1

HKYE HKRANG LA HKRUM AI LAM KAW NA, BAI SUM MAT MAI AI KUN?
(CAN SALVATION BE LOST?)

Hkye hkrang la ai lam gaw Karai Kasang shinggyim masha ni hpe jaw ya ai chyeju kumhpa re. Rai
tim dai chyeju shinggyim masha ni hta grin nga lu na matu gaw Karai daw hte shinggyim masha daw rau
ginrun mahkri shawn nga ra ai re. Dai majaw hkye hkrang la ai lam bai sum mat mai ai kun? ngu ai lam
gaw Karai Kasang a daw hte shinggyim masha a daw lahkawng hpe shingdaw nna chye na la mai nga ai.

A. Karai Kasang Hpang Maga Na Chyeju Jaw Ya Ai Daw

1. Karai Kasang gaw mungkan masha ni hkye hkrang la hkrum lu na matu Yesu Hkristu hpe mungkan
ga de dat dat ai re (Yawhan 3:17).
2. Ngai shanhte hpe n htum n wai asak jaw da we ai rai nna, shanhte galoi mung hten bya ai hkrum
na n rai; nye a lata na shanhte hpe gade ai kashun la ya lu na n rai. Shanhte hpe nye a lata hta ap ya
ai, nye Wa gaw, yawng hta grau kaba nga ai rai nna, kadai mung Wa a lata na shanhte hpe kashun
la ya lu na n rai. (Yawhan 10:28-29).
3. Hkristu a tsawra ai hta na anhte hpe kadai wa mi jahka lu na ta? (Roma 8:35); Anhte a Madu Hkristu
Yesu hta e Karai Kasang a tsawra ai hta na, anhte hpe n jahka kau lu na mi ai (Roma 8:39).
4. Yesu a asai gaw, anhte hta na yubak nlang hte hpe jasan jaseng kau ya mi ai (I Yawhan 1:7).
5. Hkye hkrang la ai nhtoi du hkra, nanhte hpe dazik shakap ai Karai Kasang a chyoi pra ai Wenyi
hpe, myit hkum shayawn myit (Ehpesu 4:30).

Karai Kasang hpang maga de na gaw kam sham ai ni a matu teng sha hkye hkrang la ai lam hpe mazing
da ya na lam pahkam jaw nga ai re.

B. Shinggyim Masha Ni Hpang Maga De Na Daw

1. Ngai hpe madu e madu e nga ai hte yawng mayawng gaw, sumsing lamu na mungdan hta
shang lu na ma ai n rai: sumsing lamu e nga ai, nye Wa a myit hkan ai wa sha, shang lu na ra
ai. Dai shani e, Madu e Madu e, na a amying hte anhte myihtoi htoi saga ai hte, na a amying
hte nat hkyawt kau nna, na a amying hte magam amu law law shachyen saga ai, n rai ni? nga
nna law law wa ngai hpe tsun na mara ai. Dai shaloi e, Ngai nanhte hpe galoi mung nchye
made ai; n tara ai amu galaw ai ni e, ngai kaw na pru mat wa mu, ngu nna ngai shanhte
hpe tsun na mawe ai. (Mahte 7:21-23).
2. Masu ai myihtoi law law mung paw pru nna, law law hpe shadam na mu ai. Tara tawt lai ai
amu law wa na majaw, masha law law a tsawra ai myit kawp mat na ra ai. Rai ti mung, jahtum
du hkra shakut sharang ai wa gaw, hkye hkrang la ai hkrum na ra ai (Mahte 24:11-13).
3. Kaning rai nme law, jahtoi ya ai lang mi hkrum yu nna, sumsing lamu na chyeju kumhpa hpe
chyim yu ai hte, dai Chyoi pra ai Wenyi hpe jawm hkam la nna, Karai Kasang a kaja htum ai
mungga hte htawm hpang prat na hpung dagu hpe chyim yu nhtawm, bai htak mat wa ai ni
gaw, Karai Kasang a Kasha hpe tinang hkum nan wudang hta bai jen da nna, shi hpe n gawn n
sawn di kau mu ai majaw, myit malai ningnan bai lu la na matu, lam kanang mung n hku
ma lu ai (Hebre 6:4-6).
4. Dai rai nna, marai langai ngai, Ngai gaw jan rai tsap nga nngai, nga nna myit a yang gaw, shi
n kadawng ai, sadi nga u ga (1Kor 10:12).
 2

