South African Journal of African Languages

ISSN: 0257-2117 (Print) 2305-1159 (Online) Journal homepage: https://www.tandfonline.com/loi/rjal20

Uhlaziyonzulu Lweqoqo Lezindatshana: Inhlamvu

Yelanga

Bhekinkosi Ntuli

To cite this article: Bhekinkosi Ntuli (2017) Uhlaziyonzulu Lweqoqo Lezindatshana:

Inhlamvu Yelanga, South African Journal of African Languages, 37:2, 267-271, DOI:
10.1080/02572117.2017.1378172

To link to this article: https://doi.org/10.1080/02572117.2017.1378172

Published online: 29 Nov 2017.

Submit your article to this journal

Article views: 122

View related articles

View Crossmark data

Full Terms & Conditions of access and use can be found at

https://www.tandfonline.com/action/journalInformation?journalCode=rjal20

Open Rubric
South African Journal of African Languages 2017, 37(2): 267–271
Uhlaziyonzulu Lweqoqo Lezindatshana: Inhlamvu Yelanga
Inhlamvu Yelanga, Maphumulo M (ed.). University Press:
University of KwaZulu-Natal. 2016.
Iqoqa
Lo mbhalo ubukeza amaqoqo ezindatshana ezimfishane
ezishicilelwe ngolimi lwesiZulu encwadini enesihloko
esithi “Inhlamvu Yelanga” eshicilelwe i-University Press
engaphansi kweNyuvesi yaKwaZulu-Natali. Le mibhalo
bekuhloswe ngayo ukuthuthukisa izinga lokufunda
nokubhala ngolimi lwesiZulu. Izindatshana zibhaleke futhi
zahleleka kahle, zikhombisa amakhono ahlukene ababhali.
Emva kokuzifunda ngizihlaziye ngithole ukuthi eziyi-15
zibhaleke kahle kakhulu. Iningi lazo ziyaheha uma uzifunda
zikwenza uzibuze umbuzo othi ‘ingabe iyozala nkomoni’?
Lokho kuwuphawu oluhle kakhulu kwezemibhalo ngoba
kuveza izinga lobuciko lababhali balezi zindatshana.
Njengokulindelekile ababhali abekho ezingeni elilinganayo
lobuciko. Nakuba kunjalo kulezi zindatshana kutholakala
izifundo ezahlukahlukene ezingaba olukhulu usizo
empilweni yabantu. Kwezinye zezifundo ezitholakala
la singabala ubungozi bokuhlukumeza abesifazane,
ukuba nguthathekile, ubugebengu, ukucwasana ngenxa
yokukhubazeka, ukuhlonishwa kwengalo yomthetho,
ukuziphatha kwabantu abasha, isikhwele, ubungozi
bemfihlo, ukuthukutheliswa into ongenasiqiniseko sayo
njalo njalo. Ngingasho ngokungangabazi ukuthi ziwufezile
umsebenzi wazo obekuwufundisa nokuqwashisa abantu
ngolimi lwabo isiZulu. Lokhu kuphinde kwaba negalelo
elimangalisayo ekuthuthukisweni kolimi lomdabu
ikakhulukazi emagcekeni ezeMfundo ePhakeme into
engavamile ukwenzeka.
Isingeniso
Inhlamvu Yelanga yiqoqo lezindaba ezimfushane
ezingamashumi amabili ezibhalwe ngabantu abehlukene.
Kulo mbiko sizoyiqoqa ngamafuphi indaba ngayinye,
bese sithi qaphuqaphu ngolokho okuphawuleka ngayo
njengendaba emfushane nanjengomsebenzi wobuciko.
Emva kwalokho kuzolandela umbiko omfushane
ngezindaba jikelele, kube nokunye futhi ukuphawula.
Izindaba
Umuntu Akathenjwa (Melusi Cebekhulu)
Kulahleke ingane yakwaSithole. Ibigcine ithunywe esitolo.
Umninisitolo, uMfundisi Ngubane, uthi naye akazi ukuthi
ikuphi. Sekuyatholakala ukuthi nguye uNgubane lo obulele
ingane ukuyicwiyela imithi yakhe yenhlanhla. Uyaboshwa
uNgubane.
Lena yindaba eqoqekile ngokwesikhathi nokwendawo.
Iqala ngomfutho njengoba umfundi ezibuza ukuthi kazi
ingane elahlekile ishonephi. Kusheshe kudambe nokho
ukuhuheka ngengane lapho esesheshe asoleke uNgubane.
The South African Journal of African Languages is co-published by NISC (Pty) Ltd and Informa UK Limited (trading as Taylor & Francis Group)
Copyright © NISC (Pty) Ltd
South African Journal
of African Languages
ISSN 0257-2117 EISSN 2305-1159
