IKA-LIMANG PULONG

“Giuhaw Ako.”

MAGBABASA:(Manindog ang tanan)

*PAGBASA GIKAN SA SANTOS NGA EBANGHILYO SUMALA NI SAN

JUAN:

“Human niini, si Jesus nga nasayod nga ang tanan natuman na, ug aron pagtuman
sa Kasulatan, miingon, “Giuhaw ako” (Juan 19:28).

PAMALANDONG:(Manglingkod ang tanan)

(Basahon kini sa kompas apan sa makusog nga tingog.
Paningkamoton sa magbasa nga magagikan gayud kini sa iyang kaugalingon nga
puno sa kahulogan.)

Hinigugma kung mga igsoon:

Ang tawo lawas ug kalag.Ang lawas magmasakiton ug maluya usab tungod sa

iyang katigulangon.Ang Simbahan nag-andam ug kahupayan sa tanang balitian sa
lawas ug kalag. Ang kahupayan ug tambal sa maluyahong kalag mao ang mga
sakramento, ilabina ang sakramento sa pagkumpisal ug pagkalawat. Ang
kahupayan sa lawas nga masakiton mao ang Sakramento sa Pahilog diin andamon
ang nagmaluyahon alang sa iyang panaw kon ugaling kuhaon na siya sa Ginoo. Sa
karaang panahon, ang Santa lana maoy ihibong sa agtang ug kamot sa tawo nga
ituboy sa pagka-Pari, Hari ug Profeta. Karon, ang Santa Lana nga gitawag ug
krisma nga maoy ihibong sa batang pagabunyagan ug kumpirmahan, sa tawong
ituboy sa Orden sa pagka-Pari, o kaha sa pag-consagrar sa mga obispo.Laing Santa
Lana usab gigamit aron sa paghilog sa mga masakiton.Ang Hilog mag-andam sa
masakiton alang sa hataas nga esprituhanong panaw nga pagasagubangon sa
pagdawat sa kamatayon, ug kon mahimo, makaayo usab sa lawas sa masakiton kon
kini itugot sa kabubut-on sa Dios. Ang tagtungod sa hilogan nga nagmaluyahon,
mao untay momaymay sa masakiton aron mouyon ug malipay ba hinoon nga
dihugdan. Sayop ang pagtoo nga kon magpatawag ug pari aron hilogon ang
masakiton, mosamot kuno hinoon kini pagkasakit ug matiwas diha sa kamatayon.
Hinonoa, labing mayo hinoon nga mo tawag ug pari para hilogon ang masakiton
bisan kon dili pa grabe ang nasakit kay makasugid pa siya sa iyang mga kasalanan,
makakalawat ug makasabat sa mga pangadyeon ug makadungog sa maymay ug
pahimangno nga ihatag sa pari. Kay giingon man sa sulat ni Santiago 5:14-16,
“Aduna ba kaninyoy nagmasakiton? Ipakuha niya ang mga pangulo sa iglesia, ug
paampoa sila alang kaniya,nga magahaplas kaniya sa lana diha sa ngalan sa Ginoo;
ug ang pag-ampo nga inubanag pagtoo magaayo sa masakiton, ug siya
pagabangonon sa Ginoo;ug kon siya nakasala ,,man, siya pagpasayloon.”

Mga igsoon, sa pagwali ni Jesus sa kabungturan sa Palestina, nakalabay siya sa

atabay ni Jacob didto sa San maria.Didto nakit-an niya ang usa ka babaye nga
Samaryanhon nga nagakos sa maong atabay. Giuhaw ang Ginoo ug busa mihangyo
siya sa babaye nga nagtimba nga mo inom sya. Nagdumili ang babaye sa
pagpainom kay Jesus kay ang mga Judio samang kang kristo ug ang mga
samaryanhon sama sa babaye wala may maayong pagsinabtanay, ang mga Judio ug
mga Samaryahon adunay may mga panaglahi sa ilang mga kultura paagi sa
pagsimba sa Dios.Namulong si Jesus sa Samaryahon nga babaye, “Kon nasayod
ka pa lamang kon kining nangayo kanimo ug tubig, mangayo ka unta kaniya ug
tubig kay ang tubig nga iyang ihatag tubig man sa kinabuhing dayon” (Juan 4:7-6).
Sa atong pagpamati sa pulong ni Kristo mahanaw ang atong kauhaw. Kay ang
binhi nga nahulog sa maayong yuta mao kadtong nakadungog sa mensahe,midawat
niini ug nagpadayun hangtud nga mamunga kini (Lukas 8:15).

