"So manga siringan iran na aya kebaloy a manga ridoay iran.
Aya ipekidia iran sa Yarosalim na lagid o ba maresik a nganin."
So Katero a Yarosalim
18 “Maontol so Allah ko kiyadanega niyan raken,

ka miyasopak aken sekaniyan!
Pamakinega ko niyo, hey manga taw ko mbalabala,
na ilaya niyo so kararasay aken ago kapakamboboko!
So manga ngongoda ko ago manga raga
na piyamiyag ago inipanaog.
19 “Piyanawag aken so manga abanga aken,

ogaid na tinipo ako iran.
So manga imam ago manga pelokelokesen aken
na miyamatay a ongos sii ko siti
sii ko di iran dii kambabanog sa pangenengken a ikeoyag iran.
20 “Ilaya ngka, ya Allah, so kararasay aken!

Masososa so pamikiran aken
na datar o pekepalian so poso aken
ka kagiya tanto a mala a kiyapakasopak aken.
Sii ko manga lalan na pepamono on so pedang,
na sii ko manga walay na aden a kapepatay ron.
21 Miyaneg o manga ped so di aken dii kapakaperego,

ogaid na da den a ba kiran raken tomiyayo.
Kiyatokawan o langon o manga ridoay aken so kiyamoralai raken,
na inikababaya iran so kiyanggolaolaa ngka sii.
Pengnin ko a italingoma ka so gawii a inisepa a ka
amay ka mbinasaan ka siran a datar o kiyabinasaa ngka raken!
22 “Ilaya ngka so langon a manga kamarataan iran.

Kidian ka kiran so datar o inikidia ngka raken
sabap ko langon o manga dosa ko.
Lalayon ako dii merego na miyalanag so poso aken."
KAMBOBOKO 2
So Kiyadanega o Allah sa Yarosalim
Inao! Sabap ko rarangit o Allah

na siyapengan iyan a Siyon sa domadatem a gabon!
Riyoseng iyan ko lopa so pangkatan a Israil a poon sa langit.
Apiya so Timplo niyan na da niyan pagongowi
sii ko gawii a kiyararangiti ron.
2 Piyaminasa o Allah so langon o manga walay sa Israil

sa da den a kapedi on.
Sabap ko rarangit iyan na pinggegeba iyan
so langon o manga kota a ililinding sa inged a Yodah.
Inibaba iyan so ndatoan ago so manga olowan on taman ko bayanek
na piyakadapanas iyan siran.
3 Sabap ko pesokeyaw a rarangit iyan

na kiyaka iyan sa Israil so langon o bager iyan.
Piyokas iyan rektano so pepekalinding a lima niyan
ko kiyagobata rektano o manga ridoay.
Lagid sekaniyan o pekerab a apoy sii sa inged a Israil
a pekirarab ko langon taman ko melilibeta on.
4 Datar o ridoay a inirat iyan so pana iyan,

na di tano niyan dii pentasan.
Datar o soranga a piyamono iyan
so langon o ipekebabaya tano ago ikasosoat.
Piyakamborngat iyan so somosokeyaw a gani niyan sa siti a Yarosalim.
5 Oway, tiyaban o Allah a Israil a lagid o ridoay;
bininasa niyan so langon o manga torogan on
ago piyanempag iyan so manga kota on.
Inowitan iyan so manga taw sa Yodah
sa da a ikepos iyan a kapakamboboko ago dii kandiyaga.
6 Piyakigeba iyan so Timplo niyan a lagid o lawig ko sapadan;

bininasa niyan so darpa a petelabokan rekaniyan.
Piyakigenekan iyan sa Siyon so dii kaselaselaa ko manga pista
ago so manga Gawii a Idedeke.
Sii ko tanto a kapekerarangiti ron
na tiyalikodan iyan palaya so dato ago so manga imam.
7 Inindarainon o Allah so aparan iyan

ago inawaan iyan so soti a darpa iyan.
Piyakigeba iyan ko manga ridoay
so makokota a manga torogan sa Yarosalim.
Milalalis siran sa kiyapakataban sii ko Timplo o Allah
a datar o sii ko gawii a dii kapista.
8 Piyasad o Allah sa ginawa niyan a itobak iyan

so manga pangeleban a mililibet sa Yarosalim.
Tiyakes iyan ai na da niyan rena a lima niyan ko kapembinasaa niyan on.
Piyakamboko iyan so manga kota ago so manga pangeleban,
ka palaya den ini miyanga gegeba.
9 Minitobak ko lopa so manga gimowa o siti

na piroropet so manga tanggal iran.
Minitaog so dato iyan ago so manga pangolo ko ped a manga nasiyon.
Di den mipengendao so Kitab,
na da den a pangingilain o manga nabi a poon ko Allah.
10 So manga pelokelokesen sa Yarosalim

na kioontod ko lopa a da a taroon iran
a kindiditar sa sako ago petegoan iran sa ombi so manga olo iran.
So manga raga sa Yarosalim
na kidodosong ko lopa sabap ko kayaan iran.
11 Kiyadaan sa nono so manga mata ko sabap ko kapesegad aken,

tanto ako a masososa,
kapapalian so poso aken
sabap ko kiyabinasaa ko ped aken a manga taw.
Pepanga adaan sa imeleng ago pepamatay a ongos
so manga wata ago manga ikaririga sii ko manga lalan ko siti.
12 Pepamangni siran ko manga ina iran
sa makan iran ago mainom.
Pepanga ooteng siran sii ko manga lalan ko siti
a lagid o miyanga angel a manga mama.
Na pepamatay siran sii ko kaaabena kiran o manga ina iran.
13 Hey Yarosalim, antonaa i mapetero aken?

Andamanaya i kapekapiyaa ko ko ginawa ngka, Hey Siti a Siyon?
Da den a ba ngka datar ko kararasay ngka!
So pali i ka na lagid sa kadalem o ragat!
Antawaa i pekabolong reka?
14 So miyanga aalamat reka o manga nabi ngka

na palaya di benar ago da a bali niyan.
Da iran sawai so manga dosa ngka
kaan ka makateobat ago makalidas ko kambiyaga reka
Ka so manga katero a piyakasampay iran reka
na manga ribat ago pekadadag baden.
15 So langon a pesegad reka sii ko lalan

na di ka iran dii sodiin.
Pepengelengkeleng siran
sa kapegongatongata iran sa Yarosalim a tig iran a
"Ba giyai so siti a miyatero gowani o manga taw sa
'Madidiyangka so kataid iyan,
a so ikapipiya a ginawa o dalem a doniya'?"
16 Di ka dii sodiin o langon o manga ridoay ngka.

Di iran dii pakakitebaan so manga ngipen iran
ko kipekegowaden iran reka a tig iran a
"Miyabinasa tano sekaniyan!
Mataan a giyai so gawii a nanayaon tano;
miyakatalingoma den na kiyamasaan tano!"
17 Pinggolaola o Allah so pikediyat iyan;

initoman iyan so inipagita iyan a penggolaolaan iyan sa miyatey den a gawii.
Giba iyan a Yarosalim a da den a ba on kapedi;
pipero niyan a inikababaya ini o manga ridoay niyo
ago inipagambog iran so kiyapakataban iran.
18 Goraok ka sebenar ko Kadnan, hey manga pangeleban a Yarosalim!

Pakatogaa ngka so manga lo o ka a lagid o lawasaig
ko gagawii daondaw!
Di ngka den pekadekea a ginawa ngka;
di ka nggenek gomoraok!
19 Omanoman ka mbowat ko kagagawii

na goraok ka ko Kadnan;
ododa ngka so manga ikaboboko o poso o ka a lagid o ig sii ko hadapan iyan.
Tapnay ka rekaniyan
a ipemangi ngka on so manga omor o manga wata a ka
a ikokopay a ongos san ko manga lalan.
So Katero a Yarosalim
20 “Ilaya ngka, ya Allah, na pemasaka ngka ini:

antawaa den i kiyakidian ka sa datar ai?
Ba patot a ken o manga babay so manga wata iran,
a so manga ikaririga a peritanen iran?
Ba patot a pamonoon so manga imam ago so manga nabi
sii ko Timplo o Kadnan?
21 “So manga kangodaan ago manga lokes

a rakes o manga wata a mama ago manga babay
na palaya siran den miyanga keketer ko bayanek ko manga lalan
a piyamamono a pedang o ridoay.
Piyamono o ka siran a da den a ba on kapedi
sii ko gawii a kapekerarangiti reka.
22 “Piyakisogoan ka so piyakalekelek a manga ridoay aken

sa kasondoli ran raken ko oman i mbala raken
a lagid o ba ngka siran siyogoi sa gawii a kapista.
Na sii ko gawii a rarangit o Allah
na da den a ba on miyakalidas aya pen o ba miyakapagoyag;
so langon o manga wata a miyaritan aken ago miyaoyag
na piyaminasa o manga ridoay aken.
KAMBOBOKO 3
Daneg, Kateobat ago inam
Saken i mama a miyakatintim ko kiyarasaya raken o badas a rarangit o Allah.

2 Inidendeg ako niyan ago piyakalalakaw niyan
ko maliboteng a kena a ba sii ko maliwanag.
3 Mataan a omanoman iyan raken ipetena so lima niyan
ko mababasa alongan.
4 Piyakakimpis iyan so badan aken ago kobal;

riyopet iyan so manga tolan aken.
5 Siyondolan ako niyan
ago inilikop iyan raken so mapait a kamaregenan.
6 Piyakakaden ako niyan ko maliboteng
a datar o siran oto a miyatey den miyamatay.
7 Tiyongkop ako niyan an ako di pekaliyo;

inedagan ako niyan a manga pepened a rantay.
8 Apiya pen mananalo ako ago gomoraok sa tabang
na di niyan pemakinegen so kapepangangarapan aken.
9 Inalangan iyan a manga lakongan so lalan aken;
bikog iyan so manga okita aken.
10 Lagid sekaniyan o magaayan a arimaw

a pepenayaw sa kasikema niyan raken.
11 Giyander ako niyan a poon ko lalan ago pisekisi ako niyan,
na inawaan ako niyan a da a ba raken pekatabang.
12 Inirat iyan so pana iyan
na iniarang iyan raken so manga gasa iyan,
13 Na inipana iyan ko poso aken so manga gasa iyan.
14 Di ako dii ikela o langon o manga taw aken;

pegongatongaten ako iran a idaida ko mababas a alongan.
15 Piyakakan ago piyakainom ako niyan sa mapait a karomasayan.
16 Riyopet iyan a grabas so manga ngipen aken;

liyomeg ako niyan ko bayanek.
17 Kiyadaan ako sa kalilintad;
kiyalipatan aken o antonaa i kapipiya a ginawa.
18 Giyoto a pitero aken a 'Miyada den so kakemboway aken
ago so langon a iinamen ko a poon ko Allah!'
19 So kapepamimikirana ko ko kararasay aken ago so kinibowangen raken

na lagid o mapait a pakatowa.
20 Katatademan aken ai piyapiya
na ikararata ini a ginawa ko.
21 Ogaid na pepekaasal so panginam aken
igira a kiyatoosan ko angkai a betad:
22 Sabap ko limo o Allah na da tano mapolang

ka da den a pitetamanan o gagaw niyan;
23 Di ini dii mbagowan oman mapita;
Tanto a makambebeken so kasasarigi reka!
24 Di aken dii teroon sa ginawa ko a "So Allah i bagian aken;
kagiya ka maoto na iinamen aken sekaniyan."
25 Mapiya so Allah ko siran oto a mbabayorantang rekaniyan,

a sii ko oman i mananagontaman rekaniyan.
26 Sabap roo na tomo a sesabar tano nomayaw
ko kasebeta rektano o Allah.
27 Tomo ko taw a kasanganan sa kokoong ko kangoda niyan pen.
28 Patot a montod sekaniyan bo a romerenek,

ka inisangan ai rekaniyan o Allah.
29 Makagepe sekaniyan ko bayanek;
ka o ba aden a panginam iyan pen.
30 Pakitengelen iyan so bies iyan ko tengel on,
na tarimaa niyan baden so mitataralo a kapakapekeyaa on.
31 Ka kena a ba dayon sa dayon a kindadarainonen o Allah ko manga taw.

32 Ka apiya pen o witi niyan siran sa kapakamboboko
na ipengalinggagaw niyan siran
sabap ko mala ago da a ikeda iyan a limo iyan.
33 Ka kena a ba niyan ipekebabaya a kaperasaya niyan ko manga taw
o di na so kapegowiti niyan kiran sa kapakamboboko.
34 Katawan den o Kadnan igira a pelosegen

so langon o kikakalaboso ko doniya,
35 Igira a pekerampasan so taw ko manga kabenar iyan
sii ko hadapan o Tohan a Lebi a Maporo,
36 Ago igira a di ipeginontolan so taw ko matito a kokoman,
na ba ini di pekeilay o Kadnan?
37 Antonaa katero o taw i mapenggolaola o da tekdira o Kadnan?

38 Ba di so katero o Tohan a Lebi a Maporo
i pekesabapan ko marata ago so mapiya?
39 Ino pen penarotaro so apiya antawaa a manosiya
sii ko kipendanegen on ko manga dosa niyan?
40 Pariksaan tano ago tepengan tano so manga olaola tano,

na mamangasoy tano ko Allah.
41 Ipagadap tano so manga poso tano
ago ibayaw tano so manga lima tano
sii ko Tohan sa kasorgaan ago teroon tano a
42 “Miyakandosa kami ago miyamakasopak reka,
na da kami ngka rilai.
43 “Kiyoloban ka a ginawa ngka sa rarangit na piseloba kami ngka;

piyamono kami ngka sa da den a ba on kapedi.
44 Liyapisan ka a ginawa ngka sa gabon
kaan da den a melambas on a pangangarapan ami.
45 Inisayan kami ngka sa manga popot ago tai sii ko manga nasiyon.
46 “Piyagongatongat kami ago piyanonongka o langon o manga ridoay ami.
47 Riyaot kami a mala a kalek
ka kiyalitagan kami, miyabinasa ago miyalaslas."
48 Lagid o lawasaig a kapetoga o manga lo aken
sabap ko kiyabinasa o manga taw aken.
49 Da den a rintas a kapegondas o manga lo aken,

ago di den kepinda
50 Taman sa di tomolong so Allah roo sa kasorgaan
sa kainengkaa niyan rekami.
51 Pekipali ko poso aken so pekeilay aken
a pekeokitan o manga babay ko siti a Yarosalim.
52 Lagid ako o papanok a kiyalitagan o manga ridoay aken

sa da den a sabap.
53 Inolog ako iran a oyagoyag ko galebo
na tiyambonan ako iran on a ator.
54 Siyangkap a ig so olo aken
na aya katao ko ron na petay ako den.
55 Ogaid na sii ko pitidaleman ko galebo

na piyananalowan aken on so Ingaran ka, ya Allah,
56 Na miyaneg ka so pangni aken
a tig aken a "Di ngka ndapenga so tangila ngka
ko kapenggoraok aken sa tabang!"
57 Na miyobay ka ko kiyatalowi aken reka
na go pitero o ka a "Di ka pekelek!"
58 Piyanabangan ako ngka, Kadnan ko,

na inaon ka so niyawa ko.
59 Ya Allah, miyailay ngka so marata a pinggolaola raken.
Panindegen ka so kabenar aken!
60 Miyailay ngka so karangit o manga ridoay aken
ago so langon a kiyakadiyati ran raken sa marata.
61 “Miyaneg ka so kapepegitoitoa iran raken, ya Allah;

katawan ka so langon o mapeniniyat iran a ikebinasa ko
62 A aantangen ago ipepamagetonga iran ko mababas a alongan.
63 Ilaya ngka siran, ya Allah! Ipoon ko kapipita taman ko kagagawii
na pepagongatongaten ako iran a idaida.
64 “Badalen ka kiran so mapapatot kiran, ya Allah

sabap ko langon a miyanggolaola iran.
65 Pakategasa ngka so manga poso iran,
na sintaan ka siran!
66 Selobaa ngka siran a rarangit
na ponasa ngka siran sii ko atag o manga langit ka, ya Allah."
KAMBOBOKO 4
So Masosowa a Yarosalim oriyan o Kiyatabana on
Miyada so katenang o bolawan,

komilas so kakindat o lombos a bolawan!
Makakayar so manga ator o Timplo
sii ko manga lalan.
2 So pakatatayaan a manga kangodaan sii sa Siyon

a lagid gowani sa arga o lombos a bolawan
na ibibilang siran baden imanto a lagid o manga koden a bote
a piyangembaalan o pakokoden.
3 Apiya so manga aso na pepakasoson iran so manga wata iran,

ogaid na miyabaloy so manga taw aken
a datar o manga ostris ko disirto
a da a ba iran kapedi ko manga wata iran.
4 Domedeket so dila o ikaririga ko pelak iyan sabap ko kawaw;

pepamangni sa paan so manga wata,
ogaid na da a ba kiran mbegay.
5 Siran oto a pekan gowani sa manga pipiya a pangenengken

na pepamatay a ongos imanto sii ko manga lalan,
na siran oto a dii maginetaw gowani a katebowakar
na makaiiga imanto ko mitatabotod a ombi.
6 So inidaneg ko manga taw aken

na mala a di so inidaneg sa Sodom
a sakotika a kiyabinasaa on
a da den a ba kiran miyakatabang.
7 Gowani na so manga pangolo tano na matimenag a di so giyaw

ago mapoti a di so gatas;
manga pipiya siran i kambobolawasan
a makindat so manga paras iran
a datar o manga montiya a robi ago sapiro.
8 Ogaid na imanto na miyakaitem so manga paras iran a di so oring;

di siran kekilala sii ko manga lalan.
Komimbel so kobal iran sii ko manga tolan iran
ago miyabaloy a datar o mirayong a kayo.
9 Tomo so siran oto a miyapamono a pedang

a di so pepamatay a ongos
a pekerasay siran ago pepagti
sabap ko kakokorangi kiran sa pangenengken.
10 Aden a makalimoon a manga babay

a initinda iran so manga wata iran
ago kiyan iran
sii ko kiyasiksaa ko manga taw aken.
11 Piyakateman o Allah so kararangit iyan;

piyakamborngat iyan so pesokeyaw a gani niyan.
Tomintem sekaniyan sa apoy roo sa Siyon
a miyakatotong on taman ko manga onayan iyan.
12 Da den a dato ko manga nasiyon
o di na apiya antawaa a komakaden ko doniya
a ba maratiyaya sa ba kasoledi a Yarosalim o manga ridoay niyan.
13 Ogaid na miyanggolaola ini sabap ko manga dosa o manga nabi niyan

ago so manga sala o manga imam iyan
a piyakatoga iran so rogo o manga oontol sii ko siti.
14 Imanto na di siran dii magenebeneb sii ko manga lalan

a datar o manga bota.
Kagiya tanto siran a kadadaketan sa rogo
na da den a sakataw bo a ba pekaderes maper ko manga nditaren iran.
15 “Awa kano san!" a ipepelalis kiran o manga taw.

"Roo kano den, roo kano! Kababatalan kano! Di kami niyo pesekoa!"
Sabap san na miyamalagoy siran a mimbaloy a taridadag,
ogaid na di kiran dii teroon o manga taw ko manga nasiyon a
"Di kano sii den pekakaden."
16 So den so Allah i miyarak kiran;

ginekan iyan siran somiyap.
Kena a ba pagaadati so manga imam,
aya pen o ba seselaa so manga pelokelokesen.
17 Diyokawan so manga mata mi

sii ko da a bali niyan a kapegalatawi ami ko tabang.
Nomiyayaw kami sa tabang
a poon ko nasiyon a di bo bes rekami pekasabet.
18 Tiyolik o manga ridoay ami so oman i kapelakad ami
na da kami den makalalakaw sii ko manga lalan ami.
Miyakarani den so kaposan ami,
na mbilambilangen den so manga gawii ami
ka miyakatalingoma den so kaposan ami!
19 So manga ridoay ami na magaan

a di so manga darayo ko kawang;
piseloba kami ran ko manga kapalawan
na inayanan kami ran ko mitataog a kaden.
20 So miyapili o Allah a dato ami a so den so niyawa o nasiyon ami,

na kiyalitagan ko litag iran.
Aya mapipikir ami na sii ko kapelindinga niyan rekami
na makapegoyag kami sii ko manga nasiyon.
21 Kababaya kano ago pakapiyaa niyo a ginawa niyo imanto,

hey manga taw sa Idomiya,
a sekano a kibabaling sa inged a Os.
Ogaid na pekainomen kano mambo ko tagayan o rarangit o Allah,
na penga bebereg kano mambo ago penga lelekasan.
22 Hey manga taw sa Siyon, kepos den so kapendanega rekano;

di den iteros o Allah so kitataogen rekano.
Ogaid na sekano a manga taw sa Idomiya,
na indaneg iyan rekano so kamarataan iyo,
na sewaan iyan so manga dosa niyo.
KAMBOBOKO 5
So Pangni sa Limo
Tanodi ngka, ya Allah, so miyaolaola ami;

ilaya ngka ini na tagoa ngka sa ginawa so kiyayai rekami!
2 Miyatangan o manga rait so inged a kawali ami

na mababaling so manga mananangga ko manga walay ami.
3 Miyabaloy kami a manga ilo a da a manga lolot ami,

na miyabalo den so manga ina ami.
4 Pepakibayadan rekami so ig a peginomen ami,

na disomala a mapemasa ami so ipegitagon ami.
5 Di kami dii pakanggalebeken sa maregen o pepamanatro rekami;

inikopay kami den na di kami pekadekean.
6 Miyakimbayabaya kami sa Misir ago Asiriya
an kami makakowa sa kiyatangkaan a pangenengken a ikeoyag ami.
7 Miyakandosa so manga apo ami,

ogaid na miyamatay siran den imanto,
na sekami i peketanaan ko ipendaneg ko manga dosa iran.
8 Pendatoan kami o manga talasogoay ago manga oripen,

na da a ba rekami pekapokas ko kapaar iran.
9 Di ami dii serakan so manga niyawa ami

igira a di kami dii mbanog sa pangenengken sii ko mitataog a kaden
sabap ko manga tanganiyaya a di roo dii magenebeneb.
10 Mikekayaw kami sabap ko kaor,

tanto a mayaw so kobal ami a lagid o towanga.
11 Pilolobed so manga babay sii sa Siyon,

ago so pen so manga raga roo ko manga siti sa Yodah.
12 Piyamatong ago piyamitin so manga pangolo ami,

na di pagaadatan so manga pelokelokesen.
13 Petegelen so manga kangodaan

ko dii kanggalebek ko manga galingan,
na pekisasawiring so manga wata
sabap ko kapened o kayo a pepakiposai kiran.
14 Minitareg so kapeketimo o manga pelokelokesen ko gimowa o siti,

na minitapelek so dii kamboboniboniyan o manga kangodaan.
15 Miyada so kapekebabaya ko manga poso ami;

kiyasambian sa kamboko so di ami dii kakeriyala.
16 So sangkad ko olo ami na miyaolog;

Kemorkaan kami ka miyakandosa kami!
17 Sabap sii na tanto a mararata a ginawa mi,

na maregen a kapepekanono ami sabap ko manga lo ami,
18 Ka kiyaawaan den ago miyatanaw so Palaw a Siyon

a pepegenebeneban o manga iila a binatang.
19 Ogaid na seka, ya Allah, na ketatap a di den kealin sa taman sa pakataman!

Midadayon so kandadato o ka sii ko langon o manga masa.
20 Ino kami ngka dii ndarainon sa dayon sa dayon?

Ino matey a katatalikodi ngka rekami?
21 Pakakasoya kami ngka sa ginawa ngka, ya Allah, kaan kami makapeto!

pakaasala ngka so andang a kapepaginetaw ami!
22 O di na ba dayon sa dayon so kisisilin ka rekami?

Ba da a kaposan o kapekerarangiti ngka rekami?
ISIKIYAL
ISIKIYAL 1
Pangingilain ko manga Baraniyawa ago so Bantogan o Allah
Sii ko ikatelo polo ragon sii ko ikapat olan ko ikalima on gawii na saken, a si Isikiyal a
imam, a so wata i Bosi na maaped ko miyamangitaog a manga Yahodi roo ko kilid o
Lawasaig a Kibar. Na miyailay aken a kiyalekaan a langit, na miyakailay ako sa manga
pangingilain ko Tohan. (2 Miyanggolaola ini sii ko ikalima ragon a kabibiyag o dato
Yahoyakin.)
3 Minitalingoma raken so katero o Allah roo ko kilid o Lawasaig a Kibar sii ko inged o
manga taw sa Babilon, na miyagedam aken a minitemo raken so kapaar o Allah.
4 Miyangilailay ako na miyailay aken a sobosobo a pepekapoon sa pagotaraan a oonotan

o makapal a gabon a malilibet o tanto a somisigay a sindaw, na pemangiteras on so
kilakilat. Sii ko pekepoonan o kilakilat na aden a lagid on o pekindat a tombaga,
5 Na miyakapoon ko look o kilakilat so pat a baraniyawa a mbobontal sa datar o
manosiya,
6 Ogaid na so oman i isa kiran na pat i paras ago pat i papak.
7 Beter so manga seki iran, na so manga ai iran na datar o ai a sapi na pepamangindat a
datar o oonasan a tombaga.
8 Aden a lima a manosiya ko didalem o manga papak iran sii ko pat a manga kilid iran.
So langon siran a pat na aden a manga paras iran ago manga papak.
9 Makaperaraota so manga papak iran, na da den a kakokorikori ran sii ko kapepegiseg
iran sa onaan.
10 Oman i isa a baraniyawa na aden a pat a mbidabida a paras iyan: sii sa onaan na paras
a manosiya, sii sa kawanan na paras a arimaw, sii sa diwang na paras a mama a sapi, na
sii sa likod na peparas sa darayo.
11 So dowa a papak o oman i baraniyawa na bebekaren iyan, na miseseko ini ko manga
papak o ped iyan a baraniyawa ko sabala a kilid iyan, na so dowa a papak iyan na aya
misasapeng ko lawas iyan.
12 So oman i isa on na pepegiseg den sa onaan; apiya anda song so niyawa na pesong
siran on a di siran den kori ko kapepegiseg iran.
13 Sii ko look o manga baraniyawa na aden a lagid on o pekerab a manga waga o apoy o
di na lagid o manga barabad a dii kekasokasoy ko manga baraniyawa. Masindaw ini a
pepekapoon on so kilakilat.
14 Magaan a dii kakekasokasoy o manga baraniyawa a datar o kapekiteras o kilakilat.
15 Sii ko kapegilaya ko ko manga baraniyawa na miyailay aken so satiman a tirikan sii ko

lopa ko kilid o oman i pat a baraniyawa.
16 Ndatadatar sa paras so pat a tirikan; so oman i isa on na gilanggomilang a datar o
montiya a krisolito, na aya kiyambaali ron na aden a isa pen a tirikan a misasalangat on.
17 Na sii ko kapepegiseg iran na pesong siran ko apiya anda ko pat a keantapan o paras o
manga baraniyawa sa da den a kakokorikori ran.
18 Tanto a maporo ago piyakamemesa so manga bibir o pat a manga tirikan na mapepeno
ini a mata ko melilibeta on.
19 Igira a pepegiseg so manga baraniyawa na moonot on so manga tirikan; na igira a

pepelayog na pepelayog mambo so manga tirikan.
20 So niyawa o manga baraniyawa na sisii ko manga tirikan; sabap san na apiya anda
pesong so niyawa na pesong on mambo so manga baraniyawa ago so manga tirikan.
21 Igira a pepegiseg so manga baraniyawa na pepegiseg mambo so manga tirikan, na igira
a petereg so manga baraniyawa na petereg siran mambo. Igira a pepelayog so manga
baraniyawa na pegonot kiran a pepelayog so manga tirikan ka kagiya so niyawa o manga
baraniyawa na sisii ko manga tirikan.
22 Sii ko kaporoan o manga olo o manga baraniyawa na aden a misasayap on a datar o

makakawang a piyakamemesa ago pekerap a lagid o ilo.
23 Sii ko atag o makakawang na mabebekar on so manga papak o oman i isa a
baraniyawa a mbabalabalaan iran ai. Na so oman i isa on na aden pen a dowa a papak
iyan a misasapeng ko lawas iyan.
24 Igira a pepelayog siran na pekeneg aken so kapelagapak o manga papak iran a datar o
kapendaleg o ragat, a datar o sowara o Tohan a Lebi a Mabager ago datar o bogembog o
madakel a sondaro. Igira a petereg siran lomayog na pelekenen iran so manga papak iran.
25 Na sii ko katatareg iran a ibababa iran so manga papak iran na aden a sowara a
miyakapoon ko kaporoan o makakawang a matatago ko liyawaw o manga olo iran.
26 Sii ko kaporoan o makakawang na aden a datar on o korsi a pimbaalan a montiya a
sapiro, na sii sangkoto a korsi na aden a moontod on a datar sa bontal o mama.
27 Ipoon ko kasadan iyan taman sa poro na mapaparas a piyakatenang a tombaga a
mikokolob on so apoy, na ipoon ko kasadan iyan taman sa baba na aden a lagid on o
paras a apoy a pekindat ko melilibeta on.
28 Malilibet sekaniyan o masindaw a tihaya a datar sa paras o boloto sii ko manga gabon
igira a miyoran. Giyai i kasasayanan o bantogan o Allah ko kiyailaya ko ron. Na kagiya
mailay aken na gomipe ako ko lopa na aden a miyaneg aken a sowara a dii tero.
ISIKIYAL 2
So Kiyasogoa ki Isikiyal
Na pitero iyan raken a "Wata o manosiya, tindeg ka, ka makipembitiyarai ako reka."
2 Sii ko di niyan dii katero na sominep raken so Roh o Allah, na miyaneg aken sekaniyan
a di raken dii makimbitiyarai
3 A tig iyan a "Wata o manosiya, sogoon ko seka ko manga taw sa Israil a so taongkir a
nasiyon a somiyopak raken. Siran ago so manga apo iran na pegongkiren ako iran ipoon
sa paganay taman den imanto.
4 Manga tetegas siran i olo a manga taw a da a adat iran, ogaid na sogoon ko seka sa
kapeteroa ngka kiran on a 'Giyai i kabasa o Lebi a Maporo a Tohan!'
5 Na apiya pemakinegen iran ago so di, ka taongkir siran a manga taw, na ketokawan iran
bo a kiyatagoan siran sa nabi.
6 “Na seka, wata o manosiya, na di ngka siran keleken aya pen o ba so manga katero iran.
Di ka pekelek apiya pen lagid o ba ka malilibet a manga sorok ago manga baletek ago
komakaden ka sii ko manga orang. Di ngka kewanen so mapetero iran aya pen o ba so
manga paras iran, ka taongkir siran a manga taw.
7 Disomala a kapeteroa ngka kiran ko manga katero aken apiya pamakinegen iran ago so
di, ka tanto siran a somosopak!
8 “Ogaid na seka, wata o manosiya, na pakinega ngka so peteroon ko reka: Di ka

pegongkir a datar angkoto a manga taongkir! Ngganga ka na kana ngka so imbegay aken
reka."
9 Na miyangilailay ako, na miyakailay ako sa lima a idadawag iyan raken so kakapetan
iyan a lololonen a sosoratan.
10 Kiyayat iyan ai ko danga aken na miyailay aken a sii ko sekelida on na misosorat on so
makapantag ko kandiyaga, kamboko ago kalendag.
ISIKIYAL 3
Na pitero raken o Allah a "Wata o manosiya, kana ngka so imbegay aken reka kana ngka
ngkai a sosoratan. Oriyan iyan na lalakaw ka na pakalangkapa ngka so manga katero on
ko manga taw sa Israil."
2 Na mingganga ako na inibegay niyan raken so sorat kaan aken makan.

3 Na tig iyan a "Wata o manosiya, kana ngka ngkanan a sorat a inibegay aken reka na
penoon ka ini ko tiyan ka. Na kiyan aken na aya taam iyan na datar sa kamis o gola a
teneb.
4 Mandiyadi na pitero iyan raken a "Wata o manosiya, ika roo den na song ka ko manga
taw sa Israil na teroa ngka kiran so manga katero aken.
5 Kena a ba ko seka sogoa ko manga taw a sambida i basa, ka sii bo ko manga Israil,
6 A kena a ba sii ko di ngka royod a manga taw a salakaw i basa a di ngka seboten.
Mataan a o siran i pakisongowan ko reka na pemakinegen ka iran!
7 Ogaid na so manga taw sa Israil na di ka iran kebayaan mamakineg ka kagiya di iran
kabaya o ba ako iran pakinega, ka langon siran manga tetegas i olo ago manga taongkir.
8 Ogaid na mbalowin ko seka a mategas a datar iran.
9 Mbelowin ko so paras ka a datar sa kategas o lebi a mategas a ator, a mategas a di so
batolakit. Di ngka siran keleken aya pen so manga paras iran, ka taongkir siran a manga
taw."
10 Na pitero iyan pen a "Wata o manosiya, piyapiyai ngka mamakineg so langon a manga
katero a peteroon ko reka na dalema ngka ko poso o ka.
11 Na song ka ko royod ka a manga taw a miyanga bibiyag na pangosiyati ngka siran.
Teroa ngka kiran a 'Giyai i kabasa o Lebi a Maporo a Tohan,' pamakinegen iran ai ago so
di."
12 Mandiyadi na inibayaw ako o Roh o Allah, na miyaneg aken so matanog a daleg o

sowara a tig iyan a "Mapodi so bantogan o Allah sii ko kakadenan iyan!"
13 Miyaneg aken so dii kapakapelapid o manga papak o manga baraniyawa, ago so
garokot o manga tirikan ko kilid iran a datar sa katanog o dalendeg.
14 Na inibayaw ako ago inawidan o Roh, na sii ko kapegawidi niyan raken na kapapaitan
ako ago pekerarangitan, ogaid na tetekesen ako komapet o lima o Allah.
15 Na miyakaoma ako sa Til Abib ko kilid o Lawasaig a Kibar a ron mababaling so
miyamangitaog a manga Israil, na miyontod ako roo a ped iran ko soled o pito gawii a
mabebengang.
Initoro o Allah si Isikiyal a Sirino
16 Sii ko kiyapopos o miyakapito gawii na minitalingoma raken so katero o Allah a tig

iyan a
17 “Wata o manosiya, initoro aken seka a sirino ko manga taw sa Israil. Igira aden a
miyatero aken reka a lalangan aken kiran na pakasampaya ngka kiran den.
18 O teroa ko ko marata a taw a 'Mataan a petay ka!' na o di ngka sekaniyan lalangi sa
katalikodi niyan ko marata a olaola niyan kaan sekaniyan maoyag na petay angkoto a
mama sabap ko karata iyan ogaid na pakipembalogo aken reka so kiyapatay niyan.
19 Ogaid na o kalalangi ngka so marata a taw na di niyan talikodan so kamarataan iyan o
di na so manga rarata a olaola niyan na ipetay niyan so dosa niyan, ogaid na minikiyas ka
a ginawa ngka.
20 “Na amay ka aden a maontol a taw a tomiyalikod ko kaontol iyan sii ko katepengi ko
ron na minggolaola sa marata na petay sekaniyan. Sabap sa da ngka sekaniyan kalalangi
na ipetay niyan so dosa niyan. Di tedeman so manga oontol a galebek iyan na
pakipembalogo aken reka so kiyapatay niyan.
21 Ogaid na o kalalangi ngka so maontol a taw sa di niyan kapakandosa ago di sekaniyan
ndosa na mataan a keoyag sekaniyan na minikiyas ka a ginawa ngka."
Miyaamang si Isikiyal
22 Samaoto na minipaar ako o Allah na pitero iyan raken a "Mbowat ka na song ka ko

kapantaran, ka roo ako reka makipembitiyarai."
23 Na gomiyanat ako na somiyong ako ko kapantaran, na miyailay aken roo so bantogan
o Allah a datar o kiyailaya ko ron ko kilid a Lawasaig a Kibar. Na gomipe ako ko lopa
23 Ogaid na sominep raken so Roh o Tohan na piyakatindeg ako niyan. Miyakimbitiyarai
raken na tig iyan a "Baling ka na pangelebi ngka a ginawa ngka ko soled a walay."
25 Na petongen ka roo a tali kaan ka di makapegenebeneb sii ko manga taw.
26 Pekadeketen ko sa pelak so dila a ka kaan ka di makapetero ago di ngka
kapembongetan angkai a taongkir a manga taw.
27 Ogaid na igira a miyakimbitiyarai ako reka na pekasen ko so dila a ka na peteroon ka
ko manga taw a 'Giyai i pitero o Lebi a Maporo a Tohan.' So ped kiran na pemakineg,
ogaid na so manga ped na di ka iran tegoon sa ginawa, ka taongkir siran a manga taw."
ISIKIYAL 4
Piyakiilay i Isikiyal so Kiyalikopi sa Yarosalim
Pitero o Allah a "Hey wata o manosiya, kowa ka sa lempid a ator na betaden ka ini ko
hadapan ka na toladen ka on so siti a Yarosalim.
2 Likopi ngka ini sa manga tambak, manga kampo ago manga teroso a ipenandal.
3 Na kowa ka sa kara a potaw na betaden ka ko lopa a lagid o alad ko pageletan ka ago so
siti, na sangori ngka so siti a datar o seka i penggobat on. Giyai i nanao ko manga taw sa
Israil.
4 Oriyan iyan na iga ka a tomatakilid sa diwang na pakiawidi ngka sa ginawa ngka so

kasalaan o ndatoan a Israil. Keawidan ka so kasalaan iran sii ko langon o manga gawii a
kaiiga a ka roo.
5 Na tindo aken so kadakel o manga gawii a kakeawidi ngka ko kasalaan o ndatoan a
Israil telo gatos ago siyaw polo gawii a giyanan i kadakel o manga ragon a di iran dii
kandosa.
6 Amay ka mapopos oto na pagalin ka tomakilid sa kawanan, ka keawidan ka so kasalaan
o ndatoan a Yodah ko soled o pat polo gawii, a so oman i salongan na saragon a badal a
di iran dii kandosa.
7 “Na sangori ngka a Yarosalim na tentengi ngka so toladan a kasondoli ron a sasawaan
so barokan ka a datar o makatitiyagar, na payaga ngka so kasiksaa ko siti.
8 Petongen ko seka a tali kaan ka di makapekelikelid taman sa di mapopos so manga
gawii a kasosondoli ngka ko siti.
9 “Kowa ka sa trigo, bantad, monggos, kodalis, tikap ago lenga na pakasembora ngka ini
sii ko isa a pananagoay na mbaali ngka a paan. Na giyai i kana ngka sii ko soled o telo
gatos ago siyaw polo gawii a kapegiga a ka a tomatakilid.
10 Timbanga ngka so ikapat bagi ka kilo a paan a kekan ka ko oman salongan, na kana
ngka ini ko tendoon a manga oras.
11 Takesa ngka pen so ig a paginomen ka oman gawii, a isa ka litro, na peginoma ngka
ini ko tendoon a manga oras.
12 Oman gawii na tindaan ka so paan ko kapekeilaya on o manga taw a pagosaren iyo a
itagon so manga tai a taw."
13 Na pitero pen o Allah a "Datar ai a okit a kapekakan o manga taw sa Israil sa karam a
pangenengken sii ko manga nasiyon a teogan ko kiran."
14 Ogaid na somimbag ako a "Kena, ya Allah a Tohan ko! Da aken den kakarami a
ginawa ko. Ipoon ko kawawatai raken taman imanto na da ako den makakan sa sapo o
miyatay a da raoti o di na miyapatay o maila a binatang, aya pen o ba ako miyakakan sa
karam a pangenengken."
15 “O giyanan," a tig o Allah, "na keosar ka so tai a sapi a kena a ba tai a taw ko
kipetindaan ka ko paan ka."
16 Na tig iyan pen a "Wata o manosiya, titisan ko sa pangenengken a Yarosalim. Penga

alek so manga taw ron ko kapekena iran ko mainot a pangenengken a petimbangen iran,
ago penga sososa so pamikiran iran ko kapepeginom iran ko mainot a ig a petekesen iran
17 Sabap ko tanto kiran a kakokorangi sa pangenengken ago ig na makapetetentenga siran
a manga bebengang, na perarayor siran sabap ko manga dosa iran."
ISIKIYAL 5
Miyagopaw ago Miyanginompa si Isikiyal
Pitero pen o Allah a "Wata o manosiya, kowa ka sa magarang a pedang na osara ngka ini
a pangopaw na kikisa ngka on so bok ko olo ngka ago so sompa a ka. Na kowa ka sa
timbangan na timbanga ngka sa telo bagi so manga bok ka.
2 Amay ka mapopos so manga gawii a kapesondoli ngka sa Yarosalim na totonga ngka
ko lembak o siti so ikatelo bagi ko bok ka. Kowaa ngka so ikatelo on peman bagi na
tateda ngka ini a pedang sii ko melilibeta ko siti, na so ikatelo on bagi na pakikayamberen
ka ko ndo, ka pekisaloba aken ai ko pedang aken.
3 Ogaid na lambaa ngka on so maito a bok ka na lolongi ngka ko sisid o kimon ka.
4 Na kowa ka on sa da mapira timan on na itogen ka ko apoy na go ngka totonga. Ipoon
roo na melangkap so apoy ko langon o nasiyon a Israil.
5 “Giyai i pitero o Lebi a Maporo a Tohan: Ilaya niyo a Yarosalim a tiyago aken ko
lembak o manga nasiyon a lilibeten sekaniyan o ped a manga inged.
6 Ogaid na siyogok iyan so manga sogoan aken ago manga kokoman a inikabaloy niyan a
mala i kamarataan a di so manga nasiyon ago manga inged ko melilibeta on. Inisili niyan
so manga sogoan aken ago da niyan tomana so manga kokoman aken.
7 “Kagiya ka maoto na giyai i pitero o Lebi a Maporo a Tohan: Misobra so kapegongkir

iyo a di so ped a manga nasiyon ko melilibeta rekano. Da niyo nggolalanen so manga
kokoman aken aya pen o ba niyo miyatoman so manga sogoan aken, na marata kano pen i
olaola a di so manga nasiyon ko melilibeta rekano.
8 “Kagiya ka maoto na saken a so Lebi a Maporo a Tohan na teroon ko rekano a riridoon
ko seka imanto, hey Yarosalim, na siksaan ko seka sii ko kamamasai ron o manga
nasiyon.
9 Sabap ko langon a piyakagowagowad a manga olaola niyo na ndanegen ko sekano sa
lebi pen a masopiit a di so miyanggolaola ko den ago di aken den peperomanan
nggolaola.
10 Sabap san na ken o manga ama so manga wata iran sii ko siti, ago ken o manga wata
so manga ama iran. Ndenegen ko sekano ago iperak aken so langon o makapegoyag
rekano sii ko pirowarowangan a doniya.
11 Matamataan ko kaooyagoyag aken, a tig o Lebi a Maporo a Tohan, ka sabap sa
piresikan iyo so Soti a Timplo aken ko langon a manga barahala niyo ago so
piyakasisingay a manga olaola niyo na mbagenasen ko sekano; di aken sekano
pegongowan aya pen o ba ko sekano kapediin.
12 So ikatelo rekano bagi na pematay a paniyakit ago ongos san ko siti, na pemonoon so
ikatelo rekano bagi ko katidawa sii ko liyo o siti, na so ikatelo ron peman bagi na iperak
aken sii ko manga ndo na pekisaloba aken siran ko pedang aken.
13 “Amay ka magiyoto na kepos den so rarangit aken na keda so di aken kiran dii
kangganii na keonseran ako ron. Na amay ka maipos den so kapekerarangiti aken kiran
na kekilala iran a saken, a so Allah, i mitero sii sabap ko kapepanaod aken.
14 “Pelaslasen ko sekano ago pakipegongatongat aken sekano ko manga nasiyon ko

melilibeta rekano sii ko kapekeilaya rekano o langon a pesegad rekano.
15 Pesodiin kano iran ago ipekela, na pembaloy kano a piyakalekelek a lalangan ko
manga nasiyon ko melilibeta rekano amay ka siksaan ko sekano sii ko masarangit a
kapembongeti aken rekano sabap ko gani aken. Saken a so Allah i mitero sii!
16 Ipena aken rekano so pemakapatay a manga gasa aken a ongos kaan aken sekano
mabinasa. Pagowitan ko sekano sa ipelonsan aken on a taon taman sa maosip so langon a
pangenengken iyo.
17 Na iperakes aken ko taon so manga iila a binatang a pengangan ko manga wata iyo.
So paniyakit ago kapamono na pekalangkap rekano na pakapetidawaan ko sekano ko
manga ridoay niyo. Saken a so Allah i mitero sii!"
ISIKIYAL 6
Inisinta o Allah so Kasimba sa manga Barahala

2 “Wata o Manosiya, sangori ngka so kapalawan sa Israil na payaga ngka on so lalag aken
3 Na teroa ngka a: Hey manga palaw sa Israil, pamakinega niyo so katero o Lebi a
Maporo a Tohan! Giyai i pitero o Lebi a Maporo a Tohan ko manga palaw, manga
bobongan, manga baogan ago manga balintad: Magaan aken sekano den witan sa pedang,
na mbinasaan aken so manga darpa iyo a pemanimbaan ko manga barahala roo ko manga
bobongan.
4 Penggegebaan so manga aparan iyo, na peroropeten so petotongan iyo sa manga doka;
na pakipemono aken so manga pagtaw niyo ko hadapan o manga barahala niyo.
5 Imbetad aken so manga bangkay o manga Israil ko danga o manga barahala iran ago
imbaraser aken so manga tolan iyo ko melilibeta ko manga aparan iyo.
6 Apiya anda kano babaling na kelaslas so manga siti niyo ago tempagen so manga darpa
iyo a pesimbaan ko manga barahala kaan mabinasa ago kaawai so manga aparan iyo ago
petotongan iyo sa doka ago an maropet so manga barahala niyo ago mada so langon
taman a pimbaalan iyo.
7 Pemonoon so manga taw ko mbalabala rekano na kekilala niyo den a saken so Allah.
8 “Ogaid na pekalidasen ko so ped rekano ko katidawa sii ko kapakapegapas iyo ko

manga nasiyon amay ka mamangiparak kano ko ped a manga inged.
9 Sa masa oto na so miyamakapagoyag na ketademan ako iran roo ko manga nasiyon a
kiyataogan kiran. Kesabotan iran a tanto aken a minimboko so pepamanakoto a manga
poso iran a tomiyalikod raken, ago so mata iran a mala i kababaya ko manga barahala
iran. Na ikegowad iran so manga ginawa iran sabap ko piyakasisingay a manga rarata a
miyanggolaola iran.
10 Na kekilala iran a saken so Allah ago kena a ba da a lalaw o kinipagitaan aken sangkai
a kamoralaan a itena aken kiran."
11 Giyai i pitero o Lebi a Maporo a Tohan: "Pakakosowaa niyo baden a lima niyo ago
pakapelilowaa niyo a manga ai niyo na goraoken iyo a 'Aidaw!' sabap ko langon a
piyakasisingay a manga rarata a miyanggolaola o manga Israil a aya kesabapan ko
kapematay iran ko katidawa, taon ago paniyakit.
12 Siran oto a sisii sa mawatan na pematay a paniyakit, na siran oto a sisii sa marani na
pemonoon a pedang na so peman so kelamba kiran a makapegoyag na pematay a ongos.
Giyanan i kapakapemborngata ko ko rarangit aken kiran.
13 Pemangibaraser so manga bangkay iran a ped o manga barahala iran ko melilibeta ko
manga aparan iran sii ko oman i maporo a bobongan, sii ko poro o oman i palaw ago sii
ko atag o oman i marimpoong ago marabong a kayo, a so manga darpa a pesepaatan iran
sa mamot a doka ko manga barahala iran. Sa masa oto na kekilala iran den a saken so
Allah.
14 Pekatanaan ko kiran a lima ko na mbelowin ko so inged iran a kiyaawaan ago
miyalaslas ipoon ko mitataog a kaden sa pagabagatan taman den sa siti a Diblah sa
pagotaraan a apiya anda siran babaling. Sa masa oto na kekilala iran a saken so Allah."
ISIKIYAL 7
Miyakatalingoma so Kaposan
Pitero raken o Allah a

2 “Wata o manosiya, giyai i pitero o Lebi a Maporo a Tohan sii ko inged a Israil: So
kaposan! Miyakatalingoma den so kaposan o dalem a inged iyo!
3 Miyaoma kano den imanto o kakepos iyo, na pakapemborngaten ko rekano so gani
aken. Indaneg aken rekano so patot ko miyanggolaola niyo, na pekibayadan ko rekano so
langon o piyakasisingay a manga okitokit iyo.
4 Di aken sekano ikepedi aya pen o ba ko pagongowi, ka ndenegen ko sekano sabap ko
piyakasisingay a manga galebek iyo a sisii rekano pen. Samaoto na kekilala niyo a saken
so Allah!
5 “Giyai i pitero o Lebi a Maporo a Tohan: Kamoralaan! Pekatalingoma so kamoralaan

a da den a lagid iyan sa karegen!
7 Miyakatalingoma den so kaposan! Miyakatalingoma den so kakepos iyo! Miyapokaw
den ai sa kapakadaseg iyan rekano, na miyakaoma den imanto!
7 Pepekaoma so kakebinasa niyo, hey sekano a kibabaling ko inged! Miyakarani den so
gawii a kena a ba gawii a kapepelalis sa kapekebabaya sii ko manga palaw, ka so
kagogorigaw.
8 Magaan aken den ododen rekano so rarangit aken ka pekapemborngaten ko rekano so
langon o gani aken. Indaneg aken rekano so patot ko miyanggolaola niyo ago
pekibayadan aken rekano so langon o piyakasisingay a manga okitokit iyo.
9 Di aken sekano ikepedi aya pen o ba ko pagongowi, ka ndenegen ko sekano sabap ko
piyakasisingay a manga galebek iyo a sisii rekano pen. Oriyan iyan na kekilala niyo a
saken a so Allah i pesiksa rekano.
10 “Minitalingoma den so gawii a kakebinasa niyo! Matitiyagar so kandanega rekano, ka

miyakarabong den so kamarataan ago katatakabor o manga taw!
11 Miyakala so kapangarasi na pepagaden ai sa kamarataan. Da den a ba kiran kelamba
ago da den a rek iran taman ko manga kakawasaan ago bantogan.
12 Miyakaoma den so masa; marani den so gawii! Da den a bali o kapekebabaya o
pepamasa aya pen so kamboboko o padagang, ka itena kiran langon so rarangit o Tohan.
13 Ka o aden a manga padagang a makapegoyag na di siran den pekakasoy ko di iran dii
kandagang. Ka di den kebaroba so miyatero o Tohan makapantag ko kandanega ko
langon o manga taw. Sabap ko kadostaan iran na da den a ba kiran pekalinding ko
kaoyagoyag niyan.
So Indaneg ko manga Dosa o Israil
14 “Apiya pen pekaonin iran so bogiyong ago tiyagaren iran so langon taman na da a ba
kiran pekasong ko katidawa ka kagiya itena kiran langon so rarangit o Tohan.
15 Sii sa liyo na aden a katidawa, na sii sa soled na aden a paniyakit on ago taon. Saden
sa peliyo ko siti na pembonoon a pedang, na siran oto a gomegenek ko siti na pematay a
ongos ago paniyakit.
16 Aden a ped a mamakapegoyag a pemagapas ko manga palaw a lagid o manga
marapatik a piyamogaw a poon ko manga balintad a so oman i isa kiran na dii mboko
sabap ko manga dosa niyan.
17 Pekalobay so langon o manga lima iran ago kikopay so manga leb iran.
18 Pendiditar siran sa sako ago kikokos kiran so kalek. Penga oopawan so manga olo
iran na pemakakapal a paras iran sa kaya.
19 Ipelelebad iran so manga pirak iran ago manga bolawan sii ko manga lalan a lagid o
maresik a nganin, ka so pirak iran ago bolawan na di kiran pekasabet sii ko gawii a
kapemborngat o rarangit o Allah. Di iran ai ikesoat aya pen o ba pekaosog ko manga
tiyan iran, ka so pirak ago bolawan i miyakaagak kiran ko kiyapakandosa iran.
20 Inipangandag iran so manga pipiya i paras a imbolawananan iran na pimbaalan iran ai
a piyakasisingay ago piyakagowagowad a manga barahala. Giyoto i sabap a mbelowin ko
kiran so kakawasaan iran a datar o maresik a nganin.
21 Peladen ko ini langon a mapeteban o manga rait ago so manga rarata a taw ko doniya,
na peresikan iran ai.
22 Ndepengen ko so manga mata ko amay ka soledan angkai a manga tekew so soti a
darpa aken ago peresikan iran.
23 “Tiyagar kano sa manga rantay, ka so inged na mapepeno a kapamono, ago so siti na

mapepeno a kapanganiyaya.
24 Pagowiten ko sii so lebi a manga rarata a manga nasiyon kaan iran matangan so manga
walay iran. Pageposen ko so katatakabor o manga ala i gees, na keresikan so manga
darpa iran a pesimbaan.
25 Pekatalingoma so piyakalekelek! Pembabanog so manga pagtaw aken sa kalilintad
ogaid na di iran den ai ketoon.
26 Petondotondog so manga morala ago so manga rarata a totol. Pemangni siran sa
pangingilain o nabi. Keda so ndao o manga imam ago so mosawir o manga
pelokelokesen.
27 Makapemboko so dato na kedaan sa inam so pendatoon, na so manga lima o manga
taw sii ko inged na penanabaden sa kalek. Aya ikidia ko kiran na so patot ko manga
olaola iran, na itena aken kiran so datar o kiyadanega iran ko ped. Oriyan iyan na kekilala
iran a saken so Allah."
ISIKIYAL 8
So Kasimba sa manga Barahala sii ko Timplo
Sii ko ikalima gawii ko ikanem olan ko ikanem ragon ko kabibiyag ami na so manga
pelokelokesen sa Yodah na moontod ko hadapan aken sii ko walay aken, na sarta a
minitemo raken so kapaar o Allah.
2 Na miyailay aken so datar sa bontal o mama. Ipoon ko kasadan iyan sa tampar sa baba
na lagid sa paras o apoy, na ipoon ko kasadan iyan sa tampar sa poro na makindat a datar
o piyakatenang a tombaga.
3 Na biter iyan so lagid o lima a gomiyamak ko bok aken. Na giyoto a inibayaw ako o
Roh o Tohan sii ko pageletan o lopa ago so langit, na sii ko pangingilain aken ko Tohan
na inowit ako niyan sa Yarosalim roo ko gimowa a ipesoled ko lamalama o Timplo o
Allah sa tampar sa pagotaraan a ron makatitindeg so mala a barahala a pepekakakat ko
katatanaod o Tohan
4 Na roo den so bantogan o Tohan o Israil a datar o sii ko pangingilain a miyailay aken ko
kapantaran.
5 Na pitero iyan raken a "Wata o manosiya, ilay ka sa tampar sa pagotaraan." Na minilay

ako sa pagotaraan, na sii ko obay o aparan a marani ko gimowa na miyailay aken angkai a
barahala a ipepanaod iyan.
6 Na pitero raken o Tohan a "Wata o Manosiya, miyailay ngka so pesowaan iran a so

tanto a piyakasisingay a di sii dii nggolaolaan o manga taw sa Israil kaan ako iran
mabogaw sa mawatan ko soti a Timplo aken? Ogaid na pekailay ka pen sa lebi pen a
piyakasisingay a di giyai."
7 Na inowit ako niyan ko gimowa o lamalama a ron ako miyakailay sa lebo sii ko
pangeleban.
8 Pitero iyan raken a "Wata o manosiya, kalot ka san ko pangeleban." Na kagiya
mabowar aken na miyakailay ako ron sa pintoan.
9 Na tig iyan a "Soled ka on den na ilaya ngka so manga rarata a piyakasisingay a di iran
sii dii nggolaolaan."
10 Na somiyoled ako ron na miyailay aken a mapepeno so manga keleb a manga toladan
o pimbarambarangang a pepamanola a paoledoled ago piyakangingiri a manga binatang
ago so langon a ped a manga nganin a pepamanimbaan o manga taw sa Israil.
11 Aden a pito polo kataw a manga pelokelokesen sa Israil a tomitindeg roo a ped iran si
Yaasaniyas a wata i Siyapan. Oman i isa kiran na komakapet sa petengelan sa doka na
peselepot on so mamot a bel iyan.
12 Na pitero raken o Allah a "Wata o Manosiya, miyailay ngka so dii nggolaolaan o
manga pelokelokesen sa Israil sii ko mitatapok a manga rowang a pesimbaan o oman i isa
kiran so rek iyan a barahala? Ka aya mapipikir iran na 'Di tano keilay o Allah; inawaan
iyan so inged tano.' "
13 Na tig iyan pen a "Keilay ngka siran pen a dii nggolaola sa lebi pen a piyakasisingay a
di giyai."
14 Na inowit ako niyan ko gimowa o Timplo o Allah sa tampar sa pagotaraan, na ron

aken miyailay so kioontod on a manga babay a imboboko iran so katohanan iran a si
Tamos.
15 Na pitero iyan raken a "Miyailay ngka ini, hey wata o manosiya? Pekailay ka pen sa
lebi pen a piyakasisingay a di sii."
16 Na giyoto a inowit ako niyan ko lamalama o Timplo o Allah. Roo ko pintaoan o soti a
darpa sii ko pageletan o liyoliyowan ago so aparan na miyailay aken roo so dowa polo
ago lima kataw a manga mama. Tatalikodan iran so Timplo o Allah na somasangor siran
sa sebangan a pesimbaan iran so alongan!
17 Pitero iyan raken a "Miyailay ngka ini, wata o manosiya? Da kasoaten angkai a manga
taw sa Yodah so di iran dii kanggolaolaa sangkai a manga piyakasisingay a miyailay ngka
sii, ka pepenoon iran pen so inged sa kapanganiyaya ago lalayon ako iran dii
pakakerangiten. Ilaya ngka so kapepagongatongata iran raken!
18 Sabap sii na itena aken kiran langon so gani aken. Di aken siran den ikepedi aya pen o
ba aken siran pagongowi. Apiya pen tanto a matanog a kapenggoraok iran raken na di
aken siran den pekinegen."
ISIKIYAL 9
So Kiyapamonoa ko Pepamanimba sa Barahala
Oriyan iyan na miyaneg aken so Allah a miyananalo sa matanog a "Song kano sii, hey
sekano a manga mama a initoro a ndaneg ko siti a kiaawid so oman i isa sa gomaan iyan!"
2 Na miyailay aken so nem kataw a manga mama a pepekapoon ko kaporoan a gimowa a
makasasangor sa pagotaraan. Oman i isa kiran na maawid sa gomaan a ipemomonoan.
Maaped kiran so sakataw a ndiditar sa sotra a maawid sa pansom ago dawat. Na
somiyoled siran ago miyamanindeg ko kilid o aparan a tombaga.
3 Mandiyadi na miniporo so bantogan o Tohan o Israil a poon ko liyawaw o manga

malaikat a ron matatago na miniseg ko ipesoled ko walay a pesimbaan. Na tiyalowan o
Allah so mama a ndiditar sa sotra a maawid sa pansom ago dawat,
4 Na pitero iyan on a "Pagenebeneba ngka so dalem a siti a Yarosalim na tagoi ngka sa
tiyap so beneng o siran oto a penggoraok ago dii mboko sabap ko langon a piyakasisingay
a dii nggolaolaan ko siti."
5 Na sii ko kapekenega ko ron na pitero iyan ko manga ped a "Tondoga niyo sekaniyan
ko siti na pamamono kano roo a da den a kapedi o di na limo on.
6 Pamonoa niyo so manga lokes, so manga kangodaan, so manga raga, so manga wata
ago so manga babay polanga niyo siran langon! Ogaid na di niyo petekora so apiya
antawaa a kiyatiyapan. Na, sii niyo ipagepoon ko Timplo aken." Na inonaan iran
mamono so manga pelokelokesen roo ko penggaka o Timplo.
7 Na pitero kiran o Allah a "Peresiki niyo so Timplo na penoa niyo so lamalama niyan a
manga bangkay o miyapamono! Ikano roo den!" Na giyoto a lomiyalakaw siran na
mipoon siran den mamamono sii ko dalem a siti.
8 Sii ko kapepemono iran na saken bo i mitelimbagak roo, na gomipe ako ago inigoraok
aken a "Aidaw, Lebi a Maporo a Tohan! Polangen ka bes so langon o miyalamba a taw
sa Israil sii ko di ngka dii kapakamborngata ko gani ngka sa Yarosalim?"
9 Na pitero iyan raken a "Tanto a mala so kamarataan o manga taw sa Israil ago giya
Yodah. Mapepeno a kapamono so dalem a inged, na so siti na mapepeno a bibid a
kokoman. ka kagiya aya kabasa iran on na 'Inawaan o Allah so inged tano; di tano keilay
o Allah.'
10 Sabap san na di aken siran den ikepedi aya pen o ba ko siran pakalidasa, ka pekioto
aken kiran so langon a miyanggolaola iran."
11 Samaoto na komiyasoy so mama a ndiditar sa sotra a maawid sa dawat na pitero iyan

ko Allah a "Ininggolalan aken so inisogo o ka raken."
ISIKIYAL 10
So Bantogan o Allah na Miyawa Timplo
Na liyangag aken so makakawang ko kaporoan o manga malaikat, na sii ko liyawaw

niyan na miyailay aken so lagid o korsi a pimbaalan a montiya a sapiro.
2 Na pitero o Allah ko mama a ndiditar sa sotra a "Song ka ko pageletan o manga tirikan
sii ko kababaan o manga malaikat na akop ka ko pekedeg a manga waga na kayamberen
ka ini ko siti." Na pinggolaola niyan ai ko kamamasai ko ron.
3 Samaoto na kititindeg so manga malaikat sa tampar sa pagabagatan o Timplo kagiya

somong kiran so mama; na aden a gabon a minipeno ko lamalama sii sa soled.
4 Sarta den a minibayaw so bantogan o Allah a poon ko manga baraniyawa na miniseg ko
penggaka o Timplo. So gabon na minipeno ko Timplo, na so lamalama na miyapeno a
sigay o bantogan o Allah.
5 So dagedeb o manga papak o manga malaikat na pekeneg sa mawatan apiya sii ko
lamalama sa liyo, a lagid o sowara o Lebi a Mabager a Tohan igira a dii tero.
6 Sii ko kiyasogoa o Allah ko mama a ndiditar sa sotra sa kakowa niyan sa apoy ko

pageletan o manga tirikan sii ko pageletan o manga malaikat, na somiyong on so mama
na tominindeg ko kilid o isa a tirikan.
7 So isa ko manga malaikat na kiyawa iyan so apoy a sisii ko look o manga malaikat, na
kominowa on sa pekedeg a manga waga na inibetad iyan ko manga lima o mama a
ndiditar sa sotra. Na kinowa ini o mama na miyawa roo.
8(So langon o manga malaikat na aden a datar o lima a manosiya san ko didalem o manga
papak iran.)
9 Miyailay aken a aden a pat a manga tirikan ko kilid o manga malaikat a nggagaisa a
tirikan ko oman i malaikat, na pepamangindat so manga tirikan a lagid o manga montiya.
10 Ndatadatar siran sa paras a so oman i isa a tirikan na lagid o aden a isa pen a tirikan a
misasalangat on.
11 Igira a pepegiseg siran na pegantap siran ko apiya anda ko pat a pekesangoran o manga
malaikat a di siran den silay sii ko kapepegiseg iran, ka pepamantek siran sii ko
kasasangoran o paras o malaikat sa da den a kakokorikori ran.
12 So langon o lawas iran a rakes on so manga likod iran, manga lima iran ago so manga
papak iran na mapepeno a manga mata taman ko pat a manga tirikan iran.
13 Miyaneg aken a kapembetowi ko manga tirikan sa 'Samasagembet a manga tirikan.'
14 Oman i isa ko manga malaikat na pat i paras. So isa a paras na bontal a malaikat, so
ikadowa na bontal a manosiya, so ikatelo na bontal a arimaw, na so ikapat na bontal a
darayo.
15 Na lomiyayog so manga malaikat. Giyai so manga baraniyawa a miyailay aken sii sa

kilid a lawasaig a Kibar.
16 Igira a pepegiseg so manga malaikat na pegonot kiran so manga tirikan, na amay ka
pembekaren iran so manga papak iran ka pelayog siran na di den pagawa so manga tirikan
sa kilid iran.
17 Igira a petereg so manga malaikat na petereg siran mambo, na igira a pelayog siran na
pegonot kiran so manga tirikan, ka kagia so niyawa o manga baraniyawa na madadalem
ko manga tirikan.
18 Oriyan iyan na miniseg so bantogan o Allah a poon ko gimowa o Timplo na tomiyareg

ko liyawaw o manga malaikat.
19 Na sii ko kapegilaya ko ron na piyamekar o manga malaikat so papak iran na
lomiyayog siran na moonot kiran so manga tirikan. Tomiyareg siran ko gimowa sa
tampar sa sebangan o Timplo o Allah, na sisii ko kaporoan iran so bantogan o Tohan o
Israil.
20 Giyai so manga baraniyawa a miyailay aken ko atag o Tohan o Israil roo ko kilid a
lawasaig a Kibar, na miyakilala ko a siran so manga malaikat.
21 Oman i isa kiran na pat i paras ago pat i papak, na aden a lagid o lima a manosiya sii
ko didalem o manga papak iran.
22 So bontal o manga paras iran na giyoto den so manga bontal a miyailay aken roo ko
lawasaig a Kibar. Na langon siran pepegiseg a pepemantek sa onaan.
ISIKIYAL 11
So Kiyadanega ko manga Olowan sa Israil
Oriyan iyan na inibayaw ako o Roh na inowit ako niyan ko gimowa o Timplo o Allah a
makasasangor sa sebangan. Roo ko penggaka o gimowa na miyailay aken so dowa polo
ago lima kataw a manga mama a maaped kiran si Yaasaniyas a wata i Asor ago si
Pilatiyas a wata i Binayas a manga olowan o manga taw.
2 Na pitero raken o Allah a "Wata o manosiya, giyai so manga mama a marata i kadiyat
ago pembegay sa marata a mosawir sii ko siti.
3 Di iran dii teroon ko manga taw a 'Ba kena a mapiya ini a oras a dii imbalay? So siti
tano na lagid o kawa a petindaan a pekalinding rektano na sektano i matatago on a sapo.'
4 Kagiya ka maoto na alamata ngka so kasiksaa kiran, hey wata o manosiya!"
5 Na giyoto a tomiyana raken so Roh o Allah na iniinsarat iyan raken a peteroon ko ko

manga taw angkai a lalag o Allah: "Hey manga taw sa Israil, giyai i di niyo dii teroon
ogaid na katawan aken so mapipikir iyo.
6 Madakel a miyapamono iyo sii sangkai a siti na pino iyo so manga lalan a manga
bangkay.
7 “Kagiya ka maoto na giyai i pitero o Lebi a Maporo a Tohan: So manga bangkay a

inipelelebad iyo roo na giyoto so sapo, na so siti na aya den so kawa, ogaid na mbogaon
ko sekano a poon ko siti.
8 Ipekelek iyo so katidawa, na so katidawa i itena aken rekano.
9 Mbogaon ko sekano ko siti na peladen ko sekano ko kapaar o manga mananangga a
ipenggolalan iran so kandanega ko rekano.
10 Pemonoon kano a pedang, na ndenegen ko sekano sii ko inged iyo taman den ko
manga temanaan a Israil, na kekilala niyo a saken so Allah.
11 Giyangkai a siti na kena a ba so kawa iyo aya pen o ba sekano i sapo on a malilinding
sii ko soled iyan; ndenegen ko sekano ko apiya anda kano kapapantagi ko inged a Israil.
12 Na kekilala niyo a saken so Allah. Ka siyogok iyo so manga kokoman aken ago da
niyo tomana so manga sogoan aken. Aya niyo baden tiyoman so manga kokoman o
midadair rekano a manga nasiyon!"
13 Sii ko di aken pen dii kateroa ko lalag o Allah na miyatay si Pilatiyas a wata i Binayas.
Na giyoto a gomipe ako ago inigoraok aken sa matanog a "Hey Lebi a Maporo a Tohan,
polangen ka bes so miyalamba a manga taw sa Israil?"
So Initopa o Tohan ko Miyamangitaog

15 “Wata o manosiya, so miyalamba a manga kibabaling roo sa Yarosalim na di iran dii
mbibitiyaraiyan so ped ka a manga Israil a miyamangitaog a tig iran a 'Mawatan siran a
tanto ko Allah, na inibegay niyan rektano angkai a inged sa katangana tano ron.'
16 “Kagiya ka maoto na teroa ngka a 'Giyai i pitero o Lebi a Maporo a Tohan: apiya pen
piyakawatan aken siran ko ped a manga nasiyon ago iniparak aken ko manga inged na
saken i kapegapasan iran imanto roo ko manga darpa a kiyataogan kiran.'
17 “Kagiya ka maoto na teroa ngka kiran a 'Penimoon ko sekano a poon ko manga

nasiyon a ron kano miyamangiparak na imbegay aken rekano peroman so inged a Israil.'
18 “Na amay ka makakasoy siran roo na pengowaan iran on so langon o manga reresik a
nganin ago piyakasisingay a manga barahala.
19 Mbegan ko siran sa matitiman a poso ago tegoan ko siran sa bago a niyawa. Kowaan
ko kiran so mategas a poso na sembian aken ai sa malemek a poso
20 Kaan iran kapiyapiyai tomoman so manga kokoman aken ago manga sogoan, na
kebaloy siran a manga pagtaw aken.
21 Ogaid na so siran oto a mababaya ko manga reresik a manga nganin ago
piyakasisingay a manga barahala na pakipembagolo aken kiran so miyanggolaola iran, a
tig o Lebi a Maporo a Tohan."
Inawaan o Bantogan o Allah a Yarosalim
22 Mandiyadi na lomiyayog so manga malaikat a ped iran so manga tirikan sii ko kilid
iran, na so bantogan o Tohan o Israil na sisii ko liyawaw iran.
23 Na miyawa so bantogan o Allah ko siti na tomiyareg ko kaporoan o bobongan ko
masesebangan o siti.
24 Mandiyadi na inibayaw ako o Roh o Tohan na piyakakasoy ako niyan ko manga taw a
miyangamanitaog roo sa Babilon. Na giyoto a miyapos so pangingilain aken makapantag
sa Yarosalim
25 Na piyanotol aken ko miyamangitaog so langon taman a piyakiilay raken o Allah.
ISIKIYAL 12
So Inibaratan ko Kiniparak o manga Taw
2 “Wata o manosiya, komakaden ka sii ko manga taw a somosopak. Aden a mata iran
ogaid na di siran pemakailay, na aden a tangila iran ogaid na di siran pemakaneg ka
kagiya taongkir siran a manga taw.
3 “Kagiya ka maoto, wata o manosiya, na panimoa ngka so manga rek ka na bekesa ngka
ini a kekena ngka mosai a datar o taw a iteog. Na sii ko kadaondaw ko kapegilaya iran on
na ganati ngka so darpa a ka sa kapelalakaw ngka ko ped a darpa a lagid o miyabiyag. Ka
kalokalo o ba iran masabot o antonaa i maana o di ngka dii nggolaolaan apiya pen
taongkir siran a manga taw.
4 Na liyon ka so pagawidan ka sii ko kadaondaw kaan ka iran kambantayi. Na sii ko
kaperimon iyan na ngganat ka ko kamamasaan iran a datar o manga taw a pemangitaog.
5 Sii ko kapegilaya iran on na bowara ngka so keleb o walay ngka na ron ka liyon so
mabebekes a manga rek ka.
6 Posaiya ngka ini sii ko kamamasai ran on na lalakaw ka ko kaperimon iyan; na sapengi
ngka a paras ka kaan ka di keilay so lopa. Langon ai a penggolaolaan ka na pekabegay sa
nanao ko manga taw sa Israil."
7 Na ininggolalan aken so inisogo raken o Allah. Sii ko kadaondaw na pitiyagar aken so

manga rek aken a datar o taw a iteog. Kagiya perimon na biyowar aken so keleb a inosar
aken a lima ko na iniliyo aken on so awid aken. Na lomiyalakaw ako sii ko maliboteng a
poposain ko so awid aken ko kamamasai ron o manga taw.
8 Kagiya mapita na pitero raken o Allah a

9 “Wata o manosiya, ba ka da isei angkoto a taongkir a manga taw sa Israil sa 'Antonaa i
pesowaan ka?'
10 Teroa ngka kiran a 'Giyai i kabasa o Lebi a Maporo a Tohan: Giyangkai a pinggolaola
ko na giyai den i kiyapayaga ko katero o Allah makapantag ko dato a ndadato sii sa
Yarosalim ago so langon o manga Israil a kibabaling on.'
11 Teroa ngka kiran a 'Nanao ako rekano. So pinggolaola ko na aya nanao ko keolaola
niyo, ka penga bibiyag kano ago pemangitaog.'
12 So dato a ndadato kiran na posain iyan so awid iyan sii ko maliboteng na melalakaw.
Pelebowan iran so pangeleban an sekaniyan on makaokit. Na sepengan iyan so paras iyan
kaan iyan di keilay so inged iyan.
13 Isisir aken on so poket aken na kelitagan sekaniyan on. Pagowiten ko sekaniyan sa
Babilon, ogaid na di niyan ai keilay, na petay sekaniyan roo.
14 Iperak aken ko mbalabala so langon a sanasanaan ago manga sondaro niyan, na
penalobaan ko siran a a pedang.
15 “Amay ka iperak aken siran ko manga nasiyon ago ikeyamber aken siran ko manga
inged na ketokawan iran a saken so Allah.
16 Ogaid na maito a pekalidasen ko kiran ko kapatay sii ko katidawa, ongos ago paniyakit
kaan sii ko manga nasiyon a kesongowan iran na mataobat iran so langon a
piyakasisingay a olaola iran. Na giyoto a ketokawan iran a saken so Allah.
So Nanao a Kapetebada ko Nabi

18 “Wata o manosiya, kana ngka so pangenengken a tatabekeren ka, ago inoma ngka so
ig a tatabaden ka sa kalek.
19 Na teroa ngka ko manga taw ko inged a 'Giyai i kabasa o Lebi a Maporo a Tohan
makapantag ko siran oto a kibabaling sa Yarosalim ago sa inged a Israil: Pekakan siran ko
pangenengken iran a pekelek siran, ago maginom siran sa ig a piyanga adaan sa inam, ka
so inged iran na pekaosipan piyapiya ko langon a matatago on sabap ko kapanganiyaya o
langon a kibabaling on.
20 Penggegebaan so manga siti a kikapepeno a manga taw, na keawaan so inged ago
kebaloy a mitataog a kaden. Na giyoto a kekilala niyo a saken so Allah.' "
So di Benar a Pananaroon sii sa Israil

22 “Wata o manosiya, ino petontola o manga taw sa Israil angkai a pananaroon:
'Pepamanagad den so manga gawii na da bo a kitoman a pangingilain'?
23 Na teroa ngka kiran a 'Giyai i pitero o Lebi a Maporo a Tohan: Pageposen ko angkai a
pananaroon na di iran den kealoy sii sa Israil. Teroa ngka kiran a 'Miyakatalingoma den
so masa a kakitoman o oman i pangingilain!
24 Ka da den a ped a di benar a pangingilain o di na ipepegakal a taabir a ba imbegay ko
manga taw sa Israil.
25 Saken den a so Allah na petero, na mapenggolaola so peteroon ko a di den kisendod.
Ka sii ko manga gawii niyo, hey sekano a manga taongkir, na itoman aken so inipagita
aken a penggolaolaan ko rekano, a tig o Lebi a Maporo a Tohan.' "
26 Pitero raken pen o Allah a

27 “Wata o manosiya, aya mapipikir o manga taw sa Israil na so manga pangingilain ka
ago manga taabir na matey pen a kakitoman iyan ka mabolobolo pen.
28 Kagiya ka maoto na teroa ngka kiran a 'Giyai i kabasa o Lebi a Maporo a Tohan: Da
den a miyatero aken a mapenggolaola a ba kisendod/sendoden pen ka kitoman den imanto
so langon taman a inipagita aken! a tig o Lebi a Maporo a Tohan.' "
ISIKIYAL 13
So Indaneg ko di Benar a manga Nabi
Na pitero raken o Allah a "Wata o manosiya, alamata ngka so kasiksaa ko di benar a

manga nabi sa Israil a pepangalamat sa rek iran bo a lalag. Teroa ngka kiran a
pamakinega iran so katero o Allah!"
3 Giyai i pitero o Lebi a Maporo a Tohan: Kemorkaan so lalong a manga nabi a

pepekipaar ko rek iran a gedageda ago pepangembaal so rek iran a pangingilain!
4 Hey manga taw sa Israil, so manga nabi niyo na lagid o manga lako a da a bali niyan a
sii komakaden ko miyanga bibinasa.
5 Da den a miyanggolaola iran a kapangompiyai ko miyanga gegeba sii ko kota o nasiyon
a Israil kaan mabager a kapakatitindeg iyan sii ko katidawa ko gawii o Allah.
6 Ka di benar so manga pangingilain iran na kabokegan so manga taabir iran. Di iran dii
teroon a 'Giyai i kabasa o Allah,' apiya da aken siran sogoa; na apiya pen oto na iinamen
iran a kitoman so manga katero iran!
7 Ba kena a ba di benar so manga pangingilain iyo ago kabokegan so manga taabir iyo
igira a di niyo dii teroon a 'Giyai i kabasa o Allah,' apiya da ko teroa?
8 “Kagiya ka maoto na giyai i pitero o Lebi a Maporo a Tohan: Sabap sa kabokegan so

manga katero iyo ago di benar so manga pangingilain iyo na riridoon ko sekano, a tig o
Lebi a Maporo a Tohan.
9 Pekatanaan ko a lima ko ko manga nabi a dii mbaal sa di benar a manga pangingilain
ago peperirimar sa manga kabokegan. Di siran den keped ko kalilimod o manga pagtaw
aken o di na mitapi ko listaan ko manga taw sa Israil aya pen o ba siran makasoled
peroman ko inged a Israil. Na giyoto a kekilala iran a saken so Lebi a Maporo a Tohan.
10 “Diyadag angkai a manga nabi so manga pagtaw aken ko kiyateroa iran sa 'Lomilintad
so langon taman!' apiya da a kalilintad. Miyangembaal so manga pagtaw aken sa bagaba
a kota na siyalapot ai o manga nabi sa sominto.
11 Teroa ngka ko siran oto a somiyalapot on sa sominto a keoteng den ai. Pekaoranen ko
sa mabager, na magoran sa manga ala a ilo na ndasengan ai o mabager a sobosobo.
12 Na amay ka matempag so kota na ba kano di pagisei o manga taw sa 'Anda so sominto
a inisalapot iyo ron?'
13 “Kagiya ka maoto na giyai i pitero o Lebi a Maporo a Tohan: Sii ko kapekerarangiti

raken na sogoon ko so mabager a sobosobo ago so mabager a oran a rakes o manga ala a
ilo sa kabinasaa iran ko kota.
14 Nggebaan ko sa tarotop so kota a siyalapot iyo a sominto kaan kasawai so manga
onayan iyan. Na amay ka matempag na kitobak rekano ron na pematay kano, na
ketokawan iyo a saken so Allah.
15 Amay ka mapenggolaola den ai na keonseran so rarangit aken ko kota ago so siran oto
a somiyalapot on sa sominto. Na peteroon ko rekano a 'Miyada den so kota ago so
miyamanalapot on,
16 A giyangkoto a manga nabi sa Israil a miyalamat makapantag sa Yarosalim ago
miyamakailay ko manga pangingilain sa kalilintad iyan apiya pen da a kalilintad.' Saken
a so Lebi a Maporo a Tohan i mitero sii."
So Miyaalamat a Sopak ko dii Menanabinabi a manga Babay a Bokeg
17 Pitero o Allah a "Imanto, wata o manosiya, na songowi ngka so manga babay ko

manga taw ngka a pepangalamat sa rek iran bo a manga pamikiran na alamata ngka so
kandanega kiran.
18 Teroa ngka a 'Giyai i pitero o Lebi a Maporo a Tohan: Kemorkaan kano a manga
babay a pelitagan iyo so manga pagtaw aken ndatar so manga ngongoda ago so manga
lokes. Iiketan iyo a manga tikesan iran sa manga adimat ago pembegan iyo siran sa
barakat kon a manga kombong. Ba aya katao niyo ron na kelitagan iyo so manga pagtaw
aken kaan iyo mapakapagoyag a manga ginawa niyo?
19 Piyakaito ako niyo sii ko manga pagtaw aken kaan kano makakowa sa da mapira
gamak a bantad ago da mapira tebi a paan Nggolalan ko kapepemokeg iyo ko manga
pagtaw aken a pepangimbenar ko manga kabokegan iyo na piyamono iyo so manga taw a
di patot a ba matay, na piyakapagoyag iyo so siran oto a patot a mbonoon.
20 “Kagiya ka maoto na giyai i pitero o Lebi a Maporo a Tohan: Ipekegowad aken so

manga adimat a ipelitag iyo ko manga taw a lagid o manga papanok. Na nggansingen
aken siran ko manga barokan iyo ago mbokaan ko so manga taw a lagid o manga papanok
a kiyalitagi niyo ron.
21 Ngginiten aken pen so manga kombong iyo ago pokasen ko so manga pagtaw aken ko
kapaar iyo na di siran den kesikem o manga lima niyo. Na giyoto a kekilala niyo a saken
so Allah.
22 Nggolalan ko manga kabokegan iyo na kinowaan iyo sa inam so manga oontol apiya
pen da aken siran pakambokoa. Na inisapar iyo baden so manga rarata so katalikodi iran
ko manga rarata a olaola iran kaan masabet so niyawa iran.
23 Sabap roo na di kano den pekailay sa di benar a manga pangingilain aya pen o ba kano
makaperimar. Pokasen ko so manga pagtaw aken ko kapaar iyo, na giyoto a kekilala niyo
a saken so Allah."
ISIKIYAL 14
So Indaneg ko Pepamanimba sa Barahala
Samaoto na somiyong raken so ped ko manga olowan sa Israil na miyontod siran ko

hadapan aken ka pekimosawir siran raken.
2 Na pitero raken o Allah
3 “Wata o manosiya, giyangkai a manga taw na tanto iran a pekebabayaan so manga
barahala iran na miyakiagak siran ko manga barahala iran ko kiyapakandosa iran. Ba
patot a kakeisei ran raken?
4 Kagiya ka maoto na teroa ngka kiran a 'Giyai i kabasa o Lebi a Maporo a Tohan: Oman
i taw sa Israil a mababaya sa manga barahala ago pepakiagak kiran ko kapakandosa na go
sekaniyan bo song ko nabi sa kaisei niyan on na saken a so Allah i sembag rekaniyan sa
patot ko kapepanakoto niyan!
5 Penggolaolaan ko ini kaan aken makowa peroman so manga poso o manga taw sa Israil
a miyabelag raken sabap ko manga barahala iran.'
6 “Kagiya ka maoto na teroa ngka ko manga taw sa Israil a 'Giyai i kabasa o Lebi a
Maporo a Tohan: Teobat kano! Talikodi niyo so manga barahala niyo ago geneki niyo so
langon a piyakasisingay a olaola niyo!
7 “ 'Ka apiya antawaa ko manga Israil o di na mananangga a mababaling sa Israil a melag

raken ago mababaya sa manga barahala ago pekiagak kiran ko kambaradosa na go bo
song ko nabi sa kapagisei niyan on makapantag ko katero aken na saken den a so Allah i
sembag rekaniyan!
8 Peridoon ko angkoto a taw na mbelowin ko sekaniyan a ladiyawan ago tototola.
Tepeden ko sekaniyan ko isa ka maginged a manga pagtaw aken, na giyoto a ketokawan
iyo a saken so Allah.
9 “ 'Makapantag ko nabi, na o miyaakal sekaniyan sa kiyateroa niyan sa kena a ba raken

poon na saken den, a so Allah, i miyakaakal on. Na pekatanaan ko sekaniyan a lima ago
mbelagen ko sekaniyan ko manga pagtaw a aken a manga Israil.
10 Ndanegen siran langon sabap ko kadostaan iran ndatar so indaneg ko nabi ago so
indaneg ko minise rekaniyan.
11 Penggolaolaan ko ini kaan di raken den makaawa so manga taw sa Israil aya pen o ba
iran kaperesiki a manga ginawa iran ko langon o manga dosa iran. Kebaloy siran a
manga pagtaw aken na pembaloy ako a Tohan iran, a tig o Lebi a Maporo a Tohan."
So Nok, so Daniyal ago so Ayob

13 “Wata o manosiya, o makandosa so isa a nasiyon ko kapagongkira iran raken na
pekatanaan ko siran a lima sa kakowai ko kiran sa pangenengken ago pagowitan ko siran
sa taon kaan mamatay so manga taw ago so manga ayam
14 Na apiya pen sisii kiran so Nok, so Daniyal ago so Ayob na siran bo i pekalidas sabap
ko kaontol iran, a tig o Lebi a Maontol a Tohan.
15 “O di na o pakipagenebeneban ko so inged sa manga iila a binatang a pemakapatay ko

manga taw ron ago mabaloy ai a kiyadaan sa taw a da den a ba on pekasagad sabap ko
manga binatang,
16 Na mataan ko kaooyagoyag aken, a tig o Lebi a Maporo a Tohan, ka apiya pen sisii
kiran angkai a telo kataw na apiya so den so manga wata iran a manga mama ago manga
babay na di iran kesabet. Giya bo a ginawa iran i kesabet iran, na kelaslas so inged.
17 “Na o witi aken sa katidawa angkoto a inged ago pekipolang aken a pedang so manga
taw ron ago so manga ayam
18 Na mataan ko kaooyagoyag aken, a tig o Lebi a Maporo a Tohan, ka apiya pen maaped
kiran angkai a telo kataw a mama na di iran kesabet so manga wata iran, ka so bo so
ginawa iran i kesabet.
19 “Na o pakapemborngata ko sangkoto a inged so rarangit aken ago tenaan aken sa

paniyakit a pemakapatay ko manga taw ron ago manga ayam
20 Na mataan ko kaooyagoyag aken, a tig o Lebi a Maporo a Tohan, na apiya pen ndodon
so Nok, so Daniyal ago so Ayob na apiya so den so manga wata iran na di iran kesabet.
Aya bo a kesabet na so manga ginawa iran sabap ko kaontol iran.
21 “Na giyai i pitero o Lebi a Maporo a Tohan: Lebi pen a maregen a di giyai amay ka
witen ko sa Yarosalim so pat a piyakalekelek a manga daneg, a so katidawa, taon, manga
iila a binatang ago manga paniyakit a pemakapatay ko manga taw ron ago so manga
ayam.
22 Ogaid na aden a ped a pekalidas on a pemakapagoyag, na kewit siran rekano sii sa
Babilon. Na amay ka mailay niyo so manga rarata a olaola iran na ketangked sa ginawa
niyo a patot so langon o manga morala a initana aken sa Yarosalim.
23 Amay ka magiyoto na ketokawan iyo a da ko nggolaolaa so langon a pinggolaola ko
ron a ba da a sabap iyan, a tig o Lebi a Maporo a Tohan."
ISIKIYAL 15
So Bayambayanan ko da a Bali niyan a Waged

2 “Wata o manosiya, antonaa i gona o waged a obas ko kipagabain on ko sapak o apiya
antonaa a kayo sa kalasan?
3 Ba kapembaali so waged sa apiya antonaa a kapenggonaan on? Ba kapembaali a sait a
kabitinan sa apiya antonaa a kasangkapan?
4 Kena, ka ipagitog baden ko apoy a itagon, na amay ka matotong so mbala a poro iyan
ago magoring so look iyan na ba aden a gona niyan?
5 O da a gona niyan sa da niyan pen katotong na aya pen o ba kanggonai amay ka
matotong ago mbaloy a oring!
6 “Kagiya ka maoto na giyai i pitero o Lebi a Maporo a Tohan: Datar o waged a pepegto a
milolook ko manga kayo sa kalasan a miniitagon ko apoy na datar ai a ikidia ko ko manga
taw a kibabaling sa Yarosalim.
7 Ndanegen ko siran na apiya pen makaliyo siran ko apoy na pageposen siran pen o apoy.
Na amay ka ndanegen ko siran na ketokawan iyo a saken so Allah.
8 Na pelaslasen ko so inged sabap ko kiyapakaongkir iran, a tig o Lebi a Maporo a
Tohan."
ISIKIYAL 16
Giya Yarosalim na di Toman sa Pasad a Karoma
Pitero raken peman o Allah a

2 “Wata o manosiya, pakitokawi ngka sa Yarosalim so karata o piyakasisingay a manga
olaola niyan
3 Na teroa ngka on a 'Giyai i pitero o Lebi a Maporo a Tohan sa Yarosalim: So manga
apo o ka ago so pimbawataan reka na sii ko inged a Kanaan; so ama a ka na Amoriyo, na
so ina a ka na Hitiyo.
4 Sii ko gawii a kinimbawataan reka na da ka katepedi sa posed aya pen o ba ka
kiyaonabi kaan ka malompiyo; da ka maibong a timos aya pen o ba ka kabongkosi sa
dinis.
5 Da den a ba reka komiyapedi sa kanggolaolaa niyan reka sa apiya satiman sangkai a
manga nganin. Da den a ba reka miyangalinggagaw sii ko gawii a kinimbawataan reka,
ka inikagowad ka baden ago inilebad ko pangomaan.
6 “Ogaid na somiyagad ako roo na miyailay aken seka a dii melikoay sii ko rogo o ka. Na
sii ko kapakakekelit ka roo ko rogo o ka na pitero aken reka a 'Maoyag ka!'
7 Piyakala aken seka a lagid o marimpoong a pamomolan ko pangomaan. Mito ka ago
miyakala na mimbaloy ka a lagid o lebi a mapiya i paras ko manga imbolawananan.
Miteong so manga soso ngka na miyakatas so bok ka, ogaid na matatalandiyang ka den.
8 “Kagiya somagad ako reka peroman na inilay aken seka na miyailay aken a osto den so
idad ka sa kapangaromaa reka. Sabap roo na kiyayat aken reka so gerab aken na
siyapengan aken so katatalandiyang ka. Misepa ako reka ago miyakipesadana ako reka sa
kakewing, a tig o Lebi a Maporo a Tohan, na miyabaloy ka a rek aken.
9 “Pipeigoan ko seka ago liyompiyo aken so rogo ko lawas ka na inibong aken seka a
mamot a lana.
10 Piyakasolot aken seka sa bobordaan a nditaren, na piyakatelompa aken seka sa
malemek a kobal. Pimbangkalaan ko seka sa manga ala i arga a dinis a landap a sotra ago
mapiya a sida.
11 Pipendaraan ko seka sa manga imbolawananan. Piyakaselay ago piyakarinti aken seka
12 Na piyanagoan aken sa sising so ngirong ka ago aritis so tangila ngka ago mapiya i
paras a sangkad so olo ngka.
13 Pipendaraan ka sa bolawan ago pirak, na so manga nditaren ka na pimbaalan a landap
a sotra ago sida ago bobordaan a dinis. Pekekan ka so lebi a manga pipiya a
pangenengken a so manga pipiya a arina, gola a teneb ago lana a olibi. Tanto ka a
miyakataid na miyabaloy ka a bai.
14 So bantogan ka na lomiyangkap ko manga nasiyon sabap ko kataid ka, ka
madidiyangka so kataid ka sabap ko manis a inibegay aken reka, a tig o Lebi a Maporo a
Tohan.
15 “Ogaid na siyarigan ka so kataid ka na inosar ka so bantogan ka sa kiyabaloy ngka a

sondal. Na miyakisondal ka ko oman i pesegad reka, na miyakowa niyan so kataid ka!
16 Kominowa ka ko manga nditaren ka, ka inipendara a ka ko manga aparan a pesimbaan
ka ko manga barahala ngka a ron ka on dii sondal. Da den a miyanggolaola a datar ai! Di
den patot a ba aden a datar ai a mapenggolaola peroman!
17 Kinowa ngka pen so manga imbolawananan a inembaalan a bolawan ago pirak a
inibegay aken reka na inimbaal ka a ginawa ngka sa manga mama a barahala na
piyanimba ngka siran a giyoto den i kiyapakisondal ka kiran.
18 Kinowa ngka so bobordaan a nditaren ka ka inisolot ka kiran, na inisapaat ka kiran so
lana ago doka a inibegay aken reka.
19 So pen so manga pangenengken a inibegay aken reka a so manga pipiya a arina, lana a
olibi ago gola a teneb a piyakikan aken reka na inipanapaat ka kiran a mamot a soasoat.
Giyanan den i miyanggolaola, a tig o Lebi a Maporo a Tohan.
20 “Liyo ron pen na kinowa ngka so manga wata a ka a manga mama ago manga babay a
inimbabawata ka raken na pikorban ka siran a pangenengken o manga barahala ngka. Ba
ka da kaonseri ko kiyasondal ka?
21 Ba kailangan pen a kiyapanombalia ngka ko manga wata aken a inipangorban ko
manga barahala?
22 Sii ko langon a kasosondal ka ago piyakasisingay a olaola na da ngka den katademi so
manga gawii a kawawatai reka isako matatalandiyang ka pen a makakekelit ka a dii
melikoay ko rogo o ka.
So Kasosondal a Yarosalim
23 “Kemorkaan ka! Kemorkaan ka! a tig o Lebi a Maporo a Tohan. Liyo pen ko langon
o ped a kamarataan ka
24 Na inimbaal ka a ginawa ngka sa manga darpa a ron ka dii sondal ko kapesimbaa ngka
ko manga barahala sii ko kilid o oman i lalan.
25 Sii ko oman i mbalakaan o manga lalan na piyakiboringan ka so kataid ka sii ko
kapepalada ngka ko lawas ka ko oman i pepekasagad reka. Na minitaralo den so
kasosondal ka.
26 Miyakisondal ka pen ko manga Imisiren, a so perakagan a manga siringan ka, na
piyakakerangit ako ngka ko pekitaralo a kapakipamotaliya a ka.
27 Sabap san na biter aken reka a lima ko sa kandanega ko reka na kinowa ko reka so
langon taman a mala reka i kipantag. Piyalad aken seka ko kapaar o manga Pilistiyo a
pepanga gogowad reka a inikabengang iran so kapetelai reka.
28 Miyakisondal ka pen ko manga taw sa Asiriya ka kagiya da ka pen kaonseri, na apiya

so kiyapakisondal ka kiran na da reka mionser.
29 Na inomanan ka pen so di ngka dii kapakisondal, ka inirakes ka on a Babilon a so
inged o manga padagang, na apiya pen ai na da ka pen kaonseri!
30 “Sayana a malobay so poso o ka, a tig o Lebi a Maporo a Tohan. Pinggolaola ngka ini
langon a somiyayan sa da a kaya iyan a sondal!
31 Sii ko kilid o oman i lalan na mimbaal ka sa darpa a ron ka dii sondal ko kapesimbaa
ngka ko manga barahala. Ogaid na kena a ba ka datar o sondal ka kagiya di ka kowa sa
tendan.
32 Ka datar ka baden o barasina a babay a pepekiperembang ko manga mananangga a da
a ba ngka karoma!
33 So oman i sondal na pembegan sa bayad, ogaid na seka baden i pembegay sa manga
pamemegayan ko pepangabaya reka! Petendanan ka siran sa kasongowi ran reka ko
mbalabala a makipemotaliya siran reka.
34 Sii ko kasosondal ka na mibibida ka ko ped a manga sondal. Da den a ba reka
petendan; seka i pembegay sa bayad na da den a ba reka mbegay! Sabap san na mibibida
ka ko ped.
So Kandanega o Allah sa Yarosalim
35 “Na pamakinega ngka so katero o Allah, hey Yarosalim a sondal!

36 Giyai i pitero o Lebi a Maporo a Tohan: Inodod ka so tamok ka ago siyawaan ka so
katatalandiyang ka ko kasosondal ka ko pepangabaya reka ago sii ko piyakasisingay a
manga barahala ngka, na piyanombali i ka so manga wata a ka a piyangorban ka ko
manga barahala.
37 Kagiya ka maoto na timoon ko so langon o pepanga baya reka a inipemotaliya a ka a
so siran oto a kiyababayaan ka a rakes o inikagowad ka. Timoon ko siran reka poon ko
mbalabala na sewaan ko so katatalandiyang ka ko hadapan iran na keilay iran so
kakediyampa a ka.
38 Na isela aken reka so indaneg ko babay a miyakasina ago miyamono, na sii ko rarangit
aken ago kapepanaod na rogo a itena aken reka.
39 Na peladen ko seka ko kapaar iran na nggebaan iran so manga darpa a ron ka dii
sondal ko kapesimbaa ngka ko manga barahala. Pelekasan ka iran ago kowaan iran so
manga pipiya a imbolawananan ka, na pagawaan ka iran a matatalandiyang ago
madidiyampa.
40 Na pengondoin iran so madakel a taw a perobakan ka iran a ator ago teteden ka iran ko
manga pedang iran.
41 Penotongen iran so manga walay ngka na ndanegen ka iran sii ko kamamasaan o
madakel a babay. Itepelek aken so kasosondal ka kaan ka den di makapenendan ko
manga pepangabaya reka.
42 Amay ka magiyoto na pekalenggaw so rarangit aken reka na keonseran ako den. Na di
ako den makapanaod aya pen o ba ako kararangiti.
43 “Sabap sa da ngka pananademi so manga gawii a kararagai reka pen ka piyakakerangit

ako ngka baden ko langon angkai a manga rarata a miyanggolaola ngka na mataan a
pakipembagolo aken reka ini langon, a tig o Lebi a Maporo a Tohan. Ka inioman ka so
kapetelai reka ko langon o ped a piyakasisingay a okitokit ka.
44 “So oman i petontol sa manga pananaroon na pagaloin iyan angkai a pananaroon

makapantag reka, hey Yarosalim: 'So parangay o ina na aya den parangay o wata a babay.'
45 Mataan a tito ka a wata o ina a ka a inikagowad iyan so karoma niyan ago so manga
wata iyan; na datar ka o manga pagari ngka a manga babay a inikagowad iran so manga
karoma iran ago so manga wata iran. Aya ina a ka na Hitiyo, na aya ama a ka na
Amoriyo.
46 So kaka ngka a babay na giya Samariya a mababaling ko pagotaraan a ped iyan so
manga wata iyan a babay; na so ari ngka a babay na giya Sodom a mababaling ko
pagabagatan a ped iyan so manga wata iyan a babay.
47 Kena bo a ba giya kiyarawata ngka ko paparangayan iran ago so kiyasowaa ngka ko
piyakasisingay a manga galebek iran, ka sii ko langon o okitokit ka na sayana a magaan a
kiyalawani ngka pen ko kamarataan iran!
48 Mataan ko kaooyagoyag aken, a tig o Lebi a Maporo a Tohan, ka so pagari ngka a
babay a Sodom ago so manga wata iyan na da iran den manggolaola so kamarataan a
miyanggolaola ngka ago so manga wata a ka.
49 “So dosa o pagari ngka a Sodom ago so manga wata iyan na katekabor, kabobosaw,
ago katapolan, na da iran tabangi so manga miskin ago so kikadodowaanan.
50 Miyangimporoan siran na minggolaola sa piyakasisingay sii ko hadapan aken. Sabap
roo na datar o katawi ngka on a kiyaponasa ko kiran.
51 “Giya Samariya na da makasabagi ko manga dosa ngka so miyanggolaola iran. Lebi a
madakel a piyakasisingay a pinggolaola ngka a di siran, na sabap ko langon ai a
miyanggolaola ngka na lagid o ba maontol so manga pagari ngka sii ko kipegabain kiran
reka!
52 Hey seka a domiyaway ko manga pagari ngka, na awidi ngka imanto so kayaan ka! Ka
sabap sa lebi a piyakasisingay so manga dosa ngka a di so rek iran na lagid o ba siran pen
a maontol a di seka. Kagiya ka maoto na maya ka ago awidi ngka so kadidiyamani reka,
ka biyaloy ngka so manga pagari ngka a lebi a maontol a pegilain a di seka."
Pekaasalen a Sodom ago giya Samariya
53 Pitero pen o Allah sa Yarosalim a "Ogaid na pekaasalen ko so kamapiyaan a Sodom

ago so manga wata iyan, ago giya Samariya ago so manga wata iyan, na pekaasalen ko
seka mambo a rakes iran
54 Kaan ka kayai ago makadapanas sabap ko langon a miyanggolaola ngka a ron keilay o
manga pagari ngka a lebi siran a mapiya i mambebetad a di seka.
55 Oway, so manga pagari ngka a manga babay a giya Sodom ago giya Samariya a rakes
o manga wata iran na pekaasalen siran ko mambebetad iran gowani, na samaoto mambo
na pekaasalen ka mambo ago so manga wata a ka ko mambebetad iyo gowani.
56 Sii ko manga gawii a kiyatekabor ka na di ngka dii sodiin so pagari ngka a Sodom
57 Sa da pen kapayag ko kamarataan ka. Ogaid na imanto na seka i dii sodiin o langon a
taw sa Idomiya ago giya Pilistiya ago so langon o ped a manga siringan ka.
58 Giyai i ipendaneg reka sabap ko tela a ka ago so piyakasisingay a manga olaola ngka, a
tig o Allah.
So da a Ikeda iyan a Kapasadan
59 “Giyai i pitero o Lebi a Maporo a Tohan: Ikidia ko reka so patot ko miyanggolaola

ngka, ka biyaroba a ka so sapa a ka ko kiyasogoka ngka ko kapasadan.
60 Apiya pen oto na tatanodan ko so kapasadan a pimbaalan ko mipantag reka sii ko
manga gawii a kararagai reka pen na tomanen ko reka so da a ikeda iyan a kapasadan
aken.
61 Sa masa oto na ketademan ka so manga okitokit ka, na ikeya a ka ini amay ka
matarima ka peman so manga pagari ngka a babay a so kaka ngka ago so ari ngka. Ka
imbegay aken siran reka a datar o ba ngka manga wata apiya pen di ini ped ko kapasadan
aken reka.
62 Na pembagowan ko so kapasadan aken reka na ketokawan iyo a saken so Allah.
63 Ketademan ka so manga dosa ngka na keya ka ago di ngka den mbengaten a ngari i ka
sabap ko kiyapakadapanas ka amay ka iperila aken reka so langon a miyanggolaola ngka,
a tig o Lebi a Maporo a Tohan."
ISIKIYAL 17
So Bayambayanan ko Dowa a manga Darayo
2 “Wata o manosiya, panotoli ngka sa bayambayanan so manga taw sa Israil.
3 Teroa ngka kiran angkai a pitero o Lebi a Maporo a Tohan: Aden a mala a darayo a
maolad i manga papak ago mapepeno a madakel i warna a manga bombol na lomiyaog ai
sa Libanon na domiyapo ko poro o kayo a sidro.
4 Piyotol iyan on so poroporo a sapak iyan na inowit iyan ko inged a dii ndadagangan na
piyamola niyan roo ko siti o manga padagang.
5 “Oriyan iyan na kominowa sekaniyan sa od sii ko inged iyo na piyamola niyan ko

masibokar a lopa ko kilid o mala a ig
6 A ron mimbekaw ago mito, na miyabaloy ai a mababa a pekorapa a waged. Mito so
manga sapak iyan sa tampar sa poro a pegantap ko darayo, na miyakadalem so manga
bekaw niyan. Na misepasapak ago miyakaraborabong angkai a waged.
7 “Ogaid na aden a salakaw a mala a darayo a mala i papak ago makapal i bombol; na
somiyangor rekaniyan angkai a waged na piyakaantap iyan on so manga bekaw niyan, na
poon ko darpa a piyamolaan on na piyakaagaw niyan on pen so manga sapak iyan kaan
sekaniyan kapakaigi angkai a darayo.
8 Pinggolaola ini o waged apiya pen miyapamola den ko masibokar a lopa ko obay o mala
a ig kaan ai sepasapak ago mamangonga ago mabaloy a marimpoong a waged.
9 “Na saken a so Lebi a Maporo a Tohan na iniise aken a ‘Ba ini pen pekato ago
petegompiya? Ba di mbadota o miyaona a darayo so manga bekaw niyan ago peropoon
iyan on so langon a onga niyan kaan maredak ago an malayon so langon a pepamagombos
a raon iyan? Na di den kailangan so mabager a barokan o di na mala a nasiyon sa
kambadota niyan ko manga bekaw niyan!
10 Oway, apiya pen ai mitogalin den mamola na ba petogompiya? Ba ini di kelayon sa
tarotop amay ka samberen o ndo a poon sa sebangan? Ka kelayon den sii ko darpa a ron
mito."
Piyagosay so Maana o Bayambayanan

12 “Teroa ngka sangkai a manga taongkir a taw: Ba niyo di katawi so maana angkai a
bayambayanan? Somiyong so dato sa Babilon sa Yarosalim na piyamiyag iyan so dato on
ago so manga sanasanaan iyan na inowit iyan siran sa Babilon.
13 Oriyan iyan na piyakandato iyan sa Yodah so isa ko mbawataan o dato na
miyakipesadanowa sekaniyan on ago piyakasepa iyan sekaniyan sa katomana niyan ko
pasad. Initaog iyan pen so manga olowan ko inged
14 Kaan di den pekabager ago pekaato so ndatoan a Israil a aya bo a ikemboway niyan na
so kapetomana niyan ko kapasadan iyan ko dato sa Babilon.
15 Ogaid na somiyopak so dato sa Yodah ka somiyogo roo sa Misir kaan on makapangni
sa manga koda ago madakel a sondaro. Ba niyan kibolos? Ba pekalidas so penggolaola
sa datar anan? Ba niyan kesogok so kapasadan a di sekaniyan kedaneg?
16 Kena! Ka mataan ko kaooyagoyag aken, a tig o Lebi a Maporo a Tohan, ka petay
angkai a dato roo sa Babilon a so inged o dato a aya on domiyato, ka biyaroba iyan so
sapa iyan ago siyogok iyan so kapasadan iyan ko dato sa Babilon.
17 Apiya si Piraon ago so madakel a manga sondaro niyan na di rekaniyan pekaogop ko
katidawa amay ka kalikopan peman a Yarosalim o manga taw sa Babilon a
mamangembaal sa manga tambak a inggobat iran on kaan iran mapamono so madakel a
taw.
18 Ka siyogok iyan so kapasadan a inisapa iyan a katomana niyan on, na sabap roo na di
sekaniyan pekalidas!
19 “Kagiya ka maoto na giyai i kabasa o Lebi a Maporo a Tohan: Mataan ko

kaooyagoyag aken ka indaneg aken rekaniyan so kiyasogoka niyan ko kapasadan a
pisepaan iyan sii ko Ingaran aken.
20 Teanen ko so sampirot aken na kelitagan sekaniyan on. Na pagowiten ko sekaniyan sa
Babilon na pagokasen ko rekaniyan roo so kokoman aken sabap ko da niyan raken
katomani sa pasad.
21 Na so langon o pepamalagoy a manga sondaro niyan na pematay ko katidawa, na siran
oto a pekalidas na kiparak ko mbalabala. Na giyoto a ketokawan iyo a saken a so Allah i
mitero sii!"
22 “Giyai i pitero o Lebi a Maporo a Tohan:
Saken den i kowa ko poroporo o kayo a sidro

na potolan ko so poro iyan sa malemek a temos
na pemolaan ko ini ko maporo ago pantaw a palaw;
23 Sii ko lebi a maporo a palaw sa Israil na ron aken pemolaa.
Pesepasapak ai ago pemangonga na pembaloy a mapiya a sidro.
So langon a pitibarangan a papanok na peselag on,
pekakaden siran sii ko kasisirongan o manga sapak iyan.
24 Na ketokawan o langon o manga kayo ko kalasan
a saken, a so Allah, na pepakababaan ko so maporo a kayo
ago pepakaporoon ko meto so mababa a kayo.
pelanesen ko so lombay a kayo
ago pepakalombain ko so rayong a kayo.
Saken a so Allah i mitero sii, na ipenggolalan aken den ai!"
ISIKIYAL 18
So Taw a Mimbaradosa na aya Petay
Na miyakimbitiyarai raken peman so Allah a tig iyan

2 “Ino niyo dii tontola angkai a pananaroon mipantag ko inged a Israil:
‘Komiyan so manga ama sa masem a manga obas

ogaid na aya kiyaseman on na so manga wata iran’?
3 “Mataan ko kaooyagoyag aken, a tig o Lebi a Maporo a Tohan, na di niyo den ketontol
angkai a pananaroon roo sa Israil.
4 Rek aken so langon o manga taw; so manga lokes ago so manga wata na palaya ko den
rek. So taw a miyakandosa na aya petay.
5 “Opama ka aden a taw a maontol a dii nggolaola sa ontol ago matito.

6 Di sekaniyan ken ko manga pangenengken a inisapaat ko manga barahala o manga taw
sa Israil sii ko manga bobongan
aya pen o ba niyan siran simbaa.
Di niyan pesinaan so karoma o siringan iyan
aya pen o ba niyan rembanga so babay a ndodon so basa.
7 Di niyan pelingowan so apiya antawaa
ka ipekesoy niyan baden so inisanda on o miyakaotang on.
Di sekaniyan pemanekew
ka ipembegay niyan so pangenengken iyan ko pepanga aaor
ago pembegan iyan sa nditaren so kikatatalandiyang.
8 Pepegotang sekaniyan a di petobo
a di niyan pekaisegen so piyagotang iyan.
Pelidasan iyan so kanggolaola sa kamarataan
ago pepangokom sekaniyan sa da a kaperamiramig.
9 Ipepaginetgaw niyan so manga kokoman aken
ago petomanen iyan piyapiya so manga sogoan aken.
Maontol angkoto a taw
na mataan a keoyag sekaniyan,
a tig o Lebi a Maporo a Tohan.
10 “Ogaid na opama ka aden a wata iyan a tekew o di na talibono o di na dii nggolaola ko

apiya anda sangkai a ped a manga nganin
11(apiya pen da den a ba on pinggolaola o ama iyan):
Pekan sekaniyan ko manga pangenengken a inisapaat ko manga barahala sii ko manga

bobongan.
Dii makisebo ko karoma o siringan iyan.
12 Pelingowan iyan so manga miskin ago so kikadodowaanan;
Pepamanekew sekaniyan.
Di niyan ikesoy so minisanda on.
Pesimba sa manga barahala.
Dii nggolaola sa piyakasisingay.
13 Di sekaniyan dii tobo ago pekowa sa mala a iseg.
Ba keoyag so datar anan a taw? Di den! Mataan a ipetay niyan angkai langon a
piyakasisingay a manga olaola niyan, na sekaniyan bo i kesenditan ko kiyapatay niyan.
14 “Ogaid na opama ka giyangkai a madodosa a wata na aden a wata iyan a pepekailay ko

langon angkai a manga dosa o ama iyan ogaid na miyapamikir iyan a di niyan sowaan
angkoto a olaola:
15 Di sekaniyan ken ko manga pangenengken a inisapaat ko manga barahala o manga taw
sa Israil sii ko manga bobongan
aya pen o ba niyan siran simbaa.
Di sekaniyan pesebo ko karoma o siringan iyan
16 Di niyan pelingowan so apiya antawaa
aya pen o ba sekaniyan pangni sa sanda ko magotang on.
Di sekaniyan pemanekew
ka ipembegay niyan so pangenengken iyan ko pepanga aaor
ago pembegan iyan sa nditaren so kikatatalandiyang.
17 Pelidasan iyan so kanggolaola sa kamarataan
na di sekaniyan petopo aya pen o ba kowa sa mala a iseg.
Petomanen iyan so manga sogoan aken ago ipepaginetaw niyan so manga kokoman aken.
Kena a ba niyan ipetay so manga dosa o ama iyan, ka keoyag sekaniyan.

18 Ogaid na ipetay o ama iyan so rek iyan bo a manga dosa ka kagiya miyanalimbot
sekaniyan ago piyanekewan iyan so pagari niyan ago minggolaola sa ribat sii ko ped iyan
a manga taw.
19 “Ogaid na iniise iyo a ‘Ino di ndanegen ko wata so manga dosa o ama iyan? Sabap sa
pinggolaola o wata so ontol ago so matito ago pipiyapiyaan iyan tomoman so manga
kokoman aken na mataan a keoyag sekaniyan.
20 So taw a miyakandosa na aya bo petay. So wata na di on kisiksa so kadostaan o ama
iyan aya pen o ba misiksa ko ama so kadostaan o wata iyan. Imbalas ko maontol a taw so
kaontol iyan, na indaneg ko marata a taw so kamarataan iyan.
21 “Ogaid na o geneki o baradosa a taw so di niyan dii kandosa ago tomanen iyan so
manga kokoman aken ago nggolaolaan iyan so ontol ago so matito na mataan a keoyag
sekaniyan; di sekaniyan petay.
22 Da den a ba tedemi ko manga kadosataan iyan, na keoyag sekaniyan sabap ko manga
oontol a miyanggolaola niyan.
23 Ba aya katao niyo ron na ikebabaya aken so kapetay o baradosa a taw, a tig o Lebi a
Maporo a Tohan? Kena! Aya kabaya aken na talikodan iyan so manga rarata a olaola
niyan ago keoyag.
24 “Ogaid na o geneki o maontol a taw so di niyan dii kapaginontolan ka nggolaolaan

iyan so langon o piyakasisingay a dii nggolaolaan o marata a taw na ba sekaniyan keoyag?
Kena! Da den a ketademan ko manga oontol a miyanggolaola niyan. Sabap ko
kiyapakaongkir iyan ago kiyambaradosa na petay sekaniyan.
25 “Ogaid na pitero iyo a 'Di ontol so okitokit o Kadnan.’ Na, pamakinega niyo, hey
manga taw sa Israil! Ba aya katao niyo ron na di ontol so okitokit aken? Ba di so manga
okitokit iyo i di ontol?
26 Amay ka genekan o maontol a taw so kapagiinontolan iyan ka nggolaolaan iyan so
kadostaan na ipetay niyan. Oway, petay sekaniyan sabap ko marata a miyanggolaola
niyan.
27 Na amay ka genekan o marata a taw so di niyan dii kambaradosa ka nggolaolaan iyan
so ontol ago matito na kesabet iyan so niyawa niyan.
28 Mataan a keoyag sekaniyan ka kagiya pimasakan iyan so di niyan dii kandosa na
tiyalikodan iyan. Di sekaniyan petay.
29 Ogaid na pitero o manga taw sa Israil a ‘Di ontol so okitokit o Kadnan!’ Hey manga
taw sa Israil, ba aya katao niyo ron na di ontol so okitokit aken? Ba kena a so manga
okitokit iyo i di ontol?
30 “Kagiya ka maoto na indaneg aken rekano, hey manga taw sa Israil, so mapapatot ko
oman i isa ko manga olaola niyan, a tig o Lebi a Maporo a Tohan. Teobat kano!
Panalikodi niyo so langon o manga dosa niyo! Di kano pekibinasa ko kadostaan iyo!
31 Lebaden iyo so langon o kamarataan a di niyo dii nggolaolaan na mbagowi niyo so
poso iyo ago pamikiran! Ino niyo petomoa a mamatay kano, hey manga taw sa Israil?
32 Kena a ba aken ipekebabaya so kapepetay o apiya antawaa, a tig o Lebi a Maporo a
Tohan. Panalikodi niyo so manga dosa niyo kaan kano maoyag!
ISIKIYAL 19
So Kiyandiyaga ko manga Dato sa Israil
"Ndiyagai ngka so manga pendatoon sa Israil:
2 Antawaa i ina a ka?

So babay a arimaw a lomolook ko manga mama a arimaw!
Lomeleko sekaniyan a lilibeten o manga ngongoda a arimaw
na pepakasoson iyan so manga wata iyan.
3 Piyakala iyan so isa ko manga wata iyan
a miyabaloy a mabager a arimaw.
Miyakasowa sekaniyan sekisi ko pekesikem iyan,
na milalamed sa manga taw.
4 Na miyaneg o manga nasiyon so makapantag rekaniyan
na kiyalitagan sekaniyan ko galebo iran.
Inowit iran a papatongen sa rantay
roo sa inged a Misir./Na tiyonda/tiyoyok iran sa/a manga banowit/a babanowitan roo sa
Misir
5 “Kagiya mailay o ina a arimaw a da mitoman so panginam iyan

ago miyada den so inam iyan
na kominowa peman sa isa ko wata iyan
na piyakala iyan ago biyaloy niyan a mabager a arimaw.
6 Miyagonotonot sekaniyan ko ped a manga arimaw
ka kagiya mabager mambo a arimaw.
Na miyakasowa sekaniyan pen sekisi ko pekesikem iyan/miyasowa iyan pen so
kapesekisia niyan ko pekesikem iyan
na milalamed sa manga taw.
7 Pinggegeba iyan so manga kota iran
ago bininasa niyan so manga siti iran.
So langon o kibabaling ko inged
na tanto a miyanga alek
ko kiyanega iran ko kapegengger iyan.
8 Mandiyadi na giyobat sekaniyan o manga nasiyon
a poon ko mbalabala on.
Tiyaan iran on so sampirot iran
na kiyalitagan sekaniyan ko galebo iran.
9 Biyanowitan iran na tiyonda iran ko doreng
ago inowit iran ko dato sa Babilon.
Kiyalaboso iran sekaniyan
kaan di den keneg so kapegengger iyan
sii ko manga palaw sa Israil.
10 “So ina a ka na lagid o waged sii ko sapadan ka

a miyapamola ko kilid o lawasaig;
Dii teribonga ago misepasapak
sabap ko mala a ig on.
11 Mategas so manga sapak iyan
a domadait ko tongkas o dato.
Makaoombaw so kaporo iyan
ko langon o ped a manga pamomolan.
Marayag ini sabap ko katas iyan
ago so lomolombay a manga sapak iyan.
12 Ogaid na sii ko rarangit na biyadot so waged
ago inipapes ko lopa.
So manga onga niyan na liyanes o ndo a poon sa sebangan;
miyapotol on so manga tetegas a sapak iyan,
na miyanga gagango ago miyatotong ko apoy.
13 Imanto na miyapamola ini ko mitataog a kaden
sii ko mamara ago da a ig on a lopa.
14 Somiyokeyaw so apoy a poon ko itado o waged
na tiyotong iyan so manga sapak iyan ago manga onga.
Da a miyalamba on ko manga babager a sapak iyan
a domadait ko tongkas o dato.
Giyangkai a ipendiyaga na pagosaren ko kandiyaga."
ISIKIYAL 20
So Somosopak a Israil
Sii ko ikasapolo gawii ko ikalima olan ko ikapito ragon ko kabibiyag ami roo sa Babilon
na somiyong raken so ped ko manga pelokelokesen sa Israil ka pagisean iyan so Allah, na
miyamangontod siran ko hadapan aken.
2 Na giyoto a pitero raken o Allah a
3 “Wata o manosiya, teroa ngka sangkai a manga pelokelokesen sa Israil a 'Giyai i kabasa
o Lebi a Maporo a Tohan: Ba aya minitalingoma niyo na pagisean ako niyo? Mataan ko
kaooyagoyag aken ka di ako rekano pekiise, a tig o Lebi a Maporo a Tohan!
4 “Wata o manosiya, kokoma ngka ago salaa ngka siran. Pakisaboti ngka kiran so
piyakasisingay a manga olaola o manga apo iran.
5 Teroa ngka kiran a Giyai so kabasa o Lebi a Maporo a Tohan: Sii ko gawii a pinili aken
so manga Israil na misepa ako ko manga mbawataan o Yakob ago miyakikilala ako kiran
roo sa Misir. Inisepa aken kiran a saken so Allah a Tohan iran.
6 Sangkoto a gawii na inisepa aken kiran a pekaliyon ko siran sa Misir ago pagowiten ko
siran ko lopa a miyapariksa aken den para kiran, a so pekepakayan a lopa ago oodaren, a
so lebi a mapiya ko langon a lopa.
7 Na pitero aken kiran a 'Oman i isa rekano na lebaden iyo so piyakasisingay a manga
barahala a pekebabayaan iyo, na di niyo peresiki a ginawa niyo ko manga katohanan sa
Misir; saken so Allah a Tohan iyo.'
8 “Ogaid na siyopak ako iran na da ako iran pakinega. Da iran lebaden so piyakasisingay
a manga barahala a pekebabayaan iran aya pen o ba iran talikodi so manga katohanan sa
Misir. Sabap san na inipagita aken a pekamborngaten ko kiran so gani aken kaan
kaonseri so rarangit aken kiran roo sa inged a Misir.
9 Ogaid na da aken ai nggolalanen sabap ko Ingaran aken kaan di keda so kababantogi
ron sii ko manga nasiyon a ron siran kibabaling. Ka sii ko kamamasaan iran na
piyakitokawan ko kiran a ginawa ko ko kiyapakaliyowa ko ko manga Israil sa inged a
Misir.
10 Na giyoto a inowit aken so manga pagtaw aken a poon sa Misir roo ko mitataog a
kaden.
11 Inibegay aken kiran so manga sogoan aken ago piyakisabotan ko kiran so manga kitab
aken, ka ipekeoyag ini o taw a petoman on.
12 Inibegay aken kiran pen so manga kokoman o manga Gawii aken a Idedeke a aya
nanao ko kapasadan aken ago siran. Na so kapetomana iran sii na ipetedam iran sa saken,
a so Allah, i sominggay kiran a soti a rek aken.
13 “Ogaid na siyopak ako o manga taw sa Israil roo ko mitataog a kaden. Da iran tomana
so manga sogoan aken na inisili iran pen so manga kitab aken apiya pen ipekeoyag ini o
taw a petoman on, na tanto iran a siyogok so manga kokoman o Gawii aken a Idedeke.
Sabap san na miyapamikir aken a pakapemborngaten ko kiran so gani aken ago pelaslasen
ko siran roo ko mitataog a kaden.
14 Ogaid na da aken ai nggolalanen sabap bo ko Ingaran aken kaan di keda so
kababantogi ron sii ko manga nasiyon a miyakamasa ko kiyapakaliyowa ko kiran sa
Misir.
15 Ogaid na inisepa aken kiran roo ko mitataog a kaden a di aken siran pagowiten ko lopa
a inibegay aken kiran, a so pekepakayan ago oodaren a lopa a lebi a mapiya ko langon a
lopa.
16 Inisepa aken ai ka kagiya inisili iran so manga kitab aken ago da iran tomana so manga
sogoan aken ago siyogok iran so manga kokoman o Gawii aken a Idedeke. Tiyomo iran a
kapesimbaa iran ko manga barahala iran.
17 Apiya pen oto na inikapedi aken siran na da aken siran binasaa aya pen o ba ko siran
polanga roo ko mitataog a kaden.
18 Ogaid na pitero aken ko manga wata iran roo ko mitataog a kaden a 'Di niyo
peginetaon so manga taritib o manga apo iyo; di niyo penggolalanen so manga kokoman
iran aya pen o ba niyo peresiki a ginawa niyo ko manga barahala iran.
19 Saken so Allah a Tohan iyo; paginetaon iyo baden so manga taritib aken ago piyapiyai
niyo tomoman so manga kokoman aken.
20 Senggain niyo a soti so manga Gawii aken a Idedeke, ka giyanan na nanao ko
kapasadan tano ago ipetedem iyo sa saken so Allah a Tohan iyo.'
21 “Ogaid na apiya so manga wata iran na siyopak ako iran. Da iran tomana so manga
sogoan aken; da iran nggolalanen so manga kitab aken apiya pen ipekeoyag ini o taw a
petoman on, na siyogok iran pen so kokoman o Gawii a Idedeke. Sabap san na
miyapamikir aken peman a pakapemborngaten ko kiran so gani aken kaan kaonseri so
rarangit aken kiran roo ko mitataog a kaden.
22 Ogaid na da aken ai nggolalanen sabap ko Ingaran aken kaan di keda so kababantogi
ron sii ko manga nasiyon a miyakamasa ko kiyapakaliyowa ko kiran sa Misir.
23 Ogaid na inisepa aken kiran roo ko mitataog a kaden a iperak aken siran sii ko langon
o manga nasiyon
24 Ka kagiya da iran tomana so manga sogoan aken, inisili iran so manga kitab aken,
siyogok iran so kokoman o Gawii a Idedeke ago sinimba iran so manga barahala o manga
apo iran.
25 Pipero aken so kapetomana iran ko manga taritib a kena a ba mapiya ago manga
kokoman a kena a ba iran ikeoyag.
26 Pipero aken so kaperesiki ran ko ginawa iran a nggolalan ko kapekorbana iran ko kaka
a manga wata iran a ikebinasa iran ai kaan iran makilala a saken so Allah.
27 “Kagiya ka maoto, wata o manosiya, na teroa ngka ko manga taw sa Israil a giyai i
kabasa o Lebi a Maporo a Tohan: Initaros o manga apo iyo so kapepagitowitoa iran raken
sii ko kiyaongkira iran raken,
28 Ka isako witen ko siran ko lopa a inisepa aken a imbegay aken kiran na igira a
miyakailay siran sa apiya antonaa a maporo a bobongan o di na marimpoong a kayo na
roo siran dii korban ago pesepaat siran on sa manga soasoat iran a pekikakat ko rarangit
aken ago petotongen iran on so doka iran ago pegododen iran on so ipesepaat a
panginginomen iran.
29 Na iniise aken kiran a 'Antonaa ngkanan a aparan ko barahala roo ko bobongan a
pesongowan iyo?' Giyanan i sabap a pembetowan angkoto a darpa sa Bamah ('Maporo a
Darpa') taman den imanto.
So Daneg ago so Kapakaasal
30 “Kagiya ka maoto na teroa ngka ko manga taw sa Israil a Giyai i kabasa o Lebi a
Maporo a Tohan: Ba niyo peresiki a ginawa niyo a datar o pinggolaola o manga apo iyo?
Ba niyo peterosen so kasosondal iyo ko kapesimbaa niyo ko piyakasisingay a manga
barahala iran?
31 Igira a ipesepaat iyo ron so manga soasoat iyo ago di niyo dii korbanen so manga wata
iyo ko apoy na ipeteros iyo den a kapeperesiki niyo sa ginawa niyo ko langon o manga
barahala niyo taman imanto. Na, ba ko niyo keisei, hey manga taw sa Israil? Mataan ko
kaooyagoyag aken, a tig o Lebi a Maporo a Tohan, ka di ako rekano pekiise!
32 Tig iyo a 'Kesayanan tano so manga nasiyon, a kedatar o manga taw a kibabaling ko
ped a manga inged.' Ogaid na di den mapenggolaola so mapipikir iyo.
33 Mataan ko kaoyagoyag aken, a tig o Lebi a Maporo a Tohan, ka pendatoan ko sekano a
nggolalan ko mabager a barokan aken ago mala a kapaar sii ko kipetenaan ko rekano ko
rarangit aken.
34 Pekiilay aken rekano so kapaar aken ago rarangit amay ka timoon ko sekano a poon ko
manga inged a ron kano miniparak.
35 Na pagowiten ko sekano ko 'Disirto ko manga Nasiyon,' na ron aken sekano pagokasi
sa kokoman amay ka makapamagadapa tano
36 Selaan ko sekano roo a datar o inikidia ko ko manga apo iyo ko mitataog a kaden sii
ko kiyapakaliyowa ko kiran sa Misir, a tig o Lebi a Maporo a Tohan.
37 Ipaar aken sekano piyapiya na pekaparatiyayaan ko sekano ko manga rokon o
kapasadan aken.
38 Mbelagen ko rekano so manga taongkir ago so siran oto a di raken dii makasela. Na
apiya pen mapakaliyo aken siran ko manga inged a babalingan iran na di siran den
pekasoled ko inged a Israil. Na giyoto a ketokawan iyo a saken so Allah.
39 “Na sekano peman, hey manga taw sa Israil, giyai i pitero o Lebi a Maporo a Tohan: O
di ako niyo pekinegen na tarosen iyo den a kapepanalagadi niyo ko manga barahala niyo
so oman i isa rekano! Ogaid na oriyan oto na mataan a pekinegen ako niyo na di niyo den
iteros so kapeperesiki niyo ko soti a Ingaran aken a nggolalan ko manga soasoat iyo ago
so manga barahala.
40 Ka sii ko soti a palaw aken, a so maporo a palaw sa Israil, a tig o Lebi a Maporo a
Tohan, na so langon o manga Israil sii ko inged na roo ako iran penalagadan, na terimaan
ko siran. Na ipeliyogat aken rekano roo so kapegowita niyo raken ko manga sapaat iyo
ago so pemiliin a manga soasoat a rakes o langon o soti a manga pamemegayan iyo.
41 Amay ka mapakaliyo aken sekano ko manga inged a kiyaparakan rekano ago timoon
ko sekano a poon ko manga nasiyon na ikesoat aken sekano a datar o soasoat a mamot a
doka. Na pekiilay aken so kasosoti aken a nggolalan rekano ko kamamasai ron o manga
nasiyon.
42 Amay ka mawit aken sekano ko inged a Israil, a so lopa a inisepa aken a imbegay aken
ko manga apo iyo, na ketokawan iyo den a saken so Allah.
43 Samaoto na ketanodan iyo so kiyapaginetaw niyo ago so langon a pinggolaola niyo a
miyakaresik rekano, na ikegowad iyo a ginawa niyo sabap ko langon kamarataan a
miyanggolaola niyo.
44 Na ketokawan iyo a saken so Allah, hey manga taw sa Israil, amay ka aya ikidia ko
rekano na kena a ba mapapatot ko marata a kiyapaginetaw niyo ago so piyakasisingay a
olaola niyo ka sabap bo ko bantogan o Ingaran aken, a tig o Lebi a Maporo a Tohan."
So Isiksa ko Nigib roo sa Pagabagatan
45 Oriyan iyan na pitero raken o Allah a

46 “Wata o manosiya, sangor ka sa pagabagatan na lalangi ngka so pagabagatan ago
alamata ngka so isiksa ko kalasan roo sa Nigib.
47 Teroa ngka ko kalasan sa pagabagatan a: Pakinega ngka angkai a kabasa o Allah a so
Lebi a Maporo a Tohan! Tenteman ko seka na ketotong sa tarotop so oman i isa a kayo
ngka, ndatar so gadong ago so gango. So pekerab a apoy na di den kepareng, na
pekararab ai ko langon o liyawaw o lopa ipoon sa pagabagatan taman sa pagotaraan.
48 Na keilay o langon o taw a saken a so Allah i tomintem on; di den ai kepareng."
49 Mandiyadi na pitero aken a "Ya Allah a Kadnan ko, aya dii teroon o manga taw
makapantag raken na 'Matag baden manga bayambayanan a di niyan dii mbaalan!' "
ISIKIYAL 21
So Pedang o Allah

2 “Wata o manosiya, sangor ka sa Yarosalim na lalangi ngka a Israil ago so manga darpa
on a pemanimbaan.
3 Teroa ngka sa Israil a: Giyai i pitero o Allah: Peridoon ko seka na mbindasen ko so
pedang aken ko tagoban iyan ago pemonoon ko so manga taw ngka ndatar so manga
oontol ago so manga rarata.
4 Na sabap sa iperakes aken mamono so manga oontol ko manga rarata na kebindas so
pedang aken sa kapakipetidawa iyan ko langon a taw a ipoon sa pagabagatan taman sa
pagotaraan.
5 Na ketokawan o langon a taw a saken a so Allah i minindas ko pedang aken ko tagoban
iyan na di aken den ai tegobanen.
6 Kagiya ka maoto na perego ka, wata o manosiya! Perego ka ko kapekeilaya iran on a

kapapalian so poso o ka ago tanto a mapait a rata a ginawa.
7 Na amay ka iise iran reka a 'Ino ka dii perego?' na teroa ngka kiran a 'Sabap ko totol a
miyaneg aken. Amay ka mitoman na melanag so oman i poso sa kalek, pekalobay so
oman i lima, kedaan sa inam so oman i niyawa na tebaden ago kerapay so langon o
manga leb. Pekatalingoma ini! Mataan a kitoman, a tig o Lebi a Maporo a Tohan."

9 “Wata o manosiya, alamat ka na teroa ngka a: Giyai i kabasa o Kadnan:
"So pedang, so pedang na giyarang ago inonasan.

10 Giyarang ai ka pagosaren ko kapamono;
ago inonasan kaan pekindat a datar o kilakilat!
"Ba patot a masosonor so manga pagtaw aken

sabap ko teken sa kadato o Yodah a inibegay aken kiran?
Kena! Ka dii sodiin o pedang so oman i datar anan a teken.
11 “Pegonasan so pedang kaan maosar.

Giyarang ago piyakakindat so pedang
kaan mapalad ko lima o pemono!
12 Goraok ka ago ndidiyagaw ka, wata o manosiya,
ka indaneg so pedang ko manga pagtaw aken;
indaneg ai ko langon o manga olowan sa Israil.
Miyapalad siran ko kambonoa kiran o pedang
a keped ko manga pagtaw aken.
Kagiya ka maoto na nggandangi ngka a rareb ka sa rata a ginawa.
13 “ 'Ipetiyoba ini ko manga pagtaw aken!

Na antonaa i keolaola o di pegongowan o pedang so teken a Yodah,
na keda ini? a tig o Lebi a Maporo a Tohan.'
14 “Na, seka, wata o manosiya, alamat ka

na ndaopay ka
kaan makadowa so kapetidaw o pedang
taman sa makatelo.
Pedang ai a ipenombali,
a so pedang ko mala a kapanombali
a pagoron iyan so manga taw ko mbalabala.
15 Piyakadarpa aken so pedang a ipenombali
sii ko langon o manga gimowa iran
kaan lanag sa kalek so manga poso iran ago madakel a maoteng.
Piyakakindat ai a lagid sa kapekindat o kilakilat,
na kakapetan ai sa kapanombali.
16 Hey pedang, tidaw ka sa kawanan
na sii peman sa diwang,
apiya anda peketampar so garangan ka.
17 Ndaopay ako mambo,
na pekalenggaw so rarangit aken.
Saken a so Allah i mitero sii!"
So Pedang o Dato sa Babilon
18 Na pitero raken peman o Allah a

19 “Wata o manosiya, mbaal ka sa mapa na tolad ka on sa dowa a lalan a keokitan o
pedang o dato sa Babilon. Maiisaisa angkai a dowa a lalan ko kiyapakapoon iran ko
isaisa a inged. Na sii ko sangaiyan o lalan na tagoi ngka sa toos a pekatoro ko lalan a
isong ko siti
20 A so isa ko lalan na isong sa Ramah a siti o manga Amoniyo ago so isa on na isong sa
Yodah ago sa kokotaan a siti a Yarosalim.
21 Ka so dato sa Babilon na tomitindeg imanto ko sangaiyan o lalan ko pitemoan o dowa
a lalan sa kaperimar iyan. Iperipa iyan so manga gasa iyan, pemangangay ko manga
barahala niyan ago sosin iyan so atay o ayam.
22 Sisii sa kawanan a lima niyan so gasa a ititiyap on a 'Yarosalim'! Na song sekaniyan
roo ago magembaal sa manga tambak a ipelikop ko siti ago petiyagar sa manga teroso a
iperompi ko manga gimowa iyan. Na mbegay sekaniyan sa sogoan sa kanggobata on ago
ipelalis iyan so katawaga sa kapamono!
23 Aya katao ron o manga taw sa Yarosalim na ribat ai sabap ko kapasadan iran ago si
Nibokadnisar. Ogaid na pekitanodan iyan kiran so kiyasopak iran, na mbiyagen iyan
siran.
24 “Kagiya ka maoto na giyai i pitero o Lebi a Maporo a Tohan: sabap sa piyakikilala

niyo so kadostaan iyo ago piyayag iyo so kasosopak iyo kaan pekeilay so manga dosa
ngka sii ko langon a di niyo dii nggolaolaan, na sabap roo na peladen ko sekano ko kapaar
o manga ridoay niyo.
25 “Hey seka a marata a dato sa Israil a kiyadaan sa pangkatan, na miyakatalingoma den

so gawii a kaketarotop o kandanega reka!
26 Giyai i kabasa o Lebi a Maporo a Tohan: Pokasa ngka on so sorban ka, kowaa ngka on
so sangkad ka! Di den makapenggowani so mambebetad; imanto na iporo so
pepangalimbabaan ago imbaba so pepangimporoan.
27 Kebinasa! Kebinasa! Mbinasaan ko so ndatoan. Na di den pekaasal taman sa di
makaoma so Tito a Kirek on, na sii aken rekaniyan imbegay.
So Pedang ago so manga Amoniyo
28 “Na seka, wata o manosiya, na alamat ka na go ngka teroa a: Giyai i pitero o Lebi a
Maporo a Tohan makapantag ko manga Amoniyo ago so di iran dii kapagongatongata sa
Israil:
So pedang, so pedang,
a binindas sa kapanombali;
giyarang ai kaan makapolang
ago makakindat a datar o kilakilat.
29 “Di benar so manga pangingilain mipantag rekano, na kapamokeg so kaperimar

mipantag rekano. Ipagilil den so pedang ko lig o manga rarata sii rekano a penombaliin,
ka miyaoma den so gawii iran, a so oras a kaketarotop a kandanega kiran.
30 Ba aken tanggoba so pedang aken sa di aken sekano pen madaneg? Kena, ka
mbinasaan ko sekano sii ko darpa a ron kano inimbabawata, a so inged o manga apo iyo.
31 Pakapemborngaten ko rekano so gani aken ago ipagiyop aken reka so pesokeyaw a
rarangit aken. Peladen ko sekano ko kapaar o manga rarangit a manga mama a mapasang
i kapaminasa.
32 Ipagitagon kano ko apoy ago pemanoga ko inged iyo so manga rogo, na di kano den
ketoosan, ka saken a so Allah i mitero sii."
ISIKIYAL 22
So manga Dosa a Yarosalim

2 “Wata o manosiya, ba ka makatitiyagar sa kaselaa ngka sa Yarosalim a so siti a
pepemonoan? Payaga ngka on so piyakasisingay a manga olaola niyan
3 Na teroa ngka a: Giyai i pitero o Lebi a Maporo a Tohan: Hey siti a pepekiwitan iyan a
ginawa niyan sa morala sii ko kapegolaa niyan ko rogo o manga taw niyan ago so
kapeseboi niyan sa ginawa niyan ko kapepangembaal sa manga barahala,
4 Na miyataksil ka den sabap ko kiyapamono o ka, ago piseboan ka a ginawa ngka sabap
ko manga barahala a piyangembaalan ka. Piyakitalingoma ngka so gawii a kambinasaa
reka! Miyaoma den so kakepos o omor ka! Kagiya ka maoto na biyaloy aken seka a dii
sodiin ago piyakakeyakayad o manga nasiyon ko dalem a doniya.
5 Siran oto a marani reka ago mawatan na pegongatongat reka, hey baradosa a siti a tanto
a magogorigaw.
6 “Ilaya niyo, ka oman i pendatoon sa Israil a sisii reka na pegosaren iyan so kapaar iyan
sa kapamono.
7 Da a adat iran ko manga ama ago so manga ina a sisii reka; ron iran pepanalimboti so
manga mananangga, na pesonsingen iran so manga ilo ago so manga balo.
8 Pisodi ka so manga nganin aken a soti, na siyogok ka so kokoman o manga Gawii aken
a Idedeke.
9 Sisii reka so manga taw a dii manendisendit kaan pekebono so ped iran. Aden a
kibabaling reka a dii kekan ko inisapaat ko manga barahala sii ko manga bobongan ago
dii nggolaola sa piyakasisingay.
10 Sisii reka so manga mama a peperembang ko manga karoma o ama iran ago dii
keroma ko babay a ndodon so basa
11 Aden a ped a dii sina ko karoma o siringan iyan, aden pen a dii makipemotaliya ko
miyakamong on a babay ago pepelobed ko pagari niyan a babay a so tito a wata o ama
iyan.
12 Sisii reka so manga taw a pekowa sa tendan sa kapamono; di siran dii meriba ago mala
i katobo ago ipepekatamok iran so kapepanalimboti ran ko manga siringan iran.
Piyakalipatan ako iran, a tig o Lebi a Maporo a Tohan.
13 “Kagiya ka maoto na pengimel ako sabap ko rarangit aken sabap ko di ontol a

kapepemantiyari ngka ago kapepamono.
14 Ba ngka mapipikir a kemboway so kawaraw ngka o di na tatap so bager a lima niyo sii
ko gawii a ndanegen ko seka? Saken a so Allah i mitero sii na ipenggolalan aken so
miyatero aken.
15 Iperak aken so manga taw ngka ko oman i inged ago manga nasiyon, na pageposen ko
ko kasosoneg ka.
16 Na amay ka kiyadiyamanan ka sii ko manga nasiyon na ketokawan iyo a saken so
Allah."
So Towanga o Allah

18 “Wata o manosiya, mimbaloy so manga taw sa Israil a da a oked iran raken. Lagid
siran o tai a pirak a giyoto so tombaga, kitang, potaw ago timbega a inibegak ko towanga
ko oriyan o kiyatonaga ko pirak.
19 Kagiya ka maoto na giyai i pitero o Lebi a Maporo a Tohan: Sabap sa langon kano
mimbaloy a da a oked iyan na pelimoden ko sekano sii sa Yarosalim.
20 Datar o katimoa o manga taw ko pirak, tombaga, potaw, timbega ago kitang ko
towanga kaan matonaw ko mabager a apoy, na nggolalan ko rarangit aken na timoon ko
sekano sa soled a Yarosalim kaan aken sekano ron matonaw.
21 Oway, timoon ko sekano ago perapogen sabap ko rarangit aken, na ketonaw kano ron.
22 Datar o kaketonaw o pirak sii ko towanga a kaketonaw niyo mambo sa Yarosalim, na
ketokawan iyo a saken, a so Allah, i tomiyana rekano ko rarangit aken."
So manga Dosa o manga Olowan sa Israil

24 “Wata o manosiya, teroa ngka ko manga taw sa Israil a sii ko gawii a kapekerarangiti
raken na kebaloy siran a lagid o lopa a da pen kalompiyowi o di na kaorani.
25 Kekadiyat so manga olowan iyo sa marata a lagid o manga arimaw a pesekisiin iran so
miyasikem iran. Pepelalamed siran sa manga taw, pepangowa sa manga tamok ago
manga ala i arga a manga nganin na pepakadakelen iran so manga balo sii ko inged sabap
ko kapepemomonoan iran.
26 Pesogoken o manga imam iran so kitab aken na di iran pegadatan so soti a manga
nganin aken. Di iran pakapesenggayaan so soti ago so kena a ba soti, na di iran
ipemangendao ko manga taw so mbidaan o karam ago so halal. Di iran tegoon sa ginawa
so manga Gawii aken a Idedeke na sabap sii na mapepakaito ako sii ko manga taw.
27 So manga olowan iran na datar o manga iila a aso a dii sekisi ko miyasikem iran;
pepakatogaan iran so manga rogo ago pepaminasa siran ko manga taw kaan siran kewasa.
28 Na so manga nabi iran na pesepengan iran angkai a manga dosa a nggolalan ko di
benar a manga pangingilain ago kaperimar a kapamokeg. Di iran dii teroon a 'Giyai i
kabasa o Lebi a Maporo a Tohan,' apiya da ini matero o Allah.
29 Pepanalimbot ago pepamanekew so manga taw ko inged. Pesetroon iran so manga
miskin ago so kikadodowaanan na pepangarasiyan iran pen so manga mananangga a di
iran kiran imbegay so manga kabenar iran.
30 Miyangiloba ako kiran sa mama a pekaompiya ko pangeleban ago pekatindeg ko
darpa a ron miyatempag kaan iyan raken mipangangarapan so inged kaan aken ai di
kebinasa, ogaid na da den a miyatoon aken kiran.
31 Sabap roo na pakapemborngaten ko kiran so gani aken na polangen ko siran ko
pesokeyaw a rarangit aken. Pakipembalogo aken kiran langon so miyanggolaola iran, a
ISIKIYAL 23
So Dowa a Magari a Babay a dii Sebo
2 “Wata o manosiya, aden a dowa a babay a magari a isaisa a ina iran.
3 Miyabaloy siran a manga sondal sii sa Misir. Apiya sii ko kararagai kiran na
miyakisesaliya siran roo ago piyamakiaper iran so manga rareb iran.
4 Aya ngaran o kaka na si Oholah, na so ari na si Oholibah. Rek aken siran na
mimbabawata sa manga mama ago manga babay. Si Oholah na giyanan a Samariya, na si
Oholibah na giya Yarosalim.
5 “Apiya pen rek aken sekaniyan na misondal si Oholah. Piyanelaan iyan so manga
pepangabaya rekaniyan a manga taw sa Asiriya a manga siringan iyan.
6 Langon siran manga tataid a kangodaan a manga olowan a sondaro ago manga poporo i
kadato a kindiditar sa biro a kikokoda sa koda.
7 Miyakipemotaliya sekaniyan ko langon a manga tenger a taw sa Asiriya, na piseboan
iyan a ginawa niyan ko kapesimbaa niyan ko manga barahala o oman i di niyan dii
panelaan.
8 Da niyan taregen so di niyan dii kasondal a kiyapoonan iyan sa Misir. Ka sii ko
kangodai ron na roo sekaniyan peperembanga o manga Imisiren a pepegaperen iran so
rareb iyan ago pepakaliyon iran rekaniyan so tela iran.
9 “Kagiya ka maoto na piyalad aken sekaniyan ko pepangabaya on a manga taw sa

Asiriya a pepenelaan iyan.
10 Likasan iran sekaniyan ago piyangagaw iran on so manga wata iran, na biyono iran
sekaniyan a pedang. Na miyatototola sekaniyan o manga babay ko kinitanaan rekaniyan
ko daneg.
11 “Apiya pen miyailay ai o pagari niyan a si Oholibah na lawan on pen so kapetelai ron
ago so kasosondal iyan a di si Oholah.
12 Piyanelaan iyan mambo so manga taw sa Asiriya a giyangkoto a manga tataid a
kangodaan a manga olowan a sondaro ago manga poporo i kadato a kindiditar piyapiya
ago kikokoda sa manga koda.
13 Miyailay aken a piseboan iyan pen a ginawa niyan; ndatar so kapepeginetaw iran a
dowa.
14 “Ogaid na initaralo niyan pen so kasosondal iyan, ka miyabarayat sekaniyan ko manga

toladan o manga taw sa Babilon a iniokir san ko manga keleb ago pinintora sa lombos a
mariga
15 A sesambitan siran ago sosorban, a langon siran datar sa paras o manga olowan a
sondaro a komakaro a poon sa inged a Babilon.
16 So den so kiyailaya niyan kiran na piyanelaan iyan siran na piyakisogoan iyan siran
roo sa Babilon.
17 Na somiyong rekaniyan so manga taw sa Babilon na miyakipemotaliya siran on, na
piseboan iran sekaniyan sii ko katetelai kiran. Ogaid na oriyan o kiyaseboi ran on na
tiyalikodan iyan siran ko kinikangingirin iyan kiran.
18 Na kagiya pakirinayag iyan so kasosondal iyan ago siyawa iyan so katatalandiyang
iyan na inikangingiri aken sekaniyan ago tiyalikodan aken a datar o kiyatalikodi aken ko
pagari niyan a babay a si Oholah.
19 Apiya pen oto na kiyalonsanan baden so kasosondal iyan sii ko katatademi niyan ko
manga gawii a kangodai rekaniyan pen isako sondal sekaniyan sa inged a Misir.
20 Roo niyan den piyanelaan so pepangabaya rekaniyan a so sangoran iran na datar o
manga asno ago so kapeliyo o biga iran na lagid o manga koda.
21 Pisingayo o ka, hey Oholibah, so kapetelai reka sii ko kangodai reka pen roo sa Misir
isako pepenaliyaan ago pepegaperen so rareb ka.
So Indaneg o Allah ko Oholibah a Ari a Babay
22 “Kagiya ka maoto, Oholibah, na giyai i pitero o Lebi a Maporo a Tohan: Pekirido aken
seka ko miyangabaya reka, a so siran oto a tiyalikodan ka a inikangingiri ngka na
pekigobat aken seka kiran ko oman i mbalabala reka
23 So manga taw sa Babilon ago so langon o manga taw sa Kaldiya a poon sa Pikod,
Siyowa ago Kowa a ped iran so langon o manga taw sa Asiriya a langon siran manga
tataid a kangodaan a manga gobirnador, manga opisiyal, manga olowan a sondaro ago
manga poporo i kadato a palaya siran kikokoda.
24 Pemakapoon siran ko pagotaraan na nggobaten ka iran a manga karo sa katidawa ago
tanto a madakel a sondaro a kikagogomaanan. Pelikopan ka iran a kisosolot siran sa
manga ilmit ago maito mala a manga kelong. Na peladen ko seka kiran kaan ka iran
madaneg, na indaneg iran reka so manga kokoman iran.
25 Itena aken reka so pepanaod a rarangit aken na masarangit a ikidia iran reka.
Pemotolen iran so ngirong ka ago so manga tangila ngka, na so manga taw a kelamba sii
reka na mbonoon a pedang. Mbiyagen iran so manga wata a ka a manga mama ago
manga babay, na so langon taman a kelamba reka na pagosipen a apoy.
26 Penggiginiten iran so manga nditaren ka na kowaan iran so manga pipiya a
imbolawananan ka.
27 Sangkai a okit na pageposen ko so katetelai reka ago kasosondal a pipoonan ka sa
Misir. Di ngka den pesingayoon angkai a manga nganin aya pen o ba ngka ketademi a
Misir.
28 “Ka giyai i kabasa o Lebi a Maporo a Tohan: Ilaya ngka man, ka peladen ko seka ko
siran oto a ipekegowad ka, a so siran oto a tiyalikodan ka ago ipekengingiri.
29 Sabap ko kipekegowaden iran reka na kowaan iran reka so langon taman a
pindokawan ka, na pagawaan ka iran a kalelekasan ago matatalandiyang, na kepayag so
piyakayaya a kasosondal ka. So katetelai reka ago kasesebo o ka
30 Na aya reka sii miyakatana sabap sa miyakisondal ka ko ped a manga nasiyon ago
piseboan ka a ginawa ngka a nggolalan ko manga barahala iran.
31 Sabap sa siyowa a ka so manga olaola o pagari ngka a babay na tegoon ko sa lima
ngka so tagayan o daneg a inidaneg aken rekaniyan.
32 “Giyai i kabasa o Lebi a Maporo a Tohan:
Paginoman ka so tagayan o pagari ngka a babay,

a so tagayan a mala ago madalem.
Pegongatongaten ka o langon a taw ago kediyamanan,
ka tanto a mala a matatago on.
33 Kepeno ka a kabebereg ago rata a ginawa
a nggolalan ko tagayan a mapepeno a kalek ago kabinasaan,
a so tagayan o pagari ngka a babay a giya Samariya.
34 Paginomen ka ago peninitisen ka so soled iyan.
Oriyan iyan na peropeten ka ini
na nggandangan ka so rareb ka sa kararasay,
Saken a so Lebi a Maporo a Tohan i mitero sii!
35 “Kagiya ka maoto na giyai i kabasa o Lebi a Maporo a Tohan: Sabap sa piyakalipatan

ako ngka ago tiyalikodan na disomala a mipembalogo ngka so kidaneg ko katetelai reka
ago kasosondal."
So Daneg o Allah ko Dowa a Magari
36 Na pitero raken o Allah a "Wata o Manosiya, ba ka makatitiyagar sa kaselaa ngka ki

Oholah ago si Oholibah? Payaga ngka kiran so piyakasisingay a manga olaola iran.
37 Ka miyakasina siran ago miyamamono. Misina siran sii ko manga barahala iran, na
piyamono iran so manga wata a inimbabawata iran raken ko kinisapaaten iran kiran ko
manga barahala iran a pangenengken.
38 Na kena a ba giyanan i pinggolaola iran raken, ka sii bo sangkoto a gawii na piresikan
iran so soti a Timplo aken ago siyogok iran so kokoman o Gawii aken a Idedeke!
39 Ka sii den ko gawii a kiyasombalia iran ko manga wata iran a inisapaat ko manga
barahala iran na piresikan iran so soti a Timplo aken ko kiyasoledi iran on. Giyanan i
pinggolaola iran ko Timplo aken!
40 “Piyakisogoan iran pen so manga mama roo sa mawatan, na miyakaoma siran. Na

sabap kiran na mipeigo so magari a manga babay, pintoraan iran a manga mata iran ago
miyamanolot sa manga imbolawananan.
41 Miyontod siran ko mapiya i paras a igaan a aden a lamisaan ko danga iyan a ron iran
inipamatog so doka ago lana a inibegay aken kiran.
42 Miyaneg so kabobosigaw o madakel a taw a dii keriyala a lomilibet kiran.
Kirarakagan siran a manga mama ago manga tamereg a poon ko disirto; na pirintian iran
so barokan o manga babay ago siyangkadan iran sa mapiya i paras so olo iran.
43 Na miyatero aken sa ginawa ko a 'Imanto na makipemotaliya siran sangkai a manga
babay a kalalayaman den a dii sina.'
44 Na rimbang iran angkoto a petelaan a manga babay a si Oholah ago si Oholiba a datar
o kaperembanga o mama ko sondal.
45 Ogaid na so manga oontol a taw na kokomen iran siran ago isela iran kiran so indaneg
a mapapatot ko manga babay a dii sina ago pepamono ka kagiya miyakasina siran na
kadadaketan a rogo so manga lima iran."
46 “Na giyai i pitero o Lebi a Maporo a Tohan: Pekigobat aken siran ko madakel a taw na
paladen ko siran ko kapengangaleka ago kapetebani kiran.
47 So madakel a taw na perobakan iran siran a ator ago potolen iran siran a pedang;
pemonoon iran so manga wata iran a manga mama ago manga babay ago penotongen iran
so manga walay iran.
48 Sangkai a okit na pekageneken aken so kambarabowat maasiya sii ko inged kaan
kalalangi so langon o manga babay ron ago di iran den perawaten so piyakasisingay a
olaola o magari a babay.
49 Pakapembayaden kano a dowa a magari ko kasosoneg iyo, na indaneg rekano so dosa
niyo a so kapesimbaa niyo ko manga barahala. Na amay ka magiyoto na ketokawan iyo a
saken o Lebi a Maporo a Tohan."
ISIKIYAL 24
So Petindaan a Kawa
Sii ko ikasapolo gawii ko ikasapolo olan ko ikasiyaw ragon ko kabibiyag ami na

minisampay raken so lalag o Allah.
2 “Wata o manosiya," a tig iyan, "na soraten ka angkai a kapapantagan a gawii, ka sii den
sangkai a gawii na siyondolan ago linikopan o dato sa Babilon so siti a Yarosalim.
3 Na teroa ngka ko manga taongkir a manga pagtaw aken angkai a bayambayanan: Giyai i
pitero o Lebi a Maporo a Tohan:
"Datolen iyo so isa a kawa na ododi niyo sa ig.

4 Tagoi niyo ini sa piyangarad a sapo,
a so langon o piyamagaraw a sapo, a so bobon ago so waga,
na saogen iyo ron so lebi a mapiya ko manga tolan iyan.
5 Osara niyo so lebi a mapiya a bilibili ko talon
na taboteden iyo so manga itagon ko didalem a kawa;
pakadidii niyo ini piyapiya
ago lotoa niyo ron so manga tolan.
6 “Ka giyai i pitero o Lebi a Maporo a Tohan:
"Kemorkaan so siti o manga talibono,

ka datar ai o kawa a boringen
a da on den mada so maresik on!
Nggagaisaa ngka on komowa so oman i karad a sapo
na da den a ba ngka on pelambaa.
7 “Ka so rogo a piyakatoga iyan na sisii rekaniyan pen,

ka inodod iyan ai ko bansayan a lakongan;
da niyan ododa ko lopa
a ron kasepengi a bayanek.
8 Na da aken ponasa angkoto a rogo ko bansayan a lakongan
kaan di kesapengi
a ron iyan kekakati so rarangit aken sa kaseopi aken rekaniyan.
9 “Kagiya ka maoto na giyai i pitero o Lebi a Maporo a Tohan:
"Kemorkaan so siti a talibono!

Giya den a ginawa ko i tebotod on sa madakel a itagon.
10 Tabotoden ka so manga itagon na biyagi ngka.
Tindaan ka piyapiya so sapo, pamalapai ngka;
ododa ngka so sawaw niyan ago pakatotonga ngka on so manga tolan iyan.
11 Na datolen ka so da a soled iyan a kawa ko waga
taman sa keyaw ago romiga so tombaga on
kaan matonaw so boring on
ago mada on so karesik iyan.
12 Ogaid na da a lalaw o langon o bager a miyaosar on;
ka da on den mada so mala a matatago on a maresik
apiya pen miyakaokit ko apoy.
13 “Giyangkai a karesik ka, hey Yarosalim, na so kapetelai reka. Na apiya pen

piyanamaran ko so kalompiyo ngka na da ka malompiyo ko karesik ka. Sabap san na di
ka den kelompiyo taman sa di reka langon mitana so rarangit aken.
14 “Saken, a so Allah, i mitero sii! Ketoman den ai ka penggolaolaan ko, na di aken den
isendod. Di ako pengampedi aya pen o ba ko alina so pamikiran ko. Indaneg reka so
mapapatot ko manga olaola ngka ka ago manga galebek, a tig o Lebi a Maporo a Tohan."
Miyatay so Karoma i Isikiyal

16 “Wata o Manosiya, di ini matey na kowaan ko reka so taw a tanto ngka a
pekebabayaan. Kitekaw den a kapetay niyan, ogaid na di ngka pembokoon o di na
ndidiyagawan aya pen o ba ngka nggoraoka
17 Ka senganseng ka baden sa masolen. Di ngka pendiyagai so miyatay; di ngka on
pokasa so sorban ka ago so manga sandal ka. Di ngka sepengi so paras ka aya pen o ba
ka kan ko pangenengken o dii ndiyaga."
18 Sii ko kapipita na di ako dii makimbitiyarai ko manga taw, na kagiya perimon na

miyatay so karoma ko. So miyakatalondog a kapipita na ininggolalan aken so inisogo
raken.
19 Na iniise raken o manga taw a "Ino ngka ini penggolaolaa? Ba ngka rekami di peyaga
o antonaa i maana niyan rekami?"
20 Na simbag aken siran a "Minisampay raken so lalag o Allah a tig iyan a:

21 Teroa ngka ko manga taw sa Israil a 'Giyai i pitero o Lebi a Maporo a Tohan:
Pakiperesikan ko so Soti a Timplo, a so darpa a ipepangandag iyo ago sasarigan, a so
ikasosoat o mata niyo ago tanto niyo a ipekebabaya. Na so manga wata iyo a manga
mama ago manga babay a minibegak iyo sa Yodiya na pemamonoon a pedang.
22 Samaoto na penggolaolaan iyo so pinggolaola ko; di niyo kesapengan a paras iyo aya
pen o ba kano kan ko pangenengken o dii ndiyaga.
23 Di niyo ron kepokas so manga sorban iyo ago so manga sandal iyo. Di kano pemboko
ago di kano nggoraok ka kepos kano baden sabap ko manga dosa niyo, na makapeperego
so oman i isa ko ped iyan.
24 Si Isikiyal na aya nanao sii rekano; penggolaolaan iyo so langon a pinggolaola niyan.
Amay ka manggolaola ini na ketokawan iyo a saken so Lebi a Maporo a Tohan.' "
25 Na pitero raken o Allah a "Wata o manosiya, sii ko gawii a kowaan ko kiran so

Timplo a sasarigan iran, a ipekebabaya iran ago pembantogen, a ikasosoat o manga mata
iran ago tanto iran a pekebabayaan, na kowaan ko kiran pen so manga wata iran a manga
26 Sii sangkoto a gawii na pekaoma reka so sakataw a miyakapalagoy ko kambinasaa sa
Yarosalim na penotolen iyan reka so miyaolaola.
27 Na amay ka makaoma sekaniyan na keda so kakeamang ka na makapetero ka peman;
ipembitiyarai ngka sekaniyan na di ka den merenek. Sii sangkai a okit na kebaloy ka a
nanao ko manga taw, na ketokawan iran a saken so Allah."
ISIKIYAL 25
So Miyaalamat a Ipemorala sa Amon

2 “Wata o manosiya, langkaw ka sa tampar sa Amon na alamaten ka so ipemorala ko
manga taw ron.
3 Teroa ngka kiran a pamakinega iran angkai a lalag o Lebi a Maporo a Tohan:
Miyababaya kano ko kiyaperesiki ko Soti a Timplo aken ago sii ko kiyalaslasa ko inged a
Israil ago so kinitaogen ko manga taw sa Yodah.
4 Sabap roo na pekidaag aken sekano ko manga taw sa sebangan. Pekempo ko inged iyo
ago keden siran sii rekano. Pengangen iran so manga onga pamomolan iyo ago
penginomen iran so manga gatas iyo.
5 Mbalowin ko so siti a Rabah a pepenateban o manga onta, na so dalem a inged a Amon
na mbalowin ko a pendekean o manga bilibili. Na ketokawan iyo a saken so Allah.
6 “Ka giyai i kabasa o Lebi a Maporo a Tohan: Sabap sa mindaopay ago miseyaw kano sa
kapekebabaya iyo ko di niyo dii kasodiya sa inged a Israil
7 Na itena aken rekano a lima ko na peladen ko sekano a petebanan o ped a manga
nasiyon. Potolen ko sekano ko manga nasiyon na ponasen ko so nasiyon iyo. Mbinasaan
ko sekano na ketokawan iyo a saken so Allah."
So Miyaalamat a Ipemorala sa Mowab
8 Na pitero o Lebi a Maporo a Tohan a "Sabap sa miyatero o manga taw sa Mowab a giya
Yodah na lagid o langon o ped a manga nasiyon
9 Na pekigobat aken so manga siti sa Mowab a matatago ko temanaan iyan, a so manga
siti a Bit Yasimot, Baal Miyon ago Kiriyataim a aya bantogan o inged.
10 Peladen ko a Mowab a rakes o manga Amoniyo a ketangan o manga taw sa sebangan
kaan siran ago so manga Amon na di den kibilang a ped ko manga nasiyon.
11 Mataan a ndanegen ko a Mowab, na ketokawan iran a saken so Allah."
So Miyaalamat a Indaneg sa Idomiya
12 Na pitero o Allah a "Tanto a miyakasela so manga Idomiyan ka siyaopan iran so

manga taw sa Yodah.
13 Kagiya ka maoto na giyai i lalag o Lebi a Maporo a Tohan: Itena a lima ko sa Idomiya
na pemonoon ko so manga taw ron ago so manga ayam. Pelaslasen ko so inged ipoon sa
siti a Timan taman sa Didan, na pematay a pedang so manga taw.
14 Seopan ko a Idomiya a nggolalan ko manga pagtaw aken a Israil. Aya ikidia iran sa
Idomiya na so den so makaaayon ko somosokeyaw a rarangit aken, na kekilala o manga
Idomiyan a saken i somiyaop kiran, a tig o Lebi a Maporo a Tohan."
So Miyaalamat a Isiksa sa Pilistiya
15 Na pitero o Lebi a Maporo a Tohan a "Masarangit so kiyasaop o manga Pilistiyo, ka

siyaopan iran a Yodah na piyanamaran iran ai minasa sabap ko kagowad ago so andang a
rido a madadalem ko poso iran.
16 Kagiya ka maoto na giyai i lalag o Lebi a Maporo a Tohan: Itena aken a lima ko
manga Pilistiyo. Polangen ko so manga Kiritiyo na mbinasaan ko sa tarotop so kelamba
kiran a kibabaling ko kilid a ragat.
17 Itena aken kiran so piyakalekelek a kaseop aken ago indaneg aken kiran so
somosokeyaw a rarangit aken. Na giyoto a ketokawan iran a saken so Allah."
ISIKIYAL 26
So Miyaalamat a Kambinasaa sa Tiro
Sii ko ikasapolo ago isa ragon ko kabibiyag ami, sii ko paganay a gawii ko olanolan na
pitero raken o Allah a
2 “Wata o manosiya, miyababaya so siti a Tiro ko kiyaoteng a Yarosalim a tig iran a
'Mapiya! Miyageba den so siti a makapapaar ko pepegokitan o manga padagang sii ko
manga nasiyon, na saken den i miyabaloy a gimowa iran! Pekewasa ko imanto ka
miyabinasa sekaniyan den!'
3 “Kagiya ka maoto na giyai i pitero o Lebi a Maporo a Tohan: Peridoon ko seka, hey
Tiro, na pekigobat aken seka ko madakel a manga nasiyon a lagid o manga begel sa ragat
a ndansal reka.
4 Tempagen iran so manga pangeleban a Tiro ago nggebaan iran so manga lantawa iyan.
Mbagenasen ko ron so miyanga bibinasa on na mbalowin ko a datar o bansayan a
lakongan.
5 Sii ko ragat na kebaloy ini a pegagagan o manga panginginseda ko manga poket iran, ka
miyatero aken ai, a tig o Lebi a Maporo a Tohan. Petebanan a Tiro o manga nasiyon,
6 Na pemonoon iran a pedang so kibabaling sii ko kaoladan ko siti ko kilid a ragat. Na
giyoto a ketokawan iran a saken so Allah.
7 “Ka giyai i pitero o Lebi a Maporo a Tohan: Pekigobat aken a Tiro ki Nibokadnisar a
dato sa Babilon, a so lebi a mala i kapaar a dato. Pekapoon sekaniyan sa pagotaraan a
rakes o manga koda ago manga karo sa katidawa, a ped so kikokoda ago madakel a
manga sondaro.
8 Paganay ron na pemonoon iyan a pedang so kibabaling ko kaoladan ko inged ka ko
kilid a ragat. Oriyan iyan na pelikopan ka niyan a kota ago manga tambak, na imbayaw
niyan so manga kelong iyan a aya niyan pelindongan ko kipetidawaan iyan reka.
9 Ndandalen iyan a teroso so manga pangeleban ka ago perompin iyan so manga lantawa
a ka.
10 Kikolob reka so bayanek a kikayamber o madakel a koda iyan. Ipetebeker ko manga
pangeleban ka so dagedeb o manga komokoda ago so manga karo sa katidawa amay ka
somoled siran ko miyanga gegeba a manga gimowa a ka.
11 Pelomegen o manga koda iyan so langon o manga lalan ka; pemonoon iran a pedang
so manga pagtaw ngka, na penga ooteng so manga babager a manga polaos ka.
12 Petebanen iran so manga kakawasaan ka na pengowaan iran so manga dagangan ka.
Tempagen iran so manga kota a ka ago nggebaan iran so manga pipiya a manga walay
ngka, na so manga ator ka ago so manga tarakayo ngka ago so ped a miyanga bibinasa na
ipelelebad iran sa ragat.
13 Pekataregen ko so dii kamboboniboniyan o manga idaida a ka, na di den keneg so
kapemangoni o manga kotiyapi i ka.
14 Mbalowin ko seka a bansayan a lakongan a ron pemangagaga so manga poket o manga
panginginseda. Di ka den kebangon peroman, ka saken a so Allah i mitero sii, a tig o
15 “Giyai i pitero o Lebi a Maporo a Tohan ko siti a Tiro: So langon o manga inged ko
kilid a ragat na penanabaden sabap ko kandagedeb o kakeoteng ka ago so kapenggoraok o
miyanga aangel sii ko kapenombalia ko kibabaling reka.
16 So langon o manga dato ko kilid a ragat na tepad siran ko manga korsi iran na
pagendaan iran so manga kimon iran ago so piyamordaan a manga nditaren iran
Kekoloban siran sa kalek, na magontod siran ko lopa a kitatabaden; kebengang siran
sabap reka a di keda so katatabekera kiran.
17 Samaoto na ipendidiyagaw iran tero makapantag reka a:
"Sayana a kiyabinasaa reka, hey kababantogan a siti,

a babalingan o manga palalayag!
Mala ka i kapaar sii sa ragat;
na seka ago so manga taw ngka
na ipekelek o langon a kibabaling ko kilid a ragat.
18 Imanto sii ko gawii a kiyatabana reka;
na penanabaden so manga inged ko kilid a ragat
na miyamemesa so manga polo ko kiyapolanga reka.
19 “Ka giyai i pitero o Lebi a Maporo a Tohan: Amay ka mabaloy aken seka a miyalaslas
a siti a datar o manga siti a da a mababaling on, ago amay ka ikolob aken reka so kalodan
ago misapeng reka so mala a ig
20 Na pagaloganen ko seka ko galebo a kitapi ko andang a manga taw. Pakakadenen ko
seka ko pitidaleman ko doniya sii ko manga darpa a andang den a miyabinasa a ped ko
siran oto a miyaolog ko kaden o miyamatay. Na di ka den kebalingan aya pen o ba ka
kabantogi sii ko lopa o kikaooyag.
21 Piyakalekelek so kapageposa ko reka, na kedadas ka den. Apiya pen o aden a
nggiloba reka na di ka den ketoon, a tig o Lebi a Maporo a Tohan."
ISIKIYAL 27
So Kiyandidiyagaw makapantag sa Tiro

2 “Wata o manosiya, ndidiyagawi ngka a Tiro
3 A giyangkoto a siti a matatago ko gimowa ko ragat, a dii pamadiyaanan ko manga taw
ko madakel a inged ko kilid a ragat. Teroa ngka on a giyai i pitero o Lebi a Maporo a
Tohan:
Hey Tiro, miyatero o ka a 'Madidiyangka so kataid aken.'

4 So manga temanaan ka na sii ko kalodan;
so mipepanday reka na tiyarotop iran so kataid ka
a lagid sa kataid o mapiya i paras a kapal.
5 So manga tarakayo a inosar iran
na poon sa kalasan sa Palaw a Hirmon,
na kominowa siran sa kayo a sidro a poon sa Libanon
na pimbaalan iran a tokod o layag ka.
6 So manga kalipapa a poon sa Basan
na aya iran pimbaalan a manga dayong ka;
na so manga kayo a goo a poon sa kilid a ragat sa Sipri
na aya iran pimbaalan a salasa a ka na tiyataan iran ai sa marpil.
7 So manga layag ka na biyordaan a sotra a poon sa Misir,
na giyai i miyabaloy a pandi i ka;
so piyagatepatep ka na biro ago maloto a mariga a dinis
a poon sa polo a Sipri.
8 So manga taw sa Sidon ago Arbad na aya ngka padadayong;
so manga papasang a mama ngka, hey Tiro,
na aya ngka manga pangongolin.
9 So manga pepangompiya a mageeda reka
na manga papasang a panday a poon sa Gibal.
So langon o manga kapal ko peragatan ago so palalayag on
na pepekaoma reka a makapamadian ko manga dagangan ka.
10 So manga mama sa Pirsiya, Lod ago Pot
na maaped ko manga sondaro ngka;
inisambir iran so manga kelong ago manga ilmit iran ko manga keleb ka,
na minibantog ai reka.
11 So manga sondaro a poon sa Arbad
na aya nggogordiya ko manga pangeleban ka ko oman i kilid iran;
so manga mama sa Gamad na tomatameng ko manga lantawa a ka.
Isasambir iran so manga kelong iran ko manga keleb ka
a inikatarotop o kataid ka.
12 “Giya Ispaniya na mindagang reka sabap ko kadakel o manga kakawasaan ka;

pesembian iran a pirak, potaw, kitang ago timbega so manga kasangkapan ka.
13 “Giya Grisiya, Tobal ago Misik na mindagang reka, na pesembian iran a manga oripen
ago manga kasangkapan a tombaga so manga dagangan ka.
14 “So manga taw sa Bit Togarmah na pesembian iran a manga koda a dii nggalebek,
manga koda sa katidawa ago manga mola so manga dagangan ka.
15 “Mindagang reka pen so manga taw sa Didan; so manga taw ko madakel a manga
inged ko kilid a ragat a pepemamasaan reka; na pembayadan ka iran a manga panga ago
kayo a iboni.
16 “Mindagang reka a Aram sabap ko madakel a kasangkapan a pasad ka; aya ipembayad
iran on na manga montiya a komarapar, manga dinis a maloto a mariga, kibobordaan a
dinis, mapiya a sotra, manga ator sa ragat ago manga robi.
17 “Giya Yodah ago Israil na mindagang reka; aya ipesembi iran ko dagangan ka na
manga trigo a poon sa Minit, manga higos, gola teneb, lana a olibi ago manga pangibong
a bolong.
18 “Mindagang reka a Damasko sabap ko pimbarambarangan a manga dagangan ka ago

so kala a ka i kakawasaan; pesembian iran reka a arak a poon sa Hilbon ago mapoti a
bombol a bilibili a poon sa Sahar.
19 “So manga Danitiyo ago manga Grigo a poon sa Osal na pesembian iran a potaw ago
manga palapa a kasiya ago kalmos so manga dagangan ka.
20 “So manga taw sa Didan na mindagang reka sa manga ala i arga a ampido.
21 “Giya Arabiya ago so manga olowan sa Kidar na ipembayad iran ko manga dagangan
ka so manga bilibili, manga mandangan ago manga kambing.
22 “Mindagang reka so manga padagang sa Siba ago sa Raamah; pesembian iran so

manga dagangan ka a lebi a mapiya a manga palapa, manga ala i arga a montiya ago
manga bolawan.
23 “So manga siti a Haran, Kani ago Idin, ago so manga padagang sa Siba, Asor ago
Kilmad na mindagang reka.
24 Aya di iran reka dii indagang na manga pipiya i paras a manga nditaren, manga dinis a
biro ago bobordaan ago madakel i warna a manga paramadali a maliget a kiyaaola on.
25 “So manga kapal sa Tarsis na aya pepegawid ko manga dagangan ka.
"Datar ka o kapal sii sa kalodan

a tetegeben a mapened a manga roran.
26 Na pegowiten ka o manga padadayong ka sii ko kalodan,
ogaid na so mabager a ndo a poon sa sebangan
na mbengkagen ka niyan sii ko posed a ragat!
27 Na so manga kakawasaan ka, manga dagangan, ago manga kasangkapan ka,
so manga palalayag ka, manga pangongolin, ago manga panday ngka,
so manga padagang ka, so manga sondaro ngka
ago so langon o manga ped a mageeda reka
na pemangigaled ko posed a ragat
sii ko gawii a kakebinasa ngka.
28 Penanabaden so manga kilid a ragat
amay ka makapelalis so manga palalayag ka sa kalek.
29 “So langon o manga padadayong, manga palalayag ago so manga pangongolin

na pagawaan iran so manga kapal iran
ago pemanindeg siran ko ipameted ko kilid a ragat.
30 Melendag siran sa matanog ago nggoraok sebenar sabap reka;
penagoan iran sa bayanek a olo iran
ago petembalilid siran ko ombi.
31 Pemagopaw siran sabap reka
ago pendiditar sa sako.
Nggoraoken ka iran a di siran dii ndidiyagaw sa mapait.
32 Na sii ko kapelendag iran ago so kipembokoon iran reka
na pendiyagaan ka iran a tig iran a
'Ba aden a datar o siti a Tiro a minigaled sa ragat?
33 Igira a miniliyo so dagangan ka sii ko ragat
na ipekesoat ai o madakel a nasiyon;
nggolalan ko mala a kakawasaan ka ago so manga dagangan ka
na piyamakakewasa ngka so manga dato ko doniya.
34 Imanto na miyabengkag ka o ragat
a minigaled ko posed a ragat.
So manga dagangan ka ago so langon a gomagalebek ka
na miyada den a minitelon ka.
35 So langon o kibabaling sa kilid a ragat
na mabebengang ko miyasowasowa a ka.
Tanto a miyanga alek so manga dato iran
na maiilay ko paras iran so kalek iran.
36 So manga padagang sii ko manga nasiyon
na di reka dii makapangelengkeleng,
ka miyakatalingoma ka den ko piyakalekelek a kaposan ka,
na miyadadas ka den sa taman sa pakataman.' "
ISIKIYAL 28
So Miyaalamat a Isiksa ko Dato sa Tiro

2 “Wata o manosiya, teroa ngka ko pendatoon sa Tiro a: Giyai i pitero o Lebi a Maporo a
Tohan:
2 Sii ko katatakabor o poso o ka na pitero o ka a 'Saken na tohan,

na moontod ako ko korsi o tohan sii ko look o ragat.'
Ogaid na matag ka manosiya a kena a ba Tohan
apiya pen pipikiren ka a datar ka sa kaongangen o Tohan.
3 Aya katao ngka on na maongangen ka a di si Daniyal
a da den a ba pagenes a ba reka mapegma.
4 So ongangen ka ago sabot na minikowa ngka sa kakawasaan
na miyakatimo ka sa bolawan ago pirak sii ko petegoan ka sa tamok.
5 Nggolalan ko kapasang ka i kandagang
na piyakala a ka so manga kakawasaan ka
na dii itekabor o poso o ka so kakawasaan ka.
6 “Kagiya ka maoto na giyai i kabasa o Lebi a Maporo a Tohan:
"Kagiya pipikiren ka a maongangen ka

a datar sa kaongangen o Tohan
7 Na pekigobat aken seka ko manga mananangga
a so lebi a marangit ko manga nasiyon;
mbindasen iran so manga pedang iran
sa kambinasaa iran ko kataid ka ago ongangen,
na mbatalan iran so kakasi ngka.
8 Pagologen ka iran ko galebo
na petay ka ko karomasayan a kapatay
sii sa posed a ragat.
9 Na ba ngka pen mapetero a 'tohan ako,'
sii ko danga o siran oto a pekapatay reka?
Matag ka baden manosiya a kena a ba tohan
sii ko kapaar o mbono reka!
10 Petay ka a datar o kapir
sii sa lima o manga mananangga, a tig o Lebi a Maporo a Tohan."
So Kiyaroseng o Dato sa Tiro

11 Na pitero raken pen o Allah a
12 “Wata o manosiya, mbokoon ka so dato sa Tiro na teroa ngka on a: Giyai i pitero o
Lebi a Maporo a Tohan:
"Gowani na ladiyawan ka ko katatarotop

a mapepeno a ongangen ago madidiyangka so kataid ka.
13 Komiyaden ka sa Iden a so sapadan o Tohan;
Inipendara reka so oman i pitibarangan a mala i arga a montiya,
a so robi, topas, diyamanti, birilo,
oniksa, haspiro, paramata, karbongko ago ismiralda.
Kiyasokodan siran ko manga pamalagen a bolawan
a mapiya a kiyapenday ron.
Sii ko gawii a kiyaadena reka na pitiyagar ai para reka.
14 Seka i kiyaidinan a malaikat a initoro aken a dii nggordiya.
Sisii ka ko soti a palaw o Tohan;
milakalakaw ka sii ko look o pekedeg a manga ator.
15 Da a kidaway ko manga olaola ngka
ipoon ko gawii a kiyaadena reka
taman ko kiyatooni reka sa kadostaan.
16 Sabap ko mala a di ngka dii kandagang
na miyapeno ka a kapangarasi,na miyakandosa ka.
Sabap san na inibowang aken seka a poon ko palaw o Tohan,
na biyogaw aken seka, hey nggogordiya a malaikat,
a poon ko darpa a ka sii ko pekedeg a manga ator.
17 Miyangimporoan so poso o ka sabap ko kataid ka,
na biyatalan ka so ongangen ka
sii ko kapepekibantog ka.
Sabap roo na inilebad aken seka sa baba roo sa doniya;
siyawaan ko seka ko hadapan o manga dato
kaan ka iran katentengi,
18 Sabap ko kadakel o manga dosa ngka
ago so kapanalimbot a kandagang ka
na piresikan ka manga soti a darpa a ka.
Sabap san na piyakaliyowan ko seka sa apoy;
na inepos ka niyan,
na piyakapagombiyombi aken seka ko lopa
ko kamamasaan o langon a pepekailay reka.
19 Na so langon o manga nasiyon a miyakakilala reka
na miyabengang ko miyasowasowa a ka.
Miyakaoma den so piyakalekelek a kaposan ka
na miyadadas ka den sa dayon sa dayon."
So Miyaalamat a Isiksa sa Sidon

21 “Wata o manosiya, sangor ka ko siti a Sidon na alamata ngka so isiksa on,
22 Na teroa ngka on a: Giyai i lalag o Lebi a Maporo a Tohan:
"Peridoon ko seka, hey Sidon,

na kebantogan ako sabap ko ikidia ko reka.
Amay ka danegen ko seka
ago pekiilay aken so kasosoti aken a nggolalan sii
na ketokawan o manga taw a saken so Allah.
23 Pagowitan ko seka sa morala
ago pemakidanawan ko a rogo so manga lalan ka.
Kapembalabalaan ka o katidawa
na sii reka penga ooteng so piyamamono a pedang.
Samaoto na ketokawan o langon a taw a saken so Allah.
Perakmatan a Israil
24 “Kedaan den a Israil sa manga siringan a di on dii sodi a pepekasakit on a lagid o

baleteken a manga sorok. Na ketokawan iran a saken so Lebi a Maporo a Tohan.
25 “Giyai i pitero o Lebi a Maporo a Tohan: Timoon ko so manga taw sa Israil a poon ko
mbarambarang a inged a ron siran miyamangiparak, na pekiilay aken ko langon o manga
nasiyon so kasosoti aken a nggolalan manga pagtaw aken. Na roo siran den pekabaling
ko inged iran, a so lopa a inibegay aken ko oripen aken a si Yakob.
26 Mbaling siran roo sa da a ba kiran pekabinasa, na pemangon siran sa manga walay ago
pemamolaan sa manga asinda a obas. Makapeginetaw siran a makasasarig amay ka
madaneg aken so langon o manga siringan iran a misosodi kiran. Na giyoto a ketokawan
iran a saken so Allah a Tohan iran.
ISIKIYAL 29
So Miyaalamat a Isiksa sa Misir
Sii ko ikasapolo ago dowa gawii ko ikasapolo olan sii ko ikasapolo ragon ko kabibiyag
ami na pitero raken o Allah a
2 “Sangor ka sa Misir na alamata ngka so isiksa ko Piraon a dato sa Misir ago so dalem a
inged a Misir.
3 Teroa ngka on a: Giyai i lalag o Lebi a Maporo a Tohan:
"Peridoon ko seka, hey Piraon a dato sa Misir,

a so mala a bowaya a komakaden sii ko manga lawasaig.
Pitero o ka a 'Rek aken so Lawasaig a Nail;
pimbaalan aken ai para sa ginawa ko.'
4 Ogaid na penagoan aken sa manga banowit so baka a ka
na so manga seda ko lawasaig ka na ipeneket aken sii ko manga nap ka.
Na toyoken ko seka poon ko manga lawasaig ka
a midedeket ko manga nap ka so langon a seda ko manga lawasaig ka.
5 Ipelebad aken seka sii ko disirto
ago so langon o manga seda a poon ko manga lawasaig ka.
Keolog ka sii ko lopa ko pangomaan
na di ka on den kowaan aya pen o ba ka milebeng,
ka inibegay aken seka a pangenengken
o manga binatang ago so manga papanok.
6 Sa masa oto na ketokawan o manga kibabaling sa Misir a saken so Allah."
Na pitero o Allah a "Isako makitabang reka so manga taw sa Israil na datar ka o teken a
balagen.
7 Sii ko kiyakapeti ran reka na miyaopak ka na minibowar ka ko irek iran, na sii ko
kinidekenen iran reka na miyapotol ka na miyalood so manga likod iran.
8 Kagiya ka maoto na giyai i lalag o Lebi a Maporo a Tohan: pekigobat aken seka ko
manga sondaro na pemonoon iran a pedang so manga taw ngka ago so manga ayam ka.
9 Kelaslas so inged a Misir ago pembaloy a lagid o disirto, na ketokawan o manga
Imisiren a saken so Allah.
"Na sabap sa pitero o ka a 'Rek aken so Lawasaig a Nail; pimbaalan aken ai,'
10 Na peridoon ko seka ago so manga lawasaig ka, na mbinasaan ko sa tarotop so inged a
Misir ipoon sa siti a Migdol sa pagotaraan taman sa siti a Aswan sa pagabagatan na
manaros roo ko temanaan a Itiyopiya.
11 Da den a taw o di na ayam a ba on pagokit, na samaoto na da a pekakaden on sii ko
soled o pat polo ragon.
12 Mbalowin ko a Misir a aya tanto a miyalaslas a inged ko langon o manga nasiyon.
Kebaloy so manga siti niyan a miyanga bibinasa sii ko soled o pat polo ragon, a aya tanto
a miyanga bibinasa a di so apiya antonaa ped a siti. Iperak aken so manga Imisiren sii ko
manga nasiyon ago pakapembelabelagen ko siran sii ko manga inged.
13 “Ogaid na giyai i lalag o Lebi a Maporo a Tohan: Amay ka mapopos so pat polo ragon
na timoon ko so manga Imisiren a poon ko manga nasiyon a ron siran miyamangiparak.
14 Pekaasalen ko so kamapiyaan iran ago pekakasowin ko siran sa Patros sii ko
pagabagatan a Misir a so lopa o manga apo iran. Na roo siran pembaloy a mababa a
ndatoan,
15 A lebi a mababa ko langon o manga ndatoan, na di niyan den ipengimporoan peroman
a ginawa niyan ko ped a manga nasiyon. Mbalowin ko siran a malobay kaan iran di den
kapendatoi so ped a manga nasiyon.
16 Na giya Misir na di den kesarigan o manga taw sa Israil sa kapakipenabang iran on, ka
so miyasowasowa a Misir na pekitadem iran ko kadostaan iran sii ko kapesenai ran on.
Na giyoto a ketokawan o manga Israil a saken so Lebi a Maporo a Tohan."
Tebanen i Nibokadnisar a Misir
17 Sii ko paganay a gawii ko paganay a olanolan ko ikadowa polo ago pito ragon ko
kabibiyag ami na pitero raken o Allah a
18 “Wata o Manosiya, si Nibokadnisar a dato sa Babilon na piyakagobat iyan so manga
sondaro niyan sa siti a Tiro, na sabap ko karegen o kiyapakitidawa iran on na piyanga
oopawan so oman i isa kiran ago piyanga oopisan so oman i manga waga iran. Ogaid na
da den a miyanggona i Nibokadnisar ago so manga sondaro niyan ko langon a galebek
iran roo.
19 Kagia ka maoto na giyai i lalag o Lebi a Maporo a Tohan: peladen ko ki Nibokadnisar
a dato sa Babilon so inged a Misir. Petebanan iyan ai na pagagaon iyan ago pagawidan so
langon a tamok ago kakawasaan sa Misir a aya niyan isokay ko manga sondaro niyan.
20 Piyalad aken rekaniyan a Misir a aya ko ron sokay ko galebek iyan ko kiyatabana iran
sa Tiro ka kagiya pinggolaola iran ai para raken, a tig o Lebi a Maporo a Tohan.
21 “Amay ka manggolaola ini na mbalowin ko so manga taw sa Israil a mabager, na

pakapeteroon ko seka peroman, hey Isikiyal, sii kiran kaan iran makilala a saken so
Allah."
ISIKIYAL 30
Kandidiyagaw sabap sa Misir

2 “Wata o manosiya, alamat ka na teroa ngka a: Giyai i pitero o Lebi a Maporo a Tohan:
"Ndidiyagaw kano sabap ko gawii!

3 Ka miyakasopeg so gawii,
marani den so gawii o Allah,
a so gawii o manga gabon
ago masa a kakemoralai ko manga nasiyon.
4 Nggobaten a Misir,
na tanto a kerasay a Itiyopiya.
Amay ka manga ooteng so piyamamono sii sa Misir
na pagagaon so kakawasaan iyan
ago penggegebaan so manga onayan iyan.
5 So kiyasokayan a manga sondaro a poon sa Itiyopiya, Libiya, Lidiya, Arabiya ago so

inged a Israil na pemonoon a pedang a miperakes ko manga Imisiren.
6 “Giyai i pitero o Allah:
"Tebanen mambo so manga abanga a Misir

na so ipepangandag a bager iyan na kepos.
Ipoon sa Migdol taman sa Sowan
na pematay siran ko katidawa,
7 “Kebaloy a Misir a aya tanto a miyalaslas

ko langon o manga nasiyon sii sa doniya,
na ngganatan so manga siti niyan
a miyanga bibinasa sa tarotop.
8 Na ketokawan o manga Imisiren a saken so Allah
amay ka tenteman ko a Misir
ago miyapamono so langon o manga pelinding on.
9 “Sii sangkoto a gawii na sogoon aken so manga taw a kipageeda sa kapal kaan iran
mapangangalek so somasana a manga taw sa Itiyopiya. Na tanto siran a penga aalek sii
ko gawii a kambinasaa sa Misir, ka mataan den a kitalingoma ini.
"Pageposen ko den so madakel a taw sa Misir ago so kakawasaan iran

a nggolalan ko kapaar i Nibokadnisar a dato sa Babilon.
11 Sekaniyan ago so manga sondaro niyan
a so lebi a marangit ko manga nasiyon
na pagowiten ko siran ko inged sa kambinasaa iran on.
Makipetidawa siran sa Misir
na kepeno so lopa a miyanga bobono a manga Imisiren.
12 Pekamaraan ko so Lawasaig a Nail
ago peladen ko a Misir ko kapaar o manga rarata a taw;
na pekilaslas aken ko manga mananangga
so inged ago so langon a ndodon.
Saken, a so Allah, i mitero on.
"Mbinasaan ko so manga barahala sa Misir

ago pagilangen aken so manga katohanan sii sa Mimpis.
Da den a ba pendatoon a kelamba sa Misir
na pagowitan ko sa kalek so dalem a inged.
14 Pelaslasen ko a Patros
ago totodan aken a Sowan,
na ndanegen ko a Tibis.
15 Pakapemborngaten ko so gani aken sa Pilosiyom
a so lebi a mabager a kota sa Misir,
na polangen ko so madakel a taw sa Tibis.
16 Tenteman ko a Misir;
tanto a masakit a kitana sa Pilosiyom;
ketempag so manga pangeleban a Tibis
na da a rintas a kapepakakaleki sa Mimpis.
17 Pemonoon a pedang so manga kangodaan sa Hiliyopolis ago sa Babastis
ago pemiyagen so ped a kibabaling sangkai a manga siti.
18 Pekaliboteng so kadaondaw roo sa Taphanis
amay ka ropeten ko so kapaar a Misir,
na kepos so ipepangandag iyan a bager iyan.
Kesapengan sekaniyan a manga gabon
na penga bibiyag so kibabaling ko pagingedingedan iyan.
19 Giyanan i indaneg aken sa Misir
na ketokawan iran a saken so Allah."
Lipo so Barokan o Dato sa Misir
20 Sii ko ikapito gawii ko paganay a olanolan ko ikasapolo ago isa ragon ko kabibiyag
ami na pitero raken o Allah a
21 “Wata o manosiya, lipo aken so barokan o Piraon a dato sa Misir. Da den ai mababed
kaan makapiya aya pen o ba mababed ko indorog on sa kapakabager iyan ago makakapet
sa pedang.
22 Kagiya ka maoto na peridoon ko so Piraon a dato sa Misir. Pelepoon ko so manga
barokan iyan a ndatar so mabager a barokan iyan a rakes o miyalepo den, na pekipelos
aken ko lima niyan so pedang iyan.
23 Iperak aken so manga Imisiren sii ko manga nasiyon na pakapembelabelagen ko siran
ko manga inged.
24 Pekabageren ko so manga barokan o dato sa Babilon na pekikapetan ko rekaniyan so
pedang aken. Ogaid na pelepoon ko so manga barokan o Piraon a dato sa Misir, na
makaperego sekaniyan ko hadapan o dato sa Babilon a datar o taw a magaan iyan den
ipetay so pali iyan.
25 Oway, pekabageren ko so manga barokan o dato sa Babilon, ogaid na ketayoton baden
so manga barokan o Piraon. Na ketokawan o manga Imisiren a saken so Allah amay ka
peladen ko so pedang aken ko dato sa Babilon na ikolat iyan ai a itena iyan sa Misir.
26 Iperak aken so manga Imisiren sii ko manga nasiyon, na ketokawan iran a saken so
Allah"
ISIKIYAL 31
Iniibarat a Misir ko Kayo a Sidro
Sii ko paganay a gawii ko ikatelo olan ko ikasapolo ago isa ragon ko kabibiyag ami na
pitero raken o Allah a
2 “Wata o manosiya, teroa ngka ko Piraon a dato sa Misir ago so langon o manga pagtaw
niyan a:
"Antonaa i keibaratan ko reka sii ko kala a ka?

3 Ipagibarat aken seka sa Asiriya
a lagid gowani o kayo a sidro sii sa Libanon
a manga pipiya i paras i manga sapak a pepekatanong sa kalasan;
tanto ini a maporo
na somiyoko ko manga gabon so poro iyan.
4 Sabap ko manga ig ko didalem a lopa
na miyakarimpoong ago mito sa maporo.
Pekibowak so manga ig
sii ko darpa a ron ai meeto,
na petoga so manga ig ko langon o manga kayo ko kalasan.
5 Makaoombaw angkai a kayo
ko langon o manga kayo sa kalasan;
manga titiwaro ago manga atas so manga sapak iyan
sabap ko madakel a manga ig a sisii ko bekaw niyan.
6 So langon o manga papanok
na dii sesalag ko manga sapak iyan,
na so langon o manga iila a binatang
na dii mbabawata sii ko atag o manga sapak iyan.
So langon o manga ala a nasiyon
na roo komakaden ko kasisirongan iyan.
7 Mabager ini ago mapiya i paras a kayo
a maririmpoong so manga sapak iyan,
ka mito sa didalem so manga bekaw niyan
ko madakel a manga ig.
8 Apiya so manga sidro ko sapadan o Tohan
na di on kiabay.
Da a kayo a goo a ba datar iyan sa manga sapak
aya pen o ba aden a kayo a platano
a ba niyan kedatar sa kalolombay.
Da den a kayo ko sapadan o Tohan
a ba pekarimbang ko kataid iyan.
9 Biyaloy aken a mapiya i paras
a madakel i manga sapak,
na ipekesigi ini o langon o manga kayo sa Iden,
a so sapadan o Tohan.
10 “Na giyai i pitero o Lebi a Maporo a Tohan: Sii ko kapegto iyan sa tanto a maporo a
somiyoko so poro iyan ko manga gabon na mimbaloy ai a dii mangimporoan ago
tetakabor.
11 Sabap roo na tiyalikodan aken angkai a kayo na peladen ko ko mala i kapaar a nasiyon,
na aya ikidia iran on na so mapapatot ko kamarataan iyan.
12 So manga rait a poon ko lebi a mawaraw a nasiyon na petaan iran ai ago pagawaan
iran. So manga sapak iyan na penga roropet ago pemangikayamber sii ko manga palaw
ko inged ago sii ko langon o manga balintad on ago manga baogan. Na so langon o
manga taw sa doniya a somisirong on na pelagoyan iran sekaniyan.
13 Ndapo so pitibarangan a manga papanok sii ko miyaoteng a kayo, na pelowak so
manga iila a binatang ko manga sapak iyan.
14 Ipoon imanto na da den a ped a kayo sii ko kilid o lawasaig a ba pekato sa maporo a
soko ko manga gabon. Da den a ped a kayo a apiya i kapepakaigi ron a ba madatar iyan
sa kaporo. Langon siran kiarong sa kapatay a datar o pepatay a manga manosiya a kitapi
ko siran oto a pepanga oolog ko galebo sii ko didalem o lopa."
15 “Giyai i pitero o Lebi a Maporo a Tohan: Sii ko gawii a pagaloganen so kayo ko darpa
o miyamatay na pekipemboko aken sekaniyan ko pitidaleman; peliten aken so manga
lawasaig on, na pagerenen ko so madakel a manga ig on. Sabap ko kiyapatay o kayo na
pagowitan ko sa maliboteng so manga palaw sa Libanon, na kelayon so langon o manga
kayo ko kalasan.
16 Amay ka ologen aken ai ko darpa o miyamatay a kitapi ko siran oto a pagaloganen ko
galebo na so dagedeb o kakeolog iyan na itebeker ko langon o manga nasiyon. Na so
langon o manga kayo sa Idin, a so lebi a piyamagaraw ago manga pipiya a kayo sa
Libanon a mapiya a kapepakaigi ron a miyakasong ko pitidaleman na iteyo kiran so
kandembeng iyan.
17 So mambo so manga abanga iyan ko manga nasiyon a komakaden ko kasisirongan
iyan na miperakes on a penga oolog ko kaden o miyamatay a kitapi ko miyapamono a
pedang.
18 “So kayo na aya den so dato sa Misir ago so langon o manga pagtaw niyan. Da den a
kayo sa Idin a ba reka pekarimbang sa kala i kapaar ago bantogan. Apiya pen oto na
pekadembengen ka mambo ko galebo ko pitidaleman ko lopa a kitapi ko manga kayo sa
Idin. Na pekaiga ka roo a kirakes ko manga kapir a miyapamono a pedang.
ISIKIYAL 32
Iniibarat so dato sa Misir ko Bowaya
Sii ko paganay a gawii ko ikasapolo ago dowa olan ko ikasapolo ago dowa ragon ko
kabibiyag ami na pitero raken o Allah a
2 “Wata o manosiya, ndidiyagaw ka sabap ko Piraon a dato sa Misir na teroa ngka on a:
"Pipikiren ka a datar ka o arimaw sii ko manga nasiyon,

ogaid na lagid ka o bowaya ko ig
a dii tereb sii ko manga lawasaig ka
a pekolikaon o manga ai ngka so manga ig
na pekelebogan ka ini.
3 “Na giyai i pitero o Lebi a Maporo a Tohan:
"Amay ka malimod so madakel a nasiyon

na poketan ko seka,
na toyoken ka iran ko ig.
4 Pagawaan ko seka ko kalopaan
na ipelebad aken seka ko pangomaan.
Pakidapoan ko seka ko langon o manga papanok,
ago pekaosogen ko ko sapo o ka so langon o manga iila a binatang.
5 Iperak aken so manga sapo o ka roo ko manga kapalawan
ago ipeno aken ko manga balintad so bangkay ngka.
6 Iperames aken ko manga palaw so kaperagiray ron o rogo o ka
taman sa lomapay ini ko manga baogan.
7 Amay ka polangen ko seka na sepengan aken so langit
ago pekalibotengan ko so manga bitoon on;
sepengan aken sa gabon so alongan,
na kedaan sa sindaw so olan.
8 So langon o pemanindaw ko langit
na pekalibotengan ko sabap reka;
pagowitan ko sa maliboteng so dalem a inged ka,
9 “Sosaan ko so manga poso o madakel a taw

amay ka pekibinasa aken seka sii ko manga nasiyon,
sii ko manga inged a di ngka katawan.
10 Kibengang ko madakel a taw so penggolaolaan ko reka,
na tanto a penga aalek so manga dato iran sabap reka
amay ka ikolat aken so pedang aken sii ko kamamasaan iran.
Sii ko gawii a kakeolog ka
na da a rintas o kapenanabada ko oman i isa kiran
pantag ko kaoyagoyag iran.
11 “Ka giyai i pitero o Lebi a Maporo a Tohan:
"Nggobaten ka a pedang o dato sa Babilon.

12 Pemakibono aken so langon o manga taw ngka
ko pedang o manga babager a sondaro,
a so lebi a mawaraw ko langon a nasiyon.
Pelaslasen iran so ipepagambog a Misir
na palaya den kebinasa so manga taw niyan.
13 Mbinasaan aken so langon o manga pangangayamen ka
sii ko kilid o manga ala a ig;
di den ai kesikar o manga ai a manosiya
aya pen o ba kapelapoti o manga ai o manga ayam.
14 Oriyan iyan na pekalintaden aken so manga ig ka
na pekatogaan ko a datar o lana so manga lawasaig ka,
15 Na amay ka laslasen ko so inged a Misir
na da den a kelamba ko langon taman a matatago on;
amay ka binasaan ko so langon a kibabaling on
na kekilala iran a saken so Allah.
16 “Giyai i ipelendag o manga taw a ipendiyaga iran sa Misir. Ipelendag ai o manga

babay a kibabaling ko manga nasiyon sabap sa Misir ago so langon o manga taw niyan, a
So Kaden o Miyamatay
17 Sii ko ikasapolo ago lima gawii ko paganay a olanolan ko ikasapolo ago dowa ragon
ko kabibiyag ami na pitero raken o Allah a
18 “Wata o manosiya, ndidiyagawi ngka so madakel a manga taw sa Misir ka ipelebad
siran a rakes o ped a manga ala i kapaar a manga nasiyon sii ko kaden o miyamatay a
kirakes ko siran oto a pegologen ko galebo.
19 Teroa ngka kiran a 'Hey Misir, ba ngka pipikira a mala ka i kakasi a di so manga ped?
Kena! Na, panog ka ko galebo sa kakirembang ka roo sii ko manga kapir.'
20 “Penga ooteng so manga taw sa Misir a rakes o siran oto a mapemono a pedang.
Miyabindas so pedang a matitiyagar den sa kapamonoa niyan kiran langon.
21 Roo ko kaden o miyamatay na so manga ala i kapaar a manga olowan na peteroon iran
makapantag sa Misir ago so manga abanga iyan a 'Miyanog siran sii, na pepamangiga
siran ko manga kapir a ped o miyanga bobono a pedang.'
22 “Ndodoo pen a Asiriya a malilibet o manga kobor o langon o manga sondaro niyan a
palaya siran den miyapamono a pedang.
23 Matatago so manga kobor iran ko pitidaleman ko galebo, na lomilibet so manga
sondaro niyan ko kobor iyan. Gowani na piyakaneb iran so kalek ko inged o kikaooyag,
ogaid na miyamatay siran imanto a palaya siran den miyapamono a pedang.
24 “Ndodoo mambo a Ilam a rakes o langon o manga sondaro niyan a lomilibet ko kobor
iyan. Langon siran miyanga bobono a miyapamatay a pedang. Pepakakalekan iran so
manga nasiyon ko kaooyagoyag iran pen, ogaid na miyanga oolog siran den a manga
kapir ko kaden o miyamatay. Na minitelon iran so kaya iran a rakes o siran oto a miyanga
oolog ko galebo.
25 Minimbaal a Ilam sa igaan a sisii ko miyamatay a lilibeten o manga kobor o manga
sondaro niyan. Langon siran manga kapir a piyamono a pedang. Pepakakalekan iran so
manga nasiyon sii ko kaooyagoyag iran pen, ogaid na imanto na makaiiga siran a
miyamatay a kaaawidan iran so kaya iran a ped o miyanga oolog ko galebo.
26 “Ndodoo mambo a Misik ago Tobal a lilibeten siran o manga kobor o manga sondaro
iran. Langon siran manga kapir a piyamono a pedang, ka piyakaneb iran so kalek sii ko
inged o kikaooyag.
27 Ba siran di makaiiga sii ko ped a miyanga ooteng a manga sondaro a manga kapir a
miyanga oolog ko kaden o miyamatay a minitelon iran so manga gomaan iran sa katidawa
a piyamakiolonan kiran so manga pedang iran? So indaneg ko manga dosa iran na
minitana ko manga tolan iran apiya pen tanto a ipekelek angkai a manga sondaro sii ko
inged o kikaooyag.
28 “Seka mambo, hey Piraon, na keropet ago kirembang ko manga kapir a miyapamatay a
pedang.
29 “Ndodoo pen a Idomiya a rakes o manga dato iyan ago so langon a pendatoon. Apiya
pen mala siran i kapaar gowani na inirembang siran den ko miyapamatay a pedang.
Makaiiga siran a ped o manga kapir ago so siran oto a miyanga oolog ko galebo.
30 “Ndodoo pen so langon a pendatoon a poon sa pagotaraan a rakes o langon a taw sa

Sidon. Miyaolog siran a kiyayaan a ped o miyapamono. So kala iran i kapaar na ipekelek
gowani, ogaid na makaiiga siran imanto a kaaawidan iran so kayaan iran sii ko galebo a
minitapi ko manga kapir a miyapamatay a pedang.
31 “Amay ka mailay siran o Piraon a dato sa Misir ago so langon a sondaro niyan na
teyoan sekaniyan mipantag ko langon o manga pagtaw niyan a miyapamono a pedang, a
tig o Lebi a Maporo a Tohan.
32 “Apiya pen piyakineb aken rekaniyan a kalek so inged o kikaooyag na so Piraon ago
so langon a manga pagtaw niyan na pemangirembang ko manga kapir a miyapamatay a
pedang, a tig o Lebi a Maporo a Tohan.
ISIKIYAL 33
Initoro o Tohan si Isikiyal a Sirino sa Israil

2 “Wata o manosiya, pakimbitiyarai ka ko manga bangsa ngka na teroa ngka kiran a:
Amay ka witan aken sa katidawa so inged na toro so manga taw ron sa sirino.
3 Na amay ka mailay niyan a pepekadaseg den so manga ridoay na pekaonin iyan so
bogiyong a aya niyan den kapekaiktiyara ko manga taw.
4 Na apiya antawaa i makaneg ko oni o bogiyong ago di niyan tagoon sa ginawa so
lalangan na o mabono a pedang na sekaniyan bo i kesenditan ko kiyapatay niyan.
5 Kagiya miyaneg iyan so oni o bogiyong ogaid na da niyan tagoa sa ginawa na
mipembalogo niyan so kiyapatay niyan. O piyakaiktiyar iyan a ginawa niyan na kesabet o
kowan a niyawa niyan.
6 Ogaid na o mailay o sirino so manga ridoay a pepekaantap kiran ago da niyan pakaoniya
so bogiyong sa kapakaiktiyara niyan ko manga taw na pekaoma so manga ridoay na
mbonoon iran angkoto a manga baradosa, ogaid na aya sekatan ko ko kiyapatay iran na so
sirino.
7 “Na, wata o manosiya, initoro aken seka a sirino ko manga taw sa Israil. Kagiya ka
maoto na pamakinga ngka so peteroon ko reka na teroa ngka ini a ipelalang kiran.
8 Amay ka peteroon ko ko marata a taw a 'Hey marata a taw, mataan a petay ka,' na o di
ngka sekaniyan lalangi sa katalikodi niyan ko marata a olaola niyan na petay angkoto a
marata a taw a madodosa pen, na seka i sekatan ko ko kiyapatay niyan.
9 Ogaid na o kiyalalangi ngka so baradosa sa katalikodi niyan ko olaola niyan a marata na
da niyan bo ini talikodi na matay sekaniyan a madodosa pen, ogaid na miyasabet ka a
niyawa ngka.
10 “Wata o manosiya, teroa ngka ko manga taw sa Israil a 'Aya di niyo dii teroon na
"Mipepened rekami so manga sala ami ago manga dosa mi a iperakowag rekami.
Andamanaya den i kakeoyag ami?"
11 Na teroa ngka kiran a 'Mataan ko kaooyagoyag aken, a tig o Lebi a Maporo a Tohan,
ka kena a ba aken ikasosoat so kapepatay o marata a taw. Aya kabaya aken na giya
kapegalina o baradosa ko olaola niyan ago maoyag. Panalikod kano! Panalikodi niyo so
manga rarata a olaola niyo, hey manga taw sa Israil! Ino kano pekipatay?
12 “Na, wata o manosiya, teroa ngka ko manga bangsa ngka a 'So manga oontol a manga
galebek o maontol a taw na di on pekasabet o pegongkir sekaniyan, na so kamarataan o
marata a taw na kena a ba niyan ikeoteng o talikodi niyan ai. Na o madosa so maontol a
taw na so kapagiinontolan iyan gowani na kena a ba niyan ikeoyag.
13 O teroa ko ko maontol a taw a mataan a keoyag sekaniyan na oriyan iyan na o sanai
niyan so kaontol iyan ago mbaradosa na da den a ba tedemi ko manga oontol a galebek
iyan; ipetay niyan so kamarataan a pinggolaola niyan
14 Na o teroa ko ko marata a taw a mataan a petay sekaniyan ogaid na o geneki niyan so
di niyan dii kambaradosa ago nggolaola sa matito ago ontol15 Opama ka kasowin iyan so
inisanda on ago so miyapamekew niyan ago ipaginetaw niyan so manga kokoman a
pepangoyag ago di penggolaola sa marata na mataan a keoyag sekaniyan ago di petay.
16 Da den a tedeman ko manga dosa niyan; minggolaola sekaniyan sa matito ago ontol,
na mataan a keoyag sekaniyan.
17 “Ogaid na aya dii teroon o bangsa ngka na 'Kena a ba ontol so okitokit o Kadnan.'
Ogaid na so okitokit iran i kena a ba ontol.
18 O geneki o maontol so kapagiinontolan iyan ago mbaradosa den na ipetay niyan ai.
19 Ogaid na o geneki o marata a taw so di niyan dii kambaradosa ago nggolaola sa ontol
ago matito na ikeoyag iyan ai.
20 Ogaid na di niyo dii teroon, hey manga Israil, a 'Kena a ba ontol so okitokit o Kadnan.'
Na ikokom aken ko oman i isa rekano so mapapatot ko okitokit iyan."
21 Sii ko ikalima gawii ko ikasapolo olan ko ikasapolo ago dowa ragon ko kabibiyag ami
na miyakaoma raken so sakataw a mama a miyakapalagoy a poon sa Yarosalim na pitero
iyan raken a "Tiyaban so siti!"
22 Sii ko kagagawii ko da niyan raken pen kapakaoma na siko ako o lima o Allah na
pikas iyan so dila aken kaan mada so kapepengaw aken ago an aken mimbitiyarai so
mama ko kapakaoma niyan.
23 Samaoto na minisampay raken so katero o Allah a:

24 Wata o manosiya, so manga taw a kibabaling ko kiyabinasaan a manga siti sa Israil na
lalayon iran dii teroon a 'So Ibraham na sasakataw a mama; apiya pen oto na miyatangan
iyan so dalem a inged. Ogaid na madakel tano den imanto, na mataan a imbegay rektano
so lopa a kawali tano.'
25 Kagiya ka maoto na teroa ngka kiran a "Giyai i pitero o Lebi a Maporo a Tohan: Ba
aya kapipikira niyo ron na ketangan iyo so lopa apiya pen pekan kano sa sapo a aden pen
a rogo on ago pepamanimba kano sa manga barahala ago pepamamono kano sa manga
taw?
26 Sasanaan iyo so manga pedang iyo, di kano dii nggolaola sa piyakayaya na dii sinaan o
oman i isa rekano so karoma o siringan iyan, na ketangan iyo bes so lopa?
27 “Teroa ngka kiran a: Giyai i pitero o Lebi a Maporo a Tohan: Mataan ko kaooyagoyag
aken ka so siran oto a kibabaling ko kiyabinasaan a manga siti na pemonoon a pedang, na
so kibabaling ko manga pangomaan na pekipangangan aken ko manga binatang, na siran
oto a matatago ko manga kota ago manga liyang na pematay a paniyakit.
28 Mbalowin ko so inged a ilang baden a disirto, na kepos so ipepagambog iran a kapaar.
So manga kapalawan sa Israil na pembaloy a mitataog a kaden a da den a ba on magokit
29 Na giyoto a ketokawan iran a saken so Allah amay ka pagilangen aken so inged sabap
ko langon o piyakasisingay a olaola iran."
30 Na pitero raken o Allah a "Wata o manosiya, so bangsa ngka a manga taw na

pepemagantaan ka iran sii ko obay o manga pangeleban o siti ago sii ko pintoan o manga
walay iran a tig o oman i isa ko ped iyan a 'Itano roo! Pemakinegen tano so nabi a
mapetero iyan rektano so katero a miyakapoon ko Allah!'
31 Na pepamanong siran reka a datar o kalilid a pesowaan iran, na pemangontod siran ko
hadapan ka sa kapamakinega iran ko manga katero o ka, ogaid na di iran ai ipenggolalan.
Pepeyagen o manga ngari iran so kapekebabayai ran raken, ogaid na aya masisingayo o
poso iran na kena a ba ontol a kapamantiyari.
32 Sii kiran na datar ka bo o dii magidaida ko kababaya a mapiya i sowara ago mapasang
i kambobonibonian. Pekeneg iran so manga katero o ka ogaid na di iran ipenggolalan.
33 Ogaid na amay ka itoman langon so miyaalamat ka ka mataan den a itoman na
ketokawan iran a kiyatagoan siran bes sa nabi."
ISIKIYAL 34
So manga Pananagikor sa Israil
"Na pitero raken o Allah a:

2 “Wata o manosiya, alamat ka sa isiksa ko manga pananagikor, a so manga olowan sa
Israil. Teroa ngka kiran a: Giyai i pitero o Lebi a Maporo a Tohan: Kemorkaan kano a
manga pananagikor sa Israil a aya bo a pekibiren iyo na giya ginawa niyo! Ba di aya
atastanggongan iyo na so kapetegikora niyo ko manga bilibili?
3 Pesombaliin iyo so lebi a mapiya ko manga bilibili na peken iyo so kalemboan on ago
ndiditar kano sa pimbaalan a bombol iran, ogaid na kena a ba niyo siran pepakakana!
4 Da niyo pamakabagera so manga lolobay ago da niyo pamalongi so pepanga sasakit aya
pen o ba niyo pamabeda so piyanga papalian kiran. Da niyo pamalingen so miyanga
dadadag aya pen o ba niyo mbabanoga so miyanga ada, ka kapangarasi ago masarangit a
kiyandatoi niyo kiran.
5 Na kagiya da a ba tomatagikor ko manga bilibili na miniparak siran, na mimbaloy siran
a penganganen o manga iila a binatang.
6 Miyakambelabelag so manga bilibili aken ko manga kapalawan ago sii ko oman i
maporo a bobongan. Miniparak siran ko dalem o doniya, ogaid na da den a ba kiran
mimbabanog.
7 “Kagiya ka maoto, hey manga pananagikor, na pakinega niyo so katero o Allah:

8 Mataan ko kaooyagoyag aken, a tig o Lebi a Maporo a Tohan, ka sabap sa da a
tomatagikor ko manga bilibili aken na miyapamatay siran ago piyangangan o oman i
maila a binatang. Na da mbabanoga o manga pananagikor aken ko manga bilibili aken,
ka kikibiren iran baden a manga ginawa iran a kena a ba so talon aken.
9 Kagiya ka maoto, manga pananagikor, na pakinega niyo so katero o Allah.
10 Giyai i pitero o Lebi a Maporo a Tohan: Peridoon ko sekano a manga pananagikor na
pakipembalogo aken rekano so miyasowasowa o manga bilibili aken. Pekigenekan ko
rekano so kapetegikora niyo ko talon kaan iyo di den mapekakan a manga ginawa niyo.
Pagagaon ko so manga bilibili aken ko manga ngari iyo kaan di niyo siran den kekan.
So Mapiya a Tomatagikor
11 “Ka giyai i pitero o Lebi a Maporo a Tohan: Saken den i pembabanog ko manga
bilibili aken ago kibiren ko siran
12 A datar o kapekibira o pananagikor ko manga bilibili niyan a miniparak a miyanga
titimo den. Kowaan ko siran a poon ko langon o manga darpa a ron siran miniparak sii
sangkoto a domadatem ago maliboteng a gawii.
13 Pengowaan ko siran a poon ko manga nasiyon, na timoon ko ago pagowiten ko siran
ko kawali iran a lopa. Pakipenateban ko kiran so manga palaw sa Israil sii ko obay o
manga lawasaig ago sii ko langon o pagingedingedan ko inged.
14 Pemakaken aken siran ko manga lombay a pananateba sii ko manga poporo a palaw sa
Israil. Roo siran pepekaiga sii ko manga pipiya a darpa na pepekakan siran ko manga
lombay a pananateba sii ko manga kapalawan sa Israil.
15 Giya den a ginawa ko i tegikor ko manga bilibili aken, na pemakaigaan aken siran a
lomilintad, a tig o Lebi a Maporo a Tohan.
16 “Pembabanogen ko so miyada kiran na imbaling aken so miyanga dadadag.

Pamabeden ko so kikapapalian na pemakabageren ko so manga lolobay, ogaid na so
manga kaolit ago so manga babager na mbinasaan ko. Tegikoren ko so talon ko kaontol.
17 “Na makapantag rekano a talon aken, na giyai i pitero o Lebi a Maporo a Tohan:
Kokomen ko so oman i isa rekano na isibay aken so manga pipiya ko manga rarata, so
manga bilibili ko manga kambing.
18 Ba niyo di kesoaten so kapepekapanateb iyo ko lebi a mapiya a pananateba? Ba
kailangan pen a pelomegen iyo so lamba a manga pananateba? Ba niyo di kesoaten so
kapeginoma iyo ko malingaw a ig? Ba kailangan pen a pelebogan iyo so lamba on?
19 Aya bo a miyalamba a kapenateban o talon aken na so miyalomeg iyo, na aya bo a
keinoman iran na so ig a libog iyo a ai.
20 “Kagiya ka maoto na giyai i pitero o Lebi a Maporo a Tohan sii rekano:
Pakapesibayaan so kaolit a manga bilibili ago so manga pagti.
21 Ka sekano a manga kaolit na ipesomag iyo a waga ago pendesengen iyo ago
pesidongen so langon o manga lolobay a bilibili taman sa midendeg iyo siran roo sa
mawatan.
22 Sabap roo na penabangan ko so manga bilibili aken na di siran den pengarasiyan ago
mbinasaan. Kokomen aken so oman i isa kiran na pakapesibayaan ko so manga pipiya
ago so manga rarata.
23 Na pakipegolowanan ko siran sa isa bo a pananagikor a so oripen aken a si Daod.
Kibiren iyan siran, na pembaloy sekaniyan a pananagikor iran.
24 Saken, a so Allah, i pembaloy a Tohan iran, na so oripen aken a Daod i makapendato
kiran. Saken a so Allah i mitero sii.
25 “Magembaal ako sa kapasadan mipantag kiran a pembegay kiran sa kalilintad. Na

pemakaawaan ko so manga iila a binatang ko inged kaan makakaden so manga pagtaw
aken ko mitataog a kaden ago pepekatorog ko manga kalasan sa da a ba kiran pekabinasa
26 Perakmatan ko siran ago so manga darpa a makalilibet ko soti a bobongan aken. Na
pepakaoranen aken ko mosim a pangoran, na pepekarakmat kiran angkai a oran.
27 Pemangonga so manga kayo na pagodaren so lopa sa madakel a manga pereperan, na
makapeginetaw siran a malilinding sii ko inged iran. Amay ka miyapotol aken so manga
potaw ko kokoong iran ago miyapokas aken siran ko lima o pepangongoripen kiran na
ketokawan iran a saken so Allah.
28 Di siran den petebanan o ped a manga nasiyon aya pen o ba siran mapangangan o
manga iila a binatang. Makapeginetaw siran a malilinding na da den a ba kiran
makapengangalek.
29 Mbegan siran sa lopa a kababantogan so kapegodara on, na di siran den keoma a kaor
aya pen o ba siran masodi o ped a manga nasiyon.
30 Samaoto na ketokawan iran den a saken, a so Allah a Tohan iran, na mipageepeda
iran, na siran, a so manga taw sa Israil, na aya manga pagtaw aken, a tig o Lebi a Maporo
a Tohan.
31 Sekano a manga taw na aya ko talon a manga bilibili a pepanagikoren aken, na saken i
Tohan iyo, a tig o Lebi a Maporo a Tohan."
ISIKIYAL 35
So Miyaalamat a Isiksa sa Idomiya

2 “Wata o manosiya, sangor ka sa Palaw a Sair na alamata ngka so isiksa ko manga taw
ron.
3 Teroa ngka a: Giyai i pitero o Lebi a Maporo a Tohan: Peridoon ko seka, hey Palaw a
Sair, na mbeteren ko a lima ko sii reka na mbalowin ko seka a miyalaslas sa tarotop.
4 Nggebaan ko so manga siti ngka na pembaloy ka a mitataog a kaden.
5 Andang den so kariridoa ngka ko manga taw sa Israil na piyalad ka siran ko
kapepamonoa kiran a pedang sii ko masa a kamomoralai kiran, sii ko a masa a ketamanan
so kapendanega kiran. so kapendanega kiran.
6 Kagiya ka maoto na mataan ko kaooyagoyag aken, a tig o Lebi a Maporo a Tohan, ka
peladen ko seka ko kapamono na selobaan ka o kapamono; kagiya kena a ba ngka
pekegowaden so kapamono na selobaan ka o kapamono.
7 Mbalowin ko so Palaw a Sair a ilang baden a mitataog a kaden, na potolen ko so
pepekaokit on ago so pekesoy ron somong.
8 Penoon ko a miyamatay so manga kapalawan ka; so siran oto a pemonoon a pedang na
penga ooteng ko manga bobongan ka ago sii ko manga balintad ka ago sii ko manga
baogan.
9 Mbalowin ko seka a mitataog a kaden sa taman sa pakataman, na di den kebalingan so
pagingedingedan ka. Sa masa oto na ketokawan iyo a saken so Allah.
10 “Pitero o ka a 'Giya Israil ago giya Yodah ago so manga inged on na rek aken na
ketangan aken,' apiya pen ndodon ako, a so Allah.
11 Sabap roo, na mataan ko kaooyaoyag aken a so Lebi a Maporo a Tohan, ka imbadal
aken reka so mapapatot ko rarangit ka ago so kariit a ininggolalan ka ko kipekegowaden
ka ko manga pagtaw aken. Na pekitokawan aken kiran a ginawa ko amay ka idaneg aken
reka so inikidia ngka kiran.
12 Samaoto na ketokawan ka a saken, a so Allah, na miyaneg aken bes so langon a
ipegitowito o ka ko manga palaw sa Israil. Ka pitero o ka a 'Miyalaslas siran den, na
miyapalad siran raken den a pelameden ko!'
13 Sii ko kiyateroa ngka sii na piyagambogan ako ngka na madakel a miyatero o ka a
marata makapantag raken, na miyaneg aken ai.
14 “Na giyai i pitero o Lebi a Maporo a Tohan: Mababaya so dalem a doniya amay ka
pelaslasen ko seka.
15 Miyababaya ka ko kiyalaslasa ko kawali o manga taw sa Israil na datar anan mambo a
ikidia ko reka. Kebaloy ka a mitataog a kaden, hey Palaw a Sair ago so dalem a inged a
Idomiya! Na giyoto a ketokawan o langon a taw a saken so Allah."
ISIKIYAL 36
So Kaperakmati ko manga Palaw sa Israil
Na pitero o Allah a "Wata o manosiya, alamat ka makapantag ko manga palaw sa Israil na

teroa ngka a: Hey manga palaw sa Israil, pamakinega niyo so katero o Allah!
2 Giyai i pitero o Lebi a Maporo a Tohan: Piyagongatongat kano o manga ridoay niyo a
tig iran a 'Na, apiya so andang a manga poporo a darpa na miyakewali ami.'
3 Kagiya ka maoto, wata o manosiya, na alamat ka na teroa ngka ko manga palaw sa Israil
a: Siyondolan kano o manga ridoay niyo ko mbalabala rekano na inagaw kano iran, na
matatangan kano imanto o ped a manga nasiyon. Pepegongatongaten kano ago
pepamagantaan o manga taw.
4 Kagiya ka maoto na pamakinega niyo so pitero o Lebi a Maporo a Tohan ko manga
palaw ago manga bobongan, so manga lawasaig ago manga balintad, ago so miyanga
bibinasa a darpa ago so kiyaawaan a manga siti a pitebanan ago piyagongatongat o ped a
manga nasiyon a lomilibet rekano.
5 Ka giyai i pitero o Lebi a Maporo a Tohan: Sabap ko somosokeyaw a kapepanaod aken
na peridoon ko so ped a manga nasiyon a ba bo labaw ron so dalem a Idomiya, ka
miyaagaw iran so lopa aken sa tanto iran a kasosonor ago kasodi kaan iran matangan ago
mateban so manga pananateba on.
6 “Kagiya ka maoto na alamat ka makapantag ko inged a Israil na teroa ngka ko manga
palaw ron ago manga bobongan ago sii ko manga lawasaig ago manga balintad a: Giyai i
pitero o Lebi a Maporo a Tohan: Mitero ako sii ko kapepanaod aken a rakes o rarangit
aken sabap ko kiyarasay niyo ko di rekano dii kasodia o manga nasiyon.
7 Na giyai i pitero o Lebi a Maporo a Tohan: Inibayaw aken a lima ko na inisepa aken a
so melilibeta rekano a manga nasiyon na mapesodi mambo.
8 Ogaid na pemangetoan so manga palaw sa Israil sa marimpoong a manga kayo a
pepamangonga para rekano a manga pagtaw aken a Israil, ka di ini matey na pembabaling
kano!
9 Ka tatagoon ko sekano sa ginawa, na pagogopan ko sekano. Pendadon ago seodan so
lopa iyo.
10 Pekadakelen ko sekano a manga pagtaw aken a Israil; pekakaden kano ko manga siti
na mbangonen iyo peroman so miyanga gegeba.
11 Pakapendakelen ko so manga taw ago so manga ayam, na kebabad kano ago tanto a
pendakel. Pekakadenen ko sekano roo a datar o miyaona a kapakambebetad iyo ron, na
pakapetegompiyaan ko sekano a lawan pen gowani. Samaoto na kekilala niyo a saken so
Allah.
12 Pakapendalakaon ko sekano peroman sii ko lopa iyo, hey manga pagtaw aken a Israil.
Tenganen iyo ago mapekewali niyo so lopa, na di kano niyan den pekowaan sa manga
wata.
13 “Giyai i pitero o Lebi a Maporo a Tohan: Aya dii teroon o ped a manga nasiyon na
giya Israil na lopa a pepelamed ko manga taw ago pekowaan iyan so nasiyon iyo sa
manga wata.
14 Ogaid na ipoon imanto na di niyan den pelameden so manga taw aya pen o ba niyan
kowai so nasiyon iyo sa manga wata, a tig o Lebi a Maporo a Tohan.
15 Di den keneg o inged iyo so kapegongatongata on o ped a manga nasiyon aya pen o ba
ini sodia o manga taw, na di niyan den pekioteng so nasiyon iyo, a tig o Lebi a Maporo a
Tohan."
So Bago a Kapaginetaw a Israil

17 “Wata o manosiya, gowani ko mababaling so manga taw sa Israil ko kawali iran a lopa
na piseboan iran ai a nggolalan ko kapepaginetaw iran ago manga galebek. So manga
olaola iran na datar o karesik o babay a ndodon so basa sii ko kapekeilaya ko ron.
18 Sabap roo na piyakamborngat aken kiran so gani aken sabap ko rogo a piyagolaan iran
sii ko inged ago sabap sa piseboan iran ai a nggolalan ko manga barahala iran.
19 Iniparak aken siran ko ped a manga nasiyon na miyakambelabelag siran sii ko manga
inged. Inidaneg aken kiran so mapapatot ko manga olaola iran ago manga galebek.
20 Ogaid na apiya anda siran song sii ko manga nasiyon na mapepakaito iran so soti a
Ingaran aken, ka aya dii teroon o manga taw ron makapantag kiran na 'Giyai so manga
pagtaw o Allah ogaid na piyakaawa iyan siran ko lopa iyan!'
21 Ogaid na piyagongowan aken so soti a Ingaran aken a miyapakaito o manga Israil ko
manga nasiyon a kiyasongowan iran.
22 “Kagiya ka maoto na teroa ngka ko manga taw sa Israil a: Giyai i pitero o Lebi a
Maporo a Tohan: So penggolaolaan ko na kena a ba para rekano, hey manga taw sa Israil,
ka para ko soti a Ingaran aken a miyapakaito iyo ko manga nasiyon a kiyasongowan iyo.
23 Pekiilay aken so kasosoti o kababantogan a Ingaran aken a miyakaito sii ko manga
nasiyon, a so Ingaran a miyapakaito iyo kiran. Na ketokawan o manga nasiyon a saken so
Allah, a tig o Lebi a Maporo a Tohan, amay ka pakiilay aken kiran so kasosoti aken a
nggolalan rekano.
24 “Ka kowaan ko sekano ko manga nasiyon ago timoon ko sekano a poon ko langon o
manga inged na ikesoy aken sekano ko inged iyo.
25 Pirikan ko sekano sa lompiyo a ig, na kelompiyo kano. Pelompiyon ko sekano ko
langon o kiyaseboi rekano ago so langon o manga barahala niyo.
26 Mbegan ko sekano sa bago a poso ago ndalemen ko sekano sa bago a niyawa.
Kowaan ko rekano sa mategas a poso na sembian aken ai sa malemek a poso.
27 Ndalemen ko rekano so Roh aken na pakipenggolalan aken rekano so manga kokoman
aken ago pekitoman aken rekano piyapiya so manga sogoan aken.
28 Na roo kano den pekakaden ko lopa a inibegay aken ko manga apo iyo. Pembaloy
kano a manga pagtaw aken na pembaloy ako a Tohan iyo.
29 Sebeten ko sekano ko langon a pepekasebo rekano. Isogo aken a pagodaren so manga
pereperan, na di kano den peraoten a ongos.
30 Pakapekeriken ko sa onga so manga kayo niyo ago so manga pangomaan iyo kaan
kano di den keyaan sii ko manga nasiyon sabap ko taon.
31 Samaoto na ketoosan iyo so manga rarata a olaola niyo ago so manga ribat a galebek
iyo, na ikegowad iyo a ginawa niyo sabap ko manga dosa niyo ago piyakasisingay a
sowasowai.
32 Ogaid na tatanodi niyo a kena a ba ko ini penggolaolaa para rekano, a tig o Lebi a
Maporo a Tohan. Patot a maya kano ago madidiyaman sabap ko manga olaola niyo, hey
manga taw sa Israil!
33 “Giyai i pitero o Lebi a Maporo a Tohan: Sii ko gawii a pelompiyon ko sekano ko

langon o manga dosa niyo na pekibalingan ko peroman so manga siti niyo na
pemangonen peroman so miyanga bibinasa.
34 So lopa a kaaawaan den gowani na pembasokan peroman a kena den a ba ilang baden
ko kapekeilaya on o langon a pemanagad on.
35 Na mapetero iran a 'Giyangkai a lopa a da a bali niyan gowani na miyabaloy a datar o
sapadan a Iden! So miyanga gegeba a manga siti a kiyaawaan den ago minitaog na
kikokotaan imanto ago kababalingan!'
36 Oriyan iyan na so kelamba ko manga nasiyon ko melilibeta rekano na kekilala iran a
saken, a so Allah, i pembangon peroman ko miyanga gegeba a manga siti ago
pemamolaan aken so miyanga iilang a manga darpa. Ka saken, a so Allah, i mitero sii na
mataan a penggolaolaan ko.
37 “Giyai i pitero o Lebi a Maporo a Tohan: Pagamponen ko peroman so pangni o manga
taw sa Israil sa tabang, na pakadakelen ko siran a lagid sa kadakel o talon a manga
bilibili.
38 So manga siti a miyanga gegeba imanto na penga pepeno a manga taw a datar sa
kadakel o manga bilibili a dii korbanen sii sa Yarosalim sii ko miyatendo a manga pista
iran. Samaoto na ketokawan iran a saken so Allah."
ISIKIYAL 37
So Balintad a Mapepeno a Miyagango a manga Tolan
Kiyapetan ako o Allah na nggolalan ko Roh iyan na inowit ako niyan ko lembak o
balintad a mapepeno a manga tolan.
2 Piyakapagenebeneb ako niyan roo, na tanto a madakel a miyailay aken on a manga tolan
a miyamangibaraser ko lopa ko balintad, na tanto siran a miyagango.
3 Na pitero iyan raken a "Wata o manosiya, ba keoyag pen angkai a manga tolan?"
Somimbag ako a "Hey Lebi a Maporo a Tohan, seka bo i matao sii."
4 Pitero iyan raken a "Alamat ka mipantag sangkai a manga tolan, na teroa ngka kiran a
'Hey miyagango a manga tolan, pamakinega niyo so katero o Allah!'
5 Ka giyai i pitero o Lebi a Maporo a Tohan sii rekano a manga tolan: Pekasoledan ko
sekano sa napas na penga ooyag kano.
6 Tegoan ko sekano sa manga ogat ago sapo na penditaran ko sekano sa kobal.
Ndaleman ko sekano sa napas na penga ooyag kano. Mandiyadi na ketokawan iyo a
saken so Allah."
7 Sabap san na miyalamat ako ka inisogo raken. Na sii ko di aken pen dii katero na
miyakaneg ako sa garokot, na miyakakekampeta so manga tolan, a so oman i tolan ko asal
a tolan iyan.
8 Sii ko di aken sii dii kambantayi na siyapengan siran sa manga ogat ago sapo, na
liyapisan ai sa kobal, ogaid na da pen a napas iran.
9 Na pitero raken o Tohan a "Wata o manosiya, alamat ka ko ndo na teroa ngka on a

'Giyai i pitero o Lebi a Maporo a Tohan: Song ka sii, hey ndo, a poon ko pat a
pekepoonan o ndo, na samber ka sangkai a manga badan kaan siran maoyag peroman!'
10 Mandiyadi na inialamat aken so inisogo iyan raken na miyakasoled kiran so napas, na

miyaoyag siran ago miyamanindeg a tanto siran a madakel a manga sondaro.
11 Na pitero iyan raken a "Wata o manosiya, giyangkai a manga tolan na so den so langon
o manga taw sa Israil. Di iran dii teroon a 'Miyagango den so manga tolan ami na miyada
den so arap ami na da den a ba mi bobolos.'
12 Kagiya ka maoto na alamat ka na teroa ngka kiran a: Giyai i pitero o Lebi a Maporo a
Tohan: Hey manga pagtaw aken, pelekaan ko so manga kobor iyo na pekagemaon ko
sekano ron na ikesoy aken sekano ko inged a Israil.
13 Amay ka pilelekaan ko so manga kobor iyo ago piyakagemaw aken sekano ron na
ketokawan iyo, hey manga pagtaw aken, a saken so Allah.
14 Ndalemen ko rekano so Roh aken na keoyag kano, na pekakadenen ko sekano ko rek
iyo a inged. Samaoto na ketokawan iyo a saken, a so Allah, i mitero sii ago
miyanggolaola ko den, a tig o Lebi a Maporo a Tohan."
Keisaisa a Yodah ago giya Israil
15 Minisampay raken peman so katero o Allah a tig iyan a

16 “Wata o manosiya, kowa ka sa giyoray na soraten ka on a 'So ndatoan a Yodah.' Na
kowa ka sa isa pen a giyoray na soraten ka on a 'So ndatoan a Israil.'
17 Na pakaperakesa ngka siran komemes.
18 Amay ka isean ka o manga bangsa ngka a 'Ba ngka rekami di mapetero o antonaa i
maana ini?'
19 Na teroa ngka kiran a: Giyai i pitero o Lebi a Maporo a Tohan: Kowaan ko so giyoray
a toos sa Israil na itepi aken ko giyoray a toos sa Yodah, na keisaisa siran sa lima ko.'
20 “Na sii ko kapegilaya o manga taw ko kakapetan ka a manga giyoray a piyanoratan ka

21 Na teroa ngka kiran a: Giyai i pitero o Lebi a Maporo a Tohan: Kowaan ko so manga
taw sa Israil a poon ko manga nasiyon a kiyasongowan iran. Timoon ko siran sii ko
mbalabala na pagowiten ko siran ko kawali iran a inged.
22 Mbalowin ko siran a satiman a nasiyon sii ko inged, sii ko manga kapalawan sa Israil.
Sasatiman bo a dato a pendato kiran langon, na di siran den kebaloy a dowa a nasiyon aya
pen o ba mabagi ko dowa a ndatoan.
23 Di iran den peseboan a ginawa iran ko piyakasisingay a manga barahala iran ago so
langon a ped a manga sala iran. Pokasen ko siran ko langon a kambaradosa a olaola iran
a ipetelikod iran raken, na pelompiyowan ko siran; pembaloy siran a manga pagtaw aken
na pembaloy ako a Tohan iran.
24 “So oripen aken a si Daod i pendato kiran, na sasatiman bo a tegikor kiran.

Ipaginetaw iran so manga kokoman aken na penanggilaan iran o ba iran di matoman so
manga sogoan aken.
25 Mbaling siran ko lopa a biyalingan o manga apo iran, a so lopa a inibegay aken ko
oripen aken a si Yakob. Roo siran mbaling ago so langon a kebabadan kiran sa dayon sa
dayon, na so oripen aken a si Daod na aya kiran pendato sa taman sa pakataman.
26 Magembaal ako sa kapasadan a kalilintad mipantag kiran; giyai na da a kaposan iyan a
kapasadan. Pakapembekenen ko ago pakapendakelen ko siran, na tegoon ko so Timplo
aken sii kiran sa taman sa pakataman.
27 Keden ako kiran; pembaloy ako a tohan iran na pembaloy siran a manga pagtaw aken.
28 Samaoto amay ka matago so Timplo aken sii kiran sa dayon sa dayon na ketokawan o
manga nasiyon a inisenggay aken a rek aken so manga taw sa Israil."
ISIKIYAL 38
So Miyaalamat a Isiksa sa Gog
2 “Wata o manosiya, alamata ngka so isiksa ki Gog a so maporo a pangolo sa Misik ago
Tobal sii sa inged a Magog
3 Na teroa ngka rekaniyan a: Giyai i pitero o Lebi a Maporo a Tohan: Peridoon ko seka,
hey Gog a so maporo a pangolo sa Misik ago Tobal!
4 Pekatalikoden ko seka na tegoan ko sa manga banowit so baka a ka ago tondaan ko seka
sa liyo a rakes o langon o manga sondaro ngka ago so manga koda a ka ago manga
komokoda a kigogomaan siran langon, a tanto siran a madakel a kiaawid sa manga kelong
ago manga pedang.
5 Aden a ped ka a manga mama a poon sa Pirsiya, Itiyopiya ago giya Libiya a langon
siran kekelong ago magiilmit.
6 Ped ka mambo so langon o manga sondaro a poon sa inged a Gomir ago Bit Togarmah
roo sa mawatan sa pagotaraan a rakes o manga mama a poon ko madakel a ped a manga
nasiyon.
7 “Na, tiyagar ka! Lalayon ka den titiyagar a rakes o langon o manga sondaro a
mitimotimo reka, na pagolowani ngka siran.
8 Oriyan o madakel a ragon na sogoon ko seka sa kapakipetidawa a ka. Sii ko kaposan o
manga ragon na sondolan ka so inged a miyakaasal ko oriyan o kiyatidawa. So manga
taw ron na miyatimo a poon ko madakel a nasiyon na piyangowit sii ko manga palaw sa
Israil a miyatey den a kaaawaan ago mitataog a kaden, na langon siran roo pepeginetaw a
lomilintad.
9 Seka ago so langon o manga sondaro ngka ago so madakel a nasiyon a ped ka na sondol
kano a pepegabanti a datar o barat, a datar o gabon a pekisapeng ko lopa.
10 “Na giyai i pitero o Allah ki Gog: Sii sangkoto a masa na makapemikir ka sa kadiyat a
marata.
11 Peteroon ka a 'Song ako ko lopa a kena a ba kokotaan so manga inged on. Sondolan
ko so manga taw a lomilintad a pepeginetaw a makasasarig sii ko manga inged a da a ba
iran pangeleban o di na tatanggalen a manga gimowa.
12 Nggobaten ko ago petebanan angkoto a manga inged a mabibinasa gowani a
babalingan imanto o manga taw a piyanimo a poon ko manga nasiyon. Pagagaon ko roo
so manga tamok iran, ka madakel a manga ayam ago manga kakawasaan a miyapantiyari
angkoto a manga taw a mababaling ko lembak o doniya.'
13 Ogaid na so manga taw sa Siba ago giya Didan ago so manga padagang sa Tarsis ago
so langon a manga inged a di iran dii ndagangan na ipagise iran reka a 'Antawaa ka bes a
peteban kiran? Ba ngka tinimo so madakel a manga sondaro ngka ka pemanekew kano
kiran ago pengowa ko pirak ago bolawan iran ago pengawid ko manga ayam ago tamok
iran, ago pengagaw ko mala a kakawasaan?'
14 “Kagiya ka maoto, wata o manosiya, na alamat ka na teroa ngka ki Gog a: Giyai i

pitero o Lebi a Maporo a Tohan: Sii sangkoto a masa amay ka pepeginetaw a lomilintad
so manga pagtaw aken a Israil na ketolikan ka ini, na ngganat ka
15 Sa kapelalakaw ngka a poon ko mawatan a darpa a ka sa pagotaraan, seka ago so
madakel a nasiyon a ped ka a kikokoda siran langon a tanto a madakel a manga sondaro.
16 Sondolan ka so manga pagtaw aken a Israil a datar o gabon a pekisapeng ko lopa.
Mapenggolaola ini, hey Gog, sii ko kaposan o manga gawii, ka pekigobat aken reka so
lopa aken kaan katokawi o manga nasiyon o antawa ako amay ka mapakiilay so kasosoti
aken a nggolalan ko keolaola ngka sii ko kapegilaya iran on.
17 “Giyai i pitero o Lebi a Maporo a Tohan: Ba di seka so miyaaloy aken gowani ko

miyanga oona a manga gawii a nggolalan ko manga oripen aken a manga nabi sa Israil?
Sa masa oto na inalamat iran a pekigobat aken siran reka sii ko manga gawii a da pen
mitalingoma.
So Kandanega o Allah ki Gog
18 “Ogaid na sii ko gawii a kanggobata i Gog sa Israil, a tig o Lebi a Maporo a Tohan, na
pemborngat so gani aken!
19 Ka sii ko kapepanaod aken ago so somosokeyaw a rarangit aken na peyagen ko imanto
a sii sangkoto a gawii na tanto a mabager a kapelinoga ko inged a Israil.
20 So langon o manga baraniyawa so langon o manga seda sa ragat, so manga papanok
sa kawang, so manga binatang sa kalasan, so manga pemanola ko lopa a rakes o langon a
taw sa doniya na penanabaden ko kamamasaan aken. Penga tetempag so manga palaw,
pemangitobak so manga pampang, na penga ooteng ko lopa so oman i pangeleban.
21 Sogoan ko sa pedang si Gog sii ko langon a kapalawan aken, a tig o Lebi a Maporo a
Tohan, na pemagonaya tidawa so manga sondaro niyan.
22 Siksaan ko sekaniyan a doong ago so kapekatogaa ko rogo; pekioranan aken sekaniyan
ago so manga sondaro niyan ago so madakel a nasiyon a ped iyan sa mabager a oran,
manga ilo, ago pekerab a sandawa.
23 Sii sangkai a okit na pekiilay aken so kala ago so kasosoti aken; pekikilala aken a
ginawa ko ko langon o manga nasiyon, na samaoto na ketokawan iran a saken so Allah!"
ISIKIYAL 39
So Kiyapanombalia ko manga Sondaro i Gog
Na pitero o Allah a "Wata o manosiya, alamat ka sa ipemorala ki Gog na teroa ngka on a:

Giyai i pitero o Lebi a Maporo a Tohan: Peridoon ko seka, hey Gog, a so maporo a
pangolo sa Misik ago Tobal!
2 Pekasangoren ko seka sa bago a pagantapan, na pekalalakaon ko seka a poon ko
mawatan a darpa sa pagotaraan taman sa maoma ngka so manga palaw sa Israil.
3 Mandiyadi na popoken ko so pana a ka ko diwang a lima ngka, na keolog so manga
gasa a ka ko kawanan a lima ngka.
4 Na petay ka sii ko manga kapalawan sa Israil, seka ago so langon o manga sondaro ngka
ago so manga nasiyon a ped ka. Imbegay aken sekano a pangenengken o langon a
pitibarangan a papanok a pepegdas sa sapo ago sii ko manga iila a binatang.
5 Penga ooteng kano a miyamatay sii ko madaya a kalopaan.
6 Na pekioranan aken sa apoy a Magog ago sii ko langon a kibabaling a somasana ko
manga kilid a ragat, na ketokawan iran a saken so Allah.
7 Pekikilala ko so soti a Ingaran aken ko manga pagtaw aken a Israil. Di aken den
peparon a ba mapakaito so soti a Ingaran aken. Samaoto na ketokawan o manga nasiyon
a saken, a so Allah, i Soti a Tohan o Israil.
8 “Pitero o Lebi a Maporo a Tohan: Pekatalingoma den so gawii a miyatero aken; mataan
a itoman den ai!
9 Oriyan iyan na peliliyo so kibabaling ko manga siti sa Israil na pengowaan iran so
manga gomaan a so maito ago mala a manga kelong, so manga pana ago manga gasa, so
manga baston sa katidawa ago so manga bangkaw, na pagosaren iran ai a itagon sii ko
soled o pito ragon.
10 Di iran den kailangan a penimo siran sa manga itagon ko pangomaan o di na pemata sa
kayo ko kalasan, ka aya ipagitagon iran na giyangkai a manga gomaan. Petebanan iran so
siran oto a miteban kiran, na pagagawan iran so miyangagaw kiran, a tig o Lebi a Maporo
a Tohan.
So Kinilebengen ki Gog
11 “Sii sangkoto a gawii na somenggay ako sa darpa sii sa Israil a pelebangan ki Gog ago
so tanto a madakel a manga sondaro niyan. Matatago ini sii sa sedepan o Maatay a Ragat
sii ko 'Balintad o dii Melalalag,' na kealangan angkai a pelebengan so pegokitan o dii
melalalag; na mbetowan iran ai sa 'Balintad o manga Sondaro i Gog.'
12 Pito olan a kipelelebengen kiran langon o manga taw sa Israil kaan iran kalompiyowi
so lopa.
13 So langon o manga taw ko inged na magogop ko kipelelebengen kiran, na kebantogan
siran sangkoto a gawii a kiyapakataban aken, a tig o Lebi a Maporo a Tohan.
14 “Sii ko kiyapopos o pito olan na pemili siran sa manga mama a makapegenebeneb ko

dalem a inged a dii mbabanog ago pelelebeng ko miyalamba a manga bangkay a ndodoo
pen ko liyawaw o lopa kaan kalompiyowi
15 Sii ko kapegenebeneb iran on na oman makailay so isa kiran sa tolan na tegoan iyan sa
toos on so kilid o tolan kaan mailay o dii mangalot sa lebeng ago mawit iran ko 'Balintad
o manga Sondaro i Gog' sa kipelebengen iran on.
16(Aden mambo a siti a ketago roo a mbetowan sa Hamonah, a aya maana niyan na
'madakel a sondaro.') Na nggolalan sii na kelompiyowan iran so lopa.
17 “Na seka, hey wata o manosiya, na giyai i pitero o Lebi a Maporo a Tohan: Talowi
ngka so langon o manga papanok ago manga iila a binatang na teroa ngka kiran a
'Timotimo kano na song kano sii a poon ko mbalabala sii ko pekorbanen a petiyagaren
aken para rekano, a so mala a kapenombali sii ko manga palaw sa Israil! Na roo kano
pekakan sa sapo ago pekainom sa rogo.
18 Pekakan kano sa sapo o manga sondaro ago pekainom kano ko rogo o manga dato ko
doniya, a langon siran piyanombali a datar o manga mandangan, manga bilibili, manga
kambing ago manga sapi, a piyanga oolitan a manga ayam a poon sa Basan.
19 Ken kano sa sibo taman sa manga oosog kano, ago maginom kano sa rogo taman sa
manga bebereg kano sii ko kapenombali a petiyagaren ko rekano.
20 Penga oosog kano sii ko pekikanan ko rekano ko manga koda ago so kikokoda on, so
manga wawaraw a mama ago so pitibarangan a manga sondaro,' a tig o Lebi a Maporo a
Tohan."
So Kiyapakaasal a Israil
21 Pitero o Allah a "Pekiilay aken so bantogan aken sii ko manga nasiyon, na keilay o
langon o manga nasiyon so inidaneg aken kiran ko kinitanaan ko kiran ko bager aken.
22 Ipoon sangkoto a gawii na kekilala o manga taw sa Israil a saken so Allah a Tohan
iran.
23 Na ketokawan o manga nasiyon a aya sabap a kinitaogen ko manga taw sa Israil na so
kadostaan iran, ka inongkir ako iran. Sabap sii na tiyalikodan aken siran na piyakitaban
aken siran ko manga ridoay iran, na langon siran miyapamono ko katidawa.
24 Aya inikidia ko kiran na so mapapatot ko kasesebo iran ago so katataongkir iran, na
tiyalikodan ko siran.
25 “Ogaid na imanto, a pitero o Lebi a Maporo a Tohan, na ipengalinggagaw aken so

manga mbawataan o Yakob, a so manga taw sa Israil, na pekaasalen ko so kapetegompiya
iran, ka ipenindeg aken so soti a Ingaran aken.
26 Sii ko kababaling iran peman a malilinding ko kawali iran a inged a da a ba kiran
makapengangalek na kelipatan iran so kiyayai kiran sii ko kiyaongkira iran raken.
27 Oriyan o kiyapangowaa ko kiran ko manga nasiyon ago so kinibalingen aken kiran a
poon ko manga inged o manga ridoay iran na pekiilay aken so kasosoti aken a nggolalan
kiran sii ko kapekeilaya on o manga nasiyon.
28 Samaoto na ketokawan o manga pagtaw aken a saken den so Allah a Tohan iran, ka
apiya pen initaog aken siran ko manga nasiyon na tinimo aken siran ko kawali iran a lopa.
Na da den a ba ko kiran imbegak.
29 Di aken kiran den pagemaan a paras aken, ka pagododen ko so Roh ko manga taw sa
Israil, a tig o Lebi a Maporo a Tohan."
SO PANGINGILAIN KO BAGO A TIMPLO
ISIKIYAL 40
Inowit si Isikiyal sa Yarosalim
Sii ko ikadowa polo ago lima ragon ko kabibiyag ami, ko ikasapolo gawii ko paganay a
olanolan a giyoto so ikasapolo ago pat ragon ko oriyan o kiyatabana ko siti a Yarosalim
na sii den sangkoto a gawii na kiyapetan ako o Allah na inowit ako niyan roo.
2 Na sii ko pangingilain o Tohan na inowit ako niyan ko inged a Israil na inibetad ako
niyan ko miyakaporoporo a palaw, na sii sa tampar sa pagabagatan on na miyailay aken
so mapoporon a manga walay a lagid sa paras o siti.
3 Inowit ako niyan roo na miyailay aken so isa a mama a pekindat so paras iyan a lagid o
tombaga. Tomitindeg sekaniyan sii ko gimowa a komakapet sa tali a sotra ago panakes.
4 Na pitero iyan raken a "Wata o manosiya, segipa ka den! Pamakinega ngka piyapiya
ago tanodi ngka so langon taman a pekiilay aken reka, ka miyawit ka sii kaan aken reka
ini mapakiilay. Na panotola ngka ko manga taw sa Israil so langon taman a keilay ngka."
So Gimowa sa Tampar sa Sebangan
5 Miyailay aken a aden a pangeleban a mililibet ko darpa a katatagoan ko Timplo. So

panakes a kakapetan o mama na telo ka mitros a katas iyan; na tiyakes iyan so pangeleban
na telo ka mitros a kakapal iyan ago telo ka mitros a kaporo iyan.
6 Oriyan iyan na somiyong sekaniyan ko gimowa o pangeleban a somasangor sa

sebangan. Miyanik sekaniyan ko towak on na tiyakes iyan so penggaka iyan, na telo ka
7 Sii ko onaan o penggaka na aden a okita on a aden a tetelo a rowang on o manga
gordiya ko mbala a kilid iyan. Oman i rowang na sokesoker a telo ka mitros so oman i
kilid iyan, na dowa ago tenga ka mitros a kakapal o manga keleb a miilet kiran. Sii ko
onaan o manga rowang o manga gordiya na aden a okita on a telo ka mitros a katas iyan a
ipesong ko rowang a somasangor ko Timplo.
8 Tiyakes iyan angkai a rowang
9 Na pat ka mitros a katas iyan, na so itotokod on a manga polaos na isa ka mitros a
kakapal iyan. Giyangkai a rowang a sii sa kaposan o okita na somasangor ko Timplo.
10(Giyangkai a tetelo a rowang o manga gordiya ko mbala a kilid o okita na ndatadatar sa
kala, na so manga keleb a miilet kiran na ndatadatar sa takes.)
11 Oriyan iyan na tiyakes o mama so kaolad o pintoan o gimowa na lima ka mitros, na

aya kabelang o okita na nem ka mitros ago tenga.
12 Sii ko danga o oman i isa a rowang o gordiya na aden a mababa a pangeleban on a
tenga sa mitros a kaporo iyan. Na sokesoker so manga rowang o gordiya a telo ka mitros
so oman i kilid iyan.
13 Mandiyadi na tiyakes iyan so kawatan a ipoon ko likod ko isa a rowang taman ko likod
o rowang ko pantag iyan, na sapolo ago telo ka mitros.
14 Tiyakes iyan so kaolad o manga paras o langon a keleb sii ko mbalabala ko soled o
okita taman ko rowang a makasasangor ko lamalama, na telo polo ka mitros.
15 Aya kalendo o okita ipoon ko ipesoled ko gimowa taman ko kaposan iyan na dowa
polo ago lima ka mitros.
16 Aden a maito a manga dirowasa sii ko makaliliyo a manga pangeleban o manga
rowang ago sii pen ko manga pangeleban sii sa soled a miilet ko manga rowang. So
manga keleb sa soled ko mbala a kilid o okita na ookiran sa manga kayo a korma.
So Makaliliyo a Lamalama o Timplo
17 Mandiyadi na inowit ako o mama ko makaliliyo a lamalama o Timplo. Aden a telo

polo a manga rowang a ililibet ko lamalama ago makasasangor on a mikakampet siran ko
pangeleban. Na sii ko danga iran na aden a darpa on a piyagatoran
18 A ililibet ko soled o lamalama. Giyangkai a makaliliyo a lamalama na mibababa a di
so makasosoled a lamalama.
19 Mandiyadi na tiyakes iyan so kawatan a ipoon ko soled o gimowa o kabebaan a
lamalama taman ko liyo o gimowa o makasosoled a lamalama, na lima polo ka mitros.
So Gimowa a Makasasangor sa Pagotaraan
20 Oriyan iyan na tiyakes iyan so katas ago so kabelang o gimowa o makaliliyo a

lamalama a somasangor sa pagotaraan.
21 Aden mambo a telo a rowang on o gordiya ko mbala a kilid iyan a rakes o manga
keleb a miilet kiran ago so rowang sa kaposan o okita na ndatadatar sa manga takes o
gimowa a somasangor sa sebangan. Aya kalendo iyan na dowa polo ago lima ka mitros,
na aya kabelang iyan na sapolo ago telo ka mitros.
22 So manga dirowasa, so rowang sa kaposan iyan ago so manga okir on a kayo a korma
na datar sa kala o matatago ko gimowa a somasangor sa sebangan. Pito kerit a ipepanik
ko gimowa, na so rowang a makasasangor ko lamalama na matatago ko kaposan o okita
on.
23 Aden a gimowa o makasosoled a lamalama a mipapantag sangkai a gimowa a
somasangor sa pagotaraan. Na miyanakes so mama ipoon ko isa a gimowa taman ko
pantag iyan na lima polo ka mitros.
So Gimowa a Somasangor sa Pagabagatan
24 Mandiyadi na inowit ako niyan sa tampar sa pagabagatan na miyailay aken so isa pen a
gimowa a somasangor sa pagabagatan. Piyanakes iyan so manga keleb ago so manga
rowang on na datar ini sa kapangaala o matatago ko ped a manga gimowa.
25 Aden a manga dirowasa o manga rowang ko okita angkai a gimowa a datar bo o
manga ped. Aya kalendo o okita iyan na dowa polo ago lima ka mitros, na aya kabelang
iyan na sapolo ago telo ka mitros.
26 Pito kerit a ipepanik on, na aden mambo a rowang ko kaposan o okita on a
somasangor ko lamalama. So manga keleb ko mbala a kilid o okita na ookiran sa manga
kayo a korma.
27 So makasosoled a lamalama na aden mambo a gimowa iyan a somasangor sa
pagabagatan, na tiyakes iyan so pageletan angkai a dowa a gimowa na lima polo ago isa
ago tenga ka mitros.
So Gimowa o Makasosoled a Lamalama a Somasangar sa Pagotaraan
28 Oriyan iyan na miyokit kami ko gimowa sa pagotaraan na inowit ako niyan ko

makasosoled a lamalama, na tiyakes iyan so gimowa iyan a somasangor sa pagotaraan, na
datar ai sa kala o manga ped.
29 So manga rowang o manga gordiya, so rowang sa kaposan o okita on ago so manga
keleb sa soled iyan na datar sa kapangaala o ped. Aden mambo a manga dirowasa o
manga rowang ko okita on, na aya katas iyan na dowa polo ago lima ka mitros, na so
kabelang iyan na sapolo ago telo ka mitros.
30(So manga liyoliyowan o manga gimowa o makasosoled a lamalama na dowa ago
tenga ka mitros a kabelang iyan ago sapolo ago telo ka mitros a katas iyan.)
31 So liyoliyowan iyan na somasangor ko makaliliyo a lamalama. Aden a inipangokir on
a kayo a korma ko manga keleb o okita on, na walo kerit a ipepanik on.
So Gimowa o Makasosoled a Lamalama a Somasangor sa Sebangan
32 Na inowit ako niyan ko gimowa o makasosoled a lamalama a somasangor sa

sebangan. Piyanekes iyan ai na datar sa takes o manga ped.
33 So manga rowang on o manga gordiya, so manga keleb a miilet kiran ago so
liyoliyowan iyan na datar sa kapangaala o manga ped. Aden a manga dirowasa ko
mbalabala on ago sii mambo ko liyoliyowan. So kalendo o okita o gimowa na dowa polo
ago tenga ka mitros, na so kabelang iyan na sapolo ago telo ka mitros.
34 So liyoliyowan iyan na somasangor ko makaliliyo a lamalama, na so manga keleb o
okita o gimowa na ookiran sa manga kayo a korma. Na walo kerit a ipepanik sangkai a
gimowa.
So Gimowa o Makasosoled a Lamalama a Somasangor sa Pagotaraan
35 Oriyan iyan na inowit ako niyan ko pagotaraan a gimowa a isoled ko makasosoled a

lamalama. Tiyakes iyan ai na datar sa takes o manga ped
36 A lagid mambo o manga rowang on o manga gordiya, so manga keleb iyan ago so
liyoliyowan. Aden mambo a manga dirowasa ko mbalabala on. Dowa polo ago tenga ka
mitros a kalendo iyan, na sapolo ago telo ka mitros a kabelang iyan.
37 So liyoliyowan iyan na somasangor ko makaliliyo a lamalama, na aden mambo a
manga kayo a korma a iniokir ko manga keleb ko mbala a kilid o okita iyan. Na walo
kerit a ipepanik on.
So manga Rowang a dii Tiyagaran ko Korban
38 Sii ko kilid o liyoliyowan o gimowa sa pagotaraan na aden a pintoan on a isoled ko

rowang a ron pegonabi so manga sapo a ipesepaat a petotongen.
39 Sii ko mbala a kilid o liyoliyowan na aden a dowa a lamisaan on a ron pepanombalia
so manga ayam a ipesepaat a petotongen, so dii korbanen sabap ko dosa ago so dii
korbanen sabap ko kiyataksil.
40 Na sii ko liyo o liyoliyowan ko sabala a kilid o manga kerit a ipepanik ko gimowa sa
pagotaraan na aden pen a dowa a lamisaan on.
41 Aden a pat a lamisaan sa soled o liyoliyowan ago pat mambo sa liyo walo langon a
manga lamisaan a ron pepanombalia so manga ayam a ipesepaat.
42 Aden mambo a pat a lamisaan a pimbaalan a piyanapilan a ator a ron dii tiyagara so
manga korban. Oman i isa on na manga isa ka mitros a katas iyan ago kaolad iyan ago
tenga sa mitros a kaporo iyan a ron ipembetad so manga kasangkapan a ipenomabali ko
manga ayam a ipesepaat a petotongen ago dii korbanen.
43 Aden a manga sait a sarangaw a katas iyan a isasambir ko manga keleb ko melilibeta
on. Na sii ipembatog ko manga lamisaan so ipesepaat a manga sapo.
So manga Rowang o manga Imam
44 Mandiyadi na inowit ako niyan ko makasosoled a lamalama na dowa a manga rowang

on. So isa on na sii ko kilid o gimowa sa pagotaraan, na somasangor ini sa pagabagatan.
Na so isa on na sii ko kilid o gimowa sa pagabagatan, na somasangor ini sa pagotaraan.
45 Pitero iyan raken a "So rowang sii ko kilid o gimowa sa pagotaraan na para ko manga
imam a komikibir ko Timplo,
46 Na so rowang sii ko kilid o gimowa sa pagotaraan na para ko manga imam a komikibir
ko aparan. Giyai so manga mbawataan i Sadok, ka siran bo i manga Libitiyo a peperon a
pekaobay ko Allah a makapenalagad on.
So Makasosoled a Lamalama ago so Timplo
47 Na tiyakes o mama so makasosoled a lamalama na sokesoker ini a lima polo ka mitros

a katas iyan ago lima polo ka mitros a kaolad iyan. Na so aparan na sii ko danga o
Timplo.
48 Oriyan iyan na inowit ako niyan ko liyoliyowan o Timplo. Tiyakes iyan so manga
polaos iyan na dowa ago tenga ka mitros so mbala a kilid iran. Aya kaolad o gimowa
iyan na pito ago tenga ka mitros, na so manga pangeleban ko mbala a kilid iyan na isa ago
tenga ka mitros a kakapal iyan.
49 Aya kaolad o liyoliyowan na sapolo ago tenga ka mitros, na lima ago tenga ka mitros
ipoon sa onaan taman sa likod. Aden a sapolo kerit a ipepanik on, na aden a manga
polaos ko mbala a kilid iyan.
ISIKIYAL 41
Oriyan iyan na inowit ako o mama ko rowang a aya kalaan a darpa ko Timplo a giyoto so
Soti a Darpa. Tiyakes iyan so manga polaos ko mbala a kilid o gimowa na telo ka mitros
so oman i kilid iyan.
2 Aya kaolad o gimowa na lima ka mitros, na so manga pangeleban ko mbala a kilid iyan
na dowa ago tenga ka mitros a kakapal iyan. Na tiyakes iyan angkai a kalaan a darpa ko
Timplo na dowa polo ago isa ka mitros a katas iyan ago sapolo ago tenga ka mitros a
kaolad iyan.
3 Mandiyadi na somiyoled sekaniyan ko makasosoled a rowang sa onaan o Soti a Darpa.