5. Kaning rai nme law, Dema gaw ndai mungkan ga hpe tsawra ai a majaw, ngai hpe kau da
nna, Htesaloni mare de sa mat wa sai, Kareka gaw Galati mung de, Titu gaw Dalamati mung
de, sa mat wa ma sai (II Tim 4:10).
6. Teng man ai a chye chyang ai lam hpe hkam la ngut sayang, yubak hpe dingsa sa galaw ga
yang gaw, yubak a matu mara hkungga nawng ya na lam, naw nga sa na n rai: daw dan hkrum
na nga ai, nachying hkrit hpa shara hte, n htan shai ai ni hpe nat kau na sindawng kahtet ai wan
sha, la nga na ra ai. Mawshe a tara tawt lai ai wa gaw, matsan dum la ai n hkrum ai sha, sakse
lahkawng masum a ga hte si ai hkrum lu ai; dai rai yang gaw, Karai Kasang a Kasha hpe
kabye shingkawt kau nna, tinang hkum hpe shachyoi shapra ya ai ga shaka a asai hpe awu
asin di kau ai hte, chyeju madun ya ai Wenyi hpe n kaw n law di kau ai wa gaw,dai hta grau
ai ari gade hkrum ging ai , ngu nna nanhte nawn da myit ta? (Hebre 10:26-29).
7. Dang lu ai wa gaw, ning re ai hpun palawng ahpraw bu hpun lu na ra ai; shi a amying hpe dai
asak laika hta na ngai gaja wa shaprai kau ya na n rai (Shingran 3:5)
8. Nang hkrum magang ra ai nni nkri hpe hkum hkrit et; yu u nanhte hpe chyam yu na, Nat gaw
nanhte hta na nkau mi hpe htawng hta sharen da nna, nanhte nhtoi shi ya tup zingri zingrat ai
hkrum na marin dai. Si hkra maju jung nga u, shaloi ngai nang hpe asak janmau jaw na de
ai (Shingran 2:10).

Makam masham kaw na htak mat nna Yesu hpe shingdu dat kau yang, asak laika kaw na shaprai
kau ya ai hkrum mai ai hte hkye hkrang la ai lam sum mat mai nga ai.

C. Ningmu Sawn Shachyaw Ai Lam Ni

Hkye hkrang la ai lam bai sum mat mai n mai hte seng ai lam hpe Hkristan mungkan hta tsun dang
rang ai lam gaw tsa ban langai aten kaw nna dai ni du hkra rai nga ai. Gara hku ningmu shachyaw la nna
hkye hkrang la ai lam kalang lu da sai wa gaw, hkye hkrang la hkrum sai chye ju kaw na galoi mung bai n
hkrat sum sai ngu hkam la ma ai kun? Ganing re ai ningmu hpe hkam la ai ni gaw hkye hkrang la hkrum
sai chyeju gaw bai hkrat sum mat mai ngu hkam la ma ai kun? Ngu ai hpe Hkrsitan mungkan hta lawu na
ningmu shachyaw ai lam lahkawng hku sang lang dan hkat nga ma ai.

(1). Lanyau (sh) Sharaw Masa (Cat or Tiger Theory)