https://doi.org/10.1080/02572117.2017.1378172
Book Review
Nesihloko sayo nje siyakudalula ukuthi nguNgubane lo
ongumuntu ongenakwethenjwa. Singathi umbuzwana
okhona ngothi uzobanjwa kanjani. Isiyonke, yindaba ekahle
nje edle ngaso isifundo sokuthi akukho qili lazikhotha
emhlane.
Ayikhulumeki Le Ndaba (Thokozani Gumede)
Kulungiselelwa umngcwabo kamfowabo kaMthengwa
oshone kuhlaselwa abokufika ePhoyinti. Noyise walaba
bafana, uMbhishobhi Maseko, ushonile. Bekwethenjwa
ukuthi indodana eshonile ingase ingene esikhundleni
sikayise. Kuba nemvuselelo, kumbiwe negodi, kodwa
akupheleli ukumba ngoba kufikwa etsheni kubuye kugcwale
amanzi egodini, kudingeke ukuba kumbiwe elinye igodi
eceleni.
Indaba igxila emalungiselelweni okungcwaba umuntu.
Iyathinta emikhubeni ethile, njengomkhuba wokuvala
umkhokha ngokufaka isele egodini okungangcwatshwanga
kulo. Yona inakho ukuqoqeka ngesigameko, nendawo,
nesikhathi. Nokho akutholakali ukukhula kwendaba iye
kuvuthondaba nasesiphethweni. Liyangabazisa igalelo lale
ndaba njengendaba okulindeleke ukuba ithokozise.
Ngenxa Yemfihlo (Mhlabuthini Hlengwa)
UNgidi, osebenza ngemithi, kade eyocupha isidumbu
somfana wakwaBele obulewe ngomunye bebanga intombi.
Ubengazi ukuthi lo mfana abeyomcupha uyindodana yakhe,
uVukani, ebingaziwa lapha ekhaya. Sekuvela kamuva
ukuthi uVukani kanti ubulewe nguDalisu, enye yamadodana
kaNgidi. UDalisu uyagula, afe, okusho ukuthi ukucupha
kukaNgidi kushaye indodana yakhe.
Yindaba ebhaleke ngekhono eliphakeme. Ukwembuleka
kwezimfihlo ezahlukene, eyokuvela kwendodana
kaNgidi nokuba uNgidi ‘abulale’ indodana yakhe engazi,
kuyakuphakamisa ukugculisa kwayo njengomsebenzi
wobuciko. Kungaxoxwa kabanzi kube nokwehlukana
kwemibono ngokwemukeleka komsebenzi kaNgidi
wokucupha ababulali. Yindaba enhle.
Ubuhle Busemanyaleni (Thandanani Mabaso)
UMaZuma, inkosikazi elungile, akasanakwa yindoda yakhe,
uGumede. Eqinisweni uGumede usemxosha nasemzini
wabo umkakhe. UGumede usethandana noPretty. UPretty
‘sewatholela’ uGumede indodana. Uma le ndodana isigula
idinga igazi, uPretty ubiza uMthunzi ukuba azonikela
ngegazi ngoba nguye uyise wangempela wale ndodana.
UMaZuma yena usekhuleliswe ngomunye umuntu
noma kungacacisiwe lokhu: okusho ukuthi nguGumede
obengenambewu.
Yindaba ebhaleke kahle. Kuthanda ukwelula ukubalisa
kukaMaZuma ngokuhlushwa kwakhe nguGumede, kodwa
omunye angathi kugcizelela ukukhathazeka kwakhe
ngokwaliwa yile ndoda yena ebeziphethe kahle. Ivela kahle
imbibizane eshaya uGumede ekugcineni, okumele ukuba
268
yalandelwa ukuzisola selishonile ilanga. Sisobala nesifundo
esibhekiswe emadodeni ahlukumeza abantu besifazane
ngokungafanele.
Siyefana (Khethiwe Mkhize)
Lena yindaba kaThandeka nendodana yakhe uSithembiso.
UThandeka indaba uyiqala ngenkathi aliwa nguVusi ngoba
esekhulelwe uSithembiso. UThandeka wabuye waxoshwa
nanguyise ekhaya wayohlala endle nengane yakhe. Indaba
ikhula ize ifike lapho uSithembiso esezokhombisa unina
umakoti wakhe, uNolwazi. UThandeka akamfuni lo makoti
okhubazekile. Kanti naye uThandeka uzokhubazeka
ngemva kokulimala engozini yemoto, afane noNolwazi.
UThandeka uyaxolisa kuNolwazi, baxolelane.
Indaba iyezwakala njengendaba emnandi, kodwa iqhelile
kokuthathwa njengemigomo yendaba emfushane. Uyacaca
umyalezo wokuthi inxeba lendoda alihlekwa, nokho indaba
isithatha iminyaka eminingi sengathi kufingqwe inoveli.
Uzamile umbhali ukuyiqoqa ngokuba ayiqale kuzofika
umakoti, ayiphethe esefikile; kepha indaba ithanda ukuselula