Tiyakes iyan so manga polaos ko gimowa on na isa ka mitros a kakapal o oman i isa on.
Aya kaolad o gimowa na telo ka mitros, na so manga pangeleban sii ko mbala a kilid iyan
na telo ago tenga ka mitros a kabelang iran.
4 Na tiyakes iyan so rowang, na so katas iyan na sapolo ago tenga ka mitros a lagid
mambo o kaolad iyan. Giyangkai a rowang na roo ko onaan o makaliliyo a rowang, na
pitero iyan raken a "Giyai i Lebi a Soti a Darpa."
So manga Rowang a Mikakampet ko manga Pangeleban o Timplo
5 Oriyan iyan na tiyakes iyan so pangeleban o Timplo, na telo ka mitros a kakapal iyan.
Aden a mararantar a manga iito a rowang a mikakampet ko liyo o pangeleban a aya
kaoled o oman i isa rowang na dowa ka mitros.
6 Giyangkoto a manga rowang na tetelo ka andana, na so oman i andana niyan na telo
polo a rowang on. Sii ko melilibeta ko manga pangeleban o Timplo na aden a domodogar
on a ron mibebetad so manga dolog o manga rowang kaan ai di kigaang ko pangeleban o
Timplo.
7 So ikadowa ago ikatelo ka andana o manga rowang a ililibet ko pangeleban o Timplo na
maolad a di so andana ko kababaan iyan. Giyai na makaaayon ko kapepekaito o kakapal
o pangeleban sii ko kapepekaporo iyan. Na aden a towak a ipepanik ko ikatelo ka andana
a pepekaokit ko ikadowa ka andana.
8 Miyailay aken a aden a kaoonayan ko Timplo a ililibet on a ron mambo maoonay so
manga rowang ko kilid iyan. Aya kaporo angkai a onayan na telo ka mitros.
9 Aya kakapal o makaliliyo a pangeleban o manga rowang sa kilid o Timplo na dowa ago
tenga ka mitros. Na so madaya a darpa ko pageletan angkai a manga rowang
10 Ago so manga rowang a mikekampet ko pangeleban o makasosoled a lamalama na
sapolo ago tenga ka mitros a kaolad iyan sii ko melilibeta ko Timplo.
11 Aden a dowa a pintoan a isoled ko manga rowang ko kilid o Timplo a poon ko darpa a
ililibet kiran a aya kaolad iyan na dowa ago tenga ka mitros. So isa sangkai a pintoan na
somasangor sa pagotaraan, na so isa on na somasangor sa pagabagatan.
So mala a Walay sa Tampar sa Sedepan
12 Sa tampar sa sedepan na aden a mala a walay ron a somasangor ko Timplo. Aya

kabelang iyan na telo polo ago nem ago tenga ka mitros, na aya katas iyan na pat polo ago
pito ka mitros, na aya kakapal o manga pangeleban iyan ko melilibeta on na dowa ago
tenga ka mitros.
So Kala o Timplo
13 Na tiyakes o mama so Timplo, na aya katas iyan na lima polo ka mitros. So lamalama
o Timplo a rakes on so Walay ago so manga pangeleban iyan na lima polo ka mitros
mambo a katas iyan.
14 Aya kaolad o lamalama o Timplo sa tampar sa sebangan a ped on so panempang o
Timplo na lima polo ka mitros mambo.
15 Mandiyadi na tiyakes iyan so walay a somasangor ko lamalama sa sebangan o Timplo,
a ped on so manga pangeleban iyan na lima polo ka mitros mambo a katas iyan.
Osayan ko Soled o Timplo
So liyoliyowan a isoled ko Timplo, so Soti a Darpa iyan ago so Lebi a Soti a Darpa
16 Na palaya lalapisan sa kayo a lagid mambo o manga pamalagen o maninit a manga
dirowasa. So manga keleb ko soled o Timplo na lalapisan sa kayo sii sa kabebaan o
manga dirowasa ago sii pen ko kaporoan iran.
17 Lalapisan mambo so keleb sii ko kaporoan o pintoan a isoled ko Lebi a Soti a Darpa.
So langon o manga keleb ko soled o Timplo na ookiran
18 Sa manga malaikat ago manga kayo a korma. Aden a kayo a ipageelet ko oman i
dowa a malaikat. So oman i malaikat na dowa i paras:
19 So paras a manosiya na somasangor ko kayo a korma ko isa a kilid iyan, na so paras a
arimaw a somasangor ko kayo a korma sa sabala a kilid. Iookir ai ko langon o manga
keleb sii ko soled o Timplo
20 Ipoon ko salasa taman ko poro o manga keleb, a rakes on so manga keleb o Soti a
Darpa.
So Lamisaan a Kayo a datar sa Paras o Aparan
21 So manga polaos ko mbala a kilid o gimowa a isoled ko Soti a Darpa na pat pasagi a
sokesoker, na sii ko danga o gimowa o Lebi a Soti a Darpa na aden a datar on sa paras
22 O aparan a pimbaalan a kayo. Aya kaporo iyan na isa ago tenga ka mitros ago isa ka
mitros a kaolad ago katas iyan. So manga rogo niyan, so itado niyan ago so manga kilid
iyan na palaya den pimbaalan a kayo. Na pitero raken o mama a "Giyai i lamisaan a
matatago ko hadapan o Allah."
So manga Pintoan
23 So pintoan o Soti a Darpa ago so pintoan o Lebi a Soti a Darpa na ndodowa silang
24 A dii makakekepa.
25 So manga pintoan o Soti a Darpa na ookiran sa manga malaikat ago manga kayo a
korma a datar o inipangokir ko manga keleb. Na so panempang o liyoliyowan o Timplo
na aden a iaatep on a kayo.
26 Aden a masimpit a manga dirowasa ko manga keleb ko mbala a kilid o liyoliyowan, na
ookiran ai sa manga kayo a korma.
ISIKIYAL 42
So manga Rowang para ko manga Imam
Oriyan iyan na inagak ako o mama sii sa tampar sa pagotaraan ko makaliliyo a lamalama.
Na inowit ako niyan ko walay ko pantag o lamalama o Timplo ago pantag o makaliliyo a
pangeleban sa tampar sa pagotaraan.
2 Giyangkai a walay, a so pintoan iyan na somasangor sa pagotaraan, na lima polo ago
dowa ka mitros a katas iyan ago dowa polo ago nem ka mitros a kaolad iyan.
3 So isa on bagi na makasasangor ko sapolo ka mitros a kaolad iyan a darpa sii ko
makasosoled a lamalama. Na so ped a bagi na makasasangor ko piyagatoran a darpa sii
ko makaliliyo a lamalama. Telo ka andana angkai a dowa a bagi na makasasangora siran.
4 Sii ko danga o manga rowang na aden a okita on a lima ka mitros a kaolad iyan ago
lima polo ago dowa ka mitros a katas iyan, na so manga pintoan iran na somasangor sa
pagotaraan.
5 So manga rowang ko ikadowa ago ikatelo ka andana na masimpit a di so manga rowang
sii ko kababaan iran sabap ko kabelang o manga okita ko danga iran.
6 Sabap sa telo ka andana angkai a walay a da a manga polaos a itotokod on a datar o
manga walay ko lamalama na so manga rowang ko ikadowa ago ikatelo ka andana na
maito a di so manga rowang ko kababaan iran.
7 Sii sa liyo na aden a pangeleban on a idodorog ko manga rowang sii ko pageletan iran
ago so makaliliyo a lamalama. Aya katas iyan na dowa polo ago lima ka mitros.
8 Giyangkai a pangeleban na iooman ko dowa polo ago nem ka mitros a katas o manga
rowang a ipapantag ko makaliliyo a lamalama, ka aya katas o manga rowang a
somasangor ko timplo na lima polo ka mitros.
9 So manga rowang sa baba na aden a gimowa iyan sa tampar sa sebangan a isoled on a
poon ko makaliliyo a lamalama.
10 Sii ko kilid o Timplo sa tampar sa pagabagatan na aden pen a dowa koyog a manga
rowang on sa tampar sa pagabagatan o pangeleban a ipageelet ko makasosoled ago
makaliliyo a manga lamalama.
11 Aden a okita sii ko pageletan angkai a dowa koyog a manga rowang na datar ini sa
katas ago kaolad o manga rowang roo sa pagotaraan, na ndatar siran sa takes ago manga
gimowa.
12 Ka aden a pintoan a isoled ko manga rowang sii ko poonan o okita a idodorog ko
pangeleban a mananaros sa tampar sa sebangan.
13 Mandiyadi na pitero raken o mama a "Giyangkai a manga rowang sa tampar sa

pagotaraan ago sa pagabagatan a somasangor ko lamalama o Timplo na manga soti a
rowang a ron pekena o manga imam a pepekaobay ko Allah so lebi a soti a manga
inisapaat. Kagiya soti angkai a manga rowang na ron petegoa o manga imam so lebi a
soti a manga sapaat, a so manga pamemegayan a pangenengken ago so manga sapaat
sabap ko dosa ago sabap ko kiyataksil.
14 Amay den ka makasoled so manga imam ko Soti a Darpa na di siran on pekaliyo
taman sa di iran mibagak so manga nditaren a inipanalagad iran, ka giyai na soti.
Disomala a somambi siran sa ped a nditaren sa di iran pen kasong ko manga darpa a dii
timotimoan ko manga taw."
So manga Takes o Darpa a Kabebetadan ko Timplo
15 Kagiya mapasad manakes o mama so misosoled ko darpa a kabebetadan ko Timplo na

iniliyo ako niyan on a miyokit kami ko gimowa sa sebangan na tiyakes iyan so manga
kilid iyan ko melilibeta on.
16 Tiyakes iyan so kilid iyan sa tampar sa sebangan na dowa gatos ago lima polo ka
17 Tiyakes iyan so tampar sa pagotaraan na dowa gatos ago lima polo ka mitros.
18 Tiyakes iyan mambo so tampar sa pagabagatan, na dowa gatos ago lima polo ka
mitros.
19 Na somiyong sekaniyan ko kilid iyan sa sedepan na tiyakes iyan pen, na dowa gatos
mambo ago nem polo ago dowa ka mitros.
20 Na miyatakes iyan so langon o darpa, na dowa gatos ago lima polo ka mitros a
sokesoker. Aden a pangeleban a mililibet on kaan mapakasenggaya so soti a darpa ago so
kena a ba soti.
ISIKIYAL 43
Komiyasoy so Bantogan o Allah ko Timplo
Oriyan iyan na inowit ako o mama ko gimowa a somasangor sa sebangan
2 Na miyailay aken so bantogan o Tohan o Israil a pepekapoon sa sebangan. So sowara
niyan na datar o daleg o ragat, na kominindat so lopa sabap ko bantogan iyan.
3 Giyangkai a pangingilain na datar o pangingilain a miyailay aken gowani isako
makaoma sekaniyan sa kambinasaa niyan sa Yarosalim, ago datar o pangingilain a
miyailay aken roo ko Lawasaig a Kibar. Na gomipe ako ko lopa,
4 Na somiyoled so bantogan o Allah ko Timplo a miyokit ko gimowa a somasangor sa
sebangan.
5 Inibayaw ako o Roh na inowit ako niyan ko makasosoled a lamalama, na minipeno so

bantogan o Allah ko Timplo.
6 Na miyaneg aken so Allah a miyakimbitiyarai raken a poon ko Timplo. (So mama a
miyanakes na tomitindeg pen ko obay aken.)
7 Pitero iyan raken a "Wata o manosiya, giyai i darpa o korsi aken ago darpa a pendapoan
o ai aken. Keden ako sii a maaped ko manga taw sa Israil sa taman sa pakataman. So
manga Israil aya pen o ba so manga dato iran na di iran den peseboan so soti a Ingaran
aken a nggolalan ko kapesimbaa iran ko ped a manga tohan ago so kapangembaal iran sa
manga monominto a pekibantog ko miyamatay a manga dato iran.
8 Piyangembaalan o manga dato iran so liyoliyowan o manga torogan iran ago so manga
poloas o manga pintoan iran sii den ko kilid o manga liyoliyowan ago manga pintoan o
Timplo aken a sasatiman bo a pangeleban a miilet kiran ago saken. Piseboan iran so soti
a Ingaran aken a nggolalan ko piyakasisingay a manga olaola iran; sabap roo na bininasa
ko siran sii ko rarangit aken.
9 Imanto na disomala a genekan iran so kapesimbaa ko ped a manga barahala ago ilebad
iran ko kamamasaan aken so manga monominto a pekibantog ko manga dato iran kaan
ako kiran makakaden sa taman sa pakataman.
10 “Hey wata o manosiya, pagosaya ngka so Timplo ko manga taw sa Israil kaan siran
maya ko kadostaan iran. Pakipemasaken ka kiran so antangan on.
11 Na o maya siran ko langon o miyanggolaola iran na pagosaya ngka kiran so antangan
ko Timplo so kapembaali ron, so manga gimowa iyan ago manga pintoan a isoled on ago
ipeliyo ron, so ropaan iyan, so katatanor o langon taman on, ago so langon o taritib ago
kokoman on. Soraten ka ini langon ko hadapan iran kaan iran mailay so kapakambebetad
o langon taman ago matoman iran so langon a taritib on.
12 Giyai i kokoman mipantag ko Timplo: So langon o darpa a lomilibet on ko poro o
palaw na lebi a soti a darpa. Giyai i kokoman mipantag ko Timplo."
So Aparan
13 “Giyai i manga takes o aparan a ipepasod ko panakes a miyaosar ko kiyatakesa ko

Timplo: Aden a kakar a ililibet ko aparan a tenga sa mitros a kadalem iyan ago tenga sa
mitros a kaolad iyan a aden a pamalagen on a sarangaw a kabelang iyan. Na giyai i
kaporo o aparan:
14 So kaporo o kababaan ko aparan ipoon sa lopa taman ko taar a ililibet ko aparan na isa
ka mitros; na so taar na tenga sa mitros a kaolad iyan. Ipoon sangkai a taar na pepekaporo
so aparan sa dowa ka mitros taman ko isa pen a taar on a tenga mambo sa mitros a kaolad
iyan.
15 Na mananaros pen so kaporo o aparan sa dowa pen ka mitros taman ko poroporo iyan
a ron petotonga so manga ipesepaat. Roo ko oman i rogo niyan na aden a panga on a
domodogar sa poro.
16 Giyangkai a petotongan sii ko poro o aparan na nem ka mitros a sokesoker.
17 So taar a ililibet on na sokesoker mambo a pito ka mitros so oman i kilid iyan a aden
pen a pamalagen on a ikapat bagi sa mitros a kabelang iyan, ago kakar a tenga sa mitros a
kaolad iyan ago kadalem iyan. So manga kerit a ipepanik ko aparan na sii ko kilid iyan sa
sebangan.
So Kasotia ko Aparan
18 Na pitero iyan raken a "Wata o manosiya, giyai i pitero o Lebi a Maporo a Tohan: Sii
ko gawii a kiyambaali ko aparan na giyai so manga kokoman mipantag ko kipesepaaten
on ko petotongen a manga soasoat ago so kapemesiki ron sa rogo:
19 Kowa ka sa kangodaan a mama a sapi a pekorbanen sabap ko dosa na began ka ko
manga imam a manga mbawataan i Sadok, ka siran bo i manga Libitiyo a pekaobay raken
sa kapanalagadi iran raken.
20 Kowa ka ko rogo iyan na sisingen ka ko pat a pangapanga ko aparan, ago sii ko pat a
rogo o taar sa poro, ago sii ko melilibeta ko pamalagen iyan. Sii sangkai a okit na
kelompiyowan ka ago kesoti ngka so aparan.
21 Na kowaa ngka so mama a sapi a pikorban sabap ko dosa na totonga ngka sii ko
miyatendo a darpa sii ko liyo o lamalama o Timplo.
22 “Sii ko talondog a gawii na pekakorban ka sa mama a kambing a da a daway niyan

sabap ko dosa, na sotiya ngka so aparan a datar o kiyasotiya on a nggolalan ko mama a
sapi.
23 Amay ka mapasad ka ini somoti na pekasapaat ka sa isa a mangoda a mama a sapi ago
bilibili a poon ko talon a palaya ini da a manga daway niyan.
24 Wita ngka ini ko hadapan o Allah, na bomboran ai o manga imam sa timos, na
pekorbanen iran a isepaat a petotongen ko Allah.
25 “Oman gawii ko soled o pito gawii na tiyagar ka sa mama a kambing a pekorbanen

sabap ko dosa, na tiyagar ka mambo sa mangoda a mama a sapi ago so bilibili a poon ko
talon a palaya ini da a daway niyan.
26 Pito gawii so kapelompiyowi ago kapesotiya o manga imam ko aparan kaan ai
misenggay ko soti a kapegosara on.
27 Mapopos ai ipoon ko ikawalo gawii na ipesepaat o manga imam sii ko aparan so
petotongen a manga korban o manga taw ago so di ran dii korbanen pantag bo ko
kanggiginawai; na terimaan ko sekano, a tig o Lebi a Maporo a Tohan."
ISIKIYAL 44
So Kalelekeban a Gimowa
Mandiyadi na inikasoy ako o mama ko gimowa sa liyo o darpa o Timplo, a so
makasasangor on sa sebangan, ogaid na kalelekeban ai.
2 Na pitero raken o Allah a "Lalayon a lelekeban angkai a gimowa; di den ai pelekaan aya
pen o ba aden a makasoled sii a magokit on, ka so Allah a so Tohan o Israil na miyokit
sii. Sabap roo na tatap den a kalelekebi ron.
3 So bo so pangolo a pendatoon i pekaontod ko soled angkai a gimowa a pekakan ko
pangenengken ko hadapan o Allah. Pekasoled sekaniyan on a magokit ko liyoliyowan o
gimowa ago ron bo pekaliyo."
So manga Kokoman mipantag ko Kapekasoled ko Timplo
4 Oriyan iyan na inowit ako o mama ko danga o Timplo a sii kami miyokit ko gimowa sa
pagotaraan. Na minilay ako na miyailay aken so bantogan o Allah a mipepeno ko
Timplo, na gomipe ako ko lopa.
5 Pitero raken o Allah a "Wata o manosiya, pangilailay ka piyapiya, na pamakinega ngka

ago tanodi ngka so langon taman a peteroon ko reka makapantag ko langon o manga
kokoman ko Timplo o Allah. Tanodi ngka piyapiya o antawaa i pekasoled ko Timplo ago
so langon a di on pekasoled
6 Sampain ka ko taongkir a manga taw sa Israil angkai a pitero o Lebi a Maporo a Tohan:
Hey manga pagtaw sa Israil, di aken den kesabar so piyakasisingay a manga olaola niyo!
7 Piseboan iyo so Timplo aken ka apiya sii ko kipesepaaten iyo raken on ko sibo ago rogo
o manga ayam a dii korbanen na piyakasoled iyo ko Timplo aken so da manga totori a
manga mananangga a di raken pemaratiyaya. Biyaroba iyo so kapasadan aken a
nggolalan ko piyakasisingay a manga olaola niyo!
8 Da niyo nggolalanen so manga sangan iyo mipantag ko soti a kapepanalagad sii ko
Timplo aken, ka aya niyo ron baden piyakakibir so manga mananangga.
9 “Giyai i pitero o Lebi a Maporo a Tohan: Da a mananangga a da matori a di raken

peparatiyaya apiya pen sii sekaniyan mababaling ko manga taw sa Israil a ba pekasoled ko
Timplo aken.
So manga Libitiyo a di Makapagimam
10 “So manga Libitiyo a tomiyalikod raken ko kapesimbaa iran ko manga barahala iran
isako teridadag so manga taw sa Israil na itena kiran so kadostaan iran.
11 Kepakay pen a manalagad siran sii ko Soti a Darpa aken a aya pekakibir ko manga
gimowa o Timplo ago penalagad on; kepakay a sombaliin iran so manga ayam a ipesepaat
a petotongen ago so dii korbanen para ko manga taw, na siran i pekatindeg ko hadapan o
manga taw sa kapanalagadi iran kiran.
12 Ogaid na sabap sa inogopan iran siran somimba ko manga barahala iran a aya
inikadosa o manga taw sa Israil na inisepa aken a mataan a itena kiran so kadostaan iran,
13 Di siran raken makapenalagad a pegimam aya pen o ba siran makaobay ko soti a
manga nganin aken a lebi raken a masosoti, ka disomala a mitana kiran so kayaan o
piyakasisingay a olaola iran.
14 Ka pekakibiren ko siran ko manga sangan ko Timplo ago so langon a galebek a
ipenggolalan on.
So manga Imam
15 “Ogaid na so manga Libitiyo a maaped ko manga mbawataan i Sadok na itataros iran

den piyapiya so kapepanalagadi raken sii ko Timplo aken isako manga dadadag so manga
Israil a tomiyalikod raken. Sabap roo na siran i makapenalagad raken ago pekaobay raken
sa kipesepaaten iran raken ko sibo ago rogo o manga korban, a tig o Lebi a Maporo a
Tohan.
16 Siran bo i pekasoled ko Timplo aken; siran bo i pekaobay ko aparan aken sa
kapenalagadi iran raken ago penggolalan ko manga sogoan aken.
17 “Igira a pesoled siran ko manga gimowa o makasosoled a lamalama na makapenditar

siran sa sotra; di siran makapenditar sa nditaren a pimbaalan a bombol a bilibili sii ko
kapepanalagad iran ko makasosoled a lamalama o di na sa soled o Timplo.
18 Makapetotob siran sa sotra ago pekasolot sa sotra a karsinsiliyo. Di siran
makapenditar sa apiya antonaa a pepagatingan siran on.
19 Na amay ka lomiyo siran ko makaliliyo a lamalama a ndodon so manga taw na
kendaan iran so manga nditaren a ipepanalagad iran ago kibegak iran ko soti a manga
rowang, na kesolot iran so ped a nditaren kaan iran di kiogalin so kasosoti iran ko manga
taw a nggolalan ko manga nditaren iran.
20 “Di siran makapegopaw aya pen o ba iran mapakatas so manga bok iran, ka lalayon
siran makapepegalot.
21 Da a imam a ba makapeginom sa arak amay ka somoled sekaniyan ko makasosoled a
lamalama.
22 Di siran makapengaroma sa balo o di na so babay a inendaan o karoma niyan. Aya bo
a mapengaroma iran na so raga a mbawataan o Israil o di na so miyabalo o karoma a
imam.
23 “Ipengendao iran ko manga pagtaw aken so mbidaan o soti ago so kena a ba soti, ago
so kapakapesenggayaa iran ko halal ago so karam.
24 O aden a rido na siran i pekakokom on na kikokom iran on so manga kokoman aken.
Ketoman iran so manga sogoan ago so manga taritib aken mipantag ko langon o miyanga
tetendo aken a pista, na kisenggay iran a soti so manga Gawii aken a Idedeke.
25 “So imam na di niyan keramen a ginawa niyan ko kapegobay niyan ko bangkay o taw.
Ogaid na kepakay den a keramen iyan on a ginawa niyan o aya miyatay na so ama iyan o
di na ina, so wata iyan a mama o di na babay, so pagari niyan a mama o di na so babay
niyan a da a karoma niyan.
26 Na oriyan o kiyasoti niyan na pekanayaw sekaniyan sa pito gawii.
27 Na sii ko gawii a kapekasoled iyan ko makasosoled a lamalama o Timplo sa
kapenalagad iyan ko Timplo na pekasapaat sekaniyan sa sapaat sabap ko dosa para sa
ginawa niyan, a tig o Lebi a Maporo a Tohan.
28 “Da den a lopa a ba mapekewali o manga imam sii sa Israil, ka saken den i kawali
iran.
29 Pekakan siran ko ipesepaat a pangenengken, so dii korbanen sabap ko dosa, ago so dii
korbanen sabap ko kiyataksil. Rek iran so langon taman sii sa Israil a inisenggay a rek o
Allah.
30 So paganay a inionga o manga pamomolan ago so langon o manga pamemegayan a
ipesepaat ko Allah na rek o manga imam. Na kibegay niyo kiran pen so paganay a bagi
ko tapong iyo kaan matatap so kaperakmati ko manga pamiliya niyo.
31 Di den pekakan so manga imam ko apiya antonaa papanok o di na ayam a baden
miyatay o di na miyapatay o maila a binatang.
ISIKIYAL 45
So Lopa a Inisenggay a Rek o Allah
"Amay ka mbagibagiin iyo so lopa a mapekewali o manga mbatabataa sa Israil na

kisenggay niyo so sabagi on a rek o Allah, a so soti a bagian iyan. Aya katas iyan na
sapolo ago dowa ago tenga ka kilomitro, na sapolo ka kilomitro a kaolad iyan. So langon
angkai a darpa na soti.
2 Sii ko soled iyan na so dowa gatos ago lima polo ka mitros a sokesoker na aya
mbangonan ko Timplo a aden pen a madaya a darpa ko melilibeta on a dowa polo ago
lima ka mitros a kaolad iyan.
3 Sii ko kalaan sangkai a soti a darpa na takes kano ron sa sabagi on a sapolo ago dowa
ago tenga ka kilomitro a katas iyan ago lima ka kilomitro a kaolad iyan, na ron tegoa so
Timplo a so Lebi a Soti a Darpa.
4 Giyai i soti a bagian ko lopa a kisenggay a para ko manga imam a pepekaobay ko Allah
ko kapepanalagadi iran on sii ko Timplo. Giyai i darpa a pemangonan ko manga walay
iran a maaped on so soti a lopa a ketagoan ko Timplo.
5 So midadair sii a lopa sangkai a soti a darpa a sapolo mambo ago dowa ago tenga ka
kilomitro a katas iyan ago lima ka kilomitro a kaolad iyan na rek o manga Libitiyo a dii
nggagalebek ko Timplo, na ron siran mambo pekabaling.
6 “So lopa a dowa ago tenga ka kilomitro a kaolad iyan ago sapolo ago dowa ago tenga
ka kilomitro a katas iyan a midadair sangkai a soti a bagian na kisenggay niyo a
mbangonan sa siti a kebalingan o apiya antawaa ko manga taw sa Israil.
So Lopa a Bagian o Pendatoon
7 “Aden pen a lopa a kisenggay a rek o pendatoon a mbabala ko darpa a ron matatago so
soti a bagian ago so kebangonan ko siti. Malalagoy ini sa tampar sa sebangan ipoon ko
kilid iyan sa sebangan, ago malalagoy sa tampar sa sedepan ipoon ko kilid iyan sa
sedepan. Na so langon a takes iyan ipoon ko temanaan iyan sa tampar sa sebangan taman
ko temanaan iyan sa tampar sa sedepan na datar sa katas o isa a sabaad ko lopa a
inisenggay ko manga mbatabataa sa Israil.
8 Giyai i bagian o pendatoon sii sa Israil. Na so manga pendatoon aken na di iran den
pengarasiyan so manga pagtaw aken, ka imbegay iran ko oman i mbatabataa sa Israil so
kawali iran ko lopa.
So manga Kokoman para ko Pendatoon
9 “Giyai i pitero o Lebi a Maporo a Tohan: Kiyatangkaan den, hey manga pendatoon sa
Israil! Geneki niyo so kapepanatro iyo ago kapepangarasi na nggolalanen iyo so ontol
ago so kokoman. Taregi niyo so kapepangaraba niyo ko lopa o manga pagtaw aken, a tig
o Lebi a Maporo a Tohan.
10 Osara niyo so tito ago ontol a timbangan, so ontol a gantangan ago ontol a asada.
11 So 'ipah' a ipetekes ko mamara na datar sa kala o 'bat' a ipetekes ko ig, na aya kala o
oman i isa on na ikasapolo bagi ko 'homir.' Na so 'homer' na aya kalilid a ipetekes
sangkai a dowa.
12 Aya kalilid a ipetekes ko timbang na so 'sikil.' So isa ka 'sikil' na dowa polo ka 'girah,'
na so nem polo a 'sikil' na isa ka 'mina.'
So manga Sapaat ago so Manga ala a Gawii
13 “Giyai i manga pamemegayan a kisepaat iyo: So ikanem bagi ko 'ipah' a bantad o di na

barli a poon ko oman i 'homir' a maperagon iyo.
14 So inisogo a bagian ko lana a olibi na ikasapolo bagi ko 'bat' a poon ko oman i isa ka
'kor' (isa ka 'kor' na sapolo ka 'bat' o di na isa ka 'homir,' ka isa ka 'homir' na sapolo ka
'bat').
15 Kibegay mambo so satiman a bilibili a poon ko oman i talon a dowa gatos a kadakel
iyan sii ko mapiya a ig on a manga pananateba sa Israil.
"Langon ai kibegay a ipenapaat a pereperan, pekorbanen a totongen ago pekorbanen
pantag bo ko kanggiginawai kaan karilai so manga dosa o siran oto a pesepaat on, a tig o
16 “So langon a taw ko inged na kepalad iran angkai a manga pamemegayan ko

pendatoon sa Israil.
17 Na aya atastanggongan o pendatoon na so kabegay sa manga dii korbanen a
petotongen, so manga ipesepaat a pereperan ago so manga ipesepaat a panginginomen sii
ko manga kapista, sii ko kapeseribolan, sii ko manga Gawii a Idedeke ago so langon o
miyatendo a manga ala a gawii o manga taw sa Israil. Kibegay niyan so manga dii
korbanen sabap ko dosa, so manga ipesepaat a pereperan, so manga dii korbanen a
petotongen ago so manga dii korbanen pantag bo ko kanggiginawai kaan mapapas so
manga dosa o manga taw sa Israil.
So manga Kapista
18 “Giyai i pitero o Lebi a Maporo a Tohan: Sii ko paganay a gawii ko paganay a
olanolan na sombali ka sa kangodaan a mama a sapi a da a daway niyan na sotia ngka so
Timplo.
19 Kowa so imam ko rogo angkai a inisapaat sabap ko dosa na isising iyan ai ko manga
polaos o gimowa o Timplo, ago sii ko pat a rogo ko kaporoan ko aparan ago sii ko manga
polaos o gimowa ko makasosoled a lamalama.
20 Giyai mambo i sowaan ka ko ikapito gawii para ko apiya antawaa a miyakandosa a da
tibabaa o di na di niyan katawan. Sii sangkai a okit na pekesoti niyo so Timplo.
21 “Sii ko ikasapolo ago pat gawii ko paganay a olanolan na pooni niyo so kapeselaselaa
niyo so Pista a Paska, na sii ko soled o pito gawii na ken kano sa paan a da a tapay ron.
22 Sii sangkoto a gawii na pekabegay so pendatoon sa mama a sapi a isepaat sabap ko
dosa pantag ko ginawa niyan ago so langon o manga taw ko inged.
23 Oman gawii sii sangkoto a pito gawii na pekabegay sekaniyan sa pito a mama a sapi
ago pito a mama a bilibili a da a manga daway niyan a isepaat a totongen ko Allah, ago
satiman a mama a kambing a isepaat sabap ko dosa.
24 Pekabegay sekaniyan pen sa isa ka 'ipah' a tapong a isepaat a pangenengken ago pat ka
litro a lana a olibi a ipagoman ko oman i mama a sapi ago oman i mama a bilibili.
25 “Na makapantag ko Pista a magepoon ko ikasapolo ago lima gawii ko ikapito olan na
oman gawii ko soled o pito gawii a kapepista na kibegay o pendatoon so datar oto a
ipenapaat para ko isepaat ko dosa, so isepaat a totongen ago so isepaat a pereperan a rakes
on so lana a olibi."
ISIKIYAL 46
So Pendatoon ago so manga Pista
"Giyai i pitero o Lebi a Maporo a Tohan: So gimowa ko makasosoled a lamalama a

somasangor sa sebangan na kelekeban ko soled o nem gawii a dii inggalebek, ogaid na
kelekaan sii ko Gawii a Idedeke ago sii ko kapeseribolan.
2 So pendatoon na pekasoled a magokit ko liyoliyowan o gimowa a poon sa liyo. Na roo
sekaniyan pekatindeg ko obay o polaos o pintoan sii ko dii kakorbana o manga imam ko
isepaat iyan a totongen ago so manga isepaat iyan pantag bo ko kanggiginawai.
Pekasimba sekaniyan roo ko penggaka o gimowa na meliyo bo, ogaid na di kelekeban so
gimowa taman sa kaperimon iyan.
3 Oman Gawii a Idedeke ago gawii a saribolan na pekasimba so langon o manga taw ko
danga angkoto a gimowa sii ko hadapan o Allah.
4 “Oman Gawii a Idedeke na aya keawidan o pendatoon sii ko Allah a ipenapaat a

totongen na nem timan a nati a bilibili ago isa a mama a bilibili a da a manga daway
niyan.
5 Pekabegay sekaniyan sa isa ka 'ipah' a pereperan a iperakes ko oman i isa a mama a
bilibili, ago saden sa kala a kebayaan iyan megay a iperakes ko oman i nati a bilibili. Na
kerakesan iyan sa telo ka litro a lana a olibi so oman i isa ka 'ipah' a pereperan.
6 Sii ko gawii a saribolan na pekabegay sekaniyan sa satiman a kangodaan a mama a sapi,
nem timan a nati a bilibili ago isa a mama a bilibili a palaya da a manga daway niyan.
7 Pekabegay sekaniyan sa isa ka 'ipah' a pereperan a iperakes ko mama a sapi ago isa ka
'ipah' a iperakes ko mama a bilibili, na saden sa kala a kebayaan iyan megay a iperakes ko
oman i nati a bilibili. Na kerakesan iyan sa telo ka litro a lana a olibi so oman i isa ka
'ipah' a pereperan.
8 Igira a pesoled so pendatoon sangkoto a gimowa na sii pekaokit ko liyoliyowan iyan, na
ron bo pekaliyo.
9 “Ogaid na igira a pepamanoled so manga taw a sii pemangokit ko gimowa sa tampar sa

pagotaraan sa kasimbaa iran ko Allah sii ko miyanga tetendo a manga pista na pekaliyo
siran a sii magokit ko gimowa sa tampar sa pagabagatan. Na siran oto a miyamanoled a
sii miyokit ko gimowa sa pagabagatan na sii pakaliyo ko gimowa sa pagotaraan. Da a ba
pekaliyo ko siyoledan iyan a gimowa ka sii pekaliyo ko pantag iyan a gimowa.
10 Pekeped kiran so pendatoon igira a pesoled siran ago igira a pepeliyo siran.
11 “Sii ko manga masa a kapista ago manga ala a gawii na so oman i kangodaan a mama
a sapi o di na mama a bilibili a isepaat na kerakesan sa isa ka 'ipah' a pereperan, na so
isepaat a pereperan a iperakes ko oman i nati a bilibili na saden sa kala a kebayaan megay
o taw a sepaat. Na kerakesan iyan sa telo ka litro a lana a olibi so oman i isa ka 'ipah' a
pereperan.
12 “Igira a pesepaat so pendatoon sa iklas a isepaat iyan ko Allah apiya anda ko korban a
totongen o di na manga korban a isepaat pantag bo ko kanggiginawai na kelekaan
rekaniyan so gimowa a makasasangor sa sebangan, na kibegay niyan so ipenapaat iyan a
datar o pesowaan iyan ko Gawii a Idedeke. Na pekaliyo sekaniyan, na sii den ko
kapakaliyo niyan na kelekeban so gimowa.
So Gawii Gawii a Ipesepaat
13 “Oman mapita na so nati a bilibili a saragon a idad iyan a da a daway niyan na

kipesepaat a petotongen ko Allah; kisapaat ai oman gawii.
14 Kerakesan ai sa isepaat a pangenengken a dowa ka kilo a tapong ago pat ka litro a lana
a olibi a imbonaw ko tapong. Giyangkai a kapesepaat ko Allah na dayon sa dayon a
taritib.
15 So nati a bilibili, so tapong ago so lana a olibi na kisapaat a petotongen ko Allah oman
kapipita sa taman sa pakataman.
So Pendatoon ago so Lopa
16 “Giyai i pitero o Lebi a Maporo a Tohan: Opama ka mbegi o pendatoon sa

pamemegayan a lopa so isa ko manga wata iyan a mama na kekawali ini mambo o manga
mbawataan iyan ka aya iran kawali sa taman sa pakataman.
17 Ogaid na o mbegi niyan sa pamemegayan a lopa so isa ko manga oripen iyan na
ketangan ai o oripen taman ko ragon a kakebokai ko manga oripen; samaoto na
pekakasoy so lopa ko pendatoon. So bo so manga mbawataan iyan a manga mama i
makapekewali ron sa dayon sa dayon.
18 Na di kepakay o ba maagaw o pendatoon so lopa a aya kawali o apiya antawaa ko
manga taw. Aya bo a kibegay niyan ko manga wata iyan a manga mama a makewali ran
na so rek iyan a lopa, kaan da a ba kedai sa lopa ko manga pagtaw aken."
So manga Tolang o Timplo
19 Oriyan iyan na inowit ako o mama ko soled o manga rowang a somasangor sa

pagotaraan a matatago ko obay o gimowa o lamalama. Giyai so soti a manga rowang a
inisenggay ko manga imam. Piyakiilay niyan raken so darpa roo sa kaposan o manga
rowang sa tampar sa sedepan
20 Na pitero iyan raken a "Giyai i darpa a ron ipetinda o manga imam so sapo o manga
ayam a dii korbanen sabap ko sala ago sabap ko kiyataksil ago so tapong ko ipepanapaat a
pereperan kaan iran ai di kewit ko makaliliyo a lamalama kaan on di kesoti so manga
taw."
21 Oriyan iyan na inowit ako niyan ko makaliliyo a lamalama na inagak ako niyan ko pat
a manga rogo niyan. Na sii ko oman i rogo niyan na miyailay aken a aden a darpa on a
lilibeten a pangeleban
22 A dowa polo ka mitros a katas iyan ago sapolo ago lima ka mitros a kabelang iyan, na
ndatadatar sa kala so pat a darpa.
23 Sii ko soled o pat a manga darpa na aden a sarantar on a manga tolang a mikakampet
ko pangeleban ko oman i kilid iyan.
24 Na pitero raken o mama a "Giyai i manga tolang a ron ipetinda o manga pepanalagad
ko Timplo so manga sapaat a dii korbanen o manga taw."
ISIKIYAL 47
So Lawasaig a Pegondas a poon ko Timplo
Oriyan iyan na piyakaonot ako o mama na komiyasoy kami ko gimowa o Timplo. Na ron
aken miyailay so ig a pepekapoon ko kababaan o ipesoled ko Timplo ago petoga sa
tampar sa sebangan (ka so panempang o Timplo na makasasangor sa sebangan). Na
pegondas so ig ko kawanan a kilid o aparan sa tampar sa pagabagatan.
2 Mandiyadi na inowit ako niyan ko liyo o pangeleban a miyokit kami ko gimowa sa
pagotaraan, na inagak ako niyan magilid sa liyo roo ko gimowa a makasasangor sa
sebangan. Na ron aken miyailay so ig a petoga sa liyo a pepekapoon ko kawanan a kilid o
gimowa.
3 Tomiyaros lomalakaw so mama sa tampar sa sebangan a kakapetan iyan so panakes
iyan, na tomiyakes sekaniyan sa lima gatos ka mitros, na pitero iyan raken a romipag ako
ron; na aya kadalem o ig na taman sa panintilan.
4 Tomiyakes sekaniyan pen sa lima gatos ka mitros na pitero iyan raken a romipag ako
ron peman, na taman sa leb a kadalem iyan. Tomiyakes peman sa lima gatos ka mitros na
aya kadalem iyan na taman sa kasadan.
5 Na tomiyakes peman sa lima gatos ka mitros na miyakadalem den so ig a miyabaloy a
lawasaig a di aken den keripag liyo ron o pelangoy ako.
6 Na pitero iyan raken a "Wata o manosiya, tatanodi ngka piyapiya so miyailay ngka."
Mandiyadi na inowit ako o mama ko kilid o lawasaig,
7 Na kagiya makaoma ko roo na miyailay aken a aden a madakel a manga kayo ko mbala
a pangeba o lawasaig.
8 Na pitero iyan raken a "Giyangkai a lawasaig na petoga sa baba sa tampar sa sebangan a
pepekaokit ko Balintad a Yordan taman ko Maatay a Ragat. Na amay ka makaondas so
lawasaig ko ragat na kebaloy so ragat a mapiya a ig.
9 Sayana a madakel a pitibarangan a bibiyag a kaaden a keden on apiya anda toga angkai
a lawasaig. Tanto a pendakel so manga seda ko Maatay a Ragat, ka pegondas roo angkai
a ig a mapekapiya niyan so ig ko ragat. Na apiya anda toga so lawasaig na penga ooyag
so langon taman on.
10 Pemanindeg so manga panginginseda ko kilid o ragat; ipoon sa In Gidi taman sa In
Iglaim na pekeyaten iran on so manga poket iran sa kapengagaga iran on. Madakel a
pitibarangan a manga seda a kipeno ko ragat a datar o manga seda ko Ragat a
Miditiraniyo.
11 Ogaid na di kebolongan so manga basak ago so manga lendeban on, ka pekepoonan ai
o timos.
12 “Pemangeto ko mbala a pangeba o lawasaig so langon o pitibarangan a manga kayo a

pemangonga. Di den kelayon so manga raon iran aya pen o ba siran kadai sa onga.
Pemangonga ini oman saolan ka pekeigan siran o ig a pepekapoon ko Timplo. Kekan o
manga taw so manga onga iran na kibolong kiran so manga raon iran.
So manga Temanaan o manga Bagian ko Lopa
13 Giyai i pitero o Lebi a Maporo a Tohan: "Giyai i manga temanaan o lopa a

pembagibagiin iyo a mapekewali o sapolo ago dowa a manga mbatabataa sa Israil, a so
dowa on bagi na rek o mbatabataa a Yosop.
14 Melagilagid so mapembagian on o oman i isa ka mbatabataa, ka inisepa aken ko
manga apo iyo a imbegay aken kiran angkai a lopa a aya iran kawali.
15 “Aya temanaan o lopa sa tampar sa pagotaraan na magepoon roo ko Ragat a

Miditiraniyo na malalagoy sa tampar sa sebangan a magokit sa siti a Hitlon, sa Libo
Hamat, sa Sidad,
16 Ago sii ko manga siti a Birotah, ago Sibraim (a matatago ko pageletan o Damasko ago
giya Hamat), na taman den sa Hasir Hatikon a ndodoo ko temanaan a Haoran.
17 Giyangkai a temanaan na ipoon ko Ragat taman ko siti a Hasar Inon a pekedeg ko
temanaan a miilet sa Hamat sii sa pagotaraan ago giya Damasko sii sa pagabagatan.
Giyai i temanaan sa tampar sa pagotaraan.
18 “So temanaan o lopa sa tampar sa sebangan na magepoon ko matetendo a darpa ko

pageletan a Damasko ago giya Haoran na malalagoy sa tampar sa pagabagatan a kedeg ko
Lawasaig a Yordan ko pageletan a inged a Israil ago giya Giliyad, na manaros den sa
taman sa Tamar. Giyai i temanaan sa tampar sa sebangan.
19 “So temanaan iyan sa tampar sa pagabagatan na magepoon sa Tamar na malalagoy sa
tampar sa sedepan taman ko manga ig sa Miribah Kidis, na ipoon sii na pekedegen iyan
so temanaan a Misir taman ko Ragat a Miditiraniyo. Giyai i temanaan iyan sa tampar sa
pagabagatan.
20 “Sii sa tampar sa sedepan na so Ragat i temanaan iyan a malalagoy ini sa tampar sa

pagotaraan taman ko matetendo a darpa ko pantag a Libo Hamat. Giyai i temanaan sa
tampar sa sedepan.
21 “Mbagibagia niyo angkai a lopa a ipepasod ko kadakel o manga mbatabataa sa Israil.

22 Mbagibagia niyo a aya niyo kawali ago so manga mananangga a mimbabaling ago
mimbabawata sii rekano. Bilangen iyo siran a tenger a taw a Israil a makapekewali siran
a datar o manga mbatabataa sa Israil.
23 Oman i mananangga na kebegan sa bagian ko lopa a maaped ko kawali o mbatabataa a
ron sekaniyan mababaling.
ISIKIYAL 48
So Kapembagibagia ko Lopa
"Giyai so listaan ko manga mbatabataa sa Israil ago so bagian ko lopa a mapekewali o

oman i isa kiran. Paganay ron so Dan. Aya temanaan o lopa iran sa tampar sa pagotaraan
na magepoon ko Ragat a Miditiraniyo na malalagoy sa tampar sa sebangan a magokit sa
Hitlon, sa Libo Hamat ago sa Hasar Inan na taman den ko temanaan a pageletan a
Damasko ago giya Hamat. Na so bagian o Dan na ipoon ko temanaan o inged a Israil sa
tampar sa sebangan taman ko Ragat roo sa sedepan.
2 “Aya dair o bagian o Dan na so bagian o Asir a ipoon sa sebangan taman sa sedepan.
3 “Aya dair o bagian o Asir na so rek o Naptali a ipoon sa sebangan taman sa sedepan.
4 “Aya dair o Naptali na so Manasih a ipoon sa sebangan taman sa sedepan.
5 “Aya dair o Manasih na so Ipraim a ipoon sa sebangan taman sa sedepan.
6 “Aya dair o Ipraim na so Robin a ipoon sa sebangan taman sa sedepan.
7 “Aya dair o Robin na so Yodah a ipoon sa sebangan taman sa sedepan.
So Tindos a Darpa sii ko Lembak o Lopa
8 “Aya dair o Yodah sa tampar sa pagabagatan na so lopa a isenggay a tindos a bagian ko

langon o lopa. Magatos ago dowa polo ago lima ka kilomitro a kaolad iyan na aya katas
iyan ipoon sa sebangan taman sa sedepan na datar sa takes o manga bagian o manga
mbatabataa, na mbangonen so Timplo ko lembak iyan.
9 “So lopa a kisenggay ko Allah na magatos ago dowa polo ago lima ka kilomitro a katas
iyan na lima polo ka kilomitro a kaolad iyan.
10 Na so ped sangkai a soti a bagian ko lopa na para ko manga imam a aya katas iyan sii
sa tampar sa pagotaraan na magatos ago dowa polo ago lima ka kilomitro, aya kaolad iyan
sa tampar sa sedepan ago sa sebangan na lima polo ka kilomitro, na aya katas iyan sa
tampar sa pagabagatan na magatos ago dowa polo ago lima ka kilomitro. Na ron
mbangona so Timplo sii ko look iyan.
11 Giyangkai a darpa na para ko manga imam a manga mbawataan i Sadok a petoman
siran ko kapepanalagadi iran raken ago da manga dadadag a datar o ped a manga Libitiyo
isako madadag so manga Israil.
12 Lebi ini a soti a bagian ko lopa a isenggay kiran.
13 Na aya midadair sangkai a lopa o manga imam na so bagian o manga ped a manga
Libitiyo a magatos mambo ago dowa polo ago lima ka kilomitro a katas iyan ago lima
polo ka kilomitro a kaolad iyan.
14 Da den a bagi sangkai a tindos a lopa a ba mapepesa o di na ba sembia aya pen o ba
mitogalin, ka inisenggay ini a soti a rek o Allah.
15 “So kelamba sangkai a darpa a dowa polo ago lima ka kilomitro a kaolad iyan ago
magatos ago dowa polo ago lima ka kilomitro a katas iyan na para ko kalilid a pagosaran
on o siti a kapemangonan sa manga walay ago so dii pagonayonan. So siti a sii matatago
ko lembak iyan
16 Na sokesoker a dowa polo ago dowa ago tenga ka kilomitro so oman i kilid iyan.
17 Sii ko melilibeta ko siti ko oman i kilid iyan na aden a madaya on a darpa a magatos
ago dowa polo ago lima ka mitros a kaolad iyan.
18 So kelamba ko lopa a midadair ko soti a bagian a di on ped so darpa o siti na lima polo
ka kilomitro sa tampar sa sebangan ago lima polo mambo ka kilomitro sa tampar sa
sedepan. Na so pereperan a penga raragon on na para ko manga gomagalebek ko siti. So
kigagalebek ko siti a poon ko langon o mbatabataa sa Israil na aya on makapembasok.
20 So langon angkai a darpa a rakes on so lopa a kisenggay a soti ago so kebangonan ko
siti na magatos ago dowa polo ago lima ka kilomitro a sokesoker.
So Lopa para ko Pendatoon
21 “So kelamba ko lopa a mbabala ko soti a bagian ago so katatagoan ko siti na rek o
pendatoon. Oman i isa sangkai a darpa na magatos ago dowa polo ago lima ka kilomitro
a kaolad iyan a so isa on na malalagoy sa tampar sa sebangan taman ko temanaan a Israil
roo sa sebangan, na so isa on na malalagoy sa tampar sa sedepan taman ko temanaan o
inged roo sa sedepan.
22 Sabap san na so lopa a rek o pendatoon na so langon o darpa sii ko pageletan o rek o
mbatabataa a Yodah a midadair on sa tampar sa pagotaraan ago so rek o mbatabataa a
Baniyamin a midadair on sa tampar sa pagabagatan a di on ped so lopa sii ko look iyan a
rek o manga Libitiyo ago so kebangonan ko siti.
So Lopa a Rek o ped a manga Mbatabataa

23 “Giyai so manga bagian ko lopa a rek o ped a manga mbatabataa: So bagian o
Baniyamin a midadair ko lopa o pendatoon sa tampar sa pagabagatan na ipoon ko
temanaan a Israil sa tampar sa sebangan taman ko temanaan iyan sa tampar sa sedepan.
24 “Aya dair o bagian o Baniyamin na so bagian o Simiyon a ipoon sa sebangan taman sa

sedepan.
25 “Aya dair o bagian o Simiyon na so bagian o Isakar a ipoon sa sebangan taman sa

sedepan.
26 “Aya dair o bagian o Isakar na so bagian o Sibolon a ipoon sa sebangan taman sa

sedepan.
27 “Aya dair o bagian o Sibolon na so bagian o Gad a ipoon sa sebangan taman sa

sedepan.
28 “So temanaan o Gad na magepoon sa Tamar na manaros ko manga ig sa Miribah

Kadis, na ipoon sii na kedeg ko temanaan a Misir taman ko Ragat a Miditiraniyo.
29 “Giyai i lopa a mapembagibagi iyo ko manga mbatabataa sa Israil a mapekewali ran,

na giyanan i manga bagian iran on," a tig o Lebi a Maporo a Tohan.
So manga Gimowa sa Yarosalim
30 Giyai i manga gimowa o siti a Yarosalim: Sii ko pangeleban iyan sa tampar sa

pagotaraan a aya katas iyan na dowa polo ago dowa ago tenga ka kilomitro
31 Na aden a telo a gimowa on a aya ipembeto ko oman i isa on na so ngaran o isa ko
manga mbatabataa sa Israil; a so gimowa o Robin, so gimowa o Yodah ago so gimowa o
Libi.
32 “Sii ko pangeleban iyan sa tampar sa sebangan a dowa polo ago dowa ago tenga ka
kilomitro a katas iyan na telo a gimowa on; so gimowa o Yosop, so gimowa o Baniyamin
ago so gimowa o Dan.
33 “Sii ko pangeleban sa tampar sa pagabagatan a dowa polo ago dowa ago tenga ka
kilomitro a katas iyan na telo a gimowa on; so gimowa o Simiyon, so gimowa o Isakar
ago so gimowa o Sibolon.
34 “Na sii ko pangeleban sa tampar sa sedepan a dowa polo ago dowa ago tenga ka
kilomitro a katas iyan na telo a gimowa on; so gimowa o Gad, so gimowa o Asir ago so
gimowa o Naptali.
35 “Aya katas langon o manga pangeleban a mililibet ko siti na siyaw polo ka kilomitro.
Na ipoon sangkoto a masa na aya ngaran o siti na "Ndodon so Allah."
DANIYAL
DANIYAL 1
So Kapetediyama ki Daniyal sii sa Babilon
Sii ko ikatelo ragon a kandadato i Yahoyakim a dato sa Yodah na si Nibokadnisar a dato

sa Babilon a rakes o manga sondaro niyan na somiyong sa Yarosalim ka giyobat iran ai.
2 Na piyakidaag rekaniyan o Kadnan si Yahoyakim a dato sa Yodah. Kagiya komasoy si
Nibokadnisar sa Babilon na initelon iyan so ped ko manga kasangkapan a isesenggay ko
Timplo o Tohan na tiyago iyan ai sii ko petimoan sa tamok ko timplo o tohan iyan.
3 Oriyan iyan na siyogo o dato si Aspinas a aya olowan o manga sanasanaan o dato sa
kapemili ko ped ko miyanga bibiyag a manga Israil a manga moriyataw o dato ago manga
ala i bangensa.
4 Inisogo on a aya pemiliin iyan na manga kangodaan a manga mama a manga pipiya i
kambobolawasan ago manga tataid, a mapasang ko langon a peganaden, ago mala i katao
ago sabot, a kepakayan manalagad sii ko torogan o dato. Inisogo pen ki Aspinas so kipa-
ngendaon kiran ko kapangadi ago kasorat sa basa o manga taw sa Babilon.
5 Oman gawii na began siran o dato sa bagian ko manga pipiya a pangenengken ago arak
a pegenaten ko lamisaan iyan. Tediyamen siran ko makatelo ragon, na maipos oto na
pakapenalagaden siran den ko dato.
6 Ped kiran a miyapili a manga kangodaan na si Daniyal, si Hananiyas, si Misail ago si

Asariyas a palaya siran ped ko mbatabataa a Yodah.
7 So olowan o manga sanasanaan na bigan iyan siran sa bago a manga ngaran: si Daniyal
na bitowan iyan sa Biltisiyasar; si Hananiyas na bitowan iyan sa Siyadrak; si Misail na
bitowan iyan sa Misak, na si Asariyas na bitowan iyan sa Abidnigo.
8 Ogaid na piyasad i Daniyal sa ginawa niyan a di niyan pekikaraman a ginawa niyan
ko kapekena niyan ko pangenengken ago so kapeginoma niyan ko arak a imbegay kiran o
dato. Kagiya ka maoto na inakol iyan ko olowan o ba maparo a di sekaniyan kekaraman
sangkoto a pangenengken.
9 Na bigan o Tohan so olowan sa kapedi ago limo ki Daniyal,
10 Na pitero iyan ki Daniyal a “Ipekelek aken so dato a kadnan aken a aya sominggay
rekano ko pangenengken ago paginomen, ka o mailay niyan a lebi ka a pagti ko manga
kangodaan a datar ka sa idad na ba niyan den potola so olo aken sabap reka.”
11 Mandiyadi na somiyong si Daniyal ko gordiya a piyakakibir o olowan ki Daniyal,
Hananiyas, Misail ago si Asariyas na pitero iyan on a
12 “Kapedipedi ka bo na tepengi kami ngka ko soled o sapolo gawii. Pegenati kami ngka
baden sa manga lite a ken ami ago ig a paginomen ami.
13 Mapopos oto na pakapagilayaa ngka so manga paras ami ago so paras o manga ngo-
ngoda a pekan sa pangenengken a pegenaten sii ko torogan. Na saden sa keinengka a ka
na nggolalanen ka rekami.”
14 Na miniyog so gordiya sangkai a antangan na tipengan iyan siran ko miyakasapolo
gawii.
15 So kiyaipos o sapolo gawii na miyailay a lebi siran a mapiya i paras ago lebi a
piyanga oolitan a di so apiya antawaa ko manga ngongoda a pekan ko pangenengken a
ipembegay kiran o dato.
16 Kagiya ka maoto na da siran den begi o komikibir ko manga pipiya a pangenengken
ago arak a paginomen iran, ka manga leletaan bo den.
17 Na bigan o Tohan angkai a pat kataw a manga ngongoda sa ongangen ago katao ko
langon a pitibarangan a manga sorat ago peganaden. Si peman si Daniyal na pekesabotan
iyan so langon a manga pangingilain ago taginepen.
18 Kagiya mapopos so masa a tindo o dato na so olowan o manga sanasanaan na
piyangowit iyan ki Nibokadnisar so langon o manga ngongoda.
19 Miyakimbitiyarai kiran so dato na miyailay niyan a da a ba on pekarepeng ki Daniyal,
Hananiyas, Misail ago si Asariyas. Sabap sii na initoro siran a kirapeg ko manga
mosawira o dato.
20 Na apiya antonaa i ipegise kiran o dato makapantag ko kapagongangen o di na
kapakasasabot na kiyatokawan iyan a sapolo takep a kapasang iran a di so langon a
manga pamimitoon ago paririmar sii ko dalem o ndatoan iyan.
21 Na mindayondayon roo den si Daniyal ko torogan o dato taman ko paganay a ragon a
kiyandato i Sayros.
DANIYAL 2
So Taginepen i Nibokadnisar
Miyakaisa a kagagawii sii ko ikadowa ragon a kandadato i Nibokadnisar na mitetaginep

sekaniyan sa tanto a inikasosa o pamikiran iyan, na di torogen.
2 Sabap roo na piyakisogoan iyan so manga pamimitoon, manga paririmar, manga
pangangatao ago manga wali kaan iran on kapemaanai so miyateginep iyan. Kagiya
makapangadap siran ko dato
3 Na pitero iyan kiran a “Mitetaginep ako sa inikasosa o pamikiran aken, na kabaya aken
a katokawan ko i maana niyan.”
4 Simbag iran so dato sii sa basa a Aramaik a tig iran a “Hey Dato, mamboway ka sa
taman sa pakataman! Panotola ngka rekami a manga oripen ka so taginepen, na
mbatonan ami sa maana.
5 Pitero kiran o dato a “Piyasad aken sa ginawa ko a o di niyo raken pakitokawi so
miyateginep aken ago so maana niyan na pakipesepotol aken so manga lawas iyo, na
kebaloy a manga tabotod so manga walay niyo!
6 Ogaid na o mapanotol iyo so taginepen ago kapemaanaan iyo na mbegan aken sekano
sa manga pamemegayan ago manga tendan a rakes o mala a bantogan. Kagiya ka maoto
na teroa niyo raken so miyateginep aken na go niyo batoni sa maana.”
7 Somimbag siran peroman a tig iran a “Teroa ngka rekami daan so taginepen, Dato, na
teroon ami reka so maana niyan.”
8 Tig o dato a “Katawan aken a ba niyo baden pegilanga so oras ka kagiya kiyasabotan
iyo a piyasad sa ginawa ko
9 A o di niyo raken mapanotol so taginepen na kesela kano langon. Piyagayonayonan iyo
a kapepamokegi niyo raken, ka iinamen iyo a maalin so maoolaola. Na, teroa niyo raken
imanto so taginepen na ketokawan ko a kapemaanaan iyo.”
10 Tig o manga wali ko dato a “Da a taw ko dalem o doniya a ba niyan mapayag reka,
Dato, so miyateginep ka. Na da a dato a apiya i kala iyan i gees i ba miyangni sa datar
anan ko apiya antawaa a pamimitoon o di na paririmar o di na wali.
11 Tanto a maregen so ipepanton o dato! Da den a sakataw bo a ba pekapayag reka ko
taginepen ka, Dato, a makaliyoliyo ko manga tohan, na kena a ba siran pepaginetaw a ped
o manosiya.”
12 Tanto ini a inikararangit o dato a minisogo iyan sa kapemonoa ko langon o manga
oongangen a mama sa Babilon.
13 Mandiyadi na piyakalangkap so sogo o dato a pemonoon siran langon, na pimbanog
iran si Daniyal ago so manga ginawai niyan kaan siran mapamono.
14 Kagiya makaoma si Ariyok a komandir o manga gordiya o dato sa kapemonoa niyan
kiran na miyakimbitiyarai ron si Daniyal sa kaongangen ago kadalem i panarima
15 A pitero iyan on a “Ino tanto a kapangarasi so sogo o dato?” Mandiyadi na piyanotol i
Ariyok ki Daniyal so miyanggolaola.
16 Na giyoto a somiyong somambot si Daniyal ko dato na piyangni niyan on a kabegan
sekaniyan sa oras kaan iyan mapayag ko dato so maana o taginepen.
Miyapayag o Tohan ki Daniyal so Maana o Taginipen
17 Oriyan iyan na miyaling si Daniyal na piyakitokawan iyan so miyanggolaola ko

manga ginawai niyan a si Hananiyas, Misail ago si Asariyas,
18 Na inakol iyan kiran a mangangampedian siran ko Tohan sa kasorgaan sa kapayaga
niyan kiran sangkai a migegaib kaan di siran kirakes a pematay ko ped a manga oonga-
ngen sa Babilon.
19 Na sii sangkoto a kagagawii na miyapayag ki Daniyal so migegaib a miyakaokit ko
pangingilain, na piyodi i Daniyal so Tohan sa kasorgaan
20 A tig iyan a
“Seselaan so Ingaran o Tohan sa taman sa pakataman;

rek iyan so ongangen ago kabatowa!
21 Sekaniyan i mamaapaar ko pekesowasowa ko doniya;
pepangowaan iyan sa kadato so manga dato,
na salakaw peman a di niyan dii pakandatoon.
Pembegay sekaniyan sa ongangen ko manga oongangen
ago so katao ko manga somasabot.
22 Pepayagen iyan so manga dadalem ago kipageenaan a manga betad;
katawan iyan o antonaa i misosolen ko maliboteng,
apiya pen o makalilibet rekaniyan so sindaw.
23 Penalamatan ago podin ko seka, hey Tohan o manga apo aken,
ka bigan ako ngka sa ongangen ago gees.
Inampon ka den so pepangnin ami reka
ka piyayag ka rekami so taginepen o dato.”
Pimaanaan i Daniyal so Taginepen
24 Na giyoto a somiyong si Daniyal ki Ariyok a piyakasangan o dato sa kambonoa ko

manga oongangen a mama sa Babilon na pitero iyan on a “Di ngka pemonoa so manga
oongangen a mama sa Babilon! Pakapangadapa ko ngka baden ko dato, ka pekitokawan
ko ron so maana o taginepen iyan.”
25 Magaan so magaan na inowit i Ariyok si Daniyal ko dato na pitero iyan on a

“Minitoona aken a mama a maaped ko miyanga bibiyag a poon sa Yodah a makapetero
reka, Dato, ko maana o taginepen ka.”
26 Na iniise o dato ki Daniyal (a bebetowan sa Biltisiyasar) a “Ba ngka raken
kapekitokawi so miyailay aken ko taginepen ago kapemaanaan ka ini?”
27 Tig i Daniyal a “Da a maongangen a mama, paririmar, pamimitoon o di na wali a ba

makapetero reka, Dato, ko migegaib a ipegise a ka.
28 Ogaid na aden a Tohan sa kasorgaan a pepayag ko kipageenaan, na piyakiilay niyan
reka, Dato Nibokadnisar, o antonaa i mapenggolaola ko akir a manga gawii. So tagi-
nepen ka ago so pangingilain a miyailay ngka ko kaiiga a ka na giyai:
29 “Sii ko katotoroga reka, Dato, na mitetaginep ka makapantag ko da pen
mitalingoma a masa, na so Tohan a pepayag ko migagaib na piyakitokawan iyan reka so
mapenggolaola on.
30 So saken on peman na miyapayag raken angkai a migegaib a kena a ba sabap sa lebi
ako a maongangen a di so apiya antawaa taw, ka sabap sa an ka katokawi so maana o
taginepen ka ago kasabotan ka so miyamanagad ko pamikiran ka.
31 “Sii ko pangingilain ka, Dato, na miyailay ngka a tomitindeg ko hadapan ka so
mala a piyagetaotaw a tanto a piyakasiransirang, a piyakalekelek a pegilain so paras iyan.
32 Aya olo niyan na inembaalan a lombos a bolawan, so rareb iyan ago manga barokan na
pirak, so tiyan ago manga witan iyan na tombaga,
33 So manga bobon iyan na potaw, na so manga ai niyan na so sabagi on na potaw ago so
sabagi on na liyoto a bote.
34 Sii ko kapegilaya ngka on na aden a miyatempag a lakongan a kena ini a ba galebek o
manosiya, na minisogat ai ko piyagetaotaw ko manga ai niyan a potaw ago bote, na
piroropet iyan ai.
35 Giyoto a so potaw, so bote, so tombaga, so pirak ago so bolawan na parengarengan a
kiyapangaroropet iran langon, na miyanga babaloy a lagid sa kapino o okap sii ko
pegegikan igira a laon. Inibayog ai langon o ndo a da den a ba on miyalamba. Ogaid na
so lakongan a minisogat ko piyagetaotaw na mimbaloy a miyakalala a palaw a minipeno
ko dalem a doniya.
36 “Giyoto so taginepen ka, na teroon ami reka imanto so maana niyan.
37 Seka, Dato, i lebi a mala i bantogan ko langon o manga dato, ka so Tohan sa kasor-
gaan na bigan ka niyan sa kadato, kapaar, gees ago kabesaran.
38 Piyakandato ka niyan ko manga manosiya ko dalem o doniya, na apiya so manga bi-
natang sa kalasan ago so manga papanok ko kawang na piyalad iyan ko lima ngka. Seka
den i olo a bolawan.
39 “Amay ka maipos so ndatoan ka na nggemaw so salakaw a ndatoan a mababa reka i
kapaar. Telondog on so ikatelo a ndatoan a kiyaibaratan o tombaga a tiyan ago manga
witan, na pendato ini sa dalem o doniya.
40 Oriyan oto na nggemaw so ikapat a ndatoan a datar sa kabager o potaw, na
peroropeten ago pemanasaan iyan so langon a miyanga oona a ndatoan, a datar o potaw a
pepekaropet ago pepekasasa ko langon taman a pekesogat iyan.
41 Na so den so miyailay ngka a so sabagi ko manga ai ago manga kemer a ai na liyoto a
bote ago so sabagi on na potaw na datar ai a kababagi angkai a ndatoan. Ogaid na
ketagoan ai sa ped ko kategas o potaw, ka kagiya miyailay ngka so potaw ago so bote a
makandedeketa.
42 Na datar o manga ai a mbabagiay sa potaw ago bote na lagid iyan mambo angkai a
ndatoan, ka so sabagi on na mabager, ago so sabagi on na magebo.
43 So den so miyailay ngka a makandedeketa so potaw ago so bote na lagid iyan mambo
a makapelolooka so manga pagtaw ko ndatoan, ogaid na di siran den keisaisa, ka datar o
potaw a di den kisaog ko bote.
44 “Sii ko masa angkoto a manga dato na so Tohan sa kasorgaan na mbengon sa
ndatoan a di den kebinasa aya pen o ba madaag o apiya antawaa taw. Sesaan iyan so
langon angkoto a manga ndatoan na pageposen iyan siran, na ketatap den angkai a ndato-
an sa taman sa pakataman.
45 Giyanan i maana o pangingilain ko lakongan a miyatempag a poon ko palaw a kena
ini a ba galebek o manosiya, a so lakongan a piyanasa iyan so potaw, so tombaga, so bote,
so pirak ago so bolawan.
“Piyakiilay reka, Dato, o kababantogan a Tohan o antonaa i mapenggolaola ko
pekatalingoma a manga masa. Matatangked so katomana ko miyateginep ka, na benar so
kiyapemaanai ron.”
Biyalasan o Dato si Daniyal ago so manga Ginawai niyan
46 Na giyoto a gomipe si Nibokadnisar ko hadapan i Daniyal ka sominimba on, na

inisogo iyan a kapesepaati ron ago so katotongi ron sa doka.
47 Na tig o dato ki Daniyal a “Matamataan a so Tohan ka na aya den Tohan o manga
tohan ago Kadnan o langon a manga dato, ago pepayag ko manga migegaib ka kagiya
miyagaga ngka mayag angkai a migegaib!”
48 Mandiyadi na iniporo o dato so pangkatan i Daniyal na bigan iyan sa madakel a
manga ala i arga a pamemegayan. Biyaloy niyan pen a gobirnador ko dalem a probinsiya
a Babilon ago olowan o langon a manga oongangen a mama.
49 Liyo ron pen na sabap ko pangni i Daniyal na initoro o dato si Siyadrak, Misak ago si
Abidnigo a manga petendingan ko manga galebek ko probinsiya a Babilon, ogaid na si
Daniyal na sii sekaniyan den ko torogan o dato a aya niyan sanasanaan.
DANIYAL 3
So Piyagtaotaw a Barahala a Bolawan
Miyakimbaal so Dato Nibokadnisar sa piyagtaotaw a barahala a bolawan a dowa polo ago

pito ka mitros a kaporo iyan ago dowa ago tenga ka mitros a kabelang iyan. Piyakatindeg
iyan ai ko kapantaran a Dora sii sa probinsiya a Babilon.
2 Na piyakisogoan iyan so manga pendatoon, manga mayor, manga gobirnador, manga
pangongokom, manga sorilo, manga wasir, manga sanasanaan ago so langon a manga
opisiyal ko manga probinsiya sa kapakadarpa iran ko kapeselaselaa ko barahala a
piyakatindeg iyan.
3 Kagiya matimotimo langon angkai a manga opisiyal a mamanindeg siran ko hadapan o

barahala a piyakatindeg o Dato Nibokadnisar
4 Na miyanawatewag sa matanog so pepemakalangkap a mama a tig iyan a “Hey manga
taw ko langon a nasiyon, a manga mbarambarang den i bangensa ago basa, na pamaki-
nega niyo so sogoan o dato:
5 Amay ka maneg iyo so kapagoni o bogiyong, so insi, so kotiyapi, so kornita, so kobing
ago so ped a manga boniboniyan na sodiyod kano a simba ko barahala a bolawan a
piyakatindeg o Dato Nibokadnisar.
6 Na saden sa di somodiyod ago somimba na magaan so magaan na ipelebad ko peso-
keyaw a apoy ko dii perapogan.”
Pipenon so manga Yahodi ko Dato
7 Kagiya ka maoto na so den so kiyanega iran ko kiyaoni o manga boniboniyan na so

langon a taw a manga mbarambarang i bangensa ago basa na miyamanodiyod ago
miyamanimba ko barahala a bolawan a piyakatindeg o Dato Nibokadnisar.
8 Ogaid na sangkoto a gawii na somiyong ko dato so pira kataw a taga Babilon ka

pipenon iran on so manga Yahodi.
9 Pitero iran ko Dato Nibokadnisar a “Hey Dato, mamboway ka sa taman sa pakataman!
10 Migay ka sa sogoan a so oman i makaneg ko kapegoni o manga boniboniyan na
paliyogat on a somodiyod ago somimba ko barahala a bolawan.
11 Sogoan ka pen a saden sa di somodiyod ago somimba na ipelebad ko pesokeyaw a
apoy ko dii perapogan.
12 Na aden a manga Yahodi a initoro o ka a petendingan ko manga galebek ko probinsiya
a Babilon, a si Siyadrak, Misak ago si Abidnigo. Giyangkai a manga taw, Dato, na da ka
iran pakinega, ka di iran pengongonotanan so manga katohanan ka, aya pen o ba siran
somimba ko barahala a bolawan a piyakatindeg ka.”
13 So kiyanega niyan on na tanto a kiyararangitan si Nibokadnisar na piyakisogoan iyan

si Siyadrak, Misak ago si Abidnigo. Miyawit siran ko hadapan o dato
14 Na pitero kiran i Nibokadnisar a “Ba benar, Siyadrak, Misak ago Abidnigo a di niyo
pagonotan so manga katohanan aken aya pen o ba niyo sinimba so bolawan a barahala a
piyakatindeg aken?
15 Na o makatitiyagar kano imanto somodiyod a pemanimba ko barahala a
piyakimbaalan aken amay ka maneg iyo so kapagoni o manga boniboniyan na mapiya.
Ogaid na o di kano ron simba na ipelebad kano den nggagaan ko pesokeyaw a apoy ko dii
perapogan. Na antawaa den i tohan a pekakowa rekano ko kapaar aken?”
16 Somimbag ko dato si Siyadrak, Misak ago si Abidnigo a tig iran a “Hey Nibokadnisar,
kena a ba mi awid a akal a kipetindegen ami sa ginawa mi sii reka mipantag sangkai a
betad.
17 O pelebaden kami ko apoy ko dii perapogan na so Tohan a pepangongonotanan ami na
kegaga kami niyan on somabet. Pokasen kami niyan ko kapaar ka, Dato.
18 Ogaid na apiya pen o di niyan ai nggolaolaa na sabota ngka, Dato, a di ami pagonotan
so manga katohanan ka aya pen o ba ami simbaa so barahala a bolawan a piyakatindeg
ka.”
So Pesokeyaw a Apoy ko dii Perapogan
19 Na giyoto a baden kiyalonsanan so rarangit i Nibokadnisar taman sa miyakariga so

paras iyan ko di niyan dii kangganii ki Siyadrak, Misak ago si Abidnigo. Inisogo iyan a
pakapekeyaon pen sa pito takep so apoy ko dii perapogan a di so asal a kayaw niyan.
20 Na siyogo iyan so lebi a manga babager ko manga sondaro niyan a patongen iran si
Siyadrak, Misak ago si Abidnigo ago ilebad iran siran ko pesokeyaw a apoy ko dii
perapogan.
21 Mandiyadi na piyamatong iran angkai a manga mama a sosoloten iran den so langon a
nditaren iran, na inilebad iran siran ko look o pesokeyaw a apoy.
22 Na sabap sa inisogo o dato sii ko kapekerarangiti ron a tanto den a pakapekeyaon so
apoy na miyapatay o kadeg o apoy so manga sondaro a lomibad ki Siyadrak, Misak ago
si Abidnigo!
23 Na giyangkai a telo kataw a papatongen pen na miyanga oolog ko look o pekerab a
apoy.
24 Sarta den a sii ko kapegilaya on o dato Nibokadnisar na tominikeras sekaniyan

tomindeg a tanto a miyamemesa, na pitero iyan ko manga mosawira iyan a “Ba kena a
telo kataw a papatongen a inilebad tano ko apoy?”
Na inisembag iran on a “Benar anan, dato.”
25 “Ilaya niyo man,” a tig o dato, “ka pepekailay ako sa pat kataw a manga mama a
pelalakaw sii ko apoy a kena a ba mapapatong ago da kasakiti! Na so paras o ikapat kiran
na datar o wata o manga tohan!”
26 Miyobay si Nibokadnisar ko gimowa o dii perapogan na inilalis iyan a “Hey Siyadrak,

Misak ago Abidnigo a manga oripen o Lebi a Maporo a Tohan, liyo kano, song kano sii!”
27 Na so manga pendatoon, manga mayor, manga gobirnador ago so manga mosawira o
dato na linibet iran siran, na miyailay iran a da den kakaidi o apoy so manga lawas iran
aya pen o ba aden a kiyasiroban ko bok ko olo iran. So mambo so manga nditaren iran na
da den a ba on kiyagailan aya pen o ba mabaw a baw a bel.
28 Na pitero i Nibokadnisar a “Podin so Tohan i Siyadrak, Misak ago si Abidnigo a

siyogo iyan sii so malaikat iyan na siyabet iyan so manga oripen iyan a somiyarig
rekaniyan. Siyogok iran so sogoan o dato, na mateterang siran matay a di sa ba iran
kaonoti o di na masimba so apiya antonaa tohan a liyo bo ko rek iran a Tohan.
29 Kagiya ka maoto na pekalangkapen aken angkai a katero: Saden sa manga taw a apiya
antonaa i bangensa iran o di na basa a makapetero sa marata a sopak ko Tohan i Siyadrak,
Misak ago si Abidnigo na pesepotolen siran, na mbeloin so walay iran a tabotod, ka da
den a salakaw a Tohan a ba pekasabet sa datar ai a okit.”
30 Na iniporo o dato so manga pangkatan i Siyadrak, Misak ago si Abidnigo sii ko
probinsiya a Babilon.
DANIYAL 4
So Taginepen i Nibokadnisar makapantag ko Kayo
Piyakalangkap o Dato Nibokadnisar angkai a totol ko manga taw ko langon a nasiyon, a

so manga mbarambarang i bangensa ago basa a kibabaling ko dalem o doniya:
“Pengnin ko a makala rekano so kalilintad ago kamapiyaan!
2 “Kabaya aken a penotolan ko sekano sa manga nanao ago piyakamemesa a pinggolaola

raken o Tohan a Lebi a Maporo.
3 “Sayana a kababantogan so manga nanao a piyakiilay niyan;

sayana a mala i kabarakat so manga piyakamemesa a pinggolaola niyan!
So ndatoan iyan na da a ikepos iyan a ndatoan,
na ketatap so kandadato iyan
ko langon a kapepamagapidapid o masa.
4 “Saken, a si Nibokadnisar, na gowani ko kababaling aken ko torogan aken a masosorot

ako ago makadadaya
5 Na mitetaginep ako sa inikalek aken. Tanto aken a inikasosa so manga pangingilain a
miyailay aken sii ko kaiiga aken ko igaan.
6 Sabap roo na inisogo aken a pakapengadapen raken so langon a manga oongangen a
mama sa Babilon kaan iran raken kapakitokawi so maana o taginepen.
7 Kagiya makaoma raken so manga pamimitoon, manga paririmar, manga wali ago so
manga pangangatao na piyanotol aken kiran so taginepen, ogaid na da iran raken
kapemaanai.
8 Oriyan iyan na miyangadap raken si Daniyal (a bebetowan sa Biltisiyasar a inisangay ko
tohan aken), na sisii rekaniyan so Roh o Soti a Tohan.
9 “Piyanotol aken on so taginepen aken a tig aken a Hey Biltisiyasar a olowan o manga
salamangkiro, katawan aken a sisii reka so Roh o Soti a Tohan na da a pageemaan a ba
maregen a kakesaboti ngka on. Teroa ngka raken so maana o taginepen aken.
10 “Sii ko kaiiga aken ko igaan na giyai i pangingilain a miyailay aken: Aden a tanto den
a maporo a kayo sii ko lembak o kalopaan.
11 Mito so kayo sa tanto a mala ago mabager na somiyoko sa langit so poro iyan, na
pekeilay ini apiya anda ko pirowarowangan o doniya.
12 Manga pipiya i paras so manga raon iyan, na mikerik ai a so manga onga niyan na
pekekan o kalangolangon. Pepekasirong so manga iila a binatang ko atag iyan, na dii
sesalag ko manga sapak iyan so manga papanok sa kawang. Na ron pepegepera so
langon a manga kaaden.
13 “Sii sangkoto a pangingilain a miyailay aken ko kaiiga aken roo na aden a siyogo, a so
soti a siyogo, a miyanog a poon sa langit.
14 Miyananalo sekaniyan sa matanog a tig iyan a ‘Pataa ngka so kayo na pamotola ngka
on so manga sapak iyan! Tataka ngka on so manga raon iyan na paraken ka so manga
onga niyan! Bogawa ngka so manga binatang a pesirong ko atag iyan ago so manga
papanok a dii sesalag ko manga sapak iyan.
15 Ogaid na lambai ngka sa tod so manga bekaw niyan sii ko lopa a mabebabed ai a
potaw ago tombaga, sii ko lomolombay a manga otan ko pangomaan. Gegeneki ngka
sekaniyan a mararames o namog sa langit, na peda ngka ko manga ayam sii ko manga
paotanotan ko kalopaan.
16 Alina ngka so pamikiran iyan a manosiya na begi ngka sa pamikiran a binatang taman
sa somagad on so makapito ragon.
17 Inipanawatewag ai o manga siyogo; piyayag o manga soti angkai a inikokom kaan
kasaboti o manga taw ko dalem o doniya a so Lebi a Maporo a Tohan i pepamaapaar ko
manga ndatoan o manosiya na ipembegay niyan ai ko apiya antawaa a kebayaan iyan a
apiya so lebi a manga bababa a taw na aya niyan on dii pakandatoon.’
18 “Giyanan i miyateginep aken a si Dato Nibokadnisar. Na imanto, hey Biltisiyasar, na

payaga ngka so maana niyan, ka da den a isa ko langon a manga oongangen ko ndatoan
aken a ba raken miyakatero ko maana niyan. Ogaid na kegaga ngka ini, ka sisii reka so
Roh o Soti a Tohan.”
Pimaanaan i Daniyal so Taginepen
19 So kiyanega sii i Daniyal (a bebetowan sa Biltisiyasar) na miyabengang sekaniyan sa

da matey, na tanto a miyasosa a pamikiran iyan. Na pitero on o dato a “Hey Biltisiyasar,
di ngka pekisosaan a ginawa ngka ko taginepen ago so maana niyan.”
Na tig i Biltisiyasar a “Hey kadnan ko, o ba bo mipenggolalan ko manga ridoay ngka so
piteginep ka, ago so maana niyan sii ko manga soranga a ka a kena a ba sii reka!
20 So kayo a miyailay ngka a mito a mala ago mabager a so poro iyan na somiyoko sa
langit ago pekeilay ko dalem o doniya,
21 A so manga raon iyan na mapiya i paras a pegilain ago madakel i onga a peken o
kalangolangon, a ron pesirong so manga iila a binatang ago dii sesalag ko manga sapak
iyan so manga papanok sa kawang,
22 Na seka den, hey dato, angkoto a kayo. Miyabaloy ka a mala ago mabager; miyakala
so bantogan ka taman sa somiyoko sa langit, na so kandadatoan ka na minirampay ko
pirowarowangan o doniya.
23 “Miyailay ngka, Dato, so siyogo a soti a pepanog a poon sa langit a tig iyan a ‘Pataa
ngka so kayo na go ngka binasaa. Ogaid na lambai ngka sa tod so manga bekaw niyan sii
ko lopa a mabebabed ai a potaw ago tombaga, sii ko lomolombay a manga otan ko pango-
maan. Gegeneki ngka sekaniyan a mararames o namog sa langit, na peda ngka den ko
manga iila a binatang taman sa somagad on so makapito ragon.’
24 “Giyai a maana o taginepen, dato; giyai i miyapayag o Lebi a Maporo a Tohan a

keokitan o kadnan aken a dato.
25 Kebogaw ka a kebelag ko manga manosiya na pekakaden ka a ped o manga iila a bina-
tang. Pekakan ka sa otan a datar o manga sapi na kerames ka a namog sa langit, na
pito ragon a kapekasagad iyan reka taman sa kilalaan ka a so Tohan a Lebi a Maporo na
aya pepamaapaar ko manga ndatoan o manga taw na ipembegay niyan ai ko apiya
antawaa i kebayaan iyan.
26 So inisogo a pelambaan sa tod so manga bekaw o kayo na aya maana niyan na
pekaasal reka den so ndatoan ka amay ka kilalaan ka a so Tohan sa kasorgaan na aya dii
ndato.
27 “Kagiya ka maoto, Dato, na pengnin ko a tarimaan ka so osiyat aken: geneki ngka so

di ngka dii kandosa na nggolaolaa ngka so ontol; teobata ngka so manga kamarataan ka
na kapediin ka so kikararasay. Masiken a giyai i kitataros o kapakapipiya ngka.”
Minitoman so Taginepen i Nibokadnisar
28 Langon ai kiyaokitan o dato Nibokadnisar.

29 Oriyan o miyakasapolo ago dowa olan sii ko dii kandadalakaw o dato ko pantar a atep
o torogan iyan sa Babilon
30 Na pitero iyan a “Ilaya niyo angkai a kababantogan a Babilon! Saken i miyangon on a
babalingan o dato ko ndatoan a nggolalan ko kala aken i gees kaan kabantogi so menang
aken.”
31 Sii ko di niyan pen dii katero na miyakapoon a sowara sa kasorgaan a tig iyan a “Hey
Dato Nibokadnisar, sii reka angkai a katero; miyakowa reka den so ndatoan ka.
32 Kebogaw ka a kebelag ko manga manosiya na pekakaden ka a ped o manga iila a bina-
tang, na pekakan ka sa otan a lagid o manga sapi. Pito ragon a kapekasagad iyan reka
taman sa kilalaan ka a so Tohan a Lebi a Maporo na aya pepamaapaar ko manga ndatoan
o manga taw na ipembegay niyan ai ko apiya antawaa a kebayaan iyan.”
33 Magaan so magaan na miyatoman angkai a miyatero makapantag ki Nibokadnisar.

Miyabogaw sekaniyan a poon ko manga manosiya na miyakakan den sa otan a lagid o
manga sapi, na pekerames so lawas iyan o namog sa langit. Ipepaginetaw niyan ai
taman sa mito so bok iyan a lagid o bombol a darayo, ago so manga kanoko niyan a lagid
o kanoko a papanok.
Piyodi i Nibokadnisar so Tohan
34 “Sii ko kiyapos o tataalikan a gawii na saken a si Nibokanisar na lomiyangag sa langit

na miyakaasal raken so mapiya a pamikiran. Na piyodi aken so Lebi a Maporo a Tohan;
piselasela ago biyantog aken sekaniyan a oyagoyag sa taman sa pakataman:
“So kandadato iyan na da a ikepos iyan a kandadato,

na ketatap so ndatoan iyan taman ko kapepamagapidapid o masa.
35 So langon o manga taw ko doniya
na palaya ibibilang a da a arga iyan,
na di niyan dii nggolaolaan so ikasosoat iyan
sii ko manga kaaden sa kasorgaan,
ago sii ko siran oto a kibabaling sa doniya;
na da den a ba pekaren ko lima niyan
aya pen o ba on makatero sa ‘Antonaa angkai a di ngka dii nggolaolaan?’
36 “So den so kiyapakaasal o mapiya a pamikiran aken na so pen so pangkatan aken, so

menang aken ago so bantogan o ndatoan aken na miyakakasoy raken. So manga
mosawira aken ago manga sanasanaan na pimbabanog ako iran na miyakambeken so
kandadato aken, na lebi pen a miyakaosor so bantogan aken a di so miyaona.
37 “Imanto na saken a si Nibokadnisar na pepodin aken ago pembantogen ago di aken dii
selaselaan so Dato sa kasorgaan, ka maontol so langon a galebek iyan na matito ago benar
so langon o manga okitokit iyan. Na siran oto a ipeporo iran a ginawa iran na kibaba
iyan.”
DANIYAL 5
So Kiyambangkiti i Bilsiyasar
Kagiya maipos so mamakapira ragon na pimbangkitiyan o Dato Bilsiyasar so sanggibo a

barabangensa a manga pagtaw niyan, na mininom sekaniyan sa arak a ped iran.
2 Sii ko kapeginom on i Bilsiyasar na inisogo iyan a witen on so bolawan ago pirak a
manga tagayan a miyakowa gowani i Nibokadnisar a ama iyan a poon ko Timplo o Tohan
roo sa Yarosalim kaan aya kainomi o dato ago so barabangensa a manga pagtaw niyan a
rakes o karoma niyan ago so manga sandil iyan.
3 Mandiyadi na inowit iran roo angkai a manga tagayan a miyakowa poon ko Timplo o
Tohan sa Yarosalim, na aya iran ininoman langon.
4 Sii ko kapeginom iran na pepodin iran so manga katohanan a inembaalan a bolawan,
pirak, tombaga, potaw, kayo ago ator.
5 Minitekaw a aden a miyapayag a manga kemer a lima a manosiya a pesorat ko keleb o

torogan o dato a marani ko pembatogan sa solo. Miyailay o dato so dii kasorat o lima
6 Na miyamansi so paras iyan. Tanto sekaniyan a miyalek a kiyadaan den sa bager a
miyakatembala a manga leb iyan.
7 Inilalis iyan sa matanog a pakisogoan so manga paririmar, manga pamimitoon ago so

manga pangangatao. Na pitero o dato sangkai a manga oongangen sa Babilon a “Saden
sa makapengadi sangkai a inisorat ago matero iyan raken o antonaa i maana niyan na
penditaran sa mariga a kimon a dato ago peselayan sa bolawan, na kebaloy pen a ikatelo a
mala i kadato sii ko ndatoan aken.”
8 Ogaid na kagiya makaoma langon angkai a manga mosawira o dato na di iran
kapengadian so inisorat aya pen o ba iran matero ko dato so maana niyan.
9 Mandiyadi na minitaralo baden so kalek o Dato Bilsiyasar a tanto a miyamoti so paras
iyan, na kiyalibogan mambo so barabangensa a manga taw.
10 Miyaneg o bai a labi so makapantag ko dii teroon o dato ago so barabangensa a manga
pagtaw niyan na somiyong sekaniyan nggagaan ko rowang a dii mbangkitiyan. Pitero
iyan a “Mamboway ka, dato, sa taman sa pakataman! Di ka pekelek mipantag sii! Di
pemoti a paras ka!
11 Aden a mama sii ko ndatoan ka a madadalem on so niyawa o soti a manga tohan. Sii
ko masa o ama a ka na kiyatokawan a aden a ilmo iyan ago sabot ago ongangen a datar o
ongangen o manga tohan. So ama a ka a so Dato Nibokadnisar na initoro iyan sekaniyan
a olowan o manga salamangkiro, manga pamimitoon, manga paririmar ago manga
pangangatao sa Babilon.
12 Giyangkai a Daniyal, a bitowan o dato sa Biltisiyasar, na kiyatokawan a aden a tindos
a pamikiran iyan, ago katao ago sabot, ago so kapasang ko kapemaanai niyan ko manga
taginepen, so kapegosaya niyan ko manga pasoalan ago so kagogoda ko manga reregen a
antoka. Pakisogoi ngka si Daniyal, ka peyagen iyan reka so maana angkanan a inisorat.”
Pimaanaan i Daniyal so Minisorat
13 Na miyawit si Daniyal ko hadapan o dato na pitero on o dato a “Ba seka si Daniyal a

isa ko miyanga bibiyag o ama aken a dato Nibokadnisar a poon sa Yodah?
14 Miyaneg aken a madadalem reka so niyawa o manga tohan ago aden a ilmo o ka ago
sabot ago tindos a ongangen.
15 So manga oongangen ago so manga paririmar na palaya raken den miyawit kaan iran
mabatiya angkai a inisorat ko keleb ago matero iran raken so maana niyan, ogaid na da
iran magaga.
16 Miyatero raken a makapemaana ka kon ago pekaosay sa manga reregen a antoka. Na o
kapangadii ngka ngkai a minisorat ago matero o ka raken so maana niyan na penditaran
ka sa mariga a kimon a dato ago peselayan ka sa bolawan, na kebaloy ka a ikatelo a mala i
kadato sii ko ndatoan.”
17 Somimbag si Daniyal ko dato a tig iyan a “Sii reka den so manga pamemegayan ka;
began ka ko ped a taw so ipepenendan ka. Inonta bo na pangadian aken so misosorat ko
keleb na peteroon ko reka so maana niyan.
18 Makapantag ko ama a ka a si Nibokadnisar, hey Dato, na so Lebi a Maporo a Tohan
na aya on migay sa ndatoan ago menang, kabesaran ago bantogan.
19 Na sabap ko menang a inibegay ron o Tohan na so manga taw ko langon a nasiyon a
manga mbarambarang i bangensa ago basa na piyananabad siran ko kipekeleken iran
rekaniyan. Saden sa kiyabayaan iyan a mbonoon na biyono iyan, na saden sa kiyabayaan
iyan a pakapegoyagen na piyakapagoyag iyan. Saden sa kiyabayaan iyan a mipangkat na
inipangkat iyan, na saden sa kiyabayaan iyan a kibaba na inibaba iyan.
20 Ogaid na kagiya mangimporoan so poso iyan ago mitegas so pamikiran iyan ko di
niyan dii katekabor na piyakaawa sekaniyan ko korsi iyan a dato, na miyada on so
menang iyan.
21 Miyabogaw sekaniyan a miyabelag ko manga manosiya na miyabaloy so pamikiran
iyan a datar o pamikiran a binatang. Miyakakaden sekaniyan a ped o manga iila a kimar
ago miyakapanateb ko manga otan a datar o sapi, na pekerames so badan iyan a namog sa
langit taman sa miyakilala niyan a so bes so Tohan a Lebi a Maporo na aya pepamaapaar
ko manga ndatoan o manga taw, na di niyan on dii pakandatoon so apiya antawaa i
kebayaan iyan.
22 “Ogaid na seka, Bilsiyasar a aya wata iyan, na da ngka pangalimbabaanen a ginawa

ngka apiya pen o katawan ka ini langon.
23 Ba ngka baden iniporo a ginawa ngka a sopak ko Kadnan sa kasorgaan, ka piyakiwit
ka sii angkai a manga tagayan a bolawan a miyakowa ko Timplo niyan. Seka ago so
barabangensa a manga pagtaw ngka a rakes o manga karoma ngka ago manga sandil na
miyamanginom on sa arak sii ko kapepodiya niyo ko manga katohanan a inembaalan a
pirak, bolawan, tombaga, potaw, kayo ago ator a di pekailay ago di pekaneg aya pen o ba
makasabot. Ogaid na da ngka bantoga so Tohan a pembegay reka sa napas ago
pepekapaar ko langon a pekeokitan ka.
24 Giyanan i sabap a siyogo iyan so lima a somiyorat sangkai a manga katero.
25 “Aya minisorat na giyai: MINI, MINI, TIKIL, PARSIN.

26 Na giyai i maana niyan:
“Aya maana o MINI na ‘binilang,’ ka binilang o Tohan so manga gawii a ipendato o ka

na go tiyamanan iyan den.
27 Aya maana o TIKIL na ‘tinimbang,’ ka miyatimbang ka den ko timbangan na
kiyatokawan a korang ka sa kapened.
28 Aya maana o PARSIN na ‘miyabagi,’ ka miyabagi so ndatoan ka na inibegay ko
manga taga Midiya ago Pirsiya.”
29 Mandiyadi na inisogo i Bilsiyasar a penditaran si Daniyal sa mariga a kimon a dato

ago peselayan sa bolawan, na inipanawatewag a ikatelo sekaniyan a mala i kadato ko
ndatoan.
30 Sii den sangkoto a kagagawii na miyabono si Bilsiyasar a dato sa Babilon,

31 Na si Dariyos a taga Midiya na miyakatangan ko ndatoan sii ko kiyapakapagidad iyan
sa nem polo ago dowa ragon.
DANIYAL 6
Si Daniyal sii ko Galebo a Darpa o manga Arimaw
Miyapamikir i Dariyos a taga Midiya a tomoro sekaniyan sa magatos ago dowa polo a
manga gobirnador a makapetendingan ko dalem o ndatoan iyan.
2 Tomiyoro pen so dato sa telo kataw a pangolo iran, a so isa kiran na si Daniyal, kaan
iran matendingan so manga gobirnador kaan da den a antap o dato a ba mailang.
3 Da matey na mimbaloy si Daniyal a lebi a kikilalaan ko manga pangolo ago manga
gobirnador sabap ko tindos a moodiset iyan, na singanin o dato a pakipegolowanan iyan
on so dalem a ndatoan.
4 Sabap roo na so ped a manga pangolo ago so manga gobirnador na mipoon siran
mangiloba sa mitipo iran ki Daniyal mipantag ko di niyan dii katendingana ko ndatoan.
Ogaid na da a karibatan i Daniyal a ba iran miyatoon, ka kagiya tomotoman sekaniyan a
di den pelalalim aya pen o ba aden a kedawayan ko galebek iyan.
5 Na pitero angkai a manga mama a “Di tano den pekatoon sa apiya antonaa a kitipo tano
ki Daniyal liyo ron o misabap ko kapetomana niyan ko kitab o Tohan iyan.”
6 Mandiyadi na misegerompong siran somong ko dato na pitero iran on a “Hey Dato

Dariyos, mamboway ka sa taman sa pakataman!
7 Sekami langon a manga pangolo ko ndatoan ago so manga gobirnador, manga
pendatoon, manga mosawira ago so ped a manga sanasanaan na miyamagopakat, na
inayonan ami a mbegay ka sa mabager a sogoan a so apiya antawaa i mamangni ko apiya
antonaa a katohanan o di na taw a makaliyoliyo reka, hey Dato, ko soled o telo polo gawii
na ilebad ko galebo a darpa o manga arimaw.
8 Na pakalangkapa ngka den, Dato, so sogoan na go ngka pirmai kaan di kealin, ka
mipepasod ko kitab sa Midiya ago Pirsiya a di den kebaroba.”
9 Kagiya ka maoto na piyakisorat o dato so sogoan ago pinirmaan iyan.
10 Kagiya katokawan i Daniyal a pinirmaan o dato angkoto a sogoan na miyaling

sekaniyan ko walay niyan na somiyodiyod sii ko rowang iyan sa poro a kalelekaan so
manga rowasan on a makasasangor sa Yarosalim. Makatelo ko salongan a kapesodiyod
iyan a pepangangarapan ago pepanalamat ko Tohan iyan a aya niyan kalalayaman.
11 Mandiyadi na mitimotimo angkai a manga ridoay i Daniyal sii ko walay niyan na
miyailay iran sekaniyan a pepangangarapan ago pepamangni ko Tohan iyan.
12 Na giyoto a siyongowan iran so dato na piyakitoosan iran on so sogoan iyan a tig iran
a “Hey Dato, ba ngka da pirmai so kokoman a saden sa mamangni ko apiya antonaa
katohanan o di na taw a makaliyoliyo reka ko soled o telo polo gawii na ilebad ko galebo
o manga arimaw?”
“Benar anan,” a tig o dato, “na mipepasod so sogoan ko kitab sa Midiya ago Pirsiya a
di den kebaroba.”
13 Na tig iran ko dato a “Si Daniyal a isa ko manga biyag a poon sa Yodah na da ka
niyan pakinega aya pen o ba niyan tiyago sa ginawa so kokoman a pinirmaan ka, ka
pepamangni sekaniyan ko Tohan iyan sa makatelo ko salongan.”
14 So kiyanega sii o dato na tanto a miyarata a ginawa niyan na kabaya iyan den so
kasebeta niyan ki Daniyal. Taman ko kasedep o alongan na piyanamaran iyan makatoon
sa okit a kilidasen iyan on.
15 Sii ko kiyaperimon iyan na misegerompong somong ko dato angkai a manga mama na
pitero iran on a “Tatademi ngka, Dato, a aya kokoman sa Midiya ago Pirsiya na da a
sogoan a inibegay o dato a ba kealin.”
16 Mandiyadi na somiyogo so dato na riyapit iran si Daniyal na inilebad iran ko galebo a

darpa o manga arimaw. Pitero o dato ki Daniyal a “Pengnin ko a masabet ka o Tohan ka
a pepangongonotanan ka lalayon!”
17 Na miyawit roo so mala a ator a initotop ko gimowa o galebo o manga arimaw na
tiyandaan ai o dato ko siliyo o sising iyan taman ko manga sising o manga sanasanaan
iyan kaan da a pekasabet ki Daniyal.
18 Oriyan iyan na miyaling so dato sa torogan na da den kan sangkoto a kagagawii aya
pen o ba makiwit sa iperinarinaw ron a manga boniboniyan, na da den toroga ko
miyabebasa gawii.
19 Sii ko kiyasobo niyan na minggagaan somong so dato ko galebo o manga arimaw.

20 Kagiya makaobay ron na piyananalowan iyan si Daniyal a mararata so lagam iyan a tig
iyan a “Hey Daniyal a oripen o oyagoyag a Tohan! So Tohan ka a pepangongonotanan ka
lalayon na ba niyan miyagaga a kinilidasen iyan reka ko manga arimaw?”
21 Somimbag si Daniyal a tig iyan a “Mamboway ka, hey dato!

22 Siyogo o Tohan aken so malaikat iyan na piyakakemed iyan so manga ngari o manga
arimaw, na da ako iran kapakasakiti; ka da a sala aken ko kapegilaya niyan raken, aya pen
o ba ako reka pemarata, Dato.”
23 Minitaralo a kiyababaya o dato, na inisogo iyan a igakap si Daniyal ko galebo.

Minigakap sekaniyan on na da den a miyatoon on a garas sabap ko kasasarigi niyan ko
Tohan iyan.
24 Na piyakisogoan o dato so manga mama a tominipo ki Daniyal na piyakilebad iyan
siran ko galebo o manga arimaw a rakes o manga karoma iran ago manga wata. Sa da
iran pen kapakatana ko didalem o galebo na siyadayan siran o manga arimaw na
piyanggarenget iran so langon o manga tolan iran.
25 So kiyaipos ai na pisoratan o dato Dariyos so langon a taw ko oman i nasiyon ko

dalem o doniya a manga mbarambarang i bangensa ago basa. Aya inisorat iyan na
“Pengnin ko a tanto a makala so kapakapipiya niyo!
26 “Isogo aken a so manga taw ko oman i kasasakopan o ndatoan aken na kaleken ago
pagadati ran so Tohan i Daniyal.
“Ka sekaniyan i oyagoyag a Tohan

a tatap sa taman sa pakataman.
Di den kebinasa so ndatoan iyan
aya pen o ba katamani so kandadato iyan.
27 Petebang sekaniyan ago pesebet,
ago dii nggolaola sa manga nanao ago manga piyakamemesa
sii ko langit ago sa doniya.
Sekaniyan i somiyabet ki Daniyal ko kawaraw o manga arimaw.”
28 Na tetagompiya den si Daniyal ko masa a kandadato i Dariyos ago so kiyandato i Siros

a taga Pirsiya.
DANIYAL 7
So Pangingilain i Daniyal ko Pat Timan a Binatang
Sii ko paganay a ragon ko kiyandato i Bilsiyasar a Dato sa Babilon na mitetaginep si

Daniyal, na miyailay niyan so manga pangingilain sii ko kaiiga iyan ko igaan. Inisorat
iyan so taginepen iyan na giya i osayan iyan on:
2 Sii ko pangingilain aken sangkoto a kagagawii na saken, a si Daniyal, na miyailay aken

so mala a ragat a pekolibogen o pat a manga ndo ko langit.
3 Na aden a pat timan a manga ala a binatang a dii mbabaton a poon ko ragat a so
oman i isa on na mibibida ko manga ped iyan.
4 So miyaona on na lagid o arimaw a aden a manga papak iyan a datar o garoda. Sii ko
katetentengi ko ron na miyapekang so manga papak iyan, na minibayaw so binatang a
poon ko lopa kaan iyan mitindeg so dowa a kamorimori niyan a datar o manosiya, na
bigan sa poso a manosiya.
5 Sarta den a mimbaton so ikadowa a binatang a lagid sa paras o mala a aso. Di ini dii
mbowat a tomatakilid, na aden a telo a gosok a itatangag ko pageletan o manga ngipen
iyan. Na miyatero on a “Tindeg ka! Sambat ka sa madakel a sapo!”
6 Oriyan ai na miyailay aken so ped a binatang a lagid o mala a tingkalong. Sisii ko likod
iyan so pat timan a papak a lagid o manga papak a papanok, na aden a pat a manga olo
niyan. Na bigan sekaniyan sa mala a kapaar.
7 Kagiya maipos ai sii ko pangingilain aken sangkoto a kagagawii na miyailay aken so

ikapat a binatang a piyakalekelek, mawaraw ago tanto a mabager. Potaw so manga ala a
ngipen iyan, na penggarngeten ago pelameden iyan so pepanga sisikem iyan a pelomegen
iyan so pekelamba on ko didalem o ai niyan. Mibibida ini ko langon o miyanga oona a
binatang, na aden a sapolo a panga niyan.
8 Sii ko kapepamimikirana ko ko manga panga na sarta den a miyakagemaw sii ko look
iran so isa a maito a panga. Na sabap ko kiyapakagemaw niyan na miyanga bebadot so
telo a miyanga oonaan iyan a panga. Giyangkai a maito a panga na aden a manga mata on
a datar o mata a manosiya, ago so ngari a dii tero sa manga katero a ipembalilis.
9 Sii den ko katetentengi aken on na aden a inibetad a manga korsi sii ko darpa iran, na
miyontod so Pekeoyagoyag sa da a Kaposan iyan sa kapengokom iyan. Mapoti so manga
nditaren iyan a datar o giyaw, na so bok ko olo niyan na datar sa kapoti o soti a bombol a
bilibili. So korsi iyan na lagid o pesokeyaw a apoy, na pekerab so manga tirikan iyan,
10 Na aden a apoy a pegondas a lagid o lawasaig a pepekapoon ko danga iyan. Aden a
nggibonggibo a pepanalagad on, ago so sapolo nggibo na tekepen peman sa sapolo
nggibo a kititindeg ko hadapan iyan. Inepoonan den so kapengokom, na piyangokab so
manga ribro.
11 Sii den ko katetentengi ko ron na pekeneg aken pen so manga katero a ipembalilis a dii
teroon o maito a panga. Na initaros aken a kapakambebantay aken taman sa miyabono so
ikapat a binatang, na miyabinasa so lawas iyan ago iniitog ko pekerab a apoy.
12 So peman so ped a telo a binatang na kiyadaan siran ko dii kandato, ogaid na miniiseg
so omor iran taman ko tindo a masa a inokoran kiran.
13 Na sii ko pangingilain aken sangkoto a kagagawii na miyailay aken pen so sakataw a

datar o Wata o manosiya a pepekaoma a oonotan o manga gabon sa langit. Miyakaoma
sekaniyan ko Pekeoyagoyag sa da a Kaposan iyan, na piyakaadap sekaniyan on.
14 Na bigan sekaniyan sa kadato, bantogan ago kapaar kaan kapangongonotani o langon a
taw ko oman i nasiyon a manga mbarambarang den i bangensa ago basa. So kapaar iyan
na da a ikepos iyan a kapaar, na di den kebinasa so ndatoan iyan.
Inosay so Pangingilain
15 Saken, a si Daniyal, na miyakandarasag so pamikiran aken, na tanto aken a inikasosa

so manga pangingilain aken.
16 Kagiya ka maoto na inobay aken so isa ko kititindeg roo na iniise aken on o antonaa i
maana angkai langon. Na piyakisabotan iyan raken so maana niyan a tig iyan a
17 “So pat a manga ala a binatang na giyoto so pat a manga ndatoan a pekagemaw ko
doniya.
18 Ogaid na sii sa kaposan na so manga soti a pagtaw o Lebi a Maporo a Tohan na aya
pekakowa ko dii kandato, na ketangan iran sa taman sa pakataman.”
19 Samaoto na kabaya aken a katokawan ko pen so tito a benar makapantag ko ikapat a

binatang a mibibida ko langon o ped iyan, a so binatang a piyakalekelek, a aden a ngipen
iyan a potaw ago manga kanoko a tombaga, a pinggagarnget iyan ago pilalamed so
miyanga sisikem iyan, ago pilolomeg iyan so miyalamba on ko didalem o ai niyan.
20 Iniise aken pen so makapantag ko sapolo a panga sii ko olo o ikapat a binatang ago so
isa a panga a miyaori a kiyapakagemaw niyan a aya kiyasabapan ko kiyapanga oolog o
telo ko ped a manga panga. Giyai so panga a lagid o ba mala i gees a di so manga ped
iyan, a aden a manga mata niyan, ago ngari a dii tero sa manga katero a ipembalilis.
21 Sii ko katetentengi aken on na pepekitidawa angkai a panga ko manga pagtaw o Tohan
na pekedaag iyan siran
22 Taman sa miyakaoma so Pekeoyagoyag sa da a Kaposan iyan. Na inokas iyan so
kokoman a sosoramig ko manga pagtaw o Lebi a Maporo a Tohan. Giyanan so masa a
kaketarimaa o manga pagtaw o Tohan ko dii kandato.
23 Mandiyadi na inibegay niyan raken angkai a osayan: “So ikapat a binatang na giyoto
so ikapat a ndatoan a nggemaw ko doniya. Mibibida ini ko langon a ped a ndatoan, na
sekaben iyan so dalem o doniya a pelomegen iyan ago sesaan iyan.
24 So sapolo a manga panga niyan na giyoto so sapolo a dato a makapendato sangkai a
ndatoan. Pekatalondog kiran na nggemaw so isa pen a dato a mibibida ko ped a sapolo a
dato, na pegesen iyan so telo kataw kiran.
25 Petero sekaniyan sa sopak ko Lebi a Maporo a Tohan na perasain iyan so manga
pagtaw o Lebi a Maporo. Tepengan iyan malin so manga ala a gawii iran ago manga
taritib, na kepalad siran ko kapaar iyan ko soled o telo ragon ago tenga.
26 “Ogaid na pagokasen so kokoman na kowaan rekaniyan so kadadatoi, na tarotop a

kakedadas iyan sa taman sa pakataman.
27 Na giyoto a so dii kandato, kapaar ago bantogan o langon o manga ndatoan ko
kabebaan o langit na imbegay ko manga pagtaw o Lebi a Maporo a Tohan. So ndatoan
iyan na da a ikepos iyan a ndatoan, na pesimbaan sekaniyan ago pengongonotanan o
langon o manga dato.”
28 Giyai i kaposan o totolan ko pangingilain. So saken on peman, a si Daniyal, na tanto a

masososa so pamikiran aken na miyamoti so paras aken ko kalek aken, ogaid na tiyago
aken ai baden langon sa ginawa ko.
DANIYAL 8
So Pangingilain i Daniyal ko Bilibili ago so Kambing
Sii ko ikatelo ragon a kandadato i Bilsiyasar na saken, a si Daniyal, na aden pen a ped a
pangingilain aken a miyakatalondog ko miyaona.
2 Sii sangkai a pangingilain na miyailay aken a sisii ako den ko kokotaan a siti a Sosa ko
probinsiya a Ilam a tomitindeg ako ko kilid o Lawasaig a Olay.
3 So kiyalangkaw aken na miyailay aken so mama a bilibili a dowa i panga a tomitindeg

ko kilid o lawasaig. Matas angkoto a manga panga, ogaid na so isa on na matas a di so
ped iyan apiya pen o miyaori a kiyato iyan.
4 Na miyailay aken so bilibili a sii niyan ipesidong so manga panga niyan sa tampar sa
sedepan, sa pagotaraan ago sa pagabagatan. Da den a binatang a ba on makaato aya pen o
ba aden a makapalagoy a poon ko kapaar iyan, ka so den so kabaya iyan i di niyan dii
nggolaolaan, na inimbantogan iyan a ginawa niyan.
5 Sii ko di aken on dii kapamimikirana na miyailay aken a mandangan a pepekaoma a

poon ko sedepan a peketasen iyan so dalem a doniya a di makatatana ko lopa.
Giyangkoto a mandangan na aden a satiman a marayag a panga sii ko pageletan o manga
mata niyan.
6 Na piyantek iyan a somasagembet so dowa i panga a bilibili a miyailay aken a
tomitindeg ko kilid o lawasaig.
7 Miyailay aken a diyaseg iyan so bilibili a tanto niyan a pekerarangitan, na diya-
sengan iyan na riyopet iyan so dowa timan a panga niyan. Da den a bager o bilibili sa
kapegatowi niyan on, na minipapes sekaniyan o mandangan ko lopa na pindapodapoan
iyan. Na da den a ba makapenabang ko bilibili ko kapaar o mandangan.
8 Inimbantogan o mandangan a ginawa niyan, ogaid na kagiya lebi a makala so bager iyan
na miyapotol so mala a panga niyan. Na minisambi sii na romitok so pat timan a manga
rarayag a panga a kipakasasangor ko pat a manga ndo ko langit.
9 Miyakapoon ko isa kiran so isa pen a maito a panga a tanto a miyakala so kapaar iyan sa
tampar sa pagabagatan, sa sebangan ago tampar ko mapiya a inged a Israil.
10 Na pepekala den so kapaar iyan a minisampay pen taman ko manga langit, na
piyangolog iyan ko lopa so ped ko manga kaaden sa langit ago so manga bitoon, na
liyomeg iyan siran.
11 Inimbantogan iyan a ginawa niyan taman ko kiyaatowi niyan ko Pangolo o manga
kaaden sa langit, ka piyakigenekan iyan so oman gawii a kapesepaati ron na piresikan
iyan so Timplo.
12 Na sabap ko dii kapakasela o madakel a taw na miyapalad ko kapaar iyan so manga
taw o Tohan a rakes o oman gawii a kapesepaat. So tito a benar na minilebad ko lopa, na
mitegompiya so panga ko langon a di niyan dii nggolaolaan.
13 Na giyoto a miyaneg aken a dii mbitiyarai so dowa ko manga malaikat, na pitero o isa
on ko ped iyan a “Ay katey a kipetomanen ko manga mapenggolaola sangkai a
pangingilain? Ay katey o pekabinasa a dii kapakasela a ipekagenek o oman gawii a kape-
sepaat? Ay katey a dii kapelomega ko Timplo ago so manga taw o Tohan?”
14 Na somimbag so isa on a tig iyan a “Taman sa mapopos so dowa nggibo ago telo gatos
a kagagawii ago kadaondaw; oriyan iyan na kesoti ago pekaasalen so Timplo.”
Piyanotol o Diyabarail so Maana o Taginepen
15 Sii ko kiyailaya aken, a si Daniyal, ko pangingilain na piyanamaran aken so kasaboti

aken on. Sarta den a aden a miyakatindeg ko hadapan aken a datar sa paras a mama.
16 Na miyaneg aken a lagam a manosiya a pepananalo sii ko Lawasaig a Olay a tig iyan a
“Hey Diyabarail; pakisaboti ngka sangkai a mama so maana o pangingilain.”
17 Na sii ko kapepekarani niyan ko darpa a titindegan aken na miyalek ako ago

miyakagepe ko lopa. Ogaid na pitero iyan raken a “Hey wata o manosiya, sabota ngka a
so kakitoman o manga mapenggolaola a miyailay ngka ko pangingilain na sii ko akir a
gawii.”
18 Sii ko di niyan raken dii kapakimbitiyarai na kaadaan ako den sa tanod ko

kapakagegepe aken roo ko lopa. Ogaid na siko ako niyan a piyakatindeg iyan.
19 Na tig iyan a “Pekitokawan ko reka o antonaa i kesowasowa sii ko da pen mitalingoma
a kapemborngat o rarangit o Tohan. So miyailay ngka na makapantag ko matetendo a
masa a kaposan.
20 So dowa i panga a bilibili a miyailay ngka na giyoto so manga dato sa Midiya ago
Pirsiya.
21 So bombolen a mandangan na giyoto so dato sa Grisiya, na so marayag a panga niyan
sii ko pageletan o manga mata niyan na giyoto so miyaona on a dato.
22 So pat timan a manga panga a minisambi ko isa a miyapotol na giyoto so pat a ndatoan
a nggemaw a pekapoon ko ndatoan iyan ogaid na kena siran a ba datar iyan sa kapaar.
23 “Sii ko kaposan a masa o di iran dii kandato amay ka matarotop so kasosopak o dii
mamakasela na pekagemaw so isa a dato a dii mangarasi ago mapasang i kapanaliba.
24 Tanto a pekala so bager iyan, ogaid na kena a ba nggolalan ko kapakagagaga niyan.
Kisabap iyan so pakabengang a kabinasaan, na petegompiya sekaniyan ko langon a di
niyan dii nggolaolaan. Mbinasaan iyan so manga babager a taw ago so manga pagtaw o
Tohan.
25 Sabap ko kabaraakal iyan na pekaosoren iyan so kapepanaliba iyan, na ipembantogan
iyan a ginawa niyan. Amay ka magedam iran a malilinding siran na mbinasaan iyan so
madakel a taw, na apiya so Makalelebi a Pangolo na pagatowan iyan den. Ogaid na
kebinasa sekaniyan a kena ini a ba galebek o manosiya.
26 “Mataan den a kitoman angkai a pangingilain a miyaosay reka makapantag ko manga

kagagawii ago kadaondaw, ogaid na pagemaa ngka den, ka matey pen a kakitoman iyan.”
27 Mandiyadi na tanto ako a inikopay, a si Daniyal, a makaiiga a pekesakit ko

miyamakapira gawii. Oriyan iyan na mimbowat ako na initaros aken so galebek a
inisangan raken o dato. Ogaid na kiyalibogan ako ko pangingilain ka di peraoten a
pamandapat.
DANIYAL 9
Miyangangarapan si Daniyal
Sii ko paganay a ragon a kandadato i Dariyos a dato sa inged a Babilon, a wata sekaniyan
i Ahasowiros a taw sa Midiya
2 Na saken, a si Daniyal, na pepangadi ko manga sorat o manga nabi. Na sii ko katero o
Allah a inisorat o Nabi Yaramiyas na siyabot aken on a so tindo a masa a kabibinasa o siti
a Yarosalim na pito polo ragon.
3 Mandiyadi na miyangadap ako ko Kadnan a Tohan ko, ka miyangangampedian ako ron
ko kapangangarapan ago kapamangni a di ako dii powasa a ndiditar sa sako ago
magoombi.
4 Miyangangarapan ako ko Allah a Tohan ko ago miteobat a tig aken a “Hey Kadnan a
mala ago piyakalekelek a Tohan, na di ngka dii nggolalan so kapasadan ka a
kipekelimoon ko siran oto a pekebabaya reka ago petoman ko manga sogoan ka.
5 Ogaid na miyakandosa kami ago miyakanggolaola sa bibid ago marata. Siyopak ami
seka ka tiyalikodan ami so manga sogoan ago manga kokoman ka.
6 Na da ami pakinega so manga oripen ka a manga nabi a miyangosiyat sii ko Ingaran ka
ko manga dato ami, manga olowan ami, manga apo ami ago sii ko langon a taw ko
bangensa ami.
7 “Maontol ka, Kadnan, ogaid na sekami na mipepanagop ami so kayaan taman den
imanto, sekami langon a manga taw sa Yodah ago so kibabaling sa Yarosalim ago so
langon a manga Israil ndatar so siran oto a sisii sa marani ago so ndodoo sa mawatan sii
ko langon a inged a ron kami ngka iniparak sabap ko kiyaongkira ami reka.
8 Hey Kadnan, langon kami a rakes o manga dato ami, manga olowan ami ago manga apo
ami na palaya ami den mipepanagop so kayaan sabap sa miyakandosa kami sii reka.
9 Ogaid na masalinggagaw ka ago paririla, hey Kadnan a Tohan ami, apiya pen
miyakasopak kami reka.
10 Da ami seka pakinega, ya Allah a Tohan ami, ka da ami paratiyayaa so manga
kokoman a initoron ka rekami a miyakaokit ko manga oripen ka a manga nabi.
11 So langon o nasiyon a Israil na miyakasogok ko kitab ka ago miyakasilay, ka siyangka
iran a kapemakinega iran reka.
“Sabap roo na minitana rekami so manga paninta ago minisepa a kasiksaan a misosorat
ko Kitab o Mosa a oripen o Tohan sabap ko kiyapakandosa mi reka.
12 Initoman ka den so miyatero o ka a indaneg rekami ago so manga olowan ami ko
kiyawiti ngka rekami sa mala a morala. Ka sii ko dalem o doniya na da den a
miyasowasowa a ba datar o kasiksaan a miyanggolaola sa Yarosalim.
13 Langon ai rekami minitalingoma a aya kiyatoman o misosorat ko Kitab o Mosa, na
apiya pen oto, ya Allah a Tohan ami, na da kami reka den pangangampedian ko katalikodi
ami ko manga dosa mi ago so katordowa mi ko tito a benar ka.
14 Initana a ka rekami, ya Allah, so morala a pitiyagar ka, ka da ami seka den pakinega,
na maontol ka, ya Allah a Tohan ami, ko langon a di ngka dii nggolaolaan.
15 “Hey Kadnan a Tohan ami a aya miyakaliyo ko manga pagtaw ngka sa Misir a
nggolalan ko mala a kabarakat ka ago piyakibantog ka so Ingaran ka a lagid o
kapekebantogi ron imanto na miyakandosa kami ago miyakanggolaola sa marata.
16 Na pengnin ko reka, Kadnan, a sabap ko langon o kaontol ka na pakawatana ngka so
rarangit ka ago gani sa siti a Yarosalim a so soti a palaw ngka. Ka sabap ko manga dosa
mi ago so kadostaan o manga apo ami na giya Yarosalim ago so manga pagtaw ngka na
pekowaan a diyaman o langon a taw ko mbalabala rekami.
17 “Pamakinega ngka imanto, hey Tohan ami, so kapepangangarapan ago

kapepangangampedian aken a oripen ka, na sabap ko Ingaran ka, Kadnan, na ilaya ngka a
limo so Timplo ngka a miyalaslas.
18 “Hey Tohan ko, lekai ngka so tangila ngka na go ngka pamakinega so pangni aken!
Bekara ngka so manga mata ngka na go ngka ilaya so miyalaslas a siti a maawid ko
Ingaran ka! Ka kena a ba ami seka pepamangnii sabap ko kaontol ami, ka sabap bo ko
kala a ka i gagaw.
19 “Pamakinega kami ngka, Kadnan! Rilai kami ngka, Kadnan! Tagoa kami ngka sa
ginawa, Kadnan, na go ka seriat! Hey Tohan ko, sabap ko Ingaran ka na di ngka
pesendoden, ka so siti ngka ago so manga pagtaw ngka na aawidan iran so Ingaran ka.”
Inosay o Diyabarail ki Daniyal so Miyaalamat
20 Na tomiyaros ako mangangarapan a di aken dii teobaten so dosa ko ago so dosa o

bangensa ko a manga Israil, a pepangangampedian ako ko Allah a Tohan ko mipantag sa
Yarosalim a so soti a palaw niyan.
21 Na sii ko di aken pen dii kapangangarapan na so Diyabarail, a so malaikat a miyailay
aken ko miyaona a pangingilain aken, na miyakaoma raken sa magaan a kapelayog iyan
sii ko wakto a kapesepaat oman perimon.
22 Na piyakasabot ako niyan a tig iyan a “Hey Daniyal, miyakaoma ko reka imanto sa
kambegi aken reka sa sowa ago sabot.
23 So den so kiyapoon ka mangangarapan na inibegay raken so sembag, na katii ako sa
kapeyaga ko ron sii reka, ka tanto ka a pekebabayaan o Tohan. Kagiya ka maoto na
pamakinega ngka piyapiya kaan ka masabot so pangingilain.
24 “So pito polo na tekepen sa pito ragon na giyoto i katey o masa a tindo o Tohan
mipantag ko bangensa ngka a manga taw ago so soti a siti niyo kaan mitapelek so
kasosopak ago an mada so dii kandosa, kaan mapapas so kadostaan ago an
mapakambeken so da a pitetamanan iyan a kaontol, kaan minggolalan so pangingilain ago
so miyaalamat ago an kasalawati so Lebi a Soti.
25 Na tanodi ngka ago sabota ngka ini: Ipoon ko kimbegan ko sogoan sa kambangona
peroman sa Yarosalim taman ko kapekaoma o Pendatoon a Miyapili o Tohan na segad so
pito a tekepen sa pito ragon ago so pen so nempolo ago dowa na tekepen sa pito ragon.
Mbangonen peroman a Yarosalim a rakes o poblasiyon ago kota apiya pen masa oto a
kasasanaat.
26 “Amay ka maipos so nem polo ago dowa a tekepen sa pito ragon na mbonoon so
Miyapili o Tohan a lagid o ba da den a miyapasad iyan. Na so manga taw a isa bo sa
bangensa ago so olowan a pekatalingoma na mbinasaan iran so siti ago so Timplo. Na
pekatalingoma so kaposan a lagid o bagiyaw a taman den sa kaposan na mitataros so dii
katidawa a rakes o kapekelaslas a miyatekdir o Tohan.
27 Giyangkanan a olowan na magembaal sa mabager a kapasadan ko madakel a taw ko
soled o pito ragon. Ogaid na amay ka iraot sa kalookan so pito ragon na pekigenekan
iyan so dii kakorban ago so kapesepaat sa soasoat. Na aya lebi a marata ko langon a
penggolaolaan iyan na pekatindegen iyan so piyakasisingay a nganin a pekamorala taman
sa pagododen sangkoto a olowan so kabinasaan a kiyokoman rekaniyan.
DANIYAL 10
So Pangingilain i Daniyal ko Siyogo
Sii ko ikatelo ragon a kandadato i Siros a dato sa Pirsiya na aden a miyapayag ki Daniyal
a bebetowan sa Biltisiyasar na miyakaokit ai ko pangingilain. Tito a benar so miyapayag
on na makapantag ai ko masa a mala a kasasanaat. Na siyabot i Daniyal so maana o
pangingilain.
2 Isako mitoron raken so pangingilain na saken, a si Daniyal, na dii mboko ko soled o telo
ka padian.
3 Da ako den makakan sa manga pipiya a pangenengken o di na sapo aya pen o ba
miyakataam sa arak, ago da aken ibonga a lana a lawas aken taman sa da mapopos so telo
ka padian.
4 Sii ko ikadowa polo ago pat gawii ko paganay a olanolan na tomitindeg ako ko kilid o
mala a lawasaig a Tigris.
5 Sii ko kiyalangkaw aken na miyailay aken so sakataw a mama a ndiditar sa sotra ago
sesambitan sa lombos a bolawan.
6 Pekerap so lawas iyan a datar o montiya, na matiyaya so paras iyan a datar o kilakilat.
So manga mata niyan na lagid o pesokeyaw a manga barabad, na komikindat so manga
barokan iyan ago manga ai a datar o piyakatenang a galang, na so oni o sowara niyan na
datar o sowara o bariboribo a manga taw.
7 Saken, a si Daniyal, na aya bo miyakailay sangkai a pangingilain. So manga mama a

ped aken na da iran mailay, ka riyaot siran baden a mala a kalek a minipalagoy iran sa
kapetepok iran.
8 Na inibegak ako roo a saken bo a tometenteng sangkai a piyakamemesa a pangingilain.
Da den a miyalamba ko bager aken na tanto a miyamansi a paras aken, na da den a
kapekagaga aken.
9 Kagiya maneg aken so lagam iyan na miyaoteng ako ko lopa a kiyadaan den sa tanod,
na makaiiga ako roo a makagegepe.
10 Na giyoto a aden a miyakakapet raken a lima a biniknat ako niyan taman sa minideken
aken ko lopa a manga leb aken ago manga palad a lima a tatabaden ako.
11 Na pitero iyan raken a “Hey Daniyal a tanto a pekebabayaan o Tohan, tindeg ka na
pamakinega ngka piyapiya so peteroon ko reka, ka siyogo ako reka imanto.” Kagiya
matero iyan ai na tominindeg ako a tatabaden pen.
12 Tomiyaros sekaniyan tero a tig iyan a “Di ka pekelek, Daniyal, ka ipoon ko paganay a
gawii a kapananamari ngka ko kapakasabot a ipepangalimbabaan ka a ginawa ngka ko
hadapan o Tohan ka na tiyarima iyan so pangni ngka, na giyoto i inisong aken sii.
13 Ogaid na so saitan a olowan o ndatoan a Pirsiya na ineren ako niyan ko miyakadowa
polo ago isa a gawii. Mandiyadi na miyakaoma si Mikail a isa ko manga poporo a
malaikat na inogopan ako niyan ka kagiya miyasendod ako roo a ped o manga dato sa
Pirsiya.
14 Na katii ako imanto sa kapagosaya reka ko keolaola o bangensa ngka a manga taw ko
akir a manga gawii, ka so pangingilain na makapantag ko masa a da pen mitalingoma.”
15 Sii ko di niyan pen dii katero na makatotolong ako baden a di makapetero.

16 Na siko o malaikat a mapaparas a manosiya so modol aken, na sarta a miyabengat
aken a ngari aken na miyakatero ako. Pitero aken rekaniyan a tomitindeg ko hadapan ko
a “Tanto ako a miyasosa sabap ko pangingilain, kadnan ko, na kiyadaan ako den sa bager.
17 Kagiya oripen ako ngka na andamanaya i kimbitiyarain aken reka a kadnan aken? Ka
miyada so bager aken, na lagid o ba da den a napas aken.”
18 Mandiyadi na siko ako niyan peman ka piyakabager iyan.

19 “Di ka pekelek,” a tig iyan, “ka tanto ka a pekebabayaan o Tohan. Piyapiya ka ago
pakababager!”
So kiyateroa niyan raken sii na miyakabager a ginawa ko, na tig aken a “Na den, tero
ka den, kadnan, ka kiyabegan ako ngka sa bager.”
20 Na pitero iyan a “Katawan ka o antonaa i inisong aken reka? Magaan ako bo komasoy
a makipetidawa ko saitan a olowan o ndatoan a Pirsiya, na amay ka maipos ako na
pekaoma so saitan a olowan o ndatoan a Grisiya.
21 Ogaid na penotolen ko reka daan so misosorat ko Kitab a Tito a Benar. (Da den a
pegogop raken sa kapegatowi sangkoto a manga ridoay a rowar ko Mikail a so malaikat a
aya niyo olowan.
DANIYAL 11
Na sii ko paganay a ragon ko kiyandato i Dariyos a taw sa Midiya na saken i
miyakapamayandeg ki Mikail sa kapagogopi aken on.)
So manga Dato sa Pagabagatan ago sa Pagotaraan
2 “Imanto,” a tig o malaikat, “na peyagen ko reka so tito a benar. Telo pen a manga dato
a pendato sa Pirsiya, na aden pen a ikapat a makalelebi a kawasa a di so langon o manga
ped. Amay ka makala so kapaar iyan a nggolalan ko kakawasaan iyan na pengondoin
iyan so oman i isa sa kapagatowi ran ko ndatoan a Grisiya.
3 “Sa masa oto na nggemaw so gaos a dato a pendatoan iyan so mala a ndatoan, na
ipenggolalan iyan so langon taman a kabaya iyan.
4 Ogaid na amay ka makambeken so di niyan dii kandato na keropet so ndatoan iyan, na
mapembagibagi ini sa pat baad. Kena a ba niyan manga mbawataan a makapendato sii,
aya pen o ba iran mipendato so kapaar a datar o inindato iyan gowani, ka pesekisiin so
ndatoan iyan ago imbegay ko manga ped.
5 “So dato sa pagabagatan na pekabager, ogaid na so isa ko manga inidal iyan na kebaloy
a lebi a mabager a di sekaniyan, na pendatoan iyan so rek iyan a ndatoan sa mala a
kapaar.
6 “Maipos so pira ragon na makapegabanga so dato sa pagabagatan ago so dato sa

pagotaraan. So wata a babay o dato sa pagabagatan na pakipengaroma ko dato sa
pagotaraan kaan makabager so kapagepeda iran. Ogaid na di kitaros o babay so
kapakagaga niyan, na di mambo kemboway so kapaar o karoma niyan. Na ipagampo so
babay a rakes o manga balisogoon iyan ago so wata iyan ago so manga pegogop on
sangkoto a manga gawii.
7 Ogaid na di ketey na so isa ko manga tonganay o babay na kebaloy a dato sa
pagabagatan. Na nggobaten iyan so manga sondaro o dato sa pagotaraan; soledan iyan so
kota iran na tebanen iyan siran.
8 Amay ka komasoy sekaniyan sa Misir na ipetelon iyan so manga katohanan iran ago
piyanowang a manga barahala a rakes o manga ala i arga a kasangkapan iran a bolawan
ago pirak. Oriyan iyan na di niyan petekoren so dato sa pagotaraan ko soled o pipira
ragon.
9 “Maipos ai na nggobat so dato sa pagotaraan ko ndatoan o dato sa pagabagatan, ogaid
na pekatailis ko inged iyan.
10 Ogaid na so manga wata a mama o dato sa pagotaraan na petiyagar siran sa katidawa
ago timo sa madakel a sondaro, na lagid o bagiyaw a kasondol iran sa kapakipetidawa
taman den ko kota o ridoay.
11 Na giyoto a meliyo so dato sa pagabagatan a pekerarangitan ka ipetidawa iyan so
madakel a sondaro a tinimo o dato sa pagotaraan, na tebanen iyan siran.
12 Na amay ka mabiyag iyan so madakel a sondaro na iporo iyan a ginawa niyan na
pakipemono iyan so bariboribo a manga ridoay niyan, ogaid na di pagtey so
kapepekataban iyan.
13 Ka so dato sa pagotaraan na pegolowanan iyan so lebi pen a madakel a sondaro a di so
miyaona, na sii ko kiyaipos o pipira ragon na kesoy sekaniyan a rakes o makapal a
sondaro a tanto a kagogomaanan.
14 “Sa masa oto na madakel a pekasopak ko dato sa pagabagatan. So pen so dii

mangarasi a manga taw ko bangensa ngka, hey Daniyal, na sopak siran a aya kaketoman o
pangingilain, ogaid na keilang baden so antap iran.
15 Na pekaoma so dato sa pagotaraan ka pelikopan iyan a manga tambak so isa a
kokotaan a siti na keagaw niyan ai. Na di ron pekaato so manga sondaro o dato sa
pagabagatan, ka apiya so lebi kiran a mabager na di pekagaga.
16 “Giyangkai a gomogobat a poon sa pagotaraan na ipenggolalan iyan so kabaya iyan a

da a ba on pekaren. Tereg sekaniyan ko kababantogan a inged a Israil a aden a kapaar
iyan sa kapelaslasa niyan on.
17 Na pegantanganen iyan a song sekaniyan a rakes o langon o bager o ndatoan iyan sa
kapakipepasadanowai niyan ko dato sa pagabagatan. Pakipengaroma niyan on so wata
iyan a babay a iinamen iyan a ikebinasa oto o ndatoan, ogaid na di kibolos so antangan
iyan aya pen o ba rekaniyan makaogop.
18 “Oriyan iyan na nggobaten iyan so manga inged sa kilid a ragat na madakel a keagaw
niyan kiran. Ogaid na so isa a komandir na pagposen iyan so katetakabor iyan a ron iyan
on bo petoa.
19 Mandiyadi na mbeling sekaniyan ko manga kota sii ko inged iyan, ogaid na kisosong
sekaniyan ago keoteng a di den keilay.
20 “Sembi rekaniyan so dato a pekataralo a kapekabowisa niyan ko manga taw kaan

makala so kakawasaan o ndatoan iyan, ogaid na di matey na kebinasa sekaniyan a kena a
ba sabap ko rarangit, aya pen o ba katidawa.
So Marata a Dato sa Pagotaraan
21 “Kesambian sekaniyan o ikagogowad a taw a da a labet iyan ko kandato. Ka kitekaw a

kakekamala niyan ko kadadatoi a nggolalan ko kapamagakal.
22 Amay ka aden a nggobat rekaniyan a madakel a sondaro na ba siran den kelaslas sii ko
hadapan iyan, na kebinasa siran a rakes o olowan sa kapasadan,
23 Ka oriyan o kipepasadanowaan iyan ko olowan na pemagakal angkai a dato. Na
pepekala so kapaar iyan apiya pen maito bo a manga pagtaw niyan.
24 Sii ko kagegedam o lebi a kawasa a manga darpa ko inged a malilinding na nggobaten
iyan siran. Na penggolaolaan iyan so da nggolaolaa o manga lokes iyan o di na so manga
apo iyan, ka pembagibagiin iyan ko manga pagtaw niyan so patemotamokan a miyateban
ago miyaagaw niyan. Na pekediyaten iyan a kanggobata niyan ko manga kota, ogaid na
sii bo ko di ketey a masa.
25 “Pokaon iyan so bager iyan ago kawaraw sa kapakipetidawa iyan ko dato sa

pagabagatan a ped iyan so madakel a sondaro niyan. Na so mambo so dato sa
pagabagatan na petiyagar sa kapagatowi niyan on a rakes o tanto a manga babager a
sondaro niyan, ogaid na di sekaniyan pekadaag ka aden a tipo ron.
26 So siran oto a mababaling ko torogan iyan na aya rekaniyan peminasa. Na peyopasen
so manga sondaro niyan na madakel kiran a pematay ko kapetidawa.
27 Na magontod angkai a dowa kataw a dato ko lamisaan ogaid na marata so manga
antap iran, na pemokegan o isa so ped iyan. Ogaid na da a keondasan ai ka kagiya da pen
mitalingoma so kaposan a matetendo a masa niyan.
28 “Mbeling so dato sa pagotaraan ko inged iyan a ipetelon iyan so tanto a mala a

kakawasaan a miyaagaw niyan a aya singanin iyan na sopak ko soti a kapasadan o Tohan.
Na ipenggolalan iyan on so marata a singanin iyan na go bo kesoy ko inged iyan.
29 “Sii ko matetendo a masa na nggobaten iyan peroman so ndatoan sa pagabagatan,

ogaid na so mapenggolaola sangkoto a masa na mibibida den a di so miyaona a
miyanggolaola.
30 Ka magato rekaniyan so manga kapal a poon ko manga inged ko masesedepan a kilid a
ragat na kedaan sekaniyan sa inam ago pengendod. Pakapemborngaten iyan so gani niyan
ko soti a kapasadan o Tohan ago so manga pagtaw niyan, na mbelasan iyan so siran oto a
tomiyalikod ko soti a kapasadan.
31 So ped ko manga sondaro niyan na song ko Timplo na peresikan iran a rakes o kota
on, na pekigenekan iran so oman gawii a dii kakorban, na pekatindegen iran pen so
piyakasisingay a nganin a pekamorala.
32 Pegorayorain iyan so siran oto a miyongkir ko kapasadan, ka pekatampilen iyan siran
ko ginawa niyan. Ogaid na so manga taw a katawan iran so Tohan iran na
makapembeken siran ago pesorang rekaniyan.
33 “So siran oto a manga oongangen na peginsaratan iran so madakel kaan siran
makasabot. Ogaid na sii sangkoto a manga gawii na pematay so ped kiran a pedang o di
na apoy, na pengalaboson siran pen ago petebanan.
34 Sii sangkai a kaperasaya kiran na keogopan siran sa maito a tabang, ogaid na madakel
a pengeped kiran a baden dii mamagomanta.
35 Pemangisosong so ped ko manga oongangen kaan siran katepengi ago masoti ago
mabaloy a da a daket iyan taman ko masa a kaposan, ka pekatalingoma pen ai sii ko
miyataalik a masa.
So Dato a Piyakibantog iyan a Ginawa niyan
36 “Penggolaolaan angkai a dato so langon taman a kabaya iyan. Pekibantog iyan ago
iporo iyan a ginawa niyan ko oman i katohanan, na petataro sa ipegitowito ko Makalelebi
a Tohan. Petegompiya sekaniyan taman sa matarotop so masa a kararangit, ka so
minikokom na disomala a kitoman.
37 Di den pesagipaan o dato so manga katohanan o manga apo iyan aya pen o ba so tohan
a dii masingayo o manga babay. Di niyan itetapian so apiya antonaa katohanan, ka iporo
iyan a ginawa niyan a makalelebi ko kalangolangon.
38 Aya niyan baden mbentogen na so katohanan o manga kota, a so katohanan a di
katawan o manga apo iyan, na sepaatan iyan sa bolawan ago pirak a rakes o manga ala i
arga a montiya ago pamemegayan ko kambantoga niyan on.
39 Nggobaten iyan so lebi a manga babager a kota a pegogopan sekaniyan angkai a
mibibida a katohanan. Siran oto a makimbabaya on na mbegan iyan sa mala a bantogan,
na pakapendatoon iyan siran ko madakel, na pembagibagiin iyan kiran so lopa a aya iran
den tendan.
40 “Sii ko masa a kaposan na makipetidawa rekaniyan so dato sa pagabagatan. Na so

dato sa pagotaraan na lagid o sobosobo a kasondoli niyan on a rakes o manga karo, manga
kikokoda a sondaro ago tanto a madakel a kapal. Pekasoled sekaniyan ko madakel a
inged a ipenagad iyan a datar o bagiyaw,
41 Na soledan iyan pen so kababantogan a inged a Israil. Penga ooteng so madakel a
nasiyon ogaid na giya Idomiya, giya Mowab ago so manga olowan ko manga taw sa
Ammon na pekalidas ko kapaar iyan.
42 Pekalaoladen iyan so di niyan dii kandato ko madakel a inged, na di on pekalidas a
Misir.
43 Kipaar iyan so bolawan, pirak ago so langon taman a kakawasaan sa Misir, na so
manga taw sa Libiya ago giya Itiyopiya na makimbabaya on.
44 “Ogaid na ikewan iyan so manga totol a poon sa sedepan ago sa pagotaraan, na

ngganat sekaniyan a tanto a pekerarangitan sa kambinasaa niyan ago kapolanga ko
madakel.
45 Pekaboroden iyan so manga ala a barombarong iyan ko pageletan o ragat ago so
kababantogan a soti a palaw; ogaid na keoma niyan so keposan on na da den a ba on
pekatabang.”
DANIYAL 12
So Kaposan a Masa
Pitero pen o malaikat ki Daniyal a “Sii sangkoto a masa na nggemaw si Mikail a so

kababantogan a malaikat a pepagipat ko bangensa ngka a manga taw. Na giyoto i
kepoonan o masa a karomasayan a lebi a maregen a di so apiya antonaa a miyanggolaola
ipoon den ko kiyaadena ko pagampaganay a nasiyon na taman imanto. Ogaid na
sangkoto a masa na kesabet so manga taw ko bangensa ngka, maana a so oman i isa a
minisorat so ngaran iyan ko Ribro o Tohan.
2 Na madakel ko miyamatay a penga ooyag, a so ped na pekatarima sa da a kaposan iyan
a kaoyagoyag, ago so pen so ped na pekatarima sa kayaan ago da a ikepos iyan a kaitoan.
3 Siran oto a manga oongangen na pemanigay a datar sa kasigay o langit, na siran oto a
miyakaagak ko madakel a taw ko kaontol na pemanindaw a lagid sa kasindaw o manga
bitoon sa taman sa pakataman.
4 Ogaid na seka, Daniyal, na pagemaa ngka so manga katero ago lekena ngka so ribro
taman sa masa a kaposan. Madakel a pelayalayag ko mbalabala, na keomanan so katao.”
5 Na giyoto a miyangilailay ako, a si Daniyal, na miyailay aken so dowa pen kataw a

tomitindeg, a so isa on na sii sangkai a kilid a lawasaig, na so isa on na sii sa sabala.
6 Pitero o isa kiran ko malaikat a ndiditar sa sotra a tomitindeg ko liyawaw o lawasaig a
“Ay kakepasad angkai a piyakamemesa a mapenggolaola?”
7 Na inibayaw o malaikat so dowa a lima niyan sa tampar sa langit na misepa sekaniyan

sii ko Ingaran o Tohan a oyagoyag sa taman sa pakataman a tig iyan a “Sii ko kapopos o
isa a masa, ago dowa a masa ago sabaad a masa. Amay ka matarotop so kaperopeta ko
kapaar o soti a manga taw na giyanan i kiyapasad angkai langon.”
8 Miyaneg aken so pitero iyan, ogaid na da aken sabota. Mandiyadi na iniise aken on a
“Kadnan ko, antonaa i keondasan ai langon?”
9 Na tig iyan a “Ika roo den, Daniyal, ka pageemaan ago di kitoman angkai a manga
katero taman sa maoma so masa a kaposan.
10 Madakel a penga sosoti ago penga babaloy a da a daket iyan ago penga tetepengan,
ogaid na siran oto a manga rarata na ipeteros iran baden so di iran dii kapemarata. Da a
isa bo ko manga rarata a ba pekasabot, ogaid na so manga oongangen na kesabot iran.
11 “Ipoon ko gawii a kapekigeneki ko oman gawii a dii kakorban ago so kapekatindega

ko piyakasisingay a nganin a pekamorala na sanggibo ago dowa gatos ago siyaw polo a
manga gawii a pekasagad.
12 Na sayana a kerakmatan so sekaniyan oto a pekanayaw ago pekatiger taman ko
kiyapopos o sanggibo ago telo gatos ago telo polo ago lima gawii.
13 So seka on peman, Daniyal, na ika roo den taman ko kaposan. Pekadeke ka, na sii sa
akir a manga gawii na keoyag ka sa katerimaa ngka ko minisenggay a kawali ngka.
HOSIYA
HOSIYA 1
Giyai so katero o Allah a initoron iyan ko nabi Hosiyas a wata i Biri sii ko masa a
kiyapakandato i Osiyas, Yotam, Ahas ago si Hisikiyas sii sa Yodah, ago si Yarobowam a
wata i Yowas sii sa Israil.
So Karoma i Hosiyas ago so manga Wata iyan
2 Isako pepoonan tomoron o Allah so katero iyan ko manga Israil a miyakanggolalan ki

Hosiyas na pitero iyan ki Hosiyas a “Ika roo na pangaroma ka sa sondal. Pembawata
sekaniyan sa manga wata ko dii kasina, ka ibarat ai o manga pagtaw aken ko inged a tanto
a marata a kiyasina iran ko kiyaawai ran ko Allah.”
3 Kagiya ka maoto na piyangaroma i Hosiyas si Gomir a wata i Diblaim, na miyaogat, na

mimbawata sa mama.
4 Na pitero o Allah ki Hosiyas a “Betowi ngka sekaniyan sa Yasriil ‘Pepamola so
Tohan,’ ka di bo matey na indaneg aken ko pamiliya i Yiho a dato sa Israil so
kiyapamono iyan sii sa Yasriil, na pageposen aken so kapakandadato o manga moriyataw
niyan sii sa Israil.
5 Sa gawii oto sii ko Balintad a Yasriil na potolen aken so bager a Israil sa
kapakipetidawa.”
6 Miyaogat peroman si Gomir na mimbawata sa babay. Na pitero o Allah ki Hosiyas a

“Betowi ngka sa Lo Rokama ‘Kena a ba Ipekepedi’ ka di aken den ikepedi so manga
taw sa Israil aya pen o ba ko siran karilai.
7 Ogaid na ikepedi aken so manga taw sa Yodah, ka sebeten aken siran a kena a ba
nggolalan ko katidawa, a so manga pana, manga pedang, manga koda o di na manga
pangongoda, ka makapenggolalan ko Allah a Tohan iran!”
8 Sii ko kiyapakageneka den i Gomir somoso ki Lo Rokama na miyaogat peroman na

mimbawata sa mama.
9 Pitero o Allah a “Betowi ngka sa Lo Ami ‘Kena a ba ko manga Pagtaw,’ ka so manga
taw sa Israil na kena den a ba ko manga pagtaw, na kena a ba ako iran Tohan.”
Pekaasalen a Israil
10 “Apiya pen oto na pekatalingoma so masa a so manga taw sa Israil na kelagid sa

kadakel o peted sa kilid a ragat a di ketakes o di na kebilang. Sa gawii oto na di siran den
mbetowan sa ‘Kena a ba ko sekano manga pagtaw,’ ka aya imbeto kiran na ‘Sekano i
manga wata o Oyagoyag a Tohan!’
11 Keisaisa so manga taw sa Yodah ago so manga taw sa Israil, na toro siran sa isa a
olowan iran. Sayana a kebantogan angkoto a gawii a Yasriil amay ka pemolaan siran
peroman o Allah sii ko inged iran!
HOSIYA 2
Sa gawii oto, Hosiyas, na mbetowan ka so ped ka a manga Israil sa Ami ‘Manga Pagtaw
o Tohan,’ ago Rokama ‘Ipekelimo o Allah.’
Dii Sina si Gomir - Dii Sina a Israil
2 “Ogaid na imanto na mbongeti ngka so ina a ka a Israil;

mbongeti ngka, ka kena den a ba ko sekaniyan karoma,
na kena den a ba ako niyan karoma.
Teroa ngka on a kowaa niyan ko paras iyan so kapekeilaya on a sondal
ago geneki niyan so di niyan dii kasina.
3 Ka o di, na pelekasan aken sekaniyan
taman sa matalandiyang a lagid isako gawii a kinimbawataan on,
na mbalowin ko a lagid o disirto a komigaw a lopa on,
na petay sekaniyan a kawaw.
4 So peman so manga wata iran na di aken ikelimo
ka kagiya inimbawata siran ko kiyasondal.
5 Misondal so ina iran a piyakayaya a kiniyogaten iyan kiran,
ka pitero iyan a ‘Song ako ko siran oto a pekebabaya raken
ka ipembegay iran raken so pangenengken aken ago ig,
so manga nditaren aken, ago so lana ko a olibi ago arak.’
6 “Sabap roo na pagalangan aken so lalan iyan sa manga sorok,
na pelakoben aken sekaniyan kaan iyan di ketoon so pagokitan iyan.
7 Selobaan iyan so pepanga bebebaya on
ogaid na di niyan peraoten.
Pengilobaan iyan siran, ogaid na di niyan ketoon.
Mandiyadi na peteroon iyan a ‘Kesoy ako ko miyaona a karoma ko,
ka lebi a mapiya a kapakambebetad aken on gowani a di so imanto.’
8 “Da niyan makilala a saken bes

i migay rekaniyan sa pereperan, bago a arak ago lana a olibi
ago so madakel a pirak ago bolawan
a inosar iyan ko kapesimbaa ko katohanan a Baal.
9 Kagiya ka maoto na mbawiin ko rekaniyan so pereperan aken igira a miyakatoa,
ago so bago a arak aken sii ko mosim iyan.
Nggansingen aken on so manga nditaren
a inibegay aken on a inisapeng ko katatalandiyang iyan.
10 Imanto na sewaan aken so kadidiyampa iyan
ko kapekeilaya on o manga pekebabaya on,
na da den a ba on pekasabet ko lima ko.
11 Pekageneken aken so langon a di niyan dii kaselaselaa ko manga pista niyan,
a so manga saribolan, so manga Gawii niyan a Idedeke
ago so langon a miyatendo a kalilimod iyan sa agama.
12 Mbinasaan ko so manga asinda niyan a obas ago kayo a higos
a miyatero iyan makapantag on a ‘Giyai i inibayad raken o pepanga bebebaya raken.’
Mbalowin aken so manga asinda niyan a kakogowan,
na ken o manga iila a binatang so onga iran.
13 Ndanegen aken sekaniyan sabap ko manga gawii
a tomiyotong sekaniyan sa doka a inisoasoat ko manga barahala a Baal;
pipendaraan iyan a ginawa niyan ko manga aritis iyan ago imbolawananan
na kited iyan so pepanga bebebaya on,
ogaid na piyakalipatan ako niyan,” a tig o Allah.
So Gagaw o Allah ko manga Pagtaw niyan a Tomiyalikod on
14 “Ogaid na pekatalingoma so gawii

a pembarayaten aken sekaniyan
na pekaonoten aken roo ko disirto,
na ipembitiyarai aken sekaniyan sa marinaw.
15 Ikesoy aken on roo so manga asinda niyan a obas,
na mbalowin ko so Balintad a Karomasayan a pintoan sa panginam.
Roo sekaniyan makapegidaida a datar o sii ko manga gawii ko kangodai ron pen
ago so gawii a kiyapakaliyo niyan sa Misir.
16 “Sii sangkoto a gawii,” a tig o Allah,

“na aya imbeto niyan raken na ‘Karoma ko;’
di ako niyan den mbetowan sa ‘Mapapaar raken.’
17 Kowaan ko sa modol iyan so ngaran o katohanan a Baal;
di den kealoy so ngaran iran.
18 Sa gawii oto na magembaal ako sa kapasadan
mipantag ko manga iila a binatang
ago so manga papanok ago so manga pepamanola ko lopa
kaan iran di kapekasakiti so manga pagtaw aken.
Na kowaan ko ko inged so langon a gomaan sa katidawa,
a so manga pana ago manga pedang
kaan siran makapaginetaw a lomilintad a da a ba kiran pekabinasa.
19 “Hey Israil, mbalowin ko seka a karoma ko sa taman sa pakataman,

na pekiilay aken reka so kaontol aken, so katito,
so da a ikeda iyan a gagaw aken ago limo.
20 Mbalowin ko seka a karoma ko ko kasasarigi raken,
na kilalaan ka a saken so Allah.
21 Sii sangkoto a gawii na pagamponen aken so langit
a pepemangni sa oran a maodod iyan ko lopa,
na pagamponen o langit so lopa a pepamangni sa oran,
22 Na pagamponen o lopa so pereperan,
ago so manga waged a obas ago kayo a higos
a pepamangni sa kapegto iran.
Na langon ai na aya kapagampona ko pepamangnin o Israil a manga pagtaw o Allah.
23 Pemolaan ko so manga pagtaw aken sii ko inged,
na ikelimo aken siran a bitowan aken gowani sa ‘Kena a ba ko ipekelimo.’
Na siran oto a bitowan gowani sa ‘Kena a ba ko manga pagtaw,’
na peteroon ko kiran a ‘Sekano i manga pagtaw aken,’
na isembag iran a ‘Seka i Tohan ami.’ ”
HOSIYA 3
Biyalingan i Hosiyas so Karoma niyan
Pitero raken o Allah a “Ika roo den na kababayai ngka bo peroman so karoma ngka apiya
pen pekebabayaan sekaniyan o salakaw a mama ago di pen dii sina. Kababayai ngka a
datar o kapekebabayai aken pen ko manga taw sa Israil apiya pen pepananangoran siran
ko salakaw a manga tohan ago pekebabaya siran on somapaat sa manga tompi a pasas.”
2 Mandiyadi na piyamasa ko sekaniyan a sapolo ago lima timan a pelata a pirak ago telo
ka sako a bantad.
3 Na pitero aken rekaniyan a “Disomala a matey a kapenayawa ngka raken a kena a ba ka
dii sondal aya pen o ba ka makeroma o ped a mama. Samaoto na penayaon ko seka
mambo.”
4 Ibarat ai o matey a kapepaginetaw o manga taw sa Israil a da a dato iran o di na olowan,

da a kakorban, da a pesimbaan iran, da a imam iran ago da a barahala.
5 Ogaid na pekatalingoma so masa a peteobat so manga Israil na pembanogen iran
peroman so Allah a Tohan iran ago so moriyataw o Daod a dato iran. Ikelek iran so Allah
na terimaan iran so kamapiyaan iyan sii ko kaposan a manga gawii.
HOSIYA 4
So Kiya o Allah sa Israil
Pamakinega niyo so katero o Allah, hey manga taw sa Israil,

ka aden a ikiya niyan rekano a kibabaling ko inged.
“Da den a kasasarigi sii ko inged, da den a limo
ago da den a katotokawi ko Tohan.
2 Aya bo a matatago on na kapamaninta, kapamokeg,
kapamanekew ago kasina.
Aden a kapanganiyaya ko mbalabala,
ago so dii tondotondog a kapamono.
3 Sabap sii na dii mboko so lopa,
na pepekalobay so langon a kibabaling on
taman ko manga binatang ko kalopaan ago so manga papanok sa kawang;
apiya so manga seda ko ragat na pepamatay.
Dii mbongetan o Allah so manga Imam
4 “Ogaid na o ba senditi o apiya antawaa so ped iyan

aya pen o ba niyan mbongeti,
ka kagiya sekano den i di aken dii mbongetan, hey manga imam!
5 Pekirepang kano ko gagawii daondaw,
na ped iyo a pekirepang so manga nabi.
Sabap san na mbinasaan ko so ina iyo a Israil.
6 Miyabinasa so manga pagtaw aken ka kagiya korang siran sa katao.
Na kagiya inisili niyo so katao na isili aken sekano mambo
kaan di kano raken den makapegimam.
Sabap sa piyakalipatan iyo so Kitab o Tohan iyo
na pekalipatan aken mambo so manga wata iyo.
7 “So den so kapepekadakel iyo a manga imam

na kapepekala mambo o di niyo raken dii kandosa.
Sabap san na sembian aken sa kayaan so bantogan iyo.
8 Pegosbaan iyo so dii kapakandosa o manga pagtaw aken;
sabap roo na kabaya iyo a ba iran den peterosen so kamarataan iran.
9 Ndatadatar so kandanega ko rekano ago so manga taw,
ka indaneg aken rekano so manga sowasowai niyo
na imbadal aken rekano so manga galebek iyo.
10 Pekakan kano ko manga sapaat ogaid na di kano den keosog.
Iteros iyo so kasosondal iyo ogaid na di kano den makapembawata
ka kagiya tiyalikodan iyo so Allah
kaan iyo masimba so salakaw a manga tohan.
11 “So kasondal ago so arak na ipekeda o kapakasasabot o manga pagtaw aken!

12 Pepekiyosiyat siran ko manga barahala a kayo;
peginsaratan siran o tongkas iran!
So singayo iran sa kasondal na aya kiran miyakadadag,
ka tiyalikodan iran den so Tohan iran
kaan iran kapangongonotani so salakaw a manga tohan.
13 Di siran dii korban ko manga barahala sii ko poro o manga palaw,
na petotong siran on sa doka sii ko atag o marabong a manga kayo,
ka mapiya roo a kasisirongan.
“Giyanan i sabap a dii makipemotaliya so manga wata iyo a babay

ago dii sina so miyakamong rekano a manga babay.
14 Ogaid na di aken siran ndanegen
igira a di siran dii makipemotaliya ago dii sina
ka kagiya sekano den mambo a manga mama
i dii makiperembang ko sebo a manga babay
ago di kano dii korban a ped o manga babay a pesondal sii ko timplo o barahala;
kebinasa so manga taw a da a sabot iran!
15 “Apiya pen pesondal a Israil ko kapesimba niyan sa manga barahala

na di kano sii den pekirambit, hey manga taw sa Yodah!
Di kano song sa Gilgal o di na roo sa Bit Abin
sa kapenakoto niyo roo,
aya pen o ba kano roo sepa sa ‘Mataan ko kaooyagoyag o Allah.’
16 So manga Israil na manga tetegas i olo
a datar o mategas i olo a nati a sapi.
Andamanaya i kakeinama iran sa tegikoren siran o Allah
a lagid o manga bilibili sii ko pepanateban?
17 Pegagaken so manga Israil o manga barahala;
di niyo siran den petekora!
18 Igira a miyakapamangondaya siran minom sa arak
na ba iran den peterosen so kasosondal iran.
Tomoon o manga olowan iran so piyakayaya a sowasowai iran
a di so bantogan iran.
19 Imbayog siran o sobosobo,
na keyaan siran sabap ko di iran dii kakorban ko manga barahala.”
HOSIYA 5
So Kandanega sa Israil
“Pakinega niyo ai, hey manga imam!

Tagoa niyo sa ginawa, hey manga taw sa Israil!
Pamakinega niyo, hey pamiliya o dato!
Tena rekano angkai a daneg a inikokom:
Miyabaloy kano a litag roo sa Mispa,
ago poket a makakayat roo ko Palaw a Tabor.
2 So manga taw a somosopak na kiyadaleman sa kapamono.
Mbongetan ko siran langon.
3 Katawan aken so manga sowasowai niyo, hey manga taw sa Israil;
di ini raken mapegma.
Misondal kano ko kiyasimba niyo sa manga barahala,
na kiyabatalan kano den.
4 So manga rarata a galebek iyo na pepekaren
ko kakesoy niyo ko Tohan iyo.
So singayo sa kasosondal na madadalem ko poso iyo,
na kena a ba niyo kikilalaa so Allah.”
5 “So katatakabor o manga taw sa Israil na peseksi sa makasosopak kiran.

Pekirepang siran sabap ko kadostaan iran,
na giya Yodah na kirepang mambo a ped iran.
6 Amay ka melalakaw siran sa kapembanoga iran ko Allah
a pepakaonoten iran so manga talon iran a bilibili, kambing ago manga sapi
a ipenompang iran on
na di iran ketoon ka inawaan iyan siran.
7 Da iran tomani sa pasad so Allah,
ka inimbawata iran so manga wata a kena a ba niyan rek.
Na makasaolan bo a kapelameda kiran
a rakes o manga lopa iran.
8 “Pakaoniya niyo so bogiyong sii sa Gibiya

ago roo sa Rama!
Lalisen iyo so kapepooni ko katidawa sii sa Bit Abin!
Pangonaan kano, hey manga taw sa Baniyamin!
9 Kelaslas a Israil sii ko gawii a kandaneg!
Pepayagen aken ko manga taw sa Israil
so matatangked a mapenggolaola.”
10 “So manga olowan sa Yodah na lagid o siran oto

a pepangowa sa temanaan a manga ator.
Pagododen aken kiran so rarangit aken
a lagid o bagiyaw.
11 Pelolopiten a Israil ago pesesaan ko kapendanega on
ka kagiya maniniyat iyan den so kapepamanimba sa manga barahala.
12 Kagiya ka maoto na mbinasaan ko a Israil ago giya Yodah
a lagid o gaab a pekan sa dilana
ago lagid o manga anay a pepekabinasa sa kayo.
13 “Kagiya mailay a Israil so kapapasangi ko sakit iyan

ago miyailay a Yodah so manga ibol iyan
na somiyong a Israil sa Asiriya
a pekitabang ko mala i gees a dato roo.
Ogaid na di kano niyan pekabageren
aya pen o ba niyan kabolongi so manga ibol iyo.
14 Kelagid ako o arimaw ko manga taw sa Israil ago giya Yodah.
Pesekisiin ko siran, na pagawaan ko;
na amay ka tondatondaan ko siran
na da den a ba kiran makapenabang.
15 Oriyan iyan na kesoy ako ko darpa aken
taman sa terimaan iran so kasalaan iran
ago pengilobaan ako iran.
Sii ko kapekerasay iran na penamaran ako iran mbabanog.”
HOSIYA 6
So Kena a ba Iklas a Kateobat a Israil
“Itano roo! Komasoy tano ko Allah!

Pisekisi tano niyan
ogaid na pemolongan tano niyan.
Piyalian tano niyan
ogaid na mbabeden iyan so manga pali tano.
2 Maipos so dowa gawii na pagoyagen tano niyan,
na sii ko ikatelo gawii na mbowaten tano niyan
kaan tano pekeoyagoyag ko kamamasaan iyan.
3 Kilalaan tano so Allah!
Panamaran tano a kakilalaa tano ron!
So kapekagemaw niyan na lagid sa katatangked o kapesebang o alongan.
Pekaoma sekaniyan rektano a datar o oran ko rendeng,
ago datar o manga tarintik a pepekabasa ko lopa.”
4 “Hey Israil ago Yodah,” a tig o Allah,

“antonaa i ikidia ko rekano?
Ka so kapekebabayai niyo raken na pesedep
a lagid o lekep ko kapipita;
magaan bo a kapekeda iyan a lagid o namog
ko kapesebang o alongan.
5 Giyoto i sabap a piyakitated aken sekano a nggolalan ko manga nabi aken;
piyamono aken sekano a manga katero a poon ko ngari aken.
So kiyandadaneg aken na miniteras rekano a datar o kilakilat.
6 Ka aya masisingayo aken na so limo a kena a ba so manga korban,
ago so katawi ko Tohan a di so petotongen a soasoat.
7 “Datar o Adam na biyaroba iran so kapasadan a pimbaalan aken mipantag kiran,

na siyopak ako iran roo.
8 Giya Giliyad na siti o manga taw a dii nggolaola sa kamarataan,
na kiyaresikan ai a rogo.
9 Lagid o sagorompong a manga tanganiyaya a magaayan ko manga taw
na lagid iyan mambo so manga imam a pepamono sii ko lalan sa Sikim
a di siran dii nggolaola sa piyakayaya a manga maasiya.
10 Miyailay aken so miyakaratarata a betad sii sa Israil!
Piyakaresikan o manga pagtaw aken a ginawa iran ko kasondal
a so kapesimba iran sa salakaw a manga tohan!
11 “Seka mambo, Yodah, na tindo aken so masa a kandanega ko reka.
HOSIYA 7
“Igira a kiyababayaan ko mamolong so manga pagtaw aken a Israil
na aya bo a pekeilay aken na so kadostaan iran
ago so kamarataan o manga taw sa Samariya.
Pepamagakal siran, pepekaleseb so manga tekew ko manga walay,
na pepanganiyaya siran sii ko manga lalan.
2 Ogaid na di iran tatagoon sa ginawa
a peketoosan aken so langon angkai a karata iran.
Mililikos kiran so manga dosa iran
a sii lalayon ko kapekeilaya ko ron.
3 So kamarataan iran ago kapepamokeg

na ipekebabaya o dato ago so manga sanasanaan iyan.
4 Langon siran dii sina a dii keyaw so lalatog iran
a lagid o apoy sii ko pogon a di sikaren o pangengembaal sa paan
ipoon ko kapelilowa ko arina taman sa makakembang.
5 “Igira a gawii a dii kapista sii ko ndatoan

na pepanga bebereg so dato ago so manga sanasanaan iyan.
Dii mbaloy so dato a malalolalong
na pepakipagepeda sekaniyan ko di on dii magongatongat.
6 Pekeyaw so manga poso iran sa manga rarata a kadiyat iran a lagid o pogon.
Dii pewaga so kararangit iran sii ko mababasa gawii,
na sii ko kakepita iyan na pesokeyaw ai a datar o komakarab a apoy.
7 Langon siran mayaw a datar o pogon
na pepamonoon iran so manga olowan iran.
Dii tondotondog a kapepamonoa ko manga dato iran,
ogaid na da den a ba kiran raken pepananalo sa tabang.”
So Israil ago so manga Nasiyon
8 “Somasarig so manga Israil ko ped a manga nasiyon;

miyabaloy siran a da a bali niyan
a lagid o magaargaw a apang a da makelid.
9 Miyapakakenel o manga rait so bager iran
na da iran den katokawi.
Kiyadaketan sa mapoti so manga bok iran
ogaid na da iran mainengka.
10 So dii katekabor o manga Israil na peseksi sa makasosopak kiran,
ogaid na apiya pen langon ai kiran miyanggolaola
na di siran kesoy ko Allah a Tohan iran
aya pen o ba iran sekaniyan mbabanoga.
11 Miyabaloy siran a lagid o marapatik a malebod maakal a da a lalag iyan.
Makaisa na pepakitabang siran sa Misir,
na peroman peman magapas sa Asiriya!
12 Ogaid na sii ko kapepagapas iran
na isisir aken kiran so poket aken
na pelitagan ko siran a lagid o manga papanok.
Na ndanegen aken siran a aya kaketoman
o langon a miyaalamat a miyapayag kiran.
13 “Kemorkaan siran ka tiyalikodan ako iran!

Kebinasa siran ka inatowan ako iran!
Apiya pen ipekedali aken siran somabet
na ba siran den pepamokeg makapantag raken.
14 Kena a ba iklas ko poso iran so kapenggoraok iran raken,
ka ba siran den dii ndidiyagaw sii ko manga igaan iran
a datar o da a manga tohan iyan.
Igira a pepangangarapan siran sa pereperan ago bago a arak
na ba iran den pekerosa a lawas iran a lagid o manga kapir.
Pesopaken ako iran!
15 Apiya pen miyapakala aken siran ago miyapakabager
na kekadiyatan ako iran sa marata.
16 Di siran raken kesoy
ka pepananangoran siran ko salakaw a manga tohan
a kena a ba sii raken a so Lebi a Maporo;
di siran kesarigan a datar o bekog a pana.
Pemonoon a pedang so manga olowan iran
sabap ko katetakabor a manga katero iran.
Sabap sii na kekowa siran a kasablawan roo sa Misir.”
HOSIYA 8
Pimbongetan o Allah a Israil sabap ko Kapepanakoto iran
“Pakaoniya niyo so bogiyong!

So ridoay na peseyaben iyan so manga pagtaw aken
a lagid o garoda a pepanakab.
Biyaroba iran so kapasadan aken
na siyopak iran so kitab aken.
2 Penggoraok siran raken a tig iran a
‘Hey Tohan ami, katawan ami seka!’
3 Apiya pen oto na inilebad iran so mapiya;
sabap sii na selobaan siran o manga ridoay iran.
4 Miyamili siran sa manga dato sa da ako ron makaayon.
Tomiyoro siran sa manga olowan a di aken katawan.
So manga pirak iran ago bolawan
na inimbaal iran on a ginawa iran sa manga barahala a aya iran ikebinasa.
5 “Hey manga taw sa Samariya, lebaden iyo so barahala niyo a nati a sapi!
Pesokeyaw rekano so rarangit aken.
Ay katey pen a kakesoti niyo?
6 Giyangkoto a barahala na pipendayan o taw sa Israil;
kena a ba anan tohan!
Keropet angkoto a nati a sapi a pesimbaan roo sa Samariya.
7 “Miyamola siran sa ndo

na aya peragonen iran na so sobosobo!
Di den pekatoa so pereperan,
na da a mapegarina on.
Na opama ka makatoa na baden pelameda o manga mananangga.
8 Miyalamed a Israil!
Miyabaloy sekaniyan den imanto a lagid o ped a manga nasiyon,
na da a bali niyan a lagid o lomiti a koden.
9 Somiyong so manga taw sa Israil roo sa Asiriya
a lagid o mategas i olo a maila a kimar
a dii ndedadedag a tetarambisa.
‘Miyanendan siran sa manga di iran di ipemotaliya.
10 Apiya pen miyanendan siran sa ped a manga nasiyon
na timoon ko siran imanto,
na di ketey na pekerata a ginawa iran
sii ko kapepakaregeni kiran o mala i gees a dato sa Asiriya.
11 “Apiya pen miyangembaal so manga Israil sa madakel a aparan
a pesepaatan sa manga sapaat a ikeda o dosa iran
na miyabaloy ai baden a manga darpa a di siran on dii ndosa!
12 Inisorat aken kiran so tanto a madakel a sogoan ko kitab aken,
ogaid na ipembilang iran ai baden a kena a ba kiran makaaatod.
13 Pesepaat siran sa manga korban a ipepanompang iran raken
na peken iran so sapo iyan,
ogaid na saken, a so Allah, na kena ini a ba ko ikasosoat.
Imanto na katatademan aken so kamarataan iran,
na indaneg aken kiran so manga dosa iran.
Pekakasoy siran sa Misir!
14 “Kiyalipatan a Israil so Miyaden on

na mimbabalay sa manga torogan;
na giya Yodah na miyangon sa madakel a kokotaan a siti.
Ogaid na tenaan ko a apoy so manga siti iran
a pekatotong ko manga torogan ago so manga kota iran.
HOSIYA 9
Piyakalangkap i Hosiyas so Kapendadaneg sa Israil
Di kano pekebabaya, hey manga taw sa Israil!

Di kano peselasela ko manga pista niyo a datar o manga kapir!
Ka misondal kano ko kiyatalikodi niyo ko Tohan iyo.
Pipesa niyo a ginawa niyo ko salakaw a manga tohan
na kiyababayaan iyo so initendan iran rekano a pereperan.
2 Sabap sii na so pereperan iyo ago so manga obas
na di ketangkaan a ipegeper ko manga taw,
na keda rekano pen so bago a arak.
3 Di kano den pekakaden ko inged o Allah,
ka pekakasoy kano roo sa Misir,
na pekakan kano sa karam a pangenengken roo sa Asiriya.
4 Sii sangkoto a manga inged
na di kano pekaodod sa arak a isepaat ko Allah.
Da den a isepaat iyo ron roo a ba niyan kasoaten.
So pekorbanen iyo na kelagid rekano o pangenengken a peken o dii ndiyaga;
kekaraman so langon a pekakan on.
Giyangkoto a pangenengken na pantag bo ko kaor iyo;
di ini kisapaat ko Allah sii ko Timplo niyan.
5 Na antonaa den i sowaan iyo sii ko manga gawii

a miyanga tetendo a kalilimod iyo,
a so manga gawii a kapepistai niyo ko Allah?
6 Apiya pen o makalidas kano ko kabinasaan sii sa Asiriya
na timoon kano o manga Imisiren
a ipelebeng kano iran roo sa Mimpis!
Pekogowan so manga darpa a igagadong on so manga pirak iyo
na pemangetoan a manga sorok so manga walay niyo.
7 Miyakatalingoma den so gawii a kapendadaneg sa Israil;

magaan den so gawii a kambadal.
Ketokawan den ai a Israil!
Aya dii teroon o manga taw na “Lalong so nabi!”
ago “Pembetengen so mama a ipapaar o Roh o Tohan!”
Madakel so manga dosa niyo
na minitaralo a kagowad iyo ko siran oto a pekebabaya ko Allah.
8 So nabi na siyogo o Tohan aken
kaan iyan mapakaiktiyar so ped iyan a manga taw sa Israil,
ogaid na apiya anda sekaniyan pesong
na pananamaran iran lomitag a lagid o papanok;
riridoon sekaniyan o manga taw sii ko inged o Tohan iyan.
9 Tanto iran a piresikan so ginawa iran
a datar o pinggolaola iran sii sa Gibiyah ko miyatey den a gawii.
Ketademan o Allah so karata iran
na indaneg iyan kiran so manga dosa iran.
So manga Dosa a Israil ago so Marata a Kiyatamanan on
10 Tig o Allah a “Hey Israil, isako mona a kiyatoona ko reka

na lagid o miyatoon aken so manga obas a pegto sii ko disirto!
Kagiya mailay aken so manga apo o ka
na lagid o ba aken miyailay so paganay a kiyalotoan a onga ko kayo a higos!
Ogaid na kagiya makasong siran sa Baal Piyor
na iniiklas iran a ginawa iran ko kapesimbaa sangkoto a piyakayaya a barahala.
Na da matey na miyabaloy siran a piyakasisingay
a datar o katohanan a kiyababayaan iran.
11 So bantogan a Israil na melayog sa mawatan a lagid o papanok.
Da den a pembawata peroman; da den a keogat
aya pen o ba aden a keraringen.
12 Na apiya pen o mapakala iran so manga wata iran
na palaya aken siran pengowaan
taman sa da den a isa kiran bo a ba malamba.
Ndowandowaan siran amay ka awaan aken siran!
13 Miyailay aken a Israil a lagid o inged a Tair
a miyapamola ko mapiya a darpa.
Ogaid na pagowiten a Israil so manga wata iyan ko pemamono kiran.”
14 Ya Allah, antonaa i mapangni aken

a imbegay ngka ko manga pagtaw ngka?
Begi ngka siran sa roranan a pembagowasan
ago kamara a manga soso!
So Inikokom o Allah sa Israil
15 “Misegipoon so langon o karataan iran roo sa Gilgal.

Roo mipoon so kinikagowaden aken kiran.
Sabap ko manga rarata a galebek iran
na mbogaon ko siran ko inged aken.
Di aken siran den kebabayaan;
pepamanopak so langon a olowan iran.
16 So manga taw sa Israil na lagid o pamomolan
a miyagango so bekaw niyan a da den a kiyonga niyan.
Apiya pen mbabawata siran
na pemonoon ko so pekebabayaan iran a manga wata iran.”
17 Imbowang siran o Tohan aken

ka da iran sekaniyan pakinega,
na pembabaloy siran a dii magenebeneb sii ko manga nasiyon.
HOSIYA 10
So manga taw sa Israil na lagid gowani o dii teribonga a waged a obas.
Na sii ko kapepekadakel o manga onga iran
na miyangembaal siran sa madakel a aparan,
na sii ko kaoodara ko lopa iran
na pipendaraan iran sa mapiya so babarakaten kon a manga ator iran.
2 Miyabaad so tagakal a poso iran
na itena kiran imanto so kasalaan iran.
Nggebaan o Allah so manga aparan iran
na peropeten iyan so babarakaten kon a manga ator iran.
3 Samaoto na peteroon iran a “Da a dato ami

ka da ami kaleken so Allah.
Ogaid na apiya o aden a dato ami
na antonaa i kiyogop iyan rekami?”
4 Di siran dii mbasa sa da a bali niyan
na di siran dii sepa sa di benar sii ko di iran dii kapakipepasadanowai.
Kagiya ka maoto na sii kiran peretok so bekog a kapengokom
a datar o towa a pamomolan sii ko dii mbabasokan.
5 Penga alek so manga taw sa siti a Samariya

na ipemboko iran so kakeda o barahala a nati a sapi sa Bit Habin.
Inggoraok ai mambo o manga imam a miyamanalagad on
a miyanga bababaya ko bantogan iyan,
ka kagiya keagaw ai kiran a iteog
6 A kewit sa Asiriya a imbowis ko mala i gees a dato.
Na kekowa a diyaman a Israil ago keyaan
sabap ko manga toma a inonotan iyan.
7 Keda a Samariya ago so dato iyan
a lagid o maroni a sapak a pekeanodanod ko liyawaw o ig.
8 Kebinasa so manga darpa sii ko manga bobongan
a ron pepamanimba sa barahala so manga taw sa Israil.
Pemangeto roo so manga sorok ago manga rarata a otan
a pekasapeng ko manga aparan iran.
Na telowan o manga taw so manga palaw sa “Tamboni kami niyo!”
ago sii ko manga bobongan sa “Tempagi kami niyo!”
9 Tig o Allah a “Hey manga taw sa Israil, da niyo tapeleken so di niyo dii kandosa
ipoon ko manga gawii a kiyandosa niyo roo sa Gibiyah.
Ba di patot so kiyagobata ko manga mama sa Gilgal
a dii nggolaola sa kamarataan?
10 Na imanto na nggobaten ko sekano ago ndanegen aken.
Pekisondolan aken sekano ko manga nasiyon
a pendadaneg rekano sabap ko madakel a dosa niyo.”
11 “Giya Israil na lagid gowani o miyatadiyam a mangoda a sapi a pekebabaya megik.

Ogaid na imanto na senganan aken sa mapened a kokoong so malemek a lig iyan.
Indendeg aken sekaniyan,
na disomala a makapendado a Yodah
ago makapengaras a Israil.
12 Saoden iyo a ginawa niyo sa kaontol,
ka maperagon iyo so da a ikeda iyan a gagaw aken.
Peroropeta niyo so mategas a lopa sii ko poso iyo,
ka masa imanto a kapembabanoga niyo ko Allah
taman sa pekaoma sekaniyan
na pekioranan kano niyan ko kaontol.’
13 “Ogaid na aya inisaod iyo baden na kamarataan,

na miragon kano sa kadostaan.
Komiyan kano sa iniyonga o manga kabokegan,
ka somiyarig kano ko bager o manga karo niyo sa katidawa
ago so kadakel o sondaro niyo.
14 Sabap roo na pekatalingoma so kapetidawa ko manga taw niyo
na penga gegeba so langon a kota iyo.
Kelagid ai o gawii a miyabinasa o dato Siyalman so siti a Bit Arbil sii ko katidawa
na miyamangidebak ko lopa so manga ina ago so manga wata iran.
15 Giyanan i keokitan iyo, hey manga taw sa Bitil,
sabap ko minitaralo a karataan iyo.
Sii ko sobo sangkoto a gawii
na tarotop so kakebinasa o dato sa Israil.”
HOSIYA 11
So Gagaw o Allah ko Somosopak a manga Pagtaw niyan
Tig o Allah a “Isako wata pen a Israil

na kiyababayaan aken sekaniyan,
na tiyalowan aken so wata aken sa ganat den sa Misir.
2 Ogaid na saden sa kapepananalowi aken sa Israil
na aya iran raken baden kapepekawatan
a di siran dii korban ko katohanan a Baal
ago pepamanotong sa doka ko manga barahala.
3 Saken i miyangendao lomalakaw sa Israil
a tatayongan ko siran sa lima;
ogaid na da iran kilalaa a saken i sominiyap kiran.
4 Piyakadaseg aken siran sa ginawa ko
a nggolalan ko manga tali a limo a iiketan sa gagaw.
Piyokas aken so kokoong ko lig iran,
na komiyoong ako sa kapekakana ko kiran.
5 “Kesoy so manga pagtaw aken sa inged a Misir

na pendatoan siran a Asiriya
sabap sa minda siran sa kakesoy iran raken.
6 Perempas so manga pedang sii ko manga siti iran
na nggebaan o manga ridoay so manga gimowa o siti.
Mbinasaan iran so manga pagtaw aken
na pageposen iran so petekdiren iran.
7 Maniniyat iran den so kapetelikodi iran raken.
Apiya pen petelowan siran o manga nabi
sa kakesoy iran ko Lebi a Maporo
na da den a isa kiran bo a ba niyan sekaniyan mbantoga.
8 “Andamanaya i kakitolaken aken reka, hey Israil?

Andamanaya i kakeawai aken reka?
Andamanaya i kakebinasai ko reka a datar o pinggolaola ko sa Admah?
Andamanaya i kipenggolalanen aken reka ko inikidia ko sa Sibowim?
Miyakisi so poso aken sii sa ginawa ko
na mitataralo so gagaw aken reka!
9 Di aken pakapemborngaten so pesokeyaw a gani aken;
di aken mbinasaan peroman a Israil.
Ka saken so Tohan a kena a ba matag manosiya
saken so Soti a Tohan a sisii rekano
na di ako reka pekaoma a pekerarangitan.
10 “Amayamay na pengongonotan bo so manga taw ko Allah.

Magengger ako a lagid o arimaw,
na amay ka magengger ako
na pekaoma siran a pepananabaden a poon sa sedepan.
11 Madilapet a kapekaoma iran a poon sa Misir a lagid o papanok,
ago poon sa Asiriya a lagid o marapatik.
Na pekabalingen ko siran ko manga walay iran,”
a tig o Allah.
Miyasala a Israil ago giya Yodah
12 “So manga taw sa Israil na linibet ako iran

a kapamokeg ago kapamagakal;
na giya Yodah na da pen makapeniyat
ko kapepangongonotani ran raken
a so kasasarigan ago Soti a Tohan.
HOSIYA 12
Peken o manga taw sa Israil so ndo;
sii ko mababasa alongan
na peselobaan iran so ndo a poon sa sebangan,
na petekepen iran so kapepamokeg iran ago dii kapangarasi.
Di siran dii makipesadanowai sa Asiriya
na di siran dii ndagang sa lana a olibi sii sa Misir.
2 Aden a dimanda o Allah ko manga taw sa Yodah.
So pen so manga taw sa Israil na indaneg iyan kiran so manga okitokit iran,
na itena iyan kiran so manga galebek iran.
3 So apo iran a si Yakob na kiyapetan iyan so palo o pagari niyan a Isaw
isako sii siran pen ko tiyan o ina iran.
Na isako makala den si Yakob na miyakipelobed sekaniyan ko Tohan
4 Oway, miyakipelobed sekaniyan ko malaikat ago miyakadaag;
na somigad si Yakob ago miyangangampedian on sa limo.
Sii sa Bitil na minitoona iyan so Tohan
na miyakimbitiyarai rekaniyan roo so Tohan.
5 Giyai so Allah a so Lebi a Mamaapaar;
so Allah i Ingaran iyan a kababantogan!
6 Kagiya ka maoto, manga mbawataan o Yakob,
na kasoy kano ko Tohan iyo!
Tatapa niyo so kapangalimo ago maontol a kapangokom
na lalayon iyo iinama so Tohan iyo.
7 Tig o Allah a “So manga taw sa Israil

na lagid sa kalalalim o manga padagang a Ikanaanen
a pegosar sa di ontol a timbangan.
Mabebaya siran mangalampas.
8 Aya di iran dii teroon na ‘Miyakakewasa tano
na tanto tano a tatamoken!
Sii ko langon a kapepakapantiyari tano
na da a ba tano niyan katooni sa kamarataan o di na dosa.’
9 Ogaid na saken a so Allah a Tohan iyo a miyakaliyo rekano sa Misir
na pekabalingen aken sekano peroman ko manga barombarong
a datar isako manga gawii a miyanga tetendo a pista niyo.
10 “Miyakimbitiyarai ako rekano a nggolalan ko manga nabi.

Bigan aken siran sa madakel a pangingilain
ago manga bayambayanan a mipagiktiyar iyo.
11 Apiya pen oto na aden a kamarataan sa Giliyad
a so kapesimba sa manga barahala.
Sii mambo sa Gilgal na aden a dii korban sa manga mama a sapi,
na kebaloy so manga aparan iran roo a datar o manga tabotod a ator
sii ko kilid o dii mbabasokan.”
12 Miyalagoy si Yakob sa inged a Aram

a roo sekaniyan minggalebek a petegikor ko manga bilibili
kaan makasokat sa mapengaroma niyan.
13 Na piyakaliyo o Allah sa Misir so mbawataan iyan a manga Israil
a miyakanggolalan ko nabi a aya kiran mambo miyakasiyap.
14 Ogaid na kiyakatan iran so Allah taman sa tanto a kapekerarangiti niyan kiran,
na itena kiran o Kadnan iran so kasalaan iran.
Indaneg iyan kiran so kiyapagitowitoa iran on.
HOSIYA 13
So Rarangit o Allah sa Israil
Gowani igira a dii tero so mbatabataa a Ipraim

na pepananabaden so ped a manga mbatabataa,
ka kababantogan a Ipraim sii sa Israil.
Ogaid na miyakasela so manga taw sa Ipraim
ko kapesimbaa iran ko barahala a Baal
a aya minitangked ko kapematay iran.
2 Na itataros iran baden imanto a di iran dii kandosa;
ipepangembaal iran a ginawa iran sa manga barahala a tiyowang a pirak
a palaya den dii teongen piyapiya o manga panday.
Na aya di iran dii teroon na “Korbani niyo ai!”
ago “Areki niyo so manga barahala a nati a sapi!”
3 Kagiya ka maoto na kelagid siran o lekep ko kapipita,
a lagid o namog a pekeda ko kapesebang o alongan,
a lagid o okap ko pegegikan a pekibayog o ndo,
ago lagid o bel a pepekaporo a poon ko bantolang.
4 “Ogaid na saken so Allah a Tohan iyo a miyakaliyo rekano sa Misir.

Da a salakaw a kilalaa niyo a tohan a rowar raken!
Da a pananabet a liyo raken!
5 Kinibir aken sekano sii ko disirto a mala on so taon.
6 Ogaid na isako pakaken aken sekano na miyanga oosog kano,
na kagiya manga oosog kano na iniporo iyo a ginawa niyo
na kiyalipatan ako niyo.
7 Kagiya ka maoto na nggobaten ko sekano a lagid o arimaw,
o di na lagid o tingkalong a magaayan ko kilid a lalan.
8 Sedayan aken sekano a lagid o maila a aso a inagawan sa wata,
na pesekisiin aken sekano ago pelameden
a lagid o arimaw o di na mawaraw a binatang.
9 “Hey manga taw sa Israil, ikebinasa niyo so kasosopak iyo raken

a aya rekano bo pekatabang!
10 Anda imanto so dato iyo a pekasabet rekano?
Anda so manga olowan iyo ko langon a inged iyo
a miyapangni niyo ko kiyateroa niyo sa
‘Begi kami ngka sa dato ago manga olowan?’
11 Sii ko gani aken na bigan aken sekano sa manga dato,
na sii ko rarangit aken na kinowa ko siran.
12 “So kamarataan ago so manga dosa a Israil na minisorat den,

na miyatago angkai a manga rikod.
13 Miyaparo ko manga Israil a ipembawata siran peroman;
ogaid na lagid siran o da a ongangen iyan a wata
a minitalingoma den a kipembawataan on
a minda sekaniyan sa kapeliyo niyan ko roranan o ina iyan.
14 Ba aken siran sebeta ko kapaar o kobor?
Ba aken siran pagaona poon ko kapatay?
Hey kapatay, wita ngka kiran so manga kasiksaan ka!
Hey kobor, wita ngka kiran so kabinasaan ka!
Di aken siran ikepedi!
15 Apiya pen lebi a pepekarimpoong so manga taw sa Ipraim a di so manga pagari ran
na pekisamberan siran o Allah sa mayaw a ndo
a pepekapoon ko disirto sii sa sebangan.
Keti so manga bowalan iran
na kemaraan so manga paridi iran,
na mapeteban so langon a kakawasaan ago tamok a miyataliyong iran.
16 Kitana ko manga taw sa Samariya so kasalaan iran,
ka somiyopak siran ko Tohan iran.
Pematay siran ko katidawa;
pemangidebak ko lopa so manga ikaririga iran
na pelalakoten so manga tiyan o kikaoogat kiran.”
HOSIYA 14
So Inipangangampedian i Hosiyas sa Israil
Kasoy kano ko Allah a Tohan iyo, hey manga taw sa Israil!
Aya minioteng rekano na so manga dosa niyo.
2 Kasoy kano ko Allah na teroa niyo ron a
“Rilai ngka so langon a dosa ami
na tarimaa kami ngka sa limo
kaan ami reka miselasela so podi o manga modol ami.
3 Di tano kesabet a Asiriya,
na di tano mapakalidas o manga koda sa katidawa.
Di tano den peteroon peroman ko manga barahala a inembaalan tano a
‘Sekano i manga tohan tano,’
ka seka bo i ketoonan o manga ilo sa limo.”
Pemolongan o Allah so manga Pagtaw niyan

4 Tig o Allah a “Mbolongan ko so kapepakasilay o manga pagtaw aken,
na kebabayaan ko siran sa iklas,
ka miyada den so rarangit aken kiran.
5 Kelagid ako o namog ko manga taw sa Israil;
pegobarobar siran ago pembebekaw sa madalem
a lagid o manga kayo sa Libanon.
6 Pekarabong so di iran dii kasepasapak
a lagid o mapiya i paras a kayo a olibi,
na kelagid so kamot iran o kayo a sidro sa Libanon.
7 Mbaling siran peroman ko kasisirongi aken kiran.
Pekarimpoong siran a lagid o pereperan
ago pemangonga a lagid o waged a obas,
na so bantogan iran na kelagid o arak a poon sa Libanon.
8 Di den makipekoyapeta so manga taw sa Israil ko manga barahala.
Pagamponen aken so manga pangni iran
na siyapen aken siran.
Lagid ako o kayo a lalayon gadong,
na saken i pekepoonan ko di iran dii kateribonga.”
9 Pengnin ko a kasabotan o manga oongangen angkai a minisorat sii!

Matago ini sa ginawa o manga dadalem i panarima!
Ka matito so manga lalan o Allah
a pekedeg on so manga oontol,
ogaid na pepamangirepang on so manga baradosa.
YOWIL
YOWIL 1
Giyai i manga katero o Allah a initoron ki Yowil a wata i Pitowil
So Kasiksaan a manga Tarapan

2 Pamakinega niyo ai, sekano a manga totoa den!
tagoa niyo sa ginawa, hey langon a kibabaling sa Yodah!
Ba aden a datar ai a miyanggolaola sii ko manga gawii niyo
o di na sii ko masa o manga apo iyo?
3 Panotola niyo ko manga wata iyo,
kaan iran mapanotol ko manga wata iran,
a aya on mambo makapenotol ko pekatalondog a apid.
4 Piyangangan o manga ngongoda a tarapan so pereperan,
na so miyasama iran na piyangangan o dii tepatepak a manga tarapan;
so miyasama iran na piyangangan o dii ngoronggorong a manga tarapan,
na so miyasama iran na lingan koman o pepangosip a manga tarapan.
5 Pagnaw kano ago goraok, sekano a manga tamereg!

Ndidiyagaw kano langon a palainom sa arak,
ka miyabinasa so manga obas a pegembaalan a bago a arak.
6 So sagorompong a makapal a tarapan na lomiyonggom ko kalopaan tano;
mala siran i gees ago di keitong,
na magarang so manga ngipen iran a lagid o ngipen a arimaw.
7 Bininasa iran so manga waged tano a obas
ago pirereteb iran so manga kayo tano a higos.
Pilolodasan iran oto taman sa miyapakapoti so manga sapak iran.
8 Lendag kano a datar o bago a taw a ndiditar sa sako

a di niyan dii mboko so matataalik a pengaroma on a miyatay.
9 Da den a pereperan o di na arak a kisapaat sii ko
Timplo o Allah
na mboboko so manga imam a dii telagad ko Allah.
10 Miyailang so manga dii mbabasokan,
na dii mboko so manga pangomaan;
ka miyabinasa so pereperan;
kominimbel so manga obas,
na miyagango so manga kayo a olibi.
11 Rataa niyo a ginawa niyo, hey manga taribasok!
Ndidiyagaw kano a pepamamola sa obas!
Mbokoon iyo so trigo ago so bantad
ka miyabinasa so langon a pereperan ko dii mbabasokan.
12 Miyalayon so manga waged a obas
na miyagango so manga kayo a higos;
so manga kayo a granada, manga kayo a korma ago manga kayo a koldi
taman ko langon a pepamangonga a kayo na miyanga lalayon.
Mataan den a miyalayon mambo so kapekebabaya o manga taw!
Pangni ko Kateobat
13 Nditar kano sa sako, hey manga imam, na go kano goraok;
ndidiyagaw kano a pepamanalagad sii ko aparan o Allah!
Song kano ko Timplo niyan na tareg kano roo ko mababasa gawii a ndiditar sa sako,
hey manga pepanalagad ko Tohan aken;
ka da den a pereperan o di na arak a kisapaat iyo ko Tohan iyo.
14 Sogo kano sa kapowasa;
tawag kano sa soti a kalilimod.
Timoa niyo ko Timplo o Allah a Tohan iyo so manga pelokelokesen
ago so langon a kibabaling sa Yodah
na goraok kano ko Allah.
15 Miyakarani den so gawii o Allah,

a kakitalemba o morala a poon rekaniyan a Lebi a Mabager.
Tanto a piyakalekelek angkoto a gawii!
16 Ba di pekeda so pangenengken sii ko kapegilaya tano ron?

Da den a kapekebabaya ago kapipiya a ginawa sii ko Timplo o Tohan tano.
17 Pepematay so manga oniin sii ko komigaw a lopa.
Kagiya da den a pereperan a pekeragon
na miyanga ooteng so da a manga tago iyan a kamalig ago taliyong.
18 Tanto a dii makaperego so manga ayam ko kapekeor iran!
Pepegenebeneb so manga sapi ka kagiya da a kapenateban iran,
na pekekarasay mambo so manga talon a bilibili.
19 Sii ako reka pepananalo, ya Allah,

ka miyalamed a apoy so manga pananateba ko pangomaan,
na miyatotong so langon a pakayokayowan.
20 Apiya so manga iila a binatang na pesekaan a di reka dii mananalo
ka piyanga aatiyan so manga lawasaig
ago miyararab so manga pepanateban.
YOWIL 2
So Makapal a manga Tarapan a Lagid o Armi
Pakaoniya niyo so bogiyong sii sa Siyon!

Pakatanoga niyo so oni a pekaiktiyar sii ko soti a palaw aken!
Panabeker kano langon a kibabaling sa Yodah,
ka pekatalingoma so gawii o Allah, na marani den.
2 Giyanan so maliboteng ago lomelekep a gawii,
a so gawii a makapal on so manga gabon a tanto a domadatem.
Na kitekaw den, a lagid o sinar a pepekaborantak ko manga palaw,
na pepekatalingoma so mala ago mabager a armi
a da den a ba niyan lagid gowani
aya pen o ba sii ko pekatelondog a manga masa.
3 Pepangonaan kiran so pepekalengan a apoy,
na pepangoriyan kiran so pesokeyaw a kadeg.
So kalopaan ko maoonaan iran na lagid o Sapadan a Iden,
ogaid na so minipanagad iran na lagid o tiyaawi a disirto,
da den a ba kiran pekapalagoy.
4 Lagid siran sa paras o manga koda;
pepelolompat siran a lagid o manga koda a ipenggobat.
5 Di siran dii tepatepak sii ko poro o manga palaw
a so kapendaleg iran na lagid o garokob o manga karo
ago lagid o kapelagti o pekerab a apoy a pepekalamed ko gango a otan
ago so dagedeb o makapal a manga sondaro
a peparada sa kapakipetidawa.
6 Sii ko kapegabanti ran na tanto a pekelek so manga taw

a pepamansi so oman i isa a paras.
7 Pepalalagoy siran a lagid o manga gomogobat;
pepangalakat siran ko manga pangeleban a lagid o manga sondaro.
Palaya siran peparada a pepamamantek
sa da den a katipatipas.
8 Di siran makaperorompaka,
ka pelalakaw so oman i isa ko kakokoyogan iyan.
Pekeseseb iran so manga kota
sa da a ba kiran pekaren.
9 Pesondol siran ko siti
a pepangalakat ko manga pangeleban.
Pepamamanik siran ko manga walay
a pepamanoled on a pegokit ko manga rowasan
a lagid o manga tekew.
10 Pekekokog so doniya ko maoonaan iran,

na petebekeren so langit;
pepekaliboteng so alongan ago so olan,
na di den sindaw so manga bitoon.
11 Dii ndadalendeg so sowara o Allah ko kapepagolowani niyan ko armi niyan;
ka giyai so madakel ago mala i gees a manga sondaro niyan
a petoman ko ipesogo iyan.
So gawii o Allah na mala ago tanto a piyakalekelek!
Antawaa i makapemayandeg on?
Kisia niyo so manga Poso iyo
12 “Kagiya ka maoto,” a tig o Allah,

na kasoy kano raken imanto sa iklas ko poso iyo
a di kano dii powasa ago penggoraok ago mboboko.
13 Na kisia niyo ron so manga poso iyo
a kena bo a ba so manga nditaren iyo.”
Kasoy kano ko Allah a Tohan iyo,

ka makalimoon sekaniyan ago masalinggagaw,
a kena a ba malebod kararangiti ago mala i kapedi,
a makatitiyagar malin ko pamikiran iyan
sa kapetelamba iyan sa morala.
14 Ka antawaa i matao ron? Baanda niyan alina a pamikiran iyan
a ba kano niyan baden begi sa rakmat,
a so pereperan ago panginginomen a kisapaat iyo
ko Allah a Tohan iyo a lagid gowani.
15 Pakaoniya niyo so bogiyong sii sa Siyon;

sogo kano sa kapowasa ago tawag kano sa kalilimod!
16 Timoa niyo so manga taw na sotia niyo siran.
Rakesen iyo ron so manga totoa den,
ago so manga wata ago manga ikaririga.
So pen so gopen kiyawing na disomala a lomiyo ko walay iran
kaan roo makatalabok.
17 Tindeg so manga imam a dii telagad ko Allah
sii ko pageletan o aparan ago so pintoan o Timplo,
na pamanegad siran a di iran dii teroon a
“Kapediin ka so manga pagtaw ngka, ya Allah.
Di ngka peparoa o ba mapagongatongat so kawali ngka
aya pen o ba matotola o ped a manga nasiyon.
Ino iran mapetero ko oman i isa kiran a
‘Anda den so Tohan o manga Israil?’ ”
So Initopa o Allah a Kapakaasal
18 Samaoto na tegoon o Allah sa ginawa so inged iyan

na ikepedi iyan so manga pagtaw niyan.
19 Sembag kiran so Allah a peteroon iyan a:
“Pekiwitan ko sekano sa pereperan, bago a arak ago lana a olibi

a ketangkaan a ikeosog iyo,
na di aken sekano den pakipegongatongat ko ped a nasiyon.
20 Ipekawatan aken rekano angkai a armi a poon sa pagotaraan,
ka mbogaon ko siran ko komigaw a mitataog a kaden.
a makasasangor so onaan iran ko Maatay a Ragat,
ago so oriyan iran na sii matatampar sa Ragat a Miditiraniyo.
Na kebembar so mado a baw o pepenga reredak a manga lawas iran.”
Matamataan a tanto a manga ala a pinggolaola o Allah!

21 Di kano pekelek, hey manga pangomaan;
keriyala kano ago kababaya sabap ko manga ala a miyanggolaola o Allah.
22 Di kano den pekelek, hey manga iila a binatang,
ka dii melolombay so manga pepanateban.
Pepamangonga so manga kayo;
dii kerik so kayo a higos ago so waged a obas.
23 Kabebaya kano, hey manga taw sa Siyon!
pakapipiyaa niyo a ginawa niyo sii ko Allah a Tohan iyo!
Ka inibegay niyan rekano so madidiyangka a oran ko rendeng,
na pekiwitan kano niyan sa madakel a oran
ndatar sii ko pangolaon ago pangoran a lagid gowani.
24 So manga pegegikan na kepeno a pereperan,
na so manga petemekan sa manga obas ago manga olibi
na penolapay sa ig a obas ago lana a olibi.
25 “Ikesoy aken rekano so miyanga ada rekano sii ko manga ragon

a kapepangangana o makapal a tarapan ko pereperan iyo,
a giyangkoto a mala a armi aken a siyogo aken rekano.
26 Madakel a kekan iyo taman sa keosog kano den,
na podiin iyo so Ingaran o Allah a Tohan iyo
a aya rekano minggolaola sa manga piyakamemesa.
Di den pakapekeyaan peroman so manga pagtaw aken.
27 Sa masa oto na ketokawan iyo, hey manga Israil, a sisii ako rekano
ago saken so Allah a aya niyo bo Tohan a da den a salakaw.
Na di den pakapekeyaan peroman so manga pagtaw aken.
So Kimbegan o Allah ko Roh iyan
28 “Oriyan oto na pagododen aken so Roh aken ko langon o manga taw.

So manga wata iyo a manga mama ago manga babay
na pemakapayag ko lalag aken;
so manga totoa den rekano a manga mama
na petetaginep sa manga taginepen,
na so manga kangodaan rekano a manga mama
na pemakailay sa manga pangingilain.
29 So mambo so manga oripen aken ndatar so manga mama ago manga babay
na pagododen aken kiran so Roh aken sangkoto a manga gawii.
30 “Magembaal ako sa manga piyakamemesa sii sa langit ago sii sa doniya,

so rogo ago apoy ago makapal a bel a magagabon.
31 Pekaliboteng so alongan na pekariga so olan a lagid o rogo
sa di pen kapekatalingoma o mala ago piyakalekelek a gawii o Allah.
32 Na oman i isa a petelo ko Ingaran o Allah na kesabet;
ka miyatero o Allah a aden a pemakalidas a manga taw sii ko Palaw a Siyon
ago sii sa Yarosalim,
na keped siran ko manga makapegoyag a telowan o Allah.
YOWIL 3
So Kandanega ko manga Nasiyon
“Sangkoto a manga gawii

amay ka pekaasalen aken so kapepekapiya a Yodah ago giya Yarosalim,” a tig o Allah,
2 “na timoon ko so langon a manga nasiyon
ka pagowiten aken siran ko balintad o Yahosapat.
Na roo aken siran kokoma sabap ko pinggolaola iran
ko manga pagtaw aken a Israil a aya ko kawali,
ka iniparak iran so manga pagtaw aken roo ko ped a manga nasiyon
na pimbagibagi iran so inged aken a Israil.
3 Rinipa iran so manga pagtaw aken,
na pipepasa iran so manga wata a mama ago manga babay a mapengongoripen
sa mibayad iran ko manga sondal
ago mipemasa iran ko arak a peginomen iran.
4 “Antonaa i pipikiren iyo a misosopak raken, hey Tiro ago giya Sidon ago so langon a
pegingedingedan sa Pilisitiya? Ba ako niyo petepengi somaop ko pinggolaola ko? O
benar oto na magaan so magaan na mbadalan aken sekano sabap ko langon a pinggolaola
niyo!
5 Ka inagaw niyo so pirak aken ago bolawan, na inawidan iyo ko manga pesimbaan iyo
so lebi a manga pipiya a kakawasaan aken.
6 Pipepasa niyo so manga taw sa Yodah ago sa Yarosalim ko manga taw sa Grisiya kaan
iyo siran mapakawatan ko inged iran.
7 “Ogaid na pengoyatan aken siran sa kapagawai ran ko manga darpa a pipesaan iyo
kiran, na mbadalan aken sekano sabap ko inikidia niyo kiran.
8 Ka pakipepasa ko mambo so manga wata iyo a manga mama ago manga babay sii ko
manga taw sa Yodah na pepasaan iran siran pen ko manga taw sa Sabiya a so mawatan a
nasiyon. Saken a so Allah i mitero sii.”
9 Pakalangkapa niyo ai ko manga nasiyon:

“Tiyagar kano sa katidawa!
Pangoyati niyo so manga babager a sondaro niyo!
Timoa niyo siran langon na gobat kano.
10 Bataka niyo a pedang so manga ponta o dado niyo
na mbaali niyo a bangkaw so manga ipepangawit iyo.
Pakateroa niyo so manga lolobay sa ‘Mabager ako!’
11 Nggagaan kano sii somong, hey langon a manga nasiyon ko mbalabala,
na timo kano sii ko balintad.”
Pakatanaa ngka so manga ala i gees a sondaro ngka, ya Allah!

12 “Mbowat kano, hey manga nasiyon,
na song kano ko balintad o Yahosapat,
ka saken a so Allah na magontod roo
a pengokom ko langon a nasiyon ko mbalabala.
13 Garaba niyo siran a lagid o pereperan sii ko masa a kaperagon.
Ikano roo na limbega niyo siran a lagid o manga obas,
ka mapepeno so petemekan on,
na pesolapay so tanto a mala a kamarataan iran ko petengelan sa arak!”
14 Nggibonggibowan a manga taw sii ko balintad a pengokoman!

Ka magaan den makatalingoma so gawii o Allah
ko balintad a pengokoman.
15 Pekaliboteng so alongan ago so olan
na di den sindaw so manga bitoon.
16 Pelalis so Allah roo ko Palaw a Siyon,
na pendadalendeg so sowara niyan roo sa Yarosalim;
kekokog so doniya ago so manga langit.
Ogaid na kebaloy so Allah a pepagapasan o manga pagtaw niyan
ago kota o manga taw sa Israil.
So Kakerakmati o Allah ko manga Pagtaw niyan
17 “Sa masa oto na sekano a manga Israil

na ketokawan iyo a saken, a so Allah a aya niyo Tohan,
na sii komakaden sa Siyon, a so soti a palaw aken.
Kebaloy a Yarosalim a soti a siti,
na di den kedaag peroman o manga rait.
18 Sii sangkoto a manga gawii na magetek so manga palaw sa bago a arak,
na ketogaan a gatas so manga bobongan.
Magondas so ig ko langon a baogan sa Yodah,
na keadenan so Timplo o Allah sa bowalan a petoga a pepekapoon roo
a pekaigan iyan so Balintad a manga Kayo a Akasiya.
19 Ogaid na kebaloy a Misir a tataawi a darpa,
ago giya Idomiya a mitataog a disirto
sabap ko kiyasonsinga iran ko manga taw sa Yodah
ko kiyapamonoa iran ko da a sala iyan a manga taw sii ko inged iran.
20 Ogaid na kebalingan a Yodah sa taman sa pakataman,
ago giya Yarosalim sii ko kalangolangon a kapepamagapidapid o masa.
21 Iseop aken so siran oto a miyapamono;
di aken pelepasen so miyamakasela,
ka saken a so Allah na keden ko Palaw a Siyon!
AMOS
AMOS 1
Giyai so manga katero o nabi Amos a isa ko manga pananagikor sa bilibili sa inged a
Tikowa sii sa Yodah. Miyapayag ai rekaniyan makapakantag sa Israil a nggolalan ko
manga pangingilain isako dowa ragon pen a da kapelinog o doniya sii ko manga gawii a
kandadato i Osiyas sii sa Yodah, ago si Yarobowam a wata i Yahowas a aya dato sa Israil.
2 Pitero i Amos a
“Matanog so sowara o Allah sii sa Palaw a Siyon

ago dii ndadalendeg sii sa Yarosalim.
Na pekelanes so pakipepanateban o manga pananagikor sa bilibili,
ago pekegango so paotanotan sii ko palaw a Karmil.”
So Kandanega ko manga Nasiyon a Midadair sa Israil
Siriya
3 Giyai i kabasa o Allah:

“Sabap sa omanoman ndosa so manga taw sa Damasko
na di aken den isendod so kandanega ko kiran.
Piyangaras iran so manga taw sa Giliyad
sa pangaras a potaw i ngipen.
4 Sabap roo na pekioranan aken sa apoy
so torogan a biyangon o dato Hasail
na ketotong so manga kota o dato Binhadad.
5 Peropeten aken so manga gimowa a Damasko,
na mbinasaan ko so manga taw a kibabaling ko Balintad a Abin
ago so pen so dato sa Bitidin.
Na so manga Isiriyan na pemangitaog sa inged a Kir,” a tig o Allah
Pilistiya
“Sabap sa omanoman ndosa so manga taw sa Gasa
Biniyag iran ago initaog so dalem o isa ka maginged a manga pagtaw aken
na pipesa iran siran a mapengongoripen o manga Idomiyan.
7 Sabap roo na pekioranan aken sa apoy so pangeleban o siti a Gasa
na ketotong so manga kota on.
8 Mbinasaan ko so manga taw a kibabaling sa Asdod
ago so pen so dato sa Askilon.
Itena aken a lima ko sa siti a Ikron
taman sa mamatay so kelamba a manga Pilistiyo,”
a tig o Allah a Lebi a Mamaapaar.”
Tiro
“Sabap sa omanoman ndosa so manga taw sa Tiro
Siyogok iran so kapasadan iran
mipantag ko dii kapakingginawai ko manga Israil,
ka piyalad iran ko manga Idomiyan
so dalem o isa ka maginged a miyanga bibiyag.
10 Sabap roo na pekioranan aken sa apoy so keleb o siti a Tiro
na ketotong so manga kota on.”
Idomiya

“Sabap sa omanoman ndosa so manga Idomiyan
Piseloba iran a pedang so manga pagari ran a manga Israil
sa da a ba on kapedi
a dii mborngat so da a pitemanan iyan a gani,
na da iran den pakalenggawa so pesokeyaw a rarangit iran
sa taman sa pakataman.
12 Sabap roo na pekioranan aken sa apoy so siti a Timan
na ketotong so manga kota sa Bosrah.”
Amon

“Sabap sa omanoman ndosa so manga Amoniyo
Sii ko di iran dii kapakitidawa a pepakaoladen iran so pegingedan iran
na pilalakot iran so manga tiyan o manga oogat a babay.
14 Sabap roo na totodan ko a apoy so keleb o siti a Rabah
na ketotong so manga kota on.
Kisarta on so dii kapelalalis sii ko gawii a kapetidawa,
ago sobosobo ko gawii a kambarabarat.
15 Na so dato iran ago so manga sanasanaan iyan
na pemangitaog siran langon,” a tig o Allah.
AMOS 2
Mowab
Giyai i kabasa o Allah:

“Sabap sa omanoman ndosa so manga Mowabiyo
Tiyotong iran so manga tolan o dato sa Idomiya
taman sa miyagombiyombi.
2 Sabap roo na pekioranan aken sa apoy so inged a Mowab
na ketotong so manga kota sa Kiriyot.
Na pematay so manga Mowabiyo sii ko kagogorigaw o kapetidawa
ago sii ko dii kapelalalis o manga sondaro
ago so kapepakaoniya ko bogiyong.
3 Mbinasaan ko so dato iran, na mbonoon ko so langon a olowan iran,”
a tig o Allah.
Yodah

“Sabap sa omanoman ndosa so manga taw sa Yodah
Tiyalikodan iran so Kitab aken
na da iran tomana so manga sogoan aken,
ka miyadadag siran o di benar a manga tohan,
a so manga tohan a piyangongonotanan o manga apo iran.
5 Sabap roo na pekioranan aken sa apoy so inged a Yodah
na ketotong so manga kota sa Yarosalim.”
So Kandanega sa Israil

“Sabap sa omanoman ndosa so manga Israil
Pipesa iran so manga oontol a mapengongoripen
sabap sa da iran kabayadi so otang iran,
na pipesa iran so manga miskin sa arga a isa ka paris a tinilas.
7 Di iran dii ndaodaogen so kikadodowaanan
na perampasan iran so pepangalimbabaan ko kabenar iran.
So mbataa mama na dii makikeromai ko isaisa a raga
a aya iran kapepakaitoa ko Ingaran aken.
8 Pegiga so manga mama ko oman i darpa a pesimbaan
a somosolot siran sa manga nditaren
a inisanda kiran o manga miskin;
na sii ko walay o tohan iran na peginom siran on sa arak
a kinowa iran ko siran oto a makaootang kiran.
9 “Apiya pen oto, manga pagtaw aken, na piyaminasa ko so manga Amoriyo

ko da niyo pen kapakaoma sangkai a inged,
a so manga taw a lagid sa kapangapoporo o manga kayo a sidro
ago lagid sa kabager o manga kayo a kalipapa.
Bininasa ko so onga iran sa poro
ago so bekaw iran sa baba.
10 Na piyakaliyo aken sekano sa Misir
na inagak aken sekano sa miyakapat polo ragon ko disirto,
na inibegay aken rekano so pagiingedan o manga Amoriyo
kaan iyo matangan.
11 Piyamili aken so ped ko manga wata iyo a mama a kebaloy a manga nabi,
ago so ped ko kangodaan iyo a kebaloy a manga Nasariyo.
Ba ini di benar, manga pagtaw aken a Israil?”
a tig o Allah.
12 “Ogaid na piyakandosa niyo so manga Nasariyo
ka piyakainom iyo siran sa arak,
na inisogo iyo ko manga nabi a
‘Di niyo peyaga so lalag o Allah!’
13 Na imanto na ipelesek aken sekano

a lagid o karo a pekilesek igira a miyapeno a pereperan.
14 Apiya so lebi a magaan a pakokoya na di pekapalagoy;
so mabager a taw na di niyan ketekes so bager iyan,
na so sondaro na di niyan kesabet a ginawa niyan.
15 So pamamana na di pekaato,
na di pekalidas so madilapet i kapelalagoy
aya pen o ba so pakokoda.
16 Sa gawii oto na apiya so lebi a manga wawaraw a sondaro
na imbegak iran so manga gomaan iran
kaan magaan a kapekapalagoy iran,”
a tig o Allah.
AMOS 3
Pamakinega niyo angkai a kabasa o Allah makapantag rekano, hey manga taw sa Israil, a
so langon o isa ka maginged a piyakaliyo aken sa Misir:
2 “Sekano bo i bangsa a pinili aken

sii ko langon a nasiyon sa doniya.
Giyanan i sabap a disomala a indaneg aken rekano
so langon a miyandosa niyo.”
3 Ba makapegonota lomalakaw so dowa kataw

o da siran makatealik sa kapetalabok iran?
4 Ba pagengger so arimaw san ko kalasan
o da a miyatoon iyan a sekaben iyan?
Ba pageker so mangoda a arimaw san ko lekowa iyan
o da a miyasikem iyan?
5 Ba kedakep so papanok ko litag sii ko lopa
o da irata so litag?
Ba kepekas so mokas o litag
o da a kesampirotan on?
6 Igira a piyakaoni so bogiyong sii ko siti
na ba di penanabada so manga taw ron sa kalek?
Igira a miyaoma a morala so siti
na ba di so Allah i kilalag on?
7 Matamataan a da den a penggolaolaan o Allah a Lebi a Mamaapaar

o di niyan daan a miyapayag so takdir iyan
ko manga oripen iyan a manga nabi.
8 Mingger so arimaw!
Antawaa i makagenggen ko kalek iyan?
Mitero den so Allah a Lebi a Mamaapaar!
Antawaa i makasangka makapayag ko lalag iyan?
Tiyawag so manga Peseksi ko Kasalaan a Israil
9 Pakalangkapa niyo ai ko manga taw a kibabaling

ko manga torogan sa Asdod ago sa Misir:
“Timotimo kano ko manga bobongan ko melilibeta sa Samariya
na ilaya niyo so mala a kagogorigaw sii ko inged
ago so dii kapangarasi o manga taw ron.”
10 “Di katawan angkai a manga taw so kanggolaola sa ontol,”

a tig o Allah.
“Pepanimoon iran ko manga torogan iran so manga tamok
a pepangalampasen iran ago pepanganiyayaan.”
11 “Sabap roo,” a tig o Allah a Lebi a Mamaapaar,

“na pekaoma so ridoay a pelikopan iyan so inged iran
a tempagen iyan so manga kota iran,
na petebanan iyan so manga ala a torogan iran.”

“Lagid o pananagikor a aya bo a kesabet iyan na dowa a bobon
o di na satebi a tangila o bilibili a itatangag o arimaw,
na lagid oto mambo a kakesabeta ko manga taw sa Israil a kibabaling sa Samariya
a sesandasandang imanto ko manga pipiya a kantir iran,
ka maito siran bo a kelamba.”
13 “Na pamakinega niyo ai na go niyo pakalangkapa ko langon a taw sa Israil,” a tig o

Kadnan a so Allah a Lebi a Mamaapaar.
14 “Sii ko gawii a ndanegen aken so manga Israil

sabap ko manga dosa iran
na mbinasaan ko so manga aparan sa Bitil.
Kepotol on so manga pangapanga iran a penga oolog ko lopa.
15 Nggebaan ko so manga pipiya a walay o manga kawasa
a pembalingan iran ko kapepanenggaw
ago so pembalingan iran ko pangolaon.
Kebinasa so manga walay iran a piyagartaan sa marpil,
na inggobar so manga torogan iran,” a tig o Allah.
AMOS 4
Pamakinega niyo ai, sekano a manga babay sa Samariya
a pepanga oolitan a lagid o manga sapi sa Basan,
a sekano a pepemeges ko manga lolobay
ago pepanalimbot ko manga miskin
a lalayon iyo dii teroon ko manga karoma niyo a
“Kowa ka sa arak ka maginom ta!”
2 So Allah a Lebi a Mamaapaar na misepa ko kasosoti niyan
a tig iyan a
“Matamataan a pekatalingoma rekano so manga gawii
a kebanowitan kano a lagid o manga seda,
na palaya kano den petondatondaan sa mawatan.
3 Pagowiten so oman i isa rekano
ko lebi a marani a kagigintaangan ko pangeleban o siti
a ipelebad sa liyo ka iteog sa Harmon.”
Da Kasoy so manga Israil ko Allah
4 Pitero o Allah a Lebi a Mamaapaar a

“Hey manga taw sa Israil, o kabaya iyo na song kano sa Bitil
na ndosa kano ko kasimbaa niyo ko manga barahala on!
Song kano sa Gilgal na ndosa kano ron sebenar!
Tarosen iyo so di niyo dii kakorban oman mapita
ago so kipembegan iyo ko diyakat oman telo gawii!
5 Tarosen iyo so kapesepaati raken sa paan a ipepanalamat a aden a tapay ron,
na tekaboren iyo so manga ped a di niyo dii isoasoat a terang sa poso iyo,
ka giyai so baya a ginawa niyo!
6 “Saken i miyowit sa taon ko oman i siti niyo

kaan da a kekan iyo,
ogaid na da kano raken kasoy,” a tig o Allah.
7 “Da aken sekano pakiorani isako telo pen olan a da kaoma o kaperaragon.
Migay ako sa oran ko isa a inged
na da ako ron begay ko ped.
So isa a kalopaan na kiyaoranan,
na da kaorani so ped, na miyagango.
8 Miyagenebeneb so manga taw a ipepanagad iran so manga inged
a pepangiloba sa ig a keinom iran
ogaid na da den kabolongi so kawaw iran.
Apiya pen oto na da kano raken kasoy,” a tig o Allah.
9 “Siniksa aken sekano a mayaw a ndo

a miyalanes iyan so pereperan iyo.
Liyaslas aken so madakel a sapadan iyo ago manga asinda a obas,
na kiyan o manga tarapan so langon a onga o manga kayo niyo a olibi ago higos.
10 “Inowitan ko sekano sa paniyakit a datar o inikidia ko sa Misir.

Piyamono aken so manga kangodaan rekano ko kapetidawa
ago so manga koda a miyaagaw niyo.
Piyakiilek aken rekano so kado o manga bangkay
sii ko manga kampo niyo,
na apiya pen oto na da kano raken kasoy,”
a tig o Allah.
11 “Bininasa ko so ped ko manga siti niyo

a datar o kiyabinasaa ko sa Sodom ago giya Gomorah.
Siran oto a miyakapagoyag sii rekano na lagid o pos a miyaagaw ko apoy.
12 “Kagiya ka maoto, manga taw sa Israil,

na iteros aken den angkai a ipekidia ko rekano,
na sabap sa penggolaolaan ko ai rekano
na tiyagar kano sa kipetoonaan iyo ko Tohan iyo!”
13 Ka so Allah i miteong ko manga palaw

ago so miyaden ko ndo;
pepayagen iyan ko manosiya so manga lalag iyan;
Pesembian iyan so kadaondaw sa kagagawii.
na pelalakaw sekaniyan ko manga poporo a darpa ko doniya.
So Allah a Lebi a Mamaapaar a Tohan i ngaran iyan!
AMOS 5
So Pangni sa Kateobat
Pamakinega niyo, manga taw sa Israil, angkai a idaida a kapelendag a ipendikir aken
makapantag rekano:
2 “Miyaoteng so raga, a giya Israil,

a di den makapembowat peroman!
Mabebeter sekaniyan a kiyaawaan den sii ko lopa
a da den a ba on pekatabang tomindeg.”
3 Giyai i kabasa o Allah a Lebi a Mamaapaar:
“So siti sa Israil a meliyo ron so sanggibo a manga sondaro a makipetidawa
na magatos bo a kelamba a pekakasoy ron;
na so siti a meliyo ron so magatos a sondaro
na sapolo bo a kelamba a pekakasoy ron.”
4 Ka pitero o Allah ko manga Israil a

“Pananangoran kano raken ka keoyag kano!
5 Di kano song sa Bitil, sa Gilgal o di na sa Birsiba
sa kasimbaa niyo ko manga barahala on,
ka matamataan a pemangitaog so manga taw sa Gilgal,
na penga iilang so manga taw sa Bitil.
6 Pananangoran kano ko Allah ka keoyag kano,
ka o di niyo ai nggolaolaa na pemborngat so gani niyan sii rekano a manga Israil
a lagid o apoy a pekalengan rekano,
na da den a katohanan iyo sa Bitil a ba pekapareng ko manga kadeg.
7 Ka pembibiden iyo so kokoman a pembalowin iyo a masakit a paninta,
na ipelebad iyo so kaontol ko lopa.
8 Pananangoran kano ko Allah a aya mimbaal ko manga pamimitoonen

a bebetowan sa Pliyadis ago Oriyon.
Pembalowin iyan so kadedelem a kaliwanag,
na pepakalibotengan iyan so kadadaondaw
a pembalowin iyan a kagagawii.
Petewagen iyan so manga ig a sisii ko kalodan
na pegododen iyan ko liyawaw o lopa;
So Allah i Ingaran iyan.
9 Pepakatanaan iyan sa kabinasaan so manga babager
a aya ipenggeba ko manga kota iran.
10 Ipekegowad iyo so maontol a pangongokom,
na di niyo dii sodiin so dii tero sa benar.
11 Pendaodoagen iyo so manga miskin
na pepanekewan iyo siran ko kapembowisi niyo kiran sa pereperan.
Kagiya ka maoto na di kano pekabaling
ko manga pipiya a walay a ator a pimbabalay niyo,
na di kano pekainom sa arak a kekowa niyo
ko dii kerik a manga obas a piyamola niyo.
12 Ka katawan aken so manga rarata a kasalaan iyo
ago so madakel a manga dosa niyo.
Pesetroon iyo so manga oontol, na pepakitendan kano
na ipesepar iyo so kapakabenara ko manga miskin
sii ko pepangokoman.
13 Kagiya ka maoto na aya patot ko maongangen a taw
na baden rerenek sangkoto a masa,
ka masa anan a kamarataan.
14 Panagontamani niyo so mapiya a kena a ba so marata

kaan kano maoyag.
Amay ka magiyoto na so Allah a Lebi a Mamaapaar a Tohan
na makipagepeda rekano
a so den so miyatero iyo makapantag rekaniyan.
15 Kagowaden iyo so marata na kababayai niyo so mapiya,
na pakaletawa niyo so kaontol ko dii kokoman.
Ka o ba baden kapediin o Allah so kelamba a manga pagtaw niyan sangkai a nasiyon.
16 Giyai i kabasa o Allah a so Tohan a Lebi a Mamaapaar:

“Keaden a dii kandidiyagaw ko langon a lalan ko siti,
ago so kipepelalalisen o manga taw sa ‘Aidaw! Aidaw!
sii ko oman i pekelimodan kiran.
Tewagen iran so manga taribasok sa kapemboko iran
a ped on so siran oto a matao lomendag sa kapendidiyagaw iran.
17 Keaden pen a dii kandidiyagaw sii ko langon a asinda a obas,
ka magokit ako ko look iyo a pendadaneg rekano,”
a tig o Allah.
So Gawii o Allah
18 Ndowandowaan kano a masisingayo iyo so gawii o Allah!

Antonaa i kamapiyaan iyo ron?
Ka so gawii o Allah na maliboteng a kena a ba maliwanag.
19 Sa gawii oto na kedatar kano o mama a pepalagoyan iyan so arimaw
na baden miyakabalak sa mawaraw a maila a aso,
o di na lagid o mama a somiyoled ko walay niyan
na inisolay niyan a lima niyan ko keleb
na baden tiyoka a nipay.
20 Ba di maliboteng so gawii o Allah a kena a ba maliwanag,
a tanto a maliboteng a da den a ba on sindaw?
21 Pitero o Allah a “Ipekegowad aken ago dii sodiin so manga pista niyo;
di aken den ikesoat so manga kalilimod iyo a agama.
22 Apiya pen o isepaat iyo raken so manga korban a petotongen ago manga sapaat a
pereperan
na di aken terimaan.
So pen so manga piyakaolitan a ayam a pekorbanen iyo pantag bo ko kanggiginawai
na di aken tegoon sa ginawa.
23 Geneki niyo so pakabowing a kapepagidaida iyo!
Di aken pemakinegen so kamboboniboniyan o kapepangotiyapi iyo.
24 Ka pakatogaa niyo baden so kapakatitito a lagid o ig,
ago so kapagiinontolan a lagid o lawasaig
a di den ketiyan.
25 “Hey manga taw sa Israil,

ba saken i pepanompangan iyo sa manga soasoat ago manga ayam
a di niyo dii korbanen sii ko miyakapat polo ragon a katatago iyo ko disirto?
26 Kena, ka ba niyo roo baden pepegawidi
so pesimbaan ko Sakot a so katohanan iyo a dato,
ago so Kaiwan a so katohanan iyo a bitoon,
a so manga barahala a pimbaalan iyo.
27 Kagiya ka maoto na iteog aken sekano ko inged sa onaan a Damasko,”
a tig o Tohan a aya Ingaran iyan na so Allah a Lebi a Mamaapaar.
AMOS 6
So Kambinasaa sa Israil
Kemorkaan kano a makadadaya roo sa Siyon

a mapipikir iyo a malilinding kano roo sa Samariya,
a sekano a kababantogan a manga taw ko aya bo tindos a nasiyon,
a sekano a pekeampitan o manga taw sa Israil!
2 Songowi niyo so siti a Kalni na ilaya niyo o antonaa i miyanggolaola niyan;
ipoon roo na song kano sa mala a siti a Hamat,
na taros kano sa Gat a siti o manga Pilistiyo.
Ba lebi kano a mapiya a di giyangkoto a manga ndatoan?
Ba lebi a maolad so pagiingedan iran a di so rek iyo?
3 Di niyo mapipikir o ba pekatalingoma so gawii a kamoralaan,
ogaid na nggolalan ko manga sowasoai niyo
na mapepakarani niyo baden angkoto a gawii.
4 Sesandasandang kano ko manga pipiya a kantir iyo a tatataan sa marpil
a pekan kano sa piyagaraw a sapo a bilibili
ago piyakaolitan a nati a sapi.
5 Di kano dii magidaida sa manga bayok
a baden piyangantang a kamberak a sasartaan o kapepangotiyapi,
a pipikiren iyo a mapasang kano i kamboboniboniyan a datar o Daod.
6 Aya niyo peginoman sa arak na manga ala a ladiya,
na ipetetanosan iyo so lebi a manga pipiya a ikekamotan.
Ogaid na kena a ba niyo tatagoa sa ginawa
so kapekebinasa o bangsa niyo a Israil.
7 Kagiya ka maoto na sekano i keona mabiyag ago pemangitaog,
na kitapelek so di niyo dii kakeriyala ago kapelamilami.
Ipekegowad o Allah so dii Kambentogan o manga Israil
8 Misepa so Allah a so Tohan a Lebi a Mamaapaar a tig iyan a
“Ipekesisingay aken so dii kambentogan o manga taw sa Israil

na ipekegowad aken so manga torogan iran.
Na peladen aken ko ridoay so siti a Samariya
a rakes o langon a matatago on.”
9 Amay ka magiyoto na o aden a sapolo kataw a mitelimbagak ko isa a walay na pematay

siran langon.
10 Na amay ka makaoma so tonganay o isa kiran a magawid ko badan o miyatay sa liyo
kaan matotong na ipagise iyan ko apiya antawaa a malalamba ko soled o walay a “Ba
aden a ped ka san?”
Na isembag iyan a “Da.”
Na peteroon o tonganay a “Di ka petero! Di ta den pegalowin so Ingaran o Allah!
Baanda ta niyan maneg.”
11 Amay ka somogo so Allah na penga gegeba ago penga roropet

so manga walay a mala ago maito.
12 Ba makapelompat so manga koda ko aatoren a darpa?

Ba ini kedado o manga sapi? Kena!
Ogaid na biyaloy niyo a towa so kokoman,
na biyaloy niyo a paninta so onga o kaontol.
13 Ipegambog iyo so kiyatabana niyo ko inged a Lo Dibar,
na di niyo dii teroon a “Ba tano da maagaw a Kornaim a nggolalan ko bager tano?”
14 “Hey manga taw sa Israil,” a tig o Allah a so Tohan a Lebi a Mamaapaar,

“Pekirido aken sekano ko nasiyon
a pemeges rekano ko dalem a inged iyo
ipoon sa Libo Hamat sa pagotaraan
na taman ko Balintad a Arabah sa pagabagatan."
AMOS 7
Pangingilain a manga Tarapan
Giyai i pangingilain a piyakiilay raken o Allah a Lebi a Mamaapaar: Miyailay aken a

tominibaba so Allah sa makapal a manga tarapan ko kiyaipos o kiyaragona ko bagian o
dato ago sii ko kapemangeto o miyakatalondog on a pereperan.
2 Sii ko pangingilain na miyailay aken a miyalengan koman o manga tarapan so oman i
isa a gadong a pepamangeto ko kalopaan, na giyoto a pitero aken a “Ya Allah a Lebi a
Mamaapaar a Tohan, kapedipedi ka bo na rilai ngka so manga pagtaw ngka!
Andamanaya i kapakapegoyag iran? Tanto siran a maito a bangsa!”
3 Na inalin o Allah so pamikiran iyan a tig iyan a “Di mapenggolaola so miyailay ngka.”
Pangingilain a Apoy
4 Aden pen a piyakiilay raken o Allah a Lebi a Mamaapaar a giyai: Miyailay aken a
pitiyagar o Allah so mala a apoy a indaneg ko manga pagtaw niyan. Na liyamed o apoy
so mala a ragat sii ko didalem o lopa, na mipoon den matotong ko kalopaan.
5 Na giyoto a pitero aken a “Ya Allah a Lebi a Mamaapaar, pengangampedian ako reka,
genek ka! Andamanaya i kapakapegoyag o manga pagtaw ngka? Tanto siran a maito a
bangsa!”
6 Na inalin o Allah so pamikiran iyan. “Di ini mambo mapenggolaola,” a tig iyan.
Pangingilain a Panadeng
7 Na aden pen a ped a piyakiilay raken o Allah a giyai: Miyailay aken so Kadnan a
tomitindeg ko kilid o keleb a inembaalan a inisoson ko panadeng, na komakapet
sekaniyan sa panadeng.
8 Na iniise raken o Allah a “Amos, antonaa i pekeilay ngka?”
“Panadeng,” a inisembag aken.
Na pitero o Kadnan a “Ilaya ngka, ka pagosaren aken ai sa kapekiilain ko sa tanto a
miyaribat so manga pagtaw aken a manga Israil a lagid o keleb a da misoson ko
panadeng, na di aken siran den peman pelepasen ko kandanega ko kiran.
9 “Kebinasa so manga aparan ko a ron pepamanimba so manga mbawataan o Iskak sa

manga barahala,
na kelaslas so manga soti a darpa sa Israil.
Pageposen aken nggagaan so dii kandato o mbawataan o Yarobowam.”
Si Amos ago si Amasiyas
10 Samaoto na si Amasiyas a aya imam sa Bitil na initoma niyan si Yarobowam a dato sa

Israil a tig iyan a “Kekadiyat si Amos sa iperido reka, na pepakalangkapen iyan ai sii ko
manga taw sa Israil. Di kebaog o inged tano so manga katero iyan ka pekabinasa oto!
11 Di niyan dii teroon a
‘Kebono si Yarobowam ko kapetidawa

na kebiyag so manga taw sa Israil
a pemangitaog sa mawatan.’ ”
12 Na pitero i Amasiyas ki Amos a “Awa ka sii, seka a pepekailay sa pangingilain!

Palagoy ka komasoy sa Yodah a inged ka na roo ka pangalamat! Roo ka pamantiyari ko
kaoyagan ka!
13 Di ka den pengalamat sii sa Bitil ka giyai i soti a darpa a pesimbaan o dato.”
14 Simbag i Amos si Amasiyas a tig iyan a “Gowani na kena a ba ako nabi aya pen o ba
wata o nabi, ka matag ako pananagikor sa manga bilibili ago komikibir ko manga kayo a
higos.
15 Ogaid na kinowa ako o Allah ko galebek aken a kapanagikor na pitero iyan raken a
‘Ika roo na pangalamat ka ko manga pagtaw aken sa Israil.’
16 Na pamakinega ngka imanto so katero o Allah. Pitero o ka raken a
‘Di ka pengalamat sa marata makapantag sa Israil!

Genek ka mangosiyat sa makasosopak ko manga mbawataan i Iskak!’
17 “Kagiya ka maoto, Amasiyas, na giyai i pitero reka o Allah:
‘So karoma ngka na kebaloy a sondal sii ko siti

na pemonoon so manga wata a ka a manga mama
ago manga babay ko kapetidawa.
Pembagibagiin so lopa a ka na imbegay ko ped a manga taw,
na seka den na petay ka sii ko kakakaraman a inged.
Na mataan den a kebiyag so manga taw sa Israil
a pemangitaog sa mawatan a inged.’ ”
AMOS 8
So Pangingilain a Kiyalotoan a Onga
Na isa pen a piyakiilay raken o Allah a Lebi a Mamaapaar a giyai: Miyailay aken so isa a
reban a mapepeno a kiyalotoan a manga onga.
2 Na iniise o Allah a “Antonaa i pekeilay ngka, Amos?”
“Isa ka reban a mapepeno a kiyalotoan a onga,” a inisembag aken.
Na pitero raken o Allah a “Kiyalotoan den so manga pagtaw aken sa Israil sa
kandanega ko kiran, na di aken siran on peman pelepasen.
3 Sii sangkoto a gawii na so dii kapagidaida ko Timplo na kesambian sa kagoraok a
kamboko. Madakel a lawas a miyamatay a pemangibaraser ko mbalabala, na ipelebad
siran ko liyo o siti ko karerenek.” Mitero so Allah a Lebi a Mamaapaar!
4 Pamakinega niyo ai, sekano a pepelolomeg ko kikadodowaanan

a pananamaran iyo minasa so manga miskin!
5 Di niyo dii teroon ko ginawa niyo a
“O ba bo magaan den mapopos so dii kapista sa saribolan
kaan kami makandagang sa margas!”
o di na
“Kabaya ami a miyaipos den so Gawii a Idedeke
kaan kami dii makapepasa sa kamais!”
Samaoto na pelalimen iyo so manga taw,
ka lelebatan iyo so asada
ago pegosaren iyo so di ontol a timbangan
ago pepakalaan iyo so arga.
6 Apiya so okap a pepayopasen iyo ko salasa
na ipeseog iyo ko per a pepasaan iyo.
Na pepangongoripenen iyo so manga miskin
igira a aden a otang iran rekano a isa bo a pelata a pirak
o di na arga bo o isa ka paris a tinilas.
7 Misepa so Allah sii ko Ingaran iyan a ‘Ipepangandag o Israil’ a tig iyan a “Di aken den
pekalipatan so apiya anda ko manga rarata a pinggolaola niyo.
8 Tebekeren so inged iyo sabap ko manga galebek iyo,

na pemboko so oman i mababaling on.
Magorog so lopa a lagid o kapegorog o lawasaig a Nail igira a mimbagiyaw;
kekokog den na magirat peman ko asal iyan
a lagid o kapegirat o lawasaig sa Misir.
9 Sangkoto a gawii,” a tig o Allah a Lebi a Mamaapaar,

“na pekasedepen aken so alongan sii ko kaooto a alongan,
na pekalibotengen aken so doniya sii ko kaliliwanag o kadadaondaw.
10 Mbalowin ko a kamboboko so di niyo dii kapista,
na sembian aken so di niyo dii kapagidaida sa kandidiyagaw.
Pegopaw kano langon ago penditar sa sako,
na mbalowin aken angkoto a masa
a datar o kimbobokoon iyo ko botong a wata iyo a miyatay.
Na tanto a mapait angkoto a gawii taman ko kaposan iyan.
11 “Pekatalingoma so manga gawii,”

a tig o Allah a Lebi a Mamaapaar,
“a tenaan ko sa taon so dalem a inged
a kena a ba taon a korang on so paan ago ig,
ka taon a da on so kapekenega o manga taw ko manga katero o Allah.
12 Na pegenebeneb siran ipoon ko isa a ragat na taman ko isa pen a ragat,
na ipoon sa pagotaraan na taman sa sebangan,
ka pelayalayag siran sa apiya anda ko mbalabala
a pepangiloba ko katero o Allah,
ogaid na di iran ketoon.
13 “Sa gawii oto

na so manga tataid a bago a taw ago so manga babager a mangoda
na pemangikopay ko kaawaw.
14 Siran oto a dii sepa sii ko ingaran o manga barahala sa Samariya a tig iran a
‘Mataan ko kaooyagoyag o katohanan sa Dan,’
o di na ‘Mataan ko kaooyagoyag o katohanan sa Birsiba,’
na keoteng siran a di den makapembowat.”
AMOS 9
So Kabinasaa sa Israil
Miyailay aken so Kadnan a tomitindeg ko kilid o aparan. Na pitero iyan a

“Bentola ngka so poro o manga polaos
taman sa makokog so kaoonayan ko walay!
Pamotola ngka so manga polaos
kaan manga ooteng ko olo o langon o manga taw,
na siran oto a kelamba na mbonoon aken ko kapetidawa.
Da den a ba kiran pekalidas; da a ba pekapalagoy.
2 Apiya pen komalot siran taman ko darpa o miyamatay
na ron siran kowaa o lima ko.
Apiya pen mamanik siran taman ko langit
na ipenog aken siran a poon roo.
3 Apiya pen itapok iran a ginawa iran ko poro o palaw a Karmil
na pengilobaan aken siran roo ago pendadakepen.
Apiya pen tepokan ako iran sii ko didalem o kalodan
na sogoon aken so nipay sa ragat sa katokaa niyan kiran roo.
4 Na apiya pen kitaog siran o manga ridoay iran ko ped a inged
na pekibono aken siran roo ko pedang.
Piyasad aken sa ginawa ko a pemoralaan ko siran
a di aken den pepiyapiyaan.”
5 So Kadnan a so Allah a Lebi a Mamaapaar i peseko ko doniya,

na peketonag ai,
na dii mboboko so langon a kibabaling on.
Pegorog so lopa a lagid o Lawasaig a Nail igira a dii mbagiyaw
na pegirat peman.
6 Biyangon o Allah so kaporoan ko kakadenan iyan sii ko manga langit
na inonay niyan sii ko doniya.
Petelowan iyan so manga ig ko kalodan
na pegododen iyan sii ko liyawaw o lopa.
So Allah i Ingaran iyan!
7 Pitero o Allah a “Ba niyo mapipikir, manga taw sa Israil,

a lebi kano a mala i kipantag raken a di so manga taw sa Itiyopiya?
Benar a piyakaliyo aken sekano sa Misir,
ogaid na ba aken mambo da pakaliyowa so manga Pilistiyo sa Kaptor
ago so manga Aramiyo a poon sa Kir?
8 “Saken, a so Allah a Lebi a Mamaapaar,

na pegilain ko angkai a madodosa a ndatoan a Israil
na penasen aken ko liyawaw o lopa.
Ogaid na kena a ba ketarotop a kambinasaa ko
ko langon a manga mbawataan o Yakob,”
a tig o Allah.
9 “Ka mbegay ako sa sogoan
na iperak aken so manga Israil sii ko manga nasiyon
a lagid o kapegayaka ko margas kaan on mada so da a bali niyan
a da den a satiman bo a malimegas a ba on keolog ko lopa.
10 Ogaid na so langon o manga baradosa ko manga
pagtaw aken na pematay a pedang,
a so langon a dii tero sa
‘Di tano den peraoten aya pen o ba katanaan a morala.’
So Kapekaasala sa Israil
11 “Sii sangkoto a gawii na pekaasalen aken so ndatoan o Daod a miyaoteng.

Lagid oto o miyabinasa a walay,
ogaid na pagompiyaan aken so miyanga roropet on na pekatindegen aken,
ka mbangonen aken peroman
a datar o asal iyan gowani ko miyanga iipos a gawii.
12 Na ketangan o manga Israil so kelamba ko inged a Idomiya
ago so langon a nasiyon a piyamili aken a rek aken,”
a tig o Allah a aya sii penggolaola.
13 “Pekatalingoma so manga gawii,” a tig o Allah,

a so kapegto o pereperan na magaan a di so kapekeragona on,
na so kapegto o manga obas na magaan a di so kapegembaali ron a arak.
Pemangetek so bago a arak a poon ko manga palaw,
na magondas ai sii ko langon o manga bobongan.
14 Pekakasowin aken so miyamangitaog a manga pagtaw aken a Israil roo ko lopa iran,
na mbangonen iran peroman so miyanga bibinasa a manga siti iran na mbalingan iran.
Pemamola siran sa manga asinda a obas
na maginom siran ko arak a kekowa on;
magembaal siran sa manga sapadan
na ken iran so ipagonga ini.
15 Pemolaan ko so manga taw aken ko rek iran a lopa,
na di siran den kebadot peroman sii ko lopa a inibegay aken kiran,”
a tig o Allah a Tohan iyo.
OBADIYAS
Giyai so pangingilain o Nabi Obadiyas a miyapayag on o Allah a Lebi a Mamaapaar
makapantag sa inged a Idom:
Siksaan o Allah a Idomiya
Piyakasong o Allah so sogo iyan roo ko manga nasiyon

na miyaneg tano so di niyan dii teroon a:
“Tiyagar tano! Somondol tano sa Idomiya ka makitidawa tano ron!”
2 Pitero o Allah a
“Ilaya ngka, Idomiya, ka mbalowin ko seka a mitatanan sii ko manga nasiyon;
pesodiin ka o kalangolangon.
3 So kipoporoon ka sa ginawa ngka i miyakadadag reka,
seka a mababaling ko manga liyang sii ko manga lakongan,
a so kakadenan ka na sii ko manga poporo a darpa;
seka a di ngka dii teroon sa ginawa ngka a
‘Antawaa i kibaba ako niyan ko lopa?’
4 Ogaid na apiya pen o pepeporo ka lomayog a lagid o garoda
ago peselag ka sii ko manga bitoon
na poon roo den na imbaba aken seka bo.
5 “Opama ka song reka so manga tekew ko kagagawii

na ba di aya iran bo penekewa na so kebabayaan iran?
O song reka so pererebas sa obas
na ba di aden a pelambaan iran?
Ogaid na tarotop a kapolanga reka o manga ridoay ngka!
6 “Tanto kano a petebanan, hey manga mbawataan o Isaw;

keagaw so igagadong iyo a tamok!
7 So langon a ampila iyo na mbogaon kano iran ko inged iyo;
so manga ginawai niyo na pagakalan ago ndaagen kano iran.
Siran oto a ipepagatoang iyo na teanan kano iran sa litag,
na di niyo ini keinengka.
8 “Sa gawii oto,” a tig o Allah,

“na mbinasaan ko so manga oongangen a mama sa Idomiya,
a so langon a somasabot sii ko manga palaw o Isaw.
9 Penga alek so manga babager a sondaro sa Timan,
na mbonoon so oman i isa kiran a sisii ko manga palaw o Isaw.”
Ino Siksaa a Idomiya
10 “Sabap ko kiyaaniyayaa ngka ko pagari ngka a so kiyababadan ko Yakob

na kepotos ka sa kayaan,
na kebinasa ka sa taman sa pakataman.
11 Ka sii ko gawii a somiyoled so manga rait ko manga gimowa iran
a miyaagaw o manga mananangga so tamok iran
ago piripa iran a Yarosalim
na tomitindeg ka baden a da ngka den tagoa sa ginawa
a lagid o ba ka isa ko ridoay iran.
12 “Di patot so kiyapagongatongata ngka ko pagari ngka sii ko gawii a kiyamoralai ron,
ago so kiyababaya a ka ko gawii a kiyabinasaa ko manga taw sa Yodah,
ago so kiyambentogan ka ko gawii a kareregeni kiran.
13 Di patot so kiyasoled ka ko siti o manga pagtaw aken
sii ko gawii a kasiksaa kiran
sa kapegagawa ngka ko manga tamok iran
a inikababaya a ka so kararasay iran.
14 Di patot so kiyapamagayan ka ko mbalakaan o manga lalan
sa kapemonoa ngka ko siran oto a pepamagoyag,
na di patot so kiyapalada ngka ko miyalamba kiran ko manga ridoay iran
ko gawii a kasasamok iran.
So Kakokoma ko manga Nasiyon
15 “Marani den so gawii a kokomen o Allah so langon a nasiyon.

So pinggolaola ngka, Idomiya, na mapenggolaola reka mambo;
so manga galebek ka na sii reka bo pepato.
16 Mininom so manga pagtaw aken ko mapait a tagayan a mapepeno a kasiksaan
roo ko soti a palaw aken,
ogaid na makalelebi so kapait o kasiksaan
a paginomen o langon a nasiyon ko mbalabala on.
Pagosipen iran ai minom
na kebaloy siran a lagid o ba da siran den maaden.
So Kapekadaag a Israil
17 “Ogaid na so Palaw a Siyon na kebaloy a pekeapasan o siran oto a pepekapalagoy,

na pembaloy ai a soti a darpa;
na ketangan o manga mbawataan o Yakob so lopa a aya iran kawali.
18 Sa masa oto na so mbawataan o Yakob ago so Yosop
na kebaloy a pekerab a apoy
a totongen ago pelameden iran so manga mbawataan o Isaw a lagid o gango a otan
na da den a ba pekapagoyag ko kiyababadan ko Isaw,” a pitero o Allah.
19 “So manga pagtaw aken sii sa pagabagatan a Yodah
na ketangan iran so manga palaw o Isaw,
na siran oto a ndodoo ko kapantaran ko kilid a ragat
na ketangan iran so lopa o manga Pilistiyo.
Kedenan iran so manga kalopaan a Ipraim ago giya Samariya,
na so manga taw sa Baniyamin na ketangan iran a Giliyad.
20 So miyamangitaog a manga Israil na kesoy sa inged a Kanaan
na ketangan iran a Ponisiya taman sa pagotaraan a siti a Saripat,
na so miyamangitaog a poon sa Yarosalim a sisii sa Siparad
na ketangan iran so manga siti sa pagotaraan a Yodah.
21 Na aden a manga pekasabet a tomekedeg ko Palaw a Siyon
a pendato siran ko manga palaw o Isaw.
Na so ndatoan na kerek o Allah!
YONAS
YONAS 1
Piyalagoyan i Yonas so Tohan
Minitoron ki Yonas a wata i Amitay so katero o Allah a tig iyan a

2 “Ganat ka den na go ka song ko mala a siti a Niniba. Pakalangkapa ngka roo so
kakesiksaa on, ka miyailay aken den so dii kambaradosa o manga taw ron.”
3 Ogaid na baden miyantap si Yonas sa inged a Ispaniya kaan iyan kapalagoyi so

kamamasai ron o Allah. Tomiyondagay sekaniyan sa Yopa a ron iyan miyatoon so kapal
a tolak den a song sa Ispaniya. Na somiyokay sekaniyan na miyageda on, ka song sa
Ispaniya kaan iyan kapalagoyi so Allah.
So Barabarat sii ko Ragat
4 Ogaid na piyakasamber o Allah so mabager a ndo sii sa ragat, a tanto a mala a barabarat
a ikebengkag o kapal.
5 Miyanga alek so manga gomagalebek ko kapal, na so oman i isa kiran na gomiyoraok sa
tabang ko tohan iyan. Na inipelelebad iran so manga roran sii ko ragat kaan kakepi so
kapal.
Si peman si Yonas na sisii ko kabebaan o kapal a roo miiga a pangengenepan a torog.
6 Somiyong on so kapitan na pitero iyan a “Ino ka baden pakatotorog? Mbowat ka na go
ka pamangni ko tohan ka! Baanda tano niyan tagoa sa ginawa kaan di tano pematay.”
7 Na mimbibitiyarai so manga gomagalebek a tig iran a “Ripaan tano o antawaa i

kiyasabapan sangkai a morala.” Na rominipa siran na aya miyaripa na si Yonas.
8 Kagiya ka maoto na pitero iran on a “Na, teroa ngka rekami o antonaa i pinggolaola
ngka a minimorala rektano? Antonaa i galebek ka? Anda ka miyakapoon? Anda i inged
ka? Antonaa i bangensa ngka?”
9 “Hibriyo ako,” a tig i Yonas, “na pesimba ako ko Allah a Tohan sa kasorgaan a aya
mimbaal ko ragat ago so lopa.”
10 Na piyakitokawan iyan kiran pen a pepalagoyan iyan so Allah.
Inilebad si Yonas ko Ragat
So kiyanega sii o manga gomagalebek na tanto siran a miyalek a tig iran a “Ino ngka nan
penggolaolaa?”
11 Na sabap sa pekelonsanan so dii kamberabarat o ragat ago so di niyan dii kambegel na
iniise iran on a “Antonaa i ikidia mi reka kaan makalengen so ragat?”
12 “Porota ko niyo na go ako niyo lebaden ko ragat,” a inisembag iyan, “na melengen
den. Ka katawan ko a saken i kiyasabapan ko kinitalingoma rekano angkai a
piyakalekelek a sobosobo.”
13 Na baden piyakateman on o manga mama so kapeporaa iran ko kapal kaan makakasoy
ko kalopaan. Ogaid na da iran magega ka baden pepekala a dii kambegel o ragat.
14 Mandiyadi na gomiyoraok siran ko Allah a tig iran a “Ya Allah, kapedipedi ka bo na
di ngka peperoa o ba kami mamatay sabap ko kambonoa mi sangkai a mama. Di ngka
rekami pakipengakowi so kapetay o da a sala iyan a mama, ka seka i kilalag, ya Allah,
sangkai a dii manggolaola a ikasosoat ka.”
15 Na giyoto a piyorot iran si Yonas na iniitog iran ko ragat, na sarta den a lomingen so di
niyan dii kamberabarat.
16 Sabap sii na tanto a inikalek o manga gomagalebek so Allah, na somiyapaat siran on
sa soasoat ago misemaya sa kapengongonotani ran on.
17 Na mitibaba so Allah sa mala a seda a makalamed ki Yonas, na sisii sekaniyan ko

tiyan o seda ko miyakatelo a kadadaondaw ago miyakatelo a kagagawii.
YONAS 2
So Pangangarapan i Yonas
Sii ko katatago i Yonas ko tiyan o mala a seda na miyangangarapan ko Allah a Tohan

iyan
2 A tig iyan a
“Sii ko kararasay aken na tiyalowan aken seka, ya Allah,

na inampon ako ngka.
Sii ko kadaleman ko darpa o miyamatay na miyangni ako sa tabang,
na piyakineg ka so kapenggoraok aken.
3 Inilebad ako ngka ko kalodan sii den ko posed a ragat;
kiyatengkopan ako o manga reges,
na minikolob raken so manga ala a begel ka.
4 Pitero aken a ‘Miyabelag ako den ko pangilailayan ka;
ogaid na kemasaan aken bo peroman so soti a Timplo ngka.'
5 Miyakatambon raken so manga ig a ipetay aken,
minisapeng raken so kalodan,
na minilibed ko olo aken so linamon.
6 Minigaled ako taman ko manga itado o manga palaw,
taman den ko darpa a katatanggalan so manga gimowa on sa taman sa pakataman.
Ogaid na inigakap ako ngka a oyagoyag a poon ko galebo,
ya Allah a Tohan ko.
7 Sii ko dii kaperempas o niyawa ko na kiyatademan aken seka, ya Allah,

na minisampay reka so pangangarapan aken
roo ko soti a Timplo ngka.
8 Siran oto a pepamanimba ko di benar a manga tohan

na petelikodan iran so limo o Allah.
9 Ogaid na sepaat ako reka sa manga soasoat
a rakes o manga idaida a ipepenalamat;
na tomanen aken so inisepa aken.
So kakesabet na poon ko Allah.”
10 Na siyogo o Allah so mala a seda, na inota iyan si Yonas ko kilid a ragat.
YONAS 3
Somiyong si Yonas sa Niniba
Oriyan iyan na minitoron peroman so katero o Allah ki Yonas a tig iyan a

2 “Ika roo den; song ka sangkoto a mala a siti a Niniba na pamakalangkapa ngka on so
katero a inibegay aken reka.”
3 Na tiyoman i Yonas so katero o Allah ka somiyong sa Niniba. Giya Niniba na tanto a

mala a siti a telo gawii a kakelibeta on.
4 Sii ko gawii a kiyapakasoled i Yonas ko siti sa kapegeneba niyan on na pepakalang-
kapen iyan a “Pat polo gawii ipoon imanto na kebinasa a Niniba!”
5 Na miyangingimbenar so manga taw sa Niniba ko katero o Tohan. Piyasad iran sa
ginawa a pepowasa siran a melagid so manga ala a taw ago so manga bebaba, na palaya
siran somiyolot sa sako a aya iran kapepekiilain ko di iran dii kateobat.
6 Kagiya misampay ko dato sa Niniba so katero a pepakalangkapen i Yonas na tomipad

poon ko korsi iyan na inendaan iyan so kimon iyan ka somiyolot sa sako, na miyontod ko
ombi.
7 Na migay so dato ago so manga sanasanaan iyan sa sogoan a pemakalangkapen sii sa
Niniba a aya oni niyan na:
“Da a sakataw bo o di na pangangayamen i ba makataam sa apiya antonaa; oman i isa na

di pekakan aya pen o ba pekainom.
8 Paliyogat ko oman i taw ago ayam a pekasoloten sa sako. So oman i isa na panamar
mamangni ko Tohan na geneki niyan so marata a sowasowai niyan ago so di niyan dii
kapanganiyaya.
9 Ka masiken a alinen o Tohan so pamikiran iyan ago pakalenggaon iyan so pesokeyaw a
rarangit iyan kaan tano niyan di mapemono.”
10 Na kagiya mailay o Tohan so pinggolaola iran ago so kiyatalikodi iran ko manga

rarata a sowasowai na inikalimo iyan siran, na da niyan nggolalanen so kasiksaa niyan
kiran a miyatero iyan den gowani.
YONAS 4
Kiyararangitan i Yonas so Limo o Tohan
Ogaid na tanto oto a da kasoaten i Yonas, na tanto sekaniyan a kiyararangitan.
2 Na miyangangarapan ko Allah a tig iyan a “Ya Allah, ba aken da matero isako sisii ako
pen sa inged aken a giyai i penggolaolaan ka? Giyanan i sabap a minggagaan ako
malagoy sa Ispaniya, ka katawan aken a makalimoon ago masalinggagaw ka a Tohan, a
kena a ba malebod kararangiti ago mala i kapedi, a lalayon ka den makatitiyagar malin ko
pamikiran ka sa kipetenaan ka ko morala.
3 Imanto den, ya Allah, na kowai ako ngka sa niyawa, ka tomoon ko a matay ako baden a
di sa ba ako pekeoyagoyag.”
4 Tig o Allah a “Ba aden a kabenar ka sa kapekerarangiti reka?”
5 Na lominiyo si Yonas ko siti sii ko darpa a masesebangan iyan na mimbaal roo sa

lawig, na miyontod ko kasisirongan on ka penayaw sa kapagilaya niyan o aden a
mapenggolaola ko siti.
6 Mandiyadi na tominibaba roo so Allah a Tohan sa pamomolan a piyakato iyan a
miyakasayap ko olo i Yonas kaan on mada so di on kadedayai. Na tanto a inikababaya i
Yonas so pamomolan.
7 Ogaid na tominibaba peman so Tohan sa oled, na sii ko kakepita iyan ko telondog a

gawii na pirereteb iyan so pamomolan a aya niyan inipatay ago inikalayon.
8 Na kagiya somebeng so alongan na piyakasamber o Tohan so mayaw a ndo a poon sa
sebangan. Riyantian o alongan so olo i Yonas taman sa kiyadaan sekaniyan sa bager, na
kabaya iyan den a matay. Tig iyan a “Tomo a ba ako baden matay a di sa ba ako pen
pekeoyagoyag.”
9 Na pitero o Tohan ki Yonas a “Ba aden a kabenar ka sa kapekerarangiti reka sabap ko

kiyapatay o pamomolan?”
“Oway,” a tig iyan, “patot so kararangit aken apiya pen taman sa ipetay aken.”
10 Na pitero o Allah a “Miyakato angkanan a pamomolan isako isa a kagagawii, na

miyatay ko tomiyalondog a kagagawii, na baden oto inikerata a ginawa ngka apiya pen o
da ngka alimai aya pen o ba ngka pakalaa.
11 Na ba di patot a ikelimo aken angkoto a mala a siti a Niniba a ron den so kalalawanan
so magatos ago dowa polo nggibo a manga taw a di iran pen ketendo so kawanan ago so
diwang, ago madakel mambo a manga pangangayamen on?”
MIKAS
MIKAS 1
Giyangkai a manga katero na makapantag ko manga siti a Samariya ago Yarosalim.
Initoron ai o Allah a nggolalan ko pangingilain sii ko nabi Mikas a taga Morisit sii ko
kiyapakandadato i Yotam, Ahas ago si Hisikiyas a miyanga dadato sa inged a Yodah.
Kapakamboboko mipantag sa Samariya ago Yarosalim
2 Pamakinega niyo ai, hey manga nasiyon!

Tagoa niyo sa ginawa, hey langon iyo a kibabaling ko doniya!
Peseksi so Allah a Lebi a Mamaapaar ko kamarataan iyo;
petero so Kadnan a ndodoo ko Timplo niyan sa kasorgaan.
3 Ilaya niyo! Dii meliyoliyo so Allah ko kakadenan iyan,
na penog sekaniyan a melalakaw ko manga poporo a darpa sa doniya.
4 Penga totonag so manga palaw ko didalem o manga ai niyan
a lagid o taro ko obay o apoy,
na toga ini ko manga balintad a lagid o ig
a pegondas sa kababaan ko mapideg a darpa.
5 Langon ai mapenggolaola sabap ko kasosopak

ago so dii kandosa o manga taw sa Israil.
Antonaa i kiyasabapan ko kasosopak o manga Israil?
Ba di so kapepanakoto o siti a Samariya?
Na anda matatago so manga darpa a pesimbaan ko manga barahala sii sa Yodah?
Ba di sii sa Yarosalim?
6 “Kagiya ka maoto,” a tig o Allah, “na mbalowin ko a manga tabotod a ator a Samariya,
a so darpa a pemolaan sa manga waged a obas.
Pagododen aken so manga ator on sii ko balintad,
na sewaan aken so manga onayan iyan.
7 Penga roropet so langon a manga barahala niyan,
na penga tototong ko apoy so langon a miyapantiyari niyan ko kapepanakoto,
na mbinasaan aken so langon a katohanan iyan.
Ka miyakowa niyan so kakawasaan iyan a minitendan ko kasosondal iyan,
na keosar ai peman a kitendan ko manga sondal.”
8 “Sabap sii,” a tig o nabi Mikas, “na pemboko ako ago pendidiyagaw.
Melalakaw ako a talandiyang ago titiniil
sa kapekiilain aken ko kararata a ginawa ko.
Magotantang ako a lagid o aso,
na melendag ako a lagid sa kapegoni o bengit.
9 Ka so pali o siti a Samariya na di kepiya,
na minirampat sii a Yodah,
ka minisampay den ko pintoan a Yarosalim
a ron mababaling so manga pagtaw aken.
Pepekaoma so Ridoay sa Yarosalim
10 Di niyo pekalangkapa so kasiksaa rektano ko manga ridoay tano sa siti a Gat;

di kano kiran pekiilay a penggoraok!
Sekano a manga taw sa Bit Oprah
na tambalilid kano ko bayanek ko kaada a arap iyo!
11 Sekano a kibabaling sa Sapir,
na lalakaw kano a talandiyang ago kaaayaan ko kitataogen rekano.
So siran oto a kibabaling sa Saanan
na di pekaraw lomiyo ko siti iran.
Amay ka maneg iyo so dii kamboko o manga taw sa Bit Isil
na ketokawan iyo ron a da a ba roo keapasan.
12 So manga kibabaling sa Marot
na makandadamar a akal iran
ko kapenawaya iran ko kakepinda o kapekerasay iran,
ka initana o Allah so kasiksaan
a minisampay den ko pintoan a Yarosalim.
13 Sekano a kibabaling sa Lakis
na sangani niyo so madilapet a manga koda ko manga karo niyo!
Seka i miyaona a siti sa Yodah a miyakasayan ko dii kandosa o Israil,
na miyaagak ka a Yarosalim sa kapakandosa niyan.
14 Kagiya ka maoto, manga taw sa Yodah,
na begi niyo so siti a Morisit Gat sa manga pamemegayan
a aya niyo ron kapagodas.
So inged a Aksib na pengakal ko manga dato sa Israil.
15 Sekano a kibabaling sa Marisah,
na pagowitan kano o Allah sa pepekadaag
a pagagaon iyan so inged iyo.
So manga olowan sa Israil na song ko gireb sa Adolam ka petepok siran on.
16 Hey manga taw sa Yodah, na pamagopaw kano
ko kimbobokoon iyo ko manga wata a pekebabayaan iyo.
Baloya niyo a ginawa niyo a oopawan a lagid o garoda,
ka pemangitaog so manga wata iyo a kebelag rekano.”
MIKAS 2
So Kandanega ko Pepanalimbot ko manga Miskin
Kemorkaan so siran oto a miiga a meenaw sii ko kagagawii

a kekadiyat sa kamarataan!
Sii ko kakepita iyan sa anda den i kapekaparo iran
na ipenggolalan iran so antangan iran.
2 Igira aden a manga lopa a kebayaan iran
na pegagaon iran a lagid mambo o manga walay.
Penggasaben iran so apiya antawaa taw
kaan iran makowa so walay niyan o di na posaka.
3 Kagiya ka maoto na pitero o Allah a “Kekadiyat ako sa morala

a itena aken sangkai a manga taw a di niyo kepalagoyan!
Di kano den pekalalakaw a ipoporo iyo a ginawa niyo sa masa oto,
ka masa a kasiksaan.
4 Sii sangkoto a gawii na kowaan kano a diyaman o manga taw,
na ipegongatongat iran rekano angkai a idaida a kamboko makapantag ko kiyaokitan iyo:
‘Miyatarotop a kiyabinasa tano!
Inimbargo o Allah so kawali tano.
Kinowa niyan rektano so manga lopa tano
na pimbagibagi iyan ko siran oto a miyamiyag rektano.’ ”
5 Kagiya ka maoto na sangkoto a masa

a kekowa o ped a manga taw so manga lopa iyo
na da den a isa rekano bo a manga pagtaw o Allah
a ba on makapembagian.
So di Benar a manga Nabi
6“
Di ngka nan peteroa!” a aya di raken dii teroon o manga taw.
Di ngka pengalamata so datar oto a kesowasowa.
Di kami den pakapekeyaan o Tohan!”
7N
a sekano a manga taw sa Israil, ba patot a di niyo sii dii kateroa?
Ba di pekerarangiten o Allah so di niyo dii kanggolaolaa sa datar oto?
Pitero o Allah a “Ba di pepekapiya so manga katero aken

ko taw a matito i olaola?
8 Ogaid na apiya taman den imanto
na perawaten o manga pagtaw aken so olaola o manga ridoay.
Penggansingen iyo so manga pipiya a gerab
o siran oto a pepamanagad a mamakasasarig
a datar o manga mama a pekesoy a poon ko katidawa.
9 So manga babay ko manga pagtaw aken
na pembogaon iyo ko manga pipiya a walay iran.
Perampasan iyo so manga wata iran
ko manga rakmat aken sa taman sa pakataman.
10 Na, ganat kano! Awai niyo angkanan a inged iyo
ka kagiya kena den a ba aya niyo pendekean,
ka kiyaresikan o manga dosa niyo a inikabinasa niyan sa tarotop.
11 “O aden a pekaoma rekano a tagakal ago pepamokeg a tig iyan a
‘Pengalamaten aken rekano a pendakel rekano so arak ago mabisa a panginginomen,’
na sekaniyan den i nabi a kebayaan iyo!
Pekaasalen a Israil
12 “Matamataan a timoon aken sekano

a so langon a kelamba a manga Israil.
Pelimoden aken sekano a lagid o manga bilibili sii ko tangkal iran.
Na lagid o pananateba a mapepeno a manga bilibili
a kepeno mambo so inged iyo a maririyaog a bariboribo a manga taw!”
13 So Dato iyo a so den so Allah i pengonaan rekano
a pegolowanan kano niyan a poon ko kitataogen rekano.
Pekaliyon kano niyan ko manga siti a kiyawitan rekano a miyanga bibiyag,
na pekakasoy kano ko rek iyo a inged.”
MIKAS 3
Pimbongetan i Mikas so manga Olowan sa Israil
Pamakineg kano, hey manga olowan sa Israil!

Ba di patot a katawi niyo ko mbidaan o maontol ago so mariribat?
2 Ogaid na ba niyo den pekegowaden so mapiya
ago pekebabayaan iyo so marata.
Pepangopisan iyo sa kobal so manga pagtaw aken
na pelonitan iyo sa sapo so manga tolan iran.
3 Peken iyo so sapo iran; pelodasen iyo so kobal iran
na pepamekangen iyo so manga tolan iran
a peteteden iyo a datar o sapo a itinda.
4 Pekatalingoma so masa a nggoraok kano ko Allah
ogaid na di kano niyan pagamponen.
Sa masa oto na pegenaan iyan rekano so paras iyan
sabap ko manga rarata a miyanggolaola niyo.
5 Giyai i kabasa rekano o Allah, a so di benar a manga nabi:

Pendadagen iyo so manga pagtaw aken.
Ipetopa niyo so kapekapiya o apiya antawaa
a pembegay rekano sa pangenengken,
ogaid na petiyagar kano makitidawa ko taw a di rekano pembayad.
6 Sabap roo na pesedep rekano so alongan, hey manga nabi,
na kepos so kadadaondaw niyo.
Pekatalingoma rekano so kagagawii
a da den a ba niyo ron pangingilain,
na kelibotengan kano a di den pekaalamat.
7 Samaoto na keyaan so manga pepekailay sa pangingilain,
na kediyamanan so manga pepekaalamat.
Kemeden iran so manga ngari iran
ka kagiya da den a ba kiran peyagen o Tohan.
8 Ogaid na so saken on peman, a si Mikas,

na mapepeno ako a kapaar ago so Roh o Allah
a sasartaan o kaontol ago kawaraw
sa kapeyaga ko ko manga taw sa Israil
ko kasosopak iran ago dii kandosa.
9 Pamakinega ko niyo a manga olowan ago manga pendatoon sa Israil
a dii sodi ko maontol a kokoman
ago pembibid ko langon a matito.
10 Pembangonen iyo a Yarosalim a so siti o Allah
sii ko onayan a kapamono ago kamarataan.
11 Sekano a manga olowan na pekokom kano sabap ko tendan,
sekano a manga imam na pepangendao kano sabap ko sokay,
na sekano a manga nabi na pepangalamat kano sabap ko pirak.
Apiya pen oto na di niyo dii teroon a sasarigan iyo so Allah
a tig iyo a “Da a kitana rektano a morala
ka sisii rektano so Allah.”
12 Kagiya ka maoto na sabap rekano
na mapendado a Siyon a datar o dii mbasokan,
na kebaloy a Yarosalim a mitatabotod a miyanga bibinasa,
na so palaw a katatagoan ko Timplo na kesapengan a makapal a paket.
MIKAS 4
So Pekatalingoma a Kapendato o Allah ko Dalem a Doniya
Ogaid na sii ko keposan sangkai a manga gawii

na so palaw a katatagoan ko Timplo o Allah
na kebaloy a tindos a palaw ko langon a palaw sa doniya,
na kipangkat ai a pekaombaw ko langon a bobongan.
Pemanong on so manga taw a poon ko madakel a nasiyon

2 A di iran dii teroon a
“Itano roo, somong tano ko palaw o Allah,
roo ko Timplo o Tohan sa Israil.
Ipengendao niyan rektano so manga okitokit iyan
kaan tano makalalakaw ko manga lalan iyan.”
Ka sangkoto a masa na melangkap so manga ndao o Allah a poon sa Siyon
ago so manga katero iyan a poon sa Yarosalim.
3 Pengokomen iyan so madakel a taw

na pesaden iyan so di pegayonayonan o manga babager a nasiyon ko mawatan marani.
Seselen iran a ponta a dado so manga pedang iran
na pagembaalan iran a pangawit so manga bangkaw iran.
Di den makipetidawa so isa a nasiyon ko ped a nasiyon
aya pen o ba siran peman pembatalo sa katidawa.
4 Oman i isa na pekakaden a lomilintad
sii ko asinda niyan a obas o di na higos
a da den a ba on pengangalek.
So Allah a Lebi a Mamaapaar i mitero sii.
5 Imanto na so langon a nasiyon na pepamaratiyaya
ago pepamanimba ko rek iran a manga tohan,
ogaid na sektano na pemaratiyaya ago pemanimba ko Allah
a Tohan tano sa taman sa pakataman!
Kesoy so manga Israil a poon ko Kitataogen kiran
6 “Sii sangkoto a gawii a pekatalingoma,” a tig o Allah,

“na penimoon ko so manga pagtaw aken a manga lepo,
a so siran oto a miyamangitaog a piyakiromasay aken.
7 Manga lolobay siran a miyapamogaw sa mawatan ko inged iran,
ogaid na pakapegoyagen aken so miyalamba kiran
na mbalowin aken siran a mabager a nasiyon.
Na saken, a so Allah, i pendato kiran sii ko Palaw a Siyon
ipoon sangkoto a gawii na taman sa pakataman.”
8 So seka on peman, hey Yarosalim
a aya lantawa ago kota o manga pagtaw o Tohan,
na ikesoy reka so miyaona a gees ago kapaar ka;
pekaasalen reka so kadato o ka.
9 Ogaid na ino ka penggoraok imanto sa matanog?

Ino ka raraota a kasakit a datar o pembaliliten a babay?
Ba sabap sa da a dato o ka ago miyamatay so manga mosawira a ka?
10 Pakatetaliyaa niyo so manga lawas iyo sa kasakit,
hey manga taw sa Yarosalim,
a datar o babay a dii mbawata,
ka imanto na pekaawa kano ko siti
na pekakaden kano ko manga pangomaan.
Pekasong kano sa inged a Babilon.
Ogaid na penabangan kano roo o Allah,
ka pokasen kano niyan ko kapaar o manga ridoay niyo.
11 Benar a madakel imanto a manga nasiyon a mitimotimo a nggobat rekano

a di iran dii teroon a
“Kaseboan a Yarosalim!
Mailay tano baden a miyabinasa!”
12 Ogaid na di katawan angkai a manga nasiyon so antangan o Allah
aya pen o ba iran kasaboti so takdir iyan,
ka tinimo iyan siran a lagid o bebekesen a ilaw a pagegiken ko pegegikan on.
13 “Na mbowat ka, hey Yarosalim,” a tig o Allah,

“na gika ngka so manga ridoay ngka!
Ka mbelowin ko seka a lagid sa kabager o todo a sapi
a potaw i panga ago tombaga i kanoko;
sesaan ka so madakel a nasiyon,
na so manga kakawasaan a miyateban iran
na isenggay ngka a rek aken, a so Kadnan o dalem a doniya.”
MIKAS 5
Hey manga taw sa Yarosalim, timoa niyo so manga sondaro niyo!
So manga ridoay na linikopan tano iran!
Pepasen iran a tongkas so bies o olowan sa Israil.
So Initopa a Dato a Pekapoon sa Bitlihim
2 “Ogaid na seka, Bitlihim Ipratah,

apiya pen maito ka sii ko manga inged sa Yodah
na san reka pekapoon so pakapendatoon aken sa Israil
a so kiyapooni ron na sii ko miyanga atey a gawii
sii ko da a poonan iyan a masa.”
3 Kagiya ka maoto na peladen o Allah so manga pagtaw niyan

ko kapaar o manga ridoay iran
taman ko masa a ipembawata o pembaliliten a babay so wata iyan a mama.
Sa masa oto na so miyalamba a manga pagari niyan a miyamangitaog
na kesoy siran ko ped a manga Israil sii ko inged iran.
4 Na amay ka makagemaw sekaniyan

na tegikoren iyan so talon iyan a nggolalan ko bager o Allah
sii ko kadadatoi ko Ingaran o Allah a Tohan iyan.
Sa masa oto na pepaginetaw so manga pagtaw niyan a malilinding,
ka so kala iyan na kekilala o manga taw ko pirowarowangan o doniya
5 Na mbegan iyan siran sa kalilintad.
So Kakesabet ago Kakebinasa
Amay ka pelosodan o manga taw sa Asiriya so inged tano

a peleseben iran so manga kota tano
na sogoon tano so pito kataw a dato
ago walo kataw a olowan a makipetidawa kiran.
6 Na tebanen iran a pedang so inged a Asiriya
ago so inged o Nimrod a sisii ko soled o manga gimowa iyan.
Na sebeten tano iran ko manga taw sa Asiriya
amay ka pekasoled siran ko inged tano sa kanggobata iran on.
7 So kelamba a manga Israil a melook ko madakel a taw

na penga babaloy a lagid o namog a poon ko Allah,
ago lagid o tarintik ko manga otan a di kegenggen o manosiya.
8 So kelamba a manga Israil a melook ko mbarambarang a manga nasiyon
na kebaloy siran a lagid o arimaw a lomolook ko manga binatang sa kalasan,
a lagid o mangoda a arimaw a lomolook ko talon a manga bilibili
a sii ko kapepegenebeneb iyan kiran
na pesikemen iyan siran ago di niyan dii sekisiin
sa da a ba kiran pekasabet.
9 Na pegesen a Israil so manga ridoay niyan
na mbinasaan iyan siran langon.
10 “Sii sangkoto a gawii,” a tig o Allah,

“na kowaan ko rekano so manga koda iyo
na nggebaan ko so manga karo niyo.
11 Mbinasaan ko so manga siti ko inged iyo,
na tempagen aken so langon a kota iyo.
12 Pekageneken aken so kapepangatao niyo,
na penga ada rekano so langon a paririmar.
13 Peropeten aken so manga barahala niyo
ago so babarakaten kon a manga ator iyo,
na di kano den pekasodiyod ko pasad o manga lima niyo.
14 Pengotengen aken so manga polaos a toos ko katohanan iyo a Asirah,
na pelaslasen aken so manga siti niyo.
15 Na sii ko tanto raken a kapekerarangiti
na seopan ko so manga nasiyon a da raken paratiyaya.
MIKAS 6
So Dimanda o Allah a Sopak sa Israil
Pamakinega niyo so dimanda o Allah a sopak sa Israil:

Mbowat ka, ya Allah, na payaga ngka so dimanda ngka;
pakinegen ka ko manga palaw ago manga bobongan so peteroon ka.
2 Hey sekano a manga palaw
ago so da a kaposan iyan a manga onayan o doniya,
na pamakinega niyo so dimanda o Allah!
Ka ipendimanda o Allah so manga pagtaw niyan;
aden a ikiya niyan sa Israil.
3 “Hey manga taw aken, antonaa i inikidia ko rekano?

Antonaa i miyanggolaola ko a inikasemo niyo?
Sembaga ko niyo!
4 Piyakaliyo aken sekano sa Misir
ago piyokas aken sekano ko kaooripeni rekano;
na siyogo aken so Mosa, so Aron ago so Mariyam a makaagak rekano.
5 Hey manga taw aken, tedentademi niyo so pikediyat i Balak a dato sa Mowab
a kipesintaan iyan rekano
ago so inisembag on i Balaam a wata i Biyor.
Toosi niyo pen so kiyaokitan iyo ko kiyalalakaw niyo
ipoon sa Sitim na taman sa Gilgal
kaan iyo kasaboti so manga oontol a okitokit aken.”
6 Antonaa i mawit aken ko Allah igira a pepangadap ako ron

sa kapesodiyodi aken ko Lebi a Maporo a Tohan?
Ba aken pegowiti sa totongen a soasoat a manga sapi
a saragon a idad iyan?
7 Ba masoat so Allah o pegowiti aken sa sanggibo a bilibili
o di na nggibonggibo a manga lawasaig a lana a olibi a isepaat on?
Ba ikesoat iyan so kakorbana ko ko kaka a wata aken a mama
sabap ko manga dosa ko? Kena!
8 Piyayag iyan reka, hey manosiya, o antonaa i mapiya.
Ka aya ipapaliyogat reka o Allah
na so kanggolaola sa ontol
ago so kapekebabayai ko limo
ago so kapepaginetaw ngka a pepangalimbabaan
a ipageepeda a ka so Tohan ka.
So Kasalaan o manga Israil ago so Kandanega kiran
9 Pepananalowan o Allah so siti a Yarosalim,

na so kipekeleken ko Ingaran iyan na kaoongangen:
“Pamakinega niyo so komakapet sa tongkas a indaneg rekano ago so Mitekdir on!
10 Aden pen a kakawasaan sii ko manga walay o manga baradosa
a miyakowa iran ko kapelalalim.
Pegosar siran sa korang a asada a aya ko ipekerarangit.
11 Ba aken perilai so manga padagang a pegosar sa ribat a panakes
ago ipepanaliba a timbangan?
12 So manga tatamoken sii rekano na manga tanganiyaya.
Na palaya kano pepamokeg a dii tero sa kapanaliba.
13 Kagiya ka maoto na siksaan ko sekano ago mbinasaan
sabap ko manga dosa niyo.
14 Ken kano a di den penga oosog,
ka baden ketatap a kapekeor iyo.
Penimo kano sa tamok a da den a ba niyo ron ketago,
ka saden sa ketimo iyo na imbegay aken
ko siran oto a pekadaag rekano ko kapetidawa.
15 Seod kano sa oniin ogaid na da a ba niyo keragon.
Temek kano sa manga olibi ogaid na di niyo keosar so lana niyan,
na temek kano sa manga obas ogaid na di niyo keinom so arak a kowaan iyo ron.
16 Mapenggolaola ini sabap sa riyawat iyo so langon a sowasowai ago manga galebek
o manga rarata a dato a si Omri ago so wata iyan a si Ahab,
na ipeteros iyo nggolaola so manga antap iran.
Kagiya ka maoto na peladen ko sekano ko kakebinasa niyo
ago so kapegongatongata rekano o langon a taw,
na pesodiin kano o ped a manga nasiyon.
MIKAS 7
So Kamarataan o manga Israil
Ndowandowaan ako den!
Miyalagid ako o pekegotem a mama
ko oriyan o kiyarebasa ko manga onga
a da den a ketoon aken a kekan a onga a obas
o di na higos a kebayaan ko.
2 Miyada ko doniya so baraamal a manga taw,
na da den a maontol a ba miyalamba ko manosiya.
Palaya siran penayaw sa kapakapemono iran,
na petepengan lomitag o oman i isa so pagari niyan.
3 Mapasang siran ko dii kanggolaola sa marata.
So manga olowan ago manga pangongokom na pepanton sa tendan.
So mala i gees a mama na di niyan kiran dii teroon so manga rarata a kabaya iyan
na palaya siran kekadiyat sa kapembibida ko kokoman.
4 So lebi kiran a mapiya ago maontol
na lagid bo sa kipantag o soroken a manga otan.
Miyakatalingoma den so gawii a kandanega rekano o Tohan
a miyatero rekano o manga nabi a pepekaalamat ko da pen makatalingoma.
Imanto na kalilibogan siran.
5 Di niyo serigi so siringan iyo;
di niyo senai so ginawai niyo.
Apiya so karoma ngka na pangalii ngka so peteroon ka on.
6 Ka so wata a mama na dii sodi ko ama iyan;
so wata a babay na pegato ko ina iyan,
na so miyakamong a babay na perido ko panogangan iyan a babay.
Na aya manga ridoay o mama na so manga ped bo ko pamiliya niyan.
7 Ogaid na makapantag raken na sasarigan ko so Allah.

Sesabar ako ko Tohan a pesebet raken
ka pagamponen ako o Tohan aken.
Kesabet so manga Israil
8 Di ngka kebebayaan so kareregeni raken, hey ridoay aken!

Apiya pen miyaoteng ako na pembowat ako bo,
na apiya pen moontod ako ko maliboteng
na so Allah i pekaliwanag raken.
9 Miyakandosa ko ko Allah
ogaid na ipenginsabar aken so rarangit iyan
taman sa ipenindeg ago pekabenaren ako niyan.
Kowaan ako niyan a poon ko maliboteng
na pagowiten iyan ko maliwanag,
na keilay aken so kapenabet iyan.
10 Keilay ai o ridoay aken na kepotos sa kayaan,
a sekaniyan a mitero raken sa “Anda so Allah a Tohan ka?”
Kemasaan aken so kakeoteng iyan,
na pelomegen sekaniyan a datar o lonatay sii ko lalan.
11 Hey Yarosalim, pekatalingoma so gawii

a mbangonen peroman so manga pangeleban ka.
Sa masa oto na pekaoladen so pagiingedan ka, hey Israil.
12 Sii sangkoto a gawii na pemanong reka so manga taw
a pekapoon sa Asiriya ago so manga siti sa Misir
ago taman pen sa lawasaig a Yopratis,
ago poon ko madakel a manga wawatan a inged
ko kilid a ragat ago sii ko kapalawan.
13 Apiya pen oto na kelaslas so doniya
sabap ko manga rarata a galebek o siran oto a kibabaling on.
So Gagaw o Allah ko manga Israil
14 Ya Allah, tagikoren ka so tongkas ka ko manga pagtaw ngka,

a so talon a aya ngka kawali
a mabibintad sii ko kalasan sa Karmil.
Pakapanateba ngka siran sii sa Basan ago sii sa Giliyad
a lagid gowani ko miyanga atey a gawii.
15 “Oway,” a tig o Allah, “na pekiilay aken rekano so manga piyakamemesa

a datar gowani ko kiyapakaliyowa ko rekano sa Misir.”
16 Keilay ai o manga nasiyon
na ikeya iran so kaito o langon a bager iran
sii ko kipegabain on ko bager o Allah.
Na indapeng iran a lima iran ko ngari iran
ago pagolenen iran a manga tangila iran ko kasasalakawi kiran.
17 Penilaan iran so bayanek a lagid o manga nipay,
na lagid o manga meranaranap a pepamanola ko lopa
a meliyo siran a pepananabaden a poon ko manga tapoka iran.
Na sengor siran a pepanga alek ko Allah a Tohan tano,
na pegadatan ka iran, ya Allah.
18 Da den a tohan a datar ka, ya Allah,
a paririla ko manga dosa o miyakapagoyag a manga pagtaw ngka.
Di ngka pelalayonen so rarangit ka sa taman sa pakataman,
ka ipekebabaya a ka so limo.
19 Ipengalinggagaw kami ngka peroman.
Pendapodapoan ka so manga dosa ami
ago ipelebad ka ko didalem a ragat.
20 Pekiilay ngka rekami so kasasarigi reka
ago so da a ikeda iyan a gagaw ngka
a so den so inisepa a ka ko manga apo ami a so Ibrahim ago Yakob
ko miyanga atey a gawii.
NAHOM
NAHOM 1
Giyai so sorat makapantag sa siti a Niniba. Initoron ai ko Nabi Nahom a taga Ilkos a
miyakanggolalan ko pangingilain.
So Rarangit o Allah sa Niniba
2 So Allah na tanaod ago pepanaop a Tohan

a peseop sii ko tanto niyan a kanggagani.
Peseopan iyan so siran oto a pesorang on,
na petetatapen niyan so rarangit iyan ko manga ridoay niyan.
3 So Allah na kena a ba malebod kararangiti,
ogaid na mala sekaniyan i kapaar
na di niyan den pelepasen so miyakasela ko kandanega on.
Pekerinayag so okitokit iyan sii ko sobosobo ago so barabarat,

na so manga gabon na aya bayanek a pekikayamber o manga ai niyan.
4 Peseparan iyan so ragat ago pepakatiyan iyan;
pepakamaraan iyan so langon a lawasaig.
Pekelayon so manga pangomaan sa Basan ago sa Karmil,
na pekelas so manga obarobar sa Libanon.
5 Pekekokog so manga palaw ko kamamasaan iyan,
na pekelanag so manga bobongan.
Petebekeren so lopa ko danga iyan
a lagid mambo o doniya ago so langon a kibabaling on.
6 Antawaa i makapemayandeg ko di niyan dii kanggani?
Antawaa i pekatiger ko pesokeyaw a rarangit iyan?
Dii mborngat so gani niyan a lagid o apoy,
na pepanga roropet so manga lakongan ko kamamasaan iyan.
7 Mapiya so Allah
a aya pekelindongan ko masa a kamaregenan.
Sisiyapen iyan so siran oto a pepagapas on
8 Ogaid na pepolangen iyan so manga ridoay niyan
a nggolalan ko pendansal a bagiyaw;
peselobaan iyan so manga soranga iyan taman den ko maliboteng.
9 Antonaa i kekadiyaten iyo a sopak ko Allah?

Mbinasaan kano niyan sa tarotop;
di den kailangan a ba niyan pen makadowa masiksa so manga ridoay niyan.
10 Kelikosan siran o manga sorok
ago penga ootengoteng a lagid o manga palaobog,
na kelengan siran a lagid o gango a ragami.
11 Aden a mama a miyakapoon reka, hey Niniba,

a pipikiren iyan so kadostaan
ago kekadiyatan iyan sa marata so Allah.
12 Na giyai i kabasa o Allah ko manga pagtaw niyan a Israil:
“Apiya pen mala i gees ago madakel so manga taw sa Asiriya
na kebinasa siran ago pengaada.
Na apiya pen pirarasay aken sekano, hey manga pagtaw aken,
na di aken sekano den peparomanan romasay.
13 Imanto na pokasan ko sekano ko kokoong iran
na potolen aken so manga patong iyo.”
14 Giyai i pitero o Allah makapantag rekano a manga taw sa Asiriya sii sa Niniba:
“Da a kebabadan rekano a pekaawid ko ingaran iyo.
Mbinasaan ko so langon a barahala
a matatago ko pesimbaan ko manga tohan iyo.
Ipetiyagar aken sekano sa kobor,
ka kena kano a ba mapapatot ko kaooyagoyag iyo den!”
15 Ilaya niyo! Roo ko manga palaw na pepekaoma a siyogo a maawid ko mapiya

a totol
a pepekalangkapen iyan so kalilintad!
Hey manga taw sa Yodah, selaselaa niyo so manga pista niyo,
na tomanen iyo so manga samaya iyo.
Di den peparomanan gomobat o manga rarata a taw so inged iyo.
Tarotop a kakepolang iran!
NAHOM 2
Keoteng a Niniba
Pepekadaseg reka so manga gomogobat, hey Niniba.

Lindinga ngka so kota!
Nggordiyai ngka so lalan!
Pakababager ka na tiyagar ka sa kapakipetidawa!
(2 Pekaasalen o Allah so bantogan o inged a Israil

apiya pen pitebanan ago bininasa o manga ridoay iran.)
3 Mariga so manga kelong o manga sondaro,

na ndiditar siran sa rambayong.
Di siran dii tiyagar nggobat!
Pepamangindat so manga karo iran a potaw,
na ikakayaw iran so manga bangkaw iran a goo.
4 Madilapet a kapepalalagoy o manga karo sii ko manga lalan
a aloyan alobak sii ko manga lamalama.
Aya kapekeilaya kiran na lagid o ba manga barabad;
peteras siran a datar o kilakilat.
5 Pepakisogoan o dato sa Niniba so manga olowan a sondaro niyan,

na pekisosong siran ko kapepalalagoy iran.
Di siran dii nggagaan ko pangeleban o siti
sa kapelindinga iran on.
6 Ogaid na ilang baden so di iran dii nggolaolaan,
ka kalelekaan so manga gimowa ko lawasaig
na pekigobar iyan so torogan.
7 Miyakokom o Allah a keagaw ago kitaog so siti.
Pepegidao so manga talasogoay ron a raga
a lagid sa kapegoni o manga marapatik,
na penggandangan iran a rareb iran ko di iran dii kamboko.
8 Lagid o ig a peletos ko miyabengkag a tangela iyan
a pepamalagoy so manga taw sa Niniba.
“Tareg kano! Tareg kano,” a ipepelalalis o manga ped,
ogaid na da den a ba on komiyasoy.
9 Tebana niyo so pirak! Tebana niyo so bolawan!

So manga tamok ko siti na lagid o ba da a pitetamanan iyan,
a so langon a kakawasaan a matitimo on!
10 Liyaslas a Niniba a pitebanan ago tiyaawi!
Pekelanag sa kalek so manga poso,
petebaden so manga leb, pekedaan sa bager so manga lawas,
na pepamansi so oman i paras.
11 Anda den imanto so siti a lagid gowani o lekowa o manga arimaw

a pekenanan o manga ngongoda a arimaw,
ago pepegenebeneban o manga arimaw a manga mama ago babay
a ped o manga wata iran a da a ba iran ikelek?
12 Pikel o arimaw so miyasikem iyan
na piyangisi iyan a makan o karoma niyan ago so manga wata iran.
Pino iyan so lekowa iyan sa sapo o pepanga sisikem iyan.
13 “Ridoay ako ngka, hey Niniba,”

a tig o Allah a Lebi a Mamaapaar.
“Totongen aken so manga karo ngka,
na kebono so manga sondaro ngka ko kapetidawa.
Di aken den peparon o ba ka makateban ko ped a nasiyon,
na di den keneg so lagam o dii tekabor a manga siyogo o ka.”
NAHOM 3
Kemorkaan a Niniba
Kemorkaan so siti a pepamono ago pepamokeg,
a mapepeno a kakawasaan a mapeteban!
2 Pamakinega niyo so sagisir o litago,
so garokob o manga tirikan,
so dagedeb o pelolompat a manga koda
ago so daleg o manga karo!
3 Ilaya niyo so pepamanindaw a manga pedang
ago pepamangindat a manga bangkaw
a ikakayaw o manga pangongoda!
Madakel a miyabono
a miyamangibaraser so di keitong a manga lawas iran
taman sa pekisaliket so ai o manga taw ko manga bangkay.
4 Langon ai dii manggolaola sabap ko dii kasebo angkoto a sondal a giya Niniba
a so pakabarayat a babay a mapasang i kapangatao,
a miyaoripen iyan so manga nasiyon
a nggolalan ko kasosondal iyan ago kapangatao.
5 “Peridoon ko seka,” a tig o Allah a Lebi a Mamaapaar.

“Pelekisan ko seka
kaan mailay o manga nasiyon ago manga ndatoan
so kadidiyampa a ka ago pagereg.
6 Selapotan ko seka sa maresik,
na pekiilay aken ko manga taw a tanto ka a ipekengingiri.
7 So langon a pekailay reka na pelagoyan ka iran
a tig iran a
‘Miyabinasa a Niniba! Antawaa i pemboko on?
Anda ko ketoon so komapedi on?”
8 Hey Niniba, ba ka tomo a di so siti a Tibis a so kapital a Misir

a matatago ko lawasaig a Nail a malilibet a ig?
So lawasaig na aya on mililinding;
so manga ig i kota iyan.
9 Giya Itiyopiya ago Misir i bager iyan a da a pitetamanan iyan;
na giya Pot ago Libiya na aya niyan manga abanga.
10 Apiya pen oto na miyabiyag ago minitaog so manga taw niyan.
So manga ikaririga iran na inipamapes ko lopa
ko oman i mbalakaan o manga lalan.
Rinipa o manga sondaro so manga olowan o siti
kaan mailay o antawaa kiran i keoripen o oman i isa,
na so langon o kikababantogan kiran a mama
na piyamatong a rantay.
11 Na seka mambo, hey Niniba, na kelagid o palaobog a pekeotengoteng;
na tepok ka a pepanamar malagoy ko manga ridoay niyo.
12 Langon o manga kota a ka na kelagid o kayo a higos
a kiyalotoan so manga onga niyan;
amay ka kekoyong ai
na keroro so manga onga niyan sii ko ngari o ken on.
13 Ilaya ngka so manga sondaro ngka,
a lagid siran langon o manga babay!
So manga gimowa a ka na maolad a kalelekai ron ko manga ridoay ngka,
na ketotong a apoy so manga tanggal iyan.
14 Tiyagar ka ko kakelikopi reka o ridoay!

Taliyong ka sa ig!
Pakabagera ngka so manga kota a ka!
Limbega ngka so bote a pagembaalan a manga bata,
na ompiyai ngka so manga pangeleban a ililinding reka!
15 Ogaid na sii den ko di ngka sii dii kanggolaolaa
na pelameden ka a apoy ago mbonoon ka a pedang.
Kelamed ka a lagid o pereperan a peken o manga tarapan.
Miyababad ka sa madakel a lagid o manga tarapan!

16 Piyakadakel ka so manga padagang ka
taman sa datar siran sa bilangan o manga bitoon sa langit.
Ogaid na lagid siran o manga tarapan
a sii ko oriyan o kiyalaslasa iran ko kalopaan
na melayog siran sa mawatan a kapekeipos iran den.
17 So manga pendatoon ka ago manga olowan
na lagid mambo o makapal a manga tarapan
a kidadapo ko soled o tangkal sii ko katenggaw o gawii,
ogaid na anda den i kasinang o alongan na melayog siran sa mawatan,
na da den a matao ron o anda siran.
18 Hey dato sa Asiriya, miyamatay so manga pekeonotan ka;

so manga olowan ka na kikakokobor ko lopa.
Miyakambelabelag so manga pagtaw ngka,
na da den a ba kiran penimo.
19 Da den a kibolong ko kasasakiti reka;
so pali i ka na aya ngka ipetay.
Oman i isa a makaneg ko totolan ko kiyabinasa ngka
na pendaopay sa kapekebabaya,
ka antawaa i miyasalebo a ba da marasay ko da a ikepos iyan a kasopiit ka?
HABAKOK
HABAKOK 1
Giyai so manga katero a piyayag o Allah ko Nabi Habakok a nggolalan ko pangingilain.
So Inipenon i Habakok
2 Ya Allah, ay katey pen a kapepananalo aken reka sa tabang

a di ngka bo pekinegen?
Sii ako reka penggoraok makapantag ko kaaaniyayai rekami,
ogaid na di kami ngka sebeten.
3 Ino ako ngka pepakailaya sa di ontol a dii nggolaolaan?
Ino ngka di tegoa sa ginawa so karoromasay?
Malilibet ako o kapepaminasa ago dii kapanganiyaya,
na aden a kambobono ago kapepawala sii ko mbalabala.
4 Kiyadaan den so kitab sa bager ago kipantag,
na kena a ba pepangokasa so maontol a kokoman.
So manga rarata na penggenggenen iran so manga oontol;
sabap sii na pekebibid so kokoman.
So Sembag o Allah
5 Inisembag o Allah a “Layasa ngka so manga nasiyon ko mbalabala na ilaya ngka,

na pamemesa ka a tanto!
Ka aden a penggolaolaan ko ko manga gawii ngka
a di ka on pengimbenar apiya pen o matero reka.
6 Pengondoin aken so nasiyon a Babilon
a giyangkoto a marangit ago da a sagosara iyan a manga taw
a peparada siran ko dalem o doniya
a pepangagaon iran so manga pagiingedan a kena a ba iran rek.
7 Piyakalekelek ago mawaraw siran a manga taw;
aya iran bo kokoman na so baya a ginawa iran,
na ipoporo iran baden a ginawa iran.
8 Magaan so manga koda iran a di so manga saladeng,
ago manga wawaraw a di so manga iila a aso ko kagagawii.
Madilapet a kapepekaoma o manga komokoda a pepekapoon sa mawatan.
Pelolompat siran a datar sa kagaan o garoda a peseyakot ko seyaben iyan;
9 Palaya siran pepekaoma a pepangangiyaya.
Pegabanti siran a lagid o ndo a poon ko disirto,
a so manga pembiyagen iran na datar sa kadakel o peted.
10 Di iran dii sodiin so manga dato
na pepagongatongaten iran so manga olowan.
Ipesinga iran so langon a siti a kikokotaan;
pelibeten iran ai a tambak na pepangagaon iran.
11 Oriyan oto na madilapet a kapeteros iran a datar o ndo, na pekeipos siran,
a manga baradosa oto a manga mama a so bager iran na aya iran tohan.”
So Ikadowa a Inipenon i Habakok

12 Ya Allah a Tohan ko, ba ka di Tohan ipoon sa pagampaganay?
Hey soti a Tohan ko, di kami pematay
ka miyapili i ka angkoto a manga taw sa Babilon
a baden makapenggolalan ko inikokom ka rekami.
Hey Lakongan aken, piyakabager ka siran kaan kami ran mandadaneg.
13 Ogaid na ino ngka pesebari angkai a makatipo a manga taw?
Tanto a soti so manga mata ngka a di magilay sa kamarataan,
na di ngka ipengonot so kadostaan.
Kagiya ka maoto na ino ka baden rerenek
ko kapelameda o manga rarata a taw ko manga oontol a di siran?
14 Ino ngka pembaloya so manga manosiya a datar o manga seda sa ragat,

ago lagid o manga meranaranap a da a ba iran dato a pekalinding kiran?
15 Ka so manga taw sa Babilon na penggamiten iran so langon a taw a kikabebanowitan,
pepangowaan iran siran ko poket iran;
pepenimoon iran ko libot iran,
na sabap sii na pekebabaya siran ago dii keriyala.
16 Kagiya ka maoto na di iran dii korbanan so poket iran,
na petotong siran sa doka a soasoat ko libot iran,
ka kagiya dii makanggolalan sangkai a manga nganin
na mapiya so kapakambebetad iran
ago mitataralo so pangenengken iran.
17 Ba tatap a kapegosara iran ko poket iran
ko kapepaminasaa iran ko manga nasiyon sa da a kapedi iran?
HABAKOK 2
Penik ako imanto ko lantawa
na penayaon ko o antonaa i peteroon raken o Allah
ago antonaa i isembag iyan sangkai a inipenon aken.
So Sembag o Allah ki Habakok
2 Na somimbag raken so Allah a tig iyan a
“Soraten ka so miyapayag reka sii ko pangingilain,

na tomboken ka a marayag ko karatola
kaan mabatiya o oman i isa a dii nggagaan sa kapesegad iyan.
3 Ka da pen makatalingoma so masa a kipenggolalanen ko miyapayag,
ogaid na magaan den makatalingoma,
na matatangked a kipenggolalanen on.
Na o lagid o ba pekelanggay na nayawa ngka den,
ka di kisendod.
4 “Ilaya ngka so mala i dangkowagan;

kena a ba matito so manga singayo iyan,
ogaid na aya ipeginetaw o maontol na so paratiyaya niyan.
5 So dii tekabor na pegakalen o kakawasaan,
na di sekaniyan den tomatangka.
So napso niyan na lagid sa kala o darpa o miyamatay,
na di den ai kesemo a lagid o kapatay.
Giyanan i sabap a petimoon iyan sa ginawa niyan so madakel a manga taw
sii ko langon a manga nasiyon.
6 Ogaid na pekatalingoma so masa a so langon angkai a manga taw
na pengetokan iran sekaniyan a rakes o kapakasodi a peteroon iran a:
“ ‘Kemorkaan ka a pepanimo sa kena a ba ngka rek,

a pepakakawasaan ka a ginawa ngka a nggolalan ko katobo!
Ay katey pen a kitataros ai?’
7 Kitekaw den a kaperidoa reka o pepamangotang reka!
Magembowat siran a itebad reka na pageboten ka iran;
samaoto na seka den i petabanan iran.
8 Piyanganiyaya ngka so manga taw ko madakel a nasiyon,
ogaid na imanto na so miyalamba kiran na paganiyayaan ka iran
sabap ko kiyapamonoa ngka ko manga taw
ago so kiyapangarasii ngka ko manga siti ko doniya ago so langon a kibabaling on.
9 “Kemorkaan ka a pepakakawasaan ka so pamiliya ngka ko di ontol a okit

a aya ngka mapipikir na giyanan i kipoporoon ka ko babalingan ka
kaan di kesangkay o kamoralaan!
10 Ogaid na piyakakeya a ka so pamiliya ngka ko kiyapaminasaa ngka ko makadel a
nasiyon,
na tiyagoan ka baden so niyawa ngka sa kabinasaan.
11 So manga ator ko keleb o walay ngka na penggoraok sa kapesenditi ran reka
na ipegolaleng ai o manga saragonting on.
12 “Kemorkaan ka a pembangon sa siti a nggolalan ko kapamono

a pepakabekenen ka so inged a nggolalan ko maasiya!
13 Ba di kahanda o Allah a Lebi a Mamaapaar
a so langon a pembangonen o manga nasiyon na matag baden ipagitagon ko apoy,
na baden dii pakandokaon o manga taw a ginawa iran ko da a bali niyan a galebek?
14 Ogaid na pekatalingoma so masa a melangkap ko doniya so katao ko bantogan o Allah
a datar o manga ig a mipepeno ko ragat.
15 “Kemorkaan ka a pembegay sa pakabereg a panginginomen ko manga siringan ka!

