TLAIZAWNG PAR

Vankhama hian khuarel hla hi a phuah hnem lem lo viau na a, a phuah chhunte
erawh a thain belhchian dawl tak a ni hlawm. Hla sawm nga dawn lai a phuah zing
atanga chhut chuan Vankhama hlaah hian khuarel phuahna hian hmun a chang tam
lua lova. A phuah chhunte erawh khawvar lam arsi ang maia eng mawi a ni thung.
Khuarel chawina hla a phuah tam lo kan tih hian khuarel lam hian a rilru a luah thuk
lo kan tihna a ni lo. A nihna takah chuan a hla zawng zawng tih theih deuhthawah
hian Khuarel (nature) hi a inzep vek hial lo chauh zawk a ni. Amaherawhchu, sawi
tawh angin Khuarel chawina a phuahna hla kan hmuh theih chinte erawh vawiin
thlenga hla tha, tia chhal ngam a ni thung. Heng Khuarel chawina hla a phuah zingah
hian Tlaizawng Par leh Rimawi Ram hian hriat a hlawhin, Khuarel chungchanga a
rilru put hmang pawh thui tak a hmuh theih a ni. Tlaizawng Par hi han thlir bing dawn
ila.
A Phuah Hun : Tlaizawng Par tih hla hi kum 1949-a a phuah a ni a. Thla la
tura a kal pahin 1st Assam Rifles Quarters Guard bul, Venghlui lam panna kawnga
Tlaizawng par vul chuk mai chu mawi a tiin a en tlawk tlawk mai a. Sipai thla la tur
an insiam nuk nuk chhung chuan he hla ropui tak, amah Prince of Natutre a nihzia
tilangtu hi a phuah ta a ni. ( Vankhama Hlate. Darchuailova Renthlei. P-42 )

A Hla Ziarang : Tlaizawng Par hi ngun taka kan en chuan Poetry phuah dan
chi khat Ode phuah dan nen eng emaw chen a inzul ve a, chuvangin ode huang
chhungah pawh khung ila tisual lutuk awm love. Chutih rualin Ode huang atanga teh
vek erawh a remchang lo ang tih erawh hriat tel a tha awm e. Chutih rual chuan Mizo
poetry zawng zawng hi English leh Grik literature huang atanga zir vek tum tur tihna
erawh a ni lo.
Ode ziaranga langsar tak pakhat chu pawn lam hmuh theih thil behchhana hla
phuah, hla phuahtuin ama ngaihdan lam aia a thil hmuh (object) lan dan leh nihphung
a hlaa a tarlanna hi a ni. Chutiang bawkin Vankhama Tlaizawng Par pawh hi a
phuahtu Vankhama ngeiin a hmuh dan zep nei hauh lova a tarlanna a ni. Tin, Ode-
ziarang pawimawh tak mai pakhat, hla phuahtuin a thil hmuh mihring anga a channa
(Personification ) he hlaah hian kan hmu a. Kan hmuh dan pawh Ode ziarang ang
thlapin chang khatnaah Vankhama hian Tlaizawng par chu ‘ Vulmawi Ka ti ang che
hming leman. An sawi chuailo par ni mai teh la’ tiin Tlaizawng par hi mihring ang
maiin hmaichhanah a bia tih kan hmu a ni.

Tin, Ode ziarang langsar tak pakhat chu hla phuahtuin a thil hmuh nihna dik
tak, a lan dan ang anga mawi taka a tar lang thin hi a ni. Tlaizawngparah pawh hian
Vankhama hian Tlaizawng par a hmuh dan chu uar ni hauh si lovin ‘Siamtu chawi
reng par I lo ni e’ a ti fel thlap mai a. Vankhama hian a hmuh dan dik takin a sawi
niin a lang. Vankhama hian a uar a ni lova, uar dawn pawh ni se hei baka han uar leh
ngaihna a vang viau maithei.

Chu mai a ni lo, a nemnghehna ni pahfawmin ‘Riah run an lum che’m ni

khuavangten?’ a han ti leh a. He tah zet hi chuan Vankhama hian thlarau khawvel a
dai ziau ziau a ni ber e. Thlasik khaw vawt vin tak mai chu Tlaizawng par tan pawha
himdama tawrh chhuah mai mai chi niin a hre lo va. Mahse, Tlaizawng lah chu tuk
tinin a mawi tial tial si a. Chuvangin, Vankhama hian Tlaizawng par chu thlasik khaw
vawt vin takin a hmeh tilh mai lohna turin zan lamah khuavangten an chenchilhin an
veng zui zel em ni dawn chu le? tiin a ngaihtuah hial a ni.

Tin, Tlaizawng par hi a mawi a ni satliah ringawt lova, a mawina piah lamah
mi dang tana a tangkaizia Vankhama hian a hmu chiang hle. Chhun lamah a par zu
chu phengphehlep te, khuai te leh sava chi hrang hrangin an tlan a, ui hauh lovin mi
dangte tan hlimna ruai a thehsak leh ta zel a ni. Kawng lehlama thlir chuan he
Tlaizawng par meuh hi chu khuavangte tan pawha riah chilh tlak khawpa ngainatawm
niin Vankhama hian a hmu a tih theih awm e. Tlaizawng par pawn lam lan dan
Vankhaman a tarlante hi Ode ziarang nen a induh thlap mai a ni.