Niining ikalimang Pulong, giingon nga giuhaw si Jesus. Ang sundalo mipainom
kaniyang bino nga sinagulag apdo.Ang kapait mikuyanap sa kaugatan sa
halangdon nga Ginoo, ug ang pagpasipala daw mahait nga banghaw nga milagbas
og kauhaw. Ang atong pagpasagad ug pagpatuyang sa bisyo maoy makapauhaw sa
atong Manunubos nga nag palansang sa krus.Sa atong pagpalayo sa Dios kay
naglikay sa pagsimba, daw nakaaghat sa Dios sa pag-ingon, “Giuhaw ako.” Gugma
ang nakapakanaog sa Anak sa Dios sa yuta, ug nagpaabot siya nga atong baslan asa
atog pagkamaunongon sa iyang mga sugo, ug ang balos sa Dios sa atong dakong
gugma mao ang grasya nga makasantos. Sa atong pagdawat sa mga sakramento ug
pagkamasinugtanon nato sa mga balaod sa simbahan, makapanag-iya kanato sa
grasya nga makasantos, nga mao ang pagpaambit kanato sa kinabuhi ni Kristo. Si
Kristo nagdapit kanato sap ag-ingon, “Pagmahingpit kamo kay ang inyong amahan
sa langit hingpit (Mateo5:48).” Ang grasya nga makasantos maghimo kanato nga
templo sa Espirito Santo (Corinto 3:16).

Mga igsoon, ang kalibutan napuno sa nagkadaiyang panghitabo. Dunay

nangamatay sa aksidente sa kadalanan, dunay naapektuhan sa mga lunop, bagyo,
linog ug pagdahili sa yuta, dunay giduot sa pagkakabus. Kining tanang panghitabo
maoy nakadaut sa mapintas nga palad sa atong mga igsoon nga binunyagan nga
minugna sa Dios sama sa Iyang panagway. Ang atong pagpalayo kanila kay
mahadlok kita nga hikuhaan ang atong bahandi ug katigayunan, maoy atong paagi
sa pagpainom sa himalatyon nga Jesus sa mapait nga apdo sa kawalay-
pagpakabana. Kini maoy pabag-o sa panamastamas nga gibuhat ngadto kaniya sa
mga lampingasan nga sundalo ug tungod niini miingon ang Ginoo, “Giuhaw
ako.”.Salamat nga aduna pay mga igsoon nga wala magpiyong sa kaalaut nga
gidangatan sa atong mga kabus nga mga igsoon. Kini sila ang mga tawo nga
adunahan sa lawasnon ug kalagnon ng mga katigayonan. Mao kini sila ang mga
kabus sa espiritu nga nahimong bahandianon sa grasya diha sa pagtabang uban
ug giandam sa ganti sa langit. Busa buhaton nato ang maayo alang sa
nagkinahanglan niini kutob sa atong mahimo. “Ayaw pahulata sa suggod sa adlaw
ang imong isigkatawo kon mahimo nimo ang pagtabang kaniya karon” (Proverbs.
3:28)

Mga igsoon, giuhaw ang atong Ginoo sa atong panginlabot sa buhat sa kalooy.
Nagdapit siya niadtong mga adunay kaya nga mahiligon lamang sa mga
lolinghayaw og pagwaldas sa ilang mga salapi, kay wala nay lain nga ilang
nahunahunaan sa paggasto sa ilang kwarta.Ang atong Ginoo nagpasidaan, “Ayaw
pagtigom og bahandi nga makawat ug makutkut sa anay. Mao hinooy
ipakabahandi ang dili makawat ug makutkut nga katigayunan didto sa gingharian
sa langit (Lucas 12:33).” Mao kini ang tubag sa pagtagbaw sa kauhaw ni Kristo.
Mopadayun kita sa pagpaningkamot uban sa kahadlok sa pagtahod aron mahingpit
ang atong tinguha nga mluwas kay ang Dios anaa kanunay uban kanato aron
paghatag kanato og tinguha pagtuman sa iyang kabubut-on.

Maayong magbalantay, ayaw itugot nga mahisalaag kami sa among panaw

padulong kanimo nga nagpasakit sa pagpas-an sa imong krus padulong sa
kalbaryo. Hatagi kami sa kahigayonan nga makalahutay sa among panaw sa pagpa-
an sa among krus uban kanimo. Himoa nga makatabang kami sa among mga
kaigsooonan nga kabus aron ang imong kauhaw dili molatay sa imong kaugatan
kay dili man apdo kon dili gugma man ang among ipainom kanimo.

Mga igsoon, ang Diosnong kauhaw mikuyanap sa daghang mga nahimong santos
dinhi sa tagsa-tagsa nilang pag-alagad. Adunay nag-alagad alang sa misyon, nag-
alagad sa mga eskwelahan, sa mga masakiton, sa mga kasundalohan, sa mga
bilangguan ug pagpakigtipon uban sa mga kabus. Ang kauhaw sa gugma sa
kahingpitan maoy bayanihon nga pag-alagad kay kini nagtukmod man kanila sa
pagtabang sa buhat sa kaluwasan, sinalikway ang madanihong pangidhat sa
kalibutanong kahamogaway ug katagbawan nga lumalabay lamang.

Silimbahon nga Jesus, ang krus maoy imong tropeo sa kadaugan nga gisalikway sa
daghan nga buot musobay sa lapad nga dalan sa kapildihan. Lamdagi kami sa
imong parola sa kadaugan pinaagi sa pagbuntog sa kalibutanong gahum, ug
ipatigbabaw sa among kaisipan ang matuod nga kidlap sa langitong kahaya nga
walay pagkapalong. Amen.