Pepakiinoman ka kiran so baso o ka taman sa mabereg siran
kaan ka mailay so kayaan iran ago katatalandiyang.
16 Ogaid na kepeno ka mambo a kayaan a kena a ba bantogan;
seka den i pekainom ago kediyampa.
Pekainomen ka o Allah ko tagayan a rarangit sii ko kawanan a lima niyan,
na kesapengan a pagereg so bantogan ka.
17 Piyamata a ka so manga kalasan sa Libanon
na kepata ka den imanto.
Piyakalekan ka so manga iila on a ayam
na pekalekan ka iran mambo imanto.
Ka piyakatoga a ka so rogo o manosiya
na bininasa ngka so madakel a pagiingedan
a rakes o langon a kibabaling on.”
18 “Antonaa i bali o barahala a pimbaalan o taw?

Matag anan piteong a piyagtaotaw a dii mamangendao sa manga kabokegan.
So di on dii teong na peserig ko rek iyan a pegembaalan,
a so barahala a di makapetero!
19 Kemorkaan ka a petero ko kayo a “Oyag ka!”
o di na sii ko da a niyawa niyan a ator a “Mbowat ka!”
Ba ini makapenggonanao?
Matag ai lalapisan sa bolawan ago pirak na da a napas iyan.
20 Ogaid na sisii so Allah ko soti a Timplo niyan;
pakarerenek so langon a taw ko dalem o doniya ko kamamasaan iyan.”
HABAKOK 3
So Pangangarapan i Habakok
Giyai so pangangarapan a inidikir o nabi Habakok:
2 Ya Allah, miyaneg aken so makapantag ko bantogan ka,

na tanto aken a ipepememesa so manga galebek ka.
Ya Allah, peromani ngka imanto so miyanggolaola ngka gowani,
na pakitokawi ngka a ginawa ngka sii ko manga gawii ami!
Sii ko kapekerarangiti reka na tagoa ngka sa ginawa so limo!
3 Pepekaoma so Tohan a poon sa Idomiya;

so soti a Tohan na pepekaoma a poon sa Palaw a Paran.
So bantogan iyan na lomalangkap ko manga langit,
na so manga podi niyan na mipepeno ko doniya.
4 So kasigay niyan na datar sa kasigay o pesebang a alongan;
pekiteras so manga sinar a poon ko lima niyan a ron mageena so kapaar iyan.
5 Pepangonaan rekaniyan so paniyakit,
na petondog on so manga siksa ko kapelakad iyan.
6 Tominindeg sekaniyan na kiyokog iyan so doniya;
minilay sekaniyan na piyakapamanabad iyan so manga nasiyon.
Miyanga tetempag so miyateytey den a manga palaw,
na miyamangitobak so andangandang a manga bobongan.
So manga okitokit o Tohan na taman sa pakataman.
7 Miyailay aken so manga taw sa Kosan ago giya Midiyan
a pepanga rarasay ago pepananabaden sa kalek.
8 Ba ngka da kasoaten so manga bowalan, ya Allah?
Ba ngka kiyararangitan so manga lawasaig?
Ba ka miyakanggani ko ragat isako pekodaan ka so manga koda a ka
ago so domadaag a manga karo ngka?
9 Inirat ka so pana a ka
na mitiyagar ka sa kipenaan ka ko manga gasa.
Piyakibegi i ka ko manga lawasaig so kalopaan;

10 Miyailay ka o manga palaw na tiyabeker siran.
Somiyagembet somagad so bagiyaw;
domiyagedeb so kalodan na piyamakala iyan so manga begel iyan.
11 So alongan ago so olan na tomiyareg ko langit
sabap ko kapekerap o pelayog a manga gasa a ka
ago so kapekindat o masindaw a bangkaw ngka.
12 Lomiyalakaw ka kometas ko doniya;

liyagosak ka so manga nasiyon sii ko di ngka dii kanggani.
13 Lominiyo ka sa kapenabangi ngka ko manga pagtaw ngka
sa kasebeta ngka ko miyanga pipili i ka.
Siyasa a ka so olowan o manga rarata
na bininasa ngka sa tarotop so manga kaom iyan.
14 So manga gasa a ka i lomiyambas ko komandir o ridoay a manga sondaro
sii ko kiyasondol iran a lagid o sobosobo sa kiperaken iran rekami
a pepanga bebebaya siran a lagid o ba iran pelameda sa masolen so manga miskin.
15 Piyakindapodapoan ka ko manga koda a ka so ragat,
na miyanga sisikar so manga kalodan.
16 Tanto ako a tiyabad ko kiyanega ko sii langon,

na minibarabad a modol aken sa kalek.
Kiyadaan den sa bager so lawas aken taman sa pekireparepang ako.
Ogaid na nomanayaw ako a sesabar ko gawii a kamoralaan
a itelingoma ko nasiyon a nggobat rekami.
17 Apiya pen di pemangonga so manga kayo a higos,

ago da a obas ko manga asinda a obas;
apiya pen keilang so kapepamangeto o manga olibi
ago da a pereperan a ipembegay o dii mbabasokan;
apiya pen da a bilibili o di na kambing ko pananateba
ago da a sapi ko manga kodal
18 Na ipekebabaya aken den so Allah;
ipekapiya a ginawa ko so Tohan a pesebet raken.
19 So Allah a Tohan ko i bager aken;

pembalowin iyan so manga ai aken a datar o ai o saladeng,
na pepakalalakaon ako niyan ko manga poporo a darpa.
SIPANIYAS
SIPANIYAS 1
Giyai so katero a initoron o Allah ko nabi Sipaniyas sii ko kandadato i Yosiyas a wata i
Amon sii sa Yodah. Si Sipaniyas na wata i Kosi, a wata i Gidaliyas, a wata i Amariyas a
aya wata i Hisikiyas.
So Pekatalingoma a Kasiksaa o Allah sa Yodah
2 “Peyopasen aken so langon taman ko liyawaw o lopa iyo,” a tig o Allah.

3 “Ndatar so manosiya ago so manga binatang a palaya ko den peyopasen.
Apiya so manga papanok ko kawang ago so manga seda ko ragat na pematay.
Mbinasaan ko so manga barahala o manga rarata a taw
sii ko kapelengana ko ko manosiya ko dalem a inged iyo,” a tig o Allah.
4 “Mbeteren aken a lima ko a pendadaneg sa Yodah
ago so langon a kibabaling sa Yarosalim.
Pageposen aken roo so apiya antonaa i miyalamba
ko kapesimbaa ko katohanan a Baal
ago so pen so dii katedentademi ko manga imam
a dii telagad sangkoto a barahala.
5 Mbinasaan ko so apiya antawaa i sodiyod sii ko atep o walay niyan
sa kasimbaa niyan ko alongan, so olan ago so manga bitoon,
ago so pen so siran oto a pesimba raken a di raken dii sepa
ogaid na di pen dii sepa ko katohanan a Molik.
6 Mbinasaan ko so siran oto a gominek raken mangongonotan,
a di ako iran sengoran aya pen o ba siran raken pakinggonanao.”
7 Rerenek kano ko kamamasaan o Lebi a Mamaapaar a Tohan,
ka magaan den makatalingoma so gawii a kapengokom o Allah!
Mitiyagar so Allah sa kapekorbana ko manga pagtaw niyan,
na kiyabantowan iyan den so pemanombali kiran.
8 “Sii sangkoto a gawii a kapenombali,” a tig o Allah,
“na ndanegen aken so manga olowan
ago so manga wata o manga dato sa Yodah,
ago so langon a perawat ko manga adat o manga rait.
9 Sa gawii oto na ndanegen aken so langon a pepamangeped ko kapesimba o manga
pepanakoto,
ago siran oto a pepanganiyaya ago pepangasab
sa kapepenoa iran a tamok ko manga walay o manga kadnan iran.
10 “Sangkoto a gawii,” a tig o Allah,

“na keneg so kapenggoraok a pekapoon ko Gimowa sa Seda sii sa Yarosalim,
ago so dii kandidiyagaw sii ko bago a sabaad ko siti,
ago so tanto a matanog a ragasa sii ko manga bobongan.
11 Ndidiyagaw kano a kibabaling ko masasakop o padian,
ka pematay so langon a di roo dii pesa ago dii mamamasa.
12 “Sii sangkoto a masa na pesolo ako a sisik ko siti a Yarosalim,

na ndanegen aken so siran oto a dii senasana a da a awid a akal iran
a pipikiren iran a ‘Da a ipenggolalan o Allah
a apiya anda ko marata o di na mapiya.’
13 Mapeteban so manga tamok iran,
na kegeba so manga walay iran.
Di siran pekabaling ko manga walay a di iran dii mbabalain
aya pen o ba siran makainom ko arak
a pekekowa ko manga asinda iran a obas a pepamolaan iran.”
So Mala a Gawii o Allah
14 Miyakarani so mala a gawii o Allah.

Kiyasipegan ai a magaan den makatalingoma.
Pamakineg kano! So kagoraok sii ko gawii o Allah na mapait,
a so kagoraok o manga babager a sondaro!
15 Giyangkoto a gawii na gawii a kararangit,
gawii a kasasamok ago karoromasay,
gawii a kapekelaslas ago kabinasaan,
gawii a maliboteng ago kadadatem,
gawii a kalelekep ago kadedelem,
16 A so gawii a kapekaoniya ko bogiyong ago kapelalalis o manga sondaro
a dii nggogobat ko kikokotaan a manga siti ago so manga lantawa on.
17 Tig o Allah a “Sabap ko kala o kamaregenan a pagowiten ko ko manga taw

na melalakaw siran a dii mangapap a datar o manga bota,
ka kagiya miyakandosa siran raken.
Keodod so rogo iran sii ko bayanek,
na ipelebad so manga lawas iran a lagid o tai.”
18 Sii sangkoto a gawii a rarangit o Allah

na apiya so langon a pirak iran ago bolawan na di kiran pekalidas.
Pelameden so dalem o doniya sii ko kaaapoy o kapepanaod aken.
na kitekaw den so kapelengana niyan ko langon a kibabaling ko doniya.
SIPANIYAS 2
Pangni ko Kateobat
Timotimo kano mangangarapan, hey da a kaya iyan a nasiyon!

2 Teobat kano imanto sii ko di pen kapekatalingoma o masa a kandanega rekano o Allah.
Teobat kano ko di pen kakeipos angkai a gawii
a lagid o kipembayogen o ndo ko okap,
ago sii ko di rekano pen kakitana o pesokeyaw a rarangit o Allah
ko gawii a kapemborngat o gani niyan.
3 Panagontamani niyo so Allah, hey langon kano a pepangalimbabaan ko doniya,
a sekano a petoman ko ipesogo iyan.
Panagontamani niyo so kapagiinontolan ago so dii kapangalimbabaan
ka o ba kano malinding sii ko gawii a kararangit o Allah.
Siksaan a Pilistiya
4 Keawaan so siti a Gasa, na kelaslas a Askilon.

Kebogaw so manga taw sa Asdod ko keoto a alongan,
na kebadot a Ikron.
5 Kemorkaan kano a manga Pilistiyo a mababaling ko kilid a ragat
ago sii sa inged a Kanaan!
Miyasala kano o Allah, na mbinasaan kano niyan
taman sa da a isa rekano bo a ba kelamba.
6 So lopa iyo ko kilid a ragat na kebaloy a pepanateban
a ndarpaan o manga pananagikor sa bilibili ago manga tangkala.
7 So manga taw sa Yodah a makapegoyag
na kerek iran angkai a lopa ko kilid a ragat.
Pakapenateben iran roo so manga talon iran,
na oman kegabi na magiga siran a ndeke
sii ko kiyaawaan a manga walay sa Askilon.
Siyapen siran o Allah a Tohan iran
na pekaasalen iyan so kararakmati kiran.
Siksaan a Mowab ago giya Amon
8 Tig o Allah a “Miyaneg aken so dii kapakasodi o manga Mowabiyo

ago so kapepagongatongat o manga Amoniyo
a inipagitowito iran ko manga pagtaw aken.
Miyaneg aken pen so ipetekabor iran
a tenganen iran so inged o manga taw aken.
9 Kagiya ka maoto na mataan ko kaooyagoyag aken,”
a tig o Allah a Lebi a Mamaapaar a so Tohan o Israil,
“ka ipesepa aken a kebinasa sa tarotop a Mowab a datar o siti a Sodom
ago giya Amon a datar o siti a Gomorah.
Kepeno so lopa iran a manga sorok
na ketago on so manga galebo a timos,
ka taman sa pakataman a kaiilang ai.
So kelamba ko manga pagtaw aken a makapegoyag
na petebanan iran siran ago tenganen iran so lopa iran.”
10 Giyai i imbadal kiran sabap ko kapepangimporoan iran,

ka piyagongatongat ago piyagitowito iran so manga pagtaw o Allah a Lebi a Mamaapaar.
11 Pekakalekan siran o Allah amay ka binasaan iyan so langon a katohanan sa doniya.
Oriyan iyan na so manga taw ko mbalabala ko doniya na pemanimba rekaniyan,
a so oman i isa kiran na sii ko darpa iyan.
Siksaan a Itiyopiya ago giya Asiriya
12 “Sekano mambo a manga taw sa Itiyopiya

na pemonoon kano o pedang aken,” a tig o Allah.
13 Mbeteren o Allah a lima niyan sa pagotaraan

sa kasiksaa niyan sa Asiriya,
na mbalowin iyan so siti a Niniba a ilang a darpa
a komekegaw a datar o disirto.
14 Pemangiga roo so manga talon a bilibili ago manga sapi,
na keden on so pitibarangan a manga binatang.
Madakel a pisosonan a bengit a pendapowa ko miyanga bibinasa a torogan on
a pepemangoni siran sii ko manga dirowasa.
So mitatabotod a popot na pekaalang ko manga pintoan o manga walay,
na kesawaan so manga dolog on a kayo a sidro.
15 Giyai i mapenggolaola ko dii keriyala a siti
a somasana so manga taw ron.
Pitero iyan sa ginawa niyan a
“Da a kababantogan a siti sa doniya a rowar raken!”
Ogaid na sayana a kakebinasa niyan
a kebaloy ai a lekowa o manga binatang!
Oman i pesagad on na makapenenentek
o di na ipengapakapay niyan on so sombag iyan.
SIPANIYAS 3
So Kiyandosa ago so Kakesabet a Yarosalim
Kemorkaan so somosopak ago maresik a siti a Yarosalim

a pepemeges ko manga taw niyan!
2 Di niyan pekinegen so Tohan,
di terima sa parinta, di serig ko Allah
aya pen o ba makarani ko Tohan iyan.
3 So manga olowan on na lagid o pegengger a manga arimaw
a pepangiloba sa masikem iran,
na so manga pangongokom iyan na lagid o pekeor a manga aso ko kagagawii
a da den a miyasama iran a tolan sii ko kakepita iyan.
4 Di kesanaan so manga nabi niyan a makatipo a manga mama.
So manga imam iyan na peresikan iran so Soti a Darpa
ago pembibiden iran so kitab o Allah.
5 Ogaid na ndodoo pen so Allah sa siti.
Maontol sekaniyan a di den penggolaola sa kamarataan.
Oman kapipita na pepakiilay niyan so kaontol iyan
na di sekaniyan den keribat.
Apiya pen oto na so di manga oontol roo
na peteros siran baden nggolaola sa marata sa da a ba iran kaya.
6 Tig o Allah a “Madakel a miyapanas aken a manga nasiyon.

Bininasa ko so manga siti iran,
na miyageba so manga kota iran ago lantawa.
Kiyadaan sa taw so manga lalan iran a da a ba on pekalalakaw;
da den a miyalamba a mababaling on apiya sakataw bo.
7 Na aya miyapikir aken na
‘Mataan a kelek raken imanto so manga pagtaw aken!
Mataan a terima siran sa parinta kaan di kebinasa so kakadenan iran.’
Ogaid na apiya i kala o kapendanega ko kiran
na baden miyakalalo so panamar iran sa kapenggolaola sa marata.
8 “Sabap roo,” a tig o Allah, “na nayawa niyo baden so gawii a kapembowat aken
sa kaselaa ko ko manga nasiyon.
Ka pitekdir aken a timoon ko so manga nasiyon ago manga ndatoan,
ka pakapemborngaten aken kiran so gani aken
ago so langon a pesokeyaw a rarangit aken.
Na pelameden so dalem o doniya sii ko kaaapoy o kapepanaod aken.
9 “Sangkoto a masa na selinen aken so manga taw

ka mbegan aken siran langon sa soti a manga modol a makapenanalo ko Ingaran aken
kaan maisaisa siran ko kapengongonotani ran raken.
10 So manga pagtaw aken a pesimba raken
a miyamangiparak ko onaan o manga lawasaig sa Itiyopiya
na pagowitan ako iran sa manga soasoat.
11 Sii sangkoto a masa na di kano den pakapekeyaan, hey manga taw aken,
sabap ko langon a miyanggolaola niyo a minisopak raken.
Ka sa masa oto na kowaan ko rekano
so siran oto a ipekebabaya iran so kaaambog iran,
na di kano den pengimporoan sii ko soti a palaw aken.
12 Ka aya imbagak aken sii rekano
na so makarorondan ago dii mangalimbabaan a manga taw,
ka siran den i somasarig ko Ingaran aken.
13 So makapegoyag a manga Israil na di siran den penggolaola sa kadostaan;
di siran pemokeg aya pen o ba pemagakal.
Ken siran ago magiga a malilinding,
a da den a ba kiran makapengangalek.”
Idaida a Kapekebabaya
14 Pagidaida kano a manga taw sa Siyon;

pelalalis kano sa matanog, hey manga Israil!
Pakapipiyaa niyo a ginawa niyo ago kababaya kano sa iklas ko poso iyo,
hey siti a Yarosalim!
15 Initapelek o Allah so kapesiksaa niyan reka,
biyogaw iyan reka so langon a ridoay ngka.
So dato sa Israil a so den so Allah na sisii reka,
na di ka den kewan o ba aden a makakaid reka.
16 Sii sangkoto a gawii na peteroon bo sa Yarosalim a
“Di ka pekelek, hey siti a Siyon!
Pakapipiyaa ngka a ginawa ngka ago pakababager ka!
17 Sisan reka so Allah a Tohan ka a mala i gees a pekasabet.
Tanto ka a ipekapiya a ginawa niyan,
pekadekean ka niyan sii ko gagaw niyan,
na ikebabaya ka niyan a rakes o kapamagidaida.”
18 Tig o Allah a “Timoon ko sekano a pekedali ko miyatendo a manga pista,

na di kano den kediyamanan.
19 Sangkoto a masa na seopan ko so langon a pepemeges rekano.
Penabangan aken so manga lolobay,
na timoon ko so siran oto a miyamangitaog,
na pekipodi aken siran ago pekibantog
sii ko oman i inged a ron siran piyakakeya.
20 Sii sangkoto a masa na timoon ko sekano;
oway, sangkoto a masa na imbaling aken sekano,
na pekibantog aken sekano ago pekipodi
sii ko langon a nasiyon sa doniya
amay ka pekaasalen aken ko kararakmati rekano
sii den ko kapekeilaya niyo ron,” a tig o Allah.
HAGAY
HAGAY 1
Inisogo o Allah a Mbangonen Peroman so Timplo niyan
Sii ko ikadowa ragon ko kandadato i Dariyos a dato sa Pirsiya, sii ko paganay a gawii ko
ikanem olan, na minitoron so katero o Allah a miyakanggolalan ko nabi Hagay a
minisampay ko gobirnador sa Yodah a si Sirobabil a wata i Siyaltiyal, ago so maporo a
imam a si Yosowa a wata i Yahosadak.
2 Giyai i pitero o Allah a Lebi a Mamaapaar: “Aya dii teroon angkai a manga taw na ‘Da
pen makatalingoma so masa a patot ko kambangona peroman ko Timplo o Allah.’ ”
3 Na initoron o Allah angkai a katero a nggolalan ko nabi Hagay a tig iyan a

4 “Ba masa ini a patot ko kakakaden iyo ko manga pipiya a walay niyo a magegeba pen
so Timplo aken?”
5 Imanto na giyai i pitero o Allah a Lebi a Mamaapaar: “Pamimikirana niyo so

pekeokitan iyo.
6 Mala a miyapamola niyo ogaid na maito a miyaragon iyo; pekan kano ogaid na di kano
den keosog; peginom kano ogaid na di kano den kedaan sa kawaw; di kano dii nditar
ogaid na petenggaon kano bo; na pekeda so sokay o gomagalebek a datar o ba niyan
petegoa ko lebo a bolsan!
7 Pamimikirana niyo angkai a pekeokitan iyo.
8 Na imanto na takedeg kano ko kalasan na kowa kano ron sa manga tarakayo na bangona
niyo peroman so Timplo, ka kesoat ako ron ago kebantogan,” a tig o Allah.
9 “Ininam iyo a mala a keragon iyo ogaid na maito, na kagiya mibaling iyo na ba aken
den inibayog. Ngkaino?” a tig o Allah a Lebi a Mamaapaar. “Sabap ko Timplo aken a
mabibinasa den a matetembang so oman i isa rekano ko di niyan dii kambalaya ko rek
iyan a walay.
10 Giyanan i sabap a pekeren so kapegoran o langit ago so kapembegay o lopa sa
pereperan.
11 Pitibaba aken a kalaoni ko manga kalopaan ago manga kapalawan, so manga
pereperan, so manga waged a obas, so manga kayo a olibi ago so langon a pepamangeto
ko lopa, ago so pen so manga manosiya, manga pangangayamen ago so langon a di niyo
dii nggalebeken.”
Tiyoman o manga Taw so manga Katero o Allah
12 Mandiyadi na si Sirobabil ago si Yosowa a maporo a imam a rakes o langon o manga

taw a miyakakasoy a poon ko kiyabiyag sa Babilon na tiyoman iran so pitero kiran o
Allah a Tohan iran a nggolalan ko nabi Hagay a so siyogo o Allah. Na sominimba siran
ko Allah.
13 Na inibegay i Hagay ko manga taw angkai a katero o Allah a “Lalayon ako rekano a
pitero o Allah!”
14 Na piyangoyatan o Allah so pamikiran i Sirobabil a gobirnador sa Yodah ago so
pamikiran i Yosowa a maporo a imam, ago so pamikiran o langon a taw a miyakakasoy a
poon ko kiyabiyag. Na mitimotimo siran ago mipoon nggalebek ko Timplo o Allah a
Lebi a Mamaapaar a so Tohan iran.
15 Giyoto so ikadowa polo ago pat gawii ko ikanem olan ko ikadowa ragon ko kandadato
i Dariyos.
HAGAY 2
So Bantogan o Bago a Timplo
Sii ko ikadowa polo ago isa gawii ko ikapito olan sangkoto den a ragon na
miyakatalingoma so katero o Allah ko nabi Hagay a tig iyan a
2 “Mbitiyarain ka si Sirobabil a gobirnador sa Yodah ago si Yosowa a maporo a imam
ago so langon o manga taw na teroa ngka kiran a
3‘Ba aden rekano a manga taw a miyamakailay ko miyaona a bantogan angkai a Timplo?
Na antonaa i pamikiran iyo ron imanto? Ba di lagid o da a kipantag iyan?’
4 Apiya pen oto, hey Sirobabil ago si Yosowa a maporo a imam, na pakababager kano
imanto ago pakapipiyaa niyo a ginawa niyo, ago sekano langon a manga taw ko inged, na
nggalebek kano ka sisii ako rekano, a tig o Allah a Lebi a Mamaapaar.
5 Lalayon rekano so Roh aken, ka giyanan i minitopa ko ko manga apo iyo ko
kiyapakaliyo iran sa Misir; di kano pekelek.
6 “Ka giyai i pitero o Allah a Lebi a Mamaapaar: Di bo matey na kokogen aken sa

makaisa pen so manga langit ago so doniya, so ragat ago so kalopaan.
7 Kokogen aken so langon a nasiyon, na pekatalingoma sii so kakawasaan o langon a
nasiyon, na penoon ko a bantogan angkai a Timplo.
8 Rek aken so pirak ago so bolawan, a tig o Allah a Lebi a Mamaapaar.
9 So keori a bantogan angkai a Timplo na kebaloy a lebi a mala a di so miyaona a
bantogan iyan, na sii sangkai a darpa na mbegay ako sa kalilintad ago kamapiyaan, a tig o
Allah a Lebi a Mamaapaar.”
So Pakaise i Hagay ko manga Imam
10 Sii ko ikadowa polo ago pat gawii ko ikasiyaw olan ko ikadowa ragon ko kandadato i
Dariyos na miyakatalingoma peman so katero o Allah ko nabi Hagay a tig iyan a
11 “Giyai i pitero o Allah a Lebi a Mamaapaar: Iseen ka ko manga imam o antonaa i tig o
Kitab makapantag sii:
12 O aden a pegawid sa soti a sapo a isesenggay a isepaat a popoyon ko kimon iyan na
miniseko so kimon iyan sa paan o di na sawaw, o di na arak, o di na lana, o di na ped pen
a pangenengken na ba oto mambo kebaloy a soti?”
Inisembag o manga imam a “Di!”
13 Na iniise pen i Hagay a “O kiyakaraman so taw sabap ko kiyapakaseko iyan sa

miyatay a lawas na o maseko iyan so apiya antonaa sangkai a manga nganin na ba oto
mambo kekarami?”
“Oway,” a inisembag o manga imam, “kekaraman mambo.”
14 Na tig i Hagay a “Pitero o Allah a: Datar oto angkai a manga taw ago giyangkai a
nasiyon ko kapekeilaya ko ron, ka so langon taman a di iran dii nggolaolaan ago so
langon a di iran dii isoasoat na kakakaraman.
15 “Pitero o Allah a: Ipoon imanto na pamimikirana niyo i kiyaokitan iyo ko da niyo pen
kapooni mangon ko Timplo o Allah.
16 Sii sangkoto a manga gawii na igira aden a miinam sa makaragon sa dowa polo ko
takes na sapolo baden a miyaragon iyan. Na igira aden a pesong ko petemekan sa obas a
iinamen iyan a makasageb on sa lima polo ka litro a ig a obas na matag baden dowa polo
a miyakowa niyan.
17 Siyogat aken sekano a mayaw a ndo ago paniyakit ago oran a giyaw a miyakabinasa ko
langon a di niyo dii nggalebeken, ogaid na da kano raken pananangoran, a tig o Allah.
18 Ogaid na giyai so ikadowa polo ago pat gawii ko ikasiyaw olan, a so gawii a
miyapasad den so kambangona ko onayan o Timplo o Allah, na keilay niyo o antonaa i
keokitan iyo ipoon imanto.
19 Ka apiya pen da den a miyalamba a pereperan sii ko taliyong, ago da pen pamangonga
so manga waged a obas ago manga kayo a higos, kayo a karomamis ago so manga kayo a
olibi na ipoon sangkai a gawii na perakmatan ko sekano.”
So Initopa o Allah ki Sirobabil
20 Sii den sangkoto a gawii a so ikadowa polo ago pat gawii ko olanolan na
miyakatalingoma peroman so katero o Allah ki Hagay a tig iyan a
21 “Teroa ngka ki Sirobabil a gobirnador sa Yodah a: Kokogen aken so manga langit ago
so doniya.
22 Keliden aken so manga ndatoan na binasaan aken so kapaar o manga ndatoan o
salakaw a manga taw. Penalimpatoon aken so manga karo ago so manga pangongolin on.
Penga ooteng so manga koda na pemagonaya mbonoai so kikokoda on.
23 Sa gawii oto na kowaan ko seka, hey Sirobabil a oripen aken a wata i Siyaltiyal, ka
mbalowin ko seka a lagid o sising aken a ipetenda, ka miyapili aken seka, a pitero o Allah
a Lebi a Mamaapaar.”
SAKARIYAS
SAKARIYAS 1
Pangni sa Kapakakasoy ko Allah
Sii ko ikawalo olan ko ikadowa ragon ko kiyandato i Dariyos sa inged a Pirsiya na

initoron so katero o Allah ko nabi Sakariyas a wata i Birikiya a wata peman i Ido
2 A tig iyan a “Teroa ngka ko manga taw a: Giyai i kabasa o Allah a Lebi a Mamaapaar:
Tanto aken a kiyararangitan so manga apo iyo.
3 Ogaid na teroon ko rekano imanto a kasoy kano raken, ka kesoy ako rekano.
4 Di niyo perawata so sowasowai o manga apo iyo. Piyakalangkap kiran o miyanga oona
a nabi so kabasa ko a ‘Talikodi niyo so manga rarata a sowasowai niyo na geneki niyo so
dii kanggolaola sa marata!’ Ogaid na da ako iran pakinega aya pen o ba iran tiyago sa
ginawa so pitero aken.
5 So manga apo iyo ago giyangkoto a manga nabi na kena den o ba pekeoyagoyag imanto.
6 Ogaid na riyaot so manga apo iyo o kasiksaan a miyatero aken den sabap ko da iran
kaparatiyayaa ko manga sogoan a inibegay aken kiran a nggolalan ko manga oripen aken
a manga nabi. Kagiya ka maoto na miteobat siran a tig iran a ‘Inibadal rektano o Allah a
Lebi a Mamaapaar so patot ko manga sowasowai tano ago manga galebek, ka aya niyan
pitekdir.’ ”
So Pangingilain o Nabi a manga Koda

7 Sii ko ikadowa polo ago pat gawii ko ikasapolo ago isa a olanolan, a so olanolan a
Sibat, sii ko ikadowa ragon ko kandadato i Dariyos na initoron peman so katero o Allah
ko nabi Sakariyas a wata i Birak a aya wata i Ido.
8 Tig i Sakariyas a “Sii ko pangingilain ko kagagawii na miyailay aken a mama a kokoda
sa mariga a koda a tomitindeg ko look o manga kayo a mirtel roo ko maito a balintad. Sii
sa talikodan iyan na aden a mariga on, palang ago mapoti a manga koda.
9 Na iniisean aken so malaikat a di raken dii makimbitiyarai a “Antona ini, kadnan ko?”
Tig iyan a “Pekiilay aken reka o antonaa ini!
10 Siran i manga siyogo o Allah sa kapegeneba iran ko dalem o doniya kaan iran
pekebantayi.”
11 Na iniripot o kikokoda a mama ko malaikat o Allah a tig iran a “Miyaneb ami so

dalem o doniya na tetakna ago lomilintad.”
12 So kiyanega on o malaikat o Allah na miyangangarapan a tig iyan “Ya Allah a Lebi a

Mamaapaar, miyakapito polo den ragon imanto a kapekerarangiti ngka sa Yarosalim ago
so manga inged sa Yodah! Ay katey pen a di ngka on kikepediin?”
13 Na simbag o Allah so malaikat sa manga katero a pekaoyat ago pekapiya sa ginawa

14 Na inisogo raken o malaikat a ipenawatawag aken so pitero o Allah a Lebi a
Mamaapaar a giyai: “Tanto aken a pakatatayaan a Yarosalim ago so Palaw a Siyon
15 Na tanto aken a pekerarangitan so ped a manga nasiyon a kipakadedaya. Ka isako
lomenggaw so rarangit aken ko manga pagtaw aken na piyakaiseg iran baden so
kaperasaya kiran.
16 Kagiya ka maoto,” a tig o Allah, “na kesoy ako sa Yarosalim ka ipengalinggagaw
aken. Kebangon roo peman so Timplo aken,” a tig o Allah a Lebi a Mamaapaar, “na
keompiyaan mambo a Yarosalim.”
17 Na pitero raken pen o malaikat a “Pakalangkapa ngka angkai a kabasa o Allah a Lebi a
Mamaapaar: ‘So manga siti aken na solapayan peman a kamapiyaan, na pekapiyaan aken
peroman a Siyon ago piliin aken a Yarosalim a rek aken.’ ”
So Pat timan a Panga ago Pat kataw a Panday
18 Na miyangilailay ako, na miyailay aken so pat timan a panga.

19 Iniise aken ko malaikat a di raken dii makimbitiyarai a “Antona ini?”
“Giyanan so manga ala i gees a nasiyon a miniparak iran so manga taw a kibabaling sa
Yodah, Israil ago sa Yarosalim,” a inisembag iyan.
20 Na taros a piyakiilay raken o Allah so pat kataw a panday sa potaw.

21 Iniise aken a “Antonaa i inisong iran sii a penggolaolaan?”
Tig iyan a “Somiyong sii angkai a manga panday kaan iran mapangangalek ago
mabinasa so manga nasiyon a inipanidong iran so panga iran ko inged a Yodah a iniparak
iran ago piyakapangalimbabaan so manga taw ron.
SAKARIYAS 2
So Mama a Maawid sa Panakes
Miyangilailay ako peman, na miyailay aken so mama a aden a panakes sii sa lima niyan.
2 Iniise aken on a “Anda ka song?”
“Tekesen aken a Yarosalim,” a inisembag iyan “sa katokawi ko ko kabelang iyan ago
katas.”
3 Na giyoto a miniseg sa onaan so malaikat a ped aken na sarta den a biyalak o isa a
malaikat
4 A tig iyan ko ped aken a “Palalagoy ka sangkoto a mangoda a maawid sa panakes na
teroa ngka on a ‘Pekatalingoma so gawii a kebalingan a Yarosalim a lagid o siti a di
kelikos a keleb sabap ko tanto a madakel a taw ago manga pangangayamen a matatago
on.
5 Ka saken den,” a tig o Allah, “i kebaloy a keleb on a apoy a melikos sa Yarosalim. Na
keden ako roo a aya niyan bantogan.”
Tiyawag so Miyamangitaog sa Kambeling iran
6 “Hey! Hey, manga pagtaw aken,” a tig o Allah, “palagoy kano a poon ko pagotaraan!
Awa kano roo! Iniparak aken sekano ko pat a pidoro o doniya,
7 Ogaid na awai niyo imanto a Babilon, hey sekano a initaog roo, na kasoy kano sa
Siyon!”
8 Sii ko oriyan o kinipangkaten raken o Allah a Lebi a Mamaapaar na siyogo ako niyan
ko manga nasiyon a miteban rekano. Ka tig iyan a “Apiya antawaa i peseko rekano
na pesekoon iyan so taw ko mata ko.
9 Na itena aken a lima ko sangkoto a manga nasiyon, na petebanan siran o manga taw a
piyangongoripen iran gowani.” Na amay ka mapenggolaola ini na ketokawan iyo a so
Allah a Lebi a Mamaapaar i somiyogo raken san rekano.
10 Pitero o Allah a “Pelalalis kano sa kapekebabaya, hey manga taw sa Yarosalim, ka

pekaoma ako a keden san rekano!”
11 Madakel a manga nasiyon a tempil ko Allah sangkoto a gawii, na kebaloy siran a

manga pagtaw niyan. Keden sekaniyan a ped iyo na ketokawan iyo a so Allah a Lebi a
Mamaapaar i somiyogo raken sii rekano.
12 Na pekewalin o Allah so inged a Yodah a aya niyan bagian sii ko soti a inged iyan, na
piliin iyan peman a Yarosalim a rek iyan.
13 Rerenek kano ko hadapan o Allah, hey langon a manosiya, ka mimbowat sekaniyan a
peseriat sii ko soti a kakadenan iyan.
SAKARIYAS 3
So Lompiyo a Nditaren o Maporo a Imam
Na piyakiilay raken o malaikat si Yosowa a maporo a imam a tomitindeg ko hadapan o
Malaikat o Allah ago so Iblis a tomitindeg ko kawanan i Yosowa sa kasenditi niyan on.
2 Na pitero o Malaikat o Allah ko Iblis a “Hey Iblis, pembongetan ka o Allah! So Allah a
minili sa Yarosalim na pembongetan ka niyan! Ba di giyangkai a mama na lagid o pos a
miyaagaw ko apoy?”
3 Samaoto na tomitindeg roo si Yosowa a ndiditar sa boringen.

4 Na pitero o Malaikat ko ped a kititindeg ko hadapan iyan a “Ndai niyo sa nditaren iyan
a boringen.” Na taros a tig iyan ki Yosowa a “Ilaya ngka man, ka piyakada aken reka so
kadostaan ka na pakapenditaren aken seka sa mapiya a bago a nditaren.”
5 Na pitero aken a “Peroa ngka a katagoi ran pen sa lompiyo a sorban ko olo niyan!”
Mandiyadi na tiyagoan iran sa lompiyo a sorban so olo niyan na pinditaran iran sa mapiya
sii ko katitindeg roo pen o Malaikat o Allah.
6 Na pisenaan o Malaikat o Allah si Yosowa a tig iyan a

7 “Giyai i kabasa o Allah a Lebi a Mamaapaar: O kedega ngka so manga lalan aken ago
inggolalan ka so galebek a inisangan aken reka na mapekakibir ka ko Timplo aken ago so
lamalama niyan, na mbegan ko seka sa kedarpaan ka ko hadapan aken a ped angkai a
kititindeg sii.
8 Na pamakineg ka imanto, hey Yosowa a maporo a imam, ago sekano langon a ped iyan
a manga imam. Sekano i nanao ko manga kamapiyaan a pekatalingoma, ka pekagemaon
ko so oripen aken a bebetowan sa ‘So Sapak.’
9 Ilaya niyo so ator a inibetad aken ko hadapan i Yosowa! Pito i patagan angkoto a
satiman a ator, na nggaangan aken sa sorat,” a tig o Allah a Lebi a Mamaapaar, “na
pepasen aken so kadostaan angkai a inged sii ko salongan bo.
10 Sii sangkoto a gawii na mboyoon o oman i isa rekano so siringan iyan sa kapakadeke
iyan sii ko asinda niyan a obas ago kayo a higos.
SAKARIYAS 4
So Bolawan a Petegoan sa Solo ago so Dowa a Kayo a Olibi
Oriyan iyan na miyobay raken so malaikat a miyakimbitiyarai raken na piyokaw ako

niyan a lagid o ba ako baden totoroga.
2 Na inisean ako niyan sa “Antonaa i pekeilay ngka?”
“Pepekailay ako sa petegoan sa solo a lombos a bolawan,” a inisembag aken, “a
kaoonayan so liyawaw niyan sa ladiya a mapepeno a lana ago pito a solo ko melilibeta on
a rakes o pito a tobo a mikekampeta o ladiya ago so oman i isa a solo.
3 Na aden pen a dowa a kayo a olibi a so isa on na sii sa kawanan o ladiya na so isa on na
sii sa diwang.”
4 Na iniise aken ko malaikat a “Antona ini, kadnan ko?”
5 “Di ngka bes katawan o antona ini?” a inisembag iyan.

Tig aken a “Di, kadnan ko.”
6 Mandiyadi na pitero iyan raken a “Giyai i kabasa o Allah ki Sirobabil: So kegaga ngka
nggolaola na kena a ba makapenggolalan ko kapaar aya pen o ba nggolalan ko bager, ka
sii makapenggolalan ko Roh aken, a tig o Allah a Lebi a Mamaapaar.
7 Antonaa ka, hey mala a palaw? Sii ko hadapan i Sirobabil na ba ka baden kepantar!
Pagimasaden i Sirobabil so kapembangona ko Timplo, na amay ka tegoon iyan so
moripori a ator ko mbetadan on na ipelalis o manga taw a ‘Karakmatan ai o Allah!
Karakmatan o Allah!’ ”
8 Initoron raken peman so katero o Allah a tig iyan a

9 “Si Sirobabil i mitad ko onayan angkai a Timplo na pagimasaden iyan so
kapembangona on. Amay ka magiyoto na ketokawan iyo a so Allah a Lebi a Mamaapaar
i somiyogo raken sii rekano.
10 Di niyo pesodia so maito a miyapasad on sangkai a gawii, ka kebabaya kano amay ka
mailay niyo a ipeteros i Sirobabil so galebek iyan on.
“(Giyangkai a pito a solo na aya manga mata o Allah a dii mamangilailay ko langon
taman sii ko dalem o doniya.)”
11 Na inisean aken so malaikat sa “Antonaa ngkai a dowa a kayo a olibi a sisii ko

kawanan ago diwang o petegoan sa solo,
12 Ago antonaa ngkai a dowa a sapak a kayo a olibi a pegodod ko mabobolawan a lana a
petoga ko dowa a tobo a bolawan?”
13 Tig iyan a “Di ngka bes katawan o antona ini?”

“Di, kadnan ko,” a inisembag aken.
14 Na pitero iyan a “Giyai so dowa kataw a mama a miyapili ago kiyaidinan a

makapenalagad ko Kadnan o dalem a doniya.”
SAKARIYAS 5
So Pelayog a Malololon a Karatas
Miyangilailay ako peroman na miyailay aken so malololon a karatas a pelayog sii ko

kawang.
2 “Antonaa i pekeilay ngka?” a iniise o malaikat.

Tig aken a “Pekeilay aken so pelayog a malololon a karatas a siyaw ka mitros a katas
iyan ago pat ka mitros ago tenga a kaolad iyan.”
3 Na pitero iyan a “Giyoto so kasosoratan sa paninta a melangkap ko dalem a doniya.

Aya misosorat on na kedadas ko inged so oman i tekew; na aya misosorat ko saklid on na
kedadas ko inged so oman i dii sepa sa di benar.
4 Na pitero o Allah a Lebi a Mamaapaar a ‘Pekalaoladen aken angkai a paninta, ka soled
ai ko walay o oman i tekew ago sii ko walay o oman i dii sepa sa di benar sii ko Ingaran
aken. Na tereg so paninta sangkoto a walay na mbinasaan iyan sa tarotop ndatar so
manga tarakayo ago manga ator on.’”
So Babay sii ko Soled o Reban
5 Na miyobay raken so malaikat a di raken dii makimbitiyarai a tig iyan a “Ilaya ngka
angkai a miyakagemaw!”
6 “Antona ini?” a iniise aken.

Tig iyan a “Giyangkai a reban na aya nanao ko kadostaan o manga taw ko dalem a
inged.”
7 Kalelekeban so reban sa timbega, na kagiya malekat ai na miyailay aken a babay a

moontod ko soled iyan.
8 Na tig o malaikat a “Giyangkai a babay na tanda o kamarataan!” Na diyasek iyan
sekaniyan ko didalem o reban na inilekeb iyan on bo so lekeb a timbega.
9 Samaoto na lomiyangag ako na miyailay aken so dowa kataw a babay a pelayog a
pegantap rekami a manga ala siran i papak a lagid o papak a tabonan. Na piyorot iran so
reban na inilayog iran sa kawang.
10 “Anda iran pagowita?” a iniise aken ko malaikat.

Inisembag iyan a “Roo sa inged a Babilon a ron iran mbangona so walay a ketagoan on.
Mapasad oto na imbetad iran so reban roo ko ndarpaan on.”
SAKARIYAS 6
So Pat Timan a Karo
Miyangilailay ako peroman na miyailay aken so pat timan a karo a pepekaoma a poon ko
pageletan o dowa a palaw, a so manga palaw a tombaga.
2 So maoona a karo na petondaan o manga ririga a koda, so ikadowa na manga iitem a
koda,
3 So ikatelo na manga popoti a koda, na so ikapat na palang a manga koda.
4 Na iniise aken ko malaikat a “Antona ini, kadnan ko?”
5 Tig iyan a “Giyai so manga niyawa sa kasorgaan a dii magenebeneb a pepekapoon ko

darpa iran ko hadapan o Kadnan o dalem o doniya.
6 So karo a totondaan o manga iitem a koda na magantap sa pagotaraan; so totondaan o
manga popoti a koda na magantap sa sedepan, na so totondaan o palang a manga koda na
sii magantap sa pagabagatan.”
7 Tanto a mateterang gomanat angkoto a manga babager a koda sa kapegenebeneba iran

ko dalem o doniya. Na pitero kiran o malaikat a “Na, lalakaw kano den na go niyo
pagenebeneba so dalem o doniya!” Na gomiyanat siran lomalakaw ko mbalabala ko
doniya.
8 Na tiyalowan ako o malaikat a tig iyan a “Giyangkoto a somiyong sa inged sa
pagotaraan na piyakalenggaw iran roo so rarangit o Allah.”
So Kiyasangkadi ki Yosowa
9 Initoron raken peroman so katero o Allah a tig iyan a

10 “Tarimaa ngka so manga pamemegayan a pirak ago bolawan a imbegay reka i Hilday,
Tobihas ago si Hidayas a miyakakasoy a poon ko miyamangitaog sa Babilon, na sii bo
sangkoto a gawii na song ka ko walay i Yosiyas a wata i Sipaniyas.
11 Kowaa ngka so pirak ago bolawan na mbaali ngka a sangkad, na tagoa ngka ko olo o
maporo a imam a si Yosowa a wata i Yosadik.
12 Na teroa ngka on a “Giyai i kabasa o Allah a Lebi a Mamaapaar: So mama a
bebetowan sa ‘So Sapak’ na mageto sii ko darpa iyan, na mbangonen iyan so Timplo o
Allah.
13 Sekaniyan i mbangon ko Timplo o Allah, na kebantogan sekaniyan ka magontod a
pendato sii ko korsi iyan. Ipenggolalan iyan pen so dii kapagimam sii ko kandadato iyan,
na makapegayonayon piyapiya angkoto a dowa a sangan iyan.
14 Na so sangkad na kebaloy a tadentadem sii ko Timplo o Allah a ipenanadem ki
Hilday, Tobihas, Hidiyas ago si Yosiyas a wata i Sipaniyas.”
15 So siran oto a matatago sa mawatan na song sii a magogop mangon ko Timplo o

Allah. Amay ka magiyoto na ketokawan iyo a so Allah a Lebi a Mamaapaar i somiyogo
raken sii rekano. Mapenggolaola ini langon o magiklas kano tomoman ko manga sogoan
o Allah a Tohan iyo.
SAKARIYAS 7
Inimbonget o Allah so Kapowasa a Kena a ba Iklas
Sii ko ikapat ragon ko kandadato i Dariyos na initoron so katero o Allah ki Sakariyas sii
ko ikapat gawii ko ikasiyaw olan, a so olanolan a Kislib.
2 Samaoto na so manga taw sa Bitil na siyogo iran si Siyarisir, si Rigimilik ago so manga
ped iran sii ko Timplo o Allah a Lebi a Mamaapaar kaan iran mapangni so limo o Allah
3 Ago an iran kaisei so manga imam ago so manga nabi sa “Ba kami peteros den mboko
ago powasa oman ikalima olan a ipetedem ko kiyabinasaa ko Timplo a datar o pesowaan
ami ko miyatey den a manga ragon?”
4 Na giyai i katero a initoron raken o Allah a Lebi a Mamaapaar:

5 “Teroa ngka ko langon o manga taw ko inged ago so manga imam a ‘Sii ko miyakapito
polo ragon a kitataogen rekano igira a mipowasa kano ago mimboboko ko ikalima ago
ikapito olan na ba saken ai i pageedatan iyo ko di niyo dii kapowasa?
6 Na igira a minimon kano ago komiyan na ba di aya niyo bo dii soasoaten na so manga
ginawa niyo?
7 Ba di giyai so manga katero a piyakalangkap aken a nggolalan ko miyanga oona a nabi
isako pembalingan ago pelintad a Yarosalim ago so ped a manga inged ko melilibeta on a
rakes on so Nigib ago so kapantaran sa sebangan?’ ”
So da Kaparatiyaya na aya Kiyasabapan ko Kinitaogen ko manga Israil
8 Initoron peroman so katero o Allah ki Sakariyas a tig iyan a

9 “Giyai i kabasa o Allah a Lebi a Mamaapaar: Pangokom kano sa ontol na kalimoon ago
pangalinggagaon o oman i isa so ped iyan.
10 Di niyo pengisegi so balo, so ilo, so mananangga o di na so miskin, na di pekediyati o
apiya antawaa sa marata so ped iyan.
11 “Ogaid na da ini tagoa sa ginawa o manga pagtaw aken, ka tomiyalikod siran baden
ago inolen iran so manga tangila iran kaan di pekaneg.
12 Piyakategas iran so poso iran a datar o ator kaan iran di mapemakineg so manga ndao
ago manga katero a inisogo o Allah a Lebi a Mamaapaar a nggolalan ko Roh iyan a
miyakaokit ko miyanga oona a nabi. Sabap san na tanto aken siran a kiyararangitan.
13 Isako talowan aken siran na da iran tagoa sa ginawa; kagiya ka maoto na isako talowan
ako iran na da aken mambo tagoa sa ginawa,” a tig o Allah a Lebi a Mamaapaar.
14 “Na iniparak aken siran ko manga wawatan a nasiyon a di iran katawan a lagid o ba
siran miyasogat o mabager a sobosobo. Na kiyaganatan iran so inged iran a tiyaawi den a
da a taw a ba on pekaketas. Giyoto i kiyailanga iran ko ipekebabaya a kalopaan.”
SAKARIYAS 8
Initopa o Allah a Perakmatan iyan a Yarosalim
Initoron raken peroman so katero o Allah a Lebi a Mamaapaar a tig iyan a

2 “Giyai i kabasa o Allah a Lebi a Mamaapaar: Tanto ako a pepanaod ko kapekebabayai
aken sa Siyon. Sabap roo na tanto aken a pekerarangitan so manga ridoay niyan.
3 Na kesoy ako sa Palaw a Siyon ka mbaling ako sa Yarosalim, na mbetowan a
Yarosalim sa ‘Titikna a Siti,’ na so Palaw o Allah a Lebi a Mamaapaar na mbetowan sa
‘Soti a Palaw.’
4 Kedenan peroman a Yarosalim o miyanga lolokes a manga mama ago manga babay a
pepamangontod ko manga poblasiyon ko siti a makateteken so oman i isa kiran sabap ko
kiyalokes iyan.
5 Na kekayar peroman ko manga lalan o siti so manga wata a manga mama ago manga
babay a di ron dii sola.”
6 Pitero o Allah a Lebi a Mamaapaar a “Masiken a so miyalamba imanto a manga taw

sangkai a bangsa na mapipikir iran a mostakil o ba ini mapenggolaola, ogaid na ba aken
mambo pipikira a mostakil den? Kena!
7 Ka sebeten aken so manga pagtaw aken sii ko manga inged sa sebangan ago sa
sedepan,” a tig o Allah a Lebi a Mamaapaar,
8 “na pagowiten ko siran sa Yarosalim na pekabalingen aken siran on. Pembaloy siran a
manga pagtaw aken na pembaloy ako kiran a kasasarigan ago maontol a Tohan.”
9 Pitero o Allah a Lebi a Mamaapaar a “Hey sekano a pepekaneg imanto sangkai a manga
katero a miyatero o manga nabi a kamamasaan isako mibetad so onayan o Timplo o Allah
a Lebi a Mamaapaar, na pakababager kano kaan mapasad mangon so Timplo!
10 Ka sii ko manga gawii a da pen mibetad so onayan iyan na da den a ba pekasokay ko
ped a taw o di na ayam aya pen o ba aden a makalalakaw ko mbalabala a ba malilinding
sabap ko ridoay niyan, ka piyakirido aken so oman i taw ko siringan iyan.
11 Ogaid na imanto na so ipekidia ko ko miyalamba a manga pagtaw aken na kena a ba
datar o inikidia ko kiran gowani,” a tig o Allah a Lebi a Mamaapaar.
12 Ka mageto piyapiya so manga oniin, na peteribonga so manga waged a obas,
pakapemagoden o lopa so pereperan, na pembegay so langit sa mala a oran. Imbegay
aken ai langon a kawali o miyalamba a manga taw sangkai a bangsa.
13 Sekano a manga taw sa Yodah ago Israil, na gowani a kasisii niyo ko ped a manga
nasiyon na miyabaloy kano a ibarat o manga taw a misisinta, ogaid na sebeten aken
sekano na kebaloy kano a manga taw a rarakmatan ago pepekarakmat. Kagiya ka maoto
na di kano pekelek na pakapipiyaa niyo a ginawa niyo!”
14 Pitero o Allah a Lebi a Mamaapaar a “Isako pakakerangiten ako o manga apo iyo na
piyasad aken sa ginawa ko a pemoralaan ko siran, na da aken alina so pitekdir aken.
15 Ogaid na imanto na piyasad aken sa ginawa ko a pepiyapiyaan aken a Yarosalim ago
so manga taw sa Yodah. Di kano pekelek!
16 Aya ipapaliyogat rekano na teroa niyo so tito a benar ko oman i isa rekano, na
pangokom kano sa ontol ago ipekalintad sii ko pepangokoman iyo.
17 Di niyo pekediyati sa marata so siringan iyo, na di niyo kebabayai so kasepa sa di
benar. Ipekegowad aken ai langon,” a tig o Allah.
18 Initoron raken peroman so katero o Allah a Lebi a Mamaapaar a tig iyan a

19 “Giyai i kabasa o Allah a Lebi a Mamaapaar: So kapowasa ko ikapat, ikalima, ikapito
ago ikasapolo olan na pembaloy a manga masa a kapista a ikapipiya a ginawa ago
ipekebabaya o manga taw sa Yodah. Kagiya ka maoto na kabebayai niyo so tito a benar
ago so kalilintad.”
20 Pitero o Allah a Lebi a Mamaapaar a “Pekatalingoma so manga gawii a so manga taw

ko madakel a siti na pemanong sa Yarosalim.
21 So kibabaling ko isa a siti na song ko ped a siti a peteroon iran a ‘Itano roo kaan tano
masimba so Allah a Lebi a Mamaapaar ago mapangni tano so limo iyan. Onot kano
rekami!’
22 Oway, madakel a taw sii ko manga ala i gees a nasiyon a pemanong sa Yarosalim a
pemanimba ko Allah a Lebi a Mamaapaar ago pemangni ron sa limo.
23 Sii sangkoto a manga gawii na sapolo kataw a mananangga a poon ko mbarambarang
a inged ko dalem a doniya na kepetan iran so sisid o kimon o sakataw a Yahodi a
penggiraw siran a ‘Pakaonota kami ngka, ka miyaneg ami a ped ka so Tohan.’
SAKARIYAS 9
So Kasiksaa ko manga Ridoay a Israil
Giyai so inikokom o Allah a kasiksaa niyan ko inged a Hadrak ago so siti a Damasko,
ka pegilain o Allah so langon a manosiya
a rakes on so manga mbatabataa a Israil.
2 Siksaan iyan pen a Hamat a mindadair a Damasko,
a lagid mambo o manga siti a Tiro ago giya Sidon
apiya pen tanto siran a mapasang.
3 Giya Tiro na inimbaal iyan a ginawa niyan sa kota
ago miyanimo sa madakel a pirak ago bolawan
a lagid sa kadakel o bayanek ko lopa.
4 Ogaid na kowaan on o Kadnan so langon taman a rek iyan;
ipelebad iyan so kakawasaan iyan sii ko ragat
na kelamed a apoy so siti a Tiro.
5 Keilay ai o siti a Askilon na tanto a kewan.

Tebekeren a Gasa sa kalek
a lagid mambo a Ikron a kedaan den sa arap.
Kedaan sa dato a Gasa,
na di den kebalingan a Askilon.
6 Giya Asdod na kebalingan o manga mananangga.
Ka pitero o Allah a
“Tipoden aken so katatakabor o manga Pilistiyo.
7 Pekageneken aken so kapekena iran ko sapo a da masombali
ago so karam a pangenengken.
Na so siran oto a kelamba na keped ko manga pagtaw aken,” a tig o Tohan,
“na kebaloy siran a isa a mbawataan sii ko mbatabataa a Yodah.
So manga taw sa Ikron na keped ko manga pagtaw aken
a datar gowani o manga Hibosiyo.
8 Pelindingen aken so Timplo aken ko gomogobat a manga sondaro.
Na da den a pepangarasi a ba pekadaag ko manga pagtaw aken,
ka pagiipaten aken siran imanto.”
So Pekatalingoma a Dato sa Siyon
9 Kabebaya kano baden a tanto, hey manga taw sa Siyon!

Pelalalis kano sa kapipiya a ginawa, hey manga taw sa Yarosalim!
Ilaya niyo, ka pekaoma rekano so Dato iyo!
Maontol sekaniyan ago domadaag,
ogaid na mangangalimbabaan sekaniyan a kokoda sa kimar,
a so kangodaan a nati a kimar.
10 Tig o Allah a
“Pagilangen aken so manga karo sa katidawa sii sa Israil
ago so manga koda sii sa Yarosalim
na penga popotol so langon a gomaan sa katidawa.
Pekalintaden o Dato iyo so manga nasiyon,
na pelaolad so kandadatoan iyan ipoon ko isa a ragat na taman ko ped a manga ragat
ago ipoon ko Lawasaig a Yopratis na taman ko pirowarowangan o doniya.”
Pekaasalen so Kapepekapiya o manga Pagtaw o Allah
11 Tig o Allah a
“So sekano on peman
na sabap ko kapasadan aken mipantag rekano a pimataanan o rogo
na pekaliyon aken sekano a kikakalaboson sii ko galebo a da a ig on.
12 Kasoy kano ko darpa a kelindongan iyo, hey sekano a miyanga bibiyag,
ka aden pen a panginam iyo imanto!
Teroon ko rekano imanto a ikesoy aken rekano sa takep so miyaona a manga kamapiyaan
iyo.
13 Inirat aken a Yodah a lagid o pana,
na biyaloy aken a gasa a Israil;
pengondoin aken so manga taw sa Siyon
makitidawa ko manga taw sa Grisiya,
na pagosaren aken siran a lagid o pedang o mabager a sondaro.”
Pepayag so Allah
14 Na pepayag so Allah sii ko poro o manga pagtaw niyan,

na kiteras so gasa iyan a lagid o kilakilat.
Pekaonin o Allah a Lebi a Mamaapaar so bogiyong,
na meliyo sekaniyan a sisii ko manga sobosobo a poon sa pagabagatan.
15 Pelindingen o Allah a Lebi a Mamaapaar so manga pagtaw niyan,
na pegesen iran so manga ridoay iran a manga ator a ipepanalibat iran.
Pelalalis siran sii ko di iran dii kapakitidawa a lagid o pepanga bebereg sa arak,
na pekatogaan iran so rogo o manga ridoay iran.
Kepeno siran a lagid o ladiya a mapepeno a rogo a ipemesipesik ko aparan.
16 Sii sangkoto a gawii na sebeten siran o Allah a Tohan iran
a datar o talon a bilibili a sebeten o pananagikor kiran.
Na pemangerap siran sii ko inged iyan a datar o manga montiya ko sangkad.
17 Kebaloy siran a tanto a pakamemesa ago mataid!
Pekalombay so manga mangoda ago so manga bago a taw
sabap ko kitaralo a pereperan ago bago a arak.
SAKARIYAS 10
So Initopa a Kakesabet
Pangni kano ko Allah sa oran ko masa a ipemola.

So Allah i pegaden ko manga gabon a pembegay sa oran
a ipepekalombay o pepamangeto ko oman i pangomaan.
2 So manga taw na pepekiosiyat ko manga barahala
ogaid na kapamerak so manga sembag iran;
so manga paririmar na pepangalamat sa di benar,
na pepamagakal so pembegay sa maana o manga taginepen;
da a bali o kapepakapiyaa iran ko ginawa.
Sabap sii na pepanga dedadag so manga pagtaw aken a lagid o manga bilibili
a pepanga reregenan sabap sa da a ba kiran petegikor.
3 Tig o Allah a “Dii mborngat so rarangit aken ko manga pananagikor iyo

na ndanegen aken angkoto a manga pekeonotan,
ka saken a so Allah a Lebi a Mamaapaar i pekibir
ko talon aken a manga taw sa Yodah,
na mbalowin ko siran a lagid o kababantogan ago mabager a koda sii ko katidawa.
4 Sii kiran pekapoon so ator a onayan,
so lapek sa barombarong,
so pana sa katidawa
ago so langon a makapendato.
5 Kelagid siran o manga wawaraw a sondaro sii ko katidawa
a pepelomegen iran so manga ridoay iran sii ko lonatay ko manga lalan.
Na sabap sa ped iran so Allah na makipetidawa siran,
na tebanen iran so kikokoda a manga ridoay.
6 “Pekabageren aken so manga taw sa Yodah,

na sebeten aken so manga Israil.
Pekakasowin aken siran ko inged iran ago pekabekenen aken
ka ipepangalinggagaw aken siran.
Kebaloy siran a datar o ba aken siran da mbowangen,
ka saken so Allah a Tohan iran,
na pagamponen aken so manga pangni iran.
7 So manga taw sa Israil na kelagid o manga babager a sondaro,
na pekalangas so poso iran a lagid o ba sabap ko arak.
Keilay ai o manga wata iran na pekapiya a ginawa iran,
na ikebabaya o poso iran so Allah!
8 Tewagen aken siran a timoon,
ka miyaaon aken siran den
na pekadakelen aken siran a lagid gowani.
9 Apiya pen piyakambelabelag aken siran sii ko manga nasiyon
na tedeman ako iran sii ko manga wawatan a inged.
Makapegoyag siran a rakes o manga wata iran
na pekakasoy siran ko inged iran.
10 Pekakasowin aken siran a poon sa Misir,
na timoon ko siran a poon sa Asiriya.
Pagowiten ko siran sa Giliyad ago sa Libanon,
na da a kediyangkaan kiran roo a kekadenan!
11 Pekaokit siran ko ragat a karomasayan,
na saken a so Allah na separan aken so dii kambegel o ragat,
na kemara so langon o pitidaleman ko Lawasaig a Nail.
Kibaba so kapepangimporoan a Asiriya,
na kedaan a Misir sa kapaar.
12 Pekabageren aken so manga pagtaw aken a nggolalan ko bager aken,
na peginetaw siran sii ko kapaar o Ingaran aken,”
a tig o Allah.
SAKARIYAS 11
So Kakeoteng o manga Tangarasi
Lekai ngka so manga pintoan ka, hey Libanon

kaan malamed o apoy so manga kayo ngka a sidro!
2 Ndidiyagaw kano, hey manga kayo a goo,
ka miyanga ooteng so manga kayo a sidro;
miyabinasa angkoto a kababantogan a pakayokayowan!
Goraok kano, hey manga kalipapa sa Basan,
ka miyanga papata so makapal a kalasan!
3 Pamakinega niyo so dii kandidiyagaw o manga pananagikor,
ka miyailang so maolad a pepakipanateban iran!
Pamakinega niyo so kapegengger o manga arimaw,
ka miyabinasa so kakadenan iran ko kilid a Yordan!
So Dowa a Pananagikor
4 Giyai i pitero raken o Allah a Tohan aken: “Tagikora ngka so talon a manga bilibili a
inisenggay a penombaliin.
5 So siran oto a pepamasa kiran na pepanombali kiran a pipikiren iran a da siran
makasela. Na siran oto a pepasa kiran na dii tero sa ‘Podin so Allah, ka mikewasa tano!’
Apiya so manga petegikor kiran na kena a ba iran siran ipekepedi.
6 Lagid oto mambo na di aken den ikepedi so manga taw a kibabaling ko inged,” a tig o
Allah, “ka peladen aken so oman i isa kiran ko kapaar o siringan iyan ago sii ko kapaar o
dato iyan. Na pelaslasen o manga ridoay so inged, na di aken pokasen so manga taw ron
ko kapaar iran.”
7 Mandiyadi na siyokayan ako, a si Sakariyas, sa kapenagikora ko ko talon a inisenggay a

penombaliin, a mataan den a so lebi a kadodowaanan a talon. Na kominowa ako sa dowa
a teken a so isa on na bitowan aken sa ‘Limo,’ na so isa on na bitowan aken sa
‘Kaiisaisa,’ na piyakapanateb aken so talon.
8 Sii ko soled o saolan na piyakaawa aken so telo a ped a pananagikor ko sangan iran a
galebek.
Ogaid na inikabongas ako o talon na inikagowad ako iran mambo,
9 Na pitero aken kiran a “Di aken sekano den petegikoren. So petay na matay den! So
mbonoon na mabono den! Na so kelamba rekano na makan o oman i isa so sapo o ped
iyan!”
10 Na kinowa ko so teken a bebetowan sa ‘Limo’ na piyotol aken ai a toos ko kiyapapasa
ko ko kapasadan a inembaalan aken ko langon o manga taw.
11 Miyapapas angkoto a kapasadan sangkoto a gawii, na so siran oto a dii ndagang sa
manga bilibili a makasisima raken na siyabot iran a so pinggolaola ko na aya kiran
kiniropaan ko katero o Allah.
12 Na pitero aken kiran a “O aya katao niyo ron na mapiya na began iyo raken so sokay
aken, ogaid na o di, na tatagoa niyo baden.” Mandiyadi na tinimbang iran so sokay aken
a telo polo lad a pelata a pirak.
13 Na pitero raken o Allah a “Itogen ka nan ko panday sa koden” – a so mitataralo a arga

a inargaan iran raken! Na kinowa ko so telo polo a pelata a pirak na iniitog aken ko
panday sa koden sii ko Timplo o Allah.
14 Oriyan iyan na piyotol aken so ikadowa a teken a bebetowan sa ‘Kaiisaisa’ a aya toos
ko kiyapotola ko dii kapegariya a Yodah ago giya Israil.
15 Na pitero raken o Allah a “Iringi ngka peroman so galebek o pananagikor, a so da a

bali niyan a pananagikor.
16 Ka pekagemaon aken sii ko inged so isa a pananagikor a di niyan siyapen so manga
bilibili a pakapapatain, di niyan pengilobaan so miyanga dedadag, di niyan pemolongan
so piyanga papalian aya pen o ba niyan pakakana so manga lilimegas kiran i lawas, ka ba
niyan den kena so sapo o lebi kiran a kaolit na pelekaben iyan so manga kanoko iran.
17 “Kemorkaan angkai a da a bali niyan a pananagikor

a pegawaan iyan so talon!
Ketidaw a pedang so barokan iyan ago so kawanan a mata niyan;
kipes so barokan iyan
na kebota so kawanan a mata niyan.”
SAKARIYAS 12
So Pekatalingoma a Kakesabet a Yarosalim
Giyai i kabasa o Allah makapantag sa Israil. So Allah a komiyayat ko langit ago mitad ko
onayan o doniya ago miteong ko niyawa a sisii ko manosiya na pitero iyan a
2 “Mbalowin ko a Yarosalim a pakabereg a panginginomen ko langon a melilibeta on a
manga nasiyon amay ka pelikopan iran a Yarosalim sa kanggobata iran on a kirakes sii
pen so manga siti sa Yodah.
3 Sii sangkoto a gawii amay ka matimo roo so langon a nasiyon sa doniya na
mbalowin aken a Yarosalim a lagid o mapened a lakongan a awid a akal ko langon o
manga taw. na apiya antonaa nasiyon i tepeng on komaog na tanto a kepalian.
4 Sa gawii oto,” a tig o Allah, “na pekalekan aken so oman i koda na pakapemetengen
aken so pangongoda on. Siyapen aken so manga taw sa Yodah ogaid na mbotaan aken so
oman i koda o manga ridoay iran.
5 Na so manga mbawataan sa Yodah na peteroon iran sa ginawa iran a ‘Manga babager
so manga taw sa Yarosalim ka so Allah a Lebi a Mamaapaar i Tohan iran.’
6 “Sii sangkoto a gawii na mbalowin ko so manga mbawataan sa Yodah a lagid o

pekedeg a manga waga a milolook ko tabotod a itagon, ago lagid o pekerab a barabad sii
ko mabebekes a pereperan, na pelameden iran so langon a nasiyon ko melilibeta kiran sa
kawanan ago sa diwang. Ogaid na kitaros den so kapakatitikna o siran oto a kibabaling sa
Yarosalim sii ko siti iran.
7 “Pekaonaan o Allah sa kapakataban so manga sondaro sa Yodah kaan so bantogan o
manga mbawataan o Daod ago so kibabaling sa Yarosalim na di pekalawan ko bantogan a
Yodah.
8 Sangkoto a gawii na pelindingen o Allah so kibabaling sa Yarosalim kaan so lebi kiran
a malobay na kelagid sa bager o Daod, na so mbawataan o Daod na kelagid o Tohan, a
lagid o Malaikat o Allah a pepangonaan kiran.
9 Sa gawii oto na aya petekdiren aken na mbinasaan aken so langon a nasiyon a
penggobat sa Yarosalim.
Ipemboko o manga Taw so Mama a Siyoker iran
10 “Pagododan aken so manga mbawataan o Daod ago so kibabaling sa Yarosalim sa

pamikiran a kapangalimo ago kapangangarapan. Na pagilain ako iran a siyoker iran na
ipemboko iran sekaniyan a datar o dii mboko ko botong a wata iyan, na tanto a kekarata a
ginawa iran sabap rekaniyan a datar o dii kakerata a ginawa o kiyadaan sa kaka a wata
iyan a mama.
11 Sangkoto a gawii na pekala so dii kamboko sii sa Yarosalim a datar o kiyapakamboko
sa Hadad-Rimon roo ko kapantaran sa Migido.
12-14 Makapemboko so langon a taw ko inged a kipakasisibaya so manga pamiliya, a so
manga pamiliya ko mbawataan o Daod, so manga pamiliya ko mbawataan o Natan, so
manga pamiliya ko mbawataan o Libi ago so manga pamiliya ko mbawataan o Simay,
ago so langon a ped a manga pamiliya. Na pemboko so manga mama ago so manga
karoma iran a kipakasisibaya siran mambo.
SAKARIYAS 13
So Kasotiya ko manga Taw sabap ko Dosa
“Sii sangkoto a gawii na aden a bowalan a kelekaan a ikesoti o manga mbawataan o

Daod ago so kibabaling sa Yarosalim ko di iran dii kapakandosa ago so kasesebo iran.
2 Sangkoto a gawii,” a tig o Allah a Lebi a Mamaapaar, “na tipoden aken so langon a
kapepanakoto ko dalem a inged kaan apiya so manga ngaran o manga barahala na di den
ketademan. Na pekadaan aken ko inged so di benar a manga nabi ago so manga saitan a
pepekagawi kiran.
3 O aden pen a pepangalamat sa masa oto na so ama iyan ago so ina iyan a aya on
mimbawata na peteroon iran on a ‘Disomala a petay ka, ka di ngka dii teroon so manga
kabokegan sii ko i
Ingaran o Allah!’ Na amay ka di sekaniyan dii mangalamat na so den so manga lokes
iyan i nggonong on.
4 Sii sangkoto a gawii na da den a di benar a nabi a ba niyan pepangandagen so manga
pangingilain iyan aya pen o ba aden a penditar sa bombolen a nditaren a nabi kaan
makapenaliba.
5 Ka ba niyan den peteroa a ‘Kena a ba ako nabi; taribasok ako ka so lopa i ipekeoyag
aken ipoon ko kawawatai raken.’
6 Na o aden a makaise on a ‘Antonaa ngkanan a manga pali sa rareb ka?’ Na isembag
iyan a ‘Kiyapalian ako roo ko walay o manga ginawai aken.’ ”
So Kiyapakambelabelag o manga Bilibili
7 Pitero o Allah a Lebi a Mamaapaar a

“Pagnaw ka, hey Pedang, sa kasopaka ngka ko pananagikor aken
ago so mama a madaseg raken!
Bonoa ngka so pananagikor
na pakapembelabelagen so manga bilibili,
na tenaan ko a lima so manga nati ko talon.
8 Dowa baad ko telo bagi ko manga taw ko dalem a inged
na penga popotol ago pematay, a tig o Allah,
ogaid na makapegoyag so ikatelo baad.
9 Na giyangkai a ikatelo baad na pekaokiten aken ko apoy,
ka tonaon ko siran a lagid o pirak
ago pagoriin aken siran a lagid o bolawan.
Telowan iran so Ingaran aken
na sembagen aken siran.
Peteroon ko a ‘Siran i manga pagtaw aken,’
na isembag iran a ‘So Allah i Tohan tano.’ ”
SAKARIYAS 14
Yarosalim ago so manga Nasiyon
Ilaya niyo ka pekatalingoma so Gawii o Allah a so miyateban a poon rekano na

pembagibagiin sii ko kamamasai niyo ron!
2 Timoon o Allah so langolangon a nasiyon sa kanggobata iran sa Yarosalim; keagaw so

siti, petebanan so manga walay na pelobeden so manga babay. So sabagi ko manga taw
ko siti na pemiyagen ago pemangitaog, ogaid na so ped ko manga taw ron na di kowaan
ko siti.
3 Samaoto na meliyo so Allah a makipetidawa sangkoto a manga nasiyon a lagid o

kiyapakitidawa iyan sii ko miyanga iipos a gawii.
4 Sangkoto a gawii na ndapo so manga ai niyan sii ko Palaw a Olibi a masesedepan a
Yarosalim. Na keopak so Palaw a Olibi a kebagi sa dowa ipoon sa sebangan na taman
sa sedepan, na keaden so mala a landeng sii ko look iyan ka so sabagi ko palaw na kiiseg
sa pagotaraan, na so sabagi on na roo sa pagabagatan.
5 Na pekapalagoy kano mokit sangkai a landeng ka makatataros ai taman sa Asil.
Pemalagoy kano a datar o manga apo iyo a piyalagoyan iran so linog sii ko masa i Osiyas
a dato sa Yodah. Na pekaoma so Allah a Tohan aken a ped iyan so langon o manga soti a
kaom iyan.
6 Sii sangkoto a gawii na di sindaw so manga solo sa langit ka pekalibotengen den.

7 Giyanan na da a lagid iyan a gawii a so bo so Allah i matao ron, ka da a kadadaondaw
ron o di na kagagawii. Ka sii ko kaperimon iyan na maliwanag den.
8 Amay ka makatalingoma angkoto a gawii na magondas so pepangoyag a ig a

pepekapoon sa Yarosalim, a so sabagi on na sii tampar ko Maatay a Ragat sa sebangan,
na so sabagi on na roo sa Ragat a Miditiraniyo sa sedepan. Magondas ai sa dayon sa
dayon a ndatar sii ko pangolaon ago sii ko pangoran.
9 Samaoto na so Allah i pendato ko dalem o doniya a kikilalaan sekaniyan ago pesimbaan
o langon a taw a aya iran bo Tohan a isaisa so Ingaran iyan.
10 Kepantar so dalem a inged ipoon sa Giba taman sa Rimon sa pagabagatan a
Yarosalim. Ogaid na petikna a Yarosalim ko maporo a darpa a katatagoan on, ipoon ko
Gimowa a Baniyamin na taman ko darpa o Paganay a Gimowa na manaros ko Gimowa
ko Rogo, ago ipoon ko Lantawa o Hananil na taman ko petemekan sa arak o dato.
11 Mbaling roo so manga taw a malilinding ka di den kesintaan aya pen o ba kabinasai a
Yarosalim.
12 Giyai i kasiksaan a itena o Allah ko langon a nasiyon a miyakitidawa sa Yarosalim:

Keredak so manga sapo iran sii ko kapakatitindeg iran pen, keronot so manga mata iran
sii ko manga peso o mata iran, na kodel so manga dila iran sii ko ngari iran.
13 Sa gawii oto na tanto siran a pekalekan o Allah ago pelibogen. So oman i isa kiran na
sikemen iyan so ped iyan na pembonoay siran.
14 So pen so manga taw sa Yodah na makipetidawa siran sa kapegabanga iran sa
Yarosalim. Na keagaw so kakawasaan o langon a melilibeta on a nasiyon, a so tanto a
madakel a bolawan, pirak ago manga nditaren.
15 Datar oto mambo a kasiksaa ko manga koda, manga mola, manga onta, manga kimar
ago apiya antonaa ped a pangangayamen sii ko manga kampo o ridoay.
16 Amay ka maipos ai na so miyamakapagoyag ko langon a nasiyon a gomiyobat sa

Yarosalim na pemanong roo oman ragon sa kapesimbaa iran ko Dato a so Allah a Lebi a
Mamaapaar ago so di iran dii kaselaselaa ko Pista ko manga Lawig.
17 O aden a bangsa ko dalem a doniya a magenda sa kapesong iran sa Yarosalim sa
kasimbaa iran ko Dato a so Allah a Lebi a Mamaapaar na di keoranan so inged iran.
18 Na o di roo song so manga Imisiren sa kapeselaselaa iran ko Pista ko manga Lawig na
itena kiran o Allah so siksa a datar o itena iyan pen ko ped a manga nasiyon a magenda sa
kasong iran roo.
19 Giyai i indaneg sa Misir ago so langon a nasiyon a di pemanong sa Yarosalim sa
kapeselaselaa iran ko Pista ko manga Lawig.
20 Sii sangkoto a gawii na apiya so manga garingking ko kakang o manga koda na

inggaang on a “Isesenggay a soti ko Allah,” na so manga koden a petindaan sii ko Timplo
o Allah na kelagid sa kasosoti o manga ladiya a pegosaren ko hadapan o aparan.
21 Aya mataan na so oman i koden a petindaan sii sa Yarosalim ago sa Yodah na
kisenggay a soti ko Allah a Lebi a Mamaapaar. Na so langon a pepekaoma roo sa
kapekorban iran na pagosaren iran angkai a manga koden a peketindaan iran ko sapo o
manga korban. Na sii sangkoto a gawii na da den a dii ndagang sii ko Timplo o Allah a
Lebi a Mamaapaar.
MALAKI
MALAKI 1
Giyai so manga katero a initoron o Allah ko manga Israil a miyakanggolalan ko nabi
Malaki.
So Kapekebabayai o Allah ko Israil
2 “Tatap so kapekebabayai aken rekano,” a tig o Allah.

Ogaid na ipegise iyo a “Andamanaya i kiyapakiilain ka ko kapekebabayai ngka
rekami?”
“Sii ko kiyababayai aken ki Yakob a apo iyo,” a inisembag o Allah. “Ka apiya pen
magari si Isaw ago si Yakob na kiyababayaan aken si Yakob
3 Ogaid na inikagowad aken si Isaw. Inilang aken so kapalawan a inged iyan na piyalad
aken so kawali niyan ko manga iila a binatang.”
4 Na apiya pen mapetero o manga mbawataan i Isaw a kibabaling sa Idomiya a “Miyasasa

tano, ogaid na mbangonen tano peroman so miyanga bibinasa a darpa,” na pitero o Allah
a Lebi a Mamaapaar a “Baanda iran mabangon, ogaid na nggebaan aken bo. Na
mbetowan siran o manga taw sa ‘Marata a inged,’ ago ‘So manga taw a pekerarangitan o
Allah sa taman sa pakataman.’
5 Kebelengbelengan iyo ai a manga Israil, na peteroon iyo a ‘Mala i gees so Allah apiya
sii ko maoonaan o temanaan o inged tano!’”
So da a Bali niyan a manga Soasoat
6 Pitero o Allah a Lebi a Mamaapaar ko manga imam a “So wata a mama na

pembantogen iyan so ama iyan, na pageedatan mambo o oripen so kadnan iyan. Saken i
ama iyo, na ino ako niyo di mbentoga? Saken i Kadnan iyo, na ino ako niyo di pegadati?
Ba niyo den dii sodia so Ingaran aken!
“Ogaid na ipegise iyo a ‘Andamanaya i kiyasodia mi ko Ingaran ka?’
7 “Nggolalan ko kipesepaaten iyo ko di soti a pangenengken ko aparan aken.

“Na ipegise iyo a ‘Andamanaya i kiyabaloya mi ron a di soti ago da ami reka
kapagadati?’
“Nggolalan ko kapipikira niyo ron a ‘Mapegitowito so aparan o Allah.’
8 Igira a pegowit kano sa bota a ayam a pekorbanen na ba anan di marata? Na igira a
pegowit kano sa lepo o di na pekesakit a ayam na ba anan di marata? Tepengi niyo
megay so gobirnador iyo sa pamemegayan a datar anan! Ba kano niyan terimaa?” a tig o
Allah a Lebi a Mamaapaar.
9 Hey sekano a manga imam, tepengi niyo mangangampedian imanto ko Tohan a ikelimo
tano niyan! Ba aya katao niyo ron na pagamponen kano niyan igira a pegowit kano ron sa
datar oto a soasoat? “Kena!” a tig o Allah a Lebi a Mamaapaar.
10 Tig o Allah a “O ba bo aden a isa rekano a pelekeban iyan so pintoan o Timplo aken
kaan iyo den di ketotong angkai a da a manga bali niyan a soasoat sii ko aparan aken!
Kena a ba ako rekano miyasoat, na di aken terimaan so manga soasoat a pegowiten iyo
raken.
11 Sii ko ped a manga nasiyon na pembantogen o manga taw so Ingaran aken ipoon ko
kapesebang o alongan taman ko kapesedep iyan. Sii ko oman i darpa na petotongan ako
iran sa doka ago pegowitan iran sa soti a manga soasoat, ka mala so Ingaran aken sii ko
manga nasiyon,” a tig o Allah a Lebi a Mamaapaar.
12 “Ogaid na di niyo baden dii mapagitowito so Ingaran aken ko kapipikira niyo ron sa
‘Kepakay a keresikan tano so aparan o Allah ko kipesepaaten tano ron ko di dait a
pangenengken.’
13 “Pitero iyo pen a ‘Tanto a pakarikor angkai a kapesepaat!’ na inipamisenga iyo baden.
Igira aya niyo raken pegowiten a dii isoasoat na piyamanekew, lepo o di na pekesakit a
ayam na ba katao niyo ron na terimaan ko anan a poon rekano?” a iniise o Allah a Lebi a
Mamaapaar.
14 “Kesintaan so palalalim a aden a mapiya a ayam ko talon iyan a initopa niyan a
pekorbanen iyan ko Kadnan na aya niyan baden inikorban so aden a daway niyan. Ka
saken so mala a Dato,” a tig o Allah a Lebi a Mamaapaar, “na ipekelek so Ingaran aken
sii ko langon a nasiyon.”
MALAKI 2
So Kiyambongeti ko manga Imam
“Hey manga imam; giyai so pandoan aken rekano.
2 O di ako niyo pakinega aya pen o ba niyo tagoa ko poso iyo so kapembantoga ko
Ingaran aken,” a tig o Allah a Lebi a Mamaapaar, “na tenaan ko sekano sa paninta.
Pesintaan ko so langon taman a kamapiyaan iyo. Oway, na minisinta aken den sabap sa
da niyo pamolaa ko poso iyo so pandoan aken.
3 Pekimeratan aken so manga pereperan iyo, na iselapot aken ko paras iyo so tai o manga
ayam a di niyo dii korbanen ko manga pista niyo, na iperakes kano ron mawid ko darpa a
petegoan sa tai.
4 Oriyan iyan na ketokawan iyo a inibegay aken rekano angkai a pandoan kaan mitataros
den so kapasadan aken ko manga imam a manga mbawataan i Libi,” a tig o Allah a Lebi a
Mamaapaar.
5 “Sii ko kapasadan aken na initopa ko kiran so kaoyagoyag ago kalilintad, na inibegay

aken ai kiran kaan ako iran kapegadati. Na sii sangkoto a manga gawii na piyagadatan
ako iran den ago inikalek iran so Ingaran aken.
6 Inipangendao iran so tito a benar, na da den a di ontol a ba miyakapoon ko modol iran.
Inipagepeda ako iran sa kapakaaayon ago kapakatitito, na madakel a miyapakatalikod iran
ko dii kandosa.
7 Paliyogat ko manga imam a lalayon siran pepangendao ko tito a katao, na patot ko
manga taw a mananamar siran mamakineg ko ipepamando iran, ka so manga imam na
manga siyogo o Allah a Lebi a Mamaapaar.
8 “Ogaid na imanto na sominilay kano baden a manga imam ko ontol a lalan. Sekano i
kiyasabapan ko da kaparatiyayaa o madakel a taw ko kitab. Miyasogok iyo so kapasadan
aken ko manga Libitiyo.
9 Kagiya ka maoto na biyaloy aken sekano a mapesodi ago mapegitowito ko kapegilaya
rekano o langon a taw sabap sa da niyo kedega so lalan aken, ka miramiramig kano baden
ko kapegokasa niyo ko kokoman.”
So da Kaparatiyaya o manga Taw sa Yodah
10 Ba di isaisa a ama tano langon? Ba di isa bo so Tohan a miyaden rektano? Ino den di
toman sa pasad so oman i isa rekano a aya niyo kapesogoka ko kapasadan o Tohan ko
manga apo tano?
11 So manga taw sa Yodah na siyopak iran so paratiyaya, na piyakagowagowad so
miyanggolaola iran sii sa Yarosalim ago sa dalem a inged a Israil. Ka piresikan o manga
mama sa Yodah so Timplo o Allah a pekebabayaan iyan ko kiyapangaromaa iran ko
manga babay a pepamanimba ko katohanan o salakaw a manga taw.
12 Pengnin ko a mabelag o Allah ko isa ka maginged a Israil so apiya antawaa mama a
minggolaola sii apiya pen o pegowit sekaniyan sa soasoat ko Allah a Lebi a Mamaapaar.
13 Aden pen a ped a di niyo dii nggolaolaan: Pekerames iyo a lo so aparan o Allah.
Pepamanegad kano ago dii ndidiyagaw sabap sa di niyan den tegoon sa ginawa so manga
soasoat a pegowiten iyo ron aya pen o ba niyan tarimaa a ikebabaya iyan.
14 Na ipegise iyo a “Ngkaino?” Aya sabap iyan na miseksi so Allah ko kiyakawinga
rekano ago so karoma ngka sii ko kangoda ngka pen, na katawan iyan a siyogok ka so
minitopa ngka on apiya pen karoma ngka sekaniyan a inipemataan ka on a di ngka den
pagendaan.
15 Ba da baloya o Allah a isaisa kano ago so karoma ngka ko lawas iyo ago niyawa? Na
ino kano niyan pekaisaisaa? Sabap sa an kano makambawata sa tito a pagtaw niyan.
Kagiya ka maoto na iktiyari niyo a ginawa niyo o ba aden a isa rekano a masogok iyan so
minitopa niyan ko karoma niyan.
16 Ka tig o Allah a Tohan o Israil a “Ipekegowad aken so kambelag. Ipekegowad aken so
mama a ipekidia niyan angkai a kapangarasi ko karoma niyan. Sabap san na iktiyar kano
o ba niyo masogok so initopa niyo.”
So Gawii a Kapengokom
17 Piyakasemo niyo so Allah ko manga katero iyo.

Na ipegise iyo a “Andamanaya i kiyapakasemowa mi ron?”
Sii ko di niyo dii kateroa sa “Mapiya so oman i dii nggolaola sa marata sii ko
kapegilaya on o Allah na ikasosoat iyan siran,” o di na “Anda den so Tohan a
pepangokom?”
MALAKI 3
Pitero o Allah a Lebi a Mamaapaar a “Ilaya niyo man, ka sogoon ko so siyogo aken a
pekatiyagar ko lalan a pagokitan aken. Na so Kadnan a pakatatalingomaan iyo na
kitekaw den a kapekaoma niyan ko Timplo niyan, a giyoto so siyogo a ipekedali iyo milay
a aya kaketoman o kapasadan. Ilaya niyo ka pekaoma sekaniyan!”
2 Ogaid na antawaa i pekatiger ko gawii a kapekatalingoma niyan? Antawaa i

makapemayandeg amay ka peyag sekaniyan? Ka lagid sekaniyan o apoy a pegori ko
potaw, ago lagid o mabisa a sabon o pamimipi.
3 Magontod sekaniyan sa kapengokom a datar o pangongori ago palolombos sa pirak.
Sotin iyan so manga imam a manga Libitiyo, na pagaraman iyan siran a lagid o kapegoria
ko bolawan ago pirak kaan siran makawit ko Allah sa manga soasoat sii ko kaontol.
4 Oriyan iyan na ketarima o Allah so di on dii isoasoat o manga taw sa Yodah ago giya
Yarosalim a datar o sii ko miyanga oona a manga gawii ko miyanga iipos a ragon.
5 “Sa masa oto na pekatalingoma ko rekano a pengokom,” a tig o Allah a Lebi a

Mamaapaar. “Pendilapet ako somaksi a sopak ko manga pangangatao, manga barasina,
manga bokeg a saksi, so pepanga lampasen iran so sokay o manga gomagalebek, so
manga makaiisega ko balo ago so ilo, ago so perampasan iran so mananangga ko kabenar
iyana so kalangolangon a da a kalek iran raken.”
So Kabegay sa Ikasapolo Bagi
6 “Saken so Allah, na di ako den kealin. Giyanan i sabap a da kano pen malengan, hey
manga mbawataan o Yakob.
7 Ipoon den ko masa o manga apo iyo na petelikodan iyo so manga sogoan aken ago da
niyo tomana. Kasoy kano raken, ka kesoy ako rekano,” a tig o Allah a Lebi a
Mamaapaar.
“Ogaid na ipegise iyo a ‘Andamanaya i kapekakasoy ami reka?’
8 “Ba maontol so kapanekewi o taw ko Tohan? Kena! Ogaid na piyanekewan ako niyo.
“Na ipegise iyo a ‘Andamanaya i kiyapanekewi ami reka?’
“Piyamanekew niyo raken so manga ikasapolo bagi ago manga pamemegayan a hak
aken.
9 Misisinta kano, ka pepamanekewan ako o langon a taw ko nasiyon iyo.
10 Wita niyo so matatarotop a ikasapolo bagi ko pekepantiyari niyo sii ko baitalmal ko
Timplo aken kaan katagoi sa pangenengken. Tepengi ako niyo sii,” a tig o Allah a Lebi a
Mamaapaar, “ka keilay niyo a pelekaan ko so manga rowasan sa kasorgaan na pagododan
ko sekano sa manga ala a kamapiyaan a di kemin ko tegoan iyo ron.
11 Separan aken so manga paoledoled a pekamerat ko pereperan iyo, na di kiampas so
onga o manga waged iyo a obas ko manga asinda niyo.
12 Mandiyadi na mbetowan kano o langon a nasiyon sa rarakmatan, ka kebaloy so inged
iyo a ipekebabaya a inged,” a tig o Allah a Lebi a Mamaapaar.
13 “Makasosopak raken so manga katero iyo,” a tig o Allah.

“Ogaid na ipegise iyo a ‘Antonaa i miyatero ami a sopak reka?’
14 “Miyatero iyo a ‘Da a gona o kapepanalagadi ko Tohan. Antonaa i miyalaba tano ko

kapetomana tano ko manga sogoan iyan ago so kapepaginetaw tano a dii mboboko ko
hadapan o Allah a Lebi a Mamaapaar?
15 Aya mapipikir tano imanto na so dii mangingimporoan na aya baden pepemakapiya.
Petegompiya so manga rarata i olaola na apiya pen o pegeraren iran so Tohan na di siran
ndanegen.’”
So Initopa o Allah a Limo
16 Samaoto na mimbibitiyarai so siran oto a maaleken ko Allah na piyakineg siran o

Allah, na miyaneg iyan so di iran dii teroon. Na sii ko kamamasaan iyan na inisorat ko
ribro a tadentadem so manga ngaran o siran oto a maaleken ko Allah ago dii
mamimikiran ko Ingaran iyan.
17 “Kerek aken siran,” a tig o Allah a Lebi a Mamaapaar. “Sii ko gawii a kapeseriat aken
na ketangan aken siran a kakawasaan aken. Na pegongowan ko siran a datar den o
kapegongowi o ama ko wata iyan a di on dii telagad.
18 Sa masa oto na keilay o manga taw so mbidaan o keokitan o maontol ago so keokitan
o baradosa, a so mbidaan o pepanalagad ko Tohan ago so di on petelagad.”
MALAKI 4
So Gawii o Allah
Pitero o Allah a Lebi a Mamaapaar a “Mataan den a pekatalingoma so gawii a kerab a

datar o rapog. So langon a dii mangingimporoan ago so langon a manga rarata i olaola na
penga tototong a lagid o gango a otan sangkoto a gawii. Kelengan siran a lagid o manga
kayo a da den a bekaw o di na sapak a ba kiran kelamba.
2 Ogaid na sekano a pekelek ko Ingaran aken na pekaborantak rekano so Alongan ko
kaontol a pepekabolong so manga sinar iyan. Na peliliyo kano a petepatepak sa
kapekebabaya a lagid o nati a sapi a miyakaboka ko tangkal iyan.
3 Pendapodapoan iyo so manga baradosa, ka kelagid siran o bayanek ko didalem o palad
a ai niyo sii ko gawii a kapenggolaolaa ko sii,” a tig o Allah a Lebi a Mamaapaar.
4 “Tatanodi niyo so Kitab o Mosa a oripen aken, a so manga sogoan ago kokoman a
inibegay aken on roo ko Palaw a Sinay kaan matoman o langon a manga Israil.
5 “Ilaya niyo man, ka sogoon ko rekano so nabi Iliyas sa di pen kapekatalingoma o mala
ago piyakalekelek a gawii o Allah.
6 Na pekasangoren iyan so poso o manga ama ko manga wata iran, ago so poso o manga
wata sii ko manga ama iran. Ka o di, na pekatalingoma ako sa kasiksaa ko ko inged iyo
sa paninta."
MATIYO
MATIYO 1
So Salsila ki Isa Al Masih
Giyai i salsila ki Isa Al Masih a moriyataw o Daod a moriyataw o Ibrahim:
2 So Ibrahim na aya ama i Iskak,

si Iskak na ama i Yakob,
si Yakob na ama i Yodah ago so manga pagari niyan,
3 Si Yodah na ama i Piris ago si Sirah (aya ina iran na si Tamar),
Si Piris na ama i Hisron,
si Hisron na ama i Ram,
4 Si Ram na ama i Aminadab,
si Aminadab na ama i Nasin,
si Nasin na ama i Salmon,
5 Si Salmon na ama i Bowas (aya ina iyan na si Rahab),
Si Bowas na ama i Obid (aya ina iyan na si Rota),
Si Obid na ama i Yasay,
6 Na si Yasay na ama o Daod a so Dato.
So Daod na ama i Solaiman (aya ina iyan na so karoma

gowani i Oriyas),
7 Si Solaiman na ama i Rihobowam,
si Rihobowam na ama i Abiyas,
si Abiyas na ama i Asa,
8 Si Asa na ama i Yahosapat,
si Yahosapat na ama i Yoram,
si Yoram na ama i Osiyas,
9 Si Osiyas na ama i Yotam,
si Yotam na ama i Ahas,
si Ahas na ama i Hisikiyas,
10 Si Hisikiyas na ama i Manasih,
si Manasih na ama i Amon,
si Amon na ama i Yosiyas,
11 Si Yosiyas na ama i Yakoniyas ago si manga pagari niyan sii ko masa a kitataogen ko
manga Yahodi sa inged a Babilon.
12 Oriyan o kinitaog iran sa Babilon na

si Yakoniyas na inimbawata iyan si Siyaltiyal,
si Siyaltiyal na ama i Sorobabil,
13 Si Sorobabil na ama i Abiyod,
si Abiyod na ama i Iliyakim,
si Iliyakim na ama i Asor,
14 Si Asor na ama i Sadok,
si Sadok na ama i Akim,
si Akim na ama i Iliyod,
15 Si Iliyod na ama i Iliyasar,
si Iliyasar na ama i Mattan,
si Mattan na ama i Yakob,
16 Si Yakob na ama i Yosop a so karoma i Mariyam,
na si Mariyam na aya ina i Isa a bebetowan sa Al Masih.
17 Ipoon ko Ibrahim taman ko Daod na miyakasapolo ago pat ka apidi. Ipoon ko Daod
taman ko kinitaog sa Babilon na miyakasapolo ago pat ka apidi, na ipoon peman ko
kinitaog sa Babilon taman ko kinimbawataan ko Al Masih na miyakasapolo ago pat ka
apidi.
So Kinimbawataan ki Isa Al Masih
18 Giyai i kiyapakaokit o kinimbawataan ki Isa Al Masih. Si Mariyam a ina iyan na

matataalik a kapengaromaa on i Yosop. Ogaid na sii ko da iran pen kapakatepi na
kiyatokawan i Mariyam a miyaogat sekaniyan a nggolalan ko Soti a Roh.
19 Si Yosop a pengaroma on na maontol a mama, na kagiya di niyan kabaya o ba niyan
pakapekayaa si Mariyam ko hadapan o manga taw na piyasad iyan sa ginawa niyan a
makipembelag on sa masolen.
20 Ogaid na sii ko kapepamimikirana niyan sii na mipeyag rekaniyan so isa a malaikat o
Kadnan a miyakaokit sa taginepen. Pitero iyan a "Hey Yosop, wata o Daod, di ngka
keleken a kapengaromaa ngka ki Mariyam, ka so wata a inikaogat iyan na poon ko Soti a
Roh.
21 Pembawata sekaniyan sa mama, na betowi ngka sekaniyan sa Isa, ka sebeten iyan so
manga pagtaw niyan ko manga dosa iran."
22 Miyanggolaola ini langon kaan mitoman so pitero o Kadnan a nggolalan ko Nabi a:
23 “Keogat so raga na pembawata sa mama, na mbetowan iran sa Imanowil," a aya maana
niyan na "Sisii rektano so Allah."
24 Na kagiya makanaw si Yosop na tiyoman iyan so inisogo on o malaikat o Kadnan na
piyangaroma niyan si Mariyam.
25 Ogaid na da niyan den keromaa si Mariyam taman sa da niyan pen mimbawata so wata
a mama. Na bitowan den i Yosop sa Isa.
MATIYO 2
So manga Pamimitoon a poon sa Sebangan
Inimbawata si Isa sa siti a Bitlihim sa Yodiya sii ko kandadato i Hirod. Sa masa oto na
aden a manga pamimitoon a miyakaoma sa Yarosalim a poon sa sebangan.
2 Miyangingise siran a "Anda so gopen inimbawata a Solotan o manga Yahodi? Miyailay
ami so bitoon iyan ko kiyasebang iyan, na somiyong kami sii ka simbaan ami."
3 Kagiya maneg ai o Dato Hirod na miyasosa so pamikiran iyan taman ko langon a taw sa
Yarosalim.
4 Na piyakitawag iyan so langon o manga poporo a imam o manga Yahodi ago so manga
goro ko Kitab, na iniise iyan kiran o anda ipembawata so Al Masih.
5 Pitero iran on a "Sii sa siti a Bitlihim sa Yodiya, ka giyai i inisorat o Nabi:
6'Seka, Bitlihim, sa inged a Yodah,

kena a ba ka lebi a mitatanan
sii ko manga ala a siti sa Yodah
ka pekapoon reka so isa a dato
a tegikor ko manga pagtaw aken a Israil.' "
7 So kiyanega sii i Hirod na piyakisogoan iyan so manga pamimitoon sa da a matao ron

na kiyatokawan iyan kiran so ponto a oras a kiyasebang o bitoon.
8 Na piyakasong iyan siran sa Bitlihim a tig iyan "Ikano roo den na mbabanoga niyo
piyapiya angkoto a wata. Amay ka matoon iyo na pakitokawi niyo raken kaan ako ron
mambo makasong, ka simbaan aken."
9 Oriyan o kiyapamakinega iran ko dato na lomiyalakaw siran. Na sii ko kapelalakaw iran
na so bitoon a miyailay iran ko kiyasebang iyan na moona kiran taman sa tomiyareg ko
kaporoan o walay a katatagoan ko wata.
10 Kagiya mailay iran so bitoon na tanto siran a miyababaya.
11 Somiyoled siran ko walay na miyailay iran so wata a ped iyan si Mariyam a ina iyan,
na miyamanodiyod siran ko wata ago sinimba iran sekaniyan. Na likaan iran so pontir
iran na bigan iran sa manga pamemegayan a bolawan, doka ago lana mamot a bebetowan
sa mira.
12 Oriyan iyan na komiyasoy siran ko inged iran a miyokit ko salakaw a lalan, ka
piyakaiktiyar siran o Kadnan a nggolalan ko taginepen sa di siran kesoy ki Hirod.
So Kiyapagapas sa Misir
13 Kagiya makalalakaw siran den na mipeyag ki Yosop so isa a malaikat o Kadnan a

miyakaokit sa taginepen, na tig iyan a "Mbowat ka na kowaa ngka so wata ago si ina iyan
na pagapas kano sa Misir. Tareg kano roo taman sa matero aken rekano a komasoy kano,
ka pembabanogen i Hirod so wata, ka mbonoon iyan."
14 Na mimbowat si Yosop na kinowa niyan so wata ago si ina iyan sangkoto den a
kagagawii, na somiyong siran sa Misir
15 A ron siran komiyaden taman ko kiyapatay i Hirod. Miyanggolaola ini a aya kinitoman
o pitero o Kadnan a nggolalan ko Nabi a "Tiyawag aken so wata aken sa ganat den sa
inged a Misir."
So Kiyapamonoa ko manga Wata
16 Kagiya masipat i Hirod a miyaakal sekaniyan o manga pamimitoon na tanto a

kiyararangitan. Na inisogo iyan a pemonoon so langon o manga wata a mama roo sa
Bitlihim ago so midadair on a manga darpa a miyakadowa ragon a idad iyan ago so da
pen madowa ragon, a mipepasod ai ko kiyatokawan iyan ko manga pamimitoon
makapantag ko masa a kiyasebang o bitoon.
17 Samaoto na minitoman den so pitero o Nabi Yaramiyas a:
18 “Aden a lagam a pekeneg roo sa Ramah

a dii ndidiyagaw ago tanto a mboboko;
si Rakil na ipenggoraok iyan so manga wata iyan,
na di kebaya o ba katayoi
ka miyamatay siran den."
So Kiyakasoy a poon sa Misir
19 Kagiya matay den si Hirod na mipeyag ki Yosop so malaikat o Kadnan roo sa Misir a
miyakaokit sa taginepen,
20 Na tig iyan a "Mbowat ka na kowaa ngka so wata ago si ina iyan na kasoy kano sa
inged a Israil, ka miyatay den so manga taw a miyanamar sa kambonoa iran ko wata."
21 Na mimbowat si Yosop na kinowa niyan so wata ago si ina iyan na komiyasoy siran sa
inged a Israil.
22 Ogaid na kagiya maneg iyan a si Arkilaos na aya den Dato sa Yodiya a minisambi ki
Hirod a ama iyan na miyalek si Yosop o ba roo baling. Na sabap sa piyakaiktiyar
sekaniyan a nggolalan ko taginepen na somiyong ko probinsiya a Galili
23 Na sii siran komiyaden ko siti a bebetowan sa Nasarit. Giyanan i kinitoman o pitero o
manga nabi a "Mbetowan sekaniyan sa taw sa Nasarit."
MATIYO 3
So Kapepangosiyat i Yahiya a Pananalawat
Sangkoto a manga gawii na miyakagemaw si Yahiya a Pananalawat a dii mangosiyat roo

ko mitataog a kaden sa Yodiya
2 A ipepangosiyat iyan a "Talikodi niyo so manga dosa niyo, ka miyakarani den so
Ndatoan o Allah!"
3 Si Yahiya i miyaaloy o Nabi Isayas isako teroon iyan a
"Aden a pepananalo roo ko mitataog a kaden:

'Tiyagara niyo so lalan para ko Kadnan;
pakatitowa niyo so manga lalan a pagokitan iyan!' "
4 So nditaren i Yahiya na pimbaalan a bombol a onta, na sesambitan sekaniyan sa kobal.

Aya pangenengken iyan na manga tarapan ago gola a teneb.
5 Pepamanong on so manga taw a poon sa Yarosalim, ago sa dalem a inged a Yodiya, ago
poon ko manga darpa a midadair ko lawasaig a Yordan.
6 Di ran dii teobaten so manga dosa iran, na pepanalawatan iyan siran roo ko lawasaig a
Yordan.
7 Ogaid na kagiya mailay i Yahiya a madakel a manga Parisi ago manga Sadosi a
pepamanong on a pemakisalawat na pitero iyan kiran a "Hey sekano a manga nipay,
antawaa i miyakalalang rekano sa kapalagowi niyo ko kapendadaneg o Allah a magaan
den mitalingoma? 8 Alina niyo so manga olaola niyo kaan mailay o ba niyo katalikodi so
manga dosa niyo.
9 Na di niyo pipikira i ba niyo kapalagowi so kandanega rekano sabap sa manga
mbawataan kano o Ibrahim. Ka teroon ko rekano a apiya angkai a manga ator na kebaloy
o Kadnan a manga mbawataan o Ibrahim.
10 Mititiyagar den so patok a ipeta ko manga kayo taman ko manga bekaw niyan. Oman i
kayo a di magonga sa mapiya na petaan na ipelebad ko apoy.
11 “Ipepanalawat aken rekano so ig sabap ko kapepanalikodi niyo ko manga dosa niyo.
Ogaid na so pekaoma a telondog raken na lebi a mala i gees a di saken, na apiya so manga
tinilas iyan na kena a ba ako mapapatot a magawid on. Ipenalawat iyan rekano so Soti a
Roh ago apoy.
12 Perambiten iyan so nigo a ipemalid iyan piyapiya ko ilaw. Penimoon iyan so
malimegas on ko taliyong, ogaid na totongen iyan so okap ko apoy a di den kepareng."
So Kiyasalawati ki Isa
13 Sa masa oto na inawaan i Isa a Galili na somiyong sa lawasaig a Yordan ka

pekisalawat ki Yahiya.
14 Ogaid na tipengan somapar i Yahiya a tig iyan a "Aya patot na saken i pekisalawat
reka, na ino ai a seka baden i somiyong raken?"
15 Somimbag si Isa a "Nggolalanen ka den ai imanto, ka giyai i patot a katomana ta ko
langon o ipapaliyogat o Allah." Na miniyog si Yahiya.
16 Sii den ko kiyasalawati ki Isa na mimbaton sekaniyan ko lawasaig. Sarta den a
kiyalekaan a kasorgaan, na miyailay niyan so Roh o Allah a petena a datar o marapatik na
tomiyana rekaniyan.
17 Na miyakapoon a sowara sa kasorgaan a tig iyan a "Giyanan so pekebabayaan ko a
Wata aken a tanto aken a ikasosoat."
MATIYO 4
So Kiyatepengi o Iblis ki Isa
Oriyan iyan na inagak si Isa o Roh roo ko mitataog a kaden kaan katepengi o Iblis.
2 Da a ba niyan miyakan ko miyakapat polo ka kadaondaw ago kagagawii, na oriyan oto
na riyaot a ongosongos.
3 Na miyakaoma rekaniyan so Iblis a tepeng on, na tig iyan a "O Wata ka o Allah na
sogoon ka sangkai a manga ator a mbabaloy a paan."
4 Somimbag si Isa a "Misosorat ko Kitab a 'Kena bo a ba aya ipekeoyag o taw na so paan,
ka so oman i katero a pepekapoon ko ngari o Allah.' "
5 Na inowit sekaniyan o Iblis roo sa Yarosalim a so Soti a Siti na piyakatindeg iyan ko
poroporo o Timplo na pitero iyan on a
6 “O Wata ka o Allah na petiyolog ka roo sa baba, ka misosorat ko Kitab a
'Sogoon iyan so manga malaikat iyan

sa kapagipata iran reka;
papaladen ka o manga lima iran
kaan di kisosong so ai ngka ko ator.' "
7 Na pitero rekaniyan i Isa a "Misosorat mambo ko Kitab a 'Di ngka tepengi so Kadnan a
Tohan ka.' "
8 Na inowit sekaniyan peman o Iblis roo ko tanto a maporo a palaw na piyakiilay niyan
on so langon a ndatoan ko doniya ago so manga kakawasaan on,
9 Na pitero o Iblis a "O sodiyodi ago simbaan ako ngka na imbegay aken reka ini langon."
10 Pitero on i Isa a "Awa ka den Iblis! Ka misosorat ko Kitab a 'So Kadnan a Tohan ka i
simbaa ngka, na sekaniyan bo i pangongonotani ngka!' "
11 Na inawaan o Iblis si Isa na sarta a aden a miyamakaoma on a manga malaikat na
piyanalagadan iran.
Inepoonan i Isa so Galebek iyan sa Galili
12 Kagiya maneg i Isa a miyakalaboso si Yahiya na komiyasoy sekaniyan sa Galili.

13 Inawaan iyan a Nasarit na roo miyaling sa Kapirnaom a matatago ko kilid a Ranaw a
Galili sii ko masasakop a Sibolon ago Naptali.
14 Giyanan i kinitoman o pitero o Nabi Isayas a
15 “Giya inged a Sibolon ago inged a Naptali

sii tampar sa ragat ko sabala a lawasaig a Yordan
roo sa Galili a babalingan o kena a ba manga Yahodi --
16 So manga taw a kibabaling sa maliboteng
na miyamakailay sa tanto a masindaw,
na siran oto a kipagiinged ko along o kapatay
na piyanga lilindawan o sindaw."
17 Ipoon roo na dii mangosiyat si Isa a di niyan dii teroon a "Panalikodi niyo so manga
dosa niyo, ka miyakarani den so Ndatoan o Allah."
Piyanawag i Isa so Paganay a manga Sokbat iyan
18 Sii ko kapelalakaw i Isa ko kilid a Ranaw a Galili na miyailay niyan so dowa kataw a
magari a si Simon a bebetowan sa Pidro ago so pagari niyan a si Andriyo. Pepamiyala
siran sa ranaw, ka manga panginginseda siran.
19 Pitero kiran i Isa a "Song kano sii na onot kano raken, ka mbalowin ko sekano a
pepamangowa ko manga taw."
20 Na sarta den a inawaan iran so manga biyala iran na miyonot siran on.
21 Tomiyaros sekaniyan lomalakaw na miyailay niyan so ped pen a magari a si Santiyago
ago si Yahiya a manga wata i Sibidi. Sisii siran ko awang a ped iran so ama iran a
pepangoripan iran so manga poket iran. Tiyawag siran i Isa
22 Na sarta a inawaan iran so awang ago so ama iran na miyonot siran on.
Piyamakapiya i Isa so Pepanga sasakit

23 Miyagenebeneb si Isa ko dalem a inged a Galili a pepangendao sii ko manga sinagoga
o manga Yahodi ago pepakalangkapen iyan so Mapiya a Totol makapantag ko Ndatoan o
Allah. Pepamakapiyaan iyan pen so manga taw a pepanga sasakit a apiya antonaa i
paniyakit iran o di na gedamen.
24 Lomiyangkap so totol mipantag rekaniyan sa dalem a inged a Siriya, na pepangowiten
rekaniyan o manga taw so langon a pepanga sasakit a mbarambarang den i paniyakit, a so
kikararasay, so kisosookan a saitan, so manga pendalikaanen, ago so kikapaparalais, na
piyamakapiya niyan siran.
25 Na tanto a madakel a taw a pepamanondog rekaniyan a poon sa Galili, sa Dikapolis, sa
Yarosalim, sa Yodiya, ago so manga inged sa sabala a lawasaig a Yordan.
MATIYO 5
So Kiyapangosiyat i Isa sii ko Bobongan
Kagiya mailay i Isa angkoto a madakel a taw na tomiyakedeg ko bobongan na miyontod

roo. Mitimotimo on so manga sokbat iyan
2 Na piyangendao niyan siran a tig iyan a
3 “Rarakmatan so manga miskin a pepamagamal,

ka rek iran so Ndatoan o Allah.
4 Rarakmatan so dii mamakamboko,
ka pekapiyaan bo so manga ginawa iran.
5 Rarakmatan so dii mangalimbabaan
ka mapekewali iran so doniya.
6 Rarakmatan so siran oto a ipekeor ago ipekewaw iran so kaontol,
ka pekaosogen siran on bo.
7 Rarakmatan so manga makapediin.
ka ikepedi siran mambo.
8 Rarakmatan so manga popoti i poso,
ka keilay iran so Allah.
9 Rarakmatan so siran oto a mananamar sa kapakalilintad o manga taw,
ka mbetowan siran sa manga wata o Allah.
10 Rarakmatan so siran oto a masasatro sabap ko kaontol iran,
ka rek iran so Ndatoan o Allah.
11 “Rarakmatan kano igira a piyagongatongat kano ago siyatro o manga taw a di ran dii
matero so langon a mbarambarang a marata a di benar makapantag rekano sabap raken.
12 Pakapipiyaa niyo a ginawa niyo na ba kano den pekebabaya, ka mala a balas a
ititiyagar rekano roo sa kasorgaan. Datar oto mambo a kiyasatroa iran ko manga nabi a
miyanga oonaan iyo a miyaginetaw.
Timos ago Solo
13 “Sekano i timos o manga manosiya. Ogaid na o so timos na kadaan sa taam na

andamanaya i kapekaasala ko taam iyan? Kiyadaan den ai sa bali, na baden pelebaden ago
pendapodapoan o manga taw.
14 “Sekano i solo o doniya. So siti a miyabangon ko bobongan na di den mapegma.
15 Na da a taw a tomentem sa palitaan a ba niyan tongkopa, ka imbatog iyan sa poro kaan
makalindaw ko langon a sisii ko walay.
16 Datar oto mambo na pakalindawa niyo so sindaw niyo ko kamamasaan o manga taw
kaan iran mailay so manga pipiya a galebek iyo, na go iran bo mapodi so Ama iyo a
ndodo sa kasorgaan.
So Kitomanen ko Kitab
17 “Di niyo pipikira i ba aya inisong aken sii na so kapekadaa ko ko Kitab o Mosa o di na
so manga Sorat o manga nabi. Kena a ba ako sii somiyong sa ba aken ai pekadaa, ka
sabap sa an aken mitoman.
18 Ka teroon ko rekano a mataan den a taman sa aden a langit ago lopa, na di den keda so
apiya satiman bo a batang o di na titik o Kitab taman sa palaya den mitoman.
19 Kagiya ka maoto na apiya antawaa i pesogok ko apiya miyakaitoito bo a sogoan
angkai a Kitab ago ipepangendao niyan ko ped so kasogoka iran on, na mbetowan
sekaniyan sa lebi a mababa ko Ndatoan o Allah. Ogaid na apiya antawaa i petoman
sangkai a manga sogoan ago ipepangendao niyan ko ped so katomana iran on, na
mbetowan sekaniyan sa mala ko Ndatoan o Allah.
20 Teroon ko rekano a o so kapetomana niyo ko kabaya o Allah na kena a ba mapiya a di
so kapetomana on o manga goro ko Kitab ago so manga Parisi, na di kano den pekasoled
ko Ndatoan o Allah.
So Rarangit
21 “Katawan iyo a miyatero gowani ko manga taw a 'Di ka pemono; na apiya antawaa i
makapemono na kewit ko pangongokom.'
22 Ogaid na teroon ko rekano imanto a oman i isa a pekerarangitan iyan so pagari niyan
na kewit ko pangongokom; na apiya antawaa i pembasa ko pagari niyan sa 'Da a oked ka,'
na kewit ko lebi a maporo a kokoman; na apiya antawaa i petero sa 'Lalong ka,' na
kiyarong ko kilebaden rekaniyan ko apoy sa kanarakaan.
23 “Sabap san na amay ka isepaat ka so pamemegayan ka ko Allah sii ko aparan na o
katademi ngka roo a aden a iperido reka o pagari ngka
24 Na begaken ka pasin so pamemegayan ka sii ko danga o aparan, na song ka ko pagari
ngka. Daan ka on a pakingginawai, na go ka bo kasoy ko aparan na sapaaten ka on den so
pamemegayan ka ko Allah.
So Kapasada ko Rido iyo ago so Pendimanda reka
25 “O aden a pendimanda reka na pakipeliwanaga ka rekaniyan nggagaan sii ko kapesong

iyo ko dii kokoman. Ka amay ka makaoma kano roo sa kapekadarpaa niyan reka ko
pangongokom, na o ba ka baden palada o pangongokom ko polis, na kekalaboso ka den.
26 Teroon ko reka a mataan den a di ka on den makaliyo taman sa kabayadan ka sa
tarotop so molta reka.
So Kasebo
27 “Katawan iyo a miyatero gowani a 'Di ka pesebo.'

28 Ogaid na teroon ko rekano imanto a apiya antawaa i pegilay ko babay a sarta a
kagegedian on, na miyakasebo on den sii ko poso iyan.
29 Kagiya ka maoto na o so kawanan a mata ngka na pekewitwit ka niyan ko
kapakandosa, na sowata ngka on na lebaden ka. Ka tomo reka a kadaan so lawas ka sa isa
a anggaota a di sa ba milebad ko kanarakaan so langon o lawas ka.
30 Na o so kawanan a lima ngka na pekewitwit ka niyan ko kapakandosa, na potola ngka
on na lebaden ka. Ka tomo reka a kadaan ka sa sabala a lima a di sa ba milebad sa
kanarakaan so langon o lawas ka.
So Kapakimbelag
31 “Miyatero pen gowani a 'Apiya antawaa i makipembelag ko karoma niyan a babay na

begi niyan sa sorat a kapasadan ko kambelag.'
32 Ogaid na teroon ko rekano imanto a apiya antawaa i makipembelag ko karoma niyan a
babay, asar a da makasebo so babay, na mapakapesina niyan so babay o makipangaroma
peroman. Na apiya antawaa i pengaroma ko babay a inimbelag na makapesina mambo.
Manga Sapa
33 “Katawan iyo pen a miyatero gowani ko manga taw a 'Di ngka mbarobaa so samaya a
ka, ka penggolalanen ka baden so inisemaya a ka ko Kadnan.'
34 Ogaid na teroon ko rekano imanto a di kano den pesepa. Di ngka pesepaan so
kasorgaan, ka aya korsi o Allah.
35 Di ngka pesepaan so doniya, ka aya niyan dadapoan. Di ngka pesepaan a Yarosalim,
ka giyai i siti o Kababantogan a Dato.
36 Di ngka pesepaan so olo ngka, ka di ngka mapekapoti o di na mapekaitem apiya so
sawaro bo ko bok ka.
37 Igira a aden a pemataanan iyo na aya niyo bo teroa na 'Oway,' o di na 'Di,' ka o
kalawani pen angkai a peteroon iyo na sii oto poon ko Iblis.
So Kasaop
38 “Katawan iyo a miyatero gowani a 'So mata na mbayadan a mata, na so ngipen na

mbayadan a ngipen.'
39 Ogaid na teroon ko rekano imanto a di ngka pagatowi so marata a taw. O aden a tepi
reka ko kawanan a bies ka, na pakitepin ka on pen so diwang.
40 O aden a pendimanda reka kaan iyan maagaw so bangkala a ka na began ka on pen so
gerab ka.
41 O tegela o sondaro sa kaawidi ngka ko awid iyan sa isa ka kilomitro, na awidi ngka sa
dowa ka kilomitro.
42 Begi ngka so pepangni reka, na di ngka telikodi so kebaya reka motang.
So Kababayai ko manga Ridoay
43 “Katawan iyo a miyatero gowani a 'Kababayai ngka so siringan ka na kagowaden ka so

ridoay ngka.'
44 Ogaid na teroon ko rekano imanto a kababayai niyo so manga ridoay niyo na
pangangarapanen iyo so manga taw a pesetro rekano.
45 Ka giyanan i kapepakiilain iyo sa manga wata kano o Ama iyo a ndodoo sa kasorgaan.
Ka pepakasindaon iyan so alongan ko manga rarata a taw ago so manga pipiya, na
pembegan iyan mambo sa oran so manga oontol ago so di maontol.
46 O aya niyo bo pekebabayaan na so manga taw a pekebabaya rekano na ino kano roo
kebalasi? Apiya so manga panenekat sa bowis na di san dii nggolaola.
47 Na o aya niyo bo peselamen na so manga pagari niyo na antonaa i di niyo dii
nggolaolaan a lawan ko makakakalilid a olaola? Apiya so manga kapir na di san dii
nggolaola.
48 Kagiya ka maoto na tarotopa niyo so paparangayan iyo a datar o katatarotop o
paparangayan o Ama iyo a ndodoo sa kasorgaan.
MATIYO 6
So Kapesidka
"Iktiyari niyo o ba niyo nggolaolaa so ipapaliyogat o agama niyo ko kamamasaan o

manga taw a kapakiilailain kiran bo. O giyanan i di niyo dii nggolaolaan na da den a
kibalas rekano o Ama iyo a ndodoo sa kasorgaan.
2 Kagiya ka maoto na igira a pembegan iyo so manga miskin na di ngka pepakalangkapa
sa ba ipemogiyong a datar o pesowaan o manga makiilailain sii ko manga sinagoga ago
manga lalan kaan siran pekebantog o manga taw. Teroon ko rekano a mataan den a roo bo
taman so imbalas kiran.
3 Ka igira a pembegan ka so miskin, na di ngka pekitokawi ko diwang a lima ngka o
antonaa i dii nggolaolaan o kawanan a lima ngka
4 Kaan mapagema so kapembegay ngka. Na so Ama a ka a pegilay ko dii manggolaola a
pageemaan na mbalasan ka niyan.
So Ndao i Isa makapantag ko Kapangangarapan
5 “Igira a pepangangarapan kano na di niyo perawata so dii mamagomanta a pekebabaya

siran tomindeg sii ko manga sinagoga ago sii ko manga mbalakaan o manga lalan kaan
siran mailay o manga taw. Teroon ko rekano a mataan den a roo bo taman so imbalas
kiran.
6 Ogaid na amay ka pengangarapan ka na soled ka ko rowang ka na lekebi ngka so
pintoan, na ron ka pangangarapan ko Ama a ka a di keilay. Na so Ama a ka a pegilay ko
dii manggolaola sa masolen na mbalasan ka niyan.
7 Sii ko kapepangangarapan iyo na di kano pemberak a datar o dii nggolaolaan o manga
kapir. Ka pipikiren iran a pagamponen siran sabap ko di ran dii katero sa madakel.
8 Di niyo siran seyani, ka katawan den o Ama iyo o antonaa i kailangan iyo sii ko da niyo
ron pen kapamangni.
9 “Giyai i ibarat o kapangangarapan iyo:
'Hey Ama ami a sesan sa kasorgaan,

kapagadatan so soti a ingaran ka.
10 Makatalingoma so Ndatoan ka.
Matoman so kabaya a ka sii sa doniya
a datar o kapetomana on san sa kasorgaan.
11 Began ka rekami imanto so pangenengken
a kailangan ami sangkai a gawii.
12 Rilaan ka rekami so manga sala ami
a datar mambo o kiyarilai ami ko miyamakasela rekami.
13 Di kami ngka pekigawiin
ka sabeta kami ngka baden ko Iblis.'
14 “Ka o rilai niyo so miyamakasela rekano, na perilaan kano mambo o Ama iyo a
ndodoo sa kasorgaan.
15 Ogaid na o di niyo siran rilai, na so Ama iyo na di niyan mambo perilaan so manga
sala iyo.
So Kapowasa
16 “Igira a di kano dii powasa na di niyo pekiilain a makaririmeng a paras iyo a datar o
pesowaan o dii mamagomanta. Peparas siran a mararata a ginawa iran kaan mailay o ped
a taw a di siran dii powasa. Teroon ko rekano a mataan den a roo bo taman so imbalas
kiran.
17 Ogaid na igira a di ka dii powasa na panagop ka ago panalday
18 Kaan da a matao ron o ba ka dii powasa, ka so bo so Ama a ka a di keilay i matao ron.
Na so Ama a ka a pegilay ko dii manggolaola sa masolen na mbalasan ka niyan.
Kakawasaan sa Kasorgaan
19 “Di kano penimo sa kakawasaan sii sa doniya a ron den binasaa o manga bobok ago
tangis, ago ron soledi o manga tekew sa kapenekewa iran on.
20 Ka panimo kano baden sa kakawasaan roo sa kasorgaan a di ron kebinasa o manga
bobok ago tangis, ago di kesoledan o manga tekew sa kapenekewa iran on.
21 Ka apiya anda matatago so manga kakawasaan ka, na ndodon mambo so masisingayo
o poso o ka.
So Solo o Lawas
22 “So mata na aya solo o lawas. O mapiya so mata ngka na kaliliwanagan so langon o
lawas ka.
23 Ogaid na o marata so mata ngka na kalilibotengan so langon o lawas ka. Kagiya ka
maoto na o so kaliwanag a madadalem reka na mbaloy a maliboteng na tanto den ai a
maliboteng!
24 “Da a taw a ba makipengongoripen ko dowa a kadnan. Aya sabap iyan na ikegowad
iyan so isa on ago kebabayaan iyan so ikadowa, o di na petomanen iyan so isa ago
pesodiin iyan so ikadowa. Di kepakay o ba makaperengan so kapakipengongoripen iyo ko
Kadnan ago so tamok.
Di Kano Pegawid a Akal
25 “Kagiya ka maoto na teroon ko rekano a di niyo pegawiden a akal so kaoyagoyag iyo o

antonaa i kekan iyo o di na keinom, aya pen so lawas iyo o antonaa i mapenditar iyo.
Ba di mala i kipantag so kaoyagoyag a di so manga pangenengken? Na ba di mala i
kipantag so lawas a di so manga nditaren?
26 Ilaya niyo so manga papanok. Kena a ba siran peseod aya pen o ba peperagon, na da a
ba iran peteliyongen. Apiya oto na pepageperen siran o Ama iyo a ndodoo sa kasorgaan.
Ba kano di lebi a mala i kipantag a di so manga papanok?
27 Antawaa rekano i ba niyan mapekalendo a omor iyan sa apiya isa bo ka oras ko
kipegawiden iyan on a akal?
28 “Na ino niyo pegawiden a akal so manga nditaren? Pandapati niyo o andamanaya i
kapemangeto o manga obarobar ko pangomaan. Kena a ba siran dii nggagalebek aya pen
o ba pepangaol sa penditaren iran.
29 Ogaid na teroon ko rekano a apiya so Solaiman a tanto a mala i kakawasaan na da a
nditaren iyan a ba datar sa kapiya i paras o isa sangkai a manga obarobar.
30 Kagiya dii ndiditaran o Allah sa datar ai so paotanotan a sisii den imanto ogaid na
kebisolan bo mapita, na ba di taralebi pen a penditaran kano niyan. Sayana kano a maito i
paratiyaya!
31 “Kagiya ka maoto na di niyo pakaaawida a akal iyo a di niyo dii teroon a 'Antonaa i
kekan ami?' o di na 'Antonaa i keinom ami?' o di na 'Antonaa i mapenditar ami?
32 Ka so langon taman ai na pananamaran komowa o manga kapir, na katawan den o
Ama iyo a ndodoo sa kasorgaan a kailangan iyo angkai a manga nganin.
33 Ogaid na onai niyo managontaman so Ndatoan iyan ago so katomana niyo ko kabaya
iyan na go rekano bo mambo kibegay angkai a manga nganin.
34 Kagiya ka maoto na di niyo pegawiden a akal o antonaa i mapenggolaola mapita, ka
aden pen a pekatalingoma on a ipegawid a akal iyo. Kiyatangkaan rekano so kipegawiden
a akal ko manga kamaregenan ko pekepantagan on a gawii.
MATIYO 7
So Kakokoma ko Ped
"Di niyo kokoma so ped, ka o ba kano mambo makokom.

2 Ka kokomen kano a datar o kapekokoma niyo ko ped, na saden sa ipekokom iyo kiran
na aya rekano den mambo kikokom.
3 “Ino ngka dii sagipaa so bayanek ko mata o pagari ngka a di ngka bo tatagoon sa
ginawa so troso sa mata ngka?
4 Ino ngka peteroa ko pagari ngka a 'Pakikowaan ka raken so bayanek sa mata ngka,'
amay ka aden bo a troso a matatago sa mata ngka?
5 Seka a dii magomanta! Daan ka a kowaa so troso sa mata ngka na go ka bo makailay
piyapiya sa kakekowaa ngka ko bayanek ko mata o pagari ngka.
6 “Di niyo mbegi sa soti a nganin so manga aso, ka o ba kano iran baden atowi ago
pangekeba. Na di niyo pagitogen so manga pirlas iyo ko danga o manga baboy, ka ba iran
den ai pelomega.
Pangni kano, Pangiloba kano, Panonotok kano
7 “Pepamangni kano baden, ka mbegan kano bo. Mbabanog kano, ka pekatoon kano.
Pepanonotok kano ko pintoan, ka pelekaan rekano.
8 Ka mbegan so oman i isa a pepamangni, na pekatoon so dii mbabanog, na pelekaan so
pintoan ko pepanonotok.
9 “Ba aden a isa rekano a mbegan iyan sa ator so wata iyan o pepamangni sa paan?
10 O di na mbegan ka bes sa nipay o pepamangni sa seda?
11 Kena! Apiya pen manga baradosa kano na matao kano bo megay sa manga pipiya a
pamemegayan ko manga wata iyo. Sabap san na so Ama iyo a ndodoo sa kasorgaan na
taralebi pen a pembegan iyan sa manga pipiya a nganin so pepamangni ron!
12 “Apiya antonaa i kabaya iyo a penggolaolaan rekano o ped na aya niyo kiran mambo
nggolaolaa, ka giyai i kiyaompongan ko manga ndao o Kitab o Mosa ago so manga Sorat
o manga nabi.
So Masimpit ago so Mabelang a Pintoan
13 “Okit kano ko masimpit a gimowa, ka mabelang so gimowa sa kanarakaan ago

madaya so lalan a isong on, na madakel a pegokit on.
14 Ogaid na maito so gimowa ago masimpit so lalan a isong ko kaoyagoyag, na maito a
taw i pepakatoon sii.
So Kayo ago so Onga niyan
15 “Iktiyari niyo so di benar a pepekapayag kon ko lalag o Allah, ka song siran rekano a
pepanaliba sa manga bilibili, ogaid na datar siran sa paparangayan o manga wawaraw a
manga iila a aso.
16 Aya niyo kiran kikilala na so ipegonga o manga galebek iran. Ibarat na so baleteken a
pamomolan na di magonga sa obas, na so soroken a kayo na di magonga sa korma.
17 Oman i mapiya a kayo na pepamangonga sa mapiya, ogaid na so kayo a pekesakit na
pegonga sa marata.
18 So mapiya a kayo na di pekaonga sa marata, na so kayo a pekesakit na di pekaonga sa
mapiya.
19 Oman i kayo a di magonga sa mapiya na petaan ago ipagitagon ko apoy.
20 Sabap san na aya niyo kikilala ko pepamangendao ko di benar na so ipegonga o manga
galebek iran.
21 “Kena a ba so oman i isa a dii tero sa kadnan ako niyan na pekasoled ko Ndatoan o
Allah, ka so bo so petoman ko kabaya o Ama aken a ndodoo sa kasorgaan.
22 Sii ko gawii a kapengokom na madakel a penggiraw raken sa 'Kadnan, Kadnan, sii ko
ingaran ka na piyayag ami so manga lalag o Kadnan. Sii ko ingaran ka na piyakaliyo ami
so manga saitan ko kisosookan, na madakel a manga ala i kabatowa a galebek a
miyanggolaola ami sii ko ingaran ka.'
23 Na peteroon ko kiran a 'Di aken sekano katawan. Awa kano raken a dii nggolaola sa
marata!'
So Maongangen ago so Lalong a dii Mbalay
24 “Oman i isa a pepakaneg sangkai a manga katero aken ago petomanen iyan na datar o
maongangen a mama a biyangon iyan so walay niyan sii ko lakongan.
25 Miyoran sa mala, na pimbagiyawan so manga lawasaig, na somiyamber so mabager a
ndo ago diyasengan iyan angkoto a walay, ogaid na da maoteng ka miyapagonay sii ko
lakongan.
26 “Ogaid na oman i pepakaneg sangkai a manga katero aken ago di niyan tomanen na
datar o lalong a mama a biyangon iyan so walay niyan sii ko peted.
27 Miyoran sa mala na pimbagiyawan so manga lawasaig, na somiyamber so mabager a
ndo ago diyasengan iyan angkoto a walay na miyaoteng, na miyageba den sa tarotop!"
28 Kagiya makapasad mangosiyat si Isa ko madakel a taw na inipamemesa iran so manga

ndao niyan,
29 Ka oonotan a kapaar so kapepangendao niyan, ka kena a ba datar o manga goro iran ko
Kitab.
MATIYO 8
Piyakapiya i Isa so Mama a Pekebowa
Sii ko kapetondagay niyan ko bobongan na tanto a madakel a taw a miyamanondog on.

2 Na miyobay rekaniyan so sakataw a mama a pekebowa na somiyodiyod ko hadapan
iyan ago tig iyan a "Sir, o kebaya ka, na mapekapiya ako ngka."
3 Kiyawa sekaniyan i Isa na siko iyan a tig iyan a "Kebaya ako. Miyakapiya ka den!"
Sakotika na miyada so bowa niyan
4 Na pitero on i Isa a "Iktiyari ngka o ba ngka ini matero ko apiya antawaa, ka ba ka den
song ko imam na pakiilain ka on a lawas ka. Na sapaaten ka so soasoat a inisogo o Mosa
a mipemataan ko manga taw a miyada so bowa ngka."
Piyakabager i Isa so Oripen o Olowan a Sondaro
5 Kagiya makaoma si Isa sa Kapirnaom na somiyong on so isa a Iromanen a olowan o

manga sondaro. Miyangangampedian ki Isa
6 A tig iyan a "Sir, so oripen aken na makaiiga sa walay aken a mapaparalais so lawas
iyan, na tanto a mararasay."
7 Tig i Isa a "Song ako ron ka pekapiyaan ko sekaniyan."
8 Na somimbag so olowan a "Naino Sir, ka kena a ba ako mapapatot sa kambolos ka ko
walay aken. Ogaid na teroa ngka baden a pekapiya so oripen aken ka pekapiya den.
9 Ka saken na mama a mapenonogo o manga poporo aken na aden a mapenonogo aken
mambo a manga sondaro. Amay ka teroon aken ko isa on a 'Lalakaw ka,' na melalakaw,
na amay ka teroon aken ko ped a 'Song ka sii,' na song raken, na amay ka teroon aken ko
oripen aken a 'Nggolaolaa ngka ini,' na penggolaolaan iyan."
10 So kiyanega sii i Isa na miyamemesa, na pitero iyan ko manga taw a pepamanondog
rekaniyan a "Teroon ko rekano a mataan den a da den a miyatoon aken ko manga taw sa
Israil a ba datar ai sa paratiyaya.
11 Teroon ko rekano a madakel a pemakaoma a poon sa sebangan ago sa sedepan a
makipegatoang ko Ibrahim, Iskak, ago so Yakob sii ko Ndatoan sa Kasorgaan.
12 Ogaid na siran oto a pitiyagaran sangkoto a Ndatoan na ipelebad sa liyo roo ko
maliboteng a ron siran pendidiyagaw a di ran dii pakakitebaan a ngipen iran.' "
13 Na pitero i Isa ko olowan a "Baling ka, ka kitoman den so paparatiyayaan ka." Na
miyakapiya so oripen sangkoto den a oras.
Madakel a Miyapamakapiya i Isa
14 Somiyong si Isa ko walay i Pidro na miyailay niyan roo so panogangan a babay i Pidro
a makaiiga a dii keyaw.
15 Tiyayongan i Isa a lima niyan na miyada on so mayaw. Na mimbowat sekaniyan na
pisekasakaw niyan si Isa.
16 Kagiya perimon den na madakel a kisosookan a saitan a piyangowit rekaniyan o
manga taw. Piyamakaliyo niyan so manga saitan a nggolalan ko katero bo, na
piyamakapiya niyan so langon a pepanga sasakit.
17 Giyanan i kinitomanen ko pitero o Nabi Isayas a
'Kinowa niyan so manga gedamen tano

na inawidan iyan so manga paniyakit tano.'
So manga Taw a Kebaya Mamangonot ki Isa
18 Kagiya mailay i Isa so madakel a taw a lomilibet on na siyogo iyan so manga sokbat
iyan sa ripag siran ko ranaw.
19 Na aden a isa a goro ko Kitab a miyobay rekaniyan a tig iyan a "Goro, magonot ako
reka apiya anda ka song."
20 Somimbag si Isa a "So manga tingkalong na aden a manga lekowa iran, ago so manga
papanok na aden a manga salag iran, ogaid na so Wata o Manosiya na da den a darpa a
keigaan iyan."
21 Pitero rekaniyan o isa a sokbat a "Kadnan, peroa ngka a mbaling ako a daan, ka
ipelebeng aken so ama aken."
22 Tig i Isa a "Pegonot ka raken, na awai ngka so miyamatay, ka kilebeng iran so
miyamatay kiran."
Siyaparan i Isa so Sobosobo
23 Mida si Isa ko awang na miyonot on so manga sokbat iyan.

24 Na tekaw den somiyamber so mabager a sobosobo sii ko ranaw, na pesengkapen o
manga begel so awang, ogaid na totorogen si Isa.
25 Miyobay ron so manga sokbat na piyokaw iran a tig iran a "Kadnan, sabeta kami ngka!
Pekigaled tano!"
26 Pitero kiran i Isa a "Ino kano tanto a pekelek? Sayana kano a maito i paratiyaya!" Na
mimbowat sekaniyan na siyaparan iyan so ndo ago so manga begel, na tanto den a
lomingen.
27 Miyamemesa siran a tig iran a "Sasoson ai a mama? Ka apiya so ndo ago so manga
begel na petoman rekaniyan."
Piyakapiya i Isa so Dowa kataw a Sosookan a Saitan
28 Kagiya makaoma siran ko sabala a ranaw sa inged o manga Gadarin na inalaw si Isa o
dowa kataw a mama a sosookan a saitan. Miyakapoon siran ko manga pelebengan, na
kagiya tanto siran a piyakalekelek na da a ba pekaraw mokit sangkoto a lalan.
29 Sarta den a kominisek siran a tig iran a "Hey Wata o Allah, antonaa i pagangin ka
rekami? Ba ka sii somiyong sa kaperasaya ngka rekami sa da pen kaoma o miyatendo a
gawii?"
30 Na aden a talon a madakel a manga baboy a dii mangangan a malo kiran mawatan.
31 Na miyangangampedian ki Isa so manga saitan a tig iran a "O pakaliyowa kami ngka
na pakasooka kami ngka sangkoto a talon a manga baboy."
32 “Ikano kano roo den!" a tig i Isa. Na mililiyo siran ko manga mama na sarta a
miyamanook ko manga baboy. Na miyalalagoy nggagaan so langon o manga baboy ko
pampang na miyanga oolog ko ranaw na palaya siran den miyanga aled.
33 So kitatagikor ko manga baboy na miyamagapas siran ko siti na piyanotol iran roo so
langon angkai a miyaolaola ago so kiyaokitan o kisosookan a manga mama.
34 Sabap sii na mililiyo so langon a taw sangkoto a siti ka songowan iran si Isa. Na
kagiya mailay iran sekaniyan na piyangangampedian iran a mawa ko inged iran.
MATIYO 9
Piyakapiya i Isa so Taw a Mapaparalais so Lawas iyan
Mida si Isa ko awang na komiyasoy romipag ko ranaw, na miyakaoma sa inged iyan.

2 Kagiya tomepad sekaniyan na inowitan o manga taw sa mama a mapaparalais so lawas
iyan a miiga ko dalagan. Miyailay i Isa a aden a paratiyaya iran na pitero iyan ko
mapaparalais a mama a "Pakapipiyaa ngka a ginawa ngka, wata aken, ka kiyarilaan den so
manga dosa ngka."
3 Ndodoo so ped ko manga goro ko Kitab, na pitero iran ko manga ginawa iran a "Si aki
ini na pepagitowitoon iyan so Allah!"
4 Katawan i Isa so mapipikir iran na tig iyan a "Ino niyo pepamikira angkanan a marata?
5 Anda i malebod? Ba so kateroa sangkai a mama sa 'Kiyarilaan den so manga dosa
ngka,' o di na so kateroa on sa 'Mbowat ka na go ka lalakaw'?
6 Pekiilay aken rekano a so Wata o Manosiya na aden a kapaar iyan sii sa doniya sa
kaperilai ko manga dosa." Na giyoto a pitero iyan ko mapaparalais a mama a "Mbowat
ka. Awidi ngka so dalagan ka na baling ka."
7 Na mimbowat sekaniyan na miyaling.
8 Kagiya mailay ai o madakel a taw na miyanga aalek siran, na biyantog iran so Allah a
migay sangkanan a kaapar ko manosiya.
Tiyawag i Isa si Matiyo
9 Miyawa si Isa sangkoto a darpa na sii ko kapelalakaw niyan na miyailay niyan so isa a
panenekat sa bowis a aya ngaran iyan na si Matiyo a moontod ko darpa a pepanekatan ko
bowis. Pitero on i Isa a "Pegonot ka raken," na gomiyanat si Matiyo na miyonot on.
10 Sii ko kapekan i Isa roo ko walay i Matiyo na madakel a panenekat sa bowis ago
manga baradosa a miyakaoma a miyatoang siran ki Isa ago so manga sokbat iyan.
11 Kagiya mailay ai o manga Parisi na iniise iran ko manga sokbat iyan a "Ino dii
pakipamagatoang so goro niyo ko manga panenekat sa bowis ago manga baradosa?"
12 Miyaneg siran i Isa na somimbag sekaniyan a "So manga pipiya i lawas na di iran
kailangan so pamomolong, ka so bo so pepanga sasakit.
13 Lalakaw kano na paganada niyo o antonaa i maana angkai a kitab a 'Aya kabaya aken
na limo, a kena a ba so ipesepaat a manga korban.' Kena a ba ako sii somiyong sa
katewaga ko ko manga oontol, ka so manga baradosa."
So Pakaise makapantag ko Kapowasa
14 Oriyan oto na somiyong ki Isa so manga sokbat i Yahiya a Pananalawat na iniise iran
on a "Ino sekami ago so manga Parisi a dii powasa, na so manga sokbat ka na di
pepowasa?"
15 Pitero kiran i Isa a "So manga biyantowan ko kakewing na ba patot a makamboboko
sii ko kaaped kiran pen o mangangaroma? Kena, ogaid na pekaoma so manga gawii a
kebelag kiran so mangangaroma, na giyanan i kapepowasa iran.
16 “Da a taw a ba niyan tepii so miyaronot a nditaren sa bago a dinis. Ka amay ka
komengkeng so initapi on na baden kitaralo so kabeberat o nditaren.
17 So mambo so bago a arak na di tegoon ko miyaronot a pananagoay a kobal a ayam, ka
o manggolaola oto na kebensi so kobal, na keodod so arak ago kebinasa so pananagoay.
Kena, ka so bago a arak na sii tegoa ko bago a pananagoay, na palaya den kemboway."
So Miyatay a Bago a Taw ago so Babay a Tetalogedam
18 Sii ko di sii pen dii kateroa i Isa na aden a miyakaoma on a olowan a somiyodiyod ki
Isa, na tig iyan a "Gopen miyatay so wata aken a babay. Ogaid na onot ka raken na
dapeneten ka on a lima ngka, ka keoyag sekaniyan bo."
19 Na gomiyanat si Isa na miyonot siran on ago so manga sokbat iyan.
20 Na sarta den a so isa a babay a miyakasapolo ago dowa ragon a kaperogoi ron na
miyobay ko katatalikodan i Isa na siko iyan so sagayadan o kimon iyan.
21 Ka pitero iyan sa ginawa niyan a "Asar a maseko aken so nditaren iyan na pekapiya
ako den."
22 Dominingil si Isa na miyailay niyan so babay na tig iyan a "Pakapipiyaa ngka a ginawa
ngka, wata aken, ka so paratiyaya ngka na aya ngka inipakabager." Na sii den sa oras oto
na miyakapiya den angkoto a babay.
23 Miyakaoma si Isa ko walay o olowan na kagiya mailay niyan so dii mamanginsi ago so
madakel a taw a magogorigaw
24 Na tig iyan a "Liyo kano langon! Da matay so wata, ka totorogen baden." Na so
kiyanega iran sii na inikekala iran si Isa.
25 Kagiya mapakaliyo den so madakel a taw na somiyoled si Isa ko rowang o wata na
kiyapetan iyan sa lima, na mimbowat so wata.
26 Na so totol mipantag sii na lomiyangkap sangkoto a dalem a inged.
Piyakapiya i Isa so Bota ago so Amang
27 Miyawa roo si Isa na sii ko kapelalakaw niyan na petondog on so dowa kataw a bota a
mama a ipepelalis iran a "Kapediin kami ngka, Wata o Daod."
28 Kagiya somoled sekaniyan ko walay na miyobay rekaniyan so manga bota na iniise
kiran i Isa a "Ba niyo paratiyayaa a kegaga ko ai nggolaola?"
Tig iran a "Oway, Kadnan."
29 Na siko i Isa so manga mata iran a tig iyan a "Sabap ko paratiyaya niyo na ketoman so
kabaya iyo",
30 Na miyakailay siran den. Na inilalang kiran i Isa a "O ba niyo ai pakitokawi ko ped.
31 Ogaid na lomiyalakaw siran na ba iran den piyakalangkap so totol makapantag ki Isa
sangkoto a dalem a inged.
32 Kagiya maipos siran na aden a manga taw a miwit ki Isa sa mama a miyaamang sabap
sa sosookan a saitan.
33 Kagiya mapakaliyo i Isa so saitan na miyakatero angkoto a mama. Na miyamemesa so
manga taw a tig iran a "Da den a ba tano miyailay a datar ai sa inged a Israil."
34 Ogaid na pitero o manga Parisi a "Pepakaliyon iyan so manga saitan a nggolalan ko
kapaar o dato o manga saitan."
Inikapedi i Isa so Madakel a taw
35 Inipanagad i Isa so langon a mala maito a inged a pepamangendao sii ko manga

sinagoga iran ago pepakalangkapen iyan so Mapiya a Totol makapantag ko Ndatoan o
Allah. Pepamakapiyaan iyan pen so oman i pekesakit a apiya antonaa i paniyakit iran o di
na gedamen.
36 Kagiya mailay niyan so madakel a taw na tanto niyan siran a inikapedi, ka kareregenan
siran a da a ba on pekatabang a datar o manga bilibili a da a ba on tomatagikor.
37 Na pitero iyan ko manga sokbat iyan a "Madakel a peragonen, ogaid na maito so di ron
dii nggagalebek.
38 Sabap san na pangangarapan kano ko Kadnan a kirek ko peragonen; pangniya niyo ron
a pakasongen iyan roo so ped pen a gomagalebek a makaperagon on.
MATIYO 10
Pinili i Isa so Sapolo ago Dowa a manga Siyogo
Tinimo i Isa so sapolo ago dowa a manga sokbat iyan na bigan iyan siran sa kapaar sa
kapakaliyowa iran ko manga saitan ko kisosookan ago so kapakapiyaa iran ko oman i
pisosonan a gedamen ago paniyakit.
2 Giyai i manga ngaran o sapolo ago dowa a siyogo: paganay ron si Simon a bebetowan
sa Pidro ago so pagari niyan a si Andriyo, si Santiyago ago so pagari niyan a si Yahiya a
manga wata i Sibidi,
3 Si Pilipi ago si Bartolomiyo, si Tomas ago si Matiyo a panenekat sa bowis, si Santiyago
a wata i Alpayo, si Tadiyos,
4 Si Simon a mala i paninindeg, ago si Yodas Iskariyot a aya tominipo ki Isa.
Siyogo i Isa so manga Sokbat
5 Piyakalalakaw i Isa angkai a sapolo ago dowa na ininsaratan iyan siran a tig iyan a "Di
kano song ko kena a ba manga Yahodi, o di na sii ko apiya antonaa a inged o manga
Isamariyan.
6 Ka songowi niyo baden so manga taw sa Israil a miyanga dadadag a datar o manga
bilibili.
7 Sii ko kapelalakaw niyo na pakalangkapa niyo a 'Miyakarani den so Ndatoan o Allah.'
8 Pakapiyaa niyo so pepanga sasakit, pangoyaga niyo so miyamatay, pamakapiyaa niyo so
pepanga bobowa, na pamakaliyowa niyo so manga saitan ko kisosookan. Miyakatarima
kano a da a bayad iyan, na pepamemegay kano mambo a di kebayadan.
9 Di kano pagawid sa bolawan, pirak o di na apiya antonaa kowarta sii ko pitaka iyo.
10 Di kano pagawid sa pontir sii ko lalakaw niyo, o di na ilisan, o di na tinilas, o di na
teken. Ka so gomagalebek na patot a mbegan sa ikeoyag iyan.
11 “Igira a miyakaoma kano ko isa a inged a mala o di na maito na pangiloba kano roo sa
pagaadatan a taw, na ron kano den kaden taman sa kaawa iyo sangkoto a inged.
12 Amay ka soled kano ko walay na salama iyo.
13 O mapapatot so walay na begaken iyo ron so salam iyo a kalilintad. Ogaid na o di
mapapatot na bawia niyo so salam iyo.
14 O aden a walay o di na inged a di rekano terima ago di iran pemakinegen so manga
katero iyo, na popoga niyo so bayanek ko ai niyo amay ka magawa kano ron.
15 Teroon ko rekano a mataan den a sii ko alongan a kapengokom na lebi pen a makep so
kandanega ko inged a Sodom ago giya Gomorah a di so kandanega sa inged oto!
So Pekatalingoma a manga Kasatroan
16 “Pamakineg kano! Sogoon ko sekano a datar o manga bilibili sii ko look o manga
wawaraw a aso. Sabap san na pananggila kano a datar o manga nipay, ago pakaliwanaga
niyo so manga poso iyo a datar o manga marapatik.
17 Ogaid na iiktiyar kano, ka aden a manga taw a ndakep rekano a magowit rekano ko
kokoman, na pemadasan kano iran sii ko manga sinagoga iran.
18 Pemakadarpaan kano iran ko manga gobirnador ago manga dato sabap raken. Giyanan
i kakeparo niyo sa kapeseksii niyo raken ko hadapan iran ago sii ko kena a ba manga
Yahodi.
19 Ogaid na amay ka mawit kano iran roo na di niyo pagawiden a akal o antonaa i
peteroon iyo, o di na andamanaya i kapeteroa niyo ron. Ka sii sangkoto a oras na kipansir
rekano so mapetero iyo.
20 Ka kena ini a ba rekano pekapoon, ka so Roh o Ama iyo na pakipetero iyan rekano.
21 “Peladen o manga taw so tito iran a manga pagari kaan mabono, na datar oto mambo a
kapelada o manga ama ko manga wata iran. So manga wata na makiperidoay ko manga
lokes iran na pekipamono iran siran.
22 Ikegowad kano o langon a taw sabap raken, ogaid na so taw a pekatiger sa taman sa
kaposan na aya kesabet.
23 Amay ka pesatroon kano ko isa a inged na pagapas kano ko ped a inged. Ka teroon ko
rekano a mataan den a di niyo kepasad a kapepanadai niyo ko langon a inged sa Israil sa
di pen kapekaoma o Wata o Manosiya.
24 “Da a morit a ba lawan ko goro niyan ago da a oripen a ba lawan ko kadnan iyan.
25 Kasosokodan ko morit o kebaloy a datar o goro niyan, ago so oripen na kebaloy a datar
o kadnan iyan. O pembetowi o manga taw so olowan ko pamiliya sa Iblis na lebi pen a
marata so imbeto iran ko ped ko pamiliya!
Antawaa i Patot a Ikelek
26 “Di niyo keleken angkoto a manga taw. Ka oman i pageemaan na kipayag bo, na oman
i misosolen na ketokawan bo.
27 So di aken rekano dii teroon sii ko maliboteng, na teroa niyo bo sii ko maliwanag. Na
so ipepamagtonga ko tangila niyo, na pakalangkapa niyo a poon ko poro o manga walay.
28 Di niyo keleken so siran oto a pepamono ko lawas a di siran pekagaga mono ko
niyawa. Ka aya niyo kaleken na so Allah a pekagaga minasa ko niyawa ago so lawas roo
sa kanarakaan.
29 So dowa timan a kenti na ba di pepesaa sa salad a kowarta? Oway, ogaid na apiya so
satiman on na di keolog ko lopa o di katao o Ama iyo.
30 Na sekano peman na apiya so bok sa olo niyo na palaya den bibilangen.
31 Kagiya ka maoto na di kano pekelek, ka lebi kano a mala i bali a di so madakel a
kenti.
32 “Apiya antawaa i pepamataanan iyan ko hadapan o manga taw a rek aken sekaniyan,
na aya ko mambo pemataanan sii ko hadapan o Ama aken roo sa kasorgaan.
33 Na apiya antawaa i ipepelaw ako niyan ko hadapan o manga taw, na ipelaw aken
mambo ko hadapan o Ama aken a roo sa kasorgaan.
Kena a ba Kalilintad ka Pedang
34 “Di niyo pipikira i ba aya inisong aken sii na pagowitan ko sa kalilintad so doniya.
Kena a ba ako sii somiyong kaan ako ron makawit sa kalilintad, ka pedang.
35 Ka somiyong ako sii kaan aken mapakasorang so wata a mama ko ama iyan, ago so
mambo so wata a babay ko ina iyan, ago so pen so miyakamong a babay ko panogangan
iyan a babay.
36 Na aya kebaloy a soranga o taw na so manga ped ko pamiliya niyan.
37 “So taw a lebi pen a kapekebabayai niyan ko ama iyan o di na ina iyan a di saken na
kena a ba mapapatot a kaom aken. Na so taw a lebi pen a kapekebabayai niyan ko wata
iyan a mama o di na babay a di saken na kena a ba mapapatot a kaom aken.
38 Apiya antawaa i di niyan posain so kros iyan ago pegonot raken na kena a ba
mapapatot a kaom aken.
39 Apiya antawaa i pekekamal iyan so kaoyagoyag iyan na pelagaan iyan baden. Na apiya
antawaa i iperila iyan so kaoyagoyag iyan sabap raken na kekamal iyan.
Manga Imbalas
40 “So taw a terima rekano na saken i peterimaan iyan. Na so terima raken na so

somiyogo raken na aya niyan peterimaan.
41 So terima ko siyogo o Allah sabap ko kiyasogoa on na kibalas on so datar o kibalas ko
siyogo o Allah. Na so terima ko maontol a taw sabap ko kaontol iyan na kibalas on so
datar o kibalas ko maontol a taw.
42 Na apiya antawaa i megay sa apiya matag bo paginomen a matenggaw a ig ko isa
sangkai a mitatanan a manga kaom aken sabap sa kaom aken sekaniyan, na teroon ko
rekano a mataan den a kebalasan sekaniyan."
MATIYO 11
Si Isa ago si Yahiya a Pananalawat
Kagiya mapasad minsarat i Isa so sapolo ago dowa a sokbat iyan na inawaan iyan angkoto
a darpa na lomiyalakaw a pepangendao ago pepangosiyat sii ko midadair on a manga
inged.
2 Kagiya maneg i Yahiya a Pananalawat roo sa kalaboso so makapantag ko manga
galebek o Al Masih na piyakasong iyan ki Isa so ped ko manga sokbat iyan.
3 Na iniise iran ki Isa a "Ba seka so pitero i Yahiya a pekaoma, o di na ba aden a salakaw
a disomala a ba ami pen penayawa?"
4 Somimbag si Isa a "Kasoy kano ki Yahiya na panotola niyo ron so pepanga aneg iyo
ago pepanga iilay;
5 So manga bota na pepamakailay, so manga sadir na pepamakalalakaw, so pepanga
bobowa na pepamakapiyaan, so manga bengel na pepamakaneg, so miyamatay na
pepanga ooyag, ago pepakalangkapen so Mapiya a Totol ko manga miskin.
6 Rarakmatan so apiya antawaa i di den keda so paratiyaya niyan raken."
7 Sii ko kapekesoy o manga sokbat i Yahiya na pitero i Isa ko madakel a taw mipantag ki
Yahiya a "Sii ko kiyasong iyo ki Yahiya roo ko mitataog a kaden na antonaa i pipikiren
iyo a pagilain iyo? Ba so taw a lagid o gi a pekipipapipay o ndo?
8 Antonaa bes i siyongowan iyo roo a pagilain iyo? Ba so mama a ndiditar sa mapiya?
Kena. Siran oto a ndiditar sa mapiya na roo kibabaling ko manga torogan o dato!
9 Teroa niyo raken o antonaa bes i siyongowan iyo roo a pagilain. Ba nabi? Oway, na
teroon ko rekano a lawan sekaniyan pen ko nabi.
10 Sekaniyan na aya minisorat ko Kitab a:
'Sogoon ko so talasogoay aken a keona a di seka

a pekatiyagar ko lalan a pagokitan ka.'
11 “Teroon ko rekano a mataan den a so kalangolangon a manosiya na da a isa kiran bo a

ba lawan ki Yahiya a Pananalawat. Ogaid na so lebi a mitatanan a taw ko Ndatoan o
Allah na lawan rekaniyan pen.
12 Ipoon ko masa i Yahiya a Pananalawat taman imanto na matetegel a kapepakalaolada
ko Ndatoan o Allah, na so manga tetegel a taw na pembaasen iran a kapepekasoled iran
on.
13 Ka so langon a manga nabi ago so Kitab o Mosa na miyaalamat iran so makapantag sii
taman ko kiyapakaoma i Yahiya.
14 Na o kebayaan iyo ai tomarima na sekaniyan si Iliyas a inalamat iran a pekaoma.
15 So aden a tangila niyan na pamakineg baden!"
16 “Antonaa i keibaratan ko sangkai a manga taw a kapapantagan sangkai a masa? Datar
siran o manga wata a dii nggitagita sa padian a ipepelalis iran ko manga ped iran a
17'Mimboboniboniyan kami sa kakewing para rekano, na da kano sesayaw. Na
miyakamboko kami ko lalantangen, na da kano goraok.'
18 Kagiya makaoma si Yahiya na mipowasa ago da inom sa arak, na pitero o manga taw a
sosookan sekaniyan a saitan.
19 Ogaid na miyakaoma so Wata o Manosiya a pekan ago peginom, na di iran dii teroon a
'Ilaya niyo man angkai a bosaw ago tamereg, a ginawai o manga panenekat sa bowis ago
manga baradosa!' Ogaid na so ongangen na pekemataanan a ontol a nggolalan ko
pekeondasan o manga galebek iyan."
So manga Siti a da Pamaratiyaya
20 Na taros a pimbongetan i Isa so manga siti a ron iyan pinggolaola so kadakelan ko

manga ala i kabatowa a galebek iyan, ka da talikodi o manga taw ron so manga dosa iran.
21 Pitero iyan a "Kemorkaan kano a manga taw sa Korasin! Kemorkaan kano san sa
Bitsaida! Ka o so manga ala i kabatowa a galebek a miyanggolaola rekano san na sii
miyanggolaola sa Tiro ago sa Sidon, na so manga taw ron na miyatey den o kowan a
kiyatalikodan iran so manga dosa iran a somosolot siran sa sako ago pegombiyan iran a
olo iran.
22 Kagiya ka maoto na teroon ko rekano a sii ko gawii a kapengokom na lebi pen a
makep so kandanega ko manga taw sa Tiro ago sa Sidon a di so kandanega rekano.
23 Na sekano mambo san sa Kapirnaom, ba kano kipangkat taman sa kasorgaan? Kena,
ka sii kano kibaba taman sa kanarakaan. Ka o so manga ala i kabatowa a galebek a
miyanggolaola rekano san na sii miyanggolaola sa Sodom na sesaya pen o kowan imanto.
24 Na teroon ko rekano a sii ko alongan a kapengokom na makep a kandanega ko manga
taw sa Sodom a di so kandanega rekano."
So Kapakadeke o Kikadodokawan
25 Samaoto na pitero i Isa a "Hey Ama, a Kadnan o kasorgaan ago so doniya, pepodin ko
seka, ka so manga nganin a piyagma a ka ko manga oongangen ago so manga ala i katao
na piyayag ka ko da a manga peleng iyan.
26 Mataan den, Ama, a miyanggolaola ngka ini ka aya ngka kabaya ago inikasoat.
27 “So Ama aken na inisarig iyan raken so langon taman. Da a ba matao ko Wata a rowar
ko Ama, na da a ba matao ko Ama a rowar ko Wata ago so siran oto a kabaya o Wata a
peyagan iyan ko Ama.
28 “Sekano langon a dodokawan maawid ko mapened a poposain iyo na song kano raken,
ka pekadekeen ko sekano.
29 Sanganen iyo so kokoong aken na pakipangendao kano raken, ka makapediin ako ago
pepangalimbabaan, na pekadeke kano.
30 Ka so kokoong aken na malebod, na makep so pekiposai aken rekano."
MATIYO 12
So dii Mbayabaya ko Gawii a Idedeke
Miyakaisa a Gawii a Idedeke na pelalakaw si Isa a pegokit ko manga pangomaan.

Pepanga aaor so manga sokbat iyan na miyangowa siran ko manga saway o bantad na
piyangangan iran.
2 Kagiya mailay ai o manga Parisi na pitero iran ki Isa a "Ilaya ngka man, ka so manga
sokbat ka na di ran dii nggolaolaan so da sa Kitab i ba nggolaolaa ko Gawii a Idedeke."
3 Ogaid na pitero kiran i Isa a "Ba niyo da mabatiya so pinggolaola i Daod isako pepanga
aaor siran ago so manga kaom iyan?
4 Somiyoled sekaniyan ko Walay o Allah na komiyan sekaniyan ko paan a isasapaat ko
Allah, apiya da sa Kitab i ba niyan kana o di na so manga kaom iyan, ka so bo so manga
imam i mapaparo a koman on.
5 Na ba niyo da mabatiya ko Kitab o Mosa a sii ko oman Gawii a Idedeke na so manga
imam sii ko Timplo na pesogoken iran so kokoman o Gawii a Idedeke ko di ran on dii
kanggalebek, ogaid na kena a ba siran miyakasela?
6 Teroon ko rekano a sisii den so lawan pen ko Timplo.
7 O sabota niyo so maana angkai a kitab a 'Aya kabaya aken na limo, a kena a ba so
ipesepaat a manga korban, na di niyo kedaway so da a sala iyan.
8 Ka so Wata o Manosiya na aya dii mbayabaya ko Gawii a Idedeke."
So Mama a Mikempis a Lima niyan
9 Miyawa si Isa sangkoto a darpa na somiyoled ko isa a sinagoga iran,

10 Na aden a mama roo a kekampis a lima niyan. Kagiya kabaya o manga Parisi a
midimanda iran si Isa na iniise iran on a "Ba sisii ko Kitab so kapamolong sii ko Gawii a
Idedeke?"
11 Somimbag si Isa a "So apiya antawaa rekano a aden a isa bo a bilibili niyan a miyaolog
ko galebo sii ko Gawii a Idedeke, na ba niyan di kepeti ago kowaan iyan on?
12 Na lebi pen a mala i bali so taw a di so bilibili! Sabap san na sisii ko Kitab so dii
kanggolaolaa ko mapiya igira a Gawii a Idedeke."
13 Na pitero iyan ko mama a "Betera ngka a lima ngka," na biter iyan na miyakapiya den
a lima niyan a datar o sabala on.
14 Ogaid na miyawa roo so manga Parisi na miyagopakat siran o andamanaya i
kambonoa iran ki Isa.
So Miyapili a Oripen o Allah

15 Katawan ai i Isa na inawaan iyan a inged oto na madakel a taw a miyamanondog
rekaniyan. Piyamakapiyaan iyan langon so pepanga sasakit
16 Na liyalangan iyan siran sa o ba iran pakitokawi o antawaa sekaniyan.
17 Giyanan i kinitoman o pitero o Nabi Isayas a
18 “Kataya so oripen aken a pinili aken,

a so pekebabayaan ko a ikasosoat aken.
Pekatanaan ko rekaniyan so Roh aken,
na pekalangkapen iyan so matito a kokoman ko manga nasiyon.
19 Di sekaniyan makipepapawala o di na pelalis,
aya pen o ba aden a pekaneg ko lagam iyan sii ko manga lalan.
20 So miyagomek a sesed na di niyan potolen,
aya pen o ba niyan parenga so pepemereperek a solo
taman sa di niyan mapakadaag so matito a kokoman.
21 Na so ingaran iyan na aya serigan o langon o manga nasiyon."
Si Isa ago so Dato o manga Saitan
22 Na inowitan o manga taw si Isa sa mama a miyabota ago miyaamang sabap sa

sosookan a saitan. Piyakapiya sekaniyan i Isa na miyakatero ago miyakailay.
23 Na miyamemesa so langon o manga taw na iniise iran a "Sekaniyan nda so Wata o
Daod?"
24 Kagiya maneg ai o manga Parisi na pitero iran a "Aya bo a kapepakaliyowa niyan ko
manga saitan ko kisosookan na nggolalan ko kapaar o Iblis a dato o manga saitan."
25 Katawan i Isa so mapipikir iran na pitero iyan kiran a "Oman i isa ka ndatoan a
maooparik a pepamagonaya tidawa so manga taw ron na kebinasa. Na oman i inged o di
na isa ka walay a mbabagiay a mamagonaya sosopaka so manga taw ron na di kemboway.
26 O pepakaliyowa o Iblis so manga saitan na makasosopaka so manga sabaad ko
ndatoan iyan, na andamanaya i kakemboway niyan?
27 O pepakaliyowa ko ko manga saitan a nggolalan ko kapaar o Iblis, na antonaa i kapaar
a dii inggolalan o manga kaom iyo ko kapepakaliyowa iran on? Kagiya ka maoto na so di
ran dii nggolaolaan na aya poriba sa ribat kano.
28 Ogaid na o pepakaliyowa ko ko manga saitan a nggolalan ko Roh o Allah na
miyakatalingoma rekano den so Ndatoan o Allah.
29 “Andamanaya i kapekasoled o taw ko walay o mabager a mama a pemanekew ko
manga tamok iyan o di niyan daan a mapatong so mabager a mama? Ka giyanan bo i
kakepanekewa niyan ko tamok iyan.
30 “So kena a ba raken tomatampil na makasosopak raken. Na so di raken magogop
makipetimo na baden makapembelabelag.
31 Sabap sii na teroon ko rekano a kirila ko manga taw so oman i dosa iran ago so
miyatero iran a ipepakaito. Ogaid na so kiyapagitowitoa ko Soti a Roh na di den kerilaan.
32 Apiya antawaa i makapetero sa sopak ko Wata o Manosiya na kerilaan. Ogaid na apiya
antawaa i makapetero sa sopak ko Soti a Roh na di den perilaan sangkai a masa o di na sa
maori a alongan.
33 “O ibilang iyo a mapiya so onga o kayo na mapiya oto a kayo, na o ibilang iyo a
marata so onga o kayo na marata oto a kayo. Ka so onga o kayo na aya on kitendo.
34 Sekano a manga nipay, andamanaya i kapetero iyo sa manga pipiya a nganin a manga
rarata kano? Ka saden sa mipepeno ko poso na aya mambo dii teroon o ngari.
35 So mapiya a taw na pepakaliyon iyan so manga pipiya a nganin a poon ko mapiya a
matatago ko poso iyan. Na so marata a taw na pepakaliyon iyan so marata a poon ko
marata a matatago ko poso iyan.
36 “Teroon ko rekano a oman i basa a da a lalaw niyan a miyatero o manga taw na
isomariya kiran sii ko gawii a kapengokom.
37 Ka so manga katero o ka na aya reka ikokom, o da a sala a ka, o di na miyakasela."
So Pangni ko Piyakamemesa a Nanao
38 Na so ped ko manga goro ko Kitab ago manga Parisi na pitero iran ki Isa a "Goro,
kabaya ami a pakailain kami ngka sa piyakamemesa a nanao."
39 Ogaid na pitero iyan kiran a "So manga rarata a taw a tomiyalikod ko Allah na aya
pepamangni sa piyakamemesa a nanao! Ogaid na da a nanao a ba kiran imbegay a rowar
ko piyakamemesa a nanao a miyaolaola o Nabi Yonas.
40 Ka madadalem si Yonas ko tiyan o miyakaselasela a seda ko miyakatelo ka
kadadaondaw ago miyakatelo ka kagagawii, na datar oto mambo a so Wata o Manosiya
na kedalem ko lembak o doniya ko makatelo ka kadadaondaw ago makatelo ka
kagagawii.
41 Sii ko gawii a kapengokom na pemangembowat so manga taw sa Ninibah na selaan
iran so manga taw a kapapantagan sangkai a masa, ka tiyalikodan o manga taw sa
Ninibah so manga dosa iran sii ko kiyanega iran ko ipepangosiyat o Yonas. Na imanto na
sisii den so lawan pen ki Yonas.
42 Sii ko gawii a kapengokom na pembangon so Bai sa Pagabagatan na selaan iyan so
kapapantagan ai a manga taw, ka lomiyalakaw sekaniyan a poon sa tanto a mawatan a
inged kaan makapamakineg ko ongangen i Solaiman. Na imanto na sisii den so lawan pen
ki Solaiman!
So Kiyakasoy o Saitan
43 “Amay ka lomiyo so isa a saitan ko lawas o taw na pepegenebeneb ko kamara a manga

darpa a dii mbabanog sa kedekean iyan, ogaid na di on pekatoon.
44 Na giyoto a peteroon iyan a 'Kesoy ako baden ko andang a babalingan aken a inawaan
ko.' Na amay ka makakasoy ron na keoma niyan ai a da kabalingi, lompiyo ago
matatanor.
45 Mandiyadi na melalakaw peroman na pekionot sa pito a ped a saitan a lebi pen a
marata a di sekaniyan, na pemanoled siran a mbeling roo. Na lebi pen a marata so a
mapembetad angkoto a taw a di isako paganay. Giyai mambo i keokitan o kapapantagan a
manga rarata a taw."
So Ina i Isa ago so manga Pagari niyan
46 Sii ko di pen dii katero i Isa ko madakel a taw na miyakaoma si ina iyan ago so manga
pagari niyan. Kititindeg siran roo sa liyo a kebayaan iran sekaniyan mimbitiyarai.
47 Pitero on o sakataw a mama a "Si ina a ka ago so manga pagari ngka na kititindeg sa
liyo a kebaya siran reka makimbitiyarai."
48 Somimbag si Isa a "Antawaa i ina aken ago antawaa i manga pagari aken?"
49 Na initoro iyan so manga sokbat iyan a tig iyan a "Katii so ina aken ago manga pagari
aken.
50 Ka apiya antawaa i dii nggolaola sa kabaya o Ama aken a ndodoo sa kasorgaan na aya
ken pagari a mama, pagari a babay ago ina aken."
MATIYO 13
So Bayambayanan makapantag ko Peseod
Sii sangkoto a gawii na lominiyo si Isa ko walay na somiyong ko kilid a ranaw na

miyontod roo.
2 Tanto a madakel a manga taw a mitimotimo on, na sabap sii na miyageda sekaniyan ko
isa a awang na miyontod on, na roo kititindeg so langon o madakel a taw ko ipameted ko
kilid a ranaw.
3 Madakel a pitero iyan kiran a miyakaokit sa bayambayanan. Tig iyan a "Somiyong so
taribasok ko lopa iyan ka seod.
4 Sii ko kipepiriken iyan ko oniin na sii minisogat so ped on ko lalan, na miyamakaoma
so manga papanok na piyanoka iran ai.
5 So ped ko oniin na sii minisogat ko saliwaton a lopa, na magaan a kiyalonaw niyan ka
kena a ba madalem a bote on.
6 Ogaid na kagiya somebang so alongan na kiyarantian so manga pamomolan, na
miyanga lalayon ai ka kagiya da mamakambekaw piyapiya.
7 So ped pen ko oniin na sii minisogat ko soroken a lopa, na miyamangeto so manga
sorok na tiyanongan iyan so manga pamomolan.
8 Ogaid na so sabagi ko oniin na sii minisogat ko masibokar a lopa na miyamangeto. So
ped on na miyamangonga sa mbabagatos, so ped na ndenempolo, ago so pen so ped na
tetelopolo.
9 So aden a tangila niyan na pamakineg baden!"
So Antap o manga Bayambayanan
10 Miyobay ki Isa so manga sokbat na iniise iran a "Ino a so di ngka dii teroon ko manga
taw na pepakaokiten ka ko manga bayambayanan?"
11 Somimbag si Isa a "Miyaparo rekano so kaketokawi niyo ko manga pageemaan
makapantag ko Ndatoan o Allah, ogaid na kena ini a ba kiran miyaparo.
12 Ka apiya antawaa i aden a rek iyan na mbegan pen, na kitaralo so rek iyan. Ogaid na so
da a rek iyan na apiya so maito bo a rek iyan na kowaan on.
13 Giyai i sabap a pepakaokiten ko ko manga bayambayanan so di aken kiran dii teroon,
ka kagiya
'Apiya pen pepangilailay siran na di siran pemakailay,
na apiya pen pepamakineg siran na di siran pemakaneg
o di na pemakasabot.'
14 Sii kiran den minitoman so miyaalamat o Nabi Isayas a tig iyan a
'Pepamakineg kano ago pepamakineg kano peparoman

ogaid na di kano den pekasabot;
na pepangilailay kano ago pepangilailay kano peparoman
ogaid na di kano den pekakilala.
15 Ka giyangkai a manga taw na miyamakategas a olo iran,
na inolen iran a manga tangila iran,
ago pinideng iran a manga mata iran;
ka o di giyoto na mamakailay so manga mata iran,
makaaaneg so manga tangila iran,
ago makasasabot so manga poso iran
na makapeteklid siran kaan aken mapakapiya.'
16 “Ogaid na sekano peman na rarakmatan kano ka pepakailay so manga mata niyo ago
pepakaneg so manga tangila niyo.
17 Teroon ko rekano a mataan den a madakel a manga nabi ago manga oontol a taw a
inikadali iran a kailaya iran ko pekeilay niyo ogaid na da iran mailay, ago so kakenega
iran ko pepamakinegen iyo ogaid na da iran maneg."
So Osayan ko Bayambayanan makapantag ko Peseod
18 “Na pamakinega niyo so kapagosaya ko bayambayanan ko peseod.

19 Igira a aden a pepakaneg ko katero makapantag ko Ndatoan o Allah a di niyan bo
seboten, na pekaoma so Iblis na pagagaon iyan so katero a inisaod ko poso iyan. Giyanan
so oniin a minipirik ko lalan.
20 So oniin a minipirik ko saliwaton a lopa na aya ibarat o taw a miyakaneg ko katero na
sarta a tiyarima iyan sa kapekebabaya.
21 Ogaid na da ini makambekaw ko poso iyan, na di sekaniyan tetas. Ka amay ka
pekatalingoma so simoket o di na kasatroan sabap ko katero, na sarta a telikodan iyan.
22 So oniin a minipirik ko soroken a otan na aya ibarat o taw a miyakaneg ko katero,
ogaid na so manga iaawid a akal iyan makapantag ko kapepaginetaw niyan, ago so
kababaya ko manga tamok, na pekatanong ko katero na di pekaonga.
23 So oniin a minipirik ko masibokar a lopa na aya ibarat o taw a miyakaneg ko katero
ago miyakasabot on. Na magonga sekaniyan sa mbabagatos, o di na ndenempolo, o di na
tetelopolo."
So Bayambayanan makapantag ko Marata a Otan
24 Piyanotol kiran i Isa so ped a bayambayanan a: "So Ndatoan o Allah na kiibarat ko

mama a somiyaod sa mapiya a oniin sii ko lopa iyan.
25 Ogaid na sii ko katotoroga kiran langon na somiyong on so ridoay niyan na somiyaod
on sa oniin a marata a otan a minisembor ko bantad, na miyalagoy.
26 Kagiya makalonaw so bantad ago mipoon den monga, na romitok mambo so otan.
27 “So manga talasogoay o taribasok na somiyong on a tig iran a 'Sir, ba ngka da saoden
so mapiya a oniin ko lopa a ka? Na anda miyakapoon so marata a otan?'
28 “ 'Aden a ridoay tano a minggolaola sii.' a inisembag iyan.
"Na iniise o manga talasogoay a 'Ba ngka kabaya a pamadoten ami so manga otan?'
29 “Tig iyan a 'Di, ka sii ko kapepamadota niyo ko otan na o ba niyo baden mirakes on so
bantad.
30 Pakaperengana niyo pasin meto so otan ago so bantad taman sa kaperagona on, ka
teroon ko bo ko peraragon a 'Onai niyo madot so manga otan na bekesa niyo ago totonga
niyo, na go niyo bo panimoa so bantad na tagoa niyo ko taliyong aken.' "
So Bayambayanan makapantag ko Oniin a Mostard

oniin a mostard a piyamola o mama ko lopa iyan.
32 Lebi ini a maito a oniin ko langon a oniin, ogaid na sii ko kiyato iyan na lebi a mala ko
langon a pamomolan, ka pembaloy a kayo, na peselasalagan o manga papanok so manga
sapak iyan."
So Bayambayanan makapantag ko Tapay

tapay a inisaog o babay ko telo ka asada a tapong taman sa palaya den miyakakembang."
So dii kinggolalanen i Isa ko manga Bayambayanan
34 Langon ai a dii teroon i Isa ko madakel a taw na piyakaokit iyan ko manga

bayambayanan, ka da den a ba niyan kiran pitero o ba di makaookit sa bayambayanan.
35 Giyanan i kinitoman o pitero o nabi a
"Ipenggolalan aken so manga bayambayanan sii ko di aken dii katero;

iperopa aken so manga pageemaan ipoon ko kiyaadena ko doniya."
So Osayan o Bayambayanan makapantag ko Marata a Otan
36 Oriyan oto na inawaan i Isa so madakel a taw na somiyoled sa walay. Miyobay ron so
manga sokbat iyan a tig iran a "Osaya ngka rekami so bayambayanan ko marata a otan a
inisaod ko lopa."
37 Na pitero iyan kiran a "So somiyaod sa mapiya a oniin na aya den so Wata o
Manosiya.
38 So lopa na aya den so doniya. So mapiya a oniin na giyoto so manga taw a dii ndatoan
o Allah. So marata a otan na giyoto so manga taw a dii ndatoan o Iblis.
39 So ridoay a somiyaod sa otan na aya den so Iblis. So kaperagon na giyoto so kaposan
angkai a masa, na so panggagarab on na giyoto so manga malaikat.
40 “So kiyapamadota ko manga otan a tiyotong ko apoy, na datar ai so kesowasowa ko
kaposan angkai a masa.
41 So Wata o Manosiya na sogoon iyan so manga malaikat iyan na penimoon iran a poon
ko Ndatoan iyan so langon a pekesabapan ko dosa ago so dii nggolaola sa marata.
42 Ipelebad siran o manga malaikat ko pekerab a apoy a roo siran pendidiyagaw a di ran
dii pakakitebaan a ngipen iran sabap ko kararasay iran.
43 Sa masa oto na pemakasindaw so manga oontol a datar o alongan roo ko Ndatoan o
Ama iran. So aden a tangila niyan na pamakineg baden!
So Bayambayanan makapantag ko Tamok a Inigadong
44 “So Ndatoan o Allah na kiibarat ko tamok a inigadong ko lopa. Miyasalak a miyatoon

ai o sakataw a mama, na tiyambonan iyan peroman. Kagiya tanto a miyababaya na
lomiyalakaw na pipesa niyan so langon taman iyan na piyamasa niyan angkoto a lopa.
So Bayambayanan makapantag ko Pirlas
45 “So peman so Ndatoan o Allah na kiibarat ko padagang a dii mbanog sa manga pipiya
a pirlas.
46 Kagiya matoon iyan so isa a tanto a mala i bali a pirlas, na lomiyalakaw na pipesa
niyan so langon taman iyan na piyamasa niyan angkoto a pirlas.
So Bayambayanan makapantag ko Biyala
47 “So Ndatoan o Allah na kiibarat pen ko biyala a inisisir ko ranaw a miyakakowa ko

langon a pitibarangan a seda.
48 Kagiya mapeno na giyamit o manga panginginseda ko ipameted. Miyontod siran na
piyanago iran so manga pipiya a seda ko manga reban, ogaid na inilelebad iran so da a
bali niyan on.
49 Kiibarat ai ko keolaola sii ko kaposan angkai a masa. Song sii so manga malaikat na
mbelagen iran so manga rarata a taw ko manga oontol,
50 Na ipelebad iran so manga rarata a taw roo ko pekerab a apoy a ron siran
pendidiyagaw a di ran dii pakakitebaan a ngipen iran sabap ko kararasay ran."
So Bago ago so Andang a manga Nganin
51 Iniise kiran i Isa a "Siyabot iyo langon angkai a manga bayambayanan?"

Tig iran a "Oway."
52 Na pitero iyan kiran a "Kagiya ka maoto na oman i goro ko Kitab a miyapangendao ko
makapantag ko Ndatoan o Allah na datar o kiwalay a ipeliyo niyan so bago ago so andang
a manga nganin a poon ko rowang a petegoan ko manga tamok iyan."
Da Tarimaa si Isa sa Nasarit

53 Kagiya mapasad manotol i Isa angkai a manga bayambayanan na inawaan iyan
angkoto a inged
54 Na komiyasoy ko inged iyan. Piyangendao niyan so manga taw sii ko sinagoga iran, na
miyamemesa siran a tig iran a "Anda miyakowa a mama ini angkai a ongangen ago
kabatowa sa kapenggolaolaa niyan ko manga ala a galebek?
55 Ba kena a sekaniyan so wata o panday sa kayo? Ba kena a si ina iyan so babay a
bebetowan sa Mariyam? Ba di pembetowan si ina iyan sa Mariyam? Ba kena a si
Santiyago, si Yosop, si Simon ago si Yodas na manga pagari niyan?
56 Ba kena a sii rektano man mababaling so langon a pagari niyan a babay? Anda ini
miyakowa langon angkai a mama?"
57 Na da iran tarimaa si Isa.
Ogaid na pitero kiran i Isa a "So nabi na seselaan o langon o manga taw a rowar ko
manga taw ko inged iyan ago sii ko walay niyan."
58 Na kena a ba madakel a manga ala i kabatowa a galebek a miyanggolaola niyan roo
sabap ko da iran kaparatiyaya.
MATIYO 14
So Kiyapatay i Yahiya a Pananalawat
Sa masa oto na si Hirod a dato sa Galili na miyaneg iyan so manga totol makapantag ki
Isa.
2 Na pitero iyan ko manga sanasanaan iyan a "Sekaniyan den si Yahiya a Pananalawat a
miyaoyag a poon ko miyamatay! Giyanan i sabap a aden a kabatowa iyan sa kanggolaola
niyan sa piyakamemesa a manga galebek."
3 Ka da pen ai matey na piyakidakep i Hirod si Yahiya na piyatong iyan ago kiyalaboso
niyan sabap ki Hirodiyas a karoma o pagari niyan a si Pilipi,
4 Ka kagiya lalayon dii teroon i Yahiya ki Hirod a "Sombang reka o ba ngka pangaromaa
so ipag ka."
5 Kabaya i Hirod a mbonoon iyan si Yahiya, ogaid na ipekelek iyan so madakel a taw, ka
tatarimaan iran a nabi sekaniyan.
6 Sii ko gawii a kiyaselaselaa ko kinimbawataan ki Hirod, na so wata i Hirodiyas a babay
na miseyaw ko hadapan o manga biyantowan. Na kagiya tanto oto a inikasoat i Hirod
7 Na tomiyopa sekaniyan ko raga a rakes a misepa sa imbegay niyan on so apiya antonaa i
pengnin iyan.
8 Sa da pen ai kanggolaola na so ina o raga na iniinsarat iyan on o antonaa i patot a
pengnin iyan, na tig o raga ki Hirod a "Began ka raken sii so olo i Yahiya a Pananalawat a
tatangelen sa talam."
9 So kiyanega sii o Dato na mikerata a ginawa niyan, ogaid na sabap ko sapa iyan ko
hadapan o manga banto, na inisogo iyan a imbegay rekaniyan so piyangni niyan,
10 Na piyakipotolan iyan si Yahiya sa olo roo sa kalaboso.
11 Miyawit roo so olo niyan a tatangelen sa talam na minibegay ko raga, na inowit iyan ki
ina iyan.
12 Na miyakaoma so manga sokbat i Yahiya na kinowa iran so lawas iyan na inilebeng
iran. Oriyan oto na siyongowan iran si Isa na piyanotol iran on so miyanggolaola.
Piyakakan i Isa so Lima nggibo a Taw
13 Kagiya maneg i Isa angkoto a totol na miyawa sekaniyan roo a meeda ko awang, na
somiyong ko matatanaw a darpa. Ogaid na kiyatokawan ai o madakel a taw na
miyamanondog siran on a pepelalalag a miyamakapoon ko manga pagingedingedan.
14 Sii ko kiyatepad i Isa ko awang na miyailay niyan so miyakadakedakel a taw, na tanto
niyan siran a inikapedi, na piyamakapiyaan iyan so pepanga sasakit kiran.
15 Kagiya magabi den na miyobay ron so manga sokbat iyan a tig iran a "Matatanaw ai a
darpa na magaan den makaliboteng. Pakalalakawa ngka so madakel a taw kaan siran
makasong ko manga inged ago makapamasa sa kekan iran."
16 Pitero kiran i Isa a "Di den kailangan a melalakaw siran. Sekano den i pamegay kiran
sa kekan iran."
17 “Aya bo a pangenengken a sisii rekami na lima timan a paan ago dowa timan a seda,"
a inisembag iran.
18 Na pitero i Isa a "Wita niyo raken."
19 Na pitero iyan ko madakel a taw a ontod siran ko otan. Kinowa niyan so lima timan a
paan ago dowa timan a seda na lomiyangag sa langit, na miyanalamat. Piyangopak iyan so
manga paan na inibegay niyan ko manga sokbat, na inipamagana iran ko madakel a taw.
20 Komiyan siran langon na miyanga oosog. Na piyanimo o manga sokbat so miyasama
iran na minipeno ko sapolo ago dowa a reban.
21 Lima nggibo a kadakel o manga mama a komiyan a di ron ped so manga babay ago
manga wata.
Pelalakaw si Isa ko Liyawaw o Ig
22 Oriyan oto na piyakada i Isa so manga sokbat ko awang na piyakaona niyan siran ko
sabala a ranaw, ka pekabalingen iyan so madakel a taw.
23 Kagiya mapakabaling iyan siran na tomiyakedeg sekaniyan ko bobongan a da a ped
iyan, ka pengangarapan. Kagiya magagawii den na ndodoo den si Isa,
24 Ogaid na so awang na sisii pen sa laod a dii kosokoson o manga begel, ka
masosonsang iran so ndo.
25 Kagiya magaan den pekelibabas, na siyono siran i Isa a pelalakaw ko liyawaw o
ranaw.
26 Kagiya mailay sekaniyan o manga sokbat a pelalakaw ko liyawaw o ranaw na
miyabengang siran a tig iran a "Arowak oto!" na miyakakisek siran sa kiyalek iran.
27 Ogaid na sarta a pitero kiran i Isa a "Pakapipiyaa niyo a ginawa niyo, ka saken bo! Di
kano pekelek!"
28 Na gominiraw si Pidro a "Kadnan, o seka na sogoa ko ngka a song ako reka san ko
liyawaw o ig."
29 “Song ka sii," a tig i Isa.
Na tomipad si Pidro ko awang na lomiyalakaw ko liyawaw o ig a pesong ki Isa.
30 Ogaid na so kiyainengkaa niyan ko mabager a ndo na miyalek sekaniyan, na sarta a
pekigaled. Inilalis iyan a "Sabeta ko ngka, Kadnan!"
31 Na magaan so magaan na kiyawa sekaniyan i Isa na kiyapetan iyan a tig iyan a "Sayana
ka a maito i paratiyaya! Ino ka pendowadowa?"
32 Na kagiya makada siran ko awang na lomingen so ndo.
33 So manga sokbat a ndodoo ko awang na sominimba ki Isa a tig iran a "Mataan a seka
den so Wata o Allah!"
Piyamakapiyaan i Isa so Pepanga sasakit sa Ginasarit
34 Kagiya makaripag siran ko ranaw na domiyongko siran sa inged a Ginasarit.

35 Kagiya makilala si Isa o manga taw sangkoto a darpa na piyakalangkap iran so
kiyapakaoma niyan ko langon a midadair on a manga a inged. Na piyangowit iran
rekaniyan so langon a pepanga sasakit
36 Na piyamangni iran on a giya bo a kasekoa iran ko sagayadan o kimon iyan. Na so
langon a miyakaseko on na miyamakapiya.
MATIYO 15
So manga Taritib o manga Apo
So ped ko manga Parisi ago manga goro ko Kitab na somiyong ki Isa a poon sa Yarosalim
na iniise iran on a
2 “Ino pesogok so manga sokbat ka ko taritib a initanan rektano o manga apo tano? Ka di
iran pagonaban a lima iran ko osto a okit ko di iran pen kaken."
3 Somimbag si Isa a "Na ino niyo pesogoka so sogoan o Allah kaan aya matoman na so
taritib iyo?
4 Ka inisogo o Allah a 'Pagadati ngka so ama a ka ago so ina a ka,' ago 'Apiya antawaa i
ndaora ko ama iyan o di na ina iyan na kebono.'
5 Ogaid na aya di niyo dii teroon na o teroa o taw ko ama iyan o di na ina a 'Saden sa rek
aken a kepakay a kitabang aken reka na minisenggay den a rek o Allah,'
6 Na di rekaniyan den paliyogat a kapagogopi niyan ki ama iyan o di na ina iyan. Sangkai
a okit na pepakadaan iyo so kipantag o katero o Allah kaan so taritib iyo na aya matoman.
7 Sekano a dii mamagomanta! Benar so miyaalamat o Isayas makapantag rekano:
8'Giyangkai a manga taw na seselaan ako iran a sii bo ko manga modol iran
ogaid na mawatan raken so manga poso iran.
9 Ilang baden a kapesimbaa iran raken,
na aya ipepamangendao iran a kitab kon o Allah
na matag baden manga kokoman o manosiya.' "
So Pepekasebo ko Taw
10 Tiyalowan i Isa so madakel a taw a somong siran on na pitero iyan kiran a "Pamakineg
kano na sabota niyo ai.
11 Kena a ba so pepekasoled ko ngari o taw i ba aya on pekasebo, ka so pepekaliyo ko
ngari iyan na aya on pekasebo."
12 Na miyobay ki Isa so manga sokbat na iniise iran on a "Katawan ka a inotegan so
manga Parisi sabap ko pitero o ka?"
13 Somimbag si Isa a "Oman i pamomolan a da pamolaa o Ama aken a ndodoo sa
kasorgaan na mbedoten.
14 Di niyo siran pesegipaa. Manga bota siran a nakoda, na o pegagaka o bota so isa a bota
na palaya siran keolog ko kakar."
15 Na gominiraw si Pidro a "Pagosaya ngka rekami so bayambayanan."
16 Na iniise kiran i Isa a "Ba kano pen di pekasabot?
17 Ba niyo di sebota a apiya antonaa i pepekasoled ko ngari na pegokit sa tiyan, na go bo
peliyo ko lawas?
18 Ogaid na so pepekaliyo ko ngari na poon ko poso, na giyoto i pepekasebo ko taw.
19 Ka pepekapoon ko poso so manga rarata a pamikiran a so kapamono, kasebo,
kambarabowat maasiya, kapamanekew, kapamamokeg ago so kapagitowito.
20 Giyai i pepekasebo ko taw, ogaid na so kakan sa da kaonabi a lima na di ron
pekasebo."
So Paratiyaya o Ikanaanen a Babay
21 Inawaan i Isa angkoto a darpa na somiyong ko pagingedingedan a midadair ko manga

siti a Tiro ago Sidon.
22 Na aden a babay a Ikanaanen a mababaling sangkoto a kaingedan, na somiyong
sekaniyan ki Isa na inilalis iyan on a "Kadnan, Wata o Daod, kapediin ako ngka! So wata
aken a babay na sosookan a saitan, na tanto a mararasay."
23 Ogaid na da a sataga bo a ba inisembag i Isa, na so manga sokbat iyan na piyangni iran
on a "Pakaawaa ngka angkai a babay, ka petondog rektano a dii melalis!"
24 Mandiyadi na pitero i Isa ko babay a "Sii ako bo siyogo ko manga taw sa Israil a
miyanga dadadag a datar o manga bilibili."
25 Ogaid na somiyodiyod sekaniyan ki Isa a tig iyan a "Ogopi ako ngka, Kadnan!"
26 Na pitero on i Isa a "Kena a ba patot i ba kowaa so pangenengken o manga wata na ba
itogen ko manga aso."
27 “Benar anan, Kadnan," a tig o babay "ogaid na apiya so manga aso na pepekakan man
ko pangenengken a pekeroro a poon ko lamisaan o kadnan iran."
28 So kiyanega sii i Isa na tig iyan a "Mala a paratiyaya ngka, Babay. Miyatoman den so
kabaya a ka." Na miyakapiya den so wata iyan sangkoto bo a oras.
Madakel a Miyapakapiya i Isa
29 Inawaan i Isa angkoto a darpa na somiyong ko marani ko Ranaw a Galili, na taros a

tomiyakedeg ko bobongan na miyontod roo.
30 Na tanto a madakel a taw a miyamanong rekaniyan a pepamangowit siran on sa manga
sadir, manga bota, manga lepo, manga amang ago madakel a ped a pepanga sasakit.
Inipamametad iran ko hadapan iyan na piyamakapiya niyan siran.
31 Miyamemesa so manga taw kagiya mailay iran so manga amang a miyamakatetaro,
miyamakapiya so manga sadir, pepamakalalakaw so manga lepo ago pepamakailay so
manga bota. Na biyantog iran so Tohan o Israil.
Pat nggibo a taw a Piyakakan i Isa

32 Tinimo i Isa so manga sokbat iyan na tig iyan a "Ipekepedi aken angkai a manga taw,
ka miyakatelo den gawii a kiyaped iran raken na da den a kekan iran imanto. Di aken
kabaya i ba ko siran pakalalakawa a penga aaor, ka o ba siran baden mikopay ko
kapembaling iran."
33 Pitero rekaniyan o manga sokbat a "Anda tano makakowa sa petoon a paan sangkai a
matatanaw a darpa a pekikan sangkai a madakel a taw?"
34 “Pira timan i paan iyo?" a iniise i Isa.
"Pito timan," a tig iran "ago maito a manga roroni a seda."
35 Na pitero i Isa ko madakel a taw a ontod siran ko lopa,
36 Na kinowa niyan so pito timan a paan ago so manga seda, na kagiya makapanalamat
na piyangopak iyan na inipamegay niyan ai ko manga sokbat, na inipamagana iran pen ko
manga taw.
37 Palaya siran den komiyan na miyanga oosog. Na piyanimo o manga sokbat so
miyasama iran, na minipeno ko pito timan a reban.
38 Pat nggibo a kadakel o manga mama a komiyan a di ron ped so manga babay ago
manga wata.
39 Kagiya mapakalalakaw i Isa so madakel a taw na mida sekaniyan ko awang na
somiyong sa inged a Magadan.
MATIYO 16
So Pangni ko Nanao
Somiyong ki Isa so manga Parisi ago so manga Sadosi sa katepengi iran on, na piyangni
iran a pakailain iyan siran sa piyakamemesa a nanao a poon sa kasorgaan.
2 Pitero kiran i Isa a "Amay ka sedep so alongan na peteroon iyo a 'Tetaid a doniya, ka
mariga a langit.'
3 Na amay ka kapipita na peteroon iyo a 'Magoran imanto, ka mariga a langit ago
domadatem.' Katawan iyo i kapemaanai niyo ko paras o langit, ogaid na di niyo
kapemaanaan so manga nanao a mipantag sangkai a masa.
4 So manga rarata a taw a tomiyalikod ko Allah na aya pepamangni sa piyakamemesa a
nanao, ogaid na da a ba kiran imbegay a nanao a rowar ko nanao a miyaolaola i Yonas."
Na inawaan siran i Isa na lomiyalakaw.
So Tapay o manga Parisi ago so manga Sadosi
5 Kagiya makaripag so manga sokbat ko ranaw na kiyatokawan iran a miyakalipat siran

romoran sa paan.
6 Na pitero kiran i Isa a "Iktiyar kano; pananggilai niyo so tapay o manga Parisi ago so
manga Sadosi."
7 Na miyapemasak oto o manga sokbat a tig iran a "Aya kiyateroa niyan sii na sabap sa da
tano makaawid sa paan."
8 Katawan i Isa so di ran dii teroon na tig iyan a "Ino niyo dii pemasaka so da niyo
kapakaawid sa paan? Sayana kano a maito i paratiyaya!
9 Ba kano pen di pekasabot? Ba niyo di ketademi so lima timan a paan a piyakikan ko
lima nggibo a taw? Pira timan a reban i kiyapenoan ko sama a piyanimo iyo?
10 Na so pito timan a paan a piyakikan ko pat nggibo a taw, na pira timan a reban i
kiyapenoan ko sama a piyanimo iyo?
11 Ino niyo di sebota a kena a ba aya ko dii teroa so makapantag ko paan? Pananggilai
niyo so tapay o manga Parisi ago so manga Sadosi."
12 Na giyoto a siyabot o manga sokbat a kena a ba so tapay sa paan i ba di kiran dii
teroon i Isa, ka so manga ndao o manga Parisi ago so manga Sadosi.
So Piyayag i Pidro makapantag ki Isa
13 Kagiya makaoma si Isa ko inged a Kaisariya Pilipi, na inisean iyan so manga sokbat
iyan a "Antawaa kon so Wata o Manosiya a kabasa o manga taw?"
14 Tig iran a "Aden a dii tero sa si Yahiya a Pananalawat. So ped na di ran dii teroon a si
Iliyas, na tig o manga ped a si Yarimiyas o di na isa ko manga nabi."
15 Na pitero i Isa a "Sekano den, antonaa i mapetero iyo o antawa ako?"
16 Somimbag si Simon Pidro a "Seka so Al Masih, a so Wata o oyagoyag a Tohan."
17 Na pitero on i Isa a "Rarakmatan ka Simon, a wata i Yonas, ka kena a ba manosiya i
miyakapayag reka sii, ka so Ama aken a ndodoo sa kasorgaan.
18 Teroon ko reka a seka na Pidro, na sii sangkai a lakongan na mbangonen aken on so
Agama ko. Na so langon o kapakagaga sa kanarakaan na di on den pekadaag.
19 Imbegay aken reka so manga gonsi o Ndatoan o Allah, na apiya antonaa i ipesepar ka
sii sa doniya na isesapar roo sa kasorgaan, na apiya antonaa i peperon ka sii sa doniya na
mapeparo roo sa kasorgaan."
20 Kagiya matero ai i Isa na liyalangan iyan so manga sokbat iyan sa di ran petetaroa ko
apiya antawaa a sekaniyan so Al Masih.
Inaloy i Isa so Kakerasay ago Kapetay niyan
21 Ipoon den sangkoto a oras na penggogoden i Isa ko manga sokbat iyan a disomala a
song sekaniyan sa Yarosalim na madakel a iperomasay rekaniyan roo o manga
pelokelokesen, ago so manga poporo a imam, ago so manga goro ko Kitab, na kebono
sekaniyan na keoyag bo sii ko ikatelo gawii.
22 Na si Pidro na inisibay niyan si Isa na pimbongetan iyan a tig iyan a "Di den, Kadnan!
Di ngka den ai keokitan!"
23 Somiyangor si Isa ki Pidro na pitero iyan on a "Awa ka raken Iblis! Pepekaalang ka ko
lalan aken, ka so manga pamikiran ka na kena a ba poon ko Allah, ka poon ko manosiya."
24 Mandiyadi na pitero i Isa ko manga sokbat iyan a "O aden a kebaya raken tomondog
na disomala a itolak iyan a ginawa niyan ago posain iyan so kros iyan ago pegonot raken.
25 Ka apiya antawaa i kebayaan iyan somabet so kaoyagoyag iyan na pelagaan iyan
baden. Ogaid na apiya antawaa i iperila iyan so kaoyagoyag iyan sabap raken na kekamal
iyan.
26 O miyakowa o taw so dalem a doniya a sarta a miyalaga so niyawa niyan, na antonaa i
miyanggona niyan on? Na antonaa i kibegay o taw a kiaon ko niyawa niyan?
27 Ka pekaoma so Wata o Manosiya a misasarta on so bantogan o Ama iyan ago
makaoonot on so manga malaikat iyan. Amay ka makaoma na mbelasan iyan so oman i
isa a taw a ipepasod ko miyanggolaola niyan.
28 Teroon ko rekano a mataan den a aden a ped ko makadadarpa sii a keilay iran so
kapekaoma o Wata o Manosiya a pendato sa di iran pen kapamatay."
MATIYO 17
So Kiyasalin o Paras i Isa
Kagiya makanem gawii na piyakaonot i Isa si Pidro ago so magari a si Santiyago ago si
Yahiya, na inowit iyan siran ko maporo a palaw sa da a ped iran.
2 Sii ko kapegilaya iran ki Isa na miyasalin den. Sominindaw so paras iyan a datar o
alongan, na miyakapoti so nditaren iyan a miyakakindakindat.
3 Na sarta den a mipeyag kiran si Mosa ago si Iliyas a dii makimbitiyarai ki Isa.
4 Na pitero i Pidro ki Isa a "Kadnan, mapiya ka sisii tano. O kebaya ka na magembaal ako
sii sa telo a lawig, a so isa on na para reka, so isa na para ki Mosa, ago so isa pen na para
ki Iliyas."
5 Sii ko di niyan dii katero na siyayapan siran o masindaw a gabon. Na miyakapoon a
sowara ko gabon a tig iyan a "Giyai so pekebabayaan ko a Wata aken a tanto aken a
ikasosoat. Pamakinega niyo sekaniyan!"
6 Kagiya maneg ai o manga sokbat na gomipe siran a tanto a miyanga alek.
7 Miyobay kiran si Isa na siko iyan siran a tig iyan a "Mbowat kano. Di kano pekelek."
8 Na miyangilailay siran na da a ba iran miyailay a taw a rowar ki Isa.
9 Sii ko kapetondagay iran ko palaw na ininsaratan siran i Isa a tig iyan a "Di niyo
petetaroa ko apiya antawaa angkai a miyailay niyo taman sa maoyag den so Wata o
Manosiya a poon ko miyamatay."
10 Na iniise on o manga sokbat a "Ino dii teroa o manga goro ko Kitab a disomala a
keona makaoma si Iliyas a di so Al Masih?"
11 Tig i Isa a "Benar den a pekaoma si Iliyas na petiyagaren iyan so langon taman.
12 Ogaid na teroon ko rekano a miyakaoma den si Iliyas na da sekaniyan makilala o
manga taw, na pinggolaola iran on langon so kabaya iran. Datar oto mambo na perasain
iran so Wata o Manosiya."
13 Kagiya maneg ai o manga sokbat na siyabot iran a aya di niyan kiran dii teroon na so
makapantag ki Yahiya a Pananalawat.
Piyakapiya i Isa so Wata a Sosookan
14 Sii ko kiyakasoy iran ko madakel a taw na miyobay ki Isa so isa a mama a

somiyodiyod on
15 A tig iyan a "Sir, kapediin ka so wata aken a mama. Pendalikaanen sekaniyan na tanto
a mararasay, ka omanoman milampes ko apoy o di na sa ig.
16 Inowit aken sekaniyan ko manga sokbat ka, ogaid na da iran mapakapiya."
17 Pitero kiran i Isa a "Sekano a da a paratiyaya niyan ago manga tetegas i olo a taw! Ay
katey a disomala a kipageepedaan aken rekano? Ay katey a disomala a kapanginginsabari
aken rekano? Wita niyo raken so wata."
18 Na siyaparan i Isa so saitan a somosook on na lominiyo ron, na miyakapiya den so
wata ipoon den sangkoto a oras.
19 Oriyan oto na miyobay ki Isa so manga sokbat a siran bo na iniise iran on a "Ino ami
da mapakaliyo so saitan?"
20 Pitero kiran i Isa a "Sabap sa maito a paratiyaya niyo. Ka teroon ko rekano a mataan
den a o aden a paratiyaya niyo a datar sa kala o miyakaitowito a oniin a mostard na
mapetero iyo sangkai a palaw a 'Tepas ka roo!' na tepas roo den. Na da den a ba niyo di
kegaga!"
Inaloy peman i Isa so Kapetay niyan
22 Miyakaisa a gawii a miyakakasoy siran den sa Galili na pitero i Isa ko manga sokbat
iyan a "So Wata o Manosiya na magaan den mapalad ko kapaar o manga taw
23 Na mbonoon iran, ogaid na sii ko ikatelo gawii na keoyag bo."
So kiyanega sii o manga sokbat na tanto a mikerata a ginawa iran.
So Imbowis ko Timplo
24 Kagiya makaoma siran roo sa Kapirnaom na so manga panenekat sa bowis para ko

Timplo na somiyong ki Pidro na iniise iran a "Ba pembayaden o goro niyo so bowis para
ko Timplo?"
Tig iyan a "Oway."
25 Na kagiya somoled si Pidro ko walay na miyona tero si Isa a tig iyan a "Simon, so
manga dato sa doniya na antawaa i pepanekatan iran sa bowis o di na bayad? Ba so
manga pagtaw iran o di na so manga mananangga? Antonaa i pamikiran ka?"
26 Tig i Pidro a "So manga mananangga."
Na pitero i Isa a "Kagiya ka maoto na di pekabayad so manga magiinged.
27 Ogaid na sabap sa di ta kabaya i ba ta mapakapagoteg angkai a manga taw na song ka
roo ko ranaw na pamanowit ka. Na so keona a seda a kekowa ngka na pakanggangaa ngka
na keilay ngka sii ko ngari iyan so pelata a pirak. Kowaa ngka na began ka kiran a
imbowis aken ago seka."
MATIYO 18
So Lebi a Mala ko Ndatoan o Allah
Sa masa oto na miyobay ki Isa so manga sokbat na iniise iran a "Antawaa i lebi a mala ko
Ndatoan o Allah?"
2 Tiyalowan i Isa so isa a wata na piyakatindeg iyan ko seronsarongan iran,
3 Na tig iyan a "Teroon ko rekano a mataan den a taman sa di kano makatekelid ago
mbeloy a datar o manga wata na di kano den pekasoled ko Ndatoan o Allah.
4 Kagiya ka maoto na apiya antawaa i pepangalimbabaan a datar angkai a wata na aya
lebi a mala ko Ndatoan o Allah.
5 Na apiya antawaa i terima sa wata a datar angkai a wata sii ko ingaran aken na saken i
peterimaan iyan.
So manga Nganin a Ipekedosa o manga Taw

6 “Ogaid na apiya antawaa i mapakandosa niyan so isa bo sangkai a mitatanan a manga
taw a peparatiyaya raken na tomo on pen a iketan a lig iyan sa mala a ator a galingan na
igaled sekaniyan ko pitidaleman ko ragat.
7 Kemorkaan so doniya sabap ko manga nganin a ipekedosa on o manga taw. Mataan a
mapenggolaola so manga nganin a ipekedosa iran, ogaid na kemorkaan so taw a ron
makapenggolalan a kanggolaola ini!
8 “O ikedosa ngka so lima ngka o di na so ai ngka na potola ngka on na lebaden ka. Ka
tomo reka a makasoled ka sa kaoyagoyag a sadir o di na lepo a di sa ba ana dowa a lima
ngka o di na ai ngka a ba ka den milebad ko apoy a da a ikepareng iyan.
9 O ikedosa ngka so mata ngka na sowata ngka on na lebaden ka. Ka tomo reka a
makasoled ka ko kaoyagoyag a sabala ka i mata a di sa ba dowa ka i mata a ba ka den
milebad ko apoy sa kanarakaan.
So Bayambayanan makapantag ko Miyadadag a Bilibili
10 “Iktiyari niyo o ba niyo masodi apiya so isa sangkai a mitatanan a manga taw. Ka
teroon ko rekano a so manga malaikat iran na ndodoo lalayon ko kamamasaan o Ama
aken roo sa kasorgaan.
12 “Antonaa i pamikiran iyo sii: Antonaa i penggolaolaan o mama a aden a magatos iyan
a bilibili na miyadadag so isa on? Ba niyan di pagawai pasin so siyaw polo ago siyaw a
bilibili na pegenebeneb sekaniyan ko manga bobongan a di niyan dii mbabanogen so
miyadadag on?
13 Na amay ka matoon iyan na teroon ko rekano a mataan den a tanto niyan a ikebabaya
angkoto a isa a bilibili a di so siyaw polo ago siyaw a da manga dadadag.
14 Datar oto mambo a kena a ba kabaya o Ama iyo a ndodoo sa kasorgaan a ba madadag
apiya so isa bo sangkai a mitatanan a manga taw.
So Ped ka a Peparatiyaya a Miyakandosa
15 “O miyakandosa reka so ped ka a peparatiyaya na songowi ngka na pakitokawi ngka

on so dosa niyan a sekano bo a dowa kataw. O pemakinega ka niyan na miningginawai
ngka bo so pagari ngka.
16 Ogaid na o di ka niyan pemakinega na pakaonota ngka so isa o di na dowa kataw kaan
so langon a peteroon na kapemataani o dowa o di na telo a saksi.
17 Na o di niyan siran den pemakinega na pakitokawi ngka ko manga magaagama, na o di
niyan mambo pemakinega so magaagama na kidian ka on den so datar o kapir, o di na
panenekat sa bowis.
So Kasapar ago so Kapero
18 “Teroon ko rekano a mataan den a apiya antonaa i ipesepar iyo sii sa doniya na
isesapar roo sa kasorgaan, na apiya antonaa i peperon iyo sii sa doniya na mapepero roo
sa kasorgaan.
19 “Na teroon ko rekano pen a amay ka magayon so dowa rekano sii sa doniya mipantag
ko apiya antonaa i pengnin iyo ko kapepangangarapan iyo, na penggolaolaan rekano den
ai o Ama aken a ndodoo sa kasorgaan.
20 Ka apiya anda matitimo so dowa o di na telo kataw sii ko ingaran aken na ndodon ako
a ped iran."
So Bayambayanan makapantag ko da a Kapedi iyan a Oripen
21 Oriyan oto na miyobay si Pidro ki Isa na iniise iyan a "Kadnan, makapira raken
makandosa so pagari ko a patot a perilaan aken pen? Ba taman sa makapito?
22 Pitero rekaniyan i Isa a "Kena a ba makapito, ka teroon ko reka a taman sa pitopolo na
takepen sa makapito.
23 “Sabap sii na so Ndatoan o Allah na kiibarat ko dato a kebayaan iyan somekat so
manga otang o manga oripen iyan.
24 Kagiya pepoon sekaniyan magitong, na inowit rekaniyan so sakataw a miyakaotang on
sa pipira nggibo a pirak.
25 Ogaid na kagiya da a kibayad iyan ko otang iyan na inisogo o kadnan iyan a pepasaan
angkoto a oripen a rakes o karoma niyan, so manga wata iyan ago so langon taman iyan
kaan mibayad ko otang.
26 “Na somiyodiyod on so oripen a tig iyan a 'Panginsabari ako ngka, ka mbeyadan ko
reka so langon a otang aken!'
27 Na inikapedi o kadnan iyan na inirila iyan on so otang iyan, na piyakalalakaw niyan.
28 “Ogaid na kagiya makaawa roo angkoto a oripen na minimbalaka iyan so ped iyan a
oripen a makaootang on sa da mapiralad a pirak. Na giyardot iyan a sarta a pikel iyan a tig
iyan a 'Bayadi ngka so otang ka raken!'
29 “Tominikoro so ped iyan a oripen na miyangangampedian on a tig iyan a 'Panginsabari
ako ngka, ka mbeyadan ko seka bo.'
30 Ogaid na da sekaniyan iyog, na ba niyan den piyakikalaboso taman sa makabayad ko
otang iyan.
31 So kiyailaya o ped a manga oripen ko miyanggolaola na tanto a mikerata a ginawa
iran, na siyongowan iran so kadnan iran na piyanotol iran on so langon a miyanggolaola.
32 “Kagiya maneg ai o kadnan iran na piyakitawag iyan angkoto a oripen na pitero iyan a
'Marata ka a oripen. Inirila aken langon so otang ka raken ka kagiya miyangangampedian
ka raken.
33 Ba di patot a ikapedi i ka so ped ka a oripen a datar o kinikapediin aken reka?'
34 Na tanto a kiyararangitan so kadnan iyan, na piyalad iyan ko merasay ron taman sa
kabeyadan iyan langon so otang iyan.
35 “Datar ai mambo a ikidia rekano o Ama aken a ndodoo sa kasorgaan taman sa di rilaan
o oman i isa rekano so pagari niyan sa iklas ko poso iyan."
MATIYO 19
Inipangendao i Isa so makapantag ko Kapakimbelag
Kagiya mapasad ai tero i Isa na inawaan iyan a Galili na somiyong sa inged a Yodiya a
masesebangan o Lawasaig a Yordan.
2 Tanto a madakel a taw a miyamanondog on, na piyamakapiya niyan siran roo.
3 Somiyong on so ped ko manga Parisi sa katepengi ran on na pitero iran a "Ba sisii ko
Kitab i ba kendai o mama so karoma niyan ko apiya antonaa sabap iyan?"
4 Tig iyan a "Ba niyo da kapangadii a sii sa pagampaganay na inaden o Allah so manosiya
a mama ago babay,
5 Na pitero iyan a 'Sabap sii na magawa so mama ki ama iyan ago ina iyan na tepi ko
karoma niyan na siran a dowa na keisaisa?'
6 Kagiya ka maoto na kena den o ba siran madodowa ka maiisaisa. Sabap sii na di
pakapembelaga o manosiya so piyakatepi o Allah."
7 Iniise o manga Parisi a "O giyanan na ino sogoon o Mosa a begi o mama so karoma
niyan sa sorat a kapasadan ko kambelag na go niyan bo mapakaawa?"
8 Pitero kiran i Isa a "Sabap sa manga tetegas kano i poso, na miyaparo rekano o Mosa a
makimbelag kano ko manga karoma niyo, ogaid na kena den a ba anan takdir o Allah
ipoon ko kiyaadena ko doniya.
9 Na teroon ko rekano a apiya antawaa mama i ndaan iyan so karoma niyan liyo ron o ba
miyakasebo, ago mangaroma sa ped a babay na miyakasina sekaniyan."
10 Na pitero rekaniyan o manga sokbat iyan a "O giyai i kokoman ko kakeromai na tomo
den a di den pengaroma so taw."
11 Tig i Isa a "Kena a ba so langon a taw i ba pekatarima sangkai a ndao, ka siran oto bo
a bigan on o Allah.
12 Madakel a sabap a di kapakapengaroma o manga mama. Aden a inimbawata a di
makapengaroma. Aden a ped a di makapengaroma ka kiyapon siran o manga taw. Na
aden pen a ped a piyasad iran sa ginawa iran a di pengaroma sabap ko Ndatoan o Allah.
So pekatarima sii na tarimaa niyan."
Riyakmatan i Isa so manga Wata
13 Samaoto na piyangowitan o manga taw si Isa sa manga wata kaan iyan kiran
mipanapenet a lima niyan ago karakmatan iyan siran. Ogaid na pimbobongetan o manga
sokbat so manga taw.
14 Pitero i Isa a "Pakasonga niyo raken so manga wata. Di niyo siran pesepari, ka so
Ndatoan o Allah na rek o datar iran a manga taw."
15 Na inipanapenet iyan kiran a lima niyan, na oriyan ai na inawaan iyan angkoto a darpa.
So Kawasa a Mangoda a Mama
16 Na aden a mama a somiyong ki Isa a iniise iyan on a "Goro, antonaa i mapiya a

disomala a penggolaolaan ko kaan ako kabegi sa da a kaposan iyan a kaoyagoyag?"
17 Pitero i Isa a "Ino ngka raken pegisean o antonaa i mapiya? Isaisa bo a mapiya. Ogaid
na o kebaya ka somoled ko kaoyagoyag a da a kaposan iyan na tomana ngka so manga
sogoan o Kitab."
18 Iniise iyan a "Antonaa manga sogoan?"
Tig i Isa a "Di ka pemono, di ka pesebo, di ka pemanekew, di ka pemamokeg,
19 Pagadati ngka so ama a ka go so ina a ka, ago kababayai ngka so siringan ka a datar a
ginawa ngka."
20 Tig o mangoda a mama a "Tiyoman aken den ai langon. Antonaa pen i makakawang
raken?"
21 Inisembag i Isa a "O kebaya ka a matarotop so kapetoman ka na baling ka na pesaa
ngka so manga tamok ka na pamegan ka so pirak ko manga miskin, na kebegan ka sa
kakawasaan roo sa kasorgaan; na go ka sii kasoy na pegonot ka raken."
22 Kagiya maneg ai o mangoda na miyawa roo a mararata a ginawa niyan, ka tanto a mala
i tamok.
23 Mandiyadi na pitero i Isa ko manga sokbat iyan a "Teroon ko rekano a mataan den a
maregen so kapekasoled o kawasa ko Ndatoan o Allah.
24 Teroon ko rekano peroman a malebod so kapekaokit o onta ko peso a ragom a di so
kapekasoled o kawasa ko Ndatoan o Allah."
25 Kagiya maneg ai o manga sokbat na tanto siran a miyamemesa a tig iran a "O benar
oto na antawaa bes i kesabet?"
26 Na tintengan siran i Isa na pitero iyan a "Di ini kegaga o manosiya, ogaid na kegaga o
Allah so langon taman."
27 Mandiyadi na pitero rekaniyan i Pidro a "Ilaya ngka man, ka inawaan ami so langon
taman kaan kami reka makaonot. Na antonaa i kekowa ami?"
28 Pitero kiran i Isa a "Teroon ko rekano a mataan den a amay ka makaontod so Wata o
Manosiya ko kababantogan a korsi iyan sii ko masa a kiyambagowi ko langon taman na
sekano a miyakaonot raken na pemakaontod mambo ko sapolo ago dowa a korsi a
pepangokom ko sapolo ago dowa a mbatabataa a manga Israil.
29 Na so oman i isa a inawaan iyan so manga walay niyan, manga pagari niyan a mama o
di na babay, so ama iyan, so ina iyan, so manga wata iyan, o di na so lopa iyan sabap
raken na kebadalan sekaniyan sa makamagatos matakep, na makapekawali pen sa da a
kaposan iyan a kaoyagoyag.
30 Ogaid na madakel a maoona imanto a keori bo, na madakel a maoori imanto a keona
bo.
MATIYO 20
So Bayambayanan makapantag ko manga Minggagalebek ko Asinda
"So Ndatoan o Allah na kiibarat ko kirek ko asinda a komiyabalaga lomalakaw ka

pengiloba sa kasokayan iyan a manga mama a makanggalebek ko asinda niyan.
2 Miyagayon siran a sokayan iyan siran sa satiman a pelata a pirak oman salongan, na
piyakasong iyan siran ko asinda niyan.
3 “Kagiya magalas nowibi na somiyong peman so kirek roo sa padian, na miyailay niyan
so ped a kititindeg ko padian a da a galebek iran.
4 Pitero iyan kiran a 'Nggalebek kano mambo ko asinda ko, ka mbeyadan ko sekano sa
osto a sokay.'
5 Na somiyong siran on.
"Kagiya magalas dosi ago magalas tris na pinggolaola niyan oto bo.
6 Na sii ko magaan den magalas singko na somiyong sekaniyan peman sa padian na
miyailay niyan on so ped a kititindeg roo. Na iniise iyan kiran a 'Ino kano sii kititindeg sa
mababasa alongan a da den a galebek iyo?'
7 “Inisembag iran a 'Kagiya da a taw a ba rekami sokay.'
"Na pitero iyan a 'Song kano mambo roo ko asinda ko na nggalebek kano ron.'
8 “Kagiya perimon den na pitero o kirek ko asinda ko komikibir ko galebek a 'Talowi
ngka so kigagalebek na bayadi ngka so manga sokay iran a ipoon ko miyanga oori a
piyakanggalebek na sii pagposa ko miyanga oona.'
9 “Na miyamangobay so manga mama a mipoon nggagalebek ko alas singko sa kegabi,
na oman i isa kiran na siyokayan sa satiman a pelata.
10 So kiyaobay roo o miyanga oona nggalebek na pipikiren iran a mala a kekowa iran a di
giyoto. Ogaid na siyokayan mambo so oman i isa kiran sa satiman a pelata.
11 Kagiya makadawat siran on na piyanarotaroan iran so kirek ko asinda a pitero iran on
a
12'Giyangkai a miyanga oori a piyakanggalebek na isaisa bo ka oras a kiyanggalebekan
iran, na siyokayan ka siran a datar ami a minggagalebek ko ranti o miyababasa alongan.'
13 “Simbag o kirek so isa kiran a 'Pamakineg ka ki. Da ko seka lingowi. Ba ka da ayon ko
sokay a satiman a pelata?
14 Awidi ngka so sokay ngka na baling ka. Kabaya aken a mbegan ko a mama ini a
miyaori nggalebek sa sokay a datar o inibegay aken reka.
15 Ba da a kabenar aken ko kapenggolaolaa ko ko kabaya aken ko rek aken a pirak? O di
na ba ka kiyatagoan sa napso sabap ko kapepamemegayan aken?' "
16 Na pitero pen i Isa a "Datar oto mambo a so siran oto a maoori imanto na keona bo, na
so maoona imanto na keori bo."
Inaloy Peman i Isa so Kapetay niyan
17 Sii ko kapelalakaw i Isa a song sa Yarosalim na inisibay niyan so sapolo ago dowa a
sokbat na pitero iyan kiran a
18 “Pamakineg kano. Pesong tano sa Yarosalim a ron kepalad so Wata o Manosiya ko
manga poporo a imam ago manga goro ko Kitab. Kisala iran on so kambonoa on
19 Na go iran bo pelada ko kena a ba manga Yahodi, na pegongatongaten iran ago
pemadasan, na totoken iran ko kros. Na sii ko ikatelo gawii na keoyag sekaniyan bo."
So Pangni o Ina i Santiyago ago si Yahiya
20 Oriyan oto na somiyong ki Isa so ina o dowa a wata i Sibidi a oonotan o manga wata
iyan. Somiyodiyod sekaniyan ki Isa ka aden a pengnin iyan on.
21 Iniise on i Isa a "Antonaa i kabaya a ka?"
Tig iyan a "Itopa ngka a so isa sangkai a dowa kataw a wata aken na makaontod ko
kawanan ka ago so isa on sa diwang ka sii ko Ndatoan ka."
22 Na pitero kiran i Isa a "Di niyo katawan i pepangnin iyo. Ba kano pekagaga minom ko
mapait a tagayan a magaan aken paginoman?"
Inisembag iran a "Oway, kegaga mi."
23 Pitero i Isa a "Mataan a pekainom kano ko tagayan aken, ogaid na kena a ba saken i
pemili o antawaa i pekaontoden ko kawanan aken ago sa diwang, ka giyangkoto a ontoda
na rek o pitiyagaran on o Ama aken."
24 Kagiya katokawan o sapolo a ped a manga sokbat ko piyangni i Yahiya ago si
Santiyago na inotegan siran sangkoto a dowa a magari.
25 Na tinimo siran i Isa na pitero iyan kiran a "Katawan iyo a so manga dato o manga
nasiyon na pepangondatoan iran so manga pagtaw iran, na so manga olowan iran na
pepekapaar kiran.
26 Ogaid na kena o ba patot ai a sowaan iyo. Ka apiya antawaa i kebaya makala sii rekano
na disomala a pembaloy a pepanalagad rekano.
27 Na apiya antawaa rekano i kebaya mona na disomala a makipangongoripen rekano,
28 A datar bo o Wata o Manosiya a kena a ba sii somiyong kaan kapenalagadi, ka sabap
sa an makapenalagad ko manga ped, ago an iyan mibegay so kaoyagoyag iyan a ipagaon
ko madakel a taw."
Miyapakailay i Isa so Dowa kataw a Bota
29 Sii ko kapegawa i Isa ago so manga sokbat iyan sa Yariko na tanto a madakel a taw a
pepamanondog kiran.
30 Na aden a dowa a bota a mama a moontod ko kilid a lalan, na kagiya maneg iran a
segad roo si Isa na miyananalo siran a "Hey Kadnan, Wata o Daod, kapediin kami ngka!"
31 Pimbobongetan siran o madakel a taw na pitero iran a rerenek siran. Ogaid na ba iran
den piyakalalo a di ran dii kapananalo a "Hey Kadnan, Wata o Daod, kapediin kami
ngka!"
32 Na tomiyareg lomalakaw si Isa na tiyalowan iyan siran. "Antonaa i kabaya iyo a ikidia
ko rekano?" a iniise iyan.
33 “Kadnan," a inisembag iran, "kabaya ami a makailay kami."
34 Na inikapedi siran i Isa na siko iyan a manga mata iran. Na sakotika den a
kiyapakailay iran, na miyonot siran on.
MATIYO 21
So Piselasela a Kiyasoled i Isa sa Yarosalim
Sii ko kapepakarani iran sa Yarosalim na miyakaoma siran sa Bitpagi sii ko Palaw a

Olibi. Na siyogo i Isa so dowa a sokbat
2 A pitero iyan kiran a "Song kano sangkoto a inged a maoonaan tano, na sii den ko
kasoled iyo ron na keoma niyo so isa a kimar a iiket a rakes o nati niyan. Bokaa niyo siran
na wita niyo raken.
3 O aden a magise rekano, na teroa niyo ron a aden a ikidia on o Kadnan, na sagogona a
pekikowa niyan rekano."
4 Miyanggolaola ini kaan mitoman so pitero o nabi a
5 “Teroa niyo ko manga taw sa Siyon a

'Ilaya niyo ka pepekaoma rekano so Dato iyo!
Mangangalimbabaan sekaniyan a kokoda sa kimar,
a so kangodaan a nati o kimar.' "
6 Na lomiyalakaw so manga sokbat na ininggolalan iran so inisogo kiran i Isa.

7 Lnowit iran on so kimar ago so nati na iniampido iran on so manga gerab iran, na
mikoda on si Isa.
8 Tanto a madakel a taw a piyangayat iran so manga nditaren iran sii ko lalan a pagokitan
iyan. So ped na miyamotol sa manga raon a kayo na piyanempas iran ko lalan.
9 Na so madakel a taw a pepangonaan ki Isa a datar peman o pepamanondog on na
ipepelalis iran a
"Podin so wata o Daod!

Rarakmatan so pepekaoma sii ko ingaran o Kadnan!
Podin roo ko pipeporoan ko kasorgaan!"
10 Kagiya somoled si Isa sa Yarosalim na miyagorigaw so langon o manga taw ko dalem

a siti a di ran dii teroon a "Antawaa ini?"
11 Somimbag so madakel a taw a tig iran a "Giyai si Isa, a so Nabi a poon sa Nasarit sii
sa Galili."
Somiyoled si Isa ko Timplo
12 Somiyoled si Isa ko Timplo o Allah na piyamogaw niyan so langon a dii ndadagang

ago so dii mamamasaan roo. Pilelekeb iyan so manga lamisaan o dii sesambiay sa pirak,
ago so manga ontoda o dii pepasa sa marapatik.
13 Pitero iyan kiran a "Misosorat ko Kitab a pitero o Allah a 'So Walay aken na
mbetowan sa Walay a Pesimbaan,' ogaid na ba niyo den mbaloya a dii tepokan o manga
tekew."
14 So manga bota ago so manga sadir na miyamanong ki Isa ko Timplo, na piyamakapiya
niyan siran.
15 Ogaid na kiyararangitan so manga poporo a imam ago so manga goro ko Kitab ko
kiyailaya iran ko manga piyakamemesa a pinggolaola niyan ago so manga wata a
ipepelalis iran sii ko Timplo a "Podin so Wata o Daod!"
16 Na iniise iran ki Isa a "Ba ngka miyaneg so di ran dii teroon?"
Tig i Isa a "Oway. Ba niyo da mabatiya angkai a misosorat ko Kitab a 'So manga modol o
manga wata ago manga ikaririga na piyakipodi ngka on a ginawa ngka'?"
17 Na miyawa kiran si Isa na lominiyo ko siti a somiyong sa Bitani a ron miyakaiga.
Mirayong so Kayo a Higos
18 Sii ko kapekasoy niyan sa Yarosalim ko teked a kapipita na miyaor sekaniyan.

19 Na miyakailay sekaniyan sa kayo a higos ko kilid a lalan, na miyobay ron ogaid na da
a ba niyan on miyatoon a onga, ka manga raon bo. Pitero iyan ko kayo a "Di ka den
pekaonga!" Na sakotika den a mirayong so kayo.
20 Kagiya mailay ai o manga sokbat na miyamemesa siran a tig iran a "Andamanaya i
kiyaperayong sa sagogona angkai a kayo a higos?"
21 Pitero kiran i Isa a "Teroon ko rekano a mataan den a o aden a paratiyaya niyo ago di
kano pendowadowa, na mapenggolaola niyo so inikidia ko sangkai a kayo a higos, na
kena a ba giyai bo, ka mapetero iyo mambo sangkai a palaw a 'Mbowat ka na go ngka
lebaden a ginawa ngka ko ragat,' na mipenggolalan den.
22 Na o peparatiyaya kano na apiya antonaa i pengnin iyo ko di niyo dii kapangangarapan
na ketarima iyo."
So Pakaise makapantag ko Kapaar i Isa
23 Komiyasoy si Isa ko Timplo, na sii ko kapepamangendao niyan na somiyong on so

manga poporo a imam ago so manga pelokelokesen o manga taw. Iniise iran on a
"Antonaa i kapaar ka sa di ngka dii kanggolaolaa sangkai a manga nganin? Na antawaa i
migay reka sangkanan a kapaar?"
24 Somimbag kiran si Isa a "Aden a ipagise aken rekano mambo, na o kesembag iyo na
peteroon ko rekano o antonaa i kapaar aken sa di aken sii dii kanggolaolaa.
25 Si Yahiya na anda poon so sangan iyan sa kapepanalawat? Ba poon ko Allah o di na
poon ko manosiya?"
Na pinggedageda iran ai a tig iran a "Opama ka aya tano isembag na 'Poon ko Allah,' na
peteroon iyan rektano a 'O benar oto na ino kano da paratiyaya ki Yahiya?'
26 Ogaid na o teroa tano a 'Poon ko manosiya,' na ipekelek tano o ba antonaa i ikidia
rektano o madakel a taw, ka tatarimaan iran langon a nabi si Yahiya."
27 Na inisembag iran ki Isa a "Di ami katawan."
Na pitero iyan kiran a "Di aken rekano mambo peteroon o antonaa i kapaar aken sa di
aken sii dii kanggolaolaa.
So Bayambayanan makapantag ko Dowa a Wata a Mama
28 “Antonaa i pamikiran iyo makapantag sii? Aden a mama a dowa i wata a mama.
Somiyong sekaniyan ko kaka on na pitero iyan a "Wata ko, song ka ko asinda na
nggalebek ka on imanto.'
29 “Na somimbag sekaniyan a 'Di, di ako roo song,' ogaid na da matey na misendit, na
somiyong roo.
30 “Na somiyong so mama ko isa a wata iyan na datar bo oto a pitero iyan on. Aya
inisembag iyan na 'Oway sir, song ako ron,' ogaid na da on song.
31 “Antawaa ko dowa oto kataw i tomiyoman ko kabaya o ama iran?"
Tig iran a "So kaka."
Na pitero kiran i Isa a "Teroon ko rekano a mataan den a so manga panenekat sa bowis
ago so manga sondal na maoona rekano somoled ko Ndatoan o Allah.
32 Ka somiyong sii rekano si Yahiya sa kapakiilain iyan rekano ko ontol a lalan, na da
niyo paratiyayaa. Ogaid na miyamaratiyaya rekaniyan so manga panenekat sa bowis ago
so manga sondal. Na apiya niyo pen ai miyailay, na da niyo alina a pamikiran iyo kaan
kano ron makaparatiyaya.
So Bayambayanan makapantag ko manga Ogopa ko Asinda a Obas
33 “Pamakineg kano sa isa pen a bayambayanan: Aden a kirek ko asinda a piyamolaan

iyan sa manga obas. Inalad iyan ai ago komiyalot sekaniyan sa ketagoan ko petemekan ko
obas, na mimbaal sa lantawa. Kagiya mapasad oto na piyagapin iyan so asinda ko manga
ogopa na lomiyalakaw.
34 Sii ko kaperagona den ko onga o obas na siyogo iyan so manga talasogoay niyan roo
ko manga ogopa, ka pekikowa niyan kiran so bagian iyan on.
35 “Na giyander o manga ogopa so manga talasogoay na piyamadasan iran so isa on,
biyono iran so isa peman, na riyobakan iran a ator so ped.
36 Mandiyadi na siyogo peroman o kirek so ped a manga talasogoay a madakel a di so
miyaona. Na datar bo a inikidia kiran o manga ogopa.
37 Moripori na piyakasong iyan kiran so wata iyan, ka tig iyan a 'Pagadatan iran so wata
aken.'
38 “Ogaid na kagiya mailay o manga ogopa so wata iyan na pitero o oman i isa ko ped
iyan a 'Sekaniyan so wata o kirek. Na, bonoon tano, ka kekowa tano angkai a asinda a
mapekewali niyan!'
39 Na giyander iran ago inowit iran ko liyo o asinda na biyono iran."
40 Na iniise i Isa a "Amay ka makaoma so kirek ko asinda na antonaa i ikidia niyan
sangkoto a manga ogopa?"
41 Inisembag iran a "Mataan a pemonoon iyan angkoto a manga rarata a taw sa
piyakalekelek a kapatay, na pegapinen iyan so asinda ko ped a manga ogopa a pekabegay
ron ko bagian iyan ko kaperagona on."
42 Na pitero kiran i Isa a "Ba niyo da mabatiya angkai a misosorat ko Kitab?
'So ator a inisili o manga panday sa walay

So Kadnan i minggolaola sii,
na tanto ini rektano a piyakamemesa!'
43 “Kagiya ka maoto na teroon ko rekano a kowaan rekano so Ndatoan o Allah, ka

imbegay ko manga taw a ipegonga iran so manga galebek a domadait sangkai a Ndatoan."
45 Kagiya maneg o manga poporo a imam ago so manga Parisi angkai a manga
bayambayanan i Isa na siyabot iran a siran i piyakailatan iyan.
46 Na kabaya iran a madakep iran sekaniyan, ogaid na ipekelek iran so madakel a taw ka
tatarimaan iran a nabi si Isa.
MATIYO 22
So Bayambayanan makapantag ko Kakendori ko Kiyawing
Miyanotol peroman si Isa ko madakel a taw sa manga bayambayanan a tig iyan a

2 “So Ndatoan o Allah na kiibarat ko dato a mitiyagar sa kakendori ko kakewinga ko
wata iyan a mama.
3 Siyogo iyan so manga talasogoay niyan a pakitokawan iran ko manga biyantowan a
talabok siran ko kakendori, ogaid na da siran on mabaya tomalabok.
4 “Na somiyogo peman so dato sa ped a manga talasogoay a tig iyan a 'Teroa niyo ko
manga biyantowan a miyatiyagar aken den so ipegana ko. Miyasombali den so manga
sapi aken ago so piyakakekaolit a manga nati a pangangayamen. Miyatiyagar den so
langon taman. Talabok kano ko kaken ko kakewing.'
5 “Ogaid na da ini tagoa sa ginawa o manga biyantowan, ka ba siran den somiyong ko
manga galebek iran. So isa on na somiyong ko lopa iyan, ago so ped na sii ko tinda niyan.
6 Na so manga ped na giyander iran so manga talasogoay na piyakakeyakaya iran ago
piyamono.
7 Tanto a kiyararangitan so dato, na siyogo iyan so manga sondaro niyan na piyaminasa
iran angkoto a miyamono ago tiyotong iran so inged iran.
8 “Na giyoto a pitero iyan ko manga talasogoay niyan a 'Matitiyagar den so kaken ko
kakewing, ogaid na di ron mapapatot so manga biyantowan.
9 Sabap roo na song kano ko manga mbalakaan o manga lalan na apiya antawaa i
peketoon iyo na bantowi niyo a telabok ko kakendori.'
10 Na somiyong so manga talasogoay roo ko manga lalan na piyanimo iran so langon a
taw a miyatoon iran a mapiya ago marata. Na so darpa a kenanan na miyapenopeno a
taw.''
11 “Ogaid na kagiya somoled so dato ka pagilain iyan so manga banto na miyainengka
iyan so isa a mama a da nditar sa nditaren ko kalilimod ko kakewing.
12 Na iniise rekaniyan o dato a 'Aki, andamanaya i kiyapakasoled ka sii a da ka
makanditar sa nditaren ko kalilimod ko kakewing?' Na da den a kisembag iyan.
13 “Mandiyadi na pitero o dato ko manga talasogoay a 'Patonga niyo a manga lima niyan
ago ai, na lebaden iyo sa liyo roo ko maliboteng a ron pendiyagaw a di niyan dii
pakakitebaan a ngipen iyan.'"
14 Pitero pen i Isa a "Madakel a kiyabantowan, ogaid na maito a miyapili on."
So Pakaisa makapantag ko Kabayad sa Bowis
15 Oriyan oto na miyawa roo so manga Parisi na pimomosawiraan iran o andamanaya i

kapakateroa iran ki Isa sa midimanda iran on.
16 Na piyakasong iran rekaniyan so manga sokbat iran ago so manga kaom i Dato Hirod
na pitero iran ki Isa a "Goro, katawan ami a maontol ka a mama. Ipepangendao ngka so
tito a benar makapantag ko lalan ko Allah, na da a taw a ba ngka peramigi, ka di ngka
tegoon sa ginawa so kapakanggegerar o taw.
17 Kagiya ka maoto na teroa ngka rekami i pamikiran ka makapantag sii. Ba sii ko Kitab
o ba tano pembayadi so bowis ko Solotan sa Roma, o di na di den?"
18 Ogaid na miyasipat i Isa so marata a kadiyat iran na tig iyan a "Sekano a dii
mamagomanta, ino ako niyo petepengi lomitag?
19 Pakiilain iyo raken so pirak a ipembayad ko bowis." Inowitan iran sa pelata
20 Na iniise iyan kiran a "Antawaa i kiparas ago ngaran a minitombok sii?"
21 Tig iran a "So Solotan sa Roma."
Na pitero kiran i Isa a "Kagiya ka maoto na began iyo ko Solotan so kak o Solotan, na
began iyo ko Allah so kak o Allah."
22 Kagiya maneg iran ai na miyamemesa siran, na inawaan iran sekaniyan ago
lomiyalakaw.
So Pakaisa makapantag ko Kakeoyag o Miyamatay
23 Sangkoto a gawii na somiyong ki Isa so manga Sadosi a di pemaratiyaya i ba keoyag

so miyamatay. Inisean iran si Isa a
24 “Goro, pitero o Mosa a 'O matay so mama a da a wata iyan na disomala a so pagari
niyan na pengaromaan iyan so balo a babay kaan siran makambawata sa moriyataw o
miyatay.'
25 Gowani na aden a pito kataw a mama a magariyari a kibabaling sii rekami.
Miyakapangaroma so kaka na miyatay a da a ba niyan miniganat a wata. Minibagak iyan
so karoma niyan ko pagari niyan.
26 Datar oto a miyanggolaola o ikadowa a pagari niyan, ago so ikatelo, ago langon siran
taman ko ikapito.
27 Aya kiyaposan on na miyatay mambo so babay.
28 Na amay ka maoyag so miyamatay na antawaa ko pito to kataw a mama i kikaroma
rekaniyan, ka palaya siran on miyakapangaroma?"
29 Somimbag si Isa a "Mariribat kano den, ka di niyo katawan so manga ndao o Kitab o
di na so kabatowa o Allah.
30 Ka amay ka maoyag so miyamatay na kedatar siran o manga malaikat sa kasorgaan a
di den makapetepitapi so manga mama ago manga babay.
31 Na makapantag ko kakeoyag o miyamatay na ba niyo da mabatiya ko Kitab so pitero
rekano o Allah?
32 Ka miyatey den a kiyaipos o kiyapamatay o Ibrahim, Iskak, ago so Yakob na pitero
iyan a 'Saken so Tohan o Ibrahim, so Tohan o Iskak, ago so Tohan o Yakob'? So Allah na
kena a ba so Tohan o miyamatay, ka so Tohan o manga oyagoyag."
33 Kagiya maneg ai o madakel a taw na miyamemesa siran ko ipepangendao niyan.
So Lebi a Mala i Kipantag a Sogoan
34 Kagiya maneg o manga Parisi a kiyalawanan i Isa so manga Sadosi ko manga sembag
iyan na somiyong siran rekaniyan.
35 So isa kiran a alim ko Kitab na tipengan iyan si Isa sangkai a pakaise:
36 “Goro, antonaa i lebi a mala i kipantag a sogoan o Kitab?"
37 Tig i Isa a " 'Kababayai ngka so Kadnan a Tohan ka sa iklas ko poso o ka, ago iklas ko
niyawa ngka, ago iklas ko iman ka.'
38 Giyai i pagampaganay ago lebi a mala i kipantag a sogoan.
39 So ikadowa na datar iyan: 'Kababayai ngka so siringan ka a datar a ginawa ngka.'
40 So dalem o Kitab o Mosa ago so Sorat o manga nabi na sii bo mipepasod sangkai a
dowa a sogoan."
So Pakaisa makapantag ko Al Masih
41 Sii ko katitimo o manga Parisi ki Isa na iniise iyan kiran a

42 “Antonaa i pamikiran iyo makapantag ko Al Masih? Antawaa i kiwata rekaniyan?"
Tig iran a "Wata sekaniyan o Daod."
43 Na pitero kiran i Isa a "O benar oto, na ino sekaniyan mbetowi o Daod sa Kadnan sii
ko di on dii kapakateroa o Soti a Roh? Ka pitero iyan a
44'So Allah na pitero iyan ko Kadnan aken a

taman sa matago aken so manga ridoay ngka
ko didalem o palad a ai ngka." '
45 Na kagiya bitowan sekaniyan o Daod sa Kadnan na andamanaya i kiyambaloy niyan a

Wata o Daod?"
46 Na da den a miyakasembag ki Isa sa sataga bo, na ipoon den sangkoto a gawii na da
den a ba on miyakaraw mise sa ped a pakaise.
MATIYO 23
Lalangan i Isa mipantag ko manga Goro ko Kitab ago so manga Parisi
Kagiya maipos oto na pitero i Isa ko madakel a taw ago so manga sokbat iyan a
2 “So manga goro ko Kitab ago so manga Parisi na aya kikilalaan a pegosay rekano ko
maana o Kitab o Mosa.
3 Kagiya ka maoto na tagoa niyo sa ginawa ago tomana niyo so langon a di ran rekano dii
teroon. Ogaid na di niyo sowaa so di ran dii nggolaolaan, ka di iran tomanen so
ipepangosiyat iran.
4 Pembekesen iran so manga awid a maregen a kapegawidi ron na pepakiposai iran ai ko
manga taw, ogaid na di iran kabaya i ba siran den i magawid on ko apiya isa bo ko kemer
iran.
5 “So langon a di ran dii nggolaolaan na sabap bo sa an mailay o manga taw. Maolad so
manga pananagoay ko inipanorat a manga ayat o Kitab a tatagoon iran sa beneng iran ago
barokan, na matas so manga garigay ko sagayadan o manga kimon iran.
6 Pekebabayaan iran so manga darpa o seselaan a taw ko kalilimod ago so isesenggay a
manga ontoda ko manga sinagoga.
7 Pekebabayaan iran so kapesalama kiran sii ko manga padian, ago so kapembetowi kiran
o manga taw sa 'Goro.'
8 “Ogaid na di patot i ba kano kabetowi sa 'Goro,' ka palaya kano magariyari, na isa bo a
Goro niyo.
9 Na di niyo mbetowi so apiya antawaa sa 'Ama,' sii sa doniya, ka isaisa bo a Ama iyo a
10 Na di patot i ba kano kabetowi sa 'Kadnan,' ka isa bo a Kadnan iyo, a so Al Masih.
11 So lebi rekano a mala na disomala a pembaloy baden a pepanalagad rekano.
12 Apiya antawaa i pepangimporoan na imbaba, na apiya antawaa i pepangalimbabaan na
iporo."
Pimbongetan siran i Isa sabap ko di ran dii Kapagomanta
13 “Kemorkaan kano a manga goro ko Kitab ago manga Parisi a dii mamagomanta!
Pelekeban iyo so pintoan ko Ndatoan o Allah ko manga taw. Di kano ron soled, na siran
oto a petepeng on somoled na di niyo pekasoleden.
Pepalayalayag kano sa ragat ago pelalakawan iyo so kalopaan kaan iyo mapakaparatiyaya
so isa a taw ko kepit iyo. Na amay ka mapesokbat iyo na mbalowin iyo a dowa takep sa
kakepatot iyan sa kapekanaraka iyan a di sekano.
16 “Kemorkaan kano a manga bota a nakoda, ka ipepangendao niyo a o pesepaan o taw
so Timplo na di ron paliyogat i ba niyan mitoman so inisepa iyan, ogaid na o pesepaan
iyan so bolawan a sisii ko Timplo na paliyogat on a kitomanen niyan on.
17 Bota kano a manga lalong! Anda i lebi a mala i kipantag ko bolawan ago so Timplo a
aya pepekasoti ko bolawan?
18 Ipepangendao niyo pen a o pesepaan o taw so aparan na di ron paliyogat i ba niyan
mitoman so inisepa iyan, ogaid na o pesepaan iyan so soasoat a isepaat ko aparan na
paliyogat on a kitomanen iyan on.
19 Manga bota kano! Anda i lebi a mala i kipantag ko soasoat ago so aparan a aya
pepekasoti ko soasoat?
20 Kagiya ka maoto na igira a dii sesapa o taw so aparan na aya niyan dii sesapa na so
aparan ago so langon a ndodon.
21 Na igira a dii sesapa o taw so Timplo na aya niyan dii sesapa na so Timplo ago so
Allah a mababaling roo.
22 Na igira a dii sesapa o taw a kasorgaan na aya niyan dii sesapa na so korsi o Allah ago
so moontod on.
Apiya so ba bo palapa a lagid o kemi, loya, tidek ago kadingag na di niyo dii ndiyakatan,
ogaid na inindarainon iyo so lebi pen a mala i kipantag a manga sogoan o Kitab mipantag
ko kapaginontolan, kapedi ago kapetoman sa pasad. Giyai i patot a penggolaolaan iyo a
sarta a di niyo pendarainonen so ped a pesowaan.
24 Manga bota kano a nakoda! Peseraan iyo ron so tendek ko peginomen iyo, ogaid na
pelamed kano sa onta.
Pelompiyon iyo so liyo o tagayan ago pinggan ogaid na so soled iyan na mapepeno a
kanggagasab ago napso.
26 Bota a Parisi! Daan iyo a lompiyowi so soled o tagayan na go bo mambo malompiyo
so liyo niyan.
27 “Kemorkaan kano a manga goro ko Kitab ago manga Parisi a dii mamagomanta! Datar
kano o manga kobor a pipintoraan sa mapoti a mapiya a pegilain sa liyo, ogaid na so
soled iyan na mapepeno a manga tolan o miyamatay ago langon a maresik a manga
nganin.
28 Datar oto mambo a malagilagid kano o ba manga oontol igira a pegilain kano o manga
taw, ogaid na so soled iyo na mapepeno a kapamagomanta ago kadostaan.
Piyayag i Isa so Kandanega kiran
Pepangembaal kano sa manga pipiya a kobor para ko manga nabi, na di niyo dii
pendaraan iyo so manga lebeng o manga oontol,
30 A di niyo dii teroon a 'O miyakapaginetaw tano ko miyanga oona a gawii o manga apo
tano na di tano kiran den pemangeped o kowan sa kambonoa ko manga nabi.'
31 Sii ko di niyo sii dii kateroa na pepamataanan iyo a manga mbawataan kano angkoto a
miyamamono sa manga nabi.
32 Na, tarosen iyo baden ago imasada niyo so inepoonan o manga apo iyo!
33 “Sekano a manga nipay ago mbawataan o manga nipay! Andamanaya i kapelagowi
niyo ko kapagowita rekano roo sa kanarakaan?
34 Sogo ako rekano sa manga nabi, manga oongangen a mama, ago manga goro.
Pemonoon iyo so ped kiran, penotoken iyo so ped ko kros, na so ped na pemadasan iyo sii
ko manga sinagoga niyo, ago penalobaan iyo siran ko pisetimanan a siti.
35 Na sabap sii na kidaneg rekano so kiyapamonoa ko langon o manga oontol a taw a
miyapamono sa doniya ipoon ko kiyabonoa ki Abil a maontol a mama taman ko
kiyabonoa ki Sakariyas a wata o Barakiyas a biyono iyo ko pageletan o Timplo ago so
aparan.
36 Teroon ko rekano a mataan den a palaya ini kidaneg ko manga taw a kapapantagan
sangkai a masa!
So Gagaw i Isa sa Yarosalim
37 “Aidaw, Yarosalim, Yarosalim, a aya pepamono ko manga nabi ago perobak a ator ko
siran oto a siyogo reka! Omanoman aken kabaya a pelimoden aken so langon o manga
taw ngka a datar o gopoan a petimoon iyan so manga piyak iyan ko atag o manga papak
iyan, ogaid na da niyo kabayai.
38 Ilaya niyo man, ka kiyaawaan den so babalingan iyo.
39 Ka teroon ko rekano a ipoon imanto na di ako niyo den keilay taman sa matero iyo a
'Podin tano so pepekaoma sii ko ingaran o Kadnan.' "
MATIYO 24
Inaloy i Isa so Kakegeba o Timplo
Sii ko kapegawai i Isa ko lamalama o Timplo na miyobay rekaniyan so manga sokbat iyan
na initoro iran on so manga walay a matatago ko darpa a Timplo.
2 Na iniise kiran i Isa a "Miyailay niyo bes angkai a langon taman? Teroon ko rekano a
mataan den a da a isa bo a ator sii a ba kibagak ko kabebetadan on, ka langon den ai
penga gegeba."
So manga Kamaregenan ago Kasatroan
3 Sii ko kaoontod i Isa ko Palaw a Olibi na somiyong on so manga sokbat a siran bo na

pitero iran a "Teroa ngka rekami o anda i kakitoman angkai a pitero o ka, ago antonaa i
toos ko kapekaoma ngka go so kaposan angkai a masa."
4 Somimbag si Isa a "Iktiyari niyo o ba kano masaliba o apiya antawaa.
5 Ka madakel a pemakaoma a pegingaranen iran so ngaran aken, a peteroon iran a 'Saken
so Al Masih,' na madakel a penga sesaliba iran.
6 Keneg iyo so makapantag ko dii katidawa ago so manga totolan ko manga katidawa,
ogaid na pangalii niyo o ba kano malek, ka disomala a mapenggolaola ini. Ogaid na kena
a ba giyanan i kaposan,
7 Ka so isa a nasiyon na makipetidawa ko salakaw a nasiyon, na so isa a ndatoan na
makipetidawa ko salakaw a ndatoan. Teonen ago pelinogen so mbarambarang a manga
inged.
8 Langon ai na datar bo o poonan o kambalilita ko babay.
So Kasetroa ko manga Sokbat

9 “Sa masa oto na pendadakepen kano o manga taw, na peladen kano iran sa kaperasaya
rekano, na pemonoon kano iran. Ikegowad kano o langon o manga nasiyon sabap raken.
10 Sangkoto a masa na telikodan o madakel a taw so paratiyaya iran, na petitipowa siran
ago pekekagowada.
11 Madakel a di tito a manga nabi a pemakagemaw, na madakel a penga sesaliba iran.
12 Na sabap ko kapekalangkap o kamarataan na ketenggaw so kapekebabaya o kadakelan
ko taw.
13 Ogaid na so makatiger sa taman sa kaposan na aya kesabet.
14 Na giyangkai a Mapiya a Totol makapantag ko Ndatoan o Allah na pekalangkapen ko
dalem a doniya kaan maneg o langon o manga nasiyon, na sii sangkoto a masa na
pekatalingoma so kaposan.
So Piyakagowagowad a Pekamorala
15 “Na amay ka mailay niyo so 'Piyakagowagowad a Pekamorala,' a miyatero o Nabi

Daniyal a makatitindeg ko soti a darpa (so pepangadi sii na tanodi niyan ai)
16 Na siran oto a ndodoo sa Yodiya na pamalagoy a pagagaw ko manga bobongan.
17 So taw a sii kapantagi ko liyoliyo o walay niyan amay ka pelagoy na di den soled ko
walay sa kakowaa niyan ko tamok iyan.
18 Na so taw a sii kapantagi ko pangomaan na di kesoy ko walay niyan sa kakowaa niyan
ko gerab iyan.
19 Dowandowaan iyan so manga oogat ago manga maritan a babay sangkoto a manga
gawii!
20 Pangniya niyo ko Allah a so kapekapalagoy niyo na kena a ba sii ko rendeng o di na so
Gawii a Idedeke.
21 Ka so karomasayan a pekatalingoma sa masa oto na tanto a mala a da den kaokiti so
datar iyan ipoon ko kiyaadena ko doniya taman imanto, na di den mambo
kapeparomanan.
22 O da kalebati so kadakel angkoto a manga gawii na da den a ba on kelamba a
oyagoyag. Ogaid na sabap ko manga taw a piyamili o Allah na kelebatan iyan angkoto a
manga gawii.
23 “Sa masa oto na o aden a petero rekano sa 'Ilaya niyo, katii so Al Masih!' o di na
'Kaoto roo!' na di niyo mbenara.
24 Ka pekagemaw so di tito a manga Al Masih ago di tito a manga nabi. Pemangembaal
siran sa manga ala a nanao ago piyakamemesa kaan apiya so manga taw a piyamili o
Allah na masaliba iran o kepakay.
25 Tanodi niyo ai, ka miyatero aken rekano sa da niyan pen kapakatalingoma.
26 “Kagiya ka maoto na o aden a petero rekano sa 'Ilaya niyo man, ka ndodoo so Al
Masih ko disirto,' na di kano roo song. O di na o teroa iran a 'Ilaya niyo, ka miyagna
sekaniyan sa walay,' na di niyo mbenara.
27 Ka so kapekaoma o Wata o Manosiya na datar o kilakilat roo sa sebangan a pesindaw
taman sa sedepan.
28 “Apiya anda a aden a bangkay ron na ron mambo petimo so manga garoda.
So Kapekaoma o Wata o Manosiya

29 “Anda den i kaipos o karomasayan sangkoto a manga gawii na pekaliboteng so
alongan ago di sindaw so olan, so manga bitoon na penga oolog a poon sa langit, na
keselenseleng so manga kabatowa roo sa langit.
30 Sa kapapantagan oto na pekagemaw so nanao ko Wata o Manosiya roo sa langit, na
pemboboko so langon o manga nasiyon sa doniya. Keilay iran so Wata o Manosiya a
pepekaoma a sisii ko manga gabon sa langit a misasarta on so mala a kabatowa ago
bantogan.
31 Na sogoon iyan so manga malaikat iyan a sarta a magoni a bogiyong sa matanog, na
penimoon iran so piyamili iyan a manga taw a poon ko pat a pidoro a alam, a poon ko isa
a kaposan o doniya taman ko sabala a kaposan iyan.
So Indao o Kayo a Higos
32 “Paganada niyo angkai a indao o kayo a higos. Amay ka melita so manga sapak iyan
ago mamagombos na ketokawan iyo a magaan lomaon.
33 Datar oto mambo a amay ka mailay niyo so langon angkai a pekeolaola na ketokawan
iyo a magaan den so kapekaoma niyan, ka sisii den ko pintoan.
34 Teroon ko rekano a mataan den a palaya ini den mapenggolaola sa di pen malengan
mamatay so kapapantagan ai a manga taw.
35 Penga ada so langit ago so doniya, ogaid na di den keda so manga katero aken.''
Da a Taw a Matao ko Gawii o di na Oras
36 “Da a taw a ba matao sangkoto a gawii o di na oras. Apiya so manga malaikat roo sa
kasorgaan ago so Wata na di iran katawan, ka so bo so Ama i matao ron.
37 So kapekaoma o Wata o Manosiya na kedatar o miyaolaola isako kiyapaginetaw o
Nok.
38 Ka sii sangkoto a manga gawii sa da pen kapakaoma o bagiyaw na so manga taw na
pepamakakan ago pepamakainom, pepamangaroma ago pepamangaromaan taman den ko
gawii a kiyapakasoled o Nok ko mala a kapal.
39 Na di iran katawan o antonaa i keolaola taman ko kiyapakaoma o bagiyaw na
minigaled siran langon. Datar ai mambo a kesowasowa amay ka pekaoma so Wata o
Manosiya.
40 So dowa kataw a mama sa masa oto a dii nggagalebek ko pangomaan na kowaan on so
isa on ago imbagak so ped iyan.
41 So dowa kataw a babay a pembowayo na kowaan on so isa on ago imbagak so ped
iyan.
42 “Kagiya ka maoto na pagaalataw kano baden, ka di niyo katawan o antonaa i gawii a
kapekaoma o Kadnan iyo.
43 Tanodi niyo ai: o katawi o kiwalay so oras ko kagagawii a kapekaoma o tekew na
magaalataw sekaniyan ago di niyan pekisoledan so walay niyan.
44 Sabap sii na lalayon kano mambo titiyagar, ka pekaoma so Wata o Manosiya ko oras a
kena o ba niyo pakatatalingomaa.
So Petoman ago so di Petoman a Talasogoay
45 “Antawaa so kasasanaan ago maongangen a talasogoay? Sekaniyan so piyakakibir o

kadnan iyan ko ped a manga talasogoay kaan iyan siran mapakakan ko ponto a oras.
46 Mapipiya a ginawa angkoto a talasogoay amay ka makaoma so kadnan iyan o maoma
o kadnan a petomanen iyan ai.
47 Teroon ko rekano a mataan den a pekikibir on o kadnan so langon o tamok iyan.
48 Ogaid na opama ka marata angkoto a talasogoay na mapemikir iyan a 'Matey pen
komasoy so kadnan aken,'
49 Na peranegen iyan so ped iyan a manga talasogoay, na magatoang mambo ko manga
tamereg.
50 Na pekaoma so kadnan angkoto a talasogoay ko alongan a kena o ba niyan
pakatatalingomaa sii ko oras a di niyan katawan.
51 Na pesetepeden sekaniyan o kadnan, na isenggay niyan a keped ko dii mamagomanta,
na ron pendiyagaw a di niyan dii pakakitebaan a ngipen iyan.
MATIYO 25
So Bayambayanan makapantag ko Sapolo a Raga
"Sii sangkoto a gawii na so Ndatoan o Allah na kiibarat ko sapolo a raga. Lomiyalakaw

siran a kiaawid sa manga palitaan iran, ka pagalaon iran so mangangaroma.
2 So lima on kataw na da a manga lalag iyan, ago so lima on kataw na manga oongangen.
3 Sii ko kiyaawidi o da a manga lalag iyan ko manga palitaan iran na da iran pangolambai
sa lanawato.
4 Ogaid na so manga oongangen na miyawid siran sa manga pananagoay a mapepeno a
lanawato a rakes o manga palitaan iran.
5 Kagiya matey a da makaoma so mangangaroma na petoratoden so manga raga na sarta a
tiyorog siran.
6 “Kagiya kalookan den a gawii na aden a miyananalo a tig iyan a 'Katii so
mangangaroma. Song kano sii na alawa niyo!'
7 “Na miyakanaw langon angkoto a manga raga na tiyanor iran so manga palitaan iran.
8 Pitero o da a manga lalag iyan ko manga oongangen a 'Saadi kami niyo ko lanawato
niyo, ka magaan den kepareng so manga solo ami.'
9 “Tig o manga oongangen a 'Di, ka masiken a di rekami petoon ago sii rekano. Song
kano baden ko tinda na pamasa kano sa keosar iyo.'
10 Na sii ko kapesong iran roo a pemasa siran na miyakaoma so mangangaroma. So
manga raga a makatitiyagar na miyonot siran on na somiyoled siran ko kenanan ko
kakewing na likeban so pintoan.
11 “Da peman matey na miyakaoma mambo so ped a manga raga, na miyananalo siran a
'Sir, Sir, lekai ngka rekami so pintoan!'
12 “Ogaid na inisembag iyan a 'Teroon ko rekano a mataan den a di ko sekano katawan.' "
13 Pitero pen i Isa a "Kagiya ka maoto na pagaalataw kano, ka di niyo katawan so gawii o
di na so oras.
So Bayambayanan makapantag ko Telo a Talasogoay

14 “So Ndatoan o Allah na kiibarat pen ko mama a magaan den lomalakaw. Tiyawag iyan
so manga talasogoay niyan na inisana niyan kiran so manga tamok iyan.
15 Bigan iyan so oman i isa kiran sa domadait ko kapasang iyan. So isa on na bigan iyan
sa lima nggibo a pelata a bolawan, so isa na dowa nggibo, ago so ped pen na sanggibo.
Na lomiyalakaw sekaniyan.
16 Sii den ko kiyaipos iyan na lominiyo so kiyabegan sa lima nggibo a pelata na
inindagang iyan, na miyakalaba sa lima nggibo.
17 Datar oto mambo a so kiyabegan sa dowa nggibo a pelata na miyakalaba sa dowa
nggibo.
18 Ogaid na so kiyabegan sa sanggibo a pelata na lomiyalakaw na komiyalot sa lopa na
piyagna iyan on so pirak o kadnan iyan.
19 “Kagiya den a matey na komiyasoy so kadnan angkoto a manga talasogoay na tinimo
iyan siran kaan iyan mapagitong so pirak iyan.
20 Miyobay ron so kiyabegan sa lima nggibo a pelata na inawidan iyan so isa pen a lima
nggibo a tig iyan a 'Inisana ngka raken so lima nggibo a pelata a bolawan, Sir, na ilaya
ngka ngkai a isa pen a lima nggibo a miyalaba ko!'
21 “Pitero o kadnan iyan a 'Mapiya oto! Mapiya ka ago kasasarigan a talasogoay!
Kiyasarigan ka ko kiyakibira ngka ko maito a manga nganin na pekikibir aken reka so
madakel. Bagian ka so kapipiya a ginawa o kadnan ka!'
22 “Miyobay ron mambo so kiyabegan sa dowa nggibo a pelata a tig iyan a 'Inisana ngka
raken so dowa nggibo a pelata a bolawan, Sir, na ilaya ngka angkai a isa pen a dowa
nggibo a miyalaba ko!'
23 “Pitero o kadnan iyan a 'Mapiya oto! Mapiya ka ago kasasarigan a talasogoay!
Kiyasarigan ka ko kiyakibira ngka ko maito a manga nganin na pekikibir aken reka so
madakel. Bagian ka so kapipiya a ginawa o kadnan ka!'
24 “Moripori na miyobay ron so kiyabegan sa sanggibo a pelata a tig iyan a 'Sir, katawan
aken a masingit ka a mama a peperagon sa da ngka pamolaa ago pepangowa sa pereperan
a da ngka saoden.
25 Na kagiya miyalek ako na lomiyalakaw ako na piyagna aken so pirak ka ko lopa. Ilaya
ngka, ka katii so rek ka!'
26 “Somimbag so kadnan iyan a 'Marata ka ago tapolan a talasogoay! O mapipikir ka a
peperagon ako sa da ko pamolaa ago pepangowa ako sa pereperan a da ko saoden
27 Na patot a katagoa ngka ko pirak aken sa bangko kaan amay ka komasoy ako na
makowa ko so rek aken ago so iseg iyan.
28 “ 'Na kowaa niyo ron so sanggibo a pelata na began iyo ko sapolo nggibo i pelata.
29 Ka so oman i isa a aden a rek iyan na kebegan pen, na kitaralo so rek iyan. Ogaid na so
da a rek iyan na apiya so maito bo a rek iyan na kowaan on.
30 Na giyangkai a da a bali niyan a talasogoay na lebaden iyo sa liyo roo ko maliboteng a
ron pendiyagaw a di niyan dii pakakitebaan a ngipen iyan.'
So manga Bilibili ago so manga Kambing
31 “Amay ka makaoma so Wata o Manosiya sa kapendato iyan a oonotan o langon o

manga malaikat iyan na magontod ko seselaan a korsi iyan.
32 Na ketimotimo ko hadapan iyan so langon o manga nasiyon sa doniya na mbegiin iyan
siran sa dowa lompok a lagid o pananagikor sa bilibili a di niyan dii pakapesibayaan so
manga bilibili ago so manga kambing.
33 Tegoon iyan so manga bilibili sa kawanan iyan na so manga kambing na sii sa diwang
iyan.
34 “Na peteroon o Dato ko manga taw a sisii sa kawanan iyan a 'Sekano a rarakmatan o
Ama aken, song kano sii na tarimaa niyo so kawali niyo, a so Ndatoan a ititiyagar rekano
ipoon den ko kiyaadena ko doniya.
35 Ka miyaor ako na piyakakan ako niyo. Miyawaw ako na piyakainom ako niyo.
Miyakapanaget ako rekano na siyakaw ako niyo.
36 Kagiya talandiyang ako na pinditaran ako niyo. Miyasakit ako na piyanisekit ako niyo.
Miyakalaboso ako na inibentel ako niyo.'
37 “Na sembag rekaniyan so manga oontol a peteroon iran a 'Kadnan, anda i kiyailaya mi
reka a pekeor na piyakakan ami seka, o di na pekewaw na piyakainom ami seka?
38 Anda i kiyailaya mi reka a mananaget ka na siyakaw ami seka, o di na talandiyang na
pinditaran ami seka?
39 Anda i kiyailaya mi reka a pekesakit o di na makakalaboso na inibentel ami seka?'
40 “Na isembag kiran o Dato a 'Teroon ko rekano a mataan den a igira a pinggolaola niyo
ai ko isa sangkai a manga pagari aken apiya lebi a mitatanan na saken i pinggolaolaan iyo
ron.'
41 “Oriyan oto na peteroon iyan ko manga taw sa diwang iyan a 'Awa kano raken a
misisinta o Allah! Roo kano ko apoy a da a ikepareng iyan a ititiyagar ko Iblis ago so
manga saitan iyan!
42 Ka miyaor ako na da ako niyo pakakana. Miyawaw ako na da ako niyo pakainoma.
43 Miyakapanaget ako rekano na da ako niyo sakawa. Talandiyang ako na da ako niyo
nditari. Miyasakit ako ago miyakalaboso na da ako niyo mbentelen.'
44 “Na sembagen iran sekaniyan a 'Kadnan, anda i kiyailaya mi reka a pekeor, o di na
pekewaw, o di na mananaget, o di na talandiyang, o di na pekesakit, o di na
makakalaboso a da ami seka ogopi?'
45 “Na isembag iyan kiran a 'Teroon ko rekano a mataan den a igira a minda kano mogop
ko isa sangkai a mitatanan a manga taw na saken i da niyo ogopi.'
46 “Mandiyadi na giyangkai a manga taw na pekasong ko da a ikepos iyan a
kapendadaneg, ogaid na pekasong so manga oontol ko kaoyagoyag a da a kaposan iyan."
MATIYO 26
So Kadiyat a Kambonoa ki Isa
Kagiya langon ai mapasad tero i Isa na pitero iyan ko manga sokbat iyan a
2 “Katawan iyo a dowa pen gawii a da kaomai ko Paska, na so Wata o Manosiya na
kepalad ko katotoka on ko kros."
3 Samaoto na mitimotimo so manga poporo a imam ago so manga pelokelokesen o
manga Yahodi roo ko torogan i Kayapas a so maporo a imam.
4 Na pikediyat iran a ndakepen iran si Isa sa da a matao ron ago mbonoon iran.
5 Ogaid na pitero iran a "Di tano ai nggolaolaan sii ko kapepista, ka o ba baden sesamok
so manga taw."
Inododan si Isa sa Lana roo sa Bitani
6 Sii ko kandodoo i Isa sa Bitani sii ko walay o pekebowa, a si Simon,

7 Na somiyong rekaniyan so isa a babay a maawid sa maito a omoy a mapepeno a lana
mamot a tanto a mala i arga, na inododan iyan on a olo i Isa sii ko kapekan iyan.
8 Kagiya mailay ai o manga sokbat na inotegan siran a tig iran a "Ino pegolai a lana ini?
9 Mapepasa nda sa mala a pirak a mibegay ko manga miskin!"
10 Katawan i Isa so di ran dii teroon, na pitero iyan kiran a "Ino niyo dii tekora angkai a
babay? Mapiya angkai a pinggolaola niyan raken.
11 Lalayon rekano sisii so manga miskin, ogaid na saken na kena a ba lalayon iyo dii
mipagepeda.
12 So kiyaododa niyan sangkai a mamot ko lawas aken na giyoto i kinitiyagaren iyan on
ko kipelebengen raken.
13 Teroon ko rekano a mataan den a apiya anda ko dalem a doniya a mapakalangkap on
angkai a Mapiya a Totol na mapenotol mambo so inikidia niyan raken a pekipananadem
on."
Miyayon si Yodas sa Katipowa niyan ki Isa
14 Oriyan oto na si Yodas Iskariyot, a isa ko sapolo ago dowa a sokbat, na somiyong ko
manga poporo a imam
15 Na pitero iyan kiran a "Antonaa i imbegay niyo raken o palada ko rekano si Isa?" Na
minilang siran sa telo polo a pelata a pirak na inibegay iran on.
16 Ipoon den sangkoto a oras na pepangiloba si Yodas sa kapekaparo niyan sa katipowa
niyan ki Isa.
So Kiyagabi i Isa ago so manga Sokbat iyan
17 Sii ko paganay a gawii ko Pista ko Kakan sa Paan a da a Tapay ron na somiyong ki Isa
so manga sokbat na iniise iran a "Anda i kabaya a ka a petiyagaran ami sa kanggabi ngka
ko Paska?"
18 Tig iyan a "Songowi niyo angkoto a isa a taw roo ko siti na teroa niyo ron a 'Pitero o
Goro a: Magaan mitalingoma so oras aken. Saken ago so manga sokbat aken na
peselaselaan ami so Paska sii ko walay ngka.' "
19 Na tiyoman o manga sokbat so pitero kiran i Isa, na pitiyagar iran so inggabi ko Paska.
20 Kagiya magagawii na miyamagatoang si Isa ago so sapolo ago dowa a sokbat.
21 Na sii ko kapekan iran na pitero i Isa a "Teroon ko rekano a mataan den a so isa
rekano na tipo raken."
22 Kagiya maneg iran ai na tanto a mikerata a ginawa iran, na iniise on o oman i isa kiran
a "Kena bes a ba saken, Kadnan?
23 Somimbag si Isa a "So isa rekano a ped aken a sominindot sa paan sii sa ladiya na aya
raken tipo.
24 Mataan a petay so Wata o Manosiya a kitoman so misosorat ko Kitab makapantag
rekaniyan, ogaid na kemorkaan angkoto a mama a tipo ko Wata o Manosiya! Tomo
rekaniyan a da den mbawataan."
25 Na giyoto a iniise i Yodas a aya on tipo a "Kena bes a ba saken, Goro?"
Na tig i Isa a "Seka den i mitero on."
So Paan ago so Arak
26 Sii ko kapekan iran na kominowa si Isa sa paan, na kagiya kapanalamatan iyan so

Allah, na piyangopak iyan na inibegay niyan ko manga sokbat a tig iyan a "Kowa kano
ron na kana niyo; giyai so lawas aken."
27 Na kinowa niyan so tagayan, na kagiya makapanalamat na inidawag iyan kiran a tig
iyan a "Palaya kano ron inom.
28 Giyai so rogo aken a ron mipepasod so kapasadan o Allah, a so rogo a keodod para ko
madakel a taw kaan karilai so manga dosa iran.
29 Teroon ko rekano a ipoon imanto na di ako den maginom sangkai a arak taman ko
gawii a paginomen aken so bago a sasoson a arak a ped iyo roo ko Ndatoan o Ama aken."
30 Na kagiya domikir siran na lominiyo siran na somiyong ko Palaw a Olibi.
Inalamat i Isa so Kapepalaw i Pidro
31 Pitero kiran i Isa a "Sangkai a kagagawii na pagawaan ako niyo langon, ka misosorat
ko Kitab a:
'Mbonoon ko so pananagikor
na pemangiparak so manga bilibili ko talon.'
32 Ogaid na amay ka maoyag ako na keona ako rekano somong sa Galili."

