Rotaract ba u?

Pagpapadaloy ng Wikang Filipino sa mundo ng mga Rotaractor

- Rizzalyn Vargas

Ang paggamit ng wikang Filipino ay nananatiling buhay sa puso at isip nating mga Pilipino. Para
itong isang binhi na itinanim na siyang mamumunga at yayabong na ating aanihin sa paglipas ng
panahon. Isa itong mayabong at matatag na puno na patuloy na sumasabay sa mahina man o
malakas na ihip ng hangin. Subalit ito ay unti-unting nababago sa paglipas ng panahon. Ang ating
wika ay nahahaluan na ng wikang banyaga partikular na ang wikang Ingles. Mahalaga ang paggamit
ng wika sa komunikasyon. Sabi nga nila ang tulay patungo sa kaunlaran ay isang bansang may
pagkakaisa, kasabay nito ang matatag at buong pamayanan na may wikang nag-uugnay sa bawat
isa.

Hindi lingid sa kaalaman natin na ang Rotaract ay isang International Organization kaya naman ang
pangunahing ginagamit na wika sa pakikipag-komunikasyon o pagpo-post sa mga social media ay
wikang Ingles, gayun pa man mayroon pa ring mga clubs ang gumagamit ng wikang Filipino sa
pagpopost maging sa pagbibigay ng pamagat sa kanilang mga proyekto.
Tumingin tayo sa pahinang ginagamit ng ating distrito at inisa-isa ang mga naka-post dito. Para sa buwan
ng agosto (Agosto 1-21), mayroong kabuuang 132 posts ang pahina kasama ang mga shared posts mula
sa iba’t ibang club na nasasakupan nito. Mula dito 19 na posts ang nasa wikang Filipino o may halong
Filipino ang ginamit na wika sa caption o kaya naman ay gumamit ng pamagat na nasa wikang Filipino.
Ito ay 14.4 na bahagdan sa kabuuang bilang ng mga posts.

Sa pakikipagkomunikasyon naman, nagtanong tayo ng ilang mga Rotaractors kung paano ang proseso
nila ukol dito. Sa una ay magpapadala sila ng liham na nakasulat sa wikang Ingles, ngunit sa pakikipag-
usap ay gumagamit naman sila ng wikang Filipino. Sa mga pagpupulong, wikang Filipino o TagLish naman
ang kanilang ginagamit na midyum ng pakikipagkomunikasyon.