kakhulu isikhathi.
Uhlanya Olukhululekile (S’fiso Mkhize)
UMaNdwandwe wedukelene nendodana yakhe uVusi.
Impilo kaMaNdwandwe ngeyokucacamezela nje ngoba
akamile kahle ngasezimalini. Usekwemukele ukuthi
uVusi uyahlanya, ngeke esasiza ngalutho lapha ekhaya.
Sekufika uZamantungwa, intombazane eyayifunda noVusi,
okubonakalayo nje ukuthi imi kahle yona. Kanti usezofika
noVusi achazele unina ukuthi ubenyamalele nje ubeqhuba
izifundo zakhe, futhi usezoshada noZamantungwa lo.
Yindaba emnandi. Kumnandi kwakhona ukufika
kukaZamantungwa adlaladlale ngamazwi noMaNdwandwe.
Okukhulu ukuthi uMaNdwandwe okade ehlupheka
usezophila impilo engcono. Indaba eqala ngosizi igcina
ngentokozo. Umbhali ukwazile ukuyiqoqela osukwini
olulodwa, wakusebenzisa kahle ukujeqeza emuva.
Iphupho Nje (Sebenzile Mngomezulu)
UNomthandazo washonelwa nguyise. Nokho waqhubeka
nezifundo zakhe waze wathola iziqu. Indaba iqala lapho
esezifunela imoto yakhe. Iqhubeka ize ifike lapho eseye
ekhaya nale moto nonina, uKaMathenjwa, esejabula.
UNomthandazo uphaphama athole ukuthi konke lokhu
bekuyiphupho nje.
Kuyayilimaza le ndaba ukuba ekugcineni kuthiwe
iyiphuho. Ukwethulwa kwemidati kuyenza ingakholeki
njengokwasemaphusheni. Okuyilimaza kakhulu ukuthi
kwezinye izindawo nguye uNomthandazo oxoxa
ngokwenzeka kuye, kwezinye kuxoxe ‘umuntu wesithathu’
ngalokho okwenzeka kuNomthandazo. Ekhasini 51 nje kuthi:
‘…kukhuluma uNomthandazo’ esikhundleni sokuthi: ‘…
kukhuluma mina’. Kuningana okuyenza ingaphumeleli kahle
le ndaba.
Ungehlule Singalwanga (Phumlani Mthembu)
Kule ndaba uNtshangase uvakashelwa nguMfundisi
Phoseka. UmkaNtshangase, uLungile, kwaziwa ukuthi
uyinyumba, kodwa utholakala esekhulelwe, kanti
ukhuleliswe nguye uMfundisi lo. Izithandani ziyambulala
uNtshangase. UMfundisi ugcina eseboshiwe.
Ntuli
Indaba yonke iqoqekela osukwini olulodwa.
Bebungalindelekile ubugebengu nesibindi salo Mfundisi,
nokho benza indaba emnandi. Kuyamangalisa kodwa
ukuba uLungile ezwakale sengathi ucela ucansi kuPhoseka
besanda kubulala uNtshangase (ikhasi 65). Ekulesi simo
pho? Lena ngenye yezindaba ezincomekayo.
Isabelo sokugcina (Cebolenkosi Myeza)
UGcina uthandana noNoxolo. Uthumela abakhongi
ukuyolobola. Indaba igxila emidatini yezingxoxo zelobolo.
Uma sebebuyele ekhaya oGcina, kufika umbiko wokuthi
kukhona izinsizwa ezithwale uNoxolo. UGcina wethuka
ashayeke phansi.
Indaba ithanda ukuma inganyakazi lapho sekudonsa
izingxoxo phakathi kwabakhongi nabakubo kwaNoxolo –
amakhasi ayisithupha. Sengathi umbhali ubefuna ukufundisa
ngaleli siko. Eqinisweni indaba iphela lapho okumele iqale
ukushisa khona, sekuzolandelwa ukuthi uNoxolo uthunjwe
ngobani, kwaphelelaphi. Indaba igubeke ngokuningi.
Akasekho (Sifiso Ndimande)
UMaSokhele uyakhandleka ezama ukusiza indodana
yakhe, uMlondolozi, ukuba ikhule ngendlela efanele ize
ithole nosizo lokuqhuba izifundo zayo. Ubephase kahle
yena, kodwa imali yokufunda aqhubeke ayikho. Kusho
ukuthi uMlondolozi uphelelwe yithemba ngoba unina umfica
esezibulele. Kulapho sekuzotheleka khona abenhlangano,
i-Youth Forward, nezindaba ezimnandi zokuthi uMlondolozi
ubeseqokelwe ukuthola umfundaze.
Ibhaleke kahle nale ndaba. Idingida indikimba esindayo
ngenselelo yabafundi abadikibala bazame ukuzibulala.
Indaba enjengalena ingalandelwa ngamaxoxo ajulile.
Nanjengendaba emfushane, iyemukeleka.
Ukube Ngangazi (Sizwe Ngidi)
Amaphoyisa ahamba noThemba noMaNdlovu, unina
kaThobile, baya lapho uThemba abehlalisene khona
noThobile. UThobile uxoxela unina ukuthi wangena