33 Pitero on i Pidro a "Apiya pen awaan ka o langon a ped na di aken seka den
pagawaan."
34 Tig i Isa a "Teroon ko reka a mataan den a giyangkai a kagagawii sa di pen komoko so
manok na ipepelaw ako ngka sa makatelo."
35 Tig i Pidro a "Apiya ako reka mirakes a mbonoon na di aken seka den ipepelaw." Na
pitero mambo o langon o manga sokbat.
Miyangangarapan si Isa roo sa Gitsimani
36 Miyakaoma si Isa ago so manga sokbat iyan ko darpa a bebetowan sa Gitsimani. Pitero
iyan kiran a "Ontod kano sii pasin sii ko kapepangangarapan aken roo."
37 Na piyakaonot iyan si Pidro ago so dowa a wata i Sibidi, na miyarata a ginawa niyan
ago miyasosa a pamikiran iyan.
38 Na pitero iyan kiran a "Minitaralo so kararata a ginawa ko a kiyarong ko kapatay.
Telimbagak kano sii na totoday kano a ped aken."
39 Malo iyan siran inawat na gomipe sa lopa na miyangangarapan a tig iyan a "Ama aken,
o kepakay na kowaa ngka raken angkai a tagayan! Ogaid na pengnin ko a kena a ba so
kabaya aken i ketoman, ka so kabaya a ka."
40 Na komiyasoy sekaniyan ko telo a sokbat na miyaoma niyan siran a kitotorogen. Na
pitero iyan ki Pidro a "Ba kano di pekatoday a ped aken apiya isa bo ka oras?
41 Totoday kano ago pepangangarapan kaan kano di ketepengi. Mateterang so niyawa,
ogaid na malobay so lawas."
42 Miperoman roo somong si Isa na miyangangarapan a tig iyan a "Ama aken, o di
kepakay a kekowa raken angkai a tagayan taman sa di ako ron makainom na matoman so
kabaya a ka."
43 Na komiyasoy peroman na miyaoma niyan siran a kitotorogen sabap ko kapened o
manga mata iran.
44 Na inawat iyan siran peman na somiyong roo ago miyangangarapan sa miyakatelo a
siyoson iyan tero so miyaona a pangni niyan.
45 Oriyan oto na komiyasoy sekaniyan ko manga sokbat na pitero iyan kiran a "Ba kano
pen totoroga ago domedeke? Ilaya niyo man, ka miyakatalingoma den so oras a peladen
so Wata o Manosiya ko kapaar o manga baradosa.
46 Mbowat kano! Itano roo ka pekaoma den so tipo raken!"
So Kiyadakepa ki Isa
47 Sii ko di niyan pen dii katero na miyakaoma si Yodas a isa ko sapolo ago dowa a
sokbat. Oonotan sekaniyan o tanto a madakel a taw a kiaawid sa manga pedang ago
manga bentol a piyakasong roo o manga poporo a imam ago so manga pelokelokesen o
manga Yahodi.
48 So tipo rekaniyan na miyatero iyan kiran den a mbegan iyan siran sa toos a tig iyan a
"So mama a pagarekan ko na giyoto den i pepangilobaan iyo. Dakepa niyo sekaniyan!"
49 Na miyobay somambot si Yodas ki Isa a tig iyan a "Mapipiya a ginawa ngka, Goro!"
na inarekan iyan.
50 Na pitero on i Isa a "Nggolaolaa ngka, Aki, so inisong ka sii."
Giyoto a miyamangobay ki Isa so manga taw na diyakep iran ago piyamageran iran
komapet.
51 Mandiyadi na isa ko ped i Isa na binindas iyan so pedang iyan na liyakot iyan so
oripen o maporo a imam, na miyasapil on a tangila niyan.
52 Pitero rekaniyan i Isa a "Tagoba ngka so pedang ka, ka so langon a pegosar sa pedang
na kepatay mambo a pedang.
53 Ba ngka di katawi a keampit aken so Ama aken na sagogona a sogoon iyan raken so
pipira nggibo a manga malaikat?
54 Ogaid na o nggolaolaa ko ini na andamanaya i kakitoman o misosorat ko Kitab a
disomala a mapenggolaola ini sangkai a okit?"
55 Na giyoto a pitero i Isa ko madakel a taw a "Ba ako tanganiyaya? Ino kano kiaawid sa
manga pedang ago manga bentol ko kiyasong iyo sii a ndakep raken? Oman gawii na
moontod ako roo ko Timplo a pepangendao na da ako niyo dakepa.
56 Ogaid na palaya ini miyanggolaola kaan mitoman so miyamangisorat o manga nabi."
Na sarta den a inawaan sekaniyan o langon o manga sokbat, na miyamalagoy siran.
Si Isa ko Hadapan o manga Pangongokom
57 So manga taw a domiyakep ki Isa na inowit iran roo ko torogan o maporo a imam, a si
Kayapas, a ron mitimotimo so manga goro ko Kitab ago so manga pelokelokesen.
58 Tomiyondog rekaniyan si Pidro a malo on maaawat taman ko kalamalama o torogan o
maporo a imam. Somiyoled sekaniyan den na miyontod ko obay o manga gordiya, ka
pagilain iyan i keondasan angkai a miyaolaola.
59 So manga poporo a imam ago so langon o manga pangongokom na pembabanog sa
manga taw a ipeseksi iran so di benar a isendit iran ki Isa kaan iran mabono.
60 Ogaid na da a ba iran miyatoon apiya pen madakel a miyamamokeg a saksi a miyadap
kiran.
Moripori ron na tominindeg so dowa kataw a mama
61 A tig iran a "Si aki ini na pitero iyan a 'Kegaga ko gomeba so Timplo o Allah ago
kebangon aken peroman ko soled o telo gawii.' "
62 Na tominindeg so maporo a imam na pitero iyan ki Isa a "Ba da a kisembag ka sii?
Antona ini a dimanda reka angkai a manga mama?"
63 Na da den tero si Isa.
Pitero on peroman o maporo a imam a "Pakapesepaan ko seka sii ko ingaran o oyagoyag
a Tohan; teroa ngka rekami o ba seka so Al Masih a so Wata o Allah!"
64 Somimbag si Isa a "Benar so pitero o ka. Na teroon ko rekano a ipoon imanto na
keilay niyo so Wata o Manosiya a makaoontod ko kawanan o Lebi a Mamaapaar ago
pepekaoma a sisii ko manga gabon sa langit."
65 Kagiya maneg ai o maporo a imam na kinisi iyan so kimon iyan sa kiyararangiti ron na
tig iyan a "Piyagitowito iyan so Allah! Di den kailangan a kapakapeseksia tano ko ped.
Miyaneg iyo imanto so kiyapagitowito iyan!
66 Antonaa i pamikiran iyo?"
Somimbag siran a "Patot a mbonoon sekaniyan!"
67 Mandiyadi na piyanodaan iran a paras i Isa ago piraraneg iran. Pisetengela sekaniyan
pen o manga ped 68 A tig iran a "Hey Al Masih, iring ka sa nabi; antawaa i somiyontok
reka?"
Inipelaw i Pidro si Isa
69 Si peman si Pidro na moontod ko kalamalama roo sa liyo o walay. Miyobay ron so isa
a babay a talasogoay a tig iyan a "Ped ka mambo i Isa a taw sa Galili."
70 Ogaid na niyokol i Pidro ko kamamasaan iran langon a tig iyan a "Di ko katawan i di
ngka dii teroon."
71 Na somiyong sekaniyan ko pintoan o kalamalama a ron den miyailay o ped a babay a
pitero iyan ko kititindeg roo a "Ped sekaniyan i Isa a taw sa Nasarit."
72 Niyokol peroman i Pidro a sarta a misepa a "Di aken katawan angkanan a mama!"
73 Da peman matey na miyamangobay ki Pidro so kititindeg roo a tig iran a "Mataan den
a isa ka kiran, ka so sigeng o lago ngka i kitendo reka a taw ka sa Galili."
74 Na tig i Pidro a "Kamorkaan ako o pepamokeg ako! Ipesepa aken a di aken katawan
angkanan a mama!"
Na sarta den a komiyoko so manok,
75 Na kiyatademan i Pidro so pitero on i Isa a "Sa da pen kakoko o manok na ipepelaw
ako ngka sa makatelo." Na lominiyo sekaniyan na gomiyoraok a tanto a misendit.
MATIYO 27
Piyakaadap si Isa ki Pilato
Kagiya pekelibabas na miyagayonayon so kalangolangon o manga poporo a imam ago

manga pelokelokesen o manga Yahodi sa mbonoon iran si Isa.
2 Na piyatong iran na piyakaonot iran ago piyalad iran ki Pilato a so gobirnador.
Binitin i Yodas a Ginawa niyan ko Kayo
3 Si peman si Yodas a tominipo ron na kagiya katokawan iyan a miyasala si Isa sa

kambonoa on na misendit sekaniyan, na inikasoy niyan so telo polo a pelata a pirak ko
manga poporo a imam ago so manga pelokelokesen
4 A tig iyan a "Miyakandosa ko, ka tinipo aken so da a sala iyan a mama."
"Antonaa i labet ami san?" a tig iran. "Seka i matao ron."
5 Na inikayamber i Yodas so pirak sii ko Timplo na miyawa roo. Mandiyadi na lominiyo
sekaniyan na miyageget a binitin iyan a ginawa niyan ko kayo.
6 Piyamorot o manga poporo a imam so manga pelata a tig iran a "Da sa Kitab i ba tano
tagoa ko baitalmal, ka tendan ko miyamono."
7 Kagiya memomosawira siran makapantag ko pirak na inipamasa iran ko lopa a
bebetowan sa 'Lopa o Panday sa Koden,' kaan mabaloy a pelebengan ko manga
mananangga ko inged.
8 Sabap saya na bebetowan angkoto a lopa sa 'Lopa o Rogo,' taman den imanto.
9 Giyanan i kinitoman o miyatero o Nabi Yaramiyas a "Kinowa iran so telo polo a pelata
a pirak a piyagayonan o manga taw sa Israil a imbayad iran rekaniyan,
10 Na inipamasa iran ko lopa o panday sa koden a aya raken inisogo o Kadnan."
Piyangingisean i Pilato si Isa
11 Si peman si Isa na tomitindeg ko hadapan o gobirnador. Na iniise rekaniyan o

gobirnador a "Ba seka so Dato o manga Yahodi?"
"Benar so pitero o ka," a pitero on i Isa.
12 Ogaid na sii ko kapesenditi ron o manga poporo a imam ago manga pelokelokesen na
da den a ba niyan inisembag.
13 Pitero rekaniyan i Pilato a "Ba ngka da maneg so langon ai a dimanda iran reka?"
14 Na da den sembag si Isa sa apiya sataga bo, na tanto a miyamemesa so gobirnador.
Minisela ki Isa so Kambonoa on
15 Oman maoma angkoto a Pista na aya adat o gobirnador na mbokaan iyan so isa a
kalaboso a pepangnin o malilimod a taw.
16 Sa masa oto na aden a makakalaboso a lomalangkap so totolan on a aya ngaran iyan na
Barabas.
17 Sabap roo na kagiya matimo so madakel a taw na iniise kiran i Pilato a "Antawaa i
kabaya iyo a aya ko rekano mbokaan: si Barabas, o di na si Isa a bebetowan sa Al
Masih?"
18 Ka katawan i Pilato a piyalad iran on si Isa ka periiten iran.
19 Sii ko kaoontod i Pilato ko dii kokoman na piyakawitan o karoma niyan sangkai a
toma a "Di ngka petekora ngkanan a mama a da a sala iyan, ka tanto ako a miyarasay
kagiya ko gagawii sabap ko piteginep aken makapantag rekaniyan."
20 Ogaid na so manga poporo a imam ago manga pelokelokesen na piyangonsi iran so
madakel a taw sa pangnin iran a si Barabas i mbokaan, na mbonoon si Isa.
21 Na iniise kiran peman o gobirnador a "Antawaa sangkai a dowa kataw i kabaya iyo a
aya ko rekano mbokaan?"
Na inisembag iran a "Si Barabas!"
22 Tig i Pilato a "O giyanan, na antonaa bes i ikidia ko ki Isa a betetowan sa Al Masih?"
Na somimbag siran langon a "Totoka ngka ko kros!"
23 “Ngkaino?" a iniise i Pilato. "Antonaa marata i miyanggolaola niyan?"
Ogaid na ba siran den miyamanamar melalalis a "Totoka ngka ko kros!"
24 Kagiya mailay i Pilato a da a gona a kipeterosen iyan sii ka ba siran den kegorigaw, na
kominowa sekaniyan sa ig na inonaban iyan a lima niyan ko hadapan o madakel a taw a
tig iyan a "Kena a ba aken sala so kambonoa sangkai a mama. Sekano i matao ron!"
25 Somimbag langon so madakel a taw a "Mitana rekami ago so manga wata ami so
kambonoa on!"
26 Mandiyadi na biyokaan kiran i Pilato si Barabas, na kagiya pakipamadasan iyan si Isa
na piyalad iyan ko katotoka on ko kros.
Piyagongatongat o manga Sondaro si Isa
27 So manga sondaro i Pilato na piyakasoled iran si Isa ko torogan o gobirnador na

piyakalibet iran rekaniyan so langon o salompok iran.
28 Likas iran on so nditaren iyan na piyakasolot iran sekaniyan sa kimon a maloto i
kariga.
29 Na somiyolampid siran sa sangkad a soroken a waged na inisangkad iran on, na
piyakakapet iran sa badas ko kawanan a lima niyan. Somiyodiyod siran rekaniyan na
piyagongatongat iran a tig iran a "Mapipiya a ginawa ngka, hey, Solotan o manga
Yahodi!"
30 Na piyanodaan iran, na kinowa iran so badas na piyamadasan iran sa olo.
31 Kagiya mapasad iran magongatongat na likas iran on so kimon na piyakinditar iran on
bo so rek iyan a nditaren, na piyakaonot iran ka totoken iran ko kros.
Tiyotok si Isa ko Kros
32 Sii ko kapelalakaw iran na minimbalaka iran so sakataw a magiinged sa Sirini a aya

ngaran iyan na si Simon, na tigel iran sekaniyan makaposai ko kros a totokan ki Isa.
33 Miyakaoma siran ko darpa a bebetowan sa 'Golgota,' a aya maana niyan na 'Darpa a
Lagas a Olo.'
34 Ron iran bigan sa arak a sasaogan sa mapait a bolong ka pekiinom iran on. Ogaid na
kagiya kataaman iyan na minda o ba on inom.
35 Kagiya matotok iran sekaniyan ko kros na pimbagibagi iran so manga nditaren iyan a
nggolalan ko kaperipa.
36 Oriyan iyan na miyontod siran roo sa kapepagipata iran on.
37 Sii ko kaporoan o olo niyan na tiyago iran on so isosorat a dimanda rekaniyan a "Giyai
si Isa a Dato o manga Yahodi."
38 Na aden a dowa kataw a tanganiyaya a tiyotok iran mambo ko manga kros a ped i Isa,
a so isa on na sii sa kawanan iyan ago so isa on na sii sa diwang.
39 So manga taw a pepamanagad roo na pepengelengkeleng siran a pepagitowitoon iran
si Isa
40 A di ran dii teroon a "Seka a nggeba ko Timplo ago mbengonen ka peroman sii ko
soled o telo gawii na sabeta ngka a ginawa ngka! O seka so Wata o Allah na tepad ka
sangkanan a kros!"
41 Datar oto mambo a pepagongatongaten sekaniyan o manga poporo a imam ago manga
goro ko Kitab ago so manga pelokelokesen
42 A di ran dii teroon a "Siyabet iyan so ped, ogaid na di niyan kesabet a ginawa niyan!
Ba kena a sekaniyan so Dato sa Israil? O tepad imanto ko kros na paratiyayaan tano!
43 Sasarigan iyan so Allah. Kapanabangan sekaniyan imanto o Allah o kabaya iyan, ka
pitero iyan a 'Wata ako o Allah!' "
44 Apiya so manga tanganiyaya a ped iyan a miyatotok ko kros na miyanonongka
rekaniyan sa datar ai.
So Kiyapatay i Isa
45 Sii ko kiyaoto o alongan na miyakaliboteng a dalem a inged oto a iniraot sa miyakatelo

ka oras.
46 Kagiya magalas tris na miyananalo si Isa sa matanog a "Ili, Ili, lama sabaktani" a aya
maana niyan na "Hey Tohan ko, Tohan ko, ino ako ngka telikodi?"
47 Miyaneg ai o ped ko kititindeg roo na pitero iran a "Petelowan iyan si Iliyas!"
48 Na magaan so magaan na miyalalagoy so isa kiran na kominowa sa pangamek. Biyasa
iyan a soka na tiyangen iyan ko poro o raros na inikawit iyan ki Isa ka pekiinom iyan on.
49 Ogaid na tig o manga ped a "Taregi ngka sekaniyan, ka ilain tano o ba pekaoma si
Iliyas a ba niyan sebeta."
50 Na miyanabenar peman melalis si Isa, na inirila iyan so niyawa niyan.
51 Na sii den sangkoto a sakotika na so rending a bibitinen ko Timplo na miyakisi a
miyadowa timan a poon sa poro taman sa baba. Tiyabeker so lopa, na miyanga oopak so
manga lakongan,
52 Na piyanga lelekaan so manga kobor na madakel a miyamatay a manga kaom o Allah
a miyanga ooyag.
53 Na oriyan o kiyaoyaga ki Isa na miyamakaliyo siran ko manga kobor iran, na
somiyong siran ko Soti a Siti na roo siran miyakiilay ko madakel a taw.
54 So olowan o manga sondaro ago so manga ped iyan a pepagipat ki Isa na kagiya
mailay iran so linog ago so langon taman a miyaolaola, na tanto siran a miyalek a tig iran
a "Mataan den a Wata sekaniyan o Allah!"
55 Aden a madakel a babay roo a kilalangkaw a poon sa mawatan. Siran i miyamangonot
ki Isa gowani ko kiyalalakaw niyan a poon sa Galili a pepamanalagad rekaniyan.
56 Maaped kiran si Mariyam Magdalina, si Mariyam a ina i Santiyago ago si Yosop, ago
so ina o manga wata i Sibidi.
So Kinikoboren ki Isa
57 Kagiya magabi den na aden a miyakaoma a kawasa a mama a poon sa Arimatiya. Aya
ngaran iyan na si Yosop, na miyakisokbat mambo ki Isa.
58 Somiyong sekaniyan ki Pilato na piyangni niyan on so lawas i Isa, na inisogo i Pilato a
imbegay ron.
59 Mandiyadi na kinowa i Yosop so lawas na biyongkosan iyan sa onong a bago a sotra,
60 Na tiyago iyan ko rek iyan a kobor a gopen iyan kiyalotan ko kilid a lakongan. Linilid
iyan on so mala a ator a inilekeb ko gimowa o kobor na miyaling.
61 Na makaoontod roo si Mariyam Magdalina ago so isa a Mariyam a marani ko kobor a
mbabantayan iran ai.
So Gordiya ko Kobor
62 Sii ko tomiyalondog a gawii ko kiyaipos o Gawii a Ipetiyagar na mitimotimo so manga

poporo a imam ago so manga Parisi ko walay i Pilato
63 Na pitero iran a "Sir, katatademan ami a isako da pen matay angkoto a tagakal na
pitero iyan a keoyag bo amay ka makatelo gawii.
64 Sabap roo na sogoon ka a nggordiyaan piyapiya so kobor apiya taman ko telo gawii, ka
o ba roo baden makasong so manga sokbat iyan na ba iran panekewa so lawas iyan, na
teroon iran ko manga taw a miyaoyag sekaniyan a poon ko miyamatay. O giyanan, na
giyangkai a keori a kapamagakal na lebi pen a marata a di so miyaona."
65 Pitero kiran i Pilato a "Mapekaonot iyo roo so manga gordiya na pakabagera niyo so
ilelekeb ko kobor sa taman sa kegaga niyo."
66 Na somiyong siran roo na piyakabager iran so kobor ka piyatri iran on so ator a
ilelekeb on, na piyakinggordiyaan iran.
MATIYO 28
So Kiyaoyag i Isa
Kagiya maipos so Gawii a Idedeke a magaan somebang so alongan sii ko Akad na

somiyong si Mariyam Magdalina ago so isa a Mariyam ko kobor, ka pagilain iran.
2 Na minitekaw a mabager a linog, na tomiyana a malaikat o Kadnan a poon sa kasorgaan
na somiyong ko kobor, na linilid iyan so ator a poon ko gimowa iyan, na miyontod on.
3 Pesigay so paras iyan a lagid o kilakilat, na miyakapotipoti so nditaren iyan.
4 Tatabaden so manga gordiya ka tanto iran a inikalek, na mimbaloy siran a datar o
miyamatay.
5 Pitero o malaikat ko manga babay a "Di kano pekelek. Katawan ko a pepangilobaan iyo
si Isa a tiyotok ko kros.
6 Da sekaniyan sii ka miyaoyag den, ka giyoto so pitero iyan. Song kano sii na ilaya niyo
so darpa a kiyaigaan o lawas iyan.
7 Na song kano nggagaan ko manga sokbat iyan na teroa niyo kiran a 'Miyaoyag
sekaniyan a poon ko miyamatay na pesong sekaniyan sa Galili a keona a di sekano, na roo
niyo mipetoona. Tatanodi niyo so pitero aken rekano."
8 Mandiyadi na minggagaan siran mawa ko kobor a pepanga aalek a sarta a tanto siran a
pekebabaya. Miyalalagoy siran ka penotolen iran ko manga sokbat iyan.
9 Minitekaw den a minimbalaka siran i Isa a tig iyan a "Mapipiya a ginawa niyo."
Miyobay siran on na kiyapetan iran a manga ai niyan na sinimba iran.
10 Na giyoto a pitero kiran i Isa a "Di kano pekelek. Songowi niyo so manga pagari aken
na teroa niyo kiran a song siran baden sa Galili, na roo ako iran mipetoona."
So Totol o manga Gordiya
11 Sii ko kapelalakaw o manga babay na so ped ko manga gordiya ko kobor na

komiyasoy ko siti na piyanotolan iran so manga poporo a imam ko langon a
miyanggolaola.
12 Na mimomosawira siran ago so manga pelokelokesen na miyakapagantang siran.
Piyamegan iran so manga sondaro sa mala a pirak
13 A pitero iran kiran a "Pamanotola niyo ko manga taw a somiyong roo so manga sokbat
iyan kagiya ko gagawii na piyanekew iran so lawas iyan sii ko katotoroga rekano.
14 Na o ketokawi ini o gobirnador na sekami den i magakol on kaan kano kadai sa awid a
akal mipantag sii."
15 Na kinowa o manga sondaro so pirak na ininggolalan iran so iniinsarat kiran. Na
giyangkai a totol na pepakalangkapen den sii ko manga Yahodi taman den imanto a
gawii.
So Kiyasogoa i Isa ko manga Sokbat iyan
16 So peman so sapolo ago isa a sokbat na somiyong siran sa Galili roo ko bobongan a
pitero kiran i Isa a songowan iran.
17 Kagiya mailay iran sekaniyan na sinimba iran apiya pen pekedowadowaan so ped
kiran.
18 Na miyobay kiran si Isa na pitero iyan a "Minibegay raken so langon a kapaar roo sa
kasorgaan ago sii sa doniya.
19 Kagiya ka maoto na song kano ko manga taw ko langon o manga nasiyon na baloya
niyo siran a manga sokbat aken. Pamanalawati niyo siran sii ko ingaran o Ama, ago so
Wata, ago so Soti a Roh,
20 Na pamangendaon iyo kiran so kapetomana ko langon taman a inisogo aken rekano.
Na tanodi niyo a lalayon ako niyo mipageepeda taman sa kaposan angkai a masa."
MARKO
MARKO 1
Giyai i pamekasan o Mapiya a Totol makapantag ki Isa Al Masih, a so Wata o Allah.

2 Misosorat ko Kitab o Nabi Isayas angkai a katero o Allah a
"Sogoon ko so talasogoay aken a keona a di seka
a pekatiyagar ko lalan a pagokitan ka.
3 Pepananalo sekaniyan roo ko mitataog a kaden a
'Tiyagara niyo so lalan para ko Kadnan;
pakatitowa niyo so manga lalan a pagokitan iyan!' "
4 Giyangkai a talasogoay na si Yahiya. Gomimaw sekaniyan sii ko mitataog a kaden a

pepanalawatan iyan so manga taw ago ipepangosiyat iyan kiran a "Talikodi niyo so
manga dosa niyo ago pakisalawat kano kaan karilai so manga dosa niyo."
5 Madakel a manga taw a pepamanong rekaniyan a poon ko dalem a inged a Yodiya ago
giya siti a Yarosalim. Na sii ko di ran dii kateobata ko manga dosa iran na pepanalawatan
iyan siran roo ko lawasaig a Yordan.
6 Ndiditar si Yahiya sa manga nditaren a pimbaalan a bombol a onta, na sesambitan
sekaniyan sa kobal. Aya pangenengken iyan na manga tarapan ago gola a teneb.
7 Di sekaniyan dii mangosiyat a tig iyan a "Aden a pekaoma a telondog raken a mala i
gees a di saken; apiya so gakot o tinilas iyan na kena a ba ako mapapatot a tikoro sa
kambokaa ko ron.
8 Ipepanalawat aken rekano so ig, ogaid na na aya ipenalawat iyan rekano na so Soti a
Roh."
So Kiyasalawati ki Isa ago so Kiyatepengi ron o Iblis
9 Sii sangkoto a manga gawii na miyakaoma si Isa a poon sa Nasarit sii sa Galili na
siyalawatan sekaniyan i Yahiya roo ko lawasaig a Yordan.
10 Sii den ko kiyapakambaton i Isa ko ig na miyailay niyan a pekebengkag a kasorgaan,
ago so Roh a petena rekaniyan a datar o marapatik.
11 Na aden a sowara a miyakapoon sa kasorgaan a tig iyan a "Seka so pekebabayaan ko a
Wata aken. Tanto aken seka a ikasosoat!"
12 Na sagogona den a so Roh na tigel iyan si Isa makasong ko mitataog a kaden.
13 Komiyaden sekaniyan roo sa miyakapat polo gawii a petepengan o Iblis. Aden a
kikakaden roo mambo a manga binatang, ogaid na pepanalagadan sekaniyan o manga
malaikat.
14 Oriyan o kiyakalabosowa ki Yahiya na somiyong si Isa sa Galili a pepakalangkapen

iyan so Mapiya a Totol a poon ko Allah.
15 “Miyakatalingoma den so masa," a tig iyan, "na miyakarani den so Ndatoan o Allah!
Talikodi niyo so manga dosa niyo ago paratiyayaa niyo so Mapiya a Totol!"
16 Sii ko kapelalakaw niyan ko kilid a Ranaw a Galili na miyailay niyan si Simon ago si
Andriyo a pagari niyan. Pepamiyala siran sa ranaw, ka manga panginginseda siran.
17 “Pegonot kano raken," a pitero i Isa, "ka pangendaon ko sekano sa kapangowaa ko
manga taw."
18 Na sagogona den a inawaan iran so manga biyala iran na miyonot siran on.
19 Sii ko kapeteros iyan den ko da on pen kawatani na miyailay niyan si Santiyago ago si
Yahiya a manga wata i Sibidi. Ndodoo siran ko awang iran a pepangoripan iran so manga
poket iran.
20 Sarta a tiyalowan iyan siran, na inawaan iran si ama iran a si Sibidi sii ko awang a ped
o manga kisosokayan, na miyonot siran ki Isa.
So Mama a Sosookan
21 Somiyong siran sa Kapirnaom, na kagiya raoten so Gawii a Idedeke na somiyoled si

Isa ko sinagoga na miyangendao.
22 Miyamemesa so manga taw roo, ka so kapepangendaowa niyan kiran na aden a kapaar
iyan, ka kena a ba datar o manga goro ko Kitab.
23 Na aden a mama a ndodoo ko sinagoga iran a sosookan a saitan. Na sarta den a
inikisek iyan a
24 “Hey Isa a Taw sa Nasarit, antonaa i pagangin ka rekami? Ba ka sii somiyong kaan
kami ngka mabinasa? Katawan aken o antawaa ka. Seka so Soti a Siyogo o Allah!"
25 Na siyaparan i Isa so saitan a tig iyan a "Rerenek ka na liyo ka rekaniyan!"
26 Na piyakatetaliya o saitan so lawas o mama na kominisek sa matanog na lominiyo ron.
27 Tanto a miyamemesa so manga taw, na iniise o oman i isa so ped iyan a "Antona ini?
Bago a ndao! Aden a kapaar iyan, ka apiya so manga saitan a pesogoon iyan na petoman
siran on!"
28 Na magaan den a kiyalangkap o manga totol makapantag ki Isa ko dalem o manga
inged a midadair sa Galili.
Madakel a Taw a Piyamakapiya i Isa
29 Kagiya mawa si Isa ko sinagoga na somiyong sekaniyan ko walay i Simon ago si

Andriyo a moonot on mambo si Santiyago ago si Yahiya.
30 Samaoto na so panogangan i Simon a babay na makaiiga roo a dii keyaw, na pitero
iran ki Isa.
31 Inobay niyan so babay na kiyapetan iyan a lima niyan na biyowat iyan. Na miyada on
so mayaw na pikormat iyan siran.
32 Kagiya magabi den ko kiyasedep o alongan na piyamangowit o manga taw ki Isa so
langon a pepanga sasakit ago kisosookan a saitan.
33 Na so langon a taw sangkoto a siti na mitimotimo ko obay o pintoan o walay.
34 Mandiyadi na madakel a piyamakapiya i Isa a gomegedam siran sa mbarambarang den
a paniyakit, na madakel a piyamakaliyo niyan a manga saitan ko kisosookan. Na da niyan
pakateroa so manga saitan, ka katawan iran o antawaa sekaniyan.
Miyangosiyat si Isa sa Galili
35 Sobo pen na mimbowat si Isa na lominiyo ko walay na somiyong ko tanaw a darpa a

ron miyangangarapan.
36 Da matey na si Simon ago so manga ped iyan na pimbabanog iran.
37 Kagiya matoon iran na pitero iran on a "Langon a taw na di reka dii mbanog."
38 Somimbag si Isa a "Tomaros tano roo ko midadair sii a manga inged kaan ako ron
mambo makapangosiyat, ka giyoto i inisong aken sii."
39 Na ineneb iyan a dalem a inged a Galili a dii mangosiyat sii ko manga sinagoga iran
ago pepamakaliyon iyan so manga saitan ko kisosookan.
40 Somiyong ki Isa so isa a mama a pekebowa, na somiyodiyod sekaniyan on ago

miyangni ron a "O kebaya ka na kelompiyo ako ngka."
41 Inikapedi sekaniyan i Isa na kiyawa iyan ago siko iyan a tig iyan a "Kebaya ako.
Miyalompiyo ka den!"
42 Na sagogona a miyada on so bowa na miyalompiyo.
43 Na piyakalalakaw sekaniyan i Isa a sarta a inilalang iyan on a
44 “Iktiyari ngka o ba ngka matero ko apiya antawaa so inikidia ko reka, ka song ka
baden ko imam na pakiilain ka on a lawas ka, na sapaaten ka so soasoat a inisogo o Mosa
sabap ko kiyalompiyowa reka kaan mipemataan ko manga taw a miyada so bowa ngka."
45 Ogaid na kagiya maipos angkoto a mama na pipoonan iyan a di kerintas a
kapepakalangkapa niyan ko totol makapantag sangkai a miyanggolaola. Na sabap sii na di
den makaperinayag somoled si Isa ko apiya anda inged, na baden komiyaden ko tanaw a
manga darpa. Ogaid na miyamanong on so manga taw a poon ko mbalabala.
MARKO 2
Piyakapiya i Isa so Taw a Mapaparalais so Lawas iyan
Kagiya makapira gawii na komiyasoy si Isa sa Kapirnaom na miyaneg o manga taw a sisii
sekaniyan sa walay.
2 Sabap roo na madakel a manga taw a mitimotimo on, na apiya so liyo o pintoan na da
den a kedarpaan on. Na sii ko kapepangosiyati niyan kiran
3 Na aden a miyamakaoma a maawid sa mama a mapaparalais so lawas iyan a
dadalaganen o pat kataw.
4 Kagiya di siran pekaobay ki Isa sabap ko madakel a taw na biyabasan iran so
mapapantar a atep o walay ko maatag iyan. Na so kiyalebowa iran on na inalogan iran so
dalagan a iigaan o mapaparalais a lawas iyan.
5 Kagiya mailay i Isa a aden a paratiyaya iran na tig iyan ko mapaparalais a mama a
"Wata aken, kiyarilaan den so manga dosa ngka."
6 Ndodoo so ped ko manga goro ko Kitab a moontod roo, na mapipikir iran a
7 “Ino dii tero a mama ini sa datar ai? Pepagitowitoon iyan so Allah! Antawaa i pekarila
sa dosa a rowar bo ko Allah?"
8 Sarta den a katawan i Isa so mapipikir iran, na pitero iyan kiran a "Ino niyo anan
pepamikira?
9 Anda i malebod: so kateroa sangkai a mapaparalais a mama sa 'Kiyarilaan den so
manga dosa ngka,' o di na so kateroa on sa 'Mbowat ka, na awidi ngka so dalagan ka na
lalakaw ka den'?
karilai niyan ko manga dosa." Na giyoto a pitero iyan ko mapaparalais a mama a
11 “Teroon ko reka a mbowat ka! Awidi ngka so dalagan ka na baling ka den."
12 Na mimbowat sekaniyan na kinowa niyan den so dalagan iyan na lomiyalakaw sii ko
kamamasaan iran langon. Na palaya siran den miyamemesa, na biyantog iran so Allah a
tig iran a "Da tano den makailay sa miyanggolaola a ba datar ai a rowar sii!"
Tiyawag i Isa si Libi
13 Komiyasoy si Isa ko kilid a ranaw na tanto a madakel a taw a miyamanong on, na

piyangendao niyan siran.
14 Na sii ko kapeteros iyan lomalakaw, na miyailay niyan si Libi a wata i Alpayo a
moontod ko darpa a pepanekatan ko bowis. Pitero on i Isa a "Pegonot ka raken." Na
gomiyanat si Libi na miyonot on.
15 Da matey na sii ko kapekan i Isa roo ko walay i Libi na madakel a panenekat sa bowis
ago manga baradosa a pepamagatoang ki Isa ago so manga sokbat iyan, ka madakel a
miyamanondog rekaniyan roo.
16 Na so manga goro ko Kitab a maaped ko manga Parisi na kagiya mailay iran si Isa a
dii makipagatoang ko manga baradosa ago manga panenekat sa bowis na iniise iran ko
manga sokbat iyan a "Ino sekaniyan dii makipagatoang ko manga panenekat sa bowis ago
manga baradosa?"
17 Kagiya maneg ai i Isa na pitero iyan kiran a "So manga pipiya i lawas na di iran
kailangan so pamomolong, ka so bo so pepanga sasakit. Kena a ba aya ko sii inisong na
so katawaga ko ko manga oontol, ka so manga baradosa."
18 Miyakaisa a gawii a dii popowasa so manga sokbat i Yahiya ago so manga Parisi na
aden a manga taw a somiyong ki Isa, na iniise iran on a "Ino dii powasa so manga sokbat i
Yahiya ago so manga sokbat o manga Parisi, ogaid na so manga sokbat ka na di
pepowasa?"
19 Pitero kiran i Isa a "Pepowasa bes so manga banto ko kakewing sii ko kaaped kiran
pen o mangangaroma? Kena, ka sii ko kipageepedaan kiran o mangangaroma na di siran
makapepowasa.
20 Ogaid na maoma so manga gawii a kebelag kiran so mangangaroma, na giyangkoto a
gawii i kapepowasa iran.
21 “Da a taw a ba niyan tepii so miyaronot a nditaren sa bago a dinis. Ka amay ka
komengkeng so bago a dinis na kebelag ko miyaronot na baden keomani a kabeberat o
nditaren.
22 Na da a taw a ba niyan tegoa so bago a arak ko miyaronot a pananagoay a kobal a
ayam. Ka o nggolaolaa niyan ai na kebensi o arak so kobal, na keolaan so arak, ago
kebinasa so pananagoay. Kena, ka so bago a arak na sii tegoa ko bago a pananagoay."
So Pakaise makapantag ko Gawii a Idedeke
23 Miyakaisa a Gawii a Idedeke na pegokit si Isa ko dii mbabasokan. Na sii ko

kapelalakaw roo o manga sokbat iyan na miyangowa siran ko manga saway o bantad.
24 Na pitero o manga Parisi ki Isa a "Ilaya ngka man, ino iran dii nggolaolaa so da sa
Kitab i ba nggolaolaa ko Gawii a Idedeke?"
25 Somimbag si Isa a "Ba niyo da mabatiya so pinggolaola o Daod ago so manga kaom
iyan isako kareregenan siran ago pepanga aaor?
26 Somiyoled sekaniyan ko walay o Allah isako aya maporo a imam na si Abiyatar, na
komiyan ko paan a isasapaat ko Allah a da sa Kitab i ba kana o apiya antawaa, ka so bo so
manga imam i pekakan on, na piyamegan iyan on pen so manga kaom iyan."
27 Na pitero kiran pen i Isa a "So Gawii a Idedeke na inaden para ko kamapiyaan o
manga taw; kena a ba inaden so manga taw para ko kamapiyaan o Gawii a Idedeke.
28 Kagiya ka maoto na so Wata o Manosiya na aya dii mbayabaya apiya sii ko Gawii a
Idedeke."
MARKO 3
Miyakaisa peman a somiyoled si Isa ko sinagoga na aden a mama on a kekampis a lima

niyan.
2 Ndodoo mambo so manga taw a kabaya iran a midimanda iran si Isa, na di ran dii
simaan o ba niyan pakapiyaa angkoto a mama ko Gawii a Idedeke.
3 Na pitero i Isa ko sadir i lima a "Song ka sii ko hadapan o kalangolangon."
4 Na iniise i Isa ko manga taw a "Antonaa i sisii ko Kitab a penggolaolaan ko Gawii a
Idedeke? So katabang o di na so kapakabinasa? So kapangoyag o di na so kapamono?"
Na ba siran den romerenek.
5 Liyayas iyan siran milay a pekerarangitan ago mararata a ginawa niyan sabap ko kategas
iran i poso. Na pitero iyan ko mama a "Betera ngka a lima ngka." Na biter iyan na
miyakapiya den a lima niyan.
6 Na mililiyo roo somambot so manga Parisi na miyakipagopakat siran ko manga kaom i
Dato Hirod o andamanaya i kambonoa iran ki Isa.
So Madakel a Taw a Matitimo ko Ranaw
7 Miyawa roo si Isa ago so manga sokbat iyan na somiyong siran ko ranaw, na tanto a
madakel a taw a miyamanondog kiran a poon sa Galili, Yodiya,
8 Yarosalim, Idomiya, poon ko pagingedingedan sa sabala a lawasaig a Yordan ago poon
ko manga inged a midadair ko manga siti a Tiro ago Sidon. Miyamanong siran rekaniyan
ka miyaneg iran den so makapantag ko langon a di niyan dii nggolaolaan.
9 Na pitero i Isa ko manga sokbat iyan a tiyagari ran sekaniyan sa awang ka o ba baden
magompit o madakel a taw.
10 Ka pepamagagaw rekaniyan mobay so pepanga sasakit kaan iran sekaniyan maseko, ka
madakel a piyamakapiya niyan.
11 Igira a pekeilay si Isa o kisosookan a saitan na penggepe siran ko hadapan iyan a
ipekisek iran a "Seka so Wata o Allah!"
12 Ogaid na liyalangan iyan siran sa di iran petetaroa o antawaa sekaniyan.
Pinili i Isa so Sapolo ago Dowa a Siyogo

13 Oriyan oto na tomiyakedeg si Isa ko bobongan na tiyawag iyan so manga taw a
kebayaan iyan na somiyong siran on.
14 Na miyamili sekaniyan sa sapolo ago dowa kataw (a bitowan iyan sa manga siyogo)
kaan iyan siran mipagepeda ago an iyan mapanonogo a mamakapangosiyat,
15 Ago an iyan siran kabegi sa kapaar sa kapakaliyowa ko manga saitan ko kisosookan.
16 Giyai so sapolo ago dowa a piyamili iyan: si Simon (a bitowan iyan sa Pidro);
17 Si Santiyago a wata i Sibidi ago si Yahiya a pagari i Santiyago (a bitowan iyan sa
'Bowanirgas' a aya maana niyan na 'Manga Wata o Dalendeg');
18 Si Andriyo, si Pilipi, si Bartolomiyo, si Matiyo, si Tomas, si Santiyago a wata i
Alpayo, si Tadiyos, si Simon a mala i paninindeg,
19 Ago si Yodas Iskariyot a aya tominipo ki Isa.
20 Kagiya maling si Isa na madakel a manga taw a mitimotimo on peroman sa apiya so

kapekakan iran ago so manga sokbat iyan na di siran on pekaparo.
21 Kagiya katokawan ai o pamiliya iyan na siyongowan iran sekaniyan kaan iran mipaar,
ka pitero iran a "Pembetengen sekaniyan!"
22 So mambo so manga goro ko Kitab a miyamakaoma roo a poon sa Yarosalim na pitero
iran a "Sosookan sekaniyan a Iblis! Pepakaliyon iyan so manga saitan ko kisosookan a
nggolalan ko kapaar o dato o manga saitan."
23 Sabap sii na piyakaobay siran i Isa na piyanotol iyan kiran angkai a bayambayanan:
"Andamanaya i kapekaliyowa o Iblis ko manga saitan?
24 O maooparik so isa a ndatoan a pepamagonaya tidawa so manga taw ron, na di
kemboway angkoto a ndatoan.
25 Na o maooparik so isa ka walay a mamagonaya siran sosopaka, na kebinasa angkoto a
isa ka walay.
26 Na o somosopak so Iblis ko manga saitan ago miyakambagiay so ndatoan iyan na di
sekaniyan tetas, na aden a sendadan iyan.
27 “Da a ba pekasoled ko walay o mabager a mama a makapanekew ko manga tamok
iyan o di niyan daan a mapatong so mabager a mama, na go niyan bo mapanekew so
langon taman ko walay niyan.
28 “Teroon ko rekano a mataan den a kerilaan so manga taw ko langon a dosa iran ago so
langon a ipekaito a matero iran.
29 Ogaid na apiya antawaa i pagitowitoon iyan so Soti a Roh na di den kerilaan, ka
miyakasela ko dosa a da den a ikeda iyan."
30 Pitero ai i Isa ka kagiya dii teroon o manga goro a sosookan sekaniyan a saitan.
31 Na miyakaoma si ina i Isa ago so manga pagari niyan a mama. Tomitindeg siran sa
liyo o walay na piyakisongowan iran.
32 Samaoto na madakel a manga taw a kioontod sii ko walay a makalilibet ki Isa, na
pitero iran rekaniyan a "Si ina a ka ago so manga pagari ngka na ndodoo sa liyo, na
kebaya siran reka makipegilaya."
33 Simbag siran i Isa a "Antawaa i ina aken ago manga pagari?"
34 Na liyayas iyan milay so manga taw a makalilibet on na tig iyan a "Katii si ina aken
ago manga pagari.
35 Ka apiya antawaa i dii nggolaola sa kabaya o Allah na aya ko pagari a mama ago
pagari a babay ago ina."
MARKO 4
Miyangendao peroman si Isa sii ko kilid a ranaw, na sabap sa mitimotimo on so tanto a

madakel a taw na miyageda sekaniyan sa awang sii sa ranaw na miyontod on, na so
langon o madakel a taw na kititindeg ko ipameted sa kilid a ranaw.
2 Madakel a inipamangendao niyan kiran a piyakaokit sa bayambayanan. Sii ko
kapepangendao niyan na tig iyan a
3 “Pamakinega niyo ai! Somiyong so taribasok ko lopa iyan ka seod.
4 Sii ko kipepiriken iyan ko oniin na sii minisogat so ped on ko lalan, na miyakaoma so
manga papanok na piyanoka iran.
5 So ped ko oniin na sii minisogat ko saliwaton a lopa a maito a bote on, na magaan a
kiyalonaw niyan ka kena a ba madalem a bote on.
6 Kagiya miporo a alongan na kiyarantian so pamomolan, na sabap sa da makambekaw
piyapiya na miyalayon.
7 So ped ko oniin na sii minisogat ko manga soroken a otan na mito so otan na
kiyatanongan iyan so pamomolan na da makaonga.
8 Ogaid na so sabagi ko oniin na sii minisogat ko masibokar a lopa na miyonga.
Milolonaw ai ago miyamakalala, na kiyaragonan so ped on sa tetelopolo, so ped on na
ndenempolo, ago so pen so ped na mbabagatos."
9 Na pitero pen i Isa a "So aden a tangila niyan a ipemakineg iyan na pamakineg baden!"
10 Kagiya mawa roo so madakel a taw na so manga ped i Isa a rakes o sapolo ago dowa a
sokbat na iniise iran o antonaa i maana o bayambayanan.
11 Na pitero iyan kiran a "Kiyabegan kano sa kaketokawi ko miyapagma gowani
makapantag ko Ndatoan o Allah. Ogaid na so ped a taw sa liyo na pepakaokiten ko
manga bayambayanan so langon a di aken kiran dii teroon.
12 Aya sabap iyan na
'an siran makapangilailay ago makapangilailay peparoman

a di siran bo pekakilala,
ago an siran makapamakineg ago makapamakineg peparoman
a di siran bo pekasabot,
ka o di giyoto na o ba siran baden teklid na go siran bo karilai.' "
13 Na pitero kiran pen i Isa a "Ba niyo da sabota angkai a bayambayanan? O da, na
andamanaya den i kakesabota niyo ko apiya antonaa bayambayanan?
14 So taribasok na ipeseod iyan so katero o Allah.
15 So ped ko manga taw na datar o oniin a minipirik ko lalan a kiyasaodan ko katero. Ka
sii den ko kapemakinega iran on na pekaoma so Iblis, ka pagagaon iyan so katero a
inisaod ko poso ran.
16 So ped pen a taw na datar o oniin a minipirik ko saliwaton a lopa. Ka amay ka
pemakinegen iran so katero na sarta den a terimaan iran a mabababaya siran.
17 Ogaid na di ini makapembekaw ko poso iran, na di tetas. Ka amay ka makatalingoma
so karomasayan o di na kasatroan sabap ko katero na sarta a telikodan iran.
18 So pen so ped a taw na datar o oniin a minipirik ko soroken a otan. Pepamakinegen
iran so katero,
19 Ogaid na so manga awid a akal mipantag ko kapepaginetaw iran, ago so kikasosoaten
iran ko manga tamok, ago so manga kabaya ko ped a manga nganin na ketago sa ginawa
iran na pekatanong ko katero, na di den pekaonga.
20 Ogaid na aden a ped a taw a datar o oniin a inisaod ko masibokar a lopa.
Pepamakinegen iran so katero na peterimaan iran, na pemangonga siran sa tetelopolo, o di
na ndenempolo, o di na mbabagatos."
So Itatapok a Palitaan
21 Pitero kiran pen i Isa a "Ba ino niyo tentemi so palitaan kaan iyo mitapok ko didalem a
asada, o di na sii ko didalem a katri? Kena, ka imbatog iyo sa poro.
22 So langon a isosolen na kipayag bo, ago so langon a pageemaan na kerinayag.
23 So aden a tangila niyan a ipemakineg iyan na pemakineg baden!"
24 Na pitero iyan pen a "Tagoa niyo sa ginawa niyo so pekeneg iyo. Saden sa kala a
ipembegay niyo na aya kala a imbegay rekano, na pagomanan pen sii rekano.
25 Ka so aden a rek iyan na kebegan pen, ogaid na so da a rek iyan na apiya so maito bo a
rek iyan na kowaan on."
So Bayambayanan makapantag ko Pegto a Oniin
26 Pitero iyan pen a "So Ndatoan o Allah na kiibarat ko mama a minirik sa oniin ko lopa.
27 Na gagawii daondaw, apiya sii ko kapepekatorog iyan o di na kapepekanaw, na
pelonaw so oniin ago pepakala a di niyan katawan o andamanaya i kapegto iyan.
28 So bo so bote i miyakato ko pamomolan, a aya keona na so reti, na seromanan na so
onga, na seromanan na miyakatoa den.
29 Anda den i kapakatoa niyan na nggaraben iyan, ka riyaot so kaperagona on."
So Bayambayanan makapantag ko Oniin a Mostard
30 Pitero iyan pen a "Antonaa i mapetero tano a datar o Ndatoan o Allah, ago antonaa i
bayambayanan a keibaratan tano ron?
31 Datar o oniin a mostard a aya lebi a maito ko langon a oniin a pepamolaan ko lopa.
32 Ogaid na amay ka mapamola na meto ago pembaloy a lebi a mala ko langon a
pamomolan. Na kagiya pesepasapak sa manga ala na makapeselag so manga papanok ko
kasisirongan on."
33 Madakel a datar ai a manga bayambayanan a pegosaren i Isa ko kipepangendaon iyan
ko manga taw ko katero o Allah sa taman sa kakesabota iran on.
34 Da den a ba niyan kiran pitero a ba da makaokit sa bayambayanan, ogaid na igira a aya
niyan bo ped so manga sokbat iyan na pegosain iyan kiran so langon taman.
Siyaparan i Isa so Barabarat
35 Kagiya magabi den sangkoto a gawii na pitero i Isa ko manga sokbat iyan a "Romipag
tano ko ranaw."
36 Na inawaan iran so madakel a taw, na miyageda so manga sokbat ko awang a eedaan i
Isa, ka iperipag iran. Na aden pen a ped a manga awang roo.
37 Da matey na somiyamber so tanto a mabager a ndo, na pendansalan o manga begel so
awang, na pekepeno a ig.
38 Na totorogen si Isa a moolon sii ko olinan a awang, na piyokaw iran sekaniyan a tig
iran a "Goro, ba ngka di tegoa sa ginawa ngka a pekigaled tano?"
39 Na mimbowat si Isa na siyaparan iyan so ndo, na pitero iyan ko manga begel a "Genek
ka! Lengen ka!" Na gominek so ndo, na tanto den a lomingen.
40 Na pitero kiran i Isa a "Ino kano pekelek? Ba da pen a paratiyaya niyo?"
41 Tanto siran a miyanga alek, na tig o oman i isa ko ped iyan a "Antawa ini a apiya so
ndo ago so manga begel na petoman rekaniyan?"
MARKO 5
Piyakapiya i Isa so Mama a Sosookan
Miyakaoma siran ko sabala a ranaw roo ko inged o manga Girasin.

2 Na sii den ko kiyatepad i Isa ko awang na inalaw sekaniyan o mama a sosookan a saitan
a miyakapoon ko manga koba
3 A ron mababaling. Da a ba rekaniyan pekapatong, apiya rantayan pen,
4 Ka omanoman den a pepatongen a manga ai niyan ago giya lima niyan, ogaid na
pekeredot iyan baden so manga rantay ago pekepotol iyan pen so potaw ko ai niyan, na da
a taw a ba on pekapeges.
5 Gagawii daondaw na di sekaniyan dii magenebeneb ko manga kobor ago sii ko manga
bobongan a lalayon pekisek ago pekerosen iyan a ator a lawas iyan.
6 Kagiya mailay niyan si Isa a mawatan pen na piyalalagoy niyan na siyododan iyan,
7 Na inilalis iyan sa matanog a "Hey Isa, a Wata o Allah a Lebi a Maporo, antonaa i
pagangin ka raken? Sepa ka ko Allah sa di ako ngka perasain!"
8 Ka di ron dii teroon i Isa a "Hey saitan, liyo ka sangkanan a mama!"
9 Na iniise i Isa a "Antawaa i ngaran ka?"
"Aya ngaran aken na 'Sagorompong,' a tig iyan, "ka madakel kami."
10 Na piyangni niyan sebenar ki Isa a di niyan siran pekaawaan sangkoto a darpa.
11 Kapapantagan oto a mala a talon a manga baboy a pepangangan roo ko silid a
bobongan.
12 Na miyangangampedian so manga saitan ki Isa a tig iran a "Pakasonga kami ngka
sangkoto a manga baboy kaan ami kapamanooki."
13 Na miniyog si Isa, na mililiyo so manga saitan ko mama a sarta a miyamanook ko
manga baboy. Na so langon angkoto a manga baboy a manga dowa nggibo na
minggagaan siran malalagoy na miyanga oolog ko pampang o ranaw, na palaya siran den
miyanga aled.
14 So kitatagikor ko manga baboy na miyalalagoy siran na piyamanotol iran ai sii ko siti
ago sii ko dii pagonayonayan. Na miyamanong roo so manga taw kaan iran mapariksa o
antonaa i miyanggolaola.
15 Kagiya makaoma siran ki Isa na miyailay iran roo so mama a sosookan gowani a
madakel a saitan a moontod roo a makandiditar ago matatanor a pikir iyan, na miyanga
alek siran.
16 Siran oto a miyakailay ron na piyamanotol iran ko ped so kiyaokitan angkoto a
sosookan ago so manga baboy.
17 Kagiya maneg iran ai inakol ki Isa a awa ko inged iran.
18 Sii ko kapageda iyan ko awang na piyangni ron o sosookan gowani a makaonot on.
19 Ogaid na da miyog si Isa, ka tig iyan a "Baling ka ko manga tonganay ngka na teroa
ngka kiran o ay kala a miniogop reka o Kadnan, ago so kinikapediin iyan reka."
20 Na lomiyalakaw so mama a pepakalangkapen iyan so inikidia on i Isa sii ko 'Sapolo a
manga Siti,' na tanto a miyamemesa so langon a miyakaneg on.
So Wata i Yairos ago so Babay a Tetalogedam
21 Kagiya romipag peroman si Isa ko ranaw a mida ko awang na tanto a madakel a taw a
mitimotimo rekaniyan sii ko kasisii niyan pen ko kilid a ranaw.
22 Na miyakaoma roo so isa a olowan sa sinagoga a aya ngaran iyan na si Yairos. Kagiya
mailay niyan si Isa na somiyodiyod sekaniyan ko hadapan iyan,
23 Na miyangangampedian on a tig iyan a "So maito a wata aken a babay na
pakapapatain. Kapedipedi ka bo na onot ka raken na dapeneten ka on a manga lima ngka
kaan makapiya ago pekeoyag."
24 Na miyonot on si Isa, na tanto a madakel a taw a miyamangonot rekaniyan mambo a
makarorompir siran on.
25 Aden a babay a lomolook kiran a lalayon den perogoan ko miyakasapolo ago dowa
ragon.
26 Tanto sekaniyan a miyarasay ko kapembolongi ron o madakel a pamomolong, na
miyanggasto niyan langon so tamok iyan ogaid na da mapinda so sakit iyan, ka baden
kiyalonsanan.
27 Somiyong sekaniyan ki Isa ka miyaneg iyan den so totolan on. Na sii sekaniyan
miyokit ko madakel a taw ko katatalikodan i Isa na siko iyan so nditaren iyan,
28 Ka miyatero iyan sa ginawa niyan a "Asar a maseko aken apiya so bo so nditaren iyan
na pekapiya ako den."
29 Na sakotika den a gominek so kapendogayas o rogo iyan, na miyagedam iyan a miyada
ko lawas iyan so paniyakit.
30 Na sagogona a katawan den i Isa a aden a kabatowa a lominiyo ron, na dominingil
sekaniyan a makalolook ko madakel a taw na iniise iyan a "Antawaa i somiko ko nditaren
aken?"
31 Somimbag so manga sokbat iyan a "Pekeilay ngka angkai a madakel a taw a
makarorompir reka, na ino ngka pagiseen o antawaa i somiko reka?"
32 Ogaid na miyangilailay si Isa ko melilibeta on sa kaperiksaa niyan o antawaa i
minggolaola sii.
33 Na so babay, a katawan iyan i miyaolaola rekaniyan, na miyobay ki Isa a tatabaden sa
kalek, na somiyodiyod rekaniyan na piyanotol iyan on so benar makapantag ko
pinggolaola niyan.
34 Na pitero on i Isa a "Wata aken a babay, so paratiyaya ngka na aya ngka inipakapiya.
Baling ka a makalilintad a ginawa ngka a kiyadaan ka sa paniyakit."
35 Sii ko di niyan pen dii katero na aden a miyamakaoma a poon ko walay o Yairos a
olowan sa sinagoga, na pitero iran on a "Miyatay so wata a ka. Ino ngka pen dii semoka
so Goro?"
36 Na man den da maneg i Isa so pitero iran, na tig iyan ko olowan a "Di ka pekelek. Ba
ka den paratiyaya."
37 Ipoon roo den na da a ba niyan piyakaonot a rowar ki Pidro, ago si Santiyago, ago si
Yahiya a pagari i Santiyago.
38 Kagiya makaoma siran ko walay o olowan sa sinagoga na miyailay i Isa so
magogorigaw a manga taw a dii nggogoraok ago dii ndidiyagaw sa matanog.
39 Somiyoled sekaniyan na pitero iyan kiran a "Ino kano pekegorigaw ago dii
nggogoraok? Da matay so wata, ka totorogen baden."
40 Na ba iran den inikekala si Isa.
Mandiyadi na palaya iyan siran piyakaliyo, na piyakaonot iyan so ama o wata, ago so ina
iyan, ago so manga sokbat a ped iyan na somiyoled siran ko katatagoan ko wata.
41 Na kiyapetan iyan so lima o wata na pitero iyan on a "Talita kom" (a aya maana niyan
na "Bago a Raga, teroon ko reka a mbowat ka!").
42 Na sagogona a mimbowat sekaniyan ago mipoon lomalakaw (aya idad iyan na sapolo
ago dowa ragon). Na so kiyailaya iran sii na tanto siran a miyamemesa.
43 Na liyalangan siran i Isa sa di iran petetaroa ko apiya antawaa so miyanggolaola, na
pitero iyan pen a pakakana iran so wata.
MARKO 6
Da Tarimaa si Isa sii sa Nasarit
Inawaan i Isa angkoto a darpa na komiyasoy ko inged iyan a oonotan o manga sokbat
iyan.
2 Kagiya raoten so Gawii a Idedeke na miyangendao sekaniyan sii ko sinagoga.
Miyamemesa so madakel a miyamakaneg rekaniyan a tig iran a "Anda langon ai
miyakowa a mama ini? Antona ini a kaongangen a minibegay ron? Andamanaya i di
niyan dii kanggolaolaa sangkai a manga ala i kabatowa a galebek?
3 Ba kena a sekaniyan so panday sa kayo, a wata i Mariyam ago pagari i Santiyago, si
Yosis, si Yoda, ago si Simon? Ba kena a sii rektano kibabaling so manga babay niyan?"
Na da iran tarimaa si Isa.
4 Na pitero iyan kiran a "So nabi na seselaan o langon o manga taw a rowar ko manga
taw sii ko inged iyan, ago sii ko manga tonganay niyan, ago sii ko walay niyan."
5 Na da a mala i kabatowa a galebek a ba niyan roo manggolaola liyo ko kinidapeneten
iyan ko lima niyan ko maito a pepanga sasakit a piyamakapiya niyan.
6 Na miyamemesa sekaniyan ko da iran kaparatiyaya.
Siyogo i Isa so Sapolo ago Dowa a Sokbat
Oriyan oto na lomiyalakaw si Isa ko melilibeta roo a manga inged a pepamangendao.

7 Na linimod iyan so sapolo ago dowa a sokbat na piyakalalakaw niyan siran a
kangginadowa. Bigan iyan siran sa kapaar ko manga saitan
8 Na inisogo iyan kiran a da a ba iran pagawidi ko kapelalakaw iran a rowar ko teken; da
a pangenengken, da a pontir, ago da a pirak ko bolosan iran.
9 Pitero iyan a petalompa siran, ogaid na di siran pagawid sa ped a bangkala a liyo bo ko
sosoloten iran.
10 Tig iyan pen a "Saden sa walay a kebolosan iyo na roo kano bo kakaden taman sa
awaan iyo angkoto a inged.
11 O aden a inged a so manga taw ron na di rekano terima o di na pemakineg, na amay ka
pagawaan iyo na popoga niyo so bayanek ko ai niyo sa kapelalangi niyo kiran."
12 Na lomiyalakaw siran a ipepangosiyat iran ko manga taw a panalikodi iran so manga
dosa iran.
13 Madakel a saitan a piyamakaliyo iran ko kisosookan, ago madakel a pepanga sasakit a
pilalanaan iran, na piyamakapiya iran siran.
So Kiyapatay i Yahiya a Pananalawat
14 So Dato Hirod na miyaneg iyan so di ran dii nggolaolaan ka miyakalangkap den so

totolan ki Isa. So ped ko manga taw na tig iran a "Sekaniyan si Yahiya a Pananalawat a
miyaoyag a poon ko miyamatay, na giyanan i sabap a mapenggolaola niyan so manga ala i
kabatowa a galebek."
15 Ogaid na tig o manga ped a "Sekaniyan si Iliyas" na so pen so ped na tig iran a "Nabi
sekaniyan a datar o isa ko miyanga oona a nabi."
16 Ogaid na kagiya maneg ai i Hirod na tig iyan a "Sekaniyan si Yahiya a piyakipotaan
aken sa olo a miyaoyag bo!"
17 Ka da pen ai matey na piyakidakep i Hirod si Yahiya na piyakikalaboso niyan sabap ki
Hirodiyas a karoma o pagari i Hirod a si Pilipi. Ka si Hirod na miyakapangaroma ki
Hirodiyas,
18 Na lalayon dii teroon i Yahiya ki Hirod a "Sombang reka o ba ngka pangaromaa so
ipag ka."
19 Sabap roo na pepamagitaan i Hirodiyas si Yahiya na kebayaan iyan makibono, ogaid
na di niyan ai kegaga
20 Ka pelindingen sekaniyan i Hirod. Ipekelek iyan si Yahiya ka katawan iyan a maontol
ago soti sekaniyan a mama. Oman iyan maneg si Yahiya na masosa a pamikiran iyan,
ogaid na pekebabayaan iyan mamakineg.
21 Da matey na aden a kiyapakaparo i Hirodiyas sa katomana niyan ko kabaya iyan sii ko
gawii a kiyaselaselaa ko kinimbawataan ki Hirod. Pipakaradiyaanan iyan so manga
poporo a sanasanaan ko gobirno, ago so manga olowan o manga sondaro, ago so manga
barabangensa a mama roo sa Galili.
22 Kagiya somoled roo so wata i Hirodiyas a babay a misayaw na miyanga babaya si
Hirod ago so manga biyantowan iyan.
Na pitero o Dato ko raga a "Pangniya ngka raken so apiya antonaa i kebayaan ka, ka
imbegay aken reka."
23 Na misepa sekaniyan a tig iyan a "Apiya antonaa i pengnin ka, apiya so sabagi ko
ndatoan aken, na imbegay aken reka."
24 Na lominiyo so raga na iniise iyan ki ina iyan a "Antonaa i pengnin aken?"
"So olo i Yahiya a Pananalawat," a inisembag iyan.
25 Na sarta a minggagaan komasoy so raga ki Hirod na miyangni ron a "Aya kabaya aken
na began ka raken imanto den so olo i Yahiya a Pananalawat a matatangel sa talam."
26 Kagiya maneg ai o Dato na tanto a mikerata a ginawa niyan. Ogaid na di niyan
kebayaan i ba sekaniyan makanda sabap ko minisepa iyan ko kamamasaan o manga
banto.
27 Kagiya ka maoto na sagogona den a siyogo iyan so isa ko manga gordiya niyan sa
kowaan iyan so olo i Yahiya. Na somiyong sekaniyan ko kalaboso na piyotaan iyan sa olo
si Yahiya.
28 Na inowit iyan so olo niyan a matatangel sa talam, na inibegay niyan ko raga, na
inibegay o raga ki ina iyan.
29 Kagiya katokawan ai o manga sokbat i Yahiya na somiyong siran roo na kinowa iran
so lawas iyan na inilebeng iran ko kobor.
30 So peman so manga siyogo i Isa, na komiyasoy siran rekaniyan na piyanotol iran on so

langon a miyanggolaola iran ago minipamangendao.
31 Na pitero iyan kiran a "Onot kano raken, ka somibay tano ko darpa a da a taw ron kaan
kano ron pasin makadeke." Ka madakel a pepamakaoma ago di bo dii mbabaling sa apiya
so kapekakan iran na di keparoan.
32 Na mida siran ko awang na somiyong siran ko tanaw a darpa a siran bo.
33 Ogaid na madakel a miyamakailay ko kiyaawa iran roo, na miyakakilala kiran. Na
miyalalagoy siran a sii pepamakapoon ko langon a melilibeta on a manga inged, na
miyaona siran pen makaoma ko pesongowan iran.
34 Sii ko kiyatepad i Isa ko awang a miyailay niyan so tanto a madakel a taw na inikapedi
iyan siran, ka datar siran o manga bilibili a da a ba on tomatagikor. Na pipoonan iyan
siran mangendao sa madakel a manga nganin.
35 Kagiya magabi den na miyobay rekaniyan so manga sokbat iyan a tig iran a "Mitataog
ai a darpa na miyagabi den.
36 Pakalalakawa ngka angkai a manga taw kaan siran makasong ko melilibeta rektano a
dii pagonayonayan ago manga inged an siran on makapamasa sa kekan iran."
37 Ogaid na pitero kiran i Isa a "Sekano den i pamegay kiran sa kekan iran."
Na pitero iran on a "Na, ba sekami i pakapemasaan ka sa paan a arga a dowa gatos a
pelata a pirak a pekikan ami kiran?"
38 “Pira timan i paan iyo?" a iniise iyan. "Ikano roo na pariksaa niyo."
Kagiya mapariksa iran na tig iran a "Lima timan a paan ago dowa timan a seda."
39 Na inisogo iyan iran a pamakaontoden iran so langon angkoto a manga taw a
pelompolompoken siran sii ko lombay a balili.
40 Milompolompok siran mamangontod sa mbabagatos ago ndilima polo.
41 Na kinowa i Isa so lima timan a paan ago dowa timan a seda na lomiyangag sekaniyan
sa langit na miyanalamat. Na piyangopak iyan so paan na inipamegay niyan ko manga
sokbat a ipemagana ko manga taw. So mambo so dowa timan a seda na pimbagibagi iyan
kiran langon.
42 Na palaya siran den komiyan taman sa miyanga oosog.
43 Piyanimo o manga sokbat so miyasama ko manga paan ago manga seda na minipeno
ko sapolo ago dowa a reban.
44 Na lima nggibo a kadakel o manga mama a komiyan.
Pelalakaw si Isa ko Liyawaw o Ig
45 Oriyan oto na piyakada i Isa so manga sokbat iyan ko awang na piyakaona niyan siran
sa Bitsaida roo ko sabala a ranaw, ka pekabalingen iyan so madakel a taw.
46 Kagiya makaodas sekaniyan kiran na tomiyakedeg ko bobongan, ka ron
pengangarapan.
47 Kagiya magagawii na ndodoo den so awang sa laod, na sii sekaniyan pen sa gilopa a
da a ped iyan.
48 Miyailay niyan a tanto siran a kareregenan ko kapepora iran, ka masosonsang iran so
ndo. Na kagiya magaan den kelibabas na somiyong kiran si Isa a pelalakaw ko liyawaw o
ig. Ba niyan siran den segadi
49 Ogaid na kagiya mailay iran sekaniyan a pelalakaw ko liyawaw a ig na miyapikir iran
o ba arowak. Na kominisek siran,
50 Ka palaya siran rekaniyan miyakailay, na tanto a miyanga alek.
Sagogona den a gominiraw kiran si Isa a "Pakapipiyaa niyo a ginawa niyo, ka saken den!
Di kano pekelek."
51 Na miyobay sekaniyan ko awang na miyageda on, na lomingen so ndo. Na tanto siran
a miyamemesa,
52 Ka da iran sabota so mala a galebek iyan ko manga paan, ka manga bababaw siran i
panarima.
Piyamakapiya i Isa so Pepanga sasakit sa Ginasarit
53 Kagiya romipag siran ko ranaw na miyakaoma siran sa Ginasarit na domiyongko siran

roo.
54 Sii den ko kiyatepad iran ko awang na miyakilala o manga taw si Isa,
55 Na miyalalagoy siran a poon sangkoto a dalem a inged na piyangowit iran ki Isa so
pepanga sasakit a kidadalaganen iran sa apiya anda iran maneg i katatagoan on.
56 Apiya anda sekaniyan song ko maroni mala a inged, o di na sii ko dii pagonayonayan,
na ipepamametad iran so dii pemakarag roo ko manga padian. Na piyamangni iran ki Isa
a o ba iran bo maseko so sagayadan o kimon iyan, na so langon a miyakaseko on na
miyamakapiya.
MARKO 7
So manga Taritib o manga Apo
Mitimotimo ki Isa so manga Parisi ago so ped ko manga goro ko Kitab a miyamakapoon
sa Yarosalim.
2 Na miyainengka iran a komiyan so ped ko manga sokbat iyan a di soti a lima iran, ka da
kaonabi ko okit a ipepangendao o manga Parisi.
3 Ka aya adat iran ago so langon a ped a Yahodi na di siran ken o di iran daan a kaonabi
so manga lima iran ko osto a okit, ka petomanen iran so taritib o manga pelokelokesen.
4 Na apiya antonaa nganin i pekipoon sa padian na di iran ken o di iran pen ai kaonabi.
Madakel pen a manga taritib a initanan kiran a petomanen iran, a lagid opama o osto a
kapangonabi ko manga tagayan, ago manga ladiya ago manga koden.
5 Kagiya ka maoto na giyangkai a manga Parisi ago manga goro ko Kitab na iniise iran ki
Isa a "Ino a so manga sokbat ka na di iran tomanen so taritib o manga pelokelokesen, ka
pekan siran a di soti a lima iran."
6 Somimbag si Isa a "Benar so miyaalamat o Isayas makapantag rekano a dii
mamagomanta a inisorat iyan a:
'Giyangkai a manga taw na seselaan ako iran a nggolalan bo ko manga modol iran
ogaid na mawatan raken so manga poso iran.
7 Ilang ba den a kapesimbaa iran raken
na aya ipepamangendao iran a kitab kon o Allah
na matag baden manga kokoman o manosiya.'
8 “Di niyo dii ndarainon so manga sogoan o Allah ka pesembian iyo baden sa manga
taritib o manga taw."
9 Pitero kiran pen i Isa a "Pipiyapiyaan iyo den tomalikod so manga sogoan o Allah kaan
iyo matoman so manga taritib iyo.
10 Ka inisogo o Mosa a 'Pagadati ngka so ama a ka ago so ina a ka,' ago 'Apiya antawaa i
ndaora ko ama iyan o di na ina iyan na kebono.'
11 Ogaid na aya di niyo dii teroon na o teroa o mama ko ama iyan o di na ina a 'Saden sa
rek aken a kepakay a kitabang aken reka na minisenggay den a pamemegayan ko Allah,'
12 Na di niyo den peparon a ba niyan kaogopi ko ama iyan o di na ina iyan.
13 Giyai i okit a kapepakadaa niyo ko kipantag o katero o Allah sabap ko taritib iyo a di
niyo dii tetanana. Na madakel pen a datar ai a di niyo dii nggolaolaan."
So Pepekasebo ko Taw
14 Na piyamakaobay peroman i Isa so madakel a taw na pitero iyan kiran a "Pamakineg

kano langon na sabota niyo so peteroon ko.
15 Apiya antonaa i makaliliyo ko lawas o taw a pekasoled on na di rekaniyan pekasebo.
Ka so pepekaliyo ko taw na aya on pepekasebo.
16 So aden a manga tangila niyan na pamakineg baden!"
17 Kagiya somoled si Isa ko walay oriyan o kiyaawai niyan ko madakel a taw na iniise
rekaniyan o manga sokbat iyan o antonaa i maana o bayambayanan.
18 Na pitero iyan a "Da kano bes mambo makasabot? Ba niyo di sebota a saden sa
pekasoled ko lawas o taw a poon sa liyo na di rekaniyan pekasebo?
19 Ka di ini pekasoled ko poso niyan ka pegokit sa tiyan na go bo peliyo ko lawas."
Giyanan i kiyateroa i Isa sa sak so langon a pangenengken.
20 Tig iyan pen a "So pepekaliyo ko taw na aya on pepekasebo
21 Ka pepekaliyo ron so manga rarata a pamikiran a madadalem ko poso o manga taw: so
kambarabowat maasiya, kapamanekew, kapamono,
22 Kasebo, kanapso, kapanabasabap, kapamagakal, mitataralo a kababaya, kariit,
kapagitowito, katekabor, ago kapelalalong.
23 Langon ai a kamarataan a pepekapoon ko soled o taw na aya on pepekasebo.
So Paratiyaya o Ikanaanen a Babay
24 Miyawa roo si Isa na somiyong ko pagingedingedan a marani sa siti a Tiro. Somiyoled

sekaniyan ko isa a walay, na kabaya iyan a da a makatokaw o anda sekaniyan. Ogaid na
da den makapagma
25 Ka so isa a babay a aden a wata iyan a babay a sosookan a saitan na miyaneg iyan a
ndodoo sekaniyan. Na sarta den a somiyong sekaniyan ki Isa na somiyodiyod ko hadapan
iyan.
26 Giyangkai a babay na kena a ba Yahodi ka taw sa inged a Ponisiya roo sa Siriya. Na
piyangni niyan ki Isa a pakaliyon iyan so saitan ko wata iyan.
27 Na pitero iyan ko babay a "Disomala a kapakakana ko mona ko manga wata, ka di
patot i ba kowaa so pangenengken o manga wata na ba itogen ko manga aso."
28 Somimbag so babay a "Oway Sir, ogaid na apiya so manga aso ko didalem o lamisaan
na pepekakan man ko manga ropod ko paan o manga wata!"
29 Na pitero on i Isa a "Sabap sangkai a pitero o ka na song ka ko walay ngka, ka
lominiyo den so saitan ko wata a ka a babay."
30 Na miyaling sekaniyan na miyaoma niyan so wata iyan a miiga ko igaan a da on den so
saitan.
Piyakapiya i Isa so Mama a Bengel ago Amang
31 Oriyan oto na inawaan i Isa a Tiro na miyokit sa Sidon ago tomiyaros ko Ranaw a
Galili. Sii ko kapegokit iyan ko pagingedingedan a bebetowan sa Dikapolis
32 Na inowitan sekaniyan o manga taw sa mama a bengel ago amang, na piyangni iran ki
Isa a idapenet iyan on a lima niyan.
33 Inawat sekaniyan i Isa ko madakel a taw na inisisok iyan a manga tindoro iyan ko
tangila o mama, na go niyan bo dodai a tindoro iyan na iniseko iyan ko dila o mama.
34 Na lomiyangag si Isa sa langit na gomininawa sa madalem, na pitero iyan ko mama a
"Ipepata!" (a aya maana niyan na "Leka ka baden!")
35 Na sagogona a kiyalekaan so manga tangila niyan ago kiyabokaan so dila iyan, na
miyakabales tero.
36 Pisanaan siran langon i Isa sa di iran ai petataroa ko apiya antawaa, ogaid na sa
kapepanamari niyan kiran on sana na baden salebilebi a kapepakalangkapa iran on.
37 Tanto siran den a miyamemesa a tig iran a "So kalangolangon a miyanggolaola niyan
na mapiya. Apiya so manga bengel na mapekaneg iyan ago so manga amang na
mapakapetero iyan."
MARKO 8
Pat nggibo a taw a Piyakakan i Isa
Sii sangkoto a manga gawii na mitimotimo peman ki Isa so tanto a madakel a taw. Na
kagiya da den a kekan iran na piyakaobay niyan so manga sokbat na pitero iyan kiran a
2 “Ipekepedi aken angkai a madakel a taw, ka miyakatelo gawii a kiyatareg iran raken na
da den a ba iran kekan imanto.
3 O pakabalinga ko siran a penga aaor na pelipadengan siran sa kapembaling iran, ka so
ped kiran na mawatan i poonan."
4 Na pitero rekaniyan o manga sokbat iyan a "Anda i kekowaan o apiya antawaa sa paan
sangkai a mitataog a kaden a petoon a pekikan sangkai a madakel a taw?"
5 “Pira timan i paan iyo?" a iniise i Isa.
"Pito timan," a inisembag iran.
6 Na siyogo iyan mamangontod sa lopa so madakel a taw. Na kinowa niyan so pito timan
a paan na miyanalamat, na piyangopak iyan ai na inipamegay niyan ko manga sokbat a
ipemagana iran ko madakel a taw, na piyamagana iran siran.
7 Aden mambo a maito a manga roroni a seda iran, na kagiya makapanalamat na pitero
iyan pen ko manga sokbat a ipemagana iran.
8 Na komiyan so manga taw taman sa miyanga oosog. Oriyan ai na piyanimo o manga
sokbat so miyasama iran na minipeno ko pito timan a reban.
9 Manga pat nggibo a kadakel angkoto a manga taw. Na kagiya mapakabaling siran i Isa
10 Na miyageda sekaniyan ko awang a ped o manga sokbat iyan na somiyong siran sa
inged a Dalmanota.
So Pangni ko Nanao
11 Somiyong ki Isa so ped ko manga Parisi na miyakindaowa siran on. Piyamangni iran a
pakailain iyan siran sa nanao a poon sa kasorgaan, ka petepengan iran sekaniyan.
12 Miyakaginawa si Isa sa madalem na pitero iyan a "Ino mangaday pepamangni sa nanao
so manga taw sangkai a masa? Teroon ko rekano a mataan den a da a ba kiran imbegay a
nanao."
13 Na inawaan iyan siran na miyageda peman ko awang ka meripag siran ko ranaw.
So Tapay o manga Parisi ago si Hirod
14 Miyakalipat mawid so manga sokbat sa paan, na sasatiman bo a paan iran sii ko

awang.
15 Na tiyapaosan siran i Isa a tig iyan a "Iktiyar kano na pananggilai niyo so tapay o
manga Parisi ago so tapay i Hirod."
16 Na mimbibitiyarai siran a tig iran a "Aya kiyateroa niyan sii na sabap sa da a paan
tano."
17 Katawan i Isa o antonaa i di ran dii mbibitiyaraiyan na iniise iyan kiran a "Ino niyo dii
ndadaowai a kada a paan iyo? Ba kano pen di pekasarino o di na pekasabot? Ba
miyakategas so manga poso iyo?
18 Aden a mata niyo; ba kano di pekailay? Aden a manga tangila niyo; ba kano di
pekaneg? Ba niyo di ketademi
19 So kiyapangopaka ko ko lima timan a paan a piyakikan ko lima nggibo a taw? Pira
timan a reban i kiyapenoan ko sama iran a piyanimo iyo?"
Tig iran a "Sapolo ago dowa."
20 “So mambo so pito timan a paan a piyakikan ko pat nggibo a taw, na pira timan a
reban i kiyapenoan ko sama iran a piyanimo iyo?"
Tig iran a "Pito timan."
21 Na pitero kiran i Isa a "Ba kano pen di pekasabot?"
Piyakapiya i Isa so Bota roo sa Bitsaida
22 Miyakaoma siran sa Bitsaida na inowitan o manga taw si Isa sa bota a mama, na

piyangni iran rekaniyan a sekoon iyan so bota.
23 Na kiyapetan i Isa a lima niyan na inowit iyan ko liyo o inged. Tiyopean iyan a manga
mata o mama ago inidapenet iyan on a lima niyan, na iniise iyan a "Ba aden a pekeilay
ngka?"
24 Miyangilailay so mama na tig iyan a "Pepekailay ako sa manga taw, ogaid na
maparaparas siran a manga kayo a dii ndadalakaw."
25 Na piparomanan i Isa a kinidapenet iyan a lima niyan ko mata o mama, na
miyangilailay sekaniyan sebenar na miyakanono den, na miyakailay piyapiya ko langon
taman.
26 Na piyakabaling i Isa a tig iyan a "Di ka pagokit sangkai a siti."
27 Oriyan iyan na tomiyaros si Isa ago so manga sokbat iyan ko manga iito a inged a
midadair sa siti a Kaisariya Pilipi. Sii ko kapelalakaw iran na iniise iyan ko manga sokbat
iyan a "Antawaa kon ako a kabasa o manga taw?"
28 Inisembag iran a "Seka kon si Yahiya a Pananalawat; na dii tero so ped sa seka si
Iliyas; na so pen so ped na tig iran a isa ka ko manga nabi."
29 Na iniise kiran i Isa a "Sekano, antonaa i mapetero iyo o antawa ako?"
Somimbag si Pidro a tig iyan a "Seka so Al Masih."
30 Na liyalangan iyan siran sa o ba iran petataroa ko apiya antawaa so makapantag
rekaniyan.
31 Mandiyadi na pipoonan iyan kiran magosay a so Wata o Manosiya na disomala a

madakel a ikerasay niyan, na di terimaan o manga pelokelokesen, ago manga poporo a
imam, ago manga goro ko Kitab, na kebono sekaniyan, na amay ka makatelo gawii na
keoyag bo.
32 Giyogod iyan ai kiran, na inisibay i Pidro si Isa na pimbongetan iyan.
33 Ogaid na dominingil si Isa na inilay niyan so manga sokbat iyan, na pimbongetan iyan
si Pidro a tig iyan a "Awa ka raken Iblis, ka so mapipikir ka na kena a ba poon ko Allah,
ka poon ko manosiya."
34 Na giyoto a piyamakaobay i Isa so madakel a taw ago so manga sokbat iyan na pitero
iyan kiran a "O aden a kebaya raken tomondog na disomala a itolak iyan a ginawa niyan
ago posain iyan so kros iyan ago pegonot raken.
baden. Ogaid na apiya antawaa i iperila iyan so kaoyagoyag iyan sabap raken ago so
Mapiya a Totol na kesabet iyan.
36 O miyakowa o taw so dalem a doniya a sarta a miyalaga so niyawa niyan na antonaa i
miyanggona niyan on?
37 Na antonaa i kibegay o taw a kiaon ko niyawa niyan?
38 Apiya antawaa i ikeya ako niyan ago so manga katero aken sii ko hadapan angkai a
manga baradosa a miyamanalikod ko Allah, na so mambo so Wata o Manosiya na ikeya
iyan angkoto a taw amay ka makaoma a misasarta on so bantogan o Ama iyan ago
oonotan o soti a manga malaikat."
MARKO 9
Na pitero kiran pen i Isa a "Teroon ko rekano a mataan den a aden a ped ko makadadarpa
sii a kemasaan iran so Ndatoan o Allah a pekatalingoma a sarta o mala a kabatowa sa di
iran pen kapatay."
2 Kagiya makanem den gawii na piyakaonot i Isa si Pidro, si Santiyago, ago si Yahiya, na
inowit iyan siran roo ko maporo a palaw sa da a ped iran. Na sii ko kapegilaya iran ki Isa
na miyasalin sekaniyan den.
3 Miyabaloy so manga nditaren iyan a pesigay sa tanto a kiyapakapoti iyan a da a
pamimipi ko doniya a ba niyan mapakapoti a datar oto.
4 Na miyamakiilay kiran si Iliyas ago si Mosa a dii makimbitiyarai ki Isa.
5 Gominiraw si Pidro a tig iyan ki Isa a "Goro, mapiya kagiya sisii tano. Magembaal kami
sa telo a lawig, a so isa on na para reka, so isa na para ki Mosa, ago so isa pen na para ki
Iliyas.'
6 Aya kiyateroa niyan sii na kagiya tanto siran a miyalek, na da a katawan iyan i ba patot
a mapetero iyan.
7 Na miyakagemaw a gabon na siyayapan iyan siran, na aden a sowara a miyakapoon ko
gabon a tig iyan a "Giyai so pekebabayaan ko a Wata aken. Pamakinega niyo sekaniyan!"
8 Na sarta den a miyangilailay siran, ogaid na da a ped iran a ba iran miyailay a rowar ki
Isa.
9 Sii ko kapetondagay ran ko palaw na pisana niyan kiran a di iran petataroa ko apiya
antawaa so miyailay iran taman sa maoyag so Wata o Manosiya a poon ko miyamatay.
10 Sabap sii na piyagma iran ai ko ginawa iran, ogaid na ipegise o oman i isa ko ped iyan
o antonaa i maana o kakeoyag a poon ko miyamatay.
11 Na iniise iran ki Isa a "Ino dii teroa o manga goro ko Kitab a keona makaoma si Iliyas
a di so Al Masih?"
12 Inisembag i Isa a "Mataan den a pekaoma mona si Iliyas na petiyagaren iyan so langon
taman. Na o giyanan, na antonaa i maana o misosorat ko Kitab makapantag ko Wata o
Manosiya a kerasay a tanto ago pesodiin?
13 Ogaid na teroon ko rekano a miyakaoma den si Iliyas, na pinggolaola on o manga taw
so langon a kabaya iran a so den so minisorat a makapantag on."
14 Kagiya maoma iran so ped ko manga sokbat na miyailay iran a lilibeten siran o
madakel a taw a ped iran so manga goro ko Kitab a dii makindadaowa ko manga sokbat.
15 So den so kiyailaya o langon o manga taw ki Isa na tanto siran a miyamemesa, na
miyalalagoy siran on na siyalam iran.
16 Iniise kiran i Isa o antonaa i di ran dii ndadaowaiyan ago so manga sokbat.
17 Na somimbag so isa a taw ko malilimod a tig iyan a "Goro, inowit aken reka so wata
aken a mama a sosookan a saitan a miyakabaloy rekaniyan a amang.
18 Igira a pepakapasangan sekaniyan o saitan na ipepapes iyan, na pendidi so ngari iyan a
dii makakiteb a manga ngipen iyan, ago pepaninder sekaniyan. Piyangni aken ko manga
sokbat ka a pakaliyowa iran so saitan, na da iran magaga."
19 Na pitero kiran i Isa a "Da a paratiyaya niyo a manga taw!" Ay katey a disomala a
kipageepedaan aken rekano? Ay katey a disomala a kapanginginsabari aken rekano? Wita
niyo raken so wata."
20 Na inowit iran on so wata. Na kagiya mailay o saitan si Isa na sagogona den a
piyakatataliya iyan a lawas o wata, na minilampes sekaniyan ko lopa a dii tetambalilid
ago pendidi a ngari iyan.
21 Iniise i Isa ko ama o wata a "Ay kiyatey a kiyagedama niyan sii?"
"Ipoon den ko kaito iyan pen" a inisembag iyan,
22 “na omanoman den ipepapes sekaniyan o saitan ko apoy ago sii ko ig a pepanamaren
iyan mono. O kegaga ngka na kapediin kami ngka na ogopi kami ngka."
23 Na tig i Isa a "Ino ngka peteroa a 'O kegaga ngka?' So langon taman na kegaga para ko
taw a peparatiyaya."
24 Na sarta a pitero sebenar o ama o wata a "Peparatiyaya ako. Ogopi ako ngka ko
kapakadaa ko ko di aken kaperatiyaya!"
25 Kagiya mailay i Isa a madakel a ped a manga taw a pepamakaoma a dii malalagoy na
siyaparan iyan so saitan a "Seka a bengel ago amang a saitan; sogoon ko seka a liyo ka ko
lawas iyan na di ka on den soled peroman!"
26 Na kominisek so saitan na piyakatataliya iyan manamar so lawas o wata, na lominiyo.
Mimbaloy so paras o wata a datar o mait, na pitero o kadakelan ko manga taw a "Miyatay
den."
27 Ogaid na kiyapetan i Isa so lima niyan na biyowat iyan, na tominindeg so wata.
28 Kagiya somoled si Isa ko walay na iniise on o manga sokbat iyan sa da a ped iran a
"Ino ami da mapakaliyo so saitan?"
29 Na pitero iyan kiran a "Aya bo a kapakaliyowa sangkai a sasoson a saitan na nggolalan
ko kapangangarapan."

30 Inawaan iran angkoto a darpa na miyokit siran sa Galili. Di kabaya i Isa o ba ana
makatokaw o anda siran matatago,
31 Ka kagiya pepamangendaon iyan so manga sokbat iyan. Pitero iyan kiran a "So Wata o
Manosiya na kepalad ko kapaar o manga taw na mbonoon iran, na amay ka makatelo
gawii na keoyag bo."
32 Ogaid na da iran sabota i maana angkoto a pitero iyan, na ipekelek iran o ba iran on
miise.
Antawaa i Lebi a Mala
33 Miyakaoma siran sa Kapirnaom, na kagiya makasoled siran den ko walay na iniise i

Isa ko manga sokbat iyan a "Antonaa i di niyo dii ndadaowaiyan ko kapelalakaw tano?"
34 Ogaid na da siran sembag, ka aya iran dii ndadaowaiyan ko kapelalakaw iran na
antawaa i lebi kiran a mala.
35 Mandiyadi na miyontod si Isa na piyakaobay niyan so sapolo ago dowa a sokbat na
pitero iyan a "O aden a kebaya mona ko manga taw na disomala a pembaloy a keori ko
langon iran ago matag pepanalagad ko kalangolangon iran."
36 Na kinowa niyan so isa a wata na piyakatindeg iyan ko look iran. Riyaben iyan so wata
na pitero iyan kiran a
37 “Apiya antawaa i terima sa isa sangkai a manga wata sii ko ingaran aken na saken i
terimaan iyan. Na apiya antawaa i terima raken na kena a ba saken i terimaan iyan ka so
somiyogo raken."
So Kena a ba Rektano Somosopak na Tomatampil Rektano
38 Pitero rekaniyan i Yahiya a "Goro, miyakailay kami sa mama a pepakaliyon iyan so

manga saitan sii ko ingaran ka na tipengan ami somapar, ka kena a ba tano sekaniyan
ped."
39 Tig i Isa a "Di niyo pesepari, ka da a taw a dii nggolaola sa manga ala i kabatowa a
galebek sii ko ingaran aken a ba magaan makatero sa marata makapantag raken.
40 Ka apiya antawaa i kena a ba rektano pesopak na tomatampil rektano.
41 Apiya antawaa i megay rekano sa isa ka tagayan a ig a mainom iyo sabap sa manga
kaom kano o Al Masih na teroon ko rekano a mataan den a kebalasan sekaniyan.
42 “Apiya antawaa i mapakandosa niyan so isa sangkai a mitatanan a manga taw a

peparatiyaya raken na tomo on a ba den kaiketi a lig iyan sa mala a ator na milebad sa
ragat.
43 O ikedosa ngka so lima ngka na potola ngka on. Tomo sii reka a makasoled ka sa
kaoyagoyag a sadir a di sa ba dowa ka i lima a ba ka den pekasong sa kanarakaan ko apoy
a da den a ikepareng iyan.
45 Na o ikedosa ngka so ai ngka na potola ngka on, ka tomo sii reka a makasoled ka sa
kaoyagoyag a lepo a di sa ba dowa ka i ai a ba ka den kilebad sa kanarakaan.
47 O ikedosa ngka so mata ngka na sowata ngka on, ka tomo sii reka a makasoled ka ko
Ndatoan o Allah a isaisa ka i mata a di sa ba dowa ka i mata a ba ka den kilebad sa
kanarakaan.
48 Roo na 'di den petay so manga oled iran ago di kepareng so apoy.'
49 “So oman i isa a taw na petimosen a apoy.
50 “Mala i kipantag so timos, ogaid na o mada so katimos iyan na andamanaya i
kitimosen on peroman? Petimosi niyo a manga ginawa niyo ago pelilintada kano."
MARKO 10
Inipangendao i Isa so makapantag ko Kapakimbelag
Inawaan i Isa angkoto a darpa na somiyong sa inged a Yodiya na miyalepas iyan a

lawasaig a Yordan. Na pitimoan sekaniyan peman o tanto a madakel a manga taw, na
piyangendao niyan siran, ka aya niyan olaola.
2 Na aden a miyakaoma rekaniyan a manga Parisi, ka tepengan iran. Iniise iran on a "Ba
sisii ko Kitab i ba kendai o mama so karoma niyan?"
3 “Antonaa i inisogo rekano o Mosa?" a inisembag iyan.
4 Pitero iran a "Iniiyog o Mosa a makapesorat so mama sa kapasadan ko kapakimbelag ko
karoma niyan na go niyan bo mapekaawa."
5 Na pitero kiran i Isa a "Inisorat rekano o Mosa angkai a sogoan sabap ko kategas iyo i
poso.
6 Ogaid na sii sa poonan isako kiyaadena ko doniya na inaden o Allah so manosiya a
mama ago babay.
7'Sabap sii na magawa so mama ki ama iyan ago ina iyan na makipetepi ko karoma niyan,
8 Na siran a dowa na keisaisa.' Kagiya ka maoto na kena den a ba siran madodowa, ka
maiisaisa.
9 Sabap sii na di pakapembelaga o manosiya so piyakatepi o Allah."
10 Kagiya somoled siran peman ko walay na inisean o manga sokbat si Isa makapantag
sii.
11 Na inisembag iyan a "Apiya antawaa mama i makipembelag ko karoma niyan ago
mangaroma sa ped a babay na miyakasina sekaniyan ago miyakandosa ko miyaona a
karoma niyan.
12 Na o so babay na makipembelag ko karoma niyan ago makipangaroma sa ped a mama
na miyakasina mambo."
13 Aden a manga taw a pepamangowitan iran si Isa sa manga wata kaan iyan siran
maseko, ogaid na pimbobongetan siran o manga sokbat.
14 Kagiya mailay ai i Isa na inotegan sekaniyan, na pitero iyan kiran a "Pakasonga niyo
raken so manga wata. Di niyo siran pesepari, ka so Ndatoan o Allah na rek o datar iran a
manga taw.
15 Teroon ko rekano a mataan den a apiya antawaa i di niyan terimaan so Ndatoan o
Allah a datar o katerimaa on o wata na di on den pekasoled."
16 Na piraraben iyan angkoto a manga wata na riyakmatan iyan siran a ipepanapenet iyan
kiran a manga lima niyan.
So Kawasa a Mama
17 Sii ko kangganat i Isa ka melalakaw na miyalalagoy ron so isa a mama na

somiyodiyod ko hadapan iyan, na iniise iyan a "Goro a mapiya, antonaa i disomala a
penggolaolaan ko kaan aken makewali so kaoyagoyag a da a kaposan iyan?"
18 Na pitero on i Isa a "Ino ako ngka mbetowi sa mapiya? Da a ba mapiya a rowar ko
Allah.
19 Katawan ka so manga sogoan o Kitab: 'Di ka pemono, di ka pesebo, di ka pemanekew,
di ka pemokeg, di ka pengasab, pagadati ngka si ama a ka ago si ina a ka.' "
20 Tig o mama a "Goro, langon angkai a sogoan na petomanen aken ipoon den ko
kawawatai raken."
21 Na inilay sekaniyan i Isa na kiyababayaan iyan. "Satiman bo a disomala a
penggolaolaan ka." a tig iyan. "Baling ka na pesaa ngka so langon a tamok ka na pamegi
ngka sa pirak so manga miskin, na kebegan ka sa kakawasaan roo sa kasorgaan. Oriyan
oto na kasoy ka na pegonot ka raken."
22 Kagiya maneg ai o mama na miyakarimeng a paras iyan. Na miyawa roo a mararata a
ginawa niyan, ka tanto den a mala i tamok.
23 Si Isa na liyayas iyan milay so manga sokbat iyan na pitero iyan kiran a "Tanto a
maregen a kapekasoled o kitatamoken ko Ndatoan o Allah!"
24 Na inipamemesa o manga sokbat angkai a manga katero iyan, na pitero kiran pen i Isa
a "Manga wata, tanto a maregen a kapekasoled ko Ndatoan o Allah!
25 Lebi a malebod a kapegokit o onta ko peso o ragom a di so kapekasoled o kawasa ko
Ndatoan o AIlah."
26 Na tanto siran a miyamemesa na iniise o oman i isa ko ped iyan a "O giyanan na
antawaa bes i kesabet?"
27 Tintengan siran i Isa na pitero iyan a "Di ini kegaga o manosiya, ogaid na kegaga o
Allah, ka so langon taman na palaya den kegaga o Allah."
28 Na pitero rekaniyan i Pidro a "Ilaya ngka man, ka tiyalikodan ami so langon taman
kaan kami reka makaonot."
29 “Teroon ko rekano a mataan den," a tig i Isa, "a apiya antawaa i tomiyalikod ko walay
niyan, o di na so manga pagari niyan a mama o di na babay, o di na so ina iyan, o di na so
ama iyan, o di na so manga wata iyan, o di na so lopa iyan sabap raken ago so Mapiya a
Totol
30 Na pekatarima sekaniyan sa masa imanto sa magatos takep ko manga walay, manga
pagari a mama ago babay, manga ina, manga wata, ago manga lopa a rakes o manga
kasatroan. Na sii ko maori a alongan na kebegan siran sa kaoyagoyag a da a kaposan iyan.
31 Ogaid na madakel a maoona imanto a keori bo, na madakel a maoori imanto a keona
bo."
32 Pelalakaw siran ko lalan a isong sa Yarosalim, na moona kiran si Isa. Pepamemesa so

manga sokbat, na pepanga aalek so manga tomotondog on. Na inisibay peman i Isa so
sapolo ago dowa a sokbat na pitero iyan kiran o antonaa i keokitan iyan.
33 “Pamakineg kano!" a tig iyan. "Pesong tano sa Yarosalim a ron kepalad so Wata o
Manosiya ko manga poporo a imam ago manga goro ko Kitab, na kisala iran on so
kambonoa on. Peladen iran sekaniyan ko kena a ba manga Yahodi,
34 Na pegitowitoon iran, penodaan, pemadasan, ago mbonoon, na amay ka makatelo
gawii na keoyag sekaniyan bo."
So Pangni i Santiyago ago si Yahiya
35 Oriyan oto na miyobay ki Isa si Santiyago ago si Yahiya a manga wata i Sibidi a tig
iran a "Goro, kebayaan ami a tomanen ka so pengnin ami reka."
36 “Antonaa i kabaya iyo a ikidia ko rekano?" a iniise iyan.
37 Inisembag iran a "Amay ka pendato ka a kababantogan na pakaontoda ngka so isa
rekami sa kawanan ka, ago so isa sa diwang ka."
38 “Di niyo katawan i pepangnin iyo." a tig i Isa. "Ba kano pekainom ko tagayan a
paginoman ko? Na ba kano kasalawati ko iselawat raken?"
39 Inisembag iran a "Kegaga mi anan."
Na pitero kiran i Isa a "Mataan a so tagayan a paginoman ko na paginoman iyo mambo,
ago so iselawat raken na iselawat rekano pen.
40 Ogaid na kena a ba saken i pemili o antawaa i magontod sa kawanan aken ago sa
diwang aken. Ka aya pekaontoden roo na so siran oto a pitiyagaran on o Ama aken."
41 Kagiya katokawan ai o sapolo a ped a manga sokbat na inotegan siran ki Santiyago
ago si Yahiya.
42 Na piyakaobay siran i Isa na pitero iyan kiran a "Katawan iyo a so siran oto a
bebetowan sa manga dato o manga nasiyon na pepangondatoan iran so manga pagtaw
iran, na so manga olowan iran na pepekapaar kiran.
43 Ogaid na kena a ba datar ai sii rekano. Ka apiya antawaa rekano i kebaya makala na
disomala a pembaloy a pepanalagad rekano.
44 Na apiya antawaa rekano i kebaya mona na disomala a makipangongoripen rekano
langon.
45 Ka apiya so Wata o Manosiya na aya inisong iyan sii na kena a ba so kapenalagadi ron,
ka so kapenalagadi niyan ko ped ago so kiperilaan iyan ko kaoyagoyag iyan a ipagaon ko
madakel a taw."
Piyakapiya i Isa so Bota a si Bartimayos
46 Miyakaoma siran sa Yariko, na sii ko kapegawa roo i Isa a ped o manga sokbat iyan
ago so madakel a ped a taw na aden a bota a mama a dii mamamangni a moontod ko kilid
a lalan. Aya ngaran iyan na si Bartimayos a wata i Timayos.
47 Kagiya maneg iyan a giyoto bes si Isa a Taw sa Nasarit na miyananalo sekaniyan a
"Hey Isa, a Wata o Daod, kapediin ako ngka!"
48 Na madakel a mimbonget rekaniyan a tig iran a "Rerenek ka!" Ogaid na miyanamar
sekaniyan baden mananalo a "Hey Wata o Daod, kapediin ako ngka!"
49 Na tomiyareg lomalakaw si Isa na tig iyan a "Talowi niyo sekaniyan."
Na tiyalowan iran so bota a mama a tig iran a "Pakapipiyaa ngka a ginawa ngka! Tindeg
ka ka petelowan ka niyan!"
50 Na inipisi niyan so gerab iyan na tominikeras tomindeg na somiyong ki Isa.
51 “Antonaa i kabaya a ka a ikidia ko reka?" a iniise on i Isa.
Na pitero o bota a "Goro, kabaya aken a makailay ako peroman."
52 “Baling ka," a tig i Isa, "ka so paratiyaya ngka na aya ngka inipakapiya." Na sarta den
a miyakailay so bota na miyonot ki Isa ko kapelalakaw niyan.
MARKO 11
Piselasela si Isa ko Kiyasoled iyan sa Yarosalim
Sii ko kapepekarani iran sa Yarosalim na miyakaoma siran sa Bitpagi ago giya Bitani a
marani ko Palaw a Olibi. Na somiyogo si Isa sa dowa ko manga sokbat iyan
2 A tig iyan a "Song kano sangkoto a inged a maoonaan tano, na anda den i kapekasoled
iyo ron na keilay niyo so isa a nati a kimar a iiket a da den kakodai. Bokaa niyo na wita
niyo sii.
3 O aden a magise rekano o ino niyo anan penggolaolaa na teroa niyo a 'Aden a ikidia on
o Kadnan, na pekikasoy niyan sii bo sa di matey.' "
4 Na lomiyalakaw siran na miyatoon iran so nati a kimar roo ko lalan a iiiket ko pintoan o
walay. Na sii ko kapembokaa iran on
5 Na iniise o ped ko kititindeg roo a "Ino niyo pembokaa angkanan a kimar?"
6 Inisembag iran so pitero kiran i Isa na piyakalalakaw siran angkoto a manga taw.
7 Inowit iran so kimar ki Isa na iniampido iran on so manga gerab iran na mikoda on
sekaniyan.
8 Na piyangayat o madakel a taw so manga gerab iran ko lalan a pagokitan iyan, na
piyanempas on o manga ped so manga ala a raon a piyamotol iran roo ko manga
pangomaan.
9 So manga taw a pepangonaan ki Isa ago so pepamanondog on na ipepelalis iran a
"Podin so Allah!
Rarakmatan so pepekaoma sii ko ingaran o Kadnan!
10 Rarakmatan so pekatalingoma a ndatoan o apo tano a so Daod!
Podin roo sa pipeporoan a kasorgaan!"
11 Na somiyoled si Isa sa Yarosalim na somiyong ko Timplo. Liyayas iyan milay so

langon taman roo, ogaid na kagiya miyagabi den na somiyong roo sa Bitani a oonotan o
sapolo ago dowa a sokbat.
Inisinta i Isa so Kayo a Higos
12 Kagiya mapita sii ko kapekesoy iran a poon sa Bitani na miyaor si Isa.

13 Na miyainengka iyan a aden a kayo a higos a marabong i raon roo ko malo mawatan.
Na siyongowan iyan ka o ba ana matoon iyan on a onga. Kagiya maoma niyan na da a ba
niyan on miyatoon ka so bo so raon iyan, ka kena a ba mosim a ipemangonga o higos.
14 Na pitero iyan ko kayo a "Da den a ba pekakan peroman ko onga ngka." Na miyaneg
ai o manga sokbat iyan.
15 Kagiya makaoma siran sa Yarosalim na somiyoled si Isa ko Timplo na pipoonan iyan

mamogaw so dii ndadagang ago dii mamamasaan roo ko Timplo. Pilelekeb iyan so
manga lamisaan o dii sesambiay sa pirak ago so manga ontoda o dii pepasa sa manga
marapatik.
16 Na da niyan pakaokita ko lamalama o Timplo so apiya antawaa a pegawid sa
dagangan.
17 Na piyangosiyatan iyan angkoto a manga taw a tig iyan a "Ba da misorat ko Kitab a tig
o Allah a 'So Walay aken na mbetowan sa Walay a Pesimbaan para ko langon a taw?'
Ogaid na ba niyo den mbaloya a dii tepokan o manga tekew!"
18 Kiyatokawan ai o manga poporo a imam ago so manga goro ko Kitab na mipoon siran
mangiloba sa okit sa kambonoa iran ki Isa. Ogaid na ipekelek iran sekaniyan, ka so
langon o madakel a taw na pepamemesa siran ko ipepamangendao niyan.
19 Kagiya merimon den na lominiyo si Isa ago so manga sokbat sa siti.
20 Kagiya mapita sii ko kapelalakaw iran na miyailay iran so kayo a higos a mirayong
den taman ko bekaw.
21 Kiyatademan i Pidro so pitero i Isa ko kayo na tig iyan a "Goro, ilaya ngka man ka so
kayo a pisintaan ka na mirayong!"
22 Na pitero kiran i Isa a "Paratiyayaa niyo so Allah.
23 Teroon ko rekano a mataan den a apiya antawaa i teroon iyan sangkai a palaw a 'Awa
ka san na roo ka sa ragat' na o di sekaniyan pekedowadowai ko poso niyan ka
peparatiyayaan iyan baden a mapenggolaola so pitero iyan na ketoman den para
rekaniyan.
24 Kagiya ka maoto na teroon ko rekano a apiya antonaa i pengnin iyo sii ko
kapepangangarapan iyo na paratiyayaa niyo a miyatarima iyo den na imbegay rekano den.
25 Oman kano tindeg a pepangangarapan na o aden a kararangit iyo ko apiya antawaa, na
rilai niyo sekaniyan kaan so Ama iyo a ndodoo sa kasorgaan na an kano niyan mambo
karilai ko manga sala iyo."
27 Miyakaoma siran peman sa Yarosalim na sii ko dii kandalakaw i Isa ko lamalama o

Timplo na miyamangobay ron so manga poporo a imam ago manga goro ko Kitab ago
manga pelokelokesen.
28 Na iniise iran on a "Antonaa i kapaar ka sa di ngka sii dii kanggolaolaa? Na antawaa i
migay reka sangkai a kapaar sa kapesowaa ngka sii?"
29 Somimbag si Isa a "Aden pasin a ipagise aken rekano, na o kesembag ako niyo na
peteroon ko rekano o antonaa i kapaar aken sa di aken sii dii kanggolaolaa.
30 So sangan i Yahiya sa kapepanalawat na ba poon ko Allah o di na poon ko manosiya?
Sembaga ko niyo."
31 Na mindadaowaiya siran a tig iran a "O teroa tano a poon ko Allah na keliden tano
niyan mise a teroon iyan a 'O benar oto na ino niyo da paratiyayaa si Yahiya?'
32 Ogaid na o teroa tano a poon ko manosiya na ipekelek tano o ba antonaa i ikidia
rektano o madakel a taw, ka tatarimaan iran langon a tito a nabi si Yahiya."
33 Na inisembag iran ki Isa a "Di ami katawan."
Na pitero i Isa a "Di aken rekano mambo peteroon o antonaa i kapaar aken sa di aken sii
dii kanggolaolaa."
MARKO 12
Mandiyadi na mipoon kiran manotol si Isa sa manga bayambayanan a tig iyan a "Aden a
mama a miyamola sa manga obas ko asinda niyan. Na inalad iyan ai, na komiyalot
sekaniyan sa ketagoan ko petemekan ko obas, na mimbalay sa lantawa. Kagiya mapasad
oto na piyagapin iyan so asinda ko manga ogopa na lomiyalakaw sa mawatan a inged.
2 Kagiya raoten so kaperagona on na siyogo iyan so isa a talasogoay niyan roo ko manga
ogopa ka pekikowa niyan on so bagian iyan ko onga o pamomolan.
3 Ogaid na diyakep iran so talasogoay ago piyamadasan iran, na piyakabaling iran sa da a
ba niyan miyakowa.
4 Na somiyogo peroman so kirek sa salakaw a talasogoay, na biyasal iran sa olo ago
piyakakeyakaya iran.
5 Na somiyogo sekaniyan sa isa pen a talasogoay na biyono iran sekaniyan. Madakel pen
a ped a siyogo iyan na so ped on na piyamadasan iran, ago so pen so ped na piyamono
iran.
6 “Na sakataw pen a kesogo iyan, a so pekebabayaan iyan a wata iyan a mama. Na
moripori na siyogo iyan sekaniyan, ka tig iyan a 'Pegadatan iran so wata aken.'
7 “Ogaid na tig o oman i isa a ogopa ko ped iyan a 'Sekaniyan so wata o kirek sii. Itano
roo ka bonoon tano na kekowa tano angkai a asinda!'
8 Na diyakep iran sekaniyan ago biyono iran, na inilebad iran ko liyo o asinda."
9 “Na antonaa den i penggolaolaan o kirek ko asinda? Songowan iyan angkoto a manga
ogopa na pemonoon iyan siran, na pegapinen iyan so asinda ko salakaw a manga taw.
10 Ba niyo da mabatiya angkai a misosorat ko Kitab a
11 Pinggolaola ini o Kadnan
na sayana rektano a piyakamemesa'?"
12 Kagiya maneg ai angkoto a manga olowan na kebayaan iran domakep si Isa ka siyabot
iran a siran i piyakailatan iyan ko bayambayanan, ogaid na ipekelek iran so madakel a
taw. Sabap roo na inawaan iran si Isa na lomiyalakaw.
So Pakaisa makapantag ko Kabayad sa Bowis
13 Da matey na siyogo iran ki Isa so ped ko manga Parisi ago manga kaom i Dato Hirod
kaan iran mapakatero sa midimanda on.
14 Kagiya makaoma siran na tig iran a "Goro, katawan ami a maontol ka a mama a da a
taw a ba ngka peramigi, ka di ngka tegoon sa ginawa ngka so kapakanggegerar o taw, na
tito a benar so ipepangendao ngka makapantag ko lalan ko Allah. Na teroa ngka rekami:
ba sisii ko Kitab o ba tano pembayadi so bowis ko Solotan sa Roma o di na di den?
Mbayadan tano o di?"
15 Ogaid na katawan i Isa so kapemagomanta iran na iniise iyan a "Ino ako niyo
petepengi? Witi ako niyo sa pelata a pirak ka ilain aken."
16 Na inowit iran on so pelata na iniise iyan a "Antawaa ini kiparas ago ngaran a
mitotombok sii?"
Tig iran a "So Solotan sa Roma."
17 Na pitero kiran i Isa a "Began iyo ko Solotan so kak o Solotan na began iyo ko Allah
so kak o Allah."
Na miyamemesa siran ko inisembag iyan.
18 Somiyong ki Isa so ped ko manga Sadosi a di pemaratiyaya i ba keoyag so miyamatay.

Na pitero iran on a
19 “Goro, inisorat rektano o Mosa a 'O petay so mama a aden a miniganat iyan a karoma
niyan ogaid na da a wata iyan, na so pagari o miyatay na disomala a pengaromaan iyan so
balo kaan siran makambawata sa kebabadan ko miyatay.'
20 Na aden a pito kataw a mama a magariyari, na miyakapangaroma so kaka on na
miyatay a da a bowad iyan.
21 So tomalondog on na piyangaroma niyan so balo na miyatay peman so mama a da on
makabowad. Giyai mambo i kiyaokitan o ikatelo
22 Na iniraot ko ikapito. Palaya siran den miyatay a da den a miyabowad iran. Oriyan
iyan na miyatay so babay.
23 Na sii ko alongan a penga ooyag so miyamatay na antawaa i kikaroma rekaniyan, ka
langon angkoto a pito kataw na miyakapangaroma on?"
24 Tig i Isa a "Mariribat kano den, ka di niyo katawan so manga ndao o Kitab o di na so
kabatowa o Allah.
25 Ka amay ka manga ooyag so miyamatay na kedatar siran o manga malaikat sa
kasorgaan, ka di den makapetepitapi so manga mama ago manga babay.
26 Na makapantag ko kakeoyag o miyamatay na ba niyo da mabatiya so Kitab a inisorat o
Mosa makapantag ko kayo a pekadeg? Ka roo na pitero o Allah ko Mosa a 'Saken so
Tohan o Ibrahim, so Tohan o Iskak, ago so Tohan o Yakob.'
27 Na kagiya Tohan iran sekaniyan na aya maana ini na oyagoyag siran pen apiya
miyamatay. Tanto kano a mariribat!"
So Lebi a Mala i Kipantag a Sogoan

28 Ndodoo so isa ko manga goro ko Kitab a miyakaneg sa di ran dii kandadaowai. Na
kagiya mainengka iyan a mapiya so inisembag kiran i Isa na iniise iyan on a "Antonaa
sogoan i lebi a mala i kipantag ko langon a sogoan?"
29 Inisembag i Isa a "Giyai i Lebi a mala i kipantag; 'Pamakineg kano a manga taw sa
Israil; so Kadnan a Tohan tano na isaisa a Kadnan,
30 Na kababayai ngka so Kadnan a Tohan ka sa iklas ko poso o ka, go iklas ko niyawa
ngka, go iklas ko iman ka, go iklas ko bager ka.'
31 So ikadowa a sogoan na giyai: 'Kababayai ngka so siringan ka a datar a ginawa ngka.'
Da a ped a sogoan a ba lebi pen a mala i kipantag a di giyangkai a dowa."
32 Tig o goro ko Kitab a "Mapiya oto Goro! Benar so pitero o ka a isaisa a Tohan ago da
den a rimbang iyan;
33 Na so kapekebabayai ron sa iklas ko poso, ago iklas ko pamikiran, ago iklas ko bager,
ago so kapekebabayai o taw ko siringan iyan a datar a ginawa niyan na lebi a mala i
kipantag a di so langon a petotongen a manga korban ago ped a soasoat a ipesepaat ko
Allah."
34 Kagiya mainengka i Isa a kaongangen so inisembag o goro ko Kitab na pitero iyan on
a "Kena a ba ka mawatan ko Ndatoan o Allah."
Na ipoon roo den na da den a ba pekaraw rekaniyan mise sa apiya antonaa pakaise.
35 Sii ko kapepangendao i Isa roo ko Timplo na tig iyan a "Ino dii teroa o manga goro ko
Kitab a so Al Masih na Wata o Daod?
36 Ka sii ko kipapaaren o Soti a Roh ko Daod na tig iyan a
So Allah na pitero iyan ko Kadnan aken a

'Ontod ka sii sa kawanan aken
taman sa matago aken so manga ridoay ngka
ko didalem o palad a ai ngka.'
37 Si den si Daod na bitowan iyan so Al Masih sa Kadnan. Kagiya ka maoto na

andamanaya i kiyambaloy niyan a Wata o Daod?"
Lalangan i Isa mipantag ko manga Goro ko Kitab
So tanto a madakel a taw a ndodoo na miyanga bababaya mamakineg ki Isa.

38 Na sii ko kapepangendaowa niyan kiran na tig iyan a "Iktiyar kano ko manga goro ko
Kitab a mababaya magenebeneb a ndiditar ko manga pipiya a kimon, ago mababaya sa
kapeselama kiran sa manga padian,
39 Ago pepamilin iran so isesenggay a manga ontoda ko sinagoga ago so lebi a mapiya a
manga darpa ko kalilimod.
40 Pepangasaben iran so tamok o manga balo a sarta a pepakalayaten iran so manga
dowaa iran a makiilailain siran sa manga oontol. Lebi den a mala so indaneg kiran."
So Sidka o Balo a Babay

41 Sii ko kaoontod i Isa ko sakeb o baitalmal ko Timplo na pegilain iyan so madakel a
taw a pepamanago on sa pirak. Madakel a manga kawasa a miyamanago on sa mala a
pirak,
42 Na miyakaoma so isa a balo a babay a miskin a tomiyago roo sa dowalad a kowarta.
43 Piyakaobay i Isa so manga sokbat iyan na pitero iyan a "Teroon ko rekano a mataan
den a giyangkoto a balo a miskin na so tiyago iyan ko baitaimal na makalalawan den ko
inipamegay o langon a miyamanago on.
44 Ka palaya siran migay ko sobra o tamok iran, ogaid na giyangkoto a babay na apiya
tanto a miskin na inibegay niyan so da a rowar on a rek iyan, a aya niyan bo langon
ikeoyag."
MARKO 13
Inaloy i Isa so Kakegeba o Timplo
Sii ko kapegawa i Isa ko Timplo na pitero on o isa a sokbat iyan a "Ilaya ngka Goro,
angkai a manga ala a ator ago manga walay a mapiya a pegilain!"
2 Tig i Isa a "Pegilain ka bes angkai a manga ala a walay? Na da den a satiman bo a ator
sii a ba kibagak ko kabebetadan on, ka penga gegeba ini langon."
3 Sii ko kaoontod i Isa sii ko Palaw a Olibi a masasakeb iyan so Timplo na si Pidro, si
Santiyago, si Yahiya, ago si Andriyo na inisean iran sekaniyan sa da a ped iran a
4 “Teroa ngka rekami o anda i kapenggolaola ini ago antonaa i toos sa kakitoman o
langon a pitero o ka?"
5 Pitero kiran i Isa a "Iktiyari niyo o ba kano masaliba o apiya antawaa.
6 Madakel a pemakaoma a pegingaranen iran so ngaran aken a peteroon iran a 'Saken so
Al Masih,' na madakel a manga taw a penga sesaliba iran.
7 Amay ka maneg iyo so makapantag ko dii katidawa ago so manga totolan ko manga
katidawa na di kano kelek, ka disomala a mapenggolaola ini, ogaid na kena a ba aya
maana niyan na aya den kaposan,
8 Ka makipetidawa so isa a nasiyon ko salakaw a nasiyon, na makipetidawa so isa a
ndatoan ko salakaw a ndatoan. Pelinogen ago teonen so mbarambarang a manga inged.
Giyai na datar bo o poonan o kambalilita ko babay.
9 “Iktiyari niyo a ginawa niyo, ka pendadakepen kano ago pagowiten kano ko manga
kokoman, na pemadasan kano sii ko manga sinagoga. Pemakadarpaan kano ko manga
olowan ago sii ko manga dato sabap raken, na makapeseksi kano kiran.
10 Disomala a daan a pekalangkapen so Mapiya a Totol ko langon a manga nasiyon.
11 Amay ka madakep kano a pagowiten ko kokoman na di niyo pegawiden a akal o
antonaa i patot a peteroon iyo. Ka saden sa kipansir rekano sangkoto a oras na aya niyo
baden teroa, ka so peteroon iyo na kena a ba rekano pekapoon, ka pekapoon ko Soti a
Roh.
12 “Tipon o manga taw so tito iran a manga pagari kaan mabono, na datar oto mambo a
katipowa o manga ama ko manga wata iran. So manga wata na makiperidoay ko manga
lokes iran na pakipemono iran siran.
13 Ikegowad kano o langon a taw sabap raken, ogaid na so pekatiger sa taman sa kaposan
na aya kesabet."
So Piyakagowagowad a Pekamorala
14 “Amay ka mailay niyo so 'Piyakagowagowad a Pekamorala' a makatitindeg ko darpa a

di ron domadait (so pepangadi sii na tanodi niyan ai) na so siran oto a ndodoo sa Yodiya
na disomala a pemalagoy a pegapas ko manga bobongan.
15 So taw a sii kapantagi ko liyoliyo o walay niyan amay ka pelagoy na di den soled ko
walay sa kakowaa niyan ko apiya antonaa ko tamok iyan.
16 So taw a sii kapantagi ko pangomaan na di den kesoy ko walay niyan sa kakowaa
niyan ko gerab iyan.
17 Dowandowaan iyan so manga oogat ago manga maritan a babay sangkoto a manga
gawii.
18 Pangniya niyo ko Allah a so kapakapelagoy niyo na kena a ba rendeng.
19 Ka so karomasayan a pekatalingoma sangkoto a manga gawii na da den a kiyaokitan a
datar iyan a poon ko kiyaadena o Allah ko doniya taman imanto, na di den mambo
kapeparomanan.
20 O di kalebati o Kadnan so kadakel angkoto a manga gawii na da den a ba kelamba a
oyagoyag. Ogaid na sabap ko rek iyan a manga taw a piyamili iyan na libatan iyan
angkoto a manga gawii.
21 “Sa masa oto na o aden a petero rekano sa 'Ilaya niyo, katii so Al Masih' o di na 'Kaoto
roo' na di niyo mbenara.
22 Pemakagemaw so di tito a manga Al Masih ago manga nabi, na pengembaal siran sa
manga nanao ago manga piyakamemesa, ka o kepakay na an iran masaliba so piyamili o
Allah.
23 Kagiya ka maoto na iktiyar kano. Pitero aken rekano den ai langon sa da niyan pen
kapakatalingoma."
24 “Sangkoto a manga gawii amay ka maipos angkoto a karomasayan na pekaliboteng so

alongan ago di sindaw so olan.
25 Penga oolog so manga bitoon a poon sa langit, na keselenseleng so manga kabatowa
roo sa langit.
26 “Sa masa oto na keilay o manga taw so Wata o Manosiya a pepekaoma a sisii ko
manga gabon a misasarta on so mala a kabatowa ago bantogan.
27 Na sogoon iyan so manga malaikat ko pat pidoro a alam, ka pakipenimo iyan so
manga taw a piyamili o Allah a poon ko kaposan o doniya taman ko sabala a kaposan
iyan.
28 “Paganada niyo angkai a indao o kayo a higos. Anda den i kapelita o manga sapak iyan
ago mamagombos na ketokawan iyo a magaan den lomaon.
29 Sakamaoto mambo a amay ka mailay niyo angkai a kesowasowa na ketokawan iyo a
magaan den so kapekaoma niyan, ka sisii den ko pintoan.
30 Teroon ko rekano a mataan den a palaya ini mapenggolaola sa di pen malengan
mamatay so kapapantagan ai a manga taw.
31 Keda so langit ago so doniya ogaid na di den keda so manga katero aken.
Da a Taw a Matao ko Gawii o di na Oras
32 “Giyangkoto a gawii o di na oras na da a ba on matao. Apiya so manga malaikat sa

kasorgaan ago so Wata na di iran katawan, ka so bo so Ama i matao ron.
33 Iktiyar kano ago totoday, ka di niyo katawan o anda i kapekatalingoma angkoto a oras.
34 Aya ibarat iyan na so mama a melalakaw sa mawatan. Sa da niyan pen kalalakaw na
piyakikibir iyan so walay niyan ko manga talasogoay niyan na piyakisengansangan iyan
ko oman i isa so galebek. Na pitero iyan ko pepagipat ko pintoan a tatamengi niyan.
35 Kagiya ka maoto na totoday kano, ka di niyo katawan i kambaling o kadnan ko walay,
o magabi, o di na sii ko kalookan a gawii, o di na sii ko kakoko o manok, o di na kapipita.
36 Ka o ba amay na mitekaw a makaoma na maoma kano niyan a kitotorogen.
37 Na so insana ko rekano na insana ko ko langon a taw: Totoday kano!"
MARKO 14
Sa masa oto na dowa gawii bo a da kaomai ko Paska ago so Pista ko Kakan sa Paan a da a
Tapay ron, na so manga poporo a imam ago manga goro ko Kitab na pipikiren iran o
andamanaya i kandakepa iran ki Isa sa da a matao ron kaan iran mabono.
2 Lnonta bo na pitero iran a "Di tano ai nggolaolaan a mipantag ko pista, ka o ba baden
sesamok so manga taw."
3 Ndodoo si Isa sa Bitani ko walay o pekebowa a si Simon. Sii ko kapekan iyan na aden a
miyakaoma on a babay a maawid sa maito a omoy a mapepeno a lana mamot o
pamomolan a nardo a da a saog iyan ago tanto a mala i arga. Piyotol iyan so lig o omoy na
inododan iyan on a olo i Isa.
4 Ogaid na inotegan so ped ko manga taw roo, na tig o oman i isa ko ped iyan a "Ino
pegolai a lana ini?
5 Mapepasa nda ini sa kelawanan so telo gatos a pelata a pirak a mibegay ko manga
miskin." Na pimbongetan iran a tanto so babay.
6 Ogaid na pitero kiran i Isa a "Taregi niyo sekaniyan. Ino niyo dii tekora? Mapiya ini a
pinggolaola niyan raken.
7 Ka lalayon rekano sisii so manga miskin, na apiya anda i kakebayai niyo kiran mogop
na mapenggolaola niyo anan. Ogaid na saken, na kena a ba lalayon a mipageepeda iyo.
8 Giyangkai a babay na pinggolaola niyan so taman a kegaga niyan raken; pikekamotanan
iyan a lawas aken sa da aken pen kapatay sa kiyatiyagara niyan on ko kipelebengen raken.
9 Teroon ko rekano a mataan den a apiya anda ko dalem a doniya a ron mapakalangkap
so Mapiya a Totol na mapenotol mambo so inikidia raken angkai a babay a
pekipananadem on."
10 Oriyan oto na si Yodas Iskariyot a isa ko sapolo ago dowa a sokbat na somiyong ko
manga poporo a imam, ka tipon iyan si Isa sii kiran.
11 Miyababaya siran ko kiyanega iran sii, na initopa iran a mbegan iran sa pirak. Na
mipoon meloloba si Yodas sa kakeparowi niyan tomipo ki Isa.
12 Riyaot so paganay a gawii ko Pista ko Kakan sa Paan a da a Tapay ron, a so gawii a

kapenombalia ko manga nati a bilibili a ken igira a dii selaselaan so Paska. Na iniise o
manga sokbat ki Isa a "Anda i kabaya a ka a songowan ami a petiyagaran ami ko kaken ka
ko inggabi ko Paska?"
13 Na somiyogo sekaniyan sa dowa ko manga sokbat iyan a tig iyan kiran a "Song kano
sangkoto a inged, na mbelaken kano o mama a maawid sa omoy a tatagoan sa ig, na
tondoga niyo.
14 Na apiya anda sekaniyan soled a walay na teroa niyo ko kiwalay a 'Pitero o Goro a:
Anda so rowang a kekanan aken ko inggabi ko Paska a ped o manga sokbat aken?'
15 Na pekiilay niyan rekano so mala a rowang sa poro a kaaasaan ago matitiyagar den. Na
tiyagara niyo roo so inggabi tano."
16 Lomiyalakaw so manga sokbat na somiyong siran sangkoto a inged, na miyaoma iran
oto langon a datar bo o pitero iyan kiran, na roo iran pitiyagar so inggabi ko Paska.
17 Kagiya magagawii na miyakaoma si Isa ago so sapolo ago dowa a sokbat.
18 Na sii ko kaoontod iran roo a pekan siran na pitero i Isa a 'Teroon ko rekano a mataan
den a so isa rekano na tipo raken, a so isa a makipepagatoang raken."
19 Mikerata a ginawa iran na iniise on o oman i isa kiran a "Kena bes a ba saken?"
20 Na inisembag iyan a "Isa sekaniyan rekano a sapolo ago dowa, a so ped aken a
pesindot sa paan ko ladiya.
21 Mataan a petay so Wata o Manosiya a kitoman so misosorat ko Kitab makapantag
rekaniyan, ogaid na kemorkaan angkoto a mama a tipo ko Wata o Manosiya. Tomo on a
da den mbawataan.
So Paan ago so Arak
22 Sii ko kapekan iran na kominowa si Isa sa paan, na kagiya kapanalamatan iyan so

Allah na inopak iyan ago inibegay niyan kiran a tig iyan a "Kowa kano ron. Giyai so
lawas aken."
23 Na kinowa niyan so tagayan, na kagiya makapanalamat na inidawag iyan kiran na
miyamanginom siran on langon.
24 Na pitero iyan kiran a "Giyai so rogo aken a ron mipepasod so kapasadan o Allah, a so
rogo a keodod para ko madakel a taw.
25 Teroon ko rekano a mataan den a di ako den maginom peroman sa arak taman ko
gawii a kapaginoma ko ko bago a sasoson a arak roo ko Ndatoan o Allah."
26 Na kagiya makadikir siran na lominiyo siran ago miyamanong ko Palaw a Olibi.
Inalamat i Isa so Kapepalaw i Pidro
27 Pitero kiran i Isa a "Pagawaan ako niyo langon, ka misosorat ko Kitab a:
'Mbonoon ko so tomatagikor ko bilibili

na pemangiparak so manga bilibili.'
28 Ogaid na amay ka maoyag ako na magona ako rekano somong sa Galili."

29 Na pitero rekaniyan i Pidro a "Apiya pen awaan ka o langon a taw na di aken seka den
pagawaan!"
30 “Teroon ko rekano," a tig i Isa, "a mataan den a imanto a gagawii sa di pen komoko so
manok sa makadowa na ipepelaw ako ngka sa makatelo."
31 Ogaid na piyakaibet tero i Pidro a "Apiya ako reka mirakes a mbonoon na di aken seka
den ipepelaw!" Na datar ai mambo a pitero iran langon.
32 Miyakaoma siran ko darpa a bebetowan sa Gitsimani. Na pitero i Isa ko manga sokbat

iyan a "Sii kano den pasin sii ko kapepangangarapan aken."
33 Na piyakaonot iyan si Pidro, si Santiyago, ago si Yahiya, na miyagedam iyan so tanto
a mala a kapakamboboko ago awid a akal.
34 Na pitero iyan kiran a "Minitaralo a kararata a ginawa ko a kiyarong ko kapatay.
Telimbagak kano sii na totoday kano."
35 Malo iyan siran inawat na gomipe ko lopa, na piyangni niyan ko Allah a o kepakay na
malepas sekaniyan o oras a ikerasay niyan.
36 “Ama," a tig iyan, "Ama aken, kegaga ngka so langon taman. Kowaa ngka raken
angkai a tagayan, ogaid na pengnin ko a kena a ba so kabaya aken i ketoman, ka so
kabaya a ka."
37 Na komiyasoy sekaniyan ko telo a sokbat, na miyaoma niyan siran a kitotorogen. Na
pitero iyan ki Pidro a "Totorogen ka bes, Simon? Ba ka di pekatoday apiya isa bo ka oras?
38 Totoday kano ago pepangangarapan kaan kano di ketepengi. Mateterang so niyawa,
ogaid na malobay so lawas."
39 Miperoman roo somong si Isa na miyangangarapan a siyoson iyan tero so paganay a
pangni niyan.
40 Ogaid na kagiya makakasoy sekaniyan na miyaoma niyan siran peman a kitotorogen
sabap ko kapened o manga mata iran. Na da iran katanodi i isembag iran on.
41 So ikatelo niyan komasoy na pitero iyan kiran a "Ba kano pen kitotoroga ago
kidedeke? Kiyatangkaan den! Miyakatalingoma den so oras. Ilaya niyo man, ka so Wata o
Manosiya na peladen ko kapaar o manga baradosa.
42 Ganat kano! Itano roo ka pekaoma den so tominipo raken!"
43 Sii ko di niyan pen dii katero na miyakaoma si Yodas a isa ko sapolo ago dowa a
sokbat. Oonotan sekaniyan o madakel a taw a kiaawid sa manga pedang ago manga
bentol a piyakasong roo o manga poporo a imam, ago manga goro ko Kitab, ago manga
pelokelokesen.
44 Sa da pen ai kanggolaola na bigan siran den o tominipo sa toos, a tig iyan a "So mama
a pagarekan ko, na giyoto so mama. Dakepa niyo ago wita niyo roo a pepagipaten iyo
piyapiya."
45 Na sii den ko kiyapakaoma i Yodas na miyobay sekaniyan ki Isa a tig iyan a "Goro!" a
sarta a inarekan iyan.
46 Na diyakep iran si Isa na kiyapetan iran manamar.
47 Na giyoto a so isa ko kititindeg roo na binindas iyan so pedang iyan na liyakot iyan so
oripen o maporo a imam, na miyasapil on a tangila niyan.
48 Pitero kiran i Isa a "Ba ako tanganiyaya? Ino kano kiaawid sa manga pedang ago
manga bentol sa kiyasong iyo sii a ndakep raken?
49 Oman gawii na sisii ako rekano ko Timplo a pepangendao na da ako niyo dakepa.
Ogaid na disomala a mitoman so misosorat ko Kitab."
50 Na sarta a inawaan sekaniyan o langon o manga sokbat, na miyamalagoy siran.
51 Aden a mangoda a mama a tomiyondog ki Isa, a aya bo a mandiditar iyan na mapoti a
dinis a mibobongkos sa lawas iyan. Na tipengan sekaniyan mambo domakep o manga
taw,
52 Ogaid na so bo so imbobongkos iyan i kiyakapetan iran, na miyalagoy sekaniyan a
matatalandiyang.
53 Inowit iran si Isa roo ko torogan o maporo a imam a ron mitimotimo so langon o
manga poporo a imam, ago manga pelokelokesen, ago manga goro ko Kitab.
54 Si Pidro na tomiyondog rekaniyan a malo on maaawat taman ko soled o kalamalama o
torogan o maporo a imam. Na miyontod sekaniyan roo ko obay o manga gordiya kaan
makapepaig ko apoy.
55 So manga poporo a imam ago so langon o manga pangongokom na pepangiloba siran
sa karina a kisala iran ki Isa kaan iran mabono, ogaid na da a ba iran miyatoon.
56 Madakel a manga taw a iniseksi iran so di benar makapantag rekaniyan, ogaid na da
pagayonayon so manga totol iran.
57 Na giyoto a tominindeg so manga ped a miseksi sa di benar a inisendit iran on a
58 “Miyaneg ami a pitero iyan a 'Nggebaan aken angkai a Timplo a pimbalay o manosiya,
na amay ka makatelo gawii na mbangonen aken so salakaw a kena a ba pimbalay a
manosiya.' "
59 Ogaid na apiya anan na da pagayonayon so manga totol iran.
60 Mandiyadi na tominindeg so maporo a imam ko hadapan iran langon, na iniise iyan ki
Isa a "Ba da a kisembag ka sangkai a dimanda reka angkai a manga mama?"
61 Na da den tero si Isa apiya sataga bo.
Piperomanan mise o maporo a imam a "Ba seka so Al Masih, a so Wata o Mapopodi a
Tohan?"
62 Tig i Isa a "Oway, saken den. Na keilay niyo so Wata o Manosiya a makaoontod ko
kawanan o Lebi a Mamaapaar ago pepekaoma a sisii ko manga gabon sa langit."
63 Na kinisi o maporo a imam so kimon iyan sa kiyararangiti ron, na pitero iyan a "Di
den kailangan a kapakapeseksia tano ko ped.
64 Miyaneg iyo angkai a kiyapagitowitoa niyan ko Allah. Antonaa i pamikiran iyo?"
Na inikokom iran on langon a patot a mbonoon sekaniyan.
65 So manga ped na piyanodaan iran si Isa, na pinilesan iran a manga mata niyan na
piyanontok iran a tig iran a "Iring ka sa nabi! Antawaa i somiyontok reka?" Na kinowa
sekaniyan o manga gordiya na pisetengela iran.
66 Si peman si Pidro na ndodoo pen ko kalamalama roo salopa na somiyagad roo so isa
ko manga raga a talasogoay o maporo a imam.
67 Kagiya mailay niyan si Pidro a dii pepaig na tiyobos iyan na pitero iyan on a "Ped ka
mambo angkoto a Taw sa Nasarit, a si Isa."
68 Na mipelaw sekaniyan a "Di aken katawan aya pen o ba ko sabota so di ngka dii
teroon," na lominiyo sekaniyan ko obay o pintoan.
69 Miyailay roo peman o raga na pitero iyan peman ko kititindeg roo a "Giya mama ini na
isa kiran."
70 Na mipelaw peroman si Pidro.
Da peman matey na pitero rekaniyan o kititindeg roo a "Mataan den a isa ka kiran, ka taw
ka sa Galili."
71 Na misepa si Pidro a "Kamorkaan ako o pepamokeg ako! Ipesepa aken a di aken
katawan angkanan a mama a di niyo dii teroon!"
72 Sagogona den a komiyoko so manok sa miyakadowa, na kiyatademan i Pidro so
kabasa on i Isa a "Sa di pen komoko so manok sa makadowa na ipepelaw ako ngka sa
makatelo." Na gomiyoraok sekaniyan a da den makapentang.
MARKO 15
Sii ko teked a kapipita na so manga poporo a imam na miyakisebota ko manga

pelokelokesen, ago so manga goro ko Kitab, ago so langon a pangongokom. Na piyatong
iran si Isa, na inowit iran ko gobirnador Pilato na piyalad iran on.
2 “Ba seka so Solotan o manga Yahodi?" a iniise rekaniyan i Pilato.
Inisembag i Isa a "Benar so di ngka dii teroon."
3 Na madakel a inisendit o manga poporo a imam ki Isa,
4 Na inisean peman i Pilato a "Ba da a kisembag ka? Ilaya ngka man angkai a madakel a
dimanda iran reka."
5 Ogaid na da peman sembag si Isa, na miyamemesa si Pilato.

6 Oman maoma angkoto a Pista na mbokaan i Pilato so isa a kalaboso a pepengnin o
manga taw.
7 Sa masa oto na aden a makakalaboso a aya ngaran iyan na Barabas. Miyadakep a
minirakes ko manga kontra a miyamakapamono sii ko kiyaridoa iran ko gobirno.
8 Kagiya matimo so madakel a taw na mipoon siran mamangni ki Pilato sa nggolaolaa
niyan so asal a pesowaan iyan kiran.
9 Na iniise kiran i Pilato a "Ba niyo kabaya a mbokaan aken rekano so Solotan o manga
Yahodi?"
10 Ka masisipat iyan a piyalad rekaniyan si Isa o manga poporo a imam sabap sa periiten
iran.
11 Ogaid na piyangondoy o manga poporo a imam so madakel a taw sa pengnin iran
baden ki Pilato a si Barabas na aya niyan mbokaan.
12 Iniise kiran peroman i Pilato a "Antonaa bes i ikidia ko ko mama a bebetowan iyo sa
Solotan o manga Yahodi?"
13 Na inipelalis iran a "Totoka ngka ko kros!"
14 “Ngkaino? Antonaa marata i miyanggolaola niyan?" a iniise i Pilato.
Ogaid na baden minilalo a kiyapelalis iran a "Totoka ngka ko kros!"
15 Na kagiya kabaya i Pilato a masoat iyan so madakel a taw na biyokaan iyan kiran si
Barabas. Na piyakipamadasan iyan si Isa na piyalad iyan ko katotoka on ko kros.
Piyagongatongaten o manga Sondaro si Isa
16 So manga sondaro na piyakasoled iran si Isa ko kalamalama o torogan o gobirnador na

piyanimo iran so ped ko salompok kiran.
17 Piyakasolot iran si Isa sa kimon a maloto i kariga, na somiyolampid siran sa sangkad a
soroken a waged na inisangkad iran on.
18 Na liyalisan iran sekaniyan a "Mapipiya a ginawa ngka, hey, Solotan o manga
Yahodi!"
19 Na piyamadasan iran sa olo ago piyanodaan iran, na pisodiyosodiyodan iran sa omanta
sa pesimbaan iran.
20 Kagiya mapasad so kiyapagongatongata iran on na likas iran on so kimon a maloto i
kariga na siyambian iran so rek iyan a nditaren. Na tiyonda iran sekaniyan sa liyo ka
totoken iran ko kros.
21 Na aden a mama a segad roo a pesong ko siti a poon ko dii pagonayonayan. Aya
ngaran iyan na si Simon a magiinged sa Sirini, a ama i Alihandro ago si Ropos, na tigel
iran sekaniyan makaposai ko kros a totokan ki Isa.
22 Inowit iran si Isa ko darpa a bebetowan sa 'Golgota' (a aya maana niyan na 'Kaden a
Lagas a Olo').
23 Na piyaladan iran sa arak a sasaogan sa bolong a bebetowan sa mira, ogaid na da niyan
inoma.
24 Na tiyotok iran sekaniyan ko kros, na pimbagibagi iran so manga nditaren iyan a
nggolalan ko kaperipa kaan matendo o antonaa i kekowa o oman i isa.
25 Aya oras a kiyatotoka iran on ko kros na alas noibi sa kapipita.
26 So dimanda on a misosorat ko karatola na giyai: "So Solotan o manga Yahodi."
27 Aden a dowa kataw a tanganiyaya a tiyotok iran mambo ko manga kros a ped i Isa, a
so isa on na sii sa kawanan iyan, ago so isa on na sii sa diwang."
29 So manga taw a pepamanagad roo na pepamangelengkeleng siran a di ran dii
pagongatongaten si Isa a "A, seka bes so nggeba ko Timplo ago mbangon on peroman ko
makatelo gawii,
30 Na sabeta ngka a ginawa ngka, na tepad ka sangkanan a kros!"
31 Datar oto mambo a di on dii kasosodia o manga poporo a imam ago manga goro ko
Kitab a tig iran ko manga ped iran a "Miyasabet iyan so ped, ogaid na giya ginawa niyan
na di niyan kesabet!
32 Patot ko Al Masih, a so Solotan sa Israil, a tepad imanto ko kros kaan tano ron
makailay ago makaparatiyaya!"
Na apiya so dowa kataw a tiyotok ko kros a ped iyan na piyanonongka iran.
So Kiyapatay i Isa
33 Kagiya maoto den a alongan na miyakaliboteng a dalem a inged oto a iniraot sa

miyakatelo ka oras.
34 Kagiya magalas tris na miyananalo sebenar si Isa a "Iloy, Iloy, lama sabaktani?" a aya
maana niyan na "Hey Tohan ko, Tohan ko ino ako ngka telikodi?"
35 So kiyanega on o ped ko kititindeg roo na tig iran a ''Pamakinega niyo! Petelowan iyan
si Iliyas!"
36 Na miyalalagoy so isa kiran a maawid sa pangamek a biyasa iyan a soka, na tiyangen
iyan ko poro o raros, na inikawit iyan ki Isa a pekiinom iyan on a tig iyan a "Apa kano
pasin. Ilain tano o ba pekaoma si Iliyas a ba niyan kowaa ko kros."
37 Na milalis si Isa sa matanog na miyatay.
38 So rending a bibitinen ko Timplo na miyakisi a miyadowa timan a poon sa poro taman
sa baba.
39 Na so olowan o manga sondaro a tomitindeg ko danga o kros, na kagiya mailay niyan
o andamanaya i kiyapatay i Isa na pitero iyan a "Mataan den a giyangkai a mama na Wata
o Allah!"
40 Ndodoo mambo so ped a manga babay a kilalangkaw sa di bo tanto mawatan. Maaped
kiran si Mariyam Magdalina, si Mariyam a ina i Santiyago a mangoda ago si Yosis, ago si
Salomi.
41 Giyangkai a manga babay na pepamangonot ki Isa a pepamanalagad on isako ndodoo
sekaniyan pen sa Galili. Aden pen a madakel a manga babay roo a miyamangonot
rekaniyan isako somong sa Yarosalim.
42 Gawii oto a Ipetiyagar (maana a isa pen gawii a di kakeomai ko Gawii a Idedeke).
Kagiya magabi den
43 Na somiyong ki Pilato si Yosop a taw sa Arimataya, ka kiyarawan iyan den a
kapengniya niyan ko lawas i Isa. Pagaadatan sekaniyan a pangongokom, na
pakatatalingomaan iyan mambo so Ndatoan o Allah.
44 Na miyamemesa si Pilato ko kiyanega niyan sa miyatay den bes si Isa. Na
piyakisongowan iyan so olowan o manga sondaro na iniise iyan on o ba miyatay den.
45 Kagiya teroon rekaniyan o olowan a benar oto na piyakikowa niyan ki Yosop so lawas
iyan.
46 Na miyamasa si Yosop sa onong a sotra, na inibaba iyan so lawas ko kros. Kagiya
kabongkosan iyan ko onong na tiyago iyan ko kobor a kiyalotan ko kilid a lakongan, na
linilid iyan so mala a ator a ipelekeb ko gimowa o kobor.
47 Si Mariyam Magdalina ago si Mariyam a ina i Yosis na miyailay iran o anda miyatago
so lawas iyan.
MARKO 16
So Kiyaoyag i Isa
Kagiya maipos so Gawii a Idedeke na si Mariyam Magdalina, si Salomi, ago si Mariyam

a ina i Yakob na miyamamasaan sa manga ikekamotan a pagawidan iran ko kobor kaan
iran miibong ko lawas i Isa.
2 Na teked a kapipita ko Akad sii ko kiyasebang o alongan na somiyong siran ko kobor.
3 Sii ko kapelalakaw iran na di ran dii mbibitiyaraiyan o antawaa i mapakalilid iran so
ator ko gimowa o kobor
4 Ka tanto ini a mala a ator. Kagiya makaoma siran on na miyailay iran a miyalilid den so
ator.
5 Na somiyoled siran ko kobor, na miyailay iran so mangoda a mama a moontod ko
makakawanan iran a ndiditar sa mapoti a kimon, na tanto siran a miyamemesa.
6 Na pitero iyan kiran a "Di kano pepamemesa. Katawan aken a pepangilobaan iyo si Isa
a Taw sa Nasarit a miyatotok ko kros. Miyaoyag den na da sii! Ilaya niyo so kiyabetadan
iran on, ka da on.
7 Ogaid na song kano ko manga sokbat iyan a rakes i Pidro na teroa niyo kiran a "Pesong
sekaniyan sa Galili a maoona rekano, na roo niyo keilay ka giyanan i pitero iyan rekano.' "
8 Na miyalalagoy siran lomiyo ko kobor, ka tatabaden siran sa kiyapamemesa iran. Na da
den a ba iran miyatero ko apiya antawaa, ka pekelek siran.
Miyakiilay si Isa ki Mariyam Magdalina

9 Kagiya maoyag si Isa ko teked a kapipita ko Akad na miyakiilay mona ki Mariyam
Magdalina, a sekaniyan so miyapakaliyo niyan on so pito a saitan.
10 Na somiyong si Mariyam ko siran oto a mipageepeda gowani i Isa na piyanotol iyan ai
kiran, ka di siran dii mboboko ago pepamanegad.
11 Ogaid na kagiya maneg iran a miyaoyag si Isa ago miyailay i Mariyam, na da iran
benara.
Miyakiilay si Isa ko Dowa a Sokbat iyan
12 Oriyan ai na miyakiilay si Isa ko salakaw a ropa ko dowa kiran a pelalakaw ko dii

pagonayonayan.
13 Na komiyasoy siran na piyanotol iran ai ko manga ped, ogaid na da iran mambo
benara.
14 Da peman matey na miyakiilay si Isa ko sapolo ago isa a sokbat sii ko kapekan iran.
Na pimbongetan iyan siran sabap ko da iran kaparatiyaya ago so kategas iran i pamikiran,
ka da iran benara so siran oto a miyamakailay rekaniyan oriyan o kiyaoyag iyan.
15 Na pitero iyan kiran a "Lalakaw kano ko dalem a doniya na pakalangkapa niyo so
Mapiya a Totol roo ko langon o manga manosiya.
16 Apiya antawaa i peratiyaya ago pekisalawat na kesabet. Ogaid na apiya antawaa i di
peratiyaya na kesala.
17 Giyangkai a manga nanao na pekaonot ko siran oto a peparatiyaya: Sii ko ingaran aken
na mapekaliyo iran so manga saitan ko kisosookan, na makapetero siran sa bago a manga
basa.
18 O makaporot siran sa manga nipay, o di na makainom sa pakatowa, na di siran
kesakitan. Pemangidapenet iran a manga lima iran ko pepanga sasakit na pemakabager
siran."
Minibayaw si Isa sa Kasorgaan
19 Na oriyan o kinimbitiyarain kiran o Kadnan a Isa na minibayaw sekaniyan sa

kasorgaan, na miyontod ko kawanan o Allah.
20 Na lomiyalakaw so manga sokbat a dii mamangosiyat ko mbalabala. Na so den so
Kadnan na ipesarta iyan kiran so galebek iyan, na pepamataanan iyan a benar so
ipepangosiyat iran a nggolalan ko piyakamemesa a manga nanao a pepemakaonot ko
manga katero iran.
LOKAS
LOKAS 1
Pamekasan
Alamat sorat ako i Lokas makasampay ki Tiyopilas a tanto a taw. Madakel a miyangako
sorat sa totol makapantag ko miyasowasowa sii rektano.
2 Mipepasod angkai a manga totol ko manga ripot a initenan rekami o siran oto a
miyamakailay sangkai a manga nganin ago miyamakalangkap mambo ko katero o Allah
ipoon sa kiyapakapoon iran.
3 Na kagiya miyapariksa aken piyapiya angkai langon ipoon sa poonan na miyapikir aken
a aya mapiya na isorat aken mambo so matatanor a totol makapantag sii para reka
4 Kaan ka katokawi so tito a benar ko manga nganin a inipangendao reka.
Miyaalamat so Kipembawataan ki Yahiya a Pananalawat
5 Sii ko masa a kandadato i Hirod sa Yodiya na aden a imam a bebetowan sa Sakariyas a

maaped ko salompok o manga imam a kiyababadan ki Abiyah. So karoma niyan a si
Ilisabit na moriyataw mambo i Aron.
6 Siran a dowa na manga oontol ko hadapan o Allah a petomanen iran so langon o manga
sogoan ago kokoman o Kadnan sa da a ba kiran kidaway.
7 Ogaid na da a wata iran ka balek si Ilisabit, na malo den minitolod a idad iran.
8 Miyakaisa a gawii na pegiman si Sakariyas ko hadapan o Allah, ka riyaot so
kapepanalagad o salompok a kaapedan on.
9 Miyatoman so adat o manga imam na pinili sekaniyan a nggolalan ko ripa a aya
pekatotong sa doka sii ko Timplo o Kadnan.
10 Sii ko wakto a katotonga ko doka na dii sesambayang so malilimod a madakel a taw sa
liyo o Timplo.
11 Sarta den a miyakimasa ki Sakariyas so isa a malaikat o Kadnan a tomitindeg sa
kawanan o aparan a petotongan sa doka.
12 So kiyailaya on i Sakariyas na kiyalibogan ago tanto a miyalek.
13 Ogaid na pitero on o malaikat a "Di ka pekelek Sakariyas, ka inampon o Allah so
pangni ngka. So karoma ngka a si Ilisabit na pembawata sa mama na betowi ngka sa
Yahiya.
14 Kebabaya ka ago pekapiya a ginawa ngka sabap ko kipembawataan on, na ikebabaya
ini mambo o madakel a taw
15 Ka pembaloy sekaniyan a mala sii ko hadapan o Kadnan. Di sekaniyan pekainom sa
arak o di na ped a panginginomen a pakabereg. Ipoon ko kipembawataan on na
masesenep sekaniyan a Soti a Roh.
16 Madakel a manga taw sa Israil a mapakasangor iyan ko Kadnan a Tohan iran.
17 Magona sekaniyan ko Kadnan, na kedalem rekaniyan so niyawa ago kabatowa a datar
o madadalem ki Iliyas. Pekasangoren iyan so manga poso o manga ama ko manga wata
iran, ago so manga pamikiran o manga taongkir sii ko kaontol kaan iyan matiyagar so
manga taw ko kapekaoma o Kadnan.”
18 Na pitero i Sakariyas ko malaikat a "Andamanaya i kaketangkeda ko sa
mapenggolaola ini? Ka miyalokes ako den, na so karoma ko na minitolod a idad iyan."
19 Somimbag so malaikat a "Saken so Diyabarail a tomitindeg ko hadapan o Allah, na
siyogo ako niyan kaan aken reka matero angkai a mapiya a totol.
20 Ogaid na kagiya da ka pangimbenar so manga katero aken a kitoman ko osto a gawii
na keamang ka imanto a di ka den makapetero pasin taman ko gawii a kanggolaola ini."
21 So peman so manga taw a penayaw ki Sakariyas na miyamemesa siran o ino sekaniyan
ketey roo ko soled o Timplo.
22 Kagiya lomiyo sekaniyan na di kiran makipembitiyarai, na miyasarino iran a
miyakailay sekaniyan sa pangingilain roo ko soled o Timplo. Na kagiya di den
makapetero, na petiniyasan iyan siran baden.
23 Kagiya mapasad so sangan iyan sii ko Timplo na miyaling sekaniyan.
24 Da matey na miyaogat si Ilisabit a karoma niyan, na da den awa sa walay ko soled o
miyakalima olan.
25 Pitero iyan a "So Kadnan i minggolaola sii para raken. Inikalimo ako niyan sii sangkai
a manga gawii na kinowa niyan raken so kababalek aken a ipekeya aken sii ko manga
taw."
Miyaalamat so Kipembawataan ki Isa
26 Sii ko ikanem olan a kiyaogat i Ilisabit na siyogo o Allah so malaikat a si Diyabarail

roo sa Nasarit, a isa a siti sa Galili.
27 Piyakasong sekaniyan ko raga a matataalik a kapengaromaa on o mama a bebetowan
sa Yosop a moriyataw o Daod. Aya ngaran angkoto a raga na si Mariyam.
28 Somiyong on so malaikat na pitero iyan a "Mapipiya a ginawa ngka, a tanto a
inikalimo! Lalayon reka so Kadnan!"
29 Kagiya maneg i Mariyam angkai a manga katero na tanto a kiyalibogan na
pepamimikiranen iyan o antonaa i maana angkai a salam.
30 Tig o malaikat a "Di ka pekelek Mariyam, ka inikalimo ka o Allah.
31 Keogat ka ago pembawata sa mama, na betowi ngka sa Isa.
32 Pembaloy sekaniyan a mala, na kebetowan sa Wata o Lebi a Maporo. So Kadnan a
Tohan na pakapendatoon iyan ko ndatoan o Daod a apo iyan
33 Na pendatoan iyan so kiyababadan ko Yakob sa taman sa pakataman; na di den kepos
so ndatoan iyan."
34 Tig i Mariyam ko malaikat a "Andamanaya i kakitoman ai a da a karoma ko?"
35 Somimbag so malaikat a tig iyan a "Kitemo reka so Soti a Roh, na so kabatowa o Lebi
a Maporo na kidalong reka. Kagiya ka maoto na so Soti a ipembawata a ka na mbetowan
sa Wata o Allah.
36 So tonganay ngka a si Ilisabit na pembawata mambo sa mama sii sangkai a kiyalokes
iyan. Bebetowan sekaniyan gowani sa balek, ogaid na miyakanem den olan imanto a
kiyaogat iyan.
37 Ka da den a ba di kegaga o Allah!"
38 Tig i Mariyam a "Oripen ako o Kadnan. Pengnin ko a manggolaola raken so pitero o
ka." Na inawaan sekaniyan den o malaikat.
Inibentel i Mariyam si Ilisabit
39 Da matey sangkoto a manga gawii na miyaninimo si Mariyam na minggagaan somong

ko isa a siti ko kapalawan sii sa Yodiya.
40 Somiyoled sekaniyan ko walay i Sakariyas na siyalam iyan si Ilisabit.
41 Kagiya maneg i Ilisabit so salam i Mariyam na mikeokaog so wata sa soled a tiyan
iyan. Sarta a sinep si Ilisabit a Soti a Roh
42 Na mitero sa matanog a "Tanto ka a rarakmatan a di so kalangolangon a ped a babay,
na rarakmatan so wata a ipembawata a ka!
43 Ino ako kelimoon sangkai a kinibentelen raken o ina o Kadnan aken?
44 Ka sii den ko kiyanega ko ko salam ka na so wata sa soled a tiyan aken na mikeokaog
sa kababaya.
45 Rarakmatan ka a miyaratiyaya a kitoman den so pitero reka o Kadnan!"
So Dikir i Mariyam a Podipodi
46 Mandiyadi na pitero i Mariyam a

"Pepodin ko so Kadnan sa iklas ko poso aken.
47 Tanto a mabababaya so niyawa ko sii ko Allah a Pepanabet raken
48 Ka tiyago iyan sa ginawa niyan
so mababa a kapakambebetad aken a oripen iyan.
Ipoon imanto na so langon o manga apid a manosiya
na mbetowan ako iran sa rarakmatan
49 Sabap ko manga ala a pinggolaola raken o Lebi a Mala i Kabatowa.
Soti so ingaran iyan.
50 Ipekepedi iyan so langon a maaleken rekaniyan
sii ko oman i pekatalingoma a masa.
51 Piyakiilay niyan so kabager o barokan iyan;
piyakambelabelag iyan so manga takabor a ipoporo iran a ginawa iran.
52 Kinowaan iyan sa kadato so manga pangolo
na iniporo iyan so manga dii mangalimbabaan.
53 Piyakaosog iyan sa manga pipiya a nganin so pepanga aaor
na piyakaawa iyan so manga kawasa sa da a ba iran kiyaawidan.
54 Inogopan iyan si Israil a oripen iyan
ka da niyan kalipati a kipekepediin iyan
55 Ki Ibrahim ago so langon o kiyababadan on sa dayon sa dayon
a so den so initopa niyan ko manga apo tano."
56 Na manga miyakatelo olan a kagegenek i Mariyam ko walay i Ilisabit na go bo kasoy

ko walay niyan.
So Kinimbawataan ki Yahiya a Pananalawat
57 Riyaot so masa a kapembawata i Ilisabit na mimbawata sa mama.

58 So manga siringan iyan ago manga tonganay na miyaneg iran a tanto a inikapedi o
Kadnan si Ilisabit, na miyanga bababaya siran langon a ped iyan.
59 Sii ko ikawalo gawii ko kinimbawataan ko wata na miyamanong siran on ka toriin
iran. Na mbetowan iran o kowan sa sagit o ngaran i ama iyan a si Sakariyas
60 Ogaid na pitero i ina iyan a "Di, ka mbetowan sekaniyan sa Yahiya!"
61 Na pitero iran ki Ilisabit a "Da a ba niyo tonganay a ba bebetowi sangkanan a ngaran!"
62 Na pitiniyasan iran so ama iyan ka iniise iran on o antonaa i kabaya iyan a ngaran o
wata.
63 Miyangni si Sakariyas sa karatas na inisorat iyan on a "Aya ngaran iyan na si Yahiya,"
na palaya siran den miyamemesa.
64 Sarta den a miyapekas so dila i Sakariyas na miyakatero a pepodin iyan so Allah.
65 Miyanga alek so langon a siringan iran, na sii sangkoto a dalem a kapalawan a inged
sa Yodiya na dii mbibitiyaraiyan o manga taw so langon angkai a miyanggolaola.
66 So langon a miyamakaneg on na tiyago iran sa ginawa iran a tig iran a "Antonaa
mangaday i pembaloyan angkai a wata?" Ka marinayag a sisii rekaniyan so kabatowa o
Kadnan.
So Miyaalamat i Sakariyas
67 Si Sakariyas a ama iyan na sinep a Soti a Roh na miyangalamat sekaniyan a tig iyan a
68 “Podin tano so Kadnan a Tohan o Israil

ka somiyong sekaniyan sii sa kasebeta niyan ko manga pagtaw niyan.
69 Piyakagemaw niyan so mala i kabatowa a Pepanabet rektano,
a so kiyababadan ko oripen iyan a si Daod
70 Ka giyoto i pitero iyan ko a nggolalan ko manga sosoti a nabi niyan ko miyanga oona a
manga gawii.
71 Initopa niyan a sebeten tano niyan poon ko manga ridoay tano
ago poon ko kapaar o langon a magogowad rektano.
72 Pitero iyan a ikepedi iyan so manga apo tano
ago tedeman iyan so soti a kapasadan iyan,
73 Ka inisepa iyan ko apo tano a so Ibrahim
74 A mbokaan tano niyan ko kapaar o manga ridoay tano
kaan tano sekaniyan kapanalagadi sa da a ba tano kalek
75 Sii ko kasosoti ago kaontol tano
ko hadapan iyan ko tenday a omor tano.
76 Na seka, wata aken na mbetowan ka sa nabi o Lebi a Maporo,
ka magona ka ko Kadnan kaan ka matiyagar so lalan iyan.
77 Pekitokawan ka ko manga pagtaw niyan a kesabet siran
a nggolalan ko kakerilai ko manga dosa iran,
78 Ka makapediin ago masalinggagaw so Tohan tano.
Sabap sii na pekasongen iyan a poon sa kasorgaan so sebet rektano
a datar o kasebang o alongan
79 A pelindaw ko manga taw a kibabaling ko maliboteng
ago sii ko along o kapatay,
na penakodaan tano niyan ko lalan ko kalilintad."
80 Na miyakala si Yahiya ago mimbaloy a mabager i niyawa. Mababaling sekaniyan roo

ko mitataog a kaden taman den ko gawii a miyakiilay sekaniyan ko manga taw sa Israil.
LOKAS 2
So Kinimbawataan ki Isa Al Masih
Sa kapapantagan oto na inisogo i Agosto a Solotan sa Roma a milista so langon a taw a

kibabaling ko ndatoan iyan.
2 Giyangkai a paganay a kinilistaan ko manga taw na sii ko kanggogobirnador i Kiriniyo
sa Siriya.
3 Somiyong so oman i isa a taw sa siti a pimbawataan on kaan milista.
4 Si mambo si Yosop na giyanatan iyan so siti a Nasarit roo sa Galili na somiyong sa
Yodiya ko siti o Daod a bebetowan sa Bitlihim, ka kiyababadan sekaniyan ko Daod.
5 Miyonot on si Mariyam a mitataalik on kaan siran milista. Samaoto na maogat si
Mariyam.
6 Sii ko katatago iran sa Bitilihim na miyaoma den so gawii a kapembawata i Mariyam.
7 Mimbawata sekaniyan sa mama a popaw sa lawas iyan, na biyongkosan iyan so wata sa
manga dinis ago liyokan iyan sii ko manga ragami ko pekenan o manga ayam, ka da den a
ba kiran keminan ko walay a pembolosan.
So manga Pananagikor sa Bilibili ago so manga Malaikat
8 Sangkoto a gagawii na aden a manga tomatagikor sa bilibili sii ko manga pangomaan a

kena a ba mawatan sa Bitlihim ka pepagipaten iran so manga bilibili iran.
9 Na miyakimasa kiran so isa a malaikat o Kadnan, na sominindaw kiran so sigay o
Kadnan, na tanto siran a miyanga alek.
10 Ogaid na pitero kiran o malaikat a "Di kano pekelek, ka inowitan ko sekano sa mapiya
a totol a tanto a ikebabaya o langon a taw.
11 Sii sangkai a gawii na inimbawata ko siti o Daod so Pepanabet rekano. Sekaniyan so
Al Masih a aya Kadnan.
12 Giyai i kikilala niyo ron: ketoon iyo so maito a wata a bobongkosan sa manga dinis a
lolokanen sii ko manga ragami ko kodal."
13 Na sagogona den a tanto a madakel a ped a manga malaikat a poon sa kasorgaan a
miyamangeped sangkoto a isa a malaikat, na pepodin iran so Allah a tig iran a
14 “Mabantog so Allah roo sa kasorgaan,

na sii sa doniya na makalilintad so manga taw a ikasosoat iyan!"
15 Kagiya mamakakasoy so manga malaikat sa kasorgaan na mimbibitiyarai so manga

tomatagikor ko manga bilibili na tig o oman i isa ko ped iyan a "Mamanong tano sa
Bitlihim kaan tano mailay angkai a miyanggolaola a piyakitokawan rektano o Kadnan."
16 Na minggagaan siran roo somong, na miyatoon iran si Mariyam ago si Yosop, na
miyailay iran so wata a pakaiigaan ko manga ragami ko kodal.
17 Na oriyan o kiyailaya iran on na piyakalangkap iran so pitero kiran o malaikat
makapantag sangkoto a wata,
18 Na so langon o miyamakaneg sii na miyamemesa ko pitero kiran o manga
tomatagikor.
19 Ogaid na si Mariyam na katatanodan iyan langon angkai a miyanggolaola a di niyan
dii pamimikiranen.
20 Na mimbabaling so manga tomatagikor sa bilibili a pembantogen ago pepodin iran so
Allah sabap ko langon a miyaneg iran ago miyailay iran, ka datar bo o pitero kiran o
malaikat.
Iningaranan so Wata sa Isa
21 Sii ko ikawalo gawii a aya den katoria ko wata na iningaranan sekaniyan sa Isa, a so
ngaran a inibegay rekaniyan o malaikat sa da on pen kikeraringen.
Piyalad si Isa ko Kadnan
22 Kagiya maipos so manga gawii a kelompiyowa ki Mariyam ago si Yosop a miyatoman

so sogoan o Kitab o Mosa na inowit iran so wata roo sa Yarosalim ka peladen iran ko
Kadnan.
23 Ka misosorat ko Kitab o Kadnan a "Oman i mama a popaw sa lawas na paliyogat a
isenggay a rek o Kadnan."
24 Inawidan iran mambo so isepaat iran on a aya iran kiyatomana ko katero o Kitab o
Kadnan a "Apiya anda ko dowa timan a marapatik o di na dowa timan a kangodaan a
pagapak."
So Miyaalamat i Simiyon
25 Sa masa oto na aden a mama a mababaling sa Yarosalim a aya ngaran iyan na si

Simiyon. Maontol sekaniyan ago baraamal a penayaon iyan so kakesabet a Israil. Lalayon
rekaniyan so Soti a Roh,
26 Na miyapayag on o Soti a Roh a di petay taman sa di niyan mailay so Al Masih a
initopa o Kadnan.
27 Somiyong si Simiyon ko Timplo a pesogoon o Roh, na samaoto na so wata, a si Isa, na
mawit roo o manga lokes iyan sa katomana iran ko sogoan o Kitab makapantag
rekaniyan.
28 Na kinowa i Simiyon so wata na siyakopo niyan, na piyanalamatan iyan so Allah a tig
iyan a
29 “Imanto, Kadnan, na perowa ngka a matay so oripen ka a lomilintad

ka initoman ka so initopa ngka raken,
30 Na so den so manga mata ko i miyakailay ko kapenabet ka
31 A miyatiyagar ka ko kamamasaan o langon a taw.
32 Sekaniyan i solo a pekapayag ko lalan ka sii ko langon o manga nasiyon
ago mabantog mambo o manga pagtaw ngka a manga Israil."
33 Miyamemesa so ama ago so ina o wata kagiya maneg iran so pitero i Simiyon
makapantag ko wata iran.
34 Mandiyadi na inipangangarapan siran i Simiyon, na pitero iyan ki Mariyam a ina o
wata a "Giyangkai a wata na kebaloy a kesabapan ko kakebinasa ago kakesabet o madakel
a manga taw sa Israil; na kebaloy mambo a nanao a sopaken o madakel a taw
35 A aya kesabapan ko kakepayag o manga pamikiran a migegaib ko manga poso iran.
Seka mambo na tanto a kerata a ginawa ngka a datar a kesoker a pedang."
36 Aden a babay roo a pepakapayag ko lalag o Allah a aya ngaran iyan na si Ana, a wata
o Panowil a maaped ko mbatabataa a Asir. Miyalokelokes sekaniyan a miyakatepi ago so
karoma niyan ko miyakapito ragon ipoon ko kararagai ron
37 Na miyabalo ko miyakawalo polo ragon ago pat. Da sekaniyan den awa ko Timplo, ka
gagawii daondaw na ron den pesimba a sarta a dii powasa ago pepangangarapan.
38 Sii den sangkoto a oras na miyakaoma sekaniyan ago piyanalamatan iyan so Allah, na
pitero iyan so makapantag sangkoto a wata ko langon a taw a penayaon iran so kakesabet
a Yarosalim.
So Kiyabaling sa Nasarit
39 Kagiya matoman i Yosop ago si Mariyam so langon a ipapaliyogat o Kitab o Kadnan
na miyaling siran ko siti iran a Nasarit roo sa Galili.
40 Miyakala den so wata ago mimbaloy a mabager. Mapepeno sekaniyan a ongangen, na
sisii rekaniyan so limo o Allah.
So Wata a si Isa a Ndodoo ko Timplo
41 Oman ragon na pesong so manga lokes i Isa sa Yarosalim kaan iran dii maselasela so
Pista a Paska.
42 Isako makapagidad sekaniyan sa sapolo ago dowa ragon na somiyong siran roo peman
ka aya iran olaola.
43 Kagiya mapasad so Pista na mimbabaling siran, ogaid na mitelimbagak so wata, a si
Isa, sa Yarosalim, na di ini katawan o manga lokes iyan.
44 Aya katao iran on na lomolook sekaniyan ko manga ped iran, na miyakalalakaw siran
den ko miyakasalongan. So da iran rekaniyan kailaya na inipangingise iran so mipantag
on ko manga tonganay iran ago manga ginawai.
45 Kagiya da iran sekaniyan matoon na komiyasoy siran sa Yarosalim kaan iran
mambanog.
46 Oriyan o miyakatelo den gawii na miyatoon iran sekaniyan sii ko Timplo a moontod a
lomolook ko manga goro a pepamakinegen iyan ago pepangingisean iyan siran.
47 So langon a pepamakineg rekaniyan na miyanga bebengang ko kapakasasabot iyan ago
manga sembag iyan.
48 Kagiya mailay sekaniyan o manga lokes iyan na miyamemesa siran den, na pitero on i
ina iyan a "Wata aken, ino ngka rekami ai kidian? Saken ago si ama a ka na tanto a
miyakaawid a akal ami sa di ami reka dii kambabanoga."
49 Somimbag si Isa a "Ino ako niyo pen dii mbabanoga? Ba niyo di katawi a disomala a
sisii ako ko Walay o Ama aken?"
50 Ogaid na da iran kasaboti so pitero iyan kiran.
51 Na miyonot kiran si Isa sa kiyabaling iran sa Nasarit na petomanen iyan siran. Ogaid
na si ina iyan na tatagoon iyan ko poso iyan angkai langon a miyanggolaola.
52 Na sii ko kapepakala i Isa na pepakala mambo so ongangen iyan, ago pekebabayaan
sekaniyan o Allah ago so manga taw.
LOKAS 3
Sii ko ikasapolo ago lima ragon a kandadato o Solotan Tibiriyo sa inged a Roma na si
Pontiyo Pilato na aya gobirnador sa Yodiya, si Hirod na aya ndadato sa Galili, si Pilipi a
pagari niyan na ndadato sa inged a Itoraya ago giya Trakonitis, si Lisaniyas na ndadato sa
Abilini,
2 Na si Anas ago si Kayapas na aya manga poporo a imam. Na sii den sangkai a masa na
minioma so katero o Allah ki Yahiya a wata i Sakariyas roo ko mitataog a kaden.
3 Na ineneb iyan so dalem a inged a midadair ko lawasaig a Yordan a ipepangosiyat iyan
ko manga taw a panalikodi ran so manga dosa iran ago pamakisalawat siran kaan karilai
so manga dosa iran.
4 Giyanan i kinitoman o misosorat ko Kitab o Nabi Isayas a tig iyan a
"Aden a pepananalo roo ko mitataog a kaden a:

'Tiyagara niyo so lalan para ko Kadnan,
pakatitowa niyo so manga lalan a pagokitan iyan.
5 Oman i baogan na ketambonan,
oman i palaw ago bobongan na kepantar;
so mikorikori a manga lalan na pekatiton
so makerang a manga okita na pekatilaken;
6 Na keilay o langon a manosiya so kapenabet o Allah."
7 Madakel a taw a miyamanong ki Yahiya a pemakisalawat rekaniyan, na pitero iyan

kiran a "Hey sekano a manga nipay! Antawaa i miyakalalang rekano sa kapalagowi niyo
ko pekatalingoma a rarangit o Allah?
8 Salina niyo a manga olaola niyo kaan mailay o ba niyo katalikodi so manga dosa niyo.
Di niyo pipikira o ba niyo kapalagowi so kandanega rekano sabap sa manga mbawataan
kano o Ibrahim. Ka teroon ko rekano a apiya angkai a manga ator na kegaga maloy o
Allah a manga mbawataan o Ibrahim.
9 Matitiyagar den so patok a ipeta ko manga kayo sii ko manga bekaw niyan. Oman i
kayo a di magonga sa mapiya na petaan na ipelebad ko apoy."
10 Na iniise o madakel a taw ki Yahiya a "Antonaa bes i penggolaolaan ami?"
11 Somimbag si Yahiya a "So dowa timan i gerab na began iyan so isa on ko taw a da a
gerab iyan, na so aden a pangenengken iyan na begi niyan on so da a pangenengken iyan."
12 Miyamanong roo mambo so manga panenekat sa bowis a pemakisalawat na iniise iran
ki Yahiya a "Goro antonaa i penggolaolaan ami?"
13 Tig iyan a "Di kano penekat sa lawan ko ipapaliyogat rekano."
14 Na aden mambo a manga sondaro a iniise iran on a "Sekami, na antonaa i
penggolaolaan ami?"
Inisembag iyan a "Di niyo tegela so apiya antawaa sa kambegi niyan rekano sa pirak, na
di niyo mambo pesebapi. Tatapiin iyo den so manga sokay niyo."
15 Na malilibog so langon o manga taw o antawaa si Yahiya o ba sekaniyan so Al Masih
a penayaon iran.
16 Sabap roo na pitero kiran langon i Yahiya a "Aya ipepanalawat aken rekano na ig,
ogaid na aden a pekaoma a lebi pen a mala i gees a di saken, na apiya so gakot o tinilas
iyan na kena a ba ako mapapatot a pemboka on. Ipenalawat iyan rekano so Soti a Roh ago
apoy.
17 Perambiten iyan so nigo a ipemalid iyan piyapiya ko ilaw. Tegoon iyan so malimegas
on ko taliyong iyan, ogaid na totongen iyan so okap ko apoy a di den kepareng."
18 Sii ko kapepakalangkapa i Yahiya ko Mapiya a Totol ko manga taw na madakel a ped
a inipangosiyat iyan kiran.
19 Ogaid na pimbongetan iyan si gobirnador Hirod sabap ko kiyapangaromaa niyan ki

Hirodiyas a karoma o pagari niyan, ago so madakel a ped a pinggolaola niyan a manga
rarata.
20 Na minggolaola pen si Hirod sa lebi pen a marata ka piyakikalaboso niyan si Yahiya.
So Kiyasalawati ki Isa
21 Sa da pen ai kaokiti i Yahiya sii ko kapepanalawati niyan ko manga taw na

miyakisalawat on mambo si Isa. Na sii ko kapepangangarapan iyan na kiyalekaan a
kasorgaan
22 Na tomiyana rekaniyan so Soti a Roh a romoropa sa lawas a marapatik. Na aden a
sowara a miyakapoon sa kasorgaan a tig iyan a "Seka so pakatatayaan ko a Wata aken.
Tanto aken seka a ikasosoat."
So Salsila ki Isa
23 Kagiya poonan i Isa so kapepangosiyat iyan na manga telo polo ragon a idad iyan.
Aya katao ron o manga taw na wata sekaniyan i Yosop
a aya wata i Hili,
24 A aya wata i Matat,
a aya wata i Libi, a aya wata i Mileki,
a aya wata i Yanay, a aya wata i Yosop,
25 A aya wata i Matatiyas, a aya wata i Amos,
a aya wata i Naom, a aya wata i Isli,
a aya wata i Nagay,
26 A aya wata i Maat,
a aya wata i Matatiyas, a aya wata i Simin,
a aya wata i Yosik, a aya wata i Yoda,
27 A aya wata i Yoanan, a aya wata i Risa,
a aya wata i Sirobabil, a aya wata i Siyaltiyal,
a aya wata i Niri,
28 A aya wata i Mileki,
a aya wata i Adi, a aya wata i Kosam,
a aya wata i Ilmadam, a aya wata i Ira,
29 A aya wata i Yosowa, a aya wata i Iliyasar,
a aya wata i Yorim, a aya wata i Matat,
a aya wata i Libi,
30 A aya wata i Simiyon,
a aya wata i Yoda, a aya wata i Yosop,
a aya wata i Yonam, a aya wata i Iliyakim,
31 A aya wata i Miliya, a aya wata i Mina,
a aya wata i Matata, a aya wata i Natan,
a aya wata o Daod,
32 A aya wata i Yasay,
a aya wata i Obid, a aya wata i Bowas,
a aya wata i Salmon, a aya wata i Nason,
33 A aya wata i Aminadab, a aya wata i Admin,
a aya wata i Arni, a aya wata i Hisron,
a aya wata i Piris, a aya wata i Yoda,
34 A aya wata i Yakob, a aya wata i Iskak,
a aya wata o Ibrahim, a aya wata i Tira,
a aya wata i Nahor,
35 A aya wata i Sirog,
a aya wata i Raw, a aya wata i Pilig,
a aya wata i Ibir, a aya wata i Sila,
36 A aya wata i Kainan, a aya wata i Arpaksad,
a aya wata i Sim, a aya wata o Nok,
a aya wata i Lamik,
37 A aya wata i Matosala,
a aya wata i Inok, a aya wata i Yarid
a aya wata i Mahalaliil, a aya wata i Kainon
38 A aya wata i Inos, a aya wata i Sito
a aya wata o Adam, a aya wata o Allah.
LOKAS 4
So Kiyatepengi o Iblis ki Isa
Si Isa a sesenepen a Soti a Roh na miyawa sa lawasaig a Yordan. Inagak sekaniyan o Roh
roo ko mitataog a kaden
2 Na roo tipengan o Iblis ko miyakapat polo gawii. Da den a ba niyan miyakan sa manga
gawii oto na so kiyaipos iyan na riyaot a ongosongos.
3 Pitero on o Iblis a "O seka so Wata o Allah na sogoa ngka ngkai a ator sa mbaloy a
paan."
4 Somimbag si Isa a "Misosorat ko Kitab a 'Kena bo a ba paan i ipekeoyag o manga taw.'
5 Na inowit sekaniyan o Iblis roo ko maporo a darpa, na sakotika den a piyakiilay niyan
on so langon a ndatoan sa doniya.
6 Na pitero rekaniyan o Iblis a "Began ko seka sa kadato sangkai langon a pendatoan ago
so kakawasaan iran, ka miyapalad ai raken na apiya antawaa i kebayaan aken megay na
mbegan ko ron.
7 Na rek ka ini langon o simbaa ko ngka."
8 Somimbag si Isa a "Misosorat ko Kitab a
"Simbaa ngka so Kadnan a Tohan ka, na sekaniyan bo i pangongonotani ngka."
9 Oriyan oto na inowit o Iblis si Isa sa Yarosalim na piyakatindeg iyan ko poroporo o

Timplo a tig iyan a "O Wata ka o Allah na petiyolog ka a poon sii.
10 Ka misosorat ko Kitab a
'Sogoon iyan so manga malaikat iyan

sa kapagipata iran reka piyapiya;
11 Na papaladen ka o manga lima iran
kaan di kesakiti so ai ngka ko manga ator.'
12 Somimbag si Isa a "Pitero o Kitab a 'Di ngka tepengi so Kadnan a Tohan ka.'
13 Kagiya mapos tomepeng o Iblis si Isa sii ko langon angkai a okit na inawaan iyan si
Isa sa da matey.
Pipoonan i Isa so Galebek iyan roo sa Galili
14 Komiyasoy si Isa roo sa Galili a madadalem rekaniyan so kabatowa o Roh, na

lomiyangkap so totol mipantag rekaniyan sangkoto a dalem a inged.
15 Pepangendao sekaniyan sii ko manga sinagoga iran na pepodin o langon a taw.
Da Tarimaa si Isa roo sa Nasarit
16 Miyakaoma si Isa sa Nasarit a ron miyakala, na somiyoled ko sinagoga ko Gawii a

Idedeke ka aya niyan olaola. Tominindeg sekaniyan ka mbatiyaan iyan so Kitab
17 Na inidawag iran on so Kitaban a inisorat o Nabi Isayas. Inokab iyan ko kasosoratan
sangkai a katero a
18 “Sisii raken so Roh o Kadnan,

ka pinili ako niyan kaan aken mapakalangkap so mapiya a totol sii ko manga miskin.
Siyogo ako niyan sa kipetewatawagen ko ko kakebokai ko miyanga bibiyag,
ago so kapakailaya peroman ko miyanga bobota,
ago so kambalokasi ko pepemegesen,
19 Ago an aken kapakitokawi a giyai i ragon a kasebeta o Kadnan ko manga pagtaw
niyan."
20 Na liken i Isa so kitaban na inikasoy niyan ko katib na miyontod. Tintengan sekaniyan

o langon a taw ko sinagoga,
21 Na pitero iyan kiran a "Imanto a gawii na miyatoman angkai a misosorat ko Kitab sii
ko kapepamakinega niyo ron."
22 Na palaya siran mitetaro sa mapiya mipantag rekaniyan, na miyamemesa siran ko
manga pipiya a katero iyan. Ogaid na iniise iran a "Ba di sekaniyan so wata i Yosop?"
23 Na pitero kiran i Isa a "Mataan a peteroon iyo raken angkai a pananaroon a: 'Seka ri a
pamomolong, bolongi ngka a ginawa ngka! Nggolaolaa ngka sii ko poonan ka a inged so
miyaneg ami a miyanggolaola ngka roo sa Kapirnaom.' "
24 “Teroon ko rekano" a tig i Isa "a da a nabi a ba tarimaa o manga taw sii ko inged iyan.
25 “Teroon ko rekano a benar a madakel a manga balo a babay sa Israil sii ko masa i
Iliyas a da den oran ko miyakatelo ragon ago tenga, na aden a mala a taon ko dalem a
inged.
26 Ogaid na da sogoa si Iliyas ko apiya antawaa kiran, ka sii baden siyogo ko balo a
mababaling sa Saripat sa inged a Sidon.
27 Madakel mambo a pekebowa sii sa Israil ko masa o Nabi Ilisas, ogaid na da a isa kiran
bo a ba miyapakapiya, ka si bo si Naaman a taw sa Siriya."
28 Kagiya maneg ai o manga taw roo ko sinagoga na tanto siran langon a kiyararangitan.
29 Na miyamanindeg siran na inidendeg iran si Isa ko liyo o siti, na inowit iran ko poro o
bobongan a ron den miyabangon, ka pagologen iran ko landeng.
30 Ogaid na miyokit sekaniyan baden ko look o madakel a taw ago miyawa roo.
So Mama a Sosookan a Saitan
31 Somiyong si Isa sa Kapirnaom a isa a siti sa Galili na ron miyangendao ko manga taw
ko Gawii a Idedeke.
32 Miyamemesa siran ko kapepangendao niyan, ka aden a kapaar o katero iyan.
33 Sii ko soled o sinagoga na aden a mama a sosookan a saitan, na kominisek sa matanog
a tig iyan a
34 “Hey Isa a Taw sa Nasarit, antonaa i pagangin ka rekami? Ba aya inisong ka sii na
mbinasaan kami ngka? Katawan aken o antawaa ka. Seka so Soti a Siyogo o Allah!"
35 Na siyaparan i Isa so saitan a tig iyan a "Renek ka! Liyo ka rekaniyan!" Na inilampes o
saitan so mama ko hadapan o kalangolangon, na lominiyo ron a da niyan den pakasakiti.
36 Miyamemesa siran langon, na tig o oman i isa ko ped iyan a "Antonaa ini a ndao?
Aden a kapaar angkai a mama ago kabatowa sa kapesogoa niyan ko manga saitan na
pepakaliyo siran."
37 Na lomiyangkap so totol mipantag ki Isa ko dalem angkoto a inged.
Madakel a Miyapamakapiya i Isa
38 Inawaan i Isa so sinagoga na somiyong sekaniyan ko walay i Simon. Sangkoto a masa

na tanto a dii keyaw so panogangan a babay i Simon, na piyangni iran ki Isa a tabangi
niyan.
39 Miyobay sekaniyan ko babay na tominindeg ko kilid o iigaan iyan na siyaparan iyan so
mayaw, na miyada on. Na mimbowat somambot so babay na piyanalagadan iyan siran.
40 Kagiya perimon den na so langon a aden a manga tonganay niyan a pekesakit ko
mbarambarang a gedamen na piyangowit iran ki Isa. Na inipanapenet iyan a lima niyan ko
oman i isa kiran na piyamakapiya niyan siran.
41 Aden pen a madakel a manga saitan a somosook ko taw a mililiyo kiran a ipekisek iran
a "Seka so Wata o Allah!" Ogaid na tiyapaosan siran i Isa sa di siran petetaro, ka katawan
iran a sekaniyan so Al Masih.
Miyangosiyat si Isa roo sa Yodiya
42 Kagiya kelibabas na giyanatan i Isa so siti na somiyong ko darpa a mitataog. Na

pimbabanog sekaniyan o manga taw, na kagiya matoon iran na inakolan iran sa di niyan
siran pagawai.
43 Ogaid na pitero iyan kiran a "Disomala a pakalangkapen aken so Mapiya a Totol
makapantag ko Ndatoan o Allah sii ko ped a manga inged, ka giyoto i sabap a kiyasogoa
raken."
44 Na domiyayon sekaniyan lomalakaw a dii mangosiyat sii ko manga sinagoga sa
Yodiya.
LOKAS 5
Miyakaisa a gawii a tomitindeg si Isa ko kilid a Ranaw a Ginisarit na madakel a taw a
pepamagagaw ron mobay kaan siran makapamakineg ko katero o Allah.
2 Na miyailay niyan so dowa timan a awang a domodongko ko kilid a ranaw a inawaan o
manga panginginseda, ka pepipian iran so manga poket iran.
3 Na miyageda si Isa ko isa sangkai a awang a rek i Simon, na piyangni niyan ki Simon a
pakatolaka niyan ai sa maito ko ig, na domiyayon sekaniyan mangosiyat ko manga taw ko
kaoontod iyan ko awang.
4 Kagiya makapasad mangosiyat na pitero iyan ki Simon a "Laod kano na tayotona niyo
so manga poket iyo kaan kano makakowa sa manga seda."
5 Somimbag si Simon a "Kadnan, mindokaw kami manginseda ko miyababasa gawii, na
da a ba mi miyakowa. Ogaid na sabap ko pitero o ka na teyotonen aken so manga poket."
6 Na kagiya nggolaolaan iran ai na tanto a madakel a seda a miyanga kokowa iran, na
pepanga beberat so manga poket.
7 Giyoto a piyangapay iran so manga ped iran roo ko isa a awang kaan makaobay kiran
ago makaogop. Miyamangobay siran on na pino iran a seda so dowa a awang iran taman
sa ba siran baden kigaled.
8 Kagiya mailay i Simon Pidro so miyaolaola na somiyodiyod ki Isa a tig iyan a
"Pakawatan ka raken, Kadnan, ka baradosa ako a mama!"
9 Ka miyamemesa sekaniyan ago so langon a ped iyan ko tanto a madakel a manga seda a
miyakowa iran,
10 Na miyamemesa mambo si Santiyago ago si Yahiya a manga wata i Sibidi a manga
dokapila i Simon.
Na pitero i Isa ki Simon a "Di ka pekelek; ipoon imanto na aya mapengowa ngka na
manga taw."
11 Na biyaton iran so manga awang iran na inawaan iran so langon taman na miyonot
siran ki Isa.
12 Miyakaisa a gawii a ndodoo si Isa ko isa a siti na aden a mama on a lalangkapen a

bowa. Kagiya mailay niyan si Isa na gomipe sekaniyan ko hadapan iyan na
miyangangampedian on a tig iyan a "Kadnan, o kebaya ka na mapekapiya ko ngka."
13 Na kiyawa sekaniyan i Isa na siko iyan a tig iyan a "Kebaya ako. Miyakapiya ka den!"
Na sakotika den a miyada on so bowa,
14 Na inisogo on i Isa a "O ba ngka ini pamakitokawi ko apiya antawaa, ka ba ka den
song ko imam na pakiilain ka on a lawas ka; na sapaaten ka so soasoat a inisogo o Mosa
sabap ko kiyapakapiya ngka kaan kapemataani ko manga taw a miyada so bowa ngka."
15 Ogaid na baden tanto a lomiyangkap so totol makapantag ki Isa, na miyamanong on so
tanto a madakel a taw a pemakineg rekaniyan ago an siran mapamakapiya ko manga
gedamen iran.
16 Ogaid na omanoman pesong si Isa ko mitataog a kaden na roo miyangangarapan.
Piyakapiya i Isa so Mama a Mapaparalais so Lawas iyan
17 Miyakaisa a gawii sii ko kapepangendao i Isa na aden a domadarpa roo a manga Parisi
ago manga goro ko Kitab a miyamakapoon ko oman i inged sa Galili ago Yodiya ago sii
sa Yarosalim. Na ndodon ki Isa so kabatowa o Kadnan ko kapemakapiya niyan ko
pepanga sasakit.
18 Na aden a miyakaoma a manga mama a domadalagan sa mama a mapaparalais so
lawas iyan, na piyanamaran iran a kisoleden iran rekaniyan ko walay kaan iran mibetad
ko hadapan i Isa.
19 Ogaid na da siran makasoled ko walay sabap ko kadakel o manga taw roo. Na
miyamanik siran baden ko mapapantar a atep o walay na biyabasan iran, na inalogan iran
so dalagan a ndodon so mapaparalais a mama sii ko seronsarongan o manga taw ko
hadapan i Isa.
20 Kagiya mailay i Isa so paratiyaya iran na pitero iyan ko mama a "Pagaria, kiyarilaan
den so manga dosa ngka."
21 Kagiya maneg ai o manga Parisi ago manga goro ko Kitab na mapipikir iran a
"Antawaa angkai a mama a pepagitowitoon iyan so Allah? Antawaa i pekarila sa dosa a
rowar ko Allah?"
22 Katawan den i Isa so mapipikir iran na iniise iyan a "Ino niyo anan pepamikira?
23 Anda i malebod; so kateroa sa 'Kiyarilaan den so manga dosa ngka,' o di na 'Mbowat
ka na lalakaw ka den'?
karilai niyan ko manga dosa." Na giyoto a pitero iyan ko mapaparalais a mama a
"Mbowat ka! Awidi ngka so dalagan ka na baling ka sa walay ngka."
25 Sakotika den na tominindeg sekaniyan sii ko hadapan o kalangolangon, na inawidan
iyan so igaan iyan na miyaling a pepodin iyan so Allah.
26 Palaya siran den miyamemesa ago tanto a miyabengang, na biyantog iran so Allah a tig
iran a "Sabelek a manga nganin a miyailay tano imanto!"
Tiyawag i Isa si Libi
27 Kagiya maipos ai na lomiyalakaw si Isa na miyailay niyan so isa a panenekat sa bowis

a aya ngaran iyan na si Libi a moontod ko darpa a pepanekatan ko bowis. Pitero rekaniyan
i Isa a "Pegonot ka raken."
28 Na tominindeg si Libi na inawaan iyan so langon taman na miyonot ki Isa.
29 Oriyan iyan na migay si Libi sa mala a kandori para ki Isa sii ko walay niyan, na
madakel a panenekat sa bowis ago ped a manga taw a pepagatoang kiran.
30 Ogaid na so manga Parisi ago manga goro iran ko Kitab na miyamanarotaro siran ko
manga sokbat i Isa a tig iran a "Ino kano dii pakipamagatoang ko manga panenekat sa
bowis ago manga baradosa"
31 Simbag siran i Isa a "So manga pipiya i lawas na di iran kailangan so pamomolong, ka
so bo so pepanga sasakit.
32 Kena a ba aya ko sii inisong na so katawaga ko ko manga oontol, ka so manga
baradosa sa katalikodi ran ko manga dosa iran."
33 Pitero iran ki Isa a "So manga sokbat i Yahiya na lalayon dii popowasa ago
pepangangarapan a datar mambo o manga sokbat o manga Parisi. Ogaid na so manga
sokbat ka na baden pekan ago peginom."
34 Somimbag si Isa a "Ba niyo mapakapepowasa so manga banto ko kakewing sii ko
kaaped kiran pen o mangangaroma?
35 Kena, ogaid na pekaoma so masa a kebelag kiran so mangangaroma, na sii sangkoto a
manga gawii na pepowasa siran den."
36 Piyanotol kiran i Isa angkai a bayambayanan: "Da a taw a ba niyan redita a bago a
nditaren a itepi iyan ko miyaronot a nditaren. O nggolaolaa niyan ai na baden miyakisi so
bago a nditaren na so ridit on a itepi ko miyaronot na di ron ndait.
37 Na da a taw a ba niyan tegoa so bago a arak ko miyaronot a pananagoay a kobal. O
nggolaolaa niyan ai na kebensi o bago a arak so kobal na keolaan so arak ago kebinasa so
pananagoay.
38 Kena, ka so bago a arak na sii tegoa ko bago a pananagoay.
39 Da a taw a ba niyan pesingayoa so bago a arak amay ka maipos iyan minom so andang
a arak ka tig iyan a 'Lebi a mapiya so andang.' "
LOKAS 6
So Pakaise makapantag ko Gawii a Idedeke
Miyakaisa a Gawii a Idedeke na pelalakaw si Isa a sii pegokit ko pangomaan. So manga

sokbat na pepangowa ko manga saway o bantad na pekosokoson iran sa lima iran na
peken iran.
2 Ogaid na so ped ko manga Parisi na tig iran a "Ino niyo penggolaolaa so inisapar o
Kitab tano a penggolaolaan ko Gawii a Idedeke?"
3 Simbag siran i Isa a "Ba niyo da mabatiya so pinggolaola o Daod isako penga aaor siran
ago so manga kaom iyan?
4 Somiyoled sekaniyan ko walay o Allah na kominowa sa paan a isasapaat ko Allah, na
komiyan on na piyamegan iyan on pen so manga kaom iyan apiya pen da sa Kitab i ba
kana o apiya antawaa, ka so bo so manga imam i pekakan on."
5 Na pitero kiran pen i Isa a "So Wata o Manosiya na aya dii mbayabaya ko Gawii a
Idedeke."
6 Miyakaisa peman a Gawii a Idedeke a somiyoled si Isa ko sinagoga na miyangendao.

Aden a mama roo a kekampis so kawanan a lima niyan.
7 So manga goro ko Kitab ago manga Parisi na di ran dii simaan si Isa o ba niyan
pakabagera angkoto a mama ko Gawii a Idedeke, ka kabaya iran a midimanda iran si Isa.
8 Ogaid na katawan iyan so mapipikir iran na pitero iyan ko mama a kekampis a lima
niyan a "Tindeg ka na song ka sii ko hadapan ami. Na gomiyanat so mama na tominindeg
roo.
9 Na pitero kiran a Isa a "Ipagise aken rekano: antonaa i sisii ko Kitab a kepakay a
nggolaolaan ko Gawii a Idedeke? So kanggolaola sa mapiya o di na so kanggolaola sa
marata? So kasabeta ko kaoyagoyag o di na so kabinasaa on?"
10 Na liyayas iyan milay so kalangolangon iran na pitero iyan ko mama a "Betera ngka a
lima ngka." Na biter iyan na miyakapiya den a lima niyan.
11 Ogaid na tanto siran a kiyararangitan na miyagopakat siran o antonaa i ikidia iran ki
Isa.
Pinili i Isa so Sapolo ago Dowa a Siyogo
12 Sa masa oto na tomiyakedeg si Isa ko bobongan ka pengangarapan, na roo sominimba

ko Allah ko miyababasa gawii.
13 Kagiya mapita den na tiyawag iyan so manga sokbat iyan na pinili iyan so sapolo ago
dowa kiran a bitowan iyan sa manga siyogo:
14 Si Simon a bitowan iyan sa Pidro, si Andriyo a pagari i Pidro, si Santiyago, si Yahiya,
si Pilipi, si Bartolomiyo,
15 Si Matiyo, si Tomas, si Santiyago a wata i Alpayo, si Simon a bebetowan sa Mala i
Paninindeg,
16 Si Yodas a wata i Santiyago ago si Yodas Iskariyot a miyabaloy a makatipo.
Miyangendao ago Miyamolong si Isa
17 Tomiyondagay si Isa ko bobongan a oonotan o manga sokbat iyan na tominindeg siran

ko pantar a darpa a ron mitimotimo so tanto a madakel a manga kaom iyan ago madakel
pen a manga taw a miyamakapoon sa dalem a inged a Yodiya, ago sa Yarosalim ago sii
ko manga siti a Tiro ago Sidon sa kilid a ragat.
18 Miyamanong siran ki Isa kaan iran mapamakineg ago an siran mamakapiya ko manga
sakit iran. Miyamakapiya pen so dii sesamoken a saitan.
19 So langon angkoto a manga taw na palaya pepanamar sa kasekoa iran ki Isa, ka
pepakapoon rekaniyan so kabatowa a inipakapiya iran langon.
So Rarakmatan ago so Kemorkaan a manga Taw
20 Inilay i Isa so manga sokbat iyan na pitero iyan a
"Rarakmatan kano a manga miskin

ka rek iyo so Ndatoan o Allah.
21 Rarakmatan kano a pepanga aaor imanto
ka pemakaosogen kano bo.
Rarakmatan kano a penggoraok imanto
ka makapekekala kano bo.
22 Rarakmatan kano igira a ipekegowad kano o manga taw,
ago di kano iran itatapian, ago pepagongatongaten kano iran
ago di ran dii teroon a manga rarata kano sabap ko Wata o Manosiya.
23 “Pakapipiyaa niyo a ginawa niyo amay ka manggolaola ini ago tetepatepak kano sa
kakebabaya iyo, ka mala a balas a ititiyagar para rekano roo sa kasorgaan. Ka so manga
apo iran na datar anan so inikidia iran ko miyanga oona a nabi.
24 Ogaid na kemorkaan kano a manga kawasa
ka kiyasagadan iyo den imanto so kapakadadaya iyo.
25 Kemorkaan kano a kikaoosog imanto
ka penga aaor kano bo.
Kemorkaan kano a dii kekala imanto
ka mamakapemboko kano ago pemakagoraok.
26 Kemorkaan kano amay ka dii teroon o langon a taw so mapiya makapantag rekano
ka datar ai mambo so inikidia o manga apo iran ko di tito a manga nabi.
So Kababayai ko manga Ridoay
27 “Ogaid na teroon ko rekano a pepamakineg raken a kababayai niyo so manga ridoay

niyo, na nggolaola kano sa mapiya ko pepanga gogowad rekano.
28 Sembaga niyo sa mapiya so pepamaninta rekano, na pangangarapanen iyo so
pepamanatro rekano.
29 O aden a somiyontok reka sa bies na pakisontoken ka on pen so sabala a bies ka. Na o
aden a magagaw ko bangkala a ka na di ngka pesepari sa kakowaa niyan pen ko gerab ka.
30 Begi ngka so oman i pemangni reka, na o aden a kominowa ko manga rek ka na di
ngka on den pengniya peroman.
31 Nggolaolaa niyo ko manga taw so kabaya iyo a penggolaolaan iran rekano."
32 “O aya bo a pekebabayaan iyo na so siran oto a pekebabaya rekano, na ino kano pen
peginam sa balas? Apiya so manga baradosa na pekebabayaan iran so pekebabaya kiran.
33 Na o aya bo a penggolaolaan iyo sa mapiya na so di rekano dii nggolaola sa mapiya, na
ino kano pen peginam sa balas? Apiya so manga baradosa na dii nggolaola sa datar anan.
34 Na o aya bo a pegotangan iyo na so manga taw a sasarigan iyo a pekabadal rekano, na
ino kano peginam sa balas? Apiya so manga baradosa na pepagotangan iran so manga
baradosa a iinamen iran a kabadalan siran sa isen o inotang iran.
35 “Kababayai niyo baden so manga ridoay niyo, na nggolaolai niyo siran sa mapiya.
Pagotangi niyo siran sa di niyo iinama a ba kano kebadali. Amay ka giyanan na mbelasan
kano sa mala, na giyanan i kapekiilain iyo sa manga wata kano o Lebi a Maporo, ka
makalimoon sekaniyan ko siran oto a di penalamat ago manga rarata.
36 Sabap san na pangalinggagaw kano a datar o Ama iyo a masalinggagaw."
So Kakokoma ko Ped
37 “Di niyo kokoma so ped a taw, ka di kano mambo kokomen. Di niyo siran selaa, ka di
kano mambo selaan. Rilai niyo siran, ka perilaan kano mambo.
38 Begi niyo siran, ka mbegan kano mambo sa osto a takes a ndekenan ago kokogen, na
pelontowan pen so imbegay rekano taman sa pepanga oodod. Ka saden sa ipetakes iyo ko
ipembegay niyo na aya mambo itakes ko imbegay rekano."
39 Piyanotol kiran pen i Isa angkai a bayambayanan: "So bota a mama na di pekaagak sa
isa pen a bota, ka penga oolog siran a dowa ko kakar.
40 Da a morit a ba makalalawan ko goro niyan, ka amay ka makapasad maganad so morit
na kedatar iyan so goro niyan.
41 “Ino ngka pekeinengka so bayanek ko mata o pagari ngka a di ngka bo pesegipaan so
troso sa mata ngka?
42 O di ngka keilay so troso sa mata ngka na ino ngka peteroa ko pagari ngka a 'Pagari
ko, pakikowaan ka raken so bayanek sa mata ngka'? Seka a dii magomanta! Daan ka a
kowaa so troso sa mata ngka na go ka bo makailay piyapiya sa kakekowaa ngka ko
bayanek sa mata o pagari ngka.
43 “Da a mapiya a kayo a ba magonga sa marata, aya pen o ba makaonga so marata a

kayo sa mapiya.
44 Aya kikilala ko oman i isa a kayo na so onga niyan. Di keropo so manga korma ko
soroken a kayo aya pen o ba kerebas so manga obas ko baleteken a pamomolan.
45 So mapiya a taw na dii nggolaola sa mapiya sabap ko mapiya a madadalem ko poso
niyan, na so marata a taw na dii nggolaola sa marata sabap ko marata a madadalem ko
poso iyan. Ka saden sa mipepeno ko poso o taw na aya niyan mambo dii matero."
So Maongangen ago so Lalong a dii Mbalay
46 “Ino ako niyo pembetowi sa 'Kadnan, Kadnan' a di niyo bo tomanen so di aken rekano
dii teroon?
47 Oman i isa a pesong raken a pepamakineg ko manga katero aken ago petomanen iyan
na pekiilay aken rekano o antonaa i datar iyan.
48 Datar sekaniyan o taw a mimbalay. Komiyalot sa madalem na piyakaontod iyan so
onayan sii ko lakongan. Na sii ko kiyambagiyaw o lawasaig na diyasengan o reges
angkoto a walay, ogaid na da makoyong ka miyabangon piyapiya.
49 Ogaid na so taw a pepamakineg ko manga katero aken a di niyan bo tomanen na datar
o taw a mimbalay sii ko bote a da niyan betadi sa onayan. Na so den so kiyadasengi ron o
bagiyaw na miyaoteng den so walay, na tarotop a kiyageba iyan."
LOKAS 7
Piyakabager i Isa so Oripen o Iromanen a Olowan a Sondaro
Kagiya mapasad ai langon tero i Isa ko manga taw a pepamakineg on na somiyong

sekaniyan sa Kapirnaom.
2 Roo na aden a Iromanen a olowan o manga sondaro a aden a oripen iyan a pekesakit a
pakapapatain, na mala i kipantag ko kadnan iyan.
3 Kagiya maneg o olowan so makapantag ki Isa na piyakasong iyan on so ped ko manga
pelokelokesen o manga Yahodi sa kapangniya iran ki Isa a somong sekaniyan roo kaan
iyan mapakapiya so oripen iyan.
4 Kagiya makaoma siran ki Isa na miyangangampedian siran on sebenar a tig iran a
"Giyangkai a mama na mapapatot a ogopan ka,
5 Ka pekebabayaan iyan so nasiyon tano na inimbalay kami niyan sa sinagoga."
6 Na giyoto a miyonot kiran si Isa, na sii ko kapepakarani niyan ko walay na somiyogo so
olowan sa manga ginawai niyan sa kapeteroa iran ki Isa a "Sir, di ngka den pesemoka a
ginawa ngka, ka kena a ba ako mapapatot a ba aken seka pakabolosa ko walay aken
7 Aya pen o ba aken bilangen a ginawa ko a mapapatot a somong reka. Ogaid na teroa
ngka baden a pekapiya so oripen aken na pekapiya sekaniyan den.
8 Ka saken mambo na mapapadalem ko kapaar o manga poporo aken, na aden a manga
sondaro a mipapaar aken. O teroa ko ko isa kiran a 'Lalakaw ka' na melalakaw den; na o
teroa ko ko ped a 'Song ka sii,' na song sii; na o teroa ko ko oripen aken a 'Nggolaolaa
ngka ini,' na penggolaolaan iyan."
9 Kagiya maneg ai i Isa na miyamemesa sekaniyan ko olowan, na somiyangor ko madakel
a taw a tomotondog on na tig iyan a "Teroon ko rekano a apiya sii ko manga taw sa Israil
na da ako pen makatoon sa paratiyaya a ba datar ai."
10 Na kagiya makakasoy so manga siyogo o olowan na miyaoma iran so oripen iyan a
miyakabager den.
Inoyag i Isa so Miyatay a Wata o Balo a Babay
11 Da peman matey na somiyong si Isa sa siti a bebetowan sa Nain na miyonot on so

manga sokbat iyan ago so madakel a manga taw.
12 Sii ko kapepekarani niyan ko gimowa o siti na aden a miyatay a mama a aawidan o
manga taw ko liyo o siti sa kipelebengen iran on. Botong sekaniyan a wata o ina iyan a
miyabalo, na madakel a magiinged sangkoto a siti a pepamangonot rekaniyan.
13 Kagiya mailay o Kadnan so balo na kiyagagawan sekaniyan on, na pitero iyan on a "Di
ka penggoraok!"
14 Na miyobay si Isa ko bangkabangkay na siko iyan, na tomiyareg so manga taw a
maawid on. Na tig i Isa a "Hey mangoda, mbowat ka!"
15 Na mimbowat so miyatay na mipoon tero, na inikasoy sekaniyan i Isa ki ina iyan.
16 Palaya siran den miyanga alek na biyantog iran so Allah a tig iran a "Barakat a nabi a
gomimaw rektano!" ago "Somiyong sii so Allah ka sebeten iyan so manga pagtaw niyan!"
17 Na lomiyangkap angkai a totol mipantag ki Isa sa dalem a Yodiya ago sii ko midadair
on a manga inged.
Si Isa ago si Yahiya a Pananalawat
18 So manga sokbat i Yahiya na piyanotol iran on so langon ai a miyaoolaola. Na tiyawag

iyan so dowa kiran
19 Na piyakasong iyan siran ko Kadnan kaan iran on miise a "Ba seka so pitero i Yahiya a
pekaoma, o di na ba aden a salakaw a ba ami pen penayawa? "
20 Kagiya makaoma siran ki Isa na tig iran a "Siyogo kami reka i Yahiya a Pananalawat
kaan ami reka miise o ba seka so miyatero iyan a pekaoma, o di na ba aden a salakaw a ba
ami pen penayawa?"
21 Na sii den sangkoto a masa na madakel a taw a piyamakapiya i Isa ko manga gedamen
iran ago manga paniyakit, ago madakel a saitan a piyamakaliyo niyan ko kisosookan, na
madakel a bota a piyamakailay niyan.
22 Na simbag iyan so manga siyogo i Yahiya a "Kasoy kano ki Yahiya na panotola niyo
ron so miyailay niyo ago miyaneg: so manga bota na pepamakailay, so manga sadir na
pepamakalalakaw, so manga pekebowa na miyanga pipiya, so manga bengel na
pepamakaneg, so miyamatay na miyanga ooyag, ago so manga miskin na ron
pepakitokawan so Mapiya a Totol.
23 Rarakmatan so taw a di den kedaan sa paratiyaya sabap raken.
24 Kagiya makalalakaw den so manga siyogo i Yahiya na mitero si Isa ko madakel a taw
mipantag ki Yahiya a tig iyan a "Sii ko kiyasong iyo ki Yahiya roo ko mitataog a kaden
na antonaa i pipikiren iyo a mailay niyo? Ba so gi a pekipipapipay o ndo?
25 Antonaa den i siyongowan iyo roo a pagilain iyo? Ba so mama a ndiditar piyapiya?
Siran oto a manga pipiya i nditaren ago pepaginetaw a kawasa na aya mababaling ko
torogan o dato.
26 Antonaa den i siyongowan iyo roo a pagilain iyo? Ba nabi? Oway, na teroon ko rekano
a lawan sekaniyan pen sa nabi.
27 Si Yahiya na aya minisorat ko Kitab a tig o Allah a
'Sogoon ko so siyogo aken a keona a di seka

a pekatiyagar ko lalan a pagokitan ka.'
28 “Teroon ko rekano," a tig pen i Isa, "a sii ko langon o manga manosiya na da a isa
kiran bo a ba lawan ki Yahiya. Ogaid na so lebi a mitatanan a taw ko Ndatoan o Allah na
lawan rekaniyan pen."
29(So langon a miyamakaneg ko manga katero i Isa, a rakes o manga panenekat sa bowis,
na tiyarima iran a ontol so inipaliyogat kiran o Allah, ka miyakisalawat siran ki Yahiya.
30 Ogaid na so manga Parisi ago manga goro ko Kitab na da iran tarimaa so takdir kiran o
Allah, ka da siran pakisalawat ki Yahiya.)
31 Tig pen i Isa a "Antonaa i keibaratan aken ko manga taw a kapapantagan sangkai a
masa? Antonaa i kedataran kiran?
32 Datar siran o manga wata a dii nggitagita sa padian a ipepelalis iran ko manga ped iran
a 'Mimboboniboniyan kami sa kakewing para rekano, na da kano sesayaw. Na
miyakamboko kami ko lalantangen, na da kano goraok.'
33 Kagiya makaoma si Yahiya a Pananalawat a dii powasa ago di maginom sa arak na
pitero iyo a 'Sosookan sekaniyan a saitan.'
34 Ogaid na miyakaoma so Wata o Manosiya a pekan ago peginom, na pitero iyo a 'Ilaya
niyo man angkai a bosaw ago tamereg, a ginawai o manga panenekat sa bowis ago manga
baradosa!'
35 Apiya oto na so ongangen o Allah na pepamataanan a ontol o langon a tomiyarima
on."
Si Isa sii ko Walay i Simon a Parisi
36 Aden a Parisi a miyanto ki Isa sa kaken. Na somiyong si Isa ko walay o Parisi na

miyakipagatoang on.
37 Sii sangkoto a siti na aden a babay ron a marata i olaola, na kagiya maneg iyan a pekan
si Isa sii ko walay o Parisi na somiyong sekaniyan on a maawid sa omoy a mapepeno a
lana mamot.
38 Kagiya makaoma na tomitindeg ko katatalikodan i Isa a tampar sa ai niyan. Pesegad
sekaniyan na miyabasa iyan a manga lo iyan so ai i Isa, na inisising iyan on a bok iyan.
Piyangangarekan iyan a ai niyan na inododan iyan sa lana mamot.
39 Kagiya mailay ai o Parisi a miyanto ki Isa na tig iyan sa ginawa niyan a "O benar a
nabi angkai a mama na kekilala niyan o antawaa ini a babay a someseko rekaniyan ago
antonaa i olaola niyan, ka baradosa."
40 Na gominiraw si Isa a tig iyan a "Simon, aden a peteroon ko reka."
Tig i Simon a "Teroa ngka den Goro."
41 Tig i Isa a "Aden a dowa a mama a miyakaotang ko dii mamagotang sa pirak. So isa
on na miyakaotang sa lima gatos a pelata a pirak, na so isa peman na lima polo.
42 Ogaid na kagiya di siran pekabayad a dowa na inirila iyan baden so otang iran. Na,
antawaa ko dowa oto kataw i lebi a kebabaya ko miyagotang kiran?"
43 “Aya pamikiran ko ron," a inisembag i Simon, "na so kiyarilaan iyan a mala i otang."
"Benar so sembag ka," a tig i Isa.
44 Na diningilan iyan so babay na pitero iyan ki Simon a "Miyailay ngka angkai a babay?
Somiyoled ako sa walay ngka na da ako ngka begi sa ig a ipagonab sa manga ai aken,
ogaid na miyabasa iyan a manga lo so manga ai aken na inisising iyan on a bok iyan.
45 Da ako ngka salama a arek, ogaid na giyangkai a babay na pepagarekan iyan den a
manga ai aken ipoon ko kiyapakaoma ko.
46 Da ngka lanai a olo aken, ogaid na liyanaan iyan sa lana mamot a manga ai aken.
47 Kagiya ka maoto na teroon ko reka a kiyarilaan den so madakel a manga dosa niyan a
aya kiyasabapan ko mala a kababaya iyan. Ogaid na so taw a kiyarilaan sa maito na maito
mambo so kababaya iyan."
48 Na pitero i Isa ko babay a "Kiyarilaan den so manga dosa ngka."
49 Na so manga ped a manga banto na tig iran sa manga ginawa iran a "Antawaa si aki ini
a pekarila sa manga dosa?"
50 Na pitero i Isa ko babay a "So paratiyaya ngka na aya reka miyakasabet. Baling ka a
makalilintad a ginawa ngka."
LOKAS 8
So manga Babay a Miyamangonot ki Isa
Oriyan oto na inipanagad i Isa so mala maito a manga inged a dii mangosiyat ago
pepakalangkapen iyan so Mapiya a Totol makapantag ko Ndatoan o Allah. Moonot on so
sapolo ago dowa a sokbat
2 Ago so pen so ped a manga babay a miyapamakapiya ko kiyasooki kiran a saitan ago
manga gedamen. Siran si Mariyam a bebetowan sa Magdalina a ron miyakaliyo so pito a
saitan,
3 Si Yowana a karoma i Kosa a komikibir ko walay i Hirod, ago si Sosana, ago madakel
pen a ped a manga babay a pepagperen iran si Isa ago so manga sokbat iyan a poon ko
manga tamok iran.
4 Madakel a manga taw a poon ko manga pagingedingedan a miyamanong ki Isa, na

kagiya matimo siran na piyanotol iyan kiran angkai a bayambayanan:
5 “Aden a mama a somiyong ko lopa iyan ka seod sa oniin. Sii ko kapeseod iyan na so
ped ko oniin na miyaolog ko lalan, na pindapodapoan o manga taw ago piyanoka o manga
papanok.
6 Miyaolog so ped on sii ko saliwaton a lopa, na so den so kiyalonaw niyan na miyalayon
ka di maoorameg so bote.
7 So ped ko oniin na sii miyaolog ko manga soroken a otan na mito siran merengan, na so
otan na kiyatanongan iyan so pamomolan.
8 Na so sabagi ko oniin na miyaolog ko masibokar a lopa, na kagiya makatoa na
miyamangonga sa mbabagatos." Kagiya matero ai i Isa na inipananalo niyan a "So aden a
tangila niyan a ipemakineg iyan na pamakineg baden!"

9 Iniise o manga sokbat iyan ki Isa o antonaa i maana ngkoto a bayambayanan.
10 Na somimbag si Isa a "So kasabota ko manga pageemaan makapantag ko Ndatoan o
Allah na inibegay rekano den, ogaid na so ped a taw na so di aken kiran dii teroon na
pepakaokiten aken ko manga bayambayanan. Aya sabap iyan na
'an siran makapangilailay a di siran bo pekakilala,

ago an siran makapamakineg a di siran bo pekasabot.'
11 “Giyai i maana o bayambayanan: so oniin na giyoto so katero o Allah.

12 So oniin a miyanga oolog ko lalan na giyoto so manga taw a miyamakineg ko katero,
ogaid na miyakaoma so Iblis na inagaw niyan so katero a poon ko manga poso iran kaan
siran di pekaparatiyaya ago di kesabet.
13 So oniin a miyanga oolog ko saliwaton a lopa na giyoto so manga taw a amay ka
pemakinegen iran so katero na terimaan iran a mabababaya siran ogaid na da ini
makambekaw ko poso iran. Peparatiyaya siran sa di bo matey, ogaid na amay ka
penepengan na pemangawa siran on.
14 So oniin a miyanga oolog ko manga soroken na giyoto so pepamakineg ko katero,
ogaid na so manga awid a akal, so manga kakawasaan, ago so kadodoniyai a manga
kabaya sangkai a kapepaginetaw iran na pemakatanong ko katero na di den kelotoan so
onga iran.
15 So oniin ko masibokar a lopa na giyoto so pepamakineg ko katero na tatagoon iran ko
mapiya ago maontol a poso iran, na ipeteros iran den taman sa mamangonga.
So Itatapok a Palitaan
16 “Da a taw a petentem sa palitaan a ba niyan tongkopa, o di na ba niyan betaden ko

didalem a katri, ka imbatog iyan baden sa poro kaan makailay sa maliwanag so
pepemanoled ko walay.
17 Ka so langon a isosolen na kepayag bo, ago so langon a pageemaan na ketokawan bo
ago kerinayag.
18 Kagiya ka maoto na iiktiyar kano ko kapepamakineg iyo. Ka so aden a rek iyan na
kebegan pen, ogaid na so da a rek iyan na apiya so ibibilang iyan a rek iyan na kowaan
on."
19 Mandiyadi na somiyong ki Isa so ina iyan ago so manga pagari niyan a mama, ogaid
na da siran on makaobay sabap ko kadakel o manga taw.
20 Na aden a mitero on ki Isa a "Si ina a ka ago so manga pagari ngka na kititindeg sa
liyo a kebaya siran reka makipegilaya."
21 Pitero kiran langon i Isa a "Aya ina aken ago manga pagari aken na siran oto a
pepamakineg ko katero o Allah ago petoman on."
Siyaparan i Isa so Barabarat
22 Miyakaisa a gawii na miyageda si Isa ko awang a ped o manga sokbat iyan, na pitero
iyan kiran a "Romipag tano ko ranaw, " na tomiyolak siran.
23 Sii ko di ran dii kapelayalayag na tiyorog si Isa. Na somiyamber so tanto a mabager a
ndo sa ranaw na pekepeno so awang a ig, na tanto siran a miyamiligro.
24 Miyobay ki Isa so manga sokbat iyan na piyokaw iran a tig iran on a "Kadnan,
Kadnan, magaan tano den migaled!"
Mimbowat si Isa na siyaparan iyan so ndo ago so ig a dii mbegel sa manga ala. Na
gominek so ndo ago so manga begel na lomingen den.
25 Na pitero iyan ko manga sokbat a "Anda den so paratiyaya niyo?"
Na miyalek siran ago miyamemesa na iniise o oman i isa ko ped iyan a "Antawaa ini a
mama? Apiya so ndo ago so ig na pesogoon iyan na petoman siran rekaniyan?"
Piyakapiya i Isa so Mama a Sosookan
26 Tomiyaros siran lomayag roo sa inged o manga Girasin roo ko sabala a ranaw a Galili.
27 So kiyatepad i Isa sa lopa na inalaw sekaniyan o mama a sosookan a manga saitan a
poon ko siti. Miyatey den na da den nditar angkai a mama ago da den makabaling sa
walay, ka sii gegenek ko manga koba.
28 Kagiya mailay niyan si Isa na kominisek sekaniyan, na gomipe ko hadapan iyan a
inilalis iyan sa matanog a "Hey Isa, Wata o Allah a Lebi a Maporo, antonaa i pagangin ka
raken? Pengnin ko reka a di ako ngka perasaya!"
29 Pitero iyan ai ka siyogo i Isa so saitan a liyo ko mama. Ka lalayon sekaniyan ipepaar o
saitan, na apiya pen pepagipaten a papatongen a rantay a manga lima niyan ago manga ai
na pekeredot iyan baden so manga rantay, na ipendendeg sekaniyan o saitan ko mitataog a
manga darpa.
30 Iniise rekaniyan i Isa a "Anta i ngaran ka?"
Inisembag iyan a "Sagorompong," ka madakel a manga saitan a somosook rekaniyan.
31 Na miyangangampedian ki Isa so manga saitan sa di niyan siran sogoon sa kasong iran
ko landeng a da a pitetamanan a kadalem iyan.
32 Marani sangkoto a darpa na aden a talon roo a manga baboy a pepangangan ko silid o
bobongan, na inakol o manga saitan ki Isa a peroon iyan a kapakasook iran ko manga
baboy. Miniyog si Isa,
33 Na giyoto a mililiyo so manga saitan ko mama na miyamanook siran ko manga baboy.
Na minggagaan siran malalagoy ko silid na miyanga oolog ko pampang o ranaw na palaya
siran den miyanga aled.
34 So manga tomatagikor ko manga baboy na kiyabantayan iran so miyanggolaola o
manga baboy, na miyalalagoy siran ago piyamanotol iran ko siti ago sii ko dii
pagonayonayan.
35 Miyamanong roo so manga taw ka pagilain iran angkoto a miyanggolaola. Kagiya
makaoma siran ki Isa na miyailay iran a moontod ko obay a ai i Isa so mama a miyakaliyo
ron so manga saitan a ndiditar sekaniyan ago miyakapiya i pamikiran, na miyanga alek
siran.
36 Siran oto a miyakamasa ko kiyapakapiyaa ko sosookan a mama na piyanotol iran ko
manga taw a somiyong roo.
37 Na so langon angkoto a madakel a taw a poon ko inged o manga Girasin na inakol iran
ki Isa a awai niyan siran, ka riyaot siran o tanto a kalek. Sabap roo na miyageda si Isa ko
awang ka kesoy sa sabala a ranaw.
38 So mama a lominiyo ron so manga saitan na piyangni niyan ki Isa a makaonot on,
ogaid na piyakabaling i Isa a tig iyan a
39 “Kasoy ka ko walay ngka na panotola ngka so pinggolaola reka o Allah." Na
komiyasoy sekaniyan na piyakalangkap iyan ko solesoled a siti so pinggolaola rekaniyan i
Isa.
So Wata i Yairos ago so Babay a Tetalogedam
40 Kagiya makakasoy si Isa ko sabala a ranaw na miyababaya so madakel a taw sa

kiyatarimaa iran on, ka pakatatalingomaan iran langon.
41 Samaoto na miyakaoma on so isa a mama a bebetowan sa Yairos a olowan sa
sinagoga, na somiyodiyod sekaniyan ko hadapan i Isa na piyangni niyan on a somong ko
walay niyan
42 Ka pakapapatain so botong a wata iyan a babay a manga sapolo ago dowa ragon a idad
iyan.
Sii ko kapesong roo i Isa na madakel a manga taw a makarorompir rekaniyan.
43 Lomolook kiran so isa a babay a di on keda so kaperogoi ron ko miyakasapolo ago
dowa ragon. Miyanggasto niyan den so langon o tamok iyan ko kapepakipamolong iyan,
ogaid na da a pamomolong a ba niyan miyapakapiya so babay.
44 Na miyobay sekaniyan ko talikodan i Isa na siko iyan so sagayadan o kimon iyan, na
sakotika den a gominek so kapendogayas o rogo iyan.
45 Iniise i Isa a "Antawaa i somiko raken?"
Kagiya makapewal siran langon na tig i Pidro a "Kadnan, madakel a manga taw a
lomilibet reka a makarorompir reka."
46 Ogaid na pitero i Isa a "Aden a somiko raken, ka miyagedam aken a lominiyo raken a
kabatowa."
47 Kagiya mailay o babay a kiyatokawan den so pinggolaola niyan na miyobay ki Isa a
sarta a tatabaden. Gomipe sekaniyan ko ai niyan na piyanotol iyan ko kamamasaan o
langon oto a taw o ino niyan sekoa ago so kiyapakapiya niyan sa sakotika.
48 Na pitero rekaniyan i Isa a "Wata aken, so paratiyaya ngka na aya ngka inipakabager.
Baling ka a lomilintad."
49 Sii ko di sii pen dii kateroa i Isa na aden a miyakaoma a poon ko walay o olowan sa
sinagoga, na pitero iyan ki Yairos a "Miyatay den so wata a ka. Di ngka den dii tekora so
Goro."
50 Miyaneg ai i Isa na pitero iyan ki Yairos a "Di ka pekelek. Paratiyaya ka baden, ka
pekabager so wata a ka.'
51 Kagiya makaoma si Isa ko walay i Yairos na da a ba niyan on piyakasoled a ped iyan a
rowar ki Pidro, si Yahiya, si Santiyago ago so ama o wata ago so ina iyan.
52 So langon a taw sii ko walay na dii nggogoraok ago dii ndidiyagaw sabap ko wata.
Ogaid na tig i Isa a "Di kano penggoraok; da matay so wata, ka totorogen baden."
53 Na inikekala iran si Isa, ka katawan iran a miyatay den so wata.
54 Ogaid na tiyayongan i Isa a lima niyan na tiyalowan iyan a tig iyan a "Wata ko,
mbowat ka!"
55 Na komiyasoy so niyawa niyan na sarta den a mimbowat. Na inisogo kiran i Isa a
began so wata sa pangenengken.
56 Tanto a miyamemesa so manga lokes iyan, ogaid na pisana kiran i Isa a di iran
petetaroa ko apiya antawaa so miyanggolaola.
LOKAS 9
Siyogo i Isa so Sapolo ago Dowa a Sokbat
Tinimo i Isa so sapolo ago dowa a sokbat iyan na bigan iyan siran sa kabatowa ago kapaar
sa kapakaliyowa ko langon a saitan ko kisosookan ago so kapamolongi ko manga
gedamen.
2 Na piyakalalakaw niyan siran sa kapakalangkapa iran ko Ndatoan o Allah ago an iran
mapamakapiya so pepanga sasakit.
3 Pitero iyan kiran a "Sii ko kapelalakaw niyo na di kano pagawid sa apiya antonaa; di
kano pagawid sa teken, o di na pontir, o di na pangenengken, o di na pirak, aya pen o ba
so isembi iyo a nditaren.
4 Apiya anda a walay a pekabolosen kano ron na roo kano den taman sa mawa kano
sangkoto a inged.
5 Na apiya anda a di kano terimaan o manga taw ron na awai niyo angkoto a inged na
popoga niyo so bayanek ko manga ai niyo sa kapelalangi niyo kiran."
6 Na gomiyanat so manga sokbat a ipepanagad iran so oman i inged a pepakalangkapen
iran on so Mapiya a totol ago pepamakapiyaan iran so pepanga sasakit ko apiya anda.
Kiyalibogan si Hirod
7 Si Hirod a aya ndadato sa Galili na miyaneg iyan so langon ai a dii nggolaolaan na tanto
sekaniyan a kiyalibogan, ka dii teroon o ped a taw a miyaoyag bo si Yahiya a poon ko
miyamatay.
8 So pen so ped na di iran dii teroon a miyakagemaw so Iliyas, na tig o manga ped a
miyaoyag bo so isa ko miyanga oona a nabi.
9 Ogaid na tig i Hirod a "Piyakipotaan aken sa olo si Yahiya, na antawaa bes angkai a
mama a madakel a manga nganin a pekeneg aken makapantag rekaniyan?" Na
sisingayoon i Hirod a kailaya niyan ki Isa.
10 Kagiya makakasoy ki Isa so manga siyogo iyan na piyanotol iran on so langon a

miyanggolaola iran. Na piyakaonot iyan siran na somiyong siran sa da a ped iran ko isa a
siti a bebetowan sa Bitsaida.
11 Ogaid na kiyatokawan ai o madakel a taw na miyamanondog siran rekaniyan. Initapi
siran i Isa na pitero iyan kiran so makapantag ko Ndatoan o Allah, na piyamakapiya niyan
pen so pepanga sasakit.
12 Sii ko kaperimon iyan den na miyobay ki Isa so sapolo ago dowa a sokbat a tig iran a
"Pakalalakawa ngka angkai a madakel a taw ko melilibeta rektano a manga inged ago dii
pagonayonayan kaan siran on makapangowa sa pangenengken ago ron mamakaiga, ka
sisii tano sangkai a mitataog a darpa."
13 Na pitero kiran i Isa a "Sekano den i pamegay kiran sa kekan iran."
Tig iran a "Lima timan bo a paan ago dowa timan a seda a sisii rekami. Ba ngka kabaya a
lomalakaw kami ago mamasa sa pangenengken a pekikan ko langon ai a manga taw?" (14
Ka manga lima nggibo a manga mama a ndodoo.)
Ogaid na pitero i Isa ko manga sokbat iyan a "Pakaontoda niyo siran a pelompolompoken
siran sa manga ndilima polo."
15 Pinggolaola ini o manga sokbat na piyakaontod iran siran langon.
16 Kinowa i Isa so lima timan a paan ago so dowa a seda na lomiyangag sa langit ago
miyanalamat. Na piyangopak iyan so paan ago so manga seda na inipamegay niyan ko
manga sokbat an iran mipagana ko madakel a taw.
17 Na palaya siran den komiyan ago miyanga oosog, na piyanimo o manga sokbat so
miyasama iran na minipeno ko sapolo ago dowa a reban.
18 Miyakaisa a gawii sii ko kapepangangarapan i Isa a sekaniyan bo, na miyobay

rekaniyan so manga sokbat iyan. Na iniise iyan kiran a "Antawaa kon ako a kabasa o
manga taw?"
19 Pitero iran a "Seka kon si Yahiya a Pananalawat, na pitero o manga ped a seka si
Iliyas, na so pen so ped na tig iran a isa ka ko miyanga oona a nabi a miyaoyag bo."
20 Na iniise kiran i Isa a "Sekano, antonaa i mapetero iyo o antawaa ko?"
Somimbag si Pidro a "Seka so Al Masih a siyogo o Allah."
21 Na liyalangan siran i Isa sa di iran ai petetaroa ko apiya antawaa.
22 Na tig iyan pen a "So Wata o Manosiya na disomala a madakel a ikerasay niyan, na di
sekaniyan terimaan o manga pelokelokesen o manga Yahodi, ago so manga poporo a
imam ago so manga goro ko Kitab. Mbonoon sekaniyan na keoyag bo sii ko ikatelo
gawii."
23 Na pitero iyan ko langon o manga taw a ""O aden a kebaya raken tomondog na
disomala a itolak iyan a ginawa niyan ago posain iyan so kros iyan oman gawii ago
pegonot raken.
baden. Ogaid na apiya antawaa i iperila iyan so kaoyagoyag iyan sabap raken na kesabet
iyan.
25 O miyakowa o taw so dalem a doniya a sarta a miyalaga o di na minisangkop a ginawa
niyan na antonaa i miyanggona niyan on?
26 Apiya antawaa i ikeya ako niyan ago so manga katero aken na ikeya sekaniyan mambo
o Wata o Manosiya amay ka makaoma a misasarta on so bantogan iyan ago so bantogan o
Ama ago so soti a manga malaikat.
27 Teroon ko rekano a mataan den a aden a ped ko makadadarpa sii a kemasaan iran so
Ndatoan o Allah sa di iran pen kapatay."
28 Kagiya mamakawalo den gawii ko kiyateroa niyan sii na tomiyakedeg si Isa ko palaw
ka pengangarapan, na piyakaonot iyan si Pidro, si Yahiya ago si Santiyago.
29 Sii ko kapepangangarapan iyan na miyasalin so paras iyan, na kominindat so manga
nditaren iyan sa kapoti iyan.
30 Na minitekaw a miyakagemaw so dowa kataw a mama a si Mosa ago si Iliyas a dii
makimbitiyarai ki Isa.
31 Maririnayag so bantogan iran na aya iran dii mbibitiyaraiyan na so kapatay i Isa a
disomala a keokitan iyan roo sa Yarosalim.
32 Si Pidro ago so manga ped iyan na tanto siran a piyangepan a torog, ogaid na kagiya
mamakanaw siran na miyailay iran so bantogan i Isa ago so dowa kataw a tomitindeg a
maabay ron.
33 Sii ko kapagawai den angkoto a dowa kataw ki Isa na pitero rekaniyan i Pidro a
"Kadnan, mapiya kagiya sisii tano. Magembaal kami sa telo a lawig, a so isa on na para
reka, so isa on na para ki Mosa, na so isa on na para ki Iliyas." (Ogaid na di katawan i
Pidro i di niyan dii teroon.)
34 Sii ko di niyan pen dii katero na miyakagemaw a gabon na siyayapan iyan siran, na
miyanga alek so manga sokbat ko kiyalibeta kiran o gabon.
35 Miyakapoon a sowara ko gabon a tig iyan a "Giyai so Wata aken a pinili aken.
Pamakinega niyo sekaniyan!"
36 Kagiya makatero so sowara na miyailay iran a si Isa na da a ped iyan. Sa masa oto na
piyagma ini o manga sokbat, ka da iran tetaroa ko apiya antawaa so kiyamasaan iran roo.
37 Kagiya talondog a gawii na tomiyondagay siran ko palaw na inalaw si Isa o tanto a

madakel a taw.
38 Na miyananalo so isa a mama a lomolook kiran a tig iyan a "Goro, kapedipedi ka bo
na ilaya ngka a wata aken ai a mama, ka aya ko bo wata.
39 Pepakapasangan sekaniyan o saitan a sarta a pekisek, na di niyan dii pakatetaliyaan a
lawas iyan ago pendidi a ngari iyan. Di ketey a katataregi niyan on ka lalayon iyan
peperanegen.
40 Piyangni aken ko manga sokbat ka a pakaliyowa iran na da iran magaga."
41 Na pitero kiran i Isa a "Sekano a da a paratiyaya niyan ago mategas i olo a manga taw.
Ay katey pen a disomala a kipageepedaan aken rekano ago kapanginginsabari rekano?"
Na pitero iyan ko mama a "Wita ngka sii so wata a ka."
42 Kagiya pepakarani so wata na inilampes o saitan, na piyakatetaliya iyan a lawas iyan.
Ogaid na siyaparan i Isa so saitan, na sarta a piyakapiya niyan so wata na piyalad iyan ko
ama iyan.
43 Na palaya siran miyamemesa ko kala i gees o Allah.
Sii ko di ran dii kapamemesa ko langon a pinggolaola i Isa na pitero iyan ko manga
sokbat iyan a
44 “Tanodi niyo angkai a peteroon ko rekano. So Wata o Manosiya na peladen ko kapaar
o manga taw."
45 Ogaid na da iran sabota i maana angkoto a pitero iyan. Piyagma ini kiran kaan iran di
kesaboti, na inikalek iran o ba iran on isean so makapantag sii.
Antawaa i Lebi a Mala
46 Mipoon ndadaowai so manga sokbat o antawaa i lebi kiran a mala.

47 Katawan i Isa so mapipikir iran na kominowa sekaniyan sa wata na piyakatindeg iyan
ko obay niyan,
48 Na pitero iyan kiran a "Apiya antawaa i terima sangkai a wata sii ko ingaran aken na
saken i terimaan iyan. Na so terima raken na terimaan iyan mambo so somiyogo raken.
Ka saden sa ibababa iyan a ginawa niyan ko kalangolangon iyo na aya lebi a mala."
So kena a ba Rekano Somosopak na Tomatampil Rekano
49 Pitero i Yahiya a "Kadnan, miyakailay kami sa mama a pepakaliyo ko manga saitan sii
ko ingaran ka, na tipengan ami somapar sekaniyan ka kena a ba rektano maaped."
50 “Di niyo pesepari," a tig i Isa, "ka so kena a ba rekano somosopak na tomatampil
rekano."
So isa a Inged sa Samariya a da Tarima ki Isa
51 Sii ko kapepakarani den o masa a kibayaon ki Isa sa kasorgaan na piyasad iyan sa

ginawa niyan a song sa Yarosalim.
52 Somiyogo sekaniyan sa manga sogo a miyaona rekaniyan, na somiyong siran ko isa a
inged sa Samariya, ka petiyagar siran roo ko kapekaoma niyan.
53 Ogaid na so manga magiinged roo na da iran tarimaa si Isa, ka marayag a pegantap
sekaniyan sa Yarosalim.
54 Kagiya mailay ai o manga sokbat a si Santiyago ago si Yahiya na tig iran a "Kadnan,
ba ngka kabaya a isogo ami a moran sa apoy a poon sa langit kaan siran mabinasa?"
55 Ogaid na dominingil kiran si Isa na pimbongetan iyan siran,
56 Na tomiyaros siran den lomalakaw roo ko salakaw a inged.
So manga Taw a Kebaya Mamangonot ki Isa
57 Sii ko kapelalakaw iran ko lalan na pitero o isa a mama ki Isa a "Magonot ako reka
apiya anda ka song."
58 Pitero rekaniyan i Isa a "So manga tingkalong na aden a manga lekowa iran, ago so
manga papanok na aden a manga salag iran. Ogaid na so wata o Manosiya na da den a
darpa a keigaan iyan."
59 Na pitero i Isa ko salakaw a mama a "Pegonot ka raken."
Ogaid na tig o mama a "Kadnan, peroa ngka a mbaling ako a daan, ka ipelebeng aken so
ama aken."
60 Somimbag si Isa a "Awai ngka so miyamatay, ka kilebeng iran so miyamatay kiran.
Ogaid na seka den, na lalakaw ka na pepangosiyaten ka so makapantag ko Ndatoan o
Allah."
61 Na pitero o ped a taw a "Magonot ako reka, Kadnan, ogaid na peroa ngka a magodas
ako a daan ko pamiliya ko."
62 Na pitero rekaniyan i Isa a "Apiya antawaa i mipoon ndado a lalayon iyan pegilain so
malilikod iyan na kena a ba mapapatot ko Ndatoan o Allah."
LOKAS 10
Siyogo i Isa so Pito Polo ago Dowa
Oriyan ai na miyamili si Isa sa pito polo ago dowa a ped a manga mama na piyakalalakaw
niyan sa kangginadowa a piyakaona niyan ko oman i inged ago darpa a magaan iyan
songowan.
2 Pitero iyan kiran a "Madakel a peragonen, ogaid na mainot so di ron dii nggagalebek.
Kagiya ka maoto na pangangarapan kano ko Kadnan a kirek ko peragonen sa pakasongen
iyan on so ped pen a gomagalebek a makaperagon on.
3 Lalakaw kano den, na tanodi niyo a pesogoon ko sekano a datar o manga nati a bilibili
sii ko look o manga wawaraw a aso.
4 Di kano pagawid sa pirak, pontir, o di na tinilas, na di kano tereg lomalakaw sa
kaperamata niyo a bitiyara ko apiya antawaa.
5 “Apiya anda a walay i mbolosan iyo na onai niyo tero a 'Pengnin ko a makalintad
angkai a walay.'
6 O aden a mababaling roo a pekebabayaan iyan so kalilintad na ketatap on so salam iyo,
ogaid na o da, na kesoy rekano baden so salam iyo.
7 Sii kano tareg sangkoto a walay, na kan kano ago inom kano ko ipegana iran rekano, ka
so gomagalebek na patot a sokayan. Di niyo pakapetetepasaa so manga walay.
8'Apiya anda a siti i songowan iyo a ron kano iran terimaa, na kana niyo so apiya antonaa
i ipegana iran rekano.
9 Pamakapiyaa niyo so pepanga sasakit sangkoto a siti na teroa niyo ko manga taw roo a
'Miyakarani rekano den so Ndatoan o Allah.'
10 Ogaid na apiya anda a siti i songowan iyo a di kano iran roo terimaan na liyo kano ko
poblasiyon na teroa niyo a
11'Apiya so bayanek ko inged iyo a domedeket ko manga ai ami na sisingen ami sa
kapelalangi ami rekano; ogaid na tanodi niyo a miyakarani den so Ndatoan o Allah.'
12 Teroon ko rekano a sii ko gawii a kapengokom na lebi pen a makep so kandanega ko
manga taw sa Sodom a di so kandanega ko manga taw sangkoto a siti.
So manga Inged a da Pamaratiyaya
13 “Kemorkaan kano a manga taw sa Korasin, ago kemorkaan kano san sa Bitsaida, ka so
manga ala i kabatowa a galebek a miyanggolaola rekano san, na o miyanggolaola roo sa
Tiro ago sa Sidon na miyatey den o kowan a kiyatalikodan iran so manga dosa iran a
pepakiilay iran ai ko kaoontod iran a somosolot sa sako ago pepirikan iran sa manga ombi
a manga olo iran.
14 Sii ko gawii a kapengokom na lebi pen a makep so kandanega ko manga taw sa Tiro
ago sa Sidon a di so kandanega rekano.
15 Sekano mambo roo sa Kapirnaom, ba kano kipangkat sa taman sa kasorgaan? Kena,
ka pagologen kano baden roo sa kanarakaan!"
16 Na tig i Isa ko manga sokbat iyan a "So pepamakineg rekano na saken i
pepamakinegen iyan, na so di rekano terima na saken i di niyan terimaan, na so telikod
raken na telikodan iyan so somiyogo raken."
So Kiyakasoy o Pito Polo ago Dowa
17 Oriyan iyan na miyakakasoy so pito polo ago dowa kataw a mama a mabababaya siran,
na pitero iran a "Kadnan apiya so manga saitan na miyakimbaya rekami igira a
piyamanogo ami siran sii ko ingaran ka."
18 Somimbag si Isa a "Miyailay aken so Iblis a domimbeng a datar o kilakilat a poon sa
kasorgaan.
19 Bigan aken sekano sa kapaar sa kadapoi niyo ko manga nipay ago so manga orang, ago
so kapegesa niyo ko langon a kapakagaga o Ridoay, na da den a ba rekano pekasakit.
20 Ogaid na di kano kebabaya sabap sa miyakimbaya rekano so manga saitan, ka
kababaya kano baden sabap sa miyamangisorat so manga ngaran iyo roo sa kasorgaan."
Miyababaya si Isa
21 Samaoto na tanto a miyababaya si Isa a nggolalan ko Soti a Roh, na tig iyan a "Hey
Ama a Kadnan sa kasorgaan ago giya doniya, pepodin ko seka, ka so pageemaan ka ko
manga somasabot ago manga oongangen na piyayag ka ko da a manga peleng iyan.
Mataan den, Ama, a pinggolaola ngka ini ka ikasosoat ka a kabaya a ka.
22 “So Ama aken na inisarig iyan raken so langon taman. Da a matao ko Wata a rowar ko
Ama, na da a matao ko Ama a rowar ko Wata ago so kebayaan o Wata a peyagan iyan
on."
23 Na somiyangor si Isa ko manga sokbat iyan na pitero iyan kiran a siran bo a
"Rarakmatan kano a pepakailay ko manga nganin a pekeilay niyo,
24 Ka teroon ko rekano a madakel a manga nabi ago manga dato a kebayaan iran milay so
pekeilay niyo, ogaid na da iran mailay. Na kebayaan iran maneg so miyaneg iyo, ogaid na
da iran ai maneg."
So Bayambayanan makapantag ko Mapiya a Taw sa Samariya

25 Miyakaisa a gawii na tominindeg so isa a goro ko Kitab sa katepengi niyan ki Isa.
Iniise iyan on a "Goro antonaa i disomala a penggolaolaan ko kaan ako makatarima sa
kaoyagoyag a da a kaposan iyan?"
26 Tig i Isa a "Antonaa i misosorat ko Kitab? Andamanaya i kiyasabota ngka on?"
27 Somimbag sekaniyan a "Kababayai ngka so Kadnan a Tohan ka sa iklas ko poso ngka,
ago iklas ko niyawa ngka, ago iklas ko bager ka, ago iklas ko iman ka, na kababayai ngka
so siringan ka a datar a ginawa ngka."
28 Tig i Isa a "Osto so inisembag ka. O nggolaolaa ngka ini na keoyag ka."
29 Ogaid na kabaya angkoto a goro a makilala sekaniyan a maontol, na iniise iyan ki Isa a
"Antawaa bes i siringan aken?"
30 Inisembag i Isa a "Aden a mama a pelalakaw a poon sa Yarosalim ka pesong sa
Yariko, na inayanan sekaniyan o manga tanganiyaya. Likasan iran, na kagiya maperaneg
iran na inawaan iran a samabo di petay.
31 “Miyasalak a aden a imam a pegokit sangkoto a lalan, na kagiya mailay niyan angkoto
a mama na siyagadan iyan baden a sii miyokit ko sabala a kilid o lalan.
32 Datar oto mambo a miyakaoma roo so isa a Libitiyo, na kagiya mailay niyan so mama
na ba niyan den mambo siyagadan ko sabala a kilid o lalan.
33 “Ogaid na aden a Isamariyan a pelalakaw roo a miyaoma niyan angkoto a mama, na
kagiya mailay niyan na inikapedi iyan.
34 Inobay niyan so mama na inododan iyan sa lana ago arak so manga pali iyan ago
biyongkosan iyan. Piyakakoda iyan ko koda iyan na inowit iyan ko walay a pembolosan
na pitebal iyan.
35 Kagiya mapita na bigan iyan sa dowa a timan a pelata a pirak so komikibir ko
pembolosan, na iniinsarat iyan on a 'Siyapa ngka a angkai a mama na amay ka komasoy
ako sii bo na beyadan ko seka ko miyanggasto ngka a di sii ketarotopan.' "
36 Tig pen i Isa a "Antawaa sangkoto a telo kataw i pipikiren ka a tomiyoman ko okitokit
ko kasisiringana ko mama a inayanan o manga tanganiyaya?"
37 Na tig o goro a "So komiyapedi on."
Tig i Isa a "Lalakaw ka den na nggolaola ka mambo sa datar oto."
Inibentel i Isa si Marta ago si Mariyam
38 Sii ko kapeteros lomlalakaw i Isa ago so manga sokbat iyan na miyakaoma siran ko isa
a inged a aden a babay ron a aya ngaran iyan na si Marta, na piyakabolos iyan si Isa ko
walay niyan.
39 Aden a pagari niyan a babay a bebetowan sa Mariyam, na miyontod sekaniyan ko obay
o ai o Kadnan a pepamakineg ko di niyan dii teroon,
40 Ogaid na matetembang si Marta ko madakel a manga galebek iyan. Na miyobay si
Marta ki Isa a tig iyan a "Kadnan, ba ngka da tagoa sa ginawa a ba ako baden pepegilaya
o pagari aken ko di aken dii kanggolaolaa ko langon o manga galebek sa walay? Teroa
ngka on a ogopi ako niyan!"
41 “Marta, Marta," a tig o Kadnan, "pepakaawiden ka a akal ka ago pekelalongan ka ko
madakel a manga nganin,
42 Ogaid na isaisa bo a di mipendarainon. Miyapili i Mariyam so lebi a mapiya, na di ron
den keagaw."
LOKAS 11
So Ndao i Isa makapantag ko Kapangangarapan
Miyakaisa a gawii na pepangangarapan si Isa roo ko isa a darpa. Kagiya makapasad

mangangarapan na pitero on o isa ko manga sokbat iyan a "Kadnan, pangendaon ka
rekami so kapangangarapan a datar o kiyapangendaowa i Yahiya ko manga sokbat iyan."
2 Pitero kiran i Isa a 'Igira a pepangangarapan kano na teroa niyo a
'Hey Ama,
Pengnin ko a kapagaadatan so soti a ingaran ka;
makatalingoma so Ndatoan ka.
3 Began ka rekami sa oman gawii
so pangenengken a kailangan ami sangkoto a gawii.
4 Rilai kami ngka ko manga dosa mi
a datar mambo o kaperilai ami ko langon o miyakasela rekami.
Na di kami ngka pekigawiin.' "
5 Pitero pen i Isa ko manga sobbat iyan a "Ibarat na aden a isa rekano a song ko walay o
ginawai niyan sii ko kiyalooki ko gawii, na peteroon iyan on a 'Hey pagariya, otangi ako
ngka sa telo timan a paan,
6 Ka miyakaoma ko walay aken so layok aken sii ko kapelalakaw niyan, na da den a
mipegana ko ron.'
7 Na giyoto a isembag rekaniyan o ginawai niyan sa soled a walay a 'Di ako ngka
pesemoka! Kiyalekeban den so pintoan, na miyakaiga kami ago so manga wata aken. Di
ako makapembowat sa ba ko seka on begi.'
8 Na teroon ko rekano," a tig i Isa, "a apiya pen di den pembowat so ginawai niyan sa
kambegi niyan on sabap bo ko di ran dii kangginawai, na pembowat sekaniyan den sabap
ko kipetarosen o mama ko kapepamangni niyan, na mbegan iyan sa apiya antonaa i
kebayaan iyan.
9 “Kagiya ka maoto na teroon ko rekano a pepamangni kano baden ka kebegan kano;
mbabanog kano ka pekatoon kano; pepanonotok kano ko pintoan ka pelekaan rekano.
10 Ka oman i isa a pepamangni na mbegan, na so dii mbabanog na pekatoon, na so
pepanonotok ko pintoan na pelekaan ai rekaniyan.
11 “Ba aden a isa rekano a kiwata a mbegan iyan sa nipay so wata iyan a pepemangni ron
sa seda?
12 O di na ba ngka sekaniyan mbegi sa orang o pepamangni sa orak a manok?
13 Ka apiya pen o manga rarata kano i olaola na matao kano megay sa manga pipiya a
pamemegayan ko manga wata iyo. Kagiya ka maoto na taralebi pen a imbegay rekano o
Ama iyo a ndodoo sa kasorgaan so Soti a Roh ko siran oto a pepamangni ron."
14 Samaoto na piyakaliyo i Isa so isa a saitan a somosook ko mama a amang, na kagiya

makaliyo den so saitan na miyakatero so mama na miyamemesa so madakel a taw.
15 Ogaid na pitero o ped kiran a "Pepakaliyon iyan so manga saitan a nggolalan ko
kapaar o Iblis a dato o manga saitan."
16 Aden a manga ped a tipengan iran si Isa, ka piyamangni iran on a pakiilain iyan kiran
so piyakamemesa a nanao a poon sa kasorgaan.
17 Ogaid na katawan i Isa so mapipikir iran na pitero iyan kiran a "Oman i isa ka ndatoan
a maooparik a mamagonaya tidawa so manga taw ron na di kemboway; na oman i isa ka
walay a maooparik a mamagonaya siran sosopaka na kebinasa.
18 So mambo so Iblis, na o pesopaka niyan so ndadatoan iyan a manga saitan na
andamanaya i kakemboway o ndatoan iyan? Ka pitero iyo a pepakaliyon ko so manga
saitan a nggolalan ko kapaar o Iblis.
19 Na o pepakaliyowa ko ko manga saitan a nggolalan ko kapaar o Iblis na andamanaya i
kapepakaliyowa kiran o manga kaom iyo? Siran den i pekikilala sa manga ribat kano den.
20 Aya mataan na pepakaliyon aken so manga saitan a nggolalan ko kapaar o Allah, na
giyai i poriba sa miyakaoma rekano den so Ndatoan o Allah.
21 Amay ka so mabager a mama a nggogomaan piyapiya na pegipaten iyan so walay
niyan na di mapanekew so manga pagigimo niyan.
22 Ogaid na amay ka nggobat rekaniyan so lebi pen a mabager a di sekaniyan na kepeges
iyan angkoto a kiwalay na pagagaon iyan on so langon o gomaan a sasanaan iyan, na
pembagibagiin iyan so manga nganin a piteban iyan.
23 “So kena a ba raken tomatampil na makasosopak raken, na so di raken magogop
makipetimo na baden makapembelabelag."
So Kiyakasoy o Saitan
24 “Amay ka makaliyo so saitan ko lawas o taw na pegenebeneb ko manga darpa a

mamara a pembabanog sa kadekean iyan. O di ron pekatoon na peteroon iyan a 'Komasoy
ako baden ko andang a babalingan a inawaan ko.'
25 Amay ka makakasoy ron na maoma niyan a lompiyo ago matatanor.
26 Na melalakaw peroman na pekaonoten iyan so pito a ped a saitan a lebi pen a marata a
di sekaniyan, na pemanookan iran angkoto a taw na roo siran mbaling. Na marata so
kaposan a kapakambebetad iyan a di so miyaona."
27 Sii ko di sii dii kateroa i Isa na aden a babay a lomolook ko madakel a taw a
inipananalo niyan a "Rarakmatan so babay a mimbawata reka ago kiyasosowan ka!"
28 Ogaid na aya inisembag i Isa na "Aya lebi pen a rarakmatan na so siran oto a
pepamakineg ko manga katero o Allah ago petoman on!"
So Pangni ko Piyakamemesa a Nanao
29 Sii ko kapekelimod o madakel pen a manga taw ki Isa na pitero iyan a "Manga rarata
so manga taw a kapapantagan sangkai a masa! Pepamangni siran sa piyakamemesa a
nanao, ogaid na da den a imbegay kiran a nanao a rowar ko nanao ki Yonas.
30 Ka si Yonas na miyabaloy a nanao ko manga taw sa Niniba, na datar oto mambo a so
Wata o Manosiya na kebaloy a nanao ko kapapantagan imanto a manga taw.
31 “Sii ko gawii a kapengokom na magembowat so Bai sa Pagabagatan na ndewain iyan
so kapapantagan imanto a manga taw, ka lomiyalakaw sekaniyan a poon sa tanto a
mawatan kaan iyan mapamakineg so ongangen i Solaiman. Na sisii den imanto so lawan
pen ki Solaiman.
32 Sii ko gawii a kapengokom na pemangembowat mambo so manga taw sa Niniba na
ndewain iran so kapapantagan imanto a manga taw, ka piyamanalikodan iran so manga
dosa iran sii ko kiyanega iran ko kiyapangosiyat i Yonas. Na sisii den imanto so lawan
pen ki Yonas."
So Solo o Lawas
33 “Da a taw a petentem sa palitaan a ba niyan solenen, o di na ba niyan sapengi ko

asada, ka imbatog iyan sa poro kaan makailay sa maliwanag so pepamanoled roo.
34 So mata ngka na aya solo o lawas ka. O mapiya so manga mata ngka na kaliliwanagan
so intiro a lawas ka, ogaid na o marata so manga mata ngka na kalilibotengan so intiro a
lawas ka.
35 Kagiya ka maoto na iktiyari ngka o ba kalibotengi so kaliwanag a madadalem reka.
36 Sabap roo na amay ka kaliliwanagan so intiro a lawas ka a da den ba on kalilibotengan
na maliwanag den piyapiya a datar bo o kapelindawi reka o kasindaw o solo."
Diyaway i Isa so manga Parisi ago so manga Goro ko Kitab
37 Kagiya makapasad tero si Isa na biyoyo o isa a Parisi ko kaken. Na somiyoled

sekaniyan ko walay o Parisi na miyakipagatoang on.
38 Miyainengka o Parisi a da pangonab si Isa ko da niyan pen kakan, na miyamemesa
baden.
39 Na pitero rekaniyan o Kadnan a "Sekano a manga Parisi na pelompiyon iyo so liyo o
tagayan ago lapad, ogaid na sii ko soled iyo na mapepeno kano a kapanalimbot ago
kamarataan!
40 Manga lalong kano! So Allah a mimbaal ko liyo na ba di mambo mimbaal ko soled?
41 Ogaid na pamegan iyo a sadka ko manga miskin so sisii rekano na go bo malompiyo
so kalangolangon sii rekano."
42 “Kemorkaan kano a manga Parisi! Ka apiya so ba bo palapa a lagid o kemi ago anis
ago oman i pisosonan a leletean na di niyo dii ndiyakatan, ogaid na indadarainon iyo so
maontol a kokoman ago so kapekebabayai niyo ko Allah. Giyanan i patot a penggolaolaan
iyo a sarta a di niyo pendarainonen so ped a pesowaan.
43 “Kemorkaan kano a manga Parisi! Ka pekebabayaan iyo so isesenggay a manga
ontoda ko sinagoga ago so kapeselama rekano roo ko manga padian.
44 Kemorkaan kano! Ka datar kano bo o manga lebeng a da a manga toos iyan a dii
kandapodapoan o manga taw sa di iran katawan."
45 So isa ko manga goro ko Kitab na pitero iyan ki Isa a "Goro, so di ngka sii dii kateroa
na pegitowitoon kami ngka mambo."
46 Tig i Isa a "Kemorkaan kano mambo a manga goro ko Kitab! Ka pepakiawidan iyo ko
manga taw so manga awid a maregen a kapagawidi ron. Ogaid na sekano den na di niyo
siran pagogopan sii mawid sa apiya isa bo a kemer iyo.
47 Kemorkaan kano! Ka pepangembaal kano sa manga pipiya a kobor para ko manga
nabi, na so den so manga apo iyo na aya kiran miyamono.
48 Nggolalan sii na pepamataanan iyo a makaaayon kano ko pinggolaola o manga apo
iyo, ka siran i miyamamono ko manga nabi na sekano i pepangembaal ko manga kobor
iran.
49 Sabap sii na pitero o Allah sii ko ongangen iyan a 'Sogo ako kiran sa manga nabi ago
manga siyogo, na pemonoon iran so ped kiran, na so ped na setroon iran.'
50 “Sabap sii na isomariya ko kapapantagan imanto a manga taw so kiyapamonoa ko
langon o manga nabi ipoon ko kiyaadena sa doniya
51 A ipoon ko kiyabonoa ki Abil taman ko kiyabonoa ki Sakariyas a miyabono ko
pageletan o aparan ago so Timplo. Teroon ko rekano a mataan den a palaya den ai
isomariya ko kapapantagan imanto a manga taw.
52 “Kemorkaan kano a manga goro Kitab! Ka kinowa niyo so gonsi a ipeleka ko pintoan
a isoled ko katotokawi ko tito a benar. Da kano ron soled na peseparan iyo so siran oto a
kebaya on somoled."
53 Kagiya mapasad ai tero i Isa na tanto a kiyararangitan so manga goro ko Kitab ago so
manga Parisi. Na ipoon roo den na marangit a kaperidoa iran on, na madakel a
ipepangingise iran on
54 Ka petepengan iran a kapakipetero on ko midimanda iran on.
LOKAS 12
So Kinilalangen ko Kapagomanta
Sa kapapantagan oto na malilimod so bariboribo den a manga taw taman sa di siran dii
makandadapoay. Na mitero mona si Isa ko manga sokbat iyan a tig iyan a "Pananggilai
niyo so tapay o manga Parisi a so di ran dii kapamagomanta.
2 Oman i pageemaan na kepayag, na so langon a isosolen na ketokawan bo.
3 Sabap sii na saden sa pitero iyo sii ko maliboteng na keneg sii ko maliwanag, na saden
sa inipangetong iyo sii ko misosolen a rowang na pekalangkapen a poon ko poro o manga
walay.
Antawaa i Patot a Ikelek
4 “Teroon ko rekano, manga ginawai aken, a di niyo keleken so siran oto a pemakapatay
sa lawas na mapasad oto na da den a ped a mapenggolaola iran rekano.
5 Pekitokawan ko rekano o antawaa i patot a ikalek iyo: kaleken iyo so Allah a amay ka
miyakapatay sa taw na aden a kapaar iyan sa kipelebaden iyan on sa kanarakaan. Oway,
teroon ko rekano a sekaniyan i kaleken iyo.
6 “So lima timan a kenti na ba di pepasaa sa dowalad bo a kowarta? Oway, ogaid na da a
isa kiran bo a ba kelipatan o Allah.
7 Na lawan sii pen na apiya so manga bok sa olo niyo na palaya den bibilangen. Di kano
pekelek, ka mala kano i bali a di so madakel a kenti.
So Kapemataani ko Kapangongonotani ko Al Masih ago so Kipepelaon on
8 “Teroon ko rekano a apiya antawaa i peteroon iyan ko hadapan o manga taw a kaom
aken sekaniyan na datar oto mambo a peteroon o Wata o Manosiya ko hadapan o manga
malaikat o Allah.
9 Ogaid na so taw a ipepelaw ako niyan ko hadapan o manga taw na ipepelaw aken
mambo ko hadapan o manga malaikat o Allah.
10 Oman i isa a petero sa marata makapantag ko Wata o Manosiya na kerilaan, ogaid na
apiya antawaa i pepagitowitoon iyan so Soti a Roh na di den kerilaan.
11 “Amay ka ipendimanda kano sii ko manga sinagoga, o di na sii ko hadapan o manga
gobirnador ago manga dato, na di niyo pegawiden a akal o andamanaya i kipetindegen iyo
ko ginawa niyo o di na antonaa i mapetero iyo.
12 Ka sii sangkoto a oras na paginsaratan kano o Soti a Roh ko patot a peteroon iyo."
So Bayambayanan makapantag ko Lalong a Kawasa
13 Aden a sakataw a mama sangkoto a malilimod a pitero iyan ki Isa a "Goro, teroa ngka
ko pagari aken a mama a pakambagianen ako niyan ko tamok a miniganat rekami o ama
ami."
14 Tig i Isa a "Ari, antawaa i miyakatoro raken a pengokom rekano o di na tomanor?"
15 Na pitero iyan kiran pen langon a "Iiktiyar kano! Pangalii niyo so apiya antonaa a
kanapso, ka so manga tamok o taw apiya mitataralo na kena a ba on mipepasod so tito a
kaoyagoyag iyan."
16 Na piyanotol kiran i Isa angkai a bayambayanan: "Aden a kawasa a mama a mala a
miyaragon ko lopa iyan.
17 Miyapamikir iyan a 'Antonaa i sowaan ko, ka da a ketagoan ko ko pereperan aken?'
18 Na tig iyan a 'Giyai i penggolaolaan ko. Gebaan ko so manga boniga ko na pembalay
ako sa lebi pen a mala a di giyanan, na ron aken tegoa so langon o pereperan aken ago
manga pagigimo.
19 Na teroon ko sa ginawa ko a "Ginawa ko, matodtod ai a miyatimo o ka a di kelengan
ko pemakatalingoma a madakel a ragon. Nggayagomaya ka baden; peken, peginom ago
pekebabaya ka." '
20 “Ogaid na pitero rekaniyan o Allah a 'Lalong ka! Sii den sangkai a kagagawii na
kowaan reka so niyawa ngka; oriyan oto na antawaa i pekatangan sangkanan a piyanimo o
ka para sa ginawa ngka?' "
21 Na pitero pen i Isa a "Giyanan i keolaola o taw a pepanimo sa kakawasaan para sa
ginawa niyan a sarta a da den a rek iyan a ibibilang o Allah a tito a kakawasaan."
Di Kano Pegawid a Akal
22 Pitero i Isa ko manga sokbat iyan a "Giyanan i sabap a kapeteroa ko rekano sa di niyo
pegawiden a akal so pangenengken a kailangan iyo a ipekeoyag iyo, o di na so manga
nditaren a ipesolot ko lawas iyo.
23 Ka so kaoyagoyag na mala i kipantag a di so pangenengken, na so lawas na mala i
kipantag a di so manga nditaren.
24 Pipikira niyo so manga kakowak. Kena a ba siran peseod aya pen o ba peperagon, na
da a ba iran manga taliyong o di na boniga, ka pepakaken siran baden o Allah. Na lebi
kano pen a mala i kipantag a di so manga papanok.
25 Antawaa rekano i mapekalendo niyan a omor iyan sa apiya isa bo ka oras a nggolalan
ko kiaawiden iyan on a akal?
26 O di niyo kegaga apiya giyangkai a maito a betad, na ino niyo aawiden a akal so ped a
manga nganin?
27 “Pandapati niyo so kapemangeto o manga obarobar; kena a ba siran dii nggagalebek
aya pen o ba pepangaol. Ogaid na teroon ko rekano a apiya si Solaiman a tanto a mala i
kakawasaan na da a ba niyan nditaren a datar sa kapiya i paras o isa sangkai a manga
obarobar.
28 O dii ndiditaran o Allah sa datar ai so manga otan ko pangomaan a sesaya imanto na
mbisolan bo mapita na taralebi pen a penditaran kano niyan. Sayana kano a maito i
paratiyaya!
29 Di niyo rarataa a ginawa niyo a lalayon iyo pegawiden a akal o antonaa i kekan iyo ago
keinom.
30 Ka giyangkai a langon taman na pananamaran komowa o di pemaratiyaya ko Allah sii
sa doniya, na katawan o Ama iyo a kailangan iyo angkai a manga nganin.
31 Ogaid na pepanagontamani niyo so Ndatoan o Allah na go kano bo kabegi mambo
sangkai a manga nganin.
Kakawasaan sa Kasorgaan
32 “Di kano pekelek, a maito a talon a bilibili, ka ikasosoat o Ama iyo a kimbegan iyan
rekano ko Ndatoan.
33 “Pesaa niyo so manga tamok iyo na begi niyo sa sadka so manga miskin. Mbaal kano
sa manga pitaka a di keronot, a maana niyan na so kapepanimoa niyo ko kakawasaan roo
sa kasorgaan, a di den kelebatan, ago di ron mapanekew o tekew aya pen o ba mabinasa o
manga bobok.
34 Ka apiya anda matatago so kakawasaan iyo na ndodon mambo so masisingayo o poso
iyo.
So Makatitiyagar a manga Oripen
35 “Titiyagar kano a ndiditar ko kapanalagad, a katetenteman so manga palitaan iyo

36 A datar o manga oripen a penayaw ko kakesoy o Kadnan iran a poon ko bangkiti a
kiyakewing kaan amay ka makaoma a penonotok na kelekaan iran nggagaan so pintoan.
37 Kebalasan angkoto a manga oripen a keoma o kadnan iran a mageenaw ago
makatitiyagar. Teroon ko rekano a mataan den a pesambitan sekaniyan, na pekaontoden
iyan siran ko lamisaan, na pagenatan iyan siran.
38 Na kebalasan angkoto a manga oripen o maoma niyan siran a makatitiyagar siran den,
apiya kelookan a gawii a kapekaoma niyan o di na kepita den.
39 “Tanodi niyo ai: o katawi o kiwalay o anda i kapekaoma on o tekew na di niyan den
peperon o ba makasoled so tekew ko walay niyan.
40 “Titiyagar kano mambo, ka pekaoma so Wata o Manosiya ko oras a kena a ba niyo
sekaniyan pakatatalingomaa."
So Petoman ago so di Petoman a Talasogoay
41 Pitero i Pidro a "Kadnan, ba para rekami bo a kiyapanotola ngka sangkai a

bayambayanan, o di na para ko langon a taw?"
42 Tig o Kadnan a "Antawaa bes i kasasanaan ago maongangen a talasogoay? Sekaniyan
so pekakibiren o kadnan iyan ko ped a manga talasogoay kaan iyan siran kabegi sa bagian
iran ko pangenengken ko osto a oras.
43 Kebalasan angkoto a talasogoay amay ka makaoma so kadnan iyan o maoma o kadnan
a dii nggolaola sangkai a galebek iyan.
44 Teroon ko rekano a mataan den a pekikibir rekaniyan o kadnan so langon o tamok
iyan.
45 Ogaid na opama ka teroa ngkoto a talasogoay ko ginawa niyan a 'Matey pen makaoma
so kadnan aken,' na o pepooni niyan meraraneg so ped iyan a manga talasogoay a mama
ago babay ago tomaralo koman ago maginom ago pemberebereg,
46 Na pekaoma so kadnan angkoto a talasogoay ko alongan a kena a ba niyan
pakatatalingomaa sii ko oras a di niyan katawan. Na penanateden sekaniyan o kadnan
iyan na isenggay niyan ko bagian iyan a keped ko di pemaratiyaya.
47 So talasogoay a katawan iyan so kabaya o kadnan iyan ogaid na da tiyagar ago da
toman ko kabaya iyan na mbadasan sa madakel.
48 “Ogaid na so talasogoay a di niyan katawan o antonaa i kabaya o kadnan iyan ago
miyakanggolaola sa patot a indaneg on na mbadasan sa maito. Oman i isa a taw a bigan sa
mala na mala a pekisangan on, na so taw a siyanaan sa mala na lebi pen a mala a
kipaliyogat on.
Si Isa i Kesabapan ko Kapakambegibegi
49 “Somiyong ako sii kaan aken kabiyagi sa apoy so doniya, na o ba bo miyaimasad den
angkai a sangan aken!
50 Aden a iselawat raken na tanto ako den a kapapasangan taman sa maipos ai!
51 Ba aya katao niyo ron na aya inisong aken sii na pagowitan ko sa kalilintad so doniya?
Kena, ka teroon ko rekano a kena a ba kalilintad, ka so kapakambagibagi.
52 Ipoon imanto na so lima kataw ko isa ka walay na mapembagibagi siran, ka so telo na
makiperidoay ko dowa, na so mambo so dowa na makiperidoay ko telo.
53 So ama na makiperidoay ko wata iyan a mama, na so wata a mama na makiperidoay
ko ama iyan; so ina na makiperidoay ko wata iyan a babay, na so wata a babay na
makiperidoay ko ina iyan; so panogangan a babay na makiperidoay ko miyakamong on a
babay, na so miyakamong a babay na makiperidoay ko panogangan iyan a babay."
So Kasabota ko Maana o Pekesowasowa
54 Pitero pen i Isa ko madakel a taw a "Amay ka makailay kano sa gabon a pepakapoon
sa sedepan na peteroon iyo a 'Magaan den moran,' na mataan a magoran.
55 Na amay ka pesember so abagat na peteroon iyo a 'Pekeyaw a doniya,' na
mapenggolaola ini.
56 Sekano a dii mamagomanta! Katawan iyo o andamanaya i kapemaanai niyo ko
mapeparas o doniya ago so langit, na ino niyo di katawi i kapemaanai ko pekesowasowa
sangkai a masa?
So Kapasada ko Rido iyo ago so Pendimanda reka
57 “Ino niyo di kokoma sa ginawa niyo o antonaa i patot a penggolaolaan iyo?

58 O aden a pendimanda reka a pegowiten ka niyan ko dii kokoman na panamari ngka a
kapasada ngka ko rido iyo sii ko kapesong iyo roo kaan ka niyan di mipendimanda ko
pengokom. Ka so pengokom na peladen ka niyan ko polis, ago so polis na tegoon ka
niyan sa kalaboso.
59 Teroon ko reka a di ka roo den pekaliyo sa taman sa di ngka kabayadi so langon a
molta reka."
LOKAS 13
O di Niyo Talikodi so manga Dosa Niyo na Pematay kano
Sa masa oto na aden a manga taw roo a piyanotol iran ki Isa so makapantag ko manga taw
sa Galili a piyamono i Pilato sii ko kipesepaaten iran ko manga korban ko Allah.
2 Pitero kiran i Isa a "Sabap sa piyamono angkoto a manga taw sa Galili sa datar oto, na
ba aya katao niyo ron na lebi siran pen a baradosa a di so langon a ped a taw sa Galili?
3 Kena, na teroon ko rekano a o di niyo talikodi so manga dosa niyo na pematay kano
mambo langon a datar iran.
4 Datar mambo angkoto a sapolo ago walo kataw roo sa Silowam a miyamatay isako
kaotengan siran o barit, na ba aya katao niyo ron na lebi siran pen a miyakasela a di so
langon a kibabaling sa Yarosalim?
5 Kena, na teroon ko rekano a o di niyo talikodi so manga dosa niyo na pematay kano
mambo langon a datar iran."
So Bayambayan ko Kayo a Da a Onga niyan
6 Na piyanotol kiran i Isa ngkai a bayambayanan: "So sakataw a mama na aden a kayo
niyan a korma a meeto sii ko asinda niyan a obas, na somiyong roo ka pengiloba sa onga
niyan, ogaid na da a ba niyan on miyatoon.
7 Na pitero iyan ko komikibir ko asinda a 'Ilaya ngka man, ka miyakatelo den ragon na
pesong ako sii den a pepangiloba sa onga angkai a kayo a korma, na da den a miyatoon
aken on. Na, pataa ngka ini, ka pekeongen iyan baden angkai a lopa.'
8 “Ogaid na somimbag so komikibir a 'Ron den pasin, Sir, sii bo sangkai a ragon; na
sibokaran aken so melilibeta on ago timplaan aken.
9 Na o monga sangkai a makasaragon na mapiya, na o di monga na pakipataan ka.' "
Piyakapiya i Isa so Babay a Kimay a Lawas iyan ko Gawii a Idedeke

10 Miyakaisa a Gawii a Idedeke a pepangendao si Isa roo ko isa a sinagoga
11 Na ndodoo so sakataw a babay a sosookan a saitan a ipekesakit iyan ko miyakasapolo
ago walo ragon. Sabap roo na mapepeko sekaniyan na di den makapemeter apiya maito
bo.
12 Kagiya mailay sekaniyan i Isa na tiyalowan iyan sa kapagobay niyan on na pitero iyan
a "Babay, kiyabokaan ka den ko gedamen ka."
13 Na inidapenet on i Isa a manga lima niyan, na sakotika den a miyakapameter so lawas
o babay na biyantog iyan so Allah.
14 Ogaid na kiyararangitan so olowan ko sinagoga sabap ko kiyapamolong i Isa sii ko
Gawii a Idedeke, na pitero iyan ko manga taw a "Nem bo gawii a patot a mipenggalebek
tano. Song kano sii sangkanan a manga gawii sa kapemolongi rekano, na kena a ba sii ko
Gawii a Idedeke."
15 Na somimbag so Kadnan a "Sekano a dii mamagomanta! Sii ko Gawii a Idedeke na
oman i isa rekano na pembokaan iyo so sapi iyo, o di na koda ko iiketan on, na pegowiten
iyo roo sa ig ka pepakainomen iyo.
16 Na giyangkai a babay a moriyataw o Ibrahim a mapapatong o Iblis ko miyakasapolo
ragon ago walo na ba di patot a kabokaan sekaniyan ko kapapatonga on sii ko Gawii a
Idedeke?"
17 So kiyateroa niyan sii na miyanga aaya so langon o manga soranga iyan, ogaid na
miyangababaya so ped a manga taw sabap ko langon a piyakamemesa a di niyan dii
nggolaolaan.
So Bayambayanan makapantag ko Od a Mostard
18 Pitero i Isa a "Antonaa i datar o Ndatoan o Allah, na antonaa i keibaratan aken on?
19 Giyai na datar o od a mostard a piyamola o mama ko sapadan iyan. Mito den ai ago
mimbaloy a kayo, na misesalag so manga papanok ko manga sapak iyan."
So Bayambayanan makapantag ko Tapay
20 Iniise peroman i Isa a "Antonaa i keibaratan aken ko Ndatoan o Allah?

21 Datar ai o tapay sa paan a inisaog o babay ko telo ka asada a tapong taman sa palaya
den miyakakembang."
So Masimpit a Pintoan
22 Na inipanagad i Isa so mala maito a inged a pepangendao sii ko kapegantap iyan sa

Yarosalim.
23 Aden a mama a iniise iyan on a "Sir, ba maito bo a manga taw a kesabet?"
Pitero kiran i Isa a
24 “Panamari niyo a kapakasoled iyo ko masimpit a pintoan, ka teroon ko rekano a
madakel a tepeng somoled, na di iran kegaga a kapekasoled iran.
25 So kiwalay na magembowat na pelekeban iyan so pintoan, na amay ka mamanindeg
kano sa liyo a pepamanotok ko pintoan a di niyo dii teroon a 'Sir, lekai ngka rekami so
pintoan,' na sembagen kano niyan a 'Di aken sekano katawan, o di na anda kano poon.'
26 Na isembag iyo a 'Miyakapamagatoang tano, na miyangendao ka sii ko manga inged
ami.'
27 Ogaid na peteroon iyan peroman a 'Di aken sekano katawan, o di na anda kano poon.
Awai ako niyo langon a manga rarata i olaola!'
28 “Na tanto kano a pendidiyagaw a di niyo dii pakakitebaan a ngipen iyo amay ka mailay
niyo so Ibrahim, so Iskak, so Yakob ago so langon o manga nabi a makasosoled ko
Ndatoan o Allah, ogaid na sekano na ipelebad baden sa liyo.
29 Madakel a taw a pemakaoma a poon sa sebangan, sa sedepan, sa pagotaraan ago sa
pagabagatan a pemangontod siran roo ko Ndatoan o Allah a makapemagatoanga.
30 Tanodi niyo a aden a maoori imanto a keona roo, na aden a maoona imanto a keori
roo."
So Kababaya i Isa sa Yarosalim
31 Sangkoto den a gawii na miyamanong ki Isa so ped ko manga Parisi na pitero iran on a
"Patot a mawa ka sii ago somong ko salakaw a darpa, ka kebayaan ka mono i Hirod."
32 Somimbag si Isa a "Song kano sangkoto a tagakal na teroa niyo ron a 'Imanto ago
mapita na pemakaliyon ko so manga saitan ko kisosookan ago pemakapiyaan ko so
pepanga sasakit, na sii ko ikatelo gawii na pagimasaden ko so galebek aken.'
33 Apiya oto na disomala a teros ako melalakaw imanto ago mapita ago sii ko
tomalondog on a gawii, ka di patot o ba mabono so isa a nabi sa liyo a Yarosalim.
34 “Aidaw, Yarosalim, Yarosalim, a aya pepamono ko manga nabi ago peperobak a ator
ko siran oto a siyogo reka! Madakel a manga masa a kebayaan ko a kapelimoda ko ko
langon a taw ngka a datar o gopoan a titimoon iyan so manga piyak iyan sii ko atag o
manga papak iyan, ogaid na di ngka kabaya o ba aken ai nggolaolaa.
35 Ilaya niyo man, ka kiyaawaan den so kababalingan iyo. Teroon ko rekano a di ako niyo
den keilay taman ko masa a peteroon iyo a 'Podin tano so pepekaoma sii ko ingaran o
Kadnan.' "
LOKAS 14
Piyakapiya i Isa so Mama a Miyangorbaw a Lawas iyan
Miyakaisa a Gawii a Idedeke na somiyoled si Isa ko walay o isa a olowan o manga Parisi
ka ken, na di sekaniyan dii simaan o manga taw roo.
2 Na ndodoo so isa a mama sii ko hadapan iyan a miyangorbaw a lawas iyan.
3 Na iniise i Isa ko manga goro ko Kitab ago so manga Parisi a "Ba sisii ko Kitab tano a
so kapakapiyaa ko pekesakit ko Gawii a Idedeke, o di na di den?"
4 Ogaid na da siran pamanembag. Mandiyadi na tiyayongan i Isa angkoto a mama na
piyakapiya niyan ago piyakalalakaw iyan.
5 Oriyan iyan na pitero kiran i Isa a "Ba aden a isa rekano a aden a wata iyan a mama, o di
na sapi, a miyaolog ko galebo ko Gawii a Idedeke a ba niyan on di kowaa somambot?"
6 Na da den a kisembag iran ki Isa mipantag sii.
So Kasakaw ago so Kapangalimbabaan

7 Miyainengka i Isa a aden a ped roo a manga banto a piyamamili iran so tindos a manga
darpa ko pekenan, na giyoto a piyanotol iyan kiran langon angkai a bayambayanan:
8 “Amay ka bantowan ka o isa a taw ko kandori o di na kakewing, na di ka pagontod ko
lebi a tindos a darpa ko pekenan, ka o ba baden aden pen a lebi a pagaadatan a banto a di
seka.
9 Na so miyanto rekano na baanda reka magobay na peteroon iyan a 'Pakaontoda ngka san
angkai a mama ko dadarpaan ka.' Na keyaan ka, na ketegel ka makaontod ko lebi a
mababa a darpa.
10 “Aya patot na amay ka bantowan ka, na roo ka ontod ko lebi a mababa a darpa kaan
amay ka makaoma so miyanto reka na peteroon iyan reka a 'Pagari ko, tepas ka sangkai a
lebi pen a mapiya a darpa.' Na kebantogan ka ko kamamasaan o langon a biyantowan.
11 Ka so oman i isa a pepangimporoan na imbaba, na so pepangalimbabaan na iporo."
12 Na pitero i Isa ko miyanto ron a "Amay ka pekendori ka, na di ngka mbantowi so
manga ginawai ngka, o di na so manga pagari ngka, o di na so manga tonganay ngka, o di
na so manga siringan ka a tatamoken, ka mbantowan ka iran mambo, na kebadalan ka ko
pinggolaola ngka.
13 Ogaid na amay ka pekendori ka na bantowi ngka so manga miskin, manga lepo, manga
piang, ago so manga bota
14 Na kerakmatan ka; ka apiya pen di siran reka pekabadal na kebalasan ka bo o Allah
amay ka manga ooyag so manga oontol a miyamatay.' "
So Bayambayanan makapantag ko Mala a Bangkiti
15 Kagiya maneg ai o isa a mama a pegatoang roo, na pitero iyan ki Isa a "Rarakmatan so
taw a keped ko bangkiti roo ko Ndatoan o Allah."
16 Pitero rekaniyan i Isa a "Aden a mama a mikendori sa mala, na madakel a manga taw a
piyamantowan iyan.
17 Kagiya maoma so gawii a kapekendori na siyogo iyan so talasogoay niyan sa
kapeteroa niyan ko piyamantowan a song siran on, ka miyatiyagar den so langon taman.
18 Ogaid na domiyaowa so oman i isa kiran. Pitero o paganay a 'Miyakapamasa ko sa
lopa na disomala a periksaan aken. Rilai ako ngka, ka di ako pekadarpa.'
19 Tig o ped a 'Miyakapamasa ko sa lima ka parisan a manga sapi, na song ako roo ka
penepengan aken siran. Rilai ako ngka, ka di ako pekadarpa.'
20 Na tig o ped pen a 'Gopen ako kiyawing, na di ako pekadarpa.'
21 “Komiyasoy so talasogoay na piyanotol iyan ai langon ko kadnan iyan. Tanto a
kiyararangitan angkoto a kiwalay, na pitero iyan ko talasogoay niyan a 'Song ka nggagaan
ko manga karsada ago sii ko manga lalan ko siti na wita ngka sii so manga miskin, so
manga lepo, so manga bota ago so manga piang.'
22 Da matey na pitero o talasogoay a 'Miyatoman den so inisogo o ka, Kadnan, ogaid na
aden pen a kedarpaan o taw ko walay ngka.'
23 “Na pitero o kadnan ko talasogoay a 'Lalakaw ka roo ko manga lalan ko dii
pagonayonayan na panegela ngka so manga taw sa kalimod iran sii kaan mapeno so walay
aken.
24 Teroon ko reka a da a isa bo ko miyaona a piyamantowan i ba pekataam ko inggabi a
miyatiyagar aken.' "
So Paliyogat ko Taw a Kebaya Makasokbat
25 Tanto a madakel a manga taw a pepamangonot ki Isa ko kapelalakaw niyan, na

siyangoran iyan siran ago tig iyan a
26 “Apiya antawaa i song raken na di kebaloy a sokbat aken taman sa di niyan ikagowad
so ama iyan, so ina iyan, so karoma niyan, so manga wata iyan, so manga pagari niyan a
mama ago babay ago giya ginawa niyan mambo.
27 Apiya antawaa i di niyan posain so kros iyan ago pegonot raken na di kebaloy a sokbat
aken.
28 “Opama ka aden a isa rekano a kebaya mbalay sa barit, na daan iyan a
penggedagedaan iyan ago ikerang iyan o pira i mapenggasto niyan on kaan iyan
mapariksa o magetoon so pirak iyan a kipasad on.
29 O di petoon na oriyan o kibetaden iyan ko onayan o barit na di niyan kepasad so ped
on, na so langon a pekailay ron na ipekela iran sekaniyan
30 A tig iran a 'Giyangkai a mama na mipoon mbalay sa barit, ogaid na di niyan bo
kepasad.'
31 “Opama ka aden a dato a aden a sapolo nggibo niyan a manga sondaro a makipetidawa
ko salakaw a dato a aden a dowa polo nggibo niyan a manga sondaro a pepamanong on,
na daan iyan a penggedagedaan ago pesaden sa ginawa o pekaato sekaniyan sangkoto a
isa a dato.
32 O di sekaniyan pekaato na pekasogo sa manga tomanor sangkoto a dato sii ko katatago
iyan pen roo ko mawatan sa kapakipesada iran on ko kalilintad.
33 Na datar oto mambo a da a isa rekano a ba kebaloy a sokbat aken taman sa di niyan
telikodan so langon taman iyan.
So Da a Bali niyan a Timos
34 “Mala i kipantag so timos ogaid na o kadai sa katimos na andamanaya i kitimosen on

peroman?
35 Da a kipantag iyan apiya so kapegosara on a timpla ka ipelebad baden. So aden a
tangila niyan na pamakineg baden!"
LOKAS 15
So Miyadadag a Bilibili
Miyakaisa a madakel a panenekat sa bowis ago manga baradosa a miyamanong ki Isa, ka

pemakinegen iran.
2 Ogaid na so manga Parisi ago manga goro ko Kitab na miyanarotaro a tig iran a "Si aki
ini na itatapian iyan so manga baradosa ago di kiran pen dii makipagatoang."
3 Sabap sii na piyanotol kiran i Isa angkai a bayambayanan:
4 “lbarat na so isa rekano a aden a magatos timan iyan a bilibili na miyadadag so isa on,
na antonaa i sowaan iyan? Pagawaan iyan pasin so siyaw polo ago siyaw a bilibili ko
pepanateban, na pembabanogen iyan so miyada a bilibili taman sa matoon iyan.
5 Amay ka matoon iyan na posain iyan a tanto sekaniyan a kebabaya.
6 Imbaling iyan ai sa walay na mbantowan iyan so manga ginawai niyan ago manga
siringan na peteroon iyan kiran a 'Mababaya tano, ka miyatoon aken so bilibili aken a
miyadadag.'
7 Na teroon ko rekano a datar oto mambo a lebi pen a mala a kakebabaya roo sa
kasorgaan sabap ko isa a baradosa a tomiyalikod ko manga dosa niyan a di sabap ko
siyaw polo ago siyaw kataw a manga oontol a di iran kailangan a kaselina iran ko olaola
iran."
So Miyada a Satiman a Pelata
8 “Ibarat na so babay a aden a sapolo timan iyan a pelata a pirak na miyada so isa on, na
antonaa i penggolaolaan iyan? Tentem sekaniyan sa palitaan ago peyopasan iyan so soled
a walay niyan, na pengilobaan iyan sebenar taman sa matoon iyan.
9 Amay ka matoon iyan na tewagen iyan so manga ginawai niyan ago manga siringan na
peteroon iyan kiran a 'Mababaya tano, ka miyatoon aken so pelata a miyada raken.'
10 Na teroon ko rekano a datar oto mambo a penga bababaya so manga malaikat o Allah
sabap ko isa a baradosa a tomiyalikod ko manga dosa niyan."
So Miyadadag a Wata a Mama
11 Tig pen i Isa a "Aden a sakataw a mama a dowa kataw i wata a mama.
12 Na pitero o ari ron ki ama iyan a 'Ama, began ka raken so bagian aken ko tamok ka.'
Na giyoto a biyagi o ama so tamok iyan sangkoto a dowa kataw a wata iyan.
13 “Kagiya mamakapira den gawii na miyaninimo so ari na lomiyalakaw sa mawatan a
inged, na ron iyan piyagolaan langon so pirak iyan sa kalalalongan a kapaginetaw.
14 Kagiya manggasto niyan langon so pirak iyan na riyaot a mala a taon angkoto a inged,
na pekekorangan sekaniyan sa kaoyagan.
15 Sabap roo na miyakipangongoripen sekaniyan ko isa a taw sangkoto a inged, na
piyakasong iyan ko pangomaan iyan kaan makatagikor sa manga baboy.
16 Sabap sa kiyaoran sekaniyan na kebaya koman ko manga onga a pamomolan a
pepakikan ko manga baboy, ogaid na da den a ba on migay sa apiya antonaa.
17 “Na kagiya kasabotan iyan so mala a ribat iyan na pitero iyan ko ginawa niyan a 'So
langon a pesokayan o ama aken na mitataralo den a pangenengken iran, ogaid na pepetay
ako sii a ongos.
18 Na gomanat ako ago maling ako roo ko ama aken na teroon ko ron a "Ama,
miyakasela ako ko Allah ago sii reka,
19 Na di ako den mapapatot a bebetowan sa wata a ka. Bilangen ako ngka baden a isa ko
pesokayan ka.'
20 “Na gomiyanat roo den ka mbeling ko ama iyan. Ogaid na kagiya mawatan pen sa
walay na miyalangkaw sekaniyan den i ama iyan na tanto niyan a inikapedi. Na
miyalalagoy sekaniyan ko wata iyan na giyakes iyan ago inarekan iyan.
21 Pitero o mangoda a 'Ama, miyakasela ako ko Allah ago sii reka, na di ako den
mapapatot a bebetowan sa wata a ka.'
22 “Ogaid na tiyalowan o ama iyan so manga talasogoay niyan a tig iyan a 'Nggagaan
kano! Wita niyo sii so lebi a mapiya a kimon na pakisoloten iyo rekaniyan, na pakasisinga
niyo pen ago pakatalompaa niyo.
23 Na kowaa niyo so kaolit a nati a sapi na sombalia niyo, ka pekendori tano an tano
mababaya,
24 Ka giyangkai a wata aken na miyatay den, ogaid na miyaoyag bo; miyada sekaniyan
ogaid na miyatoon bo.' Na mipoon siran keriyala.
25 “Sangkoto a kapapantagan na so kaka a wata iyan na ndodoo ko dii mbasokan. Sii ko
kapembaling iyan a pepakarani sekaniyan sa walay na miyaneg iyan so manga dii
mboboniboniyan ago so dii sesayaw.
26 Na tiyalowan iyan so isa ko manga talasogoay na iniise iyan a 'Antonaa oto a di ran dii
nggolaolaan?'
27 Tig iyan a 'Miyaling den so pagari ngka, na piyakisombali i ama a ka so kaolit a sapi,
ka miyakakasoy sekaniyan a da a rayorayo a ginawa niyan.'
28 “Na kiyararangitan so kaka a wata na minda o ba soled ko walay. Na lominiyo si ama
iyan na piyangangapinan iyan an makasoled.
29 Ogaid na pitero iyan ki ama iyan a 'Ilaya ngka man, ka sii ko miyatey den a manga
ragon na pepanalagadan aken seka a datar o isa ko manga oripen ka, na da ako den
makasopak ko manga sogoan ka. Ogaid na apiya so nati a kambing na da ngka raken
mibegay an kami makakeriyala ago so manga layok aken.
30 Ogaid na kagiya makabaling angkoto a wata a ka a miyagola ko tamok ka sii ko manga
sondal, na siyombalian ka baden sa kaolit a nati a sapi!'
31 “Tig o ama iyan a 'Wata aken, lalayon aken seka mipageepeda, na rek ka so langon
taman a rek aken.
32 Ogaid na patot a kendori tano ago mababaya, ka giyangkai a pagari ngka na miyatay
den na imanto na miyaoyag bo; miyada sekaniyan na imanto na miyatoon bo.' "
LOKAS 16
So Maongangen a Salimbot a Komikibir
Pitero i Isa ko manga sokbat iyan a "Aden a kawasa a mama a aden a komikibir ko walay
niyan, na miniripot ko kawasa a dii pagolaan o komikibir so tamok iyan.
2 Na giyoto a tiyawag iyan so komikibir na pitero iyan on a 'Antonaa angkai a miyaneg
aken makapantag reka? Tiyagara ngka so listaan ko kiyakibira ngka ko tamok aken, ka di
ka on den pekakibir.'
3 “Tig o komikibir sa ginawa niyan a 'Antonaa i penggolaolaan ko, ka pekaawaan ako o
kadnan aken ko galebek? Di aken kegaos so kapangalot sa kakar, na pekaya ako
mamangni.
4 A, na katawan aken so penggolaolaan ko kaan ako mapekabolos o manga taw ko manga
walay iran amay ka pakaawaan ako den ko galebek aken.'
5 “Na piyakisongowan iyan so oman i tetanggisa a makaootang ko kadnan iyan, na iniise
iyan ko miyaona on a 'Pira i miyaotang ka ko kadnan aken?'
6 Tig iyan a 'Magatos ka ganda a lana olibi.' Pitero o komikibir a 'Katii so listaan ko otang
ka. Ontod ka na go ngka on soraten a lima polo bo.'
7 “Na iniise iyan ko ikadowa a 'Seka, pira i miyaotang ka?' Tig iyan a 'Magatos ka sako a
bantad.' Pitero o komikibir a 'Katii so listaan ko otang ka. Kowaa ngka na go ngka on
soraten a walo polo bo.'
8 “Na so kadnan angkoto a salimbot a komikibir na piyodi niyan sabap ko ongangen a
ininggolalan iyan. Ka so manga taw a mala on so doniya na igira a miyakakokoyapeta
siran ago so datar iran a manga taw na lebi siran a maongangen a di so manga taw a mala
on so kaliwanag."
9 Na pitero pen i Isa a "Teroon ko rekano a pakingginawai kano a nggolalan ko
kapegosara niyo ko kadodoniyai a tamok kaan amay ka malengan ai na terimaan kano roo
ko manga mbalingan a da den a ikepos iyan."
10 “Apiya antawaa i kesarigan ko maito na kesarigan mambo ko mala, na so
pepanalimbot ko maito na penalimbot mambo ko mala.
11 Kagiya ka maoto na o di kano kesarigan ko kakikibira niyo ko tamok sangkai a doniya
na antawaa i serig rekano ko tito a kakawasaan?
12 Na o di kano kesarigan ko kakikibira niyo ko kena a ba niyo rek na antawaa i mbegay
rekano ko tito a rek iyo?
13 “Da a talasogoay a ba makipengongoripen ko dowa a kadnan, ka ikegowad iyan so isa
on na kebabayaan iyan so ped, o di na tomotoman sekaniyan ko isa na pesodiin iyan so
ped. Di kepakay o ba kano mapangongoripen o Allah ago so pirak."
14 Miyaneg ai langon o manga Parisi na piyagongatongat iran si Isa ka mababaya siran sa
pirak.
15 Pitero kiran i Isa a "Makiilailain kano sa magiinontolan ko hadapan o manga taw,
ogaid na katawan o Allah so madadalem ko poso niyo. Ka so ibibilang o manosiya a tanto
a mala i bali na ikagogowad o Allah.
So Ped a manga Ndao i Isa
16 “So Kitab o Mosa ago so manga Sorat o manga nabi na aya niyo kokoman taman ko
kiyapakaoma i Yahiya. Ipoon roo den na pepakalangkapen so Mapiya a Totol makapantag
ko Ndatoan o Allah, na petegelen o oman i isa so kapakasoled iyan on.
17 Malebod pen misedep so langit ago so doniya a di sa ba kadai sa kipantag so apiya isa
a titik o Kitab.
18 “Apiya antawaa i imbelag iyan so karoma niyan a babay ago mangaroma sa salakaw a
babay na makapesina; na so mama a pengaroma ko inimbelag a babay na makapesina
mambo."
So Kawasa a Mama ago si Lasaro
19 “Aden a kawasa a mama a dii nditar sa miyakapiyapiya ago magiinetaw a dii

tebowakar oman gawii.
20 Aden mambo a miskin a mama a pegibolen a lawas iyan, a aya ngaran iyan na si
Lasaro, na pepakakadenen sekaniyan ko gimowa o walay o kawasa
21 Ka kalokalo o ba sekaniyan makakan ko odod a penga oolog a poon ko lamisaan o
kawasa. Na apiya so manga aso na pepagobay ron ago pepanilaan iran so manga ibol iyan.
22 Miyakaisa a gawii na miyatay so miskin, na inawidan o manga malaikat ko kilid i
Ibrahim. Na miyatay mambo so kawasa na inilebeng
23 Na tanto den a mararasay roo sa kanarakaan. Lomiyangag sekaniyan na miyailay niyan
si Ibrahim roo sa mawatan, ago si Lasaro a makaaabay ron.
24 “Na inipananalo niyan ki Ibraham a 'Ama ko, kapediin ako ngka na pakasonga ngka sii
si Lasaro kaan iyan misombo so tindoro iyan ko ig an iyan on kapakatenggawi so dila
aken, ka tanto ako a mararasay sangkai a apoy.'
25 “Ogaid na somimbag si Ibrahim a 'Tanodi ngka, wata ko, a sii ko kapepaginetaw ngka
na miyatarima a ka so kapiyaan ka, na si Lasaro na aya on pekibegay so karataan bo den.
Ogaid na imanto na pakapipiyaan a ginawa niyan sii na mararasay ka san.
26 Liyo ron pen langon na aden a mala a landeng a mipapagelet rektano kaan di on
pekaripag so siran oto a kebaya rekano somong a poon sii, ago da mambo a ba pekaripag
rekami a poon san.'
27 “Somimbag so kawasa a 'O giyanan, Ama ko, na pagakolen ko reka a pakasonga ngka
si Lasaro roo ko walay o ama aken,
28 Ka aden a lima kataw ron a pagari aken a manga mama. Pakasonga ngka roo kaan iyan
siran kalalangi an siran di pekasong sangkai a darpa a ron ako mararasay.'
29 “Tig i Ibrahim a 'Ndodoo kiran so inisorat o Mosa ago so manga nabi a melalang
kiran; disomala a tegoon o manga pagari ngka sa ginawa iran so manga katero iran.'
30 “Tig o kawasa a 'Di pen anan osto, Ama Ibrahim; ogaid na o aden a pekasong kiran a
poon ko miyamatay na selinen iran so manga olaola iran.'
31 “Na pitero on i Ibrahim a 'O di iran pekinega so Mosa ago so manga nabi na di siran
keakolan apiya aden pen a keoyag a poon ko miyamatay."
LOKAS 17
Oriyan iyan na pitero i Isa ko manga sokbat iyan a "Mataan den a mapenggolaola so
manga nganin a ipekedosa o manga taw, ogaid na kemorkaan so taw a ron
makapenggolalan so kakeolaola ini.
2 Tomo rekaniyan pen a iketan so lig iyan ko mala a galingan a ator na ilebad sekaniyan
sa ragat a di sa ba niyan mapakapendosa so isa sangkai a mitatanan a manga taw.
3 Iiktiyar kano! O miyakasela so pagari ngka na sapari ngka, na o peteobat na rilai ngka.
4 O makasela sekaniyan reka sa makapito ko salongan ago makapito mambo reka somong
a tig iyan a 'Miteobat ako,' na rilai ngka sekaniyan."
So Paratiyaya
5 So manga siyogo na pitero iran ko Kadnan a "Omani ngka so paratiyaya ami."

