ING BANAL A MISA

PAMAGMULA
PAMAMUGE
Pari: King lagyu ning Ibpa, ampon ning Anak, ampon ning Banal a Espiritu.
Commentator/Malda: AMEN.
Pari: Ing gracia ning Guinú tang Jesucristo ing lugúd ning Dios at ing pamakiagum
ning Banal a Espiritu mantabe kekayu ngan.
Commentator/Malda: At keka antimurin.
PAMANISI
Pari: Capatad, tanggapan ta la at sisian ding kekatamung kasalanan ban maging
karapatdapat ta lang pagmasusian deting banal a misterio.
Pari: iyagkas ta ngening miyagnan-agnan ing kapanisyan.
Commentator/Malda: Magkumpisal ku king Dios a mayupayang tutu at kekayu
kapatad uling mikasala kung bina king isip, amanu at dapat at miyayaliuang
kakulangan: ulinita, panigapu ku kang nuan a Mariang kapilan man Virgen, karíng
sablang angel ampon banal, at kekayu kapatad, ing ipanalangin yu ku king Dios a Guinú
tamu.
Pari: Ing Dios a mayupayang tutu pakaluluan na katamu at king pañgapatauad da ring kasalanan
tamu, idala na katangan sana king bie alañg añgga.
Commentator/Malda: AMEN.
Pari: Guinú, pakalulù. Commentator/Malda: Guinú, pakalulù.
Pari: Cristo, pakalulù. Commentator/Malda: Cristo, pakalulù.
Pari: Guinú, pakalulù. Commentator/Malda: Guinú, pakalulù.

Ligaya king Dios king kakataskatasan at king yatu kapayapan karíng taung keyang
kaluguran. Pupurian da ka, parangalan da ka, sasamban da ka, paligayan da ka.
Pasalamatan da ka, pauli ning maula mung ligaya. Guinúng Dios, Ari ning banua, Dios
Ibpang mayupaya. Guinú, Anak a bugtung, Jesucristo, Guinúng Dios, Cordero ning Dios,
Anak ning Ibpa. Ikang milalako king kasalanan ning yatu, pakaluluan mu kami, ikang
milalako king kasalanan ning yatu, tanggapan mu ing dalangin mi, ikang makalukluk uanan
ning Ibpa pakaluluan mu kami. Uling ikang bukud kabanal-banalan, ikang bukud Guinú.
Ikang bukud kakataskatasan, Jesucristo, kagum ning Banal a Espiritu king ligaya ning Dios
Ibpa. AMEN.

Pari: Manalangin tamu ………………………………………………………… Iti aduan mi O Dios king

kapamilatan ning Guinú ming Jesucristong Anak mu, a mabibie at mag-ari kambe mu at ning
Banal a Espiritu, manggá man king alang anggá.
Commentator/Malda: AMEN.
Commentator: Lukluk ta pu at makiramdam king Amanu ning Guinu

ING LITURGIA NING AMANU

MUMUNANG PAMAMASA
Lector 1: Ing Amanu ning Guinú.
Commentator/Malda: Salamat king Dios

Lectors-Commentators / Sto. Rosario Chapel (Tabuyuc) 1|

Page
 ING BANAL A MISA
DALIT A PAKIBAT
CADUANG PAMAMASA
Lector 2: Ing Amanu ning Guinú.
Commentator/Malda: Salamat king Dios
Commentator: Talakad ta pu at parangalan ing Mayap a Balita
Alleluia, Alleluia! ……………………………………….. Alleluia!
EVANGELIO
Pari: Ing Guinú mantabe ya kekayu.
Commentator/Malda: At keka antimurin.
Pari: Pamamasang ibat king Mayap a Balita agpang kang . . .
Commentator/Malda: Ligaya keka, O Guinú.
Pari: Ing Mayap a Balita ning kekatang Kaligtasan….
Commentator/Malda: Kapurian keka, O Cristo!
Commentator: Lukluk ta pu at makiramdam king Homilya
Sasalpantaya ku king Dios, Ibpang mayupayang tutu, linalañg king banua at yatu. At
kang Jesucristong Anak nang bugtung a Guinú tamu, peñgagli king upaya ning Banal
a Espiritu, mibait kang nuan a Mariang Virgen; linasa lalam nang upayang Poncio Pilato,
mipaku king cruz, mete at mikutkut; tinipa ya karíng mete; king katlung aldo sinubli yang
mebie. Pepaitas ya banua, makalukluk uanan ning Dios Ibpang mayupayang tutu. Ibat karin
magbalik ya naman keti ban mukum karíng mabie ampon meñgamate. Sasalpantaya ku
king Banal a Espiritu, king Banal a Kapuluñgan Catolica, king pamisamak ding banal, king
pañgapatauad da ring kasalanan king pañgasubli rang mie ring mete, at king bie alañg añgga.
AMEN.