kanjani emsebenzini wokudayisa ngomzimba enomngani
wakhe uNonku. UNonku wake wathandana noThemba
kodwa behlukana lapho uThemba esetakula uThobile,
laba bobabili bathandana. Sekuzwakala ngokubulawa
kukaNonku, kwembuleka nokuthi kanti uNonku
ubengudadewabo kaThemba bengazani.
Yindaba ephicwe kahle. Inokujeqeza emuva okuthe
ukweluleka ngenkathi uThobile exoxa ngokuhehelwa kwakhe
emsebenzini wokudayisa ngomzimba. Omunye angathi
lokhu kwelula kuwukuchaza okudingekayo okusiza abangazi
ukuthi abantu bahehelwa kanjani kulo msebenzi. Inhle
nengwijikhwebu yokuthi kanti uThemba wasizwa nguThobile
ukwehlukana nokuthandana nodadewabo uNonku.
Ngiyofa ngizilanda (Mazwi Ngubane)
USibusiso ubekwe icala lokubulala umuntu, kodwa
kunobufakazi bokuthi uSibusiso nguye owayehlaselwe.
Uphinde ahlaselwe ngesinye isigebengu, sife,
kucatshangwe ukuthi kufe yena ngoba kutholakale
umazisi wakhe nokunye eduze kwaso. Lapho abakubo
sebelungisela ukumngcwaba uSibusiso, atheleke, okusho
ukuthi bekufe umhlaseli wakhe.
South African Journal of African Languages 2017, 37(2): 267–271
Yindaba ebhaleke kahle. Okunye kushiyelwa umfundi
ukuba ayifunde ivaliwe. Inhle nengwijikhwebu yokufika
kukaSibusiso bese kuthiwa ufile. Angabuza phela omunye
ukuthi sasingahlolisiswanga ngani isidumbu ngaphambi
kokuba kwemukelwe ukuthi nguSibusi ofile. Yindaba enhle
nokho.
Indandatho Yesethembiso (Sthembiso Nxumalo)
UMtsheleni sekuyisikhathi eside engaxhumani nesithandwa
sakhe, uNtongolozi. Abatholani nangezingcingo
nangezincwadi. Kodwa manje uphikelele kubo kwale
ntokazi, uphethe indandatho azoyethembisa ngayo
umshado. Kanti uzofika ngosuku lapho uNtongolozi eshada
khona nomunye umuntu.
Yindaba eqoqekile ngokwesikhathi nokugxila
esigamekweni esisodwa. Yona iqhubeka ngokuphindwa
kwexhala nokulangazela kukaMtsheleni ukubonana
noNtongolozi. Nokho ithanda ukuba lulana ngoba kofundayo
kuvele kusoleke ukuthi uMtsheleni uzofica uNtongolozi
esethanda omunye noma esefile. Nangempela kuba njalo.
Ukungazi kufana nokungaboni (Lindiwe Nyathikazi)
Indaba iqala lapho esithola khona uBonisiwe esephatheke
kabi ngoba engaphumelelanga esikoleni. Emqondweni
wakhe kubuya uhambo olude kusuka eqala ukufunda.
Eseqhubekile wathandana nomfana, uThemba Ndlovu,
owayempofu. Wamala lo mfana lapho esetholana noXolani
Zungu aweyecebile. Wakhulelwa uBoniswa. UXolani,
wayesevele eganiwe, izingane zakhe zikhubazekile
ngokomqodo. Kwakungenzeka ukuba nekaBoniswa
izozalwa ikhubazekile ibe ngumthwalo kunina.
Yelulekile yona le ndaba njengoba iqala intombazana
isaqala ukufunda ize ifinyelele kumatikuletsheni.
Umbhali uzame ukuyiqoqa indaba yakhe ngokuba
kube yinto ekhunjulwa nguBoniswa ngenkathi ebalisa
ngokungaphumeleli kwakhe. Yindaba edla ngazo izifundo
ngokuziphatha, ezibhekiswe ikakhulu kwabasha.
Inkambabeyibuza (Mbongeni Nzimande)
UPuleng usola ukuthi uCilo, isoka lakhe eliyingane kuye,
lilele nentombi yalo endlini yakhe. Ushiya umsebenzi
acathame aze afike athele uphetroli endlini, ayithungele
ngomlilo, abuyele emsebenzini. Uyamangala uma
sekufika uCilo emsebenzini ezobika ngomlilo oshise
indlu nabebephakathi, obekungabazali bakaPuleng
ababengenise ekhaya, kanye nendodakazi yakhe uPuleng,
uNomali.
Lena ngenye yezindaba eziphambili kuleli qoqo. Kusuka
phansi ivusa ilukuluku elikhulu lapho sithola uPuleng
esethukuthele ngobusoka bukaCilo ogangela endlini yakhe.
Igcina ngenkulu ingwijikhwebu lapho sekutholakele ukuthi
uPuleng uzigwaze ngowakhe wabulala izihlobo zakhe