6 Tig o Kadnan a "O aden a paratiyaya niyo a datar sa kala o miyakaitowito a od a
mostard na mapetero iyo sangkoto a kayo a sikomori a 'Badota ngka a ginawa ngka na
tepas ka roo sa ragat,' na tomanen kano niyan.
So Atastanggongan o Oripen
7 “lbarat na so isa rekano a aden a oripen iyan a dii ndado o di na petegikoren iyan so
manga bilibili na amay ka makaoma a poon ko pangomaan na ba ngka rekaniyan peteroa
a 'Ontod ka sii den imanto, na kan ka den?'
8 Kena, ka peteroon ka on baden a 'Tiyagara ngka so inggabi aken. Tempi ka na
panalagadi ako ngka sii ko kapekan aken ago kapeginom; oriyan iyan na seka peman i
kan ago inom.'
9 Na ba ngka panalamati angkoto o oripen sabap ko kiyatomana niyan ko inisogo on?
Kena!
10 Datar oto rekano mambo; amay ka matoman iyo so langon a inisogo rekano, na teroa
niyo a 'Matag kami manga oripen a di patot a kapodiya on, ka ininggolalan ami baden so
atastanggongan ami.' "
Piyakapiya i Isa so Sapolo Kataw a Pekebowa
11 Sii ko kapelalakaw i Isa a pesong sa Yarosalim na miyokit ko temanaan a Samariya

ago giya Galili.
12 Sii ko kapegantap iyan ko isa a inged na inalaw sekaniyan o sapolo kataw a pekebowa
a kititindeg sa malo mawatan.
13 Na miyananalo siran sa matanog a tig a iran "Hey Isa, Kadnan, kapediin kami ngka."
14 Kagiya mailay siran i Isa na tig iyan kiran a "Song kano ko manga imam na
pamakiilain iyo kiran a manga lawas iyo." Na sii ko kapesong iran roo na miyamakapiya
siran.
15 So isa kiran na kagiya mailay niyan a miyakapiya den na komiyasoy ki Isa a pepodin
iyan so Allah sa tanto a matanog.
16 Gomipe sekaniyan sii ko ai i Isa na miyanalamat on. Giyangkoto a mama na
Isamariyan.
17 Pitero on i Isa a "Ba di sapolo kataw a miyamakapiya? Anda den so ped kiran a siyaw
kataw?
18 Ba giya bo angkai a rait i komiyasoy a pepodin iyan so Allah?"
19 Na pitero rekaniyan i Isa a "Tindeg ka na lalakaw ka den. So paratiyaya ngka na aya
ngka inipakapiya."
So Kapekatalingoma o Ndatoan o Allah
20 Aden a manga Parisi a iniise iran ki Isa o anda i kapekatalingoma o Ndatoan o Allah.
Somimbag sekaniyan a "So Ndatoan o Allah na di pekatalingoma sa ba pekeilay.
21 Da a ba makapetero sa 'llaya niyo ka katii!' o di na 'Kaoto roo!' ka so Ndatoan o Allah
na madadalem sa ginawa niyo."
22 Na pitero iyan ko manga sokbat a "Pekaoma so manga gawii a ikedali iyo so
kapagilaya niyo ko isa ko manga gawii a kipageepedaan rekano o Wata o Manosiya,
ogaid na di niyo keilay.
23 Aden a manga taw a peteroon iran rekano a 'Kaoto sekaniyan!' o di na 'Katii!' ogaid na
di kano ron song ago di niyo siran pagonoti.
24 Ka datar o kilat a kiteras a pesindaw ko langit a poon ko sabala na taman ko sabala na
datar anan mambo so Wata o Manosiya sii ko gawii a kapekaoma niyan.
25 Ogaid na da pen ai kaokiti na disomala a kerasay sekaniyan a tanto na di terimaan o
kapapantagan imanto a manga taw.
26 “So pepanga sosowasowa ko manga gawii i Nok na datar oto mambo so penga
sosowasowa sii ko manga gawii a kapekaoma o Wata o Manosiya.
27 Pepamakakan so manga taw, pepamakainom, pepamangaroma ago pepamangaromaan
taman ko gawii a kiyapakasoled i Nok ko mala a kapal, na miyakaoma so bagiyaw na
palaya siran on miyapolang.
28 “Datar oto mambo sii ko masa i Lot. So langon a taw na katatabowan a dii kekan,
pepemanginom, pepamamasaan, dii pepasa, pepamamolaan ago dii mbabalay.
29 Ogaid na sii ko gawii a kiyaawa i Lot sa Sodom na miyoran sa apoy ago sandawa a
poon sa langit na palaya siran miyamatay.
30 Datar ai mambo so mapenggolaola ko gawii a peyagen so Wata o Manosiya.
31 Sangkoto a gawii na so taw a sii kepantagi ko liyoliyo o walay niyan na disomala a di
pekasoled ko walay niyan sa kakowaa niyan ko manga pagigimo niyan. So mambo so taw
a sii kepantagi ko pangomaan na disomala a di den kesoy ko walay niyan.
32 Tademi niyo so miyaolaola o karoma i Lot!
33 Apiya antawaa i mananamar somabet ko kaoyagoyag iyan na pelagaan iyan baden, na
apiya antawaa i iperila iyan so kaoyagoyag iyan na sebeten iyan.
34 Teroon ko rekano a sii sangkoto a kagagawii na amay ka aden a dowa kataw a
mererembang ko satiman a igaan na kowaan on so isa kiran na imbegak so isa on.
35 Na so dowa kataw a babay a pembowayo na kowaan so isa kiran ago imbegak so isa
on."
37 Na iniise o manga sokbat ki Isa a "Anda ini keolaola, Kadnan?"
Tig iyan a "Apiya anda a aden a bangkay ron na ron mambo petimo so manga garoda."
LOKAS 18
So Bayambayanan makapantag ko Balo ago so Pangongokom
Piyanotol kiran i Isa angkai a bayambayanan kaan iyan kiran mindao a disomala a lalayon
siran pepangangarapan ago di kedaan sa arap.
2 Tig iyan a "Sii ko isa a inged na aden a pangongokom on a da a kalek iyan ko Allah aya
pen o ba niyan pagaadati so manga taw.
3 Na aden a balo sangkoto a inged a dii kekasokasoy rekaniyan somong, ka pegakolen
iyan on a 'Pasada kami ngka ago so ridoay aken na panindegen ka so kabenar aken.'
4 Miyatey den na da iyog so pangongokom o ba niyan tabangi, ogaid na sii sa kaposan na
pitero iyan sa ginawa niyan a 'Apiya pen da a kalek aken ko Allah aya pen o ba aken
pagaadati so manga taw
5 Na ipenindeg aken so kabenar angkai a balo, ka pesemoken ako niyan, na amayamay na
o ba ako niyan mapakandokaw ko da a rintas o kapesong iyan raken.' "
6 Tig pen o Kadnan a "Tanodi niyo so pitero angkoto a salimbot a pangongokom.
7 Na so Allah, na ba kena a ba niyan paginontolani so piyamili iyan a manga pagtaw a
pepamagakol on sa gagawii daondaw? Ba niyan sendoden a katebangi niyan kiran?
8 Teroon ko rekano a paginontolanan iyan siran nggagaan. Inonta bo na amay ka kesoy so
Wata o Manosiya na ba sekaniyan pekatoon sa paratiyaya sii sa doniya?"
So Bayambayanan makapantag ko Parisi ago so Panenekat sa Bowis
9 Piyanotol pen i Isa angkai a bayambayanan ko manga taw a matatangked sa ginawa iran
a manga oontol, na di iran dii sodiin so ped.
10 Tig iyan a "Somiyong so dowa kataw a mama ko Timplo ka sembayang. So isa on na
Parisi ago so isa na panenekat so bowis.
11 Tominindeg so Parisi na mindowaa a tig iyan a 'Ya Allah, penalamatan ko seka a kena
a ba ako datar o ped a taw a mala i napso, pepanalimbot, o di na dii sina, na taralebi pen
na kena a ba ako datar angkanan a panenekat sa bowis.
12 Oman pito gawii na di ako dii powasa sa dowa gawii na di aken dii ndiyakatan so
langon o pekepantiyari aken.'
13 “So peman so panenekat sa bowis a tomitindeg sa malo mawatan na ipekeya iyan o ba
lomangag sa langit, ka penggandangan iyan baden a rareb iyan a tig iyan a 'Ya Allah,
kapediin ako ngka, ka baradosa ako.'
14 Teroon ko rekano a sii ko kiyabaling iran na giyangkanan a panenekat sa bowis na aya
ibibilang o Allah a maontol a kena a ba so Parisi. Ka so oman i ipoporo iyan a ginawa
niyan na imbaba, na so pepangalimbabaan na iporo."
15 Aden a manga taw a piyangowit iran ki Isa so manga roroni a wata iran kaan iyan siran
maseko, ogaid na kagiya mailay o manga sokbat iyan na pimbobongetan iran siran.
16 Ogaid na tiyalowan siran i Isa sa somong siran on a tig iyan a "Pakasonga niyo raken
so manga wata ago di niyo siran pesepari, ka so datar iyan a manga taw na aya kirek ko
Ndatoan o Allah.
17 Teroon ko rekano a mataan den a apiya antawaa i di niyan terimaan so Ndatoan o
Allah a datar o katarimaa on o wata na di on den pekasoled."
So Kawasa a Olowan
18 So sakataw a olowan na iniise iyan ki Isa a "Goro a mapiya, antonaa i disomala a

penggolaolaan ko kaan aken makewali so kaoyagoyag a da a kaposan iyan?"
19 Somimbag si Isa a "Ino ako ngka mbetowi sa mapiya? Da a ba mapiya a rowar ko
Allah.
20 Katawan ka so manga sogoan o Kitab: 'Di ka pesina, di ka pemono, di ka pemanekew,
di ka pemamokeg, pagadati ngka so ama a ka ago so ina a ka.'
21 Tig o mama a "Langon ai na petomanen aken ipoon den ko kawawatai raken."
22 Kagiya maneg ai i Isa na pitero iyan ko kawasa a "Aden pen a isa a disomala a
penggolaolaan a da ngka tomana. Pesaa ngka langon so tamok ka na mbaabaada ngka so
pirak ko manga miskin, na kebegan ka sa kakawasaan roo sa kasorgaan. Oriyan iyan na
kasoy ka na pegonot ka raken."
23 So kiyanega niyan sii na tanto a mikerata a ginawa niyan, ka tanto sekaniyan a kawasa.
24 Na inilay sekaniyan i Isa a tig iyan a "So manga kawasa na tanto a maregen a
kapekasoled iran ko Ndatoan o Allah.
25 Lebi a malebod a kapagokit o onta ko peso a ragom a di so kapekasoled o kawasa ko
Ndatoan o Allah."
26 So manga taw a miyamakaneg sii na tig iran a "O giyanan, na antawaa bes i kesabet?"
27 Somimbag si Isa a "So di kegaga o manosiya na kegaga o Allah."
28 Pitero rekaniyan i Pidro a "Inawaan ami so langon a rek ami sa kapegonot ami reka."
29 Na pitero kiran i Isa a "Teroon ko rekano a mataan den a apiya antawaa i inawaan iyan
so walay niyan, o di na karoma niyan, o di na manga pagari niyan, o di na manga lokes
iyan, o di na manga wata sabap ko Ndatoan o Allah
30 Na pekatarima sekaniyan sa mapeteketakep ai sa masa imanto, ago so kaoyagoyag a da
a kaposan iyan ko pekatalingoma a masa."
31 Piyakaobay i Isa so sapolo ago dowa a sokbat na pitero iyan kiran a "Pamakineg kano!
Pesong tano sa Yarosalim a ron ketoman so langon taman a miyamangisorat o manga
nabi mipantag ko Wata o Manosiya.
32 Ka peladen sekaniyan ko kena a ba manga Yahodi na pegongatongaten iran, peranegen
ago penodaan iran.
33 Pemadasan iran sekaniyan ago mbonoon, ogaid na sii ko ikatelo gawii na keoyag bo."
34 Na da kasaboti o mange sokbat so apiya satiman bo sangkai a manga nganin, ka
pageemaan kiran so maana niyan na di iran katawan i di niyan dii teroon.
Piyakapiya i Isa So Bota a Pepamangni
35 Sii ko kapepakarani i Isa sa Yariko na aden a bota a mama a dii mamamangni a

moontod ko kilid a lalan.
36 Kagiya maneg iyan so madakel a taw a pepamanagad na iniise iyan o antona anan.
37 Pitero iran on a "Si Isa a Taw sa Nasarit na segad sii."
38 Na inipelalis iyan a "Hey Isa a wata o Daod, kapediin ako ngka!"
39 So manga taw a pepanga oona na pimbongetan iran sekaniyan a pitero iran on a baden
rerenek, ogaid na ba niyan den piyakatanog a kapepelalis iyan a "Hey Wata o Daod,
kapediin ako ngka!"
40 Na tomiyareg lomalakaw si Isa na inisogo iyan a witen rekaniyan so bota. Kagiya
makaobay ron na iniise rekaniyan i Isa a
41 “Antonaa i kabaya a ka a ikidia ko reka?"
Tig o mama a "Sir, kabaya aken a makailay ako peroman."
42 Tig i Isa a "Pekailay ka den! So paratiyaya ngka na aya ngka inipakapiya."
43 Sakotika den a miyakailay sekaniyan, na miyonot ki Isa a pepodin iyan so Allah. Na
kagiya mailay ai o madakel a taw na piyodi iran mambo so Allah.
LOKAS 19
Si Isa ago si Sakayos
Miyakaoma si Isa sa Yariko na pegokit on.

2 Na ndodoo so isa a olowan o manga panenekat sa bowis, a aya ngaran iyan na si
Sakayos, na kawasa sekaniyan a mama.
3 Piyanamaran iyan milay o antawaa si Isa, ogaid na mababa si Sakayos na da niyan
mailay si Isa sabap ko madakel a taw.
4 Na giyoto a miyalalagoy sekaniyan ko onaan o manga taw na tomiyabid ko kayo a
sikomori kaan iyan mailay si Isa a magokit sangkoto a lalan.
5 Kagiya makaoma den si Isa sangkoto a darpa na liyangag iyan so kayo na pitero iyan ki
Sakayos a "Panog ka nggagaan, Sakayos, ka sii ako mbolos ko walay ngka imanto a
gawii."
6 Na minggagaan sekaniyan manog na pisekasakaw niyan si Isa sa kapekebabaya.
7 So langon a miyakailay sii na miyanarotaro a tig iran a "Miyolos sekaniyan ko walay o
baradosa!"
8 Na tominindeg si Sakayos a tig iyan ko Kadnan a "Ilaya ngka, Kadnan. Ipoon imanto na
pembaabaaden aken so sabagi ko tamok aken ko manga miskin, na o aden a
kiyasalimbotan aken na mbadalan ko ron baden sa makapat matakep."
9 Na pitero i Isa a "Imanto a gawii na miyakatalingoma sangkai a walay so kakesabet, ka
giyangkai a mama na kiyababadan mambo o Ibrahim.
10 Ka somiyong sii so Wata o Manosiya kaan iyan mangiloba ago masabet so manga taw
a pepakanaraka."
So Bayambayanan makapantag ko Manga Pelata a Bolawan
11 Sii ko kapepamakinega iran ki Isa na piyanotol iyan kiran pen angkai a bayambayanan,
ka pepekarani sekaniyan sa Yarosalim na pipikiren o manga taw a magaan den kamasaan
so Ndatoan o Allah.
12 Tig iyan a "Aden a barabangensa a mama a somiyong ko mawatan a inged a pekibaloy
a dato na mbaling bo.
13 Sa da niyan pen kaganat na tiyawag iyan so sapolo kataw a oripen iyan na so oman i
isa kiran na bigan iyan sa satiman a pelata a pirak, na pitero iyan kiran a 'Ndagangen iyo
ai taman sa makakasoy ako sii.'
14 “Ogaid na ipekegowad sekaniyan o manga magiinged ko inged iyan, na somiyogo
siran sa manga taw a telokon rekaniyan an iran on matero a 'Di ami kabaya a ba giyangkai
a mama na aya rekami makandato.'
15 “Apiya pen oto na miyabaloy sekaniyan den a dato na miyaling. Na piyakitawag iyan
so manga oripen iyan a kiyapamegan iyan sa pirak kaan iyan katokawi i pira i miyanga
lalaba iran ko kiyandagang iran.
16 Miyakaoma so miyaona on na tig iyan a 'Sir, so pelata a pirak a inibegay ngka raken na
miyakasapolo matakep a miyalaba niyan.'
17 Somimbag so kadnan iyan a 'Mapiya ka a oripen! Sabap sa kasasanaan ka ko maito na
pakapendatoon ko seka ko sapolo a siti.'
18 “Miyakaoma so ikadowa a oripen na tig iyan a 'Sir, so pelata a pirak a inibegay ngka
raken na miyakalima matakep a miyalaba niyan.'
19 Pitero on mambo o dato a 'Pakapendatoon ko seka ko lima a siti.'
20 “Na miyakaoma so isa a oripen a tig iyan a 'Sir, katii so pelata a inibegay ngka raken;
piyanago aken a piyotos piyapiya ko paniyo.
21 Ka ipekelek aken seka, ka mapanton ka a mama a pepangowa ko kena a ba ngka rek,
ago peparagon ko da ngka pamolaa.'
22 “Na somimbag so kadnan iyan a 'Da a bali ngka a oripen! So manga katero o ka na aya
ko reka ikokom. O katawi ngka a mapanton ako a mama a pepangowa ko kena a ba ko
rek ago peperagon ko da aken pamolaa
23 Na ino ngka da tagoa so pirak aken sa bangko kaan amay ka makakasoy ako sii na
kedawat aken ago so iseg iyan?'
24 Na pitero o dato ko kititindeg roo a 'Kowaa niyo ron so satiman a pelata niyan na
began iyo ko oripen a aden a sapolo timan iyan a pelata.'
25 “Tig iran a 'Sir, aden den a sapolo timan iyan a pelata.'
26 “Na pitero o dato a 'Teroon ko rekano a so oman i aden a rek iyan na kebegan pen,
ogaid na so da a rek iyan na apiya so maito a sisii rekaniyan na kowaan on.
27 Na giyangkoto a manga ridoay aken a di iran kabaya i ba aken siran ndatoi na wita
niyo siran sii na pamonoa niyo ko hadapan aken.' "
So Piselasela a Kiyasoled i Isa sa Yarosalim
28 Kagiya matero ini i Isa na tomiyaros sekaniyan sa Yarosalim a moona ko manga

sokbat.
29 Sii ko kapepekarani niyan sa Bitpagi ago giya Bitani roo ko bobongan a bebetowan sa
Palaw a Olibi, na piyakaona niyan so dowa ko manga sokbat iyan a pitero iyan kiran a
30 “Song kano ko inged a maoonaan tano na amay ka makasoled kano ron na keoma niyo
a nati a kimar a iiiket a da pen kakodai. Bokaa niyo na wita niyo sii,
31 Na o aden a magise rekano a 'Ino niyo anan mbokaa?' na teroa niyo ron a 'Aden a
ikidia on o Kadnan.' "
32 Somiyong roo so manga siyogo na miyatoon iran a datar bo o pitero kiran i Isa.
33 Sii ko kapembokaa iran ko nati a kimar na iniise kiran o manga kirek on a 'Ino niyo
pembokaa so kimar?'
34 Tig iran a "Aden a ikidia on o Kadnan."
35 Na inowit iran so kimar ki Isa na iniampido iran ko likod iyan so manga gerab iran, na
piyakakoda iran on si Isa.
36 Sii ko kakokoda iyan na pepamangayaten o manga taw so manga gerab iran sii ko
lalan a pegokitan iyan.
37 Kagiya pepakarani sekaniyan ko darpa a ron ipetondagay so lalan ko Palaw a Olibi na
so langon a madakel a taw a pepamangonot on na mipoon siran den manga bababaya a
pepodin iran so Allah sa matanog sabap ko langon a piyakamemesa a manga galebek a
miyailay iran
38 A tig iran a
"Podin tano so Solotan a pekaoma sii ko ingaran o Kadnan!

Kalilintad roo sa kasorgaan,
na rek o Allah so bantogan roo sa pipeporoan a kasorgaan!"
39 So ped ko manga Parisi a sisii ko kalilimod na pitero iran ki Isa a "Goro pakareneka
ngka so manga sokbat ka."
40 Na pitero kiran i Isa a "Teroon ko rekano a o renek siran na so den so manga ator na
aya pelalalis."
Inisegad i Isa a Yarosalim
41 Miyakarani si Isa sa Yarosalim na kagiya mailay niyan na somigad sekaniyan sa sabap

on.
42 Na pitero iyan a "O ba ngka bo kiyiatokawan den apiya imanto a gawii o andamanaya i
kapakalintad ka, ogaid na mapapagna reka imanto kaan ka di keilay.
43 Pekatalingoma reka so manga gawii a pelikopan ka o manga ridoay ngka a manga
tambak a inggobat iran reka ko oman i mbala reka.
44 Nggebaan ka iran sa tarotop, na polangen iran so manga taw a kibabaling reka. Da a
satiman bo a ator a ba iran begaken a mibabatog ko isa a ator, ka da ngka kilalaa so masa
a kiyasong reka o Allah sa kasebeta niyan reka."
45 Somiyoled si Isa ko lamalama o Timplo na piyamogaw niyan so di roo dii ndadagang,

46 Na pitero iyan a "Misosorat ko Kitab a 'So Walay aken na Walay a Pesimbaan,' ogaid
na biyaloy niyo baden a dii tepokan o manga tekew!"
47 Oman gawii na pepamangendao si Isa roo ko Timplo. So manga poporo a imam, ago
so manga goro ko Kitab, ago so manga olowan ko manga taw na kebayaan iran mono.
48 Ogaid na da iran mapamikir o andamanaya i kanggolaolaa iran sii, ka so langon a taw
na kasosomayodan siran mamakineg ko langon a di niyan dii teroon.
LOKAS 20
Miyakaisa a gawii sii ko kapepangendaowa i Isa ko manga taw ago pepakalangkapen iyan
so Mapiya a Totol roo ko Timplo na miyakaoma on so manga poporo a imam ago so
manga goro ko Kitab a ped iran so manga pelokelekesen
2 Na pitero iran rekaniyan a "Teroa ngka rekami o antonaa i kapaar ka sa di ngka sii dii
kanggolaolaa? Antawaa i migay reka sangkai a kapaar?"
3 Inisembag kiran i Isa a "Aden mambo a ipagise aken rekano. Teroa niyo raken:
4 Anda poon so sangan i Yahiya sa kapepanalawat? Ba poon ko Allah o di na sii ko
manosiya?"
5 Na pinggedageda iran ai, na pitero o oman i isa ko ped iyan a "O teroa tano a poon ko
Allah na peteroon iyan a 'Ino niyo da paratiyayaa si Yahiya?'
6 Ogaid na o teroa tano a poon ko manosiya na langon angkai a manga taw na perobakan
tano iran a ator, ka matatangked sa ginawa iran a nabi si Yahiya."
7 Na giyoto a inisembag iran a "Di ami katawan o anda ini poon."
8 Na tig i Isa a "Di aken rekano mambo peteroon o antonaa i kapaar aken sa di aken dii
kanggolaolaa sangkai a manga nganin."
9 Mandiyadi na piyanotol i Isa ko manga taw angkai a bayambayanan: "Aden a mama a

miyamola sa asinda a obas, na piyagapin iyan ai ko manga ogopa na lomiyalakaw
sekaniyan sa miyatey a manga gawii.
10 Kagiya raoten so kaperagona on na somiyogo sekaniyan sa oripen sii ko manga ogopa
ka pekikowa niyan on so bagian iyan ko onga o pamomolan. Ogaid na piyamadasan
baden o manga ogopa na piyakabaling iran a da a miyakowa niyan.
11 Na giyoto a somiyogo sekaniyan kiran sa salakaw a oripen, ogaid na piyamadasan iran
mambo ago piyakakeyakaya iran, na piyakalalakaw iran a da a ba niyan miyakowa.
12 Na somiyogo sekaniyan sa ikatelo a oripen, ogaid na piyamalian baden o manga ogopa
ago biyogaw iran sa liyo.
13 “Na pitero o kirek ko asinda a 'Antonaa i sowaan ko? A, na sogoon ko roo so
pakatatayaan ko a wata aken ka masiken a pegadatan iran sekaniyan.'
14 “Ogaid na kagiya mailay sekaniyan o manga ogopa na pitero o oman i isa ko ped iyan
a 'Giyaya so wata o kirek. Bonoon tano kaan tano makowa angkai a asinda!'
15 Na giyoyod iran sa liyo o asinda na biyono iran.
"Na antonaa i penggolaolaan o kirek ko asinda sangkoto a manga ogopa?
16 Songowan iyan siran na pemonoon iyan, na pegapinen iyan so asinda sa salakaw a
manga taw."
Kagiya maneg ai o manga taw na pitero iran a "Di den anan manggolaola!"
17 Tiyobos siran i Isa na iniise iyan kiran a "O di manggolaola, na antonaa bes i maana
angkai a misosorat ko Kitab:

na miyabaloy baden a aya kaoonayan ko kaoontodan o walay'?
18 “Oman i isa a keolog sangkai a ator na keroperopet, ogaid na apiya antawaa i keologan
on na pegombiyombi."
So Pakaisa mipantag ko Kabayad sa Bowis
19 So manga goro ko Kitab ago so manga poporo a imam na kebayaan iran domakep si
Isa sii den sangkoto a oras, ka miyasipat iran a siran i piyakailatan iyan ko kiyapanotola
niyan ko bayambayanan, ogaid na ipekelek iran so manga taw.
20 Kagiya ka maoto na totoliken iran baden si Isa, na somiyogo siran on sa manga
manoriman a dii mamagomanta sa manga titito kaan iran kalitagi si Isa a nggolalan ko
kapakapeteroa iran on sa midimanda on kaan iran mapalad si Isa ko gobirnador a aden a
kadato iyan ago kapaar sa kasalaa on.
21 Na pitero o manga manoriman ki Isa a "Goro, katawan ami a osto so di ngka dii teroon
ago ipepangendao, na da a taw a ba ngka peramigi, ka ontol so ipepangendao ngka
makapantag ko lalan ko Allah.
22 Na, teroa ngka rekami o ba sisii ko Kitab so kabayad tano sa bowis ko Solotan sa
Roma o di na di?"
23 Ogaid na miyasarino i Isa so kapamagakal iran na pitero iyan kiran a
24 “Pakailaya ako niyo sa pelata a pirak. Antawaa ini kiparas ago ngaran i mitotombok
sii?"
"So solotan sa Roma," a inisembag iran.
25 Na pitero kiran i Isa a "O giyanan na began iyo ko Solotan so kak o Solotan na began
iyo ko Allah so kak o Allah."
26 Na da iran mapakatero si Isa sa midimanda on sii ko kamamasaan o manga taw.
Miyamemesa siran ko inisembag iyan na miyakarenek siran baden.
27 Aden a manga Sadosi a somiyong ki Isa (giyai so manga taw a tatarimaan iran a di
keoyag so miyamatay)
28 Na iniise iran rekaniyan a "Goro, inisorat rektano o Mosa a 'O matay so mama a aden a
minibegak iyan a karoma ogaid na da a wata iyan, na paliyogat ko pagari angkoto a mama
a pangaromaan iyan so balo a babay kaan siran makambawata sa kebabadan ko miyatay a
mama.'
29 Gowani na aden a pito kataw a magariyari a manga mama, na miyakapangaroma so
kaka na miyatay a da a wata iyan.
30 So tomalondog rekaniyan na piyangaroma niyan angkoto a miyabalo o pagari niyan, na
miyatay mambo.
31 Datar oto so ikatelo, na ndatadatar bo a miyanggolaola angkoto a pito kataw a palaya
siran miyatay a da a ba iran miniganat a wata.
32 Oriyan oto na miyatay mambo so babay.
33 Na amay ka manga ooyag so miyamatay na antawaa i kikaroma sangkoto a babay, ka
so pito kataw a mama na palaya on miyakapangaroma."
34 Somimbag si Isa a "So manga mama ago manga babay sa masa imanto na
makapetepitapi,
35 Ogaid na siran oto a mapapatot a pagoyagen a poon ko miyamatay a peginetaw ko
maori a alongan na di siran petepitapi.
36 Di siran den pematay, ka datar siran o manga malaikat. Manga wata siran o Allah ka
miyanga ooyag siran.
37 Apiya so Mosa na rininayag iyan a penga ooyag so miyamatay, ka sii ko inisorat iyan
makapantag ko pekedeg a maito a kayo na bitowan iyan so Kadnan sa 'Tohan o Ibrahim,
so Tohan o Iskak ago so Tohan o Yakob.'
38 Na kagiya Tohan iran sekaniyan na aya maana ini na oyagoyag siran pen apiya pen
miyamatay, ka sii ko hadapan o Allah na so kalangolangon na oyagoyag."
39 Na gominiraw so ped a manga goro ko Kitab a "Mapiya so inisembag ka, Goro."
40 Na da iran den karawi mise peroman si Isa.
41 Pitero kiran i Isa a "Ino dii matetaro a so Al Masih na Wata o Daod?

42 Ka so den so Daod na aya den misorat sii ko Sabor a:
'So Allah na pitero iyan ko Kadnan aken a

43 Taman sa ibetad aken so manga ridoay ngka
a dapoay o manga ai ngka." '
44 “Na kagiya bitowan o Daod so Al Masih sa Kadnan na andamanaya i kiyambaloy

niyan a Wata o Daod?"
So Lalangan i Isa mipantag ko manga Goro ko Kitab
45 Sii ko kapepamakineg o langon o manga taw na pitero i Isa ko manga sokbat iyan a
46 “Iktiyari niyo so manga goro ko Kitab a mababaya magenebeneb a ndiditar ko manga
pipiya a kimon, ago mababaya sa kapesalama kiran roo ko manga padian, ago pepamiliin
iran so isesenggay a manga ontoda ko sinagoga ago so tindos a manga darpa sii ko
kandori.
47 Pepangasaben iran so tamok o manga balo a sarta a pepakalayaten iran so manga
dowaa iran a makiilailain sa manga oontol. Lebi den a mala so indaneg kiran!"
LOKAS 21
So Sidka o Balo a Babay
Sii ko kiyapangilailay i Isa na miyailay niyan so manga kawasa a pepamanago siran sa

manga sidka sii baitalmal o Timplo.
2 Miyailay niyan mambo so isa a balo a miskin a tomiyago on sa dowalad a kowarta.
3 Na pitero i Isa a "Teroon ko rekano a mataan a giyangkoto a miskin a balo na lebi pen a
mala a tiyago iyan roo a di so piyamanago on o langon a ped.
4 Ka palaya siran misidka ko lawan ko kakawasaan iran, ogaid na giyangkoto a babay,
apiya sii ko kamimiskini ron, na inibegay niyan langon so ikeoyag iyan."
Inalamat i Isa so Kakegeba o Timplo
5 So ped ko manga sokbat na di ran dii mbibitiyaraiyan so makapantag ko Timplo a

sayana a mapiya a pegilain a pipendaraan sa manga pipiya i paras a ator ago manga
pamemegayan a iniselasela on o manga taw. Na pitero i Isa a
6 “So langon ai a pepanga iilay niyo, na pekaoma so manga gawii a da den a satiman bo a
ator on a ba kibagak ko kabebetadan on, ka so langon ai na penga gegeba."
7 “Goro," a iniise iran, "anda i kakeolaola ini, ago antonaa i toos ko masa a kitoman ai?"
8 Tig i Isa a "Iktiyari niyo o ba kano pakisaliba, ka madakel a pekaoma sii ko ingaran
aken a di iran dii teroon a "Saken so Al Masih!" ago "Magaan den makaoma so masa!"
Ogaid na di niyo siran pagonoti.
9 Amay ka maneg iyo so makapantag ko manga katidawa ago manga kaperido na di kano
kelek, ka disomala a keolaola ini mona, ogaid na kena a ba niyan sarta a ba aya kaposan."
10 Na tig iyan pen a "So isa a nasiyon na makipetidawa ko salakaw a nasiyon, na so isa a
ndatoan na nggobaten iyan so ped a ndatoan.
11 Keolaola so manga ala a linog, manga taon ago manga paniyakit sii ko mbarambarang
den a manga darpa, na pemakagemaw so piyakalekelek ago manga ala a nanao sii sa
langit.
12 “Ogaid na sa di pen kakeolaola angkai a manga nganin na pendadakepen kano o
manga taw ago setroon kano. Pagowiten kano roo ko manga sinagoga sa kapengokoma
rekano, na kelaboson kano, na pekadarpaan kano ko hadapan o manga dato ago manga
gobirnador, na langon ai na sabap ko ingaran aken.
13 Giyanan i kakeparo niyo sa kepeseksii niyo raken.
14 Ogaid na sa di pen ai kakeolaola na temantamani niyo so manga pamikiran iyo sa di
makaawid a akal iyo o andamanaya i kipetindegen iyo sa ginawa niyo.
15 Ka mbegan ko sekano sa mapetero iyo ago ongangen a apiya sakataw bo ko manga
ridoay niyo na da a ba on pekasembag o di na pekasangka.
16 Apiya so manga lokes iyo ago manga pagari, taman ko manga tonganay niyo ago
manga ginawai na tipon kano iran na pemonoon iran so ped rekano.
17 Ikegowad kano o langon a taw sabap ko ingaran aken.
18 Ogaid na da a satiman bo a bok ko olo niyo a ba on mada.
19 Ba kano den pakatitiger, ka giyoto i kakesabet o niyawa niyo.
Inaloy i Isa so Kakegeba a Yarosalim
20 “Amay ka mailay niyo a kalilikopan a Yarosalim o madakel a manga sondaro na

ketokawan iyo a magaan den ai mabinasa.
21 Sa masa oto na siran oto a ndodoo sa Yodiya na disomala a mamalalagoy ko manga
bobongan, na siran oto a sisii ko siti na disomala a mamangawa siran on, na siran oto a
ndodoo ko dii pagonayonayan na di siran soled ko siti.
22 Ka giyoto so manga gawii a kapendadaneg a kakitoman o langon a misosorat ko Kitab.
23 Dowandowaan iyan so kikaoogat ago so manga maritan a babay sangkoto a manga
gawii! Tanto a keregenan angkai a inged, na pemborngat so rarangit o Allah sangkai a
manga taw.
24 Pemonoon siran a pedang ago pemangitaog siran a penga bibiyag roo ko langon o
manga nasiyon. Na giya Yarosalim na pelagosaken o manga taw a kena a ba manga
Yahodi taman sa mapos so masa a inokoran ko kena a ba manga Yahodi.
25 “Sa masa oto na pekagemaw so manga nanao sii ko alongan ago sii ko olan ago so
manga bitoon. Sii sa doniya na kedaan sa arap so manga nasiyon a kesosa so manga
pamikiran iran sabap ko daleg o ragat ago so di niyan dii kambegebegel.
26 Kedaan sa tanod so manga taw sabap ko kalek iran sii ko kapenayawa iran ko manga
kesowasowa ko dalem a doniya, ka keselenseleng so manga kabatowa roo sa langit.
27 Na giyoto den i kakeilaya iran ko Wata o Manosiya a pekaoma a sisii ko gabon a
misasarta on so mala a kabatowa ago bantogan.
28 Amay ka pepoonan den ai maolaola na tindeg kano ago langag kano, ka pepekarani so
kakesabet iyo."
29 Na piyanotol kiran i Isa ngkai a bayambayanan: "Ilaya niyo so kayo a higos ago so
langon o manga kayo.
30 Amay ka mailay niyo a peraon den na ketokawan iyo sa da a ba on rekano petero a
magaan den lomaon.
31 Datar anan mambo na amay ka mailay niyo a pekeolaola angkai a pitero aken na
ketokawan iyo a magaan den makatalingoma so Ndatoan o Allah.
32 Teroon ko rekano a mataan den a keolaola ini langon sa di pen malengan mamatay so
kapapantagan imanto a manga taw.
33 Penga ada so langit ago so lopa, ogaid na di den keda so manga katero aken.
Kailangan so Kaiiktiyar
34 “Iiktiyar kano ka o ba kano baden matatalekeb sabap ko kitaralo a kekan iyo ago
kapaginom ko pakabereg a panginginomen, ago so manga awid a akal mipantag ko
kapepaginetaw niyo, ka o ba kano baden katomparakan sangkoto a gawii a datar o litag.
35 Ka kitalingoma ini ko langon a taw ko dalem a doniya.
36 Lalayon kano pageenaw a ipepangangarapan iyo a kegaga niyo lomidas so langon
angkai a keolaola ago pekatindeg kano sii ko hadapan o Wata o Manosiya."
37 Oman kadaondaw na pepangendao si Isa sii ko Timplo, na igira a gagawii na peliyo ko
siti, ka roo pekeden ko bobongan a bebetowan sa Palaw a Olibi.
38 Na igira a teked a kapipita na pepamanong so langon a taw ko Timplo sa
kapemakinega iran on.
LOKAS 22
Sa masa oto na magaan den so Pista ko Kakan sa Paan a da a Tapay ron a bebetowan sa
Paska.
2 So manga poporo a imam ago so manga goro ko Kitab na dii mbabanog sa okit a
kambonoa iran ki Isa, ka ipekelek iran so manga taw.
3 Samaoto na somiyook so Iblis ki Yodas a bebetowan sa Iskariyot, a isa ko sapolo ago

dowa a sokbat.
4 Na somiyong sekaniyan ko manga poporo a imam ago so manga olowan o manga
gordiya ko Timplo na miyakimbitiyarai kiran o andamanaya i kakepalada niyan kiran ki
Isa.
5 Miyababaya siran na miyayon siran sa tendanan iran sa pirak.
6 Miniyog si Yodas na mipoon den mangiloba sa kakeparowi niyan kiran malad ki Isa sa
di katokawan o madakel a taw.
7 Riyaot so gawii ko Pista ko Kakan sa Paan a da a Tapay, a so gawii a ron ipapaliyogat a

kapenombalia ko manga nati a bilibili a kekan iran sii ko inggabi ko Paska.
8 Siyogo i Isa si Pidro ago si Yahiya a tig iyan a "Lalakaw kano na tiyagara niyo so
inggabi tano ko Paska."
9 Iniise iran a "Anda i kabaya a ka a petiyagaran ami?"
10 Tig i Isa a "Sii den ko kapekasoled iyo ko siti na mbelaken kano o mama a maawid sa
omoy a tatagoan sa ig. Tondoga niyo ko walay a songowan iyan
11 Na teroa niyo ko kiwalay ron a 'Ipagise reka o Goro a: Anda i rowang a kekanan aken
ko inggabi ko Paska a ped aken so manga sokbat aken?'
12 Na pekiilay niyan rekano so mala a rowang sa poro a kiyaasaan den, na roo niyo
tiyagara so langon taman."
13 Na giyoto a lomiyalakaw siran na miyaoma iran oto langon a datar bo o pitero kiran i
Isa, na pitiyagar iran so inggabi ko Paska.
So Paan ago so Arak
14 Kagiya raoten so oras a kaken iran na miyontod si Isa ko pekenan a ped iyan so manga
siyogo.
15 Pitero iyan kiran a "Tanto aken a inikadali a kapakapamagatoang tano sii sangkai a
inggabi ko Paska sa di aken pen kakerasay.
16 Ka teroon ko rekano a di ako sii ken peroman taman sa di ini manggolaola roo ko
Ndatoan o Allah."
17 Na kinowa i Isa so tagayan na kagiya kapanalamatan iyan so Allah na tig iyan a
"Kowaa niyo ai na mbagibagia niyo.
18 Ka teroon ko rekano a ipoon imanto na di ako den maginom sangkai a arak taman sa
makatalingoma so Ndatoan o Allah."
19 Na kinowa niyan so paan na kagiya kapanalamatan iyan so Allah na piyangopak iyan
na inibegay niyan kiran a tig iyan a "Giyai so lawas aken a inirila para rekano. Nggolaolaa
niyo ai a ipetadem raken."
20 Datar oto mambo na kagiya makapasad siran gomabi na kinowa niyan so tagayan a tig
iyan a "Giyangkai a tagayan na aya bago a kapasadan o Allah a mipepasod ko rogo aken a
keodod para rekano.
21 “Ogaid na so tipo raken na mipageepeda aken sangkai a lamisaan!
22 Mataan den a petay so Wata o Manosiya a ketoman so takdir mipantag on, ogaid na
kemorkaan angkoto a mama a tipo ron!"
23 So kiyateroa sii i Isa na miyamagisei siran o antawaa kiran i penggolaola sii.
So Kipepawala o Antawaa i Lebi a Mala
24 Samaoto na mipepawala so manga sokbat o antawaa kiran i ibibilang a lebi a mala.

25 Na pitero kiran i Isa a "So manga dato o manga nasiyon na pepangondatoan iran so
manga pagtaw iran. Na so manga olowan iran na bebetowan sa 'Ginawai o manga Taw.'
26 Ogaid na kena a ba datar ai sii rekano, ka so lebi rekano a mala na disomala a
pembaloy a datar o ariyari rekano, ago so olowan na datar o pepanalagad.
27 Ka antawaa i lebi pen a mala? Ba so moontod a ken o di na so pepanalagad rekaniyan?
Ba kena a so moontod? Ogaid na sisii ako rekano a datar o pepanalagad.
28 Sekano den i lalayon raken makadedeket sii ko langon o kiyatepengi raken.
29 Na mbegan ko sekano sa kabenar sa kapendato a datar o kiyabegi raken sii o Ama
aken.
30 Na pekakan kano ago pemakainom ko lamisaan aken sii ko Ndatoan aken, na
pekaontod kano ko manga korsi a pepangokomen iyo so sapolo ago dowa a mbatabataa a
manga Israil."
Inalamat i Isa so Kipepalaon on i Pidro
31 Tig i Isa a "Simon, Simon, pamakineg ka! So Iblis na kabaya iyan a katepengi niyan
rekano langon a datar o taribasok a pepalidan iyan so ilaw.
32 Ogaid na inipangangarapan aken seka, Simon, kaan ka di kedai sa paratiyaya. Na amay
ka sengor ka raken peroman na pakabagera ngka so paratiyaya o manga pagari ngka."
33 Somimbag si Pidro a "Kadnan, makatitiyagar ako a mirakes reka a kekalaboso ago
mbonoon!"
34 Na pitero i Isa a "Teroon ko reka, Pidro, a sa di pen kapekakoko o manok sangkai a
gawii na penokolen ka sa makatelo o ba ako ngka katawi."
Pirak, Pontir ago Pedang
35 Pitero kiran i Isa a "Isako pakalalakaon aken sekano a da a awid iyo a pirak, o di na
pontir, o di na tinilas na ba aden a makokorang rekano?"
"Da den," a tig iran.
36 Tig i Isa a "Apiya oto na imanto na so aden a pirak iyan na awidi niyan, ago so pen so
potal, na so da a pedang iyan na pesaa niyan so gerab iyan na pamasa sa pedang.
37 Ka teroon ko rekano a disomala a kitoman so misosorat ko Kitab makapantag raken a
'Initapi sekaniyan ko manga baradosa.' Ka mataan den a so langon a miyamangisorat
makapantag raken na pekitoman."
38 Na pitero o manga sokbat a "Ilaya ngka, Kadnan, katii so dowa timan a pedang."
Tig iyan a "Kiyatangkaan den anan!"
39 Miyawa roo si Isa na somiyong ko Palaw a Olibi ka asal a olaola niyan, na miyonot on
so manga sokbat.
40 Kagiya makaoma siran sangkoto a darpa na pitero iyan kiran a "Pepangangarapan kano
kaan kano di ndaaga o kapetepengi rekano."
41 Na inawat iyan siran sa masiken maraot den o lebada a ator, na romiyoko sekaniyan
ago miyangangarapan
42 A tig iyan a "Ama, o kebaya ka na kowaa ngka raken angkai a tagayan, ogaid na
pengnin ko a kena a ba so kabaya aken i ketoman, ka so kabaya a ka."
43 Na gomimaw ron so isa a malaikat a poon sa kasorgaan a miyakabager rekaniyan.
44 Na kagiya tanto a mala a kararasay niyan na piyanamaran iyan baden a di niyan dii
kapangangarapan, na so ating iyan na datar o rogo a pegetek ko lopa.
45 Kagiya makapasad mangangarapan na tominindeg sekaniyan na komiyasoy ko manga
sokbat. Na miyaoma niyan siran a kitotorogen sabap ko dii kakerata a ginawa iran.
46 Na pitero iyan kiran a "Ino kano kitotoroga? Mbowat kano na pepangangarapan kano
kaan kano di ndaaga o katepengi rekano."
47 Sii ko di niyan pen dii katero na madakel a manga taw a miyamakaoma a

penanakodaan angkoto a mama a bebetowan sa Yodas, a isa ko sapolo ago dowa a sokbat.
Miyobay sekaniyan ki Isa ka pagarekan iyan
48 Ogaid na pitero on i Isa a "Yodas, tipon ka bes so Wata o Manosiya a sarta a
kapegareki ngka on?"
49 Kagiya mailay o manga sokbat i Isa o antonaa i mapenggolaola, na pitero iran a
"Kadnan ba ami den pelalakoten so manga pedang ami?"
50 Na so isa kiran na liyakot iyan so oripen o maporo a imam na miyasapil on so
kawanan a tangila niyan.
51 Ogaid na pitero i Isa a "Tatareg kano! Kiyatangkaan den!" Na siko iyan so tangila o
oripen na piyakapiya niyan.
52 Na somiyangor si Isa ko manga poporo a imam, ago so manga gordiya ko Timplo, ago
so manga pelokelokesen a miyamanong on sa kandakepa iran on a tig iyan a "Ba ako
tanganiyaya? Ino kano kiaawid sa manga pedang ago manga bentol ko kiyasong iyo sii?
53 Oman gawii na sisii ako rekano roo ko Timplo na da ako niyo dakepa. Ogaid na giyai i
oras iyo, sii ko dii kandato o kapaar o maliboteng."
54 Na diyakep iran si Isa na inowit iran ko walay o maporo a imam, na tomiyondog on si

Pidro a malo on maaawat.
55 Kagiya makambiyag siran sa apoy ko look o lamalama na miyamangontod siran ko
melilibeta on na tomiyapi kiran si Pidro.
56 Aden a sakataw a raga a miyailay niyan sekaniyan a moontod ko obay o apoy, na
tintengan iyan si Pidro na pitero iyan a "Giyangkai a mama na ped iyan mambo!"
57 Ogaid na inipelaw ai i Pidro a tig iyan a "Di aken sekaniyan katawan, Babay!"
58 Da matey na aden a mama a miyakainengka rekaniyan a tig iyan a "Isa ka kiran pen!"
Na tig i Pidro a "Kena, Aki!"
59 Kagiya makaisa ka oras na pitero o ped a mama a da den ndowadowa a "Mataan den a
giyangkai a mama na ped iyan, ka taw mambo sa Galili!"
60 Ogaid na somimbag si Pidro a "Aki, di aken katawan i di ngka dii teroon!" Na sii ko di
niyan pen dii katero na komiyoko so manok.
61 Na dominingil so Kadnan a tintengan iyan si Pidro, na kiyatademan i Pidro so pitero
rekaniyan o Kadnan a "Sa di pen kapekakoko o manok sangkai a gawii na ipepelaw ako
ngka sa makatelo.
62 Na lominiyo si Pidro na gomiyoraok a tanto a misendit.
63 Oriyan iyan na so manga mama a nggogordiya ki Isa na piyagongatongat ago piraraneg
iran sekaniyan.
64 Pinilesan iran so manga mata niyan a di ran dii teroon a "Iring ka sa nabi! Antawaa i
somiyontok reka?"
65 Na madakel pen a pitero iran a inipagitowito iran on.

66 Kagiya mapita na mitimotimo so manga pelokelokesen ko manga Yahodi a rakes on
so manga poporo a imam ago manga goro ko Kitab na miyawit si Isa ko pengokoman
iran.
67 Pitero iran on a "O seka so Al Masih, na teroa ngka rekami."
Somimbag si Isa a "O teroa ko rekano na di ako niyo mbenaren,
68 Na o pagisei aken sekano na di ako niyo sembagen.
69 Ogaid na ipoon imanto na makaoontod so Wata o Manosiya ko kawanan o Lebi a
Mamaapaar a Tohan."
70 Na pitero iran langon a "Na, seka bes so Wata o Allah?"
Na inisembag iyan kiran a "Benar so di niyo dii teroon a saken den."
71 Na pitero iran a "Di den kailangan a kapakapeseksia tano ko ped! Sektano den i
miyakaneg sangkai a pitero iyan!"
LOKAS 23
Miyamanindeg langon angkoto a malilimod na inowit iran si Isa ko gobirnador Pilato.

2 Roo iran sekaniyan pisenditan a tig iran a "Kiyatokawan ami a giyangkai a mama na
pepakirido iyan so gobirno ko nasiyon ami. Ipesapar iyan so kapembayadi ko bowis ko
Solotan sa Roma, ago di niyan dii teroon a sekaniyan so Al Masih a isa a solotan."
3 Iniise rekaniyan i Pilato a "Ba seka so Solotan o manga Yahodi?"
Somimbag si Isa a "Benar so di ngka dii teroon."
4 Na pitero i Pilato ko manga poporo a imam ago so madakel a taw a "Da a miyatoon
aken a isela sangkai a mama."
5 Ogaid na initaros iran baden a di ron dii kasenditi a tig iran a "Pepangondoin iyan so
manga taw sa dalem a Yodiya a nggolalan ko kapepangendao niyan. Mipoon sekaniyan sa
Galili na tiyampos iyan sii den."
Si Isa sii ko Hadapan i Hirod
6 So kiyanega sii i Pilato na iniise iyan o ba taw sekaniyan sa Galili.

7 Kagiya katokawan iyan a poon bes si Isa ko inged a ndadatoan i Hirod na piyakiwit iyan
sekaniyan ki Hirod a samaoto na ndodoo mambo sa Yarosalim.
8 Tanto a miyababaya si Hirod kagiya mailay niyan si Isa, ka miyaneg iyan den so
makapantag on, na miyatey den a sisingayoon iyan a kailaya niyan on. Na iinamen iyan a
mailay niyan si Isa a dii nggolaola sa piyakamemesa a nanao.
9 Na piyangingisean sekaniyan i Hirod sa madakel a pakaise, ogaid na da den sembaga i
Isa.
10 Na miyobay so manga poporo a imam ago manga goro ko Kitab a kititindeg roo a di
alangalang a di ran dii kasenditi ki Isa.
11 Oriyan iyan na piyangongatongat ago pisodi i Hirod ago so manga sondaro niyan si
Isa, na piyakanditar iran sekaniyan sa kimon a mapiya na piyakiwit iran komasoy ki
Pilato.
12 Sii den sangkoto a gawii na miyakangginawai si Hirod ago si Pilato, ka sa da pen ai
kanggolaola na meridoay siran.
13 Piyakitawag i Pilato so manga poporo a imam ago so manga olowan ago so madakel a
taw
14 Na pitero iyan kiran a "Inowit iyo raken angkai a mama a pitero iyo a pepakirido iyan
ko manga taw so gobirno. Na piyangingisean aken sii ko hadapan iyo, ogaid na da den a
ba ko miyatoon a sala iyan a inidimanda niyo ron.
15 Da matoon mambo i Hirod i sala iyan, ka piyakakasoy niyan rekami, na marayag a da
a miyanggolaola niyan a ba patot a imbono on.
16 Sabap sii na pakipemadasan ko sekaniyan baden na mbokaan ko."
17 Ka paliyogat ki Pilato a pakaliyon iyan kiran so sakataw a kalaboso igira a miyaoma
ngkoto a Pista.
18 Ogaid na mirengarengan siran den melalis a "Bonoa ngka sekaniyan! Si Barabas i
bokai ngka para rekami!"
19 Miyakalaboso si Barabas sabap ko kiyaridoa niyan ko gobirno sa Yarosalim, na
miyakapamono sekaniyan.
20 Kagiya kabaya i Pilato a mbokaan iyan si Isa na miyananalo peroman ko manga taw.
21 Ogaid na milalalis siran baden somembag a "Totoka ngka sekaniyan ko kros! Totoka
ngka ko kros!"
22 Pitero kiran i Pilato sa miyakatelo a "Ngkaino? Antonaa i sala a pinggolaola niyan? Da
a ba ko rekaniyan miyatoon a patot a kibono on. Sabap roo na pakipemadasan aken na
mbokaan ko."
23 Ogaid na initaros iran baden a kapelalalis iran sa matanog a petegelen iran a totoken si
Isa ko kros. Na so di ran dii pelalalis na aya miyakataban,
24 Na kiyokom i Pilato sa ginawa niyan a tomanen iyan so pepangnin iran.
25 Na biyokaan iyan so mama a piyangni iran a kiyalaboso sabap ko kiyaridoa niyan ko
gobirno ago sabap sa miyakapamono, na piyalad iyan si Isa ko kabaya iran a ikidia iran
on.
26 Sii ko kapegowita iran ki Isa roo ko mbonoan on na miyakabalak siran sa mama a

pepakapoon ko dii pagonayonayan, a si Simon a magiinged sa Sirini. Diyakep iran
sekaniyan na piyakiposai iran on so kros, na pepakitondog iran on si Isa.
27 Madakel a manga taw a pepamanondog ki Isa, a so ped kiran na manga babay a di ran
sekaniyan dii mboko ago dii ndidiyagaw.
28 Na diningilan siran i Isa a tig iyan a "Manga babay sa Yarosalim, di ako niyo
penggoraoka, ka aya niyo goraoka na so manga ginawa niyo ago so manga wata iyo.
29 Ka pekatalingoma so manga gawii a peteroon o manga taw a 'Rarakmatan so manga
babay a di pembawata, ago so manga babay a da den mbawata ago da den kasosowi!'
30 Sangkoto a masa na peteroon o manga taw ko manga palaw a 'Tempagi kami niyo,'
ago sii ko manga bobongan a 'Tamboni kami niyo.'
31 Ka o giyangkai a manga nganin i di ran dii nggolaolaa sii ko kapepelita pen o kayo na
antonaa i kesowasowa amay ka miyarayong den?"
32 Aden pen a dowa kataw a tanganiyaya a pegowiten roo a mbonoon a ped i Isa.
33 Kagiya makaoma siran ko darpa a bebetowan sa 'Lagas a Olo,' na ron iran tiyotok si
Isa ago so dowa kataw a tanganiyaya ko manga kros, a so isa on na sii sa kawanan i Isa,
na so isa peman na sii sa diwang.
34 Na pitero i Isa a "Hey Ama ko, rilai ngka siran ka di iran katawan i di ran dii
nggolaolaan." Na pimbagibagi o manga sondaro so manga nditaren iyan a nggolalan ko
kaperipa.
35 Kititindeg roo so manga taw a mbabantay, na so manga olowan na di ran dii
pagongatongaten si Isa a tig iran a "Siyabet iyan so ped, na patot a sabeten iyan a ginawa
niyan o sekaniyan so Al Masih a aya Miyapili o Allah!"
36 Piyagompatompat sekaniyan pen o manga sondaro. Miyobay siran on na diyawagan
iran sa arak,
37 Na pitero iran on a "O seka so solotan o manga Yahodi, na sabeta ngka a ginawa
ngka!"
38 Na sii ko kaporoan iyan na aden a misosorat on a "Giyai so solotan o manga Yahodi."
39 So isa ko manga tanganiyaya a mabibitin roo na piyagitowito iyan si Isa a tig iyan a
"Ba di seka so Al Masih? Sabeta ngka a ginawa ngka ago sekami!"
40 Ogaid na pimbongetan sekaniyan o ped iyan a tig iyan a "Ba da a kalek ka ko Allah?
Ndatadatar a kapendanega rekta ago sekaniyan,
41 Ogaid na mapapatot rekta ini sabap ko miyanggolaola ta. Ogaid na giyangkai a mama
na da a pinggolaola niyan a marata."
42 Na pitero iyan pen a "Hey Isa, tademi ako ngka amay ka makasoled ka ko Ndatoan
ka."
43 Pitero rekaniyan i Isa a "Teroon ko reka a mataan den a imanto a gawii na keped ka
raken roo sa kasorgaan."
So Kiyapatay i Isa
44 Kagiya maoto den a alongan na kiyalibotengan den so dalem a inged oto taman sa alas
tris,
45 Ka tomiyareg sominang so alongan.
45 So rending a bibitinen roo ko Timplo na miyakisi a miyadowa timan
46 Na miyananalo si Isa sa matanog a tig iyan "Hey Ama, iserig aken so niyawa ko sii ko
manga lima ngka!" Na oriyan o kiyateroa niyan sii na miyatay den.
47 So olowan o manga sondaro na kagiya mailay niyan angkai a miyaolaola na biyantog
iyan so Allah a tig iyan a "Mataan den a maontol angkai a mama."
48 Na so langon o madakel a taw a mitimotimo roo a mbabantay na kagiya mailay iran so
miyasowasowa na mimbabaling siran a penggandangan iran a rareb iran.
49 So langon a ginawai i Isa a ped on so manga babay a miyamangonot rekaniyan a poon
sa Galili na kititindeg siran sa malo mawatan a lomalangkaw sangkai a dii manggolaola.
50 Aden a mama a bebetowan sa Yosop a isa ko pangongokom ko manga Yahodi.

Mapiya ago magiinontolan a mama
51 A da makaayon ko kiyakokoma iran ki Isa ago so inikidia on. Poon sekaniyan sa
Arimatiya a isa a inged sa Yodiya, na pakatatalingomaan iyan so Ndatoan o Allah.
52 Somiyong sekaniyan ki Pilato na piyangni niyan on so lawas i Isa.
53 Na inibaba iyan ai a poon ko kros, na biyongkosan iyan sa onong a sotra na inibetad
iyan ko kobor a kakakalotan den ko lakongan a da den katagoi sa miyatay.
54 Giyangkoto a gawii na Diyamaat, a so Gawii a Ipetiyagar ko Gawii a Idedeke.
55 So manga babay a miyonot ki Isa gowani a poon sa Galili na tomiyondog siran ki
Yosop na miyailay iran so kobor ago so kinibetaden roo ko lawas i Isa.
56 Oriyan iyan na miyaling siran na mitiyagar siran sa manga ikekamotan ago lana
mamot para ko lawas. Ogaid na domike siran ko Gawii a Idedeke a so den so inisogo o
Kitab.
LOKAS 24
So Kiyaoyag i Isa
Sii ko teked a kapipita ko Akad somiyong so manga babay ko kobor a aawidan iran so
ikekamotan a pitiyagar iran.
2 Miyaoma iran so kobor a kiyalekaan, ka miyalilid den so ator a poon ko gimowa iyan.
3 Na somiyoled siran on, ogaid na da iran matoon so lawas o Kadnan a Isa.
4 Sii ko katitindeg iran roo a kikalilibogan makapantag sii na tekaw den a miyakagemaw
so dowa kataw a mama a tominindeg ko obay ran a ndiditar sa pepamangindat a nditaren.
5 Miyalek so manga babay na miyakatolong siran. Pitero kiran o manga mama a "Ino niyo
pepangilobaa so oyagoyag sii ko miyamatay?
6 Da sekaniyan sii ka miyaoyag bo! Tademi niyo so pitero iyan rekano isako ndodoo
sekaniyan pen sa Galili
7 A tig iyan a 'So Wata o Manosiya na disomala a kepalad ko kapaar o baradosa a manga
mama ago ketotok ko kros na keoyag bo sii ko ikatelo gawii.' "
8 Na kiyatademan o manga babay so manga katero iyan,
9 Na komiyasoy siran a poon ko kobor na piyanotol iran ai langon ko sapolo ago isa a
sokbat ago so langon a ped.
10 Giyangkai a manga babay, a si Mariyam Magdalina, si Yowana, si Mariyam a ina i
Santiyago ago so ped iran a manga babay na aya miyamanotol sangkai a manga nganin sii
ko manga siyogo.
11 Ogaid na aya kapipikira iran on na dii mamerak so manga babay, na da iran mbenara
so pitero iran.
12 Ogaid na tominindeg si Pidro na miyalalagoy roo ko kobor, na komiyoong ago
siyorong iyan, na miyailay niyan a aya bo a matatago roo na so manga dinis a inibongkos
ki Isa. Na miyaling sekaniyan a pepememesa o antonaa i miyaolaola.
So Kiyalalakaw i Isa sa Imaos
13 Sii sangkoto a gawii na pelalakaw so dowa ko manga sokbat a pesong sa inged a

bebetowan sa Imaos a manga sapolo ago isa ka kilomitro a poon sa Yarosalim.
14 Di ran dii mbibitiyaraiyan so langon taman a miyasowasowa.
15 Na sii ko di ran dii kambibitiyarai na si den si Isa na domiyaseg kiran, na miyonot
kiran a pelalakaw.
16 Miyailay iran sekaniyan, ogaid na da kiran maparo o ba iran makilala.
17 Pitero kiran i Isa a "Antonaa i di niyo dii mbibitiyaraiyan ko kapelalakaw niyo?"
Tomiyareg siran lomalakaw a peparas sa mararata a ginawa iran,
18 Na somimbag so isa kiran a aya ngaran iyan na si Kliyopas a tig iyan a "Ba seka bo i
mama a gomegenek sa Yarosalim a di niyan katawan so manga miyaolaola roo ko
miyamakapira den ai gawii?"
19 “Antonaa i miyaolaola?" a iniise iyan.
Tig iran a "So kiyaokitan i Isa a Taw sa Nasarit. Nabi sekaniyan a kikilalaan o Allah ago
so langon a taw a mala i kabatowa so katero iyan ago galebek.
20 So manga poporo a imam ago so manga olowan tano na piyalad iran ko kaselaa on ko
kapatay, na tiyotok iran ko kros.
21 Aya iinamen ami gowani na sekaniyan i pekasabet sa Israil. Liyo san pen na ikatelo
den ai gawii a kiyanggolaola oto.
22 Ogaid na miyamemesa kami ko pitero o ped ko manga babay a ped ami, ka
komiyabalaga siran somong ko kobor
23 Na da iran roo matoon so lawas iyan. Komiyasoy siran na piyanotol iran a miyakailay
siran kon sa pangingilain, a so manga malaikat a pitero iran kiran a oyagoyag sekaniyan.
24 Na so ped ko manga ped ami na somiyong ko kobor, na miyaoma iran a datar bo o
pitero o manga babay, ogaid na da iran sekaniyan mailay."
25 Na pitero kiran i Isa a "Sekano a da a manga lalag iyan ago manga lolombat i
kaparatiyaya ko langon a miyatero o manga nabi!
26 Ba di disomala a daan a miyakaokit so Al Masih sangkai a manga karomasayan na go
bo makasong sa kasorgaan?"
27 Na inosay niyan kiran so misosorat ko dalem a Kitab makapantag sa ginawa niyan
ipoon ko Kitab o Mosa taman ko manga Sorat o langon o manga nabi.
28 Sii ko kapepakarani iran ko inged a songowan iran na man den a ndayon si Isa ko
kapelalakaw niyan.
29 Ogaid na inakolan iran sekaniyan a "Sii ka rekami den pasin, ka magaan den
magagawii na pekaliboteng." Na somiyoled roo si Isa ka tereg kiran.
30 Sii ko kapepamagatoang iran na kominowa sekaniyan ko paan na miyanalamat. Na
piyangopak iyan na inidawag iyan kiran.
31 Sarta den a miyabekar so manga mata iran na miyakilala iran sekaniyan. Ogaid na
somidep sekaniyan baden na da iran den mailay.
32 Na pitero o isa ko ped iyan a "Ba di tanto a kiyaoyatan so manga poso ta sii ko di
niyan rekta dii kapakimbitiyarai roo ko lalan a penggogoden iyan rekta so Kitab?"
33 Na sii den sangkoto a oras na gomiyanat siran na komiyasoy sa Yarosalim, na
miyatoon iran so sapolo ago isa a sokbat a titimo roo a rakes o manga ped iran
34 A aya iran dii teroon na "Mataan den a miyaoyag bo so Kadnan, na miyakiilay ki
Simon!"
35 Na piyanotol o dowa a mama so miyaolaola sii ko lalan, ago so kiyakilalaa iran ki Isa
sii ko kiyapangopaka niyan ko paan.

36 Sii ko kapepanotola iran sii pen na gomimaw den si Isa a tomitindeg ko seronsarongan
iran, na pitero iyan a "Malalayon rekano so kalilintad."
37 Kiyatekawan siran ago miyanga alek a aya mapipikir iran na miyakailay siran sa
arowak.
38 Pitero iyan kiran a "Ino kano penga aabeng? Ino kano pendowadowa?
39 Ilaya niyo so manga lima ko ago manga ai, ka saken den! Apera ko niyo, ka ketokawan
iyo; ka so arowak na da a ba niyan sapo ago tolan a pekeilay niyo a sisii raken."
40 Kagiya matero iyan ai na piyakiilay niyan kiran so manga lima niyan ago manga ai.
41 Ogaid na di siran pen pekapangimbenar piyapiya sa o ba sekaniyan den sabap ko
kiyababaya iran ago kiyapamemesa. Na giyoto a iniise iyan kiran a "Ba aden a kekan sii?"
42 Na bigan iran sekaniyan sa sabool a iniyaw a seda,
43 Na kinowa niyan ago kiyan iyan sii ko hadapan iran.
44 Pitero iyan kiran a "Tanodi niyo angkai a miyatero aken rekano isako sisii ako rekano
pen: Disomala a kitoman so langon a misosorat makapantag raken sii ko Kitab o Mosa
ago so manga Sorat o manga nabi ago sii ko Sabor."
45 Na taros a liniwanagan iyan so manga pamikiran iran kaan iran masabot so Kitab,
46 A tig iyan a "Giyai i misosorat on: Kerasay so Al Masih na keoyag bo a poon ko
miyamatay sii ko ikatelo gawii,
47 Na sii ko ingaran iyan na so osiyat makapantag ko katelikodi ko manga dosa ago so
kaperilai ko dosa na pekalangkapen roo ko langon o manga nasiyon a ipoon sa Yarosalim.
48 Sekano i manga saksi sangkai a manga nganin.
49 “Na pekasongen ko rekano so initopa o Ama aken. Ogaid na tatareg kano sii sa siti
taman sa masenep kano o kabatowa a poon sa kasorgaan."
50 Oriyan oto na piyakaonot siran i Isa ko liyo o siti taman sa Bitani, na inibayaw niyan a
manga lima niyan na riyakmatan iyan siran.
51 Na sii ko kaperakmati niyan kiran na inawaan iyan siran, ka minibayaw roo sa
kasorgaan.
52 Na sinimba iran sekaniyan, na komiyasoy siran sa Yarosalim a tanto siran a
pekebabaya.
53 Na milalayon siran roo ko Timplo a pepodin iran so Allah.
YAHIYA
YAHIYA 1
So Katero a Pekepoonan o Kaoyagoyag
Sii sa pagampaganay na kapapantagan den so Katero. So Katero na ped o Allah, na so

Katero na aya den so Allah.
2 Ipoon sa poonan na ped sekaniyan o Allah.
3 Nggolalan rekaniyan so kiyaadena ko langon taman, na da den a satiman bo a kaaden a
ba makaliyoliyo rekaniyan a kiyaadena on.
4 Madadalem rekaniyan so kaoyagoyag, na giyangkai a kaoyagoyag na aya solo a
pelindaw ko manga taw.
5 So solo na pesindaw sii ko kaliboteng, na da den ai kalangkolobi o maliboteng.
6 Aden a mama a siyogo o Allah a aya ngaran iyan na si Yahiya.
7 Miyakaoma sekaniyan kaan iyan matero ko langon a taw so makapantag sangkoto a
solo kaan siran makaparatiyaya sabap ko kapeseksii niyan on.
8 Si Yahiya na kena a ba so solo, ka miyakaoma kaan iyan kapeseksii so solo.
9 Samaoto na so tito a solo a pelindaw ko oman i isa a taw na pepakaoma ko doniya.
10 Ogaid na apiya pen miyaaden so doniya a nggolalan rekaniyan na da sekaniyan kilalaa
o doniya isako sisii sekaniyan on.
11 Miyakaoma sekaniyan ko manga nganin a rek iyan, ogaid na so bangsa niyan a manga
taw na da iran sekaniyan tarimaa.
12 Ogaid na so langon a tomiyarima rekaniyan a miyamaratiyaya on na bigan iyan sa
kabenar a mabaloy a manga wata o Allah.
13 Na miyabaloy siran a manga wata iyan a kena a ba sii ko kamamanosiyai a okit sabap
ko kabaya o lawas, o di na takdir o taw, ka so den so Allah i Ama iran.
14 So Katero na miyabaloy a manosiya na komiyaden rektano. Mapepeno sekaniyan a
limo ago tito a benar. Na miyailay ami so bantogan iyan, a so bantogan o botong a Wata o
Ama.
15 Miseksi si Yahiya mipantag rekaniyan, na inipananalo niyan a "Giyai so mama a pitero
aken isako teroon ko a 'Sekaniyan a pekaoma a pekatalondog raken na lawan raken, ka
kapapantagan sekaniyan den sa da raken pen kimbawataan.' "
16 Sabap ko mitataralo a limo iyan na sektano langon na miyamakatarima sa madakel a
manga rakmat, a so oman i isa on na pagomanan sa isa pen.
17 So Kitab na initoron a nggolalan ko Mosa, ogaid na so limo ago so tito a benar na
miyakatalingoma a nggolalan ki Isa Al Masih.
18 Da a taw a ba miyakailay ko Allah. So botong a Wata o Allah a pakatatayaan o Ama
na aya rekaniyan miyakapayag.
Antawaa si Yahiya a Pananalawat?
19 So manga Yahodi sa Yarosalim na somiyogo siran ki Yahiya sa manga imam ago

manga Libitiyo kaan iran kaisei o antawaa sekaniyan
20 Na pitero iyan kiran so benar a da den a piyagma iyan, ka inipemataan iyan a "Kena a
ba saken so Al Masih."
21 Iniise iran on a "Antawaa ka bes? Ba seka si Iliyas?"
Tig iyan a "Kena."
Iniise iran pen a "Ba seka so Nabi?"
Tig iyan a "Kena."
22 Na tig iran a "Na, teroa ngka rekami o antawaa ka kaan aden a kisembag ami ko
somiyogo rekami. Antonaa i mapetero o ka makapantag sa ginawa ngka?"
23 Inisembag kiran i Yahiya so manga katero o nabi Isayas a "Saken so sowara a
pepananalo sii ko mitataog a kaden a dii tero sa 'Pakatitowa niyo so lalan a pagokitan o
Kadnan.' "
24 So siran oto a siyogo ki Yahiya a poon ko manga Parisi
25 Na inisean iran sekaniyan peroman a "O kena a ba seka so Al Masih, o di na so Iliyas,
o di na so Nabi na ino ka pepanalawat?"
26 Pitero kiran i Yahiya a "Saken na aya ipepanalawat aken na ig, ogaid na sisan rekano
so sakataw a di niyo katawan.
27 Sekaniyan so pekaoma a pekatalondog raken na apiya so iket o tinilas iyan na kena a
ba ako mapapatot a pemboka on."
28 Palaya ini miyaolaola roo sa Bitani sii sa sabala a lawasaig a Yordan a ron
pepanalawat si Yahiya.
So Nati a Bilibili o Allah
29 Sii ko talondog a gawii na miyailay i Yahiya si Isa a pepekaantap rekaniyan, na tig i

Yahiya a "Kataya so Nati a Bilibili o Allah a pepakadaan iyan so dosa o doniya!
30 Sekaniyan so pitero aken isako teroon ko a 'Aden a mama a pekaoma a pekatalondog
raken a lawan raken ka kapapantagan sekaniyan den sa da raken pen kimbawataan.'
31 Gowani na di aken katawan o antawaa sekaniyan, ogaid na somiyong ako sii a
pepanalawat sa ig kaan sekaniyan mapayag ko manga taw sa Israil."
32 Na miseksi si Yahiya a tig iyan a "Miyailay aken so Roh a petena a poon sa kasorgaan
a datar o marapatik na komiyaden rekaniyan.
33 Da aken sekaniyan makilala gowani, ogaid na so Allah a somiyogo raken sa
kapenalawat aken sa ig na pitero iyan raken a 'Keilay ngka so Roh a petena ago keden ko
isa a mama; sekaniyan so penalawat ko Soti a Roh.'
34 Na miyailay aken ai, na pepamataanan aken a sekaniyan so Wata o Allah."
So Paganay a manga Sokbat i Isa
35 Kagiya talondog a gawii na ndodoo peman si Yahiya a ped iyan so dowa ko manga
sokbat iyan,
36 Na kagiya mailay niyan a somiyagad si Isa na tig iyan a "Kaoto so Nati a Bilibili o
Allah!"
37 Kagiya maneg o dowa a sokbat so pitero i Yahiya na tiyondog iran si Isa.
38 Dominingil si Isa na miyailay niyan a petondogen iran sekaniyan, na iniise iyan kiran a
"Antonaa i pepelobaan iyo?"
Somimbag siran a "Rabi," (maana a 'Goro') "anda ka mababaling?"
39 Tig iyan a "Onot kano raken na ilaya niyo." Na miyonot siran on na miyailay iran o
anda mababaling, na komiyaden siran rekaniyan sangkoto a gawii ka manga alas kowatro
oto sa kegabi.
40 So isa sangkoto a dowa a sokbat a miyakaneg ki Yahiya a tomiyondog ki Isa na si
Andriyo a pagari i Simon Pidro.
41 Pimbabanog nggagaan i Andriyo si Simon a pagari niyan na pitero iyan on a
"Minitoona ami so Al Masih" (Aya maana niyan na 'Kiyaidinan').
42 Na inowit iyan si Simon ki Isa. Tintengan sekaniyan i Isa na pitero iyan a "Seka bes si
Simon a wata i Yahiya. Ipoon imanto na mbetowan ka sa Sipas." (Aya maana niyan na
Pidro')
Tiyawag i Isa si Pilipi ago si Natanil
43 Kagiya talondog a gawii na piyasad i Isa sa ginawa niyan a song sa Galili. Minitoona
iyan si Pilipi na pitero iyan on a "Pegonot ka raken."
44 Si Pilipi na taw sa Bitsaida a so inged a babalingan i Andriyo ago si Pidro.
45 Pimbabanog i Pilipi si Natanil na pitero iyan on a "Minitoona ami so mama a inisorat
o Mosa ago so manga nabi sii ko Kitab. Sekaniyan si Isa a taw sa Nasarit, a wata i
Yosop."
46 “Ba aden bes a mapiya a ba pekapoon sa Nasarit?" a iniise i Natanil.
"Onot ka raken na ilaya ngka," a inisembag i Pilipi.
47 Kagiya mailay i Isa si Natanil a pegantap rekaniyan na tig iyan makapantag on a
"Kataya so tito a taw sa Israil a da on so kapamagakal!"
48 Iniise i Natanil a "Ino ako ngka katawi?"
Tig i Isa a "Miyailay aken seka isako ndodoo ka ko atag o kayo a korma sa da reka pen
katawaga i Pilipi.
49 Tig i Natanil a "Goro, seka den so Wata o Allah! Seka so Solotan a Israil!"
50 Na tig i Isa a "Miyaratiyaya ka bes sabap ko kiyateroa ko reka on a miyailay aken seka
sii ko atag o kayo korma? Pekailay ka sa lebi pen a piyakamemesa a di giyai!"
51 Na tig iyan pen a "Teroon ko rekano a mataan den a keilay niyo a kelekaan a
kasorgaan ago so manga malaikat o Allah a manik manog den sii ko Wata Manosiya."
YAHIYA 2
So Kakewing roo sa Kana
Kagiya makadowa den gawii na aden a kakewing sa inged a Kana roo sa Galili. Ndodoo
si ina i Isa
2 Na biyantowan mambo si Isa ago so manga sokbat iyan ko kakewing.
3 Kagiya kalenganan siran sa arak na so ina i Isa na pitero iyan rekaniyan a "Da den a
arak iran."
4 Somimbag si Isa a "Babay, ino ngka raken peteroa? Da pen maoma so oras aken."
5 Pitero i ina iyan ko manga talasogoay a "Nggolaolaa niyo so apiya antonaa i isogo iyan
rekano."
6 Na aden a pakatitindegen roo a nem timan a omoy a ator a petegoan sa ig a pegosaren o
manga Yahodi ko kapelompiyo a aya iran adat. Oman i isa on na peketagoan sa walo polo
o di magatos ka litro a ig.
7 Pitero i Isa ko manga talasogoay a "Pamenoa niyo a ig angkai a manga omoy." Na
piyameno iran a tetaman ko manga ngari iyan.
8 Tig iyan kiran pen a "Imanto na sakedo kano ron na wita niyo ko komikibir ko
bangkiti."
Na inowit iran on
9 Na tiyaaman o komikibir so ig a miyabaloy den a arak. Di niyan katawan o anda poon
apiya pen katawan o manga talasogoay a somiyakedo ron. Tiyalowan iyan so
mangangaroma
10 Na pitero iyan on a "Adat den a aya pekaonaan menat a arak na so lebi a mapiya, na
amay ka makapangondaya minom so manga banto na go bo nata so kena a ba tanto a
mapiya a arak. Ogaid na imanto ngka pen pagenata so lebi a mapiya!"
11 Giyangkai a monapona ko piyakamemesa a manga nanao a piyakiilay i Isa na sii
miyanggolaola sa Kana roo sa Galili. Piyayag iyan roo so bantogan iyan, na miyaratiyaya
on so manga sokbat iyan.
12 Oriyan ai na si Isa ago si ina iyan, so manga pagari niyan a manga mama, ago so
manga sokbat iyan na miyamanong siran sa Kapirnaom, na komiyaden siran roo ko
miyamakapira gawii.
Somiyong si Isa ko Timplo
13 Sa masa oto na magaan den so Pista ko Paska o manga Yahodi na somiyong si Isa sa
Yarosalim.
14 Sii ko Timplo na miyaoma niyan so manga taw a dii ndadagang sa manga sapi, manga
bilibili ago manga marapatik ago so pen so dii sesambiay sa pirak a kioontod roo.
15 Mandiyadi na mimbaal si Isa sa badas a tiyalitali na piyamogaw niyan siran langon roo
ko liyo o Timplo a rakes o manga bilibili ago manga sapi, na pilalayang iyan so manga
lamisaan o dii sesambiay sa pirak, na tiyowal iyan so manga pelata iran.
16 Na pitero iyan ko dii ndadagang sa manga marapatik a "Pangowita niyo ai sa liyo! Di
niyo mbaloya a padian so Walay o Ama aken!"
17 Kiyatanodan o manga sokbat iyan a misosorat ko Kitab a "So kasigi aken ko Walay
ngka, ya Allah, na aya raken nggegep."
18 Kagiya mailay ai o manga olowan o manga Yahodi na inatowan iran si Isa a tig iran a
"Antonaa i nanao i mapekiilay ngka rekami a kiporiba sa aden a kabenar ka sa
kiyanggolaolaa ngka sii?"
19 Simbag siran i Isa a "Gebaa niyo angkai a Timplo na mbangonen aken peroman sii ko
soled o telo gawii."
20 Tig o manga Yahodi a "Miyakapat polo ago nem ragon a kiyabangona sangkai a
Timplo na mbangonen ka bes peroman ko soled o telo gawii?"
21 Ogaid na aya pitero i Isa a timplo na so lawas iyan.
22 Sabap san na kagiya maoyag sekaniyan a poon ko miyamatay na kiyatanodan o manga
sokbat iyan a miyatero iyan ai. Na piyaratiyaya iran so misosorat ko Kitab ago so
miyatero i Isa.
Katawan i Isa o Antonaa i Madadalem ko Poso
23 Sii ko katatago i Isa roo sa Yarosalim sii ko Pista ko Paska na madakel a miyaratiyaya
rekaniyan ko kiyailaya iran ko piyakamemesa a manga nanao a di niyan dii nggolaolaan.
24 Ogaid na si Isa na da niyan kiran sarigen a ginawa niyan ka katawan iyan piyapiya so
langon a taw.
25 Di den kailangan a teroon rekaniyan o apiya antawaa so makapantag ko manosiya, ka
katawan iyan o antonaa i madadalem ko poso o manga taw.
YAHIYA 3
Si Isa ago si Nikodimos
Aden a isa a olowan o manga Yahodi a bebetowan sa Nikodimos a ped sekaniyan ko
manga Parisi.
2 Miyakaisa a gagawii na somiyong sekaniyan ki Isa na pitero iyan on a "Goro, katawan
ami a goro ka a siyogo o Allah, ka da a makapenggolaola sa piyakamemesa a manga
nanao a di ngka dii nggolaolaan liyo ron o mipageepeda iyan so Allah."
3 Somimbag si Isa a "Teroon ko reka a mataan den a da a ba pekailay ko Ndatoan o Allah
taman sa di imbawata peroman."
Iniise i Nikodimos a "Andamanaya i kipembawataan ko taw amay ka miyakatoa den?
Mataan a di niyan kegaga a ba makasoled peroman ko tiyan o ina iyan kaan mimbawata
peroman!"
5 Somimbag si Isa a "Teroon ko reka a mataan den a da a pekasoled ko Ndatoan o Allah
taman sa di imbawata a nggolalan ko ig ago so Roh.
6 So inimbawata o manosiya na manosiya mambo, na so inimbawata o Roh na niyawa
mambo.
7 Di ka pememesa ko pitero aken reka a disomala a imbawata ka peroman.
8 Pesember so ndo sa apiya anda kebaya somong. Pekeneg ka so kapesember iyan ogaid
na di ngka katawan o anda pepakapoon o di na anda pegantap. Datar ai mambo so
kipembawataan ko oman i isa a inimbawata o Roh."
9 “Andamanaya i kakeolaola ini?" a iniise i Nikodimos.
10 Tig i Isa a "Kikilalaan ka a goro sa Israil na di ngka bes seboten angkai a manga
nganin?
11 Teroon ko reka a mataan den a di ami dii teroon so katawan ami ago di ami dii seksian
so miyailay ami, ogaid na di niyo terimaan so katero ami.
12 Pitero aken rekano so makapantag ko manga nganin sangkai a doniya na da niyo
paratiyayaa. Sabap roo na andamanaya i kaperatiyayaa niyo o teroa ko rekano so
makapantag ko ndodoo sa kasorgaan?
13 Da den a miyakapanik sa kasorgaan a rowar ko Wata o Manosiya a miyanog a poon sa
kasorgaan.
14 Na datar o kinitongkolen o Mosa ko nipay a tombaga roo ko mitataog a kaden na
disomala a mitongkol mambo so Wata o Manosiya
15 Kaan so oman i isa a peparatiyaya rekaniyan na makatarima sa kayoyagoyag a da a
kaposan iyan.
16 “Kagiya tanto a pekebabayaan o Allah so doniya na inibegay niyan so botong a Wata
iyan kaan so oman i isa a peparatiyaya rekaniyan na di pekanaraka, ka kebegan baden sa
kaoyagoyag a da a kaposan iyan.
17 Ka siyogo o Allah so Wata iyan sii sa doniya a kena a ba an iyan masala so doniya, ka
sabap sa an masabet so doniya a nggolalan rekaniyan.
18 “Apiya antawaa i peparatiyaya rekaniyan na di den kesala. Na so di rekaniyan
peratiyaya na miyasala den, ka da niyan paratiyayaa so botong a Wata o Allah.
19 Na so kiyasalaa kiran na mipepasod sii: So solo na somiyong sii sa doniya ogaid na
kiyababayaan o manga taw so maliboteng a di so maliwanag ka marata so manga galebek
iran.
20 Oman i dii nggolaola sa marata na ipekegowad iyan so maliwanag na di den song ko
solo ka ipekelek iyan o ba mapayag so di niyan dii nggolaolaan.
21 Ogaid na so taw a ipepaginetaw niyan so tito a benar na pesong ko solo kaan mailay
piyapiya a so di niyan dii nggolaolaan na aya niyan kapetomana ko kabaya o Allah."
Si Isa ago si Yahiya
22 Oriyan ai na somiyong si Isa sa Yodiya na tomiyareg roo sa miyamakapira gawii a

pepanalawat a ped iyan so manga sokbat iyan.
23 Si mambo si Yahiya na dii manalawat roo sa Ainon a marani sa Salim ka madakel a ig
roo, na pepamanong on so manga taw a pemakisalawat.
24(Sa masa oto na da pen makalaboso si Yahiya.)
25 Na aden a Yahodi a miyakindaowa ko manga sokbat i Yahiya makapantag ko ontol a
okit a kapelompiyo.
26 Na somiyong siran ki Yahiya na pitero iran on a "Goro, so mama a minipagepeda a ka
roo ko sabala a lawasaig a Yordan a piseksian ka na pepanalawat sekaniyan imanto na
pepamanong on so langon a taw!"
27 Tig i Yahiya a "Da a ba kekowa o taw a apiya antonaa o di on began o Allah.
28 Sekano den i makapeseksi ko kiyateroa ko sa kena a ba saken so Al Masih, ka matag
ako siyogo a miyaona a di sekaniyan.
29 Aya kirek ko pengaromaan na so mangangaroma. Ogaid na so layok o mangangaroma
na penayaon iyan sekaniyan a pemamakineg, na tanto sekaniyan a kebabaya amay ka
maneg iyan so lagam o mangangaroma. Giyanan i kapekebabaya aken, na miyatarotop
den imanto.
30 Disomala a pepekala sekaniyan ago pepekababa ako."
So Miyakapoon sa Kasorgaan
31 Sekaniyan a pepekapoon sa poro na lawan ko kalangolangon, na sekaniyan a poon sa

doniya na kadodoniyai na aya di niyan dii teroon na kadodoniyai. Sekaniyan a
pepekapoon sa kasorgaan na lawan ko kalangolangon.
32 Ipeseksi iyan so miyailay niyan ago miyaneg ogaid na da a ba peterima ko katero iyan.
33 Ogaid na so tomiyarima ko katero iyan na pimataanan iyan a benar so Allah.
34 Ka so siyogo o Allah na di niyan dii teroon so manga katero o Allah, ka da a diyangka
o kipembegan on o Allah ko Roh.
35 So Ama na pekebabayaan iyan so Wata na miyapadalem iyan so langon taman ko
kapaar iyan.
36 So peparatiyaya ko Wata na aden a kaoyagoyag iyan a da a kaposan iyan, ogaid na so
pegongkir ko Wata na di den pekakamal sangkoto a kaoyagoyag, ka lalayon on so rarangit
o Allah.
YAHIYA 4
Si Isa ago so Babay a taw sa Samariya
Miyaneg o manga Parisi a si Isa na madakel a taw a dii masokbat ago pepanalawatan iyan
a di si Yahiya.
2(ogaid na aya benar na kena a ba si Isa i dii manalawat, ka so manga sokbat iyan).
3 Kagiya maneg ai i Isa na inawaan iyan a Yodiya ka kesoy sa Galili.
4 Sii ko kapesong iyan sa Galili na mipenisagad iyan a Samariya.
5 Miyakaoma sekaniyan ko isa a siti sa Samariya a bebetowan sa Sikar a kena a ba
mawatan ko lopa a inibegay i Yakob ko wata iyan a si Yosop.
6 Ndodoo so paridi a rek i Yakob, na miyontod si Isa ko obay o paridi, ka diyokawan ko
kapelalakaw niyan. Na magaan den oto maoto a alongan.
7 Miyakaoma so isa a babay a taw sa Samariya ka segeb, na pitero on i Isa a "Pakainoma
ko ngka."
8 Samaoto na da roo so manga sokbat iyan ka tomiyaros siran sa siti ka pemasa siran sa
pangenengken.
9 Tig o babay a Isamariyan a "Yahodi ka na Isamariyan ako. Ino ka raken pengni sa ig a
mainom ka?" (Ka di den makipagepeda so manga Yahodi ko manga Isamariyan.)
10 Somimbag si Isa a "O katawi ngka so pamemegayan o Allah ago antawaa i pepangni
reka sa ig na seka o kowan i pemangni rekaniyan na mbegan ka niyan sa ig a
pepangoyag."
11 “Sir," a tig o babay, "da a ba ngka kisageb na madalem so paridi. Anda ngka kowaa
ngkanan a pepangoyag a ig?
12 Ba ka lawan ki Yakob a apo tano a migay rektano sangkai a paridi? Pepeginom
sekaniyan sii ago so manga wata iyan taman ko manga pangangayamen iyan."
13 Somimbag si Isa a "Oman i peginom sangkai a ig na kewaw peroman
14 Ogaid na apiya antawaa i pekainom ko ig a imbegay aken on na di den kewaw. Ka so
ig a imbegay aken on na pembaloy a bowalan sii sa ginawa niyan a pepekabowak on so ig
a pepamegay sa kaoyagoyag a da a kaposan iyan."
15 Tig o babay a "Sir, begi ako ngka sangkai a ig kaan di ako den kewaw ago di sii den
pekasong sa kasegeb aken."
16 Pitero rekaniyan i Isa a "Baling ka na kowaa ngka si karoma ngka na kasoy kano sii."
17 Tig o babay a "Da a karoma ko."
Tig i Isa "Benar so pitero o ka a da a karoma ngka
18 Ka miyakalima ka den mapangaroma, na so mama a itetapi i ka imanto na kena a ba
ngka tito a karoma. Benar angkai a pitero o ka."
19 Tig o babay a "Masisipat aken, Sir, a nabi ka.
20 So manga apo ami a manga taw sa Samariya na miyamanimba sii sangkai a palaw,
ogaid na sekano a manga Yahodi na di niyo dii teroon a giya Yarosalim na aya patot a
darpa a ron pesimba so manga taw."
21 Tig i Isa a "Paratiyayaa ko ngka, Babay, ka pekatalingoma so masa a kena a ba
giyangkai a palaw aya pen a Yarosalim i darpa a ron iyo simbaa so Ama.
22 Sekano a manga Isamariyan na pesimbaan iyo so di niyo katawan. Sekami a manga
Yahodi na katawan ami so pesimbaan ami, ka so kakesabet na miyakapoon ko manga
Yahodi.
23 Ogaid na pekatalingoma so masa ago kapapantagan den a so tito a pepamaniniba na
simbaan iran so Ama a nggolalan ko Roh ago tito a benar, ka so datar ai a pepamanimba i
kebayaan o Ama a pesimba rekaniyan.
24 So Allah na niyawa, na so pemanimba rekaniyan na disomala a simba a nggolalan ko
Roh ago tito a benar."
25 Pitero on o babay a "Katawan ko a song sii so Al Masih (a bebetowan sa Inidinan o
Allah), na amay ka makaoma na pekitokawan iyan rektano so langon taman."
26 Somimbag si Isa a "Saken sekaniyan a di reka dii makimbitiyarai."
27 Minitabo saya den a kiyakasoy o manga sokbat i Isa na tanto siran a miyamemesa
kagiya mailay iran sekaniyan a dii makimbitiyarai ko babay. Ogaid na da a isa kiran bo a
ba minise sa "Antonaa i kabaya a ka," aya pen o ba iran miise a "Ino ngka dii mbitiyaraian
angkai a babay?"
28 Mandiyadi na inibagak o babay so omoy niyan na komiyasoy ko siti na pitero iyan ko
manga taw roo a
29 “Onot kano raken na ilaya niyo so mama a pitero iyan raken so langon a
miyanggolaola ko. Ba sekaniyan den so Al Masih?"
30 Giyoto a inawaan iran so siti na miyamanong ki Isa.
31 Samaoto na pesekaten o manga sokbat si Isa a tig iran a "Goro, kan ka den."
32 Tig iyan a "Aden a pangenengken a ken aken a di niyo katawan."
33 So kiyanega on o manga sokbat na miyamagisei siran a "Ba aden a miwit rekaniyan sa
pangenengken?"
34 Tig i Isa a "Aya pangenengken aken na so katomana ko ko kabaya o somiyogo raken
ago so kapasada ko ko galebek a inisangan iyan raken.
35 Ba kena a di niyo dii teroon a 'Pat pen olan a kakeoma o kaperagon?' Teroon ko
rekano a langkaw kano na ilaya niyo so manga pangomaan! Miyamakatoa den so manga
onga na kepakay den a peragonen.
36 So peperagon na pesokayan, na pepanimoon iyan raken so manga taw a pekakowa sa
kaoyagoyag a da a kaposan iyan kaan makaperengarengan mababaya so peseod ago so
peperagon.
37 Benar so pananaroon a 'Peseod so isa na peragon so ped.'
38 Siyogo aken sekano sa kaperagona niyo ko manga per a da niyo nggalebeka. So manga
ped i minggagalebek on, na sekano i makaperagon ko miyanggalebek iran."
39 Na madakel ko manga Isamariyan sangkoto a siti a miyamaratiyaya ki Isa sabap ko
katero o babay a "Pitero iyan raken so langon a miyanggolaola ko."
40 Sabap roo na kagiya mamakaoma so manga Isamariyan ki Isa na inakol iran on a
komaden kiran pasin, na komiyaden roo sa miyakadowa gawii.
41 Na madakel pen a miyamaratiyaya rekaniyan kagiya maneg iran so manga katero iyan.
42 Pitero iran ko babay a "Miyaratiyaya kami den imanto a kena a ba sabap ko miyatero o
ka, ka sekami den i miyakaneg ko katero iyan, na katawan ami a mataan den a sekaniyan
so Pepanabet ko doniya!"
Piyakapiya i Isa so Wata o Olowan
43 Kagiya mapopos so dowa gawii na miyawa roo si Isa na somiyong sa Galili.

44(Si den si Isa i miyakatero sa 'So nabi na kena a ba pagaadati ko rek iyan a inged.)
45 Kagiya makaoma si Isa sa Galili na tiyarima sekaniyan o manga taw roo ka miyailay
iran den so langon a pinggolaola niyan roo sa Yarosalim sii ko pista, ka miyakasong siran
roo mambo.
46 Mandiyadi na komiyasoy si Isa sa Kana sii sa Galili a roo niyan miyabaloy so ig a
arak. Na ndodoo so sakataw a olowan o gobirno a so wata iyan a mama na pekesakit roo
sa Kapirnaom.
47 Kagiya maneg angkoto a olowan a miyakaoma si Isa sa Galili a poon sa Yodiya na
somiyong sekaniyan ki Isa na inakol iyan on a somong sa Kapirnaom kaan iyan
mapakapiya so wata iyan a pakapapatain.
48 Pitero rekaniyan i Isa a "O di niyo mailay so manga nanao ago manga piyakamemesa
na di kano den peratiyaya!"
49 “Sir," a tig o olowan, "onot ka raken sa da pen kapatay o wata aken!"
50 Tig i Isa a "Baling ka, ka miyakabager den so wata a ka." Na miyaratiyaya so mama ko
pitero on i Isa na miyaling.
51 Sii ko kapembaling iyan na inalaw sekaniyan o manga talasogoay niyan na piyanotol
iran on a miyakabager den so wata a iyan.
52 Iniise iyan kiran o antonaa oras i kiyapakabager iyan na tig iran a "Kagai ko alaona na
miyada on so panenggaw."
53 Na kiyatanodan o ama iyan a giyoto so oras a kiyateroa on i Isa sa "Miyakabager den
so wata a ka." Sabap roo na miyaratiyaya sekaniyan ago so langon a ped iyan ko walay
niyan.
54 Giyanan i ikadowa a nanao a pinggolaola i Isa kagiya makaoma sa Galili a poon sa
Yodiya.
YAHIYA 5
So Mama a Piyakapiya i Isa roo ko Papaigoay
Oriyan ai na komiyasoy si Isa sa Yarosalim ka aden a pista roo o manga Yahodi.

2 Sii sa Yarosalim a marani ko gimowa a bebetowan 'Gimowa sa Bilibili,' na aden a
papaigoay ron a bebetowan sa Bitsaida ko basa a Yahodi, na lima a pekesirongan a
liyoliyowan ko melilibeta on.
3 Madakel a pepanga sasakit a kikaiiga roo, a manga bota, manga sadir ago manga
mapaparalais a lawas iyan.
5 Ndodoo so isa a mama a pekesakit ko soled o telo polo ragon ago walo.
6 Miyailay sekaniyan i Isa a miiga roo na katawan iyan a miyatey den angkai a masosowa
iyan, na iniise iyan on a "Kebaya ka makabager?"
7 Tig o pekesakit a "Sir, da a ba raken pekatago sangkanan a papaigoay igira a
miyakolibog so ig on. Na igira a pepanamar ako ron somong na aden den a miyakaona
raken tomepad."
8 Na pitero on i Isa a "Tindeg ka na awidi ngka so dempas ka na lalakaw ka!"
9 Sarta den a miyakabager so mama, na piyorot iyan so dempas iyan na lomiyalakaw.
Minitabo ai ko Gawii a Idedeke.
10 Sabap roo na pitero o manga Yahodi ko a mama a miyapakabager a "Gawii imanto a
Idedeke na da sa Kitab o ba ngka awidi so dempas ka."
11 Somimbag sekaniyan a "So mama a miyakapiya raken na pitero iyan raken a 'Awidi
ngka so dempas ka na lalakaw ka.' "
12 Iniise iran a "Antawaa ngkai a mama a somiyogo reka sa awidi ngka so dempas ka na
lalakaw ka?"
13 Ogaid na so taw a miyapiya na di niyan katawan o antawaa sekaniyan, ka miyawa roo
si Isa sabap ko madakel a taw sangkoto a darpa.
14 Oriyan oto na minitoona sekaniyan i Isa ko Timplo na pitero rekaniyan i Isa a
"Miyakapiya ka den imanto. Di ka den pendosa ka o ba baden aden pen a lebi a marata a
keokitan ka."
15 Na lomiyalakaw so mama na pitero iyan ko manga Yahodi a si bes si Isa i miyakapiya
rekaniyan.
16 Sabap sii na pipoonan somatro o manga Yahodi si Isa ka di niyan dii nggolaolaan
angkai a manga galebek ko Gawii a Idedeke.
17 Na pitero kiran i Isa a "So Ama aken na lalayon dii nggalebek taman imanto na saken
mambo na dii nggalebek."
18 Sabap sii na baden miyakala a kapepanamari o manga Yahodi sa kambonoa iran on, ka
kagiya kena bo a ba giya kiyasogoka niyan ko Gawii a Idedeke, ka bitowan iyan pen so
Allah sa Ama iyan, na giyoto i kiyabaloya niyan ko ginawa niyan a datar o Allah.
So Kapaar o Wata
19 Na simbag siran i Isa a "Teroon ko rekano a mataan den a so Wata na da a ba niyan

mapenggolaola a ba sekaniyan bo, ka aya niyan bo mapenggolaola so pekeilay niyan a dii
nggolaolaan o Ama iyan. Ka apiya antonaa i dii nggolaolaan o Ama na aya mambo
pesowaan o Wata.
20 So Ama na pekebabayaan iyan so Wata na pepakiilay niyan ko Wata so langon a di
niyan dii nggolaolaan. Na pekiilay ron pen o Ama so lebi pen a manga ala a galebek a di
giyai a kiyamasaan iyo den kaan kano pamemesa.
21 Ka datar o kapegoyaga o Ama ko miyamatay ago pembegan iyan siran sa kaoyagoyag
na so mambo so Wata na pembegan iyan sa kaoyagoyag so kebayaan iyan megay.
22 So Ama na di niyan kokomen so apiya antawaa, ka inisarig iyan ko Wata so langon a
kapengokom
23 Kaan mabantog o langon a taw so Wata a datar o kapembantoga iran ko Ama. So di
pembantog ko Wata na di niyan mambo pembatogen so Ama a somiyogo rekaniyan.
24 “Teroon ko rekano a mataan den a so pepamakineg ko katero aken ago peparatiyaya
ko somiyogo raken na aden a kaoyagoyag iyan a da a kaposan iyan. Na di sekaniyan den
kesala, ka miyakatepas baden a poon ko kapapatay na sii ko kaoyagoyag.
25 “Teroon ko rekano a mataan den a pekatalingoma so masa ago miyakatalingoma den a
keneg o miyamatay so sowara o Wata o Allah na penga ooyag so pemakineg on.
26 Datar o Ama a pekepoonan o kaoyagoyag na biyaloy niyan mambo so Wata iyan a
pekepoonan o kaoyagoyag
27 Na bigan iyan pen sa kapaar sa kapengokom, ka sekaniyan so Wata o Manosiya.
28 Di niyo ai pememesan, ka pekatalingoma so oras a keneg o langon a miyamatay so
sowara niyan
29 Na pemakaliyo siran ko manga kobor. Siran oto a miyakanggolaola sa mapiya na
penga ooyag a pekakamal sa kaoyagoyag, na siran oto a miyakanggolaola sa marata na
penga ooyag ago kesala.
So manga Peseksi makapantag ki Isa
"30 Da a ba ko mapenggolaola a ba saken bo. So kapengokom aken na datar bo o di raken

dii teroon o Allah, na ontol so kapengokom aken ka aya antap aken na kena a ba so
katomana ko kabaya aken ka so kabaya o somiyogo raken.
31 O saken bo i peseksi makapantag sa ginawa ko na so ipeseksi aken na di ketarima.
32 Ogaid na aden a ped a peseksi makapantag raken, na katawan aken a benar so iniseksi
iyan makapantag raken.
33 Siyogo iyo so manga taw ki Yahiya na piseksian iyan so tito a benar.
34 Ogaid na di aken kailangan so kapeseksi o manosiya, ka aya bo a kiyaaloya ko sii na
an kano manga sasabet.
35 Si Yahiya na datar o solo a tinteman ago pesindaw, na inikababaya iyo so sindaw
niyan sa da matey.
36 Ogaid na aden a dii seksi makapantag raken a lawan pen ko kiyaseksii raken i Yahiya.
So manga galebek a di aken dii nggolaolaan a inibegay raken o Ama aken sa kapasada ko
ron na aya dii seksi makapantag raken sa so Ama i somiyogo raken.
37 Na so Ama a somiyogo raken na miyakaseksi mambo makapantag raken. Da niyo
maneg so sowara niyan ago da niyo mailay so paras iyan,
38 Na so katero iyan na kena a ba madadalem rekano, ka di niyo peratiyayaan so siyogo
iyan.
39 “Di niyo dii piyapiyaan mangadi so misosorat ko Kitab ka mapipikir iyo a nggolalan
sii na kekowa niyo so kaoyagoyag a da a kaposan iyan. Giyanan den i manga Sorat a dii
seksi makapantag raken,
40 Na apiya oto na minda kano raken somong kaan iyo makowa angkanan a kaoyagoyag.
41 “Da a kipantag raken o kapembantoga raken o manga taw.
42 Liyo ron pen na katawan aken so madadalem ko poso iyo. Katawan aken a kena a ba
niyo pekebabayai so Allah.
43 Somiyong ako sii, sii ko ingaran o Ama aken na di ako niyo terimaan. Ogaid na o aden
a song rekano sii ko rek iyan a ingaran na sekaniyan i terimaan iyo.
44 Kabaya iyo a pepodin kano o oman i isa rekano ogaid na di niyo penanamaran a podin
kano o isaisa a Tohan. Kagiya ka maoto na andamanaya i kapakaparatiyaya niyo?
45 “Di niyo pipikira o ba saken i pendimanda rekano ko hadapan o Ama. Ka aden a di
rekano dii ndimanda, a si Mosa a aya niyo sasarigan.
46 O benar a piyaratiyaya niyo si Mosa na peratiyayaan ako niyo mambo, ka inisorat iyan
so makapantag raken.
47 Ogaid na kagiya da niyo paratiyayaa so inisorat iyan na andamanaya i kaperatiyayaa
niyo ko manga katero aken?"
YAHIYA 6
Oriyan oto na rominipag si Isa ko Ranaw a Galili (a aya den Ranaw a Tibiriyas).
2 Tanto a madakel a taw a tomiyondog rekaniyan ka miyailay iran so piyakamemesa a
manga nanao a pinggolaola niyan ko kiyapakapiyaa niyan ko pepanga sasakit.
3 Tomiyakedeg si Isa ko bobongan na miyontod roo a ped iyan so manga sokbat iyan.
4 Sa masa oto na magaan den so Paska a pista o manga Yahodi.
5 Na lomiyangkaw si Isa na kagiya mailay niyan so miyakadakedakel a taw a
pepamanong rekaniyan na tig iyan ki Pilipi a "Anda tano makapemasa sa paan a pekikan
sangkai a madakel a taw?"
6 Pitero iyan ai ka tipengan iyan si Pilipi, ka katawan den i Isa o antonaa i penggolaolaan
iyan.
7 Somimbag si Pilipi a "Apiya dowa gatos a pelata a pirak na di magetoon a ipemasa sa
paan a apiya maito bo a pekikan ko oman i isa kiran."
8 Na so isa ko manga sokbat iyan, a si Andriyo a pagari i Simon Pidro, na tig iyan ki Isa a
9 “Aden a bago a mama sii a lima timan a paan iyan a bantad ago dowa a seda. Ogaid na
antonaa i lalaw ai sii sangkai a madakel a taw?"
10 Tig i Isa a "Pakaontoda niyo so manga taw." Madakel a balili sangkoto a kaden, na
miyamangontod so manga taw a aya kadakel iran na manga lima nggibo a manga mama.
11 Oriyan iyan na kinowa i Isa so paan na piyanalamatan iyan so Allah, na pimbagibagi
iyan ko manga taw a moontod roo. Giyai mambo i inikidia niyan ko seda, na langon siran
miyamakakan sa taman den sa kabaya iran.
12 Kagiya manga oosog siran na pitero iyan ko manga sokbat iyan a "Panimoa niyo so
miyasama iran kaan da a ba on keolai."
13 Na piyanimo iran ai, na so miyasama o miyamakakan ko lima timan a paan a bantad
na minipeno ko sapolo ago dowa a reban.
14 Kagiya mailay o manga taw sangkai a piyakamemesa a nanao a pinggolaola i Isa na
pitero iran a "Matamataan a sekaniyan so nabi a song sii sa doniya!"
15 Miyasipat i Isa a songowan iran sekaniyan ago kapetan iran kaan iran mabaloy a dato
iran, na giyoto a miyawa sekaniyan roo ka somiyong ko bobongan a da a ped iyan.
Lomiyalakaw si Isa ko Liyawaw o Ig
16 Kagiya merimon den na tomiyondagay so manga sokbat iyan ko ranaw

17 Na miyageda siran ko awang na mipoon siran romipag ko ranaw a song siran sa
Kapirnaom. Ogaid na miyakaliboteng den na da siran pen masono i Isa.
18 Sa oras oto na tanto a mimbegel so ranaw ka pesember so mabager a ndo.
19 Kagiya makapora siran sa manga lima o di na nem ka kilomitro na miyailay iran si Isa
a pelalakaw ko liyawaw a ig a pepakarani ko awang. Miyanga alek siran
20 Ogaid na pitero kiran i Isa a "Saken den! Di kano pekalek."
21 So kiyanega iran sii na miyababaya siran na piyakapageda iran si Isa ko awang, na
sagogona a miyakadongko so awang ko darpa a pepegantapan iran.
Pimbabanog o manga Taw si Isa
22 Kagiya mapita na so madakel a taw a mitelimbagak ko sabala a ranaw na kiyatanodan

iran a sasatiman bo a awang roo gowani ago da on makada si Isa a ped o manga sokbat
iyan, ka tomiyolak siran a di iran ped.
23 Ogaid na aden a ped a manga awang a poon sa Tibiriyas a miyamakadongko den a
marani ko darpa a kiyanan iran ko paan oriyan o kiyapanalamat o Kadnan.
24 Na kagiya mailay o manga taw a da roo si Isa taman ko manga sokbat iyan na
miyamangeda siran sangkoto a manga awang na somiyong siran sa Kapirnaom ka
pembanogen iran si Isa.
Si Isa i Paan a Pepangoyag

25 Kagiya matoon iran si Isa roo ko sabala a ranaw na iniise iran on a "Goro, anda i
kiyapakaoma ngka sii?"
26 Pitero kiran i Isa a "Teroon ko rekano a mataan den a pepangilobaan ako niyo ka
miyamakakan kano ko paan ago miyanga oosog a kena a ba sabap sa miyailay niyo so
piyakamemesa a manga nanao.
27 Di niyo penamari so pangenengken a keredak, ka so pangenengken a ketatap sa taman
sa pakataman a pepakabegay ko kaoyagoyag a da a kaposan iyan. Giyangkai a
pangenengken na imbegay rekano o Wata o Manosiya, ka so Allah a Ama na migay
rekaniyan sangkoto a kapaar."
28 Kagiya maneg iran ai na iniise iran ki Isa a "Antonaa i sowaan ami a aya mi
kapenggolaolaa ko manga galebek a ipapaliyogat o Allah?"
29 Tig i Isa a "Giyai so galebek a ipapaliyogat rekano o Allah: paratiyayaa niyo so siyogo
iyan."
30 Na iniise iran on a "O giyanan na antonaa a piyakamemesa a nanao i pekiilay ka
rekami kaan ami mailay ago makaparatiyaya reka? Antonaa i sowaan ka?
31 So manga apo tano na mikekan sa roti roo ko mitataog a kaden a so den so misosorat
ko kitab a 'Bigan iyan siran sa paan a ken iran a poon sa kasorgaan.' "
32 Tig i Isa a "Teroon ko rekano a mataan den a kena a ba si Mosa i migay rekano ko
paan a poon sa kasorgaan, ka so Ama aken i pepamegay rekano sa tito a paan a poon sa
kasorgaan.
33 Ka so paan a ipembegay o Allah na sekaniyan a pepekapanog a poon sa kasorgaan a
pepamegay sa kaoyagoyag ko doniya."
34 Tig iran a "Sir, pembegi kami ngka lalayon sangkai a paan."
35 Pitero kiran i Isa a "Saken so paan a pepangoyag. Apiya antawaa i pesong raken na di
den keor, na apiya antawaa i peparatiyaya raken na di den kewaw.
36 Ogaid na miyatero aken rekano den a apiya miyailay ako niyo na da ako niyo
paratiyayaa.
37 So langon a ipembegay raken o Ama aken na song raken, na apiya antawaa i pesong
raken na di aken den pekaawaan.
38 Ka miyanog ako sii a poon sa kasorgaan kaan aken mipenggolalan so kabaya o
somiyogo raken, a kena a ba so rek aken a kabaya.
39 Na giyai i kabaya o somiyogo raken: a da den a ilangen aken ko langon a taw a
inibegay niyan raken, ka pagoyagen aken siran peroman ko maori a alongan.
40 Ka giyai i kabaya o Ama aken, a so oman i isa a seboten iyan o antawaa so Wata ago
peparatiyaya rekaniyan na kebegan sa kaoyagoyag a da a kaposan iyan, na pagoyagen ko
sekaniyan peroman ko maori a alongan."
41 Kagiya maneg ai o manga Yahodi na piyanarotaroan iran si Isa sabap ko pitero iyan a
"Saken so paan a miyanog a poon sa kasorgaan."
42 Na tig iran a "Ba kena a sekaniyan si Isa a wata i Yosop? Katawan tano si ama iyan
ago si ina iyan. Ino niyan peteroa a miyanog sekaniyan a poon sa kasorgaan?"
43 Simbag siran i Isa a "Di kano pepanarotaro.
44 Da a sakataw bo a ba raken pekasong taman sa di matonda o Ama a somiyogo raken,
na pagoyagen ko sekaniyan ko maori a alongan.
45 Misosorat sii ko Sorat o manga nabi a 'Langon a manosiya na pemangendaon o Allah.'
Na so oman i pepamakineg ko Ama ago pepakasowa ko ipepangendao niyan on na
pesong raken.
46 Ogaid na kena a ba aya maana ini na aden a miyakailay ko Ama, ka sekaniyan a poon
ko Allah na aya bo miyakailay ko Ama.
47 “Teroon ko rekano a mataan den a so taw a peparatiyaya na aden a kaoyagoyag iyan a
da a kaposan iyan.
48 Saken so paan a pepangoyag.
49 So manga apo iyo na komiyan sa roti roo ko mitataog a kaden, na apiya oto na
miyamatay siran bo.
50 Ogaid na so paan a di aken dii teroon na giyoto so pepakapanog a poon sa kasorgaan
kaan so apiya antawaa i pekakan on na di petay.
51 Saken so paan a pepangoyag a miyanog a poon sa kasorgaan. Apiya antawaa i pekakan
sangkai a paan na pekeoyagoyag sa taman sa pakataman. Na so paan a imbegay aken na
so sapo aken a imbegay aken kaan maoyag so doniya."
52 Kagiya maneg ai o manga Yahodi na mindadaowaiya siran a iniise iran a
"Andamanaya i kimbegan rektano a mama ini ko sapo iyan a ken tano?"
53 Na pitero kiran a Isa a "Teroon ko rekano a mataan den a taman sa di kano koman ko
sapo o Wata o Manosiya ago di maginom ko rogo iyan na da rekano so kaoyagoyag.
54 Apiya antawaa i pekan ko sapo aken ago peginom ko rogo aken na aden a kaoyagoyag
iyan a da a kaposan iyan na pagoyagen ko sekaniyan ko maori a alongan.
55 Ka so sapo aken na aya tito a pangenengken, ago so rogo aken na aya tito a
panginginomen.
56 So pekan ko sapo aken ago peginom ko rogo aken na tatap so kadadalem iyan raken,
na tatap mambo a kadadalem aken rekaniyan.
57 Siyogo ako o oyagoyag a Ama na oyagoyag ako mambo sabap ko Ama, na datar oto
mambo a so pekan raken na keoyag sabap raken.
58 Giyai i paan a miyanog a poon sa kasorgaan. Kena ini a ba datar o roti a kiyan o manga
apo iyo a miyamatay bo, ka so pekan sangkai a paan na keoyagoyag sa taman sa
pakataman."
59 Pitero ai i Isa sii ko kapepangendao niyan sii ko sinagoga sa Kapirnaom.
So manga Katero a Pekabegay sa Kaoyagoyag a da a Kaposan iyan
60 Madakel ko manga sokbat iyan a miyamakaneg sii a tig iran a "Maregen a kakesabota
sangkai a katero iyan. Antawaa i pekatarima on?"
61 Na apiya da rekaniyan matero na katawan i Isa a dii manarotaro so manga sokbat iyan
makapantag ko katero iyan, na pitero iyan kiran a "Ba inikada ini o sarig iyo raken?
62 Antonaa i mapemikir iyo o mailay niyo so Wata o Manosiya a kesoy sa poro ko
kakadenan iyan gowani?
63 Aya pepamegay sa kaoyagoyag na so Roh. So sapo na di niyan ai kegaga. So manga
katero a miyatero aken rekano na aya pepamegay sa kaoyagoyag sii ko niyawa.
64 Ogaid na aden a ped rekano a di pemaratiyaya." (Pitero ai i Isa ka ipoon sa poonan na
katawan iyan o antawaa kiran i di pemaratiyaya ago antawaa i tipo rekaniyan.)
65 Na tig iyan pen a "Giyanan i sabap a pitero aken rekano a da a ba raken pekasong o di
bo perowa o Ama."
66 Sabap sangkai a manga katero i Isa na madakel ko manga sokbat iyan a miyawa
rekaniyan na da on den magonotonot peroman.
67 Na giyoto a iniise i Isa ko sapolo ago dowa a sokbat a "Ba kano kebaya a magawa
mambo?"
68 Somimbag si Simon Pidro a "Kadnan, antawaa i kapegapasan ami? Sisii reka so
manga katero a pepamegay sa kaoyagoyag a da a kaposan iyan.
69 Na sasarigan ami ago katawan ami a seka so Soti a Siyogo o Allah."
70 Na pitero kiran i Isa "Ba kena a saken i miyamili rekano a sapolo ago dowa? Ogaid na
kaiiblisan so isa rekano."
71 Aya piyakailatan iyan na si Yodas a wata i Simon Iskariyot, ka apiya pen isa sekaniyan
ko sapolo ago dowa a sokbat na aya den tipo ki Isa.
YAHIYA 7
Da Paratiyaya so manga Pagari i Isa
Kagiya maipos ai na miyagenebeneb si Isa sii sa Galili. Di niyan kabaya o ba lalakaw roo
sa Yodiya ka kagiya kekadiyaten o manga Yahodi roo a kambonoa iran on.
2 Sa masa oto na magaan den so pista o manga Yahodi a bebetowan sa 'Pista ko manga
Lawig.'
3 Sabap san na so manga pagari i Isa a manga mama na pitero iran on a "Patot a awa ka
sii na song ka sa Yodiya kaan mailay o manga sokbat ka so manga piyakamemesa a di
ngka dii nggolaolaan.
4 Ka da a ba dii nggalebek sa masolen o kabaya iyan a mbaloy a kikilalaan. O di ngka dii
nggolaolaa angkai a manga ala a galebek na payaga ngka a ginawa ngka ko dalem a
doniya."
5 Ka apiya so manga pagari niyan na da iran sekaniyan paratiyayaa.
6 Pitero kiran i Isa a "Da pen maoma so oras aken. Apiya antonaa oras na keparoan
rekano.
7 Di kano kikagowad o doniya. Ogaid na ipekegowad ako niyan ka pepamataanan aken a
manga rarata so manga galebek iyan.
8 Song kano roo ko pista. Di ako pen song sangkai a pista ka da pen maoma so osto a
oras aken."
9 Na kagiya matero ai kiran i Isa na mitelimbagak sa Galili.
Si Isa roo ko Pista ko manga Lawig
10 Ogaid na kagiya makasong den so manga pagari niyan ko pista na somiyong roo
mambo si Isa, ogaid na kena a ba marayag a kiyalalakaw niyan ka pageemaan.
11 So manga olowan a manga Yahodi na di ran dii mbanogen si Isa roo ko pista a
ipepangingise iran o anda sekaniyan,
12 Na aden a madakel a taw a dii mamagtonga makapantag rekaniyan. So ped na tig iran
a "Mapiya sekaniyan a mama," ogaid na tig o manga ped a "Kena, ka ba niyan baden
peselibaa so manga taw."
13 Ogaid na da a ba dii tero sa marinayag makapantag rekaniyan ka ipekelek iran so
manga olowan o manga Yahodi.
14 Sii ko kiyalooki ko pista na somiyong si Isa ko Timplo na miyangendao.
15 Na tanto a miyamemesa so manga olowan o manga Yahodi a tig iran a "Andamanaya i
kiyapakasowa a mama ini sangkai a mala a katao a da sekaniyan mapangendao o manga
goro tano?"
16 Somimbag si Isa a "So ipepangendao aken na kena a ba ko rek, ka poon ko somiyogo
raken.
17 Apiya antawaa i kebaya nggolaola ko kabaya o Allah na ketokawan iyan o ba so
ipepangendao aken na poon ko Allah o di na ba saken i mbayabaya ko di aken dii katero.
18 So dii mbayabaya ko di niyan dii katero na pepanamaran iyan so rek iyan a bantogan.
Ogaid na so pepanamar ko bantogan o somiyogo rekaniyan na benar sekaniyan a da a ba
on kapamokeg.
19 Ba di si Mosa i migay rekano ko Kitab? Ogaid na da den a isa rekano bo a ba on
petoman. Ino niyo pananamari a kambonoa niyo raken?"
20 Somimbag so madakel a taw a "Sosookan ka a saitan! Antawaa i mananamar sa
kambonoa niyan reka?"
21 Pitero kiran i Isa a "Satiman bo a mala a galebek a pinggolaola ko na inipamemesa
niyo langon.
22 Ogaid na inisogo rekano i Mosa so kapanoria niyo ko manga wata iyo, na sabap sii na
petoriin iyo siran apiya pen Gawii a Idedeke. (ogaid na aya benar na kena ini a ba poon ki
Mosa ka poon ko manga apoapoan iyo),
23 Na o kepakay a toriin so isa a wata ko Gawii a Idedeke kaan di kesogok so Kitab o
Mosa na ino ako niyo kerarangiti sabap ko kiyapakapiyaa ko ko langon o lawas o mama
ko Gawii a Idedeke?
24 Di kano pengokom a ipepasod ko pekeilay niyo, ka ipepasod ko ontol a kokoman."
Ba Sekaniyan so Al Masih?
25 Iniise o ped a taw sa Yarosalim a "Ba di sekaniyan so mama a kebayaan iran mono?
26 Ilaya niyo man ka pepangosiyat sekaniyan ko hadapan o madakel a taw na da den a ba
iran on dii teroon! Ba mataan den a katawan o manga olowan a sekaniyan so Al Masih?
27 Ogaid na katawan tano o anda poon a mama ini, na amay ka makaoma so Al Masih na
da a ba matao o anda sekaniyan poon."
28 Na sii ko kapepangendao i Isa ko Timplo na pitero iyan sa matanog a "Ba mataan a
katawan ako niyo ago katawan iyo o anda ako poon? Kena a ba saken i miyakambayabaya
ko kiyasong aken sii. So somiyogo raken na benar, na di niyo sekaniyan katawan.
29 Ogaid na katawan aken sekaniyan ka poon ako rekaniyan, na sekaniyan i somiyogo
raken."
30 So kiyateroa sii i Isa na tipengan iran sekaniyan domakep, ogaid na da a ba on
miyakaseko, ka da pen maoma so oras iyan.
31 Apiya pen oto na madakel a manga taw ko malilimod a miyaratiyaya rekaniyan a tig
iran a "Amay ka makaoma so Al Masih na di sekaniyan mangaday penggolaola sa
madakel pen a manga piyakamemesa a di so miyanggolaola angkai a mama!"
Siyogo so manga Gordiya a Ndakep ki Isa

32 Miyaneg o manga Parisi so madakel a taw a di ran ai dii pamagtonga makapantag ki
Isa. Sabap san na siran ago so manga poporo a imam na somiyogo sa manga gordiya a
ndakep ki Isa.
33 Pitero i Isa a "Di bo matey a kasisii aken rekano pen na go ako bo kesoy ko somiyogo
raken.
34 Pembabanogen ako niyo ogaid na di ako niyo ketoon, na so ketagoan raken na di kano
ron pekasong."
35 Na mimbibitiyarai so manga Yahodi a tig iran a "Anda bes song angkai a mama a di
tano ron ketoon? Ba song sekaniyan ko babalingan o manga Yahodi a mipaparak ko
manga siti sa Grisiya ago roo sekaniyan pepangendao ko manga Grigo?
36 Antonaa i maana o pitero iyan a 'Pembabanogen ako niyo ogaid na di ako niyo ketoon
ago di kano pekasong ko ketagoan raken?' "
So manga Lawasaig a Pepangoyag
37 Na sii ko kaposan a gawii ko pista a aya mala a gawii na tominindeg si Isa na pitero
iyan sa matanog a "O pekewaw ka na song ka raken ago inom!
38 So peparatiyaya raken, a so den so pitero o Kitab, na poon sa dalem a ginawa niyan na
pembowalan on so manga lawasaig a pepangoyag a ig."
39 Giyangkai a pitero iyan na makapantag ko Roh a magaan den matarima o siran oto a
pepamaratiyaya ki Isa. Sa masa oto na da pen mibegay so Roh, ka da pen kabantogi si Isa.
Da Pagayonayon so manga Taw
40 Kagiya maneg o manga taw roo angkai a manga katero i Isa na tig o ped kiran a
"Mataan den a giyangkai a mama na so Nabi."
41 Pitero o manga ped a "Sekaniyan so Al Masih." Ogaid na tig o ped a "Kena bes a ba
pekapoon so Al Masih sa Galili?
42 Ba kena a pitero o Kitab a so Al Masih na kiyababadan ki Daod ago roo ipembawata
sa Bitlihim a so siti o Daod?"
43 Na miyabagi so manga taw sabap ki Isa.
44 So ped kiran na kebayaan iran sekaniyan domakep ogaid na da a ba on miyakaseko.
Da Paratiyaya so manga Imam ago so manga Parisi
45 So peman so manga gordiya a piyakasong ki Isa na komiyasoy siran ko manga poporo

a imam ago so manga Parisi. Na iniise iran ko manga gordiya a "Ino niyo sekaniyan da sii
wita?"
46 Somimbag so manga gordiya a "Da den pen a taw a miyakatero a ba datar angkoto a
mama!"
47 Somimbag so manga Parisi a "Ba kano niyan mambo miyaakal?
48 Ba aden a isa ko manga olowan o di na manga Parisi a miyaratiyaya rekaniyan?
49 Da den, ka so bo so madakel oto a taw a di manga tatao ko Kitab. Na inisinta siran
baden o Allah!"
50 Na si Nikodimos, a miyakasong gowani ki Isa, na isa sangkoto a manga olowan, na
pitero iyan kiran a
51 “Kabasa o Kitab a di tano kekokom so apiya antawaa sa da tano ron pen
kapemakinega ago kapariksaa ko miyanggolaola niyan."
52 Somimbag siran a "Ba ka poon mambo sa Galili? Paganadi ngka so Kitab na
ketokawan ka a da a nabi a ba pekapoon sa Galili."
53 Oriyan oto na mimbabaling siran langon.
YAHIYA 8
So Babay a Miyatibowa a dii Sina
Ogaid na somiyong si Isa ko Palaw a Olibi.

2 Teked a kapipita na komiyasoy sekaniyan ko Timplo. Mitimotimo on so manga taw na
miyontod sekaniyan ago miyangendao.
3 Sii ko di niyan dii katero na so manga goro ko Kitab ago so manga Parisi na miyowit
siran on sa babay a miyatibowa a dii sina, na piyakaadap iran ko manga taw.
4 Na pitero iran ki Isa a "Goro, giyangkai a babay na miyatibowa a dii sina.
5 Sii ko Kitab tano na inisogo o Mosa a so datar ai a babay na perobakan a ator taman sa
matay. Antonaa den i mapetero o ka?"
6 Pitero iran ai ka petepengan iran sekaniyan kaan iran midimanda. Ogaid na baden
tominikoro si Isa na inisorat iyan a tindoro iyan ko lopa.
7 Na sii ko kipetarosen iran ko kapepangingisei ran on na tominindeg si Isa a tig iyan
kiran a "Apiya antawaa rekano i da den makandosa na aya niyo ron pakaonaa lomebad sa
ator."
8 Na tominikoro peroman si Isa na misorat ko lopa.
9 Kagiya maneg iran ai na misekataw siran roo mamangawa a aya miyaona na so manga
lokes, na aya roo bo minibagak si Isa ago so babay.
10 Tominindeg si Isa na pitero iyan on a "Anda siran den, Babay? Ba da a miyalamba
kiran a ndaneg reka?"
11 Tig o babay a "Da, Sir".....
Na tig i Isa a "Saken mambo na di aken seka ndanegen. Lalakaw ka den na di ka den
pendosa peroman."
Si Isa i Solo o Doniya
12 Na pitero peroman i Isa ko madakel a taw a "Saken i solo o doniya. So pegonot raken
na di den pekalalakaw ko maliboteng ka ndodon so solo a pepangoyag."
13 Pitero rekaniyan o manga Parisi a "Seka bo i dii seksi makapantag ko ginawa ngka; so
di ngka dii teroon na di ketarima."
14 Tig i Isa a "Apiya pen saken i dii seksi makapantag ko ginawa ko na benar so di aken
dii teroon, ka katawan aken o anda ko poon ago anda ko song. Ogaid na sekano na di niyo
katawan o anda ko poon o di na anda ko song.
15 So kapepangokom iyo na ipepasod ko kamamanosiyai a kokoman. Kena a ba ako dii
kokom ko apiya antawaa.
16 Ogaid na o kokom ako na so ikokom aken na benar, ka kena a ba saken bo i
pengokom, ka saken ago so Ama a somiyogo raken.
17 Misosorat ko Kitab iyo a igira a miyagayon so dowa a saksi na ketarima so ipeseksi
iran.
18 Saken so isa a dii seksi makapantag ko ginawa ko, na so Ama a somiyogo raken na di
mambo dii seksi makapantag raken."
19 Iniise iran rekaniyan a "Anda bes so Ama a ka?"
Somimbag si Isa a "Di ako niyo katawan aya pen so Ama aken. O katawi ako niyo na
katawan iyo mambo so Ama aken."
20 Pitero ini langon i Isa sii ko kapepangendao niyan roo ko Timplo sii ko darpa a
katatagoan ko baitalmal. Na da a ba on domiyakep ka da pen maoma so oras iyan.
Di Kano Pekasong ko Songowan aken
21 Pitero kiran peroman i Isa a "Magawa ako na pembabanogen ako niyo, na pematay
kano a da karilai so manga dosa niyo. Di kano pekasong ko songowan aken."
22 Na miyamagisei so manga Yahodi a tig iran a "Ba sekaniyan pegeget? Ba giyanan i
sabap a pitero iyan a di tano pekasong ko songowan iyan?"
23 Simbag siran i Isa a "Sekano na poon sa baba; saken na poon sa poro. Sekano na ped
sangkai a doniya; saken na kena a ba ped sangkai a doniya.
24 Pitero aken rekano a pematay kano a da karilai so manga dosa niyo; o di niyo
peratiyayaa a saken so miyatero aken o antawa ako, na mataan den a pematay kano a da
karilai so manga dosa niyo."
25 Na iniise iran on a "Antawaa ka bes?
Tig i Isa a "Saken so miyatero aken rekano ipoon den sa poonan.
26 Madakel pen a mapetero aken a kikokom rekano. Ogaid na benar so somiyogo raken,
na aya bo a di aken dii teroon sii sa doniya na so miyaneg aken a miyatero iyan."
27 Na da iran sabota a aya di kiran dii teroon i Isa na makapantag ko Ama iyan.
28 Na pitero kiran pen i Isa a "Amay ka mitongkol iyo so Wata o Manosiya na ketokawan
iyo a saken so miyatero aken o antawa ako, na da a ba ko dii nggolaolaan a saken i di ron
dii mbayabaya, ka aya bo a di aken dii teroon na so inipangendao raken o Ama.
29 So somiyogo raken na mipageepeda aken. Da ako niyan ndarainonen a makambibisa,
ka lalayon aken dii nggolaolaan so ikasosoat iyan."
30 Na sii ko di sii dii kateroa i Isa na madakel a miyamaratiyaya on.
So Tito a Benar i Pekabalokas rekano
31 Pitero i Isa ko manga Yahodi a miyamaratiyaya rekaniyan a "O petomana niyo so

manga ndao aken na mataan a manga sokbat aken sekano.
32 Ketokawan iyo so tito a benar, na so tito a benar na aya rekano pekabalokas."
33 Somimbag siran a "Manga kiyababadan kami ko Ibrahim na da kami den
mapangongoripen o apiya antawaa. Antonaa i maana o pitero o ka a kebalokasan kami?"
34 Tig i Isa a "Teroon ko rekano a mataan den a oman i dii ndosa na oripen o dosa.
35 So oripen na kena a ba lalayon maaped ko pamiliya, ogaid na so wata na ped on den sa
taman sa pakataman.
36 Sabap san na o kabalokasi kano o Wata na kebalokasan kano den.
37 Katawan ko a manga kiyababadan kano ko Ibrahim. Apiya pen oto na pepanamaran
iyo a kambonoa niyo raken, ka di niyo terimaan so ndao aken.
38 Di aken dii teroon so piyayag raken o Ama aken, ogaid na aya niyo dii nggolaolaan na
so miyatero rekano o ama iyo."
39 Somimbag siran a "Si Ibraham na aya mi ama."
Tig i Isa a "O benar a manga wata kano o Ibrahim na penggolaolaan iyo so datar o
pinggolaola niyan.
40 Ogaid na imanto na pepanamaran iyo a kambonoa niyo raken, a saken so mama a
miyakatero rekano ko tito a benar a miyaneg aken a poon ko Allah. Da a pinggolaola o
Ibrahim a datar ai.
41 Pesowaan iyo so manga galebek o ama iyo."
Somimbag siran a "Kena a ba kami manga wata sa di kawing. Isaisa bo a ama ami a so
den so Allah."
So manga Wata o Iblis
42 Pitero kiran i Isa a "O so Allah i ama iyo na pekebabayaan ako niyo o kowan, ka
miyakapoon ako ko Allah na sisii ako den imanto. Kena a ba saken i miyakambayabaya
ko kiyasong aken sii, ka sekaniyan i somiyogo raken.
43 Ino niyo di sebota so di aken dii teroon? Aya sabap ai na di niyo keraw i ba niyo
peterimaa so manga katero aken.
44 Rek kano o ama iyo a so Iblis, na kebayaan iyo tomoman so manga kabaya o ama iyo.
Talibono sekaniyan ipoon sa poonan. Da niyan den pamayandegen so tito a benar, ka da
rekaniyan so benar. Igira a pepemokeg sekaniyan na di niyan dii teroon so pepekapoon ko
parangay niyan, ka bokeg sekaniyan ago ama o langon o manga kabokegan.
45 Ogaid na saken na di aken dii teroon so tito a benar, na giyanan i sabap a di niyo raken
kaperatiyayaa.
46 Antawaa rekano i mipemataan iyan a miyakandosa ko? O aya ko dii teroon na so tito a
benar na ino ako niyo di peratiyayaa?
47 Apiya antawaa i rek o Allah na pepamakinegen iyan so manga katero o Allah. Ogaid
na kena a ba kano rek o Allah, na giyanan i di niyo kapemakineg."
Si Isa ago so Ibrahim
48 Simbag o manga Yahodi si Isa a "Ba di benar so pitero ami a Isamariyan ka ago
sosookan a saitan?"
49 Somimbag si Isa a "Kena a ba ako sosooki a saitan, ka pagaadatan aken so Ama aken,
ogaid na kena a ba ako niyo pagaadati.
50 Kena a ba ko kabaya a pembantogen ako. Aden a kebaya sii, na sekaniyan i
pekakokom on.
51 Teroon ko rekano a mataan den a apiya antawaa i petoman ko katero aken na di den
pekaokit sa kapatay."
52 Na pitero rekaniyan o manga Yahodi a "Imanto na katawan ami a sosookan ka a
saitan! Miyatay so Ibrahim, na miyamatay mambo so manga nabi, ogaid na pitero o ka a
apiya antawaa i petoman ko katero o ka na di den pekatintim ko kapatay.
53 Ba ka lawan pen ko ama ami a Ibrahim a miyatay den? Na miyamatay mambo so
manga nabi. Antawaa ka bes ko kapipikira ngka on?"
54 Tig i Isa a "O bantoga ko a ginawa ko na da a bali o bantogan aken. Aya pembantog
raken na so Ama aken, a so pitero iyo a Tohan iyo.
55 Apiya oto na di niyo sekaniyan katawan, ogaid na katawan ko sekaniyan. O teroa ko a
di aken sekaniyan katawan na makapemokeg ako a lagid iyo. Ogaid na katawan ko
sekaniyan ago petomanen aken so katero iyan.
56 So ama iyo a si Ibrahim na tanto a miyababaya sii ko kaiinama niyan ko kakeilaya
niyan ko gawii a kasong aken sii. Na miyailay niyan na miyakapiya a ginawa niyan."
57 Na pitero rekaniyan o manga Yahodi a "Da pen malima polo ragon a idad ka, na
miyailay ngka bes si Ibrahim?"
58 Tig i Isa a "Teroon ko rekano a mataan den a sa da pen kimbawataan ko Ibrahim na
kapapantagan ako den"
59 Kagiya maneg ai o manga Yahodi na miyamorot siran sa manga ator a iperobak iran
on. Ogaid na rominirong si Isa na inawaan iyan so Timplo.
YAHIYA 9
Piyakapiya i Isa so Mama a Bota ipoon ko Kinimbawataan on
Sii ko kapelalakaw i Isa na miyailay niyan so mama a mabobota ipoon ko kinimbawataan

on.
2'So manga sokbat iyan na iniise iran on a "Goro, antawaa i miyakandosa a kiyasabapan
ko kabobota niyan isako imbawata? Sekaniyan den, o di na so manga lokes iyan?"
3 Somimbag si Isa a "Kena a ba sekaniyan i miyakandosa o di na so manga lokes iyan.
Inimbawata sekaniyan a bota kaan mapayag so galebek o Allah a nggolalan ko keokitan
iyan.
4 Disomala a nggolaolaan tano so manga galebek o somiyogo raken sii ko kadadaondaw
niyan pen, ka pekatalingoma so kagagawii a da den a ba makapenggalebek.
5 Sii pen ko kasisii aken sa doniya na saken i solo o doniya."
6 Kagiya matero ai i Isa na domiyoda ko lopa, na inibonaw niyan ko bote so ayog iyan na
inisising iyan ai ko mata ngkoto a mama.
7 Na pitero iyan on a "Ika roo den na panagop ka sii ko Papaigoay sa Silowam," (aya
maana ngkai a ngaran na 'Siyogo.') Na somiyong on so mama na miyanagop on na
komiyasoy a pepakailay den.
8 Mandiyadi na so manga siringan iyan ago so miyamakailay ron gowani ko
kapepamangni niyan na iniise iran a "Ba kena a giyai so mama a kaoontod bo den a dii
mamamangni?"
9 Tig o manga ped a "Sekaniyan den."
So ped na tig iran a "Kena, ka datar iyan baden sa paras."
Ogaid na pitero o pepamangni a "Saken den so mama."
10 Na iniise iran on a "Andamanaya i kiyapakapiya o manga mata ngka?"
11 Inisembag iyan a "So mama a bebetowan sa Isa na miyonaw sa bote na inisising iyan
ai ko manga mata ko, na pitero iyan raken a 'Song ka roo sa Silowam na panagop ka on.'
Na somiyong ako roo na kagiya makapanagop ako na miyakailay ako den."
12 Iniise iran a "Anda den sekaniyan?"
Tig iyan a "Di aken katawan.
Iniles o manga Parisi so Kiyapakapiya o Bota
13 Mandiyadi na inowit iran ko manga Parisi so mama a mabobota gowani.

14 Gawii oto a Idedeke ko kiyabonaw i Isa sa bote ago so kiyapakapiyaa niyan ko manga
mata o bota a mama.
15 Na iniise rekaniyan mambo o manga Parisi o andamanaya i kiyapakailay niyan. Tig
iyan a "Sinisingan iyan sa bote a manga mata ko, na miyanagop ako na sarta a miyakailay
ako den."
16 So ped ko manga Parisi na tig iran a "Giyangkoto a mama a minggolaola sii na kena a
ba poon ko Allah, ka di niyan petomanen so Kitab mipantag ko Gawii a Idedeke." Ogaid
na tig o manga ped a "Andamanaya i kapenggolaolaa o baradosa ko piyakamemesa a
manga nanao a datar ai?" Na sabap sii na miyabagi siran.
17 Giyoto a inisean iran peroman so mama a "Pitero o ka a piyakapiya niyan so manga
mata ngka; o benar ai na antonaa i mapetero o ka mipantag rekaniyan?
Na tig o mama a "Nabi sekaniyan."
18 Ogaid na da paratiyayaa o manga olowan o manga Yahodi a ba mabobota gowani so
mama ago miyakailay den taman sa piyakitawag iran so manga lokes iyan.
19 Na iniise iran kiran a "Ba giyai so wata iyo a mama a pitero iyo a mabobota isako
imbawata? Andamanaya i kapepakailay niyan imanto?"
20 Somimbag so manga lokes iyan a "Katawan ami a giyai so wata ami ago mabobota
isako imbawata.
21 Ogaid na di ami katawan o andamanaya i kapepakailay niyan imanto, o di na antawaa i
miyakapiya ko manga mata niyan. Iseen iyo ron; matoa den sekaniyan na pekasembag
mipantag sa ginawa niyan."
22 Pitero ini o manga lokes iyan ka ipekelek iran so manga Yahodi, ka
miyakapagayonayon siran sa apiya antawaa i peteroon iyan a si Isa na so Al Masih na
pekaawaan ko sinagoga.
23 Giyanan i sabap a kiyateroa o manga lokes iyan sa "Matoa sekaniyan den. Isei niyo
baden."
24 Na tiyawag iran peroman so mama a inimbawata a bota na pitero iran on a "Sii ko
hadapan o Allah na teroa ngka so benar! Katawan ami a so mama a miyakapiya reka na
baradosa."
25 Somimbag so mama a "Di aken katawan o ba baradosa ago so di. Aya bo a katawan ko
na bota ako gowani, na pepekailay ako imanto."
26 Iniise iran on a "Antonaa i inikidia niyan reka? Andamanaya i kiyapakapiyaa niyan ko
manga mata ngka?"
27 Somimbag sekaniyan a "Miyatero aken rekano den na da niyo paratiyayaa. Ino niyo
kebayaan mamakineg peroman? Ba niyo kabaya a mabaloy kano mambo a manga sokbat
iyan?"
28 Na giyoto a piyagongatongat iran sekaniyan a tig iran a "Seka i sokbat angkoto a
mama, ogaid na manga sokbat kami o Mosa!
29 Katawan ami a miyakimbitiyarai so Allah ki Mosa, ogaid na si aki ini na apiya so
poonan iyan na di ami katawan."
30 Pitero o mama a "Sayana ini a piyakamemesa! Apiya niyan pen piyakapiya a manga
mata ko na di niyo katawan o anda sekaniyan poon!
31 Katawan tano a di pagamponen o Allah so pangni o manga baradosa, ogaid na so taw a
pesimba rekaniyan ago dii nggolaola ko kabaya iyan na aya niyan pegamponen.
32 Ipoon ko kiyaadena ko doniya na da den miyaneg a ba aden a miyakabekar ko manga
mata o mama a inimbawata a bota.
33 O giyangkai a mama na kena a ba poon ko Allah na da a ba niyan mapenggolaola."
34 Somimbag siran a "Mitataralo so di ngka dii kambaradosa ipoon ko kinimbawataan
reka, na petepengan kami ngka bes mangendao?" Na biyogaw iran poon ko sinagoga.
So Kabobota o Pamikiran
35 Kiyatokawan i Isa a piyakaawa iran so mama ko sinagoga, na kagiya matoon iyan

sekaniyan na tig iyan a "Ba ka peparatiyaya ko Wata o Manosiya?"
36 Somimbag so mama a "Antawaa sekaniyan, Sir? Teroa ngka raken kaan aken
sekaniyan maparatiyaya."
37 Tig i Isa a "Miyailay ngka den, ka sekaniyan so di reka dii makimbitiyarai imanto."
38 Na pitero o mama a "Peparatiyaya ako, Kadnan!" Na taros a sinimba iyan si Isa.
39 Pitero i Isa a "Somiyong ako sangkai a doniya ka kokomen aken kaan mamakailay so
manga bota, ago an manga bobota so pepamakailay."
40 So ped ko manga Parisi a ndodoo a ped iyan na miyaneg iran so kiyateroa niyan sii, na
iniise iran ki Isa a "Ba ngka dii teroon a manga bota kami mambo?"
41 Tig i Isa a "Opama ka manga bota kano na da a kasalaan iyo. Ogaid na sabap sa di
niyo dii teroon imanto a pepekailay kano na lalayon rekano pen so kasalaan iyo."
YAHIYA 10
So Bayambayanan mipantag ko Kodal o manga Bilibili
"Teroon ko rekano a mataan den a so taw a di magokit ko pintoan ko kasoled iyan ko

kodal o manga bilibili, ka baden pemanik ko salakaw a pagokitan, na tekaw sekaniyan
ago tanganiyaya.
2 Ogaid na so pesoled on a pegokit ko pintoan na giyoto so tomatagikor ko manga bilibili.
3 Sekaniyan i pelekaan o petemeng ko pintoan, na pepamakinegen o manga bilibili so
sowara iyan. Ipepananalo niyan so oman i ngaran o rek iyan a manga bilibili na
pegagaken iyan siran sa liyo.
4 Amay ka mapakaliyo niyan so langon a rek iyan a manga bilibili na magona sekaniyan
kiran, na petondogen sekaniyan o manga bilibili ka katawan iran so sowara niyan.
5 Di siran den tondog ko salakaw a tomatagikor; pelagoyan iran sekaniyan baden, ka di
iran kekilala so sowara o salakaw a taw."
6 Giyai so bayambayanan a piyanotol kiran i Isa, ogaid na da iran sabota so maana o di
niyan kiran dii teroon.
Si Isa i Mapiya a Tomatagikor
7 Kagiya ka maoto na pitero peroman i Isa a "Teroon ko rekano a mataan den a saken so
pintoan a pegokitan o manga bilibili.
8 So langon o somiyong sii a miyaonaan aken na manga tekew ago manga tanganiyaya,
ogaid na da kiran pamakineg so manga bilibili.
9 Saken so pintoan. Apiya antawaa i soled a magokit raken na kesabet. Na somoled
sekaniyan lomiyo a pepekatoon sa kapenateban iyan.
10 So tekew na aya bo a kapekaoma niyan na an makapamanekew, makapamamono ago
makapaminasa. Miyakaoma ako kaan kabegi so manga taw sa kaoyagoyag, a so
kaoyagoyag a matatarotop piyapiya.
11 “Saken so mapiya a tomatagikor ko manga bilibili. So mapiya a tomatagikor ko manga
bilibili na iperila iyan so kaoyagoyag iyan para bo ko manga bilibili.
12 So matag pesokayan, a kena a ba tomatagikor o di na kirek ko manga bilibili, na amay
ka mailay niyan so maila a aso a pegantap kiran na pagawaan iyan so manga bilibili na
pelagoy. Na pesikemen o aso so manga bilibili na pakapembelabelagen iyan siran.
13 So pesokayan na pelagoy ka matag sosokayan a di niyan tatagoon sa ginawa so manga
bilibili.
14 “Saken so mapiya a tomatagikor ko bilibili. Katawan aken so manga bilibili aken na
katawan ako iran mambo
15 A datar o Ama a katawan ako niyan ago katawan aken so Ama. Na iperila aken so
kaoyagoyag aken para ko manga bilibili.
16 Aden a ped a manga bilibili aken a kena a ba matatago sangkai a tangkal a bilibili.
Disomala a agaken aken siran mambo, na pemakinegen iran so sowara ko. Na keisaisa so
talon a bilibili a isaisa a tomatagikor kiran.
17 “Pekebabayaan ako o Ama ka iperila aken so kaoyagoyag aken kaan aken makowa
peroman.
18 Da a taw a ba niyan raken mabelag so kaoyagoyag aken, ka iperila aken a saken bo i di
on dii mbayabaya. Aden a kapaar aken sa kiperilaan ko ko kaoyagoyag aken, ago aden
pen a kapaar aken sa kakowaa ko ron peroman. Giyai i inisogo raken o Ama aken."
19 Na miyabagi peman so manga Yahodi sabap sangkai a manga katero i Isa.
20 Madakel kiran a dii tero sa "Sosookan sekaniyan a saitan ago pembetengen! Ino niyo
pemakinega?"
21 Ogaid na tig o manga ped a "Kena a ba ini katero o taw a sosookan. Ba mapekapiya o
saitan so manga mata o bota?"
So da Kaparatiyaya o manga Yahodi
22 Riyaot so pista a kapeselaselaa ko kiyasotiya ko Timplo roo sa Yarosalim. Giya masa

oto na panenggaw,
23 Na dii ndalakaw si Isa sii ko Timplo ko darpa a bebetowan sa 'Liyoliyowan o
Solaiman.'
24 Pitimoan sekaniyan o manga Yahodi na pitero iran on a "Ay katey a kaalangalanga
ngka ko pamikiran ami? O seka so Al Masih na teroa ngka rekami sa da den a pageemaan
on."
25 Tig i Isa a "Miyatero aken rekano den ogaid na da ako niyo paratiyayaa. So manga
galebek a di aken dii nggolaolaan sii ko ingaran o Ama aken na aya dii seksi makapantag
raken.
26 Ogaid na di kano peratiyaya ka kagiya kena a ba kano ped ko manga bilibili aken.
27 Pepamakinegen o manga bilibili aken so sowara ko. Katawan aken siran na
petondogen ako iran.
28 Pembegan aken siran sa kaoyagoyag a da a kaposan iyan na di siran den pekanaraka.
Na da a ba kiran pekaagaw ko katatangana ko kiran.
29 So Ama aken a aya migay kiran sii raken na lawan ko kalangolangon. Na da a ba kiran
pekaagaw ko katatangana kiran o Ama.
30 Saken ago so Ama na isaisa bo."
31 Na miyamorot peroman so manga Yahodi sa manga ator a iperobak iran ki Isa,
32 Ogaid na pitero iyan kiran a "Piyakiilay aken rekano so madakel a manga pipiya a
galebek a inibegay raken o Ama a penggolaolaan ko. Anda sangkai a manga galebek i
kesabapan ko kaperobaki niyo raken?"
33 Somimbag so manga Yahodi a "Kena a ba sabap ko mapiya a galebek ka a kaperobaki
ami reka ka sabap sa piyagitowito o ka so Allah. Ka apiya pen matag ka manosiya na di
ngka dii teroon a seka na Tohan."
34 Na pitero kiran i Isa a "Ba di misosorat ko Kitab iyo a pitero o Allah a 'Manga Tohan
kano'?
35 Siran oto a kiyatoronan ko katero o Allah na bitowan iyan sa manga tohan, na di den
keribat so Kitab.
36 Kagiya ka maoto na ino niyo peteroa a saken a pinili o Ama ago siyogo iyan sii sa
doniya na miyagitowito ko Allah ko kiyateroa ko sa 'Saken so Wata o Allah'?
37 Di patot o ba ako niyo paratiyayaa o kena a ba ko pesowaa so manga galebek o Ama
aken.
38 Ogaid na o pesowaan ko ini na apiya pen o di ako niyo peratiyayaa na paratiyayaa niyo
so manga galebek kaan iyo katokawi ago masabot a so Ama na madadalem raken, ago
madadalem ako mambo ko Ama."
39 Mandiyadi na tipengan iran peman domakep si Isa, ogaid na miyakapalagoy sekaniyan
baden ko kapaar iran.
40 Komiyasoy romipag si Isa ko lawasaig a Yordan sii ko darpa a ron dii manalawat si
Yahiya gowani, na komiyaden sekaniyan roo.
41 Na madakel a taw a miyamanong on, na pitero iran a "Si Yahiya na da nggolaola sa
piyakamemesa a nanao, ogaid na benar so langon a pitero iyan makapantag sangkai a
mama."
42 Na madakel a manga taw a miyaratiyaya ki Isa roo.
YAHIYA 11
So Kiyapatay i Lasaro
Aden a mama a miyasakit a bebetowan sa Lasaro a mababaling sa Bitani a so inged i

Mariyam ago so pagari niyan a si Marta.
2 Si Mariyam na aya miyodod gowani sa ikekamotan ko ai o Kadnan na inisising iyan on
so bok iyan. Na so laki niyan a si Lasaro na aya pekesakit.
3 Na piyakisongowan o magari a babay si Isa a tig iran a "Kadnan, pekesakit so madaseg
ka a ginawai."
4 Kagiya maneg ai i Isa na tig iyan a "Giyangkai a sakit i Lasaro na kena a ba niyan
petain. Miyanggolaola ini kaan kabantogi so Allah, na nggolalan sii na kebantogan
mambo so Wata o Allah."
5 Pekebabayaan i Isa si Marta, ago so pagari niyan, ago si Lasaro.
6 Apiya pen oto na kagiya maneg iyan a pekesakit si Lasaro na komiyaden sekaniyan sa
miyakadowa pen gawii roo ko darpa a katatagoan on.
7 Oriyan iyan na pitero iyan ko manga sokbat a "Komasoy tano sa Yodiya."
8 Tig o manga sokbat a "Goro, da pen ai matey na tipengan o manga Yahodi a kaperobaki
reka a ator, na ba ka roo den kesoy?"
9 Somimbag si Isa a "Ba kena a sapolo ago dowa ka oras so kadaondaw? Apiya antawaa i
pelalakaw sii ko kadaondaw na di kirepang, ka pepakailay sabap ko kaliwanag o doniya.
10 Ogaid na o pelalakaw sekaniyan ko kagagawii na kirepang sekaniyan, ka da on so
kaliwanag."
11 Kagiya matero iyan ai na pitero iyan pen a "So ginawai tano a si Lasaro na
miyakatorog. Ogaid na songowan ko ka pokaon aken."
12 Tig o manga sokbat a "O totoroga sekaniyan, Kadnan, na baden pekapiya."
13 Aya mapemamaana i Isa na si Lasaro na miyatay den, ogaid na aya mapipikir o manga
sokbat na matag domedeke sekaniyan a totorogen.
14 Kagiya ka maoto na pitero kiran i Isa sa marayag a "Miyatay si Lasaro,
15 Ogaid na sabap rekano na miyababaya ako sa kada aken roo a ped iyan kaan kano
makaparatiyaya. Na, songowan tano sekaniyan.."
16 Na si Tomas a bebetowan sa 'Miyadowa,' na pitero iyan ko ped a manga sokbat a
"Mamangonot tano langon ko Goro kaan tano ron mirakes a mbonoon!"
Si Isa i Pepangoyag ko Miyamatay ago so Kaoyagoyag
17 Kagiya makaoma si Isa na kiyatokawan iyan a miyakapat den gawii a kinikoboren ki

Lasaro.
18 Giya inged a Bitani na manga telo baden ka kilomitro a kawatan iyan sa Yarosalim,
19 Na madakel a manga Yahodi a mintel ki Marta ago si Mariyam, ka teyoan iran siran
sabap ko kiyapatay o laki ran.
20 Kagiya maneg i Marta a magaan den makaoma si Isa na lominiyo sekaniyan ka inalaw
niyan si Isa, ogaid na mitelimbagak si Mariyam sa walay.
21 Na pitero i Marta ki Isa a "O ba bo sisii ka, Kadnan, ka di o kowan petay so laki aken!
22 Ogaid na katawan ko a apiya imanto na mbegan ka o Allah sa apiya antonaa i pengnin
ka on."
23 Pitero rekaniyan i Isa a "Keoyag peroman so laki ngka."
24 Tig i Marta a "Katawan ko a keoyag sekaniyan bo sii sa alongan a maori a kakeoyag o
miyamatay."
25 Na pitero i Isa a "Saken so pepangoyag ko miyamatay ago so kaoyagoyag. Apiya
antawaa i peparatiyaya raken na apiya pen matay na keoyag bo.
26 Na oman i isa a oyagoyag a peparatiyaya raken na di den petay. Miyaratiyaya ka sii?"
27 Tig iyan a "Oway, Kadnan. Miyaratiyaya ako a seka so Al Masih a so Wata o Allah a
somiyong sii sa doniya."
Somigad si Isa
28 Kagiya matero ini i Marta na miyaling na pitero iyan sa masolen ki Mariyam a pagari
niyan a "Sisaya so Goro, na kabaya iyan a makipembitiyarai reka."
29 Kagiya maneg ai i Mariyam na minggagaan gomanat na somiyong rekaniyan.
30 Samaoto na da pen makaoma si Isa sa kaingedan ka ndodoo pen ko darpa a inalawan
on i Marta.
31 Na so manga Yahodi a ndodoo ko walay a ped i Mariyam a peteyo rekaniyan na
tiyondog iran sekaniyan kagiya mailay iran a minggagaan tomindeg ago lomiyo, ka aya
katao iran on na song ko kobor ka roo nggoraok.
32 Miyakaoma si Mariyam ko darpa a katatagoan ki Isa, na kagiya mailay niyan on na
somiyodiyod ko hadapan iyan a tig iyan a "Kadnan, o ba bo sisii ka, ka di o kowan petay
so laki aken!"
33 Kagiya mailay i Isa a penggoraok si Mariyam a datar mambo o manga Yahodi a
miyonot on na gomininawa sa madalem a tanto a mikerata a ginawa niyan.
34 Na iniise iyan a "Anda niyo sekaniyan inikobor?"
Tig iran a "Onot ka rekami, Kadnan, na ilaya ngka."
35 Na somigad si Isa.
36 Mandiyadi na pitero o manga Yahodi a "Ilaya niyo; mataan a tanto niyan a
pekebabayaan si Lasaro!"
37 Ogaid na so ped na tig iran a "Miyapakapiya angkai a mama so mata o bota! Ba niyan
di kegaga a kipelidasen iyan ki Lasaro ko kapatay?"
Inoyag peroman i Isa si Lasaro
38 Miyakaginawa peman si Isa sa madalem na somiyong ko kobor. Giyai na liyang a so

gimowa iyan na inolen a ator.
39 Pitero i Isa a "Kowaa niyo ron so ator."
Tig i Marta a babay o miyatay a "Kadnan, miyado sekaniyan den imanto, ka miyakapat
den gawii a kinikoboren on!"
40 Pitero rekaniyan i Isa a "Ba aken reka da matero a keilay ngka so bantogan o Allah o
peratiyaya ka?"
41 Na taros a kinowa iran on so ator, na lomiyangag si Isa na tig iyan a "Penalamatan ko
seka, Ama, ka kagiya inampon ako so pangni aken.
42 Katawan ko a lalayon ako ngka pegamponen, ogaid na pitero aken ai sabap ko
madakel a taw a kititindeg sii kaan iran maparatiyaya a seka i somiyogo raken."
43 Oriyan o kiyateroa niyan sii na miyananalo si Isa sa tanto a matanog a tig iyan a
"Lasaro, liyo ka!"
44 Na lominiyo so miyatay a giya manga lima niyan ago manga ai na kikabobongkosan sa
onong, na aden a dinis a mibobongkos sa olo niyan. Na pitero kiran i Isa a "Bengkasi niyo
na pakalalakawa niyo."
45 Na madakel ko manga Yahodi a miyamanibaw ki Mariyam na kagiya mailay iran so

pinggolaola i Isa na miyaratiyaya siran on.
46 Ogaid na so ped kiran na miyamanong ko manga Parisi na piyanotolan iran siran ko
pinggolaola i Isa.
47 Sabap roo na miyakipagopakat so manga Parisi ago so manga poporo a imam ko
manga pangongokom na pitero iran a "Antonaa i sowaan tano ka giya mama oto na dii
nggolaola sa madakel a piyakamemesa a manga nanao?
48 O pakinggolaola tano ron so datar ai na peratiyaya rekaniyan so langon a taw, na song
sii so manga Iromanen na mbinasaan iran so Timplo tano ago so bangsa tano!"
49 Na so isa kiran a si Kayapas a aya maporo a imam sangkoto a ragon na pitero iyan
kiran a "Da den a imeleng iyo!
50 Ba niyo di sebota a tomo rektano a matay so sakataw a mama para ko manga taw a di
sa ba mabinasa so langon a bangsa tano?"
51 Da niyan ai teroa a poon ko pamikiran iyan ka sabap sa maporo sekaniyan a imam
sangkoto a ragon na inalamat iyan a petay si Isa para ko manga Yahodi,
52 Na kena bo a ba para ko manga Yahodi, ka para mambo ko manga wata o Allah a
mipaparak ko mbalabala kaan iyan siran matimo ago mapakaisaisa.
53 Na ipoon den sangkoto a gawii na kekadiyaten o manga olowan o manga Yahodi a
kambonoa iran ki Isa.
54 Sabap sii na di den perinayag lomalakaw si Isa sii ko manga Yahodi. Somiyong
sekaniyan baden ko darpa a marani ko mitataog a kaden, sii ko inged a bebetowan sa
Ipraim, na komiyaden roo a ped iyan so manga sokbat iyan.
55 Magaan den so Paska o manga Yahodi na madakel a taw a miyamanong sa Yarosalim
a poon ko dii pagonayonayan ka itoman iran roo so adat ko kapelompiyowa ko ginawa
iran sa di pen kakeoma o Paska.
56 Di ran dii mbabanog si Isa, na sii ko kapekelimod iran ko Timplo na pepamagisei siran
a "Antonaa i pamikiran iyo? Ba sekaniyan di song ko pista?"
57 So manga poporo a imam ago so manga Parisi na inisogo iran a o aden a makatokaw o
anda si Isa na paliyogat a iripot iyan kaan iran madakep.
YAHIYA 12
Nem pen gawii a di kakeomai ko Paska na somiyong si Isa sa Bitani a ron mababaling si
Lasaro a inoyag iyan a poon ko miyamatay.
2 Na pitiyagaran iran roo si Isa sa inggabi niyan. Si Marta i pepengenat, na si Lasaro na
isa ko miyakaatoang a ped i Isa.
3 Si Mariyam na kominowa sa tenga sa kilo a lana mamot a tanto a mala i arga a
pimbaalan a lombos a nardo, na inodod iyan ko ai i Isa na inisising iyan on so bok iyan.
Na miyabembar so kamot o lana ko dalem a walay.
4 Ogaid na si Yodas Iskariyot a isa ko manga sokbat i Isa a aya on tipo na pitero iyan a
5 “Ino da pesaa angkai a lana mamot sa telo gatos a pelata a pirak kaan mibegay ko
manga miskin?"
6 Pitero iyan ai a kena a ba sabap sa ba niyan tatagoa sa ginawa so manga miskin, ka
sabap sa tekew sekaniyan. Na sekaniyan i sasanaan ko pontir a petegoan ko pirak iran na
olaola niyan den so kapepanekewi niyan on.
7 Na pitero i Isa a "Taregi ngka sekaniyan! Miyapananago iyan angkai a lana para ko
gawii a kipelebengen raken.
8 So manga miskin na lalayon rekano maaped, ogaid na saken na kena a ba lalayon ako
niyo mipegepeda."
So Kadiyat a Kabonoa ki Lasaro
9 Tanto a madakel a Yahodi a miyamakaneg sa ndodoo si Isa sa Bitani, na miyamanong

siran roo a kena bo a ba sabap ki Isa, ka pagilain iran pen si Lasaro a inoyag iyan a poon
ko miyamatay.
10 Sabap sii na pikediyat pen o manga poporo a imam a kambonoa iran mambo ki
Lasaro,
11 Ka sabap rekaniyan na madakel ko manga Yahodi a miyamanalikod kiran ka
miyamaratiyaya siran ki Isa.
Piselasela si Isa ko Kiyasoled iyan sa Yarosalim
12 Kagiya talondog a gawii na so tanto a madakel a taw a domiyarpa ko Pista na miyaneg

iran a magaan den makaoma si Isa sa Yarosalim.
13 Sabap roo na miyangowa siran sa manga pakong o palmira na mililiyo siran ka
pagalaon iran sekaniyan a ipepelalis iran a
"Podin so Allah!
Karakmatan so pekaoma sii ko ingaran o Kadnan!
Karakmatan so Solotan sa Israil!"
14 Miyakatoon si Isa sa mangoda a kimar na mikoda on, a so den so misosorat ko Kitab a
15 “Di kano pekelek, hey manga taw sa Siyon.

Ilaya niyo, ka pekaoma so Solotan iyo a kokoda ko nati a kimar."
16 Da sabota o manga sokbat iyan angkai a miyanggolaola sa masa oto. Ogaid na kagiya
kabantogan si Isa na kiyatademan iran a misosorat ai langon ko Kitab makapantag
rekaniyan, na giyoto mambo i pinggolaola iran on.
17 So madakel a taw a maaped ki Isa isako talowan iyan si Lasaro a liyo ko kobor sii ko
kiyaoyaga niyan on a poon ko miyamatay na di ran ai dii pamanotolen.
18 Na sabap sa miyaneg den o madakel a taw a pinggolaola i Isa angkoto a piyakamemesa
a nanao na mililiyo siran mambo sa kapagalawa iran on.
19 Na mimbibitiyarai so manga Parisi a tig iran a "Mapegilailay a da den a ba tano
mapenggolaola. Ilaya niyo man; miyamangonot rekaniyan so dalem a doniya!"
20 Aden a manga taw sa Grisiya a maaped ko miyamakasong ko pista sa Yarosalim kaan

mamakasimba.
21 Somiyong siran ki Pilipi a taw sa Bitsaida roo sa Galili na pitero iran on a "Sir, kebaya
kami makipagilay si Isa."
22 Siyongowan i Pilipi si Andriyo na pitero iyan on ai. Na miyonot si Andriyo ki Pilipi na
pitero iran ai ki Isa.
23 Tig i Isa a "Miyaoma den so oras a kakebantogi ko Wata o Manosiya.
24 Teroon ko rekano a mataan den a so satiman a od a bantad na tatap den a sasatiman
taman sa di mapamola ko lopa ago matay. Ogaid na o matay ini na pemangonga sa
madakel.
25 So taw a pekebabayaan iyan so kaoyagoyag iyan na pagilangen iyan baden. Na so
ipekegowad iyan so kaoyagoyag iyan sangkai a doniya na pagongowan iyan para ko
kaoyagoyag a da a kaposan iyan.
26 Apiya antawaa i kebaya raken manalagad na disomala a pegonot raken kaan apiya
anda ako na ndodon mambo so pepanalagad raken. Na apiya antawaa i pepanalagad raken
na mbentogen o Ama aken.
27 Imanto na tanto a masososa a niyawa ko, na antonaa i mapetero aken? Ba ko peteroa a
'Ama, lidasi ako ngka ko keokitan aken sangkai a oras? Kena, ka aya inisong aken sii na
an aken kaokiti angkai a oras.
28 Ama, pakibantogen ka so Ingaran ka!"
Na aden a sowara a poon sa kasorgaan a tig iyan a "Piyakibantog aken den na pekibantog
aken peroman."
29 So madakel a taw a kititindeg roo na miyaneg iran so sowara na pitero iran a
"Mindadalendeg man!" Na tig o ped a "Aden a malaikat a miyakimbitiyarai ron!"
30 Pitero kiran i Isa a "Kena a ba raken sabap a kiyatero angkai a sowara, ka sabap
rekano.
31 Imanto so gawii a kokomen so doniya. Imanto na so Iblis a ndadato sangkai a doniya
na kilebad sa liyo.
32 Na saken na amay ka itongkol ako a poon ko lopa na tondaan aken so langon a taw ko
ginawa ko."
33 Sii ko kiyateroa niyan sii na piyayag iyan so okit o kapetay niyan.
34 Na pitero rekaniyan o madakel a taw a "Pitero o Kitab tano a dayon sa dayon a
kaooyagoyag o Al Masih. Ino ngka peteroa a disomala den a kitongkol so Wata o
Manosiya? Antawaa bes angkai a Wata o Manosiya?
35 Somimbag si Isa a "Di bo matey a kasisii rekano o solo. Lalakaw kano sii ko katatago
rekano pen o solo, ka o ba rekano miraot so maliboteng. Ka so pelalakaw ko maliboteng
na di niyan katawan o anda pepekaantap.
36 Paratiyaya kano ko solo sii ko kasisii niyan rekano pen kaan kano mabaloy a manga
wata o kaliwanag." Na kagiya matero ini i Isa na inawaan iyan siran ago mitepok.
Itataros o manga Yahodi so da iran Kaparatiyaya
37 Na apiya pen miyanggolaola i Isa angkai langon a piyakamemesa a manga nanao ko

kamamasaan iran na da iran sekaniyan paratiyayaa.
38 Giyanan i kinitoman o katero o Nabi Isayas a
"Hey Kadnan ko, antawaa i miyaratiyaya ko totol ami

na antawaa i kiyapayagan ko kapaar o Kadnan?"
39 Sabap sii na da siran makaparatiyaya, ka pitero pen o Isayas a
40 “Biyota niyan so manga mata iran

ago piyakategas iyan so manga poso iran
kaan iran di kiilay a manga mata iran
ago an iran di kisabot so manga poso iran
ka o ba siran baden makateklid na go aken siran bo kapiyapiyai."
41 Pitero ini o Isayas ka miyailay niyan so bantogan i Isa, na pitero iyan so makapantag
rekaniyan.
42 Apiya pen oto na madakel a manga olowan o manga Yahodi a miyamaratiyaya ki Isa,
ogaid na sabap ko manga Parisi na da iran ai payaga ko manga ped, ka o ba siran
mapakaawa ko sinagoga.
43 Ka miyatomo iran a podin siran o manga taw a di sa ba so Allah i podi kiran.
So Katero i Isa na aya Pengokom
44 Pitero pen i Isa sa matanog a "So taw a peparatiyaya raken na kena bo a ba saken i
peparatiyayaan iyan ka sekaniyan mambo a somiyogo raken.
45 Na so pepakailay raken na aya niyan pekeilay na so somiyogo raken.
46 Somiyong ako sii a solo sa doniya kaan so oman i peparatiyaya raken na di
makakakaden ko maliboteng.
47 “Apiya antawaa i pepakaneg ko manga katero aken a di niyan bo tomanen na kena a ba
saken i kokom rekaniyan. Ka kena a ba aya inisong aken sii na ba ko pengokoma so
doniya, ka sabap sa an aken masabet.
48 So taw a tomiyalikod raken ago di terima ko manga katero aken na aden a kokom
rekaniyan, ka so katero a miyatero aken na aya on kokom sii sa alongan a maori.
49 Ka kena a ba saken i dii mbayabaya ko di aken dii katero, ka so Ama a somiyogo
raken na inisogo iyan raken o antonaa i peteroon ko ago andamanaya i kapeteroa ko ron.
50 Na katawan ko a so sogoan iyan na pepekaagak ko kaoyagoyag a da a kaposan iyan.
Kagiya ka maoto na so di aken dii teroon na aya di raken dii pakitero o Ama."
YAHIYA 13
Piyagonaban i Isa so manga Ai o manga Sokbat
Salongan pen oto a da kaomai ko Pista a Paska na katawan i Isa a miyaoma den so oras a
kapagawai niyan sangkai a doniya ka song ko Ama. Lalayon iyan pekebabayaan so manga
pagtaw niyan a sisii sa doniya, na pekiilay niyan kiran imanto so katatarotop o
kapekebabayai niyan kiran.
2 Penggabi si Isa ago so manga sokbat iyan, na so Iblis na miyatago iyan den ko poso i
Yodas Iskariyot a wata i Simon a katipowa niyan ki Isa.
3 Katawan i Isa a miyapadalem o Ama so langon taman ko kapaar iyan; na katawan iyan a
miyakapoon sekaniyan ko Allah ago kesoy ko Allah.
4 Na tominindeg si Isa sii ko di ran dii kanggagabi na inendaan iyan so kimon iyan na
mitinambed sa towaliya.
5 Na taros a miyodod sa ig ko palanggana na pipoonan iyan mamangonab so manga ai o
manga sokbat iyan a ipesising iyan on so towaliya a ititinambed iyan.
6 Kagiya miraot sekaniyan ki Simon Pidro na tig i Pidro a "Pagonaban ka bes a manga ai
aken, Kadnan?"
7 Somimbag si Isa a "Di ngka katawan imanto so maana o di aken dii nggolaolaan ogaid
na kasabotan ka bo amay."
8 Tig i Pidro a "Di aken reka den pekionaban so manga ai aken!"
Ogaid na somimbag si Isa a "O di aken seka kaonabi na da a labet ka raken."
9 Tig i Simon Pidro a "O giyanan, Kadnan, na kena bo a ba giya ai aken i onabi ngka, ka
so pen so manga lima ko ago so olo aken!"
10 Pitero rekaniyan i Isa a "So miyakapeigo na lompiyo langon so lawas iyan na di den
kailangan a kapangonab iyan liyo ron so manga ai niyan. Sekano langon na miyalompiyo
den liyo ko sakataw rekano."
11 Katawan den i Isa o antawaa i tipo ron, na giyanan i kiyateroa niyan sa "Miyalompiyo
kano den liyo ko sakataw rekano."
12 Oriyan o kiyapangonabi i Isa ko manga ai iran na siyolot iyan peroman so kimon iyan
na miyontod ko darpa iyan ko lamisaan. Na iniise iyan kiran a "Siyabot iyo so pinggolaola
ko rekano?
13 Pembetowan ako niyo sa 'Goro,' ago 'Kadnan,' na benar anan ka saken den.
14 O saken a aya niyo Kadnan ago goro i miyangonab ko manga ai niyo na patot a
pangonaban mambo o oman i isa rekano so manga ai o ped iyan.
15 Bigan aken sekano sa ladiyawan kaan iyo masowa so pinggolaola ko rekano.
16 Teroon ko rekano a mataan den a da a oripen a ba lawan ko kadnan iyan, na da a
siyogo a ba lawan ko somiyogo rekaniyan.
17 Imanto a kiyatokawan iyo angkai a manga nganin na perakmatan kano o nggolaolaa
niyo ai.
Inalamat i Isa so Katipowa on
18 “Kena a ba sekano langon i di aken dii teroon. Katawan aken so piyamili aken, ogaid
na disomala a kitoman so misosorat ko Kitab a 'So mama a pepagatoang raken ko paan na
rinido ako niyan.'
19 Pitero aken rekano ai imanto sa da niyan pen kanggolaola kaan amay ka manggolaola
na peratiyayaan iyo a saken so miyatero aken o antawa ako.
20 Teroon ko rekano a mataan den a so taw a terima sa apiya antawaa a siyogo aken na
saken i terimaan iyan. Na so terima raken na so somiyogo raken i terimaan iyan."
21 Oriyan o kiyateroa sii i Isa na tanto a masososa a niyawa niyan na pitero iyan sa
marayag a "Teroon ko rekano a mataan den a so isa rekano na tipo raken."
22 Miyakatetentenga so manga sokbat, ka kalilibogan siran o antawaa i pitero iyan.
23 So isa ko manga sokbat a aya den pakatatayaan i Isa na moontod a makaaabay ki Isa.
24 Na pitiniyasan i Simon Pidro a tig iyan a "Iseen ka o antawaa i pitero iyan."
25 Na rominda angkoto a sokbat sa rareb i Isa na tig iyan a "Antawaa, Kadnan?"
26 Tig i Isa a "Sekaniyan i ndewagan aken sa paan amay ka misindot aken ko ladiya." Na
kominowa sa paan na kagiya misindot iyan na inidawag iyan ki Yodas a wata i Simon
Iskariyot.
27 So den so kiyakowaa i Yodas ko paan na somiyook rekaniyan so Iblis. Na pitero on i
Isa a "Nggagaanen ka nggolaola so penggolaolaan ka."
28 Na da a isa kiran bo a kioontod roo ko lamisaan a ba miyakasabot o ino to peteroa i
Isa.
29 Miyapamikir o ped a kagiya si Yodas i sasanaan ko pirak na o ba on pitero i Isa a
pamasaa niyan so kailangan iran para ko pista, o di na ba niyan begi so manga miskin.
30 Na so den so kiyakowaa i Yodas ko paan na lominiyo, na miyagagawii den.
So Bago a Sogoan
31 Kagiya maipos si Yodas na pitero i Isa a "Imanto na kiyabantogan so Wata o

Manosiya, na kiyabantogan mambo so Allah a nggolalan rekaniyan.
32 Na kagiya kiyabantogan so Allah a nggolalan rekaniyan na mbentogen mambo o Allah
so Wata sii ko ginawa niyan, na magaan den a kakebantoga niyan on.
33 Manga wata aken, di ketey a kasisii aken rekano pen. Pembabanogen ako niyo, ogaid
na teroon ko rekano imanto so pitero aken ko manga Yahodi a di kano pekasong ko
songowan aken.
34 Mbegan ko sekano sa bago a sogoan: Kababayai o oman i isa so ped iyan. Datar o
kiyababayai aken rekano na disomala a kebabayaan o oman i isa so ped iyan.
35 O kababayai o oman i isa so ped iyan na kekilala o langon a taw a manga sokbat aken
sekano."
Inalamat i Isa so Kipepalaon on i Pidro
36 Iniise on i Simon Pidro a "Anda ka song, Kadnan?"

Somimbag si Isa a "Di ka raken pekaonot imanto ko songowan aken ogaid na pekatondog
ka raken amay."
37 Iniise i Pidro a "Ino ako reka di pekaonot imanto, Kadnan? Makatitiyagar ako matay
para reka!"
38 Na pitero on i Isa a "Mataan a makatitiyagar ka matay para raken? Teroon ko reka a
mataan den a sa di pen komoko so manok na ipepalaw ako ngka sa makatelo."
YAHIYA 14
Si Isa na aya Lalan
Pitero pen i Isa a "Di niyo pekisosa so manga pamikiran iyo. Sasarigan iyo so Allah na
sarigi ako niyo mambo.
2 Sii ko walay o Ama aken na madakel a pirowangan on. Song ako roo ka petiyagar ako
sa darpa para rekano. Di aken rekano ai peteroon o di benar.
3 Na amay ka makasong ako roo ago makatiyagar ako sa darpa para rekano na kesoy ako
sii ka pekaonoten ko sekano sa katatagoan raken kaan kano ron mambo matago.
4 Katawan iyo so lalan ko songowan aken."
5 Pitero on i Tomas a "Kadnan, di ami katawan o anda ka song. Andamanaya i
kaketokawi ami ko lalan?"
6 Inisembag i Isa a "Saken so lalan, ago so tito a benar, ago so kaoyagoyag. Da a taw a ba
pekasong ko Ama o di raken makaokit.
7 O mataan den a katawan ako niyo na katawan iyo mambo so Ama aken. Na ipoon
imanto na katawan iyo sekaniyan den ago miyailay niyo."
8 Tig i Pilipi a "Kadnan, pakiilain ka rekami so Ama na ikesoat ami den."
9 Somimbag si Isa a "Miyatey den a kaaped aken rekano, na ba ako ngka pen di katawi,
Pilipi? So miyakailay raken na miyailay niyan mambo so Ama. Ino ngka pen peteroa a
'Pakiilain ka rekami so Ama?'
10 Ba ngka di peratiyayaa a madadalem ako ko Ama, ago madadalem raken so Ama? So
manga katero a di aken rekano dii teroon na kena a ba saken i dii mbayabaya ko di aken
on dii kateroa, ka so Ama a komakaden ko dalem a ginawa ko na aya dii nggolaola
sangkai a manga galebek iyan.
11 Paratiyayaa niyo so pitero aken a madadalem ako ko Ama ago madadalem raken so
Ama. Ogaid na o di niyo ai peratiyayaa, na paratiyaya kano baden sabap sangkai a manga
ala a galebek.
12 “Teroon ko rekano a mataan den a apiya antawaa i peparatiaya raken na penggolaolaan
iyan so manga galebek a di aken dii nggolaolaan. Na penggolaolaan iyan so lawan pen sii,
ka song ako ko Ama.
13 Na apiya antonaa i pengnin iyo sii ko ingaran aken na nggolaolaan ko kaan kabantogi
so Ama a nggolalan ko Wata.
14 O pengni kano raken sa apiya antonaa sii ko ingaran aken na penggolaolaan ko."
Initopa so Roh
15 “O pekebabayai ako niyo na tomanen iyo so manga sogoan aken.

16 Na pengni ako ko Ama na mbegan kano niyan sa salakaw a Salinggogopa kaan
sekaniyan makakaden sii rekano sa taman sa pakataman.
17 Sekaniyan so Roh a pekepoonan o tito a benar. So doniya na di niyan ketarima so Roh
ka di niyan keilay aya pen o ba niyan makilala. Ogaid na katawan iyo sekaniyan ka
komakaden sekaniyan sii rekano imanto, na kedalem sekaniyan rekano amay.
18 Di aken sekano ipendarainon a datar o manga ilo, ka kesoy ako rekano.
19 Di ini matey na di ako den keilay o doniya, ogaid na keilay ako niyo. Na kagiya
oyagoyag ako na keoyag kano mambo.
20 Sii sangkoto a gawii na ketokawan iyo a madadalem ako ko Ama aken, ago
madadalem kano raken, ago madadalem ako rekano.
21 So taw a tomiyarima ko manga sogoan aken ago petomanen iyan pen na aya raken
pekebabaya. Kebabayaan o Ama so pekebabaya raken, na kebabayaan aken sekaniyan
mambo ago pekikilala ko ron a ginawa ko."
22 Si Yodas a kena a ba si Yodas Iskariyot na pitero iyan ki Isa a "Kadnan, ino ngka
rekami pekikilalaan a ginawa ngka ago kena a ba sii ko doniya?"
23 Inisembag i Isa a "Apiya antawaa i pekebabaya raken na tomanen iyan so katero aken.
Kebabayaan sekaniyan o Ama aken, na saken ago so Ama aken na song rekaniyan ago
keden kami ron.
24 So kena a ba raken pekebabaya na di niyan tomanen so manga katero aken. Na so
manga katero a pekeneg iyo na kena a ba aken rek, ka poon ko Ama a somiyogo raken.
25 Pitero aken rekano ai sii ko kasisii aken rekano pen.
26 Na so Salinggogopa, a so Soti a Roh a sogoon o Ama sii ko ingaran aken, na
pengendao rekano ko langon taman na pekitanodan iyan rekano so langon taman a
miyatero aken rekano den.
27 “Imbagak aken rekano so kalilintad. So rek aken a kalilintad na aya ko rekano
ipembegay. Na so kipembegan aken on rekano na kena a ba datar o kipembegan on o
manga manosiya. Di niyo pekisosa so manga pamikiran iyo ago di kano pekelek.
28 Miyaneg iyo so pitero aken rekano a magawa ako na kesoy ako bo rekano. O
pekebabayai ako niyo na kebabaya kano sabap ko kasong aken ko Ama, ka so Ama na
lawan raken.
29 Pitero aken ai rekano imanto sa da niyan pen kanggolaola kaan amay ka maolaola ini
na makaparatiyaya kano.
30 “Na di ako rekano makipembitiyarai sa matey, ka pekaoma so Iblis a ndadato sangkai
a doniya. Da den a ba niyan kapaar sii raken
31 Ogaid na so den so inisogo raken o Ama na giyoto den i di aken dii nggolaolaan kaan
katokawi o doniya a pekebabayaan ko so Ama. Na ganat kano; somong tano roo."
YAHIYA 15
Si Isa na aya Tito a Waged
Pitero pen i Isa a "Saken i tito a itado o waged a obas, na so Ama aken na aya on
kisapadan.
2 Oman i sapak a makakakampet raken a di magonga na potolen iyan on. Na pelompiyon
iyan so oman i sapak a pegonga kaan makaonga sa madakel.
3 Miyalompiyo kano den a nggolalan ko katero a miyatero aken rekano.
4 Kakaden kano sii raken ka keden ako sii rekano. So sapak na di magonga o kena a ba
makakakampet ko itado. Na datar kano niyan mambo a di kano pekaonga o kena a ba sii
kano raken komakaden.
5 “Saken so itado o waged a obas na sekano i manga sapak. So taw a komakaden sii raken
ago komakaden ako sii rekaniyan mambo na pekaonga sa madakel, ka o mabelag kano
raken na da den a ba niyo mapenggolaola.
6 So taw a kena a ba sii raken komakaden na ipelebad sa liyo a datar o sapak, na kegango.
Na penimoon ai ago ipelebad ko apoy a ron ketotong.
7 O sii kano raken komakaden ago sii rekano mambo komakaden so manga katero aken
na makapemangni kano sa apiya antona onon i kabaya iyo na pagamponen so pangni
niyo.
8 Sii ko kapepamangonga niyo sa madakel na pekebantogan so Ama aken, na
mapepakiilay niyo mambo a manga sokbat aken sekano.
9 “Datar o kapekebabayai raken o Ama a pekebabayaan ko sekano mambo. Tatap kano ko
kapekebabayai aken rekano.
10 O petomana niyo so manga sogoan aken na ketatap ka ko kapekebabayai aken rekano
a datar o kiyatomana ko ko manga sogoan o Ama aken na tatap ako ko kapekebabayai
niyan raken.
11 Miyatero aken rekano angkai a manga nganin kaan sii rekano madalem so
kapekebabaya aken, ago an matarotop so kapekebabaya iyo.
12 Giyai i sogoan aken: Kababayai o oman i isa so ped iyan a datar o kiyababayai aken
rekano.
13 Aya da den a lawan iyan a kapekebabayai o taw ko manga ginawai niyan na so
kiperilaan iyan ko kaoyagoyag iyan para kiran.
14 Na manga ginawai aken sekano o nggolaolaa niyo so ipesogo aken rekano.
15 Di aken sekano den mbetowan sa manga oripen, ka so oripen na di niyan katawan so
dii nggolaolaan o kadnan iyan. Ka bitowan aken sekano baden sa manga ginawai aken, ka
piyakitokawan aken rekano so langon taman a miyatero raken o Ama aken.
16 Kena a ba sekano i minili raken ka saken i miyamili rekano, na initoro aken sekano a
melalakaw sa kapemangonga niyo sa onga a kemboway. Sabap san na apiya antonaa i
pengnin iyo ko Ama sii ko ingaran aken na imbegay niyan rekano.
17 Na giyai i sogoan aken rekano: kababayai o oman i isa so ped iyan.
Ipekegowad o Doniya so manga Sokbat
18 “O kagowaden kano o doniya na tatanodi niyo a saken i miyaona a inikagowad iyan.

19 Opama ka ped kano ko doniya na kebabayaan kano o doniya, ka rek kano niyan. Ogaid
na kena a ba kano rek o doniya ka piyamili aken sekano a poon ko doniya. Sabap sii na
ipekegowad kano o doniya.
20 Tademi niyo so pitero aken rekano a 'Da a oripen a ba lawan ko kadnan iyan.' O
siyatro ako iran na setroon kano iran mambo. O tiyoman iran so katero aken na tomanen
iran mambo so katero iyo.
21 Langon taman ai na penggolaolaan iran rekano sabap raken ka di iran katawan so
somiyogo raken.
22 Opama ka da ako sii makasong a miyakimbitiyarai kiran na da a kasalaan iran. Ogaid
na imanto na da a ba iran kisapeng ko dosa iran.
23 So taw a ipekegowad ako niyan na ipekegowad iyan mambo so Ama aken.
24 Opama ka da aken nggolaolaa so manga ala a galebek ko kamamasaan iran a da den a
ped a ba on miyakanggolaola na da a kasalaan iran. Ogaid na imanto na apiya miyailay
iran den so miyanggolaola ko na inikagowad ako iran ago so pen so Ama aken.
25 Ogaid na giyanan i kinitoman o misosorat ko Kitab iran a 'Inikagowad ako iran sa da a
sabap iyan.'
26 “Pekasongen aken rekano so Salinggogopa a poon ko Ama. Giyanan so Roh a
pekepoonan o tito a benar ago pepakapoon mambo ko Ama. Amay ka makaoma na
peseksian iyan so makapantag raken.
27 Na peseksi kano mambo makapantag raken, ka minipagepeda aken sekano ipoon sa
poonan."
YAHIYA 16
"Pitero aken rekano ai langon kaan di kelobay so paratiyaya niyo.
2 Pekaawaan kano iran ko manga sinagoga, na pekaoma so masa a so apiya antawaa i
mbono rekano na aya mapipikir iyan na pepangongonotanan iyan so Allah.
3 Penggolaolaan iran ai ka di iran katawan so Ama aya pen o ba ako iran katawi.
4 Na pitero aken rekano ai kaan amay ka mapenggolaola ini na ketoosan iyo a miyatero
aken rekano den. Da ko rekano ai teroa sa poonan ka mipageepeda ako niyo pen.
So Galebek o Soti a Roh

5 “Ogaid na song ako imanto ko somiyogo raken ogaid na da a isa rekano bo a ba raken
minise sa 'Anda ka song?'
6 Ka baden tanto a mikerata a ginawa niyo sabap sa pitero aken rekano den angkai a
kesowasowa.
7 Ogaid na teroon ko rekano a mataan den a tomo rekano a kapagawa aken, ka o di ako sii
mawa na di rekano song so Salinggogopa. Ogaid na o makaawa ako na pekasongen aken
sekaniyan rekano.
8 Na amay ka makaoma sekaniyan na pemataanan iyan ko manga taw sa doniya so tito a
benar makapantag ko dosa, ago so kaontol, ago so kapengokom o Allah.
9 Pemataanan iyan kiran a madodosa siran, ka di ako iran peratiyayaan.
10 Pemataanan iyan kiran so makapantag ko kaontol, ka song ako ko Ama na di ako niyo
den keilay.
11 Na pemataanan iyan kiran pen so makapantag ko kapengokom o Allah ka kagiya so
ndadato sangkai a doniya na miyakokom den.
12 “Madakel pen a mapetero aken rekano, ogaid na di niyo kekena imanto.
13 Ogaid na amay ka makaoma so Roh a pekepoonan o tito a benar na penggonanaon
kano niyan ko langon a tito a benar. Kena a ba sekaniyan i pembayabaya ko kapetero
iyan, ka aya niyan bo peteroon na so pekeneg iyan. Na pekitokawan iyan rekano so da pen
mitalingoma.
14 Mbentogen ako niyan, ka so ketarima iyan a poon raken na pekitokawan iyan rekano.
15 So langon a rek o Ama na rek aken mambo. Giyanan i kiyateroa ko ron a so ketarima o
Roh a poon raken na pekitokawan iyan rekano.
Kesembian so Rata a Ginawa sa Kapekebabaya
16 “Di bo ini matey na di ako niyo den keilay, na di bo peman matey na keilay ako niyo."
17 Na miyamagisei so manga sokbat iyan a tig iran a "Antonaa angkai a pitero iyan a 'Di
bo matey na di ako niyo den keilay, na di bo peman matey na keilay ako niyo,' ago so tig
iyan a 'Sabap sa song ako ko Ama'?"
18 Tig iran a "Antonaa i maana angkai a pitero iyan a 'di bo matey?' Di tano seboten so di
niyan dii teroon."
19 Katawan den i Isa a kebayaan iran rekaniyan mise, na p;itero iyan kiran a "Ba aya di
niyo dii pamagisei na so maana o pitero aken a 'Di bo matey na di ako niyo den keilay, na
di bo peman matey na keilay ako niyo bo?
20 Teroon ko rekano a mataan den a nggoraok kano ago pendiyagaw, ogaid na kebabaya
so doniya. Pekerata a ginawa niyo ogaid na kesembian so rata a ginawa niyo sa
kapekebabaya.
21 Igira a magaan den mbawata so babay na mararata a ginawa niyan ka kagiya
pembaliliten. Ogaid na amay ka makambawata na kelipatan iyan so kiyarasay niyan ka
kebabaya sekaniyan sa aden a wata a inimbawata sa doniya.
22 Giyai mambo i keolaola niyo, ka imanto na mararata a ginawa niyo, ogaid na
makipegilaya ako rekano bo peroman na tanto kano a kebabaya. Na da a ba rekano
pekaagaw sangkoto a kababaya iyo.
23 Sangkoto a gawii na kena a ba saken i pengniyan iyo sa apiya antonaa. Ka teroon ko
rekano a mataan den a so Ama na imbegay niyan rekano so apiya antonaa i pengnin iyo
ron sii ko ingaran aken.
24 Taman imanto na da den a ba niyo piyangni sii ko ingaran aken. Imanto na pangni
kano, ka pekatarima kano kaan matarotop so kapipiya a ginawa niyo.
25 “Pitero aken ai langon rekano a nggolalan ko manga abayabayan. Ogaid na pekaoma
so masa a di aken den pekaokiten so peteroon ko rekano ko manga abayabayan, ka
peteroon ko rekano so makapantag ko Ama sa masagogod a katero.
26 Sii sangkoto a gawii na pengni kano rekaniyan sii ko ingaran aken. Kena a ba aya ko
dii teroon a ba saken i pengni ko Ama para rekano,
27 Ka so den so Ama na pekebabayaan kano niyan ka kagiya pekebabayaan ako niyo ago
miyaratiyaya kano sa miyakapoon ako ko Allah.
28 Miyakapoon ako ko Ama na somiyong ako sa doniya. Imanto na ngganatan ko so
doniya ka kesoy ako bo ko Ama."
29 Na pitero o manga sokbat iyan a "Imanto na masagogod den a di ngka dii katero a
kena a ba pepakaokita ko manga abayabayan.
30 Kiyatokawan ami imanto a katawan ka den so langon taman, na di ngka den kailangan
a ba reka isean o apiya antawaa. Sabap sii na peparatiyayaan ami a poon ka ko Allah."
31 Tig i isa a "Peparatiyaya kano bes imanto?
32 Ilaya niyo man ka pekatalingoma so masa, na kapapantagan den imanto, a
pemangiparak kano; pembabaling kano ago pagawaan ako niyo a da a ped aken. Ogaid na
kena a ba ako mabobotong, ka mipageepeda aken so Ama.
33 Pitero aken ai rekano kaan makalilintad a ginawa niyo sii ko kaiisaisa niyo ago saken.
Sii sa doniya na pekaokit kano sa manga karomasayan, ogaid na pakapipiyaa niyo a
ginawa niyo ka miyadaag aken den so doniya!"
YAHIYA 17
Inipangangarapan i Isa so manga Sokbat iyan
Oriyan o kiyateroa sii i Isa na lomiyangag sekaniyan sa langit na pitero iyan a "Ama,
miyakatalingoma den so oras. Bantoga ngka so Wata a ka kaan ka mabantog o Wata.
2 Bigan ka sekaniyan sa kapaar ko langon a manosiya kaan iyan kabegi sa kaoyagoyag a
da a kaposan iyan so langon a taw a inibegay ngka rekaniyan.
3 Giyai i kaoyagoyag a da a kaposan iyan: so katawi iran reka, a so isaisa a tito a Tohan,
ago si Isa Al Masih a siyogo o ka.
4 Biyantog aken seka sii sa doniya ko kiyapasada ko ko galebek a inibegay ngka raken a
penggolaolaan ko.
5 Imanto, Ama, na bantoga ko ngka sii ko kaaped aken reka ko bantogan a rek aken isako
sisii ako reka sa da pen kaadena ko doniya.
6 “Piyakitokawan ko seka ko manga taw a inibegay ngka raken a poon ko doniya. Rek ka
siran gowani na inibegay ngka siran raken, na tiyoman iran so katero o ka.
7 Katawan iran imanto a so langon taman a inibegay ngka raken na poon reka.
8 Ka inibegay aken kiran so manga katero a inibegay ngka raken, na tiyarima iran.
Katawan iran a mataan den a miyakapoon ako reka, na piyaratiyaya iran a seka i
somiyogo raken.
9 “Ipepangangarapan aken siran. Kena a ba so doniya i ipepangangarapan aken, ka siran
oto a inibegay ngka raken, ka rek ka siran.
10 So langon a rek aken na rek ka mambo, na so langon a rek ka na rek aken. Na sii ako
kiran kiyabantogan.
11 Imanto na song ako reka. Di ako den keden sii sa doniya, ogaid na sisii siran pen ko
doniya. Hey Soti a Ama, pagipata ngka siran a nggolalan ko kapaar o ingaran ka, a so
ingaran a inibegay ngka raken, kaan siran maisaisa a datar o kaiisaisa ta.
12 Sii ko kaaped aken kiran pen na piyagipat aken siran a nggolalan ko kapaar o ingaran
ka a inibegay ngka raken. Lininding aken siran, na da den a sakataw bo a ba kiran miyada
a rowar ko mama a aya bagian iyan na pekanaraka, kaan mitoman so misosorat ko Kitab.
13 “Imanto na song ako reka, ogaid na sii ko kasisii aken pen sa doniya na di aken kiran
dii teroon angkai a manga nganin kaan sii kiran madalem so matatarotop a kapipiya a
ginawa ko.
14 Inibegay aken kiran so katero o ka na inikagowad siran o doniya, ka kena a ba siran
ped ko doniya a datar aken mambo a kena a ba ped ko doniya.
15 Kena a ba aken reka pepangniya a kowaan ka siran a poon ko doniya, ka pepangnin ko
a lindinga ngka siran baden ko Iblis.
16 Kena a ba siran ped ko doniya a datar aken mambo a kena a ba ped ko doniya.
17 Senggain ka siran a rek ka a nggolalan ko tito a benar. So katero o ka na aya den so
tito a benar.
18 Datar o kiyasogoa ngka raken sa doniya na siyogo aken siran ko doniya.
19 Na isenggay aken a rek ka so ginawa ko para kiran kaan matarotop a kisenggain kiran
mambo a rek ka.
20 “Kena bo a ba so miyamaratiyaya raken i ipepangangarapan aken, ka siran oto mambo
a pemaratiyaya raken amay ka maneg iran so katero iran.
21 Pengnin ko a maisaisa siran langon a datar o kaiisaisa ta, Ama, a madadalem ka raken
ago madadalem ako reka mambo. Pengnin ko a ketatap a kadadalem iran rekta kaan
maparatiyaya o doniya a seka i somiyogo raken.
22 “Inibegay aken kiran so bantogan a inibegay ngka raken kaan siran maisaisa a datar ka
ago saken a isaisa bo
23 A madadalem ako kiran ago madadalem ka raken kaan matarotop a kaiisaisa iran kaan
katokawi o doniya a seka i somiyogo raken ago pekebabayaan ka siran a datar o
kapekebabayai ngka raken.
24 Hey Ama, kabaya aken a so manga taw a inibegay ngka raken na keped siran raken
apiya anda ko matatago kaan iran mailay so bantogan aken a inibegay ngka raken sabap
ko kiyababayai ngka raken sa da pen maaden so doniya.
25 “Hey Ama a Maontol, so doniya na di ka niyan katawan. Ogaid na katawan aken seka,
na katawan angkai a manga ped aken a seka i somiyogo raken.
26 Piyakitokawan ko seka kiran na iteros aken a kapepakitokawi ko reka kaan iran
kababayai so manga ped a datar o kapekebabayai ngka raken, ago an matatap a kadadalem
aken kiran.
YAHIYA 18
Kagiya mapasad ai mangangarapan i Isa na lomiyalakaw sekaniyan a ped iyan so manga

sokbat iyan roo ko sabala o Balintad a Kidron. Sangkoto a darpa na aden a sapadan on, na
somiyoled on si Isa ago so manga sokbat iyan.
2 Si peman si Yodas a aya on tipo na katawan iyan mambo angkai a darpa ka omanoman
roo den dii makitimo si Isa ko manga sokbat iyan.
3 Na giyoto a somiyong roo si Yodas a oonotan o salompok a manga sondaro ago so ped
ko manga gordiya ko Timplo a siyogo o manga poporo a iman ago so manga Parisi.
Kiaawid siran sa manga barabad, manga solo ago manga gomaan.
4 Katawan i Isa so langon a keolaola niyan, na giyoto a inalaw niyan siran a tig iyan a
"Antawaa i pepangilobaan iyo?"
5 Tig iran a "Si Isa a so Taw sa Nasarit."
Tig i Isa a "Saken." Na si Yodas a aya on tipo na tomitindeg roo mambo a ped iran.
6 Kagiya teroon kiran i Isa a "Saken," na miyakandod siran na miyanga ooteng sa lopa.
7 Na inisean siran peroman i Isa a "Antawaa i pepangilobaan iyo?"
Somimbag siran a "Si Isa a so Taw sa Nasarit."
8 Tig i Isa a "Miyatero aken rekano den a saken. O saken i pepangilobaan iyo na
pakapalagoya niyo angkai a manga ped aken."
9 Aya kiyateroa niyan sii na an mitoman so gopen iyan miyatero ko Allah a "Da a
sakataw bo ko langon a inibegay ngka raken a ba raken miyada."
10 Si Simon Pidro na aden a pedang iyan, na binindas iyan ago liyakot iyan so oripen o
maporo a imam na miyasapil on so kawanan a tangila niyan. Aya ngaran angkoto a oripen
na si Malkos.
11 Pitero i Isa ki Pidro a "Tagoba ngka so pedang ka. Ba aken di keinomi so tagayan a
inibegay raken o Ama?"
Piyakaadap si Isa ki Anas a Maporo a Imam
12 Mandiyadi na so manga sondaro a ped o kapitan iran ago so manga gordiya a manga
Yahodi na diyakep iran si Isa na piyatong iran.
13 Inowit iran mona ki Anas a so panogangan a mama i Kayapas a aya maporo a imam
sangkoto a ragon.
14 Si Kayapas i miyakamosawir ko manga Yahodi sa tomo a matay so sakataw a mama
para ko langon a taw.
15 Si Simon Pidro ago so isa a sokbat na tiyondog iran si Isa. Kagiya giyangkai a sokbat
na katawan o maporo a imam na miyonot sekaniyan ki Isa ko kiyasoled iyan ko
kalamalama o walay o maporo a imam
16 Ogaid na mitelimbagak si Pidro roo ko liyo o gimowa. Na lominiyo bo angkoto a isa a
sokbat a katawan o maporo a imam na inimbitiyarai niyan so raga a talasogoay a
tomatameng ko gimowa, na piyakasoled iyan si Pidro.
17 Na pitero angkoto a raga ki Pidro a "Ba kena a isa ka ko manga sokbat a mama oto?"
Tig i Pidro a "Kena a ba saken!"
18 Mosim oto a panenggaw, na so manga oripen ago so manga gordiya na mimbiyag siran
sa apoy a pekedeg a manga waga, na kititindeg siran roo ko melilibeta ko apoy a di siran
dii pepaig. Na miyobay kiran si Pidro na tomitindeg roo a ped iran a dii pepaig.
Piyangingisean o Maporo a Imam si Isa
19 So peman so maporo a imam na inisean iyan si Isa mipantag ko manga sokbat iyan ago
so manga ndao niyan.
20 Somimbag si Isa a "So kapepangendao aken na lalayon maririnayag, ka sii den ko
soled o manga sinagoga ago sii ko Timplo a dii telabokan o langon a manga Yahodi. Da
den a ba aken miyatero a pageemaan.
21 Ino ako ngka pen pepangingisei? Isei ngka so manga taw a miyamakaneg raken, ka
katawan iran so miyatero aken."
22 Kagiya teroon ai i Isa na tingel sekaniyan o isa a gordiya a tomitindeg ko obay niyan,
ago tig iyan a "Ino ka pekaraw tero sa datar anan ko maporo a imam?"
23 Simbag sekaniyan i Isa a "O aden a ribat ko pitero aken na payaga ngka so ribat on.
Ogaid na o benar so pitero aken na ino ako ngka tengela?"
24 Oriyan oto na si Anas na piyakiwit iyan si Isa a mapapatong pen roo ki Kayapas a so
maporo a imam.
Inipelaw Peman i Pidro si Isa
25 Sii ko katitindeg roo i Simon Pidro a dii pepaig na pitero iran on a "Ba kena a isa ka
ko manga sokbat iyan?"
Na inipelaw i Pidro a tig iyan a "Kena a ba saken!"
26 Na so isa ko manga oripen o maporo a imam a tonganay o mama a kiyasapilan i Pidro
sa tangila na iniise iyan on a "Ba ko seka da mailay roo ko sapadan a ped ka niyan?"
27 Inipelaw ai peman i Pidro na sarta den a aden a komiyoko a manok.
28 Kagiya mapasad so kinidarpaan ki Isa ki Kayapas na inowit iran sekaniyan ko torogan

o gobirnador a Iromanen. Teked oto a kapipita. So manga Yahodi na da siran pamanoled
ko torogan, ka giyanan i kasogoka iran ko taritib iran mipantag ko kapelompiyo, na o
magiyoto na di keparo o ba siran kan ko inggabi ko Paska.
29 Sabap roo na lominiyo kiran si Pilato na iniise iyan kiran a "Antonaa i dimanda niyo sa
mama ini?"
30 Somimbag siran a "O da sekaniyan makasela na di ami sii den witen."
31 Pitero kiran i Pilato a "Sekano i kowa rekaniyan na go niyo ron kokomen so Kitab
iyo."
Tig o manga Yahodi a "Di rekami perowa o ba ami bonoa so apiya antawaa."
32 Miyanggolaola ini kaan mitoman so manga katero i Isa a aya niyan kiyapayaga ko okit
a kapetay niyan.
33 Komiyasoy somoled si Pilato ko torogan na tiyawag iyan si Isa, na inisean iyan a "Ba
seka so Solotan o manga Yahodi?"
34 Somimbag si Isa a "Pakaise a ka nan, o di na ba ini reka pitero o ped makapantag
raken?"
35 “Kena a ba ako Yahodi," a inisembag i Pilato. "So bangsa ngka a manga taw ago so
manga poporo a imam i miyalad reka sii raken. Antonaa i pinggolaola ngka?"
36 Tig i Isa a "So ndatoan aken na kena a ba ped sangkai a doniya. O so ndatoan aken na
ped sangkai a doniya na makipetidawa so manga sakop aken kaan ako di kepalad ko
manga Yahodi. Ogaid na so ndatoan aken na kena a ba sii ped."
37 Iniise i Pilato a "Solotan ka bes?
Somimbag si Isa a "Benar so pitero o ka a solotan ako. Aya sabap a kinimbawataan raken
ago so kiyasong aken sii sa doniya na an aken mipemataan so tito a benar. Oman i isa a
tomatampil ko tito a benar na pepakinegen ako niyan."
38 Tig i Pilato a "Antonaa bes i tito a benar?"
Inikokom ki Isa so Kambonoa on
Kagiya matero ini i Pilato na lominiyo peman na tig iyan ko manga Yahodi a "Da den a
ba ko miyatoon a kasalaan iyan.
39 Ogaid na aya adat iyo na mbokaan ko so isa a kalaboso a pengnin iyo igira a miyaoma
angkai a Paska. Ba niyo kabaya a bokaan ko rekano so solotan o manga Yahodi?"
40 Na milalalis siran baden a tig iran a "Kena a ba sekaniyan, ka si Barabas!" Na si
Barabas na tanganiyaya.
YAHIYA 19
Mandiyadi na kinowa i Pilato si Isa na piyakipelalambitan iyan sa maregen.
2 Na somiyolampid so manga sondaro sa sangkad a soroken a waged na tiyago iran ko
olo i Isa, na siyolotan iran sekaniyan sa kimon a maloto i kariga.
3 Pepamangobay siran on a di ran dii teroon a "Mamboway so solotan o manga Yahodi!"
Na pisetengela iran sekaniyan.
4 Oriyan iyan na lominiyo peroman si Pilato na pitero iyan ko madakel a taw a "Ilaya
niyo; ka pagowiten ko sekaniyan rekano kaan iyo katokawi a da den a ba ko miyatoon a
kasalaan iyan."
5 Giyoto a lominiyo si Isa a sasangkad sa soroken a waged ago ndiditar sa maloto i kariga
a kimon. Na pitero kiran i Pilato a "Katii so mama!"
6 Sii den ko kiyailaya rekaniyan o manga poporo a imam ago so manga gordiya na
milalalis siran a "Totoka ngka sekaniyan ko kros, totoka ngka ko kros!"
Na pitero kiran i Pilato a "Sekano i kowa on na totoka niyo ko kros, ka da den a miyatoon
aken a kasalaan iyan."
7 Somimbag so manga Yahodi a "Aden a kitab ami na pitero angkoto a kitab a paliyogat a
mbonoon sekaniyan, ka bitowan iyan a ginawa niyan sa Wata o Allah."
8 Kagiya maneg ai i Pilato na kiyaomanan baden a kaalek iyan.
9 Na komiyasoy somoled ko torogan na iniise iyan ki Isa a "Anda ka miyakapoon?"
Ogaid na da den sembag si Isa.
10 “Di ako ngka sembagen?" a tig i Pilato. "Ba ngka di katawi a aden a kapaar aken sa
kabokai aken reka ago aden a kapaar aken sa katotoka ko reka ko kros?"
11 Tig i Isa a "Da o kowan a kapaar ka raken o da reka began o Allah. Sabap san na so
taw a miyalad raken sii reka na aya lebi pen a mala i dosa."
12 Ipoon roo den na miyanamar si Pilato sa kabokai niyan ki Isa, ogaid na baden milalalis
so manga Yahodi a "O bokai ngka a mama nan na kena a ba ka ginawai o Solotan sa
Roma! Ka apiya antawaa i di niyan dii teroon a dato sekaniyan na ridoay o Solotan!"
13 Kagiya maneg ai i Pilato na inowit iyan si Isa sa liyo na miyontod sekaniyan sii ko
darpa a dii kokoman a bebetowan sa 'Piyagatoran,' a sii ko basa a Yahodi na 'Gabata.'
14 Gawii oto a Ipetiyagar ko Paska na magaan den oto maoto a alongan. Na pitero i Pilato
ko manga Yahodi a "Katii so Solotan iyo!"
15 Ogaid na milalalis siran a tig iran a "Bonoa ngka sekaniyan, bonoa ngka, totoka ngka
ko kros!"
Tig i Pilato a "Kabaya iyo a pakitotok aken so Solotan iyo ko kros?"
Somimbag so manga poporo a imam a "Da a solotan ami a rowar ko Solotan sa Roma!"
16 Na taros a piyalad kiran i Pilato si Isa kaan matotok ko kros.
17 Mandiyadi na kinowa o manga sondaro si Isa na inagak iran sekaniyan a mapoposai ko

kros. Inowit iran ko darpa a bebetowan sa 'Darpa a Lagas a Olo,' (sii ko basa a Hibriyo na
'Golgota.')
18 Tiyotok iran sekaniyan roo ko kros, na aden pen a dowa kataw a mama a tiyotok iran
ko manga kros sii ko mbala a kilid iyan, a si Isa na sii ko pageletan iran.
19 Misorat si Pilato sa karatola na piyakitago iyan sii ko kros. Aya inisorat on na "Si Isa a
taw sa Nasarit a Solotan o manga Yahodi."
20 Madakel a manga Yahodi a miyamakabatiya sii, ka so darpa a ron tiyotok si Isa ko
kros na kena a ba mawatan ko siti, na inisorat ai sa basa a Hibriyo, basa a Roma, ago basa
a Grigo.
21 So manga poporo a imam o manga Yahodi na pitero iran ki Pilato a "Di ngka on
soraten 'So Solotan o manga Yahodi,' ka 'Pitero a mama ini a Saken so solotan o manga
Yahodi.' "
22 Somimbag si Pilato a "So inisorat aken na minisorat aken den!"
23 Kagiya matotok o manga sondaro si Isa ko kros na kinowa iran so manga nditaren iyan
na biyagi iran sa pat bagi, a nggagaisa bagi ko oman i sondaro. Da on mirakes so kimon
iyan a inaol langon a poon sa poro taman sa baba a da a ba on pamanaiya.
24 Na tig o manga sondaro ko oman i ped iyan a "Di tano ai kisiin; meripa tano baden o
antawaa i pekakowa on."
Miyanggolaola ini kaan mitoman so misosorat ko Kitab a
"Pimbagibagi iran so manga nditaren aken,

na piripaan iran so kimon aken."
Na giyoto i pinggolaola o manga sondaro.

25 Na marani ko kros i Isa na tomitindeg on si ina iyan, so pagari i ina iyan, si Mariyam a
karoma i Klopas, ago si Mariyam Magdalina.
26 Kagiya mailay i Isa si ina iyan ago so sokbat iyan a pekebabayaan iyan a tomitindeg ko
obay niyan na pitero iyan ki ina iyan a "Babay, katii so wata a ka."
27 Na pitero iyan ko sokbat iyan a "Kataya so ina a ka." Na ipoon roo den na
piyakabaling angkai a sokbat si Mariyam sa walay niyan.
So Kiyapatay i Isa
28 Oriyan oto na si Isa, a katawan iyan a miyapasad den so langon taman, na an mitoman
so Kitab na pitero iyan a "Pekewaw ako."
29 Aden a omoy roo a mapepeno a soka, na biyasa iran so pangamek a soka, na tiyangen
iran ko sapak a kayo a hisop na inidokor iran ko ngari i Isa.
30 Kagiya kataaman i Isa so soka na pitero iyan a "Miyapasad den!" Oriyan iyan na
domiyonga sekaniyan na inirila iyan so niyawa niyan.
Siyoker so Kilid i Isa
31 Gawii oto a Ipetiyagar, na piyangni o manga Yahodi ki Pilato a pakipelelepoon iyan so

manga ai o manga mama a miyatotok ko kros ago pakikowaan iyan roo so manga lawas
iran. Di kabaya o manga Yahodi o ba matatago roo pen so manga bangkay sii ko manga
kros ko telondog a gawii, ka mala oto a Gawii a Idedeke.
32 Sabap san na somiyong roo so manga sondaro na pilelepo iran mona so ai o isa a
mama na go bo peman so ped iyan a miyatotok ko kros a ped i Isa.
33 Ogaid na kagiya raoten iran si Isa na miyailay iran a miyatay sekaniyan den, na da iran
pelelepoa so manga ai niyan.
34 Ogaid na so isa ko manga sondaro na inisoker iyan baden so bangkaw niyan sa kilid i
Isa, na sarta den a tomiyoga on so rogo ago ig.
35 So taw a miyakailay sangkai a miyanggolaola na pimataanan iyan ai kaan kano mambo
makaparatiyaya. Benar so iniseksi iyan, na katawan iyan a di niyan dii teroon so benar.
36 Miyanggolaola ini kaan mitoman so katero o Kitab a "Da a tolan iyan a ba keropet."
37 Na aden pen a isa a katero o Kitab a "Pagilain iran sekaniyan a siyoker iran."
38 Kagiya mapasad ai na si Yosop a taw sa Arimatiya na inakol iyan ki Pilato a makowa

niyan so lawas i Isa. Si Yosop na kaom i Isa, ogaid na pageemaan iyan ai, ka ipekelek
iyan so manga olowan o manga Yahodi. Miniyog si Pilato na giyoto a siyongowan i
Yosop na kinowa niyan so lawas i Isa.
39 Si Nikodimos a miyakipagilaya ki Isa ko miyakaisa a gagawii na miyonot ki Yosop a
maawid sa manga telo polo ka kilo a ikekamotan a sasaogan sa manga mamot a mira ago
alos.
40 Kinowa iran so lawas i Isa na biyongkosan iran sa manga dinis a sotra a irarakes on so
ikekamotan, ka giyai i adat o manga Yahodi ko dii katiyagara ko bangkay ko
kipelebengen on.
41 Aden a sapadan ko darpa a ron tiyotok si Isa ko kros, na aden a bago a kobor on a da
den katagoi sa miyatay.
42 Na sabap sa Gawii oto a Ipetiyagar a magaan den so Gawii a Idedeke o manga Yahodi
ago kagiya marani bo angkoto a kobor na tiyago iran roo si Isa.
YAHIYA 20
So Kiyaoyag i Isa
Teked a kapipita ko Akad a malo pen maliboteng na somiyong si Mariyam Magdalina ko
kobor na miyailay niyan a miyakowa on den so ator a isasapeng ko gimowa iyan.
2 Miyalalagoy sekaniyan ago somiyong ki Simon Pidro ago so isa a sokbat a
pekebabayaan i Isa, na pitero iyan kiran a "Kinowa iran so Kadnan ko kobor na di ami
katawan o anda iran tiyago!"
3 Mandiyadi na gomiyanat si Pidro ago so isa a sokbat a song siran ko kobor.
4 Miyalalagoy siran a dowa ogaid na magaan i kapalalagoy so isa a sokbat a di si Pidro na
miyaona sekaniyan makaoma ko kobor.
5 Lomingkong sekaniyan ka siyorong iyan na miyailay niyan so manga sotra a dinis a
mibebetad roo, ogaid na da sekaniyan soled.
6 Miyaori makaoma si Simon Pidro na miyanaros somoled ko kobor. Miyailay niyan so
manga dinis a mibebetad roo
7 Ago so mosala a inibongkos ko olo i Isa. Da ini mitapi ko manga dinis ka makekedet a
misisibay metad.
8 Taros a somiyoled on mambo so isa a sokbat a miyaona makaoma ko kobor, na kagiya
mailay niyan ai na miyaratiyaya.
9 Ka taman sa masa oto na da iran pen sabota so misosorat ko Kitab a disomala a keoyag
si Isa a poon ko miyamatay.
10 Na miyaling so manga sokbat.
Miyakiilay si Isa ki Mariyam Magdalina

11 Ogaid na tomitindeg si Mariyam roo ko liyo o kobor a penggoraok. Sii ko
kapenggoraok iyan na lomingkong sekaniyan ka siyorong iyan so soled o kobor
12 Na miyailay niyan roo so dowa a malaikat a kindiditar sa mapoti a moontod ko
kiyabetadan ko lawas i Isa. So isa on na sii ko kiyaolonan iyan ago so isa on peman na sii
ko dasigan.
13 “Babay, ino ka penggoraok?" a iniise iran on.
"Kinowa iran so Kadnan aken," a tig iyan, "na di aken katawan o anda iran tiyago!'
14 Kagiya matero iyan ai na dominingil si Mariyam na miyailay niyan si Isa a tomitindeg
roo, ogaid na da niyan makilala a giyoto bes si Isa.
15 Na pitero on i Isa a "Ino ka penggoraok, Babay? Antawaa i pepangilobaan ka?"
Aya katao ron i Mariyam na sekaniyan so kisapadan, na tig iyan a "O seka i kominowa
rekaniyan, Sir, na teroa ngka raken o anda ngka tiyago kaan aken kasongowi, ka kowaan
ko sekaniyan."
16 Pitero on i Isa a "Mariyam! "
Somiyangor rekaniyan si Mariyam na pitero iyan sa basa a Hibriyo a "Raboni!" (a aya
maana niyan na Goro).
17 Pitero i Isa a "Di ako ngka teyongi, ka da ako pen makasong sa poro ko Ama. Songowi
ngka baden so manga pagari aken na teroa ngka kiran a song ako sa poro ko Ama aken
ago Ama iyo mambo, a so Tohan aken ago Tohan iyo mambo."
18 Na taros a somiyong si Mariyam Magdalina ko manga sokbat na tig iyan a "Miyailay
aken so Kadnan!" Na pitero iyan kiran a miyatero on i Isa angkai a manga nganin.
Miyakiilay si Isa ko manga Sokbat iyan

19 Kagiya magagawii den sa alongan oto a Akad na matitimo so manga sokbat ko soled o
rowang, na tatanggalan so manga pintoan ka ipekelek iran so manga olowan o manga
Yahodi. Na miyakagemaw si Isa a tomitindeg ko look iran a tig iyan a "Malalayon rekano
sa kalilintad!"
20 Kagiya matero iyan ai na piyakiilay niyan kiran a manga lima niyan ago so kilid iyan,
na tanto a miyababaya so manga sokbat ko kiyailaya iran ko Kadnan.
21 Pitero peroman i Isa a "Malalayon rekano so kalilintad! Datar o kiyasogoa raken o
Ama na sogoon aken sekano mambo."
22 So kiyateroa niyan sii na iniiyop iyan kiran so napas iyan a tig iyan a "Tarimaa niyo so
Soti a Roh.
23 O perilaan iyo ko apiya antawaa so manga dosa niyan na minirila rekaniyan den. Na o
di niyo rekaniyan perilaan so manga dosa niyan na da rekaniyan den mirila."
Si Tomas a dii Ndowadowa
24 So isa ko sapolo ago dowa a manga sokbat a si Tomas a bebetowan sa "Miyadowa," na

kena a ba kiran maaped ko kiyapakagemaw i Isa.
25 Na pitero rekaniyan o ped a manga sokbat a "Miyailay ami so Kadnan!" Ogaid na
pitero kiran i Tomas a "Taman sa di aken mailay so poneng o totok ko manga lima niyan,
ago maseko o tindoro aken so lakaw o manga totok, ago maaper o lima ko so pali ko kilid
iyan na di ako den peratiyaya."
26 Kagiya makawalo den gawii na matitimo peman so manga sokbat ko walay na ped iran
si Tomas. Apiya pen tatanggalan so manga pintoan na miyakagemaw si Isa na tomitindeg
ko look iran a tig iyan a "Malalayon rekano so kalilintad."
27 Na pitero iyan ki Tomas a "Ilaya ngka so manga lima ko, na sekon ka on a tindoro o
ka. Betera ngka a lima ngka na apera ngka so pali ko kilid aken. Di ka den pendowadowa
ka paratiyaya ka baden!"
28 Na pitero rekaniyan i Tomas a "Kadnan aken ago Tohan aken!"
29 Pitero rekaniyan i Isa a "Ba ka miyaratiyaya sabap sa miyailay ako ngka? Rarakmatan
so siran oto a miyaratiyaya apiya pen da ako iran mailay."
So Antap o Kinisoraten sangkai a Ribro
30 Madakel pen a piyakamemesa a manga nanao a pinggolaola i Isa a kiyamasaan o

manga sokbat iyan a da mamangisorat sangkai a ribro.
31 Ogaid na miyamangisorat ai kaan iyo maparatiyaya a si Isa na aya den Al Masih, a so
Wata o Allah, ago an kano pekatarima sa kaoyagoyag sabap ko kapeparatiyayaa niyo ko
ingaran iyan.
YAHIYA 21
Miyakiilay si Isa ko Pito a Sokbat iyan
Oriyan ai na miyakiilay peroman si Isa ko manga sokbat iyan roo sa kilid a Ranaw a
Tibiriyas. Na aya kiyapakiilay niyan na datar ai:
2 Si Simon Pidro ago si Tomas a bebetowan sa "Miyadowa," si Natanil a taw sa Kana sii
sa Galili, so manga wata i Sibidi ago so dowa a ped a manga sokbat na matitimo siran.
3 Pitero kiran i Simon Pidro a "Panginseda ako."
Na pitero iran on a "Magonot kami reka." Na giyoto a lomiyalakaw siran na miyageda
siran ko awang, ogaid na sii sangkoto a miyababasa gawii na da den a ba iran miyakowa a
seda.
4 Kagiya teked a kapipita na tomitindeg si Isa roo ko kilid a ragat, ogaid na da makilala o
manga sokbat a giyoto bes si Isa.
5 Inipananalo kiran i Isa a "Manga pagariya, ba aden a miyakowa niyo a seda?"
Tig iran a "Da den."
6 Na pitero iyan kiran a "Sisiren iyo so biyala niyo ko makakawanan o awang, ka
pekakowa kano ron." Na giyoto a inisisir iran on so biyala, na da iran magaga o ba iran
maroran sabap ko tanto a madakel a manga seda a miyakowa iran.
7 So sokbat a pekebabayaan i Isa na tig iyan ki Pidro a "Giyoto bes so Kadnan!" So den
so kiyanega on i Simon Pidro a giyoto so Kadnan na initinambed iyan so ilalapis iyan a
nditaren, ka lomelekas sekaniyan, na tominipo ko ig.
8 So ped a manga sokbat na miyamanong sa titib a meeda siran ko awang a penggamiten
iran so biyala a mapepeno a manga seda, ka kena a ba siran mawatan ko ipameted, ka
manga lima polo bo repa a kawatan iran on.
9 Kagiya mamanepad siran ko awang na miyailay iran roo so apoy a pekedeg a manga
waga a aden a pegiyaon on a manga seda, na aden pen a paan on.
10 Na pitero kiran i Isa a "Wita niyo sii so ped ko manga seda a gopen iyo miyakowa."
11 Giyoto a miyageda si Simon Pidro ko awang na giyamit iyan so biyala ko ipameted na
mapepeno a manga ala a seda a magatos ago lima polo ago telo a kadakel iran langon.
Ogaid na apiya pen tanto ini a madakel na da den makisi so biyala.
12 Pitero kiran i Isa a "Song kano sii na pita kano." Da den a isa bo ko manga sokbat a ba
miyakaraw ron mise sa "Antawaa ka?" ka miyakilala iran a sekaniyan so Kadnan.
13 Na miyobay kiran si Isa na kinowa niyan so paan na inipamegay niyan kiran, na datar
oto mambo a inikidia niyan ko seda.
14 Ikatelo ai a kiyapakiilay i Isa ko manga sokbat iyan oriyan o kiyaoyag iyan a poon ko
miyamatay.
Si Isa ago si Pidro
15 Kagiya makapasad siran koman na iniise i Isa ki Simon Pidro a "Simon a wata i
Yahiya, ba ako ngka pekebabayai sa lawan ko kapekebabayai raken angkai a manga ped?"
"Oway, Kadnan," a tig iyan. "Katawan ka a pekebabayaan ko seka."
Pitero i Isa a "Pakakana ngka so manga nati a bilibili aken."
16 Na iniise i Isa sa ikadowa a "Simon wata i Yahiya, pekebabayaan ako ngka bes?"
Tig iyan a "Oway, Kadnan, katawan ka a pekebabayaan ko seka."
Na pitero i Isa a "Tagikora ngka so manga bilibili aken."
17 Iniise i Isa sa ikatelo a "Simon wata i Yahiya, ba ako ngka pekebabayai?"
Na mikerata a ginawa i Pidro ka iniise rekaniyan i Isa sa miyakatelo a "Ba ako ngka
pekebabayaan?" na tig iyan a "Kadnan, katawan ka so langon taman. Katawan ka a
pekebabayaan ko seka!"
Tig i Isa a "Pakakana ngka so manga bilibili aken.
18 Teroon ko reka a mataan den a sii ko kangoda ngka na seka i dii nditar sa ginawa
ngka, na miyakasong ka ko apiya anda i kebayaan ka somong. Ogaid na amay ka malokes
ka na merepa ka, na salakaw a taw a penditar reka ago pagowiten ka niyan ko di ngka
kebayaan somong."
19 Sii ko kiyataroa sii i Isa na piyayag iyan so okit o kapetay i Pidro a imbantog iyan ko
Allah. Kagiya matero iyan ai na pitero rekaniyan pen i Isa a "Pegonoti ako ngka!"
Si Isa ago so Ped a Sokbat
20 Dominingil si Pidro na miyailay niyan a petondog kiran so isa a sokbat a

pekebabayaan i Isa. Giyanan so sokbat a rominda sa rareb i Isa ko kiyagabi iran ago iniise
iyan on a "Kadnan, antawaa i tipo reka?"
21 Kagiya mailay sekaniyan i Pidro na pitero iyan ki Isa a "Kadnan, antonaa i kearongan
sangkoto a mama?"
22 Somimbag si Isa a "O kabaya aken a oyagoyag sekaniyan den taman ko kakesoy aken
na antonaa i labet ka on? Pegonoti ako ngka baden!"
23 Sabap ko kiyateroa niyan sii na miyakalangkap so totol sii ko magariari a giyangkoto a
sokbat na di petay. Ogaid na da teroa i Isa a ba di petay angkoto a sokbat, ka tig iyan a "O
kabaya aken a oyagoyag sekaniyan den taman ko kakesoy aken na antonaa i labet ka on?"
24 Giyangkai a sokbat a miyatero i Isa na aya dii seksi sangkai a manga miyaolaola ago
aya on misorat. Na katawan ami a benar so totol iyan.
So Kaposan
25 Na madakel pen a ped a pinggolaola i Isa, na o inisorat so oman i isa on na aya

arangan aken on na so dalem a doniya na di ron kemin so manga ribro a penga sosoratan.
MANGA GALEBEK
MANGA GALEBEK 1
Pekebabayaan ko a Tiyopilo, sii ko paganay a sorat aken na piyanotol aken on so langon

taman a pipoonan nggolaola i Isa ago so inipangendao niyan
2 Taman ko gawii a inibayaw sekaniyan roo sa kasorgaan. Sa da rekaniyan pen kibayaon
na nggolalan ko Soti a Roh na ininsaratan iyan so manga taw a piyamili iyan a manga
siyogo.
3 Sii ko oriyan o kiyapatay niyan na miyakiilay kiran na bigan iyan siran sa madakel a
manga poriba sa oyagoyag sekaniyan. Sii ko soled o pat polo gawii na omanoman kiran
makimasa a di kiran dii makimbitiyarai makapantag ko Ndatoan o Allah.
4 Miyakaisa den a kiyatimotimo iran na initoma niyan kiran a "Di kano pagawa sa
Yarosalim, ka nayawa niyo baden roo so pamemegayan a initopa o Ama aken a so den so
miyatero aken rekano.
5 Ka si Yahiya na aya inipanalawat iyan na ig, ogaid na sekano na amay ka mamakapira
gawii na iselawat rekano so Soti a Roh."
6 Sii ko kiyalimod iran langon na inisean iran si Isa a tig iran a "Kadnan, ba giyai i masa a
mbangonen ka peroman so ndatoan a Israil?"
7 Simbag siran i Isa a "Di keparo o ba niyo katokawi so manga masa o di na manga ragon
a tindo o Ama a nggolalan ko rek iyan a kapaar.
8 Ogaid na amay ka kitemo rekano so Soti a Roh na pekatarima kano sa kabatowa, na
makapeseksi kano raken sii sa Yarosalim, sii sa dalem a Yodiya ago Samariya ago taman
ko pirowarowangan o doniya."
9 Kagiya matero ini i Isa na inibayaw sekaniyan sa langit sii ko kapegilaya iran on, na da
iran den mailay ka kiyadalongan ko gabon.
10 Sii ko kalalangaga iran on sa langit ko kipekibayaw niyan na sarta den a aden a
miyakatindeg ko obay iran so dowa kataw a mama a kindiditar sa mapoti.
11 Tig iran a "Manga taw sa Galili, ino kano sii kititindeg a kilalangag sa langit? Si den si
Isa a minibayaw sa kasorgaan a poon rekano na kesoy bo a datar o kiyailaya niyo ron sa
kapesong iyan roo."
So Inisambi ki Yodas
12 Oriyan oto na komiyasoy siran sa Yarosalim a poon ko Palaw a Olibi a aya kawatan
iyan sa siti na baanda isa ka kilomitro.
13 Kagiya makaoma siran na miyanik siran sa poro ko rowang o walay a pembolosan
iran. Aya pekeden roo na si Pidro, si Yahiya, si Santiyago, si Andriyo, si Pilipi, si Tomas,
si Bartolomiyo, si Matiyo, si Santiyago a wata i Alpayo, si Simon a mala i paninindeg ago
si Yodas a wata i Yakob.
14 Palaya siran den dii timotimo kaan lalayon dii makapangangarapan a ped iran so
manga babay, ago si Mariyam a ina i Isa, ago so manga pagari i Isa a manga mama.
15 Miyakaisa gawii na tominindeg si Pidro sii ko katitimo o manga magatos ago dowa
polo a miyamaratiyaya na tig iyan a
16 “Manga pagari ko, disomala a minitoman so inisorat ko Kitab a pitero o Soti a Roh a
nggolalan ko Daod makapantag ki Yodas a tomiyoro ko manga taw a domiyakep ki Isa.
17 Si Yodas na ped tano gowani, ka miyapili a makapengeped ko galebek tano.
18 “Katawan iyo a so pirak a initendan rekaniyan sabap ko marata a pinggolaola niyan na
inipamasa niyan sa lopa, na ron miniomeng na mimbeto a tiyan iyan na minibontad
langon a tinai niyan.
19 Kiyatokawan ai o langon a kibabaling sa Yarosalim na aya inibeto iran sangkoto a lopa
sii ko basa iran na 'Akildama,' a aya maana niyan na 'Lopa a Biyayadan a Rogo.'
20 “Ka misosorat ko Sabor a
'Kadaan rekaniyan so kakadenan iyan

a da den a ba on pekakaden.'
na misosorat pen a
'Matarima o ped so sangan iyan.'
21 “Kagiya ka maoto na disomala a piliin tano so sakataw a mama poon ko manga taw a
maaped rektano sii ko kapepekaonota rektano o Kadnan a Isa
22 A ipoon ko masa a kapepanalawat i Yahiya taman ko gawii a kinibayaw i Isa sa
kasorgaan. Ka disomala a mabaloy sekaniyan a ped tano a makapeseksi ko kiyaoyag i
Isa."
23 Na pisemilian iran so dowa kataw, a si Yosop a bebetowan sa Barsabas, a iningaranan
mambo sa Yosto, ago si Matiyas.
24 Na miyangangarapan siran a tig iran a "Hey Kadnan, katawan ka so madadalem ko
manga poso o langon a taw. Payaga ngka o antawaa kiran a dowa kataw i pinili i ka
25 A pekasambi ki Yodas a siyogo o ka sangkai a galebek a inawaan iyan, ka somiyong
ko darpa a miyapatot on."
26 Na piyakaporot iran sa ripa a dowa oto kataw, na aya miyatendo on na si Matiyas, na
minioman sekaniyan ko sapolo ago isa a siyogo.
MANGA GALEBEK 2
So Kiyapakatalingoma o Soti a Roh
Kagiya raoten so Gawii a Pintikostis na mitimotimo so langon a miyamaratiyaya ko isa a

darpa.
2 Minitekaw a miyakapoon sa langit a domadagoos a lagid o tanto a mabandes a ndo, na
lomiyangkap ko soled a walay a titimoan iran.
3 Na miyakailay siran sa datar o diladila o kadeg a apoy, na miyanggomonggomon a
kiyapakatana iyan ko oman i isa kiran.
4 Miyanga sesenep siran langon a Soti a Roh, na miyakatetaro siran den sa mbarambarang
a manga basa a di kiran dii pakitero o Roh.
5 Sii sa Yarosalim na komakaden on so baraamal a manga Yahodi a miyamakapoon ko
oman i inged sii sa doniya.
6 Kagiya maneg iran angkai a dagedeb na madakel a taw a miyamangobay ron, na
miyabengang siran ka miyaneg o oman i isa kiran so rek iyan a basa a dii teroon o
miyamaratiyaya.
7 Tanto siran a miyamemesa a tig iran a "Ba kena a langon angkai a dii tetaro na manga
taw sa Galili?
8 Ino siran dii makatero ko oman i basa o manga inged a pimbawataan rektano?
9 Sii rektano na aden a manga taw ron sa Partiya, Midiya, Ilam, ago so manga magiinged
sa Misopotamiya, Yodiya, Kapadosiya, Pontos, Asiya,
10 Prigiya, Pampiliya, Misir, ago so manga darpa sa Libiya a makadadair sa Sirini. So
ped rektano na manga mananangga a poon sa Roma,
11 A manga Yahodi ago kena a ba Yahodi a miyakaonot ko agama a Yahodi, na aden pen
a manga taw a poon sa Krita ago giya Arabiya. Ogaid na apiya pen ai na pepanga aaneg
tano so di ran dii kateroa ko oman i basa tano makapantag ko piyakamemesa a manga
galebek o Allah!"
12 Na miyamemesa siran langon a sarta a miyabengang na miyamagisei siran a tig iran a
"Antonaa i maana ini?
13 Ogaid na so ped na piyagongatongat iran so miyamaratiyaya a tig iran a "Kikabebereg
angkai a manga taw!"
So Osiyat i Pidro ko Madakel a Taw
14 Tominindeg si Pidro a ped iyan so sapolo ago isa a ped a siyogo na mitero sa matanog
a tig iyan a "Hey manga pagari ami a manga Yahodi ago sekano langon a kibabaling sa
Yarosalim, pamakinega niyo so peteroon ko na tanodi niyo.
15 Aya pamikiran iyo na kikabebereg angkai a manga taw ogaid na kena, ka alas nibi
baden imanto sa kapipita!
16 Ogaid na giyai den so pitero o Nabi Yowil
17 A tig iyan a
'Sii ko kaposan a manga gawii, a tig o Allah

na pagododen ko so Roh aken ko langon a manosiya.
So manga wata iyo a mama ago babay
na pemakapayag ko lalag aken;
so manga kangodaan rekano a manga mama
na pemakailay sa manga pangingilain,
na so manga totoa den rekano a manga mama
na petetaginep sa manga taginepen.
18 So pen so manga oripen aken ndatar so manga mama ago manga babay
na pagododen ko kiran so Roh aken sangkoto a manga gawii,
na pekapayag siran ko lalag aken.
19 Magembaal ako sa manga piyakamemesa sii sa langit
ago manga nanao sii sa doniya;
so rogo ago apoy ago penggabogabon a bel.
20 Pekaliboteng so alongan ago pekariga so olan a lagid o rogo
sa di pen kapekatalingoma o mala ago marinayag a gawii a rek o Kadnan.
21 Amay ka masa oto na apiya antawaa i petelo ko ingaran o Kadnan na kesabet.'
22 “Hey manga taw sa Israil, pamakinega niyo angkai a manga katero! Si Isa a Taw sa
Nasarit na pimataanan a poon den ko Allah a nggolalan ko manga ala i kabatowa a
galebek, manga piyakamemesa ago manga nanao a piyakinggolaola on o Allah sii ko
kamamasaan iyo, na katawan iyo ini.
23 Na piyalad rekano angkoto a mama a aya kinitoman o takdir o Allah a andang den a
tinibaba iyan, na nggolalan ko kaogopi rekano o manga rarata a manga taw na biyono iyo
sekaniyan ko kiyatotoka niyo ron ko kros.
24 Ogaid na inoyag bo o Allah, ka piyokas iyan ko kapekeromasay niyan ko kapatay, ka
di kepakay i ba sekaniyan mipapaar o kapatay.
25 Pitero o Daod so makapantag rekaniyan a
'Lalayon aken pekeilay so Kadnan sii ko hadapan aken,

ka sisii sekaniyan sa kawanan aken
kaan ako di kekaog.
26 Sabap sii na mapipiya a ginawa ko,
na di aken dii matero so kapekebabaya aken.
Makasasarig mambo so badan aken
27 Ka di ngka ngganatan so niyawa ko sii ko darpa o miyamatay,
aya pen o ba ngka pakiredaken so Soti a Siyogo o ka.
28 Piyakitokawan ka raken so manga lalan a isong ko kaoyagoyag
na tanto aken a ikebabaya so kakemasai ko reka.'
29 “Manga pagari aken, makapantag ko apo tano a Daod na mapetero aken rekano a
mataan den a miyatay ago minilebeng, na so kobor iyan na sesaya pen imanto.
30 Ogaid na nabi sekaniyan na katawan iyan a inisepa on o Allah a pakapendatoon iyan
so isa ko kebabadan ko Daod a pekasambi on.
31 Kagiya ka maoto na inalamat iyan so kakeoyag o Al Masih sii ko kiyateroa niyan on sa
di ngganatan o Allah so niyawa niyan ko darpa o miyamatay ago di keredak so lawas
iyan.
32 Giyankoto a mama, a si Isa, na inoyag bo o Allah na langon kami ron peseksi.
33 Inipangkat sekaniyan roo ko kawanan o Allah, na tiyarima iyan so Soti a Roh a so den
so initopa on o Ama, na giyanan i inodod iyan rekami a pekeilay niyo imanto ago
pekeneg.
34 Ka kena a ba so Daod i miyakapanik sa kasorgaan ka sekaniyan i mitero sa
'Pitero o Kadnan ko Kadnan aken a

"Ontod ka sa kawanan aken
35 Taman sa mabaloy aken so manga ridoay ngka a dapoay ngka.'
36 “Kagiya ka maoto na disomala a katawan o langon a taw sa Israil a mataan den a

giyangkoto a mama a si Isa a tiyotok iyo ko kros na biyaloy o Allah a Kadnan ago Al
Masih!"
37 Kagiya maneg ai o manga taw na tanto a mikerata a ginawa iran, na pitero iran ki
Pidro ago so ped a manga siyogo a "Manga pagari ami, antonaa i mapenggolaola mi?"
38 Na pitero kiran i Pidro a "So oman i isa rekano na talikodi niyo so manga dosa niyo
ago pakisalawat sii ko ingaran i Isa Al Masih kaan karilai so manga dosa niyo, na
ketarima iyo so pamemegayan a so Soti a Roh.
39 Ka giyangkai a initopa o Allah na para rekano ago so manga wata iyo, ago para ko
manga taw a kawawatanan, a so langon a tewagen o Kadnan a Tohan tano."
40 Na madakel pen a pitero kiran i Pidro a inipangosiyat kiran, na inakolan iyan siran a
tig iyan a "Sabeta niyo a ginawa niyo kaan kano di maaped sangkai a kapapantagan a
manga rarata a taw!"
41 Na siran oto a tomiyarima ko katero iyan na miyamakisalawat. Sii sangkoto a gawii na
manga telo nggibo a manga taw a minioman ko miyamaratiyaya.
42 Lalayon siran dii timotimo kaan iran mapamakineg so ipepamangendao o manga
siyogo ago an siran makapamagepeda sii ko kapepangopaka iran ko paan ago
kapangangarapan.
So Kapepaginetaw o Pepamaratiyaya
43 So langon a taw na miyamemesa ago miyanga alek, na madakel a manga
piyakamemesa ago manga nanao a miyanggolaola a nggolalan ko manga siyogo.
44 Itataros o langon a pepamaratiyaya so di ran dii kapamagepeda, na so tamok o oman i
isa na palaya siran on kirek.
45 Di ran dii pepasaan so manga tamok iran ago manga pagigimo na di ran dii
mbagibagiin ko apiya antawaa i aden a kailangan iyan.
46 Gawii gawii den na idadayon iran so di ran dii katimotimo ko Timplo. Pepangopaken
iran so paan sii ko manga walay ran a di siran dii mamagatoang koman a sarta a pepanga
bababaya siran ago kikaliliwanagan i poso.
47 Pepodin iran so Allah na pagaadatan siran o langon a taw. Na gawii gawii den na
ipegoman kiran o Allah so manga taw a pepanga sasabet.
MANGA GALEBEK 3
Piyakapiya i Pidro so Lepo a Mama
Miyakaisa den a gawii a somiyong si Pidro ago so Yahiya ko Timplo sii ko alas tris ko
kagabi a wakto a kapesembayang iran.
2 Ndodoo so sakataw a mama a lepo ipoon ko kinimbawataan on. Oman gawii na
pegowiten sekaniyan roo ko Timplo na ipembetad ko gimowa iyan a bebetowan sa
'Mapiya i Paras,' kaan makapepamangni sa pirak ko pepamanoled roo.
3 Kagiya mailay niyan si Pidro ago si Yahiya a pekasoled ko Timplo na miyangni
sekaniyan kiran sa pirak.
4 Tintengan iran sekaniyan na tig i Pidro a "Ilaya kami ngka!"
5 Na inilay niyan siran ka iinamen iyan a aden a imbegay iran on.
6 Na pitero i Pidro a "Da a pirak aken, ogaid na aden a rek aken a imbegay aken reka. Sii
ko ingaran i Isa Al Masih a Taw sa Nasarit na tindeg ka ago lalakaw!"
7 Na tiyayongan i Pidro so kawanan a lima o lepo na piyakaganat iyan. Sarta a
miyakabager so manga ai niyan ago manga soosooran
8 Na tomikaw den tomindeg na lomiyalakaw. Na miyonot sekaniyan kiran somoled ko
Timplo a pelalakaw ago dii tepak a pepodin iyan so Allah.
9 Miyailay o langon a taw a pelalakaw sekaniyan roo a pepodi ko Allah
10 Na miyakilala iran a sekaniyan so dii mamangni a lalayon moontod ko Mapiya i Paras
a Gimowa o Timplo, na tanto siran a miyamemesa ago miyabengang ko miyasowasowa
iyan.
So Katero i Pidro makapantag ko Mama a Miyapakapiya
11 Sii ko katatayongi niyan ki Pidro ago si Yahiya na miyamemesa so langon a taw ago
miyamalalagoy kiran ko darpa a bebetowan sa Liyoliyowan o Solaiman.
12 Kagiya mailay i Pidro so manga taw na pitero iyan kiran a "Hey manga taw sa Israil,
ino kano sii pememesa; ino kami niyo kitetentengi? Ba aya kapipikira niyo ron na
miyapakalalakaw ami angkai a mama a nggolalan ko rek ami a kabatowa o di na
kabaraamal?
13 So Tohan o Ibrahim, Iskak ago so Yakob, a so Tohan o manga apo tano, na
miyabantog iyan so oripen iyan a si Isa. Piyalad iyo sekaniyan ko gobirno ago tiyalikodan
iyo sii ko hadapan i Pilato apiya pen kiyokom i Pilato a mbokaan iyan.
14 Tiyalikodan iyo angkoto a Soti ago Maontol a mama, ka ba niyo den inakol ki Pilato a
aya bokaan iyan na so mama a talibono.
15 Biyono iyo so Pekepoonan o Kaoyagoyag, ogaid na inoyag sekaniyan o Allah a poon
ko miyamatay na sekami i manga saksi sii.
16 “Giyangkai a mama a miyakilala niyo ago pegilain na piyakabager a nggolalan ko
paratiyaya ko ingaran i Isa. So ingaran i Isa ago so paratiyaya a ipepasod ki Isa na aya
miyakapiya rekaniyan a datar o kapekeilaya niyo ron.
17 “Na imanto, manga pagari aken, na katawan ko a da niyo sabota so maana o
pinggolaola niyo ki Isa, na datar mambo o manga olowan iyo.
18 Ogaid na giyoto i kinitomanen o Allah ko piyakitokawan iyan gowani a nggolalan ko
langon o manga nabi, ka piyayag iyan a kerasay so Al Masih iyan.
19 Kagiya ka maoto na talikodi niyo so manga dosa niyo ago kasoy kano ko Allah kaan
mapapas so manga dosa niyo.
20 Oriyan iyan na mitalingoma rekano so manga masa a ikapipiya o ginawa niyo a poon
ko Kadnan, na pekasongen iyan rekano peman so Al Masih a initoro iyan gowani para
rekano, a giyoto si Isa.
21 Ogaid na disomala a kapekatareg iyan sa kasorgaan taman ko masa a kapembagowi ko
langon taman a aya kakitoman o initopa o Allah isako miyatey den a nggolalan ko soti a
manga nabi niyan.
22 Ka pitero o Mosa a 'So Allah a Kadnan iyo na nggemawan kano niyan sa nabi a datar
aken a poon ko manga taw niyo, na disomala a pemakinegen iyo so langon a peteroon
iyan rekano.
23 Apiya antawaa i di ron pemakineg na kebelag ko manga pagtaw o Allah ago
kebinasaan.'
24 “Mataan den a so langon a manga nabi ipoon ko Samowil taman ko miyanga ooriyan
iyan a nabi na piyamakalangkap iran so makapantag sangkai a manga gawii.
25 Na so manga initopa o Allah a nggolalan ko manga nabi na para rekano, na
miyakambagian kano ko kapasadan a pimbaalan o Allah ko manga apo tano. Ka pitero
iyan ko Ibrahim a 'Nggolalan ko kebabadan reka na perakmatan so langon a taw sa
doniya.'
26 Sabap san na kagiya piliin o Allah so oripen iyan na sekano den i paganay a
piyakisongowan iyan on kaan kano niyan karakmati ko kapekitalikodi niyan ko oman i isa
rekano ko manga rarata a olaola niyo."
MANGA GALEBEK 4
Si Pidro ago si Yahiya sii ko Hadapan o manga Pangongokom
Sii ko dii katero i Pidro ago si Yahiya ko manga taw na miyakaoma kiran so manga imam
a moonot on so olowan o manga gordiya ko Timplo, ago so manga Sadosi.
2 Kiyararangitan siran ka pepakalangkapen o manga siyogo ko manga taw a miyaoyag
den si Isa, na poriba ini ko kapagoyaga ko miyamatay.
3 Na diyakep iran si Pidro ago si Yahiya ago kiyalaboso iran taman sa miyapita, ka kegebi
den oto.
4 Ogaid na so kadakelan ko miyamakaneg ko katero iran a miyamaratiyaya on, na aya
kadakel o manga mama na iniraot sa manga lima nggibo.
6 Sii ko talondog a gawii na so manga olowan o manga Yahodi, ago so manga
pelokelokesen, ago so manga goro ko Kitab na mitimotimo sa Yarosalim.
6 Miyakipagopakat siran ki Anas a aya maporo a imam, si Kayapas, si Yahiya, si
Alihandro ago so ped a manga tonganay o maporo a imam.
7 Piyakadarpa iran so manga siyogo ko hadapan iran na inisean iran a "Antonaa i
kabatowa o di na ngaran i ininggolalan iyo ko kiyanggolaolaa niyo sii?"
8 Na si Pidro a sesenepen a Soti a Roh na pitero iyan kiran a "Manga olowan o manga
taw ago manga pelokelokesen,
9 O aya rekami imanto ipepangingise na makapantag ko mapiya a galebek a pinggolaola
ko lepo a mama ago antonaa i inipakapiya niyan
10 Na pekitokawan ami rekano langon ago so langon a taw sa Israil a giyangkai a mama a
tomitindeg sii sa hadapan iyo na miyapakapiya den a nggolalan ko ingaran i Isa Al Masih
a Taw sa Nasarit a tiyotok iyo ko kros a inoyag bo o Allah.
11 Si Isa na aya miyatero o Kitab a "So ator a inisili niyo a manga panday sa walay, na
miyabaloy baden a aya kaoonayan ko kaoontodan o walay."
12 Na da den a ped a ba rektano pekasabet, ka sii sa dalem a doniya na da den a salakaw a
ingaran a inibegay o Allah sii ko manga taw a ron makapenggolalan a kakesabet tano."
13 Na kagiya mailay o manga olowan so kiyakewaraw i Pidro ago si Yahiya, ago kagiya
katokawan iran a kekalilidan siran a manga taw a da makapamagiskowila na miyamemesa
siran den, na miyakilala iran a manga ped siran bes gowani i Isa.
14 Ogaid na da den a mapetero iran ki Pidro ago si Yahiya ka pekeilay iran so lepo a
mama a miyapakapiya a tomitindeg roo a ped iran.
15 Kagiya ka maoto na piyakaliyo iran siran pasin ko dii kokoman na miyamagisei siran
16 A tig iran a "Antonaa i ikidia tano sangkai a manga taw? Ka kiyatokawan o langon a
kibabaling sa Yarosalim a minggolaola siran sa sabelek a piyakamemesa a galebek, na di
tano ini mapegma.
17 Ogaid na an di tanto pekalangkap angkai a dii manggolaola sii ko manga taw na
pelalangan tano siran sa da den a ped a taw a ba iran imbitiyarai sii ko ingaran i Isa."
18 Mandiyadi na piyakitawag iran peroman so dowa a siyogo na inisogo iran on a da den
a ba iran peteroa o di na ipengendao sii ko ingaran i Isa.
19 Ogaid na simbag siran i Pidro ago si Yahiya a "Kokoma niyo o anda i ontol ko
hadapan o Allah: ba so katomana ko sogoan iyo o di na so sogoan o Allah?
20 Ka di ami kegenekan tetaro so makapantag ko miyailay ami ago miyaneg."
21 So kiyanega sii o manga olowan na liyalangan iran siran peroman na taros a biyokaan
iran. Da a ba iran mapemikir o antonaa i kidaneg iran kiran, ka so langon a taw na
pembantogen iran so Allah sabap ko miyanggolaola.
22 Ka so mama a pinggolaolaan sangkai a piyakamemesa ko kiyapakapiya niyan na
miyakapagidad sa lawan sa pat polo ragon.
Miyangangarapan so Pepamaratiyaya
23 Kagiya kabokaan si Pidro ago si Yahiya na komiyasoy siran ko manga ped iran na
piyanotol iran kiran so langon a pitero o manga poporo a imam ago manga pelokelokesen.
24 Kagiya maneg iran ai na miyaisaisa siran mangangarapan ko Allah a tig iran a "Hey
Kadnan a Lebi a Mamaapaar, a aya miyaden ko langit, so lopa, so ragat ago so langon
taman a matatago on,
25 Nggolalan ko Soti a Roh na piyakatero o ka so oripen ka a so Daod a apo ami isako
teroon iyan a
'Ino kerarangiti so manga nasiyon

ago dii kediyat so manga taw sa ilang baden?
26 Ka pepamagopakat so manga dato sa doniya ago so manga olowan
sa kaperidoa iran ko Kadnan ago so Al Masih iyan.'
27 “Na miyatoman den oto, ka sii sangkai a siti na si Hirod ago si Pontiyo Pilato na
miyakipagopakat ko kena a ba manga Yahodi ago so manga taw sa Israil sa kaperidoa
iran ki Isa a soti a oripen ka a biyaloy ngka a Al Masih.
28 Na pinggolaola iran so langon a andang den a miyatakdir ka a nggolalan ko kapaar ka
ago kabaya.
29 Imanto, Kadnan, na masai ngka ngkai a ipepangangalek iran, na begi kami ngka a
manga oripen ka sa kawaraw sa kapeteroa ami ko katero o ka.
30 Betera ngka a lima ngka ka sa kapakabagera ngka ko pepanga sasakit ago an
manggolaola so manga nanao ago manga piyakamemesa a nggolalan ko ingaran i Isa a
soti a oripen ka."
31 Na kagiya makapasad siran mangangarapan na sarta a tiyabeker so walay a titimoan
iran, na miyanga sesenep siran langon a Soti a Roh, na inipangosiyat iran so katero o
Allah sa da den a kalek iran.
Dii Mbagibagiin o Pepamaratiyaya so manga Tamok iran
32 So madakel a pepamaratiyaya na maiisaisa so pamikiran iran ago kabaya. Da a isa

kiran bo a ba dii tero sa sekaniyan bo i kirek ko manga tamok iyan, ka di iran dii
mbagibagiin so langon taman a rek iran.
33 Mala i kabatowa so manga siyogo ko di iran dii kaseksii ko kiyaoyag o Kadnan a Isa,
na tanto siran a rarakmatan o Allah.
34 Da a isa kiran a ba kakokorangi, ka so langon a aden a lopa iyan o di na manga walay
na di ran dii pepasaan na pegowiten iran so pirak a pekekowa iran
35 Na pepaladen iran ko manga siyogo, na di ran ai dii mbagibagiin ko oman i isa kiran a
aden a kailangan iyan.
36 So isa kiran na si Yosop, a Libitiyo a poon sa Sipri. Iningaranan o manga siyogo sa
Barnabas, a aya maana niyan na "Pangongoyat."
37 Pipesa niyan so lopa iyan na inowit iyan ko manga siyogo so arga iyan na piyalad iyan
kiran.
MANGA GALEBEK 5
Si Ananiyas ago si Sapira
Aden a mama a aya ngaran iyan na si Ananiyas, ago so karoma niyan a si Sapira, na
pipesa iran so lopa iran.
2 Na libatan i Ananiyas so arga iyan ago inowit iyan so lamba on ko manga siyogo, ogaid
na pitero iyan kiran a giyanan bo i arga o lopa, na katawan ai o karoma niyan.
3 Na pitero i Pidro a "Ananiyas, ino ngka pekipaaren ko Iblis so poso o ka? Ka inisibay
ngka so ped ko arga o lopa a rek ka bo, na piyamokegan ka so Soti a Roh!
4 Sa da ngka pen kapesaa ko lopa na rek ka ini, na kagiya mapesa na rek ka pen so pirak.
Ino ngka pesada sa ginawa ngka a kapenggolaolaa ngka sii? Kena a ba so manga taw a
piyamokegan ka, ka so Allah!"
5 Kagiya maneg ai i Ananiyas na minilampes ago miyatay, na tanto a miyanga alek so
langon a miyakatokaw ron.
6 Na miyobay ron so manga ngongoda a mama na biyongkosan iran so lawas iyan, na
inawidan iran sa liyo na inilebeng iran.
7 Kagiya makatelo ka oras na miyakaoma so karoma i Ananiyas, na da niyan katokawi so
miyanggolaola.
8 Pitero on i Pidro a "Teroa ngka raken; ba giyai bo i arga o miyapesa niyo a lopa?"
Tig i Sapira a "Oway, giyanan bo."
9 Na pitero on i Pidro a "Ino kano pegayon sa katepengi niyo ko Roh o Kadnan? Ilaya
ngka! So manga mama a lomibeng ko karoma ngka na sisii den ko pintoan, na pagawidan
ka iran mambo sa liyo!"
10 Sarta den a minilampes so babay ko hadapan i Pidro na miyatay. Kagiya makasoled so
manga ngongoda na miyaoma iran sekaniyan a miyatay den, na inawidan iran sa liyo na
inirembang iran lomebeng ko karoma niyan.
11 Na tanto a miyanga alek so langon a magaagama ago so langon a miyakatokaw sii.
So manga Nanao ago manga Piyakamemesa
12 Madakel a manga nanao ago manga piyakamemesa a miyanggolaola o manga siyogo

sii ko manga taw. So langon o pepamaratiyaya na palaya dii timotimo ko Timplo sii ko
Liyoliyowan o Solaiman.
13 Da a ped a taw a makaliliyo kiran a ba kiran miyakaraw mangeped apiya pen tanto
siran a pagaadatan o manga taw.
14 Ogaid na tanto a madakel a taw a manga mama ago manga babay a miyamaratiyaya ko
Kadnan, na minioman siran ko kadakel iran.
15 Sabap ko dii nggolaolaan o manga siyogo na pepangowiten o manga taw so pepanga
sasakit ko manga lalan, na pepakaigaan iran ko manga dalagan ago manga dempas ka o
ba bo kadalongi o along i Pidro so ped kiran amay ka somagad.
16 Na madakel a manga taw a miyamakaoma a poon ko manga pagingedingedan a
midadair sa Yarosalim a pepangowiten iran so penga sasakit iran ago so perarasain o
manga saitan, na palaya siran den miyapakapiya.
Siyatro so manga Siyogo
17 Samaoto na so maporo a imam ago so langon a kaom iyan a ped ko opakat o manga
Sadosi na tanto iran a riniit so manga siyogo,
18 Na pindadakep iran so manga siyogo ago piyangalaboso iran.
19 Ogaid na sii sangkoto a kagagawii na so isa a malaikat o Kadnan na likaan iyan so
manga pintoan o kalaboso na piyakaliyo niyan siran. Na pitero iyan kiran a
20 “Ikano roo na tindeg kano ko lamalama o Timplo na teroa niyo ko manga taw so
langon taman makapantag sangkai a bago a kaoyagoyag."
21 So kiyanega sii o manga siyogo na somiyoled siran ko lamalama o Timplo ko
kiyakelibabas iyan na mipoon siran mamangendao.
Kagiya makaoma so maporo a imam ago so manga kaom iyan ko dii kokoman na
piyakitimo iran so langon a manga pangongokom a manga pelokelokesen sa Israil. Na
piyakisongowan iran so manga siyogo sii sa kalaboso kaan mapakadarpa kiran.
22 Ogaid na kagiya makaoma roo so manga sondaro na da iran siran maoma sii ko
kalaboso. Komiyasoy siran na miyanotol siran
23 A tig iran a "Miyaoma mi so kalaboso a kalelekeban piyapiya ago so manga gordiya a
dii magipat sii ko manga pintoan, ogaid na kagiya lekaan ami na da den a taw sa soled!"
24 Kagiya maneg ai o kapitan o manga gordiya ko Timplo ago so manga poporo a imam
na kiyalibogan siran o antonaa i miyaolaola o manga siyogo ago antonaa i kebolosan iyan.
25 Na sarta a miyakaoma so sakataw a mama a tig iyan a "Ilaya niyo man ka so manga
mama a piyangalaboso niyo na kititindeg roo ko lamalama o Timplo a pepangendao ko
manga taw!"
26 Sabap san na somiyong roo so kapitan a ped iyan so manga sondaro niyan na inowit
iran so manga siyogo ko dii kokoman, ogaid na da iran panegela ka ipekalek iran so
manga taw ka o ba iran siran perorobaki a ator.
27 Kagiya mawit iran roo so manga siyogo na piyakapangadap iran ko manga
pangongokom na piyangingisean siran o maporo a imam
28 A tig iyan a "Ba di ami rekano inisapar so kapepangendao niyo sii sangkai a ingaran?
Apiya pen oto na ba niyo den piyakalangkap so manga ndao niyo sa dalem a Yarosalim,
na kabaya iyo a pakipembalogo niyo rekami so kiyapatay angkoto a mama!
29 Somimbag si Pidro ago so ped a manga siyogo a "Disomala a tomanen ami so Allah;
kena a ba so manga taw!
30 So Tohan o manga apo tano na inoyag iyan si Isa a biyono iyo ko kiyatotoka niyo ron
ko kros.
31 Na inibayaw sekaniyan o Allah roo ko kawanan iyan a aya Pangolo ago Pepanabet
kaan iyan kabegi so manga taw sa Israil sa kapakaparo sa katalikodi ran ko manga dosa
iran kaan karilai.
32 Manga saksi kami sangkai a manga nganin ago so mambo so Soti a Roh a inibegay o
Allah ko siran oto a pepangongonotan on."
33 Kagiya maneg ai o manga pangongokom na tanto siran a kiyararangitan na kabaya iran
a pekipamono iran so manga siyogo.
34 Ogaid na so isa kiran a si Gamaliyal, a Parisi ago goro ko Kitab, a pagaadatan o langon
o manga taw, na tominindeg ko dii kokoman na inisogo iyan a pakaliyon pasin ko rowang
so manga siyogo.
35 Kagiya makaliyo siran na pitero iyan ko manga pangongokom a "Manga taw sa Israil,
iktiyari niyo so penggolaolaan iyo sangkoto a manga taw.
36 Ka gowani na miyakagemaw si Tiyodas a ipepegambog iyan a mala i gees, na manga
pat gatos a mama a miyakeom iyan. Ogaid na biyono sekaniyan na miyakambelabelag so
langon a manga pagtaw niyan , na da a kiyabobolosan iran.
37 Oriyan oto sii ko manga gawii a kinilistaan ko taw na miyakagemaw si Yodas a taw sa
Galili na piyakirido iyan ko madakel a taw so gobirno. Biyono sekaniyan mambo na
miyakambelabelag so langon a miyangongonotan on.
38 “Imanto na teroon ko rekano a taregi niyo angkai a manga taw! Bokaa niyo siran! Ka o
giyangkai a antap iran ago galebek na poon ko manosiya na keilang bo.
39 Ogaid na o poon ko Allah na di niyo siran den ndaagen, ka o panamari niyo ai na
baanda kano dii makiperidoay ko Allah!" Na inayonan iran so katero i Gamaliyal.
40 Piyakasoled iran so manga siyogo na piyakipamadasan iran. Liyalangan iran sa di siran
den petetaro sii ko ingaran i Isa, na biyokaan iran siran.
41 Sii ko kapegawa iran ko hadapan o manga pangongokom na mabababaya siran ka
inibilang siran o Allah a mapapatot ko kiyapakakeya iran sabap ko ingaran i Isa.
42 Na oman gawii sii ko Timplo ago sii ko manga walay iran na itataros iran a
kapepamangendao iran ago kapepakalangkapa ko Mapiya a Totol a si Isa na aya den so Al
Masih.
MANGA GALEBEK 6
So Pito kataw a Pepanalagad
Sangkoto a manga gawii sii ko kapepakadakel o manga sokbat na so manga Yahodi a aya
basa iran na Grigo na piyanarotaroan iran so manga Yahodi a aya basa iran na Hibriyo ka
kagiya so miyanga babalo kiran a babay na pekelepas ko dii kambagibagia ko
pangenengken sa oman gawii.
2 Sabap san na tinimo o sapolo ago dowa a manga siyogo so langon a manga sokbat na
pitero iran a "Di patot o ba ami ndarainonen so kipepangosiyaten ko katero o Allah kaan
kami makapenalagad mipantag ko kayoyagan.
3 Kagiya ka maoto, manga pagari ko, na pamili kano sa pito kataw a mama sii rekano a
pagaadatan, a sesenepen o Soti a Roh ago ongangen a mapakakibir tano sangkai a
galebek.
4 Ogaid na sekami na ipagiklas ami a ginawa mi ko kapangangarapan ago so
kipepangendaon ko katero o Allah."
5 Na miyasoat so langon a malilimod sangkoto a pitero iran, na piyamili iran si Istiban a
mala i paratiyaya ago sesenepen a Soti a Roh, ago si Pilipi, si Prokoro, si Nikanor, si
Timon, si Parminas, ago si Nikolas a taw sa Antiyokiya a miyaped ko paratiyaya o manga
Yahodi.
6 Piyakapangadap iran angkoto a pito kataw ko manga siyogo, na kagiya mangangarapan
siran na inipamanapenet iran kiran a manga lima iran.
7 Sabap san na mitataros den a kapepekalangkap o katero o Allah na pepekadakel den so
manga peparatiyaya roo sa Yarosalim, na tanto mambo a madakel a imam a
miyangongonotan ko paratiyaya.
Diyakep si Istiban
8 Si Istiban, a mama a mapepeno a paratiyaya ago kabatowa, na minggolaola sa manga

ala a piyakamemesa ago manga nanao sii ko kamamasaan o manga taw.
9 Ogaid na aden a manga taw a somiyopak rekaniyan ago miyakipewala. Manga Yahodi
siran a poon sa Sirini ago giya Alihandriya a rakes o ped a taw sa Silisiya ago giya Asiya,
na manga sakop siran o sinagoga a bebetowan sa Sinagoga o manga Taw a
Kababalokasan.
10 Ogaid na di kiran ketaban si Istiban ko kandaowa sabap ko ongangen a ipembegay
rekaniyan o Roh sii ko di niyan dii katero.
11 Na piyangonsi iran so ped a manga mama sa kapeteroa iran sa "Miyaneg ami si Istiban
a pepagitowitoon iyan so Mosa ago so Allah!"
12 Na piyangondoy iran so manga taw a rakes o manga pelokelokesen ago manga goro ko
Kitab, na siyongowan iran si Istiban ago diyakep iran, na inowit iran ko dii kokoman.
13 Na piyakaseksi iran so ped a taw a miseksi sa di benar, a tig iran a "Si aki ini na
lalayon iyan pepagitowitoon angkai a Soti a Timplo ago so Kitab o Mosa.
14 Ka miyaneg ami a pitero iyan a si Isa a Taw sa Nasarit na nggebaan iyan angkai a
Timplo ago sembian iyan so manga taritib a initenan rektano o Mosa!"
15 Na so langon a mindadarpa ko dii kokoman na tintengan iran si Istiban na miyailay
iran a so paras iyan a datar o paras a malaikat.
MANGA GALEBEK 7
So Katero i Istiban sii ko dii Kokoman
Iniise o maporo a imam ki Istiban a "Ba ini benar?"