Lanyau (sh) sharaw kanu ni gaw shi shangai da ai kasha ni hpe shara mi kaw na, shara mi de htawt sit mayu
ai shaloi shi a n-gup hte kasha a du hta ngang ngang gawa makrang da nna shi ra ai de hpai htawt sit ai re.
Kasha ni hku nna hpa n galaw ra ai. N-gun n dat ra ai. N sadi ra ai. Hpa lam hpe mung n tsang ra ai. Htawt
jasit ai lam yawng gaw kanu a lit she re. Aten du jang kanu htawt sit tawn mayu ai de du mat wa ai re. Kanu
sha atsam dat ai, n-gun dat ai masa re. Dai masa hpe ga shadawn hku yu la nna, Hkristan n kau mi hkye
hkrang la ai lam gaw Karai Kasang hte seng ai lam re ai majaw, Karai Kasang hta sha lit nga ai. Shinggyim
masha ni n-gun n dat ra ai, n sadi ra ai, lit n nga ai. Karai Kasang gaw shinggyim masha ni a makam masham
masa hta yu nna bungli galaw ai wa n re. Dai majaw Karai Kasang kaw na hkye hkrang la ai chyeju kalang
hkam la lu sai wa gaw, dazik kalang dawk shakap da hkrum sai (sh) asak laika hta kalang ka bang da hkrum
sai majaw galoi n hkrat sum sai ngu kam sham ai masa rai nga ai.

(2). Woi Masa (Monkey Theory)

 3

Woi kanu gaw woi kasha hpe shara mi kaw nna kaga shara mi de woi htawt sit hkawm ai shaloi
woi kasha hpe shi hkum hta ahpum da shangun nna lagaw lata yawng n-gun dat let htawt si hkawm ai re.
Woi kasha mung kanu hpe lata the ngang ngang a hpum da ra ai. Ngang ngang n ahpum da jang di hkrat
mat wa na re. Woi kanu gaw kasha hpe lit la nna n-gun atsam dat woi htawt sit ai zawn, kasha mung kanu
hpe ngang ngang ahpum da ra ai. Shaloi she kanu woi sa ai shara de apyaw sha du lu ai re.

Dai masa hpe ga shadawn hku yu la nna, Hkristan n kau mi hkye hkrang la ai lam gaw Karai
Kasang hte shinggyim masha lahkawng yan hta lit nga ai. Karai Kasang lit la n-gun atsam dat nna hkye
hkrang la ai chyeju jaw nga tim shinggyim masha ni Karai Kasang hpe ngang ngang kang kang n ahpum
da yang makam masham hta na htak mat mai ai,. Karai Kasang hte daw hka mat wa nna jahtum e Karai
Kasang hpe nyet kau ai de du mat wa mai ai. Dai majaw hkye hkrang la ai lam kaw na bai hkrat sum mat
mai ai ngu ai masa rai nga ai. Rai tim ndai masa gaw hkye hkrang la ai chyeju gaw prat tup a matu pahkam
(salvation assurance) n nga ai ngu tsun ai lam n re. Woi kasha kanu hpe ngang ngang ahpum da yang n di
hkrat ai zawn, Karai Kasang hpe ngang ngang kang kang kam sham manoi manat ai wa a matu hkye hkrang
la ai lam gaw prat tup a matu pahkam nga ai ngu ai masa re.

(3). Karai Kasang A Hpaw Shadan Dan Ai Lam Hpe Chye Na Ai Masa (Perception on Revelation)

Karai Kasang a hpaw shadan dan ai lam (revelation) hpe gara hku chye na hkap la ai? ngu ai lam
mung Hkye hkrang la ai lam bai sum mai n sum mai ngu ai hpe chye na hkam la ai lam hta ahkyak nga ai.
N tsa lam hku tsun ga nga yang, Karai Kasang a hpaw shadan dan ai lam myu lahkawng nga ai. Ninggawn
tawa shingran hte lak san shingran re. Dai lahkawng hku nna Karai Kasang gaw shinggyim masha ni hpe
Shi a lam, Shi a yaw shada ai lam the Shi a sharawng awng ai lam ni hpe hpaw shadan dan nga ai re. Dai
hta mahta nna shinggyim masha ni tinang a makam masham hpe grau grau ngang kang hkra gaw gap mat
wa lu na matu re.