wasinda uCilo. Inhle le ndaba.
Umandangaphakathi (Thabo Raboteng)
UKhomba nomkakhe uZakithi balwa kanzima. UKhomba
akasamfuni emzini wakhe uZakithi Sekufika inyanga,
uMhlekwa, ifika noTozo, ichaza ukuthi uTozo wacela kuyo
umuthi wentando wokudlisa uKhomba. Ngemva kwalokho
babefike kuyo inyanga bobabili uTozo noKhomba bezofuna
269
umuthi wesichitho ukuze kuchithwe uZakithi. Manje
uMhlekwa ufuna ukuba bobabili bamkhokhele namhlanje.
UMfundisi nomkhokheli ebebezothandazela uZakithi,
bavele babaleke. Uma ezwa ukuthi ubethakathwa kanjani
uZakithi ‘ufumbeka phansi’.
Lena ngenye yezindaba ezincomekayo ezithungwe
ngobuchule. Imbangela yokulwa kukaKhomba noZakithi
ize ivele ngomlomo wenyanga uMhlekwa. Kungachazwa
ngezindlela ezahlukene-ke ukubaleka kukamfundisi
nomkhokheli lapho esefakazeleka amandla enyanga
enguMhlekwa. Kokunye umbhali uyakhombisa nje
ukuthi ayasebenza namandla enqubo yomdabu kulabo
abethembele kuwo.
Emlonyeni wengwenya (Lindiwe Shandu)
UNomkhosi uthola isimemo ku-face book sivela kuZwelethu
Ndlovu ofuna ukuba ngumngani wale ntokazi. UZwelethu
uthi ungudokotela wezilwane esiqiwini saseHluhluwe.
Baze bathandane. Noma uNomkhosi esekhuzwa
ngumngani wakhe ukuba angajahi, akasezwa lutho. Uthola
esevakashele lo Zwelethu ukuthi yisigebengu lesi, besihlele
ukumdayisa. Ngenhlanhla aphunyuke.
Yindaba emnandi evusa ilukuluku yonke indawo. Ofundayo
uyasola ukuthi kungenzeka ukuba uNomkhosi uyakhohliswa,
bese umfundi ezibuza ukuthi kazi uyophunyuka yini. Indaba
ifika kuvuthondaba lapho uNomkhosi esevalelwa ehlathini,
eshaywa, naye esezisola. Indaba ibhaleke kahle, sicacile
nesifundo esibhekiswe kothathekile.
Inhlamvu yelanga (Mjikeleni Shange)
USimangele ubika kuMgawuleni ukuthi uGogo uMaNdlovu,
umakhelwane uphoqwa nguMlindeli ukuba akhiphe yonke
imali yempesheni uma esafuna ukuphila. Uyagijima
uMgawuleni ayolamulela isalukazi, abaleke uMlindeli. Kanti
usezohlaselwa yizinja ebezilandela uMgawuleni, zimbulale.
Eduze kwesidumbu sakhe kutholakala ivolovolo.
Inhle le ndaba. Konke kwenzeka esikhathini esingaphansi
kwehora, kodwa indaba iphelele. Ziningi izindlela
zokuhumusha ukubulawa kukaMlindeli yizinja; kusobala
ukuthi bekungase kudutshulwe umuntu ukuba izinja
azifikanga. UGogo uvikelwe ngamandla abengawalindele.
Seligaya Ngomunye umhlathi (Ntombi Xulu)
Kuzokwembulwa itshe emzini wakwaXulu. Sekutheleka
amaphoyisa ngeveni athi azobopha ubaba walapha
ekhaya ukuba ayophendula ngezinsolo zokuthi nguye
obulele izimbuzi zabantu abeze ngeveni yamaphoyisa.
Lokhu okwenziwa ngamaphoyisa kubonakala kuyimpoxo
enkulu ikakhulu ngoba ubaba walapha ekhaya yindoda
ehlonishwayo, ewusizayo nomphakathi. Emva kwalokhu
kulandela umlando wokuhlalisana kukaXulu nabantu
bakule ndawo. Amaphoyisa avume lapho kucelwa ukuba
ubaba wasekhaya angaboshwa, aze alethwe ngakusasa
emaphoyiseni.
Wuhlotshana olungejwayelekile lwendaba. Ingabhekwa
ngezindlela ezahlukene. Noma bekhononda abanye
ngokungafakwa evenini kukaXulu, likhona elithi
ukuhlonipheka kwakhe akungcoliswanga yilutho.
Kungaphikiswana-ke ngokuthi umuntu ohloniphekile
ungaphezu komthetho yini uma engasaboshwa nje.
Akuchazwanga lapha okwenzeka emaphoyiseni ngakusasa.
270
Kokunye kushiyelwe umfundi ukuba aziqagelele ukuthi le
ndoda iyophuma phambili.
Ngikufisela Inhlanhla Phetheni (Sizwe Zakwe)
UNdiza uzwa isimemezelo emsakazweni sokuthi uzoshada
uPhetheni abethemba ukuthi kuzoba ngumkakhe. UNdiza
wayeyixhasile nasezifundweni zayo le ntokazi. Usezama