2 Tig i Istiban a "Manga pagari ko ago manga lokes aken, na pamakinega ko niyo. So
kababantogan a Tohan tano na miyakimasa ko apo tano a si Ibrahim isako kababaling
iyan sa Misopotamiya sa da niyan pen kabaling sa Haran.
3 Pitero iyan on a 'Awai ngka so inged ka ago so manga tonganay ngka na lalakaw ka ko
inged a pekiilay aken reka.'
4 Na giyoto a giyanatan i Ibrahim so inged a Kaldaya na tomiyogalin sa Haran. Kagiya
matay so ama iyan na piyakaogalin o Allah si Ibrahim sii sangkai a inged a kakadenan iyo
imanto.
5 Sa masa oto na da sekaniyan begi o Allah sa kawali sangkai a lopa, apiya so bo so
kedapoan iyan on. Ogaid na initopa niyan a imbegay niyan on angkai a lopa a rek iyan
den ago ketangan o pekebabadan on, apiya pen da pen a wata i Ibrahim sangkoto a masa.
6 Giyai i pitero rekaniyan o Allah: 'So manga kebabadan reka na pekabaling siran a
manga mananangga sii ko inged o salakaw a taw, na roo siran mapengongoripen ago
penga rarasay ko soled o pat gatos ragon.
7 Ogaid na ndanegen aken so nasiyon a makapengongoripen kiran,' a tig o Allah, 'na
maipos oto na pekaliyo siran sangkoto a inged na pengongonotanan ako iran sii sangkai a
darpa.'
8 Na inisogo o Allah ki Ibrahim so kapanori a aya toos ko kapasadan iyan. Kagiya ka
maoto na kagiya imbawata i Ibrahim si Iskak na tiyori iyan ko ikawalo gawii. Na
ininibawata i Iskak si Yakob, na inimbawata i Yakob so sapolo ago dowa kataw a mama a
aya tano manga apo.
9 “So manga apo tano na siniig iran si Yosop a pagari ran na pipesa iran a
mapangongoripen roo sa Misir. Ogaid na mipageepeda iyan so Allah
10 Na siyabet iyan si Yosop ko langon a kamaregenan iyan. Kagiya makaadap si Yosop
ko Radiya Piraon sa Misir na bigan o Allah sa daag ago ongangen, na biyaloy sekaniyan o
Piraon a gobirnador sa Misir ago komikibir ko langon a mbawalayan iyan.
11 “Oriyan oto na tiyaon a dalem a inged a Misir ago giya Kanaan na tanto a kiyaregenan
so manga taw, na so manga lokes tano na da a kekan iran.
12 Kagiya maneg i Yakob a aden a pereperan sa Misir na piyakasong iyan roo so manga
lokes tano, na giyoto i paganay a kiyasong iran roo.
13 Sii ko ikadowa iran roo somong na miyakikilala so Yosop ko manga pagari niyan, na
kiyatokawan o Radiya Piraon so makapantag ko pamiliya i Yosop.
14 Oriyan oto na riyapit i Yosop so ama iyan a si Yakob ago so langon a pamiliya niyan a
somong siran sa Misir, a pito polo ago lima kataw langon.
15 Na somiyong si Yakob sa Misir a ped iyan so manga apo tano na roo siran miyamatay.
16 So manga badan iran na inikasoy sa Sikim na roo siran piyanago ko pekoboran a
miyapamasa i Ibrahim a pirak ko manga mbawataan o Hamor.
17 “Kagiya pekeraniyan so masa a kakitoman o initopa o Allah ki Ibrahim na tanto a
miyababad so manga taw tano a kibabaling sa Misir.
18 Kagiya den a matey na aden a miyakasambi a mindato sa Misir a di niyan katawan si
Yosop.
19 Piyagakalan angkoto a dato so manga taw tano. Siyatro iyan so manga apo tano ka
tigel iyan siran sa kaganati iran ko manga roroni a wata iran kaan mamatay.
20 “Sii sangkoto a masa na inimbawata si Mosa a mapiya a wata a lilimoon o Allah. Sii
ko soled o telo olan na rinitan sekaniyan sii ko walay o ama iyan.
21 Na kagiya awaan sekaniyan roo sa liyo na kinowa o wata a babay o Radiya Piraon, na
pimbabawata iyan sa datar bo o aya on mimbawata.
22 Miyapangendao si Mosa ko langon a ongangen o manga Imisiren, na mimbaloy a mala
i menang ko di niyan dii katero ago kanggalebek.
23 “Kagiya makapagidad sa pat polo ragon na miyapamikir iyan a imbentel iyan so
manga tonganay niyan a so manga taw sa Israil.
24 Kagiya mailay niyan so isa kiran a peranegen o isa a Imisiren na inabang iyan ago
inisaop iyan ko kiyabonoa niyan ko Imisiren.
25 Aya katao ron i Mosa na seboten o manga taw niyan a pegosaren sekaniyan o Allah sa
kasebeta niyan kiran, ogaid na da iran sabota.
26 Kagiya talondog a gawii na miyailay niyan so dowa kataw a royod iyan a manga Israil
a dii mbono. Tipengan iyan a kapakalilintad iran a tig iyan a 'Hey manga taw, ino kano dii
peranegai a magari kano?'
27 “Ogaid na so taw a pepamabaan iyan so ped iyan na inisomag iyan si Mosa a tig iyan a
'Antawaa i tomiyoro reka a olowan ami ago pengokom rekami?
28 Ba ako ngka mbonoa a datar o kiyabonoa ngka ko Imisiren kagai?'
29 Kagiya maneg ai i Mosa na miyawa roo nggagaan na miyaling sa inged a Midiyan, na
mimbawata roo sa dowa a wata a mama.
30 “Kagiya makalepas so pat polo ragon na aden a mipeyag ki Mosa a malaikat a sisii ko
pekedeg a apoy a madadalem ko paket roo ko mitataog a kaden sii ko obay o Palaw a
Sinay.
31 Miyamemesa si Mosa sangkoto a miyailay niyan na kagiya pegobain iyan kaan iyan
mapariksa na miyaneg iyan so sowara o Allah a tig iyan a
32'Saken so Tohan o manga apo o ka, a so Tohan o Ibrahim, so Iskak, ago so Yakob.' Na
tiyabad si Mosa sa kalek na da den makaraw i ba niyan ilaya.
33 “Pitero on o Kadnan a 'Pokasa ngka on so manga tinilas ka, ka so darpa a katitindegan
ka na soti a lopa.
34 Miyailay aken den so kaperarasaya ko manga pagtaw aken a ndodoo sa Misir ago
miyaneg aken so kapeperego iran, na miyanog ako ka sebeten ko siran. Na, ika roo den
imanto, ka sogoon ko seka roo sa Misir.'
35 “Giyai si Mosa a inipewal o manga Israil ko kiyateroa iran on sa 'Antawaa i tomiyoro
reka a olowan ami ago pengokom rekami.' Sekaniyan i siyogo kiran o Allah a olowan ago
pepanabet a nggolalan ko malaikat a mipeyag on sii ko pekedeg a paket.
36 Sekaniyan i minakoda kiran sii ko kiyaawa iran sa Misir a di sekaniyan dii nggolaola
sa manga piyakamemesa ago manga nanao roo sa Misir, ago sii ko Mariga a Ragat, ago
sii ko mitataog a kaden ko soled o pat polo ragon.
37 Giyai si Mosa a mitero ko manga Israil sa 'Nggemawan kano o Allah sa nabi a datar
aken a poon ko bangsa niyo.'
38 Ndodoo sekaniyan ko manga Israil a miyalimod roo ko mitataog a kaden, a rakes o
manga apo tano ago so malaikat a miyakimbitiyarai ron ko Palaw a Sinay. Na initoron
rekaniyan so pepangoyag a manga katero a misampay niyan rektano.
39 “Ogaid na so manga apo tano na minda siran o ba iran pamakinega si Mosa, ka
tiyalikodan iran baden ago miyasingayo iran a kakesoy iran sa Misir.
40 Pitero iran ki Aron a 'Mbaalen kami ngka sa manga barahala a makapengonaan
rekami, ka di ami katawan o antonaa i miyasowasowa angkoto a mama a si Mosa a miwit
rekami sii a poon sa Misir.'
41 Na giyoto a mimbaal siran sa barahala sa bontal a nati a sapi na siyapaatan iran sa
manga korban, na mipekaradiyaan siran a di ran dii selaselaan so pimbaalan iran.
42 Ogaid na tiyalikodan siran o Allah ago piyalad iyan siran ko kapepamanimba sa manga
pamimitoonen roo sa langit, a so den so misosorat ko Sorat o manga Nabi:
'Hey manga taw sa Israil,

ba saken i di niyo dii korbanan ago pesepaatan sa manga ayam
sii ko soled o pat polo ragon ko mitataog a kaden?
43 Kena, ka pepegawidan iyo baden so barombarong a pesimbaan ko barahala a si Molok,
na ipetelon iyo so bitoon o katohanan iyo a si Ripan;
ka giyanan na manga barahala a pimbaalan iyo kaan iyo masimba.
Kagiya ka maoto na iteog aken sekano sa onaan a inged a Babilon.'
44 “Roo ko mitataog a kaden na aawidan o manga apo tano so Barombarong a ndodon so

Kapasadan. Pimbaalan ai a datar o miyatero o Allah ki Mosa a ipepasod ko ladiyawan a
piyakiilay niyan on.
45 Initenan angkoto a barombarong ko manga apo tano. Na pepegawidan iran ai sii ko
kapegonot iran ki Yosowa isako maagaw iran so lopa o manga nasiyon a piyamogaw o
Allah sii ko kapepagantap iran on. Na ndodoo den angkoto a barombarong taman ko masa
i Daod.
46 “Inikalimo o Allah si Daod na piyangni niyan ko Allah a makambalay sa mbalingan o
Tohan o Yakob,
47 Ogaid na aya miyakambalay sii na si Solaiman.
48 Ogaid na so Lebi a Maporo na di mbaling ko manga walay a pimbaalan o manga
manosiya. Ka pitero o nabi a
49'So kasorgaan na aya ko korsi,' a tig o Kadnan,

'na so doniya na aya ko kadadapoan.
Antonaa walay i mapembalay niyo para raken?
Anda i darpa a ndekean aken?
50 Ba kena a saken i mimbaal sangkai a langon taman?'
51 “Manga tetegas kano i olo! Pekekapir so manga poso niyo na di kano pemakineg ko
tito a benar! Datar kano bo o manga apo iyo; lalayon iyo pesopaken so Soti a Roh!
52 Ba aden a isa bo a nabi a da satroa o manga apo iyo? Piyamono iran so siran oto a
miyakaalamat ko kapekaoma o Maontol a Siyogo, a so Al Masih, na miyabaloy kano
imanto a miyamakatipo ron ago miyamamono.
53 Sekano i kiyatoronan ko Kitab a nggolalan ko manga malaikat, ogaid na da niyo
tomana!"
Riyobak a Ator si Istiban
54 Sii ko kapepamakinega o manga pangongokom ki Istiban na tanto siran a

kiyararangitan a di ran dii pakakitebaan a ngipen iran sa gani.
55 Ogaid na si Istiban a sesenepen a Soti a Roh na lomiyangag sa langit na miyailay niyan
so tihaya o Allah ago si Isa a tomitindeg ko kawanan o Allah.
56 Tig iyan a "Ilaya niyo man ka pegilain ko so kasorgaan a kalelekaan ago so Wata o
Manosiya a tomitindeg ko kawanan Allah!"
57 So kiyanega iran sii na milalalis siran sa matanog na siyapengan iran a manga tangila
iran. Na mirengarengan siran gomampan ki Istiban
58 Na pitonda iran roo ko liyo a siti na riyobakan iran a manga ator. Na so manga peseksi
sii na inipametad iran so manga gerab iran ko danga o mangoda a aya ngaran iyan na si
Saolo kaan iyan maipat.
59 Sii ko kaperobaki iran ki Istiban na miyangangarapan sekaniyan a tig iyan a "Hey
Kadnan a Isa, tarimaa ngka so niyawa ko!"
60 Na somiyodiyod na milalis sebenar a tig iyan a "Kadnan, di ngka kiran pekiakon
angkai a dosa!" Na kagiya matero iyan ai na miyatay.
MANGA GALEBEK 8
Si Saolo na miyakaayon ko kiyabonoa iran on.
Siyatro i Saolo so Agama
Sii den sangkoto a gawii na kiyapoonan den a maregen a kapesetroa ko Agama sii sa
Yarosalim, na palaya siran a liyo ron so manga siyogo, na miyakambelabelag ko
mbalabala sii ko manga probinsiya a Yodiya ago giya Samariya.
2 Aden a baraamal a manga mama a inilebeng iran si Istiban na tanto iran a inimboko so
kiyapatay niyan.
3 Si Saolo na piyanamaran iyan a kambinasaa niyan ko Agama. Piyanoledan iyan so
manga walay ran na pindadakep iyan so miyamaratiyaya a manga mama ago manga babay
na piyangalaboso niyan siran.
Piyakalangkap so Mapiya a Totol roo sa Samariya
4 So miyamaratiyaya a miyakambelabelag na lomiyalakaw ko mbarambarang a manga

inged a pepamakalangkapen iran so Mapiya a Totol.
5 Si Pilipi na somiyong ko isa a siti sa Samariya na piyakitokawan iyan kiran so
makapantag ko Al Masih.
6 Kagiya maneg ai o madakel a taw ago mailay iran so piyakamemesa a manga nanao a
dii nggolaolaan i Pilipi na palaya siran pepamakineg piyapiya ko di niyan dii teroon.
7 Ka madakel a manga saitan a mililiyo ko kisosookan a dii melalalis sa matanog, na
madakel a mapaparalais a lawas iyan ago manga lepo a miyapakapiya.
8 Kagiya ka maoto na tanto siran a miyababaya sangkoto a siti.
Si Simon a Pangangatao
9 Sii sangkoto a siti na aden a mababaling on a mama, a si Simon, a gowani na

ipepememesa sekaniyan o manga taw sa Samariya sabap ko salamangka iyan, na di
sekaniyan dii tekabor sa mala a taw.
10 Na so langon a taw a mababa ago mala na miyaratiyaya rekaniyan a tig iran a
"Sekaniyan so kabatowa o Allah a bebetowan sa 'Mala a Kabatowa.' "
11 Pepamangonot siran on ka kagiya miyatey den na ipepememesa iran sekaniyan sabap
ko di niyan dii kaselamangka.
12 Ogaid na kagiya paratiyayaan iran so Mapiya a Totol a piyakalangkap i Pilipi
makapantag ko Ndatoan o Allah ago so ingaran i Isa Al Masih na piyanalawatan siran a
manga mama ago manga babay.
13 Apiya si Simon na miyaratiyaya mambo, na kagiya kasalawatan na miyagonotonot ki
Pilipi a miyamemesa ko kapekeilaya niyan ko manga nanao ago manga ala i kabatowa a
galebek a dii manggolaola.
14 Kagiya maneg o manga siyogo sa Yarosalim a tomiyarima so manga taw sa Samariya
ko katero o Allah na piyakasong iran kiran si Pidro ago si Yahiya.
15 Kagiya makaoma siran na inipangangarapan iran so pepamaratiyaya kaan iran
matarima so Soti a Roh,
16 Ka da pen mitemo so Roh ko apiya isa kiran bo, ka kiyasalawatan siran baden sii ko
ingaran o Kadnan a Isa.
17 Na si Pidro ago si Yahiya na inipanapenet iran kiran a manga lima iran na miyatarima
iran so Soti a Roh.
18 Kagiya mailay i Simon a inipamegay kiran so Roh ko kinidapeneten o manga siyogo
ko manga lima iran na peladan iyan siran sa pirak a tig iyan a
19 “Begi ako ngka mambo sangkai a kapaar kaan so apiya antawaa i dapenetan aken sa
lima na makatarima ko Soti a Roh."
20 Ogaid na Pitero on i Pidro a "Mabinasa ka a rakes o pirak ka sabap ko pamikiran ka sa
mapemasa ngka so pamemegayan o Allah!
21 Da a labet ka o di na bagian sangkai a galebek, ka kena a ba maontol so poso o ka sii
ko kapegilaya on o Allah.
22 Na teobata ngka ngkai a marata a kadiyat ka na pangangarapan ka ko Kadnan, ka o ba
ka niyan karilai ko kiyapamikira ngka sii.
23 Ka siyabot aken a tanto ka a mariit ago mapapatong o dosa."
24 Tig i Simon a "Pangnin ako niyo ko Kadnan kaan da den a isa bo a mitalingoma raken
ko pitero iyo!"
25 Oriyan o kiyapakaseksi i Pidro ago si Yahiya ago so kinipangosiyaten iran ko katero o
Kadnan na komiyasoy siran bo sa Yarosalim, na piyakalangkap iran pen so Mapiya a
Totol ko madakel a manga inged o manga Isamariyan.
Si Pilipi ago so Opisiyal a taw sa Itiyopiya
26 So isa a malaikat o Kadnan na pitero iyan ki Pilipi a "Ika roo den, na song ka sa
tampar sa pagabagatan roo ko lalan a ipoon sa Yarosalim a ipesong sa Gasa." Giyanan na
disirto.
27 Na gomiyanat si Pilipi na somiyong roo den. Sii ko kapelalakaw niyan na miyailay
niyan so isa a mama a taw sa Itiyopiya. Sekaniyan na kiyapon a mala i kipantag a
sanasanaan o Kandasi a Bai sa Itiyopiya, ka komikibir ko langon a tamok iyan.
Miyakasong sekaniyan sa Yarosalim ka sominimba
28 Na pembaling a mageeda sa karo a pembatiyaan iyan so Kitab a inisorat o Nabi Isayas.
29 Pitero o Roh ki Pilipi a "Songowi ngka ngkoto a karo na onot ka on."
30 Na miyalalagoy ron si Pilipi na miyaneg iyan so mama a pembatiya ko Sorat o Nabi
Isayas. Na tig i Pilipi a "Peseboten ka so pembatiyaan ka?"
31 Tig iyan a "Andamanaya i kakesabota ko ron o da a makapangendao raken on?" Na
biyoyo iyan si Pilipi a mageda ko karo kaan makaontod ko obay niyan.
32 So sabaad ko Kitab a pembtiyaan iyan na giyai:
"Inagak sekaniyan a datar o bilibili ko penombalian on;

na datar o nati a bilibili a da den oni ko hadapan o magopaw ron
na da den a ba niyan miyatero apiya sataga bo.
33 Piyakakeya sekaniyan, na lipas on so ontol a kokoman.
Da a ba makapenotol makapantag ko kebabadan on
ka kiyadaan den sa kaoyagoyag sii sa doniya."
34 Pitero o sanasanaan ki Pilipi a "Teroa ngka raken o antawaa i dii teroon o nabi sangkai
a Kitab. Ba giya ginawa niyan o di na salakaw a taw?"
35 Giyoto a piyagosay rekaniyan i Pilipi so Mapiya a Totol makapantag ki Isa a ipoon
sangkai a sabaad ko Kitab.
36 Sii ko kapendayon iran ko lalan na miyaoma iran so isa a darpa a aden a ig on. Pitero o
sanasanaan a "Ilaya ngka; kataya so ig. Ino ako di kesalawati?"
38 Na piyakatareg iyan so karo na tomipad siran na somiyosaw siran a dowa ko ig na
siyalawatan i Pilipi so sanasanaan.
39 Kagiya makambaton siran na so Roh o Kadnan na somiyayab iyan si Pilipi na da
sekaniyan den mailay o sanasanaan. Ogaid na tomiyaros lomalakaw so sanasanaan a tanto
a mababaya.
40 Si peman si Pilipi na miyainengka iyan a sisii sekaniyan sa inged a Asoto, na
piyakalangkap iyan so Mapiya a Totol ko langon a minipanagad iyan a inged taman sa
miyakaoma sekaniyan sa Kaisariya.
MANGA GALEBEK 9
So Kiyateklid i Saolo
Sii sangkoto a masa na itataros den i Saolo so kapepangangaleka niyan ko manga

pepangongonotan ko Kadnan sa kapemonoa niyan kiran. Somiyong sekaniyan ko maporo
a imam
2 Na miyangni ron sa manga sorat a pekikilala rekaniyan roo ko manga sinagoga sa
Damasko kaan amay ka ana matoon iyan roo a pepangongonotan ko Lalan o Kadnan a
mama ago babay na petongen iyan siran na pagowiten iyan sa Yarosalim.
3 Sii ko kapelalakaw i Saolo a pepekarani sa Damasko na minitekaw a aden a sindaw a
poon sa langit a sominindaw ko melilibeta rekaniyan.
4 Miyaoteng sekaniyan sa lopa na miyakaneg iyan sa sowara a tig iyan a "Saolo, Saolo,
ino ako ngka pesetroa?"
5 “Antawaa ka, Kadnan?" a iniise iyan.
Somimbag so sowara a "Saken si Isa a pesetroon ka.
6 Tindeg ka na soled ka ko siti, ka roo reka mapetero so disomala a penggolaolaan ka."
7 So manga mama a ped iyan ko kapelalakaw niyan na miyamakatareg a da siran den
makatetaro, ka miyaneg iran so sowara ogaid na da a ba iran pekeilay a taw.
8 Mimbangon si Saolo na kagiya mabekar a manga mata niyan na di sekaniyan den
pekailay. Sabap san na tiyayongan iran si Saolo sa lima ago inagak iran a inowit iran sa
Damasko.
9 Miyakatelo den gawii a da niyan kapakanono, na da den kan ago da inom.
10 Roo sa Damasko na aden a peparatiyaya a aya ngaran iyan na si Ananiyas. Na
nggolalan ko pangingilain na pitero on o Kadnan a "Hey Ananiyas."
Tig iyan a "Katii ako bo, Kadnan."
11 Tig o Kadnan a "Song ka ko lalan a bebetowan sa Matito, na sii ko walay i Yodas na
pangingiseen ka roo so taw a poon sa Tarso a aya ngaran iyan na si Saolo, ka
pepangangarapan sekaniyan.
12 Sii ko pangingilain na miyailay i Saolo a aden a miyakaoma on a mama a aya ngaran
iyan na si Ananiyas a inidapenet iyan on a manga lima niyan kaan makailay peroman."
13 Somimbag si Ananiyas a "Kadnan, madakel a miyakatero raken makapantag sangkoto
a mama ago so manga rarata a pinggolaola niyan ko manga pagtaw ngka sa Yarosalim.
14 Na somiyong sekaniyan sii a bigan o manga poporo a imam sa kapaar sa kandakepa
niyan ko langon a pepangangarapan ko ingaran ka."
15 Ogaid na pitero o Kadnan ki Ananiyas a "Song ka roo den ka pinili aken sekaniyan a
makapanalagad raken sa kapakitokawi niyan ko ingaran aken ko kena a ba manga
Yahodi, ago sii ko manga dato, ago sii ko manga taw sa Israil.
16 Na pekiilay aken rekaniyan i kala o disomala a kakerasay niyan sabap ko ingaran
aken."
17 Na somiyong si Ananiyas sangkoto a walay na somiyoled on, na inidapenet iyan a
manga lima niyan ki Saolo a tig iyan a "Saolo, pagari ko, so Kadnan i somiyogo raken.
Sekaniyan si Isa a miyakimasa reka roo ko lalan sii ko kapesong ka sii. Siyogo ako niyan
kaan ka makailay peroman ago an ka masenep o Soti a Roh."
18 Sakotika na aden a miyanga oolog a datar o nap a poon ko manga mata i Saolo na
miyakailay peroman. Na tominindeg sekaniyan ago siyalawatan,
19 Na kagiya makakan na miyakabager.
Miyangosiyat si Saolo roo sa Damasko
Tomiyareg si Saolo roo sa Damasko sa miyamakapira gawii a ped o manga peparatiyaya.

20 Somiyong sekaniyan somambot ko manga sinagoga na piyakalangkap iyan a si Isa na
so Wata o Allah.
21 Miyamemesa so langon a miyakaneg rekaniyan a tig iran a "Ba di sekaniyan so mama
a somiyatro ko manga pepangongonotan ki Isa roo sa Yarosalim? Ba kena a somiyong sii
sa kandakepa niyan kiran kaan iyan mawit ko manga poporo a imam?"
22 Ogaid na baden pepekala so kapasang i Saolo ko kapepakiilain iyan sa si Isa na aya
den so Al Masih. Sabap sii na da sekaniyan masembag o manga Yahodi a kibabaling sa
Damasko.
23 Kagiya malo den matey na pikediyat o manga Yahodi a kambonoa iran ki Saolo
24 Ogaid na kiyatokawan ai i Saolo. Gagawii daondao na pepagipaten iran so manga
gimowa ko siti kaan iran mabono.
25 Sabap san na miyakaisa a gagawii na kinowa sekaniyan o manga morit iyan na
inalogan iran a tatagoon ko mala a reban a poon ko poro o pangeleban o siti.
Si Saolo sii sa Yarosalim
26 Kagiya makaoma si Saolo sa Yarosalim na miyanabenar sa kapangeped iyan ko

miyamaratiyaya, ogaid na langon iran sekaniyan ipekelek ka da siran pangimbenar a ba
sekaniyan miyakaparatiyaya.
27 Ogaid na inogopan sekaniyan i Barnabas, ka inowit iyan si Saolo ko manga siyogo na
piyanotol kiran i Barnabas so makapantag ko kiyailaya i Saolo ko Kadnan roo ko lalan,
ago so kiyapakimbitiyarai ron o Kadnan, ago so kawaraw niyan ko kapepangosiyat iyan
sii ko ingaran i Isa roo sa Damasko.
28 Sabap roo na tomiyapi kiran si Saolo, na miyagenebeneb sekaniyan sa dalem a
Yarosalim a da a kalek iyan ko kapepangosiyat iyan sii ko ingaran o Kadnan.
29 Miyakimbitiyarai sekaniyan mambo ago miyakindadoawai ko manga Yahodi a Grigo i
basa, ogaid na mimbabanog siran sa okit a kambonoa iran on.
30 Kagiya katokawan ai o magariyari na inowit iran si Saolo sa Kaisariya na piyakasong
iran sa Tarso.
31 Sa masa oto na lomilintad so langon a manga Agama sa dalem a Yodiya, Galili ago
giya Samariya. Pepangosor siran ago pepekadakel a nggolalan ko kapegogopi kiran o Soti
a Roh sii ko kapepaginetaw iran a manga aaleken ko Kadnan.
Si Pidro roo sa Lida ago sa Yopa
32 Si peman si Pidro na sii ko kapelalakaw niyan sa mbalabala na somiyong sa Lida ka

imbentel iyan so manga kaom o Allah a kibabaling roo.
33 Miyaoma niyan roo so sakataw a mama a aya ngaran iyan na si Ainiyas a mapaparalais
so lawas iyan, na sii ko soled o walo ragon na da den makambowat ko igaan iyan.
34 Pitero on i Pidro a "Ainiyas, pekabageren ka imanto i Isa Al Masih. Mbowat ka na
timoa ngka so igaan ka!" Na sarta a mimbowat si Ainiyas.
35 Miyailay sekaniyan o langon a kibabaling sa Lida ago giya Saron na miyananangoran
siran ko Kadnan.
36 Sii sa Yopa na aden a babay ron a peparatiyaya, a si Tabita, (sii ko basa a Grigo na
Dorkas, a aya maana niyan na saladeng). Lalayon dii nggolaola sa manga pipiya a galebek
ago pegogopan iyan so manga miskin.
37 Sii sangkoto a manga gawii na miyasakit sekaniyan na miyatay. Kagiya marigo so
badan iyan na liyantang iran ko isa a rowang roo sa poro.
38 Giya inged a Yopa na marani sa Lida, na kagiya maneg o pepamaratiyaya sa Yopa a
ndodoo si Pidro sa Lida na somiyogo siran on sa dowa kataw a mama kaan iran mapangni
ki Pidro a "Song ka rekami nggagaan."
39 Giyoto a miyonot kiran si Pidro, na kagiya makaoma roo na inowit iran ko rowang sa
poro. Langon a miyanga babalo roo a babay na lilibeten iran si Pidro a dii nggogoraok na
piyakiilay iran on so manga gerab ago ped a manga nditaren a pimbaalan i Dorkas isako
oyagoyag pen.
40 Piyamakaliyo siran langon i Pidro na somiyodiyod sekaniyan ago miyangangarapan.
Siyangoran iyan so bangkay a tig iyan a "Hey Tabita, mbowat ka!" Na bikar iyan a manga
mata niyan na kagiya mailay niyan si Pidro na mimbowat.
41 Kiyapetan i Pidro so lima niyan na piyakatindeg iyan, na tiyawag iyan so
pepamaratiyaya ago so manga balo na piyalad iyan kiran si Dorkas a oyagoyag.
42 Kiyatokawan ai sa dalem a Yopa, na madakel a miyaratiyaya ko Kadnan.
43 Malo miyatey a kiyatareg i Pidro sa Yopa sii ko mama a iningaranan sa Simon a
pagagalebek sa kobal.
MANGA GALEBEK 10
Tiyawag i Korniliyo si Pidro
Sii sa Kaisariya na aden a sakataw ron a mama a aya ngaran iyan na si Korniliyo a olowan
o manga sondaro a bebetowan sa Kompaniya o manga Italiyano.
2 Baraamal sekaniyan a mama ago maaleken ko Allah a rakes o langon o pamiliya niyan.
Mala a pekitabang iyan ko manga Yahodi na lalayon sekaniyan pepangangarapan ko
Allah.
3 Miyakaisa a gawii sa manga alas tris sa magabi na miyakailay sekaniyan sa
pangingilain, na kiyamasaan iyan so isa a malaikat o Allah a miyobay rekaniyan a tig iyan
a "Korniliyo!"
4 Tintengan i Korniliyo a tanto a pekelek na tig iyan a "Antonaa, Sir?"
Somimbag so malaikat a "So manga pangangarapan ka ago so manga galebek ka a
kapangalinggagaw na tiyarima o Allah a ipetoos iyan reka.
5 Imanto na sogo ka sa manga mama sa Yopa na pakikowaan ka kiran si Simon a
bebetowan sa Pidro.
6 Ndodoo sekaniyan bobolos ko walay i Simon a pagagalebek sa kobal sa kilid a ragat."
7 Kagiya mawa roo so malaikat a miyakimbitiyarai ron na tiyawag i Korniliyo so dowa
kataw ko talasogoay niyan ago isa a baraamal a sondaro ko manga sanasanaan iyan.
8 Piyanotol iyan kiran so langon a miyaolaola na piyakasong iyan siran sa Yopa.
So Pangingilain i Pidro
9 Sii ko tomiyalondog a gawii sii ko kapepekarani o manga siyogo i Korniliyo sa Yopa na

miyanik si Pidro ko mapapantar a atep o walay ka pengangarapan. Kagiya maoto a
alongan
10 Na miyaor sekaniyan ago kebaya koman, na sii ko dii katiyagara ko pangenengken na
datar o ba mitetaginep sekaniyan.
11 Miyailay niyan a kiyalekaan a langit, na poon roo na aden a pekitana a datar o mala a
dinis a pekealogan ko lopa a mabibitin so pat a rogo niyan.
12 Sii ko soled iyan na ndodon so langon o pitibarangan a karam a manga papanok ago
manga iila a binatang a pelalakaw ago pemanola.
13 Na aden a miyaneg iyan a sowara a tig iyan a "Ganat ka, Pidro. Sombali ka on na kan
ka on."
14 Tig i Pidro a "Di ako, Kadnan! Da ako den makakan sa apiya antonaa a karam o di na
di malolompiyo."
15 Mitero peroman so sowara a tig iyan a "Di ngka mbilangen a karam so linimpiyowan o
Allah."
16 Miyakatelo ai manggolaola, na sarta den a minikasoy so dinis sa langit.
17 Sii ko dii kapamimikirana i Pidro so maana o pangingilain a miyailay niyan na
miyakaoma so manga mama a siyogo i Korniliyo ka miyatoon iran so walay i Simon na
ndodoo siran ko pintoan.
18 Miyananalo siran ago miyangingise o ba sii bobolos si Simon a bebetowan sa Pidro.
19 Pepemasaken pen i Pidro so maana o pangingilain kagiya teroon rekaniyan o Roh a
"Aden a telo a mama a di reka dii mbabanog.
20 Panog ka nggagaan na onot ka kiran. Di ka den pendowadowa na saken i somiyogo
kiran."
21 Miyanog si Pidro na pitero iyan ko manga mama a "Saken so pepangilobaan iyo. Ino
kano sii song?"
22 Somimbag siran a "Piyakasong kami sii o Kapitan Korniliyo. Maontol sekaniyan a
mama a maaleken ko Allah ago pagaadatan o langon a Yahodi. Iniinsarat on o isa a soti a
malaikat a pekisongowan ka niyan kaan ka makasong ko walay niyan kaan iyan maneg so
peteroon ka."
23 Na piyakabolos i Pidro so manga mama na roo niyan siran piyakatorog sangkoto a
kagagawii.
Kagiya mapita na miyonot kiran si Pidro na miyonot on mambo so ped ko manga
magariyari sa Yopa.
24 Sii ko ikadowa gawii na miyakaoma siran sa Kaisariya, na mananayaw siran i
Korniliyo a ped iyan so manga tonganay niyan ago manga dadaseg a ginawai niyan a
piyamantowan iyan.
25 Sii den ko kapekasoled i Pidro ko walay na inalaw sekaniyan i Korniliyo na siyododan
iyan si Pidro ka simbaan iyan.
26 Ogaid na biyowat sekaniyan i Pidro a tig iyan a "Tindeg ka, ka matag ako manosiya."
27 Na di siran dii mbitiyarai sii ko kapesoled iran ko walay, na miyailay i Pidro so
madakel a manga taw a malilimod roo.
28 Na pitero iyan kiran a "Katawan iyo a so taw a Yahodi na inisapar o agama niyan so
kapakipagepeda iyan ko kena a ba Yahodi, o di na apiya so kibentelen iyan on. Ogaid na
miyapayag raken o Allah a di patot o ba aken mbilangen so apiya antawaa a di soti o di na
pekakaram.
29 Sabap san na sii ko kiyapakisongowi niyo raken na da ako ndowadowa sa kiyasong
aken sii. Na ipagise aken rekano o ino ako niyo pekisongowi?"
30 Somimbag si Korniliyo a "Sii ko datar ai a oras a manga alas tris sa magabi sa
miyakapat den ai gawii na pepangangarapan ako sii ko walay aken na minitekaw a aden a
mama a miyakatindeg ko hadapan ko a ndiditar sa masigay.
31 Pitero iyan raken a 'Korniliyo, inampon o Allah so kapepangangarapan ka, na
kiyatanodan iyan so manga galebek ka a kapangalinggagaw.
32 Na, pakisongowi ngka roo sa Yopa si Simon a bebetowan sa Pidro. Roo sekaniyan
kakaden ko walay i Simon a pagagalebek sa kobal a mababaling sa kilid a ragat."
33 So kiyanega ko saya na piyakisongowan ko seka somambot, na mapiya so kiyasong ka
sii. Imanto na sisii kami langon sii ko hadapan o Allah ka pemakinegen ami so langon a
inisogo reka o Kadnan a peteroon ka."
So Osiyat i Pidro sii ko Walay i Korniliyo
34 Na mitero si Pidro a tig iyan a "Miyakilala ko imanto a mataan den a da a ba

peramiramigan o Allah
35 Ka so taw a maaleken on ago dii nggolaola sa maontol na terimaan iyan a apiya
antonaa i bangsa niyan.
36 Katawan iyo so katero a piyakisampay niyan ko manga taw sa Israil, ka piyakalangkap
iyan kiran so Mapiya a Totol makapantag ko kalilintad a nggolalan ki Isa Al Masih a aya
Kadnan o kalangolangon.
37 Katawan iyo so manga miyaolaola ko mbalabala sa dalem a Yodiya; mipoon ai sa
Galili oriyan o kiyapangosiyat i Yahiya ko kasalawat.
38 Katawan iyo so makapantag ki Isa a Taw sa Nasarit a inidinan o Allah sa Soti a Roh
ago kabatowa. Miyagenebeneb sekaniyan ko mbalabala a dii nggolaola sa mapiya ago
pepamakapiyaan iyan so langon a pepegesen o Iblis, ka mipageepeda iyan so Allah.
39 “Manga saksi kami ko langon a pinggolaola niyan sii ko inged o manga Yahodi ago sii
sa Yarosalim. Na biyono iran ko kiyatotoka iran on ko kros.
40 Ogaid na inoyag bo o Allah sii ko ikatelo gawii na pipero niyan ko manga taw a
kiyailaya iran rekaniyan
41 A kena a ba sii ko langon a taw ka sekami bo a manga saksi a piyamili gowani o
Allah. Miyakapagatoang kami ko kiyakan iyan ago kiyainom iyan oriyan o kiyaoyaga on a
poon ko miyamatay.
42 Na siyogo kami niyan sa kapengosiyati ami ko manga taw ago so kapemataani ami sa
sekaniyan i initoro o Allah a pekakokom ko manga oyagoyag ago so miyamatay.
43 Sekaniyan i kiyaseksian o langon o manga nabi ko kiyateroa iran sa 'So langon a
peparatiyaya rekaniyan na kerilaan ko manga dosa iran a nggolalan ko ingaran iyan."
Miyatarima so kena a ba manga Yahodi so Soti a Roh
44 Sii ko di pen dii katero i Pidro na minitemo so Soti a Roh ko langon a dii ron
mamakineg.
45 Na miyamamesa so manga Yahodi a miyamaratiyaya a miyakaonot ki Pidro ka so
pamemegayan o Allah, a so Soti a Roh, na inibegay mambo ko manga taw a kena a ba
Yahodi.
46 Ka miyaneg iran siran a dii tetaro sa mibibida a manga basa ago pembantogen iran so
Allah. Na pitero i Pidro a
47 “Giyangkai a manga taw na miyatarima iran so Soti a Roh a datar ami. Ba aden a
pekasapar sa kaselawati kiran sii ko ig?"
48 Na inisogo iyan a selawatan siran sii ko ingaran i Isa Al Masih. Oriyan oto na inakol
iran ki Pidro a komaden kiran pasin sa mamakapira gawii.
MANGA GALEBEK 11
So Kabasa i Pidro ko Agama sa Yarosalim
So manga siyogo ago so magariyari sa dalem a Yodiya na miyaneg iran a so kena a ba

manga Yahodi na tiyarima iran mambo so katero o Allah.
2 Na kagiya makakasoy si Pidro sa Yarosalim na diyaway sekaniyan o manga Yahodi a
miyamaratiyaya.
3 Pitero iran a "Somiyoled ka ko walay o di tano royod a manga taw a da manga totori na
miyakipagatoang ka kiran pen!"
4 Na piyanotol kiran i Pidro so langon a miyanggolaola a ipoon den sa poonan a tig iyan a
5 “Sii ko kapepangangarapan aken roo sa siti a Yopa na datar ako o mitetaginep, na
miyakailay ako sa pangingilain. Miyailay aken so datar o mala a dinis a pekealogan a
poon sa langit a mabibitin so pat a rogo niyan, na miniobay raken.
6 Piyariksa aken so kikatatago on na miyailay aken so manga iila a binatang a pelalakaw
ago pemanola, ago so manga papanok.
7 Miyaneg aken a sowara a tig iyan a 'Tindeg ka, Pidro. Sombali ka on na kan ka on.'
8 “Pitero aken a 'Di ako, Kadnan! Da ako den makataam sa karam o di na di
malolompiyo.'
9 “Mitero peroman so sowara a poon sa langit a tig iyan a 'Di ngka mbilangen a karam so
linimpiyowan o Allah.'
10 “Miyakatelo ai manggolaola; oriyan oto na minikasoy so langon ai sa langit.
11 Sii den sangkoto a oras na telo kataw a mama a siyogo raken a poon sa Kaisariya na
miyakaoma ko walay a gegenekan ko.
12 So Roh na pitero iyan raken a magonot ako kiran sa da den a kandowadowa. Miyonot
raken mambo angkai a nem kataw a magariyari, na miyolos kami ko walay i Korniliyo.
13 Piyanotol iyan rekami so kiyailaya niyan ko malaikat a miyakatindeg ko walay niyan a
tig iyan a 'Pakisongowi ngka sa Yopa si Simon a bebetowan sa Pidro
14 A petero reka sa manga katero a ron makapenggolalan a kakesabeta reka ago so langon
a taw ko walay ngka.'
15 “Na kagiya poon ako tero na minitemo kiran so Soti a Roh a datar o kinitemon iyan
rektano isako paganay.
16 Na kiyatademan aken so pitero o Kadnan a tig iyan a 'Si Yahiya na aya inipanalawat
iyan na ig ogaid na aya iselawat rekano na so Soti a Roh.'
17 Na miyakilala aken a so pamemegayan a inibegay kiran o Allah na datar mambo o
inibegay niyan rektano ko kiyaparatiyayaa tano ko Kadnan a Isa Al Masih. Kagiya ka
maoto na antawaa ako a pekabangen ko Allah?"
18 Kagiya maneg iran ai na da den a ped a kipawal iran ki Pidro, na biyantog iran so
Allah a tig iran a "Apiya so kena a ba manga Yahodi na miyapero kiran o Allah a
katalikodi ran ko manga dosa iran kaan iran matarima so kaoyagoyag!"
So Agama roo sa Antiyokiya
19 So peman so pepamaratiyaya a miyakambelabelag sabap ko kiyasatroa kiran isako

mabono si Istiban na milalalakaw sa taman sa Ponisiya, Sipri ago giya Antiyokiya, na so
bo so manga Yahodi i pepangosiyatan iran.
20 Ogaid na so ped kiran a manga taw sa Sipri ago Sirini na kagiya makaoma siran sa
Antiyokiya na piyangosiyatan iran pen so kena a ba manga Yahodi na piyakalangkap iran
kiran so Mapiya a Totol makapantag ko Kadnan a Isa.
21 Sisii kiran so kapaar o Allah na madakel a miyamaratiyaya ago miyananangoran ko
Kadnan.
22 So totol makapantag sii na minisampay ko Agama sa Yarosalim, na piyakasong iran si
Barnabas sa Antiyokiya.
23 Kagiya makaoma sekaniyan roo ago kagiya mailay niyan so kipekelimoon o Allah ko
manga taw na miyababaya sekaniyan, na piyamando iyan siran langon a pangongonotan
siran ko Kadnan sa iklas ko poso ran.
24 Mapiya a mama si Barnabas a sesenepen a Soti a Roh ago mala i paratiyaya, na
madakel a manga taw a minioman ko pepamaratiyaya ko Kadnan.
25 Sa masa oto na somiyong si Barnabas sa Tarso ka pembabanogen iyan si Saolo.
26 Kagiya matoon iyan si Saolo na inowit iyan sa Antiyokiya. Na sii ko soled o saragon
na pepangeped siran ko dii katimotimo o manga magaagama, na madakel a taw a
piyamangendao iran. Sii sa Antiyokiya na ron so paganay a kiyabetowi ko manga
peparatiyaya sa manga Kristiyano.
27 Sii sangkoto a masa na aden a mana nabi a miyamanong sa Antiyokiya a poon sa
Yarosalim.
28 Tominindeg so isa kiran a aya ngaran iyan na si Agabo na nggolalan ko Roh na
inalamat iyan a magaan den mitalingoma so mala a taon sa dalem a doniya.
(Minitalingoma den ai sii ko kandadato i Kladiyo.)
29 Na miyapamikir o pepamaratiyaya roo sa Antiyokiya a imbegay o oman i isa kiran so
kegaga niyan a pirak a itebang ko magariyari a kibabaling sa Yodiya.
30 Pinggolaola iran ai, na inipakawit iran so pirak ko manga pelokelokesen ko Agama sa
Yarosalim a nggolalan ki Barnabas ago si Saolo.
MANGA GALEBEK 12
Ped Pen a manga Kasatroan
Sa masa oto na pipoonan o Dato Hirod a kapesetroa niyan ko ped ko magaagama.

2 Piyakibono iyan a pedang si Santiyago a pagari i Yahiya.
3 Kagiya mailay niyan a inikasoat ai o manga Yahodi na taros a piyakidakep iyan si
Pidro. Kapapantagan oto so Pista ko Kakan sa Paan a da a Tapay ron.
4 Kagiya pakidakep iyan si Pidro na kiyalaboso niyan ago piyakinggordiyaan iyan ko pat
lompok a sondaro a pepat kataw oman i salompok. Aya takdir i Hirod na so kasomariyaa
niyan on ko kamamasaan o manga taw amay ka mapopos so Paska.
5 Sii ko kakakalaboso i Pidro na so manga magaagama na pepamagiklas siran
mangangarapan ko Allah para ki Pidro.
Biyokaan o Malaikat si Pidro ko Kalaboso
6 Sii ko kagagawii a magaan sekaniyan den mawit i Hirod ko dii kokoman na totorogen si
Pidro a pageeletan o dowa kataw a sondaro. Papatongen sekaniyan a dowa a rantay na
aden pen a nggogordiya on ko pintoan o kalaboso.
7 Minitekaw den a kiyapakagemaw roo o malaikat o Kadnan, na aden a sindaw a
lominiwanag ko kalaboso. Kiyokog o malaikat a waga i Pidro na piyokaw niyan a tig iyan
a "Mbowat ka nggagaan!" Na sarta a miyanga popokas so manga rantay ko lima niyan.
8 Na pitero on o malaikat a "Sembitan ka ago telompa ka." Na pinggolaola ini i Pidro, na
pitero pen o malaikat a "Mbengkala ka na pegonot ka raken."
9 Miyonot on si Pidro lomiyo sa kalaboso ogaid na di niyan katatanodan i ba benar so dii
nggolaolaan o malaikat, ka aya katao niyan on na miyakailay sekaniyan sa pangingilain.
10 Kagiya kasagadan iran so paganay a gordiya ago so ikadowa na miyaoma iran so
pintoan a potaw a isong sa siti. So pintoan na baden kiyalekaan na lominiyo siran ago
tomiyaros lomalakaw ko isaisa a lalan, na sakotika a inawaan o malaikat si Pidro.
11 Kagiya makatanod si Pidro na tig iyan a "Imanto na katawan aken a mataan den a
siyogo raken o Kadnan so malaikat iyan na siyabet ako niyan ko kapaar i Hirod ago so
langon a kebayaan raken nggolaola o manga Yahodi."
12 Kagiya saboten i Pidro so tito a miyasowasowa iyan na somiyong sekaniyan ko walay i
Mariyam a ina i Yahiya a bebetowan sa Marko. Madakel a taw a matitimo roo a
pepangangarapan.
13 Miyanonotok si Pidro ko pintoan sa liyo na somiyong on so babay a talasogoay a
meleka on a aya ngaran iyan na si Roda.
14 Miyakilala niyan so lagam i Pidro na tanto sekaniyan a miyababaya. Na minggagaan
sekaniyan komasoy sa soled a walay a da niyan kalekai so pintoan na piyakitokawan iyan
kiran a tomitindeg si Pidro sa liyo.
15 Pitero iran on a "Pembetengen ka!" Ogaid na piyakaibetibet iyan a benar so di niyan
dii teroon, na inisembag iran a "Giyoto nda so malaikat iyan."
16 Ogaid na itataros den i Pidro a kapepanonotok iyan ko pintoan, na kagiya lekaan iran
na miyailay iran sekaniyan na miyamemesa siran.
17 Initiniyas i Pidro ko lima niyan a rerenek siran, na piyanotol iyan kiran o andamanaya i
kiyapakaliyowa rekaniyan o Kadnan sa kalaboso. Tig iyan pen a "Teroa niyo ai ki
Santiyago ago so magariyari." Oriyan iyan na miyawa sekaniyan roo na somiyong ko
salakaw a darpa.
18 Kagiya mapita na tanto a miyagorigaw so manga sondaro, ka di iran katawan o
antonaa i miyasowasowa i Pidro.
19 Piyakimbabanog sekaniyan i Hirod ogaid na da iran den matoon. Giyoto a
piyangingisean iyan so manga gordiya na inisogo iyan a pemonoon siran. Oriyan oto na
somiyong si Hirod sa Kaisariya a poon sa Yodiya na tomiyareg roo sa malo miyatey.
So Kiyapatay i Hirod
20 Tanto a kiyararangitan i Hirod so manga taw sa Tiro ago sa Sidon. Sabap sii na
somiyong siran ki Hirod ka pengangapinan iran sekaniyan ko kalilintad, ka so inged iran
na sii pepakakowa sa manga pangenengken iran ko inged a ndadatoan i Hirod..
Miningginawai iran si Blasto a so komikibir ko walay i Hirod na inogopan iyan siran.
21 Sii ko miyatendo a gawii na pinditar i Hirod so nditaren a dato na miyontod ko korsi
iyan na mitero sa manga lalag iyan sii ko kamamasaan o madakel a taw.
22 Na milalalis siran a tig iran a "Kena a ba taw so dii tero ka tohan!"
23 Sarta den a siniksa si Hirod o malaikat o Kadnan ka da niyan bantoga so Allah, na
inoled sekaniyan ago miyatay.
24 Midadayon den a kapepakalangkap o katero o Allah.
25 Na kagiya minggolalan i Barnabas ago si Saolo so angin iran na komiyasoy siran a
poon sa Yarosalim, na piyakaonot iran si Yahiya a bebetowan sa Marko.
MANGA GALEBEK 13
Pinili ago Siyogo si Saolo ago si Barnabas
Sii ko Agama sa Antiyokiya na aden a manga nabi ago manga goro a si Barnabas, si
Simiyon a bebetowan sa Nigro, si Losiyo a taw sa Sirini, si Manain a ginawai i
Gobirnador Hirod isako maito siran pen, ago si Saolo.
2 Miyakaisa a gawii ko kapesimba iran ko Kadnan ago di siran dii powasa na pitero o
Soti a Roh a "Senggain iyo si Barnabas ago si Saolo para ko galebek a initawag aken
kiran."
3 Na mipowasa siran ago miyangangarapan, na inipanapenet iran a manga lima iran ki
Barnabas ago si Saolo na piyakalalakaw iran.
Roo sa Sipri
4 Kagiya siyogo siran o Soti a Roh na somiyong si Barnabas ago si Saolo sa Silosiya, na
poon roo na milayalayag siran sa polo a Sipri.
5 Kagiya makaoma siran sa Salamis na piyakalangkap iran so katero o Allah sii ko manga
sinagoga o manga Yahodi. Ped iran si Yahiya Marko a salinggogopa iran.
6 Ineneb iran so dalem angkoto a polo taman sa Papos na roo iran miyatoon so sakataw a
mama a salamangkiro a bebetowan sa Barisa, a Yahodi a dii magomanta sa nabi.
7 Ginawai sekaniyan i Sirgiyo Paolo a so gobirnador ko inged a baraistihad a mama. Na
piyakisongowan o gobirnador si Barnabas ago si Saolo ka kebayaan iyan mamakineg so
katero o Allah.
8 Ogaid na siyopak siran angkoto a salamangkiro a si Alimas (giyanan i ngaran iyan sa
basa a Grigo) ka tipengan iyan somapar so gobirnador sa kaperatiyaya niyan.
9 Na si Saolo a bebetowan mambo sa Paolo, a sesenepen a Soti a Roh, na tintengan iyan
so salamangkiro na pitero iyan a
10 “Wata ka o Iblis! Ridoay ka o langon a ontol! Mapepeno ka o langon o pitibarangan a
kapamagakal ago kapamokeg! Ba ngka di kegeneki a kapembekoga ngka ko matito a
lalan ko Kadnan?
11 Ndanegen ka imanto o Kadnan na kebota ka a di ka den pekailay sa kaliwanag o
alongan sa mabolobolo." Na sakotika den a kiyatomparakan sekaniyan sa lekep ago
maliboteng, na miyagenebeneb sekaniyan a pepamangni sa makaagak on.
12 Kagiya mailay o gobirnador so miyanggolaola na miyaratiyaya sekaniyan ka tanto a
miyamemesa ko ndao makapantag ko Kadnan.
Roo sa Antiyokiya sa Pisidiya
13 Milayalayag si Paolo ago so manga ped iyan a poon sa Papos na miyakaoma siran sa
Pirga sii sa Pampiliya. Ogaid na si Yahiya Marko na milag kiran roo ka komiyasoy sa
Yarosalim.
14 Poon sa Pirga na somiyong siran sa Antiyokiya sii sa Pisidiya.
Sii ko Gawii a Idedeke na somiyoled siran ko sinagoga na miyontod roo.
15 Oriyan o kiyabatiyaa ko sabagi ko Kitab o Mosa ago so Sorat o manga nabi na
piyakisongowan siran o manga olowan ko sinagoga a tig iran a "Manga pagari ami, o
aden a manga lalag iyo a ipengosiyat sangkai a manga taw na teroa niyo."
16 Tominindeg si Paolo na pitiniyasan iyan siran ko lima niyan a tig iyan a "Manga taw
sa Israil ago so ped a manga taw a pepamanimba ko Allah, na pamakinega ko niyo!
17 “So Tohan o manga taw sa Israil na pinili iyan so manga apo tano na piyakala iyan so
kiyababadan kiran sii ko kababaling iran a manga mananangga sa inged a Misir. Oriyan
oto na piyakaliyo niyan siran on bo a nggolalan ko mala a kapaar iyan.
18 Sii ko baanda miyakapat polo ragon na pisebaran iyan siran roo ko mitataog a kaden
19 Na bininasa niyan so pito a manga nasiyon sii sa Kanaan na inibegay niyan so lopa
iran ko manga pagtaw niyan a mapekewali iran.
20 Langon taman ai na baanda miyakapat gatos ago lima polo ragon a kiyapakasagad
iyan.
Kagiya maipos oto na bigan iyan siran sa manga pangongokom taman ko masa o Nabi
Samowil.
21 Na kagiya mamangni siran sa dato na inibegay kiran o Allah si Saolo a wata i Kis a
ped ko mbatabataa a Baniyamin, na miyakandato sekaniyan sa miyakapat polo ragon.
22 Kagiya kowaan sekaniyan o Allah sa kadato na piyakandato iyan kiran si Daod. Giyai i
pitero o Allah makapantag rekaniyan: 'Miyailay aken a si Daod a wata i Yasay na mama a
ikasosoat aken, ka penggolaolaan iyan so langon o kabaya aken.'
23 “Na so isa a kiyababadan ki Daod, a si Isa, na miyabaloy o Allah a Pepanabet ko
manga taw sa Israil a so den so initopa niyan.
24 Sa da sii pen kasong i Isa na inipangosiyat i Yahiya ko langon a taw sa Israil a
paliyogat a talikodan iran so manga dosa iran ago makisalawat.
25 Kagiya magaan den mapasad i Yahiya so galebek iyan na pitero iyan ko manga taw a
'Antawaa ko sa kapipikira niyo ron? Kena a ba saken i penayaon iyo, ka pekatalondog
sekaniyan raken, na apiya so gakot o tinilas iyan na kena a ba ako mapapatot a pemboka
on.'
26 “Manga pagari ko a manga wata o Ibrahim ago so ped a manga taw sii rekano a
pepamanimba ko Allah na sektano i piyakiwitan sangkai a katero makapantag ko
kakesabet.
27 So kibabaling sa Yarosalim ago so manga olowan iran na da iran kilalaa o antawaa si
Isa aya pen o ba iran siyabot so manga katero o manga nabi a pembatiyaan oman Gawii a
Idedeke. Kagiya ka maoto na miyasala iran sekaniyan, na giyoto i kinitomanen iran
sangkoto a manga katero.
28 Apiya da a miyatoon iran a sak a imbono on na piyangni iran ki Pilato a mbonoon si
Isa.
29 “Oriyan o kinitomanen iran ko langon a misosorat ko Kitab makapantag rekaniyan, na
kinowa iran sekaniyan ko kros na tiyago iran ko kobor.
30 Ogaid na inoyag bo o Allah a poon ko miyamatay
31 Na sii ko madakel a manga gawii na miyakiilay sekaniyan ko siran oto a miyakaonot
rekaniyan ko kiyasong iyan sa Yarosalim a poon sa Galili, na siran i manga saksi iyan
imanto sii ko manga taw sa Israil.
32 Na somiyong kami sii sa kapeteroa mi rekano ko Mapiya a Totol a giyai: so initopa o
Allah ko manga apo tano
33 Na initoman iyan para rektano a manga kiyababadan kiran ko kiyaoyaga niyan ki Isa.
Giyanan na aya misosorat ko Sabor ko ikadowa a sorah a
'Seka i wata aken;

imanto a gawii na miyabaloy ako a ama a ka.'
34 Na makapantag ko kiyaoyaga niyan ki Isa a poon ko miyamatay a di sekaniyan den

keredak na giyai i pitero o Allah:
'Imbegay aken reka so soti ago kesarigan a manga rakmat

a minitopa ko Daod.'
35 Na misosorat pen sii ko sabaad ko Sabor a
'Di ngka den peperon o ba maredak so Soti a Siyogo o ka.'
36 Makapantag ko Daod na kagiya matoman iyan so manga takdir o Allah sii ko

kiyapaginetaw niyan na miyatay, na inilebeng a inirembang ko manga apo iyan, na
miyaredak so lawas iyan.
37 Ogaid na sekaniyan a inoyag o Allah na da maredak.
38 “Na sabota niyo, manga pagari ko, a pepakitokawan ko rekano so kakerilai ko manga
dosa niyo a nggolalan ki Isa.
39 Na so oman i peperatiyaya rekaniyan na pekebalokasan ko langon o manga dosa niyan
ago ibibiling o Allah a maontol, a kena ini a ba mapenggolaola a nggolalan ko
kapetomana ko Kitab o Mosa.
40 Kagiya ka maoto na iktiyari niyo o ba rekano mitalingoma angkai a inisorat o manga
nabi:
41'Ilaya niyo man a manga mamakasodi!
Pamemesa kano ago mamatay kano!
ka aden a penggolaolaan ko sii ko manga gawii niyo
a di niyo den mbenaren apiya pen aden a petero rekano ron.' "
42 Sii ko kapeliyo i Paolo ago si Barnabas ko sinagoga na biyantowan siran o manga taw
sa kakesoy iran ko telondog a Gawii a Idedeke an iran mapetero peroman makapantag
43 Kagiya mapasad so kiyatimotimo iran na madakel a manga Yahodi ago so pen so
manga baraamal a kena a ba manga Yahodi a miyamaratiyaya ko agama a Yahodi a
tomiyondog ki Paolo ago si Barnabas. Na inimbitiyarai iran angkoto a madakel a taw na
inakolan iran siran sa ipendayon iran so kasasarigi ko limo o Allah.
44 Sii ko miyakatalondog a Gawii a Idedeke na ba bo di langon a manga taw ko siti na na
mitimotimo ka pemakinegen iran so katero o Allah.
45 Ogaid na kagiya mailay o manga Yahodi so kadakedakel o taw na tanto siran a
miyakariit, na siyopak iran so dii teroon i Paolo na piyagitowito iran.
46 Ogaid na baden kiyaomani so kawaraw i Paolo ago si Barnabas a tig iran a "Disomala
a sekano i paganay a kaosiyatan ko katero o Allah. Ogaid na kagiya da niyo ai tarimaa ago
miyapamikir iyo a kena a ba kano mapapatot ko kaoyagoyag a da a kaposan iyan na
pagawaan ami sekano, ka song kami ko kena a ba manga Yahodi.
47 Ka giyai i inisogo rekami o Kadnan:
'Biyaloy aken seka a solo o manga nasiyon

a aya okit a kakesabet o manga taw ko pirowarowangan o doniya.'
48 Kagiya maneg ai o kena a ba manga Yahodi na miyababaya siran na biyantog iran so

katero o Kadnan, na siran oto a kiyasenggayan sa kaoyagoyag a da a kaposan iyan na
miyamaratiyaya.
49 Na lomiyangkap so katero o Kadnan sangkoto a dalem a inged.
50 Ogaid na piyangonsi o manga Yahodi so baraamal a manga babay a barabangensa ago
so manga ala i kadato a mama sangkoto a siti. Na piyangondoy iran so manga taw sa
kapesetroa iran ki Paolo ago si Barnabas na piyakaawa iran ko darpa iran.
51 Ogaid na piyopog iran baden so bayanek ko ai iran sa toos sa tiyalikodan iran siran, na
somiyong siran sa Ikoniyo.
52 Na tanto a miyababaya so pepemaratiyaya a kisesenepen a Soti a Roh.
MANGA GALEBEK 14
Si Paolo ago si Barnabas roo sa Ikoniyo
Roo sa Ikoniyo na somiyoled si Paolo ago si Barnabas ko sinagoga o manga Yahodi ka

aya iran adat, na sabap ko kiyapangosiyat iran na madakel a manga Yahodi ago kena a ba
manga Yahodi a miyamaratiyaya.
2 Ogaid na so manga Yahodi a da pamaratiyaya na piyangondoy iran so kena a ba manga
Yahodi kaan iran ikagowad so manga magariyari.
3 Na malo miyatey a kiyatareg roo i Paolo ago si Barnabas. Da den a kalek iran ko
kipepangosiyaten iran ko makapantag ko Kadnan. Na di niyan dii pemataan so katero
makapantag ko limo iyan a nggolalan ko kapembegi niyan kiran sa kabatowa sa
kanggolaola sa manga nanao ago manga piyakamemesa.
4 Ogaid na miyakambagiay so madakel a taw sangkoto a siti, ka so manga ped na
miyampil ko manga Yahodi, na so ped na sii ko manga siyogo.
5 Na so kena a ba manga Yahodi a ped iran so manga Yahodi a rakes o manga olowan
iran na pikediyat iran a kapemabai ran ko manga siyogo, ka perobakan iran a ator.
6 Ogaid na kiyatokawan ai o manga siyogo na miyagapas siran roo sa Listra ago sa Dirbi,
a manga siti sa Likaoniya, ago sii ko midadair on a manga inged,
7 Na roo iran piyakalangkap so Mapiya a Totol.
Roo sa Listra ago sa Dirbi
8 Roo sa Listra na ana sakataw a mama a mapaparalais so manga ai niyan. Malelepo a

poon ko kinimbawataan on na da den makalalakaw.
9 Pepamakinegen iyan so dii teroon i Paolo, na miyasipat i Paolo a aden a paratiyaya
niyan sa kapakabagera rekaniyan. Na tintengan sekaniyan i Paolo
10 Na pitero iyan sa matanog a "Tindeg ka!" Na tominikeras tomindeg so mama na
mipoon lomalakaw.
11 Kagiya mailay o madakel a taw so pinggolaola i Paolo na milalalis siran a dii tetaro ko
basa a Likaoniya sa "Miyanog rektano so manga tohan a mbabaropa sa manosiya!"
12 Bitowan iran si Barnabas sa Siyos, na si Paolo na bitowan iran sa Hirmis ka sekaniyan
i dii tero.
13 So imam ki Siyos, a so timplo niyan na sii ko liyo o siti, na miyawid sa manga sapi
ago manga salay a obarobar sii ko gimowa o siti ka sekaniyan ago so madakel a taw na
kabaya iran a isepaat iran ai a manga korban sii ko manga siyogo.
14 Kagiya katokawan ai i Barnabas ago si Paolo na kinisi iran so manga nditaren iran, na
somiyong siran nggagaan ko look o madakel a taw na inipelalis iyan a
15 “Hey manga taw, ino niyo ai penggolaolaa? Matag kami manosiya a datar iyo.
Somiyong kami sii ka pekalangkapen ami rekano so Mapiya a Totol kaan iyo katalikodi
angkai a da a bali niyan a manga barahala kaan kano makasangor ko oyagoyag a Tohan a
miyaden ko langit, so lopa, so ragat ago so langon a matatago on.
16 Sii ko miyanga iipos a masa na pipero niyan ko langon a nasiyon so kapekedega iran
ko rek iran a manga lalan.
17 Ogaid na sii ko langon a manga masa na lalayon iyan peseksian a ginawa niyan a
nggolalan ko di niyan dii kanggolaola sa mapiya, ka pembegan kano niyan sa oran a poon
sa langit ago so maperagon iyo sii ko osto a mosim. Pembegan kano niyan sa mitataralo a
pangenengken ago pepakapiyaan iyan a ginawa niyo."
18 Na apiya pen ai pitero o manga siyogo na kiyaregenan siran sa kiyarena iran ko
kasepaati kiran o manga taw .
19 Na aden a manga Yahodi a miyamakaoma roo a poon sa Antiyokiya ago giya Ikoniya,
na miyapakaampil iran so madakel a taw, na riyobakan iran a ator si Paolo. Tiyoyok iran
ko liyo o siti, ka aya katao iran on na miyatay den.
20 Ogaid na kagiya lilibeten si Paolo o pepamaratiyaya na mimbowat sekaniyan na
komiyasoy sa siti. Kagiya talondog a gawii na somiyong sekaniyan ago si Barnabas sa
Dirbi.
So Kiyakasoy sa Antiyokiya sii sa Siriya
21 Na piyakalangkap iran so Mapiya a Totol sangkoto a siti na madakel a miyapakasokbat

iran ko Kadnan. Oriyan oto na komiyasoy siran sa Listra, sa Ikoniyo ago sa Antiyokiya sii
sa Pisidiya.
22 Piyakabager iran so pepamaratiyaya na inoyatan iran sa itataros iran so paratiyaya iran.
Pitero iran a "Disomala a makasagad tano sa madakel a manga karomasayan ko kasoled
tano ko Ndatoan o Allah."
23 Sii ko oman i Agama na tomiyoro on si Paolo ago si Barnabas sa manga
pelokelokesen, na sii ko di ran dii kapangangarapan ago dii kapopowasa na inisana iran
siran ko Kadnan a sasarigan iran.
24 Kagiya makaokit siran sa Pisidiya na miyakaoma siran sa Pampiliya,
25 Na kagiya makapangosiyat siran roo sa Pirga na tomiyaros siran sa Ataliya.
26 Roo na miyagda siran sa kapal na komiyasoy sa Antiyokiya a roo siran minisarig
gowani ko limo o Allah para ko galebek a miyapasad iran den.
27 Kagiya makaoma siran sa Antiyokiya na tinimo iran so magaagama na piyanotol iran
kiran so langon a pinggolaola o Allah a nggolalan kiran, ago so kiyaperowa niyan ko kena
a ba manga Yahodi sa kapakaparatiyaya iran.
28 Na miyatey a kiyakaden iran roo sii ko manga pepamaratiyaya.
MANGA GALEBEK 15
So Kiyatimotimo roo sa Yarosalim
Sa masa oto na aden a manga taw a miyamakaoma sa Antiyokiya a poon sa Yodiya na

miyangendao siran ko manga magariyari a tig iran a "Di kano kesabet o di kano manga
totori a aya kaketoman o taritib a initenan o Mosa."
2 Si Paolo ago si Barnabas na da iran ayoni so ipepangendao iran, na tanto siran a
miyakipepawala sangkoto a manga taw. Sabap sii na initoro si Paolo ago si Barnabas ago
so ped a pepamaratiyaya sa kasong iran sa Yarosalim kaan siran makimbitiyarai ko
manga siyogo ago so manga pelokelokesen makapantag sii.
3 Na piyakalalakaw siran o magaagama na miyokit siran sa Ponisiya ago sa Samariya a
pepanotolen iran so kiyatetaklid o kena a ba manga Yahodi, na tanto ini a inikababaya o
langon a magariyari.
4 Kagiya makaoma siran sa Yarosalim na tiyarima siran o Agama a rakes o manga siyogo
ago manga pelokelokesen, na piyanotol kiran i Paolo ago si Barnabas so langon a
pinggolaola o Allah a nggolalan kiran.
5 Ogaid na ndodoo so ped ko opakat o manga Parisi a miyamaratiyaya na tominindeg
siran a tig iran a "Paliyogat ko kena a ba manga Yahodi a toriin siran ago pekitoman kiran
so Kitab o Mosa."
6 Na mitimo so manga siyogo ago so manga pelokelokesen ka pemasakan iran angkai a
betad.
7 Kagiya matey a di ran dii kandadaowai na tominindeg si Pidro a tig iyan a "Manga
pagari ko, katawan iyo a pinili ako gowani o Allah a poon rekano kaan aken matero so
Mapiya a Totol ko kena a ba manga Yahodi kaan iran mapamakineg ago an siran
makaparatiyaya.
8 Na so Allah, a matao ko matatago ko poso o manga taw, na pimataanan iyan a tiyarima
iyan siran a nggolalan ko kiyabegi niyan kiran ko Soti a Roh a datar o kiyabegi niyan
rektano.
9 Na da tano niyan pakambidabidaa ago siran, ka liyompiyowan iyan so manga poso iran
sabap ko paratiyaya iran.
10 Kagiya ka maoto na ino niyo petepengi so Allah ko kapakiposain iyo ko
pepamaratiyaya ko awid a di kekena o manga apo tano ago sektano?
11 Kena ini a ba mapiya, ka peparatiyayaan tano a miyasabet tano a nggolalan ko limo o
Kadnan a Isa a datar iran bo mambo."
12 Oriyan oto na romerenek so langon a malilimod ko kapepamakinega iran ki Barnabas
ago si Paolo a pepanotolen iran so langon a manga nanao ago piyakamemesa a
pinggolaola o Allah a nggolalan kiran sii ko kena a ba manga Yahodi.
13 Kagiya makapasad siran tero na mitero mambo si Santiyago a tig iyan a
14 “Manga pagari ko, pamakinega ko niyo. Piyagosay rektano imanto i Simon so miyaona
a kinibentelen o Allah ko kena a ba manga Yahodi sa kakowaa niyan kiran ko rek iyan a
manga pagtaw.
15 Na piyagayonayonan ai o manga katero o manga nabi, ka aya inisorat iran na:
16'Amay ka mapasad ai na kesoy ako bo, a tig o Kadnan,

na mbangonen aken peroman so babalingan o Daod a miyageba.
So kiyabinasaan on na mbangonen aken peroman,
na pekaasalen aken
17 Kaan makambabanog ko Kadnan so ped a manga taw
ago so langon a kena a ba manga Yahodi a piyanawag aken a mabaloy a rek aken.
18 Giyai i pitero o Kadnan a aya miyakapayag sangkai a
manga nganin isako miyanga oona a gawii.'
19 Na tig pen i Santiyago a "Aya pamikiran ko na di tano pekareregenan so kena a ba

manga Yahodi a pepamanangor ko Allah.
20 Ka ba tano siran den sorati sa di siran pekan ko karam a pangenengken a inisapaat ko
manga barahala, ago di siran pesebo, ago di siran ken sa apiya antonaa ayam a miyapekel,
o di na so rogo.
21 Ka so manga sogoan o Mosa na tanto a miyatey a kipepangosiyaten on sii ko oman i
inged, ka oman Gawii a Idedeke na pembatiyaan sii ko manga sinagoga."
So Sorat ko Pepamaratiyaya a Kena a ba manga Yahodi
22 Kagiya maneg iran ai na so manga siyogo, so manga pelokelokesen ago so langon a

magaagama na miyagayonayon siran sa kapamili iran sa manga mama a sisii kiran a
pekasongen iran roo sa Antiyokiya a magonot ki Paolo ago si Barnabas. Na pinili iran si
Yodas a bebetowan sa Barsabas ago si Silas, a manga mama a tanto a pagaadatan o
magariyari.
23 Piyakiawidan iran kiran angkai a sorat:
Alamat sorat ako o manga pagari niyo a manga siyogo ago manga pelokelokesen
makaoma ko manga magariyari a kena a ba manga Yahodi a kibabaling sa Antiyokiya,
Siriya ago sa Silisiya.
24 Kiyatokawan ami a aden a manga taw a lomiyalakaw a poon rekami a
miyamakasamok rekano, ka miyaribogar kano iran a nggolalan ko manga katero iran,
ogaid na da ami siran sogoa.
25 Sabap san na milimod kami ago miyagayonayon so kalangolangon sa kapemili ami sa
manga mama a pekasongen ami san rekano a magonot siran ko pekebabayaan tano a
pagari tano a si Barnabas ago si Saolo,
26 A so manga mama a inisarakan iran a ginawa iran sabap ko Kadnan tano a Isa Al
Masih.
27 Sabap sii na pekasongen ami rekano san si Yodas ago si Silas, na mapetero iran rekano
so datar o inipakawit ami sii a sorat.
28 So Soti a Roh ago sekami na miyagayonayon sa da a ba ami rekano pekiawidan a
rowar sangkai a ipapaliyogat a giyai:
29 Di kano ken ko manga pangenengken a inisapaat ko barahala aya pen so rogo o di na
miyapekel a ayam, na di kano pesebo. Ka o lidasi niyo angkai a manga nganin na mapiya
so penggolaolaan iyo. Pakapipiya kano."
30 Na piyakalalakaw iran so manga mama a maawid sa sorat na somiyong siran sa

Antiyokiya. Linimod iran so langon a pepamaratiyaya na inibegay iran kiran so sorat.
31 Kagiya mabatiya iran on na miyababaya siran sabap sangkoto a osiyat.
32 Si Yodas ago si Silas, a siran den na manga nabi, na madakel a ipepangosiyat iran ko
magariyari, na pepakabageren iran so paratiyaya iran.
33 Oriyan o kiyatareg iran roo sa malo miyatey na piyakalalakaw siran o magariyari a
rakes o pangangarapan sa matatap kiran so kalilintad, na komiyasoy siran bo ko somiyogo
kiran.
35 Ogaid na mitelimbagak si Paolo ago si Barnabas sa Antiyokiya na roo siran
miyamangendao ago piyakalangkap iran so katero o Kadnan a pegogopan siran o madakel
a ped a taw.
Mimbelag si Paolo ago si Barnabas
36 Kagiya malo den matey na pitero i Paolo ki Barnabas a "Komasoy ta ko oman i inged
a kiyapakalangkapan ta ko katero o Kadnan na ibentel ta so manga magariyari roo kaan ta
mapariksa o antonaa i masosowa iran."
37 Kabaya i Barnabas a pekaonoten iran si Yahiya a bebetowan sa Marko.
38 Ogaid na aya pamikiran i Paolo na di patot i ba iran pakaonota, ka da niyan dayonen a
kapegogopi niyan kiran ko galebek iran, ka inawaan iyan siran roo sa Pampiliya.
39 Sabap sii na miyakapewala siran sa maregen na mimbelag siran. Piyakaonot i
Barnabas si Marko na milayalayag siran roo sa Sipri.
40 Ogaid na pinili i Paolo si Silas a makaonot on na gomiyanat siran oriyan o kinisanaan
kiran o magariyari ko limo o Kadnan.
41 Miyokit siran sa Siriya ago sii sa Silisiya na piyamakabager iran so manga Agama roo.
MANGA GALEBEK 16
Miyonot si Timotiyo ki Paolo ago si Silas
Tomiyaros lomalakaw si Paolo roo sa Dirbi ago sii sa Listra. Aden a peparatiyaya roo a
bebetowan sa Timotiyo. So ina iyan na Yahodi a peparatiyaya mambo, ogaid na so ama
iyan na Grigo.
2 Pepodin si Timotiyo o langon a magariyari roo sa Listra ago sii sa Ikoniyo.
3 Kabaya i Paolo a mapakaonot iyan si Timotiyo ko kapelalakaw niyan. Sabap roo na
tiyori iyan sabap ko manga Yahodi a kibabaling sangkoto a manga inged, ka katawan iran
langon a Grigo so ama iyan.
4 Sii ko kapepegokit iran ko manga inged na piyalad iran ko pepamaratiyaya so manga
kokoman a piyagayonayonan o manga siyogo ago manga pelokelokesen sa Yarosalim a
paliyogat a tomanen iran.
5 Na miyapakabager so paratiyaya o manga magaagama, na gawii gawii den na
pekeomanan so kadakel iran.
So Pangingilain i Paolo ko Mama a taw sa Masidoniya
6 Oiyan iyan na kitas i Paolo ago so manga ped iyan a inged a Prigiya ago Galasiya ka
kagiya siyaparan siran o Soti a Roh sa o ba iran pakitokawi so katero o Allah roo sa
probinsiya a Asiya.
7 Kagiya makaoma siran ko temanaan a Misiya na tipengan iran a kasoled iran sa
Bitiniya, ogaid na da ini perowa o Roh i Isa."
8 Sabap roo na kitas iran baden a Misiya na tomiyaros siran lomalakaw taman sa Trowas.
9 Sii sangkoto a kagagawii na nggolalan ko pangingilain na miyakailay si Paolo sa taw sa
Masidoniya a tomitindeg ko obay niyan a pegakolen iyan on a "Song ka sii sa Masidoniya
na ogopi kami ngka."
10 So den so kiyailaya i Paolo ko pangingilain na mitiyagar kami sa kasong ami sa
Masidoniya, ka miyatangked sa ginawa mi a so Allah i tomiyawag rekami sa
kapekalangkapa mi ko Mapiya a Totol ko manga taw roo.
So Kiyateklid i Lidiya roo sa Pilipos
11 Giyanatan ami a Troas a mageeda kami sa kapal na miyamantek kami lomayag sa

Samotrasiya, na sii ko talondog a gawii na tomiyaros kami sa Niyapolis.
12 Poon roo na lomiyalakaw kami sa Pilipos a maoona a siti sangkoto a sabaad sa
Masidoniya a masasakop pen ai a Roma. Na miyamakapira gawii a kiyatareg ami
sangkoto a siti.
13 Kagiya raoten so Gawii a Idedeke na lominiyo kami sa siti na somiyong kami ko kilid
a lawasaig, ka pipikiren ami a ron so darpa a dii sembayangan o manga Yahodi. Miyontod
kami roo na miyakimbitiyarai kami ko manga babay a di roo dii timotimo.
14 So isa kiran a miyamakineg rekami na si Lidiya a taw sa Tiyatira a dii ndagang sa
manga dinis a maloto a mariga. Pesimba sekaniyan ko Allah na likaan o Kadnan so poso
iyan sa katarimaa niyan ko dii teroon i Paolo.
15 Na siyalawatan sekaniyan ago so langon o pamiliya niyan. Oriyan iyan na biyantowan
kami niyan a tig iyan a "O ibibiling ako niyo a tito a peparatiyaya ko Kadnan na sii kano
bolos ko walay aken." Na piyagayokan kami niyan.
So Kiyakalaboso i Paolo ago si Silas
16 Miyakaisa gawii sii ko kapesong kami ko darpa a dii sembayangan na biyalak kami o
babay a oripen a sosookan a saitan a makaperimar. Mapepakakowarta niyan sa mala so
manga kadnan iyan ko di niyan dii kaperimar.
17 Tiyondog iyan si Paolo ago sekami a di niyan dii pelalis a "Giyangkai a manga mama
na manga oripen o Lebi a Maporo a Tohan, na pepakalangkapen iran rekano so okit a
kakesabet."
18 Gawii gawii den a di niyan sii dii kanggolaolaa taman sa inotegan on si Paolo, na
siyangoran iyan so babay a tig iyan ko saitan a "Sogoon ko seka sii ko ingaran i Isa Al
Masih; liyo ka ko lawas iyan!" Na sarta den a lominiyo ron so saitan.
19 Kagiya katokawan o manga kadnan o babay a miyada den so okit iran ko
kapepekakowarta iran na diyakep iran si Paolo ago si Silas na pitonda iran ko manga
olowan sa monisipiyo.
20 Sii ko kiyapakadarpa iran ko manga pangongokom a manga Iromanen na tig o manga
kadnan o babay a "Giyangkai a manga mama na Yahodi, na di ran dii semoken so siti
tano.
21 Ipepangendao iran sii rektano a manga Iromanen so manga taritib a di sak i ba tano
tarimaa aya pen o ba tano tomana."
22 Miyangeped so madakel a taw ko kapepamabai ki Paolo ago si Silas, na so manga
olowan na giyander iran on komisi so manga nditaren i Paolo ago si Silas, na inisogo iran
a pemadasan siran.
23 Oriyan o kiyapamadasi kiran sa madakel a manga lepad na kiyalaboso siran, na
inisogo ko komikibir ko kalaboso a piyapiyai niyan siran nggordiya.
24 Sabap sangkai a inisogo on na tiyago iyan siran ko maloloolook o kalaboso na
giyompis iyan pen a manga ai iran ko patonga a kayo.
25 Kagiya magaan den kelookan a gawii na pepangangarapan si Paolo ago si Silas ago
pepagidaida siran sa podi ko Allah, na pepamakinegen siran o ped a kikakalaboson.
26 Na tekaw den a milinog sa mabager, na tanto a miyakokog so kalaboso taman den ko
kaoonayan on. Sarta a piyangalelekaan so langon a manga pintoan na miyanga popokas so
manga rantay ko langon a kikakalaboson.
27 Miyakanaw so komikibir ko kalaboso na kagiya mailay niyan a piyangalelekaan so
manga pintoan o kalaboso na binindas iyan so pedang iyan ka pegeget, ka aya katao niyan
on na miyamakapalagoy so langon a manga kalaboso.
28 Ogaid na liyalis sekaniyan i Paolo sa matanog a tig iyan a "Di ngka sekita a ginawa
ngka! Sisii kami langon!"
29 Na miyangni so komikibir sa witan sa solo, na somiyoled nggagaan ki Paolo ago si
Silas na somiyodiyod kiran a tatabaden sa kalek.
30 Piyakaliyo niyan siran na iniise iyan a "Sir, antonaa i paliyogat a penggolaolaan ko
kaan ako masabet?"
31 Somimbag siran a "Paratiyayaa ngka so Kadnan a Isa na kesabet ka taman ko pamiliya
ngka."
32 Na piyakitokawan iran so katero o Allah ko komikibir ago so langon a taw ko walay
niyan.
33 Na sii den sangkoto a oras ko kagagawii na piyakaonot siran o komikibir na
piyangonaban iyan so manga pali iran, na taros a siyalawatan sekaniyan ago so langon o
pamiliya niyan.
34 Piyakabolos iyan si Paolo ago si Silas ko walay niyan na piyagana niyan siran sa
pangenengken. Tanto sekaniyan a miyababaya ago so langon a taw ko walay niyan ka
kagiya miyaratiyaya siran den ko Allah.
35 Kagiya mapita na so manga pangongokom a Iromanen na piyakasong iran so manga
sondaro ko kalaboso a tig iran a "Pakaliyowa ngka ngkoto a manga mama."
36 Na pitero o komikibir ki Paolo a "Inisogo o manga pangongokom a pekaliyon ko
sekano. Na liyo kano, ka pekalalakaw kano den sa da a ba rekano pekasamok."
37 Ogaid na pitero i Paolo ko manga sondaro a "Manga Iromanen kami, na
piyakipamadasan kami iran ko kamamasaan o manga taw apiya pen da a sala ami, na
kiyalaboso kami ran pen. Na pegmaan iran bes a kapekaliyowa iran rekami imanto? Di
anan kepakay! Disomala a siran den i song sii na aya rekami makaliyo."
38 Iniripot ai o manga sondaro ko manga pangongokom, na kagiya maneg iran a
Iromanen si Paolo ago si Silas na miyanga alek siran.
39 Na somiyong siran roo na piyangangapinan iran siran. Piyakaliyo iran siran sa
kalaboso na inakol iran a awa siran ko siti.
40 Kagiya makaliyo si Paolo ago si Silas ko kalaboso na somiyong siran ko walay i
Lidiya. Roo iran minikeilaya so magariyari, na kagiya mapamando iran siran na
gomiyanat den si Paolo ago si Silas.
MANGA GALEBEK 17
Roo sa Tisalonika
Miyokit siran sa Ampipolis ago sii sa Apoloniya na miyakaoma siran sa Tisalonika, na

aden a sinagoga roo o manga Yahodi.
2 Datar bo o adat i Paolo na somiyoled sekaniyan on, na sii ko miyakatelo Gawii a
Idedeke na miyakindadaowai kiran makapantag ko Kitab.
3 Piyagosay niyan kiran so maana niyan ago inipemataan iyan kiran a so Al Masih na
disomala a kerasay ago pagoyagen a poon ko miyamatay. Pitero iyan a "Giyangkai a Isa a
pepakitokawan ko rekano na so Al Masih."
4 Na miyamaratiyaya so ped ko manga Yahodi na miyangeped siran ki Paolo ago si Silas
a rakes o miyakadakedakel a baraamal a manga Grigo ago madakel a barabangensa a
manga babay.
5 Ogaid na miyasiig so manga Yahodi na piyakaonot iran so manga sasamok a mama a
domadangongol ko padian, na madakel a manga taw a piyanimo iran, na piyangondoy
iran so dalem a siti. Siyondolan iran so walay i Yason ka pepangilobaan iran si Paolo ago
si Silas kaan iran mapakaadap ko kalilimodan ko taw.
6 Kagiya da iran matoon na pitonda iran si Yason ago so ped ko magariyari sii ko manga
olowan ko siti. Milalalis siran a "Giyangkai a manga mama a dii sesamok ko langon a taw
ko mbalabala na miyakaoma sii
7 Na piyakabolos siran i Yason sa walay niyan. Pepekasogok siran langon ko manga
kokoman o Solotan sa Roma a di ran dii teroon a aden kon a salakaw a dato a bebetowan
sa Isa."
8 Na rinibogar iran so pamikiran o madakel a taw ago so manga olowan a di sii dii
mamakineg.
9 Na piyakapiyansa iran si Yason ago so manga ped iyan na piyakalalakaw iran siran.
Roo sa Biriya
10 Kagiya magagawii na si Paolo ago si Silas na piyakasong o manga magariyari roo sa

Biriya, na kagiya makaoma siran roo na somiyong siran ko sinagoga o manga Yahodi.
11 So manga taw roo na manga aayon a di so manga taw sa Tisalonika. Tanto siran a
kasosomayodan ko di ran dii kapamakinega ko katero o Allah, na gawii gawii den na
pepaganadan iran so Kitab kaan iran mapariksa o tito a benar so dii teroon i Paolo.
12 Na madakel kiran a miyamaratiyaya a rakes o madakel a barabangensa a manga babay
ago manga mama a Grigo.
13 Ogaid na kagiya katokawan o manga Yahodi sa Tisalonika a ndodoo si Paolo sa Biriya
a pepakalangkapen iyan roo mambo so katero o Allah, na miyamanong siran roo na
madakel a manga taw a piyangondoy iran kaan siran makasesamok.
14 Magaan so magaan na piyakalalakaw o magariyari si Paolo sii ko kilid a ragat, ogaid
na mitelimbagak si Silas ago si Timotiyo sa Biriya.
15 Siran oto a domiyolog ki Paolo na miyonot siran on taman sa Atinas. Oriyan oto na
komiyasoy siran sa Biriya a initoma kiran i Paolo a pekasonoon iran si Silas ago si
Timotiyo sa magaan.
Roo sa Atinas
16 Sii ko kapenayawa kiran i Paolo roo sa Atinas na tanto a miyasosa so pamikiran iyan
ko kiyailaya niyan ko madakel a manga barahala sangkoto a siti.
17 Sabap roo na sii ko sinagoga na di sekaniyan dii makindadaowai ko manga Yahodi
ago so kena a ba manga Yahodi a maaleken ko Allah, ago sii ko padian sa oman gawii ko
manga taw a miyasalak a kapegokit iran roo.
18 Aden a manga alim ko kepit o manga Ipikoriyano ago so kepit o manga Istowiko a
miyakindaowai mambo ki Paolo. So ped kiran na tig iran a "Antonaa i kebayaan tero
angkai a inoranti a berak?" Na tig o ped a "Datar o ba niyan dii teroa so makapantag ko
salakaw a manga tohan." Pitero iran ai ka kagiya pepakitokawan kiran i Paolo so
makapantag ki Isa ago so kakeoyag o miyamatay.
19 Piyakaonot iran si Paolo na inowit iran ko kalilimod o manga alim a bebetowan sa
Ariyopago. Pitero iran on a "Ba di kepakay a kapakitokawi ngka rekami angkai a bago a
ndao a di ngka dii teroon?
20 So ped ko pepamakinegen ami a manga katero o ka na ipepememesa mi na kabaya ami
a kasabotan ami i maana niyan."
21 Ka so langon a magiinged sa Atinas ago so manga mananangga roo na kabaya iran a
lalayon siran peketembang ko di ran dii kapakimbibitiyarai ago kapemamakinega ko bago
a manga ndao.
22 Na tominindeg si Paolo ko hadapan iran sa Ariyopago na tig iyan a "Manga taw sa
Atinas, miyailay aken a tanto kano a manga baraamal.
23 Ka sii ko di aken dii kapagenebeneb sangkai a siti niyo na miyanga iilay aken so
manga darpa a pesimbaan iyo. Na miyaoma aken so isa a aparan a aya isosorat on na 'Para
ko tohan a di tano katawan.' Na giyangkanan a pesimbaan iyo a di niyo katawan na
giyanan i pekitokawan ko rekano.
24 “So Tohan a miyaden ko doniya ago so langon taman a matatago on na aya Kadnan ko
langit ago so lopa, na kena a ba komakaden ko manga timplo a pimbaalan o manga taw.
25 Di sekaniyan den pekitabang ko manga manosiya ka da den a kailangan iyan. Ka
sekaniyan i pepamegay sa kaoyagoyag, ago so napas, ago so langon taman ko langon a
inaden iyan.
26 Biyabad iyan so langon a pisosonan a manosiya a poon ko sakataw a mama, na
piyakapaginged iyan siran ko pirowarowangan o doniya. Andang den a kiyatendoa niyan
ko manga mosim a kapekala iran ago so manga temanaan o manga darpa a kebalingan
iran.
27 “Pinggolaola niyan ai kaan sekaniyan mambabanog o manga taw, ka o ba iran matoon
ko kapepangapapa iran on. Ogaid na kena a ba sekaniyan mawatan ko oman i isa rektano
28 Ka pekesabapan sekaniyan ko kaooyagoyag tano ago so kapekekeokaog tano ago so
kapapantagi rektano. Datar ai mambo a miyatero o ped ko dii ndarangen sii rekano a tig
iran a 'Sektano mambo na pindariday niyan.'
29 Na kagiya manga wata tano o Tohan na o ba tano pipikira i ba so ginawa niyan na
datar o pimbaalan a bolawan, o di na pirak, o di na ator a pipandayan ago inokiran o
manga papasang a taw.
30 Gowani na baden piyagilay o Tohan so datar ai a dii nggolaolaan o da a sowa iyan a
manga taw, ogaid na imanto na di niyan dii teroon ko langon a taw ko mbalabala a
talikodi ran so manga dosa iran.
31 Ka tindo iyan so gawii a kapengokoma niyan ko langon a taw sa doniya ko kaoontol
iyan a nggolalan ko miyapili iyan a mama. Na inipemataan iyan ai ko langon a taw ko
kiyaoyaga niyan on a poon ko miyamatay."
32 Kagiya maneg iran so kiyaaloya i Paolo ko kiyaoyag o miyamatay na miyagongatongat
on so ped kiran. Na tig o manga ped a "Kebayaan ami mamakineg peroman so peteroon
ka makapantag sii."
33 Oriyan oto na inawaan i Paolo so kalilimodan kiran.
34 Ogaid na aden a manga mama a miyangeped rekaniyan ago miyaratiyaya. So isa kiran
na si Diyonisiyo a maaped ko manga pangongokom sa Ariyopago ago so babay a
bebetowan sa Damaris ago so ped pen a manga taw.
MANGA GALEBEK 18
Roo sa Korinto
Kagiya mapasad ai na giyanatan i Paolo a Atinas na somiyong sa Korinto.

2 Minitoona iyan roo si Akowilo a Yahodi a inimbawata sa Pontos. Gopen miyakaoma
ago so karoma niyan a si Prisila a poon sa Italiya sabap ko inisogo o Solotan Klaodiyo a
pekaawaan so langon a Yahodi sa Roma. Inibentel siran i Paolo,
3 Na kagiya ndatar so ipekeoyag iran a so kapangembaal sa tolda na sii kiran komiyaden
si Paolo ago miyangeped kiran ko dii kanggalebek.
4 Oman Gawii a Idedeke na di sekaniyan dii makindadaowai sii ko sinagoga kaan iyan
kaayoki so manga Yahodi ago so manga Grigo.
5 Oriyan o kiyapakaoma i Silas ago si Timotiyo a poon sa Masidoniya na lalayon
matetembang si Paolo ko di niyan dii kapangosiyat a di niyan dii mipemataan ko manga
Yahodi a si Isa na aya den so Al Masih.
6 Ogaid na kagiya sopaken iran si Paolo ago piyagitowito iran na inikekeng iyan so
nditaren iyan sa toos ko kiyatalikodi niyan kiran, na tig iyan a "O di kano pekisabet na
sekano bo i pekaako ron! Kena a ba raken kisala. Ipoon imanto na song ako ko kena a ba
manga Yahodi."
7 Na inawaan iyan so sinagoga na miyogalin ko walay o taw a kena a ba Yahodi a
bebetowan sa Tito Yosto a pesimba ko Allah; so walay niyan na midadair ko sinagoga.
8 Si Krispo a aya olowan ko sinagoga na miyaratiyaya ko Kadnan a rakes o langon a taw
ko walay niyan. Na madakel a taw sa Korinto a miyamakineg ki Paolo na miyamaratiyaya
ago piyanga sasalawatan.
9 Miyakaisa a gagawii na miyakaokit ko pangingilain na pitero o Kadnan ki Paolo a "Di
ka pekelek. Tarosen ka den so kapepangosiyat ka; di ka den perenek
10 Ka mipageepeda ako ngka. Da a ba reka makapetekor, ka madakel a manga pagtaw
aken sangkai a siti."
11 Na komiyaden roo si Paolo sa miyakasaragon ago tenga a ipepangendao niyan kiran so
katero o Allah.
12 Sii ko kanggogobirnador i Galiyo a Iromanen sa Grisiya na miyaisaisa so manga
Yahodi na diyakep iran si Paolo na inowit iran ko dii kokoman i Galiyo.
13 Tig iran a "Giyangkai a mama na pepegayokan iyan so manga taw sa kasimbaa iran ko
Allah ko okit a sopak ko Kitab ami."
14 Kagiya petero den si Paolo na pitero i Galiyo ko manga Yahodi a "O aya dimanda niyo
a manga Yahodi na mipantag ko kasalaan o di na marata a dosa na patot a pemakinegen
aken sekano.
15 Ogaid na o giyai na kandaowa bo mipantag ko manga katero, ago manga ngaran, ago
so Kitab iyo na sekano i matao ron, ka di aken den kokomen so datar ai."
16 Na piyakaliyo niyan siran ko pengokoman.
17 Oriyan iyan na palaya siran domiyakep ki Isostinis a olowan ko sinagoga na piraneg
iran sekaniyan sii ko hadapan o pengokoman, ogaid na da ini mbinaan i Galiyo.
Komiyasoy si Paolo sa Antiyokiya
18 Malo den miyatey a kiyakaden roo i Paolo a ped o manga magariyari. Oriyan oto na
miyodas kiran ago milayalayag sa Siriya a makaoonot on si Prisila ago si Akowilo. Sa da
iran pen kaganat na miyakiopaw si Paolo roo sa Kingkriya sabap ko samaya iyan ko
Allah.
19 Miyakaoma siran sa Ipisos a roo niyan inibagak si Prisila ago si Akowilo. Somiyoled
sekaniyan ko sinagoga na miyakindaowai ko manga Yahodi.
20 Piyangni iran rekaniyan a komaden kiran sa matey, ogaid na da sekaniyan iyog
21 Ka miyodas kiran baden a tig iyan a "Kesoy ako rekano o begay so Allah," na giyoto a
milayalayag sekaniyan a poon sa Ipisos.
22 Kagiya makaoma sekaniyan sa Kaisariya na somiyong sa Yarosalim, na siyalam iyan
so magaagama na tomiyaros sekaniyan sa Antiyokiya.
23 Kagiya malo den matey a kiyagenek iyan roo na gomiyanat sekaniyan ago
piyagenebeneban iyan a dalem a inged a Galasiya ago giya Prigiya a pepakabageren iyan
so paratiyaya o langon a miyamaratiyaya.
Si Apolos roo sa Ipisos ago sa Korinto
24 Aden a Yahodi a miyakaoma sa Ipisos a aya ngaran iyan na si Apolos a taw sa

Alihandriya. Mapasang sekaniyan i katero ago mala i katao ko Kitab.
25 Miyapangendao sekaniyan ko Lalan o Kadnan, na sii ko mala a kasosomayodi ron na
ipepangendao niyan so tito a benar makapantag ki Isa, ogaid na aya niyan bo katawan a
kasalawat na so rek i Yahiya.
26 Na pepangendao si Apolos sii ko sinagoga sa da a kalek iyan, na kagiya maneg ai i
Prisila ago si Akowilo na inowit iran sekaniyan ko walay iran na giyogod iran on piyapiya
so Lalan o Allah.
27 Kagiya mapamikir i Apolos a song sa Grisiya na miyogop rekaniyan so magariyari sa
Iposos, ka pisoratan iran so pepamaratiyaya sa Grisiya an iran sekaniyan matarima.
Kagiya makaoma roo si Apolos na mala a minitabang iyan ko manga taw a miyaratiyaya a
nggolalan ko limo o Allah.
28 Ka tiyaban iyan so manga Yahodi a nggolalan ko mabager a di niyan kiran dii
kapakindaowai ko hadapan o manga taw, ka di niyan dii mipemataan poon ko Kitab a si
Isa na aya den so Al Masih.
MANGA GALEBEK 19
Si Paolo roo sa Ipisos
Sii ko kandodoo i Apolos sa Korinto na kitas i Paolo so soled angkoto a probinsiya na

miyakaoma sa Ipisos. Roo niyan minitoona so ped a miyamaratiyaya
2 Na iniise iyan kiran a "Kagiya makaparatiyaya kano na ba kano miyakatarima ko Soti a
Roh?"
Tig iran a "Da ami den maneg o ba aden a Soti a Roh."
3 Na iniise i Paolo a "Antonaa bes i salawat a inisalawat rekano?"
"So salawat i Yahiya," a tig iran.
4 Na pitero i Paolo a "So salawat i Yahiya na para bo ko katalikodi ko manga dosa.
Inipangendao niyan ko manga taw a disomala a paratiyayaan iran so pekaoma a
pekatalondog rekaniyan, a giyoto si Isa."
5 Kagiya maneg ai o manga sokbat na miyakisalawat siran sii ko ingaran o Kadnan a Isa.
6 Sii ko kinidapeneten kiran i Paolo ko manga lima niyan na minitemo kiran so Soti a
Roh, na mitetaro siran sa mibibida a manga basa ago piyayag iran mambo so lalag o
Allah.
7 Manga sapolo siran ago dowa kataw a mama.
8 Somiyoled si Paolo ko sinagoga na sii ko soled o telo olan na pepangosiyatan iyan so
manga taw sa da den a kalek iyan. Pepagayokan iyan siran ko di niyan kiran dii
kapakindadoawai makapantag ko Ndatoan o Allah.
9 Ogaid na so ped kiran na miyamakategas i poso. Da siran paratiyaya na mitetaro sa
marata makapantag ko Lalan o Kadnan sii ko hadapan o malilimod. Sabap san na
inawaan siran i Paolo na piyakaonot iyan so pepamaratiyaya, na oman gawii na dii
makindadaowai roo ko iskowilaan i Tirano.
10 Initaros iyan ai ko miyakadowa ragon, na sabap sii na so langon a kibabaling sa
probinsiya a Asiya, a so manga Yahodi ago so kena a ba manga Yahodi na miyamakaneg
ko katero o Allah.
So Pito kataw a manga Wata i Iskiba
11 Minggolaola so Allah sa sabelek a manga piyakamemesa a nggolalan ki Paolo.

12 Ka apiya so manga paniyo ago manga tinambed a miniseko ko lawas i Paolo na
pepangowiten ko pepanga sasakit, na pepamakapiyaan so manga gedamen iran ago
peliliyo kiran so manga saitan.
13 Aden a pira kataw a manga Yahodi a dii magenebeneb a pepakaliyon iran so manga
saitan ko kisosookan. Na tipengan iran mosar so ingaran o Kadnan a Isa a tig iran a "Sii
ko ingaran i Isa a ipepangosiyat i Paolo na sogoon ko sekano sa liyo ka!"
14 Pinggolaola ini o pito kataw a mama a wata i Iskiba a isa ko manga poporo a imam o
manga Yahodi.
15 Ogaid na simbag siran o saitan a "Katawan aken si Isa, na kikilalaan aken si Paolo
ogaid na antawaa kano?"
16 Na siyadayan siran o mama a sosookan na miyapeges iyan siran langon ago tanto
niyan a piraraneg, na miyamalagoy siran a poon sangkoto a walay a palaya siran
kikapapalian ago kikatatalandiyang.
17 Kiyatokawan ai o langon a kibabaling sa Iposos a manga Yahodi ago so manga Grigo,
na riyaot siran langon a kalek na kiyabantogan so ingaran o Kadnan a Isa.
18 Na madakel a pepamaratiyaya a inepoonan iran a di ran dii kateobata ko manga rarata
a miyanggolaola iran a pepayagen iran ko manga ped.
19 Madakel a salamangkiro a piyanimo iran so manga ribro iran na tiyotong iran ko
hadapan o kalangolangon. Piyagitong iran so arga o manga ribro na lima polo nggibo a
pelata a pirak.
20 Sii sangkai a okit na lomiyangkap so kapaar ago so kapakadaag o katero o Kadnan.
So Kagogorigaw o manga Taw roo sa Ipisos
21 Oriyan angkai a miyanggolaola na tiyangked i Paolo sa ginawa niyan a magokit sa

Masidoniya ago sii sa Grisiya ago teros sa Yarosalim. Na pitero iyan a "Amay ka maipos
ako roo na disomala a song ako mambo sa Roma."
22 Na piyakaona niyan sa Masidoniya so dowa kataw a salinggogopa iyan a si Timotiyo
ago si Irasto na mitelimbagak roo pasin si Paolo sa probinsiya a Asiya.
23 Sii sangkai a masa na aden a mala a samok roo sa Ipisos mipantag ko Lalan o Kadnan.
24 Ka aden a panday sa pirak a bebetowan sa Dimitriyo a dii mamangembaal sa manga
pirak a ipeseyan sa timplo o katohanan iran a si Artimis, na madakel a ped a manga
panday a salinggogopa iyan sangkai a galebek.
25 Na tinimo siran i Dimitriyo ped on so datar iran sa galebek na pitero iyan kiran a
"Manga pagari ko, katawan iyo a ipekewasa tano angkai a galebek.
26 Miyailay niyo ago miyaneg iyo so dii nggolaolaan angkai a mama a bebetowan sa
Paolo. Pitero iyan a so manga tohan a pimbaalan o manga taw na kena a ba tito a tohan,
na madakel a manga taw a kiyaayokan iyan ago piyamagakalan a kena a ba sii bo sa
Ipisos, ka ba bo di langon a probinsiya a Asiya.
27 Sabap san na piligro o ba marata a kanega ko kaoyagan tano, na kena a ba giyai bo, ka
so mambo so timplo o mala a tohan tano a si Artimis na o ba baden kedaan sa bali, na
kebinasa mambo so bantogan angkai a tohan a pesimbaan o langon a taw sii sa Asiya ago
sa dalem a doniya."
28 Kagiya maneg iran ai na tanto siran a kiyararangitan, na inipelalis iran a "Mala i
bantogan si Artimis sa Ipisos!"
29 Na miyagorigaw so langon a taw ko siti, na diyakep iran si Gayo ago si Aristarko a
manga taw sa Masidoniya a manga ped i Paolo ko kapelalakaw iran na miyalalagoy siran
langon ko dii timotimoan ko siti.
30 Kabaya i Paolo a somong roo ogaid na siyaparan o pepamaratiyaya.
31 So pen so ped ko manga olowan ko probinsiya, a manga ginawai i Paolo, na
piyakawitan iran sa toma a inakol iran a di den song ko dii timotimoan.
32 Magogorigaw so malilimod na mbidabida a ipelalalis iran, na di katawan o kadakelan
kiran o ino siran roo ketimo.
33 Na aden a ped ko manga Yahodi a inisomag iran si Alihandro sa onaan sii ko hadapan
o madakel taw kaan iyan kiran maosay so miyaolaola. Initiniyas i Alihandro a lima niyan
kaan makatero
34 Ogaid na kagiya makilala iran a Yahodi sekaniyan na mirengarengan siran den
melalalis sa miyakadowa nda ka oras a di ran dii teroon a "Mala i bantogan si Artimis sa
Ipisos!"
35 Oriyan oto na so sikitariyo sa siti na miyapakarenek iyan so kalilimod na tig iyan a
"Hey manga taw sa Ipisos, katawan o langon a taw a giyangkai a siti a Ipisos i komikibir
ko timplo o Artimis a mala i bantogan a tohan tano ago so barahala on a miyaolog a poon
sa langit,
36 Na da a ba sii makapepelaw. Kagiya ka maoto na patot a rerenek kano ago di kano
penggolaola sa apiya antonaa a kalalalongan.
37 Inowit iyo sii angkai a manga taw apiya o da siran pamanekew ko manga timplo aya
pen o ba iran piyagitowito so tohan tano.
38 Na o aden a dimanda i Dimitriyo ago so ped iyan a manga panday niyan ko apiya
antawaa na aden a pepangokoman tano, ago manga olowan a keripotan iran.
39 Ogaid na o aden pen a ipepanon iyo na kekokom ai ko kalalayaman a kapekelimod o
langon a maginged.
40 Ka o ba baden sektano i kasenditan sa karido sabap ko miyanggolaola imanto, na da a
ba tano mapetero a kiyasabapan sangkai a kiyagorogoro tano."
41 Na oriyan o kiyateroa sii o sikitariyo na piyamakabaling iyan so malilimod a taw.
MANGA GALEBEK 20
Somiyong si Paolo sa Masidoniya ago Grisiya
Kagiya mapasad so kiyagorigaw iran na piyakisongowan i Paolo so pepamaratiyaya, na

kagiya mapando iyan siran na miyodas kiran na gomiyanat, ka song sa Masidoniya.
2 Sii ko kapegokit iyan sangkoto a manga darpa na piyamando iyan so pepamaratiyaya
roo sa madakel a manga osiyat, na tomiyaros den sa Grisiya
3 Na tomiyareg roo sa miyakatelo olan. Kagiya ngganat roo a pelayalayag sa Siriya na
kiyatokawan iyan a aden a kekadiyaten o manga Yahodi a kambonoa iran rekaniyan.
Sabap sii na miyapamikir iyan a kesoy roo a magokit sa Masidoniya.
4 Miyamangonot rekaniyan si Sopatro a wata i Piro a taw sa Biriya, siki Aristarko ago si
Sikondo a manga taw sa Tisalonika, si Gayo a taw sa Dirbi, si Timotiyo, ago siki Tikiko
ago si Tropimo a manga taw sa Asiya.
5 Miyaona siran somong a di sekami sa Trowas na roo kami ran niyayaw.
6 Sii ko kiyapopos o Pista sa Kakan sa Paan a da a Tapay ron na milayalayag kami a poon
sa Pilipos. Kagiya makalima gawii na miyaoma ami so manga ped ami sa Trowas na roo
kami tomiyareg sa miyakapito gawii.
Inoyag i Paolo so Mangoda roo sa Trowas
7 Kagiya Akad ko kagagawii na mitimotimo kami ka piyamagatoangan ami so Kaken a

Ipetedem ko Kadnan, na piyangosiyatan i Paolo so manga taw. Initaros iyan a di niyan dii
katero taman ko kiyalooki sa gawii, ka ngganat roo ko kepitaan on.
8 Madakel a manga solo ko rowang sa poro a titimoan ami
9 Na ana sakataw a mangoda a bebetowan sa Yotiko a moontod ko rowasan. Kagiya
matey den a dii katero i Paolo na petoratoden a tanto so mangoda, na kagiya torogen na
miyaolog sa lopa a poon ko ikatelo ka andana o walay, na kagiya kowaan sekaniyan o
manga taw na miyatay den.
10 Ogaid na miyanog si Paolo na tominikoro ka giyakes iyan so mangoda, na tig iyan a
"Di kano pekewan, ka oyagoyag sekaniyan pen!"
11 Na miyanik peman si Paolo na piyangopak iyan so paan na komiyan on.
Miyakimbitiyarai sekaniyan kiran peman taman sa kiyakelibabas iyan, na oriyan oto na
giyanatan iyan siran.
12 Inibaling o manga taw so mangoda a miyaoyag na tanto siran a miyababaya.
So Kiyapelayalayag a poon sa Trowas taman sa Militos
13 Miyona kami gomanat a di si Paolo na milayalayag kami sa Asos ka roo ami sekaniyan
pekapagdaa ko kapal. Giyanan i initoma niyan rekami ka pendilalag sekaniyan sa kasong
iyan roo.
14 Sii ko kiyaalawa niyan rekami sa Asos na piyakapagda ami ko sekaniyan ko kapal na
tomiyaros kami sa Mitilini.
15 Poon roo na milayalayag kami na kagiya talondog a gawii na miyakaoma kami ko
pantag a balet a Kayos. Kagiya makasalongan na miyakaoma kami ko balet a Samos, na
kagiya talondog a gawii na minisampay kami sa Militos.
16 Kiyokom i Paolo sa ginawa niyan a ba niyan den lepasa a Ipisos kaan sekaniyan di
kesendod ko probinsiya a Asiya; ka dii nggagaan kaan makaoma sa Yarosalim, o
kepakay, sa da pen kaoma o Gawii a Pintikostis.
So Kiyaodas i Paolo ko manga Pelokelokesen ko Agama sa Ipisos
17 Sii ko katatago i Paolo roo sa Militos na piyakisogoan iyan so manga pelokelokesen

ko Agama roo sa Ipisos ka piyangni niyan kiran a makitoona siran rekaniyan roo.
18 Kagiya makaoma siran na pitero iyan kiran a "Katawan iyo so sowasowai aken sii ko
kipageepedaan ko rekano ipoon ko paganay a kiyapakaoma ko sa probinsiya a Asiya.
19 Ka piyanalagadan aken so Kadnan a rakes o tanto a kiyapangalimbabaan ago
kiyasegad. Madakel a karomasayan a kiyasagadan aken sabap ko manga rarata a kadiyat o
manga Yahodi.
20 Katawan iyo a da aken ndarainonen a kiyanggolaolaa ko ko apiya antonaa a kiogop
rekano sii ko kapepangosiyati ago kapepangendaowa ko rekano sii ko hadapan o manga
taw ago san ko manga walay niyo.
21 Pimataanan aken ko manga Yahodi ago sii ko kena a ba manga Yahodi a disomala a
talikodan iran so manga dosa iran kaan siran makasangor ko Allah ago makaparatiyaya ko
Kadnan tano a Isa.
22 “Imanto na song ako sa Yarosalim a tetegelen ako o Roh, na di ko katawan o antonaa i
keokitan aken roo.
23 Aya bo a katawan ko na kekalaboso ako ago kerasay, ka giyoto i pepamataanan raken
o Soti a Roh sii ko oman i siti.
24 Ogaid na ibibilang aken so kaoyagoyag aken a da a kipantag iyan raken asar ka
matoman aken so sogoan raken ago mapasad aken so galebek a inibegay raken o Kadnan
a Isa, a so kapepakalangkapa ko Mapiya a Totol makapantag ko limo o Allah.
25 “Gowani na miyagenebeneb ako sii rekano a pepakalangkapen aken so Ndatoan o
Allah, ogaid na katawan ko imanto a da den a isa rekano bo a ba ako niyan keilay
peroman.
26 Kagiya ka maoto na pemataanan ko rekano sangkai a gawii a o aden a isa rekano a di
kesabet na kena a ba raken kisala.
27 Ka da aken ndarainonen a kiyapayaga ko rekano ko langon a takdir o Allah.
28 Iiktiyari niyo a manga ginawa niyo ago so langon a matatalon a pepamaratiyaya a
piyakikibir rekano o Soti a Roh, na tatagikora niyo so Agama o Allah a miyapamasa
niyan sa rek iyan a rogo.
29 “Katawan aken a amay ka ganatan ko sekano na aden a pemangeped rekano a manga
taw a datar sa parangay o manga wawaraw a aso a nggobat ko talon.
30 Apiya so manga ped rekano na mbibiden iran so tito a benar kaan iran mapakaonot ago
mapesokbat so ped rekano.
31 Sabap san na pagiiktiyar kano! Tatanodi niyo a sii ko miyakatelo ragon na gagawii
daondaw na da a rintas a kapemangtomai ko ko oman i isa rekano a rakes o madakel a lo.
32 “Imanto na iserig aken sekano ko Allah ago so katero makapantag ko limo iyan. Giyai
na pekabager rekano ago pekabegay rekano pen sa kawali a ped o langon a manga kaom o
Allah.
33 “Da aken kasigin so pirak, o di na bolawan, o di na manga nditaren o apiya antawaa
taw.
34 Katawan iyo a ininggalebek aken angkai a manga lima ko sa kapegasaa ko ko
kaoyagan ami ago so manga ped aken.
35 Sii ko langon o pinggolaola ko na piyakiilay aken rekano a paliyogat a pepanamar tano
nggalebek samanaya kaan tano kaogopi so manga lolobay a rakes o katatanodi ko pitero o
Kadnan a Isa a 'Lebi a mala a kapekebabaya o pepemegay a di so pepekatarima.' "
36 Kagiya mapasad ai tero i Paolo na miyamanodiyod siran langon ago miyangangarapan.
37 Miyamanegad siran langon na giyakes iran si Paolo ago piyangangarekan iran.
38 Aya tanto a inikerata a ginawa iran na so pitero iyan a di iran den keilay peroman. Na
inidolog iran sekaniyan taman ko kapal.
MANGA GALEBEK 21
Tomiyaros si Paolo sa Yarosalim
Kagiya makaodas kami kiran na tomiyolak kami na miyamantek melayalayag sa Kos.

Kagiya talondog a gawii na iniraot kami sa Rodas, na poon roo na tomiyaros kami sa
Patara.
2 Aden a miyaoma ami roo a kapal a song sa Ponisiya na mida kami ron na tomiyolak.
3 Miyailay ami a polo a Sipri na siyagadan ami a madidiwang ami na tomiyaros kami sa
Siriya. Domiyongko so kapal sa Tiro ka roo itepad so rororanen on.
4 Minitoona ami so pepamaratiyaya roo na komiyaden kami kiran ko miyakapito gawii.
Na nggolalan ko Roh na inakolan iran si Paolo a di song sa Yarosalim.
5 Ogaid na oriyan o kiyatareg ami kiran na tomiyaros kami ko kapelalakaw ami. Siran
langon a rakes o manga karoma iran ago manga wata na inonotan kami iran taman ko liyo
o siti. Roo ko kilid a ragat na somiyodiyod kami langon ka miyangangarapan.
6 Oriyan iyan na miyodas kami ko oman i isa kiran na
21 kami ko kapal, na mimbabaling siran.
7 Tomiyaros kami melayalayag a poon sa Tiro na domiyongko kami sa Tolemaida.
Siyalam ami roo so magariyari na komiyaden kami kiran sa miyakasalongan.
8 Kagiya talondog a gawii na gomiyanat kami na miyakaoma kami sa Kaisariya.
Somiyong kami ko walay i Pilipi a aya pepangosiyat ko Mapiya a Totol, na ron kami
miyolos. Sekaniyan so isa ko pito kataw a miyapili roo sa Yarosalim.
9 Aden a pat kataw a wata iyan a manga raga a pepamakapayag ko lalag o Allah.
10 Kagiya mamakapira den gawii a katatareg ami roo na miyakaoma so isa a nabi a poon
sa Yodiya a aya ngaran iyan na si Agabo.
11 Miyobay sekaniyan rekami na kinowa niyan so sambitan i Paolo, na inipatong iyan so
sambitan sa rek iyan a manga lima ago ai. Na tig iyan a "Giyai i pitero o Soti a Roh: so
kirek sangkai a sambitan na petongen sa datar ai o manga Yahodi sa Yarosalim, na
peladen iran sekaniyan ko kena a ba manga Yahodi."
12 Kagiya maneg ami ai na sekami ago so manga ped roo na inakolan ami si Paolo a di
makataros sa Yarosalim.
13 Ogaid na inisembag iyan a "Ino kano penggoraok a perataan iyo a ginawa ko? Ka
makatitiyagar ako sa kena bo a ba so kakelabosowa raken roo sa Yarosalim, ka so pen so
kapatay aken asar a sabap ko ingaran o Kadnan a Isa."
14 Kagiya da ami sekaniyan kaayoki na ginekan ami a tig ami a "Pangnin ta a matoman
so kabaya o Kadnan."
15 Kagiya mamakapira gawii na miyaninimo kami na somiyong kami sa Yarosalim.
16 Miyonot rekami so ped ko pepamaratiyaya a poon sa Kaisariya, na inidolog kami iran
ko walay i Menason ka ron kami mbolos. Si Menason na taw sa Sipri na isa sekaniyan ko
miyaona a miyamaratiyaya.
Inibentel i Paolo si Santiyago
17 Kagiya makaoma kami sa Yarosalim na siyakaw kami o magariyari roo a miyababaya

siran.
18 Kagiya talondog a gawii na si Paolo ago sekami na inibentel ami si Santiyago, na
makadadarpa roo so langon o manga pelokelokesen ko Agama.
19 Siyalam siran i Paolo na piyanotol iyan kiran so langon o pinggolaola o Allah sii ko
kena a ba manga Yahodi a nggolalan ko galebek iyan.
20 Kagiya mapasad iran sekaniyan mapamakineg na piyodi iran so Allah. Na pitero iran
ki Paolo a "Katawan ka, pagari ami, a nggibonggibo a manga Yahodi a miyamaratiyaya,
na palaya siran na ipepaninindegan iran piyapiya so Kitab o Mosa.
21 Miyatero kiran a ipepangendao ngka kon ko langon a Yahodi a kibabaling sii ko
manga inged o kena a ba manga Yahodi a paliyogat a talikodan iran so Kitab o Mosa, ago
di iran den toriin so manga wata iran aya pen o ba iran tomana so manga taritib tano.
22 Na antonaa i sowaan tano sii? Mataan a ketokawan iran a miyakaoma ka.
23 “Kagiya ka maoto na nggolaolaa ngka ngkai a peteroon ami reka. Aden a pat kataw a
mama sii a misemaya ko Allah.
24 Onot ka kiran na pangeped ka ko kipenggolalanen iran ko kapelompiyowa sa manga
ginawa iran, na bayadi ngka so mapenggasto iran kaan siran mamakiopaw. Sii sangkai a
okit na ketokawan o langon a taw a kena a ba benar so miyaneg iran makapantag reka ka
petomanen ka so Kitab o Mosa.
25 “Na mipantag ko kena a ba manga Yahodi a miyamaratiyaya na pisoratan ami siran
makapantag ko inikokom ami ron, a di siran ken ko pangenengken a inisapaat ko
barahala, o di na rogo, o di na sapo o ayam a miyapekel, ago di siran pesebo."
26 Kagiya talondog a gawii na piyakaonot i Paolo angkoto a pat kataw a mama na
ininggolalan iyan so kapelompiyowa sa ginawa niyan a ped iyan siran. Oriyan iyan na
somiyoled si Paolo ko Timplo na piyakitokawan iyan so kakepopos o manga gawii a
kapelompiyo, ka giyoto so gawii a aden a isepaat para ko oman i isa kiran.
Diyakep si Paolo
27 Kagiya kepopos den so pito gawii na aden a manga Yahodi a poon sa probinsiya a
Asiya a miyakailay ki Paolo roo ko soled o Timplo, na piyangondoy iran so langon o
madakel a taw na diyakep iran sekaniyan.
28 Inipelalis iran a "Hey manga taw sa Israil, ogop kano, ka katii so mama a pepangendao
ko langon a taw ko mbalabala sa sopak ko manga Yahodi ago so Kitab o Mosa ago
giyangkai a Timplo! Na liyo san pen na piyakasoled iyan so manga taw a kena a ba
Yahodi sii ko Timplo, na kiyakaraman iyan angkai a soti a darpa!"
29 Pitero iran ai ka miyailay iran gowani si Tropimo a taw sa Ipisos a mipageepeda i
Paolo ko siti, na aya katao iran on na ba piyakasoled i Paolo ko Timplo.
30 Miyagorigaw so langon a taw ko dalem a siti na mirengarengan siran malalagoy ko
Timplo. Diyakep iran si Paolo na tiyoyok iran roo ko liyo o Timplo, na sarta a likeban so
manga pintoan iyan.
31 Sii ko kapepanamari ran mono ki Paolo na miniripot ko inidal o manga sondaro a
Iromanen a miyasamok a dalem a Yarosalim.
32 Sagogona a piyakaonot iyan so manga kapitan ago manga sondaro na minggagaan
siran somong ko madakel a taw. Kagiya mailay iran so inidal ago so manga sondaro na
ginekan iran mamentol si Paolo.
33 Inobay o inidal si Paolo na diyakep iyan ago inisogo iyan a kapatonga on a dowa a
rantay. Na inipangingise iyan o antawaa si Paolo ago antonaa i pinggolaola niyan.
34 Ogaid na mbidabida a inipelalalis o madakel a taw, na da mapariksa o inidal o antonaa
i tito a miyaolaola sabap ko kiyagorigaw iran. Inisogo iyan ko manga sondaro a wita iran
si Paolo roo sa barak.
35 Kagiya makaoma siran ko towak na miyabaas so manga sondaro sa kasapoata iran ki
Paolo sabap ko kapeperangiti ron o madakel a taw
36 A pepamanondog kiran a ipelalalis iran a "Bonoa niyo sekaniyan!"
Inipanindeg i Paolo a Ginawa niyan
37 Kagiya isoled iran den si Paolo sa barak na tig iyan ko inidal a "Ba kepakay a
mimbitiyarai aken seka?"
Na tig o inidal a "Makapetero ka bes sa basa a Grigo?
38 Kena bes o ba seka angkoto a Imisiren a gopen ai na piyakirido iyan so gobirno ko pat
nggibo a taw a manga kontra a piyagolowanan iyan roo ko mitataog a kaden?"
39 Tig i Paolo a "Saken na Yahodi a taw sa Tarso roo sa Silisiya a magiinged ko pirmiro
a siti. Kapedipedi ka bo na peroa ngka a ipembitiyarai aken angkai a manga taw."
40 Miniyog so inidal, na tominindeg si Paolo ko towak na pitiniyasan iyan so madakel a
taw. Kagiya tanto siran a romenek na mitero si Paolo ko basa a Hibriyo a tig iyan a:
MANGA GALEBEK 22
"Manga pagari aken ago manga lokes aken, pamakinega niyo so kipenindegen aken sa
ginawa ko sa hadapan iyo."
2 Na kagiya maneg iran a mitero sekaniyan sa basa a Hibriyo na lebi pen a kiyarenek iran,
na pitero pen i Paolo a
3 “Yahodi ako a inimbawata sa Tarso roo sa Silisiya, ogaid na sii ako miyakala sa
Yarosalim ka morit i Gamaliyal. Miyabatak ako ko kapetomana piyapiya ko Kitab o
manga apo tano, na kasosomayodan ako sa kapepangongonotani aken ko Allah a datar iyo
mambo langon imanto.
4 Siran oto a pekedeg sangkai a 'Lalan' na piyanatro aken apiya sa taman sa kapatay iran.
Pindadakep ago piyangalaboso aken siran a manga mama ago babay.
5 So maporo a imam ago so langon a maporo a pangongokom na kapeseksian iran a benar
ai. Miyakatarima ako sa manga sorat a poon kiran para ko manga pagari tano a Yahodi
roo sa Damasko, na somiyong ako roo ka pendadakepen aken angkoto a manga taw ago
pagowiten ko siran sa Yarosalim kaan siran madaneg."
Piyagosay i Paolo so Kiyateklid iyan
6 “Sii ko kapepakarani aken sa Damasko na sii ko keoto a alongan na minitekaw a aden a

mala a sindaw sa langit a sominindaw ko melilibeta raken.
7 Miyaoteng ako ko lopa na miyakaneg ako sa sowara a tig iyan a 'Saolo, Saolo, ino ako
ngka pesetroa?'
8 “Iniise aken on a 'Antawaa ka, Kadnan?' Tig iyan a 'Saken si Isa a Taw sa Nasarit a
pesetroon ka.'
9 So manga ped aken na miyailay iran so sindaw ogaid na da iran maneg so sowara a
miyakimbitiyarai raken.
10 “Na iniise aken a 'Antonaa i sowaan ko, Kadnan?' Na pitero raken o Kadnan a 'Tindeg
ka na song ka sa Damasko, ka roo reka peteroon so langon a paliyogat reka a
penggolaolaan ka.'
11 “Na miyabota ako sabap ko sigay o sindaw, na kiyapetan o manga ped aken a lima ko
na inagak ako iran roo sa Damasko.
12 Aden a mama roo a bebetowan sa Ananiyas a baraamal a mama a petomanen iyan so
Kitab ago pagaadatan o langon a Yahodi a kibabaling roo.
13 Siyongowan ako niyan na tominindeg ko obay aken a tig iyan a 'Saolo, pagari ko,
pekailay ka den!' Na sii sangkoto a sakotika na miyakailay ako peroman, na miyailay aken
sekaniyan.
14 “Pitero iyan a 'So Tohan o manga apo tano na pinili ka niyan kaan ka katokawi so
kabaya iyan ago mailay ngka so Maontol a Siyogo iyan, ago an ka maneg so manga katero
a poon sa ngari iyan.
15 Ka kebaloy ka a saksi iyan a peteroon ka ko langon a taw so miyailay ngka ago
miyaneg.
16 Na ino ka pen nanayaw imanto? Tindeg ka ago pakisalawat kaan ka kalompiyowi ko
manga dosa ngka a nggolalan ko katelowi ngka ko ingaran iyan.'
So Kiyasogoa ki Paolo ko Kena a ba manga Yahodi
17 “Oriyan oto na komiyasoy ako sa Yarosalim na sii ko kapepangangarapan aken ko

Timplo na miyakailay ako sa pangingilain.
18 Na miyailay aken so Kadnan a tig iyan raken a 'Awai ngka nggagaan a Yarosalim, ka
di terimaan o manga taw sii so kapeseksii ngka raken.'
19 “Somimbag ako a 'Kadnan, katawan iran a sii ko oman i sinagoga na pindadakep aken
ago piyamadasan so pepamaratiyaya reka.
20 Na sii ko kiyabonoa ko saksi i ka, a si Istiban, na ndodoo ako, na miyayon ako ron sii
ko kapepagipata ko ko manga gerab o pepamono on.'
21 “Na pitero raken o Kadnan a 'Ika roo den,, ka pekasongen aken seka ko mawatan a
manga inged sii ko kena a ba manga Yahodi.' "
22 Sii bo taman a kiyapamakinega o manga taw ki Paolo, na sarta a inipelalalis iran a
"Bonoa niyo a mama ini! Di patot o ba pen maooyag!"
23 Sii ko kapepelalalis iran na ipekoyambet iran so manga gerab iran ago ipembombor
iran sa poro so manga bayanek.
24 Inisogo o inidal ko manga sondaro a isoled iran si Paolo sa barak, na pitero iyan kiran
a pelalambita iran kaan iyan mapariksa o ino ai ipelalalis o manga Yahodi ki Paolo.
25 Ogaid na kagiya patongen iran ka pelambiten iran na pitero i Paolo ko kapitan a
tomitindeg roo a "Ba sii ko kitab so kapelambita ko Iromanen a da pen makokom?"
26 So kiyanega sii o kapitan na somiyong ko inidal na tig iyan a "Iiktiyari ngka so
penggolaolaan ka, ka giyangkoto a mama na Iromanen!"
27 Somiyong so inidal ki Paolo na iniise iyan on a "Teroa ngka raken; ba ka Iromanen."
Tig i Paolo a "Oway."
28 Tig o inidal a "Mala a miyanggasto aken an ako mabaloy a Iromanen."
Tig i Paolo a "Inimbawata ako a Iromanen."
29 Na sarta den a siran oto a pengingise ki Paolo na ginekan iran sekaniyan, na miyalek
so inidal ko kiyatokawi niyan sa si Paolo a piyakirantayan iyan na Iromanen bes.
Si Paolo ko hadapan o Maporo a Kokoman o manga Yahodi
30 Sii ko talondog a gawii na kagiya kabaya o inidal a mapariksa iyan o antonaa i osto a
dimanda o manga Yahodi ki Paolo na biyokaan iyan ko kapapatongan on na piyakilimod
iyan so manga poporo a imam ago so langon a pangongokom o manga Yahodi, na
piyakapangadap iyan kiran si Paolo.
MANGA GALEBEK 23
Tintengan i Paolo so manga pangongokom na pitero iyan a "Manga pagari ko, maliwanag
ako i hatin ko hadapan o Allah sii ko kiyapaginetaw aken taman sangkai a gawii."
2 Na so maporo a imam a si Ananiyas na inisogo iyan ko manga taw a tomitindeg ko
obay i Paolo a tepin iran sa ngari.
3 Tig i Paolo a "Tepin ka o Allah a seka a dii magomanta! Moontod ka san a makokom
ako ngka a ipepasod ko Kitab, ogaid na siyogok ka so Kitab ko kiyapakitepin ka raken!"
4 Na pitero o kititindeg ko obay i Paolo a "Piyagongatongat ka so maporo a imam o
Allah!"
5 Somimbag si Paolo a "Di ko katawan, manga pagari ko, o ba sekaniyan i maporo a
imam, ka misosorat ko Kitab a 'Di ngka pegitowitoa so pangolo o manga taw niyo.'
6 Na katawan i Paolo a so sabaad ko manga pangongokom na manga Sadosi na so sabaad
on na manga Parisi. Sabap sii na pitero iyan sa matanog sii ko dii kokoman a "Manga
pagari ko, Parisi ako ago wata ako pen o manga Parisi. Na pekokomen ako sii sabap ko
sarig aken a aden a kapenga ooyag o miyamatay."
7 Kagiya matero iyan ai na mipepawala so manga Parisi ago so manga Sadosi, na
miyabagi so malilimod.
8 Ka dii teroon o manga Sadosi a da a kapenga ooyag o miyamatay, ago da a manga
malaikat aya pen o ba manga niyawa, ogaid na pembenaren ai langon o manga Parisi.
9 Na minitaralo so di ran dii kapepawala, na tominindeg so ped ko manga goro ko Kitab a
komekepit ko manga Parisi na milampawiya siran a tig iran a "Da a ba ami ketoon a sala
angkai a mama! Masiken a aden a niyawa o di na malaikat a miyakimbitiyarai rekaniyan!"
10 Kagiya tanto siran a makaperidoay na miyalek so inidal o ba iran baden sekisia so
lawas i Paolo. Na siyogo iyan so manga sondaro niyan sa kasong iran ko malilimod kaan
iran mabelag si Paolo ko manga taw ago mawit iran sa barak.
11 Sii sangkoto a kagagawii na miyakimasa so Kadnan ki Paolo a tomitindeg ko obay
niyan a tig iyan a "Pakapipiyaa ngka a ginawa ngka! Datar o kiyaseksii ngka raken sii sa
Yarosalim na disomala a peseksian ako ngka mambo roo sa Roma."
So Kadiyat a Kambonoa ki Paolo

12 Kagiya mapita na mikediyat so ped ko manga Yahodi, na inisepa iran a di siran ken o
di na maginom taman sa mabono iran si Paolo.
13 Sobra siran sa pat polo kataw a miyagayonayon sii.
14 Na miyamanong siran ko manga poporo a imam ago so manga pelokelokesen a tig iran
a "Inisepa ami a di kami den ken taman sa mabono ami si Paolo.
15 Na imanto na sekano ago so langon a pangongokom na teroa niyo ko inidal a
pakiwiten iyan rekano si Paolo a omamanta sa aya angin iyo na periksaan iyo piyapiya so
makapantag ko rido iyan. Na makatitiyagar kami den sa kambonoa ami ron ko di niyan sii
pen kapekaoma."
16 Ogaid na so wata a mama o babay i Paolo na kiyatokawan iyan angkai a kadiyat, na
somiyong sekaniyan ki Paolo sa barak na iniripot iyan on ai.
17 Na piyakitawag i Paolo so isa a kapitan na pitero iyan on a "Wita ngka angkai a
mangoda ko inidal, ka aden a peteroon iyan on."
18 Na inowit iyan ko inidal a tig iyan a "So kalaboso a si Paolo na tiyawag ako niyan na
inakol iyan raken a pagowiten ko reka angkai a mangoda, ka aden kon a peteroon iyan
reka."
19 Na kiyapetan o inidal so lima o mangoda na inisibay niyan, na inisean iyan a tig iyan a
"Antonaa i peteroon ka raken?"
20 Pitero o mangoda a "Miyagayonayon so manga Yahodi a pagakolen iran reka a witen
ka si Paolo ko dii kokoman mapita a omamanta sa aya angin iran na periksaan iran
piyapiya so makapantag ko rido iyan.
21 Na di ngka siran mbenara, ka aden a kalalawanan so pat polo a mama a pepagayan
rekaniyan, ka inisepa iran a di siran den ken o di na maginom taman sa mabono iran si
Paolo. Makatitiyagar siran den imanto, na aya bo a penayaon iran na so kapagiyog ka."
22 Na piyando o inidal so mangoda a tig iyan a "Di ngka peteroa ko apiya antawaa a
iniripot ka ini raken." na piyakabaling iyan so mangoda.
Inowit si Paolo ko Gobirnador Pilikso
23 Oriyan oto na tiyawag o inidal so dowa ko manga kapitan na tig iyan kiran a "Tiyagar
kano sa dowa gatos a sondaro a pekasongen sa Kaisariya imanto a alas nibi sa gagawii a
oonotan o pito polo a sondaro a kikokoda, ago dowa gatos a sondaro a kiaawid sa
bangkaw.
24 Tiyagar kano pen sa manga koda a kakodaan i Paolo, na wita niyo ko gobirnador
Pilikso sa da a ba on pekasamok."
25 Na pisoratan o inidal so gobirnador, a aya oni o sorat na:
26 Alamat sorat ako i Kladiyo Lisiyas makaoma ko lebi a tantowataw a si gobirnador

Pilikso.
27 Giyangkai a mama na diyakep o manga Yahodi na mbonoon iran o kowan. Ogaid na
siyongowan aken sekaniyan a rakes o manga sondaro aken na siyabet aken, ka
kiyatokawan aken a Iromanen sekaniyan bes.
28 Kagiya kabaya aken a mapariksa aken o antonaa i sabap a kapesenditi iran on na
piyakapangadap aken sekaniyan ko manga pangongokom iran.
29 Kiyatokawan aken a da den a pinggolaola niyan a ba sak a imbono on o di na
ikelaboso ron, ka so dimanda iran on na mipantag ko di ran dii kandadaowa ko Kitab iran.
30 Kagiya miripot raken a kekadiyat so ped ko manga Yahodi sa kambonoa iran on na
piyakasong aken reka somambot, na pitero aken ko mindimanda on a san iran reka
kidimanda."
31 Na tiyoman o manga sondaro so inisogo kiran ka kinowa iran si Paolo na inowit iran
sa Antipatris sii ko kagagawii.
32 Kagiya talondog a gawii na so manga sondaro a pelalag baden na miyamangasoy sa
barak a aya iran piyakadolog ki Paolo so kikokoda.
33 Kagiya makaoma siran sa Kaisariya na inibegay iran so sorat ko gobirnador na piyalad
iran on si Paolo.
34 Biyatiya o gobirnador so sorat na iniise iyan ki Paolo o anda poon a probinsiya. Kagiya
katokawan iyan a taw sekaniyan sa Silisiya na tig iyan a
35 “Pemakinegen aken so peteroon ka amay ka makaoma so manga mindimanda reka."
Na piyakinggordiyaan iyan si Paolo sii ko torogan i Hirod.
MANGA GALEBEK 24
Inidimanda o manga Yahodi si Paolo
Kagiya makalima gawii na so maporo a imam a si Ananiyas na somiyong sa Kaisariya a

ped iyan so pira kataw a manga pelokelokesen ago so isa a abogado a bebetowan sa
Tirtolo, na inidimanda iran si Paolo ko hadapan o gobirnador.
2 Kagiya pakitawag si Paolo na inepoonan tero i Tirtolo so ipendimanda iran on a tig iyan
a "Hey Pilikso a lebi a tantowataw, tanto a lomilintad angkai a inged tano ko di ngka on
dii kandatoi, na madakel a kiyapangosor iyan sabap ko kapamlalag ka.
3 Sii ko langon a darpa ago langon a masa na tanto ami ai a inikababaya, na
pepanalamatan ami seka.
4 Ogaid na di aken kabaya o ba ko seka sii pakapagteya, na pagakolen ami reka a sabap
ko kala a ka i limo na pamakinega kami ngka sa di matey.
5 Kiyatokawan ami a giyangkai a mama na tanto a pepakasamok, ka pepakirido iyan so
gobirno ko langon a Yahodi sa dalem a doniya. Isa sekaniyan a olowan o agama a
bebetowan sa manga Inasariten,
6 Na tipengan iyan pen so kakekarami ko Timplo; sabap san na diyakep ami.
8 O pangingisei ngka angkai a mama na ketokawan ka so makapantag ko langon ai a
inidimanda mi ron."
9 Na miyamakaayon mambo so manga Yahodi ko pitero i Tirtolo a di ran dii teroon a
palaya den benar.
Inipanindeg i Paolo a Ginawa niyan ko hadapan i Pilikso
10 Pitiniyasan o gobirnador si Paolo a tero, na tig i Paolo a "Katawan aken a seka i

pangongokom angkai a nasiyon sii ko soled o madakel a manga ragon. Kagiya ka maoto
na inipakapiya a ginawa ko so kitindegen aken sa ginawa ko sii sa hadapan ka.
11 O pariksaa ngka na ketokawan ka a da pen makasapolo ago dowa gawii a kiyasong
aken sa Yarosalim ka simba ako roo.
12 Da ako roo matoon o manga Yahodi a ba ako dii makindadaowai ko apiya antawaa ko
Timplo aya pen o ba aken penggorigawa so madakel a taw, apiya sii ko manga sinagoga o
di na apiya anda onon sii ko siti.
13 Na di iran reka keporibaan so manga dimanda iran raken imanto.
14 “Ogaid na peyagen ko sa hadapan ka a pesimbaan aken so Tohan o manga apo ami a
nggolalan ko kapekedega ko ko Lalan a di ran dii teroon a di benar. Peparatiyayaan aken
pen so langon a misosorat ko Kitab o Mosa ago so Sorat o manga nabi,
15 Na pepagarapen ko sii ko Allah a aden a kakeoyag o miyamatay a manga oontol ago di
manga oontol a aya den mambo pepagarapen angkai a manga taw.
16 Sabap sii na lalayon aken pepanamaran a kapakaliwanaga ko ko hatin aken sii ko
hadapan o Allah ago sii ko manga manosiya.
17 “Oriyan o miyamakapira ragon a kiyapakaawa aken sa Yarosailm na komiyasoy ako
roo a maawid sa manga tabang para ko manga taw aken, ago so manga soasoat a
ipesapaat aken ko Allah.
18 “Sii ko di aken sii dii kanggolaolaa na miyaoma ako iran ko Timplo oriyan o
kiyalompiyowi ko sa ginawa ko. Da a ped aken a madakel a taw, ago da a samok a
miyaolaola.
19 Ogaid na aden a manga Yahodi roo a poon sa probinsiya a Asiya, na siran i patot a
pengadap reka kaan iran matero o aden a kidimanda iran raken.
20 O di na pakiteroon ka sa manga taw ai o antonaa i miyatoon iran a sala aken ko
kiyapakadarpa aken ko manga poporo a pangongokom,
21 Liyo ko isa a katero a inipelalis aken sii ko katitindeg aken ko hadapan iran a
'Pekokomen ako imanto ko hadapan iyo sabap bo ko kapeparatiyayaa ko ko kapenga
ooyag o miyamatay.' "
22 Mandiyadi na si Pilikso, a katawan iyan piyapiya so makapantag ko Lalan, na inepos
iyan so kapekokoma ko rido iran a tig iyan a "Pesaden aken so rido iyo amay ka makaoma
so inidal a si Lisiyas."
23 Na inisogo iyan ko kapitan a penggordiyaan iyan si Paolo sa di niyan tanto a pearen,
ago peperon iyan ko manga ginawai niyan a mibegay iran on so manga kailangan iyan.
Si Paolo ko hadapan i Pilikso ago si Derosila
24 Kagiya mamakapira gawii na miyakaoma peroman si Pilikso a ped iyan so karoma

niyan a si Derosila a Yahodi. Na piyakitawag iyan si Paolo ago piyamakineg iyan so
kapepegosaya i Paolo ko makapantag ko paratiyaya ki Isa Al Masih.
25 Ogaid na sii ko kagiya maaloy i Paolo so makapantag ko kaontol, so kipaaren sa
ginawa, ago so pekatalingoma a gawii a kapengokom na miyalek si Pilikso na tig iyan a
"Di ngka ini terosen! Ika roo den imanto, na pakitawag aken seka bo amay ka aden a
logar aken."
26 Ogaid na sabap sa iinamen i Pilikso a tendanan sekaniyan i Paolo na omanoman iyan
den pakitawag kaan iyan dii mimbitiyarai.
27 Oriyan o miyakadowa ragon na miyabaloy si Porsiyo Pisto a gobirnador a minisambi
ki Pilikso, na kagiya kabaya i Pilikso a masoat iyan so manga Yahodi na da niyan
pakaliyowa si Paolo sa kalaboso.
MANGA GALEBEK 25
Pekikokom si Paolo ko Solotan sa Roma
Miyakatelo gawii ko oriyan o kiyapakaoma i Pisto ko probinsiya na somiyong sekaniyan

sa Yarosalim a poon sa Kaisariya.
2 Na so manga poporo a imam roo ago manga olowan a Yahodi na piyakitokawan iran on
so manga dimanda iran ki Paolo.
3 Na inakol iran ki Pisto a ampilan iyan siran ago pakiwiten iyan si Paolo sa Yarosalim,
ka pegayanan iran kaan iran mabono roo sa lalan.
4 Pitero i Pisto a "Kakalaboson si Paolo roo sa Kaisariya, na di ini matey na kesoy ako
roo.
5 Pakaonota niyo raken so ped ko manga olowan iyo, na o aden a sala angkoto a mama na
midimanda iran sekaniyan roo."
6 Komiyaden kiran si Pisto ko miyakawalo o di na miyakasapolo gawii, na komiyasoy sa
Kaisariya. Kagiya talondog a gawii na domiyarpa ko dii kokoman na pitero iyan a witen
roo si Paolo.
7 Kagiya makaoma si Paolo na so manga Yahodi a poon sa Yarosalim na linibet iran
sekaniyan, na madakel a mapened a manga dimanda iran on a da iran den kaporibai.
8 Ogaid na inipanindeg i Paolo a ginawa niyan a tig iyan a "Da a sala aken a minisogok
ko Kitab o manga Yahodi, aya pen so Timplo, o di na so Solotan sa Roma."
9 Kagiya kabaya i Pisto a masoat iyan so manga Yahodi na iniise iyan ki Paolo a "Ba ka
pagiyog sa kapagowita reka sa Yarosalim ago roo aken seka kokoma mipantag sangkai a
manga dimanda?"
10 Tig i Paolo a "Sii ako den ndarpa ko dii kokoman o Solotan a ron patot a kakokoma
raken. Da a pinggolaola ko a minisopak ko manga Yahodi, na katawan ka ini piyapiya.
11 O miyasogok aken so Kitab, o di na miyakanggolaola ko sa patot a imbono raken na di
aken pengnin o ba ako makalidas ko kambonoa raken. Ogaid na o di benar so manga
dimanda raken angkai a manga Yahodi na da a ba raken kiran pekapalad. Na sii ako
imanto pekikokom ko Solotan sa Roma."
12 Na oriyan o kinimbitiyarain i Pisto ko manga mosawira iyan na tig iyan ki Paolo a
"Kagiya piyangni ngka a roo ka pekikokom ko Solotan na roo ka den pekasong ko
Solotan!"
13 Kagiya mamakapira gawii na si dato Agripa ago si Birnisi na miyakaoma sa Kaisariya
ka imbentel iran si Pisto.
14 Kagiya malo matey a kiyatareg iran roo na piyanotol i Pisto ko dato so makapantag ki
Paolo a tig iyan a "Aden a kalaboso sii a da kabokai i Pilikso.
15 Sii ko kiyasong aken sa Yarosalim na so manga poporo a imam ago so manga
pelokelokesen ko manga Yahodi na piyakitokawan iran raken so langon a dimanda iran
on, na piyangni iran a selaan aken sekaniyan.
16 Ogaid na pitero aken kiran a kena a ba adat o manga Iromanen a selaan so taw a
inidimanda o da sekaniyan pen mapakapangadap, a rakes o manga mindimanda on, sii ko
dii kokoman kaan iyan mitindeg a ginawa niyan mipantag ko manga dimanda iran on.
17 “Na sii ko kiyapakaoma iran sii a ped aken na da ko den sendoden so kakokoma ko
rido, ka sii ko telondog a gawii na domiyarpa ako ko dii kokoman na piyakitawag aken
angkoto a mama.
18 Na kagiya tetaro so manga mindimanda on na da iran misendit so apiya antonaa sala a
mapipikir aken.
19 Ka aden bo a di iran pegayonayonan mipantag ko agama iran ago so taw a bebetowan
sa Isa a miyatay den, a pitero i Paolo a miyaoyag bo.
20 Na kagiya di aken katawan i kakekokoma ko sangkai a rido na iniise aken ki Paolo o
kebaya somong sa Yarosalim kaan roo makokom makapantag sii.
21 Ogaid na piyangni niyan a misenggay so rido iyan ko Solotan a aya on pekakokom.
Sabap roo na inisogo aken a kakalaboson sekaniyan den taman sa mapakasong aken roo."
22 Pitero i Agripa ki Pisto a "Kebayaan ko mamakineg angkai a mama."
Tig i Pisto a "Mapita na mapemakineg ka den."
Si Paolo sii ko hadapan i Agripa ago si Birnisi
23 Kagiya mapita na miyakaoma si Agripa ago si Birnisi a pepakiilay iran so kala iran i
kadato, na somiyoled siran ko rowang a peketimoan a oonotan o manga olowan a sondaro
ago so manga ala i kadato ko siti. Inisogo i Pisto a pakadarpaan si Paolo na miyawit roo
den.
24 Tig i Pisto a "Dato Agripa ago sekano langon a makadadarpa sii rekami, katii so mama
a inidimanda raken o langon o manga Yahodi sa Yarosalim ago sii sa Kaisariya, a
inipelalalis iran a di patot i ba pen maooyag.
25 Ogaid na da a miyatoon aken a pinggolaola niyan a patot a imbono on, na kagiya
piyangni niyan a so Solotan na aya on pekakokom na piyasad aken sa ginawa ko a
pekasongen aken sekaniyan sa Roma.
26 Ogaid na da a matatangked aken a mipesorat aken ko Solotan makapantag on. Kagiya
ka maoto na piyakaadap aken sekaniyan sii rekano, a ba di labaw reka Dato Agripa, ka o
ba aden a misorat aken amay ka mapasad a kapengingisei niyo ron.
27 Ka mapipikir aken a datar o ba kalalalongan so kapakasonga ko kalaboso ko
pekakokom on o di ron pagosaya so manga dimanda on."
MANGA GALEBEK 26
Inipanindeg i Paolo a Ginawa niyan ko hadapan i Agripa
Tig i Agripa ki Paolo a "Pipero reka a kitindegen ka sa ginawa ngka."

Na inibayaw i Paolo a lima niyan na pitero iyan a
2 “Dato Agripa, ibibilang aken a ginawa ko a miyakaokor, ka imanto a gawii na
mipenindeg aken a ginawa ko sii ko hadapan ka mipantag ko langon a inisendit raken o
manga Yahodi,
3 Na ba di labaw ka katawan ka piyapiya so langon o manga adat ago manga ndao o
manga Yahodi. Kagiya ka maoto na pengnin ko reka a sebari ako ngka sa kapemakinega
ngka raken.
4 “Katawan o langon a Yahodi so kiyapaginetaw aken ipoon ko kangodai raken roo ko
inged aken ago sii sa Yarosalim.
5 Miyatey den a katawan ako iran, na o kabaya iran na kapemataanan iran a so
kiyapaginetaw aken a Parisi na mipepasod ko aya bo mapantonen a kepit o agama tano.
6 Na sisii ako imanto a pekokomen sabap ko kaiinama ko ko initopa o Allah ko manga
apo tano.
7 Giyai so topa a so kakitoman iyan na iinamen mambo o sapolo ago dowa a mbatabataa
ko bangsa tano sii ko kapesimbaa iran ko Allah sa gagawii daondaw. Na sabap sangkai a
inam, Dato, na inidimanda ako o manga Yahodi.
8 Sekano a manga Yahodi; ino niyo pipikira a di keparatiyaya a pagoyagen o Allah so
miyamatay?
9 “Miyatangked sa ginawa ko gowani a patot a penggolaolaan ko so langon a kegaga ko a
sopak ko Ingaran i Isa a Taw sa Nasarit.
10 Na giyai i pinggolaola ko roo sa Yarosalim, ka bigan ako o manga poporo a imam sa
kapaar, na madakel a manga kaom o Allah a piyangalaboso aken, na miyakaayon ako ko
kapepamonoa kiran.
11 Madakel a kiyadanega ko kiran sii ko langon o manga sinagoga, ka pepanamaran aken
a kategela ko kiran sa katalikodi ran ko paratiyaya iran. Tanto aken siran a
pekerarangitan, na siyaloba aken siran apiya taman ko mawatan a manga siti.
Piyanotol i Paolo so Kiyateklid iyan
12 “Sii ko di aken sii dii kanggolaolaa na somiyong ako sa Damasko a siyogo ako o
manga poporo a imam a bigan ako iran sa kapaar.
13 Sii ko kapelalakaw aken, Dato, na sii ko kiyaoto a alongan na miyailay aken so sindaw
a poon sa langit a masigay a di so alongan a sominindaw ko melilibeta raken ago so
manga ped aken.
14 Palaya kami miyanga ooteng ko lopa, na miyaneg aken so sowara a tig iyan raken sa
basa a Hibriyo a 'Saolo, Saolo, ino ako ngka pesetroa? Pepakasakitan ka a ginawa ngka
ko kapesopaka ngka raken.'
15 “Pitero aken a 'Antawaa ka, Kadnan?'
Somimbag so Kadnan a 'Saken si Isa a pesetroon ka.
16 Na tindeg ka imanto; miyakimasa ako reka ka pinili aken seka a mabaloy a talasogoay
aken, na seksian ka so kiyailaya ngka raken imanto ago so ped a pekiilay aken reka pen.
17 Pelindingen ko seka ko manga Yahodi ago sii ko kena a ba manga Yahodi.
Pekasongen ko seka kiran
18 Kaan ka mapakabekar a manga mata iran, ago an ka siran mapakasangor ko
maliwanag a poon ko maliboteng, ago mapakasangor ka siran sii ko Allah a poon ko
kapaar o Iblis kaan sabap ko paratiyaya iran raken na kerilaan siran ko manga dosa iran
ago kebegan siran sa bagian iran a maped ko manga kaom o Allah."
Piyanotol i Paolo so Galebek iyan
19 “Kagiya ka maoto, Dato Agripa, na da aken sopaka so miyapayag raken a poon sa

kasorgaan.
20 Ka miyangosiyat ako; paganay ron na roo sa Damasko, na roo peman sa Yarosalim
ago sii sa dalem a Yodiya ago sii ko kena a ba manga Yahodi. Inipangosiyat aken a
kapanalikodi ran ko manga dosa iran ago so kasengora iran ko Allah, ago so kanggolaola
iran sa manga galebek a domadait ko kiyateklid iran.
21 Giyanan i sabap a kiyadakepa raken o manga Yahodi roo ko Timplo, na tipengan ako
iran mono.
22 Ogaid na taman imanto a gawii na pegogopan ako o Allah, na sabap san na tomitindeg
ako sii a dii seksi ko maporo mababa a taw. Aya di aken dii teroon na datar bo o pitero
gowani o manga nabi ago so Mosa a keolaola, a giyai:
23 Disomala a kerasay so Al Masih ago sekaniyan i keona maoyag a poon ko miyamatay,
na pekalangkapen iyan so maliwanag sii ko manga Yahodi ago so kena a ba manga
Yahodi."
24 Sii ko kipenindegen i Paolo sa ginawa niyan na piyasong i Pisto a tig iyan a "Biteng
ka, Paolo! So kitataralo o katao ngka na aya reka inibeteng!"
25 Tig i Paolo a "Da ako betanga, Pisto a tantowataw. So pitero aken na benar ago
maiiman.
26 Sasaboten o dato Agripa angkai a manga nganin, na da a ba ko pegmaan ko di aken on
dii teroon, ka matatangked sa ginawa ko a katawan iyan ai langon, ka da ini manggolaola
a pageemaan.
27 Dato Agripa, peparatiyayaan ka so manga nabi? Katawan ko a peparatiyayaan ka!"
28 Pitero i Agripa ki Paolo a "Ba aya katao ngka on na di bo bes matey a kapembaloya
ngka raken a Kristiyano?"
29 Tig i Paolo a "Matey magaan na pengnin ko ko Allah a kena bo a ba seka, ka so pen so
langon a pemamakineg raken imanto na mabaloy a datar aken bo liyo ron angkai a manga
rantay a ipapatong raken."
30 Na miyamanindeg so dato, so gobirnador, ago si Birnisi a rakes a langon a miyalimod
a manga ped iran.
31 So kiyaganat iran roo na pitero o oman i isa ko ped iyan a "Da a ba pinggolaola
angkoto a mama a patot a imbono on aya pen o ba kikalaboso ron."
32 Na pitero i Agripa ki Pisto a "Kepakay a bokaan angkoto a mama o da niyan pangniya
a pekikokom ko Solotan."
MANGA GALEBEK 27
Milayalayag si Paolo sa Roma
Kagiya pagayonayonan a pekasongen kami sa Italiya na piyalad iran si Paolo ago so ped a
manga kikakalaboson sii ki Holiyo a kapitan ko salompok a manga sondaro a bebetowan
sa 'Kompaniya o Solotan.'
2 Miyageda kami sa kapal a poon sa Adramitiyo a makatitiyagar a pelayalayag ko manga
pendongkoan sa probinsiya a Asiya. Tomiyolak kami a moonot rekami si Aristarko a taw
sa Tisalonika a isa a siti sa Masidoniya.
3 Kagiya talondog a gawii na miyakaoma kami sa Sidon. Si Holiyo na inikalimo iyan si
Paolo, na pipero niyan on a mibentel iyan so manga ginawai niyan kaan iran sekaniyan
kabegi ko manga kailangan iyan.
4 Poon roo na tomiyaros kami ko kapageeda ami ko kapal. Miyawa kami roo na kagiya
pekesonsang kami o ndo na sii kami miyokit ko kilid a polo a Sipri a makadadalong ko
ndo.
5 Piyamantek ami so ragat a pantag a Silisiya ago Pampiliya na iniraot kami sa Mira sii sa
Lisiya.
6 Roo miyakatoon so kapitan o manga sondaro sa kapal a poon sa Alihandriya a song sa
Italiya, na piyakaogalin kami niyan sangkoto a kapal.
7 Malombat a kapepelayalayag ami ko miyamakapira gawii, na maregen a kiniraoten
rekami sa pantag a Nido. Na kagiya di kami pekataros sa mapantek sabap ko ndo na sii
kami miyokit ko kadadalongan a kilid a polo a Krita a pantag a Salmoni.
8 Maregen a kapepagilida ami ron, na iniraot kami ko kaden a bebetowan sa 'Mapiya a
Pendongkoan,' a marani ko siti a Lasaya.
9 Samaoto na miyabolobolo den a kapelayalayag ami, na riaot den so masa a piligro so
kapelayalayag, ka miyaipos den so Powasa. Sabap roo na liyalangan siran i Paolo
10 A tig iyan a "Manga pagariya, pekeilay aken a o melayalayag tano imanto na
kemoralaan tano, na kelaga so manga roran tano ago so kapal taman ko manga
kaoyagoyag tano."
11 Ogaid na da ayoni o kapitan so lalangan i Paolo, ka piyakineg iyan baden so toma o
pangongolin ko kapal ago so kirek on.
12 Na kagiya giyangkoto a dodongkoan na kena a ba mapiya a lilindongan sii ko masa a
dii kambarabarat na miyagayonayon so kadakelan ko manga lomayalayag a teros siran
tomolak, ka penamaran iran a kapakadongko iran sa Pinisi. Isa ini a pendongkoan sa Krita
a makasasangor sa pagabagatan sa sedepan ago sii ko pagotaraan sa sedepan, ka roo siran
pekalindong ko masa a dii kambarabarat.
So Barat sii ko Ragat
13 Mipoon somamber so abagat sa manaot na aya katao iran on na ipenggolalan iran so

antap iran. Giyamitan iran sa dadan na milayalayag siran a pepagilid sa Krita.
14 Ogaid na da matey na somiyamber so tanto a mabager a sobosobo a bebetowan sa
'Otara' a poon sangkoto a polo.
15 Diyasengan o ndo so kapal, na kagiya di ami kesonsang so ndo na tiyaregan ami na
mipepatiyanod kami baden.
16 Sii ko kapepagilid ami ko balet a bebetowan sa Klaoda na maregen a kipekipaaren ami
ko awang a petondaan o kapal.
17 Kagiya maroran ai o manga gomagalebek na piyangolibedan iran so kapal sa tali a
kiyandong ka pimbageran iran. Kagiya ipekelek iran o ba midatol so kapal ko mala a
ipameted sa Sirtis na inibaba iran so layag na mipepatiyanod siran.
18 Mitataros den so kabager o sobosobo na sii ko miyakatalondog a gawii na inipelelebad
iran so manga roran sa ragat.
19 Na sii ko ikatelo gawii na inipelelebad iran pen so manga kasangkapan o kapal.
20 Miyabolobolo den a gawii a da ami den mailay so alongan aya pen so manga bitoon,
na mitataros den so kapesember o sobosobo sa mabager. Samaoto na kiyadaan kami sa
arap o ba kami pen makapegoyag.
21 Kagiya matey a da siran den makakan na tominindeg si Paolo ko look iran a tig iyan a
"Manga pagariya, o piyakineg ako niyo ago da tano makatolak a poon sa Krita na di tano
nda kiyarong sangkai a kamaregenan ago kabinasaan.
22 Ogaid na pakapipiyaa niyo a ginawa niyo imanto ka da a ba rekano petay apiya
sakataw bo, ka so bo so kapal i kebinasa.
23 Ka kagiya ko gagawii na so Allah a kirek raken ago pesimbaan ko na somiyogo raken
sa malaikat a miyakatindeg ko obay aken
24 A tig iyan a 'Di ka pekelek, Paolo! Disomala a makapengadap ka ko Solotan, na sabap
ko limo o Allah na sebeten iyan langon so pepelayalayag a ped ka.'
25 Sabap san na pakapipiyaa niyo a ginawa niyo, manga pagariya, ka sasarigan aken so
Allah a aya mapenggolaola na datar o pitero iyan raken.
26 Ogaid na disomala a kipimpir tano bo ko isa a polo."
Miyageba so Kapal
27 Sii ko ikasapolo ago pat kagagawii na pekeanodanod kami pen sa ragat sa Adriya, na
kagiya kalookan a gawii na miyasipat o manga gomagalebek ko kapal a pepakarani kami
sa kalopaan.
28 Inalogan iran so timbaga ko didalem a ragat ka tekesen iran i kadalem iyan, na dowa
polo repa. Kagiya makaiseg sa maito na tiyakes iran peroman, na sapolo ago lima repa.
29 Kagiya ipekelek iran o ba masasa so kapal ko manga ator na inolog iran so pat a dadan
a poon ko olinan o kapal, na miyangangarapan siran sa o ba bo kepita den.
30 So manga gomagalebek na tomipeng siran malagoy ko kapal ka inalogan iran so
awang sa ragat a omamanta sa pagalogan iran so ped a manga dadan sii ko lolong o kapal.
31 Ogaid na pitero i Paolo ko kapitan ago so manga sondaro a "O di siran tatareg ko kapal
na di kano penga sasabet."
32 So kiyanega sii o manga sondaro na piyamotol iran so manga tali a iiket ko awang na
miyaolog den ai sa ragat.
33 Magaan den oto kelibabas na piyangni i Paolo a makakan siran langon sa
pangenengken a tig iyan a "Miyakasapolo den ago pat gawii imanto a kapepenayaw niyo
na da kano den mamakakan.
34 Na pagakolen ko rekano a kekan kano kaan kano mamakabager, ka da den a satiman a
bok a ba keda ko manga olo niyo."
35 So kiyateroa sii i Paolo na kominowa sekaniyan sa paan na piyanalamatan iyan so
Allah sii ko hadapan o kalangolangon, na piyangopak iyan ai na kiyan iyan.
36 Miyakapiya a ginawa iran langon na komiyan siran mambo.
37 Dowa gatos ago pito polo ago nem kataw kami langon sii ko kapal.
38 Na kagiya manga oosog siran na inipelelebad iran sa ragat so manga bantad kaan
makakep so kapal.
39 Kagiya makaliwanag den na da iran makilala o antonaa angkoto a lopa, ogaid na
miyailay iran a aden a sogod on a aden a ipameted on. Na kiyokom iran sa ginawa iran a o
keparo na pekandongkoon iran roo so kapal.
40 Piyamotol iran so manga tali o manga dadan na inibagak iran sa ragat. Piyamokas iran
on so manga tali a iiket ko pangolin ko kapal na inibayaw iran so layag sii ko lolong o
kapal kaan siran bayogen a ndo, na miyakaagaw siran ko ipameted ko kilid a ragat.
41 Ogaid na iniraot so kapal ko kababawan ko ig na minidatol on. So lolong iyan na
minilaseg on na so olinan iyan na pekegeba o manga babager a begel.
42 So manga sondaro na miyapikir iran a pemonoon iran so manga kalaboso kaan da a isa
kiran bo a ba pekalangoy sa kalopaan ago makapalagoy.
43 Ogaid na so kapitan o manga sondaro na kebayaan iyan somabet si Paolo, na siyaparan
iyan siran sa kipenggolalanen iran ko antap iran. Na pitero iyan ko pemakalangoy a aya
mona tomipo sa ragat kaan makapagapas ko gakap,
44 Na tondog so manga ped a nggamba ko manga papan o di na apiya antonaa a miyageba
ko kapal. Na giyanan i kinisampay ami sa gakap, na palaya kami miyasabet.
MANGA GALEBEK 28
Si Paolo roo sa Malta
Kagiya makagakap kami den na kiyatokawan ami a giyangkoto a polo na bebetowan sa

Malta.
2 Tanto kami a inikapedi o manga magiinged on, ka sabap sa pegoran ago matenggaw so
doniya na mirapog siran ago pisekasakaw kami ran langon.
3 Miyamorot si Paolo sa sabekes a itagon, na sii ko kapetegoa niyan on ko rapog na
lominiyo ron so nipay sabap ko kayaw o apoy na pimborikisan iyan a lima i Paolo.
4 Kagiya mailay o manga magiinged so nipay a mabibitin sa lima niyan na pitero o oman
i isa ko ped iyan a "Baanda talibono angkai a mama, ka apiya pen miyasabet ko ragat na
di peperon o Kaontol o ba sekaniyan makapagoyag."
5 Ogaid na initapirik baden i Paolo so nipay sii ko apoy na da kasakiti.
6 Nanayaon iran a lomebag sekaniyan ago mitekaw a maoteng a miyatay. Ogaid na kagiya
matey a kananayaw iran na da a marata a miyaolaola niyan na miyaalin so pamikiran iran
ago tig iran a "Tohan sekaniyan!"
7 Kena a ba roo mawatan na aden a pangomaan a rek i Pobliyo a so olowan a sanasanaan
ko polo, na piyakabolos kami niyan ko walay niyan na pisekasakaw kami niyan ko soled
o telo gawii.
8 Samaoto na makaiiga so ama i Pobliyo ka dii keyaw ago pelagotein. Somiyoled si Paolo
ko rowang iyan na kagiya makapangangarapan na inidapenet iyan on a manga lima niyan
na piyakapiya niyan.
9 Kagiya maolaola ini na miyamanong roo so langon o pepanga sasakit sangkoto a polo
na piyamakapiya siran i Paolo.
10 Oriyan iyan na piyamegan kami iran sa madakel a manga pamemegayan, na kagiya
makatitiyagar kami melayalayag na riyoran iran ko kapal so langon a kailangan ami.
So Kiyapakaoma sa Roma
11 Sii ko kiyaipos o miyakatelo olan na tomiyolak kami a meeda ko kapal a poon sa

Alihandriya a bebetowan sa 'Miyadowa a Magari,' a domiyongko sangkoto a polo ko
masa a dii kambarabarat.
12 Miyakaoma kami ko siti a Sirakosa na tomiyareg kami roo ko miyakatelo gawii.
13 Poon roo na milayalayag kami na iniraot kami sa siti a Rigiyo. Kagiya talondog a
gawii na somiyamber so abagat, na so ikadowa gawii na miyakaoma kami sa Potiyoli.
14 Minitoona ami roo so ped a magariyari na inakol iran rekami a komaden kami kiran
pasin sa isa ka pito gawii. Oriyan oto na somiyong kami sa Roma.
15 Kiyatokawan o manga magariyari sa Roma so makapantag rekami, na miyamanong
siran rekami sa taman sa Padian sa Apiyo ago sii ko inged a bebetowan sa Telo a
Pembolosan ka pagalaon kami iran. Kagiya mailay siran i Paolo na piyanalamatan iyan so
Allah na miyakapiya a ginawa niyan.
16 Kagiya makaoma kami sa Roma na pipero ki Paolo a makabaling a masisibay, ogaid
na nggogordiyaan o sakataw a sondaro.
Miyangosiyat si Paolo roo sa Roma
17 Kagiya makatelo gawii na miyakipelimod si Paolo ko manga olowan o manga Yahodi

sangkoto a inged. Kagiya malimod siran na pitero iyan kiran a "Manga pagari ko, apiya da
a miyanggolaola ko a sopak ko bangsa tano o di na so manga taritib a initenan rekano o
manga apo tano na kiyalaboso ako roo sa Yarosalim ago piyalad ako iran ko manga
Iromanen.
18 Piyangingisean ako iran na mbokaan ako iran o kowan ka kiyatokawan iran a da a ba
ko pinggolaola a patot a imbono raken.
19 Ogaid na kagiya sopaken ai o manga Yahodi na piyangni aken a pekikokom ako ko
Solotan, apiya pen da a dimanda aken ko royod aken a manga taw.
20 Giyai i sabap a piyangni aken a kimbitiyarain aken rekano, ka mapapatong ako imanto
sangkai a rantay sabap ko pepagarapen o manga taw sa Israil."
21 Tig iran ki Paolo a "Da a miyatarima ami a sorat makapantag reka a poon sa Yodiya
aya pen o ba aden a manga magariyari a miyakaoma sii a miyakapanotol o di na
miyakatero sa marata mipantag reka.
22 Ogaid na kebayaan ami a katokawi ami ko mapipikir ka, ka katawan ami a apiya anda
na dii tero so manga taw sa makasosopak sangkai a ndao."
23 Mandiyadi na tomiyaalik siran sa gawii a kapamakinega iran peman ki Paolo. Na
kagiya raoten angkai a gawii na madakel a miyamanong ko walay niyan. Na ipoon sa
kapipita taman ko kiyagagawii niyan na piyangosiyatan iyan siran a di niyan kiran dii
pemataan so makapantag ko Ndatoan o Allah. Piyanamaran iyan a kaayoki niyan kiran
makapantag ki Isa ko kapegosaya niyan kiran ko Kitab o Mosa ago so Sorat o manga
nabi.
24 So ped kiran na kiyaayokan o manga katero iyan, ogaid na so ped na da iran
paratiyayaa.
25 Da siran pagayonayon, na miyamangawa siran roo kagiya mapasad tero i Paolo angkai
a manga katero a "Benar den so pitero o Soti a Roh a nggolalan ko Nabi Isayas sii ko
manga apo iyo
26 A tig iyan a
'Songowi ngka ngkai a manga taw na teroa ngka a

"Pemakineg kano na pemakineg kano peparoman
na di kano den pekasabot.
Magilay kano na magilay kano peparoman
na di kano den pekasarino.
27 Ka miyabaloy a makapal so manga poso angkai a manga taw;
inolen iran a manga tangila iran
ago pinideng iran a manga mata iran,
kaan iran di kiilay so manga mata iran
ago di iran kineg so manga tangila iran
ago di iran kisabot so manga poso iran.
Ka o ba siran baden makateklid kaan aken siran kapiyapiyai.'
28 “Kagiya ka maoto na kabaya aken a katokawan iyo a giyangkai a kakesabet a poon ko

Allah na piyakalangkap roo ko kena a ba manga Yahodi na pemakinegen iran!"
30 Sii ko soled o dowa ragon na mababaling si Paolo ko aapinan iyan a walay, na
pekormaten iyan so langon a pembentel on.
31 Pepakitokawan iyan so Ndatoan o Allah ago ipepangendao niyan so makapantag ko
Kadnan a Isa Al Masih sa da a kalek iyan ago da a ba on miyakabangen.
ROMA
ROMA 1
Alamat sorat ako i Paolo a oripen i Isa Al Masih makasampay ko langon a taw sa siti a
Roma. Tiyawag ako o Allah kaan ako mabaloy a siyogo iyan na initoro ako niyan sa
kapekalangkapa ko ko Mapiya a Totol iyan.
2 Initopa niyan angkai a Totol a nggolalan ko inisorat o manga nabi niyan sii ko Soti a
Kitab.
3-4 Giyai so Totol makapantag ko Wata iyan a si Isa Al Masih a Kadnan tano. Mipantag
ko kamamanosiyai ron na inimbawata sekaniyan a kiyababadan ko Daod,
4 Ogaid na miyapayag a Wata sekaniyan o Allah sii ko mala i kabatowa a kiyaoyaga on a
poon ko miyamatay a nggolalan ko Soti a Roh.
5 Nggolalan ko Al Masih ago sabap ko Ingaran iyan na inikalimo ako o Allah kaan ako
mabaloy a siyogo iyan ago mapakalangkap aken ko langon a kena a ba manga Yahodi so
Mapiya a Totol iyan kaan siran on makaparatiyaya ago makapangongonotan ko Allah.
6 Na maaped kano mambo ko siran oto a tiyawag sa kabaloya rekano a rek i Isa Al Masih.
7 Pisoratan ko sekano langon san sa Roma a pekebabayaan o Allah ago tiyawag iyan kaan
mabaloy a manga kaom iyan.
Pengnin ko a began kano sa limo ago kalilintad a poon ko Allah a Ama tano ago so
Kadnan a Isa Al Masih.
So Pangangarapan a Panalamat
8 Pagampaganay na pepanalamatan ko so Tohan ko a nggolalan ki Isa Al Masih sabap

rekano langon, ka pepekalangkap ko dalem a doniya so totolan ko paratiyaya niyo.
9 So Allah a pepanalagadan ko a iklas ko poso aken sii ko kipepangosiyaten ko ko
Mapiya a Totol makapantag ko Wata iyan na katawan iyan a lalayon aken sekano den
pegalowin
10 Oman ako pepangangarapan. Pepangnin ko ko Allah a o kabaya iyan na peron ako
niyan imanto a mibentel aken sekano.
11 Ka ipekedali aken a kapakipegilaya ko rekano kaan aken sekano mapakambagian ko
isa a rakmat o Roh a pekabager ko poso iyo
12 Ago an tano mamagoyata a nggolalan ko paratiyaya o oman i isa rektano.
13 Kabaya aken a katokawan iyo, manga pagari ko, a omanoman aken den pasaden sa
ginawa ko a kimbentelen ko rekano ogaid na taman imanto na aden a makasesendod
raken. Aya antap aken na penggalebek ako rekano san sa mapiya a ipegonga niyan a lagid
o pinggolaola ko sii ko ped a kena a ba manga Yahodi.
14 Ka aden a ipapaliyogat raken a galebek sii ko langon a taw, sii ko manga Grigo ago sii
ko di iran manga royod, sii ko aden a manga katao niyan ago sii ko da a manga sowa iyan.
15 Kagiya ka maoto na mala a kabaya aken sa kapekalangkapa ko pen ko Mapiya a Totol
sii rekano a kibabaling sa Roma.
So Kabatowa o Mapiya a Totol
16 Ka di aken ikeya so Mapiya a Totol, ka giyai so kabatowa o Allah a pekasabet ko

oman i isa a peratiyaya, paganay ron na so manga Yahodi na go bo so kena a ba manga
Yahodi.
17 Ka mapapayag sii sangkai a Totol so kaontol a ibibilang o Allah a rek o taw a ana
paratiyaya niyan a sii bo sabap ko paratiyaya. Misosorat ai ko Kitab a tig iyan a "So taw a
ibibilang a maontol sabap ko paratiyaya na keoyagoyag."
So Kadostaan o manga Manosiya
18 Pepakiilay o Allah so rarangit iyan a poon sa kasorgaan sii ko langon a kapegongkir

ago kamarataan o manga taw a pegerenen iran so kapeketokawi ko tito a benar a
nggolalan ko kapangararata iran.
19 Ka so tito a benar a ketokawan makapantag ko Allah na marayag kiran, ka so den so
Allah i miyakarayag on kiran.
20 Ka ipoon den ko kiyaadena ko doniya na so di penga iilay a kabatowa o Allah a da a
ikepos iyan, ago so katotohani ron na miyailay piyapiya, ka kesabot ai o manga taw ko
kapekeilaya iran ko manga nganin a inaden o Allah. Sabap sii na da a ba iran kidoawa,
21 Ka apiya pen miyakilala iran so Allah na da iran den begi sa bantogan a rek o Allah
aya pen o ba iran panalamat. So kapepamimikiran iran na kiyadaan baden sa bali na
piyakaliboteng so poso iran a da a kesabot iyan.
22 Kabasa iran na maongangen siran, ogaid na mimbaloy siran a manga lalong,
23 Na da iran simbaa so kababantogan ago da a ipetay niyan a Tohan, ka sominimba siran
baden ko manga barahala a inisayan sa manosiya a petay bo, ago manga papanok, manga
binatang ago manga nipay.
24 Sabap sii na piyalad siran o Allah ko kapepangonoti ran ko manga reresik a kabaya o
manga poso iran, na di ran dii nggolaolaa o oman i isa kiran so piyakayaya a manga
nganin ko lawas o ped iyan.
25 Da iran paratiyayaa so katawan iran a tito a benar makapantag ko Allah, ka ba iran den
pitibaba so kiyaparatiyayaa iran ko manga kabokegan. Na sinimba iran ago piyanalagadan
so manga nganin a inaden o Allah a kena a ba so Allah a aya kiran miyangaden a patot a
podin sa taman sa pakataman. Amin.
26 Sabap sii na piyalad siran o Allah ko piyakayaya a kapepangabaya iran. Apiya so
manga babay na tomiyalikod ko patot a olaola o kabababayai kiran ka pisembi iran ko di
patot.
27 Lagid mambo o manga mama a ginekan iran so patot a kapekeromaa ko babay na
mikekabayai siran a palaya mama a perarakagan siran, a di ran dii nggolaolaan so
piyakayaya. Sabap sii na ipendaneg kiran so mapapatot ko mariribat a olaola iran.
28 Sabap sa minda siran i ba iran kilalaa so Allah na piyalad iyan siran ko maresik a
pamikiran sa kanggolaolaa iran ko di patot a penggolaolaan.
29 Madadalem kiran so langon a pisosonan a di ontol, kadostaan, napso ago
kambarabowat maasiya. Madadalem kiran pen so kariit, kapamono, kapepawala,
kapanaliba ago kagowad. Taliyantaan siran,
30 Pepagitowitoon iran so ped na ipekegowad iran so Allah. Mamakasodi siran, ipoporo
iran a ginawa iran ago di siran dii manakabor. Pepangembaal siran sa manga rarata, ago di
iran peratiyayaan so manga lokes iran.
31 Manga lalong siran, di siran penga sasarigan, di siran maginawa ago da a ba iran
kapedi ko ped.
32 Katawan iran so kokoman o Allah a so siran oto a dii sii nggolaola na patot on so
kambonoa on. Apiya pen oto na ba iran den pendayonen nggolaola, na kena a ba giyai bo
ka pegayonan iran so manga ped a pesowa on mambo.
ROMA 2
So Ontol a Kapengokom o Allah
Kagiya ka maoto na apiya antawaa rekano a pekokomen iyan so ped iyan na da a ba niyan
kidaowa, ka o pekokoma ngka so ped na pekesala a ka a ginawa ngka, ka di ngka dii
nggolaolaan so datar anan a manga nganin.
2 Katawan tano a ontol so kakokoma o Allah ko manga taw a dii nggolaola sa datar anan
a manga nganin.
3 Na ba ngka pipikira a pekalidas ka ko kaselaa reka o Allah o pesowaa ngka so manga
olaola o ped a taw a pekokomen ka?
4 Ba ngka pesodia so kala iyan i gagaw ago kanapi ago kasabar iyan? Ba ngka di katawi a
so gagaw o Allah na aya reka pekaagak sa katalikodi ngka ko manga dosa ngka?
5 Ogaid na mategas ka i olo ago di teobat! Sabap san na ba ngka den pekelonsani so
rarangit o Allah a itena reka sii ko gawii a kepayag so rarangit iyan ago so ontol a
kapengokom iyan.
6 Ka mbadalan iyan so oman i isa sa mapapatot ko manga galebek iyan.
7 Imbegay niyan so kaoyagoyag a da a kaposan iyan ko siran oto a mananamar sa
bantogan, pangkatan ago da a ikeda iyan a kaoyagoyag a nggolalan ko kapetordowa niyan
ko di ran dii kanggolaola sa mapiya.
8 Ogaid na pakapemborngaten o Allah so gani niyan ago rarangit ko siran oto a aya iran
bo pipikiren na giya ginawa iran ago pegongkiren iran so tito a benar kaan iran
manggolaola so marata.
9 Kemoralaan ago perasain so oman i isa a dii nggolaola sa marata, a paganay ron na so
manga Yahodi na go bo so kena a ba manga Yahodi.
10 Ogaid na mbegan o Allah sa bantogan, pangkatan ago kalilintad so langon a dii
nggolaola sa mapiya, a paganay ron na so manga Yahodi na go bo so kena a ba manga
Yahodi,
11 Ka da a ba raramigi o Allah.
12 So siran oto a miyakandosa a da kiran mitoron so Kitab o Mosa na pemamatay a da

makokom o Kitab. Na siran oto a miyakandosa a initoron kiran so Kitab na kokomen
siran a ipepasod ko Kitab.
13 Ka kena a ba so pepamamakineg ko Kitab i imbilang o Allah a maontol, ka siran oto
bo a dii nggolaola ko misosorat on.
14 So kena a ba manga Yahodi a da a ba iran Kitab na igira a di ran dii nggolaolaan so
ipapaliyogat o Kitab a sii bo sabap ko migegedi ko hatin iran na miyabaloy so ginawa iran
a kitab iran apiya da siran katoroni ko Kitab.
15 Pepakiilay iran sii a so manga sogoan o Kitab na misosorat ko manga poso iran, na
pepamataanan ai mambo o manga hatin iran ka pekesalak a mapepamikir iran a
miyakasela siran na pekesalak a mapepamikir iran a da siran makasela.
16 Giyai i ipengokom o Allah sii ko gawii a pekikokom iyan ki Isa Al Masih so migagaib
a manga pamikiran o manga taw a aya kaketoman o Mapiya a Totol a pepakalangkapen
aken.
So manga Yahodi ago so Kitab o Mosa
17 Seka a bebetowan ka a ginawa ngka sa Yahodi, na o benar a somasarig ka ko Kitab

ago ipepangandag ka so Allah,
18 Na o katawi ngka so kabaya iyan ago inipangendao reka o Kitab o andamanaya i
kapamilia ngka ko lebi a mapiya,
19 Na o matatangked sa ginawa ngka a seka i pekaagak ko manga bota, ago sindaw ka o
kikalilibotengan,
20 Na o pepangosiyat ka ko manga lalong ago pepangendao ka ko da a manga sowa iyan
a rek ka so langon a katao ago tito a benar a matatago ko Kitab,
21 Na o benar anan langon na ino ngka di pengendaowa a ginawa ngka a lagid o
kapepangendaowa ngka ko manga ped? Ipepangosiyat ka a inisapar so kapamanekew
ogaid na ba ka pepamanekew?
22 Di ngka dii teroon a inisapar so kasins, ogaid na ba ka pesina? Ipekegowad ka so
manga barahala ogaid na ba ngka pepanekewi so manga pesimbaan on?
23 Ipepangandag ka a sisii reka so Kitab, ogaid na ba ngka pakapekeyaa so Allah sabap
ko kasogoka ngka ko Kitab iyan?
24 Ka misosorat ko Kitab a "Sabap rekano a manga Yahodi na mapepagitowito so
ingaran o Allah o kena a ba manga Yahodi."
25 O petomana ngka so Kitab na so kiyatoria reka a aya toos sa Yahodi ka na aden a gona
niyan. Ogaid na o pesogoka ngka so Kitab na datar ka bo o kena a ba Yahodi a da matori.
26 O so kena a ba Yahodi a da matori na petomanen iyan so manga sogoan o Kitab na ba
sekaniyan di kibilang o Allah a lagid bo o miyatori?
27 Na giyangkoto a kena a ba Yahodi a da matori a petomanen iyan so Kitab na
pepakiilay niyan a maontol sekaniyan a di seka a miyatori ago kiyatoronan ko Kitab, ka
ba ngka den pesogoka ngkoto a Kitab.
28 Ka aya tito a pagtaw o Allah na kena bo a ba so inimbawata a Yahodi a aya bo
miyatori a lawas iyan,
29 Ka aya tito a pagtaw o Allah na giyoto so taw a aya kaiiyahodii ron na sii ko dalem o
ginawa niyan a aya miyatori na so poso iyan. Giyanan na galebek o Roh o Allah a kena a
ba sii mipepasod ko Kitab. Giyangkoto a taw na kekowa niyan so podi a kena a ba poon
ko manosiya ka poon ko Allah.
ROMA 3
So Kasasarigi ko Allah
Kagiya benar oto na ba aden a mibibinta o manga Yahodi ko kena a ba manga Yahodi, na
ba aden a bali o kiyapakatori?
2 Oway, madakel a mibibinta iran. Paganay ron na inisana kiran o Allah so manga katero
iyan.
3 Ino o da pamaratiyaya so ped kiran? Ba aya maana ini na di den kesarigan so Allah sa
kitomanen iyan ko manga initopa niyan sabap ko da iran kapamaratiyaya?
4 Kena! So Allah na lalayon benar apiya pen bokeg so oman i isa a taw. Ka misosorat ko
Kitab a
"Pekiilay a benar ka igira a di ka dii tero,

na pepekataban ka igira a pekokom ka."
5 Ogaid na amay ka so karata tano na aya kesabapan ko kapeyaga piyapiya o Allah ko

kaontol iyan ko kandanega niyan rektano na ba tano mapetero a di maontol so Allah ko
kapenggolaolaa niyan sii? (Pitero aken ai ko kamamanosiyai raken.)
6 Mataan a di! O di maontol so Allah ko kapendanega niyan rektano na andamanaya i
kakekokoma niyan ko doniya?
7 So isa pen a mapetero na "O marayag piyapiya so kabebenar o Allah amay ka

pakateralebiyaan ko kapepamokeg aken na kesabapan ai ko kakebantogi rekaniyan na ino
ako pendanega den a lagid o baradosa?"
8 Giyanan na lagid bo o kapeteroa tano sa "Nggolaola tano sa marata kaan misabap on so
mapiya." Aden a ped a taw a piyagitowito ako iran ko kinisenditen iran a giyoto den i
pitero aken. Na isela kiran so miyapetot kiran.
Da den a Sakataw bo a ba Maontol
9 Na antonaa i mapetero tano? Ba sektano a manga Yahodi na lebi a mapiya i

kapakambebetad a di so kena a ba manga Yahodi? Kena! Ka miyatero aken den a so
manga Yahodi ago so kena a ba manga Yahodi na palaya den mipapaar o kadostaan.
"Da den a sakataw bo a ba maontol;
11 Da a ba pekasabot aya pen o ba aden a dii mbabanog ko Allah.
12 Miyamakasilay siran langon
na palaya siran miyanga babaloy a da a bali niyan;
da a ba dii nggolaola sa mapiya a apiya sakataw bo.
13 So manga bakereng iran na lagid o kalelekaan a manga kobor,
ka pepakapoon so kapepanalibi ko manga dila iran
na so manga katero iran na lagid o bisa o nipay.
14 Mapepeno a manga papait a sinta so manga ngari iran.
15 Makatitiyagar siran sa kapemono,
16 Na apiya anda siran song na pepaminasa siran ago peperarasay siran,
17 Na di iran katawan so lalan ko kalilintad
18 Aya pen o ba siran miyakasowa ko kikaleken ko Allah."
19 Na katawan tano a so langon a sogoan o Kitab na para ko siran oto a mapapadalem ko

Kitab kaan da a sakataw bo a ba aden a kidaowa niyan, ago an makokom o Allah so
langon a taw sa doniya.
20 Da a sakataw bo a ba kibilang a maontol o Allah a nggolalan ko kapetomana niyan ko
manga inisogo o Kitab, ka aya kipantag o Kitab na so kapekikilalaan iyan on ko manga
taw a miyakandosa siran.
So Taw na Kibilang o Allah a Maontol sabap ko Paratiyaya
21 Ogaid na imanto na miyapayag den so kaontol a imbilang o Allah a rek o taw a kena a
ba makapenggolalan ko kapetomana niyan ko manga sogoan. Inipemataan ai o Kitab ago
manga Sorat o manga nabi.
22 Giyai so kaontol a ibibilang o Allah a rek o langon a peparatiyaya ki Isa Al Masih a sii
bo sabap ko paratiyaya iran on. Ndatadatar so langon a taw
23 Ka palaya siran miyakandosa ago da siran makaraot ko kababantogan a paparangayan
a ipapaliyogat o Allah.
24 Ogaid na sabap ko da a bayad iyan a limo iyan na inibilang tano niyan a maontol a
nggolalan ko kiyaaona rektano i Isa Al Masih.
25 Ka inirila sekaniyan o Allah ko kapatay kaan mapapas so manga dosa tano a nggolalan
ko paratiyaya tano ko kiyapakatogaa ko rogo i Isa sabap rektano. Giyanan i okit a
kiyapakiilain o Allah ko kaontol iyan, ka sii ko miyanga iipos a gawii na lipas iyan so
manga dosa o manga taw sabap ko napi niyan,
26 Ogaid na nggolalan sangkai a pinggolaola niyan na piyakiilay niyan imanto so kaontol
iyan kaan makilala a maontol sekaniyan sii ko kibibilangen a maontol ko siran oto a
peparatiyaya ki Isa.
27 Kagiya ka maoto na antonaa i mipengandag tano? Da den! Ngkaino to? Ka kagiya so

kakesabet tano na kena a ba sabap ko manga galebek tano, ka sii sabap ko paratiyaya
tano.
28 Ka matatangked sa ginawa ko a so taw na imbilang o Allah a maontol a sii bo sabap
bo ko paratiyaya niyan, a kena a ba sabap ko kapetomana niyan ko manga Kitab.
29 Ba aya bo a kitohan ko Allah na so manga Yahodi? Ba kena a Tohan sekaniyan
mambo o kena a ba manga Yahodi? Mataan a Tohan iran sekaniyan mambo,
30 Ka isaisa bo so Allah, na imbilang iyan so manga Yahodi a maontol sabap ko
paratiyaya iran ago so pen so kena a ba manga Yahodi sabap mambo ko paratiyaya iran.
31 Ba aya maana ini na pepakadaan ami sa kipantag so Kitab o Mosa a nggolalan ko
paratiyaya? Kena! Ka aya benar na kikilalaan ami so tito a kipantag o Kitab.
ROMA 4
Minibilang a Maontol so Ibrahim sabap ko Paratiyaya niyan
Antonaa i mapetero tano makapantag ko Ibrahim a apoapoan tano?

2 O inibilang sekaniyan o Allah a maontol sabap ko manga galebek iyan na aden a
mipengandag iyan. Ogaid na di sekaniyan makapengandag ko hadapan o Allah,
3 Ka misosorat ko Kitab a "Miyaratiyaya so Ibrahim ko Allah na minibilang so paratiyaya
niyan a aya niyan kaontol."
4 Sokayan so taw a dii nggalebek ogaid na so sokay niyan na di kibilang a pamemegayan,
ka miyasokat iyan.
5 Ogaid na so taw a di penggalebek, ka baden peparatiyaya ko Allah a ipembilang iyan a
manga oontol so miyamakasela, na imbilang so paratiyaya ngkoto a taw a aya niyan
kaontol.
6 Giyanan i maana o pitero o Daod sii ko kiyaaloya niyan ko kararakmati ko taw a
ibibilang o Allah a maontol a kena a ba sabap ko manga galebek iyan.
7 Ka pitero iyan a:
"Rarakmatan so manga taw

a kiyarilaan ko manga sala iran
ago so siran oto a kiyasapengan so manga dosa iran.
8 Rarakmatan so taw a di den imbilang o Allah a madodosa."
9 Giyangkai a rakmat a miyaaloy o Daod na ba aya on bo kirek so miyanga totori? Kena,

ka rek ini mambo o da manga totori. Ka miyatero ami den a "So paratiyaya o Ibrahim na
minibilang a aya niyan kaontol."
10 Anda i kiyanggolaola ini? Ba isako da sekaniyan pen matori o di na isako miyatori
den? Kena a ba oriyan o kiyatori iyan, ka sii ko da niyan pen katori.
11 Na so kiyatori iyan na aya toos ago inipemataan ko kaontol a minibilang a rek iyan
sabap ko kiyaparatiyaya niyan isako da pen matori. Kagiya ka maoto na so Ibrahim na aya
ama o langolangon a da manga totori a ibibilang a manga oontol sabap ko paratiyaya iran,
12 Na ama sekaniyan mambo o langolangon a miyanga totori a kena bo a ba sabap ko
kiyapangatotori iran, ka sabap sa perawaten iran so ladiyawan o Ibrahim a ama tano a
aden a paratiyaya niyan sa da niyan pen katori.
Ketarima so Initopa o Allah a nggolalan ko Paratiyaya
13 So initopa o Allah ko Ibrahim ago so kebabadan on a mapekewali niyan so doniya na

kena a ba sabap ko kiyatomana niyan ko manga sogoan, ka sabap ko kaontol a minibilang
a rek iyan ko paratiyaya niyan.
14 Ka opama ka miyabaloy siran a mamakapekewali sabap ko kapetomana iran ko kitab
na da a bali o paratiyaya, ago da a kipantag o topa o Allah,
15 Ka so taw a pesogok ko Kitab na kerarangitan o Allah, ogaid na o da a kitab na da den
a kakesogoka ko kitab.
16 Kagiya ka maoto na so topa na mipepasod ko paratiyaya kaan ai matarima sii bo sabap

ko limo o Allah ago an matangked a kimbegan iyan on ko langon a kiyababadan ko
Ibrahim, a kena bo a ba sii ko siran oto a mapapadalem ko Kitab, ka sii pen ko siran oto a
miyamaratiyaya a lagid o Ibrahim. Sekaniyan na aya tano ama langon,
17 Ka misosorat ko Kitab a "Biyaloy aken seka a ama o madakel a manga nasiyon."
Inibegay angkai a topa ko Ibrahim sabap sa miyaratiyaya sekaniyan ko Allah, a so Tohan
a pepangoyag ko miyamatay ago di niyan dii teroon so mipantag ko manga nganin a da
pen manggolaola a lagid bo o miyanggolaola den.
18 Na apiya pen di den keinam a ba mbawata so Ibrahim na siyarigan iyan so Allah ago
piyaratiyaya niyan a pembaloy sekaniyan a ama o madakel a manga nasiyon a kitoman so
pitero on o Allah a "Giyanan i kadakel o kebabadan reka."
19 Na da kalebai so paratiyaya niyan apiya pen sii ko kapipikira niyan ko lawas iyan a
lagid bo o miyatay, ka miyakapagidad sa manga magatos ragon, ago so kababalek o Sara
a karoma niyan.
20 Da sekaniyan den ndowadowa ko kapeparatiyayaa niyan ko initopa on o Allah, ka
baden miyakabager so paratiyaya niyan, na biyantog iyan so Allah
21 Ka miyatangked sa ginawa niyan a ketoman o Allah so initopa niyan.
22 Sabap sii na "Minibilang so paratiyaya niyan a aya niyan kaontol."
23 Na giyangkai a katero a "minibilang a aya niyan kaontol" na kena bo a ba sabap
rekaniyan so kinisoraten on,
24 Ka sabap rektano mambo a imbilang a manga oontol, a sektano a pepamaratiyaya ko
Allah a aya mioyag ki Isa a Kadnan tano a poon ko miyamatay.
25 Inirila sekaniyan ko kapatay sabap ko manga dosa tano na miyaoyag bo kaan tano
mibilang a manga oontol.
ROMA 5
Makangginawai tano ago so Allah
Kagiya ka maoto na kagiya ibibilang tano o Allah a manga oontol sabap ko paratiyaya
tano na aden a kalilintad tano sii ko kaiisaisa tano ago so Allah a nggolalan ko Kadnan
tano a Isa Al Masih.
2 Na sabap mambo ko paratiyaya tano ki Isa na miyakasoled tano sangkai a titindegan
tano imanto, a so kipekelimoon rektano o Allah. Na ipekebabaya tano so arap tano sa
makapembagian tano ko bantogan o Allah.
3 Liyo san pen na ipekebabaya tano so manga karomasayan, ka katawan tano a so manga
karomasayan na pepekabegay sa kapakatiger.
4 Na so kapakatiger na pepekabegay sa paparangayan a ikesoat o Allah, na so mapiya a
paparangayan na pepekabegay sa arap.
5 Na giyangkai a arap tano na di tano niyan pakapekeyaan, ka so kapekebabayai rektano o
Allah na miyaodod sii ko manga poso tano a nggolalan ko Soti a Roh a inibegay niyan
rektano.
6 Isako da a ba tano mapenggolaola a kisabet rektano na sii ko miyatendo a masa na

miyatay so Al Masih para ko miyanga dodosa a taw.
7 Kena a ba makakakalilid i ba aden a kebaya matay para ko ped a taw apiya pen
maontol. Masiken a aden a makaraw matay para ko mapiya a taw.
8 Ogaid na piyakiilay o Allah so kala o kapekebabayai niyan rektano, ka isako manga
baradosa tano pen na miyatay so Al Masih para rektano.
9 Na kagiya ibibilang tano imanto a manga oontol sabap ko kiyatoga o rogo iyan na
taralebi pen a kakesabet tano ko rarangit o Allah a nggolalan ki Isa.
10 Gowani na manga ridoay tano o Allah ogaid na miningginawai tano niyan a nggolalan
ko kiyapatay o Wata iyan. Na kagiya miyakangginawai tano den ago so Allah na taralebi
pen a kakesabet tano a nggolalan ko kaoyagoyag o Wata iyan.
11 Kena a ba giyanan bo, ka mapipiya a ginawa tano sii ko Allah sabap ko Kadnan tano a
Isa Al Masih a ron miyakanggolalan so kiningginawain rektano o Allah.
So Adam ago so Al Masih
12 Miyakasoled so dosa ko doniya a nggolalan ko sakataw a mama a so Adam, na so dosa

i miyakawit ko kapatay. Sabap sii na miyakalangkap so kapatay ko langolangon a
manosiya ka kagiya miyakandosa so langon a taw.
13 Sisii den so dosa sa doniya ko da pen kitoronen ko Kitab, ogaid na isako da a Kitab na
da mikokom ko manga taw so manga dosa iran.
14 Ogaid na ipoon ko Adam taman ko Mosa na mipapaar o kapatay so langon a taw,
apiya so siran oto a da mamakandosa a datar o kiyasogoka o Adam ko inisogo o Allah.
So Adam na isa a kiyaibaratan ko Al Masih a miyaori makaoma a di so Adam.

15 Ogaid na mbida so ondasan o pamemegayan o Allah ago so dosa o Adam. Ka apiya o
benar a madakel a taw a miyamatay sabap ko kiyapakandosa angkoto a sakataw a mama
na lebi den a mala a kiyaondasan o limo o Allah ago so pamemegayan iyan ko madakel a
taw a inibegay a nggolalan ko limo o sakataw a mama a si Isa Al Masih.
16 Aden pen a mbidaan o pamemegayan o Allah ago so dosa ngkoto a sakataw a mama.
Sii ko kiyaipos o isa a dosa niyan na kiyokom sekaniyan ago miyasala. Ogaid na sii ko
kiyaipos o madakel a kiyapakandosa o manga taw na inibegay kiran o Allah so limo iyan
kaan siran mibilang a manga oontol.
17 Ka sabap ko dosa o sakataw a mama na mipoon ndato so kapatay a nggolalan sangkoto
a sakataw a mama, ogaid na taralebi pen a so siran oto a pekatarima ko mala a limo o
Allah ago so kaontol a aya pamemegayan iyan kiran na keoyagoyag siran ago
makapendato a nggolaIan ko sakataw a mama a si Isa Al Masih."
18 Aya samporna iyan na aya ondasan o kiyapakandosa o isa a taw na so kiyasalaa ko

langon a taw, na datar oto mambo a so ondasan o maontol a pinggolaola o isa a taw na so
kakibilangen ko langon a taw a manga oontol kaan siran maoyagoyag.
19 Ka madakel a taw a miyabaloy a manga baradosa sabap ko da kaparatiyaya o sakataw
a mama a so Adam, na datar oto mambo a madakel a taw a kebaloy a manga oontol sabap
ko kapetoman o sakataw a mama a si Isa.
20 Initoron so Kitab kaan mapakadakel so manga sala, ogaid na kagiya mindakel so
manga dosa na taralebi ron mambo a miyakala so limo o Allah
21 Kaan datar bo o kinipaaren rektano o dosa a nggolalan ko kapatay na makapepaar
rektano mambo so limo o Allah a nggolalan ko kaontol kaan tano maoyagoyag sa dayon
sa dayon a nggolalan ki Isa Al Masih a Kadnan tano.
ROMA 6
Miyatay a mipantag ko Kadostaan ogaid na Oyagoyag bo a mipantag ko Allah
Kagiya ka maoto na antonaa i mapetero tano? Ba tano terosen so di tano dii kapakandosa
kaan makala so limo o Allah?
2 Mataan a di den! Sektano a miyada on so kapaar o kadostaan na andamanaya i
kipetarosen tano ko di tano dii kandosa?
3 Ba niyo di katawi a isako kasalawatan tano a piyakaisaisa tano ago si Isa Al Masih na
piyakaisaisa tano ago so kiyapatay iyan sii ko kiyasalawati rektano?
4 Kagiya ka maoto na nggolalan ko kiyasalawati rektano na miyatay tano ago minilebeng
a ped iyan kaan datar o Al Masih a inoyag a poon ko miyamatay a nggolalan ko
kababantogan a kabatowa o Ama na mipaginetaw tano mambo so bago a kaoyagoyag.
5 Na sabap sa miyaped tano ko Al Masih sii ko kiyapatay niyan na mataan den a keoyag
tano mambo peroman a datar o kiyaoyaga rekaniyan.
6 Katawan tano a so kaasalan a ginawa tano na miyatotok ko kros a ped iyan kaan mada
so kapaar o dosa ko manga lawas tano kaan di tano den mapengongoripen o dosa.
7 Ka apiya antawaa i miyatay na miyapokas den ko kapaar o dosa.
8 Na kagiya miyatay tano a ped o Al Masih na peparatiyayaan tano a keoyag tano mambo
a ped iyan.
9 Ka katawan tano a inoyag so Al Masih a poon ko miyamatay na di den petay peroman,
na da den a kapaar on o kapatay.
10 Ka sii ko kiyapatay iyan na miyatay sekaniyan sa miyakaisaisa bo para ko dosa, ogaid
na sii ko kaooyagoyag iyan na oyagoyag sekaniyan para ko Allah.
11 Datar ai mambo na bilangen iyo a ginawa niyo a miyatay a mipantag ko dosa ogaid na
oyagoyag bo a mipantag ko Allah sii ko kaiisaisa niyo ago si Isa Al Masih.
12 Kagiya ka maoto na di niyo pekipaaren ko dosa so manga lawas iyo a aden a kapetay
niyan aya pen o ba niyo pangonoti so manga rarata a kabaya iyan.
13 Di niyo pen pelada so apiya antonaa ped ko lawas iyo ko dosa kaan maosar ko
kamarataan, ka ba niyo den palada a ginawa niyo ko Allah a datar o miyaoyag den a poon
ko miyamatay, ago palada niyo ron so manga ped ko lawas iyo kaan maosar ko manga
antap a maontol.
14 Ka so dosa na di rekano den makapepaar, ka kagiya kena den a ba kano mapapadalem
ko kitab, ka mapapadalem ko limo o Allah.
Manga Oripen o Kaontol

15 Ba aya maana ini na makapendosa tano pen sabap sa kena a ba tano pen mapapadalem
ko kitab, ka sii ko limo o Allah? Mataan a di!
16 Ba niyo di katawi a o palada niyo a ginawa niyo a oripen ko apiya antawaa sa
kapetomana niyo ron na manga oripen kano niyan? O palada niyo a ginawa niyo ko dosa
na aya ondasan iyan na kapatay, na o palada niyo ko kapetomana niyo ko Allah na aya
ondasan iyan na kaontol.
17 Ogaid na panalamatan tano so Allah ka apiya pen manga oripen kano gowani o dosa
na piyaratiyaya niyo den sa iklas ko poso iyo so tito a benar a madadalem ko
inipamangendao rekano.
18 Kiyabalokasan kano ko dosa na miyabaloy kano a manga oripen o kaontol.
19 Inosar aken sii so makakakalilid a manga katero kaan malebod a kakesabota niyo ron.
Gowani na piyalad iyo so manga ped ko lawas iyo ka kapepangongoripena kiran o
maresik ago pekitaralo a kamarataan, na datar ai mambo a palada niyo imanto so manga
ped ko lawas iyo ko kapepangongoripena kiran o kaontol a pekiyarong ko kasosoti.
20 Gowani ko manga oripen kano o dosa na da a labet iyo ko kaontol.

21 Antonaa i miyaparoli niyo ko kiyanggolaola niyo sangkoto a manga galebek a ipekeya
iyo imanto? Aya ondasan iyan na kapatay.
22 Ogaid na kiyabalokasan kano den imanto ko dosa na miyabaloy kano a manga oripen o
Allah, na di niyo dii nggolaolaan imanto so manga nganin a pekiyarong ko kasosoti a aya
ondasan iyan na kaoyagoyag a da a kaposan iyan.
23 Aya imbayad o dosa na kapatay ogaid na aya pamemegayan o Allah na kaoyagoyag a
da a kaposan iyan sii ko kaiisaisa tano ago si Isa Al Masih a Kadnan tano.
ROMA 7
Ibarat a Mipepasod ko Kakewing
Manga pagari ko a manga tatao ko Kitab, na ba niyo di katawi a aya bo a kipepaaren ko

taw o kitab na sii bo ko kaooyagoyag iyan pen?
2 Lbarat na so babay a aden a karoma niyan, na mapapadalem ko kapaar o karoma niyan
sii ko kaooyagoyag pen o karoma niyan sabap ko sogoan o Kitab. Ogaid na o matay so
mama na miyaboka so babay ko sogoan a kapakatetapi iran.
3 Kagiya ka maoto na o makipetepi so babay ko salakaw a mama sii ko kaooyagoyag pen
o karoma niyan na miyakasina sekaniyan. Ogaid na amay ka matay so karoma niyan a
mama na kepokas so babay ko sogoan na kena a ba sekaniyan miyakasina o
makipengaroma sa salakaw a mama.
4 Lagid kano niyan mambo, manga pagari ko, ka miyatay kano den mipantag ko kitab a
nggolalan ko kiyapatay niyo a ped o Al Masih sii ko kiyatotoka ko lawas iyan ko kros.
Imanto na minitapi kano ko salakaw a karoma niyo a sii rekaniyan a miyaoyag a poon ko
miyamatay kaan tano makaonga sa mala i gona ko Allah.
5 Sii ko kipepaaren rektano o kamamanosiyai rektano na so manga rarata a kabaya tano a
baden piyokaw o manga sogoan o Kitab na aya dii nggalebek sii ko manga lawas tano na
aya inionga iran na pekiyarong ko kapatay.
6 Ogaid na imanto na miyaboka tano ko Kitab, ka lagid tano bo o miyamatay mipantag
sangkoto a makapepaar rektano gowani. Imanto na makapenalagad tano ko Allah ko bago
a okit a nggolalan ko kapetomana tano ko Roh iyan, a kena a ba sii ko andang a okit a
nggolalan ko kapetomana ko manga sogoan a misosorat ko Kitab.
So Kitab o Mosa ago so Dosa
7 Ba aya maana ini na ipekedosa tano so Kitab? Mataan a kena! Ka o da a Kitab na di

aken katawan o antonaa i dosa. Di aken katawan o antonaa i napso o da a sogoan a tig
iyan a "Di ka penapso."
8 Ogaid na so dosa na inosar iyan angkai a sogoan, ka miyakanggolalan on na
miyakapokaw raken so dosa ko langon a pisosonan a marata a kabaya. Ka o da a Kitab na
da o kowan angkai a kapaar o dosa.
9 Gowani ko da ko pen kaketokawi ko Kitab na oyagoyag ako, ogaid na sii ko kiyatokawi
ko sangkai a sogoan na miyapayag so dosa
10 Na miyatay ako. Na so sogoan a patot a pekawit raken so kaoyagoyag na kiyasabapan
baden ko kiyapatay aken.
11 Ka so dosa na miyaparo ron a kiyasalibaa niyan raken, na nggolalan ko sogoan na
miyapatay ako niyan.
12 So Kitab na soti, na so manga sogoan iyan na soti, maontol, ago mapiya.

13 Ba aya maana ini na so mapiya na aya raken miyakapatay? Mataan a kena! Ogaid na so
dosa na inosar iyan so mapiya a aya niyan gomaan ko kiyabonoa niyan raken kaan
makilala so tito a parangay niyan. Sabap san na miyakanggolalan ko sogoan na
miyapayag piyapiya so karata o dosa.
So Dowa a Paparangayan o Manosiya
14 Katawan tano a so Kitab na aya bo a kaketomana on na nggolalan ko kabatowa o Roh,

ogaid na matag ako baden manosiya a pipesa a mapengongoripen o dosa.
15 Di aken seboten so di aken dii manggolaola. Kebayaan aken nggolaola so mapiya
ogaid na kena a ba giyanan i di aken dii manggolaola, ka so bo so ipekegowad aken.
16 Na o so di aken dii manggolaola na kena a ba aken kabaya a penggolaolaan ko na
keilay sii a aayonan aken a ontol so Kitab.
17 Aya benar na kena den a ba so tito a ginawa ko i ba dii nggolaola sa datar ai, ka so
dosa a madadalem raken.
18 Katawan aken a da den a mapiya a ba raken madadalem, aya maana niyan na sii ko
kamamanosiyai raken, ka apiya pen aden a niyat aken sa kanggolaola sa mapiya na di
aken ai mapenggolaola.
19 Di aken kegaga nggolaola so mapiya a kebayaan ko nggolaola, ka aya di aken dii
manggolaola na so marata a kena a ba ko kabaya a penggolaolaan ko.
20 Na o pinggolaola ko so di aken kabaya i ba ko nggolaolaa na kena a ba so tito a
ginawa ko i minggolaola on, ka so dosa a madadalem raken.
21 Kagiya ka maoto na kiyatokawan aken angkai a kokoman: igira a kebaya ako

nggolaola sa mapiya na so marata i di aken dii manggolaola.
22 Aayonan o hatin aken so manga sogoan o Allah
23 Ogaid na makikilala aken a aden a mbida a kokoman a dii nggalebek ko manga ped ko
lawas aken a makasosopak ko kokoman a aayonan o pamikiran aken, na giyangkoto a
kokoman na pepakipengongoripen ako niyan ko dosa a sisii ko manga ped ko lawas aken.
24 Dowandowaan ako den! Antawaa den i sebet raken sangkai a lawas a petonda raken
ko kapatay?
25 Penalamatan ko so Allah, ka kesabet ako ron a nggolalan ko Kadnan tano a Isa Al
Masih!
Na giyai i kapakambebetad aken: Aya niyat o pamikiran aken na so kapetomana ko ko

Kitab o Allah, ogaid na so kamamanosiyai raken na pepangongoripenen o dosa.
ROMA 8
So Kapepaginetaw a Mipapaar o Rok o Allah
Aya mataan den imanto na di den kesala so manga taw a maiisaisa siran ago si Isa Al
Masih.
2 Ka sii ko kaiisaisa tano ago si Isa Al Masih na so kabatowa o Roh a pepangoyag na
biyalokasan ako niyan ko kapaar o dosa a kiyarong ko kapatay.
3 Di ini kegaga o Kitab sabap ko kalobay o kamamanosiyai rektano. Sabap sii na
pinggolaola ini o Allah ko kiyasogoa niyan ko Wata iyan sa doniya sii ko lawas a lagid o
lawas tano a baradosa a kamamanosiyai ron kaan matay sekaniyan sabap ko manga dosa.
Na bininasa niyan so kapaar o dosa sii ko kamamanosiyai rektano.
4 Pinggolaola niyan ai kaan so kaontol a ipapaliyogat o Kitab na matarotop sii rektano a
aya tano ipepaginetaw na kena a ba so kamamanosiyai rektano, ka so Roh.
5 Siran oto a ipepaginetaw iran so kamamanosiyai kiran na lalayon pepamikir ko manga
kabaya o kamamanosiyai kiran, ogaid na siran oto a ipepaginetaw iran so Roh na lalayon
pepamikir ko manga kabaya o Roh.
6 Na so kipepaaren ko pamikiran o kamamanosiyai na kiyarong ko kapatay, na so
kipepaaren on o Roh na kiyarong ko kaoyagoyag ago kalilintad.
7 Ka so taw a ipapaar so pamikiran iyan o kamamanosiyai ron na riridoon iyan so Allah,
ka di niyan tomanen so manga sogoan o Allah na di niyan den ai ketoman.
8 Siran oto a ipapaar o kamamanosiyai kiran na di iran den kesoat so Allah.
9 Ogaid na kena a ba kano ipapaar o kamamanosiyai rekano, ka ipapaar kano o Roh, o

benar a sii rekano komakaden so Roh o Allah. Na apiya antawaa i da on so Roh o Al
Masih na kena a ba rek o Al Masih.
10 Ogaid na o madadalem rekano so Al Masih na apiya pen petay so lawas iyo sabap ko
dosa na oyagoyag so niyawa niyo sabap sa ibibilang kano a maontol o Allah.
11 Na o sii rekano komakaden so Roh o Allah a aya miyoyag ki Isa a poon ko miyamatay
na sekaniyan oto a miyoyag ki Isa Al Masih a poon ko miyamatay na pengoyagen iyan
mambo so manga lawas iyo a aden a kapetay niyan a nggolalan ko Roh iyan a komakaden
sii rekano.
12 Kagiya ka maoto, manga pagari ko, na kena a ba rektano ipapaliyogat a kapepangonoti

niyo ko kamamanosiyai rektano.
13 Ka o pepangonoti niyo so manga rarata a kabaya o kamamanosiyai rekano na pematay
kano den, ogaid na o pekibonoon iyo ko Roh so manga rarata a olaola o lawas iyo na
keoyag kano.
14 Siran oto a pegagaken o Roh o Allah na manga wata siran o Allah.
15 Ka so Roh a tiyarima iyo na di kano niyan mbalowin a manga oripen a lalayon
pekelek, ka tiyarima iyo so Roh a biyaloy kano niyan a manga wata o Allah; sabap sii na
petelowan tano sekaniyan a "Ama, Ama aken."
16 Giyangkoto a Roh na pepamataanan iyan ko niyawa tano a manga wata tano o Allah.
17 Na kagiya manga wata tano niyan na makapekawali tano ko manga rakmat a pitiyagar
o Allah para ko manga pagtaw niyan, na kirakes tano mambo ko kakekawaliya o Al
Masih ko pitiyagar o Allah para rekaniyan. Ka o pembegian tano ko manga karomasayan
iyan na makapembagian tano ko bantogan iyan.
So Pekatalingoma a Bantogan
18 Tatarimaan aken a so manga karomasayan tano sangkai a masa na lagid bo o tanto a

makep amay ka pakapelebiyaan ago so bantogan a kipayag rektano.
19 So langon a taman a miyanga aaden na nomanayaw a ipekedali iran so kipeyagen o
Allah ko manga wata iyan.
20 Ka kiyokom o Allah a keilang baden so so langon a kaaden, na kena ini a ba sabap ko
kabaya iran, ka sabap ko takdir o Allah. Ogaid na apiya pen ai na iinamen iran
21 A kebalokasan so langon a kaaden ko kaooripeni kiran o kapekeredak, ago
makapembagian siran ko kababantogan a kapakadadaya o manga wata o Allah.
22 Katawan tano a taman imanto na so langon a kaaden na dii makaperego ko masakit a
datar o pembaliliten a babay.
23 Na kena a ba siran bo, ka sektano mambo a katatagoan ko Roh a aya paganay a
pamemegayan rektano o Allah, na di tano mambo dii makaperego sii ko ginawa tano sii
ko kapenayawa tano ko kambaloya rektano piyapiya o Allah a manga wata iyan ago so
kakebalokasi niyan ko manga lawas tano.
24 Apiya pen miyasabet tano den na pepegarapen tano pen ai, ka o miyatarima tano den
na di den kailangan a kapepegarapa tano ron.
25 Ogaid na o pepegarapa tano so da tano pen matarima na pepenayaw tano ron a sesabar.
26 Na pegogopan tano o Roh sii ko kalobay tano, ka di tano katawan o antonaa i patot a
ipengangarapan tano aya pen o ba andamanaya i kapangangarapan tano ron, ogaid na so
den so Roh na ipegadap iyan ko Allah so pangangarapan tano a nggolalan ko dii
kapakaperego a di pekabales.
27 Na so Allah a matao ko madadalem ko manga poso tano na katawan iyan so dii teroon
o Roh, ka ipepamangni niyan so manga kaom o Allah a mipantag ko kabaya o Allah.
28 Katawan tano a sii ko langon a pekeolaola na dii nggalebeken o Allah so kamapiyaan

o siran oto a pekebabaya on, a so siran oto a piyanawag iyan a aya kinitoman o pitekdir
iyan.
29 Ka andang den a katawan o Allah o antawaa i tewagen iyan a rek iyan, na pitekdir iyan
sa miyatey den a kebaloy siran a datar o Wata iyan kaan mbaloy so Wata a kaka o
madakel a manga magariyari.
30 Na siran oto a pitekdir iyan a mabaloy a rek iyan na piyanawag iyan mambo, na siran
oto a tiyawag iyan na inibilang iyan a manga oontol, na siran oto a inibilang iyan a manga
oontol na piyakimbagian iyan kiran pen so bantogan iyan.
So Gagaw o Allah a dii Makanggolalan ki Isa Al Masih
31 Kagiya benar ai langon na antonaa pen i mapetero tano? O maampil rektano so Allah
na antawaa i pekasopak rektano?
32 O da anogoni o Allah so Wata iyan ka piyalad iyan baden ko kapatay para rektano
langon na ba niyan rektano di mbegan, a kirakes ko Wata iyan, so langon taman?
33 Antawaa i pendimanda ko siran oto a piyamamili o Allah? Ba so Allah? Kena, ka
sekaniyan i ibibilang iyan siran a da a manga sala iran.
34 Na antawaa i pekakokom sa miyasala siran? Ba si Isa Al Masih? Di, ka sekaniyan i
miyatay ago miyaoyag bo a sisii den sa kawanan o Allah a ipepangangarapan tano niyan.
35 Antawaa i pekabelag rektano ko kapekebabayai rektano o Al Masih? Ba so
karomasayan, o di na kamaregenan, o di na kasatroan, o di na taon, o di na kamimiskini, o
di na piyakaleklek, o di na katidawa? Kena!
36 Lagid tano o misosorat ko Kitab a
"Sabap reka na pepamonoon kami sii ko mababasa alongan.

Ibibilang kami a datar o manga bilibili a penombaliin."
37 Apiya pen oto na sii ko langon ai a masosowa na pepekataban tano piyapiya a

nggolalan rekaniyan a pekebabaya rektano.
38 Ka matatangked sa ginawa ko a da den a ba rektano pekabelag ko kapekebabayai
rektano o Allah; apiya so kapatay aya pen o ba so kaoyagoyag, o di na so manga malaikat,
o di na so manga saitan, o di na so manga ala i kabatowa, o di na so manga pekeolaola
imanto, o di na so pekatalingoma,
39 O di na so matatago sa poro, o di na roo sa didalem, o di na apiya antonaa a ped a
kaaden i ba tano niyan mabelag ko kapekebabayai rektano o Allah a nggolalan ki Isa Al
Masih a Kadnan tano.
ROMA 9
So Allah ago so Pinili iyan a manga Taw
Benar so peteroon ko imanto sii ko kaiisaisa ko ago so Al Masih, na kena a ba ako

pepamokeg. Na pepamataanan ai mambo o hatin aken a pepakaliwanagan o Soti a Roh,
na giyai i kebayaan ko tero:
2 Tanto a mararata a ginawa ko ago da den a rintas o kapakamboboko o poso aken,
3 Ka masisingayo aken a o kepakay na kemorkaan ako o Allah a mabelag ko Al Masih
para ko kamapiyaan o manga pagari aken a Yahodi a ped ko bangesa ko
4 A manga Israil. Miyapili siran o Allah a manga wata iyan na piyakambagian iyan siran
ko bantogan iyan. Pimbaalan iyan so manga Kapasadan iyan mipantag kiran, na siran i
kiyatoronan o Allah ko Kitab o Mosa. Rek iran so kapesimba ko Allah sii ko Timplo, na
miyatarima iran so manga topa o Allah.
5 Kiyababadan siran ko kababantogan a manga apoapoan, na sii ko kiyababadan kiran na
inimbawata so Al Masih mipantag ko kamamanosiyai ron. Sekaniyan so Tohan a lebi a
maporo ko langon taman a patot a pepodin sa taman sa pakataman! Amin.
6 Na apiya pen kena a ba so langon a Yahodi i ba miyakaparatiyaya na kena a ba aya

maana ini na da tomanen o Allah so topa niyan, ka kena a ba so langon a kiyababadan ko
Israil i ba tito a manga taw o Allah.
7 Kena pen a ba so langon a kiyababadan ko Ibrahim i ba tito a manga mbawataan iyan,
ka pitero o Allah ko Ibrahim a "So bo so kebabadan ki Iskak i imbilang a manga
mbawataan ka."
8 Aya maana ini na kena a ba siran oto a inimbawata ko kamamanosiyai a okit i ba manga
wata o Allah, ka siran oto a inimbawata a minisabap ko topa o Allah na aya imbilang a
tito a manga kiyababadan ko Ibrahim.
9 Ka aya initopa o Allah na giyai: "Sii ko datar ai a masa ko talondog a ragon na kesoy
ako na pembawata si Sarah sa mama.”
10 Giyangkai a wata a mama na so apo tano a si Iskak. Na mimbawata sekaniyan ago si

Ribikah sa miyadowa a manga wata.
11 Ogaid na sii ko da pen kimbawataan sangkoto a manga wata ago so da iran pen
kanggolaola sa mapiya o di na marata na aden a pitero o Allah ki Ribikah kaan matoman
so takdir iyan sa kapili iyan sa sakataw sangkoto a manga wata
12 A kena a ba sabap ko galebek iyan ka sii bo sabap ko kiyatawaga on o Allah. Na aya
pitero iyan ko Ribikah na "So kaka na mapenonogo o ari."
13 Ka miyatoman angkai a misosorat ko Kitab a "Kiyababayaan ko si Yakob ogaid na
inikagowad aken si Isaw."
14 Na antonaa i mapetero tano makapantag sii? Ba so Allah na di maontol? Mataan a

kena a ba di maontol!
15 Ka pitero iyan ko Mosa a "Ikepedi aken so kebayaan ko komapedi, na
ipengalinggagaw aken so kebayaan ko mangalinggagaw."
16 Kagiya ka maoto na so katarimaa ko topa o Allah na kena a ba mipepasod ko kabaya o
taw o di na so kapepanamar iyan, ka sii sabap ko kapedi o Allah.
17 Ka pitero o Kitab ko Radiya Piraon a "Biyaloy aken seka a dato kaan aken mapakiilay
so kabatowa aken a nggolalan reka, ago an mapakalangkap so ingaran aken ko dalem a
doniya."
18 Keilay sii a ikepedi o Allah so apiya antawaa i kebayaan iyan komapedi, na
pepakategasen iyan so poso o apiya antawaa i kebayaan iyan a kapakategasa niyan on ko
poso iyan.
So Rarangit ago so Kapedi o Allah
19 Masiken a aden a isa rekano a peteroon iyan raken a "O benar oto na ino selaa o Allah
so taw? Antawaa i pekasopak ko kabaya o Allah a penggolaolaan iyan?"
20 Ogaid na antawaa ka, a matag manosiya, a makipelampawiya ko Allah? Ba pekagiraw
so koden ko mimbaal on a "Ino ako ngka pagembaali a datar ai?"
21 Ba da a kabenar o pangengembaal sa koden sa kambaali niyan ko sasatompi a
miyabonaw a bote sa dowa barang a koden, a so isa on na mala i arga ago so isa na
barato?
22 Datar oto so kabenar o Allah. Kepakay a pekiilay niyan so rarangit iyan ago pekikilala
niyan so kabatowa iyan a nggolalan ko kambinasaa niyan ko siran oto a mapapatot on,
ogaid na tanto niyan siran baden a pisebaran.
23 Aya sabap iyan na an iyan mapakiilay so tanto a mala a bantogan iyan ko siran oto a
ipekepedi iyan a miyatiyagar iyan gowani a makapembagian ko bantogan iyan
24 A aya maana niyan na sektano den a piyanawag iyan, a kena a ba sii bo pekapoon ko
manga Yahodi, ka poon mambo ko kena a ba manga Yahodi.
25 Giyai i pitero iyan a inisorat o nabi Hosiyas a
"Mbetowan ko sa 'manga pagtaw aken' so kena a ba ko manga pagtaw gowani,

na siran oto a da ko kababayai gowani na mbetowan ko sa 'pekebabayaan ko.' "
26 Ago,
"Sii ko darpa a ron kiran miyatero gowani a ‘kena a ba ko sekano manga taw,’
na ron siran kebetowi sa 'manga wata o oyagoyag a Tohan.' "
27 Na giyai i pitero o Isayas makapantag sa Israil a
"Apiya pen so manga taw sa Israil na lagid sa kadakel o peted sa kilid a ragat
na maito bo a kesabet kiran,
28 Ka so Kadnan na penggagaanan iyan tomoman so isela iyan ko doniya kaan den
mapasad."
29 Na kitoman den so miyaalamat o Isayas a
"O da lambaa o Kadnan a Lebi a Mamaapaar so ped ko kiyababadan tano

na miyapolang tano den a datar o manga taw sa Sodom,
ago so manga taw sa Gomorah."
So Israil ago so Mapiya a Totol
30 Kagiya ka maoto na antonaa i mapetero tano? Aya mapetero tano na giyai: so kena a
ba manga Yahodi a da panagontaman sa kapakaontol iran na miyakowa iran den so
kaontol, a so kaontol a mipepasod ko paratiyaya.
31 Ogaid na so manga taw sa Israil a pepanagontamanan iran so kaontol a mipepasod ko
manga sogoan na da siran raoten ko antap iran.
32 Ngkaino bes? Aya sabap iyan na so kapepanagontaman iran na kena a ba mipepasod
ko paratiyaya, ka sii baden ko manga galebek. Minisosong siran ko ator a pekesosongan
33 A miyaaloy sangkai a misosorat ko Kitab a
"Ilaya niyo man ka imbetad aken so isa a ator sa Siyon

a kesosongan ko manga taw,
a so ator a ikeoteng iran,
ogaid na saden sa taw a peserig rekaniyan na di den makapekeya."
ROMA 10
Manga pagari aken, tanto a masisingayo o poso aken a masabet so manga Israil, na giyai i
pepangangarapanen ko ko Allah.
2 Kapemataanan aken a tanto iran a pananamaran iran a kapepanalagadi ran ko Allah
ogaid na kena ini a ba mipepasod ko ontol a katao.
3 Da iran tagoa sa ginawa so okit a kibilangen o Allah ko taw a maontol, ka piyanamaran
iran baden a kapekedega iran ko rek iran a okit ko kapakaontol, na da iran tarimaa so
kaontol a ipembegay o Allah.
4 Ka so Al Masih na inepos iyan so okit ko kapakaontol a sii mipepasod ko kapetomana
ko manga sogoan kaan mibilang a maontol so oman i peparatiyaya.
So Kakesabet na para ko Apiya Antawaa i Terima on
5 Giyai i inisorat o Mosa makapantag ko kapakaontol a mipepasod ko kapetomana ko

manga sogoan: "So taw a petoman ko manga sogoan na aya niyan ikeoyagoyag."
6 Ogaid na giyai i miyatero makapantag ko kapekaontol o taw a mipepasod ko paratiyaya:
"Di ngka peteroa sa ginawa ngka a 'Antawaa i penik sa kasorgaan?' " (Aya maana ini na
an iyan mapakapanog so Al Masih), o di na
7 “Di ngka pen peteroa a 'Antawaa i penog ko pitidaleman ko doniya?' " (Aya maana ini
na an iyan makowa so Al Masih a poon ko darpa o miyamatay).
8 Aya miyatero na giyai: "Marani rekano so katero, ka sii ko manga modol iyo ago
madadalem ko manga poso iyo." Aya maana ini na so katero makapantag ko paratiyaya a
pepakalangkapen ami.
9 Ka o teroa o modol ka a si Isa na aya Kadnan, ago peratiyayaan pen o poso o ka a
inoyag sekaniyan o Allah a poon ko miyamatay na kesabet ka.
10 Ka imbilang ka a maontol o Allah a nggolalan ko kaparatiyaya o poso o ka, na kesabet
ka a nggolalan ko kapayaga on o manga modol ka.
11 Misosorat ko Kitab a "Apiya antawaa i peserig rekaniyan na di den makapekeya,"
12 Na mirarakes sii so langon a taw, ka da a mbidabidaan o manga Yahodi ago so kena a
ba manga Yahodi, ka so isaisa a Kadnan na aya Kadnan o langon a taw, na rarakmatan
iyan so langon a pepananalo rekaniyan.
13 Ka misosorat ko Kitab a "Apiya antawaa i petelo ko ingaran o Kadnan na kesabet."
14 Ogaid na andamanaya i kapetelowi iran ko Kadnan o da iran paratiyayaa? Na

andamanaya i kaperatiyayaa iran rekaniyan o da iran maneg so makapantag on? Na
andamanaya i kakenega iran on o da a ba on pepakalangkap?
15 Na andamanaya i kapekalangkapa on o da a miyasogo a pekalangkap on? Misosorat ko
Kitab a "Sayana a mapiya i paras so manga ai o siran oto a pepakalangkap ko mapiya a
totol!"
16 Ogaid na kena a ba so langon a manga Israil a miyamakaneg ko Mapiya a Totol i ba on

tomiyarima. Ka pitero o Nabi Isayas a "Hey Kadnan, antawaa i miyaratiyaya ko totol
ami?"
17 Kagiya ka maoto na so paratiyaya na pepekapoon ko kapemakinega ko katero a
pepakalangkapen makapantag ko Al Masih.
18 Ogaid na aden a ipagise aken makapantag ko manga Yahodi. Ba iran da maneg so

katero? Mataan a miyaneg iran, ka misosorat ko Kitab a
"So sowara iran na lomiyangkap ko dalem a doniya

na iniraot so manga katero iran ko pirowarowangan o doniya."
19 Na ipagise aken pen: Ba da ini sabota o manga taw sa Israil? Aya paganay a somimbag
sii na si Mosa a tig iyan a:
"Pakipesigi aken sekano ko manga taw a kena a ba tito a bangsa.

Pakipekerangitan aken sekano ko nasiyon a da a sabot iyan."
20 Na pitero i Isayas sa masagogod a:
"Miyatoon ako o manga taw a da raken mbabanog.

Piyayag aken a ginawa ko ko manga taw a da raken pangingise.”
21 Ogaid na makapantag ko manga taw sa Israil na tig iyan a
“Pekewaan aken a lima ko mababasa alongan

so pepemangongkir ago manga tetegas i olo a manga taw.”
ROMA 11
So Kapedi o Allah ko Israil
Kagiya ka maoto na ipagise aken o ba initolak o Allah so manga taw niyan? Mataan a
kena! Ka taw ako mambo a Israil a kiyababadan ko Ibrahim ago maaped ko mbatabataa a
Baniyamin.
2 Da tolaken o Allah so manga taw niyan a piyamili iyan sii ko miyanga oona a gawii. Ba
niyo di katawi so pitero o Kitab makapantag ki Iliyas, a so kadadawaya niyan ko manga
Israil sii ko kapepangangampedian iyan ko Allah?
3 Tig iyan a "Hey Kadnan, piyamono iran so manga nabi ngka ago piyanempag iran so
manga aparan ka, na saken bo i miyalamba, na pananamaran ako iran pen mono.”
4 Na antonaa i inisembag on o Allah? Pitero iyan a "Aden pen a pito nggibo a manga taw
a inisenggay aken a rek aken a da pamanimba ko barahala a Baal."
5 Na datar oto mambo imanto, ka aden pen a manga Yahodi a piyamili o Allah sabap ko
limo iyan.
6 So kiyapamilia niyan kiran na sabap ko limo iyan a kena a ba sabap ko manga galebek
iran, ka o sabap ko manga galebek iran na so limo iyan na kena a ba tito a limo.
7 Na antonaa bes i masosowa? Kena a ba langon o manga Israil i miyakakowa ko di ran

dii mbabanogen. Aden a maito kiran a miyamakakowa on, a so siran oto a piyamili o
Allah, ogaid na so manga ped na miyamakategas i poso.
8 Giyanan i misosorat ko Kitab a
"Piyakitepol o Allah so pamikiran iran,

na taman imanto na di iran kiilay so manga mata iran
ago di iran kineg so manga tangila iran."
9 Na pitero o Daod a
"Pengnin ko a mabaloy a sampirot ago litag so manga rakmat iran

a aya kesosongan kiran ago ikebinasa iran.
10 Kalibotengan so mata iran kaan siran di pemakailay,
na manga pepeko so manga likod iran sa dayon sa dayon."
11 Na aden pen a ipagise aken: Kagiya misosong so manga Yahodi na ba siran miyaoteng
a di den makapembowat? Mataan a kena! Sabap ko kiyapakasela iran na miyakaoma so
kakesabet ko kena a ba manga Yahodi kaan kiran makasigi so manga Yahodi.
12 Na o so kiyapakasela o manga Yahodi ago so kiyakorangi kiran na aya sabap o
kiyarakmati ko kena a ba manga Yahodi sa dalem a doniya na taralebi pen a perakmatan
so doniya amay ka matarotop so kadakel o manga Yahodi a pemaratiyaya.
So Kakesabet o Kena a ba manga Yahodi
13 Na peteroon ko rekano a kena a ba manga Yahodi a sabap sa siyogo ako rekano a kena
a ba manga Yahodi na ipepangandag aken so galebek aken sii rekano
14 Kaan masiken a mapakasigi aken so ped aken a manga Yahodi ago masabet aken so
ped kiran.
15 Ka o so kinitolaken kiran o Allah na aya kiyasabapan ko kiningginawain iyan ko ped a
manga taw sa doniya na antonaa i kesowasowa amay ka terimaan iyan siran peroman?
Datar oto o kakeoyag o miyamatay!
16 O soti so paganay a sabagi ko paan a isepaat ko Allah na soti mambo so kalaan on. Na
o soti so bekaw o kayo na soti mambo so manga sapak iyan.
17 Piyamotol so ped ko manga sapak o piyamola a kayo a olibi, na seka, a kena a ba
Yahodi, na lagid o minitoor on a sapak o kayo a olibi sa kalasan, na di ka dii
makambagian ko ipekeoyag a lita a poon ko bekaw o piyamola a kayo.
18 Sabap sii na di ngka pipikira i ba ka lebi a mapiya a di so miyanga popotol a sapak. O
giyanan i mapipikir ka na tatanodi ngka a kena a ba ka makatotokod ko bekaw, ka so
bekaw na aya reka makatotokod.
19 Masiken a peteroon ka a "Piyamotol so manga sapak kaan ako mitoor ko piyotolan
on."
20 Benar oto. Ogaid na piyamotol siran ka da siran paratiyaya na aya kitatapiin reka on na
sabap ko paratiyaya ngka. Na di ngka ini pengandagen, ka ba ka den kalek.
21 Ka o da maapi o Allah so manga Yahodi a aya tito a manga sapak na di ka niyan
mambo pemaapan.
22 Keilay sii so kasalimoon o Allah ago so kasopiit iyan. Masopiit sekaniyan ko siran oto
a miyamakasilay, ogaid na ipekelimo ka niyan asar a kakaden ka sii ko limo iyan, ka o di,
na kepotol ka mambo.
23 So peman so manga Yahodi na o peratiyaya siran peroman na isompat siran peroman
ko kayo, ka kegaga o Allah so kisompaten iyan kiran on peroman.
24 Seka a kena a ba Yahodi na datar o sapak a miyapotol ko da pamolaa a kayo a olibi
ago inisompat ka ko piyamola a kayo a olibi a di reka domadait na lebi pen a malebod a
kisompaten o Allah ko manga Yahodi sangkoto a kayo a piyotolan kiran a domadait
kiran.
So Kapedi o Allah ko Kalangolangon
25 Kabaya aken, manga pagari ko, a katokawan iyo angkai a takdir o Allah a pageemaan
gowani kaan iyo di kiporo a ginawa niyo. Giyai i takdir iyan: so kategas i olo o ped ko
manga taw sa Israil na sii bo taman sa matarotop so kadakel o kena a ba manga Yahodi a
miyamanangoran ko Allah.
26 Na giyoto i kakesabet o kalangolangon o Israil, ka misosorat ko Kitab a
"Pekaoma so Pepanabet a poon sa Siyon

na pekadaan iyan so kamarataan o manga kiyababadan ko Yakob.
27 Na amay ka pepasen ko so manga dosa iran
na giyoto i kaketoman o kapasadan a initoron aken kiran."
28 Miyabaloy so manga Yahodi a manga ridoay o Allah ko da iran katarimaa ko Mapiya a

Totol kaan ai mapakalangkap rekano a kena a ba manga Yahodi, ogaid na sabap sa
miyapili siran o Allah na pekebabayaan iyan siran sabap ko manga apoapoan iran.
29 Ka di den mbewiin o Allah so manga pamemegayan iyan, na di niyan den pagalinen so
kiyapamili iyan.
30 Sekano a kena a ba manga Yahodi na pegongkir ko Allah gowani, ogaid na ipekepedi
kano imanto o Allah sabap ko kapegongkira on o manga Yahodi.
31 Datar oto mambo na pegongkir siran ko Allah imanto sii ko kipekepediin iyan rekano
kaan iyan siran mambo mikapedi.
32 Ka piyakipaar o Allah so langon a taw ko kapegongkir kaan iyan siran mikapedi
langon.
Podi ko Allah
33 Sayana a mala ago di keteked so ongangen o Allah ago so katao niyan!

Da den a ba pekaosay ko manga ikokom iyan.
Da den a ba pekasabot ko manga okitokit iyan.
34 Antawaa i matao ko pamikiran o Kadnan?
Antawaa i pekamosawir on?
35 Antawaa i miyakabegay ko Allah sa apiya antona onon
kaan disomala a kabalasi ron o Allah?
36 So langon taman na poon rekaniyan, ago miyaaden a nggolalan rekaniyan ago sabap
rekaniyan.
Rek iyan so bantogan sa taman sa pakataman! Amin.
ROMA 12
So Kapaginetaw a Kapanalagad ko Allah
Kagiya ka maoto, manga pagari aken, na sabap ko mala a kapedi rektano o Allah na
pagakolen ko rekano a palada niyo rekaniyan so manga lawas iyo a aya den oyagoyag a
sapaat, a soti ago ikesoat o Allah, ka giyanan i patot ago tito a kapesimbaa niyo ron.
2 Di niyo perawata so paparangayan a kadodoniyai, ka pakisalinen iyo baden ko Allah so
paparangayan niyo a nggolalan ko kapembagowi ko pamikiran iyo. Amay ka magiyoto na
kepariksa iyo o antonaa i kabaya o Allah, a so mapiya, matatarotop ago ikesoat iyan a
kabaya iyan.
3 Sabap ko kinikalimoon raken o Allah na peteroon ko ko oman i isa rekano a di niyo

pipikira i ba kano lebi pen a mala i kipantag a di so tito a kipantag ka, ka pakaontola niyo
baden so kakokoma niyo sa manga ginawa niyo a ipepasod ko kala o paratiyaya a
inibegay rekano o Allah.
4 Madakel a manga anggaota o isaisa a lawas o oman i isa rektano, ogaid na giyangkai a
manga anggaota na kena a ba ndatadatar bo so manga sangan iran.
5 Datar oto mambo a apiya madakel tano na lagid tano bo o isaisa a lawas sii ko kaiisaisa
tano ago so Al Masih, na so oman i tetanggisa rektano na mipageepeda o ped iyan.
6 Mbidabida so manga moodiset a inipamegay rektano o Allah. O aden a moodiset ka sa
kapekepayaga ko lalag o Allah na nggolaolaa ngka ini igira a aden a paratiyaya ngka sa
kapenggolaolaa ngka on.
7 O so moodiset ka na kapanalagad na panalagad ka baden; o so kapangendao na
pangendao ka;
8 O so kapangosiyat na pangosiyat ka. So pepemegay ko rek iyan na nggolaolaa niyan sa
da a ba on kaliget. So pepegolowan na panamar baden. So dii nggalebek ko kapedi na
nggolaolaa niyan a mapipiya a ginawa niyan.
9 Tatantowa niyo so kapekebabayai o oman i isa ko ped iyan. Lidasi niyo so marata na
kapeti niyo so mapiya.
10 Nggiginawai kano a lagid o magariyari, na pelalawana kano ko kapegadati o oman i
isa ko ped iyan.
11 Di kano pembokela, ka nggalebek kano sebenar. Pangongonotani niyo so Kadnan sa
kasosomayodi ko niyawa ngka.
12 Kababaya kano baden sii ko arap iyo. Sesabar kano ko manga karomasayan iyo.
Pepangangarapan kano lalayon.
13 Baadi niyo ko rek iyo so manga kaom o Allah a korang i rek, na panamar kano ko di
niyo dii kasekasakaw.
14 Pangniya niyo ko Allah a rakmatan iyan so siran oto a pesetro rekano. Oway, rakmati
niyo siran a kena a ba niyo pesintaan.
15 Kababaya kano igira a sisii kano ko manga pekebabaya, na segad kano igira a sisii
kano ko dii mamanegad.
16 Pagayonayon kano. Di kano pengimporoan ka pageepedaan iyo so
mangangalimbabaan. Di kano peseyan sa maongangen.
17 O nggolaolai kano sa marata o apiya antawaa na di niyo mbadali sa marata. Panamari

niyo nggolaola so kikilalaan o langon a taw a mapiya.
18 Taman sa kegaga niyo, o kepakay, na pelilintada kano ago so langon a taw.
19 Di kano peseop, manga ginawai aken, ka pakidanegen iyo baden ko Allah so
lominingo rekano, ka misosorat ko Kitab a "Saken i seop ago saken i mbedal, a tig o
Kadnan."
20 Ka nggolaolaa niyo baden angkai a misosorat a "O pekeor so ridoay ngka na pakakana
ngka sekaniyan; o pekewaw na pakainoma ngka, ka so di ngka sii dii kanggolaolaa na aya
ngka kitabotoden ko pekerab a manga waga sii ko olo niyan."
21 Di kano pekipeges ko marata, ka pakipegesen iyo so marata ko mapiya.
ROMA 13
Kapangongonotan ko Gobirno
Disomala a pakindato so oman i isa ko manga olowan sa gobirno, ka so langon a kadato

na poon ko Allah ago so langon a manga olowan na piyakandato o Allah.
2 So taw a pesopak ko kadato na pesopaken iyan so pimbaalan o Allah, na siran oto a
pesopak on na mataan a ndanegen.
3 Ka so manga olowan na da a ba sabap a kipekeleken on o taw a dii nggolaola sa
mapiya, ka so bo so dii nggolaola sa marata. Ba ngka kabaya a di ngka ikelek so olowan?
Na nggolaolaa ngka so mapiya na podin ka niyan.
4 Talasogoay sekaniyan o Allah a pepanalagad para ko kamapiyaan ka. Ogaid na o
penggolaola ka sa marata na kaleken ka, ka aden a kapaar iyan sa kandanega niyan reka,
ka talasogoay sekaniyan o Allah a pepekadaneg ko siran oto a dii nggolaola sa marata.
5 Kagiya ka maoto na ipapaliyogat rekano a kapakimbabaya iyo ko manga olowan a kena
bo a ba an iyo kalidasi so kandanega rekano, ka sabap mambo ko hatin iyo.
6 Giyanan i sabap a kapembayad iyo sa manga bowis, ka kagiya so manga olowan na

manga pepanalagad ko Allah sii ko kapetomana iran ko manga atastanggongan iran.
7 Begi niyo so langon a taw ko kak iran. Pembayadi niyo so manga bowis iyo, a so bowis
sabap ko lopa iyo, ago so bowis sabap ko tamok iyo, na pagadati niyo ago selaa niyo so
langon a kaaasakan sii.
So manga Atastanggonan o Oman i isa ko manga Ped
8 Di kano pengotang sa apiya antona onon ko apiya antawaa. Aya bo a patot a pagotangen
iyo na so kapekebabayai niyo ko oman i isa. Ka so pekebabaya ko ped na miyatoman iyan
den so Kitab.
9 Giyangkai a manga sogoan a "Di ka pesina, di ka pemono, di ka pemanekew, di ka
penapso,” ago apiya antonaa ped a sogoan na miyarangkom ai langon sangkai a isa a
sogoan a "Kababayai ngka so siringan ka a lagid a ginawa ngka."
10 So pekebabaya ko ped iyan na di niyan keraw nggolaolaan sa marata so ped iyan.
Kagiya ka maoto na so kapekebabayai ko ped na aya kapetomana ko Kitab.
11 Mala ini i kipantag a sowaan iyo, ka kagiya katawan iyo den o antonaa i masa imanto.
Giyai den i masa a disomala a pegnaw kano, ka miyakarani den imanto so kakesabet tano
a di so kiyapakapoon tano maratiyaya.
12 Minibolog den so kagagawii, ka sembi on so kadaondaw. Kagiya ka maoto na lowasen
tano so manga olaola a domadait on so maliboteng, na soloten tano so raben a ipelinding
ko taw a komadaken ko maliwanag.
13 Nggolaola tano sa patot a dii nggolaolaan sii ko kadaondaw: da a mitataralo a
kakeriyala ago kapamereg, da a kapakipamotaliya ago kambarabowat maasiya, da a
kapakimbobono ago kariit.
14 Ka solota niyo baden so Kadnan a Isa Al Masih na di niyo pipikira o andamanaya i
kapakionseri niyo so manga rarata a kabaya o kamamanosiyai rekano.
ROMA 14
Di ngka Kokoma so Pagari ngka
Tapiin iyo so da a bager o paratiyaya niyan sa di kano ron den pakipendaowa makapantag
ko rek iyan a manga pamikiran.
2 Aden a peparatiyaya sa kepakay a ken iyan so apiya antona onon a pangenengken.
Ogaid na aden a malobay i paratiyaya a aya bo a peken iyan na so manga leletaan.
3 So taw a pekan sa apiya antonaa pangenengken na di patot i ba niyan pesodia so taw a
di on kan. Na so di on kan na di patot i ba niyan kokoma so pekan on, ka palaya siran den
tiyarima o Allah.
4 Antawaa ka a pekakokom ko talasogoay o ped a taw? So bo so kadnan iyan i
pekakokom o petomanen iyan so sangan iyan ago so di. Na ketoman iyan den, ka kegaga
o Kadnan so kapakitomanen iyan on.
5 Aden a pipikiren iyan a aden a isa a gawii a lebi pen a soti a di so ped a gawii, na
pipikiren o ped a ndatadatar so langon a manga gawii. Patot a pesaden o oman i isa sa
ginawa niyan so makapantag sii.
6 So pipikiren iyan a soti so isa a gawii a di so ped na pepodin iyan so Kadnan. So pekan
sa apiya antonaa pangenengken na di niyan ai dii nggolaolaan a ipepodi niyan ko Kadnan,
ka pepanalamatan iyan so Allah ko peken iyan. Na so di kan sa sasoson a pangenengken
na di niyan ai dii nggolaolaan a ipepodi niyan ko Kadnan, na pepanalamatan iyan mambo
so Allah.
7 Ka da den a isa rektano a ba magiinetaw o di na matay a ba para bo ko ginawa niyan.
8 O oyagoyag tano na so kapepaginetaw tano na para ko Kadnan, na o matay tano na para
mambo ko Kadnan. Kagiya ka maoto na o oyagoyag tano o di na matay tano na rek tano o
Kadnan.
9 Ka so Al Masih na miyatay ago miyaoyag peroman kaan mabaloy a Kadnan o langon a
oyagoyag ago miyamatay.
10 Sabap san na ino ngka pekokoma o di na dii sodia so ped ka a miyaratiyaya? Ka
pekadarpaan tano langon ko dii kokoman o Allah,
"Mataan ko kaooyagoyag aken," a tig o Kadnan

"ka sodiyod so oman i isa a taw ko hadapan aken,
na podin o oman i isa so Allah.”
12 Kagiya ka maoto na so oman i isa rektano na isomariya on o Allah so manga

miyanggolaola niyan.
Di ngka Pakapendosaa so Pagari ngka
13 Kagiya ka maoto na paliyogat rektano a di den kokomen o oman i isa so ped iyan. Ka
pasada niyo baden sa ginawa niyo a di kano penggolaola sa apiya antona onon a
pekabinasa ko paratiyaya o pagari niyo o di na ikedosa niyan.
14 Sabap ko kaiisaisa ko ago so Kadnan a Isa na katawan aken ago matatangked sa
ginawa ko a da den a pangenengken a ba aden a misasarta on a di soti. Ogaid na o aden a
taw a tatarimaan iyan a di soti na di ini soti para rekaniyan.
15 O so kapekena ngka ko sasoson a pangenengken na ipekerata o ginawa o pagari ngka
na kena a ba ngka petomana so kapekebabayai ko ped. Di ngka peparowa a so peken ka
na pekabinasa ko taw a para on miyatay so Al Masih.
16 Di niyo penggolaolaa so tatarimaan iyo a mapiya amay ka dii teroon o ped a taw a
marata oto a olaola.
17 Ka so Ndatoan o Allah na kena a ba makapantag ko kakan ago kainom, ka so kaontol,
kalilintad, ago kapipiya a ginawa a ipembegay o Soti a Roh.
18 So taw a pepangongonotan ko Al Masih sangkai a okit na ikasosoat o Allah ago
pagaadatan o manga taw.
19 Kagiya ka maoto na lalayon tano pepanamaran so kanggolaola sa pepekabegay sa

kalilintad ago kapakabager o paratiyaya o oman i isa.
20 Di ngka mbinasaa so galebek o Allah sabap ko pangenengken a kebayaan ka koman.
Ka apiya halal so langon a pangenengken na ribat so kakana ko apiya antonaa a
pekabinasa ko paratiyaya o ped.
21 Di mapiya so kakan sa sapo, o di na so kainom sa arak, o di na so kanggolaola sa apiya
antonaa a pekabinasa ko paratiyaya o pagari ngka.
22 Pagmaa ngka so peparatiyayaan ka makapantag sangkai a manga nganin kaan so bo so
Allah ago seka i matao ron. Rarakmatan so taw a kena a ba pesenditan o hatin iyan sii ko
di niyan dii kanggolaolaa ko peparon iyan.
23 Ogaid na so taw a dii ndowadowa makapantag ko sasoson a pangenengken na kesala
ko kakena niyan on, ka kena ini a ba mipepasod ko paratiyaya niyan. Na apiya antonaa i
penggolaolaan a kena a ba mipepasod ko paratiyaya na dosa.
ROMA 15
So Kasoasoata ko manga Ped
Sektano a mabager i paratiyaya na patot a sebaran tano so malobay a paratiyaya o siran

oto a dii ndowadowa ago di tano soasoaten so manga ginawa tano.
2 Patot a soasoaten o oman i isa rektano so ped iyan para ko kamapiyaan iyan kaan
makabager so paratiyaya niyan.
3 Ka apiya so Al Masih na da niyan soasoata a ginawa niyan, ka aya miyaolaola niyan na
so den so misosorat ko Kitab a "So manga inipagitowito o miyamagitowito reka na sii
raken minitana.”
4 Na so langon a misosorat ko Kitab ko miyanga oona a gawii na inisorat a mipengendao
rektano kaan tano makakowa sa arap a nggolalan ko kasebar ago kapipiya a ginawa a
ipembegay rektano o Kitab.
5 Pengnin ko a so Allah a pekepoonan o kasebar ago kapipiya a ginawa na pakaisaisaan
iyan a pamikiran iyo sii ko kaperawata niyo ki Isa Al Masih
6 Kaan kano maisaisa ko kapembantoga niyo ko Allah a Ama o Kadnan tano a Isa Al
Masih.
7 Kagiya ka maoto na petetapiay kano a datar o kinitapiin rekano o Al Masih kaan

kabantogi so Allah.
8 Ka teroon ko rekano a miyabaloy so Al Masih a pepanalagad ko manga Yahodi kaan
iyan mapakiilay a kesarigan so Allah sii ko kinitomanen iyan ko manga topa niyan ko
manga apoapoan iran,
9 Ago an mabantog o kena a ba manga Yahodi so Allah sabap ko kapedi iyan. Ka
misosorat ko Kitab a
"Sabap sii na podin ko seka sii ko manga nasiyon,

na pagidaidaan ko a manga podi so ingaran ka!"
10 Misosorat mambo a
"Kababaya kano baden, hey manga nasiyon

a rakes o manga pagtaw o Allah!"
11 Misosorat pen a
"Podiya niyo so Kadnan, hey langon a manga nasiyon!

Podiya niyo langon a manga manosiya!”
12 Na pitero o Isayas a
"Aden a isa a Kiyababadan ko Yasay a meretok ko bekaw niyan.
Pekagemaw sekaniyan a pendato ko manga nasiyon,
na kesarigan sekaniyan o manga nasiyon.”
13 Na pengnin ko a so Allah a pekepoonan o arap na ipeno iyan rekano so langon a

kapipiya a ginawa ago kalilintad sii ko kapeparatiyayaa niyo rekaniyan kaan mitataros a
kapepakala o arap iyo a nggolalan ko kabatowa o Soti a Roh.
So Galebek i Paolo ko Kena a ba manga Yahodi
14 Matatangked aken, manga pagari ko, a mapepeno kano a kamapiyaan ago langon a
katao, na makapengosiyat so oman i isa rekano ko ped iyan.
15 Apiya pen oto na miyakakewaraw ako sii ko kinisoraten ko ko makapantag ko ped a
manga nganin kaan aken rekano den kapakitademi. Miyakakewaraw ako ron sabap ko
limo a inibegay raken o Allah,
16 A so kiyabaloya niyan raken a pepanalagad ki Isa Al Masih sii ko kena a ba manga
Yahodi. Aya galebek aken na datar o imam, ka pepakalangkapen aken so Mapiya a Totol
a poon ko Allah kaan mabaloy so kena a ba manga Yahodi a ipesoasoat ko Allah a
matarima iyan sabap ko kiyasotiya kiran o Soti a Roh.
17 Sabap san na sii ko kaiisaisa ko ago si Isa Al Masih na mipengandag aken so
kapepanalagad aken ko Allah.
18 Aya ko bo kerawan tero na so makapantag ko galebek a piyakinggolaola raken o
Allah, a giyoto so kiyaagaka ko ko kena a ba manga Yahodi ko katomana iran ko Allah a
nggolalan ko manga katero aken ago manga galebek,
19 A so den so manga ala a nanao ago manga piyakamemesa a miyanggolaola ko
kabatowa o Roh. Sii sangkai a okit na miyaimasad aken so kiyapakalangkapa ko ko
Mapiya a Totol makapantag ko Al Masih sii ko langon a inged a poon sa Yarosalim
taman sa Ilirikom.
20 Lalayon aken pepanamaran so kapepakalangkapa ko ko Mapiya a Totol sii ko manga
inged a da on den maneg so ngaran o Al Masih. Aya sabap iyan na di aken kabaya i ba ko
pakaontoda so pembalain aken sii ko onayan a inibetad o ped.
21 Ka aya kabaya aken na so kaketoman angkai a misosorat ko Kitab a
"Siran oto a da pen kapanotoli sa makapantag on na pekailay,

na siran oto a da sii makaneg na pekasabot.”
So Antap i Paolo sa Kibentelen iyan sa Roma
22 Sabap sangkai a galebek aken na omanoman ako den masendod sa kasong aken
rekano,
23 Ogaid na imanto na miyapasad den so galebek aken sangkai a manga inged. Na sabap
sa miyatey aken den a masisingayo ko madakel a manga ragon sa kibentelen ko rekano
24 Na iinamen aken a magaot ako rekano san sii ko kapesong aken sa Ispaniya. Na amay
ka makapiya a ginawa ko ko kapakipegepeda aken rekano sa di bo matey na keogopan
ako niyo sa kapekataros aken sa Ispaniya.
25 Inonta bo na song ako daan sa Yarosalim, ka magawid ako roo sa manga tabang para
ko manga kaom o Allah.
26 Ka so manga pagari ran sa Masidoniya ago giya Grisiya na miyapamikir iran a mapiya
so kapembegay iran sa tabang ko manga miskin a kaom o Allah roo sa Yarosalim.
27 Giyai na iklas ko poso iran, ka aya mataan na atastanggongan iran so katabangi
sangkoto a manga miskin. Ka sabap sa miyakambagian so kena a ba manga Yahodi ko
manga rakmat a inibegay o Allah ko manga Yahodi, na paliyogat kiran a pembagianen
iran so manga tamok iran ko manga Yahodi.
28 Amay ka mapasad aken angkai a galebek a mapalad aken kiran den so pirak a
miyatimo para kiran na melalakaw ako ka song ako sa Ispaniya, na imbentel aken sekano
ko kapesong aken roo.
29 Katawan aken a amay ka makaoma ako rekano na perakmatan tano piyapiya o Al
Masih ko kaketago aken san.
30 Manga magariyari; sii ko ingaran o Kadnan tano a Isa Al Masih ago sabap ko
kapekebabayai niyo raken a inibegay rekano o Roh na pagakolan ko sekano a pangeped
kano raken ko kapepangangarapan aken sebenar para sa ginawa ko.
31 Pangangarapana niyo a malinding ako ko siran oto a da pamaratiyaya roo sa Yodiya,
na pangniya niyo pen a matarima o manga kaom o Allah sa Yarosalim so tabang aken
kiran.
32 Oriyan oto na o peparowa o Allah na pekasong ako rekano a pekebabaya ako kaan
makapiya a ginawa ko san rekano.
33 Pengnin ko a mipageepeda iyo langon so Allah a pekepoonan o kalilintad. Amin.
ROMA 16
Manga Salam
Pekikilala ko rekano so pagari tano a babay a si Powibi a pepanalagad ko Agama sa

Kingkriya.
2 Sakawa niyo sii ko ingaran o Kadnan, ka patot ko manga kaom o Allah, na begi niyo sa
apiya antonaa tabang a kailangan iyan, ka madakel a kiyatabangan iyan a rakes o ginawa
ko.
3 Sampain iyo so salam aken ki Prisila ago si Akowilo a manga ogopa aken ko
kapepanalagad ki Isa Al Masih.
4 Iniserakan iran so kaoyagoyag iran para raken. Sabap san na pepanalamatan ko siran, a
kena a ba saken bo ka so langon o manga Agama o kena a ba manga Yahodi.
5 Sampain iyo pen so salam aken ko magaagama a dii timotimo ko walay ran.
Salamen ako niyo ko pekebabayaan ko a ginawai aken a si Ipinito a aya miyaona a

miyaratiyaya ko Al Masih sa inged a Asiya.
6 Salamen ako niyo ki Mariyam a minggalebek sebenar para rekano.

