HATA PANGAMPUON SIAN BONA NI HASUHUTON

TUSUDE BORU/ BERE, DONGAN SAHUTA, PARIBAN

DOHOT ALE-ALE TARLUMOBI DIHAMUNA
HULA HULA DOHOT TULANG

Nahuparsangapi hami Amanta Raja, Inanta soripada saluhutna ma hamu

nahupandoki hami Raja ni dongan tubu, Raja ni Boru Bere, Raja ni Dongan Sahuta,
Pariban dohot Ale-ale nami tarlumobi ma dihamu Raja ni hula-hula dohot tulang nami
parjolo mahita mandok mauliate tu Tuhanta pardenggan basai ima ala asi dohot holong ni
rohana natoktong mangiring huhut manogu-nogu hita dibagasan hasehaton hahipason
sahat tu tikki on, lumobi apala dibagasan sadarion tung mansai balga situtu Las ni
rohanta ima ala naung mardalan ulaonta dohot denggan sonang so haribo-riboan.

Andorang so hupasahat hata pangampuon, parjolo majolo hupasahat hata mauliate tu

hamu saluhutna Amanami Inanami namakkaholongi hami naro tu ulaonta sadarion.

Parjolo ma dohonon tuhamu saluhutna Boru dohot bere nami, dihamu boru dohot bere
nami diulaonta sadarion tung takkasdo huida hami songon dia holong ni rohamuna
tarida doi sian pambahenan muna nauli i lumobi ma gogo dohot pikkiran nabinahen
muna gabe boi mardalan ulaonta dohot denggan sadarion alani disude nauli nadenggan
nabinahen muna parjolo ma hupasahat hami Mauliate Godang tuhamuna saluhutna
anggiat ma antong Tuhanta nambaloshon I marlipat ganda dihamu sahali nai hupasahat
Mauliatema dihamu Tuhantama totong namandongani hita saluhutna.

Suang songonima nang dihamu saluhutna Dongan sahuta, Pariban dohot Ale-ale nami
mauliate do nang dohonon nami tuhamuna saluhutna ima disiala holong ni rohamuna ro
hamu mandapothon hami diulaonta sadarion tarlumobi akka nauli nadenggan nabinahen
muna sadarion disude nauli nadenggan nabinahen muna Mauliatema hupasahat hami
sai Tuhantama namambaloshoni marlipat ganda dihamu saluhutna jala Tuhantama
namandongani hita saluhutna.

Suang songonima nang dihamu saluhutna Rajani Dongan Tubu nami mauliate godang
ma nang dohonon nami tuhamuna ima disiala holong ni rohamuna lumobi pikkiran
dohot gogo muna gabe boi mardalan dohot denggan ulaonta sadarion ra ianggo unang
alani pangurupion muna dihami dang na tarulahon hami ulaonta sadarion, alani disude
nauli nang nadenggan nabinahen muna Mauliatema amang Inang sai Tuhantama
namambaloshoni marlipat ganda dihamu saluhutna sahalinai hupasahat hami
Mauliatema ma dihamu Tuhantama namamasu masu hita saluhutna.

Tarlumobima dihamu Hula-hula, dohot tulang nami saluhutna Mauliatema Amang

mauliate ma Inang disude akka nauli nadenggan naung dibahen muna tuhami
sadarion, akkup ni-i dipasahat hamu hata pasu-pasu lumobi pangidoan muna tu Tuhanta
marhite tangiangmuna alani amang, Inang disude nauli nadenggan napinasahatmuna
tuhami parjoloma hupasahat hami mauliate godang anggiatma Tuhanta mambaloshon i
marlipat ganda dihamu sahali nai hupasahat hami Mauliate ma dihamu, jala disude
akka hata pasu pasu nang hata nauli nadenggan dohot tangiang pangidoan muna sai
Tuhantama namansahaphoni tuhami jala sai dijakkon badan dohot tondi nami mai asa
juppang songon nidokni natua-tua dohonon nami :
 1. Turtuma ninna anduhur, tio-tioma ninna lote
Hata pasu-pasu naung pinasahatmuna tu hami rajanami
Sai unang ma muba, jala unang mose

Sude hata pasu-pasu, hata panggabean napinasahat muna tuhami asa sahat mai,
jujung di simajujung nami, tuak diabara nami jala abing diabingan nami, asa juppang
songon ni dokni natua-tua dohonon nami :

2. Naung sappuli pitu, jumadi sappulu ualu

Hata panggabean parhorasan dohot hata pasu
naung pinasahat muna Rajanami
Sai dijakkon badan dohot tondi namimai
Jala boanon nami mai hot matonga jabu

Asa ala naung sahat dipasahat hamu hata panggabean/ hata parhorasan tuhami asa
sahatma nauli sahatma nadenggan tuhami saluhutna, asa juppang songon ni dokni situa-
tua dohonon nami :

3. Sahat-sahat ni solu, sahatma tu bontean

Sahatma hita saluhut leleng mangolu
Jala sai sahatma tu panggabean

Horasma hamu saluhutna namakkaholongi hami Rajanami, jala horasma nang hami
nahinaholongan muna Tuhantama namamasu masu hita saluhutna Botima.

Jadi saonaripe Amang dohot dihamu Inang ala nungga sahat be tajalo nauli nadenggan
sian akka namarholong ni roha tu hita sadarion asa Jakon hamuma nauli nadenggan i
tikki hupasahtama tuhamu botima.

16