PASAMBAHAN MINUM KAWA

Perumpamaan :
Tuan Mudo sebagai Si Pangka (Tuan Rumah)
Sutan Basa sebagai Si Alek (Tamu)
===================================

SI PANGKA : *(Sutan Basa).!

SI ALEK : Lai, *(Tuan Mudo)
SI PANGKA : Baulang – ulang parundiangan ka bakeh *(sutan)
SI ALEK : Sabuik *(tuan).
SI PANGKA : Maagak di hari sabanta cako,
Parundiangan kito kauiknyo kameh, Pancuangnyo putuih
Pun baato nyo lai du kini
Lah tumbuah pulo nan bak bijo, Lah tabik pulo nan bak padi
Nan tumbuah tantu makanan siang, nan tabik tantu makanan tuai
Satantangan di juadah nan ka tangah,
duduak baiyo tagak baramuah jo *(sutan)
Sakian buah parundiangan ambo anta, anta sampai ka bakeh *(sutan)
SI ALEK : Sampai *(tuan)
SI PANGKA : Sakiro alah *(sutan)
SI ALEK : Dikumbalikan buah parundiangan ka bakeh *(tuan)
SI PANGKA : Sabuik *(sutan)
SI ALEK : Maagak di hari sabanta cako,
Parundiangan kito kauiknyo kameh, Pancuangnyo putuih
Pun baato nyo lai du kini
Lah tumbuah pulo nan bak bijo, Lah tabik pulo nan bak padi
Nan tumbuah tantu makanan siang, nan tabik tantu makanan tuai
Satantangan di juadah nan ka tangah, nan mintak diparenai
Mangko lalunyo *(tuan).?
SI PANGKA : Sabananyo *(sutan)
SI ALEK : Sapanjang buah parundiangan *(tuan) nan ka tangah.
Alah di adaik nan bapakai, dicupak nan baisi.
Tapi sungguah samantang nan bak nan tun
Nan rajo kato mupakaik, nan bana kato baiyo
Ambo bao kato jo mupakaik, basaba *(tuan) mananti
SI PANGKA : Sampai *(sutan).?

1
SI ALEK : Dibilang alah *(tuan)
SI PANGKA : Aratinyo, Sapanjang buah parundiangan ambo nan ka tangah.
Alah di adaik nan bapakai, dicupak nan baisi.
Tapi sungguah samantang nan bak nan tun
Nan rajo kato mupakaik, nan bana kato baiyo
*(sutan) ka mambao kato jo mupakaik, Manjapuik an ka buah bari nyo
mananti ambo sakutiko. Kan baantun bana *(sutan).?
SI ALEK : Sabananyo *(tuan)
SI PANGKA : Samulo kato taranta ka bakeh *(sutan)
Supayo barek nak bakisa ka nan ringan
Jauah nak bakisa ka nan ampia
Bao lah kato jo maupakaik
Ambo pakai sipaik mananti, *(sutan)
SI ALEK : Ambo ka mambao kato jo mupakaik,
*(tuan) mananti lai ka basaba.?
SI PANGKA : Sakiro – kiro.!

SI ALEK BAIYO JO NAN TUO/ NINIAK MAMAK

SI ALEK : Yo Ma.. *(Tuan).!

SI PANGKA : Lai, *(Sutan).

SI ALEK : Di hari sabanta cako,

*(Tuan) manauang manuruik undang, Mananti manuruik adaik
Ambo mampaiyokan kato mampalengongkan bana
ka bakeh niniak mamak sarato dunsanak nan basamo
Kini lah dapek buah jo bari baliau
Di baliau taranta ka bakeh ambo
Di ambo mangumbalikan ka bakeh *(tuan)
Alah ka rancak ka di anta.?
SI PANGKA : Nan dijapuik bana *(sutan)
SI ALEK : Aa lah ka buah barinyo di ambo ka bakeh *(tuan)
Salagi tukang di ateh atok, panokok lai samo di tangan
Parabuangan nak samo kito pakuan.
Ikolah ka namo buah jo barinyo.
SI PANGKA : Sampai *(sutan)
SI ALEK : Sakiro sampai *(tuan)

2
SI PANGKA : Di hari sabanta cako,
Ambo Mananti manuruik adaik, Manauang manuruik undang
*(sutan) mampaiyokan ban aka bakeh baliau nan basamo
Kini lah dapek buah jo bari nyo taranta ka bakeh *(sutan)
Di *(sutan) mangumbalikan ka bakeh ambo.
Aa lah ka buah barinyo di *(sutan) ka bakeh ambo
Ndak sasak langik dek bintang, ndak gambuang lukah dek aia
Tiok kandak tiok buliah, Tiok pintak tiok balaku
Lah ka baparenai kato baliau
Kan baitu bana buah lalunyo *(sutan).?
SI ALEK : Sabananyo *(tuan)
SI PANGKA : Ndak lai sabuah kandak buliah, pintak lah bapalakuan
Lah sanang kironyo hati
SI ALEK : Baa nan parundiangan kito *(tuan).?
SI PANGKA : Kito pabatehan.
Balaluan sakali *(sutan)
SI ALEK : Jalo nak samo anyuik jo bungkanyo *(tuan)