7 Salamen ako niyo pen ki Androniko ago si Honiyas a manga royod aken a Yahodi a
miyakalaboso a ped aken. Makikilala siran a manga siyogo, na miyaona siran a
miyaratiyaya ko Al Masih a di saken.
8 Sampain iyo so salam aken ki Ampliyato a pekebabayaan ko sabap ko Kadnan.
9 Salamen ako niyo ki Orbano a salinggogopa tano ko kapepanalagad ko Al Masih, na

salamen ako niyo pen ki Istakis a pekebabayaan ko a ginawai aken.
10 Salamen ako niyo ki Apilis a kiyatepengan den so paratiyaya niyan ko Al Masih.
Salamen ako niyo pen ko pamiliya i Aristobolo.
11 Salamen ako niyo ki Hirodiyo a Yahodi a datar aken ago so pepamaratiyaya ko

Kadnan a manga ped ko pamiliya i Narsiso.
12 Sampain iyo so salam aken ki Tripina ago si Triposa a dii nggagalebek sebenar para ko
Kadnan, na salamen ako niyo pen ki Pirsida a pekebabayaan ko a ginawai a madakel a
miyanggalebek iyan ko Kadnan.
13 Salamen ako niyo pen ki Ropo a pinili o Kadnan a rek iyan, ago sii mambo ki ina iyan
a datar den o ina aken mambo.
14 Sampain iyo so salam aken ki Asingkrito, si Pligon, si Hirmis, si Patrobas, si Hirmas,

ago so ped iran a magariyari.
15 Salamen ako niyo pen ki Pilologos, ki Holiya, ki Niriyos ago sii ko pagari niyan a
babay, taman ki Olimpas ago so langon o manga kaom o Allah a ped iran.
16 Pesasalama kano a sarta o soti a arek. Pesalamen kano o langon o manga Agama o Al
Masih.
So Moripori a manga Insarat
17 Pagakolan ko, sekano manga pagari ko, a pananggilai niyo so manga taw a
makapembelabelag rekano ago dii nggolaola sa makasosopak ko manga ndao a miyakenal
iyo, na lidasi niyo siran.
18 Ka so datar oto a manga taw na kena a ba pepanalagadi ko Al Masih a Kadnan tano, ka
so rek iran a manga kabaya. Na peselibaan iran so da a manga peleng iyan a nggolalan ko
manga pipiya a basa a matag kapamagompat.
19 So kapetomana niyo ko Kadnan na makikilala o langon a taw na ipekebabaya aken ai,
ogaid na kabaya aken a magongangen kano mipantag ko mapiya ago mabaloy kano a da a
manga peleng iyan mipantag ko marata.
20 Di bo matey na so Allah a pekepoonan o kalilintad na sesaan iyan so Iblis ko didalem

o ai niyo.
Pengnin ko a malalayon rekano so limo o Kadnan tano a Isa.
21 Pesalamen kano i Timotiyo a so salinggogopa aken, ago si Losiyo, si Yason ago si

Sosipatro a manga Yahodi a datar aken.
22 Saken, a si Tirsiyo a aya sii piyakasorat, na pesalamen aken sekano sii ko Kadnan.
23 Pesalamen kano i Gayos a di raken dii sekasakaw; so walay niyan na dii timotimoan o
langon a magaagama sii. Pesalamen kano i Irastos a sorilo sa siti ago so pagari tano a si
Kowartos.
Kaposan a Kapamodi
25 Bantogen tano so Allah a mapekabager iyan so paratiyaya niyo a nggolalan ko
Mapiya a Totol a pepakalangkapen aken makapantag ki Isa Al Masih. Giyangkai a Totol
na pageemaan gowani ipoon ko miyanga oona a gawii
26 Ogaid na piyayag den imanto a aya kiyatoman o inisorat o manga nabi. Na sabap ko
sogoan o da a ikepos iyan a Tohan na pepakitokawan angkai a Totol ko langon o manga
nasiyon kaan siran on makaparatiyaya ago makapangongonotan.
27 So isaisa a Tohan a aya bo maongangen na rek iyan so bantogan sa dayon sa dayon a
nggolalan ki Isa Al Masih! Amin.
1 KORINTO
1 KORINTO 1
Alamat sorat ako i Paolo a tiyawag a nggolalan ko takdir o Allah kaan ako mabaloy a
siyogo i Isa Al Masih, ago poon mambo ko pagari tano a si Sostinis
2 Makasampay ko Agama o Allah roo sa Korinto, a so siran oto a miyanga babaloy a soti
sabap ko kaiisaisa iran ago si Isa Al Masih ago piyanawag sa kabaloya kiran a manga
kaom o Allah a rakes o langon a taw ko mbalabala a pepananalo ko ingaran o Kadnan
tano a Isa Al Masih, a so Kadnan iran ago Kadnan tano mambo.
3 Pengnin ko a malalayon rekano so limo ago kalilintad a poon ko Allah a Ama tano ago
so Kadnan a Isa Al Masih.
Manga Rakmat a nggolalan ki Isa Al Masih
4 Lalayon aken pepanalamat ko Allah mipantag rekano sabap ko limo a inibegay rekano a
nggolalan ki Isa Al Masih.
5 Ka sii ko kaiisaisa niyo ago so Al Masih na mikewasa kano ko kinibegan rekano ko
langon a moodiset, a rakes o kapasang ko langon a kapananaroan ago langon a kasasabot.
6 So manga tito a benar a pimataanan ami rekano makapantag ko Al Masih na
miyakambekaw rekano den,
7 Na sabap sii na da a satiman bo a moodiset a ba kano ron kakokorangi sii ko
kapenayawa niyo ko kakepayag o Kadnan tano a Isa Al Masih.
8 Pekabageren iyan mambo so manga poso iyo taman sa kaposan kaan da a ba rekano
kidaway sii ko gawii a kakesoy o Kadnan tano a Isa Al Masih.
9 Kasasarigan so Allah a aya rekano tomiyawag ko kipageepedaan rekano o Wata iyan a
si Isa Al Masih a Kadnan tano.
Miyambagibagi so Agama
10 Sii ko ingaran o Kadnan tano a Isa Al Masih, manga magariyari, na pagakolen ko

rekano a magayonayon kano langon kaan kano di mapembagibagi. Pagisaisa kano baden
sii ko pamikiran ago antap.
11 Ka miyapanotol raken o ped ko manga sakop o pamiliya i Kelo a aden a di niyo san dii
kapakapepawala, manga pagari ko.
12 Aya maana niyan na aden a ped rekano a dii tero sa "Ampil ako ki Paolo," na aden pen
a dii tero sa "Ampil ako ki Apolos," o di na "Ampil ako ki Pidro," o di na "Ampil ako ko
Al Masih."
13 Ba miyambagibagi so Al Masih? Ba si Paolo i miyatotok ko kros para rekano? Ba
kano siyalawatan sii ko ngaran i Paolo?
14 Penalamatan ko so Allah ka da a ba ko rekano kiyasalawatan a rowar ki Krispo ago si

Gayo.
15 Sabap san na da a ba makapetero sa siyalawatan sekaniyan sii ko ngaran aken.
16(Benar bes a siyalawatan ko pen si Istipanas ago so pamiliya niyan, ogaid na
makaliyoliyo kiran na da den a salakaw a ba aken ketademi a kiyasalawatan ko.)
17 Da ako sogoa o Al Masih sa ba ako penalawat, ka sabap sa an aken mapakalangkap so
Mapiya a Totol, a kena a ba ko pegosara so manga katero a ongangen o manosiya kaan di
kedai sa kabatowa so totol makapantag ko kiyapatay o Al Masih ko kros.
So Al Masih i Bager ago Ongangen o Allah
18 Ka giyangkai a Totol makapantag ko kros na ibibilang a kabebetengan o siran oto a

pepekanaraka, ogaid na sii rektano a pepanga sasabet na giyoto so kabatowa o Allah.
"Pegilangen aken so ongangen o manga oongangen

na pekadaan aken sa bali so kapakasasabot o manga somasabot."
20 Kagiya ka maoto na antonaa den i bali o manga oongangen, ago so manga alim, ago so
manga papasang i kapakindadaowai sii sa doniya? Piyakiilay o Allah a kabebetengan so
ongangen o doniya!
21 Da den magaga o doniya a kaketokawi ran ko Allah a nggolalan ko rek iyan a
ongangen, ka pitekdir o Allah sii ko kaongangen iyan a aya bo a sebeten iyan na so siran
oto a pemaratiyaya ko kabebetengan kon o totol a pepakalangkapen ami.
22 So manga Yahodi na di siran peratiyaya o di siran pekailay sa piyakamemesa a manga
nanao, na so manga Grigo na kebaya siran makaneg sa ongangen.
23 Ogaid na aya pepakalangkapen ami na so Al Masih a miyatotok ko kros. Giyai na
ipekegowad o manga Yahodi, ago ibibilang a kabebetengan o manga Gigo.
24 Ogaid na sii ko siran oto a piyanawag o Allah, a ndatar so manga Yahodi ago so
manga Grigo, na so Al Masih na aya kabatowa ago ongangen o Allah.
25 Ka so kabebetengan kon o Allah na maongangen pen a di so manosiya, ago so kalobay
kon o Allah na lebi pen a mabager a di so manosiya.
26 Tatanodi niyo, manga magariyari, o antawaa kano gowani ko kiyatawaga rekano o

Allah. Kena a ba madakel rekano a ibibilang a manga oongangen o manosiya; kena a ba
madakel a manga ala i gees o di na manga barabangensa.
27 Ka piyamili o Allah so manga nganin a pipikiren o doniya a kalalalongan kaan iyan
mapakakeya so manga oongangen. Na piyamili iyan so manga nganin a pipikiren o doniya
a manga lolobay kaan iyan mapakakeya so manga babager.
28 Piyamili iyan so manga mitatanan sa doniya, so dii sodiin, ago so ibibilang o manga
taw a da a bali niyan kaan iyan mapakikilala a da a bali niyan so pipikiren o doniya a
mala i bali.
29 Aya sabap iyan na an da a sakataw bo a ba makapegambog sii ko hadapan o Allah.
30 So Allah na piyakapagisaisa kano niyan ago si Isa Al Mash, na biyaloy niyan so Masih
a ongangen tano a ron miyakanggolalan so kaontol tano, so kiyasotiya rektano ago so
kiyaaona rektano.
31 Kagiya ka maoto na sowaa niyo so misosorat ko Kitab a "So taw a kebaya tekabor na
aya patot a ipetekabor iyan na so Kadnan."
1 KORINTO 2
Sii ko kiyasong aken rekano san, manga magariyari, ko kiyapakalangkapa ko rekano ko
tito a benar makapantag ko Allah na da ako osar sa madalem o di na panseb a manga
katero.
2 Ka piyasad aken sa ginawa ko a da den a katawan aken sii ko kaaped aken rekano a
rowar ki Isa Al Masih a ba bo labaw ron so kiyatotoka on ko kros.
3 Isako makasong ako san rekano na da a bager aken ago tanto ako a tatabaden sa kalek.
4 Sii ko kapepangendao aken ago kapepangosiyat na da aken osara so kapamagayok a
manga basa a ongangen, ka pinggolaola ko ini a nggolalan ko kabatowa o Roh o Allah
5 Kaan so paratiyaya niyo na kena a ba mipepasod ko ongangen o manosiya, ka
mipepasod ko kabatowa o Allah.
So Ongangen o Allah
6 Inonta bo na aden a ongangen a basa a pegosaren aken sii ko siran oto a madidiyangka i
paratiyaya, ogaid na kena ini a ba ongangen angkai a doniya aya pen o ba ongangen o
manga pangolo sangkai a doniya a pepanga ada bo.
7 Ka so ongangen a di aken dii teroon na so pageemaan a ongangen o Allah a da mapayag
gowani a miyatekdir iyan sa da pen kaadena ko doniya kaan tano kabantogi.
8 Da a ba pangolo sangkai a doniya a ba niyan sebota angkai a ongangen, ka o siyabot
iran na da o kowan iran totoka ko kros so kababantogan a Kadnan.
9 Inonta bo na misosorat ko Kitab a
"So da den mailay o taw, ago da niyan den maneg, ago da niyan den manggedageda
na giyoto i pitiyagar o Allah ko siran oto a pekebabaya on."
10 Ogaid na piyayag rektano o Allah angkai a manga nganin a nggolalan ko Roh iyan, ka
so Roh na pepariksaan iyan so langon taman, apiya so lebi a madalem a manga
pageemaan o Allah.
11 Da a ba matao ko manga pamikiran o taw a rowar ko rek iyan a niyawa. Na datar oto
mambo a da a ba matao ko manga pamikiran o Allah a rowar ko Roh o Allah.
12 Na kena a ba so kadodoniyai a niyawa i miyatarima tano, ka so Roh a poon ko Allah
kaan tano kasaboti so manga pamemegayan a inibegay rektano o Allah.
13 Na igira a di ami dii teroon so makapantag sangkai a manga nganin na kena a ba ami
pegosara so manga katero a ipepangendao rekami o kamamanosiyai a ongangen. Ka aya
pegosaren ami na so manga katero a ipepangendao o Roh sii ko kapegosaya mi ko manga
tito a benar a poon ko Roh sii ko manga taw a madadalem on so Roh.
14 Ogaid na so taw a da on so Roh na di niyan ketarima so manga tito a benar a poon ko
Roh o Allah, ka aya katao niyan on na kalalalongan ai. Di niyan den ai kesabot, ka kagiya
aya bo a kakekokoma ko bali iran na nggolalan ko Roh.
15 Ogaid na so taw a madadalem on so Roh na kekokom iyan so bali o langon taman,
ogaid na di sekaniyan kekokom o apiya antawaa taw.
16 Ka misosorat ko Kitab a "Antawaa i matao ko pamikiran o Kadnan? Antawaa i
makapemando on?" Ogaid na madadalem rektano so pamikiran o Al Masih.
1 KORINTO 3
So manga Talasogoay o Allah
Isako sisan ako rekano, manga magariyari, na da ko sekano mimbitiyarai a datar o di aken
dii kapakimbitiyarai ko manga taw a ipapaar o Roh, ka datar kano bo o manga taw a
ipapaar o kamamanosiyai kiran, a datar pen o manga roroni a wata ko paratiyaya niyo ko
Al Masih.
2 Inoyag aken sekano a gatas a kena a ba mategas a pangenengken ka da kano ron
kapakayi. Na apiya imanto na di kano ron pen kepakayan
3 Ka kagiya ipapaar kano pen o kamamanosiyai rekano. Ka sabap sa madadalem rekano
so kasiig ago dii kapakapepawala na ba kano di mipapaar o kamamanosiyai rekano? Ba
kano di pepeginetaw a datar o manga taw a da on so Roh o Allah?
4 Ka igira a dii tero so isa rekano sa "Ampil ako ki Paolo," ago tig o ped a "Ampil ako ki
Apolos," na ba kano di datar o makakakalilid a manosiya?
5 Ka antawaa bes si Apolos ago antawaa si Paolo? Matag kami manga pepanalagad a
miyakaagak rekano ko paratiyaya. So oman i isa rekami na ba niyan den nggolaolaa so
galebek a inisangan on o Kadnan.
6 Saken i miyamola ko oniin, na si Apolos i miyodod on sa ig, ogaid na so Allah na aya
on miyakato.
7 So pepamola ago so pegodod on sa ig na kena a ba mala i kipantag, ka aya mala i
kipantag na so Allah a pepakato ko pamomolan.
8 Da a mbidaan o pepamola ago so pegodod sa ig. Mbelasan so oman i isa kiran a
ipepasod ko miyanggalebek iyan.
9 Mamagepeda kami a dii nggagalebek para ko Allah na sekano i dii mbasokan o Allah.
Sekano pen na walay o Allah,

10 Na sabap ko kinikalimoon raken o Allah na datar ako o mapasang a panday. Inibetad
aken so onayan, na so salakaw a taw i mbangon ko walay ron. Ogaid na disomala a
pagiktiyari o oman i isa o andamanaya i kapembalayi niyan on.
11 Da den a salakaw a onayan a ba mibetad o apiya antawaa a rowar ko onayan a
minibetad den, na giyanan si Isa Al Masih.
12 Aden a ped a pembangon on a magosar sa bolawan, pirak, ago manga ala i arga a bato,
na so ped na magosar sa kayo, otan, ago ragami.
13 Na so bali o galebek o pitenggisaan a taw na keilay piyapiya, ka peyagen sii ko gawii a
kapengokom. Peyagen ai a nggolalan ko apoy, ka tepengan o apoy so galebek o oman i
isa na periksaan iyan o antonaa i tito a bali niyan.
14 O di ketotong so miyabangon o taw ko onayan na pekatarima sekaniyan sa balas.
15 Ogaid na o matotong so galebek iyan na kelaga ini rekaniyan. Kesabet so ginawa niyan
ogaid na lagid o ba miyakaokit ko apoy.
16 Ba niyo di katawi a sekano na timplo o Allah na sii rekano komakaden so Roh o

Allah?
17 O aden a pekabatal ko timplo o Allah na mbinasaan sekaniyan o Allah, ka soti so
timplo o Allah na sekano i timplo niyan.
18 Di niyo peselibaa a manga ginawa niyo. O pipikira o isa rekano a maongangen

sekaniyan mipantag ko kadodoniyai na disomala a pembaloy a lalong ko kimbilangen on
o doniya kaan mabaloy a tito a maongangen.
19 Ka so ongangen angkai a doniya na matag baden kalalalongan ko kapegilaya on o
Allah, ka kabasa o Kitab a "Pelitagan iyan so manga oongangen sii ko katatangakal iran."
20 Na tig pen o Kitab a "Katawan o Kadnan a so manga pamikiran o manga oongangen
na da den a lalaw niyan."
21 Kagiya ka maoto na di patot i ba niyo pepangandagen so makapantag ko manosiya. Ka
aya mataan na rek iyo so langon taman:
22 Si Paolo, si Apolos, si Pidro, so doniya, so kaoyagoyag, so kapatay, so kapapantagan
ago so pekatalingoma na rek iyo ai langon.
23 Na sekano na rek o Al Masih na so Al Masih na rek o Allah.
1 KORINTO 4
So manga Siyogo o Allah
Aya patot na ibilang kami o manga taw a manga talasogoay o Al Masih ago manga
komikibir a siyanaan ko manga lalag o Allah a pageemaan gowani.
2 Na aya ipapaliyogat ko manga komikibir na so kakesarigi ron.
3 Di aken tegoon sa ginawa ko o antonaa i mapipikir iyo o di na apiya antawaa taw
makapantag raken. Ka apiya saken na kena a ba ko pekokoma a ginawa ko.
4 Maliwanag so hatin aken ogaid na kena a ba aya maana ini na da a sala aken, ka so
Kadnan i pekakokom raken.
5 Kagiya ka maoto na di niyo kokoma so apiya antonaa sa di pen kapekatalingoma o
gawii a kapengokom. Nayawa niyo so kapekaoma o Kadnan, ka keliwanagan iyan so
manga pageemaan sii ko maliboteng, na peyagen iyan so manga antap a migagaib ko poso
o manga taw. Sa masa oto na pekatarima so oman i isa sa podi a domadait on a poon ko
Allah.
6 Sii ko kiyateroa ko sii langon, manga magariyari, na biyaloy aken a ibarat si Apolos ago
saken sabap rekano kaan iyo masowa so maana o pananaroon a "Di niyo pelawani so
misosorat." Ka aya patot na da a isa rekano a ba niyan tomoa so isa a taw ago pesodiin
iyan so ped.
7 Antawaa i miyakabaloy reka a mibibida ko ped a taw? Antonaa i rek iyo a da reka
began o Allah? Na kagiya inibegay reka so langon taman na ino ka dii mbantogan a lagid
o ba reka da began?
8 Miyakakowa kano den bes ko langon taman a kabaya iyo! Mikekawasa kano den!
Mimbaloy kano a manga dato a da kami rekano maped! Mapiya o mataan den a di kano
dii ndadato kaan kami makandadato a ped iyo!
9 Ka sii ko pamikiran aken na datar o ba sekami a manga siyogo na biyaloy o Allah a
tanto a mababa, a datar o manga taw a miyakokom a mbonoon ko kamamasaan o madakel
a taw, a pembantayan kami o langon a matatago ko alam, a manga malaikat ago manga
manosiya.
10 Malalolalong kami para ko Al Masih ogaid na manga oongangen kano sii ko kaiisaisa
niyo ago so Al Masih! Da a bager ami ogaid na manga babager kano! Pagaadatan kano
ogaid na di kami dii sodiin!
11 Taman imanto na pekeor ago pekewaw kami. Di petoon so manga nditaren ami.
Peparanegen kami ago peketaataap.
12 Mananamar kami nggalebek kaan kami maoyag. Igira aden a petewap rekami na ba
ami den dii mbasai sa mapiya. Igira a pesetroon kami na pesebar kami.
13 Igira aden a pepagitowito rekami na ba ami den pengangarapanen. Taman imanto na
aya ipekidia rekami na datar o popot sa doniya ago datar o pitemanan a da mibilang a
manga taw.
14 Inisorat aken ai a kena a ba sabap sa an kano kayai, ka pepamandoon aken sekano a

datar o kipakatatayaan aken a manga wata.
15 Ka apiya pen o aden a sapolo nggibo a pepangendao rekano sa makapantag ko Al
Masih na isaisa bo a ama iyo. Ka sii ko kaiisaisa ko ago si Isa Al Masih na miyabaloy ako
a ama iyo ko kiyapakitokawi ko rekano ko Mapiya a Totol.
16 Kagiya ka maoto na pagakolen ko rekano a rawata ako niyo.
17 Sabap san na piyakasong aken rekano si Timotiyo, a pakatatayaan ago kasasarigan a
wata aken sii ko kapeparatiyayaa niyan ko Kadnan. Na pekitademan iyan rekano so
manga ndao a ipepaginetaw aken sii ko kaiisaisa ko ago si Isa Al Masih, a aya ko mambo
ipepamangendao ko langon a Agama ko mbalabala.
18 So ped rekano na ipepangandag iran a ginawa iran, ka pipikiren iran a di aken sekano
den kibentel.
19 Ogaid na o miyog so Kadnan na song ako san rekano sa di ini matey, na ketokawan
aken o antonaa i kabatowa angkoto a manga tangandag a kena bo a ba so di ran dii
matero.
20 Ka so dii kandato o Allah na kena a ba dii makanggolalan ko manga katero, ka sii ko
kabatowa.
21 Anda i petomoon iyo? Ba ako rekano song a ndanegen aken sekano, o di na ba ako roo
song a malemek i poso ago pengalinggagaw?
1 KORINTO 5
So Kasina sii ko Agama
Miyatero den a aden a dii sina san rekano, a so kasisina niyan na apiya so manga kapir na
di iran ai penggolaolaan, a so dii kakeromaa o mama ko karoma o ama iyan.
2 Na ba kano baden dii mbantogan! Patot a pemboko kano ago pekaawaan iyo ko Agama
niyo so minggolaola san.
3 Apiya ako rekano mabebelag na sisii rekano bo so pamikiran ko, na sii ko ingaran o
Kadnan a Isa na miyakokom aken den so minggolaola san a datar bo o maaped ako
rekano.
4 Amay ka matimo kano sii ko ingaran o Kadnan a Isa, a maaped rekano pen so
pamikiran aken a rakes o kabatowa o Kadnan tano a Isa,
5 Na palada niyo angkanan a mama ko Iblis kaan masiksa so badan iyan kaan masabet so
niyawa niyan sii ko gawii a kakesoy o Kadnan.
6 So di niyo dii katekabor na di mapiya. Ba niyo di katawi a so maito a tapay na

mapekakembang iyan so langon o bobonaon a arina?
7 Lebaden iyo so andang a tapay, a so dosa, kaan kano mabaloy a bago a bobonaon a
arina a da a tapay ron, ka domadait rekano. Ka miyasombali den so Nati a Bilibili ko Pista
tano a Paska a giyoto so Al Masih.
8 Kagiya ka maoto na selaselaan tano so Paska a di tano koman ko paan a sesemboran sa
andang a tapay, a so tapay a kamarataan ago kadostaan, ka ken tano baden so da a tapay
ron a paan, a giyoto so kasosoti ago so tito a benar.
9 Sii ko sorat a inipakawit aken rekano na pitero aken a di kano pakipemagepeda ko

manga taw a dii sesebo.
10 Ogaid na aya maana o pitero aken na kena a ba so kadodoniyai a manga taw a dii sebo,
o di na so manga ala i napso, o di na so manga pangangasab, o di na so pepamanimba sa
barahala, ka aya bo a kapelidasi niyo kiran na so kapagawai niyo ko doniya.
11 Ka aya inisorat aken rekano na di kano pakipegepeda ko apiya antawaa a ibibilang
iyan a ginawa niyan a miyaratiyaya ki Isa o sekaniyan na dii sebo, o di na mala i napso, o
di na pesimba sa kena a ba Tohan, o di na pepamaganta, o di na tamereg, o di na
pangangasab. Lidasi niyo so datar oto a taw a apiya so kapakipagatoangen iyo ron.
12 Da a labet aken ko kapengokoma ko manga taw a makaliliyo ko Agama. Patot a
sekano i kokom ko manga maaped on
13 Ogaid na siran oto a makaliliyo ron na so Allah i pengokom kiran. Pakaawaa niyo
rekano so madodosa a mama.
1 KORINTO 6
So Kinidimandaan ko Magariyari
Igira aden a rido o isa rekano ko ped iyan na ino sekaniyan pekaraw makikokom ko di
peratiyaya a pangongokom, a di pekikokom ko manga kaom o Allah?
2 Ba niyo di katawi a so manga kaom o Allah na aya pekakokom ko doniya? Na o sekano
i kokom ko doniya na ba rekano di patot a kapengokoma niyo ko manga aakep a rido?
3 Ba niyo di katawi a sektano i kokom ko manga malaikat? Na taralebi pen a kekokom
tano so manga rido sangkai a kaoyagoyag!
4 Kagiya ka maoto na amay ka aden a makakakalilid a rido iyo na ino niyo ai pekikokom
ko manga taw a di pagaadatan o Agama?
5 Pitero aken ai kaan aken sekano mapakakeya. Ba da den a isa rekano bo a maongangen
a pekakokom sa rido o ped iyan a miyamaratiyaya?
6 Ka pendidimandai kano baden a magariyari na pepakikokom kano ko manga
pangongokom a da a paratiyaya niyan.
7 Tanto kano a miyaribat ko kipendimandaan o oman i isa rekano ko ped iyan. Ba di tomo
a sekano i kaisegan? Ba di tomo a sekano i kasalimbotan?
8 Ogaid na sekano baden i pepangiseg ago pepamanalimbot apiya sii ko manga pagari
niyo!
9 Mataan den a katawan iyo a so manga rarata i olaola na di makapekawali ko Ndatoan o
Allah. Di niyo pegakali a ginawa niyo; so siran oto a dii sebo, o di na pepamanimba sa
kena a ba Tohan, o di na dii sina, o di na dii makipemotaliya ko datar iyan a mama o di na
datar iyan a babay,
10 O di na siran oto a pepamanekew, o di na manga ala i napso, o di na manga tamereg, o
di na manga taliyantaan, o di na manga pangangasab na da a isa kiran bo a ba
makapekawali ko Ndatoan o Allah.
11 So manga ped rekano na datar anan gowani, ogaid na miyalompiyo kano den,
minisenggay kano a rek o Allah, ago inibilang kano niyan a manga oontol a nggolalan ko
ingaran o Kadnan a Isa Al Masih ago so Roh o Tohan tano.
So Kasebo
12 Aden a ped a tig iyan a "Mapeparo raken so kanggolaola ko sa apiya antonaa." Benar
anan, ogaid na kena a ba so langon taman na pekapiya reka. Mapetero aken a mapeparo
raken so kanggolaola ko sa apiya antonaa, ogaid na di ako pekipaar ko apiya antona onon.
13 Na tig o manga ped a "So pangenengken na para ko tiyan, ago so tiyan na para ko
pangenengken." Benar anan, ogaid na pageposen o Allah angkai a dowa. So lawas o taw
na kena a ba para ko kasebo, ka para ini ko Kadnan, na so Kadnan na aya tetandingan ko
lawas.
14 Na so Allah a miyoyag ko Kadnan a poon ko miyamatay na pagoyagen tano niyan
mambo peroman a nggolalan ko kabatowa iyan.
15 Ba niyo di katawi a so manga lawas iyo na maaped ko Al Masih? Ba patot a kowaan

aken so maaped ko Al Masih na pekapeden aken ko sondal? Di den!
16 Ba niyo di katawi a so mama a initapi iyan a ginawa niyan ko sondal na maiisaisa so
lawas iyan ago so lawas o sondal? Ka pitero o Kitab a "So dowa na pembaloy a isaisa a
lawas."
17 Ogaid na so taw a initapi iyan a ginawa niyan ko Kadnan na maiisaisa so niyawa niyan
ago so niyawa o Kadnan.
18 Lidasi niyo so kasebo. So langon a ped a dosa a mapenggolaola o taw na makaliyoliyo

ko lawas iyan, ogaid na so dii sebo na dii ndosa sa makasosopak ko lawas iyan.
19 Ba niyo di katawi a so lawas iyo na aya timplo o Soti a Roh a madadalem rekano a
inibegay rekano o Allah? Kena a ba sekano i kirek ko manga ginawa niyo
20 Ka miyaaon kano o Allah a mala a minibayad iyan sabap rekano. Kagiya ka maoto na
bantoga niyo so Allah a dii makanggolalan ko manga lawas iyo.
1 KORINTO 7
Manga Pakaise makapantag ko Kapangaroma
Imanto na alowin aken so manga nganin a inisorat iyo raken. Mapiya ko mama o di
sekaniyan den pengaroma.
2 Ogaid na an makalidas ko kasebo na patot a so oman i mama na mangaroma ago so
babay na makipangaroma.
3 So mama na paliyogat a tomanen iyan so atastanggongan iyan ko kakaromai ron o
babay, na so mambo so babay na tomana niyan so atastanggongan iyan ko karoma niyan a
mama.
4 So babay na kena a ba aya bo a mamaapaar ko lawas iyan, ka so mambo so karoma
niyan a mama. Na so mama na kena a ba aya bo a mamaapaar ko lawas iyan, ka so
mambo so karoma niyan a babay.
5 Sekano a keromai na di sengkaa o oman i isa ko ped iyan so di niyo dii kakinabayai liyo
ron o miyagayon kano sa kanggolaolaa niyo ron sa di bo matey kaan kano maiiklas ko
kapepangangarapan iyo. Ogaid na mapasad oto na dayonen iyo bo a di niyo dii
kakinabayai kaan kano di kegawi o Iblis sabap ko kakokorang o kipekepaaren iyo ko
manga kabaya o lawas iyo.
6 Langon angkai a pitero aken sii na matag aken rekano pando, ka kena a ba ko rekano
sogoan.
7 Kabaya aken a so langon a taw na datar aken ogaid na oman i isa na bigan o Allah sa
rek iyan a moodiset; so isa a taw na isa a moodiset iyan na so ped na salakaw a moodiset
iyan.
8 Teroon ko rekano a da a manga karoma niyan ago manga balo a tomo rekano o da a
mitetapi iyo a lagid aken mambo.
9 Ogaid na o di niyo kipaar a ginawa niyo na pangaroma kano o di na pakipangaroma
kano, ka tomo so kapakapangaroma a di sa ba kano matotong o mitataralo a babaya.
10 Aden a sogoan aken ko keromai a kena a ba aken sogoan, ka pitero o Kadnan: so

babay na paliyogat a di makipembelag ko karoma niyan.
11 Ogaid na o miyakimbelag on den na paliyogat a di makipangaroma peroman, o di na
makimbalingan ko karoma niyan. Na so mama na paliyogat a di niyan pagendaan so
karoma niyan.
12 Aden a peteroon aken ko ped a taw a rek aken a katero, ka da a sogoan o Kadnan
makapantag sii: so mama a peparatiyaya na o aden a karoma niyan a kena a ba
peparatiyaya ago miyayon so babay ko kapakatetapi iran na paliyogat ko mama a di niyan
pagendaan so babay.
13 So mambo so babay a peparatiyaya na o aden a karoma niyan a kena a ba peparatiyaya
ago miyayon so mama ko kapakatetapi iran na paliyogat ko babay a di sekaniyan
makimbelag ko mama.
14 Ka so mama a kena a ba peparatiyaya na isesenggay ko Allah a nggolalan ko kaiisaisa
iran ago so karoma niyan a peparatiyaya. Na so babay a kena a ba peparatiyaya na
isesenggay ko Allah a nggolalan ko kaiisaisa iran ago so karoma niyan a peparatiyaya. O
kena a ba datar ai na so manga wata iran na datar o manga wata a kapir, ogaid na aya
benar na isesenggay siran ko Allah.
15 Ogaid na amay ka so kena a ba peparatiyaya na kebaya makimbelag ko karoma niyan a
peparatiyaya na kepakay. Sii ko datar anan a kapakambebetad na so peparatiyaya a mama
o di na babay na kena a ba kaiiketan ko kakekaromai. Piyanawag kano o Allah ko
kapaginetaw a lomilintad.
16 Seka a babay a peparatiyaya, na andamanaya i kaketangkeda ngka sa o ba ngka
masabet so karoma ngka a mama? Na seka a mama a peparatiyaya, na andamanaya i
kaketangkeda ngka sa o ba ngka masabet so karoma ngka a babay?
Kapaginetaw a Mipepasod ko Inisangan o Allah
17 Ogaid na patot a tatareg so oman i tetanggisa sii ko kapekambebetad iyan a inisangan

on o Kadnan, a so masosowa iyan ko kiyatawaga on o Allah. Giyanan i ipepangendao
aken ko langon a Agama.
18 Opama ka aden a mama a miyatori den ko kiyatawaga on o Allah, na di patot i ba
niyan tepengi malin a kiyatori iyan. Na o da sekaniyan matori ko kiyatawaga on na di
patot i ba pakitori.
19 Ka so kiyatoria ko taw ago so da a ba on kiyatoria na kena a ba aya mala i kipantag, ka
aya mala i kipantag na so kapetomana ko manga sogoan o Allah.
20 Oman i tetanggisa na tatareg baden ko kapakambebetad iyan ko kiyatawaga on o
Allah.
21 Ba ka oripen ko kiyatawaga reka? Di ngka pegawiden a akal. Ogaid na o aden a
kakeparo ngka a kapakaliyo ngka ko kaooripeni reka na nggolaolaa ngka ini.
22 Ka so taw a oripen ko kiyatawaga on o Kadnan, na sekaniyan so kiyabalokasan o
Kadnan, na so taw a kena a ba oripen ko kiyatawaga on na miyabaloy a oripen o Al
Masih.
23 Miyaaon kano o Allah a mala a minibayad iyan rekano; sabap san na di kano den
pepakipangongoripen ko manga manosiya.
24 Oman i tetanggisa, manga magariyari, na tatareg baden ko kapakambebetad iyan ko
kiyatawaga on sii ko kipageepedaan iyan ko Allah.
Manga Pakaise makapantag ko da a Karoma niyan ago so manga Balo
25 Makapantag ko da a manga karoma niyan na da a sogoan aken a poon ko Kadnan,

ogaid na peteroon ko so pamikiran ko a datar o taw a kesarigan sabap ko kinikapediin on
o Kadnan.
26 Sabap ko kamaregenan sangkai a masa na aya pamikiran ko na tomo ko taw a tatap

den ko kapakambebetad iyan imanto.
27 O aden a karoma ngka na di ngka sekaniyan pembelagen. O da a karoma ngka na di ka
pengaroma.
28 Ogaid na o pengaroma ka na kena a ba ngka kedosaan. Na o makipangaroma so raga
na kena a ba niyan kedosaan. Ogaid na siran oto a aden a karoma niyan na keomanan so
manga kamaregenan iran ko kapepaginetaw iran, na kabaya aken a milidas kano ron.
29 Aya maana o di aken dii teroon, manga magariyari, na giyai: Magaan den so kaposan o
kapapantagan a masa, na ipoon imanto na so mama a aden a karoma niyan na patot a
paginetaw a lagid bo o da a karoma niyan;
30 So taw a dii nggoraok na lagid bo o kena a ba dii nggoraok; so mapipiya a ginawa
niyan na lagid bo o kena a ba mapipiya a ginawa niyan; so pepamasa na lagid bo o kena a
ba kirek ko piyamasa niyan;
31 Na so dii makikoyapeta ko manga nganin sii sa doniya na lagid bo o kena a ba on
matetembang piyapiya, ka giyangkai a doniya a kapapantagan den imanto na matag baden
somasagad.
32 Kabaya aken a da a awid a akal iyo. So mama a da a karoma niyan na tatagoon iyan sa
ginawa so manga nganin a ipapantag ko Kadnan, ka pepamikiren iyan o andamanaya i
kasoata niyan ko Kadnan.
33 Ogaid na so mama a aden a karoma niyan na tatagoon iyan sa ginawa so manga nganin
a ipapantag ko doniya, ka pepamikiren iyan o andamanaya i kasoata niyan ko karoma
niyan,
34 Na miyabagi so manga kabaya iyan. Na so da a karoma niyan a babay o di na raga na
petegoon iyan sa ginawa so manga nganin a ipapantag ko Kadnan, ka kabaya iyan a so
lawas iyan ago niyawa na isesengay ko Kadnan. Ogaid na so babay a aden a karoma niyan
na petegoon iyan sa ginawa so manga nganin a ipapantag ko doniya, ka pepamikiran iyan
o andamanaya i kasoata niyan ko karoma niyan.
35 Pitero aken ai para ko kamapiyaan iyo. Kena a ba ko petepengi a karena rekano, ka aya
kabaya aken na makanggolaola kano sa ontol ago patot ko kapepangongonotani niyo ko
Kadnan a da a ba rekano pekatembang.
36 O aden a mama a pipikiren iyan a di niyan pepiyapiyaan so wata iyan a babay a da
pakipangaroma na o mikesad a raga a patot a mapengaroma na kepakay a penggolaolaan
o ama iyan so kabaya iyan. Pakipangaromaa niyan so wata iyan, ka kena a ba niyan
ikedosa.
37 Ogaid na so mama a tinimo iyan a pamikiran iyan sa di niyan pakipengaroma so wata
iyan a babay na mapiya den oto asar a aya mimbayabaya na so ama o babay a da tegela o
ped.
38 Kagiya ka maoto na amay ka pakipengaroma o mama so wata iyan a babay na mapiya
nan a penggolaolaan ogaid na lebi pen a mapiya so mapenggolaola o mama a di niyan den
pakipengaroma.
39 So babay na kaiiketan ko karoma niyan sii ko kaooyagoyag pen o mama. Ogaid na o

matay so karoma niyan na makapembayabaya so babay sa kapakipengaroma niyan ko
apiya antawaa i kebayaan iyan asar a peparatiyaya ko Kadnan.
40 Ogaid na aya pamikiran ko na lebi pen a mapipiya a ginawa ngkoto a babay o di niyan
pagalina so kapakambebetad iyan. Na mapipikir aken pen a inipaar ako o Roh o Allah ko
kiyateroa ko sii.
1 KORINTO 8
So manga Pangenengken a Inisapaat ko Barahala
Pagalowin ko imanto so pangenengken a inisapaat ko manga barahala. Benar den a aden a

katao tano langon. So katao na ikebaloy o taw a takabor, ogaid na so kapekebabayai ko
ped na ipepangosor.
2 Apiya antawaa i pipikiren iyan a aden a katao niyan na di niyan pen katawan so patot a
ketokawan iyan.
3 Ogaid na apiya antawaa i pekebabayaan iyan so Allah na katawan den o Allah.
4 Makapantag ko kakana ko pangenengken a inisapaat ko manga barahala na katawan

tano a so barahala na kena a ba tito a tohan sii sa doniya, ka katawan tano a isaisa bo a
Tohan.
5 Apiya benar a aden a manga bebetowan sa 'tohan' a ndodoo sa langit o di na sisii sa lopa
na apiya pen madakel angkai a manga 'tohan' ago manga 'kadnan'
6 Na sii rektano na isaisa bo a Tohan a so Ama a aya miyaden ko langon taman ago sabap
on so kapepaginetaw tano, na isaisa a Kadnan a si Isa Al Masih a ron miyakanggolalan so
kiyaadena ko langon taman ago ron dii makanggolalan a kaooyagoyag tano.
7 Ogaid na kena a ba so oman i isa a taw a katawan iyan ai. Aden a manga taw a
miyalayam ko manga barahala, na taman imanto na igira a pekan siran sangkoto a
pangenengken na pipikiren iran so kinisapaaten on ko barahala na ipekerata ini o hatin
iran a da a bager iyan.
8 Ogaid na so pangenengken na di tano niyan mapekarani ko Allah. O di tano ron koman
na kena ini a ba rektano pekabinasa, na o koman tano ron na kena ini a ba rektano
pekapiya.
9 Ogaid na pagiktiyari niyo o ba so kapakambabaya iyo koman na ikedosa o taw a da a
bager o hatin iyan.
10 Ka so taw a malobay i hatin na o mailay niyan a seka a aden a katao niyan na pekan
roo ko timplo o barahala, na ba di mambo pekaraw koman ko pangenengken a inisapaat
ko barahala?
11 Na giyangkoto a pagari ngka a malobay i paratiyaya a para rekaniyan so kiyapatay o Al
Masih na kebinasa sabap ko katao ngka.
12 Igira a miyakasela ka sa datar ai a nggolalan ko kiyapalii ngka ko malobay a hatin o
pagari ngka na miyakasela ka mambo ko Al Masih.
13 Sabap san na o so pangenengken a peken aken na aya kesabapan ko kapakandosa o
pagari aken na di ako den ken peroman sa sapo, ka o ba ko mapekandosa so pagari aken.
1 KORINTO 9
Manga Kabenar ago manga Sangan o Siyogo o Allah
Ba ako di kabobotawani? Ba ako da sogoa o Allah? Ba aken da mailay si Isa a Kadnan

tano? Ba kano di onga o galebek aken ko Kadnan?
2 Apiya pen so ped a taw na di iran kilalaan a siyogo ako o Allah na matatangked aken a
kikilalaan ako niyo, ka sekano na aya poriba o kiyasogoa raken sii ko kaiisaisa niyo ago
so Kadnan.
3 Giyai i sembag aken ko siran oto a di iran kilalaan so kiyasogoa raken:

4 Ba da a kabenar aken sa katarimaa ko ko imbegay raken a pangenengken ago
panginginomen sabap ko galebek aken?
5 Ba da a kabenar aken sa kapakaonot aken sa karoma a peparatiyaya sii ko kapelalakaw
aken a datar o dii nggolaolaan o ped a manga siyogo, ago so manga pagari o Kadnan, ago
si Pidro?
6 Ba si bo si Barnabas ago saken i papaliyogatan sa di ami dii kanggalebek ko ipekeoyag
ami?
7 Ba aden a katawan iyo a sondaro a pesokayan iyan a ginawa niyan sii ko kasosondaro
niyan? Ba aden a taribasok a da kan ko onga o manga obas a piyamola niyan? Ba aden a
tomatagikor sa manga sapi a da inom ko gatas o manga sapi iyan?
8 Kena ini a ba matag manga ibarat o manosiya, ka miyatero ini mambo o Kitab.
9 Ka misosorat ko Kitab o Mosa a "Di ngka pongesa so ngari o sapi igira a pegegiken
iyan so ilaw." Ba aya bo a tiyago o Allah sa ginawa na so manga sapi ko kiyateroa niyan
sii?
10 Ba di sektano i papantagan ko kiyateroa niyan on? Mataan den a minisorat ai para
rektano. So dii ndado ago so peperagon na patot a iinamen iran a makapembagian siran
ko pereperan a maperagon iran.
11 Minisaod ami sii rekano so oniin a poon ko Roh o Allah na ba di patot a peragonen
ami so ikeoyag ami a poon rekano?
12 O aden a kabenar o manga ped sa kakowaa iran sii a poon rekano na ba di lebi pen a
aden a kabenar ami ron mambo?
Ogaid na da ami nggolalanen angkai a kabenar, ka petigeren ami baden so apiya antonaa i
masosowa ami kaan da a ba pekabangen ko kapepakalangkapa ko Mapiya a Totol
13 Mataan den a katawan iyo a siran oto a pepamanalagad ko Timplo na pekekowa iran
so kaoyagan iran a poon ko Timplo, na siran oto a pesepaat ko manga soasoat ko Allah sii
ko aparan na di siran on dii makambagian.
14 Datar oto mambo na inisogo o Kadnan a so siran oto a pepakalangkap ko Mapiya a
Totol na aya iran kikowa ko kaoyagan.
15 Ogaid na da aken nggolalanen so apiya anda sangkai a manga kabenar. Na so

kinisoraten aken sii na kena a ba sabap sa an ako kabegi sa kaoyagan. Ka tomoon ko a ba
ako den matay a di sa ba raken mada angkai a ipepangandag aken.
16 Di patot i ba ko ipepangandag so kapepakalangkapa ko ko Mapiya a Totol, ka
paliyogat raken a di aken sii dii kanggolaolaa. Dowandowaan ako den o di aken
pekalangkapa so Mapiya a Totol.
17 O saken i minili sangkai a galebek na kepakay a kesokayan ako, ogaid na kagiya kena
a ba saken i minili on na di aken baden dii nggolalan so inisana raken.
18 Kagiya ka maoto na antonaa i imbalas raken? Aya imbalas raken na giyai: sii ko
kapepakalangkapa ko ko Mapiya a Totol na mapekalangkap aken sa da a ba niyan bayad a
di aken pegosaren so rek aken a kabenar ko di aken dii kanggalebeka ko Mapiya a Totol.
19 Apiya pen da a kioripen raken a taw na miyakipangongoripen ako ko langon a taw

kaan aken maagak so lebi a madakel ko Al Masih.
20 Sii ko manga Yahodi na mimbaloy ako a datar o Yahodi kaan aken siran maagak ko
Al Masih. Sii ko siran oto a mapapadalem ko Kitab o Mosa na mimbaloy ako a datar o
mapapadalem ko Kitab (apiya kena a ba ako mipapaar o Kitab) kaan aken siran maagak
ko Al Masih.
21 Sii ko kena a ba manga Yahodi a da a ba iran Kitab na mimbaloy ako a datar o da a ba
ko Kitab kaan aken siran maagak ko Al Masih. Kena a ba aya maana ini na di aken
tomanen so Kitab o Allah, ka aya mataan na mipapaar ako o manga sogoan o Al Masih.
22 Sii ko da a manga bager o paratiyaya niyan na mimbaloy ako a datar o da a bager iyan
kaan aken siran maagak ko Al Masih. Sii ko langon a pisosonan a taw na mimbaloy ako a
datar iran kaan aken masabet so ped kiran sii ko apiya antona a okit.
23 Langon ai na di aken dii nggolaolaan sabap ko Mapiya a Totol kaan ako makambagian
ko manga rakmat iyan.
24 Katawan iyo a sii ko kakoya na petetabana so langon a pelalagoy ogaid na sasakataw

kiran bo i kepirmiyowan kiran. Na panamar kano malalagoy a lagid o kebaya makataban
kaan kano kapirmiyowi.
25 Oman i isa a pepakaradiyaan a dii mbetalo na mipapaar iyan piyapiya a lawas iyan sii
ko langon a pesowaan iyan. Di niyan ai dii nggolaolaan kaan makatarima sa sangkad a
kelas bo. Ogaid na sektano na di tano ai dii nggolaolaan para ko sangkad a di den kelas sa
taman sa pakataman.
26 Giyanan i sabap a pepelalagoy ako a mapantek so kapepagantap aken ko apeta.
Pepanontok ako a kena bo a ba datar o matag pepanontok sa ndo.
27 Ka pepenontoken aken a lawas aken kaan aken mapegepeges kaan amay ka mapasad a
kapepangosiyat aken ko manga ped na ba ako di mapakay a pekakowa ko pirmiyo.
1 KORINTO 10
Lalangan ko Kasimbaa ko manga Barahala
Kabaya aken a katanodan iyo, manga magariyari, so kiyaokitan o manga apo tano ko
kiyaawa iran sa Misir. Palaya siran pinakodaan o gabon roo ko mitataog a kaden, na
palaya siran den miyakaokit ko Mariga a Ragat.
2 Kiyasalawatan siran langon a manga pagtaw o Mosa sii ko gabon ago so ragat.
3 Palaya siran den miyamangangan ko ndatadatar a kaniniyawai a pangenengken,
4 Na miyamanginom siran langon ko ndatadatar a kaniniyawai a panginginomen, ka
mininom siran ko pepekapoon ko kaniniyawai a Ator a pegonot kiran; na giyangkoto a
Ator na so Al Masih.
5 Apiya pen oto na da masoat so Allah ko kadakelan kiran na piyamono iyan siran, na
miyamangibaraser so manga bangkay iran roo ko mitataog a kaden.
6 Langon angkai a miyanggolaola na lalangan rektano kaan tano di mapesingayo so

manga rarata a nganin a datar o siyowa iran
7 Aya pen o ba tano simba sa manga barahala a datar o siyowa o ped kiran. Ka kabasa o
Kitab a "Miyamangontod so manga taw ka mikekan ago miyamanginom, na
miyamanindeg siran ago mikeraliya sebenar."
8 Na di tano pesebo a datar o pinggolaola o ped kiran, na sii bo ko soled o salongan na
dowa polo ago telo nggibo kiran a miyamatay.
9 Di tano tepengan so Kadnan a datar o pinggolaola o ped kiran, na miyanga papatay
siran o manga nipay.
10 Di kano penarotaro a datar o pinggolaola o ped kiran, na piyamono siran o
Malakalmaot.
11 Langon angkai a miyasowasowa iran na manga ladiyawan a minisorat a manga

lalangan rektano a pepaginetaw ko masa a magaan den maoma o kaposan.
12 Apiya antawaa i mapipikir iyan a makatitindeg sekaniyan a mabager na iktiyari niyan o

ba maoteng.
13 Oman i kiyaokitan iyo a minitepeng rekano na pekeokitan mambo o langon a
manosiya. Ogaid na kasasarigan so Allah, ka di kano niyan pakipetepengan ko lawan pen
ko kekena niyo. Ka amay ka tepengan kano na mbegan kano o Allah sa kipalagoy niyo
ron kaan iyo matiger.
14 Kagiya ka maoto, manga pekebabayaan ko, na lidasi niyo so kasimbaa ko kena a ba

tohan.
15 Pitero aken rekano ai ka kagiya manga oongangen kano, na timbatimbanga niyo so di
aken dii teroon.
16 So pepodin a tagayan a ipepanalamat tano ko Allah, na ba tano di makapembagian ko
rogo o Al Masih ko kapeginom tano sangkoto a tagayan? Na so paan a pepangopaken
tano na ba tano di makapembagian ko lawas o Al Masih ko kapeken tano sangkoto a
paan?
17 Kagiya isaisa bo a paan na sektano langon na isaisa a lawas apiya madakel tano, ka
palaya tano dii mbagian ko isaisa a paan.
18 Pamimikirana niyo so manga taw sa Israil. Siran oto a pepakakan ko manga ipesepaat
ko Allah na ba di giyanan so di ran dii kapakambagian ko galebek ko Allah sii ko aparan?
19 Ba aya maana o di aken dii teroon na so barahala na tito a tohan, o di na so
pangenengken a inisapaat on na aden a bali niyan?
20 Kena, ka aya maana niyan na so manga ipepanapaat o manga kapir ko barahala na
ipesepaat ko manga saitan a kena a ba sii ko Allah, na di aken kabaya i ba kano
makipagepeda ko manga saitan.
21 Di niyo keinoman so tagayan o Kadnan ago so tagayan mambo o manga saitan. Di
kano pekakan sii ko lamisaan o Kadnan ago sii mambo ko lamisaan o manga saitan.
22 Ba tano pananamari a kapekakati ko Kadnan kaan kararangiti? Ba aya pipikiren iyo na
mabager tano a di sekaniyan?
23 Pitero o ped a "Kepakay a nggolaola tano sa apiya antonaa." Benar anan, ogaid na kena
a ba rektano pekapiya so langon taman. "Kepakay a nggolaola tano sa apiya antonaa"
ogaid na kena a ba tano mipengosor so langon taman.
24 Di patot i ba pananamari o oman i tetanggisa so rek iyan a kamapiyaan, ka aya niyan
pananamari so kamapiyaan o ped iyan.
25 Kepakay a ken iyo so apiya antonaa sapo a dii pesaan sa padian, ogaid na di niyo
pagiseen o ba inisapaat ko barahala kaan di petekora so hatin iyo.
26 Ka misosorat ko Kitab a "Rek o Kadnan so doniya ago so langon a matatago on."
27 O bantowi ka ko kaken o taw a kena a ba peparatiyaya ago kabaya a ka pen a

pekaatoang ka on na kan ka ko apiya antonaa i ipegana reka a di ngka den pagiseen o
anda poon sabap ko hatin ka.
28 Ogaid na o teroa niyan reka a "Giyangkai a pangenengken na inisapaat ko barahala,"
na di ka on ken sabap ko mitero reka on ago sabap mambo ko hatin,
29 A kena a ba ngka rek a hatin, ka rek o mitero reka sii.
Masiken a aden a magise sa "Ino kegenggen o hatin o ped a taw so kapakambabaya aken?
30 O penalamatan ko so Allah sabap ko pangenengken aken na ino ako peawinga sabap
ko kapekana ko ron?"
31 Aya mala i kipantag amay ka ken kano, o di na maginom, o di na sii ko apiya antonaa i
di niyo dii nggolaolaan na nggolaolaa niyo langon a kibantog ko Allah.
32 Di niyo penggolaolaa so apiya antona onon a ikedosa o manga Yahodi, o di na so
manga Grigo, o di na so Agama o Allah.
33 Giyanan i olaola ko, ka pananamaran aken so kasoata ko langon a taw sii ko langon a
di aken dii nggolaolaan a kena a ba ko pananamari so rek aken bo a kamapiyaan, ka so
kamapiyaan o langon a taw kaan siran masabet.
1 KORINTO 11
Na rawata ako niyo a datar o kaperawata ko ko Al Masih.
So Kakombong o Babay ko Kapesimba
2 Pepodin aken sekano, ka lalayon ako niyo peketademan, ago kekepiten iyo so manga
taritib a piyalad aken rekano.
3 Ogaid na kabaya aken a saboten iyo a so Al Masih na aya olo o oman i mama, na so
mama na aya olo o karoma niyan, na so Allah na aya olo o Al Masih.
4 Sabap san na so mama a sasapengan a olo niyan igira a pesimba o di na pepayag ko
lalag o Allah na kena a ba niyan pepagadati so olo iyan.
5 Na so babay a di pekombong igira a pesimba o di na pepayag ko lalag o Allah na kena a
ba niyan pepagadati so karoma niyan, ka datar sekaniyan o babay a magoopaw.
6 Ka o di pekombong so babay na tomo a potolen iyan on so bok iyan. Ogaid na o
piyakayaya ko babay o ba opawi a olo niyan o di na potolan so bok iyan na patot a
kombong sekaniyan.
7 Di patot i ba sasapengi so olo o mama, ka makasasayan sekaniyan ko Allah ago keilay
ron so bantogan o Allah, ogaid na so babay na keilay ron so bantogan o mama.
8 Ka so mama na kena a ba miyakapoon ko babay, ka so babay i poon ko mama
9 Na so mama na da adena para ko babay, ka so babay na inaden para ko mama.
10 Kagiya ka maoto na sabap ko manga malaikat na patot a kombong so babay kaan
mailay a makimbabaya ko karoma niyan.
11 Apiya oto na sii ko kaiisaisa tano ago so Kadnan na di makapaginetaw so babay o da a
mama, na di makapaginetaw so mama o da a babay.
12 Ka datar o kiyambaali ko babay a poon ko mama, na so mama na dii mimbawata o
babay, na so langon taman na pepakapoon ko Allah.
13 Nggedagedaa niyo ai: ba patot a di pekombong so babay igira a pesimba ko Allah?

14 Ba kena a misasarta rekano so katawi sa piyakayaya ko mama o ba matas a bok iyan
15 Ogaid na bantogan ai o babay? Ka so matas a bok na inibegay ron a pekisapeng iyan.
16 Na o aden a kebaya makipendaowa makapantag sii na aya bo a mapetero aken na
sekami ago so manga Agama o Allah na da a salakaw a adat ami.
So Kaken a Ipetedem ko Kadnan
17 Sii ko telondog a manga osiyat na di aken sekano podin, ka kagiya so di niyo dii
katimotimo na kena a ba rekano pekapiya, ka ipekerata iyo.
18 Paganay ron na miyapanotol raken a di kano dii mbabaabaad ko di niyo dii katimotimo
a magaagama, na minar ako sa aden a benar on.
19 Ogaid na aya mataan na di kelidasan a kapakambaabaad iyo kaan makilala o antawaa
rekano i tito a peparatiyaya.
20 Igira a di kano dii timo na kena a so Kaken a Ipetedem ko Kadnan a di niyo dii
selaselaan.
21 Ka kanikaniya a kapeken iyo, na so manga ped na di penga oosog, na so peman so ped
na penga bebereg.
22 Ba da a rek iyo a manga walay a ron kano pekakan ago pekainom? Ba niyo kabaya a
pesodiin iyo so Agama o Allah ago pakapekeyaan iyo so siran oto a korang on so
kaoyagan? Antonaa i mapetero aken rekano? Ba aken sekano podiya mipantag sii?
Mataan a di!
23 Ka miyatarima aken a poon ko Kadnan so ndao a piyalad aken rekano a giyai: so

Kadnan a Isa na sii ko kagagawii a kiyatipowa on na kominowa sa paan.
24 Kagiya kapanalamatan iyan so Allah na piyangopak iyan so paan na pitero iyan a
"Giyai so lawas aken a inibegay para rekano. Nggolaolaa niyo ai a ipetedem iyo raken."
25 Datar oto mambo a kagiya makapasad siran koman na kinowa niyan so tagayan na
pitero iyan a "Giyangkai a tagayan na aya bago a kapasadan o Allah a sii mipepasod ko
rogo aken. Oman kano ron minom na nggolaolaa niyo a ipetedem iyo raken."
26 Ka oman kano koman sangkai a paan ago oman kano minom sangkai a tagayan na
pepakalangkapen iyo so kiyapatay o Kadnan taman ko kapekaoma niyan.
27 Kagiya ka maoto na apiya antawaa a ken sangkai a paan ago maginom sangkai a
tagayan o Kadnan sa di patot a okit na makapesela sekaniyan ko lawas ago rogo o
Kadnan.
28 Sabap san na patot a so oman i isa na daan iyan a tokawi a ginawa niyan na go bo kan
ko paan ago inom ko tagayan.
29 Ka so taw a di niyan kilalaan so lawas o Kadnan sii ko kaken iyan ko paan ago so
kapaginom iyan ko tagayan na ba niyan den pakiwiti sa daneg a ginawa niyan sii ko kaken
ago kapaginom iyan.
30 Giyanan i sabap a madakel rekano a pekelobayan ago mbalisakiten, ago so ped rekano
na miyamatay.
31 Ogaid na o daan tano den a miyapariksa a ginawa tano na di tano ndanegen o Allah.
32 Ogaid na amay ka ndanegen tano o Kadnan na giyanan i kapemarintaa niyan rektano
kaan tano di keped ko kaselaa niyan ko doniya.
33 Sabap sii, manga pagari aken, na igira a petimotimo kano ko Kaken ko Ipetedem o
Kadnan na penanayawa kano.
34 O aden a isa rekano a pekeor na paliyogat a koman sekaniyan roo ko walay niyan, ka o
ba kano madaneg sabap ko kapetimotimo iyo. Na so makapantag ko ped a manga nganin
na pesaden aken bo amay ka makasong ako san.
1 KORINTO 12
So manga Moodiset a Pamemegayan o Soti a Roh
Kabaya aken, manga magariyari, a katokawan iyo so tito a benar makapantag ko manga
moodiset a pamemegayan o Soti a Roh.
2 Katawan iyo a sii ko da niyo pen kaparatiyaya ko Kadnan na omanoman kano pekeagak
ago pekedadag o manga barahala a di makapetero.
3 Sabap sii na kabaya aken a katokawan iyo a da a taw a ipepaar o Roh o Allah a ba niyan
mipesinta si Isa. Na da a ba makapetero sa "Si Isa na Kadnan," liyo ron o sogoon
sekaniyan o Soti a Roh.
4 Aden a mbarambarang den a manga moodiset a pamemegayan o Roh, ogaid na isaisa bo

a Roh a pepamegay ron.
5 Mbarambarang den mambo a manga okit a kapanalagad ko Kadnan, ogaid na isaisa bo a
Kadnan a pepanalagadan.
6 Aden pen a mbarambarang den a dii kinggolalanen sangkoto a manga kapanalagad,
ogaid na isaisa bo a Tohan a aya dii nggolalan ko langon taman sii ko langon a taw.
7 So oman i isa na pembegan sa kapasang sa kakepayaga niyan ko kabatowa o Roh para
ko kamapiyaan o kalangolangon.
8 So isa a taw na pembegan o Roh sa kateroa ko lalag a ongangen, na so isa peman na
pembegan o Roh sa kateroa ko lalag a katao.
9 So ped na pembegan o Roh sa paratiyaya, na so peman so ped na pembegan o Roh sa
manga moodiset sa kapakapiyaa niyan ko pepanga sasakit.
10 Pembegan so isa a taw sa kabatowa sa kanggalebek iyan sa manga piyakamemesa; so
ped peman na pembegan sa moodiset sa kapeyaga ko lalag o Allah; so pen so ped na
pembegan sa kakilalaa ko mbidabida a manga niyawa; so pen so ped na pembegan sa
kapakatero sa mibibida a manga basa, ago so ped peman na pembegan sa moodiset sa
kapemaanai sangkoto a manga basa.
11 Na giyangkai a isaisa bo a Roh i dii nggolaola sangkai langon, na pepamakatokiden
iyan so manga pamemegayan iyan ko oman i tetanggisa sii ko kabaya iyan.
Isaisa bo a Lawas a Madakel a Maaped on
12 So lawas o taw na isaisa bo a lawas a madakel a anggaota iyan. Apiya madakel a

mbidabida a anggaota iyan na langon ai na isa bo a lawas, na datar oto mambo so Al
Masih.
13 Ka sektano langon a manga Yahodi ago manga Grigo, manga oripen ago kena a ba
oripen na palaya tano kiyasalawatan o isaisa a Roh sii ko kiyaped tano ko isaisa a Lawas,
na piyakainom tano pen langon ko isaisa a Roh.
14 So lawas na kena a ba isaisa bo a anggaota, ka madakel a kikaaped on.

15 O peteroa o ai a "Kagiya kena a ba ako lima na kena a ba ako maaped ko Lawas," na
apiya pen oto na maaped sekaniyan den ko lawas.
16 Na o peteroa o tangila a "Kagiya kena a ba ako mata na kena a ba ako maaped ko
lawas," na apiya pen oto na maaped sekaniyan den ko lawas.
17 O so langon a lawas na mata bo na andamanaya i kapekaneg iyan, na o palaya den
tangila na andamanaya i kapekabaw niyan?
18 Ogaid na aya benar na so Allah i tomiyago ko oman i isa a maaped ko lawas ko
kiyabayaan iyan on tomago.
19 O sasabagi so lawas na kena a ba tito a lawas.
20 Aya benar na madakel a kikaaped ko lawas, ogaid na isaisa bo so lawas.
21 So mata na di niyan mapetero ko lima a "Di aken seka kailangan," na di mambo

mapetero o olo sii ko ai a "Di aken seka kailangan."
22 Kena, ka so manga ped ko lawas a pipikiren tano a manga lolobay na aya tanto a mala
i kipantag,
23 Na so manga ped on a pipikiren tano a kena a ba tanto a mapiya na aya tano baden
pipiyapiyaan komibir. Na so kikaaped on a di mapekiilay na nditaran tano sa mapiya a
pegilain
24 A di ini kailangan o lebi pen a mapiya i paras a kikaaped ko lawas. So Allah na
piyakapamagepeda iyan so langon a kikaaped ko lawas na bigan iyan sa lebi pen a mala a
bantogan so kikaaped on a kikakokorangan
25 Kaan di mapembaabaad so lawas ago an melagilagid a kapepagipata o oman i maaped
on ko ped iyan.
26 O pekerasay so isa a maaped ko lawas na pekerasay mambo so langon a kikaaped on,
na o kiyabantogan so isa a maaped on na pekebabaya mambo so langon a kikaaped on.
27 Langon kano na Lawas o Al Masih na oman i isa rekano na maaped on.

28 Na piyanago o Allah sii ko Agama so manga maaped on a giyai: paganay ron so
manga siyogo, ikadowa na so manga pepakapayag ko lalag o Allah, ikatelo na so manga
goro, na so peman so manga dii nggolaola sa piyakamemesa a manga galebek, na
tomiyalondog on so aden a moodiset iyan sa kapakapiyaa ko pepanga sasakit, so
kapetebangi ko ped, so kapenakodai kiran ago so kapakatero sa mibibida a manga basa.
29 Ba siran langon siyogo? Ba siran langon pepekapayag ko lalag o Allah? Ba siran
langon pepangendao? Ba siran langon dii nggolaola sa piyakamemesa a manga galebek?
30 Ba langon siran na ana moodiset iyan sa kapakapiyaa ko pepanga sasakit o di na so
kapakatero sa mibibida a manga basa, o di na so kapemaanai sangkoto a manga basa?
31 Kena, ogaid na kababayai niyo tomarima so lebi pen a mapiya ko manga moodiset.
Ogaid na pekitokawan ko rekano imanto so da a lawan iyan a okitokit.
1 KORINTO 13
So Gagaw
O makapetero ako sa mbarambarang a basa o manga manosiya ago manga malaikat ogaid
na da a gagaw aken na so di aken dii katero na datar bo o pakabowing a agong o di na
kapembeting o pandaopan.
2 Apiya pen o aden a moodiset aken sa kapekepayaga ko lalag o Allah, ago masasabot
aken so langon a manga pageemaan ago so langon o katao, na apiya pen o mala ako i
paratiyaya kaan aken mapekaiseg so manga palaw ogaid na da a gagaw aken na da a lalaw
aken.
3 Apiya pen ipamemegay aken so langon a rek aken ago peladen ko a lawas aken a
totongen ogaid na da a gagaw aken na da den a bali niyan raken..
4 So gagaw na masabar ago makapediin. So gagaw na kena a ba mariit aya pen o ba
petekabor o di na pepangimporoan.
5 So gagaw na kena a ba botod, kena a ba maliget, kena a ba marangit, kena a ba peseop,
6 Di niyan ikebabaya so di ontol, ka ipekebabaya iyan so tito a benar.
7 So gagaw na lalayon makasesabar, lalayon den peparatiyaya, lalayon makasasarig ago
lalayon pepekatiger.
8 So gagaw na da a ikepos iyan. Ogaid na so kapekepayaga ko lalag o Allah na kepos, so
dii katero sa mibibida a manga basa na kegenekan, ago so katao na kedadas bo.
9 Ka so kiyatokawan tano ago so kapekepayaga tano ko lalag o Allah na kena a ba
tarotop.
10 Ogaid na amay ka pekatalingoma so matatarotop na kedadas bo so kena a ba tarotop.
11 Isako wata ako pen na so di aken dii katero, so kasasabot aken ago so kapamimikiran
aken na palaya den kawawatai. Ogaid na kagiya makatoa ko den na ginekan aken so
kawawatai a olaola.
12 Aya pekeilay tano imanto na datar o lalamokan a paras a maaleg ko pagalongan, ogaid
na sa oriyan na keilay tano a makasasangora tano. So katawan aken imanto na matag
sabaad bo, ogaid na sa oriyan na ketarotop ai piyapiya a datar sa katatarotop o katawi
raken o Allah.
13 Samanaya na tatap pen angkai a telo; so paratiyaya, so sarig ago so gagaw, ogaid na
aya lebi a mala on na so gagaw.
1 KORINTO 14
So Ped a manga Pamemegayan o Roh
Panagontamani niyo so gagaw ago kababayai niyo tomarima so manga moodiset a

pamemegayan o Roh ba di labaw so kapepayaga ko lalag o Allah.
2 Ka so dii makatero sa mibibida a manga basa na kena a ba dii tero sii ko manga taw ka
sii ko Allah, ka kagiya da a ba rekaniyan pekasabot. Di niyan dii teroon so pageemaan a
manga tito a benar a nggolalan ko Roh.
3 Ogaid na so pepakapayag ko lalag o Allah na dii tero sii ko manga taw sa manga katero
a ipepangosor, ipepangosiyat ago ipekapiya a ginawa iran.
4 So dii makatero sa mibibida a manga basa na aya niyan bo pepakapangosoren na giya
ginawa niyan, ogaid na so taw a pepakapayag ko lalag o Allah na aya niyan
pepakapangosoren na so langon a magaagama.
5 Kabaya aken a palaya kano makatero sa mibibida a manga basa ogaid na tomoon ko a
pepakapayag kano ko lalag o Allah. Ka so pepakapayag ko lalag o Allah na mala i
kipantag a di so dii makatero sa mibibida a manga basa liyo ron o ba niyan kapemaanai so
pitero iyan kaan mapakapangosor so langon a magaagama.
6 Na o somong ako rekano san, manga magariyari, ago tero ako sa mibibida a basa na
andamanaya i kaogopi aken rekano, liyo ron o ba ako rekano tero sa manga tito a benar a
miyapayag o Allah, o di na katao, o di na lalag o Allah, o di na ndao?
7 Apiya so da a niyawa niyan a manga boniboniyan a datar o insi o di na kotiyapi na

andamanaya i kaketokawi o taw ko sengkoan iyan o di mapakasesenggaya so manga oni
niyan?
8 Na o di marayag so kapepakaoniya ko bogiyong na antawaa i petiyagar para ko
katidawa?
9 Datar iyan mambo na andamanaya i kaketokawi o manga taw ko maana o di niyo dii
teroon o pegosar kano sa basa a di kesabotan? So manga katero iyo na kibayog baden o
ndo.
10 Aden a pimbarambarangan a manga basa sii sa doniya, na so oman i isa on na aden a
maana niyan.
11 Ogaid na o di ako makasabot ko maana o dii teroon o ped a taw na datar ako o rait sii
rekaniyan, na sekaniyan na datar raken mambo o rait.
12 Sabap sa masisingayo iyo a katarimaa niyo ko manga moodiset a pamemegayan o Roh
na panagontamani niyo so manga moodiset a ipepangosor o Agama.
13 Kagiya ka maoto na so taw a dii makatero sa mibibida a manga basa na disomala a

pengangarapanen iyan a kapemaanaan iyan so di niyan dii teroon.
14 Ka o pangangarapan ako sa mibibida a basa na dii mangangarapan so niyawa ko, ogaid
na so pamikiran aken na di on maaped.
15 Sabap sii na antonaa i sowaan ko? Pengangarapan ako a nggolalan ko niyawa ko, na
pengangarapan ako a nggolalan pen ko pamikiran aken. Indidaw aken so podi a nggolalan
ko niyawa ko, na indidaw aken so podi a nggolalan pen ko pamikiran aken.
16 Ka o pepodi ka ko Allah a sii bo dii makanggolalan ko niyawa ngka na so
makadadarpa san a da a sowa iyan makapantag sii na andamanaya i kapeteroa niyan sa
"Amin" sii ko kapepanalamat ka, ka kagiya di niyan seboten so di ngka dii teroon?
17 Apiya pen mapiya so kapepanalamat ka na kena a ba ini ipepangosor o ped a taw.
18 Na pepanalamatan ko so Allah a di ako dii makatero sa mibibida a manga basa a lawan

pen ko apiya antawaa rekano.
19 Ogaid na sii ko kalilimod o magaagama na tomoon ko a petero ako sa lima taga bo a
katero a kesabot kaan mipangendao ko manga taw a di so kateroa ko ko sapolo nggibo a
katero a mibibida a basa.
20 Manga magariyari, di kano seyan sa manga wata ko kapepamimikiran iyo. Sayan kano
sa manga wata mipantag ko kamarataan, ogaid na sayan kano sa manga totoa a taw ko
kapepamimikiran iyo.
21 Misosorat ko Kitab a
"Makipembitiyarai ako sangkai a manga taw," a tig o Kadnan,

"a nggolalan ko manga modol o manga rait,
a nggolalan ko mibabagowan kiran a manga basa,
ogaid na apiya oto na di ako iran pemakinegen."
22 Na marayag sii a so dii katero sa mibibida a manga basa na aya nanao sii ko siran oto a
di pemaratiyaya a kena a ba sii ko pepamaratiyaya. Na so kapepayaga ko lalag o Allah na
para ko siran oto a peparatiyaya a kena a ba so di pemaratiyaya.
23 Sabap san na o malilimod so langon a magaagama a so oman i isa na dii tero sa

mibibida a basa na o pekasoled so da a manga sowa iyan makapantag san, o di na so da
pamaratiyaya a manga taw, na ba iran di peteroa a palaya kano pembetengen?24 Ogaid na
o so langon a malilimod na pepayag ko lalag o Allah na o aden a pekasoled a da
paratiyaya o di na da mapangendao na kesabot iyan a madodosa sekaniyan na kesala
sekaniyan o hatin iyan sabap ko langon a pepanga aaneg iyan,
25 Na kepayag so manga pageemaan a mapipikir iyan. Na sodiyod sekaniyan ago simba
ko Allah a peteroon iyan a "Mataan a sisii rekano so Allah!"
So Katatanor ko Kapesimba
26 Aya ketimoan sii, manga magariyari, na giyai: Igira a petimotimo kano na so isa
rekano na aden a dikir iyan, so isa na aden a mipengendao niyan o di na lalag a
miyapayag on o Allah, so isa na petero sa mibibida a basa, na so ped na pemaanaan iyan
ai. Disomala a nggolaolaa niyo ai langon a ipekaosor o Agama.
27 O aden a petero sa mibibida a basa na dowa o di na telo bo a pakapeteroa niyo; na
disomala a makapesosokli siran tero, na so isa na pemaanai niyan so peteroon iran.
28 O da a ba on makapemaana roo na da a ba niyo pakapeteroa sa mibibida a basa sii ko
kalilimod iyo, ka sii niyan bo teroa sa ginawa niyan ago sii ko Allah.
29 Pakapeteroa niyo so dowa o di na telo kataw a pepekapayag ko lalag o Allah, na so
manga ped na timbatimbanga iran so pitero iran.
30 Ogaid na o aden a isa a taw a moontod roo a kepayagan mambo o Allah ko lalag iyan
na patot a gomenek tero so dii tero.
31 Ka kepakay a pekapayag kano langon ko lalag o Allah a makapesosokli kano tero kaan
so oman i isa na an makasowa ago kaosiyati.
32 So manga pepakapayag ko lalag o Allah na makapapaar siran ko kateroa iran on,
33 Ka so Allah na kena a ba pekepooni o kariribogar, ka so katatanor.
Igira a dii timotimo so manga kaom o Allah sii ko Agama

34 Na disomala a romerenek so manga babay sii ko kalilimod iyo. Di keparo o ba siran
tero, ka ba siran den pakimbabaya, ka giyanan i tig o Kitab.
35 O aden a kabaya iran a katokawan iran na sii iran miise ko manga karoma iran sii sa
walay, ka piyakayaya ko babay so kapakatero iyan sii ko kalilimod o Agama.
36 Ba rekano miyakapoon so katero o Allah, o di na ba sekano bo i kiyasampayan on?

Kena!
37 O aden a pipikiren iyan a makapepayag sekaniyan ko lalag o Allah o di na mipapaar
sekaniyan o Roh na paliyogat a kilalaan iyan a so inisorat aken rekano na inisogo o
Kadnan.
38 O di niyan ai kilalaa na di patot i ba sekaniyan mambo kekilala.
39 Sabap san, manga pagari ko, na panamari niyo a kapekepayaga niyo ko lalag o Allah
na di niyo separen so dii katero sa mibibida a manga basa.
40 Disomala a di niyo dii nggolaolaan so langon taman ko mapapatot ago matatanor a
okit.
1 KORINTO 15
So Kiyaoyag Peroman o Al Masih
Imanto na pekitademan aken rekano a manga magariyari so Mapiya a Totol a
piyakalangkap aken rekano ago miyatarima iyo a aya kaoonayan ko paratiyaya niyo.
2 Na pekesabet kano a nggolalan sangkai a Totol o kapeti niyo piyapiya angkoto a katero
a piyakalangkap aken rekano, liyo ron o kena a ba tito so paratiyaya niyo.
3 Piyalad aken rekano so miyatarima aken a lebi a mala i kipantag a giyai: miyatay so Al
Masih sabap ko manga dosa tano a aya kinitoman o misosorat ko Kitab.
4 Minilebeng sekaniyan ago miyaoyag peroman sii ko ikatelo gawii a aya kinitoman o
misosorat ko Kitab.
5 Miyakiilay sekaniyan ki Pidro na go bo peman ko sapolo ago dowa a manga siyogo.
6 Oriyan oto na miyakaisa sekaniyan miyakiilay ko kalalawanan so lima gatos a
miyamaratiyaya rekaniyan, a so kadakelan kiran na oyagoyag pen, ogaid na miyamatay
den so ped kiran.
7 Oriyan oto na miyakiilay sekaniyan ki Santiyago ago so langon a manga siyogo.
8 Moripori ron na miyakiilay sekaniyan raken mambo, a datar ako o inimbawata ko di

ontol a masa.
9 Ka saken i lebi a mababa ko langon a manga siyogo, na di ako man patot a mbetowan sa
siyogo ka siyatro aken so Agama o Allah.
10 Ogaid na so miyabaloy aken den imanto na sabap ko limo o Allah. Na da kaolai so
limo iyan raken, ka lebi ako a miyanamar nggalebek a di so langon a ped a manga siyogo,
apiya pen kena a ba saken i dii nggalebek ka so limo a Allah a dii nggalebek a nggolalan
raken.
11 Sabap san na kena a ba mala i kipantag o saken o di na siran i lebi pen a miyanamar,
ka giyai so pepakalangkapen ami langon na giyai mambo so miyaparatiyaya niyo.
So Kakeoyag Peroman o Miyamatay
12 O aya pepakalangkapen ami na inoyag so Al Masih a poon ko miyamatay na ino dii

teroa o ped rekano a di keoyag so miyamatay?
13 O di keoyag so miyamatay na aya maana niyan na da oyaga so Al Masih.
14 Na o da oyaga so Al Masih na da a kipantag o kapepangosiyat ami, ago da a lalaw o
paratiyaya niyo.
15 Na lawan on pen na keilay sii a miyakaseksi kami baden sa di benar makapantag ko
Allah ka miyatero ami a inoyag iyan so Al Masih a poon ko miyamatay. Ogaid na da
niyan bes oyaga o benar a di pagoyagen so miyamatay.
16 Ka o di pagoyaga so miyamatay na da mambo oyaga so Al Masih.
17 Na o da oyaga so Al Masih na da a lalaw o paratiyaya niyo na madodosa kano pen.
18 Aya maana ini na siran oto a miyamaratiyaya ko Al Masih a miyamatay den na
miyamakanaraka.
19 O so sarig tano ko Al Masih na sii bo papantagen sangkai a kapepaginetaw tano na
sektano i lebi a dowandowaan iyan ko langon a manosiya.
20 Ogaid na aya benar na inoyag so Al Masih a poon ko miyamatay a aya den poriba sa
kakeoyag o miyamatay.
21 Miyakaoma so kapatay sa doniya a nggolalan ko sakataw a mama, na datar oto mambo
a miyakaoma so kakeoyag o miyamatay a nggolalan ko sakataw a mama.
22 Ka pematay so langon a taw sabap ko kaiisaisa iran ago so Adam, na datar oto mambo
a pagoyagen so langon a taw sabap ko kaiisaisa iran ago so Al Masih.
23 Ogaid na so oman i isa na pagoyagen sii ko kapakapetetalondogai niyan. So Al Masih
na aya miyaona maoyag ko kalangolangon, na pekatalondog on so manga rek iyan amay
ka makaoma sekaniyan.
24 Na oriyan o kiyatabana o Al Masih so langon a pisosonan a kadato ago kapaar ago
kabatowa na pekaoma so kaposan, na peladen iyan so kapendato sii ko Allah a Ama.
25 Ka disomala a pendato so Al Masih taman sa di matago o Allah so langon a ridoay
niyan ko didalem a palad a ai niyan.
26 Aya moripori a ridoay a tebanen na so kapatay.
27 Ka tig o Kitab a "Tiyago o Allah so langon taman ko didalem a palad a ai niyan,"
ogaid na so tig iyan a "langon taman," na marayag sii a da on maped so Allah a aya
tomiyago ko langon taman ko kapaar o Al Masih.
28 Ogaid na amay ka mapakipaar on so langon taman na so den mambo so Wata na
pekipaar ko Allah a aya tomiyago ko langon taman ko kapaar iyan kaan kandatoi piyapiya
o Allah so langon taman.
29 Siran oto a pepakisalawat sabap ko miyamatay na ino iran ai penggolaolaa? O benar a

di pagoyagen so miyamatay na antonaa i gona o kapepamakisalawat iran sabap ko
miyamatay?
30 Na makapantag rekami; ino ami peserakanen so kaoyagoyag ami oman i oras?
31 Ka ipesepa aken rekano, manga magariyari, a pekesarempang aken so kapatay oman
gawii, na mataan den ai a datar mambo o kipepangandagen aken rekano sii ko kaiisaisa
tano ago si Isa Al Masih a Kadnan tano.
32 O miyakitidawa ako ko dii matero a "manga waraw a manga binatang" sii sa Ipisos
sabap bo ko kamamanosiyai a antap na antonaa i gona niyan raken? O di pagoyaga so
miyamatay na "koman tano ago minom tano, ka mapita na pematay tano bo."
33 Di kano pekiakal. "So manga rarata a dii mipagonota na pekarata ko mapiya a
parangay."
34 Pakaontola niyo so kapepamimikiran iyo na geneki niyo so di niyo dii kandosa, ka
aden a ped rekano a da iran pen makilala so Allah. Pitero aken ai kaan kano kayai.
So Lawas o Miyaoyag Peroman
35 Masiken a aden a magise sa "Andamanaya i kapagoyaga ko miyamatay? Antonaa i

mapembadan iran amay ka maoyag?
36 Seka ki a inoranti! Igira a miyamola ka sa oniin na di den ai magto o di daan a matay.
37 Na so ipemola ngka na kena a ba miyakatoa den a pamomolan, ka so bo so oniin, a
masiken a oniin a bantad, o di na ped a oniin.
38 Na mbegan o Allah angkoto a oniin sa lawas a kebayaan iyan on megay; pembegan
iyan so oman i pisosonan o oniin sa rek iyan a lawas.
39 Kena a ba ndatadatar so sapo o langon a kaaden. Sasoson a sapo o manosiya, salakaw
so sapo o manga pangangayamen, salakaw so rek o manga papanok ago salakaw mambo
so rek o manga seda.
40 Aden a manga lawas sa langit na aden a manga lawas sa doniya. Aden a kapiya i paras
o manga lawas sa langit ago salakaw a kapiya i paras o manga lawas sa doniya.
41 So alongan na aden a rek iyan a kataid, so olan na salakaw a kataid iyan ago so manga
bitoon na salakaw a kataid iran, na apiya so manga bitoon na mbidabida a kataid iran.
42 Lagid ai mambo so kapagoyaga ko miyamatay. So lawas a ipelebeng na keredak; amay

ka oyagen peroman na di den keredak.
43 So lawas a ipelebeng na piyakayaya ago malobay; ogaid na amay ka ogayen peroman
na kababantogan ago mabager.
44 So lawas a ipelebeng na kamamanosiyai; amay ka oyagen na lawas den ai a
kaniniyawai. Sabap sa aden a lawas a kamamanosiyai na aden mambo a kaniniyawai a
lawas.
45 Ka misosorat ko Kitab a "So paganay a Adam na pimbaalan a oyagoyag," ogaid na so
moripori a Adam na aya niyawa a pepangoyag.
46 Kena a ba miyaona so kaniniyawai a lawas, ka so kamamanosiyai, na go ron bo
makatalondog so kaniniyawai a lawas.
47 So paganay a mama na pimbaalan a poon ko bayanek sa doniya, na so ikadowa a
Mama na poon sa kasorgaan.
48 So oman i isa a sisii sa doniya na aden a lawas iyan a datar o lawas o mama a
pimbaalan a poon ko bote, na so oman i isa a ndodoo sa kasorgaan na aden a lawas iyan a
datar o lawas o Mama a poon sa kasorgaan.
49 Datar tano imanto o mama a pimbaalan a poon ko bote, na kebaloy tano mambo a
datar o Mama a poon sa kasorgaan.
50 Giyai i maana o pitero aken, manga magariyari: so pimbaalan a sapo ago rogo na di
makapekawali ko Ndatoan o Allah, na so keredak na di makapekawali ko di keredak.
51 Pamakineg kano, ka peteroon ko rekano so pageemaan gowani: kena a ba langon tano

a pematay, ogaid na penga sasalin tano langon
52 Sii ko sakotika a datar sa kadilapet o sasaperek amay ka moni so kaposan a bogiyong.
Ka magoni so bogiyong na pagoyagen so miyamatay, na penga sasalin tano langon a
pembaloy a di den petay.
53 Ka giyangkai a lawas tano a keredak na disomala a penditar sa di den keredak, na
giyangkai a petay na penditar sa di den petay.
54 Na amay ka kanditaran so keredak sa di den keredak ago kanditaran so petay sa di den
petay na giyoto i kaketoman o misosorat ko Kitab a
"Miyalamed den so kapatay! Miyatarotop so kiyatabana on!"

55 “Hey kapatay, anda den so kiyapakataban ka?
Hey kapatay, anda den so bisa ngka?"
56 So bisa o kapatay na poon ko dosa, na so bager o dosa na poon ko Kitab.
57 Ogaid na panalamatan tano so Allah a pepamegay rektano ko kapakataban a nggolalan
ko Kadnan tano a Isa Al Masih!
58 Kagiya ka maoto, manga magariyari a pekebabayaan ko, na pakabebeken kano a di den

kekaog. Lalayon kano totordo ko galebek o Kadnan, ka katawan iyo a da den a
pinggolaola niyo para ko Kadnan a ba mailang.
1 KORINTO 16
So Kapenimoa ko Pirak para ko manga Kaom o Allah
Makapantag ko kapenimoa ko pirak a itebang ko manga kaom o Allah sa Yodiya na

nggolaolaa niyo so miyatero aken ko manga Agama sa Galasiya.
2 Sii ko paganay a gawii ko oman pito gawii na sibain o oman i isa rekano so ped ko
pirak a pekesokat iyan na tagoa niyan kaan di keilangan a kapenimoa on amay ka somong
ako san.
3 Amay ka makaoma ako na pekiawidan ko ini ko manga taw a miyapili iyo, a rakes o
manga sorat a kikilala kiran, na pekasongen aken siran sa Yarosalim kaan iran roo mawit
so pamemegayan iyo.
4 Na o mapipikir iyo a patot a pekasong ako roo mambo na pekaonoten ko siran.
So manga Takdir i Paolo
5 Song ako rekano san amay ka makaokit ako sa Masidoniya, ka magokit ako roo.
6 Masiken a pekatareg ako rekano san, apiya taman sa maipos so rendeng. Oriyan oto na
keogopan ako niyo ko kapakataros aken lomalakaw sa apiya anda ko song.
7 Ka di ako kebaya o ba aken sekano bentelen a datar o ba somasagad, ka iinamen aken a
malo matey a kapakatareg aken rekano o magiyog so Kadnan.
8 Ogaid na tereg ako sii sa Ipisos taman ko Gawii a Pintikostis

9 Ka aden a kakeparo aken sa kapenggolaola ko sa mala i kipantag a galebek, na madakel
a pepamanopak raken.
10 O pekaoma san si Timotiyo na sekasakawa niyo kaan di kelek sii ko katatareg iyan
rekano, ka di niyan dii nggolaolaan so galebek o Kadnan a datar aken.
11 O ba ana isa rekano bo a ba niyan sodia, ka ba niyo den ogopi sa kapakataros iyan ko
songowan iyan a da a rayorayo a ginawa niyan kaan sekaniyan raken makakasoy, ka
nanayaon ko sekaniyan a ped o manga magariyari.
12 Makapantag ko pagari tano a si Apolo na piyangni aken on sebenar a pembentel

rekano a ped o manga magariyari, ogaid na kena den a ba niyan kabaya a kasong iyan san
imanto. Ogaid na amay ka makaparo na song sekaniyan san.
Moripori a manga Insarat

13 Iiktiyar kano; pakabebeken kano sii ko paratiyaya niyo; pakawawaraw kano ago
pakababager.
14 Kababayai niyo so manga ped iyo sii ko langon a di niyo dii nggolaolaan.
15 Katawan iyo den so makapantag ki Istipanas ago so pamiliya niyan; siran i miyaona a
miyamaratiyaya roo sa Grisiya, ago inipanagontaman iran a ginawa iran ko
kapepanalagadi ran ko manga kaom o Allah. Na pagakolen ko rekano, manga magariyari,
16 A petomana niyo so manga olowan a datar iran ago so apiya antawaa pen i pegogop ko
galebek tano.
17 Miyababaya ako ko kiyapakaoma i Istipanas, si Portonato ago si Akaikos. Pinggolaola

iran so da niyo kaparowi nggolaola,
18 Ka piyakapiya iran a ginawa ko ago so manga ginawa niyo mambo. Patot a kilalaan
iyo so kapiya o datar iran a manga taw.
19 Pesalamen kano o manga Agama sii sa probinsiya a Asiya. Si Akowilo ago si Prisila
ago so magaagama a dii timotimo ko walay ran na peselamen kano iran sa iklas ko poso
iran sii ko Kadnan.
20 Pesalamen kano o langon a magariyari sii.
Pesasalama kano a sarta o soti a arek.
21 Katii so salam a saken den i miyangonay ron sorat: "Si Paolo."
22 Kamorkaan so apiya antawaa i di pekebabaya ko Kadnan!

Hey Kadnan kasoy ka den!
23 Pengnin ko a malalayon rekano so limo o Kadnan a Isa.
24 Pekebabayaan ko sekano langon sii ko Isa Al Masih.
2 KORINTO
2 KORINTO 1
Alamat sorat ako i Paolo a siyogo i Isa Al Masih sabap ko kabaya o Allah; ago poon ko
pagari tano a si Timotiyo makasampay ko Agama o Allah sii sa Korinto a rakes o langon
a kaom o Allah ko dalem a inged a Grisiya.
So Kapepakapiyaa o Allah sa Ginawa tano
3 Podin tano so Allah a Ama o Kadnan tano a Isa Al Masih. Masalinggagaw sekaniyan a
Ama ago Tohan a ron pekepoonan o langon a kapipiya a ginawa.
4 Pepakapiyaan iyan a ginawa tano sii ko langon a kapekerasay tano kaan tano mambo
mapakapiya a ginawa o ped, a apiya antonaa i karomasayan iran, a nggolalan ko kapipiya
a ginawa a miyatarima tano a poon ko Allah.
5 Igira a madakel a karomasayan tano sabap ko Al Masih na tanto mambo a pepakapiyaan
a ginawa tano a nggolalan ko Al Masih.
6 Na o pekerasay kami na sabap sa an mapakapiya a ginawa niyo ago an kano masabet.
Na o pepakapiyaa a ginawa mi na sabap sa an ami mapakapiya a ginawa niyo kaan iyo
matiger so ndatadatar a karomasayan a peketiger ami mambo.
7 Kagiya ka maoto na di den kealin so sarig ami mipantag rekano, ka katawan ami a
kagiya di kano dii mbagian ko manga karomasayan ami na makapembagian kano mambo
ko kapepakapiyaa sa ginawa mi.
8 Kabaya ami a katokawan iyo, manga magariyari, so manga karomasayan a kiyaokitan

ami roo ko probinsiya a Asiya. Tanto kami a kiyaregenan a lawan pen ko kaketigera mi
ron, na kiyadaan kami sa inam o ba kami pen keoyag.
9 Aya mataan na miyatangked sa ginawa mi a petay kami den. Ogaid na miyanggolaola
ini kaan ami di kesarigi a ginawa mi, ka so bo so Allah a pepangoyag ko miyamatay.
10 Siyabet kami niyan sangkoto a piyakalekelek a kapatay na sebeten kami niyan on bo,
na makasasarig kami a iteros iyan a kapesebeta niyan rekami.
11 Pegogop kano rekami mambo a nggolalan ko kipepangangarapanen iyo rekami. Sabap
san na madakel a manga taw a penalamat ko Allah sabap ko madakel a manga rakmat a
ketarima ami a aya ipagampon ko manga pangni o madakel a taw.
Miyaalin So Takdir i Paolo
12 Aden a ipepangandag ami a pepamataanan mambo o hatin ami a giyai: Miyaginetaw

kami sa doniya a masosoti ago maliwanag i poso ba bo labaw ron isako sisii kami rekano.
Miyanggolaola ami ini a kena a ba nggolalan ko kamamanosiyai a ongangen, ka so limo o
Allah.
13 Da a ba ami rekano inisorat a rowar ko kesabotan iyo amay ka mbatiyaan iyo.
14 Na sasarigan aken a kesabotan iyo piyapiya so da niyo pen kasaboti makapantag
rekami kaan sii ko gawii a kakesoy o Kadnan a Isa na mipengandag kami niyo a lagid o
kipepangandagen ami rekano mambo.
15 Kagiya miyatangked aken a benar anan na piyasad aken sa ginawa ko a sekano i

pagonaan ko mentel kaan aken sekano karakmati sa makadowa.
16 Ka matetakdir aken a imbentel aken sekano sii ko kasong aken sa Masidoniya, na
magaot ako san bo peroman amay ka komasoy ako a poon sa Masidoniya kaan ako niyo
kaogopi ko kateros aken sa Yodiya.
17 Na sabap sa miyaalin den angkai a takdir na ba aya maana ini na pekedowadowaan ako
ko kiyatakdira ko ron? Ba ako petekdir a lagid o kadodoniyai a taw a peteroon aken a
"Oway," amay ka aya pamikiran aken na "Di"?
18 Datar o Allah a kesarigan na so di ami rekano dii teroon na kena a ba madodowa so
maana niyan a "Oway," ago "Di."
19 Ka si Isa Al Masih a Wata o Allah a piyakalangkap rekano i Silas, si Timotiyo ago
saken na kena a ba madodowa a maana niyan a "Oway," ago "Di." Sii rekaniyan so
"Oway,"
20 Ka so langon a initopa o Allah na kitoman den sii ko Al Masih. Sabap sii na di
rekaniyan dii makanggolalan so kapeteroa tano sa "Amin," igira a pembantogen tano so
Allah.
21 So den so Allah i pepekabeken rekami ago sekano sii ko kaiisaisa tano ago so Al
Masih. Piyamili tano niyan
22 Na tiniyapan tano niyan sa toos a rek tano niyan den. Pinggolaola niyan ai ko
kiyatagoa niyan ko Roh iyan sii ko manga poso tano a aya den poriba ko langon a
imbegay niyan rektano.
23 Pengnin ko ko Allah a iseksi iyan a benar ai: aya sabap o da aken san pen kasong sa
Korinto na an di pekerata a ginawa niyo.
24 Kena a ba antap ami a kipepaaren ko paratiyaya niyo ka mabager kano i paratiyaya, ka
pegogopan ami sekano baden kaan kano mababaya.
2 KORINTO 2
Kagiya ka maoto na piyasad aken sa ginawa ko a di ako san den song peroman a baden
pekabegay rekano sa rata a ginawa.
2 Ka o pakapekerataa ko a ginawa niyo na antawaa i pekapiya sa ginawa ko? Ba di
sekano bo a bigan aken sa rata a ginawa?
3 Na pisoratan aken sekano sa datar oto a sorat kaan amay ka ibentel aken sekano na di
mapakapekerata a ginawa ko o siran oto a patot a pekapiya sa ginawa ko. Ka matatangked
aken so makapantag rekano langon a igira a mapipiya a ginawa ko na mapipiya mambo a
ginawa niyo.
4 Tanto a miyarata a ginawa ko ago miyakamboko ako a penggoraok sebenar sii ko
kiyasorati aken rekano sangkoto a sorat a kena a ba an aken mapakapekerata a ginawa
niyo, ka sabap sa an iyo katokawi so kala o kapekebabayai aken rekano.
So Karilai ko Miyakandosa
5 So mama a miyakabegay sa rata a ginawa na kena a ba so ginawa ko i piyakakerata

iyan, ka so ped rekano. Kena a ba ko dii teroa a langon kano ka o ba pekelawani so
kabasa ko.
6 Kiyatangkaan den so kiyadanega sangkoto a mama o kadakelan rekano.
7 Imanto na rilai niyo ago pakapiyaa niyo a ginawa niyan, ka o ba mabinasa o tanto a rata
a ginawa.
8 Sabap sii na pengnin ko rekano a pakiilain iyo ron a mataan a pekebabayaan iyo.
9 Ka aya sabap a kiyasorati aken rekano gowani na an aken sekano katepengi ago
mapariksa aken o petomana niyo so langon a pandoan aken.
10 Apiya antawaa i perilaan iyo ko apiya antona onon na perilaan ko mambo. Na so
kiyarilaan aken, o aden a patot a perilaan, na pinggolaola ko sabap rekano sii ko hadapan
o Al Masih
11 Kaan tano di kebintai o Iblis, ka katawan tano den so manga kadiyat iyan.
So Awid a Akal i Paolo roo sa Trowas
12 Kagiya makaoma ako sa Trowas sa kapekalangkapa ko ko Mapiya a Totol makapantag

ko Al Masih na miyailay aken a miyapakadaya den o Kadnan so kapakanggalebek aken
roo,
13 Ogaid na makaaawid a akal aken ka da aken matoon so pagari aken a si Titos. Sabap
san na miyodas ako ko manga taw roo na domiyayon ako sa Masidoniya.
So manga Komikibir ko Bago a Kapasadan
14 Ogaid na penalamatan ko so Allah a lalayon tano niyan pegagaken a datar o

kipaparada a miyanga pepeges o Al Masih. Na nggolalan rektano na pembembaren o
Allah sii ko langon a taw so mamot a aya den so kapeketokawi ko Al Masih.
15 Ka datar tano o kamot o Al Masih a ipesoasoat ko Allah ago pekebembar ko siran oto
a pepanga sasabet ago so pepamakanaraka.
16 Sii ko pepamakanaraka na giyai so baw a pekapatay, na sii ko pepanga sasabet na giyai
so kamot a pekaoyag. Na antawaa i pekagaga sangkai a galebek?
17 Kena kami a ba datar o madakel a ped a manga taw a di ran dii ndagang so katero o
Allah kaan siran makalaba. Ka sii ko kaiisaisa ami ago so Al Masih na maliwanag kami i
poso ko hadapan o Allah sii ko kapepakalangkapa ami ko katero iyan a datar o ba kami
siyogo o Allah.
2 KORINTO 3
Ba aya kapekenega sii na datar o ba ami dii tekaboren peman a ginawa mi? Ba kami datar
o ped a kailangan iran so manga sorat an iran mapakikilala a ginawa iran sii rekano, o di
na manga sorat a kikilala rekami a poon rekano?
2 Kena, ka sekano den i sorat ami a minisorat ko manga poso ami a ketokawan ago
kebatiya o kalangolangon.
3 Marayag a sekano na sorat a poon ko Al Masih a inisabap ko galebek ami. Kena ini a ba
pisoratan a dawat, ka inisorat o Roh o oyagoyag a Tohan, na kena a ba misosorat sii ko
mapapapan a manga ator, ka sii ko poso o manga manosiya.
4 Aden a sarig ami ko Allah a nggolalan ko Al Masih sa benar angkai a pitero aken.
5 Di ami mapetero a aden a kapasang ami sangkai a galebek, ka di ami kegaga o sekami
bo. Aya kigaga ami san na poon ko Allah.
6 Biyaloy kami niyan a mapapatot a manga komikibir ko bago a kapasadan a kena ini a ba
mipepasod ko inisorat a manga sogoan, ka poon den ko Roh. Ka so inisorat a manga
sogoan na maawid sa kapatay, ogaid na so Roh na pepamegay sa kaoyagoyag.
7 Inigaang so manga batang angkoto a manga sogoan ko mapapapan a manga ator na

miyapayag so bantogan o Allah ko kinibegan iyan on ko Mosa. Sabap sii na sominindaw
so paras o Mosa na da katentengi o manga Israil so masindaw niyan apiya matag bo
sagad. Na o giyanan i bantogan o kepit a mipepasod ko manga sogoan a maawid sa
kapatay
8 Na lebi pen a kababantogan so kepit a mipepasod ko Roh.
9 Ka o kababantogan so kepit a pepamegay sa kasalaan na lebi pen a kababantogan so
kepit a pepamegay sa kaontol.
10 Na so aden a bantogan iyan gowani na datar o ba da a ba niyan bantogan imanto sabap
ko lebi a bantogan a pepekalangkolob on.
11 Ka o kababantogan angkoto a matag bo sagad na lebi pen a kababantogan so ketatap sa
dayon sa dayon.
12 Kagiya giyanan i sasarigan ami na pepekaraw kami tero sa masagogod.

13 Kena a ba kami datar o Mosa a siyapengan iyan a paras iyan kaan di keilay o manga
Israil so kaposan o kasindaw niyan a matag bo sagad.
14 Liyo san pen na biyota so manga pamikiran iran, na taman imanto na kikasasapengan
pen so pamikiran iran igira a pembatiyaan iran so andang a kapasadan. Da on den
makowa ngkoto a sapeng, ka aya bo a kakekowaa on na sii ko kaiisaisa iran ago so Al
Masih.
15 Apiya taman imanto igira a pembatiyaan iran so Kitab o Mosa na sasapengan pen so
manga pamikiran iran.
16 Ogaid na amay ka sengor so apiya antawaa ko Kadnan na kekowa on angkoto a
sapeng.
17 So Kadnan na aya den so Roh, na apiya anda matatago so Roh o Kadnan na ndodon so
kamaradika.
18 Sektano langon a kena a ba sasapengi a paras tano na datar o pagalongan a maaleg on
so bantogan o Kadnan. Na pegalinen tano o Roh o Kadnan kaan tano mabaloy a datar den
a ginawa niyan a sarta a lalayon pepakala so bantogan a maaleg rektano.
2 KORINTO 4
So Igagadong sii ko manga Koden a Bote
Kagiya ka maoto na sabap sa inisana rekami o Allah angkai a galebek sabap ko kapedi
iyan na di kami den kedaan sa arap.
2 Tiyalikodan ami so langon a pageemaan ago piyakayaya a manga sowasowai. Di kami
pamagakal aya pen o ba ami bibida so katero o Allah. Ka sii ko hadapan o Allah na
pepakalangkapen ami baden so tito a benar sa masagogod kaan makilala o langon a taw a
kesarigan tano iran.
3 O pageemaan so maana o Mapiya a Totol a pepakalangkapen ami na sii bo mapapagma
ko siran oto a pepamakanaraka.
4 Di siran peratiyaya ka so manga pamikiran iran na biyota o Iblis a tohan angkai a doniya
kaan iran di keilay so kaliwanag o Mapiya a Totol makapantag ko bantogan o Al Masih a
aya den kiyapayagan ko Allah.
5 Ka kena a ba giya ginawa mi i pepakitokawan ami, ka si Isa Al Masih a aya Kadnan, na
aya di ami dii teroon makapantag ko ginawa mi na manga oripen kami niyo sabap ki Isa.
6 So Allah a aya mitero sa "Sindaw so maliwanag a poon ko maliboteng," na aya mambo
sominindaw ko manga poso tano kaan iyan rektano kapakisaboti a giyangkai a kaliwanag
na aya den so bantogan o Allah a somisindaw sii ko paras o Al Masih.
7 Ogaid na datar kami bo o manga koden a bote a ron igagadong angkai a kakawasaan
kaan mailay a so lebi a mala a kabatowa na poon ko Allah a kena a ba sii rekami poon.
8 Madakel a ipekerasay ami ogaid na da kami den kabangeni; pekedowadowaan kami
ogaid na da kami den kadai sa arap;
9 Pesetroon kami ogaid na da kami den kaawai; peranegen kami ogaid na da kami den
mabinasa.
10 Giyangkai a manga lawas ami na lalayon dii mbagian ko kiyapatay i Isa sa apiya anda
kami pesong kaan mailay so kaoyagoyag i Isa sii ko lawas ami.
11 Ka sii ko kaooyagoyag ami na lalayon kami sasagaden o kapatay sabap ki Isa kaan
mailay so kaoyagoyag i Isa sii ko manga lawas ami a aden a kapetay niyan.
12 Aya maana ini na sii rekami na so kapatay na aya pakagaga, ogaid na sii rekano na aya
pakagaga on na so kaoyagoyag.
13 Misosorat ko Kitab a "Miyaratiyaya ako; sabap sii na mitero ako." Sekami na datar
iyan sa paratiyaya, ka so di ami dii katero na sabap ko kapeparatiyaya ami.
14 Ka katawan ami a so Allah a miyoyag ko Kadnan a poon ko miyamatay na pagoyagen
kami niyan mambo a ped i Isa, na pekadarpaan kami niyan a ped iyo sii ko hadapan iyan.
15 Langon ai na sabap ko kamapiyaan iyo kaan amay ka terima so pekitaralo a madakel a
taw ko limo o Allah na pekitaralo mambo so kapepanalamat iran a ipembantog ko Allah.
16 Sabap sii na di kami den kedaan sa arap. Apiya pen pekeronot so manga lawas tano na
dii kambagowan so niyawa tano gawii gawii den.
17 Na giyangkai a somasagad ago makep a manga karomasayan tano na pepekatiyagar
rektano ko da a ikepos iyan a bantogan a lebi a mala a di so manga karomasayan.
18 Kagiya ka maoto na aya tano pagiimanen na kena a ba so manga nganin a pekeilay, ka
so di keilay. Ka so manga nganin a pekeilay na matag bo somasagad, ogaid na so manga
nganin a di keilay na da a ikepos iyan.
2 KORINTO 5
So Bago a manga Lawas
Ka katawan tano a amay ka kegeba so babalingan tano a aya tano lawas sii sa doniya na
aden a kebalingan tano sa kasorgaan. Giyanan so da a ikepos iyan a kebalingan a
miyatiyagar o Allah a kena a ba pimbaalan o manosiya.
2 Imanto na makapeperego tano a ipekedali tano so kisoloten rektano ko kebalingan a
3 Ka amay ka misolot rektano den ai na di tano den keilay i ba da a nditaren tano.
4 Sii ko kapakababaling tano pen sangkai a kadodoniyai a barombarong na makapeperego
tano ago kareregenan. Kena a ba tano kabaya i ba tano kaawai angkai a lawas tano, ka aya
tano kabaya na misolot rektano so kebalingan sa kasorgaan kaan so aden a kapetay niyan
na masenep o kaoyagoyag.
5 So Allah i mitiyagar rektano sangkai a angin, na bigan tano niyan ko Roh iyan a aya
inipemataan ko katomana niyan on.
6 Kagiya ka maoto na lalayon kami makasasarig, na katawan ami a sii ko kakakaden tano
sangkai a lawas na mabebelag tano ko Kadnan.
7 Ka aya ipepaginetaw tano na so paratiyaya a kena a ba so pekeilay tano.
8 Peteroon ko peroman a makasasarig kami, na tomoon ami a awaan ami angkai a manga
lawas ago maling kami ko Kadnan.
9 Sabap sii na aya singanin ami na so kapesowasowata mi rekaniyan apiya sii kami pen
sangkai a lawas o di na mabebelag on.
10 Ka disomala a pekadarpaan tano langon ko hadapan o korsi a pengokoman o Al Masih
kaan matarima o oman i isa so miyapetot on sabap ko miyanggolaola niyan a mapiya o di
na marata isako kasisii niyan ko lawas iyan.
So Kingginawain ko Allah a nggolalan ko Al Masih
11 Kagiya ka maoto na sabap sa maaleken kami ko Kadnan na pepagayokan ami so

manga taw. Katawan piyapiya o Allah so parangay ami, na iinamen aken a katawan iyo
mambo sii ko manga poso iyo.
12 Kena a ba ami pepanamari peroman a kipengandagen ami sa manga ginawa mi, ka
pembegan ami sekano baden sa daowa sa kipengandagen iyo rekami kaan iyo masembag
so siran oto a di ran dii tekabor so pangkatan iran ko kapekeilaya on o taw, a kena a ba so
madadalem ko poso iran.
13 O pembetengen kami na sabap sa an mabantog so Allah, na o matatanor kami i
pamikiran na sabap ko kamapiyaan iyo.
14 Ka aya rekami makapapaar na so kapekebabayai rekami o Al Masih, ka miyatangked
sa ginawa mi a miyatay so isa a mama a inisambi ko langon a taw. Kagiya ka maoto na
miyakambagian so langon a taw ko kiyapatay iyan.
15 Na miyatay sekaniyan para ko langon a taw kaan siran oto a oyagoyag na di den
makapeginetaw para ko ginawa iran, ka para rekaniyan a miyatay a miyaoyag bo sabap
kiran.
16 Sabap sii na ipoon imanto na kena a ba so kamamanosiyai ko taw i kikilala ami ron.
Apiya gowani na so kamamanosiyai ko Al Masih na aya ami ron inikilala na kena den a
ba aya on pekikilala imanto.
17 Kagiya ka maoto na apiya antawaa i maiisaisa sekaniyan ago so Al Masih na bago
sekaniyan den a kaaden. Miyaipos den so andang, na miyakatalingoma den so bago.
18 Langon ai na poon ko Allah a miningginawai kami niyan a nggolalan ko Al Masih, na
bigan kami niyan sa kapepakalangkapa sangkai a kiningginawain iyan ko manga taw a
giyai:
19 Gowani na madadalem so Allah ko Al Masih a dii makingginawai ko doniya a kena a
ba niyan pembilangen so manga dosa o manga taw a ikesala iran, na inisana niyan rekami
so kapepakalangkapa ko kiningginawain iyan kiran.
20 Kagiya ka maoto na sekami i manga ambasador o Al Masih, na datar bo o ba so Allah

i pepegayok rekano a nggolalan rekami. Na pepagayokan ami sekano sii ko ingaran o Al
Masih a pakingginawai kano ko Allah.
21 So Al Masih a da a dosa niyan na inibilang o Allah a aden a dosa niyan para rektano
kaan sii ko kaiisaisa tano ago sekaniyan na mibilang a rek tano so kaontol o Allah.
2 KORINTO 6
Kagiya manga salinggogopa kami o Allah na pagakolen ami rekano a di niyo
pendarainonen so limo o Allah a iniraot rekano.
2 Ka pitero iyan a
"Sii ko masa a kikelimoon aken reka na inampon aken seka,

na sii ko gawii a kapenabet na inogopan aken seka."
Na pamakinega niyo, ka imanto so masa a kikelimoon reka o Allah. Imanto so gawii a

kapenabet!
So manga Kamaregenan i Paolo
3 Da den a di ami dii nggolaolaan a ba ikebinasa o sarig o apiya antawaa taw kaan da a
kidaway ko galebek ami.
4 Aya mataan na sii ko langon a okit na pepakiilay ami a manga pepanalagad kami ko
Allah a nggolalan ko mala a kapanginsabar ami sii ko manga karomasayan, manga
kamaregenan, ago manga tiyoba.
5 Piyamadasan kami, kiyalaboso ago pisamok o madakel a taw. Miyanamar kami
nggalebek ago omanoman na da a torog ami ago kakan.
6 Pepakiilay ami pen a pepamanalagad kami ko Allah a nggolalan ko kasosoti ami, katao,
kasebar, kapedi, so Soti a Roh, so tito a kapekebabayai ko ped,
7 So dii kateroa ko benar ago so kabatowa o Allah. So kapagiinontolan ami na aya ami
gomaan ko kanggogobat ami ago so kapelindinga ko ginawa mi.
8 Miyabantog kami ago piyakakeya; piyakaito kami ago miyapodi; inibilang kami a
manga bokeg apiya pen di kami dii tero sa benar.
9 Datar kami o kena a ba makikilala apiya pen makikilala piyapiya. Datar kami o
pakapapatain ogaid na oyagoyag bes. Apiya piraneg kami na da mabono.
10 Apiya makamboboko kami na lalayon den pekebabaya. Apiya pen manga miskin
kami, na madakel a di ami dii mapakakewasa. Apiya da den a rek ami na rek ami bes so
langon taman.
11 So pitero ami rekano, manga taw sa Korinto, na da den a ba on pageemaan, na

kalelekaan so manga poso ami sii rekano.
12 Kena a ba mi pegerena so kapekebabayai ami rekano, ogaid na pegerenen iyo so
kapekebabayai niyo rekami.
13 Na petero ako sii a datar o ba sekano na manga wata aken: badalen iyo rekami so
kalekai niyo mambo piyapiya ko manga poso iyo.
Lalangan ko Kaagaka reka o di Pemaratiyaya
14 Di kano pakipemagepeda ko di pemaratiyaya, ka di niyo siran royod. Ba keisaisa so

maontol ago so marata? Andamanaya i kapakapetepi o maliwanag ago so maliboteng?
15 Andamanaya i kapakapegayon o Al Masih ago so Iblis? Antonaa i mapembagian o
peparatiyaya ago so di peratiyaya?
16 Andamanaya i kapakapegopakat o Timplo o Allah ago so manga barahala? Ka sektano
so timplo o oyagoyag a Tohan, ka pitero o Allah a
"Sii ako kiran keden ago melalakaw ako a lomolook iran.
Kebaloy ako a Tohan iran na kebaloy siran a manga pagtaw aken.
17 Kagiya ka maoto na awai niyo siran
na pakimbebelag kano kiran, a tig o Kadnan.
Di niyo sekoa so maresik, ka terimaan ko sekano.
18 Kebaloy ako a Ama iyo
na kebaloy kano a manga wata aken a mama ago babay,
a tig o Kadnan a Lebi a Maapaar."
2 KORINTO 7
Sabap sangkai a manga initopa rektano, manga pekebabayaan ko, na lompiyon tano so
manga ginawa tano ko langon taman a pekaresik ko lawas tano ago niyawa, na panamaran
tano a matarotop so kasosoti tano sii ko kipekeleken tano ko Allah.
So Kapipiya a Ginawa i Paolo
2 Begi kami niyo sa darpa sii ko manga poso iyo. Da a miyanggolaola mi a ribat ko apiya
antawaa. Da a taw a ba ami pimarataan aya pen o ba aden a siyalimbotan.
3 Da aken ai teroa kaan aken sekano makokom, ka miyatero aken gowani a madadalem
kano ko manga poso ami, matay kami o di na oyagoyag.
4 Mala a sarig aken rekano ago tanto aken sekano a ipepangandag. Sii ko langon a
karomasayan ami na tanto a mapipiya a ginawa ko ago sayana ako a pekebabaya.
5 Kagiya makaoma kami sa Masidoniya na da kami den makadeke, ka pepakaregenan

kami ko mbalabala. Mililibet rekami so manga kambobono na aden a manga kalek a sisii
ko poso ami.
6 Ogaid na so Allah a pepakapiyaan iyan so kikaboboko na piyakapiya niyan a ginawa mi
a nggolalan ko kiyapakaoma i Titos.
7 Na kena bo a ba so kiyapakaoma niyan i inipakapiya a ginawa mi, ka so pen so pitero
iyan makapantag ko kiyapakapiyaa niyo sa ginawa niyan. Ka piyanotol iyan rekami so
kipekedaliin iyo raken, so kapakamboboko iyo, ago so kapakatitiyagar iyo sa
kapagabanga niyo raken, na giyoto i lebi a ipekebabaya aken.
8 Ka apiya pen inikarata a ginawa niyo so sorat aken rekano na di ako pesendit sa
kinisoraten ko ron. Misendit ako gowani kagiya katokawan ko a giyangkoto a sorat na
inikarata a ginawa niyo sa da bo matey.
9 Ogaid na mapipiya a ginawa ko imanto a kena a ba sabap sa piyakakerata aken a ginawa
niyo, ka kagiya so kiyakerata a ginawa niyo na aya niyo initeobat. Giyangkoto a rata a
ginawa na inosar o Allah, na sabap san na da kami rekano makabinasa.
10 Ka so rata a ginawa a poon ko Allah na ron pekisabap so dii kapakateobat, ago
pepekaagak rekano ko kakesabet iyo a di kano ron den makapesendit. Ogaid na
pepekapatay so rata a ginawa a kadodoniyai.
11 Ka ilaya niyo man so kiyaondasan angkoto a rata a ginawa a poon ko Allah sii rekano;
a so kapeketerang iyo sa kipetindegen iyo sa ginawa niyo, so kararangit, so kalek, so
kadali, so kasigi, ago so kapakatitiyagar sa kandanega niyo ko marata i sowasowai. Sii
sangkai langon na piyakiilay niyo a da a ba niyo kidaway sangkai a masosowa.
12 Na apiya pen inisorat aken rekano angkoto a sorat na kena a ba sabap ko mama a
miyaribat o di na sabap rekaniyan a pinggolaolaan sa ribat, ka sabap sa an mapayag
rekano sii ko hadapan o Allah so tito a kapekebabayai niyo rekami.
13 Giyanan i inipakapiya a ginawa mi.
Na kena bo a ba giya kiyapakapiya o ginawa mi, ka lebi kami pen a miyababaya sii ko
kiyailaya mi ko kapekebabaya i Titos, ka miyapakapiya a ginawa niyan o langon iyo.
14 Inipangandag aken sekano sii rekaniyan na da ako niyo kapakayai. Benar den so
langon o pitero ami rekano, na datar oto mambo a so inipangandag ami ki Titos mipantag
rekano na miyapariksa iyan a mataan a benar.
15 Na pepekala so kapekebabayai niyan rekano igira a peketademan iyan so
kapakatitiyagar iyo sa katomana ago katarimaa niyo rekaniyan a katatabaden kano sa
kalek.
16 Na pekebabaya ako, ka kesarigan aken sekano sa tarotop.
2 KORINTO 8
Kapamemegay o Pepamaratiyaya
Kabaya ami a katokawan iyo, manga magariyari, so miyanggolaola o Allah para ko

manga Agama sa Masidoniya sabap ko limo iyan.
2 Tanto siran a tiniyoba o manga kamaregenan a kiyaokitan iran, ogaid na sabap ko tanto
a mala a kapekebabaya iran na minitaralo so kiyapamemegay iran, apiya pen tanto siran a
manga miskin.
3 Ipeseksi aken a miyamemegay siran sa taman sa miyagaga iran ago lawan san pen, ka
rek iran den oto a kabaya.
4 Inakol iran rekami sebenar a makambagian siran ko katebangi ko manga kaom o Allah
roo sa Yodiya.
5 Na pinggolaola iran so lawan pen ko iinamen ami, ka paganay ron na piyalad iran a
ginawa iran sii ko Kadnan na go bo sii rekarni mambo a aya kiyatoman o kabaya o Allah.
6 Sabap sii na inakolan ami si Titos a aya mipoon sangkai a galebek sa ipendayon iyan,
ago pagogopan kano niyan mambo sa kapasada niyo sangkai a kapepamemegay niyo.
7 Lomalawan kano sii ko langon taman; a so paratiyaya, kapananaroan, katao, so
kateterangi rekano, ago so kapekebabayai niyo rekami. Kagiya ka maoto na iktiyar kano
kaan kano mambo makalawan sangkai a galebek a kapepamemegay.
8 Kena a ba ko pesogoon a nggolaolaa niyo ai, ka pegalowin aken baden so kateterangi ko

ped a manga Agama sangkai a galebek kaan aken maamad o totoo den so kapekebabayai
niyo ko ped.
9 Ka katawan iyo so limo o Kadnan tano a Isa Al Masih, a apiya pen kawasa sekaniyan na
biyaloy niyan a ginawa niyan a miskin sabap rekano kaan kano mabaloy a manga kawasa
a nggolalan ko kamimiskini ron.
10 Giyai i pamikiran ko makapantag sii: aya tomo na mapasad iyo imanto so galebek a
pipoonan iyo isako miyaipos a ragon. Sekano i miyona a kena bo a ba giya
kapepamemegay niyo, ka so kateterangi rekano ron.
11 Na tarosen iyo ago pasada niyo angkai a galebek! Teranga niyo a ginawa niyo sa
kapasada niyo ron a datar o kiyapooni niyo ron, na pamemegay kano taman sa kegaga
niyo.
12 Ka o kateterangi kano megay na terimaan o Allah so apiya antonaa i kegaga niyo
megay, ka kena a ba paliyogat a kambegay niyo o da a rek iyo.
13 Kena a ba ko antap a pakareregenan kano kaan katabangi so ped, ka kabaya aken a

makatitinabanga kano baden.
14 Ka sabap sa mala a rek iyo imanto na patot a tabangan iyo so siran oto a kakokorangan
kaan amay ka sekano peman i kakokorangan ago mala a rek iran na tebangan kano iran.
Sii sangkai a okit na mamakatitinabanga kano.
"So miyakatimo sa mala na da kasobrai,

na so miyakatimo sa maito na da kakorangi.
Si Titos ago so manga Ped iyan
16 Penalamatan ami so Allah, ka biyaloy niyan si Titos a datar ami sa kabaya sa

kapegogopi rekano.
17 Ka kena bo a ba niyan tiyarima iyan so inakol ami ron, ka tanto sekaniyan a
kasosomayodan sa kasong iyan rekano san sa iklas.
18 Pekaonoten ami ron so pagari tano a seselaan o langon a Agama sabap ko
kapepakalangkapa niyan ko Mapiya a Totol.
19 Liyo san pen na initoro sekaniyan o manga Agama a magonot rekami sii ko
kapegawidi ami sangkai a pamemegayan. Di ami ini dii nggolaolaan kaan mabantog so
Kadnan ago an mapakiilay a kebaya kami mogop.
20 Tanto kami a miiktiyar kaan da a ba makasagda rekami ko kakikibira ami sangkai a

mala a pamemegayan.
21 Ka aya kabaya ami na so kanggolaola sa ontol a kena bo a ba sii ko hadapan o Kadnan,
ka sii mambo ko kapegilaya on o manga taw.
22 Sabap san na pekaonoten ami kiran mambo so ped a pagari tano. Madakel a
kiyatepengi ami ron, na miyailay ami so kateterangi ron tomabang. Na lebi sekaniyan pen
a kateterangan imanto sabap ko mala a kasasarigi niyan rekano.
23 Makapantag ki Titos na ped aken sekaniyan ago salinggogopa ko galebek ami sii
rekano. Na makapantag ko manga pagari tano a magonot rekaniyan na manga siyogo
siran o manga Agama, na pepekibantog ko Al Masih so manga galebek iran.
24 Kagiya ka maoto na pakiilain iyo kiran so kapekebabayai niyo kiran kaan matangked
ai o manga Agama ago katokawan iran a patot so kipepangandagen ami rekano.
2 KORINTO 9
Manga Tabang ko ped a Pepamaratiyaya
Aya benar na di den kailangan a soratan ko sekano makapantag sangkai a tabang ko

manga kaom o Allah roo sa Yodiya,
2 Ka katawan aken a kateterangan kano sa kapagogop iyo, na inipangandag aken sekano
ko manga taw sa Masidoniya. Pitero aken kiran a sekano a manga taw sa Grisiya na
makatitiyagar mogop gowani bo ko miyaipos a ragon. Na so kateterangi rekano i
miyakapangoyat ko kadakelan kiran.
3 Ogaid na pekasongen aken rekano angkai a manga pagari tano kaan di keolai so
kipepangandagen ami rekano makapantag sii, ago an kano makatitiyagar megay a so den
so miyatero aken.
4 Ka o aden a magonot raken a manga taw a poon sa Masidoniya ago mapariksa iran a
kena bes o ba kano makatitiyagar na mataan a keyaan kami (liyo pen ko kayaan a
kegedam iyo) sabap ko kiyasarigi ami rekano.
5 Kagiya ka maoto na miyapamikir aken a di mipendarainon a pekaonaan ko san
makasong angkai a manga pagari tano kaan iran marigra daan so pamemegayan a initopa
niyo kaan matitiyagar den ko kapekaoma aken san. Na keilay sii a migay kano sabap ko
kabaya iyo a kena a ba sabap sa ba kano tigel.
6 Tanodi niyo a so peseod sa maito, na maito mambo a maperagon iyan, na so peseod sa

madakel na makaperagon sa mala.
7 Patot a pamemegay so oman i isa ko papasaden iyan sa ginawa niyan a kena a ba
pekerataan o pamikiran iyan o di na ba sabap sa ba petegela, ka so Allah na pekebabayaan
iyan so mababaya mamemegay.
8 Kegaga o Allah a kipembegan iyan rekano ko lawan pen ko kailangan iyo sii ko oman i
masa ago so oman i kapakambebetad iyo kaan mala a kibegay niyo mambo ko oman i
mapiya a galebek.
"Tanto a madakel a ipepamegay niyan ko manga miskin.

Tatap so kaontol iyan sa taman sa pakataman."
10 Na so Allah a pembegay sa oniin ko peseod ago so paan a kekan o manga taw na

imbegay niyan rekano mambo so langon a oniin a kailangan iyo, ago pekadakelen iyan
pen so manga onga o kapepemegay niyo.
11 Ka mbegan kano niyan sa tanto a mala sii ko oman i okit kaan kano makapepamegay
sii ko oman i masa. Na madakel a penalamat ko Allah sabap ko manga pamemegayan iyo
a ketarima iran a nggolalan rekami.
12 Ka giyangkai a pamemegayan na kena bo a ba giya kapepekabegay ko makokorang ko
manga kaom o Allah, ka pekiarong pen ko mitataralo a kapepanalamat ko Allah.
13 Na sabap ko kapemamataani ko gagaw niyo sangkai a galebek na madakel a
pembantog ko Allah sabap ko kapetomana niyo ko Mapiya a Totol makapantag ko Al
Masih a di niyo dii matero a miyatarima iyo, ago sabap mambo ko kaginawa niyo ko
kapepamegay niyo sii kiran ago so langon a taw.
14 Na sii ko kipepangangarapanen iran rekano na kebabayaan kano iran sabap ko mala a
limo a piyakiilay o Allah a nggolalan rekano.
15 Panalamatan tano so Allah sabap ko pamemegayan iyan a lebi pen a piyakamemesa ko
kakeosaya on!
2 KORINTO 10
Inipanindeg i Paolo so Galebek iyan
Saken a si Paolo a makarorondana kon igira a ped rekano ago mawaraw kon igira a
mabebelag rekano na pagakolan ko sekano a nggolalan ko kapanginginsokor ago kapedi o
Al Masih.
2 Pengnin ko rekano a di ako niyo tegela makakewaraw amay ka somong ako san, apiya
pen iinamen aken a disomala a pekawaraw ako sii ko manga taw a ipesendit iran rekami a
aya ami kon ipepaginetaw na manga antap a kamamanosiyai.
3 Ka apiya pen aya kapekeoyagoyag ami na sii ko lawas a manosiya na so di ami dii
kapakitidawa na kena a ba sii ko kamamanosiyai a okit.
4 So manga gomaan a pegosaren ami ko dii kapakitidawa na kena a ba kamamanosiyai,
ka so manga ala i kabatowa a manga gomaan o Allah a pepekatempag ko manga babager
a kota.
5 Peminasaan ami so ribat a manga daowa ago penggebaan ami so oman i ipepangandag
o taw a pepekaalang ko kapeketokawi iran ko Allah. Pepegesen ami so oman i pamikiran
ka pembalowin ami a petoman ko Al Masih.
6 Na amay ka matarotop so kapetoman iyo na makatitiyagar kami sa kandanega mi ko
oman i isa a da makapangongonotan.
7 Ilaya niyo man angkai a marayag! O aden a ibibilang iyan san a rek o Al Masih na
tanodi niyan a o sekaniyan na rek o Al Masih na datar ami mambo.
8 Apiya malo minitaralo a kipepangandagen aken ko kapaar ami a inibegay rekami o
Kadnan para ko kapakabagera rekano a kena a ba so kabinasaa rekano na di aken ai ikeya.
9 Di aken kabaya o ba niyo pipikira a ba ko sekano petepengi mangangalek a nggolalan
ko manga sorat aken.
10 Aden a mitero san sa "Manga pepened ago mala i bager so manga sorat i Paolo, ogaid
na igira a ped tano sekaniyan na malobay sekaniyan ago da a lalaw o manga katero iyan!"
11 Patot a katokawan angkoto a taw a so inisorat ami igira a mabebelag kami rekano na
giyanan i penggolaolaan ami igira a maaped kami rekano.
12 Benar den a di ami keraw o ba ami senggain o di na pelagiden a ginawa mi ko siran

oto a pepodin iran a ginawa iran. Manga lalong siran! Ka aya ipetakes iran ko manga
ginawa iran na so manga ped iran, na di ran dii pakapelagilagiden so manga ginawa iran.
13 Ogaid na so makapantag rekami na di kitaralo so kapengandag ami, ka aya ami bo
mipengandag na so galebek a piyakisangan rekami o Allah a maaped on so galebek ami
san rekano.
14 Na da ami lepasa so temanaan o piyakisangan rekami isako somong kami rekano a
maawid ko Mapiya a Totol makapantag ko Al Masih.
15 Na kena a ba ami pepangandagen so galebek o manga ped a makalelepas ko temanaan
a inisenggaay rekami o Allah. Ogaid na iinamen ami a sii ko kapepekala o paratiyaya niyo
na makanggolaola kami sa lebi pen ko miyanggalebek ami sii rekano a makasosoled ko
temanaan a inisenggay rekami o Allah.
16 Mapasad ai na mapekalangkap ami so Mapiya a Totol ko ped a manga inged a
makalelepas rekano a di ami den ipengandag so galebek a miyanggolaola ko inged a
kiyanggalebekan den o ped.
17 Kabasa o Kitab a "So taw a kebaya mangandag na patot a ipengandag iyan so

Kadnan."
18 Ka so taw a ketarima a mapiya na kena a ba so pepodi ko ginawa niyan, ka so bo so
pepodin o Kadnan.
2 KORINTO 11
Si Paolo ago so di Benar a manga Siyogo
Kabaya aken a napin iyo raken so maito a kalalalongan. Kapedipedi kano bo na napii ako
niyo!
2 Pepanaodan ko sekano a datar o kapepanaodi rektano o Allah, ka datar kano o da
kabatali a raga a minipesadana aken a pakipengaroma ko ko isa a mama a so Al Masih.
3 Ogaid na ipekewan aken o ba madadag so manga pamikiran iyo ago awaan iyo so tito a
kapepangongonotani ko Al Masih sa iklas ko poso iyo, a datar o kiyaokitan o Sitihawa a
piyagakalan o nipay a nggolalan ko manga kabokegan iyan.
4 Ka o aden a pekaoma rekano a pepakalangkap sa salakaw a Isa a kena a ba si Isa a
pepakalangkapen ami, o di na o terimaa niyo so isa a niyawa ago isa a totol a mibibida ko
Roh ago Mapiya a Totol a miyatarima iyo na ba niyo den ai pepiyapiyai sesabar!
5 Giyangkoto a pakalalawanen iyo a "manga siyogo," na mapipikir aken a kena a ba ako

kiran mababa apiya maito bo!
6 Masiken a kena a ba ako mapasang i katero, ogaid na kena a ba korang so katao aken,
na piyakarayag ami rekano ai piyapiya sii ko langon a maoolaola.
7 Piyakalangkap aken rekano so Mapiya a Totol o Allah sa da a piyakibayad aken rekano,

ka ba ako den miyangalimbabaan kaan kano miporo. Ba ako san miyaribat?
8 Sii ko masa a kaaped aken rekano na kiyasokayan ako o ped a manga Agama, na lagid
bo o piyanekewan ko siran kaan aken sekano katabangi.
9 Na isako makokorang so kaoyagan aken na kena a ba ako miyaperikor o apiya antawaa,
ka so manga magariyari a miyamakasong san a poon sa Masidoniya na inowit iran raken
so langon a kailangan aken. Ndatar gowani ago so pemakatalingoma na di ako rekano den
pangni sa tabang.
10 Datar o mataan den a madadalem raken so tito a benar o Al Masih na mataan den
mambo a da den a pekaren sangkai a kapepangandag aken sii ko dalem a inged a Grisiya.
11 Ino aken ai dii teroa? Ba sabap sa kena a ba aken sekano pekebabayai? Katawan o
Allah a mataan a pekebabayaan ko sekano!
12 Iteros aken so di aken dii nggolaolaan imanto kaan da den a ba mipengandag o siran
oto a di ran dii teroon a melagid so galebek iran ago so rek ami.
13 Kena a ba siran tito a manga siyogo; di siran dii mamokeg makapantag ko galebek iran
ago pepamanasayan siran sa manga siyogo o Al Masih.
14 Na kena a ba ini ipememesa, ka apiya so Iblis na somasayan sa malaikat a
pepekaliwanag.
15 Kagiya ka maoto na kena a ba ipememesa o so manga pepanalagad rekaniyan na
pepamanasayan sa manga pepanalagad ko kaontol. Sii sa kaposan na ketarima iran so
miyapetot ko manga galebek iran.
So manga Karomasayan i Paolo sii ko Kasosogoi ron
16 Peromanan ko tero a di pepamikira o apiya antawaa i ba ako lalong. Ogaid na o

pepamikira niyo anan na tarimaa ko niyo baden a datar o lalong kaan ako makapangandag
sa maito a datar o manga ped.
17 So di aken dii teroon na kena a ba aya raken dii pakitero o Kadnan. Sii sangkai a
kapangangandag na mataan a di ako dii tero a datar o lalong.
18 Kagiya madakel a dii mamangandag a sii bo sabap ko kadodoniyai a daowa na
pengandag ako mambo.
19 Mababaya kano sesabar ko manga lalong, ka sayana kano a manga oonganen!
20 Ba niyo den pesebara so apiya antawaa a makapapaar rekano, pegasab rekano,
pepakalabit rekano, pepagitowito rekano, o di na petepi rekano sa paras.
2 Ikeya aken tero a inikalek aken rekano anan nggolaola!
Ogaid na o aden a pekaraw mangandag na pekaraw ako ron mambo. Di ako dii tero a
lagid o lalong.
22 Ba siran manga Yahodi? Na saken mambo. Ba siran manga taw sa Israil? Na saken
mambo. Ba siran kiyababadan ko Ibrahim? Na saken mambo.
23 Ba siran manga pepanalagad ko Al Masih? Na di ako dii tero a lagid o pembetengen;
lebi ako a mapiya a pepanalagad a di siran! Lawan pen so kiyandokaw aken; madakel pen
a kiyakalaboso aken a di siran; labaw pen a kiyapamadasi raken a di siran ago madakel a
kiyapakarongaw aken ko kapatay.
24 Miyakalima ako kapamadasi o manga Yahodi sa tetelo polo ago siyaw a lepad.
25 Miyakatelo ako kapelalambiti a manga bentol; miyakaisa ako karobaki a manga ator;
miyakatelo ako makaokit ko kinigaled o kapal a pageedaan aken, na miyakaisa a
pekeanodanod ako den sa kalodan ko miyakadowa polo ago pat ka oras.
26 Sii ko madakel a kiyalalakaw aken na kiyaokitan aken so manga piligro sii ko manga
lawasaig, sii ko manga tanganiyaya, sii ko datar aken a manga Yahodi, sii ko kena a ba
manga Yahodi, sii ko manga siti, sii ko mitataog a kaden, sii ko kalodan, ago sii ko di
benar a manga peparatiyaya.
27 Miyanamar ako nggalebek ago tanto a mindokaw. Omanoman ako di torogen, pekeor
ako, pekewaw, tetenggaon, ago kakokorangan sa kaoyagan ago nditaren.
28 Na liyo pen ko ped a manga nganin a di aken pagalowin na kapepenedan ako oman
gawii o manga iaawid a akal aken mipantag ko langon o manga Agama.
29 Ka o aden a malobay na pekegedam aken mambo so kalobay niyan. Na o aden a
miyapakandosa na ikerarangit aken so inikadosa niyan.
30 O disomala a pengandag ako na ipengandag aken so manga nganin a ron pekeilay so
kalobay aken.
31 So Tohan ago Ama o Kadnan a Isa a pepodin sa taman sa pakataman na katawan iyan
a kena a ba ako pepamamokeg.
32 Isako ndodoo ako pen sa Damasko na so gobirnador a kababaan o Dato Aritas na
piyakinggordiyaan iyan so manga pintoan sa siti kaan ako niyan madakep.
33 Ogaid na inalogan ako a tatagoon sa reban a piyakaokit ko rowasan o pangeleban o
siti, na kiyapalagoyan aken so gobirnador.
2 KORINTO 12
So Pangingilain i Paolo ago so Sakit ko Lawas iyan
Disomala a pengandag ako pen apiya pen di patot. Pagalowin ko imanto so manga
pangingilain ago manga nganin a miyapayag raken o Kadnan.
2 Aden a katawan ko a mama a peparatiyaya ko Al Masih a miyakasapolo ago pat ragon
den ai a kinibayaon on ko ikatelo pangkat a kasorgaan. Di aken katawan o ba minibayaw
so niyawa niyan a rakes o lawas iyan o di na o ba on miyakaliyo. So bo so Allah i matao
ron.
3 Peromanan ko tero a katawan ko a giyangkai a mama na minibayaw sa kasorgaan, ogaid
na di aken katawan o so den so lawas iyan i minibayaw o di na so bo so niyawa niyan. So
Allah i matao ron.
4 Roo sa kasorgaan na miyaneg iyan so manga nganin a di kiropa sa katero ago di
kepakay i ba mapetero o manosiya.
5 Pengandag ako makapantag ko datar oto a mama, ogaid na di aken ipengandag a ginawa
ko, liyo ron so makapantag ko manga kalobay aken.
6 O pengandag ako na di aken pipikiren a pekelalolalong ako, ka peteroon ko so benar.
Ogaid na di ako pengandag, ka di aken kabaya o ba aden a makapamikir sa makapantag
raken a ba lawan pen ko pekeilay niyan a manga olaola ko, o di na pekeneg iyan a di aken
dii teroon.
7 Na an ako di makapengimporoan sabap sangkai a manga piyakamemesa a miyapayag

raken na kiyatagon a lawas aken sa sorok, a siyogo o Iblis, a makaperasay raken kaan ako
di makapengimporoan.
8 Miyakatelo ako mangangampedian ko Kadnan mipantag sangkai a sakit kaan
mapakaawa ko lawas aken,
9 Ogaid na aya inisembag iyan na "Katatangkaan reka so limo aken, ka ketarotop so bager
aken sii ko taw a da a bager iyan." Sabap san na ipekebabaya aken so kipepangandagen
aken ko manga kada a bager aken kaan makakaden raken so bager o Al Masih.
10 Kagiya ka maoto na pekebabaya ako igira a da a bager aken, pepanonongkaan ako,
kakokorangan, pesetroon, ago kareregenan sabap ko Al Masih ka kagiya igira a da a bager
aken na mabager ako.
So Kiaawiden a Akal i Paolo ko manga taw sa Korinto

11 Pekelalolalong ako sangkai a kapepangandag aken, ogaid na tigel ako niyo. Aya patot
na sekano i mbantog raken, ka apiya pen o da a bali aken na kena a ba ako mababa apiya
maito bo sangkoto a pakalalawanen iyo a "manga siyogo."
12 Sii ko kaaped aken rekano na tanto ako a masabar, na inembaalan aken so langon a
manga nanao, manga piyakamemesa ago manga ala i kabatowa a galebek a aya
inipemataan ko kiyasogoa raken o Allah.
13 Antonaa i da ko nggolaolaa san rekano a pinggolaola ko sii ko ped a manga Agama
liyo ko da ko rekano kapakiperikor? Rilai ako niyo sangkai a ribat aken!
14 Ikatelo den ai a kipembentelen ko rekano na di ako rekano makiperikor, ka sekano i

masisingayo aken, a kena a ba so manga pirak iyo. Ka di patot o ba so manga wata i
pegeper ko manga lokes iran, ka so manga lokes na aya pegeper ko manga wata iran.
15 Ikebabaya aken so kapenggastowa ko ko langon a rek aken a rakes o ginawa ko kaan
kano kaogopi. Ba niyo bes di mbadali so mala a kapekebabayai aken rekano?
16 Sii rekano na aden a dii tero sa apiya benar a da ako niyo karikoren na tagakal ako, na
piyagakalan aken sekano baden.
17 Andamanaya i kiyanggolaolaa ko sii? Ba aken sekano liyabiti a nggolalan ko apiya
antawaa ko manga taw a piyakasong aken rekano?
18 Inakolan aken si Titos a somong rekano san na piyakaonot aken rekaniyan so pagari
tano. Ba kano siyalimboti i Titos? Sekaniyan ago saken na ba di ndatar i antap ago
olaola?
19 Masiken a pipikiren iyo a ipetindeg ami a ginawa mi sii rekano. Kena, ka aya mi dii
teroon na so di rekami dii pakitero o Al Masih ko hadapan o Allah. Na so langon a di ami
dii nggolaolaan, manga pekebabayaan ko, na an kano makapepangosor.
20 Ipekewan aken a amay ka somong ako san na o ba aken sekano maoma a mibibida ko
kabaya aken mipantag rekano na o ba niyo katokawi a mibibida ako ko kabaya iyo
mipantag raken. Ipekewan aken o ba ko katokawi a sisii rekano so kapepawala, kadengki,
kararangit, kapelalawana, kapagitowito, kapamaganta, katekabor, ago kariribogar.
21 Ipekewan aken a amay ka somong ako san na o ba ako pakakeyaa o Allah sii ko
hadapan iyo, na pekagoraok ako sabap ko madakel a miyamakandosa gowani a da iran
den talikodi so kambarabowat maasiya, kasebo, ago mitataralo a kababaya a ininggolalan
iran.
2 KORINTO 13
Moripori a manga Lalangan ago manga Salam
Ikatelo den ai a kimbentelen ko rekano. Kabasa o Kitab a "Apiya antonaa a dimanda na

paliyogat a pemataanan o dowa o di na telo a manga saksi."
2 Gowani ko ikadowa ko rekano mentel na liyalangan aken so siran oto a
miyamakandosa. Na imanto a mabebelag ako rekano na pelalangan ko siran peman ago so
langon o manga ped; amay ka komasoy ako rekano san na da a ba pekalidas ko kandanega
ko ron.
3 Giyanan i kaketangkeda sa ginawa niyo sa so Al Masih i dii tero a nggolalan raken.
Kena a ba da a bager iyan igira a aden a penggolaolaan iyan rekano, ka mala sekaniyan i
kabatowa sii rekano.
4 Ka apiya pen miyatotok sekaniyan ko kros sii ko kada a bager iyan na pekeoyag
sekaniyan imanto a nggolalan ko kabatowa o Allah. Datar oto mambo na da a bager ami,
ogaid na sii ko kaiisaisa ami ago so Al Masih na pekeoyag kami a nggolalan ko kabatowa
o Allah, a so kabatowa a pegosaren ami igira a aden a penggolaolaan ami sii rekano.
5 Tokawi niyo ago tepengi niyo a manga ginawa niyo kaan iyo mapariksa o ba niyo
pepangonoti so paratiyaya niyo. Ba niyo di katawi a madadalem rekano si Isa Al Masih,
liyo ron o di totoo so paratiyaya niyo?
6 Matatangked aken a keamad iyo a totoo kami i paratiyaya.
7 Ipepangangarapan ami ko Allah a di niyo nggolaolaan so kamarataan, a kena a ba sabap
sa an mailay a miyatoman den so antap ami, ka pepangnin ami a nggolaolaan iyo so
mapiya apiya pen datar o ba da kami makakamal ko antap ami.
8 Ka da a ba ami mapenggolaola a misosopak ko tito a benar, ka so bo so makaaayon on.
9 Ikebabaya ami a da a bager ami asar a mabager kano. Na aya ipepangangarapan ami na
matarotop so paparangayan iyo.
10 Inisorat aken angkai a manga nganin sii ko kabebalag aken rekano kaan amay ka
makaoma ako san na kena a ba disomala a pemaas ako ko kapegosara ko ko kapaar aken,
a so kapaar a inibegay raken o Kadnan an aken sekano mapakapengosor a kena a ba so
kabinasaa ko rekano.
Kaposan a Salam
11 Moripori ron, manga magariyari, na pakapipiyaa niyo a ginawa niyo. Panamari niyo a
matarotop so parangay niyo. Osiyati niyo so oman i isa rekano. Pagayonayon kano ago
pelilintada kano, na kelalayon rekano so Allah a pepamegay sa gagaw ago kalilintad.
12 Sesalama kano a sarta o soti a arek.

Pesalamen kano o langon o manga kaom o Allah.
13 Pengnin ko a sisii rekano langon so limo o Kadnan a Isa Al Masih, ago so gagaw o
Allah, ago so kipageepedaan ko Soti a Roh.
GALASIYA
GALASIYA 1
Alamat sorat ako i Paolo a siyogo a kena a ba poon ko manosiya o di na miyakanggolalan

ko manosiya, ka poon ki Isa Al Masih ago so Allah a Ama a miyoyag ki Isa a poon ko
miyamatay
2 Makasampay ko manga Agama sa probinsiya a Galasiya. Na pesalamen kano mambo o
langon a magariyari sii a ped aken.
so Kadnan a Isa Al Masih
4 A inirila iyan a ginawa niyan ko kapatay sabap ko manga dosa tano kaan tano niyan
masabet a poon ko kapapantagan a kamarataan sangkai a masa a kaketoman o kabaya o
Allah a Ama tano.
5 Rek iyan so bantogan sa taman sa pakataman! Amin.
Isaisa bo a Mapiya a Totol
6 Pepamemesa ko rekano ka da den milanat na petelikod kano ko Allah a tomiyawag

rekano a nggolalan ko limo o Al Masih na peparatiyaya kano ko mibibida a Mapiya kon a
Totol.
7 Aya benar na da a salakaw a Mapiya a Totol ogaid na pitero aken ai ka aden a manga
taw a pesemok rekano a pepanamaran iran a kapembibidaa iran ko Mapiya a Totol
8 Ogaid na apiya pen o sekami o di na so malaikat a poon sa kasorgaan i pepekalangkap
rekano sa Mapiya kon a Totol a mibibida ko piyakalangkap ami rekano na pengnin ko a
makanaraka sekaniyan!
9 Miyatero ami den ai na peteroon ko bo peroman imanto a o aden a pepekalangkap
rekano sa Mapiya kon a Totol a mbida ago so miyatarima iyo na pengnin ko a
makanaraka sekaniyan!
10 Kena a ba aken pepanamaran a masoat raken so manga taw, ka aya kabaya aken na
masoat raken so Allah. O pepanamaran aken pen a kapekesoata ko ko manga taw na kena
a ba ako oripen o Al Masih.
So Kiyabaloy i Paolo a Siyogo
11 Kabaya aken a katokawan iyo, manga pagari ko, a so Mapiya a Totol a piyakalangkap
aken na kena a ba inantang a manosiya.
12 Da aken ai matarima a poon ko apiya antawaa taw aya pen o ba aden a miyangendao
raken sii, ka piyayag raken i Isa Al Masih.
13 Miyaneg iyo den so kapepaginetaw aken gowani sii ko kapetomana ko ko paratiyaya o

manga Yahodi. Siyatro aken so Agama o Allah sa da den a ba on kapedi na piyanamaran
aken minasa.
14 Lebi ako a baratapa ko kepit o manga Yahodi a di so kadakelan kiran a isen aken sa
idad, ka tanto ako a tomotoman ko manga taritib a initenan o manga apo tano.
15 Ogaid na pinili ako o Allah sa da raken pen kimbawataan na tiyawag ako niyan a
nggolalan ko limo iyan. Na kagiya matoman iyan so kabaya iyan
16 A peyagen iyan raken so Wata iyan kaan aken mapakalangkap so Mapiya a Totol
makapantag on ko kena a ba manga Yahodi na da ako pakipamando ko apiya antawaa
taw.
17 Na da ako song sa Yarosalim sa kapakimbitiyarai aken ko siran oto a miyabaloy a
siyogo a miyaona a di saken, ka miyamantek ako baden somong sa Arabiya na oriyan oto
na komiyasoy ako sa Damasko.
18 Kagiya makatelo den ragon na somiyong ako sa Yarosalim kaan aken mibentel si
Pidro na tomiyareg ako ron sa miyakasapolo ago lima gawii.
19 Na da a salakaw a siyogo a ba aken miyailay a rowar ki Santiyago a pagari o Kadnan.
20 Ipemataan aken ko hadapan o Allah a da ako pamokeg ko kinisoraten ko sii.
21 Oriyan oto na somiyong ako ko manga inged sa Siriya ago roo sa Silisiya.
22 Sa masa oto na so manga Agama o Al Masih roo sa Yodiya na da ako iran pen mailay.
23 Aya bo a kiyatokawi iran on na so pitero o manga ped a "So mama a pesetro rektano
gowani na pepakalangkapen iyan imanto so Mapiya a Totol makapantag ko paratiyaya a
piyanamaran iyan den minasa."
24 Na piyodi iran so Allah sabap raken.
GALASIYA 2
Si Paolo ago so ped a manga Siyogo
Kagiya mamakasapolo den ago pat ragon na komiyasoy ako sa Yarosalim a ped i
Barnabas na piyakaonot aken pen si Titos.
2 Somiyong ako roo ka kagiya piyayag raken o Allah a giyoto i penggolaolaan ko. Na sii
ko kinimbitiyarain aken ko manga olowan sa sekami bo na piyagosay aken kiran so
Mapiya a Totol a pepakalangkapen aken ko kena a ba manga Yahodi, ka di aken kabaya i
ba mailang baden so pinggalebek aken gowani ago sa masa oto.
3 So ped aken a si Titos na apiya pen taw sa Grisiya na da tegela ko kapakitori
4 Apiya pen aden a manga taw a kabaya iran a katoria on. Siran na dii magomanta a
pepamaratiyaya, na tomiyapi siran rekami a nggolalan ko kapamagakal kaan iran
mapanoriman so kamaradika a miyatarima ami sii ko kaiisaisa ami ago si Isa Al Masih,
ka kebayaan kami ran mangongoripen.
5 Da ami siran pangonoti apiya so saperek bo kaan ami malinding so tito a maana o
Mapiya a Totol sabap rekano.
6 Na siran oto a kikilalaan a manga nakoda na da a ba iran inipanton a ipagoman aken ko

ipepamangendao aken. Aya kiyateroa ko sa kikilalaan siran bo a manga nakoda na sabap
sa da ko tagoa sa ginawa ko o antawaa siran, ka di peramiramig so Allah.
7 Da a ba iran raken inipanton, ka miyailay iran a kiyasanaan ako o Allah ko
kapakalangkapa ko ko Mapiya a Totol ko kena a ba manga Yahodi a lagid o kinisanaan
iyan ki Pidro ko kapakalangkapa on ko manga Yahodi.
8 Ka so Allah a aya dii nggalebek a nggolalan ki Pidro a siyogo iyan ko manga Yahodi na
aya dii nggalebek mambo a nggolalan raken a siyogo iyan ko kena a ba manga Yahodi.
9 Na si Santiyago, si Pidro, ago si Yahiya a kikilalaan a manga nakoda na kagiya makilala
iran a inibegay raken o Allah ngkai a galebek na miyakipagamong siran raken ago si
Barnabas sa kinipagepedaan iran rekami. Piyagayonayonan ami langon a penggalebek
kami sii ko kena a ba manga Yahodi na siran na sii ko manga Yahodi.
10 Aya bo a piyangni iran na tegoon ami sa ginawa so kapetebangi ko manga miskin, na
giyanan mambo i tanto aken a kebayaan nggolaola.
Pimbongetan i Paolo si Pidro roo sa Antiyokiya
11 Kagiya makaoma si Pidro sa Antiyokiya na siyopak aken sekaniyan ko

kapakandadarpai ami, ka tanto a marayag a miyaribat sekaniyan.
12 Ka sa da pen roo kapakaoma o ped a manga taw a piyakasong roo i Santiyago na dii
makipagatoang si Pidro ko kena a ba manga Yahodi. Ogaid na kagiya makaoma siran roo
na ginekan iyan oto na mimbelag sekaniyan ko kena a ba manga Yahodi, ka inikalek iyan
angkoto a manga taw a kekepiten iran a katoria ko kena a ba manga Yaliodi.
13 Na so ped ko manga Yahodi a peparatiyaya na pisoramigan iran si Pidro ko katatalaw
niyan, na apiya si Barnabas na miyawitowit ko katatalaw a pinggolaola iran.
14 Ogaid na kagiya mailay aken a da iran kedega so tito a maana o Mapiya a Totol na
pitero aken ki Pidro ko kamamasaan iran langon a "O seka a Yahodi na pepaginetaw a
datar o kena a ba Yahodi a kena a ba lagid o Yahodi na ino ngka petepengi pembaas so
kena a ba manga Yahodi sa kakepita iran ko manga taritib o manga Yahodi?"
So Kakesabet o manga Yahodi ago so Kena a ba manga Yahodi a nggolalan ko Paratiyaya
15 Apiya pen benar a inimbawata tano a Yahodi a kena tano a ba lagid o manga kapir a
madodosa
16 Na katawan tano a imbilang o Allah so taw a maontol a sii bo sabap ko paratiyaya
niyan ki Isa Al Masih a kena a ba sabap ko kapetomana niyan ko manga sogoan. Sektano
mambo na miyamaratiyaya ki Isa Al Masih kaan tano mibilang o Allah a manga oontol
sabap ko paratiyaya tano ko Al Masih a kena a ba sabap ko kapetomana tano ko manga
sogoan. Ka da a taw a ba imbilang o Allah a maontol sabap ko kapetomana niyan ko
manga sogoan.
17 Na sii ko kapananamari tano ko kibilangen rektano o Allah a manga oontol a

nggolalan ko kapeparatiyayaa tano ko Al Masih na o marayag a madodosa tano mambo a
lagid o manga kapir na ba aya maana ini na so Al Masih i pepangoyat ko kambaradosa?
Mataan a kena!
18 Ogaid na o bangona ko peroman so giba aken na mbalowin ko a ginawa ko a
miyakasogok ko manga sogoan o Kitab.
19 Ka sabap ko di aken den kaketomana ko Kitab na miyatay ako mipantag ko Kitab kaan
ako makapaginetaw a pepangongonotan ko Allah.
20 Miyatotok ako ko kros a ped o Al Masih na kena a ba ako pen oyagoyag ka so den so
Al Masih i oyagoyag a madadalem raken. Na sii sangkai a kapepaginetaw aken imanto ko
badan aken na aya ipepaginetaw aken na so paratiyaya ko Wata o Allah a kiyababayaan
ako niyan ago piyalad iyan a ginawa niyan ko kapatay sabap raken.
21 Da aken limbana so limo o Allah, ka o kibilang so taw a maontol a nggolalan ko
kapetomana ko manga sogoan na aya maana niyan na da a lalaw o kiyapatay o Al Masih!
GALASIYA 3
So Katomana ko manga Sogoan o di na so Paratiyaya?
Sekano a da a manga lalag iyan a manga taw sa Galasiya! Antawaa i miyakasaliba
rekano? Miyapagosay rekano den sa tanto a marayag so kiyatotoka ki Isa Al Masih ko
kros.
2 Isa bo a kabaya aken a ipagise aken rekano a giyai: so kiyatarimaa niyo ko Roh o Allah
na ba sabap ko kapetomana niyo ko manga sogoan o di na sabap ko kiyaparatiyayaa niyo
ko tito a benar a miyaneg iyo?
3 Ba kano tanto a pembetenga? So inepoonan iyo a nggolalan ko Roh na ba niyo
pepanamari imanto a kaimasada niyo ron a nggolalan ko bager o kamamanosiyai rekano?
4 Ba da den bes a lalaw niyan rekano so langon a kiyaokitan iyo? Pengnin ko a kena a ba
da a lalaw niyan!
5 Igira a pembegan kano o Allah ko Roh ago di niyan dii nggalebeken so manga ala i
kabatowa san rekano, na ba giyai na sabap sa petomanen iyo so manga sogoan o di na
sabap sa peparatiyayaan iyo so tito a benar a piyamakineg iyo?
6 Aya ibarat iyan na so Ibrahim a miyaratiyaya ko Allah na inibilang o Allah so

paratiyaya niyan a aya niyan kaontol.
7 Ketokawan iyo sii a so manga aden a paratiyaya niyan na aya tito a mbawataan o
Ibrahim.
8 Minisorat den ko Kitab sa da niyan pen kanggolaola a imbilang o Allah so kena a ba
manga Yahodi a manga oontol sabap ko paratiyaya iran. Sabap san na miyatero den o
Kitab gowani angkai a Mapiya a Totol ko Ibrahim a tig iyan a "Nggolalan reka na
perakmatan so langon a nasiyon."
9 Kagiya ka maoto na perakmatan so langon a aden a paratiyaya niyan a lagid mambo o
Ibrahim a miyaratiyaya.
10 Kemorkaan so siran oto a pananamaran iran a kibilangen kiran o Allah a maontol a sii
bo dii makanggolalan ko kapetomana iran ko manga sogoan, ka misosorat ko Kitab a
"Kemorkaan so oman i isa a kena a ba lalayon petoman ko langon a misosorat ko Kitab."
11 Na marayag sii a da a taw a ba imbilang o Allah a maontol sabap ko kapetomana niyan
ko manga sogoan, ka misosorat ko Kitab a "So taw a imbilang a maontol sabap ko
paratiyaya na aya keoyagoyag.”
12 Na so Kitab na kena a ba mipepasod ko paratiyaya, ka misosorat on a "So taw a
petoman ko langon a manga sogoan o Kitab na keoyagoyag a nggolalan sii."
13 Ogaid na siyabet tano o Al Masih ko sinta a kitana ko siran oto a miyakasogok ko

manga sogoan o Kitab, ka kiyasintaan sekaniyan a inisambi rektano. Ka misosorat ko
Kitab a "Kamomorkaan so oman i isa a binitin ko kayo."
14 Na pinggolaola ini o Al Masih kaan mirakes so kena a ba manga Yahodi ko
kiyarakmati o Allah ko Ibrahim kaan sabap ko paraiyaya na matarima tano so Roh a
initopa o Allah.
So Kitab ago so Topa
15 Peteroon ko rekano, manga magariyari, so makakakalilid a ibarat. So kapasadan a

pimbaalan o manosiya a pirmaan iran na da a ba on pekasili aya pen o ba aden a
makabaroba on.
16 So manga topa o Allah na minibegay ko Ibrahim ago so moriyataw niyan. Kena a ba
tig o Kitab a "So manga moriyataw," a aya maana niyan na madakel a taw, ka aya tig iyan
na "so moriyataw ngka," a aya maana niyan na isaisa a taw a so Al Masih.
17 Giyai i maana o di ko dii teroon: mimbaal so Allah sa kapasadan na initopa niyan a
tomanen iyan. Na so Kitab a initoron iyan ko kiyaipos o pat gatos ago telo polo ragon na
di pekabaroba sangkoto a kapasadan aya pen o ba makailang ko initopa o Allah.
18 Ka opama ka so rakmat a imbegay o Allah na mipepasod ko kapetomana ko manga
sogoan, na kena a ba mipepasod ko initopa niyan. Ogaid na inibegay o Allah so rakmat ko
Ibrahim sabap sa minitopa niyan on den.
19 Kagiya benar oto na antonaa i kipantag o manga sogoan o Kitab? Minipagoman den ai
kaan makilala o antonaa i manga sala. Aya kipantag iyan na sii bo taman ko kiyapakaoma
o moriyataw o Ibrahim a aya kiyabegan ko initopa o Allah. So Kitab na initoron a
nggolalan ko manga malaikat a rakes o sakataw a taw a tomanor.
20 Ogaid na aya bo a kakegonai ko tomanor na o aden a dowa kataw a tenoren iyan, ogaid
na so Allah na isaisa bo.
So Antap o Kitab o Mosa
21 Ba aya maana ini langon na misosopak so Kitab ko manga initopa o Allah? Mataan a
kena! O aden pen a inibegay a manga sogoan a pekabegay sa kaoyagoyag na kebaloy so
taw a maontol a nggolalan ko kapetomana niyan ko manga sogoan.
22 Ogaid na kabasa o Kitab a so langon a manosiya na ipapaar o kadostaan kaan so
initopa o Allah a imbegay sabap ko paratiyaya ki Isa Al Masih na an mibegay ko siran oto
a peparatiyaya.
23 Ogaid na sa da pen makatalingoma so masa a kaperatiyaya na ipapaar tano o Kitab a

pepamarintaan tano niyan taman ko kiyapagaga sangkoto a paratiyaya.
24 So Kitab na aya rektano tomatagikor taman ko kiyapakaoma o Al Masih kaan tano
mibilang o Allah a maontol sabap ko paratiyaya.
25 Ogaid na imanto a miyakatalingoma den so masa a kaperatiyaya na so Kitab na kena
den a ba aya rektano tomatagikor.
26 Palaya kano miyabaloy a manga wata o Allah a nggolalan ko paratiyaya niyo ki Isa Al
Masih.
27 Ka so langon kano a kiyasalawatan a piyakaisaisa kano ago so Al Masih, na siyolot iyo
so paparangayan o Al Masih.
28 Sabap san na da den a mbidaan o Yahodi ago so kena a ba Yahodi, da den a mbidaan o
oripen ago so kena a ba oripen, ago da den a mbidaan o mama ago babay ka kagiya
maiisaisa kano langon sii ko kaiisaisa niyo ago si Isa Al Masih.
29 O rek kano o Al Masih na manga kiyababadan kano o Ibrahim na makapekawali kano
ko initopa on o Allah.
GALASIYA 4
Aden pen a peteroon ko makapantag sii. Sii pen ko kawawatai ko wata a makapekawali
ko patemotamokan o ama iyan na da a mbidaan iyan ago so oripen apiya sekaniyan pen i
kirek ko langon taman.
2 Ka sii pen ko kaito iyan na aden a manga tomatagikor on ago komikibir taman sa di
maoma so gawii a tindo o ama iyan.
3 Sektano mambo, na sii ko kawawatai rektano pen na maooripen tano o kadodoniyai a
manga kokoman.
4 Ogaid na kagiya makatalingoma den so osto a masa na piyakasong o Allah so Wata iyan
sa doniya a inimbawata o babay. Miyaginetaw sekaniyan a ipapaar o Kitab
5 Kaan iyan maaon so siran oto a ipapaar o Kitab kaan tano mabataw o Allah a manga
wata iyan.
6 Na sabap sa manga wata kano o Allah na piyakasong iyan so Roh o Wata iyan sii ko
manga poso tano, a so Roh a pepananalo sa "Ama, Ama aken."
7 Kagiya ka maoto na kena a ba ka oripen, ka wata ka niyan den. Na sabap sa wata ka o
Allah na biyaloy ka niyan mambo a makapekawali ko langon a initopa niyan.
So Kiaawiden a Akal i Paolo ko manga taw sa Galasiya
8 Gowani na di niyo katawan so Allah, na maooripen kano o kena a ba tito a manga

tohan.
9 Ogaid na imanto a katawan iyo den so Allah, o di na katawan kano den o Allah, na ino
kano kebaya somangor peroman sangkoto a manga kokoman a da a bager iyan ago da a
ba rekano ron kitabang? Ba niyo kabaya a maooripen kano iran peroman?
10 Di niyo dii selaselaan so manga ala a gawii, manga olanolan, manga mosim, ago
manga ragon.
11 Ipekelek aken o ba baden mailang so langon a galebek aken sii rekano.
12 Pagakolan ko rekano, manga magariyari, a mbaloy kano baden a lagid aken, ka

mimbaloy ako a lagid iyo. Da kano raken den makasela.
13 Katawan iyo a sii ko miyaona a kiyapakalangkapa ko rekano ko Mapiya a Totol na
aden a gedamen aken.
14 Ogaid na da ako niyo sodia aya pen o ba niyo inikagowad apiya pen so sakit aken na
miniregen rekano, ka initapi ako niyo baden a lagid o ba isa a malaikat o Allah a lagid
mambo o saken den si Isa Al Masih.
15 Inikababaya iyo so kasisii aken rekano gowani. Na ino keda so kiyababaya iyo?
Mapetero aken makapantag rekano sa masa oto a o kepakay na masiken a sowaten iyo ron
so manga mata niyo na imbegay niyo raken.
16 Ba ako imanto mimbaloy a ridoay niyo sabap ko di aken rekano dii kateroa ko tito a
benar?
17 So manga taw a miyaaloy aken na pepanamaran iran a kapakatampil iyo kiran. Ogaid
na kena ini a ba mapiya, ka kabaya iran a mbelagen kano iran raken kaan iyo mapeniyat a
kapakapangeped iyo kiran.
18 Mapiya so kapeniniyat asar a mapiya a peniniyaten iyo, na lalayon den mapiya a kena
bo a ba igira a sisii ako rekano.
19 Manga wata aken, lagid ako peman o pembaliliten a babay, ka pekegedam aken so
lagid iyan sa kasakit sabap rekano taman sa mapeparangayan iyo so paparangayan o Al
Masih.
20 Tanto aken a kabaya a makipegepeda ako rekano san imanto kaan aken sekano
mimbitiyarai, ka dii ndowadowa so pamikiran ko makapantag rekano!
So Ibarat i Hagar ago si Sarah
21 Sekano a kebaya makipaar ko Kitab na teroa niyo raken: ba niyo da maneg so kabasa o
Kitab?
22 Ka misosorat on a so Ibrahim na aden a dowa kataw a wata iyan a mama. So isa on na
wata iyan ko oripen a babay, na so isa on na wata iyan ko babay a kena a ba oripen.
23 So wata iyan ko oripen na inimbawata ko kalilid a okit, ogaid na so wata iyan ko kena
a ba oripen na inimbawata a initoman ko initopa o Allah.
24 Giyangkai a dowa a babay na ladiyawan o dowa a kapasadan o Allah. So isa on a si
Hagar na ibarat o kapasadan a pimbaalan roo ko Palaw a Sinay na di niyan dii mbawata
so manga oripen.
25 Si Hagar a aya ladiyawan o Palaw a Sinay roo sa Arabiya na ibarat mambo o
kapapantagan a siti a Yarosalim a maooripen a rakes o langon a taw niyan.
26 Ogaid na so siti a Yarosalim roo sa kasorgaan na kena a ba oripen na sekaniyan i ina
tano.
"Kababaya ka baden, hey babay a da den makambawata!

Lalis ka sa kapekebabaya,
seka a da den balilita!
Ka so babay a kiyaawaan na pembabawata sa madakel
a di so oripen a babay a mitetapi o karoma niyan."
28 Na sekano, manga magariyari, na manga wata kano o Allah a minisabap ko initopa

niyan, a lagid mambo o Iskak.
29 Sa masa oto na so wata a kalilid a kinimbawataan on na siyatro iyan so wata a
inimbawata a nggolalan ko kabatowa o Roh o Allah, na aya mambo imanto a pekeolaola.
30 Ogaid na antonaa i kabasa o Kitab? Pitero iyan a "Bogawa ngka so oripen a babay ago
so wata iyan, ka so wata o oripen na di den kesaadan ko mapekewali o wata o kena a ba
oripen."
31 Kagiya ka maoto, manga magariyari, na kena a ba tano manga wata o oripen a babay,
ka so babay a kena a ba oripen.
GALASIYA 5
So Kamaradika sii ko Al Masih
Biyalokasan tano o Al Masih kaan tano kabalokasi piyapiya. Kagiya ka maoto na

pakabebeken kano baden sii ko kiyamaradika iyo na di kano den pekipangongoripen
peroman.
2 Pakinega niyo! Saken a si Paolo na peteroon ko rekano a o pekitori kano na aya maana
niyan na so Al Masih na da den a gona niyan rekano.
3 Na pemataanan aken peroman ko oman i isa a mama a pekitori a paliyogat on a
tomanen iyan pen so langon a manga sogoan o Kitab.
4 Sekano a pepanamaran iyo a imbilang kano o Allah a maontol a nggolalan ko
kapetomana ko manga sogoan na miyabelag kano ko Al Masih; makaliliyo kano ko
kipekelimoon rekano o Allah.
5 Ogaid na makapantag rektano, na pakatatalingomaan tano a nggolalan ko Roh o Allah
so aarapen tano a kimbilangen rektano a manga oontol sabap ko paratiyaya.
6 Ka amay ka maiisaisa tano ago si Isa Al Masih na da a kipantag o katori o di na di
katori, ka aya mala i kipantag na so paratiyaya a dii nggalebek a nggolalan ko gagaw.
7 Mapiya den so kapegosor iyo gowani. Antawaa i miyakasendod rekano ko kapetomana

niyo ko tito a benar?
8 Kena ini a ba kiyaayoki rekano o Allah a tomiyawag rekano.
9 Tanodi niyo a "Maito bo a tapay a ipekembang o langon o miyabonaw a arina.
10 Ogaid na sasarigan ko sabap ko kaiisaisa tano ago so Kadnan a di niyo terimaan so
mibibida ko pamikiran aken. Na so taw a di rekano dii semok a apiya antawaa na
ndanegen o Allah.
11 Ogaid na makapantag raken, manga magariyari, na o benar a ipepangosiyat aken a

paliyogat so katori na ino ako pen pesetroa? Ka o benar oto na so kapepangosiyat aken
makapantag ko kiyapatay o Al Masih ko kros na di ikerarangit o manga taw.
12 Kabaya aken a so manga taw a pesemok rekano na kena bo a ba giya katoria on, ka
apiya taman sa makapon iran a ginawa iran!
13 Sekano a manga magariyari na piyanawag o Allah kaan kano makamaradika. Ogaid na

di niyo pegosara so kamamaradika iyo ko kapengonoti niyo ko manga baya a ginawa
niyo, ka panalagadi baden o oman i isa so ped iyan sii ko kapekebabayai niyan on.
14 Ka so langon a sogoan o Kitab na miyatimotimo ko isaisa a sogoan a "Kababayai ngka
so siringan ka a datar a ginawa ngka."
15 Ogaid na o pekekekebai kano ago pesesakaba kano a lagid o manga binatang na o ba
kano makambibinasai.
So Kapaginetaw a Mipapaar o Roh o Allah
16 Giyai i peteroon ko rekano: pakipaaren iyo ko Roh so kapepaginetaw niyo na di niyo

kapengonotan so manga baya o kamamanosiyai rekano.
17 Ka so manga baya o kamamanosiyai rektano na misosopak ko manga kabaya o Roh,
na so manga kabaya o Roh na misosopak ko manga baya o kamamanosiyai rektano.
Giyangkai a dowa na makasosoranga siran; sabap san na di niyo mapenggolaola so
kebayaan iyo nggolaola.
18 Ogaid na o pegagaken kano o Roh na kena a ba kano mipapaar o manga sogoan.
19 Malebod makilala so manga sowasowai o taw a mipapaar o kamamanosiyai ron: so
kasebo, karesik, kapakipamotaliya,
20 So kapesimbaa ko kena a ba tohan, kapangalintao, kapakiperiridoay, kapakipepawala,
kariit, kararangit, kapelalawana, di kapegayonayon, kaoomparik,
21 Kasiig, kamberebereg, mitataralo a dii kakeriyala, ago so ped pen a datar ai. Na
pelalangan ko sekano imanto a datar o siyowa aken gowani: so siran oto a dii nggolaola
sa datar ai na di siran makapekawali ko Ndatoan o Allah.
22 Ogaid na so sowasowai a ipegonga o Roh na so gagaw, kapipiya a ginawa, kalilintad,

kapanginginsabar, kaginawa, kapiyaan, kapeparatiyaya,
23 Kapangalimbabaan, ago kipapaaren ko ginawa. Na so datar ai a sowasowai na da a
sogoan a ba on makasosopak.
24 Siran oto a rek i Isa Al Masih na miyatotok iran den ko kros so manga rarata a gedi
ago kabaya o kamamanosiyai kiran.
25 So Roh na aya rektano pembegay sa kaoyagoyag; sabap san na pakipaar tano ron so
kapepaginetaw tano.
26 Di tano pembantogan, di tano pegatowan so manga ped aya pen o ba tano siran masiig.
GALASIYA 6
So Mapemola na aya Maperagon
Manga magariyari, o aden a taw a kiyatokawan a miyakasela na sekano a ipapaar o Roh

na pakaontola niyo sekaniyan a pepangalimbabaan kano. Na iktiyari niyo pen a ginawa
niyo, ka o ba kano mambo magawi.
2 Titibanga kano mosai ko pegawidan a karomasayan, ka giyanan i kapetomana niyo ko
inisogo o Al Masih.
3 O aden a taw a mapipikir iyan a mapiya sekaniyan i parangay ogaid na kena ini a ba
onota o di niyan dii nggolaolaan na ba niyan den pepagakali a ginawa niyan.
4 Patot a tokawan o oman i isa so rek iyan a dii nggolaolaan. O mapiya ini na
mipengandag iyan a di niyan kailangan a kipegabain iyan on ko dii nggolaolaan o ped.
5 Ka oman i isa na aden a rek iyan a pegawidan.
6 So taw a pekindao ko katero o Allah na patot a pembagianen iyan so langon a mapiya a

rek iyan ko pepangendao ron.
7 Di niyo peparowa o ba kano pagakali. So Allah na di den kelalong. Apiya antonaa i

mapemola o taw na aya niyan mambo maperagon.
8 So taw a pepamola ko ikasosoat o kamamanosiyai ron na poon on na keragon iyan so
kapatay, na so pepamola ko ikasosoat o Roh na poon on na keragon iyan so kaoyagoyag a
da a kaposan iyan.
9 Di tano petepolan ko di tano dii kanggolaolaa ko mapiya, ka sii ko mapapatot a masa na
maperagon tano so onga niyan o di tano lomoke.
10 Kagiya ka maoto na oman tano makaparo na nggolaolaan tano so mapiya ko langon a
taw a ba di labaw so manga pagari tano a pepamaratiyaya.
Kaposan a Lalangan ago Salam

11 Ilaya niyo o ay kapangaala o manga batang a ipesorat imanto o lima ko!
12 Siran oto a kebaya makiilailain na aya rekano pepanamar maas sa katori iyo. Aya di
ran sii dii kanggolaolaa na sabap sa an siran makalidas ko kasatroan a ba iran kaokiti o
peteroa iran a so kakesabet na sii bo mipepasod ko kiyapatay o Al Masih ko kros.
13 Apiya siran oto a miyakitori na di iran petomanen so manga sogoan o Kitab, ogaid na
kabaya iran a matori kano kaan iran mipagambog a tiyarima iyo so katoria rekano.
14 Ogaid na makapantag raken na da den a ipetekabor aken a rowar ko kiyapatay o
Kadnan tano a Isa Al Masih ko kros a ron miyakanggolalan na miyatay so doniya
mipantag raken, ago miyatay ako mipantag ko doniya.
15 Kena a ba mala i kipantag o miyatori so taw, o di na da, ka aya mala i kipantag na so
kiyaadena ko bago a kaoyagoyag sii ko ginawa niyan.
16 Na siran oto a ipepaginetaw iran angkai a kokoman na pengnin ko a so kalilintad ago
kapedi o Allah na malalayon kiran a rakes o langon o manga pagtaw o Allah.
17 Ipoon imanto na pengnin ko a da den a ba raken pesemok, ka so manga poneng ko

lawas aken na aya poriba sa oripen ako i Isa.
18 Pengnin ko a malalayon rekano so limo o Kadnan tano a Isa Al Masih, manga pagari
ko. Amin.
IPISOS
IPISOS 1
Alamat sorat ako i Paolo a siyogo i Isa Al Masih sabap ko kabaya o Allah makasampay
ko manga kaom o Allah a magiinged sa Ipisos, a so siran oto a mapaparatiyaya ki Isa Al
Masih.
So manga Rakmat a poon ko Roh o Allah
3 Pepodin tano so Tohan ago Ama o Kadnan tano a Isa Al Masih, ka kiyarakmatan tano
niyan ko langon a rakmat roo sa kasorgaan a poon ko Roh sabap ko kaiisaisa tano ago so
Al Masih.
4 Isako da pen kaadena ko doniya na piyamili tano den o Allah a keisaisa tano ago so Al
Masih kaan tano masoti a da a kidaway rektano sii ko hadapan iyan. Sabap ko
kapekebabayai rektano o Allah
5 Na pitekdir iyan gowani a mbataon tano niyan a manga wata iyan a nggolalan ki Isa Al
Masih, ka giyanan i ikasosoat iyan ago kabaya.
6 Pinggolaola niyan ai kaan mapodi so kababantogan a limo iyan, a so da a bayad iyan a
pamemegayan iyan rektano a nggolalan ko pekebabayaan iyan a Wata iyan.
7 Ka sii ko kiyaisaisa tano ago so Al Masih na miyaaon tano a nggolalan ko rogo iyan na
kiyarilaan so manga dosa tano. Tanto a mala angkai a limo o Allah
8 A inibegay niyan rektano a di ketakes, a rakes o langon a ongangen ago katao.
9 Piyayag iyan rektano so takdir iyan a pageemaan gowani a andang iyan den a
miyatakdir a itoman iyan a nggolalan ko Al Masih.
10 Na so takdir iyan a itoman iyan amay ka matarotop so manga gawii na so
kapekaisaisaa niyan ko langon a kaaden roo sa kasorgaan ago sii sa doniya a pegolowanan
o Al Masih.
11 Sii ko kiyaisaisa tano ago so Al Masih na biyaloy tano o Allah a kawali niyan, ka
andang tano niyan a piyamili a aya kinitoman o takdir iyan, ka so kalangolangon a di
niyan dii nggolaolaan na aya kipetomanen ko takdir iyan ago kabaya.
12 Pinggolaola niyan ai kaan mapodi so bantogan iyan sabap rektano a aya miyaona a
miyamanarig ko Al Masih.
13 Sekano mambo, na sii ko kiyanega niyo ko katero a tito a benar, a so Mapiya a Totol
makapantag ko kakesabet iyo, na miyaratiyaya kano ko Al Masih, na piyakaisaisa kano
ago sekaniyan, na tiniyapan kano pen o Allah a rek iyan ko kinibegan rekano ko Soti a
Roh a minitopa niyan.
14 So Roh na aya poriba sa mapekawali tano so langon a initopa o Allah amay ka
masabet iyan piyapiya so langon a rek iyan kaan mapodi so bantogan iyan.
So Kapanalamat ago Kapangangarapan i Paolo
15 Sabap sii na kembo aken maneg so makapantag ko paratiyaya niyo ko Kadnan a Isa
ago so kapekebabayai niyo ko langon a kaom o Allah
16 Na da a rintas a kapepanalamati aken ko Allah sabap rekano. Pekealoy aken sekano ko
di aken dii kapangangarapan
17 A pepangnin aken ko Tohan o Kadnan tano a Isa Al Masih, a so kababantogan a Ama,
a began kano niyan sa niyawa a mabaloy kano niyan a maongangen ago mapayag iyan
rekano so Allah kaan iyo katokawi piyapiya.
18 Pepangnin aken on pen a kaliwanagan so pamikiran iyo kaan iyo katokawi o antonaa i
kesarigan iyo tomarima sabap ko kiyatawaga niyan rekano, a giyoto so lebi a mala i
bantogan a mapekawali o manga kaom iyan.
19 Liyo ron pen na pepangnin ko a seboten iyo so di ketakes a kala o kabatowa iyan para
rektano a pepamaratiyaya. Giyangkai a kabatowa na magisen ago so dii kanggalebek o
mala a kapaar iyan
20 A ininggolalan iyan ko kiyaoyaga niyan ko Al Masih a poon ko miyamatay ago so
kiyapakaontoda niyan on sa kawanan iyan roo sa kasorgaan.
21 Roo na lebi a maporo so Al Masih a di so langon a dato, so aden a manga kapaar iyan
o di na kabatowa, ago so manga olowan taman ko oman i mala i gerar a kena bo a ba sii
sangkai a masa, ka so pen so pekatalingoma.
22 Na piyakindatoan rekaniyan o Allah so langon taman na biyaloy niyan a olowan o
kalangolangon para ko kapiyaan o Agama.
23 So Agama na aya niyan lawas, na so Al Masih i pekipeno on a aya pekipeno mambo
ko langon taman apiya anda den.
IPISOS 2
Inoyag tano a ped o Al Masih
Gowani na ibibilang kano o Allah a mamaatay sabap ko manga sala iyo ago manga dosa
2 A aya niyo ipepaginetaw sii ko kapepangonoti niyo ko kadodoniyai a okitokit. Sa masa
oto na pepangonot kano ko Iblis a so dato o aden a manga kapaar iyan sii sa kawang, a so
niyawa a dii nggalebek imanto sii ko manga taw a pepamangongkir ko Allah.
3 Gowani na pepaginetaw tano mambo a datar iran a pepamangonot ko manga rarata a
singayo o kamamanosiyai rektano ago petomanen tano so manga baya a ginawa tano ago
pamikiran. Na sabap ko parangay tano na pekerarangitan tano o Allah a datar mambo o
ped a taw.
4 Ogaid na tanto a makapediin so Allah, na sabap ko mala a gagaw niyan rektano
5 Na apiya ibibilang tano a mamaatay sabap ko manga sala tano na inoyag tano niyan a
ped o Al Masih. Miyasabet kano sabap ko limo o Allah.
6 Na iniporo tano niyan a ped o Al Masih ago piyakaontod tano niyan a ped iyan roo sa
kasorgaan sii ko kaiisaisa tano ago si Isa Al Masih.
7 Pinggolaola niyan ai kaan iyan mapakiilay sii ko pekatalingoma a manga masa so
mitataralo a limo iyan sii ko kinikapediin iyan rektano a nggolalan ki Isa Al Masih.
8 Ka miyasabet kano sabap ko limo o Allah a nggolalan ko paratiyaya, na kena ini a ba
rekano poon, ka pamemegayan o Allah.
9 Na giyangkai a kiyasabet iyo na kena a ba sabap ko manga galebek kaan da den a ba
mipengandag o apiya antawaa.
10 Ka sektano na pasad o Allah, na inaden tano niyan sii ki Isa Al Masih kaan tano
makanggolaola sa manga pipiya a galebek a andang den a miyatakdir o Allah a
penggolaolaan tano.
Isaisa tano sii ko Al Masih
11 Sekano a inimbawata a kena a ba manga Yahodi (a bebetowan sa da manga totori o

manga Yahodi a bebetowan sa miyanga totori, a aya maana niyan na miyatori o
manosiya) na tanodi niyo so kapakambebetad iyo gowani.
12 Sa masa oto na mabebelag kano ko Al Masih. Manga rait kano a kena a ba kano
maaped ko manga pagtaw o Allah a manga Israil. Da a ba niyo bagian ko manga
kapasadan a mipepasod ko manga initopa o Allah. Da a arap iyo ago da a Tohan iyo ko
kapepaginetaw niyo sa doniya.
13 Ogaid na sii ko kaiisaisa niyo ago si Isa Al Masih na sekano a makawawatan gowani
ko Allah na miyapakarani kano ron den imanto a nggolalan ko rogo o Al Masih.
14 Ka so den so Al Masih i kalilintad tano, ka piyakaisaisa niyan so manga Yahodi ago so
kena a ba manga Yahodi. Bininasa niyan so alad a miilet kiran, a so di ran dii
kaperiridoay,
15 Ka nggolalan ko kiyapatay o lawas iyan na piyakadaan iyan sa kipantag so Kitab o
Mosa a rakes o manga sogoan iyan ago manga kokoman. Pinggolaola niyan ai kaan iyan
maaden sii sa ginawa niyan so isaisa a pagtaw a kisambi sangkoto a dowa a bangsa, na
giyanan i kiyapakalintada niyan kiran.
16 Na siran a dowa a miyabaloy den a isaisa a lawas na piyakangginawai niyan pen ago
so Allah a nggolalan ko kiyapatay niyan ko kros, na nggolalan sii na piyakada iyan so di
ran dii kaperiridoay.
17 Na miyakaoma so Al Masih na piyakalangkap iyan so Mapiya a Totol makapantag ko
kalilintad sii rekano a kena a ba manga Yahodi a makawawatan gowani, ago sii ko manga
Yahodi a makararani ron.
18 Na nggolalan ko Al Masih na sektano langon a manga Yahodi ago kena a ba manga
Yahodi na pemakaadap ko Ama sii ko isaisa a Roh.
19 Kagiya ka maoto na sekano a kena a ba manga Yahodi na kena den o ba manga rait
ago manga mananangga, ka ped kano ko isa ka maginged a manga pagtaw o Allah, ago
manga ped ko pamiliya niyan.
20 Ped kano ko walay a miyabangon ko onayan a inipametad o manga siyogo ago manga
nabi, a si Isa Al Masih na aya lebi a mala i kipantag a ator ko kaoonayan on.
21 Sekaniyan i katitimoan ko langon o walay sii ko kapembaloya on a soti a timplo o
Kadnan.
22 Na sii ko kaiisaisa niyo ago sekaniyan na sekano mambo a rakes o langon a ped na di
kano dii mbalain a timplo a ron babaling so Allah a nggolalan ko Roh iyan.
IPISOS 3
So Galebek i Paolo para ko Kena a ba manga Yahodi
Sabap sii na saken, a si Paolo a so kakalaboson i Isa Al Masih sabap rekano a kena a ba
manga Yahodi, na pepangangarapan ko Allah.
2 Mataan den a miyaneg iyo a inisana raken o Allah so kapepakitokawi ko limo iyan sii
rekano.
3 Miyakanggolalan ko kiyapayag na piyakitokawan iyan raken so takdir iyan a pageemaan
gowani, na minisorat aken den sa makampet so makapantag sii.
4 Na amay ka kapangadian iyo ai na ketokawan iyo so kasasabota ko ko pageemaan
5 Sii ko miyanga iipos a masa na da ini kapakitokawi ko manga taw, ogaid na piyayag
den imanto o Allah ko soti a manga siyogo iyan ago manga nabi a nggolalan ko Roh.
6 Aya pageemaan na giyai: so kena a ba manga Yahodi na sabap ko kaiisaisa iran ago si
Isa Al Masih a nggolalan ko Mapiya a Totol na kirakes siran ko manga Yahodi ko
kakekowaa iran ko kawali iran, na manga ped siran ko isaisa bo a lawas, na
makapembagian siran ko initopa o Allah.
7 Miyabaloy ako a talasogoay angkai a Mapiya a Totol a nggolalan ko pamemegayan a

inibegay raken o Allah sabap ko limo iyan ago miyakanggolalan ko kabatowa iyan.
8 Bapiya pen saken i lebi a mababa ko langon a manga kaom o Allah na inibegay niyan
raken angkai a kapepakalangkapa ko Mapiya a Totol sii ko kena a ba manga Yahodi
makapantag ko da a pitetamanan iyan a kakawasaan o Al Masih,
9 Ago so kapepayaga aken sii ko langon a taw o andamanaya i kitomanen sangkai a
pageemaan a takdir o Allah. Sii ko miyanga oona a masa na da ini kapakitokawi o Allah a
aya miyangaden ko langon taman.
10 Aya sabap iyan na an makanggolalan ko Agama na pekitokawan imanto ko manga
olowan ago ana manga kapaar iyan roo sa kasorgaan so ongangen o Allah a
mbarambarang den i ropa.
11 Giyanan i kinitoman o takdir o Allah a di den kebaroba, a initoman iyan a nggolalan ki
Isa Al Masih a Kadnan tano.
12 Na sabap ko kaiisaisa tano ago so Al Masih ago dii makanggolalan ko paratiyaya tano
ron na makapangadap tano ko Allah a makasasarig ago da a kawan on.
13 Kagiya ka maoto na pagakolen ko rekano a di niyo pagedaa so inam iyo iyo sabap ko
manga karomasayan a pekeokitan aken sabap rekano, ka langon ai na para ko kamapiyaan
iyo.
So Pangangarapan i Paolo para ko manga taw sa Ipisos
14 Sabap sii langon na sodiyod ako ko hadapan o Ama

15 A ron miyakapoon so kiyapangingarani ko oman i isa ka mbatabataa roo sa kasorgaan
ago sii sa doniya,
16 Na pengnin ko ron a poon ko kababantogan a kakawasaan iyan na began kano niyan sa
kabatowa kaan mamakabager so dalem a ginawa niyo a nggolalan ko Roh iyan
17 Kaan makakaden so Al Masih ko manga poso iyo a nggolalan ko paratiyaya. Pengnin
ko a makambekaw kano ago makambeken sii ko gagaw niyan
18 Kaan iyo magaga a kasabota niyo a rakes o langon a kaom o Allah o antonaa i
kabelang, kalendo, kaporo, ago kadalem o gagaw o Al Masih.
19 Pengnin ko a katokawan iyo angkai a gagaw niyan, apiya pen lebi ini a tanto a di so
kaketokawi ron, kaan kano mapeno piyapiya ko langon a ipepemeno o Allah.
20 Na sekaniyan a makapenggolaola sa tanto a makalalawan ko apiya antonaa i mapengni

o di na mapemikir tano a nggolalan ko kabatowa iyan a dii nggalebek sii rektano,
21 Na rek iyan so bantogan a nggolalan ko Agama ago si Isa Al Masih sii ko langon a
masa sa taman sa pakataman! Amin.
IPISOS 4
So Kaiisaisa tano sii ko Al Masih
Kagiya ka maoto na saken a makakalaboso sabap ko Kadnan na pagakolen ko rekano a

pepaginetaw kano a mapapatot ko initawag rekano o Allah.
2 Lalayon kano pepangalimbabaan, pepanginsokor, ago pepanginsabar, na penanapiya
kano sii ko kapekebabayai niyo ko manga ped.
3 Panamar kano kaan malalayon so kaiisaisa niyo a ipembegay o Roh sii ko kapekebekesa
rekano o kalilintad.
4 Aden a isaisa a Lawas ago isaisa a Roh a lagid mambo o aden a isaisa bo a inam a
minisabap ko kiyatawaga rekano o Allah.
5 Aden a isaisa a Kadnan, isaisa a paratiyaya, ago isaisa a salawat.
6 Aden a isaisa a Tohan a Ama o langon a taw. Sekaniyan na maporo o langon taman,
langkap ko langon taman, ago madadalem ko langon taman.
7 Inonta bo na oman i isa rektano na bigan sa moodiset a pamemegayan o Al Masih a
kiyabayaan iyan megay.
8 Ka pitero o Kitab a
"Sii ko kiyapanik iyan sa kaporoporoan,

na madakel a miyanga bibiyag a piyakaonot iyan,
na inibegay niyan so manga pamemegayan ko manga taw."
9 Na antonaa i maana o "sii ko kiyapanik iyan?" Aya maana niyan na daan sekaniyan a
miyanog ko pitidaleman ko lopa.
10 Na sekaniyan a miyanog na aya den miyanik ko kaporoan o langon a
pipengkapangkatan o kasorgaan kaan makalangkap sekaniyan ko langon taman.
11 Sekaniyan i migay sa manga moodiset ko manga taw. So ped ko manga taw na biyaloy
niyan a manga siyogo, so ped na pepemakapayag ko lalag o Allah, so ped na
pepemakalangkap ko Mapiya a Totol, ago so ped na manga pananagikor ago manga
pepangendao ko manga pagtaw niyan.
12 Pinggolaola niyan ai kaan iran matiyagar so manga kaom o Allah sa kapanalagadi ran
ko Agama kaan makapangosor so Lawas o Al Masih
13 Taman sa maisaisa tano langon ko paratiyaya ago so katawi tano ko Wata o Allah, ago
matarotop so paparangayan tano a iperaot ko matatarotop a paparangayan o Al Masih.
14 Na di tano den kesayanan so manga wata a pekianodanod o manga begel ago
pekibayog sa apiya anda sii ko kapesembera on o pekealinalin a ndo, a maana so manga
ndao o manga tagakal a manga taw a pendadagen iran so manga ped a nggolalan ko
kapasang iran sa kapamamokeg.
15 Kena a ba giyoto, ka sii ko di tano dii kateroa ko tito a benar a rakes o kapekebabayai
ko ped na magto tano ko oman i okitokit sii ko kaiisaisa tano ago so Al Masih. Sekaniyan
so olo
16 Na sii ko kipepaaren iyan ko langon o manga anggaota o lawas na makapendadaita
siran, ago makapekekampeta so langon o lawas a dii makanggolalan ko oman i soosooran
a maaped on. Na amay ka dii nggalebek piyapiya so oman i ped on na pegto so langon o
lawas na pepakapangosoren iyan a ginawa niyan sii ko kapekebabayai o oman i isa ko ped
iyan.
So Bago a Kaoyagoyag sii ko Al Masih
17 Kagiya ka maoto na sii ko ingaran o Kadnan na pelalangan ko sekano: geneki niyo a

kapepaginetaw niyo a datar o manga kapir a da a bali niyan so kapepamimikir iran.
18 Miyamakaliboteng so manga pamikiran iran, na di siran makapembagian ko
kaoyagoyag a ipembegay o Allah sabap ko kada a peleng iran a minisabap ko kategas iran
i poso.
19 Kiyadaan siran den sa kaya, na piyalad iran a ginawa iran ko mitataralo a kababaya a
di ran dii nggolaolaan so langon a pitibarangan a maresik a di siran den keonseran.
20 Ogaid na kena a ba giyanan i miyasowa iyo makapantag ko Al Masih!

21 Ka mataan den a miyaneg iyo so makapantag on, na sii ko kapepangongonotani niyo
ron na minipangendao rekano so tito a benar a madadalem ki Isa.
22 Kagiya ka maoto na ndai niyo so andang a ginawa niyo a aya pekepoonan o marata a
kapepaginetaw niyo gowani, ka giyangkoto a andang a ginawa niyo na pembinasaan o
manga rarata a kabaya iyo a pepekasaliba rekano.
23 Disomala a pakibagowan iyo so manga poso iyo ago manga pamikiran.
24 Solota niyo so bago a ginawa a miyaaden a lagid o Allah a aden a tito a kaontol ago
kasosoti niyan.
25 Kagiya ka maoto na genek kano mamamokeg. Oman i isa na teroa niyan so benar ko
manga ped, ka palaya tano maaped ko isaisa a Lawas.
26 O pekerarangiti kano na iktiyari niyo o ba kano makandosa. Di niyo pakapegteya so
kararangit iyo ko mababasa alongan
27 Ago di niyo mbegi so Iblis sa kakeparo.
28 So pepamanekew na genek mamanekew, ka nggalebek baden ago paningkaoyagen sa
ontol kaan iyan mambo kabegi so manga miskin.
29 Pangalii niyo o ba kano makatero ko manga rarata a basa, ka so bo so pekaogop a
katero a domadait ko masosowa, a mipengosor ago ipekapiya o pepemakineg rekano.
30 Di niyo perataa a ginawa o Soti a Roh o Allah a kiyatiyapan kano ron o Allah a rek
iyan ago aya poriba ko kapekatalingoma o gawii a kakesabet iyo piyapiya.
31 Pakaawaa niyo sa ginawa niyo so langon a kapenanamai, kapakanggani, kararangit,
kapepasonga, kapamagitowito, a rakes o langon a kamarataan.
32 Ngginawai kano, kekapediay kano, ago peririlai kano a datar o kiyarilai rekano o Allah
sii ko kiyaisaisa niyo ago so Al Masih.
IPISOS 5
So Kapaginetaw sii ko Maliwanag
Kagiya ka maoto na perawata niyo so Allah, ka manga wata kano niyan a pekebabayaan
iyan.
2 Pakipaaren iyo a ginawa niyo ko kapekebabayai ko ped a lagid o kapekebabayai rektano
o Al Masih a inirila iyan so kaoyagoyag iyan para rektano a lagid sekaniyan o mamot a
soasoat a inisapaat ko Allah.
3 So kasebo ago so apiya antonaa kamaresikan o di na kananapso, na apiya so kaaloya

niyo ron na di patot ko manga kaom o Allah.
4 Na di rekano domadait o ba niyo teroa so piyakayaya a basa, o di na kalalalongan, o di
na maresik a kasablawan, ka aya patot na so kapepanalamati niyo ko Allah.
5 Ketangked iyo sa ginawa niyo a apiya antawaa taw a dii sebo, o di na maresik i
pamikiran, o di na dii menapso, (giyoto so pesimba ko kena a ba tohan) na da a isa kiran
bo a ba makapembagian ko Ndatoan o Al Masih ago so Allah.
6 Di kano pekiakal ko apiya antawaa i dii makatero sa da a gona niyan a katero; ka sabap
sangkoto a manga sowasowai na pekitana so rarangit o Allah ko siran oto a
pepamangongkir.
7 Kagiya ka maoto na di kano den pakipagepeda sangkoto a manga taw.
8 Gowani na kalilibotengan kano, ogaid na kaliliwanagan kano imanto sii ko kaiisaisa
niyo ago so Kadnan. Pepaginetaw kano a lagid o manga taw a komakaden ko kaliwanag,
9 Ka aya olaola o komakaden ko kaliwanag na so langon a kamapiyaan, kaontol ago tito a
benar.
10 Panamari niyo a masowa iyo so ikasosoat o Kadnan.
11 Di kano pepamangeped ko da a bali niyan a manga galebek a rek o maliboteng, ka
payaga niyo baden so kamarataan iran.
12 Ka piyakayaya apiya so kapegaloya ko mapapagma a dii nggolaolaan angkoto a manga
taw.
13 Ogaid na so langon taman a pepayagen o maliwanag na keilay piyapiya
14 Ka so langon taman a keilay piyapiya na kebaloy a maliwanag. Giyanan i sabap a aya
miyatero na
"Pagnaw ka den a totorogen,

mbowat ka poon ko miyamatay
ka pelindawan ka o Al Masih."
15 Kagiya ka maoto na pagiktiyari niyo piyapiya so kapepaginetaw niyo. Di kano

penggolaola sa datar o da a manga sowa iyan, ka pagoongangen kano baden.
16 Piyapiyai niyo mosar so oman i kapakapaparo niyo, ka marata angkai a manga gawii.
17 Sabap sii na di kano pelalolalong, ka panamari niyo baden a kasabota niyo ko
kebayaan o Kadnan a penggolaolaan iyo.
8 Di kano pemberebereg sa arak, ka pekailang ini rekano; pepakisenepi iyo niyo baden a
ginawa niyo ko Roh.
19 Sii ko kapakimbitiyarai o oman i isa ko ped iyan na osara niyo so manga sabor, manga
dikir, ago manga bayok o niyawa. Pagidaidai niyo ago pendidawa niyo so Kadnan sii ko
manga poso iyo.
20 Lalayon iyo pepanalamati so Allah a Ama sabap ko langon taman sii ko Ingaran o
Kadnan tano a Isa Al Masih.
So Keromai a Mama ago Babay
21 Pakimbabaya so oman i isa ko ped iyan sabap ko kapegadati niyo ko Al Masih.
22 Sekano a manga babay, na pakimbabaya kano ko manga karoma niyo a lagid o sii ko
Kadnan.
23 Ka so mama na aya olowan o karoma niyan a datar o Al Masih a aya olowan o Agama
a aya niyan Lawas, a sekaniyan den i Pepanabet on.
24 So Agama na dii makimbayabaya ko Al Masih, na datar oto mambo a patot a
pakimbabaya so manga babay ko manga karoma iran sii ko langon taman.
25 Sekano a manga mama, na kababayai niyo so manga karoma niyo a datar o

kiyababayai o Al Masih ko Agama ago inirila iyan so kaoyagoyag iyan para on
26 Kaan iyan masoti so Agama sii ko kalompiyowi niyan on ko kasalawati ron a ig ago so
katero iyan,
27 Ago an iyan mapakaiklas ko ginawa niyan so Agama a mala i bantogan ago da a
boring iyan, da a ba niyan keres ago da a saninsaning iyan a apiya antona onon, ka soti
ago da a ba on kidaway.
28 Patot a pekebabayaan o manga mama so manga karoma iran a lagid o kapekebabayai
iran ko rek iran a manga lawas. So taw a pekebabayaan iyan so karoma niyan na
pekebabayaan iyan mambo a ginawa niyan.
29 Ka da a taw a ba niyan pekegowaden a lawas iyan, ka pepagperen iyan ago sisiyapen
iyan a lagid o ipekidia o Al Masih ko Agama,
30 Ka kikaaped tano ko Lawas iyan.
31 Kabasa o Kitab a "Sabap sii na pagawaan o mama so ama ago so ina iyan ka
makipetepi ko karoma niyan, na siran a dowa na kebaloy a isaisa."
32 Aden a mala i kipantag a pageemaan gowani a miyapayag angkai a tig o Kitab, ka aya
mataan na di aken dii teroon so makapantag ko Al Masih ago so Agama.
33 Inonta bo na so oman i tetanggisa rekano a manga mama na paliyogat a kababayai
niyan so karoma niyan a datar o ginawa niyan, na oman i isa a babay na paliyogat a
pagadati niyan so karoma niyan.
IPISOS 6
So manga Wata ago so manga Lokes
Manga wata, na tomana niyo so manga lokes iyo a pakambabayaan rekano o Kadnan, ka
giyai i ontol a penggolaolaan.
2 “Pagadati ngka si ama a ka ago si ina a ka." Giyai so paganay a sogoan o Kitab a rakes
on a initopa.
3 Na giyai i minitopa: "kaan ka makategompiya ago mamboway sii sa doniya."
4 Na sekano a manga kiwata, na di niyo pakapegotega so manga wata iyo, ka tagikora

niyo siran sii ko kapeparintaa niyo kiran ago so kapepangendaowa niyo kiran makapantag
ko Kadnan.
So manga Oripen ago so manga Kadnan
5 Sekano a manga oripen, na tomana niyo so manga kadnan iyo sii sa doniya a
pagaadatan iyo siran a sarta o kalek. Nggolaolaa niyo ai a iklas ko poso iyo a datar o ba
aya niyo pepanalagadan na so Al Masih
6 A kena bo a ba igira a pegilain kano iran kaan kano iran mapodi, ka nggolaolaa niyo
baden a lagid o manga oripen o Al Masih a di kano dii nggolaola sa kabaya o Allah a
iklas ko poso iyo.
7 Nggalebek kano ko kaooripen iyo a mapipiya a ginawa niyo a datar o ba aya niyo
pepanalagadan na so Kadnan a kena a ba so matag manosiya.
8 Tanodi niyo a mbelasan o Kadnan so oman i taw a melagid so oripen ago so di, sabap
ko apiya antonaa mapiya a miyanggolaola niyan.
9 Sekano a manga kadnan, na kidian iyo mambo ko manga oripen iyo so lagid o pitero
aken. Di niyo siran pemagitai, ka tanodi niyo a siran ago sekano na rek o isaisa a Kadnan
a ndodoo sa kasorgaan a da a ba niyan peramiramigi.
So Raben o Allah
10 Aya moripori a peteroon ko na pakabagera niyo a ginawa niyo sii ko kaiisaisa niyo ago
so Kadnan a nggolalan ko mala a kabatowa iyan.
11 Solota niyo so langon a raben sa katidawa a ipembegay rekano o Allah kaan kano
makaato ko manga akal o Iblis.
12 Ka kena a ba tano dii makitidawa ko manga manosiya, ka so di keilay a manga
pangolo, manga dato, manga mamaapaar sangkai a kalilibotengan a doniya, ago manga
rarata a saitan sii ko manga langit.
13 Kagiya ka maoto na sanganen iyo so langon a raben o Allah kaan sii ko gawii a
kapekatalingoma o marata na pekaato kano ron a makipetidawa kano taman sa kaposan a
makambabager kano den.
14 Kagiya ka maoto na iiktiyar kano makitidawa a sesambitanan so kasadan iyo ko tito a
benar, ago so rareb iyo na meraraben ko kaontol,
15 Ago so manga ai niyo na kiyatelompaan ko kasosomayodi rekano ko
kepepakalangkapa niyo ko Mapiya a Totol mipantag ko kalilintad.
16 Aawidi niyo lalayon so paratiyaya a aya niyo kelong, ka giyanan i kipareng iyo ko
langon a pekadeg a gasa a ipena rekano o Iblis.
17 Na tarimaa niyo so kakesabet a ilmit iyo, ago so katero o Allah a aya niyo pedang a
ipembegay rekano o Roh.
18 Lalayon kano pangangarapan sii ko langon a manga masa a pepakipaar kano ko Roh.
Iiktiyar kano kaan iyo ai manggolaola, na pananamari niyo lalayon so kipepamangnin iyo
ko langon a kaom o Allah.
19 Na pepangnin ako niyo mambo kaan ako pekebegi o Allah sa manga katero igira a
pepangosiyat ako an aken kapakitokawi sa da a kalek aken so pageemaan gowani
mipantag ko Mapiya a Totol.
20 Miyasogo ako a pepangosiyat sangkai a Totol apiya pen o makakalaboso ako imanto.
Na pangangarapana niyo a kekawaraw ako ko kapepakalangkapa ko ron, ka giyai i
paliyogat raken.
Kaposan a manga Salam
21 So pekebabayaan a pagari tano a si Tikiko, a kasasarigan a salinggogopa ko galebek ko

Kadnan, na aya rekano penotol ko makapantag raken kaan iyo katokawi so
kapakambebetad aken.
22 Ka piyakasong aken sekaniyan rekano san kaan iyan rekano kapakitokawi so
makapantag rekami langon sii, kaan iyan mapakapiya a manga ginawa niyo.
23 Pengnin ko a so Allah a Ama tano ago so Kadnan a Isa Al Masih na began iran so
langon a magariyari sa kalilintad ago gagaw a rakes o paratiyaya.
24 Pengnin ko a malalayon so limo o Allah ko langon a taw a pekebabaya ko Kadnan
tano a Isa Al Masih ko kababaya a da a ikeda iyan.
PILIPOS
PILIPOS 1
Alamat sorat ako i Paolo ago si Timotiyo a manga oripen i Isa Al Masih makasampay ko
langon a kaom o Allah sii sa Pilipos a maiisaisa siran ago si Isa Al Masih a rakes o manga
nakoda ago manga salinggogopa ko Agama.
2 Malalayon rekano so limo ago kalilintad a poon ko Allah a Ama tano ago so Kadnan a
Isa Al Masih.
Kapanalamat ago Kapangangarapan
Pepanalamatan aken so Tohan ko igira a peketademan ko sekano.

4 Na oman aken sekano langon ipamangni na pekebabaya ako ko kapepangangarapan
aken
5 Sabap ko kapetebangi niyo raken ko galebek ko Mapiya a Totol ipoon den ko paganay a
kiyanega niyo ron taman imanto.
6 Na matatangked sa ginawa ko a giyangkai a galebek a pipoonan o Allah sii rekano na
iteros iyan den taman sa mapasad sii ko gawii a kakesoy i Isa Al Masih.
7 Patot a mapamikir aken ai makapantag rekano langon ka kagiya pekebabayaan ko
sekano; ka miyakambagian kano langon ko limo a inibegay raken o Allah sii ko
kakakalaboso aken imanto ago sii ko kiyapakadaya aken sa kinitindegen aken ago
kiyapemataani ko Mapiya a Totol.
8 Katawan o Allah a so iklas a kipekedaliin aken rekano langon na poon den ko poso i Isa
Al Masih.
9 Pengnin ko a pekeomanomanan den so kapekebabayai niyo ko ped a rakes o katao ago

langon a kapakasabot
10 Kaan iyo mapili so lebi a mapiya kaan kano masoti a da a ba rekano kidaway sii ko
alongan a kapengokom o Al Masih.
11 Amay ka magiyoto na ketarotop sii rekano so paparangayan a ipagonga o kaontol a rek
iyo sabap ki Isa Al Masih kaan kabantogi ago mapodi so Allah.
Miyababaya si Paolo sabap ko Kapepakalangkapa ko Mapiya a Totol
12 Kabaya aken a katokawan iyo, manga magariyari, a so piyanga ookitan aken na baden
miyakatabang ko kapepakalangkapa ko Mapiya a Totol.
13 Aya kiyaondasan iyan na so langon a gordiya ko torogan o solotan ago so langon a ped
a sisii na kiyatokawan iran a aya kiyakalaboso aken na sabap ko Al Masih.
14 Na sabap ko kakakalaboso aken na miyakala so sarig o kadakelan ko magariyari sii ko
Kadnan na minitaralo so kawaraw iran ko kapepakalangkapa ko katero o Allah sa da den
a kalek iran.
15 Mataan den a so ped kiran na pepakalangkapen iran so Al Masih sabap ko kasiig ago
kapelalawana, ogaid na so ped na sabap ko mapiya a kabaya.
16 Giyangkai a miyaori na di ran ai dii nggolaolaan ka kagiya pekebabayaan ako iran, ka
katawan iran a initoro ako o Allah sa kipetindegen aken ko Mapiya a Totol.
17 Ogaid na so miyaona na aya kapepakalangkapa iran ko Al Masih na kena a ba iklas ko
poso iran, ka aya antap iran giya kapakala o ginawa iran. Pipikiren iran a ipekerata iran
oto a ginawa ko ko kakakalaboso aken.
18 Ogaid na di aken ai tegoon sa ginawa ko! Ka aya mala i kipantag na pepakalangkapen

so Al Masih ko oman i okit apiya sabap ko di ontol a antap o di na ontol, na giyanan i
ipekebabaya aken. Na pekidayon den so kapekebabaya aken
19 Ka katawan aken a sabap ko manga pangangarapan iyo ago so tabang o Roh i Isa Al
Masih na aya keondasan angkai a pekesowasowa na so kakesabet aken.
So Kapepaginetaw i Paolo para ko Al Masih
20 Aya tanto aken a iinamen ago aarapen na da den a penggolaolaan ko a ba aken ikeya,
ka kekawaraw ako baden kaan lalayon kabantogi so Al Masih sii sa ginawa ko a ba di
labaw ron angkai a masa, apiya anda ko kaooyagoyag aken o di na kapatay.
21 Ka aya bo a masisingnin aken sii ko kaooyagoyag aken na so Al Masih, na o matay
ako na keomanan baden so kampiyaan aken.
22 Ogaid na o mitataros a kaooyagoyag aken na makapenggolaola ko pen sa manga pipiya
a galebek; apiya oto na di aken ketangked o anda onon i tomoon ko.
23 Kareregenan ako ko kapekedowadowai raken, ka kebaya ako gomanat kaan ako
mipagepeda o Al Masih ka giyanan i lebi a mapiya,
24 Ogaid na aya mala rekano i kipantag na so kaooyagoyag aken.
25 Na kagiya matatangked aken ai na katawan ko a di ako pen petay, ka sisii ako rekano
pen langon kaan aken sekano katabangi ko kapepagosor ago kapekebabaya iyo sii ko
paratiyaya niyo
26 Ago an iyo tanto a mapodi si Isa Al Masih sabap raken amay ka makaped ako rekano
peman.
27 Aya mala i kipantag na so kapakapaginetaw niyo a mapapatot ko Mapiya a Totol

makapantag ko Al Masih kaan apiya anda ko kapakasong aken san sa kibentelen ko
rekano o di na di, na keneg aken a mbebeken kano a isaisa a antap iyo ago makapagisaisa
kano mananamar ko kapepakiparatiyayaan iyo ko manga ped ko Mapiya a Totol.
28 Di niyo keleken so siran oto a pepemanorang rekano, ka lalayon kano baden
kekawaraw. Na kitokaw iran ai sa kebinasa siran ago kesabet kano, na poon ai langon ko
Allah.
29 Ka inibegay rekano o Allah sabap ko Al Masih a kena bo a giya kapeparatiyayaa niyo
rekaniyan, ka so pen so kapekerasay niyo para rekaniyan.
30 Ka pekeokitan iyo so dii kapakitidawa a lagid o di aken dii kapakitidawa a miyailay
niyo gowani ago pekeneg iyo imanto a kaookitan aken den.
PILIPOS 2
So Kiyapangalimbabaan o Al Masih ago so Kala iyan
Ba aden a kiosiyat aken rekano sabap ko kaiisaisa tano ago si Isa Al Masih? Ba ipekapiya
a ginawa niyo so kapekebabayai niyan rekano? Ba aden a di niyo dii kanggiginawai ago
so Roh o Allah? Ba aden a gagaw niyo ago kapedi ko manga ped iyo?
2 Oway, mataan den! Kagiya ka maoto na pakapiyaa niyo a ginawa ko sa tarotop a
nggolalan ko kapakapelagilagid o pamikiran iyo ago kapepangalinggagaw, ago so
kakeisaisa o singanin iyo ago antap.
3 Di kano penggolaola sa apiya antona onon sabap ko kapelalawana o di na so da a lalaw
niyan a katekabor, ka pangalimbabaan kano baden a ibibilang iyo so manga ped a
makalalawan a di sekano.
4 Di niyo aya bo totordowa so kamapiyaan iyo, ka so pen so kamapiyaan o oman i isa
rekano.
5 Pamimikiran kano sa datar o pamikiran i Isa Al Masih:
6 Ka apiya pen Tohan sekaniyan

na da niyan pamikira i ba riyan tegela komapet so katotohani ron.
7 Ka inibibay niyan baden so pangkatan iyan
na inisolot iyan so kaooripeni ron,
na miyabaloy a datar o manosiya.
8 Na kagiya makimasa a meroropa sa manosiya
na miyangalimbabaan sekaniyan
ago tomiyoman ko Allah
apiya miniyarong ko kapatay
a so kiyapatay niyan ko kros.
9 Sabap sii na inipangkat sekaniyan o Allah ko lebi a maporo
na bigan iyan sa Ingaran a makalalawan ko oman i ngaran
10 Kaan so langon a kaaden roo sa kasorgaan ago sii sa doniya ago sa didalem a doniya
na pemakasodiyod siran sa kapepodiya iran ko Ingaran i Isa
11 Na peteroon o oman i isa kiran a mataan den a Kadnan si Isa Al Masih,
na giyoto i kakebantogi ko Allah a so Ama.
So Kapesindaw a lagid o manga Bitoon
12 Kagiya ka maoto, manga pekebabayaan ko, na datar o lalayon iyo raken kapetomana
isako maaped ako rekano pen na lebi pen a mala i kipantag a kapetomana niyo raken
imanto sa kabebelag aken rekano. Peterosen iyo a kapepanamar iyo sa kaimasada niyo ko
kakesabet iyo a sarta a tatabaden kano sa kalek ko Allah.
13 Ka so Allah na aya sii rekano dii nggalebek a pepamegay rekano sa kabaya ago
kapakagaga sa kanggolaolaa niyo ko ikasosoat iyan.
14 Sii ko langon a di niyo dii nggolaolaan na di kano den pepanarotaro o di na

pepapawala
15 Kaan kano mabaloy a da a ba on kidaway ago da a saninsaning iyan a manga wata o
Allah a kibabaling a lomolook ko bibid ago miyamakasilay a manga taw sii sa doniya.
Patot a makasindaw kano kiran a lagid o manga bitoon a pepamanindaw ko langit
16 Sii ko kapepakitokawi niyo kiran ko katero a pepangoyag. O nggolaolaa niyo ai na
mipengandag aken sii ko gawii a kakesoy o Al Masih a da bes mailang so langon a
kiyandokaw aken ago kiyapanamar.
17 Ogaid na apiya pen keodod so rogo aken sii ko soasoat a ipesepaat iyo ko Allah, a
giyoto so galebek iyo ago paratiyaya, na mapipiya a ginawa ko ago pagepeden ko sekano
langon ko kapekebabaya aken.
18 Na patot a pakapipiyaa niyo mambo a ginawa niyo ago kababaya kano a datar aken.
Si Timotiyo ago si Ipaprodito
19 Makasasarig ako ko Kadnan a Isa a sogoon ko rekano si Timotiyo sa di bo ini matey

kaan makapiya a ginawa ko amay ka maneg aken so makapantag rekano.
20 Da a ba ko ped sii a datar iyan a tito a kiaawiden iyan a akal ko kamapiyaan iyo.
21 So langon a ped na aya iran bo tatagoon sa ginawa na so rek iran a kamapiyaan a kena
a ba so kabaya i Isa Al Masih.
22 Ogaid na katawan iyo so sowasowai i Timotiyo a datar o wata a pegogop ko ama iyan
na minggalebek sekaniyan a ped aken sabap ko Mapiya a Totol.
23 Kagiya ka maoto na iinamen aken a mapekasong aken sekaniyan rekano anda den i
katokawi ko o antonaa i kesagadan aken sii.
24 Na makasasarig ako ko Kadnan a saken den mambo i pekasong san rekano sa di bo ini
matey.
25 Miyapamikir aken den a disomala a pekakasowin aken san rekano so pagari tano a si
Ipaprodito a ped aken ko galebek ago sii ko dii kapakitidawa ka sekaniyan i siyogo iyo a
pekaogop raken ko kareregeni raken.
26 Ipekedali kano niyan langon na mikerata a ginawa niyan sabap sa miyaneg iyo a
miyasakit sekaniyan.
27 Mataan den a miyasakit na maito bo da matay ogaid na inikapedi o Allah na kena bo a
ba sekaniyan ka saken mambo, ka o ba baden pekeomanomani so kapakamboboko aken.
28 Kagiya ka maoto na lebi ako pen a kateterangan sa kapakasonga ko ron san rekano
kaan kano mababaya amay ka mailay niyo peroman, na keparin so kapakamboboko aken.
29 Na tapiin iyo sekaniyan a ipepanalamat iyo ko Kadnan a rakes o tanto a kapekebabaya.
Pagadati niyo so datar iyan a manga taw
30 Ka inisarakan iyan a kaoyagoyag iyan, na maito sekaniyan bo da matay sabap ko
galebek ko Al Masih kaan ako niyan kaogopi ko di niyo raken kiogop.
PILIPOS 3
So Tito a Kaontol
Aya moripori a peteroon ko, manga pagari ko, na kababaya kano sii ko Kadnan. Di aken
ipesendit so kapeparomani ko somorat ko minisorat aken rekano den gowani, ka giyai na
kamapiyaan iyo.
2 Pananggilai niyo so siran oto a dii nggalebek sa marata a mipeparangayan siran sa
manga aso a tig iran a paliyogat so katori.
3 Ka kena a ba siran i tito a miyanga totori, ka sektano. Ka pesimbaan tano so Allah a
nggolalan ko Roh iyan, na ipepangandag tano si Isa Al Masih, na kena a ba tano sasarigi
so kamamanosiyai rektano
4 Apiya pen aden a manga kidaowa aken sa kakesarigi ko ko kamamanosiyai raken.
Ka o aden a mapipikir iyan a aden a kidaowa niyan sa kakesarigi niyan ko kamamanosiyai
ron na lebi a kakepakay raken a di sekaniyan.
5 Ka miyatori ako isako makapagidad ako sa walo gawii, na inimbawata ako o bangsa a
Israil a ped ako ko mbatabataa a Baniyamin, na tenger ako a Yahodi. Makapantag ko
kapetomana ko Kitab na Parisi ako;
6 Sabap ko kasigi aken na siyatro aken so Agama; na da a ba raken kidaway ko di aken
dii kinggolalanen ko langon taman a ipapaliyogat o Kitab.
7 Ogaid na langon taman oto a kibilang a mibibinta aken gowani na ibibilang aken imanto
a da a bali niyan sabap ko Al Masih.
8 Na kena a ba giyanan bo, ka ibibilang aken pen so langon taman a da a bali niyan sabap
ko lebi pen a mala i bali a kapeketokawi aken ki Isa Al Masih a Kadnan aken. Sabap
rekaniyan na inirila aken so langon taman na inibilang aken a matag popot kaan aken
mapelaba so Al Masih
9 Ago an ako maisaisa ago sekaniyan sa tarotop a da den a ba ko kaontol a mipepasod ko
kapetomana ko manga sogoan, ka aden a kaontol aken a inibegay raken sabap ko
paratiyaya aken ko Al Masih, a so kaontol a poon ko Allah a sii mipepasod ko paratiyaya.
10 Aya bo a kabaya aken na katokawan ko so Al Masih, ago kalayaman aken so kabatowa
a minioyag on a poon ko miyamatay, ago makambagian ako ko kiyarasay niyan a mbaloy
ako a datar iyan sii ko kiyapatay iyan
11 Kaan masiken na makarampay ako ko kakeoyag aken a poon ko miyamatay.
So Kapalalagoya ko Apeta
12 Kena a ba ko dii teroa a miyakamal aken den ai langon, o di na ba miyatarotop so

paparangayan aken, ka itataros aken baden so kapananamar aken kaan aken makowa so
langon taman a aya kiyasabapan ko kiyakowaa raken i Isa Al Masih a rek iyan.
13 Di aken mapipikir, manga magariyari, o ba aken den ai miyakowa, ogaid na aden a isa
a di aken dii nggolaolaan a giyai: pepakalipatan aken so kiyapangaiiposan ko, na
pepanagontaman ako kaan aken maraot so maoonaan aken.
14 Na pepalalagoy ako a mamamantek den ko apeta kaan aken makowa so pirmiyo, a
giyoto so katewaga raken o Allah roo sa kasorgaan a nggolalan ki Isa Al Masih.
15 Apiya antawaa rektano i miyakatoa den ko paratiyaya na patot a mamimikiran tano sa

datar oto. Ogaid na o aden a ped rekano a salakaw so pamikiran iyan na peyagen rekano o
Allah so makapantag sii.
16 Inonta bo na pendayon tano tomoman ko tito a benar a miyasowa tano den taman
imanto.
17 Peterosen iyo, manga magariyari, so kaperawata niyo raken. Piyakiilay ami rekano den
so tito a ladiyawan na simaa niyo so siran oto a pesowa on.
18 Ka aden a miyatero aken rekano den omanoman na peparomanan ko bo tero imanto a
rakes o manga lo aken na giyai: madakel a taw a aya ipepaginetaw iran na misosopak ko
kiyapatay o Al Masih ko kros.
19 Aya sendadan iran na pekanaraka siran, ka aya iran biyaloy a katohanan iran na so
manga kabaya o lawas iran. Ipepangangarig iran so patot a ikeya iran na aya iran bo
pipikiren so kadodoniyai.
20 Ogaid na sektano na kipagiinged sa kasorgaan a ron pekapoon so Pepanabet a
pakatatalingomaan tano a so Kadnan a Isa Al Masih.
21 Selinen iyan so mitatanan a manga lawas tano na mbalowin iyan a datar o lawas iyan a
kababantogan a nggolalan ko kapaar a mipendato iyan ko langon taman.
PILIPOS 4
Kagiya ka maoto, manga pagari ko a pekebabayaan ko ago ikakadali aken, a so
ipekebabaya aken ago balas, na pakabebeken kano sii ko kaiisaisa niyo ago so Kadnan,
manga ginawai aken!
Manga Insarat
2 Seka, Iyodiya ago Sintiki, na pagakolan ko sekano a pagayonayon kano sii ko kaiisaisa
niyo ago so Kadnan.
3 Na seka mambo a tito a salinggogopa aken na pengnin ko reka a ogopi ngka ngkai a
manga babay, ka miyanamar siran a ped aken ko kapepakalangkapa ko Mapiya a Totol, a
rakes i Kliminto ago so langon a ped aken ko galebek a miyamangisorat so manga ngaran
iran ko ribro o Allah a kasosoratan ko manga ana kaoyagoyag iyan.
4 Lalayon kano baden kababaya sii ko kaiisaisa niyo ago so Kadnan, na peromanan ko
tero a kababaya kano!
5 Pakiilain iyo ko langon a taw a manapi kano. Magaan den komasoy so Kadnan.
6 Di niyo pegawiden a akal so apiya antonaa, ka pangangarapan kano baden makapantag
ko langon taman. Pakitokawi niyo ko Allah so manga pangni niyo ron a sarta o
kapepanalamat.
7 Na so kalilintad o Allah a lawan ko langon a kakesabota on o taw na magipat ko manga
poso iyo ago manga pamikiran sii ko kaiisaisa niyo ago si Isa Al Masih.
8 Moripori, manga magariyari, na aya patot a pepamimikiranen iyo na so manga nganin a

lebi a mapiya ago mapopodi, maana a so apiya antonaa a benar, pagaadatan, maontol,
soti, kebabayaan, ago maselasela.
9 Nggolaolaa niyo so miyasowa iyo ago miyatarima a poon raken a nggolalan ko manga
katero aken ago manga galebek a miyailay niyo, na amay ka giyoto na pelalayon rekano
so Allah a pepamegay sa kalilintad.
Panalamat ko Pamemegayan
10 Tanto ako a mabababaya sii ko Kadnan, ka imanto ko miyatey den a oleg na

pimbagowan iyo so katatagoa niyo raken sa ginawa niyo. Benar a tatagoon ako niyo sa
ginawa gowani ogaid na da den a paro niyo sa kapekiilain iyo sii.
11 Kena a ba ko ai dii teroa sabap sa aden a makokorang raken, ka miyasowa aken den o
andamanaya i kasosoat aken ko apiya antonaa a kapakambebetad aken.
12 Kiyalayaman aken so kakokorangi raken sa kaoyagan na kiyalayaman aken so
kasosobrai ron. Miyasowa aken den so kapipiya a ginawa sii ko apiya antonaa onon ago
oman i kapakambebetad aken o maoosog ako o di na pekeor; o mitataralo so rek aken o di
na korang.
13 Pekagaga ako nggolaola ko langon taman a nggolalan ko Al Masih a pembegay raken
sa bager.
14 Apiya pen oto na pinggolaola niyo so mapiya ko kiyaogopi niyo raken ko kareregeni
raken.
15 Sekano a manga taw sa Pilipos na katawan iyo piyapiya a isako gomanat ako sa
Masidoniya sii ko poonan o kapepakalangkapa ko ko Mapiya a Totol na sekano bo i
Agama a miyakipagepeda raken sii ko kapepamemegay ago so kapepanarima.
16 Ka apiya isako sisii ako pen sa Tisalonika na piyakiwitan ako niyo sa tabang sa
miyakadowa isako kakokorangan ako sa rek.
17 Kena a ba aya kabaya aken na so katarimaa ko manga pamemegayan, ka kabaya aken a
mala a mibalas rekano sabap ko limo iyo.
18 Kiyabegan ako niyo ko langon a kailangan aken ago sosobra pen. Kiyapagadilan ako
piyapiya, ka miyakowa ko a poon ki Ipaprodito so manga pamemegayan a piyakiwit iyo
raken. Giyanan na lagid o mamot a ipesepaat ko Allah a tiyarima iyan ago ikasosoat.
19 Na so Tohan ko na imbegay niyan rekano lalayon so langon o manga kailangan iyo a
poon ko mala a kakawasaan iyan roo sa kasorgaan a nggolalan ki Isa Al Masih.
20 Rek o Tohan tano ago Ama so bantogan sa taman sa pakataman! Amin.
Kaposan a Salam
21 Sampain iyo so salam aken ko langon a kaom o Allah a pepamaratiyaya ki Isa Al

Masih. Pesalamen kano o manga magariyari a ped aken sii.
22 Pesalamen kano mambo o langon a kaom o Allah sii a ba di labaw so kigagalebek ko
Solotan Kaisar.
23 Pengnin ko a malalayon rekano langon so limo o Kadnan a Isa Al Masih.
KOLOSAS
KOLOSAS 1
Alamat sorat ako i Paolo a siyogo i Isa Al Masih sabap ko kabaya o Allah ago poon ki
Timotiyo a pagari tano
2 Makasampay ko manga kaom o Allah sa Kolosas, a so pepamaratiyaya a manga
magariyari a maiisaisa kano ago si Isa Al Masih.
Pengnin ko a malalayon rekano so limo ago kalilintad a poon ko Allah a Ama tano.
Kapanalamat ago Kapangangarapan
3 Lalayon ami pepanalamatan so Allah a Ama o Kadnan tano a Isa Al Masih sii ko
kipepangangarapanen ami rekano
4 Ka miyaneg ami so makapantag ko paratiyaya niyo ki Isa Al Masih ago so
kapekebabayai niyo ko langon a manga kaom o Allah.
5 Giyangkai a paratiyaya niyo ago kababaya na minisabap ko sasarigan iyo komowa a
tatagoon para rekano roo sa kasorgaan. Miyaneg iyo gowani so makapantag on sii ko
kiyateroa rekano ko tito a benar, a so Mapiya a Totol.
6 Giyangkai a Totol a minisampay rekano na pepekalangkap mambo ko dalem a doniya
ago pepagonga a datar o kapegonga niyan san rekano ipoon ko gawii a miyaneg iyo ago
siyabot iyo so tito a benar makapantag ko limo o Allah.
7 Aya miyangendao rekano sii na si Ipapras a pekebabayaan a ped ami a oripen ago
kasasanaan a pepanalagad ko Al Masih sabap rekami.
8 Piyanotol iyan rekami so makapantag ko gagaw niyo a inibegay rekano o Roh.
9 Sabap sii na ipoon ko kiyanega ami ko makapantag rekano na da ami geneki so

kipepangangarapanen ami rekano. Pepangnin ami ko Allah a katokawan iyo piyapiya so
kabaya iyan a nggolalan ko langon a ongangen ago kapakasabot a ipepamegay o Roh
10 Kaan kano makapaginetaw a mapapatot ko Kadnan, ago mapenggolaola niyo lalayon
so ikasosoat iyan. Amay ka magiyanan na pemangonga kano ko langon a manga pipiya a
galebek, ago pekeomanomanan so kapeketokawi niyo ko Allah.
11 Pengnin ami a mapakabager kano niyan ko langon a bager a pepekapoon ko
kababantogan a kabatowa iyan kaan kano makatiger ago makasabar ko langon taman a
sarta o kapekebabaya
12 A pepanalamatan iyo so Ama a biyaloy kano niyan a domadait a makapembagian ko
mapekawali o manga kaom o Allah sii ko Ndatoan o kaliwanag.
13 Siyabet tano niyan ko kapaar o maliboteng na inowit tano niyan ko Ndatoan o
pekebabayaan a Wata iyan
14 A miyakanggolalan rekaniyan so kiyaaona rektano ago so kiyarilai ko manga dosa
tano.
So Katotohani ko Al Masih
15 So Al Masih i kiyapayagan ko di keilay a Tohan. Onaan sekaniyan o langon a kaaden,

16 Ka miyakanggolalan rekaniyan na inaden o Allah so langon taman roo sa kasorgaan
ago sii sa doniya, a pekeilay ago di keilay a rakes o manga pangolo, manga kadnan,
manga dato, ago manga pepamaapaar. Langon taman na miyaaden a nggolalan rekaniyan
ago sabap on.
17 Kapapantagan sekaniyan den sa da pen kaadena ko apiya antonaa, na nggolalan ko
kapaar iyan na matatanor so kalangolangon.
18 Sekaniyan i olo o Agama a aya niyan Lawas ago pekepoonan mambo o kaoyagoyag o
Lawas. Miyaona sekaniyan ko langon a penga ooyag a poon ko miyamatay kaan
sekaniyan bo i maoonaan ko langon taman.
19 Ka pitekdir o Allah a so langon a katotohani rekaniyan na komaden ko Wata iyan.
20 Na nggolalan ko Wata na miyakingginawai so Allah ko kalangolangon, a so langon a
matatago sii sa doniya ago roo sa kasorgaan, ka miyakipelintada sekaniyan kiran a
nggolalan ko kiyatoga o rogo o Al Masih ko kiyapatay niyan ko kros.
21 Gowani na mawatan kano ko Allah ago manga ridoay kano niyan sii ko pamikiran iyo
sabap ko manga rarata a olaola niyo.
22 Ogaid na miningginawai kano niyan imanto a nggolalan ko kiyapatay o Al Masih sii
ko kamamanosiyai a lawas kaan kano niyan mapakadarpa ko hadapan iyan a masosoti a
da a dosa niyo ago da a kidaway rekano.
23 Na mapenggolaola ini asar a itataros iyo den so kapeparatiyaya niyo a mabager ago di
kealin, ago di niyo pagawaan so sarig a tiyarima iyo ko kiyanega niyo ko Mapiya a Totol
a piyakalangkap ko langon a taw sa doniya. Na saken a si Paolo i miyabaloy a
pepanalagad sangkai a Totol.
So Kapepanalagad i Paolo para ko Agama
24 Imanto na ipekebabaya aken so kapekerasay aken para rekano, ka giyanan i kapegogop

aken mimasad ko da pen matarotop a kapekerasay o Al Masih para ko Lawas iyan a so
Agama.
25 Na biyaloy ako o Allah a pepanalagad ko Agama, ka inisana niyan raken angkai a
galebek para rekano a giyoto so kapekalangakapa ko langon o lalag iyan.
26 Gowani na pageemaan angkai a lalag iyan ko langon a manosiya ipoon ko miyanga
oona a gawii ogaid na miyapayag imanto ko manga kaom iyan.
27 Ka aya takdir o Allah na giya kiyapakitokawi niyan kiran ko kamapiyaan angkai a
kababantogan a pageemaan a lalag a pekalangkapen ko langon a nasiyon. Na giyai so
pageemaan: madadalem rekano so Al Masih a aya pekesabapan ko sarig iyo a
makapembagian kano ko bantogan iyan.
28 Sabap san na pepakalangkapen ami so Al Masih sii ko langon a manga taw.
Pepangosiyatan ami ago pepangendaon ami so oman i isa kiran a di ami dii nggolalan so
langon a ongangen kaan ami mapakapangadap ko Allah so oman i isa kiran a matatarotop
i paparangayan sii ko kaiisaisa niyan ago so Al Masih.
29 Giyanan i penggalebeken aken ago pepanagontamanan a di aken dii nggolalan so
kabatowa a ipembegay raken o Al Masih a aya dii nggalebek a madadalem raken.
KOLOSAS 2
Kabaya aken a katokawan iyo a tanto ako a pepanagontaman sabap rekano ago so manga
taw sa Laodisiya ago so langon a da raken pen makailay.
2 Ka aya antap aken na mapakapiya a ginawa iran ago maisaisa siran sii ko
kapekebabayai o oman i isa ko ped iyan kaan matarotop piyapiya so kapakatangked iran
ago kapakasabot. Nggolalan sii na katokawan iran so pageemaan gowani o Allah, a giyoto
so Al Masih.
3 Sii rekaniyan mitetapok so langon o kakawasaan o ongangen ago katao.
4 Pitero aken ai kaan da a ba rekano pekaakal ko manga katero a kapelalantis.

5 Ka apiya ako rekano pen mabebelag na datar o ba sisii rekano so niyawa ko, na
pekebabaya ako ko kapekeilaya ko ko kapagaayonayon iyo ago so kabager o paratiyaya
niyo ko Al Masih.
So Tarotop a Kaoyagoyag sii ko Al Masih
6 Kagiya ka maoto na kagiya miyatarima iyo si Isa Al Masih a Kadnan iyo na tarosen iyo
so kapepaginetaw niyo a makipagiisaisa kano ron.
7 Paseken iyo piyapiya rekaniyan so manga bekaw niyo; bangona niyo ron so
kapepaginetaw niyo; pepakabagera niyo so paratiyaya niyo a ipepasod ko minipangendao
rekano, na lalayon kano pepanalamat.
8 Iktiyari niyo o ba kano pekelitagi o apiya antawaa a nggolalan ko da a bali niyan ago
pepamagakal a ongangen a mipepasod ko manga ndao a dii tetanana o manga manosiya
ago sii ko kadodoniyai a manga kokoman a kena a ba mipepasod ko Al Masih.
9 Ka sii komakaden ko Al Masih so langon o katotohani ko Allah a meroropa sa lawas.
10 Na matatarotop so kaoyagoyag iyo sii ko kaiisaisa niyo ago so Al Masih a aya olowan
o langon a aden a kadato iyan ago kapaar.
11 Sii ko kiyaisaisa niyo ago sekaniyan na miyanga totori kano a kena ini a ba so katori a
pasad o taw, ka so katori a pasad o Al Masih a giyoto so kiyapokasa rekano ko kapaar o
madodosa a kamamanosiyai rekano.
12 Inilebeng kano a ped o Al Masih sii ko kiyasalawati rekano. Na inoyag kano mambo a
ped iyan a nggolalan ko paratiyaya niyo ko kabatowa o Allah a aya miyoyag ko Al Masih
a poon ko miyamatay.
13 Gowani na ibibilang kano a maatay sabap ko manga dosa niyo ago so da rekano pen
kapokasa ko kapaar o kamamanosiyai rekano, ogaid na miyaoyag kano den o Allah a ped
o Al Masih. Rinilaan iyan so langon a dosa tano
14 Na piyonas iyan so rikord o manga dimanda rektano sabap ko kiyasogoka tano ko
manga sogoan, ka piyakada iyan ai piyapiya a nggolalan ko kiyatotoka on ko kros.
15 Sii sangkoto a kros na riyampasan iyan sa kapaar so manga rarata a pangolo ago aden
a kadato iyan na piyakimbantayan iyan ko doniya so kiyayai kiran ko kiyatabana niyan
kiran sii ko kros.
16 Kagiya ka maoto na di kano pekikokom ko apiya antawaa makapantag ko ken iyo ago
paginomen, o di na makapantag ko di niyo dii kaselaselaa ko pista, so dii kaseribolan o
olanolan, o di na so manga gawii a Idedeke.
17 Giyangkai langon na matag baden along o pekatalingoma; aya katomanan ai na so Al
Masih.
18 Di kano pekikokom ko apiya antawaa a ipekebabaya iyan so di tito a
kapangalimbabaan ago so kapesimbaa ko manga malaikat. Lalayon iyan pegalowin so
manga pangingilain a miyailay niyan kon, na so datar iyan a taw na ba niyan den
ipetekabor so manga pamikiran o iman iyan a mipapaar o kamamanosiyai ron.
19 Kena a ba niyan kakapeti so Al Masih a aya olo o Lawas. Pembegay so Al Masih sa
bager ko langon o Lawas a makakekapekapeta a nggolalan ko manga soosooran iyan ago
manga ogat, na pepegto ini sii ko kapepakatoa on o Allah.
So Kiyapatay ago Kiyaoyag a ped o Al Masih
20 Sabap sa miyamatay kano a ped o Al Masih a miyapokas kano den ko kapaar o

kadodoniyai a manga kokoman na ino niyo petomana so manga kapepanaritib o doniya a
lagid o ba kano pen rek o doniya, a aya ibarat iyan na
21 “Di niyo ai teyongi," "Di niyo anan taami," ago "Di niyo oto sekoa?
22 Giyangkai a manga kapepanaritib na manga kokoman ago ndao a matag pasad a
manosiya mipantag ko manga nganin a pepanga ada sii ko kapegosara on.
23 So kapetomana sangkai a manga kokoman na lagid o ba kaongangen sii ko dii kategel
ko kapesimba, so di tito a kapangalimbabaan, ago so kapepegesa ko lawas, ogaid na di ini
pekaogop ko kapekegenggena ko mitataralo a kabaya o lawas.
KOLOSAS 3
Sabap sa inoyag kano a ped o Al Masih na panagontamani niyo so manga nganin a
ndodoo sa kasorgaan a ron makaoontod so Al Masih ko korsi iyan ko kawanan o Allah.
2 Lalayon iyo pagiimana so ndodoo sa kasorgaan a kena a ba so matatago sa doniya.
3 Ka miyatay kano isako matay so Al Masih, na so kaoyagoyag iyo na mapageema a ped
o Al Masih a sii madadalem ko Allah.
4 Amay ka makimasa so Al Masih a aya tito a kaoyagoyag iyo na kemasaan kano mambo
a ped iyan ago makapembagian ko bantogan iyan.
So Andang ago so Bago a Kapaginetaw
5 Kagiya ka maoto na bonoa niyo so kadodoniyai a sowasowai o manga lawas iyo, a so

kasebo, kamaresikan, lalatog, mitataralo a kababaya, ago kananapso, ka so kananapso na
so kapesimbaa ko kena a ba tohan.
6 Pekerarangitan o Allah so manga taw a pepamangongkir on ko di ran dii kanggolaolaa
7 Na sekano mambo na di sii dii nggolaola gowani sii ko kipapaaren ko kapepaginetaw
niyo angkai a manga kabaya.
8 Ogaid na imanto na ndai niyo ai langon: kararangit, kanggani, kagowad, kapagitowito,

ago dii kateroa ko maresik.
9 Di kano pepamokeg, ka inendaan iyo den so kaasalan a ginawa niyo a rakes o manga
sowasowai niyan
10 Na inisolot iyo den so bago a ginawa niyo a lalayon dii mbagowan a ipesayan ko Allah
a aya on miyangaden kaan iyo sekaniyan katokawi piyapiya.
11 Na sii ko kipesayanen rekano ko Allah na da a mbidabidaan o Yahodi ago so kena a ba
Yahodi, so miyatori ago so da matori, so rait, so da a sowa iyan, so oripen ago so kena a
ba oripen, ka so Al Masih na aya den kalangolangon ago madadalem ko kalangolangon.
12 Sabap sa piyamili kano o Allah a manga pagtaw niyan a pekebabayaan iyan na soloten
iyo so kapangalinggagaw, kapangampediin, kapangalimbabaan, kapanginsokor, ago
kapanginsabar.
13 Penanapiya kano ago peririlai kano igira aden a mipepanon o apiya antawaa ko ped
iyan. Lagid o kiyarilai rekano o Kadnan na peririlai kano mambo.
14 Na pagomanen iyo sii langon so kapekebabayai ko ped a aya kigakot ko
kalangolangon ai ko matatarotop a kapepagayonayon.
15 Pakandatoa niyo ko manga poso iyo so kalilintad a ipembegay o Al Masih, ka tiyawag
kano o Allah sa kapakalilintad iyo sii ko isaisa a Lawas, na pepanalamat kano baden.
16 Pakakadena niyo piyapiya ko poso iyo so manga katero o Al Masih.
Pepamangendaoway kano ago pepamagosiyata kano a rakes o langon a ongangen.
Pendidaon iyo so manga katero a Sabor ago manga ipendikir ago manga ipepanakbir a
poon ko Roh na pendidawa niyo so Allah sii ko poso iyo a sarta o kapepanalamati niyo
ron.
17 Apiya antonaa i penggolaolaan iyo o di na peteroon na nggolaolaa niyo langon sii ko
ingaran o Kadnan a Isa a rakes o kapepanalamati niyo ko Allah a Ama a nggolalan ki Isa.
Manga Insarat ko manga Pamiliya
18 Sekano a manga babay na pakimbabaya kano ko manga karoma niyo, ka giyanan i

patot rekano a mapaparatiyayaan ko Kadnan.
19 Sekano a manga mama na kababayai niyo so manga karoma niyo ago di niyo siran
pekabobologi.
20 Sekano a manga wata na petomana niyo lalayon so manga lokes iyo, ka giyanan i
ipekesoat o Kadnan.
21 Sekano a manga kiwata na di niyo pakaperangita so manga wata iyo, ka o ba siran

baden kadai sa kateterang.
22 Sekano a manga oripen na petomana niyo lalayon so manga kadnan iyo sii sa doniya a
kena bo a ba igira a pegilain kano iran kaan kano iran mapodi, ka ngolaolaa niyo ai sa
iklas ko poso iyo sabap ko kalek iyo ko Kadnan.
23 Apiya antonaa i penggolaolaan iyo na nggalebeka niyo sa kateterang a lagid bo o so
Kadnan i nggagalebekan iyo a kena a ba so manosiya.
24 Tanodi niyo a so Kadnan i mbelas rekano, ka mbegan kano niyan sa kawali a ititiyagar
iyan rekano, ka so Al Masih na aya tito a Kadnan a pepanalagadan iyo.
25 So taw a minggolaola sa di ontol na imbadal on so di ontol a pinggolaola niyan, ka di
peramiramig so Allah.
KOLOSAS 4
Sekano a manga kadnan na paginontolani niyo so manga oripen iyo na began iyo kiran so
mapapatot kiran, ka tatanodi niyo a aden mambo a Kadnan iyo roo sa kasorgaan.
So Ped a manga Insarat
2 Pananamari niyo so kapepangangarapan iyo na pageenawi niyo a rakes o

kapepanalamati ko Allah.
3 Pangangarapanen kami niyo mambo kaan kami kabegi o Allah sa kakeparo sa
kapekalangkapa mi ko lalag iyan kaan ami mapayag so pageemaan gowani makapantag
ko Al Masih, ka giyai i sabap a kakalabosowa raken imanto.
4 Pangangarapana niyo a mapakalangkap aken ai sa marayag ko patot a kapeteroa ko ron.
5 Pakaoongangen kano ko manga okitokit iyo igira a sisii kano ko manga taw a di
pemaratiyaya, na piyapiyai niyo nggolalan so manga kapakapaparo niyo.
6 Patot a so di niyo dii kapakimbibitiyarai na lalayon ipekesoat ago pekaompiya, ka amay
ka giyanan na ketokawan iyo so patot a isembag iyo ko oman i magise rekano.
7 Si Tikiko, a pekebabayaan tano a pagari tano, a kasasanaan a pepanalagad ago

salinggogopa aken ko galebek ko Kadnan, na penotolen iyan rekano so langon taman
makapantag raken.
8 Giyanan i sabap a pekasongen aken sekaniyan san rekano kaan iyo katokawi so
kapakambebetad ami sii ago an iyan mapakapiya a ginawa niyo.
9 Magonot on si Onisimo a pekebabayaan ago kasasanaan a pagari tano a poon sa inged
iyo. Penotolen iran rekano so langon a pekesowasowa sii.
10 Pesalamen kano i Aristarko a ped aken a makakalaboso, ago si pen si Marko a tenged
minsan i Barnabas. (Miyatero rekano den so makapantag rekaniyan; tapiin iyo sekaniyan
o pekasong san).
11 Pesalamen kano mambo i Yosowa a bebetowan sa Yostos. Giyangkai a telo kataw na
aya bo a manga Yahodi ko manga ped aken ko galebek ko Ndatoan o Allah na mala a
miniyogop iran raken.
12 Pesalamen kano i Ipapras a poon mambo sa inged iyo ago oripen i Isa Al Masih.
Lalayon sekaniyan mananagontaman ko kapepangangarapan iyan para rekano kaan kano
mamakabager ago an matarotop so paparangayan iyo ago an matangked piyapiya sa
ginawa niyo a saboten iyo so langon a kabaya o Allah.
13 Ka pemataanan aken a misebenar so di niyan dii kanggalebek para rekano ago so
manga taw sa Laodisiya ago sa Hirapolis.
14 Pesalamen kano i Lokas a pekebabayaan tano a pamomolong ago si Dimas.
15 Sampain iyo so salam aken ko magariyari sa Laodisiya, ago sii ki Nimpa ago so
magaagama a dii timotimo ko walay niyan.
16 Amay ka mabatiya iyo angkai a sorat na pakibatiyaan iyo mambo roo ko Agama sa
Laodisiya. Na batiyaa niyo pen so sorat a inipakawit aken sa Laodisiya.
17 Teroa niyo ki Arkipo a paliyogat a imasaden iyan so galebek a inisana on o Kadnan.
18 Katii so salam a saken den i miyangonay ron sorat: “Si Paolo.” Di niyo pelipati a
kakalaboson ako.
Pengnin ko a malalayon rekano so limo o Allah.
1 TISALONIKA
1 TISALONIKA 1
Alamat sorat ako i Paolo, si Silas ago si Timotiyo makasampay ko Agama sa Tisalonika a
rek o Allah a so Ama ago so Kadnan a Isa Al Masih. Pengnin ko a malalayon rekano so
limo ago kalilintad.
Kapanalamat ko Paratiyaya o manga Taw sa Tisalonika
2 Lalayon ami sekano pegalowin sii ko kapepangangarapan ami a lalayon ami

pepanalamatan so Allah sabap rekano langon.
3 Sii ko hadapan o Allah a Ama tano na tatanodan ami so galebek iyo a pekisabap ko
paratiyaya niyo, so panamar iyo a pekisabap ko kapekebabayai niyo ko ped, ago so
kapepakatiger iyo a pekisabap ko sarig iyo ko Kadnan tano a Isa Al Masih.
4 Katawan ami, manga magariyari, a pekebabayaan kano o Allah ago piyamili kano niyan
a rek iyan.
5 Ka so kiyapakitokawi ami rekano ko Mapiya a Totol na kena bo a ba miyakanggolalan
ko manga katero, ka sii pen ko kabatowa ago so Soti a Roh, ago sii ko katatangkeda mi sa
tito a benar so di ami dii teroon. Katawan iyo so kiyapaginetaw ami isako sisan kami
rekano sabap bo ko kamapiyaan iyo.
6 Na riyawat kami niyo ago so Kadnan, ka apiya pen tanto kano a miyarasay, na tiyarima
iyo so katero o Allah sa kapekebabaya a poon ko Soti a Roh.
7 Kagiya ka maoto na miyabaloy kano a ladiyawan ko langon a pepamaratiyaya sa
Masidoniya ago giya Grisiya.
8 Ipoon rekano na miyabembar so katero o Kadnan a kena bo a ba sii sa Masidoniya ago
sa Grisiya, ka so totolan ko kiyaparatiyayaa niyo ko Allah na miyakalangkap ko
mbalabala. Sabap sii na di den kailangan o ba ami teroa so apiya antonaa,
9 Ka siran den i pepamanotol ko kiyakormata niyo rekami ko kinibentelen ami rekano.
Pepanotolen iran so kiyatalikodi niyo ko manga barahala kaan iyo kapangongonotani so
tito ago oyagoyag a Tohan
10 Ago so kapenayawa niyo ko Wata iyan a pekapoon sa kasorgaan. Giyoto si Isa a
inoyag o Allah a poon ko miyamatay a aya sebet rektano ko pekatalingoma a rarangit o
Allah.
1 TISALONIKA 2
So Galebek i Paolo roo sa Tisalonika
Katawan iyo, manga magariyari, a da mailang so kinibentelen ami rekano san.

2 Katawan iyo a isako ndodoo kami pen sa Pilipos na piraraneg kami ago piyamakaito.
Ogaid na inogopan kami o Allah na miyakawaraw kami rekano tero ko Mapiya a Totol a
poon rekaniyan apiya pen tanto a mala a kiyasopaka rekami.
3 So kapepangosiyat ami na kena a ba mipepasod ko ribat o di na marata a antap, na kena
a ba ami petepengi magakal so apiya antawaa,
4 Ka pepangosiyat kami baden sabap sa miyapakay kami o Allah a kesanaan ko Mapiya a
Totol. Kena a ba aya antap ami na so kapesoata ko manga taw ka so Allah a aya petepeng
ko manga poso tano.
5 Katawan iyo a kagiya makasong kami rekano san na da ami sekano den pagorayoraya
na da den a ba ami napso a ba ami den siyapengan ko manga katero. So Allah na aya mi
ron saksi.
6 Kena a ba ami kabaya o ba kami podiya o apiya antawaa apiya sii rekano o di na sii ko
ped a taw
7 Apiya pen kepakay a kepaliyogatan ami sekano sabap sa manga siyogo kami o Al
Masih. Ogaid na miyanginsokor kami baden isako sisan kami rekano a datar o maritan a
babay a di niyan dii mbaromitanen so manga wata iyan.
8 Sabap ko kapekebabayai ami rekano na kateterangan kami a kena bo a ba aya mi rekano
pelada so Mapiya a Totol a poon ko Allah ka so pen so kaoyagoyag ami, ka tanto ami
sekano a pekebabayaan.
9 Mataan den, manga magariyari, a katatademan iyo so kiyandokaw ami ago panamar, ka
minggalebek kami sa gagawii daondaw kaan da a sakataw bo a ba rekami perikori sii ko
kapepakalangkapa ami rekano ko Mapiya a Totol a poon ko Allah.
10 Sekano i manga saksi ago so mambo so Allah sa isako sisan kami rekano a
pepamaratiyaya na so olaola mi na soti, maontol, ago da a ba on kidaway.
11 Katawan iyo a aya inikidia ami ko oman i isa rekano na lagid o ipekidia o ama ko
manga wata iyan.
12 Ka piyangosiyatan ami sekano, piyakapiya mi a ginawa niyo, ago inakolan ami sekano
sa pagiinetaw kano a mapapatot ko Allah a aya rekano tomiyawag sa kapakambagian iyo
ko Ndatoan iyan ago bantogan.
13 Aden pen a lalayon ami ipepanalamat ko Allah a giyai: kagiya makasampay rekano so
katero o Allah a miyaneg iyo a poon rekami na tiyarima iyo den a kena a ba niyo
bibilangen a matag baden katero o manosiya, ka inibilang iyo den a katero o Allah, na
mataan den a rek iyan ai a katero a aya dii nggalebek sii rekano a pepamaratiyaya.
14 Ka so kiyaokitan iyo, manga magariyari, na lagid o kiyaokitan o manga Agama o
Allah roo sa Yodiya a rek i Isa Al Masih. Ka ndatadatar so kiyarasaya rekano o ped iyo a
magiinged ago so kiyarasaya kiran o ped iran a manga Yahodi
15 A aya miyono ko Kadnan a Isa ago so manga nabi na somiyatro rekami mambo. Di
iran den kesoat so Allah na pesorangen iran so langon a taw.
16 Tipengan kami iran somapar ko di ami dii kateroa sii ko kena a ba manga Yahodi ko
manga katero a pekasabet kiran. Giyanan i kiyatarotop o di ran dii kandosa, na initana
kiran den so rarangit o Allah a aya iran kesendadan.
So Kabaya i Paolo a Makabentel kiran Peroman
17 Makapantag rekami, manga magariyari, na kagiya mabelag kami rekano sa da bo

matey na tanto ami sekano a ikakadali a lalayon ami sekano pipikiren, na miyanamar
kami den sa kapakipegilaya ami rekano peroman.
18 Kabaya ami a mibentel ami sekano peroman, na saken a si Paolo na madakel a
kiyasingayoa ko sa kibentelen aken rekano, ogaid na inalangan kami o Iblis.
19 Ka antonaa i iinamen ami ago ikebabaya ami, ago imbalas rekami a mipengandag ami
sii ko hadapan o Kadnan tano a Isa amay ka pekaoma? Ba di sekano den?
20 Sekano den i ipembantogan ami ago ipekebabaya ami!
1 TISALONIKA 3
Kagiya ka maoto na kagiya da ami matiger a kapenayaw ami na miyapamikir ami a
telimbagak kami sa Atinas a sekami bo
2 Na piyakasong ami rekano san si Timotiyo a pagari tano ago salinggogopa ami ko
galebek ko Allah sii ko kapepakalangkapa ko Mapiya a Totol makapantag ko Al Masih.
Siyogo ami sekaniyan san kaan kano niyan kapangoyati ago mapakabager sii ko
paratiyaya niyo
3 Kaan da den a ba rekano kadai sa panginam sabap sangkai a manga kasatroan. Katawan
iyo a giyanan i bagian tano,
4 Ka isako sisan kami rekano na pitero ami rekano ko da niyan pen kanggolaola a kesatro
tano, na katawan iyo a giyai den i miyanggolaola.
5 Sabap sii na kagiya da aken den matiger a kapenayaw aken na piyakasong aken san si
Timotiyo kaan iyan mapariksa o antonaa i masosowa o paratiyaya niyo, ka ipekewan aken
o ba kano baden miyagawi o Iblis na o ba baden miyailang so langon a galebek ami.
So Riport i Timotiyo makapantag kiran
6 Imanto na miyakakasoy rekami den si Timotiyo a poon rekano na piyanotol iyan rekami
so mapiya makapantag ko paratiyaya niyo ago so kapekebabayai niyo ko manga ped iyo.
Pitero iyan a lalayon kami niyo katatanodan sa kapekebabaya, ago ikakadali iyo a kailaya
niyo rekami a lagid o kikakadaliin ami ko kailaya ami rekano mambo.
7 Sabap sii, manga magariyari, na kiyadaan kami sa rata a ginawa sabap rekano sii ko
langon a kamaregenan ami ago karomasayan, ka so paratiyaya niyo i inipakapiya a ginawa
mi.
8 Ka imanto na mapipiya a ginawa mi asar a mbabager kano sii ko kaiisaisa niyo ago so
Kadnan.
9 Tanto ami sekano a ipepanalamat ko Allah sabap ko tanto a kapipiya a ginawa mi sii ko
hadapan o Tohan tano sabap rekano.
10 Gagawii daondaw na pepangangarapan ami sebenar ko Allah a mipagilaya ami sekano
kaan ami rekano mibegay so makokorang ko paratiyaya niyo.
11 Pengnin ami ko Allah a Ama tano ago so Kadnan tano a Isa a peron iyan a kibentelen
ami rekano.
12 Pengnin ami a omanan o Kadnan so kapekebabayai o oman i isa rekano ko ped iyan
ago so langon a taw kaan makala a tanto a lagid o kapekebabayai ami rekano.
13 Sii sangkai a okit na mapakabager iyan so manga poso iyo kaan kano masoti a da a ba
rekano kidaway ko hadapan o Allah a Ama tano amay ka makaoma so Kadnan tano a Isa
a oonotan o langon a manga kaom iyan.
1 TISALONIKA 4
So kapaginetaw a Ikasosoat o Allah
Kaposan ai, manga magariyari, na miyasowa iyo a poon rekami o antonaa i patot a
kapepaginetaw niyo a ikasosoat o Allah, na mataan den a giyanan i di niyo dii
nggolaolaan. Imanto na pagakolan ami sekano ago pepangnin ami sii ko ingaran o
Kadnan a Isa a dayonen iyo piyapiya.
2 Ka katawan iyo so manga pandoan a inibegay ami rekano a nggolalan ko kapaar o
Kadnan a Isa.
3 Aya kabaya o Allah na masoti kano ago makalidas ko kasebo.

4 Oman i isa rekano a manga mama na patot a katokawan iyo so soti ago pagaadatan a
okit ko kapangaroma
5 A kena a ba sabap ko lalatog a datar o pesowaan o manga kapir a di iran katawan so
Allah.
6 Di patot i ba aden a isa rekano a peribaten iyan o di na pelingowan iyan so pagari niyan
mipantag sii. Ndanegen o Kadnan so langon a dii nggolaola sa lagid ai a kadostaan, ka
giyanan i miyatero ami rekano den gowani, na liyalangan ami sekano.
7 Ka kena a ba aya initawag rektano o Allah na so kanggolaolaa ko kapakipemotaliya, ka
sabap sa an tano masoti.
8 Kagiya ka maoto na so taw a telikodan iyan angkai a manga sogoan na kena bo a ba so
manosiya i telikodan iyan, ka so Allah a aya rekano pembegay ko Soti a Roh iyan.
9 Makapantag ko kapekebabayai niyo ko ped iyo a magariyari na di den kailangan a

kipesoraten ko ron rekano, ka miyapangendao kano den o Allah sa kapekebabayai o oman
i isa ko ped iyan.
10 Giyai den i di niyo dii nggolaolaan ko langon a magariyari sa dalem a Masidoniya
ogaid na pagakolen ami rekano, manga magariyari, a dayonen iyo piyapiya.
11 Sinaninga niyo so lomilintad a kapepaginetaw niyo; di niyo penginsopi so galebek o

ped, na paningkaoyagen kano a so den so minipando ami rekano.
12 Amay ka giyanan na pegadatan so kapepaginetaw niyo o siran oto a di pemaratiyaya na
di den kailangan a kiperikoren rekano o apiya antawaa.
So Kakesoy o Kadnan
13 Kabaya ami, manga magariyari, a katokawan iyo so tito a benar makapantag ko siran
oto a miyamatay kaan kano di makapemboko a datar o ped a taw a da a arap iran.
14 Sabap sa miyaparatiyaya tano a miyatay si Isa ago miyaoyag bo na peparatiyayaan tano
mambo a so Allah na pekaonoten iyan ki Isa so siran oto a miyamatay a miyaratiyaya on.
15 Na giyangkai a peteroon ko rekano na ndao a poon ko Kadnan: sektano a oyagoyag

pen amay ka pekaoma so Kadnan na di tano pemakaona ko miyamatay.
16 Ka so den so Kadnan na penog a poon sa kasorgaan a kisarta on so matanog a
kapananalo, ago so sowara o olowan a malaikat, ago so oni o bogiyong o Allah. Na aya
keona a penga ooyag na siran oto a miyamatay a miyamaratiyaya ko Al Masih.
17 Oriyan oto na sektano a oyagoyag pen na keagaw sa poro a keped tano iran roo ko
manga gabon, ka pagalaon tano so Kadnan roo sa kawang na kelalayon a kipegepedaan
tano ko Kadnan.
18 Kagiya ka maoto na pamagoyata kano sangkai a manga katero.
1 TISALONIKA 5
Tiyagar Kano ko Kakesoy o Kadnan
Makapantag ko manga gawii ago manga masa a kakeolaola ini, manga magariyari, na di
den kailangan a kipesoraten ko ron rekano,
2 Ka katawan iyo piyapiya a so gawii a kakesoy o Kadnan na pekatalingoma a lagid o
tekew sii ko kagagawii.
3 Amay ka teroon o manga taw a “Lomilintad ago malilinding so langon taman,” na
kitekaw a ketomparakan siran o morala a di iran kepalagoyan, ka datar ai o masakit a
magegedam o pembaliliten a babay.
4 Ogaid na sekano a magariyari na sabap sa kena a ba kano makakakaden ko maliboteng

na di rekano kitekaw angkoto a gawii a lagid o kakeomaa rekano o tekew.
5 Ka sekano langon na rek o maliwanag ago so kadaondaw. Kena a ba tano rek o
kagagawii aya pen o ba maliboteng.
6 Kagiya ka maoto na di tano pakatotorog a datar o manga ped, ka today tano baden a
makatatanod.
7 Ka siran oto a pepekatorog na aya kapepekatorog iran na sii ko kagagawii, na siran oto
a dii mberebereg na aya kapekebereg iran na sii ko kagagawii.
8 Ogaid na kagiya rek tano o kadaondaw na disomala a tomatanod tano. Isangan tano so
paratiyaya ago gagaw a raben ko rareb tano, na isangan tano so sarig ko kakesabet tano a
ilmit tano.
9 Kena a ba tano tinibaba o Allah a kedaneg, ka sabap sa an tano masabet a nggolalan ko
Kadnan tano a Isa Al Masih.
10 Miyatay sekaniyan para rektano kaan apiya tano oyagoyag o di na maatay amay ka
komasoy sekaniyan na keoyagoyag tano a ped iyan.
11 Kagiya ka maoto na pakapiyaa o oman i isa so ginawa o ped iyan, ago
pepakapangosora o oman i isa so ped iyan.
Kaposan a manga Insarat ago Kasalam
12 Pengnin ami rekano, manga magariyari, a pagadati niyo so manga taw a dii
nggagalebek sii rekano ago pepagolowan rekano sii ko Kadnan, a pepamando siran
rekano pen.
13 Pakaalaa niyo siran ago kababayai niyo a tanto sabap ko galebek iran. Pelilintada kano.
14 Pengosiyatan ami sekano a manga magariyari a osiyati niyo so manga tapolan, oyati
niyo so manga talaw, ogopi niyo so da a manga bager iyan, na panginsabar kano ko
langon a taw.
15 Iiktiyar kano sa da a isa rekano bo a ba niyan seopi so minggolaola on sa marata, ka
lalayon iyo baden petepengi nggolaola so mapiya ko oman i isa rekano ago so langon a
taw.
16 Lalayon kano pekebabaya.
17 Pepangangarapan kano sa da a rintas iyan.
18 Pepanalamat kano apiya antonaa i pekesowasowa iyo, ka giyai i kabaya o Allah a
penggolaolaan iyo sii ko kaiisaisa niyo ago si Isa Al Masih.
19 Di niyo separi so Soti a Roh.

20 Di niyo pesodia so kapekepayaga o taw ko lalag o Allah.
21 Pariksaa niyo so langon taman na kakapeti niyo so mapiya.
22 Lidasi niyo so oman i pisosonan o marata.
23 Pengnin ko a so Allah a pembegay sa kalilintad na sotin kano niyan sa tarotop.

Pengnin ko a malinding so dalem a ginawa niyan, a so niyawa niyo, so pamikiran iyo ago
so lawas iyo, kaan da a daway niyan sii ko kapekaoma o Kadnan tano a Isa Al Masih.
24 Kasasarigan so Allah a aya rekano tomiyawag na mataan den a penggolaolaan iyan ai.
25 Pangangarapanen kami niyo mambo, manga magariyari.
26 Pesesalama kano langon a magariyari a sarta o soti a arek.
27 Pagakolen ko rekano sii ko ingaran o Kadnan a batiyaan niyo angkai a sorat ko langon
a magariyari.
28 Pengnin ko a matatap rekano so limo o Kadnan tano a Isa Al Masih.
2 TISALONIKA
2TISALONIKA 1
Alamat sorat ako i Paolo, Silas ago si Timotiyo makasampay ko Agama sa Tisalonika a
rek o Allah a Ama tano ago so Kadnan a Isa Al Masih.
2 Pengnin ko a so Allah a Ama ago so Kadnan a Isa Al Masih na began kano iran sa limo
ago kalilintad.
So Kapengokom amay ka Makaoma so Al Masih
3 Paliyogat rekami a lalayon ami pepanalamatan so Allah sabap rekano, manga

magariyari, na patot ai ka so paratiyaya niyo na pegto piyapiya na pepakala so
kapekebabayai o oman i isa rekano ko ped iyan.
4 Kagiya ka maoto na ipepangandag ami sekano ko langon a Agama o Allah sabap ko
kapepakatiger iyo ago paratiyaya sii ko langon a kapesatroa rekano ago manga
karomasayan a pekeokitan iyo.
5 Giyai langon i poriba sa maontol so kapepangokom o Allah, ka aya keondasan iyan na

kibilang kano a mapapatot ko Ndatoan iyan a ron sabap so kapekeromasay niyo.
6 Penggolaolaan o Allah so ontol, ka mbedalan iyan sa karomasayan so siran oto a
perasay rekano
7 Na pekadekean kano niyan a kikararasay ago sekami mambo. Penggolaolaan iyan ai
amay ka kepayag so Kadnan a Isa a poon sa kasorgaan a oonotan o manga ala i kabatowa
a malaikat iyan sii ko pesokeyaw a apoy.
8 Ndenegen iyan so siran oto a da iran kilalaa so Allah ago so di pemaratiyaya ko Mapiya
a Totol makapantag ko Kadnan tano a si Isa.
9 Aya kisala kiran na mbinasaan siran sa dayon sa dayon a bebelagen siran ko
kamamasaan o Kadnan ago so kababantogan a kabatowa iyan.
10 Mapenggolaola ini amay ka makaoma sekaniyan sangkoto a gawii kaan mabantog o
manga kaom iyan ago pepodin o langon a miyamaratiyaya. Na keped kano kiran mambo,
ka piyaratiyaya niyo so manga katero a piyakalangkap ami rekano.
11 Giyanan i sabap a lalayon ami sekano ipepangangarapan kaan kano mabaloy o Tohan
tano a mapapatot ko kiyatawaga niyan rekano. Pengnin ami a nggolalan ko kabatowa iyan
na tomanen iyan so langon o masisingayo iyo a mapiya ago so oman i galebek iyo a
pekisabap ko paratiyaya.
12 Sii sangkai a okit na kebantogan so ingaran o Kadnan tano a Isa sii rekano na
kebantogan kano mambo sii rekaniyan a nggolalan ko limo o Tohan tano ago so Kadnan a
Isa Al Masih.
2TISALONIKA 2
So Kaiiblisan a Mama
Aden a pagakolen ami rekano, manga magariyari, makapantag ko kapekaoma o Kadnan

tano a Isa Al Masih ago so kapelimoda niyan rektano a keped tano niyan a giyai:
2 Di niyo petekaon a kapekedowadowa o pamikiran iyo, ago di kano pekiribogar ko
totolan sa miyakatalingoma kon den so gawii o Kadnan. Di niyo ai peratiyayaa apiya pen
poon kon ko Roh, o di na katero o taw, o di na sorat a dii matero a poon rekami kon.
3 Di kano pakipegakal ko apiya antawaa ko apiya antonaa okit, ka giyangkoto a gawii na

di pekatalingoma o di daan a kaokiti so kaposposan a kasopaka ko Allah ago so
kapekagemaw o Kontra a Mama a aya sendadan iyan na kanarakaan.
4 Sopaken iyan so langon taman a bebetowan sa tohan o di na pesimbaan o manga taw.
Ipengkat iyan a ginawa niyan ko kalangolangon iran na meramig pen sa magontod ko
korsi ko Timplo o Allah a di niyan dii teroon a Tohan sekaniyan.
5 Ba niyo di ketademi a miyatero aken rekano angkai a manga nganin isako sisan ako
rekano?
6 Na katawan iyo imanto o antonaa i pegeren sangkai langon a mapenggolaola kaan di
pekagemaw so Kaiiblisan a Mama taman sa maoma so miyatendo a gawii.
7 Ka so kaiiblisi a kapaar na andang den a dii nggalebek sa masolen, ogaid na so pegeren
sii imanto na iteros iyan so kapegerena niyan on taman sa kakowaa rekaniyan on.
8 Giyoto den i kapekagemaw angkoto a Kontra a Mama, na so Kadnan a Isa na mbonoon
iyan a nggolalan ko sengaw a poon ko ngari iyan, na mbinasaan iyan a nggolalan ko
kakepayag iyan amay ka makaoma.
9 Amay ka mapayag angkoto a Mama na ipaar o Iblis, na pengembaal sekaniyan sa
langon a pisosonan a mala i kabatowa a galebek, manga nanao ago manga piyakamemesa
a ipenaliba.
10 Pagosaren iyan so langon a pisosonan a kamarataan kaan iyan masaliba so siran oto a
pepekanaraka, ka kagiya minda siran mababaya ko tito a benar a pekasabet kiran o
kowan.
11 Sabap sii na pepakipaar siran o Allah ko kariribat kaan siran makaparatiyaya ko
kapamokeg
12 Kaan masala so langon a da pamaratiyaya ko tito a benar, ka ba iran den inikababaya
so dii kapakandosa.
Pakababager Kano
13 Paliyogat rekami a lalayon kami pepanalamat ko Allah sabap rekano, manga

magariyari a pekebabayaan o Kadnan, ka kagiya piyamili kano o Allah a aya keona a
kesabet a nggolalan ko kasotiya rekano o Roh ago so paratiyaya niyo ko tito a benar.
14 Na tiyawag kano o Allah sangkai a kakesabet iyo a nggolalan ko Mapiya a Totol a
piyakalangkap ami rekano kaan kano makambagian ko bantogan o Kadnan tano a Isa Al
Masih.
15 Kagiya ka maoto, manga magariyari, na pakababager kano ago kakapeti niyo so manga
taritib a inipamangendao ami rekano a nggolalan ko katero o di na sorat.
16 Pengnin ko a so Kadnan tano a Isa Al Masih ago so Allah a Ama tano a kiyababayaan
tano niyan ago migay rektano ko da a ikeda iyan a kapipiya a ginawa ago so mapiya a
arap a nggolalan ko limo iyan
17 Na pakapiyaan iyan a ginawa niyo ago pakabageren kano niyan sii ko langon a di niyo
dii kanggolaolaa ago dii kateroa ko mapiya.
2TISALONIKA 3
Pangangarapanen Kami niyo
Aya moripori, manga magariyari, na pangangarapanen kami niyo kaan magaan

makalangkap so katero o Kadnan ago an mambo kabantogi a lagid o miyanggolaola sii
rekano.
2 Pangniya niyo pen a sabeten kami o Allah ko manga dodosa ago manga rarata a taw, ka
kena a ba so langon a taw na aden a paratiyaya niyan.
3 Ogaid na kasasarigan so Kadnan a pekabageren kano niyan ago pelindingen kano niyan
ko Iblis.
4 Na aden a sarig ami rekano a poon ko Kadnan sa di niyo dii nggolaolaan so ipesogo ami
rekano ago ipeteros iyo nggolaola.
5 Pengnin ko a so Kadnan na pakikenal iyan ko manga poso iyo so kapekebabayai rekano

o Allah ago so kapepekatiger a ipembegay o Al Masih.
Paliyogat so Kanggalebek
6 Isogo ami rekano, manga magariyari, sii ko ingaran o Kadnan a Isa Al Masih a di niyo
pegepedaan so apiya antawaa a pagari niyo a dii tepolan a di niyan tomanen so manga
taritib a miyapalad ami rekano.
7 Katawan iyo a aya patot na rawaten kami niyo. Da kami pamokebokel isako sisan kami
rekano pen.
8 Da kami pakinat sa pangenengken ko apiya antawaa a ba ami da bayadi. Ba kami den
minggalebek sa gagawii daondaw a miyamanamar kami ago mindokaw kaan kami di
miperikor o apiya antawaa rekano.
9 Pinggolaola ami ai a kena a ba sabap sa da a kabenar ami sa kapengniya mi rekano sa
kaoyagan, ka sii bo sabap sa an kami mabaloy a ladiyawan a kerawat iyo.
10 Isako sisan kami rekano pen na pitero ami rekano a apiya antawaa i di kebaya
nggalebek na di niyo pekakana.
11 Pitero ami ai ka miyaneg ami a aden a ped rekano a dii tepolan a kena a ba dii
nggalebek, ka ba iran den dii kebota so galebek o ped.
12 Sii ko ingaran o Kadnan a Isa Al Masih na sogoon ami ago pandoon ami angkai a
manga taw a rerenek siran baden ago nggagalebek kaan iran masokat so ikeoyag iran.
13 Na sekano a ped a magariyari na di kano pendokadokaw nggolaola sa mapiya.

14 O aden a di toman ko inisogo ami sangkai a sorat na tendoa niyo sekaniyan na di kano
ron pakipegepeda kaan kayai.
15 Ogaid na di niyo sekaniyan mbilangen a ridoay niyo, ka ba niyo den tomai a datar o
pagari niyo.
Kaodas
16 Pengnin ko a so den so Kadnan a aya pekepoonan o kalilintad na lalayon kano niyan

pembegan sa kalilintad sii ko langon a okit. Matatap rekano langon so Kadnan.
17 Katii so salam a saken den i miyangonay ron sorat: “Si Paolo.” Giyai i kapepirmai
aken ko oman i sorat. Giyai i kasorat aken.
18 Pengnin ko a matatap rekano langon so limo o Kadnan tano a Isa Al Masih.
1 TIMOTIYO
1 TIMOTIYO 1
Alamat sorat ako i Paolo a siyogo i Isa Al Masih sabap ko takdir o Allah a Pepanabet
rektano ago si Isa Al Masih a sasarigan tano
2 Makasampay ki Timotiyo a tito a wata aken sii ko paratiyaya.
Pengnin ko Allah a so Ama ago si Isa Al Masih a Kadnan tano na began ka iran sa limo,
kapedi ago kalilintad.
Manga Lalangan ko Ribat a manga Ndao
3 Kabaya aken a kaden ka pasin sa Ipisos, ka giyanan i inakol aken reka sii ko kapesong
aken sa Masidoniya, kaan ka masogo so ped a manga taw roo sa genekan iran mangendao
so ribat.
4 Teroa ngka kiran a di iran pekagagada ko pamikiran iran so manga iringa ago manga
salsila a da a tamat iyan. Ka baden anan pekaondoy ko dii kandadaowai. Kena ini a ba
pekaogop ko kapetomana ko kabaya o Allah a dii nggolaolaan a nggolalan ko paratiyaya.
5 Aya antap angkai a sogoan na an kano katagoi sa gagaw a pepekapoon ko soti a poso,
ago so maliwanag a hatin, ago so tito a paratiyaya.
6 Aden a manga taw a miyamakasilay a poon sangkai a manga nganin ka somiyangor
siran ko da a bali niyan a dii kandadaowai.
7 Kabaya iran a mabaloy siran a manga goro ko Kitab, ogaid na di iran kesabotan so di
ran dii teroon o di na so manga lalag a di ran dii pemataanan.
8 Katawan tano a so kitab na mapiya asar a ontol so kapegosara on.

9 Katawan tano a so manga sogoan on na da mbaali para ko manga oontol a taw, ka para
ko da a manga kokoman iyan, so manga kontra, so da a manga kalek iyan ko Allah, so
manga baradosa, so kena a ba manga soti, so manga sarani, so manga taw a miyono ko
ama iran o di na ina iran, so manga talibono,
10 So manga dii makisesebo, so manga bayot, so dii mamiyag sa taw, so manga bokeg, so
manga dii seksi sa di benar, ago siran oto a dii nggolaola sa apiya antona onon a
pekisopak ko tito a manga ndao.
11 Giyanan so manga ndao a madadalem ko kababantogan a Mapiya a Totol a inisana
raken o pepodin a Tohan.
Kapanalamat ko Kapedi o Allah
12 Pepanalamatan ko si Isa Al Masih a Kadnan tano a pembegay raken sa bager, ka

inibilang ako niyan a kasasarigan ago initoro ako niyan a makapenalagad rekaniyan.
13 Pinggolaola niyan ai apiya pen gowani na pepagitowitoon aken sekaniyan, pesetroon
aken so manga pagtaw niyan, ago pembabasaan aken siran sa marata. Ogaid na inikapedi
ako o Allah, ka da aken sabota so di aken dii nggolaolaan isako da ako pen paratiyaya.
14 Tanto ako a inikalimo o Allah, ka bigan ako niyan sa paratiyaya ago gagaw a rek tano
sii ko kaiisaisa tano ago si Isa Al Masih.
15 Giyai na kesarigan a katero a patot a terimaan piyapiya: somiyong si Isa Al Masih sii
sa doniya kaan iyan masabet so manga baradosa a saken i lebi a marata kiran.
16 Ogaid na sabap sii na inikapedi ako kaan mapakiilay i Isa Al Masih so tanto a
kapanginginsabar iyan ko inikidia niyan raken a lebi a marata ko manga baradosa. Na
miyabaloy ako a ibarat sa kikapediin iyan ko langon a pekaparatiyaya on bo a kebegan
mambo sa kaoyagoyag a da a kaposan iyan.
17 Na so Allah a aya Dato a da a ikepos iyan, ago da a ipetay niyan, ago di keilay a isaisa
bo a Tohan na rek iyan so pangkatan ago bantogan sa taman sa pakataman. Amin.
18 Giyangkai a sogoan a isena ko reka, Timotiyo a wata aken, na ipepasod ko lalag o
Allah a miyapayag gowani makapantag reka. Nggolalanen ka ngkoto a manga katero a
manga gomaan ka kaan mapiya a di ngka dii kapakitidawa
19 A kakapetan ka so paratiyaya ago maliwanag a hatin. Aden a ped a taw a bininasa iran
so paratiyaya iran ko kapesogoka iran ko hatin iran.
20 Maaped kiran si Himinayo ago si Alihandro a miyapalad aken ko kapaar o Iblis kaan
iran masowa gomenek a kapepagitowitoa iran ko Allah.
1 TIMOTIYO 2
Manga Insarat makapantag ko Kasimba
Aya pagampaganay a pagakolen aken ko langon a pepamaratiyaya na giyai:

pangangarapanen iyo so langon a taw a sarta o manga pangni, manga kapamagayok ago
manga panalamat.
2 Pangangarapanen iyo so manga dato ago so langon a ped a olowan sa gobirno kaan tano
makapaginetaw a di tano masasamok a makalilintad tano a pegamal ago makaaadata sii
ko langon a di tano dii nggolaolaan.
3 Mapiya ini ago ikasosoat o Allah a Pepanabet rektano
4 Ka kabaya iyan a masabet so langon a taw ago katokawan iran so tito a benar.
5 Ka aden a isaisa bo a Tohan ago isaisa a tomanor ko Allah ago so manga manosiya.
Giyanan so mama a si Isa Al Masih
6 A inirila iyan a kaoyagoyag iyan a iniaon ko langon a taw. Miyanggolaola ini sii ko
tataalikan on a gawii a aya kiyapemataani ko takdir o Allah.
7 Na initoro ako niyan a pepakalangkap sii, na siyogo ako niyan sa ipemangendao aken
ko kena a ba manga Yahodi so makapantag ko paratiyaya ago so tito a benar. Kena a ba
ako pepamokeg; aya ko dii teroon so benar.
8 Kabaya aken a sii ko oman i darpa a di niyo dii timotimoan na pepangangarapan on so

manga mama a ibabayaw iran a lima iran a sarta o kaiiklas o poso iran ko Allah sa da a ba
on rarangit o di na kapepawala.
9 Kabaya aken pen a so manga babay na pepanginsokoren iran ago ontolen so di ran dii
kandiditaran ko domadait kiran, a di iran itaralo so kaperobaya ko bok iran ago so
kisanganen ko imbolawanan, o di na manga pirlas, o di na manga ala i arga a nditaren.
10 Ka sanganen iran baden so manga pipiya a galebek a aya patot ko manga babay a dii
tero sa baraamal siran.
11 Patot a makasowa so manga babay ko ipepamangendao kiran a rerenek siran ago
makimbabaya.
12 Di aken pakipengendao o di na pakipemando ko babay so manga mama, ka disomala a
ba siran den romerenek.
13 Ka so Adam na aya miyaona a inaden o Allah na go ron bo so Sitihawa.
14 Na kena a ba so Adam i kiyaakalan, ka so babay i kiyaakalan ago miyakasogok ko
sogoan o Allah.
15 Inonta bo na kesabet so babay a nggolalan ko kambabawata asar a ipeteros iran so
paratiyaya ago so kapekebabayai ko ped ago so kasosoti a sarta o kapanginsokor.
1 TIMOTIYO 3
Manga Olowan sii ko Agama
Benar angkai a kabasa: so taw a kebaya mabaloy a nakoda ko Agama na masisingayo iyan
so mapiya a galebek.
2 Paliyogat ko nakoda ko Agama a di kedawayan, isaisa bo i karoma, manginginsokor,
pekegenggen iyan a ginawa niyan, makaaadata, masakaw, ago matao mangendao
3 A kena a ba palaobog o di na marangit, ka masabar a kena a ba dii makiperiridoay ago
kena a ba mababaya sa pirak.
4 Paliyogat on a mapiya sekaniyan i kaawid ko rek iyan a walay a mipapaar iyan so
manga wata iyan kaan iran sekaniyan petomana ago kapagaadati.
5 Ka o aden a mama a di matao mawid ko pamiliya niyan na andamanaya i kakekibira
niyan ko Agama o Allah?
6 So gopen miyakaparatiyaya na di kepakay a nakoda ka o ba niyan baden iporo a ginawa
niyan na kedaneg sekaniyan a datar o kiyaokitan o Iblis.
7 Paliyogat on pen a mapiya a kapekenega on ko siran oto a kena a ba maaped ko Agama,
ka o ba sekaniyan baden mapakakeyakaya ago kalitagan o Iblis sangkai a okit.
Manga Pepanalagad sii ko Agama
8 So mambo so manga salinggogopa ko Agama na paliyogat on a mabetad siran, kena a

ba pekedowa i dila, kena a ba mala i kapaginom sa arak ago di pengowarta.
9 Disomala a kekepitan iran so tito a benar a miyapayag makapantag ko paratiyaya tano a
sarta o maliwanag a hatin.
10 Di mipendarainon a daan siran a tepengan na oriyan oto na o da a kidaway kiran na
kepakay a mbeloy siran a pepanalagad.
11 Disomala mambo a so manga karoma iran na pagaadatan siran, kena a ba taliyantaan
ka manginginsokor ago kasasarigan ko langon taman.
12 Paliyogat pen ko manga pepanalagad a isaisa bo i karoma ago mapiya a kapekibira
iran ko manga wata iran ago walay.
13 Na siran oto a mapiya i kapanalagad na kekowa iran so mapiya a pangkatan ago mala a
kawaraw ko di ran dii kateroa ko makapantag ko paratiyaya iran ki Isa Al Masih.
So Mala a Pageemaan
14 Iinamen aken a pekasong ako san reka sa di ini bo matey ogaid na inisorat aken reka
ngkai a manga pandoan
15 Kaan o ba ako kesendod na ketokawan ka o antonaa i patot a olaola o manga pagtaw o
Allah. Giyanan so Agama o oyagoyag a Tohan a aya mambo maawid ago dii
maninindegan ko tito a benar.
16 Di mipendowadowa a mala so tito a benar a pageemaan gowani ko agama tano a
miyapayag den imanto:
Mipeyag so Al Masih sii ko lawas o manosiya

ago kiyamataanan a maontol a nggolalan ko Roh.
Miyailay sekaniyan o manga malaikat
ago piyakalangkap ko manga nasiyon.
Miyaparatiyaya sekaniyan sa doniya
ago minibayaw sa kasorgaan.
1 TIMOTIYO 4
Di Benar a manga Ndao
So Roh na marayag a pitero iyan a sii ko penga oori a manga gawii na aden a manga taw a
telikodan iran so paratiyaya tano ka tomanen iran so pepanaliba a manga niyawa ago so
manga ndao o manga saitan.
2 Giyangkai a manga ndao na pepakapoon ko manga bokeg a taw a dii mamagomanta, a
so manga hatin iran na di den pekagedam a datar o miyalowis o pelangga a potaw.
3 Ipengendao iran a di sak so kapangaroma ago so kakena ko ped a manga pangenengken,
apiya pen inaden o Allah angkai a pangenengken a ken a sarta o kapepanalamat o siran
oto a pepamaratiyaya ago miyamakasowa ko tito a benar.
4 Ka palaya den mapiya so langon a inaden o Allah, na da den a pangenengken a ba
kilebad asar a matarima a sarta o kapepanalamat,
5 Ka kebaloy ai a soti a nggolalan ko katero o Allah ago so kapangangarapan.
So Mapiya a Pepanalagad i Isa Al Masih
6 O ipepanginsarat ka angkai a manga pandoan ko magariyari na mapiya ka a

pepanalagad i Isa Al Masih a pepangoyagen o manga katero o paratiyaya tano ago so
mapiya a manga ndao a petomanen ka.
7 Ogaid na di ngka pemakinega so kadodoniyai ago kalalalongan a manga iringa. Bataka
ngka a ginawa ngka ko kapepaginetaw a baraamal.
8 Ka so kapelogata ko lawas na aden a bali niyan a matag somasagad ogaid na so
kababataka ko kapagamal na mala i bali ko langon taman, ka pepekabegay sa balas sii ko
kaoyagoyag tano imanto ago sii ko pekatalingoma.
9 Kesarigan angkai a katero ago patot a terimaan sa tarotop.
10 Sabap sii na di tano dii nggagalebek sebenar ago pepanagontaman tano, ka sasarigan
tano so oyagoyag a Tohan a Pepanabet ko langon a taw a ba di labaw so pepamaratiyaya.
11 Sogoon ka ago pangendaon ka angkai a manga pandoan.

12 Di ngka peparowa o ba ka sodia o apiya antawaa sabap ko kangongodai reka, ka
baloya ngka baden a ginawa ngka a ladiyawan o pepamaratiyaya sii ko katero o ka, sii ko
parangay ngka, sii ko kapekebabayai ngka ko ped, sii ko paratiyaya ngka ago sii ko
kasosoti.
13 Taman sa makaoma ko san na tordo ka mamatiya ko Kitab sii ko hadapan o madakel a
taw, a rakes o kapepangosiyati ago kapepangendaowa ngka kiran.
14 Di ngka pendarainonen so moodiset a pamemegayan o Roh a madadalem reka a
inibegay reka a nggolalan ko kiyapayaga ko lalag o Allah sii ko kinidapeneten reka o
manga pelokelokesen ko manga lima iran.
15 Panamari ngka nggolaola ngkai a langon taman sa iklas ko poso o ka kaan mailay o
langon a taw so kapepagosor ka.
16 Iktiyari ngka a ginawa ngka ago so ipepangendao ngka. Lalayon ka ini dii nggolaolaa,
ka sii sangkai a okit na kesabet ka a ginawa ngka ago so pepamakineg reka.
1 TIMOTIYO 5
Manga Pandoan mipantag ko manga Balo, manga Pelokelokesen ago manga Oripen
Di ngka pembongeti so mama a matoa a di seka, ka ba ngka den akoli a datar bo o

sekaniyan na ama a ka. So manga mama a mangoda a di seka na kidian ka kiran so datar
bo o manga pagari ngka.
2 Kidian ka ko manga babay a matoa a di seka so datar bo o ina a ka, ago siran oto a
mangoda a di seka na datar bo o manga babay ngka a masosoti so langon a ikikidia ngka
kiran.
3 Pagadati ngka so manga babay a tito a balo.

4 Ogaid na amay ka so balo na aden a manga wata iyan o di na manga apo na patot a
masowa iran sa paganay so kapegawidi ran ko kapepagamal iran sii ko pamiliya iran a
nggolalan ko kapembalasi iran ko manga lokes iran, ka giyanan i ikasosoat o Allah.
5 So babay a tito a balo a da a ba on petegikor na sasarigan iyan so Allah, na lalayon
pepangangarapan a pepangni ron sa tabang ko gagawii daondaw.
6 Ogaid na so balo a aya bo a ipepaginetaw niyan na so kapesoata niyan sa ginawa niyan
na maatay den so niyawa niyan apiya pen oyagoyag so lawas iyan.
7 Began ka pen angkai a manga pandoan ko manga magaagama kaan siran di kedawayan.
8 O aden a taw a di niyan kibiren so manga tonganay niyan a ba di labaw so manga ped
ko pamiliya niyan na tiyalikodan iyan so paparatiyayaan tano na lebi sekaniyan pen a
marata a di so da a paratiyaya niyan.
9 Di ngka soraten ko listaan ko manga balo so ngaran o da pen makapagidad sa nem polo
ragon. Paliyogat on mambo a miyakaisa sekaniyan bo mapangaroma
10 Ago miyakilala ko manga pipiya a galebek iyan, a ibarat na miyakapangoyag piyapiya
sa manga wata iyan, pesekasakaw sa manga mananangga, pepegonaban iyan pen so
manga ai o manga kaom o Allah, petebangan iyan so kikareregenan, ago tomotordo
nggolaola sa langon a pisosonan a mapiya a galebek.
11 Di ngka soraten ko listaan so kangodaan a manga balo, ka amay ka kalangkoloban o

manga singayo o lawas iran so kipagiiklasen iran ko ginawa iran ko Al Masih na kebaya
siran makipangaroma peroman.
12 Na amay ka giyanan na kesala siran, ka miyabaroba iran so paganay a initopa iran ko
Al Masih.
13 Liyo ron pen na pembabaloy siran a manga tapolan a baden pepamanipanik, na kena a
ba giyai bo, ka pekasowa siran mamaganta ago so dii kakebota ko galebek o manga ped a
di ran dii teroon so kena a ba patot.
14 Kagiya ka maoto na aya pandoan aken na mamakipangaroma so manga kangodaan a
balo na mbabawata a kibiren iran so manga walay ran kaan di pekaparo so ridoay sa
kapakatero sa marata makapantag kiran,
15 Ka aden a manga balo a miyamakasilay den a miyonot ko Iblis.
16 So babay a peparatiyaya a aden a manga tonganay niyan a manga balo na paliyogat a
kirbiren iyan siran ago di niyan pekirikori ko Agama kaan makibir o Agama so manga
balo a da a ba niyan tonganay.
17 So manga pelokelokesen ko Agama a mapiya so kapenakoda iran na patot a mibilang

siran a domadait ko dowa takep a sokay a ba di labaw ron so pepamanamar mangosiyat
ago mangendao.
18 Ka tig o Kitab a “Di ngka pongesa so sapi igira a pegegik sa ilaw,” ago tig pen o Kitab
a “So gomagalebek na patot a sokayan.”
19 Di ngka pemakinega so apiya antonaa a pepanonen makapantag ko isa a pelokelokesen
ko Agama taman sa di pemataanan o dowa o di na telo a saksi.
20 Siran oto a dii ndodosa na mbongeti ngka ko kamamasaan o kalangolangon iyo kaan
malek so ped.
21 Sii ko hadapan o Allah ago si Isa Al Masih ago so soti a manga malaikat na isogo aken
reka a tomana ngka ngkai a manga pandoan sa da den a ba ngka peramiramigan o di na
penampilampilan sii ko apiya antonaa a di ngka dii nggolaolaan.
22 Di ngka penggagaanen domapenet so manga lima ngka ko apiya antawaa para ko
galebek o Kadnan, ka o ba ka baden marambit ko dii kandosa o ped a taw. Iktiyari ngka
so kasosoti ngka.
23 Di ka paginom sa ig bo, ka inom ka mambo sa maito a arak a bolombolong ko tiyan ka

ago so kapekesakit ka omanoman.
24 Marayag so manga dosa o ped a taw na katawan den o kalangolangon a ndanegen

siran, ogaid na so manga dosa o ped na mapageema pen imanto ogaid na kepayag bo sa
oriyan.
25 Datar oto mambo a marayag so manga pipiya a galebek, na apiya pen di tanto marayag
na di ini matatap o ba mapagema.
1 TIMOTIYO 6
So langon a oripen na patot a pagadatan iran piyapiya so manga kadnan iran kaan da a ba
makapetero sa marata makapantag ko ingaran o Allah ago so manga ndao tano.
2 So manga oripen a so manga kirek on na miyamaratiyaya a datar iran na patot a di iran
ipendarainon a kapagadati ran kiran ka kagiya magariyari siran. Patot pen a ba iran den
piyapiyai so di ran dii kanggalebek, ka siran oto a pegosba ko galebek iran na
miyamaratiyaya a pekebabayaan o Allah.
Ribat a manga Ndao ago Tito a Kakawasaan
Pangendaon ka ago pangosiyaten ka angkai a manga pandoan.

3 O aden a pepangendao sa salakaw a manga ndao a di magayon ko ontol a manga katero
o Kadnan tano a Isa Al Masih ago so manga ndao mipantag ko kapagamal
4 Na dii sekaniyan tekabor ago da a sowa iyan. Mababaya sekaniyan makindaowa ago
makipepawala makapantag ko manga katero. Pekiarong ai ko kariit, dii kambobono,
kapagitowito, marata a panarima,
5 Ago da a rintas a dii kapepawala o manga taw a di pemanabot a miyada kiran den so
tito a benar. Mapipikir iran a so kapagamal na isa a okit ko kapekewasa.
6 Mataan den a so kapagamal na ipekewasa o taw amay ka ikasosoat iyan so apiya

antonaa i rek iyan.
7 Ka da den a inowit tano sii sa doniya na da a ba tano mambo keawidan a poon on.
8 Kagiya ka maoto na asar a aden a pangenengken tano ago nditaren na patot a keonseran
tano ron.
9 Ogaid na siran oto a kebaya kewasa na kesarani ago kelitagan ko madakel a
kalalalongan ago pekarata a manga kabaya a aya nggaled ko manga taw ko kabinasaan
ago kasiksaan.
10 Ka so kapekebabayai ko pirak na aya pekepoonan o langon a pisosonan a kamarataan.
Aden a manga taw a sabap ko kapananamari iran sa kakewasa iran na baden
miyamakasilay ko paparatiyayaan tano na riyata iran a ginawa iran ko madakel a
kapakamboboko.
Manga Insarat
11 Ogaid na seka, Timotiyo, rek o Allah na lidasi ngka ini langon. Panamari ngka a
mbaloy ka a maontol, baraamal, mala i paratiyaya, mala i gagaw, pepekatiger ago
pepangalimbabaan.
12 Panagontamani ngka piyapiya so di ngka dii kapakimbatalo para ko paratiyaya.
Kamala ngka sa ginawa ngka so kaoyagoyag a da a kaposan iyan, ka giyanan na aya reka
initawag o Allah; na mapiya a kiyapemataani ngka ko paratiyaya ngka ko kamamasaan o
madakel a manga saksi.
13 Sii ko hadapan o Allah a pembegay sa kaoyagoyag ko kalangolangon ago sii ko
hadapan i Isa Al Masih a mapiya a kiyaseksii niyan ko tito a benar ko hadapan i Pontiyo
Pilato na isogo aken reka
14 A petomana ngka angkai a sogoan a iktiyari ngka o ba ka kaboringi o di na kadawayi
taman ko kakesoy o Kadnan tano a Isa Al Masih.
15 So kakepayag iyan na sii ko gawii a miyatendo o Allah a aya pepodin ago isaisa a
Pangolo, a aya bo Dato o manga dato ago Kadnan o manga kadnan.
16 Sekaniyan bo i da a ipetay niyan a mababaling ko sindaw a di keobay. Da a ba
rekaniyan miyakailay ago da den a ba on pekailay. Rek iyan so pangkatan ago so da a
kaposan iyan a kapaar!
17 Pandoa ngka so manga kawasa sangkai a doniya sa di siran pengimporoan ago di iran
serigi so kakawasaan iran a matag somasagad, ka sarigi iran baden so Allah a ipembegay
niyan rektano sa da a diyangka iyan so langon taman a ipekapiya a ginawa tano.
18 Pandoa ngka siran sa kanggolaola iran sa mapiya ago so kapakakewasa iran ko manga
pipiya a galebek, a maginawa siran ago maktitiyagar sa kapakapembagiana iran ko rek
iran ko manga ped.
19 Sii sangkai a okit na pekatimo siran sa kakawasaan a kebaloy a mabager a onayan para
ko manga gawii a da pen mitalingoma kaan iran makamal so kaoyagoyag a aya tito a
kaoyagoyag.
20 Seka, Timotiyo, na ipata ngka so inisana reka. Di ngka pekinega so kadodoniyai ago
da a bali niyan a manga katero ago so kalalalongan a dii kandadaowai a bebetowan o ped
a taw sa katao, ogaid na di benar.
21 Aden a ped a pepamangonot sangkai a katao, na sabap san na miyakasilay siran a poon
ko paparatiyayaan tano.
Pengnin ko a matatap rekano langon so limo o Allah.
2 TIMOTIYO
2 TIMOTIYO 1
Alamat sorat ako i Paolo a siyogo i Isa Al Masih sabap ko kabaya o Allah kaan aken
mapakalangkap so kaoyagoyag a initopa o Allah a rek tano ko kaiisaisa tano ago si Isa Al
Masih
2 Makasampay ki Timotiyo a pekebabayaan ko a wata aken.
Pengnin ko a malalayon reka so limo, kapedi, ago kalilintad a poon ko Allah a Ama ago
so Kadnan tano a Isa Al Masih.
Kapanalamat ago Kapangoyat
3 Pepanalamatan ko so Allah a pepangongonotanan aken a datar o miyanggolaola o

manga apo aken a sarta o maliwanag a hatin. Lalayon aken seka pegalowin sii ko
kapepangangarapan aken sa gagawii daondaw.
4 Peketademan aken so manga lo o ka, na ikakadali aken a kapakipegilayaan ko reka kaan
ako mababaya a tanto.
5 Kiyatoosan ko so da a saninsaning iyan a paratiyaya ngka a datar o paratiyaya a sii
komakaden sa paganay ki ina a ka a bai, a si Lowisa, ago sii mambo ki ina a ka, a si
Iyonisa, na tatangkeden aken a madadalem reka ini mambo.
6 Sabap sii na pekitanodan aken reka a biyaga ngka so apoy a giyoto so moodiset a
inibegay reka o Allah sii ko kinidapeneten aken reka ko manga lima ko.
7 Ka so Roh a inibegay rektano o Allah na kena a ba pekepoonan o katatalaw, ka poonan
o kabatowa, ago so gagaw, ago so kipapaaren ko ginawa.
8 Kagiya ka maoto na di ka keya ko di ngka dii kaseksii ko Kadnan tano, na di ako ngka
keyaan a makakalaboso sa sabap on. Ka nggolalan ko bager a ipembegay reka o Allah na
mbagian ka ko kapekerasay aken sabap ko Mapiya a Totol.
9 Siyabet tano niyan ago pinili a mabaloy a manga kaom iyan. Kena ini a ba sabap ko
miyanggolaola tano, ka sabap ko takdir iyan ago limo. Giyangkai a limo na inibegay
rektano a nggolalan ki Isa Al Masih sa da pen kapooni ko doniya
10 Ogaid na miyapayag den ai imanto ko kiyapakaoma o Pepanabet rektano a si Isa Al
Masih. Piyakada iyan so kapaar o kapatay na piyayag iyan so da a ikepos iyan a
kaoyagoyag a nggolalan ko Mapiya a Totol.
11 Initoro ako o Allah ago siyogo ako iyan sa kapekalangkapa ko ago kipemangendaon
sangkai a Totol.
12 Giyanan i sabap angkai a kapekerasay aken. Ogaid na kena ini a ba ko pekeyaan, ka
katawan aken sekaniyan a sasarigan ko, na matatangked sa ginawa ko a mapegipat iyan so
inisana aken on taman sangkoto a gawii a kakesoy niyan.
13 Rawata ngka so ladiyawan a inibegay aken reka, a so tito a benar a manga ndao a
inipangendao aken reka. Na nggolaolaa ngka ini a rakes o paratiyaya ago gagaw a rek
tano sii ko kaiisaisa tano ago si Isa Al Masih.
14 Pagongowi ngka angkoto a mapiya a inisana reka; ipata ngka a nggolalan ko
kapegogopi reka o Soti a Roh a komakaden rektano.
15 Katawan ka a tiyalikodan ako o langon a taw sa inged a Asiya taman ki Pigilo ago si
Hirmoginis.
16 Pengnin ko ko Kadnan a ikapedi iyan so pamiliya i Onisiporo, ka omanoman iyan
pakapiyaan a ginawa ko. Da niyan kayaan so kapegogopi niyan raken sii sa kalaboso,
17 Ka sii den so kiyapakaoma niyan sa Roma na piyanamaran ako niyan meloloba taman
sa miyatoon ako niyan.
18 Pengnin aken ko Kadnan a ibegay niyan on so kapedi sii ko gawii a kakesoy niyan.
Katawan ka piyapiya i kala o minitabang iyan raken roo sa Ipisos.
2 TIMOTIYO 2
Mapiya a Sondaro i Isa Al Masih
Seka, wata aken, na pakababager ka a nggolalan ko limo a rek tano ko kaiisaisa tano ago
si Isa Al Masih.
2 So miyaneg ka a inipangosiyat aken sii ko kamamasaan o madakel a peseksi na
pangendaon ka ko kasasarigan a manga taw a makapangendao mambo ko ped.
3 Tigera ngka pasin so bagian ka a karomasayan a lagid o mapiya a sondaro i Isa Al

Masih.
4 Da a isa bo a dii sondaro a ba pekirampat ko galebek a da a labot iyan ko kasosondaroi
ron, ka kabaya iyan a masoat sekaniyan o maporo iyan.
5 So mambo so pakokoya a pelalagoy ko kapakikoya na di pekakowa sa pirmiyo o di
niyan petomana so manga kokoman.
6 So taribasok a dii ndokaw piyapiya na patot a aya pekatarima ko paganay a bagian ko
peragonen.
7 Pamimikirana ngka angkai a pitero aken, ka so Kadnan na pekisabotan iyan reka ini
langon.
8 Tatademi ngka si Isa Al Masih a inoyag a poon ko miyamatay, a moriyataw sekaniyan o

Daod. Giyai so Mapiya a Totol a pepakalangkapen aken,
9 Na sabap sii na mararasay ako a papatongen pen a rantay a datar o ba ako tanganiyaya.
Ogaid na so katero o Allah na kena a ba mapapatong.
10 Kagiya ka maoto na titigeren aken so langon taman sabap ko piyamimili a manga
pagtaw o Allah kaan siran mambo makatarima ko kakesabet a rek iran ko kaiisaisa iran
ago si Isa Al Masih a rakes o bantogan sa dayon sa dayon.
11 Benar den angkai a katero:
“O miyatay tano a ped i Isa

na keoyag tano mambo a ped iyan.
12 O titiger tano
na makapendato tano mambo a ped iyan.
O pelaon tano sekaniyan
na ipepelaw tano niyan mambo.
13 Apiya o da a sarig tano
na lalayon sekaniyan kasasarigan
ka kagiya di niyan kesopak a ginawa niyan.”
So Gomagalebek a Ikasosoat o Allah
14 Pepakitoosi ngka ini ko manga taw san na lalangi ngka siran ko hadapan o Allah sa di
siran pepapawala makapantag ko manga katero. Kena ini a ba pekatabang, ka baden
pekabinasa ko pepamamakineg on.
15 Panamar ka kaan ka miyadap a ginawa ngka ko Allah a ikasosoat iyan a gomagalebek
a da a ba niyan ikeya ko galebek iyan, a pegontolen iyan so kipepangendaon iyan ko tito a
benar a katero o Allah.
16 Lidasi ngka so kadodoniyai a kamberak a da a bali niyan, ka baden pekioman ko
kapekesarani o taw.
17 Ka so ipepangendao iran na kelagid o panido a peken iyan so kobal. So ped kiran a
pepangendao na si Himinayo ago si Pilito.
18 Sominilay siran a poon ko tito a benar na pembinasaan iran so paratiyaya o ped a
nggolalan ko di ran dii kateroa sa miyaipos den so kakeoyag o miyamatay.
19 Inonta bo na so onayan a inibetad o Allah na di den kiiseg, na misosorat on angkai a
katero: “Makikilala o Kadnan so manga rek iyan,” ago “Oman i di niyan dii teroon a rek o
Kadnan na disomala a tomalikod ko kapakandosa.”
20 Sii ko mala a walay na aden a mbarambarang on a manga kasangkapan. So ped na
bolawan ago pirak, ago so ped na inembaalan a kayo ago bote. So ped on na para ko
tindos a kapegosara on, ago so ped na para ko makakakalilid a kapegosara on.
21 Kagiya ka maoto na o pelompiyowa o taw a ginawa niyan a poon sangkai a manga
rarata a olaola na pembaloy a lagid o kasangkapan a tindos a ipekidia on. Kesoti
sekaniyan a mala i kipantag ko Kadnan ago makatitiyagar ko apiya antonaa a mapiya a
galebek.
22 Palagowi ngka so manga baya sa ginawa o kangongodai reka na pegagaw ka ko
kaontol, paratiyaya, kapekebabayai ko ped, ago kalilintad a ped o siran oto a
pepamanimba ko Kadnan a sarta a malolompiyo i poso.
23 Lidasi ngka so kalalalongan ago da a manga lalag on a kandadaowai, ka katawan ka a
kiyarong baden ai sa kambobono.
24 Na paliyogat ko oripen o Kadnan a di makipepepawala, ka baden makalimoon ko
langon a taw, a matao sekaniyan mangendao ago manginginsabar.
25 Patot a mangangalimbabaan sekaniyan igira a pepamandoon iyan so siran oto a
pesopak on, ka masiken a began siran o Allah sa kaketalikodi ran ko manga dosa iran
kaan iran katokawi so tito a benar.
26 Amay ka giyanan na kaompiyaan so pamikiran iran, na kapalagoyan iran so litag o

Iblis a domiyakep ago miyangongoripen kiran.
2 TIMOTIYO 3
So Kamarataan sii ko Pepanga oori a manga Gawii
Tanodi ngka a sii ko pepanga oori a gawii na pekatalingoma so manga reregen a masa.
2 Ka sii sa masa oto na pembaloy so manga taw a manga liliget, mala i napso, manga
takabor, ipoporo iran a ginawa iran, pepagongatongat, pepegongkir ko manga lokes iran,
di pepanalamat, marata i olaola,
3 Da a gagaw iran, di kepangangapinan, pepanabasabap, di iran kipaar a ginawa iran,
manga rarangit, ipekegowad iran so mapiya,
4 Mamakatipo siran, manga sasarakanen, ago manga ala i maratabat a pekebabayaan iran
so ikasosoat a ginawa iran a kena a ba so Allah.
5 Makiilailain siran sa komekepit ko agama tano ogaid na di iran terimaan so kabatowa
iyan. Lidasi ngka angkai a manga taw.
6 So ped kiran na pepamanipanik ko manga walay a pepagakalan iran so manga lalong a
babay a melolonang ko manga dosa iran ago pekebarayat o mbarambarang den a manga
rarata a singayo iran.
7 Dii sebenar angkai a manga babay sa kapakasowa iran, ogaid na di iran den kesabot so
tito a benar.
8 Datar i Yanis ago si Yambris a somiyopak ko Mosa na somosopak mambo angkai a
manga mama ko tito a benar. Bibid siran i pamikiran ago di tito so paratiyaya iran.
9 Ogaid na aden a sendadan iran ka kagiya so kalalalongan iran na keilay bo o langon a
taw a datar o kiyaokitan i Yanis ago si Yambris.
So Kaposan a manga Insarat i Paolo ki Timotiyo
10 Ogaid na seka na katawan ka piyapiya so ipepangendao aken, so kapepaginetaw aken,

so singanin aken, so paratiyaya ko, so kapanginginsabar aken, so gagaw aken, so katiger
aken,
11 So manga kasatroan ago karomasayan a kiyaokitan aken. Katawan ka langon so
miyaolaola ko roo sa Antiyokiya, sa Ikoniyo ago sii sa Listra, a so piyakalekelek a manga
kasatroan a tiniger aken. Ogaid na siyabet ako o Kadnan sangkoto langon.
12 Na mataan den a so langon a makasisingayo sa kapaginetaw a kambaraamal sii ko
kaiisaisa iran ago si Isa Al Masih na mataan a kesatro siran.
13 Ogaid na so manga rarata a taw ago so dii mamagomanta na keomanan baden a karata
iran a pepanalibaan iran so ped ago pekesaliba siran mambo.
14 Ogaid na seka peman na kekepiti ngka so miyanga sosowa a ka a matatangked sa
ginawa ngka a tito a benar, ka katawan ka so miyamangendao reka sii.
15 Poon ko kawawatai reka na ipepangendao reka so soti a Kitab a aya reka miyakabegay
sa ongangen a minggonanao reka ko kakesabet ka a nggolalan ko paratiyaya ki Isa Al
Masih.
16 Oman i bitiyara a Kitab na minisengaw o Allah na mala ini i gona para ko
kipepangendaon ko tito a benar, so kapesepari ko miyanga riribat, so kapepakaontola ko
miyamakasilay, ago so kipepandoon ko maontol a kapepaginetaw
17 Kaan kaaasai piyapiya so pagtaw o Allah a mititiyagar ko oman i pisosonan a mapiya a
galebek.
2 TIMOTIYO 4
Aden a pegakolen ko reka sii ko hadapan o Allah ago si Isa Al Masih a aya pengokom ko
langon a manosiya a manga oyagoyag ago miyamatay. Sabap ko kakesoy niyan ago so
kapendato iyan na sogoon ko seka
2 Sa pakalangkapa ngka so katero o Allah a makatitiyagar ka ko kipengosiyaten ka on
igira a aden a kapakadadaya iyan o di na da den. Pakatanora ngka, sapari ngka, ago osiyati
ngka so manga taw a pepangendaon ka siran a rakes o langon a kapanginginsabar.
3 Ka pekatalingoma so masa a di iran den pemakinegen so ontol a ndao. Pengonotan iran
baden so manga kabaya iran ka pengiloba siran sa manga goro a petero kiran ko
pekebabayaan iran mamakineg.
4 Di iran den pemakinegen so tito a benar, ka aya iran bo tegoon sa ginawa na so manga
iringa.
5 Ogaid na seka peman na papaaren ka a ginawa ngka sii ko langon a kapakambebetad ka.
Tigera ngka so manga kamaregenan. Nggolalanen ka so sangan o pepangosiyat ko
Mapiya a Totol ago tomana ngka piyapiya so galebek ka a pepanalagad ko Allah.
6 Na saken peman, na pekeodod den so kapepaginetaw aken a datar o panginginomen a

ipesepaat ko Allah, na miyakatalingoma den so oras a kapagawai aken sangkai a
kaoyagoyag.
7 Miyanagontaman ako piyapiya sii ko kapakikoya na miyalalagoy ako a taman ko
petebanaan. Kiyapetan aken den so paparatiyayaan tano.
8 Imanto na ititiyagar so sangkad a pirmiyo aken sabap ko kaontol. Giyoto na imbegay
raken o Kadnan a aya maontol a Pangongokom sii sangkoto a gawii, na kena bo a ba
saken i mbegan iyan on ka so pen so langon a taw a ipekedali iran so kapekaoma niyan.
Manga Toma
9 Sebenari ngka a kapakasong ka raken sii sa magaan.