ngemithi nodlame ukwehlukanisa uPhetheni nesoka lakhe,
uyehluleka. Indaba iphela uNdiza eseshade kamnandi
nomunye umuntu. Uzwa ukuthi uPhetheni uboshelwe
izidakamizwa eBrazil. UNdiza ubhuqa ngokuthi umfisela
inhlanhla uPhetheni noma eselapho ejele.
Yindaba enobuyaluyalu. Kuyaluza kakhulu uNdiza, aze
enze ubulima ngoba esethemba ukuthi uzobuyela kuye
uPhetheni. Okuvela ekugcineni ukuthi wayevele engemuntu
uPhetheni njengoba eseze eboshelwa izidakamizwa
nje. Yindaba emhehayo oyifundayo ozolokhu edabukela
uNdiza okusengathi uyasangana. Kungaxoxwa kabanzi
ngokuziphatha kukaPhetheni okubuye kungaqondakali
kahle. Iyagculisa-ke indaba uma uNdiza esengumuntu
ojabule ekugcineni. Yindaba emnandi.
Iqoqa lokuphawula ngezindaba
Kwakhona nje ukubona iqoqo lezindaba eziningi kangaka
ezibhalwe ngabalobi abehlukene kusenza silindele
ukuthola izindikimba ezahlukene ezibhalwe ngamakhono
ehlukene. Kodwa futhi asilindeli ukuthi bonke laba babhali
bangaba sezingeni elifanayo ngekhono lokubhala. Kunjalo
nangempela kuleli qoqo.
Kuyathokozisa ukuthola ababhali bedingida izihloko
ezahlukene. Okuphawulekayo yikho ukuthi izihloko noma
izindikimba lezi zithintana ngqo nempilo yabantu banamuhla.
Zikhona phela izindikimba okungasoze kwayekwa ukubhala
ngazo ngoba zihlale zisithina isintu.
Uthando nesikhwele ngeke kwaphela esintwini. Nakho
endabeni ethi: ‘Ngikufisela inhlanhla Phetheni’ uNdiza
ebhokelwa yisikhwele uma ezwa ukuthi iyashada intombi
ayithandayo aze azidele ayokulwa nesoka layo. Endabeni
ethi: ‘Inkambabeyibuza’ uPuleng usola ukuthi isoka lakhe
lizwana nenye intombazana, ayoshisa indlu acabanga
ukuthi bakuyo kanti kuzosha abazali bakhe abebengenise
kuyo. Ezindabeni ezinje ababhali kusobala ukuthi bafaka
isixwayiso ukuba abantu bangahluthukelwa yizinhliziyo
benze okungafanele.
Ukuganga okunhlobonhlobo kuyode kubhalwa ngakho.
Ababhali balezi zindaba benze kwaze kwaganga nabefundisi,
abantu abahloniphekile. Nakhona phela endabeni ethi:
‘Umuntu akathenjwa’ kuba ngumfundisi obulala ingane ukuze
ayicwiyele umuthi. Endabeni ethi: ‘Ungehlule singalwanga’
nguMfundisi Phoseka okhulelise umkaNtshangase. Uze
ahlangane nalo mama ekubulaleni uNtshangase. Lezi
zigangi ziyazithola izijeziso zazo ezifanele.
Ukusetshenziswa komuthi ngeke kuphele kwabamnyama.
Yikho lokhu okwenze uMfundisi Ngubane abulale ingane
endabeni esiyiphawule ngenhla. Umuthi uyasebenza
njengoba kunobufakazi endabeni: ‘Ngenxa yemfihlo’ lapho
uNgidi eyocupha isidumbu somfana wakwaBele, kanti
ozocupheka afe yindodana yakhe abengayazi uNgidi.
Uyasebenza umuthi nasendabeni ethi: ‘Umandangaphakathi’
ngoba kuba nobufakazi bokuthi umuthi othengwe kuMhlekwa
Ntuli
ukwenzile obuthengelwe khona. Kodwa okuziphakamisayo
lezi zindaba ngamangwevu athile akhishwa ngumbhali.
Kulena ethi: ‘Ngenxa yemfihlo’ kuvela njengengwijikhwebu
enkulu ekugcineni ukuthi uNgidi ubulele ingane yakhe
ngomuthi wakhe.
Zikhona izindaba ezixwayisa ngezinkinga zanamuhla.
Indaba ethi ‘Emlonyeni wengwenya’ nje, noma
kungeyendikimba yothando, ixwayisa abangaze bathandane
nabantu abangabazi ku-facebook, kanti bazoholelwa
ophathe. Indaba ethi: ‘Ukube ngangazi’ ixwayisa
ngokuyengelwa kwabantu emsebebenzini wokudayisa
ngomzimba bengaqondile.
Kuyangenwa nasezinkingeni ababhekana nazo
abantwana abaphumelela kahle kodwa bangalutholi usizo
lokuqhubeka nezifundo zabo. Usizo kuzwakala ngalo
esezibulele uMlondolozi endabeni ethi: ‘Akasekho’. Indaba
enje ithinta umphakathi wonke ukuba ube nezindlela
zokuvimba ukugebela ekuzibulaleni okunje.