PANALANGIN DING MALDA

Pari: Manalangin ta king Guinu ……………………. Ngatamung Manalangin…………… “Guinú,
pakiramdaman me ing kekang balayan” Ulitan ta ya.
Commentator/Malda: Guinú, pakiramdaman me ing kekang balayan
Lector 3 (PDM): Aduan ta ngeni ing sarili tang kapagnasan.

Pari: Iti aduan mi king kapamilatan nang Cristong Guinú mi.

Commentator/Malda: AMEN.

ING LITURGIA NING EUCARISTIA

Pari: Mipuri ka Guinúng Dios ning meto sikluban, uling king kekang kayapan tinggap mi ya ing
tinape a yampang mi keka, tinapeng bunga ning gabun at pipagalan ning tau, a para kekami
magauang tinape ning bie.
Commentator/Malda: Mipuri ya ing Dios kapilan man.
Pari: Mipuri ka Guinúng Dios ning meto sikluban, uling ning kekang kayapan tinggap mi ya ing
alak a yampang mi keka, alak a ibat karíng ubas at pipagalan ning tau, para kekami magauang
inuman ning kaladua.
Commentator/Malda: Mipuri ya ing Dios kapilan man.
Pari: Manalangin kayu, kapatad, ban ing kekatamung daun matanggáp ya arapan ning Dios
Ibpang mayupayang tutu.

Lectors-Commentators / Sto. Rosario Chapel (Tabuyuc) 2|

Page
 ING BANAL A MISA

Commentator/Malda: Tanggapan ne sa ning Guinú iting daun karíng gamat

mu, king ikapuri at ikaligaya ning keyang laguiu, king kekatang ikasaplala at
ning mabilug nang Santa Iglesya.

PANALANGIN BABO RING AIN

Pari: Iti aduan mi king kapamilatan nang Cristong Guinú mi.
Commentator/Malda: AMEN.

PANALANGIN NING KAPURIAN AT KAPASALAMATAN

Pari: Ing Guinú mantabe ya kekayu.
Commentator/Malda: At keka antimurin.
Pari: Iyatna yo ring pusu yu.
Commentator/Malda: Makayatna no king Guinú.
Pari: Pasalamat ta king Dios a Guinú tamu.
Commentator/Malda: Iti karapatdapat at matulid.
Pari: Tune pin karapatdapat at matulid, ing pasalamatan da kang parati at nu man Karin, O
Ibpa Dios king alang angga at lubus mayupaya………….. Ulinita kambe ring sablang koro ring
anghel karin banwa daralit mi ing kekang ligaya, layun makyabe alang tuknang babiye kapuryan
keka at ngaming sasabi/(kakanta)…
Commentator/Malda o (Ikanta ne ning Koro):
Banal, Banal, Banal ya ing Guinú, Dios ning upaya. Mipnu ya ing banua at ing yatu king kekang
ligaya. Hosanna king kakataskatasan. Nuan ya ing daratang king laguiu ning Guinú. Hosanna
king kakataskatasan.