Hkye hkrang la ai lam kalang hkam la lu ai lam gaw galoi mung n hkrat sum sai nga hkam la ai
Hkrsitan ni gaw moi chyaloi n hkoi kaw nna (sh) nu a hkri tung kaw nna hkye hkrang la hkrum na ni hpe
Karai Kasang tau hkrau masat da ngut chyalu, Ngarai de sa ra na ni hpe mung tau hkrau masat da ngut
chyalu re. Dai majaw Karai Kasang a hpaw shadan dan ai lam gaw hkye hkrang la hkrum na ni ngu masat
da hkrum ai ni hpe shadum la ai lam sha she re. Shinggyim masha ni Hkye hkrang la hkrum na lam hte n
seng ai ngu hkam la ma ai. Hkye hkrang la hkrum na ni gaw moi chyaloi n hkoi kaw nna (sh) hkri tung kaw
nna tau hkrau masat da hkrum sai ni re majaw ga loi mung n sum sai ngu hkap la kam sham ai lam rai nga
ai.

Bai nna, hkye hkrang la hkrum ai lam gaw bai hkrat sum mat mai ai ngu hkap la kam sham ai
Hkrsitan ni gaw, Karai Kasang a hpaw shadan dan ai lam gaw shinggyim masha ni a kam wa lu na hte
makam masham grau grau ngang kang wa lu na matu hte Satan hpe dang manga lu na matu re. Hkye hkrang
la ai lam hte ading tawk seng ai lam re. Dai majaw shinggyim masha ni makam masham kaw na htak mat
ai hte Karai Kasang hpe nyet kau ai kaw n du na matu re. Hkye hkrang la ai lam gaw Karai Kasang hte
shinggyim masha lahkawng yan hte seng ai lam re. Dai rai nna, makam masham kaw na htak mat ai hte
Karai Kasang hpe nyet kau ai wa gaw hkye hkrang la ai chyeju hpe gin lut kau mai ai ngu hkam la ma ai.

(4). Yesu A Malai Si Hkam Ya Ai Lam (Atonement) Hpe Chye Na Hkap La Ai Masa (Perception
On Atonement)
 4

Hkye hkrang la hkrum ai lam prat tup galoi mung n sum sai ngu hkap la kam sham ai Hkrsitan ni
gaw Yesu a malai si hkam ya ai lam hpe Karai Kasang a daw hku nna Karai Kasang tau hkrau hkye hkrang
la hkrum na matu lata san da sai ni a matu sha re ngu kam sham ma ai. Dai majaw hkye hkrang la ai lam
gaw Karai Kasang a lit la gun hpai ai daw hte sha seng ai ngu kam sham ai masa re. Dai hta la kap nna
Karai Kasang gaw sadi dung ai wa , tsawra myit kaba ai wa, chyeju jaw nga ai wa re majaw Shi tsawra
myit hte chyeju hku jaw ya ai hkye hkrang la ai lam gaw, shinggyim masha daw hte n seng ai, Karai Kasang
hte sha seng ai. Dai rai nna hkye hkrang la hkrum ai lam gaw galoi mung n hkrat sum sai ngu kam sham ai
lam rai nga ai.

Hkye hkrang la hkrum ai lam kaw nna bai hkrat sum mai ai ngu hkap la kam sham ai ni gaw, Yesu
a malai si hkam ai lam hpe Karai Kasang a daw hku chye na hkap la tim, dai gaw shinggyim masha yawng
hte seng ai re; shinggyim masha dai hpe hkap la kam sham nna hkye hkrang la hkrum na matu re. Dai
majaw hkye hkrang la ai lam gaw shinggyim masha ni a teng man ngang grin ai makam masham hte mung
seng ai. Karai daw hte shinggyim masha daw lahkawng yan hte seng ai. Dai majaw Karai daw hku nna jaw
ai hkye hkrang la ai chyeju gaw, makam masham kaw na htak mai ai hte Yesu hpe nyet kau ai rai yang bai
sum mat mai ai ngu kam ai lam rai nga ai.

(5). Karai Kasang jaw ya ai chyeju kum hpa (Grace) hpe gara hku chye na hkap la ai?

Karai Kasang jaw ya ai chyeju kum hpa gaw hkap manga kau (sh) ningdang kau n mai ai
(irresistible).Shinggyim masha kaw ninghkap manga na ahkang n nga ai, ngu hkam la ai Hkristan ni gaw
hkye hkrang la ai lam galoi n sum sai ngu hkap la kam sham ma ai. Hkye hkrang la ai lam gaw Karai Kasang
jaw ai chyeju re. Karai Kasang hte sha seng ai. Shinggyim masha a masa hte n seng ai ngu, kam ai lam rai
nga ai.