10 Si Dimas na inawaan ako niyan sabap ko kababaya iyan sangkai a doniya, na
somiyong sekaniyan sa Tisalonika. Si Krisins na somiyong sa Galasiya, ago si Titos na
roo sa Dalmasiya.
11 Si bo si Lokas i ped aken. Pakaonota ngka si Marko amay ka somong ka sii, ka
pekatabang ko galebek aken.
12 Piyakasong aken si Tikiko sa Ipisos.
13 Amay ka somong ka sii na awidi ngka so gerab aken a inibagak aken ki Karpo roo sa
Trowas. Awidi ngka mambo so manga ribro a ba di labaw so pisoratan a kobal.
14 Si Alihandro a panday sa galang na tanto a marata so inikidia niyan raken. So Kadnan
i mbadal on ko pinggolaola niyan.
15 Seka mambo na pananggilai ngka sekaniyan, ka tanto niyan a siyopak so manga katero
ami.
16 Sii ko paganay a kiyapakadarpa aken ko dii kokoman na da den a ba raken

miyaninindegan, ka inawaan ako baden o langon a taw. Na pengnin ko a di ini imbilang o
Allah a isela kiran.
17 Ogaid na inipamayandeg ako o Kadnan na bigan ako niyan sa bager kaan aken
matoman so kapekalangkapa ko mapiya a totol kaan on makapamakineg so langon a kena
a ba manga Yahodi. Na miyasabet ako a poon ko ngari o arimaw.
18 Sebeten ako o Kadnan ko langon a marata a antangan na pagowiten ako niyan piyapiya
roo sa kasorgaan a aya niyan Ndatoan. Rek iyan so bantogan sa taman sa pakataman!
Amin.
Kaposan a Salam
19 Sampain ka so salam aken ki Prisila ago si Akowilo ago so pamiliya i Onisiporo.

20 Si Irasto na mitelimbagak sa Korinto na inibagak aken si Tropimo sa Milito ka
miyasakit sekaniyan.
21 Panamari ngka a kapakasong ka sii sa di pen so panenggaw.
Si Yobolo, si Podins, si Lino, ago si Klaodiya taman ko langon a magariyari na

pesalamen ka iran.
22 Pengnin ko a malalayon reka so Kadnan.

Matatap rekano langon so limo o Allah.
TITOS
TITOS 1
Alamat sorat ako i Paolo a oripen o Allah ago siyogo i Isa Al Masih kaan aken
mapakabager so paratiyaya o siran oto a pinili o Allah ago so katao iran ko tito a benar a
pepekaagak kiran ko soti a kapaginetaw.
2 Giyangkai a paratiyaya ago katao na ipepasod ko arap ko kaoyagoyag a da a kaposan
iyan. So Allah a di makapemokeg na initopa niyan angkai a kaoyagoyag sii ko da pen
kaadena ko doniya.
3 Na sii ko osto a masa na piyayag iyan so katero iyan a nggolalan ko kiyapakalangkapa
ko ron, ka inisana raken angkai a galebek a nggolalan ko sogoan o Allah a Pepanabet
rektano.
4 Makasampay angkai a sorat ki Titos a wata aken ko paratiyaya a di tano dii mambagian.
Pengnin ko a malalayon reka so limo ago kalilintad a poon ko Allah a Ama ago si Isa Al
Masih a Pepanabet rektano.
So Galebek i Titos roo sa Krita
5 Aya sabap a kinibegaken aken reka sa Krita na an ka mapakatanor so manga nganin a

da pen mapasad ago an ka makapanoro sa manga pelokelokesen ko Agama sii ko oman i
inged. Tatanodi ngka so manga insarat aken reka a
6 Paliyogat ko pelokelokesen a di kedawayan, isaisa bo i karoma, ago petoman so manga
wata iyan a kena a ba aya kapekenega on na di siran mipapaar o di na di makaaadata.
7 Kagiya inisana ko nakoda so galebek ko Allah na paliyogat on a da a ba on kidaway,
kena a ba takabor, kena a ba magaan kararangitan, kena a ba tamereg, kena a ba marangit,
ago kena a ba mala i napso,
8 Ka disomala a masakaw sekaniyan, a pekebabayaan iyan so mapiya, ago maongangen,
matito, baraamal, ago mipapaar iyan a ginawa niyan.
9 Paliyogat on a kekepitan iyan piyapiya so kasasarigan a katero a inipangendao ron kaan
iyan kapangosiyati so ped ko ontol a ndao ago an iyan mapakapangimbenar so siran oto a
pesopak on.
10 Ka madakel a taw a pepamanopak a ba di labaw so ped ko miyamakateklid a poon ko

agama a Yahodi a ndadagen iran so ped ko kalalalongan a katero iran.
11 Disomala a pakareneken siran, ka pepekabinasa siran ko langon o manga pamiliya a
nggolalan ko kipepangendaon iran ko di patot a manga ndao kaan iran mipangowarta
ngkai a piyakayaya a okit.
12 So den so sakataw a taw sa Krita a isa ko manga goro iran i mitero on a “So manga
taw sa Krita na manga bokeg, manga rarangit a manga binatang, ago tapolan a manga
bosaw.”
13 Na benar angkoto a pitero iyan. Kagiya ka maoto na mbongeti ngka siran sebenar kaan
makaontol so paratiyaya iran
14 Ago an iran di ketago sa ginawa iran so di benar a manga totol o manga Yahodi ago so
manga sogoan o taw a tomiyalikod ko tito a benar.
15 So langon taman na soti ko siran oto a manga sosoti, ogaid na da den a nganin a ba
soti ko siran oto a maresik ago di pemaratiyaya, ka miyakaresik baden so pamikiran iran
ago hatin.
16 Tetaroon iran a katawan iran so Allah, ogaid na ipepalaw iran ai a nggolalan ko manga
olaola iran. Ikagogowad siran, manga taongkir, ago di siran makapenggolaola sa apiya
antonaa a mapiya a galebek.
TITOS 2
So Ontol a manga Ndao
Ogaid na seka na pamandoon ka so manga olaola a ipapaliyogat o ontol a ndao.

2 Tomai ngka so manga totoa a mama a patot a panginginsokor siran, makaaadata,
pekipaaren iran a ginawa iran, ago piyapiyai iran so paratiyaya iran, so kapekebabayai
iran ko ped, ago so kapakatiger iran.
3 Tomai ngka pen so manga totoa a babay sa kanggolaolaa iran ko patot ko dii
mananangoran ko Allah. Paliyogat a di siran pemaganta, di siran pekioripen ko
kapeginom sa arak, ago pepangendaon iran so mapiya a olaola.
4 Sii sangkai a okit na malayam iran so manga ngongoda a babay sa kapekebabayai iran
ko manga karoma iran ago manga wata,
5 So kagenggena ko manga ginawa iran, so kapaginetaw a soti, so mapiya a kapekibira
iran ko walay iran ago so kapakimbabaya iran ko manga karoma iran kaan da a ba
makapegitowito ko katero o Allah sabap ko olaola iran.
6 Datar oto mambo na osiyati ngka so manga ngongoda a mama sa kagenggena iran ko
manga ginawa iran.
7 Seka peman na sii ko langon a di ngka dii nggolaolaan na baloya ngka a ginawa ngka a
ladiyawan ko manga pipiya a galebek. Sii ko kapepangendao ngka na pakiilain ka a
maliwanag ka i poso ago makaaadata.
8 Osara ngka so manga pipiya a katero a di kedawayan kaan kayai so manga
makasosorang reka a da a ba iran mapetero a marata makapantag rektano.
9 Tomai ngka so manga oripen sa kapakimbabaya iran ko manga kadnan iran. Paliyogat a
kapesoata iran kiran sii ko langon a pesowaan iran ago di iran penembagen
10 Aya pen o ba iran pemanekewi, ka pakiilain iran baden a lalayon siran kasasanaan
piyapiya. Amay ka magiyoto na sii ko langon a di ran dii nggolaolaan na keilay a mapiya
so ndao makapantag ko Allah a Pepanabet rektano.
11 Ka so limo o Allah a pegowiten iyan so kakesabet na miyapayag den ko langon a taw.

12 Giyangkoto a limo na aya rektano pepamarinta sa katalikodi tano ko manga olaola a
pekasarani ago so manga rarata a kabaya a kadodoniyai kaan tano makapaginetaw a
manginginsokor, maontol, ago pepagamal sa masa imanto
13 Sii ko kapenayawa tano ko aarapen tano a ikebabaya tano a giyoto so kakepayag o lebi
a mala i gees a Tohan tano ago Pepanabet rektano a si Isa Al Masih sii ko bantogan iyan.
14 Inirila iyan a kaoyagoyag iyan para rektano kaan tano niyan mapokas ko langon a
kamarataan ago an tano niyan mabaloy a soti a manga pagtaw niyan a lalayon
kateterangan nggolaola sa manga pipiya a galebek.
15 Pangendaon ka angkai a manga pandoan na pangosiyati ngka ago pakaontola ngka so

pepamakineg reka a rakes o langon a kapaar. Di ngka peparowa o ba ka masodi o apiya
antawaa.
TITOS 3
So Kanggolaolaa ko manga Pipiya a Galebek
Pepakitanodi ngka ko manga taw a pakimbabaya siran ko gobirno ago so manga olowan
ago petomanen iran siran a makatitiyagar siran nggolaola ko langon a mapiya a galebek.
2 Tomai ngka siran sa di iran pegitowitoa so apiya antawaa, ka ba siran den dii pelilintada
ago dii nggiginawai a lalayon iran pepakiilay so parangay a baraadaten ko langon a taw.
3 Ka gowani na sektano mambo na pekelalolalong, pepamangongkir ago pepanga
dadadag. Miyapangongoripen tano o mbarambarang den a manga rarata a kabaya ago
ikasosoat o ginawa tano. Aya inipaginetaw tano na so kamarataan ago kariit. Inikagowad
tano o manga ped na inikagowad tano siran mambo.
4 Ogaid na sii ko kiyapayag o limo ago gagaw o Allah a Pepanabet rektano
5 Na siyabet tano niyan a kena a ba sabap ko apiya antonaa a maontol a galebek a
miyanggolaola tano, ka sabap ko kapedi iyan. Sii ko kiyasabeta niyan rektano na
liyompiyowan tano niyan ago bigan tano niyan sa bago a kaoyagoyag a nggolalan ko
kiyambagowi rektano o Soti a Roh.
6 Giyangkai a Roh na minitaralo a kiyaododa on rektano o Allah a nggolalan ki Isa Al
Masih a Pepanabet rektano.
6 Na kagiya inibilang tano o Allah a manga oontol sabap ko limo iyan na katawan tano
imanto a mapekewali tano so kaoyagoyag a da a kaposan iyan.
8 Na benar angkai a manga katero.
Kabaya aken a lalayon ka pepamataanan angkai a manga ndao kaan so miyamaratiyaya ko

Allah na matordo iran so di ran dii kanggolaola sa manga pipiya a galebek. Langon taman
ai na mapiya ago mala i gona ko manga taw.
9 Ogaid na lidasi ngka so kalalalongan a kapakindadaowai, so dii kakedekedega ko
manga apoapoan, ago so di kapegayonayon ago kapakipepawala makapantag ko Kitab, ka
langon ai na pekabinasa ago da a lalaw niyan.
10 So taw a aya pekesabapan ko dii kapakasisibaya o magaagama na lalangi ngka sa
makaisa o di na makadowa, na oriyan ai na talikodi ngka sekaniyan.
11 Ka katawan ka a so datar oto a taw na bibid i pamikiran, na so manga dosa niyan na
aya poriba a miyaribat sekaniyan.
Kaposan a manga Insarat
12 Amay ka pakasongen aken san reka si Artimas o di na si Tikiko na nggagaani ngka a

kapakasong ka raken sa Nikopolis, ka miyapamikir aken a tereg ako roo sii ko masa a
panenggaw.
13 Panamari ngka a kapegimowi ngka ki Sinas a so abogado ago si Apolo para sa
kapakalalakaw iran kaan da a korang kiran.
14 Patot ko ped ta a pepamaratiyaya a masowa iran so di ran dii kanggolaola sa manga
pipiya a galebek kaan iran makowa so manga nganin a kailangan iran ago an mala a
ipagonga o kapepaginetaw iran.
15 Pesalamen ka o langon a ped aken sii.

Sampain ka so salam aken ko manga ginawai tano san ko paratiyaya.
Pengnin ko a matatap rekano langon so limo o Allah.
PILIMON
Alamat sorat ako i Paolo a makakalaboso sabap ki Isa Al Masih ago poon ki Timotiyo a
pagari tano makasampay ki Pilimon a ginawai ami ago ped ko galebek,
2 Ago sii ko pagari tano a babay a si Apiya ago so ped tano a sondaro a si Arkipo ago so
magaagama a dii timotimo ko walay ngka.
So Kababaya ago Paratiyaya i Pilimon
4 Oman ako pepangangarapan na ipangni aken seka, na pepanalamatan aken so Tohan

aken
5 Ka kagiya pekeneg aken so makapantag ko paratiyaya ngka ko Kadnan a Isa ago so
kapekebabayai ngka ko langon a kaom o Allah.
6 Pengnin ko a so kapepakaparatiyayaa ngka ko ped na aya iran pekisabot ko langon a
rakmat a rek tano sii ko kaiisaisa tano ago so Al Masih.
7 Tanto raken a inikababaya ago minioyat, pagari ko, so kapekebabayai ngka ko ped, ka
piyamakapiya ngka a ginawa o manga kaom o Allah.
So Kiyaayoki ki Pilimon para ki Onisimo
8 Kagiya ka maoto na sii ko kaiisaisa ko ago so Al Masih na pekawaraw ako sa kisogoon

ko reka ko patot a penggolaolaan ka.
9 Ogaid na kena ini a ba aken sowaa, ka pagakolan ko seka baden sabap ko gagaw. Saken
a si Paolo a lokes ago kakalaboson pen imanto sabap ki Isa Al Masih
10 Na pagakolan ko seka para ki Onisimo a miyabaloy a wata aken, ka piyakaparatiyaya
aken ki Isa sii ko kakakalaboso aken.
11 Gowani na da a gona niyan reka ogaid na imanto na mala sekaniyan i gona sii reka ago
sii raken.
12 Ikesoy aken sekaniyan reka imanto a lagid o ba giya poso aken i ipekawit aken reka.
13 Kabaya aken o kowan a mapakatareg aken sekaniyan sii kaan ako niyan pekeogopi a
minisambi reka sii ko kakakalabosowa raken sabap ko Mapiya a Totol.
14 Ogaid na di aken kabaya i ba ako penggolaola sa apiya antona onon a di ngka
pagayonan kaan so mapiya a sowaan ka na kena a ba kisabap sa tigel aken seka, ka sabap
sa kabaya a ka.
15 Masiken a miyabelag reka pasin si Onisimo sa da matey kaan ka matarima peroman a

maped ka sa taman sa pakataman
16 A kena bo a ba matag sekaniyan oripen, ka lawan pen sa oripen, ka datar o
pekebabayaan a pagari ngka. Mataan a pekebabayaan ko sekaniyan ogaid na lebi pen a
kebabayaan ka, a kena bo a ba datar o ped ka a manosiya, ka ped ka pen a peparatiyaya ko
Kadnan.
17 O ibibilang ako ngka a ginawai ngka na tarimaa ngka sekaniyan a datar o ba saken i
terimaan ka.
18 O miyakanggolaola sekaniyan reka sa ribat, o di na o miyakaotang reka na saken i
sekati ngka.
19 Saken den i miyangonay sorat sangkai a pekatalondog: "Saken a si Paolo i mbayad
reka." (Di aken kabaya o ba ko reka aloya a aya otang ka raken na giya den a ginawa
ngka.)
20 Kagiya ka maoto, pagari ko, na nggolaolaa ngka ngkai a mapiya para raken sabap ko
Kadnan. Pakapiyaa ngka a ginawa ko sii ko kaiisaisa ta ago so Al Masih.
21 Sii ko kinisoraten ko sii na makasasarig ako sa mataan a penggolaolaan ka so inakol

aken, ago pelawanan ka pen.
22 Na sarta mambo a tiyagaren ako ngka sa rowang a mbolosan ko, ka pepegarapen ko a
pagamponen o Allah so ipepangangarapan iyo, na pekasongen ako niyan san rekano.
Kaposan a Salam
23 Pesalamen ka i Ipapras a kakalaboson a ped aken sabap ki Isa Al Masih.

24 Pesalamen ka pen i Marko, si Aristarko, si Dimas, ago si Lokas a manga ped aken ko
galebek.
25 Pengnin ko a matatap rekano langon so limo o Kadnan a Isa Al Masih.
HIBRIYO
HIBRIYO 1
So Katero o Allah a Nggolalan ko Wata iyan
Sii ko miyanga oona a masa na so Allah na omanoman iyan dii imbitiyarai so manga apo
tano sii ko mbarambarang a okit a nggolalan ko manga nabi.
2 Ogaid na sii sangkai a miyanga oori a gawii na inimbitiyarai tano niyan a nggolalan ko
Wata iyan. Initoro sekaniyan o Allah a makapekawali ko langon taman na ron
miyakanggolalan a kiyaadena o Allah ko alam.
3 Isisindaw niyan so tihaya o bantogan o Allah na peparangain iyan so tito a katotohani
ron. Aawidan iyan so langon taman a nggolalan ko mala i kabatowa a katero iyan. Na
oriyan o kiyaadena niyan ko okit a kakepapasa ko manga dosa a nggolalan ko kiyapatay
niyan na miyontod sekaniyan ko kawanan o Mala i Gees a Tohan roo sa kasorgaan.
So Wata na Lawan ko manga Malaikat
4 Miyabaloy so Wata a lawan pen ko manga malaikat a datar o kiyabegi rekaniyan o

Allah sa ingaran a kababantogan a di so manga ngaran o manga malaikat.
5 Ka da den teroa o Allah ko apiya antawaa ko manga malaikat a
“Seka i Wata aken;

imanto a gawiii na miyabaloy ako a Ama a ka.”
Aya pen o ba niyan teroa ko isa kiran bo a

“Kebaloy ako a Ama iyan
na kebaloy sekaniyan a wata aken.”
6 Na sii peman ko kinitoronen o Allah sa doniya ko Wata iyan a onaan o langon a kaaden
na pitero iyan a
“So langon a malaikat o Allah na paliyogat a somimba rekaniyan.”
7 Makapantag ko manga malaikat na pitero o Allah a
“Pembalowin iyan so manga malaikat iyan a lagid o ndo
ago so manga talasogoay niyan a lagid o manga kadeg a apoy.”
8 Ogaid na makapantag ko Wata na pitero o Allah a

“So kapendato o ka, hey Tohan, na ketatap sa taman sa pakataman,
na so kaontol i di ngka dii indato ko ndatoan ka.
9 Pekebabayaan ka so kaontol na ipekegowad ka so marata,
sabap sii na so Allah a Tohan ka na inododan ka niyan sa lana a kapekebabaya a lawan
pen ko manga ped ka.”
10 Tig iyan pen a
“Sii sa pagampaganay, hey Kadnan, na inibetad ka so onayan o doniya,
na so lima ngka i mimbaal sa manga langit.
11 Penga dadadas siran langon ogaid na ketatap ka;
palaya siran penga roronot a lagid o manga nditaren.
12 Pelolonen ka siran a lagid o malong
na kesambian siran a lagid o bangkala.
Ogaid na di ka den kealin
ago di den kepos so omor ka.”
13 Da den teroa o Allah ko apiya antawaa ko manga malaikat a

“Ontod ka sii sa kawanan aken
taman sa ibetad aken so manga ridoay ngka
a dapoay o manga ai ngka.”
14 Kagiya ka maoto na antonaa bes so manga malaikat? Palaya siran den manga niyawa a
pepanalagad ko Allah a pepanonogoon iyan an iran kaogopi ko siran oto a penga sasabet.
HIBRIYO 2
So Mala a Kakesabet
Kagiya ka maoto na disomala a tagoon tano piyapiya sa ginawa tano so miyanga aneg
tano kaan tano ron di kebelag.
2 So katero a inibegay a nggolalan ko manga malaikat na kiyapemataanan a tito a benar,
na oman i isa a miyakasogok on ago da on paratiyaya na miyadaneg ko patot a indaneg
on.
3 Kagiya benar oto na andamanaya i kakelidasi tano ko kandanega rektano o indadarainon
tano so mala i kipantag a kakesabet? So den so Kadnan i miyaona a miyakalangkap
sangkai a kakesabet, na so langon a miyakaneg rekaniyan na pimataanan iran rektano a
tito ai a benar.
4 Na pimataanan mambo o Allah so peseksian iran a nggolalan ko manga nanao, manga
piyakamemesa, pimbarambarangan a manga ala i kabatowa a galebek, ago manga
moodiset a pamemegayan o Soti a Roh a pimbagibagi iyan a nggolalan ko kabaya iyan.
So Wata i Pekaagak ko Kakesabet
5 Kena a ba so manga malaikat i piyakandato o Allah ko doniya a pekatalingoma a di ami

dii teroon.
6 Ka aden a bitiyara a Kitab a tig iyan a
“Antawaa so matag baden manosiya a ba ngka pipikira,

o di na so wata o manosiya a ba ngka pagiipata?
7 Biyaloy ngka sekaniyan sa da matey a mababa a di so manga malaikat;
siyangkadan ka sa bantogan ago pangkatan
8 Na piyakandato o ka ko langon taman.”
Sii ko kiyapakandatoa rekaniyan o Allah ko langon taman na da den a ba niyan on da

pakipaaren, ogaid na imanto na da tano pen mailay a makapepaar sekaniyan ko langon
taman.
9 Ogaid na aya pekeilay tano na si Isa, a miyabaloy sa da matey a mababa a di so manga
malaikat, a sasangkadan sekaniyan imanto sa bantogan ago pangkatan sabap ko kiyarasay
niyan ko kapatay. Ka sabap ko limo o Allah na makaokit sekaniyan sa kapatay para ko
langon o manga taw.
10 Maaaden so langon taman a dii makanggolalan ko Allah ago ipapantag rekaniyan, na
pakapembagianen iyan so madakel a wata iyan ko bantogan iyan. Na kagiya si Isa na aya
kiran pegagak ko kakesabet iran na patot ko Allah a kiyatarotopa niyan ki Isa a nggolalan
ko kiyarasay niyan.
11 Na si Isa a aya pesoti ko manga taw ago so siran oto a pesotin iyan na isaisa i Ama.
Giyanan i sabap a di ikeya si Isa sa kapembetowi niyan kiran sa manga pagari niyan.
12 Ka pitero iyan a
“Pekikilala ko so Ingaran ka, ya Allah, sii ko manga pagari aken;
pegidaidaan ko seka sa manga podi sii ko hadapan o kikalilimod.”
13 Pitero iyan pen a

“Serigan ko so Allah.”
Na tig iyan pen a

“Katii ako bo, ago so manga wata a inibegay raken o Allah.”
14 Na kagiya giyangkoto a manga wata na palaya manosiya a aden a sapo iran ago rogo
na miyabaloy mambo si Isa a lagid iran, ka miyakambagian ko kamamanosiyai kiran. Aya
sabap iyan na an makapenggolalan ko kapetay niyan na kebinasa niyan so Iblis a aden a
kapaar iyan ko kapatay
15 Ago an iyan kabalokasi so langon a taw a maooripen o kalek iran ko kapatay ko tenday
o omor iran.
16 Mataan den a kena a ba so manga malaikat i pegogopan iyan, ka so kiyababadan ko
Ibrahim.
17 Sabap sii na inipaliyogat ki Isa a kiyambaloy niyan a datar o manga pagari niyan sii ko
langon taman kaan mabaloy a masalinggagaw ago kasasarigan a maporo a imam ko
kapepanalagad iyan ko Allah kaan iyan maaden so kakepapasa ko dosa o manga taw.
18 Na sabap sa miyarasay sekaniyan ko kiyatepengi ron na pekaogop sekaniyan pen ko
siran oto a petepengan.
HIBRIYO 3
Si Isa na Lawan ki Mosa
Kagiya ka maoto, manga pagari ko a manga kaom o Allah a piyanawag iyan, na

pamimikirana niyo si Isa a siyogo o Allah a maporo a imam ko paratiyaya a kekepitan
tano.
2 Petomanen iyan so Allah a aya on tomiyoro sangkai a galebek a datar o kapetomana o
Mosa ko sangan iyan ko walay o Allah.
3 Ogaid na patot ki Isa a lawan pen so bantogan iyan a di so Mosa, a datar o taw a
miyangon ko walay na lebi pen a mala i bantogan a di so walay.
4 Oman i walay na aden a mimbalay ron, ogaid na so Allah i mimbaal ko langon taman.
5 So Mosa na kasasarigan a talasogoay ko langon o walay o Allah, na so galebek iyan na
aya ibarat o manga nganin a peyagen o Allah sa oriyan iyan.
6 Ogaid na so Al Masih na kasasarigan a Wata a komikibir ko walay o Allah. Na sektano
so walay niyan asar a kakapetan tano so sarig tano ago so arap a ipepangandag tano.
Lalangan mipantag ko da Kaparatiyaya
7 Sabap sii na dii teroon o Soti a Roh a

“O keneg iyo imanto so sowara o Allah
8 Na di niyo pekategasa so manga poso iyo a lagid o kiyasopaka niyo ko Allah
ko kiyatepengi niyo ron sii ko disirto.
9 Roo ako tipengan ago tiyokawan o manga apo iyo, a tig o Allah,
apiya iran pen kiyabantayan so manga galebek aken
sii ko soled o miyakapat polo ragon.
10 Sabap roo na kiyararangitan aken angkoto a manga taw
na miyatero aken a ‘Lalayon pekedadag so manga poso iran
na da iran den makilala so manga okitokit aken.
Na sii ko kiyararangiti raken na inisepa aken a
‘Di siran den pekasoled ko dedekean ko.’
12 Iktiyari niyo, manga magariyari, o ba ana isa rekano bo a ba on madadalem so marata a

poso a di peratiyaya ago tomiyalikod ko oyagoyag a Tohan.
13 Ka osiyati niyo baden so oman i isa rekano sa gawii gawii den taman sa di mada so
kapaparo niyo imanto kaan da a isa rekano bo a ba masaliba o dosa ago mabaloy a
mategas i poso.
14 Ka mamagepeda tano ko Al Masih asar a sebenaran tano komapet taman sa kaposan so
sarig a rek tano sii sa paganay.
15 Tanodi niyo so tig o Kitab a
“O keneg iyo imanto so sowara o Allah

na di niyo pekategasa so manga poso iyo
a datar o kiyasopaka niyo rekaniyan gowani.”
16 Na antawa onon a manga taw i miyakaneg ko sowara o Allah ago somiyopak on? Ba
di so langon a taw a pinakodaan o Mosa sa kiyapakaliyo iran sa Misir?
17 Na antawaa i pekerarangitan o Allah ko soled o miyakapat polo ragon? Ba di so
miyamakandosa a miyamatay roo ko disirto?
18 So kinisepaan o Allah sa di siran den pekasoled ko dedekean iyan na antawaa i di
niyan dii teroon? Aya di niyan dii teroon na siran oto a miyamangongkir on.
19 Na miyailay tano sii a da siran on makasoled ka da siran pamaratiyaya.
HIBRIYO 4
Kapakadeke para ko manga Pagtaw o Allah
Na mitataros den so initopa o Allah makapantag ko kapekasoled ko dedekean iyan.

Kagiya ka maoto na malek tano, ka o ba baden na aden a isa rekano bo a da makasampay
ko kapekasoled iyan on.
2 Ka mataan den a piyakalangkap rektano so Mapiya a Totol makapantag ko ndekean a
datar mambo o pinggolaola sii kiran. Ogaid na da iran kanggonai so manga katero a
miyaneg iran, ka da iran pamakinega a sarta o paratiyaya iran.
3 Na sektano bo a miyamaratiyaya i miyakasoled sangkoto a ndekean. Na aya miyaolaola
o da pamaratiyaya na datar o pitero o Allah a
“Sii ko kiyararangiti raken na inisepa aken a di siran den pekasoled ko dedekean ko."
“Pitero iyan ai apiya pen miyatiyagar angkoto a ndekean ipoon ko kiyaadena ko doniya.
4 Ka sii ko sabaad ko Kitab na giyai i miyatero makapantag ko ikapito a gawii: “Dikean o
Allah ko ikapito a gawii so langon a galebek iyan.”
5 Ogaid na apiya pen miyatiyagar den so ndekean na pitero iyan so miyaonaan ai a
miyaaloy den a “Di siran den pekasoled ko dedekean ko.”
6 Na siran oto a miyaona a miyakaneg ko Mapiya a Totol makapantag ko ndekean na da
on mamakasoled sabap ko da iran kaparatiyaya.
7 Sabap roo na tomiyaalik pen so Allah sa isa a gawii a bebetowan sa “Imanto a gawii.”
Pitero iyan so makapantag on a nggolalan ko Daod kagiya den a matey ko oriyan o da iran
kaparatiyaya, ka aya pitero iyan na so misosorat ko Kitab a miyaaloy den a
“Imanto na o keneg iyo so sowara o Allah

na di niyo pekategasa so manga poso iyo.”
8 O miyapakasoled siran o Yosowa ko dedekean o Allah na di den pagalowin o Allah so

ped a gawii kagiya maipos oto.
9 Ogaid na sabap sa inaloy niyan ai na aden den a kapekadeke o manga pagtaw o Allah a
lagid o kiyapakadeke o Allah sii ko ikapito a gawii.
10 Ka so taw a pekasoled ko dedekean o Allah na kedekean iyan so manga galebek iyan a
lagid o kiyadekei o Allah ko galebelek iyan.
11 Kagiya ka maoto na managontaman tano sa kapakasoled tano sangkoto a ndekean kaan
da a isa rektano a ba maroseng sabap ko kaperawata niyan ko katataongkir o manga Israil.
12 So katero o Allah na oyagoyag ago pekagaga, ago magarang a di so apiya antonaa

pedang a dowa i garangan. Magoteng ai taman ko kambebelagan o iman ago niyawa,
taman ko manga soosooran ago so otek o tolan. Mapengokom iyan so manga lalag ago
manga singanin sii ko poso o taw.
13 Da den a kaaden a ba mapegma ko Allah. So langon taman na kasasawaan ago
mapapayag ko kapegilaya on o Allah a aya rektano pekasomariya.
Si Isa a so Lebi a Maporo a Imam
14 Kagiya ka maoto na sebenaran tano komapet so paratiyaya a kekepiten tano, ka aden a

lebi a maporo a imam tano a miyakasong taman ko pipeporoan o kasorgaan. Sekaniyan si
Isa a so Wata o Allah.
15 Giyangkai a maporo a imam tano na sasabotan iyan piyapiya so manga kalobayan
rektano, ka kiyatepengan sekaniyan ko langon a okit a datar tano, ogaid na da den
makandosa.
16 Kagiya ka maoto na mamangadap tano a makasasarig ko korsi o Allah a makalimoon
kaan tano matarima so kapedi ago limo a kitabang rektano ko masa a kailangan tano.
HIBRIYO 5
Oman i maporo a imam na pinili a poon ko manga taw ago initoro a isasaliyo ko manga
taw ko hadapan o Allah kaan iran pekisapaat ko Allah so manga soasoat ago manga
korban sabap ko manga dosa iran.
2 Ikeranon iyan so da a manga peleng iyan ago so pepanga riribat, ka malobay sekaniyan
mambo a datar iran.
3 Sabap sii na paliyogat on a kipesepaaten iyan ko manga korban a kena a ba sii bo sabap
ko manga dosa o manga taw, ka so pen so rek iyan a manga dosa.
4 Da a taw a ba niyan kekamal sa ginawa niyan angkai a pangkatan a maporo a imam, ka
disomala a itoro sekaniyan sii o Allah a datar o Aron.
5 Datar oto mambo a so Al Masih na da niyan kiyamal sa ginawa niyan angkanan a
pangkatan a maporo a imam, ka so Allah i tomiyoro on a tig iyan a
“Seka so wata aken;

imanto a gawii na mimbaloy ako a Ama a ka.”
6 Pitero iyan pen sii ko sabaad ko Kitab a
“Seka na imam sa taman sa pakataman

a datar o Milkisidik sa kaiimami.”
7 Sii ko kiyapaginetaw niyan sa doniya na miyangangarapan ago miyangangampedian si

Isa a sarta o matanog a kapepelalis iyan ago kapemangetek o lo iyan sii ko Allah a aya on
pekasabet ko kapatay. Na inampon so manga pangni niyan sabap sa mangangalimbabaan
sekaniyan a makimbabaya ko Allah.
8 Na apiya Wata sekaniyan o Allah na miyasowa iyan so kapangongonotan a nggolalan
ko manga kiyaromasay niyan.
9 Na kagiya matarotop sekaniyan na miyabaloy a pekepoonan o da a ikepos iyan a
kakesabet o langon a pepangongonotan on.
10 Na iningaranan sekaniyan o Allah sa maporo a imam a datar o Milkisidik sa kaiimami.
Lalangan an di Kebelag ko Paratiyaya
11 Madakel a mapetero ami makapantag sii, ogaid na maregen a pekisabotan rekano, ka

kagiya tanto kano a malombat ko kapakasabot.
12 Kagiya miyatey den a kiyaparatiyaya niyo na patot a mimbabaloy kano a manga goro,
ogaid na kailangan iyo a mapengendao kano pen ko pagampaganay a ndao makapantag ko
manga katero o Allah. Mimbabaloy kano a manga taw a aya on bo patot na gatas a di
pekakan sa mategas a pangenengken.
13 Oman i isa a dii pakanggatasen na maitek pen a wata a da niyan den masowa so ndao
makapantag ko kaontol.
14 Ogaid na so mategas a pangenengken na para ko manga totoa den a miyanga lalayam
ko kapegosara ko sipat iran sa kapakapelebiyaa ko mapiya ago so marata.
HIBRIYO 6
Kagiya ka maoto na gomanat tano poon ko pagampaganay a ndao makapantag ko Al
Masih na tomaros tano ko manga ndao a patot ko manga totoa a taw. Di tano den
seromanan metad so onayan, a so manga ndao makapantag ko katalikodi ko manga olaola
a kiyarong ko kapatay, so paratiyaya ko Allah,
2 So manga insarat makapantag ko manga salawat, so kipendapeneten ko manga lima, so
kakeoyag o miyamatay, ago so pekatalingoma a kapengokom.
3 Tomaros tano den! Na o begay so Allah na nggolaolaan tano ai.
4 Ka so siran oto a kiyasindawan gowani o Allah, ago miyamakataam ko pamemegayan a

poon sa kasorgaan, ago miyamakambagian ko Roh o Allah,
5 Ago miyamakataam ko kapiyaan o katero o Allah ago so manga ala i kabatowa a
galebek o pekatalingoma a masa,
6 Na o tomiyalikod siran sangkai a manga nganin na di den kepakay i ba siran on pen
mapakasangor sa lagid o paganay, ka sii ko ginawa iran na petotoken iran peroman so
Wata o Allah ko kros na di ran dii pakakeyakayaan sekaniyan ko kamamasaan o manga
taw.
7 So lopa a pesenepan o ig a lalayon den pegoranan a aya pen pepakato ko manga

pamomolan a mala i gona ko dii ron basok na perakmatan o Allah angkoto a lopa.
8 Ogaid na o pemangetoi a manga sorok ago marata a otan na da a bali niyan, na mararani
ko kipesintaan on a aya sendadan iyan na ketotong.
9 Ogaid na apiya pen di ami dii teroon so datar ai, manga pekebabayaan ami, na
matatangked sa ginawa mi a di niyo dii nggolaolaan so manga nganin a lebi pen a mapiya
a di giyoto -- a so manga nganin a makaoonot ko kapekesabet iyo.
10 Maontol so Allah, na di niyan kelipatan so galebek iyo ago so kapekebabayai niyo ron
a piyakiilay niyo ko kiyaogopi niyo ko manga kaom iyan ago so kipeterosen iyo kiran
pegogop.
11 Masisingayo ami a so oman i isa rekano na itataros iyan angkai a kasosomayodi ron
taman sa kaposan kaan matoman so manga nganin a pepagarapen iyo.
12 Ka di ami kabaya o ba kano dii mbokebokel, ka rawata niyo baden so siran oto a
pekatarima ko initopa o Allah sabap ko paratiyaya iran ago kapanginginsabar.
So Matatangked a Topa o Allah
13 Isako tomopa so Allah ko Ibrahim na inisepa iyan a itoman iyan so initopa niyan on.
Na sabap sa da den a lawan iyan a ipesepa na inisepa iyan a ginawa niyan
14 A pitero iyan a “Matamataan a perakmatan ko seka ago pekadakelen ko a tanto so
kebabadan reka.”
15 Na misebar so Ibrahim na miyatarima iyan so initopa o Allah.
16 Igira a pesepa so taw na osaren iyan so ingaran o labaw rekaniyan, na giyangkoto a
sepa na aya inipemataan ko pitero iyan ago pekapasad ko langon a dii kandadaowaiyaan.
17 Datar oto mambo na kagiya kabaya o Allah a pakarayagen iyan piyapiya ko siran oto a
makapekawali ko initopa niyan a di niyan den mberobaan so takdir iyan na pisepaan iyan
so initopa niyan.
18 Sii sangkai a dowa a nganin, a so topa o Allah ago so sapa iyan a di den kebaroba, na
di den kepakay i ba makapemokeg so Allah ko kapeteroa niyan on. Sabap sii na langon
tano a miyakaagaw ko Allah na kiyaoyatan a tanto sa kakakapeti tano sebenar ko arap a
inibegay rektano.
19 Kakapetan tano angkai a arap a lagid o dadan o poso tano a kababageran ago di
kekaog, a iraraot ko soled o rending sii ko Lebi a Soti a Kaden roo sa kasorgaan.
20 Somiyoled roo si Isa a miyaona a di sektano ago sabap rektano, ka miyabaloy
sekaniyan a maporo a imam sa taman sa pakataman a datar o Milkisidik sa kaiimami.
HIBRIYO 7
So Imam a si Milkisidik
Giyangkai a Milkisidik na dato sa Salim ago imam ko Lebi a Maporo a Tohan. Kagiya
pembaling so Ibrahim a poon sa katidawa a ron iyan miyataban so manga dato na inalaw
sekaniyan o Milkisidik na riyakmatan iyan so Ibrahim.
2 Na inibegay ron o Ibrahim so ikasapolo bagi ko langon a tamok a ndodon. (Aya
paganay a maana o ngaran o Milkisidik na “Dato ko Kaontol,” na kagiya dato sekaniyan
sa Salim na makapemamaana pen so ngaran iyan sa “Dato ko Kalilintad.”)
3 Da a ama iyan ago da a ina iyan ago da misalsila. Da a poonan o di na kaposan o
kaooyagoyag iyan. Lagid sekaniyan o Wata o Allah, a imam sa taman sa pakataman.
4 Ilaya niyo man o ay kala iyan! Apiya so Ibrahim a paapoapoan na inibegay niyan on so
ikasapolo bagi ko langon a miyateban niyan ko katidawa.
5 So kiyabababadan ko Libi a pembabaloy a manga imam na ipapaliyogat kiran o Kitab
so kapepamanekata iran ko ikasapolo bagi ko rek o manga taw sa Israil, a aya maana
niyan na pepamanekatan iran so manga pagari iran apiya pen kiyababadan siran mambo o
Ibrahim.
6 Ogaid na so Milkisidik na kena a ba moriyataw o Libi na riyakmatan iyan so Ibrahim a
aya tiyopaan o Allah.
7 Na di mipendowadowa a so perakmat na lebi pen a mala a di so perakmatan.
8 So manga imam a pepamanekat sa diyakat na pematay bo, ka manga manosiya, ogaid
na so Milkisidik a miyanekat sa diyakat na piseksian o Kitab a oyagoyag pen.
9 Mapetero ta a so Libi a pepanekat sa diyakat na migay sa diyakat a nggolalan ko
Ibrahim.
10 Ka apiya da pen mbawataan so Libi isako alaon o Milkisidik so Ibrahim na mapetero
ta a madadalem so Libi ko lawas o Ibrahim a apo iyan.
11 So Kitab a initoron ko manga taw sa Israil na mipepasod ko kaiimam o kiyababadan

ko Libi. Na o ketarotop so parangay o manga taw a nggolalan sii, na di den kailangan a
kapekagemaw o sasoson a imam a lagid o Milkisidik sa kaiimami a kena a ba lagid o
Aron.
12 Na amay ka sembian so kaiimami na di mipendarainon a kakesambii mambo ko Kitab.
13 So Kadnan tano a di ami sii dii teroon na ped ko salakaw a mbatabataa, na da den a
maaped sangkai a mbatabataa a ba miyakanggalebek ko kaiimami sii ko aparan.
14 Marayag den a maaped sekaniyan ko kiyababadan ko Yoda, na da maaloy o Mosa
ngkoto a mbatabataa ko kiyatero iyan makapantag ko manga imam.
Si Isa na Lagid o Milkisidek
15 Na miyakarayag pen a tanto so di ami dii teroon sabap ko kiyapakagemaw o sasoson a

imam, a so imam a datar o Milkisidik.
16 Da sekaniyan mbaloy a imam sabap ko kokoman a mipepasod ko salsila ko manga
taw, ka sabap ko kabatowa o kaoyagoyag a da a ikepos iyan.
17 Ka misosorat ko Kitab a “Imam ka sa dayon sa dayon a datar o Milkisidik sa
kaiimami.”
18 Sii sangkai a okit na so andang a kokoman na inisili, ka da a bager iyan ago da a bali
niyan.
19 Ka so kitab o Mosa na di pekatarotop sa apiya antonaa. Ogaid na kiyasambian ai sa
lebi pen a mapiya a arap a kipakarani tano ko Allah.
20 Na lebi ini a mapiya sabap ko inisepa o Allah. Da sekaniyan den sepa ko kiyabaloy a
imam o manga moriyataw o Libi
21 Ogaid na miyabaloy si Isa a imam a nggolalan ko sapa sii ko kiyateroa on o Allah a
“Misepa so Kadnan na di niyan den pagalinen so pamikiran iyan:

‘Imam ka sa taman sa pakataman.' ”
22 Na sabap sangkai a sapa na miyabaloy si Isa a topa ko lebi pen a mapiya a kapasadan.
23 Giyangkoto a ped a manga taw a miyanga babaloy a imam na madakel, ka da a isa
kiran bo a ba niyan kidayon so galebek iyan, ka petay bo.
24 Ogaid na kagiya oyagoyag si Isa sa dayon sa dayon na so kaiimam iyan na di kiidal sa
ped.
25 Sabap san na kegaga niyan a kapekesabeta niyan piyapiya ko siran oto a pepakarani ko
Allah a nggolalan rekaniyan, ka oyagoyag sekaniyan sa dayon sa dayon kaan iyan siran
mipemangni ko Allah.
26 Kagiya ka maoto na si Isa i domadait rektano a maporo a imam, ka soti sekaniyan a da

a daway niyan o di na dosa. Miyabelag sekaniyan ko manga baradosa na minibayaw roo
ko pipeporoan o manga kasorgaan.
27 Kena sekaniyan a ba datar o ped a manga poporo a imam, ka kena a ba paliyogat on so
kipesepaaten iyan ko manga korban ko Allah oman gawii. Giyanan i dii nggolaolaan o
ped a imam, a paganay ron na sabap ko rek iran a manga dosa na go bo so dosa o manga
taw. Ogaid na pinggolaola ini i Isa sa miyakaisa bo ko kinirilaan iyan sa ginawa niyan ko
kapatay.
28 So manga taw a initoro o Kitab o Mosa a manga babaloy a manga poporo a imam na
manga lolobay; ogaid na so topa o Allah a sarta o sapa a miyaori a di so kinitoronen ko
Kitab na initoro iyan so Wata a aya mabaloy a imam a matatarotop i parangay sa taman sa
pakataman.
HIBRIYO 8
Si Isa na Maporo a Imam ko Bago a Kapasadan
Aya kasasampornaan ko di ami dii teroon na giyai: Aden a maporo a imam tano a datar ai
a moontod ko kawanan o korsi o Allah roo sa kasorgaan.
2 Pepagimam sekaniyan ko Lebi a Soti a Darpa sii ko tito a Barombarong a biyangon o
Kadnan a kena a ba manosiya.
3 Oman i maporo a imam na initoro a pekasapaat sa manga pamemegayan ago manga

korban ko Allah, na so mambo so Maporo a Imam tano na paliyogat on a aden a kisapaat
iyan.
4 O sisii sekaniyan sa doniya na kena a ba imam, ka aden den a manga imam a pesepaat
sa manga pamemegayan a ipapaliyogat o Kitab o Mosa.
5 Ogaid na so kaiimam iran na sii ko pesimbaan a matag baden ibarat ago along angkoto
a ndodoo sa kasorgaan. Ka sii ko kiyainsarati o Allah ko Mosa sii ko kapagembaali niyan
ko Barombarong na tig iyan a “Iktiyar ka sa kapagembaali ngka ko langon taman a lagid o
ladiyawan a piyakiilay reka roo ko palaw.”
6 Ogaid na aya benar na kiyabegan den si Isa sa kaiimami a sangan a tanto a makalalawan
ko rek o manga imam a manosiya, a lagid mambo o kapasadan a sekaniyan i tomiyanor
on a lebi a mapiya a di so andang, ka kagiya mipepasod den ko lebi a mapiya a manga
topa o Allah.
7 Ka o da a daway o miyaona a kapasadan na di den kailangan so ikadowa a kisambi on.

8 Ogaid na piyayag o Allah a so miyaona na aden a korang on isako teroon iyan a
“Ilaya niyo man, ka pekatalingoma so manga gawii, a tig o Kadnan,

a magembaal ako sa bago a kapasadan
mipantag ko manga taw sa Israil ago so manga taw sa Yoda.
9 Kena ini a ba datar o kapasadan a inembaalan aken mipantag ko manga apo iran
sii ko gawii a kiyapetan ko so manga lima iran
sa kapegagaka ko kiran a poon sa inged a Misir.
Da iran tomana ngkoto a kapasadan aken
na sabap roo na inindarainon aken siran, a tig o Kadnan.
10 Giyai i kapasadan a pagembaalan ko sii ko manga taw sa Israil
amay ka pekatalingoma ngkoto a manga gawii, a tig o Kadnan:
ndalemen aken so manga sogoan aken sii ko manga pamikiran iran
na isorat aken sii ko manga poso iran.
Pembaloy ako a Tohan iran na pembaloy siran a manga pagtaw aken.
11 Na di den kailangan a ba pangendaowa o oman i isa kiran so siringan iyan,
aya pen o ba niyan teroa ko pagari niyan a ‘Kilaaa ngka so Kadnan,’
ka palaya siran raken pekakilala
ipoon ko lebi kiran a mababa a taw taman ko lebi a mala.
12 Ka perilaan ko so manga sala iran
na di aken den tedeman so manga dosa iran.”
13 So kiyabetowi o Allah sangkai a kapasadan sa bago na giyanan i kiyabaloya niyan a

andang ko miyaona a kapasadan. Na saden sa pekeandang ago pekeronot na magaan den
kedadas.
HIBRIYO 9
So Kasimba sii ko Timplo ko Doniya
So miyaona a kapasadan na aden a manga kokoman on ko kasimba ago aden a darpa on a

pesimbaan a pimbaalan a manosiya.
2 Aden a Barombarong a miyabangon a dowa a rowang on. So isa on na bebetowan sa
Soti a Darpa a ron matatago so solo ago so lamisaan a ron mibabatog so paan a isasapaat
ko Allah.
3 Sii ko malilikod o rending na giyoto so ikadowa a rowang a bebetowan sa Lebi a Soti a
Darpa.
4 Ron matatago so aparan a bolawan a petotongan sa doka. Ndodon mambo so Kaban sa
Kapasadan a palaya lalapisan sa bolawan. Misosoled sangkoto a Kaban so omoy a
bolawan a tatagoan ko roti, so tongkas o Aron a miyagombos, ago so dowa timan a
mapapapan a ator a ron misosorat so manga sogoan a kapasadan.
5 Sii ko liyawaw o kaban na ndodon so mala i bantogan a piyagtaotaw a manga malaikat
a isasayap so manga papak iran ko lekeb o Kaban a ron pekepapas o Allah so manga
dosa. Ogaid na di ami keosay piyapiya imanto angkai a manga nganin.
6 Kagiya matiyagar angkanan a manga nganin na pesoled so manga imam ko paganay a

rowang oman gawii ka ipetoman iran so kaiimam iran.
7 Ogaid na so bo so maporo a imam i pekasoled ko ikadowa a rowang, na makaisaisa
niyan ai penggolaolaan ko makasaragon. Maawid sekaniyan sa rogo a isepaat iyan ko
Allah sabap ko manga dosa niyan ago so dosa o manga taw a di ran katawan i
kiyapakandosa iran.
8 Aya ipepamangendao sii o Soti a Roh na so okit a kapekasoled ko Lebi a Soti a Darpa
na da pen mapayag sii ko kapakatitindeg pen angkoto a miyaona a Barombarong.
9 Langon oto na lagid o bayambayanan a aya ipepamangendao niyan rektano sa masa
imanto na giyai: So manga pamemegayan ago manga korban a ipesepaat ko Allah na di
ran den mapekaliwanag so hatin o taw a pesimba on.
10 Ka giyangkoto a andang a kepit na aya kapetomana ko manga taritib a matag baden
ipapantag ko lawas, a ibarat so kakan, kainom, ago mbarambarang den a kapamangonab.
Na minidayon so kapaar angkoto a manga taritib sa taman bo ko kinisambiin on ko bago
a kepit.
So Rogo o Al Masih i Pekapapas ko Dosa
11 Ka miyakaoma den so Al Masih a aya maporo a imam ko mapiya a kepit a sisii den
imanto. Lebi a mala ago lebi a tarotop so Barombarong a pepagimaman iyan a kena a ba
pimbaalan a manosiya ago kena a ba maaped sangkai a miyaaden a doniya.
12 Miyakasoled sekaniyan ko Lebi a Soti a Darpa sa miyakaisaisa bo, na kena a ba so
rogo o kambing ago nati a sapi i inawidan iyan roo a isepaat iyan, ka so rek iyan a rogo.
Na giyanan i kiyaadena niyan ko kakesabet tano sa dayon sa dayon.
13 So rogo o manga kambing ago mama a sapi, ago so ombi o tiyotong a nati a sapi a
ipembombor ko manga taw a kiyabatalan na pepakasoti kiran ai kaan pekelompiyo so
lawas iran ko kapesimba.
14 Kagiya benar ai na taralebi pen a tanto a pekagaga so rogo o Al Masih.
Miyakanggolalan ko da a ikepos iyan a Roh na inirila iyan a ginawa niyan a da a daway
niyan a soasoat ko Allah, na so rogo iyan i pekalompiyo ko manga hatin tano ko manga
olaola a kiyarong ko kapatay kaan tano kapangongonotani so oyagoyag a Tohan.
15 Sabap sii na so Al Masih i tomiyanor ko bago a kapasadan kaan so siran oto a tiyawag
o Allah na an makatarima sa da a kaposan iyan a kawali a initopa o Allah. Mapenggolaola
ini ka kagiya so kiyapatay niyan na aya kiran pekasabet ko manga dosa a miyanggolaola
iran isako kipapaaren kiran pen o miyaona a kapasadan.
16 Di den keparo so apiya antona onon a amanat o di daan a kamataanan a miyatay den so
miyagamanat on.
17 Ka da a lalaw o amanat sii ko kaoyagoyag pen o mimbaal on. Aya bo a kakeparo niyan
na amay ka miyatay sekaniyan den.
18 Giyanan i sabap a apiya so miyaona a kapasadan na da mapero a liyo ko kinggolalanen
ko rogo.
19 Na giyai i miyanggolaola: Paganay ron na pitero o Mosa ko langon a taw so oman i
sogoan o Kitab. Kagiya maipos oto na kinowa niyan so rogo o nati a manga sapi ago
kambing a rakes o ig na inipirik iyan ko Kitaban ago so langon a taw a pegosaren iyan on
so manga raon a hisopo a bababaden sa mariga a tanor a dilana.
20 Na pitero iyan a “Giyai so rogo a inipemataan ko kapasadan a inisogo o Allah a
tomanen iyo.”
21 Sii ko datar oto a okit na pinirikan pen o Mosa sa rogo so Barombarong ago so langon
a kasangkapan a pekeosar ko kapesimba.
22 Mataan den a ipapaliyogat o Kitab a ba bo di langon taman na pekelompiyowan a
nggolalan ko rogo. Na o da a kapekatoga o rogo na da den a kakepapas o dosa.
23 Langon angkai a manga nganin a ladiyawan ko ndodoo sa kasorgaan na paliyogat a

kapelompiyowi ron sangkai a okit. Ogaid na so manga nganin a iniibarat kiran roo sa
kasorgaan na paliyogat on so lebi pen a mapiya a di sii.
24 Kena a ba so Soti a Darpa a pimbaalan a manosiya i siyoledan o Al Masih a matag
baden ladiyawan ko tito a Soti a Darpa, ka somiyoled sekaniyan sa kasorgaan kaan dii
makapangadap ko Allah imanto para rektano.
25 So maporo a imam o manga Yahodi na pesoled ko Lebi a Soti a Darpa ko oman ragon
a maawid sa rogo a kena a ba niyan rek. Ogaid na sii ko kiyapakasoled o Al Masih sa
kasorgaan na kena a ba sabap sa an iyan misapaat a ginawa niyan ko Allah sa omanoman.
26 Ka o giyanan na disomala a omanoman sekaniyan pekerasay a ipoon ko kiyaadena ko
doniya. Ogaid na mipeyag sekaniyan imanto sa miyakaisa bo sangkai a kakepos o manga
masa kaan iyan mapakada so dosa a nggolalan ko kinisapaaten iyan sa ginawa niyan.
27 Bagian o oman i isa a taw a makaisa bo matay, na maipos oto na kokomen o Allah.
28 So mambo so Al Masih na miyakaisa a kinisapaaten rekaniyan ko Allah kaan iyan
mapakada so dosa o madakel a taw. Na pepayag sekaniyan bo ko ikadowa a kena a ba
mipantag ko dosa, ka sabap sa an iyan masabet so siran oto a pepanayaw rekaniyan.
HIBRIYO 10
So Kitab o Mosa na matag baden along o manga pipiya a rakmat a pemakatalingoma.
Giyangkai a Kitab na kena a ba so tito a manga rakmat. Kagiya ka maoto na di niyan den
ketarotop so manga taw a pepakarani ko Allah a nggolalan ko ndatadatar a manga korban
a lalayon iran on ipesepaat oman ragon.
2 O benar a kelompiyowan piyapiya sa dosa so pepamanimba na di den kegedam o hatin
iran a aden pen a dosa iran, na masiken a benar a kiyagenekan den a kipesepaaten
sangkoto a manga korban.
3 Ogaid na aya benar na giyangkoto a manga korban na pekitadem o manga taw ko
manga dosa iran oman ragon.
4 Ka so rogo o manga mama a sapi ago manga kambing na di den ipekada o manga dosa.
5 Kagiya ka maoto na sii ko kiyasong o Al Masih sa doniya na pitero iyan ko Allah a

“Di ka kebaya sa manga korban ago so ped a manga ipesepaat reka,
ogaid na bigan ako ngka sa lawas.
6 Da ngka kasoaten so manga ayam a petotongen ko aparan
ago so ped a ipesepaat para ko manga dosa."
7 Na pitero aken a ‘Katii ako bo, ya Allah, a toman ko kabaya a ka,
ka giyoto i misosorat ko kitab makapantag raken.' ”
8 Paganay ron na pitero iyan a “Di ngka kabaya aya pen o ba ka masoat ko manga ayam a
petotongen ko aparan, o di na so manga korban ago ped a manga sapaat a ipesepaat para
ko dosa,” (pitero iyan ai apiya pen so kipesepaaten sii langon na ipapaliyogat o Kitab).
9 Oriyan oto na pitero iyan a “Katii ako bo, ya Allah, a toman ko kabaya a ka.” Inisili o
Allah so miyaona a kapasadan kaan iyan mapakambeken so ikadowa.
10 Ka sabap sa tiyoman i Isa Al Masih so kabaya o Allah na miyasoti tano a nggolalan ko
kinisapaaten ko lawas iyan sa miyakaisaisa bo.
11 Oman i imam a Yahodi na petindeg ko aparan oman gawii a petomanen iyan so

kapepanalagad iyan a omanoman iyan ipesepaat so ndatadatar a manga sapaat a di den
ipekeda o manga dosa.
12 Ogaid na so Al Masih na somiyapaat sa isaisa bo a sapaat para ko manga dosa a
pakagaga sa taman sa pakataman, na go bo ontod ko kawanan o Allah
13 A ron sekaniyan penayaw imanto taman sa mabaloy so manga ridoay niyan a dapoay o
manga ai niyan.
14 Ka nggolalan sangkoto a isaisa a sapaat na biyaloy niyan a matatarotop sa taman sa
pakataman so siran oto a pekesoti.
15 Na pepamataanan ai rektano mambo o Soti a Roh. Paganay ron na pitero iyan a

16 Giyai i kapasadan a pagembaalan ko mipantag kiran
amay ka maipos angkoto a manga gawii, a tig o Kadnan:
Tegoon aken so manga sogoan aken ko manga poso iran,
na isorat aken ko manga pamikiran iran.”
17 Na pitero iyan pen a

“Di aken den tedeman so manga dosa iran
ago so manga rarata a galebek iran.”
18 Na amay ka miyapapas ai langon na di den kailangan a kisepaaten ko apiya antona

onon para ko dosa.
Panamaran tano so Kasasarigi ko Allah
19 Kagiya ka maoto, manga magariyari, na makasasarig tano sa kapakasoled tano ko Lebi

a Soti a Darpa a nggolalan ko rogo o Isa.
20 Likaan iyan rektano so bago ago oyagoyag a ipesoled on a kiokit ko rending a aya
niyan lawas.
21 Na sabap sa aden a maporo a imam tano a komikibir ko Walay o Allah,
22 Na mamakarani tano ko Allah a rakes o iklas a poso ago mabager a kapakatatangked a
mipepasod ko paratiyaya. Ka kiyapamesipesikan so manga poso tano kaan da den a
marata a ba magegedam o hatin tano, ago kiyaonaban so manga lawas tano ko soti a ig.
23 Panamaran tano komapet sa da a kapekealinalin iyan so sarig a pepemataanan tano a
rek tano, ka kesarigan so Allah sa kaketomana niyan ko topa niyan.
24 Na tagoon tano sa ginawa so manga ped tano kaan tano siran kaoyati sa kapekebabayai
ko ped ago so kanggolaolaa ko manga pipiya a galebek.
25 Di tano indarainon so di tano dii katimotimo a datar o pesowaan o ped, ka
mamagoyata tano baden a ba di labaw ko kapekeilaya niyo sa magaan den pekatalingoma
so gawii a kakesoy o Kadnan.
26 Ka o tibabaa tano so dii kandosa oriyan o kiyatokawi tano ago kiyatarimaa ko tito a
benar na da den a ped a misepaat ko Allah a ikeda o manga dosa.
27 Na aya bo a miyalamba na so piyakalekelek a kapakatatalingomaa ko kapengokom ago
so pekerab a apoy a pekaosip ko manga ridoay o Allah.
28 Apiya antawaa i miyongkir ko Kitab o Mosa na miyabono sa da den a kapedi asar a
piseksian o dowa o di na telo a saksi.
29 Na pamimikirana niyo o antonaa i lebi pen a mala a indaneg a patot ko taw a misodi
ko Wata o Allah, ago inibilang iyan a da a bali o rogo a ron mipepasod so kapasadan a
aya rekaniyan miyakasoti, ago piyagitowito iyan pen so Roh a pepamegay sa limo.
30 Ka katawan tano o antawaa i mitero on a “Rek aken so kasaop," ago
"Pakapembayaden ko so siran oto a mapapatot on." Na pitero iyan pen a “Kokomen o
Kadnan so manga pagtaw niyan.”
31 Piyakalekelek so kakeroseng o taw ko kandanega on o oyagoyag a Tohan!
32 Tademi niyo so miyasowasowa iyo gowani. Sangkoto a manga gawii ko oriyan o

kiyalindawi kano o sindaw o Allah na madakel a karomasayan a inikarasay niyo, ogaid na
miyatiger iyo.
33 Pekesalak a pepagongatongaten kano ago pesetroon ko hadapan o manga taw, na
pekesalak a pekeped kano ko manga taw a ipekidia kiran so datar ai.
34 Miyakambagian kano ko kararasay o kikakalaboson. Na sii ko kiyaagawa ko tamok
iyo na siyabar iyo a ikakapiya a ginawa niyo, ka katawan iyo a aden a lebi pen a mapiya a
rek iyo a da a ikeda iyan.
35 Kagiya ka maoto na di niyo lebaden so sarig iyo, ka aden a mala a imbalas on.
36 Disomala a titiger kano baden kaan amay ka manggolaola niyo so kabaya o Allah na
matarima iyo so initopa niyan.
37 Ka aya tig o Kitab na
“Di bo matey na sekaniyan a tomatalingoma

na pekaoma na di den sendod.
38 Ogaid na so taw a ibibilang aken a maontol
na aya ipepaginetaw niyan na so paratiyaya,
na o pengendod sekaniyan na di ako ron kesoat.”
39 Ogaid na kena a ba tano mirarakes ko siran oto a pepangendod a baden kebinasa, ka

mirarakes tano ko pepamaratiyaya taman ko kakesabet o niyawa tano.
HIBRIYO 11
Paratiyaya
So paratiyaya na aya inipemataan ko sasarigan tano ago so kiyapakatangked tano

makapantag ko di tano keilay.
2 So miyanga oona a apo tano na kiyapemataanan o Allah a inikasoat iyan sabap ko
paratiyaya iran.
3 Nggolalan ko paratiyaya na kesabotan tano a miyaaden so alam a nggolalan ko katero o

Allah, na so pepanga iilay tano na pimbaalan a poon ko di keilay.
4 Sabap ko paratiyaya i Abil na somiyapaat sekaniyan ko Allah sa lebi pen a mapiya a di

so inisapaat i Kain. Sabap ko paratiyaya niyan na miyasoat rekaniyan so Allah, na
tiyarima o Allah so manga sapaat iyan a aya inipemataan sa maontol si Abil. Na
nggolalan ko paratiyaya niyan na aden pen a di niyan dii teroon apiya pen miyatay
sekaniyan.
5 Sabap ko paratiyaya i Inok na minibayaw sekaniyan kaan di pekaokit ko kapatay. Da

den matoon ka miyakowa sekaniyan o Allah. Ka tig o Kitab a sa da on pen kibayaon na
inikasoat sekaniyan o Allah.
6 Na da a ba pekasoat ko Allah o da a paratiyaya niyan, ka so taw a pepakarani ko Allah
na disomala a peparatiyayaan iyan a kapapantagan den so Allah, na mbelasan iyan so di
ron dii mbabanog.
7 Sabap ko paratiyaya i Nok, na kagiya pakaiktiyaren o Allah mipantag ko kesowasowa a

da pen mailay, na tiyoman iyan so Allah na mimbaal sa mala a kapal a ron miyasabet ago
so pamiliya niyan. Nggolalan sii na miyasala iyan so doniya na miyatarima iyan so
kaontol a inibilang a rek iyan sabap ko paratiyaya.
8 Sabap ko paratiyaya i Ibrahim na tiyoman iyan so kiyatawaga on o Allah sa somong ko

inged a initopa o Allah a imbegay ron. Na giyanatan iyan so inged iyan apiya pen di niyan
katawan o anda i songowan iyan.
9 Na nggolalan ko paratiyaya na miyaling sekaniyan ko inged a initopa on a datar o ba on
mananangga, a mababaling sekaniyan ko manga barombarong. Datar oto mambo si Iskak
ago si Yakob a piyamegan o Allah ko datar iyan bo a topa.
10 Ka pakatatalingomaan o Ibrahim so siti a tatap den so onayan iyan a inantang ago
pimbaalan o Allah.
11 Si mambo si Sara na sabap ko paratiyaya niyan na bigan sa kabatowa sa kiyakeraringa

on, na mimbawata apiya pen miyakalepas so idad iyan sa kapembawata iyan, ka
piyaratiyaya niyan a tomanen o Allah so initopa niyan.
12 Sabap sii na apiya pen datar o ba miyatay den so Ibrahim ka miyalokelokes na
miyakapoon sangkai a isa a taw so manga kiyababadan a datar sa kadakel o manga bitoon
sa langit ago so kadakel o peted sa kilid a ragat a di den keitong.
13 Miyamatay angkai langon a manga taw, ogaid na sii ko kiyapamatay iran na

pepamaratiyaya siran pen apiya da iran matarima so manga initopa o Allah. Ogaid na
miyailay iran ai a kawawatanan pen na piyanalamatan iran. Na kinilala iran a ba siran den
manga rait ago mananangga sa doniya.
14 Siran oto a dii tetaro sa datar ai na pepayagen iran a ikakadali iran so tito a inged iran.
15 Da iran pamikira so inged a inawaan iran, ka o pipikira iran na masiken maparo a
makakasoy siran on.
16 Ogaid na aya benar na masisingayo iran so lebi pen a mapiya a inged roo sa kasorgaan.
Kagiya ka maoto na di ikeya o Allah a kapembetowi ron sa Tohan iran, ka pitiyagaran
iyan siran sa siti a mbalingan iran.
17 Sabap ko paratiyaya o Ibrahim na inirila iyan si Iskak isako tepengan sekaniyan o

Allah. Ka so Ibrahim a aya tiyopaan o Allah na miyakatiyagar sa kisepaaten iyan ko
botong a wata iyan a soasoat ko Allah
18 Apiya pen miyatero on o Allah a “Sii pekaokit ko Iskak a kakebabad ka a minitopa ko
reka.”
19 Peparatiyayaan o Ibrahim a kegaga o Allah a kapagoyaga niyan ki Iskak a poon ko
miyamatay. Na mapetero ta a so miyanggolaola na datar o kiyatarimaa niyan ki Iskak a
poon ko miyamatay.
20 Sabap ko paratiyaya i Iskak na initopa niyan ki Yakob ago sii ki Isaw so manga rakmat
ko pekatalingoma a manga gawii.
21 Sabap ko paratiyaya i Yakob na isako magaan matay na riyakmatan iyan so dowa a

wata i Yosop. Na sominimba sekaniyan ko Allah a romoroko ko poro o teken iyan.
22 Sabap ko paratiyaya i Yosop sii ko magaan iyan den kapetay na pitero iyan so
makapantag ko kapakaliyo o manga taw sa Israil sa Misir. Na iniinsarat iyan o antonaa i
ikidia ko bangkay niyan.
23 Sabap ko paratiyaya o manga lokes o Mosa na initapok iran sekaniyan ko miyakatelo

olan oriyan o kinimbawataan on, ka miyailay ran a mataid a wata na da iran kaleken so
kasogoka iran ko inisogo o Solotan.
24 Sabap ko paratiyaya o Mosa isako makala na da magiyog o ba sekaniyan pembetowi sa

wata o wata a babay o Radiya Piraon,
25 Ka miyatomo iyan baden a kapekerasay niyan a ped o manga pagtaw o Allah a di so
dii kapakandosa a ipekapiya a ginawa sa di bo matey.
26 Inibilang iyan so kapesodia rekaniyan para ko Al Masih a lebi pen a mala i bali a di so
kakawasaan sa Misir, ka lalayon iyan mapipikir so balas a ketarima iyan.
27 Sabap ko paratiyaya o Mosa na miyawa sekaniyan sa Misir a da den a kalek iyan ko

rarangit o Solotan. Tiniger iyan so miyasowasowa iyan, ka datar o ba niyan pekeilay so
Allah a di keilay.
28 Sabap ko paratiyaya niyan na inisogo iyan so kaselaselaa ko Paska ago so
kapamesipesiki sa rogo ko manga pintoan kaan di kebono o Malakalmaot so manga
popaw sa lawas a wata a mama o manga taw sa Israil.
29 Sabap ko paratiyaya o manga taw sa Israil na miyakaripag siran ko Mariga a Ragat a

datar o ba sii ko mamara a lopa. Ogaid na kagiya tomepeng sii nggolaola so manga
Imisiren na miyanga aled siran.
30 Sabap ko paratiyaya na miyanga ooteng so manga pangeleban o siti a Yariko oriyan o
kapepegalibeta on o manga Israil oman gawii ko soled o pito gawii.
31 Sabap ko paratiyaya o Rahab a sondal a babay na da sekaniyan mirakes ko kiyabonoa
ko manga taongkir sangkoto a siti ka kagiya piyakabolos iyan so manga manoriman a
Yahodi sa da a marata a kadiyat iyan.
32 Antonaa pen i mapetero aken? Da den a oras a ba aken pen panotola so makapantag ki
Gidiyon, Barak, Samson, Hipta, ago si Daod, si Samowil ago so manga nabi.
33 Nggolalan ko paratiyaya na tiyaban iran so manga ndatoan, pinggolaola iran so ontol
ago miyatarima iran so initopa o Allah. Piyakakemed iran pen so manga arimaw,
34 Miyapareng iran so pekerab a manga apoy ago miyakalidas siran sa kambonoa kiran a
pedang. Manga lolobay siran ogaid na piyamakabager den, miyanga babaloy siran a mala
i gees ko kapakitidawa, na miyapakapalagoy iran so miyakadakedakel a sondaro o manga
rait.
35 Sabap ko paratiyaya na minikasoy ko manga babay so miyamatay a manga lolot iran a
nggolalan ko kiyaoyaga kiran peroman.
Ogaid na aden a ped a da iran tarimaa so kamaradika, ka miyatomo iran a miyatay siran a
mararasay kaan maoyag ko lebi pen a mapiya a kaoyagoyag.
36 So ped na piyagongatongat ago piyamadasan, na so pen so ped na piyamatong a manga
rantay ago piyangalaboso.
37 Riyobakan siran a ator, piyamotol a gabas, ago piyamono a pedang. Miyakanebeneb
siran a kindiditar sa kobal a bilibili o di na kambing. Manga miskin siran, pesetroon, ago
dii peranegen.
38 Di mapapatot so doniya ko kapiya iran. Mindadadadag siran ko mitataog a manga
kaden ago manga kapalawan a kibabaling siran ko manga liyang ago manga gireb.
39 Palaya siran den kiyapemataanan a inikasoat o Allah sabap ko paratiyaya iran, ogaid
na da iran tarimaa so initopa niyan.
40 Ka lebi pen a mapiya a pitekdir iyan para rektano na di siran ketarotop taman sa di
siran rektano maped.
HIBRIYO 12
Pepakatanoren o Allah so manga Wata iyan
Kagiya ka maoto na sabap sa malilibet tano angkai a miyakadakedakel a taw a dii seksi na
isili tano so langon a makababangen rektano ago so dosa a tanto rektano a komakapet, na
mananamar tano malalagoy ko kakoya a pepegantap ko dii tebanaan a maoonaan tano.
2 Itenteng tano so manga mata tano ki Isa a ron mipepasod so paratiyaya tano a poon sa
paganay taman sa kaposan. Sabap ko kapipiya a ginawa a ketarima iyan na tiniger iyan so
kiyatotoka on ko kros. Da niyan tagoa sa ginawa so kayaan on, na moontod sekaniyan
imanto ko kawanan o korsi o Allah.
3 Rasama niyo sekaniyan a siyabar iyan angkai a tanto a kiyasopaka on o manga baradosa
kaan kano di ndokawi o di na kedai sa arap.
4 Ka sii ko kapananamari niyo somopak ko dosa na da niyo pen pakatemana a taman sa
katogai rekano pen a rogo.
5 Ba niyo kiyalipatan so pandoan o Allah a pitero iyan rekano a manga wata iyan? Tig
iyan a
“Wata aken, di ngka pipikira i ba maito bo i gona so kapepakatanora reka o Kadnan,

aya pen o ba ka kadai sa arap igira a pembongetan ka niyan;
6 Ka pepakatanoren o Kadnan so oman i pekebabayaan iyan
ago pendanegen iyan so oman i tiyarima iyan a wata.”
7 Tigera niyo ai ka giyanan i kapendanega niyan rekano. Ka so ipekidia rekano o Allah na

sii sabap sa manga wata kano niyan. Ba aden a wata a di pendanegen o ama iyan?
8 Na o di kano pendanega o Allah a lagid o langon a manga wata na kena a ba kano tito a
manga wata iyan ka manga inikagingay.
9 So manga ama tano a manosiya na pindadaneg tano iran na piyagadatan tano siran. Na
taralebi pen a makimbabaya tano ko Ama o niyawa tano kaan tano maoyagoyag!
10 Pindadaneg tano o manga ama tano a manosiya sa da bo matey a alongan ko mapipikir
iran a patot rektano. Ogaid na pendanegen tano o Allah para ko rek tano a kamapiyaan
kaan tano makambagian ko kasosoti niyan.
11 So langon a daneg na lagid o ba baden ipekerata pasin o ginawa, ka kena a ba
ipekebabaya. Ogaid na sii sa oriyan na siran oto a piyakatanor a nggolalan sii na
pemangonga sa kaontol ago kalilintad.
Manga Insarat ago manga Lalangan
12 Kagiya ka maoto na pakabagera niyo so kidodokawan a manga lima niyo ago so

manga lolobay a leb iyo!
13 Pakatitowa niyo so manga lalan a pekelalakawan iyo kaan di kesadir so lepo a manga
ai niyo ka pekabager baden.
14 Panamari niyo so kapakalilintad iyo ago so langon a taw, ago so kapaginetaw niyo a
soti, ka kagiya da den a di masosoti a ba niyan mailay so Kadnan.
15 Ikitiyari niyo o ba aden a isa rekano a ba talikod ko limo o Allah, aya pen o ba
sekaniyan misayan sa mapait a bekaw a magto a pekasamok ko ped ago madakel a manga
taw a kerambit ko kapait iyan.
16 Iktiyari niyo pen o ba aden a isa rekano a mabaloy a sebo o di na kadodoniyai a datar o
Isaw. Pipesa niyan so kabenar iyan ko kakakai ron a wata sabap bo ko pangenengken a
makaisa makan.
17 Na katawan iyo a sii ko oriyan oto na kagiya pangnin iyan ko ama iyan a imbegay
niyan on so rakmat a kak iyan na da on mibegay. Di niyan den kindod so pinggolaola
niyan apiya pen miyangangampedian a tanto ko ama iyan a penggoraok pen.
18 So kiyaraniyan iyo na kena a ba datar o Palaw a Sinay a kiyaraniyan o manga Israil a

keaper iran, a so palaw a pekerab on so apoy a rakes o kaliboteng, kakekenem, ago barat,
19 Ago so matanog a kiyaoni o bogiyong, ago piyakalekelek a sowara. Na kagiya maneg
o manga Israil angkoto a sowara na piyangni iran a da den a ped a katero a ba mapetero
kiran
20 Ka kagiya di iran ketiger mamakineg so inisogo kiran a “Apiya so ayam a ndapo ko
palaw na disomala a perobakan a ator taman sa matay.”
21 Na kagiya tanto ini a piyakalekelek a pekeilay na pitero o Mosa a “Pekelek ako ago
tatabaden.”
22 Ogaid na sekano, na aya kiyaraniyan iyo na so Palaw a Siyon ago so siti o oyagoyag a
Tohan, a so kasosorgai a Yarosalim a ndodoo so di bo den pira nggibo a malaikat a
malilimod sa kapeselasela iran,
23 A rakes o manga magaagama, a so langon a kaka a manga mbawataan o Allah a
miyamangisorat so manga ngaran iran roo sa kasorgaan. Miyakarani kano ko Allah a so
pangongokom ko langon a taw, ago sii ko manga niyawa o manga oontol a taw a
miyatarotop den.
24 Miyakarani kano ki Isa a ron mipepasod so bago a kapasadan, ago sii ko
inipamesipesik a rogo a di niyan dii teroon so lebi a mapiya a di so dii matero o rogo o
Abil.
25 Iktiyari niyo o ba kano magenda mamakineg ko Allah a di rekano dii tero. So siran oto
a minda mamakineg ko mitero kiran sii sa doniya na da siran den makalidas ko daneg, na
taralebi pen a di tano ron pekalidas o talikodi tano sekaniyan a dii tero sii sa kasorgaan.
26 So sowara niyan na initabeker sa doniya sa masa oto, ogaid na imanto na initopa niyan
a “Kokogen aken peroman sa makaisa a kena bo a ba giya doniya, ka so pen so langit.”
27 So kabasa niyan a “peroman sa makaisa” na aya maana niyan na so kapengowaa on ko
manga nganin a kekokog, a giyoto so manga nganin a miyanga aaden, kaan so di kekokog
na aya bo kelamba.
28 Kagiya ka maoto na manalamat tano ka pepekatarima tano sa Ndatoan a di den

kekaog. Manalamat tano ago mangongonotan tano ko Allah ko okit a ikesoat iyan a rakes
o kapagadati ron ago kalek.
29 Ka mataan den a so Tohan tano na penggagep a apoy.
HIBRIYO 13
So Moripori a manga Pandoan
Peterosen iyo so di niyo dii kanggiginawai a datar o magariyari.

2 Di niyo pendarainonen so kasekasakawa ko manga mananangga. Aden a misekasakaw
ron a di ran katawan a so bes so manga malaikat i pisekasakaw iran.
3 Tatademi niyo so kikakalaboson a datar o ba kano iran ped a makakalaboso. Tatademi
niyo pen so manga taw a perarasain a datar o ba kano mambo perarasain a ped iran.
4 Disomala a kapagaadati o langon a taw ko kapangaroma, na di pekisebo so dii

kakeromai. Ka siran oto a dii keromai a da makawing ago manga dii sesebo na ndanegen
o Allah.
5 Di niyo pekipaaren a kapepaginetaw niyo ko kababaya ko pirak. Tatapiin iyo den so
kapapantagan a manga rek iyo, ka miyatero den o Allah a “Di aken seka den pagawaan
aya pen o ba ko talikodi.”
6 Sabap san na mapetero tano sa kapakasasarig a
“So Kadnan i pegogop raken; di ako kelek.
antonaa i mapenggolaola raken o manosiya?”
7 Tademi niyo so manga nakoda iyo gowani a miyamangendao rekano ko katero o Allah.
Masaki niyo so kiyabolosan o manga olaola iran na rawata niyo so paratiyaya iran.
8 Si Isa Al Masih na di den kealin, ka datar iyan bo gowani, ago imanto, ago taman sa
pakataman.
9 Di niyo peperowa o ba kano mapakasilay o pimbarambarangan a mibabagowan a
manga ndao. Aya mapiya na so limo o Allah na aya ipekabager o manga poso tano a kena
a ba so kapetomana ko manga taritib mipantag ko manga pangenengken, ka di ini
pekaogop ko siran oto a petoman on.
10 Aden a aparan tano a apiya so manga imam a pepanalagad ko Barombarong o manga

Yahodi na da a kabenar iran sa kakekana ko ipesepaat on.
11 So maporo a imam iran na pegowiten iyan so rogo o manga ayam sii ko Lebi a Soti a
Darpa a aya ikepapas o manga dosa, ogaid na petotongen so lawas angkoto a manga ayam
sii sa liyo o kampo.
12 Sabap saya na riyasay mambo si Isa ago miyatay sii sa liyo o gimowa o siti kaan iyan
masoti so manga taw a nggolalan ko rek iyan a rogo.
13 Kagiya ka maoto na somong tano rekaniyan roo sa liyo o kampo ago mbagian tano ko
kayaan iyan.
14 Ka da a siti tano sii sa doniya a ba mamboway sa dayon sa dayon, ogaid na ipekedali
tano baden so siti a pekatalingoma.
15 Kagiya ka maoto na patot a lalayon tano ipesepaat ko Allah so kapepodiya on a
nggolalan ki Isa. Giyanan i onga o manga modol a pepanalamat ko Ingaran iyan.
16 Di niyo pendarainonen nggolaola so mapiya ago so di niyo dii kapakambagiana ko ped
ko manga rek iyo, ka so datar ai a manga sapaat na aya ikesoat piyapiya o Allah.
17 Tomana niyo so manga nakoda iyo ago pakimbabaya kano kiran, ka pepagipaten kano
iran a datar o manga taw a isomariya on so galebek iran. Tomana niyo siran kaan so
kapepanalagad iran para rekano na ikebabaya iran a kena a ba mipemboko, ka giyanan na
di rekano pekatabang.
18 Pepangangarapanen kami niyo. Miyatangked sa ginawa mi a maliwanag so hatin ami,

ka kebayaan ami nggolaola lalayon so ontol.
19 Na pagakolen ko rekano a pangniya niyo ko Allah a pakakasowin ako niyan rekano
san sa di bo ini matey.
20 So Allah a pekepoonan o kalilintad na inoyag iyan a poon ko miyamatay so Mala a

Tomatagikor sa bilibili a so Kadnan tano a Isa. Na pengnin ko a nggolalan ko rogo a ron
mipepasod so da a ikepos iyan a kapasadan
21 A imbegay niyan rekano so langon a kamapiyaan a kailangan iyo ko kapetomana niyo
ko kabaya iyan. Na pengnin ko a nggolaolaan iyan sii rekano so ikasosoat iyan a
nggolalan ki Isa Al Masih, a rek iyan so bantogan sa taman sa pakataman! Amin.
22 Pagakolen ko rekano, manga magariyari, a sebari niyo mamakineg angkai a manga

pandoan, ka mapontok angkai a inisorat aken rekano.
23 Pekitokawan ko rekano a si Timotiyo a pagari tano na miyakaliyo den sa kalaboso. O
makaoma sekaniyan sii sa magaan na pekaonoten aken amay ka song ako rekano san.
24 Sampain iyo so salam aken ko langon a nakoda iyo ago so langon a manga pagtaw o
Allah. Pesalamen kano o manga magariyari a poon sa Italiya.
25 Pengnin ko a malalayon rekano langon so limo o Allah.
SANTIYAGO
SANTIYAGO 1
Alamat sorat ako i Santiyago a oripen o Allah ago so Kadnan a Isa Al Masih makasampay
ko sapolo ago dowa a mbatabataa a mipaparak sa mbalabala. Selamen aken sekano!
Paratiyaya ago Ongangen
2 Manga pagari ko, amay ka kesagadan iyo so mbarambarang a itiyoba rekano na

bilangen iyo a tanto niyo a ikebabaya,
3 Ka katawan iyo a so kapetepengi ko paratiyaya niyo na ipembaloy niyo a pepekatiger.
4 Na perowa niyo a midayon o kapepakatiger iyo so galebek iyan kaan kano mabaloy a
matatarotop ago maganap i parangay a da a korang on.
5 Ogaid na o aden a isa rekano a kakokorangan sa ongangen na pangniya niyan ko Allah,
ka imbegay niyan on. Ka pepamegay sekaniyan ko langon a taw sa da a sangkaan iyan
ago da den a kasendit on.
6 Ogaid na disomala a aden a paratiyaya niyan sii ko di niyan dii kapangni sa da a
kandowadowa on. Ka so taw a dii ndowadowa na lagid o manga begel a aloyan alobak sa
kalodan ko kapendansali ron o ndo.
7 So taw a datar ai na di niyan iinama i ba aden a imbegay ron o Kadnan a apiya antona
onon
8 Ka kagiya madodowa a pamikiran iyan a dii selinsalin sii ko langon a di niyan dii
nggolaolaan.
Kamimiskini ago Kakawasai
9 So mababa a taw a peparatiyaya na patot a mipengandag iyan so kiniporoon on o Allah.

10 Ogaid na so kawasa a peparatiyaya na pangandagen iyan so kinibabaan on o Allah, ka
so kawasa na keda bo a datar o obarobar sa pangomaan.
11 Ka amay ka somebang so alongan a romanti na kelayon so obarobar na keolog, na
keda so kapiya niyan i paras. Datar ai mambo so kawasa, ka keda sekaniyan bo sii ko
kapepanamok iyan.
Katepeng ago Kasarani
12 Rarakmatan so pepekatiger ko kapetepengi ron, ka amay ka ikesoat o Allah na

terimaan iyan so sangkad, a so kaoyagoyag a initopa o Allah ko siran oto a pekebabaya
rekaniyan.
13 Igira a pekegawi so taw sa kanggolaola niyan sa marata na di niyan peteroa i ba so
kapekegawia on na poon ko Allah. Ka so Allah na di kegawi, na di niyan mambo
nggawiin so apiya antawaa.
14 Ogaid na pekegawi so taw igira a pekebarayat ago peketondog o marata a singayo
iyan.
15 Na amay ka keraringen so singayo iyan na pembawata sa dosa, na amay ka makatoa so
dosa na pembawata sa kapatay.
16 Manga pagari ko a pekebabayaan, na di niyo peparowa o ba kano panalibaa.

17 So oman i isa a pamemegayan a mapiya ago da a daway niyan na poon sa kasorgaan a
initana rektano a poon ko Allah a aya miyaden ko manga pesindaw roo sa langit. Di
sekaniyan den kebaroba aya pen o ba aden a mailay ron a along a pekesalinsalin.
18 Sii ko kabaya iyan na biyaloy tano niyan a manga wata iyan a nggolalan ko katero iyan
a tito a benar kaan tano mabaloy a datar o keona a keragon ko langon a inaden iyan.
Kapamakineg ago Katoman
19 Tanodi niyo ai, pekebabayaan ko a manga pagari aken: patot a so oman i isa na
ndilapet mamakineg, di penggagaan tero, ago di kerarangiti nggagaan.
20 Ka so rarangit o taw na di ron den makapenggolalan so kaontol a kabaya o Allah.
21 Kagiya ka maoto na bowangen iyo so oman i isa a maresik a olaola ago so langon a
kamarataan a madadalem rekano pen, na tarimaa niyo, a rakes o kapepangalimbabaan iyo,
so katero o Allah a piyamola niyan ko manga poso iyo, ka aya rekano pekasabet.
22 Lalayon iyo petomana so katero iyan a kena bo a ba giya kapepamakinega niyo ron, ka
amay ka giyanan na pepagakalan iyo a ginawa niyo.
23 Ka so taw a pepamakineg ko katero iyan a sarta a di niyan tomanen na datar o taw a
tintengan iyan so tito a mambobontal iyan ko pagalongan,
24 Na oriyan o kiyailaya niyan on na miyawa roo a sarta a kiyalipatan iyan so bontal a
paras iyan.
25 Ogaid na taw a pegamasamasen iyan so matatarotop a Kitab a pekabalokas rektano
ago ipeteros iyan ai a di pekalipat ko pepamakinegen iyan ka petomanen iyan baden, na
perakmatan sekaniyan ko langon a di niyan dii nggolaolaan.
26 O aden a pipikiren iyan a baraamal sekaniyan a sarta a di niyan pekegenggen so dila

iyan na pepagakalan iyan a ginawa niyan, na da den a lalaw o agama niyan.
27 So agama a tito ago da a daway niyan ko hadapan o Allah a Ama tano na giyai: so
kapegogopi niyo ko manga ilo ago manga balo ko kareregeni kiran, ago so kapelidasi
niyo ko kakeboringi rekano o doniya.
SANTIYAGO 2
Lalangan ko Kaperamiramig
Manga pagari ko, na sii ko kapeparatiyayaa niyo ki Isa Al Masih a kababantogan a

Kadnan tano na di kano peramiramig.
2 Ibarat na opama ka aden a mama a somiyoled ko kalilimodan rekano a pipiyapiya
ndiditar ago sisising sa bolawan na sarta a somiyoled on mambo so sakataw a miskin a
ndiditar sa miyanaberitan,
3 Na o peramigi niyo so ndiditar sa mapiya a teroa niyo ron a “Ontod ka sii sangkai a
mapiya a darpa,” na peteroon iyo ko miskin a “Tindeg ka san,” o di na “Ontod ka sa
salasa ini sa obay a ai aken,”
4 Na miyakasela kano, ka piyakambidabida iyo so isen iyo a manga taw na miyabaloy
kano a manga pangongokom a marata i pamikiran.
5 Pamakineg kano, pekebabayaan ko a manga pagari aken! Piyamili o Allah so manga

taw a pipikiren o doniya a manga miskin an mabaloy a mala i paratiyaya, a aya iran
kakawasaan, ago an siran makakewali ko Ndatoan a initopa niyan ko manga pekebabaya
on.
6 Ogaid na di niyo dii sodiin so manga miskin. Ba di so manga kawasa i di rekano dii
mangarasi ago petonda rekano ko manga kokoman?
7 Ba di siran i dii mbabasa sa marata makapantag ko ingaran o Kadnan iyo?
8 O mataan den a petomanen iyo so maoonaan a sogoan o Kitab a “Kababayai ngka so

siringan ka a datar a ginawa ngka,” na mapiya so di niyo dii nggolaolaan.
9 Ogaid na o peramiramig kano na miyakandosa kano, na miyasala kano o Kitab, ka
miyasogok iyo.
10 Ka so petoman ko langon o Kitab a liyo ko isaisa a sogoan on a siyogok iyan na aya
kasalaan iyan na datar o ba niyan siyogok so langon o Kitab.
11 Ka so mitero sa “Di ka pesina,” na pitero iyan pen a “Di ka pemono.” Na apiya o da ka
sina na miyasogok ka so Kitab o miyakapamono ka.
12 Igira a di ka dii tero, ago sii ko langon a di niyo dii nggolaolaan na tatanodi niyo a
ikokom rekano so Kitab a pekabalokas rekano.
13 Ka amay ka pengokom so Allah na di niyan ikepedi so taw a da a kapedi iyan ko ped.
Ogaid na so aden a kapedi iyan na da a ikelek iyan amay ka kokomen.
Paratiyaya ago Manga Galebek
14 Antonaa i gona niyan, manga pagari ko, o dii teroa o taw a aden a paratiyaya niyan
ogaid na da a manga galebek iyan a aya on poriba? Ba rekaniyan pekasabet angkanan a
paratiyaya? Mataan a di.
15 Ibarat o aden a pagari niyo a mama o di na babay a da a nditaren iyan o di na da a
kekan iyan,
16 Na o teroa kiran o isa rekano a “Pengnin ko a mapipiya a ginawa ngka! Pakayaw ka
ago kan ka piyapiya,” na antonaa i lalaw niyan o di ngka sekaniyan begi ko kailangan
iyan?
17 Datar ai so paratiyaya: maatay den ai o da a manga galebek a misasarta on.
18 Ogaid na aden nda a petero sa “So isa a taw na aden a paratiyaya niyan a da on so
manga galebek, na so pen so ped na aden mambo a manga pipiya a galebek iyan." Aya
kisembag aken on na giyai: “Ba ngka mapekiilay so paratiyaya ngka a da on so galebek?
Kena, ogaid na pekiilay aken so paratiyaya ko a nggolalan ko manga galebek aken.”
19 Peparatiyayaan ka a isaisa bo a Tohan. Mapiya! Apiya so manga saitan na
peparatiyayaan iran ai mambo, na penanabaden siran sa kalek.
20 Seka ki a da a lalag iyan! Ba ka pen kebaya sa poriba a so paratiyaya a di on misasarta
so manga galebek na da a lalaw niyan?
21 So Ibrahim a apo tano, na ino sekaniyan bilangen o Allah a maontol? Ba di sabap ko
galebek iyan a kinisapaaten iyan ko wata iyan a so Iskak sii ko aparan?
22 Na keilay ngka a so paratiyaya niyan na oonotan o manga galebek iyan, na miyatarotop
so paratiyaya niyan a nggolalan ko manga galebek iyan.
23 Na miyatoman den so pitero o Kitab a “Miyaratiyaya so Ibrahim ko Allah na so
paratiyaya niyan na inibilang o Allah a aya niyan kaontol,” na bitowan sekaniyan sa
ginawai o Allah.
24 Sabap san na keilay niyo a imbilang o Allah a maontol so taw sabap ko manga galebek
iyan, a kena bo a ba sii sabap ko paratiyaya niyan.
25 Datar ai mambo so miyaolaola o sondal a si Rahab. Inibilang sekaniyan o Allah a
maontol sabap ko manga galebek iyan ko kiyapakabolosa niyan ko manga manoriman a
siyogo o manga Yahodi ago so kiyaogopi niyan kiran ko kiyapakapalagoy iran sii ko
salakaw a lalan.
26 Na datar o miyatay a lawas a da a niyawa niyan na maatay mambo so paratiyaya o di
on misasarta so manga galebek.
SANTIYAGO 3
So Dila
Di patot i ba so kadakelan rekano na mabaloy a goro, manga pagari ko, ka katawan iyo a
sektano a manga goro na kokomen ko lebi pen a masopiit a kokoman a di so manga ped.
2 Ka langon tano pekeribat ko madakel a okit iyan. O aden a di keribat ko di niyan dii
katero na tarotop sekaniyan i parangay a pekegenggen iyan so intiro a lawas iyan.
3 Amay ka kakangan tano so ngari o koda na kipaar tano so intiro a lawas iyan kaan
pepekaonot apiya anda tano song.
4 O di na ibarat so manga kapal; apiya pen ai manga ala ago pepagawidawidan o mabager
a ndo na ipapaar ini o maito a pangolin ago pesong apiya anda pepakaantapa o
pangongolin.
5 Datar ai mambo so dila; apiya pen maito ini a ped sa lawas na makapetekabor sa mala.
Pamikira niyo man o antonaa i kaito o apoy a kitentem ko maolad a kalasan!

6 Na so dila na apoy. Giyai na kadodoniyai a kamarataan sii ko manga anggaota o lawas.
Pekebatalan iyan so intiro a lawas ago pepakakaraben iyan so langon o kapepaginetaw
tano ko apoy a poon den sa kanarakaan.
7 Pelayamen o manga taw ago miyalayam iran den so langon a pisosonan a manga iila a
ayam a rakes o manga papanok, manga nipay, ago manga seda.
8 Ogaid na so dila na da a taw a ba on pekapiis. Marata ini a di kegenggen a mapepeno a
bisa a pekapatay.
9 Pegosaren tano ini ko kapepodiya ko Kadnan a Ama tano, ago so dii kitewapen ko
manga taw a inembaalan a minisayan ko ginawa o Tohan.
10 So podi ago sinta na peliyo ko isaisa a ngari. Kena ini a ba patot a dii manggolaola,
manga pagari ko!
11 Ba kepakay a sii bo pegembowat so mapiya a ig ago so matimos a ig ko isaisa a
bowalan?
12 Ba kepakay, manga pagari ko, a ba monga so kayo a korma sa manga olibi, o di na ba
monga so waged a obas sa manga korma? Di mambo kepoonan so ragat sa ig a da a timos
on.
So Ongangen a poon sa Kasorgaan
13 O aden rekano a maongangen ago somasabot na patot a pakiilay niyan ai a nggolalan

ko mapiya a sowasowai niyan ago manga galebek iyan a oonotan o kapepangalimbabaan
a pepekapoon ko ongangen.
14 Ogaid na o madadalem ko poso iyo so mapait a kasiig ago so kapelalawana na di niyo
pengandagen so ongangen iyo, ka giyanan i kapepagmaa ko benar.
15 Giyangkoto a kaongangen na kena a ba poon sa kasorgaan, ka kadodoniyai,
kamamanosiyai, ago kaiiblisi.
16 Ka aya mirarakes ko kasiig ago kapelalawana na so di kapegayonayon ago so langon a
pisosonan a marata a galebek.
17 Ogaid na so ongangen a poon sa kasorgaan na paganay ron na da a saog iyan, ago
pekebabaya ko kalilintad, pepanginsokor, makaaayona, tanto a makapediin ago mapiya i
galebek, di peramiramig, ago di pemagomanta.
18 So kaontol na aya onga o oniin a ipesaod o siran oto a pepakalintad sii ko kalilintad.
SANTIYAGO 4
So Kapakingginawai ko Doniya
Antonaa i pekesabapan ko di niyo dii katitidawa ago kapepawala? Ba di so manga rarata a

kabaya a dii mbobono sii sa ginawa niyo?
2 Aden a kebayaan iyo a di niyo kekowa, na sabap sii na makaiiktiyar kano mamono.
Aden a ipekesigi niyo ogaid na di niyo peraoten na ba kano den pepapawala ago
petitidawa. Da niyo makowa so singanin iyo ka da niyo pangniya ko Allah.
3 Na igira a pepamangni kano na di kano kebegan ka kagiya marata so angin iyo, ka
pepangnin iyo so ikesoat o ginawa niyo.
4 Sekano a miyamanalikod ko Allah! Ba niyo di katawi a o pengginawain iyo so doniya

na peridoon iyo so Allah? Apiya antawaa i minili sa kapakinggiginawai niyan ko doniya
na mimbaloy a ridoay o Allah.
5 Ba niyo pipikira a da a lalaw o pitero o Kitab a “Mitataralo a kasiig o niyawa a tiyago
rektano o Allah?”
6 Ogaid na so limo a ipembegay niyan na lebi pen a mala i kapaar. Ka pitero o Kitab a
“Pesopaken o Allah so ipoporo iyan a ginawa niyan

ogaid na pembegan iyan sa limo so pepangalimbabaan.”
7 Kagiya ka maoto na pakimbabaya kano ko Allah. Atowi niyo so Iblis, ka pelagoyan

kano niyan.
8 Obay kano ko Allah, ka magobay sekaniyan rekano mambo. Pamowanaw kano a manga
baradosa. Sotiya niyo a manga poso iyo a madodowa i pamikiran!
9 Rataan iyo sa ginawa niyo so manga dosa niyo ago mbokoon iyo a sarta a goraok kano!
Sambii niyo sa kamboko so kapesinga iyo, na sambii niyo sa rata a ginawa so
kapekebabaya iyo!
10 Pangalimbabaan kano ko hadapan o Kadnan, ka iporo kano niyan.
Lalangan ko Kapaawinga ko Ped
11 Di kano pepepaawinga, manga magariyari, ka apiya antawaa i pepaawing ko pagari

niyan o di na kokomen iyan na pepaawingen iyan so Kitab ago pekokomen iyan. Na o
kokoma ngka so Kitab na di ngka petomanen so Kitab, ka biyaloy ngka baden a ginawa
ngka a pekakokom on.
12 So bo so Allah i pekabegay sa Kitab ago pekakokom. Sekaniyan bo i pekasabet ago
pekabinasa. Na antawaa ka a pepaawingen ka so siringan ka?
Lalangan ko Kapegambog
13 Pamakineg kano, sekano a dii tetaro sa “Imanto o di na mapita na song kami sa isa a
inged na keden kami roo sa makasaragon, ka pendagang kami kaan kami makalaba.”
14 Di niyo katawan o antonaa i kesowasowa iyo mapita, ka lagid kano o lekep a pekeilay
sa di matey na kedadas bo.
15 Aya patot a peteroon iyo na giyai: “O miyog so Allah na keoyagoyag kami, na giyai o
di na giyanan i penggolaolaan ami.”
16 Ogaid na imanto na di kano dii tekabor ago dii magambog. Na marata so langon a
datar ai a dii katekabor.
17 Kagiya ka maoto na so taw a katawan iyan o antonaa i patot a penggolaolaan iyan
ogaid na da niyan ai nggolaolaa na miyakandosa sekaniyan.
SANTIYAGO 5
Lalangan ko manga Kawasa
Hey sekano a manga kawasa, goraok kano ago pelendalendag sabap ko manga
karomasayan a kitalemba rekano!
2 So manga kakawasaan iyo na penga reredak, na so manga nditaren iyo na pengangan a
gaab.
3 Tengisen so manga bolawan iyo ago pirak, na so tangis iyan na pembaloy a peseksi a
pekasopak rekano, na kelagid ai o apoy a ken iyan so sapo iyo. Ogaid na pepanimo kano
pen sa manga kakawasaan sii sangkai a kaposan a manga gawii.
4 Ilaya niyo man, ka so manga sokay a da niyo tarotopa ko kigagalebek sii ko manga lopa
iyo na penggoraoken iran a kadosa niyo. Na so dii ipenon o manga peperagon ko
pereperan iyo na miyaneg o Kadnan a Lebi a Mamaapaar.
5 Gayagomaya so kapepaginetaw niyo sii sa doniya, na piyanamaran iyo so ikasosoat a
ginawa niyo. Piyagolitolitan iyo a ginawa niyo a ititiyagar ko gawii a kasombalia rekano.
6 Siyala ago piyamono iyo so da a manga sala iyan, na da kano iran atowi.
Kapanginsabar
7 Na panginsabar kano, manga magariyari, taman sa kapekaoma o Kadnan. Pamimikirana

niyo man so taribasok a pepenayaw ko kaperagona ko pereperan a mala i bali a poon ko
lopa iyan. Sesabar sekaniyan sii ko kapenayawa niyan ko keona ago keori a kapengoran.
8 Disomala a sesabar kano mambo. Pakabagera niyo so manga poso iyo, ka miyakarani
den so kapekaoma o Kadnan.
9 Di kano pesesagdai, manga magariyari, ka o ba aya rekano mikokom. So pangongokom

na sisii den ko pintoan!
10 Rawata niyo, manga magariyari, so ladiyawan o manga nabi a miyangosiyat sii ko
ingaran o Kadnan, ka miyasabar iran so kiyarasay iran.
11 Siran oto a miyakatiger na ibibilang tano a kiyarakmatan. Miyaneg iyo so
kiyapakatiger o Yob na katawan iyo so inikidia on o Kadnan sii sa kaposan, ka
masalinggagaw so Kadnan ago makalimoon.
12 Lawan san pen, manga pagari ko, na di kano pesepa igira a petopa kano. Di niyo
pesepaan so kasorgaan, o di na so doniya, aya pen so apiya antona onon a ped a ipesepa.
Aya bo a teroa niyo na “Oway” o di na “Di” kaan kano di kedaneg o Allah.
Kapangangarapan a Sasartaan o Paratiyaya
13 Ba aden a kareregenan rekano? Na pangangarapan baden ko Allah. Ba aden a

pekebabaya? Patot a pagidaida sekaniyan sa kapodi.
14 Ba aden a pekesakit rekano? Na tawaga niyan so manga pelokelokesen ko Agama
kaan iran sekaniyan mipangangarapan ago kaododan iran sa lana sii ko ingaran o Kadnan.
15 Na giyangkoto a kapangangarapan a sasartaan o paratiyaya na ipekapiya o pekesakit,
ka pekabageren sekaniyan o Kadnan. Na o miyakandosa sekaniyan na kerilaan den.
16 Kagiya ka maoto na tetaobata kano ko manga dosa niyo ago pangangarapanen o oman
i isa so ped iyan kaan kano mapakapiya. Tanto a pekagaga so kapangangarapan o maontol
a taw.
17 So Iliyas na datar tano bo a manosiya, na miyangni sebenar sa di moran na da den oran
sii sa lopa ko soled o miyakatelo ragon ago tenga.
18 Na miyangni peroman na migay so langit sa oran, na miyamangeto so manga
pereperan ko lopa.
19 O aden a isa rekano, manga pagari ko, a pekasilay a poon ko tito a benar ago aden a
mapakasangor iyan sekaniyan on peroman
20 Na tanodi niyo a apiya antawaa i mapekasangor iyan so baradosa a poon ko lalan a
ribat na kesabet iyan so niyawa niyan ko kapatay na kisabap on so kakeda o madakel a
manga dosa.
1 PIDRO
1 PIDRO 1
Alamat sorat ako i Pidro a siyogo i Isa Al Masih makasampay ko piyamamili o Allah a
miyamangiparak a kibabaling a mananangga sii ko manga probinsiya a Ponto, Galasiya,
Kapadosiya, Asiya, ago giya Bitiniya.
2 Piyamili kano o Allah a Ama a aya kinitoman o pitekdir iyan sa miyatey den, na
miyasoti kano o Roh iyan kaan kano makapangongonotan ki Isa Al Masih ago
kelompiyowan kano o rogo iyan.
Pengnin ko a malalayon rekano so mitataralo a limo ago kalilintad.
So Arap a da a Ikeda iyan
3 Podin tano so Tohan ago Ama o Kadnan tano a Isa Al Masih. Sabap ko mala a kapedi
iyan na bigan tano niyan sa bago a kaoyagoyag a nggolalan ko kiyaoyaga ki Isa Al Masih
a poon ko miyamatay. Sabap sii na aden a arap tano a da a ikeda iyan,
4 Na pakatatalingomaan tano so mapekewali tano a di keronot, da a daway niyan, ago di
den kedadas a tatagoon para rektano roo sa kasorgaan.
5 Na nggolalan ko paratiyaya niyo na pepagipaten kano o kabatowa o Allah taman ko
kakesabet iyo a matitiyagar den a kapeyaga on sii ko kaposan o manga gawii.
6 Sabap sii na tanto kano a pekebabaya apiya pen masiken a disomala a pekerata a ginawa
niyo sa di bo matey sabap ko pimbarambarangan a ipetepeng rekano.
7 Aya sabap ai na an matangked a tito so paratiyaya niyo, ka apiya so bolawan, a matag
baden somasagad, na petepengan a mapepakaokit ko apoy kaan da a saninsaning iyan. So
mambo so paratiyaya niyo a mala i bali a di so bolawan na disomala a tepengan kaan
kano mabaloy a mapapatot ko podi, bantogan, ago pangkatan sii ko gawii a kapeyaga ki
Isa Al Masih.
8 Pekebabayaan iyo sekaniyan apiya pen da niyo mailay, na peparatiyayaan iyo sekaniyan
apiya pen di niyo pekeilay imanto. Sabap sii na pekebabaya kano sa tanto a mala a
kapipiyia a ginawa a kababantogan ago di kebales a katero
9 Ka kagiya pekekamal iyo so onga o paratiyaya niyo a giya kakesabet o manga niyawa
niyo.
10 So manga nabi a miyangalamat mipantag ko limo a imbegay rekano o Allah na
pimbanog iran ago inipangingise so makapantag sangkai a kakesabet.
11 So Roh o Al Masih a madadalem kiran na pegalamaten iyan so kakerasay o Al Masih
ago so kakebantoga on a pekatalondog sii, na pepanamaran iran mamad o antonaa i masa
ago okit a kakitoman angkai a kesowasowa.
12 Ogaid na miyapayag sangkoto a manga nabi a so manga nganin a pekealamat iran na
kena a ba para ko kamapiyaan iran ka para rekano. Na giyangkai a manga nganin na
piyakalangkap rekano den o manga pangongosiyat ko Mapiya a Totol a nggolalan ko
kabatowa o Soti a Roh a siyogo a poon sa kasorgaan. Na apiya so manga malaikat na
kebayaan iran a katokawi iran piyapiya sangkai a manga nganin.
Soti a Kapaginetaw
13 Kagiya ka maoto na pakaiiktiyara niyo a pamikiran iyo. Paaren iyo a ginawa niyo ago
piyapiyai niyo somarig so limo a imbegay rekano amay ka mapayag si Isa Al Masih.
14 Sabap sa manga wata kano o Allah a pepangongonotan kano ron, na di niyo
pekipaaren so kapepaginetaw niyo ko andang a manga rarata a kabaya a rek iyo sii ko da
niyo pen katokawi ko tito a benar.
15 Ka sosoti kano baden sii ko langon a di niyo dii nggolaolaan, ka soti so Allah a
tomiyawag rekano.
16 Ka misosorat ko Kitab a “Sosoti kano baden, ka soti ako.”
17 So Allah a aya niyo petelowan a Ama na di peramiramig ko kapekokoma niyan ko

oman i isa a ipepasod ko manga galebek iyan. Kagiya ka maoto na kaleken iyo sekaniyan
sii ko somasagad a kapepaginetaw niyo ko doniya.
18 Ka katawan iyo o antonaa i iniaon rekano a inisabet rekano ko da a gona niyan a
kapaginetaw niyo a minitenan rekano o manga apo iyo. Katawan iyo a kena ini a ba so
nganin a kedaan sa bali a lagid o pirak o di na bolawan,
19 Ka so mala i bali a rogo o Al Masih a lagid sekaniyan o bilibili a da a daway niyan ago
daket.
20 Tinibaba sekaniyan den o Allah sa da pen kaadena ko doniya na piyayag sekaniyan
sangkai a pepanga oori a gawii sabap rekano.
21 Nggolalan rekaniyan na miyamaratiyaya kano ko Allah a aya rekaniyan miyoyag a
poon ko miyamatay ago migay ron sa bantogan. Kagiya ka maoto na so paratiyaya niyo
ago sarig na sii ko Allah.
22 Kagiya miyalompiyo kano den a nggolalan ko kapetomana niyo ko tito a benar ago
aden den a totoo a gagaw niyo ko ped iyo a miyamaratiyaya na kababayai o oman i isa so
ped iyan sa iklas ko poso iyan.
23 Ka inimbawata kano peroman a kena a ba miyakaokit ko kamamanosiyai, ka giyangkai
a bago a kaoyagoyag iyo na inibegay rekano a nggolalan ko pepangoyag ago da a ikeda
iyan a katero o Allah.
24 Ka pitero o Kitab a
“So langon a manosiya na lagid o otan,

na so langon o kapiya niyan i paras na lagid o obarobar.
Kelayon so otan ago keolog so obarobar
25 Ogaid na so katero o Allah
na tatap den sa taman sa pakataman.”
Giyangkai a katero na aya den so Mapiya a Totol a piyakalangkap sii rekano.
1 PIDRO 2
So Oyagoyag a Ator ago So Soti a Nasiyon
Kagiya ka maoto na lebaden iyo so langon a kamarataan a rakes o langon a kapamagakal,

kapamagomanta, kasiig, ago kapamaganta.
2 Datar o manga wata a ikaririga na kadaliin iyo so lombos a gatas a ipapantag ko niyawa
niyo kaan sii ko kapeginoma niyo ron na pekala kano taman ko kakesabet iyo.
3 Ka mataan den a kiyataaman iyo so kapiya o Kadnan.
4 Pamakarani kano ko Kadnan a so oyagoyag a ator a inisili o manga taw ogaid na pinili o
Allah ago ibibiling iyan a mala i bali.
5 Pamakarani kano ron a datar mambo o oyagoyag a manga ator, na pakimbalain iyo a
ginawa niyo ko Allah a kaniniyawai a timplo a ron kano makapegimam a masosoti kano,
a ipesepaat iyo ko Allah so kaniniyawai a manga soasoat a terimaan iyan a nggolalan ki
Isa Al Masih.
“Ilaya niyo, ka mbetadan aken a Siyon sa ator a keonayan,

a so miyapili ago mala i bali a ator,
na apiya antawaa i peserig on na di den keolaan.
7 Na sekano a pepamaratiyaya na mala rekano i bali angkai a ator. Ogaid na so

makapantag ko da pamaratiyaya na pitero o Kitab a
“So ator a inisili o manga panday sa walay

na miyabaloy a aya kaoonayan ko kaoontodan o walay.”
8 Na tig o sabaad ko Kitab a
“Sekaniyan so ator a pekisosong on so manga taw

ago so lakongan a ikeoteng iran.”
Na pepamangisosong siran ka di siran peratiyaya ko katero o Allah, na giyai i bagian iran.
9 Ogaid na sekano na aya miyapili a manga pagtaw, ago pendatoon a manga imam, ago
soti a nasiyon. Miyabaloy kano o Allah a rek iyan kaan iyo mapakalangkap so manga
pipiya a galebek o Allah a tomiyawag rekano a poon ko maliboteng na inowit kano niyan
ko piyakamemesa a sindaw niyan.
10 Gowani na kena a ba kano manga pagtaw o Allah, ogaid na imanto na manga pagtaw
kano niyan den. Gowani na da kano niyan kapediin, ogaid na inikapedi kano niyan
imanto.
So Kapakimbabaya ko Kadato
11 Pegakolan ko sekano, manga pekebabayaan ko, a lagid o manga mananangga ago

manga rait sangkai a doniya; lidasi niyo so manga rarata a kabaya o kamamanosiyai
rekano a lalayon dii makimbono ko iyawa niyo.
12 Piyapiyai niyo so manga olaola niyo ko kapepaginetaw niyo sii ko manga kena a ba
pepamaratiyaya kaan apiya o di kano iran dii senditan sa marata na keilay iran so manga
pipiya a galebek iyo ago kebantog iran so Allah ko gawii a kakesoy niyan.
13 Sabap ko Kadnan na pakimbabaya kano ko oman i kadato o manosiya: a so dato a aya

maporo a olowan,
14 O di na so manga gobirnador a manga sasanaan iyan sa kandadanega ko siran oto a dii
nggolaola sa marata ago so kapodiya ko siran oto a dii nggolaola sa mapiya.
15 Ka aya kabaya o Allah na nggolalan ko di niyo dii kanggolaolaa ko mapiya na
pakareneken iyo so da a lalag iyan a manga lalong.
16 Paginetaw kano a lagid o manga taw a kababalokasan, ogaid na di niyo pegosara so
kababalokasi rekano a dalina sa kapenggolaola sa marata, ka paginetaw kano baden a
datar o manga oripen o Allah.
17 Pagadati niyo so langon a taw. Kababayai niyo so magariyari a pepamaratiyaya.
Kaleken iyo so Allah na pagadati niyo so dato.
So Ladiyawan o Kiyarasay o Al Masih
18 Sekano a manga oripen na pakimbabaya kano ko manga kadnan iyo na pagadati niyo
piyapiya, a kena bo a ba sii ko siran oto a mapiya ago masabar ka so pen so pepenatro.
19 Ka o tigera niyo so kapakamboko ko di rekano patot a kaperomasay a sabap ko
katatanodi niyo ko Allah na ikesoat iyan ai.
20 Ogaid na ba kano kepodi o tigera niyo so kapemadasi rekano a patot rekano sabap ko
kiyanggolaola niyo sa di ontol? Di den! Ogaid na o di kano dii nggolaola sa mapiya a
petigeren iyo so karomasayan a pekisabap sii na ikesoat ai o Allah.
21 Ka tiyawag kano o Allah kaan kano makakokit sa datar ai, ka kagiya miyarasay so Al
Masih sabap rekano na giyanan i ladiyawan a inibegak iyan rekano kaan iyo marawat.
22 “Da sekaniyan makandosa

aya pen o ba niyan matero so kapanaliba.”
23 Sii ko kiyapagongatongata rekaniyan na da sekaniyan saop sa kapagongatongat. Na sii

ko kiyarasaya on na da sekaniyan pamagita, ka ba niyan den inisarig a ginawa niyan ko
Allah a maontol a pangongokom.
24 Sekaniyan den i miyakaawid sa manga dosa tano ko lawas iyan sii ko kros kaan tano
mapokas ko kapaar o kadostaan ago makapaginetaw a manga oontol. Na nggolalan ko
manga pali iyan na piyamakapiyaan kano den.
25 Gowani na datar kano o manga bilibili a pepanga dadadag, ogaid na imanto na
miyamakakasoy kano ko Tomatagikor ago Pepagipat ko manga niyawa niyo.
1 PIDRO 3
So Manga Keromai
Datar oto mambo a sekano a manga babay, na pakimbabaya kano ko manga karoma niyo
kaan o aden a isa kiran a di peratiyaya ko katero o Allah na mapakateklid siran o parangay
niyo apiya o da den a ba kiran miyatero
2 Ka sii bo sabap ko kapekeilaya iran ko masosoti ago baraamal a sowasowai niyo.
3 Kena a ba patot a ba so kataid iyo na sii mipepasod ko katatanosa ko lawas iyo, a ibarat
so mitataralo a kaperobaya ko bok, o di na so kisanganen ko manga imbolawanan, o di na
so kanditar sa manga pipiya a nditaren.
4 Ka so kataid a aya rekano patot na sii poon ko poso, a so da a ikeda iyan a kataid o
mangangalimbabaan ago mabetad a parangay a ibibiling o Allah a tanto a mala i bali.
5 Ka datar ai so dii katenos o baraamal a manga babay gowani a somasarig ko Allah ago
petomanen iran so manga karoma iran.
6 Datar oto si Sara a petoman ki Ibrahim a pembetowan iyan sa kadnan. Na manga wata
kano o Sara o di kano dii nggolaola sa mapiya ago di kelek sa apiya antonaa.
7 Sekano mambo a manga mama, na sii ko kitetapiin iyo ko manga karoma niyo na
kilalaa niyo a da a bager iran a di sekano na piyapiyai niyo siran, ka datar iyo siran a
pekatarima ko pamemegayan o Allah a so kaoyagoyag. Nggolaolaa niyo ai kaan da a ba
pekabangen ko di niyo dii kapangangarapan.
So Kapekerasay sabap ko Kanggolaola sa Ontol
8 Aya samporna iyan na pagayonayon kano langon. Pepangalinggagaon iyo so ped iyo,
nggiginawai kano a lagid o magariyari, kekapediay kano, ago pangangalimbabaan kano.
9 Di niyo mbadalen so marata ko marata, na di niyo mbadalen so kandadaora ko
kandadaora, ka badalen iyo baden so rakmat, ka tiyawag kano o Allah kaan iyo makewali
so rakmat.
10 Ka tig o Kitab a
“Apiya antawaa i kebaya mababaya ko kapepaginetaw niyan

ago masisingayo iyan so manga gawii a kapipiya ginawa
na disomala a di den petero sa marata ago di den pemagakal.
11 Lidasi niyan so marata na nggolaolaa niyan so mapiya;
disomala a mbabanogen iyan so kalilintad ago panamaran iyan so karaota niyan sii.
12 Ka pegilain o Kadnan so manga oontol
na lalayon iyan pegamponen so manga pangni iran,
ogaid na telikodan iyan so dii nggolaola sa marata.”
13 Antawaa i makaperata rekano amay ka kasosomayadan kano sa kanggolaola sa
mapiya?
14 Ogaid na apiya pen o perasaya kano sabap ko di niyo dii kanggolaola sa ontol na
rarakmatan kano. Di niyo kaleken so kapepangangaleka rekano o manga taw ago di niyo
pegawiden a akal.
15 Ogaid na baloya niyo so Al Masih a aya bo Kadnan o manga poso iyo, na lalayon kano
titiyagar sa kasembaga niyo ko apiya antawaa i magise rekano o antonaa i pekesabapan o
arap iyo.
16 Ogaid na nggolaolaa niyo ai a rakes o kaperondarondan ago kapakaaadata. Lalayon iyo
pakaliliwanaga so hatin iyo kaan amay ka pembabasaan kano sa marata o siran oto a dii
sodi ko mapiya a sowasowai niyo sabap ko kapetomana ngka ko Al Masih na ikeya iran
so miyanga tetaro iran.
17 Ka tomo so kapekerasay niyo sabap ko dii kanggolaola sa mapiya, o kabaya ini o
Allah, a di so kanggolaola sa marata.
18 Ka so den so Al Masih na miyakaisa matay sabap ko manga dosa, a so maontol na
miyatay para ko di manga oontol, kaan tano niyan maagak ko Allah. Biyono sekaniyan ko
kamamanosiyai ron ogaid na inoyag bo ko kaniniyawai ron.
19 Na sii ko kaniniyawai ron na somiyong seeekaniyan ko manga niyawa a kikakalaboso
na piyangosiyatan iyan siran.
20 Giyanan so manga niyawa a miyamangongkir ko Allah sa miyatey den a gawii sii ko
kasesabar iyan a penayaon iyan so dii kambaali o Nok ko mala a kapal. Maito a manga
taw a somiyoled ko kapal, a walo bo kataw langon, na miyasabet siran a nggolalan ko ig.
21 Giyangkoto a ig na kaiibaratan ko salawat a pepakasabet rekano imanto, a kena ini a
ba so kaonabi ko boring o lawas, ka so kapangniya ko Allah ko maliwanag a hatin.
Pepekasabet ai rekano a dii makanggolalan ko kiyaoyag peroman i Isa Al Masih
22 A somiyong roo sa kasorgaan na ndodoo den ko kawanan o Allah a di rekaniyan dii
makimbaya so langon a malaikat ago so aden a manga kapaar iyan ago kabatowa.
1 PIDRO 4
So Miyaalin a Kapaginetaw
Kagiya miyarasay so Al Masih sii ko lawas iyan na sanganen iyo mambo so pamikiran a
lagid o pamikiran iyan. Ka apiya antawaa i miyarasay sii ko lawas iyan na gominek
makipaar ko kapakandosa.
2 Sabap san na sii ko lamba pen ko omor angkai a taw na di niyan den pagonotan so
manga rarata a singayo o kamamanosiyai ron, ka so bo so kabaya o Allah.
3 Kiyatangkaan den a kapesowaa niyo gowani ko kebayaan nggolaola o da a manga
katohanan iyan, a so kapepangonot sa kambarabowat maasiya, manga baya a ginawa,
kapamereg, mitataralo a dii kakeriyala, kapaginom sa arak, ago so ipekegowad a
kapesimbaa ko manga barahala.
4 Na ipepamemesa angkoto a manga kapir a di kano den kiran pengeped sangkai a

masarakanen a kambarabowat maasiya, na pepagitowitoon kano iran.
5 Ogaid na isomariya kiran ai langon ko hadapan o Allah a makatitiyagar den sa
kakokoma niyan ko manga bibiyag ago so miyamatay.
6 Giyanan i sabap a so Mapiya a Totol na inipangosiyat mambo ko siran oto a miyamatay
imanto kaan apiya pen inikokom ko manga lawas iran so kapatay a aya bagian o manga
manosiya na makambagian so manga niyawa iran ko kaoyagoyag o Allah.
7 Magaan den so kaposan o langon taman. Kagiya ka maoto na paaren iyo a ginawa niyo
na go niyo iiktiyari a pamikiran iyo kaan kano makapangangarapan.
8 Lebi a mala i kipantag na kababayai o oman i isa so ped iyan sa iklas ko poso iyan, ka
so kababaya na madakel a manga dosa a pekesapengan iyan.
9 Pesekasakawa o oman i isa so ped iyan sa da a ba on kapanemotemod.
10 Disomala a pegosaren o oman i isa so moodiset a inibegay ron o Allah sa kapegogopi
niyan ko manga ped a lagid o mapiya a komikibir ko pimbarambarangan a pamemegayan
o Allah.
11 So pepangosiyat na pangosiyaten iyan so manga katero o Allah; so pepanalagad na
nggolaolaa niyan a rakes o bager a ipembegay ron o Allah kaan kabantogi so Allah sii ko
langon taman a nggolalan ki Isa Al Masih. Rek iyan so bantogan ago gees sa taman sa
pakataman! Amin.
So Kapekerasay sabap ko Kapeparatiyaya
12 Manga pekebabayaan ko a manga pagari aken, di kano pememesa sii ko manga

karomasayan a ipetepeng rekano a lagid o apoy. Di niyo pipikira i ba giyai i sabelek a
pekeokitan iyo.
13 Ka pakapipiyaa niyo baden a ginawa niyo, ka di kano dii makambagian ko manga
karomasayan o Al Masih kaan kano tanto a mababaya amay ka mapayag so bantogan
iyan.
14 O pepanonongkaa kano sabap ko kapeparatiyayaa niyo ko Al Masih na rarakmatan
kano, ka aya maana ini na komakaden rekano so kababantogan a Roh, a so Roh o Allah.
15 Disomala a da a isa rekano a marasay sabap ko kapamanekew, kasogoka ko kokoman,
o di na so kakebota ko galebek o ped.
16 Ogaid na o aden a kerasay rekano sabap sa pepangongonotan sekaniyan ko Al Masih
na di niyan ai keyaan, ka podiya niyan baden so Allah sabap sangkai a ingaran.
17 Ka miyakatalingoma den so masa a kapengokom, na so manga pagtaw o Allah na aya

keonaan komokom. Na o sektano i keona a kokomen na antonaa i keondasan o siran oto a
da pamaratiyaya ko Mapiya a Totol a poon ko Allah?
18 Ka tig o Kitab a
“O maregen a kakesabet o maontol a taw

na antonaa i keondasan o da a katohanan iyan ago so baradosa?”
19 Kagiya ka maoto na siran oto a pekerasay sabap sa kabaya o Allah na sanaan iran a
ginawa iran ko kesarigan a Miyaden kiran, na itaros iran bo a di ran dii kanggolaola sa
mapiya.
1 PIDRO 5
So manga Pelokelokesen ago so Manga ngongoda
Aden a ipangosiyat aken ko manga pelokelokesen san rekano ko Agama, ka

pelokelokesen ako mambo a datar iyo. Saksi ako ko kiyarasay o Al Masih ago
makapembagian ko bantogan a kepayag den.
2 Pagakolen ko rekano a tagikora niyo so talon a bilibili, a giyoto so manga pagtaw a
piyakikibir rekano o Allah. Siyapa niyo siran a kena a ba sabap sa ipapaliyogat rekano, ka
sabap sa kabaya iyo den so pakipenggalebek rekano o Allah, ago kena a ba sabap ko
kapengowarta, ka sii ko kasosomayodi rekano.
3 Di niyo pendatodatoi so siran oto a piyakitagikor rekano, ka baloya niyo baden a ginawa
niyo a mapiya a ladiyawan ko talon.
4 Na amay ka makimasa si Isa a Pangolo a Tomatagikor na ketarima iyo so sangkad a di
den kelas so bantogan iyan.
5 Sekano mambo a manga kangodaan na pakimbabaya kano ko manga pelokelokesen.

Pepangalimbabaan kano langon ago pepamagogopa kano, ka pitero o Kitab a
“Peridoon o Allah so manga takabor

ogaid na ipekelimo iyan so dii mangalimbabaan.”
6 Kagiya ka maoto na pakipangalimbabaan kano ko mala a kapaar o Allah kaan kano

niyan miporo sii ko patot on a masa.
7 Pakiawidi niyo rekaniyan so langon a awid a akal iyo, ka sisiyapen kano niyan.
8 Iiktiyar kano ago pageenaw, ka so ridoay niyo a so Iblis na pepegenebeneb a lagid o

pegengger a arimaw a pepangiloba sa sekaben iyan.
9 Atowi niyo sekaniyan a mbebeken so paratiyaya niyo, ka katawan iyo a so ped iyo a
miyamaratiyaya sa dalem a doniya na pepamakaokit ko datar ai a karomasayan.
10 Na so Allah a pekepoonan o langon a limo, a aya rekano tomiyawag sa kapakambagian
iyo ko da a ikepos iyan a bantogan iyan sii ko kaiisaisa niyo ago so Al Masih, na amay ka
marasay kano sa di matey na pepiyapiyaan kano niyan ago mbalowin kano niyan a
mabeken, mabager, ago di kekaog.
11 Rek iyan so kapaar sa taman sa pakataman! Amin.
12 Sii ko kinisoraten aken sangkai a mapontok a sorat na inogopan ako i Silbano a

ibibilang aken a kasasarigan a pagari tano. Inipangosiyat aken ago pimataanan so tito a
limo o Allah sii sangkai a sorat. Na pakababager kano sangkai a limo.
13 So Agama roo sa Babilon a piyamili o Allah a ped iyo na pesalamen kano iran a lagid
mambo i Marko a wata aken.
14 Pesasalama kano a sarta o arek sa kababaya.
Pengnin ko a so kalilintad na malalayon rekano langon a rek o Al Masih.

2 PIDRO
2 PIDRO 1
Alamat sorat ako i Simon Pidro a oripen ago siyogo i Isa Al Masih makasampay ko siran
oto a miyakatarima sa paratiyaya a datar sa kala i bali o paratiyaya ami, a so paratiyaya a
inibegay rektano o Tohan tano ago Pepanabet rektano a si Isa Al Masih sabap ko kaontol
iyan.
2 Pengnin ko a malalayon rekano so mitataralo a limo ago kalilintad a nggolalan ko
katawi niyo ko Allah ago si Isa a Kadnan tano.
So Kiyapanawag ago Kiyapamili o Allah
3 So kabatowa o Allah na miyakabegay rektano ko langon taman a kailangan tano para ko

kambaraamal a kapaginetaw. Inibegay ini rektano a nggolalan ko katawi tano rekaniyan a
aya rektano tomiyawag an tano makambagian ko bantogan iyan ago kapiyaan.
4 Sii sangkai a okit na bigan tano niyan sa piyakamemesa ago mala i bali a manga initopa
niyan kaan nggolalan sii na kalidasan iyo so pekabinasa a manga rarata a kabaya sii sa
doniya ago makambagian kano ko parangay o Allah.
5 Sabap sii na panamari niyo piyapiya so kipagomanen iyo ko kapiya sii ko paratiyaya
niyo. Sii ko kapiya na pagomanen iyo ron so katao.
6 Sii ko katao na pagomanen iyo ron so kipapaaren ko ginawa. Sii ko kipapaaren ko
ginawa na pagomanen iyo ron so kapakatiger. Sii ko kapakatiger na pagomanen iyo ron
so kambaraamal.
7 Sii ko kambaraamal na pagomanen iyo ron so kanggiginawai. Sii ko kanggiginawai na
pagomanen iyo ron so kapekebabayai ko ped.
8 Ka o madadalem rekano langon angkai a moodiset a pepangosor mambo na kebaloy
kano iran a pekagaga ago magonga sa mapiya sii ko katawi niyo ko Kadnan tano a Isa Al
Masih.
9 Ogaid na so taw a da niyan ai makamal na bota a di pekailay sa mawatan, na kiyalipatan
iyan a kiyarilaan den ko miyanga oona a dosa niyan.
10 Kagiya ka maoto, manga magariyari, na panamari niyo a matangked iyo so kiyatawaga

ago kiyapilia rekano o Allah. Ka o nggolaolaa niyo ai langon na di kano den pekasilay,
11 Na mbegan kano sa tanto a mapiya a kapekasoled iyo ko da a kaposan iyan a Ndatoan
o Kadnan tano ago Pepanabet a si Isa Al Masih.
12 Sabap sii na piyasad aken sa ginawa ko a lalayon aken rekano pepakitademan angkai a
manga pandoan apiya pen katawan iyo den ai ago kekepiten iyo piyapiya so tito a benar a
miyatarima iyo.
13 Pipikiren aken a patot a pepakitademan ko rekano angkai a manga nganin taman sa
kasisii aken pen sangkai a lawas aken.
14 Ka katawan aken a di bo matey na pagendaan aken so lawas aken, ka giyanan i
piyayag raken o Kadnan tano a Isa Al Masih.
15 Na penamaran ko pen a kambaali ko sa okit sa kapeketademi niyo lalayon sangkai a
manga nganin amay ka miyatay ako den.
So Kiyailaya ko Bantogan o Al Masih
16 So piyakitokawan ami rekano makapantag ko kabatowa o Kadnan tano a Isa Al Masih

ago so kakesoy niyan na kena a ba mipepasod ko manga iringa a pimbaalan o mapasang a
taw, ka sekami den i miyakailay ko bantogan iyan.
17 Ka bigan sekaniyan o Allah a Ama sa pangkatan ago bantogan sii ko kinisampain on
ko sowara a poon ko Lebi a Mala i Bantogan a tig iyan a “Giyai so pekebabayaan ko a
Wata aken a ikasosoat aken.”
18 Na sekami den i miyakaneg sangkoto a sowara a poon sa kasorgaan isako ndodoo
kami a ped iyan roo ko soti a palaw.
19 Sabap sii na pimataanan rektano piyapiya so sarig ami ko manga katero o Allah a
miyapayag o rnanga nabi. Na patot a tagoon iyo sa ginawa so manga katero iran, ka lagid
ai o solo a pesindaw sii ko maliboteng a darpa taman sa kelibabas so gawii ago sebang so
Makabanges sii ko manga poso iyo.
20 Ogaid na aya mala i kipantag na seboten iyo a da den a isa bo ko langon a miyaalamat
o manga nabi sii ko Kitab a ba poon ko pamikiran o nabi a misorat on.
21 Ka so kiyapakaalamat na kena den a ba pitibaba o manosiya, ka ipapaar baden so
manga taw o Soti a Roh ko kiyateroa iran ko manga lalag a poon ko Allah.
2 PIDRO 2
So Pepamangendao sa di Benar
Ogaid na gowani na aden a di tito a manga nabi a lomolook ko manga taw sa Israil, na
pekagemaw rekano mambo so pepamangendao sa di benar. Pagowiten iran rekano sa
masolen so pekabinasa ago di benar a manga ndao na ipepelaw iran so Kadnan a
miyakaaon kiran. Sii sangkai a okit na iperaot iran ko ginawa iran so kitekaw a kasiksaan.
2 Ogaid na apiya pen ai na madakel a merawat ko marata a sowasowai iran, na sabap san
na mapegitowito so lalan ko tito a benar.
3 Sii ko kananapso iran na pemirakan kano angkai a manga pepangendao sa di benar a
nggolalan ko manga totol a pepangembaalan iran. Miyatey den a pitiyagaran siran sa
daneg, na magaan den makatalingoma so kasiksaa kiran!
4 Ka da den maapi o Allah so manga malaikat a miyamakandosa, ka inilebad iyan siran
ko kanarakaan, na ron siran tatagoa ko maliboteng a manga galebo taman ko Gawii a
Kapengokom.
5 Da niyan mambo maapi so andang a doniya, ka piyakimbagiyawan iyan so manga rarata
a taw ron. Na aya bo a siyabet iyan na so Nok a pepangosiyat ko kaontol ago so pito
kataw a manga ped iyan.
6 Siniksa o Allah so manga siti a Sodom ago Gomorah ko kiyatotonga niyan on taman sa
miyagombiyombi. Na biyaloy niyan ai a ibarat o keokitan o manga rarata a taw.
7 Ogaid na siyabet iyan si Lot a maontol a mama a inikarata a ginawa niyan so karesik o
manga rarata a taw.
8 Ka sii ko kababaling iyan kiran na gawii gawii den na pekesakitan so maontol a poso
iyan ko kapekeilaya niyan ago kapekenega ko manga rarata a olaola iran.
9 Na marayag sii langon a matao somabet so Kadnan ko manga taw a baraamal a poon ko
manga ipetiyoba kiran, na katawan iyan i kipesenggain iyan ko manga rarata a taw ko
kapendanega kiran taman ko Alongan a Kapengokom
10 A ba di labaw so siran oto a pepamangonot ko pepekasebo a manga rarata a kabaya o
kamamanosiyai kiran a mamakasodi siran pen ko kadato.
Giyangkai a pepamangendao sa di benar na masarakanen ago manga takabor, na di iran

ikelek a kapepagitowitoa iran ko manga ala i bantogan.
11 Ogaid na apiya so manga malaikat a lebi pen a mabager ago mala i kabatowa na di iran
selaan angkai a manga ala i bantogan a sarta o kapepagitowito sii ko hadapan o Kadnan.
12 Ogaid na giyangkai a manga pepangendao na pepagitowitoon iran so manga nganin a
di iran seboten. Lagid siran o manga iila a binatang a di matao mamimikiran a
inimbawata kaan madakep ago masombali. Na kebinasa siran sii ko kapepaminasaa iran
ko ped,
13 Ka imbadal kiran so marata sabap ko marata a di ran dii nggolaolaan. Ipekebabaya iran
so di ran dii kakeriyala apiya sii ko kadaondaw. Lagid siran o manga daket a pepekasebo
rekano, na apiya sii ko di ran rekano dii kapakipagatoang na ipekebabaya iran so
kapeselibaa iran ko ped.
14 Sii ko kapegilaya iran ko manga babay na lalayon siran on gegedian. Di siran den
keonseran ko dii kapakandosa. Pepagakalan iran so manga taw a pekesalinsalin so
pamikiran iran. So manga poso iran na miyalayam ko kanapso. Inisinta siran o Allah!
15 Inawaan iran so matito a lalan na miyamakasilay. Kideg iran so lalan a inokitan o
Balaam a wata o Bosor a kiyababayaan iyan so pirak a initendan ko galebek iyan a di
ontol.
16 Ogaid na pimbongetan sekaniyan sabap ko sala iyan, ka so kimar iyan a di makapetero
na mitero a datar o taw, na inisapar iyan so kalalalongan a penggolaolaan angkoto a nabi.
17 Giyangkai a manga taw na lagid o manga bowalan a kiyamaraan ago lagid pen o
manga gabon a pekibayomber o mabager a ndo. Inisenggay o Allah so kedarpaan iran a
tanto a miyakaliboliboteng.
18 Di siran dii tekabor a pembabasa sa kalalalongan, na penggawiin iran a nggolalan ko
manga rarata a kabaya o lawas so siran oto a mararani makapalagoy ko sowasowai o
mariribat a manga taw.
19 Ipetopa iran kiran so kababalokasi kiran apiya pen siran oto a petopa sii na
pepangongoripen o pekabinasa a manga olaola iran. Ka so taw na oripen o apiya antonaa i
makapapaar rekaniyan.
20 Siran oto a miyakapalagoy ko kamaresikan sa doniya a nggolalan ko kiyakilalaa iran
ko Kadnan tano ago Pepanabet a si Isa Al Masih na oriyan oto na o kelitagi siran on
peroman ago kepeges na lebi a marata a kapembetadan iran sii sa kaposan a di isako
paganay.
21 Tomo den a da iran katokawi so lalan ko kaontol a di so kiyatokawi ran on a telikodan
iran bo so soti a sogoan a inibegay kiran.
22 So miyaolaola iran na minipemataan sangkai a pananaroon a “So aso na kesoyan iyan
so pinggowa iyan” ago “So baboy a piyaigoan na petona peroman ko lapot.”
2 PIDRO 3
So Gawii o Kadnan
Giyai i ikadowa a sorat aken rekano, manga pekebabayaan ko. Sii ko miyaona a sorat
aken ago giyangkai a sorat na piyanamaran aken a kapokawa ko ko manga pamikiran iyo
a nggolalan ko kapepakitademi ko rekano sangkai a manga nganin.
2 Kabaya aken a tatademan iyo so miyatero gowani o soti a manga nabi, ago so inisogo o
Kadnan tano ago Pepanabet a inibegay rekano a nggolalan ko manga siyogo iyan.
3 Paganay ron na disomala a sabota niyo a sii ko kaposan a manga gawii na pekagemaw
so manga taw a mamakasodi a pepamangonot ko manga rarata a kabaya iran. Na pesodiin
kano iran
4 A peteroon iran a “Ba kena a initopa i Isa a kesoy? Anda sekaniyan den? Ka inipoon ko
kiyapamatay o manga apo tano na da den a ba miyaalin, ka lagid bo isako kaadena ko
doniya.”
5 Peteroon iran ai ka kagiya pitibaba iran so kiyapakalipati iran on sa sii ko miyanga oona
a gawii na miyaaden so langit ago so lopa a nggolalan ko katero o Allah. Miyalimbag so
lopa a poon ko ig ago nggolalan ko ig,
6 Na giyangkoto a doniya a kapapantagan den sa masa oto na kiyabinasaan ko kiyalapayi
ron o ig.
7 Ogaid na nggolalan mambo ko katero o Allah na so manga langit ago so lopa a
kapapantagan den imanto na ititiyagar ko kambinasaa on o apoy. Tatagoon ai taman ko
gawii a kokomen ago kesiksa so manga rarata a taw.
8 Ogaid na di niyo pekalipati, manga pekebabayaan ko, a ibibilang o Kadnan so salongan

a datar bo o sanggibo ragon, ago so sanggibo ragon na datar bo o salongan.
9 Kena a ba ipesendod o Kadnan so kitomanen iyan ko initopa niyan a aya den mapipikir
o ped. Ka sesabaran kano niyan baden, ka di niyan kabaya o ba aden a isa bo a ba
pekanaraka, ka kabaya iyan a so langon a taw na talikodan iran so manga dosa iran.
10 Na so Gawii o Kadnan na pekatalingoma a lagid o tekew. Sii sangkoto a Gawii na

kedadas so manga langit a sarta o matanog a dagedeb. Kerab so langon a manga
pamimitoon na pesenaw, na kesawaan so doniya ago so langon a ndodon.
11 Sabap sa mbinasaan ai langon sangkai a okit na antonaa i patot a sowasowai niyo?
Patot a maginetaw kano a soti ago pepangongonotan ko Allah
12 Sii ko kapenayawa niyo ko Gawii o Allah a tanto kano a kasosomayodan ko
kapekatalingoma niyan. Giyanan so Gawii a ketotong so manga langit ago pesenaw, na so
langon a kaaden a ndodon na penga totonag ko tanto niyan a kayaw.
13 Ogaid na penayaon tano so initopa o Allah, a giyanan so bago a manga langit ago lopa
a ron pekakaden so kaontol.
14 Kagiya ka maoto, manga pekebabayaan ko, na sii ko kapenayawa niyo sangkoto a

Gawii na panagontamani niyo a kabaloy niyo a da a saninsaning iyan ago di kedawayan
ago makalilintad sii ko hadapan o Allah.
15 Tanodi niyo a so kapepanginsabar o Kadnan tano na aya kapekeparowa ko kakesabet
iyo. Giyai mambo i inisorat rekano i Paolo a pekebabayaan a pagari tano a nggolalan ko
ongangen a inibegay ron o Allah.
16 Giyai i okit a kinisoraten iyan ko langon a sorat iyan igira a pegalowin iyan angkai a
manga nganin. Aden a maregen saboten sii ko manga sorat iyan, na so da a manga sowa
iyan ago so manga malebod matonda na pembibiden iran a maana ini a datar o ipekidia
iran ko ped a bagi ko Kitab. Na sabap sii na pegowiten iran a manga ginawa iran ko
kabinasaan.
17 Ogaid na sekano, manga pekebabayaan ko, na katawan iyo den ai. Sabap san na
iiktiyar kano kaan kano di mapakasilay o kariribat o manga taw a pegongkir ko Kitab ago
o ba kano maolog a poon ko mabeken a titindegan iyo.
18 Ogaid na tatarosen iyo baden so kapepegto iyo sii ko limo ago katao ko Kadnan tano
ago Pepanabet a si Isa Al Masih. Rek iyan so bantogan imanto ago taman sa pakataman!
Amin.
1 YAHIYA
1 YAHIYA 1
So Katero a Pepangoyag
Pekalangkapen ami rekano sii sangkai a sorat so makapantag ko Katero a pepangoyag a

kapapantagan den a poon sa poonan. Miyaneg ami ai ago miyailay o manga mata mi;
kiyamasaan ami ago miyaseko a lima ami.
2 Sii ko kiyapayaga sangkoto a kaoyagoyag na miyailay ami, na pepamataanan ago
pepakalangkapen ami rekano angkai a kaoyagoyag a da a kaposan iyan a sisii gowani ko
Ama ago miyapayag rekami.
3 Pepakalangkapen ami rekano so miyailay ami ago miyaneg kaan kano rekami maped ko
di ami dii kanggiginawai ago so Ama a rakes o Wata iyan a si Isa Al Masih.
4 Na ipesorat ami ai kaan matarotop so kapipiya a ginawa tano.
So Allah na Sindaw
5 Giyai so katero a miyaneg ami a poon rekaniyan a pepakalangkapen ami rekano: So

Allah na sindaw na da on so maliboteng.
6 O teroa tano a di tano dii nggiginawai ago so Allah ogaid na komakaden tano pen ko
maliboteng na di tano dii mamokeg na kena a ba tano pepaginetaon so tito a benar.
7 Ogaid na o komakaden tano ko sindaw a datar o katatago o Allah ko sindaw na
makapenggiginawai tano, na so rogo i Isa a Wata iyan na ipelompiyo rektano ko langon a
manga dosa tano.
8 O teroa tano a da a kadostaan tano na pepagakalan tano a ginawa tano na da rektano so

tito a benar.
9 O peteobata tano so manga dosa tano na kesarigan tano so Allah sa kaperilai niyan ko
manga dosa tano sabap ko kaontol iyan, na pelompiyon tano niyan ko langon a kadostaan.
10 O teroa tano a da tano makandosa na datar o ba tano peteroa a bokeg so Allah, na da
tano tarimaa so katero iyan.
1 YAHIYA 2
So Al Masih i Peninindegan Rektano
Ipesorat aken rekano ai, manga wata aken, kaan kano di makapendosa. Ogaid na o aden a
miyakandosa na aden a peninindegan rektano a pengadap ko Ama a giyoto si Isa Al
Masih a so Maontol.
2 Sekaniyan den i minikorban sabap ko manga dosa tano kaan mapapas, a kena a ba so
rek tano bo, ka so pen so manga dosa o langon a taw sa dalem a doniya.
3 O petomana tano so manga sogoan o Allah na ketangked tano a katawan tano

sekaniyan.
4 O aden a petero sa "Katawan aken so Allah," ogaid na di niyan bo petomanen so manga
sogoan iyan na bokeg angkoto a taw a da on so tito a benar.
5 Ogaid na so petoman ko katero iyan na mataan den a matatarotop so kapekebabayai
niyan ko Allah. Na giyai i kaketangkeda tano sa madadalem tano ko Allah:
6 So dii tero sa komakaden sekaniyan sii ko Allah na paliyogat a maginetaw a datar o
kiyapaginetaw i Isa.
So Bago a Sogoan
7 Manga pekebabayaan ko, kena a ba bago a sogoan a ipesorat aken rekano, ka andang
den a sogoan a sisii rekano den ipoon sa poonan. So andang a sogoan na so katero a
miyaneg iyo den.
8 Ogaid na so ipesorat aken rekano na mataan den a bago a sogoan, a tiyoman o Al Masih
ago petomanen iyo mambo, ka kagiya pekeipos so maliboteng ago lomilindaw so tito a
sindaw.
9 So dii tero sa sisii sekaniyan ko maliwanag a ipekegowad iyan bo so pagari niyan na

sisii pen ko maliboteng taman imanto.
10 Na so pekebabaya ko pagari niyan na komakaden sekaniyan ko maliwanag a da
rekaniyan den so ikedosa o pagari niyan.
11 Ogaid na so pekegowad ko pagari niyan na sisii pen ko maliboteng. Pelalakaw
sekaniyan ko maliboteng a di niyan katawan o anda pegantap, ka so maliboteng na
minibota ko manga mata niyan.
12 Pesoratan ko sekano a manga wata, ka kiyarilaan den so manga dosa niyo sabap ki Isa.
13 Pesoratan ko sekano a manga lokes, ka katawan iyo sekaniyan a kapapantagan den a
ipoon sa poonan. Na pesoratan ko sekano a manga kangodaan, ka miyapeges iyo so Iblis.
14 Pisoratan ko sekano a manga wata, ka katawan iyo so Ama. Pisoratan ko sekano a

manga lokes, ka katawan iyo sekaniyan a kapapantagan den ipoon sa poonan. Na
pisoratan ko sekano a manga kangodaan, ka manga babager kano, na so katero o Allah na
madadalem rekano, na miyapeges iyo so Iblis.
15 Di niyo kebabayai so doniya o di na apiya antonaa onon a matatago ko doniya. O

kababayai o taw so doniya na da on so kapekebabayai niyan ko Ama.
16 Ka so langon taman a matatago ko doniya a aya maana niyan na so manga rarata a
masisingayo o kamamanosiyai ko taw, ago so manga rarata a kabaya o mata niyan, ago so
di niyan dii kambantogan ko manga rek iyan ago manga galebek na kena ini a ba poon ko
Ama, ka poon ko doniya.
17 Na so doniya ago so langon taman a ndodon a masisingayo o taw na penga ada. Ogaid
na so dii nggolaola ko kabaya o Allah na tatap den sa taman sa pakataman.
So Somosopak ko Al Masih
18 Manga wata, giyai so kaposan a masa. Miyatero rekano den a pekatalingoma so

Somosopak ko Al Masih, na madakel a pepamanopak rekaniyan a sisii den imanto. Sabap
sii na katawan tano a giyai so kaposan a masa.
19 Giyangkai a manga taw na miyawa rektano, ka kena a ba siran tito a maaped rektano.
Ka o benar a maaped siran rektano na tatap siran rektano o kowan. Ogaid na mimbelag
siran kaan makilala a da a isa kiran bo a ba tano ped.
20 Ogaid na inododan kano o Al Masih sa Soti a Roh na katawan iyo langon so tito a
benar.
21 Aya kiyasorati ko rekano na kena a ba sabap sa di niyo katawan so tito a benar, ka
sabap sa katawan iyo den, na katawan iyo a da a kabokegan a ba pekapoon ko tito a benar.
22 Antawaa i bokeg? Aya bokeg na so taw a tig iyan a si Isa na kena a ba so Al Masih.
Sekaniyan i somosopak ko Al Masih a di niyan dii pelaw so Ama ago so Wata.
23 Apiya antawaa i di niyan dii pelaw so Wata na da on So Ama. Ogaid na so tomiyarima
ko Wata na ndodon mambo so Ama.
24 Tatagoa niyo lalayon sa ginawa niyo so manga katero a miyaneg iyo ipoon sa poonan.
Ka o lalayon rekano madadalem so miyaneg iyo ipoon sa poonan na ketatap a kakakaden
iyo sii ko Wata ago sii ko Ama.
25 Na aya initopa niyan rektano na so kaoyagoyag a da a kaposan iyan.
26 Inisorat aken rekano ai makapantag ko siran oto a pepanamaran kano iran somaliba.
27 Ogaid na so Roh a miyaodod rekano den o Al Masih na lalayon rekano madadalem, na
di den kailangan a kapakipepangendao niyo ko apiya antawaa. Ka so Roh na aya rekano
pepangendao ko langon taman, na tito a benar so ipepangendao niyan a da a ba on
kabokegan. Kagiya ka maoto na tomana niyo so inipangendao niyan rekano na ketatap a
kakakaden iyo sii ko Al Masih.
28 Imanto na tatapa niyo a kakakaden iyo ron, manga wata, kaan tano makasasarig ago di
den keya ko hadapan iyan sii ko kakesoy niyan.
29 Kagiya katawan iyo a maontol so Allah na katawan iyo pen a so oman i dii nggolaola
sa kaontol na miyabaloy den o Allah a wata iyan.
1 YAHIYA 3
Manga Wata o Allah
Pipikira niyo man so tanto a mala a kapekebabayai rektano o Ama! Sabap sii na
kiyabetowan tano sa manga wata o Allah, na benar oto. Na di tano kekilala o manga taw
sa doniya ka kagiya di iran katawan so Allah.
2 Imanto, manga pekebabayaan ko, na manga wata tano o Allah na da pen mapayag o
antonaa i kebaloyan rektano. Ogaid na katawan tano a amay ka mapayag so Al Masih na
kebaloy tano a datar iyan, ka keilay tano so tito a ginawa niyan.
3 Na oman i isa a ndodon angkai a arap sii ko Al Masih na sosotin iyan a ginawa niyan a
datar o kasosoti o Al Masih.
4 Oman i dii ndosa na pesogoken iyan so Kitab, ka so kapakandosa na aya kapekesogoka

ko Kitab.
5 Ogaid na katawan iyo a mipeyag so Al Masih kaan iyan mapapas so manga dosa, na
sekaniyan na da a dosa niyan.
6 Oman i isa a komakaden sii ko Al Masih na kena a ba dii ndosa, ogaid na oman i dii
ndosa na da niyan pen mailay sekaniyan aya pen o ba niyan katawi.
7 Di kano pakipegakal, manga wata, ko apiya antawaa. So dii nggolaola sa ontol na

maontol a datar o Al Masih.
8 So taw a peteros ndosa na rek ko Iblis ka kagiya dii mbaradosa so Iblis ipoon sa
poonan. Na aya kiyapayag o Wata o Allah na sabap sa an iyan mabinasa so manga
galebek o Iblis.
9 Oman i miyabaloy o Allah a wata iyan na kena a ba peteros ndosa, ka ndodon den so
kaoyagoyag o Allah na di kepakay i ba dii ndosa, ka inisabap den o Allah a wata iyan.
10 So marayag a mbidaan o manga wata o Allah ago so manga wata o Iblis na giyai:
oman i di penggolaola sa ontol o di na di niyan pekebabayaan so pagari niyan na kena a
ba wata o Allah.
Kababayai o Oman i isa so Ped iyan
11 So katero a miyaneg iyo ipoon sa poonan na giyai: disomala a kababayaan o oman i isa
so ped iyan.
12 Di tano rawaten so olaola o Kain a rek o Iblis, ka biyono o Kain so pagari niyan. Na
ino niyan bonoa? Sabap sa manga rarata so galebek o Kain na maontol so manga galebek
o pagari niyan.
13 Di kano pepamemesa, manga magariyari, o pekegowaden kano o doniya.

14 Aya katawi tano sa miyakatepas tano ko kaoyagoyag a poon ko kapatay na sabap sa
pekebabayaan tano so manga pagari tano. Apiya antawaa i di rekaniyan pekebabaya na
makakakaden sii ko kapatay.
15 Apiya antawaa i ipekegowad iyan so pagari niyan na talibono, na katawan iyo a da a
talibono a ba on madadalem so kaoyagoyag a da a kaposan iyan.
16 Aya katawi tano sa pekebabayaan tano o Allah na giyai: Inirila o Al Masih so
kaoyagoyag iyan para rektano. Na patot a iperila tano mambo so kaoyagoyag tano para ko
manga pagari tano.
17 O aden a tatamoken a ba niyan den pegilaya so pagari niyan a kakokorangan sa
kaoyagan a da niyan bo kalimoon na andamanaya i kapeteroa niyan on a pekebabayaan
iyan so Allah?
18 Disomala, manga wata, a tito so kapekebabayai tano ko manga ped a kena bo a ba sii
ko katero, ka pakiilay tano ai ko manga galebek tano.
Kapakasasarig ko Hadapan o Allah
19 Amay ka magiyoto na ketokawan tano a rek tano o tito a benar na mapekasarig tano so
poso tano ko hadapan o Allah
20 Igira a pesenditan tano o poso tano. Ka mala so Allah a di so poso tano na katawan
iyan so langon taman.
21 O di tano pesenditi o poso tano, manga pekebabayaan ko, na makasasarig tano ko
hadapan o Allah
22 Na apiya antonaa i pengnin tano ron na imbegay niyan rektano ka kagiya petomanen
tano so manga sogoan iyan ago di tano dii nggolaolaan so ikasosoat iyan.
23 Na aya inisogo iyan na giyai: paratiyayaan tano so ingaran o Wata iyan a si Isa Al
Masih na kababayaan tano so oman i isa rektano, ka giyoto i inisogo rektano o Al Masih.
24 So taw a petoman ko manga sogoan o Allah na komakaden sekaniyan sii ko Allah, na
komakaden rekaniyan mambo so Allah. Na katawan tano a komakaden rektano so Allah
sabap ko Roh a inibegay niyan rektano.
1 YAHIYA 4
So Tito ago so di Tito a Roh
Di niyo mbenara so oman i isa a niyawa, manga pekebabayaan ko, ka pariksaa niyo baden
so manga niyawa o ba mataan a poon ko Allah, ka kagiya madakel a di tito a manga nabi
a sisii den imanto sa doniya.
2 Aya kikilala niyo ko Roh o Allah na giyai: oman i niyawa a kikilalaan iyan a si Isa Al
Masih na somiyong sii ko lawas a manosiya na poon den ko Allah.
3 Na oman i niyawa a di niyan ai kilalaan makapantag ki Isa na kena a ba poon ko Allah.
Giyanan i niyawa o Somosopak ko Al Masih; miyaneg iyo a pekatalingoma ini na sisii
den imanto sa doniya.
4 Rek kano o Allah, manga wata, na tiyaban iyo angkai a di tito a manga nabi ka kagiya
lebi pen a mala i kabatowa so Roh a madadalem rekano a di so niyawa a madadalem ko
manga taw a rek o doniya.
5 Kagiya rek siran o doniya na so di ran dii teroon na mipantag ko manga nganin sa
doniya, na pepamakineg kiran so doniya.
6 Ogaid na sektano na rek o Allah. So taw a katawan iyan so Allah na pemakinegen tano
niyan, na so kena a ba rek o Allah na di tano niyan den pemakinegen. Giyanan i kikilala
tano ko Roh a pekepoonan o tito a benar ago so niyawa a pekepoonan o ribat.
So Paparangayan o Allah na Gagaw
7 Manga pekebabayaan ko, patot a kababayai o oman i isa so ped iyan, ka so gagaw na
poon ko Allah. Oman i pekebabaya ko ped iyan na miyabaloy o Allah a wata iyan na
katawan iyan so Allah.
8 Na so taw a di pekebabaya ko ped iyan na di niyan katawan so Allah, ka so Allah na
gagaw.
9 Na aya kiyapayag o kapekebabayai rektano o Allah na giyai: Initoron iyan sa doniya so
botong a Wata iyan kaan tano makatarima sa kaoyagoyag a nggolalan rekaniyan.
10 Aya tito a kababaya na kena a ba so kiyababayai tano ko Allah, ka so kiyababayai
niyan rektano ago so kinitoronen iyan ko Wata iyan a mikorban sabap ko manga dosa
tano kaan ai mapapas.
11 Kagiya giyanan i kiyababayai rektano o Allah, manga pekebabayaan ko, na patot a

kababayaan o oman i isa so ped iyan.
12 Da a taw a ba miyakailay ko Allah, ogaid na o kababayai tano ko manga ped tano na
madadalem rektano so Allah, na miyatarotop so gagaw niyan sii ko manga poso tano.
13 Miyatangked tano a komakaden tano ko Allah ago komakaden rektano mambo so

Allah, ka sabap sa bigan tano niyan ko Roh iyan.
14 Miyailay ami ago peseksian ami a initoron o Ama so Wata iyan a mabaloy a Pepanabet
ko doniya.
15 Apiya antawaa i pepayagen iyan a si Isa na aya Wata o Allah na komakaden rekaniyan
so Allah ago komakaden sekaniyan ko Allah.
16 Na kiyatokawan tano ago piyaratiyaya tano a pekebabayaan tano o Allah.
So Allah na gagaw. So taw a tatap on so gagaw na komakaden sekaniyan ko Allah ago

komakaden rekaniyan mambo so Allah.
17 Sabap sii na peketarotop so gagaw sii rektano kaan tano makasasarig sii ko Gawii a
Kapengokom, ka lagid tano o Al Masih sii sangkai a doniya.
18 Da a kalek a ba mirarangkap ko gagaw. So tarotop a gagaw na pepekabogaw sa kalek,
ka aya ipekelek o taw na so daneg. So taw a pekelek na da pen matarotop so gagaw niyan.
19 Pekebabayaan tano so Allah ka miyaona a kiyababayai niyan rektano.

20 O aden a petero sa “Pekebabayaan ko so Allah” ogaid na ipekegowad iyan so pagari
niyan na bokeg sekaniyan. Ka so di pekebabaya ko pagari niyan a pekeilay niyan na
andamanaya i kakebabayai niyan ko Allah a da niyan mailay?
21 Na aya inisogo iyan rektano na giyai: Apiya antawaa i pekebabaya ko Allah na
paliyiogat a kababayaan iyan mambo so pagari niyan.
1 YAHIYA 5
So Katabana ko Doniya
Oman i peparatiyaya a si Isa na Al Masih na inisabap sekaniyan o Allah a wata iyan. Na
oman i pekebabaya ko Ama na pekebabaya mambo ko wata iyan.
2 Na ketangked tano a pekebabayaan tano so manga wata o Allah o pekebabayaan tano so
Allah ago petomanen tano so manga sogoan iyan.
5 Ka so kapekebabayai tano ko Allah na so kapetomana tano ko manga sogoan iyan. Na
kena a ba maregen so kapetomana ko manga sogoan iyan,
4 Ka oman i miyabaloy o Allah a wata iyan na pepegesen iyan so doniya na aya ipepeges
on na so paratiyaya tano.
5 Antawaa i pekapeges ko doniya? Aya bo a pekapeges on na so peparatiyaya sa si Isa na
so Wata o Allah.
So Iniseksi makapantag ki Isa Al Masih
6 Si Isa Al Masih i somiyong sii a nggolalan ko ig a inisalawat rekaniyan ago so rogo o

kiyapatay niyan, a kena bo a ba nggolalan ko ig, ka so ig ago so rogo. So den so Roh o
Allah i peseksi sa benar ai, ka so Roh na aya tito a benar.
7 Ka aden a telo a peseksi;
8 So Roh, so ig, ago so rogo; na miyagayonayon angkai a telo.
9 Peterimaan tano so dii kaseksi o manga taw ogaid na so dii kaseksi o Allah na lebi pen
a mala i kipantag, ka giyai so iniseksi iyan makapantag ko Wata iyan.
10 Apiya antawaa i peparatiyaya ko Wata o Allah na pimataanan iyan a benar ai sii ko
poso iyan. Na apiya antawaa i di peratiyaya ko Allah na lagid o ba niyan pipikira a bokeg
so Allah ka kagiya da niyan paratiyayaa so iniseksi o Allah makapantag ko Wata iyan.
11 Na aya iniseksi iyan na giyai: bigan tano o Allah sa kaoyagoyag a da a kaposan iyan,
na giyangkai a kaoyagoyag na madadalem ko Wata iyan.
12 So taw a tomiyarima ko Wata na rek iyan angkai a kaoyagoyag, na so taw a da tarima
ko Wata o Allah na da on angkoto a kaoyagoyag.
So Kaoyagoyag a da a Kaposan iyan
13 Inisorat aken ai sii rekano a pepamaratiyaya ko ingaran o Wata o Allah kaan iyo
matangked a aden a kaoyagoyag iyo a da a kaposan iyan.
14 Na makasasarig tano igira a pepangadap tano ko Allah, ka kagiya o aden a pengnin
tano ron a makaaayon ko kabaya iyan na pemakinegen tano niyan.
15 Na kagiya katawan tano a pemakinegen tano niyan na ketangked tano a miyatarima
tano den so apiya antonaa i pepangnin tano ron.
16 O aden a makailay ko pagari niyan a miyakandosa a kena a ba kiyarong ko kapatay so

dosa niyan na patot a ipengni niyan ko Allah so pagari niyan, ka mbegan o Allah sa
kaoyagoyag asar a di kiyarong ko kapatay so dosa niyan. Ogaid na aden a dosa a kiyarong
ko kapatay na kena a ba aya ko dii teroa a patot a ipengni niyo ko Allah so makapantag
sii.
17 Langon a di ontol a olaola na dosa, ogaid na aden a dosa a kena a ba kiyarong ko
kapatay.
18 Katawan tano a apiya antawaa inisabap o Allah a wata iyan na kena a ba peteros
ndosa, ka pelindingen sekaniyan o Wata o Allah na di den kapenginsopan o Iblis.
19 Katawan tano a rek tano o Allah na so dalem a doniya na ipapaar o Iblis.
20 Katawan tano pen a miyakasong sii so Wata o Allah na bigan tano niyan sa sabot kaan
tano katokawi so tito a Tohan. Na maiisaisa tano ago so tito a Tohan, ka maiisaisa tano
ago so Wata iyan a si Isa Al Masih. Sekaniyan i tito a Tohan a pekepoonan o kaoyagoyag
a da a kaposan iyan.
21 Manga wata, na lidasi niyo so di benar a manga tohan.
2 YAHIYA
Alamat sorat ako i Yahiya a pelokelokesen makasampay ko miyapili a babay ago so
manga wata iyan a mataan den a pekebabayaan ko, ago pekebabayaan mambo o langon o
manga tatao ko tito a benar
2 Sabap ko tito a benar a madadalem rektano ago ketatap den rektano sa taman sa
pakataman.
3 Pengnin ko a so limo, gagaw ago kalilintad a poon ko Allah a Ama ago so Wata iyan a
si Isa Al Masih na malalayon rektano a pepaginetaw sii ko tito a benar ago so
kapekebabayai ko ped.
So Tito a Benar ago so Kababaya
4 Tanto ako a miyababaya kagiya mailay aken so ped ko manga wata a ka a pepaginetaw
a ipepasod ko tito a benar a datar o inisogo rektano o Ama.
5 Na pengnin ko reka imanto, Bai, a kababayai o oman i isa so ped iyan. Kena ini a ba
bago a sogoan a ipesorat aken reka, ka sisii rektano den ipoon sa poonan.
6 Na aya maana ngkai a gagaw na so kapepaginetaw tano a petomanen tano so manga
sogoan o Allah. Na aya inisogo iyan a miyaneg iyo a poon sa poonan na giyai: disomala a
so kapepaginetaw niyo na ipepasod ko kapekebabayai ko ped.
7 Madakel a pepanaliba a sisii den imanto sa doniya a di iran peratiyayaan a somiyong sii
si Isa Al Masih ko lawas a manosiya. So datar oto a taw na giyoto so Pepanaliba ago so
Somosopak ko Al Masih.
8 Iiktiyar kano kaan di keilang so miyanggalebek iyo kaan kano makatarima sa
matitimbel a balas.
9 Apiya antawaa i inawaan iyan so ndao o Al Masih a di niyan dii teroon a ba niyan den
pelawani na kena a ba on ndodon so Allah. Ogaid na apiya antawaa i kekepiten iyan
angkai a ndao na ndodon so Ama ago so Wata.
10 O aden a pekaoma rekano san a kena a ba niyan dii pamangendao angkai a ndao na di
niyo pekabolosa ko walay niyo aya pen o ba niyo salama.
11 Ka apiya antawaa i selam rekaniyan na pekasakoto ko manga rarata a galebek iyan.
Kaodas
12 Madakel pen o kowan a peteroon ko rekano, ogaid na di aken kabaya i ba aken ai

pakaokita sa karatas ago dawat, ka iinamen aken a imbentel aken sekano san ago
makipembitiyarai ako rekano kaan matarotop a kapipiya a ginawa tano.
13 So manga wata o pagari ngka a babay a pekebabayaan ka na pesalamen ka iran.
3 YAHIYA
Alamat sorat ako i Yahiya a pelokelokesen makasampay ko ginawai aken a si Gayo a
mataan a pekebabayaan ko.
2 Ginawai aken, pengnin ko a pekapiya ka i bobolos ko langon taman, ago malimegas so

lawas ka a datar mambo o kapakapipiya o niyawa ngka.
Piyodi si Gayo
3 Tanto aken a inikababaya so kiyapakaoma o ped ko manga magariyari a miyapanotol

iran raken a pepaginetaw ka sii ko tito a benar a datar o kiyalayaman ka.
4 Da den a lawan oto a inikababaya aken a di so kakenega ko ron sa pepaginetaw so
manga wata aken sii ko tito a benar.
5 Tanto ka a kasasanaan, pekebabayaan ko, ko kapepanalagadi ngka ko manga magariyari

apiya pen manga mananangga siran.
6 Piyanotol iran ko Agama sii so makapantag ko kiyababayai ngka kiran. Na aya mapiya
na ogopi ngka siran ko okit a ikesoat o Allah kaan iran mitataros so kapelalakaw iran.
7 Ka aya antap o kapelalakaw iran na so kapepanalagadi ran ko Al Masih, na da a ba iran
tiyarima a tabang a poon ko di pemaratiyaya.
8 Kagiya ka maoto na patot a sekasakaon tano so datar ai a manga taw kaan tano
makambagian ko galebek iran para ko tito a benar.
9 Pisoratan aken so Agama ogaid na si Diyotripis a kebaya a makilala a olowan san na da

niyan tagoa sa ginawa so pitero ami.
10 Kagiya ka maoto na amay ka somong ako san na pagalowin aken so di niyan dii
nggolaolaan a ipepamaganta iyan rekami so marata. Ogaid na kena a ba giyanan bo, ka di
niyan sekaon so magariyari igira a pepakaoma siran, na peseparan iyan pen so kebaya
kiran pesekasakaw ago pepakaawaan iyan siran ko Agama.
11 Pekebabayaan ko, na di ngka sowaa so marata, ka so mapiya. Apiya antawaa i dii

nggolaola sa mapiya na rek o Allah na apiya antawaa i dii nggolaola sa marata na da
niyan mailay so Allah.
12 Si Dimitriyo na pepamataanan a mapiya o langon a taw, na apiya so tito a benar na
mimataan sii. Magayon kami ron mambo, na katawan ka a benar so di ami dii teroon.
Kaodas
13 Madakel pen o kowan a peteroon ko reka ogaid na di aken kabaya i ba ko soraten,

14 Ka iinamen aken a makipegilaya ako reka sa di bo ini matey kaan ta makambitiyarai.
15 Pengnin ko a malalayon reka so kalilintad.
So manga ginawai ngka sii na pesalamen ka iran. Na sampain ka mambo so salam aken
ko oman i isa a ginawai ta san.
YODAS
Alamat sorat ako i Yodas a oripen i Isa Al Masih ago pagari i Santiyago makasampay ko
manga taw a tiyawag o Allah, a pekebabayaan siran o Allah a Ama ago sisiyapen i Isa Al
Masih.
2 Pengnin ko a malalayon rekano so mitataralo a kapedi, kalilintad, ago gagaw.
So Dosa ago so Daneg o Mipepelaw ki Isa Al Masih
3 Manga pekebabayaan ko, miyasinganin aken gowani a kapesorati ko rekano

makapantag ko kakesabet a palaya tano ron miyakambagian. Ogaid na disomala a
pesoratan ko sekano baden kaan aken sekano kaayoki sa kipenindegen iyo ko paratiyaya a
miyakaisaisa bo misarig ko manga kaom o Allah.
4 Ka aden a manga rarata a taw a da a kalek iyan ko Allah a miyangeped siran rekano sa
masolen. Binibid iran so ndao makapantag ko limo o Tohan tano kaan iran pekedalini ko
di ran dii kasebo, na inipelaw iran si Isa Al Masih a aya tano bo Pangolo ago Kadnan.
Miyatey den a miyaalamat o Kitab so kandanega kiran.
5 Aden a kebayaan ko rekano makitadem apiya pen kiyatokawan iyo den, na giyai:
siyabet o Allah so manga pagtaw niyan a Israil sii sa inged a Misir ogaid na oriyan iyan na
piyamono iyan so siran oto a da paratiyaya.
6 Na tademi niyo so manga malaikat a da siran panareg ko kadato a inisana kiran, ka
inawaan iran baden so inisenggay a kakadenan iran. Na papatongen siran sa da a ikeda
iyan a rantay sii ko tanto a makapal a maliboteng a ron siran tatagoa o Allah a ipenayaw
ko kakokoma kiran ko Mala a Gawii.
7 Tademi niyo pen so manga siti a Sodom ago Gomorah ago so melilibeta on a manga
inged. So manga kibabaling on na piyalad iran a ginawa iran ko dii kasebo a datar mambo
angkai a manga malaikat a piyangonotan iran so manga rarata a kabaya iran. So
kiyadanega kiran na ibarat o kasiksaa ko manga naraka sii ko apoy a da den a ikipadeng
iyan.
8 Giyangkoto a manga taw a miyangeped rekano na di mambo dii nggolaola sa datar oto.
Aden a manga taginepen iran a pepekaoyat kiran ko kapeseboi ran ko manga lawas iran, a
di ran dii sodiin so ana kadato iyan, ago pepagitowitoon iran so kikababantogan a
malaikat.
9 Ogaid na apiya so olowan o manga malaikat a si Mikail na da nggolaola sa datar oto.
Ka sii ko kiyapakandaowai iran ago so Iblis makapantag ko badan o Mosa na da niyan
maraw i ba niyan salaa so Iblis a sarta o kapagitowito, ka aya bo a pitero iyan na “So
Kadnan i makapembonget reka!”
10 Ogaid na giyangkoto a manga taw na pepagitowitoon iran so manga nganin a di iran
sasaboten, na so manga nganin a katawan iran a nggolalan ko gedi a lawas iran, a datar
mambo o manga ayam a di matao mamimikiran, na giyanan i ipekebinasa iran.
11 Kemorkaan siran! Ka riyawat iran so pinggolaola i Kain, na miyakipaar siran ko ribat
kaan siran makapangowarta a lagid o pinggolaola i Balaam. Somiyopak siran pen ko
kadato a lagid o pinggolaola i Korah na makapembagian siran ko kiyasiksaa rekaniyan.
12 Lagid siran o manga daket a lomolook rekano sii ko dii kapamagatoang o magaagama.
Da a ikeya iran na aya bo a petordon iran na so bo so ginawa iran. Lagid siran o manga
gabon a ipembayog o ndo a kena a ba makaaawid sa oran. Lagid siran pen o manga kayo
a di pemangonga apiya igira a mosim a ipegonga iran, na miyakadowa siran matay, ka
piyamadot pen.
13 Lagid siran o manga ala a begel ko ragat a ipendidi iyan so piyakayaya a manga olaola
iran. Lagid siran o taridadag a manga bitoon a inisenggay kiran so darpa a tanto a
miyakaliboliboteng sa taman sa pakataman.
14 Si Inok a ikapito apid a kiyababadan ko Adam na miyaalamat iyan so makapantag

sangkoto a manga taw a tig iyan a “Ilaya niyo man, ka pekaoma so Kadnan a oonotan o di
bo den pira nggibo a soti a manga malaikat iyan
15 Kaan iyan makokom so langon a taw ago madaneg iyan so langon a baradosa ko
langon a manga rarata a galebek iran ago so langon a kiyapagongatongata o manga rarata
a baradosa ko Allah.”
16 Pepanemotemod ago pepanarotaro angkai a manga taw. Pepangonotan iran so manga
rarata a kabaya iran. Manga takabor siran, na di ran dii mbantobantogen so ped kaan iran
makamal so antap iran.
So manga Lalangan ago manga Insarat
17 Ogaid na sekano a manga pekebabayaan ko, tanodi niyo so pitero gowani o manga
siyogo o Kadnan tano a Isa Al Masih.
18 Ka pitero iran rekano a sii ko kaposan a manga gawii na pekagemaw so manga taw a
pegongatongat rekano ago pemangonot siran ko manga rarata a kabaya iran.
19 Siran i manga taw a makapembelabelag rekano. Madadalem siran ko kapaar o
kamamanosiyai kiran a da on so Soti a Roh.
20 Ogaid na sekano, manga pekebabayaan ko, na pepakabagera niyo a ginawa niyo sii ko
lebi a soti a paratiyaya niyo ago nggolalan ko kapepangangarapan iyo a makipapaar kano
ko Soti a Roh.
21 Tatapa niyo a ginawa niyo sii ko kapekebabayai rekano o Allah sii ko kapepanayawa
niyo ko kaoyagoyag a da a kaposan iyan a imbegay rekano o Kadnan tano a Isa Al Masih
sabap ko limo iyan.
22 Kapediin iyo so siran oto a pekedowadowaan.
23 Sabeta niyo siran a datar o kapagagawa niyo kiran a poon ko apoy. So ped na kapediin
iyo a sarta o kalek a ipekegowad iyo apiya so nditaren iran a kiyaseboan ko manga rarata
a baya a ginawa iran.
Kapodi ko Allah
24 So podi na rek o Allah a makapegipat rekano kaan kano di kirepang ago makawit
rekano ko kababantogan a hadapan iyan sa da a daway niyo ago tanto kano a pekebabaya;
25 So aya bo Tohan a Pepanabet rektano a nggolalan ki Isa Al Masih a Kadnan tano na
rek iyan so bantogan, pangkatan, kapaar, ago gees ipoon den sa poonan, ago imanto, ago
taman sa pakataman! Amin.
MIYAPAYAG
MIYAPAYAG 1
Misosorat sii so manga nganin a miyapayag o Allah ki Isa Al Masih kaan iyan mapakiilay
ko manga oripen iyan so manga keolaola a magaan den makataligoma. Na piyakitokawan
ai o Al Masih ko oripen iyan a si Yahiya a nggolalan ko malaikat a siyogo iyan on,
2 Na piseksian i Yahiya so langon a miyailay niyan makapantag ko katero o Allah ago so
kiyapemataani ron i Isa Al Masih.
3 Rarakmatan so pembatiya sangkai a taabir, ago rarakmatan so siran oto a pepamakineg
on ago tatagoon iran sa ginawa so misosorat on, ka magaan den so kakitoman iyan.
Manga Salam ko Pito a Agama
4 Alamat sorat ako i Yahiya makasampay ko pito a Agama sa probinsiya a Asiya.

Pengnin ko a matatap rekano so limo ago kalilintad a poon ko Allah a kapapantagan den
imanto ago gowani ago aya pekatalingoma, ago poon ko pito a niyawa a sii matatago ko
hadapan o korsi iyan,
5 Ago poon ki Isa Al Masih a so kasasarigan a saksi, a aya onaan o langon a miyaoyag a
poon ko miyamatay, a aya mambo Pangolo o manga dato sa doniya.
Pekebabayaan tano niyan na miyapokas tano niyan ko manga dosa tano a nggolalan ko
kiyatoga o rogo iyan
6 Na biyaloy tano niyan a ndatoan iyan a manga imam a makapenalagad ko Allah a Ama
iyan. Rek iyan so bantogan ago kapaar sa taman sa pakataman! Amin.
7 Ilaya niyo, ka pekaoma sekaniyan a oonotan o manga gabon.

Keilay sekaniyan o oman i isa,
a rakes o siran oto a somiyoker on.
Pendiyagaw so langon a taw sabap rekaniyan.
Mataan den ai! Amin.
8 “Saken so Alpa ago so Omiga,” a tig o Kadnan a so Lebi a Mamaapaar a Tohan a aya
kapapantagan den imanto ago gowani, ago aya pekatalingoma.
So Pangingilain ko Isa Al Masih
9 Saken a si Yahiya a pagari niyo na di aken dii mbagianen a rakes iyo ko manga
karomasayan ago so Ndatoan ago so kapakatiger a rek tano sii ko kaiisaisa tano ago so
Isa. Initaog ako ko balet a Patmos sabap ko kiyapakalangkapa ko ko katero o Allah ago so
kiyaseksii ko ki Isa.
10 Sii ko Gawii a rek o Kadnan na inipaar ako o Roh, na miyaneg aken sii sa likod aken a
matanog a sowara a miyaolaleng a datar o bogiyong.
11 Pitero iyan a “Soraten ka ko ribro so keilay ngka na pakawiten ka ko pito a Agama roo
sa Ipisos, sa Ismirna, sa Pirgamo, sa Tiyatira, sa Sardis, sa Piladilpiya, ago giya
Laodisiya.”
12 Dominingil ako ka pagilain ko o antawaa i di raken dii makimbitiyarai na kagiya

domingil ako na miyailay aken so pito timan a palitaan a bolawan.
13 Sii ko look iran na tomitindeg on so datar o Wata o Manosiya a ndiditar sa kimon a
iraraot sa ai niyan, na aden a ililikos on a bolawan sa rareb.
14 So bok iyan na miyakapotipoti a lagid o bombol a bilibili o di na giyaw. So manga
mata niyan na lagid o pekerab a apoy.
15 So manga ai niyan na pesigay a lagid o tombaga a tiyonaw ko tonawa. So sowara
niyan na lagid sa kadagedeb o mala a tataya.
16 Komakapet sekaniyan sa pito a manga bitoon sii sa kawanan a lima niyan, na
pepakapoon ko ngari iyan so magarang a pedang a dowa i garangan. So paras iyan na
pakasirang a datar o alongan igira a maooto.
17 Kagiya mailay aken sekaniyan na minilampes ako sii ko ai niyan a datar ako o
miyatay. Iniseko iyan raken so kawanan a lima niyan a tig iyan a “Di ka pekalek! Saken
so Monapona ago so Moripori.
18 Saken so oyagoyag. Miyatay ako, ogaid na ilaya ngka man ka oyagoyag ako sa taman
sa pakataman! Aden a kapaar aken ko kapatay ago so kaden o miyamatay.
19 “Soraten ka so miyailay ngka a pekeolaola imanto ago so ped a mapenggolaola amay

ka maipos ai.
20 Kataya so pageemaan a maana o pito a manga bitoon a miyailay ngka sii sa kawanan a
lima ko ago so pito timan a palitaan a bolawan. So pito a bitoon na giyoto so manga
nakoda o pito a Agama, na so pito a palitaan na giyoto so pito a Agama.”
MIYAPAYAG 2
So Katero para sa Agama sa Ipisos
“Soraten ka ini a ipekawit ko nakoda o Agama roo sa Ipisos:

Giyai i pitero o komakapet ko pito a bitoon sa kawanan a lima niyan a pelalakaw sii ko
look o pito a palitaan a bolawan.
2 Katawan aken o antonaa i miyanggolaola ngka, ago so kiyapanamari ngka ko galebek
ka, ago so kiyapakatiger ka. Katawan aken a di ngka kesabar so manga rarata a taw ago
tipengan ka so siran oto a pepanaliba sa manga nabi kon na miyapariksa a ka a manga
bokeg siran.
3 Manginginsabar ka ago tiniger ka so kareregeni reka sabap ko ingaran aken na da ka
den dokawi.
4 Ogaid na aden a indaway aken reka a giyai: di ako ngka pekebabayaan a datar isako
paganay.
5 Tanodi ngka i kala a kiyapakasilay ngka! Salina ngka so manga olaola ngka ago sowaa
ngka so miyanggalebek ka isako paganay. O di ngka selina so manga olaola ngka na song
ako reka na kowaan ko so palitaan ka ko katitindegan iyan.
6 Ogaid na aya kapiya ngka na giyai: ipekegowad ka so manga galebek o manga
Nikolaitan a datar o kipekegowaden ko ron.
7 So aden a tangila niyan na pamakinega niyan so dii teroon o Roh ko manga Agama.
So pekataban na mbegan ko sa kabenar sa kapakakan iyan ko onga o kayo a pepangoyag a
sisii ko sapadan o Allah.
So Katero para ko Agama sa Ismirna
8 “Soraten ka ini a ipekawit ko nakoda o Agama roo sa Ismirna:
Giyai i pitero o aya den monapona ago moripori, a miyatay ago miyaoyag bo peroman.
9 Katawan aken so manga karomasayan ka ago so kamimiskini reka, ogaid na aya mataan
na kawasa ka! Katawan aken pen a di reka dii kapagitowitoa o manga taw a dii
mamagomanta sa manga Yahodi siran, ogaid na kena, ka manga sakop siran bes o Iblis.
10 Di ngka keleken so manga karomasayan a magaan den a keokitan ka. Pekikalaboso o
Iblis so ped rekano kaan kano ron katepengi, na setroon kano ko makasapolo gawii. Na
paparatiyaya ka den sa taman sa kapatay, ka imbegay aken reka so sangkad a so
kaoyagoyag.
11 So aden a tangila niyan na pamakinega niyan i dii teroon o Roh ko manga Agama.
So pekataban na di kapekasakitan o ikadowa a kapatay.
So Katero para ko Agama sa Pirgamo
12 “Soraten ka ini a ipekawit ko nakoda o Agama roo sa Pirgamo:
Giyai i pitero o komakapet ko magarang a pedang a dowa i garangan.

13 Katawan aken a sii ka babaling ko kaden a katatagoan ko korsi o Iblis. Apiya oto na
kakapetan ka pen so Ingaran aken, na da ngka awai so paratiyaya ngka raken apiya sii ko
manga gawii a kiyabonoa ki Antipas a kasasarigan a saksi aken a biyono san ko inged iyo
a ron mababaling so Iblis.
14 Ogaid na aden a da bo makapira a indaway aken reka. Aden a ped rekano a petoman
ko ndao i Balaam. Inipangendao niyan ki Balak o andamanaya i kapakandosaa niyan ko
manga taw sa Israil a nggolalan ko kakana iran ko pangenengken a inisapaat ko manga
barahala, ago so kiyasebo iran.
15’Na sesan reka mambo so ped a petoman ko ndao o manga Nikolaitan.
16 Na talikodi ngka so manga dosa ngka! Ka o di, na song ako reka san sa magaan na
makipetidawa ako sangkanan a manga taw a pagosaren aken so pedang a pepakapoon ko
ngari aken.
So pekataban na imbegay aken rekaniyan so ped ko misosolen a roti, na mbegan aken pen
sa mapoti a ator a ron misosorat so bago a ngaran a da a matao ron a rowar ko pekakowa
on.
So Katero para ko Agama sa Tiyatira
18 “Soraten ka ini a ipekawit ko nakoda o Agama roo sa Tiyatira:
Giyai i pitero o Wata o Allah a aden a mata niyan a lagid o pekerab a apoy, na so ai niyan
na pesigay a lagid o piyakatenang a tombaga.
19 Katawan aken so manga galebek ka, so kapekebabayai ngka ko ped, so paratiyaya
ngka, so kapepanalagad ka, ago so kapepanginsabar ka. Katawan aken pen a mala so di
ngka dii nggolaolaan imanto a di isako mona.
20 Ogaid na aden a indaway aken reka. Giyangkanan a babay a si Yisabil a dii

magomanta sa nabi sekaniyan na peperon ka so kapepangendaowa niyan ko manga oripen
aken, na pegagaken iyan siran sa kapakasebo iran ago kapakakan ko pangenengken a
inisapaat ko manga barahala.
21 Bigan aken sekaniyan sa oras sa katalikodi niyan ko di niyan dii kasebo, ogaid na da
niyan den ai nggolaolaa.
22 Kagiya ka maoto na indebak aken sekaniyan ko igaan a ron den kerasay, na siran oto a
miyakisebo on na tanto aken a siksaan o di iran telikodi so manga rarata a pinggolaola
iran a ped angkoto a babay.
23 Pemonoon ko pen so manga wata iyan, na ketokawan o langon a manga Agama a
saken i matao ko madadalem ko pamikiran ago poso o taw, na imbadal aken ko oman i
isa rekano so patot ko manga galebek iyan.
24 Ogaid na so manga ped rekano san sa Tiyatira a da iran tomana angkanan a marata a
ndao ago da mambo mamakasowa ko manga nganin a bebetowan sa 'Maregen saboten a
manga isosolen o Iblis,' na teroon ko rekano a da den a ped a ipenton aken rekano.
25 Ogaid na disomala a kapetan iyo piyapiya so sisii rekano den taman sa di ako
makaoma.
26 So pekataban a dii nggolaola ko kabaya aken taman ko kaposan na mbegan aken

sekaniyan sa kapaar ko manga nasiyon,
27 A giyoto so kapaar a miyatarima aken a poon ko Ama aken, na
Ipendato iyan kiran so badas a potaw,

na peropeten iyan siran a lagid o manga koden a bote.
28 Na imbegay aken on pen so Bitoon a Makabanges.
MIYAPAYAG 3
So Katero para ko Agama sa Sardis
“Soraten ka ini a ipekawit ko nakoda o Agama roo sa Sardis:
Giyai i pitero o komakapet ko pito a Roh o Allah ago so pito a manga bitoon. Katawan
aken so manga galebek ka. Mapipikir o kalangolangon a oyagoyag ka, apiya pen o maatay
ka.
2 Pagnaw ka! Pakabagera ngka so miyalamba a sisii reka a magaan den matay, ka
miyailay aken a da matarotop so manga galebek ka ko kapegilaya on o Tohan ko.
3 Kagiya ka maoto na tademi ngka so manga ndao a miyaneg ka ago miyatarima a ka.
Tomana ngka ini na talikodi ngka so manga dosa ngka. O di ka pegnaw na song ako reka
a datar o tekew, na di ngka ketokawan so oras a kapekaoma ko.
4 Ogaid na aden pen a pipira kataw a ped ka san sa Sardis a da iran pakiboringi so manga
nditaren iran, na melalakaw siran a ped aken a ndiditar sa mapoti, ka mapapatot siran sa
kapenggolaola iran sii.
5 So pekataban na penditaran sa mapoti, na di aken ponasen so ngaran iyan ko ribro a

kasosoratan ko aden a manga kaoyagoyag iyan. Na peyagen ko a kaom aken sekaniyan sii
ko hadapan o Ama aken ago so manga malaikat iyan.
6’So aden a tangila niyan na pamakinega niyan so dii teroon o Roh o Allah ko manga
Agama.
So Katero para ko Agama sa Piladilpiya
7 “Soraten ka ini a ipekawit ko nakoda o Agama roo sa Piladilpiya:
Giyai i pitero o soti ago so benar, a aya komakapet ko gonsi o Daod. Saden sa kelekaan
iyan na da a pekalekeb on, na saden sa kelekeban iyan na da a pekaleka on.
8 Katawan aken so manga galebek ka. Ilaya ngka man, ka miyakaleka ako den sa pintoan
sii ko hadapan ka a da den a ba on pekalekeb, Katawan ko a apiya pen maito a bager ka
na tiyoman ka so katero aken ago da ngka pelaon so ingaran aken.
9 Na giyangkoto a manga sakop o Iblis a dii mamagomanta sa manga Yahodi siran ogaid
na baden manga bokeg na pekadarpaan ko siran reka ago pekasodiyoden ko siran ko
hadapan o ai ngka, na ketokawan iran a pekebabayaan ko seka.
10 Sabap sa tiyoman ka so inisogo aken a pesebar ka na pelindingen ko seka ko oras a
tiyoba a pekatalingoma ko dalem a doniya a itepeng ko manga taw a kibabaling on.
11 Pekaoma ako sa magaan. Kakapeti ngka so sisii reka kaan da a ba pekaagaw ko
sangkad a imbalas reka.
12 So pekataban na mbalowin aken a polaos ko Timplo o Tohan aken na di sekaniyan den

meliyo peroman. Isorat aken rekaniyan so Ingaran o Tohan aken ago so ngaran o siti o
Tohan aken, a so bago a Yarosalim a pekapanog a poon sa kasorgaan a poon ko Tohan
ko. Na isorat aken on pen so bago a ingaran aken.
13’So aden a tangila niyan na pamakinega niyan so dii teroon o Roh ko manga Agama.
So Katero para ko Agama sa Laodisiya
14 “Soraten ka ini a ipekawit ko nakoda o Agama roo sa Laodisiya:
Giyai i pitero o 'Amin,' a so kasasarigan ago benar a saksi ago so poonan o langon a
inaden o Allah.
15 Katawan aken so manga galebek ka. Katawan aken a kena a ba ka matenggaw, na kena
a ba ka mayaw. Kabaya aken a matenggaw ka o di na baden mayaw!
16 Ogaid na sabap sa malokeloke ka, a kena a ba mayaw o di na matenggaw, na pagotaan
ko seka!
17 Di ngka dii teroon a “Kawasa ako. Miyakatamok ako na da den a makokorang raken,"
ogaid na di ngka katawan a kareregenan ka, dowandowaan, miskin, mabobota, ago
matatalandiyang.
18 Sabap san na pagosiyatan ko seka sa pamasa ka raken sa lombos a bolawan kaan ka
kewasa. Pamasa ka pen sa mapoti a manga nditaren a isolot ko lawas ka kaan kasapengi
so piyakayaya a katatalandiyang iyan. Na pamasa ka raken pen sa bolong a ipagibong sa
mata ngka kaan ka makailay.
19 Siran oto a pekebabayaan ko na pepakatanoren aken ago pendanegen. Kagiya ka
maoto na kasigin ka a kapegalina ngka ko manga oloala ngka.
20 Ilaya ngka man, ka tomitindeg ako ko pintoan a pepanonotok. O aden a makaneg ko
sowara ko ago lekaan iyan so pintoan na mbolos ako ron, ka magatoang ako a ped iyan na
makipegatoang sekaniyan raken mambo.
21 So pekataban na pekaontoden aken a ped aken ko korsi aken a datar mambo o

kiyapakataban aken a miyakaontod ako a ped o Ama aken ko korsi iyan.
MIYAPAYAG 4
So Korsi roo sa Kasorgaan
Kagiya maipos oto na miyakailay ako sa pintoan a kalelekaan roo sa kasorgaan.
So sowara a miyaneg aken gowani a di raken dii makimbitiyarai a miolaleng a datar o

bogiyong na pitero iyan a “Panik ka sii, ka pekiilay aken reka so kesowasowa amay ka
maipos ai”
2 Sagogona na inipaar ako o Roh na miyailay aken roo sa kasorgaan so isa a korsi a aden
a moontod on.
3 Sominimag so paras o moontod on a lagid o manga montiya a yaspir ago sardiyos, na sii
ko melilibeta ko korsi na aden a tihaya ron a datar sa warna o montiya a ismiralda.
4 Lilibeten ai o dowa polo ago pat a ped a korsi a oontodan o dowa polo ago pat a
pelokelokesen a kindiditar sa mapoti ago kisasangkad sa bolawan.
5 Poon ko korsi na pepamangiteras on so manga kilat, a sasartaan o domadagedeb a parti
a dalendag, na aden a pito timan a kikatetenteman on a solo a pekadeg ko hadapan o korsi
a giyoto so pito a Roh o Allah.
6 Sii ko danga o korsi na aden a datar on o ragat a kapegalongan a lagid sa kalingaw o
kristal.
Sii ko oman i sabala ko korsi na aden a makalilibet on a pat timan a oyagoyag a kaaden a
malalangkap a manga mata so sangoran iran ago giya likod iran.
7 So paganay a oyagoyag a kaaden na peparas sa arimaw, so ikadowa na peparas sa nati a
sapi, so ikatelo na aya paras iyan na lagid o manosiya, na so ikapat na peparas sa agila a
dii melayolayog.
8 Oman i isa ko pat a oyagoyag a kaaden na nem timan a papak iyan a lalangkapen a
manga mata sa poro ago sa baba. Gagawii daondaw na da a rintas o di ran dii kateroa sa
“Soti, soti, soti so Kadnan a Lebi a Mamaapaar a Tohan

a aya kapapantagan den gowani ago imanto ago aya pekatalingoma.”
9 Na oman peladen angkoto a pat a kaaden so bantogan, pangkatan, ago kapanalamat ko

moontod ko korsi a oyagoyag sa taman sa pakataman,
10 Na pesodiyod on so dowa polo ago pat a pelokelokesen ko hadapan o moontod ko
korsi na pesimbaan iran sekaniyan a oyagoyag sa dayon sa dayon. Na ipegitog iran so
manga sangkad iran ko hadapan o korsi a tig iran a
11 “Mapapatot ka, Kadnan ami ago Tohan,

sa katarimaa ngka ko bantogan, pangkatan, ago kabatowa
ka seka i miyaden ko langon taman
na nggolalan ko takdir ka na miyaaden siran
ago kiyabegan sa kaoyagoyag.”
MIYAPAYAG 5
So Lololonen a Pematiyaan ago so Bilibili
Samaoto na miyakailay ako sa lololonen a pematiyaan sii sa kawanan a lima o moontod

ko korsi a sosoratan ai sa soled ago sii sa liyo a sisiliyowan sa pito a siliyo.
2 Miyailay aken pen so isa a mala i gees a malaikat a pitero iyan sa matanog a “Antawaa i
mapapatot sa kapokasa niyan ko manga siliyo ai ago so kabekara niyan sangkai a liyolon
a pematiyaan?”
3 Ogaid na roo sa kasorgaan ago sii sa doniya ago sa didalem o doniya na da den a ba
pekabekar ko ribro o di na ba pekailay ko soled iyan.
4 Na tanto ako a somigad ka kagiya da den a ba miyatoon a mapapatot sa kabekara niyan
ko pematiyaan o di na so kailaya niyan ko soled iyan.
5 Pitero raken o isa ko pelokelokesen a “Di ka pesegad! Ilaya ngka man, ka miyakataban
so Arimaw ko mbatabataa a Yoda, a so kababantogan a moriyataw o Daod, na kepokas
iyan so pito a manga siliyo ago kebekar iyan so liyolon a pematiyaan."
6 Mandiyadi na miyailay aken so isa a Nati a Bilibili a tomitindeg ko pageletan o korsi

ago so pat a oyagoyag a manga kaaden. Lilibeten sekaniyan o manga pelokelokesen na
aya kapegilaya rekaniyan na datar o ba miyasombali den. Aden a pito a manga panga
niyan ago pito a manga mata. Giyoto so pito a Roh o Allah a piyakapagenebeneb sa
dalem a doniya.
7 Inobay o Nati a Bilibili so moontod ko korsi na kinowa niyan so liyolon a pematiyaan a
poon sa kawanan a lima niyan.
8 Kagiya makowa niyan ai na so pat a oyagoyag a manga kaaden ago so dowa polo ago
pat a manga pelokelokesen na miyamanodiyod ko hadapan o Nati a Bilibili. So oman i isa
kiran na aden a awid iyan a kotiyapi iyan ago ladiya a bolawan a mapepeno a doka.
Giyoto so manga pangararapan o manga kaom o Allah.
9 Dominidaw siran sa bago a kadidaw a tig iran a
“Mapapatot ka sa kakowaa ngka ko lololonen a pematiyaan ago so kapokasa ngka ko

manga siliyo niyan
ka nggolalan ko kiyasombalia reka na iniaon ka so rogo o ka
ko manga taw a imbegay ngka ko Allah a poon ko oman i isa ka mbatabataa, oman i basa,
oman i bangsa, ago oman i nasiyon.
10 Biyaloy ngka siran a ndatoan a manga imam a makapenalagad ko Tohan tano,
na pendato siran sa doniya.”
11 Miyangilailay ako peroman na miyaneg aken so sowara o di bo den pira nggibo a

manga malaikat a makalilibet ko korsi a ped o manga oyagoyag a kaaden ago so manga
pelokelokesen.
12 Miyagidaida siran sa matanog a:
“Mapapatot so miyasombali a Nati a Bilibili sa katarimaa niyan ko kabatowa,

kakawasaan, ongangen, bager, pangkatan, bantogan, ago podi!”
13 Na miyaneg aken so langon a kaaden roo sa kasorgaan ago sii sa doniya ago sa
didalem a doniya ago sii ko ragat a rakes o langon a matatago on a tig iran a
“So moontod ko korsi ago so Nati a Bilibili na rek iran so podi, pangkatan,
bantogan, ago kapaar sa taman sa pakataman!”
14 Somimbag so pat a oyagoyag a manga kaaden a tig iran a “Amin.” Na somiyodiyod so

manga pelokelokesen na sominimba siran.
MIYAPAYAG 6
So Manga Siliyo
Miyailay aken a piyokas o Nati a Bilibili so paganay ko pito a siliyo, na miyaneg aken so
sowara a datar o dalendeg a miyakapoon ko isa ko pat a oyagoyag a kaaden a tig iyan a
“Song ka sii!”
2 Na miyailay aken so isa a mapoti a koda, na so kokoda on na komakapet sa pana. Bigan
sekaniyan sa sangkad na lomiyalakaw a tomataban kaan makapepanaban.
3 Kagiya mapokas o Nati a Bilibili so ikadowa a siliyo na miyaneg aken so ikadowa a

oyagoyag a kaaden a tig iyan a “Song ka sii!”
4 Na gomimaw so isa pen a koda a mariga, na so kokoda on na bigan sa kapaar sa
kakekowai niyan sa kalilintad ko doniya kaan makapepataya so manga taw, na bigan
sekaniyan sa mala a pedang.
5 Kagiya mapokas o Nati a Bilibili so ikatelo a siliyo na miyaneg aken so ikatelo a

oyagoyag a kaaden a tig iyan a “Song ka sii!” Na miyailay aken so ped a koda a maitem,
na so kokoda on na mabibibit sa timbangan.
6 Miyakaneg ako sa sowara a miyakapoon ko look o pat a oyagoyag a kaaden a tig iyan a
“Isa ka litro a trigo na makapegarga ko sokay ko salongan, ago telo ka litro a bantad na
makapegarga ko sokay ko salongan. Ogaid na di ngka mbinasaa so lana olibi ago so
arak.”
7 Kagiya mapokas o Nati a Bilibili so ikapat a siliyo na miyaneg aken so ikapat a

oyagoyag a kaaden a tig iyan a “Song ka sii!”
8 Na sarta a miyailay aken so ped pen a koda a mapotipoti a aya ngaran o kokoda on na so
Kapatay, na tomotondog on sa marani so Kaden o Miyamatay. Bigan siran sa kapaar sa
kapamonoa ko manga taw ko ikapat bagi ko doniya a nggolalan ko pedang, taon,
paniyakit, ago manga iila a binatang sa doniya.
9 Kagiya mapokas o Nati a Bilibili so ikalima a siliyo na miyailay aken sii ko didalem o
aparan so manga niyawa o siran oto a miyanga bobono sabap ko katero o Allah ago so di
ran on dii kaseksii.
10 Milalalis siran sa matanog a tig iran a “Hey Kadnan a Lebi a Mamaapaar a soti ago
benar, ay katey pen a kapepooni ngka komokom ko manga taw sa doniya ago so
kandanega ngka kiran sabap ko kiyapamonoa rekami.”
11 Na bigan so oman i isa kiran sa mapoti a kimon, na pitero kiran a deke siran sa di bo
matey taman sa matarotop so kadakel o manga ped iran a oripen ago manga pagari ran a
pemonoon mambo a datar iran.
12 Na miyailay aken a piyokas o Nati a Bilibili so ikanem a siliyo na milinog sa tanto a

mabager. Miyakaitem so alongan a lagid o maitem a bombol a ayam, na miyakariga so
olan a lagid o rogo.
13 So manga bitoon sa langit na miyanga oolog sa lopa a lagid o kapepanga oolog o
manga onga o kayo a korma igira a pekekoyong o mabager a ndo.
14 Miyadadas so langit a lagid o pelolonen a karatas, na oman i palaw ago polo na
miniiseg ko kabebetadan on.
15 Sa maoto na so manga dato sa doniya, so manga barabangensa, so manga olowan o
manga sondaro, so manga kawasa, so manga ala i gees, ago so langon a ped a taw a
manga oripen ago kena a ba oripen na mitetapok siran sii ko manga liyang ago sii ko
pageleteletan o manga lakongan ko manga palaw.
16 Na pepananalowan iran so manga palaw ago manga lakongan a tig iran a “Tempagi
kami niyo ago dalongi kami niyo ko kapegilaya rekami o moontod ko korsi ago sii ko
rarangit o Nati a Bilibili,
17 Ka miyakatalingoma den so mala a gawii ko rarangit iran na antawaa i
makapemayandeg sii?”
MIYAPAYAG 7
So Magatos ago Pat Polo ago Pat Nggibo a manga Israil
Kagiya maipos oto na miyailay aken so pat a malaikat a tomitindeg ko pat a rogo o doniya
a pegrenen iran so pat a ndo ko doniya kaan di pekasamber sa lopa o di na sa ragat o di na
sii ko apiya antonaa kayo.
2 Miyailay aken so ped a malaikat a gomimaw a poon sa sebangan a pegawidan iyan so
ipetiyap o oyagoyag a Tohan. Liyalis iyan sa matanog so pat a manga malaikat a bigan o
Allah sa kapaar sa kapekarataa ko lopa ago so ragat
3 A tig iyan a “Di niyo pekarataa so lopa o di na so ragat o di na so manga kayo taman sa
katiyapan ami so manga oripen o Tohan tano sii ko manga beneng iran.”
4 Na miyaneg aken so kadakel angkoto a kiyatiyapan, na magatos ago pat polo ago pat
nggibo a taw a poon ko oman i isa ka mbatabataa ko manga taw sa Israil.
5 Sapolo ago dowa nggibo a poon ko mbatabataa a Yoda a kiyatiyapan,

sapolo ago dowa nggibo a poon ko mbatabataa a Robin,
sapolo ago dowa nggibo a poon ko mbatabataa a Gad,
6 Sapolo ago dowa nggibo a poon ko mbatabataa a Asir,
sapolo ago dowa nggibo a poon ko mbatabataa a Naptali,
sapolo ago dowa nggibo a poon ko mbatabataa a Manasih
7 Sapolo ago dowa nggibo a poon ko mbatabataa a Simiyon,
sapolo ago dowa nggibo a poon ko mbatabataa a Libi,
sapolo ago dowa nggibo a poon ko mbatabataa a Isakar,
8 Sapolo ago dowa nggibo a poon ko mbatabataa a Sibolon,
sapolo ago dowa nggibo a poon ko mbatabataa a Yosop,
ago sapolo ago dowa nggibo a poon ko mbatabataa a Baniyamin a kiyatiyapan.
So Bariboribo a manga Taw a Kindiditar sa Mapoti
9 Oriyan ai na miyailay aken so bariboribo a taw a da a ba on pekabilang a poon ko oman

i nasiyon, oman i isa ka mbatabataa, oman i bangsa, ago oman i basa. Tomitindeg siran
ko hadapan o korsi ago so Nati a Bilibili a kindiditar siran sa manga popoti a kimon ago
kikakapet sa manga meraraon a sapak.
10 Pepelalis siran sa matanog a tig iran a “So kapenabet na rek o Tohan tano a moontod
ko korsi ago so Nati a Bilibili!”
11 Tomitindeg so langon a malaikat a lomilibet ko korsi a rakes o manga pelokelokesen
ago so pat a oyagoyag a kaaden, na miyamanodiyod siran ko hadapan o korsi ago
miyamanimba ko Allah
12 A tig iran a
“Amin!
So podi, bantogan, ongangen, manga panalamat, pangkatan, kabatowa, ago bager
na rek o Tohan tano sa taman sa pakataman! Amin!”
13 Na inisean ako o isa ko manga pelokelokesen a tig iyan a “Giyangkai a manga taw a
kindiditar sa mapoti na antawaa siran ago anda siran poon?”
14 Simbag aken sekaniyan a “Di ko katawan, Sir. Katawan ka den.” Tig iyan raken a
“Siran so manga taw a miyakaokit ko mala a kasatroan. Pinipian iran so manga kimon
iran ago piyakapoti iran sii ko rogo o Bilibili.
15 Giyanan i sabap a sisii siran ko hadapan o korsi o Allah a pepanalagad rekaniyan sa
daondaw gagawii sii ko Timplo niyan. Sekaniyan a moontod ko korsi na pelindingen iyan
siran a nggolalan ko kapepakakaden iyan kiran.
16 Di siran den keor o di na kewaw aya pen o ba siran kasakiti ko karanti o alongan o di
na apiya antonaa a mayaw.
17 Ka so Nati a Bilibili a sisii ko danga o korsi na aya kiran tegikor. Pagagaken iyan siran
ko manga bowalan o ig a pepangoyag, na sisingen o Allah so oman i lo ko manga mata
iran.”
MIYAPAYAG 8
So Ikapito a Siliyo
Kagiya mapokas o Nati a Bilibili so ikapito a siliyo na aden a kiyarenek roo sa kasorgaan
sa manga tenga sa oras.
2 Na miyailay aken so pito a manga malaikat a kititindeg ko hadapan o Allah, na bigan
siran sa pito a bogiyong.
3 Aden a isa pen a malaikat a miyakaoma a maawid sa pananagoay a bolawan a

petotongan sa doka, na tominindeg sekaniyan ko hadapan o aparan. Bigan sekaniyan sa
madakel a doka a mipagoman iyan ko manga pangangarapan o langon a kaom o Allah
kaan iyan misapaat sii ko aparan a bolawan ko hadapan o korsi.
4 Na so bel o peketotong a doka a rakes o manga pangangarapan o manga oripen o Allah
na minibayaw a poon ko lima o malaikat a tomitindeg ko hadapan o Allah.
5 Na kinowa o malaikat so petegoan sa doka na pino iyan a apoy a poon ko aparan na
inilebad iyan sii sa doniya, na mindadalendeg, domiyagedeb, mikilakilat, ago milinog.
So manga Bogiyong
6 So pito a manga malaikat a maawid sa pito a manga bogiyong na mitiyagar siran sa
kapekaoniya iran on.
7 Miyamogiyong so maoona a malaikat na inoranan so lopa sa giyaw ago apoy a

kasasaogan sa rogo. Miyatotong so ikatelo bagi ko lopa, na miyatotong pen so ikatelo
bagi ko manga kayo ago so langon a paotanotan.
8 Miyamogiyong so ikadowa a malaikat na aden a minilebad roo sa ragat a lagid sa paras

o mala a palaw a pekerab, na miyabaloy a rogo so ikatelo bagi ko ragat,
9 Na miyamatay so ikatelo bagi ko manga baraniyawa ko ragat, na miyanga gegeba so
ikatelo bagi ko manga kapal.
10 Miyamogiyong so ikatelo a malaikat na miyaolog a poon sa langit so isa a mala a

bitoon a komakarab a datar o barabad, na miyakatana ini ko ikatelo bagi ko manga
lawasaig ago manga bowalan.
11 Aya ngaran angkoto a bitoon na “Mapait,” na miyakapait so ikatelo bagi ko manga ig,
na madakel a taw a miyamatay ko kiyainoma iran on, ka mapait.
12 Miyamogiyong so ikapat a malaikat na kiyabinasaan so ikatelo bagi ko alongan, so

ikatelo bagi ko olan, ago so ikatelo bagi ko manga bitoon. Miyakaliboteng so ikatelo bagi
kiran, na da den a kaliwanag o ikatelo bagi ko daondaw ago so gagawii.
13 Miyangilailay ako na miyaneg aken so isa a agila a pepelayolayog sa kawang a pitero

iyan sa matanog a “Kemorkaan, kemorkaan, kemorkaan so langon a kibabaling sa doniya
amay ka mamangoni so manga bogiyong o telo a ped a malaikat!”
MIYAPAYAG 9
Miyamogiyong so ikalima a malaikat na miyailay aken so isa a bitoon a miyaolog ko lopa
a poon sa langit, na bigan angkai a bitoon sa gonsi para ko mala a landeng a da a
pitetamanan a kadalem iyan.
2 Likaan iyan so mala a landeng na somiyalepot on so bel a datar o bel a poon ko mala a
rapog. Na miyakaliboteng so alongan ago so langit sabap ko bel a poon ko mala a
landeng.
3 Na poon ko bel na minggegemaw ron so manga tarapan a tomiyana sa lopa, na bigan
siran sa kabisa a lagid o kabisa o manga orang sa doniya.
4 Pitero kiran a di iran mbinasaa so manga otan, o di na apiya antonaa pamomolan o di na
kayo, ka aya bo a kapekasakitan iran na so manga manosiya a da a tiyap on o Allah sii ko
manga beneng iran.
5 Da peroa ko manga tarapan a kapamonoa ko manga taw, ka giya bo a kapekasakiti kiran
ko soled o lima olan. Na so masakit iran na lagid o kasakit ko kasasakiti ko taw a inebot o
orang.
6 Sii ko soled angkoto a lima olan na tomoon o manga taw a mamatay siran ogaid na di
siran pematay ka pelagoyan siran o kapatay.
7 Peparas angkoto a manga tarapan sa manga koda a miiktiyar makitidawa. Sii ko manga
olo iran na aden a lagid on o manga sangkad a bolawan, na so manga paras iran na lagid o
paras a manosiya.
8 So bok iran na lagid o bok o manga babay, na so manga ngipen iran na lagid o ngipen a
arimaw.
9 Meraraben siran sa rareb sa lagid o potaw, na so kapelagapak o manga papak iran na
datar o kapendagedeb o madakel a manga karo a petondaan o manga koda a pepalalagoy
sa katidawa.
10 Aden a manga ikog iran ago pangebot a lagid o orang. So ikog iran na aya katatagoan
ko kapaar iran sa kapepakasakiti ko manga taw ko soled o lima olan.
11 Aya dato iran a so malaikat a komikibir ko mala a landeng a da a pitetamanan a
kadalem iyan. Aya ngaran iyan sa basa a Hibriyo na Abadon, na sii ko basa a Grigo na
Apoliyon, a aya maana niyan na so Pepaminasa.
12 Miyaipos den so paganay a kamoralaan na aden pen a dowa a kamoralaan a

pekatalingoma.
13 Miyamogiyong so ikanem a malaikat na aden a miyaneg aken a sowara a miyakapoon

ko pat a rogo o aparan a bolawan sii ko hadapan o Allah.
14 Pitero o sowara ko ikanem a malaikat a komakapet ko bogiyong a “Bokai ngka so pat
a malaikat a mapapatong ko mala a lawasaig a Yopratis.”
15 Na giyoto a biyokaan angkoto a pat a manga malaikat a miyatiyagar den para sangkoto
a oras, sangkoto a gawii, sangkoto a olanolan, ago sangkoto a ragon kaan iran mapamono
so ikatelo bagi ko manosiya.
16 Miyaneg aken a so kadakel o manga sondaro a kikokoda na dowa gatos ka miliyon.
17 So manga koda ago so kikokoda kiran a miyailay aken sii ko pangingilain aken na
aden a manga raben iran a mariga, ago biro, ago binaning. So olo o manga koda na datar o
olo a arimaw, na pepeliyo ko ngari iran so apoy, ago bel, ago sandawa.
18 So ikatelo bagi ko manga manosiya na miyapatay angkai a telo a kamoralaan a apoy
ago bel ago sandawa a pepeliyo ko ngari o manga koda.
19 Ka so kapaar o manga koda na sii ko manga ngari iran ago ikog. So manga ikog iran
na datar o manga nipay a aden a olo ron na giyanan i ipepakasakit iran ko manga taw.
20 So ped a taw a da mapamatay angkai a telo a siksa na da iran den talikodi so manga
rarata a galebek o manga lima iran, ka da iran geneki so kapesimbaa ko manga saitan ago
so manga barahala a bolawan, pirak, tombaga, ator, ago kayo a di pekailay, di pekaneg,
ago di pekalalakaw.
21 Na da iran den talikodi so kapepamono iran, kapangalintao, kasebo, ago kapamanekew
iran.
MIYAPAYAG 10
So Malaikat ago so Maito a Ribro
Miyailay aken so salakaw pen a mala i gees a malaikat a petena a poon sa kasorgaan a
mapopotos sa manga gabon, a aden a boloto sii ko kaporoan o olo niyan. So paras iyan na
datar o alongan, na so manga ai niyan na datar o manga polaos a apoy.
2 Aden a maito a ribro a maookab sii sa lima niyan. Inidapo iyan so kawanan a ai niyan
sii sa ragat ago so diwang a ai niyan na sii sa kalopaan. Milalis sekaniyan sa matanog a
datar o kapenggengger a arimaw, na kagiya makapelalis na somimbag so pito a dalendeg.
4 Sii ko kiyandadalendeg iran na pesorat ako o kowan, ogaid na miyaneg aken so sowara
a poon sa kasorgaan a tig iyan a “Pagmaa ngka so pitero o pito a dalendeg na di ngka ini
pesoraten.”
5 Na so malaikat a miyailay aken a sesakad sa ragat ago sa lopa na inibayaw niyan a

kawanan a lima niyan sa langit
6 Na misepa sii ko ingaran o Allah a oyagoyag sa taman sa pakataman, a aya miyaden ko
kasorgaan ago so langon a matatago on, so doniya ago so langon a matatago on, ago so
ragat ago so langon a matatago on a tig iyan a “Di den kisendod so kesowasowa,
7 Ka amay ka mamogiyong so ikapito a malaikat na ketoman den so pageemaan a takdir
iyan a so den so miyapayag iyan ko manga oripen iyan a manga nabi.”
8 Mandiyadi na so sowara a miyaneg aken a poon sa kasorgaan na mitero raken peman a

tig iyan a “Song ka ko malaikat a sesakad sa ragat ago sa lopa na kowaa ngka so maookab
a ribro sa lima niyan.”
9 Na inobay aken so malaikat na piyangni aken on a ibegay niyan raken so maito a ribro.
Tig iyan raken a “Kowaa ngka ini ago kana ngka. Mamis ai a datar o gola a teneb sii ko
katatago iyan pen sa ngari i ka, ogaid na mapekapait iyan a tiyan ka."
10 Na kinowa ko so maito a ribro sii sa lima niyan na kiyan aken, na mamis ai sii ko
kasisii niyan pen sa ngari aken a datar o gola a teneb ogaid na kagiya malamed aken na
kiyapaitan on a tiyan aken.
11 Oriyan oto na pitero iran raken a “Paliyogat a kepayag ka peroman so lalag o Allah
makapantag ko madakel a manga bangsa, manga nasiyon, manga basa, ago manga dato.”
MIYAPAYAG 11
So Dowa a Saksi
Bigan ako sa panakes a datar o teken na pitero raken a “Ika roo den na takesa ngka so
Timplo o Allah ago so aparan, na bilanga ngka so pepamanimba roo.
2 Ogaid na di ngka tekesa so lamalama a makaliliyo ko Timplo ka minibegay den ai ko
kena a ba manga Yahodi, na pelagosaken iran so soti a siti sii ko soled o pat polo ago
dowa olan.
3 Na mbegan ko so dowa a saksi aken sa kapaar, na pekalangkapen iran so katero o Allah
sii ko soled o sanggibo ago dowa gatos ago nem polo gawii a ndiditar siran sa sako.”
4 Giyangkai a dowa a saksi na aya den dowa a kayo a Olibi ago so dowa a palitaan a sii
makatitindeg ko hadapan o Kadnan o doniya.
5 O aden a tepeng kiran makasakit na meliyo so apoy sii ko manga ngari iran a
pekabinasa ko manga ridoay ran. Giyanan i okit a kakebonoa ko apiya antawaa a tepeng
kiran makasakit.
6 Aden a kapaar iran sa kalekebi iran ko langit kaan di pekaoran sii ko masa a
kapepakalangkapa iran ko katero o Allah. Aden pen a kapaar iran sa kapembaloya iran a
rogo ko manga ig, ago so kasiksaa iran ko manga taw sa doniya apiya antonaa i masa a
kabaya iran.
7 Oriyan o kiyapakalangkapa iran ko katero o Allah na makipetidawa kiran so binatang a

penik a poon ko mala a landeng, na pegesen iyan siran ago mbonoon.
8 Keketer so manga bangkay iran sii ko lalan o mala a siti a ron miyatotok so Kadnan iran
ko kros. Aya initanda a ipembeto sangkoto a siti na 'Sodom' ago 'Misir'.
9 Sii ko soled o telo gawii ago tenga na so manga taw a poon ko oman i isa ka
mbatabataa, oman i basa, ago oman i nasiyon na pegilain iran so manga bangkay iran, na
di iran siran pekilebeng.
10 Kebabaya so langon a taw ko doniya ko kiyapatay iran, na peselaselaan iran ai a
nggolalan ko kapembebegaya iran sa manga pamemegayan, ka kagiya tanto a riyasay
angkoto a dowa a nabi so manga taw sa doniya.
11 Ogaid na kagiya maipos so telo gawii ago tenga na miyakamasok kiran so niyawa a
pepangoyag a poon ko Allah na tominindeg siran. Na tanto a miyalek so langon a
miyamakailay kiran.
12 Mandiyadi na miyaneg o dowa a nabi so inipelalis a poon sa kasorgaan a tig iyan a
“Panik kano sii!” Na minibayaw siran sa kasorgaan sii ko gabon sii ko kababantayi kiran
o manga ridoay iran.
13 Sii den sangkoto a oras na tanto a milinog, na miyageba so ikasapolo bagi ko siti, na
miyamatay so pito nggibo a manga taw sabap ko linog. Tanto a miyalek so miyalamba a
manga taw na biyantog iran so Tohan sa kasorgaan.
14 Miyaipos so ikadowa a kamoralaan, na magaan den makatalingoma so ikatelo.
So Ikapito a Bogiyong
15 Miyamogiyong so ikapito a malaikat na aden a manga tatanog a sowara roo sa

kasorgaan a tig iran a
“So intiro a doniya na miyabaloy den a ndatoan o Kadnan tano ago so Al Masih iyan,
na pendato sekaniyan sa taman sa pakataman.”
16 So dowa polo ago pat a pelokelokesen a moontod ko manga korsi iran ko hadapan o
Allah na somiyodiyod siran ago miyamanimba ko Allah
17 A tig iran a
“Hey Kadnan a Lebi a Mamaapaar a Tohan

a aya kapapantagan den imanto ago gowani,
na penalamatan ami seka, ka inosar ka so mala a kabatowa ngka
na mipoon ka ndato.
18 Tanto a kiyararangitan so manga nasiyon,
ogaid na miyakatalingoma den so gawii a kakerarangiti reka
ago so kakokoma ko miyamatay,
a so gawii a kambalasi ngka ko manga oripen ka a nabi,
ago so langon a kaom ka a mala ago maito, ago so langon a maaleken reka.
Giyai so oras a kambinasaa ngka ko siran oto a pepaminasa sa doniya.”
19 Na kiyalekaan so Timplo o Allah roo sa kasorgaan, na sii ko soled o Timplo niyan na

miyailay roo so Kaban sa kapasadan iyan. Na sarta den a mikilakilat, mipeparti,
mindadalendeg, milinog, ago miyoran sa mala a giyaw.
MIYAPAYAG 12
So Babay ago so Naga
Oriyan oto na miyakiilay so mala a nanao roo sa kasorgaan; a so babay a ndiditar sa

alongan, ago domadapo ko olan, ago sasangkadan sa sapolo ago dowa a manga bitoon.
2 Maogat sekaniyan, na penggoraok sabap ko masakit o kapembalilita on ka magaan den
mbawata.
3 Na aden a salakaw a nanao a miyailay roo sa kasorgaan, a so mala a mariga a naga a

pito i olo ago sapolo i panga, na sasangkadan so oman i isa ko pito a manga olo niyan.
4 Na nggolalan ko ikog iyan na tiyonda iyan so ikatelo bagi ko manga bitoon sa langit na
inilebad iyan ai ko lopa. Tominindeg so naga ko hadapan o babay a magaan den mbawata
kaan iyan masakab so wata iyan sii den ko kipembawataan on.
5 Mimbawata so babay sa bago a mama a pendato ko langon a nasiyon a aya ipendato
iyan kiran so badas a potaw. Na miyaagaw so wata iyan na miyawit ko Allah ago sii ko
korsi iyan.
6 Na miyalagoy so babay ko mitataog a kaden a pitiyagaran on o Allah sa ketaregan iyan
kaan mapageper sekaniyan roo ko soled o sanggibo ago dowa gatos ago nem polo gawii.
7 Oriyan oto na aden a katidawa sa kasorgaan. Si Mikail ago so manga malaikat iyan na
miyakitidawa siran ko naga, na miyakitidawa kiran mambo so naga ago so manga
malaikat iyan.
8 Ogaid na di pekaato so naga ago so manga malaikat iyan, na di siran den pekakadenen
sa kasorgaan.
9 Inilebad so mala a naga, a giyangkoto a andang a nipay a bebetowan sa Iblis ago Saitan
a aya pepanaliba ko langon a taw sa doniya. Inilebad sekaniyan sa baba sii sa lopa a rakes
o manga malaikat iyan.
10 Oriyan iyan na miyaneg aken so matanog a sowara roo sa kasorgaan a tig iyan a
“Imanto na miyakatalingoma den so kapenabet o Allah!

Piyayag iyan so kabatowa iyan sa kapendato ago so kapaar o Al Masih iyan,
ka so pendimanda ko manga pagari tano
a di kiran dii ndimanda sii ko hadapan o Allah sa gagawii daondaw
na inilebad sa baba.
11 Tiyaban sekaniyan den o manga pagari tano
a nggolalan ko rogo o Nati a Bilibili
ago so tito a benar a piseksian iran,
na da iran pagongowi so kaoyagoyag iran
ka peserakan siran mamatay.
12 Kagiya ka maoto na kababaya baden so kasorgaan
ago sekano a kibabaling on!
Ogaid na dowandowaan iyan so lopa ago so ragat
ka miyanog rekano san so Iblis a tanto a pekerarangitan,
ka katawan iyan a makampet so logar iyan."
13 Kagiya katanodan o naga a minilebad bes sa lopa na piyanaloba iyan so babay a

mimbawata sa bago a mama.
14 Ogaid na bigan so babay sa mbala a papak, a so manga papak o mala a agila, kaan
makalayog roo ko darpa iyan ko mitataog a kaden a ron pegepera ko soled o telo ragon
ago tenga a di sekaniyan keraot o nipay.
15 Na tomiyope so nipay sa mala a ig a lagid o lawasaig a pepekasaloba ko babay kaan
maanod sa mawatan o reges iyan.
16 Ogaid na inogopan o lopa so babay, ka mingganga na siyosop iyan so lawasaig a
initope o naga a poon ko ngari iyan.
17 Tanto a kiyararangitan o naga so babay, na lomiyalakaw ka makipetidawa ko ped a
kiyababadan ko babay, a so langon a petoman ko manga sogoan o Allah ago itataros iran
so kapeseksii ran ki Isa.
18 Na tomitindeg so naga sa kilid a ragat.
MIYAPAYAG 13
So Binatang a Pekapoon sa Ragat
Na miyailay aken so isa a binatang a pepekagemaw a poon sa ragat. Aden a sapolo a

panga niyan ago pito a olo niyan. Sasangkadan so oman i isa a panga niyan, na misosorat
ko manga olo niyan so manga ngaran a ipegitowito ko Allah.
2 So binatang a miyailay aken na datar sa paras o mala a tingkalong. So manga ai niyan
na datar o ai o mala a aso sa kalasan, ago so ngari iyan na datar o ngari a arimaw.
Inibegay o naga sangkoto a binatang so kabatowa iyan ago so korsi iyan ago so mala a
kapaar.
3 So isa ko manga olo o binatang na lagid o ba kiyapalian a piyakapapatay, ogaid na so
pali iyan a kiyarong ko kapatay na miyapiya den. Miyamemesa so langon a taw sa doniya
na miyaratiyaya siran ko binatang.
4 Sinimba iran so naga ka inibegay niyan so kapaar ko binatang, na sinimba iran pen so
binatang a tig iran a “Antawaa i datar o binatang? Antawaa i makipetidawa on?”
5 Na inibegay ko binatang so dii kapakatero sa kapagambog ago so kapagitowito, na

pipero ron so kapegosara niyan ko kapaar iyan sii ko soled o pat polo ago dowa olan.
6 Pipoonan iyan magitowito so Allah, so ingaran iyan, ago so babalingan iyan a rakes o
langon a mababaling roo sa kasorgaan.
7 Pipero ron pen a kapakipetidawa iyan ko manga kaom o Allah ago so katabana niyan
kiran, na bigan pen sa kapaar sa kapendatoi niyan ko oman i isa ka mbatabataa, oman i
bangsa, basa, ago nasiyon.
8 Na pemanimba ko binatang so langon a taw a kibabaling sa doniya a da mamangisorat
so manga ngaran iran ipoon ko kiyaadena ko doniya sii ko ribro a kasosoratan ko manga
aden a kaoyagoyag iyan, a rek ai o Nati a Bilibili a miyabono.
9 So aden a tangila niyan na pamakineg baden!
10 Apiya antawaa a aya bagian iyan na mbiyagen na kebiyag den,

na apiya antawaa a aya bagian iyan na mbonoon a pedang na kebono den a pedang.
Sabap sii na paliyogat ko manga kaom o Allah a pepekatiger siran ago tatapen iran so
paratiyaya iran.
So Binatang a Pekapoon sa Lopa
11 Oriyian iyan na miyailay aken so salakaw a binatang a pepekagemaw a poon sa lopa.

Aden a dowa a panga niyan a lagid o panga a bilibili, na so di niyan dii katero na lagid o
katero o naga.
12 Inosar iyan so langon a kapaar o miyaona a binatang para rekaniyan. Biyaas iyan so
doniya ago so langon a kibabaling on sa kasimbaa iran ko miyaona a binatang a miyapiya
den so pali iyan a kiyarong ko kapatay.
13 Giyangkai a ikadowa a binatang na minggolaola sa manga ala ago piyakamemesa a
manga nanao; piyakaoran iyan so apoy sii sa lopa a poon sa langit sii ko kamamasai ron o
manga taw.
14 Miyasaliba iyan so langon a taw sa doniya a nggolalan ko manga nanao a pipero a
kanggolaolaa niyan on para ko miyaona a binatang. Na inisogo o binatang ko manga taw
sa doniya a mbaal siran sa barahala a iseyan ko miyaona a binatang a kiyapalian a pedang
ogaid na da matay.
15 Na pipero ko ikadowa a binatang a katagoi niyan sa kaoyagoyag ko barahala a
siyayanan ko miyaona a binatang kaan makatero so barahala ago mapakipamono iyan so
langon a di ron simba.
16 Na initegel o binatang a katiyapan so oman i isa a taw a maito ago mala, kawasa ago
miskin, oripen ago kena a ba oripen sii sa kawanan a lima iran o di na sii ko beneng iran.
17 Na da a isa bo a ba makapemasa o di na ba makapendagang o da katiyapi sangkoto a
tiyap, a giyoto so ngaran o binatang o di na so romiro o ngaran iyan.
18 Kailangan so ongangen sa kakesabota sii. So aden a sabot iyan na keantok iyan so

maana o romiro o binatang, ka aya romiro o manosiya. So romiro niyan na nem gatos ago
nem polo ago nem.
MIYAPAYAG 14
So Bilibili ago so manga Pagtaw niyan
Miyangilailay ako na miyailay aken so Nati a Bilibili a tomitindeg ko palaw a Siyon a ped
iyan so magatos ago pat polo ago pat nggibo a taw a misosorat ko manga beneng iran so
ngaran o Nati a Bilibili ago so ngaran o Ama iyan.
2 Na miyaneg aken so sowara a poon sa kasorgaan a lagid o dagedeb o mala a tataya ago
so matanog a dalendeg. So miyaneg aken na lagid sa oni o madakel a pangongotiyapi a
pepangotiyapian iran so manga kotiyapi iran.
3 Pepamagidaida siran sa bago a dikir sii ko hadapan o korsi ago so pat a oyagoyag a
manga kaaden ago so manga pelokelokesen. Na da a ba pekasowa sangkoto a dikir a
rowar ko magatos ago pat polo ago pat nggibo a taw a miyanga aaon a poon sa doniya.
4 Giyanan so manga taw a da siran den kabatali a nggolalan ko manga babay, ka da siran
pangaroma. Pepagonot siran ko Nati a Bilibili apiya anda pesong. Miyaaon siran a poon
ko manga manosiya kaan siran mapalad ko Allah ago so Nati a Bilibili a datar o paganay
a inisapaat kiran.
5 Da siran den makapamokeg; da a kidaway kiran.
So Telo a Malaikat
6 Oriyan oto na miyailay aken so salakaw a malaikat a pelayog sii sa kawang. Aawiden
iyan so taman sa pakataman a Mapiya a Totol a pekalangkapen iyan ko manga taw sa
doniya sii ko oman i nasiyon, oman i isa ka mbatabataa, ago oman i basa ago bangsa.
7 Pitero iyan sa matanog a “Kaleken iyo so Allah ago bantoga niyo, ka miyakatalingoma
den so oras a kapengokom iyan. Simbaa niyo sekaniyan a aya miyaden ko langit, so lopa,
so ragat ago so manga bowalan o manga ig.”
8 Aden a ikadowa a malaikat a tomiyondog on a tig iyan a “Tiyaban den! Tiyaban den so
mala a siti a Babilon! Piyakiinom iyan ko langon a nasiyon so mabisa a arak a aya den so
kasesebo iyan.”
9 Aden a ikatelo a malaikat a tomiyondog kiran a inipelalis iyan sa matanog a “Apiya

antawaa i pesimba ko binatang ago so barahala a siyayanan on ago ketiyapan mambo so
beneng iyan o di na lima
10 Na pekainomen sekaniyan sa arak a aya den rarangit o Allah a matatangel a da a saog
iyan sii ko tagayan o gani niyan. Na pakapesekiten sekaniyan ko apoy ago sandawa ko
hadapan o soti a manga malaikat ago so Nati a Bilibili.
11 So bel o apoy a pepekasakit kiran na pepekaporo sa taman sa pakataman. Gagawii
daondaw na da a rintas o kapekesakiti ko siran oto a sominimba ko binatang ago so
barahala niyan o di na so apiya antawaa i kiyatiyapan sa ngaran iyan.”
12 Sabap sii na paliyogat a makatiger so manga kaom o Allah a petomanen iran so manga
sogoan iyan ago kakapetan iran so paratiyaya ki Isa.
13 Oriyan iyan na miyaneg aken so sowara a poon sa kasorgaan a tig iyan a “Soraten ka
ini. Ipoon imanto na rarakmatan so siran oto a pematay sii ko kaiisaisa iran ago so
Kadnan.” “Mataan den ai," a tig o Roh, "pekadeke siran a di den peman ndokawan, ka
makaoonot kiran so onga o manga galebek iran.”
So Kaperagona ko Doniya
14 Miyangilailay ako na miyailay aken so mapoti a gabon a aden a moontod on a datar sa

paras o wata o manosiya. Aden a sangkad a bolawan sa olo niyan na maawid sekaniyan sa
magarang a sangket.
15 Lominiyo so ped a malaikat ko Timplo na tiyalowan iyan sa matanog so moontod ko
gabon a tig iyan a “Garaben ka so sangket ka na peragon ka, ka miyakaoma den so osto a
oras na miyakatoa den so peragonen sa doniya.”
16 Na inigarab o moontod ko gabon so sangket iyan sa doniya na miyaperagon so doniya.
17 Lominiyo so salakaw a malaikat a poon ko Timplo roo sa kasorgaan a maawid mambo

sa magarang a sangket.
18 Na so pen so salakaw a malaikat a makapapaar ko apoy na lominiyo ko aparan na

tiyalowan iyan sa matanog so malaikat a maawid sa magarang a sangket a tig iyan a
“Garaben ka so sangket ka na sapila ngka so manga obas ko manga waged sa doniya, ka
kiyalotoan den.”
19 Na inigarab o malaikat so sangket iyan sa doniya na siyapil iyan so manga obas ko
manga waged, na iniitog iyan ko mala a petemekan sa arak a aya den rarangit o Allah.
20 Na timek so manga obas ko petemekan roo sa liyo a siti na tomiyoga so rogo a poon
ko petemekan a manga telo gatos ka kilomitro a kawatan iyan ago manga sarepa a
kadalem iyan.
MIYAPAYAG 15
So manga Malaikat a Maawid ko Kaposan a manga Kasiksaan
Oriyan iyan na miyailay aken so ped a mala ago piyakamemesa a nanao roo sa kasorgaan.
Aya miyailay aken na pito a manga malaikat a kiaawid sa pito a kaposan a kasiksaan, ka
ron kepasad so kipenggolalanen ko rarangit o Allah.
2 Miyailay aken pen so lagid sa paras o ragat a kapegalongan a kasasaogan sa apoy, na

kititindeg ko kilid o ragat so siran oto a miyakataban ko binatang, ago so barahala a
siyayanan on, ago so romiro o ngaran iyan, na kiaawid siran sa manga kotiyapi a inibegay
kiran o Allah.
3 Ipepegidaida iran so dikir o Mosa a oripen o Allah ago so dikir o Nati a Bilibili a tig
iran a
“Tanto a mala ago piyakamemesa so manga galebek ka,

hey Kadnan a Lebi a Mamaapaar a Tohan!
Ontol ago tito a benar so manga okitokit ka,
Dato o langon a nasiyon!
4 Antawaa i di reka kelek, Kadnan,
ago di pekabantog ko ingaran ka?
Seka bo i soti, na pemanong reka so langon a nasiyon
a pemanimba ko hadapan ka,
ka miyapayag so manga oontol a galebek ka.”
5 Kagiya maipos oto na miyailay aken a kiyalekaan so Timplo roo sa kasorgaan, (giyanan
na datar o Barombarong a ndodon so Kapasadan).
6 Lominiyo so pito a malaikat ko Timplo a aawidan iran so pito a kasiksaan. Kindiditar
siran sa lompiyo a mapoti a dinis ago lilikosan a rareb iran sa bolawan.
7 Na so isa ko pat a kaaden a oyagoyag na bigan iyan so pito a manga malaikat sa pito a
manga ladiya a bolawan a mapepeno a rarangit o Allah a oyagoyag sa taman sa
pakataman.
8 Miyapeno so Timplo a bel a poon ko bantogan o Allah ago so kabatowa iyan. Na da a
ba pekasoled ko Timplo taman sa da mapos so pito a manga kasiksaan a aawidan o pito a
malaikat.
MIYAPAYAG 16
So Pito a Ladiya a Tatagoan ko Rarangit o Allah
Oriyan iyan na miyaneg aken so matanog a sowara a poon ko Timplo a tig iyan ko pito a
malaikat a “Ikano roo den na ododa niyo ko doniya so pito a ladiya a tatagoan ko rarangit
o Allah.”
2 Lomiyalakaw so paganay a malaikat na inodod iyan so matatago ko ladiya iyan sii sa

doniya na minitemo so ikakagowad ago masakit a manga panido ko manga taw a
kiyatiyapan o binatang ago miyamanimba ko barahala a siyayanan on.
3 Inodod o ikadowa a malaikat so matatago ko ladiya iyan roo sa ragat na mimbaloy a

datar o rogo o miyatay a taw, na miyamatay so langon a bibiyag a kaaden sa ragat.
4 Inodod o ikatelo a malaikat so matatago ko ladiya iyan sii ko manga lawasaig ago
manga bowalan na mimbaloy a rogo so manga ig on.
5 Miyaneg aken so malaikat a makapapaar ko manga ig a tig iyan a
“Maontol ka sii sangkai a kiyakokoma ngka ko manga taw,

hey Soti a Tohan a kapapantagan imanto ago gowani.
6 Ka piyakatoga iran so rogo o manga kaom ka ago so manga nabi
na piyakainom ka siran sa rogo, na mapapatot ai kiran.”
7 Na miyaneg aken a somimbag so aparan a tig iyan a
“Oway, Kadnan a Lebi a Mamaapaar a Tohan,

tito a benar ago ontol so manga ipengokom ka.”
8 So ikapat a malaikat na inodod iyan so matatago ko ladiya iyan sii ko alongan, na

pipero ron a kapelowisa niyan a apoy ko manga taw.
9 Na miyanga lolowis siran o tanto a mayaw a ranti o alongan, na pindadaoraan iran so
ingaran o Allah a aya makapapaar sangkai a manga kasiksaan. Ogaid na da iran talikodi
so manga dosa iran ago da iran sekaniyan bantoga.
10 Inodod o ikalima a malaikat so matatago ko ladiya iyan sii ko korsi o binatang na
miyakaliboteng so ndatoan iyan, na piyangekeb o manga taw so manga dila iran sabap ko
kasakit o kararasay iran.
11 Pindadaoraan iran so Tohan sa kasorgaan sabap ko masakit a kararasay iran ago so
manga panido, ogaid na da iran alina so manga olaola iran.
12 Inodod o ikanem a malaikat so matatago ko ladiya iyan sii ko mala a lawasaig a

Yopratis, na miyati den so ig on kaan katiyagari so pagokitan o manga dato a pekapoon sa
sebangan.
13 Oriyan oto na miyailay aken so telo a manga reresik a niyawa a lagid sa paras o manga
babak a miyamakapoon ko ngari o naga, ago so ngari o binatang, ago so ngari o di tito a
nabi.
14 Giyanan so manga niyawa o manga saitan a dii nggolaola sa piyakamemesa a manga
nanao. Pepamanong siran ko manga dato ko dalem a doniya kaan iran siran matimo ko
katidawa sii ko Mala a Gawii o Allah a Lebi a Mamaapaar.
15 “Ilaya niyo man ka pekaoma ako a datar o tekew!

Perakmatan so mageenaw a matitiyagar so manga nditaren iyan
kaan di pekalalakaw a talandiyang a makapekeya ko kamamasaan o manga taw.”
16 Na tinimo o manga saitan so manga dato ko kaden a bebetowan sa Armagidon sa basa

a Hibriyo.
17 Na inodod o ikapito a malaikat so matatago ko ladiya iyan sa kawang na miyakapoon a

matanog a sowara ko korsi ko Timplo a tig iyan a “Miyapasad den!”
18 Na sarta den a mikilakilat, domiyagedeb, mindadalendeg, ago milinog sa mabager a da
den a ba niyan lagid sa kabager a linog ipoon ko katatago o manga taw sa doniya.
19 Miyaopak so mala a siti sa telo bagi na miyanga gegeba so manga siti sii ko manga
nasiyon. Na kiyatademan o Allah so Mala a siti a Babilon, ka piyakiinoman iyan on so
tagayan a mapepeno a arak a aya den so piyakalekelek a rarangit iyan.
20 Miyanga ada so langon a polo na miyakapapantara so langon a palaw.
21 Miyanga oolog ko manga taw so manga ala a giyaw a poon sa langit a manga pat polo
ka kilo a kapened o oman i isa on. Na pindadaoraan o manga taw so Allah sabap ko
kasiksaan a giyaw, ka tanto a piyakaleklek a kasiksaan.
MIYAPAYAG 17
So Mala a Sondal ago so Mariga a Binatang
Somiyong raken so isa ko pito a malaikat a kiaawid sa pito a ladiya na pitero iyan a “Onot
ka raken ka pekiilay aken reka so kandanega ko mala a sondal a giyanan so mala a siti a
miyabangon a marani ko madakel a ig.
2 Miyakisebo so manga dato sa doniya sangkai a sondal, na miyanga bebereg so manga
taw sa doniya ko kiyainoma iran ko arak a aya den so kapepanondal iyan.”
3 Na inipaar ako o Roh na inawidan ako angkoto a malaikat ko mitataog a kaden.

Miyailay aken roo so sakataw a babay a kokoda sa mariga a binatang a lalangkapen so
lawas iyan a manga ngaran a ipepagitowito ko Allah. So binatang na aden a pito a olo
niyan ago sapolo a panga niyan.
4 Ndiditar so babay sa kasomba ago mariga na pipendaraan sa manga bolawan, manga
montiya, ago manga pirlas. Aden a tagayan a bolawan sii sa lima niyan a mapepeno a
piyakasisingay ago maresik a manga nganin a onga o kasesebo iyan.
5 Misosorat ko beneng iyan so isa a ngaran a pageemaan a maana niyan a giyai: “So Mala
a Siti a Babilon a ina o langon a sondal ago manga piyakasisingay sii sa doniya.”
6 Miyailay aken a pekebereg so babay ko kiyainoma niyan ko rogo o manga kaom o Allah
ago so rogo o siran oto a miyanga bobono sabap ko kapeseksii ran ki Isa.
Kagiya mailay aken sekaniyan na tanto ako a miyamemesa.

7 Inisean ako o malaikat a “Ino ka pememesa? Teroon ko reka so pageemaan a maana o
babay ago so kokodaan iyan a binatang a pito i olo ago sapolo i panga.
8 So binatang a miyailay ngka na maaaden den gowani ogaid na kena a ba maaaden
imanto. Di ini matey na nggemaw sekaniyan a poon ko mala a landeng na pekasong ko
kakebinasa niyan. So manga taw sa doniya a da mamangisorat so manga ngaran iran
ipoon ko kiyaadena ko doniya sii ko ribro a kasosoratan ko ana kaoyagoyag iyan na
pememesa siran amay ka mailay iran so binatang, ka kagiya maaaden den gowani ogaid
na kena a ba maaaden imanto, na pekagemaw peroman.”
9 “Aya kisabot sii na so maongangen a pamikiran. So pito a manga olo na pito a manga
bobongan a oontodan o babay. Aden mambo a pito a manga dato.
10 Tiyaban den so lima kiran. So isa on na kapapantagan a ndadato ago so isa on na da
pen makatalingoma. Amay ka makaoma sekaniyan na disomala a di bo matey a kasisii
niyan.
11 So binatang a maaaden den gowani ogaid na kena a ba maaaden imanto na sekaniyan
so ikawalo a dato a ped mambo ko miyaona a pito. Na pekasong sekaniyan ko kakebinasa
niyan.
12 “So sapolo a panga a miyailay ngka na giyanan so sapolo a manga dato a da pen
makapoon ndato. Ogaid na mbegan siran sa kapaar sa kapendato iran a ped o binatang ko
soled o isa ka oras.
13 Sasatiman bo a antap angkai a sapolo a dato, na imbegay iran so kabatowa iran ago
kapaar sii ko binatang.
14 Makipetidawa siran ko Nati a Bilibili ogaid na tebanen siran o Nati a Bilibili, ka
sekaniyan so Kadnan o langon a kadnan ago Dato o langon a dato, na siran oto a moonot
on na so manga taw a piyanawag iyan ago piyamili a pepangongonotan on."
15 Pitero raken pen o malaikat a "So ig a miyailay ngka a oontodan o sondal na aya den
so madakel a taw a poon ko manga bangsa, manga nasiyon ago manga basa.
16 So sapolo a manga panga a miyailay ngka ago so binatang na ikegowad iran so sondal.
Kowaan iran on so langon a rek iran na pelekasan iran sekaniyan. Ken iran so sapo iyan
na totongen iran sekaniyan sa apoy.
17 Ka inikadim kiran o Allah so kanggolaolaa iran ko takdir iyan a nggolalan ko
kapagayonayon iran sa kimbegan iran ko kadato iran sii ko binatang taman sa di kitoman
so manga katero o Allah.
18 “So miyailay ngka a babay na giyanan so mala a siti a pepaar ko manga dato sa
doniya.”
MIYAPAYAG 18
So Kiyatabana sa Babilon
Kagiya maipos oto na miyailay aken so salakaw a malaikat a petena a poon sa langit.
Aden a mala a kapaar iyan, na kiyaliwanagan so doniya o sigay niyan.
2 Miyananalo sa matanog a tig iyan a
“Tiyaban den! Tiyaban den so Mala siti a Babilon!

Miyabaloy ai a babalingan o manga saitan
ago tapoka o oman i pisosonan a maresik a niyawa
ago papanok a karam ago ipekegowad.
3 Ka miyainom o langon a nasiyon so mabisa a arak
a aya den so kapepanondal iyan.
Miyakisebo on so manga dato sa doniya
na mikekawasa so manga padagang sa doniya
a nggolalan ko mitataralo a kakawasaan iyan.”
4 Miyaneg aken so salakaw a sowara a poon sa kasorgaan a tig iyan a
“Liyo kano, manga taw aken! Belaga niyo ron a ginawa niyo,
ka o ba kano mirampat ko manga dosa niyan
na o ba kano makambagian ko manga kisiksa on.
5 Ka somiyoko sa langit so manga dosa niyan,
na kiyatanodan o Allah so manga rarata a sowasowai niyan.
6 Nggolaolaa niyo ron so lagid o inikidia niyan rekano.
Badali niyo sa dowa takep sabap ko pinggolaola niyan.
Penoa niyo so tagayan iyan sa pemanginomen
a dowa takep sa kabisa o piyakiinom iyan rekano.
7 Begi niyo sa mala a karomasayan ago rata a ginawa
a lagid sa kala o bantogan ago kakawasaan a inibegay niyan sa ginawa niyan. Ka di niyan
dii teroon sa ginawa niyan a 'Moontod ako sii a bai.
Kena a ba ako balo. Di ako pekasagad sa kapakamboko.'
8 Kagiya ka maoto na salongan bo a kitenaan on ko manga kisiksa on,
a so paniyakit, so kapakamboko ago so taon,
na nggagepen sekaniyan o apoy
ka lebi a mabager so kokom rekaniyan, a so Kadnan a aya den Tohan."
9 So manga dato sa doniya a miyakisebo on ago miyamakambagian ko manga

kakawasaan iyan na makapemboko siran ago pendiyagaan iran amay ka mailay iran so bel
o kapetotonga on.
10 Pagawaten iran ka penga alek siran sabap ko kapekerasay niyan, na peteroon iran a
"Dowandowaan iyan, dowandowaan iyan

so mala ago pepamaapaar a siti a Babilon!
Miyakaisaisa bo ka oras a kiyapakatalingoma o kiyasiksaa on!”
11 Nggoraok mambo ago pemboko so langon a padagang ko doniya sabap rekaniyan, ka

kagiya da den a pemamasa ko manga dagangan iran
12 A so manga bolawan, pirak, manga montiya, manga pirlas, so manga pipiya a dinis a
kasomba ago mariga ago so sida, so langon a pisosonan a tindos a kayo, so langon a
kasangkapan a pimbaalan a marpil, manga ala i arga a kayo, tombaga, potaw ago marmar,
13 So kemi, manga palapa, manga doka, kadingag, manga mamot, arak, lana, arina, trigo,
manga pangangayamen, manga bilibili, manga koda, manga karo, ago so manga oripen a
giyoto den so niyawa o manga taw.
14 Na peteroon o manga padagang a "Langon taman a ikasosoat ka a miyakowa ngka na
miyanga ada den. So langon o kamapiyaan ka ago manga kakawasaan na miyailang baden
na di ngka den ketoon."
15 Na giyangkai a manga padagang a mikekawasa sa di ran dii kandagang sangkoto a siti
na pagawaten iran sa kapengaalek iran sabap ko kapekerasay niyan. Pekagoraok siran ago
ipemboko iran
16 A peteroon iran a
“Dowandowaan iyan, dowandowaan iyan so mala a siti!

Gowani na dii nditar sa mapiya a dinis a kasomba ago mariga,
a pipendaraan sa bolawan, manga montiya, ago manga pirlas.
17 Sii ko miyakaisaisa bo ka oras na miyabinasa langon angkai a kakawasaan!”
So langon a kirek ko manga kapal, so kipageeda on, so manga pepelayalayag, ago so

langon a dii maningkawiyagen sa ragat na pegawaten iran so siti
18 Na pelalis siran ko kapegilaya iran ko bel o kapeketotong iyan a tig iran a “Da den a ba
ped a siti a datar sa kala angkai a miyakalala a siti! “
19 Na bomboran iran sa manga lopapek a olo iran a di siran dii nggogoraok ago dii
kekarata a ginawa iran. Ipelalis iran a
“Dowandowaan iyan! Dowandowaan iyan den so mala a siti!

So manga kirek ko manga kapal a dii melayalayag sa ragat
na mikekawasa a poon ko kakawasaan iyan,
na sii ko miyakaisaisa bo ka oras na miyabinasa sekaniyan den!”
20 Kababaya baden so kasorgaan sabap ko kiyabinasaa on!
Kababaya kano a manga kaom o Allah, so manga siyogo ago so manga nabi,
ka siyala sekaniyan o Allah sabap ko pinggolaola niyan rekano!"
21 Oriyan oto na so isa a mabager a malaikat na miyorot sa ator a datar sa kala o mala a
galingan na inilebad iyan sa ragat a tig iyan a
“Datar ai so kipelebaden sa baba ko mala a siti a Babilon
na di den ketoon peroman.
22 Di reka den keneg peroman so dii kamboniboniyan o manga pangongotiyapi,
manga pababayok, manga panginginsi ago dii mamogiyong.
Da a panday sa apiya antonaa galebek a ba reka pen ketoon peroman,
na so daleg o manga galingan na di reka den keneg peroman.
23 Di reka den keilay peroman so sindaw o manga solo
na di reka den keneg peroman so lagam o mangangaroma ago so pengaromaan.
So manga padagang ka na aya mala gowani sa dalem a doniya,
na piyagakalan ka so langon a nasiyon ko kapepangatao ngka.”
24 Miyatoon sangkoto a siti so rogo o manga nabi ago so manga kaom o Allah
taman ko rogo o langon a piyamono sa doniya."
MIYAPAYAG 19
Kagiya maipos oto na miyaneg aken so lagid o matanog a bogembog o miyakadakedakel
a taw roo sa kasorgaan a tig iran a "Aliloya! So kapenabet, bantogan, ago so kabatowa na
rek o Tohan tano!
2 Matito ago ontol so manga kokoman iyan, ka diyaneg iyan so kababantogan a sondal a
aya miyakaresik ko doniya a nggolalan ko kasesebo iyan. Siyaopan sekaniyan o Allah
sabap ko kiyapamonoa niyan ko manga oripen iyan.”
3 Na miperoman siran melalis a tig iran a
"Aliloya!
So bel a poon ko peketotong a mala a siti na pepekaporo sa taman sa pakataman!"
4 Na miyamanodiyod so dowa polo ago pat a pelokelokesen ago so pat a oyagoyag a

kaaden na sinimba iran so Allah a moontod ko korsi a tig iran a
“Amin! Aliloya!”
So Bangkiti ko Kakewinga ko Nati a Bilibili
5 Oriyan oto na miyakapoon ko korsi so sowara a tig iyan a
“Podin tano so Tohan tano, sekano langon a manga oripen iyan

ago so langon a manga taw a mala ago maito
a maaleken rekaniyan!”
Oriyan iyan na miyaneg aken so lagid o bogembog o miyakadakedakel a taw ago lagid o
kadagedeb o mala a tataya ago lagid o matanog a dalendeg a tig iran a
“Aliloya!
Ka dii ndato so Kadnan a Lebi a Mamaapaar a Tohan tano!
7 Pakapipiyaan tano a ginawa tano ago mababaya tano.
Bantogen tano so Allah,
ka minitalingoma den so kakewinga ko Nati a Bilibili,
na so pengaromaan iyan na kiyatiyagaran iyan a ginawa niyan.
8 Piyakanditar sekaniyan sa mapiya a sotra a makindat ago lompiyo.”
(So mapiya a sotra na so manga oontol a galebek o manga kaom o Allah.)
9 Na pitero raken o malaikat a “Soraten ka ini: Rarakmatan so siran oto a biyantowan ko

bangkiti a kakewinga ko Bilibili.” Tig iyan pen a “Giyoto so tito a benar a manga katero o
Allah.”
10 Na somiyodiyod ako ko hadapan o ai niyan ka simbaan aken sekaniyan, ogaid na tig

iyan raken a “Di ngka ini penggolaolaa! Oripen ako mambo a lagid ka ago so manga
pagari ngka a di ran dii seksian si Isa. Aya ngka simbaa so Allah!" So dii kaseksii ki Isa
na aya tito a antap o manga katero a miyapayag o manga nabi.
So Kokoda ko Mapoti a Koda
11 Oriyan oto na miyailay aken a kalelekaan den a kasorgaan na aden a mapoti on a koda.
So kokoda on na bebetowan sa Kasasarigan ago Benar. Maontol sekaniyan ko
kapepangokom iyan ago so di niyan dii kapakitidawa.
12 So manga mata niyan na lagid o pekerab a apoy, na sesangkad sa madakel so olo
niyan. Aden a misosorat on a ngaran a da a ba matao ko maana niyan a rowar rekaniyan.
13 So kimon a isosolot on na minigaled sa rogo, na bebetowan sekaniyan sa “Katero o
Allah.”
14 Madakel a manga sondaro sa kasorgaan a tomotondog rekaniyan a kikokoda sa manga
popoti a koda ago kindiditar sa mapiya a sotra a mapoti ago lompiyo.
15 Pepekapoon sa ngari iyan so magarang a pedang a aya niyan kitaban ko manga
nasiyon. Ipendato iyan kiran so badas a potaw na pelosegen iyan so manga obas sii ko
petemekan sa arak a giyanan so piyakalekelek a rarangit o Allah a Lebi a Mamaapaar.
16 Sii ko kimon iyan ago sii sa bobon iyan na misosorat on so ngaran a
“Dato o manga dato ago Kadnan o manga kadnan.”
17 Na miyailay aken so isa a malaikat a tomitindeg sii ko alongan. Liyalis iyan so langon
o manga papanok a dii melayolayog ko kawang a tig iyan a “Song kano sii na timo kano
ko mala a bangkiti o Allah
18 Kaan iyo makan so sapo o manga dato, manga inidal ago so manga sondaro, so sapo o
manga koda ago so kikokoda on, ago so sapo o langon a taw a kena a ba oripen ago
oripen, maito ago mala.”
19 Oriyan oto na miyailay aken so binatang ago so manga dato sa doniya a rakes o manga
sondaro iran a mitimotimo siran, ka makipetidawa siran rekaniyan a kokoda sa mapoti a
koda ago so madakel a manga sondaro niyan.
20 Na miyadakep so binatang ago so di tito a nabi a aya minggolaola sa piyakamemesa a
manga nanao para ko binatang. Nggolalan sangkai a manga piyakamemesa na miyaakal
iyan so manga taw a kiyatiyapan sa tiyap o binatang ago siran oto a miyamanimba ko
barahala a siyayanan on. Na so binatang ago so di tito a nabi na palaya siran minilebad a
oyagoyag siran pen sii ko ranaranaw a apoy a peketotong on so sandawa.
21 Na so manga sondaro iran na piyamamono a pedang a pepekapoon ko ngari o kokoda
sa koda, na piyakaosog o langon a papanok a ginawa iran ko manga sapo iran.
MIYAPAYAG 20
So Sanggibo a Ragon
Oriyan oto na miyailay aken so isa a malaikat a petena a poon sa kasorgaan a aawidan
iyan so gonsi ko mala a landeng a da a pitetamanan a kadalem iyan ago so mala a rantay a
sisii sa lima niyan.
2 Sinikem o malaikat so naga, a so andang a nipay a giyanan so Iblis ago Saitan, na
piyatong iyan sekaniyan ko soled o sanggibo ragon,
3 Na inilebad iyan sii ko mala a landeng. Likeban iyan so landeng ago giyonsian iyan
kaan di makapenaliba so Iblis ko manga nasiyon taman sa maipos so sanggibo ragon.
Amay ka maipos ai na disomala a kebokaan sekaniyan sa di bo matey.
4 Oriyan oto na miyailay aken so manga korsi ago so kioontod on na piyamegan siran sa
kapaar sa kapengokom iran. Miyailay aken pen so manga niyawa o manga taw a
piyamotaan sa olo sabap ko kiyaseksii ran ki Isa ago sabap ko katero o Allah. Da siran
den simba ko binatang o di na so barahala a siyayanan on aya pen o ba kiyatiyapi so
manga beneng iran o di na so lima iran ko tiyap o binatang. Miyanga ooyag siran peroman
ago mindato a ped o Al Masih ko soled o sanggibo ragon.
5 Giyai i paganay a kiyapangoyaga ko miyamatay. So ped ko miyamatay na da manga
ooyag peroman taman sa maipos so sanggibo ragon.
6 Rarakmatan ago soti so siran oto a kirakes ko paganay a kapenga ooyag peroman o
miyamatay. Da den a kapaar kiran o ikadowa a kapatay, ka kebaloy siran a manga imam
ko Allah ago so Al Masih, na makapendato siran a ped o Al Masih ko soled o sanggibo
ragon.
So Kiyatabana ko Iblis
7 Amay ka maipos so sanggibo ragon na kebokaan so Iblis ko kalaboso niyan.

8 Na pegeneben iyan so manga nasiyon sii ko pirowarowangan o doniya, sii sa Gog ago
giya Magog, ka penalibaan iyan siran. Timoon iyan siran sa kapakipetidawa iran a aya
kadakel iran na datar o kadakel o peted sa kilid a ragat.
9 Tomiyarapas siran ko maolad a kapantaran a kalopaan na linikopan iran so kampo o
manga kaom o Allah ago so siti a pekebabayaan iyan. Ogaid na miyakapoon so apoy sa
kasorgaan na pinggagep iyan siran.
10 Na so Iblis a somiyaliba kiran na inilebad ko ranaranaw a apoy ago sandawa a ron
mambo minilebad so binatang ago so di tito a nabi, na roo siran perasaya sa gagawii
daondaw sa taman sa pakataman.
So Kaposan a Kapangokom
11 Oriyan oto na miyailay aken so mala a mapoti a korsi ago so moontod on. So doniya
ago so langit na miyamalagoy a poon ko kamamasan iyan, na da den ai mailay peroman.
12 Na miyailay aken pen so miyamatay a manga ala ago manga iito a kititindeg ko
hadapan o korsi, na miyanga ookab so manga ribro. Na miyaokab mambo so ped a ribro a
aya kasosoratan ko manga aden a kaoyagoyag iyan. Na miyanga kokokom so miyamatay
a mipepasod ko miyanggolaola iran a misosorat ko manga ribro.
13 So ragat na inirila iyan so miyamatay ron, na so kapatay ago so kaden o miyamatay na
inirila iran so miyamatay a matatago on. Na palaya siran den miyakokom a tetanggisa a
mipepasod ko miyanggolaola iran.
14 Oriyan oto na so kapatay ago so kaden o miyamatay na palaya den minilebad ko
ranaranaw a apoy. Giyangkai a ranaranaw na so ikadowa a kapatay.
15 Na apiya antawaa i da misorat so ngaran iyan ko ribro a kasosoratan ko manga aden a
kaoyagoyag iyan na inilebad ko ranaranaw a apoy.
MIYAPAYAG 21
So Bago a Langit ago so Bago a Lopa
Oriyan oto na miyailay aken so bago a langit ago so bago a lopa a da a ba on ragat, ka
misenaw den so miyaona a langit ago miyaona a lopa.
2 Miyailay aken pen so soti a siti a giya bago a Yarosalim a pekitana a poon ko Allah roo
sa kasorgaan. Giyangkai a siti na makatitiyagar den a lagid o pengaromaan a ndiditar sa
kakewinga kiran ago so pengaroma on.
3 Miyaneg aken so matanog a sowara a miyakapoon ko korsi a tig iyan a “Imanto na so
mbalingan o Allah na sisii den ko manga manosiya. Keden sekaniyan kiran na pembaloy
siran a manga pagtaw niyan. So den so Allah na makipegepeda kiran, na pembaloy
sekaniyan a Tohan iran.
4 Sisingen o Allah so oman i lo ko manga mata iran, na samaoto na da den a kapatay aya
pen o ba kamboko, kagoraok, o di na masakit, ka miyadadas den so andang a manga
nganin."
5 Oriyan iyan na pitero o moontod ko korsi a “Imanto na pembagowan ko so langon

taman!” Na pitero iyan raken a "Soraten ka ini ka giyangkai a manga katero na kesarigan
ago tito a benar."
6 Tig iyan pen a “Miyapasad den! Saken so Alpa ago so Omiga, so poonan ago so
kaposan. Apiya antawaa i pekewaw na pekainomen aken sa ig a da a bayad iyan a poon
ko bowalan o ig a pepangoyag.
7 So pekataban na makapekewali sii langon: pembaloy ako a Tohan iyan na pembaloy
sekaniyan a wata aken.
8 Ogaid na so manga talaw, so di pemaratiyaya, so dii mbarabowat maasiya, so manga
talibono, so dii sesebo, so manga pangangatao, so pepamanimba sa barahala, ago so
langon a bokeg na aya bagian iran na ketago siran ko ranaranaw a apoy a peketotong on
so sandawa. Giyanan so ikadowa a kapatay.”
So Bago a Yarosalim
9 Miyobay raken so isa ko pito a manga malaikat a kiaawid sa pito a ladiya a mapepeno
sa pito a moripori a kasiksaan, na pitero iyan raken a “Song ka sii, ka pekiilay aken reka
so pengaromaan, a so karoma o Nati a Bilibili.”
10 Na inipaar ako o Roh na inowit ako o malaikat ko poro o mala a palaw a tanto a
maporo na piyakiilay niyan raken so soti a siti a Yarosalim a pekitana a poon ko Allah roo
sa kasorgaan.
11 Ndodon so bantogan o Allah, na pepamangerap so siti a lagid o mala i arga a montiya
a yaspir a pegalong a lagid o kristal.
12 Mililibet on so mala ago maporo a pangeleban a sapolo ago dowa a gimowa iyan ago
sapolo ago dowa a malaikat a pepagipat ko manga gimowa iyan. Initokid somorat ko
manga gimowa so manga ngaran o sapolo ago dowa a mbatabataa a manga Israil.
13 Aden a telo a gimowa iyan sa sebangan, telo sa pagotaraan, telo sa pagabagatan, ago
telo sa sedepan.
14 Miyabangon so pangeleban o siti ko sapolo ago dowa a onayan iyan a manga ator a
initokid on somorat so manga ngaran o sapolo ago dowa a siyogo o Bilibili.
15 So malaikat a di raken dii makimbitiyarai na aden a awid iyan a panakes a bolawan a

itekes ko siti, so manga gimowa iyan ago so pangeleban iyan.
16 Pat pasagi so siti a ndatar so katas iyan ago so kaolad iyan. Tiyakes o malaikat so siti
ko panakes iyan, na aya katas iyan na manga dowa nggibo ago dowa gatos ka kilomitro.
So pen so kaolad iyan ago so kaporo iyan na ndatar den so takes iran.
17 Tiyakes iyan pen so pangeleban iyan na pito polo ka mitro a kaporo iyan a tiyakes o
makakakalilid a panakes a pegosaren o malaikat.
18 So pangeleban o siti na pimbaalan a ator a yaspir, na pimbaalan so siti a lombos a
bolawan a pegalong a lagid o katiya.
19 So manga ator a kaoonayan ko pangeleban o siti na piremaremaan sa langon a
pitibarangan a montiya. So paganay a onayan iyan a ator na yaspir, so ikadowa na sapiro,
so ikatelo na kalkidona, so ikapat na ismiralda,
20 So ikalima na sardonis, so ikanem na sardiyos, so ikapito na krisolita, so ikawalo na
biril, so ikasiyaw na topas, so ikasapolo na krisopras, so ikasapolo ago isa na hiyasinta,
ago so ikasapolo ago dowa na amitista.
21 So sapolo ago dowa a manga gimowa na manga pirlas. So oman i gimowa na
pimbaalan a isa a pirlas. So lalan ko siti na lombos a bolawan a pegalong a lagid o katiya.
22 Da a miyailay aken a timplo roo ko siti, ka so Kadnan a Lebi a Mamaapaar a Tohan

ago so Nati a Bilibili na aya den timplo ron.
23 Di den kailangan o siti so sindaw o alongan ago so olan, ka liliwanagan o bantogan o
Allah, na so Nati a Bilibili na aya on solo.
24 Melalakaw so manga taw ko doniya sii ko kaliwanag iyan, na pagawidan roo o manga
dato sa doniya so manga kakawasaan iran.
25 Kilelekaan so manga gimowa o siti ko mababasa alongan, na di den ai pelekeban ka da
den a kagagawii roo.
26 Pagowiten roo ko siti so bantogan ago so kakawasaan o manga nasiyon.
27 Ogaid na da den a maresik a ba on pekasoled, o di na apiya antawaa i dii nggolaola sa
piyakayaya aya pen o ba so pepamokeg. Aya bo a pekasoled ko siti na so siran oto a
miyamangisorat so manga ngaran iran sii ko ribro o Nati a Bilibili a kasosoratan ko
manga ana kaoyagoyag iyan.
MIYAPAYAG 22
So Lawasaig a Pepangoyag
Piyakiilay raken pen o malaikat so lawasaig a pepangoyag so ig on a malingaw a datar o

katiya. So lawasaig na pepekapoon ko korsi o Allah ago so Nati a Bilibili
2 Na pegondas ai ko look o mala a lalan o siti. Sii ko oman i kilid o lawasaig na aden a
kayo ron a pepangoyag a pepegonga sa sapolo ago dowa a pisosonan iyan, a so sasoson a
onga niyan oman saolan. So manga raon iyan na bolong a ipekapiya o manga nasiyon.
3 Da den a nganin san a inisinta o Allah a ba ketoon ko siti. Ndodon so korsi o Allah ago
so Nati a Bilibili, na so manga oripen o Allah na pengongonotanan iran sekaniyan.
4 Keilay iran so paras iyan na isorat so ingaran iyan sii ko manga beneng iran.
5 Di roo den kegagawii, na di iran den kailangan so manga solo o di na so kaliwanag o
alongan ka pesindaw kiran so Kadnan a Tohan iran. Na makapendato siran sa taman sa
pakataman.
So Kakesoy o Isa
6 Pitero raken o malaikat a “Kesarigan ago tito a benar angkai a manga katero. So
Kadnan a so Tohan a aya pepaar ko manga niyawa o manga nabi, na siyogo iyan so
malaikat iyan kaan iyan mapakiilay ko manga oripen iyan o antonaa i mapenggolaola sa
di bo matey."
7 Pitero i Isa a "Pakineg kano, ka pekaoma ako sa di bo matey! Rarakmatan so taw a

tatagoon iyan sa ginawa niyan so manga katero a miyaalamat sangkai a ribro."
8 Saken a si Yahiya na aya miyakaneg ago miyakailay sangkai a manga nganin. Na kagiya
maneg aken ago mailay aken den na somiyodiyod ako ko hadapan o manga ai o malaikat
a piyakiilay niyan raken ai, ka simbaan aken.
9 Ogaid na pitero iyan raken a “Di ngka nan penggolaolaa! Matag ako oripen o Allah a
datar ka ago so manga pagari ngka a nabi ago so langon a tetagoon iran sa ginawa so
manga katero sangkai a ribro. Aya ngka simbaa na so Allah!"
10 Na pitero iyan raken pen a “Di ngka pegmaa so manga alamat a matatago sangkai a
ribro, ka magaan den ai mitoman.
11 So dii nggolaola sa kamarataan na tarosen iyan baden so di niyan dii kanggolaola sa
kamarataan, na so maresik na tarosen iyan baden so kapekeresik iyan, na so maontol na
tarosen iyan baden so kapagiinontolan iyan, na so soti na tarosen iyan baden so kasosoti
niyan.”
12 Pitero i Isa a "Pakineg kano! Pekaoma ako sa di ini katey! Na pagawidan ko so

imbalas aken, ka imbegay aken ko oman i isa a taw so patot ko miyanggolaola niyan.
13 Saken so Alpa ago so Omiga, so Monapona ago so Moripori, so Poonan ago so
Kaposan.”
14 Rarakmatan so siran oto a pemamipi ko manga kimon iran kaan siran kabegi sa
kabenar sa kapakakan iran ko onga o kayo a pepangoyag ago pekasoled siran ko siti a
mokit ko manga gimowa iyan.
15 Ogaid na roo sa liyo o siti na ndodoo so manga aso, a giyoto so manga pangangatao,
so dii sesebo, so manga talibono, so pepamanimba sa barahala, ago so oman i isa a
mababaya mamokeg ago pepanaliba.
16 “Saken a si Isa na siyogo aken so malaikat aken kaan iyan rekano mapakalangkap
angkai a manga nganin sii ko manga Agama. Saken so Bekaw o Daod ago so
Kiyababadan rekaniyan. Saken so maliwanag a makabanges.”
17 So Roh ago so pengaromaan na di ran dii teroon a “Song ka sii!” na so pepakaneg on

na teroa niyan mambo a “Song ka sii!”
Apiya antawaa i pekewaw na song sii baden.

Apiya antawaa i kebaya on na kowaa niyan so da a bayad iyan a ig a pepangoyag.
Kaposan
18 Saken a si Yahiya na pelalangan ko so langon o pepakaneg ko manga alamat a

matatago sangkai a ribro: O aden a magoman sii na ipagoman rekaniyan o Allah so
manga kasiksaan a misosorat sangkai a ribro.
19 Na o aden a melebat ko manga katero a matatago sangkai a ribro a kapanalamat na
kowaan rekaniyan o Allah so bagian iyan ko kayo a pepangoyag ago sii ko soti a siti a
miyaosay sangkai a ribro.
20 Sekaniyan a dii seksi sangkai a langon taman na tig iyan a “Mataan den a pekaoma ako
sa di ini bo matey!”
Amin. Song ka sii den, Kadnan a Isa!
21 Pengnin ko a malalayon rekano langon so limo o Kadnan a Isa.

Maranao Bible

Uploaded by

Document Information

Copyright

Available Formats

Share this document

Share or Embed Document

Sharing Options

Did you find this document useful?

Is this content inappropriate?

Copyright:

Available Formats

Maranao Bible

Uploaded by

Copyright:

Available Formats

MAKSOD

Sii sa pagampaganay na inaden o Tohan so langit ago so doniya.

6 Pitero o Tohan a “Maaden so kawang a mipagelet ko manga ig ago mapakasesenggaya

9 Pitero o Tohan a “Matimo sa satiman a darpa so manga ig ko atag o langit kaan

11 Mandiyadi na pitero o Tohan a “Kapamangetoan so kalopaan sa manga paotanotan ago

14 Pitero o Tohan a “Maaden so manga solo sii ko langit a mapakasenggaya iran so

20 Pitero o Tohan a “Mangapepeno so manga ig sa mbarambarang den a manga

24 Pitero o Tohan a “Makaaden so lopa sa langon a pitibarangan a manga meranaranap,

27 Kagiya ka maoto na inaden o Tohan so manosiya a inisayan iyan siran ko ginawa

31 Inilay o Tohan so langon taman a inembaalan iyan na sayana a mapiya. Giyoto a

4 Giyanan i totolan ko kiyaadena ko langit ago so doniya.

Si Adam ago si Sittihawa

Isako pagembaalan o Allah so doniya ago so langit

7 Samaoto na kominowa so Allah sa bayanek sii ko lopa na linimbag iyan a mama.

18 Na pitero o Allah a ”Kena a ba mapiya i ba mabobotong so mama. Ipagembaal aken

19 Sa da pen ai kanggolaola na miyalimbag o Allah poon ko bote so langon a manga

Ogaid na da pen a ba salinggogopa a domadait ki Adam.

"Na, katii den i datar aken, a tolan a poon ko tolan aken

25 Si Adam ago so karoma niyan na palaya siran matatalandiyang, na kena a ba siran

4 “Matamataan a kena a ba niyo petain!” a tig o nipay ko babay.

8 Si ko kaperimon iyan na miyaneg o mama ago so karoma niyan so dalepek o Allah a

11 “Antawaa i mitero reka on sa matatalandiyang ka?’ a iniise on o Allah. “Ba ka

13 Na pitero o Allah ko babay a “Antonaa bes angkai a pinggolaola ngka?”

14 Mandiyadi na pitero o Allah ko nipay a

“Sabap sa pinggolaola ngka oto na

16 Na pitero iyan mambo ko babay a

“Tanto aken a pekaregenen so kaoogat ka,

“Kesintaan so lopa sabap reka;

20 Aya inibeto o Adam ko karoma niyan na Sittihawa ka kagiya sekaniyan i pembaloy a

Piyakaawa si Adam ago si Sittihawa ko Sapadan

22 Oriyan na pitero o Allah a “Imanto na miyabaloy so mama a lagid tano ko kiyatokawi

Rimbang i Adam so karoma niyan a Sittihawa, na miyaogat sekaniyan na inimbawata

Si Abil na mimbaloy a pananagikor sa bilibili, na si Kain na taribasok.

6 Mandiyadi na pitero o Allah ki Kain a “Ino ka pekerarangiti? Ino pekarimeng so paras

8 Mandiyadi na pitero i Kain ko pagari niyan a Abil a “Somong ta ko dii mbabasokan.”

9 Na iniise o Allah ki Kain a “Anda so pagari ngka a si Abil?”

13 Pitero i Kain ko Allah a “So indaneg raken na mala a di so kekena ko!

15 Ogaid na pitero on o Allah a “Kena, ka o aden a makabono reka, Kain, na makapito ka

17 Romimbang si Kain ko karoma niyan na miyaogat, na inimbawata iyan si Inok. Sa

23 Pitero i Lamek ko manga karoma niyan a

“Hey Adah ago Silah, pamakinega ko niyo;

Si Sito ago si Inos

25 Romimbang peroman si Adam ko karoma niyan, na mimbawata sa wata a mama na

Giyai i salsila ko kiyababadan ki Adam:

Isako maaden o Tohan so manosiya na pimbaalan iyan siran a mipelagid o Tohan.

6 Kagiya makapagidad si Sito sa magatos ago lima ragon na mimbawata sa mama a si

9 Kagiya makapagidad si Inos sa siyaw polo ragon na mimbawata sa mama a si Kinan.

12 Kagiya makapagidad si Kinan sa pito polo ragon na mimbawata sa mama a si

32 Kagiya makapagidad si Nok sa lima gatos ragon, na mimbabawata sekaniyan sa telo

5 Miyailay o Allah a mala i kadostaan so manga taw sa doniya, ka so dii mapamikir o

9 Giyai I totolan ki Nok. Maontol a mama si Nok na sekaniyan bo I taw a da a ba on

11 Mikerata so doniya ko kapekeilaya on o Tohan ago mapepeno a kapanganiyaya.

22 Na so den so langon taman a inisogo o Tohan ki Nok i pinggolaola niyan.

5 Na ininggolalan i Nok so langon a inisogo on o Allah.

17 Miyakapat polo gawii a dii kambagiyawi ko doniya, na sii ko kapepegorog o ig na

24 Na da den tirak so ig ko doniya ko soled o miyakamagatos ago lima polo gawii.

20 Mandiyadi na mimbaal si Nok sa aparan ko Allah, na kominowa sekaniyan sa satiman

22 “Taman ko kaaaden pen o doniya

6 “Apiya antawaa i pekabono sa manosiya,

7 Sekano peman na mbabawata ago ndakedakel kano kaan mabembar ko doniya so

8 Na pitero pen o Tohan ki Nok ago so manga wata iyan a

12 Tig pen o Tohan a “Giyai i nanao sangkai a da a ikepos iyan a kapasadan a

17 Pitero o Tohan ki Nok a “Giyanan den i nanao ko kapasadan a inembaalan aken

So Manga Wata i Nok a manga Mama