ING PANALANGIN NING KAPURIAN AT KAPASALAMATAN

Pari: Ipasiag ta ya ing misterio ning kasalpantayanan.
Commentator/Malda:Y Kristo mete ya, Y Kristo sinubli yang mebie, Y Kristo dating yang
pasibayu king kawakasan ning panahon.
Pari: King kapamilatan na, kambe na, at kaya, O Dios, Ibpang mayupayang tutu, kagum ning
Banal a Espiritu, pupurian da ka at parangalan manggá man king alang anggá.

Malda: AMEN.

ING PAMAKINABANG
Pari: Ngeni manalangin tamung mitmung kapanaligan at lugud karing amanung tiru na
kekatamu ning Guinu.

Commentator/Malda o (Ikanta ne ning Koro): Ibpa mi, a atiu banua,misamban

ya ing laguiu mu, datang kekami ing kayarian mu, mipamintuan ing lub mu keti sulip
anti banua. Ing kakanan mi king aldo-aldo ibie mu kekami king aldo ngeni: ampon
ipatauad mo kekami ring sala mi keka, anti ing pamamatauad mi karíng mikasala
kekami; manga e mu ke ipaysaul king tuksu nune ikabus mu kami king marok.

Pari: Ikabus mu kami king sablang marok, O Guinú, malugúd mung ipagkalub ing kapayapan
king panaun mi, ban king kasaupan ning kekang pakalulù, parati kaming mitimaua king
pamanalipan ning kasalanan, at mikabus alang kasasagkulan king sablang kaligaligan kabang

Lectors-Commentators / Sto. Rosario Chapel (Tabuyuc) 3|

Page
 ING BANAL A MISA
manenaya kami kambe ning maligayang kapanaligan king paniatang nang JesuCristong
kekaming Talapangabus.

Commentator/Malda: Uling keka ing kayarian, at ing kayupayan at ing ligaya,

manggá man king alang anggá.

RITU NING KAPAYAPAN

Pari: Dios a Ibpa mi, ing Guinú ming JesuCristo, sinabi na karíng keyang apostol: ing
kapayapan lalakuan ku kekayu, ing kapayapan ku babie ku kekayu. E mo sana babalikdan ding
kekaming kasalanan nune ing lauen mu ing kasalpantayanan ning kekang Banal a Kapulungan,
at pamayapan me ampon bilugan agpang king kaburian mu. Ikang mabibie at mag-ari manggá
man king alang anggá.
Commentator/Malda: AMEN.

Pari: Ing kapayapan ning Guinú mantabe sa kapilan man kekayu.

Commentator/Malda: At keka antimurin.
Pari: Ipakit ta ngeni king mikakametung ta king kapayapan.

PAMAMIRASU KING TINAPE

Commentator/Malda:
Cordero ning Dios, a milalako king kasalanan ning yatu, pakaluluan mu kami.
Cordero ning Dios, a milalako king kasalanan ning yatu, pakaluluan mu kami.
Cordero ning Dios, a milalako king kasalanan ning yatu, ibie mu kekami ing kapayapan.

IMBITASYUN PARA KING PAMAKINABANG

Pari: Nio ing Cordero ning Dios, Nio ing milalako king kasalanan ning yatu. Nuan la ring
mayayaus king apunan ning Cordero.

Commentator/Malda: Guinú, e ku matampang tanggáp keka, dapot iyagkas

mia ing amanu mu, kumayap na ku.

PANALANGIN KAIBAT NING PAMAKINABANG

Pari: Manalangin tamu: . . .
Iti aduan mi king kapamilatan nang Cristong Guinú mi.
Commentator/Malda: AMEN.

ING BENDISYUN AT PAMUPUS

Pari: Ing Guinú mantabe ya kekayu.
Commentator/Malda: At keka antimurin
Pari: Bendisyunan na kayu ning Dios a mayupayang tutu, ing Ibpa, at ing Anak
at ing Banal a Espiritu.
Commentator/Malda: AMEN.
Pari: Ume kayu king kapayapan ban luguran at suyuan ing Guinú.
Commentator/Malda: Salamat king Dios!

Lectors-Commentators / Sto. Rosario Chapel (Tabuyuc) 4|

Page