Amaherawhchu, Tlaizawng par hian Ode ziarang a phur chhuak tha hle nia a
lan laiin hla phuahtu suangtuahna leh vei vawng tarlanna subjective / personal poetry
ziarang dik tak a keng tel tlat bawk. Ode ziarang leh kalphung atanga teh ngawr
ngawr chuan subjective poetry hlimthla lo lang hian mit a tikham deuh mai thei e.
Mahse, Vankhama hian Tlaizawng par a phuah hian Ode ziarang leh kalphung lam a
ngaihtuah lo tih erawh kan hriat reng a tha awm e. He hlaa subjective poetry ziarang
langsar tak mai chu chang tawp bera ‘Aw, engah mawi tin thang dang zawng pawh,
chul mai tura khuanun a siam le?’ a tih lai hi a ni. He thu hian Tlaizawng par chauh ni
lo, thil mawi dang zawng zawng a huap a. Tlaizawng parin chuai hun a nei dawn a ni
tih a hriat rual rualin khawvel thil mawi dang te pawhin chuai hun an nei ang a, kum
hlun tur reng a awm lo tih a ngaihtuah thlentir ta hial a. Tlaizawng par chu thilsiam
zawng zawng aiawha dingin, chuai leh mai tur an nihzia puang chhuaktuah
Vankhama hian a hmang ta a ni. Chutih rualin Ode ah chuan a phuahtu rilru kamtu,
mutmawh hnarmawha a neih te tar lanna a nih tho avangin he thu hian Tlaizawng par
hi ode huangah a khung tel leh thei tho lawi si a ni. Mihringte chang ni lo, khuarel
mawina te pawh hi chatuan daih a awm tak tak lo a ni tih hi ngaihtuah chian chuan tu
tan pawha mut mawh hnar mawha neih tham chu a ni ve hrim hrim bawk. Chuvangin,
Vankhaman Tlaizawng par a hmuh rual ruala a lungkham ber mai chu chul leh mai
tura khuanu siam kan lo ni tlat mai hi a ni.

Thilsiam ( nature) mawina leh Vankhama : Sawi tawh angin Vankhama

hlaah hian khuarel chungchang kan hmu tam viau mai. Amaherawhchu,
Vankhama’n Khuarel mawina a tarlanna chiang taka kan hmuh theih chu Tlaizawng
par deuh chauh hi a ni hial awm e. A hla tam takah hian khuarel hlimthla tarlang viau
mahse a mawina lam aiin a thuchah lam puan chhuahna a ni tlangpui. Rimawi Ram tih
hlaah hian Mizoram timawitu chu a chhunga thilsiam chi hrang hrangte an nih dan ai
mahin, chung thilsiam chi hrang hrang infawk khawmte chu rimawi tak a nih dan a
sawi uar ber a. Hei hian an mawina piah lamah thilsiamte hian eng thuchah nge an
puan tih Vankhama hian a tuipui zawk emaw chu aw, a tih theih a ni. Tlaizawng parah
hian Tlaizawngpar chu ‘Vulmawi’ tia koin, a mawi dan pawh tlreirawl hmel that
vanglai ang maia duhawm a nihzia sawiin, ‘Tleitir sakhmel ianga tlaizawng par’ ti
meuhin a au chhuak a. Mahse, chu Tlaizawng par mawi a tihnaah chuan a tawp mai
lo. Tlaizawng par mawi takah chuan he thu ‘Aw, engah mawi tin thang dang zawng
pawh, chul mai tura khuannun a siam le!’ tih hi a chhiar chhuak tel tlat a ni.

John Keats-a chuan a hla ‘Ode on Grecian Urn’ tihah chuan ‘A thing of
beauty is a joy forever’ tiin, thil mawite chu chatuan lawmna an ni, tia au chhuakin,
a phena inphum a hmuhchhuah chu thil mawi hi thudik a ni a, thu dik hi a mawi a ni’
( Beauty is truth, Truth beauty ) tih hi a ni a. Chu mawina phena thu dik inphum chu
a dawngtu tan a thlum dan emaw, a khak dan lam emaw Keats-a hian a chhui zui ve
lo. A tan chuan thilsiam mawinate chu chatuan lawmna thlentu niin, chu tluka thil hlu
chu awm theiin a hre lo a ni. Vankhama erawh chuan thilsiam chi hrang hrang mawi
tak tak te pawh hi kumhlun tur reng a awm lo tih a hmuh tel tlat avangin Tlaizawng
par mawina chu rilru zawng zawngin a hlimpui ve thei lo. Chu ai chuan tlaizawng
par-in ngawi renga a puanchhuah ‘Thil mawi leh tha ber berte pawh hian chatuan an
daih bik love’ tih hi a chang thlan ta zawk a ni. Hla phuahtu tam takin an dai ngam loh
Vankhama hian a dai ngam a tih theih awm e.
Q. Tlaizawng Par tih hla atanga Vankhama’n Khuarel (nature) a thlir dan han sawi
teh.
Q.Tlaizawng Par tih hla hi Poetry kan tih zingah hian eng ziarang nge hnaih ber a
hriat? A chhan chiang takin han sawi nghal teh.

Q.Tlaizawng Par tih hian a phuahtu themthiam dan a tarlangin i hria em? Han sawi
zau teh

Q.Tlaizawng par hla atang hian khuarel leh mihring nun inlaichin dan han chhui teh.