Lapha sithinta kokumbalwa nje okuyizihloko okubhalwe
ngazo kuleli qoqo. Singake sithinte kancane emaswini
ababhali. Nakhona sizothi hloko. Kusobala ukuthi ababhali
bathi beqala ukubhala lezi zindaba babe sebenaso
isisekelo semigomo ezimele ukuyilandeka. Omkhulu yiwo
owokuqoqeka mayela nesigameko, isikhathi, indawo
nabalingiswa.
Izindaba eziningi ziyilandela ngezindlela ezahlukene le
migomo. Zenzeka esikhathini esifushane, nasendaweni
eqoqekile nje izindaba ezifana nalezi: ‘Umuntu akathenjwa’,
‘Ungehlule singalwanga’. Konke kwenzeka ngosuku
olulodwa. Kukhona ezenzeka ezinsukwini ezimbalwa, kodwa
zibe ziqoqekile.
Ezinye ziyala ukumpintshekela esikhathini esifushane.
Imvamisa-ke umbhali angabeka umlingiswa endaweni
eyodwa, bese yethulwa njengokujeqeza emuva yonke indaba
kokunye eyenzeke esikhathini esithe ukweluleka. Indaba
ethi: ‘Ukungazi kufana nokungaboni’ iqala lapho uBoniswa
ekhala ngoba engaphumelelenga, bese ihlehlela kukho
konke okwenzeka empilweni yakhe ngaphambi kwalolo
suku, ize igcine kulolu suku abuka ngalo imiphumela. Uma
kwenziwe ngobuciko lokhu, iba nohlobo oluthile lokuqoqeka
indaba ebingase isabalale.
Izindaba eziningi zidla ngeziqalo ezinomfutho. Indaba ethi:
‘Umandangaphakathi’ ingeniswa ngamazwi athi: ‘Kwasuka
lokho! Base begonyozene. Kazi kwakhala nyonini emzini
kaNdelu?’ Lokhu kuvusa umdlandla ukuba umuntu afise
ukwazi ukuthi kuliwa nje kubangwani, nokuthi kuzolandelani.
Akuyibo bonke ababhali abayiqala ekuqaleni indaba.
ULindiwe Shandu nje indaba ethi: ‘Emlonyeni wengwenya’
uyiqala kuvuthondaba: ‘Engabe Nkosi yami bengisukwe yini,
sengizophuma kanjani manje lapha? … Uma ngabe egcine
ephumile akazi nokuthi uzophuma abheke ngaphi kuleli
hlathi elingaka….’ Kube yima eyochaza ukuthi uze kanjani
kuleli hlathi. Izindledlana ezehlukene zokwethula indaba
zenza iqoqo lingabi nesicefe kofundayo.
Nakulo imaphakathi lezindaba kukhona ukwehlukahlukana.
Enye indaba iyaqala nje ibheke phambili kube kuncane
ukujeqeza emuva, njengakulena ethi: ‘Ngikufisela inhlanhla
Phetheni’. Kwezinye izindaba indaba iyaqala, kuthi
‘umzimba’ wayo ube ukujeqeza emuva, njengasendabeni
ethi: ‘Siyefana’.
South African Journal of African Languages 2017, 37(2): 267–271
SesiphawuIile ngokuphetha kwendaba ngengwijikhwebu
njengasendabeni ethi: ‘Ngenxa yemfihlo’. Endabeni ethi:
‘Uhlanya olukhululekile’ uMaNdwandwe uyakhala ngoba
esethatha ngokuthi iyahlanya indodana eseyanyamalala,
ayethembele kuyo. Nanso-ke isifika ichaza ukuthi ibicashile
nje, ibizithuthukisa ezifundweni zayo, isizomthwala
ngokuphelele. Eziningi izindaba zinezinhlobo ezahlukene
zengwijikhwebu. Kulena nje ethi: ‘Ngikufisela inhlanhla
Phetheni’ uNdiza wayephatheke kabi ngokulahlekelwa
yintokazi ayeyithanda, wezwa kamuva ukuthi yaboshelwa
izidakamizwa. Kusho ukuthi uNdiza wayephunyukile
ehlazweni lokuxhumana nomuntu wezidakamizwa noma
yena wayengazi.
Zibhaleke kahle eziningi zalezi zindaba. Yebo phela,
zikhona ezinye ukuphumelela kwazo okungafinyeleli
kokwezinye ngezizathu ezithile. Lena nje ethi: ‘Isabelo
sokugcina’ ixoxa ngoNoxolo olotsholwayo, emva kwalokho
kufike ezinye izinsizwa zimthwale. Kanti nakuwo nje
‘umzimba’ wendaba besinikwa imidati yezingxoxo
zokulobolisana ezingasisizi kangako isakhiwo sendaba.
Ezindabeni eziningi ‘umxoxi’ wendaba kuba ngumuntu
wokuqala noma wesithathu. Akuvamile ukuba besebenze
kahle kanyekanye laba baxoxi. Endabeni ethi: ‘Iphupho
nje’ kuqale kusebenze umxoxi wokuqala, kuthi lapho