Bai Hkristan n kau mi gaw Karai Kasang jaw ya ai chyeju kum hpa (Grace) hpe hkap la tim mai ai
zawn, ninghkap kau (sh) ningdang kau mung mai ai. Dai majaw hkye hkrang la ai lam gaw Karai daw the
shinggyim masha daw lahkawng yen hte seng ai ngu kam ma ai. Dai majaw Karai Kasang a chyeju kum
hpa hpe ninghkap kau (sh) ningdang kau ai ni a matu gaw hkye hkrang la ai lam bai sum mat mai ai ngu
hkap la kam sham ma ai.

(6). Yubak mara (Sin) hpe gara hku chye na hkap la ai?

Shinggyim masha yubak hta hkrat sum ai lam hpe mai kaja lam hpa mung n nga sai ngu kam ai ni gaw hkye
hkrang la ai lam prat tup n sum sai ngu kam sham nna; mai kaja lam hpa mung n nga mat hkra n re,
shinggyim masha lata la na ahkang naw nga ai ngu hkap la ai ni gaw hkye hkrang la ai lam kaw na bai hkrat
sum mai ai ngu kam sham ma ai.

(7). Tau hkrau masat tawn da ya ai lam (Predestination) hpe gara hku chye na hkap la ai?

Tau hkrau masat tawn da ya ai lam ngu ai hpe Hkristan nkau mi gaw hkye hkrang la ai lam hte
ading tawk seng ai ngu hkam la ai majaw, Karai Kasang tau hkrau kaw nna lajang da ya ai hkye hkrang la
hkrum ai chyeju kaw na galoi n hkrat sum sai ngu kam sham ma ai.

Rai tim Hkristan n kau mi gaw Tau hkrau masat tawn da ya ai lam (Predestination) gaw magam
lit she re, hta ni htana hkye hkrang la hkrum na ngu ai lachyum n re ngu kam ma ai. Ga shadaw, Israela
amyu sha ni yawng gaw lata la hkrum ai ni re. Rai tim yawng gaw hkye hkrang la hkrum na re ngu ai
 5

lachyum chyum laika hta n mu lu ai. Karai Kasang gaw shi hpe n nawku ai tara mai gan Kuru hkawhkam
hpe mung lata la nna jai lang ai re. Dai majaw Tau hkrau masat tawn da ya ai lam (Predestination) ngu
ai gaw Yesu Hkristu hpe hkap la kam sham ai ni teng sha hkye hkrang la ai hkrum na matu tau hkrau masat
tawn ai lam she re. Shinggyim masha daw hku nna jahtum du hkra kam sham ra ai. Dai majaw makam
masham kaw nna htak mat ai ni, makam masham hpe nyet kau ai ni gaw hkye hkrang la ai lam kaw nna bai
hkrat sum mat mai ai ngu kam sham ma ai.

(8). lahta na lam ni hta mahta nna, Karai Kasang a daw hte sha seng ai i? (sh) Karai Kasang hte shinggyim
masha lahkawng yan hte seng ai i? ngu ai hpe daw dan nna, hkye hkrang la hkrum ai lam hte hkye hkrang
la hkrum ai lam bai mai sum n sum ngu ai hpe daw dan hkap la ai re. Hkye hkrang la ai lam gaw Karai daw
hte sha seng ai, shinggyim masha daw hte n seng ai ngu hkam la ai ni gaw hkye hkrang la ai lam kalang lu
la da sai ni, dai hkye hkrang la hkrum ai lam hta na galoi mung n hkrat sum sai ngu htai la ma ai re. Bai
hkye hkrang la ai lam gaw Karai Kasang a daw hte shinggyim masha a daw lahkawng yen hte seng ai ngu
hkam la ai ni gaw, hkye hkrang la hkrum ai lam kaw na masha gaw bai hkrat sum mat mai ai ngu htai la
ma ai re.

Ginlen shalai ai,

Rev. Dr. Lahpai Awng Li

MIT, Insein, Yangon.
Nhtoi 10 Sept. 2017.