indaba iqhubeka (ikhasi 51) kugaxele owesithathu.
Kunokushayisana lokhu. Kusobala ukuthi zehlukene
izindaba nangamazinga okuphumelela kwazo.
Ukuphawula ngokuhleleka
Abacaphuni
Emibhalweni eminingi yephrozi inkulumo yomuntu
ngamunye iba sesigabeni (ipharagrafu) sayo. Ezindaweni
eziningi kuleli qoqo kukhuluma abantu abaningi esigabeni
esisodwa, kodwa akwenziwa lokhu kuzo zonke izindaba.
Izibonelo zabaningi abaphendulana esigabeni esisodwa
zisemakhasini 1, 33, nakwamanye.
Ukubhalwa kwamagama
Kukhona lapho okuke kuphunyuke khona: isib. Kuyisonto
> kuyiSonto; wensizwa > we nsizwa (ikh.15); uzithwele >
Uzithwele (ikh. 28); vele bengisukile > Vele …; iSingisi >
isiNgisi (ikh. 51); sizokhokha umlilo > sizokokha …(ikh. 74);
agwaza nguyena > agwaza …kuyena (?) (129); uPhetheni
> UPhetheni (ikh.181); manje ubufisa > Manje ubufisa (ikh.
184) (Kuningana okunje).
Amapharagrafu amade kakhulu
Kunezindaba ezinamapharagrafu asemade kakhulu, izib.
amakhasi 29, 30, 32, 34. 103, 104, 109, 111, 113.
Noma kukhonyana lokhu kusoba ukuthi abebecubungula
lo mqulu ungakashicilelwa bazikhandlile ukuba kuphume
umsebenzi ocolekile. Siyahalalisa.
Elokuphetha
Noma sesiphawulile ngalezi zindaba, besikha phezulu nje.
Kuningi okungase kushiwo kabanzi ngendaba ngayinje.
Ngumzamo omkhulu lo ikakhulu uma kukhunjulwa ukuthi
ngowabalobi abavunjululwe ngumkhankaso wokukhuthaza
ababhali. Bafinyelele emongweni womsebenzi wobuciko,
okuthi uthokozisa ube ufundisa noma weluleka. Abaningi
271
baphumelele ekufezeni okuthathwa ngokuthi yimigomo
yalolu hlobo lombhalo. Abagqugquzela lo mkhankaso
siyabakhuthaza ukuba baqhubeke ngoba abakwenzayo
kungukuphonsa itshe esivivaneni semibhalo emisha
yesiZulu.
Book Abstract (English)
This book review assesses a collection of twenty isiZulu
short stories that were selected for publication after
a competition. The short stories were published in a
book titled Inhlamvu Yelanga (Maphumulo, 2016) by
the University of KwaZulu-Natal Press. The aim of this
competition was to inculcate the culture of reading and
writing in isiZulu. The stories have been well written and
arranged, and showcase a variety of literary techniques
by the writers. After the reading and reviewing process, I
discovered that the majority of the short stories are catchy
and employ suspense as a narrative technique. As one
reads, one is made to ask oneself what the end result
would be. This is a great sign in literary writing because it
highlights the various levels of skills of the different authors.
As expected, the writers are not at the same level of
experience, but despite this, there are various lessons that
are learnt in these stories which can be useful in people’s
lives. Among some of the lessons that are embedded in
these stories, there are contemporary issues around the
abuse of women, abduction, crime, discrimination against
disabled people, respect of the rule of law, the behaviour
of the youth, jealousy, the dangers of secrets, unwarranted
anger, etc. I can quite confidently say that these stories
have served their purpose in creating awareness and
educating the readership through the medium of isiZulu.
This publication will have a tremendous impact on the
development of an indigenous language, especially in
the higher education space, which is a very unusual
occurrence.
Reference
Maphumulo M. (ed.) 2016. Inhlamvu Yelanga. University Press:
University of KwaZulu-Natal.
Bhekinkosi Ntuli
University of KwaZulu-Natal
Email: ntulidb@lantic.net